Kinh tạng Tây Tạng (Kangyur Đại Học) — 043_དཀོན་བརྩེགས།_ཅ

ི་སྐྱེད། །ནོར་མེད་ནོར་ནི་དོན་དུ་གཉེར་བར་བྱེད། །ཉེས་པ་འདི་དག་ལས་ལ་ཆགས་པའི་ཡིན། །ཁྱིམ་དུ་རྒྱུ་བ་དག་ལ་ཆགས་པར་འགྱུར། །འདུ་འཛི་
དགའ་བས་ཐམས་ཅད་འཇིག་པར་བྱེད། །གཟེབ་ཀྱི་ནང་དུ་བྱ་བཅུག་བཞིན་དུ་འགྱུར། །ཉེས་པ་འདི་དག་ལས་ལ་ཆགས་པའི་ཡིན། །ཁྱིམ་པའི་ལས་ལ་དེ་རྟག་མྱ་ངན་བྱེད། །ཡོངས་སུ་གདུངས་པར་གྱུར་ཀྱང་ཡིད་མི་འབྱུང་། །ནམས་ཀྱང་ཚིག་ནི་བཙུན་པར་མི་འགྱུར་ཏེ། །
ཉེས་པ་འདི་དག་ལས་ལ་དགའ་བའི་ཡིན། །བླ་མས་བསྐུལ་ན་བཀའ་བློ་མི་བདེ་ཞིང་། །རྗེས་སུ་བསྟན་པ་འཐུན་པར་འཛིན་མི་བྱེད། །དེ་ནི་མྱུར་དུ་ཚུལ་ཁྲིམས་ཉམས་པར་འགྱུར། །ཉེས་པ་འདི་དག་ལས་ལ་དགའ་བའི་ཡིན། །ཁྱིམ་ན་གནས་པའི་ལས་རྣམས་རྟག་སེམས་པས། །
དེ་ནི་རྟག་ཏུ་འདོད་པར་འགྱུར་བ་སྟེ། །བསམ་གཏན་དང་ནི་སྤོང་བ་དེ་མི་བྱེད། །ཉེས་པ་འདི་དག་ལས་ལ་དགའ་བའི་ཡིན། །དེ་ཡི་འདོད་ཆགས་ཤས་ནི་ཆེ་བར་སྐྱེ། །དེ་ནི་རོ་བྲོ་རྣམས་ལ་ཆགས་ཤིང་ཞེན། །དེ་ནི་ངན་ངོན་ཙམ་གྱིས་དགར་མི་འགྱུར། །ཉེས་པ་འདི་དག་ལས་ལ་
དགའ་བའི་ཡིན། །དེ་ནི་འཁོར་ཕལ་ཆེ་ན་དགར་འགྱུར་ཏེ། །དེ་ཉམས་ན་ནི་ཤིན་ཏུ་སྡུག་བསྔལ་འགྱུར། །དེ་ནི་བོང་བུ་བཞིན་དུ་ལང་ལོང་འགྱུར། །ཉེས་པ་འདི་དག་ལས་ལ་དགའ་བའི་ཡིན། །དེ་སེམས་རྟག་ཏུ་གནོད་སེམས་ལྡན་པར་འགྱུར། །ལས་རྣམས་འཕེལ་ཞིང་
ཟད་པར་མི་འགྱུར་ཏེ། །སྲེད་པའི་འཁྲི་ཤིང་དག་གིས་དམ་དུ་བཅིངས། །ཉེས་པ་འདི་དག་ལས་ལ་དགའ་བའི་ཡིན། །དེ་ནི་རྟག་ཏུ་བླ་མ་རྣམས་མི་སྟེན། །ཕྱོགས་འདོད་ཁྱིམ་པ་ལ་ནི་སྟེན་པར་བྱེད། །ཚུལ་ཁྲིམས་གནས་པ་དག་ལའང་ཕྲག་དོག་བྱེད། །ཉེས་པ་འདི་དག་

ལས་ལ་དགའ་བའི་ཡིན། །ཉིན་དང་མཚན་དུ་སེམས་གཞན་མེད་པར་ནི། །ཟས་དང་གོས་ལ་རྒྱུན་དུ་སེམས་པར་བྱེད། །དེ་ནི་རྟག་ཏུ་ཡོན་ཏན་འདོད་མ་ཡིན། །ཉེས་པ་འདི་དག་ལས་ལ་དགའ་བའི་ཡིན། །དེ་ནི་འཇིག་རྟེན་པ་ཡི་བྱ་བ་འདྲི། །རིགས་པ་མིན་པའི་
སྨྲ་བ་རྣམས་ལ་དགའ། །རིགས་པའི་སྨྲ་ལ་དེ་ནི་དགའ་མི་འགྱུར། །ཉེས་པ་འདི་དག་ལས་ལ་དགའ་བའི་ཡིན། །སྡོམ་བརྩོན་རྣམས་ལ་དེ་ནི་རྟག་ཏུ་གཤེ། །དབང་ཕྱུག་ཉེས་པས་དེ་དག་དེས་ཚར་གཅོད། །མི་སྡུག་ལས་རྣམས་མངོན་པར་འདུ་བྱེད་དེ། །ཉེས་པ་འདི་དག་
ལས་ལ་དགའ་བའི་ཡིན། །དེ་ནི་རྟག་ཏུ་གཞན་གྱི་སྐྱོན་རྟོག་ཅིང་། །བདག་ལ་ཡོད་པའི་སྐྱོན་རྣམས་མི་མཐོང་ལ། །ཡོན་ཏན་ལྡན་པ་རྣམས་ལ་འཁྲུལ་པ་ཚོལ། །ཉེས་པ་འདི་དག་ལས་ལ་དགའ་བའི་ཡིན། །བྱིས་པ་དེ་ནི་གཞན་གྱིས་མྱུར་དུ་བརྙས། །དེ་ནི་ཕ་རོལ་དག་ལ་ཆོས་སྟོན་
ཚེ། །བློ་ཉམས་པས་ན་མངོན་པར་ཤེས་མི་འགྱུར། །ཉེས་པ་འདི་དག་ལས་ལ་དགའ་བའི་ཡིན། །གནོད་འགྱུར་ཉེས་པ་འདི་དག་མཐོང་ནས་ནི། །ལས་ངན་དག་ལ་སུ་ཞིག་དགའ་བར་བྱེད། །དཔའ་བོ་དག་ནི་རྟག་ཏུ་ལས་མཆོག་བྱེད། །བྱས་པ་གང་ཡིན་ཆུད་ནི་གཟོན་མི་བྱེད། །
ལན་སྟོང་བརྗོད་ཀྱང་ཚིག་གཅིག་མི་འཛིན་པ། །དེ་ནི་བློ་ཅན་དག་གིས་སྤྱོ་བ་ཡིན། །གང་ཞིག་ལས་ངན་དག་ནི་བྱེད་པ་ལ། །དམ་པ་དག་གིས་དེ་ལྟར་རྟག་ཏུ་སྨད། །དེ་ལྟ་བས་ན་མཁས་མིས་འདི་རྟག་ཏུ། །ལས་ངན་དག་ནི་རྣམ་པར་སྤངས་ནས་ཀྱང་། །ཐུབ་དབང་རྣམས་ཀྱིས་
རྟག་ཏུ་བསྔགས་པ་ཡི། །བཟང་པོའི་ལས་རྣམས་གང་ཡིན་དེ་དག་བྱ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་གང་དག་ཆོས་ཀྱི་མཆོག་ཡོངས་སུ་སྤངས་ནས་
ལས་ངན་པ་རྩོམ་པ་དེ་དག་ནི་ཤེས་རབ་ཤིན་ཏུ་ཆུང་ཞིང་ཤེས་རབ་ཀྱིས་དམན་པར་འགྱུར་བ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ་དེ་དེ་བཞིན་

ཏེ། དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། བྱང་ཆུབ་སེམས་དཔའ་གང་དག་ཆོས་ཀྱི་མཆོག་ཡོངས་སུ་སྤངས་ནས་ལས་ངན་པ་རྩོམ་པ་དེ་དག་ནི་ཤེས་རབ་ཤིན་ཏུ་ཆུང་ཞིང་ཤེས་རབ་ཀྱིས་དམན་པར་འགྱུར་བ་ཡིན་ནོ། །བྱམས་པ་གཞན་ཡང་ཁྱོད་
མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །བྱང་ཆུབ་སེམས་དཔའ་གང་དག་ལ་སྦྱོར་བ་མེད་ཅིང་བསམ་གཏན་མེད་ལ་སྤོང་བ་མེད་ཅིང་འདོན་པ་མེད་པ་དང་། མང་དུ་ཐོས་པ་ཡོངས་སུ་ཚོལ་བ་མེད་པ་དེ་དག་ནི་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བ་མ་ཡིན་
ནོ། །བྱམས་པ་དེ་བཞིན་གཤེགས་པའི་བསྟན་པ་ནི་བསམ་གཏན་དང་སྤོང་བས་ཕྱེ་བ་དང་། ཡེ་ཤེས་ཀྱིས་འདུས་བྱས་པ་དང་། ཡེ་ཤེས་ཀྱིས་མཉམ་པར་བཞག་པ་དང་། བརྩོན་པས་ཕྱེ་བ་ཡིན་གྱི། ཁྱིམ་པའི་ལས་དང་ཞལ་ཏ་བྱེད་པས་ཕྱེ་བ་ནི་མ་ཡིན་ཏེ། འདི་ལྟར་ཞལ་ཏ་བྱེད་པའི་ལས་དེ་ནི་མི་རིགས་པ་ལ་
སྦྱོར་བ་རྣམས་དང་། འདུ་བྱེད་ལ་མངོན་པར་དགའ་བ་རྣམས་དང་། འཇིག་རྟེན་པའི་བྱ་བས་སྦགས་པ་སྟེ། བྱང་ཆུབ་སེམས་དཔས་དེ་ལ་འདོད་པ་བསྐྱེད་པར་མི་བྱའོ། །བྱམས་པ་གལ་ཏེ་བྱང་ཆུབ་སེམས་དཔའ་ཞལ་ཏ་བྱེད་པ་ལ་བརྩོན་པས་རིན་པོ་ཆེ་སྣ་བདུན་གྱི་མཆོད་རྟེན་དག་གིས་སྟོང་གསུམ་གྱི་
སྟོང་ཆེན་པོའི་འཇིག་རྟེན་གྱི་ཁམས་འདི་བཀང་ན་དེས་ནི་ང་མཉེས་པར་བྱས་པ་མ་ཡིན། རི་མོར་བྱས་པ་མ་ཡིན། བཀུར་སྟིར་བྱས་པ་མ་ཡིན་གྱི། བྱམས་པ་གལ་ཏེ་བྱང་ཆུབ་སེམས་དཔའ་ཐ་ན་ཕ་རོལ་ཏུ་ཕྱིན་པ་དང་ལྡན་པའི་ཚིག་བཞི་པའི་ཚིགས་སུ་བཅད་པ་གཅིག་ཙམ་འཛིན་
ཏམ། འཆང་ངམ། ཀློག་གམ། ཀུན་ཆུབ་པར་བྱེད་དམ། འཆང་ན་དེས་ནི་ང་ལ་བཀུར་སྟིར་བྱས། བླ་མར་བྱས། རི་མོར་བྱས། མཆོད་པ་བྱས་པར་འགྱུར་རོ། །དེ་ཅིའི་ཕྱིར་ཞེ་ན། བྱམས་པ་དེ་བཞིན་གཤེགས་པ་རྣམས་ཀྱི་བྱང་ཆུབ་ནི་མང་དུ་ཐོས་པ་ལས་བྱུང་བ་ཡིན་གྱི། དངོས་པོ་
ཡོངས་སུ་འཛིན་པ་ལས་བྱུང་བ་ནི་མ་ཡིན་པའི་ཕྱིར་རོ། །བྱམས་པ་གལ་ཏེ་བྱང་ཆུབ་སེམས་དཔའ་ཞལ་ཏ་བྱེད་པ་ལ་བརྩོན་པས་བྱང་ཆུབ་སེམས་དཔའ་ལུང་ནོད་པ་དང་། ཁ་ཏོན་བྱེད་པ་ལ་བརྩོན་པ་ཞལ་ཏ་བྱེད་པའི་སྦག་པས་སྦགས་པར་བྱེད་ན་བསོད་ནམས་འདོད་པ་དེས་ནི་བསོད་ནམས་

མ་ཡིན་པའི་ཕུང་པོ་ཆེན་པོ་སྐྱེད་པར་འགྱུར་ཏེ། ལས་ཀྱི་སྒྲིབ་པ་ཡང་ཡོངས་སུ་འཛིན་པར་འགྱུར་རོ། །དེ་ཅིའི་ཕྱིར་ཞེ་ན། བསོད་ནམས་བྱ་བའི་གཞི་གསུམ་པོ་གང་ཡིན་པ་དེ་དག་ཐམས་ཅད་ནི་ཤེས་རབ་ལས་བྱུང་བའི་ཕྱིར་རོ། །བྱམས་པ་དེ་ལྟ་བས་ན་བྱང་ཆུབ་སེམས་དཔའ་ཞལ་
ཏ་བྱེད་པ་ལ་བརྩོན་པས་བྱང་ཆུབ་སེམས་དཔའ་ལུང་ནོད་པ་དང་། ཁ་ཏོན་བྱེད་པ་ལ་བརྩོན་པའི་བར་ཆད་མི་བྱའོ། །འཛམ་བུའི་གླིང་འདི་ཞལ་ཏ་བྱེད་པས་ཡོངས་སུ་གང་བར་གྱུར་པའི་ཞལ་ཏ་བྱེད་པ་དེ་དག་ཐམས་ཅད་ཀྱིས་ནི་བྱང་ཆུབ་སེམས་དཔའ་ལུང་ནོད་པ་དང་། ཁ་ཏོན་བྱེད་པ་
ལ་བརྩོན་པ་གཅིག་ལ་རིམ་གྲོ་དང་བསྙེན་བཀུར་བྱའོ། །བྱང་ཆུབ་སེམས་དཔའ་ལུང་ནོད་པ་དང་། ཁ་ཏོན་བྱེད་པ་ལ་བརྩོན་པ་འཛམ་བུའི་གླིང་གང་བསྙེད་ཀྱིས་ནི་བྱང་ཆུབ་སེམས་དཔའ་ནང་དུ་ཡང་དག་འཇོག་ལ་བརྩོན་པ་གཅིག་ལ་རིམ་གྲོ་དང་བསྙེན་བཀུར་བྱའོ། །དེ་ལྟར་བྱས་ན་དེ་
བཞིན་གཤེགས་པས་རྗེས་སུ་ཡི་རང་བ་དང་གནང་བ་ཡིན་ཏེ། དེ་དག་གི་བསྙེན་བཀུར་ནི་ལེགས་པར་བྱས་པ་ཡིན་ནོ། །གང་ཞིག་ཤེས་རབ་སྤྱོད་པ་ལ་མོས་ནས་རིམ་གྲོ་དང་བསྙེན་བཀུར་བྱེད་པའི་བསོད་ནམས་ཀྱི་ཕུང་པོ་ནི་ཚད་མེད་པར་སྐྱེད་པར་འགྱུར་རོ། །དེ་ཅིའི་ཕྱིར་ཞེ་ན།
འདི་ལྟར་ཤེས་རབ་ཀྱི་ལས་ནི་དཀའ་བའི་ལས་དང་། བླ་ན་མེད་པ་དང་། གོང་ན་མེད་པ་དང་། འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་ཤིང་མངོན་པར་འཕགས་པའི་ཕྱིར་རོ། །བྱམས་པ་དེ་ལྟ་བས་ན་བྱང་ཆུབ་སེམས་དཔའ་མངོན་པར་བརྩོན་པ་དོན་
དུ་གཉེར་ཞིང་བརྩོན་འགྲུས་རྩོམ་པར་འདོད་པས་ཤེས་རབ་ལ་བརྩོན་པར་བྱ་ཞིང་ཤེས་རབ་ཡོངས་སུ་བཙལ་བ་ལ་བརྩོན་འགྲུས་བརྩམ་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །
བཅོམ་ལྡན་འདས་བྱང་ཆུབ་སེམས་དཔའ་འདུ་འཛི་ལ་དགའ་བ་དང་། ལས་ལ་དགའ་བ་རྣམས་ཀྱི་ནོངས་དམིགས་རྣམས་ནི་བཀའ་སྩལ་ལགས་ན། བཅོམ་ལྡན་འདས་བྱང་ཆུབ་སེམས་དཔས་སྤྲོས་པ་ལ་དགའ་བའི་ནོངས་དམིགས་རྣམས་ཇི་ལྟར་བརྟག་པར་བགྱི།

