Kinh tạng Tây Tạng (Kangyur Đại Học) — 043_དཀོན་བརྩེགས།_ཅ

་རྫོགས་པའི་སངས་རྒྱས་ཆོས་ཐམས་ཅད་ལ་སྤོབས་པ་བཀོད་པའི་དཔལ་ཞེས་བྱ་བ་ཞིག་ད་ལྟར་བཞུགས་ཏེ། འཚོ་ཞིང་གཞེས་པ་ཡོད་དོ། །བསྐལ་
པ་དེ་ནི་ཤཱཀྱ་མངོན་པར་མཛེས་པ་ཞེས་བྱའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཐམས་ཅད་ལ་སྤོབས་པ་བཀོད་པའི་དཔལ་དེའི་མཚན་འཛིན་པའི་རིགས་ཀྱི་བུ་འམ། རིགས་ཀྱི་བུ་མོ་དད་པ་
ཅན་ནི་མཚོན་གྱིས་འཆི་བའི་དུས་བྱེད་པར་མི་འགྱུར་རོ། །དུག་གིས་མ་ཡིན། ཆུས་མ་ཡིན་ཏེ། མེས་ཀྱང་འཆི་བའི་དུས་བྱེད་པར་མི་འགྱུར་རོ། །རྫུས་ཏེ་སྐྱེ་བར་ཡང་འགྱུར་རོ། །ཚེ་རྗེས་མ་ཐག་ཏུ་ཡང་ཤུགས་བརྒྱ་པ་ཞེས་བྱ་བའི་གཟུངས་འཐོབ་པར་
འགྱུར་རོ། །དེ་ལ་འདི་སྐད་ཅེས་བྱ་སྟེ། མི་གང་སངས་རྒྱས་མཚན་འདི་རྗོད་བྱེད་པ། །འདི་ལ་མི་དེའི་ལུས་མེས་མི་འཆི་ཞིང་། །མཚོན་གྱིས་མིན་ལ་ཆུས་མིན་དུག་གིས་མིན། །དེ་ནི་རྫུས་ཏེ་སྐྱེ་བ་ཁོ་ནར་འགྱུར། །ཡོན་ཏན་རིན་ཆེན་མེ་ཏོག་ཀུན་ཏུ་རྒྱས་པ་
བྱང་ཕྱོགས་ན་མུན་པ་དང་རྡུལ་དང་བྲལ་བ་ཞེས་བྱ་བའི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོབས་པ་དཔག་མེད་བཀོད་པ་ཡང་དག་པར་སྤྱོད་པའི་བློ་ཞེས་བྱ་བ་ཞིག་ད་ལྟར་བཞུགས་ཏེ། འཚོ་ཞིང་གཞེས་པ་
ཡོད་དོ། །བསྐལ་པ་དེ་ནི་གྲགས་པ་ཆེན་པོ་འཛིན་པ་ཞེས་བྱའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོབས་པ་དཔག་མེད་བཀོད་པ་ཡང་དག་པར་སྤྱོད་པའི་བློ་དེའི་མཚན་འཛིན་པའི་རིགས་ཀྱི་བུ་འམ། རིགས་

ཀྱི་བུ་མོ་དད་པ་ཅན་ནི་སངས་རྒྱས་བྱེ་བ་ཁྲག་ཁྲིག་ཕྲག་བཅུ་མཉེས་པར་བྱེད་པར་འགྱུར་རོ། །ཐམས་ཅད་དུ་རྗེས་སུ་སོང་བ་ཞེས་བྱ་བའི་གཟུངས་ཀྱང་ཐོབ་པར་འགྱུར་རོ། །ཟད་མི་ཤེས་པའི་ཟ་མ་ཏོག་ཅེས་བྱ་བའི་གཟུངས་ཀྱང་ཐོབ་པར་འགྱུར་བ་ནས་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་དུ་ཡང་འགྱུར་རོ། །ངན་སོང་གསུམ་པོ་རྣམས་སུ་སྐྱེ་བར་མི་འགྱུར་རོ། །བྱང་ཆུབ་སེམས་དཔའི་སྤྱད་པ་སྤྱོད་པ་ན་སངས་རྒྱས་ཀྱི་ཞིང་གང་དང་གང་དུ་སྐྱེ་བར་འགྱུར་བ་དེ་དང་དེར་ངན་སོང་
དུ་སྐྱེས་པའི་སེམས་ཅན་རྣམས་ཡོངས་སུ་ཐར་བར་བྱེད་དོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ཡང་འགྱུར་རོ། །དེ་ལ་འདི་སྐད་ཅེས་བྱ་སྟེ། མི་གང་སངས་རྒྱས་མཚན་འདི་རྗོད་བྱེད་པ། །དེ་ཡི་ཡོན་ཏན་བགྲང་བར་མི་ནུས་ཤིང་། །
དེ་ནི་བྱང་ཆུབ་འཐོབ་པར་ཐེ་ཚོམ་མེད། །དེ་ལ་ཐེ་ཚོམ་མེད་པར་གཟུངས་སྐྱེའོ། །ཡོན་ཏན་རིན་ཆེན་མེ་ཏོག་ཀུན་ཏུ་རྒྱས་པ་ཤར་ལྷོའི་མཚམས་ཀྱི་ཕྱོགས་ན་ཤིན་ཏུ་མཛེས་པ་བཀོད་པའི་འཇིག་རྟེན་གྱི་ཁམས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་འབྲུག་སྟོང་བསྒྲགས་པའི་སྒྲ་སྐད་ཀྱི་རྒྱལ་པོ་ཞེས་བྱ་བ་ཞིག་ད་ལྟར་བཞུགས་ཏེ། འཚོ་ཞིང་གཞེས་པ་ཡོད་དོ། །བསྐལ་པ་དེ་ནི་ཡོན་ཏན་འབྱུང་བ་ཞེས་བྱའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
འབྲུག་སྟོང་བསྒྲགས་པའི་སྒྲ་སྐད་ཀྱི་རྒྱལ་པོ་དེའི་མཚན་འཛིན་པའི་རིགས་ཀྱི་བུ་འམ། རིགས་ཀྱི་བུ་མོ་དད་པ་ཅན་དེ་ནི་ཚེ་རྗེས་མ་ཐག་ཏུ་མི་འཇིགས་པ་བཞི་འཐོབ་པར་འགྱུར་རོ། །རྫུ་འཕྲུལ་གྱི་རྐང་པ་བཞི་འཐོབ་པར་འགྱུར་རོ། །བྱམས་པ་ཆེན་པོ་དང་། སྙིང་
རྗེ་ཆེན་པོ་འཐོབ་པར་འགྱུར་རོ། །སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་འཐོབ་པར་འགྱུར་རོ། །དེ་བཞིན་གཤེགས་པ་ཚེ་དཔག་མེད་ཀྱི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཅི་འདྲ་བ་དེ་ལྟ་བུ་འཐོབ་པར་འགྱུར་རོ། །བུད་མེད་ཀྱི་ཚེ་རྗེས་ནས་སྐྱེས་པའི་

ལུས་འཐོབ་པར་འགྱུར་རོ། །དེ་ལ་འདི་སྐད་ཅེས་བྱ་སྟེ། གང་ཞིག་རྒྱལ་བའི་མཚན་འདི་འཛིན་བྱེད་པའི། །བྱང་ཆུབ་སེམས་དཔས་ཡོན་ཏན་འདི་དང་གཞན། །བསམ་གྱིས་མི་ཁྱབ་རྟག་ཏུ་འཐོབ་པར་འགྱུར། །བྱང་ཆུབ་སེམས་དཔས་སངས་རྒྱས་མང་པོ་
མཐོང་། །ཡོན་ཏན་རིན་ཆེན་མེ་ཏོག་ཀུན་ཏུ་རྒྱས་པ་ལྷོ་ནུབ་མཚམས་ཀྱི་ཕྱོགས་ན་བཀོད་པ་དཔག་ཏུ་མེད་པའི་འཇིག་རྟེན་གྱི་ཁམས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་མཆོག་འོད་དཔལ་ཞེས་བྱ་བ་ཞིག་ད་ལྟར་
བཞུགས་ཏེ། འཚོ་ཞིང་གཞེས་པ་ཡོད་དོ། །བསྐལ་པ་དེ་ནི་ཆོས་ཐམས་ཅད་ཡང་དག་པར་སྐྱེད་པ་ཞེས་བྱའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་མཆོག་འོད་དཔལ་དེའི་མཚན་འཛིན་པའི་རིགས་
ཀྱི་བུ་འམ། རིགས་ཀྱི་བུ་མོ་དད་པ་ཅན་དེ་མཚན་ཐོས་པ་དེས་སངས་རྒྱས་བཅོམ་ལྡན་འདས་བྱེ་བ་ཕྲག་དགུ་མཉེས་པར་འགྱུར་རོ། །སེམས་ཅན་ཐམས་ཅད་མཆོག་ཏུ་འགྲོ་བར་བྱེད་པ་ཞེས་བྱ་བའི་ཏིང་ངེ་འཛིན་འཐོབ་པར་འགྱུར་རོ། །རྒྱུ་གང་གིས་ན་སེམས་ཅན་
ཐམས་ཅད་མཆོག་ཏུ་འགྲོ་བར་བྱེད་ཅེས་བྱ་ཞེ་ན། རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཏིང་ངེ་འཛིན་འདི་ལ་གནས་ནས། ཆོས་སྟོན་པར་འགྱུར་ཞིང་། དེ་ཆོས་སྟོན་པ་ན་ཏིང་ངེ་འཛིན་དེའི་ཆོས་ཉིད་ཐོབ་པས། སྟོང་གསུམ་གྱི་སྟོང་
ཆེན་པོའི་འཇིག་རྟེན་གྱི་ཁམས་ན། སེམས་ཅན་གང་དག་འཁོད་པ་དེ་དག་ཐམས་ཅད་བདེ་བ་དང་ལྡན་པར་འགྱུར་ཏེ། དཔེར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡིད་འོང་གི་སངས་རྒྱས་ཀྱི་ཞིང་ན། སེམས་ཅན་རྣམས་
གཅིག་ཏུ་བདེ་བ་དང་ལྡན་ཞིང་། སེམས་ཅན་ངན་སོང་དུ་སྐྱེས་པ་ཐམས་ཅད་ཡོངས་སུ་ཐར་བར་འགྱུར་ཏེ། དེ་དག་དེ་ནས་ཡོངས་སུ་གྲོལ་ནས་ལྷ་དང་མིའི་ལུས་ཐོབ་པར་འགྱུར་ཞིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བ་བཞིན་

ནོ། །དེ་ལ་འདི་སྐད་ཅེས་བྱ་སྟེ། གསེར་མཆོག་འོད་དཔལ་གྱི་ནི་མཚན་འཛིན་པ། །དེ་ལ་གཟི་བརྗིད་དཔལ་མདོག་སྟོབས་དབང་པོ། །ཚེ་རབས་ཀུན་ཏུ་རྙེད་པར་དཀའ་མ་ཡིན། །དེ་ལ་བློ་ཐོགས་མེད་པ་མཐའ་ཡས་འགྱུར། །
ཡོན་ཏན་རིན་ཆེན་མེ་ཏོག་ཀུན་ཏུ་རྒྱས་པ་ནུབ་བྱང་མཚམས་ན་སྡིག་པ་དང་བྲལ་བའི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཟི་བརྗིད་ཀྱི་རྒྱལ་པོ་རྣམ་མང་དཔལ་སྣང་ཞེས་བྱ་བ་ཞིག་ད་ལྟར་བཞུགས་
ཏེ་འཚོ་ཞིང་གཞེས་པ་ཡོད་དོ། །བསྐལ་པ་དེ་ནི་ཁྱིམ་རྒྱས་པ་ཞེས་བྱའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཟི་བརྗིད་ཀྱི་རྒྱལ་པོ་རྣམ་མང་དཔལ་སྣང་དེའི་མཚན་འཛིན་པའི་རིགས་ཀྱི་
བུ་འམ། རིགས་ཀྱི་བུ་མོ་དད་པ་ཅན་དེ་ནི་ཚེ་རྗེས་མ་ཐག་ཏུ་སྤོབས་པ་དཔག་ཏུ་མེད་པ་བཀོད་པ་ཞེས་བྱ་བའི་གཟུངས་འཐོབ་པར་འགྱུར་རོ། །ཚེགས་ཆུང་ངུས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཀྱི་
སངས་རྒྱས་ཀྱི་ཞིང་གི་ཡོན་ཏན་བཀོད་པ་འཛིན་པར་འགྱུར་རོ། །སངས་རྒྱས་བྱེ་བ་ཕྲག་བརྒྱད་ཅུའི་ཆོས་སྟོན་པ་ཡང་ཐོས་པར་འགྱུར། འཛིན་པར་འགྱུར་རོ། །དེ་ལ་འདི་སྐད་ཅེས་བྱ་སྟེ། གང་ཞིག་རྒྱལ་བའི་མཚན་མཆོག་འདི་འཛིན་པ། །ཚེ་
དཔག་མེད་ཀྱི་སངས་རྒྱས་ཞིང་དུ་དེ། །དེ་ནི་ཚེ་དཔག་མེད་ལྡན་ཆོས་ཤེས་འགྱུར། །སྐྱེ་གཅིག་ཐོགས་པས་བྱང་ཆུབ་རྫོགས་འཚང་རྒྱ། །ཡོན་ཏན་རིན་ཆེན་མེ་ཏོག་ཀུན་ཏུ་རྒྱས་པ་བྱང་ཤར་མཚམས་ཀྱི་ཕྱོགས་ན་མྱ་ངན་ཐམས་ཅད་ལས་རྒལ་བའི་འཇིག་
རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྐལ་པ་བྱེ་བ་གྲངས་མེད་པར་བྱང་ཆུབ་ཡང་དག་པར་བསྒྲུབས་པ་ཞེས་བྱ་བ་ཞིག་ད་ལྟར་བཞུགས་ཏེ་འཚོ་ཞིང་གཞེས་པ་ཡོད་དོ། །བསྐལ་པ་དེ་ནི་

སྤོབས་པ་བཀོད་པ་ཞེས་བྱའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྐལ་པ་བྱེ་བ་གྲངས་མེད་པར་བྱང་ཆུབ་ཡང་དག་པར་བསྒྲུབས་པ་དེའི་མཚན་འཛིན་པའི་རིགས་ཀྱི་བུའམ། རིགས་
ཀྱི་བུ་མོ་དད་པ་ཅན་དེ་ནི་ཚེ་རྗེས་མ་ཐག་ཏུ་རྣམ་པ་དྲུག་ཅུ་དང་ལྡན་པའི་སྒྲ་དབྱངས་ཀྱི་སྤོབས་པ་ཕུན་སུམ་ཚོགས་པ་འཐོབ་པར་འགྱུར་རོ། །སངས་རྒྱས་བྱེ་བ་ཕྲག་བརྒྱད་ཅུ་ལ་དགེ་བའི་རྩ་བ་བསྐྱེད་པ་འཛིན་པར་འགྱུར་རོ། །དེ་ལ་འདི་སྐད་ཅེས་བྱ་
སྟེ། སྒྲ་དབྱངས་ཡན་ལག་དྲུག་ཅུ་ཕུན་ཚོགས་ལྡན། །དེ་ནི་ཀུན་ཏུ་ཤེས་པ་འང་ཕ་རོལ་ཕྱིན། །རྒྱལ་བ་བྱེ་བ་བརྒྱད་ཅུ་མཆོད་བྱེད་པའི། །བསོད་ནམས་གང་ཡིན་བསམ་ཡས་དེས་འཐོབ་འགྱུར། །ཡོན་ཏན་རིན་ཆེན་མེ་ཏོག་ཀུན་ཏུ་རྒྱས་པ་
སྟེང་གི་ཕྱོགས་ན་ཡོན་ཏན་དཔག་ཏུ་མེད་པ་བཀོད་པའི་གཟི་བརྗིད་ཀྱི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་པོ་དང་། ནམ་མཁའ་ངེས་པར་སྒྲོགས་པ་བཀོད་པའི་འོད་ཅེས་བྱ་
བ་ཞིག་ད་ལྟར་བཞུགས་ཏེ། འཚོ་ཞིང་གཞེས་པ་ཡོད་དོ། །བསྐལ་པ་དེ་ནི་ཚད་མེད་ལེན་ཅེས་བྱའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་པོ་དང་། ནམ་མཁའ་ངེས་
པར་སྒྲོགས་པ་བཀོད་པའི་འོད་དེའི་མཚན་འཛིན་པའི་རིགས་ཀྱི་བུ་འམ། རིགས་ཀྱི་བུ་མོ་དད་པ་ཅན་དེ་ནི་ཚུལ་ཁྲིམས་ཀྱི་ཕུང་པོ་དཔག་ཏུ་མེད་པ་ཡོངས་སུ་སྦྱོང་བར་འགྱུར་རོ། །ཏིང་ངེ་འཛིན་གྱི་ཕུང་པོ་དཔག་ཏུ་མེད་པ་དང་། ཤེས་རབ་ཀྱི་ཕུང་
པོ་དཔག་ཏུ་མེད་པ་དང་། རྣམ་པར་གྲོལ་བའི་ཕུང་པོ་དཔག་ཏུ་མེད་པ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དཔག་ཏུ་མེད་པ་ཡོངས་སུ་སྦྱོང་བར་འགྱུར་རོ། །ས་ནས་ས་ཡང་འཐོབ་པར་འགྱུར་རོ། །ཚིག་གཟུང་བར་འོས་པ་ཉིད་ཀྱང་

