Kinh tạng Tây Tạng (Kangyur Đại Học) — 048_མདོ་སྡེ།_ང

ཏུ་འཇོམས་པ་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་
དགའ་འབྱུང་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཡེ་ཤེས་དཔལ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་དོན་གྱི་བློ་གྲོས་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་
རྣམ་པར་བསྒྲགས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་རྣམ་པར་བསྒྲགས་པའི་སྟོབས་ཀྱི་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་དཔའ་བོ་ཞེས་བྱ་བ་བཏང་ངོ་། །དེའི་ཡང་འདབ་
ཆགས་ན་འཇིག་རྟེན་གྱི་ཁམས་ཡོན་ཏན་ཅན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཡོན་ཏན་རྒྱལ་པོའི་འོད་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་དོན་གྱི་བློ་གྲོས་ཞེས་བྱ་བ་བཏང་ངོ་། །
དེའི་ཡང་འདབ་ཆགས་ན་འཇིག་རྟེན་གྱི་ཁམས་ཤིན་ཏུ་རྣམ་པར་བསྒོམས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་རིན་ཆེན་མེ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་དཔས་བྱིན་ཞེས་བྱ་བ་
བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་ཡིད་གཉིས་མནན་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཡིད་གཉིས་ཐམས་ཅད་ཡང་དག་པར་འཇོམས་འབྱུང་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་

རྒྱལ་ཚབ་མི་འཇིགས་པ་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་ཡོན་ཏན་ཅན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་རིམ་པའི་སྲས་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་
དེས་བྱང་ཆུབ་སེམས་དཔའ་རྒྱལ་ཚབ་སྒྲོན་མ་འཛིན་ཅེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་བཟང་ལྡན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཏོག་གི་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་
བྱང་ཆུབ་སེམས་དཔའ་རྒྱལ་ཚབ་བཤེས་གཉེན་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་སྤོས་མཆོག་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་པད་མའི་དཔལ་འབྱུང་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་
དེས་བྱང་ཆུབ་སེམས་དཔའ་རྒྱལ་ཚབ་ཡེ་ཤེས་རབ་མཆོག་ཅེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་ཏོག་བཟང་པོ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་འོད་ཟེར་རབ་བཏང་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་
ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ཐམས་ཅད་བཤེས་གཉེན་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་སྤྲིན་ཆེན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་བྱམས་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་
ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་སྐར་རྒྱལ་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་སྣང་བ་ཅན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་པད་མ་སྣང་བའི་འོད་ཟེར་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ།
བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ཆོས་འཕགས་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་སྙན་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་སྤྱོད་པ་ཁྱད་པར་ཅན་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་

ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་མངོན་དུ་འཕགས་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་དབང་པོའི་གནས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་མཐའ་ཡས་རྣམ་པར་གནོན་ཅེས་བྱ་བ་བཞུགས་ཏེ་འཚོ་ཞིང་
གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་བཤེས་གཉེན་གྲགས་ལྡན་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་པད་མ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་རྒྱ་མཚོའི་ལྷུན་པོ་མངོན་དུ་
འཕགས་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་དཀོན་མཆོག་འབྱུང་གནས་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་དགའ་བ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་
པ་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་དབང་པོ་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་རྟག་ཏུ་བརྒྱན་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་
མཐོང་བ་དོན་ཡོད་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་དཔའ་བའི་དཔལ་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་རྣམ་པར་བསྒྲགས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་
པ་ཐོགས་མེད་དབྱངས་ཀྱི་ང་རོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ཤིན་ཏུ་རབ་གནས་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་རྟག་ཏུ་རབ་བརྗོད་ཅེས་བྱ་བ་ཡོད་དེ།
དེ་ན་དེ་བཞིན་གཤེགས་པ་ཡོན་ཏན་དཔག་ཏུ་མེད་པའི་དཔལ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་སྒྲོགས་བྱེད་ཅེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་ཟས་ཀྱི་རྒྱལ་མཚན་ཞེས་

བྱ་བ་ཡོད་དེ། དེ་ན་དེ་བཞིན་གཤེགས་པ་ཐ་དད་པ་མེད་པའི་གོ་ཆ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ཐོགས་པ་མེད་པའི་གོ་ཆ་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་
རྟེན་གྱི་ཁམས་ཙན་དན་དྲི་བསུང་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་འོད་ཟེར་མཐའ་ཡས་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་དྲི་མ་མེད་པའི་དཔལ་ཞེས་བྱ་བ་བཏང་ངོ་། །དེའི་ཡང་འདབ་
ཆགས་ན་འཇིག་རྟེན་གྱི་ཁམས་འདྲེན་པའི་རྒྱལ་མཚན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་སྤྱན་བཟངས་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ལག་ན་རིན་ཆེན་ཞེས་བྱ་བ་བཏང་ངོ་། །
བྱང་ཆུབ་སེམས་དཔའ་དེ་ལ་སོགས་པ་སྐྱེ་བ་གཅིག་གིས་ཐོགས་པ་གྲངས་མེད་དཔག་ཏུ་མེད་པ་དག་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། བཅོམ་ལྡན་
འདས་འབའ་ཞིག་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་དོ། །དེའི་ཚེ་ལྷོ་ཕྱོགས་སུ་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་ན་དེ་བཞིན་གཤེགས་པ་རིན་པོ་ཆེའི་མཛོད་གཅིག་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་
འདས་དེས་ངའི་འོག་ཏུ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་བྱང་ཆུབ་སེམས་དཔའ་རྒྱུ་སྐར་གྱི་ཕྲེང་བ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་རྒྱུ་སྐར་གྱི་ཕྲེང་བས་སྣང་བ་ཆེན་པོ་དེ་མཐོང་སྟེ། གསུང་བསལ་བའི་སྒྲ་དེ་ཡང་ཐོས་ནས་བཅོམ་ལྡན་འདས་དེ་ལ་ཞུས་པ། བཅོམ་ལྡན་འདས་གསུང་བསལ་བའི་སྒྲ་གྲག་པ་དེ་སུའི་ལགས། བཅོམ་ལྡན་འདས་དེས་བཀའ་སྩལ་པ། རྒྱུ་སྐར་གྱི་ཕྲེང་བ་

འདི་ནས་བྱང་ཕྱོགས་སུ་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་ཀྱི་
ཆོས་ཀྱི་རྣམ་གྲངས་ཀྱི་ཆོས་ཀྱང་སྟོན་ཏོ། །འཁོར་དེར་ཡང་ཆོས་མཉན་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གྱིས་མི་ཁྱབ་པའི་གོ་ཆ་བགོས་པ་དག་འདུས་ཏེ། རྒྱུ་སྐར་གྱི་ཕྲེང་བ་འཇིག་རྟེན་གྱི་ཁམས་གཞན་ན་ནི་སེམས་ཅན་རྣམས་བྱང་ཆུབ་སེམས་དཔའ་
དེ་དག་ཇི་ལྟ་བུའི་གོ་ཆ་དག་གིས་གོ་ཆ་བགོས་པའི་གོ་ཆ་དེ་ལྟ་བུ་དག་གིས་སྟོངས་སོ། །དེ་ནས་བཅོམ་ལྡན་འདས་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྒྱུ་སྐར་གྱི་ཕྲེང་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གྱིས་མི་ཁྱབ་པའི་གོ་ཆ་བགོས་པ་དེ་དག་བལྟ་བའི་སླད་དུ་འཇིག་རྟེན་གྱི་ཁམས་མི་མཇེད་དེར་
བདག་མཆི་བར་བགྱིའོ། །བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་དེའི་དུས་ལ་ད་བབ་པར་ཤེས་ན་སོང་ཤིག །ངའི་ཚིག་གིས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་གསོལ་
ལ། རིགས་ཀྱི་བུ་ཁྱོད་སངས་རྒྱས་ཀྱི་ཞིང་དེར་ཡང་ཤེས་བཞིན་དུ་སྤྱོད་པར་གནས་པར་བྱོས་ཤིག །དེ་ཅིའི་ཕྱིར་ཞེ་ན། སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་དེ་དག་ནི་བསྙེན་པར་དཀའ་བའི་ཕྱིར་རོ། །དེ་ནས་བྱང་ཆུབ་སེམས་དཔའ་རྒྱུ་སྐར་གྱི་ཕྲེང་བས་བཅོམ་
ལྡན་འདས་དེའི་ཞབས་ལ་ཕྱག་འཚལ་ཏེ། བསྐོར་བ་ཡང་བྱས་ནས་སོང་སྟེ། དེ་འདི་ལྟ་སྟེ་དཔེར་ན། སྐྱེས་བུ་སྟོབས་དང་ལྡན་པ་ཞིག་གིས་ལག་པ་བསྐུམ་པ་རྐྱོང་བར་བྱེད་པའམ། ལག་པ་བརྐྱང་བ་སྐུམ་པར་བྱེད་པའི་སྐད་ཅིག་དེས་འཇིག་རྟེན་གྱི་ཁམས་དེ་ནས་མི་སྣང་བར་

གྱུར་ནས་འཇིག་རྟེན་གྱི་ཁམས་མི་མཇེད་འདིར་འདུག་སྟེ། དེ་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས་བཅོམ་ལྡན་འདས་ལ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་ལྡན་ནམ། བདེ་བར་རེག་པ་ལ་གནས་སམ་ཞེས་དེ་བཞིན་གཤེགས་པ་རིན་པོ་ཆེའི་མཛོད་གཅིག་པ་སྙུན་གསོལ་ལགས་སོ། །དེ་ནས་བཅོམ་ལྡན་འདས་
ཀྱིས་བྱང་ཆུབ་སེམས་དཔའ་རྒྱུ་སྐར་གྱི་ཕྲེང་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཅི་བཅོམ་ལྡན་འདས་དེ་སྙུན་མི་མངའ་འམ། སྟོབས་དང་ལྡན་ནམ། བདེ་བ་དང་ལྡན་ནམ། འགྱུར་བ་མི་མངའ་འམ། གསོལ་པ། བཅོམ་ལྡན་འདས་དེ་ལྟ་ལགས་སོ། །བྱང་
ཆུབ་སེམས་དཔའ་སེམས་དཔའ་ཆེན་པོ་དེ་ལ་སོགས་པ་སྐྱེ་བ་གཅིག་གིས་ཐོགས་པ་གྲངས་མེད་དཔག་ཏུ་མེད་པ་དག་ལྷོ་ཕྱོགས་ནས་སངས་རྒྱས་ཀྱི་ཞིང་ཐ་དད་པ་དག་ཏུ་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་
ཏུ་འཁོད་དོ། །དེའི་ཚེ་ནུབ་ཕྱོགས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེ་བ་གཅིག་གིས་ཐོགས་པ་གྲངས་མེད་དཔག་ཏུ་མེད་པ་དག་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །
བཅོམ་ལྡན་འདས་དེ་བཞིན་གཤེགས་པ་རྡུལ་མེད་རྡུལ་བྲལ་རྣམ་གྲོལ་འདས་པ་དང་། མ་འོངས་པ་དང་། ད་ལྟར་བྱུང་བ་ལ་མ་ཆགས་པའི་གོ་ཆའི་སངས་རྒྱས་ཀྱི་ཞིང་ནས་དེ་དག་གི་དང་པོ་བྱང་ཆུབ་སེམས་དཔའ་ཁྱུ་མཆོག་མཐའ་ཡས་སངས་རྒྱས་ཀྱི་མེ་ཏོག་ཀུན་ཏུ་སྟོན་པའི་
གོ་ཆ་ཞེས་བྱ་བ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་རྣམས་དང་ལྷན་ཅིག་ཏུ་འཇིག་རྟེན་གྱི་ཁམས་མི་མཇེད་ག་ལ་བ་དང་། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེར་སོང་སྟེ། བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས།

