Kinh tạng Tây Tạng (Kangyur Đại Học) — 042_དཀོན་བརྩེགས།_ང

ར་སྨོན་ལམ་དེ་དག་བགྱིད། །ཕུང་པོ་འདི་དག་མ་སྐྱེས་རྟོགས་གྱུར་ཅིང་། །ལུང་བསྟན་བདེ་གཤེགས་ཉིད་ཀྱང་མ་སྐྱེས་ལ། །བྱང་ཆུབ་སེམས་དཔའ་བྱང་ཆུབ་ཀྱང་མ་སྐྱེས། །དེ་
ལྟར་གང་འཚལ་དེ་ལ་རྨོངས་མ་མཆིས། །སྐྱེ་བོའི་ཆོས་དང་སངས་རྒྱས་ཡོན་ཏན་རྣམས། །དེ་དག་ཀུན་དང་བདེ་གཤེགས་མ་སྐྱེས་ཏེ། །མི་ཡི་སེང་གེ་དེ་ལྟར་གང་འཚལ་བ། །དེ་ནི་ཁྱོད་སྲས་ཁྱོད་ནི་དེ་ཡི་ཡབ། །གང་ཞིག་ཕུང་པོ་འགག་པ་མ་མཆིས་ཤིང་། །ཁམས་དང་སྐྱེ་མཆེད་དེ་བཞིན་
རྒྱལ་བའི་ཆོས། །བྱང་ཆུབ་རྒྱལ་བ་དེ་བཞིན་ལུང་བསྟན་པ། །བཅོམ་ལྡན་འདི་ཀུན་འགག་མེད་འཚལ་བ་དང་། །གང་རྣམས་བྱང་ཆུབ་འཚལ་ཞིང་སྤྱོད་བགྱིད་པ། །འཇིག་རྟེན་མཁས་པ་དེ་དག་འགག་མ་མཆིས། །འགྲོ་བ་ཐམས་ཅད་འགག་མེད་བློར་གྱུར་ན། །དེ་འདྲའི་བློ་ལྡན་བྱང་ཆུབ་རྙེད་མི་
དཀའ། །ཕུང་པོ་སྐྱེ་མཆེད་དག་དང་ཁམས་རྣམས་དང་། །བྱང་ཆུབ་རྒྱལ་བ་རྒྱལ་སྲས་མི་གཡོ་བར། །གང་གིས་འཚལ་བ་དེ་དག་རྒྱལ་སྲས་ཏེ། །དེ་དག་རྒྱལ་བའི་ཆོས་འདི་འཛིན་པ་ལགས། །ཕུང་པོ་སེམས་མེད་དེ་བཞིན་སྐྱེ་མཆེད་དང་། །ཁམས་དང་བྱང་ཆུབ་རྒྱལ་བ་རྒྱལ་སྲས་དང་། །
ལུང་བསྟན་དེ་བཞིན་སེམས་པ་མ་མཆིས་པར། །གང་གིས་འཚལ་བ་དེ་དག་རྒྱལ་བའི་སྲས། །རང་བྱུང་ཕུང་པོ་དངོས་ཉིད་སྟོང་པ་སྟེ། །ཁམས་དང་སྐྱེ་མཆེད་དག་དང་རྒྱལ་བ་དང་། །བྱང་ཆུབ་དང་ནི་ལུང་བསྟན་རྒྱལ་སྲས་རྣམས། །ངོ་བོ་ཉིད་ཀྱིས་སྟོང་པར་གང་སྤྱོད་དང་། །ཕུང་པོ་སྤྲོས་
འདྲ་དེ་བཞིན་ཁམས་རྣམས་དང་། །སྐྱེ་མཆེད་རྐང་གཉིས་མཆོག་དང་བྱང་ཆུབ་དང་། །ལུང་བསྟན་སྤྲོས་པ་མེད་པར་གང་སྤྱོད་ཅིང་། །དེ་ལྟར་གང་འཚལ་དེ་དག་རྒྱལ་བའི་སྲས། །གནས་པ་མ་མཆིས་མི་གནས་མ་ལགས་ཏེ། །མཆིས་པ་མ་ལགས་མ་མཆིས་ཡོང་མ་ལགས། །

འདུས་བྱས་མ་ལགས་འདུས་མ་བྱས་མ་ལགས། །དེ་ལྟར་གང་འཚལ་དེ་དག་རྒྱལ་བའི་སྲས། །རྒྱལ་དང་འགྲོ་འདི་དེ་ལྟར་ཡོངས་མཐོང་ཞིང་། །སྟོན་པའི་དགོངས་པ་དེ་ལྟར་འཚལ་གྱུར་ལ། །དེ་ལྟར་བགྱིས་ན་གང་ཟག་མཆོག་མཆོད་ཅིང་། །འདྲེན་པ་འཁོར་དང་བཅས་ལ་བསྙེན་
བཀུར་ལགས། །རྣམ་པར་འདྲེན་ལ་བསྟོད་པའི་བསོད་ནམས་གང་། །ཇི་སྙེད་འཇིག་རྟེན་ཕན་མཛད་མཁྱེན་པ་ཡི། །དགེ་བ་དེ་ཡིས་འགྲོ་བ་རང་བྱུང་བ། །རྒྱལ་བ་མཚན་མཆོག་ལྡན་པ་གྲུབ་པར་ཤོག །དེ་ནས་བཅོམ་ལྡན་འདས་ཀྱིས་དགའ་ལྡན་རིས་ཀྱི་ལྷ་དེ་དག་གི་ལྷག་པའི་
བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འདྲེན་པ་རྒྱུ་ཡི་སྟོབས་ནི་གང་ཞིག་གིས། །སྟོབས་བཅུ་བརྙེས་པ་འདི་ལྟར་འཛུམ་མཛད་པ། །འཛུམ་པའི་རྒྱུ་དེ་འདྲེན་པས་བཀའ་སྩལ་
གསོལ། །དེས་ནི་འཇིག་རྟེན་འདི་དག་དགའ་བར་འགྱུར། །ཤཱཀྱ་ཐུབ་པའི་ཞལ་ནས་འཛུམ་མཛད་པ། །འགྲོ་བ་འདིས་མཐོང་ཐེ་ཚོམ་འཚལ་འགྱུར་ཏེ། །ཉན་པར་འཚལ་ཞིང་གཞན་དུ་མི་སེམས་པར། །ཀུན་ཀྱང་འཇིག་རྟེན་ཕན་པའི་ཞལ་དུ་ལྟ། །འདི་ལྟར་དཔེར་ན་ནད་པ་ནད་སྐྱོ་བ། །
སྨན་པས་བསྒོ་བ་བཞིན་དུ་འཛིན་བགྱིད་པ། །དེ་བཞིན་འཁོར་འདི་ལུང་བསྟན་ཐོས་འཚལ་ཞིང་། །རྐང་གཉིས་དབང་པོ་བདེ་གཤེགས་ཞལ་དུ་ལྟ། །འཁོར་འདི་ཐམས་ཅད་རྒྱ་ཆེན་ལྡན་པ་སྟེ། །སངས་རྒྱས་དགོངས་ལ་ཞེན་པའི་ཡིད་དང་ལྡན། །རྒྱལ་བས་ལུང་བསྟན་དེ་དག་ཐོས་འཚལ་ཏེ། །
ཀུན་ཀྱང་བདེ་གཤེགས་ཞལ་དུ་ལྟ་ཞིང་སྡོད། །དེ་ལ་རྒྱལ་བས་ཐུགས་རྗེ་ཆེ་བསྐྱེད་ཅིང་། །ཅི་ནས་འཁོར་འདི་རབ་ཏུ་དགར་འགྱུར་དང་། །སངས་རྒྱས་དགོངས་ལ་བསམ་པ་གཞོག་འགྱུར་བར། །ཡེ་ཤེས་སྟོབས་ཀྱིས་ཐེ་ཚོམ་གཅད་དུ་གསོལ། །མི་ཡི་ཁྱུ་མཆོག་ལུང་བསྟན་དུས་ལ་བབ། །
ཐེ་ཚོམ་འཚལ་བའི་ཐེ་ཚོམ་བསལ་དུ་གསོལ། །སངས་རྒྱས་སླར་སྡོའི་དགྲ་ནི་མི་མངའ་ན། །རྟོག་གེའི་ཚོགས་ཀྱི་སྡེ་ནི་གཞིག་ཏུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ཁྱོད་ཀྱིས་འཇིག་རྟེན་སྒྲོན་མཛད་ལ། །འཛུམ་

པའི་དོན་དྲིས་དེ་ནི་དུས་དང་ལྡན། །དེ་ལྟར་འཇིག་རྟེན་མཁས་ལ་དྲིས་པས་ན། །དེ་རིང་འགྲོ་བ་འདི་ཡི་དོན་ཆེན་བྱས། །འཇིག་རྟེན་ཕན་ཕྱིར་འཛུམ་པ་འདི་མཛད་པ། །གང་གིས་ཆོས་རབ་འདི་དག་ཤེས་གྱུར་ཏེ། །ང་ལ་མཆོད་པ་རྒྱ་ཆེན་འདི་བྱས་པའི། །དགའ་ལྡན་
ལྷ་ཡི་བསམ་པ་མཁྱེན་ནས་མཛད། །འགྲོ་བ་ཡང་དག་རྟོགས་པ་བཞིན་དུ་མཐོང་། །རྒྱལ་བའི་དགོངས་པས་ཆོས་ཉིད་བརྙེས་པར་གྱུར། །གང་ལ་འགྲོ་བ་ཐམས་ཅད་རྨོངས་གྱུར་པའི། །རྣམ་པར་ཐར་པའི་སྒོ་གསུམ་རབ་ཏུ་རྟོགས། །སྔོན་གྱི་རྒྱལ་བ་རྣམས་ལ་ལྷག་བྱ་བྱས། །བསམ་
པ་གཅིག་གིས་ཞུ་བ་ལེགས་པར་ཞུས། །དེ་ཉིད་དུ་ནི་སྟོང་ཉིད་ལེགས་པར་བསྒོམས། །སྔོན་ཆད་བྱས་པ་དེ་ནི་འདིར་ཡང་བསྟན། །དེ་དག་དེ་བཞིན་གཤེགས་དང་དེང་ཕྲད་ཅིང་། །སྐྱེས་བུ་མཆོག་དང་འགྲོགས་པ་ཐོབ་གྱུར་ནས། །སྟོང་པ་ཉིད་ཀྱིས་འདྲེན་པ་བསྟོད་བྱས་པས། །དེ་རིང་
འགྲོ་བའི་དོན་ཆེན་ཤིན་ཏུ་བྱས། །འགྲོ་བ་ཐམས་ཅད་སྐྱེ་མེད་ཇི་བཞིན་དུ། །བྱང་ཆུབ་རྒྱལ་བ་དེ་བཞིན་ལུང་བསྟན་དང་། །གང་དག་ཞི་བ་ཐོབ་ནས་སྤྱོད་པ་དང་། །བྱང་ཆུབ་དེ་བཞིན་དེ་དག་སྐྱེ་བ་མེད། །འགྲོ་བ་ཀུན་གྱི་ཆོས་ཉིད་འདི་འདྲ་བ། །དེ་ཤེས་བྱང་ཆུབ་ཐོབ་པར་འགྱུར་རོ་ཞེས། །ལྷ་
རྣམས་གང་ཡང་དེ་ལ་ཐེ་ཚོམ་མེད། །བྱང་ཆུབ་སེམས་ཀྱིས་རྟག་པར་དེ་ལྟར་སྤྱོད། །དེ་བཞིན་འགྲོ་བ་འགག་མེད་ཇི་བཞིན་དུ། །ལྷ་ཚོགས་འདི་དག་རྟོགས་པའི་བློ་ལྡན་ཏེ། །མཁས་པ་འདི་དག་ནེམ་ནུར་མེད་པས་ན། །དེ་ཕྱིར་འདི་དག་རྒྱལ་བ་རང་བྱུང་འགྱུར། །གནས་པ་མེད་པ་
ལ་ནི་ངེས་གྱུར་ནས། །གཡོ་བ་མེད་པ་དེ་ལ་ནེམ་ནུར་མེད། །འགྲོ་བ་ཀུན་ལ་སེམས་པ་ཡོད་མིན་པ། །དེ་ལའང་ལྷ་རྣམས་ཐེ་ཚོམ་ཡོད་མེད་དོ། །ཆོས་རྣམས་ངོ་བོ་ཉིད་ཀྱིས་རང་བཞིན་མེད། །བྱང་ཆུབ་སེམས་དང་དེ་བཞིན་བྱང་ཆུབ་ཀྱང་། །ཐམས་ཅད་ངོ་བོ་ཉིད་ཀྱིས་རང་བཞིན་
མེད། །དེ་ལའང་ལྷ་རྣམས་ཐེ་ཚོམ་རྣམ་པར་དག །བློ་མཆོག་ལྡན་པའི་དགའ་ལྡན་ལྷ་འདི་རྣམས། །ཀུན་ཀྱང་གནས་མེད་དེ་ལ་རབ་གནས་ཏེ། །དེ་ཕྱིར་ལྷ་རྣམས་བྱང་ཆུབ་རྙེད་མི་དཀའ། །རང་བྱུང་ཉིད་ནི་མྱུར་དུ་ཐོབ་པར་འགྱུར། །འདྲེན་པས་སྐར་མ་འདྲ་བའི་བསྐལ་པ་ལ། །འགྲོ་

བ་མཐའ་ཡས་རྣམ་པར་འགྲེལ་པར་འགྱུར། །རྒྱལ་བ་དེ་དག་མཚན་དུ་འགྱུར་བ་ནི། །རང་བྱུང་ཆོས་ལ་རྣམ་དེས་རྒྱལ་པོའོ། །དེ་ལྟར་རྒྱལ་བས་དགའ་ལྡན་ལྷ་རྣམས་ཀྱི། །བསམ་པ་མཁྱེན་ཏེ་འགྲོ་ལ་བསྟན་མཛད་པ། །དེ་ཐོས་ནས་ནི་ལྷར་བཅས་འཇིག་རྟེན་ཡང་། །ཡི་རངས་གྱུར་
ཅིང་སྟོབས་ཀྱང་ཐོབ་པར་འགྱུར། །དགའ་ལྡན་པ་ལུང་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་དེའི་ཚེ་རབ་འཕྲུལ་ལ་སོགས་པ་འཕྲུལ་དགའ་བ་བྱེ་བ་ཕྲག་བདུན་ཅུས་ལྷ་མ་ཡིན་རྣམས་ནས་དགའ་ལྡན་རིས་ཀྱི་བར་གྱི་ལྷ་དེ་དག་གི་མཆོད་པ་ཡང་མཐོང་།
ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་། ཡིད་བདེ་བ་སྐྱེས་ནས་ཡང་དག་པའི་མཐའ་ལ་གནས་ཤིང་དེ་བཞིན་ཉིད་ལ་ཐེ་ཚོམ་མེད་པར་གྱུར་ནས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་
འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པའི་དོན་བདག་གིས་འཚལ་བ་ལྟར་ན། ཆོས་ཐམས་ཅད་ནི་ཡང་དག་པའི་མཐའ་དང་། སྒྲིབ་པ་མ་མཆིས་པའི་མཐའ་དང་། མཐའ་ཡས་པའི་མཐའ་དང་།
མི་གནས་པའི་མཐའ་དང་། མི་ཟད་པའི་མཐའ་དང་། མི་གཉིས་པའི་མཐའ་སྟེ། མཐའ་མ་མཆིས་པའོ། །བཅོམ་ལྡན་འདས་དེ་ལ་མ་ནོར་བའི་སླད་དུ་ཡང་དག་པའི་མཐའ་ཞེས་བགྱིའོ། །ཚད་མ་མཆིས་པའི་སླད་དུ་མཐའ་ཡས་པའི་མཐའ་ཞེས་བགྱིའོ། །ཆགས་པ་མ་མཆིས་པའི་སླད་དུ་
སྒྲིབ་པ་མ་མཆིས་པའི་མཐའ་ཞེས་བགྱིའོ། །ངོ་བོ་ཉིད་མ་མཆིས་པའི་སླད་དུ་མི་གནས་པའི་མཐའ་ཞེས་བགྱིའོ། །འབྱུང་བ་མཆིས་པའི་སླད་དུ་མི་ཟད་པའི་མཐའ་ཞེས་བགྱིའོ། །རོ་གཅིག་པའི་སླད་དུ་མི་གཉིས་པའི་མཐའ་ཞེས་བགྱིའོ། །མཐའ་མ་མཆིས་པའི་སླད་དུ་མཐའ་མ་མཆིས་པ་ཞེས་
བགྱིའོ། །བཅོམ་ལྡན་འདས་ཡང་དག་པའི་མཐའ་འདི་ནི་ཐམས་ཅད་ཀྱི་རྗེས་སུ་སོང་བ་ལགས་ཏེ། ཆོས་གང་ཡང་དག་པའི་མཐའ་མ་ལགས་པའི་ཆོས་དེ་གང་ཡང་མ་མཆིས་སོ། །བཅོམ་ལྡན་འདས་བྱང་ཆུབ་ཅེས་བགྱི་བ་འདི་ནི་ཡང་དག་པའི་མཐའ་སྟེ། བྱང་ཆུབ་གང་ཞེ་ན། བཅོམ་ལྡན་

