Kinh tạng Tây Tạng (Kangyur Đại Học) — 042_དཀོན་བརྩེགས།_ང

ཏུ་བྱུང་བ་ནི་ཡོངས་སུ་འཛིན་པ་ལས་རྣམ་པར་གྲོལ་བའོ། །ཁྱིམ་ན་གནས་པ་ནི་ཉེས་པར་སྤྱོད་པའི་གཞིའོ། །རབ་ཏུ་བྱུང་བ་ནི་ལེགས་པར་
སྤྱོད་པའི་གཞིའོ། །ཁྱིམ་ན་གནས་པ་ནི་རྡུལ་གྱི་ནང་ན་གནས་པའོ། །རབ་ཏུ་བྱུང་བ་ནི་རྡུལ་གྱི་ནང་ན་མི་གནས་པའོ། །ཁྱིམ་ན་གནས་པ་ནི་འདོད་པའི་འདམ་དུ་བྱིང་བའོ། །རབ་ཏུ་བྱུང་བ་ནི་འདོད་པའི་འདམ་ནས་འབྱིན་པའོ། །ཁྱིམ་ན་གནས་པ་ནི་བྱིས་པའི་སྐྱེ་བོའི་ཞུགས་པའོ། །རབ་ཏུ་བྱུང་བ་ནི་སྐྱེ་
བོ་མཁས་པའི་ཞུགས་པའོ། །ཁྱིམ་ན་གནས་པ་ནི་འཚོ་བ་སྦྱང་བར་དཀའ་བའོ། །རབ་ཏུ་བྱུང་བ་ནི་འཚོ་བ་སྦྱང་བར་སླ་བའོ། །ཁྱིམ་ན་གནས་པ་ནི་འགྲན་ཟླ་མང་བའོ། །རབ་ཏུ་བྱུང་བ་ནི་འགྲན་ཟླ་མེད་པའོ། །ཁྱིམ་ན་གནས་པ་ནི་ཕོངས་པ་མང་བའོ། །རབ་ཏུ་བྱུང་བ་ནི་ཕོངས་པ་མེད་པའོ། །ཁྱིམ་
ན་གནས་པ་ནི་མྱ་ངན་གྱི་གནས་སོ། །རབ་ཏུ་བྱུང་བ་ནི་དགའ་བའོ། །ཁྱིམ་ན་གནས་པ་ནི་ངན་སོང་གི་ཐེམ་སྐས་སོ། །རབ་ཏུ་བྱུང་བ་ནི་མངོན་པར་མཐོ་བའི་ཐེམ་སྐས་སོ། ཁྱིམ་ན་གནས་པ་ནི་བཅིངས་པའོ། །རབ་ཏུ་བྱུང་བ་ནི་ཐར་པའོ། །ཁྱིམ་ན་གནས་པ་ནི་འཇིགས་པ་དང་བཅས་པའོ། །རབ་ཏུ་
བྱུང་བ་ནི་འཇིགས་པ་མེད་པའོ། །ཁྱིམ་ན་གནས་པ་ནི་ཆད་པ་དང་བཅས་པར་སྤྱོད་པའོ། །རབ་ཏུ་བྱུང་བ་ནི་ཆད་པ་མེད་པར་སྤྱོད་པའོ། །ཁྱིམ་ན་གནས་པ་ནི་མཚོན་ཆ་སྤྱོད་པ་དང་བཅས་པའོ། །རབ་ཏུ་བྱུང་བ་ནི་མཚོན་ཆ་མི་སྤྱོད་པའོ། །ཁྱིམ་ན་གནས་པ་ནི་ཡོངས་སུ་གདུང་བ་དང་བཅས་པའོ། །

རབ་ཏུ་བྱུང་བ་ནི་ཡོངས་སུ་གདུང་བ་མེད་པའོ། །ཁྱིམ་ན་གནས་པ་ནི་ཀུན་དུ་ཚོལ་བས་སྡུག་བསྔལ་བའོ། །རབ་ཏུ་བྱུང་བ་ནི་ཀུན་དུ་ཚོལ་བ་མེད་པས་བདེ་བའོ། །ཁྱིམ་ན་གནས་པ་ནི་རྒོད་པའོ། །རབ་ཏུ་བྱུང་བ་ནི་ཉེ་བར་ཞི་བའོ། །ཁྱིམ་ན་གནས་པ་ནི་འཇུངས་པའོ། །རབ་ཏུ་བྱུང་བ་
ནི་མ་འཇུངས་པའོ། །ཁྱིམ་ན་གནས་པ་ནི་ཞན་པའོ། །རབ་ཏུ་བྱུང་བ་ནི་མི་ཞན་པའོ། །ཁྱིམ་ན་གནས་པ་ནི་མ་རབས་སོ། །རབ་ཏུ་བྱུང་བ་ནི་ཡ་རབས་སོ། །ཁྱིམ་ན་གནས་པ་ནི་ཀུན་དུ་འབར་བའོ། །རབ་ཏུ་བྱུང་བ་ནི་འབར་བ་ཞི་བའོ། །ཁྱིམ་ན་གནས་པ་ནི་གཞན་གྱི་དོན་ཏོ། །རབ་ཏུ་བྱུང་བ་ནི་གཉི་གའི་དོན་
ཏོ། །ཁྱིམ་ན་གནས་པ་ནི་དོན་ཆུང་བའོ། །རབ་ཏུ་བྱུང་བ་ནི་དོན་ཆེ་བའོ། །ཁྱིམ་ན་གནས་པ་ནི་གཟི་ཆུང་བའོ། །རབ་ཏུ་བྱུང་བ་ནི་གཟི་ཆེ་བའོ། །ཁྱིམ་ན་གནས་པ་ནི་ཀུན་ནས་ཉོན་མོངས་པས་སྡུག་བསྔལ་བའོ། །རབ་ཏུ་བྱུང་བ་ནི་མངོན་པར་བྱུང་བས་བདེ་བའོ། །ཁྱིམ་ན་གནས་པ་ནི་ཚེར་མ་སྐྱེད་པའོ། །
རབ་ཏུ་བྱུང་བ་ནི་ཚེར་མ་བསལ་བའོ། །ཁྱིམ་ན་གནས་པ་ནི་ཆོས་ཆུང་ངུ་དང་ལྡན་པའོ། །རབ་ཏུ་བྱུང་བ་ནི་ཆོས་ཆེན་པོ་དང་ལྡན་པའོ། །ཁྱིམ་ན་གནས་པ་ནི་འདུལ་བ་མ་ཡིན་པ་བྱེད་པའོ། །རབ་ཏུ་བྱུང་བ་ནི་འདུལ་བ་བྱེད་པའོ། །ཁྱིམ་ན་གནས་པ་ནི་འགྱོད་པའོ། །རབ་ཏུ་བྱུང་བ་ནི་མི་འགྱོད་པའོ། །
ཁྱིམ་ན་གནས་པ་ནི་མཆི་མ་དང་ནུ་ཞོ་དང་ཁྲག་གི་རྒྱ་མཚོ་འཕེལ་བའོ། །རབ་ཏུ་བྱུང་བ་ནི་མཆི་མ་དང་ནུ་ཞོ་དང་ཁྲག་གི་རྒྱ་མཚོ་སྐེམས་པའོ། །ཁྱིམ་ན་གནས་པ་ནི་སངས་རྒྱས་དང་། རང་སངས་རྒྱས་དང་། ཉན་ཐོས་ཀྱིས་སྨད་པའོ། །རབ་ཏུ་བྱུང་བ་ནི་སངས་རྒྱས་དང་། རང་སངས་རྒྱས་དང་།