གནོད་པ་ཆུང་ངམ། ཉམ་ང་བ་ཉུང་ངམ། ཞེས་སྙུན་གསོལ་ཏེ་ཕྱོགས་གཅིག་ཏུ་འདུག་གོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་དོན་གྱི་དབང་ཅི་མཐོང་ནས་འཇིག་རྟེན་གྱི་ཁམས་མི་མཇེད་འདིར་
འོངས། གསོལ་པ། བཅོམ་ལྡན་འདས་དེ་བཞིན་གཤེགས་པའི་བྱིན་གྱི་རླབས་ཀྱིས་འཇིག་རྟེན་གྱི་ཁམས་འདིར་མཆིས་ལགས་མོད་ཀྱི། འོན་ཀྱང་བཅོམ་ལྡན་འདས་བདག་ནི་འཇིག་རྟེན་གྱི་ཁམས་དེ་ཉིད་ན་མཆིས་ཀྱང་། འཇིག་རྟེན་གྱི་ཁམས་ཐམས་ཅད་མཐོང་ཞིང་
དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱང་མཐོང་ལགས་ཏེ། བྱང་ཆུབ་སེམས་དཔའ་རྣམས་ནི་འདི་སྙམ་དུ་བདག་ཅག་འཇིག་རྟེན་གྱི་ཁམས་གཞན་དུ་འདོང་བར་བྱའོ། །དེ་བཞིན་གཤེགས་པ་གཞན་ཡང་བལྟ་བར་བྱའོ། །སྙམ་
དུ་མི་སེམས་ལགས་སོ། །དེ་ཅིའི་སླད་དུ་ཞེ་ན། བྱང་ཆུབ་སེམས་དཔའ་དེ་དག་ནི་འཇིག་རྟེན་གྱི་ཁམས་དེ་དག་ཉིད་ན་མཆིས་ཀྱང་དེ་བཞིན་གཤེགས་པ་ཐམས་ཅད་མཐོང་ལགས་ཏེ། བཅོམ་ལྡན་འདས་དེའི་སླད་དུ་དེ་བཞིན་གཤེགས་པའི་ཐུགས་བསྐྱེད་པ་ཙམ་གྱིས་དེ་བཞིན་
གཤེགས་པའི་མཐུས་བདག་འཇིག་རྟེན་གྱི་ཁམས་འདིར་མཆིས་ལགས་སོ། །བྱང་ཆུབ་སེམས་དཔའ་གཞན་གང་དག་མཆི་བ་དེ་དག་ཀྱང་། དེ་བཞིན་གཤེགས་པའི་སྔོན་གྱི་སྨོན་ལམ་གྱི་དབང་གིས་དེ་བཞིན་གཤེགས་པའི་མཐུས་མཆིས་ལགས་སོ། །དེའི་ཚེ་ནུབ་ཕྱོགས་
ནས་དེ་བཞིན་གཤེགས་པ་བདུད་རྩིའི་མེ་ཏོག་གི་སངས་རྒྱས་ཀྱི་ཞིང་དང་། དེ་བཞིན་དུ་དེ་བཞིན་གཤེགས་པ་བདུད་རྩིའི་འོད་དང་། བཀོད་པ་དཔག་མེད་དང་། འོད་ཟེར་དཔག་མེད་དང་། འོད་དཔག་མེད་དང་། ཁྱུ་མཆོག་དཔག་མེད་དང་། རྣམ་པར་གནོན་པ་དཔག་མེད་དང་།
རྒྱུ་སྐར་གཅིག་པ་དང་། རྒྱུ་སྐར་གྱི་ཕྲེང་བ་དང་། རིན་ཆེན་གདུགས་དང་། རྒྱུ་སྐར་རྒྱལ་པོ་དང་། འོད་ཀྱི་དཀྱིལ་འཁོར་ཅན་དང་། འོད་ཀྱི་རྒྱལ་པོ་དང་། འོད་ཟེར་མངོན་པར་འཕགས་པའི་དཔལ་དང་། འོད་ཟེར་མཐའ་ཡས་དང་། ཁྱུ་མཆོག་དང་། ཁྱུ་མཆོག་མཐའ་ཡས་རྣམ་

པར་གནོན་དང་། ཐོགས་པ་མེད་པའི་དབྱངས་དང་། སྤྲིན་ཆེན་འོད་ཟེར་དང་། དྲ་བ་ཅན་གྱི་འོད་ཟེར་དང་། སངས་རྒྱས་མེ་ཏོག་འོད་ཟེར་དང་། པད་མའི་ཁྱུ་མཆོག་མེ་ཏོག་དང་། རིའི་རྒྱལ་པོ་དང་། ཟླ་བའི་ཡོན་ཏན་བདག་པོ་དང་། འོད་ཟེར་རབ་ཏུ་
བཏང་བ་དང་། དཔུང་མགོ་ཤིན་ཏུ་ཟླུམ་པ་དང་། མཐོང་བ་དོན་ཡོད་དང་། རྩེ་མོ་མངོན་པར་འཕགས་པའི་རྒྱལ་པོ་དང་། པད་མའི་རྩེ་མོ་མངོན་པར་འཕགས་པའི་རྒྱལ་པོ་དང་། དེ་བཞིན་གཤེགས་པ་དེ་དག་ལ་སོགས་པའི་སངས་རྒྱས་ཀྱི་ཞིང་དག་ནས། བྱང་ཆུབ་
སེམས་དཔའ་སྐྱེ་བ་གཅིག་གིས་ཐོགས་པ་གྲངས་མེད་དཔག་ཏུ་མེད་པ་དག་འཇིག་རྟེན་གྱི་ཁམས་མི་མཇེད་འདིར་ལྷགས་ཏེ། ལྷགས་ནས་ཀྱང་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་བཅོམ་ལྡན་འདས་ཀྱི་ཞབས་ལ་
མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །དེའི་ཚེ་བྱང་ཕྱོགས་སུ་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་ན་འཇིག་རྟེན་གྱི་ཁམས་རྒྱུ་སྐར་གྱི་ཕྲེང་བ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དོན་ཡོད་མིང་སྒྲོགས་ཞེས་བྱ་བ་བཞུགས་
ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཕྱིར་མི་ལྡོག་པའི་འཁོར་ལོ་བསྐོར་བར་ངེས་པའི་གོ་ཆ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་བྱང་ཆུབ་སེམས་དཔའ་དེས་སྣང་
བ་ཆེན་པོ་དེ་མཐོང་ཞིང་གསུང་བསལ་བའི་སྒྲ་དེ་ཡང་ཐོས་ནས། བཅོམ་ལྡན་འདས་དེ་བཞིན་གཤེགས་པ་དོན་ཡོད་མིང་སྒྲོགས་དེ་ལ་དེས་འདི་སྐད་ཅེས་གསོལ་ཏོ། །བཅོམ་ལྡན་འདས་འོད་ཀུན་དུ་གདའ་བ་དང་། གསུང་བསལ་བའི་སྒྲ་གྲག་པ་དེ་དེ་བཞིན་གཤེགས་པ་གང་གི་
ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་དེས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཕྱིར་མི་ལྡོག་པའི་འཁོར་ལོ་བསྐོར་བར་ངེས་པའི་གོ་ཆ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སངས་རྒྱས་ཀྱི་ཞིང་འདི་ནས་ལྷོ་ཕྱོགས་

སུ་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་ཅེས་བྱ་བའི་ཆོས་ཀྱི་རྣམ་
གྲངས་ཀྱི་ཆོས་ཀྱང་སྟོན་ཏེ། སྣང་བ་དེ་དང་། གསུང་བསལ་བའི་སྒྲ་གྲག་པ་དེ་ནི་དེའི་ཡིན་ནོ། །སངས་རྒྱས་ཀྱི་ཞིང་དེར་ནི་བྱང་ཆུབ་སེམས་དཔའ་བསམ་གྱིས་མི་ཁྱབ་པའི་གོ་ཆ་བགོས་པ་དག་སྐྱེས་ཏེ། དེ་དག་གིས་མིང་བརྗོད་པ་ཙམ་གྱིས་ཕྱོགས་བཅུའི་བྱང་ཆུབ་སེམས་
དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་རོ། །དེ་སྐད་ཅེས་བཀའ་སྩལ་པ་དང་། དེ་བཞིན་གཤེགས་པ་དོན་ཡོད་མིང་སྒྲོགས་ལ་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཕྱིར་མི་ལྡོག་པའི་འཁོར་ལོ་བསྐོར་བར་ངེས་པའི་གོ་ཆས་
འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་སངས་རྒྱས་ཀྱི་ཞིང་འཇིག་རྟེན་གྱི་ཁམས་མི་མཇེད་དེར་བདག་མཆི་བར་བགྱིའོ། །བཅོམ་ལྡན་འདས་དེས་བཀའ་
སྩལ་པ། རིགས་ཀྱི་བུ་དེའི་དུས་ལ་ད་བབ་པར་ཤེས་ན་སོང་ཤིག །ངའི་ཚིག་གིས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་ཡང་གསོལ་ཅིག །དེ་ནས་བྱང་ཆུབ་སེམས་དཔའ་དེ་བཅོམ་
ལྡན་འདས་དེའི་ཞབས་ལ་ཕྱག་འཚལ་ཏེ། བསྐོར་བ་ཡང་བྱས་ནས་སོང་སྟེ། དེ་འདི་ལྟ་སྟེ་དཔེར་ན་སྐྱེས་བུ་སྟོབས་དང་ལྡན་པ་ཞིག་གིས་ལག་པ་བསྐུམ་པ་རྐྱོང་བར་བྱེད་པའམ། བརྐྱང་བ་སྐུམ་པར་བྱེད་པའི་སྐད་ཅིག་དང་། ཐང་ཅིག་དང་། ཡུད་ཙམ་དེས་འཇིག་རྟེན་གྱི་
ཁམས་དེ་ནས་མི་སྣང་བར་གྱུར་ནས་འཇིག་རྟེན་གྱི་ཁམས་མི་མཇེད་འདིར་འདུག་སྟེ། དེ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དེའི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་

