Kinh tạng Tây Tạng (Kangyur Đại Học) — 042_དཀོན་བརྩེགས།_ང

བསྟན་ལ་ཡང་དག་བརྩོན་བགྱིས་ན། །འདོད་ཆགས་ཟད་པར་མི་འགྱུར་ཞེས། །ཁྱོད་ལ་རྒོལ་བ་ཡོང་མ་མཆིས། །ལྷའི་བུ་འགྲོ་བ་མེད་པ་རབ་ཏུ་ཤེས་ཀྱིས་གསོལ་པ། ཤིན་ཏུ་བསྙེངས་པ་མི་མངའ་བས། །ཞེ་སྡང་སྤང་ཕྱིར་བྱམས་གསུངས་པ། །དེ་བསྒྲུབས་སེལ་
བར་མི་འགྱུར་ཞེས། །དགྲ་འཇོམས་ཁྱོད་ལ་རྒོལ་མ་མཆིས། །ལྷའི་བུ་མིག་རྣམ་པར་དག་གིས་གསོལ་པ། ཤེས་རབ་གཏི་མུག་སྤང་བའི་ཕྱིར། །གསུངས་པ་དེ་ལ་བསྟེན་བགྱིས་ཀྱང་། །གཏི་མུག་སེལ་བར་མི་འགྱུར་ཞེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་རྣམ་པར་

རྟོག་པ་འཇོམས་ཀྱིས་གསོལ་པ། རྣམ་པར་རྟོག་པའི་གཉེན་པོར་ནི། །དབུགས་དབྱུང་རྔུབ་པ་དྲན་གསུངས་པ། །དེ་ལ་བརྩོན་བགྱིས་མ་ཞི་ཞེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་མཚན་མ་མེད་པ་ལྷུར་ལེན་པས་གསོལ་པ། ངའོ་སྙམ་པ་སྤང་སླད་དུ། །སྟོང་ཉིད་ཁྱོད་
ཀྱིས་བཀའ་སྩལ་ཏེ། །དེས་ནི་དེ་ཞི་མི་འགྱུར་ཞེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་ངའོ་སྙམ་པའི་ང་རྒྱལ་སྤངས་ཀྱིས་གསོལ་པ། ང་སྙམ་ང་རྒྱལ་སྤང་སླད་དུ། །མཚན་མ་མེད་པ་ཁྱོད་ཀྱིས་གསུངས། །བསྟེན་ཀྱང་ཞི་བར་མི་འགྱུར་ཞེས། །འདི་ན་ཁྱོད་ལ་རྒོལ་མ་
མཆིས། །ལྷའི་བུ་སེམས་རྒྱུན་རྣམ་པར་དག་པས་གསོལ་པ། ལྷག་པའི་བསམ་པ་དག་པ་ཡིས། །ཉོན་མོངས་ཐམས་ཅད་འཇིག་པར་འགྱུར། །དེས་ནི་ཉོན་མོངས་མི་ཟད་ཅེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་འདུ་ཤེས་རྣམ་པར་བཤིག་གིས་གསོལ་པ། ཕྱོགས་གང་
གཉེན་པོའི་རྣམ་པ་དང་། །ཉོན་མོངས་ལམ་དང་ལམ་འཇུག་ལ། །འཇིགས་པ་མེད་པར་རྒོལ་བ་ནི། །ཐུབ་པ་ཆེན་པོ་མ་མཐོང་ངོ་། །ལྷའི་བུ་ཐ་སྙད་ཤིན་ཏུ་ཤེས་པས་གསོལ་པ། བཅོམ་ལྡན་ཕྱོགས་དང་ཕྱོགས་མིན་དང་། །ཟད་དང་མ་ཟད་ཐ་སྙད་ཙམ། །འཇིགས་པ་མ་མཆིས་རྒོལ་
བགྱིད་པ། །ཐུབ་པ་དེ་ནི་མིང་ཙམ་མོ། །ལྷའི་བུ་ལུས་ཀྱི་ལས་དུལ་བས་གསོལ་པ། མཁྱེན་པས་ཡོངས་སུ་མཁྱེན་གྱུར་ནས། །ཁྱོད་ཀྱི་སྐུ་ཡི་ཕྲིན་ལས་འཇུག །ཐམས་ཅད་མ་ལུས་མཁྱེན་པས་ན། །དེས་ན་འདྲེན་པ་ཐམས་ཅད་མཁྱེན། །ལྷའི་བུ་ལུས་ཀྱི་ལས་ཡོངས་སུ་ཤེས་
པས་གསོལ་པ། སེམས་ཅན་རྣམས་ལ་ཐུགས་བརྩེ་བས། །དཔའ་བོ་ཁྱོད་སྐུའི་ཕྲིན་ལས་ནི། །མཐའ་དག་ཤིན་ཏུ་ངེས་པ་ལགས། །འཇིག་རྟེན་མགོན་ལ་ཕྱག་ཀྱང་འཚལ། །ལྷའི་བུ་ལུས་ཀྱི་ལས་ཤིན་ཏུ་ངེས་པས་གསོལ་པ། སྐུ་ཡི་ཕྲིན་ལས་རབ་ངེས་པར། །ལུས་ཅན་ཀུན་ལ་
སྨན་སླད་དུ། །འཇིག་རྟེན་སྒྲོན་མ་ཁྱོད་མཛད་དེ། །དེས་ན་ཁྱོད་ནི་གང་ཟག་མཆོག །ལྷའི་བུ་ལུས་ཀྱི་ལས་ཀྱི་མཐའ་ཤིན་ཏུ་མཐོང་བས་གསོལ་པ། སེམས་ཅན་ཀུན་ལ་སྨན་སླད་དུ། །འདྲེན་པ་ཐམས་ཅད་མཁྱེན་པ་ནི། །སྐུ་ཡི་ཕྲིན་ལས་དག་པ་དང་། །ལེགས་པར་ཡོངས་

སུ་བརྟགས་དང་ལྡན། །ལྷའི་བུ་ལུས་ཀྱི་ལས་ཀྱི་མཐའ་ཤིན་ཏུ་མཉམ་པར་བཞག་པས་གསོལ་པ། ཤིན་ཏུ་མཉམ་པར་བཞག་སྐུ་དང་། །སྐུ་ཡི་ཕྲིན་ལས་རྣམ་དག་དང་། །ལྡན་པར་སེམས་ཅན་བདེ་དོན་དུ། །གང་ཟག་མཆོག་ནི་སྤྱོད་པར་མཛད། །ལྷའི་བུ་ཚིག་གྲུབ་
ཀྱིས་གསོལ་པ། སྙན་ཅིང་ཡོན་ཏན་ལྡན་པ་དང་། །རྩུབ་པ་ཡོངས་སུ་སྤངས་པའི་གསུང་། །མཁྱེན་པས་ཤིན་ཏུ་ཡོངས་བརྟགས་ཤིང་། །མགོན་པོ་ཁྱོད་ནི་གསུང་བ་མཛད། །ལྷའི་བུ་དུས་སུ་སྨྲ་པས་གསོལ་པ། དུས་སུ་དོན་དང་ལྡན་པ་དང་། །དོན་མེད་ཡོངས་སུ་སྤངས་པའི་
གསུང་། །གསུང་བར་འོས་དང་བླང་འོས་པ། །འདྲེན་པ་ཁྱོད་ནི་གསུང་བ་མཛད། །ལྷའི་བུ་སྡུམས་བྱེད་བློ་གྲོས་ཀྱིས་གསོལ་པ། དབྱེན་དུ་འགྱུར་བ་ཡོངས་སྤངས་ཏེ། །འདུམ་པར་གྱུར་དང་ཡིད་འོང་བ། །དབྱེན་མེད་འབྲས་བུ་རྣམ་པར་སྨིན། །སྔོན་ཆད་ཁྱོད་ཀྱིས་གསུང་དུ་བརྗོད། །
ལྷའི་བུ་མི་སླུ་བས་གསོལ་པ། སྲོག་གི་དོན་དུའང་ཁྱོད་ཀྱིས་ནི། །སྲིད་པ་རྣམས་སུ་བརྫུན་མ་གསུངས། །དེ་བས་ཁྱོད་ཀྱི་གྲགས་པ་ཀུན། །འཇིག་རྟེན་དག་ན་ཐོགས་མ་མཆིས། །ལྷའི་བུ་ཡང་དག་པར་སྨྲ་བས་གསོལ་པ། འདི་ལྟར་འགྲོ་བ་ཐམས་ཅད་ཀྱང་། །སངས་རྒྱས་ཆོས་
རྣམས་བཙལ་སླད་དུ། །ཐུབ་པའི་གསུང་ལ་བསྟོད་པ་ནི། །ཡང་དག་གསུངས་པའི་རྒྱུ་འཐུན་ལགས། །ལྷའི་བུ་ཡང་དག་པའི་མཐའ་ལས་ངེས་པར་བྱུང་གིས་གསོལ་པ། མི་མཆོག་ཁྱོད་ཀྱིས་བདེན་པ་ཡིས། །རྫོགས་པའི་བྱང་ཆུབ་འདི་བསྒྲུབས་ཏེ། །ཆོས་ཀྱི་ཡང་དག་རང་
བཞིན་ཡང་། །རྐང་གཉིས་དམ་པ་ཁྱོད་ཀྱིས་མཁྱེན། །ལྷའི་བུ་ཡང་དག་པ་ལ་རྟུལ་བས་གསོལ་པ། འདུས་བྱས་དག་གི་ཆོས་ཀྱི་རྣམས། །ཡང་དག་ཇི་བཞིན་བལྟ་བ་དང་། །ཆོས་རྣམས་ཡང་དག་མཚན་ཉིད་ཀྱང་། །མི་ཡི་དབང་པོས་རབ་ཏུ་མཁྱེན། །ལྷའི་བུ་ལས་ལ་རྟོག་པས་གསོལ་
པ། ཡེ་ཤེས་ཡོངས་སུ་དག་པ་ཡིས། །བདག་ཉིད་དང་ནི་གཞན་དག་གི །ཚིག་གི་ལས་ཀྱང་རབ་ཏུ་མཁྱེན། །དེས་ན་རྒྱལ་བ་མཉམ་མ་མཆིས། །ལྷའི་བུ་ཡིད་ལ་རྟོག་པས་གསོལ་པ། མི་ཡི་དབང་པོའི་ཐུགས་ཀྱི་ལས། །ཇི་སྙེད་གང་དག་འཇུག་པ་ནི། །དེ་དག་འགྲོ་ལ་

ཐུགས་རྗེས་འཇུག །འགྲོ་ཕན་ཁྱོད་ལ་ཕྱག་ཀྱང་འཚལ། །ལྷའི་བུ་ཡིད་ཀྱི་རྣམ་པར་རྟོག་པ་ལ་མཁས་པས་གསོལ་པ། འགྲོ་ལ་ཐུགས་རྗེ་བསྐྱེད་ནས་ནི། །གང་ལ་ཁྱོད་ནི་སྤྱོད་མཛད་པ། །དེ་ལ་ཐུགས་ནི་དུལ་བར་བྱུང་། །འགྲོ་ཕན་ཁྱོད་ལ་ཕྱག་ཀྱང་འཚལ། །ལྷའི་བུ་ཐབས་ལ་མཁས་པས་
གསོལ་པ། འགྲོ་བའི་བསམ་པ་རྣམ་དཔྱད་ནས། །རྣམ་འདྲེན་ཐུགས་ཀྱི་ཕྲིན་ལས་འཇུག །ཐུབ་པ་ཡེ་ཤེས་སྣ་ཚོགས་ནི། །མཁྱེན་བཞིན་ཀུན་ཏུ་རབ་ཏུ་འཇུག །ལྷའི་བུ་ཡིད་རྣམ་པར་བཤིག་གིས་གསོལ་པ། སངས་རྒྱས་ས་དང་ཡིད་ཀྱི་ལས། །སེམས་ཅན་ཐུགས་རྗེས་གཟིགས་
པས་འབྱུང་། །སངས་རྒྱས་ཉིད་ལ་ཡེ་ཤེས་ཐབས། །རང་བཞིན་མེད་པར་རབ་ཏུ་མཁྱེན། །ལྷའི་བུ་འདས་པ་ལ་མཁས་པས་གསོལ་པ། སྦྱིན་དང་ཚུལ་ཁྲིམས་བཟོད་པ་དང་། །བརྩོན་འགྲུས་བསམ་གཏན་དག་ལ་ཡང་། །གང་གིས་གང་ལ་སྔོན་སྤྱད་པ། །སྔོན་གྱི་དུས་ཀྱང་རབ་ཏུ་མཁྱེན། །
ལྷའི་བུ་འདས་པ་ལ་རྟོག་པས་གསོལ་པ། བྱང་ཆུབ་མཆོག་ནི་ཚོལ་མཛད་ཅིང་། །གང་དུ་ཁྱོད་ཀྱིས་སྔོན་སྤྱད་པ། །སྔོན་གྱི་སྤྱོད་པ་ཡོངས་བརྟགས་ནས། །སངས་རྒྱས་བྱེ་བ་རབ་ཏུ་མཁྱེན། །ལྷའི་བུ་སྔོན་གྱི་ཚུལ་ཕུན་སུམ་ཚོགས་པས་གསོལ་པ། བསྐལ་པ་བྱེ་བ་གྲངས་མེད་དུ། །གང་དུ་
ཁྱོད་ཀྱིས་སྔོན་སྤྱད་པ། །སྔོན་གྱི་ཚུལ་ནི་དགོངས་མཛད་ཀྱང་། །ཁྱོད་ཀྱི་ཐུགས་ཡིད་ཐོགས་མི་མངའ། །ལྷའི་བུ་སྔོན་གྱི་ཚུལ་ལ་ཡོངས་སུ་རྟོག་པས་གསོལ་པ། སངས་རྒྱས་མང་ལས་བྱུང་བ་ཡི། །ཏིང་འཛིན་མངོན་པར་བསྒྲུབ་བྱ་བ། །སངས་རྒྱས་བྱེ་བ་གྲངས་མེད་ལ། །རྣམ་
པར་འདྲེན་པ་ཁྱོད་ཀྱིས་ཞུས། །ལྷའི་བུ་སྔོན་གྱི་སྦྱོར་བ་ལས་ངེས་པར་བྱུང་གིས་གསོལ་པ། སྔོན་གྱི་སངས་རྒྱས་དྲུང་དག་ཏུ། །གྲངས་མེད་དཔག་ཏུ་མེད་པ་ཡི། །ཏིང་འཛིན་སྒོ་དག་འདྲེན་པ་ཡིས། །ཞུས་ཤིང་བསྒོམ་པ་མཛད་པར་གྱུར། །ལྷའི་བུ་སྔོན་གྱི་གནས་ལ་རྟོག་པས་
གསོལ་པ། འཁོར་བའི་ཉེས་པ་རབ་མང་དང་། །བཀུར་སྟི་རྣམ་པ་སྣ་ཚོགས་དག །གཟིགས་པས་སེམས་ཅན་རྣམས་ལ་སྟོན། །སེམས་ཅན་ལོང་བ་རྣམས་ཀྱང་འགྲེལ། །ལྷའི་བུ་སྔོན་གྱི་དུས་ན་འཕྲུལ་པས་གསོལ་པ། གཞན་དང་གཞན་དག་ཟོས་ཤིང་འཚལ། །རྩེ་ཞིང་རབ་ཏུ་

དགའ་བ་བགྱིས། །གནོད་པ་མི་བཟད་བགྱིས་པ་དག །གཞན་དང་གཞན་ཡང་ཁྱོད་ཀྱིས་གཟིགས། །ལྷའི་བུ་སྔོན་གྱི་སྤྱོད་པས་ཡང་དག་པར་བྱུང་བས་གསོལ་པ། ཐམས་ཅད་མཁྱེན་པ་འགྲོ་རྟོགས་པ། །ཁྱོད་ཀྱི་ཡེ་ཤེས་འདས་དུས་ཀྱི། །ལས་དང་བསམ་
གཏན་སྙོམས་འཇུག་དང་། །འགྲོ་བ་རྣམས་ལ་ཐོགས་མ་མཆིས། །ལྷའི་བུ་ཕྱི་མའི་མཐའ་ལ་མཁས་པས་གསོལ་པ། འདྲེན་པ་ཁྱོད་ཀྱི་མཁྱེན་པ་ནི། །མ་འོངས་དུས་ཀྱི་འཆི་འཕོ་དང་། །སྐྱེ་དང་ལས་ཀྱི་རྣམ་སྨིན་ལ། །ཐོགས་པར་འགྱུར་བ་མ་མཆིས་སོ། །ལྷའི་བུ་མ་འོངས་པའི་སྤྱོད་
ཡུལ་གྱིས་གསོལ་པ། བརྟེན་པ་འགྲོ་བ་མཁས་ཁྱོད་ཀྱི། །མཁྱེན་པ་ཕྱི་དུས་སེམས་ཅན་གྱི། །བསམ་དང་ལས་ཀྱི་འབྲས་བུ་དང་། །འགྲོ་བ་རྣམས་ལ་ཐོགས་མ་མཆིས། །ལྷའི་བུ་སྲིད་པ་ལས་བསྐྱོད་ཀྱིས་གསོལ་པ། ཁམས་རྣམས་གསུམ་པོ་འདི་དག་དང་། །དུས་གསུམ་ཀུན་ལ་
མཁས་ཁྱོད་ཀྱི། །ཡེ་ཤེས་མཆོག་ནི་མི་ཆགས་ཏེ། །སྲིད་པའི་སྤྱོད་ཡུལ་ཁྱོད་ཀྱིས་མཁྱེན། །ལྷའི་བུ་ཐ་སྙད་ལ་སྤྱོད་པས་གསོལ་པ། ལས་དང་སེམས་ཅན་འགྲོ་བ་དང་། །རྣམ་པར་སྨིན་པ་མྱོང་བ་དག །དེ་དག་ཐམས་ཅད་མིང་ཙམ་དུ། །རྐང་གཉིས་དམ་པ་བསྟན་པ་མཛད། །ལྷའི་བུ་ད་ལྟར་བྱུང་བ་ལ་
ཡང་དག་པར་རྟོག་པས་གསོལ་པ། དཔའ་བོ་ཁྱོད་ཀྱི་མཁྱེན་པ་ནི། །ད་ལྟར་བྱུང་ལ་ཐོགས་མ་མཆིས། །གྲངས་མེད་སངས་རྒྱས་ཞིང་རྣམས་ནི། །འཇིག་རྟེན་མགོན་པོས་རབ་ཏུ་མཁྱེན། །ལྷའི་བུ་ད་ལྟར་བྱུང་བ་ལ་རྣམ་པར་དཔྱོད་པས་གསོལ་པ། མི་ཡི་དབང་པོས་རྣམ་དཔྱད་ནས། །བྱིས་པའི་བློ་གྲོས་
རྨོངས་བགྱིད་པ། །དུས་གསུམ་དངོས་པོ་མ་མཆིས་པར། །ངེས་པར་མཉམ་པ་ཉིད་དུ་གཟིགས། །ལྷའི་བུ་མི་གནས་པའི་བློ་གྲོས་ཀྱིས་གསོལ་པ། དུས་གསུམ་གནས་པ་མ་མཆིས་ཤིང་། །ངོ་བོ་ཉིད་ལ་མི་གནས་ཏེ། །དངོས་པོ་ཐམས་ཅད་དངོས་མེད་པར། །རྣམ་པར་འདྲེན་པ་ཁྱོད་ཀྱིས་གཟིགས། །
ལྷའི་བུ་དུས་གསུམ་མངོན་པར་བསྐུལ་བས་གསོལ་པ། འདས་པ་དག་དང་མ་འོངས་དང་། །ད་ལྟར་བྱུང་བའི་ཕུང་པོ་རྣམས། །མ་མཆིས་དངོས་པོ་མ་མཆིས་པར། །སྐྱེས་བུ་དམ་པས་བསྟན་པ་མཛད། །ལྷའི་བུ་ཆགས་མེད་ཡིད་ཀྱིས་གསོལ་པ། དུས་གསུམ་སེམས་ཅན་ཐམས་ཅད་ལ། །སྙིང་པོ་མཆིས་པར་