ཉན་ཐོས་ཀྱིས་བསྔགས་པའོ། །ཁྱིམ་ན་གནས་པ་ནི་ཆོག་མི་ཤེས་པའོ། །རབ་ཏུ་བྱུང་བ་ནི་ཆོག་ཤེས་པའོ། །ཁྱིམ་ན་གནས་པ་ནི་བདུད་དགའ་བའོ། །རབ་ཏུ་བྱུང་བ་ནི་བདུད་མྱ་ངན་བྱེད་པའོ། །ཁྱིམ་ན་གནས་པ་ནི་རྙོག་པ་ཆེན་པོའི་མཐར་ཐུག་པར་འགྱུར་རོ། །རབ་ཏུ་བྱུང་བ་ནི་རྙོག་པ་ཐམས་
ཅད་ཉེ་བར་ཞི་བའི་མཐར་ཐུག་པའོ། །ཁྱིམ་ན་གནས་པ་ནི་ཀུན་དུ་མི་ཐུལ་བའོ། །རབ་ཏུ་བྱུང་བ་ནི་ཀུན་དུ་ཐུལ་བའོ། །ཁྱིམ་ན་གནས་པ་ནི་བྲན་གྱི་ལས་བྱེད་པའོ། །རབ་ཏུ་བྱུང་བ་ནི་རྗེ་བོ་བྱེད་པའོ། །ཁྱིམ་ན་གནས་པ་ནི་འཁོར་བའི་མཐར་འགྱུར་བའོ། །རབ་ཏུ་བྱུང་བ་ནི་མྱ་ངན་ལས་

འདས་པའི་མཐར་འགྱུར་བའོ། །ཁྱིམ་ན་གནས་པ་ནི་གཡང་ས་པའོ། །རབ་ཏུ་བྱུང་བ་ནི་གཡང་ས་ལས་འདས་པའོ། །ཁྱིམ་ན་གནས་པ་ནི་མུན་ནག་གོ། །རབ་ཏུ་བྱུང་བ་ནི་སྣང་བའོ། །ཁྱིམ་ན་གནས་པ་ནི་དབང་པོ་ལ་དབང་མི་བྱེད་པའོ། །རབ་ཏུ་བྱུང་བ་ནི་དབང་པོ་ལ་དབང་བྱེད་པའོ། །
ཁྱིམ་ན་གནས་པ་ནི་དྲེགས་པ་སྐྱེད་པའོ། །རབ་ཏུ་བྱུང་བ་ནི་དྲེགས་པ་འདུལ་བའོ། །ཁྱིམ་ན་གནས་པ་ནི་དམ་པ་མ་ཡིན་པ་སྐྱེད་པའོ། །རབ་ཏུ་བྱུང་བ་ནི་དམ་པ་སྐྱེད་པའོ། །ཁྱིམ་ན་གནས་པ་ནི་ངན་སོང་སྐྱེད་པའོ། །རབ་ཏུ་བྱུང་བ་ནི་བདེ་འགྲོ་སྐྱེད་པའོ། །ཁྱིམ་ན་གནས་པ་ནི་བལྟ་བར་མི་
འོས་པའོ། །རབ་ཏུ་བྱུང་བ་ནི་བལྟ་བར་འོས་པའོ། །ཁྱིམ་ན་གནས་པ་ནི་རྩོམ་པ་ཆེན་པོའོ། །རབ་ཏུ་བྱུང་བ་ནི་རྩོམ་པ་ཆུང་བའོ། །ཁྱིམ་ན་གནས་པ་ནི་འབྲས་བུ་ཆུང་བའོ། །རབ་ཏུ་བྱུང་བ་ནི་འབྲས་བུ་ཆེ་བའོ། ཁྱིམ་ན་གནས་པ་ནི་གྱ་གྱུ་ཅན་ནོ། །རབ་ཏུ་བྱུང་བ་ནི་དྲང་བའོ། །ཁྱིམ་ན་གནས་
པ་ནི་ཡིད་མི་བདེ་བ་མང་བའོ། །རབ་ཏུ་བྱུང་བ་ནི་ཡིད་བདེ་བ་དང་ལྡན་པའོ། །ཁྱིམ་ན་གནས་པ་ནི་ཟུག་རྔུ་དང་བཅས་པའོ། །རབ་ཏུ་བྱུང་བ་ནི་ཟུག་རྔུ་ཕྱུང་བའོ། །ཁྱིམ་ན་གནས་པ་ནི་ན་བའོ། །རབ་ཏུ་བྱུང་བ་ནི་ནད་མེད་པར་བྱེད་པའོ། །ཁྱིམ་ན་གནས་པ་ནི་ཆོས་རྒས་པར་བྱེད་པའོ། །རབ་ཏུ་བྱུང་
བ་ནི་ཆོས་དར་བར་བྱེད་པའོ། །ཁྱིམ་ན་གནས་པ་ནི་བག་མེད་པར་བྱེད་པའོ། །རབ་ཏུ་བྱུང་བ་ནི་བག་ཡོད་པར་བྱེད་པའོ། །ཁྱིམ་ན་གནས་པ་ནི་འཆལ་པའི་ཤེས་རབ་ཀྱི་འབྱུང་གནས་སོ། །རབ་ཏུ་བྱུང་བ་ནི་ཤེས་རབ་འཕེལ་བའོ། །ཁྱིམ་ན་གནས་པ་ནི་ཤེས་རབ་ཀྱི་བར་ཆད་བྱེད་པའོ། །རབ་ཏུ་
བྱུང་བ་ནི་ཤེས་རབ་ཀྱི་སྲོག་བྱེད་པའོ། །ཁྱིམ་ན་གནས་པ་ནི་སླུ་བར་སོ་སོར་ཉེ་བར་གནས་པའོ། །རབ་ཏུ་བྱུང་བ་ནི་མི་སླུ་བར་སོ་སོར་ཉེ་བར་གནས་པའོ། །ཁྱིམ་ན་གནས་པ་ནི་བྱེད་པ་མང་བའོ། །རབ་ཏུ་བྱུང་བ་ནི་བྱེད་པ་ཉུང་བའོ། །ཁྱིམ་ན་གནས་པ་ནི་དུག་དང་བཅས་པའི་བཏུང་བ་ལྟ་བུའོ། །
རབ་ཏུ་བྱུང་བ་ནི་བདུད་རྩི་དང་བཅས་པའི་བཏུང་བ་ལྟ་བུའོ། །ཁྱིམ་ན་གནས་པ་ནི་གནོད་པ་ཅན་ནོ། །རབ་ཏུ་བྱུང་བ་ནི་གནོད་པ་མེད་པའོ། །ཁྱིམ་ན་གནས་པ་ནི་འདྲེས་པའོ། །རབ་ཏུ་བྱུང་བ་ནི་མ་འདྲེས་པའོ། །ཁྱིམ་ན་གནས་པ་ནི་ཀིམ་པ་ཀའི་འབྲས་བུ་ལྟ་བུའོ། །རབ་ཏུ་བྱུང་བ་ནི་བདུད་རྩིའི་

འབྲས་བུ་ལྟ་བུའོ། །ཁྱིམ་ན་གནས་པ་ནི་མི་སྡུག་པ་དང་ཕྲད་པར་བྱེད་པའོ། །རབ་ཏུ་བྱུང་བ་ནི་མི་སྡུག་པ་དང་འབྲལ་བར་བྱེད་པའོ། །ཁྱིམ་ན་གནས་པ་ནི་སྡུག་པ་དང་འབྲལ་བར་བྱེད་པའོ། །རབ་ཏུ་བྱུང་བ་ནི་སྡུག་པ་དང་ཕྲད་པར་བྱེད་པའོ། །ཁྱིམ་ན་གནས་པ་ནི་གཏི་