འདུག་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ལ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་དེ་བཞིན་གཤེགས་པ་དོན་ཡོད་མིང་
སྒྲོགས་སྙུན་གསོལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཅི་བཅོམ་ལྡན་འདས་དེ་སྙུན་མི་མངའ་འམ། སྟོབས་དང་ལྡན་ནམ། བདེ་བ་དང་ལྡན་ནམ། འགྱུར་བ་མི་མངའ་འམ། དེས་གསོལ་པ། བཅོམ་ལྡན་འདས་དེ་ལྟ་ལགས་སོ། །
དེའི་ཚེ་བྱང་ཕྱོགས་ནས་བཅོམ་ལྡན་འདས་དེ་བཞིན་གཤེགས་པ་དོན་ཡོད་མིང་སྒྲོགས་ལ་སོགས་ཏེ། བཅོམ་ལྡན་འདས་དོན་ཡོད་རྣམ་པར་གནོན་གྱི་སངས་རྒྱས་ཀྱི་ཞིང་དང་། དེ་བཞིན་དུ་དོན་ཡོད་ཁྱུ་མཆོག་དང་། དོན་ཡོད་འོད་ཟེར་དང་། བརྩོན་འགྲུས་མཐའ་ཡས་དང་།
སཱ་ལའི་དབང་པོའི་རྒྱལ་པོ་དང་། བརྩོན་པ་མཐའ་ཡས་དང་། སཱ་ལ་རིན་པོ་ཆེ་དང་། གདུགས་གཅིག་པ་དང་། རྒྱུ་སྐར་བཀོད་པ་དང་། དཀོན་མཆོག་འབྱུང་གནས་དང་། ཙན་དན་ཁང་པ་དང་། ཙན་དན་སྤོས་ཀྱི་འོད་དང་། འོད་མཐའ་ཡས་དང་། འོད་ཀྱི་དཀྱིལ་
འཁོར་ཅན་དང་། ལྷུན་པོ་རྣམ་དག་དང་། ཐོགས་པ་མེད་པའི་སྤྱན་དང་། སྤྱན་མཐའ་ཡས་དང་། རིན་ཆེན་འབྱུང་དང་། ཀུན་གྱི་དཔལ་དང་། སངས་རྒྱས་མེ་ཏོག་འབྱུང་བའི་དཔལ་དང་། བློ་གྲོས་རབ་གནས་དང་། མཐའ་ཡས་རྣམ་པར་གནོན་དང་། དོན་ཡོད་དཔལ་དང་།
རིན་ཆེན་རྣམ་པར་གནོན་དང་། གོ་ཆ་མཐའ་ཡས་དང་། བཀོད་པ་མཐའ་ཡས་དང་། ནམ་མཁའི་དཀྱིལ་འཁོར་འོད་ཟེར་དང་། མཚན་མ་མེད་པའི་ང་རོ་དང་། རྩིའི་རྒྱལ་པོ་དང་། བག་ཚ་བ་མི་མངའ་བ་དང་། སྤུ་ཟིང་ཞེས་བྱེད་པའི་འཇིགས་བྲལ་དང་། ཡོན་ཏན་རྒྱལ་པོའི་འོད་
དང་། སྤྱན་རས་གཟིགས་ཀྱི་བློ་སྒྲུབ་མེ་ཏོག་དང་། ནམ་མཁའི་རིགས་དང་། ནམ་མཁའི་ང་རོ་དང་། ནམ་མཁའ་བཀོད་པའི་ང་རོ་དང་། དེ་བཞིན་གཤེགས་པ་དེ་དག་དང་། གཞན་དག་གིས་སངས་རྒྱས་ཀྱི་ཞིང་དག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེ་

བ་གཅིག་གིས་ཐོགས་པ་དག་འཇིག་རྟེན་གྱི་ཁམས་མི་མཇེད་ག་ལ་བ་དང་། བཅོམ་ལྡན་འདས་ག་ལ་བ་དེར་ལྷགས་ཏེ་ལྷགས་ནས་ཀྱང་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་འོག་གི་ཕྱོགས་སུ་འཇིག་རྟེན་གྱི་ཁམས་གྲངས་མེད་དཔག་
ཏུ་མེད་པ་དག་འདས་པ་ན་འཇིག་རྟེན་གྱི་ཁམས་ནམ་མཁའི་དཀྱིལ་འཁོར་རྣམ་པར་དག་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་སྤྱན་ཆེན་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རིམ་པའི་བུ་ཞེས་བྱ་
བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་བྱང་ཆུབ་སེམས་དཔའ་རིམ་པའི་བུས་སྣང་བ་ཆེན་པོ་དེ་མཐོང་སྟེ། གསུང་བསལ་བའི་སྒྲ་དེ་ཡང་ཐོས་སོ། །ཐོས་ནས་ཀྱང་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
འོད་ཀྱི་སྣང་བ་ཀུན་དུ་གདའ་བ་དེ་དང་། གསུང་བསལ་བའི་སྒྲ་གྲག་པ་དེ་སུའི་ལགས། བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་སྟེང་གི་ཕྱོགས་སུ་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་
ཡོད་དེ། དེ་ན་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། མཐུ་དེ་ནི་དེའི་ཡིན་ནོ། །དེ་བཞིན་གཤེགས་པ་དེ་ནི་ད་ལྟར་བྱང་ཆུབ་སེམས་དཔའི་སྡེ་སྣོད་སེམས་ཅན་ཐམས་ཅད་ཡང་དག་པར་ཚིམ་པར་བྱེད་པ་སེམས་ཅན་
ཐམས་ཅད་ཀྱི་ཐེ་ཚོམ་གཅོད་པར་བྱེད་པ་ཞེས་བྱ་བའི་ཆོས་ཀྱི་རྣམ་གྲངས་ཡང་དག་པར་རབ་ཏུ་སྟོན་ཏེ། མཐུ་དེ་ལྟ་བུ་དེ་ནི་དེའི་ཡིན་ནོ། །འཁོར་དེ་ན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ་དཔེ་མེད་པ་སེམས་པ་དག་ཆོས་བསྟན་པ་དེ་ཉན་པར་
བྱེད་དེ། དེ་དག་གི་མིང་བརྗོད་པ་ཙམ་གྱིས་སེམས་ཅན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རིམ་པའི་བུས་འདི་སྐད་ཅེས་

གསོལ་ཏོ། །བཅོམ་ལྡན་འདས་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བའི་སླད་དུ་འཇིག་རྟེན་གྱི་ཁམས་མི་མཇེད་དེར་བདག་མཆི་བར་བགྱིའོ། །བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་དེའི་དུས་ལ་ད་
བབ་པར་ཤེས་ན་སོང་ཤིག །ངའི་ཚིག་གིས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་ཡང་གསོལ་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རིམ་པའི་བུ་བཅོམ་ལྡན་འདས་དེའི་
ཞབས་ལ་ཕྱག་འཚལ་ཏེ། འདི་ལྟ་སྟེ་དཔེར་ན། སྐྱེས་བུ་སྟོབས་དང་ལྡན་པ་ཞིག་གིས་ལག་པ་བསྐུམ་པ་རྐྱོང་བར་བྱེད་པའམ། བརྐྱང་བ་སྐུམ་པར་བྱེད་པའི་སྐད་ཅིག་དེས་འཇིག་རྟེན་གྱི་ཁམས་དེ་ནས་མི་སྣང་བར་གྱུར་ནས་དེ་འཇིག་རྟེན་གྱི་ཁམས་མི་མཇེད་འདིར་འདུག་སྟེ།
དེ་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ལ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་
ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་དེ་བཞིན་གཤེགས་པ་སྤྱན་ཆེན་པོ་སྙུན་གསོལ་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་རིམ་པའི་བུ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཅི་སངས་རྒྱས་ཀྱི་ཞིང་དེ་ན་བཅོམ་
ལྡན་འདས་དེ་གནོད་པ་ཆུང་ངམ། སྙུན་མི་མངའ་འམ། བདེ་བར་རེག་པ་ལ་གནས་སམ། གསོལ་པ། བཅོམ་ལྡན་འདས་དེ་ལྟ་ལགས་སོ། །དེ་ལྟར་དེ་བཞིན་གཤེགས་པ་སྤྱན་ཆེན་པོ་ལ་སོགས་ཏེ། བཅོམ་ལྡན་འདས་དེ་བཞིན་གཤེགས་པ་མཆོག་གི་དཔལ་
གྱི་སངས་རྒྱས་ཀྱི་ཞིང་དང་དེ་བཞིན་དུ་དེ་བཞིན་གཤེགས་པ་པད་མའི་དཔལ་འབྱུང་དང་། སེང་གེའི་དཔལ་དང་། དོན་གྲུབ་དང་། དཔལ་སྦས་དང་། སེང་གེའི་འགྲམ་པ་དང་། ཤིན་ཏུ་རབ་ཏུ་གནས་པའི་རྒྱལ་པོ་དང་། ཚངས་པ་ལྷུན་པོ་དང་། སྤྱན་རྣམ་པར་དག་པ་

དང་། དོན་ཡོད་པའི་གོམ་པས་རྣམ་པར་གནོན་དང་། སྤོས་ཀྱི་གླང་པོ་ཆེ་དང་། སྤོས་ཀྱི་དཔལ་དང་། སྤོས་ཀྱི་ལྷུན་པོ་དང་། སྤྱན་ཚད་མེད་པ་དང་། སྤོས་བརྩེགས་དང་། རིན་ཆེན་ལྷུན་པོ་དང་། ཤིན་ཏུ་རབ་གནས་དང་། ཤིན་ཏུ་རབ་ཏུ་གནས་པའི་རྒྱལ་པོ་དང་།
སཱ་ལའི་དབང་པོའི་རྒྱལ་པོ་དང་། འོད་ཀྱི་དཀྱིལ་འཁོར་འཛིན་དང་། མེ་སྒྲོན་དང་། སྐར་མདའ་སྒྲོན་མ་དང་། བརྩོན་འགྲུས་དོན་ཡོད་དང་། ཤིན་ཏུ་ཡང་དག་བརྟགས་ཀྱི་གོ་ཆ་དང་། སེང་གེ་དང་། སེམས་ཅན་གྱི་ཁ་ལོ་སྒྱུར་བ་དང་། རབ་མཆོག་རབ་ཏུ་
གནས་པའི་རྒྱལ་པོའི་སངས་རྒྱས་ཀྱི་ཞིང་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་སོགས་པ་གྲངས་མེད་དཔག་ཏུ་མེད་པ་དག་གི་སངས་རྒྱས་ཀྱི་ཞིང་དག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེ་བ་གཅིག་
གིས་ཐོགས་པ་གྲངས་མེད་དཔག་ཏུ་མེད་པ་དག་འཇིག་རྟེན་གྱི་ཁམས་མི་མཇེད་ག་ལ་བ་དང་། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ།། །།བམ་པོ་དགུ་པ།
དེའི་ཚེ་སྟེང་གི་ཕྱོགས་སུ་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་ན་འཇིག་རྟེན་གྱི་ཁམས་ཙན་དན་སྤོས་ཀྱི་འོད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཡུལ་མཐའ་ཡས་པར་མངོན་པར་འཕགས་པའི་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་
གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ང་རོ་དཔག་ཏུ་མེད་ཅེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་བྱང་ཆུབ་སེམས་དཔའ་ང་རོ་དཔག་ཏུ་མེད་ཀྱིས་སྣང་བ་ཆེན་པོ་དེ་མཐོང་ཞིང་གསུང་
བསལ་བའི་སྒྲ་དེ་ཡང་ཐོས་ནས། དེ་བཅོམ་ལྡན་འདས་དེ་བཞིན་གཤེགས་པ་ཡུལ་མཐའ་ཡས་པར་མངོན་དུ་འཕགས་པའི་རྒྱལ་པོ་ག་ལ་བ་དེར་སོང་སྟེ། ཕྱིན་ནས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ་གསོལ་པ། བཅོམ་ལྡན་འདས་འོད་གདའ་