འཐོབ་པར་འགྱུར་རོ། །སྤོབས་པ་བུལ་བ་མེད་པ་ཕུན་སུམ་ཚོགས་པ་ཡང་འཐོབ་པར་འགྱུར་རོ། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ཡི་གེ་དང་སྒྲའི་བརྡ་ཡང་འཐོབ་
པར་འགྱུར་རོ། །རིགས་མཐོན་པོ་དང་རིགས་ཆེན་པོ་ཡང་འཐོབ་པར་འགྱུར་རོ། །མངོན་པར་ཤེས་པ་ལྔ་ཡང་འཐོབ་པར་འགྱུར་རོ། །ཚེ་རབས་དྲན་པར་ཡང་འགྱུར་རོ། །སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱང་འཐོབ་པར་འགྱུར་རོ། །དེ་
ལ་འདི་སྐད་ཅེས་བྱ་སྟེ། གང་ཞིག་རྒྱལ་བའི་མཚན་མཆོག་འཛིན་བྱེད་པ། །དེ་ནི་ཡན་ལག་བརྒྱད་དབྱངས་ཕུན་སུམ་འཐོབ། །དེ་ནི་སངས་རྒྱས་བྲལ་བར་ཡང་མི་སྐྱེ། །མི་དེ་མི་ཐོགས་བྱང་ཆུབ་འཚང་རྒྱར་འགྱུར། །ཡོན་ཏན་རིན་ཆེན་མེ་ཏོག་ཀུན་ཏུ་རྒྱས་
པ་འོག་གི་ཕྱོགས་ན། ཐ་དད་པ་མེད་པ་ཉིད་ལ་དགའ་བའི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཐམས་ཅད་ཀྱི་ཚུལ་ལ་རྣམ་པར་འཕྲུལ་པའི་གཟི་བརྗིད་ཀྱི་འོད་ཅེས་བྱ་བ་ཞིག་ད་ལྟར་བཞུགས་ཏེ། འཚོ་
ཞིང་གཞེས་པ་ཡོད་དོ། །བསྐལ་པ་དེ་ནི་ཡེ་ཤེས་ཀུན་ནས་བསྡུས་པ་ཞེས་བྱའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཐམས་ཅད་ཀྱི་ཚུལ་ལ་རྣམ་པར་འཕྲུལ་པའི་གཟི་བརྗིད་ཀྱི་འོད་དེའི་མཚན་
འཛིན་པའི་རིགས་ཀྱི་བུ་འམ། རིགས་ཀྱི་བུ་མོ་དད་པ་ཅན་དེའི་ཚེ་རྗེས་མ་ཐག་ཏུ་སངས་རྒྱས་ཡོངས་སུ་འགྲུབ་པ་ཞེས་བྱ་བའི་གཟུངས་འཐོབ་པར་འགྱུར་རོ། །སྐྱེ་བ་གཅིག་གིས་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་
པར་འཚང་རྒྱ་བར་འགྱུར་རོ། །སངས་རྒྱས་བྱེ་བ་ཕྲག་དགུ་བཅུའི་ཆོས་བསྟན་པ་ཡང་ཐོས་པར་འགྱུར་རོ། །ཐོས་ནས་ཀྱང་ཐམས་ཅད་ཀུན་ཏུ་འཛིན་པར་འགྱུར་རོ། །དེ་ལ་འདི་སྐད་ཅེས་བྱ་སྟེ། སངས་རྒྱས་མཚན་འཛིན་སངས་རྒྱས་བྱེ་བ་ཕྲག །

དགུ་བཅུ་རྣམས་ཀྱི་ཆོས་བསྟན་ཐོས་འགྱུར་ཞིང་། །སྐྱེ་བ་གཅིག་ཐོགས་བླ་ན་མེད་པ་ཡི། །བྱང་ཆུབ་མངོན་པར་རྫོགས་པར་འཚང་རྒྱར་འགྱུར། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་རིན་ཆེན་མེ་ཏོག་ཀུན་ཏུ་རྒྱས་པ་དང་། བྱང་ཆུབ་
སེམས་དཔའ་སེམས་དཔའ་ཆེན་པོ་ཡོན་ཏན་རིན་ཆེན་ཐམས་ཅད་དང་ལྡན་པའི་སྤོབས་པའི་སྐད་ཀྱིས་གཟུངས་འཐོབ་པར་གྱུར་ཏོ། །བྱང་ཆུབ་སེམས་དཔའ་བྱེ་བ་ཕྲག་བརྒྱད་ཅུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ས་
ཐོབ་བོ། །ལྷ་དང་མིའི་སྐྱེ་དགུ་སུམ་ཁྲིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་རིན་ཆེན་མེ་ཏོག་ཀུན་ཏུ་རྒྱས་
པ་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་
བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། ཡོན་ཏན་རིན་ཆེན་མེ་ཏོག་ཀུན་ཏུ་རྒྱས་པས་ཞུས་པའི་ལེའུ་ཞེས་བྱ་སྟེ་སུམ་ཅུ་རྩ་བཞི་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། པྲ་ཛྙ་བར་མ་དང་། ཞུ་
ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་སུམ་ཅུ་རྩ་ལྔ་པ་སྟེ། སངས་རྒྱས་ཀྱི་ཡུལ་
བསམ་གྱིས་མི་ཁྱབ་པ་ལུང་བསྟན་པ། བམ་པོ་དང་པོ། །རྒྱ་གར་སྐད་དུ། ཨཱརྱ་ཨ་ཙིན་ཏྱ་བུད་དྷ་བི་ཥ་ཡ་ནི་ར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་བསྟན་པ་ཞེས་བྱ་བ་ཐེག་

པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་
ཀུན་དགའ་ར་བ་ན། དགེ་སློང་སྟོང་དུ་ཚང་པའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་ཁྲི་དང་ཐབས་ཅིག་ཏུ་བཞུགས་ཏེ། འདོད་པ་ན་སྤྱོད་པ་དང་། གཟུགས་ན་སྤྱོད་པ་ལྷའི་བུ་རྣམས་དང་། གནས་གཙང་མའི་ལྷའི་བུ་རྣམས་དང་ཡང་
ཐབས་ཅིག་གོ །དེ་ནས་བཅོམ་ལྡན་འདས་འཁོར་བརྒྱ་སྟོང་དུ་མས་ཡོངས་སུ་བསྐོར་ཏེ་མདུན་གྱིས་བལྟས་ནས་ཆོས་སྟོན་ཏོ། །ཡང་དེའི་ཚེ་འཇམ་དཔལ་གཞོན་ནུར་གྱུར་པ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ །ལྷའི་བུ་དཔལ་བཟངས་ཀྱང་འཁོར་དེ་
ཉིད་དུ་འདུས་པར་གྱུར་ཏེ་འདུག་གོ །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ངས་ཁྱོད་ལ་བསྐུལ་གྱིས། ཁྱོད་ཀྱིས་ཆོས་དང་ལྡན་པའི་གཏམ་ལས་བརྩམས་ཏེ། ལྷའི་འཁོར་འདི་དང་བྱང་ཆུབ་
སེམས་དཔའ་འདི་དག་ལ་སྤོབས་པར་གྱིས་ཤིག །འཇམ་དཔལ་གྱིས་གསོལ་པ། བཅོམ་ལྡན་འདས་བདག་གིས་ཅི་ལས་བརྩམས་ཏེ་སྤོབས་པར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཀྱིས་སངས་རྒྱས་ཀྱི་ཡུལ་
ལས་བརྩམས་ཏེ་སྤོབས་པར་གྱིས་ཤིག །གསོལ་པ། བཅོམ་ལྡན་འདས་སངས་རྒྱས་ཀྱི་ཡུལ་ནི་གང་མིག་གི་ཡུལ་མ་ལགས་པ་དང་། གཟུགས་ཀྱི་ཡུལ་མ་ལགས་པ་དང་། རྣ་བའི་ཡུལ་མ་ལགས་པ་དང་། སྒྲའི་ཡུལ་མ་ལགས་པ་དང་། སྣའི་ཡུལ་མ་ལགས་
པ་དང་། དྲིའི་ཡུལ་མ་ལགས་པ་དང་། ལྕེའི་ཡུལ་མ་ལགས་པ་དང་། རོའི་ཡུལ་མ་ལགས་པ་དང་། ལུས་ཀྱི་ཡུལ་མ་ལགས་པ་དང་། རེག་བྱའི་ཡུལ་མ་ལགས་པ་དང་། ཡིད་ཀྱི་ཡུལ་མ་ལགས་པ་དང་། ཆོས་ཀྱི་ཡུལ་མ་ལགས་པ་སྟེ། དེ་སངས་རྒྱས་ཀྱི་ཡུལ་ཞེས་བགྱིའོ། །བཅོམ་ལྡན་འདས་ཡུལ་

ཁྱད་པར་མ་མཆིས་པ་ནི་སངས་རྒྱས་ཀྱི་ཡུལ་ལགས་ཏེ། བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་སངས་རྒྱས་ཀྱི་ཡུལ་ཁོང་དུ་ཆུད་པར་འཚལ་བས། ཁོང་དུ་ཆུད་པ་མ་མཆིས་པའི་ཚུལ་དུ་སངས་རྒྱས་ཀྱི་ཡུལ་དེ་ལྟར་ཁོང་དུ་ཆུད་པར་བགྱིའི། །བཅོམ་ལྡན་འདས་དེ་བཞིན་གཤེགས་པས་བྱང་ཆུབ་བརྙེས་པའི་
ཡུལ་ཅི་ལགས། བཀའ་སྩལ་པ། འཇམ་དཔལ་ལྟ་བར་གྱུར་པ་མཉམ་པ་ཉིད་ཀྱི་ཕྱིར་སྟོང་པ་ཉིད་ནི་ངས་བྱང་ཆུབ་ཐོབ་པའི་ཡུལ་ལོ། །མཚན་མ་མཉམ་པ་ཉིད་ཀྱི་ཕྱིར་མཚན་མ་མེད་པ་ནི་ཡུལ་ལོ། །ཁམས་གསུམ་པ་མཉམ་པ་ཉིད་ཀྱི་ཕྱིར་སྨོན་པ་མེད་པ་ནི་ཡུལ་ལོ། །འདུ་བྱེད་མཉམ་པ་ཉིད་ཀྱི་ཕྱིར་མངོན་པར་འདུ་བྱ་བ་
མེད་པ་ནི་ཡུལ་ལོ། །འདུས་བྱས་མཉམ་པ་ཉིད་ཀྱི་ཕྱིར་སྐྱེ་བ་མེད་པ་དང་། འབྱུང་བ་མེད་པ་དང་། འདུ་བྱེད་པ་མེད་པ་ནི་ཡུལ་ལོ། །གསོལ་པ། བཅོམ་ལྡན་འདས་འདུས་མ་བགྱིས་ཀྱི་ཡུལ་གང་ལགས། བཀའ་སྩལ་པ། འཇམ་དཔལ་སེམས་མེད་པ་ནི་འདུས་མ་བྱས་ཀྱི་ཡུལ་ལོ། །གསོལ་པ།
བཅོམ་ལྡན་འདས་སེམས་མ་མཆིས་པ་ནི་སངས་རྒྱས་ཀྱི་ཡུལ་ལགས་ཏེ། དེ་ལ་བརྗོད་པ་མ་མཆིས་ལགས་སོ། །བརྗོད་པ་མ་མཆིས་པ་ལ་བསྟན་པ་མ་མཆིས་ལགས་སོ། །བསྟན་པ་མ་མཆིས་པ་ལ་མངོན་པར་བརྗོད་པ་མ་མཆིས་ལགས་སོ། །བཅོམ་ལྡན་འདས་མངོན་པར་བརྗོད་པ་མ་མཆིས་པའི་ཡུལ་ནི་སངས་རྒྱས་
ཀྱི་ཡུལ་ལགས་སོ། །བཀའ་སྩལ་པ། འཇམ་དཔལ་སངས་རྒྱས་ཀྱི་ཡུལ་གང་དུ་བཙལ་བར་བྱ། གསོལ་པ་བཅོམ་ལྡན་འདས་སངས་རྒྱས་ཀྱི་ཡུལ་ནི་སེམས་ཅན་ཐམས་ཅད་ཀྱི་ཉོན་མོངས་པ་རྣམས་ལས་ཡོངས་སུ་བཙལ་བར་བགྱི་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟ་སྟེ། སེམས་
ཅན་ཐམས་ཅད་ཀྱི་ཉོན་མོངས་པ་ཡོངས་སུ་རྟོགས་པ་ནི་ཉན་ཐོས་དང་རང་སངས་རྒྱས་ཐམས་ཅད་ཀྱི་ཡུལ་མ་ལགས་ཀྱི། གང་འདི་སེམས་ཅན་ཐམས་ཅད་ཀྱི་ཉོན་མོངས་པ་ཡོངས་སུ་རྟོགས་པ་དེ་ནི་སངས་རྒྱས་ཀྱི་ཡུལ་ལགས་པའི་སླད་དུའོ། །བཀའ་སྩལ་པ། འཇམ་དཔལ་སངས་རྒྱས་ཀྱི་ཡུལ་ལ་
འཇུག་པའམ་ལྡོག་པ་ཡོད་དམ་ཅི་ན། འདི་ལྟར་སངས་རྒྱས་ཀྱི་ཡུལ་སེམས་ཅན་ཐམས་ཅད་ཀྱི་ཉོན་མོངས་པ་རྣམས་ལས་ཡོངས་སུ་བཙལ། གསོལ་པ། བཅོམ་ལྡན་འདས་སངས་རྒྱས་ཀྱི་ཡུལ་ནི་འཇུག་པ་མ་མཆིས་ལྡོག་པ་མ་མཆིས་ལགས་སོ། །བཀའ་སྩལ་པ། འཇམ་དཔལ་གལ་ཏེ་

སངས་རྒྱས་ཀྱི་ཡུལ་འཇུག་པ་མེད་ཅིང་ལྡོག་པ་མེད་ན་སངས་རྒྱས་ཀྱི་ཡུལ་ཇི་ལྟར་སེམས་ཅན་ཐམས་ཅད་ཀྱི་ཉོན་མོངས་པ་རྣམས་ལས་ཡོངས་སུ་ཤེས། གསོལ་པ། བཅོམ་ལྡན་འདས་ཇི་ལྟར་སངས་རྒྱས་ཀྱི་ཡུལ་འཇུག་པ་མ་མཆིས་ཤིང་ལྡོག་པ་མ་མཆིས་པ་དེ་བཞིན་དུ་ཉོན་མོངས་པ་དེ་དག་གི་རང་བཞིན་
གང་ལགས་པ་དེ་ཡང་འཇུག་པ་མ་མཆིས་ཤིང་ལྡོག་པ་མ་མཆིས་པ་ལགས་སོ། །བཀའ་སྩལ་པ། འཇམ་དཔལ་ཉོན་མོངས་པ་རྣམས་ཀྱི་རང་བཞིན་ཇི་ལྟ་བུ། གསོལ་པ། བཅོམ་ལྡན་འདས་སངས་རྒྱས་ཀྱི་ཡུལ་གྱི་རང་བཞིན་གང་ལགས་པ་དེ་ཉིད་ཉོན་མོངས་པ་ཐམས་ཅད་ཀྱི་རང་བཞིན་ལགས་སོ། །བཅོམ་
ལྡན་འདས་གལ་ཏེ་ཉོན་མོངས་པ་རྣམས་ཀྱི་རང་བཞིན་ཀྱང་གཞན་དུ་གྱུར་ལ། སངས་རྒྱས་ཀྱི་ཡུལ་གྱི་རང་བཞིན་ཀྱང་གཞན་ཞིག་ལགས་ན་ནི་དེ་བཞིན་གཤེགས་པས་ཆོས་ཐམས་ཅད་མཉམ་པ་ཉིད་དུ་མངོན་པར་རྫོགས་པར་སངས་རྒྱས་སོ་ཞེས་ཀྱང་བསྟན་པར་མི་འགྱུར་བ་ཞིག་ན། བཅོམ་ལྡན་འདས་འདི་ལྟར་ཉོན་མོངས་
པ་རྣམས་ཀྱི་རང་བཞིན་གང་ལགས་པ་དེ་ཉིད་སངས་རྒྱས་ཀྱི་ཡུལ་གྱི་རང་བཞིན་ལགས་ཏེ། དེའི་སླད་དུ་དེ་བཞིན་གཤེགས་པས་ཆོས་ཐམས་ཅད་མཉམ་པ་ཉིད་དུ་མངོན་པར་རྫོགས་པར་སངས་རྒྱས་སོ་ཞེས་སྟོན་ལགས་སོ། །བཀའ་སྩལ་པ། འཇམ་དཔལ་ཁྱོད་ཀྱིས་དེ་བཞིན་གཤེགས་པ་མཉམ་པ་ཉིད་དུ་གང་གིས་
གནས་པ་ཤེས་སམ། གསོལ་པ། བཅོམ་ལྡན་འདས་འཚལ་ལགས་སོ། །བཀའ་སྩལ་པ། འཇམ་དཔལ་དེ་བཞིན་གཤེགས་པ་མཉམ་པ་ཉིད་གང་གིས་གནས། གསོལ་པ། བཅོམ་ལྡན་འདས་བྱིས་པ་སོ་སོའི་སྐྱེ་བོ་རྣམས་མཉམ་པ་ཉིད་གང་ལ་གནས་ནས། འདོད་ཆགས་དང་། ཞེ་སྡང་དང་། གཏི་མུག་ཀུན་
ཏུ་འབྱུང་བའི་མཉམ་པ་ཉིད་དེས་དེ་བཞིན་གཤེགས་པ་གནས་ལགས་སོ། །བཀའ་སྩལ་པ། འཇམ་དཔལ་བྱིས་པ་སོ་སོའི་སྐྱེ་བོ་རྣམས་མཉམ་པ་ཉིད་གང་ལ་གནས་ཏེ་འདོད་ཆགས་དང་། ཞེ་སྡང་དང་། གཏི་མུག་ཀུན་ཏུ་འབྱུང་། གསོལ་པ། སྟོང་པ་ཉིད་དང་། མཚན་མ་མ་མཆིས་པ་དང་། སྨོན་པ་མ་
མཆིས་པ་མཉམ་པ་ཉིད་ལ་གནས་པ་རྣམས་ཀྱི་མཉམ་པ་ཉིད་དེས་དེ་བཞིན་གཤེགས་པ་གནས་ལགས་སོ། །བཀའ་སྩལ་པ། འཇམ་དཔལ་ཅི་སྟོང་པ་ཉིད་ལ་འདོད་ཆགས་དང་། ཞེ་སྡང་དང་། གཏི་མུག་ཡོད་དམ། གསོལ་པ། བཅོམ་ལྡན་འདས་མཆིས་པ་གང་གིས་སྟོང་པ་ཉིད་མཆིས་པའི་མཆིས་