འདས་ཆོས་ཐམས་ཅད་རང་བཞིན་མ་མཆིས་པ་ནི་བྱང་ཆུབ་ལགས་པར་རིག་པར་བགྱིའོ། །ཐ་ན་མཚམས་མེད་པ་རྣམས་ཀྱང་བྱང་ཆུབ་བོ། དེ་ཅིའི་སླད་དུ་ཞེ་ན། བཅོམ་ལྡན་འདས་བྱང་ཆུབ་ནི་རང་བཞིན་མ་མཆིས་པ་སྟེ། མཚམས་མེད་པ་རྣམས་ཀྱང་རང་བཞིན་མ་མཆིས་
པ་ལགས་པས་དེའི་སླད་དུ་མཚམས་མེད་པ་རྣམས་ཀྱང་བྱང་ཆུབ་ཅེས་བགྱིའོ། །བཅོམ་ལྡན་འདས་ཕུང་པོ་མ་ལུས་པའི་མྱ་ངན་ལས་འདས་པའི་དབྱིངས་ནི་རང་བཞིན་མ་མཆིས་པ་སྟེ། མཚམས་མེད་པ་རྣམས་ཀྱང་དེའི་རང་བཞིན་ནོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་
ནི་ཕུང་པོ་མ་ལུས་པའི་མྱ་ངན་ལས་འདས་པའི་དབྱིངས་ཏེ། མཚམས་མེད་པ་རྣམས་ཀྱང་དེའི་རང་བཞིན་ནོ། །བཅོམ་ལྡན་འདས་གང་སུ་དག་ཡོངས་སུ་མྱ་ངན་ལས་འདའ་བར་འཚལ་བ་དེ་དག་ནི་གནོད་པར་འགྱུར་བའི་ཆོས་ཅན་ཏེ། དེ་ཅིའི་སླད་དུ་ཞེ་ན། གལ་ཏེ་འཁོར་བར་ཞུགས་པ་ཞིག་
མཆིས་ན་ནི་མྱ་ངན་ལས་འདའ་བ་ཡང་བཙལ་བར་འགྱུར་ན། ཡང་དག་པའི་མཐའ་ལ་ནི་འཁོར་བར་ཞུགས་པ་གང་ཡང་མ་མཆིས་ན་དེ་མྱ་ངན་ལས་འདས་པ་ཅི་ཞིག་ཚོལ་བར་འགྱུར། བཅོམ་ལྡན་འདས་ཡང་དག་པའི་མཐའ་ནི་གཉིས་སུ་མ་མཆིས་པ་སྟེ། བཅོམ་ལྡན་འདས་དེ་ལ་
བདག་ཅག་སོམ་ཉི་མ་མཆིས་ཐེ་ཚོམ་མ་མཆིས་སོ། །བཅོམ་ལྡན་འདས་གང་ལ་ལ་ཞིག་ཆོས་འདི་ལ་ནེམ་ནུར་དང་ཐེ་ཚོམ་མ་མཆིས་ན་དེ་ནི་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་ལུང་བསྟན་པར་འཚལ་བར་བགྱིའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ལྷའི་རྒྱལ་པོ་རབ་འཕྲུལ་ལ་སོགས་པ། འཕྲུལ་དགའ་རིས་ཀྱི་ལྷ་བྱེ་བ་ཕྲག་བདུན་ཅུ་པོ་དེ་དག་རང་གིས་རང་ལུང་བསྟན་པ་གསན་ནས་འགྲོ་བ་ཐམས་ཅད་རབ་ཏུ་དགའ་བར་བྱ་བའི་ཕྱིར་དེའི་ཚེ་འཛུམ་པ་
མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འཇིག་རྟེན་ཕན་པར་བཞེད་པས་འཛུམ་པ་མཛད། །འཛུམ་པའི་རྒྱུ་ནི་ཁྱོད་ཀྱིས་མ་བསྟན་ཏེ། །རང་བྱུང་སྐྱེས་བུ་དམ་པ་གང་དག་ཀྱང་། །རྒྱུ་མ་མཆིས་པར་འཛུམ་པ་མི་མཛད་པས། །

ཁྱོད་ཀྱི་ཞལ་ནས་འཛུམ་པ་དེ་མཛད་པ། །མཐོང་ནས་ལྷར་བཅས་འཇིག་རྟེན་ཐེ་ཚོམ་འཚལ། །འཛུམ་པའི་རྒྱུ་དེ་གང་ལགས་རང་བྱུང་གསུངས། །ཐེ་ཚོམ་འཚལ་བའི་ཐེ་ཚོམ་བསལ་དུ་གསོལ། །ཁྱོད་ཀྱིས་འཛུམ་མཛད་རྒྱུ་དེ་ཐོས་གྱུར་ན། །འཁོར་འདི་ཐམས་ཅད་ངོ་མཚར་ཐོབ་པར་འགྱུར། །
བྱང་ཆུབ་མཆོག་ནི་ཡོངས་སུ་བསྒྲུབ་སླད་དུ། །དེ་དག་ལམ་མཆོག་ཤིན་ཏུ་རྣམ་དག་འགྱུར། །ཐེ་ཚོམ་འཚལ་བ་དག་ནི་ནམ་དུ་ཡང་། །བྱང་ཆུབ་ཡིད་བཞིན་བདེ་བར་མི་འགྲུབ་སྟེ། །ཐེ་ཚོམ་སོམ་ཉི་བསལ་ནས་མཁས་པ་རྣམས། །བྱང་ཆུབ་མཆོག་གི་རྒྱུ་དང་སྐལ་ལྡན་འགྱུར། །རྐང་
གཉིས་དབང་པོ་ཁྱོད་ཀྱི་འཁོར་འདི་དག །སྡིག་པ་ཡོངས་སྤངས་བྱང་ཆུབ་སེམས་དང་ལྡན། །ལྷ་རྣམས་ལུང་བསྟན་དེ་དག་ཐོས་གྱུར་ན། །རྒྱལ་བའི་གོ་འཕང་རྒྱ་ཆེན་ཐོབ་པར་འགྱུར། །དེ་བས་རྒྱལ་བས་ཐུགས་རྗེ་ཆེ་བསྐྱེད་ཅིང་། །ཐེ་ཚོམ་འཚལ་བ་རྣམས་ལ་ཐུགས་བརྩེ་བས། །
ལྷ་ཚོགས་འདི་དག་ཐམས་ཅད་ལུང་བསྟན་ཅིང་། །འགྲོ་བ་འདི་དག་ཐམས་ཅད་དགའ་བར་མཛོད། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། ངས་ནི་འཇིག་རྟེན་ཕན་ཕྱིར་འཛུམ་པ་མཛད། །རྟ་ཐུལ་ཁྱོད་ཀྱིས་ཞུ་བ་དེ་ཞུས་པ། །
ལུང་བསྟན་དེ་ནི་ཁྱོད་ལ་མ་ལུས་པར། །བསྟན་པར་ངས་བྱས་དང་བས་ཀུན་ཀྱང་ཉོན། །འཕྲུལ་དགའི་རིས་ཀྱི་ལྷ་ཚོགས་འདི་རྣམས་ཀྱིས། །ཐམས་ཅད་མཁྱེན་པར་བདག་ཅག་ལུང་བསྟན་ཏེ། །མུ་སྟེགས་ཚོགས་ཀྱིས་བསམ་པ་ཟིལ་མནན་ནས། །འཁོར་འདིར་སེང་གེའི་ང་རོ་ཆེན་པོ་
བསྒྲགས། །གནམ་དུ་རྡོ་འཕངས་ས་ལ་ལྟུང་བ་ལྟར། །དེ་ལ་ཐེ་ཚོམ་ཟ་བར་མི་འགྱུར་ཏེ། །དེ་ལྟར་ཐེ་ཚོམ་མེད་པའི་ཚུལ་ཐོབ་པ། །བདག་ཅག་ཉིད་ནི་སྟོབས་བཅུར་འགྱུར་བར་ཤེས། །ཉི་མ་ནུབ་གྱུར་ནམ་སྲོས་གྱུར་པའི་ཚེ། །མི་རྣམས་ཟླ་བ་མྱུར་དུ་འཆར་བར་ཤེས། །དེ་བཞིན་རྒྱལ་
བའི་སྲས་པོ་ཚུལ་ཐོབ་དག །བདག་ཅག་ཉིད་ནི་སྟོབས་བཅུར་འགྱུར་བར་ཤེས། །སྐར་ཚོགས་དབུས་ན་ཟླ་བ་གནས་པ་ནི། །སེམས་ཅན་མཚུངས་པར་འདི་ལ་ཐེ་ཚོམ་མེད། །དེ་བཞིན་རྒྱལ་བའི་སྲས་པོ་ཚུལ་ཐོབ་དག །བདག་ཅག་ཐམས་ཅད་མཁྱེན་དུ་འགྱུར་བར་ཤེས། །ཇི་

ལྟར་ཉི་མ་ནུབ་པར་གྱུར་པའི་ཚེ། །ཉི་མ་མི་མཐོང་སེམས་ཅན་དེ་དག་ཤེས། །དེ་བཞིན་བདེ་གཤེགས་སྲས་པོ་ཚུལ་ཤེས་པ། །ཡེ་ཤེས་དམ་པ་ཐོབ་པར་འགྱུར་དུ་ཤེས། །ཆུ་ཀླུང་ཇི་ལྟར་གཞོལ་བར་འབབ་འགྱུར་ཞིང་། །རྒྱ་མཚོར་འབབ་པར་མཁས་པ་རྣམས་
ཀྱིས་ཤེས། །དེ་བཞིན་བདེ་གཤེགས་སྲས་པོ་ཚུལ་ཤེས་པ། །བྱང་ཆུབ་རྒྱ་ཆེན་ཐོབ་པར་འགྱུར་བར་ཤེས། །ཇི་ལྟར་གནམ་དུ་བོང་བ་འཕངས་པ་ནི། །ས་ལ་ལྟུང་བར་འགྱུར་དུ་ཐེ་ཚོམ་མེད། །དེ་བཞིན་རྒྱལ་སྲས་མཁས་པ་དེ་དག་ཀྱང་། །འཇིག་རྟེན་མཁས་པ་མྱུར་འགྱུར་ཡེ་ཤེས་
འཇུག །གང་ཐོས་ནས་ནི་ཐེ་ཚོམ་མེད་འགྱུར་ཞིང་། །སངས་རྒྱས་ཡོན་ཏན་གནས་པར་བདག་ཤེས་ལ། །རང་གི་སར་ཉེ་ལག་སྟོང་མ་ཡིན་པར། །མཁས་པ་རྣམས་ཀྱི་ཆོས་ཉིད་རབ་ཏུ་མཐོང་། །གལ་ཏེ་བདུད་ཀྱི་ཚོགས་ནི་བྱེ་བ་དག །སངས་རྒྱས་གཟུགས་བསྒྱུར་བར་ཆད་སྨྲས་བྱས་
ཀྱང་། །ཆོས་ལ་མཁས་པ་ཆོས་ཉིད་རབ་མཐོང་བ། །དེ་དག་བྱང་ཆུབ་ལས་ནི་བཟློག་མི་ནུས། །དེ་ལྟར་སངས་རྒྱས་ཡོན་ཏན་རབ་གནས་ཤིང་། །བདག་གིས་བདག་ཉིད་ལུང་བསྟན་རྗོད་བྱེད་པ། །དེ་ལ་འདྲེན་པ་ཆོ་ག་ཚུལ་མཁྱེན་པ། །མི་དབང་ལུང་བསྟན་དེ་ལ་ཡི་རང་མཛོད། །དེ་
ལྟར་ལྷ་ཚོགས་འདི་དག་ཚུལ་འདི་ལ། །གཞན་གྱི་དྲིང་ལ་མི་འཇོག་མངོན་ཤེས་ཤིང་། །དེ་དག་བདེ་གཤེགས་འགྱུར་ཞེས་རང་སྨྲ་ལ། །འཇིག་རྟེན་མཁས་པ་རྗེས་སུ་ཡི་རང་མཛད། །རྟ་ཐུལ་དེ་བས་མཁས་པ་གང་གི་རྣམས། །བླ་མེད་བྱང་ཆུབ་ཐོབ་པར་བྱར་སེམས་པ། །དེ་དག་
ཚུལ་འདི་ཤེས་པར་གང་གྱུར་པའི། །འཕགས་པའི་སྐྱེ་བོ་མཁས་ལ་བསྟེན་པར་བྱ། །གང་དག་ཚུལ་ལ་འཇུག་པ་རབ་མཐོང་ཞིང་། །མཁས་པ་གང་དག་བདེ་གཤེགས་བསྙེན་བཀུར་བ། །དེ་དག་བྱང་ཆུབ་ལག་མཐིལ་འདྲ་བར་གསལ། །ཚུལ་ཤེས་དེ་དག་རང་གིས་རང་འབྱུང་འགྱུར། །
གང་གིས་བསྐལ་པ་སྟོང་དུ་དཀའ་ཐུབ་སྤྱད། །ཤ་ཁྲག་པགས་ལ་མི་ལྟ་བྱས་པ་བས། །གང་གིས་ཚུལ་འདི་སྐད་ཅིག་རྟོགས་གྱུར་ན། །དེ་ནི་ཁྱད་འཕགས་དཀའ་ཐུབ་ད་ལྟར་མིན། །འདས་པའི་རང་བྱུང་གང་རྣམས་བྱུང་བ་དང་། །མ་འོངས་སེམས་ཅན་ཕན་བཞེད་གང་འབྱུང་དང་། །

ད་ལྟར་དུས་ན་འདྲེན་པ་གང་བཞུགས་པ། །ཀུན་ཀྱང་ཚུལ་གྱིས་བདེ་བར་གཤེགས་པ་ཐོབ། །རབ་འཕྲུལ་ལྷ་ཚོགས་ཐུབ་པའི་ཚུལ་ཤེས་པ། །འདི་དག་ང་ལ་མཆོད་པ་མཆོག་བྱས་ཤིང་། །འདྲེན་པ་ཐམས་ཅད་བསྙེན་བཀུར་རབ་བྱས་ན། །ཚུལ་གྱིས་སུ་ནི་རང་འབྱུང་ཐོབ་པར་འགྱུར། །
འཇིག་རྟེན་མཁས་པའི་ཏིང་འཛིན་གང་ཡིན་པ། །དེ་ཡིས་རྒྱལ་བ་རང་བྱུང་གནས་པའི་རྣམས། །དེ་དག་ཐམས་ཅད་རྒྱལ་བའི་སྤྱོད་ཡུལ་ལོ། །ཚུལ་ཐོབ་རྣམས་ཀྱིས་མངོན་བསྟེན་མྱུར་དུ་འཐོབ། །དེ་ལ་རྟ་ཐུལ་སངས་རྒྱས་སྲས་རྣམས་ནི། །སངས་རྒྱས་གནས་པ་དེ་ལ་ནེམ་ནུར་མེད། །
སངས་རྒྱས་ཚུལ་ལ་སེམས་ཅན་རྣམ་རྩེ་བ། །ཚུལ་ཤེས་པ་དག་སྟོན་པའི་ལམ་ལ་སྤྱོད། །དེ་ལྟས་ཚུལ་ལ་དད་པའི་ཡིད་བྱས་ཏེ། །བརྩམ་པར་བྱ་ཡི་སྡུག་བསྔལ་སྤྱོད་ལ་མིན། །རྟག་ཏུ་དགེ་བཤེས་མཁས་པ་བསྟེན་བྱས་ན། །བླ་མེད་བྱང་ཆུབ་མྱུར་དུ་ཐོབ་པར་འགྱུར། །བདེ་བར་
གཤེགས་པའི་གསུང་མཆོག་ཐོས་ནས་ནི། །འཁོར་ཀུན་རྒྱལ་བའི་བྱང་ཆུབ་ཡི་རངས་ཏེ། །རྗེས་སུ་ཡི་རང་ཐེ་ཚོམ་མེད་གྱུར་ནས། །མཐར་ཕྱིན་བློ་གྲོས་ལ་ནི་ཞུགས་པར་གྱུར། །འཕྲུལ་དགའ་བ་ལུང་བསྟན་པའི་ལེའུ་སྟེ་བཅྭ་བརྒྱད་པའོ།། །།བམ་པོ་
བདུན་པ། དེ་ནས་དེའི་ཚེ་ལྷའི་རྒྱལ་པོ་དབང་སྒྱུར་ལ་སོགས་པ་གཞན་འཕྲུལ་དབང་བྱེད་རིས་ཀྱི་ལྷ་ཁྲག་ཁྲིག་ཕྲག་བརྒྱད་ཅུས་ལྷ་མ་ཡིན་རྣམས་ནས་འཕྲུལ་དགའི་ལྷའི་བར་དག་གིས་མཆོད་པ་ཡང་མཐོང་། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་
དགའ་ཞིང་དགའ་བ་དང་། ཡིད་བདེ་བ་སྐྱེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཕྲུལ་དགའི་ལྷ་རྣམས་ཀྱིས་ཡང་དག་པའི་མཐའ་ཞེས་གང་སྨྲས་པ་དེ་ལ་བདག་ཅག་གིས་ནི་ཡང་དག་པ་ཡང་མི་དམིགས་ན་དེའི་མཐའ་ལྟ་སྨོས་ཀྱང་ཅི་འཚལ།
དེ་ཅིའི་སླད་དུ་ཞེ་ན། བཅོམ་ལྡན་འདས་གང་ལ་ལ་ཞིག་གིས་ཡང་དག་པ་དམིགས་ན་ནི་མཐའ་ཡང་དེས་དམིགས་པར་འགྱུར་ཏེ་དེ་ནི་གཉིས་ཀྱིས་སྤྱོད་པའོ། །དེ་ལྟ་བུ་དེ་ནི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུ་དང་། རིགས་ཀྱི་བུ་མོ་རྣམས་ཀྱི་སྤྱོད་ཡུལ་མ་ལགས་སོ། །

