Kinh tạng Tây Tạng (Kangyur Đại Học) — 042_དཀོན་བརྩེགས།_ང

་ལགས་བསྙེལ་བ་ཡང་མི་མངའ། །བདེ་བར་གཤེགས་པ་ལུས་ལ་སོང་བའི་བསྒོམ་པ་བསྒོམ་པར་གྱིས་ཤེས་གསུངས། །སངས་རྒྱས་ཚུལ་འདི་རིག་ནས་བདེ་བར་
གཤེགས་པ་སྐྱོབ་ལ་མཆོད་པ་བགྱིས། །འདྲེན་པས་ཚོར་བའི་རང་བཞིན་བཙལ་བ་མཛད་ན་བརྙེས་པར་མ་གྱུར་ལ། །ཚོར་བ་ཚོར་བར་བགྱིད་པའང་ཐུབ་པས་ཡོངས་སུ་བཙལ་ན་མ་བརྙེས་ཏེ། །དེ་ལྟར་གང་ཞིག་དྲན་སྒོམ་དེ་ནི་སངས་རྒྱས་ཀྱིས་ཀྱང་ཡོང་མ་གཟིགས། །སངས་
རྒྱས་ཚུལ་འདི་འཚལ་ནས་སྟོན་པ་ལ་ནི་བདག་ཅག་མཆོད་པ་བགྱིས། །ཐུབ་པས་སེམས་དང་སེམས་ལས་བྱུང་བ་དགོངས་ཏེ་བཙལ་ན་མ་བརྙེས་ལ། །གང་གི་ཉེ་བར་གཞག་པ་དེ་ཡང་དྲན་པ་མེད་པར་རབ་མཁྱེན་ཀྱང་། །ཐར་པ་འདོད་པ་རྣམས་ཀྱིས་སེམས་འདུས་དྲན་པ་
བསྒོམ་པར་གྱིས་ཤེས་གསུངས། །བདེ་བར་གཤེགས་པའི་དགོངས་པ་འདི་འཚལ་ནས་ནི་སྟོན་ལ་མཆོད་པ་བགྱིས། །འཇིག་རྟེན་ཕན་པར་བཞེད་པས་ཆོས་དང་ཆོས་ལ་གང་སྤྱོད་དེ་མ་གཟིགས། །བསྒོམ་པར་གང་གསུངས་དྲན་པ་དེ་ཡང་འདི་ན་རང་བཞིན་མ་མཆིས་ལ། །ཐར་པ་
འདོད་པ་རྣམས་ཀྱིས་ཆོས་འདུས་དྲན་པ་བསྒོམ་པར་གྱིས་ཤེས་གསུངས། །སངས་རྒྱས་ཚུལ་བཞི་པོ་འདི་རབ་ཏུ་འཚལ་ནས་སྐྱོབ་ལ་མཆོད་པ་བགྱིས། །གནས་གཅིག་མཆིས་པ་མ་ལགས་གཉིས་སམ་གསུམ་འམ་བཞི་ལྟ་ག་ལ་མཆིས། །གང་གིས་གནས་སུ་བརྗོད་པའི་དྲན་པ་

དེ་ཡང་གང་ནའང་མ་མཆིས་ཏེ། །དེ་བས་གང་གི་བདེ་བའམ་སྡུག་བསྔལ་ཡང་དག་གང་ནའང་དེ་མ་མཆིས། །སྟོན་པའི་ཚུལ་འདི་འཚལ་ནས་དེས་ན་བདག་ཅག་ཁྱོད་ལ་མཆོད་པ་འཚལ། །སྟོན་པའི་ཚུལ་མཆོག་བཞི་པོ་འདི་རྣམས་དགེ་སློང་གང་དག་
འཛིན་བགྱིད་ན། །འདི་དག་ཐར་པ་ཉིད་ཀྱི་ལམ་སྟེ་འཁོར་བ་ལས་ནི་འབྱུང་བར་འགྱུར། །དེ་ལྟར་དེ་ནི་ཚུལ་འདིར་མ་བཅིང་མ་གྲོལ་བྱང་ཆུབ་འདྲེན་པ་མིན། །བཅོམ་ལྡན་འདས་ཀྱིས་བརྟགས་པ་མ་བཤིག་དེས་ན་ཁྱོད་ལ་མཆོད་པ་འཚལ། །ཐར་མཛད་སླད་དུ་བཅོམ་ལྡན་
འདས་ཀྱིས་ལམ་ཞི་རྫུ་འཕྲུལ་རྐང་པ་གསུངས། །འདི་དག་བསྒོམས་ན་མི་རྣམས་དཔའ་བོ་དུལ་ཞིང་མྱ་ངན་འདའ་བར་འགྱུར། །ཡང་དག་དུ་ན་རྫུ་འཕྲུལ་དང་ནི་རྐང་པ་སྒོམ་པ་མི་དམིགས་ཏེ། །ཆད་པར་མི་འགྱུར་བྱ་བའང་སྟོན་ཅིང་བྱེད་པ་པོ་ཡང་ཡོང་མི་དམིགས། །ཐམས་
ཅད་མཁྱེན་གྱི་བསྟན་འདིར་ལྷ་ཚོགས་ཐེ་ཚོམ་གང་ནའང་མ་མཆིས་ཏེ། །དེ་དག་དེ་ལ་ནེམ་ནུར་མ་མཆིས་དེ་བཞིན་སོམ་ཉི་མ་མཆིས་འགྱུར། །འདི་ནི་མཆོད་པ་བཟང་པོ་མཆོག་ཅེས་མཆོད་འོས་སངས་རྒྱས་རྣམས་ཀྱིས་གསུངས། །དེས་ན་བདེ་གཤེགས་དཔེ་མེད་སྤྱོད་མངའ་
མཆོད་འོས་ཁྱོད་ལ་མཆོད་པར་འཚལ། །ཐར་པར་མཛད་སླད་འཇིག་རྟེན་མཁས་པས་ངེས་འབྱུང་དབང་པོ་ལྔ་ཡང་གསུངས། །རྟག་ཏུ་བག་ཡོད་བྱོས་ལ་མྱ་ངན་འདས་འགྲོའི་ལམ་འདི་སྒོམ་ཞེས་བསྟན། །ཐུབ་པ་དབང་པོ་དང་ནི་སྒོམ་པ་པོ་དང་ཐར་པའང་མི་དམིགས་ཏེ། །
འདི་ལ་ལྷ་འཁོར་ཐེ་ཚོམ་མ་མཆིས་དེ་སླད་ཁྱོད་ལ་མཆོད་པ་འཚལ། །སངས་རྒྱས་རྣམས་ཀྱི་མྱ་ངན་འདས་པར་འགྲོ་བའི་དྲང་ལམ་སྟོབས་ལྔ་པོ། །དེ་དག་ཉོན་མོངས་ཟད་བགྱིད་ཐར་པར་བགྱིད་ཅེས་སྟོན་པ་ཐུབ་པས་གསུངས། །དེ་དག་རང་བཞིན་མ་མཆིས་ཉོན་མོངས་མ་མཆིས་
རྒྱལ་བ་མ་མཆིས་ཏེ། །ཐུབ་པ་བདག་ཅག་གང་ལའང་ཐེ་ཚོམ་མ་མཆིས་དེ་སླད་ཁྱོད་ལ་མཆོད། །བྱང་ཆུབ་ཡན་ལག་བདུན་པོ་འདི་དག་དགེ་བ་ལམ་གྱི་དམ་པ་སྟེ། །སངས་རྒྱས་རྣམས་ཀྱི་མྱ་ངན་འདས་འགྲོའི་དྲང་ལམ་མཆོག་ཅེས་ཐུབ་པས་གསུངས། །འཆིང་བ་མཆིས་པ་མ་ལགས་

གྲོལ་བ་མ་མཆིས་བཅིངས་པའང་མ་མཆིས་ཏེ། །སེམས་ཅན་དཀོན་མཆོག་འདི་ལ་བདག་ཅག་ཐེ་ཚོམ་མ་མཆིས་ཁྱོད་ལ་མཆོད། །རྐང་གཉིས་གཙོ་བོ་ཁྱོད་ཀྱིས་བཞི་ཕྲག་གཉིས་ལམ་སེམས་ཅན་རྣམས་ལ་བསྟན། །བརྩོན་འགྲུས་ལྡན་པར་འཕགས་ལམ་སྡུག་བསྔལ་མཐའ་
མར་འབྱིན་པ་སྒོམས་ཞེས་གསུངས། །མི་མཆོག་ལམ་དང་དེ་བཞིན་ཉོན་མོངས་འདི་གཉིས་གཡོ་བ་མ་མཆིས་ཏེ། །འདི་ལ་ལྷ་ཚོགས་ཐེ་ཚོམ་མ་མཆིས་གྱུར་པས་མཆོད་འོས་ཁྱོད་ལ་མཆོད། །འདོད་ཆགས་གཉེན་པོར་ཞི་གནས་བཀའ་སྩལ་ཞེ་སྡང་གཉེན་པོར་བྱམས་པ་གསུངས། །
གཏི་མུག་གཉེན་པོར་ལྷག་མཐོང་ཐུབ་པ་མཆོག་གིས་སེམས་ཅན་རྣམས་ལ་བསྟན། །འདི་དག་ཐམས་ཅད་གཡོ་བ་མ་མཆིས་སྐད་ཅིག་དག་མིན་ཉོན་མོངས་མིན། །འདི་ལ་ལྷ་ཚོགས་ཐེ་ཚོམ་མ་མཆིས་ཐུབ་པ་མཆོད་སླད་རྟག་ཏུ་བརྩོན། །སྡུག་བསྔལ་ཞི་བྱ་ཕྱིར་ནི་ཞི་གནས་ལྷག་
མཐོང་ལམ་ཡང་སྒོམས་ཞེས་གསུངས། །བཅོམ་ལྡན་གང་གིས་འགྲོ་བ་ཉོན་མོངས་བག་ཆགས་བཅས་དྲི་དེ་དག་ཞི། །ཐུབ་པ་ཞི་གནས་ལྷག་མཐོང་དེ་བཞིན་དྲི་མ་ཐམས་ཅད་སྟོང་པ་སྟེ། །འདི་ལ་ལྷ་ཚོགས་གང་དུའང་ཐེ་ཚོམ་མ་མཆིས་སྐྱོན་བྲལ་ཁྱོད་ལ་མཆོད། །སྟོབས་བཅུ་
སེམས་ཅན་རྣམས་ལ་དགེ་བ་བཅུ་ཡི་ལས་ལམ་བསྟན་མཛད་དེ། །གསོད་དང་འཁྲིག་དང་མ་བྱིན་ཕྲ་མ་བརྫུན་དང་ཞེ་གཅོད་ཀྱལ་ཚིག་དང་། །གནོད་སེམས་དང་ནི་མི་རིགས་འདོད་དང་དེ་བཞིན་ལོག་པར་རྟོག་པ་རྣམས། །མི་དགེའི་ལས་ལམ་འདི་ཡང་བཅོམ་ལྡན་འདས་ཀྱིས་
སེམས་ཅན་རྣམས་ལ་བསྟན། །སེམས་ཅན་མི་དམིགས་གསོད་པ་ག་ལ་མཆིས་ཏེ་ལྷག་མ་དེ་དང་འདྲ། །གཉེན་པོ་དགེ་བ་མ་མཆིས་དེ་ནི་ངོ་བོ་ཉིད་ཀྱིས་སྟོང་པ་སྟེ། །བདེ་གཤེགས་ཐུབ་པ་ཟག་པ་མི་མངའ་རྣམས་ཀྱང་ངོ་བོ་ཉིད་ཀྱིས་སྟོང་། །རྣམ་འདྲེན་ཐེ་ཚོམ་སོམ་ཉི་མ་
མཆིས་དེ་སླད་ཁྱོད་ལ་མཆོད་པར་འཚལ། །སངས་རྒྱས་སྲས་པོ་དགེ་བའི་བློ་ཅན་གང་ཞིག་སྤྱོད་པ་འདི་སྟེན་པ། །མཁས་པ་ཀུན་ཏུ་དགེ་བ་ཉིད་མྱོང་སྡུག་བསྔལ་མྱོང་བར་ཡོང་མི་འགྱུར། །བཅོམ་ལྡན་བདེ་གཤེགས་ཡེ་ཤེས་དེས་ནི་ཚུལ་འདི་བདེ་བར་ཐོབ་པར་བགྱིས། །འདི་

ལ་ལྷ་ཚོགས་ཐེ་ཚོམ་མ་མཆིས་མཆོད་འོས་ཁྱོད་ལ་མཆོད་པར་འཚལ། །དེ་ལྟར་དགེ་རྒྱས་ཀྱི་ལྷ་རྣམས་ཀྱིས་བཅོམ་ལྡན་འདས་ལ་མངོན་པར་བསྟོད་ནས་ཅང་མི་ཟེར་བར་འཁོད་དོ། །དེ་ནས་བཅོམ་ལྡན་འདས་ཀྱིས་དགེ་རྒྱས་ཀྱི་ལྷ་རྣམས་ཅང་མི་ཟེར་བར་
འཁོད་པ་ཡང་མཁྱེན། དེ་དག་གི་ལྷག་པའི་བསམ་པས་སྒྲུབ་པ་ཡང་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་བ། །སྐྱེ་བོ་འདི་ཀུན་བཅོམ་ལྡན་ཁྱོད་ཀྱི་མཁྱེན་པའི་ཟིལ་གྱིས་ཟིལ་
མནན་ནས། །བདེ་གཤེགས་རྒྱལ་བ་མཆོག་ཁྱོད་ཀྱིས་ནི་འཛུམ་མཛད་པ་འདི་འཇིག་རྟེན་བསྟན། །རྒྱུ་མ་མཆིས་པར་ཆོས་ཀུན་མཁས་པ་རྣམས་ནི་འཛུམ་པ་མི་མཛད་ན། །འཛུམ་རྒྱུ་དོན་གཉེར་མིག་མེད་རྣམས་ལ་འཇིག་རྟེན་མཁས་པས་བཀའ་སྩལ་གསོལ། །མ་ལུས་
འདི་དག་ཐམས་ཅད་གཞན་དུ་མི་སེམས་ཁྱོད་འཛུམ་རེ་ཞིང་འཁོད། །དཔལ་སྟུག་ཁྱོད་ལ་བསྟོད་པ་བགྱིད་ཅིང་ཉན་པར་འཚལ་བའི་ཡིད་ཀྱིས་གནས། །སངས་རྒྱས་གསུང་གི་དབང་ཕྱུག་ཐོས་ནས་ཡིད་ནི་རབ་ཏུ་རངས་གྱུར་ཏེ། །ཆོས་རྣམས་ཀུན་ལ་ངེས་པའི་བློ་དགེ་ལྡན་པའི་
སྟོན་པར་སྐྱེ་བར་འགྱུར། །བདེ་གཤེགས་མི་མཆོག་དགེ་བའི་ཐུགས་ཅན་དེ་རིང་སུ་ཞིག་བློ་གྲོས་བསྐྱེད། །དེ་རིང་གང་གིས་འཆི་མེད་ཞི་བ་རྟོགས་ཤིང་ཕྱོགས་རྣམས་སྣང་བར་བགྱིས། །སུ་ཞིག་འཇིག་རྟེན་ཐུགས་བརྩེ་རྒྱལ་བ་འདྲེན་པ་དཔག་ཏུ་མེད་འགྱུར་བ། །དེ་དག་
བཀའ་སྩོལ་དྲང་སྲོང་འཁོར་འདི་ལེགས་པར་གསུངས་པས་ཚིམ་པར་མཛོད། །རྒྱལ་བ་ཁྱུ་མཆོག་དགེ་སྦྱོང་དམ་པ་དེང་སུ་བཙུན་ལ་དད་པ་སྐྱེས། །བདུད་ཀྱི་མི་ཕྲོགས་བློ་ལྡན་གང་ཞིག་ཆོས་ལ་ཡང་དག་ཡོངས་སུ་གནས། །སངས་རྒྱས་སྲས་པོ་ཚུལ་མཁས་གང་ཞིག་དེ་རིང་
ངེས་པ་ཐོབ་པར་འགྱུར། །རྐང་གཉིས་གཙོ་བོ་དེ་དག་བཀའ་སྩོལ་འགྲོ་འདི་ཐེ་ཚོམ་མ་མཆིས་མཛོད། །བདེ་གཤེགས་དེང་སུ་འགྲོ་ལ་དང་བསྐྱེད་སྐྱེ་དགུ་རྣམས་ལ་བྱམས་གྱུར་ཅིང་། །བྱང་ཆུབ་མཐར་ཕྱིན་བློ་གྲོས་བརྟན་ཞིང་ཐམས་ཅད་མཁྱེན་པ་ཉིད་ལ་གནས། །གང་ལ་འཛུམ་