བ་དེ་དང་གསུང་བསལ་བའི་སྒྲ་གྲག་པ་དེ་སུའི་ལགས། བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་འོག་གི་ཕྱོགས་སུ་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་
དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། འཁོར་དེར་ཡང་ཆོས་མཉན་པའི་ཕྱིར། བྱང་ཆུབ་སེམས་དཔའ་སེམས་དཔའ་ཆེན་པོ་དཔེ་མེད་པ་སེམས་པ་དག་འདུས་པར་གྱུར་ཏེ་འཁོད་དོ། །གསོལ་པ་བཅོམ་ལྡན་འདས་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེའི་ཐད་དུ་འཇིག་རྟེན་གྱི་ཁམས་མི་མཇེད་དེར་བདག་མཆི་བར་བགྱིའོ། །བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་དེའི་དུས་ལ་ད་བབ་པར་ཤེས་ན་སོང་ཤིག །ངའི་
ཚིག་གིས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་ཡང་གསོལ་ཅིག །དེ་ནས་བྱང་ཆུབ་སེམས་དཔའ་ང་རོ་དཔག་ཏུ་མེད་པས་བཅོམ་ལྡན་འདས་དེའི་ཞབས་ལ་ཕྱག་འཚལ་ཏེ་བཅོམ་ལྡན་འདས་དེ་ལ་བསྐོར་
བ་བྱས་ནས་སོང་སྟེ། འདི་ལྟ་སྟེ་དཔེར་ན་སྐྱེས་བུ་སྟོབས་དང་ལྡན་པ་ཞིག་གིས་ལག་པ་བསྐུམ་པ་རྐྱོང་བར་བྱེད་པའམ། བརྐྱང་བ་སྐུམ་པར་བྱེད་པའི་སྐད་ཅིག་དེས་སངས་རྒྱས་ཀྱི་ཞིང་དེ་ནས་མི་སྣང་བར་གྱུར་ནས། འཇིག་རྟེན་གྱི་ཁམས་མི་མཇེད་འདིར་འདུག་སྟེ། དེ་རྒྱལ་
པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་
ཏོ། །བཅོམ་ལྡན་འདས་བཅོམ་ལྡན་འདས་ལ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་དེ་བཞིན་གཤེགས་པ་ཡུལ་མཐའ་ཡས་པར་མངོན་དུ་འཕགས་པའི་རྒྱལ་པོ་སྙུན་གསོལ་ལགས་སོ། །དེ་ནས་

བཅོམ་ལྡན་འདས་ཀྱིས་དེ་ལ་བཀའ་སྩལ་པ། རིགས་ཀྱི་བུ་ཅི་བཅོམ་ལྡན་འདས་དེ་སྙུན་མི་མངའ་འམ། སྟོབས་དང་ལྡན་ནམ། འགྱུར་བ་མི་མངའ་འམ། དེས་གསོལ་པ། བཅོམ་ལྡན་འདས་དེ་ལྟར་ལགས་སོ། །དེ་ལྟར་དེ་བཞིན་གཤེགས་པ་ཡུལ་མཐའ་ཡས་པར་མངོན་དུ་
འཕགས་པའི་རྒྱལ་པོ་ལ་སོགས་པ་བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་མངོན་དུ་འཕགས་པའི་རྒྱལ་པོའི་སངས་རྒྱས་ཀྱི་ཞིང་དང་། དེ་བཞིན་དུ་དེ་བཞིན་གཤེགས་པ་ཡིད་གཉིས་ཡང་དག་འཇོམས་དང་། རྒྱུ་སྐར་བཟང་པོའི་རྒྱལ་པོ་དང་། ཉིན་མཛད་དང་།
འོད་མཛད་དང་། ལྷུན་པོ་འོད་དང་། འོད་ཀྱི་དཀྱིལ་འཁོར་དང་། རྣམ་པར་དག་པའི་འོད་དང་། ཟས་ཀྱི་གདུགས་དང་། སྤོས་ཀྱི་གདུགས་དང་། རིན་ཆེན་གདུགས་དང་། ཙན་དན་གྱི་ཁང་པ་དང་། དགའ་བའི་དཔལ་དང་། རི་རབ་ཕུང་པོ་དང་། རིན་པོ་ཆེའི་
འོད་དང་། སཱ་ལའི་དབང་པོའི་རྒྱལ་པོ་དང་། ཚངས་པའི་དཔལ་དང་། རྣམ་པར་དག་པའི་སྤྱན་དང་། བག་ཚ་བ་མི་མངའ་བ་དང་། སྤུ་ཟིང་ཞེས་བྱེད་པའི་འཇིགས་པ་དང་བྲལ་བ་དང་། རིན་ཆེན་གོ་ཆ་མཐའ་ཡས་དང་། བླ་ན་མེད་པའི་འོད་ཟེར་དང་། དེ་བཞིན་གཤེགས་པ་
དྲ་བ་ཅན་གྱི་འོད་ཀྱི་ཏོག་དང་། དེ་བཞིན་གཤེགས་པ་རྒྱུའི་རྒྱལ་པོའི་སངས་རྒྱས་ཀྱི་ཞིང་དང་། སངས་རྒྱས་བཅོམ་ལྡན་འདས་དེ་དག་ལ་སོགས་པ་གྲངས་མེད་དཔག་ཏུ་མེད་པ་དག་གི་སངས་རྒྱས་ཀྱི་ཞིང་དག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་
ཏུ་མེད་པ་དག་འཇིག་རྟེན་གྱི་ཁམས་མི་མཇེད་ག་ལ་བ་དང་། རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ། ཕྱིན་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་ཤར་ལྷོའི་
ཕྱོགས་མཚམས་སུ་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་ན་འཇིག་རྟེན་གྱི་ཁམས་སངས་རྒྱས་པད་མའི་མེ་ཏོག་འབྱུང་བའི་དཔལ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་སངས་རྒྱས་ཐམས་ཅད་ཀྱི་སྐུ་ཀུན་ཏུ་སྟོན་པའི་དཔལ་ཞེས་བྱ་བ་བཞུགས་

ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་མྱ་ངན་བྲལ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་བྱང་ཆུབ་སེམས་དཔའ་མྱ་ངན་བྲལ་གྱིས་སྣང་བ་ཆེན་པོ་དེ་མཐོང་
ཞིང་གསུང་བསལ་བའི་སྒྲ་དེ་ཡང་ཐོས་སོ། །ཐོས་ནས་ཀྱང་བཅོམ་ལྡན་འདས་དེ་བཞིན་གཤེགས་པ་སངས་རྒྱས་ཐམས་ཅད་ཀྱི་སྐུ་ཀུན་ཏུ་སྟོན་པའི་དཔལ་དེ་ག་ལ་བ་དེར་སོང་སྟེ། བཅོམ་ལྡན་འདས་དེའི་ཞབས་ལ་ཕྱག་འཚལ་ནས་བཅོམ་ལྡན་འདས་དེ་ལ་འདི་སྐད་ཅེས་གསོལ་
ཏོ། །བཅོམ་ལྡན་འདས་འོད་གདའ་བ་དེ་དང་། གསུང་བསལ་བའི་སྒྲ་གྲག་པ་དེ་སུའི་ལགས། བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་ནུབ་བྱང་གི་ཕྱོགས་མཚམས་སུ་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་ན་འཇིག་རྟེན་གྱི་ཁམས་
མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། འདི་ལྟ་སྟེ་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གྱིས་མི་ཁྱབ་ཅིང་དཔེ་མེད་པའི་གོ་ཆ་བགོས་པ་རྣམས་ལ་བྱང་ཆུབ་སེམས་དཔའི་
སྡེ་སྣོད་ཅེས་བྱ་བའི་ཆོས་ཀྱི་རྣམ་གྲངས་ཡང་དག་པར་རབ་ཏུ་སྟོན་ཏོ། །གསོལ་པ། བཅོམ་ལྡན་འདས་བཅོམ་ལྡན་འདས་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བའི་སླད་དུ་འཇིག་རྟེན་གྱི་ཁམས་མི་མཇེད་དེར་བདག་མཆི་བར་བགྱིའོ། །བཅོམ་
ལྡན་འདས་དེས་བཀའ་སྩལ་པ། རིགས་ཀྱི་བུ་དེའི་དུས་ལ་ད་བབ་པར་ཤེས་ན་སོང་ཤིག །ངའི་ཚིག་གིས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་ཡང་གསོལ་ཅིག །དེ་ནས་བྱང་ཆུབ་སེམས་
དཔའ་མྱ་ངན་བྲལ་བཅོམ་ལྡན་འདས་དེ་ལ་ཕྱག་འཚལ་ནས་སོང་སྟེ། འདི་ལྟ་སྟེ་དཔེར་ན་སྐྱེས་བུ་སྟོབས་དང་ལྡན་པ་ཞིག་གིས་ལག་པ་བསྐུམ་པ་རྐྱོང་བར་བྱེད་པའམ། བརྐྱང་བ་སྐུམ་པར་བྱེད་པའི་སྐད་ཅིག་དེས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། དེ་བཅོམ་ལྡན་

འདས་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེར་སོང་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ལ་གནོད་པ་
ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་དེ་བཞིན་གཤེགས་པ་སངས་རྒྱས་ཐམས་ཅད་ཀྱི་སྐུ་ཀུན་ཏུ་སྟོན་པའི་དཔལ་སྙུན་གསོལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་
ཅི་བཅོམ་ལྡན་འདས་དེ་སྙུན་མི་མངའའམ། སྟོབས་དང་ལྡན་ནམ། འགྱུར་བ་མི་མངའའམ། གསོལ་པ། བཅོམ་ལྡན་འདས་དེ་ལྟ་ལགས་སོ། །དེ་ལྟར་དེ་བཞིན་གཤེགས་པ་སངས་རྒྱས་ཐམས་ཅད་ཀྱི་སྐུ་ཀུན་ཏུ་སྟོན་པ་ལ་སོགས་པ་བཅོམ་ལྡན་འདས་དེ་བཞིན་
གཤེགས་པ་དམིགས་པ་མཐའ་ཡས་པའི་སངས་རྒྱས་ཀྱི་སྐུ་ཀུན་ཏུ་སྟོན་པའི་སངས་རྒྱས་ཀྱི་ཞིང་དང་། དེ་བཞིན་དུ་དེ་བཞིན་གཤེགས་པ་པད་མ་བཀོད་པའི་ཁྱུ་མཆོག་དང་། དྲ་བ་ཅན་གྱི་འོད་དང་། འོད་མཐའ་ཡས་སངས་རྒྱས་མེ་ཏོག་འབྱུང་དང་། རིན་ཆེན་སཱ་ལ་
དང་། རིན་ཆེན་ཟླ་བའི་ཁྱུ་མཆོག་དང་། རྩིའི་རྒྱལ་པོ་དང་། སྨན་དང་། ཡེ་ཤེས་མཆོག་དང་། མངོན་དུ་འཕགས་པའི་གོ་ཆ་དང་། ལྷུན་པོ་གོང་ན་མེད་པ་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང་། མེ་ཏོག་བརྩེགས་དང་། མེ་ཏོག་རབ་གཏོར་དང་།
རྟག་ཏུ་མཛེས་པའི་འོད་ཟེར་དང་། བླ་ན་མེད་པའི་འོད་ཟེར་དང་། མི་གཡོས་རྣམ་པར་གནོན་དང་། གོམ་པས་རྣམ་པར་གནོན་དང་། གོམ་པ་མཐའ་ཡས་པས་རྣམ་པར་གནོན་དང་། སྨོན་ལམ་མཐའ་ཡས་དང་། སྤོབས་པ་དཔག་མེད་དང་། ཁྱུ་མཆོག་མཐའ་ཡས་
དང་། སྨོན་ལམ་ངེས་པ་དང་། མངལ་འགྱུར་མཛད་དང་། སྐྱོན་མེད་འགྱུར་མཛད་སྨོན་ལམ་དང་། དམིགས་པའི་གོ་ཆ་དང་། སངས་རྒྱས་ནམ་མཁའ་དང་། འབྱུང་བའི་དཔལ་གྱི་སངས་རྒྱས་ཀྱི་ཞིང་དང་། དེ་བཞིན་གཤེགས་པ་དེ་དག་དང་། གཞན་དག་གི་