མུག་གིས་ལྕི་བའོ། །རབ་ཏུ་བྱུང་བ་ནི་ཡེ་ཤེས་ཀྱིས་ཡང་བའོ། །ཁྱིམ་ན་གནས་པ་ནི་སྦྱོར་བ་རྣམ་པར་འཇིག་པའོ། །རབ་ཏུ་བྱུང་བ་ནི་སྦྱོར་བ་རྣམ་པར་སྦྱོང་བའོ། །ཁྱིམ་ན་གནས་པ་ནི་བསམ་པ་རྣམ་པར་འཇིག་པའོ། །རབ་ཏུ་བྱུང་བ་ནི་བསམ་པ་རྣམ་པར་སྦྱོང་བའོ། །ཁྱིམ་ན་གནས་པ་
ནི་ལྷག་པའི་བསམ་པ་རྣམ་པར་འཇིག་པའོ། །རབ་ཏུ་བྱུང་བ་ནི་ལྷག་པའི་བསམ་པ་རྣམ་པར་སྦྱོང་བའོ། །ཁྱིམ་ན་གནས་པ་ནི་དཔུང་གཉེན་མེད་པར་བྱེད་པའོ། །རབ་ཏུ་བྱུང་བ་ནི་དཔུང་གཉེན་བྱེད་པའོ། །ཁྱིམ་ན་གནས་པ་ནི་མགོན་མེད་པར་བྱེད་པའོ། །རབ་ཏུ་བྱུང་བ་ནི་མགོན་བྱེད་པའོ། །ཁྱིམ་
ན་གནས་པ་ནི་གནས་མེད་པར་བྱེད་པའོ། །རབ་ཏུ་བྱུང་བ་ནི་གནས་བྱེད་པའོ། །ཁྱིམ་ན་གནས་པ་ནི་སྐྱབས་མེད་པར་བྱེད་པའོ། །རབ་ཏུ་བྱུང་བ་ནི་སྐྱབས་བྱེད་པའོ། །ཁྱིམ་ན་གནས་པ་ནི་གནོད་སེམས་མང་བའོ། །རབ་ཏུ་བྱུང་བ་ནི་བྱམས་པ་མང་བའོ། །ཁྱིམ་ན་གནས་པ་ནི་ཁུར་ཁྱེར་བའོ། །རབ་ཏུ་བྱུང་
བ་ནི་ཁུར་བོར་བའོ། །ཁྱིམ་ན་གནས་པ་ནི་ཐུག་པ་མེད་པར་སྤྱོད་པའོ། །རབ་ཏུ་བྱུང་བ་ནི་སྤྱོད་པ་ཐམས་ཅད་མཐར་འབྱིན་པའོ། །ཁྱིམ་ན་གནས་པ་ནི་ཁ་ན་མ་ཐོ་བ་དང་བཅས་པའོ། །རབ་ཏུ་བྱུང་བ་ནི་ཁ་ན་མ་ཐོ་བ་མེད་པའོ། །ཁྱིམ་ན་གནས་པ་ནི་གདུང་བར་འགྱུར་བའོ། །རབ་ཏུ་བྱུང་བ་ནི་གདུང་བར་
མི་འགྱུར་བའོ། ཁྱིམ་ན་གནས་པ་ནི་ཉོན་མོངས་པ་དང་བཅས་པའོ། །རབ་ཏུ་བྱུང་བ་ནི་ཉོན་མོངས་པ་མེད་པའོ། །ཁྱིམ་ན་གནས་པ་ནི་ཟང་ཟིང་དང་བཅས་པའོ། །རབ་ཏུ་བྱུང་བ་ནི་ཟང་ཟིང་མེད་པའོ། །ཁྱིམ་ན་གནས་པ་ནི་མངོན་པའི་ང་རྒྱལ་དང་བཅས་པའོ། །རབ་ཏུ་བྱུང་བ་ནི་མངོན་པའི་ང་རྒྱལ་
མེད་པའོ། །ཁྱིམ་ན་གནས་པ་ནི་ནོར་སྙིང་པོར་བྱེད་པའོ། །རབ་ཏུ་བྱུང་བ་ནི་ཡོན་ཏན་སྙིང་པོར་བྱེད་པའོ། །ཁྱིམ་ན་གནས་པ་ནི་ཡམས་ཀྱི་ནད་དོ། །རབ་ཏུ་བྱུང་བ་ནི་ཡམས་ཀྱི་ནད་ཞི་བར་བྱེད་པའོ། །ཁྱིམ་ན་གནས་པ་ནི་འབྲི་བའོ། །རབ་ཏུ་བྱུང་བ་ནི་འཕེལ་བའོ། །ཁྱིམ་ན་གནས་པ་ནི་རྙེད་པར་

སླ་བའོ། །རབ་ཏུ་བྱུང་བ་ནི་བསྐལ་པ་བརྒྱ་སྟོང་དུ་ཡང་རྙེད་པར་དཀའ་བའོ། །ཁྱིམ་ན་གནས་པ་ནི་བྱ་སླ་བའོ། །རབ་ཏུ་བྱུང་བ་ནི་བྱ་དཀའ་བའོ། །ཁྱིམ་ན་གནས་པ་ནི་རྒྱུན་ཕྱོགས་སུ་འགྲོ་བའོ། །རབ་ཏུ་བྱུང་བ་ནི་རྒྱུན་ལས་བཟློག་སྟེ་འགྲོ་བའོ། །ཁྱིམ་ན་གནས་པ་ནི་ཆུ་བོའོ། །རབ་ཏུ་བྱུང་བ་ནི་གཟིངས་
སོ། ཁྱིམ་ན་གནས་པ་ནི་ཉོན་མོངས་པའི་ཆུ་བོའོ། །རབ་ཏུ་བྱུང་བ་ནི་ཟམ་པའོ། །ཁྱིམ་ན་གནས་པ་ནི་ཚུ་རོལ་གྱི་ངོགས་སོ། །རབ་ཏུ་བྱུང་བ་ནི་ཕ་རོལ་གྱི་ངོགས་སོ། །ཁྱིམ་ན་གནས་པ་ནི་གླགས་པའོ། །རབ་ཏུ་བྱུང་བ་ནི་མ་གླགས་པའོ། །ཁྱིམ་ན་གནས་པ་ནི་ཤར་གཉེར་བའོ། །རབ་ཏུ་བྱུང་བ་
ནི་ཤར་གཉེར་བ་ཞིའོ། །ཁྱིམ་ན་གནས་པ་ནི་རྒྱལ་པོའི་ནན་ཏུར་བཞིན་བྱེད་པའོ། །རབ་ཏུ་བྱུང་བ་ནི་སངས་རྒྱས་ཀྱི་བསྟན་པ་བཞིན་བྱེད་པའོ། །ཁྱིམ་ན་གནས་པ་ནི་ཉམ་ཐག་པའོ། །རབ་ཏུ་བྱུང་བ་ནི་ཉམ་ཐག་པ་མེད་པའོ། །ཁྱིམ་ན་གནས་པ་ནི་སྡུག་བསྔལ་འབྱུང་བའོ། །རབ་ཏུ་བྱུང་བ་ནི་
བདེ་བ་འབྱུང་བའོ། ཁྱིམ་ན་གནས་པ་ནི་སྒང་བུའོ། །རབ་ཏུ་བྱུང་བ་ནི་ཟབ་མོའོ། ཁྱིམ་ན་གནས་པ་ནི་གྲོགས་མོད་པའོ། །རབ་ཏུ་བྱུང་བ་ནི་གྲོགས་དཀོན་པའོ། ཁྱིམ་ན་གནས་པ་ནི་ཆུང་མ་དང་འགྲོགས་པའོ། །རབ་ཏུ་བྱུང་བ་ནི་མོས་པ་དང་འགྲོགས་པའོ། །ཁྱིམ་ན་གནས་པ་ནི་རྒྱ་དང་འདྲ་