མ་བསྟན་ཏེ། །སྒྱུ་མ་སྨིག་རྒྱུ་མིག་ཡོར་དང་། །བྲག་ཅ་ལྟ་བུར་ཁྱོད་ཀྱིས་བསྟན། །ལྷའི་བུ་དུས་གསུམ་དཔོག་གིས་གསོལ་པ། འདྲེན་པ་ཁྱོད་ཀྱི་མཁྱེན་པ་ནི། །དུས་གསུམ་པོ་དག་ཀུན་དུ་ཡང་། །སྒྱུ་མ་ལྟ་བུར་མཁྱེན་པས་ན། །ཁྱོད་ཀྱི་དབང་པོ་ཆགས་མི་མངའ། །ལྷའི་བུ་མོས་པ་ཡོངས་སུ་རིག་པར་
བྱེད་ཀྱིས་གསོལ་པ། གང་གི་ནུབ་མོ་དཔའ་ཁྱོད་ཀྱིས། །བྱང་ཆུབ་མངོན་དུ་བགྱིས་གྱུར་པ། །དེ་དུས་ཚུན་ཆད་མོས་པ་ལ། །བྲི་བར་གྱུར་པར་ཡོང་མི་གདའ། །ལྷའི་བུ་མོས་པ་ཡང་དག་ཐོབ་ཀྱིས་གསོལ་པ། འཇིག་རྟེན་སྒྲོལ་མའི་མོས་པ་ནི། །བར་དུ་རྒྱུན་ཆད་མི་འགྱུར་ཏེ། །རྟག་པར་ཁྱོད་ཀྱི་མོས་པ་
དེས། །ཁྱོད་ཀྱི་སྲས་རྣམས་མོས་པ་ཆེ། །ལྷའི་བུ་མོས་པས་མངོན་འཕགས་ཀྱིས་གསོལ་པ། ཆབ་ལས་པད་མ་ཇི་བཞིན་དུ། །ཁྱོད་ནི་མོས་པས་མངོན་དུ་འཕགས། །འཇིག་རྟེན་དག་གིས་མི་གོས་ཏེ། །པད་མ་ཆབ་ཀྱིས་ཇི་བཞིན་ནོ། །ལྷའི་བུ་མོས་པས་ཡོངས་སུ་གྲོལ་གྱིས་གསོལ་པ།
འཇིག་རྟེན་མགོན་དང་མོས་པ་ནི། །ཆོས་ཀྱི་དབྱིངས་ཞེས་བརྗོད་པ་སྟེ། །གཉིས་མེད་གཉིས་སུ་བགྱིད་མ་མཆིས། །སྨད་པ་མེད་པ་ཁྱོད་ཀྱིས་གཟིགས། །ལྷའི་བུ་བརྩོན་འགྲུས་ཡང་དག་ཐོབ་ཀྱིས་གསོལ་པ། གཟི་བརྗིད་ཆེན་པོ་བརྩོན་འགྲུས་ཀྱིས། །བྱང་ཆུབ་ཡང་དག་བརྙེས་པར་གྱུར། །མཛད་
པ་མཛད་ཀྱང་མགོན་པོ་ཁྱོད། །བརྩོན་འགྲུས་བཏང་བ་ཡོང་མ་མཛད། །ལྷའི་བུ་དྲན་པ་ཕུན་སུམ་ཚོགས་པས་གསོལ་པ། དཔའ་བོ་ཆེན་པོའི་དགོངས་པ་ནི། །ཐམས་ཅད་ཀུན་གྱི་རྗེས་སུ་འཇུག །མཛད་པ་མཛད་ཀྱང་མགོན་པོ་ཁྱོད། །དགོངས་པ་བྲི་བ་ཡོང་མ་མཆིས། །ལྷའི་བུ་སེམས་མཉམ་པར་
བཞག་པས་གསོལ་པ། མགོན་པོ་རྟག་ཏུ་མཉམ་བཞག་སྟེ། །སེམས་ཅན་རྣམས་ཀྱི་སྤྱོད་པ་མཁྱེན། །འདྲེན་པ་སྤྱོད་པའི་དབང་གིས་ནི། །སེམས་ཅན་རྣམས་ལ་ཆོས་ཀྱང་སྟོན། །ལྷའི་བུ་ཤེས་རབ་ལྷུར་ལེན་གྱིས་གསོལ་པ། འཇིག་རྟེན་སྒྲོན་མར་གྱུར་ཁྱོད་ཀྱི། །ཡེ་ཤེས་རྒྱ་མཚོའི་མཐའ་
མ་ནི། །བསྐལ་པ་བྱེ་བར་བརྗོད་བགྱིས་ཀྱང་། །སངས་རྒྱས་རྣམས་ཀྱིས་བཤད་མི་སྤྱོད། །ལྷའི་བུ་རྣམ་པར་གྲོལ་བ་ལ་མཁས་པས་གསོལ་པ། རྣམ་པར་གྲོལ་དང་མ་གྲོལ་བ། །གང་སླད་ཁྱོད་ཀྱིས་མ་བརྙེས་པས། །མཚུངས་པ་མེད་པ་ཁྱོད་ལ་ནི། །རྣམ་གྲོལ་ཡོངས་སུ་ཉམས་མི་མངའ། །

ལྷའི་བུ་རྣམ་པར་གྲོལ་བའི་ཡེ་ཤེས་ལ་བརྩོན་པས་གསོལ་པ། ཐུབ་པ་ཁྱོད་ནི་རྣམ་གྲོལ་ནས། །ངོ་བོ་ཉིད་མེད་མཁྱེན་པས་ན། །རྣམ་གྲོལ་ཡེ་ཤེས་གཟིགས་པ་ནི། །ཡང་དག་མཁྱེན་པ་ཉམས་མི་མངའ། །ལྷའི་བུ་སྔོན་གྱི་སྲིད་པ་རྣམ་པར་དཔྱོད་ཀྱིས་གསོལ་པ། མར་མེ་མཛད་པ་
ཚུན་ཆད་དུ། །དཔའ་བོ་ཡང་དག་གཟིགས་ཁྱོད་ཀྱི། །སྤྱོད་ལ་འཁྲུལ་པ་མི་མངའ་སྟེ། །དེས་ན་སངས་རྒྱས་ལེགས་ཞེས་བསྟོད། །ལྷའི་བུ་ཟབ་མོ་ལ་སྤྱོད་པས་གསོལ་པ། སྲོག་ཆགས་གཞན་དག་ཇི་བཞིན་དུ། །བདེ་གཤེགས་ཁྱོད་ལ་ཆགས་མི་མངའ། །ཆོས་ཀྱི་རང་བཞིན་མཁྱེན་པས་
ན། །རང་བཞིན་དེ་ལ་རྨོངས་མི་མངའ། །ལྷའི་བུ་བློ་གྲོས་ཡངས་པས་གསོལ་པ། ཐམས་ཅད་མཁྱེན་པ་ཁྱོད་ལ་ནི། །རྣམ་པ་ཀུན་དུ་བསྙེལ་མི་མངའ། །མགོན་པོའི་དགོངས་པ་ཉེར་གཞག་པས། །ཐུབ་པ་འབྲུ་མར་སྣོད་དང་འདྲ། །ལྷའི་བུ་སེམས་གཡེང་བ་མེད་ཀྱིས་གསོལ་པ། འཇིག་
རྟེན་སྒྲོན་མ་ཁྱོད་ལ་ནི། །མཉམ་པར་མ་བཞག་སེམས་མི་མངའ། །མ་འདྲེས་སངས་རྒྱས་ཆོས་ཀྱི་རྣམས། །སྲོག་ཆགས་ཀུན་གྱིས་ཤེས་པར་དཀའ། །ལྷའི་བུ་ཡེ་ཤེས་ལ་རབ་ཏུ་གནས་ཀྱིས་གསོལ་པ། བདེ་བར་གཤེགས་པ་ཁྱོད་ལ་ནི། །མ་བརྟགས་བཏང་སྙོམས་མི་མངའ་སྟེ། །མི་
ཡི་དབང་པོའི་སངས་རྒྱས་ཆོས། །མ་འདྲེས་པ་ནི་བསམ་མི་ཁྱབ། །ལྷའི་བུ་ཐམས་ཅད་ཟིལ་གནོན་གྱིས་གསོལ་པ། སྐྱེས་བུ་ཁྱུ་མཆོག་ཁྱོད་ལ་ནི། །འཇིག་རྟེན་གསུམ་ན་མཚུངས་མ་མཆིས། །ཐམས་ཅད་མཁྱེན་པ་མ་ཕམ་པ། །ཁྱོད་ཀྱིས་ཆོས་རྣམས་ཐམས་ཅད་མཁྱེན། །ལྷའི་བུ་སྙིང་པོ་
བླངས་པས་གསོལ་པ། སེམས་ཅན་སྙིང་པོ་བླ་ན་མེད། །ཆོས་རྣམས་ཀུན་ལ་འཇིགས་མི་མངའ། །སངས་རྒྱས་ཀུན་དང་མཉམ་བརྙེས་པ། །སངས་རྒྱས་བྱང་ཆུབ་ཕྱག་འཚལ་ལོ། །གནས་གཙང་མ་པའི་ལེའུ་སྟེ་ཉི་ཤུ་རྩ་བཞི་པའོ།། །།དེ་ནས་དེའི་ཚེ་གཞན་
མུ་སྟེགས་ཅན་སྤྱོད་པ་ཅན་དང་། ཀུན་ཏུ་རྒྱུ་དྲུག་ཁྲིས་ལྷ་མ་ཡིན་དང་། ནམ་མཁའ་ལྡིང་དང་། ཀླུའི་བུ་མོ་དང་། ཀླུ་དང་། གྲུལ་བུམ་དང་། དྲི་ཟ་དང་། གནོད་སྦྱིན་དང་། མིའམ་ཅི་དང་། ཕྲེང་ལྡན་གླང་པོ་ཅན་དང་། རྒྱལ་ཆེན་བཞིའི་རིས་དང་། སུམ་ཅུ་རྩ་གསུམ་དང་། འཐབ་

བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་པ་དང་། འོད་གསལ་དང་། དགེ་རྒྱས་དང་། འབྲས་བུ་ཆེ་བའི་ལྷ་དག་གིས་མཆོད་པ་ཡང་མཐོང་། ལུང་བསྟན་པ་ཡང་ཐོས། གནས་གཙང་མའི་རིས་ཀྱི་ལྷ་དག་གིས་བསྟོད་པ་བརྗོད་པ་ཡང་ཐོས་ནས་
ངོ་མཚར་ཐོབ་པར་གྱུར་ཏེ་ཆོས་ཀྱི་ཚུལ་ལ་འཇུག་པ་འདི་ཐོས་ནས་འདི་ལྟར་སྔོན་ཆད་མ་ཐོས་པའི་ཆོས་ཀྱི་ཚུལ་ཐོས་པས་ཡིད་གཉིས་སུ་གྱུར། ནེམ་ནུར་དང་། ཐེ་ཚོམ་ཟ་བར་གྱུར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་སྔན་ཆད་མ་ཐོས་པའི་ཆོས་བསྟན་པ་འདི་ཐོས་ནས་
བདག་ཅག་ནི་ཀུན་དུ་རྒྱུའི་གནས་ཀྱང་མི་འཚལ། ཁྱིམ་གྱི་གནས་ཀྱང་མི་འཚལ་བར་གྱུར་ཅིང་འདི་ལྟར་སྔོན་ཆད་མ་ཐོས་པའི་ཆོས་ཀྱི་ཚུལ་འདི་ཐོས་ནས་ཆོས་འདི་ལ་ནེམ་ནུར་དང་ཐེ་ཚོམ་དུ་གྱུར་ཏེ། སེམས་དང་བར་ཡང་མ་གྱུར་མོད་ཀྱི། འོན་ཀྱང་དགེ་སྦྱོང་གཽ་ཏ་མ་ཁྱོད་ལ་བདག་ཅག་ཡིད་ཆེས་པ་
མཆིས་སོ། །དེ་ཅིའི་སླད་དུ་ཞེ་ན། འདི་ལྟར་དགེ་སྦྱོང་གཽ་ཏ་མ་ཁྱོད་ཀྱིས་རྫུ་འཕྲུལ་མངོན་པར་འདུ་བྱ་བ་འདི་ལྟ་བུ་མངོན་པར་མཛད་དེ། རྫུ་འཕྲུལ་མངོན་པར་འདུ་བྱ་བ་ཇི་ལྟ་བུ་མངོན་པར་མཛད་པས་བདག་ཅག་གིས་ལྷའི་འཁོར་རྒྱ་ཆེན་པོ་འདི་དག་དང་། ཐམས་ཅད་དང་ལྡན་པའི་འཁོར་ཕལ་ཆེར་གཽ་ཏ་
མ་ཁྱོད་ཀྱི་ལེགས་པར་གསུངས་པ་འཚལ་ཞིང་ཡི་རངས་བར་གྱུར་བ་མཐོང་སྟེ། དེས་ན་བདག་ཅག་དགེ་སྦྱོང་གཽ་ཏ་མ་ཁྱོད་ལ་དད་པ་མཆིས་པར་གྱུར་ཏོ། །ཀྱེ་གཽ་ཏ་མ་གང་འབྲས་བུ་ཆེ་བའི་ལྷ་རྣམས་ཀྱིས་ཆོས་ཐམས་ཅད་ནི་དེ་བཞིན་གཤེགས་པའོ་ཞེས་སྨྲས་པ་དེ་ལ་ཇི་ལྟར་ཆོས་ཐམས་ཅད་དེ་བཞིན་
གཤེགས་པ་སྙམ་དུ་བདག་ཅག་ཐེ་ཚོམ་ཆེར་འཚལ་ལོ། །དགེ་སྦྱོང་གཽ་ཏ་མ་ཁྱོད་ནི་ཅི་ནས་བདག་ཅག་ལེགས་པར་བཤད་པའི་དོན་དེ་རྟོགས་ནས་མུན་པ་མེད་པར་གྱུར་ཏེ། སྟན་འདི་ལས་ལྡང་བར་འགྱུར་བ་དེ་ལྟར་བདག་ཅག་ལ་ཆོས་སྟོན་སྤྱོད་དོ་སྙམ་སྟེ། བདག་ཅག་དགེ་སྦྱོང་གཽ་ཏ་མ་ཁྱོད་
ལ་དེ་ལྟར་མངོན་པར་དད་པར་གྱུར་ཏོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གཞན་མུ་སྟེགས་ཅན་སྤྱོད་པ་ཅན་དང་། ཀུན་ཏུ་རྒྱུ་རྣམས་ལ་འདི་སྐད་ཅེས་བཀའ་སྩལ་ཏོ། །ཀུན་ཏུ་རྒྱུ་དག་དེའི་ཕྱིར་ཁྱེད་ཉིད་ལ་དྲིས། ཁྱེད་ཀྱིས་ཇི་ལྟར་བཟོད་པ་དེ་ལྟར་ལན་ཐོབ་ཤིག །དགེ་

སྦྱོང་གཽ་ཏ་མ་ལེགས་སོ་ཞེས་གསོལ་ཏེ། ཀུན་ཏུ་རྒྱུ་དེ་དག་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །ཀུན་ཏུ་རྒྱུ་དག་ཁྱེད་ཀྱིས་ཇི་ལྟར་མངལ་དུ་འཇུག་པ་ཤེས་སམ། དེ་དག་གིས་གསོལ་པ། ཀྱེ་གཽ་ཏ་
མ་བདག་ཅག་གིས་བསྟན་བཅོས་ལས་ཐོས་ན་གསུམ་འདུས་ནས་མངལ་དུ་འཇུག་པར་འགྱུར་ཏེ། གང་འདི་ཕ་དང་མ་གཉིས་ཀྱང་ཚོགས་པ་དང་། ཆགས་པར་ཡང་གྱུར་པ་དང་། ཆགས་ནས་ཀྱང་འདོད་པའི་རྣམ་པར་རྟོག་པ་རྣམས་ཀྱིས་རྣམ་པར་བརྟགས་པས་འདོད་ཆགས་ཀྱང་བྱུང་བ་དེའི་ཚེ་
མངལ་དུ་འཇུག་པར་འགྱུར་རོ་ཞེའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་ཏུ་རྒྱུ་དག་འདི་ལ་ཇི་སྙམ་དུ་སེམས། ཕ་དང་མ་གཉིས་རྣམ་པར་རྟོག་པའི་ཚེ་འདོད་ཆགས་དེ་མའི་སེམས་ལས་བྱུང་ངམ་གསོལ་པ། ཀྱེ་གཽ་ཏ་མ་མ་ལགས་སོ། །མའི་རྣམ་པར་རྟོག་པ་ལས་བྱུང་ངམ།
ཀྱེ་གཽ་ཏ་མ་མ་ལགས་སོ། །དེ་ཕའི་སེམས་ལས་བྱུང་ངམ། །ཀྱེ་གཽ་ཏ་མ་མ་ལགས་སོ། །ཕའི་རྣམ་པར་རྟོག་པ་ལས་བྱུང་ངམ། ཀྱེ་གཽ་ཏ་མ་མ་ལགས་སོ། །ཀུན་ཏུ་རྒྱུ་དག་འདི་ལ་ཇི་སྙམ་དུ་སེམས། ཕའི་འདོད་ཆགས་གང་ཡིན་པ་དེ་མའི་མངལ་དུ་ཞུགས་སམ། ཀྱེ་གཽ་ཏ་མ་
དེ་ནི་མ་ལགས་སོ། །ཀུན་ཏུ་རྒྱུ་དག་འདི་ཇི་སྙམ་དུ་སེམས། ཕའི་སེམས་གང་ཡིན་པ་དེ་མའི་མངལ་དུ་ཞུགས་སམ། ཀྱེ་གཽ་ཏ་མ་དེ་ནི་མ་ལགས་སོ། །ཀུན་ཏུ་རྒྱུ་དག་འདི་ལ་ཇི་སྙམ་དུ་སེམས། ཕའི་ཀུན་ཏུ་རྟོག་པ་དེ་མའི་མངལ་དུ་ཞུགས་སམ། ཀྱེ་གཽ་ཏ་མ་དེ་ནི་མ་ལགས་སོ། །ཀུན་
ཏུ་རྒྱུ་དག་འདི་ལ་ཇི་སྙམ་དུ་སེམས། མངལ་ན་གནས་པ་དེ་ལྷ་ལས་ཤི་འཕོས་ཏེ་མའི་མངལ་དུ་ཞུགས་སམ། ཀྱེ་གཽ་ཏ་མ་མ་འཚལ་ཏོ། །ཀུན་ཏུ་རྒྱུ་དག་འདི་ལ་ཇི་སྙམ་དུ་སེམས། མངལ་ན་གནས་པ་དེ་མི་དང་། ལྷ་མ་ཡིན་དང་། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་།
གཤིན་རྗེའི་འཇིག་རྟེན་ནས་ཤི་འཕོས་ཏེ་མའི་མངལ་དུ་ཞུགས་སམ། ཀྱེ་གཽ་ཏ་མ་མ་འཚལ་ཏོ། །ཀུན་ཏུ་རྒྱུ་དག་འདི་ལ་ཇི་སྙམ་དུ་སེམས། མངལ་ན་གནས་པ་དེ་གཟུགས་ཡོད་པའམ། གཟུགས་མེད་པ་ཞིག་མའི་མངལ་དུ་ཞུགས་སམ། ཀྱེ་གཽ་ཏ་མ་མ་འཚལ་ཏོ། །ཀུན་ཏུ་རྒྱུ་དག་འདི་ལ་