པ་དེང་བསྟན་བདེ་གཤེགས་བསྟན་པ་འཛིན་པ་དེ་གང་ལགས། །བསོད་ནམས་བརྒྱ་ཡི་མཚན་མངའ་དེ་དག་བཀའ་སྩོལ་བདག་གི་ཐེ་ཚོམ་ཁུམ། །འདྲེན་པ་ཁྱོད་གསུང་ཡན་ལག་བརྒྱད་ལྡན་ལེགས་པར་བཀའ་སྩལ་ཐོས་གྱུར་ན། །བདེ་གཤེགས་གསུང་གིས་ཐོག་མར་
བདག་ཅག་འདོང་ཞིང་འགྲོ་བ་གཞན་ཡང་འདྲེན། །དེ་ལྟར་གྱུར་ན་བདེ་གཤེགས་བསྟན་རབ་འདི་ནི་སྲས་ལ་གནས་པར་འགྱུར། །འཇིག་རྟེན་འདི་དག་ཡིད་ནི་མྱུར་དུ་བདེ་གཤེགས་རྣམས་ལ་གནས་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་
ཚིགས་སུ་བཅད་དེ་སླར་བཀའ་སྩལ་པ། །ང་ཡིས་འཇིག་རྟེན་དོན་བྱེད་འཛུམ་མཛད་རྟ་ཐུལ་ཁྱོད་ཀྱིས་མཐོང་གྱུར་ཅིང་། །སྐྱེས་བུ་དམ་པ་ཁྱོད་ཀྱིས་དུས་སུ་དྲིས་ཏེ་འགྲོ་བའི་དོན་བྱས་པ། །ཁྱོད་ཀྱིས་བསོད་ནམས་འཕེལ་བ་བརྗོད་དུ་མེད་དེ་དེ་ནི་ཟད་མི་འགྱུར། །དེ་ནི་ཁྱོད་ལ་
བསྟན་གྱིས་ཁྱོད་དང་འགྲོ་བ་འདི་དག་དགའ་བས་ཉོན། །དགེ་རྒྱས་ལྷ་ཚོགས་འདི་དག་ང་ཡི་ཆོས་ཉིད་ལ་ནི་ཐེ་ཚོམ་མེད། །ཀུན་ཀྱང་ཡི་རངས་རབ་ཞི་ཡིད་ཀྱིས་ཚིགས་བཅད་དག་གིས་ང་ལ་བསྔགས། །སྔོན་གྱི་སངས་རྒྱས་བྱེ་བ་ཁྲག་ཁྲིག་སྟོང་བགྲངས་མཆོད་འོས་མཆོད་བྱས་ཏེ། །
ཐེ་ཚོམ་མེད་པའི་ཡིད་ཀྱིས་ཚུལ་དྲིས་ཀུན་ཏུ་སོམ་ཉི་མེད་པར་གྱུར། །དེ་ལྟར་སྔོན་གྱི་རྒྱུ་དེས་འདིར་ཡང་ཚིགས་སུ་བཅད་པས་ང་ལ་བསྟོད། །བསྐལ་པ་བཟང་པོའི་རྒྱལ་བ་བསྟོད་འོས་ཀུན་ལའང་འདི་དག་བསྟོད་པར་འགྱུར། །འདི་དག་བསྐལ་པ་ཨུད་པ་ལ་ལ་རྒྱལ་བ་དགྲ་
རྒྱལ་མཐུ་ཆེན་འགྱུར། །འདི་དག་སེམས་ཅན་ཁྲག་ཁྲིག་བསམ་ཡས་ཡོངས་སུ་མྱ་ངན་འདའ་བར་བྱེད། །སངས་རྒྱས་དྲང་སྲོང་ཆེན་པོ་དེ་དག་ཡིད་འོང་མཚན་དུ་གང་འགྱུར་བ། །དེ་ཡང་བསྟན་གྱིས་དང་བའི་ཡིད་ཀྱིས་སེམས་ཀྱི་ཐ་བ་སྤོངས་ཏེ་ཉོན། །རྒྱལ་བ་དེ་ཀུན་
ཆོས་ཀྱི་ཏོག་ཅེས་བྱ་བ་འདྲེན་པ་གཞལ་ཡས་འགྱུར། །འདི་དག་རེ་རེས་ཀྱང་ནི་ཁྲག་ཁྲིག་བསམ་ཡས་མྱ་ངན་བཟླ་བར་འགྱུར། །དེ་ཡི་ཚེ་ན་བདེ་གཤེགས་ཀུན་གྱི་རིང་བསྲེལ་ཤིན་ཏུ་རྒྱས་འགྱུར་ཏེ། །དེ་ཚེ་ཞིང་རྣམས་ཀུན་ཏུ་རྒྱལ་བའི་མཆོད་རྟེན་མེ་ཏོག་རྒྱས་པར་

འགྱུར། །ཐུབ་པ་གྲགས་ཆེན་དེ་དག་ཡོངས་སུ་མྱ་ངན་འདས་པར་གྱུར་པ་ན། །ཐུབ་པ་སྐྱོབ་པ་དེ་དག་ཀུན་གྱི་རིང་བསྲེལ་རྒྱས་པས་དོན་ཆེན་འགྱུར། །སེམས་ཅན་ཁྲག་ཁྲིག་བསམ་ཡས་རྣམས་ཀྱིས་དེ་ཚེ་རིང་བསྲེལ་མཆོད་བྱས་ཏེ། །
རིང་བསྲེལ་དེ་དག་མཆོད་ནས་མྱ་ངན་འདས་པ་ཞི་བ་འཆི་མེད་འཐོབ། །ཐུབ་པ་རྐང་གཉིས་གཙོ་བོ་དེ་དག་གྲགས་པ་རྒྱུན་འཆད་མི་འགྱུར་ཏེ། །སློབ་པ་ཁྲག་ཁྲིག་བསམ་ཡས་རྣམས་ཀྱང་དེ་ཚེ་རྒྱལ་བའི་དྲུང་དུ་འདུ། །ཇི་ལྟར་བྱེ་བ་བརྒྱ་བགྲངས་ང་ལ་
ལེགས་པར་སྤྱད་པ་བྱས་ནས་སུ། །བྱམས་པ་བལྟ་ཕྱིར་རྒྱ་ཆེན་ཡིད་ཀྱིས་བྱམས་པའི་འཁོར་དུ་འདོང་འགྱུར་བ། །དེ་ལྟར་རྒྱལ་བའི་ཉན་ཐོས་སློབ་ཚོགས་དེ་དག་རྒྱལ་ནས་རྒྱལ་འཁོར་དུ། །རྐང་གཉིས་གཙོ་བོ་དེ་དག་ཀུན་གྱི་རིང་བསྲེལ་མཆོད་པ་བྱ་ཕྱིར་འདོང་། །
བདེ་གཤེགས་གསུང་སྙན་འགྲོ་བ་ཐམས་ཅད་ངོ་མཚར་གྱུར་པ་དེ་ཐོས་ཤིང་། །དགེ་རྒྱས་རིས་ཀྱི་ལྷ་ཡི་བདག་ཉིད་ཆེན་པོ་དེ་ཚེ་ཐོས་གྱུར་ནས། །འཁོར་རྣམས་ཐམས་ཅད་རབ་ཏུ་དགའ་སྟེ་ཕལ་ཆེར་བྱང་ཆུབ་སེམས་ཀྱང་བསྐྱེད། །བདག་ཉིད་ཆེན་པོ་ཤེས་ནས་ཐུབ་པའི་
ཞབས་ལ་མགོ་བོས་རབ་ཏུ་གཏུགས། །དགེ་རྒྱས་རིས་ལུང་བསྟན་པའི་ལེའུ་སྟེ་ཉི་ཤུ་རྩ་གཉིས་པའོ།། །།དེ་ནས་དེའི་ཚེ་འབྲས་བུ་ཆེ་བའི་རིས་ཀྱི་ལྷ་བྱེ་བ་ཕྲག་བརྒྱད་ཅུས་ལྷ་མ་ཡིན་རྣམས་ནས་དགེ་རྒྱས་ཀྱི་ལྷའི་བར་དག་གི་མཆོད་པ་ཡང་མཐོང་ལུང་
བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་བ་དང་། མགུ་བ་དང་། ཡིད་བདེ་བ་སྐྱེས་ནས། ཚུལ་གཅིག་ལ་ཞུགས་པ་དང་། ཆོས་རེ་རེ་ལས་ཀྱང་ཆོས་ཀྱི་སྒོ་མཐའ་ཡས་པ་འབྱུང་བར་ཡང་དག་པར་མཐོང་ཞིང་། ཚུལ་ལ་འཇུག་པ་
ཐམས་ཅད་ལས་ཀྱང་མཐའ་ཡས་པའི་སྤོབས་པ་དང་། མི་ཆོད་པའི་སྤོབས་པ་དང་། རིགས་པའི་སྤོབས་པ་དང་། གྲོལ་བའི་སྤོབས་པ་དང་། ཐོགས་པ་མེད་པའི་སྤོབས་པ་དང་། ཉེ་བའི་སྤོབས་པ་དང་། ཕྲ་བའི་སྤོབས་པ་དང་། ཟབ་པའི་སྤོབས་པ་དང་། སྣ་

ཚོགས་ཀྱི་སྤོབས་པ་དང་། འཇམ་པའི་སྤོབས་པ་དང་། འབྲེལ་བའི་སྤོབས་པ་དག་ཀྱང་འབྱུང་བར་ཤེས་ནས་བཅོམ་ལྡན་འདས་ལ་དགའ་བ་སྐྱེས་ཏེ། ཆོས་ཉིད་བརྗོད་ཅིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྒོའི་ཚུལ་མཐའ་
ཡས་པ་ཞེས་བགྱི་བའི་ཏིང་ངེ་འཛིན་མཆིས་ཏེ། དེ་ལ་བརྩོན་པར་བགྱིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་འཐོབ་ཅིང་མི་ཆོད་པའི་སྤོབས་པ་ཐོབ་པར་འགྱུར་བ་དང་། དམིགས་པ་དང་སྙོམས་པར་འཇུག་པ་ཐམས་ཅད་ལ་རྨོངས་པ་མ་
མཆིས་པར་འགྱུར་རོ། །དེ་ལ་དམིགས་པ་གང་ཡང་གཟུགས་ལགས་པར་མ་འཚལ་བའི་ཚུལ་གྱིས་སྒྲིབ་པར་མི་འགྱུར་རོ། །དེ་ནི་ཕུང་པོ་ལ་འཇུག་པས་ཀྱང་སྒོའི་ཚུལ་མཐའ་ཡས་པའི་གཟུངས་ཐོབ་པར་འགྱུར། ཁམས་ལ་འཇུག་པ་དང་། སྐྱེ་མཆེད་ལ་འཇུག་
པ་དང་། དབང་པོ་ལ་འཇུག་པ་དང་། བདེན་པ་ལ་འཇུག་པ་དང་། རྟེན་ཅིང་འབྲེལ་པར་འབྱུང་བ་ལ་འཇུག་པ་དང་། སེམས་ཅན་ལ་འཇུག་པ་དང་། སེམས་ཅན་མ་མཆིས་པ་ལ་འཇུག་པ་དང་། དངོས་པོ་ལ་འཇུག་པ་དང་། དངོས་པོ་མ་མཆིས་པ་ལ་འཇུག་པ་དང་།
དམིགས་པ་ལ་འཇུག་པ་དང་། དམིགས་པ་མ་མཆིས་པ་ལ་འཇུག་པ་དང་། བདག་ལ་འཇུག་པ་དང་། སྟོང་པ་ལ་འཇུག་པ་དང་། མཚན་མ་ལ་འཇུག་པ་དང་། མཚན་མ་མ་མཆིས་པ་ལ་འཇུག་པ་དང་། སྨོན་པ་ལ་འཇུག་པ་དང་། སྨོན་པ་མ་མཆིས་པ་ལ་འཇུག་
པ་དང་། གནས་པ་ལ་འཇུག་པ་དང་། གནས་པ་མ་མཆིས་པ་ལ་འཇུག་པ་དང་། འདུས་བྱས་ལ་འཇུག་པ་དང་། འདུས་མ་བྱས་ལ་འཇུག་པས་ཀྱང་སྒོའི་ཚུལ་མཐའ་ཡས་པའི་གཟུངས་ཐོབ་པར་འགྱུར་ཏེ། ཐམས་ཅད་ལ་ཐོགས་པ་མ་མཆིས་པའི་
སྤོབས་པ་དང་ལྡན་པར་འགྱུར་རོ། །དེ་ནི་ཕུང་པོ་ལ་འཇུག་པས་ཀྱང་འདི་ལྟ་སྟེ། ཕུང་པོ་ཞེས་བྱ་བའི་ཆོས་འདི་ནི་ཡོངས་སུ་མ་གྲུབ་པའོ་ཞེས་གཟུངས་རབ་ཏུ་འཐོབ་བོ། །དེ་ཅིའི་སླད་དུ་ཞེ་ན། གཟུགས་ནི་གང་ཡང་ཡོངས་སུ་གྲུབ་པ་མ་མཆིས་ཏེ། ས་

ནི་སར་ཡོངས་སུ་མ་གྲུབ། དེ་བཞིན་དུ་ཆུ་དང་། མེ་དང་། རླུང་ནི་རླུང་དུ་ཡོངས་སུ་མ་གྲུབ་པའོ། །དེ་ཅིའི་སླད་དུ་ཞེ་ན། ས་ནི་རང་བཞིན་མ་མཆིས་པ་སྟེ། ཆོས་གང་ལ་ཡང་རང་བཞིན་མ་མཆིས་པ་དེ་ནི་ཡོངས་སུ་མ་གྲུབ་པའོ། །ཆུ་དང་། མེ་དང་། རླུང་ནི་རང་བཞིན་མ་མཆིས་
པ་སྟེ། ཆོས་གང་ལ་ཡང་རང་བཞིན་མ་མཆིས་པ་དེ་ནི་ཡོངས་སུ་མ་གྲུབ་པའོ། །དེ་ལྟར་ཡོངས་སུ་མ་གྲུབ་པའི་གཟུགས་ནི་འདས་པ་ཞེས་གདགས་པར་མི་བགྱི། མ་འོངས་པ་ཞེས་གདགས་པར་མི་བགྱི། ད་ལྟར་བྱུང་བ་ཞེས་གདགས་པར་མི་བགྱིའོ། །དེ་ཅིའི་སླད་དུ་ཞེ་ན། འདི་ལྟར་
གཟུགས་ནི་དངོས་པོ་མ་མཆིས་པ་སྟེ། དངོས་པོ་མ་མཆིས་པའི་སླད་དུ་སྐྱེ་བ་མ་མཆིས་པའོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་ཏེ་གང་མ་སྐྱེས་མ་འགགས་པ་དེ་ནི་གདགས་སུ་མ་མཆིས་སོ། །དེ་བཞིན་གཤེགས་པས་ཀྱང་འདས་པ་དང་། མ་འོངས་པ་དང་།
ད་ལྟར་བྱུང་བའི་གཟུགས་གང་ཅི་ཡང་རུང་སྟེ། དེ་དག་ཐམས་ཅད་གཅིག་ཏུ་བསྡུས་ནས་གཟུགས་ཀྱི་ཕུང་པོའོ་ཞེས་བཀའ་སྩལ་ཏེ། གཟུགས་ཀྱི་རང་བཞིན་ནི་དམིགས་སུ་མ་མཆིས་ན་འདས་པར་ལྟ་ག་ལ་འགྱུར། མ་འོངས་པར་ཡང་ག་ལ་འགྱུར། ད་ལྟར་བྱུང་བར་ཡང་ག་ལ་འགྱུར(།,)
ཏེ། དེ་བས་ན་གཟུགས་ཀྱི་ཕུང་པོ་ནི་གདགས་སུ་མ་མཆིས་པའོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཕུང་པོ་རྣམས་ཀྱང་དེ་བཞིན་ཏེ། དེའི་སླད་དུ་ཕུང་པོ་རྣམས་ནི་དམིགས་སུ་མ་མཆིས་སོ། །ཕུང་པོ་དམིགས་སུ་མ་མཆིས་པས་གཟུངས་དམིགས་སུ་མ་
མཆིས་ཏེ། དེ་ལྟར་ཕུང་པོ་ལ་འཇུག་པས་གཟུངས་ལ་འཇུག་པར་འགྱུར་རོ། །གཟུངས་དེ་ཡང་མིང་ཙམ་དང་། ཐ་སྙད་ཙམ་དང་། བརྡ་ཙམ་དང་། ཀུན་རྫོབ་ཙམ་དང་། བརྗོད་པ་ཙམ་དང་། གདགས་པ་ཙམ་མ་གཏོགས་པར་གཟུངས་ལ་འཇུག་པ་མི་དམིགས་ཏེ། འདི་ལ་ཕུང་པོ་ཡང་མི་
དམིགས། གཟུངས་ཀྱང་མི་དམིགས། འཇུག་པ་ཡང་མི་དམིགས། གཟུངས་ཀྱང་རང་བཞིན་གྱིས་མི་དམིགས་སོ། །དེ་ཅིའི་སླད་དུ་ཞེ་ན། གང་འདི་ཕུང་པོ་ཞེས་བགྱི་བ་དེ་ནི་མ་བགྱིས་པའི་ཆོས་ཏེ། ཆོས་གང་མ་བགྱིས་པ་དེ་ལ་སྤུངས་པ་ཡང་ག་ལ་མཆིས་ཏེ། ཕུང་པོ་ནི་སྤུངས་པའི་

སླད་དུ་ཕུང་པོ་ཞེས་བགྱིའོ། །དཔེར་ན་ཁྱིམ་དང་། ཁང་བཟངས་དང་། བསིལ་ཁང་དང་། ཁང་པ་བརྩེགས་པ་དང་། སྐར་ཁུང་ཁོལ་མ་དང་། བ་གམ་དང་། དྲ་བ་དང་། སྟེགས་བུ་དང་། ཁ་ཁྱེར་དང་། སྐར་ཁུང་དང་། རྟ་བབས་དང་། ར་བ་དང་། ཤིང་ཐགས་དང་། འོབས་དང་། ཆོས་མང་པོ་བསགས་པ་ལ།
གྲོང་ཁྱེར་ཞེས་བགྱི་བ་བཞིན་དུ་ཕུང་པོ་ཞེས་བགྱི་བ་ཡང་དེ་བཞིན་ཏེ། གཟུགས་དེ་ཡང་ངོ་བོ་ཉིད་ཀྱིས་མི་དམིགས་ན་དེ་ལ་སྤུངས་པ་ལྟ་ག་ལ་མཆིས། སྤུངས་པ་མ་མཆིས་པས་ན་གཟུགས་ཀྱང་མ་མཆིས། གཟུགས་ཀྱི་ཕུང་པོ་ཡང་མ་མཆིས་སོ། །དེ་བཞིན་དུ་ཚོར་བ་དང་། འདུ་ཤེས་དང་།
འདུ་བྱེད་དང་། རྣམ་པར་ཤེས་པ་ཡང་རང་བཞིན་གྱིས་དམིགས་སུ་མ་མཆིས་ན་དེ་ལ་སྤུངས་པ་ལྟ་ག་ལ་མཆིས་ཏེ། སྤུངས་པ་མ་མཆིས་པའི་སླད་དུ་རྣམ་པར་ཤེས་པ་ཡང་མ་མཆིས། རྣམ་པར་ཤེས་པའི་ཕུང་པོ་ཡང་མ་མཆིས་སོ། །དེ་ལྟར་ཕུང་པོ་ལ་འཇུག་པས་གཟུངས་ཐོབ་པར་འགྱུར།
གཟུངས་ཐོབ་པས་སྤོབས་པ་ཐོབ་པར་འགྱུར་རོ། །དེ་ལ་སྐྱེ་མཆེད་ལ་འཇུག་པས་གཟུངས་ཐོབ་པར་འགྱུར་བ་ནི་མིག་གི་སྐྱེ་མཆེད་ཅེས་བགྱི་བ་ནི་ཅིའི་སྐྱེ་མཆེད་ཅེས་བགྱི་ན། སྡུག་བསྔལ་གྱི་སྐྱེ་མཆེད་དོ། །དེ་ལ་མིག་གང་ཞེ་ན། འབྱུང་བ་ཆེན་པོ་བཞི་དང་བ་སྟེ། སའི་ཁམས་དང་། ཆུའི་ཁམས་དང་།
མེའི་ཁམས་དང་། རླུང་གི་ཁམས་དང་བའོ། །དེ་ལ་སའི་ཁམས་དང་བ་ནི་རང་བཞིན་མ་མཆིས་པ་སྟེ། ཆོས་གང་གི་རང་བཞིན་མི་དམིགས་པ་དེ་ནི་ཡོངས་སུ་མ་གྲུབ་པའོ། །དེ་བཞིན་དུ་ཆུའི་ཁམས་དང་བ་དང་། མེའི་ཁམས་དང་བ་དང་། རླུང་གི་ཁམས་དང་བ་ནི་རང་བཞིན་མ་མཆིས་པ་སྟེ།
ཆོས་གང་གི་རང་བཞིན་མི་དམིགས་པ་དེ་ནི་ཡོངས་སུ་མ་གྲུབ་པའོ། །དེ་ལྟར་ཡོངས་སུ་མ་གྲུབ་པའི་མིག་གི་སྐྱེ་མཆེད་དེ་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང་། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་མིག་གི་སྐྱེ་
མཆེད་ནི་དངོས་པོ་མ་མཆིས་པ་སྟེ། དངོས་པོ་མ་མཆིས་པའི་སླད་དུ་སྐྱེ་བ་མ་མཆིས་པའོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་ཏེ། གང་མ་སྐྱེས་མ་འགགས་པ་དེ་ནི་གདགས་སུ་མ་མཆིས་པའོ། །དེ་ལྟར་མིག་ཀྱང་མ་སྐྱེས་མ་འགགས། སྐྱེ་མཆེད་དང་སྡུག་བསྔལ་ཡང་མ་སྐྱེས་

