Kinh tạng Tây Tạng (Kangyur Đại Học) — 052_མདོ་སྡེ།_ཉ

དེ་བས་ན་ཟླ་བ་ལྟ་བུའི་ཏིང་ངེ་འཛིན་ཅེས་བྱའོ། །རྒྱལ་པོ་ཆེན་པོ་དཔེར་ན་རབ་ཏུ་ཚ་བའི་དུས་ན་སེམས་ཅན་ཐམས་ཅད་རྟག་ཏུ་ཟླ་བའི་འོད་སེམས་སོ། །ཟླ་བའི་འོད་ཀྱིས་ཕོག་ན་ཚ་བ་མེད་པར་འགྱུར་རོ། །དེ་བཞིན་དུ་ཟླ་བ་ལྟ་བུའི་ཏིང་ངེ་

འཛིན་ཀྱང་སེམས་ཅན་གྱི་འདོད་པའི་ཉོན་མོངས་པས་གདུངས་པ་ཐམས་ཅད་མེད་པར་བྱེད་དོ། །རྒྱལ་པོ་ཆེན་པོ་དཔེར་ན་ཟླ་བ་ཉ་བ་ནི་སྐར་མ་མང་པོའི་རྒྱལ་པོ་ལྟ་བུ་སྟེ། བདུད་རྩིའི་རོ་ལྟ་བུར་སེམས་ཅན་ཐམས་ཅད་དགའ་ཞིང་མོས་སོ། །དེ་བཞིན་དུ་ཟླ་བ་ལྟ་བུའི་
ཏིང་ངེ་འཛིན་ཀྱང་དེ་དང་འདྲ་སྟེ། དགེ་བ་ཐམས་ཅད་ཀྱི་རྒྱལ་པོ་བདུད་རྩིའི་རོ་ལྟ་བུ་སྟེ། སེམས་ཅན་ཐམས་ཅད་དགའ་ཞིང་མོས་ཏེ། དེ་བས་ན་ཟླ་བ་ལྟ་བུའི་ཏིང་ངེ་འཛིན་ཅེས་བྱའོ། །རྒྱལ་པོས་སྨྲས་པ། ཁོ་བོས་འདི་སྐད་ཅེས་ཐོས་ཏེ། དེ་བཞིན་གཤེགས་པ་ནི་མི་སྡིག་པ་ཅན་དང་ལྷན་
ཅིག་མི་གནས་མི་འགྲོགས་གཏམ་མི་ཟེར་ཏེ། ཇི་ལྟར་རྒྱ་མཚོར་མི་རོ་ཞག་ཏུ་མི་གནས་པ་དང་། བྱ་ངུར་པ་སྐོམ་པའི་སར་མི་གནས་པ་དང་། བརྒྱ་བྱིན་ལྷའི་དབང་ཕྱུག་ཡི་དགས་དང་ལྷན་ཅིག་མི་གནས་པ་དང་། བྱ་ཀུ་ཤི་ལ་ཤིང་སྐམ་པོའི་སྟེང་དུ་མི་ཉལ་བ་དང་འདྲའོ་ཞེས་ཐོས་ཏེ།
དེ་བཞིན་གཤེགས་པ་ཡང་དེ་དང་འདྲ་ན་བདག་གིས་ཇི་ལྟ་བུར་མཐོང་བར་བྱ། གལ་ཏེ་མཐོང་བར་གྱུར་ན། ཁོ་བོའི་ལུས་སའི་ནང་དུ་མི་ནུབ་བམ། ཁོ་བོས་བལྟས་ན་དེ་བཞིན་གཤེགས་པ་ནི་བལ་གླང་སྨྱོས་པ་དང་། སེང་གེ་དང་སྟག་དང་། སྤྱང་ཀི་དང་མེ་མ་མུར་དང་ཉེ་ཡང་
བླའི། མི་སྡིག་ཅན་དང་ནམ་དུ་ཡང་མི་སྟེན་པ་དང་འདྲའོ་སྙམ་སེམས་ཏེ། བདག་གིས་ཇི་ལྟ་བུའི་སེམས་དང་བཅས་ཏེ་དེ་བཞིན་གཤེགས་པའི་སྤྱན་སྔར་འགྲོ་བར་བྱ། འཚོ་བྱེད་ཀྱིས་སྨྲས་པ། རྒྱལ་པོ་ཆེན་པོ་དཔེར་ན་སྐོམ་གྱིས་གདུངས་པ་ནི་མྱུར་དུ་ཆུ་གཙང་མའི་གན་དུ་
འགྲོའོ། །བཀྲེས་པ་ཟས་འདོད་པ་དང་། འཇིགས་པ་སྐྱབས་འདོད་པ་དང་། ནད་པ་སྨན་འདོད་པ་དང་། ཚ་བ་གྲིབ་མ་འདོད་པ་དང་། གྲང་བ་མེ་འདོད་པ་དང་འདྲ་བར། དེ་ལྟར་རྒྱལ་པོ་སངས་རྒྱས་འདོད་པ་ཡང་དེ་དང་འདྲ་བར་བྱ་བའི་རིགས་སོ། །རྒྱལ་པོ་ཆེན་པོ་དེ་
བཞིན་གཤེགས་པ་ནི་ལོག་སྲེད་ཅན་ལ་ཡང་དམ་པའི་ཆོས་སྟོན་ན། རྒྱལ་པོ་ཆེན་པོ་ལོག་སྲེད་ཅན་མ་ལགས་པ་ལ་ཐུགས་རྗེས་དགོངས་ཤིང་སྐྱབས་མཛད་པ་ལྟ་ཅི་སྨོས། རྒྱལ་པོས་སྨྲས་པ། འཚོ་བྱེད་ཁོ་བོས་སྔོན་འདི་སྐད་ཅེས་ཟེར་བ་ཐོས་ཏེ། ལོག་སྲེད་ཅན་ཞེས་བྱ་བ་ནི་མ་དད་པ།

མི་ཉན་པ། དོན་ཡིད་ལ་མི་བྱེད་པ། དོན་ཡང་མི་རྟོགས་པ་ཡིན་ནོ་ཞེས་ཟེར་ན། དེ་བཞིན་གཤེགས་པ་ཅི་སྟེ་ཆོས་སྟོན་པར་འགྱུར། འཚོ་བྱེད་ཀྱིས་སྨྲས་པ། རྒྱལ་པོ་ཆེན་པོ་དཔེར་ན་མི་ལ་ལ་ཞིག་ནད་ཚབས་པོ་ཆེས་བཏབ་པ་ལ། རྨི་ལམ་ན་ཀ་བ་གཅིག་པའི་ཁང་པར་འདུག་གམ།
མར་དང་སྣུམ་ལ་སོགས་པ་ཟ་ཞིང་ལུས་ལ་ཡང་སྐུད་དམ། ཐལ་བའི་ནང་དུ་ཉལ་ཞིང་ཐལ་བ་ཟ་བའམ། ཤིང་སྐོམ་པོ་རུལ་པ་ལ་འཛེག་གམ། བར་བར་སྤྲེའུ་དང་འགྲོགས་ཤིང་ཉལ་ལམ། འདུག་གམ། ཆུར་བྱིང་ངམ། འདམ་རྫབ་ཏུ་ནུབ་བམ། ཡང་ཐོག་གམ། ཁང་པའམ།
རི་མཐོན་པོའམ། ཤིང་ཁའམ། བལ་གླང་ངམ། རྟའམ། བ་ལང་ངམ། ལུག་གི་ཐོག་ནས་ལྷུང་བའམ། ལུས་ལ་གོས་སྔོན་པོའམ། སེར་པོའམ། དམར་པོའམ། ནག་པོ་གྱོན་ཏེ་གླུ་གར་དང་རྩེད་མོ་བྱེད་པའམ། བྱ་རོག་གམ། སྲིན་བྱའམ། ཝ་ལ་སོགས་པ་མཐོང་བའམ།
སོ་དང་སྐྲ་ལྷུང་བའམ། གཅེར་བུར་ཁྱི་ལ་སྔས་བཅས་ཏེ་ལུད་ཕུང་གི་སྟེང་ན་ཉལ་བའམ། སྔོན་ཤི་བའི་མི་དང་ལྷན་ཅིག་འགྲོགས་ཤིང་འདུག་གམ། ལག་པ་སྦྲེལ་ཞིང་འགྲོ་བའམ། སྦྲུལ་གདུག་པས་གང་བའི་སྟེང་དུ་འབོགས་ཤིང་འགྲོ་བའམ། ཡང་ན་བུད་མེད་སྐྲ་བཤིག་པ་ལ་
ལག་གིས་འཁྱུད་ཅིང་ལྷན་ཅིག་ཉལ་བར་རྨིས་པའམ། ཤིང་ཏ་ལའི་ལོ་མས་གོས་བྱེད་པའམ། བོང་བུས་འདྲེན་པའི་ཤིང་རྟ་ཞིག་ལ་ཞོན་ཏེ། ལྷོ་ཕྱོགས་སུ་འགྲོ་བའམ། དེ་ལྟ་བུ་དག་རྨིས་ནས་ཤིན་ཏུ་མི་དགའ་བས་སེམས་གདུངས་པར་གྱུར་ཏོ། །དེ་ལྟར་
མི་དགའ་བས་གདུངས་པའི་ཕྱིར་ནད་ཀྱང་ཕྱི་ཕྱིར་ན་བར་གྱུར་ཏོ། །ནད་ཕྱི་ཕྱིར་ན་བས་གཉེན་རྣམས་ཀྱིས་སྨན་པ་གཉེར་དུ་བཏང་ངོ་། །གལ་ཏེ་སྨན་པའི་སྟེང་དུ་མངགས་པའི་མི་དེ་ལུས་ཐུང་ངམ། ལུས་ཀྱི་ཡན་ལག་མ་ཚང་ཞིང་དབང་པོ་དང་མི་ལྡན་པའམ། མགོ་
ལ་རྡུལ་ཆགས་པའམ། གོས་རལ་པོ་གྱོན་པའམ། ཤིང་རྟ་ཞིག་པ་ཁྲིད་དེ། སྨན་པ་ལ་འདི་སྐད་དུ་མྱུར་དུ་ཤིང་རྟ་དེ་ལ་འཛེགས་ཞེས་ཟེར་བ་དེའི་ཚེ། སྨན་པ་མཁས་པ་དེས་དེ་ལྟ་བུའི་སུན་མ་དང་། ལྟས་བཀྲ་མི་ཤིས་པ་མཐོང་ནས། ནད་པ་དེ་ནི་ཤིན་ཏུ་གསོ་

དཀའོ་སྙམ་སེམས་སོ། །ཡང་འདི་སྙམ་དུ་དེ་ལྟར་སུན་མ་བཀྲ་མི་ཤིས་པ་ཡིན་མོད་ཀྱི། ཡང་གསོར་རུང་ངམ་མི་རུང་སྙམ་ཉི་མ་བལྟའོ། །དེ་ལ་གལ་ཏེ་ཚེས་བཞི་དང་། དྲུག་དང་། བརྒྱད་དང་། བཅུ་གཉིས་དང་། བཅུ་བཞིའི་ཉི་མ་ལ་ནད་ཀྱིས་བཏབ་ན་གསོ་དཀའོ་སྙམ་
སེམས་སོ། །ཡང་འདི་སྙམ་དུ་སེམས་ཏེ་ཉི་མ་ངན་མོད་ཀྱི་ཡང་གསོར་རུང་ངམ་མི་རུང་སྙམ་སྐར་མ་ལ་བལྟའོ། །དེ་ལ་སྐར་མ་མེ་དང་། གསེར་དང་། སྣར་མ་དང་། གཤིན་རྗེ་དང་། གཤེར་དང་། གང་དང་སྐར་མ་དེ་དག་ལ་ནད་ཀྱིས་བཏབ་ན་གསོ་དཀའོ། །ཡང་འདི་སྙམ་དུ་སྐར་མ་ངན་ཀྱང་
དུས་ལ་བལྟའོ་སྙམ་སྟེ། དེ་ལ་སྟོན་དང་དགུན་དང་། ཉི་མ་ནུབ་པའི་དུས་དང་། ནམ་ཕྱེད་དང་། ཟླ་བ་ནུབ་པའི་དུས་སུ་ནད་ཀྱིས་བཏབ་ན་གསོ་དཀའོ། །ཡང་འདི་སྙམ་དུ་དེ་ལྟར་ལྟས་མང་པོ་དེ་དག་ངན་མོད་ཀྱི། རྟོགས་ཀྱང་སྲིད། མི་རྟོགས་ཀྱང་སྲིད་དེ། ནད་པ་ཉིད་བལྟ་སྟེ་གལ་ཏེ་
བསོད་ནམས་ཡོད་པ་ཞིག་ན་གསོར་རུང་ངོ་། །བསོད་ནམས་མེད་ན་ལྟས་བཟང་ཡང་ཅི་ལ་ཕན་སྙམ་སེམས་སོ། །དེ་སྙམ་དུ་བསམས་ནས། སུན་མ་དང་འགྲོགས་ཏེ་ལམ་དུ་ཞུགས་པ་དང་། ཡང་འདི་སྙམ་དུ་གལ་ཏེ་ནད་པ་དེ་ཚེ་རིང་བའི་ལྟས་ཡོད་ན་གསོར་རུང་ངོ་། །ཚེ་ཐུང་བའི་ལྟས་
དང་ཕྲད་ན་གསོར་མི་རུང་ངོ་སྙམ་བསམས་ནས། ལམ་དུ་བུས་པ་ཆུང་ངུ་གཉིས་གཅིག་ལ་གཅིག་དྲངས་ཏེ་འཐབ་ལ། ཐོར་ཏོ་ནས་བཟུང་ནས་སྐྲ་འབལ་ཞིང་གྱོ་མོ་དང་། རྡོ་དང་། མཚོན་ཆ་དང་། དབྱུག་པ་འཕེན་ཞིང་གཅིག་ལ་གཅིག་རྡེག་པའམ། མེ་ཐོགས་པ་མེ་རང་ཤི་བ་མཐོང་ངམ།
ཤིང་གཅོད་པ་མཐོང་ངམ། མིའི་ལག་ན་ཀོ་བ་ཉེད་ཅིང་ལམ་དུ་འགྲོ་བའམ། ལམ་ན་རྫས་ལུས་པ་མཐོང་ངམ། མི་སྣོད་སྟོང་པ་ཐོགས་པ་མཐོང་ངམ། དགེ་སློང་གཅིག་པུ་གྲོགས་མེད་པར་འགྲོ་བ་མཐོང་ངམ། སྟག་གམ། སྤྱང་ཀིའམ། བྱ་རོག་གམ། སྲིན་བྱའམ། ཝ་ལ་སོགས་
པ་དངོས་པོ་དེ་ལྟ་བུ་དག་མཐོང་ནས། ཡང་འདི་སྙམ་དུ་མངགས་པའི་སུན་མ་ནས། ལམ་དུ་འགྲོ་བའི་བར་དུ་མཐོང་ངོ་ཅོག་ཀུན་ཀྱང་བཀྲ་མི་ཤིས་ན་ནད་པ་དེ་གདོན་མི་ཟ་བར་གསོ་དཀའོ་སྙམ་སེམས་སོ། །ཡང་འདི་སྙམ་དུ་བདག་གལ་ཏེ་མ་སོང་ན་སྨན་པ་མཁས་པ་ཞེས་མི་གྲགས་ལ།

ཅི་སྟེ་སོང་ན་གསོར་མི་རུང་ངོ་སྙམ་སེམས་ཏེ། ཡང་འདི་སྙམ་དུ་བསམས་སོ། །དེ་ལྟ་བུས་ལྟས་མང་པོ་དག་བཀྲ་མི་ཤིས་མོད་ཀྱི། འོན་ཀྱང་ནད་པའི་ཐད་དུ་རྩེ་གཅིག་འགྲོའོ་སྙམ་བསམས་ནས་ལམ་དུ་འགྲོ་བ་ལས་སྒྲ་འདི་དག་ཐོས་ན་མི་རུང་སྟེ། གང་ཞེ་ན། ཤི་བ་དང་སྟོར་བ་དང་།
བྱུང་བ་དང་། ཆག་པ་དང་། ཞིག་པ་དང་གྲུགས་པ་དང་ཤུས་པ་དང་། ལྷུང་བ་དང་། གྲོལ་བ་དང་། ཁུར་ཁྱེར་བ་དང་། ཚིག་པ་དང་མ་འོངས་ཞེས་ཟེར་བ་དེ་དག་ཐོས་ན་གསོ་དཀའ་སྟེ་མགོན་སྐྱབས་མི་ནུས་སོ། །ཡང་ལྷོ་ཕྱོགས་ནས་བྱའི་སྐད་ཐོས་པ་ལ་འདི་ལྟ་སྟེ། བྱ་རོག་དང་སྲིན་བྱ་
དང་སྐེ་ཀའི་སྐད་དང་། ཁྱིའམ། བྱི་བའམ། ཝའམ། རི་བོང་ངམ། ཕག་སྟེ། དེ་དག་གི་སྐད་ཐོས་ན། ཡང་འདི་སྙམ་དུ་ནད་པ་དེ་ནི་ཤིན་ཏུ་གསོ་དཀའོ་སྙམ་སེམས་སོ། །དེ་ནས་ནད་པའི་ཁྱིམ་དུ་ཞུགས་པ་དང་། ནད་པ་ལ་བལྟས་ན། དེ་རེས་འགའ་ནི་གྲང་། རེས་འགའ་ནི་ཚ་
ཞིང་ལྷུ་ཚིགས་ཐམས་ཅད་ལྷང་ལྷང་པོར་ན་སྟེ། མིག་དམར་བ་ལ་མཆི་མ་ཟག་པ་དང་། རྣ་བའི་ནང་ན་སྒྲ་གྲག་པ་དང་། ལྐོག་མ་འགགས་ཏེ་ན་བ་དང་། ལྕེ་གས་པ་དང་། མདོག་རབ་ཏུ་གནག་པ་དང་། མགོ་མི་ཐེག་པ་དང་། ལུས་སྐེམ་ཞིང་རྡུལ་མོད་པ་དང་། བཤང་གཅི་འགགས་
པ་དང་། ལུས་གློ་བུར་དུ་ཚོ་རབ་ཏུ་གྱུར་ཏེ་ཤིན་ཏུ་དཀར་བ་དང་། དམར་བ་དང་། ཚིག་གི་སྒྲ་ཤས་མི་མཉམ་ཞིང་རེས་འགའ་ནི་སྦོམ། རེས་འགའ་ནི་ཕྲ་བ་དང་། ལུས་ཐམས་ཅད་ཁྲ་བོར་གྱུར་ཅིང་ངོ་མཚར་གྱི་ཁ་དོག་སྔོན་པོ་དང་། སེར་པོ་བྱུང་བ་དང་། ཁོང་པ་གང་ཞིང་སྐྲངས་ནས་
སྨྲ་བའི་ཚིག་མི་གསལ་ཏེ། དེ་ལྟ་བུར་གྱུར་པ་མཐོང་ནས་ནད་གཡོག་དེ་ལ་ནད་པ་འདི་སྔོན་གྱི་ཚུལ་ལས་གྱུར་པ་ཅི་ཡོད་ཅེས་དྲིས་སོ། །ནད་གཡོག་དེས་སྨྲས་པ། སྨན་པ་ཆེན་པོ་མི་འདི་ནི་སྔོན་དཀོན་མཆོག་གསུམ་དང་། ལྷ་རྣམས་ལ་དད་ཅིང་བཀུར་སྟི་བྱེད་པ་ལས་ད་ནི་འགྱུར་ཏེ་དད་
པའི་སེམས་མེད་པར་གྱུར་ཏོ། །སྔོན་སྦྱིན་པ་ལ་དགའ་བ་ལས་ད་ནི་འཇུངས་པར་གྱུར་ཏོ། །སྔོན་ལྟོ་ཆུང་བ་ལས་ད་ནི་ལྟོ་ཆེ་བར་གྱུར་ཏོ། །སྔོན་འཇམ་ཞིང་དེས་པ་ལས་ད་ནི་ཁྲོ་ཞིང་ཞེ་སྡང་ཆེ་བར་གྱུར་ཏོ། །སྔོན་སྲི་ཞུ་ཆེ་ཞིང་ཕ་མ་ལ་ངོ་མཚར་བཀུར་སྟི་བྱེད་པ་ལས་ད་ནི་ཕ་མ་ལ་བཀུར་

