Kinh tạng Tây Tạng (Kangyur Đại Học) — 043_དཀོན་བརྩེགས།_ཅ

ངན་ལས་འདའོ། །དེ་ནས་རིགས་ཀྱི་བུ་བཟང་པོ་བར་སྣང་དེ་ལས་བབས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་དེང་སླན་
ཆད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱེ་བ་འབུམ་ཕྲག་དུ་མ་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆིའོ། །དེ་བཞིན་གཤེགས་པ་དེ་བཞིན་ཉིད་གང་གིས་དེ་བཞིན་ཉིད་ལས་སླར་མ་ལོག་པའི་དེ་བཞིན་གཤེགས་
པའི་དེ་བཞིན་ཉིད་དང་། དབྱེར་མ་མཆིས་པའི་དེ་བཞིན་ཉིད་དང་། མ་ཚང་བ་མ་མཆིས་པའི་དེ་བཞིན་ཉིད་དང་། རྣམ་པར་མི་རྟོག་པའི་དེ་བཞིན་ཉིད་དང་། སྐྱེ་བ་མ་མཆིས་པའི་དེ་བཞིན་ཉིད་དང་། མངོན་པར་འདུ་བགྱི་བ་མ་མཆིས་པའི་དེ་བཞིན་ཉིད་ཀྱིས་དེ་བཞིན་གཤེགས་པ་དེ་བཞིན་ཉིད་
གསུང་བ་བཞིན་དུ་བདག་ཀྱང་དེ་སྐད་མཆིའོ། །དེ་ནས་ཚེ་དང་ལྡན་པ་ཀུན་དགའ་བོས་རིགས་ཀྱི་བུ་བཟང་པོ་ལ་འདི་སྐད་ཅེས་སྨྲས་སོ། །བཟང་པོ་ཁྱོད་དེ་བཞིན་གཤེགས་པའི་ཆོས་ཉིད་རྗེས་སུ་ཐོབ་བམ། ཅི་ན་ཁྱོད་ཇི་ལྟར་དེ་བཞིན་གཤེགས་པ་དེ་བཞིན་ཉིད་གསུང་བ་ལྟར་ཁྱོད་དེ་
སྐད་སྨྲ། བཟང་པོས་སྨྲས་པ། ཀུན་དགའ་བོ་ཆོས་ཐམས་ཅད་ཀྱང་དེ་བཞིན་གཤེགས་པའི་ཆོས་ཉིད་ཐོབ་པ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་དེ་བཞིན་གཤེགས་པས་དེ་བཞིན་ཉིད་དབྱེར་མེད་པ་ཉིད་དུ་ཐུགས་སུ་ཆུད་དེ། དེ་བཞིན་ཉིད་དབྱེར་མེད་པ་གང་
ཡིན་པ་དེར་ཁོ་བོ་ཡང་ཆུད་ཅིང་ཇི་ལྟར་ཁོ་བོ་ཆུད་པ་དེ་བཞིན་དུ་སེམས་ཅན་ཐམས་ཅད་ཀྱང་ཆུད་ལ། ཇི་ལྟར་སེམས་ཅན་ཐམས་ཅད་ཆུད་པ་དེ་བཞིན་དུ་ཆོས་ཐམས་ཅད་ཀྱང་ཆུད་པའི་ཕྱིར་ཏེ། བཙུན་པ་ཀུན་དགའ་བོ་དེ་བཞིན་གཤེགས་པའི་ཆོས་ཉིད་ནི་གཉིས་ཀྱིས་རབ་ཏུ་ཕྱེ་
བ་མ་ཡིན་ནོ། །བཙུན་པ་ཀུན་དགའ་བོ་གཉིས་སུ་མེད་པ་ནི་གང་ན་ཀུན་ཏུ་ཤེས་པ་མེད་པ་ཉིད་དང་། ཡོངས་སུ་ཤེས་པ་མེད་པ་ཉིད་དོ། །དེ་ཅིའི་ཕྱིར་ཞེ་ན། འདུ་ཤེས་ཡོངས་སུ་ཤེས་པའི་ཤེས་པ་ནི་སངས་རྒྱས་ཀྱི་ཡེ་ཤེས་ཡིན་པའི་ཕྱིར་རོ། །དེ་ནས་བཅོམ་ལྡན་འདས་

ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་བཟང་པོ་ནི་ལྷ་དང་བཅས་པའི་འཇིག་རྟེན་མགོ་རྨོངས་པར་བགྱིད་པ་སྟེ། སྔོན་ཡང་སྒྱུ་མའི་ཆོས་ཉིད་ཀྱིས་མགོ་རྨོངས་པར་བགྱིས་སོ། །ད་ཡང་ཤེས་རབ་དང་། ཡེ་ཤེས་ཀྱིས་མགོ་
རྨོངས་པར་བགྱིད་དོ། །དེ་ཅིའི་སླད་དུ་ཞེ་ན། འདིའི་ཤེས་རབ་དང་། ཡེ་ཤེས་ཀྱི་སྤོབས་པ་ནི་དེ་ལྟ་བུ་ལགས་པའི་སླད་དུའོ། །དེ་ནས་བཅོམ་ལྡན་འདས་ཀྱིས་སྒྱུ་མ་མཁན་བཟང་པོ་ལ་འདི་སྐད་ཅེས་བཀའ་སྩལ་ཏོ། །བཟང་པོ་ཁྱོད་ལྷ་དང་བཅས་པའི་འཇིག་རྟེན་མགོ་
རྨོངས་པར་བྱེད་པ་བདེན་ནམ། གསོལ་པ། བཅོམ་ལྡན་འདས་ཀྱིས་ཇི་ལྟར་མགོ་རྨོངས་པར་མཛད་པ་དེ་བཞིན་དུ་བདག་ཀྱང་མགོ་རྨོངས་པར་བགྱིད་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟ་སྟེ། བདག་མེད་པ་ཉིད་ཀྱིས་སེམས་ཅན་དུ་ཐ་སྙད་
བཏགས་ཏེ་ཆོས་སྟོན་པ་དང་། སྲོག་མེད་པ་དང་། གང་ཟག་མེད་པ་ཉིད་ཀྱིས་གང་ཟག་ཏུ་ཆོས་སྟོན་པ་འདི་ནི་མགོ་རྨོངས་པར་བགྱིད་པ་ཆེན་པོ་ལགས་པའི་སླད་དུའོ། །དེ་བཞིན་གཤེགས་པས་ནི་བྱང་ཆུབ་ཀྱི་སྙིང་པོ་ལ་བཞུགས་ནས་ཆོས་འགའ་ཡང་འཆི་འཕོ་བ་འམ། འགྲོ་
བའམ། སྐྱེ་བ་མ་གཟིགས་མོད་ཀྱི། འཆི་འཕོ་བ་དང་། འགྲོ་བ་དང་། སྐྱེ་བའི་ཆོས་སྟོན་པར་ཡང་མཛད་དེ། བཅོམ་ལྡན་འདས་དེ་ལྟ་ལགས་པས་དེ་བཞིན་གཤེགས་པ་ཡང་དག་པར་གསུང་བ་བཀའ་སྩོལ་བ་ལྟར་ལྷ་དང་བཅས་པའི་འཇིག་རྟེན་གྱི་ཡུལ་ག་ལ་ལགས།
དེ་ནས་བཅོམ་ལྡན་འདས་ཀྱིས་སྒྱུ་མ་མཁན་བཟང་པོ་ལ་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ལེགས་སོ་ལེགས་སོ། །ཁྱོད་ཇི་སྐད་སྨྲ་བ་དེ་ཁོ་ན་བཞིན་ཏེ། འདི་ལྟ་སྟེ་བདག་མེད་པ་ཉིད་ཀྱིས་སེམས་ཅན་དུ་ཐ་སྙད་བཏགས་ཏེ་ཆོས་སྟོན་པ་དང་། སྲོག་མེད་པ་དང་།
གང་ཟག་མེད་པ་ཉིད་ཀྱིས་གང་ཟག་ཏུ་ཆོས་སྟོན་པ་འདི་ནི་མགོ་རྨོངས་པ་ཆེན་པོ་ཡིན་ནོ། །དེ་བཞིན་གཤེགས་པས་ནི་བྱང་ཆུབ་ཀྱི་སྙིང་པོ་ལ་བཞུགས་ནས་ཆོས་འགའ་ཡང་འཆི་འཕོ་བ་འམ། འགྲོ་བ་འམ། སྐྱེ་བ་མ་གཟིགས་མོད་ཀྱི། འཆི་འཕོ་བ་དང་། འགྲོ་བ་དང་།

སྐྱེ་བའི་ཆོས་སྟོན་པར་ཡང་མཛད་དེ། འདི་ལ་ཡོངས་སུ་མྱ་ངན་ལས་འདའ་བ་འམ། ཡོངས་སུ་མྱ་ངན་ལས་བཟླ་བའི་ཕྱིར་ཆོས་སྟོན་པའི་ཆོས་ནི་འགའ་ཡང་མེད་དོ། །དེ་ནས་རིགས་ཀྱི་བུ་བཟང་པོས་བཅོམ་ལྡན་འདས་ལ་རབ་ཏུ་འབྱུང་བར་གསོལ་པ་དང་།
བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་ལ་བཀའ་སྩལ་པ། བྱམས་པ་ཁྱོད་ཀྱིས་རིགས་ཀྱི་བུ་བཟང་པོ་རབ་ཏུ་ཕྱུང་ཤིག །དེ་ནས་བྱམས་པས་རིགས་ཀྱི་བུ་བཟང་པོ་རབ་ཏུ་ཕྱུང་རྫོགས་པར་བསྙེན་པར་བྱས་སོ། །རབ་ཏུ་རྫོགས་པར་བསྙེན་ནས་ཀྱང་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་རྣམས་ནི་ཁ་དོག་དང་། རྟགས་དང་། ཚུལ་གྱིས་རབ་ཏུ་བྱུང་བ་མ་ལགས་སོ། །བཅོམ་ལྡན་འདས་དེ་ཅིའི་སླད་དུ་ཞེ་ན། བྱང་ཆུབ་སེམས་དཔའ་གང་ཞིག་མཚན་མ་ཐམས་ཅད་ལ་ཡང་ཆགས་པ་
མ་མཆིས་ལ་སེམས་ཅན་ཡོངས་སུ་སྨིན་པར་བགྱི་བའི་སླད་དུ་ཁམས་གསུམ་ན་ཡང་གནས་ན་དེ་ནི་བྱང་ཆུབ་སེམས་དཔའ་རྣམས་ཀྱི་རབ་ཏུ་བྱུང་བ་ལགས་སོ། །ཡང་དེའི་ཚེ་བསྟན་པ་འདི་བཤད་པ་ན་སྲོག་ཆགས་ལྔ་སྟོང་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
སེམས་བསྐྱེད་དོ། །དགེ་སློང་ཉིས་བརྒྱ་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདིའི་མིང་
ཇི་སྐད་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། སྒྱུ་མ་མཁན་བཟང་པོ་ལུང་བསྟན་པ་ཞེས་བྱ་བར་ཟུང་ཤིག །རིམ་གྱིས་བྱང་ཆུབ་ཡང་དག་པར་འབྱུང་བ་ཞེས་བྱ་བར་ཡང་ཟུང་ཤིག །ཀུན་དགའ་བོ་བྱང་ཆུབ་སེམས་དཔའ་གང་དེ་བཞིན་གཤེགས་པས་ལྟ་བར་
འདོད་པ་དང་། སེམས་ཅན་རྣམས་ལ་སངས་རྒྱས་ཀྱི་མཛད་པ་བྱ་བར་འདོད་པ་དེས་ཆོས་ཀྱི་རྣམ་གྲངས་འདི་གཟུང་བར་བྱ། བཅང་བར་བྱ། བཀླག་པར་བྱ། གཞན་དག་ལ་ཡང་བསྟན་པར་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ་གང་གིས་འདི་བཟུང་བ་དང་། བཅངས་པ་

དང་། བཀླགས་པ་དང་། གཞན་དག་ལ་ཡང་རབ་ཏུ་བསྟན་པ་དེས་ནི་དེ་བཞིན་གཤེགས་པ་མཐོང་བ་ཡིན། དེས་ནི་སེམས་ཅན་རྣམས་ལ་སངས་རྒྱས་ཀྱི་མཛད་པ་ཡང་བྱས་པ་ཡིན་ནོ། །ཀུན་དགའ་བོ་དེ་ལྟ་བས་ན་ཁྱོད་ཀྱི་སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་
བརྩེ་བ་དང་། འདི་ལྟ་སྟེ། ལྷ་དང་མི་རྣམས་ཀྱི་དོན་དང་། ཕན་པ་དང་བདེ་བའི་ཕྱིར་ཆོས་ཀྱི་རྣམ་གྲངས་འདི་ཟུང་ཤིག །ཆོངས་ཤིག །ལྷོགས་ཤིག །ཀུན་ཆུབ་པར་གྱིས་ཤིག །ཀུན་དགའ་བོ་ཆོས་གང་དག་གིས་བྱང་ཆུབ་ཡང་དག་པར་འབྱུང་བ་དང་། ཐེག་པ་ཆེན་པོ་འདི་ལ་ཡང་
ཡང་དག་པར་འབྱུང་བར་འགྱུར་བ་དེ་དག་ནི་ཐེག་པ་ཆེན་པོ་འདི་ལས་ཡང་དག་པར་རབ་ཏུ་སྟོན་ཏོ། །དེས་ན་ཆོས་ཀྱི་རྣམ་གྲངས་འདི་བྱང་ཆུབ་ཡང་དག་པར་འབྱུང་བ་ཞེས། ཀུན་དགའ་བོ་ཁྱོད་མོས་པར་བྱའོ། །ཁོད་དུ་ཆུད་པར་བྱའོ། །གང་ཞིག་ཆོས་ཀྱི་རྣམ་གྲངས་འདི་གླེགས་
བམ་དུ་བྱེད་པ་འམ། ལུས་ལ་སྲེལ་བ་དེའི་ལུས་ལ་དེ་བཞིན་གཤེགས་པ་ཡོད་པ་ཡིན་ན་གང་དག་གིས་ཐོས་ནས་དེ་བཞིན་ཉིད་དུ་སྒྲུབ་པ་ལྟ་སྨོས་ཀྱང་ཅི་དགོས། དེ་ནས་བཅོམ་ལྡན་འདས་ལ་རིགས་ཀྱི་བུ་བཟང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་
གྲངས་འདི་ནི་སྔོན་གྱི་དགེ་བའི་རྩ་བ་སྐུལ་བ་ཞེས་བགྱི་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་བདག་གིས་ཆོས་ཀྱི་རྣམ་གྲངས་འདི་ཐོས་ནས་དགེ་བའི་རྩ་བ་སྔོན་བསགས་པ་ཐམས་ཅད་མངོན་སུམ་དུ་གྱུར་པའི་སླད་དུ་ལགས་སོ། །བཅོམ་ལྡན་འདས་ཀྱིས་དེ་
སྐད་ཅེས་བཀའ་སྩལ་ནས། རིགས་ཀྱི་བུ་བཟང་པོ་དང་། ཚེ་དང་ལྡན་པ་ཀུན་དགའ་བོ་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་
བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་སྒྱུ་མ་མཁན་བཟང་པོ་ལུང་བསྟན་པ་ཞེས་བྱ་བ་སྟེ། ལེའུ་ཉི་ཤུ་རྩ་གཅིག་པ་རྫོགས་སོ།། །།རྒྱ་གར་གྱི་

མཁན་པོ་ཛི་ན་མི་ཏྲ་དང་། པྲཛྙ་བརྨ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་
སྟོང་ཕྲག་བརྒྱ་པ་ལས་ལེའུ་ཉི་ཤུ་རྩ་གཉིས་པ་སྟེ་ཆོ་འཕྲུལ་ཆེན་པོ་བསྟན་པ། བམ་པོ་དང་པོ། །རྒྱ་གར་སྐད་དུ། ཨཱརྱ་མ་ཧཱ་པྲ་ཏི་ཧཱརྱ་ནི་ར་དེ་ཤ་ནཱ་མ་མ་ཧཱ་ཡ་ན་སཱུ་ཏྲ། བོད་སྐད་དུ། འཕགས་པ་ཆོ་འཕྲུལ་ཆེན་པོ་བསྟན་པ་ཞེས་བྱ་བ་ཐེག་པ་ཆེན་པོའི་མདོ།
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་
གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་བརྒྱད་སྟོང་དང་ཐབས་ཅིག་ཏུ་བཞུགས་སོ། །དེ་ནས་ལྷའི་བུ་དེད་དཔོན་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ །འཇམ་དཔལ་གཞོན་ནུར་གྱུར་པ་ཡང་འཁོར་དེ་ཉིད་དུ་འདུས་པར་གྱུར་ཏེ་འདུག་གོ །དེ་ནས་བཅོམ་
ལྡན་འདས་ལ་ལྷའི་བུ་དེད་དཔོན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཆོ་འཕྲུལ་དུ་ཞིག་གིས་སེམས་ཅན་རྣམས་འདུལ་བར་མཛད་ལགས། བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་ང་ནི་ཆོ་འཕྲུལ་རྣམ་པ་གསུམ་གྱིས་
སེམས་ཅན་རྣམས་འདུལ་བར་བྱེད་དོ། །གསུམ་གང་ཞེ་ན། འདི་ལྟ་སྟེ། ཀུན་རྗོད་པའི་ཆོ་འཕྲུལ་དང་། རྗེས་སུ་བསྟན་པའི་ཆོ་འཕྲུལ་དང་། རྫུ་འཕྲུལ་གྱི་ཆོ་འཕྲུལ་ལོ། །དེ་ལ་དེ་བཞིན་གཤེགས་པའི་ཀུན་རྗོད་པའི་ཆོ་འཕྲུལ་དེ་གང་ཞེ་ན། ཐོགས་པ་མེད་པའི་
ཡེ་ཤེས་ཀྱིས་མ་འོངས་པའི་དུས་གཟིགས་པ་གང་ཡིན་པ་དང་། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་མཁྱེན་ཅིང་གཟིགས་པ་དང་། དཀོན་མཆོག་གསུམ་པོ་དག་ལ་མ་དད་པ་རྣམས་དད་པར་མཛད་པ་དང་། ལས་ཀྱི་རྣམ་པར་སྨིན་པ་ལ་འཇུག་པ་མཁྱེན་པ་དང་།