བའོ། །རབ་ཏུ་བྱུང་བ་ནི་རྒྱ་དྲལ་བའོ། །ཁྱིམ་ན་གནས་པ་ནི་གཞན་ལ་གནོད་པ་བྱེད་པ་གཅེས་སུ་རྩི་བའོ། །རབ་ཏུ་བྱུང་བ་ནི་གཞན་ལ་ཕན་འདོགས་པ་གཅེས་སུ་རྩི་བའོ། །ཁྱིམ་ན་གནས་པ་ནི་ཟང་ཟིང་གི་སྦྱིན་པ་ཆེད་ཆེར་འཛིན་པའོ། །རབ་ཏུ་བྱུང་བ་ནི་ཆོས་ཀྱི་སྦྱིན་པ་ཆེད་ཆེར་འཛིན་པའོ། །ཁྱིམ་ན་
གནས་པ་ནི་བདུད་ཀྱི་རྒྱལ་མཚན་འཛིན་པའོ། །རབ་ཏུ་བྱུང་བ་ནི་སངས་རྒྱས་ཀྱི་རྒྱལ་མཚན་འཛིན་པའོ། ཁྱིམ་ན་གནས་པ་ནི་སྡུག་བསྔལ་གྱི་གཞིའོ། །རབ་ཏུ་བྱུང་བ་ནི་སྡུག་བསྔལ་གྱི་གཞི་ཡང་དག་པར་འཇོམས་པའོ། ཁྱིམ་ན་གནས་པ་ནི་ཕུང་པོ་རྣམ་པར་འཕེལ་བའོ། །རབ་ཏུ་བྱུང་བ་ནི་ཕུང་
པོ་ཐམས་ཅད་ངེས་པར་འདོར་བའོ། ཁྱིམ་ན་གནས་པ་ནི་ཐིབས་པོའོ། །རབ་ཏུ་བྱུང་བ་ནི་ཐིབས་པོ་ལས་ཐར་པ་ཡིན་ཏེ། ཁྱིམ་བདག་དེ་ལྟར་བྱང་ཆུབ་སེམས་དཔའ་ཁྱིམ་པས་རབ་ཏུ་བྱུང་བ་ལ་གཞོལ་བར་བྱའོ། །དེས་ཡང་འདི་ལྟར་གལ་ཏེ་བདག་གིས་ཉི་མ་དུ་མར་གང་གཱའི་ཀླུང་གི་བྱེ་མ་སྙེད་

ཀྱི་མཆོད་སྦྱིན་བྱས་ཏེ་བདོག་པ་ཐམས་ཅད་ཡོངས་སུ་བཏང་བ་བྱས་པ་དེ་དག་ཐམས་ཅད་ནི་ལེགས་པར་བཤད་པའི་ཆོས་འདུལ་བ་ལ་རབ་ཏུ་འབྱུང་བའི་སེམས་ཀྱིས་ཟིལ་གྱིས་ནོན་ཏོ་སྙམ་དུ་སེམས་བསྐྱེད་པར་བྱའོ། །དེ་ཅིའི་ཕྱིར་ཞེ་ན། ཁྱིམ་བདག་མ་དད་པ་དང་། བྱས་པ་མི་གཟོ་
བ་དང་། ཆོམ་རྐུན་དང་། གདོལ་པ་དང་། རྒྱལ་པོའི་བཀྲབས་པ་དང་། བློན་པོ་ཡང་སྦྱིན་པ་སྦྱིན་པར་བྱེད་དེ། ཟང་ཟིང་གི་སྦྱིན་པ་ནི་དམན་པ་ཡིན་ནོ། ཁྱིམ་བདག་བྱང་ཆུབ་སེམས་དཔའ་ཁྱིམ་པས་འདི་ལྟར་བདག་གིས་སྦྱིན་པའི་སྙིང་པོས་ཆོག་པར་མི་བྱའི་བདག་གིས་ནི་ཚུལ་ཁྲིམས་
དང་། ཐོས་པ་དང་། ཚངས་པར་སྤྱོད་པ་ཡང་སྙིང་པོར་བྱའོ་སྙམ་དུ་སེམས་བསྐྱེད་པར་བྱའོ། །དེ་གཙུག་ལག་ཁང་དུ་འོངས་ན་དེ་བཞིན་གཤེགས་པའི་མཚན་མ་ལ་ཕྱག་བྱའོ། །དེ་དག་ལ་ཕྱག་བྱས་ནས་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། བདག་ཀྱང་འདི་འདྲ་བར་
མཆོད་པའི་འོས་སུ་འགྱུར་བར་བྱ་བ་དང་། སེམས་ཅན་ལ་སྙིང་བརྩེ་བའི་ཕྱིར་བདག་གི་ལུས་ཀྱང་བྱིན་གྱིས་བརླབ་པ་དང་། བདག་ཀྱང་ཇི་ལྟར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སངས་རྒྱས་ཀྱི་བྱ་བ་བྱས་ཏེ་དེ་བཞིན་གཤེགས་པ་ཡོངས་སུ་མྱ་
ངན་ལས་འདས་པས་ཡོངས་སུ་མྱ་ངན་ལས་འདའ་བར་བྱ་བ་དེ་ལྟར་བསླབ་ཅིང་དེ་ལྟར་ནན་ཏན་བྱའོ་སྙམ་པའོ། །དེ་གཙུག་ལག་ཁང་དུ་ཞུགས་ན་དེས་དགེ་སློང་མང་དུ་ཐོས་པ་ནི་གང་། དགེ་སློང་ཆོས་བརྗོད་པ་ནི་གང་། དགེ་སློང་འདུལ་བ་འཛིན་པ་ནི་གང་། དགེ་སློང་མ་མོ་འཛིན་པ་ནི་གང་། དགེ་སློང་
བྱང་ཆུབ་སེམས་དཔའི་སྡེ་སྣོད་འཛིན་པ་ནི་གང་། དགེ་སློང་དགོན་པ་བ་ནི་གང་། བསོད་སྙོམས་པ་ནི་གང་། ཕྱག་དར་ཁྲོད་པ་དང་། འདོད་པ་ཆུང་བ་དང་། ཆོག་ཤེས་པ་དང་། རབ་ཏུ་དབེན་པ་ནི་གང་། དགེ་སློང་རྣལ་འབྱོར་སྤྱོད་པ་ནི་གང་། དགེ་སློང་བསམ་གཏན་པ་ནི་གང་། དགེ་སློང་བྱང་ཆུབ་སེམས་
དཔའི་ཐེག་པ་བ་ནི་གང་། དགེ་སློང་ལག་གི་བླ་ནི་གང་། དགེ་སློང་ཞལ་ཏ་བྱེད་པ་ནི་གང་། དགེ་སློང་དཔོན་སྣ་བྱེད་པ་ནི་གང་ཡིན་ཞེས་དགེ་སློང་གི་དགེ་འདུན་གྱི་སྤྱོད་པ་ཐམས་ཅད་ལ་རྣམ་པར་བརྟག་པར་བྱའོ། །དེས་དེ་དག་གི་སྤྱོད་པ་ལ་རྣམ་པར་བརྟགས་ནས་ཐམས་ཅད་དང་འཐུན་པར་འཇུག་པའི་

ཕྱིར་ཅི་རིགས་པར་འཐུན་པར་གནས་པར་བྱའོ། །དེས་གཞན་གྱི་མདུན་དུ་སྤྱོད་པ་གཞན་བསྟན་པར་མི་བྱའོ། །དེ་ཅིའི་ཕྱིར་ཞེ་ན། གཙུག་ལག་ཁང་དུ་ནི་གྲོང་གི་གསང་ངོ་། །གྲོང་དུ་ནི་གཙུག་ལག་ཁང་གི་གསང་ངོ་། །ངག་གི་ལས་ཤིན་དུ་བསྡམས་པ་དེས་གྲོང་དུ་གཙུག་ལག་ཁང་གི་གསང་དང་།
