Kinh tạng Tây Tạng (Kangyur Đại Học) — 052_མདོ་སྡེ།_ཉ

་དུ་བྱེད་པ་ནི་དཔེར་ན་སྤུ་དང་པགས་པ་ལ་རེག་པ་ཙམ་
གྱིས་ཁ་ལོ་སྒྱུར་བའི་ཡིད་བཞིན་དུ་འགྲོ་བ་དང་འདྲ་སྟེ་གཉིས་སོ། །སྐྱེ་བ་དང་། རྒ་བ་དང་ན་བ་བསྟན་པས་སངས་རྒྱས་ཀྱི་བཀའ་བཞིན་དུ་བྱེད་པ་ནི་དཔེར་ན་སྤུ་དང་པགས་པ་དང་ཤ་ལ་རེག་པས་ཁ་ལོ་སྒྱུར་བའི་ཡིད་བཞིན་དུ་འགྲོ་བ་དང་འདྲ་སྟེ་གསུམ་མོ། །སྐྱེ་བ་དང་རྒ་བ་དང་ན་
བ་དང་ཤི་བ་བསྟན་པས་སངས་རྒྱས་ཀྱི་བཀའ་བཞིན་དུ་བྱེད་པ་ནི་དཔེར་ན་སྤུ་དང་པགས་པ་དང་ཤ་དང་རུས་པ་ལ་རེག་པས་ཁ་ལོ་སྒྱུར་བའི་ཡིད་བཞིན་དུ་འགྲོར་བཏུབ་པ་དང་འདྲ་སྟེ་བཞིའོ། །རིགས་ཀྱི་བུ་རྟའི་ཁ་ལོ་སྒྱུར་བ་ནི་ངེས་པ་མ་ཡིན་གྱི། སངས་རྒྱས་བཅོམ་ལྡན་འདས་ཀྱིས་
སེམས་ཅན་གདུལ་བ་ནི་ངེས་པ་སྟེ་མི་བརྫུན་པས་ན་སངས་རྒྱས་བཅོམ་ལྡན་འདས་ནི་སྐྱེས་བུ་འདུལ་ཞིང་ཁ་ལོ་སྒྱུར་བ་ཞེས་བྱའོ། །དེ་ལ་ཇི་ལྟར་ན་ལྷ་དང་མི་རྣམས་ཀྱི་སྟོན་པ་ཞེ་ན། སྟོན་པ་ཞེས་བྱ་བ་ལ་རྣམ་པ་གཉིས་ཏེ། དགེ་བ་སྟོན་པ་དང་། སྡིག་པ་སྟོན་པའོ། །སངས་རྒྱས་
དང་བྱང་ཆུབ་སེམས་དཔའ་ནི་རྟག་ཏུ་དགེ་བའི་ཆོས་རྣམས་སེམས་ཅན་ལ་སྟོན་ཏོ། །དགེ་བའི་ཆོས་གང་དག་ཅེ་ན། ལུས་དང་ངག་དང་ཡིད་ཀྱི་སྒོ་ནས་དགེ་བའོ། །སངས་རྒྱས་དང་བྱང་ཆུབ་སེམས་དཔའ་ནི་སེམས་ཅན་རྣམས་ལ་འདི་སྐད་ཅེས་སྟོན་ཏོ། །ཀྱེ་རིགས་ཀྱི་བུ་དག་
ལུས་མི་དགེ་བའི་ལས་ཡོངས་སུ་སྤང་བར་བྱའོ། །དེ་ཅིའི་ཕྱིར་ཞེ་ན། ལུས་མི་དགེ་བའི་ལས་ཡོངས་སུ་སྤངས་ན་རྣམ་པར་གྲོལ་བར་འགྱུར་རོ། །དེ་བས་ན་ཆོས་འདི་དག་ནི་ཁྱེད་ལ་སྟོན་གྱི། མི་དགེ་བའི་ལས་ཡོངས་སུ་མ་སྤངས་པས་རྣམ་པར་གྲོལ་བར་འགྱུར་རོ་ཞེས་ཁྱེད་ལ་

མི་སྟོན་ཏོ། །ཅི་སྟེ་སེམས་ཅན་རྣམས་སྡིག་པའི་ལས་ཡོངས་སུ་སྤངས་ན་ངན་སོང་གསུམ་དུ་ལྟུང་བར་འགྱུར་རོ་ཞེས་བྱ་བའི་གནས་མེད་དོ། །ཡོངས་སུ་སྤངས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་ཅིང་མྱ་ངན་ལས་འདས་པ་ཆེན་པོ་འཐོབ་པར་
འགྱུར་བ་ནི་གནས་ཡོད་དོ། །དེ་བས་ན་སངས་རྒྱས་དང་བྱང་ཆུབ་སེམས་དཔའ་ནི་རྟག་ཏུ་ཆོས་འདི་ཉིད་སེམས་ཅན་རྣམས་ལ་སྟོན་ཏེ། ངག་དང་ཡིད་ཀྱང་དེ་བཞིན་དུ་རིག་པར་བྱའོ། །དེ་བས་ན་སངས་རྒྱས་བཅོམ་ལྡན་འདས་ནི་བླ་ན་མེད་པ་སྟོན་པའོ། །གཞན་ཡང་སྔོན་མ་ཐོབ་པ་ཐོབ་
པར་གྱུར་ལ། ཐོབ་པ་རྣམས་སེམས་ཅན་ལ་སྟོན་པ་དང་། ཐོག་མ་ནས་ཚངས་པར་མ་སྤྱད་པ་ཚངས་པར་སྤྱོད་དེ། སྤྱོད་པ་རྣམས་ཀྱང་སེམས་ཅན་ལ་སྟོན་པ་དང་། བདག་ཉིད་མ་རིག་པ་བཅོམ་པས་སེམས་ཅན་གྱི་མ་རིག་པ་འཇོམས་པ་དང་། བདག་ཉིད་ཡོངས་སུ་དག་པའི་
མིག་ཐོབ་པས་སེམས་ཅན་གྱི་ལྡོངས་པའི་རབ་རིབ་བསལ་ནས་ཡོངས་སུ་དག་པའི་མིག་ཐོབ་པར་བྱེད་པ་དང་། བདག་ཉིད་བདེན་པ་གཉིས་ཤེས་པས་སེམས་ཅན་རྣམས་ལ་ཡང་བདེན་པ་གཉིས་སྟོན་པ་དང་། བདག་ཉིད་རྣམ་པར་གྲོལ་བས་སེམས་ཅན་རྣམས་ལ་རྣམ་
པར་གྲོལ་བའི་ཆོས་སྟོན་པ་དང་བདག་ཉིད་མཐའ་མེད་པའི་འཁོར་བའི་ཀླུང་ལས་རྒལ་བས་སེམས་ཅན་ཐམས་ཅད་ཀྱང་དེ་ལ་སྒྲོལ་བ་དང་། བདག་ཉིད་འཇིགས་པ་མེད་པར་གྱུར་པས་སེམས་ཅན་རྣམས་ལ་འཇིགས་པ་མེད་པ་སྟོན་པ་དང་། བདག་ཉིད་ཡོངས་སུ་མྱ་ངན་ལས་
འདས་པས་སེམས་ཅན་རྣམས་ལ་མྱ་ངན་ལས་འདས་པ་ཆེན་པོ་སྟོན་པ་སྟེ། དེའི་ཕྱིར་ན་སངས་རྒྱས་བཅོམ་ལྡན་འདས་ནི་བླ་ན་མེད་པ་སྟོན་པ་ཞེས་བྱའོ། །ལྷ་ཞེས་བྱ་བ་ནི་ཉིན་མོ་ཞེས་བྱ་སྟེ། ལྷ་རྣམས་ལ་ཉིན་རིང་མཚན་ཐུང་བས་ནི་ལྷ་ཞེས་བྱའོ། །གཞན་ཡང་ལྷ་ཞེས་
བྱ་བ་ནི་མྱ་ངན་མེད་པ་སྟེ། རྟག་ཏུ་བདེ་བའི་ཕྱིར་ན་ལྷ་ཞེས་བྱའོ། །གཞན་ཡང་ལྷ་ཞེས་བྱ་བ་ནི་སྣང་བའི་སྒྲོན་མ་ཞེས་བྱའོ། །མུན་པ་བཅོམ་ནས་སྣང་བ་ཆེན་པོར་འགྱུར་བའི་ཕྱིར་ལྷ་ཞེས་བྱའོ། །གཞན་ཡང་སྡིག་པའི་ལས་ནག་པོ་བཅོམ་ནས་དགེ་བའི་ལས་

དཀར་པོ་ཐོབ་སྟེ། ལྷར་སྐྱེ་བའི་ཕྱིར་ན་ལྷ་ཞེས་བྱའོ། །ལྷ་ནི་བཀྲ་ཤིས་པ་སྟེ། བཀྲ་ཤིས་པའི་ཕྱིར་ལྷ་ཞེས་བྱའོ། །གཞན་ཡང་ལྷ་ཞེས་བྱ་བ་ནི་ཉི་མ་སྟེ། ཉི་མ་ལ་འོད་ཡོད་པའི་ཕྱིར་ཉི་མ་ལ་ལྷ་ཞེས་བྱའོ། །དོན་དེ་ལྟ་བུས་ན་ལྷ་ཞེས་བྱའོ། །མི་ཞེས་བྱ་བ་ནི་དོན་ལ་མང་དུ་
སེམས་པའོ། །གཞན་ཡང་མི་ཞེས་བྱ་བ་ནི་ལུས་དང་ངག་འཇམ་ཞིང་དེས་པའོ། །གཞན་ཡང་མི་ཞེས་བྱ་བ་ནི་ང་རྒྱལ་དང་བཅས་པའོ། །མི་ཞེས་བྱ་བ་ནི་ང་རྒྱལ་བཅོམ་པའོ། །རིགས་ཀྱི་བུ་སངས་རྒྱས་བཅོམ་ལྡན་འདས་ནི་སེམས་ཅན་ཐམས་ཅད་ཀྱི་བླ་ན་མེད་
པའི་སྟོན་པ་ཡིན་མོད་ཀྱི། གསུང་རབ་ལས་ལྷ་དང་མིའི་སྟོན་པ་ཞེས་འབྱུང་ངོ་། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ཀྱི་ནང་ན་ལྷ་དང་མི་འབའ་ཞིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནུས་ཤིང་དགེ་བ་བཅུའི་ལས་བྱེད་ནུས་པས་རྒྱུན་
དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་དང་། རང་སངས་རྒྱས་ཀྱི་འབྲས་བུ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པར་འགྱུར་བས་དེའི་ཕྱིར་ན་སངས་རྒྱས་བཅོམ་ལྡན་
འདས་ནི་ལྷ་དང་མིའི་སྟོན་པ་ཞེས་བྱའོ། །དེ་ལ་ཇི་ལྟར་ན་སངས་རྒྱས་ཞེས་བྱ་ཞེ་ན། སངས་རྒྱས་ཞེས་བྱ་བ་ནི་ཚོར་བའི་དོན་ཏེ། བདག་ཀྱང་ཚོར་ལ་གཞན་ཡང་ཚོར་བར་བྱེད་དོ། །རིགས་ཀྱི་བུ་དཔེར་ན་མི་ཞིག་ཁྱིམ་དུ་རྐུན་པོ་འོང་བར་ཚོར་ན་རྐུན་པོས་མི་ཚུགས་སོ། །བྱང་
ཆུབ་སེམས་དཔའ་སེམས་དཔའ་ཆེན་པོ་ཡང་ཚད་མེད་པའི་ཉོན་མོངས་པ་ཐམས་ཅད་ཚོར་ཏེ། དེ་ལྟར་ཚོར་བས་ན་ཉོན་མོངས་པ་ཐམས་ཅད་ཀྱིས་མི་ཚུགས་སོ། །དེ་བས་ན་སངས་རྒྱས་ཞེས་བྱའོ། །དེ་ལྟར་ཚོར་བས་ན་མི་སྐྱེ་མི་རྒ་མི་ན་མི་འཆི་སྟེ། དེའི་ཕྱིར་ན་སངས་རྒྱས་ཞེས་
བྱའོ། །དེ་ལ་ཇི་ལྟར་ན་བཅོམ་ལྡན་འདས་ཞེ་ན། བཅོམ་པ་ཞེས་བྱ་བ་ནི་བཅོམ་པའོ། །ལྡན་པ་ཞེས་བྱ་བ་ནི་ཉོན་མོངས་པའོ། །ཉོན་མོངས་པ་ཐམས་ཅད་བཅོམ་པའི་ཕྱིར་ན་བཅོམ་ལྡན་འདས་ཞེས་བྱའོ། །གཞན་ཡང་དགེ་བའི་ཆོས་ཐམས་ཅད་དང་ལྡན་པའི་ཕྱིར་ཆོས་

རྣམས་ཀྱི་དོན་ལ་ཤིན་ཏུ་མཁས་པའི་ཕྱིར། ཡོན་ཏན་ཆེན་པོ་དང་ལྡན་པས་གཞན་གྱིས་མི་ཐུབ་པའི་ཕྱིར། གྲགས་པ་ཆེན་པོ་ཕྱོགས་བཅུར་གྲགས་པའི་ཕྱིར། སྦྱིན་པ་རྣམ་པ་སྣ་ཚོགས་བྱིན་པའི་ཕྱིར། བསྐལ་པ་ཚད་མེད་གྲངས་མེད་པའི་བར་དུ་བུད་མེད་
ཀྱི་དབང་པོ་སྐྱུགས་པ་ལྟ་བུར་བོར་བའི་ཕྱིར་རོ། །རིགས་ཀྱི་བུ་གལ་ཏེ་སྐྱེས་པའམ་བུད་མེད་གང་ཞིག་གིས་དེ་ལྟར་སངས་རྒྱས་རྗེས་སུ་དྲན་པ་བསྒོམས་ན། འགྲོའམ་སྡོད་དམ་འདུག་གམ་ཉལ་ལམ་སྣང་ངམ་མུན་པར་གྱུར་ཀྱང་། ཉིན་མཚན་རྟག་ཏུ་སངས་རྒྱས་མཐོང་
བ་དང་མི་འབྲལ་ལོ། །རིགས་ཀྱི་བུ་ཅིའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པ་ནས་བཅོམ་ལྡན་འདས་ཀྱི་བར་དུ་དེ་ལྟ་བུ་ཡོན་ཏན་ཚད་མེད་པ་དང་། གྲགས་པ་ཆེན་པོ་དང་ལྡན་ཞེ་ན། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྔོན་
བསྐལ་པ་ཚད་མེད་གྲངས་མེད་པའི་བར་དུ་ཕ་མ་དང་། མཁན་པོ་དང་། སློབ་དཔོན་དང་། བླ་མ་དང་། གོང་མ་རྣམས་ལ་རིམ་གྲོ་དང་བཀུར་སྟིར་བྱས། བསྐལ་པ་ཚད་མེད་གྲངས་མེད་པའི་བར་དུ་སེམས་ཅན་གྱི་ཕྱིར་སྦྱིན་པ་བྱིན་པ་དང་། ཚུལ་ཁྲིམས་བསྲུངས་པ་དང་།
བཟོད་པ་བསྒོམས་པར་བྱས་པ་དང་། བརྩོན་འགྲུས་བརྩམས་པ་དང་། བསམ་གཏན་ལ་མཉམ་པར་བཞག་པ་དང་། ཤེས་རབ་ལ་ནན་ཏན་བྱས་པ་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་ལ་ནན་
ཏན་བྱས་པས་དེའི་ཕྱིར་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་། རྡོ་རྗེ་ལྟ་བུའི་སྐུ་ཐོབ་པར་གྱུར་ཏོ། །གཞན་ཡང་བྱང་ཆུབ་སེམས་དཔའ་སྔོན་བསྐལ་པ་ཚད་མེད་གྲངས་མེད་པའི་བར་དུ་དད་པ་དང་། བརྩོན་འགྲུས་དང་། དྲན་པ་དང་།
ཏིང་ངེ་འཛིན་དང་། ཤེས་རབ་ཀྱི་དབང་པོ་ལ་ནན་ཏན་བྱས་ཏེ། སློབ་དཔོན་དང་། བླ་མ་ལ་རིམ་གྲོ་དང་བཀུར་སྟིར་བྱས་ནས་དེ་ཡང་ཆོས་འདོད་པའི་ཕྱིར་གྱི། ཟས་དང་རྙེད་པ་འདོད་པའི་ཕྱིར་མ་ཡིན་ནོ། །བྱང་ཆུབ་སེམས་དཔའ་གལ་ཏེ་མདོ་སྡེ་བཅུ་