བཅོམ་ལྡན་འདས་གང་ལ་ལ་ཞིག་གཉིས་སུ་མ་མཆིས་པའི་ཆོས་རྣམས་ནི་གཉིས་སུ་མེད་དོ་ཞེས་མི་སྤྱོད་མ་མོས་ན་དེ་འདི་སྙམ་དུ་བདག་གིས་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་སྙམ་དུ་སེམས་སུ་ལགས་ཀྱང་། དེ་ནི་ལམ་ལོག་པར་ཞུགས་
པར་འཚལ་བར་བགྱི་བའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གང་འདི་བྱང་ཆུབ་ཏུ་སྨོན་པ་དེ་ནི་ལམ་ལོག་པར་ཞུགས་པ་ལགས་ཏེ། བཅོམ་ལྡན་འདས་གང་མངོན་པར་རྫོགས་པར་འཚང་རྒྱ་བར་བགྱི་བའི་ཆོས་དེ་གང་ཡང་མ་མཆིས་སོ། །དེ་ཅིའི་སླད་དུ་ཞེ་ན།
བཅོམ་ལྡན་འདས་ཆོས་འགའ་ཞིག་དམིགས་པར་གྱུར་ན་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་སོ། །བཅོམ་ལྡན་འདས་ཆོས་ནི་འདས་པ་མ་ལགས། མ་འོངས་པ་མ་ལགས། ད་ལྟར་བྱུང་བ་མ་ལགས། འདུས་བྱས་མ་ལགས། འདུས་མ་བྱས་མ་ལགས།
དངོས་པོ་མ་ལགས། དངོས་པོ་མ་མཆིས་པ་མ་ལགས། མངོན་པར་ཤེས་པར་བགྱི་བ་མ་ལགས། ཡོངས་སུ་ཤེས་པར་བགྱི་བ་མ་ལགས། སྤང་བར་བགྱི་བ་མ་ལགས། བསྒོམ་པར་བགྱི་བ་མ་ལགས། མངོན་དུ་བགྱི་བ་མ་ལགས་སོ། །བཅོམ་ལྡན་འདས་བྱང་ཆུབ་ཅེས་བགྱི་
བ་དེ་ཡང་ཆོས་གང་གི་གཉེན་པོ་ཡང་མ་ལགས་ལ་ཆོས་གང་ཡང་ཆོས་དེའི་གཉེན་པོ་མ་ལགས་སོ། །དེ་ཅིའི་སླད་དུ་ཞེ་ན། ཆོས་དེ་ནི་ཀུན་ནས་ཉོན་མོངས་པ་མ་ལགས། རྣམ་པར་བྱང་བ་མ་ལགས་ཏེ། གང་གིས་ཆོས་གཞན་གྱི་གཉེན་པོར་གྱུར་པའི་ཆོས་དེ་ཡང་རང་བཞིན་གྱིས་
མི་དམིགས་ལ་གང་ཆོས་དེའི་གཉེན་པོར་གྱུར་པའི་ཆོས་གཞན་དེ་གང་ཡང་རང་བཞིན་གྱིས་མི་དམིགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་ནི་མཚན་མ་དང་བྲལ་བ་སྟེ། དེ་དག་ནི་མངོན་པར་ཤེས་པར་བགྱི་བ་མ་ལགས། ཡོངས་སུ་ཤེས་པར་བགྱི་བ་མ་
ལགས། སྤང་བར་བགྱི་བ་མ་ལགས། བསྒོམ་པར་བགྱི་བ་མ་ལགས། མངོན་དུ་བགྱི་བ་མ་ལགས་ཏེ། བཅོམ་ལྡན་འདས་གཟུགས་ནི་གཟུགས་ཀྱི་མཚན་མ་དང་བྲལ་བའོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ནི་རྣམ་པར་ཤེས་པའི་མཚན་

མ་དང་བྲལ་བའོ། །གཟུགས་ཀྱི་སྐྱེ་བའི་མཚན་མ་ནས་རྣམ་པར་ཤེས་པའི་བར་གྱི་སྐྱེ་བ་གང་ལགས་པ་དེ་ཡང་སྐྱེ་བའི་མཚན་མ་དང་བྲལ་བའོ། །གཟུགས་ཀྱི་འགག་པ་ནས་རྣམ་པར་ཤེས་པའི་བར་གྱི་འགག་པ་གང་ལགས་པ་དེ་ཡང་འགག་པའི་མཚན་མ་དང་བྲལ་བའོ། །བཅོམ་
ལྡན་འདས་འདས་པ་དང་། མ་འོངས་པ་དང་། ད་ལྟར་བྱུང་བ་ཡང་འདས་པ་དང་། མ་འོངས་པ་དང་། ད་ལྟར་བྱུང་བ་དང་བྲལ་བའོ། །འདུས་བྱས་ཀྱང་འདུས་བྱས་ཀྱི་མཚན་མ་དང་བྲལ་བའོ། །འདུས་མ་བྱས་ཀྱང་འདུས་མ་བྱས་ཀྱི་མཚན་མ་དང་བྲལ་བའོ། །བཅོམ་ལྡན་
འདས་དེ་ལྟར་ཇི་ཙམ་དུ་ཕུང་པོས་བཟུང་བའམ། སྐྱེ་བ་དང་། འགག་པས་བཟུང་བའམ། འདས་པས་བཟུང་བའམ། མ་འོངས་པས་བཟུང་བའམ། ད་ལྟར་བྱུང་བས་བཟུང་བའམ། འདུས་བྱས་ཀྱིས་བཟུང་བའམ། འདུས་མ་བྱས་ཀྱིས་བཟུང་བ་དེ་དག་ནི་རྣམ་པ་ཐམས་
ཅད་དུ་མི་དམིགས་ཏེ། དེ་ལྟར་མི་དམིགས་པ་དེ་ནི་མངོན་པར་ཤེས་པར་བགྱི་བ་མ་ལགས། ཡོངས་སུ་ཤེས་པར་བགྱི་བ་མ་ལགས། སྤང་བར་བགྱི་བ་མ་ལགས། བསྒོམ་པར་བགྱི་བ་མ་ལགས། མངོན་དུ་བགྱི་བ་མ་ལགས་ཏེ། བཅོམ་ལྡན་འདས་གང་དག་དེ་ལྟར་ཞུགས་
པའི་རིགས་ཀྱི་བུ་དང་། རིགས་ཀྱི་བུ་མོ་དེ་དག་ནི་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་ཞེས་བགྱིའོ། །དེ་ནས་གཞན་འཕྲུལ་དབང་བྱེད་རིས་ཀྱི་ལྷ་དེ་དག་གིས་ཇི་ལྟར་ཤེས་པའི་ཆོས་དེ་ལྟར་ལུང་བསྟན་ནས་དེའི་ཚེ། བཅོམ་ལྡན་འདས་ལ་ཚིགས་སུ་བཅད་པ་
དག་གིས་མངོན་པར་བསྟོད་པ། བཅོམ་ལྡན་སྲིད་པ་མཐར་འབྱིན་ལེགས་པར་གསུངས། །འདྲེན་པས་སྲིད་པའི་སྙིང་པོ་མ་བརྙེས་ན། །སྐྱེ་བོ་མི་མཁས་དེ་དག་འཇིགས་པ་ཡིས། །འཁོར་བའི་ཕ་རོལ་བགྲོད་ཕྱིར་རབ་ཏུ་ཞུགས། །ཕུང་པོ་རྣམས་ནི་ཀུན་ཏུ་མི་དམིགས་ཏེ། །
ཕུང་པོའི་མཚན་མས་ཕུང་པོ་སྟོང་པ་ཉིད། །ཆོས་གང་གང་གི་གཉེན་པོར་འགྱུར་བ་ནི། །མཚན་མས་སྟོང་སྟེ་གང་ཡང་མ་མཆིས་སོ། །ངོ་བོ་ཉིད་ཀྱིས་སྟོང་ཕྱིར་དངོས་པོ་གང་། །ཡོངས་ཤེས་བྱ་དང་སྤང་བསྒོམ་མངོན་བྱ་བ། །གང་ཡང་མ་མཆིས་གང་དུའང་མི་དམིགས་ཏེ། །

དངོས་པོ་རྣམས་ནི་དངོས་མེད་རང་བྱུང་གསུང་། །བྱང་ཆུབ་གང་ཡང་མཚན་མར་མི་དམིགས་ཏེ། །བྱང་ཆུབ་ཕྱོགས་ཀྱི་ཆོས་རྣམས་དེ་བཞིན་ནོ། །སངས་རྒྱས་གང་ཡང་མཚན་མར་མི་དམིགས་ཏེ། །བྱང་ཆུབ་སེམས་དཔའ་མཚན་མས་རྟོགས་མི་འགྱུར། །
མི་མཁས་གང་དག་མཚན་མར་མངོན་ཞེན་པ། །དེ་དག་བྱང་ཆུབ་འཚང་རྒྱར་སེམས་བསྐྱེད་ཀྱང་། །མཚན་མར་སྤྱོད་ཅིང་སྤྱོད་ཡུལ་ལོག་པ་སྟེ། །བློ་གྲོས་ངན་པས་བྱང་ཆུབ་ལམ་མི་སྤྱོད། །མཚན་མ་སུས་སྤངས་སངས་རྒྱས་སྤྱོད་ཡུལ་ལ། །སྤྱོད་པ་དེ་དག་སངས་རྒྱས་
བསྟན་ལ་མཁས། །མཚན་མ་དེ་བཞིན་མཚན་མ་མེད་སྤངས་ཏེ། །སྟོང་དང་མི་སྟོང་དེ་བཞིན་དམིགས་མེད་པ། །མཁས་པ་དེ་དག་བྱང་ཆུབ་ལམ་ལ་སྤྱོད། །དེ་དག་བྱང་ཆུབ་དམ་པ་ཞི་བ་འཐོབ། །ཕས་ཀྱི་རྒོལ་བ་ཀུན་གྱི་སྤྱོད་ཡུལ་མིན། །གནས་དེ་ཉན་ཐོས་རྣམས་
ཀྱིས་བགྲོད་བྱ་མིན། །རང་རྒྱལ་རྣམས་ཀྱང་དེ་ལ་མི་འགྲོ་སྟེ། །རྣམ་གྲོལ་སེམས་ལྡན་ཟག་མེད་ཐ་བ་མེད། །དགྲ་བཅོམ་བསྟན་པ་འདི་ལ་གང་བརྩོན་དང་། །དེ་བཞིན་རང་རྒྱལ་སྐྱོབ་པར་གྱུར་པ་དག །མཁས་པའི་སྤྱོད་ཡུལ་དེ་ལ་སྤྱོད་ཡུལ་མེད། །གོ་འཕང་དེ་ནི་མཚན་
མ་སྤྱོད་པ་དང་། །ཉི་ཚེའི་སྟོང་པ་ཉིད་ལ་སྒོམ་པ་དང་། །གང་རྣམས་སྟོང་པས་སྟོང་ཞེས་སྟོང་སྨྲ་དང་། །ཆོས་ཀུན་རང་བཞིན་ཡོད་སྨྲས་འཐོབ་མི་ནུས། །སངས་རྒྱས་མ་སྨད་རྣམས་ཀྱི་བསླབ་པ་ལ། །སློབ་དང་རྣམ་བྲལ་སློབ་པ་སློབ་པའི་རྣམས། །མཁས་དེ་རྟོགས་པ་མེད་
པས་བྱང་ཆུབ་རྟོགས། །སྟོན་པས་བསྟན་པ་བཞིན་དུ་དགྱེས་བྱེད་ལགས། །སངས་རྒྱས་རྐང་གཉིས་གཙོ་བོ་བསྟོད་པས་ན། །བདག་ཅག་བསོད་ནམས་མི་ཆུང་གང་ཐོབ་དེས། །འགྲོ་བ་བྱང་ཆུབ་དམ་པ་འཚང་རྒྱ་ཞིང་། །མི་ཤེས་སྟོན་མཛད་སངས་རྒྱས་འགྲུབ་པར་ཤོག །དེ་
ནས་བཅོམ་ལྡན་འདས་ཀྱིས་དེའི་ཚེ་ལྷའི་རྒྱལ་པོ་དབང་སྒྱུར་ལ་སོགས་པ་གཞན་འཕྲུལ་དབང་བྱེད་རིས་ཀྱི་ལྷ་ཁྲག་ཁྲིག་ཕྲག་བརྒྱད་ཅུ་པོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་སྐྱེ་བོ་ཕལ་པོ་ཆེ་དེ་དག་གི་དགེ་བའི་རྩ་བ་བསྐྱེད་པའི་ཕྱིར་དེའི་ཚེ་འཛུམ་པ་མཛད་དོ། །དེ་ནས་

ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། གཞན་འཕྲུལ་དབང་བྱེད་ལྷ་ཡི་བསམ་མཁྱེན་ནས། །རྐང་གཉིས་གཙོ་བོ་ཁྱོད་ཀྱིས་འཛུམ་མཛད་ལ། །ཐུབ་པས་འཛུམ་པའི་རྒྱུ་དེ་མ་གསུངས་ན། །རྒྱལ་བ་འཛུམ་པའི་རྒྱུ་ནི་བསྟན་དུ་གསོལ། །
འདྲེན་པ་རྒྱུ་མེད་འཛུམ་པ་མི་མཛད་ཅེས། །རྒྱལ་བ་ཁྱུ་མཆོག་དམ་པས་དེ་སྐད་གསུངས། །འཇིག་རྟེན་དོན་སླད་འཛུམ་པ་མཛད་པའི་རྒྱུ། །འདྲེན་པས་བཀའ་སྩོལ་ཐེ་ཚོམ་བསལ་དུ་གསོལ། །དྲང་སྲོང་ཆེན་པོའི་ཞལ་ནས་འཛུམ་རིག་ནས། །ཐུབ་ཆེན་ཁྱོད་ཀྱི་འཁོར་རྣམས་
ཐེ་ཚོམ་འཚལ། །གཽ་ཏམ་རྒྱལ་བ་འདྲེན་པས་དེ་དག་ལ། །འཇིག་རྟེན་སྨན་སླད་འཛུམ་རྒྱུ་ལུང་བསྟན་གསོལ། །འདི་དག་འཁོར་བའི་རྒྱུད་ལས་རྒྱབ་ཕྱོགས་ཏེ། །མྱ་ངན་འདས་པའི་སེམས་ཀྱིས་ཐལ་སྦྱར་སྡོད། །འཁོར་འདི་ཡངས་པའི་སེམས་ལྡན་ཐེ་ཚོམ་འཚལ། །
དོན་ཡོང་གྲགས་མངའ་སོམ་ཉི་བསལ་དུ་གསོལ། །བདེ་གཤེགས་བསྟན་ལ་ཐེ་ཚོམ་མ་མཆིས་ཏེ། །ཕྱིར་ཞིང་དད་བསྐྱེད་རིམ་གྲོ་ཆེར་བགྱིད་དེ། །ཐེ་ཚོམ་མི་འཚལ་སེམས་ནི་གྲོལ་འགྱུར་བར། །རྒྱལ་བས་སྐྱེ་བོའི་ཐེ་ཚོམ་ལེགས་པར་ཁུམ། །བདེ་གཤེགས་བསྟན་
ལ་འདི་དག་བདེར་གནས་ཤིང་། །གང་ལམ་རང་བྱུང་རྒྱལ་བ་གཤེགས་གྱུར་པ། །ལམ་དེ་ནས་ནི་ཐེ་ཚོམ་མ་མཆིས་མཆི། །དེ་བས་སྐྱེ་བོའི་ཐེ་ཚོམ་གཅོད་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། སྐྱེ་བོ་
ཚོགས་ཆེན་དོན་དབང་བརྟེན་བྱས་ནས། །ཚིགས་སུ་བཅད་དེ་དུས་སུ་གང་སྨྲས་ཤིང་། །འཛུམ་པའི་དོན་གྱི་རྒྱུ་ནི་ཡོངས་ཞུས་པ། །ཁྱོད་ཀྱི་ཚིག་ནི་དུས་དང་ལྡན་པ་ཡིན། །རྟ་ཐུལ་དྲི་བ་དེ་ཡི་དོན་དྲིས་པས། །སྐྱེ་བོ་ཚོགས་ཆེན་འདི་ཡི་དོན་བྱས་གྱུར། །ཁྱོད་ཀྱིས་དེ་དྲིས་སྐྱེ་བོ་
ཚོགས་ཆེན་དག །བྱང་ཆུབ་མཆོག་ཏུ་ཡང་དག་ཞུགས་པར་འགྱུར། །གཞན་འཕྲུལ་དབང་བྱེད་བསམ་པ་ངས་མཁྱེན་ཏེ། །རྟ་ཐུལ་འཛུམ་པ་འདི་ནི་ངས་བསྟན་ཏོ། །འཇིག་རྟེན་མཁྱེན་པའི་བསྟན་པའི་ལམ་དེ་ནས། །དོན་དུ་གཉེར་བ་དེ་དག་དེ་བཞིན་འདོད། གང་གིས་

འགྲོ་བ་འདི་དག་མཚན་མེད་པར། །སྨིག་རྒྱུ་ལ་ནི་ཇི་ལྟར་ཆུ་བཞིན་མཐོང་། །བྱིས་པའི་རྨོངས་པ་མཁས་པའི་ཚུལ་བཞིན་ཏེ། །དེ་དག་རྗེས་སུ་བྱང་ཆུབ་འདོད་པས་བསླབ། །མཚན་མའི་འདུ་ཤེས་སྤང་ཕྱིར་མི་རྣམས་གང་། །རྟག་ཏུ་མཚན་མ་མངོན་དགའ་
འཇིག་འགྱུར་ཞིང་། །མཚན་མའི་འདུ་ཤེས་ལོག་པའི་ལམ་དུ་འདོང་། །མཚན་མ་མེད་པས་བྱང་ཆུབ་མཆོག་ཐོབ་འགྱུར། །མེད་པའི་རྟོག་ལྡན་མཚན་མར་རྣམ་བརྟགས་ནས། །ཇི་ལྟར་བརྟགས་པས་དེ་ལྟར་འཆིང་བ་ཡིན། །མཚན་མ་སྟོང་པར་རྣམ་མཐོང་མཁས་པ་ཡི། །ཞི་བ་
དག་ནི་གྲགས་པ་དམ་པ་ཐོབ། །འདུ་ཤེས་མཚན་ཅན་མི་མཉམ་སེམས་རྒྱུད་ཀྱིས། །སྡིག་པ་བརྒྱ་དག་མི་མཁས་དེ་དག་བྱེད། །འགྲོ་བ་ཀུན་ཏུ་སྡུག་བསྔལ་མི་ཆུང་མྱོང་། །དེ་ལྟར་མི་མཁས་མཚན་མ་བརྟག་པ་བྱས། །མཚན་མར་འདུ་ཤེས་པ་ནི་ཕུང་པོ་དང་། །སངས་རྒྱས་
བྱང་ཆུབ་བྱང་ཆུབ་སེམས་དཔའ་མཐོང་། །དེ་ལྟར་མཚན་མ་མེད་ཅིང་སྟོང་མཐོང་ན། །བྱང་ཆུབ་གཞལ་མེད་བླ་ན་མེད་པ་འཐོབ། །འདུ་ཤེས་མཚན་མ་ཅན་ལ་ཉོན་མོངས་འཕེལ། །མཚན་མ་མེད་པ་ཀུན་ཏུ་སྦྱོར་བ་སྤོང་། །མཚན་མ་ལས་ནི་ཀུན་སྦྱོར་གཞན་མེད་དེ། །ཀུན་ཏུ་
སྦྱོར་བ་དེ་ཉིད་མཚན་མེད་ཡིན། །གང་རྣམས་བྱང་ཆུབ་ཐོབ་པར་བྱ་རྟོག་པ། །རྟོག་པ་དེ་ཉིད་མི་མཁས་བར་ཆད་ཡིན། །མཁས་པའི་ལོངས་སྤྱོད་རྣམ་པ་ཐོབ་བྱེད་ན། །ལོངས་སྤྱོད་དེ་ཉིད་མཚན་མ་མེད་པར་འགྱུར། །ཆོས་རྣམས་གང་ཡང་རང་བཞིན་ཉིད་ཀྱིས་མེད། །རྣམ་པར་རྟོག་
པས་ཆོས་བྱུང་ཀུན་ཀྱང་སྟོང་། །རྟོག་པ་མེད་པས་མཚན་མ་མེད་པར་འགྱུར། །དེ་ཉིད་བྱང་ཆུབ་གཞན་དུ་མཁས་མི་སྨྲ། །རྒྱལ་བས་གསུངས་པ་དེ་དག་ཐོས་གྱུར་ནས། །མི་འཇིགས་ལྡན་པའི་འཁོར་ནི་ཐེ་ཚོམ་བསལ། །དཔེར་ན་ཙམ་པའི་ཕྲེང་བ་འཛིན་པ་ལྟར། །མཁས་རྣམས་
ཐུབ་པས་གསུངས་ལ་ལེགས་ཞེས་འཛིན། །འཇིགས་པ་མེད་པའི་ལྷ་ཚོགས་འདི་དག་གིས། །མཆོད་པ་འཕགས་པ་བླ་ན་མེད་བྱས་ཤིང་། །རྒྱལ་བའི་སྤྱོད་ཡུལ་ཆོས་རྣམས་ཡོངས་ཤེས་ནས། །འགྲོ་བ་རྣམ་པར་འདྲེན་པ་ཀུན་མཁྱེན་འགྱུར། །གཞན་འཕྲུལ་དབང་བྱེད་པ་ལུང་

བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་ཚངས་རིས་ཀྱི་ལྷ་བྱེ་བ་ཕྲག་དྲུག་ཅུས་ལྷ་མ་ཡིན་རྣམས་ནས་གཞན་འཕྲུལ་དབང་བྱེད་རིས་ཀྱི་ལྷའི་བར་དག་གི་མཆོད་པ་ཡང་མཐོང་། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་
དགའ་ཞིང་དགའ་བ་དང་ཡིད་བདེ་བ་སྐྱེས་ནས་སྔོན་དགེ་བའི་རྩ་བ་བསགས་པ་དང་། སྔོན་གྱི་རྒྱལ་བ་ལ་བསྙེན་བཀུར་བྱས་པ་དང་། བསམ་པ་ཡོངས་སུ་དག་པའི་ཕྱིར་འཇིག་རྟེན་པའི་བསམ་གཏན་ལ་མི་འདོད་པ་སྐྱེས་ཤིང་དེ་བཞིན་གཤེགས་པའི་བསྟན་པ་འདི་ལ་ནི་སྣང་བ་ཐོབ་
སྟེ། ཆོས་ཟབ་མོ་ལ་བཟོད་པ་ཐོབ་པར་གྱུར་ནས་དེ་དག་གིས་ཆོས་ཐམས་ཅད་བྱས་པ་ཡང་མ་ཡིན། མ་བྱས་པ་ཡང་མ་ཡིན་ཞེས་བྱ་བར་ཤེས་པར་གྱུར་ཏོ། །དེ་བཞིན་དུ་སྐྱེས་པ་ཡང་མ་ཡིན། མ་སྐྱེས་པ་ཡང་མ་ཡིན། བྱུང་བ་ཡང་མ་ཡིན། མ་བྱུང་བ་ཡང་མ་ཡིན།
གྲུབ་པ་ཡང་མ་ཡིན། མ་གྲུབ་པ་ཡང་མ་ཡིན། འགགས་པ་ཡང་མ་ཡིན། མ་འགགས་པ་ཡང་མ་ཡིན། གནས་པ་ཡང་མ་ཡིན། མི་གནས་པ་ཡང་མ་ཡིན། ཀུན་ནས་ཉོན་མོངས་པ་ཡང་མ་ཡིན། རྣམ་པར་བྱང་བ་ཡང་མ་ཡིན། རྗེས་སུ་ཆགས་པ་ཡང་མ་ཡིན།
ཁོང་ཁྲོ་བ་ཡང་མ་ཡིན། རྨོངས་པ་ཡང་མ་ཡིན། མ་རྨོངས་པ་ཡང་མ་ཡིན། ཤེས་པ་པོ་ཡང་མ་ཡིན། ཤེས་པ་པོ་མེད་པ་ཡང་མ་ཡིན། མཐོང་བ་པོ་ཡང་མ་ཡིན། མཐོང་བ་པོ་མེད་པ་ཡང་མ་ཡིན། ཚོར་བ་པོ་ཡང་མ་ཡིན། ཚོར་བ་པོ་མེད་པ་ཡང་མ་ཡིན། སྟོན་
པ་པོ་ཡང་མ་ཡིན། སྟོན་པ་པོ་མེད་པ་ཡང་མ་ཡིན། ཡོད་པ་ཡང་མ་ཡིན། མེད་པ་ཡང་མ་ཡིན། དངོས་པོ་ཡང་མ་ཡིན། དངོས་པོ་མེད་པ་ཡང་མ་ཡིན། དམིགས་པ་ཡང་མ་ཡིན། མི་དམིགས་པ་ཡང་མ་ཡིན། འགྲོ་བ་ཡང་མ་ཡིན། འོང་བ་ཡང་མ་ཡིན། སོང་བ་
ཡང་མ་ཡིན། འོང་བ་ཡང་མ་ཡིན། སྟོང་པ་ཡང་མ་ཡིན། མི་སྟོང་པ་ཡང་མ་ཡིན། མཚན་མ་ཡོད་པ་ཡང་མ་ཡིན། མཚན་མ་མེད་པ་ཡང་མ་ཡིན། སྨོན་པ་ཡོད་པ་ཡང་མ་ཡིན། སྨོན་པ་མེད་པ་ཡང་མ་ཡིན་ནོ་ཞེས་བྱ་བར་ཤེས་པར་གྱུར་ཏོ། །དེ་དག་དེ་ལྟར་ཆོས་ཐམས་ཅད་

ལ་ཡོང་མི་གནས་པའི་ཡིད་ཀྱིས་དེ་དག་མིང་ལ་ཡང་མི་གནས། ཐ་སྙད་ལ་ཡང་མི་གནས། བརྗོད་པ་ལ་ཡང་མི་གནས། དེ་དག་ནི་བརྗོད་པའི་འདུ་ཤེས་ཅན་ཡང་མ་ཡིན་བརྗོད་དུ་མེད་པའི་འདུ་ཤེས་ཅན་ཡང་མ་ཡིན། བྱ་བའི་འདུ་ཤེས་ཅན་ཡང་མ་ཡིན། བྱ་བ་མེད་
པའི་འདུ་ཤེས་ཅན་ཡང་མ་ཡིན། སོ་སོའི་སྐྱེ་བོའི་འདུ་ཤེས་ཅན་ཡང་མ་ཡིན། སོ་སོའི་སྐྱེ་བོ་མ་ཡིན་པའི་འདུ་ཤེས་ཅན་ཡང་མ་ཡིན། སོ་སོའི་སྐྱེ་བོའི་ཆོས་ཀྱི་འདུ་ཤེས་ཅན་ཡང་མ་ཡིན། སོ་སོའི་སྐྱེ་བོ་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། ཉན་ཐོས་ཀྱི་འདུ་ཤེས་
ཅན་ཡང་མ་ཡིན། ཉན་ཐོས་མ་ཡིན་པའི་འདུ་ཤེས་ཅན་ཡང་མ་ཡིན། ཉན་ཐོས་ཀྱི་ཆོས་ཀྱི་འདུ་ཤེས་ཅན་ཡང་མ་ཡིན། ཉན་ཐོས་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། རང་སངས་རྒྱས་ཀྱི་འདུ་ཤེས་ཅན་ཡང་མ་ཡིན། རང་སངས་རྒྱས་མ་ཡིན་པའི་འདུ་ཤེས་ཅན་
ཡང་མ་ཡིན། རང་སངས་རྒྱས་ཀྱི་ཆོས་ཀྱི་འདུ་ཤེས་ཅན་ཡང་མ་ཡིན། རང་སངས་རྒྱས་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། བྱང་ཆུབ་སེམས་དཔའི་འདུ་ཤེས་ཅན་ཡང་མ་ཡིན། བྱང་ཆུབ་སེམས་དཔའ་མ་ཡིན་པའི་འདུ་ཤེས་ཅན་ཡང་མ་ཡིན། བྱང་ཆུབ་
སེམས་དཔའི་ཆོས་ཀྱི་འདུ་ཤེས་ཅན་ཡང་མ་ཡིན། བྱང་ཆུབ་སེམས་དཔའ་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། སངས་རྒྱས་ཀྱི་འདུ་ཤེས་ཅན་ཡང་མ་ཡིན། སངས་རྒྱས་མ་ཡིན་པའི་འདུ་ཤེས་ཅན་ཡང་མ་ཡིན། སངས་རྒྱས་ཀྱི་ཆོས་ཀྱི་འདུ་ཤེས་ཅན་ཡང་མ་ཡིན།
སངས་རྒྱས་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། མྱ་ངན་ལས་འདས་པའི་འདུ་ཤེས་ཅན་ཡང་མ་ཡིན། མྱ་ངན་ལས་འདས་པ་མ་ཡིན་པའི་འདུ་ཤེས་ཅན་ཡང་མ་ཡིན། འཁོར་བའི་འདུ་ཤེས་ཅན་ཡང་མ་ཡིན། འཁོར་བ་མེད་པའི་འདུ་ཤེས་ཅན་ཡང་མ་ཡིན་ཏེ། དེ་
ལྟར་ཐམས་ཅད་ཀྱི་ཐམས་ཅད་དུ་རྟོག་པ་མེད་པའི་བློ་ཅན་ནམ་མཁའ་བཞིན་དུ་དག་ཅིང་གོས་པ་མེད་པར་གྱུར་ནས་དེ་རྣམས་དག་པ་དང་གོས་པ་མེད་པའི་ཕྱིར་དེའི་ཚེ་དེ་དག་ཞི་བས། བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། ཞི་ལ་ཞི་བའི་ཐུགས་མངའ་ཞི་

བ་སྤྱད་ཅིང་ཞི་བའི་ཕ་རོལ་བྱོན། །ཞི་བ་བསྟེན་པར་མཛད་ཅིང་འགྲོ་ལ་ཞི་བ་བསྟེན་པ་རྗེས་སུ་སྟོན། །ཞི་བའི་སྤྱོད་ཡུལ་དགྱེས་ཤིང་བྱང་ཆུབ་ཞི་ལ་དྲི་བྲལ་འཁྲུགས་མ་མཆིས། ཁྱོད་ཀྱིས་འཆི་མེད་ཞི་བ་འགྲོ་རྒྱུད་ཐམས་ཅད་ཟད་པ་མྱུར་དུ་བརྙེས། །ཞི་བ་ཐོབ་པར་བགྱིད་པའི་ཞི་
བའི་ལམ་མཆོག་ཞི་བ་ཡང་དག་བསྟེན། །ཡན་ལག་བརྒྱད་པས་ཉོན་མོངས་ཀློང་རྣམས་ཞི་མཛད་འགྲོ་བ་ཐམས་ཅད་བཏོན། །སྔོན་གྱི་རྒྱལ་བས་བསྟེན་པའི་བྱང་ཆུབ་གཞལ་ཡས་ཞི་བ་དེ་ལ་འགོད། །དེ་བསྟེན་སངས་རྒྱས་འཕགས་པས་བསྟེན་པའི་གྲོང་ཁྱེར་ཞི་བར་དེང་ཞེས་གསུང་། །
འདྲེན་པ་དེ་ལྟར་འགྲོ་བ་འདི་ལ་རྒྱལ་བས་བསྟེན་པའི་བསླབ་པ་བསྟན། །གལ་ཏེ་བསླབ་པ་དེ་སློབ་འགྲོ་བ་འདི་དག་བྱང་ཆུབ་གཞལ་ཡས་འཐོབ། །བསླབས་ནས་ཞི་ཞིང་ཡིད་ཞི་ཞི་བའི་ལམ་དོང་དབང་པོ་ཞི་བ་དག །འཇིག་རྟེན་མཁས་པ་འགྲོ་བ་ཞི་བྱེད་མཐུ་ཆེན་ཞི་བ་ཤེས་པར་
འགྱུར། །འདྲེན་པ་ཁྱོད་ཀྱི་སྲས་མཆོག་ཞི་བ་འགྲོ་བ་ཞི་བགྱིད་གང་དག་གིས། །འཆི་མེད་ཞི་བ་མཚན་མ་ཐམས་ཅད་ཟད་པ་རྣམ་པར་རྟོག་གྱུར་པ། །དེ་དག་འདྲེན་པ་ཚུལ་ལ་མཁས་པ་མཆོད་པ་མཆོག་གིས་མཆོད་པར་འགྱུར། །ཉོན་མོངས་ཞི་ཞིང་མཚན་མ་ཀུན་སྤངས་ཞི་བ་
རྟག་ཏུ་སྟོན་པར་འགྱུར། །འགྲོ་བ་ཐམས་ཅད་ཞི་ཞིང་མཚན་མ་བྲལ་བ་དེ་ཉིད་མྱ་ངན་འདས། །ཐུབ་པ་གང་དག་ཞི་ལས་ཞི་འདོད་སེམས་པ་དེ་དག་ཉོན་མོངས་འགྱུར། །རྒྱལ་བ་ཁྱོད་ཀྱི་བྱང་ཆུབ་དང་ནི་འགྲོ་ཀུན་ཆོས་ཀུན་བསམ་མི་ཁྱབ། །ཐུབ་པ་བློ་ལྡན་འདམ་ལས་རྒལ་
བ་དེ་ལ་བདག་ཅག་དོགས་མ་མཆིས། །གང་དག་ཕུང་པོ་བོར་ཏེ་བྱང་ཆུབ་ཞི་ཚོལ་དེ་ལ་ཞི་བར་རྟོགས། །ཕུང་པོ་འཇིག་པ་དེ་དག་ཤཱཀྱ་ཐུབ་པའི་བསྟན་ལ་དགའ་མ་ལགས། །དབེན་པའི་བློ་གྲོས་ལྡན་པ་ཞི་ཚོལ་དེ་དག་བློ་འཁྲུགས་གྱུར་པ་སྟེ། །ཆོས་ཀྱི་མཚན་མ་སྤྱོད་ཡུལ་
འདི་དག་བྱིས་པ་ཞེས་ནི་སྟོན་པས་གསུངས། །ཐམས་ཅད་མཁྱེན་པས་ཞི་དང་མཚན་མའི་འཆིང་བ་འདི་དག་གསུངས། །ཐུབ་པ་གང་དག་ཕུང་པོ་རྣམས་ལ་རྣམ་པ་ཀུན་ཏུ་མཚན་མི་རྙེད། །དེ་དག་ཤཱཀྱ་ཐུབ་པའི་བསྟན་པ་མཛེས་བྱེད་གང་དག་མཚན་མེད་དགའ། །དེ་དག་བྱང་ཆུབ་སྐྱོན་བྲལ་

ཞི་བ་མཁས་པའི་སྤྱོད་ཡུལ་ཐོབ་པར་འགྱུར། །བདུད་ཀྱི་རྩོད་ལས་རྒྱལ་ནས་ཉོན་མོངས་ཞི་བའི་ཐམས་ཅད་མཁྱེན་པ་འཐོབ། །རྣམ་འདྲེན་ཞི་བ་མཛད་ལ་བསྟོད་པས་བདག་ཅག་བསོད་ནམས་གང་རྙེད་པ། །ཆགས་མེད་ཐུགས་མངའ་བདེ་བར་གཤེགས་པས་
འདི་ཙམ་ཞེས་ནི་མཁྱེན་གྱུར་པ། །དེས་ནི་འགྲོ་བ་ཐམས་ཅད་ལམ་མཆོག་ཐམས་ཅད་མཁྱེན་པས་བསྟེན་གྱུར་པ། །ཞི་བྱེད་ཞི་བ་བསྟེན་ནས་མཁས་པས་མཆོད་པའི་རང་འབྱུང་སྡིག་མེད་ཤོག །དེ་ནས་མི་མཇེད་ཀྱི་བདག་པོ་ཚངས་པས་ཚངས་པ་རྣམས་དང་། ལྷ་རྣམས་ཀྱིས་བཅོམ་
ལྡན་འདས་ལ་བསྟོད་པར་རིག་ནས་བདག་ཉིད་ཀྱིས་ཚུལ་དང་འདྲ་བའི་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། མི་དབང་ཁྱོད་ཀྱིས་ཆོས་རྣམས་ཐམས་ཅད་ནི། །ལོག་པ་རྨོངས་བྱེད་ཆང་བ་སྟོང་འད་ཞིང་། །སྟོན་གྱི་སྤྲིན་འདྲ་མིག་འཕྲུལ་འདྲ་བར་
མཁྱེན། །རྒྱལ་བས་འདོད་པའི་ཡོན་ཏན་མེད་པར་མཁྱེན། །ཇི་ལྟར་མི་ཞིག་རྨི་ལམ་བཀྲེས་གྱུར་པས། །ཁ་ཟས་རོ་བརྒྱ་ཟོས་ཀྱང་མ་འདྲངས་པ། །དེ་ལ་བཀྲེས་མེད་ཟས་མེད་སེམས་ཅན་མེད། །རྨི་ལམ་དེ་འདྲར་ཆོས་རྣམས་ཐམས་ཅད་གཟིགས། །སྐོམ་པའི་མི་ཞིག་ཉལ་
བའི་རྨི་ལམ་ན། །ཆུ་བསིལ་དང་ཞིང་རྙོག་མེད་འཐུངས་གྱུར་ཀྱང་། །ངོམས་མེད་ཚ་བ་ཞི་བར་མི་འགྱུར་ཏེ། །དེ་བཞིན་ཁྱོད་ཀྱིས་ཆོས་རྣམས་ཐམས་ཅད་གཟིགས། །འདི་ལ་བྱེད་མེད་ཚོར་མེད་སེམས་ཅན་མེད། །བྱས་པ་དེ་བཞིན་མེད་ཅིང་རྣམ་སྨིན་མེད། །འབྲས་བུ་མྱོང་བར་
འགྱུར་བ་དེ་མེད་ཅེས། །འདི་འདྲའི་ཆོས་མཁྱེན་ཐེ་ཚོམ་ཡོང་མི་མངའ། །མི་ཞིག་ཡིད་དུ་འོང་བའི་ཚིག་སྨྲ་ན། །དགའ་བར་འགྱུར་ཡང་ཚིག་ལ་འཕོ་བ་མེད། ཚིག་ཉིད་མེད་ཅིང་དགར་འགྱུར་དངོས་ཀྱང་མེད། །དེ་མཁྱེན་དེ་ལ་ཐེ་ཚོམ་ཡོང་མི་མངའ། །པི་བང་སྒྲ་སྙན་མཉན་ན་རྣར་
སྙན་ཏེ། །སྒྲ་དེ་རང་བཞིན་གང་ཡང་ཡོད་པ་མིན། །དེ་ལྟར་མཁས་པས་ཕུང་པོ་འདི་གཟིགས་ན། །ཕུང་པོའི་རང་བཞིན་གང་ཡང་དམིགས་མི་མངའ། །ནོར་བུ་རིན་ཆེན་རང་བཞིན་གསལ་དག་པ། །གོས་ཀྱི་དྲུང་བཞག་སྣ་ཚོགས་ཚོན་དུ་འགྱུར། །དེ་ལྟར་རང་བཞིན་ཡོངས་དག་