མ་འགགས་པའོ། །གང་མ་སྐྱེས་མ་འགགས་པ་དེ་ནི་མིང་ཙམ་དང་། ཐ་སྙད་ཙམ་དང་། བརྡ་ཙམ་དང་། ཀུན་རྫོབ་ཙམ་དང་། བརྗོད་པ་ཙམ་མ་གཏོགས་པར་གདགས་སུ་མ་མཆིས་པ་སྟེ། མིང་དེ་ཡང་མིང་གིས་མ་མཆིས་པའོ། །དེ་ཅིའི་སླད་དུ་ཞེ་ན། ཆོས་གང་ལ་མིག་ཅེ་
འམ། སྐྱེ་མཆེད་ཅེ་འམ། སྡུག་བསྔལ་ཞེས་གདགས་པར་བགྱི་བའི་ཆོས་དེ་གང་ཡང་དམིགས་སུ་མ་མཆིས་ཏེ། མིང་ཡང་མིང་དུ་བརྗོད་དུ་མ་མཆིས་སོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་རྣམས་ཀྱང་དེ་བཞིན་ཏེ། དེའི་
སླད་དུ་སྐྱེ་མཆེད་ལ་འཇུག་པས་གཟུངས་འཐོབ། གཟུངས་ལ་འཇུག་པས་སྤོབས་པ་འཐོབ་བོ། །དེ་ལ་ཁམས་ལ་འཇུག་པས་གཟུངས་འཐོབ་པ་ནི་མིག་ནི་མིག་གིས་མ་མཆིས་པ། ཁམས་ནི་ཁམས་ཀྱིས་མ་མཆིས་པ་སྟེ། དེ་ཅིའི་སླད་དུ་ཞེ་ན། མིག་ནི་མིག་གི་རང་བཞིན་དང་བྲལ་བ། ཁམས་ནི་ཁམས་
ཀྱི་རང་བཞིན་དང་བྲལ་བའི་སླད་དུ་སྟེ། ཆོས་གང་ལ་རང་བཞིན་མ་མཆིས་པ་དེ་ནི་དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི་ཡོངས་སུ་མ་གྲུབ་པའོ། །གང་ཡོངས་སུ་མ་གྲུབ་པ་དེ་ལ་ནི་སྐྱེ་བ་མ་མཆིས་སོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་སོ། །གང་མ་སྐྱེས་
མ་འགགས་པ་དེ་ནི་མིང་ཙམ་དང་། ཐ་སྙད་ཙམ་དང་། བརྡ་ཙམ་དང་། ཀུན་རྫོབ་ཙམ་དང་། བརྗོད་པ་ཙམ་མ་གཏོགས་པར་འདས་པ་ཞེས་གདགས་པར་བགྱི་བ་མ་ལགས་སོ། །མ་འོངས་པ་དང་། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །མིང་དེ་ཡང་མིང་གིས་མ་མཆིས། བརྗོད་པའི་བར་
དེ་ཡང་བརྗོད་པས་མ་མཆིས་པ་སྟེ། ཆོས་གང་ལ་རང་བཞིན་མ་མཆིས་པ་དེ་ནི་དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི་ཡོངས་སུ་མ་གྲུབ་པ་སྟེ། ཡོངས་སུ་མ་གྲུབ་པའི་སླད་དུ་སྐྱེ་བ་མ་མཆིས་པའོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་སོ། །གང་མ་སྐྱེས་མ་
འགགས་པ་དེ་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང་། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་གདགས་པར་བགྱི་བ་མ་ལགས་པ་དེ་ནི་མིང་མ་མཆིས་པ། མཚན་ཉིད་མ་མཆིས་པ། མཚན་མ་མ་མཆིས་པ། ཐ་སྙད་མ་མཆིས་པ།

བརྡ་མ་མཆིས་པ། དངོས་པོ་མ་མཆིས་པ། འདྲིས་པ་མ་མཆིས་པ། བརྗོད་དུ་མ་མཆིས་པ། འོང་བ་མ་མཆིས་པ། འགྲོ་བ་མ་མཆིས་པ། མ་བསྟན་པ། རབ་ཏུ་མ་བསྟན་པ། མངོན་པར་ཤེས་པར་བགྱི་བ་མ་ལགས་པ། ཡོངས་སུ་ཤེས་པར་བགྱི་བ་མ་ལགས་པ། དཀར་པོ་མ་ལགས་པ། ནག་པོ་མ་ལགས་པ།
གནས་མ་ལགས་པ། རྟེན་མ་ལགས་པ། ཐོབ་པ་མ་ལགས་པ། ཐོབ་པར་བགྱི་བ་མ་ལགས་པ། རྟོགས་པ་མ་ལགས་པ། རྟོགས་པར་བགྱི་བ་མ་ལགས་པ། མངོན་དུ་བགྱིས་པ་མ་ལགས་པ། མངོན་དུ་བགྱི་བ་མ་ལགས་པ། སོ་སོའི་སྐྱེ་བོའི་ས་མ་ལགས་པ། ཉན་ཐོས་ཀྱི་ས་མ་ལགས་པ། རང་
སངས་རྒྱས་ཀྱི་ས་མ་ལགས་པ། བྱང་ཆུབ་སེམས་དཔའི་ས་མ་ལགས་པ། སངས་རྒྱས་ཀྱི་ས་མ་ལགས་པ་སྟེ། ས་ཡང་མ་ལགས། ས་མ་ལགས་པ་ཡང་མ་ལགས་སོ། །དེ་ནི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ལགས་པ་དེ་བཞིན་ཉིད་དང་། ཞི་བ་དང་། མཚན་ཉིད་མ་མཆིས་
པ་སྟེ། ཐ་སྙད་ཙམ་དུ་བཏགས་པའོ། །དེས་ཐ་སྙད་དུ་དེ་བཞིན་གཤེགས་པ་ཞེས་བགྱི་སྟེ་དོན་དམ་པར་ནི་མ་ལགས་སོ། །དེ་ཅིའི་སླད་དུ་ཞེ་ན། གང་ལ་དེ་བཞིན་གཤེགས་པ་ཞེས་བགྱི་བའི་ཆོས་དེ་མི་དམིགས་སོ། །དེ་བཞིན་དུ་གཟུགས་ཀྱི་ཁམས་དང་། མིག་གི་རྣམ་པར་ཤེས་པའི་ཁམས་དང་། ཡིད་ཀྱི་
ཁམས་དང་། ཆོས་ཀྱི་ཁམས་དང་། ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུ་རྒྱ་ཆེར་ཁམས་ཐམས་ཅད་ཀྱིས་ཆོས་ཀྱི་དབྱིངས་ལ་འཇུག་པར་བགྱིའོ། །བཅོམ་ལྡན་འདས་ཆོས་ཀྱི་དབྱིངས་ནི་ཕུང་པོར་བཏགས་ཀྱང་ཆོས་ཀྱི་དབྱིངས་ཉིད་མི་འདོར། ཁམས་དང་། སྐྱེ་མཆེད་དང་། དབང་པོ་དང་།
བདེན་པ་དང་། རྟེན་ཅིང་འབྲེལ་པར་འབྱུང་བར་བཏགས་ཀྱང་ཆོས་ཀྱི་དབྱིངས་ཉིད་མི་འདོར་ཏེ། ཆོས་ཀྱི་དབྱིངས་ཏེ་མིང་གང་དང་གང་གིས་བཏགས་ཀྱང་དེ་དང་དེས་ཆོས་ཀྱི་དབྱིངས་ཉིད་མི་འདོར་རོ། །བཅོམ་ལྡན་འདས་འདི་ལྟ་སྟེ། དཔེར་ན་སའི་ཁམས་ནི་མིང་གང་དང་གང་གིས་ཐ་སྙད་དུ་བགྱིས་
ཀྱང་དེ་དང་དེས་སའི་ཁམས་ཉིད་མི་འདོར་རོ། །བཅོམ་ལྡན་འདས་དེ་བཞིན་དུ་ཆོས་ཀྱི་དབྱིངས་ཀྱང་མིང་གང་དང་གང་གིས་ཐ་སྙད་དུ་བགྱི་བ་དེ་དང་དེས་ཆོས་ཀྱི་དབྱིངས་ཉིད་མི་འདོར་རོ། །བཅོམ་ལྡན་འདས་འདི་ལྟ་སྟེ། དཔེར་ན་ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་

ནི་མིང་གང་དང་གང་གིས་ཐ་སྙད་དུ་བགྱི་བ་དེ་དང་དེས་ཆུ་དང་། མེ་དང་། རླུང་དང་། ནམ་མཁའི་ཁམས་ཉིད་མི་འདོར་རོ། །བཅོམ་ལྡན་འདས་དེ་བཞིན་དུ་ཆོས་ཀྱི་དབྱིངས་ཀྱང་མིང་གང་དང་གང་གིས་ཐ་སྙད་དུ་བགྱི་བ་དེ་དང་དེས་ཆོས་ཀྱི་དབྱིངས་ཉིད་མི་འདོར་ཏེ། དེ་ལྟར་
ན་ཁམས་ལ་འཇུག་པས་གཟུངས་འཐོབ། གཟུངས་ལ་འཇུག་པས་སྤོབས་པ་འཐོབ་བོ། །བཅོམ་ལྡན་འདས་དེ་ལ་དབང་པོ་ལ་འཇུག་པས་ཆོས་ཀྱི་དབྱིངས་ལ་འཇུག་པ་ནི་དབང་པོ་ཉི་ཤུ་གཉིས་ཏེ། འདི་ལྟ་སྟེ། མིག་གི་དབང་པོ་དང་། རྣ་བའི་དབང་པོ་དང་། སྣའི་དབང་པོ་དང་།
ལྕེའི་དབང་པོ་དང་། ལུས་ཀྱི་དབང་པོ་དང་། ཡིད་ཀྱི་དབང་པོ་དང་། མོའི་དབང་པོ་དང་། ཕོའི་དབང་པོ་དང་། སྲོག་གི་དབང་པོ་དང་། བདེ་བའི་དབང་པོ་དང་། སྡུག་བསྔལ་གྱི་དབང་པོ་དང་། ཡིད་བདེ་བའི་དབང་པོ་དང་། ཡིད་མི་བདེ་བའི་དབང་པོ་དང་། བཏང་སྙོམས་ཀྱི་དབང་པོ་
དང་། དད་པའི་དབང་པོ་དང་། བརྩོན་འགྲུས་ཀྱི་དབང་པོ་དང་། དྲན་པའི་དབང་པོ་དང་། ཏིང་ངེ་འཛིན་གྱི་དབང་པོ་དང་། ཤེས་རབ་ཀྱི་དབང་པོ་དང་། མི་ཤེས་པ་ཀུན་ཤེས་པར་བྱེད་པའི་དབང་པོ་དང་། ཀུན་ཤེས་པའི་དབང་པོ་དང་། ཀུན་ཤེས་པ་དང་ལྡན་པའི་དབང་པོ་སྟེ། དེ་ལ་
མིག་ནི་མིག་གིས་མ་མཆིས། དབང་པོ་ནི་དབང་པོས་མ་མཆིས་པའོ། །དེ་ཅིའི་སླད་དུ་ཞེ་ན། མིག་ནི་མིག་གི་རང་བཞིན་དང་བྲལ་བ་སྟེ། ཆོས་གང་ལ་རང་བཞིན་མ་མཆིས་པ་དེ་ནི་དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི་ཡོངས་སུ་མ་གྲུབ་པའོ། །གང་ཡོངས་སུ་མ་
གྲུབ་པ་དེ་ནི་མི་སྐྱེ་བ། གང་མ་སྐྱེ་བ་ནི་མི་འགག་པ། གང་མ་སྐྱེས་མ་འགགས་པ་དེ་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང་། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་མི་དམིགས་པ་དེ་ནི་མིག་མ་ལགས། དབང་པོ་མ་
ལགས་སོ། །གང་མིག་མ་ལགས་ཤིང་དབང་པོ་མ་ལགས་པ་དེའི་ཐ་སྙད་ཇི་ལྟར་འཚལ་བར་བགྱི། འདི་ལྟ་སྟེ། དཔེར་ན་ཆང་པ་སྟོང་པ་ནི་བརྫུན་པ། ཡང་དག་པ་མ་ལགས་པ། མ་མཆིས་པ་སྟེ། འདི་ལྟར་མིང་དུ་གདགས་པར་བས་ཀྱི། དོན་དམ་པར་ནི་སྟོང་པ་ཡང་མི་དམིགས།

ཆང་བ་ཡང་མི་དམིགས་སོ། །དེ་བཞིན་དུ་མིག་དང་དབང་པོ་ཡང་ཆང་པ་སྟོང་པ་ལྟར་བརྫུན་ཞིང་མ་མཆིས་ལ། ཡང་དག་པ་མ་ལགས་པ་སྟེ། གསོ་བ། གསོག །ལོག་པ། སླུ་བའི་ཆོས་ཅན། བྱིས་པ་འདྲིད་པ། གླེན་པ་རྨོངས་པར་བགྱིད་པ་སྟེ། འདི་ལྟར་མིང་དུ་གདགས་པར་
བས་ཀྱི། དོན་དམ་པར་ནི་མིག་ཀྱང་མི་དམིགས་དབང་པོ་ཡང་མི་དམིགས་ན་དེ་ནི་བཅོམ་ལྡན་འདས་ཀྱིས་ཐམས་ཅད་མཁྱེན་པའི་ཡེ་ཤེས་བརྙེས་ནས་ཇི་ཙམ་དུ་ཕྱིན་ཅི་ལོག་ལ་གནས་པའི་སེམས་ཅན་རྣམས་གཟུང་པའི་སླད་དུ་དབང་པོ་ཞེས་བཏགས་ཀྱི། དོན་དམ་པར་ནི་མ་ལགས་སོ། །
དབང་པོ་ནི་རང་བཞིན་དང་བྲལ་ཞིང་དབང་པོའི་ངོ་བོ་ཉིད་ཀྱིས་སྟོང་པ་སྟེ། ཆོས་གང་ཆོས་གང་གིས་སྟོང་པ་དེ་ལ་དེས་ཐ་སྙད་དུ་བགྱི་བ་ནི། བརྫུན་པ། མ་མཆིས་པ། གསོ་བ །གསོག །ལོག་པ། སླུ་བའི་ཆོས་ཅན་བྱིས་པ་འདྲིད་པ། གླེན་པ་རྨོངས་པར་བགྱིད་པ། རང་བཞིན་དང་བྲལ་བ་
སྟེ། དེ་ནི་མི་སྐྱེ་མི་འགག་གོ །གང་མ་སྐྱེས་མ་འགགས་པ་དེ་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང་། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་མ་མཆིས་པ་དེ་ནི་མིང་མ་མཆིས་པ། མཚན་མ་མ་མཆིས་པ།
བརྫུན་པ། མཚན་ཉིད་མ་མཆིས་པ། གདགས་སུ་མ་མཆིས་པ། གདགས་པ་མ་ལགས་པ། མ་ཤེས་པ། ཤེས་པར་བགྱི་བ་མ་ལགས་པ། རྣམ་པར་ཤེས་པ། རྣམ་པར་ཤེས་པར་བགྱི་བ་མ་ལགས་པ། མ་ཐོས་པ། ཐོས་པར་བགྱི་བ་མ་ལགས་པ། རྣམ་པར་མ་རིག་པ།
རྣམ་པར་རིག་པར་བགྱི་བ་མ་ལགས་པ། མ་རྟོགས་པ། རྟོགས་པར་བགྱི་བ་མ་ལགས་པ། མ་ཐོབ་པ། ཐོབ་པར་བགྱི་བ་མ་ལགས་པ། མ་མཐོང་བ། མཐོང་བར་བགྱི་བ་མ་ལགས་པ། མ་རྙེད་པ། རྙེད་པར་བགྱི་བ་མ་ལགས་པའོ། །དེ་ཅིའི་སླད་དུ་ཞེ་ན། མ་མཆིས་ཤིང་
མཆིས་པ་མ་ལགས་པའི་སླད་དུའོ། །འདི་ལྟ་སྟེ། དཔེར་ན་མི་ཞིག་རྨི་ལམ་ན་རྒོད་པ་དང་། དགའ་བ་དང་། རྩེས་པ་དང་། དགའ་མགུར་སྤྱད་པ་དག་ཉལ་ཉལ་བ་ལས་སད་དེ་རྗེས་སུ་དྲན་ལ་དེ་དྲན་ཡང་རྙེད་པར་མི་འགྱུར། འཐོབ་པར་མི་འགྱུར་རོ། །དེ་ཅིའི་སླད་དུ་ཞེ་ན། རྨི་ལམ་

