Kinh tạng Tây Tạng (Kangyur Đại Học) — 052_མདོ་སྡེ།_ཉ

མ་པའི་བདེན་པ་ལ་ནན་ཏན་བྱས་པས་ན། དོན་སོ་སོ་ཡང་དག་པར་ཤེས་པ་ཐོབ་པར་གྱུར་ཏོ། །གཞན་ཡང་བསྐལ་པ་ཚད་མེད་མཐའ་ཡས་པའི་བར་དུ་གཙུག་ལག་བེའི་ཀ་ར་ན་ལ་ཤིན་ཏུ་ནན་ཏན་བྱས་པས་ཚིག་སོ་སོ་ཡང་དག་པར་ཤེས་པ་ཐོབ་པར་གྱུར་ཏོ། །
གཞན་ཡང་བསྐལ་པ་ཚད་མེད་གྲངས་མེད་པའི་བར་དུ་འཇིག་རྟེན་གྱི་གཙུག་ལག་བསླབས་པས་སྤོབས་པ་སོ་སོ་ཡང་དག་པར་ཤེས་པ་ཐོབ་པར་གྱུར་ཏོ། །རིགས་ཀྱི་བུ་ཉན་ཐོས་དང་རང་སངས་རྒྱས་ཀྱིས་ནི་སོ་སོ་ཡང་དག་པར་ཤེས་པ་བཞི་པོ་འདི་དག་འཐོབ་པའི་གནས་མེད་དོ། །རིགས་ཀྱི་བུ་ངས་མདོ་སྡེ་དགུ་པོ་ལས།
ཉན་ཐོས་དང་རང་སངས་རྒྱས་ཀྱི་སོ་སོ་ཡང་དག་པར་ཤེས་པ་བཞི་འཐོབ་པོ་ཞེས་གསུངས་ཏེ། ཉན་ཐོས་དང་རང་སངས་རྒྱས་ཀྱིས་ནི་ཡང་དག་པར་འཐོབ་པ་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་གྱི་དོན་བྱེད་པས་སོ་སོ་ཡང་དག་པར་ཤེས་པ་བཞི་ལ་ནན་ཏན་
བྱེད་དོ། །རང་སངས་རྒྱས་ལ་སོགས་པ་ནི་ཞི་བ་ཕྱོགས་གཅིག་པ་སྤྱོད་དེ་གཅིག་པུ་གནས་པ་ལ་དགའ་བས་གལ་ཏེ་སེམས་ཅན་གྱི་དོན་བྱེད་ན་ཡང་མངོན་པར་ཤེས་པ་འབའ་ཞིག་སྟོན་གྱི། རྟག་ཏུ་ཅང་མི་སྨྲ་བར་འདུག་པས་སྟོན་ཅིང་བཤད་པ་མེད་ན། སོ་སོ་ཡང་དག་པར་ཤེས་པ་བཞི་ལྟ་ཞིག་ག་ལ་ཡོད། ཅིའི་
ཕྱིར་ཅང་མི་སྨྲ་བ་ལ་བསྟན་པ་མེད་ཅེ་ན། རང་སངས་རྒྱས་ཀྱིས་ཆོས་བཤད་པས་སེམས་ཅན་གྱི་དོན་བྱེད་པའམ་ཕ་རོལ་པོས་དྲོད་དང་། སྤྱི་བོ་དང་། འཇིག་རྟེན་པའི་ཆོས་ཀྱི་མཆོག་འཐོབ་པར་འགྱུར་བའམ། རྒྱུན་དུ་ཞུགས་པ་དང་། ལན་ཅིག་ཕྱིར་ལྡོག་པ་དང་ཕྱིར་མི་ལྡོག་པ་དང་། དགྲ་བཅོམ་པ་འཐོབ་པར་རམ། སངས་རྒྱས་འཐོབ་
པར་རམ། བྱང་ཆུབ་སེམས་དཔའ་སེམས་དཔའ་ཆེན་པོ་འཐོབ་པར་བྱེད་ཀྱང་མི་ནུས་ལ། ཕ་རོལ་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བྱེད་ཀྱང་མི་ནུས་སོ། །དེ་ཅིའི་ཕྱིར་ཞེ་ན། རིགས་ཀྱི་བུ་རང་སངས་རྒྱས་ལ་ནི་འཇིག་རྟེན་དང་འཇིག་རྟེན་ལས་འདས་པའི་མདོ་སྡེ་དགུ་པོ་མེད་དེ། དེ་བས་ན་རང་

སངས་རྒྱས་ནི་ཚིག་སོ་སོ་ཡང་དག་པར་ཤེས་པ་དང་། སྤོབས་པ་སོ་སོ་ཡང་དག་པར་ཤེས་པ་མེད་དོ། །རིགས་ཀྱི་བུ་རང་སངས་རྒྱས་ནི་ཚིག་ཀུན་ཤེས་མོད་ཀྱི། ཆོས་སོ་སོ་ཡང་དག་པར་ཤེས་པ་ནི་མེད་དོ། །དེ་ཅིའི་ཕྱིར་ཞེ་ན། ཆོས་སོ་སོ་ཡང་དག་པར་ཤེས་པ་ནི་ཡི་གེ་ཤེས་པ་ཞེས་བྱ་སྟེ། རང་སངས་རྒྱས་ཀྱིས་ཀྱང་ཡི་
གེ་ཤེས་མོད་ཀྱི། ཡི་གེ་སོ་སོ་ཡང་དག་པར་ཤེས་པ་ཞེས་བྱ་བ་མེད་དོ། །དེ་ཡང་ཅིའི་ཕྱིར་ཞེ་ན། རྟག་པ་གནས་པ་ཞེས་བྱ་བའི་ཡི་གེ་གཉིས་པོ་མི་ཤེས་པས་ན། རང་སངས་རྒྱས་ནི་ཚིག་སོ་སོ་ཡང་དག་པར་ཤེས་པ་ཐོབ་པ་མ་ཡིན་ནོ། །དོན་ཤེས་ཀྱང་དོན་སོ་སོ་ཡང་དག་པར་ཤེས་པ་མ་ཡིན་ནོ། །ཡང་དག་པར་དོན་ཤེས་པ་ནི་སེམས་
ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་ཤེས་པའོ། །སངས་རྒྱས་ཀྱི་རང་བཞིན་གྱི་དོན་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཅེས་བྱའོ། །དེ་ལྟ་བས་ན་རང་སངས་རྒྱས་ནི་དོན་སོ་སོ་ཡང་དག་པར་ཤེས་པ་ཐོབ་པ་མ་ཡིན་ཏེ། དེ་བས་ན་རང་སངས་རྒྱས་ནི་ཐམས་ཅད་ཀྱི་ཐམས་ཅད་དུ་སོ་སོ་ཡང་དག་
པར་ཤེས་པ་བཞི་མེད་དོ། །ཅིའི་ཕྱིར་ཉན་ཐོས་ལ་སོ་སོ་ཡང་དག་པར་ཤེས་པ་བཞི་མེད་ཅེ་ན། ཉན་ཐོས་ལ་ཐབས་མཁས་པ་རྣམ་པ་གསུམ་པོ་མེད་པའི་ཕྱིར་རོ། །གསུམ་པོ་གང་ཞེ་ན་ངེས་པའི་ཚིག་འཇམ་པོ་སྨྲ་ཞིང་ཆོས་སྦྱིན་པ་དང་། ངེས་པའི་ཚིག་རྩུབ་པོ་སྨྲ་ཞིང་ཆོས་སྦྱིན་པ་དང་། འཇམ་པོ་ཡང་མ་ཡིན།
རྩུབ་པོ་ཡང་མ་ཡིན་པས་ཆོས་སྦྱིན་པ་སྟེ། ཉན་ཐོས་ལ་རྣམ་པ་གསུམ་པོ་འདི་དག་མེད་པས་ན་སོ་སོ་ཡང་དག་པར་ཤེས་པ་བཞི་མེད་དོ། །གཞན་ཡང་ཉན་ཐོས་དང་རང་སངས་རྒྱས་ནི་ཚིག་དང་དོན་ཤེས་པའི་མཐར་ཡང་མ་ཕྱིན་ལ། སྤྱོད་ཡུལ་ཤེས་པའི་དབང་དུ་འགྱུར་བའི་ཡེ་ཤེས་ཀྱང་མེད། སྟོབས་
བཅུ་དང་། མི་འཇིགས་པ་བཞི་ཡང་མེད་རྟེན་ཅིང་འབྲེལ་པར་འབྱུང་བ་བཅུ་གཉིས་ཀྱི་མཐར་ཕྱིན་པ་ཡང་མ་ཡིན། སེམས་ཅན་རྣམས་ཀྱི་དབང་པོ་རྣོ་རྟུལ་གྱི་ཁྱད་པར་རྟོགས་པར་ཡང་མ་གྱུར། བདེན་པ་གཉིས་ལ་ཐེ་ཙོམ་ཟ་བའི་སེམས་ཀྱང་ཡོངས་སུ་ཆད་པ་མ་ཡིན། སེམས་ཅན་གྱི་སེམས་ཡུལ་ཅི་ལ་དམིགས་པ་
ཡང་མཁས་པར་མ་གྱུར། དོན་དམ་པའི་སྟོང་པ་ཉིད་སྟོན་པ་ལ་ཤིན་ཏུ་མཁས་པར་ཡང་མ་གྱུར་ཏེ། དེ་བས་ན་ཐེག་པ་ཆུང་ངུ་གཉིས་ཀྱིས་ནི་སོ་སོ་ཡང་དག་པར་ཤེས་པ་བཞི་འཐོབ་པ་མ་ཡིན་ནོ། །དེ་ནས་བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། བཅོམ་ལྡན་འདས་དེ་ལྟར་ཉན་ཐོས་དང་རང་

སངས་རྒྱས་ལ་ཐམས་ཅད་ཀྱི་ཐམས་ཅད་དུ་སོ་སོ་ཡང་དག་པར་ཤེས་པ་བཞི་མ་མཆིས་ན། ཅིའི་སླད་དུ་དེ་བཞིན་གཤེགས་པས་འདི་སྐད་དུ། ཚེ་དང་ལྡན་པ་ཤཱ་རིའི་བུ་ནི་ཤེས་རབ་ཀྱི་མཆོག་གོ། །མཽད་གལ་ཡ་ན་ཆེན་པོ་ནི་མངོན་པར་ཤེས་པའི་མཆོག་གོ། །ཀཽཥྛི་ལ་ཆེན་པོ་ནི་སོ་སོ་ཡང་དག་པར་ཤེས་པ་བཞིའི་
མཆོག་ཅེས་གསུངས་ལ། ཅི་སྟེ་མཆིས་ན་དེ་བཞིན་གཤེགས་པ་ཅིའི་སླད་དུ་དེ་སྐད་ཅེས་བཀའ་སྩལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ལེགས་སོ་ཤིན་ཏུ་ལེགས་སོ་ཞེས་བྱ་བ་བྱིན་ནོ། །རིགས་ཀྱི་བུ་འདི་ལྟ་སྟེ། དཔེར་ན་ཀླུང་གང་གཱའི་ཆུ་ཡང་ཚད་མེད་ལ། ཀླུང་སིནྡུ་ཞེས་བྱ་བའི་ཆུ་
ཡང་ཚད་མེད། ཀླུང་པཀྵུའི་ཆུ་ཡང་ཚད་མེད། ཀླུང་སི་ཏའི་ཆུ་ཡང་ཚད་མེད། མཚོ་མ་དྲོས་པའི་ཆུ་ཡང་ཚད་མེད། རྒྱ་མཚོ་ཆེན་པོའི་ཆུ་ཡང་ཚད་མེད་དེ་དེ་ལྟར་ཆུ་མང་པོ་དག་ཚད་མེད་པར་འདྲ་མོད་ཀྱི། ཡང་དག་པར་ན་མང་ཉུང་ནི་མི་མཉམ་མོ། །ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སོ་སོ་
ཡང་དག་པར་ཤེས་པ་བཞི་ཡང་དེ་དང་འདྲའོ། །རིགས་ཀྱི་བུ་དེ་ལ་མཉམ་མོ་ཞེས་བྱ་བ་ནི་གནས་མེད་དོ། །རིགས་ཀྱི་བུ་ངས་བུས་པ་མ་རབས་ལ་ཁྱད་པར་དུ་ཀཽཥྛི་ལ་ཆེན་པོ་ནི་སོ་སོ་ཡང་དག་པར་ཤེས་པ་བཞིའི་མཆོག་གོ་ཞེས་གསུངས་ཏེ། ཁྱོད་ཀྱིས་དྲིས་པའི་དོན་ནི་འདིའོ། །རིགས་ཀྱི་བུ་ཉན་ཐོས་ཀྱི་ཐེག་པ་པ་
དག་ལ་ལས་ནི་གཅིག་ཙམ་འཐོབ། ལ་ལས་ནི་གཉིས་ཙམ་འཐོབ་སྟེ། བཞི་ཅར་རྫོགས་པར་འཐོབ་པ་ནི་གནས་མེད་དོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་གསུངས་པ་ལྟར། སྔར་ཚངས་པར་སྤྱོད་པའི་ལེའུ་གསུངས་པ་ལས་བྱང་ཆུབ་སེམས་དཔའ་
ཤེས་པ་དང་མཐོང་བས་སོ་སོ་ཡང་དག་པར་ཤེས་པ་བཞི་འཐོབ་པ་ནི། བྱང་ཆུབ་སེམས་དཔས་ཤེས་པ་དང་མཐོང་བ་ལ་འཐོབ་པ་ཡང་མ་མཆིས་ལ། སེམས་ཀྱང་མ་མཆིས་པས་ཐོབ་པ་མེད་དོ་ཞེས་གསུངས་ཏེ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཡང་དག་པར་ན་ཐོབ་པ་མ་
མཆིས་སོ། །ཅི་སྟེ་བྱང་ཆུབ་སེམས་དཔའ་ལ་འཐོབ་པའི་སེམས་མཆིས་ན། བྱང་ཆུབ་སེམས་དཔའ་མ་ལགས་ཏེ་བྱིས་པ་མ་རབས་སོ་ཞེས་གསུངས་ན། དེ་ཅིའི་སླད་དུ་དེ་བཞིན་གཤེགས་པས་བྱང་ཆུབ་སེམས་དཔས་འཐོབ་པ་མཆིས་སོ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ།

ངས་ཀྱང་བཤད་པར་དགོངས་པ་ལས་ཁྱོད་ཀྱིས་ཞུས་པ་ཤིན་ཏུ་ལེགས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཡང་དག་པར་ན་ཅི་ཡང་འཐོབ་པ་མེད་དེ། ཅི་ཡང་འཐོབ་པ་མེད་པ་ནི་སོ་སོ་ཡང་དག་པར་ཤེས་པ་བཞི་ཞེས་བྱའོ། །རིགས་ཀྱི་བུ་དོན་ཅི་ཞིག་གི་ཕྱིར་ཅི་ཡང་འཐོབ་པ་
མེད་པ་ལ་སོ་སོ་ཡང་དག་པར་ཤེས་ཞེས་བྱ་ཞེ་ན། གལ་ཏེ་ཐོབ་པ་ཡོད་ན་ཐོགས་པ་དང་བཅས་པ་ཞེས་བྱ་སྟེ། ཇི་ཙམ་དུ་ཐོགས་པ་དང་བཅས་པ་དེ་ནི་ཕྱིན་ཅི་ལོག་བཞི་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཕྱིན་ཅི་ལོག་བཞི་མེད་པའི་ཕྱིར་སོ་སོ་ཡང་དག་པར་ཤེས་པ་བཞི་འཐོབ་སྟེ།
དེ་བས་ན་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །རིགས་ཀྱི་བུ་གཞན་ཡང་ཅི་ཡང་འཐོབ་པ་མེད་པ་ནི་ཤེས་རབ་ཅེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་དེ་འཐོབ་པས་ན་ཅི་ཡང་འཐོབ་པ་མེད་པ་ཞེས་བྱའོ། །འཐོབ་པ་དང་བཅས་པ་ནི་མ་རིག་པ་ཞེས་བྱ་སྟེ། བྱང་ཆུབ་སེམས་དཔའ་ནི་མ་རིག་
པའི་མུན་པ་ཡོངས་སུ་བཅད་པས་ན་འཐོབ་པ་མེད་པ་ཞེས་བྱ་སྟེ། དེ་བས་ན་བྱང་ཆུབ་སེམས་དཔའ་ནི་འཐོབ་པ་མེད་པ་ཞེས་བྱའོ། །རིགས་ཀྱི་བུ་གཞན་ཡང་འཐོབ་པ་མེད་པ་ནི་མྱ་ངན་ལས་འདས་པ་ཆེན་པོ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་ལྟར་མྱ་ངན་ལས་འདས་པ་ཆེན་པོ་ལ་བདེ་བར་གནས་པས་
ཆོས་རྣམས་ཀྱི་མཚན་ཉིད་མི་མཐོང་བས་བྱང་ཆུབ་སེམས་དཔའ་ནི་འཐོབ་པ་མེད་པ་ཞེས་བྱའོ། །ཇི་ཙམ་དུ་འཐོབ་པ་དང་བཅས་པ་དེ་ནི་སྲིད་པ་ཉི་ཤུ་རྩ་ལྔ་ཞེས་བྱའོ། །བྱང་ཆུབ་སེམས་དཔའ་ནི་སྲིད་པ་ཉི་ཤུ་རྩ་ལྔ་པོ་ཡོངས་སུ་བཅད་ནས་མྱ་ངན་ལས་འདས་པ་ཆེན་པོ་འཐོབ་པས་ན་བྱང་ཆུབ་སེམས་དཔའ་
ནི་ཅི་ཡང་འཐོབ་པ་མེད་པ་ཞེས་བྱའོ། །རིགས་ཀྱི་བུ་གཞན་ཡང་འཐོབ་པ་མེད་པ་ནི་ཐེག་པ་ཆེན་པོ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་ལ་མི་གནས་པས་ན་ཐེག་པ་ཆེན་པོ་ཐོབ་པར་འགྱུར་ཏེ། དེ་བས་ན་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་
པ་ཞེས་བྱའོ། །ཇི་ཙམ་དུ་ཐོབ་པ་ཡོད་ན་ནི་ཉན་ཐོས་དང་རང་སངས་རྒྱས་ཀྱི་བྱང་ཆུབ་ཅེས་བྱའོ། །བྱང་ཆུབ་སེམས་དཔའ་ནི་ཐེག་པ་ཆུང་ངུ་གཉིས་ཀྱི་བྱང་ཆུབ་ཡོངས་སུ་བཅད་དེ་སངས་རྒྱས་ཀྱི་བྱང་ཆུབ་ཐོབ་པས་ན། བྱང་ཆུབ་སེམས་དཔའ་ནི་འཐོབ་པ་མེད་པ་ཞེས་བྱའོ། །རིགས་ཀྱི་བུ་གཞན་ཡང་