གཙུག་ལག་ཁང་དུ་གྲོང་གི་གསང་བསྙད་པར་མི་བྱའོ། །དགེ་སློང་གང་ཆོས་གོས་མ་ཚང་བའམ། ལྷུང་བཟེད་མ་ཚང་བའམ། ན་བའི་གསོས་སྨན་དང་ཡོ་བྱད་མ་ཚང་བ་དེ་ལ་དེས་ཇི་ལྟར་གཞན་དག་གཤེ་བའམ། ཁྲོ་བསྐྱེད་པར་མི་འགྱུར་བ་དེ་ལྟར་སྦྱིན་པར་བྱའོ། །དེ་ཅིའི་ཕྱིར་ཞེ་ན། ལྷ་དང་
མི་རྣམས་ཀྱི་ཀུན་དུ་སྦྱོར་བ་ནི་ཕྲག་དོག་དང་སེར་སྣ་ཡིན་ཏེ། དེ་བས་ན་སོ་སོའི་སྐྱེ་བོ་རྣམས་ལ་ནི་རབ་ཏུ་བསྲུང་བར་བྱའི་དགྲ་བཅོམ་པ་ལ་ནི་མ་ཡིན་ནོ། །དེ་ཅིའི་ཕྱིར་ཞེ་ན། སོ་སོའི་སྐྱེ་བོ་རྣམས་ལས་ནི་ཉེས་པ་སྐྱེའི་དགྲ་བཅོམ་པ་རྣམས་ལས་ནི་མ་ཡིན་ནོ། །དེ་བས་ན་མང་དུ་ཐོས་པ་ལ་བསྟེན་ཏེ་ཐོས་པ་
ཡོངས་སུ་བཙལ་བ་ལ་བརྩོན་པར་བྱའོ། །ཆོས་བརྗོད་པ་ལ་བསྟེན་ཏེ་རྣམ་པར་ངེས་པའི་གཏམ་ལ་བརྩོན་པར་བྱའོ། །འདུལ་བ་འཛིན་པ་ལ་བསྟེན་ཏེ་ཉེས་པ་འདུལ་བ་དང་། ཉོན་མོངས་པ་འདུལ་བ་ལ་བརྩོན་པར་བྱའོ། །མ་མོ་འཛིན་པ་ལ་བསྟེན་ཏེ་ལུས་དང་ངག་དང་ཡིད་སྡོམ་པ་ལ་བརྩོན་པར་བྱའོ། །
བྱང་ཆུབ་སེམས་དཔའི་སྡེ་སྣོད་འཛིན་པ་ལ་བསྟེན་ཏེ་ཕ་རོལ་དུ་ཕྱིན་པ་དྲུག་དང་། ཐབས་ལ་མཁས་པ་ལ་བརྩོན་པར་བྱའོ། །དགོན་པ་བ་ལ་བསྟེན་ཏེ་རབ་ཏུ་དབེན་པ་ལ་བརྩོན་པར་བྱའོ། །བསོད་སྙོམས་པ་ལ་བསྟེན་ཏེ་རྙེད་པ་དང་། མ་རྙེད་པ་དང་། གྲགས་པ་དང་། མ་གྲགས་པ་དང་། བསྟོད་པ་
དང་། སྨད་པ་དང་། བདེ་བ་དང་། སྡུག་བསྔལ་གྱིས་མི་སྒུལ་བ་ལ་བརྩོན་པར་བྱའོ། །ཕྱག་དར་ཁྲོད་པ་ལ་བསྟེན་ཏེ་ཆོས་གོས་ཀྱིས་ཚ་བ་དང་། རྒྱན་ལ་མངོན་པར་མི་དགའ་བ་ལ་བརྩོན་པར་བྱའོ། །འདོད་པ་ཆུང་བ་ལ་བསྟེན་ཏེ་འདོད་པ་ཆུང་བ་ལ་བརྩོན་པར་བྱའོ། །ཆོག་ཤེས་པ་ལ་བསྟེན་ཏེ་ཆོག་
ཤེས་པ་ལ་བརྩོན་པར་བྱའོ། །རབ་ཏུ་དབེན་པ་ལ་བསྟེན་ཏེ་རབ་ཏུ་དབེན་པ་ལ་བརྩོན་པར་བྱའོ། །རྣལ་འབྱོར་སྤྱོད་པ་ལ་བསྟེན་ཏེ་ནང་གི་སེམས་ཀྱི་ཞི་གནས་དང་ལྷག་མཐོང་ཚུལ་བཞིན་ཡིད་ལ་བྱེད་པ་ནང་དུ་ཡང་དག་འཇོག་པ་ལ་བརྩོན་པར་བྱའོ། །བསམ་གཏན་པ་ལ་བསྟེན་ཏེ་ཉོན་མོངས་པ་

བསལ་བ་ལ་བརྩོན་པར་བྱའོ། །བྱང་ཆུབ་སེམས་དཔའི་ཐེག་པ་པ་ལ་བསྟེན་ཏེ་སྦྱིན་པ་དང་། སྙན་པར་སྨྲ་བ་དང་། དོན་སྤྱོད་པ་དང་། དོན་འཐུན་པ་སྟེ་བསྡུ་བའི་དངོས་པོ་བཞི་པོ་རྣམས་ལ་བརྩོན་པར་བྱའོ། །ལག་གི་བླ་ལ་བསྟེན་དེ་ཇི་ལྟར་དངོས་པོ་ཡོངས་སུ་གཏོང་བར་སྤྲོ་བ་ལ་
བརྩོན་པར་བྱའོ། །ཞལ་ཏ་བྱེད་པ་ལ་བསྟེན་ཏེ་བྱའོ་ཅོག་བྱེད་པ་ལ་བརྩོན་པར་བྱའོ། །དཔོན་སྣ་བྱེད་པ་ལ་བསྟེན་ཏེ་ཡིད་ཡོངས་སུ་མི་སྐྱོ་བར་བྱའོ། །ཁྱིམ་བདག་དེ་ལྟར་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པས་སྤྱོད་པ་ཇི་ལྟ་བ་བཞིན་དུ་རྗེས་སུ་འཇུག་པ་ལ་བརྩོན་པར་བྱའོ། །དགེ་སློང་གང་ཡང་
དག་པར་སྐྱོན་མེད་པ་ལ་མ་ཞུགས་པ་ཆོས་གོས་ཀྱིས་སྡུད་པའམ། ལྷུང་བཟེད་ཀྱིས་སྡུད་པ་བྱེད་པ་ན། དགེ་སློང་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་གཞུག་གོ །དེ་ཅིའི་ཕྱིར་ཞེ་ན། གང་ཟང་ཟིང་གི་སྡུད་པས་ཆོས་ཀྱི་བསྡུ་བ་བསྐྱེད་པའི་གནས་ཡོད་པའི་ཕྱིར་རོ། །ཁྱིམ་བདག་
དེ་ལྟར་བྱང་ཆུབ་སེམས་དཔའ་ཁྱིམ་པས་དགེ་སྦྱོང་གི་སྤྱོད་པ་ལ་མཁས་པར་བྱའོ། །དེས་ཡང་དགེ་སློང་མི་འདུམ་པ་རྣམས་ཀྱི་བསྡུམས་ཀྱང་བྱའོ། །དམ་པའི་ཆོས་རབ་ཏུ་རྣམ་པར་འཇིག་པ་ན་དེས་སྲོག་ཀྱང་ཡོངས་སུ་གཏང་ཞིང་དམ་པའི་ཆོས་ཀུན་དུ་གཟུང་བར་བྱའོ། ཁྱིམ་བདག་གང་བྱང་ཆུབ་