ཇི་སྙམ་དུ་སེམས། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མའི་མངལ་དུ་ཞུགས་སམ། ཀྱེ་གཽ་ཏ་མ་མ་འཚལ་ཏོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གཞན་མུ་སྟེགས་ཅན་ཀུན་ཏུ་རྒྱུ་དེ་དག་ལ་འདི་སྐད་ཅེས་བཀའ་
སྩལ་ཏོ། །ཀུན་ཏུ་རྒྱུ་དག་ཆོས་འདི་ནི་ཟབ་ཅིང་ཕྲ་སྟེ། མཁས་པ་ཤེས་པ་བློ་དང་ལྡན་པས་རིག་པར་བྱ་བ་ཡིན་ཏེ། བརྟག་ཏུ་མེད་ཅིང་བརྟག་པའི་ཡུལ་མ་ཡིན་ལ། བལྟ་དཀའ་ཞིང་ཤེས་པར་དཀའ་བས་དེ་ནི་ཁྱེད་ཡུན་རིང་པོར་གཞན་དུ་བལྟས་པ། གཞན་དུ་མོས་པ། གཞན་
དུ་དད་པ། གཞན་དུ་བརྩོན་པ། གཞན་དུ་ལྟ་བའི་གནས་ལ་གནས་པ་རྣམས་ཀྱིས་ཤེས་པར་མི་ནུས་མོད་ཀྱི། ཀུན་ཏུ་རྒྱུ་དག་འོན་ཀྱང་རིགས་ཀྱི་བུའམ། རིགས་ཀྱི་བུ་མོ་དག་ཚུལ་དང་འདྲ་བའི་དགེ་བའི་བཤེས་གཉེན་ལ་བརྟེན་ནས་ཆོས་ཟབ་མོ་རྣམས་ལ་མིག་སྐྱེ་བར་འགྱུར་ཏེ། ཀུན་ཏུ་རྒྱུ་དག་
འདི་ལྟ་སྟེ། དཔེར་ན་མི་མིག་གི་དབང་པོ་ཉམས་པ་ནི་དེའི་ཚུལ་དང་འདྲ་བའི་གསོ་བ་བྱེད་པ་དགེ་བའི་བཤེས་གཉེན་ལ་བརྟེན་ན་ཚེ་འདི་ཉིད་ལ་མིག་ཡོངས་སུ་དག་པར་འགྱུར་ཏེ། མིག་དེས་ཀྱང་ཚེ་འདི་ཉིད་ལ་གཟུགས་རྣམས་མཐོང་བར་འགྱུར་རོ། །ཀུན་ཏུ་རྒྱུ་དག་དེ་བཞིན་དུ་རིགས་ཀྱི་བུའམ། རིགས་
ཀྱི་བུ་མོ་ཤེས་རབ་ཀྱི་མིག་ཉམས་པར་གྱུར་པས་ཀྱང་ཚུལ་དང་འདྲ་བའི་དགེ་བའི་བཤེས་གཉེན་ལ་བརྟེན་ན་ཤེས་རབ་ཀྱི་མིག་རྣམ་པར་དག་པར་འགྱུར་ཏེ། དེས་ཀྱང་ཆོས་ཟབ་མོ་རྣམས་མཐོང་བར་འགྱུར་རོ། །ཀུན་ཏུ་རྒྱུ་དག་ཁྱེད་ཀྱང་ཡུན་རིང་པོ་ནས་གཞན་དུ་བལྟས་པ། སྔོན་ལོག་པའི་གདམས་
ངག་གིས་བསླུས་པ། ཆོས་མ་ཡིན་པ་ལ་ཆོས་སུ་འདུ་ཤེས་པ། ཐར་པ་མ་ཡིན་པ་ལ་ཐར་པར་འདུ་ཤེས་པ། འབྱུང་བ་མ་ཡིན་པ་ལ་འབྱུང་བར་འདུ་ཤེས་པ། ཆུད་ཟོས་པ་རྣམས་ཀྱིས་ཆུད་གཟན་པ་ཡིན་ཏེ། ཀུན་ཏུ་རྒྱུ་དག་འདི་ལྟ་སྟེ། དཔེར་ན་ལོང་བའི་དམིགས་བུ་ལོང་བས་བྱས་ན།
གང་འདི་བཀྲི་བ་དང་། ཁྲིད་པ་དེ་གཉི་ག་ཡང་ཚུལ་མ་ཡིན་པར་སྡུག་བསྔལ་ཐོབ་པར་འགྱུར་བར་ཤེས་པར་བྱའོ། །ཀུན་ཏུ་རྒྱུ་དག་དེ་བཞིན་དུ་དགེ་སློང་ངམ། བྲམ་ཟེ་གང་ལ་ལ་སྟོན་པ་མ་ཡིན་པར་བདག་ཅག་ནི་སྟོན་པ་ཡིན་ནོ་ཞེས་ཁས་འཆེ་བ་དང་། ཡང་དག་པར་རྫོགས་པའི་སངས་རྒྱས་མ་

ཡིན་པར་བདག་ཅག་ནི་ཡང་དག་པར་རྫོགས་པའི་སངས་རྒྱས་ཡིན་ནོ་ཞེས་ཁས་འཆེ་བ་དང་། འབྱུང་བ་ལ་མཁས་པ་མ་ཡིན་པར་བདག་ཅག་ནི་འབྱུང་བ་ལ་མཁས་པའོ་ཞེས་ཁས་འཆེ་བ་དང་། འབྱུང་བ་མཐོང་བ་མ་ཡིན་པར་བདག་ཅག་ནི་འབྱུང་བ་མཐོང་བ་ཡིན་ནོ་ཞེས་ཁས་འཆེ་བ་དང་། མུ་
སྟེགས་བྱེད་པ་མ་ཡིན་པར་བདག་ཅག་ནི་མུ་སྟེགས་བྱེད་པ་ཡིན་ནོ་ཞེས་ཁས་འཆེ་བ་ཡིན་ཏེ། དེ་དག་སྟོན་པ་མ་ཡིན་པར་སྟོན་པའོ་ཞེས་ཁས་འཆེ་ཞིང་གང་རྗེས་སུ་སྟོན་པ་དེ་ནི་ལོག་པར་རྗེས་སུ་སྟོན་པར་འགྱུར། ཡང་དག་པར་རྫོགས་པའི་སངས་རྒྱས་མ་ཡིན་པར་གང་ཁོང་དུ་ཆུད་པར་བྱེད་པ་དེ་ནི་
ལོག་པར་ཁོང་དུ་ཆུད་པར་བྱེད་པར་འགྱུར། གང་འབྱུང་བ་ལ་མཁས་པ་མ་ཡིན་པར་གང་འབྱིན་པ་དེ་ནི་ལོག་པར་འབྱིན་པར་འགྱུར། འབྱུང་བ་མཐོང་བ་མ་ཡིན་པར་གང་འབྱུང་བ་སྟོན་པ་དེ་ནི་ལོག་པར་སྟོན་པར་འགྱུར། མུ་སྟེགས་བྱེད་པ་མ་ཡིན་པར་གང་སྒྲོལ་བ་དེ་ནི་ལོག་པར་སྒྲོལ་བར་
འགྱུར་ཏེ། དེ་དག་ནི་ཚུལ་མ་ཡིན་པར་སྡུག་བསྔལ་ཐོབ་པར་འགྱུར་རོ། །ཀུན་ཏུ་རྒྱུ་དག་འདི་ལྟ་སྟེ། དཔེར་ན་བ་ལང་རྫི་རབ་ཀ་ལ་མཁས་པ་མ་ཡིན་པས་རབ་ཀ་མ་ཡིན་པར་བ་ལང་བསྒྲལ་ན། དེའི་བ་ལང་དེ་དག་གིས་ཕ་རོལ་དང་ཚུ་རོལ་གྱི་འགྲམ་མ་རྙེད་ནས་འཁྱིལ་ཏེ། དེ་ཉིད་དུ་ཚུལ་མ་ཡིན་པར་
སྡུག་བསྔལ་ཐོབ་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་བ་ལང་རྫི་དེ་རབ་ཀ་ལ་མི་མཁས་པའི་ཕྱིར་རོ། །ཀུན་ཏུ་རྒྱུ་དག་དེ་བཞིན་དུ་གང་ལ་ལ་མུ་སྟེགས་བྱེད་པ་མ་ཡིན་པར་མུ་སྟེགས་བྱེད་པར་ཁས་འཆེ་ཞིང་གང་སྒྲོལ་བ་དེ་ནི་ཚུལ་མ་ཡིན་པར་སྡུག་བསྔལ་ཐོབ་པར་འགྱུར་རོ། །ཀུན་ཏུ་རྒྱུ་དག་
ང་ནི་སྟོན་པ་ཉིད་ཡིན་ལ་སྟོན་པར་ཁས་འཆེ་བས་ང་གང་རྗེས་སུ་སྟོན་པ་དེ་ཡང་དག་པར་རྗེས་སུ་སྟོན་པ་ཡིན། ཡང་དག་པར་རྫོགས་པའི་སངས་རྒྱས་ཉིད་ཡིན་ལ་ཡང་དག་པར་རྫོགས་པའི་སངས་རྒྱས་སུ་ཁས་འཆེ་བས། ང་གང་ཁོང་དུ་ཆུད་པར་བྱེད་པ་དེ་ཡང་དག་པར་ཁོང་དུ་ཆུད་པར་བྱེད་པ་
ཡིན། འབྱུང་བ་ལ་མཁས་པ་ཉིད་ཡིན་ལ་འབྱུང་བ་ལ་མཁས་པར་ཁས་འཆེ་བས་ང་གང་འབྱིན་པ་དེ་དག་ཡང་དག་པར་འབྱིན་པ་ཡིན། འབྱུང་བ་མཐོང་བ་ཉིད་ཡིན་ལ་འབྱུང་བ་སྟོན་པར་ཁས་འཆེ་བས་ང་གང་འབྱུང་བ་སྟོན་པ་དེ་ཡང་དག་པར་སྟོན་པ་ཡིན། མུ་སྟེགས་བྱེད་པ་ཡིན་ལ་མུ་

སྟེགས་བྱེད་པར་ཁས་འཆེ་བས་ང་གང་སྒྲོལ་བ་དེ་ཡང་དག་པར་སྒྲོལ་བ་ཡིན་ཏེ། སྟོན་པའི་ཆོས་རབ་ཏུ་ཤེས་ནས་ནི་རྗེས་སུ་སྟོན། སངས་རྒྱས་ཀྱི་ཆོས་རབ་ཏུ་ཤེས་ནས་ནི་ཁོང་དུ་ཆུད་པར་བྱེད། འབྱུང་བ་རབ་ཏུ་ཤེས་ནས་ནི་འབྱིན། ཡང་དག་པར་མཐོང་ནས་ནི་སྟོན། མུ་སྟེགས་
རབ་ཏུ་ཤེས་ནས་ནི་སྒྲོལ་ཏེ། གང་སྒྲོལ་བ་དེ་ཡང་མུ་སྟེགས་བདེ་བས་རབ་ཏུ་སྒྲོལ་བ་ཡིན་ནོ། །འདི་ལྟ་སྟེ། ཀུན་ཏུ་རྒྱུ་དག་ཁྱེད་ཀྱང་ཐར་པར་འདོད་པ་ཡིན་ལ། ང་ཡང་སྟོན་པ་མངོན་དུ་བཞུགས་པ་ཡིན་ཏེ། ཡང་དག་པར་སྟོན་པ། ཡང་དག་པར་ཁོང་དུ་ཆུད་པར་བྱེད་པ། འབྱུང་བ་ཕུན་སུམ་
ཚོགས་པ་འབྱུང་བ་མཐོང་བ། ཡང་དག་པའི་མུ་སྟེགས་བྱེད་པ་ཡིན་གྱིས་དེའི་ཕྱིར་རྣ་བ་ལྷོགས་ཏེ་མོས་པ་སྐྱེད་ལ་དྲན་པ་ཉེ་བར་ཞོག་སྟེ། ཡིད་འདུན་པར་གྱིས་ལ་མ་ཐོབ་པའི་ཆོས་རྣམས་ཐོབ་པར་བྱ་བ་དང་། སྔོན་མ་ཕྱིན་པའི་ལམ་དུ་འགྲོ་བར་བྱ་བ་དང་། སྔོན་མ་སོང་བའི་ཕྱོགས་སུ་
འགྲོ་བར་བྱ་བ་དང་། སྔོན་མ་འགྲོགས་པའི་ལམ་གྲོགས་དང་འགྲོགས་པར་བྱ་བ་དང་། སྔོན་མ་བཙལ་བའི་ལམ་བཙལ་བར་བྱ་བ་དང་། སྔོན་མ་ཐོབ་པའི་ཆོས་ཀྱི་མཛོད་ཐོབ་པར་བྱ་བའི་ཕྱིར། བརྩོན་འགྲུས་ཡང་དག་པར་རྩོམས་ཤིག །ཀུན་ཏུ་རྒྱུ་དག་ཆོས་གསུམ་མངོན་དུ་གྱུར་པས་མངལ་དུ་འཇུག་
ཅེས་གང་སྨྲས་པ་དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་། མངལ་དུ་འཇུག་པ་ཞེས་བྱ་བའི་ཆོས་ཀྱི་རྣམ་གྲངས་འདི་ཁྱེད་ལ་ངས་བཤད་དོ། ཀུན་ཏུ་རྒྱུ་དག་དེ་ལ་མ་ཞེས་གང་སྨྲས་པ་དེ་ནི་སྔོན་གྱི་ལས་བསགས་པའི་རྐྱེན་དུ་གསུངས་སོ། །ཕ་ཞེས་བྱ་བ་དེ་ནི་སྔོན་གྱི་ལས་བསགས་
པའི་རྒྱུར་གསུངས་སོ། །དྲི་ཟ་ཞེས་བྱ་བ་དེ་ནི་རྣམ་པར་ཤེས་པ་ལས་ཀྱིས་འཕངས་པའི་ཚིག་བླ་དགས་སོ། མེར་མེར་པོ་ཞེས་བྱ་བ་དེ་ནི་ལས་ཀྱིས་འཕངས་པའི་རྣམ་པར་ཤེས་པའི་གནས་དང་གཞིའོ། །མའི་མངལ་ཞེས་བྱ་བ་དེ་ནི་རྣམ་པར་ཤེས་པ་ལས་ཀྱིས་འཕངས་པའི་གཞི་སྟེ། འདི་ལྟར་
མའི་མངལ་ན་གནས་པའི་རྣམ་པར་ཤེས་པ་ནི་སྐྱེ་བ་དང་། འཕེལ་བ་དང་། རྒྱས་པར་འགྱུར་རོ། །ཀུན་ཏུ་རྒྱུ་དག་འདི་ལྟ་སྟེ་དཔེར་ན། ས་ཆེན་པོ་ལ་གནས་ན་རྩྭ་དང་། ཤིང་གེལ་བ་དང་། སྨན་དང་། ནགས་ཚལ་དག་སྐྱེ་ཞིང་འཕེལ་བ་དང་རྒྱས་པར་འགྱུར་རོ། །དེ་བཞིན་དུ་མའི་མངལ་ན་