དེ་བཞིན་གཤེགས་པས་གང་ཟག་གང་ལ་ད་ལྟར་བྱུང་བ་ན་ཉེས་པར་སྤྱད་པའི་གཞི་ངན་སོང་དང་། ངན་འགྲོ་གང་ཡང་རུང་བ་དག་ཏུ་སྐྱེ་བར་འགྱུར་བ་དེ་ནི་དེ་ཁོ་ན་བཞིན་དུ་འགྱུར་གྱི་གཞན་དུ་མ་ཡིན་ནོ། །ཞེས་ཀུན་རྗོད་པར་མཛད་པ་དང་། གང་ཟག་དེ་སྔོན་དགེ་བའི་རྩ་བ་ཡང་དག་པར་བླངས་པའི་རྒྱུས་ངན་སོང་
རྣམས་ལས་ཐར་ནས་ལྷ་དང་མི་དག་ཏུ་སྐྱེ་བར་འགྱུར་ཞིང་། ཐེག་པ་གང་གིས་ངེས་པར་འབྱུང་བར་འགྱུར་བ་ཡང་ན་ཉན་ཐོས་ཀྱི་ཐེག་པའམ། ཡང་ན་རང་སངས་རྒྱས་ཀྱི་ཐེག་པའམ། ཡང་ན་ཐེག་པ་ཆེན་པོས་ངེས་པར་འབྱུང་བར་འགྱུར་བ་དང་། དེ་བཞིན་དུ་བདེ་བ་དང་།
སྡུག་བསྔལ་མྱོང་བར་འགྱུར་བ་དང་། བསྐལ་པ་ཇི་སྙེད་ཅིག་གིས་ངེས་པར་འབྱུང་བར་འགྱུར་བ་དང་། སྤྱོད་པ་ཇི་ལྟ་བུས་སངས་རྒྱས་བཅོམ་ལྡན་འདས་ཇི་སྙེད་ཅིག་མཐོང་བར་འགྱུར་ཞིང་མཉེས་པར་བྱེད་པར་འགྱུར་བ་དེ་དག་ཐམས་ཅད་དེ་བཞིན་གཤེགས་པས་རབ་ཏུ་མཁྱེན་
ཏོ། །མཁྱེན་ནས་ཀྱང་དེ་ནི་དེ་ཁོ་ན་བཞིན་དུ་འགྱུར་གྱི་གཞན་དུ་མ་ཡིན་ནོ། །ཞེས་དེ་ཁོ་ན་བཞིན་དུ་ཀུན་རྗོད་པར་མཛད་པ་དང་། གང་ཟག་གང་དགེ་བའི་རྩ་བ་ཡང་དག་པར་བླངས་པའི་རྒྱུས་འདོད་པའི་ཁམས་རྣམས་སུ་སྐྱེ་བར་འགྱུར་བ་དང་། གཟུགས་ཀྱི་ཁམས་དང་། གཟུགས་
མེད་པའི་ཁམས་ཀྱི་སྐྱེ་མཆེད་གང་ཡང་རུང་བ་དག་ཏུ་སྐྱེ་བར་འགྱུར་བ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །ཐེག་པ་གང་གིས་ངེས་པར་འབྱུང་བར་འགྱུར་བ་དང་། བསྐལ་པ་ཇི་སྙེད་ཅིག་གིས་ངེས་པར་འབྱུང་བར་འགྱུར་བ་དང་། སྤྱོད་པ་ཇི་ལྟ་བུས་སངས་རྒྱས་བཅོམ་
ལྡན་འདས་ཇི་སྙེད་ཅིག་མཐོང་བར་འགྱུར་ཞིང་མཉེས་པར་བྱེད་པར་འགྱུར་བ་དེ་དག་ཐམས་ཅད་ཀྱང་དེ་བཞིན་གཤེགས་པས་རབ་ཏུ་མཁྱེན་ཏོ། །མཁྱེན་ནས་ཀྱང་དེ་ཁོ་ན་བཞིན་དུ་ཀུན་རྗོད་ཅིང་ལུང་སྟོན་པར་མཛད་པ་དང་། དགེ་བའམ། མི་དགེ་བའམ། དམན་པའམ། བར་
མའམ། མཆོག་གམ། ཐ་ན་སེམས་བསྐྱེད་པ་གཅིག་ཀྱང་མི་འདའ་སྟེ། དེ་ནི་དེ་བཞིན་གཤེགས་པའི་ཀུན་རྗོད་པའི་ཆོ་འཕྲུལ་ཡིན་ནོ། །དེ་ལ་དེ་བཞིན་གཤེགས་པའི་རྗེས་སུ་བསྟན་པའི་ཆོ་འཕྲུལ་གང་ཞེ་ན། བསླབ་པ་བསྲུང་བའི་དོན་གྱི་ཕྱིར་རྗེས་སུ་སྟོན་པར་མཛད་པ་

གང་ཡིན་པ་སྟེ། འདི་ནི་བྱ་བའོ། །འདི་ནི་བྱ་བ་མ་ཡིན་པའོ། །འདི་ནི་བསྟེན་པར་བྱ་བའོ། །འདི་ནི་བསྟེན་པར་བྱ་བ་མ་ཡིན་པའོ། །འདི་ནི་སྒྲུབ་པའོ། །འདི་ནི་ལོག་པར་སྒྲུབ་པའོ། །ཆོས་འདི་དག་ནི་ཀུན་ནས་ཉོན་མོངས་པའི་ཆ་དང་
འཐུན་པའོ། །ཆོས་འདི་དག་ནི་རྣམ་པར་བྱང་བའི་ཆ་དང་འཐུན་པའོ་ཞེས་དེ་ལྟར་ཡོན་ཏན་ཐམས་ཅད་ཡང་དག་པར་བླང་བ་རྗེས་སུ་སྟོན་པ་དང་། མི་དགེ་བ་ཐམས་ཅད་སྤང་བ་རྗེས་སུ་སྟོན་པ་དང་། དགེ་བའི་ལམ་གྱི་ཚོགས་ཐམས་ཅད་བླང་བ་རྗེས་སུ་སྟོན་པ་དང་། ལམ་
འདི་ནི་ཉན་ཐོས་ཀྱི་ཐེག་པ་ཡོངས་སུ་རྫོགས་པར་འགྱུར་བའོ། །ལམ་འདི་ནི་རང་སངས་རྒྱས་ཀྱི་ཐེག་པ་ཡོངས་སུ་རྫོགས་པར་འགྱུར་བའོ། །ལམ་འདི་ནི་ཐེག་པ་ཆེན་པོ་ཡོངས་སུ་རྫོགས་པར་འགྱུར་བའོ། །ཞེས་རྗེས་སུ་སྟོན་པ་གང་ཡིན་པ་སྟེ། དེ་དག་ཇི་
སྐད་བསྟན་པ་བཞིན་དུ་བསྒྲུབས་ན། གནས་གང་ཡིན་པ་དེ་རྗེས་སུ་འཐོབ་པར་མི་འགྱུར་བ་ནི་གནས་མ་ཡིན། སྐབས་མ་ཡིན་ཏེ། དེ་ནི་གནས་མེད་དོ། །ལས་འདི་ཡང་དག་པར་བླངས་ན་ནི་སེམས་ཅན་དམྱལ་བ་རྣམས་སུ་ཁྲིད་པར་བྱེད་དོ། །ལས་འདི་ཡང་
དག་པར་བླངས་ན་ནི་དུད་འགྲོའི་སྐྱེ་གནས་རྣམས་སུ་ཁྲིད་པར་བྱེད་དོ། །ལས་འདི་ཡང་དག་པར་བླངས་ན་ནི་གཤིན་རྗེའི་འཇིག་རྟེན་རྣམས་སུ་ཁྲིད་པར་བྱེད་དོ། །ལས་འདི་ཡང་དག་པར་བླངས་ན་ནི་ལྷ་རྣམས་སུ་ཁྲིད་པར་བྱེད་དོ། །ལས་འདི་ཡང་དག་པར་བླངས་ན་
ནི་མི་རྣམས་སུ་ཁྲིད་པར་བྱེད་དོ། །དེ་ལ་གང་དག་མི་དགེ་བ་སྤངས་ནས་དགེ་བ་ཡང་དག་པར་བླང་བའི་ཕྱིར་འཇུག་པ་དང་། འཕགས་པའི་ལམ་དུ་འཇུག་པ་དེ་དག་ནི་ལྷ་དང་མི་རྣམས་སུ་སྐྱེས་ནས་རིམ་གྱིས་ཡོངས་སུ་མྱ་ངན་ལས་འདའ་བའི་ཆོས་ཅན་དུ་འགྱུར་བ་དང་།
ཚུལ་དེ་ལྟ་བུས་ཁ་ན་མ་ཐོ་བ་མེད་པ་དང་། རྨོངས་པ་མེད་པ་རྗེས་སུ་སྟོན་པར་མཛད་པ་གང་ཡིན་པ་སྟེ། དེ་ནི་དེ་བཞིན་གཤེགས་པའི་རྗེས་སུ་བསྟན་པའི་ཆོ་འཕྲུལ་ཡིན་ནོ། །དེ་ལ་དེ་བཞིན་གཤེགས་པའི་རྫུ་འཕྲུལ་གྱི་ཆོ་འཕྲུལ་གང་ཞེ་ན། གང་དག་རྫུ་

འཕྲུལ་གྱིས་འདུལ་བའི་སེམས་ཅན་ང་རྒྱལ་དང་། རྒྱགས་པ་དང་། དྲེགས་པས་བཅོམ་པ་རྣམས་ལ་རྫུ་འཕྲུལ་གྱི་ཆོ་འཕྲུལ་ཀུན་ཏུ་སྟོན་པར་མཛད་དེ། འདི་ལྟ་སྟེ། གཅིག་ཏུ་གྱུར་ནས་དུ་མར་འགྱུར་རོ། །དུ་མར་གྱུར་ནས་གཅིག་ཏུ་འགྱུར་རོ། །སྣང་བར་
གྱུར་ཅིང་མི་སྣང་བར་ཡང་འགྱུར་རོ། །རྩིག་པ་ལ་ཡང་ཐད་ཀར་འགྲོའོ། །ར་བ་ལ་ཡང་ཐད་ཀར་འགྲོའོ། །རི་ལ་ཡང་མི་ཐོགས་པར་ཐད་ཀར་འགྲོའོ། །ས་ལ་ཡང་སྟེང་དུ་འབྱུང་བ་དང་བྱིའུ་ཟུལ་བྱེད་དེ་དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་མི་ནུབ་པར་
འགྲོ་སྟེ། དཔེར་ན་ས་ལ་བྱ་བ་བཞིན་ནོ། །ནམ་མཁའ་ལ་ཡང་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །ལུས་ཀྱི་སྟོད་ནས་མེ་འབར་བར་བྱེད་ཅིང་ལུས་ཀྱི་སྨད་ནས་ཆུའི་རྒྱུན་འབབ་པར་བྱེད་དོ། །ལུས་ཀྱི་སྨད་ནས་མེ་འབར་བར་བྱེད་ཅིང་ལུས་ཀྱི་སྟོད་
ནས་ཆུའི་རྒྱུན་འབབ་པར་བྱེད་དོ། །ཉི་མ་དང་ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་ལ། འདི་ལྟར་མཐུ་ཆེ་བ། འདི་ལྟར་གཟི་བརྗིད་ཆེ་བ་ལ་ཡང་ལག་པས་འཛིན་ཅིང་ཀུན་ཏུ་ཉུག་པར་བྱེད་དོ། །ཚངས་པའི་འཇིག་རྟེན་གྱི་བར་དུ་ཡང་ལུས་ཀྱིས་དབང་སྒྱུར་རོ། །
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་ཀུན་ཏུ་འབར་བར་སྟོན་ཏེ། སེམས་ཅན་ཡོངས་སུ་སྨིན་པར་བྱ་བའི་ཕྱིར། རྫུ་འཕྲུལ་གྱི་རྣམ་པར་འཕྲུལ་པའི་ཁྱད་པར་ཅི་དང་ཅི་ལྟ་བུས་སེམས་ཅན་རྣམས་འདུལ་བར་འགྱུར་བ་དེ་དང་དེ་ལྟ་བུའི་རྫུ་
འཕྲུལ་གྱི་རྣམ་པ་དག་མངོན་པར་སྒྲུབ་པར་བྱེད་དོ། །དེ་ནི་དེ་བཞིན་གཤེགས་པའི་རྫུ་འཕྲུལ་གྱི་ཆོ་འཕྲུལ་ཡིན་ནོ། །ལྷའི་བུ་ད་ནི་ཆོ་འཕྲུལ་གསུམ་པོ་དེ་དག་གིས་སེམས་ཅན་རྣམས་འདུལ་བར་བྱེད་དོ། །དེ་ནས་བཅོམ་ལྡན་འདས་ལ་ལྷའི་བུ་དེད་དཔོན་
གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོ་འཕྲུལ་དེ་དག་མ་ལགས་པའི་ཆོ་འཕྲུལ་དམ་པ་གཞན་ཅི་ཞིག་མངའ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་ཡོད་དོ། །དེ་ནས་བཅོམ་ལྡན་འདས་ཀྱིས་འཇམ་

དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཆོ་འཕྲུལ་བསྟན་པའི་ཆོས་ཀྱི་རྣམ་གྲངས་གང་ཐོས་ན་ཟབ་མོ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བཟོད་པ་ཐོབ་པར་འགྱུར་བ་དང་། བདུད་ཀྱི་ཕྱོགས་
ཀྱང་ཤིན་ཏུ་ཚར་བཅད་པར་འགྱུར་བ་དང་། དེ་བཞིན་གཤེགས་པ་རྣམས་ཀྱི་བྱང་ཆུབ་འདི་ཡང་ཡུན་རིང་དུ་གནས་པར་འགྱུར་བའི་ཆོ་འཕྲུལ་བསྟན་པ་ཞེས་བྱ་བའི་ཆོས་ཀྱི་རྣམ་གྲངས་འདི་ལ་ཁྱོད་སྤོབས་པར་གྱིས་ཤིག །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་
དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ནི་བཞེད་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྒྱ་མཚོ་ཆེན་པོའི་ཆབ་ཀྱི་ཕུང་པོ་གང་ལགས་པ་དེ་ཐམས་ཅད་ཕྱག་གི་ཁྱོར་བ་ཡ་གཅིག་ཏུ་སྩལ་ཀྱང་ཆབ་ཀྱི་སེམས་
ཅན་རྣམས་ལ་ཡང་གནོད་པར་མི་འགྱུར་ཏེ། བཅོམ་ལྡན་འདས་དེ་བཞིན་གཤེགས་པ་ལ་ནི་ཆོ་འཕྲུལ་འདི་མངའ་ལགས་སོ། །ཡང་འདི་ནི་ཆོ་འཕྲུལ་དམ་པ་ལགས་ཏེ། གང་དེ་བཞིན་གཤེགས་པས་བརྗོད་དུ་མ་མཆིས་པ་དང་། ཡི་གེ་མ་མཆིས་པ་དང་། བསྙད་
དུ་མ་མཆིས་པ་དང་། སྐྱེ་བ་མ་མཆིས་པ་དང་། འབྱུང་བ་མ་མཆིས་པ་དང་། མིང་མ་མཆིས་པ་དང་། མཚན་མ་མ་མཆིས་པ་དང་། སྒྲ་མ་མཆིས་པ་དང་། དབྱངས་མ་མཆིས་པ་དང་། ཚིག་གི་ལམ་མ་མཆིས་པ་དང་། རྒྱུ་མཚན་མ་མཆིས་པ་དང་།
མཚན་ཉིད་མ་མཆིས་པ་དང་། སྤྱོད་པ་མ་མཆིས་པ་དང་། རྒྱུ་བ་མ་མཆིས་པ་དང་། ཀུན་ཏུ་འབྱུང་བ་མ་མཆིས་པ་དང་། རྣམ་པར་རིག་པ་མ་མཆིས་པ་དང་། འདུས་མ་བགྱིས་པ་དང་། སེམས་དང་། ཡིད་དང་། རྣམ་པར་ཤེས་པ་དང་བྲལ་བ་དང་། ཐ་
སྙད་ཐམས་ཅད་ཡང་དག་པར་ཆད་པ་དང་། ཞི་བ་དང་། བྱང་བ་དང་། ཕྲ་བ་དང་། མཐོང་བར་དཀའ་བ་དང་། བརྟག་ཏུ་མ་མཆིས་པ་དང་། རྟོག་གེའི་སྤྱོད་ཡུལ་མ་ལགས་པའི་ཆོས་མངོན་པར་རྫོགས་པར་སངས་རྒྱས་ནས་ཡི་གེ་དང་། ངེས་པའི་ཚིག་དང་། བརྡ་