པ་དེས་འདོད་ཆགས་དང་། ཞེ་སྡང་དང་། གཏི་མུག་རྣམས་མཆིས་ལགས་སོ། །བཀའ་སྩལ་པ། འཇམ་དཔལ་ཡོད་པ་གང་གིས་སྟོང་པ་ཉིད་ཡོད་ཅིང་ཡོད་པ་གང་གིས་འདོད་ཆགས་དང་། ཞེ་སྡང་དང་། གཏི་མུག་རྣམས་ཡོད། གསོལ་པ། བཅོམ་ལྡན་འདས་ཡི་གེ་དང་། སྐད་དང་། སྒྲ་དང་། བརྗོད་པའི་
མཆིས་པས་སྟོང་པ་ཉིད་མཆིས་ལགས་སོ། །ཡི་གེ་དང་། སྐད་དང་། སྒྲ་དང་། བརྗོད་པའི་མཆིས་པས་འདོད་ཆགས་དང་། ཞེ་སྡང་དང་། གཏི་མུག་རྣམས་མཆིས་ལགས་སོ། །གསོལ་པ། བཅོམ་ལྡན་འདས་ཀྱིས་འདི་སྐད་དུ་དགེ་སློང་དག་མ་སྐྱེས་པ་དང་། མ་བྱུང་བ་དང་། མ་བྱས་པ་དང་། མངོན་པར་
འདུས་མ་བྱས་པ་དང་། མངོན་པར་འདུ་མི་བྱེད་པ་ནི་ཡོད་དེ། དགེ་སློང་དག་མ་སྐྱེས་པ་དང་། མ་བྱུང་བ་དང་། མ་བྱས་པ་དང་། མངོན་པར་འདུས་མ་བྱས་པ་དང་། མངོན་པར་འདུ་མི་བྱེད་པ་ནི་མེད་པ་མ་ཡིན་ནོ། །དགེ་སློང་དག་གལ་ཏེ་མ་སྐྱེས་པ་དང་། མ་བྱུང་བ་དང་། མ་བྱས་པ་དང་། མངོན་པར་འདུས་
མ་བྱས་པ་དང་། མངོན་པར་འདུ་མི་བྱེད་པ་མེད་དུ་ཟིན་ན། སྐྱེས་པ་དང་། བྱུང་བ་དང་། བྱས་པ་དང་། མངོན་པར་འདུས་བྱས་པ་དང་། མངོན་པར་འདུ་བྱེད་པ་འདི་དག་ལས་འབྱུང་བར་གདགས་པར་མི་འགྱུར་བ་ཞིག་ན་དགེ་སློང་དག་འདི་ལྟར་མ་སྐྱེས་པ་དང་། མ་བྱུང་བ་དང་། མ་བྱས་པ་དང་། མངོན་པར་འདུས་
མ་བྱས་པ་དང་། མངོན་པར་འདུ་མི་བྱེད་པ་ནི་ཡོད་དེ། དེའི་ཕྱིར་སྐྱེས་པ་དང་། བྱུང་བ་དང་། བྱས་པ་དང་། མངོན་པར་འདུས་བྱས་པ་དང་། མངོན་པར་འདུ་བྱེད་པ་འདི་དག་ལས་འབྱུང་བར་གདགས་སོ་ཞེས་བཀའ་སྩལ་པ་དེ་བཞིན་དུ། བཅོམ་ལྡན་འདས་གལ་ཏེ་སྟོང་པ་ཉིད་མ་མཆིས་སུ་ལགས་ན། འདོད་
ཆགས་དང་། ཞེ་སྡང་དང་། གཏི་མུག་གི་ཉོན་མོངས་པ་འདི་དག་ལས་འབྱུང་བར་གདགས་པར་མི་འགྱུར་བ་ཞིག་ན། བཅོམ་ལྡན་འདས་འདི་ལྟར་སྟོང་པ་ཉིད་ནི་མཆིས་ཏེ། དེའི་སླད་དུ་འདོད་ཆགས་དང་། ཞེ་སྡང་དང་། གཏི་མུག་གི་ཉོན་མོངས་པ་རྣམས་ལས་འབྱུང་བར་གདགས་ལགས་སོ། །བཅོམ་
ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཀྱིས་ཇི་སྐད་བསྟན་པ་དེ་དེ་ལྟ་ཡིན་དུ་ཟིན་ན། གང་སུ་དག་སྟོང་པ་ཉིད་ལ་གནས་པ་དེ་དག་ཐམས་ཅད་འདོད་ཆགས་དང་། ཞེ་སྡང་དང་། གཏི་མུག་ལ་གནས་པར་འགྱུར་རོ། །གསོལ་པ། བཅོམ་ལྡན་འདས་རྣལ་འབྱོར་སྤྱོད་པ་གང་འདོད་ཆགས་

དང་། ཞེ་སྡང་དང་། གཏི་མུག་ལས་གུད་དུ་སྟོང་པ་ཉིད་ཚོལ་བ་དེ་ནི་རྣལ་འབྱོར་ལ་མི་སྤྱོད་པ་ལགས་ཏེ། རྣལ་འབྱོར་མ་ལགས་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདོད་ཆགས་དང་། ཞེ་སྡང་དང་། གཏི་མུག་ལས་གུད་དུ་སྟོང་པ་ཉིད་བཙལ་བར་བགྱི་བ་མ་མཆིས་ཏེ། བཅོམ་ལྡན་
འདས་འདོད་ཆགས་དང་། ཞེ་སྡང་དང་། གཏི་མུག་ཉིད་སྟོང་པ་ལགས་སོ། །བཀའ་སྩལ་པ། འཇམ་དཔལ་ཁྱོད་ཅི་འདོད་ཆགས་དང་བཅས། ཞེ་སྡང་དང་བཅས། གཏི་མུག་དང་བཅས་པ་ཡིན་ནམ། འོན་ཏེ་འདོད་ཆགས་དང་བྲལ་བ། ཞེ་སྡང་དང་བྲལ་བ། གཏི་མུག་དང་བྲལ་བ་ཡིན། གསོལ་
པ། །བཅོམ་ལྡན་འདས་འདོད་ཆགས་དང་། ཞེ་སྡང་དང་། གཏི་མུག་རྣམས་ཀྱི་སྟོང་པ་ཉིད་གང་ལགས་པ་དེ་དང་བདག་མཉམ་སྟེ། གང་མཉམ་པ་ཉིད་དེ་ཐོབ་པ་དེ་ནི་འདོད་ཆགས་དང་བཅས་པ་ཡང་མ་ལགས། འདོད་ཆགས་དང་བྲལ་བ་ཡང་མ་ལགས། ཞེ་སྡང་དང་བཅས་པ་ཡང་མ་ལགས། ཞེ་སྡང་
དང་བྲལ་བ་ཡང་མ་ལགས། གཏི་མུག་དང་བཅས་པ་ཡང་མ་ལགས། གཏི་མུག་དང་བྲལ་བ་ཡང་མ་ལགས་སོ། །བཅོམ་ལྡན་འདས་དགེ་སྦྱོང་དང་། བྲམ་ཟེ་གང་དག་བདག་ལ་འདོད་ཆགས་དང་བྲལ་བ། ཞེ་སྡང་དང་བྲལ་བ། གཏི་མུག་དང་བྲལ་བར་ཡང་དག་པར་རྗེས་སུ་ལྟ་ཞིང་ཕ་རོལ་ལ་འདོད་
ཆགས་དང་བཅས་པ་དང་། ཞེ་སྡང་དང་བཅས་པ་དང་། གཏི་མུག་དང་བཅས་པར་ཡང་དག་པར་རྗེས་སུ་ལྟ་བ་དེ་དག་ནི་ལྟ་བར་གྱུར་པ་གཉིས་ལ་ཆགས་པ་ལགས་སོ། །གཉིས་གང་ལགས་ཤེ་ན། ཆད་པར་ལྟ་བ་དང་། རྟག་པར་ལྟ་བ་ལགས་སོ། །དེ་ཅིའི་སླད་དུ་ཞེ་ན། གང་བདག་ལ་འདོད་ཆགས་
དང་བྲལ་བ་དང་། ཞེ་སྡང་དང་བྲལ་བ་དང་། གཏི་མུག་དང་བྲལ་བར་ཡང་དག་པར་རྗེས་སུ་ལྟ་བ་དེ་ནི་དེ་དག་གི་ཆད་པར་ལྟ་བ་ལགས་སོ། །གང་ཕ་རོལ་ལ་འདོད་ཆགས་དང་བཅས་པ། ཞེ་སྡང་དང་བཅས་པ། གཏི་མུག་དང་བཅས་པར་ཡང་དག་པར་རྗེས་སུ་ལྟ་བ་དེ་ནི་དེ་དག་གི་རྟག་པར་ལྟ་བ་ལགས་སོ། །
ཡང་བཅོམ་ལྡན་འདས་ཡང་དག་པར་ཞུགས་པའི་དགེ་སློང་ནི་ཕ་རོལ་དམན་པ་དང་། བདག་ཁྱད་པར་དུ་འཕགས་པར་ཡང་དག་པར་རྗེས་སུ་མི་ལྟ་ལགས་སོ། །བཀའ་སྩལ་པ། འཇམ་དཔལ་གང་ཡང་དག་པར་ཞུགས་པ་དེ་གང་དུ་ཞུགས་པ་ཡིན། གསོལ་པ། བཅོམ་ལྡན་འདས་གང་ཡང་དག་

པར་ཞུགས་པ་དེ་ནི་གང་དུ་ཡང་ཞུགས་པ་མ་ལགས་སོ། །བཀའ་སྩལ་པ། འཇམ་དཔལ་གང་ཡང་དག་པར་ཞུགས་པ་དེ་ལམ་ལ་ཞུགས་པ་མ་ཡིན་ནམ། གསོལ་པ། བཅོམ་ལྡན་འདས་གང་ལམ་ལ་ཞུགས་པ་དེ་ནི་འདུས་བགྱིས་ལ་ཞུགས་པ་ལགས་ཏེ། གང་འདུས་བགྱིས་ལ་ཞུགས་པ་དེ་མཉམ་པ་ཉིད་དུ་
ག་ལ་འགྱུར་ལགས། དེ་ཅིའི་སླད་དུ་ཞེ་ན། བཅོམ་ལྡན་འདས་འདུས་བགྱིས་ན་སྐྱེ་བ་དང་། འཇིག་པ་དང་། གནས་པ་དང་ལྡན་པའི་སླད་དུའོ། །བཀའ་སྩལ་པ། འཇམ་དཔལ་འདུས་མ་བྱས་ལ་གྲངས་གང་ཡང་ཡོད་དམ། གསོལ་པ། བཅོམ་ལྡན་འདས་འདུས་མ་བགྱིས་ལ་གྲངས་གང་ཡང་མ་
མཆིས་ལགས་སོ། །བཅོམ་ལྡན་འདས་གལ་ཏེ་འདུས་མ་བགྱིས་ལ། གྲངས་མཆིས་པར་གྱུར་ན་དེ་འདུས་བགྱིས་ཉིད་དུ་འགྱུར་གྱི་འདུས་མ་བགྱིས་མ་ལགས་སོ། །བཀའ་སྩལ་པ། འཇམ་དཔལ་གང་འདུས་མ་བྱས་ཐོབ་པའི་འཕགས་པ་ཐམས་ཅད་ལ་གྲངས་གང་ཡང་ཡོད་པར་འགྱུར་བའི་རྣམ་
གྲངས་ཡོད་དམ། གསོལ་པ། བཅོམ་ལྡན་འདས་འཕགས་པ་རྣམས་ལ་གྲངས་གང་ཡང་མ་མཆིས་ཏེ། བཅོམ་ལྡན་འདས་འཕགས་པ་རྣམས་ནི་གྲངས་མ་མཆིས་པ། གྲངས་དང་བྲལ་བ་ལགས་སོ། །བཀའ་སྩལ་པ། འཇམ་དཔལ་ཅི་ཁྱོད་འཕགས་པའི་ཆོས་དང་ལྡན་པ་ཡིན་ནམ། འོན་ཏེ་འཕགས་
པ་མ་ཡིན་པའི་ཆོས་དང་ལྡན་པ་ཡིན། གསོལ་པ། བཅོམ་ལྡན་འདས་བདག་ནི་འཕགས་པའི་ཆོས་དང་ལྡན་པ་ཡང་མ་ལགས། འཕགས་པ་མ་ལགས་པའི་ཆོས་དང་ལྡན་པ་ཡང་མ་ལགས་སོ། །ཅི་ལགས་གང་བཅོམ་ལྡན་འདས་ཀྱི་སྤྲུལ་པ་དེ་འཕགས་པའི་ཆོས་དང་ལྡན་པ་ལགས་སམ། འཕགས་
པ་མ་ལགས་པའི་ཆོས་དང་ལྡན་པ་ལགས། བཀའ་སྩལ་པ། འཇམ་དཔལ་སྤྲུལ་པ་ནི་འཕགས་པའི་ཆོས་དང་ལྡན་པ་ཡང་མ་ཡིན། འཕགས་པ་མ་ཡིན་པའི་ཆོས་དང་ལྡན་པ་ཡང་མ་ཡིན་ནོ། །གསོལ་པ། ཆོས་ཐམས་ཅད་སྤྲུལ་པ་ལྟ་བུའོ་ཞེས་བཅོམ་ལྡན་འདས་ཀྱིས་མ་བསྟན་པ་ལགས་སམ།
བཀའ་སྩལ་པ། འཇམ་དཔལ་དེ་ལྟའོ། །གསོལ་པ། བཅོམ་ལྡན་འདས་ཆོས་ཐམས་ཅད་སྤྲུལ་པའི་རང་བཞིན་གྱིས་མཚན་ཉིད་ལགས་ན་བདག་ཀྱང་དེའི་རང་བཞིན་གྱི་མཚན་ཉིད་ལགས་ཏེ། དེའི་སླད་དུ་བདག་འཕགས་པའི་ཆོས་དང་ལྡན་པ་ཡང་མ་ལགས། འཕགས་པ་མ་ལགས་པའི་ཆོས་

དང་ལྡན་པ་ཡང་མ་ལགས་སོ། །བཀའ་སྩལ་པ། འཇམ་དཔལ་ཁྱོད་ཅི་དང་ལྡན། གསོལ་པ། བཅོམ་ལྡན་འདས་བདག་ནི་སངས་རྒྱས་ཀྱི་ཡུལ་མཉམ་པ་ཉིད་དང་མི་འགལ་བ་དང་ལྡན་ལགས་སོ། །བཀའ་སྩལ་པ། འཇམ་དཔལ་ཁྱོད་ཀྱིས་སངས་རྒྱས་ཀྱི་ཡུལ་རྙེད་དམ། གསོལ་པ། བཅོམ་ལྡན་
འདས་གལ་ཏེ་བཅོམ་ལྡན་འདས་ཀྱིས་བརྙེས་ན་བདག་གིས་ཀྱང་རྙེད་ལགས་སོ། །དེ་ནས་ཚེ་དང་ལྡན་པ་རབ་འབྱོར་གྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་དེ་བཞིན་གཤེགས་པས་སངས་རྒྱས་ཀྱི་ཡུལ་མ་བརྙེས་སམ། སྨྲས་པ། གནས་བརྟན་གྱིས་ཉན་ཐོས་ཀྱི་
ཡུལ་གང་ཡང་རྙེད་དམ། སྨྲས་པ། འཇམ་དཔལ་འཕགས་པའི་རྣམ་པར་གྲོལ་བའི་ཡུལ་ཡང་མེད། ཡུལ་རྙེད་པ་ཡང་མེད་དོ། །སྨྲས་པ། བཙུན་པ་རབ་འབྱོར་དེ་བཞིན་དུ་དེ་བཞིན་གཤེགས་པའི་རྣམ་པར་གྲོལ་བའི་ཡུལ་ཡང་མེད། ཡུལ་བརྙེས་པ་ཡང་མེད་དོ། །སྨྲས་པ། འཇམ་དཔལ་ཁྱོད་ནི་རྗེས་སུ་
བསྲུང་བ་མེད་པར་ཆོས་སྟོན་ཏེ། ཁྱོད་ནི་ལས་དང་པོ་པ་རྣམས་རྗེས་སུ་མི་སྲུང་ངོ་། །སྨྲས་པ། དེ་བས་ན་གནས་བརྟན་ཉིད་ལ་ཡོངས་སུ་དྲིས་ཁྱོད་ཀྱིས་ཇི་ལྟར་བཟོད་པ་བཞིན་དུ་ལན་ཐོབ་ཤིག །བཙུན་པ་རབ་འབྱོར་འདི་ཇི་སྙམ་དུ་སེམས། གང་སྨན་པ་མཁས་པས་ནད་པ་ཡོངས་སུ་སྲུང་ཞིང་ཁ་བ་དང་། སྐྱུར་བ་
དང་། ཚ་བའི་སྨན་མ་བྱིན་ན་ཅི་དེས་ནད་པ་དེ་ལ་ནད་མེད་པའི་བདེ་བ་བྱིན་པ་ཡིན་ནམ། །སྨྲས་པ། འཇམ་དཔལ་དེ་ནི་མ་ཡིན་ནོ། །སྨྲས་པ། བཙུན་པ་རབ་འབྱོར་དེ་བཞིན་དུ་གང་ཆོས་སྨྲ་བས་ལས་དང་པོ་པ་ཡོངས་སུ་སྲུང་ཞིང་ཟབ་མོའི་གཏམ་བཅབས་ཏེ། གཏམ་སྣ་ཚོགས་བསྟན་ན་དེས་དེ་ཡང་དང་ཡང་
འཆི་བ་ལས་ཐར་བར་བྱས་པར་མི་འགྱུར། ཤིན་ཏུ་བདེ་བ་མྱ་ངན་ལས་འདས་པ་ལ་རབ་ཏུ་བཞག་པར་མི་འགྱུར་རོ། །བསྟན་པ་འདི་བཤད་པ་ན་དགེ་སློང་ལྔ་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ལྷའི་བུ་བརྒྱད་བརྒྱ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་
བྲལ་བ་རྣམ་པར་དག་གོ །ལྷའི་བུ་བདུན་བརྒྱས་འཇམ་དཔལ་གཞོན་ནུར་གྱུར་པའི་སྤོབས་པ་ཐོབ་ནས་འདོད་ཅིང་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཡང་ཚེ་དང་ལྡན་པ་རབ་འབྱོར་གྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །

འཇམ་དཔལ་ཁྱོད་ཉན་ཐོས་ཀྱི་ཐེག་པས་སེམས་ཅན་འདུལ་ན། ཅི་ཁྱོད་ཉན་ཐོས་ཀྱི་ཐེག་པས་རྣམ་པར་གྲོལ་བ་ཡིན་ནམ། སྨྲས་པ། བཙུན་པ་རབ་འབྱོར་ཁོ་བོ་ནི་ཐེག་པ་ཐམས་ཅད་ཀྱིས་རྣམ་པར་གྲོལ་ཏེ། བཙུན་པ་རབ་འབྱོར་ཁོ་བོ་ནི་ཉན་ཐོས་ཀྱི་ཐེག་པས་རྣམ་པར་གྲོལ་བ་ཡང་ཡིན། ཁོ་བོ་ནི་རང་སངས་རྒྱས་
ཀྱི་ཐེག་པས་རྣམ་པར་གྲོལ་བའང་ཡིན། བཙུན་པ་རབ་འབྱོར་ཁོ་བོ་ནི་ཐེག་པ་ཆེན་པོས་རྣམ་པར་གྲོལ་བའང་ཡིན་ནོ། །སྨྲས་པ། འཇམ་དཔལ་ཁྱོད་ཅི་ཉན་ཐོས་སམ། འོན་ཏེ་རང་སངས་རྒྱས་སམ། འོན་ཏེ་ཡང་དག་པར་རྫོགས་པའི་སངས་རྒྱས་ཡིན། སྨྲས་པ། བཙུན་པ་རབ་འབྱོར་ཁོ་བོ་ནི་ཉན་ཐོས་ཡིན་
ཏེ། ཕ་རོལ་ལས་མཉན་པའི་སྒྲ་ལ་སྦྱོར་བར་བརྩོན་པ་ནི་མ་ཡིན་ནོ། །ཁོ་བོ་ནི་རང་སངས་རྒྱས་ཡིན་ཏེ། སྙིང་རྗེ་ཆེན་པོ་དང་། མི་འཇིགས་པ་དང་བྲལ་བ་ནི་མ་ཡིན་ནོ། །ཁོ་བོ་ནི་ཡང་དག་པར་རྫོགས་པའི་སངས་རྒྱས་ཡིན་ཏེ་བྱ་བའི་རྒྱུན་བཅད་པ་ནི་མ་ཡིན་ནོ། །སྨྲས་པ། འཇམ་དཔལ་ཁྱོད་ཇི་ལྟར་ཉན་ཐོས་
ཡིན། སྨྲས་པ། ཆོས་མ་ཐོས་པ་མཉན་པ། སེམས་ཅན་ཐམས་ཅད་ལ་ཐོས་པར་བྱེད་དེ། དེས་ན་ཁོ་བོ་ཉན་ཐོས་ཡིན་ནོ། །སྨྲས་པ། འཇམ་དཔལ་ཁྱོད་ཇི་ལྟར་རང་སངས་རྒྱས་ཡིན། སྨྲས་པ། ཁོ་བོས་ཆོས་ཐམས་ཅད་རྟེན་ཅིང་འབྲེལ་བར་འབྱུང་བར་རྟོགས་ཏེ། དེས་ན་ཁོ་བོ་རང་སངས་
རྒྱས་སོ། །སྨྲས་པ། འཇམ་དཔལ་ཁྱོད་ཇི་ལྟར་ཡང་དག་པར་རྫོགས་པའི་སངས་རྒྱས་ཡིན། སྨྲས་པ། ཁོ་བོས་ཆོས་ཐམས་ཅད་ཆོས་ཀྱི་དབྱིངས་སུ་མཉམ་པ་ཉིད་ཀྱིས་མཉམ་པར་ཁོང་དུ་ཆུད་དེ། དེས་ན་ཁོ་བོ་ཡང་དག་པར་རྫོགས་པའི་སངས་རྒྱས་སོ། །སྨྲས་པ། འཇམ་དཔལ་ཁྱོད་ཉན་ཐོས་ཀྱི་ས་འམ།
རང་སངས་རྒྱས་ཀྱི་ས་འམ། འོན་ཏེ་ཡང་དག་པར་རྫོགས་པའི་སངས་རྒྱས་ཀྱི་ས་འམ། ས་གང་ལ་ངེས་པ་ཡིན་པ་གཟུང་བར་བྱ། སྨྲས་པ། བཙུན་པ་རབ་འབྱོར་ཁོ་བོ་ནི་ས་ཐམས་ཅད་ལ་ངེས་པ་ཡིན་པར་ཟུང་ཤིག །སྨྲས་པ། འཇམ་དཔལ་ཁྱོད་སོ་སོའི་སྐྱེ་བོའི་ས་ལ་ཡང་ངེས་པར་གཟུང་བར་བྱ་
འམ། སྨྲས་པ། བཙུན་པ་རབ་འབྱོར་དེ་དེ་བཞིན་ནོ། །དེ་ཅིའི་ཕྱིར་ཞེ་ན། བཙུན་པ་རབ་འབྱོར་ཆོས་ཐམས་ཅད་ནི་ཡང་དག་པ་ཉིད་དུ་ངེས་པར་ངེས་པའོ། །ངེས་པ་དེར་སེམས་ཅན་ཐམས་ཅད་ཀྱང་ངེས་པ་སྟེ། ཁོ་བོ་ཡང་ངེས་པ་དེར་ངེས་པ་ཉིད་དོ། །དེས་ན་ཁོ་བོ་སོ་སོའི་སྐྱེ་བོའི་ས་ལ་ཡང་ངེས་པར་

གཟུང་བར་བྱའོ། །སྨྲས་པ། འཇམ་དཔལ་གལ་ཏེ་ཆོས་ཐམས་ཅད་ཡང་དག་པ་ཉིད་དུ་ངེས་པར་ངེས་པ་ཡིན་ན་འདི་ནི་སོ་སོའི་སྐྱེ་བོའི་སའོ། །འདི་ནི་ཉན་ཐོས་ཀྱི་སའོ། །འདི་ནི་རང་སངས་རྒྱས་གྱི་སའོ། །འདི་ནི་བྱང་ཆུབ་སེམས་དཔའི་སའོ། །འདི་ནི་སངས་རྒྱས་ཀྱི་སའོ་ཞེས་ས་རྣམ་པར་གཞག་
པ་གདགས་པར་ག་ལ་འགྱུར། སྨྲས་པ། བཙུན་པ་རབ་འབྱོར་འདི་ལྟ་སྟེ། དཔེར་ན། ཕྱོགས་བཅུའི་ནམ་མཁའ་ལ་འདི་ནི་ཤར་ཕྱོགས་ཀྱི་ནམ་མཁའོ། །འདི་ནི་ལྷོ་ཕྱོགས་ཀྱིའོ། །འདི་ནི་ནུབ་ཕྱོགས་ཀྱིའོ། །འདི་ནི་བྱང་ཕྱོགས་ཀྱིའོ། །འདི་ནི་ཤར་ལྷོ་ཡིའོ། །འདི་ནི་ལྷོ་ནུབ་ཀྱིའོ། །འདི་ནི་
ནུབ་བྱང་གིའོ། །འདི་ནི་བྱང་ཤར་གྱིའོ། །འདི་ནི་འོག་གིའོ། །འདི་ནི་སྟེང་གི་ཕྱོགས་ཀྱི་ནམ་མཁའོ་ཞེས་བརྗོད་ཀྱང་ཕྱོགས་ཆ་ལ་ཐ་དད་པ་ཡོད་ཀྱི། ནམ་མཁའ་ལ་ནི་ཐ་དད་པ་མེད་དོ། །བཙུན་པ་རབ་འབྱོར་དེ་བཞིན་དུ་ཆོས་ཐམས་ཅད་ཡང་དག་པ་ཉིད་དུ་ངེས་པར་ངེས་པ་ལ། དེ་བཞིན་གཤེགས་པ་ཐབས་
ལ་མཁས་པས་འདི་ནི་སོ་སོའི་སྐྱེ་བོའི་སའོ། །འདི་ནི་ཉན་ཐོས་ཀྱི་སའོ། །འདི་ནི་རང་སངས་རྒྱས་ཀྱི་སའོ། །འདི་ནི་བྱང་ཆུབ་སེམས་དཔའི་སའོ། །འདི་ནི་སངས་རྒྱས་ཀྱི་སའོ། །ཞེས་ས་རྣམ་པར་འཇོག་ཀྱང་ས་རྣམ་པར་གཞག་པ་ལ་ཐ་དད་པ་ཡོད་ཀྱི་ཡང་དག་པ་ཉིད་དུ་ངེས་པ་ལ་ནི་ཐ་དད་པ་མེད་དོ། །
སྨྲས་པ། འཇམ་དཔལ་ཁྱོད་ཡང་དག་པ་ཉིད་དུ་ངེས་པ་ལ་ཞུགས་སམ། །སྨྲས་པ། ཞུགས་པ་ཡང་ཡིན་ལ། བྱུང་བ་ཡང་ཡིན་ནོ། །སྨྲས་པ། འཇམ་དཔལ་ཇི་ལྟར་ན་ཁྱོད་ཞུགས་པ་ཡང་ཡིན་ལ། བྱུང་བ་ཡང་ཡིན། སྨྲས་པ། བཙུན་པ་རབ་འབྱོར་འདི་ལ་བྱང་ཆུབ་སེམས་དཔའ་རྣམས་
ཀྱི་ཐབས་དང་། ཤེས་རབ་དང་། ཡེ་ཤེས་བལྟ་བར་བྱ་སྟེ། བཙུན་པ་རབ་འབྱོར་འདི་ན་སྐྱེས་བུ་མཁས་པ་ཁ་ཅིག་བཤད་པའི་དོན་དཔེས་ཤེས་པར་འགྱུར་བ་ཡོད་དེ། དེའི་ཕྱིར་ཁྱོད་ལ་དཔེ་བསྟན་པར་བྱའོ། །བཙུན་པ་རབ་འབྱོར་འདི་ལྟ་སྟེ་དཔེར་ན་འཕོང་གི་སློབ་དཔོན་ཆེན་པོ་ཞིག་ལ་སྡུག་པ། མཛེས་པ། ཡིད་དུ་འོང་བ། བལྟ་ན་སྡུག་
པའི་བུ་གཅིག་པ་ཞིག་ཀྱང་ཡོད། དེ་ལ་མི་སྡུག་པ། ཡིད་དུ་མི་འོང་བ། ཕྱིར་རྒོལ་བ་ཞིག་ཀྱང་ཡོད་པ་ལས། དེས་བུ་གཅིག་པ་དེ་ཐག་རིང་པོ་ལམ་གོལ་བའི་ཕྱོགས་ཤིག་ན་འདུག་པ་མཐོང་ནས་དེ་འདི་སྙམ་དུ་དེ་ནི་བདག་ལ་ཕྱིར་རྒོལ་བ་ཡིན་ནོ་སྙམ་དུ་སེམས་སྐྱེས་ཏེ། དེས་དེ་གསད་པའི་ཕྱིར་མདའ་འཕངས་ནས་

འཕངས་མ་ཐག་ཏུ་བུ་གཅིག་པ་ཡིན་པའི་འདུ་ཤེས་སྐྱེས་ཏེ། དེ་སྔོན་གོམས་པ་བྱས་པས་ཤིན་ཏུ་བརྒྱུགས་ཏེ། མདའ་དེ་བུ་གཅིག་པའི་ལུས་ལ་མ་ཕོག་པ་ཉིད་དུ་ལག་གིས་འཛིན་པ་འདི་ནི་དོན་རྣམ་པར་ཤེས་པར་བྱ་བའི་ཕྱིར་དཔེར་བྱས་པའོ། །འདི་ལ་དོན་དུ་བལྟ་བ་གང་ཞེ་ན། བཙུན་པ་རབ་འབྱོར་འཕོང་གི་
སློབ་དཔོན་ཞེས་བྱ་བ་དེ་ནི་བྱང་ཆུབ་སེམས་དཔའི་ཚིག་བླ་དགས་སོ། །བཙུན་པ་རབ་འབྱོར་བུ་གཅིག་པ་ཞེས་བྱ་བ་ནི་སེམས་ཅན་ཐམས་ཅད་ལ་བྱང་ཆུབ་སེམས་དཔའ་བུ་གཅིག་པའི་འདུ་ཤེས་ཉེ་བར་འཇོག་པ་ཡིན་ནོ། །གསོད་པའི་ཕྱིར་རྒོལ་བ་ཞེས་བྱ་བ་འདི་ནི་ཉོན་མོངས་པ་ཐམས་ཅད་ཀྱི་ཚིག་བླ་དགས་སོ། །
བཙུན་པ་རབ་འབྱོར་མདའ་ཞེས་བྱ་བ་འདི་ནི་འཕགས་པའི་ཤེས་རབ་ཀྱི་དབང་པོའི་ཚིག་བླ་དགས་སོ། །བཙུན་པ་རབ་འབྱོར་འདི་ལྟ་སྟེ་དཔེར་ན་འཕོང་གི་སློབ་དཔོན་གྱིས་མདའ་འཕངས་ལ་བུ་གཅིག་པའི་ལུས་ལ་མ་ཕོག་པར་ཤིན་ཏུ་བརྒྱུགས་ཏེ་འཛིན་པ་དེ་བཞིན་དུ། བཙུན་པ་རབ་འབྱོར་བྱང་ཆུབ་སེམས་དཔའ་
ཤེས་རབ་ཀྱི་ཕ་རོལ་ཏུ་ཕྱིན་པའི་སྟོབས་བསྐྱེད་པས་འདུ་བྱེད་ཐམས་ཅད་སྐྱེ་བ་མེད་པར་སོ་སོར་རྟོག་གོ །ཡང་དག་པ་ཉིད་དུ་ངེས་པ་ལ་རྣམ་པར་བལྟས་ནས་སྙིང་རྗེ་ཆེན་པོ་དང་། ཐབས་ལ་མཁས་པའི་སྟོབས་བསྐྱེད་པས་ཡང་དག་པའི་མཐའ་མངོན་སུམ་དུ་བྱེད་ཀྱང་ཉན་ཐོས་དང་། རང་སངས་རྒྱས་ཀྱི་ས་ལ་མི་
གནས་ཀྱི། བྱང་ཆུབ་སེམས་དཔའི་ས་ལ་གནས་སོ། །སངས་རྒྱས་ཀྱི་ས་ལ་ཡང་འཛུད་དོ། །སྨྲས་པ། འཇམ་དཔལ་འདི་བྱང་ཆུབ་སེམས་དཔའ་གང་དག་གི་ཡུལ་ཡིན། སྨྲས་པ། བཙུན་པ་རབ་འབྱོར་འདི་ནི་བྱང་ཆུབ་སེམས་དཔའ་གང་དག་འཇིག་རྟེན་ན་ཡང་སྤྱོད་ལ་འཇིག་རྟེན་གྱི་ཆོས་རྣམས་ཀྱིས་
ཀྱང་མི་གོས་ཤིང་འཇིག་རྟེན་ན་ཡང་སྣང་ལ་ཆོས་ཐམས་ཅད་ལ་སྣང་བ་མེད་པས་རབ་ཏུ་ཕྱེ་བའི་བྱང་ཆུབ་སེམས་དཔའ་དེ་དག་གི་ཡུལ་ལོ། །བཙུན་པ་རབ་འབྱོར་འདི་ནི་བྱང་ཆུབ་སེམས་དཔའ་གང་དག་ས་ཐམས་ཅད་ལ་ཡང་སྣང་ལས་ངན་པ་ལ་ཡང་མི་གནས་པ་དང་། བཙུན་པ་རབ་འབྱོར་བྱང་ཆུབ་སེམས་དཔའ་
གང་དག་སེམས་ཅན་ཐམས་ཅད་ཀྱི་ཉོན་མོངས་པ་སྤང་བའི་ཕྱིར་ཡང་བརྩོན་ལ། ཆོས་ཀྱི་དབྱིངས་ཟད་པར་ནི་ཡང་དག་པར་རྗེས་སུ་མི་ལྟ་བ་དང་། བཙུན་པ་རབ་འབྱོར་བྱང་ཆུབ་སེམས་དཔའ་གང་དག་འདུས་བྱས་ལས་ཀྱང་བསྐྱོད་ལ་འདུས་མ་བྱས་ཀྱང་ཡང་དག་པར་མ་རྙེད་པ་དང་། བཙུན་པ་རབ་འབྱོར་