འཐོབ་པ་མེད་པ་ནི་ཤིན་ཏུ་རྒྱས་པའི་མདོ་སྡེ་ཞེས་བྱའོ། །བྱང་ཆུབ་སེམས་དཔའ་མདོ་སྡེ་འདི་ཀློག་ཅིང་འདོན་པས་ན་མྱ་ངན་ལས་འདས་པ་ཆེན་པོ་ཐོབ་པ་ཞེས་བྱ་སྟེ། དེ་བས་ན་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །འཐོབ་པ་ཡོད་པ་ནི་མདོ་སྡེ་བཅུ་གཅིག་པོ་སྟེ།
བྱང་ཆུབ་སེམས་དཔའ་ཐེག་པ་ཆེན་པོའི་མདོ་སྡེ་ཤིན་ཏུ་རྒྱས་པ་འབའ་ཞིག་སྟོན་ཅིང་འཆད་དེ། དེ་བས་ན་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །རིགས་ཀྱི་བུ་གཞན་ཡང་འཐོབ་པ་མེད་པ་ནི་ནམ་མཁའ་དང་མཉམ་ཞེས་བྱའོ། །འཇིག་རྟེན་ན་དངོས་པོ་ཅི་ཡང་མེད་
པ་ནི་ནམ་མཁའ་ཞེས་བྱ་སྟེ། བྱང་ཆུབ་སེམས་དཔས་ནམ་མཁའ་ལྟ་བུའི་ཏིང་ངེ་འཛིན་ཐོབ་པས་ཅི་ཡང་མི་མཐོང་སྟེ། དེ་བས་ན་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །འཐོབ་པ་དང་བཅས་པ་ནི་འཁོར་བར་འཁོར་བའི་འཁོར་ལོ་སྟེ། བྱིས་པ་མ་རབས་ཐམས་ཅད་
ནི་འཁོར་བར་འཁོར་བས་ན་མཐོང་བ་ཡོད་དོ། །བྱང་ཆུབ་སེམས་དཔས་ནི་འཁོར་བ་ཐམས་ཅད་ཡོངས་སུ་བཅད་དེ་དེ་བས་ན་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ཅི་ཡང་འཐོབ་པ་མེད་པ་ནི་རྟག་པ་
དང་། བདེ་བ་དང་བདག་དང་ཡོངས་སུ་དག་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་སངས་རྒྱས་ཀྱི་རང་བཞིན་མཐོང་བས་ན་རྟག་པ་དང་། བདེ་བ་དང་བདག་དང་ཡོངས་སུ་དག་པ་ཞེས་བྱ་བ་འཐོབ་སྟེ། དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཅི་ཡང་འཐོབ་པ་
མེད་པ་ཞེས་བྱའོ། །འཐོབ་པ་དང་བཅས་པས་ནི་མི་རྟག་པ་མི་བདེ་བ་བདག་མེད་པ་ཡོངས་སུ་མ་དག་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་མི་རྟག་པ་དང་། མི་བདེ་བ་དང་བདག་མེད་པ་དང་། ཡོངས་སུ་མ་དག་པ་ཡོངས་སུ་བཅད་པས་ན་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་
བྱའོ། །རིགས་ཀྱི་བུ་གཞན་ཡང་ཅི་ཡང་འཐོབ་པ་མེད་པ་ནི་དོན་དམ་པའི་སྟོང་པ་ཉིད་ཅེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས་དོན་དམ་པའི་སྟོང་པ་ཉིད་ལ་རྣམ་པར་བལྟས་ན་ཅི་ཡང་མི་མཐོང་བས་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །འཐོབ་པ་དང་བཅས་པ་ནི་ལྟ་

བ་ལྔ་ཞེས་བྱ་སྟེ། བྱང་ཆུབ་སེམས་དཔའ་ནི་ལྟ་བ་ལྔ་ཡོངས་སུ་བཅད་དེ་དོན་དམ་པའི་སྟོང་པ་ཉིད་འཐོབ་པས་ན་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་རྩ་གསུམ་པ། རིགས་ཀྱི་བུ་གཞན་ཡང་ཅི་ཡང་འཐོབ་
པ་མེད་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཅེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པ་ནི་ཅི་ཡང་འཐོབ་པ་མེད་པས་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །འཐོབ་པ་དང་བཅས་པ་ནི་ཉན་ཐོས་དང་རང་སངས་རྒྱས་
ཀྱི་བྱང་ཆུབ་སྟེ། བྱང་ཆུབ་སེམས་དཔའ་ནི་ཐེག་པ་ཆུང་ངུ་གཉིས་ཀྱི་བྱང་ཆུབ་ཡོངས་སུ་བཅད་པས་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །རིགས་ཀྱི་བུ་ཁྱོད་ཀྱིས་དྲིས་པ་ཡང་འཐོབ་པ་མེད་ལ། ངས་བཤད་པ་ལ་ཡང་འཐོབ་པ་མེད་དོ། །ཇི་ཙམ་དུ་ཐོབ་པར་ཡོད་པ་དེ་ནི་བདུད་ཀྱི་རིས་ཡིན་ཏེ་
ངའི་ཉེ་གནས་མ་ཡིན་ནོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའི་ཐོབ་པ་མ་མཆིས་པ་བདག་ལ་བསྟན་པ་ན་སེམས་ཅན་ཚད་མེད་པ་རྣམས་མཚན་མ་དང་བཅས་པའི་སེམས་ཡོངས་སུ་སྤངས་པར་གྱུར་ཏེ། དེ་བས་ན་
བདག་གིས་ཐོབ་པ་མ་མཆིས་པའི་དོན་ཞུས་པས་ཚད་མེད་པའི་སེམས་ཅན་དེ་དག་བདུད་ཀྱི་འཁོར་དུ་འགྱུར་བ་སྤངས་ནས་སངས་རྒྱས་ཀྱི་ཉེ་གནས་སུ་གྱུར་ཏོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྔར་ཤིང་སཱ་ལའི་དྲུང་ན་བཞུགས་
པ་ན་ཙུན་ད་ལ་ཚིགས་སུ་བཅད་དེ་བཀའ་སྩལ་པ། །སྔོན་ནི་ཡོད་ལ་ད་ནི་མེད། །སྔོན་ནི་མེད་ལ་ད་ནི་ཡོད། །དུས་གསུམ་སྲིད་པའི་ཆོས་ཐམས་ཅད། །དེ་ལྟ་བུ་ཡི་གནས་མི་སྲིད། །ཅེས་བཅོམ་ལྡན་འདས་ཀྱིས་གསུངས་པའི་དོན་ཇི་ལྟ་བུ་ལགས། བཅོམ་ལྡན་འདས་
ཀྱིས་བཀའ་སྩལ་པ། རིགས་ཀྱི་བུ་ངས་སེམས་ཅན་མང་པོ་གདུལ་བའི་ཕྱིར་ཡང་དེ་སྐད་ཅེས་གསུངས་པ་ཡིན། གཞན་ཡང་ཉན་ཐོས་དང་རང་སངས་རྒྱས་ཀྱི་ཕྱིར་ཡང་དེ་སྐད་ཅེས་གསུངས་པ་ཡིན། གཞན་ཡང་འཇམ་དཔལ་གཞོན་ནུའི་ཕྱིར་དེ་སྐད་ཅེས་གསུངས་པ་ཡིན་གྱི། ཙུན་ད་གཅིག་

པུའི་ཕྱིར་དེ་སྐད་ཅེས་ཚིགས་སུ་བཅད་དེ་གསུངས་པ་མ་ཡིན་ནོ། །དེའི་ཚེ་འཇམ་དཔལ་གྱིས་ང་ལ་དེ་སྐད་དུ་ཞུ་བར་གཟས་པ་ལས། ངས་དེའི་སེམས་པ་མཁྱེན་ནས་དེ་ལ་བཤད་དོ། །ངས་དེ་ལྟར་བཤད་ནས་འཇམ་དཔལ་གཞོན་ནུས་ནི་དོན་ཡང་མངོན་པར་རྟོགས་པར་གྱུར་ཏོ། །བྱང་
ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། བཅོམ་ལྡན་འདས་འཇམ་དཔལ་ལྟར་དོན་མངོན་པར་རྟོགས་པ་དུ་མཆིས། དེ་བཞིན་གཤེགས་པས་འཁོར་གྱི་དཀྱིལ་འཁོར་ལ་རྒྱ་ཆེར་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཤིན་
ཏུ་བརྟགས་པར་ཉོན་ཅིག་དང་ཁྱོད་ལ་ཡང་བཤད་པར་བྱའོ། །ཐོག་མ་ནས་ཡོད་ཅེས་བྱ་བ་ནི་ང་ལ་སྔོན་ཉོན་མོངས་པ་ཚད་མེད་པ་སྙེད་ཡོད་དེ། ཉོན་མོངས་པའི་དབང་གིས་ད་ལྟར་གྱི་མྱ་ངན་ལས་འདས་པ་ཆེན་པོ་མེད་དོ། །ཐོག་མ་ནས་མེད་ཅེས་བྱ་བ་ནི་ཐོག་མ་ནས་ཤེས་
རབ་ཀྱི་ཕ་རོལ་ཏུ་ཕྱིན་པ་མེད་དེ། ཤེས་རབ་ཀྱི་ཕ་རོལ་ཏུ་ཕྱིན་པ་མེད་པས་ད་ལྟར་གྱི་ཀུན་ནས་ཉོན་མོངས་པ་ཡོད་དོ། །གལ་ཏེ་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། མིའམ་གང་ཡང་རུང་སྟེ། དེ་བཞིན་གཤེགས་པ་ལ་འདས་པ་དང་། མ་འོངས་
པ་དང་། ད་ལྟར་གྱི་དུས་ན་ཉོན་མོངས་པ་ཡོད་ཅེས་སྨྲ་ན་དེ་ནི་གནས་མ་ཡིན་ནོ། །རིགས་ཀྱི་བུ་གཞན་ཡང་ཐོག་མ་ནས་ཡོད་ཅེས་བྱ་བ་ནི་ང་ལ་ཐོག་མ་ནས་ཕ་མ་གཉིས་འདུས་པ་ལས་བྱུང་བའི་ལུས་ཡོད་དེ། དེ་བས་ན་ད་ལྟར་གྱི་རྡོ་རྗེ་ལྟ་བུའི་ཆོས་ཀྱི་སྐུར་ནི་མེད་དོ། །ཐོག་མ་ནས་མེད་
ཅེས་བྱ་བ་ནི་ངའི་སྐུ་ལ་ཐོག་མ་ནས་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་མེད་དེ། ཐོག་མ་ནས་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་མེད་པས། ད་ལྟར་གྱི་ནད་བཞི་བརྒྱ་རྩ་བཞི་ཚང་བར་ཡོད་དོ། །དེ་ལ་གལ་ཏེ་དགེ་སྦྱོང་ངམ། བྲམ་
ཟེའམ། ལྷའམ། བདུད་དམ། ཚངས་པའམ། མིར་བཅས་པ་གང་ཡང་རུང་སྟེ། དེ་བཞིན་གཤེགས་པ་ལ་འདས་པ་དང་། མ་འོངས་པ་དང་། ད་ལྟར་གྱི་དུས་ན་ནད་ཀྱི་སྡུག་བསྔལ་ཡོད་ཅེས་སྨྲ་ན་དེ་ནི་གནས་མ་ཡིན་ནོ། །རིགས་ཀྱི་བུ་གཞན་ཡང་ཐོག་མ་ནས་ཡོད་

ཅེས་བྱ་བ་ནི་ང་ལ་ཐོག་མ་ནས་མི་རྟག་པ་དང་། བདག་མེད་པ་དང་། བདེ་བ་མེད་པ་དང་། ཡོངས་སུ་དག་པ་མེད་པ་ཡོད་དེ། དེ་ལྟར་མི་རྟག་པ་དང་། བདག་མེད་པ་དང་། བདེ་བ་མེད་པ་དང་། ཡོངས་སུ་དག་པ་མེད་པ་ཡོད་པས་ད་ལྟར་གྱི་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ནི་མེད་དོ། །ཐོག་མ་ནས་མེད་ཅེས་བྱ་བ་ནི་ཐོག་མ་ནས་སངས་རྒྱས་ཀྱི་རང་བཞིན་མ་མཐོང་སྟེ། དེ་ལྟར་མ་མཐོང་བས་ན་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མེད་དོ། །དེ་ལ་གལ་ཏེ་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པ་
འམ། མིར་བཅས་པ་གང་ཞིག་གིས་དེ་བཞིན་གཤེགས་པ་ལ་འདས་པ་དང་། མ་འོངས་པ་དང་། ད་ལྟར་གྱི་དུས་ན་མི་རྟག་ཅེའམ། བདེ་བ་དང་། བདག་དང་། ཡོངས་སུ་དག་པ་མེད་ཅེས་ཟེར་ན། དེ་ནི་གནས་མ་ཡིན་ནོ། །རིགས་ཀྱི་བུ་གཞན་ཡང་ཐོག་མ་ནས་ཡོད་ཅེས་བྱ་བ་ནི་ཐོག་
མ་ནས་བུས་པ་མ་རབས་ལས་དཀའ་ཐུབ་སྤྱོད་པའི་སེམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་སྙམ་སྟེ། དངོས་པོ་དེ་ལྟ་བུའི་ཕྱིར་ད་ལྟར་གྱི་དུས་ན་བདུད་རྣམ་བཞི་ཆོམས་པ་ཡང་མ་ཡིན་ནོ། །ཐོག་མ་ནས་མེད་ཅེས་བྱ་བ་ནི་ཐོག་མ་ནས་ཕ་རོལ་ཏུ་ཕྱིན་པ་དྲུག་མེད་དོ། །
ཕ་རོལ་ཏུ་ཕྱིན་པ་དྲུག་མེད་པས་ན་བུས་པ་མ་རབས་ཀྱི་དཀའ་ཐུབ་སྤྱོད་པའི་སེམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་སྙམ་སེམས་སོ། །དེ་ལ་གལ་ཏེ་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། མིར་བཅས་པ་གང་ཞིག་གིས་དེ་བཞིན་
གཤེགས་པ་ལ་འདས་པ་དང་། མ་བྱོན་པ་དང་། ད་ལྟར་གྱི་དུས་ན་དཀའ་ཐུབ་སྤྱོད་པ་ཡོད་དོ། །ཞེས་སྨྲ་ན། དེ་ནི་གནས་མ་ཡིན་ནོ། །རིགས་ཀྱི་བུ་གཞན་ཡང་ཐོག་མ་ནས་ཡོད་ཅེས་བྱ་བ་ནི་ང་ལ་ཐོག་མ་ནས་ཟས་དང་འདྲེས་པའི་ལུས་ཡོད་དོ། །ཟས་ཀྱི་ལུས་ཡོད་པས་ད་ལྟར་
གྱི་མཐའ་ཡས་པའི་སྐུ་མེད་དོ། །ཐོག་མ་ནས་མེད་ཅེས་བྱ་བ་ནི་ཐོག་མ་ནས་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་མེད་དོ། །དེ་ལྟར་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་མེད་པས་ད་ལྟར་གྱི་ཟས་དང་འདྲེས་པའི་ལུས་ཡོད་དོ། །དེ་ལ་གལ་ཏེ་དགེ་སྦྱོང་ངམ། བྲམ་ཟེ་འམ།