དང་། ཐ་སྙད་ཀྱི་ལམ་དེ་དང་དེ་དག་གིས་ཆོས་དེ་དག་གཞན་དག་ལ་རྣམ་པར་རིག་པར་མཛད་པ་དེ་ནི་དེ་བཞིན་གཤེགས་པའི་ཆོ་འཕྲུལ་ཆེན་པོ་ལགས་སོ། །ལྷ་དང་བཅས་པའི་འཇིག་རྟེན་གྱིས་དེའི་གཏིང་མི་རྟོགས་ཤིང་། དམིགས་པ་དང་། མཚན་མ་དང་།
ཡོངས་སུ་རྟོག་པ་དང་བཅས་པའི་དགེ་སྦྱོང་དང་། བྲམ་ཟེ་ཐམས་ཅད་དངང་ཞིང་འཇུག་པར་མི་འགྱུར་བ་དེ་ཡང་དེ་བཞིན་གཤེགས་པའི་ཆོ་འཕྲུལ་ཆེན་པོ་ལགས་སོ། །བཅོམ་ལྡན་འདས་གཞན་ཡང་དེ་བཞིན་གཤེགས་པ་ནི་བཞེད་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་འདི་ཞལ་གྱི་སྒོར་སྩལ་ཀྱང་གླིང་ཆེན་པོ་བཞི་པའི་སེམས་ཅན་རྣམས་དང་། དགུང་ཟླ་དང་། གདུགས་དག་དང་། ཁོར་ཡུག་རྣམས་དང་། རན་དང་། ཤིང་གེལ་པ་དང་། སྨན་དང་། ནགས་ཚལ་རྣམས་ལ་ཡང་སྒྲིབ་པར་མི་འགྱུར་བ་དང་། སླར་ཕྱུང་སྟེ།
གནས་ཇི་ལྟ་བ་བཞིན་དུ་བཀོད་ཀྱང་སེམས་ཅན་རྣམས་ཀྱིས་འདི་ལྟར་བདག་ཅག་ཡུལ་གང་དུ་བཀོད་པ་དང་། བདག་ཅག་ཡུལ་གང་ནས་བཏོན་པ་ཡང་མ་འཚལ་ཏེ། བཅོམ་ལྡན་འདས་དེ་ཡང་དེ་བཞིན་གཤེགས་པའི་ཆོ་འཕྲུལ་ཆེན་པོ་ལགས་སོ། །འདི་ནི་ཆོ་འཕྲུལ་
ཆེན་པོ་དམ་པ་ལགས་ཏེ། གང་དེ་བཞིན་གཤེགས་པས་བརྗོད་དུ་མ་མཆིས་པ་དང་། ཡི་གེ་མ་མཆིས་པ་དང་། བསྙད་དུ་མ་མཆིས་པ་དང་། མིང་མ་མཆིས་པ་དང་། མཚན་མ་མ་མཆིས་པ་དང་། དེ་བཞིན་དུ་སྦྱར་ཏེ། སེམས་དང་། ཡིད་དང་། རྣམ་པར་ཤེས་
པ་དང་བྲལ་བ་དང་། ཐ་སྙད་ཐམས་ཅད་ཡང་དག་པར་ཆད་པ་དང་། ཞི་བ་དང་། བྱང་བ་དང་། ཕྲ་བ་དང་། མཐོང་བར་དཀའ་བ་དང་། བརྟག་ཏུ་མ་མཆིས་པ་དང་། རྟོག་གེའི་སྤྱོད་ཡུལ་མ་ལགས་པའི་བར་གྱི་ཆོས་ཐམས་ཅད་མངོན་པར་རྫོགས་པར་སངས་རྒྱས་ནས་
ཡི་གེ་དང་། ངེས་པའི་ཚིག་དང་། བརྡ་དང་། ཐ་སྙད་ཀྱི་ལམ་དེ་དང་དེ་དག་གིས་ཆོས་དེ་བསྟན་པ་དེ་ཡང་དེ་བཞིན་གཤེགས་པའི་ཆོ་འཕྲུལ་ཆེན་པོ་ལགས་སོ། །བཅོམ་ལྡན་འདས་གཞན་ཡང་གང་དག་དེ་བཞིན་གཤེགས་པའི་སྐུ་དང་ལྡན་པའི་ཆོ་འཕྲུལ་དེ་དག་ཐམས་ཅད་ནི་མཚན་མའི་

དངོས་པོ་དང་བཅས་པའི་སེམས་ཅན་རྣམས་ཀུན་ནས་འདྲེན་པར་མཛད་པ་ལགས་སོ། །འདི་ཡང་དེ་བཞིན་གཤེགས་པའི་ཆོ་འཕྲུལ་ཆེན་པོ་ལགས་ཏེ། འདི་ལྟ་སྟེ། བདག་མ་མཆིས་པ་ལ་བདག་ཏུ་ཐ་སྙད་འདོགས་པ་དང་། སེམས་ཅན་མ་མཆིས་པ་ལ་སེམས་ཅན་
དུ་ཐ་སྙད་འདོགས་པ་དང་། སྲོག་མ་མཆིས་པ་ལ་སྲོག་ཏུ་ཐ་སྙད་འདོགས་པ་དང་། གསོ་བ་མ་མཆིས་བ་ལ་གསོ་བར་ཐ་སྙད་འདོགས་པ་དང་། གང་ཟག་མ་མཆིས་པ་ལ་གང་ཟག་ཏུ་ཐ་སྙད་འདོགས་པ་དང་། ཤེད་ལས་སྐྱེས་མ་མཆིས་པ་ལ་ཤེད་ལས་སྐྱེས་སུ་ཐ་སྙད་
འདོགས་པ་དང་། ཤེད་བུ་མ་མཆིས་པ་ལ་ཤེད་བུར་ཐ་སྙད་འདོགས་པ་དང་། མིང་མ་མཆིས་པ་ལ་མིང་དུ་ཐ་སྙད་འདོགས་པ་དང་། གཟུགས་མ་མཆིས་པ་ལ་གཟུགས་སུ་ཐ་སྙད་འདོགས་པ་དང་། ཚོར་བ་མ་མཆིས་པ་ལ་ཚོར་བར་ཐ་སྙད་འདོགས་པ་དང་། འདུ་
ཤེས་མ་མཆིས་པ་ལ་འདུ་ཤེས་སུ་ཐ་སྙད་འདོགས་པ་དང་། འདུ་བྱེད་རྣམས་མ་མཆིས་པ་ལ་འདུ་བྱེད་རྣམས་སུ་ཐ་སྙད་འདོགས་པ་དང་། རྣམ་པར་ཤེས་པ་མ་མཆིས་པ་ལ་རྣམ་པར་ཤེས་པར་ཐ་སྙད་འདོགས་པ་དང་། ཕུང་པོ་མ་མཆིས་པ་ལ་ཕུང་པོར་ཐ་སྙད་འདོགས་པ་
དང་། ཁམས་མ་མཆིས་པ་ལ་ཁམས་སུ་ཐ་སྙད་འདོགས་པ་དང་། སྐྱེ་མཆེད་མ་མཆིས་པ་ལ་སྐྱེ་མཆེད་དུ་ཐ་སྙད་འདོགས་པ་དང་། མིག་སྟོང་ཞེས་བགྱི་བར་ཐ་སྙད་འདོགས་ཀྱང་མིག་ནི་འདི་སྙམ་དུ་བདག་སྟོང་ངོ་སྙམ་དུ་མི་སེམས་པ་དང་། གཟུགས་སྟོང་ཞེས་བགྱི་བར་ཐ་སྙད་
འདོགས་ཀྱང་གཟུགས་ནི་འདི་སྙམ་དུ་བདག་སྟོང་ངོ་སྙམ་དུ་མི་སེམས་པ་དང་། མིག་གི་རྣམ་པར་ཤེས་པ་སྟོང་ཞེས་བགྱི་བར་ཐ་སྙད་འདོགས་ཀྱང་མིག་གི་རྣམ་པར་ཤེས་པ་ནི་འདི་སྙམ་དུ་བདག་སྟོང་ངོ་སྙམ་དུ་མི་སེམས་པ་དང་། དེ་བཞིན་དུ་རྣ་བ་དང་། སྒྲ་དང་། རྣ་བའི་རྣམ་
པར་ཤེས་པ་དང་། སྣ་དང་། དྲི་དང་། སྣའི་རྣམ་པར་ཤེས་པ་དང་། ལྕེ་དང་། རོ་དང་། ལྕེའི་རྣམ་པར་ཤེས་པ་དང་། ལུས་དང་། རེག་བྱ་དང་། ལུས་ཀྱི་རྣམ་པར་ཤེས་པ་དང་། ཡིད་སྟོང་ཞེས་བགྱི་བར་ཐ་སྙད་འདོགས་ཀྱང་ཡིད་ནི་འདི་སྙམ་དུ་བདག་སྟོང་ངོ་

སྙམ་དུ་མི་སེམས་པ་དང་། ཆོས་རྣམས་སྟོང་ཞེས་བགྱི་བར་ཐ་སྙད་འདོགས་ཀྱང་ཆོས་རྣམས་ནི་འདི་སྙམ་དུ་བདག་ཅག་སྟོང་ངོ་སྙམ་དུ་མི་སེམས་པ་དང་། ཡིད་ཀྱི་རྣམ་པར་ཤེས་པ་སྟོང་ཞེས་བགྱི་བར་ཐ་སྙད་འདོགས་ཀྱང་ཡིད་ཀྱི་རྣམ་པར་ཤེས་པ་ནི་འདི་སྙམ་དུ་བདག་སྟོང་ངོ་སྙམ་
དུ་མི་སེམས་ཏེ། འདི་ལྟར་བེམས་པོ་དང་། སེམས་པ་མ་མཆིས་པ་དང་། དངོས་པོ་མ་མཆིས་པ་དང་། མིང་མ་མཆིས་པ་དང་། མཚན་མ་མ་མཆིས་པའི་ཆོས་འདི་ལྟ་བུ་འདི་དག་སེམས་ཅན་གཞན་དང་། གང་ཟག་གཞན་དག་ལ་ཡང་དག་པར་གོ་བར་མཛད་པ་གང་
ལགས་པ་འདི་ནི་དེ་བཞིན་གཤེགས་པའི་ཆོ་འཕྲུལ་ཆེན་པོ་ལགས་ཏེ། ཆོ་འཕྲུལ་དེ་ནི་མིག་དང་ལྡན་པ་ཡང་མ་ལགས། གཟུགས་དང་ལྡན་པ་ཡང་མ་ལགས། མིག་གི་རྣམ་པར་ཤེས་པ་དང་ལྡན་པ་ཡང་མ་ལགས། རྣ་བ་དང་ལྡན་པ་ཡང་མ་ལགས། སྒྲ་དང་
ལྡན་པ་ཡང་མ་ལགས། རྣ་བའི་རྣམ་པར་ཤེས་པ་དང་ལྡན་པ་ཡང་མ་ལགས། སྣ་དང་ལྡན་པ་ཡང་མ་ལགས། དྲི་དང་ལྡན་པ་ཡང་མ་ལགས། སྣའི་རྣམ་པར་ཤེས་པ་དང་ལྡན་པ་ཡང་མ་ལགས། ལྕེ་དང་ལྡན་པ་ཡང་མ་ལགས། རོ་དང་ལྡན་པ་ཡང་མ་
ལགས། ལྕེའི་རྣམ་པར་ཤེས་པ་དང་ལྡན་པ་ཡང་མ་ལགས། ལུས་དང་ལྡན་པ་ཡང་མ་ལགས། རེག་བྱ་དང་ལྡན་པ་ཡང་མ་ལགས། ལུས་ཀྱི་རྣམ་པར་ཤེས་པ་དང་ལྡན་པ་ཡང་མ་ལགས། ཡིད་དང་ལྡན་པ་ཡང་མ་ལགས། ཆོས་རྣམས་དང་ལྡན་པ་ཡང་མ་
ལགས། ཡིད་ཀྱི་རྣམ་པར་ཤེས་པ་དང་ལྡན་པ་ཡང་མ་ལགས་ཏེ། དེ་ལྟ་བུའི་ཆོ་འཕྲུལ་དེ་ནི་ཡུལ་མ་མཆིས་པའི་ཆོ་འཕྲུལ་ལགས་སོ། །དེ་ནི་ཡུལ་དང་བྲལ་བའི་ཆོ་འཕྲུལ་ལགས་ཏེ། ཆོ་འཕྲུལ་དེ་ནི་ལུས་དང་ལྡན་པར་བལྟ་བ་མ་ལགས། སེམས་དང་། ཡིད་
དང་། རྣམ་པར་ཤེས་པ་དང་ལྡན་པར་བལྟ་བ་མ་ལགས་ཏེ། དེའི་སླད་དུ་ཆོ་འཕྲུལ་དེ་ནི་འཇིག་རྟེན་ཐམས་ཅད་གློ་བ་མི་ཆེས་པར་འགྱུར་བ་ལགས་སོ། །དེ་ཅིའི་སླད་དུ་ཞེ་ན། འཇིག་རྟེན་ཞེས་བགྱི་བ་ནི་ཕུང་པོ་ལྔ་པོ་དག་ལགས་ཏེ། ཕུང་པོ་ལྔ་པོ་མི་རྟག་པ་དེ་ལ་བྱིས་

པ་རྣམས་མངོན་པར་ཞེན་ཅིང་། དེ་དག་གིས་ཕུང་པོ་ལྔ་པོ་དག་རྟག་པར་གཟུང་བའི་སླད་དུ་སྟེ། དེའི་སླད་དུ་ཆོ་འཕྲུལ་དེ་ནི་འཇིག་རྟེན་ཐམས་ཅད་གློ་བ་མི་ཆེས་པར་འགྱུར་བ་ལགས་སོ། །འཇིག་རྟེན་ནི་ཕུང་པོ་ལྔ་པོ་དག་རྟག་ཅེས་བགྱི་བར་གློ་བ་ཆེས་པས་ན་
དེ་དག་མི་རྟག་གོ་ཞེས་བཤད་ན་འཇིག་རྟེན་ཐམས་ཅད་གློ་བ་མི་ཆེས་ལགས་སོ། །འཇིག་རྟེན་ནི་ཕུང་པོ་ལྔ་པོ་དག་བདེ་ཞེས་བགྱི་བར་གློ་བ་ཆེས་པས་ན་དེ་དག་སྡུག་བསྔལ་ལོ་ཞེས་བཤད་ན་འཇིག་རྟེན་ཐམས་ཅད་གློ་བ་མི་ཆེས་ལགས་སོ། །འཇིག་རྟེན་ནི་ཕུང་པོ་ལྔ་པོ་དག་
བདག་ཅེས་བགྱི་བར་གློ་བ་ཆེས་པས་ན་དེ་དག་བདག་མ་མཆིས་སོ་ཞེས་བཤད་ན་འཇིག་རྟེན་ཐམས་ཅད་གློ་བ་མི་ཆེས་ལགས་སོ། །འཇིག་རྟེན་ནི་ཕུང་པོ་ལྔ་པོ་དག་སྡུག་ཅེས་བགྱི་བར་གློ་བ་ཆེས་པས་ན་དེ་དག་མི་སྡུག་གོ་ཞེས་བཤད་ན་འཇིག་རྟེན་ཐམས་ཅད་གློ་བ་མི་ཆེས་ལགས་
སོ། །འཇིག་རྟེན་ནི་ཕུང་པོ་ལྔ་པོ་དག་བདག་གི་ཞེས་བགྱི་བར་གློ་བ་ཆེས་པས་ན་དེ་དག་བདག་པོ་མ་མཆིས་སོ་ཞེས་བཤད་ན་འཇིག་རྟེན་ཐམས་ཅད་གློ་བ་མི་ཆེས་ལགས་སོ། །འཇིག་རྟེན་ནི་ཕུང་པོ་ལྔ་པོ་དག་ཡང་དག་པ་ཞེས་བགྱི་བར་གློ་བ་ཆེས་པས་ན་དེ་དག་ཡང་དག་པ་
མ་ལགས་སོ་ཞེས་བཤད་ན་འཇིག་རྟེན་ཐམས་ཅད་གློ་བ་མི་ཆེས་ལགས་ཏེ། དེའི་སླད་དུ་དེ་བཞིན་གཤེགས་པའི་ཆོ་འཕྲུལ་དེ་ནི་འཇིག་རྟེན་ཐམས་ཅད་གློ་བ་མི་ཆེས་པར་འགྱུར་བ་ལགས་སོ། །ཆོ་འཕྲུལ་དེ་ལ་ནི་སེམས་རངས་པར་མི་འགྱུར་ལགས་ཏེ། ཆོ་འཕྲུལ་དེ་
ནི་བསམ་གྱིས་མི་ཁྱབ་པ་ལགས་སོ། །ཆོ་འཕྲུལ་དེ་ནི་མིག་ཏུ་བགྲང་བ་མ་ལགས། གཟུགས་སུ་བགྲང་བ་མ་ལགས་ཏེ། ཆོ་འཕྲུལ་དེ་ནི་མིག་དང་གཟུགས་ཀྱི་ཡུལ་ལས་ཡང་དག་པར་འདས་པ་ལགས་སོ། །ཆོ་འཕྲུལ་དེ་ནི་རྣ་བར་བགྲང་བ་མ་ལགས། སྒྲར་
བགྲང་བ་མ་ལགས་ཏེ། ཆོ་འཕྲུལ་དེ་ནི་རྣ་བ་དང་སྒྲའི་ཡུལ་ལས་ཡང་དག་པར་འདས་པ་ལགས་སོ། །དེ་བཞིན་དུ་སྦྱར་ཏེ། ཆོ་འཕྲུལ་དེ་ནི་ཡིད་དུ་བགྲང་བ་མ་ལགས། ཆོས་སུ་བགྲང་བ་ཡང་མ་ལགས་ཏེ། ཆོ་འཕྲུལ་དེ་ནི་ཡིད་དང་ཆོས་ཀྱི་ཡུལ་ལས་ཡང་དག་