ཆོས་རྣམས་ཀྱང་། །ལོག་པའི་རྣམ་པར་རྟོག་པས་དེ་ལྟར་གྱུར། །ཙན་དན་དྲི་མེད་སྐྱོན་དང་བྲལ་བ་ཡང་། །རྐྱེན་དང་སྦྱར་ན་དྲི་ཞིམ་གཞན་དུ་འགྱུར། །དེ་ལྟར་རང་བཞིན་ཡོངས་དག་ཆོས་རྣམས་ཀྱང་། །སོ་སོ་རང་གིས་བརྟགས་པའི་རྣམ་པ་བཞིན། །ཇི་ལྟར་མི་ཡིས་
དུང་གི་སྒྲ་ཐོས་ཏེ། །སྒྲ་འདི་ག་ལས་བྱུང་ཞེས་བརྟག་བྱས་ཀྱང་། །རང་བཞིན་གྱིས་སྟོང་དངོས་པོ་དེ་མི་དམིགས། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །ཇི་ལྟར་མི་ཞིག་བསོད་པའི་ཁ་ཟས་ལ། །ཡན་ལག་སྲོག་ཕན་ཇི་ལྟར་འགྱུར་བརྟགས་ན། །དངོས་མེད་
ཡན་ལག་སྲོག་ཀྱང་དེ་བཞིན་ཏེ། །དྲང་སྲོང་ཆེན་པོས་དེ་བཞིན་ཆོས་ཀུན་གཟིགས། །ཇི་ལྟར་མི་ཞིག་ནམ་མཁའི་འཇའ་མཐོང་ན། །ཡན་ལག་གཞིགས་བརྟགས་རང་བཞིན་མེད་ཅིང་སྟོང་། །ནམ་མཁའི་འཇའ་བཞིན་ཁྱོད་ཀྱིས་ཡན་ལག་སྟོང་། །དྲང་སྲོང་ཆེན་པོས་དེ་བཞིན་
ཆོས་ཀུན་གཟིགས། །གྲོང་ཁྱེར་མཆོག་ཀྱང་ཡན་ལག་རྣམ་གཞིགས་ན། །གྲོང་ཁྱེར་རང་བཞིན་དེ་བཞིན་མིང་མི་དམིགས། །གྲོང་ཁྱེར་ཇི་བཞིན་དེ་ལྟར་ཡན་ལག་སྟོང་། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུ་དགའ་བར་རྔ་ཞིག་བརྡུངས་བགྱིས་ན། །
དགའ་བ་སྐྱེད་ཀྱང་སྒྲ་ཡི་རང་བཞིན་སྟོང་། །ཇི་ལྟར་སྒྲ་བཞིན་དེ་ལྟར་ཡན་ལག་སྟོང་། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །སྒྲ་ནི་ཕྱོགས་སུ་མི་འགྲོ་འབྱུང་བ་མེད། །ཕྱོགས་སུ་དེ་བཞིན་འགག་པར་མི་འགྱུར་ཏེ། །མི་དབང་
ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །ཐོགས་པ་མེད་ཅིང་སྙན་པའི་རང་བཞིན་ཏེ། ཁྱོད་ཀྱི་ཡན་ལག་རྔ་སྒྲ་དེ་དང་འདྲ། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །སྒྲ་དེ་འཇིག་རྟེན་
དགའ་བྱར་རྟོག་པ་མེད། །ཇི་ལྟར་སྒྲ་བཞིན་ཁྱོད་ཀྱི་ཡན་ལག་སྟོང་། །མི་དབང་ཁྱོད་ཀྱིས་ཆོས་ཀུན་དེ་ལྟར་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །གཡོ་བ་མེད་ཅིང་ཞི་བའི་དངོས་ཀྱང་མེད། །ཇི་ལྟར་རྔ་བཞིན་ཁྱོད་ཀྱི་ཡན་ལག་སྟོང་། །མི་དབང་ཁྱོད་ཀྱིས་དེ་བཞིན་

ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །སྒྲ་དེ་ཡན་ལག་མ་བྱུང་རང་དབང་མིན། །ཇི་ལྟར་སྒྲ་བཞིན་ཁྱོད་ཀྱི་ཡན་ལག་སྟོང་། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །དེ་ནས་བཅོམ་ལྡན་འདས་ཀྱིས་ཚངས་རིས་ཀྱི་ལྷ་དེ་དག་
དང་། མི་མཇེད་ཀྱི་བདག་པོ་ཚངས་པ་དེའི་ལྷག་པའི་བསམ་པ་ཐུགས་སུ་ཆུད་ཅིང་ཞི་གནས་དང་ཡེ་ཤེས་མཐོང་བའི་བསྟོད་པ་དེས་དེ་ལྟར་བསྟོད་པས་འཁོར་དེ་ཡང་དགེ་བའི་རྩ་བ་བསགས་པར་གྱུར་པར་གཟིགས་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་
གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། ཤཱཀྱ་ཐུབ་པའི་ཞལ་ནས་འཛུམ་མཛད་དྲི་མེད་དག་མཐོང་ནས། །ལྷར་བཅས་མིར་བཅས་ཀླུ་དང་གནོད་སྦྱིན་བཅས་པའི་འཇིག་རྟེན་ཀུན། །སྐྱོབ་པའི་འཛུམ་མཐོང་ཐམས་ཅད་ལྡན་པའི་འགྲོ་བ་ཐེ་ཚོམ་འཚལ། །
བདེ་གཤེགས་ཞལ་བཟངས་དེ་ལ་ལྟ་ཞིང་ཐོས་པར་དགའ་སྟེ་སྡོད། །རྒྱལ་བ་འཛུམ་མཛད་ལེགས་པར་བཀའ་སྩོལ་ཐེ་ཚོམ་དགུམ་དུ་གསོལ། །རྣམ་པར་འདྲེན་པ་ཐུབ་མཆོག་ཀུན་མཁྱེན་སངས་རྒྱས་འདྲེན་པ་རྣམས། །རྒྱུ་མ་མཆིས་པར་འཇིག་རྟེན་དོན་བྱེད་འཛུམ་མཛད་མ་
མཐོང་ན། །བདེ་གཤེགས་ཁྱོད་ཀྱིས་གང་སླད་འཛུམ་མཛད་ཐེ་ཚོམ་རྒྱུ་དེ་གསུངས། །རྒྱལ་བ་འཛུམ་མཛད་རྒྱུ་ཐོས་འགྲོ་བ་རྣམས་ནི་དགའ་བར་འགྱུར། །འཁོར་འདི་ཐེ་ཚོམ་འཚལ་ནས་ཐལ་མོ་སྦྱར་ཏེ་ཁྱོད་ལ་སེམས། །བདེ་གཤེགས་ཐུབ་པའི་གསུང་མཆོག་ཐེ་ཚོམ་
གཅོད་པ་ཉན་འཚལ་ན། །རྣམ་འདྲེན་ཐུབ་པ་འཛུམ་མཛད་རྒྱུ་དེ་དེ་དག་རྣམས་ལ་གསུངས། །ཐོས་ནས་འགྲོ་བ་དགའ་ཞིང་ཐེ་ཚོམ་མ་མཆིས་འཕེལ་བར་འགྱུར། །འཁོར་འདི་སྙིང་བོ་ལྡན་ཞིང་རྙོག་མེད་སངས་རྒྱས་ཡོན་ཏན་འཚལ། །སྟོན་པ་ཁྱོད་ཀྱི་ཞལ་མཛེས་ཟླ་བ་མཛེས་
པ་འདྲ་ལ་ལྟ། །འདྲེན་པ་ཆགས་མེད་རྫོགས་པ་ཚངས་པ་འདྲ་བའི་གསུང་བསྒྲགས་གསོལ། །དེ་ཐོས་འཁོར་རྣམས་ཐེ་ཚོམ་ཆད་ཅིང་ཆོས་ལ་གནས་པར་འགྱུར། །ཁྱོད་ཀྱི་ཚངས་པའི་གསུང་མཆོག་དོན་ལྡན་འཇིག་རྟེན་འདས་རིག་ནས། །སྐྱེ་བོ་དགའ་ཞིང་མགུ་བའི་ཡིད་

ལྡན་ཐམས་ཅད་མཁྱེན་པས་ཚིམ། །དེ་དག་དོགས་བསལ་སྦྱངས་པའི་ཡིད་ཀྱིས་ཐམས་ཅད་མཁྱེན་དུ་སྒྲུབ། །བརྩོན་འགྲུས་སྟོབས་ཆེན་བསྐྱེད་ནས་འདུན་པ་སྟོབས་ལྡན་རྩོམ་པར་བགྱིད། དེ་ལྟ་ལགས་པས་འཇིག་རྟེན་འདྲེན་པ་ཕན་མཛད་གསུང་བསྒྲགས་གསོལ། །རྐང་
གཉིས་དམ་པའི་གསུང་མཆོག་མི་གཡོ་ཐོས་ནས་དེ་ཡིས་ནི། །དགེ་བ་ཐོབ་པའི་འཁོར་འདི་ཐམས་ཅད་མཁྱེན་དུ་སེམས་འགྱུར་བར། །སྟོབས་བཅུ་མངའ་བ་འགྲོ་བ་ཀུན་ལ་ཕན་པ་ལེགས་པར་དགོངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་
བཅད་དེ་སླར་བཀའ་སྩལ་པ། རྟ་ཐུལ་ང་ཡིས་ཕན་བྱེད་འཛུམ་པ་འགྲོ་བ་ཀུན་ལ་གང་བསྟན་པ། །རྩེ་གཅིག་ཡིད་ཀྱིས་སྙེན་ཅིང་བསྔགས་པ་མཛེས་པ་དེ་ནི་མཉན་པར་བྱོས། །དེ་ཐོས་འགྲོ་བ་ཡོན་ཏན་བསགས་པ་མྱུར་དུ་འཇིག་རྟེན་དོན་བྱེད་པ། །ཕན་དང་ལྡན་པའི་བྱ་བ་སངས་
རྒྱས་བཀའ་སྩལ་དེ་ལ་བརྩོན་འགྲུས་རྩོམ། །ཚངས་པ་ཀུན་འཁོར་འདི་དག་དགའ་ཞིང་ཆོས་རྣམས་ལ་ནི་ཐེ་ཚོམ་མེད། །བསྐལ་པ་ཁྲག་ཁྲིག་གང་གཱའི་བྱེ་མ་སྙེད་དུ་དགེ་བ་ལེགས་པར་སྤྱད། །ཀུན་ཏུ་རྣམ་པ་དག་ལ་མ་ཆགས་ཡིད་གྱུར་འདུ་ཤེས་མཁའ་འདྲ་སྟེ། །དེ་ལྟར་གྱུར་
ཀྱང་བདེ་གཤེགས་བྱང་ཆུབ་རྫོགས་པར་འཚང་རྒྱ་སེམས་མ་བསྐྱེད། །འདི་དག་མ་འོངས་དུས་ན་བསྐལ་པ་བྱེ་བ་བརྒྱ་ཕྲག་གཞལ་ཡས་པ། །གང་གཱའི་བྱེ་མ་སྙེད་ན་རྡུལ་བསལ་ཐམས་ཅད་མཁྱེན་པའི་སྟོབས་ལ་གནས། །དེ་དག་ཕྱི་ནས་བདེ་བར་གཤེགས་པ་ཆེ་ལྡན་སངས་རྒྱས་འདྲེན་
ཆེ་བ། །སྲིད་པ་སེལ་ཅིང་འགྲོ་བ་སྟོང་པར་སྟོན་པའི་བཅོམ་ལྡན་འདས་སུ་འགྱུར། །སྐྱོབ་པ་དེ་དག་ཇི་ལྟར་སྤྱོད་པ་སྐུ་ཚེའི་ཚད་ཀྱང་དེ་ལྟར་འགྱུར། །བདེ་གཤེགས་མཐའ་ཡས་གྲགས་ལྡན་འཇིག་རྟེན་སྡུག་བསྔལ་འགྲེལ་ཅིང་གནས་པར་འགྱུར། །དེ་དག་རྣམས་ཀྱི་སངས་རྒྱས་
ཞིང་ནི་ཞིང་གི་འབྱོར་པ་གཞལ་ཡས་ཏེ། །འདྲེན་པ་ཆེན་པོ་རྣམས་ཀྱིས་བསྐལ་པ་ཁྲག་ཁྲིག་རྣམ་པ་དུ་མར་ནི། །སངས་རྒྱས་མཐའ་ཡས་རྣམས་ཀྱིས་གསུངས་ཀྱང་དེ་དག་བཀོད་པ་ཟད་མི་ནུས། །དེ་ཚེ་དེ་དག་ཡེ་ཤེས་སྟོབས་ལྡན་ཞེས་བྱའི་རྒྱལ་བར་འཐུན་པར་འགྱུར། །གཡོ་བ་

མེད་ཅིང་སེམས་མེད་མི་གནས་ཆོས་ནི་འགྲོ་ལ་སྟོན་པར་འགྱུར། །དེ་དག་ཞིང་མཆོག་རྣམས་སུ་སྐྱོབ་པའི་ཐམས་ཅད་མཁྱེན་ལམ་མ་སྦྱངས་པའི། །སེམས་ཅན་གཅིག་ཀྱང་མི་འབྱུང་སྲིད་པ་དེ་ལ་ཕལ་ཆེར་མྱ་ངན་འདའ། །དེ་དག་ན་ནི་དེ་ཚེ་འགྲོ་བ་དེ་དག་སྡུག་
བསྔལ་གཅིག་ཤེས་ཏེ། །མི་རྟག་འདུ་བྱེད་སྡུག་བསྔལ་རབ་ཏུ་འཇིགས་པས་སེམས་ཅན་ཡིད་འབྱུང་བའོ། །དེ་ན་འགྱུར་བའི་སྡུག་བསྔལ་དང་ནི་སྡུག་བསྔལ་སྡུག་བསྔལ་ཡོད་མི་འགྱུར། །དེ་དག་ཐམས་ཅད་བློ་འཐུན་འགྱུར་ཞིང་སླ་བའི་ལམ་ལ་མྱུར་བར་འགྱུར། །དེ་ན་
མི་རྣམས་དག་གི་སྒྲ་སྐད་རང་བཞིན་གཞན་ནི་འབྱུང་མི་འགྱུར། །མི་སྡུག་མི་རྟག་དེ་བཞིན་ཉིད་དང་སྡུག་བསྔལ་དེ་བཞིན་བདག་མེད་དང་། །ཞི་བ་སྟོང་ཉིད་མཚན་མེད་འཆི་མེད་མྱ་ངན་འདས་དང་བྱང་ཆུབ་ཞི། །སྒྲ་སྐད་དེ་དག་ཡང་དང་ཡང་འབྱུང་དེ་དག་རྣ་ལ་གནས་པར་འགྱུར། །
སྒྲ་གང་ཐོས་ནས་དེ་དག་འཁོར་བ་གྲོལ་གནས་ཐོབ་པར་མི་འགྱུར་བ། །དེ་འདྲའི་སྒྲ་དེ་ཤིང་ངམ་རྩིག་པ་དག་དང་གང་ནའང་ཡོད་མི་འགྱུར། །བླ་གབ་མེད་དང་མཁའ་དང་གཙུག་ལག་ཁང་དང་གནས་ཁང་རྣམས་ན་མེད། །དེ་ཚེ་སངས་རྒྱས་མཐུ་ཡིས་ཡན་ལག་བརྒྱད་དང་ལྡན་
པའི་སྒྲ་དབྱངས་འབྱུང་། །དེ་ཚེ་འདྲེས་པའི་ཉེས་པ་མེད་ཅིང་འདོད་ཆགས་དང་ནི་ཞེ་སྡང་དང་། །གཏི་མུག་དག་གིས་གཟིར་བ་རྣམས་ཀྱི་རྣར་ནི་དགེ་བའི་སྒྲ་གྲག་འགྱུར། །འགྲོ་བ་ཐམས་ཅད་འཁོར་བ་ལས་ནི་འབྱུང་ཞིང་མྱ་ངན་འདས་འགྲོར་འགྱུར། །དེ་ཚེ་ཞིང་མཆོག་སྟོང་པ་ཐམས་
ཅད་དགའ་བའི་སྐྱེ་བོས་གང་བར་འགྱུར། །སྐྱེས་བུ་དམ་པ་དེ་དག་བསྐལ་པ་ཁྲག་ཁྲིག་བྱང་ཆུབ་བརྩོན་བྱས་ནས། །དྲང་སྲོང་ཆེན་པོ་དེ་དག་སྨོན་ལམ་གྱིས་ནི་འབྱོར་པ་འདི་བརྩམས་ཏེ། །ཞིང་མཆོག་དེ་ན་སེམས་ཅན་ཚོགས་གང་ཡོད་པ་དེ་ཀུན་བདེ་གཤེགས་འགྱུར། །ཚངས་
པའི་སྨོན་ལམ་ཡངས་པ་རྒྱ་ཆེན་ཞི་བ་འགྲོ་བས་མཐོང་གྱུར་ན། །ཇི་ལྟར་སངས་རྒྱས་བཀའ་སྩལ་བཞིན་དུ་ཚངས་པའི་ཚོགས་ཀྱིས་བསྟེན་གྱུར་པ། །དེ་ལ་བསླབས་ནས་འགྲོ་བ་ཐམས་ཅད་ཐོགས་པ་མེད་པའི་འདྲེན་པར་འགྱུར། །དེ་དག་རྒྱལ་བ་ཐོབ་ནས་འགྲོ་བ་འདི་ཀུན་དངོས་པོ་མེད་ཅེས་སྟོན། །