ལྷའམ། བདུད་དམ། ཚངས་པའམ། མིར་བཅས་པ་གང་ཞིག་གིས་དེ་བཞིན་གཤེགས་པ་ལ་འདས་པ་དང་། མ་འོངས་པ་དང་། ད་ལྟར་གྱི་དུས་ན་ཟས་དང་འདྲེས་པའི་ལུས་ཡོད་ཅེས་ཟེར་ན། དེ་ནི་གནས་མ་ཡིན་ནོ། །རིགས་ཀྱི་བུ་གཞན་ཡང་ཐོག་མ་ནས་ཡོད་ཅེས་
བྱ་བ་ནི་ངས་སྔོན་ཐོག་མ་ནས་ཆོས་ཐམས་ཅད་བླངས་པ་དང་། ཆགས་པའི་སེམས་ཡོད་དེ། དེ་བས་ན་ད་ལྟར་གྱི་མཐར་ཕྱིན་པའི་སྟོང་པ་ཉིད་ཀྱི་ཏིང་ངེ་འཛིན་ནི་མེད་དོ། །ཐོག་མ་ནས་མེད་ཅེས་བྱ་བ་ནི་ཐོག་མ་ནས་དབུ་མའི་དོན་བདེན་པ་མེད་དོ། །དེ་ལྟར་དབུ་མའི་དོན་བདེན་པ་མེད་
པས་ཆོས་ཐམས་ཅད་ལ་མ་ཆགས་པའི་སེམས་མེད་དོ། །གལ་ཏེ་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། མིར་བཅས་པ་གང་ཞིག་གིས་དེ་བཞིན་གཤེགས་པ་ལ་འདས་པ་དང་། མ་འོངས་པ་དང་། ད་ལྟར་གྱི་དུས་ན་ཆོས་ཐམས་ཅད་ལ་
མཚན་མ་ཡོད་དོ་ཞེས་སྨྲ་ན་དེ་ནི་གནས་མ་ཡིན་ནོ། །རིགས་ཀྱི་བུ་གཞན་ཡང་ཐོག་མ་ནས་ཡོད་ཅེས་བྱ་བ་ནི་ངས་སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པ་ན་དབང་པོ་རྟུལ་པོ་ཉན་ཐོས་ཀྱི་ཉེ་གནས་སུ་གྱུར་པ་ཡོད་དོ། །དེ་ལྟར་དབང་པོ་རྟུལ་པོ་ཉན་ཐོས་ཀྱི་
ཉེ་གནས་སུ་གྱུར་པ་ཡོད་པས་ན་ཐེག་པ་གཅིག་པུའི་བདེན་པ་མེད་དོ། །ཐོག་མ་ནས་མེད་ཅེས་བྱ་བ་ནི་ཐོག་མ་ནས་དབང་པོ་རྣོན་པོའི་མིའི་ནང་ན་བལ་གླང་གི་རྒྱལ་པོ་ལྟ་བུ་བྱང་ཆུབ་སེམས་དཔའ་འོད་སྲུང་ལ་སོགས་པ་མེད་དོ། །དབང་པོ་རྣོན་པོ་འོད་སྲུང་ལྟ་བུ་མེད་པས་ན་ཅི་རིགས་
སུ་ཐབས་མཁས་པས་ཐེག་པ་གསུམ་དུ་ཕྱེ་སྟེ་བསྟན་ཏོ། །དེ་ལ་གལ་ཏེ་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། མིར་བཅས་པ་གང་ཞིག་གིས་ཀྱང་དེ་བཞིན་གཤེགས་པ་ལ་འདས་པ་དང་། མ་འོངས་པ་དང་། ད་ལྟར་གྱི་དུས་ན་
ཐེག་པ་གསུམ་མཐར་ཕྱིན་པ་ཡིན་ནོ་ཞེས་སྨྲ་ན་དེ་ནི་གནས་མ་ཡིན་ནོ། །རིགས་ཀྱི་བུ་གཞན་ཡང་ཐོག་མ་ནས་ཡོད་ཅེས་བྱ་བ་ནི་ངས་སྔོན་འདི་སྐད་དུ་ད་སྟེ་ཟླ་བ་གསུམ་ན་ཤིང་སཱ་ལ་དྲུང་གཉིས་ཀྱི་བར་ན་ཡོངས་སུ་མྱ་ངན་ལས་འདའོ་ཞེས་གསུངས་ཏེ། དེ་བས་ན་ད་ལྟར་ཤིན་ཏུ་

རྒྱས་པ་ཡོངས་སུ་མྱ་ངན་ལས་འདས་པ་ཐེག་པ་ཆེན་པོའི་མདོ་འཆད་པར་མི་འགྱུར་རོ། །ཐོག་མ་ནས་མེད་ཅེས་བྱ་བ་ནི། ཐོག་མ་ནས་འཇམ་དཔལ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མེད་དོ། །དེ་ལྟར་མེད་པས་ན་ད་ལྟར་དེ་
བཞིན་གཤེགས་པ་ལ་མི་རྟག་གོ་ཞེས་གསུངས་སོ། །དེ་ལ་གལ་ཏེ་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། མི་ཡང་རུང་གང་ཞིག་གིས་དེ་བཞིན་གཤེགས་པ་ལ་འདས་པ་དང་། མ་འོངས་པ་དང་། ད་ལྟར་གྱི་དུས་སུ་མི་རྟག་གོ་ཞེས་
ཟེར་ན་དེ་ནི་གནས་མ་ཡིན་ནོ། །རིགས་ཀྱི་བུ་དེ་བཞིན་གཤེགས་པ་ནི་སེམས་ཅན་ཐམས་ཅད་ཀྱི་ཕྱིར་ཆོས་ཐམས་ཅད་མཁྱེན་ཀྱང་མི་མཁྱེན་ཅེས་གསུང་ངོ་། །ཆོས་ཐམས་ཅད་གཟིགས་ཀྱང་གཟིགས་པ་མེད་དོ་ཞེས་གསུང་། མཚན་མ་དང་བཅས་པའི་ཆོས་ལ་མཚན་
མ་མེད་དོ་ཞེས་གསུང་། མཚན་མ་མེད་པའི་ཆོས་ཀྱང་མཚན་མ་དང་བཅས་པའོ་ཞེས་གསུང་། ཡང་དག་པར་མི་རྟག་པ་ཡང་རྟག་གོ་ཞེས་གསུང་། ཡང་དག་པར་རྟག་པ་ཡང་མི་རྟག་གོ་ཞེས་གསུང་སྟེ། བདག་དང་བདེ་བ་དང་། ཡོངས་སུ་དག་པ་ཡང་དེ་བཞིན་དུ་
རྒྱས་པར་རིག་པར་བྱའོ། །ཐེག་པ་གསུམ་གྱི་ཆོས་ཀྱང་ཐེག་པ་གཅིག་ཏུ་གསུང་། ཐེག་པ་གཅིག་ཀྱང་ཅི་རིགས་པར་གསུམ་དུ་གསུང་ངོ་། །མདོའི་མཚན་ཉིད་ནི་རྒྱས་པའི་མཚན་ཉིད་དུ་གསུང་། རྒྱས་པའི་མཚན་ཉིད་ཀྱང་མདོར་གསུང་། ཕས་ཕམ་པ་བཞི་
ནི་ཉེས་པ་སྦོམ་པོར་ཡང་གསུང་། ཉེས་པ་སྦོམ་པོ་ནི་ཕས་ཕམ་པ་བཞིར་ཡང་གསུང་། ཁ་ན་མ་ཐོ་བ་ནི་ཁ་ན་མ་ཐོ་བ་མ་ཡིན་པར་གསུང་། ཁ་ན་མ་ཐོ་བ་མ་ཡིན་པ་ནི་ཁ་ན་མ་ཐོ་བ་དང་བཅས་པ་ཡིན་ནོ་ཞེས་གསུང་། ཉེས་པ་ཡང་བ་ནི་ལྕི་བར་གསུང་། ལྕི་བ་ནི་ཡང་
བར་ཡང་གསུང་ངོ་། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་ནི་སེམས་ཅན་སོ་སོའི་དབང་པོ་གསལ་བར་གཟིགས་པའི་ཕྱིར་རོ། །རིགས་ཀྱི་བུ་དེ་བཞིན་གཤེགས་པ་ནི་དེ་སྐད་གསུང་ཡང་བརྫུན་མ་ཡིན་ནོ། །དེ་ཅིའི་ཕྱིར་ཞེ་ན། བརྫུན་དུ་སྨྲ་བ་ནི་སྐྱོན་དང་

བཅས་པ་ཡིན་ཏེ། དེ་བཞིན་གཤེགས་པ་ནི་ཉེས་པའི་སྐྱོན་ཐམས་ཅད་ཡོངས་སུ་བྲལ་བ་ཡིན་ན་བརྫུན་དུ་སྨྲ་བ་ག་ལ་ཞིག་ཡོད། རིགས་ཀྱི་བུ་དེ་བཞིན་གཤེགས་པ་ལ་བརྫུན་དུ་གསུང་བ་མེད་མོད་ཀྱི། ཇི་སྟེ་སེམས་ཅན་དག་ལ་བརྫུན་དུ་སྨྲ་བའི་རྐྱེན་གྱི། ཆོས་ཀྱིས་ཕན་
པའི་དོན་དུ་འགྱུར་ན། ཅི་རིགས་པའི་ཐབས་ཀྱིས་དེ་ལ་སྟོན་ཅིང་གསུང་ངོ་། །རིགས་ཀྱི་བུ་ཀུན་རྫོབ་ཀྱི་བདེན་པ་ཐམས་ཅད་ནི། དེ་བཞིན་གཤེགས་པའི་དོན་དམ་པའི་བདེན་པའོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ནི་དོན་དམ་པའི་བདེན་པ་ལས་ཀུན་
རྫོབ་ཀྱི་བདེན་པ་གསུངས་ཏེ། གཞན་དུ་ན་སོ་སོའི་སྐྱེ་བོ་དག་དོན་དམ་པའི་བདེན་པ་ཐོབ་པར་བྱ་བའི་ཕྱིར་རོ། །ཇི་སྟེ་སོ་སོའི་སྐྱེ་བོ་དག་དོན་དམ་པའི་བདེན་པ་མི་ཐོབ་ན་སངས་རྒྱས་བཅོམ་ལྡན་འདས་ཀྱིས་ཀུན་རྫོབ་ཀྱི་བདེན་པ་ནམ་དུ་ཡང་མི་གསུང་ངོ་། །རིགས་ཀྱི་བུ་དེ་བཞིན་
གཤེགས་པ་ནི་བར་འགའི་དུས་སུ་ཀུན་རྫོབ་ཀྱི་བདེན་པ་གསུང་བ་ན། སེམས་ཅན་གྱིས་ནི་དེ་བཞིན་གཤེགས་པས་དོན་དམ་པའི་བདེན་པ་གསུང་ངོ་སྙམ་སེམས་སོ། །སྐབས་ཁ་ཅིག་ཏུ་ནི་དོན་དམ་པའི་བདེན་པ་གསུངས་པ་ན་སེམས་ཅན་གྱིས་དེ་བཞིན་གཤེགས་པ་ནི་ཀུན་
རྫོབ་ཀྱི་བདེན་པ་གསུང་ངོ་སྙམ་སེམས་ཏེ། དེ་ནི་སངས་རྒྱས་བཅོམ་ལྡན་འདས་རྣམས་ཀྱི་སྤྱོད་ཡུལ་ཟབ་མོ་ཡིན་གྱི་ཉན་ཐོས་དང་རང་སངས་རྒྱས་རྣམས་ཀྱིས་ཤེས་པ་ནི་མ་ཡིན་ནོ། །རིགས་ཀྱི་བུ་དེ་བས་ན་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཅི་ཡང་
འཐོབ་པ་མེད་དོ་ཞེས་བརྒལ་བའི་མི་རིགས་སོ། །བྱང་ཆུབ་སེམས་དཔའ་ནི་རྟག་ཏུ་དོན་དམ་པའི་བདེན་པ་དང་ལྡན་པ་ཡིན་ན། ཅིའི་ཕྱིར་ཅི་ཡང་འཐོབ་པ་མེད་དོ་ཞེས་བརྒལ། འོད་སྲུང་གིས་ཡང་གསོལ་པ། བཅོམ་ལྡན་འདས་དོན་དམ་པའི་བདེན་པ་ནི་ལམ་ཞེས་ཀྱང་བགྱི།
བྱང་ཆུབ་ཅེས་ཀྱང་བགྱི། མྱ་ངན་ལས་འདས་པ་ཞེས་ཀྱང་བགྱི་ན། ཇི་སྟེ་བྱང་ཆུབ་སེམས་དཔའ་ལམ་དང་བྱང་ཆུབ་དང་མྱ་ངན་ལས་འདས་པ་ཐོབ་ན་དེ་ནི་མི་རྟག་པ་ལགས་སོ། །དེ་ཅིའི་སླད་དུ་ཞེ་ན། ཇི་སྟེ་རྟག་པ་ལགས་ན་འཐོབ་པར་ཡང་མི་རུང་ངོ་། །དཔེར་ན་ནམ་མཁའ་ནི་སུས་

ཀྱང་འཐོབ་པར་ཡང་མི་རུང་ངོ་། །བཅོམ་ལྡན་འདས་དཔེར་ན་འཇིག་རྟེན་གྱི་དངོས་པོ་དག་ཐོག་མ་ནས་མེད་ལ་ད་ཡོད་པ་ནི་མི་རྟག་པ་ཞེས་བགྱི་ན་བྱང་ཆུབ་ཀྱང་དེ་དང་འདྲ་སྟེ། ཇི་སྟེ་བྱང་ཆུབ་ཐོབ་པ་ཞིག་ལགས་ན་མི་རྟག་པ་ཞེས་བགྱིའོ། །ཇི་སྟེ་ཆོས་རྟག་པ་ཞིག་
ལགས་ན། འཐོབ་པ་ཡང་མ་མཆིས་ལ་སྐྱེ་བ་ཡང་མ་མཆིས་ཏེ། དཔེར་ན་སངས་རྒྱས་ཀྱི་རང་བཞིན་ཡང་འཐོབ་པ་ཡང་མ་མཆིས་ལ། སྐྱེ་བ་ཡང་མ་མཆིས་སོ། །བཅོམ་ལྡན་འདས་ལམ་ནི་གཟུགས་ཀྱང་མ་ལགས། གཟུགས་མ་ལགས་པ་ཡང་མ་ལགས། རིང་པོ་ཡང་མ་
ལགས། ཐུང་ངུ་ཡང་མ་ལགས། མཐོ་བ་ཡང་མ་ལགས། དམའ་བ་ཡང་མ་ལགས། སྐྱེ་བ་ཡང་མ་ལགས། འགོག་པ་ཡང་མ་ལགས། དམར་པོ་ཡང་མ་ལགས། དཀར་པོ་ཡང་མ་ལགས། སྔོན་པོ་ཡང་མ་ལགས། སེར་པོ་ཡང་མ་ལགས། ཡོད་པ་ཡང་མ་ལགས།
མེད་པ་ཡང་མ་ལགས་ན། ཅིའི་སླད་དུ་དེ་བཞིན་གཤེགས་པས་འཐོབ་པར་རུང་ཞེས་གསུངས། བྱང་ཆུབ་དང་མྱ་ངན་ལས་འདས་པ་ཡང་དེ་དང་མཚུངས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ཏེ། དེ་དེ་བཞིན་ནོ། །རིགས་ཀྱི་བུ་ལམ་ལ་རྣམ་པ་གཉིས་ཏེ། རྟག་
པ་དང་མི་རྟག་པའོ། །བྱང་ཆུབ་ལ་ཡང་རྣམ་པ་གཉིས་ཏེ། རྟག་པ་དང་མི་རྟག་པའོ། །མྱ་ངན་ལས་འདས་པ་ཡང་དེ་དང་འདྲ་སྟེ། ཕྱི་རོལ་པ་མུ་སྟེགས་ཅན་གྱི་ལམ་ནི་མི་རྟག་པ་ཞེས་བྱའོ། །ནང་གི་ལམ་ནི་རྟག་པ་ཞེས་བྱའོ། །ཉན་ཐོས་དང་རང་སངས་རྒྱས་ཀྱི་བྱང་ཆུབ་ནི་
མི་རྟག་པ་ཞེས་བྱའོ། །བྱང་ཆུབ་སེམས་དཔའ་དང་སངས་རྒྱས་རྣམས་ཀྱི་བྱང་ཆུབ་ནི་རྟག་པ་ཞེས་བྱའོ། །ཕྱི་རོལ་གྱི་རྣམ་པར་གྲོལ་བ་ནི་མི་རྟག་པ་ཞེས་བྱའོ། །ནང་གི་རྣམ་པར་གྲོལ་བ་ནི་རྟག་པ་ཞེས་བྱའོ། །རིགས་ཀྱི་བུ་ལམ་དང་བྱང་ཆུབ་དང་མྱ་ངན་ལས་འདའ་བ་ནི་ཀུན་
ཀྱང་རྟག་པ་ཞེས་བྱའོ། །སེམས་ཅན་ཐམས་ཅད་ནི་རྟག་ཏུ་ཉོན་མོངས་པ་གྲངས་མེད་པས་ཡོངས་སུ་ཁེབས་ཏེ། ཤེས་རབ་ཀྱི་མིག་མེད་པས་མཐོང་བར་མ་གྱུར་ཏོ། །སོ་སོའི་སྐྱེ་བོ་དག་མཐོང་བར་འདོད་པས་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ལ་ནན་ཏན་དུ་སྤྱོད་དོ། །