བྱང་ཆུབ་སེམས་དཔས་གང་དག་ལ་བརྟགས་ན་ཉེ་བར་ཞི་བ་ལ་གནས་ཤིང་རྩོད་པ་མ་མཆིས་པར་གནས་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། བྱམས་པ་བྱང་ཆུབ་སེམས་དཔས་སྤྲོས་པ་ལ་དགའ་བའི་ཉེས་དམིགས་རྣམས་མདོར་བསྡུ་ན་
ཉི་ཤུ་པོ་འདི་དག་ཏུ་བརྟག་པར་བྱའོ། །རྒྱས་པར་ནི་དེ་བཞིན་གཤེགས་པས་མཐའ་ཡས་པར་བསྟན་ཏེ་མཐར་ཐུག་པར་ཡང་མི་འགྱུར་རོ། །ཉི་ཤུ་གང་ཞེ་ན། བྱམས་པ་བྱང་ཆུབ་སེམས་དཔའ་སྤྲོས་པ་ལ་དགའ་བ་ནི་ཚེ་འདི་ཉིད་ལ་སྡུག་བསྔལ་བ་དང་ཡིད་མི་བདེ་བ་མང་བར་གནས་
པ་དང་། བཟོད་པ་ལས་ཡོངས་སུ་ཉམས་པར་འགྱུར་བ་དང་། དེའི་མི་མཛའ་བ་རྣམས་ཡི་རངས་པར་འགྱུར་བ་དང་། དེ་ལ་བདུད་ཀྱང་མགུ་བར་འགྱུར་བ་དང་། དེ་ལ་བདུད་ཀྱི་འཁོར་ཀྱང་དགའ་བར་འགྱུར་བ་དང་། དེའི་དགེ་བའི་ཆོས་མ་སྐྱེས་པ་རྣམས་སྐྱེ་བར་མི་འགྱུར་བ་
དང་། སྐྱེས་པ་རྣམས་མེད་པར་འགྱུར་བ་དང་། འཐབ་པ་དང་འཁོན་དུ་འཛིན་པ་དང་། རྩོད་པ་དང་། འགྱེད་པ་མང་བར་འགྱུར་བ་དང་། འཐབ་པ་དང་། རྩོད་པ་དང་། འགྱེད་པས་ངན་སོང་དུ་འགྲོ་བར་འགྱུར་བའི་ལས་མངོན་པར་འདུ་བྱེད་པར་འགྱུར་བ་དང་། བག་
མེད་པར་འགྱུར་བའི་ལམ་རབ་ཏུ་འཛིན་པ་དང་། དེའི་ལྕེའི་དབང་པོ་རྩུབ་པར་འགྱུར་བ་དང་། དེའི་ལུང་མནོས་པའི་ཆོས་རྣམས་ལེགས་པར་གནས་པར་མི་འགྱུར་བ་དང་། མདོ་སྡེ་ལུང་མ་མནོས་པ་རྣམས་རྣ་ལམ་དུ་གྲག་པར་མི་འགྱུར་བ་དང་། དགེ་བའི་བཤེས་གཉེན་ཐམས་ཅད་
ཀྱིས་ཡོངས་སུ་སྤོང་བར་འགྱུར་བ་དང་། སྡིག་པའི་གྲོགས་པོ་རྣམས་དང་མྱུར་དུ་ཕྲད་པར་འགྱུར་བ་དང་། དཀའ་བའི་ལམ་གྱིས་ངེས་པར་འབྱུང་བར་འགྱུར་བ་དང་། རྒྱུན་མི་འཆད་པར་ཡིད་དུ་མི་འོང་བའི་ཚིག་ཐོས་པར་འགྱུར་བ་དང་། གང་དང་གང་དུ་སྐྱེས་པ་དེ་དང་
དེར་ཐེ་ཚོམ་ཅན་དུ་འགྱུར་བ་དང་། དེ་ལ་མི་ཁོམ་པ་བརྒྱད་པོ་དག་ཉེ་བར་འགྱུར་བ་དང་། རྟག་ཏུ་དེའི་དཀར་པོའི་ཕྱོགས་ལ་བརྩོན་པ་ལ་བར་ཆད་འབྱུང་བར་འགྱུར་བ་སྟེ། བྱམས་པ་ཉི་ཤུ་པོ་དེ་དག་ནི་སྤྲོས་པ་ལ་དགའ་བའི་ཉེས་དམིགས་རྣམས་མདོར་བསྡུས་པ་ཡིན་ཏེ།

དེ་དག་ཡོངས་སུ་སྤང་བར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །དེ་ནི་ཚེ་འདིར་བདེ་བར་མི་འགྱུར་ཏེ། །བཟོད་དང་རིང་ཞིང་ཁྲོ་བའི་ཕྱོགས་ལ་གནས། །དེ་ཡི་དགྲ་རྣམས་དགའ་བར་འགྱུར་བ་སྟེ། །སྤྲོས་སྤྱོད་
དེ་ཡི་ཉེས་པ་འདི་དག་གོ །བདུད་ཀྱང་དེ་ལ་དགའ་ཞིང་མགུ་བར་འགྱུར། །བདུད་ཀྱི་ཕྱོགས་ཀྱང་དེ་ལ་དགའ་བར་འགྱུར། །དེ་ཡི་དགེ་བའི་ཆོས་སྐྱེས་ཆུད་ཟར་འགྱུར། །སྤྲོས་སྤྱོད་དེ་ཡི་ཉེས་པ་འདི་དག་གོ །དེ་ནི་ནམས་ཀྱང་དགེ་བ་མི་སྐྱེད་དེ། །འཆི་ཀར་
ཐ་དད་རྒྱུ་ལ་གནས་པ་དང་། །ངན་སོང་འགྲོ་བའི་ལས་ནི་བྱེད་པར་འགྱུར། །སྤྲོས་སྤྱོད་དེ་ཡི་ཉེས་པ་འདི་དག་གོ །མི་མཛེས་པ་དང་བལྟ་ན་མི་སྡུག་དང་། །དེ་ནི་རྟག་ཏུ་རུས་རིགས་དམའ་བར་འགྱུར། །དེ་ཡི་ལྕེ་ཡི་དབང་པོ་རྩུབ་འགྱུར་ཏེ། །སྤྲོས་སྤྱོད་དེ་
ཡི་ཉེས་པ་འདི་དག་གོ །ལུང་མནོས་ཆོས་རྣམས་ལེགས་པར་མི་གནས་ཤིང་། །ལུང་མནོས་མ་བྱས་མདོ་སྡེ་ཐོས་མི་འགྱུར། །དགེ་བའི་བཤེས་གཉེན་རྣམས་ཀྱང་རྣམ་པར་སྤོང་། །སྤྲོས་སྤྱོད་དེ་ཡི་ཉེས་པ་འདི་དག་གོ །སྡིག་པའི་གྲོགས་པོ་དག་དང་
ཕྲད་པར་འགྱུར། །དཀའ་བའི་ཐེག་པས་རྣམ་པར་དག་འགྱུར་ཞིང་། །མི་འདོད་པ་ཡི་ཚིག་རྣམས་རྒྱུན་དུ་ཐོས། །སྤྲོས་སྤྱོད་དེ་ཡི་ཉེས་པ་འདི་དག་གོ །བྱིས་པའི་བློ་ཅན་དེ་ནི་གར་སྐྱེས་དེར། །ཡིན་ནམ་མ་ཡིན་སྙམ་དུ་དེ་རྟོག་ཅིང་། །རྟག་ཏུ་དེས་ནི་ཐེ་ཚོམ་
རྙེད་པར་འགྱུར། །སྤྲོས་སྤྱོད་དེ་ཡི་ཉེས་པ་འདི་དག་གོ །དེ་ནི་མི་ཁོམ་བརྒྱད་དང་རིང་མི་འགྱུར། །དེ་ནི་དལ་བ་ལྡན་པའི་མཆོག་མི་འགྱུར། །དེ་ལ་གནོད་པ་འདི་དག་རྟག་འབྱུང་སྟེ། །སྤྲོས་སྤྱོད་དེ་ཡི་ཉེས་པ་འདི་དག་གོ །དེ་ཡི་དགེ་བ་དག་ལ་བར་ཆད་མང་། །བགེགས་
སུ་འགྱུར་བས་མྱུར་དུ་འཐོབ་མི་འགྱུར། །བརྩོན་དང་ལྡན་ཡང་དེ་ལ་དགྲ་རྣམས་འབྱུང་། །སྤྲོས་སྤྱོད་དེ་ཡི་ཉེས་པ་འདི་དག་གོ །མཁས་པས་ཉེས་འདི་ཡང་དག་རིག་ནས་ནི། །སྤྲོས་པ་ཐམས་ཅད་ཡོངས་སུ་སྤང་བར་བྱ། །སྤྲོས་སྤྱོད་དག་ནི་གནོད་པ་རྙེད་པར་སླ། །དེ་ལྟ་

བས་ན་སྤྲོས་ལ་གནས་མི་བྱ། །གང་ལ་སྤྲོས་པའམ་རྩོད་པ་ཡོད་པ་ལས། །དཔག་ཚད་བརྒྱ་ཡི་ཕ་རོལ་འགྲོ་བ་མཆོག །གང་ན་ཉོན་མོངས་ཡོད་པ་དེ་དག་ཏུ། །ཡུད་ཙམ་ཞིག་ཀྱང་གནས་ཤིང་འདུག་མི་བྱ། །རབ་བྱུང་དོན་འདོད་ཡོན་ཏན་འདོད་པ་རྣམས། །
སྡང་བའི་སེམས་ཀྱིས་རྩོད་པར་མ་བྱེད་ཅིག །ཁྱེད་ལ་ཞིང་མེད་ཞིང་ལས་ཚོང་བྱར་མེད། །གང་ལ་ནོར་ཕྱིར་འདི་དག་འབྱུང་བ་སྤྲོས། །ཁྱེད་ལ་ཆུང་མ་བུ་དང་བུ་མོ་མེད། །ཁྱིམ་དང་གཉེན་གྱི་ཚོགས་ཀྱང་ཡོད་མ་ཡིན། །བྲན་ཕོ་བྲན་མོ་མེད་ཅིང་དབང་ཕྱུག་མེད། །རབ་ཏུ་བྱུང་ནས་
རྩོད་པར་མ་བྱེད་ཅིག །ཞི་ཞིང་རབ་ཏུ་ཞི་བས་བསྟེན་པ་ཡི། །ངུར་སྨྲིག་གོས་རྣམས་དད་པས་བླངས་ནས་ནི། །ཞི་ཞིང་རབ་ཞི་ཉེ་བར་ཞི་བར་བྱོས། །སྤྲོས་པ་རྣམ་པར་སྤོངས་ལ་བཟོད་པ་སྐྱེད། །མི་བཟད་སེམས་ནི་སྦྲུལ་དུག་འདྲ་བ་སྲུངས། །སྤྲོས་ལ་སྤྱོད་པ་སེམས་ཅན་དམྱལ་
བ་དང་། །དུད་འགྲོ་གཤིན་རྗེའི་ཡུལ་དང་རིང་མི་འགྱུར། །དེ་ལྟ་བས་ན་བཟོད་དང་བརྩོན་འགྲུས་སྐྱེད། །ཚོགས་པ་གཞིག་ཕྱིར་སྤྲོས་པར་བྱེད་ན་ནི། །སྡུག་བསྔལ་གསོད་དང་འཆིང་བ་ཅི་ཡང་རུང་། །གོ་ར་བརྡེག་དང་བསྡིགས་པ་དེ་དག་ནི། །འཇིག་རྟེན་འདི་ན་གནས་པ་
རྣམས་ལ་འབྱུང་། །ཚོགས་པར་གྱུར་ལ་ཉེས་པ་འདི་དག་དཀོན། །ཚོགས་གྱུར་བག་ལ་ཉལ་བ་འཕེལ་བ་མེད། །ཚོགས་གྱུར་རྣམས་ལ་དགའ་བ་འབྱུང་འགྱུར་ན། །མཁས་པ་སུ་ཞིག་ཚོགས་པ་སྐྱེད་མི་བྱེད། །གླགས་ཚོལ་དག་གིས་སྐྱོན་རྣམས་རྙེད་མི་འགྱུར། །ནམས་
ཀྱང་འཁོར་རྣམས་ཕྱེད་པར་མི་འགྱུར་ཏེ། །དེ་ཡི་མཛའ་བཤེས་དག་ཀྱང་རྒྱུན་དུ་འབྱུང་། །སྤྲོས་པ་སྤངས་པའི་ཕན་ཡོན་དེ་དག་ཡིན། །ཐེག་པའི་སྟོབས་འདི་ཡིས་ནི་དག་འགྱུར་ཞིང་། །ལས་ཀྱི་སྒྲིབ་པ་མ་ལུས་བྱང་ནས་ནི། །སྟོབས་དང་བཅས་ཤིང་བཞོན་བཅས་བདུད་ཐུལ་ཅིག །
བརྟན་པ་གང་ཡིན་དེས་ནི་བཟོད་པ་བསྐྱེད། །སྤྲོས་པ་རྒྱས་པ་ལ་ནི་སྐྱོན་མང་ཆགས། །ཉེས་པ་དེ་དག་ངས་ནི་བསྟན་མི་ནུས། །རྟག་ཏུ་སྤྲོས་མེད་བསྔགས་པ་མཐའ་ཡས་འགྱུར། །སུ་ཞིག་དོན་གཉེར་དེས་ནི་བཟོད་པ་སྐྱེད། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་

དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀུན་ནས་ཉོན་མོངས་པ་དེ་ཙམ་དུ་གླེང་བ་ནི་དེ་བཞིན་གཤེགས་པས་ལེགས་པར་གསུངས་ཏེ་ངོ་མཚར་ལགས་སོ། །བཅོམ་ལྡན་འདས་ཅི་ལྔ་བརྒྱ་པ་ཐ་མ་ལ་བྱང་ཆུབ་སེམས་དཔའ་རྣམས་ཀྱིས་ཚིག་གི་མཆོག་
འདི་ལྟ་བུ་འདི་དག་ཐོས་ན་སྐྱོ་བར་འགྱུར་ཞིང་ཀུན་ནས་ཉོན་མོངས་པའི་སྤྱོད་པ་ཡང་སྤོང་བར་འགྱུར་ལགས་སམ་བཀའ་སྩལ་པ། བྱམས་པ་ལྔ་བརྒྱ་པ་ཐ་མ་ལ་བྱང་ཆུབ་སེམས་དཔའི་ཐེག་པ་པའི་གང་ཟག་རྣམས་ཚིག་གི་མཆོག་འདི་ལྟ་བུ་འདི་དག་ཐོས་ན་སྐྱོ་བར་འགྱུར་ཞིང་ཀུན་
ནས་ཉོན་མོངས་པའི་སྤྱོད་པ་ཡང་སྤོང་བར་འགྱུར་བ་འབྱུང་བ་དེ་དག་ནི་ཉུང་ངོ་། །བྱམས་པ་གང་སེམས་ཀྱི་རྒྱུད་ཁེངས་པར་འགྱུར་ཞིང་གུས་པ་མེད་པ་དང་། མངོན་པའི་ང་རྒྱལ་ལ་གནས་པ་དང་། གཅིག་ལ་གཅིག་ཐེ་ཚོམ་ཟ་བ་མང་བ་དག་ནི་ཕལ་ཆེ་སྟེ། དེ་དག་ནི་དེ་བཞིན་
གཤེགས་པས་གསུངས་པའི་མདོ་སྡེ་ཟབ་མོ་བསྟན་པའི་ཡོན་ཏན་དང་ཕན་ཡོན་ཟབ་པ་དག་ལུང་ནོད་པར་མི་བྱེད། ཁ་ཏོན་དུ་མི་བྱེད། འཆང་བར་མི་བྱེད། ཀུན་ཆུབ་པར་མི་བྱེད་དེ། དེ་དག་གི་ལས་ཀྱི་སྒྲིབ་པ་ཤས་ཆེ་བས་ཡོན་ཏན་དེ་དག་དང་ཕན་ཡོན་དེ་དག་འབྱུང་བར་མི་འགྱུར་རོ། །
དེ་དག་དད་པ་མེད་པ་དེས་མདོ་སྡེ་དེ་དག་ལ་ཐེ་ཚོམ་ཟ་བར་འགྱུར་ཏེ། ཕྱིས་ཀྱང་ལུང་ནོད་པར་མི་བྱེད། འཆང་བར་མི་བྱེད། ཀུན་ཆུབ་པར་མི་བྱེད་དེ། དེ་དག་གི་དྲུང་དུ་བདུད་སྡིག་ཅན་དགེ་སློང་གི་ཆ་ལུགས་སུ་འདུག་ནས་འདི་སྐད་དུ་མདོ་སྡེ་འདི་དག་ནི་རང་བཟོར་བྱས་པ་ཡིན་ཏེ། འདི་དག་ནི་
དེ་བཞིན་གཤེགས་པས་གསུངས་པ་མ་ཡིན་ནོ། །དེ་ཅིའི་ཕྱིར་ཞེ་ན། མདོ་སྡེ་འདི་དག་ལས་ཡོན་ཏན་དང་ཕན་ཡོན་བཤད་པ་གང་ཡིན་པ་དེ་དག་ཁྱེད་ཀྱི་འདི་ལས་མི་འབྱུང་ཞིང་མེད་པའི་ཕྱིར་རོ་ཞེས་མོས་པ་ཟློག་པར་བྱེད་དོ། །དེ་དག་དེ་ལྟར་མོས་པ་ཟློག་པས་མདོ་སྡེ་ཟབ་མོ་དག་མི་འདོད་
ཅིང་ཐེ་ཚོམ་དུ་འགྱུར་ཏེ། ལུང་ནོད་པར་མི་བྱེད། ཁ་ཏོན་དུ་མི་བྱེད་དེ། མི་བླུན་པོ་དེ་དག་གིས་ཡོན་ཏན་དང་ཕན་ཡོན་དེ་དག་ཐོས་ན་འདི་ལྟར་ཆོས་སྤོང་བར་འགྱུར་བའི་ལས་ཀྱི་རྣམ་པར་སྨིན་པ་ནི་སྦྱང་བར་མི་ནུས་སོ་སྙམ་དུ་མི་སེམས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་

དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་ཀྱི་ཡོན་ཏན་དེ་བཞིན་གཤེགས་པས་གསུངས་པ་གང་ལགས་པ་འདི་དག་ལས་གང་གིས་སེམས་བསྐྱེད་པ་གང་ཡང་རུང་
བ་ཞིག་ཡིད་ལ་བགྱིད་ཅིང་། དེ་བཞིན་གཤེགས་པ་ཚེ་དཔག་མེད་ཡིད་ལ་བགྱིད་པ་དེ་སངས་རྒྱས་ཀྱི་ཞིང་དེར་སྐྱེ་བར་འགྱུར་ན། བཅོམ་ལྡན་འདས་སེམས་བསྐྱེད་པ་དེ་དག་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་
བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ་སེམས་བསྐྱེད་པ་གང་དག་གིས་དེ་བཞིན་གཤེགས་པ་ཚེ་དཔག་མེད་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་བར་བྱེད་པ་དེ་དག་
ནི་བྱིས་པའི་སེམས་བསྐྱེད་པ་མ་ཡིན། སྐྱེས་བུ་དམ་པ་མ་ཡིན་པའི་སེམས་བསྐྱེད་པ་མ་ཡིན། ཀུན་ནས་ཉོན་མོངས་པའི་སེམས་བསྐྱེད་པ་མ་ཡིན་ཏེ། བྱམས་པ་སེམས་བསྐྱེད་པ་ནི་བཅུ་པོ་འདི་དག་ཡིན་ནོ། །བཅུ་གང་ཞེ་ན། བྱམས་པ་འདི་
ལྟ་སྟེ། སེམས་ཅན་ཐམས་ཅད་ཀྱི་སྤྱོད་པ་ལ་ཞེ་འགྲས་པས་ནི་དེ་བཞིན་གཤེགས་པ་ཚེ་དཔག་མེད་ཀྱི་སངས་རྒྱས་ཀྱི་ཞིང་དུ་སྐྱེ་བར་མི་ནུས་ཏེ། སེམས་ཅན་ཐམས་ཅད་ལ་བྱམས་པའི་སེམས་བསྐྱེད་པ་དང་། འཚེ་བ་ཡོངས་སུ་སྤངས་ཏེ། སེམས་ཅན་
ཐམས་ཅད་ལ་སྙིང་རྗེ་བའི་སེམས་བསྐྱེད་པ་དང་། ལུས་དང་སྲོག་ལ་མི་ལྟ་བར་དམ་པའི་ཆོས་བསྲུང་བའི་སེམས་བསྐྱེད་པ་དང་། ཟབ་མོའི་བཟོད་པ་ལ་ངེས་པར་གྱུར་པས་དམ་པའི་ཆོས་ལ་མངོན་པར་ཞེན་པའི་སེམས་བསྐྱེད་པ་དང་། རྙེད་པ་དང་
བཀུར་སྟིས་མ་གོས་པས་བསམ་པ་ཡོངས་སུ་དག་པའི་སེམས་བསྐྱེད་པ་དང་། བརྗེད་པ་མེད་པས་ཐམས་ཅད་མཁྱེན་པ་ཉིད་ལ་རིན་པོ་ཆེར་སེམས་བསྐྱེད་པ་དང་། ཞུམ་པ་མེད་པས་སེམས་ཅན་ཐམས་ཅད་ལ་བླ་མ་བཞིན་དུ་གུས་པའི་སེམས་བསྐྱེད་པ་དང་།

བྱང་ཆུབ་ཀྱི་ཡན་ལག་ལ་ངེས་པས་ཉི་ཚེ་བའི་བསམ་གཏན་གྱི་རོ་མྱང་བར་མི་བྱ་བའི་སེམས་བསྐྱེད་པ་དང་། མ་འདྲེས་པས་དགེ་བའི་རྩ་བ་རྣམ་པ་སྣ་ཚོགས་ཀྱི་སེམས་བསྐྱེད་པ་དང་། མཚན་མ་ཡོངས་སུ་སྤངས་ཏེ། སངས་རྒྱས་རྗེས་སུ་དྲན་པ་བསྒོམ་པའི་
སེམས་བསྐྱེད་པ་སྟེ། བྱམས་པ་སེམས་བསྐྱེད་པ་བཅུ་པོ་ནི་དེ་དག་ཡིན་ཏེ། སེམས་བསྐྱེད་པ་བཅུ་པོ་དེ་དག་ལས་སེམས་བསྐྱེད་པ་གང་ཡང་རུང་བའི་སེམས་བསྐྱེད་པ་གང་ཡིན་པ་དེ་ནི་སེམས་བསྐྱེད་པ་དེ་དག་དང་ལྡན་ན་སངས་རྒྱས་ཀྱི་ཞིང་དེར་སྐྱེ་བར་མི་
འགྱུར་བ་དེ་ནི་གནས་མེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷག་པའི་བསམ་པ་བསྐུལ་བའི་ཆོས་ཀྱི་རྣམ་གྲངས་འདི་དེ་ཙམ་དུ་བསམ་གྱིས་མི་ཁྱབ་པ་ནི་ངོ་མཚར་ལགས་སོ། །
དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་ལེགས་སོ་ཞེས་བྱ་བ་བྱིན་ཏེ། ཀུན་དགའ་བོ་ལེགས་སོ་ལེགས་སོ། །ཀུན་དགའ་བོ་དེའི་ཕྱིར་ཁྱོད་ཀྱིས་ལྷག་པའི་བསམ་པ་བསྐུལ་བ་ཞེས་བྱ་བའི་ཆོས་ཀྱི་རྣམ་གྲངས་
འདི་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། བྱང་ཆུབ་སེམས་དཔའ་དེ་དག་དང་། ཚེ་དང་ལྡན་པ་ཀུན་དགའ་བོ་དང་། ལྷ་དང་། མི་དང་།
ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་
པ་ལས་ལྷག་པའི་བསམ་པ་བསྐུལ་བའི་ལེའུ་ཞེས་བྱ་སྟེ་ཉི་ཤུ་ལྔ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

༄༅༅། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་ཉི་ཤུ་རྩ་དྲུག་པ་སྟེ་ལག་བཟངས་ཀྱིས་ཞུས་པ། བམ་པོ་དང་པོ། རྒྱ་གར་སྐད་དུ། ཨཱརྱ་སུ་བཱ་ཧུ་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་
སྐད་དུ། འཕགས་པ་ལག་བཟངས་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་བྱ་ཀ་ལན་
ད་ཀའི་གནས་ན། དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ལག་བཟངས་ཞེས་བྱ་བ་གཡོག་དང་བཅས་ཏེ། རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་ནས་འོད་མའི་ཚལ་བྱ་ཀ་ལན་དཀའི་གནས་
ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་བྱང་ཆུབ་སེམས་དཔའ་སེམས་དཔའ་ཆེན་
པོ་ལག་བཟངས་ཀྱིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དུ་དང་ལྡན་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་འཚང་རྒྱ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་བཟངས་ལ་འདི་སྐད་ཅེས་བཀའ་སྩལ་ཏོ། །ལག་བཟངས་བྱང་ཆུབ་སེམས་དཔའ་སེམས་དཔའ་ཆེན་པོས་མྱུར་དུ་མངོན་པར་རྫོགས་
པར་བྱང་ཆུབ་པར་བྱ་བའི་ཕྱིར་ཕ་རོལ་ཏུ་ཕྱིན་པ་དྲུག་པོ་འདི་དག་རྟག་པར་རྒྱུན་དུ་ཡོངས་སུ་རྫོགས་པར་བྱའོ། །དྲུག་གང་ཞེ་ན། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་

ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། ལག་བཟངས་བྱང་ཆུབ་སེམས་དཔའ་སེམས་དཔའ་ཆེན་པོས། ཕ་རོལ་ཏུ་ཕྱིན་པ་དྲུག་པོ་འདི་དག་རྟག་པར་རྒྱུན་དུ་ཡོངས་སུ་རྫོགས་པར་བྱའོ། །ལག་བཟངས་བྱང་ཆུབ་
སེམས་དཔའ་སེམས་དཔའ་ཆེན་པོ་ཇི་ལྟར་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་ཅེ་ན། ལག་བཟངས་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཆོས་ཀྱིས་ལོངས་སྤྱོད་རྣམས་ཡོངས་སུ་ཚོལ་གྱི་ཆོས་མ་ཡིན་པས་ནི་མ་ཡིན་ནོ། །མཉམ་པས་ཡིན་གྱི་
མི་མཉམ་པས་ནི་མ་ཡིན་ནོ། །དེ་སྲོག་ཆགས་གཞན་དག་དང་། སེམས་ཅན་གཞན་རྣམས་ལ་གནོད་པ་མི་བྱེད། ཉམ་ང་བ་མི་བྱེད་པར་སྦྱིན་པ་སྦྱིན་ཏེ། བརྗོད་པ་དང་། སྒྲ་དང་ཚིགས་སུ་བཅད་པའི་ཕྱིར་མ་ཡིན། འཛེམ་པའི་ཕྱིར་མ་ཡིན། འཇིགས་པའི་ཕྱིར་མ་
ཡིན། ལན་དུ་ཕན་འདོགས་སུ་རེ་བའི་ཕྱིར་མ་ཡིན། མཐོ་རིས་ཀྱི་ཕྱིར་མ་ཡིན། ཚུལ་འཆོས་པ་མ་ཡིན། ཁ་གསག་བྱེད་པ་མ་ཡིན། བརྙས་པ་མ་ཡིན་པའོ། །སྦྱིན་གནས་སམ། སྦྱིན་གནས་མ་ཡིན་པའམ། མངོན་པར་ཤེས་པའམ། མངོན་པར་ཤེས་
པ་མ་ཡིན་པའམ། ཚུལ་ཁྲིམས་དང་ལྡན་པའམ། ཚུལ་ཁྲིམས་འཆལ་པའམ། འདྲིས་པའམ། མ་འདྲིས་པའམ། མཛའ་བའམ། མི་མཛའ་བ་ལ་ཡང་རུང་སྟེ། བཀུར་སྟིར་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ཅིང་འདུན་པ་དྲག་པོ་དང་།
དགའ་བ་དྲག་པོ་དང་། དད་པ་དྲག་པོས་དེ་ཉུང་ངུ་བདོག་ན་ཡང་ཉུང་ངུ་སྦྱིན། མང་དུ་བདོག་ན་ཡང་མང་དུ་སྦྱིན། བཟང་དུ་བདོག་ན་ཡང་བཟང་དུ་སྦྱིན། ངན་པ་བདོག་ན་ཡང་ངན་པ་སྦྱིན། གྱ་ནོམ་པ་བདོག་ན་ཡང་གྱ་ནོམ་པ་སྦྱིན་ནོ། །ལག་བཟངས་ཇི་ལྟར་བྱང་ཆུབ་སེམས་
དཔའ་བརྒྱ་སྟོང་སྦྱིན་པ་དང་། རླབས་པོ་ཆེའི་སེམས་དང་། རངས་པའི་སེམས་ཀྱིས་སྦྱིན་པ་དེ་བཞིན་དུ་ཀཱ་ཀ་ནི་ཙམ་ཡང་སྦྱིན་ཞིང་རླབས་པོ་ཆེའི་སེམས་དང་། རངས་པའི་སེམས་ཀྱིས་སྦྱིན་ནོ། །དེས་ཟས་འདོད་པ་རྣམས་ལ་སེམས་ཅན་ཐམས་ཅད་ཐམས་ཅད་མཁྱེན་

པའི་ཡེ་ཤེས་བླ་ན་མེད་པའི་སྟོབས་ཀྱིས་བརྟན་པ་ཐོབ་པར་བྱ་བའི་ཕྱིར་ཟས་སྦྱིན་ནོ། །སྐོམ་འདོད་པ་རྣམས་ལ་ནི་སེམས་ཅན་ཐམས་ཅད་ཉོན་མོངས་པའི་སྐོམ་པ་ཐམས་ཅད་བསལ་བའི་སྟོབས་ཐོབ་པར་བྱ་བའི་ཕྱིར་སྐོམ་སྦྱིན་ནོ། །གོས་འདོད་
པ་རྣམས་ལ་ནི་སེམས་ཅན་ཐམས་ཅད་ངོ་ཚ་ཤེས་པ་དང་ཁྲེལ་ཡོད་པའི་གོས་ཐོབ་པར་བྱ་བའི་ཕྱིར་གོས་སྦྱིན་ནོ། །བཞོན་པ་འདོད་པ་རྣམས་ལ་ནི་སེམས་ཅན་ཐམས་ཅད་བྱང་ཆུབ་སེམས་དཔའི་ཐེག་པ་དང་། རྫོགས་པའི་སངས་རྒྱས་ཀྱི་ཐེག་པ་བླ་ན་མེད་པ་ཐོབ་པར་བྱ་བའི་
ཕྱིར་བཞོན་པ་སྦྱིན་ནོ། །སྤོས་འདོད་པ་རྣམས་ལ་ནི་སེམས་ཅན་ཐམས་ཅད་སངས་རྒྱས་ཀྱི་ཚུལ་ཁྲིམས་ཀྱི་དྲི་བསུང་ཐམས་ཅད་ཐོབ་པར་བྱ་བའི་ཕྱིར་སྤོས་སྦྱིན་ནོ། །མེ་ཏོག་འདོད་པ་རྣམས་ལ་ནི་སེམས་ཅན་ཐམས་ཅད་དེ་བཞིན་གཤེགས་པའི་བྱང་ཆུབ་ཀྱི་ཡན་ལག་
བདུན་གྱི་མེ་ཏོག་བླ་ན་མེད་པ་ཐོབ་པར་བྱ་བའི་ཕྱིར་མེ་ཏོག་རྣམས་སྦྱིན་ནོ། །ཕྱེ་མ་འདོད་པ་རྣམས་ལ་ནི་སེམས་ཅན་ཐམས་ཅད་ཉེས་པར་སྤྱོད་པའི་དྲི་ང་བའི་དྲི་མ་གཞོམ་པའི་སྟོབས་ཐོབ་པར་བྱ་བའི་ཕྱིར་ཕྱེ་མ་སྦྱིན་ནོ། །བྱུག་པ་འདོད་པ་རྣམས་ལ་ནི་སེམས་ཅན་ཐམས་ཅད་
ཉེས་པ་མེད་པའི་ཚུལ་ཁྲིམས་དང་སྤྱོད་པའི་བྱུག་པ་ཐོབ་པར་བྱ་བའི་ཕྱིར་བྱུག་པ་སྦྱིན་ནོ། །གདུགས་འདོད་པ་རྣམས་ལ་ནི་སེམས་ཅན་ཐམས་ཅད་ཉོན་མོངས་པའི་གདུང་བ་ཐམས་ཅད་ཉེ་བར་ཞི་བའི་སྟོབས་ཐོབ་པར་བྱ་བའི་ཕྱིར་གདུགས་སྦྱིན་ནོ། །ལྷམ་འདོད་པ་རྣམས་ལ་ནི་
སེམས་ཅན་ཐམས་ཅད་བླ་ན་མེད་པའི་བདེ་བ་མངོན་པར་ཤེས་པ་ཐོབ་པར་བྱ་བའི་ཕྱིར་ལྷམ་སྦྱིན་ནོ། །མལ་ཆ་འདོད་པ་རྣམས་ལ་ནི་སེམས་ཅན་ཐམས་ཅད་ལྷ་དང་། ཚངས་པ་དང་། འཕགས་པའི་གནས་པའི་མལ་ཆའི་བདེ་བར་སྦྱར་བའི་སྟོབས་ཐོབ་པར་བྱ་བའི་ཕྱིར་མལ་ཆ་སྦྱིན་
ནོ། །སྟན་འདོད་པ་རྣམས་ལ་ནི་སེམས་ཅན་ཐམས་ཅད་བྱང་ཆུབ་ཀྱི་སྙིང་པོར་བདུད་དང་ཉོན་མོངས་པའི་སྒྲིབ་པ་བར་དུ་གཅོད་པ་ཐམས་ཅད་ཀྱིས་མི་ཕྱེད་པ། དཔའ་བའི་སྟན་ཐོབ་པར་བྱ་བའི་ཕྱིར་སྟན་སྦྱིན་ནོ། །གནས་འདོད་པ་རྣམས་ལ་ནི་སེམས་ཅན་ཐམས་ཅད་སྐྱབས་དང་། གནས་