ན་ཡང་མི་དེས་རྒོད་པ་དང་། དགའ་བ་དང་། རྩེས་པ་དང་། དགའ་མགུར་སྤྱད་པ་དེ་དག་མ་ཐོབ་མ་རྙེད་ན། ཉལ་བ་ལས་སད་པའི་ཚེ་ལྟ་སྨོས་ཀྱང་ཅི་འཚལ་ཏེ། ཐོབ་པ་དང་། རྙེད་པར་བགྱི་བ་དེའི་གནས་མ་མཆིས་སོ། །བཅོམ་ལྡན་འདས་དེ་བཞིན་དུ་དབང་པོ་རྣམས་ནི་རྨི་
ལམ་ལྟ་བུ་སྟེ། ཇི་ལྟར་རྨི་ལམ་ན་རྒོད་པ་དང་། དགའ་བ་དང་། རྩེས་པ་དང་། དགའ་མགུར་སྤྱད་པ་དེ་དག་དམིགས་སུ་མ་མཆིས་པ་དེ་བཞིན་དུ་ཆོས་ཐམས་ཅད་ཀྱང་ངོ་བོ་ཉིད་ཀྱིས་དམིགས་སུ་མ་མཆིས་པ་སྟེ། དེ་དག་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང་། ད་
ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་དམིགས་སུ་མ་མཆིས་པ་དེ་དག་ནི་བརྗོད་དུ་མ་མཆིས་པ་ཞེས་བགྱི་སྟེ། དབང་པོ་ཐམས་ཅད་ཀྱང་དེ་བཞིན་དུ་རིག་པར་བགྱིའོ། །དེ་ལྟར་ན་ཆོས་ཀྱི་དབྱིངས་ལ་འཇུག་པས་ཆོས་ཐམས་ཅད་ལ་འཇུག་པར་བགྱི། ཆོས་ཐམས་
ཅད་ལ་འཇུག་པས་ཀྱང་ཆོས་ཀྱི་དབྱིངས་ལ་འཇུག་པར་བགྱིའོ། །དེ་ལ་ཇི་ལྟར་ན་བདེན་པ་ལ་འཇུག་པས་ཆོས་ཀྱི་དབྱིངས་ལ་འཇུག་པར་བགྱི་ཞེ་ན། བཞི་པོ་འདི་དག་ནི་བདེན་པ་སྟེ། སྡུག་བསྔལ་དང་། ཀུན་འབྱུང་དང་། འགོག་པ་དང་། ལམ་མོ། །བཅོམ་ལྡན་འདས་ཀྱིས་ཀྱང་ཆོས་ཐམས་
ཅད་ནི་སྟོང་པ་སྟེ། སེམས་ཅན་མེད་པ། སྲོག་མེད་པ། གང་ཟག་མེད་པ། མཚན་མ་མེད་པ། མཚན་ཉིད་མེད་པའོ་ཞེས་བཀའ་སྩལ་ཏེ། དེ་ལ་བདག་ཅག་ཐེ་ཚོམ་མ་མཆིས། སོམ་ཉི་མ་མཆིས་སོ། །བཅོམ་ལྡན་འདས་དེ་ལ་སེམས་ཅན་མ་མཆིས་པའི་སླད་དུ་སྡུག་བསྔལ་མ་མཆིས་པར་རིག་
པར་བགྱིའོ། །དེ་ཅིའི་སླད་དུ་ཞེ་ན། གང་ལ་སེམས་ཅན་མ་མཆིས་པ་དེ་ལ་སྡུག་བསྔལ་ཡང་མ་མཆིས་སོ། །བཅོམ་ལྡན་འདས་སྡུག་བསྔལ་མ་མཆིས་པའི་སླད་དུ་ཀུན་འབྱུང་བ་ཡང་མ་མཆིས་པར་རིག་པར་བགྱིའོ། །དེ་ཅིའི་སླད་དུ་ཞེ་ན། གང་ལ་འབྲས་བུ་མ་མཆིས་པ་དེ་ནི་རྒྱུ་མ་ལགས་པའི་
སླད་དུའོ། །བཅོམ་ལྡན་འདས་ཀུན་འབྱུང་བ་མ་མཆིས་པའི་སླད་དུ། འགོག་པ་མ་མཆིས་པར་རིག་པར་བགྱིའོ། །དེ་ཅིའི་སླད་དུ་ཞེ་ན། ཀུན་འབྱུང་བ་མ་མཆིས་པ་ལ་སྤང་པ་མ་མཆིས་པའི་སླད་དུའོ། །བཅོམ་ལྡན་འདས་འགོག་པ་མ་མཆིས་པའི་སླད་དུ་ལམ་མ་མཆིས་པར་རིག་པར་བགྱིའོ། །

དེ་ཅིའི་སླད་དུ་ཞེ་ན། གང་སྤོང་བར་མི་བགྱིད་པ་དེ་ནི་ལམ་མ་ལགས་ཏེ། ལམ་གྱི་འབྲས་བུ་ནི་འགོག་པ་མ་ལགས་ལ། གང་སྤང་བའི་འགོག་པའི་ཉོན་མོངས་པ་དེ་ནི་མི་དམིགས་ཏེ། འགོག་པ་དམིགས་སུ་མ་མཆིས་ན་ལམ་དུ་འཐད་པ་མ་ལགས་ཏེ། འབྲས་བུ་མ་མཆིས་པའི་ལམ་ཡང་མ་མཆིས་པས་དེ་ལྟར་ན་
འཕགས་པའི་བདེན་པ་བཞི་པོ་དེ་དག་ནི་བརྟགས་པ་རྣམ་པར་བསྒྲུབས་པ་སྟེ། གང་བརྟགས་ཤིང་རྣམ་པར་བསྒྲུབས་པ་དེ་ནི་མ་མཆིས་པའོ། །གང་མ་མཆིས་པ་དེ་ལ་ནི་འདས་པ་ཞེས་ཐ་སྙད་དུ་བགྱི་བ་མ་མཆིས་སོ། །མ་འོངས་པ་དང་། ད་ལྟར་བྱུང་བ་ཞེས་ཐ་སྙད་དུ་བགྱི་བ་མ་མཆིས་སོ། །གང་
དུས་གསུམ་དུ་མི་དམིགས་པ་དེ་ནི་མ་སྐྱེས་པ་མ་འགགས་པ། མཚན་ཉིད་མ་མཆིས་པ་མཚན་མ་མ་མཆིས་པ། མ་བཏགས་པ་གདགས་པར་མི་བགྱི་བ། མ་བསྟན་པ། རབ་ཏུ་མ་བསྟན་པ། བསྟན་པར་བགྱི་བ་མ་ལགས་པ། རབ་ཏུ་བསྟན་པར་བགྱི་བ་མ་ལགས་པ། མ་བརྗོད་པ། བརྗོད་པར་བགྱི་བ་མ་ལགས་
པ། མངོན་པར་མ་བརྗོད་པ། མངོན་པར་བརྗོད་པར་བགྱི་བ་མ་ལགས་པ། མ་མཐོང་བ། མཐོང་བར་བགྱི་བ་མ་ལགས་པ། མ་ཤེས་པ། ཤེས་པར་བགྱི་བ་མ་ལགས་པ། ཁོང་དུ་མ་ཆུད་པ། ཁོང་དུ་ཆུད་པར་བགྱི་བ་མ་ལགས་པ། མ་རྟོགས་པ། རྟོགས་པར་བགྱི་བ་མ་ལགས་པ། མ་རྙེད་པ། རྙེད་པར་བགྱི་
བ་མ་ལགས་པ། མ་ཐོབ་པ། ཐོབ་པར་བགྱི་བ་མ་ལགས་པ། མ་ཐོས་པ། ཐོས་པར་བགྱི་བ་མ་ལགས་པ། མ་མཐོང་བ། མཐོང་བར་བགྱི་བ་མ་ལགས་པ། མ་བསྒྲུབས་པ། བསྒྲུབ་པར་བགྱི་བ་མ་ལགས་པ། མངོན་དུ་མ་བགྱིས་པ། མངོན་དུ་བགྱི་བ་མ་ལགས་པ། དཀར་པོ་མ་ལགས་པ། ནག་པོ་མ་
ལགས་པ། སྣང་བ་མ་ལགས་པ། མུན་པ་མ་ལགས་པ། འགྲོ་བ་མ་ལགས་པ། འོང་བ་མ་ལགས་པ། གསལ་བ་མ་ལགས་པ། ཟབ་པ་མ་ལགས་པ། འཁྲུགས་པ་མ་ལགས་པ། དང་བ་མ་ལགས་པ། འཇིག་པ་མ་ལགས་པ། བདེ་བ་མ་ལགས་པ། འཆིང་བ་མ་ལགས་པ། གྲོལ་བ་མ་ལགས་པ།
རྗེས་སུ་ཆགས་པ་མ་ལགས་པ། ཁོང་ཁྲོ་བ་མ་ལགས་པ། ཀུན་ནས་ཉོན་མོངས་པ་མ་ལགས་པ། རྣམ་པར་བྱང་བ་མ་ལགས་པ། ཡེ་ཤེས་མ་ལགས་པ། རྣམ་པར་ཤེས་པ་མ་ལགས་པ། ལམ་མ་ལགས་པ། ལམ་གོལ་བ་མ་ལགས་པ། འཇིག་པ་མ་ལགས་པ། རྣམ་པར་འཇིག་པ་མ་ལགས་པ།

གཟུང་བ་མ་ལགས་པ། མི་གཟུང་བ་མ་ལགས་པ། དོར་བ་མ་ལགས་པ། རབ་ཏུ་དོར་བ་མ་ལགས་པ། དམིགས་པ་མ་ལགས་པ། དམིགས་སུ་མ་མཆིས་པ་མ་ལགས་པ། སེམས་ཅན་མ་ལགས་པ། སེམས་ཅན་མ་མཆིས་པ་མ་ལགས་པ། སྲོག་མ་ལགས་པ། སྲོག་མ་མཆིས་པ་མ་ལགས་
པ། གང་ཟག་མ་ལགས་པ། གང་ཟག་མ་མཆིས་པ་མ་ལགས་པ། བདག་མ་ལགས་པ། བདག་མ་མཆིས་པ་མ་ལགས་པ། དངོས་པོ་མ་ལགས་པ། དངོས་པོ་མ་མཆིས་པ་མ་ལགས་པ། སྟོང་པ་མ་ལགས་པ། མི་སྟོང་པ་མ་ལགས་པ། མཚན་མ་མ་ལགས་པ། མཚན་མ་མ་མཆིས་པ་མ་ལགས་པ། སྨོན་པ་
མ་ལགས་པ། སྨོན་པ་མ་མཆིས་པ་མ་ལགས་པ། གནས་པ་མ་ལགས་པ། གནས་མ་མཆིས་པ་མ་ལགས་པ། འདུས་བྱས་མ་ལགས་པ། འདུས་མ་བྱས་མ་ལགས་པ། ཆད་པ་མ་ལགས་པ། རྟག་པ་མ་ལགས་པ། ལོག་པ་མ་ལགས་པ། ཡང་དག་པ་མ་ལགས་པ། བདེན་པ་མ་ལགས་པ། བརྫུན་པ་མ་
ལགས་པ། མངོན་པར་ཞེན་པ་མ་ལགས་པ། མངོན་པར་ཞེན་པ་མ་མཆིས་པ་མ་ལགས་པ། རྟེན་མ་ལགས་པ། རྟེན་མ་མཆིས་པ་མ་ལགས་པ། གཞི་མ་ལགས་པ། གཞི་མ་མཆིས་པ་མ་ལགས་པ། མངོན་པར་ཤེས་པར་བགྱི་བ་མ་ལགས་པ། ཡོངས་སུ་ཤེས་པར་བགྱི་བ་མ་ལགས་པ། སྤང་བ་མ་
ལགས་པ། བསྒོམ་པ་མ་ལགས་པ། མངོན་དུ་བགྱི་བ་མ་ལགས་པ། རྙེད་པ་མ་ལགས་པ། རྙེད་པར་བགྱི་བ་མ་ལགས་པ། འཁོར་བ་མ་ལགས་པ། མྱ་ངན་ལས་འདས་པ་མ་ལགས་པ། སངས་རྒྱས་མ་ལགས་པ། འཚང་རྒྱ་བར་བགྱི་བ་མ་ལགས་པ། སོ་སོའི་སྐྱེ་བོའི་སྤྱོད་ཡུལ་མ་ལགས་པ། འཕགས་པའི་
སྤྱོད་ཡུལ་མ་ལགས་པ། ཉན་ཐོས་ཀྱི་སྤྱོད་ཡུལ་མ་ལགས་པ། རང་སངས་རྒྱས་ཀྱི་སྤྱོད་ཡུལ་མ་ལགས་པ། བྱང་ཆུབ་སེམས་དཔའི་སྤྱོད་ཡུལ་མ་ལགས་པ། སངས་རྒྱས་ཀྱི་སྤྱོད་ཡུལ་མ་ལགས་པ། སྤྱོད་ཡུལ་ཡང་མ་ལགས་པ། སྤྱོད་ཡུལ་མ་ལགས་པ་ཡང་མ་ལགས་པ། བགྱིས་པ་མ་ལགས་པ། མ་བགྱིས་པ་
མ་ལགས་པ། དག་པ་མ་ལགས་པ། དག་པར་བགྱི་བ་མ་ལགས་པ་སྟེ། དེ་ལྟར་བདེན་པ་ལ་འཇུག་པས་ཆོས་ཀྱི་དབྱིངས་ལ་འཇུག་པར་འགྱུར། ཆོས་ཀྱི་དབྱིངས་ལ་འཇུག་པས་གཟུངས་ཐོབ་པར་འགྱུར། གཟུངས་ཐོབ་པས་སྤོབས་པ་འཐོབ་པར་འགྱུར་རོ། །དེ་ལ་ཇི་ལྟར་ན་རྟེན་ཅིང་འབྲེལ་བར་འབྱུང་བ་ལ་འཇུག་

པས་ཆོས་ཀྱི་དབྱིངས་ལ་འཇུག་ཅེ་ན། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་རྐྱེན་གྱིས་རྣམ་པར་ཤེས་པ་ནས་དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་འབྱུང་བར་འགྱུར་རོ་ཞེས་བགྱི་བའི་བར་དུ་སྟེ། འདི་ནི་རྟེན་ཅིང་འབྲེལ་བར་འབྱུང་བའོ། །བཅོམ་ལྡན་འདས་དེ་ལ་མ་རིག་པ་ནི་མ་རིག་
པས་མ་མཆིས་སོ། །དེ་ཅིའི་སླད་དུ་ཞེ་ན། འདི་ལྟར་མ་རིག་པ་ནི་རང་བཞིན་དང་བྲལ་བ་སྟེ། ཆོས་གང་ལ་རང་བཞིན་མ་མཆིས་པ་དེ་ནི་དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི་ཡོངས་སུ་མ་གྲུབ་པའོ། །གང་ཡོངས་སུ་མ་གྲུབ་པ་དེ་ནི་མི་སྐྱེ་བའོ། །གང་མི་སྐྱེ་བ་དེ་ནི་མི་འགག་པའོ། །
གང་མ་སྐྱེས་མ་འགགས་པ་དེ་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང་། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་མི་དམིགས་པ་དེ་ནི་མིང་མ་མཆིས་པ། མཚན་ཉིད་མ་མཆིས་པ། མཚན་མ་མ་མཆིས་པ། གདགས་སུ་མ་མཆིས་
པ་སྟེ། གཞན་དུ་ན་མིང་ཙམ་དང་། བརྡ་ཙམ་དང་། ཐ་སྙད་ཙམ་དང་། བརྗོད་པ་ཙམ་དང་། གདགས་པ་ཙམ་དུ་སེམས་ཅན་རྣམས་གཟུང་བའི་དོན་དུ་བགྱི་བ་མ་གཏོགས་པར་མ་རིག་པ་དེ་ནི་དོན་དམ་པར་དམིགས་སུ་མ་མཆིས་སོ། །ཆོས་གང་དོན་དམ་པར་དམིགས་སུ་མ་
མཆིས་པ་དེ་ནི་གདགས་སུ་མ་མཆིས་པ། ཐ་སྙད་དུ་བགྱིར་མ་མཆིས་པ། བརྗོད་དུ་མ་མཆིས་པ་སྟེ། བཅོམ་ལྡན་འདས་གང་མིང་ཙམ་ཞེས་བགྱི་བ་ནས། གདགས་པ་ཙམ་གྱི་བར་དེ་དག་ཀྱང་ཡང་དག་པ་མ་ལགས་པ། བརྫུན་པ། ལོག་པ། བརྟགས་པ། རྣམ་པར་བསྒྲུབས་པ། ཡོངས་སུ་བརྟགས་པ། རྣམ་པར་བརྟགས་
པ། རྣམ་པར་དཔྱད་པ། མ་ཞི་བ་དང་། རབ་ཏུ་སྤྲོས་པའོ། །མ་རིག་པའི་རྐྱེན་གྱིས་འདུ་བྱེད་རྣམས་ཞེས་བགྱི་བ་ཡང་ཆོས་གང་ངོ་བོ་ཉིད་ཀྱིས་མ་མཆིས་པ་དེ་འདུ་བྱེད་སྐྱེད་པར་ཡང་ཇི་ལྟར་འགྱུར་ཏེ། དེ་བས་ན་མ་རིག་པ་ནི་མ་རིག་པ་མ་མཆིས་པའོ། །དེ་ལྟར་མ་རིག་པ་མ་མཆིས་པས་འདུ་བྱེད་རྣམས་ཀྱང་
མ་སྐྱེས་པའོ། །གང་མ་སྐྱེས་པ་དེ་དག་ནི་རྒ་བར་མི་འགྱུར། ན་བར་མི་འགྱུར། འཆི་བར་མི་འགྱུར། ཤི་འཕོ་བར་མི་འགྱུར། སྐྱེ་བར་མི་འགྱུར་རོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་གང་མ་སྐྱེས་པ་དེ་ལ་རྒ་བ་ག་ལ་མཆིས་ཏེ། གང་ལ་རྒ་བ་མ་མཆིས་པ་དེ་ནི་ན་བར་མི་འགྱུར། འཆི་བར་