བྱང་ཆུབ་སེམས་དཔའ་གང་དག་འཁོར་བ་ལ་སྐྱེད་མོས་ཚལ་དང་གཞལ་མེད་ཁང་དུ་ཡང་འདུ་ཤེས་ལ་མྱ་ངན་ལས་འདས་པ་ཡང་དོན་དུ་གཉེར་ཞིང་བསམ་པ་ཡོངས་སུ་མ་རྫོགས་པ་དང་། བཙུན་པ་རབ་འབྱོར་བྱང་ཆུབ་སེམས་དཔའ་གང་དག་བདག་མེད་པའི་བཟོད་པ་ཡང་ཐོབ་ལ་སེམས་ཅན་ཡོངས་
སུ་སྨིན་པར་བྱ་བའི་ཕྱིར་ཡང་བརྩོན་པ་དང་། བཙུན་པ་རབ་འབྱོར་བྱང་ཆུབ་སེམས་དཔའ་གང་དག་ཆོས་ཐམས་ཅད་ཀྱི་རང་བཞིན་ནམ་མཁའི་རང་བཞིན་དུ་ཡང་ཤེས་ལ་སངས་རྒྱས་ཀྱི་ཞིང་ཡོངས་སུ་དག་པར་བྱ་བ་ལ་ཡང་བརྩོན་པ་དང་། བཙུན་པ་རབ་འབྱོར་བྱང་ཆུབ་སེམས་དཔའ་གང་དག་སངས་རྒྱས་ཐམས་
ཅད་ཆོས་ཀྱི་དབྱིངས་དང་མཚུངས་པར་ཡང་མཐོང་ལ། སངས་རྒྱས་ཀྱི་སྐུ་དང་གསུང་དང་ཐུགས་ཀྱི་རྒྱན་གྱི་ཕྱིར་བརྩོན་འགྲུས་ཀྱང་མི་གཏོང་བའི་བྱང་ཆུབ་སེམས་དཔའ་དེ་དག་གི་ཡུལ་ལོ། །སྨྲས་པ། འཇམ་དཔལ་བྱང་ཆུབ་སེམས་དཔའི་སྤྱོད་པ་འདི་དག་ནི་འཇིག་རྟེན་ཐམས་ཅད་དང་མི་འཐུན་པའོ། །
སྨྲས་པ། བཙུན་པ་རབ་འབྱོར་འདི་ལྟར་བྱང་ཆུབ་སེམས་དཔའ་རྣམས་འཇིག་རྟེན་གྱི་ཆོས་ཡོངས་སུ་ཤེས་པ་དང་ལྡན་ཡང་འཇིག་རྟེན་གྱི་ཆོས་ལས་ཡང་དག་པར་འདའ་བའི་ཕྱིར་སེམས་ཅན་རྣམས་ལ་ཆོས་སྟོན་ཏོ། །སྨྲས་པ། འཇམ་དཔལ་ཁྱོད་འཇིག་རྟེན་གྱི་ཆོས་ལས་ཡང་དག་པར་འདའ་བ་ལས་
རྩོམས་ཏེ་སྤོབས་པར་གྱིས་ཤིག །ཇི་ལྟར་བྱང་ཆུབ་སེམས་དཔའ་རྣམས་འཇིག་རྟེན་གྱི་ཆོས་ལས་ཡང་དག་པར་འདའ། སྨྲས་པ། བཙུན་པ་རབ་འབྱོར་འཇིག་རྟེན་ཞེས་བྱ་བ་ནི་ཕུང་པོ་ལྔའོ། །ལྔ་གང་ཞེ་ན། གཟུགས་ཀྱི་ཕུང་པོ་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་
ཤེས་པའི་ཕུང་པོའོ། །དེ་ལ་གཟུགས་ནི་དབུ་བ་རྡོས་པ་ལྟ་བུའོ། །ཚོར་བ་ནི་ཆུའི་ཆུ་བུར་ལྟ་བུའོ། །འདུ་ཤེས་ནི་སྨིག་རྒྱུ་ལྟ་བུའོ། །འདུ་བྱེད་ཐམས་ཅད་ནི་ཆུ་ཤིང་ལྟ་བུའོ། །རྣམ་པར་ཤེས་པ་ནི་སྒྱུ་མ་ལྟ་བུའོ། །དབུ་བ་དང་། ཆུའི་ཆུ་བུར་དང་། སྨིག་རྒྱུ་དང་། ཆུ་ཤིང་དང་། སྒྱུ་མ་གང་ཡིན་པ་དེ་
ལ་འཇིག་རྟེན་ཡང་མེད། འཇིག་རྟེན་དུ་གདགས་པ་ཡང་མེད། ཕུང་པོ་རྣམས་ཀྱང་མེད། ཕུང་པོར་གདགས་པ་ཡང་མེད་པར་གང་ཕུང་པོའི་རང་བཞིན་ལ་དེ་ལྟར་མོས་པ་དེ་ནི་ཡང་དག་པར་ཞུགས་པའོ། །གང་ཡང་དག་པར་ཞུགས་པ་དེ་འཇིག་རྟེན་གྱི་ཆོས་རྣམས་དང་མ་འདྲེས་པའོ། །གང་

འཇིག་རྟེན་གྱི་ཆོས་རྣམས་དང་མ་འདྲེས་པ་དེ་འཇིག་རྟེན་གྱི་ཆོས་རྣམས་ལས་ཡང་དག་པར་འདའོ། །བཙུན་པ་རབ་འབྱོར་གཞན་ཡང་ཕུང་པོ་ལྔ་ནི་རང་བཞིན་གྱིས་སྟོང་ངོ་། །གང་རང་བཞིན་གྱིས་སྟོང་པ་དེ་ལ་གཉིས་སུ་མེད་དོ། །གང་གཉིས་སུ་མེད་པ་དེ་ལ་ངར་འཛིན་པ་མེད། ང་ཡིར་འཛིན་པ་མེད་དོ། །གང་ལ་ངར་
འཛིན་པ་མེད་པ་དང་། ང་ཡིར་འཛིན་པ་མེད་པ་དེ་ལ་ཆགས་པ་མེད་དེ། ཆགས་པ་མེད་པ་རྙེད་པ་ནི་འཇིག་རྟེན་ལས་ཡང་དག་པར་འདའོ། །བཙུན་པ་རབ་འབྱོར་གཞན་ཡང་ཕུང་པོ་ལྔ་ནི་རྐྱེན་ལ་རག་ལུས་པའོ། །གང་དག་རྐྱེན་ལ་རག་ལུས་པ་དེ་དག་རག་ལུས་པ་མེད་པའོ། །གང་དག་རག་ལུས་པ་
མེད་པ་དེ་དག་བདག་པོ་མེད་པའོ། །གང་དག་བདག་པོ་མེད་པ་དེ་དག་བདག་གི་བ་མེད་པའོ་གང་དག་བདག་གི་བ་མེད་པ་དེ་དག་ཡོངས་སུ་འཛིན་པ་མེད་པའོ། །གང་དག་ཡོངས་སུ་འཛིན་པ་མེད་པ་དེ་ལ་འཐབ་པ་མེད་དོ། །གང་ལ་འཐབ་པ་མེད་པ་དེ་ལ་རྩོད་པ་མེད་དོ། །གང་ལ་རྩོད་པ་མེད་པ་དེ་དག་དགེ་
སྦྱོང་གི་ཆོས་རྩོད་པ་མེད་པའོ། །གང་དག་དགེ་སྦྱོང་གི་ཆོས་མི་རྩོད་པ་དེ་དག་ནམ་མཁའ་ལ་ལག་པ་དང་མཚུངས་ཏེ། ཆོས་ཐམས་ཅད་ཀྱང་ནམ་མཁའ་ལ་ལག་པ་དང་མཚུངས་པར་ཤེས་ནས་འཇིག་རྟེན་ལས་ཡང་དག་པར་འདའོ། །བཙུན་པ་རབ་འབྱོར་གཞན་ཡང་ཕུང་པོ་ལྔ་ནི་ཆོས་ཀྱི་དབྱིངས་དང་མཉམ་
པའོ། །ཆོས་ཀྱི་དབྱིངས་ཀྱང་དབྱིངས་མེད་པ་སྟེ། གང་དབྱིངས་མེད་པ་དེ་ལ་མིག་གི་ཁམས་མེད་དོ། །གཟུགས་ཀྱི་ཁམས་མེད་དོ། །མིག་གི་རྣམ་པར་ཤེས་པའི་ཁམས་མེད་དོ། །རྣ་བའི་ཁམས་མེད་དོ། །སྒྲའི་ཁམས་མེད་དོ། །རྣ་བའི་རྣམ་པར་ཤེས་པའི་ཁམས་མེད་དོ། །སྣའི་
ཁམས་མེད་དོ། །དྲིའི་ཁམས་མེད་དོ། །སྣའི་རྣམ་པར་ཤེས་པའི་ཁམས་མེད་དོ། །ལྕེའི་ཁམས་མེད་དོ། །རོའི་ཁམས་མེད་དོ། །ལྕེའི་རྣམ་པར་ཤེས་པའི་ཁམས་མེད་དོ། །ལུས་ཀྱི་ཁམས་མེད་དོ། །རེག་པའི་ཁམས་མེད་དོ། །ལུས་ཀྱི་རྣམ་པར་ཤེས་པའི་ཁམས་མེད་དོ། །ཡིད་ཀྱི་
ཁམས་མེད་དོ། །ཆོས་ཀྱི་ཁམས་མེད་དོ། །ཡིད་ཀྱི་རྣམ་པར་ཤེས་པའི་ཁམས་མེད་དོ། །གང་ཁམས་མེད་པ་དེ་ལ་སའི་ཁམས་མེད་དོ། །ཆུའི་ཁམས་མེད་དོ། །མེའི་ཁམས་མེད་དོ། །རླུང་གི་ཁམས་མེད་དོ། །ནམ་མཁའི་ཁམས་མེད་དོ། །རྣམ་པར་ཤེས་པའི་ཁམས་མེད་དོ། །

འདོད་པའི་ཁམས་མེད་དོ། །གཟུགས་ཀྱི་ཁམས་མེད་དོ། །གཟུགས་མེད་པའི་ཁམས་མེད་དོ། །འདུས་བྱས་ཀྱི་ཁམས་མེད་དོ། །འདུས་མ་བྱས་ཀྱི་ཁམས་མེད་དོ། །གང་ཁམས་མེད་པ་དེ་ལ་བདག་མེད། སེམས་ཅན་མེད། སྲོག་མེད། གསོ་བ་མེད། གང་ཟག་མེད། ཤེད་ལས་སྐྱེས་མེད། ཤེད་བུ་མེད་དེ།
གང་གིས་དེ་དག་རྗེས་སུ་རྟོགས་པ་མེད་པའི་ཚུལ་གྱིས་མཉམ་པ་ཉིད་དུ་རྟོགས་པ་དེ་འཇིག་རྟེན་ལས་ཡང་དག་པར་འདའོ། །བསྟན་པ་འདི་བཤད་པ་ན་འཁོར་དེ་ལས་དགེ་སློང་སྟོང་ཉིས་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་དག་སེམས་རྣམ་པར་གྲོལ་ནས་རང་རང་གི་བླ་
གོས་ཀྱིས་འཇམ་དཔལ་གཞོན་ནུར་གྱུར་པ་ལ་བཀབ་སྟེ། ཚིག་འདི་སྐད་དུ་གང་དག་ཆོས་ཟབ་མོ་བསྟན་པ་འདི་ལ་མོས་པ་མེད་པའི་སེམས་ཅན་དེ་དག་ནི་ཐོབ་པ་ཡང་མེད། མངོན་པར་རྟོགས་པ་ཡང་མེད་དོ་ཞེས་འཛེར་ཏོ། །དེ་ནས་ཚེ་དང་ལྡན་པ་རབ་འབྱོར་གྱིས་དགེ་སློང་དེ་དག་ལ་འདི་སྐད་ཅེས་སྨྲས་སོ། །
ཚེ་དང་ལྡན་པ་དག་གིས་ཅི་ཞིག་ཐོབ་ཅིང་ཅི་ཞིག་མངོན་པར་རྟོགས། དགེ་སློང་དེ་དག་གིས་འདི་སྐད་ཅེས་སྨྲས་སོ། །བཙུན་པ་རབ་འབྱོར་དགེ་སྦྱོང་ནི་ཐོབ་པ་མེད་པ། མངོན་པར་རྟོགས་པ་མེད་པའོ། །དེ་ཅིའི་ཕྱིར་ཞེ་ན། ཐོབ་པ་ཞེས་བྱ་བ་དེ་ནི་གཡོ་བ་ཉིད་དོ། །མངོན་པར་རྟོགས་པ་ཞེས་བྱ་བ་དེ་ནི་
རློམ་སེམས་ཉིད་དོ། །གཡོ་བ་དང་རློམ་སེམས་གང་ཡིན་པ་དེ་ནི་བདུད་ཀྱི་ལས་སོ། །ལྷག་པའི་ང་རྒྱལ་ཅན་དག་ནི་བདག་གིས་ཐོབ་བོ། །བདག་གིས་མངོན་པར་རྟོགས་སོ་ཞེས་འདི་ལྟ་བུ་འདི་དག་གི་ཚུལ་དུ་རྣམ་པར་རྟོག་པར་འགྱུར་རོ། །སྨྲས་པ། ཚེ་དང་ལྡན་པ་དག་གིས་ལྷག་པའི་ང་རྒྱལ་ཅན་རྣམས་
ཤེས་སམ། སྨྲས་པ། བཅོམ་ལྡན་འདས་མཁྱེན་པ་དང་ལྡན་པས་མཁྱེན་ཏེ། བདག་ཅག་ནི་ཇི་ལྟར་སྡུག་བསྔལ་གྱི་མཚན་ཉིད་མི་ཤེས་པར་བདག་གིས་སྡུག་བསྔལ་ཡོངས་སུ་ཤེས་སོ་ཞེས་སྨྲ་བ་ལྷག་པའི་ང་རྒྱལ་ཅན་དུ་རིག་པར་བྱ་ཞིང་ཀུན་འབྱུང་བའི་མཚན་ཉིད་དང་། འགོག་པའི་མཚན་ཉིད་
དང་། ལམ་གྱི་མཚན་ཉིད་མི་ཤེས་པ་བདག་གིས་ལམ་བསྒོམས་སོ་ཞེས་སྨྲ་བ་ལྷག་པའི་ང་རྒྱལ་ཅན་དུ་རིག་པར་བྱའོ་སྙམ་མོ། །དེ་ཅིའི་ཕྱིར་ཞེ་ན། སྡུག་བསྔལ་གྱི་མཚན་ཉིད་དང་། ཀུན་འབྱུང་བའི་མཚན་ཉིད་དང་། འགོག་པའི་མཚན་ཉིད་དང་། ལམ་གྱི་མཚན་ཉིད་གང་ཡིན་པ་དེ་ནི་སྐྱེ་