དང་། མགོན་དང་། དཔུང་གཉེན་དུ་གྱུར་པའི་ལུས་ཐོབ་པར་བྱ་བའི་ཕྱིར་གནས་སྦྱིན་ནོ། །ཕྲུ་ཏོག་དང་། བུམ་པ་དང་། འཚོག་ཆས་འདོད་པ་རྣམས་ལ་ནི་སེམས་ཅན་ཐམས་ཅད་ཆོས་ཀྱི་རྫིང་ལྟ་བུའི་ལུས་ཐོབ་པར་བྱ་བའི་ཕྱིར་ཕྲུ་ཏོག་དང་། བུམ་པ་དང་། འཚོག་ཆས་
སྦྱིན་ནོ། །སེམས་ཅན་ཐམས་ཅད་ཞི་བ་དང་ཉེ་བར་ཞི་བ་བླ་ན་མེད་པའི་ཏིང་ངེ་འཛིན་དང་སྙོམས་པར་འཇུག་པ་ཐམས་ཅད་ཐོབ་པར་བྱ་བའི་ཕྱིར་སངས་རྒྱས་དང་། ཆོས་དང་། དགེ་འདུན་ལ་དཀའ་ཐུབ་ཀྱི་ནགས་ཚལ་སྦྱིན་པ་སྦྱིན་ནོ། །སེམས་ཅན་ཐམས་ཅད་སྐྱེས་བུ་ཆེན་
པོའི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་ཐོབ་པར་བྱ་བའི་ཕྱིར་མཆོད་རྟེན་རྣམས་ལ་རྒྱན་སྦྱིན་པ་སྦྱིན་ནོ། །སེམས་ཅན་ཐམས་ཅད་དེ་བཞིན་གཤེགས་པའི་ལྷའི་སྤྱན་མཐའ་ཡས་པ་ཐོབ་པར་བྱ་བའི་ཕྱིར་མུན་ཁྲོད་ཀྱི་མཆོད་རྟེན་ནམ་ལམ་རྣམས་ལ་
མར་མེའི་སྦྱིན་པ་སྦྱིན་ནོ། །སེམས་ཅན་ཐམས་ཅད་དེ་བཞིན་གཤེགས་པའི་ལྷའི་སྙན་མཐའ་ཡས་པ་ཐོབ་པར་བྱ་བའི་ཕྱིར་སངས་རྒྱས་ལ་མཆོད་པ་རྣམས་སམ། ཆོས་ལ་མཆོད་པ་རྣམས་སམ། དགེ་འདུན་ལ་མཆོད་པ་རྣམས་ལ་རོལ་མོའི་དབྱངས་སྒྲ་སྦྱིན་པ་སྦྱིན་ནོ། །
སེམས་ཅན་ཐམས་ཅད་ཆ་བྱད་དང་། ཚུལ་ཁྲིམས་དང་། སྤྱོད་པ་མཛེས་པ་བླ་ན་མེད་པ་ཐོབ་པར་བྱ་བའི་ཕྱིར་ལྷུང་བཟེད་དང་ཆོས་གོས་སྦྱིན་པ་སྦྱིན་ནོ། །སེམས་ཅན་ཐམས་ཅད་དབུགས་དབྱུང་བ་སྦྱིན་པའི་སྟོབས་ཐོབ་པར་བྱ་བའི་ཕྱིར་སྣོད་ཚགས་སྦྱིན་པ་སྦྱིན་ནོ། །
སེམས་ཅན་ཐམས་ཅད་ཤེས་རབ་ཆེན་པོའི་ཚོགས་ཡོངས་སུ་བསྐང་བ་ཐོབ་པར་བྱ་བའི་ཕྱིར་མྱུ་གུ་དང་། སྣག་ཚ་དང་། གླེགས་བུ་དང་། ཆོས་ཀྱི་ཁྲི་སྟན་སྦྱིན་པ་སྦྱིན་ནོ། །སེམས་ཅན་ཐམས་ཅད་ཀྱི་ཉོན་མོངས་པའི་ནད་ཐམས་ཅད་གཞོམ་པའི་ཕྱིར་ན་བའི་གསོས་
སྨན་དང་། ཡོ་བྱད་སྦྱིན་པ་སྦྱིན་ནོ། །སེམས་ཅན་ཐམས་ཅད་བྱང་ཆུབ་རྣམ་པ་གསུམ་གྱི་ས་དང་། བདུད་རྩིའི་དབྱིངས་ཀྱི་ས་ཐོབ་པར་བྱ་བའི་ཕྱིར་ས་སྦྱིན་པ་སྦྱིན་ནོ། །སེམས་ཅན་ཐམས་ཅད་སློབ་དཔོན་མེད་པའི་དམ་པའི་ཆོས་མཐོན་པོ་ཐོབ་པར་བྱ་བའི་ཕྱིར་མཆོད་རྟེན་

མཐོན་པོ་དང་། སྐུ་གཟུགས་མཐོན་པོ་བྱེད་དོ། །བདོག་པ་ལྟ་ན་སེམས་ཅན་ཐམས་ཅད་མངོན་པར་ཤེས་པ་མྱུར་བ་ཐོབ་པར་བྱ་བའི་ཕྱིར་མྱུར་ཞིང་ཡོངས་སུ་ཉོན་མོངས་པར་མ་གྱུར་པར་སྦྱིན་པ་སྦྱིན་ནོ། །སེམས་ཅན་ཐམས་ཅད་བར་དུ་གཅོད་པ་
མེད་པར་རྫོགས་པའི་བྱང་ཆུབ་ཐོབ་པར་བྱ་བའི་ཕྱིར་རུང་བ་སྦྱིན་གྱི་རུང་བ་མ་ཡིན་པ་ནི་མ་ཡིན་ནོ། །སེམས་ཅན་ཐམས་ཅད་སྤོབས་པ་ཆེན་པོ་ཡོངས་སུ་མི་འཆད་པ་ཐོབ་པར་བྱ་བའི་ཕྱིར་ཡོངས་སུ་མི་གཅོད་པར་སྦྱིན་པ་སྦྱིན་ནོ། །སེམས་ཅན་ཐམས་ཅད་སྙིང་རྗེ་ཆེན་པོ་
མཚུངས་པ་མེད་པ་ཐོབ་པར་བྱ་བའི་ཕྱིར་སེམས་ཅན་ཐམས་ཅད་ལ་མཉམ་པར་སྦྱིན་པ་སྦྱིན་ནོ། །སེམས་ཅན་ཐམས་ཅད་བདུད་དང་མུ་སྟེགས་བྱེད་ཐམས་ཅད་ཀྱིས་ཚར་མི་ཆོད་པ་དང་། གནོད་པར་མི་ནུས་པའི་ཆོས་མངོན་པར་རྫོགས་པར་བྱང་ཆུབ་པར་བྱ་བའི་ཕྱིར་གཞན་
ལ་མི་གནོད་པར་སྦྱིན་པ་སྦྱིན་ནོ། །ལག་བཟངས་གལ་ཏེ་བྱང་ཆུབ་སེམས་དཔའ་ལ་སྦྱིན་པ་འདི་དག་སྦྱིན་དུ་ནོར་མེད་ཅིང་འབྱོར་བ་མེད་པར་གྱུར་ན། དེ་འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ལ་སྦྱིན་པ་མཐའ་ཡས་ཤིང་དཔག་ཏུ་མེད་པ་འདི་དག་
སྦྱིན་པར་ཡིད་ཀྱིས་འདོད་ཅིང་སྨོན་ལ་སྨོན་ལམ་འདེབས་ཏེ། ལག་བཟངས་བྱང་ཆུབ་སེམས་དཔའ་དེ་སྦྱིན་པ་འདི་དག་སྦྱིན་པའི་ནུས་པ་དང་ལྡན་ཡང་རུང་། ནུས་པ་དང་མི་ལྡན་ཡང་རུང་སྟེ། གང་འཇིག་རྟེན་གྱི་ཁམས་ཐམས་ཅད་ན་སེམས་ཅན་ཐམས་ཅད་བདག་གི་བདེ་
བ་སྦྱར་བ་ཉིད་དང་ལྡན་པ་དང་། ཡང་དག་པར་ལྡན་པར་གྱུར་ཅིང་འབད་པ་མེད་པ་དང་། འདོད་པ་མེད་པར་བརྣག་པ་རྣམས་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་ཤིན་ཏུ་ཡོངས་སུ་རྫོགས་ཤིང་བསམ་པ་མ་ལུས་པར་ཡོངས་སུ་རྫོགས་ནས་བདེ་བ་ལ་
རེག་པར་གནས་པར་འགྱུར་བར་བདག་གི་དེ་བཟང་པོར་གྱུར་ཅིག །བདག་གི་དེ་དགེ་བར་གྱུར་ཅིག་ཅེས་དེ་ལྟར་ཡིད་ཀྱིས་འདོད་ཅིང་སྨོན་ལ་སྨོན་ལམ་འདེབས་སོ། །འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ལ་རིན་པོ་ཆེའི་རྒྱ་མཚོ་ཡང་སྦྱིན་པར་འདོད་ཅིང་

སྨོན་ལ་སྨོན་ལམ་འདེབས་སོ། །དབྱིག་གི་རི་དང་། གསེར་གྱི་རི་དང་། གོས་ཀྱི་རི་དང་། ཡོ་བྱད་ཐམས་ཅད་ཀྱི་རི་དང་། བཟའ་བ་རྒྱ་མཚོ་དང་། བཏུང་བ་རྒྱ་མཚོ་དང་། གནས་ལེགས་པར་བྱས་པ། ལེགས་པར་གནས་པ། མཐའ་ཡས་ཤིང་དཔག་ཏུ་མེད་པ་
དག་ཀྱང་སྦྱིན་པར་འདོད་ཅིང་སྨོན་ལ་སྨོན་ལམ་འདེབས་སོ། །འཁོར་བའི་སྲིད་པ་ཐམས་ཅད་ཀྱི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་འདས་པ་དང་། མ་འོངས་པ་དང་། ད་ལྟར་བྱུང་བ་ཐམས་ཅད་ཀྱི་སྦྱིན་པ་དང་། གཏོང་བ་དང་། རྣམ་པར་གཏོང་བ་གང་ཡིན་པ་ཟང་
ཟིང་སྦྱིན་པ་འམ། མི་འཇིགས་པ་སྦྱིན་པ་འམ། ཆོས་སྦྱིན་པ་མ་ལུས་པ་དེ་དག་ཐམས་ཅད་ལ་ཐ་ན་དུས་གསུམ་དུ་ཡང་མངོན་པར་དགའ་ཞིང་རྗེས་སུ་ཡི་རང་ངོ་། །གལ་ཏེ་དེ་ལ་བསླངས་ལ་ནོར་སྦྱིན་མི་ནུས་ན་ཡང་རང་གི་ཟན་སྐལ་སྦྱིན་པའམ། གྲོགས་སུ་འགྱུར་བ་འམ། ཀུན་
དུ་བཙལ་བའི་ཐབས་ཀྱང་དེ་ལ་སྟོན་པར་འགྱུར་ཞིང་ཆོས་ཀྱི་གཏམ་གྱིས་དེའི་འདོད་པ་སེལ་བར་བྱེད་དོ། །དེ་སྦྱིན་པར་འདོད་པར་གྱུར་པ་ན་ཡང་སྦྱིན་པ་དེ་སེམས་ཅན་ཐམས་ཅད་བསྒྲལ་བ་དང་། སེམས་ཅན་ཐམས་ཅད་དགྲོལ་བ་དང་། སེམས་ཅན་ཐམས་ཅད་དབུགས་དབྱུང་བ་
དང་། སེམས་ཅན་ཐམས་ཅད་ཡོངས་སུ་མྱ་ངན་ལས་བཟླ་བ་དང་། ཐམས་ཅད་མཁྱེན་པ་ཉིད་ཐོབ་པར་བྱ་བ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །སྦྱིན་པ་དེ་བྱིན་
ནས་ཀྱང་སྦྱིན་པ་དེ་སེམས་ཅན་ཐམས་ཅད་བསྒྲལ་བ་དང་། སེམས་ཅན་ཐམས་ཅད་དགྲོལ་བ་དང་། སེམས་ཅན་ཐམས་ཅད་དབུགས་དབྱུང་བ་དང་། སེམས་ཅན་ཐམས་ཅད་ཡོངས་སུ་མྱ་ངན་ལས་བཟླ་བ་དང་། ཐམས་ཅད་མཁྱེན་པ་ཉིད་ཐོབ་པར་བྱ་བ་དང་། སངས་རྒྱས་ཀྱི་
ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །གལ་ཏེ་སྦྱིན་པ་དང་། གཏོང་བ་དང་། རྣམ་པར་གཏོང་བ་དེ་ལ་སློབ་པའི་ནུས་པ་དང་མི་ལྡན་པར་གྱུར་ན་དེ་འདི་ལྟར་ཡང་དག་པར་སློབ་སྟེ། དུས་དུས་

སུ་འམ། ཅུང་ཟད་ཅུང་ཟད་དུ་ཡང་ཆགས་པ་དང་། སེར་སྣ་དང་། སྦྱིན་པས་འཇིགས་པ་སྤང་བ་དང་། དོར་བ་དང་། བསལ་བར་རྩོལ་ལོ། །འབད་དོ། །དུས་དུས་སུ་འམ། ཅུང་ཟད་ཅུང་ཟད་དུ་ཡང་སྦྱིན་པ་དང་། གཏོང་བ་དང་། རྣམ་
པར་གཏོང་བ་ལ་སློབ་པ་དང་། མངོན་པར་འཕེལ་བར་བྱ་བ་དང་། ཡོངས་སུ་རྫོགས་པར་བྱ་བར་རྩོལ་ལོ། །འབད་དོ། །སྲིད་པ་གཞན་དུ་གྱུར་པ་ན་ཡང་ཞུམ་པར་མི་འགྱུར་ཞིང་སྒྱིད་ལུག་པར་མི་འགྱུར་རོ། །ལག་བཟངས་བྱང་ཆུབ་སེམས་དཔའ་རྣམས་ཀྱི་བྱང་ཆུབ་
ཏུ་སེམས་བསྐྱེད་པ་དང་། བྱང་ཆུབ་ཀྱི་སེམས་རྗེས་སུ་དྲན་པ་དང་། བྱང་ཆུབ་ཀྱི་སེམས་བསྒོམ་པ་དང་། བྱང་ཆུབ་ཏུ་སྨོན་པ་དང་། བྱང་ཆུབ་ཏུ་སྨོན་ལམ་འདེབས་པ་གང་ཡིན་པ་དེ་ཉིད་དེ་དག་གི་སྦྱིན་པ་ཆེན་པོ་དང་། གཏོང་བ་ཆེན་པོ་དང་། རྣམ་པར་གཏོང་བ་ཆེན་པོ་གྲངས་མེད་
ཅིང་དཔག་ཏུ་མེད་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ལ་དམ་པའི་ཆོས་ཀྱི་ཆར་སྦྱིན་པར་འདོད་པ་དང་། བདུད་རྩིའི་དབྱིངས་ཀྱི་ཆར་སྦྱིན་པར་འདོད་པ་དང་། དམ་པའི་ཆོས་ཀྱི་ཆར་གཏོང་བར་འདོད་པ་
དང་། བདུད་རྩིའི་དབྱིངས་ཀྱི་ཆར་གཏོང་བར་འདོད་པ་དང་། དམ་པའི་ཆོས་ཀྱི་ཆར་རྣམ་པར་གཏོང་བར་འདོད་པ་དང་། བདུད་རྩིའི་དབྱིངས་ཀྱི་ཆར་རྣམ་པར་གཏོང་བར་འདོད་པ་དེ་ནི་སྦྱིན་པ་དང་། གཏོང་བ་དང་། རྣམ་པར་གཏོང་བ་ཐམས་ཅད་ཀྱི་ནང་ན་མཆོག་ཡིན་ནོ། །
དེ་ནི་དམ་པ་ཡིན་ནོ། །ལག་བཟངས་དེ་ལྟར་ན་བྱང་ཆུབ་སེམས་དཔའ་བདེ་བ་དང་ལྡན་ལ་ཡིད་བདེ་བ་དང་། ལྡན་ཞིང་ཚེགས་ཆུང་ངུ་དང་། སྡུག་བསྔལ་ཆུང་ངུས་མྱུར་དུ་སྐྱེན་པར་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལག་བཟངས་བྱང་ཆུབ་སེམས་
དཔའ་ནི་སློང་བ་རྣམས་ཀྱིས་བསླངས་པ་ན་ཡན་ལག་དང་ཉིང་ལག་གཅོད་དམ། བཅད་ནས་སློང་བ་རྣམས་ལ་སྦྱིན་པར་མི་བྱེད་དོ། །དེ་ཅིའི་ཕྱིར་ཞེ་ན། དེ་དག་ཉིད་ཀྱིས་སེམས་ཅན་དམྱལ་བ་ཆེན་པོར་འགྱུར་བ་དང་། མི་དགེ་བའི་ལས་ཆེན་པོ་རྒྱ་ཆེར་ཡོངས་སུ་མི་སྤོང་བའི་ཕྱིར་རོ། །