གཉིས་བཟུང་ནས་གལ་ཏེ་ཀློག་གམ་འདོན་ཀྱང་རྟག་ཏུ་སེམས་ཅན་ཐམས་ཅད་རྣམ་པར་གྲོལ་བར་བྱ་བ་དང་རབ་ཏུ་བདེ་བར་བྱ་བའི་ཕྱིར་གྱི། བདག་ཉིད་ཀྱི་ཕྱིར་ནི་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་རྟག་ཏུ་འཇིག་རྟེན་ལས་འདས་པའི་སེམས་དང་།
རབ་ཏུ་བྱུང་བའི་སེམས་དང་། འདུས་མ་བྱས་པའི་སེམས་དང་། རྩོད་པ་མེད་པའི་སེམས་དང་། དྲི་མ་མེད་པའི་སེམས་དང་། བཅིངས་པ་མེད་པའི་སེམས་དང་། ཆགས་པ་མེད་པའི་སེམས་དང་། སྒྲིབ་པ་མེད་པའི་སེམས་དང་། ལུང་མི་སྟོན་པ་མེད་པའི་སེམས་དང་།
འཁོར་བ་མེད་པའི་སེམས་དང་། ཐེ་ཚོམ་གྱི་དྲ་བ་མེད་པའི་སེམས་དང་། འདོད་ཆགས་མེད་པའི་སེམས་དང་། ཞེ་སྡང་མེད་པའི་སེམས་དང་། གཏི་མུག་མེད་པའི་སེམས་དང་། ང་རྒྱལ་མེད་པའི་སེམས་དང་། རྙོག་པ་མེད་པའི་སེམས་དང་། ཉོན་མོངས་པ་མེད་པའི་སེམས་
དང་། སྡུག་བསྔལ་མེད་པའི་སེམས་དང་། ཚད་མེད་པའི་སེམས་དང་། རྒྱ་ཆེ་བའི་སེམས་དང་། ནམ་མཁའ་ལྟ་བུའི་སེམས་དང་། མེད་པའི་སེམས་དང་། མེད་པ་མ་ཡིན་པའི་སེམས་དང་། དུལ་བའི་སེམས་དང་། མི་སྐྱོ་བའི་སེམས་དང་། མི་འཆབ་པའི་
སེམས་དང་། འཇིག་རྟེན་མ་ཡིན་པའི་སེམས་དང་། རྟག་ཏུ་ཏིང་ངེ་འཛིན་གྱི་སེམས་དང་། རྟག་ཏུ་ནན་ཏན་བྱེད་པའི་སེམས་དང་། རྟག་ཏུ་རྣམ་པར་གྲོལ་བའི་སེམས་དང་། རེ་བ་མེད་པའི་སེམས་དང་། སྨོན་པ་མེད་པའི་སེམས་དང་། ཤིན་ཏུ་སྨོན་པ་མེད་པའི་
སེམས་དང་། སྨྲ་བ་མེད་པའི་སེམས་དང་། མཉེན་ཞིང་དེས་པའི་སེམས་དང་། མི་གནས་པའི་སེམས་དང་། དབང་སྒྱུར་བའི་སེམས་དང་། ཟག་པ་མེད་པའི་སེམས་དང་། དོན་དམ་པའི་སེམས་དང་། མི་ལྡོག་པའི་སེམས་དང་། མི་རྟག་པའི་སེམས་དང་།
ཡང་དག་པའི་སེམས་དང་། གཡོ་སྒྱུ་མེད་པའི་སེམས་དང་། དགེ་བའི་སེམས་དང་། ལྷག་ཆད་མེད་པའི་སེམས་དང་། བར་ཆད་མེད་པའི་སེམས་དང་། བུས་པ་ལྟ་བུ་མ་ཡིན་པའི་སེམས་དང་། ཉན་ཐོས་ལྟ་བུ་མ་ཡིན་པའི་སེམས་དང་། རང་སངས་རྒྱས་ལྟ་བུ་མ་

ཡིན་པའི་སེམས་དང་། ཤིན་ཏུ་ཤེས་པའི་སེམས་དང་། ཁམས་ཤེས་པའི་སེམས་དང་། ཁམས་སྐྱེ་བ་ཤེས་པའི་སེམས་དང་། ཁམས་ལ་གནས་པ་ཤེས་པའི་སེམས་དང་། ཁམས་ལ་དབང་སྒྱུར་བ་ཤེས་པའི་སེམས་ཀྱིས་ནན་ཏན་བྱས་པས་ན། སྟོབས་
བཅུ་དང་། མི་འཇིགས་པ་བཞི་དང་། སྙིང་རྗེ་ཆེན་པོའི་ཏིང་ངེ་འཛིན་དང་། རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཐོབ་པར་གྱུར་ཏོ། །དེ་བས་ན་དེ་བཞིན་གཤེགས་པ་ནས་བཅོམ་ལྡན་འདས་ཀྱི་བར་དུ་བཏགས་ཏེ། དེ་ལྟར་ན་བྱང་ཆུབ་སེམས་དཔའ་སེམས་
དཔའ་ཆེན་པོས་སངས་རྒྱས་རྗེས་སུ་དྲན་པ་ཞེས་བྱའོ། །དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་རྗེས་སུ་དྲན་པ་ཞེ་ན། རིགས་ཀྱི་བུ་བྱང་ཆུབ་སེམས་དཔའ་ཆེན་པོས་སངས་རྒྱས་བཅོམ་ལྡན་འདས་ཀྱིས་གསུངས་པའི་ཆོས་ལ་འདི་ལྟར་ཡིད་ལ་བྱེད་དོ། །བཅོམ་
ལྡན་འདས་ཀྱིས་གསུངས་པའི་ཆོས་ནི་མཆོག་ཏུ་གྱུར་པ། ཕུལ་དུ་གྱུར་པ་སྟེ། ཆོས་ཀྱིས་རྒྱུ་བྱས་པས་ན་སོ་སོའི་སྐྱེ་བོ་དག་ཀྱང་འབྲས་བུ་མངོན་སུམ་དུ་ཐོབ་པར་གྱུར་ཏོ། །དམ་པའི་ཆོས་འདི་འབའ་ཞིག་ནི་དུས་དང་ཚོད་མེད་དེ། ཆོས་ཀྱི་མིག་གིས་མཐོང་བ་ཡིན་གྱི། ཤའི་མིག་
གིས་མཐོང་བ་མ་ཡིན་ན། དཔེ་དང་ཟླས་ཀྱང་དཔེར་བྱ་བ་མ་ཡིན་ཏེ། མ་སྐྱེས་པ། མ་བྱུང་བ། མི་གནས་པ། མི་འགོག་པ། ཐོག་མ་མེད་པ། ཐ་མ་མེད་པ། འདུས་མ་བྱས་པ། བགྲང་དུ་མེད་པ། གནས་མེད་པ་རྣམས་ཀྱི་གནས་སུ་གྱུར་པ། རྟེན་མེད་པའི་རྟེན། སྣང་བ་མེད་པའི་
སྣང་བ། ཕ་རོལ་ཏུ་མ་ཕྱིན་པ་རྣམས་ཕ་རོལ་ཏུ་སྒྲོལ་བ། དྲི་བསུང་མེད་པའི་དྲི་བསུང་། ཐོགས་པ་མེད་པ། བལྟར་མི་རུང་བར་མཐོང་བ། མི་གཡོ་བ། མི་འགྱུར་བ། མི་རིང་བ། མི་ཐུང་བ། བདེ་བ་ཡོངས་སུ་བཅད་ཀྱང་རབ་ཏུ་བདེ་བའི་མཐར་ཕྱིན་པ། གཟུགས་མ་ཡིན།
གཟུགས་ཆད་པ་མ་ཡིན། གཟུགས་ཀྱང་མ་ཡིན་པ་ནས་རྣམ་པར་ཤེས་པ་མ་ཡིན་པ། རྣམ་པར་ཤེས་པ་ཆད་པ་མ་ཡིན། རྣམ་པར་ཤེས་པའི་བར་དུ་ཡང་མ་ཡིན་པ། ལས་མ་ཡིན་པ། ལས་ཆད་པ་ལས་ཀྱང་མ་ཡིན་པ། ཉོན་མོངས་པ་མ་ཡིན། ཉོན་མོངས་པ་མ་བཅད་པ།

ཉོན་མོངས་པ་ཡང་མ་ཡིན་པ། དངོས་པོ་མ་ཡིན། དངོས་པོ་བཅད་པ། དངོས་པོ་ཡང་མ་ཡིན་པ། ཁམས་མ་ཡིན། ཁམས་བཅད་པ། ཁམས་ཀྱང་མ་ཡིན་པ། སྲིད་པ་མ་ཡིན། སྲིད་པ་བཅད་པ། སྲིད་པ་ཡང་མ་ཡིན་པ། སྐྱེ་མཆེད་མ་ཡིན། སྐྱེ་མཆེད་བཅད་པ། སྐྱེ་མཆེད་ཀྱང་
མ་ཡིན་པ། རྒྱུ་མ་ཡིན། རྒྱུ་བཅད་པ། རྒྱུ་ཡང་མ་ཡིན་པ། འབྲས་བུ་མ་ཡིན། འབྲས་བུ་བཅད་པ། འབྲས་བུ་ཡང་མ་ཡིན་པ། བརྫུན་པ་མ་ཡིན། བརྫུན་པ་ཐམས་ཅད་བཅད་པ། བརྫུན་པ་ཡང་མ་ཡིན་པ། བདེན་པ་མ་ཡིན། བདེན་པ་ཐམས་ཅད་བཅད་པ། བདེན་པ་ཡང་
མ་ཡིན་པ། སྐྱེ་བ་མ་ཡིན། འགོག་པ་མ་ཡིན། སྐྱེ་བ་དང་འགོག་པ་ཡོངས་སུ་བཅད་པ། འགོག་པ་ཡང་མ་ཡིན་པ། མཚན་མ་མ་ཡིན། མཚན་མ་མ་ཡིན་པ་ཡང་མ་ཡིན། མཚན་མ་ཐམས་ཅད་བཅད་པ། མཚན་མ་ཡང་མ་ཡིན་པ། སྟོན་པ་མ་ཡིན། མི་སྟོན་པ་ཡང་མ་
ཡིན། སྟོན་པ་ཐམས་ཅད་བཅད་པ། སྟོན་པ་ཡང་མ་ཡིན་པ། འཇིགས་པ་མ་ཡིན། བདེ་བ་མ་ཡིན། འཇིགས་པ་ཐམས་ཅད་བཅད་པ། བདེ་བ་ཡང་མ་ཡིན་པ། བཟོད་པ་མ་ཡིན། མི་བཟོད་པ་མ་ཡིན། མི་བཟོད་པ་ཐམས་ཅད་བཅད་པ། བཟོད་པ་ཡང་མ་ཡིན་པ། ཞི་
གནས་མ་ཡིན། ཞི་གནས་མ་ཡིན་པ་ཡང་མ་ཡིན། ཞི་གནས་ཐམས་ཅད་བཅད་པ། ཞི་གནས་ཀྱང་མ་ཡིན་པ། ཆོས་ཐམས་ཅད་ཀྱི་སྤྱི་བོར་ཕྱིན་པ། ཉོན་མོངས་པ་ཐམས་ཅད་ཡོངས་སུ་བཅད་པ། ཡོངས་སུ་དག་པ། མཚན་མ་མེད་པ། མཚན་མ་ལས་ཡོངས་སུ་གྲོལ་བ།
སེམས་ཅན་ཚད་མེད་པའི་མཐར་ཕྱིན་པའི་གནས་སུ་གྱུར་པ། འཁོར་བའི་མེ་འབར་བ་ཐམས་ཅད་ཞི་བར་བྱེད་པ། སངས་རྒྱས་རྣམས་ཀྱི་རོལ་པའི་གནས། རྟག་པ་མི་འགྱུར་བའི་ཡིད་ལ་བྱེད་པ་སྟེ། དེ་ནི་བྱང་ཆུབ་སེམས་དཔའ་ཆོས་རྗེས་སུ་དྲན་པ་ཞེས་བྱའོ། །དེ་ལ་ཇི་
ལྟར་ན་དགེ་འདུན་རྗེས་སུ་དྲན་པ་ཞེ་ན། སངས་རྒྱས་རྣམས་ཀྱི་འཕགས་པའི་དགེ་འདུན་ནི་ཆོས་བཞིན་དུ་གནས་པ། ཡང་དག་པའི་ཆོས་འཛིན་པ། རྗེས་སུ་རྣལ་འབྱོར་དུ་སྤྱོད་པ། བལྟར་མི་རུང་བ། གཟུང་དུ་མེད་པ། གཞིག་ཏུ་མེད་པ། གནོད་པ་བྱར་མི་རུང་བ། བསམ་གྱིས་མི་

ཁྱབ་པ། སེམས་ཅན་ཐམས་ཅད་ཀྱི་བསོད་ནམས་ཀྱི་ཞིང་དུ་གྱུར་པ། བསོད་ནམས་ཀྱི་ཞིང་དུ་གྱུར་ཀྱང་ལེན་པ་མེད་པ། ཡོངས་སུ་དག་པ། རྙོག་པ་མེད་པ། ཟག་པ་མེད་པ། འདུས་མ་བྱས་པ། ཡངས་པ། མཐའ་ཡས་པ། སེམས་ཤིན་ཏུ་དུལ་བ། མཉམ་
སྙོམས་པ། གཉིས་སུ་མེད་པ། མྱ་ངན་མེད་པ། རྟག་པ་མི་འགྱུར་བ་སྟེ། དེ་ནི་དགེ་འདུན་རྗེས་སུ་དྲན་པ་ཞེས་བྱའོ། །དེ་ལ་ཇི་ལྟར་ན་བསླབ་ཚིག་རྗེས་སུ་དྲན་པ་ཞེ་ན། བྱང་ཆུབ་སེམས་དཔའ་ཚུལ་ཁྲིམས་ཡོད་པ་ཡིད་ལ་བྱས་པས་མི་འཇིགས་པ། མི་ཟག་པ། མི་ཉམས་པ། མ་
འདྲེས་པ། གཟུགས་མེད་དུ་ཟིན་ཀྱང་ཤིན་ཏུ་བསྲུང་བ། རེག་པའི་དངོས་པོ་མེད་ཀྱང་ཤིན་ཏུ་ཐབས་མཁས་པས་བསྙེན་པར་རྫོགས་པར་བྱེད་པ། ཉེས་པའི་སྐྱོན་མེད་པ། སངས་རྒྱས་དང་། བྱང་ཆུབ་སེམས་དཔའ་རྣམས་ཀྱིས་བསྔགས་ཤིང་བསྟོད་པ། ཤིན་ཏུ་རྒྱས་པ། ཡོངས་
སུ་མྱ་ངན་ལས་འདས་པ་ཆེན་པོའི་རྒྱུར་གྱུར་པ། རིགས་ཀྱི་བུ་འདི་ལྟ་སྟེ། དཔེར་ན་ས་ཆེན་པོ་དང་། གྲུ་དང་སེ་མོ་དོ་དང་། རི་ཆེན་པོ་དང་། རྒྱ་མཚོ་དང་། ཐལ་བའི་ཁུ་བ་དང་། ཁང་ཁྱིམ་དང་། རལ་གྲི་དང་། ཟམ་པ་དང་། སྨན་པ་མཁས་པ་དང་། སྨན་བཟང་པོ་དང་། བྱུག་པའི་སྨན་
དང་། ཡིད་བཞིན་གྱི་ནོར་བུ་རིན་པོ་ཆེ་དང་། རྐང་ལག་དང་། མིག་དང་། ཕ་མ་དང་། གྲིབ་མ་ནི་ཅིས་ཀྱང་མི་འཕྲོགས་ཏེ། གནོད་པ་བྱར་མེད། མེས་བསྲེག་ཏུ་མེད། ཆུས་གཡེང་དུ་མེད། རི་མཐོན་པོ་ལ་འཛེག་པའི་ཐེམ་སྐས་ལྟ་བུ་སྟེ། སངས་རྒྱས་དང་བྱང་ཆུབ་སེམས་དཔའ་
རྣམས་ཀྱི་རིན་པོ་ཆེ་དམ་པའི་རྒྱལ་མཚན་ལྟ་བུའོ། །ཚུལ་ཁྲིམས་དེ་ལ་གནས་ན་རྒྱུན་དུ་ཞུགས་པའི་འབྲས་བུ་ཐོབ་པའི་སྐལ་བ་ང་ལ་ཡང་ཡོད་མོད་ཀྱི་ང་མི་འདོད་དོ། །དེ་ཅིའི་ཕྱིར་ཞེ་ན། གལ་ཏེ་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ན་རྒྱ་ཆེར་སེམས་ཅན་ཐམས་ཅད་ཀྱི་དོན་
བྱེད་མི་ནུས་སོ། །གལ་ཏེ་ཚུལ་ཁྲིམས་ལ་གནས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་བའི་སྐལ་བ་ཡང་ང་ལ་ཡོད་དེ། དེ་ནི་ང་འདོད་དོ། །དེ་ཅིའི་ཕྱིར་ཞེ་ན། གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་ན་སེམས་ཅན་ཐམས་ཅད་ལ་

དམ་པའི་ཆོས་རྒྱ་ཆེར་སྟོན་པར་འགྱུར་ཏེ། མགོན་སྐྱབས་སུ་འགྱུར་བས་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་རྗེས་སུ་དྲན་པ་ཞེས་བྱའོ། །དེ་ལ་ཇི་ལྟར་ན་སྦྱིན་པ་རྗེས་སུ་དྲན་པ་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོས་ཤིན་ཏུ་བརྟགས་ན་སྦྱིན་
པ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཡིན་པས་སངས་རྒྱས་དང་བྱང་ཆུབ་སེམས་དཔའ་རྣམས་སྦྱིན་པ་དེ་ལ་ཤིན་ཏུ་བསྙེན་ཏེ་ནན་ཏན་བྱེད་པས་བདག་ཀྱང་དེ་ལ་བསྙེན་ཏེ་ནན་ཏན་བྱའོ། །གལ་ཏེ་སྦྱིན་པ་མ་བྱས་ན་འཁོར་རྣམ་པ་བཞིའི་རྒྱུན་དུ་མི་འགྱུར་རོ། །སྦྱིན་པ་
བྱས་པས་ཀུན་ནས་ཉོན་མོངས་པ་ཡོངས་སུ་མ་ཆོད་ཀྱང་ད་ལྟར་གྱི་ཉོན་མོངས་པ་འཇོམས་པར་འགྱུར་རོ། །སྦྱིན་པ་བྱས་པ་དེའི་རྒྱུ་དང་དེའི་རྐྱེན་གྱིས་རྟག་ཏུ་ཕྱོགས་བཅུའི་འཇིག་རྟེན་གྱི་ཁམས་ཚད་མེད་མཐའ་ཡས་པའི་ཀླུང་གང་གཱའི་བྱེ་མ་སྙེད་ཀྱི་སེམས་ཅན་ཐམས་ཅད་ཀྱིས་
བསྔགས་ཤིང་བསྟོད་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ལ་ཟས་བྱིན་པ་ནི་འཚོ་བ་བྱིན་པ་སྟེ། དེའི་འབྲས་བུས་མངོན་པར་སངས་རྒྱས་པ་ན་རྟག་པ་མི་འཕོ་བའི་གནས་སུ་འགྱུར་རོ། །བདེ་བ་བྱིན་པས་ནི་མངོན་པར་སངས་རྒྱས་པ་ན་
ཤིན་ཏུ་བདེ་བ་ཐོབ་པར་འགྱུར་རོ། །བྱང་ཆུབ་སེམས་དཔའ་སྦྱིན་པ་བྱིན་པ་ན་ཆོས་བཞིན་དུ་རྙེད་པ་ཡིན་གྱི། གཞན་ལ་གནོད་པ་མ་ཡིན་པས་མངོན་པར་སངས་རྒྱས་པ་ན་ཡོངས་སུ་དག་པའི་མྱ་ངན་ལས་འདས་པ་ཐོབ་པར་འགྱུར་རོ། །བྱང་ཆུབ་སེམས་དཔའ་སྦྱིན་པ་བྱིན་པ་ན་སེམས་
ཅན་རྣམས་ཀྱིས་ཆེད་དུ་མ་བསླངས་པར་ཐོབ་པས་མངོན་པར་སངས་རྒྱས་པ་ན་དབང་བསྒྱུར་བའི་བདག་ཅེས་བྱ་བ་འཐོབ་པར་འགྱུར་རོ། །སྦྱིན་པ་བྱིན་པའི་རྐྱེན་གྱིས་ཕ་རོལ་པོ་མཐུ་དང་ལྡན་པར་གྱུར་པས་མངོན་པར་སངས་རྒྱས་པ་ན་སྟོབས་བཅུ་ཐོབ་པར་འགྱུར་རོ། །སྦྱིན་པ་བྱིན་
པའི་རྐྱེན་གྱིས་ཕ་རོལ་པོ་སྨྲ་བའི་སྤོབས་པ་དང་ལྡན་པར་འགྱུར་བས་མངོན་པར་སངས་རྒྱས་པ་ན་ཡང་དག་པར་སོ་སོར་ཤེས་པ་བཞི་ཐོབ་པར་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་སྦྱིན་པ་བྱིན་པས་ཡོངས་སུ་མྱ་ངན་ལས་འདས་པའི་རྒྱུར་འགྱུར་ཏེ། དེ་

བས་ན་བདག་ཀྱང་སྦྱིན་པ་ལ་ནན་ཏན་བྱས་ཏེ་མྱ་ངན་ལས་འདས་པའི་རྒྱུར་འགྱུར་བར་བྱའོ། །རྒྱས་པར་ནི་མེ་ཏོག་སྣ་ཚོགས་ཞེས་བྱ་བའི་ནང་ནས་འཆད་དོ། །དེ་ལ་ཇི་ལྟར་ན་ལྷ་རྗེས་སུ་དྲན་པ་ཞེ་ན། རྒྱལ་ཆེན་རིས་བཞིའི་གནས་ནས་འདུ་ཤེས་མེད་འདུ་ཤེས་མེད་
མིན་སྐྱེ་མཆེད་སྟེངས་ཀྱི་གནས་ཡོད་དེ། གང་ཞིག་རྒྱལ་ཆེན་རིས་བཞིའི་ལྷ་ལ་དད་པ་དེ་ལ་ཡང་སྐལ་བ་ཡོད་དེ། གང་ཞིག་མང་དུ་ཐོས་པ་དང་སྦྱིན་པ་དང་ཤེས་རབ་ཀྱིས་རྒྱལ་ཆེན་རིས་བཞིའི་ལྷ་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཀྱི་བར་དུ་བདག་ལ་ཡང་སྐལ་བ་ཡོད་མོད་ཀྱི།
བདག་འདོད་པ་མ་ཡིན་ནོ། །དེ་ཅིའི་ཕྱིར་ཞེ་ན། རྒྱལ་ཆེན་རིས་བཞིའི་ལྷ་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཀྱི་བར་དུ་ཐམས་ཅད་ཀྱང་མི་རྟག་པའོ། །མི་རྟག་པ་ཡིན་པས་ན་སྐྱེ་བ་དང་། རྒ་བ་དང་། ན་བ་དང་། འཆི་བ་སྟེ། དེ་བས་ན་བདག་འདོད་པ་མ་ཡིན་ནོ། །
འདི་ལྟ་སྟེ། དཔེར་ན་སྒྱུ་མ་ནི་སྐྱེ་བོ་གླེན་པ་དག་སླུ་བ་ཡིན་ཏེ། མཁས་པ་ཤེས་རབ་ཅན་ནི་ཆགས་པའམ་སླུ་བར་མི་འགྱུར་རོ། །སྒྱུ་མ་ནི་རྒྱལ་ཆེན་རིས་བཞིའི་གནས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་སྟེངས་ལྟ་བུའོ། །གླེན་པ་ནི་བྱིས་པ་མ་རབས་ཐམས་ཅད་ལྟ་བུ་སྟེ།
བདག་ནི་སོ་སོའི་སྐྱེ་བོ་གླེན་པ་དང་མི་འདྲའོ། །བདག་གིས་སྔོན་ཐོས་ན་དོན་དམ་པའི་ལྷ་སྟེ། སངས་རྒྱས་དང་བྱང་ཆུབ་སེམས་དཔའ་ནི་རྟག་པ་མི་འགྱུར་བ། མི་སྐྱེ་བ། མི་རྒ་བ། མི་ན་བ། མི་འཆི་བ་ཡིན་ཏེ། བདག་ནི་སེམས་ཅན་ཐམས་ཅད་ཀྱི་ཕྱིར་དོན་དམ་པའི་ལྷ་ཚོལ་ལོ། །དེ་ཅིའི་
ཕྱིར་ཞེ་ན། དོན་དམ་པའི་ལྷས་ནི་སེམས་ཅན་དག་གི་ཉོན་མོངས་པ་ཡོངས་སུ་གཅོད་དེ། དཔེར་ན་ཡིད་བཞིན་གྱི་ཤིང་ལྟ་བུའོ། །ཅི་སྟེ་བདག་ལ་དད་པ་ནས་ཤེས་རབ་ཀྱི་བར་དུ་ཡོད་ན་དོན་དམ་པའི་ལྷ་ཐོབ་པར་འགྱུར་ཏེ། སེམས་ཅན་ཐམས་ཅད་ལ་ཡང་དོན་དམ་པའི་ལྷ་རྒྱས་པར་སྟོན་ཅིང་
འཆད་པར་འགྱུར་རོ། །དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ལྷ་རྗེས་སུ་དྲན་པ་ཞེས་བྱའོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་པ་མ་ཡིན་གྱི། འཇིག་རྟེན་པས་ནི་མི་ཤེས་མི་མཐོང་། མི་རྟོགས་པ་སྟེ། བྱང་ཆུབ་

སེམས་དཔས་ཤེས་པ། མཐོང་བ། རྟོགས་པ་ཞེས་བྱའོ། །རིགས་ཀྱི་བུ་གལ་ཏེ་ངའི་ཉེ་གནས་ལས་མདོ་སྡེ་བཅུ་གཉིས་ཀློག་པ་དང་། འདོན་པ་དང་། འཆང་བ་དང་། འཛིན་པ་དང་། གླེགས་བམ་དུ་འདྲི་བ་དང་། གཞན་དག་ལ་རྒྱ་ཆེ་བར་སྟོན་ཅིང་འཆད་པ་དང་། ཡོངས་སུ་མྱ་ངན་ལས་འདས་
པ་ཆེན་པོའི་མདོ་འདོན་པ་དང་། ཀློག་པ་དང་། འཆང་བ་དང་། འཛིན་པ་དང་། གླེགས་བམ་དུ་འདྲི་བ་དང་། གཞན་ལ་རྒྱས་པར་སྟོན་ཅིང་འཆད་པར་འདྲའོ་ཞེས་བྱ་བ་མི་རུང་ངོ་། །དེ་ཅིའི་ཕྱིར་ཞེ་ན། རིགས་ཀྱི་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ནི་སངས་རྒྱས་བཅོམ་ལྡན་
འདས་ཐམས་ཅད་ཀྱི་དགོངས་པའི་དོན་ཟབ་མོའོ། །སངས་རྒྱས་བཅོམ་ལྡན་འདས་རྣམས་ཀྱི་དགོངས་པའི་དོན་ཟབ་མོ་ཡིན་པས་ན་མཆོག་ཏུ་གྱུར་པ་ཡིན་ནོ། །རིགས་ཀྱི་བུ་དེ་བས་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་ནི་ངོ་མཚར་རྨད་དུ་ཆེ་བ་སྟེ། བསམ་གྱིས་མི་ཁྱབ་པའོ། །
དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ཀྱང་ཡོངས་སུ་མྱ་ངན་ལས་འདས་པ་ཆེན་པོའི་མདོ་འདི་ནི་ངོ་མཚར་རྨད་དུ་ཆེ་བ་སྟེ། བསམ་གྱིས་མི་ཁྱབ་བོ་སྙམ་དུ་བགྱིད་དོ། །སངས་རྒྱས་དང་། ཆོས་དང་། དགེ་འདུན་ཡང་
བསམ་གྱིས་མི་ཁྱབ། བྱང་ཆུབ་སེམས་དཔའི་བྱང་ཆུབ་དང་། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཡང་བསམ་གྱིས་མི་ཁྱབ་བོ་སྙམ་བགྱིད་དོ། །བཅོམ་ལྡན་འདས་དོན་ཅི་ཞིག་གི་སླད་དུ་བྱང་ཆུབ་སེམས་དཔའ་ཡང་བསམ་གྱིས་མི་ཁྱབ་བོ་ཞེས་གསུངས། བཅོམ་
ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སུས་ཀྱང་མ་བསྟན་པར་རང་བྱང་ཆུབ་ཏུ་སེམས་བསྐྱེད་དོ། །དེ་ལྟར་སེམས་བསྐྱེད་ནས་ཤིན་ཏུ་བརྩོན་འགྲུས་རྩོམ་པས་གལ་ཏེ་མེ་ཆེན་པོས་ལུས་དང་། མགོ་ཚིག་ཀྱང་ཆོས་རྗེས་སུ་དྲན་
པ་བཏང་སྟེ། མེ་གསོད་པར་མི་བྱེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་འདི་སྙམ་དུ་སེམས་ཏེ། བདག་བསྐལ་པ་གྲངས་མེད་ཚད་མེད་པའི་བར་དུ་སེམས་ཅན་དམྱལ་བ་དང་། ཡི་དགས་དང་། བྱོལ་སོང་གི་སྐྱེ་གནས་དང་། ལྷ་དང་།

མིར་འཁོར་ཏེ། ཀུན་ནས་ཉོན་མོངས་པའི་མེས་ཚིག་པར་གྱུར་ཀྱང་གདོན་མི་ཟ་བར་ངེས་པའི་ཆོས་གཅིག་ཙམ་ཡང་མ་ཐོབ་བོ། །ངེས་པའི་ཆོས་ཞེས་བྱ་བ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །བདག་ནི་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཀྱི་ཕྱིར་ལུས་དང་སྲོག་ལ་ཆུང་ཟད་ཀྱང་ཕངས་པར་མི་བྱེད་དོ། །བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་ལུས་འདི་རྡུལ་དུ་ཞིབ་མོར་བཏགས་ཀྱང་བརྩོན་འགྲུས་རྩོམ་པ་མི་གཏོང་ངོ་། །དེ་ཅིའི་ཕྱིར་ཞེ་ན། བརྩོན་འགྲུས་ཀྱི་སེམས་ནི་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཀྱི་རྒྱུར་འགྱུར་རོ། །རིགས་ཀྱི་དེ་ལྟར་བྱང་ཆུབ་སེམས་དཔས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མ་མཐོང་བར་ལུས་དང་སྲོག་ཀྱང་མི་ཕངས་ན་མཐོང་བ་ལྟ་ཅི་སྨོས་ཏེ། དེ་བས་ན་བྱང་ཆུབ་སེམས་དཔའ་ནི་བསམ་གྱིས་མི་ཁྱབ་པའོ། །གཞན་ཡང་བསམ་གྱིས་མི་
ཁྱབ་པ་ཞེས་བྱ་བ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་འཁོར་བའི་སྐྱོན་ཚད་མེད་པ་མཐོང་བ་ནི་ཉན་ཐོས་དང་རང་སངས་རྒྱས་ཀྱིས་རྟོགས་པ་མ་ཡིན་ཏེ། དེ་ལྟར་འཁོར་བའི་སྐྱོན་ཚད་མེད་པ་མཐོང་ཡང་སེམས་ཅན་གྱི་ཕྱིར་སྡུག་བསྔལ་ཡོངས་སུ་མྱོང་བ་ལ་སྐྱོ་བར་མི་བྱེད་དེ།
དེ་བས་ན་བསམ་གྱིས་མི་ཁྱབ་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་གྱི་ཕྱིར་སེམས་ཅན་དམྱལ་བ་ན་སྡུག་བསྔལ་མང་པོ་མྱོང་ཡང་བསམ་གཏན་གསུམ་པའི་བདེ་བ་དང་འདྲ་སྟེ། དེ་བས་ན་བསམ་གྱིས་མི་ཁྱབ་བོ། །རིགས་ཀྱི་བུ་འདི་ལྟ་སྟེ།
དཔེར་ན་ཁྱིམ་བདག་ཅིག་ཁྱིམ་དུ་མེ་ཤོར་ན་ཁྱིམ་དེ་ནས་ཕྱིར་རོལ་ཏུ་འབྱུང་ངོ་། །ཇི་སྟེ་ཁྱིམ་བདག་དེའི་བུ་རྣམས་ཁྱིམ་གྱི་ནང་དུ་ལུས་ཏེ་མེ་ལས་མ་ཐར་ན། ཁྱིམ་བདག་དེ་དེའི་ཚེ་ན་གདོན་མི་ཟ་བར་མེས་ཚིག་པར་འགྱུར་བར་ཤེས་ཀྱང་བུ་རྣམས་གདོན་པའི་ཕྱིར་ཁྱིམ་དེའི་ནང་དུ་འཇུག་
གོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། འཁོར་བ་ན་ཉེས་པའི་སྐྱོན་མང་པོ་ཡོད་པར་ཤེས་ཀྱང་སེམས་ཅན་གྱི་ཕྱིར་འཁོར་བ་ན་གནས་པ་ལ་མི་སྐྱོ་སྟེ། དེ་བས་ན་བསམ་གྱིས་མི་ཁྱབ་བོ། །རིགས་ཀྱི་བུ་སེམས་ཅན་ཚད་མེད་པ་རྣམས་བྱང་ཆུབ་ཏུ་

སེམས་བསྐྱེད་ནས་ཀྱང་འཁོར་བའི་སྐྱོན་མང་པོ་མཐོང་བས་སེམས་དེ་ལས་ཕྱིར་ལྡོག་སྟེ། ལ་ལ་ནི་ཉན་ཐོས་སུ་འགྱུར། ལ་ལ་ནི་རང་སངས་རྒྱས་སུ་འགྱུར་རོ། །གལ་ཏེ་བྱང་ཆུབ་སེམས་དཔའ་མདོ་སྡེ་འདི་ཐོས་ན་བྱང་ཆུབ་ཀྱི་སེམས་ལས་ཕྱིར་མི་ལྡོག་གོ། །ཉན་ཐོས་དང་རང་སངས་རྒྱས་སུ་
འགྱུར་མི་སྲིད་དོ། །དེ་ལྟར་བྱང་ཆུབ་སེམས་དཔའ་དེས་མི་གཡོ་བའི་ས་དང་པོ་མ་ཐོབ་ཀྱང་། སེམས་ཤིན་ཏུ་བརྟན་པར་འགྱུར་ཏེ། ཕྱིར་མི་ལྡོག་པས་ན་བསམ་གྱིས་མི་ཁྱབ་པ་ཞེས་བྱའོ། །རིགས་ཀྱི་བུ་གལ་ཏེ་མི་ཞིག་འདི་སྐད་དུ་བདག་ནི་རྒྱ་མཚོ་ཆེན་པོ་འདི་ལ་རྐྱལ་ཏེ་རྒལ་
ནུས་སོ་ཞེས་སྨྲ་ན། ཚིག་དེ་བསམ་གྱིས་མི་ཁྱབ་པ་ཡིན་ནམ། བཅོམ་ལྡན་འདས་དེ་སྐད་ཅེས་སྨྲ་བའི་ཚིག་དེ་ནི་བསམ་གྱིས་ཁྱབ་པ་ཡང་ལགས་ལ། བསམ་གྱིས་མི་ཁྱབ་པ་ཡང་ལགས་སོ། །དེ་ཅིའི་སླད་དུ་ཞེ་ན། གལ་ཏེ་མི་ཞིག་གིས་རྐྱལ་ཏེ་ཕ་རོལ་ཏུ་ཕྱིན་ན་དེ་ནི་
བསམ་གྱིས་མི་ཁྱབ་བོ། །གལ་ཏེ་ལྷ་མ་ཡིན་ཞིག་རྐྱལ་ཏེ་ཕ་རོལ་ཏུ་ཕྱིན་ན་བསམ་གྱིས་ཁྱབ་པ་ལགས་སོ། །རིགས་ཀྱི་བུ་སྐབས་འདིར་ནི་མི་འབའ་ཞིག་ལ་བྱའི། ལྷ་མ་ཡིན་ནི་མ་ཡིན་ནོ། །བཅོམ་ལྡན་འདས་མིའི་ནང་ན་ཡང་བསམ་གྱིས་མི་ཁྱབ་པ་དང་། བསམ་གྱིས་
ཁྱབ་པ་མཆིས་སོ། །བཅོམ་ལྡན་འདས་མི་ལ་ཡང་རྣམ་པ་གཉིས་ཏེ། འཕགས་པ་དང་། བྱིས་པ་མ་རབས་སོ། །བྱིས་པ་མ་རབས་ལ་བགྱི་ན་ནི་བསམ་གྱིས་མི་ཁྱབ་པ་ལགས་སོ། །འཕགས་པ་ལ་བགྱི་ན་བསམ་གྱིས་ཁྱབ་བོ། །རིགས་ཀྱི་བུ་སྐབས་འདིར་ནི་ངས་བུས་པ་མ་
རབས་ལ་བྱའི་འཕགས་པ་ལ་ནི་མ་ཡིན་ནོ། །བཅོམ་ལྡན་འདས་ཅི་སྟེ་བུས་པ་མ་རབས་ལ་བགྱི་ན་བསམ་གྱིས་མི་ཁྱབ་པ་ལགས་སོ། །རིགས་ཀྱི་བུ་བུས་པ་མ་རབས་ཀྱིས་ནི་ཡང་དག་པར་ན་རྒྱ་མཚོ་ཆེན་པོ་ལ་རྐྱལ་ཏེ་ཕ་རོལ་ཏུ་མི་ཕྱིན་ནོ། །བྱང་ཆུབ་སེམས་དཔའ་སེམས་
དཔའ་ཆེན་པོས་ནི་ཡང་དག་པར་འཁོར་བའི་རྒྱ་མཚོའི་ཕ་རོལ་ཏུ་ཕྱིན་ཏེ། དེ་བས་ན་བསམ་གྱིས་མི་ཁྱབ་པ་ཞེས་བྱའོ། །རིགས་ཀྱི་བུ་ཅི་སྟེ་ལ་ལ་ཞིག་གིས་པད་མོའི་རྩ་བའི་ཉག་མས་རི་རབ་ལྷུན་པོ་བཏེག་སྟེ་ནམ་མཁའ་ལས་སྤྱངས་ན། དེ་བསམ་གྱིས་མི་ཁྱབ་པ་ཡིན་ནམ།

གསོལ་པ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་སྐད་ཅིག་ཐང་ཅིག་ཙམ་གྱིས་འཁོར་བ་ཐམས་ཅད་འཇལ་དབོག་པ་ནི་བསམ་གྱིས་མི་ཁྱབ་པ་ཞེས་བྱའོ། །རིགས་ཀྱི་བུ་བྱང་
ཆུབ་སེམས་དཔའ་སེམས་དཔའ་ཆེན་པོས་བསྐལ་པ་ཚད་མེད་གྲངས་མེད་པའི་བར་དུ་འཁོར་བ་ལ་མི་རྟག་པ་དང་། བདག་མེད་པ་དང་། བདེ་བ་མེད་པ་དང་། ཡོངས་སུ་མ་དག་པར་རྟོགས་པས་སེམས་ཅན་རྣམས་ལ་རྟག་པ་དང་། བདེ་བ་དང་། བདག་ཡོད་པ་དང་། ཡོངས་སུ་
དག་པ་རྒྱས་པར་འཆད་ཅིང་སྟོན་ཏེ། དེ་ལྟར་སྟོན་ཅིང་འཆད་ཀྱང་ངན་པར་ལྟ་བ་མ་ཡིན་པས་ན་བསམ་གྱིས་མི་ཁྱབ་པ་ཞེས་བྱའོ། །རིགས་ཀྱི་བུ་དཔེར་ན་ལ་ལ་ཞིག་ཆུར་མཆོངས་ཀྱང་ཆུས་མི་ཁྱེར་ལ། མེ་ཆེན་པོར་མཆོངས་ཀྱང་མེས་མི་ཚིག་ན། དེ་ནི་བསམ་གྱིས་མི་ཁྱབ་པ་ཞེས་
བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་བར་འཁོར་བའི་ནང་དུ་གནས་ཀྱང་འཁོར་བས་གནོད་པར་མི་འགྱུར་བས་ན་བསམ་གྱིས་མི་ཁྱབ་པ་ཞེས་བྱའོ། །རིགས་ཀྱི་བུ་འདི་ལྟ་སྟེ། དཔེར་ན་མི་ལ་རྣམ་པ་གསུམ་སྟེ། རབ་དང་། འབྲིང་དང་།
ཐ་མའོ། །དེ་ལ་མིའི་ནང་ན་ཐ་མ་ནི་མངལ་ན་འདུག་པའི་ཚེ་འདི་སྙམ་དུ། བདག་ནི་ཕྱིས་ཁུང་ངམ། མི་གཙང་བའི་གནས་སམ། མི་རོའི་ནང་ངམ། ཚེར་ཕུང་གི་སྟེང་ངམ། མུན་པའི་ནང་ན་གནས་སོ་སྙམ་སེམས་སོ། །མངལ་ནས་བྱུང་བའི་ཚེ་ཡང་ད་ནི་བདག་གི་ཕྱིས་ཁུང་
ངམ། མི་གཙང་བའི་གནས་སམ། མུན་ནག་ཆེན་པོའི་གནས་ལས་བྱུང་ངོ་སྙམ་སེམས་སོ། །དེ་ལ་མིའི་ནང་ན་འབྲིང་ནི་མངལ་ན་གདུག་པའི་ཚེ་འདི་སྙམ་དུ་བདག་ནི་སྐྱེད་ཤིང་གི་ཚལ་ལམ། ཆུ་གཙང་མའི་ནང་ངམ། ཁང་ཁྱིམ་བཟང་པོའི་ནང་ན་འདུག་གོ་སྙམ་སེམས་
ཏེ། བྱུང་བའི་ཚེ་ཡང་དེ་སྙམ་དུ་སེམས་སོ། །དེ་ལ་མིའི་ནང་ན་རབ་ནི་མངལ་ན་འདུག་པའི་ཚེ་ཡང་འདི་སྙམ་དུ་བདག་ནི་ཡང་ཐོག་བཟང་པོའམ། སྐྱེད་མོས་ཚལ་ལམ། རྟའམ། བ་ལང་ངམ། གླང་པོ་ཆེ་ལ་ཞོན་ཏེ་རི་མཐོན་པོ་ལ་འཛེག་གོ་སྙམ་སྟེ། བྱུང་བའི་ཚེ་ཡང་དེ་སྙམ་དུ་

སེམས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཐོག་མ་མངལ་དུ་འཇུག་པ་ན་ཡང་འཇུག་པར་ཤེས། མངལ་ན་གནས་པའི་ཚེ་ཡང་གནས་པར་ཤེས། ཕྱིར་བྱུང་བའི་ཚེ་ཡང་བྱུང་བར་ཤེས་ཏེ། འདོད་ཆགས་དང་ཞེ་སྡང་གི་སེམས་ནམ་དུ་ཡང་མི་འབྱུང་མོད་ཀྱི་ས་
ལ་གནས་པ་མ་ཡིན་པས་ན་བསམ་གྱིས་མི་ཁྱབ་པ་ཞེས་བྱའོ། །རིགས་ཀྱི་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་དཔེར་བྱར་མེད་དོ། །རིགས་ཀྱི་བུ་སེམས་ཀྱང་ཕྱོགས་དང་དཔེ་བསྐྲུན་ཅིང་བརྗོད་སླ་བ་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་
ཆེན་པོ་ནི་སྟོན་པའི་སློབ་དཔོན་དང་སློབ་མའི་གནས་མེད་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་གྱུར་ཏོ། །དེ་ལྟར་ཆོས་དེ་དག་ཐོས་ནས་འཇུངས་པ་མེད་པའི་སེམས་ཀྱིས་རྟག་ཏུ་སེམས་ཅན་ལ་སྟོན་ཅིང་འཆད་པས་ན་དེའི་ཕྱིར་ཡང་བསམ་གྱིས་མི་
ཁྱབ་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ལུས་ཀྱིས་ཡོངས་སུ་སྤོང་ལ་ངག་གིས་མ་ཡིན་པ་ཡང་ཡོད། ངག་གིས་ཡོངས་སུ་སྤོང་ལ་ལུས་ཀྱིས་མ་ཡིན་པ་ཡང་ཡོད། །ལུས་དང་ངག་མ་ཡིན་པས་ཡོངས་སུ་སྤོང་བ་ཡང་ཡོད་དོ། །ལུས་
ཀྱིས་ཡོངས་སུ་སྤོང་བ་ཞེས་བྱ་བ་ནི་སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་སྟེ། ངག་གིས་མ་ཡིན། ངག་གིས་ཡོངས་སུ་སྤོང་བ་ནི་བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་པོ་སྨྲ་བ་དང་། ཚིག་ཐུན་ཚགས་སྨྲ་བ་སྟེ། ངག་གིས་ཡོངས་སུ་སྤོང་བ་
ཡིན་གྱི། ལུས་ཀྱིས་མ་ཡིན། ལུས་དང་ངག་མ་ཡིན་པས་ཡོངས་སུ་སྤོང་བ་ནི་འདོད་ཆགས་དང་ཞེ་སྡང་དང་ངན་པར་ལྟ་བའོ། །རིགས་ཀྱི་བུ་དེ་ནི་ལུས་ཀྱང་མ་ཡིན། ངག་ཀྱང་མ་ཡིན་པ་ཡོངས་སུ་སྤོང་བ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་
ནི་ཆོས་གཅིག་ཙམ་ལ་ཡང་ལུས་ཀྱིས་སམ། ལས་ཀྱིས་སམ། བདག་པོས་ཡོངས་སུ་སྤོང་བར་མི་ལྟ་སྟེ། ཡོངས་སུ་སྤོང་བ་ཡང་ཡོད་པས་དེའི་ཕྱིར་ཡང་བསམ་གྱིས་མི་ཁྱབ་པ་ཞེས་བྱ་སྟེ། ངག་ཀྱང་དེ་བཞིན་དུ་རིག་པར་བྱའོ། །རིགས་ཀྱི་བུ་ལུས་ལས་ལུས་ཀྱིས་སྤོང་བ་དང་།

ངག་ལས་ངག་གིས་སྤོང་བ་སྟེ། ཤེས་རབ་ཀྱིས་ཡོངས་སུ་སྤོང་བ་ནི་ལུས་ཀྱིས་མ་ཡིན། ངག་གིས་མ་ཡིན་ནོ། །རིགས་ཀྱི་བུ་ཡང་དག་པར་ན་ཤེས་རབ་འདི་དག་ནི་བྱང་ཆུབ་སེམས་དཔས་སྤོང་བར་མི་འགྱུར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཆོས་གཅིག་ཙམ་ཡང་
འཇིག་པའམ། བྱས་པ་མེད་དེ། འདུས་བྱས་པའི་ཆོས་ཉིད་ནི་ཐ་དད་པས་སྐྱེ་ལ་ཐ་དད་པས་འགོག་སྟེ། དེའི་ཕྱིར་ཤེས་རབ་འདི་ནི་ཡོངས་སུ་སྤོང་བར་མི་འགྱུར་རོ། །རིགས་ཀྱི་བུ་ཤེས་རབ་ཀྱིས་འཇིག་པར་མི་ནུས། མེས་ཚིག་པར་མི་ནུས། ཆུས་འདྲུལ་བར་མི་ནུས། རླུང་གིས་ཁྱེར་
བར་མི་ནུས། སས་འཛིན་པར་མི་ནུས། སྐྱེ་བས་བསྐྱེད་པར་མི་ནུས། རྒ་བས་རྒས་པར་མི་ནུས། གནས་པས་གནས་པར་མི་ནུས། འཇིག་པས་འཇིག་པར་མི་ནུས། འདོད་པས་འདོད་པར་མི་ནུས། ཞེ་སྡང་བས་ཞེ་སྡང་བར་མི་ནུས། གཏི་མུག་པས་རྨུགས་པར་མི་ནུས་ཏེ། འདུས་
བྱས་ཀྱི་རང་བཞིན་གྱིས་སྐྱེ་ཞིང་ཐ་དད་པས་འགོག་གོ། །བྱང་ཆུབ་སེམས་དཔའ་སེམས་དཔའ་ཆེན་པོས་འདི་སྙམ་དུ་བདག་གི་ཤེས་རབ་འདིས་ཉོན་མོངས་པ་ཐམས་ཅད་བཅོམ་མོ་སྙམ་མི་སེམས་ཏེ། བདག་གིས་ཉོན་མོངས་པ་ཐམས་ཅད་བཅོམ་མོ་ཞེས་སྨྲའོ། །ཅི་སྟེ་དེ་
སྐད་ཅེས་སྨྲས་ཀྱང་བརྫུན་དུ་སྨྲ་བ་མ་ཡིན་ཏེ། དེ་བས་ན་བསམ་གྱིས་མི་ཁྱབ་པ་ཞེས་བྱའོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་རྩ་ལྔ་པ། དེ་ནས་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
བཅོམ་ལྡན་འདས་བདག་གིས་དེང་གདོད་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གྱིས་མི་ཁྱབ་པ་དང་། སངས་རྒྱས་དང་ཆོས་དང་དགེ་འདུན་དང་། ཡོངས་སུ་མྱ་ངན་ལས་འདས་པ་ཆེན་པོའི་མདོ་དང་། དེ་གཟུངས་སུ་འཛིན་པ་དང་། བྱང་ཆུབ་དང་། མྱ་ངན་ལས་
འདས་པ་བསམ་གྱིས་མི་ཁྱབ་པར་འཚལ་ཏོ། །བཅོམ་ལྡན་འདས་བླ་ན་མེད་པའི་སངས་རྒྱས་ཀྱི་ཆོས་ཇི་ཙམ་གྱི་བར་དུ་གནས། ཇི་ཙམ་ན་ནུབ་པར་འགྱུར། རིགས་ཀྱི་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལ་སྤྱོད་པ་རྣམ་པ་ལྔ་ཡོད་དེ། འདི་ལྟ་སྟེ། འཕགས་

པའི་སྤྱོད་པ་དང་། ཚངས་པའི་སྤྱོད་པ་དང་། ལྷའི་སྤྱོད་པ་དང་། ན་བའི་སྤྱོད་པ་དང་། བུས་པའི་སྤྱོད་པའོ། །གལ་ཏེ་ངའི་ཉེ་གནས་རྣམས་ལས་གང་གཟུངས་སུ་འཛིན་ཅིང་ཀློག་པ་དང་། འདོན་པ་དང་། ཡི་གེར་འདྲི་བ་དང་། དོན་དགྲོལ་བར་བྱེད་ཅིང་སེམས་ཅན་རྣམས་བསྟི་སྟང་དང་།
བཀུར་སྟི་དང་། རིམ་གྲོ་དང་། བསྔགས་པ་དང་། མཆོད་པ་རྣམ་པ་སྣ་ཚོགས་ཀྱིས་མཆོད་པར་ནུས་ན་དེའི་ཚེ་སངས་རྒྱས་ཀྱི་ཆོས་ནུབ་པ་མ་ཡིན་པར་རིག་པར་བྱའོ། །རིགས་ཀྱི་བུ་གལ་ཏེ་མྱ་ངན་ལས་འདས་པའི་མདོ་སྡེ་འདི་རྒྱས་པར་སྤེལ་ལ་དེའི་དུས་ན་ངའི་ཉེ་གནས་
རྣམས་ཚུལ་ཁྲིམས་སྡོམ་པ་བཤིག་པ་མང་ལ་མི་དགེ་བ་མང་དུ་བྱེད་དེ་མདོ་སྡེ་འདི་ལ་དད་པར་མི་བྱེད། དེ་ལྟར་མ་དད་པའི་ཕྱིར་འཛིན་པ་དང་། ཀློག་པ་དང་། འདོན་པ་དང་། ཡི་གེ་འདྲི་བ་དང་། དོན་དགྲོལ་བར་མི་བྱེད་དེ། སྐྱེ་བོ་མང་པོ་བཀུར་སྟི་དང་མཆོད་པའི་བར་དུ་བྱེད་པར་མི་
འགྱུར་ལ། གཟུངས་སུ་འཛིན་པ་མཐོང་ན་སྨོད་ཅིང་ཁྱོད་ནི་སྟོན་པ་དྲུག་གིས་བསྟན་པ་ལ་འཇུག་པ་ཡིན་གྱི་སངས་རྒྱས་ཀྱི་ཉེ་གནས་མ་ཡིན་ནོ་ཞེས་སྐུར་པ་དེའི་ཚེ་ན་སངས་རྒྱས་ཀྱི་ཆོས་རིང་པོ་མི་ཐོགས་པར་ནུབ་པར་འགྱུར་བར་རིག་པར་བྱའོ། །ཡང་བྱང་ཆུབ་སེམས་
དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བཅོམ་ལྡན་འདས་ལས་མངོན་སུམ་དུ་སངས་རྒྱས་འོད་སྲུང་གི་ཆོས་འཇིག་རྟེན་དུ་ཞག་བདུན་གནས་ནས་ནུབ་བོ་ཞེས་གསུངས་པ་ཐོས་སོ། །བཅོམ་ལྡན་འདས་དེ་བཞིན་
གཤེགས་པ་འོད་སྲུང་ལ་མདོ་སྡེ་འདི་མངའ་འམ་མི་མངའ། དེ་སྟེ་མངའ་བ་ཞིག་ན་ཅིའི་སླད་དུ་ནུབ་ཅེས་གསུངས། ཅི་སྟེ་མི་མངའ་ན་ཅིའི་སླད་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ནི་དེ་བཞིན་གཤེགས་པ་ཐམས་ཅད་ཀྱི་གསང་བའི་སྙིང་པོ་ཞེས་གསུངས། བཅོམ་
ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་སྔར་ཡང་དོན་འདི་ནི་འཇམ་དཔལ་གཞོན་ནུ་འབའ་ཞིག་གིས་ཤེས་སོ་ཞེས་གསུངས་ཏེ། ད་ཡང་བཟླས་ཏེ་བཤད་ཀྱིས་ཤིན་ཏུ་ཡིད་ལ་བྱས་ཏེ་བརྟགས་པར་ཉོན་ཅིག །རིགས་ཀྱི་བུ་སངས་རྒྱས་བཅོམ་ལྡན་འདས་རྣམས་

ལ་ཆོས་རྣམ་པ་གཉིས་མངའ་སྟེ། ཀུན་རྫོབ་དང་། དོན་དམ་པའོ། །ཀུན་རྫོབ་ཀྱི་ཆོས་ནི་འགོག་གོ། །དོན་དམ་པའི་ཆོས་ནི་མི་འཇིག་མི་འགོག་གོ། །དེ་ཡང་རྣམ་པ་གཉིས་ཏེ། མི་རྟག་པ། བདག་མེད་པ། བདེ་བ་མེད་པ། ཡོངས་སུ་དག་པ་མེད་པ་དང་།
རྟག་པ། བདེ་བ། བདག་ཡོངས་སུ་དག་པའོ། །དེ་ལ་མི་རྟག་པ་དང་། བདག་མེད་པ་དང་། བདེ་བ་མེད་པ་དང་ཡོངས་སུ་དག་པ་མེད་པ་ནི་འཇིག་པ་དང་འགོག་པ་ཡོད་དོ། །རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ནི་འཇིག་པ་དང་འགོག་པ་མེད་དོ། །ཡང་
རྣམ་པ་གཉིས་ཏེ། ཐེག་པ་གཉིས་ཀྱིས་འཛིན་པ་དང་། བྱང་ཆུབ་སེམས་དཔས་འཛིན་པའོ། །དེ་ལ་ཐེག་པ་གཉིས་ཀྱིས་འཛིན་པ་ནི་འཇིག་པ་དང་འགོག་པ་ཡོད་དོ། །བྱང་ཆུབ་སེམས་དཔས་འཛིན་པ་ནི་འཇིག་པ་དང་འགོག་པ་མེད་དོ། །ཡང་རྣམ་པ་གཉིས་ཏེ། ནང་དང་། ཕྱི་
རོལ་ལོ། །དེ་ལ་ཕྱི་རོལ་གྱི་ཆོས་ནི་འཇིག་པ་དང་འགོག་པ་ཡོད་དོ། །ནང་གི་ཆོས་ནི་འཇིག་པ་དང་འགོག་པ་མེད་དོ། །ཡང་རྣམ་པ་གཉིས་ཏེ། འདུས་བྱས་དང་། འདུས་མ་བྱས་སོ། །དེ་ལ་འདུས་བྱས་ཀྱི་ཆོས་ནི་འཇིག་པ་དང་འགོག་པའོ། །འདུས་མ་བྱས་ཀྱི་ཆོས་ནི་
འཇིག་པ་དང་འགོག་པ་མེད་པའོ། །ཡང་རྣམ་པ་གཉིས་ཏེ། དམིགས་སུ་ཡོད་པ་དང་། དམིགས་སུ་མེད་པའོ། །དེ་ལ་དམིགས་སུ་ཡོད་པའི་ཆོས་ནི་འཇིག་པ་དང་འགོག་པའོ། །དམིགས་སུ་མེད་པའི་ཆོས་ནི་འཇིག་པ་དང་འགོག་པ་མེད་པའོ། །ཡང་རྣམ་པ་
གཉིས་ཏེ། འདྲེས་པའི་ཆོས་དང་མ་འདྲེས་པའི་ཆོས་སོ། །དེ་ལ་འདྲེས་པའི་ཆོས་ནི་འཇིག་པ་དང་འགོག་པའོ། །མ་འདྲེས་པའི་ཆོས་ནི་འཇིག་པ་དང་འགོག་པ་མེད་པའོ། །ཡང་རྣམ་པ་གཉིས་ཏེ། ལྷ་དང་། མིའོ། །དེ་ལ་མི་ནི་འཇིག་པ་དང་འགོག་པའོ། །ལྷ་ནི་
འཇིག་པ་དང་འགོག་པ་མེད་པའོ། །ཡང་རྣམ་པ་གཉིས་ཏེ། མདོ་སྡེ་བཅུ་གཅིག་དང་། ཤིན་ཏུ་རྒྱས་པའི་མདོ་སྡེའོ། །དེ་ལ་མདོ་སྡེ་བཅུ་གཅིག་ནི་འཇིག་པ་དང་འགོག་པའོ། །ཤིན་ཏུ་རྒྱས་པའི་མདོ་སྡེ་ནི་འཇིག་པ་དང་འགོག་པ་མེད་པ་སྟེ། རིགས་ཀྱི་བུ་གལ་

ཏེ་ངའི་ཉེ་གནས་གང་ཤིན་ཏུ་རྒྱས་པའི་མདོ་སྡེ་གཟུངས་སུ་འཛིན་ཅིང་ཀློག་གམ། འདོན་ཏམ། ཡི་གེར་འདྲིའམ། འགྲོལ་ཞིང་བཤད་དམ། བཀུར་སྟི་དང་། རིམ་གྲོ་དང་། མཆོད་པ་བྱེད་ན། དེའི་ཚེ་སངས་རྒྱས་ཀྱི་ཆོས་ནུབ་པ་མ་ཡིན་པར་རིག་པར་བྱའོ། །རིགས་ཀྱི་བུ་ཁྱོད་
ཀྱིས་གོང་དུ་དེ་བཞིན་གཤེགས་པ་འོད་སྲུང་ལ་མདོ་སྡེ་འདི་ཡོད་དམ་ཞེས་དྲིས་པ་ནི་རིགས་ཀྱི་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ནི་དེ་བཞིན་གཤེགས་པ་ཐམས་ཅད་ཀྱིས་དགོངས་ཏེ་གསུངས་པའི་སྙིང་པོའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་རྣམས་
མདོ་སྡེ་བཅུ་གཅིག་མངའ་མོད་ཀྱི་དེ་དག་ལ་སངས་རྒྱས་ཀྱི་རང་བཞིན་དང་། དེ་བཞིན་གཤེགས་པའི་རྟག་པ་དང་བདེ་བ་དང་བདག་དང་ཡོངས་སུ་དག་པ་མི་འཆད་ན། སངས་རྒྱས་བཅོམ་ལྡན་འདས་རྣམས་མཐའ་ཡུན་དུ་མྱ་ངན་ལས་མི་འདའ་བས། དེའི་ཕྱིར་མདོ་སྡེ་འདི་ནི་
དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་ཞེས་བྱའོ། །མདོ་སྡེ་བཅུ་གཅིག་ལས་མི་འཆད་པས་སྙིང་པོ་ཞེས་བྱ་སྟེ། ཇི་ལྟར་རིན་པོ་ཆེ་སྣ་བདུན་བདོག་པའི་ཕྱི་རོལ་ཏུ་མི་སྤྱོད་པའི་ཕྱིར་གཏེར་ཞེས་བྱ་སྟེ་རིགས་ཀྱི་བུ་མི་དེས་གཏེར་དུ་བསགས་ཤིང་སྦས་པ་དེ་ཡང་མ་
འོངས་པ་ན་དགོས་པའི་ཕྱིར་ཏེ། དེ་ལ་མ་འོངས་པ་ན་དགོས་པ་ནི་འདི་ལྟ་སྟེ་ཁྲེ་འབྲས་དཀོན་པ་དང་། བདག་གི་ཡུལ་དུ་དགྲ་འོང་བ་དང་། རྒྱལ་པོ་ངན་པ་དང་ཕྲད་པའི་ཚེ་སྲོག་སླུ་བ་དང་། འགྲོན་དུ་སོང་བ་ལས་ཉམ་ང་བ་དང་ཕྲད་པ་དང་། ནོར་དཀོན་པའི་ཚེ་གདོད་ཕྱུང་ཞིང་
སྤྱོད་དོ། །རིགས་ཀྱི་བུ་དེ་བཞིན་གཤེགས་པ་རྣམས་ཀྱིས་དགོངས་ཏེ་གསུངས་པའི་སྙིང་པོ་ཡང་དེ་དང་འདྲ་སྟེ། མ་འོངས་པའི་དུས་ཀྱི་དགེ་སློང་ངན་པ་མ་བརྟགས་པའི་རྫས་འཆང་བས། འཁོར་རྣམ་བཞི་ལ་དེ་བཞིན་གཤེགས་པ་ནི་མཐའ་ཡུན་དུ་མྱ་ངན་ལས་འདས་སོ་
ཞེས་སྟོན་པ། འཇིག་རྟེན་གྱི་གཙུག་ལག་ཀློག་ཅིང་འདོན་གྱི། སངས་རྒྱས་ཀྱི་གཞུང་ལ་མི་བཀུར་བ་དེ་ལྟ་བུ་ལ་སོགས་པའི་ངན་པ་འཇིག་རྟེན་དུ་བྱུང་བ་ན། དེ་བཞིན་གཤེགས་པས་ངན་པ་དེ་དག་མེད་པར་མཛད་ཅིང་ལོག་པའི་འཚོ་བ་དང་། རྙེད་པ་དང་། གྲགས་

པ་སྤོང་བར་མཛད་པའི་ཕྱིར་མདོ་སྡེ་འདི་གསུངས་སོ། །གལ་ཏེ་མདོ་སྡེ་དགོངས་ཏེ་གསུངས་པའི་སྙིང་པོ་འདི་ནུབ་ཅིང་མི་སྣང་བར་འགྱུར་བ་ན་སངས་རྒྱས་ཀྱི་ཆོས་ཀྱང་ནུབ་པར་འགྱུར་བར་རིག་པར་བྱའོ། །རིགས་ཀྱི་བུ་ཡོངས་སུ་མྱ་ངན་ལས་འདས་པ་
ཆེན་པོའི་མདོ་ནི་རྟག་པ་མི་འགྱུར་མི་འཕོ་བ་ཡིན་ན་ཅི་སྟེ་འདི་སྐད་དུ་བཅོམ་ལྡན་འདས་འོད་སྲུང་ལ་མདོ་སྡེ་འདི་ཡོད་དམ་ཞེས་འདྲི། རིགས་ཀྱི་བུ་བཅོམ་ལྡན་འདས་འོད་སྲུང་གི་ཚེའི་སེམས་ཅན་ནི་འདོད་ཆགས་སྲབ་ཅིང་ཤེས་རབ་དང་ལྡན་ཏེ། བྱང་ཆུབ་སེམས་དཔའ་
སེམས་དཔའ་ཆེན་པོ་ཤ་སྟག་ལ་ཞི་བ། དུལ་བ། གདུལ་སླ་བ། གཟི་བརྗིད་ཆེན་པོ་དང་ལྡན་ཏེ། གཟུངས་མི་བརྗེད་པ་བལ་གླང་གི་ཁྱུ་མཆོག་དང་མཚུངས་པ། འཇིག་རྟེན་གྱི་ཁམས་ཡོངས་སུ་དག་པ། སེམས་ཅན་ཐམས་ཅད་ཀྱིས་དེ་བཞིན་གཤེགས་པ་ནི་མཐའ་ཡུན་དུ་
ཡོངས་སུ་མྱ་ངན་ལས་མི་འདའ་ཞིང་རྟག་ཏུ་གནས་པ། མི་འགྱུར་མི་འཕོ་བར་ཤེས་པས། མདོ་སྡེ་འདི་ཡོད་དུ་ཟིན་གྱིས་ཀྱང་སྟོན་ཅིང་བཤད་མི་དགོས་སོ། །རིགས་ཀྱི་བུ་ད་ལྟར་གྱི་དུས་ཀྱི་སེམས་ཅན་ནི་ཉོན་མོངས་པ་མང་ཞིང་། གཏི་མུག་ཆེ་བས་བརྗེད་ངས་ལ།
ཤེས་རབ་མེད་ཅིང་། ནེམ་ནུར་མང་བ་དད་པའི་རྩ་བ་མི་ཚུགས་ཏེ་འཇིག་རྟེན་གྱི་ཁམས་མ་དག་པས། སེམས་ཅན་ཐམས་ཅད་ཀྱང་འདི་སྐད་དུ་དེ་བཞིན་གཤེགས་པ་ནི་མི་རྟག་པ། འགྱུར་ཞིང་འཕོ་བ་སྟེ། མཐའ་ཡུན་དུ་ཡོངས་སུ་མྱ་ངན་ལས་འདས་པའོ། །
ཞེས་ཟེར་ཏེ། དེ་བས་ན་དེ་བཞིན་གཤེགས་པས་མདོ་སྡེ་འདི་གསུངས་སོ། །རིགས་ཀྱི་བུ་སངས་རྒྱས་འོད་སྲུང་གི་ཆོས་ནི་ཡང་དག་པར་ནུབ་པ་མ་ཡིན་ནོ། །དེ་ཅིའི་ཕྱིར་ཞེ་ན། རྟག་པ་མི་འགྱུར་མི་འཕོ་བའི་ཕྱིར་རོ། །རིགས་ཀྱི་བུ་གལ་ཏེ་སེམས་ཅན་གང་
བདག་ཡོད་པ་ལ་བདག་མེད་པར་ལྟ་བ་དང་། བདག་མེད་པ་ལ་བདག་ཡོད་པར་ལྟ་བ་དང་། རྟག་པ་ལ་མི་རྟག་པར་ལྟ་བ་དང་། མི་རྟག་པ་ལ་རྟག་པར་ལྟ་བ་དང་། བདེ་བ་ལ་མི་བདེ་བར་ལྟ་བ་དང་། མི་བདེ་བ་ལ་བདེ་བར་ལྟ་བ་དང་། ཡོངས་སུ་དག་པ་ལ་ཡོངས་

སུ་མ་དག་པར་ལྟ་བ་དང་། ཡོངས་སུ་མ་དག་པ་ལ་ཡོངས་སུ་དག་པར་ལྟ་བ་དང་། མི་འགོག་པ་ལ་འགོག་པར་ལྟ་བ་དང་། འགོག་པ་ལ་མི་འགོག་པར་ལྟ་བ་དང་། སྡིག་པ་ལ་མི་སྡིག་པར་ལྟ་བ་དང་། མི་སྡིག་པ་ལ་སྡིག་པར་ལྟ་བ་དང་། སྡིག་པ་ཡང་བ་ལ་ལྕི་བར་ལྟ་
བ་དང་། སྡིག་པ་ལྕི་བ་ལ་ཡང་བར་ལྟ་བ་དང་། ཐེག་པ་ལ་ཐེག་པ་མ་ཡིན་པར་ལྟ་བ་དང་། ཐེག་པ་མ་ཡིན་པ་ལ་ཐེག་པར་ལྟ་བ་དང་། ལམ་ཡིན་པ་ལ་ལམ་མ་ཡིན་པར་ལྟ་བ་དང་། ལམ་མ་ཡིན་པ་ལ་ལམ་ཡིན་པར་ལྟ་བ་དང་། བྱང་ཆུབ་ཡང་དག་པ་ལ་བྱང་ཆུབ་མ་ཡིན་པར་
ལྟ་བ་དང་། བྱང་ཆུབ་མ་ཡིན་པ་ལ་བྱང་ཆུབ་ཏུ་ལྟ་བ་དང་། སྡུག་བསྔལ་ལ་སྡུག་བསྔལ་མ་ཡིན་པར་ལྟ་བ་དང་། སྡུག་བསྔལ་མ་ཡིན་པ་ལ་སྡུག་བསྔལ་དུ་ལྟ་བ་དང་། ཀུན་འབྱུང་ལ་ཀུན་འབྱུང་བ་མ་ཡིན་པར་ལྟ་བ་དང་། འགོག་པ་ལ་འགོག་པ་མ་ཡིན་པར་ལྟ་བ་དང་། བདེན་
པ་ལ་བདེན་པ་མ་ཡིན་པར་ལྟ་བ་དང་། ཀུན་རྫོབ་ལ་དོན་དམ་པར་ལྟ་བ་དང་། དོན་དམ་པ་ལ་ཀུན་རྫོབ་དུ་ལྟ་བ་དང་། སྐྱབས་སུ་འགྲོ་བ་ལ་སྐྱབས་སུ་འགྲོ་བ་མ་ཡིན་པར་ལྟ་བ་དང་། སྐྱབས་སུ་འགྲོ་བ་མ་ཡིན་པ་ལ་སྐྱབས་སུ་འགྲོ་བར་ལྟ་བ་དང་། སངས་རྒྱས་ཀྱི་བཀའ་ཡང་
དག་པ་ལ་ནི་བདུད་ཀྱི་ཚིག་ཅེས་ཟེར་བ་དང་། བདུད་ཀྱི་ཚིག་ཡང་དག་པ་ལ་ནི་སངས་རྒྱས་ཀྱི་བཀའ་ཞེས་ཟེར་བ་དེ་ལྟ་བུའི་དུས་ན་དེ་བཞིན་གཤེགས་པ་རྣམས་ཀྱིས་གདོད་ཡོངས་སུ་མྱ་ངན་ལས་འདས་པའི་མདོ་འདི་གསུང་ངོ་། །རིགས་ཀྱི་བུ་སྦྲང་བུ་མཆུ་སྨྱུང་གི་མཆུས་རྒྱ་མཚོའི་
གཏིང་དུ་མ་ལུས་པར་ཐུག་ཅེས་ཟེར་བ་བླའི། དེ་བཞིན་གཤེགས་པའི་ཆོས་ནུབ་བོ་ཞེས་མི་བྱའོ། །རླུང་དྲག་པོ་ལ་ཞགས་པས་བཅིང་དུ་རུང་ཞེས་ཟེར་བ་ཡང་བླའི། དེ་བཞིན་གཤེགས་པའི་ཆོས་ནུབ་བོ་ཞེས་མི་བྱའོ། །རི་རབ་རིའི་རྒྱལ་པོ་ལ་ཁའི་དབུགས་ཀྱིས་བུས་ཏེ་ཞིག་ཅིང་
འགྱེས་ཟེར་ཀྱང་བླའི། དེ་བཞིན་གཤེགས་པའི་ཆོས་ནུབ་བོ་ཞེས་མི་བྱའོ། །མེ་ཁབ་ཏ་ལ་ཞེས་བྱ་བའི་ནང་ན་པད་མོ་སྐྱེའོ་ཞེས་ཟེར་ཀྱང་བླའི། དེ་བཞིན་གཤེགས་པའི་ཆོས་ནུབ་བོ་ཞེས་མི་བྱའོ། །སྨན་ཨ་ག་ཏ་དུག་ཏུ་འགྱུར་རོ་ཞེས་ཟེར་ཀྱང་བླའི། དེ་བཞིན་གཤེགས་པའི་ཆོས་

ནུབ་བོ་ཞེས་མི་བྱའོ། །ཟླ་བ་ནི་ཚ་ལ་ཉི་མ་ནི་བསིལ་ཞེས་ཟེར་ཡང་བླའི། དེ་བཞིན་གཤེགས་པའི་ཆོས་ནུབ་བོ་ཞེས་མི་བྱའོ། །ཆེན་པོ་བཞི་སོ་སོའི་རང་བཞིན་སྤོང་ཞེས་ཟེར་ཡང་བླའི། དེ་བཞིན་གཤེགས་པའི་ཆོས་ནུབ་བོ་ཞེས་མི་བྱའོ། །རིགས་ཀྱི་བུ་གལ་ཏེ་
དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་མེད་པར་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་ན་ཆོས་དེ་འཇིག་རྟེན་ན་རིང་པོ་མི་གནས་པར་རིག་པར་བྱའོ། །གཞན་
ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་རྣམས་ཡོད་ན་དེ་བཞིན་གཤེགས་པ་ཡོངས་སུ་མྱ་ངན་ལས་འདས་སུ་ཟིན་ཀྱང་ཆོས་འཇིག་རྟེན་ན་ཡུན་དུ་གནས་པར་
འགྱུར་བར་རིག་པར་བྱའོ། །གཞན་ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་ཡོད་དུ་ཟིན་ཀྱང་ཁྱིམ་པ་དད་པས་སངས་རྒྱས་ཀྱི་ཆོས་ལ་བཀུར་བའི་དགེ་བསྙེན་
མེད་པར་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པར་གྱུར་ན། ཆོས་འཇིག་རྟེན་དུ་རིང་པོ་མི་གནས་པར་རིག་པར་བྱའོ། །གཞན་ཡང་རིགས་ཀྱི་བུ་གལ་ཏེ་སངས་རྒྱས་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་
མོ་ཤེས་པའི་ཉེ་གནས་ཀྱང་ཡོད། ཁྱིམ་པ་དད་པ་ཅན་སངས་རྒྱས་ཀྱི་ཆོས་ལ་བཀུར་བའི་དགེ་བསྙེན་ཡང་ཡོད་ན་དེ་བཞིན་གཤེགས་པ་མྱ་ངན་ལས་འདས་སུ་ཟིན་ཀྱང་ཆོས་ཡུན་དུ་འཇིག་རྟེན་ན་གནས་པར་འགྱུར་རོ། །གཞན་ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས་
བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་ཀྱང་ཡོད། ཁྱིམ་པ་དད་པ་ཆེ་བ་སངས་རྒྱས་ཀྱི་ཆོས་ལ་བཀུར་བའི་དགེ་བསྙེན་ཡོད་དུ་ཟིན་གྱིས་ཀྱང་ཉེ་གནས་རྣམས་ཀྱིས་མྱ་ངན་ལས་འདས་པའི་ཕྱིར་ནི་མ་ཡིན་གྱི།

རྙེད་པ་དང་གྲགས་པའི་ཕྱིར་མདོ་སྡེ་ཟབ་མོ་སྟོན་ལ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པར་གྱུར་ན་ཆོས་དེ་འཇིག་རྟེན་ན་རིང་པོར་མི་གནས་པར་རིག་པར་བྱའོ། །གཞན་ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས། བླ་ན་མེད་པ་དགྲ་བཅོམ་པ་ཡང་
དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་ཀྱང་ཡོད། ཁྱིམ་པ་ཤིན་ཏུ་དད་པ་སངས་རྒྱས་ཀྱི་ཆོས་ལ་བཀུར་བའི་དགེ་བསྙེན་ཡང་ཡོད་ལ། ཉེ་གནས་རྣམས་ཀྱིས་སྟོན་ཅིང་བཤད་པ་ཡང་རྙེད་པ་དང་། གྲགས་པའི་ཕྱིར་ནི་མ་ཡིན་གྱི། མྱ་ངན་
ལས་འདས་པ་ཚོལ་བའི་ཕྱིར་སྟོན་ན་དེ་བཞིན་གཤེགས་པ་མྱ་ངན་ལས་འདས་སུ་ཟིན་ཀྱང་དེའི་ཆོས་འཇིག་རྟེན་ན་ཡུན་དུ་གནས་པར་འགྱུར་བར་རིག་པར་བྱའོ། །གཞན་ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་
བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་ཀྱང་ཡོད། ཁྱིམ་པ་ཤིན་ཏུ་དད་པ་སངས་རྒྱས་ཀྱི་ཆོས་ལ་བཀུར་བའི་དགེ་བསྙེན་ཡོད་དུ་ཟིན་ཀྱང་། ཉེ་གནས་རྣམས་གཅིག་གིས་གཅིག་སྨད་ཅིང་རྩོད་པ་མང་ལ། དེ་བཞིན་གཤེགས་པ་ཡང་མྱ་ངན་ལས་འདས་པར་
གྱུར་ན་ཆོས་དེ་འཇིག་རྟེན་ན་རིང་པོ་མི་གནས་པར་རིག་པར་བྱའོ། །གཞན་ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་ནི་ཡོད། ཁྱིམ་པ་ཤིན་ཏུ་དད་པ་སངས་
རྒྱས་ཀྱི་ཆོས་ལ་བཀུར་བའི་དགེ་བསྙེན་ཡང་ཡོད་ལ། ཉེ་གནས་དེ་དག་ཀྱང་འདུམ་པའི་ཆོས་སྤྱོད་ཅིང་གཅིག་ལ་གཅིག་མི་སྨོད་པར་གཅིག་གིས་གཅིག་བཀུར་ན་དེ་བཞིན་གཤེགས་པ་ཡོངས་སུ་མྱ་ངན་ལས་འདས་སུ་ཟིན་ཀྱང་དེའི་ཆོས་ཡུན་རིང་དུ་འཇིག་རྟེན་ན་གནས་པར་འགྱུར་བར་རིག་པར་
བྱའོ། །གཞན་ཡང་རིགས་ཀྱི་བུ་གལ་ཏེ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་ཀྱང་ཡོད། ཁྱིམ་པ་ཤིན་ཏུ་དད་པ་སངས་རྒྱས་ཀྱི་ཆོས་ལ་བཀུར་བའི་དགེ་བསྙེན་ཀྱང་ཡོད་ལ།

ཉེ་གནས་དེ་དག་མྱ་ངན་ལས་འདས་པ་ཆེན་པོའི་ཕྱིར་ཆོས་སྟོན་ཅིང་གཅིག་ལ་གཅིག་བཀུར་སྟིར་བྱེད་དེ། རྩོད་པར་མི་བྱེད་མོད་ཀྱི། མ་བརྟགས་པའི་རྫས་རྣམས་འཆང་ལ། ཡང་བདག་གིས་འདི་སྐད་དུ་བདག་ནི་རྒྱུན་དུ་ཞུགས་པའི་འབྲས་བུ་ནས་དགྲ་བཅོམ་པའི་འབྲས་
བུའི་བར་དུ་ཐོབ་པར་གྱུར་ཏོ་ཞེས་བསྔགས་ལ། དེ་བཞིན་གཤེགས་པ་ཡང་མྱ་ངན་ལས་འདས་པར་གྱུར་ན། དེའི་ཆོས་འཇིག་རྟེན་ན་རིང་པོ་མི་གནས་པར་རིག་པར་བྱའོ། །གཞན་ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་
པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་ཀྱང་ཡོད། ཁྱིམ་བདག་དད་པ་སངས་རྒྱས་ཀྱི་ཆོས་ལ་བཀུར་བའི་དགེ་བསྙེན་ཡང་ཡོད་ལ། ཉེ་གནས་དེ་དག་ཀྱང་ཡོངས་སུ་མྱ་ངན་ལས་འདས་པ་ཆེན་པོའི་ཕྱིར་མདོ་སྡེ་ལ་སོགས་པ་སྟོན་ཏེ། འདུམ་པའི་ཆོས་སྤྱོད་
ཅིང་གཅིག་ལ་གཅིག་བཀུར་ཞིང་བསྟི་སྟང་བྱེད། མ་བརྟགས་པའི་རྫས་ཐམས་ཅད་མི་འཆང་ལ། བདག་ཉིད་ཀྱིས་རྒྱུན་དུ་ཞུགས་པའི་འབྲས་བུ་ཐོབ་བོ་ཞེས་བྱ་བ་ནས་དགྲ་བཅོམ་པའི་འབྲས་བུའི་བར་དུ་ཡང་འཐོབ་བོ་ཞེས་མི་ཟེར་ན། སངས་རྒྱས་བཅོམ་ལྡན་འདས་
ཡོངས་སུ་མྱ་ངན་ལས་འདས་སུ་ཟིན་ཀྱང་དེའི་ཆོས་འཇིག་རྟེན་ན་ཡུན་རིང་དུ་གནས་པར་རིག་པར་བྱའོ། །གཞན་ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་ཉེ་གནས་རྣམས་དོན་
ཟབ་མོ་ཤེས་པ་ནས་དགྲ་བཅོམ་པ་ཐོབ་བོ་ཞེས་བྱ་བའི་བར་དུ་མི་ཟེར་ཡང་སོ་སོ་ནས་ལྟ་བ་རེ་རེ་འཛིན་ཏེ། འདི་སྐད་དུ་ཐ་དད་པ་རྣམ་པ་སྣ་ཚོགས་འཆད་དོ། །ཚེ་དང་ལྡན་པ་རྣམས་བཅོམ་ལྡན་འདས་ཀྱིས་ལྕི་བ་བཞི་ནས་རྩོད་པ་ཞི་བའི་ཆོས་བདུན་པོའི་བར་དུ་བཅས་པ་དེ་དག་ཀྱང་
སེམས་ཅན་རྣམས་ཀྱི་ཕྱིར་སྡོམ་པ་དང་། སྐབས་དབྱེ་བ་ཡང་ཡོད་དོ། །མདོ་སྡེ་བཅུ་གཉིས་ཀྱང་དེ་དང་འདྲའོ། དེ་ཅིའི་ཕྱིར་ཞེ་ན། བཅོམ་ལྡན་འདས་ཀྱི་ཡུལ་དང་དུས་ཐ་དད་ཅིང་སེམས་ཅན་གྱི་དབང་པོ་རྣོ་རྟུལ་ཁྱད་པར་དུ་གྱུར་པ་མཁྱེན་ཏེ་དེ་བས་ན་དེ་བཞིན་གཤེགས་པས་ཁ་ཅིག་

ཏུ་ནི་བསྡམས། ཁ་ཅིག་ཏུ་ནི་སྐབས་ཕྱེ་སྟེ་ལྕི་བ་དང་ཡང་བ་གསུངས་སོ། །རིགས་ཀྱི་བུ་དཔེར་ན་སྨན་པ་མཁས་པས་ནད་པ་ལ་འོ་མ་གཏོང་བ་དང་། ནད་པ་ལ་བཀག་པ་བཞིན་ཏེ། མཁྲིས་པའི་ནད་ལ་ནི་འོ་མ་གཏོང་། བད་ཀན་གྱི་ནད་ལ་ནི་འོ་མ་བཀག་གོ། །དེ་བཞིན་དུ་དེ་བཞིན་
གཤེགས་པ་ཡང་སེམས་ཅན་རྣམས་ཀྱི་ཉོན་མོངས་པའི་རྩ་བ་ལ་གཟིགས་ཏེ། ཕྱེ་བ་ཡང་ཡོད། བཀག་པ་ཡང་ཡོད་དོ། །ཚེ་དང་ལྡན་པ་རྣམས་བདག་གིས་འདི་བཞིན་དུ་བཅོམ་ལྡན་འདས་ལས་དོན་འདི་ཐོས་ཏེ། བདག་འབའ་ཞིག་དོན་ཤེས་ཀྱི་ཁྱེད་མི་ཤེས་སོ། །བདག་འབའ་ཞིག་
འདུལ་བ་ཤེས་ཀྱི་ཁྱེད་མི་ཤེས་སོ། །བདག་མདོ་སྡེ་རྣམས་ཤེས་ཀྱི་ཁྱེད་མི་ཤེས་སོ་ཞེས་ཟེར་ལ། སངས་རྒྱས་བཅོམ་ལྡན་འདས་དེ་ཡང་ཡོངས་སུ་མྱ་ངན་ལས་འདས་ན་དེའི་ཆོས་འཇིག་རྟེན་ན་རིང་པོ་མི་གནས་པར་རིག་པར་བྱའོ། །གཞན་ཡང་རིགས་ཀྱི་བུ་དེ་བཞིན་གཤེགས་
པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་ཉེ་གནས་རྣམས་ཀྱིས་བདག་རྒྱུན་དུ་ཞུགས་པ་ཐོབ་བོ་ཞེས་བྱ་བ་ནས་དགྲ་བཅོམ་པའི་བར་དུ་ཐོབ་ཞེས་ཀྱང་མི་ཟེར་ལ། སངས་རྒྱས་བཅོམ་ལྡན་འདས་རྣམས་ཀྱིས་སེམས་ཅན་
གྱི་ཕྱིར་བཀག་པ་དང་། སྐབས་ཕྱེ་བ་གནང་ངོ་ཞེས་ཀྱང་མི་ཟེར་ལ། ཚེ་དང་ལྡན་པ་བདག་གིས་བཅོམ་ལྡན་འདས་ལས་དོན་འདི་དང་ཆོས་འདི་དང་འདུལ་བ་འདི་བཞིན་དུ་ཐོས་ཀྱིས། ཚེ་དང་ལྡན་པ་དག་དེ་བཞིན་གཤེགས་པའི་མདོ་སྡེ་བཅུ་གཉིས་ལྟར་གྱིས་ཤིག །དོན་འདི་
གལ་ཏེ་ཡིན་ན་བདག་གིས་གཟུང་བར་བྱ། གལ་ཏེ་མ་ཡིན་ན་བདག་གིས་སྤང་བར་བྱའོ་ཞེས་ཟེར་ན། སངས་རྒྱས་བཅོམ་ལྡན་འདས་དེ་ཡོངས་སུ་མྱ་ངན་ལས་འདས་ཀྱང་ཆོས་ནི་འཇིག་རྟེན་ན་ཡུན་རིང་པོར་གནས་པར་འགྱུར་བར་རིག་པར་བྱའོ། །རིགས་ཀྱི་བུ་ངའི་ཆོས་ཡོངས་
སུ་ནུབ་པའི་ཚེ། ཉན་ཐོས་ཀྱི་ཉེ་གནས་དག་རེས་འགའ་ནི་རྣམ་པར་ཤེས་པ་ཡོད་པར་འཆད། རེས་འགའ་ནི་རྣམ་པར་ཤེས་པ་སྟོང་པར་འཆད། རེས་འགའ་ནི་ལྔ་ཕུང་བར་མ་ཡོད་པར་འཆད། རེས་འགའ་ནི་ལྔ་ཕུང་བར་མ་མེད་པར་འཆད། རེས་འགའ་ནི་དུས་གསུམ་

ཡོད་པར་འཆད། རེས་འགའ་ནི་དུས་གསུམ་མེད་པར་འཆད། རེས་འགའ་ནི་ཐེག་པ་གསུམ་ཡོད་པར་འཆད། རེས་འགའ་ནི་ཐེག་པ་གསུམ་མེད་པར་འཆད། རེས་འགའ་ནི་ཐམས་ཅད་ཡོད་པར་འཆད། རེས་འགའ་ནི་ཐམས་ཅད་མེད་པར་འཆད། རེས་
འགའ་ནི་སེམས་ཅན་ཐོག་མ་དང་ཐ་མ་ཡོད་པར་འཆད། རེས་འགའ་ནི་སེམས་ཅན་ཐོག་མ་དང་ཐ་མ་མེད་པར་འཆད། རེས་འགའ་ནི་རྟེན་ཅིང་འབྲེལ་ཏེ་འབྱུང་བ་བཅུ་གཉིས་འདུས་བྱས་ཀྱི་ཆོས་ཡིན་ནོ་ཞེས་འཆད། རེས་འགའ་ནི་རྟེན་ཅིང་འབྲེལ་ཏེ་འབྱུང་བ་འདུས་བྱས་ཀྱི་ཆོས་
མ་ཡིན་ནོ་ཞེས་འཆད། རེས་འགའ་ནི་དེ་བཞིན་གཤེགས་པ་ལ་སྙུན་གྱི་སྡུག་བསྔལ་མངའོ་ཞེས་འཆད། རེས་འགའ་ནི་དེ་བཞིན་གཤེགས་པ་ལ་སྙུན་གྱི་སྡུག་བསྔལ་མི་མངའ་བར་འཆད། རེས་འགའ་ནི་དེ་བཞིན་གཤེགས་པས་དགེ་སློང་རྣམས་ལ་ཤ་རྣམ་པ་བཅུ་ཟར་མི་
གནང་ངོ་ཞེས་འཆད། བཅུ་གང་ཞེ་ན། མི་དང་། སྦྲུལ་དང་། བལ་གླང་དང་། རྟ་དང་། བོང་བུ་དང་། ཁྱི་དང་། སེང་གེ་དང་། ཕག་པ་དང་། ཝ་དང་། སྤྲེའུའི་ཤ་སྟེ། གཞན་ཀུན་གནང་ངོ་ཞེས་འཆད། རེས་འགའ་ནི་ཐམས་ཅད་མི་གནང་ངོ་ཞེས་འཆད། རེས་འགའ་ནི་དགེ་སློང་དངོས་
པོ་ལྔ་བྱེད་དུ་མི་གནང་བར་འཆད་དེ། ལྔ་གང་ཞེ་ན། མི་དང་། མཚོན་དང་། ཆང་དང་། ཞོ་དང་། འབྲུ་མར་འཚོང་དུ་མི་གནང་སྟེ། དེ་མ་ཡིན་པ་གཞན་ཀུན་གནང་བར་འཆད། རེས་འགའ་ནི་གནས་རྣམ་པ་ལྔར་འགྲོར་མི་གནང་སྟེ། ལྔ་གང་ཞེ་ན། ཤན་པ་དང་། སྦྲུལ་
འཚོང་མ་དང་། ཆང་འཚོང་མ་དང་། རྒྱལ་པོའི་ཕོ་བྲང་དང་། རིགས་ངན་གྱི་ཁྱིམ་སྟེ། གཞན་དུ་འགྲོར་གནང་བར་འཆད། རེས་འགའ་ནི་གོས་ཀིའུ་ཤ་ཡ་བགོར་མི་གནང་སྟེ། གཞན་ཐམས་ཅད་གནང་བར་འཆད། རེས་འགའ་ནི་དེ་བཞིན་གཤེགས་པས་དགེ་སློང་རྣམས་
ལ་གོས་དང་ཟས་དང་མལ་ཆའི་ཟོང་གསེར་སྲང་ཁྲི་ཕྲག་བཅུ་རི་བ་འཆང་དུ་གནང་བར་འཆད། རེས་འགའ་ནི་མི་གནང་བར་འཆད། རེས་འགའ་ནི་མྱ་ངན་ལས་འདས་པ་རྟག་པ་དང་། བདེ་བ་དང་། བདག་དང་། ཡོངས་སུ་དག་པར་འཆད། རེས་འགའ་ནི་མྱ་ངན་ལས་འདས་པ་ཀུན་

ནས་ཉོན་མོངས་པ་ཟད་པ་མ་ཡིན་གྱི། ཆོས་གཞན་གང་ཡང་མྱ་ངན་ལས་འདས་པ་ཞེས་བྱ་བ་མེད་དོ། །དཔེར་ན་སྐུད་པ་བཏགས་པ་ནི་གོས་ཞེས་བྱའོ། །གོས་ཞིག་ནས་གོས་མེད་ཅེས་བྱ་སྟེ། ཆོས་གཞན་ལ་གོས་མེད་དོ། །ཞེས་བྱ་བ་མེད་དེ། མྱ་ངན་ལས་འདས་པའི་མཚན་ཉིད་
ཀྱང་དེ་དང་འདྲའོ། །ཞེས་འཆད་དོ། །རིགས་ཀྱི་བུ་དེའི་ཚེ་དེའི་དུས་ན་ངའི་ཉེ་གནས་རྣམས་བདེན་པར་འཆད་པ་ནི་ཉུང་། ལོག་པར་འཆད་པ་ནི་མང་བདེན་པའི་ཆོས་འཛིན་པ་ནི་ཉུང་། ལོག་པའི་ཆོས་འཛིན་པ་ནི་མང་། སངས་རྒྱས་ཀྱི་བཀའ་འཛིན་པ་ནི་ཉུང་། བདུད་ཀྱི་ཚིག་འཛིན་པ་ནི་
མང་ངོ་། །རིགས་ཀྱི་བུ་དེའི་ཚེ་ན་ཡུལ་ཀཽ་ཤཱམ་བཱི་ན་ཉེ་གནས་གཉིས་ཡོད་དེ་གཅིག་ནི་དགྲ་བཅོམ་པའོ། །གཅིག་ནི་ཚུལ་ཁྲིམས་བཤིག་པའོ། །དེ་ལ་ཚུལ་ཁྲིམས་བཤིག་པའི་འཁོར་ནི་ལྔ་བརྒྱ་ཡོད། དགྲ་བཅོམ་པའི་འཁོར་ནི་བརྒྱ་ཡོད་དེ། ཚུལ་ཁྲིམས་བཤིག་པས་ནི་དེ་བཞིན་
གཤེགས་པ་མཐར་ཡོངས་སུ་མྱ་ངན་ལས་འདས་པའོ། །བདག་གིས་འདི་བཞིན་དུ་བཅོམ་ལྡན་འདས་ལས་དོན་འདི་ཐོས་ཏེ། དེ་བཞིན་གཤེགས་པ་རྩ་བ་བཞི་བཅས་པ་སྡོམ་ན་ཡང་རུང་། གལ་ཏེ་ཞིག་ན་ཡང་ཉེས་པ་མེད་དོ། །བདག་ཀྱང་ད་ལྟར་དགྲ་བཅོམ་པའི་འབྲས་བུ་
དང་། ཐོགས་པ་མེད་པའི་ཡེ་ཤེས་བཞི་ཐོབ་པ་ཡིན་ཏེ། དགྲ་བཅོམ་པ་ཡང་རྩ་བ་བཞི་པོ་དེ་དག་བཤིག་གོ། །རྩ་བ་བཞི་པོའི་ཆོས་དེ་ཡང་དག་པར་སྡིག་པ་ཞིག་ན་དགྲ་བཅོམ་པས་འདྲལ་བའི་མི་རིགས་སོ། །དེ་བཞིན་གཤེགས་པ་འཇིག་རྟེན་ན་བཞུགས་པའི་ཚེ་ནི་ཤིན་ཏུ་སྡོམས་
ཤིག་ཅེས་བཀའ་སྩལ། ཡོངས་སུ་མྱ་ངན་ལས་འདས་པའི་ཚེ་ནི་ཐམས་ཅད་གཏོང་ངོ་ཞེས་ཟེར། དེ་ལ་དགྲ་བཅོམ་པ་ལ་སོགས་པའི་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་དེ་བཞིན་གཤེགས་པ་མཐར་ཡོངས་སུ་མྱ་ངན་ལས་འདས་སོ་ཞེས་བྱ་བའི་མི་རིགས་སོ། །དེ་བཞིན་
གཤེགས་པ་ནི་རྟག་པ་མི་འགྱུར་མི་འཕོ་བར་བདག་ཅག་ཤེས་ཏེ། དེ་བཞིན་གཤེགས་པ་འཇིག་རྟེན་ན་བཞུགས་པ་དང་། ཡོངས་སུ་མྱ་ངན་ལས་འདས་པའི་འོག་ཏུ་རྩ་བ་བཞི་བཤིག་པའི་སྡིག་པ་ནི་ཁྱད་པར་མེད་དོ། །དེ་ལྟར་དགྲ་བཅོམ་པའང་རྩ་བ་བཞི་བཤིག་གོ་ཞེས་བྱ་བར་

མི་རུང་ངོ་། །དེ་ཅིའི་ཕྱིར་ཞེ་ན། རྒྱུན་དུ་ཞུགས་པ་ཡང་སྡོམ་པ་མི་འཇིག་ན་དགྲ་བཅོམ་པ་ལྟ་སྨོས་ཀྱང་ཅི་དགོས། གལ་ཏེ་ཚེ་དང་ལྡན་པ་ཁྱེད་བདག་དགྲ་བཅོམ་པའི་འབྲས་བུ་ཐོབ་ཅེས་ཟེར་ན། དགྲ་བཅོམ་པ་ནི་བདག་དགྲ་བཅོམ་པ་ཡིན་ནོ་ཞེས་བྱ་བའི་
འདུ་ཤེས་མི་སྐྱེད་དོ། །དགྲ་བཅོམ་པ་ནི་དགེ་བ་འབའ་ཞིག་འཆད་དེ་མི་དགེ་བ་མི་འཆད་ན། ཚེ་དང་ལྡན་པས་བཤད་དོ་ཅོག་ནི་ཆོས་མ་ཡིན་པ་ཤ་སྟག་སྟེ། གལ་ཏེ་གང་མདོ་སྡེ་བཅུ་གཉིས་མཐོང་བས་ནི་ཚེ་དང་ལྡན་པ་དག་ངེས་པར་དགྲ་བཅོམ་པ་མ་ཡིན་པར་རིག་གོ། །རིགས་
ཀྱི་བུ་དེའི་ཚེ་ན་ཚུལ་ཁྲིམས་འདྲལ་བའི་འཁོར་རྣམས་ཀྱིས་དགྲ་བཅོམ་པ་དེའི་སྲོག་གི་འཚོ་བ་གཅོད་དོ། །རིགས་ཀྱི་བུ་དེའི་ཚེ་ན་བདུད་སྡིག་ཅན་གྱིས་དགེ་འདུན་སྡེ་གཉིས་ཁྲོས་འཁྲུགས་པའི་སེམས་སུ་གྱུར་པའི་སྐབས་སུ་དགེ་སློང་དྲུག་བརྒྱ་པོ་དེ་དག་ལ་རབ་ཏུ་གནོད་
པར་གཙེས་སོ། །དེ་ནས་སྐྱེ་བོ་མ་རབས་རྣམས་ཀྱིས་སོ་སོ་ནས་འདི་སྐད་དུ་ངོ་མཚར་ཏོ། །སངས་རྒྱས་ཀྱི་ཆོས་ནི་ནུབ་བོ་ཟད་དོ་ཅེས་ཟེར་ཏེ་ཡང་དག་པར་ན་ངའི་དམ་པའི་ཆོས་ནི་མ་ནུབ་སྟེ། དེའི་ཚེ་ན་ཡུལ་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཁྲི་ཕྲག་བཅུ་
གཉིས་ངའི་ཆོས་ཤིན་ཏུ་འཛིན་ན། ཅི་སྟེ་ངའི་ཆོས་ནུབ་ཅེས་བྱ། དེའི་ཚེ་དེའི་དུས་ན་འཛམ་བུའི་གླིང་དུ་ངའི་ཉེ་གནས་སུ་གྱུར་པའི་དགེ་སློང་གཅིག་ཀྱང་མེད་ནས་དེ་ནས་བདུད་སྡིག་ཏོ་ཅན་གྱིས། མེ་བོ་ཆེ་བུས་ནས་མདོ་སྡེ་ཐམས་ཅད་བསྲེགས་སོ། །དེ་ལ་ཅུང་ཟད་ལུས་པ་
དག་ནི་བྲམ་ཟེ་རྣམས་ཀྱིས་མདོ་མདོར་བརྐུས་ནས་ཁོ་བ་དག་གི་གཞུང་དུ་བསྟན་ཏེ། དེ་ལྟ་བས་ན་སངས་རྒྱས་མ་བྱུང་བའི་སྔོན་ལོགས་སུ་བྱང་ཆུབ་སེམས་དཔའ་ཕྲ་མོ་རྣམས་གཅིག་གིས་གཅིག་དྲངས་ཏེ་བྲམ་ཟེའི་ཚིག་ལ་མོས་ཤིང་འཛིན་ཏོ། །བྲམ་ཟེ་རྣམས་འདི་སྐད་དུ་བདག་
ལ་འདུལ་ཁྲིམས་ཡོད་དོ་ཞེས་ཟེར་མོད་ཀྱི། ཡང་དག་པར་ན་མུ་སྟེགས་ཅན་ལ་ཡོད་པ་མ་ཡིན་ནོ། །མུ་སྟེགས་ཅན་རྣམས་བདག་དང་བདེ་བ་དང་། ཡོངས་སུ་དག་པ་ཡོད་དོ་ཞེས་སྨྲ་མོད་ཀྱི། ཡང་དག་པར་ན་བདག་དང་བདེ་བ་དང་། ཡོངས་སུ་དག་པའི་དོན་མི་ཤེས་

ཏེ། སངས་རྒྱས་ཀྱི་ཆོས་ལས་ཡི་གེ་འབྲུ་གཅིག་དང་། གཉིས་དང་། ཚིག་གཅིག་དང་། གཉིས་བཟུང་སྟེ་བཤད་ནས་ངའི་གཞུང་ལ་དོན་འདི་ལྟ་བུ་ཡོད་དོ་ཞེས་ཟེར་རོ། །དེ་ནས་དེའི་ཚེ་གྲོང་ཁྱེར་རྩྭ་མཆོག་སཱ་ལའི་ཤིང་དྲུང་ན་འཁོར་མང་པོ་ཚད་མེད་མཐའ་ཡས་པ་སྙེད་ཀྱིས་དེ་སྐད་
དུ་སྨྲས་པ་ཐོས་ནས་ཐམས་ཅད་ཀྱིས་འདི་སྐད་དུ་འཇིག་རྟེན་སྟོངས་སོ་འཇིག་རྟེན་སྟོངས་སོ་ཞེས་སྨྲས་སོ། །བྱང་ཆུབ་སེམས་དཔའ་འོད་སྲུང་གིས་འཁོར་མང་པོ་རྣམས་ལ་སྨྲས་པ། ཁྱེད་རེ་ཞིག་ངུད་མོ་དང་མི་དགའ་བར་མ་བྱེད་ཅིག །འཇིག་རྟེན་མི་སྟོངས་ཀྱིས། དེ་བཞིན་གཤེགས་
པ་ནི་མི་འགྱུར། མི་འཕོ་བར་རྟག་ཏུ་གནས་ཏེ། ཆོས་དང་། དགེ་འདུན་ཡང་དེ་བཞིན་ནོ། །དེ་ནས་འཁོར་མང་པོ་དེ་དག་གིས་དེ་སྐད་ཅེས་སྨྲས་པ། ཐོས་ནས་ངུད་མོ་བཏང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེའི་ཚེ་རྒྱལ་པོའི་ཁབ་ན་
རྒྱལ་པོ་མ་སྐྱེས་དགྲ་ཞེས་བྱ་བ། རང་བཞིན་གྱིས་ཁྲོ་ལ་གཏུམ་པ། སེམས་ཅན་གྱི་སྲོག་གཅོད་པ་ལ་དགའ་བ། ངག་མི་དགེ་བའི་ལས་བཞི་པོ་རྫོགས་པར་བྱེད་པ། འདོད་ཆགས་དང་། ཞེ་སྡང་དང་། གཏི་མུག་གི་སེམས་ཤིན་ཏུ་མཆེད་པ། ད་ལྟར་གྱི་འབའ་ཞིག་ལ་ལྟའི། ཕྱི་མ་མ་
འོངས་པའི་དུས་མི་མཐོང་བ། འཁོར་ཤིན་ཏུ་ངན་པ་ལ་བརྟེན་པ། ད་ལྟར་གྱི་འདོད་པ་ལྔ་ལ་ཆགས་པས་རྒྱལ་པོས་ཡབ་ཀྱང་ཉེས་པ་མེད་པར་བསད་དོ། །དེ་ལྟར་ཕ་བསད་པས་འགྱོད་པའི་སེམས་སྐྱེས་ནས་མྱ་ངན་གྱིས་གདུངས་པས་ལུས་ཀྱི་རྒྱན་རྣམས་དང་། རོལ་མོ་ཡང་
བཏང་ངོ་། །འགྱོད་པའི་སེམས་ཀྱིས་གདུངས་པས་ལུས་ཁྱབ་པར་འབྲུམ་བུ་མང་པོ་བྱུང་ངོ་། །འབྲུམ་བུ་ཡང་བསྙེན་མི་བཟོད་པ་ཙམ་དུ་མནམ་པས་དེ་འདི་སྙམ་དུ་བསམས་སོ། །བདག་གི་ལས་ནི་འཕྲལ་དུ་ཡང་རྣམ་པར་སྨིན་ལ། སེམས་ཅན་དམྱལ་བའི་རྣམ་པར་སྨིན་
པ་ཡང་རིང་པོ་མི་ཐོགས་སོ། །སྙམ་སེམས་པར་གྱུར་ཏོ། །དེ་ནས་རྒྱལ་པོ་མ་སྐྱེས་དགྲའི་མ་ལུས་འཕགས་མས་སྨན་རྣམ་པ་སྣ་ཚོགས་ཀྱིས་བསྐུས་ཀྱང་འབྲུམ་བུ་ཕྱི་ཕྱིར་མཆེད་ཀྱིས་ཕན་པར་མ་གྱུར་ཏོ། །རྒྱལ་པོས་མ་ལ་སྨྲས་པ། འབྲུམ་བུ་འདི་ནི་བདག་གི་བསམ་པའི་