པར་འདས་པ་ལགས་སོ། །ཆོ་འཕྲུལ་དེ་ནི་ཤེས་པའི་སྤྱོད་ཡུལ་མ་ལགས། རངས་པར་བགྱིད་བ་མ་ལགས་ཏེ། ཆོ་འཕྲུལ་དེ་ནི་རྣམ་པར་རིག་པར་བགྱི་བ་མ་ལགས་སོ། །སྟོང་པ་ཉིད་ནི་བརྗོད་དུ་མ་མཆིས་པ་ལགས་ན་སྟོང་པ་ཉིད་རྗོད་པ་དེ་ནི་ཆོ་འཕྲུལ་ལགས་སོ། །
མཚན་མ་མ་མཆིས་པ་ནི་བརྗོད་དུ་མ་མཆིས་པ་ལགས་ན་མཚན་མ་མ་མཆིས་པ་རྗོད་པ་དེ་ནི་ཆོ་འཕྲུལ་ལགས་སོ། །སྨོན་པ་མ་མཆིས་པ་ནི་བརྗོད་དུ་མ་མཆིས་པ་ལགས་ན་སྨོན་པ་མ་མཆིས་པ་བརྗོད་པ་དེ་ནི་ཆོ་འཕྲུལ་ལགས་སོ། །མངོན་པར་འདུ་བགྱི་བ་མ་མཆིས་པ་ནི་བརྗོད་
དུ་མ་མཆིས་པ་ལགས་ན་མངོན་པར་འདུ་བགྱི་བ་མ་མཆིས་པ་བརྗོད་པ་དེ་ནི་ཆོ་འཕྲུལ་ལགས་སོ། །སྐྱེ་བ་མ་མཆིས་པ་ནི་བརྗོད་དུ་མ་མཆིས་པ་ལགས་ན་སྐྱེ་བ་མ་མཆིས་པ་རྗོད་པ་དེ་ནི་ཆོ་འཕྲུལ་ལགས་སོ། །འབྱུང་བ་མ་མཆིས་པ་ནི་བརྗོད་དུ་མ་མཆིས་པ་ལགས་ན་འབྱུང་བ་མ་མཆིས་
པ་རྗོད་པ་དེ་ནི་ཆོ་འཕྲུལ་ལགས་སོ། །དངོས་པོ་མ་མཆིས་པ་ནི་བརྗོད་དུ་མ་མཆིས་པ་ལགས་ན་དངོས་པོ་མ་མཆིས་པ་རྗོད་པ་དེ་ནི་ཆོ་འཕྲུལ་ལགས་སོ། །མཚན་ཉིད་མ་མཆིས་པ་ནི་བརྗོད་དུ་མ་མཆིས་པ་ལགས་ན་མཚན་ཉིད་མ་མཆིས་པ་རྗོད་པ་དེ་ནི་ཆོ་འཕྲུལ་ལགས་སོ། །འགག་
པ་མ་མཆིས་པ་ནི་བརྗོད་དུ་མ་མཆིས་པ་ལགས་ན་འགག་པ་མ་མཆིས་པ་རྗོད་པ་དེ་ནི་ཆོ་འཕྲུལ་ལགས་སོ། །མྱ་ངན་ལས་འདས་པ་ནི་བརྗོད་དུ་མ་མཆིས་པ་ལགས་ན་མྱ་ངན་ལས་འདས་པ་རྗོད་པ་དེ་ནི་ཆོ་འཕྲུལ་ལགས་སོ། །འདི་ལྟ་སྟེ། བདག་ཏུ་དམིགས་པ་མ་མཆིས་པ་
དང་། སེམས་ཅན་དུ་ཀུན་ཏུ་འབྱུང་བ་མ་མཆིས་པ་དང་། བྱང་ཆུབ་ལ་རློམ་སེམས་མ་མཆིས་པའི་འཁོར་གསུམ་ཡོངས་སུ་དག་པའི་སྦྱིན་པ་དེ་ནི་ཆོ་འཕྲུལ་ལགས་སོ། །འདི་ལྟ་སྟེ། ལུས་གཡོ་བ་མ་མཆིས་པ་དང་། ངག་བརྗོད་པ་མ་མཆིས་པ་དང་། སེམས་
རྒྱུ་བ་མ་མཆིས་པའི་འཁོར་གསུམ་ཡོངས་སུ་དག་པའི་ཚུལ་ཁྲིམས་དེ་ནི་ཆོ་འཕྲུལ་ལགས་སོ། །འདི་ལྟ་སྟེ། སྲེད་པར་སྒྲོ་འདོགས་པ་མ་མཆིས་པ་དང་། སེམས་སྐད་ཅིག་ཏུ་འཇིག་པ་དང་། ལུས་དང་སེམས་རྣམ་པར་མི་རྟོག་པའི་འཁོར་གསུམ་ཡོངས་སུ་དག་

པའི་བཟོད་པ་དེ་ནི་ཆོ་འཕྲུལ་ལགས་སོ། །འདི་ལྟ་སྟེ། བླང་བ་མ་མཆིས་པ་དང་། དོར་བ་མ་མཆིས་པ་དང་། གནས་པ་མ་མཆིས་པའི་འཁོར་གསུམ་ཡོངས་སུ་དག་པའི་བརྩོན་འགྲུས་དེ་ནི་ཆོ་འཕྲུལ་ལགས་སོ། །འདི་ལྟ་སྟེ། ནང་ཉེ་བར་ཞི་བ་དང་། ཕྱི་
རོལ་ཏུ་རྒྱུ་བ་མ་མཆིས་པ་དང་། སེམས་བསགས་པ་མ་མཆིས་པའི་འཁོར་གསུམ་ཡོངས་སུ་དག་པའི་བསམ་གཏན་དེ་ནི་ཆོ་འཕྲུལ་ལགས་སོ། །འདི་ལྟ་སྟེ། ངར་འཛིན་པ་རྣམ་པར་སྤངས་པ་དང་། ང་ཡིར་འཛིན་པ་བོར་བ་དང་། ལྟ་བའི་རྣམ་པ་ཐམས་ཅད་དང་བྲལ་
བའི་འཁོར་གསུམ་ཡོངས་སུ་དག་པའི་ཤེས་རབ་དེ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་རྣམ་པར་བྲལ་བ་མ་མཆིས་པ་ལགས་ན་དེ་དག་རྣམ་པར་བྲལ་བར་བཤད་པ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་དངོས་པོ་མ་མཆིས་པ་ལགས་ན་རང་གི་ངོ་བོ་དང་
བྲལ་བར་བཤད་པ་དེ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་དབྱེར་མ་མཆིས་པ་ལགས་ན་ཡི་གེས་ཀུན་ཏུ་ཕྱེ་སྟེ་བཤད་པ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་འོང་བ་མ་མཆིས་པ་དང་། འགྲོ་བ་མ་མཆིས་པ་ལགས་ན་འོང་བ་དང་འགྲོ་བར་བཤད་པ་ནི་ཆོ་
འཕྲུལ་ལགས་སོ། །ཆོས་ཐམས་ཅད་ནི་འབྱུང་བ་མ་མཆིས་པ་ལགས་ན་འབྱུང་བར་བཤད་པ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་མངོན་པར་རྟོགས་པ་གཅིག་པ་ལགས་ན་འབྲས་བུ་རྣམ་པར་དགོད་པ་བཤད་པ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་རོ་
གཅིག་པ་ལགས་ན་ཐེག་པ་གསུམ་དུ་རྣམ་པར་དགོད་པ་བཤད་པ་ནི་ཆོ་འཕྲུལ་ལགས་སོ། །ཆོས་ཀྱི་དབྱིངས་ན་དབྱེར་མ་མཆིས་པ་ལགས་ན་ཆོས་ཐམས་ཅད་རྣམ་པར་དགོད་པ་བཤད་པ་ནི་ཆོ་འཕྲུལ་ལགས་སོ། །སངས་རྒྱས་ཐམས་ཅད་ནི་སངས་རྒྱས་གཅིག་པ་ལགས་ན་
སངས་རྒྱས་དཔག་ཏུ་མ་མཆིས་པར་བཤད་པ་ནི་ཆོ་འཕྲུལ་ལགས་སོ། །ཞིང་ཐམས་ཅད་ནི་ཞིང་གཅིག་པ་ལགས་ན་ཞིང་སྣ་ཚོགས་བཤད་པ་ནི་ཆོ་འཕྲུལ་ལགས་སོ། །སེམས་ཅན་ཐམས་ཅད་ནི་སེམས་ཅན་གཅིག་པ་ལགས་ན་སེམས་ཅན་གྱི་རིམ་པ་བཤད་པ་ནི་ཆོ་འཕྲུལ་

ལགས་སོ། །ཆོས་ཐམས་ཅད་ནི་ཆོས་གཅིག་པ་ལགས་ན་ཐ་མ་དང་མཆོག་དང་བར་མར་བཤད་པ་ནི་ཆོ་འཕྲུལ་ལགས་སོ། །ཆོས་ཐམས་ཅད་ནི་རྣམ་པར་བསྒྲུབས་པ་མ་མཆིས་པ་ལགས་ན་རྣམ་པར་བསྒྲུབས་པའི་མཚན་ཉིད་བཤད་པ་ནི་ཆོ་འཕྲུལ་ལགས་སོ། །
ཆོས་ཐམས་ཅད་ནི་རྣམ་པར་རིག་པ་མ་མཆིས་པ་ལགས་ན་གཞན་ལ་རྣམ་པར་རིག་པར་བཤད་པ་ནི་ཆོ་འཕྲུལ་ལགས་སོ། །དེ་ནས་ལྷའི་བུ་དེད་དཔོན་གྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་ཇི་སྐད་སྨྲས་པའི་དོན་ཁོ་
བོས་ཤེས་པ་ལྟར་ན་ཇི་ཙམ་དུ་བརྗོད་པའི་ཆོས་དེ་དག་ཐམས་ཅད་ནི་ཆོ་འཕྲུལ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ཆོས་ཐམས་ཅད་ནི་བརྗོད་དུ་མེད་པ་ཡིན་པས་དེ་དག་ལ་བརྗོད་པ་གང་ཡིན་པ་དེ་ནི་ཆོ་འཕྲུལ་ཆེན་པོ་
ཡིན་ནོ། །བསྟན་པ་འདི་བཤད་པ་ན་ལྷའི་བུ་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་ལྔ་བརྒྱ་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་ལྷའི་བུ་དེད་དཔོན་ལ་
འདི་སྐད་ཅེས་སྨྲས་སོ། །ལྷའི་བུ་ཅི་ཁྱོད་ཆོ་འཕྲུལ་བསྟན་པ་འདི་ཐོས་ན་སྐྲག་པར་མི་འགྱུར་རམ། ལྷའི་བུས་སྨྲས་པ། བཙུན་པ་ཤ་ར་དྭ་ཏིའི་བུ་ཁོ་བོ་ཉིད་ཀྱང་ཆོ་འཕྲུལ་ཡིན་ན་དེ་ལ་ཁོ་བོ་སྐྲག་པར་འགྱུར་དུ་ཅི་ཡོད། ཤ་ར་དྭ་ཏིའི་བུས་སྨྲས་པ། ལྷའི་བུ་ཁྱོད་ཅི་ལས་
བསམས་ཏེ་དེ་སྐད་སྨྲས། ལྷའི་བུས་སྨྲས་པ། བཙུན་པ་ཤ་ར་དྭ་ཏིའི་བུ། ཆོས་ཐམས་ཅད་ནི་འཕོ་བ་མེད་པ་ཡིན་ན་དེ་ལ་དགེ་བ་དང་མི་དགེ་བའི་ཆོས་འཕོ་བ་གང་ཡིན་པ་དེ་ནི་ཆོ་འཕྲུལ་ཆེན་པོ་ཡིན་ནོ། །བཙུན་པ་ཤ་ར་དྭ་ཏིའི་བུ་དགེ་བའི་ལས་མངོན་པར་འདུ་བྱ་བ་
གང་གིས་ཁོ་བོ་ལྷ་རྣམས་ཀྱི་ནང་དུ་སྐྱེས་ཏེ། བདག་ཉིད་ཆེན་པོ་འདི་ཡང་ཐོབ་པའི་དགེ་བའི་ལས་མངོན་པར་འདུ་བྱ་བ་གང་ཡིན་པ་དེ་ནི་སེམས་པར་མི་བྱེད་ཅིང་རྣམ་པར་ཤེས་པར་མི་བྱེད་དོ། །དེ་ལྟ་བས་ན་སེམས་ཅན་ཐམས་ཅད་ཀྱི་འཆི་འཕོ་དང་སྐྱེ་བ་ཡང་སེམས་པར་མི་བྱེད་ཅིང་

རྣམ་པར་ཤེས་པར་མི་བྱེད་དེ། སེམས་པར་མི་བྱེད་ཅིང་རྣམ་པར་ཤེས་པར་མི་བྱེད་པ་གང་ཡིན་པ་དེ་ནི་ཆོ་འཕྲུལ་ཆེན་པོ་ཡིན་ཏེ། བཅོམ་ལྡན་འདས་ཀྱིས་ཇི་སྐད་དུ་ལས་རྣམས་ཀྱི་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་བོ། །ཀླུ་རྣམས་ཀྱི་ཀླུའི་ཡུལ་
ཡང་བསམ་གྱིས་མི་ཁྱབ་བོ། །བསམ་གཏན་པ་རྣམས་ཀྱི་བསམ་གཏན་གྱི་ཡུལ་ཡང་བསམ་གྱིས་མི་ཁྱབ་བོ། །སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཡུལ་ཡང་བསམ་གྱིས་མི་ཁྱབ་བོ་ཞེས་གསུངས་པ་ལྟ་བུ་སྟེ། དེ་ལྟ་བས་ན་ཆོས་ཐམས་ཅད་ནི་བསམ་གྱིས་
མི་ཁྱབ་པ་སྟེ། བསམ་གྱིས་མི་ཁྱབ་པ་གང་ཡིན་པ་དེ་ནི་ཆོ་འཕྲུལ་ཆེན་པོ་ཡིན་ནོ། །ཡང་གནས་བརྟན་ཤ་ར་དྭ་ཏིའི་བུས་འདི་སྐད་དུ་ལྷའི་བུ་ཅི་ཁྱོད་བཅོམ་ལྡན་འདས་ཀྱིས་ཆོ་འཕྲུལ་བསྟན་པ་གང་ཡིན་པ་དེ་ཐོས་ན་སྐྲག་པར་མི་འགྱུར་རམ་ཞེས་ཟེར་བ་ནི། བཙུན་པ་ཤ་ར་དྭ་
ཏིའི་བུ་ཅི་དེ་བཞིན་གཤེགས་པས་ཆོ་འཕྲུལ་བསྟན་པ་གང་ཡིན་པ་དེས་ནམ་མཁའི་ཁམས་སྐྲག་པར་འགྱུར་རམ། སྨྲས་པ། ལྷའི་བུ་དེ་ནི་མ་ཡིན་ནོ། །སྨྲས་པ། བཙུན་པ་ཤ་ར་དྭ་ཏིའི་བུ་གལ་ཏེ་དེ་བཞིན་གཤེགས་པས་ཆོ་འཕྲུལ་བསྟན་པ་དེས་ནམ་མཁའི་ཁམས་
སྐྲག་པར་མི་འགྱུར་ན་ཁོ་བོ་ཡང་སྐྲག་པར་མི་འགྱུར་རོ། །སྨྲས་པ། ལྷའི་བུ་ཅི་ཁྱོད་ནམ་མཁའ་ཡིན་ནམ། སྨྲས་པ། བཙུན་པ་ཤ་ར་དྭ་ཏིའི་བུ་ཁོ་བོ་ནི་ནམ་མཁའ་ཡིན་ནོ། །སྨྲས་པ། ལྷའི་བུ་ཁྱོད་ཅི་ལས་བསམས་ཏེ་དེ་སྐད་སྨྲ། སྨྲས་པ། བཙུན་པ་ཤ་ར་དྭ་
ཏིའི་བུ་ཅི་བཅོམ་ལྡན་འདས་ཀྱིས་ནང་གི་ནམ་མཁའི་ཁམས་སུ་གསུངས་པ་གང་ཡིན་པ་དང་། ཕྱི་རོལ་གྱི་ནམ་མཁའི་ཁམས་སུ་གསུངས་པ་གང་ཡིན་པ་དེ་ཉིད་ནམ་མཁའི་ཁམས་མ་ཡིན་ནམ། སྨྲས་པ། ལྷའི་བུ་དེ་ནི་ཡིན་ནོ། །སྨྲས་པ། བཙུན་པ་ཤ་ར་དྭ་ཏིའི་
བུ་དེ་ལྟ་བས་ན། སེམས་ཅན་ཐམས་ཅད་ཀྱང་ནམ་མཁའི་ཁམས་ཀྱི་རང་བཞིན་ཅན་ཡིན་ནོ། །སྨྲས་པ། ལྷའི་བུ་ཇི་ལྟར་ཁྱོད་ཀྱིས་བསྟན་པ་བཞིན་དུ་ཁྱོད་ཉིད་ཀྱང་རིང་པོ་མི་ཐོགས་པར་ཆོ་འཕྲུལ་དེ་དག་ཉིད་ཉེ་བར་སྟོན་པར་འགྱུར་རོ། །སྨྲས་པ། བཙུན་པ་ཤ་ར་དྭ་