སེམས་ཅན་གཞན་གྱི་ཕྱིར་རམ། སེམས་ཅན་གཞན་གྱི་ཆེད་ལ་དེ་རང་གི་ཡན་ལག་དང་། ཉིང་ལག་ཡོངས་སུ་མི་གཏོང་བ་ནི་མ་ཡིན་ནོ། །ལག་བཟངས་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སློང་བས་བདོག་པ་ཐམས་ཅད་བསླངས་ན་ཕ་མ་ལ་གནོད་པ་བྱས་ཤིང་
སྤངས་ཏེ་སྡུག་བསྔལ་བར་བྱས། བུ་དང་། ཆུང་མ་དང་། བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་ལ་གནོད་པ་བྱས་ཤིང་སྤངས་ཏེ་སྡུག་བསྔལ་བར་བྱས་ནས་བདོག་པ་ཐམས་ཅད་སློང་བ་རྣམས་ལ་སྦྱིན་པར་མི་བྱེད་དོ། །དེ་ཅིའི་ཕྱིར་ཞེ་ན།
བྱང་ཆུབ་སེམས་དཔའ་ནི་སེམས་ཅན་ཐམས་ཅད་ལ་མཚུངས་པར་སྙིང་བརྩེ་བ་ཡིན་ཏེ། ཇི་ལྟར་ཕ་མ་ལ་གནོད་པ་མི་བྱེད་ཅིང་མི་སྤོང་ལ་སྡུག་བསྔལ་བར་ཡང་མི་བྱེད་པ་དང་། བུ་དང་། ཆུང་མ་དང་། བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་ལ་
གནོད་པ་མི་བྱེད་ཅིང་མི་སྤོང་སྟེ། སྡུག་བསྔལ་བར་མི་བྱེད་པར་སྦྱིན་པ་ཡང་སྦྱིན་པ་དེ་བཞིན་དུ་སེམས་ཅན་ཐམས་ཅད་ལ་མཚུངས་པར་གསོ་བར་བྱེད་དོ། །དེ་ནི་སེམས་ཅན་གཞན་གྱི་ཕྱིར་རམ། སེམས་ཅན་གཞན་གྱི་ཆེད་ལ་བདོག་པ་ཐམས་ཅད་ཡོངས་སུ་མི་གཏོང་བ་ཡང་མ་
ཡིན་ནོ། །ལག་བཟངས་དེ་བཞིན་གཤེགས་པ་རྣམས་ནི་སེམས་ཅན་ལ་གནོད་པའི་སྦྱིན་པའི་བསྔགས་པ་གསུང་བ་མ་ཡིན་ན། །བྱང་ཆུབ་སེམས་དཔའ་རྣམས་ཀྱི་ཡན་ལག་བཅད་པ་ལྟ་ལ་དེ་ལྟར་ག་ལ་འགྱུར། ལག་བཟངས་བྱང་ཆུབ་སེམས་དཔའ་ཇི་ལྟར་ཚུལ་ཁྲིམས་
ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་ཅེ་ན། ལག་བཟངས་འདི་ལ་བྱང་ཆུབ་སེམས་དཔའ་ནི་སྲོག་གི་ཕྱིར་ཡང་སྲོག་ཆགས་གཞན་དག་དང་། སེམས་ཅན་གཞན་རྣམས་ལ་མི་རྡེག་མི་གསོད་ཅིང་གསོད་པ་ལ་རྗེས་སུ་ཡི་རང་བར་མི་བྱེད་དོ། །སྲོག་གི་ཕྱིར་ཡང་
མ་བྱིན་པར་མི་ལེན་ལ། མ་བྱིན་པར་ལེན་དུ་མི་འཇུག་ཅིང་མ་བྱིན་པར་ལེན་པ་ལ་རྗེས་སུ་ཡི་རང་བར་མི་བྱེད་དོ། །སྲོག་གི་ཕྱིར་ཡང་འདོད་པ་ལ་ལོག་པར་གཡེམ་པར་མི་བྱེད་ལ། འདོད་པ་ལ་ལོག་པར་གཡེམ་པ་བྱེད་དུ་མི་འཇུག་ཅིང་འདོད་པ་ལ་ལོག་པར་གཡེམ་པ་ལ་རྗེས་

སུ་ཡི་རང་བར་མི་བྱེད་དོ། །སྲོག་གི་ཕྱིར་ཡང་བརྫུན་མི་སྨྲ་ལ། བརྫུན་ཟེར་དུ་མི་འཇུག་ཅིང་བརྫུན་སྨྲ་བ་ལ་རྗེས་སུ་ཡི་རང་བར་མི་བྱེད་དོ། །སྲོག་གི་ཕྱིར་ཡང་ཆང་མི་འཐུང་ལ། ཆང་འཐུང་དུ་མི་འཇུག་ཅིང་། ཆང་འཐུང་བ་ལ་རྗེས་སུ་ཡི་རང་བར་མི་
བྱེད་དོ། །དེ་བསླབ་པའི་གཞི་ལྔ་པོ་དེ་དག་ལ་རིང་དུ་གནས་ཤིང་བརྟན་པོར་གནས་ལ་དམ་པོར་གནས་ཏེ་མི་ལྷོད་པར་གནས་ཤིང་སྒྲུབ་པོ། །དེ་བཞིན་དུ་ཞིང་རྨེད་པ་དང་། ཞིང་རྨེད་དུ་འཇུག་པ་དང་། འཆིང་བ་དང་། འཆིང་དུ་འཇུག་པ་དང་། གོ་རར་འཇུག་པ་དང་། གོ་
རར་འཇུག་དུ་འཇུག་པ་དང་། རྡེག་པ་དང་། རྡེག་ཏུ་འཇུག་པ་དང་། གཅོད་པ་དང་། གཅོད་དུ་འཇུག་པ་དག་སྤང་བ་དང་། དོར་བ་དང་། བསལ་བར་འབད་པར་བྱེད་དོ། །དེ་ལྟར་བསླབ་པའི་གཞི་ལྔ་པོ་དག་ལ་རིང་དུ་གནས་ཤིང་བརྟན་པོར་གནས་ལ་དམ་པོར་གནས་ཏེ་མི་
ལྷོད་པར་གནས་ཤིང་སྒྲུབ་བོ། །དེ་བཞིན་དུ་ཕྲ་མའི་ཚིག་དང་། ངག་རྩུབ་པོ་དང་། ཚིག་ཀྱལ་པ་སྤང་བ་དང་། དོར་བ་དང་། བསལ་བར་འབད་པར་བྱེད་དོ། །དེ་སྲོག་ཆགས་ཐམས་ཅད་དང་། སེམས་ཅན་ཐམས་ཅད་ནི་བདག་གི་ཕ་མ་ཇི་ལྟ་བ་བཞིན་ནོ། །བུ་གཅིག་
པ་ཕངས་པ་ཇི་ལྟ་བ་བཞིན་ཏེ། ཇི་ལྟར་ཕ་མ་དང་། བུ་གཅིག་པ་ཕངས་པ་བདག་ལ་འཁུ་ཡང་སླར་འཁུ་བར་མི་བྱ་ལ། ལག་པའམ། བོང་བའམ། དབྱུག་པའམ། རལ་གྲིའམ། མདས་བརྡེགས་ཀྱང་སླར་བརྡེག་པར་མི་བྱ། གསོད་ཀྱང་སླར་གསད་
པར་མི་བྱ་ཞིང་ཇི་ལྟར་ཕ་མ་དང་། བུ་གཅིག་པ་ཕངས་པ་འཁུ་ཡང་སླར་འཁུ་བར་མི་བྱ་བ་དེ་བཞིན་དུ་བདག་སྲོག་ཆགས་ཐམས་ཅད་དང་། སེམས་ཅན་ཐམས་ཅད་ཀྱིས་ལག་པ་འམ། བོང་བ་འམ། དབྱུག་པ་འམ། རལ་གྲི་འམ། མདས་བརྡེགས་ཀྱང་སླར་
བརྡེག་པར་མི་བྱ། གསོད་ཀྱང་སླར་གསད་པར་མི་བྱའོ་ཞེས་དེ་ལྟར་སློབ་བོ། །དཔེར་ན་ཕ་འམ། མ་འམ། བུ་གཅིག་པ་ཕངས་པ་ཡུན་རིང་པོར་ཡུལ་རྒྱུས་ཏེ་འོངས་པ་མཐོང་ན་དགའ་ཞིང་ཡིད་བདེ་བར་འགྱུར་བ་དེ་བཞིན་དུ་ལག་བཟངས་བྱང་ཆུབ་སེམས་དཔའ་

སེམས་དཔའ་ཆེན་པོ་ཡང་སྲོག་ཆགས་ཐམས་ཅད་དང་། སེམས་ཅན་ཐམས་ཅད་མཐོང་ན་དགའ་བ་དང་། ཡིད་བདེ་བར་འགྱུར་རོ། །དེའི་སྲོག་གཅོད་པ་སྤངས་པའི་ཚུལ་ཁྲིམས་ནི་སེམས་ཅན་ཐམས་ཅད་མི་སློབ་པའི་ཚུལ་ཁྲིམས་སྲོག་གཅོད་པ་སྤངས་
པ་ལ་དགོད་པའི་ཕྱིར་རོ། །དེའི་མ་བྱིན་པར་ལེན་པ་སྤངས་པའི་ཚུལ་ཁྲིམས་ནི་སེམས་ཅན་ཐམས་ཅད་མི་སློབ་པའི་ཚུལ་ཁྲིམས་མ་བྱིན་པར་ལེན་པ་སྤངས་པ་ལ་དགོད་པའི་ཕྱིར་རོ། །དེའི་འདོད་པ་ལ་ལོག་པར་གཡེམ་པ་སྤངས་པའི་ཚུལ་ཁྲིམས་ནི་སེམས་ཅན་ཐམས་
ཅད་མི་སློབ་པའི་ཚུལ་ཁྲིམས་ཚངས་པར་སྤྱོད་པ་ལ་དགོད་པའི་ཕྱིར་རོ། །དེའི་བརྫུན་དུ་སྨྲ་བ་སྤངས་པའི་ཚུལ་ཁྲིམས་ནི་སེམས་ཅན་ཐམས་ཅད་མི་སློབ་པའི་ཚུལ་ཁྲིམས་བརྫུན་དུ་སྨྲ་བ་སྤངས་པ་ལ་དགོད་པའི་ཕྱིར་རོ། །དེའི་ཆང་འཐུང་བ་སྤངས་པའི་ཚུལ་ཁྲིམས་ནི་སེམས་ཅན་
ཐམས་ཅད་མི་སློབ་པའི་ཚུལ་ཁྲིམས་ཆང་འཐུང་བ་སྤངས་པ་ལ་དགོད་པའི་ཕྱིར་རོ། །དེའི་ཞིང་རྨེད་པ་དང་། ཞིང་རྨེད་དུ་འཇུག་པ་སྤངས་པའི་ཚུལ་ཁྲིམས་ནི་སེམས་ཅན་ཐམས་ཅད་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་ཐོབ་པར་བྱ་བའི་ཕྱིར་རོ། །དེའི་འཆིང་བ་དང་།
འཆིང་དུ་འཇུག་པ་སྤངས་པའི་ཚུལ་ཁྲིམས་ནི་སེམས་ཅན་ཐམས་ཅད་ཀྱི་ཉོན་མོངས་པའི་བཅིང་བ་ཐམས་ཅད་གཅད་པའི་ཕྱིར་རོ། །དེའི་གོ་རར་འཇུག་པ་དང་། གོ་རར་འཇུག་ཏུ་འཇུག་པ་སྤངས་པའི་ཚུལ་ཁྲིམས་ནི་སེམས་ཅན་ཐམས་ཅད་ཀྱི་འགྲོ་བ་ལྔ་དགག་པ་དང་བསལ་བའི་ཕྱིར་
རོ། །དེའི་རྡེག་པ་དང་། རྡེག་ཏུ་འཇུག་པ་སྤངས་པའི་ཚུལ་ཁྲིམས་ནི་སེམས་ཅན་ཐམས་ཅད་བདུད་དང་ཉོན་མོངས་པའི་བསྒྲིབ་པ་བར་དུ་གཅོད་པ་ཐམས་ཅད་ཀྱིས་ཟིལ་གྱིས་མི་ནོན་པའི་ཆོས་ཉིད་ཐོབ་པར་བྱ་བའི་ཕྱིར་རོ། །དེའི་གཅོད་པ་དང་། གཅོད་དུ་འཇུག་པ་
སྤངས་པའི་ཚུལ་ཁྲིམས་ནི་སེམས་ཅན་ཐམས་ཅད་ལུས་དང་ངག་དང་ཡིད་ཀྱི་ལས་ཀུན་དུ་བསྲུངས་པ་ཐོབ་པར་བྱ་བའི་ཕྱིར་རོ། །དེའི་ཕྲ་མའི་ཚིག་སྤངས་པའི་ཚུལ་ཁྲིམས་ནི་གཡོག་ཉན་ཐོས་ཀྱི་དགེ་འདུན་ཆེན་པོ་མི་ཕྱེད་པ་ཐོབ་པར་བྱ་བའི་ཕྱིར་རོ། །དེའི་ཚིག་རྩུབ་པོ་སྤངས་

པའི་ཚུལ་ཁྲིམས་ནི་ཡན་ལག་ལྔ་པའི་ངག་གི་ལམ་དང་ལྡན་པའི་ཚངས་པའི་དབྱངས་ཐོབ་པར་བྱ་བའི་ཕྱིར་རོ། །དེའི་ཚིག་ཀྱལ་པ་སྤངས་པའི་ཚུལ་ཁྲིམས་ནི་ཚིག་གཟུང་བར་འོས་པ་ཐོགས་པ་མེད་པ་ཐོབ་པར་བྱ་བའི་ཕྱིར་རོ། །དེའི་འཆི་བས་འཇིགས་
སྐྲག་པ་ཡོངས་སུ་སྐྱོབ་པའི་ཚུལ་ཁྲིམས་ནི་སེམས་ཅན་ཐམས་ཅད་ཀྱི་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པའི་འཇིགས་པ་རབ་ཏུ་ཞི་བར་བྱ་བའི་ཕྱིར་རོ། །དེའི་
གཞན་གྱི་ནོར་དང་ཡོ་བྱད་འཇིག་ཅིང་ཆུད་ཟ་བ་ཡོངས་སུ་སྐྱོབ་པའི་ཚུལ་ཁྲིམས་ནི་སེམས་ཅན་ཐམས་ཅད་བྱང་ཆུབ་ཀྱི་ཕྱོགས་ཀྱི་ཆོས་ཀྱི་ནོར་བླ་ན་མེད་པ་ཐོབ་པར་བྱ་བའི་ཕྱིར་རོ། །དེའི་གཞན་གྱི་བུད་མེད་ལ་འཛིན་པ་གཏོང་བར་བྱེད་པ་དང་། གཏོང་བར་བྱེད་དུ་འཇུག་པའི་
ཚུལ་ཁྲིམས་ནི་འཁྲུལ་པ་མེད་པའི་ཆོས་ཉིད་ཐོབ་པར་བྱ་བའི་ཕྱིར་རོ། །དེའི་འགུགས་པ་གཏོང་བར་བྱེད་པ་དང་། གཏོང་བར་བྱེད་དུ་འཇུག་པའི་ཚུལ་ཁྲིམས་ནི་རང་གི་སེམས་ལ་དབང་ཐོབ་པར་བྱ་བའི་ཕྱིར་རོ། །དེའི་འཆིང་བ་འགྲོལ་བ་དང་། འགྲོལ་དུ་འཇུག་པའི་ཚུལ་ཁྲིམས་
ནི་དཔའ་བོའི་སྟན་བྱང་ཆུབ་ཀྱི་སྙིང་པོར་བདུད་ཀྱི་དམག་དང་ཉོན་མོངས་པའི་འཆིང་བ་ཐམས་ཅད་གཞིག་པའི་ཕྱིར་རོ། །དེའི་ཁྱིམ་ནས་འབྱུང་བའི་ཚུལ་ཁྲིམས་ནི་སེམས་རྣམ་པར་གྲོལ་བ་སྒྲིབ་པ་མེད་པ་ཐོབ་པར་བྱ་བའི་ཕྱིར་རོ། །དེའི་རྡེག་པ་འཆགས་པའི་ཚུལ་ཁྲིམས་ནི་མི་
འཇིགས་པ་རྣམ་པ་བཞིས་འཇིགས་པ་ཡང་དག་པར་གཞོམ་པ་ཐོབ་པར་བྱ་བའི་ཕྱིར་རོ། །དེའི་གཅོད་པ་ཟློག་པའི་ཚུལ་ཁྲིམས་ནི་ཀུན་དུ་སྲུང་བའི་ཆོས་བཞི་ཐོབ་པར་བྱ་བའི་ཕྱིར་རོ། །དེའི་མི་སླུ་བའི་ཚིག་སྨྲ་བའི་ཚུལ་ཁྲིམས་ནི་དཔའ་བོའི་སྟན་བྱང་ཆུབ་ཀྱི་སྙིང་པོར་བདུད་དང་
ཉོན་མོངས་པའི་སྒྲིབ་པ་བར་དུ་གཅོད་པ་ཐམས་ཅད་ཀྱིས་མི་སླུ་བའི་ཆོས་ཉིད་ཐོབ་པར་བྱ་བའི་ཕྱིར་རོ། །དེའི་བྱེ་བ་རྣམས་ཀྱི་སྡུམས་བྱེད་ཅིང་མཛའ་བ་བརྟན་པར་བྱེད་པའི་ཚུལ་ཁྲིམས་ནི་གཡོག་འཕགས་པའི་ཉན་ཐོས་ཀྱི་དགེ་འདུན་ཆེན་པོ་མི་ཕྱེད་པ་ཐོབ་པར་བྱ་བའི་ཕྱིར་རོ། །དེའི་ཚིག་སྙན་