དེ་ལྟར་ན་ནན་ཏན་དུ་སྤྱོད་པས་ན་ལམ་དང་བྱང་ཆུབ་དང་མྱ་ངན་ལས་འདའ་བ་མཐོང་བར་འགྱུར་ཏེ། དེ་ནི་བྱང་ཆུབ་སེམས་དཔས་ལམ་དང་། བྱང་ཆུབ་དང་། མྱ་ངན་ལས་འདའ་བ་ཐོབ་པ་ཞེས་བྱའོ། །ལམ་གྱི་མཚན་ཉིད་ནི་ཡང་དག་པར་སྐྱེ་བའམ་འགོག་པ་མ་ཡིན་ཏེ། དེ་བས་
ན་གཟུང་དུ་མེད་དོ། །རིགས་ཀྱི་བུ་ལམ་དང་ཞེས་བྱ་བ་ནི་གཟུགས་དང་། དབྱིབས་ཀྱང་མེད། བལྟར་རུང་བའམ། དཔག་ཏུ་རུང་བའམ། ཤེས་པར་རུང་བ་མ་ཡིན་མོད་ཀྱི། ཡང་དག་པར་ན་དགོས་པ་ཡོད་དོ། །རིགས་ཀྱི་བུ་དཔེར་ན་སེམས་ཅན་གྱི་སེམས་ཀྱང་གཟུགས་
མ་ཡིན། རིང་པོ་མ་ཡིན། ཐུང་ངུ་མ་ཡིན། སྦོམ་པོ་མ་ཡིན། ཕྲ་མོ་མ་ཡིན། བཅིངས་པ་མ་ཡིན། གྲོལ་བ་མ་ཡིན། མཐོང་བའི་ཆོས་མ་ཡིན་མོད་ཀྱི། མེད་པ་ནི་མ་ཡིན་ནོ། །དེ་བས་ན་ངས་ཁྱིམ་བདག་སྐྱབས་མེད་ཟས་སྦྱིན་ལ་སེམས་ནི་གྲངས་ཁྱེར་གྱི་བདག་པོ་དང་འདྲའོ། །
ཁྱིམ་བདག་གལ་ཏེ་སེམས་མ་བསྲུངས་ན་ལུས་དང་ངག་ཀྱང་བསྲུངས་པར་མི་འགྱུར་གྱི། སེམས་བསྲུངས་ན་ལུས་དང་ངག་ཀྱང་བསྲུངས་པར་འགྱུར་རོ། །ལུས་དང་ངག་ལེགས་པར་མ་བསྲུངས་ན་སེམས་ཅན་དག་ངན་སོང་གསུམ་དུ་ལྟུང་བར་བྱེད་དོ། །ལུས་དང་ངག་བསྲུངས་ན་
སེམས་ཅན་རྣམས་ལྷ་དང་མིའི་མྱ་ངན་ལས་འདས་པ་ཐོབ་པར་འགྱུར་རོ། །དེ་ལྟར་ཐོབ་པ་ནི་ཡང་དག་པ་ཞེས་བྱའི་མ་ཐོབ་པ་ནི་ཡང་དག་པ་ཞེས་མི་བྱའོ། །རིགས་ཀྱི་བུ་ལམ་དང་བྱང་ཆུབ་དང་མྱ་ངན་ལས་འདའ་བ་ཡང་དེ་དང་འདྲ་སྟེ། ཡོད་པ་ཡང་མ་ཡིན་རྟག་པ་ཡང་མ་ཡིན་
ནོ། །ཇི་སྟེ་མེད་པ་ཞིག་ཡིན་ན་ཉོན་མོངས་པ་ཐམས་ཅད་ཅིས་ཆོད་པར་འགྱུར། དེ་ལྟར་ཡོད་པས་ན་བྱང་ཆུབ་སེམས་དཔའ་ཐམས་ཅད་ཀྱིས་ཀྱང་མངོན་སུམ་དུ་གསལ་བར་མཐོང་ཞིང་ཤེས་སོ། །རིགས་ཀྱི་བུ་མཐོང་བ་ལ་རྣམ་པ་གཉིས་ཏེ། མཚན་མས་མཐོང་བ་དང་།
མངོན་སུམ་དུ་གསལ་བར་མཐོང་བའོ། །དེ་ལ་ཇི་ལྟར་ན་མཚན་མས་མཐོང་བ་ཡིན་ཞེ་ན། དཔེར་ན་རྒྱང་མ་ནས་དུད་པ་མཐོང་ན་མེ་མཐོང་བ་ཞེས་བྱ་སྟེ། ཡང་དག་པར་མེ་མ་མཐོང་སྟེ། མེ་མ་མཐོང་མོད་ཀྱི་བརྫུན་ཡང་མ་ཡིན་ནོ། །ཆུ་བྱ་མཐོང་ན་ཆུ་མཐོང་བ་ཞེས་བྱ་སྟེ་ཆུ་

མ་མཐོང་མོད་ཀྱི་བརྫུན་མ་ཡིན་ནོ། །དཔེར་ན་མེ་ཏོག་དང་ལོ་མ་མཐོང་ན་རྩྭ་བ་མཐོང་ཞེས་བྱའོ། །རྩྭ་བ་མ་མཐོང་མོད་ཀྱི་དེ་ཡང་བརྫུན་མ་ཡིན་ནོ། །དཔེར་ན་མི་ཞིག་ར་བའི་རྒྱབ་ན་རྭ་མཐོང་ན་བ་ལང་མཐོང་བ་ཞེས་བྱ་སྟེ། བ་ལང་ཉིད་མ་མཐོང་ཡང་བརྫུན་ནི་མ་ཡིན་ནོ། །
དཔེར་ན་བུད་མེད་སྦྲུམ་མ་མཐོང་ན་སྐྱེས་པ་དང་ཉལ་བར་མཐོང་ངོ་ཞེས་བྱས་ཀྱང་ཉལ་བ་ཉིད་མ་མཐོང་མོད་ཀྱི་བརྫུན་ནི་མ་ཡིན་ནོ། །དཔེར་ན་སྐྱེད་ཤིང་གི་ལོ་མ་མཐོང་བས་ཆུ་མཐོང་ངོ་ཞེས་བྱས་ཀྱང་ཆུ་ཉིད་མ་མཐོང་མོད་ཀྱི་བརྫུན་ནི་མ་ཡིན་ནོ། །དཔེར་ན་སྤྲིན་མཐོང་བས་ཆར་པ་མཐོང་ངོ་
ཞེས་བྱས་ཀྱང་། ཆར་པ་ཉིད་མ་མཐོང་མོད་ཀྱི་བརྫུན་ནི་མ་ཡིན་ནོ། །དཔེར་ན་ལུས་ཀྱི་ལས་དང་ངག་གི་ལས་མཐོང་བས་ཡིད་ཀྱི་ལས་མཐོང་ངོ་ཞེས་བྱས་ཀྱང་། ཡིད་ཀྱི་ལས་ནི་མ་མཐོང་མོད་ཀྱི་བརྫུན་དུ་སྨྲ་བ་ནི་མ་ཡིན་ཏེ། དེ་ནི་མཚན་མས་མཐོང་བ་ཞེས་བྱའོ། །དེ་ལ་ཇི་
ལྟར་ན་མངོན་སུམ་དུ་གསལ་བར་མཐོང་ཞེ་ན། དཔེར་ན་མིག་གིས་གཟུགས་མཐོང་བ་ལྟ་བུ་སྟེ། རིགས་ཀྱི་བུ་དཔེར་ན་གང་ཟག་མིག་གི་དབང་པོ་མ་ཉམས་ཤིང་ཡོངས་སུ་དག་པས་ལག་མཐིལ་དུ་ཨ་མྲའི་འབྲས་བུ་གཞག་པ་དང་འདྲ་བར། བྱང་ཆུབ་སེམས་དཔའ་སེམས་དཔའ་
ཆེན་པོས་ལམ་དང་བྱང་ཆུབ་དང་མྱ་ངན་ལས་འདས་པ་མངོན་སུམ་དུ་གསལ་བར་མཐོང་བ་ཡང་དེ་དང་འདྲའོ། །དེ་ལྟར་མཐོང་མོད་ཀྱི་ཐོག་མ་ནས་མཐོང་བའི་མཚན་ཉིད་མེད་དོ། །རིགས་ཀྱི་བུ་དེའི་རྒྱུ་དེའི་རྐྱེན་གྱིས་ངས་སྔོན་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་
རིའི་བུ་འཇིག་རྟེན་དུ་བཅས་པ་དགེ་སྦྱོང་དང་། བྲམ་ཟེ་དང་། ལྷ་དང་། བདུད་དང་། ཚངས་པ་དང་། མི་ལ་སོགས་པ་ཐམས་ཅད་ཀྱིས་མི་ཤེས་པ་དང་། མི་མཐོང་བ་དང་། མི་རྟོགས་པ་ཐམས་ཅད་དེ་བཞིན་གཤེགས་པས་ཐམས་ཅད་མཁྱེན་ཅིང་གཟིགས་ཏེ་རྟོགས་སོ། །བྱང་
ཆུབ་སེམས་དཔའ་རྣམས་ཀྱང་དེ་བཞིན་ནོ། །ཤཱ་རིའི་བུ་འཇིག་རྟེན་དུ་བཅས་པ་རྣམས་ཀྱིས་ཤེས་པ་དང་། མཐོང་བ་དང་། རྟོགས་པ་ནི་ང་དང་བྱང་ཆུབ་སེམས་དཔའ་རྣམས་ཀྱིས་མཁྱེན་ཅིང་གཟིགས་ཏེ་རྟོགས་སོ། །འཇིག་རྟེན་དུ་བཅས་པ་ཐམས་ཅད་ཀྱིས་མི་ཤེས་པ་དང་། མི་

མཐོང་བ་དང་། མི་རྟོགས་པ་ནི་འདི་ལྟར་བདག་གིས་མི་ཤེས་མི་མཐོང་མི་རྟོགས་པར་ནི་མི་ཤེས་ཀྱི། འཇིག་རྟེན་གྱི་སེམས་ཅན་འདི་དག་ནི་ཤེས་པ་དང་མཐོང་བ་དང་རྟོགས་པ་ལ་བདག་གིས་འདི་ལྟར་ཤེས་སོ་མཐོང་ངོ་རྟོགས་སོ་ཞེས་ཟེར་རོ། །ཤཱ་རིའི་བུ་དེ་བཞིན་གཤེགས་པ་ནི་ཐམས་
ཅད་མཁྱེན་ཅིང་གཟིགས་ཀྱང་འདི་ལྟར་ངས་མཁྱེན་ཅིང་གཟིགས་སོ་ཞེས་མི་གསུང་སྟེ། བྱང་ཆུབ་སེམས་དཔའ་ཐམས་ཅད་ཀྱང་དེ་བཞིན་ནོ། །དེ་ཅིའི་ཕྱིར་ཞེ་ན། གལ་ཏེ་དེ་བཞིན་གཤེགས་པས་མཁྱེན་ཅིང་གཟིགས་པའམ་རྟོགས་པར་དགོངས་ན་དེ་ནི་སངས་རྒྱས་བཅོམ་ལྡན་
འདས་སམ། བྱང་ཆུབ་སེམས་དཔའ་ཞེས་མི་བྱ་སྟེ། བྱིས་པ་མ་རབས་ཡིན་ནོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཤཱ་རིའི་བུ་ལ་འདི་སྐད་ཅེས་འཇིག་རྟེན་གྱིས་ཤེས་པ་ནི་ངས་མཁྱེན་ལ། འཇིག་
རྟེན་གྱིས་མི་ཤེས་པ་ཡང་ངས་ཀུན་མཁྱེན་ནོ་ཞེས་གསུངས་པའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འཇིག་རྟེན་དུ་བཅས་པ་ཐམས་ཅད་ཀྱིས་ནི་སངས་རྒྱས་ཀྱི་རང་བཞིན་མི་ཤེས་མི་མཐོང་མི་རྟོགས་ཏེ། གལ་ཏེ་ཤེས་སམ་མཐོང་ངམ་རྟོགས་ན་
འཇིག་རྟེན་པ་ཞེས་མི་བྱའི་བྱང་ཆུབ་སེམས་དཔའ་ཡིན་ནོ། །འཇིག་རྟེན་པས་ནི་མདོ་སྡེ་བཅུ་གཉིས་དང་། །རྟེན་ཅིང་འབྲེལ་ཏེ་འབྱུང་བ་བཅུ་གཉིས་དང་། །ཕྱིན་ཅི་ལོག་བཞི་དང་། བདེན་པ་བཞི་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་། བླ་ན་མེད་པ་ཡང་
དག་པར་རྫོགས་པའི་བྱང་ཆུབ་དང་། ཡོངས་སུ་མྱ་ངན་ལས་འདས་པ་ཆེན་པོ་ཡང་མི་ཤེས་མི་མཐོང་མི་རྟོགས་སོ། །ཅི་སྟེ་ཤེས་སམ་མཐོང་ངམ། རྟོགས་ན་འཇིག་རྟེན་པ་ཞེས་མི་བྱའི་བྱང་ཆུབ་སེམས་དཔའ་ཞེས་བྱའོ། །རིགས་ཀྱི་བུ་འདི་དག་ནི་འཇིག་རྟེན་པས་མི་ཤེས་མི་
མཐོང་མི་རྟོགས་པ་ཞེས་བྱའོ། །དེ་ལ་ཇི་ལྟར་ན་འཇིག་རྟེན་པས་ཤེས་ཤིང་མཐོང་བ་དང་རྟོགས་པ་ཞེ་ན། འདི་ལྟ་སྟེ། ཚངས་པའི་ལྷ་དང་། དབང་སྒྱུར་དང་། ལག་བརྒྱད་པ་དང་། རང་བཞིན་དང་། དུས་དང་། རྡུལ་དང་། ཆོས་དང་། ཆོས་མ་ཡིན་པ་དང་། བྱམས་

པའི་བདག་པོ་དང་། འཇིག་རྟེན་གྱི་ཐོག་མ་དང་། མཐའ་དང་རྟག་པ་དང་། ཆད་པར་ལྟ་བ་གཉིས་དང་། བསམ་གཏན་དང་པོ་ནས། འདུ་ཤེས་མེད་མིན་སྐྱེ་མཆེད་སྟེངས་ནི་མྱ་ངན་ལས་འདས་པའོ་ཞེས་སྨྲ་སྟེ། རིགས་ཀྱི་བུ་དེ་ནི་འཇིག་རྟེན་པའི་ཤེས་པ་དང་
མཐོང་བ་དང་རྟོགས་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་ཀྱང་དངོས་པོ་དེ་དག་དེ་ལྟར་ཤེས་ཤིང་མཐོང་སྟེ། བྱང་ཆུབ་སེམས་དཔའ་དེ་ལྟར་ཤེས་ཤིང་མཐོང་ལ་རྟོགས་ཀྱང་། ཅི་སྟེ་མི་ཤེས་མི་མཐོང་མ་རྟོགས་ཞེས་སྨྲ་ན་བརྫུན་དུ་འགྱུར་ཏེ། ཇི་ཙམ་
དུ་བརྫུན་དུ་སྨྲ་བ་ནི་ཁ་ན་མ་ཐོ་བར་འགྱུར་ཏེ། ཁ་ན་མ་ཐོ་བའི་དབང་གིས་སེམས་ཅན་དམྱལ་བར་ལྟུང་ངོ་། །རིགས་ཀྱི་བུ་གལ་ཏེ་སྐྱེས་པའམ། བུད་མེད་དམ། དགེ་སྦྱོང་ངམ། བྲམ་ཟེའམ། གང་ཡང་རུང་བ་ལམ་དང་། བྱང་ཆུབ་དང་། མྱ་ངན་ལས་འདས་པ་མེད་དོ་ཞེས་སྨྲ་ན་
དེ་ནི་ལོག་སྲེད་ཅན་ཡིན་ཏེ། བདུད་ཀྱི་རིས་ལ་གཏོགས་པ་ཆོས་ལ་སྐུར་པ་ཞེས་བྱའོ། །དེ་ལྟར་ཆོས་ལ་སྐུར་པ་དེ་ནི་སངས་རྒྱས་རྣམས་ལ་སྐུར་པ་ཞེས་བྱ་སྟེ། གང་ཟག་དེ་ནི་འཇིག་རྟེན་པ་ཞེས་ཀྱང་མི་བྱ། འཇིག་རྟེན་པ་མ་ཡིན་ཞེས་ཀྱང་མི་བྱའོ། །དེའི་ཚེ་འོད་སྲུང་
གིས་དེ་སྐད་ཅེས་གསུངས་པ་ཐོས་ནས་ཚིགས་སུ་བཅད་པ་འདི་དག་གིས་སངས་རྒྱས་ལ་མངོན་པར་བསྟོད་དོ། །སེམས་ཅན་ཀུན་ལ་ཐུགས་བརྩེ་བ། །བདག་ནི་དེ་ལ་སྐྱབས་སུ་མཆི། །གདུག་པའི་ཟུག་རྔུ་འབྱིན་པས་ན། །དེ་བས་སྨན་པའི་རྒྱལ་པོར་གྲགས། །འཇིག་
རྟེན་སྨན་པས་གསོ་བ་ནི། །སྐད་ཅིག་སོས་ཏེ་སླར་ཡང་ལྡང་། །དེ་བཞིན་གཤེགས་པས་གསོ་བ་ནི། །དེ་ལས་ནམ་དུའང་མི་ལྡང་ངོ་། །བཅོམ་ལྡན་འདས་ཀྱིས་བདུད་རྩིའི་སྨན། །སེམས་ཅན་རྣམས་ལ་ཡོངས་བཏང་བ། །སེམས་ཅན་རྣམས་ཀྱིས་དེ་འཚལ་ནས། །
འཆི་བ་མེད་ལ་སྐྱེ་བ་མེད། །དེ་བཞིན་གཤེགས་པས་བདག་སླད་དུ། །ཡོངས་སུ་མྱ་ངན་འདས་པ་བསྟན། །སེམས་ཅན་གསུང་བ་ཐོབ་པ་རྣམས། །སྐྱེ་འགག་མེད་པ་ཐོབ་པར་འགྱུར། །བྱང་ཆུབ་སེམས་དཔའ་འོད་སྲུང་གིས་ཚིགས་སུ་བཅད་པ་དེ་སྐད་སྨྲས་