སྟི་བྱེད་པའི་སེམས་མེད་པར་གྱུར་ཏོ། །སྨན་པས་དེ་སྐད་ཅེས་ཟེར་བ་ཐོས་ནས་དྲུང་དུ་བསྙེན་ཏེ་མནམས་སོ། །དེ་ལ་ཨུད་པ་ལའི་དྲི་བྲོའམ། ཨ་ག་རུ་དང་སྤོས་སྣ་ཚོགས་དང་། སྤོས་བྱིད་ཀ་ཏ་དང་། ཏ་ཀ་ར་དང་ཏ་མ་ལ་དང་གུར་གུམ་དང་ཙན་དན་གྱི་དྲི་བྲོ་བ་དང་། སྲེག་
ཤའི་དྲི་བྲོ་བ་དང་། རྒུན་ཆང་བྲོ་བ་དང་རྒྱུས་པ་དང་། རུས་པ་སྲེགས་པའི་དྲི་ལྟར་མནམ་པ་དང་། ཉ་བྲོ་བ་དང་ངན་སྐྱུགས་བྲོ་བ་སྟེ། དེ་ལྟར་དྲི་ཞིམ་པོ་དང་མནམ་པོ་གང་བྲོ་བ་རིག་ནས་ལུས་ལ་མནམས་ཏེ། ལུས་དར་རམ། མེ་ཏོག་ཀ་པ་ལ་ཤ་ལྟར་མཉེན་ཞིང་འཇམ་པའམ། འོན་ཏེ་རྡོ་བཞིན་
སྲའམ། ཆབ་བྲོམ་བཞིན་དུ་གྲང་ངམ། མེ་བཞིན་དུ་ཚའམ། བྱེ་མ་བཞིན་དུ་རྩུབ་པར་གྱུར་ན། དེ་ནས་སྨན་པ་མཁས་པ་དེས་དེ་ལྟ་བུའི་ལྟས་རྣམ་པ་སྣ་ཚོགས་མཐོང་ནས། ནད་པ་དེ་གདོན་མི་ཟ་བར་འཆི་བར་ཤེས་མོད་ཀྱི། འོན་ཀྱང་མི་འདི་འཆིའོ་ཞེས་པའི་ཚིག་ཆད་པ་མི་སྨྲ་སྟེ།
ནད་གཡོག་ལ་འདི་སྐད་དུ་བདག་དེང་བྲེལ་བ་ཞིག་ཡོད་ཀྱིས་སང་འོང་ངོ་། །ཅི་དང་ཅི་འདོད་པ་མ་དགག་པར་བྱིན་ཅིག་ཅེས་སྨྲས་ནས་ཕྱིར་ཁྱིམ་དུ་སོང་ངོ་། །དེ་ནས་ཡང་འབོད་དུ་འོངས་ན་སུན་མ་ལ་འདི་སྐད་དུ་བདག་གི་ལས་ད་དུང་མ་ཟིན་པའི་སྟེང་དུ་སྨན་ཀྱང་མ་སྦྱར་རོ་ཞེས་ཟེར་ན་མཁས་
པ་ཤེས་རབ་ཅན་གྱིས་ནི་ནད་པ་དེ་གདོན་མི་ཟ་བར་འཆི་བར་རིག་གོ། །རྒྱལ་པོ་ཆེན་པོ་བཅོམ་ལྡན་འདས་ཀྱང་དེ་དང་འདྲ་སྟེ། ལོག་སྲེད་ཅན་དག་གི་དབང་པོ་དང་རང་བཞིན་ཇི་ལྟ་བ་རབ་ཏུ་མཁྱེན་པས་དེ་ལ་ཡང་ཆོས་སྟོན་ཏོ། །དེ་ཅིའི་ཕྱིར་ཞེ་ན། གལ་ཏེ་དེ་དག་ལ་ཆོས་མ་བསྟན་ན་བུས་པ་མ་
རབས་ཐམས་ཅད་འདི་སྐད་དུ་དེ་བཞིན་གཤེགས་པ་ལ་ནི་བྱམས་པ་དང་སྙིང་རྗེ་ཆེན་པོ་མི་མངའོ། །བྱམས་པ་དང་སྙིང་རྗེ་ཆེན་པོ་མངའ་བ་ནི་ཐམས་ཅད་མཁྱེན་པ་ཞེས་བྱ་སྟེ། བྱམས་པ་དང་སྙིང་རྗེ་མེད་ན་ཇི་ལྟར་ན་ཐམས་ཅད་མཁྱེན་པ་ཞེས་སྨྲ་བ་དེ་དག་གི་ཕྱིར་དེ་བཞིན་གཤེགས་པས་ལོག་
སྲེད་ཅན་དག་ལ་ཆོས་སྟོན་ཏོ། །རྒྱལ་པོ་ཆེན་པོ་སངས་རྒྱས་བཅོམ་ལྡན་འདས་ནི་ན་བ་རྣམས་གཟིགས་ན་རྟག་ཏུ་ཆོས་ཀྱི་སྨན་བྱིན་ཏེ། ནད་པས་མི་འཐུང་གི་དེ་བཞིན་གཤེགས་པས་མ་ཉེས་སོ། །རྒྱལ་པོ་ཆེན་པོ་ལོག་སྲེད་ཅན་དག་རྣམ་པར་ཕྱེ་ན་རྣམ་པ་གཉིས་ཏེ། ད་ལྟར་

གྱི་དུས་ན་དགེ་བའི་རྩ་བ་ཐོབ་པ་དང་། ཕྱི་མའི་དུས་སུ་དགེ་བའི་རྩ་བ་ཐོབ་པའོ། །དེ་བཞིན་གཤེགས་པས་ལོག་སྲེད་ཅན་གང་ད་ལྟར་གྱི་དུས་སུ་དགེ་བའི་རྩ་བ་ཐོབ་པ་མཁྱེན་པས་དེ་ལ་ཆོས་སྟོན་ཏོ། །ཕྱི་མའི་དུས་སུ་ཐོབ་པར་འགྱུར་བ་ལ་ཡང་ཆོས་སྟོན་ཏོ། །ད་ལྟར་གྱི་དུས་
སུ་ཕན་པར་མི་འགྱུར་ཡང་ཕྱི་མའི་དུས་ཀྱི་རྒྱུར་འགྱུར་བའི་ཕྱིར། དེ་བཞིན་གཤེགས་པས་ལོག་སྲེད་ཅན་ལ་ཡང་ཆོས་ཀྱི་གཞུང་སྟོན་ཏོ། །ལོག་སྲེད་ཅན་ཞེས་བྱ་བ་ལ་ཡང་རྣམ་པ་གཉིས་ཏེ། དབང་པོ་རྣོན་པོ་དང་དབང་པོ་འབྲིང་པོའོ། །དབང་པོ་རྣོན་པོ་ནི་ད་ལྟར་གྱི་དུས་ན་དགེ་
བའི་རྩ་བ་ཐོབ་པའོ། །དབང་པོ་འབྲིང་པོས་ནི་ཕྱི་མའི་དུས་སུ་འཐོབ་པར་འགྱུར་ཏེ། སངས་རྒྱས་བཅོམ་ལྡན་འདས་ནི་དོན་མེད་པར་ཆོས་མི་སྟོན་ཏོ། །རྒྱལ་པོ་ཆེན་པོ་དཔེར་ན་མི་གཙང་མ་ཞིག་སྣམ་ཕྱི་སར་ལྷུང་ནས་གྲོགས་པོ་མཛའ་བོ་ཞིག་གིས་མཐོང་བ་དང་། སྐྲ་ལས་
བཟུང་སྟེ་ཕྱིར་ཕྱུང་ངོ་། །དེ་བཞིན་དུ་སངས་རྒྱས་བཅོམ་ལྡན་འདས་ཀྱང་སེམས་ཅན་དག་ངན་སོང་གསུམ་དུ་ལྷུང་བར་གཟིགས་ན་ཐབས་ཀྱིས་བསྐྱེད་ཅིང་དབྱུང་བར་མཛད་དོ། །དེ་བས་ན་དེ་བཞིན་གཤེགས་པས་ལོག་སྲེད་ཅན་ཐམས་ཅད་ལ་ཆོས་སྟོན་ཏོ། །རྒྱལ་པོས་འཚོ་
བྱེད་ལ་སྨྲས་པ། གལ་ཏེ་དེ་བཞིན་གཤེགས་པ་ཡང་དག་པར་དེ་ལྟ་བུ་ཡིན་པར་བདེན་ན་ལྟ། སང་ཉི་མ་བཟང་པོ་དང་སྐར་མ་བཟང་པོ་བལྟས་ཏེ་གདོད་འདོང་ངོ་། །འཚོ་བྱེད་ཀྱིས་གསོལ་པ། རྒྱལ་པོ་ཆེན་པོ་དེ་བཞིན་གཤེགས་པའི་ཆོས་ལ་ནི་ཉི་མ་དང་སྐར་མ་བཟང་ངན་ཅེས་བྱ་བ་
མེད་དོ། །རྒྱལ་པོ་ཆེན་པོ་དཔེར་ན་ནད་པ་ཚབས་པོ་ཆེ་ལ་ཡང་ཉི་མ་དང་སྐར་མ་དང་དུས་བཟང་ངན་ཅེས་བྱ་བ་ལྟ་བ་མེད་དེ། སྨན་པ་མཁས་པ་དོན་དུ་གཉེར་རོ། །རྒྱལ་པོ་ཡང་ནད་ཚབས་པོ་ཆེས་བཏབ་པ་དང་འདྲ་སྟེ། སྨན་པ་དེ་བཞིན་གཤེགས་པ་གཉེར་བ་ལ་ཉི་མ་དང་དུས་བཟང་ངན་ལྟ་
བའི་མི་རིགས་སོ། །རྒྱལ་པོ་ཆེན་པོ་དཔེར་ན་ཙན་དན་གྱི་མེ་དང་། ཨེ་རཎྜའི་མེ་ནི་གཉི་ག་ཚིག་པའི་མཚན་ཉིད་དུ་འདྲ་སྟེ་ཐ་དད་པ་མེད་དོ། །ཉི་མ་བཟང་པོ་དང་ངན་པ་ཡང་དེ་དང་འདྲ་སྟེ། གལ་ཏེ་སངས་རྒྱས་ཀྱི་སྤྱན་སྔར་ཕྱིན་ན་སྡིག་པ་ཀུན་འབྱང་བར་འགྱུར་གྱིས། རྒྱལ་པོ་ཆེན་

པོ་དེ་རིང་ཉིད་མྱུར་དུ་གཤེགས་པར་སྨོན་ཏོ། །དེ་ནས་རྒྱལ་པོས་བློན་པོ་བཀྲ་ཤིས་ཞེས་བྱ་བ་བཀུག་ནས་འདི་སྐད་ཅེས་བཀའ་སྩལ་ཏོ། །འདི་ལྟར་རིག་པར་གྱིས་ཤིག །བདག་དེང་སངས་རྒྱས་བཅོམ་ལྡན་འདས་ཀྱི་སྤྱན་སྔར་འགྲོ་ཡིས་མྱུར་དུ་མཆོད་པའི་ཡོ་བྱད་དང་
དགོས་སོ་ཅོག་སྦྱོར་ཅིག །བློན་པོས་གསོལ་པ། རྒྱལ་པོ་ཆེན་པོ་ལེགས་སོ་ལེགས་སོ། །ཡོ་བྱད་ཅི་བཞེད་དོ་འཚལ་ཐམས་ཅད་མཆིས་སོ། །དེ་ནས་རྒྱལ་པོ་མ་སྐྱེས་དགྲ་བཙུན་མོ་དང་བཅས་ཏེ་ཤིང་རྟ་རབ་ཏུ་བརྒྱན་པ་ཁྲི་ཉིས་སྟོང་དང་། བལ་གླང་བཟང་ཞིང་རབ་ཏུ་ཆེ་བ་ལྔ་ཁྲི་ཡང་
ཆས་སོ། །བལ་གླང་དེ་རེ་རེའི་སྟེང་ཡང་མི་གསུམ་གསུམ་ཞོན་ཏེ། གདུགས་དང་བ་དན་དང་མེ་ཏོག་དང་སྤོས་དང་རོལ་མོའི་ཆ་བྱད་ཐོགས་ཏེ། མཆོད་པའི་ཡོ་བྱད་རྣམ་པ་སྣ་ཚོགས་མ་འབྱོར་པ་མེད་དོ། །རྟ་བའི་ཚོགས་ཁྲི་ཕྲག་བཅྭ་བརྒྱད་དང་། ཡུལ་དབུས་འགྱུར་འཆང་ན་གནས་པའི་
མི་ཁྲི་ཕྲག་ལྔ་བཅུ་རྩ་བརྒྱད་སྙེད་ཀྱང་རྒྱལ་པོའི་ཞབས་འབྲིང་དུ་ཆས་སོ། །དེའི་ཚེ་རྩྭ་མཆོག་གི་གྲོང་ཁྱེར་ན་འཁོར་མང་པོ་དཔག་ཚད་བཅུ་གཉིས་ཀྱི་བར་གང་བ་ཀུན་གྱིས་རྒྱང་མ་ནས་རྒྱལ་པོ་མ་སྐྱེས་དགྲ་འཁོར་དང་བཅས་ཏེ་འོང་བ་མཐོང་ངོ་། །དེ་ནས་བཅོམ་ལྡན་འདས་ཀྱིས་འཁོར་མང་
པོ་རྣམས་ལ་བཀའ་སྩལ་པ། སེམས་ཅན་ཐམས་ཅད་ཀྱི་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་དང་ཉེ་བའི་རྒྱུར་གྱུར་པའི་དགེ་བའི་བཤེས་གཉེན་ལས་འདའ་བ་མེད་དོ། །དེ་ཅིའི་ཕྱིར་ཞེ་ན། རྒྱལ་པོ་མ་སྐྱེས་དགྲས་གལ་ཏེ་འཚོ་བྱེད་ཀྱི་ངག་མ་མཉན་ན། ཟླ་བ་ཕྱི་
མ་ཚེས་ཞག་བདུན་ལ་གདོན་མི་ཟ་བར་ཚེའི་དུས་བྱས་ནས་མཚམས་མེད་པའི་སེམས་ཅན་དམྱལ་བར་ལྟུང་ངོ་། །དེ་བས་ན་ཉེ་བའི་རྒྱུར་གྱུར་པ་ནི་དགེ་བའི་བཤེས་གཉེན་ལས་འདའ་བ་མེད་དོ། །རྒྱལ་པོ་མ་སྐྱེས་དགྲ་ལམ་དུ་ཞུགས་པ་ན་ཡང་འདི་སྐད་ཅེས་ཐོས་སོ། །ཡུལ་མཉན་དུ་ཡོད་པའི་
རྒྱལ་པོ་བཻ་དཱུརྱ་ཞེས་བྱ་བ་གྲུར་ཞུགས་ཏེ་རྒྱ་མཚོར་ཞུགས་པ་ཡང་མེས་ཚིག་གོ། །དགེ་སློང་ཀུ་ཀ་རི་གསོན་པོར་སར་ནུབ་སྟེ་མཚམས་མེད་པའི་སེམས་ཅན་དམྱལ་བར་ལྷུང་ངོ་། །སུ་ན་ཙ་ཏ་ཞེས་བྱ་བ་མི་དགེ་བ་རྣམ་པ་སྣ་ཚོགས་བྱས་ནས་སངས་རྒྱས་ཀྱི་སྤྱན་སྔར་ཕྱིན་པ་དང་། སྡིག་པ་ཐམས་