ཏིའི་བུ་ཆོ་འཕྲུལ་དེ་དག་ནི་ཉེ་བར་བསྟན་པར་མི་ནུས་སོ། །དེ་ཅིའི་ཕྱིར་ཞེ་ན། ཆོ་འཕྲུལ་དེ་དག་ནི་ཡུལ་ཐམས་ཅད་ལས་ཡང་དག་པར་འདས་པ་ཡིན་པའི་ཕྱིར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་
ལྷའི་བུ་དེད་དཔོན་འདི་དེ་ལྟ་བུ་སྟོན་པ་ལས་ན་འདིས་ནི་སྔོན་གྱི་རྒྱལ་བ་ལ་ལྷག་པར་བགྱི་བ་བགྱིས་ཤིང་འཇམ་དཔལ་གཞོན་ནུར་གྱུར་པ་ལ་ཡང་བསྙེན་བཀུར་བགྱིས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་དེ་དེ་བཞིན་ནོ། །ཇི་སྐད་སྨྲས་
པ་དེ་བཞིན་ཏེ། ཤ་ར་དྭ་ཏིའི་བུ་ལྷའི་བུ་དེད་དཔོན་འདི་ནི་འཇམ་དཔལ་གཞོན་ནུར་གྱུར་པས་ཡོངས་སུ་སྨིན་པར་བྱས་པ་ཡིན་ནོ། །ཤ་ར་དྭ་ཏིའི་བུ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་པ་འདས་པར་གྱུར་པ་དེའི་ཚེ་དེའི་དུས་ན་བསྐལ་པ་
མངོན་པར་དགའ་བ་ཞེས་བྱ་བ་ལ་འཇིག་རྟེན་གྱི་ཁམས་བདེ་བ་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་
པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རི་རབ་ལྟ་བུ་ཞེས་བྱ་བ་འཇིག་རྟེན་དུ་བྱུང་བར་གྱུར་ཏོ། །ཤ་ར་དྭ་ཏིའི་བུ་འཇིག་རྟེན་གྱི་ཁམས་བདེ་བ་ཞེས་བྱ་བ་དེ་ཡང་འཇིག་རྟེན་གྱི་ཁམས་དེ་ན་སེམས་ཅན་རྣམས་བདེ་བ་ཐམས་ཅད་དང་ལྡན་པར་གནས་ཤིང་སྡུག་བསྔལ་བ་དང་། ཡིད་
མི་བདེ་བའི་སྒྲ་འགའ་ཙམ་ཡང་མེད་ལ་འཇིག་རྟེན་གྱི་ཁམས་དེ་ཡང་རིན་པོ་ཆེ་སྣ་བཞི་གསེར་དང་། དངུལ་དང་། བཻདཱུརྱ་དང་། ཤེལ་ལས་གྲུབ་ཅིང་ལག་མཐིལ་ལྟར་མཉམ་ལ་ཀ་ཙ་ལིན་དིའི་གོས་ལྟར་རེག་ན་འཇམ་ཞིང་མི་ཁོམ་པ་དང་། ངན་སོང་རྣམས་དང་བྲལ་ལ་ལྷ་དང་མི་རྣམས་ཀྱིས་ཀུན་ཏུ་
གང་ཞིང་ཡིད་ལ་བསམས་པ་ཙམ་གྱིས་བཟའ་བ་དང་བཏུང་བ་དག་འབྱོར་ལ་བདེ་བ་ཚད་མེད་པ་དང་ལྡན་པས་ན་དེའི་ཕྱིར་འཇིག་རྟེན་གྱི་ཁམས་དེ་བདེ་བ་ཞེས་བྱའོ། །དེ་བཞིན་གཤེགས་པ་དེའི་དགེ་འདུན་ནི་བྱང་ཆུབ་སེམས་དཔའ་འབའ་ཞིག་སྟེ། བརྩོན་འགྲུས་འབར་བ། ཤེས་

རབ་ཀྱི་སྣང་བ་ཐོབ་པ། གཟུངས་དང་མདོ་སྡེའི་རྒྱལ་པོ་ཐོབ་པ། སྤོབས་པ་མི་ཆོད་པ། ཚིག་ཐམས་ཅད་རབ་ཏུ་འབྱེད་ཅིང་སྟོན་པའི་ཤེས་པ་ལ་མཁས་པ། མངོན་པར་ཤེས་པས་རྣམ་པར་ཤེས་པ་ཁོང་དུ་ཆུད་པ། བདུད་དང་ཕྱིར་རྒོལ་བ་ངེས་པར་བཅོམ་པ། སྒྲིབ་པ་
མེད་པའི་རྣམ་པར་ཐར་པའི་ཡེ་ཤེས་ཀྱི་བཟོད་པ་དང་ལྡན་པ། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ལ་ཇི་ལྟར་རིགས་པ་བཞིན་དུ་ཆོས་ཀྱི་སྨན་སྦྱོར་བ་ལ་མཁས་པ། བསོད་ནམས་དང་། ཡེ་ཤེས་ཀྱི་ཚོགས་ཆེན་པོ་བསགས་པ། གསོལ་བ་མ་བཏབ་པར་སེམས་ཅན་ཐམས་ཅད་
ཀྱི་དགེ་བའི་བཤེས་གཉེན་བྱེད་པ། རྫུ་འཕྲུལ་གྱིས་སངས་རྒྱས་ཀྱི་ཞིང་ཐམས་ཅད་དུ་འགྲོ་བའི་ཤེས་པ་ལ་མཁས་པ། དྲན་པ་དང་། བློ་གྲོས་དང་། རྟོགས་པ་དང་། ངོ་ཚ་ཤེས་པ་དང་། བརྟན་པ་དང་། བློ་རྒྱ་མཚོའི་རྗེས་སུ་ཞུགས་པ། སྦྱིན་པ་དང་། དུལ་བ་དང་། ལེགས་པར་སྡོམ་
པ་དང་། ཚུལ་ཁྲིམས་དང་། ཐོས་པ་དང་། ཤེས་རབ་ལ་ཤིན་ཏུ་གནས་པ། ཐབས་མཐའ་ཡས་པས་དགེ་བའི་རྩ་བ་ཡོངས་སུ་བསྔོ་བ་ལ་མཁས་པ། སྟོབས་དང་། མི་འཇིགས་པ་དང་། སངས་རྒྱས་ཀྱི་ཆོས་ཐམས་ཅད་ལ་ལྷག་པའི་བསམ་པས་ཤིན་ཏུ་ཞུགས་པ། བསམ་གཏན་
དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པས་རྣམ་པར་རྩེ་བའི་བྱང་ཆུབ་སེམས་དཔའ་ཤ་སྟག་གོ །ཤ་ར་དྭ་ཏིའི་བུ་དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེའི་གསུང་རབ་ལ་
འཁོར་ལོས་སྒྱུར་བའི་རྒྱལ་པོ་དགེ་བའི་བཀོད་པ་ཞེས་བྱ་བ་ཆོས་དང་ལྡན་པ། ཆོས་ཀྱི་རྒྱལ་པོ། གླིང་བཞིའི་དབང་ཕྱུག །རིན་པོ་ཆེ་སྣ་བདུན་དང་ལྡན་པ། མིའི་དབང་པོར་གྱུར་པ་ཞིག་བྱུང་བར་གྱུར་ཏོ། །དེའི་བུ་སྟོང་དུ་ཚང་བར་གྱུར་ཏེ། དེ་དག་ཐམས་ཅད་ཀྱང་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ལ་ཡང་དག་པར་ཞུགས་པ་ཤ་སྟག་གོ །ཤ་ར་དྭ་ཏིའི་བུ་རྒྱལ་པོ་དགེ་བའི་བཀོད་པ་དེ་ཡང་བཙུན་མོའི་ཚོགས་རྣམས་དང་ལྷན་ཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པར་གྱུར་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་

བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེའི་སྐུ་ཚེའི་ཚད་དང་། མི་དེ་དག་གི་ཚེའི་ཚད་ནི་ལོ་དུང་ཕྱུར་ཕྲག་བདུན་དུ་གྱུར་ཏོ། །དེ་ནས་རྒྱལ་པོ་དགེ་བའི་བཀོད་པ་བུ་སྟོང་དང་ལྷན་ཅིག །བཙུན་མོའི་འཁོར་དང་ལྷན་ཅིག་ཏུ་ཆོས་ལ་དགའ་བ་དང་། མཆོག་ཏུ་དགའ་བ་
དང་། དད་པ་ཐོབ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་བྱང་ཆུབ་སེམས་དཔའི་དགེ་འདུན་དང་བཅས་པ་དེ་ལ་ལོ་འབུམ་ཚང་བར་ཐུགས་ལ་དགོངས་པ་བཞིན་དུ་ན་བཟའ་དང་། ཞལ་ཟས་དང་། གཟིམས་ཆ་དང་།
གདན་དང་། སྙུན་གྱི་གསོས་སྨན་དང་། ཡོ་བྱད་རྣམས་དང་། བདེ་བར་སྦྱར་བ་ཐམས་ཅད་ཀྱིས་བསྙེན་བཀུར་བྱས་སོ། །རྒྱལ་པོ་དགེ་བའི་བཀོད་པ་འཁོར་དང་བཅས་པས་རྟག་པར་རྒྱུན་ཏུ་དེ་བཞིན་གཤེགས་པ་དེ་ལ་མངོན་སུམ་དུ་ཉིན་གཅིག་མི་འཆད་པར་རང་གི་ལག་ནས་གུས་
པར་ཕུལ་ཞིང་རྟག་ཏུ་རྒྱུན་མི་འཆད་པར་ཆོས་ཉན་པ་ལ་ཡང་འཇུག་པར་གྱུར་ཏོ། །དེ་བུ་དང་བཅས། བཙུན་མོའི་འཁོར་དང་བཅས་པས་ལོ་འབུམ་འདས་ནས་ཀྱང་ཡང་དང་ཡང་དུ་སངས་རྒྱས་མཐོང་ཞིང་ཡང་དང་ཡང་དུ་དེ་ལ་ཆོས་མཉན་པས་རྗེས་སུ་དྲན་པ་བཞི་ཐོབ་པར་གྱུར་ཏོ། །བཞི་
གང་ཞེ་ན། སངས་རྒྱས་རྗེས་སུ་དྲན་པ་དང་། ཆོས་རྗེས་སུ་དྲན་པ་དང་། དགེ་འདུན་རྗེས་སུ་དྲན་པ་དང་། སྦྱིན་པ་དང་ལྡན་ཞིང་བྱང་ཆུབ་ཀྱི་སེམས་མི་བརྗེད་པའི་ཚུལ་ཁྲིམས་རྗེས་སུ་དྲན་པ་སྟེ། རྗེས་སུ་དྲན་པ་བཞི་པོ་དེ་དག་ཐོབ་པར་གྱུར་ཏོ། །དེ་རྗེས་སུ་དྲན་པ་བཞི་པོ་དེ་དག་དང་ལྡན་
པས་ཉིན་མཚན་དུ་སངས་རྒྱས་མཐོང་བ་དང་། ཆོས་ཡང་དག་པར་བགྲོ་བ་དང་། བྱང་ཆུབ་སེམས་དཔའི་དགེ་འདུན་མཐོང་བ་དང་བྲལ་བར་མ་གྱུར་ཏོ། །དེ་ནས་དུས་གཞན་ཞིག་ན་རྒྱལ་པོ་དགེ་བའི་བཀོད་པ་བུ་དང་བཅས། བཙུན་མོའི་འཁོར་དང་བཅས་པ་དེ་ཆོས་མཉན་པའི་ཕྱིར་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེ་ག་ལ་བ་དེར་སོང་ངོ་། །དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེས་བྱང་ཆུབ་སེམས་དཔའ་དེ་དག་ལ་ཆོ་འཕྲུལ་རྣམ་

པ་དུ་མས་རྗེས་སུ་གདམས་པ་མཛད་པར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེ་ལ་རྒྱལ་པོ་དགེ་བའི་བཀོད་པ་དེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོ་འཕྲུལ་དེ་དག་མ་ལགས་
པའི་ཆོ་འཕྲུལ་དམ་པ་གཞན་མཆིས་ལགས་སམ། དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེས་རྒྱལ་པོ་དགེ་བའི་བཀོད་པ་དེ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ཆོ་འཕྲུལ་
དེ་དག་མ་ཡིན་པའི་ཆོ་འཕྲུལ་དམ་པ་གཞན་ཡང་ཡོད་དོ། །དེ་ཡང་གང་ཞེ་ན། འདི་ལྟ་སྟེ། སེམས་དང་སེམས་ལས་བྱུང་བ་གཟུགས་ཅན་མ་ཡིན་པ་རྣམས་བཤད་པ་དང་། སེམས་དང་སེམས་ལས་བྱུང་བ་འགགས་པ་རྣམས་བཤད་པ་དང་། ད་ལྟར་བྱུང་བའི་སེམས་དང་སེམས་ལས་བྱུང་
བ་མི་གནས་པ་རྣམས་སྨོས་པ་དང་། མ་སྐྱེས་མ་བྱུང་བའི་ལམ་བཤད་པ་དང་། རྣམ་པར་ཐར་པའི་སྒོ་རོ་གཅིག་པ་དང་། ཡན་ལག་གསུམ་དུ་སྨོས་པ་དང་། མངོན་པར་རྟོགས་པ་གཅིག་ཏུ་འདུས་པ་ལ་བདེན་པ་བཞིར་ཡོངས་སུ་བརྗོད་པ་དང་། མཚན་མ་མེད་པ་དང་། རྣམ་པ་མེད་པ་
དང་། འདུས་མ་བྱས་པའི་བྱང་ཆུབ་ལ་ཡོངས་སུ་སྒྲུབ་པར་བྱེད་པ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཆོས་རྣམས་བཤད་པ་དང་། ཕྱིན་ཅི་ལོག་དང་། ཉོན་མོངས་པས་གྲུབ་པའི་སེམས་ཅན་རྣམས་ཡོངས་སུ་སྨིན་པར་བྱེད་པ་དང་། བླང་བ་མེད་པ་དང་།
དོར་བ་མེད་པའི་ཆོས་རྣམས་ལ་སྦྱིན་པའི་ཕ་རོལ་ཏུ་ཕྱིན་པ་ཡོད་པ་དང་། མངོན་པར་འདུ་བྱེད་པ་མེད་པ་དང་། བྱས་པ་མེད་པའི་ཆོས་རྣམས་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོད་པ་དང་། འབྱུང་བ་མེད་ཅིང་སྐད་ཅིག་པའི་ཆོས་རྣམས་ལ་བཟོད་པའི་ཕ་རོལ་ཏུ་ཕྱིན་པ་ཡོད་པ་དང་། ལུས་དང་
སེམས་དབེན་པའི་ཆོས་རྣམས་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོད་པ་དང་། བསྡུས་པ་དང་རྣམ་པར་གཡེངས་པ་མེད་པའི་ཆོས་རྣམས་ལ་བསམ་གཏན་གྱི་ཕ་རོལ་ཏུ་ཕྱིན་པ་ཡོད་པ་དང་། ཕ་རོལ་དང་ཚུ་རོལ་མེད་པའི་ཆོས་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོད་པ་དང་། བརྟག་པ་དང་།