གནས་པའི་རྣམ་པར་ཤེས་པ་ཡང་སྐྱེ་བ་དང་། འཕེལ་བ་དང་། རྒྱས་པར་འགྱུར་ཏེ། འཕེལ་ནས་སྐྱེ་བར་འགྱུར་རོ། །བཙས་ནས་རྣམ་པར་འཕེལ་ལོ། །འཕེལ་ནས་སྤྱོད་པ་སྣང་བར་འགྱུར་ཏེ། འགྲོ་བ་གང་དང་གང་ནས་ཤི་འཕོས་ནས་དེ་དང་དེར་སྐྱེས་ནས་དེ་དང་འདྲ་བའི་
སྤྱོད་པ་དེ་དག་དེ་སྤྱོད་པར་འགྱུར་ཏེ། དེ་དག་ཀྱང་མཁས་པས་ཤེས་པར་བྱ་བ་ཡིན་གྱི། གླེན་པས་ནི་མ་ཡིན་ནོ། །ཡུན་རིང་པོ་ནས་འགྲོགས་འགྲོགས་པས་ཤེས་པར་བྱ་བ་ཡིན་གྱིས་ཡུན་ཐུང་དུས་མ་ཡིན་ནོ། །ཡང་དག་པར་སེམས་པས་ཤེས་པར་བྱ་བ་ཡིན་གྱི། མི་བརྩོན་པས་མ་ཡིན་ནོ། །
ཀུན་ཏུ་རྒྱུ་དག་དེ་ལ་སེམས་ཅན་དམྱལ་བ་ནས་ཤི་འཕོས་པའི་གང་ཟག་གི་རྟགས་མཁས་པས་ཤེས་པར་བྱ་བ་ནི་འདི་དག་ཡིན་ཏེ། འདི་ལྟ་སྟེ། སྐད་ཤ་ཤ་པོ་ཡིན། སྐད་གྱོ་དུམ་གྱི་སྒྲ་ལྟ་བུ་ཡིན། སྐད་བརྟག་དགོས་པ་ཡིན། སྐད་ཆེ་བ་ཡིན། སྐད་ལྷང་ལྷང་པོ་ཡིན། རྟག་ཏུ་དངངས་པ་
ཡིན། རྟག་ཏུ་འདར་བ་ཡིན། རྟག་ཏུ་སྤུ་ཟིང་ཞེས་བྱེད་པ་ཡིན། རྨི་ལམ་ན་མེའི་ཕུང་པོ་འབར་བ་མཐོང་བ་ཡིན། རི་རྒྱུག་པར་མཐོང་བ་ཡིན། མེ་མདག་འབར་བར་མཐོང་བ་ཡིན། ལྕགས་ཟངས་ཀྱི་ནང་དུ་བཙོ་བ་མཐོང་བ་ཡིན་ལག་ན་དབྱུག་པ་ཐོགས་པའི་མི་དག་མཐོང་བ་ཡིན། སྲིན་པོ་
དག་གིས་བདག་འཕང་བར་མཐོང་བ་ཡིན། བདག་ཉིད་གསོན་པོར་གསལ་ཤིང་གིས་གཟུགས་པར་མཐོང་བ་ཡིན། ཁྱི་དག་གིས་བདག་དབང་བར་མཐོང་བ་ཡིན། ཁྱི་དག་གིས་བདག་བསྐོར་བར་མཐོང་བ་ཡིན། བདག་ཉིད་གླང་པོ་ཆེ་དང་སྦྲུལ་གྱིས་གཙེས་པར་མཐོང་བ་ཡིན། ཕྱོགས་བཞིར་
བྲོས་ནས་ཕྱོགས་མི་ཤེས་པ་ཡིན། སེམས་ཅན་ཀུན་ལ་ཡིད་མི་རྟོན་པ་ཡིན་ནོ། །ཀུན་ཏུ་རྒྱུ་དག་རྣམ་པ་ཉི་ཤུ་པོ་དེ་དག་གིས་སེམས་ཅན་དམྱལ་བ་ནས་ཤི་འཕོས་པའི་གང་ཟག་ཏུ་རིག་པར་བྱའོ། །ཀུན་ཏུ་རྒྱུ་དག་དེ་ལ་དུད་འགྲོའི་སྐྱེ་གནས་ནས་ཤི་འཕོས་པའི་གང་ཟག་གི་མཚན་མ་ནི་འདི་
དག་ཡིན་ཏེ། འདི་ལྟ་སྟེ། རྨུགས་ཤིང་གཉིད་ཆེ་བ་ཡིན། ལེ་ལོ་ཆེ་བ་ཡིན། མང་དུ་ཟ་བ་ཡིན། ས་ལ་འདྲུད་པ་ཡིན། མི་འཇིགས་པ་མེད་པ་ཡིན། མི་གསལ་བར་སྨྲ་བ་ཡིན། གླེན་པ་ལ་དགའ་བ་ཡིན། མུན་པ་ལ་དགའ་བ་ཡིན། འདམ་རྫབ་ལ་དགའ་བ་ཡིན།

ཡང་དང་ཡང་སོས་རྩ་གཅོད་པ་ཡིན། རྒྱུན་དུ་རྐང་པའི་མཐེ་བོས་ས་རྐོ་བ་ཡིན། ཡང་དང་ཡང་མགོ་ལ་སྦྲང་མ་འདུ་བ་ཡིན། ཡང་དང་ཡང་ནམ་མཁའ་ལ་སོས་འདེབས་པ་ཡིན། ཀུན་ཏུ་བསྐུམས་ཏེ་ཉལ་བ་ཡིན། ས་ལ་ཉལ་བ་ཡིན། མི་གཙང་བས་མི་འདོག་པ་ཡིན། ཡང་
དང་ཡང་ནམ་མཁའ་ལ་མནོམ་པ་ཡིན། ཡང་དང་ཡང་མ་སྨིན་པར་ཟ་བ་ཡིན། གཞན་དུ་སྨྲ་ཞིང་གཞན་དུ་བྱེད་དེ་གཡོ་བྱེད་པ་ཡིན། བབ་བབ་ཏུ་སྤྱོད་པ་ཡིན། རྨི་ལམ་ན་བདག་རྫབ་ཀྱིས་གོས་པར་རྨི་བ་ཡིན། རྨི་ལམ་ན་བདག་ནགས་སུ་སོང་སྟེ་རྩྭ་ཟ་བར་རྨི་བ་ཡིན། སྦྲུལ་གདུག་
པས་བདག་བསྐོར་བར་མཐོང་བ་ཡིན། བདག་ཉིད་རི་ཁྲོད་དུ་ཞུགས་པར་མཐོང་བ་ཡིན་ཏེ། ཀུན་ཏུ་རྒྱུ་དག་དེ་དག་ལ་སོགས་པ་དུད་འགྲོའི་སྐྱེ་གནས་ནས་ཤི་འཕོས་པའི་གང་ཟག་གི་མཚན་མ་རྣམ་པ་དུ་མར་ཤེས་པར་བྱ་སྟེ། དེ་དག་ནི་བསྐལ་པའམ། བསྐལ་པ་ལས་ལྷག་པར་བརྗོད་ཀྱང་
ཟད་པར་མི་ནུས་སོ། །ཀུན་ཏུ་རྒྱུ་དག་དེ་ལ་གཤིན་རྗེའི་འཇིག་རྟེན་ནས་ཤི་འཕོས་པའི་གང་ཟག་གི་མཚན་མ་ནི་འདི་དག་ཡིན་ཏེ། འདི་ལྟ་སྟེ། སྐྲ་སེར་བ་ཡིན། མིག་ཝའི་མིག་ལྟ་བུ་ཡིན། རྟག་པར་བཀྲེས་པ་ཡིན། རྟག་ཏུ་སྐོམ་པ་ཡིན། སེར་སྣ་ཆེ་བ་ཡིན། འདོད་ཆེན་ཆེ་བ་དང་།
འཐོབ་པ་མི་རྙེད་པ་ཡིན། གཞན་གྱི་ལ་རེ་བ་ཡིན། ཁྲོ་བ་ཡིན། མིག་དམར་བ་ཡིན། བཟའ་བ་ཐམས་ཅད་ལ་སྲེད་པ་ཡིན། བདོག་པ་ཐམས་ཅད་ལ་ཆགས་པ་ཡིན་སྦྱིན་པའི་གནས་དག་མཐོང་བར་མི་འདོད་པ་ཡིན། དངོས་པོ་ཀུན་ལ་ཡང་དེ་བརྐུ་བའི་སེམས་ཡོད་པ་ཡིན། དངོས་པོ་
ངན་པ་རྣམས་ལ་ཡང་དགའ་བ་ཡིན། འཐོབ་པ་ལ་མོས་པ་ཡིན། ཟས་སྐོམ་མི་གཙང་བ་ལ་དགའ་བ་ཡིན། གཞན་གྱི་ཕུན་སུམ་ཚོགས་པ་ལ་ཕྲག་དོག་བྱེད་པ་ཡིན། གཞན་གྱི་ལོངས་སྤྱོད་ལ་སྲེད་པ་སྐྱེད་པ་ཡིན། གཞན་གྱི་ལོངས་སྤྱོད་གང་ཡིན་པ་དེ་དག་ལ་བདག་གི་སྙམ་དུ་
སེམས་པ་ཡིན། ཟས་གཏོར་ན་སེམས་མི་དགའ་བ་ཡིན། ཚོང་འདུས་ཀྱི་སྲང་དག་ནས་ཀྱང་ཤིང་ཐོག་ལེན་པ་ཡིན་ཏེ། ཀུན་ཏུ་རྒྱུ་དག་གཤིན་རྗེའི་འཇིག་རྟེན་ནས་ཤི་འཕོས་པའི་གང་ཟག་གི་རྟགས་ཀྱི་བྱེ་བྲག་ནི་དེ་དག་ལ་སོགས་པ་མཐའ་ཡས་པར་ཤེས་པར་བྱའོ། །ཀུན་ཏུ་རྒྱུ་དག་

དེ་ལ་ལྷ་མ་ཡིན་ལས་ཤི་འཕོས་པའི་གང་ཟག་གི་མཚན་མ་ནི་འདི་དག་ཡིན་ཏེ། འདི་ལྟ་སྟེ། ཁེངས་པ་ཡིན། འཐབ་ཀྲོལ་ཆེ་བ་ཡིན། འཁོན་དུ་འཛིན་པ་ཡིན། ང་རྒྱལ་ཆེ་བ་ཡིན། ལུས་ཆེ་བ་ཡིན། མིག་ཆེ་བ་ཡིན། མིག་དཀར་བ་ཡིན། མཆེ་
བ་སྣང་བ་ཡིན། མཐུ་དང་ལྡན་པ་ཡིན། ཐབ་མོའི་བློ་ཅན་ཡིན། དབྱེན་ལ་དགའ་བ་ཡིན། བྱ་བ་ཐམས་ཅད་ལ་ང་རྒྱལ་ཆེ་བ་ཡིན། སོ་སྣང་བ་ཡིན། འཇིག་རྟེན་ཐམས་ཅད་ལ་བརྙས་པའི་འདུ་ཤེས་ཅན་ཡིན། མཚོན་ཆ་རྣོ་བ་ཡིན། ཚིག་ན་བ་ཡིན། བད་ག་གཟེངས་སྟོད་
པ་ཅན་ཡིན། མི་ཤེས་པའི་སྟོབས་ཅན་ཡིན། ཉོན་མོངས་པའི་སྟོབས་ཅན་ཡིན་ཏེ། ཀུན་ཏུ་རྒྱུ་དག་དེ་དག་ལ་སོགས་པ་ནི་ལྷ་མ་ཡིན་ལས་ཤི་འཕོས་པའི་གང་ཟག་གི་མཚན་མར་ཤེས་པར་བྱའོ། །ཀུན་ཏུ་རྒྱུ་དག་དེ་ལ་མི་ལས་ཤི་འཕོས་པའི་གང་ཟག་གི་མཚན་མ་ནི་འདི་དག་ཡིན་ཏེ།
འདི་ལྟ་སྟེ། ངོ་མཚར་དུ་འཛིན་པ་ཅན་ཡིན། འཕགས་པ་དང་སྟེན་པ་ཡིན། འཕགས་པ་མ་ཡིན་པ་ལ་སྨོད་པ་ཡིན། དགེ་བ་བྱེད་པ་ཡིན། མངོན་རྟགས་འདོད་པ་ཡིན། གྲགས་པ་འདོད་པ་ཡིན། སྙན་པ་འདོད་པ་ཡིན། བཟོ་ལ་དགའ་བ་ཡིན། ཤེས་པ་ལ་དགའ་བ་ཡིན། ཉོན་
མོངས་པ་ཆུང་བ་ཡིན། ཁྲེལ་ཡོད་ཅིང་ངོ་ཚ་ཤེས་པ་ཡིན། རིགས་ཀྱི་བུའི་ཚུལ་ཕུན་སུམ་ཚོགས་པ་ཡིན། བྱས་པ་གཟོ་བ་ཡིན། མཛའ་བོ་ལ་གདུང་བ་ཡིན། ཡོངས་སུ་གཏོང་བ་དང་ལྡན་པ་ཡིན། བྱེ་བྲག་ཤེས་པ་ཡིན། བྱས་པ་དང་མ་བྱས་པ་ལ་རྟོག་པ་ཡིན། ཚིག་གི་མཐུ་
ཡོད་པ་ཡིན། གྲོས་གཟུང་བར་བྱ་བའི་མཐུ་ཡོད་པ་ཡིན། འདུམ་པར་བྱ་བ་དང་། འཐབ་མོ་བྱ་བ་ལ་མངོན་པར་མཁས་པ་ཡིན། ཕོ་ཉ་ནུས་པ་ཡིན། སྐད་ཐམས་ཅད་འཛིན་པའི་མཐུ་ཡོད་པ་ཡིན། གནས་དང་གནས་མ་ཡིན་པ་མངོན་པར་ཤེས་པ་ཡིན་ཏེ། ཀུན་ཏུ་རྒྱུ་དག་དེ་དག་ལ་
སོགས་པ་ནི་མི་ལས་ཤི་འཕོས་པའི་གང་ཟག་གི་རྟགས་ཡིན་ནོ། །ཀུན་ཏུ་རྒྱུ་དག་དེ་ལ་ལྷ་ལས་ཤི་འཕོས་པའི་གང་ཟག་གི་རྟགས་ནི་འདི་དག་ཡིན་ཏེ། འདི་ལྟ་སྟེ། མཛེས་པ་ཡིན། གཙང་སྦྲ་ཆེ་བ་ཡིན། ཕྲེང་བ་ལ་དགའ་བ་ཡིན། སྤོས་ལ་དགའ་བ་ཡིན། བདུག་པ་ལ་དགའ་བ་ཡིན། གླུ་

ལེན་པའི་ངང་ཚུལ་ཅན་ཡིན། བྱུག་པ་ལ་དགའ་བ་ཡིན། འདོད་པའི་ཡོན་ཏན་ངན་ངོན་གྱིས་མི་མགུ་ཞིང་རྒྱ་ཆེན་པོ་ལ་དགའ་བ་ཡིན། རོལ་མོའི་སྒྲ་ཐམས་ཅད་ལ་དགའ་བ་ཡིན། གླུ་ཐམས་ཅད་ལ་དགའ་བ་ཡིན། སྐྱེ་བོ་རྒྱ་ཆེན་པོ་དང་འགྲོགས་པར་དགའ་བ་ཡིན། ཁང་པ་དང་། ཁང་པ་
བརྩེགས་པ་དང་། ཁྱིམ་དང་། ལོངས་སྤྱོད་རྒྱ་ཆེན་པོ་ལ་དགའ་བ་ཡིན། དེའི་སེམས་བྱམས་པ་སྔོན་དུ་འགྲོ་བ་ཡིན། རྒོད་པའི་ངང་ཚུལ་ཅན་ཡིན། འཇམ་པར་སྨྲ་བ་ཡིན། དགའ་བ་ལ་མཁས་པ་ཡིན། རྒྱན་ལ་དགའ་བ་ཡིན། ཆེ་བའི་ངང་ཚུལ་ཅན་ཡིན། འགྲོ་བའི་ངང་
ཚུལ་ཅན་ཡིན། ལུས་ཀྱི་ཤུགས་འབྱིན་པའི་ངང་ཚུལ་ཅན་ཡིན། ཆགས་པའི་མཚན་མ་དང་མི་ཆགས་པའི་མཚན་མ་ཤེས་པ་ཡིན། ཕན་པར་བྱ་བ་ལ་མཁས་པ་ཡིན་ཏེ། ཀུན་ཏུ་རྒྱུ་དག་མཚན་མ་དེ་དག་ལ་སོགས་པས། མཐོ་རིས་ནས་ཤི་འཕོས་པའི་གང་ཟག་ཏུ་ཤེས་པར་བྱའོ། །
ཀུན་ཏུ་རྒྱུ་དག་དེ་ལ་མཚན་མ་དེ་དག་ལས་ཡང་དག་པར་འདའ་བར་བྱ་བའི་ཕྱིར་རིགས་ཀྱི་བུའམ། རིགས་ཀྱི་བུ་མོ་དག་གིས་དགེ་བའི་བཤེས་གཉེན་གང་དག་མཚན་མ་དེ་དག་ལས་ཡང་དག་པར་འདའ་བར་བྱ་བའི་ཕྱིར་ཆོས་སྟོན་པར་བྱེད་པ་དེ་ལྟ་བུའི་དགེ་བའི་བཤེས་གཉེན་རྣམས་བསྟེན་པར་བྱ།
བསྙེན་པར་བྱ། བསྙེན་བཀུར་བར་བྱའོ། །དེ་ལ་སེམས་ཅན་དམྱལ་བ་ནས་ཤི་འཕོས་པའི་གང་ཟག་གིས་ནི་སྔོན་མིར་གྱུར་པའི་ཚེ་ཞེ་སྡང་ལ་ཡོངས་སུ་བསྟེན་པས་དེས་ཞེ་སྡང་ལས་བྱུང་བའི་ལས་མངོན་པར་འདུ་བྱས་པས་དེ་ལས་དེས་སེམས་ཅན་དམྱལ་བར་སྐྱེས་ཏེ། དེའི་ཕྱིར་སེམས་ཅན་དམྱལ་
བར་གནས་པ་རྙེད་ནས་སེམས་ཅན་དམྱལ་བའི་སྤྱོད་པ་ཅན་དུ་གྱུར་པས་དེ་མིའི་ནང་དུ་སྐྱེས་ཏེ། སྤྱོད་པའི་རྟགས་འདི་དག་ཐོས་ནས་བདག་ནི་སེམས་ཅན་དམྱལ་བ་ནས་ཤི་འཕོས་པའོ་ཞེས་བདག་ཉིད་ཀྱིས་ཤེས་པར་བྱ་ཞིང་། དེས་སེམས་ཅན་དམྱལ་བའི་ལས་ཀྱི་རྒྱུ་སྤང་བའི་ཕྱིར་དགེ་བའི་
བཤེས་གཉེན་བཙལ་བར་བྱ་སྟེ། དེ་ལ་དགེ་བའི་བཤེས་གཉེན་དེ་དག་ཞེ་སྡང་གི་གཉེན་པོར་བྱམས་པ་སྟོན་ཏོ། །བྱམས་པ་དང་ལྡན་པའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་དང་། བྱམས་པ་དང་ལྡན་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྟོན་ཏོ། །དེས་ཀྱང་དེའི་ཞེ་སྡང་གི་བག་ལ་ཉལ་