ཅད་བྱང་བར་གྱུར་ཏོ་ཞེས་དེ་སྐད་དུ་སྨྲས་པ་ཐོས་ནས་འཚོ་བྱེད་ལ་སྨྲས་པ། བདག་དེང་དེ་ལྟ་བུའི་ཚིག་རྣམ་པ་གཉིས་ཐོས་མོད་ཀྱི་འོན་ཀྱང་བདེན་ནམ་མི་བདེན་པ་ཡིད་མི་ཆེས་ཀྱིས་འཚོ་བྱེད་ཁྱོད་ཚུར་ཤོག །ཁོ་བོ་དང་བལ་གླང་གཅིག་ལ་ཞོན་པར་དགའོ། །གལ་ཏེ་ཁོ་བོ་མཚམས་མེད་པའི་
སེམས་ཅན་དམྱལ་བར་ལྷུང་ན། ཁྱོད་ཀྱིས་ཁོ་བོ་ལྟུང་བར་མི་འགྱུར་བར་ཟུང་ཤིག །དེ་ཅིའི་ཕྱིར་ཞེ་ན། བདག་སྔོན་འདི་སྐད་དུ་ལམ་ཐོབ་པའི་མི་ནི་སེམས་ཅན་དམྱལ་བར་མི་འགྲོའོ་ཞེས་ཐོས་སོ། །དེ་ནས་བཅོམ་ལྡན་འདས་ཀྱིས་འཁོར་མང་པོ་རྣམས་ལ་བཀའ་སྩལ་པ། རྒྱལ་པོ་ཆེན་པོ་མ་
སྐྱེས་དགྲ་ད་དུང་དུ་ཐེ་ཚོམ་གྱི་སེམས་དང་བཅས་ཀྱིས་དེའི་སེམས་གདོན་མི་ཟ་བར་བྱའོ་ཞེས་གསུངས་སོ། །དེ་ནས་འཁོར་གྱི་དཀྱིལ་འཁོར་དེའི་ནང་ན་བྱང་ཆུབ་སེམས་དཔའ་ཐམས་ཅད་འཛིན་པ་ཞེས་བྱ་བས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བཅོམ་
ལྡན་འདས་ཀྱིས་གསུངས་པ་ལྟར་ཆོས་ཐམས་ཅད་མ་ངེས་པའི་མཚན་ཉིད་དོ། །འདི་ལྟ་སྟེ། གཟུགས་མ་ངེས་པའི་མཚན་ཉིད་ནས་མྱ་ངན་ལས་འདས་པའི་བར་དུ་ཡང་མ་ངེས་པའི་མཚན་ཉིད་དོ་ཞེས་གསུངས་ན། དེ་བཞིན་གཤེགས་པས་དེ་ཅིའི་སླད་དུ་རྒྱལ་པོ་མ་སྐྱེས་དགྲའི་སེམས་ངེས་
པར་མཛད་དོ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །ངས་དེང་ངེས་པར་རྒྱལ་པོ་མ་སྐྱེས་དགྲའི་སེམས་ངེས་པར་མཛད་དོ། །དེ་ཅིའི་ཕྱིར་ཞེ་ན། གང་རྒྱལ་པོའི་ཐེ་ཚོམ་གྱིས་སེམས་གཞིག་ཏུ་རུང་བ་ཞིག་ཡིན་ན། ཆོས་ཐམས་ཅད་ཀྱང་ངེས་པའི་
མཚན་ཉིད་མེད་པ་ཡིན་པར་རིག་པར་བྱ་སྟེ། དེའི་ཕྱིར་ངས་རྒྱལ་པོ་མ་སྐྱེས་དགྲའི་སེམས་ངེས་པར་མཛད་པའི་སེམས་དེ་ཉིད་ངེས་པ་མེད་པ་ཡིན་པར་རིག་པར་བྱའོ། །རིགས་ཀྱི་བུ་གལ་ཏེ་རྒྱལ་པོ་དེའི་སེམས་ངེས་པ་ཞིག་ཡིན་ན། རྒྱལ་པོ་དེའི་མཚམས་མེད་པའི་ཁ་ན་མ་ཐོ་བ་འཇིག་ཏུ་མི་རུང་ངོ་། །ངེས་
པ་མེད་པས་ན་ཁ་ན་མ་ཐོ་བ་དེ་འཇིག་ཏུ་རུང་ངོ་། །དེ་བས་ན་ངས་རྒྱལ་པོ་མ་སྐྱེས་དགྲའི་སེམས་ངེས་པར་མཛད་དོ། །དེ་ནས་རྒྱལ་པོ་ཆེན་པོ་སཱ་ལའི་ཤིང་དྲུང་སངས་རྒྱས་ཀྱི་སྤྱན་སྔར་ཕྱིན་ཏེ། དེ་བཞིན་གཤེགས་པའི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་ལ་བལྟས་ན། གསེར་

གཡའ་དག་པའི་རི་བོ་དང་འདྲ་བར་མཐོང་ངོ་། །དེ་ནས་བཅོམ་ལྡན་འདས་ཀྱིས་དབྱངས་རྣམ་པ་བརྒྱད་ཕྱུང་སྟེ། རྒྱལ་པོ་ཆེན་པོ་ཞེས་བོས་པ་དང་། དེའི་ཚེ་མ་སྐྱེས་དགྲས་ཕན་ཚུན་དུ་བལྟས་ཏེ་འཁོར་མང་པོ་འདིའི་ནང་ན་རྒྱལ་པོ་ཆེན་པོ་ཞེས་བྱ་བ་སུ་ཡིན། བདག་ནི་སྡིག་ལྕི་
བའི་སྟེང་དུ་ཡོན་ཏན་མེད་པ་ཡིན་ཏེ། དེ་བཞིན་གཤེགས་པས་རྒྱལ་པོ་ཆེན་པོ་ཞེས་གསུང་བའི་མི་རིགས་སོ་སྙམ་སེམས་སོ། །དེ་ནས་དེ་བཞིན་གཤེགས་པས་ཡང་རྒྱལ་པོ་ཆེན་པོ་མ་སྐྱེས་དགྲ་ཞེས་བོས་སོ། །དེ་ནས་རྒྱལ་པོས་ཐོས་ནས་རབ་ཏུ་དགའ་བའི་སེམས་སྐྱེས་ཏེ། འདི་སྙམ་དུ་དེ་
བཞིན་གཤེགས་པས་དེང་བདག་བོས་ཏེ་གསུང་བས་ན། དེ་བཞིན་གཤེགས་པ་ནི་སེམས་ཅན་ཐམས་ཅད་ལ་ཐུགས་བརྩེ་བའི་ཐུགས་རྗེ་ཆེན་པོ་ཐམས་ཅད་ལ་ཁྱད་པར་མེད་པར་མཉམ་མོ་སྙམ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་དེང་ཐེ་ཚོམ་གྱི་སེམས་
ལྷག་མ་ཙམ་ཡང་མ་ལུས་པར་དེ་བཞིན་གཤེགས་པ་ནི་སེམས་ཅན་ཐམས་ཅད་ཀྱི་སྟོན་པ་བླ་ན་མེད་པ་ཡང་དག་པར་ལགས་པར་ཤིན་ཏུ་རྟོགས་སོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བྱང་ཆུབ་སེམས་དཔའ་ཐམས་ཅད་འཛིན་ལ་སྨྲས་པ། དེ་བཞིན་གཤེགས་པས་རྒྱལ་པོ་མ་
སྐྱེས་དགྲའི་སེམས་ངེས་པར་མཛད་དོ། །དེ་ནས་རྒྱལ་པོ་མ་སྐྱེས་དགྲས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་བདག་དེང་ཚངས་པའམ་བརྒྱ་བྱིན་ལྷའི་དབང་ཕྱུག་དང་ལྷན་ཅིག་མཆིས་ཤིང་འཚལ་མ་ལྷན་ཅིག་འཚལ་བར་གྱུར་ཀྱང་དགའ་བ་མ་ལགས་ཏེ།
དེ་བཞིན་གཤེགས་པ་དང་མཇལ་ནས་གསུང་གཅིག་གིས་སྨྲས་པས་རབ་ཏུ་དགའ་བར་གྱུར་ཏོ། །དེ་ནས་རྒྱལ་པོ་མ་སྐྱེས་དགྲས་སྔ་ནས་བཤམས་པའི་གདུགས་དང་། བ་དན་དང་མེ་ཏོག་དང་སྤོས་དང་རོལ་མོ་ལ་སོགས་པས་མཆོད་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། གཡས་
ཕྱོགས་སུ་ལན་གསུམ་བསྐོར་ནས་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་རྒྱལ་པོ་མ་སྐྱེས་དགྲ་ལ་བཀའ་སྩལ་པ། རྒྱལ་པོ་ཆེན་པོ་ཁྱོད་ལ་དམ་པའི་ཆོས་ཀྱི་གཞུང་བསྟན་གྱིས་ཤིན་ཏུ་ཡིད་ལ་བྱ་ཞིང་བརྟགས་པར་ཉོན་ཅིག །བུས་པ་མ་རབས་རྟག་ཏུ་སེམས་རྩེ་གཅིག་ཏུ་ལུས་

ལ་རྟག་པའི་དངོས་པོ་རྣམ་པ་ཉི་ཤུ་ཡོད་དོ། །འདི་ལྟ་སྟེ། བདག་གི་ལུས་འདི་ནི་གསོ་བ་གསོག་ལྟ་བུ་སྟེ། ཟག་པ་མེད་པ་མ་ཡིན་པ་དང་། དགེ་བའི་རྩ་བ་རྣམས་མེད་པ་དང་། བདག་གི་འཁོར་བར་འཁོར་བ་འདི་མ་དུལ་བ་དང་། ཤིན་ཏུ་གཡང་སར་ལྷུང་སྟེ་ཀུན་ནས་འཇིགས་པ་དང་། ཐབས་ཇི་ལྟ་བུ་
ཞིག་གིས་སངས་རྒྱས་ཀྱི་རང་བཞིན་མཐོང་བ་དང་། ཇི་ལྟར་ཏིང་ངེ་འཛིན་བསྒོམས་ན་སངས་རྒྱས་ཀྱི་རང་བཞིན་མཐོང་བ་དང་། འཁོར་བ་ནི་རྟག་ཏུ་སྡུག་བསྔལ་བ་སྟེ་རྟག་པ་དང་བདེ་བ་དང་བདག་དང་ཡོངས་སུ་དག་པ་མེད་པ་དང་། མི་ཁོམ་པ་བརྒྱད་སྤང་དཀའ་བ་དང་། འཁོན་དུ་འགྱུར་བའི་དགྲས་ཤིན་ཏུ་
གཙེ་བ་དང་། སྲིད་པ་ལས་ཟློག་པའི་ཆོས་གཅིག་ཙམ་ཡང་མེད་པ་དང་། ངན་སོང་གསུམ་ལས་གྲོལ་བར་མ་གྱུར་པ་དང་། མི་དགེ་བ་ངན་པར་ལྟ་བ་རྣམ་པ་སྣ་ཚོགས་དང་ལྡན་པ་དང་། མཚམས་མེད་པ་ལྔ་ལས་རྒལ་བའི་ཚོགས་མ་བསགས་པ་དང་། འཁོར་བ་ནི་མཐར་ཐུག་པ་མེད་དེ་མཐར་མ་ཕྱིན་
ནོ་ཞེས་བྱ་བ་དང་། ལས་རྣམས་མ་བྱས་ན་འབྲས་བུ་མི་འཐོབ་པ་དང་། བདག་བྱས་པས་འབྲས་བུ་གཞན་གྱིས་མྱོང་བར་མི་འགྱུར་བ་དང་། བདེ་བའི་རྒྱུ་མ་བྱས་ན་བདེ་བའི་འབྲས་བུ་མེད་པ་དང་། ལས་བྱས་ཀྱང་འབྲས་བུ་རྣམས་མི་སྟོར་བ་དང་། མ་རིག་པའི་རྒྱུ་ལས་སྐྱེས་ཏེ་མ་རིག་པའི་རྒྱུས་འཆི་བ་
དང་། འདས་པ་དང་མ་འོངས་པ་དང་ད་ལྟར་རྟག་ཏུ་ལེ་ལོ་སྤྱོད་པ་དང་ཉི་ཤུའོ། །རྒྱལ་པོ་ཆེན་པོ་བུས་པ་མ་རབས་སོ་སོའི་སྐྱེ་བོས་རྟག་ཏུ་ལུས་འདི་ལ་རྟོག་པ་རྣམ་པ་ཉི་ཤུ་པོ་དེ་དག་གིས་བརྟག་གོ། །དེ་ལྟར་བརྟགས་ནས་འཁོར་བ་ལ་མི་དགའ་བར་འགྱུར། འཁོར་བ་ལ་མི་དགའ་བས་ལྷག་མཐོང་
དང་ཞི་གནས་ཐོབ་པར་འགྱུར་རོ། །དེ་ནས་རིམ་གྱིས་སེམས་དང་། སྐྱེ་བའི་མཚན་ཉིད་དང་། གནས་པའི་མཚན་ཉིད་དང་། འགོག་པའི་མཚན་ཉིད་བརྟག་གོ། །རིམ་གྱིས་སེམས་དང་། སྐྱེ་བ་དང་། གནས་པ་དང་། འགོག་པའི་མཚན་ཉིད་རྟོག་པ་ལྟར་ཏིང་ངེ་འཛིན་དང་། ཤེས་རབ་དང་། བརྩོན་
འགྲུས་དང་། ཚུལ་ཁྲིམས་ཀྱང་དེ་བཞིན་ནོ། །སྐྱེ་བ་དང་། གནས་པ་དང་། འགོག་པ་རྟོགས་ནས། སེམས་ཀྱི་མཚན་ཉིད་ནས་ཚུལ་ཁྲིམས་ཀྱི་མཚན་ཉིད་ཀྱི་བར་དུ་རབ་ཏུ་ཤེས་ན་ནམས་ཀྱང་མི་དགེ་བ་མི་བྱེད་དེ་འཆི་བའི་འཇིགས་པ་དང་། ངན་སོང་གསུམ་གྱི་འཇིགས་པ་མེད་དོ། གལ་

ཏེ་སེམས་རྩེ་གཅིག་ཏུ་དངོས་པོ་རྣམ་པ་ཉི་ཤུ་པོ་དེ་དག་ལ་མ་བརྟགས་ན་ལེ་ལོ་དང་དྲེགས་པའི་སེམས་སྐྱེ་སྟེ། མི་དགེ་བ་ཐམས་ཅད་བྱེད་པར་འགྱུར་རོ། །རྒྱལ་པོ་མ་སྐྱེས་དགྲས་གསོལ་པ། ཇི་ལྟར་བཅོམ་ལྡན་འདས་ཀྱིས་གསུངས་པའི་དོན་བདག་གིས་འཚལ་བ་ལྟར་ན།
བདག་སྔོན་དངོས་པོ་རྣམ་པ་ཉི་ཤུ་པོ་དེ་དག་ལ་མ་བརྟགས་པས་མི་དགེ་བ་མང་པོ་བགྱིས་སོ། །མི་དགེ་བ་མང་པོ་བགྱིས་པས་འཆི་བའི་འཇིགས་པ་དང་ངན་སོང་གསུམ་གྱི་འཇིགས་པ་མཆིས་པར་གྱུར་ཏོ། །བཅོམ་ལྡན་འདས་བདག་གིས་བདག་ལ་འཁུས་ཏེ། སྡིག་ལྕི་བ་འདི་ལྟ་བུ་བགྱིས་
སོ། །ཡབ་རྒྱལ་པོ་ནོངས་པ་མ་མཆིས་པར་བཀུམ་མོ། །དངོས་པོ་ཉི་ཤུ་པོ་དེ་དག་རྟོགས་ཀྱང་རུང་། མ་རྟོགས་ཀྱང་རུང་སྟེ། གདོན་མི་འཚལ་བར་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཆོས་
ཐམས་ཅད་ཀྱི་རང་བཞིན་དང་མཚན་ཉིད་ནི་མི་རྟག་པ་དང་མ་ངེས་པ་ཡིན་ན་ཅི་སྟེ་རྒྱལ་པོ་ཁྱོད་གདོན་མི་ཟ་བར་སེམས་ཅན་དམྱལ་བར་ལྟུང་བར་འགྱུར་ཞེས་སྨྲ། རྒྱལ་པོ་མ་སྐྱེས་དགྲས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་ཆོས་ཐམས་ཅད་མ་ངེས་པའི་མཚན་
ཉིད་ལགས་ན། བདག་གིས་བསད་པའི་ཁ་ན་མ་ཐོ་བ་ཡང་མ་ངེས་པ་ལགས་སམ། གལ་ཏེ་བསད་པ་ངེས་པ་ཞིག་ལགས་ན་ཆོས་ཐམས་ཅད་ཀྱང་མ་ངེས་པ་མ་ལགས་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ལེགས་སོ་ལེགས་སོ། །སངས་རྒྱས་
བཅོམ་ལྡན་འདས་ཀྱིས་ཀྱང་ཆོས་ཐམས་ཅད་མ་ངེས་པའི་མཚན་ཉིད་དོ་ཞེས་གསུངས་ལ། རྒྱལ་པོ་ཉིད་ཀྱང་བསད་པ་ནི་མ་ངེས་པར་ཤེས་ཏེ། དེ་བས་ན་བསད་པ་ནི་མ་ངེས་པའི་མཚན་ཉིད་ཡིན་པར་རིག་པར་བྱའོ། །རྒྱལ་པོ་ཆེན་པོ་ཇི་ལྟར་ཁྱོད་ཀྱིས་སྨྲས་པ་ལྟར་ཡབ་རྒྱལ་པོ་ཉེས་པ་མེད་པར་
བསད་དོ་ཞེས་བྱ་བ་དེ། དེ་ལ་ཕ་ཞེས་བྱ་བ་གང་ཡིན། སེམས་ཅན་གྱི་ཕུང་པོ་ལྔ་ལ་ཕའོ་ཞེས་འདུ་ཤེས་བསྐྱེད་དེ་ཐ་སྙད་དུ་བཏགས་པ་ཙམ་དུ་ཟད་ན། སྐྱེ་མཆེད་བཅུ་གཉིས་དང་། ཁམས་བཅྭ་བརྒྱད་ལ་ཕ་ཞེས་བྱ་བ་གང་ཡིན། གལ་ཏེ་གཟུགས་ཕ་ཡིན་ན་ཕུང་པོ་བཞི་མ་གཏོགས་སོ། །

གལ་ཏེ་ཕུང་པོ་བཞི་ཕ་ཡིན་ན་གཟུགས་ཀྱང་མ་གཏོགས་སོ། །གལ་ཏེ་གཟུགས་དང་གཟུགས་མ་ཡིན་པ་འདུས་པ་ལས་ཕར་གྱུར་པ་དེ་ནི་གནས་མ་ཡིན་ནོ། །དེ་ཅིའི་ཕྱིར་ཞེ་ན། གཟུགས་དང་གཟུགས་མ་ཡིན་པ་རང་བཞིན་གྱིས་བསྡུར་མི་རུང་བའི་ཕྱིར་རོ། །རྒྱལ་པོ་ཆེན་པོ་སེམས་ཅན་
མ་རབས་ནི་གཟུགས་ཀྱི་ཕུང་པོ་ལ་ལོག་པར་ཕར་འདུ་ཤེས་བསྐྱེད་དེ། དེ་ལྟར་གཟུགས་ཀྱི་ཕུང་པོ་དེ་ཡང་གསད་དུ་རུང་བ་མ་ཡིན་ནོ། །དེ་ཅིའི་ཕྱིར་ཞེ་ན། གཟུགས་ལ་རྣམ་པ་བཅུ་སྟེ་རྣམ་པ་བཅུ་པོ་དེ་དག་ལ་གཟུགས་གཅིག་པུ་ནི་བལྟར་རུང་། གཟུང་དུ་རུང་། བཙལ་དུ་རུང་། དཔག་ཏུ་
རུང་། ཁྲིད་དུ་རུང་། བཅིང་དུ་རུང་སྟེ། དེ་ལྟར་བལྟ་བ་དང་བཅིང་དུ་ཡང་རུང་ཡང་རང་བཞིན་གྱིས་མི་གནས་སོ། །དེ་ལྟར་མི་གནས་པས་བལྟར་མེད། གཟུང་དུ་མེད། གཞལ་དུ་མེད། བཀྲིར་མེད། བཅིང་དུ་མེད་དོ། །གཟུགས་ཀྱི་མཚན་ཉིད་དེ་ལྟར་བས་ན་ཇི་ལྟར་གསད་དུ་རུང་། གལ་ཏེ་གཟུགས་
ཕ་ཡིན་ཏེ། གསད་དུ་རུང་གནོད་པར་བྱར་རུང་སྟེ་སྡིག་པ་སྨིན་པར་འགྱུར་ན། ལྷག་མ་དགུ་མ་གཏོགས་པར་འགྱུར་རོ། །ཅི་སྟེ་དགུ་མ་གཏོགས་ན་ཁ་ན་མ་ཐོ་བའི་སྡིག་ཀྱང་མེད་དོ། །རྒྱལ་པོ་ཆེན་པོ་གཟུགས་ལ་རྣམ་པ་གསུམ་སྟེ། འདས་པ་དང་། མ་འོངས་པ་དང་། ད་ལྟར་གྱིའོ། །འདས་པ་དང་།
ད་ལྟར་གྱི་ནི་གསད་དུ་མི་རུང་ངོ་། །དེ་ཅིའི་ཕྱིར་ཞེ་ན། འདས་པ་ནི་སྔར་འདས་པའི་ཕྱིར་རོ། །ད་ལྟར་གྱི་ནི་སྐད་ཅིག་སྐད་ཅིག་མར་འགོག་པའི་ཕྱིར་རོ། །མ་འོངས་པ་དགག་པའི་ཕྱིར་གསོད་པ་ཞེས་བྱ་སྟེ། དེ་ལྟར་གཟུགས་རྣམ་པ་གཅིག་ལས། ལ་ལ་ནི་གསད་དུ་རུང་། ལ་ལ་ནི་གསད་དུ་མེད་དོ། །
གསད་དུ་ཡོད་པ་དང་གསད་དུ་མེད་པས་ན་གཟུགས་ལ་ངེས་པ་མེད་དོ། །དེ་ལྟར་ན་གཟུགས་ལ་ངེས་པ་མེད་པས་གསོད་པ་ཡང་ངེས་པ་མེད་དོ། །གསོད་པ་ལ་ངེས་པ་མེད་པས་རྣམ་པར་སྨིན་པ་ལ་ཡང་ངེས་པ་མེད་ན་ཅི་སྟེ་གདོན་མི་ཟ་བར་སེམས་ཅན་དམྱལ་བར་ལྟུང་ཞེས་སྨྲ། རྒྱལ་པོ་ཆེན་པོ་
སེམས་ཅན་ཐམས་ཅད་སྡིག་པའི་ལས་བྱེད་དོ་ཅོག་ལ་རྣམ་པ་གཉིས་ཏེ། ཡང་བ་དང་ལྕི་བའོ། །དེ་ལ་ཡིད་དང་ངག་གིས་བྱས་པ་ནི་ཡང་བའོ། །ལུས་དང་ངག་དང་སེམས་དང་ཡིད་ཀྱིས་བྱས་པ་ནི་ལྕི་བའོ། །རྒྱལ་པོ་ཆེན་པོ་སེམས་ཀྱིས་བསམས། ངག་གིས་བརྗོད་དེ་ལུས་ཀྱིས་མ་བྱས་ན་བྱས་