སེམས་དཔའ་ཁྱིམ་པས་དགེ་སློང་ན་བ་ཞིག་མཐོང་ན་དེས་རང་གི་ཤ་དང་ཁྲག་གིས་ཀྱང་དགེ་སློང་དེ་ནད་དེ་ལས་གསོ་བར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་གཏོང་ཞིང་སྦྱིན་པས་གཞན་དག་འགྲོན་དུ་གཉེར་བར་བྱ་སྟེ། བྱིན་ནས་ཀྱང་འགྱོད་པའི་སེམས་མི་བསྐྱེད་དོ། །དེ་དགེ་
བའི་རྩ་བ་ཐམས་ཅད་ཀྱི་སྔོན་དུ་ཡང་བྱང་ཆུབ་ཀྱི་སེམས་འགྲོ་བར་བྱའོ། །ཁྱིམ་བདག་དེ་ལྟར་ན་བྱང་ཆུབ་སེམས་དཔའ་ཁྱིམ་པ་ཁྱིམ་གྱི་ས་ལ་གནས་པ་དེ་བཞིན་གཤེགས་པ་རྣམས་ཀྱི་བཀའ་བཞིན་བྱེད་པ་ཡིན་ཏེ། བྱང་ཆུབ་ཀྱི་ཕྱོགས་ཀྱི་ཆོས་རྣམས་ལས་མི་ཉམས། ཡོངས་སུ་མི་ཉམས་སོ། །
འདི་ལ་ཡང་ཁ་ན་མ་ཐོ་བའི་ལས་མེད་ཅིང་གཞན་དུ་ཡང་བྱེ་བྲག་ཏུ་འགྲོ་བར་འགྱུར་རོ། །དེ་ནས་ཁྱིམ་བདག་དྲག་ཤུལ་ཅན་དང་། ཁྱིམ་བདག་གཞན་དེ་དག་གིས་མགྲིན་གཅིག་ཏུ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཇི་ཙམ་དུ་

བཅོམ་ལྡན་འདས་ཀྱིས་ཁྱིམ་ན་གནས་པའི་ཉེས་པ་དང་། སྡོམ་པ་དང་། སྤྱོད་པ་དང་རབ་ཏུ་བྱུང་བའི་ཡོན་ཏན་གྱི་ཕན་ཡོན་འདི་དག་ལེགས་པར་གསུངས་པ་ནི་ངོ་མཚར་ཏོ། །བཅོམ་ལྡན་འདས་བདག་ཅག་ཀྱང་འདིར་ཁྱིམ་ན་གནས་པ་ལ་ཉེས་པའི་སྐྱོན་ཆགས་པ་ཇི་སྙེད་པ་དང་། རབ་ཏུ་བྱུང་བའི་ཡོན་
ཏན་དང་ཕན་ཡོན་མཐའ་ཡས་པ་མངོན་སུམ་དུ་གྱུར་ན། བཅོམ་ལྡན་འདས་བདག་ཅག་རྣམས་རབ་ཏུ་ཕྱུང་སྟེ། བདེ་བར་གཤེགས་པས་ལེགས་པར་བཤད་པའི་ཆོས་འདུལ་བ་ལ་བསྙེན་པར་རྫོགས་པར་མཛད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཁྱིམ་བདག་དེ་
དག་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་རྣམས་རབ་ཏུ་བྱུང་བ་ནི་འབྱུང་བར་དཀའ་སྟེ། སྤྱོད་པ་ནི་ཤིན་དུ་རྣམ་པར་དག་པར་བསྒྲུབ་པར་དཀའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཁྱིམ་བདག་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་རབ་ཏུ་
བྱུང་བ་ཡང་འབྱུང་བར་དཀའ་བ་ལགས་མོད་ཀྱི། འོན་ཀྱང་བཅོམ་ལྡན་འདས་ཀྱིས་བདག་ཅག་རབ་ཏུ་འབྱུང་བའི་སླད་དུ་སྐབས་དབྱེ་བར་གསོལ། བདག་ཅག་བཅོམ་ལྡན་འདས་ཀྱི་བསྟན་པ་ལ་ནན་ཏན་གྱིས་བསྒྲུབ་པར་འཚལ་ལོ། །བཅོམ་ལྡན་འདས་ཀྱིས་ཁྱིམ་བདག་དེ་དག་ལ་རབ་ཏུ་འབྱུང་བའི་
སྐབས་ཕྱེ་སྟེ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་དང་། བྱང་ཆུབ་སེམས་དཔའ་སྤྱོད་པ་ཐམས་ཅད་རྣམ་པར་དག་པ་ལ་འདི་སྐད་ཅེས་བཀའ་སྩལ་ཏོ། །སྐྱེས་བུ་དམ་པ་ཁྱེད་གཉིས་ཀྱིས་ཁྱིམ་བདག་འདི་རྣམས་རབ་ཏུ་བྱུང་ལ་བསྙེན་པར་རྫོགས་པར་གྱིས་ཤིག་ཅེས་བཅོམ་
ལྡན་འདས་ཀྱིས་གནང་ནས་བྱང་ཆུབ་སེམས་དཔའ་བྱམས་པས་ཁྱིམ་བདག་དགུ་སྟོང་རབ་ཏུ་ཕྱུང་ངོ་། །བྱང་ཆུབ་སེམས་དཔའ་སྤྱོད་པ་ཐམས་ཅད་རྣམ་པར་དག་པས་ནི་ཁྱིམ་བདག་བདུན་སྟོང་རབ་ཏུ་ཕྱུང་ངོ་། །བྱང་ཆུབ་སེམས་དཔའ་ཁྱིམ་པ་རྣམས་ཀྱི་བསླབ་པའི་རྒྱུན་བསྟན་པའི་ཆོས་ཀྱི་རྣམ་གྲངས་འདི་བཤད་པ་
ན་སྲོག་ཆགས་སྟོང་དུ་ཚང་བ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ།། །།བམ་པོ་གསུམ་པ་སྟེ་ཐ་མ། དེ་ནས་བཅོམ་ལྡན་འདས་ལ་ཁྱིམ་བདག་དྲག་ཤུལ་ཅན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བྱང་ཆུབ་