སངས་རྒྱས་ཀྱི་ཞིང་དག་ནས་བྱང་ཆུབ་སེམས་དཔའ་གྲངས་མེད་དཔག་ཏུ་མེད་པ་དག་འཇིག་རྟེན་གྱི་ཁམས་མི་མཇེད་འདིར་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་ལྷོ་ནུབ་ཀྱི་ཕྱོགས་
མཚམས་སུ་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་ན་འཇིག་རྟེན་གྱི་ཁམས་བཀྲ་ཤིས་བཟང་པོ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དོན་ཡོད་གྲུབ་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་
བྱང་ཆུབ་སེམས་དཔའ་རྒྱལ་ཚབ་དོན་ཐམས་ཅད་གྲུབ་ཅེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ་ཞེས་བྱ་བ་ནས། དེ་ཡང་འོངས་ཏེ་ཞེས་བྱ་བ་དང་། དེ་ལྟ་ལགས་སོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དེ་ལྟར་དེ་ལ་སོགས་པ་བཅོམ་ལྡན་
འདས་དེ་བཞིན་གཤེགས་པ་གྲུབ་པའི་གོ་ཆའི་སངས་རྒྱས་ཀྱི་ཞིང་དང་། དེ་བཞིན་དུ་དེ་བཞིན་གཤེགས་པ་གཙུག་ཏོར་ཅན་དང་། ཤིན་ཏུ་རབ་གནས་གོ་ཆ་དང་། གོ་ཆ་མཐའ་ཡས་དང་། མཚན་གྱི་གོ་ཆ་དང་། གོ་ཆ་མཐའ་ཡས་དང་། ཀུན་ནས་གོ་ཆ་དང་། མར་མེ་མཛད་
དང་། འོད་མཛད་དང་། མཛོད་གཅིག་པ་དང་། སྐུ་མི་མངའ་བ་དང་། དྲ་བ་ཅན་གྱི་འོད་ཟེར་དང་། བརྩོན་འགྲུས་མཐའ་ཡས་དང་། རྩེ་མོ་དང་། རྩེ་མོ་མངོན་དུ་འཕགས་དང་། འོད་ཀྱི་དཀྱིལ་འཁོར་ཅན་དང་། རྣམ་པར་གཟིགས་དང་། དོན་ཡོད་མིང་སྒྲོགས་དང་། འཇིགས་
པ་དང་། བག་ཚ་བ་ཐམས་ཅད་རྣམ་པར་འཇོམས་མཛད་དང་། ཡོན་ཏན་མཐའ་ཡས་རྒྱལ་པོའི་འོད་དང་། ཕྱིར་རྒོལ་བ་ཐམས་ཅད་ངེས་པར་འཇོམས་དང་། བདུད་ཐམས་ཅད་ཀྱི་ཡུལ་ལས་འདས་པ་དང་། དཔག་མེད་མེ་ཏོག་དང་། བདུད་རྩི་འཛིན་དང་། དབྱངས་ཀྱི་ང་རོ་
དཔག་མེད་དང་། འོད་ཟེར་བརྩེགས་དང་། སྣང་བའི་དཔལ་དང་། གཉིས་མེད་བྲལ་བའི་དཀྱིལ་འཁོར་ཅན་དང་། འཆི་མེད་རྟོགས་པའི་མེ་ཏོག་འོད་ཟེར་དང་། བདུད་རྩིའི་དབྱངས་དང་། ལྷུན་པོའི་འོད་དང་། ཤིན་ཏུ་མཐོང་དང་། སྤྱན་བཟངས་དང་། མཆོག་གི་ཚོགས་

ཅན་དང་། རིན་ཆེན་མེ་ཏོག་དང་། རིན་ཆེན་འབྱུང་དང་། ཟླ་བའི་མེ་ཏོག་དང་། སེམས་ཅན་ཀུན་གྱི་གོ་ཆ་དང་། སྙིང་པོ་ཐམས་ཅད་འགྱུར་མཛད་དང་། སྤོབས་པ་མཐའ་ཡས་དང་། རྩོད་པ་དང་། བག་ཚ་བ་མི་མངའ་བ་དང་། དམིགས་པ་ཐམས་ཅད་སྤོབས་པས་སྤྱོད་པ་
དང་། སངས་རྒྱས་བཅོམ་ལྡན་འདས་དེ་དག་དང་། གཞན་དག་གིས་སངས་རྒྱས་ཀྱི་ཞིང་དག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེ་བ་གཅིག་གིས་ཐོགས་པ་དག་འཇིག་རྟེན་གྱི་ཁམས་མི་མཇེད་ག་ལ་བ་དང་། བཅོམ་ལྡན་འདས་ག་ལ་བ་དེར་ལྷགས་ནས་བཅོམ་
ལྡན་འདས་ཤཱཀྱ་ཐུབ་པའི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་ནུབ་བྱང་གི་ཕྱོགས་མཚམས་སུ་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་ན་འཇིག་རྟེན་གྱི་ཁམས་ཙན་དན་སྤོས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་
པ་ཀུན་དུ་སྤོས་ཀྱི་འོད་ཟེར་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །བཅོམ་ལྡན་འདས་དེས་བྱང་ཆུབ་སེམས་དཔའ་ཀུན་ཏུ་བཟང་པོ་ཞེས་བྱ་བ་རྒྱལ་ཚབ་དུ་དབང་བསྐུར་ཏོ་ཞེས་བྱ་བ་ནས། དེ་ཡང་འོངས་ཏེ་ཞེས་བྱ་བ་དང་། དེ་ལྟ་ལགས་སོ་ཞེས་བྱ་བའི་བར་དུ་
སྔ་མ་བཞིན་དུ་སྦྱར་རོ། །དེ་ལྟར་བཅོམ་ལྡན་འདས་དེ་བཞིན་གཤེགས་པ་ཀུན་དུ་སྤོས་ཀྱི་འོད་ཟེར་ལ་སོགས་པ་བཅོམ་ལྡན་འདས་དེ་བཞིན་གཤེགས་པ་སྤོས་ཀྱི་གླང་པོ་ཆེ་དང་། སྤོས་ཀྱི་ཁྱུ་མཆོག་དང་། སྤོས་ཀྱི་ཁང་པ་དང་། འོད་ཀྱི་དཀྱིལ་འཁོར་ཅན་དང་། འོད་ཟེར་གྱི་རྒྱལ་པོ་
དང་། པད་མ་མངོན་དུ་འཕགས་པའི་རྒྱལ་པོ་དང་། སངས་རྒྱས་ཁྱུ་མཆོག་དང་། ཁྱུ་མཆོག་མཐའ་ཡས་དང་། གོ་ཆ་བཟང་པོ་དང་། ཤིན་ཏུ་གོ་ཆ་བགོས་པའི་དཔལ་དང་། མེ་ཏོག་རབ་གཏོར་དང་། མེ་ཏོག་གདུགས་ཀྱི་ཕྲེང་བ་དང་། མེ་ཏོག་ཁང་པ་དང་། གསེར་གྱི་མེ་ཏོག་
དང་། སྤོས་ཀྱི་མེ་ཏོག་དང་། ལྷུན་པོའི་རྒྱལ་པོ་དང་། སེམས་ཅན་ཀུན་ལས་མངོན་པར་འཕགས་པའི་གོ་ཆ་དང་། སེམས་ཅན་ཐམས་ཅད་སྐྱོན་མེད་འགྱུར་མཛད་དང་། ལེགས་པར་སྤྱད་པའི་གོ་ཆ་དང་། ཀུན་ཏུ་བཏང་བའི་འོད་ཟེར་རབ་བཏང་དང་། པད་མ་རབ་གཏོར་འབྱུང་བའི་

དཔལ་དང་། རིན་ཆེན་དྲ་བ་དང་། མངོན་དུ་འཕགས་པའི་རྒྱལ་པོ་དང་། སངས་རྒྱས་ཀྱི་ཞིང་གདུགས་གཅིག་པས་ཁྱབ་པ་དང་། རྒྱུ་སྐར་གྱི་རྒྱལ་པོ་དང་། དཔུང་མགོ་ཤིན་ཏུ་ཟླུམ་པ་དང་། ཤིན་ཏུ་ཡང་དག་ཞུགས་ཀྱི་རྒྱལ་པོ་དང་། སྤོས་ལྡན་དང་། ཡེ་ཤེས་མཐའ་
ཡས་ཁྱུ་མཆོག་དང་། དོན་ཡོད་གོ་ཆ་བགོས་དང་། མཐོང་བ་དོན་ཡོད་དང་། ཐོགས་པ་མེད་པའི་སྤྱན་དང་། སེམས་དང་པོ་བསྐྱེད་པ་དང་ལྡན་པའི་མི་འཁྲུགས་པ་དང་། སྤྱན་མཐའ་ཡས་དང་། མར་མེའི་བདག་པོ་དང་། ཀུན་དུ་སྣང་བ་དང་། སྣང་བའི་འོད་ཟེར་དང་། སངས་རྒྱས་
ཀྱི་ཞིང་དུ་སེམས་ཅན་ཐམས་ཅད་གཅད་དུ་མེད་པའི་སྤོབས་པ་དང་། རྡུལ་མེད་རྡུལ་བྲལ་རྣམ་པར་གནོན་དང་། གོམ་པ་མེད་ཀྱིས་རྣམ་པར་གནོན་དང་། སངས་རྒྱས་བཅོམ་ལྡན་འདས་དེ་དག་ལ་སོགས་པའི་སངས་རྒྱས་ཀྱི་ཞིང་དག་ནས་བྱང་ཆུབ་སེམས་དཔའ་སེམས་དཔའ་ཆེན་
པོ་སྐྱེ་བ་གཅིག་གིས་ཐོགས་པ་གྲངས་མེད་དཔག་ཏུ་མེད་པ་དག་འཇིག་རྟེན་གྱི་ཁམས་མི་མཇེད་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་བྱང་ཤར་གྱི་ཕྱོགས་མཚམས་སུ་འཇིག་
རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་ན་འཇིག་རྟེན་གྱི་ཁམས་མངོན་དུ་བགྲོད་བྱ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་ཐམས་ཅད་སེལ་མཛད་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ།
བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་དོན་ཡོད་མིང་སྒྲོལ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ་ཞེས་བྱ་བ་ནས། དེ་ཡང་བཅོམ་ལྡན་འདས་ཤཱཀྱ་ཐུབ་པ་ལ་ཆོས་མཉན་པའི་ཕྱིར་འོངས་ཏེ་ཞེས་བྱ་བ་དང་། དེ་ལྟ་ལགས་སོ་ཞེས་བྱ་བའི་
བར་དུ་སྔ་མ་བཞིན་དུ་སྦྱར་རོ། །དེ་ལྟར་བཅོམ་ལྡན་འདས་དེ་བཞིན་གཤེགས་པ་མྱ་ངན་ཐམས་ཅད་སེལ་མཛད་ལ་སོགས་པ་འཇིག་རྟེན་གྱི་ཁམས་མངོན་དུ་བགྲོད་བྱ་དེའི་ཡང་ཕ་རོལ་ན་འཇིག་རྟེན་གྱི་ཁམས་མྱ་ངན་མེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་མྱ་ངན་བྲལ་ཞེས་བྱ་བ་

བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་འོད་ཆེན་པོ་ཞེས་བྱ་བ་བཅོམ་ལྡན་འདས་ཀྱིས་ཆོས་ཀྱི་སྐྱེས་བཀུར་ཏེ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་དགའ་བ་ཞེས་བྱ་བ་ཡོད་དེ། དེ་ན་དེ་བཞིན་
གཤེགས་པ་འབྱུང་བའི་དཔལ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ལག་པ་མཐའ་ཡས་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་ཡོན་ཏན་འབྱུང་ཞེས་བྱ་བ་ཡོད་དེ། དེ་ན་
དེ་བཞིན་གཤེགས་པ་ཡོན་ཏན་རྒྱལ་པོའི་འོད་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ཕྱད་པའི་བློ་གྲོས་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་གསེར་གྱི་དྲ་བས་ཀུན་དུ་ཁེབས་
པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ལྷུན་པོ་མཆོག་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་སེང་གེའི་ལྷུན་པོ་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་སྤོས་ཀྱི་འོད་ཅེས་
བྱ་བ་ཡོད་དེ། དེ་ན་དེ་བཞིན་གཤེགས་པ་སྤོས་ཀྱིས་རྒྱགས་པར་མཛད་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་དབྱངས་ཀྱིས་བྱིན་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་
རིན་ཆེན་བརྩེགས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཀཽཎྜི་ནྱ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་མཚན་ཉིད་གཉིས་པའི་དཔལ་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་
གྱི་ཁམས་བརྟན་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་མཐུ་དཔལ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ཚངས་པས་བྱིན་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་ཨུད་པ་

ལ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཨུད་པ་ལ་དམར་པོའི་དཔལ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་པད་མ་འབྱུང་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་
རྟེན་གྱི་ཁམས་ཀུ་མུ་ད་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཀུ་མུ་ད་འབྱུང་བ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་འཇིགས་པ་མེད་ཅེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་
གྱི་ཁམས་རབ་སྒྲོགས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་སྤྱན་བཏུད་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་གོང་ན་མེད་པའི་གཟི་བརྗིད་ཅེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་
རྟེན་གྱི་ཁམས་སྤོས་བཀོད་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་མཆོག་གི་ཚོགས་ཅན་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་བརྟུལ་ཞུགས་བཟང་པོ་ཞེས་བྱ་བ་བཏང་ངོ་། །དེའི་ཡང་འདབ་
ཆགས་ན་འཇིག་རྟེན་གྱི་ཁམས་སྣང་བ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་སྣང་བ་མཐའ་ཡས་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་དཔལ་གྱི་སྙིང་པོ་ཞེས་བྱ་བ་བཏང་ངོ་། །དེའི་ཡང་འདབ་ཆགས་
ན་འཇིག་རྟེན་གྱི་ཁམས་ཙན་དན་སྤོས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཟླ་བ་འཕགས་པའི་འོད་ཟེར་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ཕྱོགས་ཀྱི་སྒྲོན་མ་ཞེས་བྱ་བ་བཏང་ངོ་། །དེའི་ཡང་འདབ་
ཆགས་ན་འཇིག་རྟེན་གྱི་ཁམས་སྣང་བ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཕྱོགས་སུ་རྣམ་པར་བསྒྲགས་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་རྣམ་པར་བསྒྲགས་པའི་སྟོབས་ཀྱི་རྒྱལ་པོ་ཞེས་བྱ་བ་བཏང་

ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་ཟླ་བ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་སྐར་མའི་རྒྱལ་པོ་ཚོགས་ཀྱི་བདག་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་གྲགས་པའི་སྡེ་
ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་ཀུན་དུ་སྣང་བའི་དཔལ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་སྣང་བ་མཐའ་ཡས་དཔལ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་
རྒྱལ་ཚབ་དྲི་མ་མེད་པའི་ཏོག་ཅེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་སྤོས་སྣང་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་སྤོས་མེད་མཆོག་གི་ལྷུན་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་
སེམས་དཔའ་རྒྱལ་ཚབ་རྣམ་པར་རྒྱལ་བ་སྲུང་བ་ཅན་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་མི་འཇིགས་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་མི་འཇིགས་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་
དེས་བྱང་ཆུབ་སེམས་དཔའ་རྒྱལ་ཚབ་སྐྱེ་བོའི་དབང་པོ་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་བདེ་མཆོག་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་བདེ་འབྱུང་དཔལ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་
ཆུབ་སེམས་དཔའ་རྒྱལ་ཚབ་ཡིད་གཉིས་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་སྣང་བ་མཐའ་ཡས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཡོན་ཏན་མཐའ་ཡས་སྤྱོད་པ་འབྱུང་བའི་དཔལ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ།
བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་འགྲོ་བའི་དབང་པོ་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་བརྒྱན་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཡོན་ཏན་ཀུན་གྱིས་སོ་སོར་བརྒྱན་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་

སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་དགའ་སྤྱོད་ཅེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་པད་མའི་དྲ་བས་ཀུན་དུ་ཁེབས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་མེ་ཏོག་རྒྱལ་པོ་ཞེས་བྱ་བ་བཞུགས་ཏེ་
འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་མེ་ཏོག་འབྱུང་བ་མངོན་དུ་འཕགས་པའི་དཔལ་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་རྒྱལ་མཚན་སྣ་ཚོགས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་
ཕས་མ་ཕམ་པའི་རྒྱལ་མཚན་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ཕས་མ་ཕམ་པ་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་བརྟན་པ་ཞེས་བྱ་བ་ཡོད་དེ། དེ་ན་དེ་བཞིན་
གཤེགས་པ་དབང་སྦས་འོད་ཟེར་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ཀུན་ནས་སྦས་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་དགའ་བ་ཞེས་བྱ་བ་ཡོད་དེ། དེ་ན་དེ་བཞིན་
གཤེགས་པ་པད་མ་འཇིགས་བྱེད་མངོན་དུ་འཕགས་པའི་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ཡེ་ཤེས་སྨན་ཅེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་བདེ་བ་ཞེས་བྱ་བ་ཡོད་
དེ། དེ་ན་དེ་བཞིན་གཤེགས་པ་སྤྱོད་པ་ཐ་དད་མེད་འབྱུང་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་སྤྱོད་པ་ཐ་དད་མེད་ཅེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་དགའ་བ་ཞེས་བྱ་བ་ཡོད་དེ།
དེ་ན་དེ་བཞིན་གཤེགས་པ་ང་རོ་བསྡམས་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ང་རོ་འབར་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་བདེ་བའི་དཔལ་ཞེས་བྱ་བ་ཡོད་དེ། དེ་ན་དེ་བཞིན་

གཤེགས་པ་ནམ་མཁའི་དཀྱིལ་འཁོར་རྣམ་པར་དག་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ལྷུན་པོ་མཆོག་ཅེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་མངོན་དགའ་ཞེས་བྱ་བ་ཡོད་
དེ། དེ་ན་དེ་བཞིན་གཤེགས་པ་མཚན་མ་མེད་པའི་ང་རོ་ངེས་པའི་དབྱངས་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་སྤྱན་རས་གཟིགས་ཀྱི་ང་རོ་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་
གྱི་ཁམས་འབྱུང་བ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་མངོན་དུ་འཕགས་པའི་དཔལ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ཅི་འཇིགས་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་
རྟེན་གྱི་ཁམས་ཚངས་ལྡན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཚངས་པའི་དཔལ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ཚངས་པས་མཆོད་ཅེས་བྱ་བ་བཏང་ངོ་། །དེའི་ཡང་འདབ་ཆགས་
ན་འཇིག་རྟེན་གྱི་ཁམས་སྤོས་ཅན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཐོགས་པ་མེད་པའི་སྤོས་ཀྱི་གླང་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་དབང་པོས་བྱིན་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་
འཇིག་རྟེན་གྱི་ཁམས་པད་མ་ཅན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ལྷུན་པོའི་འོད་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་རྒྱ་མཚོ་ཞེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་
རྟེན་གྱི་ཁམས་མར་མེ་བྱེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་སྒྲོན་མ་མཛད་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་སྤྲིན་གྱི་འོད་ཟེར་ཅེས་བྱ་བ་བཏང་ངོ་། །དེའི་ཡང་འདབ་ཆགས་

ན་འཇིག་རྟེན་གྱི་ཁམས་སྙན་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་པད་མ་མཆོག་གི་འོད་ཟེར་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ཆོས་ཀྱི་འབྱུང་གནས་ཞེས་བྱ་བ་བཏང་
ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་བདེ་བ་ཅན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་གྲགས་པ་ལྡན་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་ལྷུན་པོས་བྱིན་ཞེས་བྱ་བ་
བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་ཤིན་ཏུ་རབ་གནས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་བཤེས་གཉེན་གྲགས་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རྒྱལ་ཚབ་སེང་
གེ་ལྟར་གནོན་ཅེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་སཱ་ལ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་སཱ་ལའི་དབང་པོའི་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་
རྒྱལ་ཚབ་སཱ་ལའི་དབང་པོའི་ཏོག་ཅེས་བྱ་བ་བཏང་ངོ་། །དེའི་ཡང་འདབ་ཆགས་ན་འཇིག་རྟེན་གྱི་ཁམས་སྣང་བ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་འོད་ཟེར་མཐའ་ཡས་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་
སེམས་དཔའ་རྒྱལ་ཚབ་དོན་ཡོད་གོམ་པས་རྣམ་པར་གནོན་ཅེས་བྱ་བ་བཏང་ངོ་། །དེ་ལྟར་བྱང་ཤར་གྱི་ཕྱོགས་མཚམས་ནས་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་གྲངས་མེད་དཔག་ཏུ་མེད་པ་དག་ལྷགས་ཏེ་ལྷགས་ནས་ཀྱང་བཅོམ་ལྡན་འདས་དེ་བཞིན་གཤེགས་པ་
ཤཱཀྱ་ཐུབ་པའི་ཞབས་ལ་མགོ་བོས་ཕྱག་འཚལ་ཞིང་བསྐོར་བ་བྱས་ཏེ། རྣམ་པ་དུ་མས་མཆོད་ནས་བཅོམ་ལྡན་འདས་འབའ་ཞིག་ལ་ལྟ་ཞིང་ཕྱོགས་གཅིག་ཏུ་འཁོད་དོ། །དེའི་ཚེ་འཇིག་རྟེན་གྱི་ཁམས་དེ་གང་ལྷ་དང་། ཀླུ་དང་། གནོད་སྦྱིན་དང་། མི་འམ་ཅི་དང་། ལྟོ་འཕྱེ་ཆེན་པོ་

དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེ་བ་བསམ་གྱིས་མི་ཁྱབ་ཅིང་དཔེ་མེད་པའི་གོ་ཆ་བགོས་པ་དག་གིས་མ་ཁྱབ་པའི་བར་ནི་ཐ་ན་ཁར་བ་བཞག་པ་ཙམ་ཡང་མེད་དོ། །དེ་དག་ཐམས་ཅད་ཀྱང་གཅིག་ལ་གཅིག་ཉམ་ང་བ་མེད་དེ། ཆོས་མཉན་པའི་སྲེད་པས་བཅོམ་
ལྡན་འདས་ཀྱི་ཞལ་དུ་ལྟ་བ་ལྷུར་ལེན་ཅིང་འཁོད་དོ། །བྱང་ཆུབ་སེམས་དཔའ་འདུས་པའི་ལེའུ་སྟེ་ལྔ་པའོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས་བྱང་ཆུབ་སེམས་དཔའ་འདུས་པ་ཆེན་པོ་དེ་མཁྱེན་ནས། གདན་དེ་ལ་བཞུགས་བཞིན་དུ་དཔའ་བར་
འགྲོ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་རྡོ་རྗེའི་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་དེས་པའི་ཚིག་མེད་པའི་གནས་ལ་གནས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་
ལས་བཞེངས་ནས་བཀོད་པ་གཅིག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་སེང་གེའི་གདུགས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་སྒྲུབ་པ་མཐའ་ཡས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་སོ། །དེ་ལས་བཞེངས་ནས་སེང་གེ་རྣམ་པར་བསྒྱིངས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་འོད་ཟེར་རྒྱལ་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་སའི་སྙིང་པོ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་སོ། །དེ་ལས་བཞེངས་ནས་མངོན་པར་མ་དམིགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་སེང་གེ་རྣམ་པར་འཕྲུལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་ཟླ་བའི་དཀྱིལ་
འཁོར་རྒྱལ་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་བཀོད་པ་གཅིག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་འོད་ཟེར་དུ་མ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་

ནས་རྒྱ་མཚོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་ཕྱག་རྒྱ་ཐམས་ཅད་སྒྲུབ་པ་ཆོས་ཀྱི་དབྱིངས་སུ་ངེས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་སྨོན་ལམ་དང་དམིགས་པ་མཐའ་ཡས་སྟོན་
པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་ཆོས་ཐམས་ཅད་ཁྱུ་མཆོག་ཏུ་གྱུར་པ་མཐའ་ཡས་པ་སྒྲུབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་དམིགས་པ་གཅིག་པ་སྒྲུབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
སོ། །དེ་ལས་བཞེངས་ནས་ཆོས་ཐམས་ཅད་ཀྱི་གནས་ལ་གནས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་འོད་ཟེར་མཐའ་ཡས་སངས་རྒྱས་པད་མ་མངོན་དུ་འཕགས་པ་སྒྲུབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་
བཞེངས་ནས་ཆོས་ཐམས་ཅད་ཤིན་ཏུ་བྱང་བ་དྲི་མ་མེད་པའི་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་ཆོས་ཐམས་ཅད་ཀྱི་རྒྱལ་པོའི་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་ཁྱུ་མཆོག་མཐའ་
ཡས་ཀུན་དུ་སྟོན་པའི་སངས་རྒྱས་རྣམ་པར་འཕྲུལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་སེམས་ཅན་ཐམས་ཅད་ཡོངས་སུ་མྱ་ངན་ལས་འདས་པའི་གོ་ཆ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་ཆོས་
ཐམས་ཅད་དེ་བཞིན་གཤེགས་པའི་སྤྱོད་ཡུལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་ཁྱུ་མཆོག་ཏུ་གྱུར་པ་མཐའ་ཡས་པ་ཀུན་དུ་སྟོན་པའི་སངས་རྒྱས་རྣམ་པར་འཕྲུལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་
དམིགས་པ་ཐམས་ཅད་སངས་རྒྱས་པའི་སྒྲུབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་འདས་པ་དང་། མ་འོངས་པ་དང་། ད་ལྟར་བྱུང་བ་ལ་མ་ཆགས་པར་ཆོས་ཐམས་ཅད་ངེས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་

བཞེངས་ནས་ཆོས་ཐམས་ཅད་ཀྱི་དབང་ཕྱུག་གིས་དབང་སྒྱུར་བའི་སངས་རྒྱས་ཁྱུ་མཆོག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་ཆོས་ཐམས་ཅད་ཡང་དག་པར་འདུ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་བརྟན་
པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་རབ་ཏུ་འཕེལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་རབ་ཏུ་མི་གཡོས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་མི་
འཁྲུགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་ཆོས་ཐམས་ཅད་ལ་ལྟ་བ་དང་། རྣམ་པར་ལྟ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་ཀུན་དུ་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །
དེ་ལས་བཞེངས་ནས་མཉམ་པར་རྣམ་པར་ལྟ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་ལྟ་བ་དང་རྣམ་པར་ལྟ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་མི་ལྟ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་སོ། །དེ་ལས་བཞེངས་ནས་ཆོས་ཐམས་ཅད་ཐོགས་པ་མེད་པ་དང་ལེན་པ་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་དབང་པོ་དང་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་མི་ཟད་ལ་
ཟད་མི་ཤེས་པར་ངེས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་དམིགས་པ་མི་ཟད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་དམིགས་པ་གཅིག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་
ལས་བཞེངས་ནས་བཀོད་པ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་བཀོད་པ་མཐའ་ཡས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་བག་ཚ་བ་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །

དེ་ལས་བཞེངས་ནས་སེམས་ཅན་ཐམས་ཅད་ཀྱི་དགེ་བའི་རྩ་བ་ཡང་དག་པར་སྐུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་སེམས་ཅན་ཐམས་ཅད་ཀྱི་དགེ་བའི་རྩ་བ་མངོན་དུ་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་སོ། །དེ་ལས་བཞེངས་ནས་ཆོས་ཐམས་ཅད་ཡོངས་སུ་ཚོལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་སྣང་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་ཆོས་ཐམས་ཅད་རྣམ་པར་དག་པའི་
སྤྱོད་ཡུལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་ཆོས་ཐམས་ཅད་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་བྱང་ཆུབ་སེམས་དཔའ་ཐམས་ཅད་ཀྱི་སྣང་བ་རྣམ་པར་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་སོ། །དེ་ལས་བཞེངས་ནས་དེ་ནས་བཅོམ་ལྡན་འདས་ཉན་ཐོས་ཐམས་ཅད་ཀྱི་སྒྲིབ་པ་མེད་པའི་མིག་རྣམ་པར་སྦྱོང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་འཁོར་ཐམས་ཅད་ཀྱི་སྒྲིབ་པ་མེད་པར་རྣམ་པར་དག་པའི་དགེ་བའི་རྩ་བ་
ཡང་དག་པར་བསྐྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་གྱི་སྡུག་བསྔལ་རྒྱུན་གཅོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་སངས་རྒྱས་ཀྱི་ཞིང་ཐམས་
ཅད་དུ་བྱམས་པ་ཆེན་པོ་སྒྲུབ་པས་དགེ་བའི་རྩ་བ་ཡང་དག་པར་བསྐྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལས་བཞེངས་ནས་མི་གཡོ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལྟར་བཅོམ་ལྡན་འདས་མི་གཡོ་བའི་ཏིང་ངེ་འཛིན་ལ་སྙོམས་པར་ཞུགས་
པ་ན་གནས་གཙང་མའི་རིས་ཀྱི་ལྷ་རྣམས་ཀྱིས་ཚིགས་སུ་བཅད་པ་དག་གིས་མངོན་པར་བསྟོད་པ། །མི་གཡོ་བརྙེས་པས་གཡོ་མེད་མི་གཡོ་བ། །བསྙེན་དཀའ་ལྷུན་པོ་འདྲ་བ་རྣམ་པར་མཛེས། །ཕས་ཀྱི་རྒོལ་བ་ཐམས་ཅད་ཟིལ་མནན་ནས། །སྟོང་གསུམ་འཇིག་རྟེན་ཤིན་ཏུ་

བླངས་ཏེ་བཞུགས། །སངས་རྒྱས་ཐུགས་ནི་ནམ་ཡང་རྟེན་མ་མཆིས། །མི་རྟེན་བསམ་གཏན་མཛད་པ་གང་ཟག་མཆོག །མིང་ཙམ་བསམ་གཏན་པ་སྟེ་གར་མི་གནས། །སངས་རྒྱས་ཡོན་ཏན་དེ་འདྲ་བསམ་མི་ཁྱབ། །ཐུབ་པ་ཁམས་གསུམ་ངེས་འབྱུང་རིགས་གསུམ་
ལྡན། །རྟག་ཏུ་མཉམ་བཞག་སོམ་ཉི་མི་མངའ་བརྙེས། །ཐེ་ཙོམ་བཅད་ཅིང་སོམ་ཉི་བསལ་དུ་གསོལ། །སྲོག་ཆགས་རྣམས་ལ་སྨན་སླད་ཆོས་བསྟན་གསོལ། །ཐུབ་པ་རབ་གནས་སོམ་ཉི་མི་མངའ་བརྙེས། །བྱང་ཆུབ་སེམས་དཔའ་འདུས་པ་དེ་དག་ནི། །དཔའ་བོ་ཆོས་ཀྱིས་
འཕགས་ཤིང་ཆོས་ལ་གནས། །སོམ་ཉི་བཅད་ཅིང་ཐེ་ཙོམ་བསལ་དུ་གསོལ། །སངས་རྒྱས་མིག་བརྟེན་བསམ་གཏན་མཛད་མ་ལགས། །སངས་རྒྱས་མིག་མ་བརྟེན་པར་སྒོམ་མ་ལགས། །རྟེན་དང་རྟེན་མིན་མིག་ཀྱང་མཆིས་མ་ལགས། །བསམ་གཏན་དེ་ནི་འཕགས་པས་མངོན་པར་
བསྔགས། །ཐུབ་པ་གལ་ཏེ་མིག་བརྟེན་བསམ་གཏན་མཛད། །རྒྱལ་བས་འཛེམ་པ་མ་མཆིས་བརྙེས་པར་འགྱུར། །འདིར་ནི་མིག་མེད་བསམ་གཏན་མཛད་པ་ན། །སངས་རྒྱས་མ་མཆིས་བརྟེན་ནས་སྒོམ་མ་ལགས། །སངས་རྒྱས་དབང་པོ་དྲུག་བརྟེན་སྒོམ་མ་ལགས། །རྒྱལ་བ་
དབང་པོ་མ་མཆིས་བརྟེན་མ་ལགས། །འདི་ལ་མུ་སྟེགས་གཞན་མང་དེ་དག་འཁྲུལ། །ལྷར་བཅས་འཇིག་རྟེན་འགྲོ་བ་རྟོགས་མ་ལགས། །དེ་ནས་བཅོམ་ལྡན་འདས་མི་གཡོ་བའི་ཏིང་ངེ་འཛིན་ལས་བཞེངས་ནས་བྱང་ཆུབ་སེམས་དཔའི་ཚོགས་ལ་རྗེས་སུ་རྣམ་པར་གཟིགས་ཏེ། ཚེ་དང་ལྡན་པ་
ཤ་ར་དྭ་ཏིའི་བུ་ལ་བཀའ་སྩལ་པ། ཤ་ར་དྭ་ཏིའི་བུ་ཆོས་བཞི་པོ་འདི་དག་ནི་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ཀྱི་ཡོངས་སུ་ཉམས་པར་མི་འགྱུར་བ་དང་། དགེ་བའི་རྩ་བ་ཐམས་ཅད་ཀྱི་བསོད་ནམས་ཀྱི་ཚོགས་དང་། མངོན་པར་མ་དམིགས་པའི་སངས་རྒྱས་ཀྱི་ཡེ་ཤེས་སྒྲུབ་
པ་དང་། སྦྱིན་པའི་སྟོབས་སྒྲུབ་པ་དང་། ཚུལ་ཁྲིམས་ཀྱི་སྟོབས་སྒྲུབ་པ་དང་། བཟོད་པའི་སྟོབས་སྒྲུབ་པ་དང་། བྱམས་པའི་སྟོབས་སྒྲུབ་པ་དང་། སྙིང་རྗེའི་སྟོབས་སྒྲུབ་པ་དང་། ཏིང་ངེ་འཛིན་གྱི་སྟོབས་སྒྲུབ་པ་དང་། ཤེས་རབ་ཀྱི་སྟོབས་སྒྲུབ་པ་དང་། དེ་བཞིན་གཤེགས་