སྤོང་བར་འགྱུར་ཏེ། དེ་བྱམས་པ་ཆེན་པོ་བསྒོམས་པས་ཕ་རོལ་ཏུ་ཕྱིན་པ་དྲུག་པོ་ཐམས་ཅད་ཡོངས་སུ་རྫོགས་པར་འགྱུར་རོ། །ཀུན་ཏུ་རྒྱུ་དག་དེ་ལ་དུད་འགྲོའི་སྐྱེ་གནས་ནས་ཤི་འཕོས་པའི་གང་ཟག་གིས་ནི་སྔོན་མིར་གྱུར་པའི་ཚེ། གཏི་མུག་ལ་ཡོངས་སུ་བསྟེན་པས་དེས་གཏི་
མུག་ལས་བྱུང་བའི་ལས་མངོན་པར་འདུ་བྱས་པས། དེ་ལས་དེས་དུད་འགྲོའི་སྐྱེས་གནས་སུ་སྐྱེས་ཏེ། དེའི་ཕྱིར་དེ་དུད་འགྲོའི་སྐྱེ་གནས་ན་གནས་པ་རྙེད་ནས་དུད་འགྲོའི་སྐྱེ་གནས་ཀྱི་སྤྱོད་པ་ཅན་དུ་གྱུར་པས་དེ་དུད་འགྲོའི་སྐྱེ་གནས་ནས་ཤི་འཕོས་ཏེ། མིའི་ནང་དུ་སྐྱེས་ཀྱང་དུད་འགྲོའི་སྐྱེ་གནས་
ཀྱི་སྤྱོད་པ་དེ་དག་ཉིད་སྤྱོད་པར་འགྱུར་ཏེ། དེས་སྤྱོད་པ་དེ་དག་གིས་བདག་ནི་དུད་འགྲོའི་གནས་ནས་ཤི་འཕོས་ནས་མིའི་ནང་དུ་སྐྱེས་སོ་ཞེས་བདག་ཉིད་ཀྱིས་ཤེས་པར་བྱ་ཞིང་། དེས་དུད་འགྲོའི་སྐྱེ་གནས་ཀྱི་ལས་དེ་དག་ལས་ཡང་དག་པར་འདའ་བར་བྱ་བའི་ཕྱིར་དགེ་བའི་བཤེས་གཉེན་བཙལ་
བར་བྱ་སྟེ། །དེ་ལ་དགེ་བའི་བཤེས་གཉེན་དེ་དག་གཏི་མུག་སྤང་བའི་ཕྱིར་རྟེན་ཅིང་འབྲེལ་བར་འབྱུང་བ་སྟོན་ཏོ། །དེས་ཀྱང་དེའི་གཏི་མུག་གི་བག་ལ་ཉལ་སྤོང་བར་འགྱུར་རོ། །ཡང་ཤེས་རབ་ཀྱི་ཕ་རོལ་ཏུ་ཕྱིན་པ་དུས་གསུམ་མཉམ་པ་ཉིད་སྟོན་ཏེ། དེས་དེ་གཏི་མུག་དེ་ནི་རང་བཞིན་མེད་པའོ་ཞེས་བྱ་
བར་ཤེས་པ་སྐྱེ་བར་འགྱུར་རོ། །ཡང་ན་དེ་ལ་ཆོས་ཐམས་ཅད་མཉམ་པ་ཉིད་སྟོན་ཏེ། དེས་དེ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཤིང་ཐམས་ཅད་མཁྱེན་པ་ཉིད་ཐོབ་པར་འགྱུར་རོ། །ཀུན་ཏུ་རྒྱུ་དག་དེ་ལ་གཤིན་རྗེའི་འཇིག་རྟེན་ནས་ཤི་འཕོས་པའི་གང་ཟག་གིས་ནི་སྔོན་མིར་
གྱུར་བའི་ཚེ་སེར་སྣ་ལ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་དེས་དེར་སེར་སྣ་དང་ལྡན་པ་ཆགས་པ་ལས་བྱུང་བའི་ལས་མངོན་པར་འདུ་བྱས་པས་དེ་ལས་བྱས་པ་དང་། བསགས་པ་དང་། ཟིན་པར་བྱས་པ་དང་། རྫོགས་པར་བྱས་པ་དང་། བླངས་པ་དེས་གཤིན་རྗེའི་འཇིག་
རྟེན་དུ་སྐྱེས་ཏེ། དེ་གཤིན་རྗེའི་འཇིག་རྟེན་ན་གནས་པ་དེས་གཤིན་རྗེའི་འཇིག་རྟེན་པའི་སྤྱོད་པ་ཅན་དུ་གྱུར་བས་དེ་གཤིན་རྗེའི་འཇིག་རྟེན་ནས་ཤི་འཕོས་ཏེ་མིའི་ནང་དུ་སྐྱེས་ཀྱང་གཤིན་རྗེའི་འཇིག་རྟེན་པའི་སྤྱོད་པ་དེ་དག་ཉིད་སྤྱོད་པར་འགྱུར་ཏེ། དེས་སྤྱོད་པ་དེ་དག་གིས་བདག་ནི་གཤིན་རྗེའི་

འཇིག་རྟེན་ནས་ཤི་འཕོས་པའོ་ཞེས་བྱ་བར་བདག་ཉིད་ཀྱིས་ཤེས་པར་བྱ་ཞིང་། དེས་སྤྱོད་པ་དེ་དག་ལས་ཡང་དག་པར་འདའ་བར་བྱ་བའི་ཕྱིར་དགེ་བའི་བཤེས་གཉེན་བཙལ་བར་བྱ་སྟེ། དེ་ལས་དགེ་བའི་བཤེས་གཉེན་དེ་དག་སེར་སྣ་སྤང་བའི་ཕྱིར་གཏོང་བ་སྟོན་ཏོ། །དེས་ཀྱང་དེའི་སེར་སྣའི་
བག་ལ་ཉལ་སྤོང་བར་འགྱུར་རོ། །ཡང་ན་དེ་ལ་གཏོང་བ་དང་ལྡན་པའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་སྟོན། སྦྱིན་པའི་ཕ་རོལ་ཏུ་ཕྱིན་པ་སྟོན་ཏེ། དེ་བསྒོམས་པས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། ཀུན་ཏུ་རྒྱུ་དག་དེ་ལ་ལྷ་མ་ཡིན་ལས་ཤི་འཕོས་པའི་གང་ཟག་གིས་
སྔོན་མིར་གྱུར་པའི་ཚེ་དགེ་བའི་རྩ་བ་རྒྱ་ཆེན་པོ་དག་ཀྱང་མངོན་པར་འདུ་བྱས་ལ་ང་རྒྱལ་ལ་ཡང་ཡོངས་སུ་བསྟེན་པས་དེ་ང་རྒྱལ་དང་ལྡན་པའི་ལས་བྱས་པ་དང་། བསགས་པ་དང་། ཟིན་པར་བྱས་པ་དང་། རྫོགས་པར་བྱས་པ་དང་། བླངས་པ་དེས་ལྷ་མ་ཡིན་དུ་སྐྱེས་ཏེ། ལྷ་མ་ཡིན་གྱི་ནང་ན་
གནས་པ་དེས་ལྷ་མ་ཡིན་གྱི་སྤྱོད་པ་ཅན་དུ་གྱུར་པས་དེ་ལྷ་མ་ཡིན་ནས་ཤི་འཕོས་ཏེ་མིའི་ནང་དུ་སྐྱེས་ཀྱང་ལྷ་མ་ཡིན་གྱི་སྤྱོད་པ་དེ་དག་ཉིད་སྤྱོད་པར་འགྱུར་ཏེ། དེས་སྤྱོད་པ་དེ་དག་གིས་བདག་ནི་ལྷ་མ་ཡིན་ལས་ཤི་འཕོས་པའོ་ཞེས་བྱ་བར་བདག་ཉིད་ཀྱིས་ཤེས་པར་བྱ་ཞིང་། དེས་སྤྱོད་པ་དེ་དག་
ལས་ཡང་དག་པར་འདའ་བར་བྱ་བའི་ཕྱིར་དགེ་བའི་བཤེས་གཉེན་བཙལ་བར་བྱ་སྟེ། དེ་ལ་དགེ་བའི་བཤེས་གཉེན་དེ་དག་ང་རྒྱལ་སྤང་བ་དང་། ངའོ་སྙམ་པའི་ང་རྒྱལ་གཞོམ་པའི་ཕྱིར་སྐྱེ་མཆེད་རྣམས་སྟོན་ཏོ། །དེས་ཀྱང་དེའི་ང་རྒྱལ་སྤོང་བར་འགྱུར་རོ། །ཡང་ན་དེ་ལ་སྟོང་པ་ཉིད་
སྟོན་ཏེ། དེས་དེའི་ང་རྒྱལ་གྱི་བག་ལ་ཉལ་སྤོང་བ་དང་། བདག་རྣམ་པར་འཇིག་པར་འགྱུར་རོ། །ཡང་ན་ཇི་ལྟར་བྱ་བ་འབྱུང་བ་རྣམས་ཚོགས་པ་ལས་བྱུང་བའི་ཚུལ་སྟོན་ཏེ། དེས་དེའི་ང་རྒྱལ་གྱི་བག་ལ་ཉལ་སྤོང་བར་འགྱུར་རོ། །ཡང་ན་དེ་ལ་ཆོས་རྣམས་ཀྱི་
མཚན་ཉིད་གཅིག་པ་སྟོན་ཏེ། དེས་དེའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་ཞིང་དེ་བསྒོམས་པས་ཐམས་ཅད་མཁྱེན་པ་ཉིད་དུ་འགྲུབ་པར་འགྱུར་རོ། །ཀུན་ཏུ་རྒྱུ་དག་དེ་ལ་མི་ལས་ཤི་འཕོས་པའི་གང་ཟག་གིས་ནི་སྔོན་མིར་གྱུར་པའི་ཚེ་ཡང་དགེ་བ་བཅུའི་ལས་ཀྱི་ལམ་

ལ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་དེ་ལས་དེ་བྱས་པ་དང་། བསགས་པ་དང་། ཟིན་པར་བྱས་པ་དང་། རྫོགས་པར་བྱས་པ་དང་། བླངས་པས་མིར་སྐྱེས་ཏེ། དེ་མིའི་ནང་ན་གནས་པ་དེས་མིའི་སྤྱོད་པ་ཅན་དུ་གྱུར་པས་དེ་མིའི་ནང་ནས་ཤི་འཕོས་ཏེ་མིའི་ནང་དུ་སྐྱེས་ཀྱང་མིའི་སྤྱོད་པ་
དེ་དག་ཉིད་སྤྱོད་པར་འགྱུར་ཏེ། དེ་སྤྱོད་པ་དེ་དག་གིས་བདག་ནི་མིའི་ནང་ནས་ཤི་འཕོས་པའོ་ཞེས་བྱ་བར་བདག་ཉིད་ཀྱིས་ཤེས་པར་བྱ་ཞིང་དེས་མིའི་སྤྱོད་པ་དེ་དག་ལས་ཡང་དག་པར་འདའ་བར་བྱ་བའི་ཕྱིར་དགེ་བའི་བཤེས་གཉེན་བཙལ་བར་བྱ་སྟེ། དེ་ལ་དགེ་བའི་བཤེས་གཉེན་དེ་དག་མི་རྟག་
པའི་འདུ་ཤེས་སྟོན་ཏོ། །དེས་ཀྱང་དེའི་སྤྱོད་པ་བག་ལ་ཉལ་དང་བཅས་པར་སྤོང་བར་འགྱུར་རོ། །ཡང་ན་དེ་ལ་འཁོར་བའི་མི་བསྔགས་པ་དང་། མྱ་ངན་ལས་འདས་པའི་བསྔགས་པ་སྟོན་ཏེ། དེས་དེ་འཁོར་བ་ལ་མི་དགའ་ཞིང་མྱ་ངན་ལས་འདས་པ་དོན་དུ་གཉེར་བར་འགྱུར་རོ། །ཡང་ན་དེ་
ལ་ཕ་རོལ་ཏུ་ཕྱིན་པ་དྲུག་སྟོན་ཏེ། དེ་ཐོས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་རོ། །དེ་ལ་ཐབས་མཁས་པ་ཡང་སྟོན་ཏོ། །དེས་དེའི་ཕ་རོལ་ཏུ་ཕྱིན་པ་དྲུག་པོ་དེ་དག་ཤིན་ཏུ་བཟུང་བ་དང་། ཐམས་ཅད་མཁྱེན་པ་ཉིད་ཀྱང་མྱུར་དུ་ཐོབ་པར་འགྱུར་
རོ། །ཀུན་ཏུ་རྒྱུ་དག་དེ་ལ་མཐོ་རིས་ནས་ཤི་འཕོས་པའི་གང་ཟག་གིས་ནི་སྔོན་མིར་གྱུར་པའི་ཚེ་ཚངས་པར་སྤྱོད་པ་མཆོག་ཏུ་བཟུང་སྟེ་སྤྱད་པ་དང་། སྦྱིན་པ་མཆོག་ཏུ་བཟུང་སྟེ་བྱིན་པ་དང་། ཚུལ་ཁྲིམས་མཆོག་ཏུ་བཟུང་སྟེ་བསྲུངས་པས་དེ་ལས་དེ་བྱས་པ་དང་། བསགས་པ་དང་། ཟིན་པར་
བྱས་པ་དང་། རྫོགས་པར་བྱས་བ་དང་། བླངས་པས་ལྷའི་ནང་དུ་སྐྱེས་ཏེ། དེ་ལྷའི་ནང་ན་གནས་པ་དེ་ལྷའི་སྤྱོད་པ་ཅན་དུ་གྱུར་པས་དེ་ལྷ་ལས་ཤི་འཕོས་ཏེ། མིའི་ནང་དུ་སྐྱེས་ཀྱང་ལྷའི་སྤྱོད་པ་དེ་དག་ཉིད་སྤྱོད་པར་འགྱུར་ཏེ། དེས་སྤྱོད་པ་དེ་དག་གིས་བདག་ནི་ལྷའི་ནང་ནས་ཤི་འཕོས་པའོ་
ཞེས་བདག་ཉིད་ཀྱིས་ཤེས་པར་བྱ་ཞིང་དེས་སྤྱོད་པ་དེ་དག་ལས་ཡང་དག་པར་འདའ་བར་བྱ་བའི་ཕྱིར་དགེ་བའི་བཤེས་གཉེན་བཙལ་བར་བྱ་སྟེ། དེ་ལ་དགེ་བའི་བཤེས་གཉེན་དེ་དག་ཚངས་པར་སྤྱོད་པ་མཆོག་ཏུ་འཛིན་པའི་ཉེས་པ་སྟོན་ཅིང་མི་གནས་པའི་ཚངས་པར་སྤྱོད་པའི་ཡོན་ཏན་བརྗོད་

དོ། །མཆོག་ཏུ་འཛིན་པའི་སྦྱིན་པ་སྨོད་ཅིང་མཆོག་ཏུ་འཛིན་པ་མེད་པའི་སྦྱིན་པ་བསྔགས་པར་འགྱུར་རོ། །མཆོག་ཏུ་འཛིན་པའི་ཚུལ་ཁྲིམས་ལ་དམོད་ཅིང་མཆོག་ཏུ་འཛིན་པ་མེད་པའི་ཚུལ་ཁྲིམས་བསྔགས་པར་འགྱུར་རོ། །དེས་དེའི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་བག་ལ་
ཉལ་དང་བཅས་པར་སྤོང་བར་འགྱུར་རོ། །ཡང་ན་དེ་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྟོན་ཏེ། དེ་བསྒོམས་པས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །དེ་ལ་ཐབས་ལ་མཁས་པ་ཡང་སྟོན་ཏོ། །དེ་དང་ལྡན་པས་མྱུར་དུ་ཐམས་ཅད་མཁྱེན་པ་ཉིད་དུ་ངེས་པར་འབྱུང་
བར་འགྱུར་རོ། །ཀུན་ཏུ་རྒྱུ་དག་དེ་ལ་སེམས་ཅན་དམྱལ་བ་ནས་ཤི་འཕོས་པའི་གང་ཟག་གིས་ནི་དགེ་བའི་བཤེས་གཉེན་ལ་བརྟེན་ཏེ། དུས་གསུམ་མཉམ་པ་ཉིད་མཉན་པར་བྱའོ། །ཐོས་ནས་ཀྱང་ཤས་ཆེར་གནས་པར་བྱ་སྟེ། གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་
དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དག་ན་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། འཁོར་བཞི་བོ་མང་པོ་ཡོད་པ་དག་ཏུ་གནས་པར་བྱ་ཞིང་དེ་དག་དང་འགྲོགས་པར་བྱའོ། །དེས་འགྲོ་བ་བྱས་ཏེ་གོམས་པའི་རྗེས་སུ་འགྲོ་བས་ཆོས་
ཐམས་ཅད་ནི་དངོས་པོ་མེད་པའི་ངོ་བོ་ཉིད་དོ་ཞེས་དུས་གསུམ་མཉམ་པ་ཉིད་མངོན་དུ་འགྱུར་རོ། །ཀུན་ཏུ་རྒྱུ་དག་དེ་ལ་དུད་འགྲོའི་སྐྱེ་གནས་ནས་ཤི་འཕོས་པའི་གང་ཟག་གིས་ནི་དགེ་བའི་བཤེས་གཉེན་ལ་བརྟེན་ཏེ། གཏི་མུག་གི་གཉེན་པོར་བསྟན་བཅོས་ལ་མཁས་པའི་སྐྱེ་བོ་དང་ལྷན་ཅིག་
དགའ་བར་གནས་པར་བྱའོ། །དེས་དེའི་གཏི་མུག་སྤོང་བར་འགྱུར་ཏེ། དེས་བསྟན་བཅོས་དེ་དང་བསྟན་བཅོས་ཤེས་པ་དེ་དག་རང་བཞིན་གྱིས་ཡང་དག་པར་བརྟག་པར་བྱའོ། །དེའི་ཕྱིར་དེ་ལ་བསྟན་བཅོས་དང་བསྟན་བཅོས་ཤེས་པ་རྣམས་ཀྱང་རང་བཞིན་མེད་དོ། །རང་བཞིན་མེད་
དོ་ཞེས་བྱ་བར་སྣང་བར་གྱུར་ཏེ། དེས་དེ་ལ་དུས་གསུམ་མཉམ་པ་ཉིད་མངོན་དུ་འགྱུར་ཞིང་མྱུར་དུ་ཐམས་ཅད་མཁྱེན་པ་ཉིད་དུ་ངེས་པར་འབྱུང་བར་འགྱུར་རོ། ཀུན་ཏུ་རྒྱུ་དག་དེ་ལ་གཤིན་རྗེའི་འཇིག་རྟེན་ནས་ཤི་འཕོས་པའི་གང་ཟག་གིས་ནི་གང་ལ་རྟེན་ན་དེའི་སྦྱིན་པའི་བློ་སྐྱེ་བར་འགྱུར་བ་དང་།