སེམས་དཔའ་ཁྱིམ་པ་རྣམས་ཀྱི་ཁྱིམ་གྱིས་དང་། ཁྱིམ་ན་གནས་པའི་ནོངས་པ་དག་ནི་བཤད་ལགས་ན། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རབ་ཏུ་བྱུང་བར་གཏོགས་པ་རྣམས་ཀྱི་རབ་ཏུ་བྱུང་བའི་སྒྲུབ་པ་དང་། ཚུལ་ཁྲིམས་དང་། ཐོས་པ་དང་། སྦྱངས་པའི་
ཡོན་ཏན་དང་། ཡོ་བྱད་བསྙུངས་པ་དང་། སྤྱོད་པ་དང་། ཆོ་ག་ཕུན་སུམ་ཚོགས་པ་དེ་ལེགས་པར་བཤད་དུ་གསོལ། བཅོམ་ལྡན་འདས་ཇི་ལྟར་ན་ལེགས་པར་བཤད་པའི་ཆོས་འདུལ་བ་ལ་བྱང་ཆུབ་སེམས་དཔའ་རབ་ཏུ་བྱུང་ནས་གུས་པར་སྨྲ་བ་དང་། ཕྱག་འཚལ་བ་དང་། ལྡང་བ་དང་། ཐལ་མོ་
སྦྱོར་བ་དང་། འདུད་པའི་ལས་དོན་མ་མཆིས་པར་མི་བགྱིད་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་ཁྱོད་གང་དེ་བཞིན་གཤེགས་པ་ལ་རབ་ཏུ་བྱུང་བའི་སྒྲུབ་པ་དང་། ཚུལ་ཁྲིམས་དང་།
ཐོས་པ་དང་། སྦྱངས་པའི་ཡོན་ཏན་དང་། ཡོ་བྱད་བསྙུངས་པ་དང་། སྤྱོད་པ་དང་། ཆོ་ག་ཕུན་སུམ་ཚོགས་པ་འདི་ཀུན་འདྲི་བ་ནི་ལེགས་སོ་ལེགས་སོ། །ཁྱིམ་བདག་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་། བྱང་ཆུབ་སེམས་དཔའ་རབ་ཏུ་བྱུང་བར་གཏོགས་པས་ཇི་ལྟར་
གནས་པར་བྱ་བ་དང་། ཇི་ལྟར་བསྒྲུབ་པར་བྱ་བ་ངས་ཁྱོད་ལ་བཤད་དོ། །བཅོམ་ལྡན་འདས་ལེགས་སོ་ཞེས་གསོལ་ནས་ཁྱིམ་བདག་དྲག་ཤུལ་ཅན་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་འདི་ལ་བྱང་ཆུབ་སེམས་
དཔའ་རབ་ཏུ་བྱུང་བས་འདི་ལྟར་བདག་སུའི་ཆེད་ལ་ཁྱིམ་ནས་ཁྱིམ་མ་ཡིན་པར་རབ་ཏུ་བྱུང་སྙམ་དུ་གཞལ་བར་བྱ་སྟེ། དེས་མགོ་དང་གོས་ལ་མེ་འབར་བ་བཞིན་དུ་ཡེ་ཤེས་ཡོངས་སུ་བཙལ་བས་བརྩོན་འགྲུས་བརྩམ་པར་བྱའོ། །དེ་དེ་ལྟར་ཡོངས་སུ་འཇལ་བས་ཐོག་མ་ཉིད་དུ་འཕགས་པའི་རིགས་བཞི་
པོ་དག་ལ་རབ་ཏུ་གནས་ཤིང་སྦྱངས་པའི་ཡོན་ཏན་དང་། ཡོ་བྱད་བསྙུངས་པ་ལ་མངོན་པར་དགའ་བར་བྱའོ། །ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་འཕགས་པའི་རིགས་བཞི་པོ་དག་ལ་རབ་ཏུ་གནས་པ་ཡིན་ཞེ་ན། ཁྱིམ་བདག་འདི་ལ་བྱང་ཆུབ་སེམས་དཔའ་རབ་ཏུ་བྱུང་བ་ནི་

ཆོས་གོས་ངན་ངོན་གྱིས་ཆོག་པར་འཛིན་པ་ཡིན། ཆོས་གོས་ངན་ངོན་གྱིས་ཆོག་པར་འཛིན་པའི་བསྔགས་པ་ཡང་བརྗོད་པ་ཡིན་ཏེ། དེ་ཆོས་གོས་ཀྱི་ཕྱིར་ཚུལ་དང་མི་འདྲ་བས་ཚོལ་བར་མི་བྱེད་དོ། །ཆོས་གོས་མ་རྙེད་ན་ཡང་ཡི་མི་འཆད་ཅིང་ཡོངས་སུ་གདུང་བ་མེད་དོ། །ཆོས་གོས་རྙེད་ན་ཡང་
ཆགས་པ་མེད། རྨོངས་པ་མེད། དགའ་བ་མེད། ཞེན་པ་མེད་ཅིང་ཞེན་པར་མི་འགྱུར་ཏེ། ཉེས་དམིགས་མཐོང་ལ་འབྱུང་བ་རབ་ཏུ་ཤེས་ནས་ཆགས་པ་མེད་པར་སྤྱོད་དེ། ཆོས་གོས་ངན་ངོན་གྱིས་ཆོག་པར་འཛིན་པ་དེ་བདག་ལ་མི་སྟོད་ཅིང་གཞན་ལ་མི་སྨོད་དོ། ཁྱིམ་བདག་གཞན་ཡང་བྱང་ཆུབ་
སེམས་དཔའ་རབ་ཏུ་བྱུང་བ་ནི་བསོད་སྙོམས་ངན་ངོན་གྱིས་ཆོག་པར་འཛིན་པ་ཡིན། བསོད་སྙོམས་ངན་ངོན་གྱིས་ཆོག་པར་འཛིན་པའི་བསྔགས་པ་ཡང་རྗོད་པ་ཡིན་ཏེ། དེ་བསོད་སྙོམས་ཀྱི་ཕྱིར་ཚུལ་དང་མི་འདྲ་བས་ཚོལ་བར་མི་བྱེད་དོ། །བསོད་སྙོམས་མ་རྙེད་ན་ཡང་ཡི་མི་འཆད་ཅིང་ཡོངས་སུ་
གདུང་བ་མེད་དོ། །བསོད་སྙོམས་རྙེད་ན་ཡང་ཆགས་པ་མེད། རྨོངས་པ་མེད། དགའ་བ་མེད། ཞེན་པ་མེད་ཅིང་ཞེན་པར་མི་འགྱུར་ཏེ། ཉེས་དམིགས་མཐོང་ལ་འབྱུང་བ་རབ་ཏུ་ཤེས་ནས་ཆགས་པ་མེད་པར་སྤྱོད་དེ། བསོད་སྙོམས་ངན་ངོན་གྱིས་ཆོག་པར་འཛིན་པ་དེ་བདག་ལ་མི་སྟོད་ཅིང་གཞན་