པ་དང་། འཇམ་པོར་སྨྲ་བའི་ཚུལ་ཁྲིམས་ནི་སེམས་ཅན་ཐམས་ཅད་ཀྱི་རྣར་བདེ་ཞིང་སྙིང་དུ་འོང་ལ་བདེན་པའི་ངག་ཐོབ་པར་བྱ་བའི་ཕྱིར་རོ། །དེའི་ཀུན་ཏུ་འཐུན་པའི་སྨྲ་བའི་ཚུལ་ཁྲིམས་ནི་ཚར་མི་ཆོད་ཅིང་གཟུང་བར་འོས་ལ་འབྲས་བུ་ཡོད་པའི་ཆོས་སྟོན་པ་ཐོབ་པར་བྱ་བའི་
ཕྱིར་རོ། །དེའི་སངས་རྒྱས་ཀྱི་ཡོན་ཏན་གྱི་བསྔགས་པ་བརྗོད་པའི་ཚུལ་ཁྲིམས་ནི་འཕགས་པའི་ཡོན་ཏན་དང་ལྡན་པའི་དགེ་འདུན་གྱི་གཡོག་འཁོར་ཆེན་པོ་ཐོབ་པར་བྱ་བའི་ཕྱིར་རོ། །དེའི་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་དང་། ཆོས་
དང་། དགེ་འདུན་དང་། བྱང་ཆུབ་སེམས་དཔའ་འཇིག་རྟེན་གྱི་ཁམས་ཐམས་ཅད་དུ་གཏོགས་པ་གྲངས་མེད་དཔག་ཏུ་མེད་པ་རྣམས་ལ་དུས་གསུམ་དུ་ཡན་ལག་ལྔས་གཏུགས་ཏེ་ཕྱག་འཚལ་བར་བྱེད་པའི་ཚུལ་ཁྲིམས་ནི་སེམས་ཅན་ཐམས་ཅད་དཔའ་བོའི་སྟན་བྱང་ཆུབ་ཀྱི་སྙིང་
པོར་མི་ཕྱེད་ཅིང་སྲ་ལ་ཤིན་ཏུ་བརྟན་པའི་དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་མཆོག་གི་ཆོས་ཉིད་དམ་པ་ལྔ་ཐོབ་པར་བྱ་བའི་ཕྱིར་རོ། །དེའི་དུས་གསུམ་དུ་སངས་རྒྱས་ཀྱི་མཆོད་རྟེན་ཐམས་ཅད་ལ་རིམ་གྲོ་བྱེད་པའི་ཚུལ་ཁྲིམས་ནི་སངས་
རྒྱས་ཀྱི་ཆོས་ཐམས་ཅད་ཡོངས་སུ་བསྐང་བ་ཐོབ་པར་བྱ་བའི་ཕྱིར་རོ། །དེའི་དུས་གསུམ་དུ་ཆོས་ཀྱི་ཡོན་ཏན་བརྗོད་པ་སྨྲ་བའི་ཚུལ་ཁྲིམས་ནི་ཆོས་ཀྱི་འཁོར་ལོ་གནས་མེད་པ་བླ་ན་མེད་པ་བསྐོར་བའི་ཕྱིར་རོ། །དེའི་དུས་གསུམ་དུ་དགེ་འདུན་གྱི་ཡོན་ཏན་བརྗོད་པ་སྨྲ་བའི་ཚུལ་ཁྲིམས་ནི་
འཕགས་པའི་དགེ་འདུན་མི་ཕྱེད་པའི་གཡོག་འཁོར་ཆེན་པོ་ཐོབ་པར་བྱ་བའི་ཕྱིར་རོ། །དེའི་དུས་གསུམ་དུ་དཀོན་མཆོག་གསུམ་ལ་སྐྱབས་སུ་འགྲོ་བའི་ཚུལ་ཁྲིམས་ནི་སེམས་ཅན་ཐམས་ཅད་ལ་སྐྱབས་བླ་ན་མེད་པ་སྦྱིན་པའི་ཕྱིར་རོ། །དེའི་དུས་གསུམ་དུ་འཇིག་རྟེན་གྱི་ཁམས་
ཐམས་ཅད་དཀོན་མཆོག་གསུམ་དང་། བྱང་ཆུབ་སེམས་དཔའ་རྣམས་ཀྱིས་སྟོངས་པར་མི་འགྱུར་བར་གསོལ་བ་འདེབས་པའི་ཚུལ་ཁྲིམས་ནི་བདེ་བར་འགྱུར་བར་གཅིག་ཏུ་ངེས་པར་རྫོགས་པའི་བྱང་ཆུབ་ཐོབ་པར་བྱ་བའི་ཕྱིར་རོ། །དེའི་དུས་གསུམ་དུ་སངས་རྒྱས་ཐམས་

ཅད་ལ་བསྐལ་པར་ཆོས་སྟོན་པར་གསོལ་བ་འདེབས་པའི་ཚུལ་ཁྲིམས་ནི་ས་བཅུ་པ་ཆོས་ཀྱི་སྤྲིན་ཐོབ་པར་བྱ་བའི་ཕྱིར་རོ། །དེའི་དུས་གསུམ་དུ་སྡིག་པ་ཐམས་ཅད་སོ་སོར་འཆགས་པ་དང་། སྡིག་པ་ཐམས་ཅད་སོ་སོར་འདོར་བ་དང་། སྡིག་པ་ཐམས་
ཅད་ལ་སྨོད་པའི་ཚུལ་ཁྲིམས་ནི་བག་ཆགས་ཀྱི་མཚམས་སྦྱོར་བ་ཐམས་ཅད་ཡང་དག་པར་གཞོམ་པ་ཐོབ་པར་བྱ་བའི་ཕྱིར་རོ། །དེའི་དུས་གསུམ་དུ་དགེ་བའི་རྩ་བ་ཐམས་ཅད་ཡང་དག་པར་འཛིན་པའི་ཚུལ་ཁྲིམས་ནི་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་བསྐང་བ་ཐོབ་པར་བྱ་
བའི་ཕྱིར་རོ། །དེའི་དུས་གསུམ་དུ་སངས་རྒྱས་དང་། རང་སངས་རྒྱས་དང་། འཕགས་པ་ཉན་ཐོས་ཀྱི་དགེ་འདུན་དང་། བྱང་ཆུབ་སེམས་དཔའ་འཇིག་རྟེན་གྱི་ཁམས་ཐམས་ཅད་དུ་གཏོགས་པ་འདས་པ་དང་། མ་འོངས་པ་དང་། ད་ལྟར་བྱུང་བ་ཐམས་ཅད་དང་། སེམས་ཅན་འགྲོ་བ་ཐམས་ཅད་དུ་སོང་བ་འཇིག་རྟེན་
གྱི་ཁམས་ཐམས་ཅད་དུ་གཏོགས་པ་འདས་པ་དང་། མ་འོངས་པ་དང་། ད་ལྟར་བྱུང་བ་ཐམས་ཅད་ཀྱི་དགེ་བའི་རྩ་བ་ཐམས་ཅད་ལ་རྗེས་སུ་ཡི་རང་བའི་ཚུལ་ཁྲིམས་ནི་བྱང་ཆུབ་ཀྱི་ཚོགས་མཐའ་ཡས་ཤིང་དཔག་ཏུ་མེད་པ་བསགས་པ་ཡོངས་སུ་རྫོགས་པར་བྱ་བའི་ཕྱིར་རོ། །དེའི་དུས་གསུམ་
དུ་རྫོགས་པའི་བྱང་ཆུབ་ཏུ་སྨོན་པའི་ཚུལ་ཁྲིམས་ནི་རྫོགས་པའི་བྱང་ཆུབ་ཐོབ་པར་ངེས་པ་ལ་འཇུག་པར་བྱ་བའི་ཕྱིར་རོ། །དེའི་དུས་གསུམ་དུ་དགེ་བའི་རྩ་བ་ཐམས་ཅད་རྫོགས་པའི་བྱང་ཆུབ་ཐོབ་པར་ཡོངས་སུ་སྔོ་བའི་ཚུལ་ཁྲིམས་ནི་གཅིག་ཏུ་དེ་བཞིན་གཤེགས་པའི་སྟོབས་དང་།
མི་འཇིགས་པ་ཐོབ་པར་བྱ་བའི་ཕྱིར་རོ། །དེའི་ཕ་མ་དང་། བླ་མ་དང་། རྒན་པ་དང་། སློབ་དཔོན་དང་། མཁན་པོ་ལ་ཡོངས་སུ་སྤྱད་པར་བྱེད་པའི་བསྙེན་བཀུར་བྱེད་པའི་ཚུལ་ཁྲིམས་ནི་ཟིལ་གྱིས་མི་ནོན་པའི་ཆོས་ཉིད་ཐོབ་པར་བྱ་བའི་ཕྱིར་རོ། །དེའི་འཇིགས་པ་དང་།
སྐྲག་པ་དང་། ཉམ་ཐག་པ་དང་། མགོན་མེད་པ་དབུགས་འབྱིན་པའི་ཚུལ་ཁྲིམས་ནི་དྲིས་པ་ཐམས་ཅད་ལ་མི་སྐྱོ་བར་ལན་འདེབས་པ་ལ་ལུང་བསྟན་པ་ལ་མཁས་པ་ཐོབ་པར་བྱ་བའི་ཕྱིར་རོ། །དེའི་རྒྱལ་པོ་དང་། ཆོམ་རྐུན་དང་། མེ་དང་། ཆུ་དང་། བགོ་སྐལ་ལ་སྤྱོད་

པའི་སྡུག་བསྔལ་གྱི་ནང་དུ་ཆུད་པ་རྣམས་ཡོངས་སུ་བསྐྱབ་ཅིང་གྲོགས་བྱ་བའི་ཚུལ་ཁྲིམས་ནི་གནས་དང་། ས་དང་ཕ་རོལ་ཏུ་ཕྱིན་པ་ཆེན་པོ་ཡོངས་སུ་བསྐང་བ་ཐོབ་པར་བྱ་བའི་ཕྱིར་རོ། །དེའི་སངས་རྒྱས་དང་། རང་སངས་རྒྱས་དང་། འཕགས་པ་ཉན་ཐོས་དང་།
བྱང་ཆུབ་སེམས་དཔའ་རྣམས་ཀྱི་རྫུ་འཕྲུལ་གྱི་ཆོ་འཕྲུལ་རྗེས་སུ་བསྔགས་པའི་ཚུལ་ཁྲིམས་ནི་དེ་བཞིན་གཤེགས་པའི་རྫུ་འཕྲུལ་གྱི་སྟོབས་བླ་ན་མེད་པ་ཐོབ་པར་བྱ་བའི་ཕྱིར་རོ། །དེའི་ཕ་རོལ་གྱི་སེམས་རྗེས་སུ་སྲུང་བ་དང་འཐུན་པའི་ལུས་ཀྱི་ལས་ཀྱི་ཚུལ་ཁྲིམས་དང་། ཕ་རོལ་
གྱི་སེམས་མངོན་པར་དགའ་བ་དང་། ཡང་དག་པར་དགའ་བར་འགྱུར་བའི་ལུས་ཀྱི་ལས་ཀྱི་ཚུལ་ཁྲིམས་དང་། ཕ་རོལ་གྱི་སེམས་རྗེས་སུ་སྲུང་བ་དང་འཐུན་པའི་ངག་གི་ལས་ཀྱི་ཚུལ་ཁྲིམས་དང་། ཕ་རོལ་གྱི་སེམས་མངོན་པར་དགའ་བ་དང་། ཡང་དག་པར་དགའ་
བར་འགྱུར་བའི་ངག་གི་ལས་ཀྱི་ཚུལ་ཁྲིམས་ནི་དེ་བཞིན་གཤེགས་པའི་ཕ་རོལ་གྱི་སེམས་མཁྱེན་པའི་སྟོབས་མཐའ་ཡས་པ་ཐོབ་པར་བྱ་བའི་ཕྱིར་རོ། །དེའི་ཚེ་འདིའི་དོན་དང་། ཚེ་རབས་གཞན་གྱི་དོན་དང་། ཉན་ཐོས་ཀྱི་ཐེག་པའི་དོན་དང་། རང་སངས་རྒྱས་ཀྱི་ཐེག་པའི་དོན་
དང་། རྫོགས་པའི་བྱང་ཆུབ་ཀྱི་ཐེག་པའི་དོན་རྣམས་ལ་བག་མེད་པ་དང་། བརྗེད་པ་རྣམས་ཀྱི་དྲན་པ་ཡང་དག་པར་སྐྱེད་པའི་ཚུལ་ཁྲིམས་དང་། དྲན་པ་འབྱུང་བར་བྱེད་པའི་ཚུལ་ཁྲིམས་ནི་བརྗེད་པ་མེད་པའི་ཆོས་ཉིད་ཐོབ་པར་བྱ་བའི་ཕྱིར་རོ། །དེའི་ཆོས་ཉན་པའི་ཚུལ་ཁྲིམས་
དང་། ཆོས་འཛིན་པའི་ཚུལ་ཁྲིམས་དང་། ཆོས་གོམས་པར་བྱེད་པའི་ཚུལ་ཁྲིམས་དང་། ཆོས་ཉེ་བར་སྟོན་པའི་ཚུལ་ཁྲིམས་ནི་སོ་སོ་ཡང་དག་པར་རིག་པ་དང་། ཕ་རོལ་ཏུ་ཕྱིན་པ་ཡོངས་སུ་བསྐང་བ་ཐོབ་པར་བྱ་བའི་ཕྱིར་རོ། །དེའི་ཚུལ་ཁྲིམས་ཡང་དག་པར་ལེན་པར་
འདོད་པ་དང་། ལྷག་པར་སྤྱད་པར་འདོད་ན་ཡང་ལུས་དང་། ངག་དང་། སེམས་ཀྱི་དགེ་བའི་རྩ་བ་དེ་ཐམས་ཅད་སེམས་ཅན་ཐམས་ཅད་བསྒྲལ་བ་དང་། སེམས་ཅན་ཐམས་ཅད་དགྲོལ་བ་དང་། སེམས་ཅན་ཐམས་ཅད་དབུགས་དབྱུང་བ་དང་། ཐམས་ཅད་མཁྱེན་པ་ཉིད་

ཐོབ་པར་བྱ་བ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་སྔོ་བར་བྱེད་དོ། །ཡང་དག་པར་འཛིན་པ་དང་། ལྷག་པར་སྤྱོད་པ་དང་། ཡང་དག་པར་བླངས་པ་དང་། ལྷག་པར་སྤྱད་ནས་ཀྱང་སེམས་ཅན་ཐམས་ཅད་
བསྒྲལ་བ་དང་། སེམས་ཅན་ཐམས་ཅད་དགྲོལ་བ་དང་། སེམས་ཅན་ཐམས་ཅད་དབུགས་དབྱུང་བ་དང་། ཐམས་ཅད་མཁྱེན་པ་ཉིད་ཐོབ་པར་བྱ་བ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་སྔོ་བར་བྱེད་དོ། །གལ་ཏེ་ཚུལ་ཁྲིམས་དེ་མ་ཞིག་
པ་དང་། མ་རལ་བ་དང་། འདྲེན་མ་མ་ཡིན་པར་སློབ་པའི་ནུས་པ་དང་མི་ལྡན་པར་གྱུར་ན་དེ་འདི་ལྟར་ཡང་དག་པར་སློབ་སྟེ། དུས་དུས་སུའམ། ཅུང་ཟད་ཅུང་ཟད་དུ་ཡང་མི་དགེ་བ་སྤང་བ་དང་། དོར་བ་དང་། བསལ་བར་རྩོལ་ལོ། །འབད་དོ། །དུས་དུས་སུའམ། ཅུང་
ཟད་ཅུང་ཟད་དུ་ཡང་དགེ་བ་ལ་སློབ་པ་དང་། མངོན་པར་འཕེལ་བར་བྱ་བ་དང་། ཡོངས་སུ་རྫོགས་པར་བྱ་བར་རྩོལ་ལོ། །འབད་དོ། སྲིད་པ་གཞན་དུ་གྱུར་པ་ན་ཡང་ཞུམ་པར་མི་འགྱུར་ཞིང་སྒྱིད་ལུག་པར་མི་འགྱུར་རོ། །ལག་བཟངས་བྱང་ཆུབ་སེམས་དཔའ་རྣམས་ཀྱི་བྱང་ཆུབ་
ཏུ་སེམས་བསྐྱེད་པ་དང་། བྱང་ཆུབ་ཀྱི་སེམས་རྗེས་སུ་དྲན་པ་དང་། བྱང་ཆུབ་ཀྱི་སེམས་སྒོམ་པ་དང་། བྱང་ཆུབ་ཏུ་སྨོན་པ་དང་། བྱང་ཆུབ་ཏུ་སྨོན་ལམ་འདེབས་པ་གང་ཡིན་པ་དེ་ཉིད་དེ་དག་གི་དགེ་བའི་ཚུལ་ཁྲིམས་ཡང་དག་པར་འཛིན་པ་དང་། དགེ་བའི་ཚུལ་ཁྲིམས་
ལ་ལྷག་པར་སྤྱོད་པ་གྲངས་མེད་ཅིང་དཔག་ཏུ་མེད་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ལ་ཟག་པ་མེད་པའི་ཚུལ་ཁྲིམས་བསྐྱེད་པར་འདོད་པ་དང་། མི་སློབ་པའི་ཚུལ་ཁྲིམས་བསྐྱེད་པར་འདོད་པ་དང་། ཟག་
པ་མེད་པའི་ཚུལ་ཁྲིམས་ཡང་དག་པར་བསྐྱེད་པར་འདོད་པ་དང་། མི་སློབ་པའི་ཚུལ་ཁྲིམས་ཡང་དག་པར་བསྐྱེད་པར་འདོད་པ་དེ་ནི་དགེ་བའི་ཚུལ་ཁྲིམས་ཡང་དག་པར་འཛིན་པ་དང་། དགེ་བའི་ཚུལ་ཁྲིམས་ལ་ལྷག་པར་སྤྱོད་པའི་མཆོག་ཡིན་ནོ། །དེ་ནི་དམ་པ་ཡིན་ནོ། །ལག་