གང་གིས་དེ་ལ་དུས་གསུམ་མཉམ་པ་ཉིད་དང་། གང་འདི་མཚན་ཉིད་མེད་པར་མཚན་ཉིད་གཅིག་པ་མངོན་དུ་འགྱུར་བ་དང་། དེ་བསྒོམས་པས་མྱུར་དུ་ཐམས་ཅད་མཁྱེན་པ་ཉིད་དུ་ངེས་པར་འབྱུང་བར་འགྱུར་བའི་དགེ་བའི་བཤེས་གཉེན་ལ་བསྟེན་པར་བྱ། ཡོན་ཏན་ལ་བསྟེན་པར་བྱའོ།། །།
བམ་པོ་བཅུ་གཉིས་པ། ཀུན་ཏུ་རྒྱུ་དག་དེ་ལ་ལྷ་མ་ཡིན་ལས་ཤི་འཕོས་པའི་གང་ཟག་གིས་ནི་དགེ་བའི་བཤེས་གཉེན་ལ་བསྟེན་ཏེ། ཉོན་མོངས་པའི་བདུད་དང་འཐབ་པར་བྱའོ། །འདི་ལྟ་སྟེ། ང་རྒྱལ་ཞེས་བྱ་བའི་ཆོས་དེ་ནི་གང་ཞིག །དེ་ནི་ཅི་ཞིག་གིས་ཡོངས་སུ་བཟུང་། དེ་ནི་སུ་ལ་
ཀུན་ནས་ལངས། སུ་ཞིག་དེ་སྤོང་བར་བྱེད་ཅེས་ཡང་དག་པར་བཙལ་ན་ང་རྒྱལ་དེ་མི་དམིགས་སོ། །གང་གིས་དེ་ཡོངས་སུ་བཟུང་བ་དང་། གང་ལ་དེ་ཀུན་ནས་ལངས་པ་དང་། གང་དེ་སྤང་བའི་ཕྱིར་རྩོལ་བ་དེ་ཡང་མི་དམིགས་ཏེ། དེ་ནི་ཡང་དག་པ་མ་ཡིན་པར་ཡོངས་སུ་བཟུང་བས་བདག་
དང་འཇིག་རྟེན་བསླུས་པར་ཡང་དག་པར་རྗེས་སུ་མཐོང་ངོ་། །དེས་ཆོས་ཐམས་ཅད་རང་བཞིན་མེད་པར་ཡང་དག་པར་རྗེས་སུ་མཐོང་ཞིང་ཆོས་གང་ལ་རང་བཞིན་མེད་པ་དེ་ནི་དངོས་པོ་མེད་པའོ་ཞེས་བྱ་བར་རབ་ཏུ་ཤེས་སོ། །དངོས་པོ་མེད་པས་ཡོངས་སུ་མ་གྲུབ་བོ་ཞེས་བྱ་བར་རབ་ཏུ་ཤེས་སོ། །ཡོངས་སུ་མ་གྲུབ་
པས་མི་སྐྱེ་བ་སྟེ། གང་མི་སྐྱེ་བ་དེ་ནི་མི་འགག་གོ །གང་མི་སྐྱེ་མི་འགག་པ་དེ་ནི་གདགས་སུ་མེད་པའོ་ཞེས་བྱ་བར་རབ་ཏུ་ཤེས་སོ། །གང་གདགས་སུ་མེད་པ་དེ་ནི་འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་ནོ། །གང་དུས་གསུམ་དུ་མི་དམིགས་
པ་དེ་ནི་ཐོབ་པ་ཡང་མ་ཡིན། ཆུད་ཟོས་པ་ཡང་མ་ཡིན་ནོ་ཞེས་བྱ་བར་རབ་ཏུ་ཤེས་སོ། །ཀུན་ཏུ་རྒྱུ་དག་དེ་ལྟར་ན་དེ་ནི་ཆོས་ཐམས་ཅད་ཀྱི་ཆོས་ཉིད་དོ། །ཆོས་ཉིད་གང་གིས་ཆོས་ཐམས་ཅད་དེ་བཞིན་ཉིད་མ་ནོར་བ་དེ་བཞིན་ཉིད། གཞན་མ་ཡིན་པ་དེ་བཞིན་ཉིད་དེ །དེ་བཞིན་
གཤེགས་པ་ཡང་དེ་བཞིན་ཉིད། མ་ནོར་བ་དེ་བཞིན་ཉིད། གཞན་མ་ཡིན་པ་དེ་བཞིན་ཉིད་པས་དེའི་ཕྱིར་ཆོས་ཐམས་ཅད་ནི་དེ་བཞིན་གཤེགས་པའོ། །ཀུན་ཏུ་རྒྱུ་དག་ངས་ནི་སྔོན་ཆད་དང་ད་ལྟར་ཡང་འཇིག་རྟེན་བཏགས་པ་ནི་ང་རྒྱལ་གྱི་རང་བཞིན་ནོ་ཞེས་བཤད་དོ། །ང་རྒྱལ་གྱིས་

ནི་མི་ལས་ཤི་འཕོས་པ་གདགས་པར་འགྱུར་རོ། །ང་རྒྱལ་གྱིས་ནི་མཐོ་རིས་ནས་ཤི་འཕོས་པ་གདགས་པར་འགྱུར་རོ། །ང་རྒྱལ་གྱིས་ནི་སེམས་ཅན་དམྱལ་བའི་བར་དུ་ཤི་འཕོས་པ་གདགས་པར་འགྱུར་རོ། །ང་རྒྱལ་མེད་ན་གདགས་པ་མེད་དོ། །ཀུན་ཏུ་རྒྱུ་དག་དེ་ནི་ང་རྒྱལ་མེད་པའི་ཡེ་ཤེས་
ཤེས་བྱའོ། །དེ་ཡང་ཐབས་མཁས་པ་དང་ལྡན་ཞིང་ཤེས་རབ་ཀྱི་ཕ་རོལ་ཏུ་ཕྱིན་པ་དང་། དགེ་བའི་བཤེས་གཉེན་གྱིས་ཡོངས་སུ་ཟིན་པས་ཤེས་པར་ནུས་སོ། །དེ་ནས་ཀུན་ཏུ་རྒྱུ་དྲུག་ཁྲི་པོ་དེ་དག་གིས་བསྟན་པ་འདི་ཐོས་ནས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏེ། དེ་དག་
མི་སྐྱེ་བའི་ཆོས་ལ་བཟོད་པ་ཐོབ་ནས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ་ཕྱོགས་གཅིག་ཏུ་འཁོད་ནས་ཀྱང་དེའི་ཚེ་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། མགོན་པོ་ཡེ་ཤེས་
སྟོབས་ཀྱིས་ཡང་དག་འཕགས། །འགྲོ་བ་ཀུན་ལ་གཞན་གྱི་དྲིང་མི་འཇོག །འགྲོ་བ་ཀུན་ན་སྤྱོད་པ་རྣམ་གཟིགས་ཏེ། །ལག་པའི་མཐིལ་དུ་སྐྱུ་རུ་ར་བཞག་བཞིན། །འཇིག་རྟེན་ལྟ་བའི་རྣམ་པས་ཀུན་ཏུ་དཀྲུགས། །སྤྲིན་སྟུག་དག་གིས་ནམ་མཁའ་ཡོག་པ་བཞིན། །དེ་དག་གིས་ནི་
བྱིས་པ་རྨོངས་ནས་སྤྱོད། །ལོང་བའི་ཚོགས་རྣམས་རབ་ཏུ་ལམ་སྟོར་བཞིན། །འཇིག་རྟེན་རྟག་དང་འཇིག་རྟེན་མི་རྟག་དང་། །རྟག་ཀྱང་རྟག་ལ་མི་རྟག་ཁ་ཅིག་མཆི། །རྟག་པ་མ་ཡིན་མི་རྟག་མིན་ཞེས་ཏེ། །གླང་པོའི་དབང་པོ་ཁྱིམ་དུ་བཏགས་ལྟར་བརླག །འཇིག་རྟེན་མཐའ་ཡོད་
འཇིག་རྟེན་མཐའ་མེད་དང་། །མཐའ་ཡང་ཡོད་ལ་མཐའ་མེད་ཁ་ཅིག་མཆི། །མཐའ་ཡོད་མ་ཡིན་མཐའ་མེད་མིན་ཞེས་ཏེ། །དཔེར་ན་བྱ་ནི་གཟེབ་ཏུ་བཅུག་པ་བཞིན། །ལ་ལ་དག་ནི་ལུས་འདི་བདག་ཅེས་མཆི། །ལ་ལ་དག་ནི་ལུས་འདི་གཞན་ཞེས་མཆི། །རྟོག་པས་ཡོངས་སུ་
དཀྲིས་ནས་ཉལ་བགྱིད་དེ། །བྱ་ནི་བྱ་རྒྱར་ཆུད་ནས་ཐོགས་པ་བཞིན། །ལ་ལ་དག་ནི་དབང་ཕྱུག་སྤྲུལ་ཅེས་མཆི། །ལ་ལ་རྒྱུ་མེད་བྱུང་ཞེས་འདོགས་པར་བགྱིད། །ལྟ་བའི་རྣམ་པ་དག་གིས་ཀུན་ནས་དཀྲིས། །མཁའ་ལ་གནས་པའི་ཟླ་ལྟར་རྒྱལ་བས་གཟིགས། །ཇི་

ལྟར་གཟེབ་ཏུ་བཅུག་པའི་བྱ་རྨོངས་པ། །བུ་ག་བུ་གར་ཐར་བར་རེ་བ་ལྟར། །མི་མཁས་ལྟ་བའི་རྣམ་པས་བཏགས་པར་གྱུར། །ཐར་པ་མི་འཐོབ་རྐང་གཉིས་བཏགས་པ་བཞིན། །ཚངས་དང་སྐྱེ་དགུའི་བདག་དང་སྐེམ་བྱེད་དང་། །གཞན་ཡང་འཁོར་ལོ་འཛིན་དང་
རྣམ་ཐོས་བུ། །ཕྱོགས་དང་རྒྱ་མཚོ་ཀུན་ལ་ཕྱག་འཚལ་ཏེ། །རྒྱལ་པོས་མཚན་མོ་རྐུན་པོ་བཟུང་བ་བཞིན། །དབུལ་བོ་བུ་ལོན་ཆགས་པ་བུ་ལོན་པས། །བཟུང་ན་གཉར་སྦྲོན་གསོལ་བ་འདེབས་པ་བཞིན། །ལྟ་བའི་རྣམ་པར་གནས་པའི་བྱིས་པ་རྣམས། །དབང་ཕྱུག་ལས་ནི་བདེ་
བ་ཚོལ་བགྱིད་དེ། །རྐུན་པོའི་ཚོགས་རྣམས་བཙོན་རར་སྩལ་བ་བཞིན། །འགྲོ་བ་རྣམས་སུ་སྡུག་བསྔལ་བརྒྱ་མྱོང་བ། །དེ་དག་དེ་བཞིན་གཤེགས་པ་ཁྱོད་ཀྱིས་གཟིགས། །ཕྱག་གི་མཐིལ་ན་སོར་མོ་ལྔ་དང་མཚུངས། །དེ་ལ་མི་དབང་ཐུགས་རྗེ་བསྐྱེད་ནས་ནི། །འགྲོ་བ་མཁྱེན་པ་འགྲོ་
བར་སྤྱོད་མཛད་དེ། །བློ་མཆོག་ཚེ་རབས་འགྲོ་བ་བཀྲོལ་བ་ནི། །དཔེར་ན་རྒྱལ་པོས་བཙོན་རྣམས་བཀྱེ་བ་བཞིན། །འཇིག་རྟེན་སྨན་སླད་བསྐལ་པ་བསམ་ཡས་སུ། །དཀའ་བ་མཛད་ནས་བྱང་ཆུབ་མཆོག་བརྙེས་ཏེ། །ལྟ་བའི་རྣམ་པར་སེམས་ཅན་འཁྱམས་མཁྱེན་ནས། །དེ་དག་
བཅིངས་ལས་ཁྱོད་ཀྱིས་གྲོལ་བར་མཛད། །བདེ་གཤེགས་མི་ཡི་སེང་གེ་རྐང་གཉིས་གཙོ། །ཆོས་ཚོགས་གང་ལ་མདའ་དབང་ཁྱོད་མཛད་པ། །ལྟ་བའི་རྣམ་པ་སྒྱུ་འདྲར་རྨོངས་མི་མངའ། །བདེ་གཤེགས་ཁྱོད་ནི་དེ་འདྲར་བདག་ཅག་འཚལ། །སྟོབས་རྣམས་གང་གིས་རྒྱལ་བ་སྟོབས་
བརྙེས་ཤིང་། །མི་འཇིགས་གང་གིས་སྔོ་བའི་དགྲ་བསལ་ཏེ། །འཁོར་གྱི་ནང་དུ་སེང་གེའི་སྒྲ་སྒྲོགས་པ། །ཁྱུ་མཆོག་དེ་ནི་བདག་ཅག་ཐོབ་པར་ཤོག །གང་གིས་རྒྱལ་བ་འཇིག་རྟེན་གསུམ་བསྐྱོད་དང་། །གང་གིས་མཐའ་ཡས་འོད་ནི་འགྱེད་པ་དང་། །གང་གིས་མི་མཆོག་སེམས་ཅན་
ལུང་སྟོན་པ། །དེ་རིང་ཡུད་ཀྱིས་བདག་ཅག་དེ་ཐོབ་ཤོག །དེ་ནས་དེའི་ཚེ་བཅོམ་ལྡན་འདས་ཀྱིས་ཀུན་ཏུ་རྒྱུ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས། བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འཇིག་

རྟེན་ཕན་བཞེད་འཛུམ་པ་གང་མཛད་པ། །མུ་སྟེགས་ཚོགས་འདི་ཤིན་ཏུ་འཕགས་གྱུར་ཏམ། །མི་མཆོག་རང་བྱུང་ཅི་སླད་འཛུམ་མཛད་པ། །འཛུམ་རྒྱུ་དེ་ནི་ཁྱོད་ཀྱིས་བཀའ་སྩལ་གསོལ། །བདེ་བར་གཤེགས་པས་འཛུམ་པ་མཛད་མཐོང་ནས། །འཇིག་རྟེན་ཕན་བཞེད་འགྲོ་འདི་ཐེ་ཚོམ་འཚལ། །
ཟླ་བ་ཉ་ལ་འགྲོ་བ་ལྟ་བ་བཞིན། །ལྟ་ཞིང་མཆིས་ན་རྒྱལ་བ་འཛུམ་རྒྱུ་གསུངས། །སུ་ཞིག་རྒྱལ་ལ་མཆོད་པ་དམ་པ་བགྱིས། །གང་གིས་དེ་རིང་ཡབ་ནི་མཉེས་པར་བགྱིས། །རྒྱལ་བའི་ཡོན་ཏན་དེ་རིང་གང་གིས་མཐོང་། །མཁས་པ་མྱུར་དུ་ལེགས་པར་བཀའ་སྩལ་གསོལ། །མུ་སྟེགས་
ཅན་རྣམས་ལུང་བསྟན་དེ་ཐོས་ནས། །འཇིག་རྟེན་ཐམས་ཅད་རབ་ཏུ་དགའ་བར་འགྱུར། །འདི་ལྟར་འདི་དག་བདེ་བར་གཤེགས་པས་བཏུལ། །དེས་ན་འགྲོ་བ་ཀུན་གྱི་རྣམ་འདྲེན་ལགས། །རྒྱལ་བས་ཐེ་ཚོམ་ལེགས་པར་བསལ་དུ་གསོལ། །སོམ་ཉི་འཚལ་བའི་སོམ་ཉི་དགུམ་དུ་
གསོལ། །དེས་ནི་འཁོར་རྣམས་འདི་དག་ཡི་རངས་ཤིང་། །སངས་རྒྱས་ཁྱོད་ཀྱི་དགོངས་ལ་དད་པར་མཆི། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ཁྱོད་ཀྱིས་དུས་འདི་ཤེས་གྱུར་ནས། །རྒྱལ་བ་དགྲ་ལས་རྒྱལ་ལ་དྲིས་
པ་ལེགས། །འདྲེན་པ་རང་བྱུང་ཉིད་ལ་དེ་དྲིས་པས། །འཇིག་རྟེན་ཕན་པའི་ཚིག་ཀྱང་བརྗོད་པར་གྱུར། །འཛུམ་པ་འདི་ནི་ཇི་ལྟར་ངས་མཛད་པ། །འཛུམ་རྒྱུ་ངས་དེང་ཁྱོད་ལ་བསྟན་པར་བྱས། །ཡང་དག་ཇི་བཞིན་ང་ཡིས་བསྟན་པ་ལ། །དགའ་བའི་ཡིད་དུ་བྱོས་ཏེ་དེང་ཉོན་ཅིག །མུ་སྟེགས་ཚོགས་
འདི་རབ་ཏུ་དུལ་གྱུར་ཏེ། །ལྟ་བའི་རྣམ་སྤངས་ལྟ་བ་བཟང་པོར་འགྱུར། །ལྟ་བའི་རྣམ་པར་འཇིག་རྟེན་འཁྱམས་མཐོང་ནས། །སྙིང་རྗེ་ཅན་གྱུར་བྱང་ཆུབ་རབ་ཏུ་ཞུགས། །ལྟ་བའི་རྣམ་པ་དག་ནི་རབ་སྤངས་ཏེ། །ལྟ་བ་དྲང་པོ་རྙོག་མེད་རྟོགས་གྱུར་ཅིང་། །ང་ཡིས་ལུང་བསྟན་ཐོགས་མེད་
ཐོས་གྱུར་ནས། །དེ་དག་ཀུན་གྱིས་ཐམས་ཅད་མཁྱེན་སེམས་བསྐྱེད། །སྔོན་གྱི་རྒྱལ་བ་དག་ལ་དད་བསྐྱེད་དེ། །ཐུགས་རྗེ་ལྡན་པ་རྐང་གཉིས་དམ་པ་པོ། །རྒྱལ་བ་བྱེ་བ་ཉི་ཤུར་ཚང་བ་ལ། །བླ་མེད་བྱང་ཆུབ་ཚོལ་ཞིང་བསྙེན་བཀུར་བྱས། །རྒྱལ་བ་རྣམས་ལ་སྦྱིན་པ་མི་ཉུང་ཕུལ། །ཁྲིམས་དང་