བསལ་བ་མེད་པའི་ཆོས་རྣམས་ལ་ཐབས་ལ་མཁས་པ་ཡོད་པ་དང་། སྐྱེ་བ་མེད་པ་དང་། རྟོན་པ་མེད་པའི་ཆོས་རྣམས་ལ་བྱམས་པ་སྒོམ་པ་དང་། བྱ་བ་མེད་པ་དང་། གཞིག་པ་མེད་པའི་ཆོས་རྣམས་ལ་སྙིང་རྗེས་སྦྱོར་བ་དང་། དགའ་བ་མེད་པའི་ཆོས་རྣམས་ལ་དགའ་བ་མངོན་པར་སྒྲུབ་པ་དང་།
གནས་པ་མེད་པའི་ཆོས་རྣམས་ལ་བཏང་སྙོམས་སྒོམ་པ་དང་། ཤེས་པ་མེད་པ་དང་། མཐོང་བ་མེད་པའི་ཆོས་རྣམས་ལ་ལྷའི་མིག་མངོན་པར་སྒྲུབ་པ་དང་། ཐོས་པ་མེད་པ་དང་། རྣམ་པར་རིག་པ་མེད་པའི་ཆོས་རྣམས་ལ་ལྷའི་རྣ་བ་མངོན་པར་སྒྲུབ་པ་དང་། དམིགས་པ་དང་། སེམས་
དང་རྣམ་པར་བྲལ་བའི་ཆོས་རྣམས་ལ་ཕ་རོལ་གྱི་སེམས་ཤེས་པ་ཡོད་པ་དང་། སྔོན་གྱི་མཐའ་དང་བྲལ་བའི་ཆོས་རྣམས་ལ་སྔོན་གྱི་གནས་རྗེས་སུ་དྲན་པའི་ཤེས་པ་ཡོད་པ་དང་། སེམས་དང་ལུས་དང་། སྒྲ་དང་། བརྩོན་འགྲུས་དང་བྲལ་བའི་ཆོས་རྣམས་ལ་རྫུ་འཕྲུལ་གྱི་རྐང་པ་འཐོབ་པ་དང་།
གནས་པ་མེད་པའི་ཆོས་རྣམས་ལ་དྲན་པ་ཉེ་བར་གཞག་པ་སྒོམ་པ་དང་། སྐྱེ་བ་མེད་པ་དང་། འགག་པ་མེད་པའི་ཆོས་རྣམས་ལ་ཡང་དག་པའི་སྤོང་བ་སྒོམ་པ་དང་། དབང་པོ་མེད་པའི་ཆོས་རྣམས་ལ་དབང་པོ་བསྟན་པ་དང་། སྟོབས་མེད་པ་དང་། ཉམ་ཆུང་བའི་ཆོས་རྣམས་ལ་སྟོབས་
ཡོངས་སུ་རྗོད་པ་དང་། ཉེ་བར་ཞི་བའི་ཆོས་རྣམས་ལ་བྱང་ཆུབ་ཀྱི་ཡན་ལག་བཤད་པ་དང་། ཁྱད་པར་མེད་པའི་ཆོས་རྣམས་ལ་ལམ་སྨོས་པ་དང་། ཞི་བའི་མཐར་སོང་བའི་ཆོས་རྣམས་ལ་ཞི་གནས་སྐྱེད་པ་དང་། རྣམ་པར་གྲོལ་བའི་མཚན་ཉིད་ཀྱི་ཆོས་རྣམས་ལ་ལྷག་མཐོང་ལ་མཁས་
པ་དང་། རང་བཞིན་གྱིས་ཡོངས་སུ་མྱ་ངན་ལས་འདས་པའི་ཆོས་རྣམས་ལ་མྱ་ངན་ལས་འདས་པ་སྨོས་པའོ། །ཞེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེས་རྒྱལ་པོ་དགེ་བའི་བཀོད་པ་དེ་དང་། བུ་སྟོང་པོ་དེ་དག་
དང་། བཙུན་མོའི་ཚོགས་དེ་དག་ལ་ཆོ་འཕྲུལ་བསྟན་པའི་ཆོས་ཀྱི་རྣམ་གྲངས་དེ་ཉིད་ལས་བརྩམས་ཏེ་དེ་ལྟ་དེ་ལྟར་ཆོས་བསྟན་པ་དང་། སྲོག་ཆགས་བརྒྱད་ཁྲི་བཞི་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །རྒྱལ་པོ་དགེ་བའི་བཀོད་པ་དང་། དེའི་བུ་

སྟོང་གིས་ནི་ཆོས་རྣམས་ལ་རྗེས་སུ་འཐུན་པའི་བཟོད་པ་ཐོབ་པར་གྱུར་ཏོ། །དེ་དག་གིས་བཟོད་པ་ཐོབ་ནས་སངས་རྒྱས་ཀྱི་མཐུ་དང་། རང་གི་སྤོབས་པས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ལྟ་བུ་དེ་ལ་
ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཇི་ལྟར་རྒྱ་མཚོའི་དབུས་ན་ནི། །ལྷུན་པོའི་རྒྱལ་པོ་མཛེས་པ་ལྟར། །དེ་བཞིན་དགེ་འདུན་དབུས་ན་ནི། །ཆོས་ཀྱི་རྒྱལ་པོ་རྣམ་པར་མཛེས། །ཇི་ལྟར་ཉི་མ་འཆར་བ་ཡིས། །མུན་པ་ཐམས་ཅད་སེལ་བ་ལྟར། །དེ་བཞིན་སངས་རྒྱས་
མཛོད་སྤུ་ཡང་། །སངས་རྒྱས་ཞིང་རྣམས་སྣང་བར་བགྱིད། །ཇི་ལྟར་ཟླ་བ་ཉ་བ་ཡི། །ཟླ་བ་ཡོངས་རྫོགས་ལྷང་ངེ་ལྟར། །སངས་རྒྱས་ཆོས་རྣམས་རྫོགས་པ་ཡི། །འཇིག་རྟེན་མགོན་ཡང་ལྷང་ངེ་ལགས། །ཇི་ལྟར་མེ་ཏོག་པད་མ་ནི། །ཆབ་ཀྱི་ནང་དུ་མི་གོས་ལྟར། །དེ་བཞིན་འཇིག་རྟེན་
མགོན་པོ་ཡང་། །འཇིག་རྟེན་ཆོས་ཀྱིས་མི་གོས་ལགས། །ཇི་ལྟར་སེང་གེ་རི་དགས་རྒྱལ། །ནགས་ན་སྒྲ་སྐད་སྒྲོགས་པ་ལྟར། །དེ་བཞིན་སྐྱེས་བུ་སེང་གེ་ཡང་། །སྟོང་པ་ཉིད་ཀྱི་སྒྲ་སྐད་སྒྲོགས། །མཆིས་སམ་ཡང་ན་མ་མཆིས་དང་། །མཆིས་དང་མ་མཆིས་ཐམས་ཅད་དང་། །
མཐར་ལྟ་བ་ལས་རྣམ་འདས་པ། །ངེས་པར་སེང་གེའི་སྒྲ་ཞེས་བགྱི། །སྐྱེ་བའམ་ཡང་ན་འཇིག་པའང་རུང་། །དེ་དག་མཚན་མར་བསྟན་མཛད་ཅིང་། །མི་སྐྱེ་འགག་པ་མ་མཆིས་པ། །ངེས་པར་སེང་གེའི་སྒྲ་ཞེས་བགྱི། །ཕ་རོལ་དང་ནི་ཚུ་རོལ་དག །དེ་དག་རྣམ་པར་རྟོག་པར་བསྟན། །
ཆོས་རྣམས་ཀུན་ལ་མི་གནས་པ། །ངེས་པར་སེང་གེའི་སྒྲ་ཞེས་བགྱི། །ཀུན་ནས་ཉོན་མོངས་རྣམ་བྱང་བ། །དེ་གཉིས་མཚན་ཉིད་མ་མཆིས་ཏེ། །ཤིན་ཏུ་དྲི་མ་མ་མཆིས་ཆོས། །ངེས་པར་སེང་གེའི་སྒྲ་ཞེས་བགྱི། །འདོད་ཆགས་ཞེ་སྡང་གཏི་མུག་ནི། །ཡོངས་སུ་རྟོག་ལས་བྱུང་བ་སྟེ། །རྟོག་བྲལ་རྣམ་
རྟོག་མ་མཆིས་པ། །ངེས་པར་སེང་གེའི་སྒྲ་ཞེས་བགྱི། །འཁོར་བ་དང་ནི་མྱ་ངན་འདས། །དེ་དག་ལམ་དུ་གཞུག་པ་སྟེ། །ཆོས་རྣམས་ཤིན་ཏུ་གསོག་ལགས་པ། །ངེས་པར་སེང་གེའི་སྒྲ་ཞེས་བགྱི། །སྐྱེ་དང་འཆི་དང་འཁོར་བ་ནི། །ཕྱིན་ཅི་ལོག་ལས་བྱུང་བ་སྟེ། །མི་རྟག་སྡུག་བསྔལ་བདག་མེད་

དོན། །ངེས་པར་སེང་གེའི་སྒྲ་ཞེས་བགྱི། །ལྟ་དང་དམིགས་པ་གནས་ལགས་ཏེ། །དེ་དག་གིས་ནི་འཇིག་རྟེན་འཇུག །ཆོས་རྣམས་སྟོང་པར་རབ་བཤད་པ། །ངེས་པར་སེང་གེའི་སྒྲ་ཞེས་བགྱི། །འཇིག་རྟེན་མགོན་པོས་ཆོ་འཕྲུལ་ནི། །གང་དག་ཇི་སྙེད་བསྟན་མཛད་པ། །དེ་དག་ཐམས་ཅད་
བཤད་པ་ནི། །ངེས་པར་སེང་གེའི་སྒྲ་ཞེས་བགྱི། །སེམས་ནི་མཉམ་པ་ཉིད་སླད་དུ། །རྗེས་སུ་འཐུན་དང་མི་འཐུན་པ། །གང་ལའང་སེམས་ནི་མི་འཇུག་པ། །དེ་ནི་རྗེས་འཐུན་བཟོད་པ་ལགས། །སངས་རྒྱས་རྣམས་ཀྱིས་བཤད་པ་ཡི། །ཟབ་ཅིང་ཞི་ལ་འཐུན་བགྱིད་ཅིང་། །
དེ་ལ་རྩོད་པར་མི་བགྱིད་པ། །དེ་ནི་རྗེས་འཐུན་བཟོད་པ་ལགས། །མི་དགེ་ཐམས་ཅད་མ་གཏོགས་པར། །དགེ་ཆོས་རྣམས་ལ་འཇུག་འགྱུར་ཞིང་། །དེ་ལའང་གནས་པར་མི་བགྱིད་པ། །དེ་ནི་རྗེས་འཐུན་བཟོད་པ་ལགས། །སྟོང་པའི་སྒྲ་དང་སེམས་ཅན་སྒྲ། །དེ་བཞིན་ལྟ་བའི་སྒྲ་དང་ནི། །
སྒྲ་རྣམས་ཀུན་ལ་མ་ཆགས་པ། །དེ་ནི་རྗེས་འཐུན་བཟོད་པ་ལགས། །སངས་རྒྱས་སྒྲ་དང་ཉོན་མོངས་སྒྲ། །རྣམ་མང་ཆོས་ཀྱི་སྒྲ་རྣམས་དང་། །གང་གི་སྒྲ་ལའང་མི་རྟོག་པ། །དེ་ནི་རྗེས་འཐུན་བཟོད་པ་ལགས། །སྦྱིན་དང་ཚུལ་ཁྲིམས་ཐོས་པ་དང་། །བརྩོན་འགྲུས་བསམ་གཏན་ཤེས་
རབ་དང་། །དེ་བཞིན་ཀུན་ལ་བརྩོན་བགྱིད་པ། །དེ་ནི་རྗེས་འཐུན་བཟོད་པ་ལགས། །ཐམས་ཅད་དག་ལ་སེམས་མཉམ་ཞིང་། །བྱང་ཆུབ་སེམས་ནི་མི་སྤོང་ལ། །བྱང་ཆུབ་ལམ་ནི་སྟོན་བགྱིད་པ། །དེ་ནི་རྗེས་འཐུན་བཟོད་པ་ལགས། །རྫོགས་སངས་རྒྱས་ཀྱིས་བདག་ཅག་ལ། །དེ་འདྲའི་
ཆོས་ནི་བསྟན་མཛད་དེ། །དེ་ལ་སོམ་ཉི་མ་མཆིས་པ། །དེ་ནི་རྗེས་འཐུན་བཟོད་པ་ལགས། །བདག་ཀྱང་བྱང་ཆུབ་སངས་རྒྱས་ཤིང་། །སེང་གེའི་སྒྲ་སྐད་བསྒྲགས་ནས་ནི། །ཇི་ལྟར་འདྲེན་པས་བསྟན་མཛད་པའི། །ཆོ་འཕྲུལ་ངེས་པར་བསྟན་པར་བགྱི། །ཞིང་འདི་བསམ་གྱིས་མི་ཁྱབ་སྟེ། །
བླ་མེད་བསོད་ནམས་ཞིང་དེ་ལ། །བདག་གིས་ས་བོན་བཏབ་པས་ན། །བདག་ནི་སླར་ལྡོག་མ་མཆིས་ལགས། །དོག་ས་ཐམས་ཅད་རྡོལ་འགྱུར་ཞིང་། །རྒྱ་མཚོ་འདབས་པར་འགྱུར་གདའ་ཡི། །རྫོགས་སངས་རྒྱས་ལ་བསྐྲུན་པ་ཡི། །ས་བོན་ནམ་ཡང་ཆབ་མི་འཚལ། །སེམས་

ཅན་རྣམས་ཀྱི་སེམས་འཚལ་ཅིང་། །ནམ་མཁའ་གཞལ་བར་རྔོ་ཐོག་གི །བྱང་ཆུབ་ཏུ་ནི་བསྐྲུན་པའི་སེམས། །དེ་ཡི་བསོད་ནམས་ཚད་མ་མཆིས། །བདག་གི་བསམ་པ་ཅི་འདྲ་བའི། །དབང་དུ་ལྷ་དང་དྲི་ཟ་དང་། །མི་རྣམས་གཞན་དག་མ་མཆིས་ཏེ། །བཅོམ་ལྡན་
འདས་ཉིད་བདག་གི་དཔང་། །འདྲེན་པ་བདག་ནི་ལོངས་སྤྱོད་དང་། །གཟུགས་དང་མཐོ་རིས་མི་འཚལ་གྱི། །མི་མཆོག་ཁྱོད་ཀྱི་མཁྱེན་པ་ནི། །ཅི་འདྲ་དེ་ལྟར་བདག་གྱུར་ཅིག །བྱང་ཆུབ་ལ་ནི་དམིགས་བགྱིས་ནས། །བདག་གིས་དགུང་ལོ་འབུམ་དུ་ནི། །མ་ཆགས་སྡང་བ་མ་མཆིས་
པར། །བདག་གིས་བདེ་གཤེགས་བསྙེན་བཀུར་བགྱིས། །བདག་གི་བྱིས་པ་སྟོང་རྣམས་དང་། །མཆིས་བྲང་ཡོངས་སུ་སྨིན་བགྱིས་པ། །གང་ལགས་འདི་དག་སངས་རྒྱས་ཀྱི། །བྱང་ཆུབ་སླད་དུ་སྤྲོ་བར་མཛད། །བདག་གིས་བདེ་གཤེགས་ལེགས་མཐོང་ཞིང་། །ཆོས་འདི་
ལེགས་པར་ཐོས་པ་དང་། །བྱང་ཆུབ་ལ་ནི་རྟག་དགའ་བ། །བདག་གིས་རྙེད་པ་ལེགས་པར་རྙེད། །གང་ཞིག་བྱང་ཆུབ་དགའ་བགྱིད་པ། །དེ་ནི་ཆོས་ལའང་རྟག་ཏུ་དགའ། །ཆོས་རྣམས་སྤོང་བར་མི་བགྱིད་པ། །སེམས་ཅན་ཀུན་ལ་རྟག་དགའ་ལགས། །དེ་ནས་འཁོར་དེ་ཉིད་དུ་
ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་ཞེས་བྱ་བ་ཞིག་འདུས་ཏེ་འདུག་པར་གྱུར་པ་དེས་རྒྱལ་པོ་དགེ་བའི་བཀོད་པ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཁྱོད་ཀྱིས་ནི་དེ་བཞིན་གཤེགས་པའི་ཆོ་འཕྲུལ་དེ་དང་འཐུན་པར་མ་བྱས་ཀྱི་མི་འཐུན་པར་བྱས་པས་ན་ཁྱོད་ནི་གནས་མ་ཡིན་པ་
ལ་གནས་པ་ཡིན་ནོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་བྱང་ཆུབ་ནི་ཆོས་ཀྱི་དབྱིངས་ཀྱི་གནས་ལ་གནས་པས་འཇུག་པ་མེད་པའོ། །རྒྱལ་པོ་ཆེན་པོ་བྱང་ཆུབ་ནི་ཚོར་བ་ཐམས་ཅད་མེད་པས་ཤེས་པ་མེད་པའི་མཚན་ཉིད་ཡིན་ནོ། །རྒྱལ་པོ་ཆེན་པོ་བྱང་ཆུབ་ནི་བླངས་པ་མེད་ཅིང་བོར་བ་མེད་
པས་བླང་བ་མེད་ལ་དོར་བ་མེད་པ་ཡིན་ནོ། །རྒྱལ་པོ་ཆེན་པོ་བྱང་ཆུབ་ནི་ནམ་མཁའ་ལ་བྲིས་པ་དང་འདྲ་བས་གཟུགས་མེད་པ། ཁ་དོག་མེད་པ། རྟགས་མེད་པ། དབྱིབས་མེད་པ་ཡིན་ནོ། །རྒྱལ་པོ་ཆེན་པོ་བྱང་ཆུབ་ནི་རང་བཞིན་གྱིས་ཡོངས་སུ་དག་པས་གཉེན་པོ་མེད་པ་ཡིན་ནོ། །