བཟངས་དེ་ལྟར་ན་བྱང་ཆུབ་སེམས་དཔའ་བདེ་བ་དང་ལྡན་ལ་ཡིད་བདེ་བ་དང་ལྡན་ཞིང་ཚེགས་ཆུང་ངུ་དང་། སྡུག་བསྔལ་ཆུང་ངུས་མྱུར་དུ་སྐྱེན་པར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལག་བཟངས་བྱང་ཆུབ་སེམས་དཔའ་ཇི་ལྟར་བཟོད་པའི་ཕ་རོལ་ཏུ་ཕྱིན་
པ་ཡོངས་སུ་རྫོགས་པར་བྱེད་ཅེ་ན། ལག་བཟངས་འདི་ལ་བྱང་ཆུབ་སེམས་དཔའ་ནི་གཞན་དག་གི་རང་གི་ལུས་ཀྱི་སྲོག་གཅོད་དམ། བདོག་པ་ཐམས་ཅད་འཕྲོག་གམ། ཆུང་མ་འཕྲོག་གམ། བརྫུན་དུ་སྨྲ་བའམ། ཕྲ་མ་དང་། ངག་རྩུབ་པོ་དང་། ཚིག་ཀྱལ་པ་སྨྲ་བའམ།
གཤེ་འམ། གསོད་དམ། འཛིན་ཏམ། རྡེག་གམ། གཅོད་ཀྱང་སླར་གནོད་པར་མི་བྱེད་ཅིང་སླར་མི་ཁྲོ་སྟེ་ཤར་གཉེར་ཞིང་འཁོན་དུ་འཛིན་པར་མི་བྱེད་དོ། །དེ་འདི་ལྟར་ཡང་དག་པར་སློབ་སྟེ། བདག་ཉིད་ཀྱིས་སྔོན་གྱི་སྲིད་པ་རྣམས་དང་། སྲིད་པ་འདི་ལ་སྡིག་པ་མི་དགེ་
བའི་ལས་འདི་དག་བྱས་ཤིང་བསགས་པ་དེ་དག་གི་འབྲས་བུ་ནི་འདི་ཡིན། དེ་དག་གི་རྣམ་པར་སྨིན་པ་ནི་འདི་ཡིན་ཏེ། རང་གི་ལས་ཀྱི་འབྲས་བུ་དང་། རང་གི་ལས་ཀྱི་རྣམ་པར་སྨིན་པ་བདག་གིས་མྱོང་བ་ལ་ཅིའི་ཕྱིར་གཞན་ལ་སླར་གནོད་པར་བྱ་ཞིང་སླར་ཁྲོ་བ་དང་། ཤར་
གཉེར་ཞིང་འཁོན་དུ་འཛིན་པར་བྱ་སྙམ་དུ་སེམས་སོ། །ལག་བཟངས་གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། གལ་ཏེ་བདག་གི་སྲོག་གཅོད་པའམ། བདོག་པ་ཐམས་ཅད་འཕྲོག་པའམ། ཆུང་མ་འཕྲོག་པའམ། བརྫུན་དུ་སྨྲ་བའམ། ཕྲ་མ་
འམ། ངག་རྩུབ་པོའམ། ཚིག་ཀྱལ་པ་སྨྲ་བའམ། གཤེ་བའམ། གསོད་པའམ། འཛིན་པའམ། རྡེག་པའམ། གཅོད་པ་ཡང་རུང་སྟེ། གཞན་དག་ལ་སླར་གནོད་པ་བྱས་སམ། སླར་ཁྲོ་བའམ། ཤར་གཉེར་ཞིང་འཁོན་དུ་བཟུང་ན་སླར་གནོད་པ་
བྱས་པ་དང་། སླར་ཁྲོས་པ་དང་། ཤར་གཉེར་ཞིང་འཁོན་དུ་བཟུང་བའི་སྡིག་པ་མི་དགེ་བ་དེའི་སྡུག་བསྔལ་གྱི་ཚོར་བ་མི་འདོད་པ། མི་སྡུག་པ་ཡིད་དུ་མི་འོང་བ་འདི་བས་བདག་ལ་ལས་ཀྱི་རྣམ་པར་སྨིན་པ་དང་། ལས་ཀྱི་རྒྱུ་འཐུན་པ་བརྒྱ་གྱུར་ཏམ། སྟོང་གྱུར་ཏམ།

དེ་བས་ལྷག་པར་མི་འདོད་པ་དང་། མི་སྡུག་པ་དང་། ཡིད་དུ་མི་འོང་བའི་སྡུག་བསྔལ་གཞན་ཡང་འབྱུང་བར་འགྱུར་རོ་སྙམ་མོ། །ལག་བཟངས་གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། སྲོག་ཡོད་པས་སྲོག་གཅོད་
པར་འགྱུར། རྫས་ཡོད་པས་རྫས་འཕྲོག་པར་འགྱུར། རྣ་བའི་དབང་པོ་ཡོད་པས་རྫུན་དུ་སྨྲ་བ་ཐོས་པར་འགྱུར་ཞིང་། ཕྲ་མ་དང་། ངག་རྩུབ་པོ་དང་། ཚིག་ཀྱལ་པ་ཐོས་པར་འགྱུར་ལ། ལུས་ཡོད་པས་ལུས་འདྲེན་པ་དང་། འཆིང་བ་དང་། འཛིན་པ་དང་། རྡེག་པ་དང་།
གཅོད་པར་འགྱུར་ཏེ། བདག་ཉིད་ཀྱིས་སྡུག་བསྔལ་ཀྱི་དངོས་པོ། །སྡུག་བསྔལ་གྱི་གཞི། །སྲོག་གི་དབང་པོ་དང་། རྣ་བའི་དབང་པོ་དང་། ལུས་བླངས་པར་གྱུར་ན་ཇི་ལྟར་གཞན་དག་ལ་སླར་གནོད་པ་དང་། སླར་ཁྲོ་བ་དང་། ཤར་གཉེར་ཞིང་འཁོན་དུ་གཟུང་བར་བྱ་
སྙམ་མོ། །ལག་བཟངས་གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། དཔེར་ན་སའི་ཁམས་ཀྱི་མཚན་ཉིད་ནི་སྲ་བ་སྟེ། དེ་ནི་ངོ་བོ་ཉིད། དེ་ནི་ཆོས་ཉིད། དེ་ནི་རང་བཞིན་ནོ། །ཆུའི་ཁམས་ཀྱི་མཚན་ཉིད་ནི་གཤེར་བ། མེའི་ཁམས་ཀྱི་མཚན་ཉིད་
ནི་ཚ་བ། རླུང་གི་ཁམས་ཀྱི་མཚན་ཉིད་ནི་ཡང་ཞིང་གཡོ་བ་སྟེ། དེ་ནི་ངོ་བོ་ཉིད། དེ་ནི་ཆོས་ཉིད། དེ་ནི་རང་བཞིན་ནོ། །དེ་བཞིན་དུ་སྲོག་ཆགས་ཐམས་ཅད་ཀྱང་ཟད་པའི་ཆོས་ཅན། འགོད་པའི་ཆོས་ཅན། འགོག་པའི་ཆོས་ཅན་ནོ། །དབང་པོ་ཐམས་ཅད་ཀྱང་སྡུག་བསྔལ་
གྱི་ཆོས་ཅན། སྡུག་བསྔལ་འདུས་ཏེ་རེག་པའི་ཆོས་ཅན། སྡུག་བསྔལ་མྱོང་བའི་ཆོས་ཅན་ནོ། །ལུས་ཐམས་ཅད་ཀྱང་སྡུག་བསྔལ་གྱི་ཆོས། སྡུག་བསྔལ་འདུས་ཏེ་རེག་པའི་ཆོས། སྡུག་བསྔལ་མྱོང་བའི་ཆོས་ཏེ། དེ་ནི་ངོ་བོ་ཉིད། དེ་ནི་ཆོས་ཉིད། དེ་ནི་རང་བཞིན་
ཡིན་ནོ། །སྲོག་གི་དབང་པོ་ཟད་པའི་ཆོས་ཅན། འགོད་པའི་ཆོས་ཅན། འགོག་པའི་ཆོས་ཅན། ཟད་ཅིང་དེངས་ལ་འགོག་པ་དང་། དབང་པོ་དྲུག་པོ་སྡུག་བསྔལ་གྱི་ཆོས་ཅན། སྡུག་བསྔལ་འདུས་ཏེ་རེག་པའི་ཆོས་ཅན། སྡུག་བསྔལ་མྱོང་བའི་ཆོས་ཅན་རྣམས་ལ་

སྡུག་བསྔལ་འདུས་ཏེ་རེག་པའི་ཇི་ལྟར་གཞན་དག་ལ་སླར་གནོད་པ་འམ། སླར་ཁྲོ་བའམ། ཤར་གཉེར་ཞིང་འཁོན་དུ་གཟུང་བར་བྱ། དེ་ཅིའི་ཕྱིར་ཞེ་ན། འདི་ནི་ངོ་བོ་ཉིད། འདི་ནི་ཆོས་ཉིད། འདི་ནི་རང་བཞིན་ཡིན་ནོ་སྙམ་མོ། །ལག་བཟངས་གཞན་ཡང་བྱང་ཆུབ་སེམས་
དཔའ་འདི་ལྟར་ཡང་དག་པར་སློབ་སྟེ། བདག་གི་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱང་བདག་མེད་ཅིང་བདག་གི་མེད་པ་ཡིན་ལ། གཞན་དག་གི་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱང་བདག་མེད་ཅིང་བདག་གི་
མེད་པ་ཡིན་ན། མཁས་པ་རིག་པ་དག་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་བདག་མེད་ཅིང་བདག་གི་མེད་པ་ལ། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་བདག་མེད་ཅིང་བདག་གི་མེད་པ་དང་། ཇི་ལྟར་དགའ་བའམ།
རྗེས་སུ་ཆགས་པ་འམ། ཡང་དག་པར་དགའ་བར་འགྱུར་བ་འམ། རྡེག་པའམ། སླར་གནོད་པར་བྱེད་པ་འམ། སླར་ཁྲོ་བ་འམ། ཤར་གཉེར་ཞིང་འཁོན་དུ་འཛིན་པར་འགྱུར་སྙམ་མོ། །ལག་བཟངས་གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་
སྟེ། འདི་ལྟ་སྟེ་མིར་སྐྱེས་པའི་སྡུག་བསྔལ་ནི་ཉུང་ཞིང་ཆུང་གི །ཡི་དགས་ཀྱི་སྡུག་བསྔལ་ནི་ཆེས་མི་བཟད་ལ་ཆེས་བཟོད་པར་དཀའ་བ་ཡིན། དུད་འགྲོའི་སྐྱེ་གནས་ཀྱི་སྡུག་བསྔལ་དང་། སེམས་ཅན་དམྱལ་བའི་སྡུག་བསྔལ་ཡང་ཆེས་མི་བཟད་ཅིང་བཟོད་པར་དཀའ་བ་ཡིན་
ན། བདག་གིས་ཇི་ལྟར་སྡུག་བསྔལ་ཆུང་ཞིང་ཉུང་བ་ཙམ་གྱི་ཕྱིར་གཞན་དག་ལ་སླར་གནོད་པ་དང་། སླར་ཁྲོ་བ་དང་། ཤར་གཉེར་ཞིང་འཁོན་དུ་གཟུང་བར་བྱ་སྙམ་མོ། །ལག་བཟངས་གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། གང་བདག་
གཅིག་པུའི་དོན་འདོད་པ་དང་། བདག་གཅིག་པུ་ལ་ཕན་པར་འདོད་པས་གཞན་དག་ལ་ཕྱིར་གནོད་པ་བྱེད་ཅིང་ཕྱིར་ཁྲོ་སྟེ་ཤར་གཉེར་ཞིང་འཁོན་དུ་འཛིན་པ་དེ་ཡང་མི་རིགས་ཏེ་ཆ་མ་ཡིན་ན། བདག་འཇིག་རྟེན་ཐམས་ཅད་ཀྱི་དོན་འདོད་པ། འཇིག་རྟེན་ཐམས་ཅད་ལ་ཕན་པར་

འདོད་པ། གོ་ཆ་ཆེན་པོ་བགོས་པ། ཡི་དམ་བཅས་པ་ཆེན་པོས་ཡི་དམ་བཅས་པ། ཐེག་པ་ཆེན་པོ་ལ་ཡང་དག་པར་ཞུགས་པ། སངས་རྒྱས་ཀྱི་ཆོས་རྒྱ་ཆེན་པོ་ཡོངས་སུ་བསྐང་བར་འདོད་པ་ལྟ་ལ་སྨོས་ཀྱང་ཅི་དགོས་ཏེ། མི་བཟོད་པ་དང་།
ཕྱིར་གནོད་པ་བྱེད་པ་དང་། ཕྱིར་ཁྲོ་བ་དང་། ཤར་གཉེར་ཞིང་འཁོན་དུ་འཛིན་པས་ནི་སངས་རྒྱས་ཀྱི་ཆོས་འདི་དག་སོགས་པ་དང་། འཕེལ་བ་དང་། ཡོངས་སུ་རྫོགས་པར་མི་འགྱུར་གྱི། བཟོད་པ་དང་། ཕྱིར་གནོད་པ་མི་བྱེད་པ་དང་། ཕྱིར་མི་ཁྲོ་བ་དང་། ཤར་
གཉེར་ཞིང་འཁོན་དུ་འཛིན་པ་མི་བྱེད་པས་སངས་རྒྱས་ཀྱི་ཆོས་འདི་དག་སོགས་ཤིང་འཕེལ་ཏེ། ཡོངས་སུ་རྫོགས་པར་འགྱུར་རོ་སྙམ་མོ། །ལག་བཟངས་རིགས་ཀྱི་བུ་འམ། རིགས་ཀྱི་བུ་མོ་སངས་རྒྱས་ཀྱི་ཆོས་ཡོངས་སུ་བསྐང་བར་འདོད་པས་མནར་མེད་པའི་སྡུག་བསྔལ་གྱི་
རེག་པས་རེག་ཀྱང་གཞན་དག་ལ་སླར་གནོད་པར་མི་བྱ། སླར་ཁྲོ་བར་མི་བྱ། ཤར་གཉེར་ཞིང་འཁོན་དུ་གཟུང་བར་མི་བྱ་ན། མིའི་སྡུག་བསྔལ་གྱིས་རེག་པས་ལྟ་སྨོས་ཀྱང་ཅི་དགོས། དེ་སྤྱོས་སམ། བརྒྱད་དམ། སྨད་དམ། མི་སྙན་པ་བྱས་ཀྱང་བྱམས་པའི་སེམས་དང་།
སྙིང་རྗེའི་སེམས་དང་། དེ་བཞིན་གཤེགས་པའི་ཐུགས་ཤིན་ཏུ་དྲི་མ་མེད་ཅིང་དག་ལ་དཀར་བ་ཐོབ་པར་བྱ་བའི་ཕྱིར་བཟོད་ཅིང་དང་དུ་ལེན་ཏོ། །དེ་དྲུད་བཤལ་ཏམ། བཅིངས་སམ། བཟུང་ཡང་བྱམས་པའི་སེམས་དང་། སྙིང་རྗེའི་སེམས་དང་། སྐད་ཅིག་གཅིག་ལ་མ་རིག་
པའི་སྒྲིབ་པའི་སྒོ་ངའི་སྦུབས་གཞོམ་པའི་ཕྱིར་བཟོད་ཅིང་དང་དུ་ལེན་ཏོ། །དེ་བརྡེགས་ཀྱང་བྱམས་པའི་སེམས་དང་། སྙིང་རྗེའི་སེམས་དང་། སེམས་ཅན་ཐམས་ཅད་ཀྱི་རྗེས་སུ་ཆགས་པ་དང་ཁོང་ཁྲོ་བ་བཟློག་པའི་ཕྱིར་བཟོད་ཅིང་དང་དུ་ལེན་ཏོ། །དེ་རྣ་བ་བཅད་ཀྱང་བྱམས་པའི་སེམས་དང་།
སྙིང་རྗེའི་སེམས་དང་། སེམས་ཅན་ཐམས་ཅད་ལ་དད་པར་བྱ་བའི་ཆོས་ཀྱི་རྣ་བ་བསྐྱེད་པའི་ཕྱིར་བཟོད་ཅིང་དང་དུ་ལེན་ཏོ། །དེ་སྣ་བཅད་ཀྱང་བྱམས་པའི་སེམས་དང་། སྙིང་རྗེའི་སེམས་དང་། སེམས་ཅན་ཐམས་ཅད་ཚུལ་ཁྲིམས་ཀྱི་ཡོན་ཏན་མཛེས་ཤིང་བླ་ན་མེད་པ་ལ་ལོངས་སྤྱོད་པར་བྱ་བའི་ཕྱིར་