བ་མེད་པའི་མཚན་ཉིད་དེ། སྐྱེ་བ་མེད་པའི་མཚན་ཉིད་ནི་མཚན་ཉིད་མེད་པའོ། །མཚན་ཉིད་མེད་པ་ནི་འཕགས་པ་རྣམས་ཀྱི་རྣམ་པར་གྲོལ་བའོ། །ཆོས་ཐམས་ཅད་ཀྱང་རྣམ་པར་གྲོལ་བའི་མཚན་ཉིད་དེ། དེ་ལ་ནི་གང་སྡུག་བསྔལ་ཡོངས་སུ་ཤེས་སོ། །གང་ཀུན་འབྱུང་བ་སྤོང་ངོ་། །གང་འགོག་པ་མངོན་
དུ་བྱེད་དོ། །གང་ལམ་སྒོམ་མོ་ཞེས་བྱ་བ་གང་ཡང་མི་དམིགས་ཏེ། ཆོས་ཐམས་ཅད་མཉམ་པ་ཉིད་འདི་ཐོས་ནས་སྐྲག་པ་དེ་ལྷག་པའི་ང་རྒྱལ་ཅན་ཡིན་པར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་དགེ་སློང་དེ་དག་ལ་ལེགས་སོ་ཞེས་བྱ་བ་བྱིན་ཏེ། གནས་བརྟན་རབ་འབྱོར་ལ་བཀའ་སྩལ་
པ། རབ་འབྱོར་དགེ་སློང་འདི་དག་གིས་ཇི་སྐད་བསྟན་པ་དེ་དེ་བཞིན་ནོ། །རབ་འབྱོར་དགེ་སློང་འདི་དག་གིས་དེ་བཞིན་གཤེགས་པ་འོད་སྲུང་གི་གསུང་རབ་ལ་འཇམ་དཔལ་གཞོན་ནུར་གྱུར་པ་ཉིད་ལས་ཟབ་མོའི་ཆོས་བསྟན་པ་འདི་ལྟ་བུ་འདི་ཐོས་ཏེ། ཆོས་ཟབ་མོ་མཉན་པ་དེ་ཉིད་ཀྱི་རྒྱུས་འདི་ལྟར་མངོན་
པར་ཤེས་པ་མྱུར་བར་གྱུར་ཏོ། །ཟབ་མོའི་ཆོས་བསྟན་པ་འདི་ལ་ཡང་རྗེས་སུ་འཐུན་པར་གྱུར་ཏེ་མི་འཐུན་པ་མ་ཡིན་ནོ། །རབ་འབྱོར་རྣམ་གྲངས་དེས་ན་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་མ་གཏོགས་པར་གང་དག་དའི་གསུང་རབ་འདི་ལ་ཆོས་ཟབ་མོ་བསྟན་པ་འདི་ཉན་ཅིང་
ཐོས་ནས་ཀྱང་ལྷག་པར་མོས་པ་དེ་དག་ཐམས་ཅད་ནི་དེ་བཞིན་གཤེགས་པ་བྱམས་པའི་གསུང་རབ་ལ་འདུས་པ་གསུམ་གྱི་གྲངས་སུ་གཏོགས་པར་རིག་པར་བྱའོ། །གང་ཡང་ཐེག་པ་ཆེན་པོ་ལ་ཡང་དག་པར་ཞུགས་པ་དེ་ནི་བཟོད་པ་གང་ཡང་རུང་བ་འཐོབ་པར་འགྱུར་རོ། །དེ་ནས་ལྷའི་བུ་དཔལ་
བཟངས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་རྒྱུན་ཏུ་འཛམ་བུའི་གླིང་ན་ཆོས་སྟོན་ཏམ། འཇམ་དཔལ་དགའ་ལྡན་གྱི་གནས་སུ་བཞུད་དོ། །དེར་དགའ་ལྡན་གྱི་རིས་ཀྱི་ལྷ་རྣམས་ལ་ཆོས་བསྟན་དུ་གསོལ། དེ་ན་ལྷའི་བུ་སྔོན་གྱི་རྒྱལ་བ་ལ་ལྷག་
པར་བྱ་བ་བྱས་པ་དགེ་བའི་རྩ་བ་བསྐྱེད་པ་དག་ཡོད་དེ། དེ་དག་ཡུལ་ཕུན་སུམ་ཚོགས་པས་བག་མེད་པའི་དབང་གིས་བཅོམ་ལྡན་འདས་དང་། ཁྱོད་ལ་ཆོས་ཉན་དུ་མི་འོང་བས་ན་དེ་དག་ཆོས་མི་ཉན་པས་ཡོངས་སུ་ཉམས་པར་འགྱུར་ཏེ། དེ་དག་ཁྱོད་ལས་ཆོས་ཐོས་ནས་དགེ་བའི་

རྩ་བ་ཆེན་པོ་འཕེལ་བར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ་གང་གིས་ལྷའི་བུ་དཔལ་བཟངས་དང་། ཐམས་ཅད་དང་ལྡན་པའི་འཁོར་དེ་དག་དགའ་ལྡན་གྱི་གནས་སུ་བཞུགས་པར་བདག་ཉིད་ཀྱིས་ཤེས་པ་དང་། ཉམས་དགའ་བའི་ཀུན་དགའ་ར་བ་དང་། ཉམས་དགའ་བའི་ཚལ་དང་།
ཉམས་དགའ་བའི་རྫིང་དང་། ཉམས་དགའ་བའི་སྐྱེད་མོས་ཚལ་དང་། རིམ་པ་བདུན་དང་། བརྒྱད་དང་། བཅུ་དང་། ཉི་ཤུ་པའི་ཁང་པ་བརྩེགས་པ་བསིལ་ཁང་དང་། བ་གམ་དང་། སྟེགས་བུ་དང་། རྟ་བབས་དང་། སྐར་ཁུང་དང་ལྡན་པ་དེ་དག་ཀྱང་སྣང་བ་དང་། ལྷའི་བུ་མོ་རྐང་ལག་འཇམ་ཞིང་མཉེན་པ། གསེར་གྱི་དྲ་བ་ལྟར་
འོད་རྣམ་པར་དག་པ། སྨིན་མ་ལེགས་པ། འཕྲལ་བ་ལེགས་པ། བཞིན་ལེགས་པ། མིག་པད་མ་འདབ་མ་བརྒྱད་པ་སྔོན་པོ་ལྟ་བུར་མཛེས་ཤིང་དྲི་མ་མེད་པ་ཤིན་དུ་ཡངས་པ། འདོད་པའི་སེམས་བསྐྱེད་པ། ཟླ་བ་ཚེས་པ་ལྟར་མངོན་པར་དགའ་བ། བཞིན་འཛུམ་པ་དང་བཅས་པ་དེ་དག་རྒྱུད་གཅིག་པ་དང་། པི་བང་
དང་། སྒྲ་སྙན་དང་། ཁར་བའི་སིལ་ཁྲོལ་དང་། ཕེག་དང་། རྔ་ཟླུམ་དང་། རྫ་རྔ་དང་། རྔ་སྙན་པ་དང་། གླིང་བུ་དང་། གླུ་དབྱངས་དང་། རོལ་མོའི་དབྱངས་སྒྲ་དང་། གར་དང་། བཞད་གད་དང་། འཇོ་བ་དང་། སྒེག་པ་དང་། རྩེ་བས་རྒྱགས་ཤིང་དགའ་བ་དང་། རྩེ་བ་དང་། དགའ་མགུར་སྤྱོད་པ་དག་ཀྱང་སྣང་བ་དེ་ལྟ་བུའི་རྫུ་
འཕྲུལ་མངོན་པར་བྱ་བ་མངོན་པར་བྱས་སོ། །དེ་འདྲ་བའི་བྱིན་གྱི་རླབས་ཀྱིས་བྱིན་གྱིས་རླབས་སོ། །དེ་ནས་ལྷའི་བུ་དཔལ་བཟངས་ཀྱིས་རང་གི་གནས་རྒྱན་ཐམས་ཅད་ཀྱིས་བརྒྱན་པ་ཡང་མཐོང་། རང་གི་གཡོག་འཁོར་རྣམས་ཀྱང་མཐོང་ངོ་། །མཐོང་ནས་ཀྱང་ངོ་མཚར་དུ་གྱུར་ཏེ། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་
སོ། །འཇམ་དཔལ་བདག་ཅག་འདི་ལྟར་མྱུར་དུ་དགའ་ལྡན་གྱི་གནས་སུ་ཕྱིན་ཏེ། ཉམས་དགའ་བའི་ཀུན་དགའི་ར་བ་འདི་དག་དང་ཞེས་བྱ་བ་ནས། དགའ་བ་དང་། རྩེ་བ་དང་། དགའ་མགུར་སྤྱོད་པ་དང་། བདག་གི་རང་གི་གནས་འདི་དང་རང་གི་གཡོག་ཅེས་བྱ་བའི་བར་དུ་སྦྱར་ཏེ། འདི་དག་སྣང་བ་ངོ་མཚར་ཏོ། །དེ་
ནས་ཚེ་དང་ལྡན་པ་རབ་འབྱོར་གྱིས་ལྷའི་བུ་དཔལ་བཟངས་ལ་འདི་སྐད་ཅེས་སྨྲས་སོ། །ལྷའི་བུ་ཁྱོད་ནི་འཁོར་གྱི་དཀྱིལ་འཁོར་འདི་ནས་གང་དུ་ཡང་མ་གཡོས་ལ། དགའ་ལྡན་གྱི་གནས་སུ་ཡང་མ་ཕྱིན་ཏེ། ལྷའི་བུ་འོན་ཀྱང་ཐམས་ཅད་དང་ལྡན་པའི་འཁོར་འདི་དགའ་ལྡན་གྱི་གནས་སུ་ཞུགས་པར་བདག་ཉིད་ཀྱིས་

ཤེས་པ་དང་། ལྷའི་བུ་ཁོ་བོ་ཅག་ཀྱང་དགའ་ལྡན་གྱི་གནས་སུ་ཞུགས་པར་བདག་ཉིད་ཀྱིས་ཤེས་པ་དེ་ནི་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་བའི་ཆོ་འཕྲུལ་དང་། ཏིང་ངེ་འཛིན་གྱི་བྱིན་གྱིས་བརླབས་ཀྱི་སྟོབས་སོ། །དེ་ནས་བཅོམ་ལྡན་འདས་ལ་ལྷའི་བུ་དཔལ་བཟངས་ཀྱིས་འདི་སྐད་ཅེས་
གསོལ་ཏོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་བའི་སྟོབས་དང་། ཏིང་ངེ་འཛིན་གྱི་བྱིན་གྱིས་བརླབས་ཀྱི་སྟོབས་འདི་ནི་བསམ་གྱིས་མི་ཁྱབ་སྟེ། འདི་ལྟར་ཐམས་ཅད་དང་ལྡན་པའི་འཁོར་འདི་ས་ཕྱོགས་འདི་ནས་གང་དུ་ཡང་མ་གཡོས་པར་འདི་སྙམ་དུ་བདག་ཅག་དགའ་
ལྡན་གྱི་གནས་སུ་ཕྱིན་ཏོ་སྙམ་པ་ནི་ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་པ་ཇི་སྙེད་ཅིག་ངས་ཤེས་པ་ལས་ཁྱོད་ཀྱིས་ཇི་ཙམ་ཞིག་ཤེས་ཏེ། ལྷའི་བུ་འཇམ་དཔལ་གཞོན་ནུར་གྱུར་པ་འདོད་ན་སངས་རྒྱས་ཀྱི་ཞིང་གི་ཡོན་ཏན་བཀོད་
པ་གང་གཱའི་ཀླུང་གི་བྱེ་མ་སྙེད་གང་དག་ཡོད་པ་དེ་དག་ཐམས་ཅད་ཞིང་གཅིག་ཏུ་ཡང་དག་པར་སྟོན་ཏོ། །སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་གང་དག་ཡོད་པ། དེ་དག་གཙུག་ཕུད་ཀྱིས་ཕུག་སྟེ། སྟིང་གི་བར་སྣང་གི་ནམ་མཁའ་ལ་འཇོག་གོ །སངས་རྒྱས་ཀྱི་ཞིང་དེ་དག་ན་རྒྱ་མཚོ་ཆེན་པོར་གྱུར་པའི་
ཆུའི་ཕུང་པོ་གང་དག་ཡོད་པ་དེ་དག་ཐམས་ཅད་སྤུའི་ཁུང་བུ་གཅིག་ཏུ་བླུགས་ཀྱང་ཆུའི་སེམས་ཅན་རྣམས་ལ་གནོད་པ་མེད་དེ། ཐམས་ཅད་ཀྱང་རང་རང་གི་རྒྱ་མཚོ་ཆེན་པོ་ན་གནས་པར་བདག་ཉིད་ཀྱིས་ཤེས་སོ། །སངས་རྒྱས་ཀྱི་ཞིང་དེ་དག་ན་རིའི་རྒྱལ་པོ་རི་རབ་གང་དག་ཡོད་པ་དེ་དག་ཐམས་ཅད་རི་གཅིག་ཏུ་བྱིན་གྱིས་
བརླབས་ཏེ། རི་དེ་དག་ཡུངས་ཀར་གྱི་འབྲུའི་ནང་དུ་བཅུག་ཀྱང་རི་རབ་ལ་གནས་པའི་ལྷ་དེ་དག་ལ་ཡང་གནོད་པ་མེད་དེ། ཐམས་ཅད་ཀྱང་རང་རང་གི་གནས་ན་འཁོད་པར་བདག་ཉིད་ཀྱིས་ཤེས་སོ། །སངས་རྒྱས་ཀྱི་ཞིང་དེ་དག་ན་འགྲོ་བ་ལྔར་སྐྱེས་པའི་སེམས་ཅན་གང་དག་ཡོད་པ་དེ་དག་ཐམས་ཅད་ལག་པ་གཡས་
པའི་མཐིལ་དུ་བཞག་སྟེ། འཇིག་རྟེན་གྱི་ཁམས་བདེ་བ་ཐམས་ཅད་ཀྱིས་རབ་ཏུ་བརྒྱན་པའི་སེམས་ཅན་རྣམས་ཀྱི་བདེ་བར་སྦྱར་བ་ཅི་འདྲ་བ་དེ་ལྟ་བུ་དག་དེ་དག་ལ་སྒྲུབ་པོ། །གང་ཡང་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་སྲེག་པར་བྱེད་པའི་མེ་དེ་དག་ཐམས་ཅད་མར་མེའི་སྙིང་པོ་གཅིག་གི་མེ་ལྕེ་

ཙམ་གྱི་མེར་བྱིན་གྱིས་རློབ་སྟེ། དེས་བྱ་བ་བྱེད་པ་གང་ཡིན་པ་དེ་བྱེད་དོ། །སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་དག་ན་ཉི་མ་དང་ཟླ་བའི་འོད་གང་དག་ཡོད་པ་དེ་དག་ཐམས་ཅད་སྤུའི་ཁུང་བུ་གཅིག་གི་འོད་ཀྱིས་ཟིལ་དུ་རླག་པར་བྱེད་དོ། །ལྷའི་བུ་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་
འཕྲུལ་པའི་ཆོ་འཕྲུལ་ལས་བརྩམས་ནས་ང་བསྐལ་པའམ། བསྐལ་པ་ལས་ལྷག་པར་ཡང་ཆོས་སྟོན་ཏེ། འཇམ་དཔལ་གཞོན་ནུར་གྱུར་པ་ནི་རྫུ་འཕྲུལ་དང་བྱིན་གྱི་རླབས་ཀྱི་སྟོབས་བསམ་གྱིས་མི་ཁྱབ་པ་འདི་ལྟ་བུ་དང་ལྡན་ནོ།། །།བམ་པོ་གཉིས་པ་སྟེ་ཐ་མ། དེ་ནས་བདུད་སྡིག་ཅན་འཁོར་དེ་ཉིད་
དུ་འདུས་པར་གྱུར་ནས་འདུག་སྟེ། དེས་བདག་ཉིད་དགེ་སློང་གི་གཟུགས་སུ་བྱིན་གྱིས་བརླབས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་པའི་ཆོ་འཕྲུལ་དེ་བདག་གིས་བལྟ་བར་བགྱིའོ། །བཅོམ་ལྡན་འདས་ཚིག་ཙམ་དུ་གསུངས་
པས་ཅི་སྨན་གྱིས་བདག་ལ་མངོན་སུམ་དུ་གྱུར་ཅིག །དེ་ནས་བཅོམ་ལྡན་འདས་ཀྱིས་བདུད་སྡིག་ཅན་དུ་མཁྱེན་བཞིན་དུ་སེམས་ཅན་ཚད་མེད་པ་དེ་དག་གི་དགེ་བའི་རྩ་བ་རྣམ་པར་སྤེལ་བའི་ཕྱིར་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ངས་ཁྱོད་ལ་བསྐུལ་གྱིས་ཁྱོད་ཀྱིས་
འཁོར་འདི་དག་ལ་རང་གི་རྫུ་འཕྲུལ་གྱི་སྟོབས་དང་ཆོ་འཕྲུལ་སྟོན་ཅིག་དང་། སེམས་ཅན་ཚད་མེད་པ་རྣམས་ཀྱི་དགེ་བའི་རྩ་བ་རྣམ་པར་འཕེལ་བར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པ་བཅོམ་ལྡན་འདས་ཀྱིས་བསྐུལ་བར་ཤེས་ནས་ཆོས་ཐམས་ཅད་སེམས་ཀྱིས་དབང་སྒྱུར་བ་རྣམ་པར་འཕྲུལ་པ་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་སོ། །འཇམ་དཔལ་གཞོན་ནུར་གྱུར་པས་ཆོས་ཐམས་ཅད་སེམས་ཀྱིས་དབང་སྒྱུར་བ་རྣམ་པར་འཕྲུལ་པའི་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ་དེ་ནས་དེའི་མོད་ལ་ཐམས་ཅད་དང་ལྡན་པའི་འཁོར་དེས་འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་པའི་ཆོ་
འཕྲུལ་བཅོམ་ལྡན་འདས་ཀྱིས་ཇི་སྐད་གསུངས་པ་དེ་བཞིན་དུ་མ་ཆད་པ་དང་། མ་ལྷག་པ་དང་། མི་མང་བར་མཐོང་ངོ་། །དེ་ནས་ཐམས་ཅད་དང་ལྡན་པའི་འཁོར་གྱིས་ཆོ་འཕྲུལ་དེ་མཐོང་ནས་ངོ་མཚར་དུ་གྱུར་ཏེ། སངས་རྒྱས་བྱུང་བ་ལེགས་སོ་ལེགས་སོ། །སངས་རྒྱས་བྱུང་བ་ནི་སེམས་ཅན་རྣམས་ལ་དོན་