མི་འགྱུར། ཤི་འཕོ་བར་མི་འགྱུར། སྐྱེ་བར་མི་འགྱུར་རོ། །འདི་ནི་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་སྟེ་མིང་ཙམ་དུ་བས་ཀྱི། དོན་དམ་པར་ནི་མ་ལགས་སོ། །མ་རིག་པ་གང་ལགས་པ་དེ་ཉིད་
བྱང་ཆུབ་བོ། །དེ་བཞིན་དུ་སྲིད་པའི་ཡན་ལག་ཐམས་ཅད་ཀྱང་ཤེས་པར་བགྱི་སྟེ། དེ་ལྟར་ན་རྟེན་ཅིང་འབྲེལ་བར་འབྱུང་བ་ལ་འཇུག་པས་ཆོས་ཀྱི་དབྱིངས་ལ་འཇུག་པར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་ནི་མ་སྐྱེས་པ་སྟེ། ཆོས་ཐམས་ཅད་ཀྱང་མ་སྐྱེས་པའོ། །དེ་བས་ན་
ཆོས་ཐམས་ཅད་ནི་དེ་བཞིན་གཤེགས་པའོ། །བཅོམ་ལྡན་འདས་དེ་བཞིན་གཤེགས་པ་ནི་མ་འགགས་པ་སྟེ་ཆོས་ཐམས་ཅད་ཀྱང་མ་འགགས་པའོ། །བཅོམ་ལྡན་འདས་དེ་བཞིན་དུ་དེ་བཞིན་གཤེགས་པ་ནི་མཚན་ཉིད་མ་མཆིས་པ། མཚན་མ་མ་མཆིས་པ། དམིགས་སུ་མ་མཆིས་པ།
ཀུན་ནས་ཉོན་མོངས་པ་མ་མཆིས་པ། རྣམ་པར་བྱང་བ་མ་མཆིས་པ། རྗེས་སུ་ཆགས་པ་མ་མཆིས་པ། ཁོང་ཁྲོ་བ་མ་མཆིས་པ་སྟེ། ཆོས་ཀྱི་དབྱིངས་དང་། དེ་བཞིན་ཉིད་དང་། ཡང་དག་པའི་མཐའ་སྟེ། ཆོས་ཐམས་ཅད་ཀྱང་ཡང་དག་པའི་མཐའོ། །དེའི་སླད་དུ་ཆོས་ཐམས་
ཅད་ནི་དེ་བཞིན་གཤེགས་པ་སྟེ། བཅོམ་ལྡན་འདས་དེ་ལྟར་ན་ཆོས་གང་དང་གང་དག་གིས་དེ་བཞིན་གཤེགས་པ་མཆིས་པའི་ཆོས་དེ་དང་དེ་དག་གིས་ཆོས་ཐམས་ཅད་མཆིས་པ་སྟེ། དེའི་སླད་དུ་ཆོས་ཐམས་ཅད་ནི་དེ་བཞིན་གཤེགས་པའོ། །བཅོམ་ལྡན་འདས་གང་ལ་
ལ་ཞིག་འདི་སྐད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། དེ་བཞིན་གཤེགས་
པ་ནི་གཉིས་སུ་མ་མཆིས་པ་སྟེ། བྱང་ཆུབ་ཀྱང་གཉིས་སུ་མ་མཆིས་པ་ལགས་པས་གཉིས་སུ་མ་མཆིས་པས་ནི་གཉིས་སུ་མ་མཆིས་པ་མངོན་པར་རྫོགས་པར་འཚང་མི་རྒྱའོ། །བཅོམ་ལྡན་འདས་དེ་བཞིན་དུ་གང་ལ་ལ་ཞིག་འདི་སྐད་དུ་དེ་བཞིན་གཤེགས་

པས་བླ་ན་མེད་པའི་ཆོས་ཀྱི་འཁོར་ལོ་བསྐོར་ཏོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པ་ནི་ཟློག་པ་འམ་སྐོར་བར་མཛད་པ་མ་ལགས་སོ། །བཅོམ་ལྡན་འདས་གང་ལ་ལ་ཞིག་འདི་སྐད་དུ་དེ་བཞིན་གཤེགས་
པས་སེམས་ཅན་ཚད་མེད་པ་ཡོངས་སུ་མྱ་ངན་ལས་བཟླས་སོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་ནི་སེམས་ཅན་མ་མཆིས་པ་སྟེ། དེ་ལ་ཡོངས་སུ་མྱ་ངན་ལས་འདས་པ་གང་ཡང་མ་མཆིས་སོ། །
བཅོམ་ལྡན་འདས་གང་ལ་ལ་ཞིག་འདི་སྐད་དུ་དེ་བཞིན་གཤེགས་པས་སེམས་ཅན་ཚད་མེད་པའི་དོན་མཛད་དོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་བཞིན་གཤེགས་པ་ནི་ཆོས་གང་ལ་ཡང་ཕན་པའམ།
གནོད་པའི་རྣམ་པར་ཉེ་བར་གནས་པ་མ་ལགས་སོ། །བཅོམ་ལྡན་འདས་གང་ལ་ལ་ཞིག་འདི་སྐད་དུ་དེ་བཞིན་གཤེགས་པས་ཚེའི་འདུ་བྱེད་བོར་རོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཀྱི་དབྱིངས་ནི་
ཅིའང་འདོར་བའམ། ལེན་པ་མ་མཆིས་སོ། །བཅོམ་ལྡན་འདས་གང་ལ་ལ་ཞིག་འདི་སྐད་དུ་དེ་བཞིན་གཤེགས་པ་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ་ཞེས་མཆི་ན། དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་
པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཀྱི་དབྱིངས་ནི་འཁོར་བའམ། ཡོངས་སུ་མྱ་ངན་ལས་འདའ་བ་མ་ལགས་སོ། །བཅོམ་ལྡན་འདས་གང་ལ་ལ་ཞིག་འདི་ལྟ་བུའི་ཆོས་ལ་ངེས་པར་གྱུར་ན་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ལས་ཕྱིར་མི་ལྡོག་པ་སྟེ། བཅོམ་ལྡན་འདས་ཆོས་ཀྱི་དབྱིངས་ལ་ནི་འགྱུར་བ་མ་མཆིས་ཀྱང་གདའི་། རིགས་ཀྱི་བུའམ། རིགས་ཀྱི་བུ་མོ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་བ་མི་གདའོ།། །།

བམ་པོ་དགུ་པ། དེ་ནས་འབྲས་བུ་ཆེ་བའི་ལྷ་བྱེ་བ་ཕྲག་བརྒྱད་ཅུས་བཅོམ་ལྡན་འདས་ཀྱི་སྤྱན་སྔར་ཆོས་ཉིད་ལ་ངེས་པར་འགྲོ་བ་བརྗོད་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཐལ་མོ་
སྦྱར་ཏེ། ཕྱོགས་གཅིག་ཏུ་འཁོད་དོ། ཕྱོགས་གཅིག་ཏུ་འཁོད་ནས་ཀྱང་དེའི་ཚེ་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། བདེ་གཤེགས་མཐུ་ཆེན་འདྲེན་པ་ཚུལ་དང་ཚུལ་མིན་མཁྱེན་ལ་ཕྱག་འཚལ་ལོ། །འགྲོ་བ་ཀུན་ལ་ཐུགས་བརྩེ་ཐུབ་
པ་ཡང་དག་ཇི་བཞིན་སྟོན་མཛད་པ། །འདྲེན་པ་ཚུལ་མཁས་ཁྱོད་ཀྱིས་ཚུལ་ནི་ཡང་དག་ཉིད་དུ་ཡང་དག་བསྟན། །མཐའ་ཡས་ཡོན་ཏན་མངའ་ཞིང་ཡེ་ཤེས་མངོན་པར་འཕགས་ལ་མགོས་ཕྱག་འཚལ། །ཁྱོད་ཀྱིས་བྱང་ཆུབ་ངེས་པར་འབྱུང་བའི་དྲང་ལམ་གཅིག་པུ་བགྲོད་
པ་བསྟན། །ཁྱོད་ཀྱིས་བྱང་ཆུབ་དམ་པ་གཞལ་ཡས་ཞི་བ་ཤིས་པ་མི་གཡོ་བརྙེས། །སྲོག་ཆགས་བྱེ་བ་ཁྲག་ཁྲིག་འཁོར་བའི་སྡུག་བསྔལ་ཉམ་ཐག་འགྲོལ་མཛད་པ། །མཐའ་ཡས་ཡོན་ཏན་མངའ་ཞིང་ཡེ་ཤེས་མངོན་པར་འཕགས་ལ་མགོས་ཕྱག་འཚལ། །ཕུང་པོ་རྣམས་ནི་
ངོ་བོ་ཉིད་སྟོང་ཤིན་ཏུ་ཕུང་པོ་རྣམས་དང་བྲལ། །བྱིས་པ་རྨོངས་བྱེད་རྣམས་ནི་རབ་ཏུ་བྲལ་བར་ཁྱོད་ཀྱིས་ཡོངས་སུ་བརྟགས། །ཤེས་པ་མི་ལྡན་སྐྱེ་བོ་ཕལ་ཆེན་འདིར་བཅིངས་རྙོང་ལ་སྤྲེའུ་ཐོགས་པ་བཞིན། །གྲོལ་བ་མཁས་པ་རྣམས་ནི་མཁའ་ལ་རླུང་བཞིན་ཆགས་པ་མེད་པར་
འདོད། །ཁམས་རྣམས་ཁམས་ཀྱིས་རྣམ་པ་ཀུན་ཏུ་སྟོང་པར་ཐམས་ཅད་མཁྱེན་པས་གསུངས། །དཔེར་ན་བྲག་ཅ་རྣམ་པ་ཀུན་ཏུ་ཤིན་ཏུ་སྒྲ་དང་བྲལ་བ་འདྲ། །དེས་ནི་མི་མཁས་སྐྱེ་བོ་ཡང་དག་ཇི་བཞིན་མི་ཤེས་མང་པོ་བཅིངས། །གྲོལ་བ་མཁས་པ་ཡང་དག་རྟོགས་པ་རྣམས་
ནི་ཁམས་གསུམ་ཆགས་མ་མཆིས། །སྐྱེ་མཆེད་ངོ་བོ་ཉིད་ཀྱིས་རྟག་ཏུ་སྟོང་ཞེས་ཐམས་ཅད་མཁྱེན་པས་བསྟན། །ཡང་དག་མ་ལགས་བརྫུན་ཞིང་བྱིས་པ་སླུ་བ་ཆང་པ་སྟོང་པ་འདྲ། །མི་མཁས་སྐྱེ་བོ་ལམ་ལ་གཅིག་ཏུ་མ་ངེས་མང་པོ་དེ་ལ་ཆགས། །དཔེར་ན་འགྲོན་པ་རྒྱ་མཚོ་ཆེན་

པོར་འཁྱམས་པ་བཞིན་དུ་འཁོར་བར་ལྷུང་། །འདྲེན་པ་དབང་པོ་འདི་དག་དབང་པོ་ཉིད་ཀྱིས་ཤིན་ཏུ་སྟོང་པ་སྟེ། །ཐུབ་པ་མེ་ལོང་ནང་གི་བཞིན་གྱི་དཀྱིལ་འཁོར་ལྟ་བུར་ཤིན་ཏུ་སྟོང་། །མི་མཁས་སྐྱེ་བོ་ཡང་དག་མ་འཚལ་མང་པོ་དག་ནི་དེ་ལ་ཆགས། །བྱ་དང་མཚོ་ཡི་ཉ་དང་སྲོག་
ཆགས་དག་ནི་རྒྱ་ལ་ཐོགས་པ་བཞིན། །སེམས་ཅན་སེམས་ཅན་ཉིད་སྟོང་སེམས་ཅན་བྲལ་ཞིང་ངོ་བོ་ཉིད་ཀྱིས་སྟོང་། །ཐུབ་པ་སེམས་ཅན་རི་མོ་མཁན་གྱིས་གཟུགས་བྲིས་བཞིན་དུ་མ་མཆིས་ན། །མི་མཁས་སྐྱེ་བོ་ཡང་དག་ཇི་བཞིན་མ་འཚལ་མང་པོ་དེ་ལ་ཆགས། །མཁས་
པ་ཡང་དག་རྟོགས་རྣམས་སྒོ་ངའི་སྦུབས་ནས་བྱུང་བའི་བྱ་བཞིན་གྲོལ། །རྟེན་ཅིང་ཆོས་རྣམས་དེ་དག་སྐད་ཅིག་པ་སྟེ་སྟོང་ཞིང་དམིགས་མ་མཆིས། །རྨི་ལམ་དགའ་བ་བཞིན་དུ་གཟུང་དུ་མ་མཆིས་བྱིས་པ་རྨོངས་བགྱིད་པ། །མི་ཤེས་རྟོག་པའི་སླད་དུ་དེས་ཀྱང་མི་མཁས་སྐྱེ་
བོ་མང་པོ་བཅིངས། །མཁས་པ་ཡང་དག་རབ་ཏུ་རྟོགས་རྣམས་གཟེབ་ནས་ཐར་བའི་བྱ་བཞིན་གྲོལ། །ཐུབ་པས་ཆོས་ཉིད་བསམ་ཡས་ཇི་བཞིན་ཆོས་རྣམས་ཐམས་ཅད་བསམ་མི་ཁྱབ། །ཐུབ་པ་ཞི་བ་མྱ་ངན་འདས་པ་ཇི་བཞིན་ཆོས་ཀུན་མཚན་ཉིད་བྲལ། །ཐུབ་པ་ཁམས་གསུམ་མི་
ཆགས་བཞིན་དུ་ཆོས་ཀུན་གནས་པ་མ་མཆིས་ཏེ། །དེ་སླད་ཚུལ་གཅིག་འདི་འཚལ་གྱུར་ན་འགྲོ་ཀུན་བདེ་བར་གཤེགས་པར་འགྱུར། །ཐུབ་པ་བདག་དང་གཞན་དུ་མི་མཁྱེན་ལྟ་བུར་ཆོས་ཀུན་གཡོ་བ་མེད། །ཐུབ་པའི་ཡེ་ཤེས་རྒྱལ་བའི་བསྟན་པ་ཇི་བཞིན་ཆོས་ཀུན་བསམ་མི་
ཁྱབ། །ཐུབ་པ་བྱིས་པའི་སྤྱོད་ཡུལ་མ་ལགས་ཇི་བཞིན་ཆོས་ཀུན་བརྟགས་མ་ལགས། །སངས་རྒྱས་རྣམས་ཀྱི་སྤྱོད་ཡུལ་འདི་ནི་རབ་གསལ་དེ་བཞིན་ཤེས་པར་བགྱི། །མི་མཁས་གང་དག་རྒྱལ་བས་བྱང་ཆུབ་གཞལ་ཡས་བརྙེས་ཤེས་སྨྲ་བ་དང་། །གང་དག་རྒྱལ་བས་
འཁོར་ལོ་དམ་པ་གཞལ་ཡས་མཆོག་བསྐོར་སྨྲ་བ་དང་། །གང་དག་བདེ་གཤེགས་སྐྱོབ་པས་སྲོག་ཆགས་ཁྲག་ཁྲིག་མྱ་ངན་བཟླས་སྨྲ་བ། །དེ་དག་ཐམས་ཅད་ཡང་དག་མ་འཚལ་ལྟ་བ་ཐིབས་པོར་ཡོངས་སུ་དཀྲིས། །གང་དག་བདེ་བར་གཤེགས་པས་ཚེ་ཡི་འདུ་བྱེད་བཏང་བཟུང་སྨྲ་བ་

དང་། །གང་དག་སྟོབས་བཅུ་འགྲོ་བའི་དོན་མཛད་ཡོངས་སུ་མྱ་ངན་འདས་སྨྲ་བ། །དེ་དག་ཐམས་ཅད་ལྟ་བར་སོང་ལ་ཡིད་ཆགས་བདུད་ཀྱི་ལག་ཏུ་མཆིས། །ཆོས་ཀྱིས་དེ་བཞིན་ཉིད་མ་འཚལ་ཏེ་འདྲེན་པས་མཁྱེན་བཞིན་འཚལ་བར་བགྱི། །གང་དག་ཚུལ་དང་
ཚུལ་མིན་འདི་ལ་མཁས་པ་དེ་དག་འདྲེན་པ་འཚལ། །དེ་དག་རྐང་གཉིས་གཙོ་བོ་དཔལ་སྟུག་འཇིག་རྟེན་ཐུགས་བརྩེ་རྒྱལ་བར་འགྱུར། །དེ་བཞིན་ཉིད་འདི་འགྱུར་བའི་དབང་དང་ལྡན་ཏེ་དེ་ཉིད་ཆོས་ཉིད་ལགས། །དེ་ལྟར་འདི་འཚལ་གྱུར་ནས་ཚུལ་ལ་མཁས་པ་མི་ཡི་
མཆོག་ཏུ་འགྱུར། །དེ་ལྟར་འབྲས་བུ་ཆེ་བའི་ལྷ་ཚོགས་ཆོས་རྣམས་ངེས་པར་རྟོགས་གྱུར་པ། །སྟོན་པའི་སྤྱན་སྔར་བརྗོད་དེ་ལྷག་པའི་བསམ་པ་དེ་ཡང་བསྟན་བྱས་ནས། །ཁ་ཅིག་ཡི་རངས་དོགས་མེད་ཡིད་ཀྱིས་སངས་རྒྱས་ཉིད་དུ་བདག་མཐོང་ནས། །འདྲེན་སྲས་དེ་དག་ཚུལ་
འདི་ཉིད་ཀྱིས་བདག་གིས་བདག་ལུང་བསྟན་པར་གྱུར། །དེ་ནས་བཅོམ་ལྡན་འདས་ཀྱིས་འབྲས་བུ་ཆེ་བའི་ལྷ་དེ་དག་གི་ལྷག་པའི་བསམ་པ་ཕུན་སུམ་ཚོགས་པ་དང་། ཆོས་རྣམས་ངེས་པར་རྟོགས་པར་ཐུགས་སུ་ཆུད་ནས་སེམས་ཅན་རྣམས་ཀྱི་དགེ་བའི་རྩ་བ་བསྐྱེད་པའི་ཕྱིར་
དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། དཔལ་སྟུག་འདྲེན་པ་རྣམས་ནི་རྒྱུ་ཞིག་གཟིགས་ནས་འཛུམ་པ་མཛད་ལགས་ཏེ། །རྒྱུ་མེད་མི་མཛད་བཀའ་སྩལ་བདག་གིས་བདེ་གཤེགས་མངོན་སུམ་
དེ་སྐད་ཐོས། །འདི་ལྟར་འདྲེན་པ་ཁྱོད་ཀྱིས་ཞི་བ་བདེ་བ་བསིལ་བའི་འཛུམ་མཛད་ན། །རྒྱལ་བ་ལྷ་མི་ལྷ་མིན་བླ་མ་འཛུམ་པ་མཛད་པའི་རྒྱུ་དེ་གསུངས། །དེ་རིང་འདི་ལྟར་འདྲེན་པ་ཁྱོད་ཀྱི་ཞལ་ནས་འཛུམ་མཛད་བསིལ་མཐོང་ནས། །འགྲོ་བ་འདི་ཀུན་ཐེ་ཚོམ་འཚལ་ཏེ་བདེ་
གཤེགས་ཁྱོད་ཀྱི་ཞལ་དུ་ལྟ། །མི་མཆོག་ཐུགས་རྗེ་ལྡན་པ་ཁྱོད་ཀྱིས་འཛུམ་རྒྱུ་དེ་ནི་མྱུར་དུ་གསུངས། །དེ་ཐོས་གྱུར་ནས་རྒྱལ་མཆོག་འགྲོ་བ་འདི་དག་ཐེ་ཚོམ་མ་མཆིས་འགྱུར། །འདྲེན་པ་དམ་པ་ལྷ་ཚོགས་གང་དག་རང་གིས་རང་ལ་ལུང་བསྟན་པ། །དེ་དག་སུ་ཞིག་གང་