རྒྱལ་པོ་ཆེན་པོ་བྱང་ཆུབ་ནི་ཆོས་ཐམས་ཅད་དང་མཉམ་པས་ཐམས་ཅད་ཀྱི་རྗེས་སུ་སོང་བ་ཡིན་ནོ། །རྒྱལ་པོ་ཆེན་པོ་བྱང་ཆུབ་ནི་མཚན་མ་ཐམས་ཅད་དང་བྲལ་བས་གཡོ་བ་མེད་པ་ཡིན་ནོ། །རྒྱལ་པོ་ཆེན་པོ་བྱང་ཆུབ་ནི་རབ་ཏུ་ཞི་བའི་མཚན་ཉིད་ཡིན་པས་ཞི་བའོ། །རྒྱལ་པོ་ཆེན་པོ་བྱང་ཆུབ་ནི་བརྟག་
པ་དང་བསལ་བ་དང་བྲལ་བས་ཉེ་བར་ཞི་བའོ། །རྒྱལ་པོ་ཆེན་པོ་བྱང་ཆུབ་ནི་མི་འཐུན་པ་མེད་པས་ལྷག་པར་གཡོ་བ་མེད་པའོ། །རྒྱལ་པོ་ཆེན་པོ་བྱང་ཆུབ་ནི་ཡོངས་སུ་གྲུབ་པ་མེད་པས་སེམས་མཉམ་པའོ། །རྒྱལ་པོ་ཆེན་པོ་བྱང་ཆུབ་ནི་གཟོད་མ་ནས་མ་སྐྱེས་པས་སེམས་ཅན་དང་མཚུངས་པའོ། །
རྒྱལ་པོ་ཆེན་པོ་བྱང་ཆུབ་ནི་རྣམ་པར་རིག་པའི་མཚན་ཉིད་མ་ཡིན་པས་སྐྱེ་བ་མེད་པས་རབ་ཏུ་ཕྱེ་བའོ། །རྒྱལ་པོ་ཆེན་པོ་བྱང་ཆུབ་ནི་སེམས་དང་། ཡིད་དང་། རྣམ་པར་ཤེས་པ་དང་བྲལ་བས་རྣམ་པར་རིག་པ་མེད་པའོ། །རྒྱལ་པོ་ཆེན་པོ་བྱང་ཆུབ་ནི་ཡུལ་ཐམས་ཅད་ལས་ཡང་དག་པར་འདས་པས་
རྒྱུ་བ་མེད་པའོ། །རྒྱལ་པོ་ཆེན་པོ་བྱང་ཆུབ་ནི་རྣམ་པར་རྟོག་པ་ཐམས་ཅད་དང་བྲལ་བས་སྤྲོས་པ་མེད་པའོ། །རྒྱལ་པོ་ཆེན་པོ་བྱང་ཆུབ་ནི་སྟོང་པ་ཉིད་ཀྱི་མཚན་ཉིད་ཡིན་པས་སྟོང་པའོ། །རྒྱལ་པོ་ཆེན་པོ་བྱང་ཆུབ་ནི་མཚན་མ་ཐམས་ཅད་དང་བྲལ་བས་མཚན་མ་མེད་པའོ། །རྒྱལ་པོ་ཆེན་པོ་བྱང་
ཆུབ་ནི་སྨོན་པ་དང་བྲལ་བས་སྨོན་པ་མེད་པའོ། །རྒྱལ་པོ་ཆེན་པོ་བྱང་ཆུབ་ནི་ལས་ཀྱི་རྣམ་པར་སྨིན་པ་མེད་པས་མངོན་པར་འདུ་བྱེད་པ་མེད་པའོ། །རྒྱལ་པོ་ཆེན་པོ་བྱང་ཆུབ་ནི་མཚན་ཉིད་གསུམ་དང་བྲལ་བས་འདུས་མ་བྱས་པ་སྟེ། རྒྱལ་པོ་ཆེན་པོ་གང་དག་བྱང་ཆུབ་ཀྱི་མཚན་ཉིད་དེ་ལྟ་བུ་དང་། ངོ་
བོ་ཉིད་དེ་ལྟ་བུ་ལ་སྒྲུབ་པར་བྱེད་པ་དང་། གང་དག་སྨོན་ལམ་འདེབས་པར་བྱེད་པ་དང་། གང་དག་མངོན་པར་དགའ་བར་བྱེད་པ་དང་། གང་དག་འདོད་པར་བྱེད་པ་དེ་དག་ཐམས་ཅད་ནི་ལོག་པར་རྩོལ་བ་ཡིན་ནོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་བྱང་ཆུབ་ཅི་འདྲ་བར་བྱང་ཆུབ་སེམས་དཔའི་སྤྱོད་པ་
ཡང་དེ་འདྲ་བ་ཡིན་པས་ན་གང་དག་དེ་ལྟར་སྤྱོད་པ་དེ་དག་ནི་ཡང་དག་པར་སྤྱོད་པ་ཡིན་པའི་ཕྱིར་རོ།། །།བམ་པོ་གཉིས་པ། དེ་ནས་རྒྱལ་པོ་དགེ་བའི་བཀོད་པས་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་བྱང་ཆུབ་

སེམས་དཔའ་རྣམས་ཀྱི་ཡང་དག་པ་ཉིད་ཀྱི་སྤྱོད་པ་ལ་སྤོབས་པར་གྱིས་ཤིག །དེ་སྐད་ཅེས་སྨྲས་པ་དང་། ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་གྱིས་རྒྱལ་པོ་དགེ་བའི་བཀོད་པ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་སེམས་ཅན་ཐམས་ཅད་ལ་རློམ་སེམས་མེད་པ་
མཉམ་པ་ཉིད་ཀྱིས་བདོག་པ་ཐམས་ཅད་ཡོངས་སུ་གཏོང་བའི་སྤྱོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཚུལ་ཁྲིམས་ཀྱིས་རློམ་སེམས་སུ་མི་བྱེད་པ་མཉམ་པ་ཉིད་ཀྱིས་ཚུལ་ཁྲིམས་དང་། བསླབ་པ་དང་། སྦྱངས་པའི་ཡོན་ཏན་ཐམས་ཅད་ཡང་དག་པར་ལེན་པའི་སྤྱོད་པ་ནི་བྱང་
ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །བཟོད་པས་རློམ་སེམས་སུ་མི་བྱེད་པ་མཉམ་པ་ཉིད་ཀྱིས་ཐ་བ་དང་། ཁྲོ་བ་དང་། གནོད་སེམས་དང་། འཆབ་པའི་ཡོངས་སུ་གདུང་བ་དང་། ཞེ་སྡང་གི་ཡོངས་སུ་གདུང་བ་ཐམས་ཅད་འབྱིན་པར་བྱེད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་
ནོ། །བརྩོན་འགྲུས་ཀྱིས་རློམ་སེམས་སུ་མི་བྱེད་པ་མཉམ་པ་ཉིད་ཀྱིས་བརྩོན་འགྲུས་བརྟན་ཞིང་འབར་བ་དང་། ཞུམ་པ་མེད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །བསམ་གཏན་གྱིས་རློམ་སེམས་སུ་མི་བྱེད་པ་མཉམ་པ་ཉིད་ཀྱིས་བསམ་གཏན་དང་། རྣམ་པར་ཐར་པ་དང་།
ཏིང་ངེ་འཛིན་དང་། སྙོམས་པར་འཇུག་པ་སྒྲུབ་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཤེས་རབ་ཀྱིས་རློམ་སེམས་སུ་མི་བྱེད་པ་མཉམ་པ་ཉིད་ཀྱིས་མཉམ་པའི་ཤེས་རབ་ཀྱི་ཚོགས་ཡོངས་སུ་ཚོལ་བ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །གཉིས་དང་བྲལ་བའི་
བཏང་སྙོམས་མཉམ་པ་ཉིད་ཀྱིས་ཚངས་པའི་གནས་པ་སྐྱེད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །མངོན་པར་ཤེས་པས་རློམ་སེམས་སུ་མི་བྱེད་པ་མཉམ་པ་ཉིད་ཀྱིས་མངོན་པར་ཤེས་པ་སྐྱེད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །དོན་དང་ཆོས་ལ་ངེས་པར་
སེམས་པ་མཉམ་པ་ཉིད་ཀྱིས་སོ་སོ་ཡང་དག་པར་རིག་པ་ལ་འཇུག་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཆོས་ཀྱི་དབྱིངས་གཡོ་བ་མེད་པ་མཉམ་པ་ཉིད་ཀྱིས་རྟོན་པ་ལ་མོས་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཡང་དག་པར་སྐྱོ་བ་མེད་པའི་སེམས་ཀྱིས་ངེས་

པར་སེམས་པ་མཉམ་པ་ཉིད་ཀྱིས་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡང་དག་པར་སྡུད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །དོན་འཐུན་པ་མཉམ་པ་ཉིད་ཀྱིས་བསྡུ་བའི་དངོས་པོ་བཞི་ཡང་དག་པར་འཛིན་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སེམས་ཀྱིས་
རློམ་སེམས་སུ་མི་བྱེད་པ་མཉམ་པ་ཉིད་ཀྱིས་སེམས་ཅན་ཐམས་ཅད་ལ་སེམས་མཉམ་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ནམ་མཁའ་ཡོངས་སུ་དག་པ་དང་། སེམས་ཡོངས་སུ་དག་པ་དང་། ཞིང་ཡོངས་སུ་དག་པ་མཉམ་པ་ཉིད་ཀྱིས་སངས་རྒྱས་ཀྱི་ཞིང་ཡོངས་སུ་དག་པར་
བྱེད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །མཚན་ཉིད་མེད་པའི་ཆོས་ལ་སོ་སོར་རྟོག་པ་མཉམ་པ་ཉིད་ཀྱིས་མཚན་སུམ་ཅུ་རྩ་གཉིས་ཀྱི་ཚོགས་ཡང་དག་པར་སྡུད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ལུས་དང་། ངག་དང་། སེམས་མཉམ་པ་ཉིད་ཀྱིས་
ལུས་དང་། ངག་དང་། སེམས་བརྒྱན་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སེམས་ཅན་ཐམས་ཅད་ལ་བདག་མེད་པར་མཉམ་པ་ཉིད་ཀྱིས་སེམས་ཅན་ཐམས་ཅད་ལ་ཅི་ཞིག་བྱ་སྙམ་དུ་སྤྲོ་བ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །རྨི་ལམ་གྱི་རང་བཞིན་ལྟ་
བུར་མོས་པ་མཉམ་པ་ཉིད་ཀྱིས་འཁོར་བས་ཡོངས་སུ་མི་སྐྱོ་བ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ལས་དང་ལས་ཀྱི་རྣམ་པར་སྨིན་པ་ལ་མོས་པ་མེད་པ་མཉམ་པ་ཉིད་ཀྱིས་ལེགས་པར་སྤྱོད་པའི་ལས་བྱེད་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཆོས་སྒྱུ་མ་
ལྟ་བུར་སོ་སོར་རྟོག་པ་མཉམ་པ་ཉིད་ཀྱིས་བརྟུལ་ཞུགས་དང་དཀའ་ཐུབ་ཀྱི་གོ་ཆ་བགོས་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སྡུག་བསྔལ་སྐྱེ་བ་མེད་པར་ཤེས་པ་མཉམ་པ་ཉིད་ཀྱིས་སྡུག་བསྔལ་ཐམས་ཅད་བཟོད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །མཛའ་
བཤེས་དང་མཛའ་བཤེས་མ་ཡིན་པ་ལ་སེམས་སྙོམས་པ་མཉམ་པ་ཉིད་ཀྱིས་མཛའ་བ་བརྟན་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ལན་ལ་རེ་བ་མེད་པ་མཉམ་པ་ཉིད་ཀྱིས་ལྷག་པའི་བསམ་པ་ལ་སྦྱོར་བ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཐོས་པ་དང་། སྒྲུབ་

པ་མཉམ་པ་ཉིད་ཀྱིས་ཐོས་པ་ཚོལ་བས་མི་ངོམས་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཟང་ཟིང་མེད་པའི་ཆོས་སྟོན་པ་མཉམ་པ་ཉིད་ཀྱིས་ཆོས་ལ་སློབ་དཔོན་གྱི་དཔེ་མཁྱུད་མེད་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཆོས་དབེན་པ་མཉམ་པ་ཉིད་
ཀྱིས་དམ་པའི་ཆོས་ཡོངས་སུ་འཛིན་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །དོན་དམ་པའི་བདེན་པ་མཉམ་པ་ཉིད་ཀྱིས་བདེན་པའི་ཤེས་པ་ཡོངས་སུ་ཚོལ་བ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །སེམས་ཅན་ལ་ཤིན་ཏུ་འདུད་པ་མཉམ་པ་ཉིད་ཀྱིས་ང་རྒྱལ་ངེས་པར་
བཅོམ་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །ཡོན་ཏན་ཐམས་ཅད་ཡང་དག་པར་བླངས་པས་རློམ་སེམས་མེད་པ་མཉམ་པ་ཉིད་ཀྱིས་ཡོན་ཏན་ཐམས་ཅད་ཡང་དག་པར་བསྡུ་བ་ཡོངས་སུ་ཚོལ་བ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡིན་ནོ། །དེ་ནས་རྒྱལ་པོ་དགེ་བའི་
བཀོད་པས་བྱང་ཆུབ་སེམས་དཔའ་རྣམས་ཀྱི་ཡང་དག་པ་ཉིད་ཀྱི་སྤྱོད་པ་དེ་དག་ཐོས་ནས་དགའ་བ་དང་། མགུ་བ་དང་། ཡི་རངས་པ་དང་། རབ་ཏུ་དགའ་བ་དང་། དགའ་ཞིང་ཡིད་བདེ་བ་སྐྱེས་ནས་གོས་དང་། རྒྱན་ཅི་གྱོན་པ་རྣམས་ཀྱིས་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་ལ་མངོན་པར་
བཀབ་བོ། །བུ་སྟོང་པོ་དེ་དག་གིས་ཀྱང་རང་རང་གི་རྒྱན་དག་གིས་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་ལ་བཀབ་ནས་ཚིག་འདི་སྐད་དུ་གང་བདག་ཅག་གིས་སྐྱེས་བུ་དམ་པ་འདི་ལྟ་བུ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དག་རྙེད་པ་ནི་བདག་ཅག་གིས་རྙེད་པ་ལེགས་པར་རྙེད་
དོ། །སེམས་ཅན་ཐམས་ཅད་ཀྱིས་ཀྱང་བྱང་ཆུབ་སེམས་དཔའི་སྤྱོད་པ་དེ་ལྟ་བུ་དང་། སྤོབས་པ་དེ་ལྟ་བུ་དག་ཐོབ་པར་གྱུར་ཅིག་ཅེས་ཀྱང་སྨྲས་སོ། །དེ་ནས་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་གྱིས་རྒྱལ་པོ་དགེ་བའི་བཀོད་པ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་འདི་ལྟ་སྟེ་གོས་དང་། རྒྱན་
ཙམ་གྱིས་མཆོད་པ་དེ་ནི་མཆོད་པ་ཆེན་པོ་མ་ཡིན་གྱི། དེ་ལས་གཞན་པའི་མཆོད་པ་ཁྱད་པར་དུ་འཕགས་པ་དག་ཀྱང་ཡོད་ཀྱིས་དེ་དག་ཁྱོད་ཀྱིས་སྒྲུབས་ཤིག །དེ་ཡང་གང་ཞེ་ན། དེ་ནས་དེའི་ཚེ་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་གྱིས་ཚིགས་སུ་བཅད་པ་འདི་དག་སྨྲས་སོ། །གང་