ཆེན་པོར་ཉེ་བར་གནས་སོ། །དེ་བྱུང་བས་སྐྱེས་བུ་དམ་པ་འདི་ལྟ་བུ་འདི་དག་ཀྱང་འཇིག་རྟེན་དུ་བྱུང་བ་ཡིན་ནོ། །ཆོ་འཕྲུལ་བསམ་གྱིས་མི་ཁྱབ་པ་འདི་ལྟ་བུ་ཡང་འཇིག་རྟེན་ན་སྣང་བ་ཡིན་ནོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་བདུད་སྡིག་ཅན་གྱིས་ཆོ་འཕྲུལ་དེ་མཐོང་སྟེ། ངོ་མཚར་དུ་གྱུར་ནས་ཐལ་མོ་སྦྱར་ཏེ་འཇམ་དཔལ་གཞོན་
ནུར་གྱུར་པ་ལ་ཕྱག་འཚལ་ཞིང་ཚིག་འདི་སྐད་ཅེས་སྨྲས་སོ། །འཇམ་དཔལ་གཞོན་ནུར་གྱུར་པའི་རྫུ་འཕྲུལ་གྱི་ཆོ་འཕྲུལ་བསམ་གྱིས་མི་ཁྱབ་སྟེ་ངོ་མཚར་ཏོ། །སེམས་ཅན་གང་དག་ཆོ་འཕྲུལ་བཤད་པ་འདི་ཐོས་ནས་མོས་པ་དེ་དག་ངོ་མཚར་ཆེ་བར་བདག་གིས་བསམས་སོ། །བཅོམ་ལྡན་འདས་གལ་ཏེ་བདུད་
སྡིག་ཅན་གང་གཱའི་ཀླུང་གི་བྱེ་མ་སྙེད་དུ་གྱུར་ཀྱང་དེ་ལྟར་མོས་པའི་སེམས་ཅན་དེ་ལ་བར་ཆད་བགྱི་བའི་རྔོ་མི་ཐོག་ལགས་སོ། །བཅོམ་ལྡན་འདས་བདུད་སྡིག་ཅན་བདག་ནི་རྟག་ཏུ་རྒྱུན་མི་འཆད་པར་དེ་བཞིན་གཤེགས་པ་ལ་གླགས་ལྟ་ཞིང་སྐབས་ཚོལ་བ་དང་། སེམས་ཅན་རྣམས་ལ་ཡང་གཙེ་བར་སེམས་པ་
དང་། བརྩོན་པའི་གང་ཟག་རྣམས་ཀྱི་དགེ་བའི་རྩ་བའི་བར་ཆད་བགྱི་བའི་སླད་དུ་ཡང་ཞུགས་པ་ལགས་ཏེ། བཅོམ་ལྡན་འདས་དེང་སླན་ཆད་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། ཕོ་བྲང་འཁོར་གང་ན་ཆོས་ཀྱི་རྣམ་གྲངས་འདི་རབ་ཏུ་སྤྱོད་པ་དེར་ཁོ་ར་ཁོར་ཡུག་ཏུ་དཔག་
ཚད་བརྒྱ་ཚུན་ཆད་དུ་མིག་གིས་མི་རྩོལ་བར་བགྱི་བའི་སླད་དུ་བདག་མི་མཆི་བར་བདག་ཡི་དམ་དེ་ལྟ་བུ་བླང་བར་བགྱིའོ། །གང་དག་འཆང་བ་དང་། འཆད་པ་དང་། སྟོན་པ་དང་། སོ་སོར་རྟོག་པ་དང་། བསྒྲུབ་པ་དེ་ལ་སྟོན་པ་ལ་བགྱི་བ་ལྟར་གུས་པ་བསྐྱེད་པར་བགྱིའོ། །བཅོམ་ལྡན་འདས་འོ་ན་དུ་
ལགས་ཀྱང་བདག་གི་འཁོར་གང་དེ་བཞིན་གཤེགས་པའི་བསྟན་པའི་བར་ཆད་བགྱི་བ་དང་། བརྩོན་པ་རྣམས་གཡེངས་པར་བགྱི་བའི་སླད་དུ་ཞུགས་པ་དག་མཆིས་ཏེ་དེ་དག་ཆད་པས་དགུམ་པའི་སླད་དུ་རིགས་ཀྱི་བུའམ་རིགས་ཀྱི་བུ་མོ་དེ་དག་གིས་གསང་སྔགས་ཀྱི་ཚིག་འདི་དག་དྲན་པར་བགྱིའོ། །ཏདྱ་ཐཱ། ཨ་མ་ལེ།
བི་མ་ལེ། སྠི་ཏ་ཏྭེ། ཨ་ག་ལ་མ་ནི་རྫི་ཏ་ཤ་ཏྲུ། ཛ་ཡེ་ཛ་ཡ་བ་ཏི། བྷཱུ་ཏ་མ་ཏི། ཤ་མེ། ཤཱན་ཏི། ཨ་ཕུ་མེ། ཕུ་ཕུ་མེ། དྷི་རེ། ཨ་ཁེ། མ་ཁེ། ཁ་ཁེ། མི་སི་ལེ། ཨ་ག་མེ། ཕུ་ལ་ཏེ། ཕུ་ལ། ཕུ་ལེ། ཕ་ཤུ་མེ། ཤུ་ཤུ་མེ། དྷི་དྷེ་རེ། ཨ་ན་བ་ན་ཏེ། སྠི་ཏ་ཏྭེ། ཀྲྀ་ཏཱ་ར་ཐེ། ཀྲི་ཏཱ་བཱིརྱ། བཻ་རོ་ཙ་ན་སད་དྷརྨ་བྷ་ཎ་ཀོ་

སྱ་སཱུ་ཏྲ་སྱ་དྷཱ་རི་ཀ། ཨ་བྷྲ་མུ་ག་ཏ་ཨི་བ་སཱུརྱ་སྭཱ་ཧཱ། བཅོམ་ལྡན་འདས་ཆོས་སྨྲ་བ་གང་གསང་སྔགས་ཀྱི་ཚིག་འདི་རྣམས་ཀྱིས་ཀུན་དུ་བསྲུངས་པ་དེ་ལ་བདུད་ཀྱི་རིས་ཀྱི་ལྷའི་བུ་རྣམས་ཀྱིས་བར་ཆད་བགྱི་བ་ནི་གནས་མ་ལགས་ཤིང་སྐབས་མ་ལགས་ཏེ། དེ་ནི་གནས་མ་མཆིས་ཀྱི་སྟེང་དུ་དེ་ལ་གོས་
དང་། ཟས་དང་། མལ་ཆ་དང་། ན་བའི་གསོས་སྨན་དང་། ཡོ་བྱད་རྣམས་ཉེ་བར་བསྒྲུབ་པ་དང་། སྤྲོ་བར་བགྱི་བ་དང་། སྤོབས་པར་བགྱི་བར་སྤྲོ་བར་འགྱུར་ལགས་སོ། །བཅོམ་ལྡན་འདས་རིགས་ཀྱི་བུ་འམ་རིགས་ཀྱི་བུ་མོ་གང་དག་གསང་སྔགས་ཀྱི་ཚིག་འདི་དག་བརྗོད་པས་གཡེང་བ་མ་མཆིས་
པའི་རྒྱུད་ཀྱིས་གདུགས་མཚན་འདས་པར་བགྱིད་པ་དེ་དག་ལྷ་རྣམས་ཀྱིས་བསྲུངས་པར་འགྱུར། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ལགས་པ་རྣམས་ཀྱིས་བསྲུངས་པར་འགྱུར་ཏེ། དེ་
དག་ལ་སླར་རྒོལ་བའམ་མི་མཛའ་བ་གང་གིས་གླགས་བལྟས་ཀྱང་གླགས་རྙེད་པར་མི་འགྱུར་ལགས་སོ། །དེ་ནས་བཅོམ་ལྡན་འདས་ཀྱིས་བདུད་སྡིག་ཅན་ལ་ལེགས་སོ་ཞེས་བྱ་བ་བྱིན་ཏེ། སྡིག་ཅན་ལེགས་སོ་ལེགས་སོ། །འདིར་ཁྱོད་ཀྱིས་གསང་སྔགས་ཀྱི་ཚིག་བསྟན་པ་བརྗོད་པས་
འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་རྣམ་པ་དྲུག་ཏུ་གཡོས་ཏེ། ཁྱོད་ཀྱི་སྤོབས་པ་དེ་ཐམས་ཅད་ནི་འཇམ་དཔལ་གཞོན་ནུར་གྱུར་པའི་བྱིན་གྱིས་བརླབས་སུ་རིག་པར་བྱའོ། །འཇམ་དཔལ་གཞོན་ནུར་གྱུར་པའི་རྫུ་འཕྲུལ་རྣམ་པར་འཕྲུལ་པའི་ཆོ་འཕྲུལ་དང་བྱིན་གྱི་རླབས་འདི་བསྟན་
པ་དང་། བདུད་ཀྱི་གསང་སྔགས་ཀྱི་སྟོབས་དང་། རིག་སྔགས་ཀྱི་སྟོབས་བསྟན་པ་ན་སྲོག་ཆགས་ཉི་ཁྲིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་རྫུ་འཕྲུལ་བསྡུས་ནས་ལྷའི་བུ་དཔལ་བཟངས་ལ་འདི་སྐད་ཅེས་
སྨྲས་སོ། །ལྷའི་བུ་ཁྱོད་དགའ་ལྡན་གྱི་གནས་སུ་སོང་ལ་དགའ་ལྡན་གྱི་རིས་ཀྱི་ལྷའི་བུ་རྣམས་སྡུས་ཤིག་དང་ཁོ་བོ་ཡང་དེར་འོང་ངོ་། །དེ་ནས་ལྷའི་བུ་དཔལ་བཟངས་ཀྱིས་འཇམ་དཔལ་གཞོན་ནུར་གྱུར་པའི་ལྟར་མཉན་ཏེ། བཅོམ་ལྡན་འདས་དང་འཇམ་དཔལ་གཞོན་ནུར་གྱུར་པ་དང་

བྱང་ཆུབ་སེམས་དཔའི་དགེ་འདུན་ཐམས་ཅད་དང་། ཉན་ཐོས་ཀྱི་དགེ་འདུན་ལ་བསྐོར་བ་བྱས་ནས་འཁོར་དང་བཅས་པར་འཁོར་དེ་ནས་མི་སྣང་བར་གྱུར་ཏེ་དགའ་ལྡན་གྱི་གནས་སུ་ཕྱིན་ཏོ། །དེ་ནས་ལྷའི་བུ་དཔལ་བཟངས་ཀྱིས་དགའ་ལྡན་གྱི་རིས་ཀྱི་ལྷའི་བུ་རྣམས་ལ་སྨྲས་པ། གྲོགས་པོ་དག་ཤེས་
པར་གྱིས་ཤིག །འཇམ་དཔལ་གཞོན་ནུར་གྱུར་པའོ་བུ་ཅག་ལ་སྙིང་བརྩེ་བའི་ཕྱིར་འདིར་འོང་གིས་དེ་ལ་དགའ་ལྡན་གྱི་རིས་ཀྱི་ལྷ་ཁྱེད་དགའ་བ་དང་། རྩེ་བ་ལ་བག་མེད་པ་འོར་ཏེ་བག་ཡོད་པར་གྱིས་ལ་འཇམ་དཔལ་གཞོན་ནུར་གྱུར་པ་ལ་ཆོས་ཉན་དུ་ཤེག་ཤིག །དེ་ནས་ལྷའི་བུ་དཔལ་
བཟངས་ཀྱིས་འཇམ་དཔལ་གཞོན་ནུར་གྱུར་པ་ལ་མཆོད་པའི་ལས་ཀྱི་ཕྱིར་དགའ་ལྡན་གྱི་གནས་ཀྱི་དབུས་སུ་ལྷའི་ཡིད་ལས་བྱུང་བ་རིན་པོ་ཆེ་ཐམས་ཅད་ལས་བྱས་པའི་འཁོར་གྱི་ཁྱམས་ཆུར་ཤར་ནུབ་ཏུ་དཔག་ཚད་སུམ་ཁྲི་ཉིས་སྟོང་ཡོད་ལ། ཞེང་ལྷོ་བྱང་དུ་དཔག་ཚད་ཁྲི་དྲུག་སྟོང་ཡོད་པ་བྱས་ཏེ།
དེར་སེང་གེའི་ཁྲི་སྣ་ཚོགས་བལྟ་ན་སྡུག་པ་ལྷའི་རས་བཅོས་བུ་བརྒྱ་སྟོང་དུ་མ་བཏིང་བ་སྟོང་ཕྲག་དུ་མ་བྱས་སོ། །དེ་ནས་ལྷའི་བུ་དཔལ་བཟངས་ཀྱིས་རྣམ་པ་འདི་ལྟ་བུའི་འཁོར་གྱི་ཁྱམས་བཀོད་པ་དེ་དག་དང་། སེང་གེའི་ཁྲི་རྣམས་ཀྱང་བྱས་ནས་ཐལ་མོ་སྦྱར་ཏེ། འཇམ་དཔལ་གཞོན་ནུར་གྱུར་པ་ལ་འདི་
སྐད་ཅེས་སྨྲས་སོ། །འཇམ་དཔལ་འཁོར་གྱི་ཁྱམས་བཀོད་པ་དང་། སེང་གེའི་ཁྲི་བཀོད་པ་བགྱིས་ལགས་ན་ད་དེའི་དུས་ལ་བབ་པར་མཁྱེན་ན་གཤེགས་སུ་གསོལ། དེ་ནས་འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་ཁྲི་ཉིས་སྟོང་དང་། ཉན་ཐོས་ཀྱི་མཆོག་ལྔ་བརྒྱ་
དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་སྟོང་ཕྲག་དུ་མ་དག་དང་ལྷན་ཅིག་ཏུ་ཡོངས་སུ་བསྐོར་ཅིང་མདུན་དུ་བདར་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་དྲུང་ནས་མི་སྣང་བར་གྱུར་
ནས། སྐད་ཅིག་ཐང་ཅིག་ཡུད་ཙམ་དེ་ལ་དགའ་ལྡན་གྱི་གནས་སུ་ཕྱིན་ཏོ། །དེ་ནས་འཇམ་དཔལ་གཞོན་ནུར་གྱུར་པ་རིན་པོ་ཆེ་བཀོད་པའི་འཁོར་གྱི་ཁྱམས་དེར་རང་གི་ཁྲི་ཇི་ལྟར་བཤམས་པ་ལ་འདུག་གོ །བྱང་ཆུབ་སེམས་དཔའ་རྣམས་དང་། ཉན་ཐོས་ཆེན་པོ་རྣམས་དང་། ཐམས་

ཅད་དང་ལྡན་པའི་འཁོར་ཀྱང་སྟན་ཅི་རིགས་པ་ལ་འཁོད་དོ། །རྒྱལ་ཆེན་བཞིའི་རིས་ཀྱི་ལྷ་རྣམས་དང་། སུམ་ཅུ་རྩ་གསུམ་དང་། འཐབ་བྲལ་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། བདུད་ཀྱི་རིས་རྣམས་དང་། གཟུགས་ན་སྤྱོད་པའི་ཚངས་རིས་ཀྱི་ལྷ་ནས་བཟུང་སྟེ།
འོག་མིན་གྱི་བར་གྱི་ལྷ་རྣམས་ཀྱིས་གཅིག་ནས་གཅིག་ཏུ་སྒྲ་ཐོས་པ། འདི་ལྟར་འཇམ་དཔལ་གཞོན་ནུར་གྱུར་པ་དགའ་ལྡན་གྱི་གནས་སུ་འབེལ་བའི་ཆོས་ཀྱི་གཏམ་ཆེན་པོ་སྨྲ་བར་འགྱུར་གྱིས་བདག་ཅག་ཀྱང་ཆོས་མཉན་པའི་ཕྱིར་ངེས་པར་དེར་འདོང་བར་བྱའོ། །སྐྱེས་བུ་དམ་པ་དེ་ལྟ་བུ་དག་མཐོང་བ་ནི་
ལེགས་པར་མཐོང་བའོ། །དེ་དག་ལས་ཆོས་ཐོས་པ་ནི་ལེགས་པར་ཐོས་པའོ་ཞེས་སྒྲ་ཐོས་ནས་སྐད་ཅིག་ཐང་ཅིག་ཡུད་ཙམ་དེ་ལ་འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷའི་བུ་ཚད་མེད་གྲངས་མེད་པ་དག་རང་རང་གི་གནས་ནས་མི་སྣང་བར་གྱུར་ཏེ། དགའ་ལྡན་གྱི་གནས་སུ་ཕྱིན་ཏོ། །
དེ་ནས་འཇམ་དཔལ་གཞོན་ནུར་གྱུར་པས་དེ་ལྟ་བུའི་བྱིན་གྱི་རླབས་ཀྱི་བྱིན་གྱིས་བརླབས་པས་དེས་ལྷའི་འཁོར་དེ་ཙམ་དུ་ཚད་མེད་པ་དག་རིན་པོ་ཆེ་བཀོད་པའི་ཁྱམས་ཀྱི་འཁོར་དེ་ཉིད་དུ་གོ་སྐབས་ཡངས་པར་གནས་པར་གྱུར་ཏོ། །དེ་ནས་ལྷའི་བུ་དཔལ་བཟངས་ཀྱིས་འཇམ་དཔལ་གཞོན་ནུར་གྱུར་པ་
ལ་འདི་སྐད་ཅེས་སྨྲས་སོ། །འཇམ་དཔལ་ལྷའི་འཁོར་ཆེན་པོ་འདི་འདུས་ལགས་ན་ཆོས་ཀྱི་བཀའ་མཆིད་ལས་བརྩམས་ཏེ་སྤོབས་པར་མཛད་དུ་གསོལ། དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས་ལྷའི་བུ་དཔལ་བཟངས་དང་། ཐམས་ཅད་དང་ལྡན་པའི་འཁོར་དེ་ལ་འདི་སྐད་ཅེས་
སྨྲས་སོ། །གྲོགས་པོ་དག་ཆོས་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་ཆོས་ཐམས་ཅད་སྡུད་པར་འགྱུར་བ་དག་གོ །བཞི་གང་ཞེ་ན། འདི་ལྟ་སྟེ་ཚུལ་ཁྲིམས་ལ་གནས་པའི་ཐོས་པ་དང་། བསམ་གཏན་ལ་གནས་པའི་ཤེས་རབ་དང་། མངོན་པར་ཤེས་པ་ལ་གནས་
པའི་ཡེ་ཤེས་དང་། ཐབས་ལ་གནས་པའི་བག་ཡོད་པ་སྟེ། གྲོགས་པོ་དག་ཆོས་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་ཆོས་ཐམས་ཅད་སྡུད་པར་འགྱུར་བའོ། །གྲོགས་པོ་དག་དེ་ལ་ཡོངས་སུ་དག་པ་རྣམ་པ་བརྒྱད་ཀྱིས་ཚུལ་ཁྲིམས་ལ་འཇུག་སྟེ། ཡོངས་སུ་དག་པ་