སོ་ཅོག་གི་རྣམ་པར་སྨིན་པ་ཡང་བའོ། །རྒྱལ་པོ་ཆེན་པོས་སྔོན་སོད་ཅིག་ཅེས་ནི་མ་བསྒོའི། རྐང་པ་ཆོད་ཅིག་ཅེས་བསྒོ་ལ། རྒྱལ་པོ་ཆེན་པོས་གལ་ཏེ་འགྲེང་སྟེ། བློན་པོ་ལ་རྒྱལ་པོའི་མགོ་ཆོད་ཅིག་ཅེས་བསྒོ་བ་ལ་འདུག་པའི་ཚེ་གདོད་བཅད་ན་འོན་ཀྱང་སྡིག་པར་མི་འགྱུར་ན། རྒྱལ་པོས་
མ་བསྒོ་བར་སྡིག་པར་འགྱུར་བ་ལྟ་ཅི་སྨོས། གལ་ཏེ་རྒྱལ་པོས་སྡིག་ཐོབ་ན་སངས་རྒྱས་བཅོམ་ལྡན་འདས་ཀྱང་སྡིག་འཐོབ་བོ། དེ་ཅིའི་ཕྱིར་ཞེ་ན། ཁྱོད་ཀྱི་ཕ་རྒྱལ་པོ་གཟུགས་ཅན་སྙིང་པོ་རྟག་ཏུ་སངས་རྒྱས་ལ་དགེ་བའི་རྩ་བ་བསྐྲུན་ཏེ་དེའི་ཕྱིར་རྒྱལ་པོའི་ཐབས་ཐོབ་བོ། །གལ་ཏེ་སངས་རྒྱས་
བཅོམ་ལྡན་འདས་ཀྱིས་མཆོད་པ་མ་བཞེས་ན་རྒྱལ་པོར་མི་འགྱུར་རོ། །གལ་ཏེ་རྒྱལ་པོར་མ་གྱུར་ན་ཁྱོད་ཀྱིས་ཡུལ་སྲིད་ཀྱི་ཕྱིར་རྒྱལ་པོ་གསད་དུ་མེད་དོ། །ཅི་སྟེ་ཁྱོད་ཀྱིས་ཕ་བསད་པས་སྡིག་པར་འགྱུར་བ་ཞིག་ཡིན་ན། ང་ལ་སོགས་པ་སངས་རྒྱས་བཅོམ་ལྡན་འདས་རྣམས་ཀྱང་སྡིག་པ་ཐོབ་
པའི་རིགས་སོ། །གལ་ཏེ་སངས་རྒྱས་བཅོམ་ལྡན་འདས་རྣམས་ལ་སྡིག་པར་མི་འགྱུར་ན། ཁྱོད་གཅིག་པུ་ཅི་སྟེ་སྡིག་པ་ཐོབ་པར་འགྱུར། རྒྱལ་པོ་ཆེན་པོ་རྒྱལ་པོ་གཟུགས་ཅན་སྙིང་པོ་སྔོན་ཕྱི་བོ་ལའི་རི་ལ་རྒྱུ་ཞིང་རི་དགས་ཤོར་དུ་ཆས་པ་ལས་དབྱེ་དགོན་པ་ཀུན་ཏུ་བྱུགས་ན་ཅི་ཡང་མ་རྙེད་དེ་དྲང་སྲོང་མངོན་
པར་ཤེས་པ་ལྔ་དང་ལྡན་པ་གཅིག་ཅིག་མཐོང་ངོ་། །མཐོང་ནས་ཞེ་སྡང་གི་སེམས་སྐྱེས་ཏེ། དེང་རི་དགས་ཤོར་བ་ལས་ཅི་ཡང་མ་རྙེད་པ་ནི་མི་འདིའི་ཕྱིར་རོ་སྙམ་ནས་རི་ལས་དེད་དེ་གཡོག་རྣམས་ལ་སོད་ཅིག་ཅེས་བསྒོའོ། །དྲང་སྲོང་དེའི་ཚེའི་དུས་བྱེད་པ་ན་ཁྲོ་བའི་སེམས་སྐྱེས་པས་རྫུ་འཕྲུལ་སྟོར་ཏེ། ཡི་
དམ་འདི་སྐད་དུ་ང་ཉེས་པ་མེད་པར་ཁྱོད་ཀྱིས་ཡིད་དང་ངག་གིས་ནན་གྱིས་བསད་པ་ལྟར་མ་འོངས་པའི་དུས་ན་ངས་ཀྱང་འདི་ལྟར་ཡིད་དང་ངག་གིས་ཁྱོད་བསད་དོ་ཞེས་དམ་བཅས་སོ། །དེའི་ཚེ་རྒྱལ་པོས་ཐོས་ནས་འགྱོད་པའི་སེམས་སྐྱེས་ཏེ་རོ་ལ་མཆོད་པ་བྱས་སོ། །རྒྱལ་པོ་དེ་དེ་ལྟར་བྱས་པས་ཉེས་པ་ཡང་
ཡང་བར་གྱུར་ཏེ་སེམས་ཅན་དམྱལ་བར་མ་ལྟུང་ན། རྒྱལ་པོས་ནི་དེ་ལྟར་མ་བྱས་པར་སེམས་ཅན་དམྱལ་བའི་འབྲས་བུ་སྨིན་པ་ལྟ་ཅི་སྨོས། སྔོན་རྒྱལ་པོ་གཟུགས་ཅན་སྙིང་པོ་བདག་གིས་བྱས་པས་བདག་མྱོང་བ་ཡིན་ན་ཅི་སྟེ་རྒྱལ་པོས་གསོད་པའི་སྡིག་འཐོབ་པར་འགྱུར། ཇི་ལྟར་རྒྱལ་པོས་ཕ་

རྒྱལ་པོ་ཉེས་པ་མེད་དོ་ཞེས་བྱ་བ་དེ་ཇི་ལྟར་ན་ཉེས་པ་མེད་ཅེས་བྱར་རུང་། གང་སྡིག་པ་དང་བཅས་པ་ནི་སྡིག་པའི་འབྲས་བུ་རྣམ་པར་སྨིན་ནོ། །གང་དགེ་བའི་ལས་བྱེད་པ་ནི་སྡིག་པའི་ལས་རྣམ་པར་སྨིན་པ་ཡང་མེད་དོ། །ཁྱོད་ཀྱི་ཕ་རྒྱལ་པོ་གལ་ཏེ་སྡིག་པ་མེད་པ་ཞིག་ན་ཅི་སྟེ་ལས་རྣམ་པར་སྨིན་པར་འགྱུར།
གཟུགས་ཅན་སྙིང་པོ་ད་ལྟར་གྱི་དུས་སུ་དགེ་བའི་འབྲས་བུ་ཐོབ་ལ་མི་དགེ་བའི་འབྲས་བུ་ཡང་ཐོབ་སྟེ། དེའི་ཕྱིར་རྒྱལ་པོ་སྔ་མ་ནི་མ་ངེས་པའོ། །དེ་ལྟར་མ་ངེས་པས་ན་བསད་པ་ཡང་མ་ངེས་སོ། །བསད་པ་མ་ངེས་པ་ཡིན་ན་ཅི་སྟེ་ངེས་པར་སེམས་ཅན་དམྱལ་བར་ལྟུང་ངོ་ཞེས་སྨྲ། སེམས་ཅན་རྣམས་ནི་མྱོས་པ་
དང་བསད་པ་ལ་རྣམ་པ་བཞི་སྟེ། འདོད་པས་མྱོས་པ་དང་། སྨན་གྱིས་མྱོས་པ་དང་། སྔགས་ཀྱིས་མྱོས་པ་དང་། སྔོན་གྱི་ལས་ཀྱི་རྐྱེན་གྱིས་མྱོས་པའོ། །རྒྱལ་པོ་ཆེན་པོ་ངའི་ཉེ་གནས་ཀྱི་ནང་ན་ཡང་མྱོས་པ་བཞི་པོ་དང་བཅས་པ་ཡོད་དེ་མི་དགེ་བ་མང་དུ་བྱས་ཀྱང་དེ་ཚུལ་ཁྲིམས་བཤིག་པ་ཡིན་ནོ་ཞེས་ལུང་མི་སྟོན་ཏོ། །
དེ་དག་གིས་ཅི་བྱས་ཀྱང་ངན་སོང་གསུམ་དུ་མི་འགྲོ་ལ། གལ་ཏེ་ཕྱིར་དྲན་པར་གྱུར་ན་ཚུལ་ཁྲིམས་ཉམས་པ་ཞེས་མི་བྱའོ། །རྒྱལ་པོ་ཡང་སྲིད་དང་ཡུལ་འདོད་པའི་ཕྱིར་རྒྱལ་པོ་ཕ་བསད་པ་ནི་འདོད་པས་མྱོས་པའི་སེམས་ཀྱིས་བྱས་པ་ཡིན་ན་ཅི་སྟེ་སྡིག་པར་འགྱུར། རྒྱལ་པོ་ཆེན་པོ་དཔེར་ན་མི་ཞིག་ཆང་གིས་མྱོས་
ནས་མ་བསད་དོ། །སངས་པར་གྱུར་པ་དང་རབ་ཏུ་འགྱོད་པའི་སེམས་སྐྱེས་ན་ལས་དེ་ནི་རྣམ་པར་སྨིན་པ་མ་ཡིན་པར་རིག་པར་བྱའོ། །རྒྱལ་པོ་ཡང་འདོད་པས་མྱོས་པའི་ཕྱིར་བྱས་ཀྱི། དྲན་བཞིན་དུ་བྱས་པ་ནི་མ་ཡིན་ནོ། །དེ་ལྟར་དྲན་བཞིན་དུ་བྱས་པ་མ་ཡིན་ན་ཅི་སྟེ་ཁ་ན་མ་ཐོ་བའི་སྡིག་འཐོབ་པར་འགྱུར། རྒྱལ་པོ་
ཆེན་པོ་དཔེར་ན་སྒྱུ་མ་མཁན་གྱིས་ལམ་གྱི་བཞི་མདོར་སྒྱུ་མའི་སྐྱེས་པ་དང་། བུད་མེད་དང་། བལ་གླང་དང་། རྟ་དང་། སེ་མོ་དོ་དང་། གོས་ལ་སོགས་པ་རྣམ་པ་སྣ་ཚོགས་བྱས་པ་ལ་བུས་པ་གླེན་པ་གཏི་མུག་ཅན་གྱིས་ཡང་དག་པ་བདེན་པ་ཡིན་པར་འཛིན་ཏོ། །མཁས་པ་ཤེས་རབ་ཅན་གྱིས་ནི་ཡང་དག་པའི་བདེན་
པ་མ་ཡིན་པར་རིག་སྟེ། དེ་བཞིན་དུ་གསོད་པ་ཡང་དེ་དང་འདྲ་སྟེ། བུས་པ་མ་རབས་སོ་སོའི་སྐྱེ་བོ་དག་ནི་ཡང་དག་པར་ཡོད་པར་འཛིན། སངས་རྒྱས་བཅོམ་ལྡན་འདས་ཀྱིས་ནི་ཡང་དག་པ་མ་ཡིན་པར་རིག་གོ། །རྒྱལ་པོ་ཆེན་པོ་དཔེར་ན་བྲག་ཅ་ལ་གཏི་མུག་ཅན་གྱིས་སྒྲ་ཡང་དག་པར་འཛིན་ཏོ། །མཁས་པ་ཤེས་

རབ་ཅན་གྱིས་ནི་ཡང་དག་པར་མ་ཡིན་པར་རིག་སྟེ། གསོད་པ་ཡང་དེ་དང་འདྲ་བར་བུས་པ་མ་རབས་སོ་སོའི་སྐྱེ་བོ་ཡང་དག་པར་འཛིན། སངས་རྒྱས་བཅོམ་ལྡན་འདས་ཀྱིས་ནི་ཡང་དག་པ་མ་ཡིན་པར་རིག་གོ། །རྒྱལ་པོ་ཆེན་པོ་དཔེར་ན་དགྲ་ཞིག་སྒྱུས་ཉེ་བར་འོང་བ་ལ་གཏི་མུག་ཅན་གྱིས་ནི་ཡང་
དག་པར་ཉེ་བར་འཛིན་ཏོ། །མཁས་པ་ཤེས་རབ་ཅན་གྱིས་ནི་སྒྱུ་མ་ཡིན་པར་ཤེས་སོ། །གསོད་པ་ཡང་དེ་དང་འདྲ་སྟེ་བུས་པ་སོ་སོ་སྐྱེ་བོས་ནི་ཡང་དག་པར་འཛིན། སངས་རྒྱས་བཅོམ་ལྡན་འདས་ཀྱིས་ནི་ཡང་དག་པ་མ་ཡིན་པར་རིག་གོ། །རྒྱལ་པོ་ཆེན་པོ་ཇི་ལྟར་མེ་ལོང་ལས་བདག་གི་ངོ་སྣང་བ་ལ་གཏི་མུག་
ཅན་གྱིས་ཡང་དག་པར་ངོ་ཡིན་པར་འཛིན་ཏོ། །མཁས་པ་ཤེས་རབ་ཅན་གྱིས་ནི་རབ་ཏུ་རྟོགས་པས་ཡང་དག་པ་མ་ཡིན་པར་རིག་གོ། །གསོད་པ་ཡང་དེ་དང་འདྲ་སྟེ་བུས་པ་མ་རབས་སོ་སོའི་སྐྱེ་བོས་ནི་ཡང་དག་པར་འཛིན། སངས་རྒྱས་བཅོམ་ལྡན་འདས་ཀྱིས་ནི་ཡང་དག་པ་མ་ཡིན་པར་རིག་གོ། །རྒྱལ་པོ་
ཆེན་པོ་དཔེར་ན་སྨིག་རྒྱུ་ལ་གཏི་མུག་ཅན་གྱིས་ནི་ཆུ་ཡིན་པར་འཛིན་ཏོ། །མཁས་པ་ཤེས་རབ་ཅན་གྱིས་ནི་རབ་ཏུ་རྟོགས་ཏེ་ཆུ་མ་ཡིན་པར་ཤེས་སོ། །གསོད་པ་ཡང་དེ་དང་འདྲ་སྟེ་བུས་པ་མ་རབས་སོ་སོ་སྐྱེ་བོས་ནི་ཡང་དག་པར་འཛིན། སངས་རྒྱས་བཅོམ་ལྡན་འདས་ཀྱིས་ནི་ཡང་དག་པ་མ་ཡིན་པར་རིག་གོ། །
རྒྱལ་པོ་ཆེན་པོ་དཔེར་ན་དྲི་ཟའི་གྲོང་ཁྱེར་ལ་གླེན་པ་གཏི་མུག་ཅན་གྱིས་ནི་ཡང་དག་པར་འཛིན་ཏོ། །མཁས་པ་ཤེས་རབ་ཅན་གྱིས་ནི་རབ་ཏུ་རྟོགས་ཏེ་ཡང་དག་པ་མ་ཡིན་པར་ཤེས་སོ། །གསོད་པ་ཡང་དེ་དང་འདྲ་སྟེ་བུས་པ་མ་རབས་སོ་སོ་སྐྱེ་བོས་ནི་ཡང་དག་པར་འཛིན། སངས་རྒྱས་བཅོམ་ལྡན་འདས་ཀྱིས་ནི་
ཡང་དག་པ་མ་ཡིན་པར་རིག་གོ། །རྒྱལ་པོ་ཆེན་པོ་དཔེར་ན་རྨི་ལམ་གྱི་ནང་ན་འདོད་པ་ལྔའི་དགའ་བ་མྱོང་བ་ལ་གཏི་མུག་ཅན་གྱིས་ནི་ཡང་དག་པར་འཛིན་ཏོ། །མཁས་པ་ཤེས་རབ་ཅན་གྱིས་རབ་ཏུ་རྟོགས་ཏེ་ཡང་དག་པ་མ་ཡིན་པར་ཤེས་སོ། །གསོད་པ་ཡང་དེ་དང་འདྲ་སྟེ་བུས་པ་མ་རབས་ཀྱིས་ནི་ཡང་དག་པར་
འཛིན། སངས་རྒྱས་བཅོམ་ལྡན་འདས་ཀྱིས་ནི་ཡང་དག་པ་མ་ཡིན་པར་རིག་གོ། །རྒྱལ་པོ་ཆེན་པོ་གསོད་པའི་ཆོས་དང་། གསོད་པའི་ལས་དང་། གསོད་པ་དང་། གསོད་པའི་འབྲས་བུ་དང་། རྣམ་པར་གྲོལ་བའི་བར་དུ་ཁ་ན་མ་ཐོ་བའི་ལས་མེད་པར་ངས་གསལ་བར་རྟོགས་སོ། །རྒྱལ་པོ་ཆེན་པོས་གསོད་པ་