གིས་ཅི་འཐོབ་མཐའ་བཅས་རྣམ་པར་འཕྲུལ་བ་གསུངས། །མི་མཆོག་ཚངས་པའི་གསུང་དབྱངས་སྒྲོག་སྟེ་ཐེ་ཚོམ་ཀུན་ཏུ་བསལ་དུ་གསོལ། །དེ་ཐོས་རྒྱལ་བའི་འཁོར་འདི་རབ་ཏུ་དགའ་ཞིང་མཆོག་ཏུ་མགུ་བ་འཐོབ། །བདེ་གཤེགས་རྒྱལ་མཚན་མཐོན་པོ་དེ་དག་ཐམས་ཅད་
གཞན་དུ་མི་སེམས་པར། །འདྲེན་པའི་སྲས་རྣམས་བྱང་ཆུབ་གཞལ་ཡས་ཞི་བ་དམ་པ་སེམས་ཤིང་མཆིས། །ཐུབ་པ་འདྲེན་མཆོག་ཐེ་ཚོམ་འཚལ་བ་དེ་དག་རྣམས་ཀྱི་ཐེ་ཚོམ་ཁུམ། །དེས་ནི་ཡེ་ཤེས་སྟོབས་ལྡན་ཚུལ་དང་ཚུལ་མིན་མཁས་ཀུན་རྒྱལ་བར་འགྱུར། །རྐང་གཉིས་
གཙོ་བོའི་ཡན་ལག་བརྒྱད་ལྡན་གསུང་ཐོས་གྱུར་ནས་རབ་དགའ་སྟེ། །བདེ་གཤེགས་བསྟན་པ་བཞིན་དུ་བགྱིད་ཅིང་གསུངས་པའི་རྗེས་འཇུག་མཁས་པར་འགྱུར། །དེ་དག་དོན་གྱི་དབང་ལ་བརྟེན་ནས་བདེ་གཤེགས་འདྲེན་པ་བཀའ་སྩལ་གསོལ། །དེས་ནི་ཡི་རངས་གྱུར་ཏེ་
འགྲོ་བ་ཆོས་ཀྱི་མཐའ་མར་ཕྱིན་པར་འགྱུར། །འདྲེན་པ་ཆེན་པོ་ལྷ་དེ་དག་གི་སྔོན་གྱི་སྤྱོད་པ་ཐོས་གྱུར་ཅིང་། །རྒྱལ་བའི་གསུང་ཐོས་གྱུར་ནས་བརྣག་པ་ཡོངས་རྫོགས་ཞི་ཞིང་རབ་དགའ་སྟེ། །ཚུལ་ལ་ཞུགས་ཤིང་ཚུལ་ལ་མཁས་རྣམས་མྱུར་དུ་ཐམས་ཅད་མཁྱེན་པར་
འགྱུར། །འགྲོ་བ་རབ་ཏུ་འགྲོལ་མཛད་ཇི་བཞིན་ཡང་དག་སྟོན་པར་མཛད་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། ལྷ་ཚོགས་རྣམས་ཀྱི་ཆེད་དུ་ང་ཡིས་འཛུམ་པ་འཇིག་རྟེན་བསྟན་མཛད་པ། །རྟ་
ཐུལ་ཁྱོད་ཀྱིས་དུས་དང་ཚོད་ཤེས་ང་ལ་དྲིས་པ་ཤིན་ཏུ་ལེགས། །གང་ཕྱིར་ང་ཡིས་འཛུམ་པ་མཛད་པ་འདི་ཡི་ཚུལ་དང་རྒྱུ། །དེ་ཁྱོད་བསྟན་གྱིས་ཁྱོད་དང་འགྲོ་བ་རྩེ་གཅིག་ཡིད་ཀྱིས་ཉོན། །ཐམས་ཅད་མཁྱེན་པ་རྣམས་ནི་རྒྱུ་ཡི་འབྲས་བུ་རྣམ་པ་གསུམ་གཟིགས་ཤིང་། །
རྒྱུ་ལས་གཟིགས་ནས་རྐང་གཉིས་དམ་པ་དཔལ་སྟུག་རྣམས་ནི་འཛུམ་པ་མཛད། །ཁ་ཅིག་བློ་ཞན་བདག་ཅག་ཉན་ཐོས་འགྱུར་ཞེས་མྱ་ངན་འདས་ཞུགས་དང་། །ཁ་ཅིག་ཁ་རོག་འདུག་ལ་དགའ་ཞིང་རང་རྒྱལ་བྱང་ཆུབ་འདོད་ཞུགས་དང་། །ཁ་ཅིག་བདག་ཅག་འཇིག་རྟེན་

འདྲེན་པ་མཐུ་བོ་ཆེར་ནི་འགྱུར་བྱ་སྟེ། །སྐྱེ་བོ་སྡུག་བསྔལ་ལྷུང་བ་དགྲོལ་ཞེས་ཞུགས་པའི་བསམ་པ་མཁྱེན་གྱུར་ནས། །འཛུམ་པ་ཆུང་མཛད་གང་བྱུང་ཉན་ཐོས་དོན་དུ་མཛད་པར་ཤེས་པར་བྱ། འཛུམ་པ་འབྲིང་མཛད་གང་བྱུང་རང་རྒྱལ་དོན་དུ་མཛད་པར་
རིག་པར་བྱ། །འཛུམ་མཆོག་ངས་གང་མཛད་པ་འདི་ནི་འདྲེན་པའི་དོན་དུ་ཤེས་པར་བྱ། །རབ་འབྲིང་ཐ་མ་རྣམ་པ་འདི་གསུམ་འཛུམ་པ་མཛད་པའི་རྒྱུར་གསུངས་ཏེ། །ཁ་ཅིག་ཐར་པའི་དོན་གཉེར་ལམ་གསུམ་ཞུགས་པའི་འཇིག་རྟེན་འདི་མཁྱེན་ནས། །དེས་ན་འཇིག་
རྟེན་མཁས་པ་རྣམ་པར་འདྲེན་པ་དམ་པ་འཛུམ་པ་མཛད། །རྟ་ཐུལ་དེ་ལ་ཉན་ཐོས་དོན་དུ་འཛུམ་མཛད་ཞབས་འོག་ནུབ་པར་འགྱུར། །རང་རྒྱལ་དོན་དུ་འཛུམ་པ་གང་མཛད་སྐུ་ཡི་དབུས་སུ་ནུབ་པར་འགྱུར། །འདྲེན་པ་སྟོབས་བཅུའི་དོན་དུ་འཛུམ་པ་མཛད་པ་གཙུག་ཏུ་ནུབ་
པར་འགྱུར། །དེ་ལྟར་རྟ་ཐུལ་ཁྱོད་ཀྱིས་འཛུམ་པའི་རྒྱུ་ནི་རྣམ་གསུམ་ཤེས་པར་གྱིས། །རྒྱལ་བ་མཆོག་རྣམས་དོན་དུ་གང་འཛུམ་དེ་ཀུན་ང་ཡི་གཙུག་ཏུ་ནུབ། །སྡིག་པ་གཞོམ་པའི་ཚུལ་དུ་དེ་ལྟར་འཛུམ་པ་ངས་བསྟན་ཤེས་པར་གྱིས། །འདྲེན་པ་རྣམས་ཀྱི་འཛུམ་པ་གང་
ཡིན་དེ་རྒྱུ་རྣམ་གསུམ་ཡང་བཤད་ཀྱིས། །ཀུན་ཀྱང་རྩེ་གཅིག་ཡིད་བྱོས་དེ་ནི་ང་ལས་ལེགས་པར་མཉན་པར་གྱིས། །དང་པོའི་དོན་དུ་འདྲེན་པ་འཛུམ་པ་ངས་མཛད་མྱུར་དུ་ཐོག་མར་ནུབ། །འབྲིང་གི་དོན་ནི་དུས་ཚོད་ཅུང་ཟད་བསྡད་ཅིང་ཕྱི་ནས་ནུབ་པར་འགྱུར། །བློ་མཆོག་ལྡན་ཕྱིར་
འཛུམ་པ་རྒྱལ་བ་ངས་མཛད་ཤིན་ཏུ་རིང་དུ་གནས། །རྟ་ཐུལ་ཉན་ཐོས་དོན་དུ་གང་གནས་འཛུམ་དེ་ཐེག་པའི་དབང་གིས་མཛད། །གཞན་ཡང་འཛུམ་རྒྱུ་རྣམ་གསུམ་བཤད་ཀྱིས་རྟ་ཐུལ་ཁྱོད་ཀྱིས་མཉན་པར་གྱིས། །གང་དག་རྒྱལ་བ་དྲང་པོ་སྟོབས་བཅུ་པོ་ལ་སྐོར་བ་བྱེད་པ་ནི། །
དེ་དག་ང་ལ་སྐྱེན་པར་བསྐོར་ནས་མྱུར་དུ་ཤིན་ཏུ་མཁས་པར་འགྱུར། །འབྲིང་དོན་ཕྱིར་ནི་སྲབ་ཅིང་ཆེ་ལ་དལ་གྱིས་སྐོར་བ་བྱེད་པར་འགྱུར། །དལ་གྱིས་གཡས་ཕྱོགས་བསྐོར་བ་བྱས་ནས་རྒྱ་ཆེར་འགྱུར་ཞིང་མནན་པར་འགྱུར། །གང་དག་གསེར་རྒྱན་ལ་དཀར་སྟེང་བཞག་འདྲ་

བའི་བདེ་གཤེགས་མཐོང་གྱུར་ན། །དེ་ནི་རྐང་གཉིས་དམ་པ་ཐུབ་པའི་སྐུ་ཀུན་ཁྱབ་པར་གནས་པར་འགྱུར། །ཐམས་ཅད་མཁྱེན་པས་འཛུམ་བསྟན་འདི་ནི་ཞིང་གི་དབང་དུ་ཤེས་པར་བྱ། །གང་ཚེ་གདུགས་འདྲ་མཐའ་ཡས་མིག་ལྡན་པས་ནི་འདྲེན་དེ་འགེབས་པ་དང་། །གང་
ཚེ་མེ་ཏོག་འདྲ་ལ་འདྲེན་པའི་སྟེང་གི་མཁའ་ལ་ལྡིང་བ་དང་། །གང་ཚེ་སྒོ་མོ་འདྲ་ཞིང་བདེ་བར་གཤེགས་ལ་ལན་གསུམ་སྐོར་བྱེད་པ། །དེ་ནི་འཇིག་རྟེན་འདས་པ་ཚེ་ཡི་དབང་དུ་འཛུམ་མཛད་ཤེས་པར་བྱ། །བདེ་གཤེགས་རྒྱལ་བ་རྣམས་ཀྱིས་འཛུམ་མཛད་རྒྱུ་ནི་རྣམ་གསུམ་
དེ་ཙམ་བསྟན། །རྟ་ཐུལ་ཁྱོད་ཀྱིས་འཛུམ་མཛད་རྒྱུ་རྣམས་གསུམ་པོ་དེ་དག་ཤེས་པར་གྱིས། །དེས་ན་འཇིག་རྟེན་དོན་བསྟན་བཞེད་ནས་འཇིག་རྟེན་རྣམ་འདྲེན་འཛུམ་པ་མཛད། །དེ་ཐོས་གྱུར་ནས་ཐམས་ཅད་མཁྱེན་གྱི་བསྟན་ལ་ཐེ་ཚོམ་མེད་པར་གྱིས། །འབྲས་བུ་ཆེ་རིས་ལྷ་
ཚོགས་བྱེ་བ་བརྒྱད་ཅུ་ཐམ་པ་འདི་དག་ནི། །ཞིང་རྣམས་དག་ཏུ་ཆོས་ཚུལ་ཤིན་ཏུ་རྒྱ་ཆེན་སྨྲ་བའི་རྒྱལ་བར་འགྱུར། །མཁས་པ་དེ་དག་དཔག་མེད་ཚེ་ལྡན་བསྐལ་པ་མང་པོར་གནས་པར་འགྱུར། །དེ་ཕྱིར་བདེ་བར་གཤེགས་པས་འཛུམ་པ་རྒྱ་ཆེན་མཆོག་གི་ཆ་འདི་བསྟན། །དེ་
དག་སྔོན་གྱི་བསྐལ་པ་སུམ་ཅུ་དྲུག་གི་རྒྱལ་བ་རྣམས་ཀྱང་མཐོང་། །བསྐལ་པ་སུམ་ཅུ་དྲུག་ཏུ་ཐམས་ཅད་མཁྱེན་པ་བསྙེན་བཀུར་སྤྱད་པ་སྤྱོད། །ད་དུང་ཚུལ་མཁས་འདི་དག་བསྐལ་པ་གྲངས་མེད་སུམ་ཅུ་རྩ་དྲུག་ཏུ། །གང་ཟག་ཆེན་པོ་འདི་དག་རྒྱལ་བ་ཁྱུ་མཆོག་མཆོད་
པ་བྱེད་ཅིང་གནས། །ཐམས་ཅད་དུ་ཡང་ཕུན་སུམ་ཚུལ་རྟོགས་རྒྱལ་བའི་མཆོག་ལ་མཆོད་པ་བྱེད། །རྐང་གཉིས་གཙོ་བོ་མཆོད་དེ་བྱང་ཆུབ་ཞི་བ་ཡོངས་སུ་བཙལ་བྱས་ནས། །དེ་དག་དེའི་འོག་ཏུ་དཔལ་སྟུག་རྐང་གཉིས་དམ་པ་སྐྱེས་བུ་མཆོག །འདྲེན་པ་མཐུ་ཆེན་ཡོན་
ཏན་ལྡན་པར་གསེར་གྱི་རྒྱལ་མཚན་བསྐལ་ལ་འབྱུང་། །རྒྱལ་བ་དེ་དག་སྣ་ཚོགས་ཞིང་ན་གནས་ཤིང་རང་རང་ཞིང་སྦྱངས་ཏེ། །སེམས་ཅན་དམ་པ་དེ་ཀུན་ཉི་མའི་འོད་ཀྱི་དཀྱིལ་འཁོར་དཔལ་ཞེས་བྱ། །དེ་ཚེ་ཡོན་ཏན་ལྡན་པ་དེ་དག་རྣམས་ཀྱི་འདུས་པ་གྲངས་མེད་དེ། །