ཞི་བའི་ཏིང་འཛིན་རྣམ་པར་སྦྱངས། །ཤེས་རབ་བརྩོན་འགྲུས་སྟོབས་ཀྱང་འབར་བར་བྱས། །ཐུགས་རྗེ་ལྡན་རྣམས་དྲུང་དུ་བཟོད་པ་བསྟེན། །བྱང་ཆུབ་དམ་པ་བཙལ་ནས་ཡུན་རིང་དུ། །ཕ་རོལ་ཕྱིན་པ་དྲུག་ལ་བློ་ཡང་ཞུགས། །རྒྱལ་བ་དགྲ་ལས་རྒྱལ་ལ་ཞུ་བ་
ཞུས། །སངས་རྒྱས་བརྒྱ་འགྲངས་དག་ལ་ཡིད་དགའ་བྱས། །དེ་དག་སྡིག་པའི་གྲོགས་ཀྱི་དབང་གིས་ནི། །ལྟ་བའི་རྣམ་པ་སྡུག་ལ་གནས་གྱུར་པ། །དེ་དག་བདེ་གཤེགས་རང་བྱུང་མཐོང་གྱུར་ནས། །ཆགས་པ་མེད་པས་ལྟ་བའི་རྣམ་པ་སྤངས། །སྟོན་པའི་དགོངས་པ་ཡང་དག་རྣམ་
པར་རྟོགས། །སྟོན་པའི་དགོངས་པ་རྣམས་ལ་དད་པ་གནས། །མ་འོངས་དུས་ན་བྱང་ཆུབ་ཚོལ་བྱེད་ཅིང་། །རྒྱལ་བ་བྱེ་བ་བསྙེན་བཀུར་བྱེད་པར་འགྱུར། །མ་འོངས་བསྐལ་པ་སྐར་མ་འདྲ་བ་ལ། །རྒྱལ་བ་ང་རྒྱལ་བཅོམ་པར་མཚན་འཐུན་པར། །གྲགས་པ་ཆེན་པོར་ཕྱོགས་སུ་རྣམ་པར་
གྲགས། །འཇིག་རྟེན་མཁས་པ་འགྲོ་བ་འགྲེལ་པར་འགྱུར། །དེ་དག་སངས་རྒྱས་ཞིང་ཡང་དག་འགྱུར་ཏེ། །དེ་དག་བཀོད་པ་སྣ་ཚོགས་མཚུངས་པ་མེད། །སངས་རྒྱས་ཞིང་དེར་སྡིག་པའི་བློ་ཅན་མེད། །བློ་གྲོས་དག་པར་འཐུན་པ་ཤ་སྟག་གནས། །དེ་ནི་ངན་སོང་ཐམས་ཅད་རྣམ་པར་སྦྱངས། །
མི་ཁོམ་བསལ་ཏེ་དུས་དེའི་ཐ་མ་ལ། །རྒྱལ་བ་དེ་དག་སྐུ་ཚེའི་སྟོབས་ལྡན་ཏེ། །ལོ་ནི་སྟོང་ཕྲག་བརྒྱད་ཅུ་ཐུབ་པར་འགྱུར། །མི་དེ་དག་གིས་བྱང་ཆུབ་འདི་ཐོས་ནས། །དེ་ཚེ་མི་མཉེས་པར་ནི་བྱེད་མི་འགྱུར། །ཆགས་མེད་བློ་མངའ་རྣམས་ཀྱི་མཚན་ཐོས་ན། །བུད་མེད་རྣམས་ཀྱང་སྐྱེས་
པའི་ལུས་ཐོབ་འགྱུར། །དེ་ལྟར་ང་བཅོམ་རྒྱལ་བ་དྲང་སྲོང་ཆེ། །སྟོན་པས་མུ་སྟེགས་ལུང་བསྟན་བཀའ་སྩལ་པ། །དེ་ཐོས་གྱུར་ནས་ལྷར་བཅས་འཇིག་རྟེན་རྣམས། །ཡི་རངས་གྱུར་ཅིང་སྟོབས་ཀྱང་སྐྱེས་པར་གྱུར། །མུ་སྟེགས་ཅན་ལུང་བསྟན་པའི་ལེའུ་སྟེ་ཉི་ཤུ་ལྔ་པའོ།། །།
དེ་ནས་རྒྱལ་པོ་ཟས་གཙང་མ་འཁོར་དང་བཅས་པས་ལྷ་མ་ཡིན་རྣམས་དང་། ནམ་མཁའ་ལྡིང་རྣམས་ནས་ཀུན་ཏུ་རྒྱུ་རྣམས་ཀྱི་བར་གྱི་ལུང་བསྟན་པ་ཐོས་ནས་འདི་སྙམ་དུ་སེམས་པར་གྱུར་ཏེ། འདི་ལྟར་བཅོམ་ལྡན་འདས་ཀྱིས་ལེགས་པར་གསུངས་པས་འགྲོ་བ་ཐམས་ཅད་ཚིམ་པར་བྱས་པ་ནི་

ངོ་མཚར་ཏོ་སྙམ་ནས་དེ་ཡང་བུ་ལ་ཆགས་པས་ཀུན་ཏུ་དཀྲིས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཟས་གཙང་མའི་སེམས་ཐུགས་སུ་ཆུད་ནས་རྒྱལ་པོ་ཟས་གཙང་མ་ལ་བཀའ་སྩལ་པ། རྒྱལ་པོ་ཆེན་པོ་ཁྱོད་ལ་ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་
དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བའི་ཆོས་འདི་ལྟ་སྟེ། ཁམས་དྲུག་རྣམ་པར་དབྱེ་བ་ཞེས་བྱ་བའི་ཆོས་ཀྱི་རྣམ་གྲངས་བཤད་ཀྱིས་དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་བཤད་
དོ། །བཅོམ་ལྡན་འདས་ལེགས་སོ་ཞེས་གསོལ་ནས། རྒྱལ་པོ་ཟས་གཙང་མ་བཅོམ་ལྡན་འདས་ཀྱི་ལྟར་ཉན་པ་དང་། དེ་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ཁམས་དྲུག་རྣམ་པར་དབྱེ་བ་ཞེས་བྱ་བའི་ཆོས་ཀྱི་རྣམ་གྲངས་དེ་གང་ཞེ་ན། རྒྱལ་པོ་ཆེན་
པོ་སྐྱེས་བུ་གང་ཟག་འདི་ནི་ཁམས་དྲུག་པ། རེག་པའི་སྐྱེ་མཆེད་དྲུག་པ། ཡིད་ཀྱི་ཉེ་བར་སྤྱོད་པ་བཅོ་བརྒྱད་པ་སྟེ། སྐྱེས་བུ་འདི་ནི་ཁམས་དྲུག་པ་ཞེས་གང་སྨྲས་པ་དེ་ཅི་ལས་བརྟེན་ཏེ་སྨྲས་ཤེ་ན། རྒྱལ་པོ་ཆེན་པོ་ཁམས་དྲུག་ནི་འདི་དག་གོ །དྲུག་གང་ཞེ་ན། འདི་ལྟ་སྟེ། སའི་
ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་དང་། རྣམ་པར་ཤེས་པའི་ཁམས་སོ། །རྒྱལ་པོ་ཆེན་པོ་དེ་དག་ནི་ཁམས་དྲུག་སྟེ། སྐྱེས་བུ་འདི་ནི་ཁམས་དྲུག་པའོ་ཞེས་གང་ངས་སྨྲས་པ་དེ་ནི་དེ་ལ་བརྟེན་ཏེ་སྨྲས་སོ། །སྐྱེས་བུ་འདི་ནི་
རེག་པའི་སྐྱེ་མཆེད་དྲུག་པའོ་ཞེས་གང་སྨྲས་པ་དེ་ཅི་ལས་བརྟེན་ཏེ་སྨྲས་ཤེ་ན། རྒྱལ་པོ་ཆེན་པོ་རེག་པའི་སྐྱེ་མཆེད་དྲུག་ནི་འདི་དག་སྟེ། དྲུག་གང་ཞེ་ན། གཟུགས་རྣམས་ལ་ལྟ་བའི་ཕྱིར་མིག་རེག་པའི་སྐྱེ་མཆེད་དང་། སྒྲ་རྣམས་ལ་ཉན་པའི་ཕྱིར་རྣ་བ་རེག་པའི་སྐྱེ་མཆེད་དང་། དྲི་རྣམས་ལ་
མནོམ་པའི་ཕྱིར་སྣ་རེག་པའི་སྐྱེ་མཆེད་དང་། རོ་རྣམས་ལ་མྱང་བའི་ཕྱིར་ལྕེ་རེག་པའི་སྐྱེ་མཆེད་དང་། རེག་བྱ་རྣམས་ལ་རེག་པའི་ཕྱིར་ལུས་རེག་པའི་སྐྱེ་མཆེད་དང་། ཆོས་རྣམས་རྣམ་པར་ཤེས་པའི་ཕྱིར་ཡིད་རེག་པའི་སྐྱེ་མཆེད་དོ། །རྒྱལ་པོ་ཆེན་པོ་དེ་དག་ནི་རེག་པའི་སྐྱེ་མཆེད་དྲུག་སྟེ།

སྐྱེས་བུ་འདི་ནི་རེག་པའི་སྐྱེ་མཆེད་དྲུག་པའོ་ཞེས་གང་ངས་སྨྲས་པ་དེ་ནི་དེ་ལ་བརྟེན་ཏེ་སྨྲས་སོ། །རྒྱལ་པོ་ཆེན་པོ་སྐྱེས་བུ་འདི་ནི་ཡིད་ཀྱི་ཉེ་བར་སྤྱོད་པ་བཅོ་བརྒྱད་པའོ་ཞེས་གང་སྨྲས་པ་དེ་ཅི་ལས་བརྟེན་ཏེ་སྨྲས་ཤེ་ན། རྒྱལ་པོ་ཆེན་པོ་ཡིད་ཀྱི་ཉེ་བར་སྤྱོད་པ་བཅོ་བརྒྱད་ནི་
འདི་དག་སྟེ། བཅོ་བརྒྱད་གང་ཞེ་ན། འདི་ལ་མིས་མིག་གིས་གཟུགས་མཐོང་ན་ཡིད་བདེ་བ་དང་། ཡིད་མི་བདེ་བ་དང་། བཏང་སྙོམས་སུ་འགྱུར་བར་གཟུགས་ལ་ཉེ་བར་སྤྱོད་དོ། །རྣ་བས་སྒྲ་ཐོས་ན་ཡིད་བདེ་བ་དང་། ཡིད་མི་བདེ་བ་དང་། བཏང་སྙོམས་སུ་འགྱུར་བར་སྒྲ་ལ་ཉེ་བར་
སྤྱོད་དོ། །སྣས་དྲི་ཚོར་ན་ཡིད་བདེ་བ་དང་། ཡིད་མི་བདེ་བ་དང་། བཏང་སྙོམས་སུ་འགྱུར་བར་དྲི་ལ་ཉེ་བར་སྤྱོད་དོ། །ལྕེས་རོ་མྱོང་ན་ཡིད་བདེ་བ་དང་། ཡིད་མི་བདེ་བ་དང་། བཏང་སྙོམས་སུ་འགྱུར་བར་རོ་ལ་ཉེ་བར་སྤྱོད་དོ། །ལུས་ཀྱིས་རེག་བྱ་ལ་རེག་ན་ཡིད་བདེ་བ་དང་། ཡིད་
མི་བདེ་བ་དང་། བཏང་སྙོམས་སུ་འགྱུར་བར་རེག་བྱ་ལ་ཉེ་བར་སྤྱོད་དོ། །ཡིད་ཀྱིས་ཆོས་རིག་ན་ཡིད་བདེ་བ་དང་། ཡིད་མི་བདེ་བ་དང་། བཏང་སྙོམས་སུ་འགྱུར་བར་ཆོས་ལ་ཉེ་བར་སྤྱོད་དོ། །རྒྱལ་པོ་ཆེན་པོ་དེ་ལ་གང་དག་ཡིད་བདེ་བར་ཉེ་བར་སྤྱོད་པ་དྲུག་དང་། གང་དག་ཡིད་མི་བདེ་
བར་ཉེ་བར་སྤྱོད་པ་དྲུག་དང་། གང་དག་བཏང་སྙོམས་སུ་འགྱུར་བར་ཉེ་བར་སྤྱོད་པ་དྲུག་པོ་དེ་དག་གཅིག་ཏུ་བསྡུས་ན་ཡིད་ཀྱི་ཉེ་བར་སྤྱོད་པ་བཅོ་བརྒྱད་དུ་འགྱུར་རོ། །རྒྱལ་པོ་ཆེན་པོ་བཅོ་བརྒྱད་པོ་དེ་དག་ནི་ཡིད་ཀྱི་ཉེ་བར་སྤྱོད་པ་སྟེ། རྒྱལ་པོ་ཆེན་པོ་སྐྱེས་བུ་འདི་ནི་ཡིད་ཀྱི་ཉེ་བར་སྤྱོད་
པ་བཅོ་བརྒྱད་པའོ་ཞེས་གང་ངས་སྨྲས་པ་དེ་ནི་དེ་ལ་བརྟེན་ཏེ་སྨྲས་སོ། །རྒྱལ་བོ་ཆེན་པོ་དེ་ལ་སའི་ཁམས་ནི་རྣམ་པ་གཉིས་ཏེ་ནང་གི་ཡང་ཡོད། ཕྱི་རོལ་གྱི་ཡང་ཡོད་དོ། །རྒྱལ་པོ་ཆེན་པོ་ནང་གི་སའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་ནང་གི་ཁོང་ན་སྲ་བ་དང་།
མཁྲང་བའི་རྣམ་པ་དང་། ཉེ་བར་གྱུར་པ་དང་ཟིན་པའོ། །དེ་ཡང་གང་ཞེ་ན། འདི་ལྟ་སྟེ་སྐྲ་དང་། སྤུ་དང་། སེན་མོ་དང་། སོ་དང་། རྡུལ་དང་། དྲི་མ་དང་། པགས་པ་དང་། ཤ་དང་། རྩ་དང་། ཆུ་རྒྱུས་དང་། རུས་པ་དང་། རྐང་དང་། སྙིང་དང་། མཆིན་པ་དང་།

གློ་བ་དང་། མཁལ་མ་དང་། སུལ་མངས་དང་། མཆིན་དྲི་དང་། རྒྱུ་མ་དང་། གཉེ་མ་དང་། ལྒང་བ་དང་། མཆེར་པ་དང་། ཕྱི་ས་དང་། གཞང་དང་། ཀླད་པ་དང་། ཀླད་རྒྱས་དང་། གཞན་གང་ཡང་ལུས་འདི་ལ་ནང་གི་ཁོང་ནས་སྲ་བ་དང་། མཁྲང་བའི་རྣམ་པ་དང་། ལུས་སུ་
གཏོགས་པར་གྱུར་པ་དང་། ཟིན་པ་འདི་ནི་ནང་གི་སའི་ཁམས་ཞེས་བྱའོ། །རྒྱལ་པོ་ཆེན་པོ་ཕྱི་རོལ་གྱི་སའི་ཁམས་གང་ཞེ་ན། གང་ཅི་ཡང་རུང་སྟེ། ཕྱི་རོལ་གྱི་སྲ་བ་དང་། མཁྲང་བའི་རྣམ་པ་དང་། ལུས་སུ་མ་གཏོགས་པ་དང་། མ་ཟིན་པ་འདི་ནི་ཕྱི་རོལ་གྱི་སའི་ཁམས་ཤེས་བྱའོ། །
རྒྱལ་པོ་ཆེན་པོ་དེ་ལ་ནང་གི་སའི་ཁམས་འབྱུང་བའི་ཚེ་གང་ནས་ཀྱང་མི་འོང་། འགག་པའི་ཚེ་ཡང་གང་དུ་ཡང་སོགས་པར་མི་འགྲོའོ། །རྒྱལ་པོ་ཆེན་པོ་བུད་མེད་ནང་དུ་བདག་ནི་བུད་མེད་དོ་ཞེས་རྟོག་ཅིང་དེ་ནང་དུ་བུད་མེད་ཅེས་བརྟགས་ནས། ཕྱི་རོལ་དུ་སྐྱེས་པ་ལ་སྐྱེས་པའོ་ཞེས་རྟོག་གོ །
དེ་ཕྱི་རོལ་དུ་སྐྱེས་པ་ལ་སྐྱེས་པ་ཞེས་བརྟགས་ནས་ཆགས་པར་གྱུར་ཏེ། ཕྱི་རོལ་གྱི་སྐྱེས་པ་དང་ཕྲད་པར་འདོད་དོ། །སྐྱེས་པ་དེ་ཡང་ནང་དུ་བདག་སྐྱེས་པ་ཞེས་རྟོག་སྟེ། ནང་དུ་བདག་ནི་སྐྱེས་པ་ཞེས་བརྟགས་ནས་ཕྱི་རོལ་དུ་བུད་མེད་ལ་བུད་མེད་ཅེས་རྟོག་གོ། །ཕྱི་རོལ་དུ་བུད་མེད་ལ་བུད་
མེད་ཅེས་བརྟགས་ནས་ཆགས་པར་འགྱུར་ཏེ། ཕྱི་རོལ་གྱི་བུད་མེད་དང་ཕྲད་པར་འདོད་དོ། །ཕྲད་པར་འདོད་པས་ཕྲད་པར་འགྱུར་རོ། །ཕྲད་པའི་རྐྱེན་གྱིས་མེར་མེར་པོ་སྐྱེ་བར་འགྱུར་བའི་དུས་དེ་ཡོད་དོ། །རྒྱལ་པོ་ཆེན་པོ་གང་ལ་ཀུན་ཏུ་བརྟག་པ་དང་། གང་ཀུན་ཏུ་རྟོག་པ་དེ་གཉི་ག་ཡང་མེད་
དེ། བུད་མེད་ལ་ནི་བུད་མེད་མེད་དོ། །སྐྱེས་པ་ལ་ནི་སྐྱེས་པ་མེད་དོ། །དེ་ལྟར་མེད་ཅིང་ཡང་དག་པ་མ་ཡིན་པར་ཀུན་ཏུ་རྟོག་པ་སྐྱེས་ཏེ། ཀུན་ཏུ་རྟོག་པ་དེ་ཡང་ངོ་བོ་ཉིད་ཀྱིས་མེད་དོ། །ཀུན་ཏུ་རྟོག་པ་ཇི་ལྟ་བ་དེ་བཞིན་དུ་ཕྲད་པ་དང་། མེར་མེར་པོ་ཡང་ངོ་བོ་ཉིད་ཀྱིས་མེད་དོ། །
གང་ངོ་བོ་ཉིད་མེད་པ་དེ་ཇི་ལྟར་སྲ་བ་སྐྱེད་པར་འགྱུར། རྒྱལ་པོ་ཆེན་པོ་དེ་ལྟར་ཀུན་ཏུ་རྟོག་པ་ཤེས་པར་བྱས་ནས་སྲ་བ་ཉིད་རྟོགས་པར་བྱ་སྟེ། ཅི་ནས་སྲ་བ་ནི་སྐྱེ་བའི་ཚེ་གང་ནས་ཀྱང་མི་འོང་བར་ཤེས་པར་བྱའོ། །རྒྱལ་པོ་ཆེན་པོ་འདི་ལྟར་གང་ལུས་འདི་དུར་ཁྲོད་ཀྱི་མཐར་འགྱུར་བའི་དུས་