ཤེས་པ་ཙམ་གྱིས་ཅིའི་ཕྱིར་སྡིག་པར་འགྱུར། རྒྱལ་པོ་ཆེན་པོ་དཔེར་ན་མི་ཞིག་ཆང་བདག་བྱེད་པ་དེ། ཅི་སྟེ་མ་འཐུངས་ན་མྱོས་པར་མི་འགྱུར་རོ། །དེ་བཞིན་དུ་མེ་ལ་དབང་བ་ཡང་ཚིག་པར་མི་འགྱུར་བ་ལྟར། རྒྱལ་པོ་ཡང་དེ་དང་འདྲ་སྟེ་གསོད་པར་ཤེས་པ་ཙམ་གྱིས་ན་ཅིའི་ཕྱིར་སྡིག་པར་འགྱུར། རྒྱལ་པོ་ཆེན་པོ་སེམས་
ཅན་ཁ་ཅིག་ཉི་མ་ཤར་བ་ན་ཁ་ན་མ་ཐོ་བའི་སྡིག་རྣམ་པ་སྣ་ཚོགས་བྱེད་པ་དང་། ཟླ་བ་ཤར་བ་ན་ཆོམ་པོ་དང་རྐུན་ཤོད་བྱེད་དོ། །ཉི་མ་དང་ཟླ་བ་མ་ཤར་ན་སྡིག་པ་མི་བྱེད་དེ། དེ་ལྟར་ཉི་མ་དང་ཟླ་བའི་རྐྱེན་གྱིས་སྡིག་པ་བྱེད་ཀྱང་ཟླ་བ་དང་ཉི་མ་དེ་ལ་ཡང་དག་པར་ན་སྡིག་པ་མེད་དོ། །གསོད་པ་ཡང་དེ་དང་འདྲ་སྟེ། རྒྱལ་པོའི་རྐྱེན་
གྱིས་དེ་ལྟར་གྱུར་ཀྱང་རྒྱལ་པོ་ལ་ནི་ཡང་དག་པར་སྡིག་པ་མེད་དོ། །རྒྱལ་པོ་ཆེན་པོ་ཇི་ལྟར་རྒྱལ་པོའི་ཁབ་ན། རྟག་ཏུ་ལུག་གསོད་དུ་བཅུག་ཀྱང་། ཐོག་མ་ནས་འཇིགས་པའི་སེམས་མེད་ན། ཅི་སྟེ་ཕ་འབའ་ཞིག་ལ་འཇིགས་པའི་སེམས་སྐྱེ། རྒྱལ་པོ་ཆེན་པོ་ཇི་ལྟར་མི་དང་བྱོལ་སོང་ལ་རིམ་པའི་ཁྱད་པར་ཡོད་ཀྱང་སྲོག་ལ་
ཆགས་པ་དང་ཕངས་པ་ལ་ནི་གཉིས་ཀ་ཐ་དད་པ་མེད་ན། ཅི་སྟེ་ལུག་ལ་ནི་སེམས་བག་ཡངས་སུ་འཇིགས་པ་མེད་ལ། ཕ་རྒྱལ་པོ་ལ་ནི་རབ་ཏུ་མི་དགེ་བའི་མྱ་ངན་སྐྱེད། རྒྱལ་པོ་ཆེན་པོ་འཇིག་རྟེན་པ་ནི་འདོད་པའི་ཁོལ་པོར་གྱུར་ཏེ་དབང་མེད་པར་གྱུར་ཏོ། །འདོད་པས་བཀོལ་བའི་ཕྱིར་གསོད་པའི་ལས་བྱེད་དོ། །
གལ་ཏེ་དེ་ལ་འབྲས་བུ་རྣམ་པར་སྨིན་པ་ཡོད་ན་འདོད་པ་ལ་སྡིག་པར་འགྱུར་ཏེ། རྒྱལ་པོ་ལ་དབང་མེད་པས་ཅིའི་ཕྱིར་ཉེས་པར་འགྱུར། རྒྱལ་པོ་ཆེན་པོ་དཔེར་ན་ཡོངས་སུ་མྱ་ངན་ལས་འདས་པ་ནི་ཡོད་པ་ཡང་མ་ཡིན། མེད་པ་ཡང་མ་ཡིན་ཏེ། ཡོད་པ་ཡང་ཡིན་ནོ། །གསོད་པ་ཡང་དེ་དང་འདྲ་སྟེ། ཡོད་པ་ཡང་མ་ཡིན། མེད་
པ་ཡང་མ་ཡིན་མོད་ཀྱི། ཡོད་པར་ཡང་འགྱུར་རོ། །ཁྲེལ་བ་དང་འཛེམ་པ་ཡོད་པ་ལ་ནི་ཡོད་པ་མ་ཡིན། ཁྲེལ་བ་དང་འཛེམ་པ་མེད་པ་ལ་ནི་མེད་པ་ཡང་མ་ཡིན་ནོ། །འབྲས་བུ་རྣམ་པར་སྨིན་པ་མྱོང་བ་ནི་ཡོད་པ་ཞེས་བྱའོ། །སྟོང་པར་ལྟ་བ་ལ་ནི་ཡོད་པ་མ་ཡིན་ཡོད་པར་ལྟ་བ་ལ་ནི་མེད་པ་མ་ཡིན། ཡོད་པར་ལྟ་བ་ལ་ནི་ཡོད་པ་ཞེས་
བྱའོ། །དེ་ཅིའི་ཕྱིར་ཞེ་ན། ཡོད་པར་ལྟ་བ་དང་བཅས་པ་ནི་འབྲས་བུ་རྣམ་པར་སྨིན་པ་ཡང་ཡོད་དོ། །ཡོད་པར་ལྟ་བ་མེད་པ་ལ་ནི་འབྲས་བུ་རྣམ་པར་སྨིན་པ་མེད་དོ། །རྟག་པར་ལྟ་བ་ལ་ནི་ཡོད་པ་མ་ཡིན་མི་རྟག་པར་ལྟ་བ་ལ་ནི་མེད་པ་མ་ཡིན། རྟག་པ་རྟག་པར་ལྟ་བ་ལ་ནི་མེད་པ་མ་ཡིན་ནོ། །དེ་ཅིའི་ཕྱིར་ཞེ་ན། རྟག་པ་རྟག་པར་ལྟ་བ་

ལ་ནི་མི་དགེ་བའི་ལས་ཀྱི་འབྲས་བུ་ཡོད་དེ་དེའི་ཕྱིར་རྟག་པ་རྟག་པར་ལྟ་བ་ལ་མེད་པ་ཞེས་བྱར་མི་རུང་ངོ་། །དེ་བས་ཡོད་པ་ཡང་མ་ཡིན་མེད་པ་ཡང་མ་ཡིན་མོད་ཀྱི། ཡོད་པ་ཡང་མ་ཡིན་ནོ། །རྒྱལ་པོ་ཆེན་པོ་སེམས་ཅན་ཞེས་བྱ་བ་ནི་ཕྱི་ནང་གི་དབུགས་རྒྱུ་བའོ། །དབུགས་རྒྱུ་བ་གཅོད་པ་ནི་གསོད་པ་ཞེས་
བྱ་སྟེ། དེ་བཞིན་གཤེགས་པ་རྣམས་ཀྱང་འཇིག་རྟེན་པའི་རྗེས་སུ་གསོད་པ་ཞེས་ཀྱང་གསུངས་སོ། །རྒྱལ་པོ་ཆེན་པོ་གཟུགས་ནི་མི་རྟག་པ་སྟེ། གཟུགས་ཀྱི་རྟེན་ཅིང་འབྲེལ་ཏེ་འབྱུང་བ་ཡང་མི་རྟག་གོ། །མི་རྟག་པའི་རྒྱུ་ལས་སྐྱེས་ན་གཟུགས་ཅི་སྟེ་རྟག །རྣམ་པར་ཤེས་པ་མི་རྟག་པས་ན་རྣམ་པར་ཤེས་པའི་རྟེན་
ཅིང་འབྲེལ་ཏེ་འབྱུང་བའི་བར་དུ་ཡང་མི་རྟག་པ་སྟེ། དེ་ལྟར་མི་རྟག་པའི་རྒྱུ་ལས་སྐྱེས་ན་རྣམ་པར་ཤེས་པ་ཅི་སྟེ་རྟག །དེ་ལྟར་མི་རྟག་པའི་ཕྱིར་སྡུག་བསྔལ་ལོ། །སྡུག་བསྔལ་བའི་ཕྱིར་སྟོང་པའོ། །སྟོང་པའི་ཕྱིར་བདག་མེད་པའོ། །གལ་ཏེ་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་ཡིན་ན་ཅི་
ཞིག་གིས་ཅི་གསོད་པར་འགྱུར་མི་རྟག་པ་བསད་ན་རྟག་པའི་མྱ་ངན་ལས་འདས་པ་ཐོབ་ལ། སྡུག་བསྔལ་བསད་ན་བདེ་བ་འཐོབ། སྟོང་པ་བསད་ན་བདེན་པ་འཐོབ། བདག་མེད་པ་བསད་ན་ཡང་དག་པའི་བདག་འཐོབ་བོ། །རྒྱལ་པོ་ཆེན་པོ་གང་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་གསོད་
པ་ནི་ང་དང་འདྲའོ། །ང་ཡང་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་བསད་དེ་སེམས་ཅན་དམྱལ་བར་མ་སོང་ན་ཁྱོད་ཅི་སྟེ་འགྲོ། དེ་ནས་རྒྱལ་པོ་མ་སྐྱེས་དགྲས་ཇི་ལྟར་བཅོམ་ལྡན་འདས་ཀྱིས་གསུངས་པ་ལྟར་གཟུགས་བརྟག་པ་ནས་རྣམ་པར་ཤེས་པའི་བར་དུ་བརྟགས་ཏེ། དེ་ལྟར་རྟོགས་ནས་བཅོམ་
ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་གཟོད་གཟུགས་མི་རྟག་པ་ནས། རྣམ་པར་ཤེས་པའི་བར་དུ་མི་རྟག་པ་ལགས་པར་འཚལ་ཏོ། །བདག་གིས་གལ་ཏེ་སྔར་དེ་ལྟར་འཚལ་ན་ཁ་ན་མ་ཐོ་བའི་སྡིག་མི་བགྱིད་དོ། །བཅོམ་ལྡན་འདས་བདག་སྔོན་འདི་སྐད་ཅེས་སངས་རྒྱས་བཅོམ་
ལྡན་འདས་རྣམས་ནི་རྟག་ཏུ་སེམས་ཅན་གྱི་ཕ་མ་མཛད་དོ་ཞེས་ཐོས་ཏེ། དེ་སྐད་ཐོས་ཀྱང་ངེས་པར་མ་རྟོགས་ཏེ། དེང་གཟོད་ངེས་པར་རྟོགས་སོ། །བཅོམ་ལྡན་འདས་བདག་གིས་ཡང་འདི་སྐད་ཅེས་ཐོས་ཏེ། རི་རབ་རིའི་རྒྱལ་པོ་ནི་རིན་པོ་ཆེ་སྣ་བཞི་ལས་བྱས་ཏེ། འདི་ལྟར་གསེར་དང་དངུལ་དང་བཻ་དཱུརྱ་དང་ཤེལ་ལོ། །

གལ་ཏེ་ཕྱོགས་གང་དུ་བྱ་མང་པོ་འདུས་པ་དེ་དག་ཁ་དོག་དེ་དང་འདྲ་བར་འགྱུར་རོ། །ཞེས་ཐོས་ཀྱང་ངེས་པར་མ་རྟོགས་ཏེ། བདག་དེང་དེ་བཞིན་གཤེགས་པའི་རི་རབ་ཀྱི་དྲུང་དུ་ཕྱིན་ནས་ཁ་དོག་མཚུངས་པར་གྱུར་ཏོ། །དེ་ལ་ཁ་དོག་མཚུངས་པ་ཞེས་བྱ་བ་ནི་ཆོས་ཐམས་ཅད་མི་རྟག་པ་སྡུག་བསྔལ་བ་སྟོང་པ་བདག་མེད་པར་
ཤེས་པར་མཚུངས་སོ། །བཅོམ་ལྡན་འདས་བདག་གིས་ནི་འཇིག་རྟེན་ན། ཨེ་རཎྜའི་འབྲས་བུ་ལས་ཨེ་རཎྜའི་སྡོང་པོ་སྐྱེ་བར་མཐོང་གི། ཨེ་རཎྜའི་འབྲས་བུ་ལས་ཙན་དན་གྱི་སྡོང་པོ་སྐྱེ་བར་མ་མཐོང་སྟེ། བདག་གིས་དེང་གཟོད་ཨེ་རཎྜའི་འབྲས་བུ་ལས་ཙན་དན་གྱི་སྡོང་པོ་སྐྱེས་པ་མཐོང་ངོ་། །དེ་ལ་
ཨེ་རཎྜའི་འབྲས་བུ་ནི་བདག་གི་ལུས་སོ། །ཙན་དན་གྱི་སྡོང་པོ་ནི་བདག་གི་སེམས་དད་པའི་རྩ་བ་མ་མཆིས་པའོ། །རྩ་བ་མ་མཆིས་པ་ཞེས་བགྱི་བ་ནི་བདག་སྔོན་དེ་བཞིན་གཤེགས་པ་ལ་བཀུར་སྟི་བགྱི་བར་མི་འཚལ། ཆོས་དང་དགེ་འདུན་ལ་མ་དད་དེ། དེ་ནི་རྩ་བ་མ་མཆིས་པ་ཞེས་བགྱིའོ། །བཅོམ་
ལྡན་འདས་བདག་གལ་ཏེ་སངས་རྒྱས་བཅོམ་ལྡན་འདས་དང་མ་ཕྲད་ན་བསྐལ་པ་ཚད་མེད་གྲངས་མེད་པའི་བར་དུ་སེམས་ཅན་དམྱལ་བ་ཆེན་པོར་སྡུག་བསྔལ་ཚད་མེད་པ་སྙེད་མྱོང་བར་འགྱུར་རོ། །བདག་གིས་དེང་སངས་རྒྱས་མཐོང་བར་གྱུར་ཏེ། སངས་རྒྱས་མཐོང་བའི་བསོད་ནམས་ཇི་སྙེད་ཐོབ་པ་དེས།
སེམས་ཅན་གྱི་ཉོན་མོངས་པ་མི་དགེ་བའི་སེམས་ཐམས་ཅད་ཆོམས་པར་གྱུར་ཅིག །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ལེགས་སོ་ལེགས་སོ། །ངས་དེང་ཁྱོད་གདོན་མི་ཟ་བར་སེམས་ཅན་གྱི་མི་དགེ་བའི་སེམས་ཆོམས་པར་མཁྱེན་ཏོ། །གསོལ་པ། བཅོམ་ལྡན་འདས་གལ་ཏེ་བདག་དེ་ལྟར་
བརྟགས་པར་སེམས་ཅན་གྱི་མི་དགེ་བའི་སེམས་རྣམས་ཆོམས་པར་འགྱུར་ན་ལྟ། གལ་ཏེ་བདག་རྟག་ཏུ་སེམས་ཅན་དམྱལ་བར་མཆིས་ཏེ། སེམས་ཅན་རྣམས་ཀྱི་ཕྱིར་བསྐལ་པ་ཚད་མེད་པའི་བར་དུ་སྡུག་བསྔལ་ཆེན་པོ་ལེན་ཡང་སྡུག་བསྔལ་བར་མི་འཛིན་ཏོ། །དེ་ནས་དེའི་ཚེ་ཡུལ་དབུས་འགྱུར་འཆང་གི་མི་
ཚད་མེད་པ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་ལྟར་ཚད་མེད་པ་དེ་དག་གི་སེམས་རབ་ཏུ་བསྐྱེད་པའི་ཕྱིར་རྒྱལ་པོ་མ་སྐྱེས་དགྲའི་སྡིག་ལྕི་བ་ཡང་བར་གྱུར་ནས་རྒྱལ་པོ་དང་། བཙུན་མོ་དང་། སླས་ལ་སོགས་པ་ཀུན་གྱིས་ཅིག་ཅར་བླ་ན་མེད་པ་ཡང་དག་པར་

རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་རྒྱལ་པོ་མ་སྐྱེས་དགྲས་འཚོ་བྱེད་ལ་སྨྲས་པ། འཚོ་བྱེད་བདག་མ་ཤི་བར་ལྷའི་ལུས་ཐོབ་སྟེ། ཚེ་ཐུང་བ་སྤངས་ནས་ཚེ་རིང་བར་གྱུར། མི་རྟག་པའི་ལུས་སྤངས་ནས་རྟག་པའི་ལུས་ཐོབ་བོ། །དེ་ནི་སེམས་ཅན་རྣམས་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཀྱི་སེམས་སྐྱེད་པར་བྱེད་པ་སྟེ། ད་ནི་ལྷའི་ལུས་ཚེ་རིང་བ་རྟག་པ་ཡིན། སངས་རྒྱས་ཐམས་ཅད་ཀྱི་ཉེ་གནས་ཡིན་ནོ། །དེ་སྐད་ཅེས་སྨྲས་ནས་རིན་པོ་ཆེ་རྣམ་པ་སྣ་ཚོགས་ཀྱི་རྒྱལ་མཚན་དང་། བ་དན་དང་། གདུགས་དང་། སྤོས་དང་། མེ་ཏོག་དང་། ཕྲེང་བ་དང་། རོལ་མོ་
དམ་པས་བཅོམ་ལྡན་འདས་ལ་མཆོད་ནས་ཀྱང་ཚིགས་སུ་བཅད་པ་འདི་དག་གིས་བསྟོད་དོ། །ཚིག་བདེན་ཤིན་ཏུ་དམ་པ་དེ། །ཚིག་དང་དོན་ལ་རབ་མཁས་པ། །ཟབ་མོ་གསང་བའི་སྙིང་པོ་ཡང་། །མང་པོ་ཀུན་ལ་གསལ་བར་སྟོན། །རྒྱ་ཆེ་འབྱམ་ཀླས་ཚིག་རྣམས་ཀྱང་། །བསྡུས་ཏེ་འཁོར་ལ་མདོ་ཙམ་སྟོན། །དེ་
ལྟ་བུ་ཡི་ཚིག་དང་ལྡན། །སེམས་ཅན་ནད་གསོ་བ་ལ་མཁས། །གལ་ཏེ་སེམས་ཅན་རྣམས་གང་གིས། །ཚིག་དེ་ཐོས་པར་གྱུར་པ་དེ། །དད་པ་རྣམས་དང་མ་དད་པ། །སངས་རྒྱས་གསུང་བ་ཡིན་པར་རྟོགས། །སངས་རྒྱས་གསུང་ནི་འཇམ་པ་སྟེ། །འཁོར་ལ་རྩུབ་པའི་ཚིག་ཀྱང་གསུང་། །འཇམ་དང་རྩུབ་པོར་གང་གསུངས་
པ། །གཉིས་ཀ་དོན་དམ་ལགས་པས་ན། །དེ་ཕྱིར་བདག་ཀྱང་དེ་རིང་འདིར། །བཅོམ་ལྡན་འདས་ལ་སྐྱབས་སུ་མཆི། །བཅོམ་ལྡན་གསུང་ནི་རོ་གཅིག་སྟེ། །ཇི་ལྟར་རྒྱ་མཚོའི་ཆུ་དང་མཚུངས། །བདེན་པ་དམ་པ་ཞེས་བྱ་སྟེ། །དོན་མེད་པ་ཡི་ཚིག་མ་མཆིས། །དེ་རིང་དེ་བཞིན་གཤེགས་པ་ཡིས། །ཚད་མེད་ཆོས་རྣམས་རབ་
བསྟན་པ། །སྐྱེས་པ་བུད་མེད་ཐོས་པ་དང་། །འཐུན་པར་དོན་དམ་ཐོབ་པར་འགྱུར། །རྒྱུ་མེད་འབྲས་བུ་ཡང་མེད་དེ། །སྐྱེ་བ་མེད་ཅིང་འགོག་པ་མེད། །དེ་ནི་མྱ་ངན་འདས་པ་སྟེ། །ཐོས་པས་རྣམ་སྨིན་འཇོམས་པར་འགྱུར། །དེ་བཞིན་གཤེགས་ནི་ཐམས་ཅད་ཀྱི། །ཤིན་ཏུ་བྱམས་པའི་ཕ་མ་མཛད། །སེམས་ཅན་སོ་སོའི་སྐྱེ་
བོ་དག །དེ་བཞིན་གཤེགས་ཀྱི་སྲས་སུ་རིག །བཅོམ་ལྡན་བྱམས་པའི་ཐུགས་རྗེ་ཡིས། །མང་པོའི་ཕྱིར་ནི་དཀའ་བ་མཛད། །ཇི་ལྟར་གདོན་གྱིས་བརླམས་པ་ལྟར། །སྨྱོས་ནས་རྣམ་པ་མང་པོ་བྱེད། །བདག་གིས་བཅོམ་ལྡན་དེང་མཐོང་བའི། །དགེ་བར་གྱུར་པའི་ལས་གསུམ་པོའི། །བསོད་ནམས་ཇི་སྙེད་ཐོབ་པ་འདི། །