དེ་ལྟ་བས་ན་ཚུལ་ཀུན་འཇུག་ལ་མཁས་པའི་སྤྱོད་པ་བསྟན་པར་གྱིས། །ཚངས་པ་ལུང་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་འོད་གསལ་གྱི་ལྷ་བྱེ་བ་ཕྲག་ལྔ་བཅུ་རྩ་བརྒྱད་ཀྱིས་ལྷ་མ་ཡིན་རྣམས་ནས་ཚངས་པའི་བར་གྱི་ལྷ་དེ་དག་གི་མཆོད་པ་
ཡང་མཐོང་། །ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་
སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔས་ཚུལ་ལ་འཇུག་པའི་སླད་དུ་གང་ལ་བསླབས་ནས་ཆོས་ཐམས་ཅད་སྣང་བར་འགྱུར་བའི་ཏིང་ངེ་འཛིན་ཆོས་ཐམས་ཅད་སྣང་བ་ཞེས་བགྱི་བ་མཆིས་ཏེ། དེས་ཆོས་
ཐམས་ཅད་ཀྱི་ཚུལ་ལ་འཇུག་པ་རྟོགས་པར་བགྱིད་དོ། །དེ་རྟོགས་པས་བསམ་གྱིས་མི་ཁྱབ་པའི་སྤོབས་པ་དང་། ཐོགས་པ་མ་མཆིས་པའི་སྤོབས་པ་དང་། བྱིན་གྱིས་བརླབས་པའི་སྤོབས་པ་དང་། སྣ་ཚོགས་ཀྱི་སྤོབས་པ་དང་། འཇམ་པའི་སྤོབས་པ་དང་། དགེ་བའི་སྤོབས་
པ་དང་། རིགས་པའི་སྤོབས་པ་དང་། གྲོལ་བའི་སྤོབས་པ་དང་། ཉེ་བར་གྱུར་བའི་སྤོབས་པ་དང་། ཟབ་པའི་སྤོབས་པ་དང་། ཕྲ་བའི་སྤོབས་པ་དང་། ཐུན་མོང་མ་ཡིན་པའི་སྤོབས་པ་ཅན་དུ་འགྱུར་ཏེ། སངས་རྒྱས་ཀྱི་སྤོབས་པ་ཡང་ཐོབ་པར་འགྱུར་རོ། །ཆོས་ཐམས་ཅད་
སྣང་བ་ཞེས་བགྱི་བའི་ཏིང་ངེ་འཛིན་དེ་གང་ཞེ་ན། བཅོམ་ལྡན་འདས་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ཀྱི་ཚུལ་ལ་འཇུག་པའི་སླད་དུ་རྣམ་པར་རྟོག་པ་དང་། རྣམ་པར་དཔྱོད་པ་ཐམས་ཅད་ཡིད་ལ་མི་བགྱིད་དེ། དེ་འདི་སྙམ་དུ་ཆོས་ཐམས་ཅད་
ནི་རྣམ་པར་རྟོག་པ་མེད་དེ་རྣམ་པར་རྟོག་པ་ཡོངས་སུ་ཆད་པའོ། །གང་རྣམ་པར་མི་རྟོག་པ་དེ་ནི་ཐམས་ཅད་དུ་སོང་བ་སྟེ། ཆོས་གང་ཡང་རྣམ་པར་རྟོག་པར་ནུས་པ་མ་མཆིས་ཏེ། དེ་ཅིའི་སླད་དུ་ཞེ་ན། རང་བཞིན་མ་མཆིས་པའི་སླད་དུ་སྟེ། ཆོས་གང་ལ་རང་བཞིན་མ་མཆིས་པ་

དེ་ལ་ཇི་ལྟར་རྣམ་པར་རྟོག་པར་འགྱུར་ཞེས་ཆོས་ཐམས་ཅད་ལ་རྣམ་པར་མི་རྟོག་པར་ཨ་ལ་འཇུག་པའི་སྤོབས་པ་རབ་ཏུ་ཐོབ་ཅིང་། དེ་དག་ཨའི་སྒོ་ལ་ཞུགས་པས་སྤོབས་པ་མཐའ་ཡས་པར་འགྱུར་ཏེ། ཨ་ཞེས་བགྱི་བ་ནི་མཐའ་ཡས་པ། ཀུན་ཏུ་མཐའ་ཡས་
པ། མ་བགྱིས་པ། མངོན་པར་འདུས་མ་བགྱིས་པ། ཡོངས་སུ་མ་གྲུབ་པ། དངོས་པོ་མ་མཆིས་པ། མི་གནས་པ། མི་གཡོ་བ། འདུ་བ་མ་མཆིས་པ། འཕྲོ་བ་མ་མཆིས་པ། རྟོག་པ་མ་མཆིས་པ། རྣམ་པར་རྟོག་པ་མ་མཆིས་པ། མ་བསྒྲུབས་པ། ཡོངས་སུ་ཐུག་
པ་མ་མཆིས་པ། མ་བརྟགས་པ། གཟུགས་མ་མཆིས་པ། བསྟན་དུ་མ་མཆིས་པ། བལྟར་མ་མཆིས་པ། མ་མཐོང་བ། བསམ་དུ་མ་མཆིས་པ། རྣམ་པར་མི་གནས་པ། མ་ཤེས་པ། རྣམ་པར་མ་ཤེས་པ། མ་སྨོས་བ། མ་བསྟན་པ། བསམ་གྱིས་མི་ཁྱབ་པ།
བསམ་དུ་མ་མཆིས་པ། སོང་བ་མ་མཆིས་པ། འོངས་པ་མ་མཆིས་པ། ཉེ་བ་མ་ལགས་པ། རིང་བ་མ་ལགས་པ། མ་བརྟགས་པ། གདགས་པ་མ་མཆིས་པའི་ཆོས་ཅན། མིང་མ་མཆིས་པ། ཐ་སྙད་མ་མཆིས་པ། གཉེན་པོ་མ་མཆིས་པ། སྒྲིབ་པ་མ་མཆིས་པ།
འཕོ་བ་མ་མཆིས་པ། འཁྲུག་པ་མ་མཆིས་པ། བརྟག་ཏུ་མ་མཆིས་པ། མི་ཟད་པ། གཉིས་སུ་མ་མཆིས་པ། མ་བྱུང་བ། བརྫུན་པ་མ་ལགས་པ། བདེན་པ་མ་ལགས་པ། ཤོ་བེ་མ་ལགས་པ། མ་སྐྱེས་པ། མ་འགགས་པ། སྦྱངས་པ་མ་ལགས་པ། སྦྱང་བར་
འོས་པ་མ་ལགས་པ། གདགས་སུ་མ་མཆིས་པ། མཚན་མས་མ་བསྐྱོད་པ། མ་བཟུང་བ། མ་བོར་བ། འཛིན་པ་མ་མཆིས་པ། ཡོངས་སུ་འཛིན་པ་མ་མཆིས་པ། གཏད་དུ་མ་མཆིས་པ། ཡོངས་སུ་གཏད་དུ་མ་མཆིས་པ། མ་བཏང་བ། ཡོངས་སུ་མ་བཏང་བ་སྟེ། ཨ་
ཞེས་བགྱི་བ་ནི་སུས་ཀྱང་མ་བགྱིས་པ། ཆོས་གང་གི་བྱེད་པ་པོ་ཡང་མ་ལགས་སོ། །ཨ་ནི་མ་སྐྱེས་པ་སྟེ། ཆོས་གང་ཡང་སྐྱེ་བར་བགྱིད་པ་མ་ལགས་སོ། །ཨ་ནི་མ་སྐྱེས་པ་སྟེ། ཆོས་གང་གི་སྐྱེ་བའི་རྒྱུར་འགྱུར་བའང་མ་ལགས་སོ། །ཨ་ནི་མ་འགགས་པ་སྟེ། ཆོས་

གང་གི་འགག་པའི་རྒྱུར་འགྱུར་བའང་མ་ལགས་སོ། །ཨ་ནི་མ་འགགས་པ་ཡང་མ་ལགས་པ་སྟེ། །ཆོས་གང་གི་མི་འགག་པའི་རྐྱེན་དུ་འགྱུར་བའང་མ་ལགས་སོ། །ཨ་ནི་གནས་པ་ཡང་མ་ལགས། མི་གནས་པ་ཡང་མ་ལགས། ཨ་ནི་བཏགས་པ་ཡང་མ་ལགས།
མ་བཏགས་པ་ཡང་མ་ལགས། ཨ་ནི་སྤངས་པ་ཡང་མ་ལགས། མ་སྤངས་པ་ཡང་མ་ལགས། ཨ་ནི་ཤེས་པ་ཡང་མ་ལགས། མ་ཤེས་པ་ཡང་མ་ལགས། ཨ་ནི་དམིགས་པ་ཡང་མ་ལགས། མ་དམིགས་པ་ཡང་མ་ལགས། ཨ་ནི་སྟོང་པ་ཡང་མ་ལགས། མི་སྟོང་
པ་ཡང་མ་ལགས། ཨ་ནི་དམིགས་སུ་མཆིས་པ་ཡང་མ་ལགས། དམིགས་སུ་མ་མཆིས་པ་ཡང་མ་ལགས། ཨ་ནི་མཚན་མ་ཡང་མ་ལགས། མཚན་མ་མ་མཆིས་པ་ཡང་མ་ལགས། ཨ་ནི་སྨོན་པ་ཡང་མ་ལགས། སྨོན་པ་མ་མཆིས་པ་ཡང་མ་ལགས་ཏེ། བཅོམ་ལྡན་
འདས་དེ་ལྟར་ན་ཆོས་ཐམས་ཅད་ཀྱི་མཚན་ཉིད་ནི་ཨའི་ཚུལ་ལོ། །ཆོས་ཐམས་ཅད་ནི་ཚུལ་གཅིག་པ་སྟེ་ཨའི་ཚུལ་ལོ། །ཆོས་ཐམས་ཅད་ནི་འགྲོ་བ་གཅིག་པ་སྟེ། ཨའི་འགྲོ་བའོ། །ཆོས་ཐམས་ཅད་ནི་འཇུག་པ་གཅིག་པ་སྟེ་ཨ་ལ་འཇུག་པའོ། །ཆོས་ཐམས་ཅད་ནི་
གདགས་པ་གཅིག་པ་སྟེ་ཨས་གདགས་པའོ། །ཆོས་ཐམས་ཅད་ནི་ཐ་སྙད་གཅིག་པ་སྟེ་ཨའི་ཐ་སྙད་དོ། །ཆོས་ཐམས་ཅད་ནི་བརྗོད་པ་གཅིག་པ་སྟེ་ཨས་བརྗོད་པའོ། །བཅོམ་ལྡན་འདས་ཆོས་གང་མ་སྐྱེས་པ་དེ་དག་ནི་རྟོགས་པར་བགྱི་བ་མ་ལགས་པའི་ཚུལ་གྱིས་རྟོགས་
པར་བགྱིའོ། །ཆོས་གང་མ་བྱུང་བ་དེ་དག་ནི་དངོས་པོ་མ་མཆིས་པའི་ཚུལ་གྱིས་རྟོགས་པར་བགྱིའོ། །ཆོས་གང་མ་གྲུབ་པ་དེ་དག་ནི་མ་གྲུབ་པའི་ཚུལ་གྱིས་རྟོགས་པར་བགྱིའོ། །ཆོས་གང་མ་འགགས་པ་དེ་དག་ནི་འགག་པ་མ་མཆིས་པའི་ཚུལ་གྱིས་རྟོགས་པར་བགྱིའོ། །
བཅོམ་ལྡན་འདས་ཆོས་གང་མངོན་པར་འདུ་མ་བགྱིས་པ་དེ་དག་ནི། འདུས་མ་བགྱིས་པའི་ཚུལ་གྱིས་རྟོགས་པར་བགྱི་སྟེ། དེ་ནི་ཆོས་ཐམས་ཅད་ཀྱི་ཚུལ་ལོ། །བཅོམ་ལྡན་འདས་ཆོས་གང་མ་སྐྱེས་པ་དེ་དག་ནི་ཐ་སྙད་ཇི་ལྟར་རྟོགས་པར་བགྱི་ཞེ་ན། འདི་ལྟ་སྟེ། དཔེར་ན་རྨི་ལམ་ན་

བྱ་བ་སྣ་ཚོགས་འབྱུང་བ་དེ་བཞིན་དུ་ཆོས་ཐམས་ཅད་བལྟ་བར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་གྱི་བྱ་བ་ནི་མ་སྐྱེས་པ། མ་བྱུང་བ། དངོས་པོ་མ་མཆིས་པ་སྟེ། འོན་ཀྱང་དེ་དག་ལ་གདགས་པར་གསུངས་སོ། །དེ་བཞིན་དུ་ཆོས་ཐམས་ཅད་ཀྱི་
བྱེད་པ་ཡང་འཚལ་བར་བགྱིའོ། །བཅོམ་ལྡན་འདས་འདི་ལྟ་སྟེ། དཔེར་ན་བྲག་ཅ་ལ་ཐ་སྙད་མཆིས་པ་དེ་བཞིན་དུ་ཆོས་ཐམས་ཅད་ཀྱི་ཐ་སྙད་ཀྱང་བལྟ་བར་བགྱིའོ། །བཅོམ་ལྡན་འདས་འདི་ལྟ་སྟེ། དཔེར་ན་སྒྱུ་མའི་སྐྱེས་བུ་ལ་གདགས་པ་མཆིས་པ་དེ་བཞིན་དུ་ཆོས་ཐམས་ཅད་
ཀྱི་གདགས་པར་བལྟའོ། །བཅོམ་ལྡན་འདས་འདི་ལྟ་སྟེ། དཔེར་ན་སྨིག་རྒྱུ་ལ་ཆབ་ཏུ་གདགས་པའི་ཐ་སྙད་མཆིས་པ་དེ་བཞིན་དུ་ཆོས་ཐམས་ཅད་ཀྱི་ཐ་སྙད་བལྟ་བར་བགྱིའོ། །བཅོམ་ལྡན་འདས་འདི་ལྟ་སྟེ། དཔེར་ན་མེ་ལོང་གི་དཀྱིལ་འཁོར་ལ་བུད་མེད་ཀྱི་གཟུགས་སམ།
སྐྱེས་པའི་གཟུགས་ཀྱི་ཐ་སྙད་མཆིས་པ་དེ་བཞིན་དུ་ཆོས་ཐམས་ཅད་ཀྱི་ཐ་སྙད་བལྟ་བར་བགྱི་སྟེ། བཅོམ་ལྡན་འདས་བྱིས་པ་རྣམས་དགའ་བར་བགྱི་བའི་སླད་དུ་རྨི་ལམ་གྱི་བྱ་བ་ཐ་སྙད་དུ་བགྱིའི་རྨི་ལམ་གྱི་བྱ་བ་དེ་དག་ནི་མ་མཆིས་སོ། །བཅོམ་ལྡན་འདས་དེ་བཞིན་དུ་བྱིས་པ་
དགའ་བར་བགྱི་བའི་སླད་དུ་མིག་ཡོར་དང་། སྨིག་རྒྱུ་དང་། བྲག་ཅའི་བྱ་བ་དག་ཀྱང་ཐ་སྙད་དུ་བགྱི་སྟེ། བྲག་ཅ་ལ་བྱ་བ་མ་མཆིས་སོ། །བཅོམ་ལྡན་འདས་དེ་ལྟར་བདག་ཅག་གིས་བཅོམ་ལྡན་འདས་ཀྱིས་གསུངས་པའི་དོན་འཚལ་ཏེ། བཅོམ་ལྡན་འདས་འདི་ནི་ཆོས་ཐམས་ཅད་
སྣང་བ་ཞེས་བགྱི་བའི་ཏིང་ངེ་འཛིན་ཏོ། །དེ་སྐད་ཅེས་གསོལ་ནས་འོད་གསལ་གྱི་ལྷ་རྣམས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། བདེ་གཤེགས་ཁྱོད་ཀྱིས་ཚུལ་གཅིག་མཁྱེན་ཏེ་འོན་ཀྱང་གཞན་དང་གཞན་དུ་གསུངས། །ཐུབ་པ་
འཇིག་རྟེན་མཁས་པའི་སྲས་རྣམས་རྣམ་པར་རོལ་པའང་དེ་བཞིན་ནོ། །དེ་ལ་འཇིག་རྟེན་བློ་མེད་བདག་ཏུ་ལྟ་བ་རྣམས་ཀྱིས་ཁོང་མི་ཆུད། །བདག་གི་དོན་དེ་ཕྱོགས་བཅུར་མ་མཆིས་བདག་ཉིད་ཀྱིས་ནི་འགྲོ་བ་སྟོང་། །སྒྱུ་མ་གསོག་དང་སྨིག་རྒྱུ་ཆུ་མ་མཆིས་ལ་ཆབ་ཀྱི་འདུ་ཤེས་

