Kinh tạng Tây Tạng (Kangyur Đại Học) — 048_མདོ་སྡེ།_ང

་། །ལུས་ཀྱིས་བྱེད་པ་ཡོད་མ་ཡིན། །དེ་ཡི་འབྲས་བུ་མི་སྣང་བས། །བརྫུན་གྱི་ཚིག་ཏུ་སྨྲ་བ་ཉིད། །གལ་ཏེ་ཚིག་གིས་ཐོབ་འགྱུར་ན། །བདག་འོད་རིར་ཆེན་དཀྲིས་པར་འགྱུར། །ཡོན་ཏན་ཉམས་པ་དེ་ཀུན་ཀྱང་། །ཚིག་
གིས་རྒྱལ་བ་རྣམས་སུ་འགྱུར། །དེ་ནས་ཁྱེའུ་མྱ་ངན་མེད་ཀྱིས་ཁྱེའུ་མྱ་ངན་བྲལ་ལ་ཚིགས་སུ་བཅད་པ་དག་གིས་སླར་སྨྲས་པ། བདག་ཉིད་ཡིན་གྱི་གཞན་མིན་པར། །གང་ཕྱིར་དེ་འདྲ་སྨྲ་བྱེད་ཅིང་། །དེ་ཕྱིར་ཅི་ཡང་མི་སྨྲ་བ། །སེམས་དེ་སེར་སྣ་ཅན་གྱི་ལགས། །བདག་གིས་

སེམས་ཅན་འགྲོན་དུ་གཉེར། །བདག་ནི་ཀུན་ཏུ་བགེད་པར་བགྱིད། །བདག་ལ་སེར་སྣ་གཞར་མ་མཆིས། །སྲོག་ཆགས་འདྲེན་པ་རྣམས་སུ་ཤོག །མཁས་པ་བྱུང་བར་གྱུར་པ་རྣམས། །དེ་དག་ཚིག་ཏུ་སྨྲ་མི་བྱེད། །ཚིག་མང་རབ་ཏུ་སྨྲས་ནས་སུ། །ཇི་ལྟར་དོན་བཞིན་བྱེད་
མ་ཡིན། །དེ་དག་སྔོན་ཆད་ཉིད་ནས་ཀྱང་། །སེར་སྣའི་སེམས་དང་ལྡན་པར་གྱུར། །དེས་ན་འབྱུང་བར་འགྱུར་ཞིག་གམ། །འོན་ཏེ་མི་འབྱུང་ཚིག་ཏུ་སྨྲ། །དེ་ནས་ཁྱེའུ་མྱ་ངན་བྲལ་གྱིས་ནུ་བོ་མྱ་ངན་མེད་ལ་ཚིགས་སུ་བཅད་པས་སླར་སྨྲས་པ། གཅིག་ཏུ་གྱུར་ནས་སོང་བྱས་ཏེ། །
ནུ་བོ་ཁྱོད་དང་ཁོ་བོ་ཡི། །སེམས་བསྐྱེད་པ་ནི་གང་ཆེ་ཞེས། །མགོན་པོ་དེ་ལ་ཞུ་བར་བྱ། །དེ་ནས་ཁྱེའུ་མྱ་ངན་བྲལ་ཁང་བཟངས་ཀྱི་སྟེང་དེ་ནས་བབས་ཏེ། ནོར་བུ་ལས་བྱས་པའི་མཆིལ་ལྷམ་ཐོགས་ཤིང་གོས་བྱེ་བ་རི་བ་ཡང་ཐོགས་ནས། དེ་བཞིན་གཤེགས་པ་བདེ་བའི་རྒྱལ་པོ་
ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཁྱེའུ་མྱ་ངན་མེད་ཀྱིས་ནི་ཁང་བཟངས་གྱི་སྟེང་དེ་ཉིད་ནས་བདག་ཉིད་བོར་རོ། །དེ་ནས་ཁྱེའུ་མྱ་ངན་མེད་བཅོམ་ལྡན་འདས་དེ་བཞིན་གཤེགས་པ་བདེ་བའི་རྒྱལ་
པོ་དེ་ག་ལ་བ་དེར་སོང་ངོ་། །ཁྱེའུ་དེས་ཀྱང་གོས་རིན་པོ་ཆེ་དང་། གཙུག་གི་ནོར་བུ་ཡང་ཐོགས་པར་གྱུར་ཏེ། ཁྱེའུ་དེས་གོས་དེ་དང་གཙུག་གི་ནོར་བུ་དེ་བཅོམ་ལྡན་འདས་དེ་ལ་ཕུལ་བ་དང་། བཅོམ་ལྡན་འདས་དེས་ཁྱེའུ་མྱ་ངན་མེད་ཀྱི་ལག་པ་ནས་བཞེས་སོ། །ཁྱེའུ་མྱ་ངན་བྲལ་ནི་
ཕྱིས་བཅོམ་ལྡན་འདས་ག་ལ་བ་དེར་སོན་གྱི་ཁྱེའུ་མྱ་ངན་མེད་ནི་ཆེས་སྔར་སོན་ཏོ། །དེས་ཁྱེའུ་མྱ་ངན་མེད་དེ་བཞིན་གཤེགས་པ་བདེ་བའི་རྒྱལ་པོའི་སྤྱན་སྔ་ན་འདུག་པ་མཐོང་ངོ་། །མཐོང་ནས་ཀྱང་སྨྲས་པ། མྱ་ངན་མེད་ཁྱོད་ལམ་གང་ནས་ཆེས་སྔར་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོའི་ཐད་དུ་སོང་། །དེས་སྨྲས་པ། ཕུ་བོ་ཁང་བཟངས་དེ་ཉིད་ནས་བཅོམ་ལྡན་འདས་ག་ལ་བ་དེར་བདག་ཉིད་བོར་ཏེ། བདག་ནི་ལུས་མ་སྣད་མ་སྨས་པ་ཁོ་ནར་བཅོམ་ལྡན་འདས་ག་ལ་བ་དེར་མཆིས་སོ། །དེ་ནས་ཁྱེའུ་མྱ་ངན་བྲལ་

གྱིས་ཁྱེའུ་མྱ་ངན་མེད་ལས་ལན་ཐོས་ནས། བཅོམ་ལྡན་འདས་དེ་ལ་མཆིལ་ལྷམ་དེ་གཉིས་དང་། གོས་རིན་པོ་ཆེ་དེ་ཕུལ་ནས་དེའི་ཚེ་ཚིགས་སུ་བཅད་དེ་གསོལ་པ། ལམ་ངན་ནས་ནི་འགྲོ་མ་འགྱུར། །འཇིག་རྟེན་འདྲེན་པ་མཐོང་གྱུར་ཅིག །སངས་
རྒྱས་ཀྱིས་ནི་གང་བསྟན་པའི། །ལམ་ལ་རྟག་ཏུ་བསྟེན་པར་ཤོག །དེ་ནས་ཁྱེའུ་མྱ་ངན་མེད་ཀྱིས་ཀྱང་ཕུ་བོ་ལ་ཚིགས་སུ་བཅད་པ་དག་གིས་སྨྲས་པ། །གང་དག་ལུས་དང་དེ་བཞིན་དུ། །སྲོག་གི་དབང་པོ་སྲུང་བྱེད་པ། །དེ་དག་རྟག་ཏུ་ལམ་ཚོལ་འགྱུར། །ཕུ་བོ་དེ་ནི་ཁྱོད་བཞིན་
ནོ། །གང་དག་རྟག་ཏུ་བདེ་བ་དོན་གཉེར་བ། །དེ་དག་གཞན་གྱི་བདེ་བ་ཚོལ་མི་བྱེད། །ལུས་སྲོག་དབང་པོ་བོར་ནས་གཞན་དུ་ནི། །སྡུག་བསྔལ་རྣམ་པ་སྣ་ཚོགས་འབྱུང་བར་འགྱུར། །མི་རྣམས་ཀྱི་ནི་རྒྱ་ཆེན་དོན་ཀྱང་བྱ། །སྡུག་བསྔལ་དྲ་བ་ལས་ནི་ཡོངས་སྒྲོལ་བྱ། །
ལམ་འདི་ཉིད་དེ་སངས་རྒྱས་མཐོང་བ་འདི། །སངས་རྒྱས་མཐོང་ནས་ཕྱི་ནས་ལམ་མ་ཚོལ། །བདག་ཅག་ལམ་ནས་བདེ་བར་འགྲོ་བྱ་ཞེས། །མ་རྟོགས་མི་མཁས་གཞན་དག་རློམ་སེམས་འགྱུར། །དེ་ནས་ལམ་ངན་ལམ་དེར་འགྲོ་བར་འགྱུར། །དེ་དག་གིས་ནི་ཡང་དག་
ལམ་མི་ཤེས། །ལམ་ངན་འགྲོ་བ་དོན་དམ་བློ་ཅན་རྣམས། །ལམ་ལ་དེ་ནི་ལམ་ངན་ཞེས་འཇུག་པ། །དེ་ནི་རྟག་ཏུ་བདུད་ཀྱི་འཆིང་བས་ཟིན། །དེ་འདྲ་དེ་ནི་ལམ་མཆོག་འདི་ལས་རིང་། །རྟག་ཏུ་སངས་རྒྱས་དག་དང་ཕྲད་གྱུར་ཅིག ། རྟག་པར་རྒྱུན་ཏུ་ངུར་སྨྲིག་གྱོན་པར་ཤོག །
རྟག་ཏུ་ཚངས་པར་སྤྱོད་པ་ཐོབ་གྱུར་ཅིག །སྐྱེས་ནས་ཤིན་ཏུ་སེམས་ཅན་དོན་བྱེད་ཤོག །དམ་ཆོས་སྤྱོད་ལ་རྟག་ཏུ་གནས་གྱུར་ཅིག །རྟག་ཏུ་ཆོས་ཀྱང་ཀུན་ཏུ་འཛིན་པར་ཤོག །རྟག་ཏུ་རྒྱལ་བ་རྣམས་ཀྱི་ཆོས་བཟུང་ནས། །རྟག་ཏུ་སྲོག་ཆགས་རྣམས་ལ་ཕན་བྱེད་ཤོག །
རྟག་ཏུ་བརྩོན་འགྲུས་བརྟན་པོར་རྩོམ་གྱུར་ཅིག །ཐོས་པའི་ཆོས་རྣམས་ཆུད་ཟ་མ་གྱུར་ཅིག །དུས་རྣམས་ཀུན་ཏུ་མཉམ་པར་འཇོག་གྱུར་ཅིག །ཡོན་ཏན་རྣམས་ཀྱིས་རྟག་ཏུ་བརྒྱན་པར་ཤོག །མ་ཕམ་པ་དེ་ནས་ཁྱེའུ་མྱ་ངན་མེད་དང་། ཁྱེའུ་མྱ་ངན་བྲལ་གྱིས་ཚིགས་སུ་བཅད་

པ་དེ་དག་སྨྲས་ནས། དེ་བཞིན་གཤེགས་པ་བདེ་བའི་རྒྱལ་པོའི་ཐད་དུ་ཁྱིམ་ནས་ཁྱིམ་མེད་པར་འཐུན་པར་རབ་ཏུ་བྱུང་ངོ་། །དེ་ལྟར་དེ་དག་རབ་ཏུ་བྱུང་མ་ཐག་ཏུ་གཅིག་ལ་གཅིག་སྨྲས་པ། བདག་ཆེས་ཐོག་མར་དེ་བཞིན་གཤེགས་པར་འགྱུར་བར་བྱའོ། །དེ་ནས་དགེ་སློང་
མྱ་ངན་མེད་ཀྱིས་དགེ་སློང་མྱ་ངན་བྲལ་ལ་སྨྲས་པ། མྱ་ངན་བྲལ་ཁྱོད་ཀྱིས་བདག་ཆེས་ཐོག་མར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་ཞེས་དེ་སྐད་ཅེས་སྨྲས་ན། ཁྱོད་ཀྱིས་སེམས་ཇི་ལྟ་བུ་ཞིག་བསྐྱེད། དེས་སྨྲས་པ། མྱ་
ངན་མེད་འདིར་བདག་གིས་ནི་གལ་ཏེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་སེམས་ཅན་རེ་རེའི་དོན་གྱི་ཕྱིར་སེམས་ཅན་དམྱལ་བ་རྣམས་སུ་བསྐལ་པ་འབུམ་དུ་སྨིན་པར་གྱུར་ནའང་དེའི་ཚེ་ཡང་བྱང་ཆུབ་ཀྱི་སེམས་དོར་བར་མི་བྱའོ་
སྙམ་སྟེ། མྱ་ངན་མེད་བདག་གིས་སེམས་དེ་ལྟ་བུ་བསྐྱེད་དོ། །མྱ་ངན་མེད་འོན་ཀྱང་བདག་གིས་གལ་ཏེ་བདག་གི་མགོ་བོར་ཤར་ཕྱོགས་དང་། དེ་བཞིན་དུ་ཕྱོགས་ཐམས་ཅད་ནས་ལ་ལ་ཞིག་འོངས་ཏེ། བཤང་བའི་ཆང་བུའམ། མེའི་རིལ་ལུའམ། རྡུལ་གྱི་རིལ་ལུའམ། བཤང་
བའི་བུམ་པའམ། མེའི་བུམ་པའམ། རྡུལ་གྱི་བུམ་པ་ཞིག་བཞག་ཀྱང་གཞི་དེ་ལས་བདག་གིས་གནོད་སེམས་སུ་མི་བྱ། ཞེ་སྡང་བསྐྱེད་པར་མི་བྱ། སེམས་ཁྲོས་པས་མི་དེ་ལ་རྣམ་པར་བལྟ་བར་མི་བྱ། སེམས་ཁྲོས་པ་དང་ལྡན་པས་དེ་ལ་ངས་གནོད་པ་ཅི་བྱས་ཞེས་དེ་སྐད་ཅེས་ཀྱང་སྨྲ་བར་
མི་བྱ་སྟེ། ཕྱིར་རྒོལ་བ་སུ་གང་གིས་ལས་དེ་བརྩམས་པའི་སེམས་ཅན་དེ་ཉིད་ཀྱི་དོན་གྱི་ཕྱིར་བདག་གིས་ཕ་རོལ་དུ་ཕྱིན་པ་དག་ལ་སྤྱད་པར་བྱ་སྟེ། དེས་གང་བྱས་པའི་ལས་དེ་ནི་སངས་རྒྱས་ཀྱི་ཡེ་ཤེས་རྩོམ་པ་ཡིན། ལས་དེ་ནི་སངས་རྒྱས་ཀྱི་ཆོས་རྩོམ་པ་ཡིན་ཏེ། གལ་ཏེ་བདག་གིས་
རྐྱེན་དག་བྱུང་བ་ན་སེམས་མཉམ་པར་མ་བཞག་ན། བདག་གིས་བཟོད་པའི་ཕ་རོལ་དུ་ཕྱིན་པ་ཇི་ལྟར་ཡོངས་སུ་རྫོགས་པར་བྱེད་པར་འགྱུར། བདག་ལ་གནོད་སེམས་ཀྱི་རྐྱེན་དག་མ་བྱུང་བར་ནི་ཡ་མཚན་ཅིར་འགྱུར་ཏེ། དེ་ལྟ་བས་ན་སེམས་ཅན་དེ་དག་ཉིད་ཡོངས་སུ་སྨིན་པར་བྱ་བའི་ཕྱིར་

དང་། ཡོངས་སུ་མྱ་ངན་ལས་འདའ་བར་བྱ་བའི་དོན་གྱི་ཕྱིར་གོ་ཆ་བགོ་བར་བྱའོ་སྙམ་ནས་བཟོད་པའི་གོ་ཆ་དེ་ལྟ་བུ་བགོས་སོ། །གལ་ཏེ་གནོད་སེམས་སུ་བྱེད་པའི་སེམས་ཅན་དེ་དག་ལ་ཡང་གནོད་སེམས་སུ་བྱས་ན་བདག་ལ་ཁྱད་པར་དུ་འཕགས་པ་ཅི་ཞིག་འབྱུང་བར་འགྱུར་
ཏེ། མྱ་ངན་མེད་བདག་གིས་དེ་ལྟ་བུ་དེ་ལྟ་བུའི་གོ་ཆ་བགོས་སོ། །དེ་ནས་དགེ་སློང་མྱ་ངན་མེད་ཀྱིས་དགེ་སློང་མྱ་ངན་བྲལ་ལ་འདི་སྐད་ཅེས་སྨྲས་སོ། །ཕུ་བོ་ཁྱོད་ཀྱིས་གང་གིས་གོ་ཆ་བགོས་པའི་སེམས་དེ་ཁྱོད་ཀྱིས་གཟིགས་སམ། སྨྲས་པ། གལ་ཏེ་སེམས་མེད་པར་གྱུར་ན་
ནི་གོ་ཆ་བགོས་པ་དེ་ལྟ་བུ་མེད་པར་འགྱུར་ལ། གོ་ཆ་དེ་ཡང་མེད་ན་ནི་རབ་ཏུ་བསྟན་པ་ཡང་མེད་པར་འགྱུར་ཏེ། མྱ་ངན་མེད་གང་གི་ཕྱིར་སེམས་དེ་ཡོད་པ་དེའི་ཕྱིར་གོ་ཆ་དེ་རབ་ཏུ་བསྟན་པ་ཡང་ཡོད་དོ། །དེ་ནས་དགེ་སློང་མྱ་ངན་མེད་ཀྱིས་དགེ་སློང་མྱ་ངན་བྲལ་ལ་འདི་སྐད་ཅེས་སྨྲས་སོ། །
ཇི་ལྟར་སེམས་དེ་ཡོད་པ་དེ་བཞིན་དུ་གོ་ཆ་ཡང་ཡོད་དོ་ཞེས་དེ་སྐད་ཅེས་ཁྱོད་མ་གསུང་ཤིག །དེ་ཅིའི་ཕྱིར་ཞེ་ན། མྱ་ངན་བྲལ་སེམས་ནི་སྐྱེ་བ་དང་འཇིག་པའི་ཆོས་ཅན་བས་སྒྱུ་མ་ལྟ་བུ་ཡིན་པའི་ཕྱིར་ཏེ། སྐྱེ་བ་དང་འཇིག་པའི་ཆོས་ཅན་གྱི་སེམས་སྒྱུ་མ་ལྟ་བུ་ལ་ཡོད་པའམ། མེད་པ་
ཡང་མེད་དོ། །མྱ་ངན་བྲལ་གང་ཡོད་པའམ། མེད་པ་དེ་ནི་ལྟ་བ་དེ་ཡིན་ཏེ། གང་དེ་ལྟ་བུའི་ལྟ་བ་དེ་ནི་ལོག་པར་ལྟ་བའོ། །གང་ལོག་པར་ལྟ་བ་དེ་ནི་ལམ་གོལ་བ་ཡིན་ཞིང་ལམ་མ་ཡིན་ལ། དེ་བྱང་ཆུབ་ཀྱི་ལམ་མ་ཡིན་པས་དེའི་བྱང་ཆུབ་དེ་ཐག་རིང་བ་ཡིན་ཞིང་བྱང་ཆུབ་དེ་ཐག་ཉེ་བ་
མ་ཡིན་ལ། དེའི་བྱང་ཆུབ་བགྲོད་པར་དཀའ་བ་ཡིན་ཏེ། མྱ་ངན་བྲལ་དེ་ལྟ་བས་ན་དེ་དག་ཐམས་ཅད་ནི་སྤྲོས་པ་ཡིན་ནོ། །གང་དག་ཆོས་སྤྲོས་པ་དང་ལྡན་པ་དང་། ཆོས་རློམ་སེམས་དང་ལྡན་པ་དེ་དག་ནི་བྱང་ཆུབ་སེམས་དཔས་བསྟེན་པར་བྱ་བ་མ་ཡིན་ནོ། །བྱང་ཆུབ་སེམས་
དཔས་བསྟེན་པར་བྱ་བའི་ཆོས་ཀྱང་གང་ཞེ་ན། བྱང་ཆུབ་སེམས་དཔས་ཆོས་གང་ཡང་བསྟེན་པར་བྱ་བ་མ་ཡིན་པ་སྟེ། དེ་ཅིའི་ཕྱིར་ཞེ་ན། ཆོས་རྣམས་བསྟེན་པར་གྱུར་ན་ནི་ཆོས་མ་ཡིན་པ་རྣམས་བསྟེན་པར་འགྱུར་བའི་ཕྱིར་རོ། །དེ་ལྟར་བྱང་ཆུབ་སེམས་དཔས་ཆོས་ཐམས་ཅད་

ལ་མངོན་པར་ཞེན་པར་མི་བྱ་སྟེ། དེ་ཅིའི་ཕྱིར་ཞེ་ན། བྱང་ཆུབ་ནི་གཞི་མེད་པའི་ཕྱིར་རོ། །གལ་ཏེ་བྱང་ཆུབ་སེམས་དཔས་དེ་ལྟར་རློམ་སེམས་སུ་བྱེད་ན། དེ་ཡང་ཆོས་མ་ཡིན་པ་སྟེ། དེ་ཅིའི་ཕྱིར་ཞེ་ན། བྱང་ཆུབ་ནི་རློམ་སེམས་མེད་པའི་ཕྱིར་རོ། །གལ་ཏེ་བྱང་ཆུབ་སེམས་
དཔའ་དེ་ལྟར་གནས་པར་བྱེད་ན། དེ་ཡང་ཆོས་མ་ཡིན་པ་སྟེ། དེ་ཅིའི་ཕྱིར་ཞེ་ན། བྱང་ཆུབ་ནི་གནས་མེད་པའི་ཕྱིར་རོ། །གལ་ཏེ་བྱང་ཆུབ་སེམས་དཔའ་དེ་ལྟར་མོས་པར་བྱེད་ན། དེ་ཡང་ཆོས་མ་ཡིན་པ་སྟེ། དེ་ཅིའི་ཕྱིར་ཞེ་ན། བྱང་ཆུབ་ནི་མོས་པ་མེད་པའི་ཕྱིར་རོ། །གལ་
ཏེ་བྱང་ཆུབ་སེམས་དཔའ་དེ་ལྟར་རབ་ཏུ་ཤེས་པར་བྱེད་ན། དེ་ཡང་ཆོས་མ་ཡིན་པ་སྟེ། དེ་ཅིའི་ཕྱིར་ཞེ་ན། བྱང་ཆུབ་ནི་མཚན་ཉིད་མེད་པའི་ཕྱིར་རོ། །གལ་ཏེ་བྱང་ཆུབ་སེམས་དཔའ་དེ་ལྟར་ཁོང་དུ་ཆུད་པར་བྱེད་ན། དེ་ཡང་ཆོས་མ་ཡིན་པ་སྟེ། དེ་ཅིའི་ཕྱིར་ཞེ་ན། བྱང་
ཆུབ་ནི་འགྱུར་བ་མེད་པའི་ཕྱིར་རོ། །གལ་ཏེ་བྱང་ཆུབ་སེམས་དཔས་དེ་ལྟར་མངོན་དུ་བྱའོ་སྙམ་ནས་དེ་ལྟར་སྒོམ་པར་བྱེད་ན། དེ་ཡང་ཆོས་མ་ཡིན་པ་སྟེ། དེ་ཅིའི་ཕྱིར་ཞེ་ན། བྱང་ཆུབ་ནི་མེད་པའི་ཕྱིར་དང་། བྱང་ཆུབ་དེ་ནི་ཡི་གེ་མེད་པའི་ཕྱིར་རོ། །དེ་ནས་དགེ་སློང་མྱ་ངན་བྲལ་གྱིས་
དགེ་སློང་མྱ་ངན་མེད་ལ་འདི་སྐད་ཅེས་སྨྲས་སོ། །མྱ་ངན་མེད་བྱང་ཆུབ་དེ་མེད་དམ་ཅི་ན། དེའི་ཕྱིར་དེ་སྐད་སྟོན། ཇི་སྟེ་མྱ་ངན་བྲལ་ཡོད་ཅིང་བདག་ཡོད་ན་ནི་བྱང་ཆུབ་ཀྱང་ཡོད་དོ། །དགེ་སློང་མྱ་ངན་མེད་ཀྱིས་སྨྲས་པ། ཕུ་བོ་ཁྱོད་སྤྲོས་པ་མེད་པའི་བྱང་ཆུབ་ལ་བྱང་ཆུབ་ཡོད་ཅེའམ། མེད་
ཅེས་རྣམ་པར་མ་རྟོག་ཤིག །དེ་ཅིའི་ཕྱིར་ཞེ་ན། ཇི་ཙམ་དུ་སྤྲོས་པ་དེ་ནི་བྱང་ཆུབ་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་ནི་སྤྲོས་པ་མེད་པའི་ཕྱིར་ཏེ། འདི་ནི་ཚུལ་ཡིན་ནོ། །ཡང་ན་ཇི་ཙམ་དུ་སྤྲོས་པ་དེ་ཙམ་དུ་བྱང་ཆུབ་བོ། །མྱ་ངན་བྲལ་གྱིས་སྨྲས་པ། ནུ་བོ་ཇི་ཙམ་
དུ་སྤྲོས་པ་དེ་བྱང་ཆུབ་བོ། ཞེས་སྨྲས་པ་དེའི་དོན་བདག་གིས་མི་ཤེས་སོ། །དེ་ནས་དགེ་སློང་མྱ་ངན་མེད་ཀྱིས་ཕུ་བོ་ལ་སྨྲས་པ། ཕུ་བོ་དེའི་ཕྱིར་གཉི་ག་འགྲོགས་ནས། བཅོམ་ལྡན་འདས་དེ་བཞིན་གཤེགས་པ་བདེ་བའི་རྒྱལ་པོ་ག་ལ་བ་དེར་འདོང་ངོ་། །དེ་ནས་དེ་གཉིས་

བཅོམ་ལྡན་འདས་དེ་བཞིན་གཤེགས་པ་བདེ་བའི་རྒྱལ་པོ་དེ་ག་ལ་བ་དེར་དོང་ནས། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེ་གཉིས་ཕྱོགས་གཅིག་ཏུ་འཁོད་ནས་ཀྱང་། བཅོམ་ལྡན་འདས་དེ་ལ་གཏམ་ཀུན་ཏུ་
བརྗོད་པ་དེ་ཇི་སྙེད་བྱུང་བ་དེ་ཐམས་ཅད་གསོལ་ཏོ། །དེ་ནས་བཅོམ་ལྡན་འདས་དེས་དགེ་སློང་མྱ་ངན་མེད་ལ་མྱ་ངན་མེད་ལེགས་སོ་ལེགས་སོ། །ཞེས་བྱ་བ་བྱིན་ཏེ། དེ་ལ་ལེགས་སོ་ཞེས་བྱ་བ་བྱིན་ནས་ཀྱང་། དགེ་སློང་མྱ་ངན་བྲལ་ལ་འདི་སྐད་ཅེས་བཀའ་སྩལ་ཏོ། །མྱ་ངན་བྲལ་
དེ་དེ་བཞིན་ཏེ། ཇི་ཙམ་དུ་སྤྲོས་པ་དེ་ནི་བྱང་ཆུབ་སྟེ། དེ་ཅིའི་ཕྱིར་ཞེ་ན། སྤྲོས་པ་ཐམས་ཅད་ནི་དབེན་པ་ཡིན་པའི་ཕྱིར་ཏེ། བྱང་ཆུབ་དེ་ཡང་དབེན་པ་ཡིན་ནོ། །དབེན་པ་ཉིད་ཀྱང་གང་ཞེ་ན། སྤྲོས་པ་གང་ཡིན་པའོ། །སྤྲོས་པ་གང་ཞེ་ན། རྟོག་པ་སྟེ། གཟུགས་སྤྲོས་
པ་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་སྤྲོས་པ་དང་། ཚུལ་ཁྲིམས་སྤྲོས་པ་དང་། ཏིང་ངེ་འཛིན་སྤྲོས་པ་དང་། འདོད་པ་ཆུང་བ་ཉིད་སྤྲོས་པ་དང་། ཆོག་ཤེས་པ་ཉིད་སྤྲོས་པ་དང་། དགང་སླ་བ་ཉིད་སྤྲོས་པ་དང་། མ་འདྲེས་པ་ཉིད་སྤྲོས་
པའོ། །སྤྲོས་པ་དེ་ཡང་གང་ལས་བྱུང་ཞེ་ན། ཀུན་ཏུ་རྟོག་པ་ལས་བྱུང་སྟེ། གཟུགས་ཀྱི་ཀུན་ཏུ་རྟོག་པ་ནས་ཏིང་ངེ་འཛིན་གྱི་ཀུན་ཏུ་རྟོག་པའི་བར་དུ་ཀུན་དུ་རྟོག་པ་ཇི་སྙེད་ཡོད་པ་སྤྲོས་པ་ཡང་དེ་སྙེད་དོ། །དེ་ལ་ཀུན་ཏུ་རྟོག་པ་གང་ཡིན་པ་དེ་ནི་གཟུགས་ཅན་མ་ཡིན་པའི་ཕྱིར་ཀུན་ཏུ་རྟོག་པ་ནི་
གཟུགས་ཅན་མ་ཡིན་པའོ། །ཀུན་ཏུ་རྟོག་པ་གང་ཡིན་པ་དེ་ནི་རྟོག་པ་མེད་པའོ། །ཀུན་ཏུ་རྟོག་པ་གང་ཡིན་པ་དེ་ནི་ཚུལ་ཁྲིམས་མ་ཡིན་པ་ནས་ཆོག་ཤེས་པ་ཉིད་ཀྱི་བར་དུའང་མ་ཡིན་ནོ། །བྱང་ཆུབ་ནི་གཟུགས་སྟོང་པ་ཉིད་དོ། །བྱང་ཆུབ་ནི་ཚོར་བ་དང་འདུ་ཤེས་དང་འདུ་བྱེད་རྣམས་དང་རྣམ་པར་ཤེས་པ་སྟོང་པ་
ཉིད་དོ། །དེ་བཞིན་དུ་བྱང་ཆུབ་དེ་ནི་ཚུལ་ཁྲིམས་དང་། ཏིང་ངེ་འཛིན་དང་། འདོད་པ་ཆུང་བ་ཉིད་དང་། ཆོག་ཤེས་པ་ཉིད་དང་། དགང་སླ་བ་ཉིད་དང་། གསོ་སླ་བ་ཉིད་སྟོང་པ་ཉིད་དོ། །སྟོང་པ་ཉིད་ནི་གཅིག་པའང་མ་ཡིན་ཐ་དད་པའང་མ་ཡིན་ཏེ། བྱང་ཆུབ་དེ་ནི་དེ་ཡིན་ནོ། །

དེ་ནས་དགེ་སློང་མྱ་ངན་བྲལ་གྱིས་ཆོས་ཀྱི་རྣམ་གྲངས་དེ་ཐོས་ནས་མི་སྐྱེ་བའི་ཆོས་ལ་བཟོད་པ་ཐོབ་བོ། །སེམས་གང་གིས་བྱང་ཆུབ་སེམས་དཔའ་ཞེས་བརྗོད་པའི་བྱང་ཆུབ་ཀྱི་སེམས་དེ་ཡང་རབ་ཏུ་ཤེས་སོ། །དེ་ལྟར་དགེ་སློང་མྱ་ངན་མེད་དང་། དགེ་སློང་མྱ་ངན་བྲལ་དེ་ལྟར་ཆོས་
རྣམས་ལ་ལྷག་མཐོང་དང་། དེ་ལྟར་ཆོས་རྣམས་རབ་ཏུ་ཤེས་པ་དང་། དེ་ལྟར་ཆོས་རྣམས་ལ་མོས་པས་ལོ་བརྒྱད་ཁྲི་བཞི་སྟོང་དུ་ནམ་ཡང་རྨུགས་པ་དང་། གཉིད་ཀྱིས་མ་ནོན་ཅིང་ནམ་ཡང་བརྩོན་འགྲུས་མ་བཏང་སྟེ། གཞན་དུ་ན་རྟག་ཏུ་འཆག་པ་ལ་མངོན་པར་བརྩོན་པ་
འབའ་ཞིག་ཏུ་གྱུར་པ་ནི་མ་གཏོགས་སོ། །ནམ་ཡང་འདོད་ཆགས་ཀྱི་སེམས་མ་བསྐྱེད། ཞེ་སྡང་གི་སེམས་མ་བསྐྱེད། གཏི་མུག་གི་སེམས་མ་བསྐྱེད་དོ། །དེ་གཉིས་དེ་ནས་ཤི་འཕོས་ནས་འོག་གི་འཇིག་རྟེན་གྱི་ཁམས་སུ་དེ་བཞིན་གཤེགས་པ་དཔུང་མགོ་ཟླུམ་པ་ཞེས་བྱ་བའི་
སངས་རྒྱས་ཀྱི་ཞིང་སངས་རྒྱས་ཀྱི་ཞིང་སྟོང་གི་རྗེས་སུ་འཐུན་པ་ཞེས་བྱ་བར་སྐྱེས་ཏེ། དེར་ཡང་བརྩོན་འགྲུས་བརྩོམ་པ་ཡང་དག་པར་བླངས་ནས་གནས་པར་གྱུར་ཏོ། །མ་ཕམ་པ་རྣམ་གྲངས་དེས་བྱང་ཆུབ་སེམས་དཔའ་དེ་གཉིས་ཀྱིས་སངས་རྒྱས་བྱེ་བ་ཕྲག་དྲུག་ཅུ་རྩ་བརྒྱད་མཉེས་པར་
བྱས་སོ། །སྐྱེ་བ་ཐམས་ཅད་དུ་ཡང་རབ་ཏུ་བྱུང་སྟེ། ཐམས་ཅད་དུ་ཡང་བརྩོན་འགྲུས་བརྩམས་པ་དག་གིས་གནས་སོ། །དེའི་འོག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་མེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ།
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚོགས་མཆོག་བཀོད་པ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་འོག་ཏུ་བྱང་ཆུབ་སེམས་དཔའ་མྱ་ངན་བྲལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་བཞིན་
གཤེགས་པ་མཆོག་གི་ཚོགས་ཅན་ཞེས་བྱ་བ་བྱུང་བར་གྱུར་ཏེ། མ་ཕམ་པ་དེ་དག་གི་གསུང་རབ་དེ་ཡང་རྒྱ་ཆེན་པོར་གྱུར་ཏོ། །མ་ཕམ་པ་དེ་བཞིན་གཤེགས་པ་དེ་དག་ནི་ཚེ་ཡང་དཔག་ཏུ་མེད་པར་གྱུར་ཏོ། །མ་ཕམ་པ་བྱང་ཆུབ་སེམས་དཔའི་སེམས་གང་ཡིན་པ་དེ་ནི་གང་དུ་

ཡང་བསྐུར་བ་མ་ཡིན། གང་ནས་ཀྱང་བླངས་པ་མ་ཡིན། བསྐྱེད་པ་མ་ཡིན། བཀག་པ་མ་ཡིན། གནས་པ་མ་ཡིན། རྒྱུན་ཆད་པ་མ་ཡིན། སོང་བ་མ་ཡིན། འོངས་པ་མ་ཡིན་ནོ། །མ་ཕམ་པ་སེམས་དེ་གང་ཡིན་པ་དང་། བྱང་ཆུབ་སེམས་དཔའ་གང་ཡིན་པ་དེ་གཉི་
ག་ཡང་མཆོག་ཏུ་རྙེད་པར་དཀའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བསྐལ་པ་བྱེ་བ་རྣམས་སུ་ཡང་། །འཇིག་རྟེན་སྣང་བྱེད་རྣམས་ནི་དཀོན། །ཨུ་དུམ་བཱ་རའི་མེ་ཏོག་བཞིན། །འཇིག་རྟེན་དུ་ནི་རེས་འགའ་འབྱུང་། །
གང་དག་བྱང་ཆུབ་ཕྱིར་ཞུགས་པའི། །བྱང་ཆུབ་སེམས་དཔའ་སེམས་དེའང་དཀོན། །དཔའ་བོ་ཡི་ནི་སེམས་དེ་ཡང་། །འཇིག་རྟེན་དུ་ནི་རེས་འགའ་འབྱུང་། །དེ་ལྟ་བས་ན་དེ་འདྲ་བའི། །དག་པའི་སེམས་དེ་བསྐྱེད་ནས་སུ། །སངས་རྒྱས་དག་གི་སྟོབས་རྣམས་དང་། །
དེ་བཞིན་མི་འཇིགས་རྣམས་ཀྱང་སྣང་། །དེ་ལས་སེང་གེའི་སྒྲ་སྒྲོགས་དང་། །དྲང་སྲོང་སྨྲ་བར་ང་ཡིས་སུ། །ཡང་དག་འཁོར་ལོ་བསྐོར་བ་བཞིན། །ཆོས་ཀྱི་འཁོར་ལོའང་དེ་བཞིན་ནོ། །ང་ཡི་མ་འདྲེས་བཅོ་བརྒྱད་ཆོས། །མ་ཚང་མེད་པ་གང་ཡིན་དང་། །སངས་
རྒྱས་རྣམས་ཀྱི་མཚན་གང་ཡིན། །དེ་དག་ཀྱང་ནི་འདིར་ལྟོས་ཤིག །རྨོངས་པ་མེད་པས་གཤེགས་པ་དང་། །གླང་པོ་ཆེ་ཡི་གཟིགས་སྟངས་དང་། །སྤྱི་གཙུག་བལྟར་མི་མཐོང་བ་ཡང་། །སེམས་དེ་ལས་ནི་རབ་ཏུ་ལྟོས། །ཚུལ་ཁྲིམས་ཕ་རོལ་ཕྱིན་པ་དང་། །ཏིང་འཛིན་
ཕ་རོལ་ཕྱིན་པ་དང་། །ཤེས་རབ་ཕ་རོལ་ཕྱིན་པ་དང་། །བྱང་ཆུབ་སེམས་དེའང་འདི་ལས་ལྟོས། །སངས་རྒྱས་ཆོས་རྣམས་རབ་བསྟན་པའི། །ཆོས་གཞན་གང་དག་ཡིན་པ་ཡང་། །དེ་དག་ཐམས་ཅད་སེམས་དེ་དང་། །དང་པོའི་སེམས་ལ་གནས་པ་ཡིན། །ཉན་
ཐོས་ཚུལ་ཁྲིམས་གང་ཡིན་དང་། །ཉན་ཐོས་ཏིང་འཛིན་གང་ཡིན་དང་། །ཤེས་རབ་ཕུང་པོ་རྫུ་འཕྲུལ་གང་། །དེ་དག་ཐམས་ཅད་འདིར་ལྟོས་ཤིག །སྔོན་ཆད་སེམས་ནི་བསྐྱེད་པ་དེ། །གལ་ཏེ་འཇུག་པ་མ་ཡིན་ན། །བླ་ན་མེད་པའི་ཡེ་ཤེས་ཀྱང་། །འཇུག་པར་

འགྱུར་བ་ག་ལ་ཡིན། །སངས་རྒྱས་ཆོས་རྣམས་མཐོང་མིན་ན། །ཐོས་པར་ཡང་ནི་ག་ལ་འགྱུར། །འཇིག་རྟེན་དུ་ནི་ཉན་ཐོས་རྣམས། །འབྱུང་བར་སྲིད་པ་མ་ཡིན་ནོ། །རྫོགས་པའི་རང་སངས་རྒྱས་གང་དག །གནས་ནས་མྱ་ངན་འདས་པ་ཡི། །དགེ་བའི་གོ་ཆ་
དེ་ཡང་ནི། །སེམས་དེ་ཉིད་ལས་བལྟ་བར་བྱོས། །སེམས་ཅན་བདེ་བ་གང་ཅི་ཡང་རུང་། །འཇིག་རྟེན་པའམ་འཇིག་རྟེན་འདས། །ཐམས་ཅད་ཀྱང་ནི་སེམས་དེ་དང་། །དང་པོའི་སེམས་ལ་གནས་པ་ཡིན། །སེམས་དེའི་རྣམ་པར་སྨིན་པ་ནི། །རྒྱ་ཆེན་ཡིན་ཏེ་
དེ་མཐོང་ན། །བསྐལ་པ་བྱེ་ཕྲག་སྟོང་དུ་ཡང་། །དེ་ནི་ཟད་པར་མི་འདོད་དོ། །སྐྱེ་བ་དང་ནི་འཇིག་ལྡན་ལ། །རྐྱེན་རྣམས་ཀྱིས་ནི་བསྐྱེད་གྱུར་པ། །སེམས་ཀྱིས་དངོས་པོ་སྟོང་པ་ཡི། །རྣམ་པར་སྨིན་པ་ཅི་འདྲ་ལྟོས། །རྐྱེན་རྣམས་ཀྱིས་ནི་སེམས་བསྐྱེད་ལ། །སེམས་
དེའང་དངོས་པོ་མེད་པ་སྟེ། །དངོས་པོ་མེད་དང་ལྡན་སེམས་ཀྱིས། །རྣམ་པར་སྨིན་པ་ཅི་འདྲ་ལྟོས། །དམིགས་པར་བྱ་བ་དེ་དག་གིས། །སེམས་ནི་ནམ་ཡང་མི་སྐྱེ་སྟེ། །གང་གི་བསྔགས་པ་མི་ཉམས་པའི། །དེ་ཡི་རྣམ་སྨིན་ཉིད་ལ་ལྟོས། །བརྟན་པའི་བློ་ཅན་མི་ཞིག་
གིས། །དེ་འདྲའི་སེམས་ནི་རབ་ཤེས་ནས། །རྟག་ཏུ་ཐེག་པ་དམ་པ་ལ། །གནས་པ་སུ་ཞིག་ཆུད་ཟར་འགྱུར། །གང་དག་མིག་དང་གཟུགས་གནས་ཤིང་། །ཚོར་བ་དང་ནི་འདུ་ཤེས་གནས། །འདུ་བྱེད་ལ་ཡང་གནས་ནས་སུ། །བདག་ཉིད་རྣམ་ཤེས་མ་བྱས་པ། །བློ་
གྲོས་ངན་པས་ནམ་མཁའ་ལ། །ཀུན་དུ་བརྟགས་པས་འདག་སྙམ་པ། །ཡུན་རིང་དག་པར་མ་གྱུར་པས། །སྲིད་པར་མི་མཁས་རྣམས་སུ་འགྱུར། །དེ་ཕྱིར་སེམས་ནི་གསོབ་དང་གསོག །ཡོད་པ་མིན་པར་རབ་ཤེས་ནས། །དེ་ལ་སྙིང་པོར་མི་བཟུང་སྟེ། །དེ་དག་ངོ་
བོ་ཉིད་ཀྱིས་སྟོང་། །བརྟེན་ནས་སེམས་ནི་བསྐྱེད་གྱུར་པ། །ནམ་ཡང་ཆུད་ཟར་མི་འགྱུར་ཞིང་། །གང་དག་དེ་ཡི་རྐྱེན་ཡིན་པ། །དེ་དག་ངོ་བོ་ཉིད་ཀྱིས་སྟོང་། །ངོ་བོ་ཉིད་ཀྱིས་སྟོང་པའི་ཆོས། །དེ་དག་ལ་ནི་སྒྲུབ་པ་མེད། །ཆོས་རྣམས་ཐམས་ཅད་བརྟགས་

པ་སྟེ། །རང་བཞིན་དེ་ལྟར་རབ་ཏུ་བསྟན། །གང་དག་དེ་ལྟར་རབ་ཤེས་པ། །དེ་དེ་བྱང་ཆུབ་ལུང་བསྟན་གྱི། །དེ་དག་གཟུགས་ཀྱིས་ལུང་མ་བསྟན། །ཚོར་བས་ཀྱང་ནི་ལུང་མ་བསྟན། །འདུ་ཤེས་འདུ་བྱེད་རྣམས་ཀྱིས་མིན། །རྣམ་ཤེས་ཀྱིས་
ཀྱང་ལུང་མ་བསྟན། །འདི་ལ་ཆོས་རྣམས་མི་དམིགས་ཀྱང་། །དེ་དག་ལུང་མ་བསྟན་པའང་མིན། །གང་དག་འདི་ལ་ཆོས་ཐམས་ཅད། །མཚན་མེད་དེ་འདྲའི་ཤེས་ལྡན་ཞིང་། །ཤེས་པས་རློམ་སེམས་མི་བྱེད་པ། །དེ་དག་བྱང་ཆུབ་ལུང་བསྟན་ཏོ། །བཟོད་པ་
འདི་འདྲ་དེ་སྐྱེས་པ། །བློ་གྲོས་བསྟན་པས་བཟོད་དུ་ཟད། །བོང་བའི་ཆད་པས་མཚོན་ཆད་ལ། །དེ་དག་མི་མཇེད་ཅན་དུ་འགྱུར། །གང་དག་བཟོད་པ་དེ་འདྲ་བ། །ལེགས་པར་སྐྱེས་པར་གྱུར་པ་དག །དེ་དག་རྙེད་དང་བཀུར་སྟི་བཟོད། །དེ་ནི་རྙེད་པས་རློམ་སེམས་
མེད། །དེ་འདྲ་བ་ཡི་བཟོད་པ་དེ། །མཁས་པ་རྣམས་ཀྱིས་གནོད་པ་ཡིན། །མཐའ་གཉིས་ཟིལ་གྱིས་མནན་ནས་སུ། །མཁས་རྣམས་དབུ་མས་སྤྱོད་པར་བྱེད། །དེ་ཕྱིར་བཟོད་པ་བསྟེན་པར་བྱ། །ངོ་བོ་ཉིད་ཀྱིས་ཆོས་སྟོང་པ། །དེ་ནི་བྱང་ཆུབ་ལམ་ཡིན་ཏེ། །
ངས་ཀྱང་དེ་ནི་བསྟེན་པ་ཡིན། །བྱང་ཆུབ་ཏུ་སེམས་བསྐྱེད་པ་བསྔགས་པའི་ལེའུ་ཞེས་བྱ་སྟེ་བཞི་པའོ།། །།བམ་པོ་ལྔ་པ། དེའི་ཚེ་ཤར་ཕྱོགས་ཀྱི་ཕྱོགས་ཆར་འཇིག་རྟེན་གྱི་ཁམས་གྲངས་མེད་པ་སྟོང་ཕྲག་དྲུག་ཅུ་རྩ་བརྒྱད་འདས་པ་ན་འཇིག་རྟེན་གྱི་ཁམས་
བློ་གྲོས་རབ་གནས་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནམ་མཁའི་རིགས་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་ནམ་མཁའི་རིགས་དེས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བས་སྣང་བ་དེ་མཐོང་སྟེ། གསུང་བསལ་བའི་སྒྲ་དེ་ཡང་ཐོས་སོ། །

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནམ་མཁའི་རིགས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གསུང་བསལ་བའི་སྒྲ་གྲག་པ་དེ་དང་། འོད་གདའ་བ་དེ་སུའི་ལགས། དེ་སྐད་
ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་ནམ་མཁའི་རིགས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་གྲངས་མེད་པ་སྟོང་ཕྲག་དྲུག་ཅུ་རྩ་བརྒྱད་
འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་ཅེས་བྱ་བའི་ཆོས་ཀྱི་རྣམ་གྲངས་
ཀྱི་ཆོས་ཀྱང་སྟོན་ཏོ། །གསུང་བསལ་བའི་སྒྲ་གྲག་པ་དེ་དང་། འོད་སྣང་བ་དེ་ནི་བཅོམ་ལྡན་འདས་དེའི་ཡིན་ནོ། །དེ་ནས་བཅོམ་ལྡན་འདས་དེ་ལ་བྱང་ཆུབ་སེམས་དཔའ་ཟླ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཤཱཀྱ་ཐུབ་པ་དེའི་ཐད་དུ་འཇིག་རྟེན་གྱི་
ཁམས་མི་མཇེད་དེར་བདག་མཆི་བར་བགྱིའོ། །བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་ཁྱོད་དེའི་དུས་ལ་ད་བབ་པར་ཤེས་ན་སོང་ཤིག །དེ་ནས་བཅོམ་ལྡན་འདས་དེས་སྐབས་ཕྱེ་ནས་བྱང་ཆུབ་སེམས་དཔའ་ཟླ་བས་བཅོམ་ལྡན་འདས་དེ་ལ་རྣམ་པར་བལྟས་ཏེ། བཅོམ་
ལྡན་འདས་དེའི་ཞབས་ལ་མགོ་བོས་ཕྱག་འཚལ་ནས་འགྲོ་བར་ཆས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ནམ་མཁའི་རིགས་དེས་བྱང་ཆུབ་སེམས་དཔའ་ཟླ་བའི་ལག་པར་ལག་པ་ལྟ་བུའི་མེ་ཏོག་ཀུ་མུ་ད་བྱིན་ཏེ། འདི་སྐད་ཅེས་ཀྱང་བཀའ་སྩལ་ཏོ། །རིགས་ཀྱི་བུ་ཁྱོད་
ཀྱིས་ལག་པ་ལྟ་བུའི་མེ་ཏོག་ཀུ་མུ་ད་འདི་བཅོམ་ལྡན་འདས་དེ་ལ་ཕུལ་ལ། བཅོམ་ལྡན་འདས་བཅོམ་ལྡན་འདས་ལ་དེ་བཞིན་གཤེགས་པ་ནམ་མཁའི་རིགས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་

གསོལ་ལོ་ཞེས་དེ་སྐད་ཅེས་ཀྱང་གསོལ་ཅིག །དེ་ནས་བྱང་ཆུབ་སེམས་དཔའ་ཟླ་བས་བཅོམ་ལྡན་འདས་དེའི་ལྟར་མཉན་ཏེ། ལེགས་སོ་ཞེས་གསོལ་ནས་སོང་སྟེ། དེ་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་
འདས་ག་ལ་བ་དེར་འདི་ལྟ་སྟེ། དཔེར་ན་སྐྱེས་བུ་སྟོབས་དང་ལྡན་པ་ཞིག་གིས་ལག་པ་བསྐུམ་པ་རྐྱོང་བར་བྱེད་པའམ། ལག་པ་བརྐྱང་བ་སྐུམ་པར་བྱེད་པའི་སྐད་ཅིག་དེས་སོང་ངོ་། །དེ་ནས་བྱང་ཆུབ་སེམས་དཔའ་ཟླ་བས་ཕྱིན་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་
འཚལ་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ལ་དེ་བཞིན་གཤེགས་པ་ནམ་མཁའི་རིགས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ།
སྟོབས་དང་བདེ་བ་ལ་རེག་པར་གནས་སམ་ཞེས་སྙུན་གསོལ་ཞིང་། བཅོམ་ལྡན་འདས་ལ་བཅོམ་ལྡན་འདས་དེས་ལག་པ་ལྟ་བུའི་ཀུ་མུ་ད་འདི་ཡང་བསྐུར་བ་ལགས་སོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཟླ་བའི་ལག་པ་ནས་ལག་པ་ལྟ་བུའི་ཀུ་མུ་ད་དེ་བཞེས་ཏེ། བཞེས་
ནས་ཀྱང་བཀའ་སྩལ་པ། ཟླ་བ་ཅི་བཅོམ་ལྡན་འདས་དེ་སྙུན་མི་མངའ་འམ། སྟོབས་དང་ལྡན་ནམ། བདེ་བ་དང་ལྡན་ནམ། འགྱུར་བ་མི་མངའ་འམ། བདེ་བར་རེག་པ་ལ་གནས་སམ། གསོལ་པ། བཅོམ་ལྡན་འདས་དེ་ལྟ་ལགས་སོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་
བཞི་ཁྲི་འདས་པ་ན་འཇིག་རྟེན་གྱི་ཁམས་སའི་སྙིང་པོ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་བསྒྲགས་པའི་སྟོབས་ཀྱི་རྒྱལ་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་
བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་རྣམ་པར་བསྒྲགས་པ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་རྣམ་པར་བསྒྲགས་པས་སྣང་བ་ཆེན་པོ་དེ་མཐོང་སྟེ། གསུང་བསལ་བའི་སྒྲ་

དེ་ཡང་ཐོས་སོ། །དེ་ནས་བྱང་ཆུབ་སེམས་དཔའ་ཡེ་ཤེས་རྣམ་པར་བསྒྲགས་པ། བཅོམ་ལྡན་འདས་དེ་བཞིན་གཤེགས་པ་རྣམ་པར་བསྒྲགས་པའི་སྟོབས་ཀྱི་རྒྱལ་པོ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་
ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འོད་དེ་དང་། གསུང་བསལ་བའི་སྒྲ་དེ་སུའི་ལགས། དེ་ནས་བཅོམ་ལྡན་འདས་དེས་བྱང་ཆུབ་སེམས་དཔའ་དེ་ལ་བཀའ་སྩལ་པ། རིགས་ཀྱི་བུ་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་གྲངས་མེད་པ་
བཞི་ཁྲི་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་སེམས་ཅན་ཐམས་ཅད་
ཀྱི་བསམ་པ་ཡང་དག་པར་ཚིམ་པར་བྱེད་པའི་ཆོས་ཀྱི་རྣམ་གྲངས་ཀྱི་ཆོས་ཀྱང་སྟོན་ཏོ། །དེ་ནས་བཅོམ་ལྡན་འདས་དེ་ལ་བྱང་ཆུབ་སེམས་དཔའ་དེས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་
བ་དང་། དཔེ་མེད་པ་སེམས་པའི་བྱང་ཆུབ་སེམས་དཔའ་དེ་དག་ཀྱང་བལྟ་བའི་སླད་དུ་འཇིག་རྟེན་གྱི་ཁམས་མི་མཇེད་དེར་བདག་མཆི་བར་བགྱིའོ། །བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་དེའི་དུས་ལ་ད་བབ་པར་ཤེས་ན་སོང་ཤིག །དེ་ནས་བཅོམ་ལྡན་
འདས་དེས་སྐབས་ཕྱེ་ནས་བྱང་ཆུབ་སེམས་དཔའ་ཡེ་ཤེས་རྣམ་པར་བསྒྲགས་པས་བཅོམ་ལྡན་འདས་དེ་ལ་ཕྱག་འཚལ་ཏེ། འཇིག་རྟེན་གྱི་ཁམས་མི་མཇེད་ག་ལ་བ་དེར་ཆས་སོ། །དེ་ནས་དེ་བཞིན་གཤེགས་པ་རྣམ་པར་བསྒྲགས་པའི་རྒྱལ་པོ་དེས་ཙན་དན་དམར་པོའི་ཐུམ་པོ་
བྱིན་ནས། རིགས་ཀྱི་བུ་ཁྱོད་ཀྱིས་བཅོམ་ལྡན་འདས་དེ་ལ་འདི་ཕུལ་ཏེ། ཕུལ་ནས་ཀྱང་ངའི་ཚིག་གིས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ། ཞེས་སྙུན་གསོལ་ཅིག །དེ་ནས་བྱང་ཆུབ་

སེམས་དཔའ་ཡེ་ཤེས་རྣམ་པར་བསྒྲགས་པས་མཉན་ནས་ལེགས་སོ་ཞེས་གསོལ་ཏེ། འདི་ལྟ་སྟེ། དཔེར་ན་སྐྱེས་བུ་སྟོབས་དང་ལྡན་པ་ཞིག་གིས་ལག་པ་བསྐུམ་པ་རྐྱོང་བར་བྱེད་པའམ། ལག་པ་བརྐྱང་བ་སྐུམ་པར་བྱེད་པའི་སྐད་ཅིག་དང་། ཐང་ཅིག་དང་།
ཡུད་ཙམ་དེས་འཇིག་རྟེན་གྱི་ཁམས་འདིར་འོངས་སྟེ་། དེ་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་བཅོམ་ལྡན་འདས་ལ་དེ་བཞིན་གཤེགས་པ་རྣམ་པར་བསྒྲགས་པའི་སྟོབས་ཀྱི་རྒྱལ་པོ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་གསོལ་ཞིང་། བཅོམ་ལྡན་འདས་ལ་
བཅོམ་ལྡན་འདས་དེས་ཙན་དན་དམར་པོའི་ཐུམ་པོ་འདི་ཡང་བསྐུར་བ་ལགས་སོ། །བཅོམ་ལྡན་འདས་ཀྱིས་བཞེས་ཏེ། བཞེས་ནས་ཀྱང་བཀའ་སྩལ་པ། ཡེ་ཤེས་རྣམ་པར་བསྒྲགས་པ་ཅི་བཅོམ་ལྡན་འདས་དེ་སྙུན་མི་མངའ་འམ། སྟོབས་དང་ལྡན་ནམ། འགྱུར་བ་མི་མངའ་འམ།
གསོལ་པ། བཅོམ་ལྡན་འདས་དེ་ལྟ་ལགས་སོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་དགུ་སྟོང་འདས་པ་ན་འཇིག་རྟེན་གྱི་ཁམས་ཟླ་བ་འཕགས་པའི་འོད་ཟེར་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་འོད་ཟེར་རབ་ཏུ་བཏང་བ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་འོད་ཀྱི་དཀྱིལ་འཁོར་ཅན་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །བྱང་ཆུབ་སེམས་དཔའ་འོད་ཀྱི་
དཀྱིལ་འཁོར་ཅན་གྱིས་སྣང་བ་ཆེན་པོ་དེ་མཐོང་སྟེ། གསུང་བསལ་བའི་སྒྲ་དེ་ཡང་ཐོས་སོ། །དེ་ནས་བཅོམ་ལྡན་འདས་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འོད་ཀྱི་དཀྱིལ་འཁོར་ཅན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་འོད་དེ་དང་། གསུང་བསལ་

སྒྲ་གྲག་པ་དེ་སུའི་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་ཀྱི་དཀྱིལ་འཁོར་ཅན་ལ་འདི་སྐད་ཅེས་བཀའ་སྩལ་ཏོ། །འོད་ཀྱི་དཀྱིལ་འཁོར་ཅན་ནུབ་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་དགུ་སྟོང་
འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་ཅེས་བྱ་བའི་ཆོས་ཀྱི་རྣམ་
གྲངས་ཀྱི་ཆོས་ཀྱང་སྟོན་ཏོ། །དེ་ནས་བཅོམ་ལྡན་འདས་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འོད་ཀྱི་དཀྱིལ་འཁོར་ཅན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཤཱཀྱ་ཐུབ་པ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་
དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་བལྟ་བའི་སླད་དུ་འཇིག་རྟེན་གྱི་ཁམས་དེར་བདག་མཆི་བར་བགྱིའོ། །བཀའ་སྩལ་པ། རིགས་ཀྱི་བུ་ཁྱོད་དེའི་དུས་ལ་ད་བབ་པར་ཤེས་ན་སོང་ཤིག །དེ་ནས་བཅོམ་ལྡན་འདས་དེ་བཞིན་གཤེགས་པ་འོད་
ཟེར་རབ་ཏུ་བཏང་བས་བྱང་ཆུབ་སེམས་དཔའ་འོད་ཀྱི་དཀྱིལ་འཁོར་ཅན་ལ་པད་མ་ཆེན་པོ་གཅིག་བྱིན་ཏེ། རིགས་ཀྱི་བུ་ཁྱོད་ཀྱིས་བཅོམ་ལྡན་འདས་དེ་ལ་པད་མ་ཆེན་པོ་འདི་ཕུལ་ལ། བཅོམ་ལྡན་འདས་ལ་བཅོམ་ལྡན་འདས་འོད་ཟེར་རབ་ཏུ་བཏང་བ་གནོད་པ་ཆུང་ངམ། ཉམ་ང་
བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་གསོལ་ལོ་ཞེས་དེ་སྐད་ཅེས་གསོལ་ཅིག །དེ་ནས་བྱང་ཆུབ་སེམས་དཔའ་འོད་ཀྱི་དཀྱིལ་འཁོར་ཅན་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ་བསྐོར་བ་བྱས་ནས། འདི་ལྟ་སྟེ་དཔེར་
ན། སྐྱེས་བུ་སྟོབས་དང་ལྡན་པ་ཞིག་གིས་ཞེས་བྱ་བ་ནས་རྒྱས་པར་སྐད་ཅིག་དེས་འཇིག་རྟེན་གྱི་ཁམས་མི་མཇེད་འདིར་ཕྱིན་ཏེ། དེ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་བཅོམ་ལྡན་

འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ལ་དེ་བཞིན་གཤེགས་པ་འོད་ཟེར་རབ་ཏུ་བཏང་བ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ། ཞེས་སྙུན་
གསོལ་ཞིང་། བཅོམ་ལྡན་འདས་ལ་བཅོམ་ལྡན་འདས་དེས་པད་མ་ཆེན་པོ་འདི་ཡང་བསྐུར་བ་ལགས་སོ། །བཅོམ་ལྡན་འདས་ཀྱིས་བཞེས་ཏེ། བཞེས་ནས་ཀྱང་བྱང་ཆུབ་སེམས་དཔའ་འོད་ཀྱི་དཀྱིལ་འཁོར་ཅན་ལ་བཀའ་སྩལ་པ། འོད་ཀྱི་དཀྱིལ་འཁོར་ཅན་ཅི་བཅོམ་ལྡན་
འདས་སྙུན་མི་མངའ་འམ། སྟོབས་དང་ལྡན་ནམ། བདེ་བ་དང་ལྡན་ནམ། འགྱུར་བ་མི་མངའ་འམ། གསོལ་པ། བཅོམ་ལྡན་འདས་དེ་ལྟ་ལགས་སོ། །དེའི་ཚེ་ཤར་ཕྱོགས་སུ་སངས་རྒྱས་ཀྱི་ཞིང་གྲངས་མེད་པ་སུམ་ཁྲི་བརྒྱད་སྟོང་འདས་པ་ན་འཇིག་རྟེན་གྱི་
ཁམས་འདྲེན་པའི་རྒྱལ་མཚན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངེས་པར་འདྲེན་པའི་རྒྱལ་མཚན་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་ཀྱང་བྱང་ཆུབ་སེམས་
དཔའ་སེམས་དཔའ་ཆེན་པོ་རིན་པོ་ཆེའི་གོ་ཆ་མཐའ་ཡས་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་བྱང་ཆུབ་སེམས་དཔའ་རིན་པོ་ཆེའི་གོ་ཆ་མཐའ་ཡས་ཀྱིས་སྣང་བ་ཆེན་པོ་དེ་དང་། ས་གཡོ་བ་ཆེན་པོ་དེ་ཡང་མཐོང་སྟེ། མཐོང་ནས་ཀྱང་
བཅོམ་ལྡན་འདས་དེ་བཞིན་གཤེགས་པ་འདྲེན་པའི་རྒྱལ་མཚན་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འོད་ཀྱི་སྣང་བ་དེ་དང་དོག་ས་གཡོ་བ་དེ་དང་། གསུང་བསལ་བའི་སྒྲ་དེ་སུའི་ལགས།
བཅོམ་ལྡན་འདས་ཀྱིས་བཀའ་སྩལ་པ། རིན་པོ་ཆེའི་གོ་ཆ་མཐའ་ཡས་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གྲངས་མེད་པ་སུམ་ཁྲི་བརྒྱད་སྟོང་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་

པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་སེམས་ཅན་ཐམས་ཅད་ཀྱི་བསམ་པ་ཡང་དག་པར་ཚིམ་པར་བྱེད་པ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཆོས་ཀྱང་སྟོན་ཏེ། འོད་ཀྱི་སྣང་བ་དེ་དང་། གསུང་
བསལ་བའི་སྒྲ་དེ་ནི་དེའི་ཡིན་ནོ། །དེ་ནས་བཅོམ་ལྡན་འདས་དེ་ལ་བྱང་ཆུབ་སེམས་དཔའ་རིན་པོ་ཆེའི་གོ་ཆ་མཐའ་ཡས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། བྱང་ཆུབ་
སེམས་དཔའ་དེ་དག་ཀྱང་བལྟ་བའི་སླད་དུ་འཇིག་རྟེན་གྱི་ཁམས་དེར་བདག་མཆི་བར་བགྱིའོ། །དེ་ནས་བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་ཁྱོད་དེའི་དུས་ལ་ད་བབ་པར་ཤེས་ན་སོང་ཤིག །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་ངེས་པར་འདྲེན་པའི་རྒྱལ་མཚན་གྱིས་བྱང་ཆུབ་སེམས་དཔའ་རིན་པོ་ཆེའི་གོ་ཆ་མཐའ་ཡས་ཀྱི་ལག་པར་ཀ་ཤི་ཀའི་གོས་གཅིག་བྱིན་ཏེ། ཁྱོད་ཀྱིས་བཅོམ་ལྡན་འདས་དེ་ལ་ཀ་ཤི་ཀའི་གོས་འདི་ཕུལ་ལ། ངའི་ཚིག་གིས་གནོད་
པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་གསོལ་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་གོ་ཆ་མཐའ་ཡས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་
ཏེ་སོང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་གོ་ཆ་མཐའ་ཡས་འཇིག་རྟེན་གྱི་ཁམས་འདྲེན་པའི་རྒྱལ་མཚན་ནས་མི་སྣང་བར་གྱུར་ཏེ་འཇིག་རྟེན་གྱི་ཁམས་མི་མཇེད་དུ་འདུག་གོ། །དེ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ག་
ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་བྱང་ཆུབ་སེམས་དཔའ་རིན་པོ་ཆེའི་གོ་ཆ་མཐའ་ཡས་ཀྱིས་འདི་སྐད་ཅེས་གསོལ་ཏོ། །བཅོམ་

ལྡན་འདས་བཅོམ་ལྡན་འདས་ལ་དེ་བཞིན་གཤེགས་པ་ངེས་པར་འདྲེན་པའི་རྒྱལ་མཚན་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ། ཞེས་སྙུན་གསོལ་ཞིང་། བཅོམ་ལྡན་འདས་ལ་བཅོམ་
ལྡན་འདས་དེས་ཀ་ཤི་ཀའི་གོས་འདི་ཡང་བསྐུར་བ་ལགས་སོ། །བཅོམ་ལྡན་འདས་ཀྱིས་ཀ་ཤི་ཀའི་གོས་དེ་བཞེས་ཏེ། བཞེས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་གོ་ཆ་མཐའ་ཡས་ལ་འདི་སྐད་ཅེས་བཀའ་སྩལ་ཏོ། །རིན་པོ་ཆེའི་གོ་ཆ་མཐའ་ཡས་
ཅི་བཅོམ་ལྡན་འདས་དེ་སྙུན་མི་མངའའམ། སྟོབས་དང་ལྡན་ནམ། བདེ་བ་དང་ལྡན་ནམ། འགྱུར་བ་མི་མངའའམ། གསོལ་པ། བཅོམ་ལྡན་འདས་དེ་ལྟ་ལགས་སོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་བདུན་སྟོང་འདས་པ་ན་འཇིག་རྟེན་
གྱི་ཁམས་མེ་ཏོག་པད་མ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣ་ཚོགས་མེ་ཏོག་ཚོགས་ཀྱི་དཔལ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེ་བཞིན་གཤེགས་པ་དེས་ཀྱང་བྱང་ཆུབ་
སེམས་དཔའ་བརྩོན་འགྲུས་མཐའ་ཡས་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་མཐའ་ཡས་ཀྱིས་སྣང་བ་ཆེན་པོ་དེ་མཐོང་སྟེ། གསུང་བསལ་བའི་སྒྲ་དེ་ཡང་ཐོས་སོ། །དེ་ནས་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣ་ཚོགས་མེ་ཏོག་ཚོགས་ཀྱི་དཔལ་ལ་བྱང་ཆུབ་སེམས་དཔའ་བརྩོན་འགྲུས་མཐའ་ཡས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་མཐུ་དེ་སུའི་ལགས། བཅོམ་ལྡན་འདས་
དེས་བཀའ་སྩལ་པ། རིགས་ཀྱི་བུ་ནུབ་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་བདུན་སྟོང་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་

ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་ཅེས་བྱ་བ་ཆོས་ཀྱི་རྣམ་གྲངས་ཀྱི་ཆོས་ཀྱང་སྟོན་ཏེ། མཐུ་དེ་ནི་དེའི་ཡིན་ནོ། །དེ་ནས་བཅོམ་ལྡན་འདས་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་མཐའ་ཡས་ཀྱིས་འདི་སྐད་ཅེས་གསོལ་ཏོ། །
བཅོམ་ལྡན་འདས་བཅོམ་ལྡན་འདས་ཤཱཀྱ་ཐུབ་པའི་ཐད་དུ་འཇིག་རྟེན་གྱི་ཁམས་དེར་བདག་མཆི་བར་བགྱིའོ། །བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་དེའི་དུས་ལ་ད་བབ་པར་ཤེས་ན་སོང་ཤིག །དེ་ནས་དེ་བཞིན་གཤེགས་པ་སྣ་ཚོགས་མེ་ཏོག་ཚོགས་ཀྱི་དཔལ་
གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་མཐའ་ཡས་ཀྱི་ལག་པར་པད་མ་ཆེན་པོ་ཞིག་བྱིན་ཏེ། རིགས་ཀྱི་བུ་ཁྱོད་ཀྱིས་བཅོམ་ལྡན་འདས་དེ་ལ་པད་མ་ཆེན་པོ་འདི་ཕུལ་ལ། ངའི་ཚིག་གིས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་
རེག་པ་ལ་གནས་སམ་ཞེས་སྙུན་གསོལ་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་མཐའ་ཡས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣ་ཚོགས་མེ་ཏོག་ཚོགས་ཀྱི་དཔལ་གྱི་ཞབས་ལ་ཕྱག་འཚལ་ཏེ་བསྐོར་བ་བྱས་
ནས། འདི་ལྟ་སྟེ་དཔེར་ན་སྐྱེས་བུ་སྟོབས་དང་ལྡན་པ་ཞིག་གིས་ལག་པ་བསྐུམ་པ་རྐྱོང་བར་བྱེད་པའམ། ལག་པ་བརྐྱང་བ་སྐུམ་པར་བྱེད་པའི་སྐད་ཅིག་དང་ཐང་ཅིག་དང་། ཡུད་ཙམ་དེས་སོང་སྟེ། སངས་རྒྱས་ཀྱི་ཞིང་དེ་ནས་མི་སྣང་བར་གྱུར་ནས་འཇིག་རྟེན་གྱི་ཁམས་མི་མཇེད་དུ་འདུག་
གོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་མཐའ་ཡས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་། འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་
ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ལ་དེ་བཞིན་གཤེགས་པ་སྣ་ཚོགས་མེ་ཏོག་ཚོགས་ཀྱི་དཔལ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་

བར་རེག་པ་ལ་གནས་སམ་ཞེས་སྙུན་གསོལ་ཞིང་། བཅོམ་ལྡན་འདས་ལ་བཅོམ་ལྡན་འདས་དེས་པད་མ་ཆེན་པོ་འདི་ཡང་བསྐུར་བ་ལགས་ན། བཅོམ་ལྡན་འདས་ཀྱིས་པད་མ་འདི་བཞེས་སུ་གསོལ། བཅོམ་ལྡན་འདས་ཀྱིས་པད་མ་དེ་བཞེས་ཏེ། བཞེས་ནས་
ཀྱང་འདི་སྐད་ཅེས་བཀའ་སྩལ་ཏོ། །བརྩོན་འགྲུས་མཐའ་ཡས་ཅི་བཅོམ་ལྡན་འདས་དེ་སྙུན་མི་མངའའམ། སྟོབས་དང་ལྡན་ནམ། བདེ་བ་དང་ལྡན་ནམ། འགྱུར་བ་མི་མངའའམ། གསོལ་པ། བཅོམ་ལྡན་འདས་དེ་ལྟ་ལགས་སོ། །དེའི་ཚེ་ཤར་ཕྱོགས་སུ་འཇིག་རྟེན་
གྱི་ཁམས་གྲངས་མེད་པ་སུམ་ཁྲི་དྲུག་སྟོང་འདས་པ་ན་འཇིག་རྟེན་གྱི་ཁམས་གདུགས་གཅིག་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་པའི་སྤུ་ཟིང་ཞེས་བྱེད་པ་དང་བྲལ་བ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་
ཆོས་ཀྱང་སྟོན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་པའི་སྤུ་ཟིང་ཞེས་བྱེད་པ་དང་བྲལ་བ་དེས་བྱང་ཆུབ་སེམས་དཔའ་དྲ་བ་ཅན་གྱི་འོད་ཅེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །བྱང་ཆུབ་སེམས་དཔའ་
སེམས་དཔའ་ཆེན་པོ་དྲ་བ་ཅན་གྱི་འོད་ཀྱིས་སྣང་བ་ཆེན་པོ་དེ་མཐོང་སྟེ། གསུང་བསལ་བའི་སྒྲ་དེ་ཡང་ཐོས་སོ། །ཐོས་ནས་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་དེ་ལ་འདི་སྐད་ཅེས་གསོལ་
ཏོ། །བཅོམ་ལྡན་འདས་འོད་དེ་དང་། གསུང་བསལ་བའི་སྒྲ་དེ་སུའི་ལགས། བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་གྲངས་མེད་པ་སུམ་ཁྲི་དྲུག་སྟོང་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ།
དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་ཅེས་བྱ་བའི་ཆོས་ཀྱི་རྣམ་གྲངས་ཀྱི་ཆོས་ཀྱང་སྟོན་ཏེ། མཐུ་དེ་ནི་དེའི་ཡིན་ནོ། །དེ་སྐད་ཅེས་བཀའ་

སྩལ་པ་དང་། བཅོམ་ལྡན་འདས་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བ་ཅན་གྱི་འོད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་བལྟ་
བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། བསམ་གྱིས་མི་ཁྱབ་པའི་གོ་ཆ་བགོས་པའི་བྱང་ཆུབ་སེམས་དཔའ་དེ་དག་ཀྱང་བལྟ་བའི་སླད་དུ་འཇིག་རྟེན་གྱི་ཁམས་མི་མཇེད་དེར་བདག་མཆི་བར་བགྱིའོ། །བཀའ་སྩལ་པ། རིགས་ཀྱི་བུ་དེའི་དུས་ལ་དབབ་
པར་ཤེས་ན་སོང་ཤིག །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དྲ་བ་ཅན་གྱི་འོད་ལ་མེ་ཏོག་ཁ་དོག་ལྔ་པས་ཁལ་བཅུ་ཚད་བཀང་ནས་བྱིན་ཏེ། རིགས་ཀྱི་བུ་ཁྱོད་ཀྱིས་བཅོམ་ལྡན་འདས་དེ་ལ་འདི་ཕུལ་ལ། ངའི་ཚིག་གིས་བཅོམ་ལྡན་འདས་གནོད་པ་ཆུང་
ངམ། ཉམ་ང་བ་ཉུང་ངམ། སྙུན་མི་མངའའམ། བསྐྱོད་པ་ཡང་ངམ། སྟོབས་དང་ལྡན་ནམ། བདེ་བར་རེག་པ་ལ་གནས་སམ་ཞེས་དེ་སྐད་ཅེས་སྙུན་ཡང་གསོལ་ཅིག། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བ་ཅན་གྱི་འོད་བཅོམ་ལྡན་འདས་དེའི་ཞབས་ལ་མགོ་བོས་ཕྱག་
འཚལ་ནས་འདི་ལྟ་སྟེ། དཔེར་ན་སྐྱེས་བུ་སྟོབས་དང་ལྡན་པ་ཞིག་གིས་ཞེས་བྱ་བ་ནས་རྒྱས་པར་སྐད་ཅིག་དང་། ཐང་ཅིག་དང་། ཡུད་ཙམ་དེས་འཇིག་རྟེན་གྱི་ཁམས་མི་མཇེད་འདིར་འདུག་སྟེ། དེ་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་
ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བ་ཅན་གྱི་འོད་ཀྱིས་འདི་སྐད་ཅེས་གསོལ་ཏོ། །བཅོམ་
ལྡན་འདས་བཅོམ་ལྡན་འདས་ལ་དེ་བཞིན་གཤེགས་པ་འཇིགས་པའི་སྤུ་ཟིང་ཞེས་བྱེད་པ་དང་བྲལ་བ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ། ཞེས་སྙུན་གསོལ་ཞིང་། བཅོམ་ལྡན་འདས་ལ་བཅོམ་ལྡན་འདས་དེས་

མེ་ཏོག་ཁ་དོག་ལྔ་པས་བལྟམ་པའི་ཁལ་བཅུ་ཚད་འདི་ཡང་བསྐུར་བ་ལགས་ན། བཅོམ་ལྡན་འདས་ཀྱིས་བཞེས་སུ་གསོལ། བཅོམ་ལྡན་འདས་ཀྱིས་བཞེས་ཏེ་བཞེས་ནས་ཀྱང་བཀའ་སྩལ་པ། རིགས་ཀྱི་བུ་ཅི་བཅོམ་ལྡན་འདས་དེ་སྙུན་མི་མངའ་འམ། སྟོབས་
དང་ལྡན་ནམ། བདེ་བ་དང་ལྡན་ནམ། འགྱུར་བ་མི་མངའའམ། གསོལ་པ། བཅོམ་ལྡན་འདས་དེ་ལྟ་ལགས་སོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་ལྔ་སྟོང་འདས་པ་ན་འཇིག་རྟེན་གྱི་ཁམས་ཤིན་ཏུ་རྣམ་པར་དག་པ་ཞེས་བྱ་བ་ན། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་ཀྱི་དཔལ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་ཡེ་ཤེས་ཀྱི་སྟོབས་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
ལུང་བསྟན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་ཀྱི་སྟོབས་ཀྱིས་སྣང་བ་ཆེན་པོ་དེ་མཐོང་སྟེ། གསུང་བསལ་བའི་སྒྲ་དེ་ཡང་ཐོས་ནས། དེ་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་ཀྱི་དཔལ་ག་ལ་བ་དེར་སོང་སྟེ། བཅོམ་ལྡན་འདས་དེའི་ཞབས་ལ་
མགོ་བོས་ཕྱག་འཚལ་ནས། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྣང་བ་ཆེན་པོ་དེ་དང་། གསུང་བསལ་བའི་སྒྲ་ཆེན་པོ་དེ་སུའི་ལགས་བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་གྲངས་
མེད་པ་སུམ་ཁྲི་ལྔ་སྟོང་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་ཅེས་བྱ་བའི་
ཆོས་ཀྱི་རྣམ་གྲངས་ཀྱི་ཆོས་ཀྱང་སྟོན་ཏེ། མཐུ་དེ་ལྟ་བུ་དེ་ནི་དེའི་ཡིན་ནོ། །དེས་གསོལ་པ། བཅོམ་ལྡན་འདས་བཅོམ་ལྡན་འདས་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། བསམ་གྱིས་མི་ཁྱབ་པའི་གོ་ཆ་བགོས་པའི་བྱང་ཆུབ་སེམས་དཔའ་སེམས་

དཔའ་ཆེན་པོ་དེ་དག་ཀྱང་བལྟ་བའི་སླད་དུ་འཇིག་རྟེན་གྱི་ཁམས་མི་མཇེད་དེར་བདག་མཆི་བར་བགྱིའོ། །བཀའ་སྩལ་པ། རིགས་ཀྱི་བུ་དེའི་དུས་ལ་ད་བབ་པར་ཤེས་ན་སོང་ཤིག །དེ་ནས་དེ་བཞིན་གཤེགས་པ་ཡེ་ཤེས་ཀྱི་དཔལ་གྱིས་བྱང་ཆུབ་སེམས་དཔའ་སེམས་དཔའ་
ཆེན་པོ་ཡེ་ཤེས་ཀྱི་སྟོབས་ལ་ལག་པ་ལྟ་བུའི་ཨུད་པ་ལ་བྱིན་ཏེ། རིགས་ཀྱི་བུ་ཁྱོད་ཀྱིས་བཅོམ་ལྡན་འདས་དེ་ལ་འདི་ཕུལ་ལ། ཕུལ་ནས་ཀྱང་བཅོམ་ལྡན་འདས་བཅོམ་ལྡན་འདས་ལ་དེ་བཞིན་གཤེགས་པ་ཡེ་ཤེས་ཀྱི་དཔལ་གནོད་པ་ཆུང་ངམ། ཉམ་ང་བ་ཉུང་ངམ།
བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་སྙུན་གསོལ་ལོ་ཞེས་དེ་སྐད་ཅེས་ཀྱང་གསོལ་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་ཀྱི་སྟོབས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། འདི་ལྟ་སྟེ། དཔེར་
ན་སྐྱེས་བུ་སྟོབས་དང་ལྡན་པ་ཞིག་གིས་ལག་པ་བསྐུམ་པ་རྐྱོང་བར་བྱེད་པའམ། ལག་པ་བརྐྱང་བསྐུམ་པར་བྱེད་པའི་སྐད་ཅིག་དང་ཐང་ཅིག་དང་ཡུད་ཙམ་དེས་སོང་སྟེ་འཇིག་རྟེན་གྱི་ཁམས་མི་མཇེད་འདིར་འདུག་གོ། དེ་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་བཅོམ་ལྡན་འདས་
ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་བྱང་ཆུབ་སེམས་དཔའ་ཡེ་ཤེས་ཀྱི་སྟོབས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་
ལྡན་འདས་ལ་དེ་བཞིན་གཤེགས་པ་ཡེ་ཤེས་ཀྱི་དཔལ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་གསོལ་ཞིང་། བཅོམ་ལྡན་འདས་ལ་བཅོམ་ལྡན་འདས་དེས་ལག་པ་ལྟ་བུའི་ཨུད་པ་ལ་འདི་ཡང་བསྐུར་
བ་ལགས་ན། བཅོམ་ལྡན་འདས་ཀྱིས་བཞེས་སུ་གསོལ། བཅོམ་ལྡན་འདས་ཀྱིས་ལག་པ་ལྟ་བུའི་ཨུད་པ་ལ་དེ་བཞེས་ཏེ་བཞེས་ནས་ཀྱང་བཀའ་སྩལ་པ། རིགས་ཀྱི་བུ་ཅི་བཅོམ་ལྡན་འདས་དེ་སྙུན་མི་མངའ་འམ། བདེ་བར་གནས་སམ། །སྟོབས་དང་ལྡན་ནམ།

འགྱུར་བ་མི་མངའའམ། གསོལ་པ། བཅོམ་ལྡན་འདས་དེ་ལྟ་ལགས་སོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་བཞི་སྟོང་འདས་པ་ན་འཇིག་རྟེན་གྱི་ཁམས་སྤོས་བརྩེགས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཙན་དན་གྱི་བསུང་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་ཅེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །
བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་ཀྱིས་སྣང་བ་ཆེན་པོ་དེ་མཐོང་སྟེ། གསུང་བསལ་བའི་སྒྲ་དེ་ཡང་ཐོས་སོ། །དེ་ནས་བཅོམ་ལྡན་འདས་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་སྣང་
བ་དེ་དང་། གསུང་བསལ་བའི་སྒྲ་གྲག་པ་དེ་སུའི་ལགས། བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་ནུབ་ཕྱོགས་ཀྱི་ཕྱོགས་ཆར་འཇིག་རྟེན་གྱི་ཁམས་གྲངས་མེད་པ་སུམ་ཁྲི་བཞི་སྟོང་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་སེམས་ཅན་ཐམས་ཅད་ཡང་དག་པར་ཚིམ་པར་བྱེད་པ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཆོས་ཀྱང་སྟོན་ཏོ། །
གསོལ་པ། བཅོམ་ལྡན་འདས་བཅོམ་ལྡན་འདས་དེའི་ཐད་དུ་འཇིག་རྟེན་གྱི་ཁམས་དེར་བདག་མཆི་བར་བགྱིའོ། །བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་དེའི་དུས་ལ་ད་བབ་པར་ཤེས་ན་སོང་ཤིག །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དྲི་མ་མེད་ཀྱི་
ལག་པར་ཙན་དན་གྱི་ཐུམ་པོ་བྱིན་ཏེ། རིགས་ཀྱི་བུ་ཁྱོད་ཀྱིས་བཅོམ་ལྡན་འདས་དེ་ལ་ཙན་དན་གྱི་ཐུམ་པོ་འདི་ཕུལ་ལ། ངའི་ཚིག་གིས་བཅོམ་ལྡན་འདས་བཅོམ་ལྡན་འདས་ལ་དེ་བཞིན་གཤེགས་པ་ཙན་དན་གྱི་བསུང་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ།

སྟོབས་དང་བདེ་བར་རེག་པ་ལ་གནས་སམ། ཞེས་སྙུན་གསོལ་ལོ་ཞེས་ཀྱང་གསོལ་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ་བསྐོར་བ་བྱས་ནས་འདི་ལྟ་སྟེ། དཔེར་ན་སྐྱེས་བུ་སྟོབས་དང་
ལྡན་པ་ཞིག་གིས་ལག་པ་བསྐུམ་པ་རྐྱོང་བར་བྱེད་པའམ། བརྐྱང་བ་སྐུམ་པར་བྱེད་པའི་སྐད་ཅིག་དང་། ཐང་ཅིག་དང་། ཡུད་ཙམ་དེས་འཇིག་རྟེན་གྱི་ཁམས་མི་མཇེད་འདིར་འདུག་གོ། །དེ་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་
འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ལ་དེ་བཞིན་གཤེགས་པ་ཙན་དན་གྱི་བསུང་གནོད་པ་ཆུང་ངམ། ཉམ་ང་བ་ཉུང་ངམ།
བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ། ཞེས་སྙུན་གསོལ་ཞིང་། བཅོམ་ལྡན་འདས་ལ་བཅོམ་ལྡན་འདས་དེས་ཙན་དན་གྱི་ཐུམ་པོ་འདི་ཡང་བསྐུར་བ་ལགས་ན་ཙན་དན་གྱི་ཐུམ་པོ་འདི་བཅོམ་ལྡན་འདས་ཀྱིས་བཞེས་སུ་གསོལ། བཅོམ་ལྡན་འདས་ཀྱིས་
བཞེས་ཏེ་བཞེས་ནས་ཀྱང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་དྲི་མ་མེད་ལ་བཀའ་སྩལ་པ། རིགས་ཀྱི་བུ་ཅི་བཅོམ་ལྡན་འདས་དེ་སྙུན་མི་མངའ་འམ། སྟོབས་དང་ལྡན་ནམ། འགྱུར་བ་མི་མངའ་འམ། བདེ་བར་རེག་པ་ལ་གནས་སམ། གསོལ་པ། བཅོམ་
ལྡན་འདས་སྙུན་མི་མངའ་ཞིང་སྟོབས་དང་ལྡན་ལ། འགྱུར་བ་མི་མངའ་སྟེ། བདེ་བར་གནས་ལགས་སོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་སུམ་སྟོང་འདས་པ་ན་འཇིག་རྟེན་གྱི་ཁམས་དྲི་འདས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་མིག་བཏུད་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་ཕན་འདོད་ཅེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །བྱང་ཆུབ་སེམས་དཔའ་

སེམས་དཔའ་ཆེན་པོ་ཕན་འདོད་ཀྱིས་སྣང་བ་ཆེན་པོ་དེ་མཐོང་སྟེ། གསུང་བསལ་བའི་སྒྲ་དེ་ཡང་ཐོས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕན་འདོད་བཅོམ་ལྡན་འདས་དེ་བཞིན་གཤེགས་པ་མིག་བཏུད་དེ་ག་ལ་བ་དེར་སོང་ནས་བཅོམ་ལྡན་འདས་དེ་ལ་
འདི་སྐད་ཅེས་གསོལ་ཏོ། །བཅོམ་ལྡན་འདས་འོད་དེ་དང་། གསུང་བསལ་བའི་སྒྲ་དེ་སུའི་ལགས། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གྲངས་མེད་པ་སུམ་
ཁྲི་སུམ་སྟོང་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་སེམས་ཅན་ཐམས་ཅད་
ཀྱི་བསམ་པ་ཡང་དག་པར་ཚིམ་པར་བྱེད་པ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཆོས་ཀྱང་སྟོན་ཏོ། །དེས་གསོལ་པ། བཅོམ་ལྡན་འདས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བའི་སླད་དུ་འཇིག་རྟེན་གྱི་ཁམས་
མི་མཇེད་དེར་བདག་མཆི་བར་བགྱིའོ། །བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་དེའི་དུས་ལ་ད་བབ་པར་ཤེས་ན་སོང་ཤིག །དེ་ནས་བཅོམ་ལྡན་འདས་དེ་བཞིན་གཤེགས་པ་མིག་བཏུད་ཀྱིས་བྱང་ཆུབ་སེམས་དཔའ་ཕན་འདོད་ཀྱི་ལག་པར་པད་མ་ཆེན་པོའི་རྒྱལ་པོ་
མངོན་པར་འཕགས་པ་གཅིག་བྱིན་ཏེ། རིགས་ཀྱི་བུ་ཁྱོད་ཀྱིས་བཅོམ་ལྡན་འདས་དེ་ལ་པད་མའི་རྒྱལ་པོ་འདི་ཕུལ་ལ་ངའི་ཚིག་གིས་བཅོམ་ལྡན་འདས་བཅོམ་ལྡན་འདས་ལ་དེ་བཞིན་གཤེགས་པ་མིག་བཏུད་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་
བདེ་བར་རེག་པ་ལ་གནས་སམ། ཞེས་སྙུན་གསོལ་ལོ་ཞེས་དེ་སྐད་ཅེས་ཀྱང་གསོལ་ཅིག །དེ་ནས་བྱང་ཆུབ་སེམས་དཔའ་ཕན་འདོད་བཅོམ་ལྡན་འདས་དེའི་ཞབས་ལ་ཕྱག་འཚལ་ཏེ། འདི་ལྟ་སྟེ། དཔེར་ན་སྐྱེས་བུ་སྟོབས་དང་ལྡན་པ་ཞིག་གིས་ལག་པ་བསྐུམ་པ་རྐྱོང་བར་བྱེད་པའམ།

ལག་པ་བརྐྱང་བ་སྐུམ་པར་བྱེད་པའི་སྐད་ཅིག་དང་། ཐང་ཅིག་དང་། ཡུད་ཙམ་དེས་འཇིག་རྟེན་གྱི་ཁམས་དེ་ནས་མི་སྣང་བར་གྱུར་ཏེ། འཇིག་རྟེན་གྱི་ཁམས་མི་མཇེད་འདིར་འདུག་གོ། །དེ་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་འདས་
ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་བྱང་ཆུབ་སེམས་དཔའ་ཕན་འདོད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་
ལ་དེ་བཞིན་གཤེགས་པ་མིག་བཏུད་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་གསོལ་ཞིང་། བཅོམ་ལྡན་འདས་ལ་བཅོམ་ལྡན་འདས་དེས་པད་མ་ཆེན་པོའི་རྒྱལ་པོ་འདི་ཡང་བསྐུར་བ་ལགས་སོ་བཅོམ་ལྡན་འདས་ཀྱིས་
བཞེས་ཏེ། བཞེས་ནས་ཀྱང་བྱང་ཆུབ་སེམས་དཔའ་ཕན་འདོད་ལ་བཀའ་སྩལ་པ། ཕན་འདོད་ཅི་བཅོམ་ལྡན་འདས་དེ་སྙུན་མི་མངའ་འམ། སྟོབས་དང་ལྡན་ནམ། འགྱུར་བ་མི་མངའ་འམ། གསོལ་པ། བཅོམ་ལྡན་འདས་དེ་ལྟ་ལགས་སོ། །དེའི་ཚེ་ཤར་ཕྱོགས་སུ་སངས་
རྒྱས་ཀྱི་ཞིང་གྲངས་མེད་པ་སུམ་ཁྲི་ཉིས་སྟོང་འདས་པ་ན་འཇིག་རྟེན་གྱི་ཁམས་རིན་ཆེན་མཐའ་ཡས་བརྩེགས་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཀོན་མཆོག་འབྱུང་གནས་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་
ཀྱང་སྟོན་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཀོན་མཆོག་འབྱུང་གནས་དེས་བྱང་ཆུབ་སེམས་དཔའ་ཡེ་ཤེས་བླ་མ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །བྱང་ཆུབ་སེམས་དཔའ་
སེམས་དཔའ་ཆེན་པོ་ཡེ་ཤེས་བླ་མས་སྣང་བ་ཆེན་པོ་དེ་མཐོང་སྟེ། གསུང་བསལ་བའི་སྒྲ་ཆེན་པོ་དེ་ཡང་ཐོས་སོ། །དེ་ནས་བཅོམ་ལྡན་འདས་དེ་ལ་བྱང་ཆུབ་སེམས་དཔའ་ཡེ་ཤེས་བླ་མས་འདི་སྐད་ཅེས་གསོལ་ཏོ། །བཅོམ་ལྡན་འདས་འོད་དེ་དང་། གསུང་བསལ་བའི་སྒྲ་དེ་སུའི་

ལགས། བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་ནུབ་ཕྱོགས་ཀྱི་ཕྱོགས་ཆར་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གྲངས་མེད་པ་སུམ་ཁྲི་ཉིས་སྟོང་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་སེམས་ཅན་ཐམས་ཅད་ཀྱི་བསམ་པ་ཡང་དག་པར་ཚིམ་པར་བྱེད་པ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཆོས་ཀྱང་སྟོན་ཏོ། །དེ་ནས་བཅོམ་ལྡན་འདས་དེ་
བཞིན་གཤེགས་པ་དཀོན་མཆོག་འབྱུང་གནས་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་བླ་མས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་
དང་། བསམ་གྱིས་མི་ཁྱབ་པའི་གོ་ཆ་བགོས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་བལྟ་བའི་སླད་དུ་འཇིག་རྟེན་གྱི་ཁམས་མི་མཇེད་དེར་བདག་མཆི་བར་བགྱིའོ། །བཀའ་སྩལ་པ། རིགས་ཀྱི་བུ་དེའི་དུས་ལ་ད་བབ་པར་ཤེས་ན་སོང་ཤིག །དེ་ནས་བཅོམ་ལྡན་འདས་
དེས་བྱང་ཆུབ་སེམས་དཔའ་ཡེ་ཤེས་བླ་མའི་ལག་པར་མེ་ཏོག་ཁ་དོག་ལྔ་པ་སྙིམ་པ་གང་བྱིན་ཏེ། རིགས་ཀྱི་བུ་ཁྱོད་ཀྱིས་བཅོམ་ལྡན་འདས་དེ་ལ་མེ་ཏོག་ཁ་དོག་ལྔ་པ་སྙིམ་པ་གང་འདི་ཕུལ་ལ། བཅོམ་ལྡན་འདས་བཅོམ་ལྡན་འདས་ལ་དེ་བཞིན་གཤེགས་པ་དཀོན་མཆོག་འབྱུང་
གནས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་གསོལ་ལོ་ཞེས་དེ་སྐད་ཅེས་ཀྱང་གསོལ་ཅིག །དེ་ནས་བྱང་ཆུབ་སེམས་དཔའ་ཡེ་ཤེས་བླ་མས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ།
འདི་ལྟ་སྟེ། དཔེར་ན་སྐྱེས་བུ་སྟོབས་དང་ལྡན་པ་ཞིག་གིས་ལག་པ་བསྐུམ་པ་རྐྱོང་བར་བྱེད་པའམ། བརྐྱང་བ་སྐུམ་པར་བྱེད་པའི་སྐད་ཅིག་དང་། ཐང་ཅིག་དང་ཡུད་ཙམ་དེས་འཇིག་རྟེན་གྱི་ཁམས་དེ་ནས་མི་སྣང་བར་གྱུར་ཏེ། འཇིག་རྟེན་གྱི་ཁམས་མི་མཇེད་འདིར་འདུག་གོ། །དེ་བཅོམ་

ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ག་ལ་བ་དེར་སོང་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ལ་དེ་བཞིན་གཤེགས་
པ་དཀོན་མཆོག་འབྱུང་གནས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་གསོལ་ཞིང་། བཅོམ་ལྡན་འདས་ལ་བཅོམ་ལྡན་འདས་དེས་མེ་ཏོག་ཁ་དོག་ལྔ་པ་སྙིམ་པ་གང་འདི་བསྐུར་བ་ལགས་ན་བཅོམ་ལྡན་འདས་
ཀྱིས་བཞེས་སུ་གསོལ། བཅོམ་ལྡན་འདས་ཀྱིས་བཞེས་ཏེ། བཞེས་ནས་ཀྱང་བཀའ་སྩལ་པ། ཡེ་ཤེས་བླ་མ་ཅི་བཅོམ་ལྡན་འདས་དེ་སྙུན་མི་མངའ་འམ། སྟོབས་དང་ལྡན་ནམ། བདེ་བ་དང་ལྡན་ནམ། འགྱུར་བ་མི་མངའ་འམ། དེས་གསོལ་པ། བཅོམ་ལྡན་འདས་དེ་ལྟ་ལགས་
སོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་ཆིག་སྟོང་འདས་པ་ན་འཇིག་རྟེན་གྱི་ཁམས་སྤོས་ཀྱིས་བརྒྱན་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་ཀྱི་གླང་པོ་ཆེ་ཞེས་བྱ་བ་བཞུགས་ཏེ་འཚོ་
ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རིན་ཆེན་གླང་པོ་ཆེ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་རིན་ཆེན་གླང་པོ་ཆེས་སྣང་བ་ཆེན་པོ་དེ་མཐོང་སྟེ། གསུང་
བསལ་བའི་སྒྲ་དེ་ཡང་ཐོས་སོ། །དེ་ནས་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དེ་ལ་ཞུས་པ། མཐུ་དེ་སུའི་ལགས། དེ་ནས་བཅོམ་ལྡན་འདས་དེས་དེ་ལ་བཀའ་སྩལ་པ། རིགས་ཀྱི་བུ་ནུབ་ཀྱི་ཕྱོགས་ཀྱི་ཕྱོགས་ཆར་སངས་རྒྱས་ཀྱི་ཞིང་འདི་ནས་འཇིག་
རྟེན་གྱི་ཁམས་གྲངས་མེད་པ་སུམ་ཁྲི་ཆིག་སྟོང་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་ཏེ། འཚོ་ཞིང་གཞེས་ལ། འདི་ལྟ་སྟེ། བྱང་ཆུབ་

སེམས་དཔའི་སྡེ་སྣོད་ཅེས་བྱ་བའི་ཆོས་ཀྱི་རྣམ་གྲངས་ཀྱི་ཆོས་ཀྱང་སྟོན་ཏོ་ཞེས་བྱ་བ་ནས། དེ་ཡང་འོངས་ཏེ་ཞེས་བྱ་བ་དང་། དེ་ལྟ་ལགས་སོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་
སུམ་ཁྲི་འདས་པ་ན་འཇིག་རྟེན་གྱི་ཁམས་རྡོ་རྗེའི་སྙིང་པོ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཆོག་གི་ཚོགས་ཅན་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་
དཔའ་ཡེ་ཤེས་ཚོགས་ཅན་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ་ཞེས་བྱ་བ་ནས། དེ་ཡང་འོངས་ཏེ་ཞེས་བྱ་བ་དང་། དེ་ལྟ་ལགས་སོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་
ཁྲི་ཉིས་སྟོང་འདས་པ་ན་འཇིག་རྟེན་གྱི་ཁམས་སྣ་ཚོགས་རྒྱལ་མཚན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྷུན་པོའི་ཕུང་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་
སེམས་དཔའ་ངེས་འདྲེན་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ་ཞེས་བྱ་བ་ནས། དེ་ཡང་འོངས་ཏེ་ཞེས་བྱ་བ་དང་། དེ་ལྟ་ལགས་སོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་ཉིས་
སྟོང་འདས་པ་ན་འཇིག་རྟེན་གྱི་ཁམས་པད་མའི་གདུགས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གདུགས་གཅིག་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་
རིན་པོ་ཆེའི་མཛོད་གཅིག་པ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ་ཞེས་བྱ་བ་ནས། དེ་ཡང་འོངས་ཏེ་ཞེས་བྱ་བ་དང་། དེ་ལྟ་ལགས་སོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་འདས་པ་

ན་འཇིག་རྟེན་གྱི་ཁམས་རྟག་ཏུ་སྣང་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐོགས་པ་མེད་པའི་འཁོར་ལོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་ཡེ་ཤེས་
ཁྱུ་མཆོག་ཅེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ་ཞེས་བྱ་བ་ནས། དེ་ཡང་འོངས་ཏེ་ཞེས་བྱ་བ་དང་། དེ་ལྟ་ལགས་སོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་ཆིག་སྟོང་འདས་
པ་ན་འཇིག་རྟེན་གྱི་ཁམས་བཟང་པོ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཙན་དན་གྱི་བསུང་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། དེ་བཞིན་གཤེགས་པ་དེས་བྱང་ཆུབ་སེམས་དཔའ་ཡེ་ཤེས་ལྷུར་ལེན་པ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་ལུང་བསྟན་ཏོ་ཞེས་བྱ་བ་ནས། དེ་ཡང་འོངས་ཏེ་ཞེས་བྱ་བ་དང་། དེ་ལྟ་ལགས་སོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དེའི་ཚེ་ཤར་ཕྱོགས་སུ་སངས་རྒྱས་ཀྱི་ཞིང་གྲངས་མེད་པ་ཉི་ཁྲི་དགུ་སྟོང་འདས་པ་ན་འཇིག་རྟེན་གྱི་ཁམས་བཟང་ལྡན་ཞེས་བྱ་བ་ཡོད་དེ། དེ་ན་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔུང་མགོ་ཟླུམ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་ཁྱད་པར་བློ་གྲོས་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་
བསྟན་ཏོ་ཞེས་བྱ་བ་ནས། དེ་ཡང་འོངས་ཏེ་ཞེས་བྱ་བའི་བར་དང་། དེ་ལྟ་ལགས་སོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་ཆིག་སྟོང་འདས་པ་ན་འཇིག་རྟེན་གྱི་ཁམས་རིན་ཆེན་དཔལ་ཞེས་བྱ་བ་ཡོད་དེ། དེ་ན་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲ་བ་ཅན་གྱི་འོད་ཅེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་ཡེ་ཤེས་དཔལ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ་

ཞེས་བྱ་བ་ནས། དེ་ཡང་འོངས་ཏེ་ཞེས་བྱ་བ་དང་། དེ་ལྟ་ལགས་སོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་ཆིག་སྟོང་འདས་པ་ན་འཇིག་རྟེན་གྱི་ཁམས་བདེ་བའི་དཔལ་ཞེས་བྱ་བ་ཡོད་དེ།
དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཨུད་པ་ལ་དམར་པོའི་དཔལ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་པད་མ་མངོན་འཕགས་དཔལ་ཞེས་བྱ་བ་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་ལུང་བསྟན་ཏོ་ཞེས་བྱ་བ་ནས། དེ་ཡང་འོངས་ཏེ་ཞེས་བྱ་བ་དང་། དེ་ལྟ་ལགས་སོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་ཆིག་སྟོང་འདས་པ་ན་འཇིག་རྟེན་གྱི་ཁམས་རབ་ཏུ་ཞི་བ་
ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་མེ་ཏོག་རིན་པོ་ཆེའི་འོད་ཀྱི་དཔལ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །བཅོམ་ལྡན་འདས་དེས་བྱང་ཆུབ་སེམས་དཔའ་མཆོག་གི་བཀོད་པ་
ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ་ཞེས་བྱ་བ་ནས། དེ་ཡང་འོངས་ཏེ་ཞེས་བྱ་བ་དང་། དེ་ལྟ་ལགས་སོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་ཆིག་སྟོང་འདས་པ་ན་འཇིག་
རྟེན་གྱི་ཁམས་བཟང་ལྡན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་འཕགས་པའི་འོད་ཟེར་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་སེམས་དཔའ་རིན་པོ་ཆེའི་འོད་
ཟེར་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ་ཞེས་བྱ་བ་ནས། དེ་ཡང་འོངས་ཏེ་ཞེས་བྱ་བ་དང་། དེ་ལྟ་ལགས་སོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་སུམ་ཁྲི་འདས་པ་ན་འཇིག་

རྟེན་གྱི་ཁམས་བཟོད་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་པ་དང་བག་ཚ་བ་ཐམས་ཅད་རྣམ་པར་འཇིག་པར་མཛད་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་
བྱང་ཆུབ་སེམས་དཔའ་བག་ཚ་བ་མེད་པ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ་ཞེས་བྱ་བ་ནས། དེ་ཡང་འོངས་ཏེ་ཞེས་བྱ་བ་དང་། དེ་ལྟ་ལགས་སོ་ཞེས་བྱ་བའི་བར་དུ་སྔ་མ་བཞིན་དུ་སྦྱར་རོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་
མེད་པ་སུམ་ཁྲི་འདས་པ་ན་འཇིག་རྟེན་གྱི་ཁམས་ལྷུན་པོའི་རྒྱལ་མཚན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྷུན་པོའི་ཕུང་པོ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། བཅོམ་ལྡན་འདས་དེས་བྱང་ཆུབ་
སེམས་དཔའ་ཕུང་པོ་ཤིན་ཏུ་བཤིག་པ་ཞེས་བྱ་བ་བླ་ན་མེད་པ་ཡང་དག་པར