བླ་མེད་བྱང་ཆུབ་ལ་བསྔོའོ། །བདག་གིས་དེང་འདིར་སངས་རྒྱས་དང་། །ཆོས་དང་དགེ་འདུན་ལ་མཆོད་པའི། །བསོད་ནམས་ཇི་སྙེད་བསྐྱེད་པ་དེ། །སངས་རྒྱས་ཆོས་དང་དགེ་འདུན་གསུམ། །རྟག་ཏུ་འཇིག་རྟེན་གནས་པར་ཤོག །བདག་གིས་དེང་འདིར་འདི་ཉིད་དུ། །བསོད་ནམས་ཇི་སྙེད་
ཐོབ་གྱུར་པ། །བསོད་ནམས་དེ་ཡིས་སེམས་ཅན་གྱི། །བདུད་བཞི་རབ་ཏུ་ཞིགས་པར་ཤོག །མི་དགེའི་བཤེས་དང་བདག་ཕྲད་པས། །དུས་གསུམ་སྡིག་པ་གང་བགྱིས་པ། །དེང་འདིར་སྤྱན་སྔར་ཀུན་ཀྱང་བཤགས། །སླན་ཆད་སྡིག་པ་མི་བགྱིད་དོ། །སེམས་ཅན་སོ་སོའི་སྐྱེ་བོ་དག །
བྱང་ཆུབ་ཏུ་ནི་སེམས་བསྐྱེད་ནས། །ཕྱོགས་བཅུའི་རྒྱལ་བ་ཐམས་ཅད་ལ། །རྩེ་གཅིག་སེམས་ཀྱིས་དྲན་པར་ཤོག །གཞན་ཡང་སེམས་ཅན་ཐམས་ཅད་ཀྱི། །ཉོན་མོངས་མང་པོ་ཡོངས་བཅོམ་ནས། །ཇི་ལྟར་འཇམ་དཔལ་དང་འདྲ་བར། །སངས་རྒྱས་རང་བཞིན་མཐོང་བར་ཤོག །
དེ་ནས་བཅོམ་ལྡན་འདས་ཀྱིས་རྒྱལ་པོ་མ་སྐྱེས་དགྲ་ལ་ལེགས་སོ་ལེགས་སོ་ཞེས་བྱ་བ་བྱིན་ནོ། །གལ་ཏེ་གང་ཞིག་བྱང་ཆུབ་ཏུ་སེམས་བསྐྱེད་པ་དེ་ནི། སངས་རྒྱས་ཀྱི་དཀྱིལ་འཁོར་ཡོངས་སུ་བརྒྱན་པ་ཞེས་བྱའོ། །རྒྱལ་པོ་ཆེན་པོ་ཁྱོད་སྔོན་སངས་རྒྱས་རྣམ་པར་གཟིགས་ལས་བྱང་
ཆུབ་ཏུ་སེམས་བསྐྱེད་དེ། དེ་ནས་ང་འཇིག་རྟེན་དུ་བྱུང་བའི་བར་དུ་སེམས་ཅན་དམྱལ་བར་ལྟུང་བའི་སྡུག་བསྔལ་མྱོང་བར་མ་གྱུར་ཏོ། །རྒྱལ་པོ་ཆེན་པོ་འདི་ལྟར་རིག་པར་བྱ་སྟེ། བྱང་ཆུབ་ཀྱི་སེམས་ནི་དེ་ལྟ་བུའི་འབྲས་བུ་ཚད་མེད་པ་སྙེད་ཡོད་དོ། །རྒྱལ་པོ་ཆེན་པོ་དེང་ཕྱིན་ཆད་
ཀྱང་རྟག་ཏུ་བྱང་ཆུབ་ཀྱི་སེམས་ལ་བརྩོན་པར་བྱའོ། །དེ་ཅིའི་ཕྱིར་ཞེ་ན། དེའི་རྒྱུ། དེའི་རྐྱེན་གྱིས་ཁ་ན་མ་ཐོ་བའི་ལས་ཚད་མེད་པ་སྙེད་འབྱང་བའི་ཕྱིར་རོ། །དེ་ནས་རྒྱལ་པོ་མ་སྐྱེས་དགྲ་ཡུལ་དབུས་འགྱུར་འཆང་གི་མི་དང་བཅས་སུ་འདུག་པ་ལས་ལངས་ནས་བཅོམ་
ལྡན་འདས་ལ་ལན་གསུམ་བསྐོར་ཏེ། ཕྱིར་ཕོ་བྲང་དུ་དོང་ངོ་། །ལྷས་སྤྱོད་པའི་ལེའུ་ནི་མེ་ཏོག་སྣ་ཚོགས་ཀྱི་མདོ་ལས་བཤད་པ་བཞིན་ནོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས། ཚངས་པར་སྤྱོད་པ་ཞེས་བྱ་བའི་ལེའུ་སྟེ་བདུན་པའོ།། །།

རིགས་ཀྱི་བུ་ཇི་ལྟར་ན་བུས་པ་ཆུང་ངུའི་སྤྱོད་པ་ཞེ་ན། རིགས་ཀྱི་བུ་ལྡང་བ་དང་། འདུག་པ་དང་། འོང་བ་དང་། སོང་བ་དང་། སྨྲ་མི་ནུས་པ་ནི་བུས་པ་ཆུང་ངུ་ཞེས་བྱ་སྟེ། དེ་བཞིན་གཤེགས་པ་ཡང་དེ་དང་འདྲའོ། །ལྡང་མི་ནུས་པ་ནི་དེ་བཞིན་གཤེགས་པ་ཡང་
ཆོས་ཐམས་ཅད་ཀྱི་མཚན་ཉིད་ལས་མི་ལྡང་ངོ་། །འདུག་མི་ནུས་པ་ནི་དེ་བཞིན་གཤེགས་པ་ཡང་ཆོས་ཐམས་ཅད་ལ་མ་ཆགས་པའོ། །འོང་མི་ནུས་པ་ནི་དེ་བཞིན་གཤེགས་པའི་སྐུའི་སྤྱོད་པ་མི་གཡོ་བའོ། །འགྲོ་མི་ནུས་པ་ནི་དེ་བཞིན་གཤེགས་པ་ཡོངས་སུ་མྱ་ངན་ལས་འདས་
པ་ཆེན་པོ་མཐར་ཕྱིན་པའོ། །སྨྲ་མི་ནུས་པ་ནི་དེ་བཞིན་གཤེགས་པས་སེམས་ཅན་ཐམས་ཅད་ལ་ཆོས་རྣམས་སྟོན་ཀྱང་ཡང་དག་པར་ན་སྟོན་པ་མེད་པའོ། །དེ་ཅིའི་ཕྱིར་ཞེ་ན། ཇི་སྙེད་དུ་སྟོན་པ་ཡོད་པ་ནི་འདུས་བྱས་ཀྱི་ཆོས་ཞེས་བྱ་སྟེ། སངས་རྒྱས་བཅོམ་ལྡན་འདས་ནི་འདུས་བྱས་
མ་ཡིན་པས་དེའི་ཕྱིར་བཤད་པ་མེད་དོ། །ཡང་མི་སྨྲ་བ་ནི་ཇི་ལྟར་བུས་པ་ཆུང་ངུ་ཚིག་གསལ་བར་མི་ཤེས་པ་སྨྲ་བ་ཡོད་དུ་ཟིན་ཀྱང་ཡང་དག་པར་ན་སྨྲ་བ་མེད་དོ། །དེ་བཞིན་གཤེགས་པ་ཡང་དེ་དང་འདྲ་སྟེ། སྨྲ་བ་མི་གསལ་བ་ཞེས་བྱ་བ་ནི་དེ་བཞིན་གཤེགས་པ་རྣམས་ཀྱིས་
དགོངས་ཏེ་གསུངས་པའོ། །གསུངས་པ་ཡོད་དུ་ཟིན་ཀྱང་སེམས་ཅན་གྱིས་མི་ཤེས་པས་མི་སྨྲ་བ་ཞེས་བྱའོ། །ཡང་བུས་པ་ཞེས་བྱ་བའི་ནི་ཚིག་ཡང་དག་པར་མི་ཤེས་པའི་ཕྱིར་རྫས་ལ་མིང་གཅིག་ཏུ་མ་ཆད་དོ། །ཚིག་ཡང་དག་པར་མི་ཤེས་པས་རྫས་ལ་མིང་གཅིག་ཏུ་མ་ཆད་
ཀྱང་། རྒྱུ་དེ་མ་ཡིན་པའི་ལོགས་ཤིག་ན་རྫས་ཤེས་པ་འགྱུར་བ་མེད་དོ། །དེ་བཞིན་གཤེགས་པ་ཡང་དེ་དང་འདྲ་སྟེ། སེམས་ཅན་ཐམས་ཅད་ཀྱི་རིགས་རྣམ་པ་སྣ་ཚོགས་ཐ་དད་པས་ཚིག་མི་འཐུན་ཏེ། དེ་བཞིན་གཤེགས་པས་ཐབས་ཀྱིས་ཇི་ལྟ་བ་དེ་ལྟར་སྟོན་པས་དེའི་
རྒྱུས་ཐམས་ཅད་ཤེས་པར་ཡང་མཛད་དོ། །ཡང་བུས་པ་ཞེས་བྱ་བ་ནི་ཡི་གེ་ཆེན་པོ་འབའ་ཞིག་སྟོན་ནུས་ཏེ། དེ་བཞིན་གཤེགས་པ་ཡང་དེ་དང་འདྲ་བར་ཡི་གེ་ཆེན་པོ་སྟོན་ཏོ། །འདི་ལྟ་སྟེ། བ་ཧྭཱ་ཞེས་བྱའོ། །དེ་ལ་ཧྭཱ་ཞེས་བྱ་བ་ནི་འདུས་བྱས་སོ། །བ་ཞེས་བྱ་བ་ནི་འདུས་

མ་བྱས་ཏེ། དེ་ནི་བུས་པ་ཞེས་བྱའོ། །ཧྭཱ་ཞེས་བྱ་བ་ནི་ང་མི་རྟག་པའོ། །བ་ཞེས་བྱ་བ་ཞེས་བྱ་ནི་རྟག་པའོ། །དེ་བཞིན་གཤེགས་པ་ཡང་རྟག་པ་འཆད་དེ། སེམས་ཅན་ཐོས་ནས་ང་ཆོས་རྟག་པ་འདོད་པའི་ཕྱིར་མི་རྟག་པ་གཅོད་དེ། དེ་ནི་བུས་པའི་སྤྱོད་པའོ། །ཡང་བུས་པ་ནི་
སྡུག་བསྔལ་བ་དང་། བདེ་བ་དང་། ཉིན་པར་དང་། མཚན་མོ་དང་། ཕ་མ་མི་ཤེས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། སེམས་ཅན་གྱི་ཕྱིར་བདེ་བ་དང་སྡུག་བསྔལ་མི་མཐོང་ཉིན་པར་དང་མཚན་མོ་ཞེས་བྱ་བ་མེད། སེམས་ཅན་ཐམས་ཅད་ལ་
སེམས་མཉམ་པའི་ཕྱིར་ཕ་དང་མ་དང་གཉེན་ལ་སོགས་པའི་མཚན་ཉིད་མེད་དོ། །ཡང་བུས་པ་ནི་ལས་ཆེན་པོ་དང་ཆུང་ངུ་རྣམས་བྱེད་མི་ནུས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། བྱང་ཆུབ་སེམས་དཔས་འཁོར་བའི་ལས་མི་བྱེད་པས་མི་བྱེད་པ་
ཞེས་བྱའོ། །དངོས་པོ་ཆེན་པོ་ཞེས་བྱ་བ་ནི་མཚམས་མེད་པ་ལྔ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས་ནི་ནམས་ཀྱང་མཚམས་མེད་པ་ལྔའི་སྡིག་ལྕི་བ་མི་བྱེད་དོ། །དངོས་པོ་ཆུང་ངུ་ཞེས་བྱ་བ་ནི་ཐེག་པ་གཉིས་པའི་སེམས་ཏེ། བྱང་ཆུབ་སེམས་དཔའ་ནམས་ཀྱང་
བྱང་ཆུབ་ཀྱི་སེམས་ལས་ལོག་སྟེ། ཉན་ཐོས་དང་རང་སངས་རྒྱས་ཀྱི་ཐེག་པར་མི་ལྟུང་ངོ་། །ཡང་བྱིས་པའི་སྤྱོད་པ་ནི་ཇི་ལྟར་བུས་པ་དེ་ངུ་བ་ན། ཕ་མས་ལྕང་མའི་ལོ་མ་སེར་པོ་བྱིན་ཏེ། འདི་སྐད་དུ་བུ་མ་ངུ་ཤིག་མ་ངུ་ཤིག །ངས་ཁྱོད་ལ་གསེར་སྦྱིན་ཞེས་བྱས་ནས་བུས་པས་དེ་མཐོང་
བ་དང་གསེར་ཡང་དག་པའི་འདུ་ཤེས་བསྐྱེད་དེ་མི་ངུ་བར་གྱུར་ཏེ། ལྕང་མའི་ལོ་མ་དེ་ནི་ཡང་དག་པར་གསེར་མ་ཡིན་ནོ། །གལ་ཏེ་ཤིང་ལ་བྱས་པའི་གླང་དང་། རྟ་དང་། སྐྱེས་པ་དང་། བུད་མེད་ལ་བུས་པས་མཐོང་ནས་སྐྱེས་པ་དང་བུད་མེད་ལ་སོགས་པ་ཡིན་པའི་འདུ་ཤེས་བསྐྱེད་
དེ་མི་ངུའོ། །དེ་སྐྱེས་པ་དང་བུད་མེད་མ་ཡིན་པར་སྐྱེས་པ་དང་བུད་མེད་ཀྱི་འདུ་ཤེས་འཇོག་པའི་ཕྱིར་བུས་པ་ཞེས་བྱའོ། །དེ་བཞིན་གཤེགས་པ་ཡང་དེ་དང་འདྲ་སྟེ། གལ་ཏེ་སེམས་ཅན་དག་མི་དགེ་བ་མང་པོ་བྱེད་ན། དེ་བཞིན་གཤེགས་པས་སུམ་ཅུ་རྩ་གསུམ་གནམ་གྱི་

རྟག་པ་དང་། བདེ་བ་དང་། བདག་དང་། ཡོངས་སུ་དག་པ་དང་། བྱད་བཟང་བ་དང་། ལོངས་སྤྱོད་དང་། གཞལ་མེད་ཁང་བཟང་པོའི་ནང་ན་འདོད་པ་ལྔ་སྤྱོད་པ་དང་། དབང་པོ་དྲུག་གི་གཉེན་པོ་ཐམས་ཅད་བདེ་བ་དང་དགའ་བ་ཤ་སྟག་ཡིན་པར་
བསྟན་ཏེ། སེམས་ཅན་གྱིས་དེ་ལྟ་བུའི་བདེ་བ་ཡོད་པ་ཐོས་ནས་བདེ་བ་ལ་ཆགས་པའི་སེམས་སྐྱེས་ཏེ། མི་དགེ་བ་བཏང་ནས་སུམ་ཅུ་རྩ་གསུམ་གནམ་གྱི་ལས་དགེ་བ་ལ་བརྩོན་ནོ། །དེ་ནི་ཡང་དག་པར་འཁོར་བ་ཡིན་ཏེ། མི་རྟག་པ། བདེ་བ་མེད་པ། བདག་མེད་པ།
ཡོངས་སུ་དག་པ་མ་ཡིན་ཡང་སེམས་ཅན་སྒྲོལ་བའི་ཕྱིར་ཐབས་ཀྱིས་རྟག་པ་དང་། བདེ་བ་དང་། བདག་དང་། ཡོངས་སུ་དག་པའོ་ཞེས་གསུངས་སོ། །ཡང་བུས་པ་ཞེས་བྱ་བ་ནི། གལ་ཏེ་སེམས་ཅན་གང་འཁོར་བ་ལ་རབ་ཏུ་སྐྱོ་བ་ན་དེ་བཞིན་གཤེགས་པས་ཐེག་པ་
གཉིས་སྟོན་ཏེ། དེ་ལ་ཡང་དག་པར་ཐེག་པ་གཉིས་པོའི་བདེན་པ་མེད་ཀྱང་ཐེག་པ་གཉིས་ཀྱི་ཕྱིར་འཁོར་བའི་སྐྱོན་ཤེས་ཤིང་མྱ་ངན་ལས་འདས་པའི་བདེ་བ་མཐོང་ངོ་། །དེ་ལྟར་མཐོང་བའི་ཕྱིར་རང་གིས་གཅོད་པ་དང་། མི་གཅོད་པ་དང་། བདེན་པ་དང་མི་བདེན་པ་
དང་། སྤྱོད་པ་དང་མི་སྤྱོད་པ་དང་། ཐོབ་པ་དང་མི་ཐོབ་པའི་དངོས་པོ་རིག་པར་འགྱུར་རོ། །རིགས་ཀྱི་བུ་ཇི་ལྟར་བུས་པ་དེ་གསེར་མ་ཡིན་པ་ལ་གསེར་གྱི་འདུ་ཤེས་བསྐྱེད་པ་ལྟར་དེ་བཞིན་གཤེགས་པ་ཡང་དེ་དང་འདྲ་བར་ཡོངས་སུ་མ་དག་པ་ལ་ཡོངས་སུ་དག་པའོ་ཞེས་
འཆད་དེ། དེ་བཞིན་གཤེགས་པས་དོན་དམ་པ་ཐོབ་པའི་ཕྱིར་ཡང་དག་པ་མ་ཡིན་པ་མེད་དོ། །ཇི་ལྟར་བུས་པ་དེ་བ་ལང་དང་རྟ་མ་ཡིན་པ་ལ་བ་ལང་དང་རྟར་འདུ་ཤེས་པ་ལྟར། གལ་ཏེ་སེམས་ཅན་གང་ལམ་མ་ཡིན་པ་ལ་ལམ་ཡང་དག་པར་འདུ་ཤེས་འཇོག་ན། དེ་བཞིན་
གཤེགས་པས་ཀྱང་ལམ་མ་ཡིན་པ་ལ་ལམ་དུ་འཆད་དེ། ལམ་མ་ཡིན་པ་ལ་ཡང་དག་པར་ལམ་མེད་མོད་ཀྱི། ལམ་གྱི་རྒྱུ་ཅུང་ཟད་བསྐྱེད་ནུས་པའི་ཕྱིར་ལམ་མ་ཡིན་པ་ལམ་དུ་འཆད་དོ། །ཇི་ལྟར་བུས་པ་དེ་ཤིང་གི་ཁྱེའུ་དང་བུ་མོ་ལ་ཁྱེའུ་དང་བུ་མོར་འདུ་ཤེས་པ་ལྟར། དེ་བཞིན་