ཅན། །བྱིས་པ་དེ་དག་བློ་ལོག་དེ་བཞིན་འཁྲུལ་ཏེ་བདག་ཏུ་སྦྱོར་བར་བགྱིད། །དེ་དག་ཡང་དག་མ་འཚལ་མི་མཁས་གནས་མིན་དངོས་ལ་རྟེན་ཀྱང་འཆའ། །དེ་བཞིན་བྱིས་པའི་སྐྱེ་བོ་སྨིག་རྒྱུ་འདྲ་བའི་ཕུང་པོ་ཡོང་མ་འཚལ། །འཁོར་བར་དགའ་བ་ཟུག་རྔུས་ཟུག་ཅིང་སྡུག་བསྔལ་
དེ་ཡིས་དབང་པོ་བདས། །གང་ལ་མི་མཁས་ངེས་པར་སྡུག་བསྔལ་མྱོང་བ་དེ་ལ་དངོས་མ་མཆིས། །བློ་སྟོར་ཡིད་ནོར་སྡུག་བསྔལ་རྣམས་ལ་བདེ་བར་འདུ་ཤེས་ནོར་བ་ལ། །ཉོན་མོངས་འཇིགས་པ་ཆེ་དང་དུག་གསུམ་རྣམས་ཀྱང་རྗེས་སུ་འགྲོ་ཞིང་འབྲང་། །འདོད་ཆགས་ཞེ་སྡང་གཏི་
མུག་དུག་ཆེན་ཉོན་མོངས་མཚུངས་མེད་རྗེས་སུ་འབྲང་། །བློ་སྟོར་དེ་དག་སྡུག་བསྔལ་གང་གིས་སྡུག་བསྔལ་གྱུར་པའི་སྡུག་བསྔལ་བ། །དེ་རྣམས་དེ་དག་རྗེས་འབྲང་བྱིས་པ་མི་མཁས་གནོད་པའི་ཁུར་ཡང་ཁྱེར། །དེ་དག་རྒྱལ་བའི་ཚུལ་སྒོ་ཐར་པ་བགྱིད་པ་སྟོང་པ་འདི་ཐོས་ནས། །སྐྱེས་
བུ་ངན་པ་བློ་ཞན་དེ་དག་བསྟན་ངག་བདེན་པ་ཉིད་ཀྱིས་འཇིགས། །བདེ་གཤེགས་ཁྱོད་ཀྱིས་ཨ་ཡི་ཡི་གེ་ཚུལ་ཆེན་སྒོ་གཅིག་དེ་ལྟར་བསྟན། །དེ་ལ་ཡང་དག་བློ་ཅན་ས་ལས་ཤིང་སྐྱེ་བཞིན་དུ་ཡིད་བསྐྱེད་ཅིང་། །བདུད་རྣམས་བྱེ་བ་དཔུང་དང་བཅས་བཏུལ་བྱང་ཆུབ་ཞི་བ་མངོན་འཚང་རྒྱ། །
ཡན་ལག་བརྒྱད་པའི་གྲུ་བཅས་སྐྱེ་བོ་ཉོན་མོངས་རྒྱ་མཚོ་ཆེ་ལས་སྒྲོལ། །བདེ་བར་གཤེགས་པ་ཅང་མཁྱེན་དེས་པ་རྣམས་ནི་ཚུལ་གྱི་དམ་པ་དེས། །མྱུར་དུ་ཉོན་མོངས་དུག་བསལ་བྱང་ཆུབ་དཔག་ཡས་ཞི་བ་འཐོབ་འགྱུར་ཞིང་། །གྲོལ་ནས་དུག་མེད་གྱུར་པ་སྐྱེ་བོ་གཞན་མཐོང་ངེས་
པའི་མཁྱེན་བརྙེས་ནས། །ཕ་རོལ་མྱུར་ཕྱིན་དུག་མེད་བདེ་ཞིང་གདུག་པ་ཐམས་ཅད་འཇོམས་པར་མཛད། །བདེ་གཤེགས་ཐམས་ཅད་སྟོང་ཡང་བདག་ཏུ་རྟོག་རྣམས་ཚུལ་དང་ཚུལ་མིན་རྟོག །འགྲོ་བ་ཀུན་གྱི་ནང་ནས་མཁས་པ་ཚུལ་དང་ཚུལ་མིན་བསླབས་པ་དག །གྲོལ་ནས་
འགྲོ་བ་ཀུན་ལ་ཆགས་མེད་ཡིད་ཀྱིས་ངོ་བོ་ཉིད་ཀྱི་ཆོས། །དེ་ཡི་ཚུལ་མཐོང་ཚུལ་ལ་མཁས་པ་དེ་དག་མཐུ་ཆེན་མགོན་པོར་འགྱུར། །འཆིང་དང་བཅིངས་པ་མེད་ཅིང་བདེ་བར་གཤེགས་པ་ཆོས་རྣམས་ཆོས་ཉིད་མེད། །དེ་བཞིན་ཉིད་དང་མ་ནོར་དེ་བཞིན་ཉིད་ཞི་མི་འདག་ཉོན་མི་མོངས། །

ཉོན་མོངས་མཚན་མ་མེད་ཅིང་ཞི་བྱེད་མེད་ལ་ཉོན་མོངས་རྣམས་ཀྱང་མེད། །གང་གིས་ཚུལ་ཆེན་དམ་པ་འདི་མཐོང་དེ་དག་ཐམས་ཅད་མཁྱེན་དུ་འགྱུར། །གྲོལ་ཞིང་འགྲོལ་མཛད་ཞི་བའི་ཆོས་ཅན་ཞི་མཛད་ངོ་མཚར་འགྱུར་མི་མངའ། །བཅོམ་ལྡན་ལྷར་བཅས་འཇིག་རྟེན་
དཔྱིད་ཀྱི་སྨིག་རྒྱུ་བཞིན་དུ་འཁྲུལ་པ་སྟེ། །ཀུན་རྟོག་བདག་ཉིད་ཟིལ་གནོན་བདག་དང་གཞན་མེད་སྐྱེས་པ་བུད་མེད་རྟོག །འགྲོ་བ་སྡུག་བསྔལ་དེ་ན་སྣ་ཚོགས་ཀྱིས་བསྐྱེད་སེམས་ཀྱིས་སེམས་ཀྱང་ནི། །ལས་དང་འབྲས་བུ་མེད་ཅིང་དེ་མྱོང་གང་གྱུར་དེ་ཡང་མེད། །བདེ་གཤེགས་
དེ་ལྟར་སངས་རྒྱས་རྣམས་ཀྱི་སྤྱོད་ཡུལ་ཚུལ་ནི་བདག་ཅག་འཚལ། །དེས་ན་ད་ལྟར་བདེ་གཤེགས་ཞི་ཐུགས་དབང་པོ་ཞི་ཞིང་དེས་པ་སྟེ། །དགེ་བའི་བློ་མངའ་དག་གཙང་དྲི་མེད་ཆོས་ཀྱིས་རབ་ཏུ་མཆོད་པར་འགྱུར། །སངས་རྒྱས་འཇིག་རྟེན་འཕགས་པའི་གཙོ་བོ་བསྟོད་པས་
བསོད་ནམས་གང་བྱུང་བ། །ཇི་སྙེད་དཔལ་སྟུག་རྐང་གཉིས་གཙོ་བོས་རྣམ་སྨིན་ཡོངས་སུ་མཁྱེན་གྱུར་པའི། །བདག་ཅག་དགེ་རྩ་དེ་ཡིས་འགྲོ་བ་འདི་ཀུན་ཀུན་མཁྱེན་ཉིད་ཐོབ་ཤོག །བསོད་ནམས་འདི་ཀུན་འགྲོ་བ་ཀུན་གྱི་དོན་བསྔོ་ཀུན་ཀྱང་རྒྱལ་བར་ཤོག །དེ་ནས་
བཅོམ་ལྡན་འདས་ཀྱིས་འོད་གསལ་གྱི་ལྷ་དེ་དག་གི་ལྷག་པའི་བསམ་པ་ཡོངས་སུ་དག་པ་དང་། ཚུལ་གྱི་རྗེས་སུ་འགྲོ་བའི་སྤོབས་པ་ཕུན་སུམ་ཚོགས་པ་ཡང་ཐུགས་སུ་ཆུད་ལ་འཁོར་དེ་དག་གིས་ཀྱང་ཁྱད་པར་ཐོབ་པར་འགྱུར་བར་མཁྱེན་ནས་དེའི་ཚེ་འཛུམ་པ་མཛད་དོ། །
དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འཇིག་རྟེན་དོན་མཛད་རྣམ་པར་འདྲེན་མཆོག་ཀུན་མཁྱེན་ཐམས་ཅད་ཟིལ་གནོན་པ། །བདེ་གཤེགས་ཐུགས་རྗེ་ལྡན་རྣམས་རྒྱུ་མ་མཆིས་པར་བཞད་པ་མི་མཛད་ན། །རྒྱལ་བ་དཔལ་སྟུག་
རྐང་གཉིས་མཆོག་གིས་འཇིག་རྟེན་ཐུགས་བརྩེས་བཀའ་སྩལ་གསོལ། །འཇིག་རྟེན་འདས་ཁྱོད་ཅི་སླད་འཛུམ་མཛད་དེ་རྒྱུ་བདག་ཅག་རྣམས་ལ་གསུངས། །གཙོ་བོ་དེ་ཐོས་འགྲོ་བ་མཐའ་དག་ཡིད་ནི་རབ་ཏུ་དང་འགྱུར་ཞིང་། །རྣམ་པར་འདྲེན་པ་ངེས་འབྱུང་ལས་དང་འབྲས་བུ་

གཞལ་ཡས་བགྱིད་པར་འགྱུར། །དེས་ནི་ལྷ་མིར་བཅས་པའི་འཇིག་རྟེན་འཁོར་བར་སྡུག་བསྔལ་ཉམ་ཐག་འདི། །འཕགས་ལམ་ཡན་ལག་བརྒྱད་བསྟན་སྲིད་པའི་རྒྱ་མཚོ་འདི་ནས་སྒྲོལ་བར་འགྱུར། །དྲང་སྲོང་ཆེན་པོའི་གསུང་མཆོག་ཡན་ལག་བརྒྱད་ལྡན་བཟང་པོ་འདི་ཐོས་ནས། །
འགྲོ་བ་ཐམས་ཅད་སངས་རྒྱས་ཉིད་འཚལ་དགེ་ལ་བརྩོན་ཞིང་དགའ་བར་འགྱུར། །ཐེ་ཚོམ་བྲལ་གྱུར་རྣམ་དག་ཡིད་ཀྱིས་བརྩོན་འགྲུས་དྲག་པོའི་སྟོབས་བསྐྱེད་ཅིང་། །བདེ་བར་གཤེགས་པའི་བསྟན་པ་བཞིན་བགྱིད་ཁྱོད་དང་འཐུན་བྱུང་སྲས་སུ་འགྱུར། །འཁོར་རྣམས་འདི་དག་
བརྟེན་པ་གཞན་མ་མཆིས་པར་འདྲེན་པ་ཁྱོད་ཀྱི་ཞལ་དུ་ལྟ། །འགྲོ་བའི་རྩ་ལག་རྟོག་པ་ཡིད་གཉིས་བསལ་ཞིང་བཀའ་ལུང་སྩལ་དུ་གསོལ། །བཅོམ་ལྡན་འཇིག་རྟེན་འདི་དག་ཁྱོད་ཀྱི་ཞབས་འབྲིང་གནས་ཤིང་ཉན་པར་འཚལ། །གསུང་རབ་ལེགས་བརྗོད་བདུད་རྩིའི་ཆར་ཕོབ་
གང་དག་སྐོམ་པ་འཚལ་བར་འགྱུར། །འདྲེན་པ་ཆེན་པོ་ཁྱོད་ཀྱི་འཁོར་འདི་དག་ཅིང་སངས་རྒྱས་ཡོན་ཏན་འཚལ། །རིང་དུ་སོང་བའི་མ་ལ་བུ་ལྟ་བཞིན་དུ་ཁྱོད་ཀྱི་ཞལ་དུ་ལྟ། །བདེ་གཤེགས་ལྷ་རྣམས་ལུང་བསྟན་བཀའ་སྩོལ་བཞད་པའི་དོན་ཀྱང་བསྟན་དུ་གསོལ། །སྐྱོབ་པའི་
གསུང་མཆོག་ཐོས་ན་འཇིག་རྟེན་དོན་ཆེན་ཤིན་ཏུ་ཐོབ་པར་འགྱུར། །ཐུབ་པ་དེ་རིང་སུ་ཞིག་དགེ་བ་འཕེལ་ཞིང་གྲགས་པ་དོན་དུ་གཉེར། །སུ་ཞིག་འདྲེན་པའི་ཡོན་ཏན་གཏེར་རྙེད་འགྱུར་བ་བདག་ཅག་དེ་ཉན་འཚལ། །རྒྱལ་བའི་འཁོར་རྣམས་ཁྱོད་ཀྱིས་གསུངས་པ་དེ་དག་ཐོས་
ཤིང་དགར་གྱུར་ནས། །ཚུལ་འདི་སྟོན་ཅིང་ཏིང་འཛིན་སྟོབས་ལྡན་ཤེས་རབ་ལ་ཡང་སྒོམ་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ཁྱོད་ཀྱི་སྤོབས་པ་ལེགས་པར་དུས་ལྡན་སྐྱེས་པ་ཤིན་ཏུ་
ལེགས། །བདེ་གཤེགས་རྣམ་པར་སྤྲུལ་བཞིན་དེ་ལྟར་ཁྱོད་ཀྱི་བློ་གྲོས་འབྱུང་འགྱུར་ཞིང་། །སྤོབས་པ་ཆེ་འབྱུང་དེ་ཕྱིར་གང་དང་གང་དག་ཁྱོད་ཀྱིས་དྲིས་གྱུར་པ། །དེ་དག་ལུང་བསྟན་ངས་བཤད་ཀུན་ཀྱང་དབང་པོ་ཞི་བས་མཉན་པར་གྱིས། །འོད་གསལ་བ་ཡི་ལྷ་རྣམས་བློ་དག་

སྔོན་གྱི་རྒྱལ་བ་མཐོང་བ་སྟེ། །འཇིག་རྟེན་མགོན་མེད་ཡིད་ཅན་འདི་དག་མཐོང་ནས་བྱང་ཆུབ་ཡང་དག་ཞུགས། །བྱང་ཆུབ་ངེས་འབྱུང་ལམ་མཆོག་ཡང་དག་རྒྱལ་བས་སྤྱད་སྤྱོད་པ། །བྱང་ཆུབ་འགྲོ་འདོད་གང་ཚེ་སྟོན་མེད་ལམ་སྟོར་རྣམས་ལ་སྟོན་པར་འགྱུར། །
ཚུལ་གྱི་དམ་པ་ཤིན་ཏུ་གསལ་སྒྲ་ཐུན་མོང་མ་ཡིན་འདི་ཐོས་ན། །སངས་རྒྱས་ཡོན་ཏན་དོན་གཉེར་བློ་སྦྱངས་དེ་དག་བྱང་ཆུབ་ཞི་འཐོབ་འགྱུར། །དེ་དག་སྟོབས་སྐྱེས་ཚུལ་དང་ཚུལ་མིན་མཁས་ཤིང་བྱང་ཆུབ་ཡིད་ངེས་གྱུར། །བུ་སྐྱེས་མ་བཞིན་དགའ་བས་བྱང་ཆུབ་མཆོག་ཏུ་དེ་དག་
སྨོན་ལམ་བཏབ། །འོད་གསལ་ལྷ་རྣམས་འདི་དག་བྱང་ཆུབ་འདོད་ལ་ཚུལ་གྱི་སྒོ་བསྟན་ཏེ། །བསྐལ་པ་ཁྲག་ཁྲིག་བརྗོད་དུ་མེད་པར་ཕྲ་བའི་ཚུལ་འདི་བསྟན་བྱས་ནས། །སེམས་ཅན་སྐར་མའི་གྲངས་པས་ཆེས་མང་བ་དག་བྱང་ཆུབ་དགའ་བྱས་ཏེ། །དེ་ཡི་འོག་ཏུ་འཇིག་རྟེན་མཁས་
པ་རང་བྱུང་སྐྱོན་བྲལ་ཀུན་མཁྱེན་འགྱུར། །དེ་དག་ཞིང་མཆོག་བརྗོད་དུ་མེད་པ་ཞིང་རྣམས་བྱེ་བ་བརྒྱ་འགྲངས་པར། །ཡངས་ཤིང་ཤིན་ཏུ་དགའ་ལ་མཐའ་དག་བཀོད་པ་རྣམས་ཀྱིས་བརྒྱན་པ་སྟེ། །ཀུན་གྱི་ཞིང་དུ་ངན་སོང་རྣམས་དང་དེ་བཞིན་མི་ཁོམ་ཡོང་མི་འབྱུང་། །བདེ་
བར་གཤེགས་རྣམས་ཐུགས་བརྩེས་སེམས་ཅན་ཐམས་ཅད་རང་འབྱུང་མཛད་པར་འགྱུར། །ཞིང་རྣམས་དེ་དག་གང་ནའང་ཉན་ཐོས་ཐེག་པ་སྟོན་པར་མི་འགྱུར་ཏེ། །སེམས་ཅན་ཐམས་ཅད་རང་བྱུང་ཉིད་དུ་མངོན་ཕྱོགས་འཕྲོགས་པ་མེད་པར་འགྱུར། །དེ་ན་རང་བྱུང་
སངས་རྒྱས་ཉིད་སྟོན་མཛད་པ་འཇིག་རྟེན་མཁས་རྣམས་ཀྱི། །སྐུ་ཚེའི་ཚད་ནི་བསྐལ་པ་བྱེ་བ་བརྒྱ་འགྲངས་གང་གཱའི་བྱེ་སྙེད་འགྱུར། །རྟ་ཐུལ་འཇིག་རྟེན་ཁྲག་ཁྲིག་ཁམས་ཀྱི་ཉན་ཐོས་མྱ་ངན་བཟླས་པ་བས། །གང་ཡང་སྐྱེས་པའམ་བུད་མེད་གཅིག་ཅིག་བྱང་ཆུབ་ཡང་
དག་དགའ་བྱས་ན། །བསོད་ནམས་དེ་ལ་སྔ་མས་གྲངས་སམ་དཔེར་ཡང་བྱ་བར་མི་ནུས་སོ། །དེ་བས་བྱང་ཆུབ་ཞུགས་པའི་སྐྱེས་བུ་དམ་པ་བྱང་ཆུབ་དགའ་བར་གྱིས། །རྟ་ཐུལ་འདི་ལ་འདྲེན་པ་ཐམས་ཅད་མཁྱེན་པ་འབྱུང་བ་རྙེད་སླ་མིན། །དེ་ནི་ཨུ་དུམ་བ་རའི་མེ་ཏོག་འདྲ་ཞེས་