དེ་ཡོད་དེ། དེའི་སྲ་བ་དེ་འཇིག་ཅིང་འགག་པར་འགྱུར་བའི་ཚེ་ཤར་ཕྱོགས་སུ་མི་འགྲོ། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། སྟེང་དང་། འོག་དང་། ཕྱོགས་མཚམས་རྣམས་སུ་ཡང་མི་འགྲོ་སྟེ། རྒྱལ་པོ་ཆེན་པོ་ནང་གི་སའི་ཁམས་ནི་དེ་ལྟར་བལྟའོ། །
རྒྱལ་པོ་ཆེན་པོ་འཇིག་རྟེན་གནས་པ་འདི་ནམ་མཁར་གྱུར་པ་ལ་ཚངས་པའི་གཞལ་མེད་ཁང་རིན་པོ་ཆེ་སྣ་བདུན་གྱི་རྒྱུ་ལས་གྲུབ་པ་གནས་པའི་དུས་དེ་ཡོད་དེ། རྒྱལ་པོ་ཆེན་པོ་དེའི་སྲ་བ་དེ་འབྱུང་བའི་ཚེ་གང་ནས་ཀྱང་མི་འོང་། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་གཞལ་མེད་ཁང་རིན་པོ་ཆེ་སྣ་བདུན་གྱི་
རྒྱུ་ལས་གྲུབ་པ་བྱུང་ཡང་། རྒྱལ་པོ་ཆེན་པོ་དེའི་སྲ་བ་དེ་འབྱུང་བའི་ཚེ་གང་ནས་ཀྱང་མི་འོང་ངོ་། །ཁོར་ཡུག་དང་ཁོར་ཡུག་ཆེན་པོའི་རི་རྡོ་རྗེའི་རྒྱུ་ལས་གྲུབ་པ་སྲ་ཞིང་བརྟན་ལ་ལྷུན་སྟུག་པ་རྣམས་གནས་པར་གྱུར་ཀྱང་དེ་དག་གི་སྲ་བ་དེ་འབྱུང་བའི་ཚེ་གང་ནས་ཀྱང་མི་འོང་ངོ་། །རིའི་རྒྱལ་པོ་
རི་རབ་དག་དང་། གཉའ་ཤིང་འཛིན་དག་དང་། མུ་ཁྱུད་འཛིན་དག་དང་། གཤོལ་མདའ་འཛིན་དག་དང་། རྡོ་རྗེ་འཛིན་དག་དང་། སེང་ལྡེང་ཅན་དག་དང་། རྣམ་པར་འདུད་དག་དང་། རི་རྟ་རྣ་དག་དང་། བལྟ་ན་སྡུག་དག་དང་། བལྟ་ན་སྡུག་ཆེན་པོ་དག་དང་། ཐེར་སྒྲེ་དག་དང་། སྤོས་
ཀྱི་ངད་ལྡང་དག་དང་། གངས་རི་དག་དང་། དེ་མ་ཡིན་པའི་རི་ནག་པོ་དག་གནས་པ་དང་། ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གནས་པ་དང་། རྔམས་སུ་དཔག་ཚད་བརྒྱད་ཁྲི་བཞི་སྟོང་ཡོད་ལ། རྒྱར་དཔག་ཚད་དྲུག་ཁྲི་ཡོད་པའི་ས་ཆེན་པོ་
གནས་པར་གྱུར་ཀྱང་། རྒྱལ་པོ་ཆེན་པོ་སྲ་བ་དེ་འབྱུང་བའི་ཚེ་གང་ནས་ཀྱང་མི་འོང་ངོ་། །རྒྱལ་པོ་ཆེན་པོ་འཇིག་རྟེན་འདི་འཇིག་པར་འགྱུར་བའི་ཚེ་ས་ཆེན་པོ་འདི་མེས་ཚིག་པའམ། ཆུས་བཤིག་པའམ། རླུང་གིས་གཏོར་བར་འགྱུར་བའི་དུས་དེ་ཡོད་དེ། དེ་མེས་ཚིག་ན་ནི་དུ་
བ་ཡང་མི་མངོན། ཐལ་བའི་ལྷག་མ་ཡང་མི་མངོན་པར་འགྱུར་རོ། །འདི་ལྟ་སྟེ། དཔེར་ན་ནམ་མཁའ་ལ་མར་རམ། འབྲུ་མར་གྱི་མེས་བསྲེགས་ན་དུ་བ་ཡང་མི་མངོན་ཞིང་ཐལ་བའི་ལྷག་མ་ཡང་མི་མངོན་པར་འགྱུར་རོ། །དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་

ཁམས་འདི་མེས་ཚིག་པའི་ཚེ་དུ་བ་ཡང་མི་མངོན་ཞིང་ཐལ་བའི་ལྷག་མ་ཡང་མི་མངོན་པར་འགྱུར་རོ། །ཆུས་བཤིག་པའི་ཚེ་ཡང་ལྷག་མ་ཅི་ཡང་མི་མངོན་པར་འགྱུར་ཏེ། འདི་ལྟ་སྟེ། དཔེར་ན་ལན་ཚྭ་ཆུའི་ནང་དུ་ཞུ་བ་ནི་ལྷག་མ་ཅུང་ཟད་ཀྱང་མི་མངོན་པར་འགྱུར་རོ། །དེ་བཞིན་དུ་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་ཆུས་བཤིག་པའི་ཚེ་ལྷག་མ་ཅུང་ཟད་ཀྱང་མི་མངོན་པར་འགྱུར་རོ། །རླུང་གིས་གཏོར་བའི་ཚེ་ཡང་ལྷག་མ་ཅུང་ཟད་ཀྱང་མི་མངོན་པར་འགྱུར་ཏེ། འདི་ལྟ་སྟེ། དཔེར་ན་རྣམ་པར་འཐོར་རླུང་གིས་འདས་པའི་བྱེའུ་ནི་ལྷག་མ་
ཅུང་ཟད་ཀྱང་མི་མངོན་པར་འགྱུར་རོ། །དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རླུང་གིས་གཏོར་བའི་ཚེ་ལྷག་མ་ཅུང་ཟད་ཀྱང་མི་མངོན་པར་འགྱུར་རོ། །རྒྱལ་པོ་ཆེན་པོ་དེ་ལྟར་སའི་ཁམས་དེ་འབྱུང་བ་ཡང་སྟོང་། སའི་ཁམས་འཇིག་པ་དང་འབྱུང་བ་
ཡང་ངོ་བོ་ཉིད་ཀྱིས་སྟོང་ངོ་། །རྒྱལ་པོ་ཆེན་པོ་སའི་ཁམས་ནི་ཐ་སྙད་ཙམ་མ་གཏོགས་པར་སའི་ཁམས་ཉིད་དུ་མི་དམིགས་ཏེ། ཐ་སྙད་དེ་ཡང་བུད་མེད་མ་ཡིན། སྐྱེས་པ་མ་ཡིན་གྱི། རྒྱལ་པོ་ཆེན་པོ་དེ་ལྟར་དེ་ཡང་དག་པ་ཇི་ལྟ་བ་བཞིན་གྱི་ཤེས་རབ་ཀྱིས་རྟོགས་ཤིག །རྒྱལ་པོ་
ཆེན་པོ་དེ་ལ་ཆུའི་ཁམས་ནི་རྣམ་པ་གཉིས་ཏེ། ནང་གི་དང་། ཕྱི་རོལ་གྱིའོ། །ནང་གི་ཆུའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་ནང་གི་ཁོང་ན་ཆུ་དང་། ཆུའི་རྣམ་པ་དང་། ཆུ་ཉིད་དང་། བརླན་པ་དང་། བརླན་པའི་རྣམ་པ་དང་། བརླན་པ་ཉིད་དང་། གཤེར་བ་
ཉིད་དང་། ལུས་སུ་གཏོགས་པ་དང་། ཟིན་པའོ། །དེ་ཡང་གང་ཞེ་ན། འདི་ལྟ་སྟེ། མཆི་མ་དང་། རྡུལ་དང་། མཆིལ་མ་དང་། སྣབས་དང་། ཆུ་སེར་དང་། ཚིལ་དང་། མཁྲིས་པ་དང་། ངར་སྣབས་དང་། རྣག་དང་། ཁྲག་དང་། འོ་མ་དང་། གཅིན་དང་། གཞན་
ཡང་གང་ལུས་འདི་ལ་ནང་གི་ཁོང་ན་ཆུ་དང་། ཆུའི་རྣམ་པ་དང་། ཆུ་ཉིད་དང་། བརླན་པ་དང་། བརླན་པའི་རྣམ་པ་དང་། བརླན་པ་ཉིད་དང་། གཤེར་བ་ཉིད་དང་། ལུས་སུ་གཏོགས་པ་དང་། ཟིན་པ་འདི་ནི་ནང་གི་ཆུའི་ཁམས་ཞེས་བྱའོ། །ཕྱི་རོལ་གྱི་ཆུའི་ཁམས་

གང་ཞེ་ན། གང་ཕྱི་རོལ་གྱི་ཆུ་དང་། ཆུའི་རྣམ་པ་དང་། ཆུ་ཉིད་དང་། བརླན་པ་དང་། བརླན་པའི་རྣམ་པ་དང་། བརླན་པ་ཉིད་དང་། གཤེར་བ་དང་། ལུས་སུ་མ་གཏོགས་པ་དང་། མ་ཟིན་པ་འདི་ནི་ཕྱི་རོལ་གྱི་ཆུའི་ཁམས་ཞེས་བྱའོ། །རྒྱལ་པོ་
ཆེན་པོ་དེ་ལ་ནང་གི་ཆུའི་ཁམས་འབྱུང་བའི་ཚེ་གང་ནས་ཀྱང་མི་འོང་ངོ་། །རྒྱལ་པོ་ཆེན་པོ་སྡུག་པ་མཐོང་ན་མཆི་མ་འབྱུང་བ་དང་། སྡུག་བསྔལ་གྱིས་ཉེན་པ་དང་། ཆོས་ཀྱི་ཤུགས་ཀྱིས་མཆི་མ་འབྱུང་བ་དང་། རླུང་གིས་བཏབ་བམ། རྣམ་པ་གཞན་དག་གིས་ཀྱང་མཆི་མ་འབྱུང་སྟེ།
དཔྱད་བྱས་པས་ཀྱང་ནང་གི་ཆུའི་ཁམས་དེ་འཕེལ་བར་འགྱུར་བའི་དུས་དེ་ཡོད་དེ། རྒྱལ་པོ་ཆེན་པོ་ཆུའི་ཁམས་དེ་འབྱུང་བའི་ཚེ་གང་ནས་ཀྱང་མི་འོང་ངོ་། །རྒྱལ་པོ་ཆེན་པོ་གང་ནང་གི་ཆུའི་ཁམས་ཡོངས་སུ་སྐམ་པར་འགྱུར་བའི་དུས་དེ་ཡོད་དེ། དེ་ཡོངས་སུ་སྐམ་ཞིང་འགག་པའི་
ཚེ་གང་དུ་ཡང་མི་འགྲོའོ། །རྒྱལ་པོ་ཆེན་པོ་གང་ནང་གི་མེའི་ཁམས་ཤས་ཆེ་བར་གྱུར་ན་དེས་ནང་གི་ཆུའི་ཁམས་ཡོངས་སུ་གདུང་བར་འགྱུར་བའི་དུས་དེ་ཡོད་དེ། གདུངས་པའི་ཚེ་གང་དུ་ཡང་མི་འགྲོའོ། །རྒྱལ་པོ་ཆེན་པོ་དེ་བཞིན་དུ་ནང་གི་ཆུའི་ཁམས་འབྱུང་བའི་ཚེ་གང་ནས་ཀྱང་
མི་འོང་། འགག་པའི་ཚེ་གང་དུ་ཡང་མི་འགྲོའོ། །རྒྱལ་པོ་ཆེན་པོ་གང་འཇིག་རྟེན་འདི་འཆགས་པར་འགྱུར་བའི་དུས་དེ་ཡོད་དེ། འཇིག་རྟེན་གྱི་ཁམས་འདི་འཆགས་པར་འགྱུར་བའི་ཚེ་ནམ་མཁའ་འདི་ལ་ཀུན་ཏུ་སྤྲིན་ཤིན་ཏུ་སྟུག་པོའི་ཚོགས་སུམ་ཅུ་རྩ་གཉིས་འཁྲིགས་པར་འགྱུར་ཏེ།
དེ་དག་འཁྲིགས་པས་ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ཡོག་པར་འགྱུར་ཏེ། དེ་ལ་བསྐལ་པ་བར་མ་ལྔའི་བར་དུ་གཤོལ་མདའ་ཙམ་གྱི་ཆར་གྱི་རྒྱུན་འབབ་པོ། །བསྐལ་པ་བར་མ་ལྔའི་བར་དུ་གླང་པོ་ཆེའི་ཕོ་མཚན་ཙམ་གྱི་ཆར་
འབབ་བོ། །བསྐལ་པ་བར་མ་ལྔའི་བར་དུ་རྒྱུན་མི་འཆད་པའི་ཆར་འབབ་བོ། །བསྐལ་པ་བར་མ་ལྔའི་བར་དུ་ཐིགས་པ་ཆེན་པོའི་ཆར་འབབ་བོ། །དེས་ས་ཆེན་པོ་འདི་ནས་ཚངས་པའི་འཇིག་རྟེན་གྱི་བར་དུ་ཆུས་ཁྱབ་པར་གང་བར་འགྱུར་ཏེ། རྒྱལ་པོ་ཆེན་པོ་ཆུའི་ཕུང་པོ་ཆེན་པོ་དེ་འབྱུང་བའི་ཚེའང་

གང་ནས་ཀྱང་མི་འོང་ངོ་། །རྒྱལ་པོ་ཆེན་པོ་གང་འཇིག་རྟེན་འདི་འཇིག་པར་འགྱུར་བའི་དུས་དེ་ཡོད་དེ། འཇིག་རྟེན་གྱི་ཁམས་འདི་འཇིག་པར་འགྱུར་བའི་ཚེ་ཉི་མ་གཉིས་འཇིག་རྟེན་དུ་འབྱུང་བར་འགྱུར་ཏེ། ཉི་མ་གཉིས་འཇིག་རྟེན་དུ་བྱུང་བས་ཆུ་མིག་དང་། ཆུ་བྲན་རྣམས་སྐམ་པར་འགྱུར་རོ། །དེ་ནས་ཉི་མ་གསུམ་འཇིག་རྟེན་དུ་
འབྱུང་སྟེ། ཉི་མ་གསུམ་འཇིག་རྟེན་དུ་བྱུང་བས་ཆུ་མིག་ཆེན་པོ་དང་། ཆུ་ཀླུང་ཆེན་པོ་རྣམས་སྐམ་པར་འགྱུར་རོ། །དེ་ནས་ཉི་མ་བཞི་འཇིག་རྟེན་དུ་འབྱུང་སྟེ། ཉི་མ་བཞི་འཇིག་རྟེན་དུ་བྱུང་བས་གང་ན་ཆུ་ཀླུང་ཆེན་པོ་བཞི་པོ་འདི་དག་འབབ་པའི་མཚོ་ཆེན་པོ་མ་དྲོས་པ་དེ་ཡང་
ཡོངས་སུ་སྐམ་པར་འགྱུར། ཐིམ་པར་འགྱུར་ཏེ་མེད་པར་འགྱུར་རོ། །དེ་ནས་ཉི་མ་ལྔ་འཇིག་རྟེན་དུ་འབྱུང་སྟེ། ཉི་མ་ལྔ་འཇིག་རྟེན་དུ་བྱུང་བས་རྒྱ་མཚོ་ཆེན་པོ་ཡང་དཔག་ཚད་གཅིག་ཙམ་གྱི་ཆུ་ཡོངས་སུ་ཟད་ཅིང་ཡོངས་སུ་འགྲིབ་པར་འགྱུར་རོ། །དཔག་ཚད་གཉིས་དང་།
གསུམ་དང་། བཞི་དང་། ལྔ་དང་། བཅུ་དང་། ཉི་ཤུ་དང་། སུམ་ཅུ་དང་། བཞི་བཅུ་དང་། དཔག་ཚད་ལྔ་བཅུ་ཙམ་གྱི་ཆུ་ཡོངས་སུ་ཟད་ཅིང་ཡོངས་སུ་འགྲིབ་པར་འགྱུར་རོ། །དཔག་ཚད་བརྒྱ་དང་། ཉིས་བརྒྱ་དང་། སུམ་བརྒྱ་དང་། བཞི་བརྒྱ་དང་། དཔག་ཚད་ལྔ་
བརྒྱ་དང་། དཔག་ཚད་སྟོང་དང་། ཉིས་སྟོང་དང་། སུམ་སྟོང་དང་། དཔག་ཚད་བཞི་སྟོང་ཙམ་དུ་རྒྱ་མཚོ་ཆེན་པོ་ལས་ཆུ་ཡོངས་སུ་ཟད་ཅིང་ཡོངས་སུ་འགྲིབ་པར་འགྱུར་རོ། །རྒྱལ་པོ་ཆེན་པོ་རྒྱ་མཚོ་ཆེན་པོ་ལ་དཔག་ཚད་བཞི་ཁྲིའི་ཆུ་ལས་པར་འགྱུར་བ་དང་། དཔག་
ཚད་སུམ་ཁྲི་དང་། ཉི་ཁྲི་དང་། དགུ་སྟོང་དང་། བརྒྱད་སྟོང་དང་། བདུན་སྟོང་དང་། དྲུག་སྟོང་དང་། ལྔ་སྟོང་དང་། བཞི་སྟོང་དང་། སུམ་སྟོང་དང་། ཉིས་སྟོང་དང་། སྟོང་གི་ཆུ་ལས་པར་འགྱུར་བ་དང་། དཔག་ཚད་དགུ་བརྒྱའི་ཆུ་ལས་པར་འགྱུར་བ་དང་། དཔག་
ཚད་བརྒྱད་བརྒྱ་དང་། བདུན་བརྒྱ་དང་། དྲུག་བརྒྱ་དང་། ལྔ་བརྒྱ་དང་། བཞི་བརྒྱ་དང་། སུམ་བརྒྱ་དང་། ཉིས་བརྒྱ་དང་། བརྒྱའི་ཆུ་ལས་པར་འགྱུར་བ་དང་། དཔག་ཚད་ལྔ་བཅུ་དང་། བཞི་བཅུ་དང་། སུམ་ཅུ་དང་། ཉི་ཤུ་དང་། བཅུ་དང་། དགུ་དང་། བརྒྱད་དང་།

བདུན་དང་། དྲུག་དང་། ལྔ་དང་། བཞི་དང་། གསུམ་དང་། གཉིས་དང་། དཔག་ཚད་གཅིག་གི་ཆུ་ལས་པར་འགྱུར་བ་དང་། ཤིང་ཏ་ལ