གཤེགས་པ་ཡང་དེ་དང་འདྲ་བར་སེམས་ཅན་མ་ཡིན་པར་མཁྱེན་བཞིན་དུ་སེམས་ཅན་གྱི་མཚན་ཉིད་འཆད་དེ། ཡང་དག་པར་ན་སེམས་ཅན་གྱི་མཚན་ཉིད་མེད་དོ། །གལ་ཏེ་སངས་རྒྱས་བཅོམ་ལྡན་འདས་ཀྱིས་སེམས་ཅན་མེད་པར་འཆད་ན་སེམས་ཅན་ཐམས་ཅད་ངན་པར་
ལྟ་བར་ལྟུང་སྟེ། དེ་བས་ན་དེ་བཞིན་གཤེགས་པས་སེམས་ཅན་ཡོད་པར་གསུངས་སོ། །སེམས་ཅན་ལས་སེམས་ཅན་དུ་འདུ་ཤེས་འཇོག་པ་ནི་སེམས་ཅན་གྱི་མཚན་ཉིད་འཇིག་མི་ནུས་སོ། །གང་སེམས་ཅན་ལས་སེམས་ཅན་གྱི་མཚན་ཉིད་འཇིག་པ་ནི་ཡོངས་སུ་མྱ་
ངན་ལས་འདས་པ་ཆེན་པོ་ཐོབ་པར་འགྱུར་རོ། །དེ་ལྟར་མྱ་ངན་ལས་འདས་པ་ཆེན་པོ་ཐོབ་པའི་ཕྱིར་མི་ངུ་བར་འགྱུར་ཏེ་དེ་ནི་བུས་པའི་སྤྱོད་པ་ཞེས་བྱའོ། །རིགས་ཀྱི་བུ་གལ་ཏེ་སྐྱེས་པའམ་བུད་མེད་གང་སྤྱོད་པ་ལྔ་པོ་འདི་གཟུངས་སུ་འཛིན་ཅིང་འཆང་ངམ། ཀློག་གམ་
ཡི་གེར་བྲིས་སམ། དགྲོལ་ཞིང་འཆད་ན་གང་ཟག་དེས་གདོན་མི་ཟ་བར་སྤྱོད་པ་ལྔ་པོ་དེ་དག་ཐོབ་པར་རིག་པར་བྱའོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བཅོམ་ལྡན་
འདས་ཀྱིས་གསུངས་པའི་དོན་འཚལ་བ་ལྟར་ན། བདག་ཀྱང་གདོན་མི་འཚལ་བར་སྤྱོད་པ་ལྔ་པོ་དེ་དག་ཐོབ་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་འབའ་ཞིག་གིས་སྤྱོད་པ་ལྔ་པོ་དེ་དག་ཐོབ་པ་མ་ཡིན་གྱི། ད་ལྟ་འཁོར་འདིའི་
ནང་ན་མི་ཁྲི་ཕྲག་དགུ་བཅུ་རྩ་གསུམ་ཡང་ཁྱོད་དང་འདྲ་བར་སྤྱོད་པ་ལྔ་པོ་དེ་དག་ཐོབ་པར་གྱུར་ཏོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས། བུས་པ་ཆུང་ངུ་སྤྱོད་པ་ཞེས་བྱ་བའི་ལེའུ་སྟེ་བརྒྱད་པའོ།། །།འཕགས་པ་ཡོངས་སུ་མྱ་
ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་བརྒྱད་པ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་གལ་ཏེ་བྱང་ཆུབ་སེམས་དཔའ་སེམས་

དཔའ་ཆེན་པོ་གང་མྱ་ངན་ལས་འདས་པ་ཆེན་པོའི་མདོ་འདི་ལ་རྣལ་འབྱོར་དུ་སྤྱོད་ན་ཡོན་ཏན་རྣམ་པ་བཅུ་འཐོབ་པར་འགྱུར་ཏེ། ཉན་ཐོས་དང་རང་སངས་རྒྱས་དང་ཐུན་མོང་མ་ཡིན་ཞིང་བསམ་གྱིས་མི་ཁྱབ་སྟེ་ཐོས་པ་ཙམ་གྱིས་ངོ་མཚར་རྨད་དུ་འཛིན་ལ།
ནང་མ་ཡིན། ཕྱི་རོལ་མ་ཡིན། དཀའ་བ་མ་ཡིན། སླ་བ་མ་ཡིན། མཚན་ཉིད་མ་ཡིན། མཚན་ཉིད་མ་ཡིན་པ་མ་ཡིན། འཇིག་རྟེན་གྱི་ཆོས་མ་ཡིན་ཏེ། མཚན་མ་དང་དབྱིབས་མེད་པ་འཇིག་རྟེན་ན་མི་སྲིད་པའོ། །རྣམ་པ་བཅུ་གང་ཞེ་ན། གཅིག་ལ་ཡང་རྣམ་པ་ལྔ་སྟེ།
ལྔ་གང་ཞེ་ན། མ་ཐོས་པ་ཐོས་པར་འགྱུར་བ་དང་། ཐོས་ནས་ཕན་པའི་དོན་དུ་འགྱུར་བ་དང་། ཐེ་ཙོམ་དང་ནེམ་ནུར་གྱི་སེམས་ཆོད་པར་འགྱུར་བ་དང་། ཤེས་རབ་ལ་གཡོ་སྒྱུ་མེད་པ་དང་། དེ་བཞིན་གཤེགས་པས་དགོངས་ཏེ་གསུངས་པའི་དོན་ཟབ་མོ་ཤེས་པ་དང་ལྔའོ། །དེ་
ལ་མ་ཐོས་པ་ཐོས་པར་འགྱུར་བ་ཞེས་བྱ་བ་གང་ཞེ་ན། འདི་ལྟ་སྟེ་དགོངས་ཏེ་གསུངས་པའི་དོན་ཤིན་ཏུ་ཟབ་མོ་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པ་དང་། སངས་རྒྱས་དང་། ཆོས་དང་དགེ་འདུན་ལ་ཁྱད་མེད་པ། དཀོན་མཆོག་གསུམ་གྱི་རང་བཞིན་
དང་། མཚན་ཉིད་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་དང་། སངས་རྒྱས་བཅོམ་ལྡན་འདས་ཐམས་ཅད་ནི་མཐའ་ཡུན་དུ་མྱ་ངན་ལས་འདས་པ་མེད་དེ། རྟག་པ། གནས་པ། མི་འགྱུར་མི་འཕོ་བ་དང་། དེ་བཞིན་གཤེགས་པའི་མྱ་ངན་
ལས་འདས་པ་ནི་ཡོད་པ་མ་ཡིན། མེད་པ་མ་ཡིན། འདུས་བྱས་པ་མ་ཡིན། འདུས་མ་བྱས་པ་མ་ཡིན། ཟག་པ་དང་བཅས་པ་མ་ཡིན། ཟག་པ་མེད་པ་མ་ཡིན། གཟུགས་མ་ཡིན། གཟུགས་མ་ཡིན་པ་མ་ཡིན། མིང་མ་ཡིན། མིང་མ་ཡིན་པ་མ་ཡིན། མཚན་ཉིད་མ་
ཡིན། མཚན་ཉིད་མ་ཡིན་པ་མ་ཡིན། ཡོད་པ་མ་ཡིན། མེད་པ་མ་ཡིན། དངོས་པོ་མ་ཡིན། དངོས་པོ་མ་ཡིན་པ་མ་ཡིན། རྒྱུ་མ་ཡིན། འབྲས་བུ་མ་ཡིན། ལྟོས་པ་མ་ཡིན། མི་ལྟོས་པ་མ་ཡིན། སྣང་བ་མ་ཡིན། མུན་པ་མ་ཡིན། བྱུང་བ་མ་ཡིན། མ་བྱུང་བ་མ་

ཡིན། རྟག་པ་མ་ཡིན། མི་རྟག་པ་མ་ཡིན། ཆད་པ་མ་ཡིན། མ་ཆད་པ་མ་ཡིན། ཐོག་མ་མ་ཡིན། ཐ་མ་མ་ཡིན། འདས་པ་མ་ཡིན། མ་འོངས་པ་མ་ཡིན། ད་ལྟར་མ་ཡིན། ཕུང་པོ་མ་ཡིན། ཕུང་པོ་མ་ཡིན་པ་མ་ཡིན། སྐྱེ་མཆེད་མ་ཡིན། སྐྱེ་མཆེད་མ་ཡིན་
པ་མ་ཡིན། ཁམས་མ་ཡིན། ཁམས་མ་ཡིན་པའང་མ་ཡིན། རྟེན་ཅིང་འབྲེལ་པར་འབྱུང་བ་བཅུ་གཉིས་མ་ཡིན། རྟེན་ཅིང་འབྲེལ་པར་འབྱུང་བ་བཅུ་གཉིས་མ་ཡིན་པ་མ་ཡིན། དེ་དག་ལ་སོགས་པའི་ཆོས་དགོངས་ཏེ་གསུངས་པའི་དོན་ཤིན་ཏུ་ཟབ་མོ་སྔོན་མ་ཐོས་པ་ཐོས་
པར་འགྱུར་བ་དང་། གཞན་ཡང་མ་ཐོས་པ་ནི་འདི་ལྟ་སྟེ། མུ་སྟེགས་ཅན་ཐམས་ཅད་ཀྱི་གཙུག་ལག་རིམ་པ་བཞི་དང་། བྱཱ་ཀ་ར་ཎའི་གཙུག་ལག་དང་། རྒྱལ་པོའི་གཙུག་ལག་དང་། བགྲང་བ་དང་། བརྩི་བའི་གཙུག་ལག་ལ་སོགས་པ་དང་། རིག་སྔགས་དང་། སྨན་
དཔྱད་དང་། སྒྱུ་རྩལ་དང་། ཉི་ཟླ་སྤྱང་ཀིས་ཟིན་པ་དང་། སྐར་མ་འཕོ་ཞིང་འགྱུར་བ་དང་། རི་མོ་དང་ཡི་གེ་དང་། ལུང་སྟོན་པའི་གཙུག་ལག་ལ་སོགས་པའི་ཡི་གེ་དང་། གཙུག་ལག་དེའི་གསང་བའི་དོན་སྔོན་མ་ཐོས་པ་ད་མདོ་སྡེ་འདི་ལས་ཤེས་པར་འགྱུར་བ་དང་། གཞན་
ཡང་ཤིན་ཏུ་རྒྱས་པའི་མདོ་སྡེ་མ་གཏོགས་པ་མདོ་སྡེ་བཅུ་གཅིག་ལས་དགོངས་ཏེ་གསུངས་པའི་དོན་ཤིན་ཏུ་ཟབ་མོ་མེད་པ་ཡང་དེང་མདོ་སྡེ་འདིའི་རྐྱེན་གྱིས་ཤེས་པར་གྱུར་ཏོ། །རིགས་ཀྱི་བུ་དེ་ནི་མ་ཐོས་པ་ཐོས་པར་འགྱུར་བ་ཞེས་བྱའོ། །ཐོས་ནས་ཕན་པར་འགྱུར་བ་ཞེས་
བྱ་བ་ནི་གལ་ཏེ་མྱ་ངན་ལས་འདས་པ་ཆེན་པོའི་མདོ་འདི་ཡོངས་སུ་འཛིན་ན། ཤིན་ཏུ་རྒྱས་པ་ཐེག་པ་ཆེན་པོའི་མདོའི་དོན་གྱི་རོ་ཤིན་ཏུ་ཟབ་མོ་ཐམས་ཅད་རྫོགས་པར་ཀུན་ཤེས་པར་ནུས་སོ། །དཔེར་ན་ཁྱེའུ་འམ་བུ་མོ་དག་མེ་ལོང་གསལ་བའི་ནང་ན་གཟུགས་དང་ཆ་ལུགས་
གསལ་བར་སྣང་བ་བཞིན་དུ་མྱ་ངན་ལས་འདས་པ་ཆེན་པོའི་མེ་ལོང་ཡང་དེ་དང་འདྲ་སྟེ། བྱང་ཆུབ་སེམས་དཔས་ཐོས་ན་ཐེག་པ་ཆེན་པོའི་མདོ་སྡེའི་དོན་ཤིན་ཏུ་ཟབ་མོ་གསལ་བར་མཐོང་ངོ་། །གཞན་ཡང་ལ་ལ་ཞིག་མུན་ཁང་གི་ནང་དུ་སྒྲོན་མ་ཆེན་པོ་ཕྱུང་ན། རྫས་ཐམས་ཅད་

མཐོང་བ་བཞིན་དུ་མྱ་ངན་ལས་འདས་པ་ཆེན་པོའི་སྒྲོན་མ་ཡང་དེ་དང་འདྲ་སྟེ། བྱང་ཆུབ་སེམས་དཔས་འཛིན་ན་ཐེག་པ་ཆེན་པོའི་དོན་ཟབ་མོ་གསལ་དཀའ་བ་མཐོང་བར་འགྱུར་རོ། །གཞན་ཡང་ཇི་ལྟར་ཉི་མ་ཤར་བ་ན་འོད་སྣང་བ་སྟོང་ཡོད་པ་དེས་རི་རྣམས་ཀྱི་
སུ་ལ་ཟབ་མོ་མུན་པ་ཅན་ཀུན་སྣང་བར་བྱེད་དེ། སྐྱེ་བོ་ཐམས་ཅད་ཀྱིས་རྒྱང་རིང་པོ་ནས་རྫས་རྣམས་མཐོང་བ་བཞིན་དུ་མྱ་ངན་ལས་འདས་པ་ཆེན་པོའི་ཡོངས་སུ་དག་པའི་ཤེས་རབ་ཀྱི་ཉི་མ་ཡང་དེ་དང་འདྲ་སྟེ། ཐེག་པ་ཆེན་པོས་ཤིན་ཏུ་ཟབ་མོའི་གནས་སྣང་བར་བྱེད་དེ། ཉན་ཐོས་
དང་། རང་སངས་རྒྱས་ཀྱི་ཐེག་པ་བས་རྒྱང་རིང་པོ་ནས་སངས་རྒྱས་ཀྱི་བྱང་ཆུབ་མཐོང་བར་བྱེད་དོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པ་ཆེན་པོའི་མདོ་སྡེ་དམ་པ་མཉན་ཅིང་འཛིན་པའི་ཕྱིར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དེ་ལྟར་མྱ་ངན་
ལས་འདས་པ་ཆེན་པོའི་མདོ་ཉན་ཏམ་འཛིན་ན་ཆོས་ཐམས་ཅད་ཀྱི་རྣམ་གྲངས་རྟོགས་པར་འགྱུར་རོ། །གལ་ཏེ་ཡི་གེར་བྲིས་སམ། ཀློག་གམ། འདོན་ཏམ། ཁོང་དུ་ཆུད་པར་བྱེད་དམ། གཞན་ལ་རྒྱས་པར་སྟོན་ཏམ། དོན་ཡིད་ལ་བྱེད་ན་ཆོས་ཐམས་ཅད་ཀྱི་
དོན་ཚུལ་བཞིན་དུ་རྟོགས་པར་འགྱུར་རོ། །རིགས་ཀྱི་བུ་གང་ཉན་ཅིང་འཛིན་པ་དེས་ནི་རྣམ་གྲངས་འབའ་ཞིག་ཤེས་ཀྱི། དོན་འདི་ཉིད་མི་རྟོགས་སོ། །གང་ཡི་གེར་བྲིས་སམ། གཟུངས་སུ་འཛིན་ཏམ། ཀློག་གམ། འདོན་ཏམ། གཞན་ལ་རྒྱས་པར་སྟོན་
ཏམ། དོན་ཡིད་ལ་བྱེད་ན། དོན་ཉིད་རྟོགས་པར་འགྱུར་རོ། །གཞན་ཡང་རིགས་ཀྱི་བུ་མདོ་སྡེ་འདི་མཉན་པས་ན་སངས་རྒྱས་ཀྱི་རང་བཞིན་ཡོད་པར་ཐོས་ཀྱི་མཐོང་བར་ནི་མི་ནུས་སོ། །ཡི་གེར་བྲིས་ཤིང་ཀློག་གམ། འདོན་ཏམ། གཞན་ལ་རྒྱས་པར་སྟོན་
ཏམ། དོན་ཡིད་ལ་བྱེད་ན་དེས་ནི་མཐོང་བར་འགྱུར་རོ། །མདོ་སྡེ་འདི་མཉན་པ་ཙམ་གྱིས་སྦྱིན་པ་ཐོབ་པར་འགྱུར་གྱིས། སྦྱིན་པའི་ཕ་རོལ་ཏུ་ཕྱིན་པ་མཐོང་བ་ནི་མ་ཡིན་ནོ། །མདོ་སྡེ་འདི་ཡི་གེར་བྲིས་ཤིང་འདོན་ཏམ། ཀློག་གམ། གཞན་ལ་ཡང་རྒྱས་