བཟོད་ཅིང་དང་དུ་ལེན་ཏོ། །དེ་རྐང་པ་བཅད་ཀྱང་བྱམས་པའི་སེམས་དང་། སྙིང་རྗེའི་སེམས་དང་། སེམས་ཅན་ཐམས་ཅད་དེ་བཞིན་གཤེགས་པའི་རྫུ་འཕྲུལ་གྱི་རྐང་པ་བཞི་ཐོབ་པར་བྱ་བའི་ཕྱིར་བཟོད་ཅིང་དང་དུ་ལེན་ཏོ། །དེ་ལག་པ་བཅད་ཀྱང་བྱམས་པའི་སེམས་དང་། སྙིང་རྗེའི་
སེམས་དང་། སེམས་ཅན་ཐམས་ཅད་ལ་ཞི་བ་དང་། ཉེ་བར་ཞི་བའི་ཆོས་ཀྱི་ལག་པ་བཀྱང་པ་སྦྱིན་པ་ཐོབ་པར་བྱ་བའི་ཕྱིར་བཟོད་ཅིང་དང་དུ་ལེན་ཏོ། །དེ་ཡན་ལག་ཐམས་ཅད་བཅད་ཀྱང་བྱམས་པའི་སེམས་དང་། སྙིང་རྗེའི་སེམས་དང་། ཕ་རོལ་ཏུ་ཕྱིན་པ་དྲུག་གི་ཡན་ལག་དང་། ཉིང་ལག་
ཡོངས་སུ་རྫོགས་པར་བྱ་བའི་ཕྱིར་བཟོད་ཅིང་དང་དུ་ལེན་ཏོ། །དེ་མིག་ཕྱུང་ཡང་བྱམས་པའི་སེམས་དང་། སྙིང་རྗེའི་སེམས་དང་། སེམས་ཅན་ཐམས་ཅད་ཤེས་བཞིན་གྱི་མིག་གཡུང་དྲུང་ཐོབ་པར་བྱ་བའི་ཕྱིར་བཟོད་ཅིང་དང་དུ་ལེན་ཏོ། །དེ་མགོ་གཅོད་ཀྱང་བྱམས་པའི་སེམས་དང་།
སྙིང་རྗེའི་སེམས་དང་། སེམས་ཅན་ཐམས་ཅད་ཐམས་ཅད་མཁྱེན་པ་ཉིད་ཀྱི་ཆོས་ཀྱི་མགོ་ཐོབ་པར་བྱ་བའི་ཕྱིར་བཟོད་ཅིང་དང་དུ་ལེན་ཏོ། །དེ་བཟོད་པ་འདི་དག་དང་། ཇི་མི་སྙམ་པ་འདི་དག་མངོན་སུམ་དུ་བྱ་བར་འདོད་པ་དང་། ཡིད་ལ་བྱ་བར་འདོད་པ་ན་ཡང་སེམས་ཅན་ཐམས་ཅད་བསྒྲལ་བ་
དང་། སེམས་ཅན་ཐམས་ཅད་དགྲོལ་བ་དང་། སེམས་ཅན་ཐམས་ཅད་དབུགས་དབྱུང་བ་དང་། ཐམས་ཅད་མཁྱེན་པ་ཉིད་ཐོབ་པར་བྱ་བ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཡོངས་སུ་སྔོ་བར་བྱེད་དོ། །མངོན་སུམ་དུ་བྱེད་པ་དང་། ཡིད་ལ་བྱེད་
པ་དང་། མངོན་སུམ་དུ་བྱས་པ་དང་། ཡིད་ལ་བྱས་ནས་ཀྱང་སེམས་ཅན་ཐམས་ཅད་བསྒྲལ་བ་དང་། སེམས་ཅན་ཐམས་ཅད་དགྲོལ་བ་དང་། སེམས་ཅན་ཐམས་ཅད་དབུགས་དབྱུང་བ་དང་། ཐམས་ཅད་མཁྱེན་པ་ཉིད་ཐོབ་པར་བྱ་བ་དང་། སངས་རྒྱས་ཀྱི་ཆོས་ཐམས་ཅད་
ཡོངས་སུ་རྫོགས་པར་བྱ་བའི་ཕྱིར་ཡོངས་སུ་སྔོ་བར་བྱེད་དོ། །གལ་ཏེ་བཟོད་པ་འདི་དག་དང་། ཇི་མི་སྙམ་པ་འདི་དག་མ་ཉམས་པ་དང་སྐྱོན་མེད་པ་དང་། འདྲེན་མ་མ་ཡིན་པར་སློབ་པའི་ནུས་པ་དང་མི་ལྡན་པར་གྱུར་ན་དེ་འདི་ལྟར་ཡང་དག་པར་སློབ་སྟེ། དུས་དུས་སུའམ། ཅུང་ཟད་

ཅུང་ཟད་དུ་ཡང་མི་བཟོད་པ་དང་། ཇི་སྙམ་པར་མི་བྱེད་པ་སྤང་བ་དང་། དོར་བ་དང་། བསལ་བར་སྩོལ་ལོ། །འབད་དོ། །དུས་དུས་སུ་འམ། ཅུང་ཟད་ཅུང་ཟད་དུ་ཡང་བཟོད་པ་དང་། ཇི་མི་སྙམ་པ་ལ་སློབ་པ་དང་། མངོན་པར་འཕེལ་བར་བྱ་བ་དང་། ཡོངས་སུ་
རྫོགས་པར་བྱ་བ་སྩོལ་ལོ། །འབད་དོ། །སྲིད་པ་གཞན་དུ་གྱུར་པ་ན་ཡང་ཞུམ་པར་མི་འགྱུར་ཞིང་སྒྱིད་ལུག་པར་མི་འགྱུར་རོ། །ལག་བཟངས་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཏུ་སེམས་བསྐྱེད་པ་དང་། བྱང་ཆུབ་ཀྱི་སེམས་རྗེས་སུ་དྲན་པ་དང་། བྱང་ཆུབ་ཀྱི་སེམས་སྒོམ་པ་
དང་། བྱང་ཆུབ་ཏུ་སྨོན་པ་དང་། བྱང་ཆུབ་ཏུ་སྨོན་ལམ་འདེབས་པ་གང་ཡིན་པ་དེ་ཉིད་དེ་དག་གི་བཟོད་པ་ཀུན་ཏུ་སྤྱོད་པ་དགེ་བ་དང་། བཟོད་པ་ཡང་དག་པར་བསྒྲུབ་པ་དགེ་བ་གྲངས་མེད་ཅིང་དཔག་ཏུ་མེད་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། འཇིག་རྟེན་གྱི་ཁམས་
ཐམས་ཅད་དུ་སེམས་ཅན་ཐམས་ཅད་ལ་ཟག་པ་མེད་པའི་བཟོད་པ་བསྐྱེད་པར་འདོད་པ་དང་། མི་སློབ་པའི་བཟོད་པ་བསྐྱེད་པར་འདོད་པ་དང་། ཟག་པ་མེད་པའི་བཟོད་པ་ཡང་དག་པར་བསྐྱེད་པར་འདོད་པ་དང་། མི་སློབ་པའི་བཟོད་པ་ཡང་དག་པར་བསྐྱེད་པར་འདོད་པ་དེ་ནི་བཟོད་
པ་ཀུན་ཏུ་སྤྱོད་པ་དགེ་བ་དང་། བཟོད་པ་ཡང་དག་པར་སྒྲུབ་པ་དགེ་བ་ཐམས་ཅད་ཀྱི་མཆོག་ཡིན་ནོ། །དེ་ནི་དམ་པ་ཡིན་ནོ། །ལག་བཟངས་དེ་ལྟར་ན་བྱང་ཆུབ་སེམས་དཔའ་བདེ་བ་དང་ལྡན་ལ་ཡིད་བདེ་བ་དང་ལྡན་ཞིང་ཚེགས་ཆུང་ངུ་དང་། སྡུག་བསྔལ་ཆུང་ངུས་མྱུར་དུ་སྐྱེན་པར་བཟོད་པའི་
ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལག་བཟངས་བྱང་ཆུབ་སེམས་དཔའ་ཇི་ལྟར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་ཅེ་ན། ལག་བཟངས་འདི་ལ་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། ཕྱོགས་བཅུའི་ཕྱོགས་རེ་རེར་ཡང་འཇིག་རྟེན་
གྱི་ཁམས་མཐའ་ཡས་མུ་མེད་དེ། འཇིག་རྟེན་གྱི་ཁམས་རེ་རེ་ན་ཡང་སེམས་ཅན་མཐའ་ཡས་སོ། །དེ་ལྟར་སེམས་ཅན་གྱི་ཚོགས་མཐའ་ཡས་ཤིང་མུ་མེད་པ་ལ་མཐའ་ཡོད་པ་མ་ཡིན་མུ་ཡོད་པ་མ་ཡིན་ཏེ། བདག་ནི་སེམས་ཅན་གྱི་ཚོགས་མཐའ་ཡས་ཤིང་མཐའ་ཡས་པ་དེ་ལ་ཕན་པའི་ཕྱིར་གོ་ཆ་བགོས་

ལ། སེམས་ཅན་གྱི་ཚོགས་མཐའ་ཡས་ཤིང་མཐའ་ཡས་པ་ལ་བདེ་བའི་ཕྱིར་གོ་ཆ་བགོས་ན་སེམས་ཅན་ཐམས་ཅད་ལ་ཕན་པར་དམིགས་པ་མཐའ་ཡས་ཤིང་མཐའ་ཡས་པ་དང་། སེམས་ཅན་ཐམས་ཅད་ལ་བདེ་བར་དམིགས་པ་མཐའ་ཡས་ཤིང་མཐའ་ཡས་པའི་དགེ་བའི་རྩ་བ་མཐའ་
ཡས་པ་དག་བག་མེད་པར་གྱུར་ཏམ། སེམས་གཞན་དུ་གྱུར་ཏམ། གཉིད་ཀྱིས་ལོག་ཀྱང་ཉིན་མཚན་དུ་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་འཕེལ་བ་དང་། རྒྱས་པ་དང་། ཡོངས་སུ་རྫོགས་པར་འགྱུར་ཏེ། སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་དགེ་བའི་རྩ་བ་མཐའ་ཡས་ཤིང་མཐའ་
ཡས་པ་དག་སྐྱེ་བ་དང་། བྱང་ཆུབ་ཀྱི་ཚོགས་ཀྱི་ཕུང་པོ་མཐའ་ཡས་ཤིང་མཐའ་ཡས་པ་དག་སྐྱེ་བས་རྫོགས་པའི་བྱང་ཆུབ་རྙེད་དཀའ་བར་མི་འགྱུར་ན་བདག་གིས་འདིར་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་དགེ་བའི་རྩ་བ་འཕེལ་བ་མཐའ་ཡས་ཤིང་མཐའ་ཡས་པ་དང་། དགེ་བའི་རྩ་བ་རྒྱས་པར་
འགྱུར་བ་མཐའ་ཡས་ཤིང་མཐའ་ཡས་པ་ཡང་དག་པར་རྗེས་སུ་མཐོང་ལ་གཞི་དེ་ལས་རྫོགས་པའི་བྱང་ཆུབ་རྙེད་མི་དཀའ་བར་ཡང་དག་པར་རྗེས་སུ་མཐོང་བཞིན་དུ་རྫོགས་པའི་བྱང་ཆུབ་ཐོབ་པར་འགྱུར་བའི་བརྩོན་འགྲུས་སྲོག་གི་ཕྱིར་ཡང་ཅིའི་ཕྱིར་ཉམས་པར་བྱ་སྙམ་མོ། །ལག་བཟངས་གཞན་ཡང་
བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། གང་ཞིག་སེམས་ཅན་གྱི་ཚོགས་མཐའ་ཡས་ཤིང་མཐའ་ཡས་པ་དེའི་རྒ་བའི་སྡུག་བསྔལ་གཅིག་པུ་བསལ་བ་དང་གཞོམ་པར་འདོད་པ་དེ་ཡང་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་དགེ་བའི་རྩ་བ་མཐའ་ཡས་ཤིང་མཐའ་ཡས་པ་འཕེལ་ལ།
དགེ་བའི་རྩ་བ་མཐའ་ཡས་ཤིང་མཐའ་ཡས་པ་རྒྱས་པར་འགྱུར་ན། གང་ཞིག་སེམས་ཅན་གྱི་ཚོགས་མཐའ་ཡས་ཤིང་མཐའ་ཡས་པ་དེའི་སྐྱེ་བའི་སྡུག་བསྔལ་དང་། འཆི་བའི་སྡུག་བསྔལ་བསལ་བར་འདོད་པ་དང་། སྡུག་པ་དང་བྲལ་བའི་སྡུག་བསྔལ་དང་། མི་སྡུག་པ་དང་ཕྲད་པའི་སྡུག་བསྔལ་དང་།
འདོད་པ་མི་འབྱོར་བའི་སྡུག་བསྔལ་དང་། དུད་འགྲོའི་སྐྱེ་གནས་ཀྱི་སྡུག་བསྔལ་དང་། གཤིན་རྗེའི་འཇིག་རྟེན་གྱི་སྡུག་བསྔལ་དང་། སེམས་ཅན་དམྱལ་བའི་སྡུག་བསྔལ་དང་། གྲང་བའི་སེམས་ཅན་དམྱལ་བའི་སྡུག་བསྔལ་དང་། ཚ་བའི་སེམས་ཅན་དམྱལ་བའི་སྡུག་

བསྔལ་བསལ་བར་འདོད་པ་ལྟ་སྨོས་ཀྱང་ཅི་དགོས་སྙམ་མོ། །ལག་བཟངས་གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། གང་ཞིག་སེམས་ཅན་གྱི་ཚོགས་མཐའ་ཡས་ཤིང་མཐའ་ཡས་པ་དེའི་སྡུག་བསྔལ་སེམས་ཀྱི་སྐད་ཅིག་གཅིག་པའི་སེམས་ཀྱི་སྐད་ཅིག་
གཅིག་ཙམ་དང་འབྲེལ་བ་བསལ་བར་འདོད་པ་དེ་ཡང་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་དགེ་བའི་རྩ་བ་མཐའ་ཡས་ཤིང་མཐའ་ཡས་པ་འཕེལ་ལ། དགེ་བའི་རྩ་བ་མཐའ་ཡས་ཤིང་མཐའ་ཡས་པ་རྒྱས་པར་འགྱུར་ན། གང་ཞིག་མ་འོངས་ཤིང་མ་ཕྱིན་པའི་བསྐལ་པ་མཐའ་ཡས་དཔག་ཏུ་མེད་
པ་རྣམས་སུ་སེམས་ཅན་གྱི་ཚོགས་མཐའ་ཡས་ཤིང་མཐའ་ཡས་པ་དེའི་སྐྱེ་བའི་སྡུག་བསྔལ་ནས་སྲིད་པའི་སྡུག་བསྔལ་གྱི་བར་དུ་བསལ་བར་འདོད་པ་ལྟ་སྨོས་ཀྱང་ཅི་དགོས་སྙམ་མོ། །ལག་བཟངས་གཞན་ཡང་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ། གང་ཞིག་རང་སངས་རྒྱས་
ཀྱི་ཡོན་ཏན་ནམ། ཉན་ཐོས་ཀྱི་ཡོན་ཏན་འདོད་པ་དེ་ཡང་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་དགེ་བའི་རྩ་བ་མཐའ་ཡས་ཤིང་མཐའ་ཡས་པ་འཕེལ་ལ། དགེ་བའི་རྩ་བ་མཐའ་ཡས་ཤིང་མཐའ་ཡས་པ་རྒྱས་པར་འགྱུར་ན། རིགས་ཀྱི་བུའམ། རིགས་ཀྱི་བུ་མོ་གང་སངས་རྒྱས་
ཀྱི་ཆོས་ཡོན་ཏན་མཐའ་ཡས་ཤིང་ཡོན་ཏན་མུ་མེད་པ། སྟོབས་མཐའ་ཡས་ཤིང་སྟོབས་མུ་མེད་པ་མཐའ་དག་ཆུབ་པ་ཡོངས་སུ་རྫོགས་པར་འདོད་པ་དང་། མོས་པ་དང་། སྨོན་པ་ལྟ་སྨོས་ཀྱང་ཅི་དགོས་ཏེ། བག་མེད་པར་གྱུར་ཏམ། གཉིད་ཀྱིས་ལོག་ཀྱང་རྒྱུ་བཞི་དང་། རྐྱེན་བཞི་
དང་། དམིགས་པ་བཞི་པོ་དེ་དག་ནི་དེའི་དགེ་བའི་རྩ་བའི་ཕུང་པོ་མཐའ་ཡས་ཤིང་མུ་མེད་པ་བཞི་དང་། བྱང་ཆུབ་ཀྱི་ཚོགས་ཀྱི་ཕུང་པོ་མཐའ་ཡས་ཤིང་མུ་མེད་པ་བཞི་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་འཕེལ་ཞིང་རྒྱས་པར་འགྱུར་བ་སྟེ། སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་
དགེ་བའི་རྩ་བའི་ཕུང་པོ་མཐའ་ཡས་ཤིང་མཐའ་ཡས་པ་བཞི་སྐྱེ་བ་དང་། རྫོགས་པའི་བྱང་ཆུབ་ཀྱི་ཚོགས་ཀྱི་ཕུང་པོ་མཐའ་ཡས་ཤིང་མཐའ་ཡས་པ་བཞི་སྐྱེ་བ་དག་གིས་རྫོགས་པའི་བྱང་ཆུབ་རྙེད་པར་མི་དཀའ་ན། བདག་གིས་འདིར་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་དགེ་བའི་རྩ་བའི་

ཕུང་པོ་མཐའ་ཡས་ཤིང་མཐའ་ཡས་པ་བཞི་དང་། རྫོགས་པའི་བྱང་ཆུབ་ཀྱི་ཚོགས་ཀྱི་ཕུང་པོ་མཐའ་ཡས་ཤིང་མཐའ་ཡས་པ་བཞི་ཡང་དག་པར་རྗེས་སུ་མཐོང་ལ། གཞི་དེ་ལས་རྫོགས་པའི་བྱང་ཆུབ་རྙེད་པར་མི་དཀའ་བར་ཡང་དག་པར་རྗེས་སུ་མཐོང་བཞིན་དུ་རྫོགས་པའི་
བྱང་ཆུབ་འཐོབ་པར་འགྱུར་བའི་བརྩོན་འགྲུས་སྲོག་གི་ཕྱིར་ཡང་ཅིའི་ཕྱིར་ཉམས་པར་བྱ་སྙམ་མོ། །རྒྱ་མཚོ་ཆེན་པོ་བཞི་ནི་ཤར་ཕྱོགས་ཀྱི་མཐའ་ཡང་མངོན་ཞིང་མུ་ཡང་མངོན་ལ། ལྷོ་དང་། ནུབ་དང་། བྱང་དང་། འོག་དང་། སྟེང་གི་མཐའ་ཡང་མངོན་ཞིང་མུ་ཡང་མངོན་
ལ། དགེ་བའི་རྩ་བ་བྱང་ཆུབ་ཀྱི་ཚོགས་ཀྱི་རྒྱ་མཚོ་ཆེན་པོ་མཐའ་ཡས་མུ་མེད་པ་བཞི་པོ་དེ་དག་ལ་ནི་མཐའ་དང་མུ་ཡོད་པ་མ་ཡིན་ན། བདག་གིས་སེམས་ཀྱི་སྐད་ཅིག་སེམས་ཀྱི་སྐད་