ནས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར་འཇིག་རྟེན་པ་ཐམས་ཅད་ཀྱིས་མི་ཤེས་མི་མཐོང་མི་རྟོགས་པ་དག་བྱང་ཆུབ་སེམས་དཔས་ཐམས་ཅད་ཤེས་ཤིང་མཐོང་ལ་རྟོགས་སོ་ཞེས་བགྱི་བ། ཅི་སྟེ་བྱང་ཆུབ་སེམས་
དཔའ་ཡང་འཇིག་རྟེན་པ་ལགས་ན་ནི། འཇིག་རྟེན་པས་ནི་མི་ཤེས་མི་མཐོང་མི་རྟོགས་པ་དག །བྱང་ཆུབ་སེམས་དཔས་ཤེས་སོ་མཐོང་ངོ་རྟོགས་སོ་ཞེས་བགྱི་བ་ཡང་མི་རུང་། ཅི་སྟེ་འཇིག་རྟེན་པ་མ་ལགས་ན་ཐ་དད་པ་ཡང་ཅི་ཞིག་མཆིས། བཅོམ་ལྡན་འདས་ཀྱིས་བཀའ་
སྩལ་པ། རིགས་ཀྱི་བུ་བྱང་ཆུབ་སེམས་དཔའ་ཞེས་བྱ་བ་ནི་འཇིག་རྟེན་པ་ཡང་ཡིན་ལ། འཇིག་རྟེན་པ་ཡང་མ་ཡིན་ནོ། །གང་མི་ཤེས་མི་མཐོང་མི་རྟོགས་པ་ནི་འཇིག་རྟེན་པ་ཞེས་བྱའོ། །ཤེས་ཤིང་མཐོང་ལ་རྟོགས་པ་ནི་འཇིག་རྟེན་པ་ཞེས་མི་བྱའོ། །ཁྱོད་ཀྱིས་ཐ་དད་པ་ཅི་ཡོད་
ཅེས་དྲིས་པ་ཡང་ངས་བཤད་པར་བྱའོ། །རིགས་ཀྱི་བུ་ཇི་སྟེ་སྐྱེས་པའམ་བུད་མེད་གང་ཡང་རུང་བ། ཡོངས་སུ་མྱ་ངན་ལས་འདས་པའི་མདོ་སྡེ་ཐོས་མ་ཐག་ཏུ་དད་པ་སྐྱེས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ནི་འཇིག་རྟེན་པའི་བྱང་ཆུབ་
སེམས་དཔའ་ཞེས་བྱ་སྟེ། འཇིག་རྟེན་པ་ཐམས་ཅད་ཀྱིས་མི་ཤེས་མི་མཐོང་མི་རྟོགས་པ་ལྟར། བྱང་ཆུབ་སེམས་དཔའ་ཡང་འཇིག་རྟེན་པ་དང་འཐུན་པར་མི་ཤེས་མི་མཐོང་མི་རྟོགས་སོ། །བྱང་ཆུབ་སེམས་དཔའ་ཡོངས་སུ་མྱ་ངན་ལས་འདས་པའི་མདོ་སྡེ་ཐོས་ནས།
འཇིག་རྟེན་པས་མི་ཤེས་མི་མཐོང་མི་རྟོགས་པ་དག་བྱང་ཆུབ་སེམས་དཔས་ཤེས་ཤིང་མཐོང་ལ་རྟོགས་སོ། །དེ་ལྟར་དངོས་པོ་དེ་དག་ཤེས་ནས། བདག་འདི་སྙམ་དུ་སེམས་སོ། །བདག་གི་ཇི་ལྟར་ཐབས་གང་གིས་ནན་ཏན་གང་བྱས་པས་ཤེས་པ་དང་མཐོང་བ་དང་རྟོགས་པར་འགྱུར་
སྙམ་སེམས་སོ། །ཡང་འདི་སྙམ་དུ་དེ་ནི་ཤིན་ཏུ་དད་པའི་སེམས་ཀྱིས་ཚུལ་ཁྲིམས་ཡོངས་སུ་དག་པར་བསྲུངས་པ་ལས་ཐོབ་པར་འགྱུར་སྙམ་སེམས་སོ། །རིགས་ཀྱི་བུ་དེའི་ཚེ་ན་བྱང་ཆུབ་སེམས་དཔའ་དེའི་རྒྱུ་དེའི་རྐྱེན་གྱིས་མ་འོངས་པའི་དུས་སུ་གང་ནས་གང་དུ་སྐྱེ་བ་དེ་དང་

དེ་དག་ཏུ་ཚུལ་ཁྲིམས་ཡོངས་སུ་དག་པར་སྲུང་ངོ་། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཡོངས་སུ་དག་པས་ན་གང་ནས་གང་དུ་སྐྱེས་ཀྱང་རྟག་ཏུ་ང་རྒྱལ་དང་ངན་པར་ལྟ་བ་དང་ཐེ་ཙོམ་གྱིས་གླགས་པ་མེད་དེ།
ནམ་དུ་ཡང་དེ་བཞིན་གཤེགས་པ་མཐར་ཡོངས་སུ་མྱ་ངན་ལས་འདས་པར་ཞུགས་སོ་ཞེས་མི་ཟེར་ཏེ། དེ་དག་ནི་བྱང་ཆུབ་སེམས་དཔའ་ཚུལ་ཁྲིམས་ཡོངས་སུ་དག་པར་བསྲུངས་པ་ཞེས་བྱའོ། །དེ་ལྟར་ཚུལ་ཁྲིམས་ཡོངས་སུ་དག་པས་ན་ཏིང་ངེ་འཛིན་ལ་ནན་ཏན་
བྱེད་དོ། །ཏིང་ངེ་འཛིན་ལ་ནན་ཏན་བྱེད་པས་ན་གང་ནས་གང་དུ་སྐྱེ་བ་དེ་དང་དེ་དག་ཏུ་ཡང་དག་པའི་དྲན་པ་མི་ཉམས་སོ། །འདི་ལྟ་སྟེ་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པ་དང་། མདོ་སྡེ་བཅུ་གཉིས་དང་། སངས་རྒྱས་བཅོམ་ལྡན་འདས་རྣམས་
ཀྱི་རྟག་པ་དང་བདེ་བ་དང་བདག་དང་ཡོངས་སུ་དག་པ་དང་། བྱང་ཆུབ་སེམས་དཔའ་ཐམས་ཅད་ཤིན་ཏུ་རྒྱས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལ་གནས་པས་ཐམས་ཅད་ཀྱིས། སངས་རྒྱས་ཀྱི་རང་བཞིན་མཐོང་བ་ལ་སོགས་ཏེ་དངོས་པོ་དེ་དག་མི་བརྗོད་དོ། །
ཏིང་ངེ་འཛིན་ལ་ནན་ཏན་བྱས་པས་སྟོང་པ་བཅུ་གཅིག་ཀྱང་འཐོབ་པར་འགྱུར་ཏེ། དེ་ནི་བྱང་ཆུབ་སེམས་དཔའི་ཏིང་ངེ་འཛིན་ཡོངས་སུ་དག་པ་ལ་ནན་ཏན་བྱེད་པ་ཞེས་བྱའོ། །དེ་ལྟར་ཚུལ་ཁྲིམས་དང་། ཏིང་ངེ་འཛིན་དུ་ལྡན་པར་གྱུར་པས་ཡོངས་སུ་དག་པའི་ཤེས་རབ་ལ་
ནན་ཏན་བྱེད་དོ། །ཤེས་རབ་ལ་ནན་ཏན་བྱས་པས་ན་ཐོག་མ་ནས་ལུས་ཀྱི་ནང་ན་བདག་ཡོད་པར་རམ། བདག་གི་ནང་ན་ལུས་ཡོད་པར་མི་འཛིན་ཏེ་ལུས་དང་། བདག་ལུས་མ་ཡིན། བདག་མ་ཡིན་པར་མི་འཛིན་ཏེ། དེ་ནི་བྱང་ཆུབ་སེམས་དཔའ་ཤེས་རབ་ཡོངས་སུ་
དག་པར་ནན་ཏན་བྱེད་པའོ། །ཤེས་རབ་ལ་ནན་ཏན་བྱས་པས་ཚུལ་ཁྲིམས་བསྲུངས་པ་རྣམས་ཀྱང་ཤིན་ཏུ་བརྟན་པར་གྱུར་ཏོ། །རིགས་ཀྱི་བུ་འདི་ལྟ་སྟེ། དཔེར་ན་རི་རབ་ལྷུན་པོ་ནི་རླུང་རྣམ་པ་བཞིས་བསྐྱོད་མི་ནུས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་

ཡང་དེ་དང་འདྲ་སྟེ། ཕྱིན་ཅི་ལོག་བཞིས་བསྐྱོད་མི་ནུས་སོ། །རིགས་ཀྱི་བུ་བྱང་ཆུབ་སེམས་དཔའ་དེའི་ཚེ་ན་བདག་གིས་ཚུལ་ཁྲིམས་བསྲུངས་པ་རྣམས་ཅིས་ཀྱང་བསྐྱོད་མི་ནུས་པར་ཤེས་སོ་མཐོང་ངོ་རྟོགས་སོ། །དེ་ནི་བྱང་ཆུབ་སེམས་དཔས་ཤེས་པ་དང་མཐོང་བ་རྟོགས་
པ་ཞེས་བྱ་སྟེ། འཇིག་རྟེན་པས་ནི་མ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་ཚུལ་ཁྲིམས་བསྲུངས་པ་རྣམས་ཤིན་ཏུ་བརྟན་ཞིང་མི་གཡོ་བར་མཐོང་བས་འགྱོད་པའི་སེམས་མེད་དེ། འགྱོད་པ་མེད་པས་སེམས་རབ་ཏུ་དགའ་བར་
འགྱུར། རབ་ཏུ་དགའ་བར་གྱུར་པས་སེམས་ཤིན་ཏུ་ཚིམ་པར་འགྱུར་རོ། །ཤིན་ཏུ་ཚིམ་པར་གྱུར་པས་བདེ་བར་འགྱུར། སེམས་རབ་ཏུ་བདེ་བར་གྱུར་པས་མི་གཡོ་བའི་ཏིང་ངེ་འཛིན་འཐོབ་བོ། །མི་གཡོ་བའི་ཏིང་ངེ་འཛིན་འཐོབ་པས་ཤེས་པ་དང་ལྟ་བ་ཡང་
དག་པར་འགྱུར་རོ། །ཤེས་པ་དང་ལྟ་བ་ཡང་དག་པར་གྱུར་པས་འཁོར་བ་ལས་ཡོངས་སུ་སྐྱོའོ། །འཁོར་བ་ལས་སྐྱོ་བས་ན་རྣམ་པར་གྲོལ་བར་འགྱུར་རོ། །རྣམ་པར་གྲོལ་བར་གྱུར་པས་ན་སངས་རྒྱས་ཀྱི་རང་བཞིན་གསལ་བར་མཐོང་སྟེ། དེ་ནི་བྱང་ཆུབ་
སེམས་དཔས་ཤེས་པ་དང་མཐོང་བ་དང་། རྟོགས་པ་ཡིན་གྱི། འཇིག་རྟེན་པས་ཤེས་པ་ནི་མ་ཡིན་ནོ། །རིགས་ཀྱི་བུ་འདི་དག་ནི་འཇིག་རྟེན་པས་ནི་མི་ཤེས་མི་མཐོང་མི་རྟོགས་པ་ཡིན་གྱི། བྱང་ཆུབ་སེམས་དཔས་ནི་ཤེས་སོ་མཐོང་ངོ་རྟོགས་སོ། །འོད་སྲུང་
གིས་ཡང་གསོལ་པ། ཇི་ལྟར་བྱང་ཆུབ་སེམས་དཔའ་ཚུལ་ཁྲིམས་ཡོངས་སུ་དག་པར་ནན་ཏན་བགྱིས་པས་འགྱོད་པའི་སེམས་མ་མཆིས་པ་ནས་སངས་རྒྱས་ཀྱི་རང་བཞིན་གྱི་བར་དུ་གསལ་བར་མཐོང་བ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་
ཀྱི་བུ་འཇིག་རྟེན་གྱི་ཚུལ་ཁྲིམས་ནི་ཡོངས་སུ་དག་པ་ཞེས་མི་བྱའོ། །དེ་ཅིའི་ཕྱིར་ཞེ་ན། འཇིག་རྟེན་གྱི་ཚུལ་ཁྲིམས་ནི་སྲིད་པ་དང་བཅས་པ། རང་བཞིན་གྱིས་མ་ངེས་པ། མཐར་ཕྱིན་པ་མ་ཡིན་ཏེ། སེམས་ཅན་ཐམས་ཅད་ཀྱི་དོན་དུ་རྒྱས་པར་འགྱུར་བ་མ་ཡིན་

པའི་ཕྱིར་ཡོངས་སུ་དག་པ་ཞེས་མི་བྱའོ། །ཡོངས་སུ་དག་པ་མ་ཡིན་པས་ན་འགྱོད་པའི་སེམས་དང་བཅས་སོ། །འགྱོད་པའི་སེམས་དང་བཅས་པས་ན་དགའ་བའི་སེམས་མེད་དོ། །དགའ་བའི་སེམས་མེད་པས་ཚིམ་པ་མེད། ཚིམ་པ་མེད་པས་
བདེ་བ་མེད་དོ། །བདེ་བ་མེད་པས་མི་གཡོ་བའི་ཏིང་ངེ་འཛིན་མེད་དོ། །མི་གཡོ་བའི་ཏིང་ངེ་འཛིན་མེད་པས་ཤེས་པ་དང་ལྟ་བ་ཡང་དག་པ་མེད་དོ། །ཤེས་པ་དང་ལྟ་བ་ཡང་དག་པ་མེད་པས་འཁོར་བ་ལ་སྐྱོ་བ་མེད། འཁོར་བ་ལ་སྐྱོ་བ་མེད་པས་རྣམ་པར་གྲོལ་བར་མི་
འགྱུར། རྣམ་པར་མ་གྲོལ་བས་ན་སངས་རྒྱས་ཀྱི་རང་བཞིན་མི་མཐོང་ངོ་། །སངས་རྒྱས་ཀྱི་རང་བཞིན་མི་མཐོང་བས་ཡོངས་སུ་མྱ་ངན་ལས་འདས་པ་ཆེན་པོ་མི་འཐོབ་སྟེ། དེ་ནི་འཇིག་རྟེན་གྱི་ཚུལ་ཁྲིམས་ཞེས་བྱའི་ཡོངས་སུ་དག་པ་མ་ཡིན་ནོ། །རིགས་ཀྱི་བུ་བྱང་
ཆུབ་སེམས་དཔའ་སེམས་དཔའ་ཆེན་པོའི་ཡོངས་སུ་དག་པའི་ཚུལ་ཁྲིམས་ནི་ཚུལ་ཁྲིམས་ཉིད་ཀྱང་ཚུལ་ཁྲིམས་མ་ཡིན་པ། སྲིད་པ་དང་བཅས་པ་མ་ཡིན་པ་ངེས་པ། མཐར་ཕྱིན་པ། སེམས་ཅན་གྱི་དོན་དུ་འགྱུར་བ་སྟེ། དེ་ནི་བྱང་ཆུབ་སེམས་དཔའི་ཚུལ་ཁྲིམས་
ཡོངས་སུ་དག་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ཡོངས་སུ་དག་པའི་ཚུལ་ཁྲིམས་ལ་འགྱོད་པ་མེད་པའི་སེམས་ཆེད་དུ་མ་བསྐྱེད་ཀྱང་། འགྱོད་པ་མེད་པའི་སེམས་རང་སྐྱེའོ། །རིགས་ཀྱི་བུ་དཔེར་ན་མི་ཞིག་མེ་ལོང་ཐོགས་ན་བཞིན་
ཆེད་དུ་སྣང་བར་མ་བྱས་ཀྱང་བཞིན་རང་འབྱུང་ངོ་། །དཔེར་ན་ཞིང་པས་ཞིང་གཤིན་པ་ལ་ས་བོན་བཏབ་ན་མྱུ་གུ་ཆེད་དུ་མ་བསྐྱེད་ཀྱང་མྱུ་གུ་རང་སྐྱེའོ། །དཔེར་ན་མེ་མར་བཙུགས་ན་མུན་པ་ཆེད་དུ་མེད་པར་མ་བྱས་ཀྱང་མུན་པ་རང་མེད་པར་འགྱུར་རོ། །རིགས་ཀྱི་བུ་བྱང་ཆུབ་སེམས་
དཔའ་སེམས་དཔའ་ཆེན་པོ་ཚུལ་ཁྲིམས་ཡོངས་སུ་དག་པར་བསྲུངས་པས་འགྱོད་པ་མེད་པའི་སེམས་རང་སྐྱེ་བ་ཡང་དེ་དང་འདྲའོ། །ཚུལ་ཁྲིམས་ཡོངས་སུ་དག་པས་རབ་ཏུ་དགའ་བའི་སེམས་ཐོབ་པར་འགྱུར་རོ། །རིགས་ཀྱི་བུ་དཔེར་ན་སྐྱེས་བུ་ངོ་བཞིན་བཟང་པོ་དང་ལྡན་

པ་ཞིག་བདག་གི་བཞིན་མཐོང་ན་རབ་ཏུ་དགའ་བའི་སེམས་སྐྱེའོ། །ཚུལ་ཁྲིམས་ཡོངས་སུ་དག་པ་ཡང་དེ་དང་འདྲའོ། །རིགས་ཀྱི་བུ་ཚུལ་ཁྲིམས་ངན་པ་ཅན་ནི་ཚུལ་ཁྲིམས་ཡོངས་སུ་མ་དག་པས་ན་དགའ་བའི་སེམས་མི་སྐྱེའོ། །དཔེར་ན་བཞིན་མི་སྡུག་པ་ཞིག་བདག་
གི་བཞིན་མཐོང་ན་དགའ་བའི་སེམས་མི་སྐྱེ་བ་ལྟར་ཚུལ་ཁྲིམས་ངན་པ་ཅན་ཡང་དེ་དང་འདྲའོ། །རིགས་ཀྱི་བུ་དཔེར་ན་བུད་མེད་རྫེའུ་ཐོགས་པ་གཉིས་ཤིག་གཅིག་ནི་ཞོའི་བུམ་པ་ཐོགས་ལ། གཅིག་ནི་དར་བའི་བུམ་པ་ཐོགས་ཏེ། གཉིས་ཀ་འགྲོགས་ནས་ཚོང་འདུས་སུ་ཆས་
པ་ལས་ལམ་དུ་རྡེག་འཆོས་ཏེ། བུམ་པ་གཉིས་ཀ་ཆག་ན་གཅིག་ནི་དགའ། གཅིག་ནི་མི་དགའོ། །ཚུལ་ཁྲིམས་དང་ལྡན་པ་དང་། ཚུལ་ཁྲིམས་ཉམས་པ་ཡང་དེ་དང་འདྲའོ། །ཚུལ་ཁྲིམས་ཡོངས་སུ་དག་པ་ནི་སེམས་རབ་ཏུ་དགའ་བར་འགྱུར་རོ། །སེམས་རབ་ཏུ་དགའ་
བས་ན་དེ་འདི་སྙམ་དུ་སེམས་སོ། །སངས་རྒྱས་བཅོམ་ལྡན་འདས་ཀྱིས་ཡོངས་སུ་མྱ་ངན་ལས་འདས་པ་ལས་གང་གིས་ཚུལ་ཁྲིམས་ཡོངས་སུ་དག་པར་བསྲུངས་ན་མྱ་ངན་ལས་འདའ་བར་འགྱུར་རོ་ཞེས་གསུངས་ཏེ། བདག་གིས་ཀྱང་ཚུལ་ཁྲིམས་ཡོངས་སུ་དག་པར་
ནན་ཏན་བྱས་ན་འཐོབ་པར་འགྱུར་རོ་སྙམ་སེམས་ཏེ། དེའི་རྒྱུ་དེའི་རྐྱེན་གྱིས་ན་སེམས་རབ་ཏུ་དགའ་བར་འགྱུར་རོ། །བྱང་ཆུབ་སེམས་དཔའ་འོད་སྲུང་གིས་ཡང་གསོལ་པ། བཅོམ་ལྡན་འདས་དགའ་བ་དང་བདེ་བ་ཞེས་བགྱི་བ་ལ་ཁྱད་པར་ཅི་མཆིས། བཅོམ་ལྡན་
འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཁ་ན་མ་ཐོ་བར་འགྱུར་བའི་སྡིག་པ་མི་བྱེད་པས་ན་དགའ་བ་ཞེས་བྱའོ། །ཡོངས་སུ་དགའ་བའི་སེམས་ཀྱིས་ཚུལ་ཁྲིམས་སྲུང་བ་ནི་བདེ་བ་ཞེས་བྱའོ། །རིགས་ཀྱི་བུ་བྱང་ཆུབ་སེམས་
དཔའ་སེམས་དཔའ་ཆེན་པོས་འཁོར་བ་ཤིན་ཏུ་རྟོགས་པས་དགའ་བ་ཞེས་བྱའོ། །ཡོངས་སུ་མྱ་ངན་ལས་འདས་པ་ཆེན་པོ་ཐོབ་པས་བདེ་བ་ཞེས་བྱའོ། །ཐ་མ་ནི་དགའ་བ་ཞེས་བྱའོ། །མཆོག་ནི་བདེ་བ་ཞེས་བྱའོ། །འཇིག་རྟེན་དང་འདྲེས་པའི་ཆོས་ཡོངས་སུ་སྤངས་པ་ནི་དགའ་