སངས་རྒྱས་མཐའ་ཡས་བློ་མངའས་གསུངས། །དེ་ཕྱིར་བླ་ན་མེད་པའི་ཞི་བདེ་བྱང་ཆུབ་མི་གང་འདོད་པ་ཡིས། །ཤིན་ཏུ་བློ་ཕྲ་སྟེན་བཟང་མཁྱེན་པ་ཚུལ་མཁས་འདྲེན་ལ་བསྟེན་པར་བྱ། །དེ་བཞིན་གཤེགས་ཀྱི་ཞལ་ནས་དོན་བྱེད་གསུང་དག་དེ་འདྲ་ཐོས་གྱུར་ནས། །འཁོར་རྣམས་ཐམས་
ཅད་ཡི་རངས་མཆོག་ཏུ་དགའ་ཞིང་ཡང་དག་དགའ་བར་འགྱུར། །ཁྲག་ཁྲིག་ལྷ་རྣམས་ནམ་མཁར་འཁོད་ནས་གོས་ཀྱི་གཡབ་མོ་འདོར་བར་བྱེད། །དགའ་ནས་སངས་རྒྱས་དབང་ཕྱུག་ཁྱོད་ལ་ཕྱག་འཚལ་ལོ་ཞེས་སྒྲ་ཡང་ཕྱུང་། །ཞི་བ་ཐུགས་ཞི་སྐྱེ་བོ་ཉོན་མོངས་རྒོད་པས་རྒོད་གྱུར་ཞི་
བར་མཛད། །བདུད་རྩི་སྟོན་ཅིང་དུག་གསུམ་ཞི་མཛད་སེམས་ཅན་དུག་ནི་བསྐྱུག་ཏུ་གསོལ། །ཁྱོད་ཀྱི་ཡེ་ཤེས་ཐོས་ནས་སྐྱེ་དགུའི་དུག་མེད་འགྱུར་ཞིང་དགྲ་མེད་འགྱུར། །སྡུག་བསྔལ་རྣམས་ཀྱིས་འདྲེན་ལས་ཚུལ་ཐོས་མི་བཟད་སྲིད་པའི་རྒྱུད་ལས་གྲོལ། །འོད་གསལ་བ་ལུང་བསྟན་
པའི་ལེའུ་སྟེ་ཉི་ཤུ་རྩ་གཅིག་པའོ།། །།བམ་པོ་བརྒྱད་པ། དེ་ནས་དགེ་རྒྱས་རིས་ཀྱི་ལྷ་ཁྲག་ཁྲིག་ཕྲག་བཅུ་གཉིས་ཀྱིས་ལྷ་མ་ཡིན་རྣམས་ནས་འོད་གསལ་བའི་ལྷའི་བར་དག་གི་མཆོད་པ་ཡང་མཐོང་། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་
ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་བདག་ཅག་ཚུལ་ཕུན་སུམ་ཚོགས་པར་གྱུར་པ་ཡང་བརྗོད་ཅིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཐམས་ཅད་ལ་བདེ་བར་འགྲོ་བ་ཞེས་བགྱི་བའི་ཏིང་ངེ་འཛིན་མཆིས་ཏེ། ཏིང་ངེ་
འཛིན་དེ་ཐོབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་པའི་དངོས་པོ་ཐམས་ཅད་ལ་བདེ་བའི་ཚོར་བ་ཤ་སྟག་མྱོང་བར་འགྱུར་ཞིང་སྡུག་བསྔལ་གྱི་ཚོར་བ་མི་མྱོང་ལ། སྡུག་བསྔལ་ཡང་མ་ལགས་བདེ་བ་ཡང་མ་ལགས་པ་ཡང་མི་མྱོང་སྟེ། སེམས་ཅན་དམྱལ་བའི་གནོད་
པས་གནོད་པར་བགྱིས་ཀྱང་བདེ་བའི་འདུ་ཤེས་ཉེ་བར་གནས་པ་དང་། མིའི་གནོད་པས་གནོད་པར་བགྱིས་ཀྱང་བདེ་བའི་འདུ་ཤེས་ཉེ་བར་གནས་པ་དང་། ལག་པ་བཅད་དམ། རྐང་པ་བཅད་དམ། རྐ་ལག་བཅད་དམ། རྣ་བ་འམ། སྣ་འམ། རྣ་བ་དང་སྣ་གཏུབས་ཀྱང་བདེ་བའི་འདུ་

ཤེས་ཉེ་བར་གནས་པར་འགྱུར་བ་དང་། སྦ་ལྕག་གིས་གཞུས་སམ། སྤ་ལྕག་བྱེད་ཚལ་ལམ། ལྕག་གིས་གཞུས་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་བ་དང་། བཙོན་རར་བཅུག་གམ། ལྕགས་སྒྲོག་དང་། ཤིང་སྒྲོག་ཏུ་བཅུག་གམ།
བཙོན་ཆ་དམ་པོ་ལ་རྒྱས་བཏབ་བམ། བྱིས་པའི་གཙུག་ཕུད་ལྟར་བཅིངས་སམ། དུགས་ཀྱི་སྣོད་ལྟར་བདུགས་སམ། བུ་རམ་ཤིང་བརྡུངས་པ་ལྟར་བརྡུངས་སམ། འདམ་བུ་གཞོམ་པ་ལྟར་བཅོམ་འམ། འབྲུ་མར་གྱི་མར་མེ་ལྟར་འབར་བར་བྱས་སམ། མར་གྱི་མར་མེ་
དང་ཞོ་བསྐོལ་བ་ལྟར་འབར་བར་བྱས་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་བ་དང་། མེའི་ནང་དུ་བོར་རམ། སེང་གེའི་ཁར་བསྟབས་སམ། སྟག་གི་ཁར་བསྟབས་སམ། སྐམ་རིལ་བྱ་བ་ལྟར་གྲིལ་ཏམ། བྱི་བོའི་ཆད་པ་ལྟ་བུས་བཅད་དམ། ཉེས་བྱུང་བ་
བསྒྲགས་པ་ལྟར་བསྒྲགས་སམ། ཀར་ཥ་པ་ཎ་ཙམ་དུ་གཏུབས་སམ། འབྲས་ཕྱེ་བཙོ་བ་ལྟར་བཙོས་སམ། གླང་པོ་ཆེ་རྣམས་ཀྱིས་བཅོམ་ཡང་བདེ་བའི་འདུ་ཤེས་ཉེ་བར་གནས་པར་འགྱུར་བ་དང་། མིག་ཕྱུང་ངམ། གསལ་ཤིང་གི་རྩེ་མོ་ལ་བཞག་གམ། གསད་པའི་གནས་
སུ་ཁྲིད་དེ་རྣམ་པ་ཐམས་ཅད་དུ་མོག་གཅོད་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་ཏེ། བདེ་བ་ཡང་མ་ལགས། མི་བདེ་བ་ཡང་མ་ལགས་པའི་འདུ་ཤེས་རྣམ་པ་ཐམས་ཅད་དུ་མི་འབྱུང་ངོ་། །དེ་ཅིའི་སླད་དུ་ཞེ་ན། འདི་ལྟར་བྱང་ཆུབ་སེམས་དཔའ་སེམས་དཔའ་
ཆེན་པོ་དེས་ཡུན་རིང་པོ་ནས་སྤྱད་པ་སྤྱོད་པའི་ཚེ་སྨོན་ལམ་འདི་ལྟར་བཏབ་སྟེ། གང་གིས་བདག་ལ་ཁ་ཟས་བྱིན་པ་དེ་དག་ཉེ་བར་ཞི་བའི་བདེ་བ་ཐོབ་པར་གྱུར་ཅིག། གང་གིས་བདག་ལ་སྐོམ་བླུད་པ་དང་། གང་གིས་བདག་ལ་རིམ་གྲོ་བྱས་པ་དང་། བཀུར་སྟི་བྱས་པ་དང་།
བསྟི་སྟང་བྱས་པ་དང་། མཆོད་པ་བྱས་པ་དེ་དག་ཐམས་ཅད་ཀྱང་ཉེ་བར་ཞི་བའི་བདེ་བ་ཐོབ་པར་གྱུར་ཅིག། གང་ཡང་བདག་ལ་གཤེ་བ་དང་། མི་བདེ་བར་བྱེད་པ་དང་། བརྡེག་པ་དང་། མཚོན་གྱིས་འདེབས་པ་དང་། རྣམ་པ་ཐམས་ཅད་དུ་སྲོག་གཅོད་པའི་བར་དུ་བྱེད་པ་དེ་དག་ཐམས་

ཅད་ཀྱང་བྱང་ཆུབ་ཀྱི་བདེ་བ་ཐོབ་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་ཅེས་སྨོན་ལམ་བཏབ་སྟེ། དེ་ཡིད་ལ་བྱ་བ་དེ་དག་དང་ལྡན་ཞིང་དེ་དེ་ལྟ་བུའི་ལས་དང་། དེ་ལྟ་བུའི་སྨོན་ལམ་དང་ལྡན་པས་སེམས་ཅན་ཐམས་ཅད་ཀྱི་
རྗེས་སུ་སོང་བའི་བདེ་བའི་འདུ་ཤེས་ལ་སྟེན་ཅིང་སྙེན་ལ་སྒོམ་ཞིང་མང་དུ་བྱེད་དེ། དེ་ལས་དེའི་རྣམ་པར་སྨིན་པས་ཆོས་ཐམས་ཅད་ལ་བདེ་བར་འགྲོ་བའི་ཏིང་ངེ་འཛིན་རབ་ཏུ་འཐོབ་བོ། །གང་གི་ཚེ་བྱང་ཆུབ་སེམས་དཔས་ཆོས་ཐམས་ཅད་ལ་བདེ་བར་འགྲོ་བའི་ཏིང་ངེ་འཛིན་ཐོབ་པར་
གྱུར་པ་དེའི་ཚེ། བདུད་ཀྱི་ལས་ཐམས་ཅད་ཀྱིས་མི་འཕྲོགས་ཤིང་མི་འཁྲུགས་པར་འགྱུར་ཏེ། དེའི་ཚེ་འདི་ལྟར་ཚེ་ལ་དབང་བ་དང་། སྐྱེ་བ་ལ་དབང་བ་དང་། ལས་ལ་དབང་བ་དང་། རྣམ་པར་རྟོག་པ་ལ་དབང་བ་དང་། ཡོ་བྱད་ལ་དབང་བ་སྟེ། དབང་ལྔ་ཐོབ་པར་རིག་པར་
བགྱིའོ། །དེ་འཚལ་ན་ཚེ་རྗེས་མ་ཐག་ཏུ་བྱང་ཆུབ་མངོན་པར་རྫོགས་པར་འཚང་རྒྱའོ། །དེ་འཚལ་ན་བསྐལ་པ་གྲངས་མ་མཆིས་པར་གནས་སོ། །དེ་ཅིའི་སླད་དུ་ཞེ་ན། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཐེག་པ་ཆེན་པོ་ལ་ཡང་དག་པར་ཞུགས་ཤིང་
བྱང་ཆུབ་སེམས་དཔའ་སྒྲུབ་པ་དང་། བྱང་ཆུབ་སེམས་དཔའ་ཡོངས་སུ་འཛིན་པ་དང་། ངན་འགྲོ་ཐམས་ཅད་རབ་ཏུ་བསལ་བ་དང་། འགྲོ་བ་དྲུག་པོ་ཀུན་ཏུ་སྐྱེས་པ་དང་། བྱང་ཆུབ་སེམས་དཔའི་བསླབ་པ་ཐམས་ཅད་ལ་བསླབས་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པས་
ཡོངས་སུ་བཟུང་བ་དང་། ཐབས་མཁས་པ་དང་ལྡན་པ་དང་། བདུད་ཀྱི་ལས་ལས་རྣམ་པར་རྒྱལ་བ་དང་། ཆོས་ཐམས་ཅད་ཁོང་དུ་ཆུད་པར་རིག་པར་བགྱི་བའི་སླད་དུ་སྟེ། བཅོམ་ལྡན་འདས་གང་གིས་བྱང་ཆུབ་སེམས་དཔའ་ཆོས་ཐམས་ཅད་ལ་ངེས་པའི་རྟོགས་པ་ཐོབ་པར་
འགྱུར་བ་ཐམས་ཅད་ནི་དེ་བཞིན་གཤེགས་པའི་མཐུའོ། །དེ་ནས་དགེ་རྒྱས་ཀྱི་ལྷ་རྣམས་ཀྱིས་ཏིང་ངེ་འཛིན་འདི་བརྗོད་ནས་དེའི་ཚེ་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། དགེ་རྒྱས་ལྷ་ཚོགས་འདི་དག་ཐམས་ཅད་ཆོས་ལ་མཐར་ཐུག་གྱུར་པ་སྟེ། །

སྟོན་པ་དབང་པོ་ཞི་ཞིང་ཞི་བ་མཁྱེན་ལ་མགོ་བོས་སྐྱབས་སུ་མཆིས། །དེ་དག་མཁས་པས་མཆོད་པའི་སངས་རྒྱས་དོན་མཁྱེན་འཁོར་བ་རྒལ་གྱུར་པ། །ཐུབ་པ་མི་ཡི་འདྲེན་པའི་ཚུལ་མཁས་རྒྱལ་བ་འདྲེན་པ་འདྲེན་ལ་བསྟོད། །འདི་ན་རང་བཞིན་ངེས་པའི་
ཐུབ་ཆོས་གནས་པ་གང་ནའང་མ་མཆིས་ཏེ། །སྒྱུ་མའི་མཁན་པོས་སྒྱུ་མ་ཇི་བཞིན་ཁྱོད་ཀྱིས་ཐུབ་པ་ལེགས་པར་མཁྱེན། །ཡན་ལག་སྣ་ཚོགས་སྒྲ་བརྙན་རི་ཁྲོད་འབྱུང་བ་མཁས་པས་རྟོགས་པ་ལྟར། །དེ་བཞིན་བདེ་གཤེགས་དྲང་སྲོང་ཁྱོད་ཀྱིས་ལྷ་མིར་བཅས་པའི་འཇིག་རྟེན་
གཟིགས། །འདི་ན་སེམས་ཅན་སྲོག་དང་ཤེད་བུ་གསོ་བ་གང་ཟག་མ་མཆིས་ཏེ། །མི་མཆོག་ཁྱོད་ཀྱིས་འདུ་ཤེས་རྣམ་པར་བཤིག་ཅིང་སྟོང་པར་རྣམ་གཞག་ལ། །རྐང་གཉིས་དམ་པ་སེམས་ཅན་གཙོ་བོ་བྱམས་པ་གཞལ་ཡས་སྒོམ་པའང་མཛད། །རྒྱལ་བ་སངས་རྒྱས་དགོངས་
པ་འདི་ནི་འགྲོ་བ་ཀུན་གྱིས་རྟོགས་པར་དཀའ། །བྱམས་པ་དགེ་སྒོམ་སེམས་ཅན་དམིགས་པ་ཡིན་ཞེས་འདྲེན་པས་བཀའ་སྩལ་ལ། །སེམས་ཅན་རྣམ་པར་བཤིག་ཅིང་འགྲོ་བ་ཐམས་ཅད་སེམས་ཅན་མེད་པར་མཁྱེན། །དེ་ལྟར་རྐང་གཉིས་དམ་པ་རྙོག་པ་མི་མངའ་ཐེ་ཚོམ་བྲལ་
ཐུགས་ལྡན། །དེས་ན་བདེ་གཤེགས་རྣམ་བརྟགས་བློ་མངའ་མཆོད་འོས་ཁྱོད་ལ་མཆོད་པ་འཚལ། །བདེ་བར་གཤེགས་པ་སྡུག་བསྔལ་ཕྱོགས་བཅུར་གནས་པ་ཀུན་ཏུ་མི་དམིགས་ཀྱང་། །ལྷ་ཡི་ལྷར་གྱུར་ཁྱོད་ཀྱིས་སེམས་ཅན་རྣམས་ལ་སྙིང་རྗེ་བགྱི་བ་གསུངས། །དེ་ལྟར་
རྒྱལ་མཆོག་བདག་ཅག་རྒྱལ་བའི་དགོངས་པ་ཇི་བཞིན་ཀུན་ཏུ་འཚལ། །དེས་ན་རྐང་གཉིས་གཙོ་བོ་མི་མཆོག་མཆོད་འོས་ཁྱོད་ལ་མཆོད་པ་འཚལ། །ཐུབ་པ་ཁྱོད་ཀྱིས་སེམས་ཅན་དང་ནི་བསལ་བགྱི་སྡུག་བསྔལ་མི་གཟིགས་ལ། །དགྱེས་པ་སྐྱེས་ནས་རབ་ཏུ་དགྱེས་པའི་ཐུགས་ཀྱིས་
མི་དགྱེས་རྣམ་པར་བསལ། །དེ་ལྟར་སངས་རྒྱས་ཚུལ་ནི་བསམ་གྱིས་མི་ཁྱབ་ཚུལ་འདི་ཇི་བཞིན་འཚལ། །དེས་ན་མི་མཆོག་ཁྱོད་ལ་མཆོད་ནས་བརྙེས་པའི་འབྲས་བུ་ཐོབ་པར་བགྱི། །སྐྱོན་བྲལ་ཁྱོད་ཀྱིས་འགྲོ་བ་ཀུན་ཏུ་སྡུག་བསྔལ་མྱ་ངན་འདས་མ་དམིགས། །འོན་ཀྱང་འཁོར་བར་

སེམས་ཅན་གཟིགས་ཤིང་དོན་མཛད་སྟོབས་དང་ལྡན་པ་བསྐྱེད། །སེམས་ཅན་སྡུག་བསྔལ་འགྲོ་དང་ཐུབ་དང་མྱ་ངན་འདས་དང་གནས་མ་མཆིས། །སངས་རྒྱས་ཚུལ་འདི་རྟོགས་ནས་ཐུབ་པ་མཆོད་འོས་ཁྱོད་ལ་མཆོད་པ་འཚལ། །འདྲེན་པ་ཚད་མེད་བཞི་པོ་གཟིགས་ཤིང་དེ་ཡང་
གཉིས་སུ་མེད་པར་བསྟན། །གང་ཞིག་དེར་དུལ་མ་གཟིགས་གང་ཡང་ཚད་མེད་གནས་པ་དེ་མ་གཟིགས། །ཐུབ་པས་བག་མེད་གང་ཡང་མ་གཟིགས་བག་ཡོད་མི་ཡང་མ་གཟིགས་ཏེ། །སངས་རྒྱས་ཚུལ་འདི་འཚལ་ནས་ཐུབ་པ་སྟོན་པ་ཁྱོད་ལ་མཆོད་པ་བགྱིས། །ཐུབ་
པ་སྐུ་ནི་རྣམ་པར་སྤངས་པས་སྐུ་བཙལ་མཛད་ན་མ་བརྙེས་ཀྱང་། །དེ་ལྟར་འདྲེན་པ་དྲན་པ་མ་གསུངས་མ