རྣམ་པ་བརྒྱད་ཀྱིས་ཇི་ལྟར་འཇུག་ཅེ་ན། འདི་ལྟ་སྟེ། ལུས་དག་པའི་རྣམ་པས་འཇུག་པ་དང་། ངག་དག་པའི་རྣམ་པས་འཇུག་པ་དང་། སེམས་དག་པའི་རྣམ་པས་འཇུག་པ་དང་། བསམ་པ་དག་པའི་རྣམ་པས་འཇུག་པ་དང་། འཚོ་བ་དག་པའི་རྣམ་པས་འཇུག་པ་དང་། སྦྱངས་པའི་ཡོན་ཏན་དང་
ཡོ་བྱད་བསྙུངས་པ་དག་པའི་རྣམ་པས་འཇུག་པ་དང་། ཚུལ་འཆོས་པ་དང་། ཁ་གསག་དང་། གཞོགས་སློང་དང་། ཐོབ་ཀྱིས་འཇལ་བ་ཐམས་ཅད་རྣམ་པར་སྤོང་བའི་རྣམ་པས་འཇུག་པ་དང་། བྱང་ཆུབ་ཀྱི་སེམས་མི་བརྗེད་པའི་རྣམ་པས་འཇུག་པ་སྟེ། གྲོགས་པོ་དག་དེ་ལྟར་ཡོངས་སུ་དག་
པ་རྣམ་པ་བརྒྱད་ཀྱིས་ཚུལ་ཁྲིམས་ལ་འཇུག་གོ །གྲོགས་པོ་དག་དེ་ལ་རྣམ་པ་བརྒྱད་ཀྱིས་ཐོས་པ་ཡོངས་སུ་དག་སྟེ། རྣམ་པ་བརྒྱད་གང་ཞེ་ན། འདི་ལྟ་སྟེ། བླ་མ་ལ་གུས་པས་ཡོངས་སུ་དག་པ་དང་། ང་རྒྱལ་བཅོམ་པས་ཡོངས་སུ་དག་པ་དང་། བརྩོན་འགྲུས་དང་ཏིང་ངེ་འཛིན་ཐོབ་པས་
ཡོངས་སུ་དག་པ་དང་། དྲན་པ་མི་གཡེང་བས་ཡོངས་སུ་དག་པ་དང་། བསྟན་པ་དང་རབ་ཏུ་བཤད་པས་ཡོངས་སུ་དག་པ་དང་། བདག་ལ་མི་སྟོད་ཅིང་གཞན་ལ་མི་སྨོད་པས་ཡོངས་སུ་དག་པ་དང་། ཚུལ་བཞིན་དུ་སོ་སོར་རྟོག་པས་ཡོངས་སུ་དག་པ་དང་། ཇི་ལྟར་ཐོས་པའི་ཆོས་
སྒྲུབ་པས་ཡོངས་སུ་དག་པ་སྟེ། གྲོགས་པོ་དག་དེ་ལྟར་རྣམ་པ་བརྒྱད་ཀྱིས་ཐོས་པ་ཡོངས་སུ་དག་གོ །གྲོགས་པོ་དག་དེ་ལ་རྣམ་པ་བརྒྱད་ཀྱིས་བསམ་གཏན་ཡོངས་སུ་དག་པ་སྟེ། རྣམ་པ་བརྒྱད་གང་ཞེ་ན། འདི་ལྟ་སྟེ། དགོན་པ་ལ་གནས་ཤིང་དབེན་པ་ལ་དགའ་བས་ཡོངས་
སུ་དག་པ་དང་། འདུ་འཛི་སྤོང་བས་ཡོངས་སུ་དག་པ་དང་། ཡུལ་དང་མི་འདྲེ་བས་ཡོངས་སུ་དག་པ་དང་། ལུས་དང་སེམས་ལས་སུ་རུང་བས་ཡོངས་སུ་དག་པ་དང་། ཁ་ཟས་བསྙུངས་ཏེ་ལུས་འཚོ་བས་ཡོངས་སུ་དག་པ་དང་། དམིགས་པ་ལ་འཇོག་པས་ཡོངས་སུ་དག་པ་དང་། སྒྲ་དང་
མཚན་མ་ཐམས་ཅད་རྣམ་པར་འཇིག་པས་ཡོངས་སུ་དག་པ་དང་། འཕགས་པའི་བདེན་པ་དང་ཟང་ཟིང་མེད་པར་སོ་སོར་ཡང་དག་པར་བགེང་པས་ཡོངས་སུ་དག་པ་སྟེ། གྲོགས་པོ་དག་དེ་ལྟར་རྣམ་པ་བརྒྱད་ཀྱིས་བསམ་གཏན་ཡོངས་སུ་དག་གོ །གྲོགས་པོ་དག་དེ་ལ་རྣམ་པ་བརྒྱད་ཀྱིས་

ཤེས་རབ་ཡོངས་སུ་དག་སྟེ། རྣམ་པ་བརྒྱད་གང་ཞེ་ན། འདི་ལྟ་སྟེ། ཕུང་པོ་ལ་མཁས་པའི་རྣམ་པས་ཡོངས་སུ་དག་པ་དང་། ཁམས་ལ་མཁས་པའི་རྣམ་པས་ཡོངས་སུ་དག་པ་དང་། སྐྱེ་མཆེད་ལ་མཁས་པའི་རྣམ་པས་ཡོངས་སུ་དག་པ་དང་། རྟེན་ཅིང་འབྲེལ་བར་
འབྱུང་བ་ལ་མཁས་པའི་རྣམ་པས་ཡོངས་སུ་དག་པ་དང་། བདེན་པ་ལ་མཁས་པའི་རྣམ་པས་ཡོངས་སུ་དག་པ་དང་། དབང་པོ་ལ་མཁས་པའི་རྣམ་པས་ཡོངས་སུ་དག་པ་དང་། རྣམ་པར་ཐར་པའི་སྒོ་གསུམ་ལ་མཁས་པའི་རྣམ་པས་ཡོངས་སུ་དག་པ་དང་། བག་ལ་ཉལ་དང་། ཀུན་ནས་
དཀྲིས་པ་དང་། ལྟ་བ་ཐམས་ཅད་ཡང་དག་པར་འཇོམས་པ་ལ་མཁས་པའི་རྣམ་པས་ཡོངས་སུ་དག་པ་སྟེ། གྲོགས་པོ་དག་དེ་ལྟར་རྣམ་པ་བརྒྱད་ཀྱིས་ཤེས་རབ་ཡོངས་སུ་དག་གོ །གྲོགས་པོ་དག་དེ་ལ་རྣམ་པ་བརྒྱད་ཀྱིས་མངོན་པར་ཤེས་པ་ཡོངས་སུ་དག་སྟེ། རྣམ་པ་བརྒྱད་གང་ཞེ་ན།
འདི་ལྟ་སྟེ། སྒྲིབ་པ་མེད་པར་གཟུགས་ཐམས་ཅད་མཐོང་བས་ལྷའི་མིག་ཡོངས་སུ་དག་པ་དང་། སྒྲིབ་པ་མེད་པར་སྒྲ་ཐམས་ཅད་ཐོས་པས་ལྷའི་རྣ་བ་ཡོངས་སུ་དག་པ་དང་། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ལ་རྣམ་པར་ལྟ་བས་ཕ་རོལ་གྱི་སེམས་ཤེས་པ་ཡོངས་སུ་དག་པ་དང་།
སྒྲིབ་པ་མེད་ཅིང་ཆགས་པ་མེད་པར་སྔོན་གྱི་མཐའ་རྗེས་སུ་དྲན་པས་སྔོན་གྱི་གནས་རྗེས་སུ་དྲན་པའི་ཤེས་པ་ཡོངས་སུ་དག་པ་དང་། སངས་རྒྱས་ཀྱི་ཞིང་མཐའ་ཡས་པར་འགྲོ་བས་རྫུ་འཕྲུལ་གྱི་བྱ་བ་ཡོངས་སུ་དག་པ་དང་། ཟག་པ་ཐམས་ཅད་ཟད་པ་ཤེས་པས་བསལ་ཅིང་དུས་མ་ཡིན་པ་
ཡོངས་སུ་སྤངས་པས་ཟག་པ་ཟད་པ་ཡོངས་སུ་དག་པ་དང་། གཡོ་བ་དང་། རློམ་སེམས་ཐམས་ཅད་དང་བྲལ་བས་དགེ་བའི་རྩ་བ་མངོན་པར་ཤེས་པ་ཡོངས་སུ་དག་པ་དང་། ཇི་ལྟར་སྔོན་དམ་བཅས་པ་ཉམས་འོག་ཏུ་ཆུད་པར་བྱེད་པས་ཤེས་པ་བསྟན་པ་ཡོངས་སུ་དག་པ་སྟེ། གྲོགས་པོ་དག་
དེ་ལྟར་རྣམ་པ་བརྒྱད་ཀྱིས་མངོན་པར་ཤེས་པ་ཡོངས་སུ་དག་གོ །གྲོགས་པོ་དག་དེ་ལ་རྣམ་པ་བརྒྱད་ཀྱིས་ཡེ་ཤེས་ཡོངས་སུ་དག་སྟེ། རྣམ་པ་བརྒྱད་གང་ཞེ་ན། འདི་ལྟ་སྟེ། ཕུང་པོ་ལྔ་ཡོངས་སུ་ཤེས་པས་སྡུག་བསྔལ་ཤེས་པ་ཡོངས་སུ་དག་པ་དང་། སྲེད་པ་ཤིན་ཏུ་སྤོང་བས་ཀུན་འབྱུང་བ་

ཤེས་པ་ཡོངས་སུ་དག་པ་དང་། བརྟེན་ནས་སྐྱེས་པ་ལ་སྐྱེ་བ་མེད་པར་སོ་སོར་རྟོག་པས་འགོག་པ་ཤེས་པ་ཡོངས་སུ་དག་པ་དང་། འདུས་བྱས་དང་། འདུས་མ་བྱས་མཉམ་པ་ཉིད་དུ་འཇུག་པས་ལམ་ཤེས་པ་ཡོངས་སུ་དག་པ་དང་། ལས་དང་བྱ་བ་དང་མི་འགལ་བས་རྒྱུ་ཤེས་པ་ཡོངས་སུ་
དག་པ་དང་། བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གསོ་བ་མེད་པས་རྐྱེན་ཤེས་པ་ཡོངས་སུ་དག་པ་དང་། འཁོར་གསུམ་ཡོངས་སུ་གཅོད་པས་དུས་གསུམ་ཤེས་པ་ཡོངས་སུ་དག་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཡེ་ཤེས་ཐམས་ཅད་ལ་འཇུག་
པས་ཐམས་ཅད་མཁྱེན་པའི་ཡེ་ཤེས་ཡོངས་སུ་དག་པ་སྟེ། གྲོགས་པོ་དག་དེ་ལྟར་རྣམ་པ་བརྒྱད་ཀྱིས་ཡེ་ཤེས་ཡོངས་སུ་དག་གོ །གྲོགས་པོ་དག་དེ་ལ་རྣམ་པ་བརྒྱད་ཀྱིས་ངེས་པར་སེམས་པ་ཡོངས་སུ་དག་སྟེ། རྣམ་པ་བརྒྱད་གང་ཞེ་ན། འདི་ལྟ་སྟེ། ནང་ཉེ་བར་ཞི་བས་ཡོངས་སུ་དག་པ་
དང་། ཕྱི་རོལ་དུ་མི་རྒྱུ་བས་ཡོངས་སུ་དག་པ་དང་། ཁམས་གསུམ་ལ་མི་གནས་པས་ཡོངས་སུ་དག་པ་དང་། རྟེན་ཅིང་འབྲེལ་པར་འབྱུང་བ་དང་འཐུན་པས་ཡོངས་སུ་དག་པ་དང་། སྐྱེ་བ་མེད་པ་དང་འབྱུང་བ་མེད་པས་ཡོངས་སུ་དག་པ་དང་། མངོན་པར་འདུ་བྱེད་པ་མེད་པར་སོ་སོར་རྟོག་
པས་ཡོངས་སུ་དག་པ་དང་། ཆོས་ཐམས་ཅད་བདག་མེད་པར་སོ་སོར་རྟོག་པས་ཡོངས་སུ་དག་པ་དང་། ཉོན་མོངས་པ་ཐམས་ཅད་ཀྱིས་ཤིན་ཏུ་མི་འཁྲུགས་པས་ཡོངས་སུ་དག་པ་སྟེ། གྲོགས་པོ་དག་འདི་ནི་རྣམ་པ་བརྒྱད་ཀྱིས་ངེས་པར་སེམས་པ་ཡོངས་སུ་དག་པའོ། །གྲོགས་པོ་དག་དེ་ལ་
རྣམ་པ་བརྒྱད་ཀྱིས་བག་ཡོད་པ་ཡོངས་སུ་དག་སྟེ། རྣམ་པ་བརྒྱད་གང་ཞེ་ན། འདི་ལྟ་སྟེ། ཚུལ་ཁྲིམས་མཆོག་ཏུ་འཛིན་པ་མེད་པས་ཡོངས་སུ་དག་པ་དང་། ཐོས་པ་ཡོངས་སུ་བྱང་བས་ཡོངས་སུ་དག་པ་དང་། བསམ་གཏན་དེ་ལ་མ་ཆགས་པས་ཡོངས་སུ་དག་པ་དང་། ཤེས་རབ་དང་གསུང་རབ་
ཀྱིས་ཡོངས་སུ་དག་པ་དང་། མངོན་པར་ཤེས་པ་ལས་མ་ཉམས་པས་ཡོངས་སུ་དག་པ་དང་། ཡེ་ཤེས་ཀྱིས་རློམ་སེམས་མེད་པས་ཡོངས་སུ་དག་པ་དང་། ངེས་པར་སེམས་པས་རྩོད་པ་མེད་པས་ཡོངས་སུ་དག་པ་དང་། དགེ་བའི་ཆོས་ཆུད་མི་ཟ་བས་ཡོངས་སུ་དག་པ་སྟེ། གྲོགས་པོ་དག་

རྣམ་པ་བརྒྱད་པོ་དེ་དག་གིས་བག་ཡོད་པ་ཡོངས་སུ་དག་གོ །གྲོགས་པོ་དག་དེ་ལྟ་བས་ན་ཁྱེད་བག་ཡོད་པར་གྱིས་ཤིག །བག་ཡོད་པ་ལ་རྟོན་པའི་བྱང་ཆུབ་སེམས་དཔའ་རྣམས་ནི་བདེ་བ་གསུམ་ལས་ཡོངས་སུ་ཉམས་པར་མི་འགྱུར་རོ། །གསུམ་གང་ཞེ་ན། འདི་ལྟ་སྟེ། ལྷའི་བདེ་བ་དང་། བསམ་
གཏན་གྱི་བདེ་བ་དང་། མྱ་ངན་ལས་འདས་པའི་བདེ་བའོ། །ངན་སོང་གསུམ་ལས་ཡོངས་སུ་ཐར་བར་འགྱུར་ཏེ། གསུམ་གང་ཞེ་ན། འདི་ལྟ་སྟེ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ཏེ་གསུམ་པོ་དེ་དག་གོ །སྡུག་བསྔལ་གསུམ་གྱིས་འཕྲོགས་པར་མི་
འགྱུར་ཏེ། གསུམ་གང་ཞེ་ན། སྐྱེ་བའི་སྡུག་བསྔལ་དང་། རྒ་བའི་སྡུག་བསྔལ་དང་། འཆི་བའི་སྡུག་བསྔལ་ཏེ་གསུམ་པོ་དེ་དག་གོ །འཇིགས་པ་གསུམ་ལས་ཡང་དག་པར་འདའ་བར་འགྱུར་ཏེ། གསུམ་གང་ཞེ་ན། འཚོ་བ་མེད་པའི་འཇིགས་པ་དང་། ཚིགས་སུ་བཅད་པ་མེད་པའི་འཇིགས་པ་དང་།
འཁོར་ལ་བག་ཚ་བའི་འཇིགས་པ་སྟེ་གསུམ་པོ་དེ་དག་གོ །སྲིད་པ་གསུམ་ལས་ཡང་དག་པར་འདའ་བར་འགྱུར་ཏེ། འདོད་པའི་སྲིད་པ་དང་། གཟུགས་ཀྱི་སྲིད་པ་དང་། གཟུགས་མེད་པའི་སྲིད་པའོ། དྲི་མ་གསུམ་སྦྱོང་སྟེ། འདོད་ཆགས་ཀྱི་དྲི་མ་དང་། ཞེ་སྡང་གི་དྲི་མ་དང་། གཏི་མུག་གི་དྲི་མའོ། །
བསླབ་པ་གསུམ་ཡོངས་སུ་རྫོགས་པར་བྱེད་དེ། ལྷག་པའི་ཚུལ་ཁྲིམས་དང་། ལྷག་པའི་སེམས་དང་། ལྷག་པའི་ཤེས་རབ་བོ། །ཡོངས་སུ་དག་པ་གསུམ་ཐོབ་པར་འགྱུར་ཏེ། ལུས་ཡོངས་སུ་དག་པ་དང་། ངག་ཡོངས་སུ་དག་པ་དང་། སེམས་ཡོངས་སུ་དག་པའོ། །བསོད་ནམས་བྱ་བ་ལས་བྱུང་བའི་དངོས་པོ་
གསུམ་ཡོངས་སུ་རྫོགས་པར་བྱེད་དེ། སྦྱིན་པ་ལས་བྱུང་བ་དང་། ཚུལ་ཁྲིམས