བ་ཞེས་བྱའོ། །མ་འདྲེས་པའི་ཆོས་འཐོབ་པ་ནི་བདེ་བ་ཞེས་བྱའོ། །ཚུལ་ཁྲིམས་ཡོངས་སུ་དག་པས་ན་ལུས་ལས་སུ་རུང་བ་དང་། ངག་རྩུབ་པོའི་སྐྱོན་མེད་དེ། བྱང་ཆུབ་སེམས་དཔའ་དེའི་ཚེ་ལྟ་བ་དང་། ཉན་པ་དང་། སྣོམ་པ་དང་། རོ་མྱོང་བར་བྱེད་པ་
དང་། རེག་བྱ་དང་། ཤེས་པར་བྱེད་པ་ཐམས་ཅད་ལ་ཁ་ན་མ་ཐོ་བར་འགྱུར་བ་མེད་དོ། །ཁ་ན་མ་ཐོ་བར་འགྱུར་བ་མེད་པས་སེམས་རབ་ཏུ་བདེ་བར་འགྱུར་རོ། །སེམས་རབ་ཏུ་བདེ་བར་གྱུར་པས་ན་ཞི་བའི་ཏིང་ངེ་འཛིན་འཐོབ་བོ། །ཞི་བའི་ཏིང་ངེ་འཛིན་ཐོབ་པས་ན་
ཤེས་པ་དང་ལྟ་བ་ཡང་དག་པར་འགྱུར་རོ། །ཤེས་པ་དང་ལྟ་བ་ཡང་དག་པར་གྱུར་པས་འཁོར་བ་ལ་ཡོངས་སུ་སྐྱོའོ། །འཁོར་བ་ལ་ཡོངས་སུ་སྐྱོ་བས་ན་རྣམ་པར་གྲོལ་བར་འགྱུར། རྣམ་པར་གྲོལ་བས་ན་སངས་རྒྱས་ཀྱི་རང་བཞིན་མཐོང་ངོ་། །སངས་རྒྱས་ཀྱི་རང་བཞིན་
མཐོང་བས་ན་ཡོངས་སུ་མྱ་ངན་ལས་འདས་པ་ཆེན་པོ་འཐོབ་བོ། །དེ་དག་ནི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པ་ཡིན་གྱི། འཇིག་རྟེན་གྱི་ཚུལ་ཁྲིམས་ནི་མ་ཡིན་ནོ། །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་
ཡོངས་སུ་དག་པར་བསྲུངས་ན་ཆོས་རྣམ་པ་འདི་ལྔ་གྲོགས་སུ་འགྱུར་རོ། །ལྔ་གང་ཞེ་ན། དད་པ་དང་ལྡན་པ་ཡིན། ཁྲེལ་བ་དང་ལྡན་པ་ཡིན། འཛེམ་པ་དང་ལྡན་པ་ཡིན། དགེ་བའི་བཤེས་གཉེན་དང་ལྡན་པ་ཡིན། ཚུལ་ཁྲིམས་ལ་གུས་པར་བྱེད་པ་ཡིན་ནོ། །
སྒྲིབ་པ་ལྔ་ཡོངས་སུ་སྤངས་པས་ལྟ་བ་རྣམ་པར་དག་པར་འགྱུར་བ་དང་། ལྟ་བ་ལྔ་ཡོངས་སུ་སྤངས་པས་ཐེ་ཙོམ་གྱི་སེམས་མེད་པར་འགྱུར་རོ། །གཞན་ཡང་ཐེ་ཙོམ་ལྔ་ཡོངས་སུ་སྤོང་བར་འགྱུར་ཏེ། ལྔ་གང་ཞེ་ན། སངས་རྒྱས་ལ་ཐེ་ཙོམ་ཟ་བ་དང་། ཆོས་ལ་ཐེ་ཙོམ་ཟ་
བ་དང་། དགེ་འདུན་ལ་ཐེ་ཙོམ་ཟ་བ་དང་། ཚུལ་ཁྲིམས་ལ་ཐེ་ཙོམ་ཟ་བ་དང་། བག་མེད་པ་ལ་ཐེ་ཙོམ་ཟ་བའོ། །བྱང་ཆུབ་སེམས་དཔའ་དེའི་ཚེ་དབང་པོ་ལྔ་ཡང་ཐོབ་པར་འགྱུར་ཏེ། ལྔ་གང་ཞེ་ན། དད་པའི་དབང་པོ་དང་། བརྩོན་འགྲུས་ཀྱི་དབང་པོ་དང་། དྲན་པའི་

དབང་པོ་དང་། ཏིང་ངེ་འཛིན་གྱི་དབང་པོ་དང་། ཤེས་རབ་ཀྱི་དབང་པོའོ། །དབང་པོ་ལྔ་ཐོབ་པས་མྱ་ངན་ལས་འདས་པ་རྣམ་པ་ལྔ་ཡང་འཐོབ་པར་འགྱུར་རོ། །ལྔ་གང་ཞེ་ན། གཟུགས་རྣམ་པར་གྲོལ་བ་ནས། རྣམ་པར་ཤེས་པ་རྣམ་པར་གྲོལ་བའི་བར་དུ་སྟེ། དེ་ནི་བྱང་ཆུབ་
སེམས་དཔའི་ཚུལ་ཁྲིམས་ཡོངས་སུ་དག་པ་ཞེས་བྱའི། འཇིག་རྟེན་གྱི་མ་ཡིན་ནོ། །རིགས་ཀྱི་བུ་དེ་དག་ནི་འཇིག་རྟེན་པས་མི་ཤེས་པ་དང་མི་མཐོང་བ་དང་མི་རྟོགས་པ་སྟེ། བྱང་ཆུབ་སེམས་དཔས་ཤེས་པ་དང་མཐོང་བ་དང་རྟོགས་པ་ཞེས་བྱའོ། །རིགས་ཀྱི་བུ་ཇི་སྟེ་ངའི་ཉེ་གནས་
ལས་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འཆང་ངམ། འཛིན་ཏམ། ཀློག་གམ། འདོན་ཏམ། གླེགས་བམ་དུ་འདྲིའམ། སྟོན་ཅིང་འཆད་པ་གང་ཞིག་ཚུལ་ཁྲིམས་ཉམས་ན་གཞན་གྱིས་བརྙས་ཤིང་སྨོད་དེ། དེ་དག་འདི་སྐད་དུ་གལ་ཏེ་སངས་རྒྱས་
ཀྱིས་དགོངས་པའི་སྙིང་པོ་ཡོངས་སུ་མྱ་ངན་ལས་འདས་པ་ཆེན་པོའི་མདོ་མཐུ་དང་ལྡན་པ་ཞིག་ཡིན་ན། ཅིའི་ཕྱིར་ཚུལ་ཁྲིམས་མནོས་པ་ཉམས་པར་འགྱུར་ཞེས་ཟེར་རོ། །ཅི་སྟེ་གང་ཞིག་མྱ་ངན་ལས་འདས་པའི་མདོ་འཆང་ངམ་འཛིན་པ་ལ་ཚུལ་ཁྲིམས་ཉམས་ན་དེ་ནི་མདོ་སྡེ་
མཐུ་མེད་པར་རིག་པར་བྱ་སྟེ། གལ་ཏེ་མཐུ་མེད་ན་ཀློག་གམ་འདོན་ཀྱང་ཕན་པའི་དོན་དུ་མི་འགྱུར་ཏེ། དེ་ལྟར་མྱ་ངན་ལས་འདས་པའི་མདོ་སྡེ་ལ་བརྙས་སྨད་པས་སེམས་ཅན་ཚད་མེད་མཐའ་ཡས་པ་སྙེད་སེམས་ཅན་དམྱལ་བར་ལྟུང་བར་བྱེད་དོ། །ཅི་སྟེ་མདོ་སྡེ་འདི་ཉིད་འཆང་
ངམ་འཛིན་པ་དེ་ཚུལ་ཁྲིམས་ཉམས་པར་བྱེད་ན་དེ་ནི་སེམས་ཅན་གྱི་སྡིག་པའི་བཤེས་གཉེན་ཡིན་ཏེ། ངའི་ཉེ་གནས་མ་ཡིན་གྱི་བདུད་ཀྱི་འཁོར་ཡིན་ནོ། །གང་ཟག་དེ་ནི་མདོ་སྡེ་འདི་ཉིད་འཆང་ངམ། འཛིན་ཏམ། ཉན་དུ་ཡང་མ་གནང་གི་ཉིས་ན་མ་བཅངས། མ་བཟུང་། མ་
བསྒོམས་ཀྱང་སླའི། ཚུལ་ཁྲིམས་ཉམས་པས་འཆང་ངམ། འཛིན་ཏམ་སྒྲུབ་པར་བྱེད་པ་མ་ཡིན་ནོ། །རིགས་ཀྱི་བུ་ངའི་ཉེ་གནས་ལས་ཡོངས་སུ་མྱ་ངན་ལས་འདས་པའི་མདོ་སྡེ་འཆང་ངམ། འཛིན་ཏམ། ཀློག་གམ། འདོན་ཏམ། གླེགས་བམ་དུ་འདྲི་བའམ། སྟོན་ཅིང་

འཆད་འདོད་ན་ཡང་དག་པའི་ལུས་དང་སེམས་ཀྱིས་བསྒྲུབ་པར་བྱའི། ཉམ་རངས་དང་འཕྱར་བ་དང་འགྲན་ཏོར་གྱིས་ནི་མ་ཡིན་ནོ། །དེ་ལ་ལུས་ལས་བྱུང་བ་ནི་ཉམ་རངས་ཞེས་བྱ། སེམས་ལས་བྱུང་བ་ནི་འཕྱར་བ་ཞེས་བྱའོ། །ཚོལ་བ་དང་བཅས་པའི་
སེམས་ནི་འཕྱར་བ་ཞེས་བྱ། ལུས་ཀྱི་ལས་བྱས་པ་ནི་ཉམ་རངས་ཞེས་བྱའོ། །ཅི་སྟེ་ངའི་ཉེ་གནས་ཚོལ་བ་དང་བཅས། བྱེད་པའི་ལས་དང་བཅས་ན་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་འཆང་ངམ། གཟུང་བར་མི་བྱའོ། །ཅི་སྟེ་དེ་ལྟ་བུ་དང་བཅས་
པས་མདོ་སྡེ་འདི་ཉིད་འཆང་ངམ་འཛིན་པར་བྱེད་ན། གཞན་གྱིས་བརྙས་སྨོད་པར་འགྱུར་ཏེ། དེ་ལ་འདི་སྐད་དུ་ཇི་སྟེ་སངས་རྒྱས་ཀྱི་དགོངས་པའི་སྙིང་པོ་ཡོངས་སུ་མྱ་ངན་ལས་འདས་པའི་མདོ་སྡེ་མཐུ་དང་ལྡན་པ་ཞིག་ཡིན་ན། ཅིའི་ཕྱིར་ཁྱོད་ལ་ཚོལ་བ་དང་བཅས།
བྱེད་པ་དང་བཅས་པར་འགྱུར་ཞེས་ཟེར་རོ། །ཅི་སྟེ་མདོ་སྡེ་འདི་ཉིད་འཆང་བར་བྱེད་པ་དེ་ཚོལ་བ་དང་བཅས། བྱེད་པ་དང་བཅས་ན་དེ་ནི་མདོ་སྡེ་འདི་ཉིད་ལ་མཐུ་མེད་དོ་ཞེས་ཟེར་བར་འགྱུར་རོ། །གལ་ཏེ་མཐུ་མེད་ན་འཆང་ངམ་འཛིན་པར་བྱེད་ཀྱང་ཕན་པའི་དོན་དུ་མི་
འགྱུར་ལ། དེ་ལྟར་མྱ་ངན་ལས་འདས་པའི་མདོ་སྡེ་ལ་བརྙས་སྨད་པས། སེམས་ཅན་ཚད་མེད་པ་སྙེད་སེམས་ཅན་དམྱལ་བར་ལྟུང་བར་བྱེད་དོ། །མདོ་སྡེ་འདི་འཆང་ངམ་འཛིན་པར་བྱེད་པ་དེ་ཚོལ་བ་དང་བཅས། བྱེད་པ་དང་བཅས་ན་དེ་ནི་སེམས་ཅན་གྱི་མི་དགེ་བའི་བཤེས་
གཉེན་ཡིན་ཏེ། ངའི་ཉེ་གནས་མ་ཡིན་གྱི་བདུད་ཀྱི་རིས་ཡིན་ནོ། །གཞན་ཡང་རིགས་ཀྱི་བུ་ངའི་ཉེ་གནས་ལས་ཡོངས་སུ་མྱ་ངན་ལས་འདས་པའི་མདོ་སྡེ་འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། གླེགས་བམ་དུ་འདྲི་བ་དང་། སྟོན་པར་བྱེད་པ་དག་དུས་མ་
ཡིན་པར་བསྟན་པར་མི་བྱ། བརྡ་མི་ཕྲད་པ་ལ་བསྟན་པར་མི་བྱ། གསོལ་བ་མ་བཏབ་པ་ལ་བསྟན་པར་མི་བྱ། བརྙས་པའི་སེམས་དང་བཅས་པས་བསྟན་པར་མི་བྱ། དུས་ཐམས་ཅད་ཀྱི་ཐམས་ཅད་དུ་བཤད་པར་མི་བྱ། བདག་བསྟོད་པའི་ཕྱིར་བསྟན་པར་མི་བྱ། གཞན་

སྨད་པའི་ཕྱིར་བཤད་པར་མི་བྱ། སངས་རྒྱས་ཀྱི་ཆོས་ནུབ་པར་འགྱུར་བར་བཤད་པར་མི་བྱ། འཇིག་རྟེན་གྱི་ཆོས་དར་བར་འགྱུར་བའི་ཕྱིར་བཤད་པར་མི་བྱའོ། །རིགས་ཀྱི་བུ་ངའི་ཉེ་གནས་ལས་མདོ་སྡེ་འདི་འཆང་བ་དང་འཛིན་པ་དག་དུས་མ་ཡིན་པར་སྟོན་པ་ནས་འཇིག་རྟེན་གྱི་
ཆོས་དར་བར་བྱེད་པའི་བར་དུ་སྟོན་ན། གཞན་གྱིས་དཔྱས་ཤིང་སྨོད་པར་འགྱུར་ཏེ། འདི་སྐད་ཅེས་ཟེར་རོ། །སངས་རྒྱས་ཀྱིས་དགོངས་ཏེ་གསུངས་པའི་སྙིང་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་མཐུ་དང་ལྡན་པ་ཞིག་ཡིན་ན། ཅིའི་ཕྱིར་དུས་མ་ཡིན་པ་སྟོན་པ་ནས་འཇིག་
རྟེན་གྱི་ཆོས་དར་བར་བྱེད་པའི་བར་དུ་སྟོན་པར་འགྱུར་རོ་ཞེས་ཟེར་རོ། །གལ་ཏེ་མདོ་སྡེ་འདི་འཛིན་པ་དག་དེ་ལྟ་བུའི་ཚུལ་དུ་སྟོན་ན་མདོ་སྡེ་འདི་ལ་མཐུ་མེད་པར་འཛིན་ཏོ། །ཅི་སྟེ་མཐུ་མེད་ན་བཅངས་སམ་འཛིན་ཀྱང་ཕན་པ་དང་བདེ་བ་དོན་དུ་མི་འགྱུར་ཏེ། དེ་ལྟར་དེ་མྱ་ངན་ལས་འདས་
པའི་མདོ་སྡེ་ལ་བརྙས་སྨད་པས་སེམས་ཅན་ཚད་མེད་པའི་རྣམས་སེམས་ཅན་དམྱལ་བར་ལྟུང་བར་འགྱུར་རོ། །མདོ་སྡེ་འདི་འཆང་ཞིང་འཛིན་པ་དག་དུས་མ་ཡིན་པར་སྟོན་པ་ནས་འཇིག་རྟེན་གྱི་ཆོས་དར་བར་བྱ་བའི་བར་དུ་སྟོན་ན། དེ་ནི་སེམས་ཅན་གྱི་མི་དགེ་བའི་བཤེས་གཉེན་ཡིན་
གྱི། ངའི་ཉེ་གནས་མ་ཡིན་ཏེ། བདུད་ཀྱི་རིས་སུ་གཏོགས་པ་ཡིན་ནོ། །རིགས་ཀྱི་བུ་དེ་ལ་གང་ཞིག་ཡོངས་སུ་མྱ་ངན་ལས་འདས་པའི་མདོ་སྡེ་འཆང་ངམ། འཛིན་ཏམ། སྟོན་ཏམ། སངས་རྒྱས་ཀྱི་རང་བཞིན་སྟོན་ཅིང་འཆད་པ་དང་། དེ་བཞིན་གཤེགས་པས་དགོངས་ཏེ་གསུངས་
པའི་སྙིང་པོ་འཆད་པ་དང་། ཐེག་པ་ཆེན་པོ་སྟོན་པ་དང་། ཤིན་ཏུ་རྒྱས་པའི་མདོ་སྡེ་སྟོན་པ་དང་། ཉན་ཐོས་ཀྱི་ཐེག་པ་སྟོན་པ་དང་། རང་སངས་རྒྱས་ཀྱི་ཐེག་པ་སྟོན་པ་དང་། རྣམ་པར་གྲོལ་བ་སྟོན་པ་དང་། སངས་རྒྱས་ཀྱི་རང་བཞིན་མཐོང་བ་དག་ཐོག་མ་ཁོ་ནར་ལུས་ཡོངས་སུ་དག་པར་
སྦྱང་བར་བྱའོ། །ལུས་ཡོངས་སུ་དག་པས་ན་བརྙས་སྨོད་པ་མེད་དོ། །བརྙས་སྨོད་པ་མེད་པས་སེམས་ཅན་ཚད་མེད་པ་རྣམས་ཡོངས་སུ་མྱ་ངན་ལས་འདས་པའི་མདོ་སྡེ་ལ་ཡོངས་སུ་དག་པའི་དད་པ་སྐྱེའོ། །དད་པའི་སེམས་སྐྱེས་པས་མདོ་སྡེ་འདི་ལ་རིམ་གྲོ་དང་བཀུར་སྟིར་བྱེད་དོ། །