ལ་མི་སྨོད་དོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་ནི་མལ་ཆ་ངན་ངོན་གྱིས་ཆོག་པར་འཛིན་པ་ཡིན། མལ་ཆ་ངན་ངོན་གྱིས་ཆོག་པར་འཛིན་པའི་བསྔགས་པ་ཡང་བརྗོད་པ་ཡིན་ཏེ། དེ་མལ་ཆའི་ཕྱིར་ཚུལ་དང་མི་འདྲ་བས་ཚོལ་བར་མི་བྱེད་དོ། མལ་ཆ་མ་རྙེད་ན་ཡང་ཡི་མི་
འཆད་ཅིང་ཡོངས་སུ་གདུང་བ་མེད་དོ། །མལ་ཆ་རྙེད་ན་ཡང་ཆགས་པ་མེད། རྨོངས་པ་མེད། དགའ་བ་མེད། ཞེན་པ་མེད་ཅིང་ཞེན་པར་མ་འགྱུར་ཏེ། ཉེས་དམིགས་མཐོང་ལ་འབྱུང་བ་རབ་ཏུ་ཤེས་ནས་ཆགས་པ་མེད་པར་སྤྱོད་དེ། མལ་ཆ་ངན་ངོན་གྱིས་ཆོག་པར་འཛིན་པ་དེ་བདག་ལ་མི་སྟོད་ཅིང་
གཞན་ལ་མི་སྨོད་དོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་ནི་ན་བའི་གསོས་སྨན་དང་། ཡོ་བྱད་ངན་ངོན་གྱིས་ཆོག་པར་འཛིན་པ་ཡིན། ན་བའི་གསོས་སྨན་དང་། ཡོ་བྱད་ངན་ངོན་གྱིས་ཆོག་པར་འཛིན་པའི་བསྔགས་པ་ཡང་རྗོད་པ་ཡིན་ཏེ། དེ་ན་བའི་གསོས་སྨན་དང་།

ཡོ་བྱད་ཀྱི་ཕྱིར་ཚུལ་དང་མི་འདྲ་བས་ཚོལ་བར་མི་བྱེད་དོ། །ན་བའི་གསོས་སྨན་དང་། ཡོ་བྱད་མ་རྙེད་ན་ཡང་ཡི་མི་འཆད་ཅིང་ཡོངས་སུ་གདུང་བ་མེད་དོ། །ན་བའི་གསོས་སྨན་དང་། ཡོ་བྱད་རྙེད་ན་ཡང་ཆགས་པ་མེད། རྨོངས་པ་མེད། དགའ་བ་མེད། ཞེན་པ་མེད་ཅིང་ཞེན་པར་མི་
འགྱུར་ཏེ། ཉེས་དམིགས་མཐོང་ལ་འབྱུང་བ་རབ་ཏུ་ཤེས་ནས་ཆགས་པ་མེད་པར་སྤྱོད་དེ། ན་བའི་གསོས་སྨན་དང་། ཡོ་བྱད་ངན་ངོན་གྱིས་ཆོག་པར་འཛིན་པ་དེ་བདག་ལ་མི་སྟོད་ཅིང་གཞན་ལ་མི་སྨོད་དོ། །སྤོང་བ་ལ་དགའ་བ་ཡང་ཡིན་ཏེ། སྤོང་བ་ལ་མོས་ཤིང་སྤོང་བ་ལ་དགའ་བའི་སྦྱོར་བ་ལ་བརྩོན་
ནོ། །དེ་སྡིག་པ་མི་དགེ་བའི་ཆོས་རྣམས་སྤངས་པས་དགའ་བར་འགྱུར་ཏེ། མ་སྤངས་པས་ནི་མ་ཡིན་ནོ། །དེ་བསྒོམ་པ་ལ་དགའ་བ་ཡིན་ཏེ། བསྒོམ་པ་ལ་དགའ་བའི་སྦྱོར་བ་ལ་བརྩོན་ནོ། །དགེ་བའི་ཆོས་བསྒོམས་པས་དགའ་བར་འགྱུར་ཏེ། མ་བསྒོམས་པས་ནི་མ་ཡིན་ཏེ། སྤོང་བ་ལ་དགའ་བ་སྤོང་
བ་ལ་མོས་པ། སྤོང་བ་ལ་དགའ་བའི་སྦྱོར་བ་ལ་བརྩོན་པ། བསྒོམ་པ་ལ་དགའ་བ། བསྒོམ་པ་ལ་མོས་པ། བསྒོམ་པ་ལ་དགའ་བའི་སྦྱོར་བ་ལ་བརྩོན་པ་དེ་བདག་ལ་མི་སྟོད་ཅིང་གཞན་ལ་མི་སྨོད་དོ། །ཁྱིམ་བདག་དེ་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་འཕགས་པའི་རིགས་བཞི་པོ་དག་ལ་གནས་
པ་ཡིན་ནོ། །ཅིའི་ཕྱིར་འཕགས་པའི་རིགས་ཞེས་བྱ་ཞེ་ན། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་འདི་ལ་གནས་པས་དེའི་ཕྱིར་འཕགས་པའི་རིགས་ཞེས་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའི་རབ་ཏུ་བྱུང་བས་ཕན་ཡོན་ལ། དགའ་བ་བཅུས་ཆོས་གོས་ལུས་ལ་བཅང་བར་བྱ་སྟེ།
བཅུ་གང་ཞེ་ན། འདི་ལྟ་སྟེ། ངོ་ཚ་ཞིང་འཛེམ་པས་དཀྲི་བ་དང་། ཤ་སྦྲང་དང་། སྦྲང་བུ་དང་། རླུང་དང་། ཉི་མ་དང་། སྡིག་སྦྲུལ་གྱིས་རེག་པར་འགྱུར་བ་གཡོགས་པ་དང་། དགེ་སྦྱོང་གི་ཁ་དོག་དང་། རྟགས་བསྟན་པ་དང་། ངུར་སྨྲིག་དེ་དག་ནི་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་
རྟེན་གྱི་མཆོད་རྟེན་ཡིན་ནོ་སྙམ་ནས་མཆོད་རྟེན་གྱི་ཕྱིར་ཡང་དག་པར་གཟུང་བར་བྱ་བ་དང་། དེ་དག་ནི་ཡིད་འབྱུང་བ་དང་། འདོད་ཆགས་དང་བྲལ་བས་ཁ་དོག་བསྒྱུར་བ་ཡིན་ཏེ། འདི་དག་ནི་འདོད་ཆགས་ཀྱིས་ཁ་དོག་བསྒྱུར་བ་མ་ཡིན་པ་དང་། འདི་དག་ནི་ཉེ་བར་ཞི་བ་དང་འཐུན་པ་ཡིན་གