Kinh tạng Tây Tạng (Kangyur Đại Học) — 048_མདོ་སྡེ།_ང

རྟན་པའི་བློ་
གྲོས་ཀྱིས་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་བདག་ཕྱོགས་འགའ་ཞིག་ཞུ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་བརྟན་པའི་བློ་
གྲོས་ལ་འདི་སྐད་ཅེས་བཀའ་སྩལ་ཏོ། །བརྟན་པའི་བློ་གྲོས་ཁྱོད་ཅི་དང་ཅི་འདོད་པ་དྲིས་ཤིག་དང་། ངས་དེ་དང་དེ་ཉིད་ཀྱི་དྲི་བ་ལན་བཏབ་པས་ཁྱོད་ཀྱི་སེམས་རངས་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བརྟན་པའི་བློ་གྲོས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་
འདས་སྒོར་འཇུག་པ་ཞེས་བགྱི་ན། བཅོམ་ལྡན་འདས་སྒོར་འཇུག་པ་ཞེས་བགྱི་བ་དེ་གང་ལགས། བཅོམ་ལྡན་འདས་དེ་བཞིན་གཤེགས་པས་དེ་ཡང་བཤད་པར་གསོལ། གང་དག་སྒོའི་ཚིག་དག་ལ་ཞུགས་པའི་བྱང་ཆུབ་སེམས་དཔའ་དེ་དག་ཀྱང་བཤད་པར་གསོལ། ཆོས་དེ་དག་གི་འཇུག་པ་

དེ་ཡང་བཤད་པར་གསོལ། ཆོས་མཆོག་དེ་དག་གང་ཞིག་ལགས། །དེ་དག་འཇུག་པ་ཇི་ལྟ་བུ། །དེ་དག་སྒོ་ཡང་ཅི་འདྲ་ལགས། །འདྲེན་པ་དེ་བཞིན་བཤད་པར་གསོལ། །ཆོས་ལ་ཞུགས་ནས་ཇི་ལྟ་བུར། །བྱང་ཆུབ་འབྱུང་བར་འགྱུར་བ་ལགས། །ཇི་ལྟར་ཆོས་ནི་བསྟན་པ་ནས། །
སྤོབས་པ་ཆད་པར་མི་འགྱུར་ལགས། །ཆོས་དེ་དག་ནི་ག་ལས་མཆིས། །དེ་དག་གང་དུ་གནས་པ་ལགས། །དེ་དག་ཇི་ལྟར་མི་རྨོངས་ཤིང་། །ཆོས་རྣམས་ལ་ནི་དྲན་པ་འཇུག །ཅི་ནས་དེ་དག་ཞུགས་འགྱུར་བའི། །འཇུག་པའི་མཚན་ཉིད་བཤད་དུ་གསོལ། །ཞུགས་པ་རྣམས་ཀྱི་
ཆོས་གང་དག །མངོན་དུ་འགྱུར་བ་བཤད་པར་གསོལ། །དེ་དག་ཇི་ལྟར་མི་རྨོངས་ཤིང་། །ཆོས་ལ་དྲན་འབྱུང་འདྲེན་པ་པོ། །བསྐལ་པ་གྲངས་ནི་མ་མཆིས་པར། །སྤོབས་པ་ཆད་པར་མི་འགྱུར་ལགས། །དེ་དག་དམིགས་པ་ཅི་འདྲ་ཞིག །རྟེན་ཀྱང་ཇི་འདྲ་བ་ཞིག་ལགས། །གང་གིས་སྨྲ་
བ་དེ་དག་གི། །མཐར་འགྱུར་མ་མཆིས་འདྲེན་པ་པོ། །ཇི་ལྟར་སྔོན་ཆད་དེ་དག་གིས། །སྦྱིན་པ་སྩལ་ནས་ཞི་བར་བསྔོས། །གང་གིས་གཟི་བརྗིད་ལྡན་རྣམས་ཀྱི། །སྤོབས་པ་སྐྱེ་དང་མཇལ་བར་འགྱུར། །ཇི་ལྟ་བུར་ནི་ཚུལ་ཁྲིམས་བསྲུངས། །ཇི་ལྟ་བུར་ནི་ཚུལ་ཁྲིམས་བསྟེན། །ཇི་ལྟ་
བུར་ནི་ཚུལ་ཁྲིམས་བསྔོས། །གང་དེ་ཁྲིམས་ཀྱིས་མ་སོང་ལགས། །ཇི་ལྟ་བུར་ན་བཟོད་པ་བསྒོམས། །ཇི་ལྟ་བུར་ན་བཟོད་པ་བསྟེན། །གང་གིས་དེ་དག་མ་སྐྱེས་མཐའ། །བླ་ན་མ་མཆིས་རྗེས་སུ་ཐོབ། །ཇི་ལྟ་བུར་ན་བརྩོན་འགྲུས་བརྩམས། །ཇི་ལྟ་བུར་ན་བརྩོན་འགྲུས་བསྟེན། །གང་
གིས་སངས་རྒྱས་བྱང་ཆུབ་དང་། །བྲལ་བར་མ་གྱུར་འདྲེན་པ་པོ། །ཇི་ལྟ་བུར་ན་བསམ་གཏན་བསྐྱེད། །ཇི་ལྟ་བུར་ན་བསམ་གཏན་བསྟེན། །ཆོས་གང་ལ་ནི་བསམ་གཏན་བགྱིད། །གང་གིས་སྤོབས་པ་བསྐྱེད་པ་ལགས། །ཇི་ལྟར་དེ་དག་ཤེས་རབ་བསྒོམས། །ཇི་ལྟ་བུར་ན་ཤེས་རབ་བསྟེན། །ཇི་
ལྟར་དེ་དག་ཡེ་ཤེས་འཇུག །ཇི་ལྟར་སྤོབས་པ་ཆད་མི་འགྱུར། །བླ་མེད་ཚུལ་ལ་གནས་པ་ལགས། །ཡང་དག་ཆོས་རྣམས་སྟོན་པ་ལགས། །ཟབ་ཅིང་ཞི་བ་སྟོང་པ་ཡི། །བྱང་ཆུབ་དེ་དང་སུ་ཞིག་ཉེ། །ཇི་ལྟར་མདོ་སྡེ་སྣ་ཚོགས་གཟུང་། །སྣ་ཚོགས་དོན་ལ་རྣམ་ངེས་ལགས། །ཡང་དང་ཡང་དུའང་

སྟོན་བགྱིད་ལགས། །ཞུ་བ་དེ་ནི་ལན་སྩལ་གསོལ། །སེམས་ཅན་རྣམས་ཀྱི་ཐེ་ཚོམ་གཅོད། །དེ་ནི་བདག་གིས་སྟོན་ལ་ཞུ། །མ་མཆིས་པ་ཡི་དུས་ན་ནི། །ཆོས་སྨྲ་བ་ནི་འབྱུང་བར་འགྱུར། །ཇི་ལྟར་དེ་ལའང་གནས་པར་བགྱི། །འདྲེན་པ་ཇི་ལྟར་གནས་ནས་སུ། །ཇི་
ལྟར་ཆོས་ནི་བཟུང་ནས་སུ། །ཇི་ལྟར་ཆོས་ནི་ཡོངས་སུ་འཛིན། །འཇིག་རྟེན་མགོན་པོ་མི་མཆོག་གིས། །ཞུས་པ་དེ་ནི་བདག་ལ་སྟོན། །ཕྱི་མའི་དུས་ན་ཇི་ལྟ་བུར། །སྲོག་ཆགས་རྣམས་ཀྱི་ཐེ་ཚོམ་གཅད། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་
སེམས་དཔའ་ཆེན་པོ་བརྟན་པའི་བློ་གྲོས་ལ་འདི་སྐད་ཅེས་བཀའ་སྩལ་ཏོ། །བརྟན་པའི་བློ་གྲོས་ཁྱོད་དེ་བཞིན་གཤེགས་པ་ལ་དོན་དེ་ཡོངས་སུ་འདྲི་བར་སེམས་པ་ནི་ལེགས་སོ་ལེགས་སོ། །འདི་ལྟར་ཁྱོད་ཀྱིས་ནི་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་རྣམས་ལ་དགེ་བའི་རྩ་བ་བྱས་སོ། །དེ་བཞིན་གཤེགས་པ་དེ་དག་ལ་ཡང་ཡོངས་སུ་ཞུས་སོ། །བརྟན་པའི་བློ་གྲོས་ངས་ནི་འདས་པའི་དུས་བསྐལ་པ་གྲངས་མེད་པ་ན་ནམ་མཁས་ཡོངས་སུ་ཟིན་པའི་ས་ཕྱོགས་འདི་ཉིད་དུ་སངས་རྒྱས་སྟོང་ཕྲག་དྲུག་ཅུ་རྩ་བརྒྱད་ལ་ཁྱོད་ཀྱིས་ཞུ་བ་གང་ཞུས་པ་
དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་ཁྱོད་ཀྱི་ཞུ་བ་དེ་ཞུ་བ་ན་ཡང་སེམས་ཅན་མང་པོ་དཔག་ཏུ་མེད་པའི་དོན་དུ་གྱུར་པར་མངོན་པར་ཤེས་སོ། །བརྟན་པའི་བློ་གྲོས་དེ་ལྟ་བས་ན་རྣམ་གྲངས་དེས་ཁྱོད་ཀྱིས་འདི་ལྟར་རིག་པར་བྱ་སྟེ། བརྟན་པའི་བློ་
གྲོས་སྔོན་བྱུང་བ་འདས་པའི་དུས་བསྐལ་པ་གྲངས་མེད་པར་གྱུར་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་མངོན་དུ་འཕགས་པའི་འོད་ཟེར་ཅེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་དེའི་ཚེའི་ཚད་ནི་བསྐལ་པ་ཕྱེད་ཐུབ་པར་གྱུར་ཏོ། །བཅོམ་
ལྡན་འདས་དེ་གང་དག་དང་ཐབས་ཅིག་ཏུ་ལྗོངས་རྒྱུ་བ་མཛད་པ་དང་། གང་དག་དང་ཐབས་ཅིག་ཏུ་དབྱར་གནས་པར་དམ་བཅའ་བར་མཛད་པ་དེའི་དགྲ་བཅོམ་པ་ཟག་པ་ཟད་པ་དག་ནི་བྱེ་བ་ཕྲག་བདུན་ཅུ་ཚང་བར་བྱུང་བར་གྱུར་ཏོ། །བརྟན་པའི་བློ་གྲོས་དེའི་དུས་ན་འཛམ་བུའི་གླིང་དེ་ནི་ཡངས་ཤིང་རྒྱ་ཆེ་སྟེ། དཔག་

ཚད་ཁྲག་ཁྲིག་འབུམ་ཕྲག་བདུན་ཅུ་པར་གྱུར་ཏོ། །དེའི་དུས་ན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ། མཐའ་བཞིར་རྣམ་པར་རྒྱལ་བ་སྲུང་བ། ཆོས་དང་ལྡན་པ། ཆོས་ཀྱི་རྒྱལ་པོ་གླིང་བཞི་པའི་འཇིག་རྟེན་གྱི་ཁམས་ཀྱི་དབང་ཕྱུག་འཁོར་ལོས་སྒྱུར་བ་མ་སྨད་པའི་བསོད་ནམས་དབང་
ཕྱུག་ཅེས་བྱ་བ་བྱུང་བར་གྱུར་ཏོ། །དེའི་དུས་ན་འཛམ་བུའི་གླིང་དེར་གྲོང་ཁྱེར་ཆེ་ཞིང་རྒྱ་ཆེ་སྟེ། ཆུར་ནི་དཔག་ཚད་བཞི་བཅུ་པ། ཞེང་དུ་ནི་དཔག་ཚད་སུམ་ཅུ་པ། འབྱོར་པ། རྒྱས་པ། བདེ་བ། ལོ་ལེགས་པ། ཉམས་དགའ་བ། སྐྱེ་བོ་དང་མི་མང་པོས་གང་བ་བྱེ་བ་ཕྲག་བརྒྱད་ཅུ་བྱུང་བར་གྱུར་ཏོ། །
བརྟན་པའི་བློ་གྲོས་རྒྱལ་པོ་མ་སྨད་པའི་བསོད་ནམས་དབང་ཕྱུག་དེའི་འཛམ་བུའི་གླིང་གི་དབུས་སུ་གང་དུ་རྒྱལ་པོ་མ་སྨད་པའི་བསོད་ནམས་དབང་ཕྱུག་གནས་འཆའ་བར་བྱེད་པའི་རྒྱལ་པོའི་ཕོ་བྲང་འཁོར་ཆེན་པོ་ཁོ་ར་ཁོར་ཡུག་ཏུ་དཔག་ཚད་བརྒྱད་ཅུ་ཡོད་པ་གྲུ་བཞི་ལྷམ་པ། རྒྱར་དཔག་ཚད་ཕྱེད་ཕྱེད་ཀྱང་མིག་མངས་
རིས་སུ་བྲིས་པ་གཅིག་བྱུང་བར་གྱུར་ཏོ། །བརྟན་པའི་བློ་གྲོས་རྒྱལ་པོའི་ཕོ་བྲང་འཁོར་དེའི་མིང་ནི་བདེ་བ་ཅན་ཞེས་བྱ་བར་གྱུར་ཏོ། །རྒྱལ་པོའི་ཕོ་བྲང་འཁོར་དེར་སེམས་ཅན་དེ་དག་གིས་ལོངས་སྤྱོད་པའི་ཕྱིར་བདག་གི་མེད་ཅིང་ཡོངས་སུ་འཛིན་པ་མེད་པའི་སྐྱེད་མོས་ཚལ་ཁོར་ཡུག་ཏུ་སྟོང་ཕྲག་བདུན་
ཅུ་བྱུང་བར་གྱུར་ཏོ། །བརྟན་པའི་བློ་གྲོས་རྒྱལ་པོ་མ་སྨད་པའི་བསོད་ནམས་དབང་ཕྱུག་དེའི་རྒྱལ་པོའི་ཕོ་བྲང་འཁོར་དཔག་ཚད་བརྒྱད་ཅུ་པ་དེ་ཇི་ཙམ་དུ་ཆེ་བར་སྐྱེད་མོས་ཚལ་ཆེན་པོ་གཅིག་བྱུང་བར་གྱུར་ཏེ། སྐྱེད་མོས་ཚལ་ཆེན་པོ་དེ་ནི་ཤིང་ཏ་ལའི་ཕྲེང་བ་རིམ་པ་བདུན་གྱིས་བསྐོར་བར་གྱུར་ཅིང་དྲིལ་བུ་གཡེར་
ཀའི་དྲ་བ་རིམ་བདུན་དང་། རྟ་བབས་རིམ་བདུན་དང་། རབ་རིམ་བདུན་དང་། འོབས་རིམ་བདུན་གྱིས་ཁོར་ཡུག་ཏུ་བསྐོར་བར་གྱུར་ཏོ། །བརྟན་པའི་བློ་གྲོས་དེའི་ཚེ་དེའི་དུས་ན་དེ་བཞིན་གཤེགས་པ་རིན་པོ་ཆེ་མངོན་དུ་འཕགས་པའི་འོད་ཟེར་དེ་དགྲ་བཅོམ་པ་བྱེ་བ་ཕྲག་བདུན་ཅུའི་དགེ་སློང་གི་དགེ་འདུན་
ཆེན་པོ་དང་ཐབས་ཅིག་ཏུ་རིམ་གྱིས་ཡུལ་རྒྱུ་བས་རྒྱུ་ཞིང་རྒྱལ་པོའི་ཕོ་བྲང་འཁོར་དུ་བྱོན་པར་གྱུར་ཏེ། བརྟན་པའི་བློ་གྲོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་མངོན་དུ་འཕགས་པའི་འོད་ཟེར་དགེ་སློང་བྱེ་བ་ཕྲག་བདུན་ཅུ་དང་ཐབས་ཅིག་ཏུ་རིམ་གྱིས་ཡུལ་

རྒྱུ་བ་རྒྱུ་ཞིང་རྒྱལ་པོའི་ཕོ་བྲང་འཁོར་དུ་བྱོན་ནས་དེ་རྒྱལ་པོའི་ཕོ་བྲང་འཁོར་དེའི་སྐྱེད་མོས་ཚལ་ཞིག་ན་བཞུགས་སོ། །ཞེས་རྒྱལ་པོ་མ་སྨད་པའི་བསོད་ནམས་དབང་ཕྱུག་གིས་ཐོས་སོ། །བརྟན་པའི་བློ་གྲོས་དེ་ནས་རྒྱལ་པོ་མ་སྨད་པའི་བསོད་ནམས་དབང་ཕྱུག་དེ་དེ་བཞིན་གཤེགས་
པ་རིན་པོ་ཆེ་མངོན་དུ་འཕགས་པའི་འོད་ཟེར་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དེའི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །བརྟན་པའི་བློ་གྲོས་དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་མངོན་དུ་འཕགས་
པའི་འོད་ཟེར་གྱིས་རྒྱལ་པོ་དེའི་བསམ་པ་ཐུགས་སུ་ཆུད་ནས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་སེམས་ཅན་ཐམས་ཅད་ཀྱི་ཐེ་ཚོམ་གཅོད་པ་དེ་ཡང་དག་པར་རབ་ཏུ་བསྟན་ཏོ། །དེས་དེ་ཐོས་ནས་ཡི་རངས་ཤིང་རབ་ཏུ་དགའ་བར་གྱུར་ཏེ། དགའ་བ་དང་ཡིད་བདེ་བ་སྐྱེས་པར་གྱུར་ཏོ། །
དེ་ནས་དེ་འདི་སྙམ་དུ་སེམས་ཏེ། དེ་བཞིན་གཤེགས་པ་རིན་པོ་ཆེ་མངོན་དུ་འཕགས་པ་དེས་ལོངས་སྤྱད་པའི་ཕྱིར་རང་གི་སྐྱེད་མོས་ཚལ་དེ་ཤིན་ཏུ་ལེགས་པར་བརྒྱན་ལ་བདག་གིས་ལེགས་པར་དབུལ་གོར་མ་ཆག་གོ་སྙམ་ནས་བརྟན་པའི་བློ་གྲོས་ལོངས་སྤྱད་པར་བྱ་བའི་ཕྱིར་རྒྱལ་པོ་དེས་སྐྱེད་མོས་ཚལ་དེ་ཕུལ་
ལོ། །གཙུག་ལག་ཁང་བྱེ་བ་ཕྲག་བདུན་ཅུ་དང་འཆག་ས་བྱེ་བ་ཕྲག་བདུན་ཅུ་ཡང་བྱེད་དུ་བཅུག་གོ། །ཁྲིའུ་བྱེ་བ་ཕྲག་བདུན་ཅུ་ཡང་བྱེད་དུ་བཅུག་གོ། །ཀུན་དགའ་ར་བ་བྱེ་བ་ཕྲག་བདུན་ཅུ་ཡང་རིམ་གྲོ་བ་དག་དང་བཅས་པར་ཕུལ་ཏེ་ཕུལ་ནས་ཀྱང་བཅོམ་ལྡན་འདས་དེ་ག་ལ་བ་དེར་སོང་སྟེ་ཕྱིན་ནས། དེ་
བཞིན་གཤེགས་པ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བདག་ལ་ཐུགས་བརྩེ་བའི་སླད་དུ་དགེ་སློང་གི་དགེ་འདུན་དང་ཐབས་ཅིག་ཏུ་སང་གདུགས་ཚོད་ལ་གཤེགས་པར་གནང་བར་མཛད་དུ་གསོལ། བརྟན་པའི་བློ་གྲོས་དེ་ནས་རྒྱལ་པོ་དེས་བཅོམ་ལྡན་འདས་དེ་ཅང་མི་གསུང་བར་
གྱུར་པས་གནང་བར་རིག་ནས། ཞབས་ལ་ཕྱག་འཚལ་ཏེ་སོང་ནས་དེའི་མཚན་མོ་འཁོར་ལོས་སྒྱུར་བའི་ཟས་ལྟ་བུ་མང་བ་དང་བསོད་པ་གཡོས་བྱེད་དུ་བཅུག་ནས། དེའི་མཚན་མོ་འདས་པ་དང་བཅོམ་ལྡན་འདས་དེའི་ཐད་དུ་སོང་ནས་གདུགས་ཚོད་ལ་བབ་པ་གསོལ་ཏོ། །བརྟན་པའི་བློ་གྲོས་དེ་ནས་དེ་བཞིན་

གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་མངོན་དུ་འཕགས་པའི་འོད་ཟེར་དེ་སྔ་དྲོའི་དུས་ཀྱི་ཚེ་ཤམ་ཐབས་དང་ཆོས་གོས་མནབས། ལྷུང་བཟེད་བསྣམས་ཏེ་དགེ་སློང་གི་དགེ་འདུན་གྱིས་མདུན་དུ་བདར་ནས་རྒྱལ་པོ་མ་སྨད་པའི་བསོད་ནམས་དབང་ཕྱུག་གི་ཁྱིམ་ག་ལ་བ་དེར་
གཤེགས་ཏེ་བྱོན་ནས་གདན་བཤམས་པ་ལ་བཞུགས་སོ། །དགེ་སློང་དེ་དག་ཀྱང་སྟན་ཇི་ལྟར་བཤམས་པ་ལ་འཁོད་དོ། །བརྟན་པའི་བློ་གྲོས་དེ་ནས་རྒྱལ་པོ་མ་སྨད་པའི་བསོད་ནམས་དབང་ཕྱུག་གིས་བཅོམ་ལྡན་འདས་དེ་བཞུགས་པ་དང་། དགེ་སློང་གི་དགེ་འདུན་འཁོད་པར་རིག་ནས་རང་གི་ལག་
གིས་གུས་པར་བྱས་ཏེ། མང་ཞིང་བསོད་པའི་ཟས་ཇི་ལྟར་བསྡོགས་པས་ཚིམ་པར་བྱེད་ཅིང་བསྟབས་སོ། །དེས་བཅོམ་ལྡན་འདས་དེ་ལ་རང་གི་ལག་གིས་གུས་པར་བྱས་ཏེ་ཚིམ་པར་བྱས་ཤིང་བསྟབས་ནས། གསོལ་ཟིན་ཅིང་སྡེར་གྱུ་ཕྱག་བཅབས་པར་རིག་ནས། བཅོམ་ལྡན་འདས་དང་དགེ་སློང་
གི་དགེ་འདུན་ལ་སོ་སོར་ཆོས་གོས་གསུམ་གསུམ་སྐུ་ལུས་ལ་གསོལ་ཏོ། །བཅོམ་ལྡན་འདས་དང་དགེ་སློང་གི་དགེ་འདུན་དེ་ལ་སྐུ་ལུས་ལ་གསོལ་ཏེ། གསེར་གྱི་རིལ་བ་བྷྲིང་གར་ཐོགས་ནས་བཅོམ་ལྡན་འདས་དེ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཕྱག་དུ་ཆུ་ཕུལ་ཏེ་གསོལ་པ།
བཅོམ་ལྡན་འདས་བཅོམ་ལྡན་འདས་ལ་སྐྱེད་མོས་ཚལ་འདི་དང་གཙུག་ལག་ཁང་འདི་དག་དང་། འཆག་ས་འདི་དག་དང་། གཟིམས་ཆ་འདི་དག་དང་། ཁྲིའུ་འདི་དག་དང་། ཀུན་དགའ་ར་བ་འདི་དག་འབུལ་ལགས་སོ། །རིམ་གྲོ་དང་བསྙེན་བཀུར་བགྱི་བའི་སླད་དུ་བདག་ཉིད་ཀྱང་འབུལ་ལགས་
སོ། །བརྟན་པའི་བློ་གྲོས་དེ་ནས་རྒྱལ་པོ་དེས་དེའི་རྗེས་ལ་དེ་བཞིན་གཤེགས་པ་དེ་ལ་རིམ་གྲོ་དང་བསྙེན་བཀུར་བྱས་ཤིང་ཆོས་མཉན་པའི་ཕྱིར་ཡང་ཉིན་གཅིག་བཞིན་དུ་གུས་པར་བྱས་ནས་སོང་ངོ་། །བརྟན་པའི་བློ་གྲོས་དེ་ནས་རྒྱལ་པོ་མ་སྨད་པའི་བསོད་ནམས་དབང་ཕྱུག་དེས་བཅོམ་ལྡན་འདས་དེ་ལ་
བསྐལ་པ་ཕྱེད་དུ་རིམ་གྲོ་བྱས་ཤིང་། དེ་བཞིན་གཤེགས་པ་དེ་ལ་གནས་དང་གནས་མ་ཡིན་པ་དག་ཀྱང་ཡོངས་སུ་དྲིས་སོ། །དེ་ཡང་ཡོངས་སུ་འདྲི་ཞིང་། བཅོམ་ལྡན་འདས་དེ་ཡང་ལན་ལྡོན་པ་ན་སེམས་ཅན་གྲངས་མེད་དཔག་ཏུ་མེད་པའི་དོན་བྱས་སོ། །བརྟན་པའི་བློ་གྲོས་དེའི་ཚེ་དེའི་དུས་ན་རྒྱལ་

པོ་མ་སྨད་པའི་བསོད་ནམས་དབང་ཕྱུག་ཅེས་བྱ་བ་བྱུང་བ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉིའམ་ཡིད་གཉིས་ཟ་བར་གྱུར་ན། ཁྱོད་ཀྱིས་དེ་ལྟར་བལྟ་བར་མི་བྱའོ། །དེ་ཅིའི་ཕྱིར་ཞེ་ན། བརྟན་པའི་བློ་གྲོས་རྒྱལ་པོ་མ་སྨད་པའི་བསོད་ནམས་དབང་ཕྱུག་ཅེས་བྱ་བ་བྱུང་བ་དེ་
ཁྱོད་ཉིད་ཡིན་པའི་ཕྱིར་རོ། །བརྟན་པའི་བློ་གྲོས་ངས་ནི་འདས་པའི་དུས་ན་ཆོས་ཀྱི་རྣམ་གྲངས་དེ་ཉིད་ཡོངས་སུ་དྲི་བའི་ཕྱིར་གང་ལ་ཁྱོད་ཀྱིས་བླ་ན་མེད་པའི་རིམ་གྲོ་དང་བསྙེན་བཀུར་བྱས་པའི་སངས་རྒྱས་སྟོང་ཚང་བ་བྱུང་བར་མངོན་པར་ཤེས་སོ། །བརྟན་པའི་བློ་གྲོས་གང་ཡང་ཁྱོད་ཀྱིས་ཆོས་ཀྱི་སྒོ་སྒྲུབ་
པ་སྨྲས་པ་དེ་དང་། ཇི་ལྟར་ཆོས་ཀྱི་སྒོ་མངོན་པར་སྒྲུབ་པ་ཁྱོད་ལ་བསྟན་པར་བྱའོ། །བརྟན་པའི་བློ་གྲོས་དེ་ལ་ཆོས་ཀྱི་སྒོ་ཞེས་བྱ་བ་ནི་གནས་དང་གཞི་རྣམས་ཡིན་ཏེ། དེ་དག་ནི་སེམས་པ་མེད་པ། མཚན་མ་མེད་པ། རྩོལ་བ་མེད་པ། དག་པ། རྣམ་པར་དག་པ། ཡོངས་སུ་དག་པ།
བརྗོད་དུ་མེད་པ། ཡི་གེ་མེད་པ། ཡི་གེ་ལས་རྣམ་པར་ལོག་པ། བསྟན་དུ་མེད་པ་དག་ཡིན་ནོ། །བརྟན་པའི་བློ་གྲོས་ཡང་ཆོས་ནི་སྣང་བར་མི་འགྱུར་ཞིང་། ཆོས་ནི་ཤེས་པས་རྣམ་པར་རིག་པར་བྱ་བ་མ་ཡིན་ནོ། །བརྟན་པའི་བློ་གྲོས་ཡང་ཆོས་ཀྱི་སྒོ་ཞེས་བྱ་བ་ནི་དེ་བཞིན་གཤེགས་པས་མཛད་པ་
གང་གིས་མྱ་ངན་ལས་འདས་པ་རབ་ཏུ་མཁྱེན་པ་སྟེ། ཇི་ལྟར་རབ་ཏུ་མཁྱེན་པ་དང་། གང་གིས་རབ་ཏུ་མཁྱེན་པ་དེ་ནི་ངས་རྣམ་པར་རིག་པར་བྱ་མི་ནུས་སོ། །བརྟན་པའི་བློ་གྲོས་ཆོས་དེ་དག་ནི་རྣམ་པར་རིག་པར་བྱ་བ་མ་ཡིན་ཞིང་གདགས་པ་མ་ཡིན་པ་དག་གོ། །བརྟན་པའི་བློ་གྲོས་ཡང་གང་ལ་ལར་གདགས་
པའི་ལམ་དེ་ནི་ཆོས་ཀྱི་སྒོ་ཡིན་ནོ། །བརྟན་པའི་བློ་གྲོས་ཆོས་ཐམས་ཅད་ནི་རོ་གཅིག་པའི་ཕྱིར་རྒྱ་མཚོའི་རྒྱས་བཏབ་པ་ཡིན་ནོ། །བརྟན་པའི་བློ་གྲོས་ཆོས་ཐམས་ཅད་ནི་མི་ཟད་པའི་མུ་ཅན་ཡིན་ཞིང་མི་ཟད་པའི་མཐའ་ཅན་ཡིན་པའི་ཕྱིར་ཟད་མི་ཤེས་པ་ཡིན་ནོ། །བརྟན་པའི་བློ་གྲོས་ཆོས་ཐམས་ཅད་ནི་
གང་བ་དང་བྲི་བ་མེད་པས་མི་ཟད་པ་ཉིད་དུ་གྱུར་པ་སྟེ། དེས་ན་དེ་བཞིན་གཤེགས་པ་ནི་ཟད་མི་ཤེས་པའི་སྒོ་སྒྲུབ་པ་ཡང་འདོགས་པར་མཛད་དོ། །སྟོན་པར་མཛད། རབ་ཏུ་འཇོག་པར་མཛད་དོ། །ཆོས་ཐམས་ཅད་ནི་ཨ་ཞེས་བྱ་བའི་སྒོ་ཅན་ཏེ། ཨ་ཞེས་བྱ་བ་ལ་འཇུག་པ་ནི་རྣམ་པ་མེད་པའི་སྒོ་

གདགས་པའི་བཤད་པའི་གནས་སོ། །དེ་མངོན་པར་བསྒྲུབ་པ་ནི་མཚམས་སྦྱོར་བར་བྱེད་པའོ། །དེ་ལ་མཚམས་སྦྱོར་བའི་ཡི་གེ་དག་གིས་ཨ་ཞེས་བྱ་བ་མ་བྱས་ཏེ། དེའི་ཕྱིར་ཆོས་ནི་ཨ་ཞེས་བྱ་བ་ཞེས་བྱའོ། །དེ་ནི་ཨ་ཞེས་བྱ་བས་རྣམ་པར་རིག་པར་བྱེད་ཅིང་། རྣམ་པར་རིག་པ་དེ་ཡང་དེའི་
མཚམས་སྦྱོར་བའི་ཚིག་དང་ཡི་གེ་དག་དང་ལྡན་པར་ཡོངས་སུ་རྫོགས་པར་བྱེད་དོ། །དེས་ན་དེ་བཞིན་གཤེགས་པས་འདི་སྐད་དུ་ཆོས་ཐམས་ཅད་ནི་ཨ་ཞེས་བྱ་བའི་སྒོ་ཅན་ནོ་ཞེས་གསུངས་སོ། །སྒོ་དེ་གང་དག་གི་ཡིན་པའི་ཆོས་དེ་དག་ཀྱང་གང་ཞེ་ན། བརྟན་པའི་བློ་གྲོས་ཆོས་དེ་དག་ནི་མ་བྱས་པའོ། །
མ་བྱས་པ་ནི་རྣམ་པར་རིག་པ་མ་ཡིན་པས་མ་བཏགས་པ་རྣམ་པར་རིག་པ་མ་ཡིན་པར་རྣམ་པར་རིག་པ་བརྗོད་དུ་མེད་པར་བརྗོད་པ། མངོན་པར་བརྗོད་དུ་མེད་པར་མངོན་པར་བརྗོད་པ། ཟད་མི་ཤེས་པར་ཟད་པ་དག་གོ། །བརྟན་པའི་བློ་གྲོས་དེ་ལྟར་ན་ཨ་ཞེས་བྱ་བ་ནི་ཆོས་ཐམས་ཅད་ཀྱི་ལས་བྱེད་པ་ཡིན་ནོ། །
རིགས་ཀྱི་བུའམ་རིགས་ཀྱི་བུ་མོ་སྒོ་གང་ལ་ཞུགས་པས་ཡེ་ཤེས་ཟད་མི་ཤེས་ཤིང་། སྤོབས་པ་ཟད་མི་ཤེས་པར་འགྱུར་བའི་སྒོ་དེ་ནི་ཨ་ཞེས་བྱ་བའི་སྒོའོ། །བརྟན་པའི་བློ་གྲོས་མི་ཟད་པ་ནི་ཟད་པ་ལས་འདས་པའོ། །བརྟན་པའི་བློ་གྲོས་གང་ལ་གདགས་པ་མེད། རྣམ་པར་རིག་པ་མེད་པ་ནི་ཟད་པ་ཡིན་
ཏེ། གང་དག་རྣམ་པར་རིག་པ་མ་ཡིན་པར་རྣམ་པར་རིག་པར་བྱས་པ་དེ་དག་ནི་རྣམ་པར་རིག་པར་བྱས་པ་མ་ཡིན་ཞིང་། གང་དག་བཏགས་པ་དེ་དག་ནི་མ་བཏགས་པ་སྟེ། བརྟན་པའི་བློ་གྲོས་དེས་ན་སྒོ་དེ་ནི་ཟད་པ་ཞེས་བྱའོ། །སྒོ་དེ་གང་གི་ཡིན་ཞེ་ན། ཆོས་དེ་དག་གི་སྒོའོ། །གང་དག་གི་ཞེ་ན། གང་
དག་དེ་བཞིན་གཤེགས་པས་མ་བརྙེས་མ་དམིགས་པའོ། །བརྟན་པའི་བླ་གྲོས་སྒོ་ཞེས་བྱ་བ་ནི་ཕྱིར་མི་ལྡོག་པ་སྟེ། འཇུག་པ་དེ་ནི་ཆོས་ཐམས་ཅད་ཀྱི་ཡིན་ནོ། །མངོན་པར་བརྗོད་པ་ཐམས་ཅད་ཀྱང་མངོན་པར་བརྗོད་དུ་མེད་པ་ཡིན། ངག་ཐམས་ཅད་ཀྱང་མི་ཟད་པའི་ངག་ཡིན། ངག་ཐམས་ཅད་ཀྱང་
དེ་བཞིན་གྱི་ངག་ཡིན། གཞན་མ་ཡིན་པའི་ངག་ཡིན། རྣམ་པར་རིག་པ་ཐམས་ཅད་ཀྱང་རྣམ་པར་རིག་པ་མ་ཡིན་པ་ཡིན་ཏེ། བརྟན་པའི་བློ་གྲོས་འདི་ནི་རྡོ་རྗེའི་ཚིག་གོ། །ཅིའི་ཕྱིར་རྡོ་རྗེའི་ཚིག་ཅེས་བྱ་ཞེ་ན། གང་ལ་ཡང་ནམ་ཡང་དབྱེར་མེད་ཅིང་གང་ལ་ཡང་དབྱེར་མེད་པ་དེ་ལ་བྱེད་པ་པོ་གང་ཡང་མེད་ལ། གང་

ལ་བྱེད་པ་པོ་གང་ཡང་མེད་པས་དེས་ན་རྡོ་རྗེའི་ཚིག་ཅེས་བྱའོ། །ཆོས་ཐམས་ཅད་ནི་ལས་མེད་པ་སྟེ། གང་ལས་མེད་པ་ཉིད་དེ་ལ་ནི་རྣམ་པར་སྨིན་པ་གང་ཡང་མེད་ལ། གང་ལ་རྣམ་པར་སྨིན་པ་གང་ཡང་མེད་པས་དེས་ན་ཆོས་ཐམས་ཅད་ནི་ལས་མེད་པ་རྣམ་པར་སྨིན་པ་མེད་པ་ཞེས་བྱའོ། །
ཆོས་ཀྱི་ཕྱག་རྒྱ་དེ་ནི་གང་ལ་ལར་དེ་བཞིན་གཤེགས་པས་ལས་ཀྱི་རྣམ་པར་སྨིན་པ་བསྟན་པ་དེའི་ཚེ་ན་ཆོས་ཀྱི་ཕྱག་རྒྱ་དེས་བསྟན་པའོ། །ཕྱག་རྒྱ་དེ་ནི་མ་བྱས་པ་དང་དབྱེར་མེད་པར་ཁོང་དུ་ཆུད་པར་བྱའོ། །བརྟན་པའི་བློ་གྲོས་རིགས་ཀྱི་བུའམ། རིགས་ཀྱི་བུ་མོ་ལས་ཀྱི་རྣམ་པར་སྨིན་པ་ལ་འཇུག་པར་འདོད་
པས་ནི་དེ་ལྟར་འཇུག་པར་བྱའོ། །བརྟན་པའི་བློ་གྲོས་ཆོས་ཐམས་ཅད་ནི་ནམ་མཁའ་ལ་འཇུག་པས་འོང་བ་མེད་པ། འགྲོ་བ་མེད་པ་ཡིན་ནོ། །བརྟན་པའི་བློ་གྲོས་དེ་བཞིན་གཤེགས་པས་ནི་སྒོ་དེ་ལ་བརྟེན་ནས་སེམས་ཅན་རྣམས་ཀྱི་འཆི་འཕོ་དང་སྐྱེ་བ་རབ་ཏུ་མཁྱེན་ཏོ། །བརྟན་པའི་བློ་གྲོས་རིགས་ཀྱི་
བུའམ། རིགས་ཀྱི་བུ་མོ་འཆི་འཕོ་དང་སྐྱེ་བ་ལ་འཇུག་པར་འདོད་པས་ནི་ཕྱག་རྒྱ་དེ་ལ་འཇུག་པར་བྱའོ། །བརྟན་པའི་བློ་གྲོས་འདི་ནི་ཆོས་རྣམས་ཀྱི་ཡི་གེ་མེད་པའི་ཕྱག་རྒྱ་ཡིན་ནོ། །གདགས་པ་མེད་པའི་ཕྱག་རྒྱ་ཡིན་ནོ། །བརྟན་པའི་བློ་གྲོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ཀྱིས་ཇི་ཙམ་དུ་མངོན་པར་བརྗོད་པ་ཐམས་ཅད་ནི་ཕྱག་རྒྱ་དེས་མངོན་པར་བརྗོད་པར་མཛད་ཅིང་ཕྱག་རྒྱ་དེ་ཉིད་མངོན་པར་བརྗོད་པར་མཛད་དོ། །བརྟན་པའི་བློ་གྲོས་ལུས་ཐམས་ཅད་ནི་དེ་བཞིན་གཤེགས་པའི་སྐུའོ། །དེ་ཅིའི་ཕྱིར་ཞེ་ན། འདི་ལྟར་སྐུ་དེ་ནི་ལུས་ཀྱི་སྐུ་ཡིན་ཞིང་
དེ་བཞིན་གཤེགས་པ་ནི་ཕྱག་རྒྱ་དེས་སེམས་ཅན་རྣམས་ཀྱི་ལུས་མངོན་པར་སྒྲུབ་པ་སྟོན་པར་མཛད་པའི་ཕྱིར་རོ། །བརྟན་པའི་བློ་གྲོས་ཕྱག་རྒྱ་གང་གིས་བཏབ་པའི་ལུས་ཀྱི་ཕྱག་རྒྱ་དེ་ནི་ལུས་ཐམས་ཅད་ཀྱི་གདགས་པའོ། །བརྟན་པའི་བློ་གྲོས་གང་ལ་ལར་ལུས་མངོན་པར་བསྒྲུབ་པ་དེ་ཐམས་ཅད་ནི་ཕྱག་རྒྱ་
དེས་བཏབ་པ་ཡིན་ཞིང་དེ་བཞིན་གཤེགས་པ་ནི་ཕྱག་རྒྱ་དེ་ཉིད་མངོན་པར་སྒྲུབ་པར་མཛད་དོ། །བརྟན་པའི་བློ་གྲོས་ཆོས་ཐམས་ཅད་ནི་འཇུག་པ་མེད་པའི་ཕྱིར་སྒོ་མེད་པ་ཡིན་ནོ། །བརྟན་པའི་བློ་གྲོས་ཆོས་ཐམས་ཅད་ནི་འགྲོ་བ་མེད་པའི་ཕྱིར་འཇུག་པ་མེད་པ་ཡིན་ནོ། །བརྟན་པའི་བློ་གྲོས་ཆོས་ཐམས་ཅད་ནི་འཇུག་པ་

མེད་པ་ཉིད་ཀྱི་ཕྱིར་འགྲོ་བ་མེད་པ་ཡིན་ནོ། །བརྟན་པའི་བློ་གྲོས་དེ་བཞིན་གཤེགས་པ་ནི་གང་དང་གང་ནས་ཆོས་སྟོན་པ་དེ་དང་དེ་ནས་ཆགས་པ་མེད་པའི་མུ་དང་ལྡན་པ་ཁོ་ན་དག་སྟོན་པར་མཛད་ཅིང་སེམས་ཅན་ཐམས་ཅད་ཀྱི་མུ་དེ་ཉིད་ཀྱང་རབ་ཏུ་མཁྱེན་ཏེ། མུ་དེ་ནི་དེ་ལྟ་བུ་ཡིན་ནོ། །བརྟན་པའི་བློ་གྲོས་
ཆགས་པ་མེད་པའི་མུ་ཞེས་བྱ་བ་ནི་མཐའ་ཡས་པའི་མུ་སྟེ། སེམས་ཅན་ཐམས་ཅད་ནི་ཡ་མ་བརླའི་མུར་བསྟན་པས་དེ་ལྟ་བུའི་མུ་ཅན་ཡིན་ནོ། །བརྟན་པའི་བློ་གྲོས་གང་དུ་ཆོས་ཐམས་ཅད་ཀྱི་སྒོ་མུའི་སྒོ་དེས་མུའི་སྒོ་ཡིན་པ་དེ་ཐམས་ཅད་ནི་ཆོས་ཀྱི་ཕུང་པོ་ཡིན་ལ་ཆོས་ཀྱི་ཕུང་པོ་ཡང་ཕུང་པོ་མེད་པ་སྟེ། དེ་
ལྟར་ཕུང་པོ་དེ་དག་ནི་ཕུང་པོ་མེད་པ་ཡིན་ཞིང་ཕུང་པོ་དེ་དག་ནི་ཆོས་ཀྱི་ཕུང་པོ་ཡང་ཡིན་ནོ། །བརྟན་པའི་བློ་གྲོས་དེ་བཞིན་གཤེགས་པ་ནི་གང་དང་གང་ནས་ཕུང་པོ་དག་སྟོན་པ་དེ་དང་དེ་ནས་ཆོས་ཀྱི་ཕུང་པོའི་སྒོ་མུ་དེས་སྟོན་པར་མཛད་དོ། །གཟུགས་ཀྱི་ཕུང་པོ་དང་། ཚོར་བའི་ཕུང་པོ་དང་། འདུ་ཤེས་
ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་སྟེ་ཕུང་པོ་རྣམས་ནི་ཕུང་པོ་མེད་པ་ཡིན་ནོ། །འདི་ནི་ཕུང་པོ་རྣམས་ཀྱི་རྣམ་པའི་སྒོ་བསྟན་པའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བརྟན་པའི་བློ་གྲོས་ཀྱིས་
འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་རྣམས་ཀྱི་འཇུག་པ་དེ་ནི་ཟབ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བརྟན་པའི་བློ་གྲོས་དེ་བཞིན་གཤེགས་པ་ནི་འདི་སྙམ་དུ་འདི་ནི་ཟབ་པའོ། །འདི་ནི་གསལ་བའོ་སྙམ་དུ་མི་དགོངས་ཏེ། བརྟན་པའི་བློ་གྲོས་དེ་བཞིན་
གཤེགས་པ་ནི་ཅུང་ཟད་ཅིག་སྟོན་པར་མཛད་དོ། །གསོལ་པ། ཇི་ལྟར་བྱིས་པ་རྣམས་ཀྱིས་བཟུང་བ་དེ་ལྟར་ནི་སྟོན་པར་མི་མཛད་ཀྱི་ཇི་ལྟར་མཁས་པ་རྣམས་ཀྱིས་ཀུན་འཚལ་བ་དེ་ལྟར་གསུངས་ཏེ། དེ་བཞིན་གཤེགས་པ་ནི་དེ་ལྟར་ཆོས་སྟོན་པར་མཛད་ལགས་སོ། །བཀའ་སྩལ་པ། བརྟན་པའི་
བློ་གྲོས་དེ་བཞིན་གཤེགས་པ་ནི་ཇི་ལྟར་རབ་ཏུ་ཤེས་པ་དེ་ལྟར་སྟོན་པར་མི་བྱེད། འདོགས་པར་མི་བྱེད། རབ་ཏུ་འཇོག་པར་མི་བྱེད་དོ། །དེ་ཅིའི་ཕྱིར་ཞེ་ན། བརྟན་པའི་བློ་གྲོས་ཆོས་ཐམས་ཅད་ནི་དེ་ལྟར་མཁས་པ་རྣམས་ཀྱིས་ཀུན་ཤེས་པ་ཡིན་ཞིང་། ཇི་ལྟར་བྱིས་པ་རྣམས་ཀྱིས་བཟུང་བ་དེ་ལྟར་

ནི་ཡི་གེའི་རྣམ་པར་རིག་པ་ཡིན་ལ། ཡི་གེ་དེ་དག་ཀྱང་ཡི་གེ་མེད་པ་ཡིན་པས་བསྟན་པ་མེད་པའི་ཕྱིར་རོ། །གཞན་ཡང་བཅོམ་ལྡན་འདས་ཀྱིས་བརྟན་པའི་བློ་གྲོས་ལ་བཀའ་སྩལ་པ། བརྟན་པའི་བློ་གྲོས་ཆོས་ཐམས་ཅད་ནི་ཉི་མའི་དཀྱིལ་འཁོར་གྱི་སྣང་བ་ཡིན་ནོ། །བརྟན་
པའི་བློ་གྲོས་གང་དང་གང་ནས་ཆོས་ལ་ཚུལ་བཞིན་དུ་སོ་སོར་རྟོག་པ་དེ་དང་དེ་ནས་མཐའ་ཡས་པའི་མུ་ཅན་ཁོ་ནར་སྣང་སྟེ། དེ་ལྟར་དེ་དག་ནི་ཆོས་ཀྱི་སྣང་བ་ཡིན་ནོ། །བརྟན་པའི་བློ་གྲོས་ཆོས་ཐམས་ཅད་ནི་ཀུན་ནས་སྣང་བ་དང་སྒྲིབ་པ་མེད་པའི་ཕྱིར་འོད་གསལ་བ་ཡིན་ནོ། །བརྟན་པའི་བློ་གྲོས་ཆོས་
ཐམས་ཅད་ནི་གང་གིས་ཀྱང་མ་བསྒྲིབས་པའི་ཕྱིར་སྒྲིབ་པ་མེད་པ་ཡིན་ནོ། །བརྟན་པའི་བློ་གྲོས་ཆོས་ཐམས་ཅད་ནི་བླ་གབ་མེད་པ་དང་མཚུངས་པའི་ཕྱིར་མ་བསྒྲིབས་པ་ཡིན་ནོ། །བརྟན་པའི་བློ་གྲོས་གང་ན་གཉིས་གདགས་པ་དང་གཉིས་འཛིན་པ་དེ་ལ་དེ་བཞིན་གཤེགས་པའི་སྤྱན་སྒྲིབ་པ་མེད་པ་
འཇུག་གོ། །བརྟན་པའི་བློ་གྲོས་དེ་བཞིན་གཤེགས་པས་མིག་གང་གིས་ཆོས་ཐམས་ཅད་རབ་ཏུ་ཤེས་ཤིང་ཇི་ལྟར་རབ་ཏུ་ཤེས་པ་དེ་ལྟར་སྒྲིབ་པ་མེད་པར་རབ་ཏུ་ཤེས་པ་འདི་ནི་མིག་གི་ཆོས་ཡིན་ནོ། །བརྟན་པའི་བློ་གྲོས་རིགས་ཀྱི་བུས་གང་ལ་བརྟེན་ནས་དོན་ལ་ངེས་པར་རྟོག་པའི་བརྗོད་པ་འབྱུང་བ་དང་།
ཟབ་མོ་བསྟན་པའི་བརྗོད་པ་འབྱུང་བ་དང་། མ་ཆགས་པའི་བརྗོད་པ་འབྱུང་བའི་ཆོས་ཐམས་ཅད་ཀྱི་སྒོ་དེ་ནི་སྒྲིབ་པ་མེད་པའི་སྒོ་ཡིན་ནོ། །གཞན་ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བརྟན་པའི་བློ་གྲོས་ལ་བཀའ་སྩལ་པ། བརྟན་པའི་བློ་གྲོས་ཆོས་ཐམས་ཅད་ནི་ཆགས་པ་མེད་ཅིང་ཆགས་
པ་དང་བྲལ་བའི་ཕྱིར་རྡུལ་དང་བྲལ་བ་ཡིན་ནོ། །བརྟན་པའི་བློ་གྲོས་ཆོས་ཐམས་ཅད་ནི་ཕན་འདོགས་པ་མེད་པའི་ཚུལ་གྱིས་ཡོངས་སུ་མ་བཟུང་བ་ཡིན་ནོ། །བརྟན་པའི་བློ་གྲོས་ཆོས་ཐམས་ཅད་ནི་དངོས་པོ་དམིགས་སུ་མེད་པས་མཐའ་ཡས་མུ་མེད་པ་ཡིན་ནོ། །བརྟན་པའི་བློ་གྲོས་གང་དང་གང་དུ་ཡི་གེའི་
བསྟན་པ་སྟོན་པ་དེ་དང་དེར་ནི་ཆོས་ཐམས་ཅད་ཡི་གེ་མེད་པ་ཁོ་ནར་སྟོན་པ་ཡིན་ནོ། །བརྟན་པའི་བློ་གྲོས་ཆོས་དེ་དག་གི་མཐའ་ཐུག་པ་མེད་པ་དང་། མཐར་ཐུག་པ་མེད་པ་བསྟན་པས་ཇི་ལྟར་སུ་ཞིག་ཡི་གེ་མེད་པའི་སྒོ་དེ་ལ་འཇུག་སྟེ། འདི་ནི་དེའི་འཇུག་པ་ཡིན་ནོ། །འཇུག་པ་དེ་ནི་ཆོས་གང་གི་ཡང་འཇུག་པ་

མ་ཡིན་ནོ། །བརྟན་པའི་བློ་གྲོས་དེ་བཞིན་གཤེགས་པས་ནི་ཏིང་ངེ་འཛིན་གྱི་སྒོ་སྒྲུབ་པ་གསུངས་ཏེ། ཏིང་ངེ་འཛིན་གྱི་སྒྲུབ་པ་ཡང་གང་ཞེ་ན། བརྟན་པའི་བློ་གྲོས་ཆོས་ཐམས་ཅད་བཀོད་པ་ཚུལ་གཅིག་པ་ཞེས་བྱ་བའི་ཏིང་ངེ་འཛིན་ཡོད་དོ། །བཀོད་པ་དུ་མ་ཞེས་བྱ་བའི་ཏིང་ངེ་འཛིན་ཡོད་དོ། །དེ་ལ་
བཀོད་པ་གཅིག་པ་ཞེས་བྱ་བའི་ཏིང་ངེ་འཛིན་གང་ཞེ་ན། བརྟན་པའི་བླ་གྲོས་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་འཇིག་རྟེན་གྱི་ཁམས་ག་གེ་མོ་ཞེས་བྱ་བ་ན་དེ་བཞིན་གཤེགས་པ་ཆེ་གེ་མོ་ཞེས་བྱ་བ་ཆོས་སྟོན་ཏོ། །ཞེས་དེ་བཞིན་གཤེགས་པ་གཅིག་གི་མཚན་ཐོས་པར་བྱེད་
དོ། །དེ་དེ་བཞིན་གཤེགས་པ་དེའི་མཚན་ཐོས་ནས་མཚན་མའི་སྒོ་ནས་ལེགས་པར་འཛིན་པར་བྱེད། མཚན་མའི་རྣམ་པ་མདུན་དུ་བྱེད། མངོན་དུ་བྱེད་དོ། །དེ་དེ་བཞིན་གཤེགས་པ་བྱང་ཆུབ་ཀྱི་སྙིང་པོ་མཆོག་ན་བཞུགས་པའམ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་སངས་རྒྱས་པའམ། ཆོས་ཀྱི་འཁོར་ལོ་བསྐོར་བའམ། ཉན་ཐོས་ཀྱི་ཚོགས་ཀྱིས་ཡོངས་སུ་བསྐོར་བའམ། ཆོས་སྟོན་པ་འབའ་ཞིག་དྲན་པ་རྣམ་པར་མི་གཡེང་བ་དང་། དབང་པོ་མི་རྒོད་པ་དག་དང་། ཡིད་ཕྱི་རོལ་ཏུ་མ་སོང་བས་ཡིད་ལ་བྱེད་དོ། །དེ་དེ་བཞིན་གཤེགས་པ་དེའི་མཚན་མ་རྗེས་
སུ་དྲན་པས་འཇིག་རྟེན་གྱི་ཁམས་ལ་དམིགས་པ་མདུན་དུ་བྱེད་དོ། །དེ་དེ་བཞིན་གཤེགས་པ་ལ་དམིགས་པ་དང་། འཇིག་རྟེན་གྱི་ཁམས་ལ་དམིགས་པ་ཡང་འདི་ལྟ་སྟེ། དམིགས་པ་མེད་པ་ཉིད་ཀྱིས་དམིགས་པ་གཅིག་པ་ཉིད་དུ་རྟོགས་པར་བྱེད་དོ། །དེ་དེ་ལྟར་གནས་ཤིང་སྦྱོར་བ་དེ་རྗེས་སུ་མི་
གཏོང་བས་དེ་བཞིན་གཤེགས་པའི་སྐུ་མངོན་དུ་འགྱུར་རོ། །དེ་ཆོས་སྟོན་པ་ཡིད་ལ་བྱེད་པས་ཟབ་པ་དང་། གསལ་བ་དང་། དོན་དང་ཚིག་འབྲུའི་སྒོ་ནས་ཇི་ལྟ་ཇི་ལྟར་མོས་པ་དེ་ལྟ་དེ་ལྟར་ཡང་མདུན་དུ་བྱེད་དོ། །དེ་ཏིང་ངེ་འཛིན་དེ་ལ་གནས་ནས་དངོས་པོ་ཐམས་ཅད་རྣམ་པར་འཇིག་པ་ཉིད་ཀྱིས་དེ་བཞིན་གཤེགས་
པའི་ཆོས་བསྟན་པ་ཉན་པར་བྱེད་དོ། །དེ་ཆོས་བསྟན་པ་དེ་དག་ཀུན་ལེན་པར་བྱེད་ཅིང་འཛིན་པར་བྱེད་དོ། །བླངས་ཤིང་བཟུང་ནས་ཀྱང་ཏིང་ངེ་འཛིན་དེ་ལས་ལངས་ནས་འཁོར་བཞི་པོ་དག་ལ་ཆོས་སྟོན་ཏེ། འཇུག་པ་དེ་དང་དམིགས་པ་དེ་ནི་འདི་ལྟ་སྟེ། བཀོད་པ་གཅིག་པའི་ཏིང་ངེ་འཛིན་མངོན་པར་སྒྲུབ་པ་

ཡིན་ནོ། །བརྟན་པའི་བློ་གྲོས་གཞན་ཡང་བྱང་ཆུབ་སེམས་དཔའ་ནི་ཡང་དམིགས་པ་དེ་ཉིད་རྣམ་པར་འཇིག་པར་བྱེད་ཅིང་། བདག་ཉིད་ཀྱི་ལུས་ཀྱང་རྣམ་པར་འཇིག་པར་བྱེད་དོ། །དེ་དངོས་པོ་ཐམས་ཅད་རྣམ་པར་འཇིག་པ་ཉིད་ཀྱིས་བཀོད་པ་གཅིག་པའི་ཏིང་ངེ་འཛིན་ལ་འཇུག་པར་བྱེད་དོ། །
དེ་དེ་ལས་ལངས་ནས་ཀྱང་ཡང་འཁོར་བཞི་པོ་དག་ལ་ཆོས་སྟོན་པར་བྱེད་དེ། བརྟན་པའི་བློ་གྲོས་འདི་ཡང་བཀོད་པ་གཅིག་པའི་ཏིང་ངེ་འཛིན་མངོན་པར་སྒྲུབ་པ་ཡིན་ནོ། །བརྟན་པའི་བློ་གྲོས་གཞན་ཡང་བྱང་ཆུབ་སེམས་དཔའ་ནི་དེ་བཞིན་གཤེགས་པའི་སྐུ་ལ་དམིགས་པ་དེ་ཉིད་ལ་འདི་ལྟར་སོ་སོར་རྟོག་པར་བྱེད་
དོ། །དེ་བཞིན་གཤེགས་པའི་སྐུ་དེ་ག་ལས་འོངས། བདག་ཀྱང་གང་དུ་སོང་ཞིག་གུ་སྙམ་ནས། དེ་དེ་བཞིན་གཤེགས་པ་ཡང་མ་འོངས་པར་རབ་ཏུ་ཤེས་ཤིང་། བདག་ཉིད་ཀྱང་མ་སོང་བར་རབ་ཏུ་ཤེས་སོ། །དེ་འདི་སྙམ་དུ་སེམས་ཏེ། ཆོས་ཐམས་ཅད་ནི་འོངས་པ་མེད་པའོ། །འགྲོ་བ་མེད་པའོ་
སྙམ་མོ། །དེ་དེ་ལྟར་གནས་ཤིང་དེ་ལྟར་བརྩོན་པས་རིང་པོ་མི་ཐོགས་པར་ཆོས་ཀྱི་མིག་སྒྲིབ་པ་མེད་པ་ཐོབ་བོ། །ཆོས་ཀྱི་མིག་སྒྲིབ་པ་མེད་པ་དེ་ཐོབ་ནས་དེ་བཞིན་གཤེགས་པ་ཡིན་ཏེ། ཆོས་ཀྱི་སྒོ་གང་གིས་མ་ཆགས་པའི་སྤོབས་པ་ཉིད་འཐོབ་པའི་ཆོས་ཀྱི་སྒོ་མངོན་དུ་བྱེད་དོ། །དེ་ཆོས་ཀྱང་སྟོན་པར་
བྱེད་ལ་ཆོས་དེ་དག་ཀྱང་ཡང་དག་པར་རྗེས་སུ་མི་མཐོང་ངོ་། །བརྟན་པའི་བློ་གྲོས་འདི་ལྟ་སྟེ། དཔེར་ན་འདས་པའི་དུས་ལ་དེ་བཞིན་གཤེགས་པའི་ཡེ་ཤེས་མ་ཆགས་པ་འཇུག་ཀྱང་ལུས་རྣམས་ལ་དེ་བཞིན་གཤེགས་པའི་ཡེ་ཤེས་ཐོགས་པ་ཡང་མེད་དོ། །འདས་པའི་དུས་ལ་དམིགས་པའི་སྒོ་
ནས་དེ་བཞིན་གཤེགས་པའི་ཡེ་ཤེས་ཀྱང་མི་འཇུག་ཅིང་འདས་པའི་དུས་ལ་དེ་བཞིན་གཤེགས་པའི་ཡེ་ཤེས་མི་འཇུག་ཀྱང་། འདས་པའི་དུས་ལ་དེ་བཞིན་གཤེགས་པ་ནི་ཡེ་ཤེས་མངའ་བ་ཉིད་དེ་འདས་པའི་དུས་ལ་དེ་བཞིན་གཤེགས་པའི་དམིགས་པའི་ལུས་རྗེས་སུ་འཇུག་པ་ཡང་མ་ཡིན་ནོ། །མ་
འོངས་པ་དང་། ད་ལྟར་བྱུང་བ་ལ་ཡང་དེ་དང་འདྲའོ། །བརྟན་པའི་བློ་གྲོས་དེ་བཞིན་དུ་བྱང་ཆུབ་སེམས་དཔའ་དེ་ནི་བཀོད་པ་གཅིག་པའི་ཏིང་ངེ་འཛིན་དེ་ལ་གནས་ནས་ཆོས་ཀྱང་སྟོན་པར་བྱེད་ལ། ཆོས་དེ་དག་ཀྱང་ཡང་དག་པར་རྗེས་སུ་མི་མཐོང་ངོ་། །དེ་ཤིན་ཏུ་བསྒོམས་པས་ཏིང་ངེ་འཛིན་དེ་ལ་གནས་

ནས་འཇིག་རྟེན་གྱི་ཁམས་གང་ན་བཞུགས་པར་འགྱུར་ཞིང་། བྱང་ཆུབ་ཀྱི་སྙིང་པོ་ན་བཞུགས་པའམ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའམ། ཆོས་ཀྱི་འཁོར་ལོ་བསྐོར་བའམ། ཆོས་སྟོན་པའི་དེ་བཞིན་གཤེགས་པ་གཉིས་པ་ཡིད་
ལ་བྱེད། དམིགས་པར་བྱེད། མངོན་དུ་བྱེད་དོ། །དེ་དེ་བཞིན་གཤེགས་པའི་ཆོས་བསྟན་པ་དེ་ཡང་ཀུན་ལེན་པར་བྱེད། འཛིན་པར་བྱེད་དོ། །དེ་དེ་བཞིན་གཤེགས་པ་ལ་དམིགས་པ་སྔ་མ་དེ་ཡང་དམིགས་པར་བྱེད་ཅིང་། དེ་བཞིན་གཤེགས་པ་ལ་དམིགས་པ་འདི་ཡང་གཏོང་
བར་མི་བྱེད་དོ། །དེ་ཆོས་སྟོན་པའི་དེ་བཞིན་གཤེགས་པ་དེ་གཉི་ག་དམིགས་པར་བྱེད། མངོན་དུ་བྱེད་དེ། བརྟན་པའི་བློ་གྲོས་འདི་ཡང་བཀོད་པ་གཅིག་པའི་ཏིང་ངེ་འཛིན་མངོན་པར་བསྒྲུབ་པ་ཡིན་ནོ། །བརྟན་པའི་བློ་གྲོས་གཞན་ཡང་བྱང་ཆུབ་སེམས་དཔའ་ནི་དེ་བཞིན་གཤེགས་པ་
ལ་དམིགས་པ་གཅིག་ལེགས་པར་ཀུན་བཟུང་ཞིང་ལེགས་པར་བརྟགས་ལ། ལེགས་པར་བྱང་བར་བྱས་ནས་དེ་བཞིན་གཤེགས་པ་ཇི་སྙེད་འདོད་པ་དེ་སྙེད་ཡིད་ལ་བྱེད་དོ། །བརྟན་པའི་བློ་གྲོས་འདི་ལྟ་སྟེ། དཔེར་ན་ལུས་ཀྱི་སྐྱེ་མཆེད་དག་ལ་དགེ་སློང་དབང་དུ་གྱུར་པ་དེ་དམིགས་པ་སྔོན་པོ་ཡིད་ལ་བྱེད་དོ། །
དེ་ཐམས་ཅད་ཀྱང་གང་ཅི་ཡང་རུང་བ་ཐམས་ཅད་དམིགས་པ་སྔོན་པོ་ཁོ་ནར་མོས་པར་བྱེད་དེ། སྔོན་པོ་ཁོ་ན་ཡིན་པ་མ་གཏོགས་པར་དེ་ལ་དམིགས་པ་ཅི་ཡང་མངོན་དུ་མི་འགྱུར་རོ། །དེ་འགྲོ་བ་ཐམས་ཅད་སྔོན་པོ་ཁོ་ནར་མོས་པར་བྱེད་ཅིང་བྱིན་གྱིས་རློབ་པར་བྱེད་ལ། སྔོན་པོ་ཁོ་ནར་མངོན་དུ་བྱེད་དོ། །
ནང་དང་ཕྱིའི་ཆོས་རྣམས་ལ་དེའི་ཤེས་པ་སྔོན་པོའོ་སྙམ་དུ་འཇུག་ཅིང་། དེ་ལ་དེ་ནི་དབང་དུ་གྱུར་པ་ཡང་ཡིན་ནོ། །བརྟན་པའི་བློ་གྲོས་དེ་བཞིན་དུ་བྱང་ཆུབ་སེམས་དཔའ་དེ་ནི་འཇིག་རྟེན་གྱི་ཁམས་གང་དང་གང་ན་དེ་བཞིན་གཤེགས་པ་ཇི་སྙེད་བཞུགས་པ་ཐོས་པར་གྱུར་པའི་འཇིག་རྟེན་གྱི་ཁམས་རྣམས་
དང་དེ་བཞིན་གཤེགས་པའི་དེ་དག་ཀྱང་ཡིད་ལ་བྱེད་དོ། །དེ་དེ་བཞིན་གཤེགས་པ་ལ་དམིགས་པའི་ཡིད་ལ་བྱེད་པ་ཤིན་ཏུ་ལེགས་པར་བརྟགས་པ་ཤིན་ཏུ་ངེས་པར་བྱ་བ་དེས་འགྲོ་བ་ཐམས་ཅད་ནི་དེ་བཞིན་གཤེགས་པའོ། །སངས་རྒྱས་སོ། །རང་བྱུང་ངོ་ཞེས་བྱིན་གྱིས་རློབ་པར་བྱེད་དོ། །དེ་དེ་བཞིན་

གཤེགས་པ་ལ་དམིགས་པའི་ཡིད་ལ་བྱེད་པ་དེ་ཤིན་ཏུ་ཡིད་ལ་བྱེད་པས་དམིགས་པ་ཐམས་ཅད་ནི་འདི་ལྟ་སྟེ། དེ་བཞིན་གཤེགས་པ་མངོན་དུ་འགྱུར་བའི་དམིགས་པ་གཅིག་ཏུ་བྱིན་གྱིས་རློབ་པར་བྱེད་དོ། །དེ་དེ་བཞིན་གཤེགས་པ་ལས་དམིགས་པའི་དངོས་པོ་གཞན་ཅི་ཡང་
ཡང་དག་པར་རྗེས་སུ་མི་མཐོང་ངོ་། །གཞན་དུ་ན་སངས་རྒྱས་ཉག་གཅིག་མ་གཏོགས་ཏེ། བརྟན་པའི་བློ་གྲོས་འདི་ཡང་བཀོད་པ་གཅིག་པའི་ཏིང་ངེ་འཛིན་མངོན་པར་སྒྲུབ་པ་ཡིན་ནོ། །གསོལ་པ། བཅོམ་ལྡན་འདས་ཏིང་ངེ་འཛིན་དེའི་མངོན་པར་སྒྲུབ་པ་དེ་གང་ལགས། བཀའ་སྩལ་པ། འདི་
ལྟ་སྟེ། དེ་བཞིན་གཤེགས་པ་ཐམས་ཅད་ལ་དམིགས་པའི་སེམས་རྩེ་གཅིག་པ་ཉིད་མི་གཏོང་བ་སྟེ། བརྟན་པའི་བློ་གྲོས་འདི་ནི་བཀོད་པ་གཅིག་པའི་ཏིང་ངེ་འཛིན་མངོན་པར་སྒྲུབ་པ་ཡིན་ནོ། །བརྟན་པའི་བློ་གྲོས་ཡང་གང་དམིགས་པ་གཅིག་གིས་ཆོས་ཐམས་ཅད་རྟོགས་པ་ནི་ཐམས་ཅད་ཀྱི་
ཆོས་ཉིད་ཀྱང་ཡིན་ཏེ། བརྟན་པའི་བློ་གྲོས་འདི་ནི་བཀོད་པ་གཅིག་པའི་ཏིང་ངེ་འཛིན་ཅེས་བྱའོ། །བྱང་ཆུབ་སེམས་དཔའ་ནི་ཏིང་ངེ་འཛིན་དེ་ལ་གནས་ནས་ངག་ཐམས་ཅད་ནི་དེ་བཞིན་གཤེགས་པའི་ངག་གོ། །ལུས་ཐམས་ཅད་ནི་དེ་བཞིན་གཤེགས་པའི་སྐུའོ་སྙམ་དུ་དེ་ལྟར་འཇུག་པར་བྱེད་ཅིང་།
དེ་ལྟར་མོས་པར་བྱེད་དོ། །བརྟན་པའི་བློ་གྲོས་གཞན་ཡང་བྱང་ཆུབ་སེམས་དཔའ་ནི་དེ་བཞིན་གཤེགས་པ་གཉིས་དང་། གསུམ་དང་། བཞི་དང་། ལྔ་དང་། བཅུ་དང་། བརྒྱའི་བར་དང་། འབུམ་གྱི་བར་གྱི་མཚན་དག་ཉན་པར་བྱེད་ཅིང་། དེ་དག་ཐམས་ཅད་དུས་གཅིག་ཏུ་མངོན་དུ་བྱེད་ཡིད་ལ་བྱེད་དོ། །
དེ་བཞིན་གཤེགས་པ་དེ་དག་གི་སངས་རྒྱས་ཀྱི་ཞིང་གི་བཀོད་པ་དང་ཉན་ཐོས་ཀྱི་བཀོད་པ་དེ་དག་ཐམས་ཅད་ཀྱང་མངོན་དུ་བྱེད། ཡིད་ལ་བྱེད་དོ། །དེ་བཞིན་གཤེགས་པ་དེ་དག་གི་གཟུགས་ཕུན་སུམ་ཚོགས་པ་དང་། མཚན་ཕུན་སུམ་ཚོགས་པ་དང་། མདོག་ཕུན་སུམ་ཚོགས་པ་དང་།
སྐུ་ཕུན་སུམ་ཚོགས་པ་དང་། ཆུ་ཞེང་ཕུན་སུམ་ཚོགས་པ་ཡང་མངོན་དུ་བྱེད། ཡིད་ལ་བྱེད། མདུན་དུ་བྱེད་དོ། །སྐྱེས་བུ་ཆེན་པོའི་མཚན་རེ་རེའི་མཚན་མ་ཡང་འཛིན་པར་བྱེད་དོ། །མ་རྨོངས་པར་རྣམ་པར་གཤེགས་པའི་མཚན་མ་དང་། སེང་གེའི་རྣམ་པར་བསྒྱིངས་པའི་མཚན་མ་དང་།

སྤྱི་གཙུག་བལྟར་མི་མཐོང་བའི་མཚན་མ་དང་། འོད་འདོམ་གང་གི་མཚན་མ་ཡང་འཛིན་པར་བྱེད་དོ། །འོད་འདོམ་གང་པོ་དེ་ཡང་འོད་མཐའ་ཡས་པ་ཉིད་དུ་མོས་པར་བྱེད་དེ་བྱིན་གྱིས་རློབ་པར་བྱེད་དོ། །འོད་མཐའ་ཡས་པ་ཉིད་ཀྱང་ཀུན་ཏུ་ཤེས་སོ། །སངས་རྒྱས་ཀྱི་ཞིང་མཐའ་ཡས་པ་ཉིད་ཀྱང་འཛིན་
པར་བྱེད་དོ། །སངས་རྒྱས་ཀྱི་ཞིང་གི་བཀོད་པ་དཔག་ཏུ་མེད་པ་ཡང་བྱིན་གྱིས་རློབ་པར་བྱེད། མོས་པར་བྱེད་ཅིང་ཀུན་ཏུ་ཤེས་སོ། །ཉན་ཐོས་ཀྱི་བཀོད་པ་མཐའ་ཡས་པ་ཡང་ཀུན་ཏུ་ཤེས་ཤིང་མོས་པར་བྱེད། བྱིན་གྱིས་རློབ་པར་བྱེད་དོ། །དེ་ཡང་འདི་ལྟར་སོ་སོར་རྟོག་པར་བྱེད་དེ་དེ་བཞིན་གཤེགས་
པ་དེ་དག་ག་ལས་འོངས་པ་དག་ཀྱང་གང་དུ་སོང་ཞིག་གུ་སྙམ་ནས། དེ་དེ་བཞིན་གཤེགས་པ་དང་བདག་ཉིད་ཀྱི་མ་འོངས་པ་ཉིད་དང་། མ་སོང་བ་ཉིད་ལ་འཇུག་པར་བྱེད་ཅིང་ཀུན་ཏུ་ཤེས་ལ་མོས་པར་བྱེད་དོ། །དེ་འདི་སྙམ་དུ་སེམས་ཏེ། འདི་ལ་དེ་བཞིན་གཤེགས་པ་ཞེས་བྱ་བའི་ཆོས་གང་ཡང་མེད་དོ། །
བདག་ཅེས་བྱ་བའི་ཆོས་ཀྱང་གང་ཡང་མེད་དོ་སྙམ་མོ། །དེ་འདི་ལྟར་སོ་སོར་རྟོག་པར་བྱེད་དེ། ཆོས་ཐམས་ཅད་ཀྱང་དེ་བཞིན་དུ་འགྱུར་རོ་སྙམ་མོ། །དེ་དེ་ལྟར་སོ་སོར་རྟོག་པས་ཆོས་ཐམས་ཅད་མཚན་ཉིད་གཅིག་གོ་སྙམ་དུ་མོས་པར་བྱེད། འཇུག་པར་བྱེད་དོ། །དེ་དེ་ལྟར་མངོན་པར་འདུ་བྱེད་པ་
མེད་པའི་མཚན་ཉིད་ཀྱིས་མཚན་ཉིད་དག་ནི་ཆོས་རྣམས་སོ་སྙམ་དུ་འཇུག་པར་བྱེད་མོས་པར་བྱེད་ཅིང་ཀུན་ཏུ་ཤེས་ལ་བྱིན་གྱིས་རློབ་པར་བྱེད་དོ། །དེ་ཆོས་ཐམས་ཅད་མཚན་ཉིད་མེད་པ་ཉིད་ཀྱིས་མཚན་ཉིད་གཅིག་པར་འཇུག་པར་བྱེད་དོ། །བརྟན་པའི་བློ་གྲོས་ཇི་སྙམ་དུ་སངས་རྒྱས་དུ་མ་མངོན་པར་སྒྲུབ་པ་ནི་
སེམས་རྩེ་གཅིག་པ་ཉིད་ཀྱང་ཡིན་ཏེ། བརྟན་པའི་བློ་གྲོས་འདི་ནི་བཀོད་པ་གཅིག་པའི་ཏིང་ངེ་འཛིན་མངོན་པར་སྒྲུབ་པ་ཡིན་ནོ། །གང་སངས་རྒྱས་སུ་མཚན་ཉིད་གཅིག་པ་དང་མཚན་ཉིད་མེད་པར་མངོན་པར་སྒྲུབ་པ་འདི་ནི་བཀོད་པ་གཅིག་པའི་ཏིང་ངེ་འཛིན་ཅེས་བྱའོ། །དེ་ཏིང་ངེ་འཛིན་དེ་ལ་གནས་ནས་དེ་
བཞིན་གཤེགས་པ་མ་ཡིན་པའོ་སྙམ་དུ་གང་ཅི་ཡང་ཀུན་ཏུ་མི་ཤེས་སོ། །ཆོས་མ་ཡིན་པའོ་སྙམ་དུ་གང་ཅི་ཡང་ཀུན་ཏུ་མི་ཤེས་སོ། །ཉན་ཐོས་མ་ཡིན་པའོ་སྙམ་དུ་གང་ཅི་ཡང་ཀུན་ཏུ་མི་ཤེས་སོ། །ཉན་ཐོས་སོ་སྙམ་དུ་ཡང་མི་དམིགས་སོ། །ཆོས་བསྟན་པ་མ་ཡིན་པའོ་སྙམ་དུ་གང་ཅི་ཡང་ཀུན་

ཏུ་མི་ཤེས་སོ། །ཆོས་བསྟན་པ་ཡང་མི་དམིགས་སོ། །དམིགས་པ་མ་ཡིན་པའོ་སྙམ་དུ་གང་ཅི་ཡང་ཀུན་ཏུ་མི་ཤེས་སོ། །དམིགས་པ་ཡང་མི་དམིགས་སོ། །སངས་རྒྱས་ཀྱི་ཞིང་མ་ཡིན་པའོ་སྙམ་དུ་གང་ཅི་ཡང་ཀུན་ཏུ་མི་ཤེས་སོ། །སངས་རྒྱས་ཀྱི་ཞིང་ཡང་མི་
དམིགས་སོ། །འཁོར་མ་ཡིན་པའོ་སྙམ་དུ་གང་ཅི་ཡང་ཀུན་ཏུ་མི་ཤེས་སོ། །འཁོར་ཀྱང་མི་དམིགས་སོ། །སྤོབས་པ་མ་ཡིན་པའོ་སྙམ་དུ་གང་ཅི་ཡང་ཀུན་ཏུ་མི་ཤེས་སོ། །སྤོབས་པ་ཡང་མི་དམིགས་སོ། །རབ་ཏུ་བརྗོད་པ་མ་ཡིན་པའོ་སྙམ་དུ་གང་ཅི་ཡང་ཀུན་ཏུ་མི་ཤེས་སོ། །རབ་
ཏུ་བརྗོད་པ་ཡང་མི་དམིགས་སོ། །བྱིན་གྱིས་རློབ་པ་མ་ཡིན་པ་གང་ཅི་ཡང་ཀུན་ཏུ་མི་ཤེས་སོ། །བྱིན་གྱིས་བརླབས་ཀྱང་མི་དམིགས་སོ། །མོས་པར་མི་བྱེད་པ་གང་ཅི་ཡང་མེད་དོ། །མོས་པ་ཡང་མི་དམིགས་སོ། །རློམ་སེམས་མི་བྱེད་པ་གང་ཅི་ཡང་མེད་དོ། །རློམ་སེམས་ཀྱང་མི་
དམིགས་སོ། །སྒོམ་པར་མི་བྱེད་པ་གང་ཅི་ཡང་མེད་དོ། །སྒོམ་པ་ཡང་མི་དམིགས་སོ། །རྣམ་པར་མི་འབྱེད་པ་གང་ཅི་ཡང་མེད་དོ། །རྣམ་པར་འབྱེད་པ་ཡང་མི་དམིགས་སོ། །གསལ་བར་མི་བྱེད་པ་གང་ཅི་ཡང་མེད་དོ། །གསལ་བ་ཡང་མི་དམིགས་སོ། །རབ་ཏུ་སྟོན་པར་མི་
བྱེད་པ་གང་ཅི་ཡང་མེད་དོ། །རབ་ཏུ་སྟོན་པ་ཡང་མི་དམིགས་ཏེ། བརྟན་པའི་བློ་གྲོས་འདི་ནི་གང་བྱང་ཆུབ་སེམས་དཔའ་རྣམས་ཀྱི་ཡེ་ཤེས་སྒྲིབ་པ་མེད་པ་མཐོང་བར་འགྱུར་བའི་ཆོས་ཐམས་ཅད་ཀྱི་ཏིང་ངེ་འཛིན་མངོན་པར་སྒྲུབ་པ་ཞེས་བྱའོ། །འདི་ལ་གང་མིག་གི་ཆགས་པ་མེད་པ་ཉིད་འདི་ནི་མ་
ཆགས་པ་ཉིད་ཅེས་བྱའོ། །གང་ཆོས་དེ་ལྟ་བུ་དག་ལ་འཇུག་པ་འདི་ནི་ཆོས་ཀྱི་མིག་ཅེས་བྱའོ། །བྱང་ཆུབ་སེམས་དཔའ་གང་གིས་སྤོབས་པ་མཐའ་ཡས་པ་ཉིད་རྗེས་སུ་འཐོབ་པར་འགྱུར་བ་དེ་ནི་ཏིང་ངེ་འཛིན་ཡིན་ནོ།། །།བམ་པོ་བཅོ་བརྒྱད་པ་སྟེ་ཐ་མ། དེ་ནས་བཅོམ་
ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བརྟན་པའི་བློ་གྲོས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་སླད་མའི་ཚེ་སླད་མའི་དུས་ན་གང་དག་ཏིང་ངེ་འཛིན་དེ་ལ་སྙོམས་པར་འཇུག་ཅིང་ཏིང་ངེ་འཛིན་དེས་ངེས་པར་འབྱུང་ལ། སྤོབས་པ་མཐའ་ཡས་པ་ཡང་ཐོབ་པར་འགྱུར་བའི་

བྱང་ཆུབ་སེམས་དཔའ་སེམས་དཔའ་ཆེན་པོ་ཇི་སྙེད་ཅིག་འབྱུང་བར་འགྱུར་ལགས། བཀའ་སྩལ་པ། བརྟན་པའི་བློ་གྲོས་ཕྱི་མའི་ཚེ་ཕྱི་མའི་དུས་ལྔ་བརྒྱ་པ་ཐ་མ་ལ་བབ་པ་ན། གང་ལས་ཏིང་ངེ་འཛིན་དེ་ཐོབ་པའི་བྱང་ཆུབ་སེམས་དཔའ་དེ་ནི་ཏིང་ངེ་འཛིན་དེས་ངེས་པར་འབྱུང་བ་ཡིན་ཞིང་། དགེ་སློང་དེའི་སྤོབས་
པ་མཐའ་ཡས་པ་ཡིན་པར་དེའི་མཐའ་ཁོང་དུ་ཆུད་པར་བྱའོ། །བརྟན་པའི་བློ་གྲོས་གང་ཁྱོད་འདི་སྐད་དུ་སེམས་ཅན་གང་དག་ཏིང་ངེ་འཛིན་དེས་ངེས་པར་འབྱུང་བར་འགྱུར་བ་དེ་དག་ཇི་སྙེད་ཅིག་འབྱུང་བར་འགྱུར་ཞེས་ཟེར་བ་ནི་བརྟན་པའི་བློ་གྲོས་གང་དག་ཏིང་ངེ་འཛིན་དེ་ལ་སྒོམ་པར་བྱེད་ཅིང་། ཡིད་གཞན་དུ་
མི་སེམས་ལ་ལན་མང་དུ་བྱེད་པ་དེ་དག་ནི་ཏིང་ངེ་འཛིན་དེས་ངེས་པར་འབྱུང་བར་འགྱུར་ཞིང་། སྤོབས་པ་མཐའ་ཡས་པ་ཡང་ཐོབ་པར་འགྱུར་ལ། དེ་བཞིན་གཤེགས་པ་མི་འཁྲུགས་པ་ལས་སྤོབས་པ་མཐའ་ཡས་པ་ཉིད་དུ་བྱ་བའི་ཕྱིར་ཆོས་ཀྱི་སྒོ་སྟོང་བརྒྱད་བརྒྱ་ཐོབ་པར་འགྱུར་ཏེ། བརྟན་པའི་བློ་གྲོས་
འདི་ནི་སྒོ་གཅིག་ཏུ་མཚམས་སྦྱོར་བའི་ཚིག་ཡིན་ནོ། །བརྟན་པའི་བློ་གྲོས་ཆོས་ཀྱི་སྒོ་དེ་དག་ཐམས་ཅད་པོ་འདི་ནི་རིམ་པར་ཕྱེ་བའི་ཚིག་ཡིན་ནོ། །བརྟན་པའི་བློ་གྲོས་དེ་ལྟ་བས་ན་སྒོ་ནི་ཅི་ནས་ཁོང་དུ་ཆུད་པར་བྱ་བ་ཡིན། ཅི་ནས་འཇུག་པར་བྱ་བ་ཡིན། ཅི་ནས་བསྒོམ་པར་བྱ་བ་ཡིན་ནོ། །དེ་མཚན་མར་བྱས་
ནས་དེ་ཡོངས་སུ་འཆད་པ་ནི་རྟག་ཏུ་བསྒོམ་པར་བྱ་བའོ། །དེ་བཞིན་དུ་དམིགས་པ་དག་ཀྱང་བསྒོམ་པར་བྱ་བ་ཡིན་ཏེ། ལས་གཅིག་པོ་འདི་ནི་སངས་རྒྱས་ཀྱི་སྐུ་ཡིན་ནོ། །སངས་རྒྱས་བྱང་ཆུབ་དེ་ནི་སེམས་ཀྱིས་བརྟགས། །སེམས་ཀྱང་གཟུགས་མེད་རང་བཞིན་རྣམ་པར་དག །དམིགས་པ་རྣམས་ཀྱིས་
རྒྱ་ཆེར་གང་གནས་པ། །དམིགས་པ་གཞན་དང་གཞན་ལ་འཇུག་པར་འགྱུར། །སེམས་ཀྱི་ཡོངས་གཅོད་སོ་སོར་ཤེས་ནས་སུ། །དེ་བཞིན་དམིགས་ལའང་ཆོས་འདི་ཐམས་ཅད་ནི། །རྣམ་པར་རྟོག་ལས་བྱུང་བ་ཡིན་པར་ཤེས། །གང་དུ་རྟོག་མི་སྐྱེ་བ་དེ་སྒོ་ཡིན། །སེམས་ཀྱི་འགྱུར་བའི་རང་བཞིན་
ཤེས་པར་འགྱུར། །དེ་བཞིན་དམིགས་པ་ཉིད་ཀྱང་ཤེས་པར་འགྱུར། །འགྲོ་བ་འདི་ཀུན་གསོབ་ཏུ་རབ་ཏུ་ཤེས། །རབ་ཏུ་ཤེས་པས་དྲན་པ་རྨོངས་མི་འགྱུར། །དེ་ལྟར་ཆོས་དེ་རབ་ཏུ་ཤེས་པས་ན། །དེ་ནི་སངས་རྒྱས་སྐུ་མང་སྤྲུལ་པར་བྱེད། །དེ་ནི་སྐུ་ལའང་ཅུང་ཟད་ཆགས་མི་འགྱུར། །དེ་བཞིན་དེ་ནི་

འགྲོ་བ་སྟོང་པར་ཤེས། །དམིགས་པ་ཡི་ནི་མཚན་མ་བཟུང་ནས་སུ། །སེམས་དང་ལུས་ཀྱི་འགྱུར་བ་མཐོང་བར་འགྱུར། །དེ་ཕྱིར་ཏིང་འཛིན་དེ་ནི་མྱུར་བསྒོམས་པས། །དེ་ཡི་ཤེས་པ་དེ་ལྟར་ཆོས་ལ་ཞུགས། །ཆོས་བསྟན་པ་ཡིས་རྣམ་པར་འཕྲུལ་བར་འགྱུར། །ཆོས་བསྟན་ཚེ་ན་ནམ་ཡང་རྨོངས་མི་འགྱུར། །མི་རྣམས་ཀྱི་ནི་དགེ་
བ་བསྐྱེད་པར་འགྱུར། །རིང་པོ་མི་ཐོགས་ཆོས་དེའང་ཐོབ་པར་འགྱུར། །སྒོའི་ཚིག་མངོན་པར་སྒྲུབ་པའི་ལེའུ་སྟེ་བཅུ་གསུམ་པའོ།། །།བརྟན་པའི་བློ་གྲོས་ཆོས་བཞི་དང་ལྡན་ན། ཏིང་ངེ་འཛིན་དེ་སྒྲུབ་པ་དང་གཞན་དག་ལ་བསྟན་པར་ནུས་ཏེ། བཞི་གང་ཞེ་ན། ཏིང་ངེ་འཛིན་དེ་ཐོབ་པར་བྱ་བའི་ཕྱིར་བརྩོན་འགྲུས་བརྩམས་
པ་ཡིན་ཞིང་བརྩོན་པ་མི་གཏོང་བ་ཡང་ཡིན། ཉིན་མཚན་ཉིད་དུ་འཆག་པ་ལྷུར་ལེན་པས་འདུག་པ་ན་བྱང་ཆུབ་ཀྱི་སྙིང་པོ་མཆོག་ན་བཞུགས་པའམ། ཆོས་ཀྱི་འཁོར་ལོ་བསྐོར་བའི་དེ་བཞིན་གཤེགས་པ་དེ་དག་མངོན་དུ་བྱེད་ཅིང་ཆོས་ལ་སེར་སྣ་ཡང་མེད་པ་ཡིན། ཆོས་ཀྱི་སྦྱིན་པ་ཡང་སྦྱིན་པར་བྱེད་ཅིང་བདག་ཉིད་དང་ཆོས་ཉན་པ་དེ་
དག་དེ་བཞིན་གཤེགས་པའི་སྐུ་དག་ཏུ་བྱིན་གྱིས་རློབ་པར་བྱེད་ལ་རང་གི་ལུས་རྣམ་པར་འཇིག་པར་བྱེད་ཀྱང་། གང་ལ་ཡང་མི་གནས་པ་ཡིན་ཞིང་མི་གནས་བཞིན་དུ་ཆོས་སྟོན་པར་བྱེད་པ་ཡིན། དེ་གནས་པ་དེ་ལྟ་བུ་དང་སྤྱོད་ཡུལ་དེ་ལྟ་བུ་དང་། བྱིན་གྱི་རླབས་དེ་ལྟ་བུར་བྱས་ནས་སྟན་དེ་ལ་འདུག་པར་བྱེད་ཅིང་། འདུག་ནས་ཀྱང་ཆོས་
ཀྱི་སྦྱིན་པ་སྦྱིན་པར་བྱེད་པ་ཡིན་ཏེ། དེ་ཏིང་ངེ་འཛིན་དེ་ཐོབ་པར་འགྱུར་རོ། །བརྟན་པའི་བློ་གྲོས་ཁ་ཅིག་གིས་ནི་ཆོས་ཀྱི་སྦྱིན་པ་སྦྱིན་པར་བྱེད་པ་ན་ཐོབ་པར་འགྱུར་རོ། །ཁ་ཅིག་གིས་ནི་ཕྱིས་སོ། །ཁ་ཅིག་གིས་ནི་རྩོམ་པའི་ཚེའོ། །བརྟན་པའི་བློ་གྲོས་ཆོས་གཞན་བཞི་དང་ལྡན་པས་ཏིང་ངེ་འཛིན་དེ་ལ་སྦྱོར་བར་བྱ་སྟེ། བརྟན་པའི་བློ་
གྲོས་བཞི་གང་ཞེ་ན། འདི་ལ་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་ཡིན། བས་མཐའི་གནས་མལ་ན་གནས་ཤིང་དགོན་པ་དང་རབ་ཏུ་དགོན་པ་ལ་མངོན་པར་དགའ་བ་ཡིན། དེ་སེམས་ཅན་གྱི་སྤྱོད་པ་ལ་འཇུག་པ་དག་ལ་རྗེས་སུ་རྣམ་པར་བལྟས་ནས་ཡུལ་ཇི་ལྟ་བ་བཞིན་དུ་གདམས་ངག་དང་རྗེས་སུ་
བསྟན་པ་སྟོན་པར་བྱེད་པ་ཡིན། བྱང་ཆུབ་སེམས་དཔའ་མོས་པ་ཇི་ལྟ་བ་རྣམས་ཀྱི་སྤྱོད་པ་ཡང་ཡང་དག་པར་རབ་ཏུ་ཤེས་པ་ཡིན་ནོ། །བརྟན་པའི་བློ་གྲོས་ཆོས་གཞན་བཞི་དང་ལྡན་པ་ནི་དགེ་བའི་བཤེས་གཉེན་དུ་རིག་པར་བྱ་སྟེ། བཞི་གང་ཞེ་ན། ཚར་གཅོད་པའི་ཚིག་དང་ལྡན་པ་ཉིད་ཡིན། ཆོས་ཟབ་མོ་ལ་སྦྱོར་བར་བྱེད་པ་ཉིད་

ཡིན། དུས་དུས་སུ་གདམས་ངག་གི་ཚིག་དང་ལྡན་པ་ཉིད་ཡིན། དུས་དུས་སུ་ཡལ་བར་འཇོག་པ་ཉིད་ཡིན་ཏེ། ཆོས་གཞན་བཞི་པོ་དེ་དག་དང་ལྡན་པ་ནི་དགེ་བའི་བཤེས་གཉེན་དུ་རིག་པར་བྱའོ། །དེ་ལ་འདི་སྐད་ཅེས་བྱ་སྟེ། ས་དང་ཕྱོགས་ནི་རབ་ཤེས་ཤིང་། །གང་ཟག་ཀྱང་ནི་རབ་ཏུ་ཤེས། །གང་གིས་དེ་དག་མྱུར་འབྱུང་བའི། །
གདམས་ངག་དེ་ལ་སྦྱིན་པར་བྱེད། །དེ་ལ་ཚར་གཅད་སྨྲ་བྱེད་ཅིང་། །ཟབ་མོ་ལ་ཡང་སྦྱོར་བར་བྱེད། །དེ་ལ་དུས་སུ་འདོམས་བྱེད་ཅིང་། །དུས་སུ་ཡལ་བར་འཇོག་པར་བྱེད། །འབྱོར་པ་ཅི་ཞིག་སྨྲས་ཀྱང་རུང་། །ལྷག་པར་གླེང་བར་བྱེད་ཀྱང་རུང་། །དེ་ལ་གཟུང་བ་ཡོད་མ་ཡིན། །དེ་བས་དུས་སུ་ཡལ་བར་འཇོག །བརྟན་པའི་བློ་
གྲོས་ཆོས་བཞི་དང་ལྡན་པ་ནི་དགེ་བའི་བཤེས་གཉེན་དུ་རིག་པར་བྱ་སྟེ། བཞི་གང་ཞེ་ན། བརྟན་པའི་བློ་གྲོས་འདི་ལ་དགེ་བའི་བཤེས་གཉེན་ནི་མངོན་པར་འབྱུང་བ་ལ་སྦྱོར་དུ་འཇུག་པ་ཡིན་དོན་ཟབ་མོ་ངེས་པར་སེམས་པ་ལ་སྦྱོར་དུ་འཇུག་པ་ཡིན། བསམ་གཏན་གྱི་དམིགས་པ་ཐམས་ཅད་ལ་མ་ཆགས་པ་ཉིད་ལ་སྦྱོར་
དུ་འཇུག་པ་ཡིན། མཚན་མ་མེད་པའི་དམིགས་པ་ཉིད་ལ་སྦྱོར་དུ་འཇུག་པ་ཡིན་ཏེ། བཞི་པོ་དེ་དག་གོ། །དེ་ལ་འདི་སྐད་ཅེས་བྱ་སྟེ། རྣམ་པར་དབེན་པའི་དགོན་གནས་དང་། །མངོན་པར་འབྱུང་ལ་སྦྱོར་གཞུག་བྱ། །དེ་ཡི་བསྔགས་པ་ཀུན་ཏུ་སྨྲ། །དགེ་བའི་བཤེས་གཉེན་དེ་འདྲའོ། །ཟབ་མོ་ངེས་པའི་ཆོས་རྣམས་ནི། །དམ་པའི་
དོན་དུ་སྦྱོར་བར་བྱ། །དེ་ནི་བསམ་གཏན་རྣམས་མི་སྟོང་། །དེ་དག་བཤེས་གཉེན་རབ་བཟང་ཡིན། །བརྟན་པའི་བློ་གྲོས་ཆོས་བཞི་དང་ལྡན་ན། ཏིང་ངེ་འཛིན་དེ་བསྒོམ་པར་ནུས་ཏེ། བཞི་གང་ཞེ་ན། རང་གི་བློ་བོར་ནས་སློབ་དཔོན་གྱི་བློས་འགྲོ་བར་བྱ་བ་ཡིན། བརྩོན་འགྲུས་ཡོངས་སུ་ཆད་པས་མི་བརྩམ་པར་བྱ་བ་ཡིན། བརྩོན་པ་
མི་གཏོང་བ་དང་། དགོན་པ་དང་། རབ་ཏུ་དགོན་པ་ལ་མངོན་པར་དགའ་བར་བྱ་བ་ཡིན། བྲེ་མོ་གཏམ་ཐམས་ཅད་ཡོངས་སུ་སྤང་བར་བྱ་བ་ཡིན་ཏེ། བརྟན་པའི་བློ་གྲོས་ཆོས་བཞི་པོ་དེ་དག་དང་ལྡན་པའི་བྱང་ཆུབ་སེམས་དཔས་ནི་ཏིང་ངེ་འཛིན་དེ་ཐོབ་པར་ནུས་སོ། །བརྟན་པའི་བློ་གྲོས་གཞན་ཡང་ཆོས་བཞི་དང་ལྡན་ན། ཏིང་ངེ་འཛིན་
དེ་ཐོབ་པར་ནུས་ཏེ། བཞི་གང་ཞེ་ན། ལེགས་པར་བཟུང་བའི་དེ་བཞིན་གཤེགས་པ་ལ་དམིགས་པས་ཐ་ན་རྨི་ལམ་དུ་རྨི་བ་ལ་གནས་ཀྱང་དེ་བཞིན་གཤེགས་པ་མི་སྤོང་བ་ཡིན། ལེགས་པར་བཟུང་བའི་ཆོས་བསྟན་པ་ལ་དམིགས་པས་ཐ་ན་རྨི་ལམ་དུ་རྨི་བ་ལ་གནས་ཀྱང་ཆོས་བསྟན་པ་ལ་དམིགས་པ་མི་སྤོང་བ་ཡིན་

ཞིང་ཆོས་བསྟན་པ་ལ་སྙོམ་ལས་མེད་པ་ཡང་ཡིན། དངོས་པོ་ཐམས་ཅད་རྣམ་པར་འཇིག་པ་ཉིད་ཀྱིས་ཆོས་ཟབ་མོ་ལ་བཟོད་པ་ཐོབ་པ་ཡང་ཡིན། དབེན་པ་ལ་གཞོལ་བ་ཉིད་ཀྱིས་མི་གནས་པའི་བསམ་གཏན་པ་ཡང་ཡིན་ཏེ། བརྟན་པའི་བློ་གྲོས་ཆོས་བཞི་པོ་དེ་དག་དང་ལྡན་པའི་བྱང་ཆུབ་སེམས་
དཔས་ནི་ཏིང་ངེ་འཛིན་དེ་ཐོབ་པར་ནུས་སོ། །དེ་ལ་འདི་སྐད་ཅེས་བྱ་སྟེ། གལ་ཏེ་དགེ་བའི་བཤེས་གཉེན་གྱིས། །འདི་ལྟར་རྗེས་སུ་འཐུན་འདོམས་བྱེད། །སངས་རྒྱས་རྣམས་ཀྱིས་བགྲོད་བྱ་བ། །དེ་མི་སྤོང་བར་ང་སྨྲའོ། །བརྟན་པའི་བློ་གྲོས་ཆོས་བཞི་དང་ལྡན་པ་ནི་དགེ་བའི་བཤེས་གཉེན་དུ་རིག་པར་བྱ་སྟེ། བཞི་གང་ཞེ་ན། དགེ་
བ་ལ་སྦྱོར་བར་བྱེད་པ་ཉིད་ཡིན། སྡིག་པ་ལས་ཟློག་པར་བྱེད་པ་ཉིད་ཡིན། ཆོས་ལ་ཡང་རབ་ཏུ་གཞོག་པར་བྱེད་པ་ཡིན། རྗེས་སུ་འཐུན་པའི་རྗེས་སུ་བསྟན་པ་ཡང་སྦྱིན་པར་བྱེད་པ་ཡིན་ཏེ། བཞི་པོ་དེ་དག་གོ། །དེ་ལ་འདི་སྐད་ཅེས་བྱ་སྟེ། དགེ་བའི་བཤེས་གཉེན་རྟག་ཏུ་བསྟེན་པར་བྱ། །གང་དག་སྡིག་པའི་ཆོས་རྣམས་ཟློག་བྱེད་
ཅིང་། །རྒྱལ་བས་གནང་བའི་ཆོས་ནི་སྟོན་བྱེད་པ། །སྐྱེས་མཆོག་དེ་འདྲ་དེ་དག་བསྟེན་པར་བྱ། །གང་ལས་ཆོས་ནི་འབྱུང་བར་འགྱུར་བ་ཡི། །དཔའ་བོ་དག་ནི་རྗེས་འཐུན་གདམས་ངག་སྦྱིན། །ཇི་ལྟར་བསྟན་པ་བཞིན་དུ་ཆོས་ལ་གནས། །ཆོས་ལ་གནས་ནས་ཀྱང་ནི་ཁྱད་པར་འགྲོ། །གང་དག་བསྟེན་པར་བྱ་བའི་ཆོས་རྣམས་སྟེན། །
གང་དག་བསྟེན་པར་བྱ་བའི་ཆོས་རྣམས་ཤེས། །རྣམ་པར་སྤང་བར་བྱ་བའང་རྣམ་སྤངས་ནས། །རྒྱལ་བས་གནང་བའི་ཆོས་རྣམས་སྟེན་པར་བྱེད། །རང་གི་ཤེས་པས་རབ་ཏུ་བསྟན་པའི་ཕྱིར། །བྱང་ཆུབ་སེམས་དཔའ་གང་ཞིག་སྤོབས་འདོད་པས། །ཏིང་འཛིན་དེ་ནི་མྱུར་དུ་བསྒོམ་པར་བྱ། །དགེ་བའི་བཤེས་གཉེན་རྗེས་སུ་འབྲང་བར་བྱ། །ཇི་ལྟར་བསྟན་
པ་བཞིན་དུ་ཡོངས་སུ་སྤང་། །ཆོས་ནི་གང་ཡང་རྣམ་པར་སྤང་མི་བྱ། །ཆོས་གང་ཁོ་ན་ཐོབ་པར་འགྱུར་བ་ཡི། །དེ་ཉིད་ཕན་པའི་དོན་དུ་བསྟན་པར་བྱ། །བསམ་པ་ཐམས་ཅད་ཀྱིས་ནི་བསྒྲུབ་པར་བྱ། །དེ་ཡིས་གཡོ་ནི་ངེས་པར་བསྟན་མི་བྱ། །དགེ་བའི་བཤེས་གཉེན་རྟག་ཏུ་བསྟེན་པ་ཡིས། །དེ་འདྲའི་ཆོས་དེ་དོན་དུ་གཉེར་བར་བྱ། །དེ་ཕྱིར་དགེ་བའི་
བཤེས་གཉེན་བསྟེན་པར་བྱ། །སྡིག་པའི་གྲོགས་པོ་ཡོངས་སུ་སྤང་བར་བྱ། །དགེ་བའི་བཤེས་གཉེན་ལས་ནི་ཐོས་པ་འབྱུང་། །དེ་ལས་ཏིང་འཛིན་དེ་ཡང་མྱུར་དུ་འཐོབ། །བརྟན་པའི་བློ་གྲོས་གཞན་ཡང་ཆོས་བཞི་དང་ལྡན་པའི་དགེ་བའི་བཤེས་གཉེན་ནི་བསྟེན་པར་བྱ་བ་ཡིན་ཏེ། བཞི་གང་ཞེ་ན། གདམས་ངག་ཀྱང་རབ་ཏུ་ཤེས་པ་

ཡིན། །བསྒོམ་པ་ཡང་རབ་ཏུ་ཤེས་པ་ཡིན། གདམས་ངག་གི་སྐྱོན་ཡང་རབ་ཏུ་ཤེས་པ་ཡིན། བསྒོམ་པའི་སྐྱོན་ཡང་རབ་ཏུ་ཤེས་པ་ཡིན་ཏེ། བཞི་པོ་དེ་དག་གོ། །དེ་ལ་འདི་སྐད་ཅེས་བྱ་སྟེ། གདམས་ངག་དང་ནི་དེ་བཞིན་བསྒོམ་པའང་ཤེས། །དེ་ལ་དེ་བཞིན་བསྒོམ་པའི་སྐྱོན་དང་ནི། །གདམས་ངག་སྐྱོན་ཡང་རབ་ཏུ་
ཤེས་ནས་སུ། །སྐྱོན་མེད་ཆོས་ཀྱིས་སྦྱོར་བར་བྱེད་པ་ཡིན། །བརྟན་པའི་བློ་གྲོས་ཆོས་གཞན་བཞི་དང་ལྡན་པ་ནི་དགེ་བའི་བཤེས་གཉེན་དུ་རིག་པར་བྱ་སྟེ། བཞི་གང་ཞེ་ན། འདི་ལྟ་སྟེ། ས་ཡང་རབ་ཏུ་ཤེས་པ་ཡིན། ཡུལ་ཡང་རབ་ཏུ་ཤེས་པ་ཡིན། གང་ཟག་ཀྱང་རབ་ཏུ་ཤེས་པ་ཡིན། སྤྱོད་པ་ཡང་རབ་ཏུ་ཤེས་པ་
ཡིན་ནོ། །ཇི་ལྟར་ས་རབ་ཏུ་ཤེས་པ་ཡིན་ཞེ་ན། གང་ཟག་དང་འཚམ་པས་ས་ཇི་ལྟ་བ་བཞིན་དུ་རབ་ཏུ་ཤེས་པའོ། །ཇི་ལྟར་གང་ཟག་རབ་ཏུ་ཤེས་པ་ཡིན་ཞེ་ན། སྤྱད་པས་གང་ཟག་ཏུ་འགྱུར་བ་ཇི་ལྟ་བ་དེ་བཞིན་དུ་རབ་ཏུ་ཤེས་པའོ། །ཇི་ལྟར་སྤྱོད་པ་རབ་ཏུ་ཤེས་པ་ཡིན་ཞེ་ན། འདོད་ཆགས་དང་། ཞེ་སྡང་དང་། གཏི་
མུག་གི་སྤྱོད་པ་དང་རྗེས་སུ་འཐུན་པའི་ཆོས་བསྟན་པ་ལ་འཇུག་པ་ངེས་པར་བསྟན་པས་ནི་ཆགས་པ་རྣམ་པར་སྤོང་བ་ཉིད་ཀྱི་ཕྱིར་ཆོས་གོས་གསུམ་ལྷུར་ལེན་པ་ཡིན། རབ་ཏུ་བྱུང་བ་དང་། ཁྱིམ་པ་དག་དང་ལྷན་ཅིག་མ་འདྲེས་པ་ཡིན་ཞིང་། རྩོད་པ་རྣམ་པར་སྤོང་བ་དང་། ཟབ་མོ་ལ་བཟོད་པ་དང་། སྟོང་པ་ཉིད་ཀྱི་སྤྱོད་ཡུལ་བ་ཡིན་
ཏེ། བརྟན་པའི་བློ་གྲོས་ཆོས་བཞི་པོ་དེ་དག་དང་ལྡན་པ་ནི་ཏིང་ངེ་འཛིན་དེ་ཐོབ་པར་འགྱུར་བའི་དགེ་བའི་བཤེས་གཉེན་དུ་རིག་པར་བྱའོ། །བརྟན་པའི་བློ་གྲོས་བྱང་ཆུབ་སེམས་དཔའ་ཁྱིམ་པ་ཆོས་བཞི་དང་ལྡན་ན་ཏིང་ངེ་འཛིན་དེ་ཐོབ་པར་བྱ་བ་དང་། ཏིང་ངེ་འཛིན་དེ་ལ་མངོན་པར་བརྩོན་པར་ནུས་ཏེ། བཞི་གང་ཞེ་ན། བརྟན་པའི་
བློ་གྲོས་འདི་ལ་བྱང་ཆུབ་སེམས་དཔའ་ཁྱིམ་པས་ནི་བསླབ་པའི་གཞི་ལྔ་གཟུང་བར་བྱ་བ་ཡིན། ཟ་གཅིག་པ་ལྷུར་ལེན་པས་གཙུག་ལག་ཁང་དུ་གནས་པར་ཡང་བྱ་བ་ཡིན། མང་དུ་ཐོས་པར་ཡང་བྱ་བ་ཡིན། དོན་རྣམ་པར་ངེས་པ་ལ་མཁས་པ་དང་། གང་དག་ཏིང་ངེ་འཛིན་དེ་ལ་གནས་ནས་འདོམས་པར་བྱེད་པའི་དགེ་
བའི་བཤེས་གཉེན་ལ་བསྟེན་པར་བྱ་བ་ཡིན་ཏེ། བརྟན་པའི་བློ་གྲོས་བྱང་ཆུབ་སེམས་དཔའ་ཁྱིམ་པ་ཆོས་བཞི་པོ་དེ་དག་དང་ལྡན་ན་ཏིང་ངེ་འཛིན་དེ་ཐོབ་པར་བྱ་བའི་ཕྱིར་སྦྱོར་བར་བྱའོ། །བརྟན་པའི་བློ་གྲོས་ཆོས་གཞན་བཞི་དང་ལྡན་པས་སྦྱོར་བར་བྱ་སྟེ། བཞི་གང་ཞེ་ན། ཆོས་ཐམས་ཅད་ལ་མི་གནས་པས་ཏིང་ངེ་འཛིན་དེ་ཐོབ་པར་བྱ་

བའི་ཕྱིར་ཚུལ་ཁྲིམས་ཀྱི་ཕུང་པོ་ཡོངས་སུ་དག་པ་དང་། འཚོ་བ་ཡོངས་སུ་དག་པ་དང་། འགྱོད་པ་མེད་པར་གྱུར་ནས་ལུས་དང་སྲོག་ལ་ཡང་མི་ལྟ་བར་བྱ་བ་ཡིན། ཆོས་ཉན་དུ་འཇུག་པ་ལ་ཡང་སྟོན་པའི་འདུ་ཤེས་སུ་བྱ་བ་ཡིན། དེ་བཞིན་གཤེགས་པའི་སྐུ་ཡང་མངོན་དུ་བྱ་བ་ཡིན། སེར་སྣ་མེད་པར་ཡང་བྱ་
བ་ཡིན་ནོ། །བརྟན་པའི་བློ་གྲོས་ཆོས་བཞི་པོ་འདི་དག་ནི་ཏིང་ངེ་འཛིན་དེ་ཐོབ་པར་བྱ་བའི་ཕྱིར་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ལ་ཕན་འདོགས་པར་གྱུར་པ་ཡིན་ཏེ། བཞི་གང་ཞེ་ན། ལུས་ལ་ལུས་ཀྱི་རྗེས་སུ་བལྟ་བར་བྱའི་ལུས་དང་ལྡན་པའི་རྟོག་པས་བརྟག་པར་མི་བྱ་བ་ཡིན། ཚོར་བ་རྣམས་ལ་
ཚོར་བའི་རྗེས་སུ་བལྟ་བར་གནས་པར་བྱའི་ཚོར་བ་དང་ལྡན་པའི་རྟོག་པས་བརྟག་པར་མི་བྱ་བ་ཡིན། སེམས་ལ་སེམས་ཀྱི་རྗེས་སུ་བལྟ་བར་གནས་པར་བྱའི་སེམས་དང་ལྡན་པའི་རྟོག་པས་བརྟག་པར་མི་བྱ་བ་ཡིན། ཆོས་ལ་ཆོས་ཀྱི་རྗེས་སུ་བལྟ་བར་བྱའི་ཆོས་དང་ལྡན་པའི་རྟོག་པས་བརྟག་པར་མི་བྱ་བ་ཡིན་ཏེ།
བརྟན་པའི་བློ་གྲོས་ཆོས་བཞི་པོ་དེ་དག་ནི་ཏིང་ངེ་འཛིན་དེ་ཐོབ་པར་བྱ་བའི་ཕྱིར་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ལ་ཕན་འདོགས་པར་གྱུར་པ་ཡིན་ནོ། །དེ་ལ་འདི་སྐད་ཅེས་བྱ་སྟེ། གང་དག་ང་ཡིས་རྟག་བསྔགས་པ། དྲན་པ་ཉེར་གཞག་རྣམ་སྒོམ་བྱེད། །དགེ་སློང་གི་ནི་སྤྱོད་ཡུལ་ཏེ། །ཏིང་འཛིན་དེ་ལྟར་
ཐོབ་པར་འགྱུར། །ལུས་ནི་མི་རྟག་སྒོམ་པར་བྱེད། །ལུས་ལ་ཡང་ནི་གནས་པ་མིན། །མི་གནས་པ་ཡི་སེམས་ཀྱིས་སུ། །ཏིང་འཛིན་དེ་ལྟར་ཐོབ་པར་འགྱུར། །རྫུ་འཕྲུལ་རྐང་བཞི་སོ་སོ་རིག་པ་བཞི། །ཆོས་དེ་བཙལ་བས་ཆོས་ཀྱི་སེར་སྣ་མེད། །ཚུལ་ཁྲིམས་ཕུང་པོར་གནས་ནས་བཤེས་བཟང་བསྟེན། །ཏིང་འཛིན་
དེ་བཙལ་སྟོན་པའི་འདུ་ཤེས་སྒོམ། །དེ་ནི་དཀར་པོ་མང་པོའི་རིགས། །དེ་ནི་ཐོས་པའི་འབྱུང་གནས་ཡིན། །དེ་བཞིན་བདུད་ནི་སེལ་བར་བྱེད། །དེ་ལ་རབ་ཏུ་སྦྱོར་བར་བྱ། །དེ་ནི་དེ་ཡི་མིག་གི་མཆོག །ཆོས་ཀྱི་མིག་ནི་བླ་ན་མེད། །ཆོས་བསྟན་པས་ནི་སུ་ལ་ཡང་། །དེ་ལ་སྒྲིབ་པར་འགྱུར་མ་ཡིན། །དེ་ནི་མདོ་སྡེའི་ལུང་
ཡིན་ཞིང་། །མང་དུ་ཐོས་པའི་ལུང་ཡང་ཡིན། །དེ་ལས་ང་ཡི་བྱང་ཆུབ་བྱུང་། །དེ་ཕྱིར་དེ་ལ་བསྟེན་པར་བྱ། །གང་དག་ང་ཡིས་སྟོབས་བཅུ་དང་། །སོ་སོ་ཡང་དག་རིག་བཞི་བཤད། །ཀུན་ཀྱང་འདི་ལས་ངེས་པར་བྱུང་། །དེ་ཕྱིར་དེ་ལ་བསྟེན་པར་བྱ། །གང་གིས་ཐོབ་ཅིང་ཅིར་འགྱུར་བའི། །ཏིང་ངེ་འཛིན་ནི་སངས་རྒྱས་

བསྟན། །སྤོབས་པ་དེ་ནི་བཤད་པ་ཡིས། །ཟད་པར་འགྱུར་བ་མ་ཡིན་ནོ། །དེ་ལ་འབྲི་བ་ཉིད་མེད་ཅིང་། །གང་བ་ཉིད་ཀྱང་ཡོད་མ་ཡིན། །ཀུན་ནས་སོ་སོར་རྟོགས་པས་ན། །རྒྱ་མཚོ་བཞིན་དུ་མི་འཁྲུགས་འགྱུར། །གང་གིས་དེ་ནི་ཐོབ་འགྱུར་བའི། །ཏིང་འཛིན་ང་ཡིས་བཤད་པས་ན། །ཕྱི་ནས་འཆད་པ་སུ་ཡི་
ཡང་། །བཞིན་ལ་དེ་ནི་ལྟ་མི་འགྱུར། །ལྷ་དང་ཀླུ་དང་མི་འམ་ཅི། །མི་དང་མི་མ་ཡིན་རྣམས་ཀྱང་། །བཤད་པས་དེ་ཡི་གདོང་དུ་ལྟ། །མང་པོར་རྣམ་པར་ལྟ་བར་འགྱུར། །གང་དག་དེ་ཡིས་རབ་བསྟན་པའི། །དེ་དག་དེ་ཡིས་གང་ནས་ཐོབ། །དེ་ལ་དེས་ནི་ཇི་ལྟར་བསླབས། །ཇི་ལྟར་ཆོས་ཀྱིས་ཁྱད་པར་འཕགས། །
མདོ་སྡེ་དེ་ནི་རབ་བཤད་པས། །དེ་དག་བསམ་པ་ཤེས་པར་འགྱུར། །ཏིང་འཛིན་དེ་ལ་བསླབས་པས་ནི། །སེམས་ཅན་རྣམས་ཀྱི་སྤྱོད་པ་ཤེས། །མདོ་སྡེ་འདི་ལ་བློ་བརྟན་བྱོས། །གང་དག་ང་ཡིས་སངས་རྒྱས་བསྟན། །ཀུན་གྱི་མཚན་ནི་ཤེས་པར་འགྱུར། །དེ་དག་གི་ནི་ཆོས་ཀྱང་ཤེས། །འཇིག་རྟེན་ཁམས་སུ་མདོ་
སྡེ་དག །གང་དག་ཇི་སྙེད་བཤད་པ་རྣམས། །དེ་དག་ང་ལ་དམིགས་བྱས་ནས། །དེ་དག་ཐམས་ཅད་རབ་ཏུ་ཤེས། །འཇིག་རྟེན་མགོན་པོ་དེ་དག་གི། །ཉན་ཐོས་བཀུར་བ་གང་བྱུང་གྱུར། །ཏིང་འཛིན་དེ་ལ་གནས་ནས་སུ། །དེ་དག་ཐམས་ཅད་རབ་ཏུ་ཤེས། །དེ་དག་བཀོད་པ་ཅི་འདྲ་བའི། །སངས་རྒྱས་ཞིང་ནི་རབ་ཏུ་ཤེས། །
གང་གིས་ཏིང་འཛིན་རྣམས་བསྒོམས་པས། །དེ་དག་གི་ནི་སྐུ་ཚེའང་ཤེས། །ཉི་མ་གང་དག་བྱུང་གྱུར་དང་། །ཟླ་བ་ཕྱེད་དང་ཟླ་བ་དང་། །ལོ་ནི་ཁྱུད་ཁོར་རངས་པ་དང་། །བསྐལ་པ་དེ་ཡང་རབ་ཏུ་ཤེས། །གང་དག་ཕྱོགས་བཅུའི་འཇིག་རྟེན་ན། །རྫོགས་པའི་སངས་རྒྱས་རྐང་གཉིས་མཆོག །དེ་དག་དེ་ཡིས་རབ་ཏུ་ཤེས། །
དེ་ཡིས་ཞིང་ཀུན་ཤེས་པར་འགྱུར། །གང་དག་སྟོན་པས་འཇིག་རྟེན་མགོན། །དེ་དག་གི་ནི་མཚན་རྣམས་ཀྱང་། །གང་གིས་ཏིང་འཛིན་བསྒོམས་པ་ཡིས། །དེ་དག་ཐམས་ཅད་རབ་ཏུ་ཤེས། །གང་དག་སྐྱོབ་པས་བཤད་པ་ཡི། །མདོ་སྡེ་དེ་དག་རབ་ཏུ་ཤེས། །ཉན་ཐོས་ཕུན་སུམ་ཚོགས་པ་དང་། །འཇིག་རྟེན་མགོན་པོ་
དེ་སྙེད་ཤེས། །གང་གིས་ཏིང་འཛིན་འདི་ཐོབ་པ། །བློ་གྲོས་བརྟན་པོར་འགྱུར་བ་ཡིན། །སངས་རྒྱས་རྣམས་ཀྱི་སྤྱོད་ཡུལ་གང་། །དེ་ཡང་དེ་ཡིས་འདིར་ཤེས་སོ། །བསྐལ་པ་བྱེ་བར་འབྱུང་འགྱུར་བའི། །སངས་རྒྱས་གང་དག་མ་བྱོན་དང་། །མཚན་གང་གདུང་རུས་གང་ཡིན་པ། །ཐམས་ཅད་དེ་ཡིས་རབ་ཏུ་ཤེས། །དེ་དག་

རྣམས་ཀྱི་ཚེ་ཚད་ཤེས། །ཉན་ཐོས་རྣམས་ཀྱང་རབ་ཏུ་ཤེས། །གང་དག་སྐྱོབ་པས་འཆད་འགྱུར་བ། །དེ་དག་རྣམས་ཀྱི་མདོ་སྡེའང་ཤེས། །དེ་ཡི་སངས་རྒྱས་ཞིང་ཅི་འདྲ། །དེ་དག་གི་ནི་བཀོད་ཅི་འདྲ། །སངས་རྒྱས་མྱ་ངན་འདས་རྣམས་ཀྱི། །ཆོས་ནི་ཇི་སྲིད་གནས་འགྱུར་བ། །ཏིང་ངེ་འཛིན་ལ་གནས་ནས་
སུ། །དེ་དག་ཐམས་ཅད་དེ་ཡིས་ཤེས། །དེ་ལྟ་བས་ན་སུ་གང་ཞིག །མང་ཐོས་འདོད་པས་དེ་བསྟེན་བྱ། །ཏིང་འཛིན་དེ་ནི་བསྟེན་པ་ཡིས། །དེ་ཡི་དོན་ཀྱང་ཤེས་པར་འགྱུར། །སངས་རྒྱས་ཡེ་ཤེས་འཇུག་པ་ཡི། །སྒོ་དེ་ཡིན་ཞིང་བློ་གྲོས་བརྟན། །དེ་ལས་དོན་ནི་འབྱུང་བར་འགྱུར། །སངས་རྒྱས་ཡེ་ཤེས་འཇུག་པར་འགྱུར། །
གང་གི་མཐའ་ནི་ཡོད་མིན་པའི། །བསོད་ནམས་དེ་ལས་ཐོབ་པར་འགྱུར། །དེ་ཚེ་སངས་རྒྱས་གང་འབྱུང་བ། །འཇིག་རྟེན་མགོན་པོ་མི་ཡི་མཆོག །རྫོགས་པའི་སངས་རྒྱས་ཇི་སྙེད་པ། །དེ་སྙེད་དེ་ཡིས་རབ་ཏུ་ཤེས། །མི་གང་བྱང་ཆུབ་རབ་ཞུགས་ནས། །སངས་རྒྱས་རེ་རེ་རེ་རེའི་ཡང་། །ཉན་ཐོས་དག་ནི་དེ་སྙེད་པ། །དེ་དག་རྣམས་ལ་
མཆོད་པར་བྱེད། །སངས་རྒྱས་རེ་རེ་རེ་རེ་ལའང་། །མཆོད་པའི་དོན་ཕྱིར་ནོར་བསགས་པ། །སྟོང་གསུམ་ལས་ནི་མི་ཉུང་བའི། །འཇིག་རྟེན་ཁམས་ནི་ཡོངས་སུ་བཀང་། །རྗེས་སུ་དཔག་པ་དེ་ཡིས་སུ། །ཉན་ཐོས་དང་ནི་རྒྱལ་བར་བཅས། །དེ་ལ་བསྐལ་པ་རྫོགས་ཚང་བར། །སངས་རྒྱས་ཀུན་ལ་རིམ་གྲོ་བྱེད། །འཇིག་རྟེན་མགོན་པོ་
གྲགས་ཆེན་པོ། །གང་དག་མ་བྱོན་སངས་རྒྱས་རྣམས། །དེ་དག་ལ་ཡང་འདུ་བྱེད་འགྱུར། །དེ་འདྲ་བ་ཡི་མཆོད་པའང་བྱེད། །བསོད་ནམས་ཕུང་པོ་ཇི་སྙེད་པའང་། །བློ་གྲོས་བརྟན་པ་དེ་འཛིན་བྱེད། །སངས་རྒྱས་ཡེ་ཤེས་བསམ་མི་ཁྱབ། །ཡེ་ཤེས་དམ་པ་ཚོལ་བར་བྱེད། །གང་དག་བྱང་ཆུབ་དོན་གཉེར་བས། །ཏིང་ངེ་འཛིན་འདི་
བསྒོམ་པར་བྱ། །གང་གིས་ཏིང་འཛིན་འདི་བསྒོམས་པས། །དེ་ནི་ཐོས་པས་འཕགས་པར་འགྱུར། །གང་གིས་ཏིང་འཛིན་འདི་བསྒོམས་དང་། །གང་དག་བསྒོམ་པར་འགྱུར་རྣམས་ཀྱི། །བསོད་ནམས་ཕུང་པོ་དེ་ལ་ནི། །ཚད་ཡོད་དོ་ཞེས་ང་མི་སྨྲ། །ཏིང་ངེ་འཛིན་འདི་བསྒོམས་པ་ཡི། །བསོད་ནམས་དེ་ནི་རབ་ཏུ་མང་། །ཤེས་པ་དེ་ནི་རྣམ་
པར་འཕེལ། །སངས་རྒྱས་མཆོད་པས་དེ་ལྟ་མིན། །མེ་ཏོག་སྤོས་དང་ཕྲེང་བ་དང་། །བཟའ་བ་དག་དང་བཏུང་བ་དང་། །ཡོ་བྱད་རྣམས་ཀྱིས་བསྙེན་བཀུར་བ། །དེ་ནི་སངས་རྒྱས་བསྙེན་བཀུར་མིན། །བརྟན་པའི་བློ་གྲོས་ང་ཡིས་སུ། །བྱང་ཆུབ་སྙིང་པོར་ཆོས་གང་རྟོགས། །ཆོས་དེར་གང་དག་སྦྱོར་བྱེད་པ། །དེ་ཡིས་སངས་རྒྱས་བསྟི་སྟང་བྱས། །

གང་ཡང་ཆོས་དེ་ཚོལ་བྱེད་ཅིང་། །སངས་རྒྱས་མཐོང་བར་འདོད་བྱེད་པ། །དེ་ཡིས་མྱུར་བར་འདི་འདྲའི་ཆོས། །ཏིང་ངེ་འཛིན་འདི་བཙལ་བར་བྱ། །གང་དག་ཏིང་འཛིན་དེ་ཐོབ་ནས། །དགའ་བ་བཟང་པོ་སྐྱེད་བྱེད་པ། །སངས་རྒྱས་སྟོང་ཕྲག་མང་པོ་དག །དེ་དག་གིས་ནི་སྔོན་ཆད་ཤེས། །ཏིང་ངེ་འཛིན་གྱི་ལས་ཀྱི་ལེའུ་སྟེ་བཅུ་བཞི་
པའོ།། །།བརྟན་པའི་བློ་གྲོས་གཞན་ཡང་མངོན་པར་ཤེས་པ་མྱུར་བ་ཉིད་དུ་བྱ་བའི་ཕྱིར་དེ་བཞིན་གཤེགས་པའི་མཆོད་རྟེན་མཆོད་པ་དང་། ཕྱིར་བཅོས་པ་དང་། བྱི་དོར་བྱ་བ་ལྷུར་བླང་བར་བྱ་སྟེ། བརྟན་པའི་བློ་གྲོས་དེ་ལ་རིགས་ཀྱི་བུའམ། རིགས་ཀྱི་བུ་མོ་གང་ཞིག་དེ་བཞིན་གཤེགས་པའི་མཆོད་རྟེན་བྱི་དོར་བྱེད་པ་དེ་ནི་
སྨོན་ལམ་གྱི་མཆོག་རྣམ་པར་དག་པ་བཞི་རྗེས་སུ་འཐོབ་པོ། །བཞི་གང་ཞེ་ན། གཟུགས་ཀྱི་སྨོན་ལམ་གྱི་མཆོག་རྣམ་པར་དག་པ་དང་། དལ་བ་ཕུན་སུམ་ཚོགས་པའི་སྨོན་ལམ་གྱི་མཆོག་རྣམ་པར་དག་པ་དང་། ཡང་དག་པར་བླང་བ་བརྟན་པའི་སྨོན་ལམ་གྱི་མཆོག་རྣམ་པར་དག་པ་དང་། དེ་བཞིན་གཤེགས་པ་བལྟ་བའི་
སྨོན་ལམ་གྱི་མཆོག་རྣམ་པར་དག་པའོ། །སྨོན་ལམ་དགེ་བས་བསྐྱེད་པ་ཡིས། །མངོན་གྲུབ་དེ་བཞིན་གཤེགས་རྣམས་འབྱུང་། །དམིགས་པའི་རབ་ཏུ་དབྱེ་བ་ཡིས། །ཇི་ལྟར་སྤྲུལ་པ་འབྱུང་བ་བཞིན། །ཞབས་མཐིལ་ཞབས་སོར་འོག་འཁོར་ལོ། །དཔེ་བྱད་ལས་ནི་འབྱུང་བར་འགྱུར། །དཔེ་བྱད་བཟང་འབྱོར་འདི་འདྲ་བ། །
དེ་ནི་བཤད་བྱས་དེ་ཉོན་ཅིག །དེ་བཞིན་ང་ཡི་དཔེ་བྱད་རབ་ཏུ་གསལ། །ང་ཡི་སོར་མོ་དག་ལ་འཐུན་པར་གནས། །ཡང་དག་འཕགས་ཤིང་རྗེས་སུ་འཐུན་པར་གནས། །དེ་ཡི་ཡངས་པར་གནས་པ་ཡང་དག་འཕགས། །དེ་ཡི་འོད་ཟེར་གནས་པ་མངོན་དུ་འཕགས། །འོད་ཟེར་བྱེ་བ་ཇི་བཞིན་རབ་ཏུ་སྣང་། །ལྷུན་པོ་བཞིན་དུ་འོད་
ཀྱིས་ཡང་དག་འབྱུང་། །དེ་ཡི་སྟེང་ན་འོད་ཟེར་དྲ་བ་ཅན། །སྙིང་པོ་བསགས་པའི་དཔེ་བྱད་དེ་དག་ལ། །དེ་ཚེ་འོད་ཟེར་གནས་པ་བྱེ་ཕྲག་བཅུ། །དེ་ཚེ་ཀུན་གྱི་མིང་ནི་གཞན་དང་གཞན། །དེ་ཚེ་འོད་དང་མདོག་ཀྱང་གཞན་དང་གཞན། །ང་ཡི་འོད་ཟེར་གཅིག་ལས་འོད་སྟོང་འབྱུང་། །དེ་ཚེ་ཐམས་ཅད་ཁ་དོག་དུ་མར་གནས། །སྟོང་
གསུམ་གྱི་ནི་ས་དེ་བཤིག་ནས་སུ། །འོག་ཏུ་དེ་དག་སངས་རྒྱས་མཛད་པ་བྱེད། །ང་ནི་སངས་རྒྱས་འོད་ཀྱིས་བྱུང་བ་ཡིན། །ང་ནི་ལས་ཀྱི་འབྲས་བུས་འོངས་མ་ཡིན། །དེ་བཞིན་གཤེགས་པའི་འོད་དེ་མཐོང་ནས་སུ། །སྐྱེས་པ་བུད་མེད་དག་ནི་མྱོས་པར་འགྱུར། །བསྐལ་པ་བྱེ་བ་མང་པོར་མངོན་པར་སྤྲུལ། །ཡང་ན་སངས་རྒྱས་ཞིང་བཀོད་

གཞན་དང་གཞན། །གང་དུ་སངས་རྒྱས་མཛད་པ་ངས་བྱས་པ། །དེ་བཞིན་རྒྱལ་བ་དག་ནི་ཆོ་འཕྲུལ་སྤྲུལ། །ང་ཡི་ཏིང་ངེ་འཛིན་ནི་ཀུན་ནས་སྣང་། །སངས་རྒྱས་ཞིང་ནི་ཀུན་ནས་སྣང་བར་བྱེད། །ལྷུན་པོའི་རྒྱལ་མཚན་འོད་ཟེར་ཞེས་བྱ་འཕགས། །དཔའ་བར་འགྲོ་བ་ཞེས་བྱའི་ཏིང་འཛིན་འཕགས། །ཆོས་རྣམས་ཀུན་
གྱིས་ཁྱབ་པར་མཐོང་ལྡན་པ། །རྣམ་དག་ཁ་ཅིག་སངས་རྒྱས་སྤྲུལ་འདིར་མཐོང་། །ཁ་ཅིག་ལྷུམས་ཞུགས་མཐོང་ཞིང་བཙས་པ་དང་། །འཇིགས་མེད་མི་སྐྲག་གོམ་བདུན་འདོར་འདིར་མཐོང་། །དེ་ནི་རྒྱལ་བ་བྱང་ཆུབ་འཚང་རྒྱ་སྙམ། །ས་ཡི་སྙིང་པོར་བྱང་ཆུབ་བཞུགས་པར་མཐོང་། །ཆོས་ཀྱི་འཁོར་ལོ་བསྐོར་བར་འགྱུར་སྙམ་བྱེད། །
ཁ་ཅིག་བྱང་ཆུབ་ཕྱིར་ནི་སྤྱོད་སྙམ་བྱེད། །ཏིང་འཛིན་གང་ལ་གནས་ནས་རྣམ་འཕྲུལ་བའི། །ཏིང་འཛིན་གཟི་བརྗིད་དེ་ནི་ཅི་འདྲ་ལྟོས། །ཁ་ཅིག་ང་ཡི་སྐུ་ཚེ་བསྐལ་པར་སེམས། །ཁ་ཅིག་ཀྱང་ནི་བསྐལ་པ་ཕྱེད་དུ་སེམས། །དེ་ཚེ་ཁ་ཅིག་བར་གྱི་བསྐལ་པར་སེམས། །གཉིས་གསུམ་བཞི་དང་དེ་ལས་ལྷག་པར་ཡང་། །དེ་ཚེ་ཁ་ཅིག་
ལོ་ནི་བྱེ་བར་སེམས། །ཁ་ཅིག་གི་ནི་མང་ཉུང་རབ་ཏུ་མཐོང་། །འཛམ་བུའི་གླིང་འདིར་ང་ཡི་སྐུ་ཚེ་ནི། །ལོ་གྲངས་བརྒྱད་ཅུ་ཡིན་པར་མི་རྣམས་ཤེས། །ཁ་ཅིག་དེར་ནི་སྐུ་ཚེ་ཉིན་མཚན་ཤེས། །ཁ་ཅིག་གིས་ནི་སྐུ་ཚེ་རིང་པོར་ཤེས། །སྟོང་གསུམ་འཇིག་རྟེན་དུ་ནི་ལྷ་རྣམས་ཀྱི། །ཉིན་མཚན་ཅི་འདྲ་དེ་བཞིན་གཞན་དུ་
སེམས། །དེ་དག་ཇི་ལྟར་མོས་པ་དེ་བཞིན་ཤེས། །དེ་བཞིན་དུ་ནི་དེ་ལ་གདམས་ངག་མཛད། །ཇི་ལྟར་མོས་ལ་དེ་བཞིན་བྱིན་གྱིས་རློབ། །ཡེ་ཤེས་དེ་བཞིན་དེ་ཡི་དེ་ལྟར་བསྟན། །དེ་དག་བསྟན་པས་མོས་པ་སྐྱེ་བར་འགྱུར། །འདི་ནི་དེ་ཡི་རྨད་བྱུང་ཆོ་འཕྲུལ་ཡིན། །གལ་ཏེ་རང་གི་གནས་པ་བསྟན་གྱུར་ན། །མཁས་པ་མ་
ཡིན་མི་རྣམས་མྱོས་པར་འགྱུར། །ང་ཡི་སྤྱོད་ཡུལ་གང་དང་གནས་པ་གང་། །དེ་མཐོང་དགའ་བ་སུ་ཞིག་སྐྱེད་མི་བྱེད། །དེ་དག་ང་ཡི་སྤྱོད་ཡུལ་ཤེས་ནས་སུ། །དེ་དག་ཆོས་ཀྱི་འཁོར་ལོ་བསྐོར་བར་འགྱུར། །དེ་ཚེ་མོས་པ་སྣ་ཚོགས་ཆོས་སྨྲ་རྣམས། །དེ་དག་ང་ཡི་སྤྱོད་ཡུལ་ཀུན་མི་ཤེས། །གང་གིས་ཀུན་
མཁྱེན་སྤྱོད་ཡུལ་མི་ཤེས་པ། །དེ་དག་ཆོས་ཀྱི་ཚིག་ཉུང་སྟོན་པར་བྱེད། །དེ་དག་གི་ནི་དམིགས་པ་གང་ཡང་མེད། །མཐོང་ནས་དེ་དག་ཡིད་ལ་གནོད་པར་འགྱུར། །གང་དག་རྒྱལ་བའི་ཆོས་ཉིད་དེ་ཤེས་པ། །དེ་དག་ཡིད་ལ་ནམ་ཡང་གནོད་པ་མེད། །འདི་ལྟར་ཆོས་མཉམ་ཉིད་ཀྱི་སྤྱོད་

ཡུལ་ལ། །དེ་དག་ཐམས་ཅད་རབ་ཏུ་གནས་པ་ཡིན། །གང་དག་ང་ཡི་མདུན་ན་ཐལ་སྦྱར་ཅིང་། །འཁོད་པའི་དགེ་སློང་བརྒྱད་འདི་མ་གཏོགས་པ། །བློ་གྲོས་བརྟན་པ་ཕྱི་མའི་དུས་ན་འདིར། །མདོ་སྡེ་འདི་འཛིན་སུ་ཡང་འབྱུང་མི་འགྱུར། །བློ་གྲོས་བརྟན་པ་འདི་དག་རྟག་ཏུ་ཡང་། །འདས་པའི་
སངས་རྒྱས་མཚུངས་མེད་སྤྱོད་ཡུལ་ཡིན། །དེ་དག་རྟག་པར་སྔོན་དུ་འགྲོ་བར་འགྱུར། །དེ་དག་ཆོས་ཀྱི་སྣོད་དུ་གྱུར་པ་ཡིན། །དེ་ཚེ་བྱང་ཆུབ་སེམས་ནི་ཡང་དག་ལེན། །སངས་རྒྱས་རྣམས་ཀྱིས་རྟག་པར་བསྔགས་པའང་ཡིན། །ཇི་ལྟར་དེ་དག་ང་ཡི་མདུན་འཁོད་པ། །དེ་བཞིན་འདས་པའི་དུས་
ནའང་ངས་ཤེས་ཏེ། །དེ་དག་གང་གཱའི་ཀླུང་གི་བྱེ་སྙེད་ཀྱི། །རྒྱལ་བ་དེ་དག་རྣམས་ཀྱི་སྤྱན་སྔར་འཁོད། །དེ་ཡི་འོག་ཏུ་ལྔ་བརྒྱ་འཁོད་པ་ཡིན། །བྱང་ཆུབ་མཆོག་དེ་ངས་ཀྱང་གཟུང་བར་བྱ། །ཕྱི་དུས་རྒྱལ་བའི་ཡེ་ཤེས་དེ་དག་ཡིན། །བརྟན་པའི་བློ་གྲོས་ཁྱོད་ཀྱང་དེ་ལ་དཔའ། །གང་དག་
ཆོས་ཀུན་གཟུང་ཕྱིར་ཞུགས་པ་ནི། །གཞན་ཡང་དཔའ་བོ་དུང་ཕྱུར་ཕྲག་བརྒྱད་དོ། །ངས་ཀྱང་དེར་ནི་ཆོས་མཉན་བྱ་བ་ཡིན། །ཐོས་པར་གྱུར་ནས་ཀྱང་ནི་ཆོས་དེ་ལ། །གནས་པར་བྱ་སྟེ་སྤྱོད་པ་མི་ཞན་པ། །དེ་ཡི་ཚེ་ན་བསྟན་པར་བྱ་བ་ཡིན། །དེ་ཚེ་སྟོན་པས་བྱང་ཆུབ་མཆོག་ལུང་
བསྟན། །རང་རང་ལུང་བསྟན་པ་ནི་ཐོས་ནས་སུ། །དུང་ཕྱུར་ཕྲག་བརྒྱད་དགའ་བས་ཁྱབ་གྱུར་ནས། །ཏ་ལ་བདུན་སྲིད་མངོན་པར་འཕགས་པར་གྱུར། །འཇིག་རྟེན་མགོན་པོས་ཀུན་དགའ་བཀའ་སྩལ་པ། །ཕྱི་མའི་དུས་ཚེ་སྡིག་པ་ཅན་དེར་ནི། །ཆོས་འདི་འཛིན་པར་སྤྲོ་ཞིང་ནུས་
གྱུར་ཏམ། །མི་སྤྲོ་ཞེས་ནི་བཅོམ་ལྡན་འདས་ལ་གསོལ། །མཁྱེན་བཞིན་རྒྱལ་བ་འོད་སྲུང་བཀའ་སྩལ་པ། །འོད་སྲུང་ཆོས་འདི་འཛིན་པར་བྱེད་འགྱུར་རམ། །ཡོངས་སུ་མྱ་ངན་འདས་ནས་ཆོས་ཟུང་ཤིག །མི་སྤྲོ་ལགས་སོ་ཞེས་ཏེ་འོད་སྲུང་སོང་། །སྟོང་གསུམ་འཇིག་རྟེན་ཁམས་འདི་
སྐྱེ་བོ་དང་། །རྒྱ་མཚོ་རི་དང་ནགས་ཚལ་བཅས་གཟུང་ཞིང་། །ཁུར་གཞན་མང་པོ་བསྐུར་བར་སྤྲོ་ལགས་ཀྱི། །ཁུར་འདི་བསྐུར་བར་བདག་ནི་མི་སྤྲོ་ལགས། །སླད་མའི་དུས་ན་སུ་ཞིག་ཆོས་འཛིན་ལགས། །དེ་ཉིད་དགེ་སློང་ཤིན་ཏུ་དབང་བགྱི་དཀའ། །རྗེས་སུ་བསྟན་པ་འདི་ལ་གནས་མི་

བགྱིད། །འཇིག་རྟེན་འདྲེན་པ་མྱ་ངན་འདས་ཅི་སྨོས། །འོད་སྲུང་ཁྱོད་ནི་རྒས་འཁོགས་གྱུར་ཏོ་ཞེས། །སླད་དུས་བདག་གི་ཚིག་བཞིན་ཡོང་མི་བགྱིད། །བདག་གི་རྗེས་སུ་བསྟན་ལ་གནས་མི་འགྱུར། །བདག་ཅག་འདི་ནི་མཁས་ཤིང་དོན་སེམས་སྙམ། །སྙན་དངགས་
འཇིག་རྟེན་རྒྱང་ཕན་སེམས་པ་ལགས། །དེ་བཞིན་འཇིག་རྟེན་སྒྲ་ཡིས་གནས་པ་ལགས། །བསམ་གཏན་དེ་བཞིན་ཏིང་ངེ་འཛིན་སྤངས་ནས། །དེ་དག་འཇིག་རྟེན་པ་ལ་སྤྱོད་པར་འགྱུར། །རྒྱས་པ་ཆེ་དང་གྲགས་པ་ཆེན་པོ་ལགས། །རྟག་ཏུ་འཇིག་རྟེན་གྱིས་ཀྱང་མཐོང་བར་འགྱུར། །
དེ་དག་བདག་གིས་ནམ་ཡང་བརྟག་མི་ནུས། །སྐྱོན་རྣམས་དམ་པོ་དག་ནི་མཐོང་ལགས་སོ། །བདག་ནི་གཅིག་པུར་དགོན་པར་གནས་པ་ན། །ལྷ་ཞིག་མཆིས་ནས་བདག་ལ་འདི་སྐད་བརྗོད། །ཆོས་དེ་འདྲ་བར་རྒྱལ་བ་རྣམས་ཀྱིས་བསྟན། །འཕགས་པའི་ཆོས་ལ་སེམས་ཅན་མང་པོ་བཏུལ། །
དགེ་སློང་བསམ་གཏན་ཏིང་ངེ་འཛིན་ལ་མཁས། །རྣམ་ཐར་རྫུ་འཕྲུལ་སྟོབས་ཀྱི་ཕ་རོལ་ཕྱིན། །ཐོས་ནས་བརྒྱ་བྱིན་དགའ་བར་འགྱུར་བ་ལགས། །དེ་རིང་དེ་ལ་ངོ་མཚར་ཅི་མཆིས་སྨྲ། །ཕྱི་དུས་བདག་གི་ཐད་དུ་དེ་མཆིས་ནས། །དེ་ཚེ་ཡིད་མི་བདེ་བས་ངུ་ཞིང་སྟོན། །འོད་སྲུང་དེང་ནི་བསྟན་པ་འཇིག་པར་འགྱུར། །དེ་ཐོས་བདག་ནི་
ཡིད་མི་བདེ་བར་འགྱུར། །མང་དུ་འཆད་པར་ཡང་ནི་སྤྲོ་མ་ལགས། །མདོ་སྡེ་དེ་ནི་འཛིན་པར་སྤྲོ་མ་ལགས། །དེར་ནི་དེ་དག་ཞུམ་པར་འགྱུར་བ་ལགས། །དགེ་སློང་མཆོག་ཏུ་བཀའ་བློ་མི་བདེ་འགྱུར། །དེ་ཚེ་དེར་ནི་ལྷ་ཚོགས་འདུ་བར་འགྱུར། །བཅོམ་ལྡན་འདས་ཀྱིས་འོད་སྲུང་བཀའ་སྩལ་པ། །ཆོས་ཀྱི་
ཚུལ་ནི་འཛིན་པར་མི་ནུས་པར། །འོད་སྲུང་དེ་ནི་ང་ཡིས་སྔ་ནས་ཤེས། །མདོ་སྡེ་དེ་འདྲ་དེ་ནི་གང་འཛིན་པ། །ང་ཡི་ཉན་ཐོས་གང་ཡང་འདི་ན་མེད། །གང་དག་མདོ་སྡེ་དེ་འདྲ་དེ་འཛིན་པ། །ང་ཡིས་གང་དག་བྱིན་རླབས་དེར་མ་གཏོགས། །གང་དག་ཕྱི་ནས་ཐེ་ཚོམ་མེད་འགྱུར་བ། །དེ་དག་ཐེ་ཚོམ་
དེ་ནི་ང་ཡིས་གཅད། །གཞན་དག་ལས་ནི་མཐུ་ཆེ་གང་ཡིན་པ། །མདོ་སྡེ་དེ་ལ་ཅི་ཕྱིར་སྔོན་མ་སྤྱད། །དེ་དག་འཛིན་པའི་དགེ་སློང་གསར་བུ་གཞོན། །མདོ་སྡེ་དེ་དག་རྒྱས་པ་ཆེན་པོ་ཡིན། །གང་དག་ཆོས་དེ་འདྲ་བ་དེ་མི་འཛིན། །འདི་ལ་ཇི་ལྟར་ཕ་རོལ་ཕྱིན་པར་འགྱུར། །བརྟན་པའི་བློ་གྲོས་ང་ཡིས་

བསྟན་པ་ན། །གང་དག་གིས་ནི་དེ་རིང་ང་མཐོང་འགྱུར། །དེ་དག་ཕྱི་དུས་འཇིགས་པ་ཆེན་པོའི་ཚེ། །ཆོས་དེ་ཐོས་ནས་དགའ་བ་ཐོབ་པར་འགྱུར། །ང་ནི་དམིགས་པ་འབའ་ཞིག་འཆད་པ་ཡིན། །འཇིགས་མེད་ང་ཡི་ཚིག་དེར་དད་པར་བྱོས། །གང་གི་འདི་ན་སྟོན་པ་མཐོང་གྱུར་པ། །དེ་
དག་ཆོས་དེ་འཛིན་པར་སྤྲོ་བར་འགྱུར། །ཡེ་ཤེས་དེ་འདྲ་དེ་ནི་ཚོལ་བྱེད་ཅིང་། །དེ་ཚེ་འདྲེན་པ་རྣམས་ལ་མཆོད་པར་བྱེད། །རིང་བསྲེལ་མཆོད་དང་དེ་བཞིན་མཆོད་རྟེན་མཆོད། །འཇིགས་མེད་དེ་དག་དེར་ནི་བྱེད་པར་འགྱུར། །ཡོངས་སུ་གཏད་པའི་ཕན་ཡོན་གྱི་ལེའུ་སྟེ་བཅོ་
ལྔ་པའོ།། །།དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ནས། བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། དེ་ཇི་ལྟར་
གཟུང་བར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་ནི་དགེ་བའི་རྩ་བ་ཡོངས་སུ་འཛིན་པ་ཞེས་བྱ་བར་ཟུང་ཤིག་བསོད་ནམས་ཀྱི་ཚོགས་ཀྱི་གནས་ཞེས་བྱ་བར་ཡང་ཟུང་ཤིག
བྱང་ཆུབ་སེམས་དཔའ་འགྲོགས་པ་ཞེས་བྱ་བར་ཡང་ཟུང་ཤིག །བྱང་ཆུབ་སེམས་དཔས་ཞུས་པ་ཞེས་བྱ་བར་ཡང་ཟུང་ཤིག །ཐེ་ཚོམ་ཐམས་ཅད་གཅོད་པའི་ལེའུ་ཞེས་བྱ་བར་ཡང་ཟུང