དེ་ཚེ་ཐུབ་པ་རེ་རེའི་ཉན་ཐོས་འདུས་པར་འགྱུར་བ་དེ་དག་ནི། །གལ་ཏེ་བསྐལ་པ་ཁྲག་ཁྲིག་དག་ཏུ་སྟོབས་བཅུས་ཉན་ཐོས་དེ་བགྲངས་ཀྱང་། །ལེགས་མཛད་རྣམས་ཀྱི་ཉན་ཐོས་འདུས་པ་དག་ནི་མཐར་ཕྱིན་བགྲངས་མི་འགྱུར། །འདུས་པ་དེ་དག་ཐམས་ཅད་
གྲངས་མེད་འདུས་པ་དེ་ནི་ཅི་འདྲ་བ། །དེ་ལས་ཉིས་གྱུར་དེ་ཚེ་བྱང་ཆུབ་ཏུ་ནི་ཡང་དག་ཞུགས་པར་འགྱུར། །དེ་ཚེ་རྒྱལ་བར་ཞུགས་ཀྱི་རྒྱལ་བ་ཐམས་ཅད་མཁྱེན་པ་ཉིད་མ་ཡིན། །དེ་དག་ཐམས་ཅད་ཡོངས་དག་ཞིང་དུ་སྤྱད་ནས་ཀུན་ཀྱང་རྒྱལ་བར་འགྱུར། །བདེ་གཤེགས་
དེ་དག་སྤྱོད་པ་གང་ཡིན་དེ་དག་རྣམས་ཀྱི་འང་དེ་ཉིད་འགྱུར། །འཇིག་རྟེན་མཁས་པ་དེ་དག་མྱ་ངན་འདས་པར་གྱུར་ནས་དམ་པའི་ཆོས། །དེ་ཚེ་སྲས་ཀྱིས་གཟུང་ཞིང་བསྐལ་པ་བྱེ་བ་བརྒྱད་ཅུར་གནས་པར་འགྱུར། །དེ་དག་འདས་ནས་སྟོན་པའི་གསུང་རབ་དེ་ལ་བྱང་ཆུབ་
སེམས་བསྐྱེད་པ། །གང་གཱའི་ཀླུང་གི་བྱེ་མ་བས་ཀྱང་ཤིན་ཏུ་མང་བ་འབྱུང་བར་འགྱུར། །དེ་དག་འདས་ནས་སྟོན་པ་སྐྱོབ་པ་རྣམས་ཀྱི་གསུང་རབ་དེ་ལ་ནི། །ཉན་ཐོས་རྒྱ་མཚོ་ཀུན་གྱི་བྱེ་སྙེད་དཔག་ཡས་མྱ་ངན་འདའ་བར་འགྱུར། །དེ་ལྟར་འཇིག་རྟེན་དོན་རྣམས་མཛད་
པ་རང་བྱུང་དེ་དག་ཐམས་ཅད་ཀྱི། །བསྟན་པ་གང་ཡིན་དེ་ནི་ཆོས་དང་ཡོངས་སུ་ལེགས་པར་ལྡན་གྱུར་ཅིང་། །ཡང་དག་ཤར་བར་འགྱུར་ཏེ་དེ་ནི་བསྟན་པ་རྣམས་ཀྱི་ཆོས་ཉིད་ཡིན། །མི་མཆོག་དེ་ཡི་གསུང་རབ་དེ་ཐོས་འགྲོ་བ་མ་ལུས་དད་གྱུར་ནས། །རྐང་གཉིས་དམ་པ་
གཞལ་ཡས་འཇིག་རྟེན་དོན་བྱེད་བདག་ཅག་འགྱུར་ཞེས་ཏེ། །ཐམས་ཅད་དགའ་ནས་རྒྱལ་བའི་ཞབས་ལ་ཕྱག་འཚལ་སྐྱེ་བོ་རབ་ཏུ་དགའ། །བདེ་བར་གཤེགས་ལ་དགའ་བ་གཞལ་ཡས་བསྐྱེད་ནས་ཆོས་ཀྱིས་བསྙེན་བཀུར་བྱས། །དེ་ལྟ་བས་ན་དགའ་བར་བྱོས་ལ་མགོ་
ལ་འབར་བཞིན་སྤྱད་སྤྱོད་དེ། །རྟག་ཏུ་ཤེས་རབ་ཕ་རོལ་ཕྱིན་དང་དགེ་བའི་བཤེས་གཉེན་བསྟེན་བྱོས་ལ། །ཡང་དག་མཐོང་བའི་སྤྱད་པ་དགེ་བ་འདི་ལ་ཀུན་ཏུ་བསྟེན་བྱོས་ཏེ། །དགེ་སློང་ཁྱེད་ཅག་རྐང་གཉིས་གཙོ་བོ་འཇིག་རྟེན་ཐུགས་བརྩེར་འགྱུར་བར་གྱིས། །འབྲས་བུ་

ཆེ་བ་ལུང་བསྟན་པའི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་གནས་གཙང་མའི་རིས་ཀྱི་ལྷ་རྣམས་ཀྱིས་དེའི་ཚེ་སེམས་ཅན་དཔག་ཏུ་མེད་པ་བྱང་ཆུབ་ཏུ་ཡང་དག་པར་ཞུགས་པར་རིག་ཅིང་སངས་རྒྱས་ཀྱི་ཆོས་རྣམས་ལ་ཐེ་ཚོམ་མེད་པར་གྱུར་པར་རིག་ནས་ཚིམ་
ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་སོ་སོ་ནས་མངོན་པར་བསྟོད་དོ། །དེ་ལ་ལྷའི་བུ་སྦྱིན་པ་ལ་མོས་པས་གསོལ་པ། ཁྱོད་ཀྱིས་སྡུག་པའི་སྲས་རྣམས་དང་། །
བཙུན་མོ་དང་ནི་སྲོག་ཕངས་བཏང་། །རྒྱལ་སྲིད་བཏང་བར་ཅི་སྨོས་ཏེ། །སྦྱིན་མཐར་ཕྱིན་ལ་ཕྱག་ཀྱང་འཚལ། །ལྷའི་བུ་ཚུལ་ཁྲིམས་ལ་མོས་པས་གསོལ་པ། ཁྱོད་ཀྱིས་ཚུལ་ཁྲིམས་རྣམ་སྦྱངས་པ། །རྣམ་པ་ཀུན་ཏུ་བསྙེངས་མི་མངའ། །ཤིན་ཏུ་བསླབས་པས་
མཐར་ཕྱིན་པ། །ཁྲིམས་མཐར་ཕྱིན་ལ་ཕྱག་ཀྱང་འཚལ། །ལྷའི་བུ་བཟོད་པ་ལ་མོས་པས་གསོལ་པ། །ཁྱོད་ཀྱིས་བཟོད་པ་བསྟེན་མཛད་པས། །ཡན་ལག་གཏུབས་པའང་བཟོད་པར་མཛད། །ཟབ་མོར་སྒྱིད་ལུག་མ་ལགས་ཏེ། །བཟོད་མཐར་ཕྱིན་ལ་ཕྱག་ཀྱང་འཚལ། །
ལྷའི་བུ་བརྩོན་འགྲུས་ལ་མོས་པས་གསོལ་པ། བརྩོན་པ་མ་བཏང་བརྩོན་འགྲུས་ཏེ། །སྟོབས་ཆེན་བརྩོན་འགྲུས་ལྡན་གྱུར་པས། །རྫོགས་པའི་བྱང་ཆུབ་མཆོག་བརྙེས་པ། །བརྩོན་མཐར་ཕྱིན་ལ་ཕྱག་ཀྱང་འཚལ། །ལྷའི་བུ་བསམ་གཏན་ལ་མོས་པས་གསོལ་པ། །ཁྱོད་
ཀྱིས་བསམ་གཏན་བསྟེན་མཛད་པ། །དེ་ལ་འཇིག་རྟེན་གཏིང་མི་རྙེད། །དུས་གསུམ་མཉམ་པ་ཉིད་བརྙེས་པ། །བསམ་གཏན་མཐར་ཕྱིན་ཕྱག་ཀྱང་འཚལ། །ལྷའི་བུ་གཟི་བརྗིད་དང་ལྡན་པས་གསོལ་པ། །དཔའ་བོས་ཤེས་རབ་ཕ་རོལ་ཕྱིན། །ཡང་དང་ཡང་ནི་
བསྒོམས་པས་ན། །ཐམས་ཅད་མཁྱེན་པ་ཉིད་བརྙེས་པ། །ཤེས་རབ་མཐར་ཕྱིན་ཕྱག་ཀྱང་འཚལ། །ལྷའི་བུ་ཁམས་ཀྱི་བློ་གྲོས་ཀྱིས་གསོལ་པ། སྦྱིན་པ་དག་དང་ངག་སྙན་དང་། །དོན་སྤྱད་འཐུན་པའི་དོན་དག་གིས། །འཇིག་རྟེན་འདི་དག་ཁྱོད་ཀྱིས་བཏུལ། །

འདྲེན་པ་ཁྱོད་ལ་ཕྱག་ཀྱང་འཚལ། །ལྷའི་བུ་དགེ་བའི་བློ་གྲོས་ཀྱིས་གསོལ་པ། བྱམས་ཆེན་ཐུགས་རྗེ་ཆེན་པོ་དག །ཡུན་རིང་དུས་ནས་བསྒོམས་མཛད་དེ། །སེམས་ཅན་དཔག་ཡས་ཡོངས་སུ་བསྒྲལ། །གདོས་འཛིན་ཁྱོད་ལ་ཕྱག་ཀྱང་འཚལ། །ལྷའི་བུ་
དག་པའི་སེམས་ཀྱིས་གསོལ་པ། ཉོན་མོངས་མེད་པའི་མཐར་ཕྱིན་ཅིང་། །ཐུབ་ཆེན་དུལ་བའི་སེམས་མངའ་བས། །མ་དུལ་ཐམས་ཅད་དུལ་མཛད་པ། །ཁ་ལོ་སྒྱུར་ལ་ཕྱག་ཀྱང་འཚལ། །ལྷའི་བུ་བློ་གྲོས་དྲི་མ་མེད་ཀྱིས་གསོལ་པ། སེམས་དག་མཉེན་པའི་སེམས་
མངའ་བ། །སེམས་དུལ་དབང་པོ་ཞི་མངའ་བ། །སེམས་ཅན་ཀུན་གྱི་སེམས་མཁྱེན་པ། །སེམས་མཁྱེན་ཁྱོད་ལ་ཕྱག་ཀྱང་འཚལ། །ལྷའི་བུ་བློ་གྲོས་རྣམ་པར་དག་པས་གསོལ་པ། ཤེས་རབ་ལྡན་པའི་བློ་གྲོས་ཅན། །བློ་གྲོས་མཆོག་ལ་རབ་ཏུ་ཞུགས། །ཐུགས་གསལ་
ཕུན་སུམ་ཚོགས་པའི་བློ། །མི་མཁས་རྟོགས་མཛད་ཕྱག་ཀྱང་འཚལ། །ལྷའི་བུ་སེམས་བརྒྱན་གྱིས་གསོལ་པ། ཁྱོད་ཀྱི་སེམས་ནི་རྣམ་པར་སྦྱངས། །སངས་རྒྱས་ཞིང་ཡང་རྣམ་དག་མཛད། །སེམས་ཅན་བློ་ཡང་རྣམ་སྦྱངས་པ། །ཀུན་དགའ་ཁྱོད་ལ་ཕྱག་ཀྱང་འཚལ། །
ལྷའི་བུ་ཕམ་པ་མེད་པས་གསོལ་པ། དགོངས་པ་ཕམ་པ་མི་མངའ་བ། །ཁྱོད་ཀྱིས་བདུད་ཀྱི་དཔུང་ཡང་བཅོམ། །ཁྱོད་ཀྱིས་ལྷ་ཚོགས་ཐམས་ཅད་ཀྱང་། །རབ་ཏུ་དགའ་བའི་ཡིད་དུ་བསྒྱུར། །ལྷའི་བུ་མྱུར་དུ་བྱེད་པས་གསོལ་པ། ཁྱོད་ཀྱིས་ཆོས་རྣམས་མྱུར་བར་
མཁྱེན། །སེམས་ཅན་མྱུར་བར་རྣམ་པར་སྦྱངས། །ཟབ་ཅིང་བལྟ་དཀའི་ཆོས་དག་ལ། །མྱུར་དུ་མཛད་ལ་ཕྱག་ཀྱང་འཚལ། །ལྷའི་བུ་བརྩོན་འགྲུས་བརྟན་པས་གསོལ་པ། བྲལ་གྱུར་ཡོངས་སུ་བྲལ་གྱུར་པ། །ཆུ་བོ་རྒལ་ཏེ་ཟག་པ་སྤངས། །ཕ་རོལ་ཕྱིན་ཅིང་ཐང་
ལ་བཞུགས། །བརྩོན་འགྲུས་བརྟན་ལ་ཕྱག་ཀྱང་འཚལ། །ལྷའི་བུ་སྤྱོད་ལམ་དང་ལྡན་པས་གསོལ་པ། འདོད་ཆགས་སྤངས་ཤིང་ཞེ་སྡང་སྤངས། །གཏི་མུག་སྤངས་པ་ཟག་མེད་པ། །སྦྱིན་གནས་བསོད་ནམས་ཞིང་གྱུར་པ། །འཇིག་རྟེན་མཆོད་འོས་ཕྱག་ཀྱང་འཚལ། །ལྷའི་

བུ་ཤིན་ཏུ་བརྟན་པས་གསོལ་པ། ཁྱོད་ཀྱི་དམ་ཆོས་ཤིན་ཏུ་བརྟན། །འཇིག་རྟེན་གསུམ་དུ་རབ་ཏུ་མཆོད། །གཅིག་པུ་བགྲོད་པས་བདེ་བ་བརྙེས། །དེ་ཕྱིར་ཁྱོད་ལ་ཕྱག་ཀྱང་འཚལ། །ལྷའི་བུ་མི་འཁྲུགས་པས་གསོལ་པ། ལྷུན་སྟུག་གཅིག་ཏུ་གྱུར་པའི་རི། །རླུང་གིས་
བསྐྱོད་པར་མི་ནུས་ཏེ། །དེ་བཞིན་བསྟོད་དང་སྨད་པ་ཡིས། །བདེ་གཤེགས་བསྐྱོད་པར་མི་ནུས་སོ། །ལྷའི་བུ་མཉམ་པ་ཉིད་ཐོབ་པས་གསོལ་པ། དཔའ་བོ་ཆེན་པོ་ཟབ་ཅིང་མཉམ། །མཚན་རབ་སུམ་ཅུ་རྩ་གཉིས་ཅན། །ཤེས་རབ་ཟབ་མོ་བློ་ལྡན་པ། །རྒྱལ་བ་མཛེས་
ལ་ཕྱག་ཀྱང་འཚལ། །ལྷའི་བུ་ཟབ་པའི་བློ་གྲོས་ཀྱིས་གསོལ་པ། སྐུ་ཆེན་ཁྱོད་ལ་སྐུ་མི་མངའ། །དེ་བཞིན་ཉིད་ལ་རབ་ཏུ་བཞུགས། །ཡང་དག་མཐའ་ཡང་རབ་ཏུ་སྟོན། །ཁྱོད་མཚུངས་གང་ཟག་ཡོང་མ་མཆིས། །ལྷའི་བུ་བློ་གྲོས་དང་བས་གསོལ་པ། གཉིས་སུ་
མེད་པས་ཡང་དག་སྟོན། །དཔའ་བོ་དཔའ་བས་རྣམ་པར་གནོན། །གང་དག་ཟབ་ལ་ཞུམ་མ་མཆིས། །དེ་དག་ཁྱོད་ཆོས་ཕ་རོལ་ཕྱིན། །ལྷའི་བུ་རབ་ཏུ་དགའ་བས་གསོལ་པ། མཆོག་ཏུ་དགའ་ཡིད་བརྟན་པ་དག །ཁྱོད་ཀྱི་སློབ་ལ་བསླབས་པའི་རྣམས། །སྦྲུལ་
རྣམས་པགས་པ་རྙིང་འདོར་བཞིན། །སྲིད་པ་གསུམ་པོ་འདི་དག་འདོར། །ལྷའི་བུ་ཞི་བའི་ཡིད་ཀྱིས་གསོལ་པ། ཇི་ལྟར་མར་མེ་མར་ཟད་ཅིང་། །སྙིང་པོ་ཟད་པས་ཞིར་འགྱུར་བཞིན། །ཁྱོད་ཀྱིས་བསྟན་པ་མྱུར་ཐོས་ནས། །ཤེས་རབ་ཆེན་པོ་མྱ་ངན་འདའ། །ལྷའི་
བུ་ཞི་གནས་ལ་གནས་པས་གསོལ་པ། གང་གིས་ཀུན་མཁྱེན་ཁྱོད་མཐོང་བའི། །མི་རྣམས་འདོད་ཆགས་བཅིངས་པ་ཡང་། །ཤེས་རབ་མཚོན་གྱིས་མཁས་པ་དག །འདོད་ཆགས་ཞགས་པ་གཅོད་པར་འགྱུར། །ལྷའི་བུ་ཞི་གནས་མང་གིས་གསོལ་པ། ཞི་བའི་
སེམས་མངའ་ཞི་ལ་སྤྱོད། །ཆོ་ག་སྤྱོད་ཡུལ་རབ་ཏུ་ཞི། །ཉོན་མོངས་ཐམས་ཅད་ཞི་གྱུར་པ། །དགྲ་རྣམས་ཞི་ལ་ཕྱག་ཀྱང་འཚལ། །ལྷའི་བུ་ཞི་གནས་འཇིགས་མེད་ཀྱིས་གསོལ་པ། ཁྱོད་ཀྱི་ཞི་གནས་བསླབས་པ་ཡི། །བྱང་ཆུབ་སེམས་དཔའ་གྲགས་ཆེན་དག །

ཞི་གནས་ཉིད་ཀྱིས་འབྱུང་འགྱུར་ཞིང་། །སེམས་ཞི་དེ་བཞིན་གཤེགས་པར་འགྱུར། །ལྷའི་བུ་ཞི་གནས་ཟས་ཀྱིས་གསོལ་པ། ཆོས་རྣམས་ཀུན་གྱི་ཞི་བ་ནི། །དཔའ་བོ་ཁྱོད་ཀྱིས་རབ་ཏུ་བསྟན། །ཤེས་རབ་ཆེན་པོས་དེ་འཚལ་ན། །དེ་དག་དེ་བཞིན་
གཤེགས་པར་འགྱུར། །ལྷའི་བུ་རྟག་ཏུ་རྣམ་པར་ལྟ་བས་གསོལ་པ། ཁྱོད་ཀྱིས་སེམས་ཅན་རྟག་ཏུ་གཟིགས། །མཁས་པ་ཁྱོད་ལྟར་སློབ་པ་རྣམས། །ཡེ་ཤེས་མཆོག་གིས་མཉམ་གཞག་ཅིང་། །བྱང་ཆུབ་མཆོག་ཀྱང་ཐོབ་པར་འགྱུར། །ལྷའི་བུ་སྣང་འཛིན་གྱིས་
གསོལ་པ། ཤེས་རབ་ཕ་རོལ་ཕྱིན་གྱུར་པ། །ཐུབ་ཆེན་ཁྱོད་ལས་གང་སློབ་པ། །དེ་དག་འཇིག་རྟེན་སྣང་མཛད་ཅིང་། །སྒྲིབ་པ་མེད་པར་གཟིགས་པར་འགྱུར། །ལྷའི་བུ་འོད་བྱེད་ཀྱིས་གསོལ་པ། འཇིག་རྟེན་སྒྲོན་མ་ཁྱོད་ཀྱི་གསུངས། །ཡེ་ཤེས་རྒྱ་མཚོ་དེ་ཐོས་
ནས། །དེ་དག་དྲི་མེད་བདེ་བ་འཐོབ། །བསམ་གྱིས་མི་ཁྱབ་འོད་ཀྱང་འབྱུང་། །ལྷའི་བུ་དྲི་མ་མེད་པའི་འོད་ཀྱིས་གསོལ་པ། ཆོས་རྣམས་ཐམས་ཅད་རྣམ་མི་རྟོག །ཐབས་ལ་མཁས་པས་དེ་དག་གསུངས། །དེ་འདྲའི་ཡེ་ཤེས་སྟོན་བགྱིད་པ། །དེ་དག་གང་ཟག་མཆོག་ཏུ་
འགྱུར། །ལྷའི་བུ་རབ་ཏུ་མི་གནས་ཀྱིས་གསོལ་པ། གནས་མ་མཆིས་ཤིང་བླང་མ་མཆིས། །ཆོས་རྣམས་ཐམས་ཅད་སེམས་མ་མཆིས། །བདག་དང་གཞན་གྱི་རྣམ་འགྱུར་བ། །དེ་དག་ཁྱོད་ཀྱིས་དེ་བཞིན་མཁྱེན། །ལྷའི་བུ་གནས་མེད་བློ་གྲོས་ཀྱིས་གསོལ་པ།
ཆོས་རྣམས་ཐམས་ཅད་གཞི་མེད་པར། །རྣམ་པར་འདྲེན་པ་ཁྱོད་ཀྱིས་གཟིགས། །དེ་དག་ཁྱོད་ཀྱིས་ལུགས་བཟློག་སྟེ། །སེམས་ཅན་རྣམས་ལ་བསྟན་པ་མཛད། །ལྷའི་བུ་མི་རྟེན་བློ་གྲོས་ཀྱིས་གསོལ་པ། ཆོས་རྣམས་ཐམས་ཅད་རྟེན་མ་མཆིས། །སེམས་ཅན་
མ་མཆིས་ཕན་ཚུན་མིན། །ལག་མཐིལ་སྐྱུ་རུ་ར་བཞག་བཞིན། །ཡང་དག་ཇི་བཞིན་ཁྱོད་ཀྱིས་བསྟན། །ལྷའི་བུ་བར་སྣང་རྒྱུ་བས་གསོལ་པ། བདེ་གཤེགས་ཁྱོད་ཀྱིས་ཆོས་ཀྱི་རྣམས། །བར་སྣང་ལྟ་བུར་སྣང་བ་སྟེ། །སྐྱེ་དང་འགོག་པ་མེད་པར་གཟིགས། །དེ་སླད་