གལ་ཏེ་ཚིག་བཞི་པའི་ཚིགས་སུ་བཅད་པ་གཅིག་གམ། རྐང་པ་གཅིག་གམ། ཚིག་འབྲུ་གཅིག་ཙམ་ཐོས་པར་བྱེད་དེ། ཆོས་བསྟན་པ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བྱེད་ན་གང་ཟག་དེ་ནི་སེམས་ཅན་གྱི་དགེ་བའི་བཤེས་
གཉེན་ཡང་དག་པ་ཡིན་གྱི་མི་དགེ་བའི་བཤེས་གཉེན་མ་ཡིན། ངའི་ཉེ་གནས་ཡིན་གྱི་བདུད་ཀྱི་རིས་མ་ཡིན། དེ་ནི་བྱང་ཆུབ་སེམས་དཔའ་ཞེས་བྱའི། འཇིག་རྟེན་པ་མ་ཡིན་ནོ། །རིགས་ཀྱི་བུ་འདི་དག་ནི་འཇིག་རྟེན་པས་མི་ཤེས་པ་དང་མི་མཐོང་བ་དང་མི་རྟོགས་པ་སྟེ། བྱང་ཆུབ་སེམས་དཔས་
ནི་ཤེས་པ་མཐོང་བ་རྟོགས་པ་ཞེས་བྱའོ། །རིགས་ཀྱི་བུ་གཞན་ཡང་ཇི་ལྟར་ན་འཇིག་རྟེན་ཐམས་ཅད་ཀྱིས་མི་ཤེས་མི་མཐོང་མི་རྟོགས་ལ། བྱང་ཆུབ་སེམས་དཔས་ཤེས་པ་དང་མཐོང་བ་དང་རྟོགས་པ་ཞེ་ན། འདི་ལྟ་སྟེ་དྲན་པར་བྱ་བའི་གནས་དྲུག་གོ། །དྲུག་གང་ཞེ་ན། སངས་རྒྱས་དྲན་པར་བྱ་
བ་དང་། ཆོས་དྲན་པར་བྱ་བ་དང་། དགེ་འདུན་དྲན་པར་བྱ་བ་དང་། བསླབ་ཚིག་དྲན་པར་བྱ་བ་དང་། སྦྱིན་པ་དྲན་པར་བྱ་བ་དང་། ལྷ་དྲན་པར་བྱ་བའོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་རྩ་བཞི་པ། རིགས་ཀྱི་བུ་དེ་ལ་ཇི་ལྟར་ན་སངས་རྒྱས་
དྲན་པར་བྱ་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་
ནི་རྟག་པ། མི་འགྱུར་བ། མི་འཕོ་བ། སྟོབས་བཅུ་དང་མི་འཇིགས་པ་བཞི་དང་ལྡན་པ། སེང་གེ་ཆེན་པོའི་སྒྲ་སྒྲོགས་པ། དགེ་སྦྱོང་ཆེན་པོ། བྲམ་ཟེ་ཆེན་པོ། ཚངས་པ་ཆེན་པོ། མཐར་ཕྱིན་པ། ཕ་རོལ་ཏུ་ཕྱིན་པ་གཞན་གྱིས་མི་ཐུབ་པ། སྤྱི་གཙུག་བལྟར་མི་སྣང་བ། བསྙེངས་
པ་མེད་པ། བག་ཚ་བ་མེད་པ། གཡོ་བ་མེད་པ། གཅིག་པུ་གྲོགས་མེད་པ། མ་བསྟན་པར་རང་གིས་རིག་པ། མྱུར་བའི་ཡེ་ཤེས། ཡེ་ཤེས་ཆེན་པོ། རྣོ་བའི་ཡེ་ཤེས། ཟབ་པའི་ཡེ་ཤེས། རྣམ་པར་གྲོལ་བའི་ཡེ་ཤེས། ཐུན་མོང་བ་མེད་པའི་ཡེ་ཤེས། ཀུན་ཏུ་རྒྱས་པའི་ཡེ་ཤེས།

མཐར་ཕྱིན་པའི་ཡེ་ཤེས། རིན་པོ་ཆེའི་ཡེ་ཤེས་དང་ལྡན་པ། མིའི་ནང་ན་ཁྱུ་མཆོག་གི་རྒྱལ་པོ་ལྟ་བུ། མིའི་ནང་ན་གླང་པོ་ཆེའི་རྒྱལ་པོ་ལྟ་བུ། མིའི་ནང་ན་ཀླུའི་རྒྱལ་པོ་ལྟ་བུ། མིའི་ནང་ན་སྐྱེས་བུ། མིའི་ནང་ན་མེ་ཏོག་པད་མོ་ལྟ་བུ། པུན་ད་རཱི་ཀ་ལྟ་བུ། ཁ་ལོ་སྒྱུར་བ། མིའི་སྟོན་པ།
སྦྱིན་བདག་ཆེན་པོ། ཆོས་ཆེན་པོ་སྟོན་པ། ཆོས་མཁྱེན་པའི་ཕྱིར་ཆོས་ཆེན་པོ་སྟོན་པ། དོན་མཁྱེན་པའི་ཕྱིར་ཆོས་ཆེན་པོ་སྟོན་པ། དུས་མཁྱེན་པའི་ཕྱིར་ཆོས་ཆེན་པོ་སྟོན་པ། ཆོག་ཤེས་པའི་ཕྱིར་ཆོས་ཆེན་པོ་སྟོན་པ། བདག་ཤེས་པའི་ཕྱིར་ཆོས་ཆེན་པོ་སྟོན་པ། འཁོར་ཆེན་པོ་ཤེས་
པའི་ཕྱིར་ཆོས་ཆེན་པོ་སྟོན་པ། སེམས་ཅན་གྱི་རང་བཞིན་རྣམ་པ་ཐ་དད་པ་མཁྱེན་པའི་ཕྱིར་ཆོས་ཆེན་པོ་སྟོན་པ་དབང་པོ་རྣོན་པོ་དང་རྟུལ་པོ་དང་བར་མ་མཁྱེན་པའི་ཕྱིར་ཆོས་ཆེན་པོ་སྟོན་པ། ལམ་དབུ་མ་སྟོན་པའི་ཕྱིར་ཆོས་ཆེན་པོ་སྟོན་པ་ཞེས་བྱའོ། །དེ་ལ་ཇི་ལྟར་ན་དེ་བཞིན་
གཤེགས་པ་ཞེས་བྱ་ཞེ་ན། སྔོན་འདས་པའི་སངས་རྒྱས་རྣམས་ཀྱིས་གསུངས་པ་ལས་མི་འགྱུར་བའི་ཕྱིར་དེ་བཞིན་གཤེགས་པ་ཞེས་བྱའོ། །ཇི་ལྟར་མི་འགྱུར་ཞེ་ན། སྔོན་འདས་པའི་སངས་རྒྱས་རྣམས་ཀྱང་སེམས་ཅན་བསྒྲལ་བའི་ཕྱིར་མདོ་སྡེ་བཅུ་གཉིས་གསུངས་སོ། །
དེ་བཞིན་གཤེགས་པ་ཡང་དེ་དང་འདྲ་བས་ན་དེ་བཞིན་གཤེགས་པ་ཞེས་བྱའོ། །སངས་རྒྱས་བཅོམ་ལྡན་འདས་རྣམས་ནི་ཕ་རོལ་ཏུ་ཕྱིན་པ་དྲུག་དང་། བྱང་ཆུབ་ཀྱི་ཕྱོགས་སུམ་ཅུ་རྩ་བདུན་དང་། སྟོང་པ་བཅུ་གཅིག་ལས་གཤེགས་པས་ན་ཡོངས་སུ་མྱ་ངན་ལས་འདས་པ་ཆེན་
པོར་ཕྱིན་ཏེ། དེ་བཞིན་གཤེགས་པ་ཡང་དེ་དང་འདྲ་བས་ན་སངས་རྒྱས་ལ་དེ་བཞིན་གཤེགས་པ་ཞེས་བྱའོ། །སངས་རྒྱས་བཅོམ་ལྡན་འདས་ནི་སེམས་ཅན་གྱི་ཕྱིར་ཐབས་དེ་ཉིད་ཀྱིས་ཐེག་པ་གསུམ་དུ་བསྟན་ཏེ། སྐུ་ཚེའི་ཚད་ཀྱང་ཚད་མེད་དཔག་ཏུ་མེད་པས་དེ་བཞིན་གཤེགས་
པ་ཡང་དེ་དང་འདྲ་སྟེ། དེ་བས་ན་སངས་རྒྱས་ལ་དེ་བཞིན་གཤེགས་པ་ཞེས་བྱའོ། །དེ་ལ་ཇི་ལྟར་ན་དགྲ་བཅོམ་པ་ཞེ་ན། འཇིག་རྟེན་གྱི་ཆོས་ཐམས་ཅད་ནི་དགྲ་ཞེས་བྱ་སྟེ། སངས་རྒྱས་ཀྱིས་རྣམ་པ་དེ་དག་ཆོམས་པས་ན་དགྲ་བཅོམ་པ་ཞེས་བྱའོ། །བདུད་རྣམ་པ་བཞི་

ནི་བྱང་ཆུབ་སེམས་དཔའི་དགྲ་ཞེས་བྱ་སྟེ། སངས་རྒྱས་བཅོམ་ལྡན་འདས་ཀྱང་བྱང་ཆུབ་སེམས་དཔའ་མཛད་པ་ན། ཐམས་ཅད་མཁྱེན་པའི་ཡེ་ཤེས་ཀྱིས་བདུད་རྣམ་པ་བཞི་བཅོམ་པས་ན་དགྲ་བཅོམ་པ་ཞེས་བྱའོ། །གཞན་ཡང་དགྲ་བཅོམ་པ་ནི་ཡོངས་སུ་སྤངས་
པ་ཞེས་བྱ་སྟེ། བྱང་ཆུབ་སེམས་དཔའི་ཚེ་ན་ཉོན་མོངས་པ་ཚད་མེད་པ་རྣམས་ཡོངས་སུ་སྤངས་པས་ན་དགྲ་བཅོམ་པ་ཞེས་བྱའོ། །གཞན་ཡང་དགྲ་བཅོམ་པ་ནི་འདས་པའི་སངས་རྒྱས་རྣམས་ཀྱི་བདེ་བ་ཞེས་བྱའོ། །སྔོན་བྱང་ཆུབ་སེམས་དཔའ་མཛད་པ་ན་བསྐལ་པ་ཚད་མེད་གྲངས་མེད་པའི་
བར་དུ་སེམས་ཅན་གྱི་ཕྱིར་སྡུག་བསྔལ་རྣམ་པ་སྣ་ཚོགས་མྱོང་ཡང་མི་བདེ་བ་མེད་དེ་རྟག་ཏུ་བདེའོ། །དེ་བཞིན་གཤེགས་པ་ཡང་དེ་དང་འདྲ་བས་ན་དགྲ་བཅོམ་པ་ཞེས་བྱའོ། །གཞན་ཡང་དགྲ་བཅོམ་པ་ཞེས་བྱ་བ་ནི་འཇིག་རྟེན་དུ་བཅས་པ། ལྷ་དང་མི་ཐམས་ཅད་ཀྱིས་ལྷ་རྫས་ཀྱི་མེ་ཏོག་དང་།
ཕྲེང་བ་དང་། རྒྱལ་མཚན་དང་། བ་དན་དང་། རོལ་མོ་རྣམ་པ་སྣ་ཚོགས་ཀྱིས་མཆོད་པས་ན་དགྲ་བཅོམ་པ་ཞེས་བྱའོ། །དེ་ལ་ཇི་ལྟར་ན་ཡང་དག་པར་རྫོགས་པ་ཞེ་ན། ཡང་དག་པ་ཞེས་བྱ་བ་ནི་ཕྱིན་ཅི་མ་ལོག་པའོ། །རྫོགས་པ་ཞེས་བྱ་བ་ནི་ཕྱིན་ཅི་ལོག་བཞི་མངོན་པར་མ་རྟོགས་
པ་མེད་པའོ། །གཞན་ཡང་ཡང་དག་པ་ཞེས་བྱ་བ་ནི་དཀའ་ཐུབ་སྤྱོད་པའོ། །རྫོགས་པ་ཞེས་བྱ་བ་ནི་སྡུག་བསྔལ་སྤྱོད་པའི་རྐྱེན་ཀྱིས་ངེས་པར་སྡུག་བསྔལ་གྱི་འབྲས་བུ་མྱོང་བར་ཤེས་པའོ། །གཞན་ཡང་ཡང་དག་པ་ཞེས་བྱ་བ་ནི་འཇིག་རྟེན་གྱི་དབུ་མའོ། །རྫོགས་པ་ཞེས་བྱ་བ་
ནི་མཐར་ལམ་དབུ་མ་ལ་ནན་ཏན་བྱས་ན་ངེས་པར་བླ་ན་མེད་པ་ཡང་དག་པར་རྫོགས་པར་ཤེས་པའོ། །གཞན་ཡང་ཡང་དག་པ་ནི་བགྲང་དུ་ཡོད་པ། ཚད་གཟུང་དུ་ཡོད་པ། དཔག་ཏུ་ཡོད་པའོ། །རྫོགས་པ་ཞེས་བྱ་བ་ནི་བགྲང་དུ་མེད་པ། ཚད་གཟུང་དུ་མེད་པ། དཔག་ཏུ་
མེད་པ་སྟེ། དེ་བས་ན་སངས་རྒྱས་ལ་ཡང་དག་པར་རྫོགས་པ་ཞེས་བྱའོ། །རིགས་ཀྱི་བུ་ཉན་ཐོས་དང་རང་སངས་རྒྱས་ལ་ཡང་དག་པར་རྫོགས་པ་ཞེས་བྱ་བ་ཡོད་དེ། དེ་ནི་ཡང་དག་པར་རྫོགས་པ་མ་ཡིན་ནོ། །དེ་ཅིའི་ཕྱིར་ཞེ་ན། ཡང་དག་པར་རྫོགས་པ་ནི་ཕུང་པོ་ལྔ་

དང་། །སྐྱེ་མཆེད་བཅུ་གཉིས་དང་། ཁམས་བཅྭ་བརྒྱད་ཤེས་པ་སྟེ། ཉན་ཐོས་དང་རང་སངས་རྒྱས་ཀྱིས་ཀྱང་ཤེས་པས་ཡང་དག་པར་རྫོགས་པ་ཞེས་བྱའོ། །ཅིའི་ཕྱིར་ཡང་དག་པར་རྫོགས་པ་མ་ཡིན་ཞེ་ན། རིགས་ཀྱི་བུ་ཅི་སྟེ་ཐེག་པ་ཆུང་ངུ་གཉིས་ཀྱིས་བསྐལ་པ་ཚད་མེད་
པའི་བར་དུ་གཟུགས་ཀྱི་ཕུང་པོ་གཅིག་པུ་ལ་རྟོག་ཀྱང་རྫོགས་པར་མི་ཤེས་པས། དེའི་ཕྱིར་ཉན་ཐོས་དང་རང་སངས་རྒྱས་ནི་ཡང་དག་པར་རྫོགས་པ་ཞེས་མི་བྱའོ། །དེ་ལ་ཇི་ལྟར་ན་མཁྱེན་པ་དང་ཞབས་སུ་ལྡན་པ་ཞེ་ན། མཁྱེན་པ་ནི་དགེ་བའི་འབྲས་བུ་ཚད་མེད་པ་ཐོབ་པའོ། །
ཞབས་དང་ལྡན་པ་ནི་ཞབས་ཉིད་དོ། །དེ་ལ་དགེ་བའི་འབྲས་བུ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །ཞབས་ཞེས་བྱ་བ་ནི་ཚུལ་ཁྲིམས་དང་ཤེས་རབ་སྟེ། ཚུལ་ཁྲིམས་དང་ཤེས་རབ་ཀྱི་རྐང་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཕྱིན་པས་ན་མཁྱེན་
པ་དང་ཞབས་སུ་ལྡན་པ་ཞེས་བྱའོ། །གཞན་ཡང་མཁྱེན་པ་ནི་རིག་པའོ། །ལྡན་པ་ནི་བཀྲ་ཤིས་སོ། །ཞབས་ནི་འབྲས་བུའོ། །རིགས་ཀྱི་བུ་དེ་དག་ནི་འཇིག་རྟེན་གྱི་དོན་ཞེས་བྱའོ། །རིག་པ་ནི་རྣམ་པར་གྲོལ་བའོ། །བཀྲ་ཤིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
བོ། །འབྲས་བུ་ནི་ཡོངས་སུ་མྱ་ངན་ལས་འདས་པ་ཆེན་པོ་སྟེ། དེ་བས་ན་མཁྱེན་པ་དང་ཞབས་སུ་ལྡན་པ་ཞེས་བྱའོ། །གཞན་ཡང་མཁྱེན་པ་ནི་སྣང་བ་ཞེས་བྱའོ། །ལྡན་པ་ནི་ལས་ཞེས་བྱའོ། །ཞབས་ནི་འབྲས་བུ་ཞེས་བྱ་སྟེ། རིགས་ཀྱི་བུ་དེ་ནི་འཇིག་རྟེན་གྱི་དོན་ཏོ། །སྣང་བ་ཞེས་
བྱ་བ་ནི་བག་ཡོད་པའོ། །ལས་ནི་ཕ་རོལ་ཏུ་ཕྱིན་པ་དྲུག་གོ། །འབྲས་བུ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །གཞན་ཡང་མཁྱེན་པ་ནི་རིག་པ་གསུམ་སྟེ། བྱང་ཆུབ་ཀྱི་རིག་པ་དང་། སངས་རྒྱས་ཀྱི་རིག་པ་དང་། མ་རིག་པའི་རིག་པའོ། །དེ་ལ་བྱང་ཆུབ་ཀྱི་
རིག་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །སངས་རྒྱས་ཀྱི་རིག་པ་ནི་སངས་རྒྱས་ཀྱི་རིག་པ་ཉིད་དོ། །མ་རིག་པའི་རིག་པ་ནི་སྟོང་པ་ཉིད་ཀྱི་མཐར་ཕྱིན་པའོ། །ལྡན་པ་ཞེས་བྱ་བ་ནི་བསྐལ་པ་གྲངས་མེད་པའི་བར་དུ་སེམས་ཅན་གྱི་ཕྱིར་དགེ་བའི་ལས་མང་པོ་བསྒོམས་པའོ། །ཞབས་ཞེས་