སེམས་ལས་བྱུང་གི། ཆེན་པོ་བཞི་ལས་བྱུང་བ་མ་ཡིན་པས་འདི་ལ་འགྲོ་བ་གང་ཡང་གསོ་བའི་གནས་སུ་འགྱུར་བ་མེད་དོ། །དེའི་ཚེ་ན་བློན་པོ་ཆེན་པོ་ཉི་ཟླ་གྲགས་པ་ཞེས་བྱ་བ་ཞིག་རྒྱལ་པོ་གང་ན་བར་འོངས་ནས་ཕྱོགས་གཅིག་ཏུ་འགྲེང་བཞིན་དུ་འདི་སྐད་ཅེས་
སྨྲས་སོ། །རྒྱལ་པོ་ཆེན་པོ་ལུས་མི་བདེ་བ་དང་། སེམས་མི་བདེ་བར་གྱུར་ན་ཅིའི་ཕྱིར་འདི་ལྟར་ངོ་འཛུམ་གནག་ཅིང་མྱ་ངན་བྱེད་པ་བདག་ལ་སྨྲོས་ཤིག །རྒྱལ་པོས་སྨྲས་པ། བདག་གི་ལུས་དང་སེམས་བདེ་བའི་གཏོལ་ག་ལ་ཞིག་ཡོད། བདག་གིས་ཕ་ཉེས་པ་མེད་པར་བསད་
དེ། བདག་གིས་སྔོན་མཁས་པ་དག་ལས་ཐོས་ན་འཇིག་རྟེན་ན་མཚམས་མེད་པ་ལྔ་བྱས་པ་དག་ནི་སེམས་ཅན་དམྱལ་བ་ལས་ཐར་བའི་དུས་མེད་དོ་ཞེས་ཐོས་ལ་བདག་གིས་ཁ་ན་མ་ཐོ་བ་མཐའ་ཡས་དཔག་ཏུ་མེད་པ་གྲངས་མེད་པ་བྱས་པས་བདག་གི་ལུས་དང་སེམས་ན་བ་གསོ་
བའི་སྨན་པ་མཁས་པ་ཡང་མེད་ན། ལུས་དང་སེམས་མི་ན་བའི་གཏོལ་ག་ལ་ཡོད། བློན་པོ་དེས་སྨྲས་པ། རྒྱལ་པོ་ཆེན་པོ་མྱ་ངན་ཆེར་མ་བྱེད་ཅིག་ཅེས་ཚིགས་སུ་བཅད་དེ་སྨྲས་པ། རྟག་ཏུ་མྱ་ངན་གང་བྱེད་པ། །མྱ་ངན་ཕྱིར་ཞིང་སྐྱེ་བར་འགྱུར། །ཇི་ལྟར་གཉིད་ལ་དགའ་བ་
ཡང་། །ཕྱིར་ཞིང་དེ་བཞིན་གཉིད་ཆེར་འགྱུར། །དེ་བཞིན་འདོད་ཆགས་སྲེད་པ་དང་། །ཆང་དད་ཆེ་བའང་རིག་པར་བྱ། །རྒྱལ་པོ་གསུང་བ་ལྟར་འཇིག་རྟེན་ན་མཚམས་མེད་པ་ལྔ་བྱས་པའི་གང་ཟག་ནི་སེམས་ཅན་དམྱལ་བ་ལས་ཐར་བའི་དུས་མེད་དོ་ཞེས་བྱ་བ་དེ་སུ་ཞིག་
གིས་མྱོང་ཞིང་མཐོང་ནས་རྒྱལ་པོ་ལ་གཏམ་དུ་སྨྲས། སེམས་ཅན་དམྱལ་བ་ཞེས་བྱ་བ་ནི་འཇིག་རྟེན་ན་ཤེས་པ་མང་བ་ཅིག་གིས་རང་བཟོར་གཏམ་དུ་སྨྲས་པར་ཟད་དོ། །རྒྱལ་པོ་གསུང་བ་ལྟར་འཇིག་རྟེན་ན་ལུས་དང་སེམས་གསོ་བའི་སྨན་པ་མཁས་པ་མེད་དོ་ཞེས་བྱར་མི་རུང་
སྟེ། ད་ལྟར་སྨན་པ་ཆེན་པོ་འོད་སྲུང་རྫོགས་བྱེད་ཅེས་བྱ་བ་ཐམས་ཅད་མཁྱེན་པ། ཐམས་ཅད་གཟིགས་པ། དབང་དུ་གྱུར་པའི་ཏིང་ངེ་འཛིན་ཐོབ་པ། ཚངས་པར་སྤྱོད་པ་ཡོངས་སུ་དག་པའི་མཐར་ཕྱིན་པ། སེམས་ཅན་ཚད་མེད་མཐའ་ཡས་པ་ལ་བླ་ན་མེད་པའི་མྱ་

ངན་ལས་འདའ་བའི་ལམ་སྟོན་པ་ཡང་ཉེ་གནས་རྣམས་ལ་འདི་སྐད་ཅེས་ཆོས་སྟོན་ཏོ། །ལས་ནག་པོ་ཡང་མེད་ལ། ལས་ནག་པོའི་རྣམ་པར་སྨིན་པ་ཡང་མེད། ལས་རྣམ་པར་དཀར་བ་ཡང་མེད་ལ། ལས་རྣམ་པར་དཀར་བའི་རྣམ་པར་སྨིན་པ་ཡང་མེད། ལས་དཀར་པོ་དང་
ནག་པོ་ཡང་མེད་ལ། ལས་དཀར་པོ་དང་ནག་པོའི་རྣམ་པར་སྨིན་པ་ཡང་མེད། ལས་རབ་ཅེས་བྱ་བ་དང་། ལས་ཐ་མ་ཞེས་བྱ་བ་ཡང་མེད་དོ་ཞེས་འཆད་དོ། །དེ་སྐད་ཅེས་སྟོན་པའི་སློབ་དཔོན་དེ་ད་ལྟར་རྒྱལ་པོའི་ཁབ་ན་བཞུགས་ཀྱིས། རྒྱལ་པོ་ཆེན་པོ་དེར་གཤེགས་སུ་གསོལ།
སློབ་དཔོན་དེས་ནི་འབྲུམ་བུ་དང་། ལུས་དང་། སེམས་ཀྱང་གསོ་བར་འགྱུར་རོ། །རྒྱལ་པོས་སྨྲས་པ། ཅི་སྟེ་ཁྱོད་ཟེར་བའི་ཚིག་བདེན་ལ། དེ་ལྟར་བདག་གི་ཁ་ན་མ་ཐོ་བ་མེད་པར་བྱེད་ནུས་ན་ལྟ་དེ་ལ་སྐྱབས་སུ་འགྲོ་བར་བྱའོ། །གཞན་ཡང་བློན་པོ་སྙིང་པོ་ཐོབ་ཅེས་བྱ་བ་ཞིག་རྒྱལ་
པོ་གང་ན་བར་འོངས་ནས་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་ཅིའི་ཕྱིར་ངོ་འཛུམ་གནག་ལ་ཁ་ཡང་སྐམས་ནས་ཇི་ལྟར་མི་སྡར་མ་དག་དགྲ་དང་ཕྲད་ན་སྒྲ་སྐད་ཕྲ་ལ་འདར་བ་ལྟ་བུར་གྱུར་ཅིང་མདངས་ཀྱང་མེད་ན་ཅིས་མི་བདེ་བར་གྱུར། འོན་ཏེ་ལུས་ནའམ། འོན་ཏེ་སེམས་ན་བར་
གྱུར། རྒྱལ་པོས་སྨྲས་པ། བདག་གི་ལུས་དང་སེམས་མི་ན་བའི་གཏོལ་ག་ལ་ཞིག་ཡོད། བདག་ནི་མ་རིག་པས་ལྡོངས་ཏེ་ཤེས་རབ་ཀྱི་མིག་མེད་པས་མི་དགེ་བའི་བཤེས་གཉེན་ལ་བསྟེན་ནས། ལྷ་སྦྱིན་ལྟ་བུའི་སྡིག་པའི་རྗེས་སུ་ཞུགས་ཏེ། སྡིག་པ་ཅན་གྱི་ཚིག་མཉན་ནས་ཡང་དག་
པའི་ཆོས་ཀྱིས་འཚོ་བའི་ཕ་རྒྱལ་པོ་ཉེས་པ་མེད་པར་བསད་དོ། །བདག་གིས་སྔོན་མཁས་པ་ཤེས་རབ་ཅན་ལས་ཚིགས་སུ་བཅད་པ་འདི་སྐད་ཅེས་ཐོས་སོ། །གང་གི་ཕ་དང་མ་དག་དང་། །སངས་རྒྱས་རྣམས་དང་ཉེ་གནས་ལ། །མི་དགེ་བ་ཡི་སེམས་བསྐྱེད་དེ། །སྡིག་པར་
འགྱུར་བའི་ལས་བྱས་ན། །དེ་ཡི་རྣམ་པར་སྨིན་པ་ནི། །མཚམས་མེད་དམྱལ་བར་སྐྱེ་ཞེའོ། །དེ་བས་ན་བདག་ཤིན་ཏུ་འཇིགས་སྐྲག་སྟེ་སྡུག་བསྔལ་ཆེན་པོས་གདུངས་ཀྱང་གསོ་བར་འགྱུར་བའི་སྨན་པ་མཁས་པ་མེད་དོ། །བློན་པོ་དེས་ཡང་གསོལ་པ། རྒྱལ་པོ་ཆེན་པོ་

རེ་ཞིག་མྱ་ངན་མ་བྱེད་ཅིག །ཆོས་ལ་རྣམ་པ་གཉིས་ཏེ། རབ་ཏུ་བྱུང་བ་དང་། རྒྱལ་པོའི་ཆོས་སོ། །རྒྱལ་པོའི་ཆོས་ཞེས་བྱ་བ་ནི་ཕ་བསད་པས་རྒྱལ་པོའི་ཡུལ་འདིར་མཚམས་མེད་པའི་ལས་ཞེས་བྱ་མོད་ཀྱི། ཁ་ན་མ་ཐོ་བའི་སྡིག་པར་མི་འགྱུར་རོ། །དཔེར་
ན་སྲིན་བུ་ཀ་ཀ་ལ་ལྟ་བུ་མའི་གསུས་པ་བརྟོལ་ནས་གདོད་སྐྱེས་ཏེ་ཆོས་ཉིད་ཀྱིས་དེ་ལྟར་སྐྱེ་བས་ན། དེ་ལྟར་མའི་ལུས་མ་རུང་བར་བྱས་མོད་ཀྱི་སྡིག་པར་མི་འགྱུར་ཏེ། དྲེའུ་ལ་སོགས་པ་བུ་འབྱུང་བ་ཡང་དེ་དང་འདྲའོ། །རྒྱལ་པོའི་སྲིད་ཀྱི་ཆོས་ཀྱང་ཆོས་ཉིད་ཀྱིས་དེ་ལྟ་བུ་ཡིན་པས་
དེ་ལྟར་རྒྱལ་པོས་ཕ་བསད་ཀྱང་སྡིག་པར་མི་འགྱུར་རོ། །རབ་ཏུ་བྱུང་བའི་ཆོས་ནི་ཆུང་ངུ་ན་གྲོག་སྦུར་ཙམ་བསད་ན་ཡང་སྡིག་པར་འགྱུར་བ་དང་མི་འདྲ་ན་རྒྱལ་པོ་ཆེན་པོ་རེ་ཞིག་མྱ་ངན་མ་བྱེད་ཅིག །དེ་ཅིའི་ཕྱིར་ཞེ་ན། རྟག་ཏུ་མྱ་ངན་གང་བྱེད་པ། །མྱ་ངན་ཕྱིར་ཞིང་སྐྱེ་བར་འགྱུར། །
ཇི་ལྟར་གཉིད་ལ་དགའ་བ་ཡང་། །ཕྱིར་ཞིང་དེ་བཞིན་གཉིད་ཆེར་འགྱུར། །དེ་བཞིན་འདོད་ཆགས་སྲེད་པ་དང་། །ཆང་དད་ཆེ་བའང་རིག་པར་བྱ། །རྒྱལ་པོ་གསུང་བ་ལྟར་ལུས་དང་སེམས་གསོ་བའི་སྨན་པ་མཁས་པ་མེད་དོ་ཞེས་བྱར་མི་རུང་སྟེ། ད་ལྟར་སྟོན་པ་ཆེན་པོ་
ཕྱུགས་ལྷས་ཀྱི་བུ་མས་ཀ་རི་ཞེས་བྱ་བ་ཐམས་ཅད་མཁྱེན་པ། ཐམས་ཅད་གཟིགས་པ། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་བྱམས་པ། ཉོན་མོངས་པ་ཡོངས་སུ་སྤངས་པ། སེམས་ཅན་ཐམས་ཅད་ཀྱི་གདུག་པ་གསུམ་གྱི་ཟུག་རྔུ་འབྱིན་པ། སེམས་
ཅན་ཐམས་ཅད་ཀྱིས་མི་ཤེས། མི་མཐོང་། མི་རྟོགས་པའི་ཆོས་ཐམས་ཅད་སྟོན་པ་ཆེན་པོ་དེ་གཅིག་པུས་མཁྱེན་ཅིང་གཟིགས་ཏེ། རྟོགས་པས་ཉེ་གནས་རྣམས་ལ་རྟག་ཏུ་ཆོས་འདི་སྐད་ཅེས་སྟོན་ཏོ། །སེམས་ཅན་ཐམས་ཅད་ཀྱི་ལུས་ནི་ཕྱོགས་ཆ་རྣམ་པ་བདུན་
ཏེ། བདུན་གང་ཞེ་ན། ས་དང་། ཆུ་དང་། མེ་དང་། རླུང་དང་། སྡུག་བསྔལ་དང་། བདེ་བ་དང་། འཚོ་བའི་སྲོག་གོ། །དེ་ལྟར་ཆོས་བདུན་པོ་དེ་ནི་སྤྲུལ་པའམ་བྱས་པ་མ་ཡིན་ཏེ་གཞིག་ཏུ་མི་རུང་ངོ་། །དཔེར་ན་རྩ་ཨི་ཤི་ཀ་ནི་རྟག་ཏུ་གནས་ཏེ་མི་གཡོའོ། །རི་རབ་རིའི་རྒྱལ་པོ་

ནི་བཏང་བ་ཡང་མེད་ལ། བྱེད་པ་ཡང་མེད་དོ། །དཔེར་ན་འོ་མ་དང་ཞོ་ཡང་སྡུག་བསྔལ་ཞེའམ། བདེ་ཞེའམ། དགེ་ཞེའམ། མི་དགེ་ཞེས་རྩོད་པ་མེད་ལ། །མཚོན་རྣོན་པོས་ཀྱང་གནོད་པར་མི་འགྱུར་རོ། །དེ་ཅིའི་ཕྱིར་ཞེ་ན། རྣམ་པ་བདུན་པོ་སྟོང་པ་ཡིན་པས་ཐོགས་པ་མེད་
པའི་ཕྱིར་རོ། །སྲོག་ཀྱང་གཅད་དུ་མེད་དེ། དེ་ཅིའི་ཕྱིར་ཞེ་ན། གསོད་པ་ཡང་མེད་ལ། འཆི་བ་ཡང་མེད། བྱས་པ་ཡང་མེད། མྱོང་བ་ཡང་མེད། བཤད་པ་ཡང་མེད། ཉན་པ་ཡང་མེད། རྟོགས་པ་ཡང་མེད། སྟོན་པ་ཡང་མེད་དོ་ཞེས་རྟག་ཏུ་ཆོས་དེ་དག་འཆད་དེ། སེམས་
ཅན་མང་པོའི་ཁ་ན་མ་ཐོ་བའི་སྡིག་པ་ཐམས་ཅད་ཞི་བར་བྱེད་པའི་སློབ་དཔོན་ཆེན་པོ་ད་ལྟར་རྒྱལ་པོའི་ཁབ་ན་བཞུགས་ཀྱི། རྒྱལ་པོ་ཆེན་པོ་སློབ་དཔོན་ཆེན་པོ་གང་ན་བ་དེར་གཤེགས་སུ་གསོལ། མཐོང་བ་ཙམ་གྱིས་སྡིག་པ་ཐམས་ཅད་འབྱང་བར་འགྱུར་རོ། །རྒྱལ་པོས་སྨྲས་
པ། དེ་ལྟར་ངེས་པར་བདག་གི་སྡིག་པ་མེད་པར་བྱེད་ནུས་ན་ལྟ་དེ་ལ་སྐྱབས་སུ་འགྲོ་བར་བྱའོ། །གཞན་ཡང་བློན་པོ་བདེན་པ་ཐོབ་ཅེས་བྱ་བ་ཞིག་རྒྱལ་པོ་གང་ན་བར་འོངས་ནས་ཚིགས་སུ་བཅད་པ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་ཅི་ཡི་ཕྱིར། །ལུས་ཀྱི་རྒྱན་ཡང་ཐམས་
ཅད་བཀྲོལ། །དབུ་ཡི་སྐྲ་ཡང་འཛིངས་པ་འདི། །ཅི་ཡི་སླད་དུ་དེ་ལྟར་གྱུར། །ཅིའི་ཕྱིར་ད་ལྟར་རྒྱལ་པོའི་ལུས། །མི་བདེ་འགུལ་ཞིང་འདར་བ་ནི། །མེ་ཏོག་ཆགས་པའི་ཤིང་རྣམས་ལ། །ཤིན་ཏུ་རླུང་གིས་བཏབ་པ་བཞིན། །རྒྱལ་པོ་འདི་ལྟར་ཤིན་ཏུ་ངོམ་ཟུང་གནག་པ་ནི་ཇི་ལྟར་
ཞིང་པ་དག་ས་བོན་བཏབ་ན་ཆར་པ་མ་བབས་ན་མྱ་ངན་བྱེད་པ་བཞིན་དུ། མྱ་ངན་བྱེད་པ་འདི་འོན་ཏེ་ལུས་ནའམ། སེམས་ན་བར་གྱུར། རྒྱལ་པོས་སྨྲས་པ། བདག་གི་ལུས་དང་སེམས་མི་ན་བའི་གཏོལ་ག་ལ་ཞིག་ཡོད། རྒྱལ་པོ་ཡབ་བདག་ལ་ཤིན་ཏུ་བྱམས་ཤིང་བརྩེ་བས་
ཉེས་པའི་སྐྱོན་མེད་དེ། ཐོག་མ་མཚན་མཁན་ལ་བསྟན་པ་ན། མཚན་མཁན་གྱིས་ཀྱང་ཁྱོད་ཀྱི་བུ་འདི་སྐྱེས་ནས་ཕ་གསོད་པར་འགྱུར་རོ་ཞེས་སྨྲས་ཏེ། དེ་སྐད་ཅེས་ཐོས་མོད་ཀྱི་འོན་ཀྱང་གསོས་སོ། །མཁས་པ་ཤེས་རབ་ཅན་ལས་སྔོན་འདི་སྐད་ཅེས་ཐོས་ཏེ། གང་ཞིག་མ་

ལ་མི་ཚངས་པར་སྤྱད་དམ། དགེ་སློང་མ་ལ་མི་ཚངས་པར་སྤྱད་དམ། དགེ་འདུན་གྱི་ནོར་བརྐུས་སམ། བླ་ན་མེད་པའི་བྱང་ཆུབ་ཏུ་ས