པར་སྟོན་ཏམ། དོན་ཡིད་ལ་བྱེད་ན་སྦྱིན་པའི་ཕ་རོལ་ཏུ་ཕྱིན་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་མཐོང་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་མྱ་ངན་ལས་འདས་པ་ཆེན་པོའི་མདོ་འདི་མཉན་ན་ཆོས་ཤེས་པ་དང་།
དོན་ཤེས་པར་འགྱུར་རོ། །སོ་སོ་ཡང་དག་པར་ཤེས་པ་དེ་གཉིས་དང་ལྡན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། འཇིག་རྟེན་དུ་བཅས་པ་ཐམས་ཅད་ཀྱིས་མི་འཇིགས་པ་དང་། མདོ་སྡེ་བཅུ་གཉིས་རྣམ་པར་འབྱེད་ཅིང་དོན་སྟོན་པ་ལ་
འགལ་བ་མེད་པ་དང་། གཞན་ལས་མ་མཉན་པར་རང་གིས་རིག་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཉེ་བར་འགྱུར་རོ། །རིགས་ཀྱི་བུ་དེ་ནི་ཐོས་ནས་ཕན་པར་འགྱུར་བ་ཞེས་བྱའོ། །ཐེ་ཚོམ་གྱི་སེམས་ཆོད་པ་ཞེས་བྱ་བ་ནི་རྣམ་པ་གཉིས་ཏེ། ཚིག་
ལ་ཐེ་ཚོམ་ཟ་བ་དང་། དོན་ལ་ཐེ་ཚོམ་ཟ་བའོ། །མདོ་སྡེ་འདི་མཉན་པས་ཚིག་ལ་ཐེ་ཚོམ་ཟ་བའི་སེམས་ཆོད་པར་འགྱུར་རོ། །དོན་ཡིད་ལ་བྱེད་པས་ནི་དོན་ལ་ཐེ་ཚོམ་ཟ་བའི་སེམས་ཆོད་པར་འགྱུར་རོ། །གཞན་ཡང་རིགས་ཀྱི་བུ་ཐེ་ཚོམ་ལ་རྣམ་པ་ལྔ་སྟེ། སངས་རྒྱས་
ངེས་པར་མྱ་ངན་ལས་འདའ་འམ་སྙམ་ཐེ་ཚོམ་ཟ་བ་དང་། སངས་རྒྱས་རྟག་ཏུ་གནས་པ་ཡིན་ནམ་སྙམ་ཐེ་ཚོམ་ཟ་བ་དང་། སངས་རྒྱས་ཡང་དག་པར་བདེན་པ་ཡིན་ནམ་སྙམ་ཐེ་ཚོམ་ཟ་བ་དང་། སངས་རྒྱས་ཡང་དག་པར་ཡོངས་སུ་དག་པ་ཡིན་ནམ་སྙམ་ཐེ་ཚོམ་ཟ་བ་དང་།
སངས་རྒྱས་ཡང་དག་པར་བདག་ཡིན་ནམ་སྙམ་དུ་ཐེ་ཚོམ་ཟ་བ་སྟེ། མདོ་སྡེ་འདི་མཉན་པས་ནི་སངས་རྒྱས་མྱ་ངན་ལས་འདའ་བ་ཐེ་ཚོམ་ཟ་བ་ཡོངས་སུ་ཆོད་པར་འགྱུར་རོ། །ཡི་གེར་བྲིས་ཤིང་ཀློག་གམ་འདོན་ཏམ། གཞན་ལ་རྒྱས་པར་སྟོན་ཏམ། དོན་ཡིད་ལ་བྱེད་
པས་ནི་ཐེ་ཚོམ་ལྷག་མ་བཞི་ཡོངས་སུ་ཆོད་པར་འགྱུར་རོ། །རིགས་ཀྱི་བུ་གཞན་ཡང་ཐེ་ཚོམ་ལ་རྣམ་པ་གསུམ་སྟེ། ཉན་ཐོས་ཡོད་པ་ཡིན་ནམ་མེད་པ་ཡིན་སྙམ་ཐེ་ཚོམ་ཟ་བ་དང་། རང་སངས་རྒྱས་ཡོད་པ་ཡིན་ནམ་མེད་པ་ཡིན་སྙམ་ཐེ་ཚོམ་ཟ་བ་དང་། སངས་རྒྱས་ཡོད་

པ་ཡིན་ནམ་མེད་པ་ཡིན་སྙམ་ཐེ་ཚོམ་ཟ་བ་སྟེ། མདོ་སྡེ་འདི་མཉན་པ་ཙམ་གྱིས་ཐེ་ཚོམ་རྣམ་པ་གསུམ་མ་ལུས་པར་མེད་པར་འགྱུར་རོ། །ཡི་གེར་བྲིས་ཤིང་ཀློག་གམ་འདོན་ཏམ། གཞན་ལ་རྒྱས་པར་སྟོན་ཏམ། དོན་ཡིད་ལ་བྱེད་པས་ནི་སེམས་ཅན་
ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་རྟོགས་པར་འགྱུར་རོ། །རིགས་ཀྱི་བུ་གལ་ཏེ་སེམས་ཅན་གང་མྱ་ངན་ལས་འདས་པ་ཆེན་པོའི་མདོ་སྡེ་འདི་མ་ཐོས་ན་ཐེ་ཚོམ་གྱི་སེམས་མང་བ་ནི་འདི་ལྟ་སྟེ། རྟག་པའམ། མི་རྟག་པའམ། བདེ་བའམ། མི་བདེ་བ་
འམ། ཡོངས་སུ་དག་པའམ། ཡོངས་སུ་མ་དག་པའམ། བདག་གམ། བདག་མེད་པའམ། སྲོག་གམ། སྲོག་མ་ཡིན་ནམ། སེམས་ཅན་ནམ། སེམས་ཅན་མ་ཡིན་ནམ། མཐར་ཐུག་གམ། མཐར་མ་ཐུག་གམ། མ་འོངས་པའི་དུས་སམ། འདས་པའི་
དུས་སམ། ཡོད་པའམ། མེད་པའམ། སྡུག་བསྔལ་ལམ། སྡུག་བསྔལ་མ་ཡིན་ནམ། ཀུན་འབྱུང་ངམ། ཀུན་འབྱུང་མ་ཡིན་ནམ། ལམ་མམ། ལམ་མ་ཡིན་ནམ། འགོག་པའམ། འགོག་པ་མ་ཡིན་ནམ། ཆོས་སམ། ཆོས་མ་ཡིན་ནམ། དགེ་བའམ།
དགེ་བ་མ་ཡིན་ནམ། སྟོང་པའམ། སྟོང་པ་མ་ཡིན་ནམ་སྙམ་དུ་ཐེ་ཚོམ་ཟ་བ་སྟེ། མདོ་སྡེ་འདི་མཉན་ན་དེ་ལྟ་བུའི་ཐེ་ཚོམ་ཐམས་ཅད་ཡོངས་སུ་ཆོད་པར་འགྱུར་རོ། །གཞན་ཡང་རིགས་ཀྱི་བུ་གལ་ཏེ་གང་མདོ་སྡེ་འདི་མ་ཐོས་ན། གཞན་ཡང་ཐེ་ཚོམ་རྣམ་པ་མང་པོ་ཡོད་པར་
འགྱུར་རོ། །འདི་ལྟ་སྟེ། གཟུགས་བདག་ཡིན་ནམ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་བདག་ཡིན་ནམ། འོན་ཏེ་མིག་གིས་མཐོང་ངམ། བདག་གིས་མཐོང་བ་ནས། དེ་བཞིན་དུ་རྣམ་པར་ཤེས་པའི་བར་དུ་ཤེས་པར་ནུས་སམ།
བདག་གིས་ཤེས་པར་ནུས་སམ། གཟུགས་ཀྱིས་རྣམ་པར་སྨིན་པ་མྱོང་ངམ། བདག་གིས་རྣམ་པར་སྨིན་པ་མྱོང་བ་ནས། དེ་བཞིན་དུ་རྣམ་པར་ཤེས་པའི་བར་དུ་རྣམ་པར་སྨིན་པ་མྱོང་ངམ། བདག་གིས་རྣམ་པར་སྨིན་པ་མྱོང་ངམ། གཟུགས་ཕ་རོལ་གྱི་འཇིག་རྟེན་དུ་

འགྲོའམ། འོན་ཏེ་བདག་ཕ་རོལ་གྱི་འཇིག་རྟེན་དུ་འགྲོའམ། དེ་བཞིན་དུ་རྣམ་པར་ཤེས་པ་ཡང་དེ་དང་འདྲ་སྟེ། འཁོར་བ་ཐོག་མ་དང་ཐ་མ་ཡོད་དམ། འོན་ཏེ་ཐོག་མ་དང་ཐ་མ་མེད་པ་ཡིན་ནམ་སྙམ་ཐེ་ཚོམ་ཟ་བ་སྟེ། མདོ་སྡེ་འདི་མཉན་ན་དེ་ལྟ་བུའི་ཐེ་ཚོམ་ལ་སོགས་པ་
ཡང་ཡོངས་སུ་ཆོད་པར་འགྱུར་རོ། །ཡང་ལ་ལ་ཞིག་གིས་ལོག་སྲེད་ཅན་དང་། རྩ་བ་བཞི་ཉམས་པ་དང་། མཚམས་མེད་པ་ལྔའི་ཁ་ན་མ་ཐོ་བ་བྱས་པ་དང་། མདོ་སྡེ་ཤིན་ཏུ་རྒྱས་པ་ལ་སྐུར་པ་དེ་དག་ལ་སངས་རྒྱས་ཀྱི་རང་བཞིན་ཡོད་དམ། སངས་རྒྱས་ཀྱི་རང་བཞིན་མེད་
སྙམ་ཐེ་ཚོམ་ཟ་བ་དག་ཀྱང་མདོ་སྡེ་འདི་མཉན་ན་ཐེ་ཚོམ་དེ་དག་ཐམས་ཅད་ཡོངས་སུ་ཆོད་པར་འགྱུར་རོ། །ཡང་ལ་ལ་ཞིག་གིས་འཇིག་རྟེན་མཐའ་ཡོད་དམ། འཇིག་རྟེན་མཐའ་མེད་དམ། ཕྱོགས་བཅུའི་འཇིག་རྟེན་ཡོད་དམ་ཕྱོགས་བཅུའི་འཇིག་རྟེན་མེད་སྙམ་ཐེ་ཚོམ་ཟ་
བ་དག་ཀྱང་མདོ་སྡེ་འདི་མཉན་ན། དེ་ལྟ་བུའི་ཐེ་ཚོམ་དག་ཀྱང་ཡོངས་སུ་ཆོད་པར་འགྱུར་ཏེ། དེ་ནི་ཐེ་ཚོམ་དང་ནེམ་ནུར་གྱི་སེམས་ཆོད་པར་འགྱུར་བ་ཞེས་བྱའོ། །ཤེས་རབ་ལ་གཡོ་སྒྱུ་མེད་པ་ཞེས་བྱ་བ་ནི་འདི་ལྟ་སྟེ། གལ་ཏེ་སེམས་ལ་ཐེ་ཚོམ་ཡོད་ན་ལྟ་བ་ཐམས་ཅད་
ཡང་དག་པ་མ་ཡིན་པར་འགྱུར་རོ། །སོ་སོའི་སྐྱེ་བོ་དག་གལ་ཏེ་མྱ་ངན་ལས་འདས་པ་ཆེན་པོའི་མདོ་སྡེ་དམ་པ་འདི་མ་ཐོས་ན་ལྟ་བ་ཐམས་ཅད་ལོག་པར་འགྱུར་རོ། །དེ་བཞིན་དུ་ཉན་ཐོས་དང་རང་སངས་རྒྱས་ཀྱི་བར་དུ་ཡང་ལྟ་བ་ཐམས་ཅད་ལོག་པ་ཡིན་ནོ། །ཇི་ལྟར་ན་བྱིས་པ་སོ་
སོའི་སྐྱེ་བོ་དག་ལྟ་བ་ལོག་པ་ཞེས་བྱ་ཞེ་ན། ཟག་པ་དང་བཅས་པ་ལ་རྟག་པ་དང་། བདེ་བ་དང་། བདག་དང་། ཡོངས་སུ་དག་པར་ལྟ། དེ་བཞིན་གཤེགས་པ་ལ་ནི་མི་རྟག་པ་དང་། སྡུག་བསྔལ་བ་དང་། ཡོངས་སུ་མ་དག་པ་དང་། བདག་མེད་པར་ལྟ་ལ། སེམས་ཅན་དང་།
འཚོ་བ་དང་། སྲོག་དང་། མཐོང་བ་དང་། ཤེས་པ་ཡོད་པར་ལྟ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ལ་མྱ་ངན་ལས་འདས་པ་ཡིན་པར་འཛིན་པ་དང་། ལྷ་དབང་སྒྱུར་ལ་འཕགས་པའི་ལམ་བརྒྱད་ཡོད་པར་ལྟ་བ་དང་། རྟག་པར་ལྟ་བ་དང་། ཆད་པར་ལྟ་བ་སྟེ།

ལྟ་བ་དེ་དག་ཐམས་ཅད་ནི་ལོག་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་གལ་ཏེ་མྱ་ངན་ལས་འདས་པ་ཆེན་པོའི་མདོ་སྡེ་འདི་ཐོས་ཤིང་འཕགས་པའི་སྤྱད་པ་སྤྱོད་པ་ན། ལོག་པར་ལྟ་བ་དེ་དག་མེད་པར་འགྱུར་རོ། །ཇི་ལྟར་ན་ཉན་
ཐོས་དང་རང་སངས་རྒྱས་དང་ལོག་པར་ལྟ་བ་ཞེ་ན། བྱང་ཆུབ་སེམས་དཔའ་དགའ་ལྡན་གྱི་གནས་ནས་བབས་པ་ན་བལ་གླང་ལ་བཅིབས་ཏེ་ཡུམ་གྱི་ལྷུམས་སུ་གཤེགས་པ་དང་། ཡབ་ནི་ཟས་གཙང་མ། ཡུམ་ནི་ལྷ་མཛེས་ཞེས་བྱ་བ་དང་། གྲོང་ཁྱེར་སེར་སྐྱར་ཡུམ་གྱི་
ལྷུམས་སུ་ཟླ་བ་བཅུ་ཚང་ནས་བལྟམ་པ་དང་། བལྟམས་པའི་ཚེ་བརྒྱ་བྱིན་གྱིས་ས་ལ་མ་རེག་པར་བཟུང་སྟེ། ཀླུའི་རྒྱལ་པོ་དགའ་བོ་དང་། བསྙེན་དགའ་བོ་གཉིས་ཀྱིས་ཆུ་ཕབ་ནས་སྐུ་བསིལ་བ་དང་། གནོད་སྦྱིན་གྱི་རྒྱལ་པོ་ཆེན་པོ་མ་ནི་བ་རྟ་ཞེས་བྱ་བས་རིན་པོ་ཆེའི་
གདུགས་ཐོགས་པ་དང་། སའི་ལྷས་པད་མོ་སྤྲུལ་ཏེ་ཞབས་བརྟེན་པ་དང་། ཕྱོགས་བཞི་ཀུན་ཏུ་གོམ་པ་བདུན་བདུན་བོར་བ་དང་། ལྷའི་འཇིག་རྟེན་དུ་གཤེགས་ནས་ལྷ་ཐམས་ཅད་ལངས་ཏེ་བསུས་པ་དང་། དྲང་སྲོང་ཨ་སི་ཏས་པང་དུ་བླངས་ཏེ་མཚན་བལྟས་པ་
དང་། མཚན་བལྟས་ནས་བདག་ནི་ཚེའི་དུས་བྱེད་པར་འགྱུར་ཏེ། སངས་རྒྱས་མངོན་དུ་གཤེགས་པ་མི་མཐོང་ངོ་སྙམ་དུ་སྡུག་བསྔལ་ཆེན་པོ་སྐྱེས་ཏེ་ཡིད་ལ་རབ་ཏུ་གཅགས་པ་དང་། སློབ་དཔོན་ལས་ཡིག་རྩིས་དང་། འཕོང་དང་། ཁ་ལོ་སྒྱུར་བ་དང་། རི་མོ་
དང་། ལུང་སྟོན་པ་དང་། སྒྱུ་རྩལ་སློབ་པ་དང་། ཕོ་བྲང་གི་ནང་དུ་བུ་མོ་དང་སླས་དྲུག་ཁྲི་དང་ལྷན་ཅིག་ཏུ་རྩེ་ཞིང་ལོངས་སྤྱོད་པ་དང་། ཁབ་ནས་བྱུང་སྟེ་འཆག་ཏུ་གཤེགས་པ་ལས་གྲོང་ཁྱེར་སེར་སྐྱའི་སྒོར་མི་རྒས་འཁོགས་པ་མཐོང་བ་ནས། དེ་བཞིན་དུ་དགེ་སྦྱོང་
ཆོས་གོས་གྱོན་ཅིང་འགྲོ་བའི་བར་དུ་མཐོང་ནས་ཕྱིར་ཕོ་བྲང་དུ་ཕྱིན་ཏེ། བུ་མོ་དང་སླས་རྣམས་ཀྱི་ལུས་དང་གཟུགས་ལ་ཀེང་རུས་དང་འདྲ་བར་མཐོང་བ་དང་། ཕོ་བྲང་ཡང་དུར་ཁྲོད་དང་ཐ་མི་དད་པར་མཐོང་ནས། ཁྱིམ་ལ་སྐྱོ་བར་གྱུར་ཏེ་ནམ་གྱི་གུང་ལ་ཁབ་ནས་བྱུང་སྟེ།

དྲང་སྲོང་ཨུ་ཏ་ཀ་དང་། ཨ་ལ་ཙ་ལ་སོགས་པའི་གན་དུ་ཕྱིན་ནས་དེ་དག་ལས་རྣམ་ཤེས་མཐའ་ཡས་སྐྱེ་མཆེད་སྟེངས་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དག་བཤད་པ་ཐོས་སོ། །ཐོས་ནས་སྐྱེ་མཆེད་ལ་ཡོངས་སུ་བརྟགས་ན་མི་རྟག་པ་དང་། སྡུག་བསྔལ་བ་དང་།
ཡོངས་སུ་མ་དག་པ་དང་། བདག་མེད་པ་ཡིན་པར་རྟོགས་ནས་དེ་སྤངས་ཏེ་ཤིང་དྲུང་ན་ལོ་དྲུག་གི་བར་དུ་དཀའ་བ་སྤྱོད་པ་དང་། དེ་ལྟར་དཀའ་བ་སྤྱོད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་མ་རྒྱས་ཏེ། དེ་ནས་ཡང་ཆུ་བོ་དགའ་སྐྱེད་ཅེས་བྱ་བའི་ནང་དུ་
ཁྲུས་བྱས་ནས་གནག་རྫི་མོས་འོ་མའི་འཇམས་ཕུལ་བ་བཞེས་པ་དང་། བཞེས་ནས་བྱང་ཆུབ་ཀྱི་ཤིང་དྲུང་དུ་གཤེགས་ཏེ་བདུད་སྡིག་ཏོ་ཅན་བཏུལ་ནས་བླ