བྱ་བ་ནི་སངས་རྒྱས་ཀྱི་རང་བཞིན་གསལ་བར་མཐོང་བ་སྟེ། དེ་བས་ན་མཁྱེན་པ་དང་ཞབས་སུ་ལྡན་པ་ཞེས་བྱའོ། །དེ་ལ་ཇི་ལྟར་ན་བདེ་བར་གཤེགས་པ་ཞེ་ན་བདེ་བ་ནི་མཐོ་བའོ། །གཤེགས་པ་ནི་མི་མཐོ་བ་སྟེ། རིགས་ཀྱི་བུ་དེ་ནི་འཇིག་རྟེན་གྱི་དོན་ཏོ། །མཐོ་བ་ནི་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །མི་མཐོ་བ་ནི་དེ་བཞིན་གཤེགས་པའི་ཐུགས་སོ། །རིགས་ཀྱི་བུ་ཇི་སྟེ་ཐུགས་མཐོ་ན། དེ་བཞིན་གཤེགས་པ་ཞེས་མི་བྱ་སྟེ། དེ་བས་ན་དེ་བཞིན་གཤེགས་པ་ལ་བདེ་བར་གཤེགས་པ་ཞེས་བྱའོ། །གཞན་ཡང་བདེ་བ་ནི་དགེ་བའི་
བཤེས་གཉེན་ནོ། །གཤེགས་པ་ནི་དགེ་བའི་བཤེས་གཉེན་གྱི་འབྲས་བུ་སྟེ། རིགས་ཀྱི་བུ་དེ་ནི་འཇིག་རྟེན་གྱི་དོན་ཏོ། །དགེ་བའི་བཤེས་གཉེན་ནི་སེམས་དང་པོ་བསྐྱེད་པའོ། །འབྲས་བུ་ནི་ཡོངས་སུ་མྱ་ངན་ལས་འདས་པ་ཆེན་པོ་སྟེ། དེ་བཞིན་གཤེགས་པ་ནི་ཐོག་མ་སེམས་
བསྐྱེད་པ་མ་བཏང་བས་ཡོངས་སུ་མྱ་ངན་ལས་འདས་པ་ཆེན་པོ་འཐོབ་པས། དེའི་ཕྱིར་བདེ་བར་གཤེགས་པ་ཞེས་བྱའོ། །གཞན་ཡང་བདེ་བ་ནི་བཟང་པོའོ། །གཤེགས་པ་ནི་ཡོད་པ་སྟེ། རིགས་ཀྱི་བུ་དེ་ནི་འཇིག་རྟེན་གྱི་དོན་ཏོ། །དེ་ལ་བཟང་པོ་ནི་སངས་རྒྱས་ཀྱི་རང་བཞིན་མཐོང་
བའོ། །ཡོད་པ་ནི་མྱ་ངན་ལས་འདས་པ་ཆེན་པོའོ། །རིགས་ཀྱི་བུ་མྱ་ངན་ལས་འདས་པའི་རང་བཞིན་ནི་ཡང་དག་པར་ཡོད་པ་མ་ཡིན་མོད་ཀྱི། སངས་རྒྱས་བཅོམ་ལྡན་འདས་ཀྱིས་འཇིག་རྟེན་གྱི་དབང་དུ་བྱེད་དེ་ཡོད་ཅེས་གསུངས་སོ། །རིགས་ཀྱི་བུ་དཔེར་ན་འཇིག་རྟེན་གྱི་
མི་བུ་མེད་པ་ལ་བུ་ཡོད་དོ་ཞེས་བྱ་བ་དང་། ལམ་མེད་པར་ལམ་ཡོད་དོ་ཞེས་སྨྲས་པ་དང་འདྲ་སྟེ། ཡོངས་སུ་མྱ་ངན་ལས་འདས་པ་ཡང་འཇིག་རྟེན་གྱི་དབང་དུ་བྱས་ནས་ཡོད་དོ་ཞེས་གསུངས་སོ། །སངས་རྒྱས་བཅོམ་ལྡན་འདས་རྣམས་ནི་ཡོངས་སུ་མྱ་ངན་ལས་འདས་པ་
ཆེན་པོ་ལྷུན་གྱིས་གྲུབ་པའི་ཕྱིར་བདེ་བར་གཤེགས་པ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་འཇིག་རྟེན་རིག་པ་ཞེ་ན། རིགས་ཀྱི་བུ་འཇིག་རྟེན་ཞེས་བྱ་བ་ནི་ཕུང་པོ་ལྔའོ། །རིག་པ་ནི་ཤེས་པའོ། །སངས་རྒྱས་བཅོམ་ལྡན་འདས་ནི་ཕུང་པོ་ལྔ་ལ་ཤིན་ཏུ་མཁས་པས་འཇིག་རྟེན་

རིག་པ་ཞེས་བྱའོ། །གཞན་ཡང་འཇིག་རྟེན་ཞེས་བྱ་བ་ནི་འདོད་པ་ལྔའོ། །རིག་པ་ཞེས་བྱ་བ་ནི་མ་ཆགས་པའོ། །འདོད་པ་ལྔ་ལ་ཡོངས་སུ་མ་ཆགས་པའི་ཕྱིར་ཡང་འཇིག་རྟེན་རིག་པ་ཞེས་བྱའོ། །གཞན་ཡང་འཇིག་རྟེན་ཞེས་བྱ་བ་ནི་ཤར་ཕྱོགས་ཀྱི་འཇིག་རྟེན་གྱི་ཁམས་ཚད་མེད་
གྲངས་མེད་དེ། ཉན་ཐོས་དང་རང་སངས་རྒྱས་ཀྱིས་མི་ཤེས་མི་མཐོང་མི་རྟོགས་པ་དག་སངས་རྒྱས་བཅོམ་ལྡན་འདས་ཀྱིས་ནི་མཁྱེན་ཅིང་གཟིགས་ཏེ་རྟོགས་སོ། །དེ་བཞིན་དུ་ལྷོ་དང་། ནུབ་དང་། བྱང་དང་། ཕྱོགས་མཚམས་བཞི་དང་། སྟེང་དང་འོག་གི་འཇིག་རྟེན་གྱི་ཁམས་ཀྱང་དེ་
བཞིན་དུ་རིག་པས་ན་སངས་རྒྱས་བཅོམ་ལྡན་འདས་ནི་འཇིག་རྟེན་རིག་པའོ། །གཞན་ཡང་འཇིག་རྟེན་ཞེས་བྱ་བ་ནི་སྐྱེ་བོ་མ་རབས་ཐམས་ཅད་དོ། །རིག་པ་ཞེས་བྱ་བ་ནི་སྐྱེ་བོ་ཡ་རབས་རྣམས་ཀྱིས་དགེ་བ་དང་སྡིག་པའི་རྒྱུ་དང་འབྲས་བུ་ཤེས་པ་སྟེ། ཉན་ཐོས་དང་རང་སངས་རྒྱས་རྣམས་
ཀྱིས་ཤེས་པ་མ་ཡིན་གྱི་སངས་རྒྱས་ཉག་གཅིག་གིས་མཁྱེན་པས་ན་སངས་རྒྱས་བཅོམ་ལྡན་འདས་ནི་འཇིག་རྟེན་རིག་པའོ། །གཞན་ཡང་འཇིག་རྟེན་ཞེས་བྱ་བ་ནི་པད་མོ་ཞེས་བྱའོ། །རིག་པ་ནི་མི་གོས་པ་ཞེས་ཏེ། རིགས་ཀྱི་བུ་དེ་ནི་འཇིག་རྟེན་གྱི་དོན་ཏོ། །པད་མོ་ཞེས་བྱ་
བ་ནི་དེ་བཞིན་གཤེགས་པའོ། །མི་གོས་པ་ནི་དེ་བཞིན་གཤེགས་པ་ལ་འཇིག་རྟེན་གྱི་ཆོས་བརྒྱད་ཀྱིས་མི་གོས་པའི་ཕྱིར་སངས་རྒྱས་བཅོམ་ལྡན་འདས་ནི་འཇིག་རྟེན་རིག་པ་ཞེས་བྱའོ། །གཞན་ཡང་འཇིག་རྟེན་རིག་པ་ནི་སངས་རྒྱས་དང་བྱང་ཆུབ་སེམས་དཔའ་ལ་འཇིག་རྟེན་རིག་པ་
ཞེས་བྱའོ། །དེ་ཅིའི་ཕྱིར་ཞེ་ན། སངས་རྒྱས་དང་བྱང་ཆུབ་སེམས་དཔའ་ནི་འཇིག་རྟེན་གཟིགས་པའི་ཕྱིར་འཇིག་རྟེན་རིག་པ་ཞེས་བྱའོ། །རིགས་ཀྱི་བུ་དཔེར་ན་ཟས་ཀྱི་རྐྱེན་གྱིས་འཚོ་བར་འགྱུར་བས་ཟས་ལ་འཚོ་བ་ཞེས་བྱ་བ་དང་འདྲ་བར་སངས་རྒྱས་དང་བྱང་ཆུབ་སེམས་དཔའ་ཡང་འཇིག་
རྟེན་གཟིགས་པས་འཇིག་རྟེན་རིག་པ་ཞེས་བྱའོ། །དེ་ལ་ཇི་ལྟར་ན་བླ་ན་མེད་པ་ཞེ་ན། བླ་ན་ཡོད་པ་ནི་གཅོད་པའི་དོན་ཏེ། གཅད་དུ་མེད་པའི་ཕྱིར་བླ་ན་མེད་པའོ། །སངས་རྒྱས་བཅོམ་ལྡན་འདས་ལ་ཉོན་མོངས་པ་མི་མངའ་བའི་ཕྱིར་གཅད་དུ་མེད་དེ། དེ་བས་ན་སངས་རྒྱས་བཅོམ་

ལྡན་འདས་ནི་བླ་ན་མེད་པ་ཞེས་བྱའོ། །གཞན་ཡང་བླ་ན་ཡོད་པ་ཞེས་བྱ་བ་ནི་རྩོད་པ་དང་བཅས་པའོ། །བླ་ན་མེད་པ་ནི་རྩོད་པ་མེད་པ་སྟེ། དེ་བཞིན་གཤེགས་པ་ལ་རྩོད་པ་མེད་པས་སངས་རྒྱས་བཅོམ་ལྡན་འདས་ནི་བླ་ན་མེད་པའོ། །གཞན་ཡང་བླ་ན་ཡོད་པ་ཞེས་བྱ་བ་ནི་
ཚིག་གིས་སུན་དབྱུང་དུ་རུང་བའོ། །བླ་ན་མེད་པ་ནི་ཚིག་གིས་སུན་དབྱུང་དུ་མི་རུང་བ་སྟེ། དེ་བཞིན་གཤེགས་པས་གསུངས་པ་ལ་སེམས་ཅན་ཐམས་ཅད་ཀྱིས་སུན་དབྱུང་དུ་མི་རུང་བས་ན་སངས་རྒྱས་བཅོམ་ལྡན་འདས་ནི་བླ་ན་མེད་པའོ། །གཞན་ཡང་བླ་ན་ཡོད་པ་ཞེས་བྱ་བ་ནི་བླ་ན་ཡོད་པའོ། །
བླ་ན་མེད་པ་ཞེས་བྱ་བ་ནི་བླ་ན་མེད་པ་སྟེ། དུས་གསུམ་གྱི་སངས་རྒྱས་རྣམས་ལ་འདས་པ་མེད་པའི་ཕྱིར་སངས་རྒྱས་བཅོམ་ལྡན་འདས་ནི་བླ་ན་མེད་པའོ། །གཞན་ཡང་བླ་ན་ཡོད་པ་ཞེས་བྱ་བ་ནི་གསར་རྙིང་ངོ་། །སངས་རྒྱས་བཅོམ་ལྡན་འདས་ནི་ཡོངས་སུ་མྱ་ངན་ལས་འདས་པའི་ངོ་བོ་ཉིད་
དུ་གྱུར་པས་གསར་རྙིང་ཞེས་བྱ་བ་མེད་དེ། སངས་རྒྱས་བཅོམ་ལྡན་འདས་ནི་བླ་ན་མེད་པ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་སྐྱེས་བུ་འདུལ་ཞིང་ཁ་ལོ་སྒྱུར་བ་ཞེ་ན། བདག་ཉིད་སྐྱེས་བུ་ཡིན་པས་སྐྱེས་བུ་གཞན་ཡང་འདུལ་ལོ། །རིགས་ཀྱི་བུ་དེ་བཞིན་གཤེགས་པ་ཞེས་བྱ་བ་ནི་ཡང་
དག་པར་ན་སྐྱེས་བུ་མ་ཡིན་སྐྱེས་བུ་མ་ཡིན་པ་ཡང་མ་ཡིན་ཏེ། སྐྱེས་བུ་འདུལ་བའི་ཕྱིར་དེ་བཞིན་གཤེགས་པ་ནི་སྐྱེས་བུ་ཞེས་བྱའོ། །རིགས་ཀྱི་བུ་སྐྱེས་པ་དང་བུད་མེད་གང་ཡང་རུང་། ཆོས་རྣམ་པ་འདི་བཞི་དང་ལྡན་ན་སྐྱེས་བུ་ཞེས་བྱའོ། །བཞི་གང་ཞེ་ན། དགེ་བའི་བཤེས་གཉེན་
ཚོལ་བ་དང་། ཆོས་ཉན་པ་དང་། དོན་སེམས་པ་དང་། སྨྲས་པ་བཞིན་དུ་སྤྱོད་པའོ། །རིགས་ཀྱི་བུ་ཆོས་རྣམ་པ་བཞི་པོ་འདི་དང་ལྡན་པའི་སྐྱེས་པ་ཡང་རུང་། བུད་མེད་ཀྱང་རུང་དེ་ནི་སྐྱེས་བུ་ཞེས་བྱའོ། །རིགས་ཀྱི་བུ་གལ་ཏེ་སྐྱེས་པ་ཡིན་ཡང་ཆོས་རྣམ་པ་འདི་བཞི་དང་མི་ལྡན་ན་
སྐྱེས་བུ་ཞེས་མི་བྱའོ། །དེ་ཅིའི་ཕྱིར་ཞེ་ན། སྐྱེས་པའི་ལུས་ཡིན་མོད་ཀྱི། སྤྱོད་པ་བྱོལ་སོང་དང་འདྲ་སྟེ། དེ་བཞིན་གཤེགས་པ་ནི་ཕོ་མོ་གཉིས་ཀ་འདུལ་བས་སྐྱེས་བུ་འདུལ་ཞིང་ཁ་ལོ་སྒྱུར་བ་ཞེས་བྱའོ། །གཞན་ཡང་རིགས་ཀྱི་བུ་དཔེར་ན་རྟའི་ཁ་ལོ་སྒྱུར་བ་ནི་རྣམ་པ་བཞི་

སྟེ། སྤུ་ལ་རེག་པ་དང་། པགས་པ་ལ་རེག་པ་དང་། ཤ་ལ་རེག་པ་དང་། རུས་པ་ལ་རེག་པ་སྟེ། ཅི་ལ་རེག་པ་བཞིན་དུ་ཁ་ལོ་སྒྱུར་བའི་ཡིད་བཞིན་དུ་འགྲོའོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཆོས་རྣམ་པ་འདི་བཞིས་སེམས་ཅན་རྣམས་འདུལ་ལོ། །གང་
ཞེ་ན། སྐྱེ་བ་བཤད་པས་སངས་རྒྱས་ཀྱི་བཀའ་བཞིན་བྱེད་པ་ནི་དཔེར་ན་སྤུ་ལ་རེག་པ་ཙམ་གྱིས་ཁ་ལོ་སྒྱུར་བའི་ཡིད་བཞིན་དུ་འགྲོ་བ་དང་འདྲ་སྟེ་གཅིག་གོ། །སྐྱེ་བ་དང་རྒ་བའི་ཆོས་བསྟན་པས་སངས་རྒྱས་ཀྱི་བཀའ་བཞིན