འཇིག་རྟེན་ཆགས་མི་མངའ། །ལྷའི་བུ་ངར་འཛིན་པ་མེད་པས་གསོལ་པ། ཁྱོད་ཀྱིས་འགྲོ་བ་འདི་དག་ཀུན། །ལུས་ཀྱི་ངོ་བོ་ཉིད་ཀྱིས་ནི། །གཡོ་བ་མེད་ཅིང་ངར་འཛིན་མེད། །སྤྱོད་མེད་རྩོལ་བ་མེད་པར་གཟིགས། །ལྷའི་བུ་བློ་གྲོས་རྣམ་པར་བསྒོམས་ཀྱིས་གསོལ་
པ། སྒྱུ་མ་སྣ་ཚོགས་ལེགས་བགྱིས་པ། །སྒྱུ་མའི་མཁན་པོས་བསྟན་གྱུར་ན། །དེ་བཞིན་མ་ལགས་དེ་བཞིན་གདའ། །ཐུབ་པ་དེ་ལྟར་མཉམ་མ་མཆིས། །ལྷའི་བུ་རབ་ཏུ་སད་པའི་ངང་ཚུལ་གྱིས་གསོལ་པ། གཟུགས་བརྙན་ཇི་ལྟར་མེ་ལོང་ལ། །གདའ་ཡང་
དེ་ལྟར་མ་མཆིས་པ། །དེ་བཞིན་ཆོས་རྣམས་ཁྱོད་ཀྱིས་གཟིགས། །དེ་བས་འཇིག་རྟེན་རྨོངས་མི་མངའ། །ལྷའི་བུ་ཡིད་གཉིས་རྣམ་པར་འཇིག་གིས་གསོལ་པ། སངས་རྒྱས་གཟུགས་བརྙན་ལྟ་བུ་སྟེ། །དེ་བཞིན་སངས་རྒྱས་ཆོས་ཀྱི་རྣམས། །དེ་བཞིན་ཁྱོད་ཀྱིས་
བསྟན་པ་མཛད། །དེ་ལྟར་འགྲོ་བ་ཀུན་ཀྱང་མཁྱེན། །ལྷའི་བུ་སྤོབས་པ་ཐོགས་མེད་ཀྱིས་གསོལ་པ། ཆོས་ཉིད་ལ་ནི་ཁོར་ཟུག་ཏུ། །སྤོབས་པ་རབ་ཏུ་འབྱུང་འགྱུར་ཞིང་། །ཆོས་ཉིད་དེ་ནི་བརྙེས་པས་ན། །དེ་སླད་ཁྱོད་ནི་སྤོབས་པ་ལྡན། །ལྷའི་བུ་ཆགས་མེད་བློ་
གྲོས་ཀྱིས་གསོལ་པ། ཁྱོད་ཀྱི་ཆོས་འདི་ཐམས་ཅད་ནི། །རང་བཞིན་མཚན་ཉིད་མ་མཆིས་པར། །ཡང་དག་ཇི་བཞིན་རབ་ཏུ་མཁྱེན། །དེ་བས་ཐུབ་པས་རབ་རིབ་བསལ། །ལྷའི་བུ་མྱ་ངན་བྲལ་གྱིས་གསོལ་པ། མྱ་ངན་མེད་ཅིང་ཉེར་ལེན་མེད། །སྤྲོས་པ་མེད་ཅིང་
རྙོག་པ་མེད། །ཆོས་རྣམས་ཀུན་ཏུ་ཉོན་མ་མོངས། །དེ་དག་རང་བཞིན་ཁྱོད་ཀྱིས་མཁྱེན། །ལྷའི་བུ་རྟོགས་པ་ཕུན་སུམ་ཚོགས་པས་གསོལ་པ། ཆོས་རྣམས་ཡང་དག་མ་ལགས་དེ། །འགྲོ་དང་འོང་བ་མ་མཆིས་པ། །དེ་དག་ཁྱོད་ཀྱིས་ཡང་དག་མཁྱེན། །དེ་བཞིན་
རབ་ཏུ་བསྟན་པར་མཛད། །ལྷའི་བུ་བློ་གྲོས་མཆོག་གིས་གསོལ་པ། ལྷུན་གྱིས་གྲུབ་ཅིང་བླང་མེད་པ། །རྨོངས་པ་མེད་ཅིང་ཤེས་པ་མེད། །ཆོས་རྣམས་ཅི་ཡང་མི་བགྱིད་པ། །ཁྱོད་ཀྱིས་རང་བཞིན་ཐུགས་སུ་ཆུད། །ལྷའི་བུ་སྒྲིབ་མེད་ཐོབ་ཀྱིས་གསོལ་པ། སྣང་བ་

མ་མཆིས་མུན་མ་མཆིས། །གཟུགས་མེད་མ་ལགས་གཟུགས་ཅན་མིན། །གཟུང་བ་མ་མཆིས་གྲོལ་མ་མཆིས། །ཁྱོད་ཀྱིས་རང་བཞིན་ཐུགས་སུ་ཆུད། །ལྷའི་བུ་མིག་དཔས་ཀྱིས་གསོལ་པ། ཡུལ་དང་ཕྱོགས་ན་མི་གནས་པ། །ཡོད་དང་མེད་པ་མ་
ལགས་པར། །རྨི་ལམ་འདོད་པ་ཇི་བཞིན་དུ། །དེ་དག་རང་བཞིན་ཁྱོད་ཀྱིས་གཟིགས། །ལྷའི་བུ་མིག་མི་འཛུམས་ཀྱིས་གསོལ་པ། བྱིས་པ་རྣམས་ཀྱི་བློ་རྨོངས་པ། །མ་སྐྱེས་པ་དང་མ་འགགས་པ། །བར་ནའང་གནས་པ་མ་མཆིས་པ། །དེ་དག་རང་བཞིན་ཁྱོད་ཀྱིས་
གཟིགས། །ལྷའི་བུ་སྟོང་པ་ཉིད་ལ་གནས་པས་གསོལ་པ། གང་ཟག་སེམས་ཅན་མ་མཆིས་པ། །མ་མཆིས་ཐ་སྙད་མ་མཆིས་པ། །བསྟན་པའི་སླད་དུ་བརྗོད་བགྱི་བ། །དེ་དག་རང་བཞིན་ཁྱོད་ཀྱིས་གཟིགས། །ལྷའི་བུ་མཚན་མ་མེད་པ་ལ་གནས་པས་གསོལ་པ། གང་
གིས་ཐ་སྙད་གདགས་པ་ཡི། །མཚན་མ་དེ་དག་མ་མཆིས་ཏེ། །ཆོས་ཀུན་མཚན་མ་མ་མཆིས་པར། །རྣམ་པར་འདྲེན་པ་ཁྱོད་ཀྱིས་གཟིགས། །ལྷའི་བུ་སྨོན་པ་མེད་པ་ལ་གནས་པས་གསོལ་པ། ཇི་ལྟར་མཚན་མ་སྟོང་གྱུར་ཅིང་། །སྨོན་པ་དམིགས་སུ་མ་མཆིས་དང་། །
སུ་ལ་སྨོན་ལམ་མཆིས་གྱུར་པ། །དེ་ཡང་དེ་ལྟའི་ཚུལ་དུ་མཁྱེན། །ལྷའི་བུ་ཏིང་ངེ་འཛིན་ལ་གཞོལ་བས་གསོལ་པ། རྣམ་ཐར་སྒོ་ལ་བརྟེན་བགྱིས་ཤིང་། །གང་ཞིག་གྲོལ་འགྱུར་དེ་མ་མཆིས། །དེ་བཞིན་ཀུན་ནས་ཉོན་མོངས་པ། །དེ་དག་རང་བཞིན་ཁྱོད་ཀྱིས་གཟིགས། །
ལྷའི་བུ་མ་སྨད་པས་གསོལ་པ། ཁྱོད་ནི་སྡིག་པ་ཀུན་སྤངས་ཤིང་། །བསོད་ནམས་ཐམས་ཅད་བསགས་གྱུར་ཏེ། །བདེ་གཤེགས་ཁྱོད་ལ་སྨད་མི་མངའ། །སུ་སྨོད་དེ་དག་མཁས་མ་ལགས། །ལྷའི་བུ་གློག་གི་སྤྲིན་གྱིས་གསོལ་པ། ཇི་ལྟར་གློག་བཅས་སྤྲིན་གྱི་ཚོགས། །
ཆར་གྱིས་ས་ཆེན་ངོམས་པར་བགྱིད། །དེ་བཞིན་འདྲེན་པས་ཆོས་ཆར་གྱིས། །འཇིག་རྟེན་རྣམས་ནི་ངོམས་པར་མཛད། །ལྷའི་བུ་བསམ་པ་དོན་ཡོད་ཀྱིས་གསོལ་པ། ཐུབ་ཁྱོད་གསུང་ནི་དོན་མཆིས་ཏེ། །ཆོས་ཀྱི་འཁོར་ལོ་རབ་ཏུ་བསྐོར། །ཤིན་ཏུ་བརྟགས་ཏེ་མཛད་

པས་ན། །དེ་ནི་ཐམས་ཅད་མཁྱེན་པའི་མཚན། །ལྷའི་བུ་བློ་གྲོས་ཕུན་སུམ་ཚོགས་པས་གསོལ་པ། ཆོས་རྣམས་ཐམས་ཅད་དངོས་ཉིད་ཀྱིས། །མ་སྐྱེས་འགགས་པ་མ་ལགས་ཏེ། །དེ་དག་བདེ་གཤེགས་ཁྱོད་ཀྱིས་མཁྱེན། །གཞན་ཡང་དེ་བཞིན་རྟོགས་པར་མཛད། །
ལྷའི་བུ་སེང་གེའི་ང་རོས་གསོལ་པ། ཁྱོད་ཀྱིས་སྟོང་པ་ཉིད་བསྟན་ཏེ། །སེང་གེའི་ང་རོ་བསྒྲགས་མཛད་པས། །མུ་སྟེགས་ཅན་ཀུན་རབ་འཇིགས་པ། །སེང་གེས་རི་དགས་ཕྲ་མོ་བཞིན། །ལྷའི་བུ་བག་ཡོད་ལས་ཀྱིས་གསོལ་པ། བག་ཡོད་སྔོན་དུ་བཏང་མཛད་དེ། །ཁྱོད་ཀྱིས་
སྤྱོད་པ་སྤྱད་བགྱིས་པས། །སངས་རྒྱས་ཆོས་ལ་འདྲེན་པ་ཁྱོད། །བག་ཡོད་པས་ནི་ངེས་པར་འབྱུང་། །ལྷའི་བུ་བག་ཡོད་རབ་གནས་ཀྱིས་གསོལ་པ། བག་ཡོད་པ་ལ་རབ་གནས་ཏེ། །ཁྱོད་ཀྱིས་ཉིད་ཀྱི་ཆོས་ཀྱང་སྤེལ། །སྟོབས་བཅུ་གཞན་ཡང་སངས་རྒྱས་ཆོས། །བསམ་
གྱིས་མི་ཁྱབ་རབ་ཏུ་སྤེལ། །ལྷའི་བུ་བག་ཡོད་སྐྱེས་ཀྱིས་གསོལ་པ། བག་ཡོད་པ་ལ་བརྩོན་པས་ན། །བྱང་ཆུབ་ཕྱོགས་རྣམས་ཡང་དག་སྐྱེས། །ཐུབ་ཆེན་རང་ཡང་གྲོལ་གྱུར་ནས། །དེ་དག་རྣམས་ནི་འཇིག་རྟེན་འགྲེལ། །ལྷའི་བུ་བག་ཡོད་ངེས་པར་བྱུང་གིས་གསོལ་པ།
བྱང་ཆུབ་སེམས་དཔའ་ཉན་ཐོས་དག །ཇི་སྙེད་ཐར་ལ་རྟེན་པའི་རྣམས། །ཀུན་ཀྱང་ཁྱོད་ལ་བསླབས་པ་སྟེ། །བག་ཡོད་པས་ནི་ངེས་པར་འབྱུང་། །ལྷའི་བུ་བག་ཡོད་གནས་པས་གསོལ་པ། བག་ཡོད་ཡོངས་སུ་མ་བཏང་བས། །རྣམ་པར་འདྲེན་པ་ཁྱོད་ཀྱི་སྲས། །འགྲོ་བ་
འདི་ལ་མ་ཆགས་པར། །ཐམས་ཅད་མཁྱེན་དུ་ངེས་པར་བྱུང་། །ལྷའི་བུ་བག་ཡོད་བསྲུངས་ཀྱིས་གསོལ་པ། བྱང་ཆུབ་ལམ་ལ་བསྟེན་མཛད་ཅིང་། །ཁྱོད་ནི་བག་གིས་བསྲུངས་པས་ན། །ཐུགས་རྗེ་ཆེན་པོ་མཁས་པ་ཡིས། །བྱང་ཆུབ་དམ་པ་བརྙེས་པར་གྱུར། །ལྷའི་བུ་
བག་ཡོད་བརྩོན་གྱིས་གསོལ་པ། བག་ཡོད་པ་ལ་རབ་བརྩོན་ཞིང་། །མཚན་ཉིད་གཅིག་པོ་རྟོགས་བགྱིས་པ། །དཔའ་བོ་ཆེན་པོ་ཁྱོད་ཀྱི་སྲས། །ཡབ་ཀྱི་དཀོར་ཡང་ཐོབ་པར་འགྱུར། །ལྷའི་བུ་བག་ཡོད་མངོན་པར་དགའ་བས་གསོལ་པ། བག་ཡོད་དགའ་བའི་བརྟན་པ་

རྣམས། །དེ་དག་སངས་རྒྱས་ཡེ་ཤེས་ཀྱིས། །དཔའ་བོ་ཉོན་མོངས་རི་འཇིག་པས། །ང་རྒྱལ་རི་ཡང་དེ་བཞིན་བསྙིལ། །ལྷའི་བུ་བག་ཡོད་འཛིན་གྱིས་གསོལ་པ། སངས་རྒྱས་ཡེ་ཤེས་ཚོལ་མཛད་ཚེ། །ཁྱོད་ནི་བག་གིས་བཟུང་བས་ན། །བསྐལ་པ་བྱེ་བ་
གྲངས་མེད་དུ། །ཁྱོད་ཀྱི་ཐུགས་ནི་སྐྱོར་མ་གྱུར། །ལྷའི་བུ་ཞི་གནས་བརྩོན་གྱིས་གསོལ་པ། ཆོས་རྣམས་དེ་དག་རང་བཞིན་ཞི། །དེ་ནི་སངས་རྒྱས་སྤྱོད་ཡུལ་ལགས། །བྱང་ཆུབ་ཡང་དག་གང་ཞུགས་དང་། །ཐམས་ཅད་མཁྱེན་པ་དེར་མི་འཇིགས། །ལྷའི་བུ་ཞི་གནས་ལ་ཡང་
དག་པར་གནས་པས་གསོལ་པ། སངས་རྒྱས་ཞི་གནས་བཞུགས་པ་སྟེ། །འོན་ཀྱང་དེ་ལ་ཆགས་མི་མངའ། །སེམས་ཅན་ཉོན་མོངས་ཞི་བར་མཛད། །རྡུལ་འཐུལ་བ་ལ་ཆར་པ་བཞིན། །ལྷའི་བུ་ཞི་གནས་རབ་ཏུ་གནས་ཀྱིས་གསོལ་པ། སངས་རྒྱས་ཞི་ལ་རབ་ཏུ་བཞུགས། །
སུས་ཀྱང་མི་བསྐྱོད་རི་བོ་བཞིན། །ཁྱེད་ལ་གནོད་བགྱིར་མི་ནུས་ཏེ། །སེམས་ཞི་ཁྱོད་ལ་ཕྱག་ཀྱང་འཚལ། །ལྷའི་བུ་ཞི་གནས་དུལ་གྱིས་གསོལ་པ། །ཁྱོད་ཀྱི་སྲས་རྣམས་མ་སྨད་པ། །ཞི་གནས་ཀྱིས་ནི་ཡོངས་སུ་དུལ། །བདུད་རྣམས་བྱེ་བས་མི་ཚུགས་ཏེ། །འདོད་ཆགས་
ཀྱིས་ནི་གནོད་མི་འགྱུར། །ལྷའི་བུ་ཞི་གནས་ངེས་པར་བྱུང་གིས་གསོལ་པ། ཞི་བའི་ཡིད་མངའ་ཞི་གནས་ལ། །དཔའ་བོ་ཆེན་པོ་བསྒོམ་མཛད་པས། །ཅི་ལ་གནས་ཏེ་བསམ་གཏན་མཛད། །སུས་ཀྱང་ཁྱོད་ཀྱི་ཚུལ་མ་འཚལ། །ལྷའི་བུ་ཞི་གནས་སྔོན་དུ་འགྲོས་གསོལ་