པའི་སྟོབས་བཅུ་ཐོགས་པ་མེད་པ་སྒྲུབ་པ་དང་། ཤེས་རབ་ཀྱི་རབ་ཏུ་དབྱེ་བ་སྒྲུབ་པ་དང་། ཐོགས་པ་མེད་པའི་སྤོབས་པ་སྒྲུབ་པ་དང་། གཅད་དུ་མེད་པ་དང་། དགའ་བ་དང་། རྣོ་བ་དང་། ཟབ་པའི་སྤོབས་པ་མཐའ་ཡས་པ་སྒྲུབ་པ་དང་། གཟུངས་ཐོབ་པ་དང་།
སངས་རྒྱས་མཐོང་བ་ཐོབ་པ་དང་། མངོན་པར་འབྱུང་བ་ཐོབ་པར་འགྱུར་ཞིང་ཇི་ལྟར་འཚམ་པའི་དགེ་བའི་ཚོགས་དང་བྲལ་བར་མི་འགྱུར། ལོངས་སྤྱོད་མ་ཚང་བ་མེད་པར་འགྱུར། གཡོག་འཁོར་མ་ཚང་བ་མེད་པར་འགྱུར། གཟུགས་མ་ཚང་བ་མེད་པར་འགྱུར། ཡན་ལག་དང་ཉིང་ལག་མ་ཚང་
བ་མེད་པར་འགྱུར། མིག་དང་། རྣ་བ་དང་། སྣ་དང་། ལྕེ་དང་། ལུས་མ་ཚང་བ་མེད་པར་འགྱུར། སེམས་མ་ཚང་བ་མེད་པར་འགྱུར། ལམ་ངན་པར་ཞུགས་པ་མ་ཡིན་པར་འགྱུར། སེམས་འཁྲུགས་པ་མ་ཡིན་པར་འགྱུར། དྲན་པ་རྨོངས་པ་མ་ཡིན་པར་འགྱུར། དྲན་པ་དང་
ལྡན་པར་ཡང་འགྱུར། དྲན་པའི་སྟོབས་མཆོག་དང་ལྡན་པར་འགྱུར། ངོ་ཚ་ཤེས་པ་དང་ལྡན་ཞིང་ཁྲེལ་ཡོད་པ་དང་ལྡན་པར་འགྱུར། །སྡིག་པ་ཐམས་ཅད་བྱ་བ་ལ་འཛེམ་པ་དང་། འགྱོད་པ་ཅན་དུ་འགྱུར། དྲན་པ་མི་ཆོད་པར་འགྱུར། སྐྱེ་བ་རྣམ་པར་ལོག་པར་འགྱུར། །དྲན་པ་དང་ལྡན་པ་ཡང་
ཡིན་ཏེ། དྲན་པའི་སྟོབས་མཆོག་དང་ལྡན་པས་སྔོན་གྱི་སྨོན་ལམ་ཡང་མི་གཏོང་བར་འགྱུར། སངས་རྒྱས་བཅོམ་ལྡན་འདས་རྣམས་ལ་དགེ་བའི་རྩ་བ་བསྐྱེད་པའི་ཕྱིར་བདག་གི་མེད་པ་དང་། ཡོངས་སུ་འཛིན་པ་མེད་པའི་སེམས་ཀྱིས་ཚོགས་ཀྱི་དགེ་བའི་རྩ་བ་དཔག་ཏུ་མེད་པ་ཡང་སྐྱེད་པར་
འགྱུར། སེམས་ཅན་ཐམས་ཅད་དང་ཐུན་མོང་དུ་བྱེད་པར་ཡང་འགྱུར། སེམས་ཅན་དུ་དམིགས་པ་ལས་རྣམ་པར་དབེན་པ་ལ་ཡང་མཁས་པར་འགྱུར། ཆོས་རྣམས་རྟོགས་པར་ཁོང་དུ་ཆུད་པར་ཡང་འགྱུར་ཞིང་ཆོས་ལ་བརྟེན་པ་མ་ཡིན་པར་ཡང་འགྱུར་རོ། །དེ་བརྟེན་པ་ཡང་མ་ཡིན་
པས་བདུད་དམ་བདུད་ཀྱི་རིས་ཀྱི་ལྷ་རྣམས་སམ། དེ་ལས་གཞན་པའི་སེམས་ཅན་ལམ་ངན་པར་ཞུགས་པ་རྣམས་ཀྱིས་ཐུལ་བར་མི་ནུས་ཏེ། བྱང་ཆུབ་ཀྱི་སྙིང་པོ་དཔུང་གཉེན་དུ་ཡང་འགྱུར་རོ། །རང་གི་སྟན་ལ་འདུག་སྟེ། ཆོས་ཐམས་ཅད་ཤིན་ཏུ་བྱང་བ་དྲི་མ་མེད་པའི་ཕྱག་རྒྱའི་ཏིང་ངེ་

འཛིན་ལ་གནས་ནས། སྐད་ཅིག་གཅིག་དང་ལྡན་པའི་ཤེས་རབ་ཀྱིས་གང་ཆུང་ཟད་ཤེས་པར་བྱ་བ་དང་། བལྟ་བར་བྱ་བ་དང་། ཐོབ་པར་བྱ་བ་དང་། མངོན་དུ་བྱ་བ་དེ་ཐམས་ཅད་ཀྱང་མངོན་པར་འདུ་བྱེད་པར་འགྱུར་ཞིང་། མ་ལུས་པར་མངོན་དུ་བྱེད་ལ། ཐམས་ཅད་མངོན་པར་
འཚང་རྒྱ་བ་ཁོ་ནར་འགྱུར། ཐམས་ཅད་མངོན་པར་རྟོགས་པ་ཁོ་ནར་འགྱུར། ཐམས་ཅད་ཡོངས་སུ་ཤེས་པ་ཁོ་ནར་འགྱུར་ཞིང་། བག་ཆགས་ཀྱི་མཚམས་སྦྱོར་བ་མ་ལུས་པ་ཉིད་རྗེས་སུ་འཐོབ་པར་འགྱུར་བ་སྟེ། བཞི་གང་ཞེ་ན། ཤ་ར་དྭ་ཏིའི་བུ་འདི་ལ་ཐེག་པ་ཆེན་པོ་ལ་ཡང་དག་
པར་ཞུགས་པས་གོ་ཆ་ཆེན་པོ་གྱོན་པར་བྱེད་པ་ཡིན། སེམས་ཅན་འདི་དག་ཐམས་ཅད་ནི་འདོད་ཆགས་དང་། ཞེ་སྡང་དང་། གཏི་མུག་དག་གིས་ཡོངས་སུ་གང་བ། སེམས་ཅན་འདི་དག་ཐམས་ཅད་ནི་མགོན་མེད་པའི་འཆི་བ་ཉེ་བར་གནས་པ་མཐས་ཟིན་པའི་འཆི་བ་ཐོབ་པ། གཡང་
ས་ཆེན་པོར་ལྟུང་བར་འགྱུར་བ། སེམས་ཅན་འདི་དག་ནི་འཆི་བ་ལ་གསོ་བ་རྙེད་དཀའ་བ་དང་ལྡན་པའོ་སྙམ་སྟེ། ལྟ་བ་ཆེན་པོས་སེམས་ཅན་ལ་ལྟ་བའི་གོ་ཆ་གྱོན་པར་བྱེད་པ་ཡིན། སེམས་ཅན་དེ་དག་ལ་བདག་གིས་ཁམས་གསུམ་པ་ལས་ངེས་པར་འབྱུང་བའི་ཐེག་པ་ཆེན་པོ་དེ་ཡང་དག་
པར་བསྒྲུབས་ནས་བསྟན་པར་བྱའོ། །སེམས་ཅན་ཐམས་ཅད་གསོ་བར་དགོས་པའི་ཕྱིར་ཡོངས་སུ་མ་བཙལ་ཅིང་གསོལ་བ་མ་བཏབ་པར་བདག་ཅག་གིས་བལྟ་བར་བྱ་དགོས་སོ། །ཇི་ལྟར་སེམས་ཅན་རྣམས་ཀྱིས་གཟུགས་ཀྱི་ཆོས་ཉིད་མི་གཡོས་པ་རྗེས་སུ་ཐོབ་པར་འགྱུར་བ་དང་།
ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཆོས་ཉིད་མི་གཡོས་པ་རྗེས་སུ་ཐོབ་པར་འགྱུར་བ་དང་། མྱ་ངན་ལས་འདས་པར་འགྲོ་བའི་ལམ་མི་གཡོས་པ་རྗེས་སུ་ཐོབ་པར་འགྱུར་བ་དེ་ལྟ་བུའི་གསོ་བས་བདག་ཅག་གིས་སྦྱོར་བར་བྱའོ་སྙམ་དུ་དེ་དེ་ལྟར་སེམས་ཤིང་
གོ་ཆ་བགོས་ནས་ཆོས་ཚོལ་བ་ལ་མངོན་པར་བརྩོན་པ་ཡིན་ཏེ། ཆོས་གང་དག་ཚོལ་བར་བྱེད་ཅེ་ན། དེ་དག་ནི་བྱང་ཆུབ་ཀྱི་ཕྱོགས་ཀྱི་ཆོས་ཡོངས་སུ་སྨིན་པར་འགྱུར་བ་དང་། སངས་རྒྱས་ཀྱི་ཆོས་རྣམས་ཡོངས་སུ་སྨིན་པར་འགྱུར་བ་སྟེ། འདི་ལྟ་སྟེ། སེམས་ཅན་ཐམས་ཅད་ཀྱི་ཐེ་ཚོམ་

གཅོད་པར་བྱེད་པ། སེམས་ཅན་ཐམས་ཅད་ཡང་དག་པར་ཚིམ་པར་བྱེད་པའི་ཆོས་ཀྱི་རྣམ་གྲངས་གཟུང་བ་དང་། དབང་པོ་ཤིན་ཏུ་རྒྱས་པར་མངོན་པར་བསྒྲུབ་པ་ཡང་དག་པར་སྒྲུབ་པའི་ཕྱིར། ཆོས་དེ་དག་ཡོངས་སུ་ཚོལ་བར་བྱེད་དེ། དེ་ལྟར་ཆོས་ཡོངས་སུ་ཚོལ་བ་
ལ་མངོན་པར་བརྩོན་པས་གནས་པ་ཡིན་ཏེ། ཐ་ན་སངས་རྒྱས་ཀྱི་མཚན་དང་ལྡན་པའི་ཚིགས་སུ་བཅད་པ་ཟབ་མོ་དང་ལྡན་པ། ཐབས་ལ་མཁས་པ་དང་། དོན་ཟབ་མོ་དང་ལྡན་པའི་ཚིག་བཞི་པའི་ཚིགས་སུ་བཅད་པ་གཅིག་ཙམ་ལུས་ལ་ཐོགས་ཏེ། སེམས་ཅན་གཅིག་ཙམ་
ལ་ཡང་ཡང་དག་པར་རབ་ཏུ་སྟོན་པར་བྱེད་པ་ཡིན། ཆོས་དེའི་དོན་དང་། ཚིགས་སུ་བཅད་པ་དེའི་དོན་གང་ཡིན་པ་དེ་སེམས་ཅན་དེ་དང་སེམས་ཅན་ཐམས་ཅད་ཀྱིས་ཀུན་ཤེས་པར་གྱུ