དག་སྟོང་ཆེན་སེམས་ཅན་དེ་དག་ཀུན། །བྱང་ཆུབ་ཕྱིར་ནི་རབ་ཏུ་ཞུགས་གྱུར་ཅིང་། །མ་ཞུམ་སེམས་ཀྱིས་བསྐལ་པ་རྫོགས་པར་ནི། །བུ་དང་ཆུང་མའི་སྦྱིན་པ་བྱས་པ་བས། །གང་གིས་བྱང་ཆུབ་ཕྱིར་ནི་སེམས་བསྐྱེད་ནས། །དེ་བཞིན་གཤེགས་པའི་རྗེས་སུ་བསླབ་པ་དང་། །རབ་འབྱུང་
སེམས་ཀྱིས་གོམ་པ་གཅིག་བོར་བ། །དེ་ནི་དེ་བས་བསོད་ནམས་ཁྱད་པར་འཕགས། །གང་དག་སྔོན་ཆད་བྱུང་བའི་སངས་རྒྱས་དང་། །གང་དག་མ་བྱོན་བྱུང་དང་བཞུགས་པ་རྣམས། །དེ་དག་སྐྱོན་མང་ཁབ་ནི་མ་སྤངས་པར། །བླ་མེད་བྱང་ཆུབ་ཞི་བ་ཐོབ་པ་མེད། །རབ་འབྱུང་དེ་བཞིན་གཤེགས་
པ་ཐམས་ཅད་ཀྱིས། །རབ་ཏུ་བསྟོད་ཅིང་བསྔགས་ལ་བཀུར་བ་སྟེ། །གང་ཞིག་སངས་རྒྱས་ཀུན་ལ་མཆོད་འདོད་པ། །རྒྱལ་བའི་བསྟན་ལ་རབ་འབྱུང་གཟུང་བར་གྱིས། །གང་ཞིག་ཁྱིམ་གནས་རིན་ཆེན་ཁྱིམ་བརྒྱན་པའི། །གང་གཱའི་བྱེ་སྙེད་སངས་རྒྱས་ཞིང་བྱིན་དང་། །གང་ཞིག་རབ་འབྱུང་
ཉིན་དང་མཚན་གཅིག་ཏུ། །མི་རྟག་སྡུག་བསྔལ་བདག་མེད་སེམས་བྱེད་ན། །གང་ཞིག་རབ་འབྱུང་བག་ཡོད་གྱུར་པ་ཡི། །བྱང་ཆུབ་སེམས་དཔའ་བྱང་ཆུབ་ཉེ་བ་དང་། །བདུད་ཀྱི་དཀྱིལ་འཁོར་ཤིན་ཏུ་བཅོམ་བྱས་ཤིང་། །དགེ་བའི་ཕྱོགས་ཀྱང་མི་འགྲིབ་འཕེལ་བ་ཡིན། །རབ་འབྱུང་དེ་ནི་ལམ་
ངན་སྤངས་པ་དང་། །ལམ་གྱི་རྗེས་འཐུན་འཕགས་པའི་སྐྱེ་བོས་བསྟོད། །དེ་ནི་དགེ་བ་ཆུད་ཟ་མ་ཡིན་ཞིང་། །དེ་ནི་ཡོངས་སུ་འཛིན་པ་སྤངས་པ་ཡིན། །ཁྱིམ་ལས་གྲོལ་བ་ཉོན་མོངས་མི་འཕེལ་ཞིང་། །ཉོན་མོངས་རྣམ་གྲོལ་བདུད་ཀྱི་འཆིང་བ་མེད། །རྣམ་གྲོལ་སེམས་ནི་བྱང་ཆུབ་སྤྱད་པ་
སྤྱོད། །སྤྱོད་པ་དག་པས་བྱང་ཆུབ་རྙེད་མི་དཀའ། །དེ་ནས་རྒྱལ་པོ་དགེ་བའི་བཀོད་པས་ཚིགས་སུ་བཅད་པ་དེ་དག་ཐོས་པ་དང་། འདོད་པའི་དགའ་བ་དང་། ལོངས་སྤྱོད་དང་། རྒྱལ་སྲིད་ཀྱི་དབང་ཕྱུག་དག་ལ་མི་ལྟ་བར་གྱུར་ཅིང་སྐྱོ་ལ། འདོད་ཆགས་དང་བྲལ་བ་སྐྱེས་པར་གྱུར་ཏེ་རབ་ཏུ་
འབྱུང་བ་ལ་སེམས་གཞོལ་བར་གནས་ནས་བཅོམ་ལྡན་འདས་དེ་བཞིན་གཤེགས་པ་རི་རབ་ལྟ་བུ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་བསྙེན་པར་རྫོགས་པ་དགེ་སློང་གི་དངོས་པོ་འཐོབ་ལགས་སམ། བཅོམ་

ལྡན་འདས་དེ་བཞིན་གཤེགས་པ་རི་རབ་ལྟ་བུ་དེས་བཀའ་སྩལ་པ། རྒྱལ་པོ་ཆེན་པོ་རབ་ཏུ་འབྱུང་བ་ནི་དགག་པ་མེད་པ་སྟེ། སེམས་ཅན་ཐམས་ཅད་ལ་ཡང་བར་དུ་མི་གཅོད་ཅིང་སྐབས་ཡོད་དོ། །ཁྱིམ་ན་གནས་པ་ནི་ཉོན་མོངས་པའི་ནང་ན་གནས་པ་ཡིན་གྱིས། གལ་
ཏེ་འདོད་ན་ངས་ཁྱོད་ལ་གདམས་ཤིང་རྗེས་སུ་བསྟན་གྱིས་ཁྱོད་ཀྱིས་ཀྱང་གཏམས་ཤིང་རྗེས་སུ་བསྟན་པ་བཞིན་དུ་བསྒྲུབ་པར་བྱའོ། །དེ་ནས་བཅོམ་ལྡན་འདས་དེས་རབ་ཏུ་འབྱུང་བའི་སྐབས་ཕྱེ་བ་དང་། རྒྱལ་པོ་དགེ་བའི་བཀོད་པས་བུ་སྟོང་པོ་དེ་དག་ལ་སྨྲས་པ། ཁྱེད་ཅག་ལས་རྒྱལ་
སྲིད་སྒྲུབ་པ་དང་། སེམས་ཅན་རྣམས་ཆོས་ཡང་དག་པར་འཛིན་དུ་འཇུག་པར་སྤྲོ་བ་སུ་ཡོད། དེ་དག་ཐམས་ཅད་ཀྱིས་སྨྲས་པ། ཡབ་བདག་ཅག་ཀྱང་དད་པས་ཁྱིམ་ནས་ཁྱིམ་མ་མཆིས་པར་རབ་ཏུ་འབྱུང་ལགས་ཀྱིས། བདག་ཅག་མི་དོར་བར་གསོལ། རྒྱལ་པོས་སྨྲས་པ།
གལ་ཏེ་ཁྱེད་ཅག་ཐམས་ཅད་རབ་ཏུ་བྱུང་ན་གླིང་བཞི་པའི་འཇིག་རྟེན་གྱི་ཁམས་ཐམས་ཅད་ཀྱི་སྐྱེ་བོའི་ཚོགས་ཐམས་ཅད་རབ་ཏུ་ཆུད་ཟོས་པར་འགྱུར་གྱིས་ཁྱེད་ཅག་ལས་གང་སེམས་ཅན་རྣམས་ལ་བརྟན་པའི་སྙིང་རྗེ་ཆེན་པོ་འཇུག་པར་འགྱུར་བ་དེས་རྒྱལ་སྲིད་བསྒྲུབས་ལ་སེམས་ཅན་རྣམས་ལ་
ཆོས་ཡང་དག་པར་འཛིན་དུ་ཆུག་ཤིག །དེ་ནས་རྒྱལ་བུ་གཞོན་ནུ་དེ་དག་གི་ནང་ནས་རྒྱལ་བུ་གཞོན་ནུ་སྙིང་རྗེ་ཆེར་སེམས་ཤེས་བྱ་བ་དེས་རང་གི་ཕ་དེ་དང་། རྒན་རབས་དེ་དག་ལ་ཚིགས་སུ་བཅད་དེ་སྨྲས་པ། རབ་འབྱུང་ཡོན་ཏན་དུ་མ་བསག་པ་ཞེས། །དེ་བཞིན་གཤེགས་པ་རྣམས་ཀྱིས་
གསུངས་མོད་ཀྱི། དེ་ལྟ་ལགས་ཀྱང་སྙིང་རྗེར་གྱུར་པས་ན། །འགྲོ་ལ་ཕན་ཕྱིར་རྒྱལ་སྲིད་བདག་གིས་བསྒྲུབ། །ཇི་སྲིད་འཚོ་བར་བདག་ནི་ཚངས་སྤྱོད་ཅིང་། །གསོ་སྦྱོང་ཡན་ལག་བརྒྱད་པ་བླང་བར་བགྱི། །མེ་ཏོག་རྣམས་དང་དྲི་དང་བྱུག་པ་དང་། །དེ་བཞིན་ཆང་ཡང་མྱང་བར་མི་
བགྱིའོ། །ལུས་ལ་རྒྱན་རྣམས་ཀྱང་ནི་མི་ཐོགས་ཤིང་། །མཆིལ་ལྷམ་མི་འཚལ་རིན་ཆེན་གཙུག་ཕུད་མིན། །ཁྲི་རྐང་གསེར་ལས་བགྱིས་པར་མི་ཉལ་ཞིང་། །རྒྱལ་པོའི་རྐྱེན་ཀྱི་གོས་ཀྱང་མི་འཚལ་ལོ། །སིལ་སྙན་གླུ་དབྱངས་སྒྲ་ལ་མི་དགའ་ཞིང་། །རྨ་བྱ་ངང་པའི་སྒྲ་ལའང་དགའ་མི་

བགྱིད། །སྐྱེ་བོས་མདུན་བདར་བུད་མེད་གནས་སྤོང་ཞིང་། །གཅིག་པུ་མལ་ན་མཆིས་ཉལ་རླུང་མི་གཡབ། །བདག་ནི་གླིང་ནས་གླིང་དུ་མཆི་བགྱི་ཞིང་། །དགེ་བ་བཅུ་རྣམས་རབ་ཏུ་བཤད་པར་བགྱི། །ཁྱིམ་ན་གནས་པའི་ནོངས་པ་བསྟན་བགྱི་ཞིང་། །རབ་ཏུ་འབྱུང་བའི་བསྔགས་པ་
འང་བརྗོད་པར་བགྱི། །གཟུགས་དང་ལོངས་སྤྱོད་དབང་ཕྱུག་དྲེགས་པ་ཡིས། །སངས་རྒྱས་ཆོས་དང་དགེ་འདུན་བགྲོད་མི་བགྱི། །བྱང་ཆུབ་སེམས་ནི་བསྐྱེད་པར་མི་བགྱི་ཞིང་། །རྟག་ཏུ་ཡིད་བྱུང་སྲིད་གསུམ་སྤྱད་པར་བགྱི། །སྦྱིན་དང་སྙན་སྨྲ་དོན་སྤྱོད་དོན་འཐུན་པས། །སེམས་ཅན་
བསྡུ་བ་ལ་ནི་བརྩོན་བགྱི་ཞིང་། །བླ་མེད་ཐེག་ཆེན་དམ་པ་འདི་ལ་ཡང་། །སྲོག་ཆགས་བྱེ་བ་མང་པོ་ཡོངས་སྨིན་བགྱི། །ཆོས་དོན་མཉན་ཅིང་བཤད་པར་བགྱི་སླད་དུ། །ཉིན་མོ་དུས་གསུམ་མཚན་མོ་དུས་གསུམ་དུ། །རི་རབ་ལྟ་བུའི་སྤྱན་སྔར་ཉེར་མཆི་ཞིང་། །དེ་བཞིན་གཤེགས་པ་
ལ་ནི་མཆོད་པའང་བགྱི། །དེ་ནས་བཅོམ་ལྡན་འདས་དེ་བཞིན་གཤེགས་པ་རི་རབ་ལྟ་བུ་དེས་རྒྱལ་བུ་གཞོན་ནུ་སྙིང་རྗེ་ཆེར་སེམས་ལ་ལེགས་སོ་ཞེས་བྱ་བ་བྱིན་ཏེ། སྐྱེས་བུ་དམ་པ་ལེགས་སོ་ལེགས་སོ། །བསླབ་པ་བརྒྱད་ཀྱི་ཚུལ་ཁྲིམས་ཡང་དག་པར་བླངས་པའི་ཆོས་ཀྱི་ཡོན་ཏན་དེས་ན་
ཁྱིམ་པར་གྱུར་པའི་བྱང་ཆུབ་སེམས་དཔའ་ཡང་རབ་ཏུ་བྱུང་བ་དང་། ཡོན་ཏན་མཚུངས་པ་ཡིན་ནོ། །ཁྱོད་ཀྱི་སྙིང་རྗེ་ཆེན་པོ་དེས་ན་རབ་ཏུ་བྱུང་བའི་ཡོན་ཏན་བསྒྲུབ་པ་ཡང་སྒྲུབ་པར་བྱེད་པ་ཡིན་ནོ། །དེ་ནས་རྒྱལ་པོ་དགེ་བའི་བཀོད་པས་རྒྱལ་བུ་གཞོན་ནུ་སྙིང་རྗེ་ཆེར་སེམས་རྒྱལ་སྲིད་ལ་བཞག་ནས་བུ་
སྟོང་དུ་གཅིག་གིས་མ་ཚང་བ་དང་། ལྷན་ཅིག་ཏུ་བཅོམ་ལྡན་འདས་དེའི་བསྟན་པ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གྱུར་ཏོ། །དེ་དག་རབ་ཏུ་བྱུང་ནས་ཀྱང་དེ་བཞིན་གཤེགས་པ་དེས་ཆོ་འཕྲུལ་བསྟན་པ་འདི་ཉིད་ཀྱིས་དེ་ལྟ་དེ་ལྟར་གདམས་ཤིང་རྗེས་སུ་བསྟན་པས་དེ་དག་གིས་རིང་
པོ་མ་ཐོགས་པར་མངོན་པར་ཤེས་པ་ལྔ་བསྐྱེད་པར་གྱུར་ཏོ། །གཟུངས་དང་། དྲན་པ་དང་། ཆོས་མཉན་པའི་ཤེས་པ་ཡང་བསྐྱེད་པར་གྱུར་ཏོ། །རྒྱལ་བུ་གཞོན་ནུ་སྙིང་རྗེ་ཆེར་སེམས་ཀྱང་རྒྱལ་སྲིད་ལ་དབང་བསྐུར་ནས་ཟླ་བ་ཉའོ་ཅོག་ན་གླིང་ཆེན་པོ་བཞི་པོ་དག་ཏུ་རྗེས་སུ་སྟོན་པར་བྱེད་དེ། ཅི་ནས་

ཀྱང་སྲོག་ཆགས་དུང་ཕྱུར་ཕྲག་དགུ་དང་། བྱེ་བ་ཕྲག་གཉིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བ་དེ་ལྟ་དེ་ལྟར་སེམས་ཅན་རྣམས་ལ་ཆོས་སྟོན་པར་གྱུར་ཏོ། །དེ་དག་ཐམས་ཅད་ཀྱང་བཅོམ་ལྡན་འདས་དེ་བཞིན་གཤེགས་པ་རི་རབ་ལྟ་བུ་
དེའི་བསྟན་པ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་ཐེག་པ་ཆེན་པོ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཤ་སྟག་ཏུ་གྱུར་ཏོ། །ཤ་ར་དྭ་ཏིའི་བུ་ཁྱོད་ཀྱིས་ཇི་ཙམ་དུ་དགེ་བའི་རྩ་བ་བསྐྱེད་པ་དང་། ཡོངས་སུ་སྦྱང་བ་བྱས་པའི་སེམས་ཅན་རྣམས་ཀྱི་རྟེན་དུ་གྱུར་ཅིང་
དད་པ་བསྐྱེད་པར་གྱུར་པའི་གསུང་རབ་དེ་ལ་ལྟོས། ཤ་ར་དྭ་ཏིའི་བུ་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་དགེ་བའི་བཀོད་པ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉི་དང་ཡིད་གཉིས་ཟ་བར་གྱུར་ན། ཤ་ར་དྭ་ཏིའི་བུ་ཁྱོད་ཀྱིས་དེ་ལྟར་མི་བལྟ་སྟེ། ལྷའི་བུ་དེད་དཔོན་འདི་ཉིད་
དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་དགེ་བའི་བཀོད་པ་ཞེས་བྱ་བར་གྱུར་ཏོ། །ཤ་ར་དྭ་ཏིའི་བུ་དེའི་ཚེ་དེའི་དུས་ན་ཆོས་སྨྲ་བའི་དགེ་སློང་ཆོས་ཀྱི་རྒྱལ་མཚན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་སོམ་ཉ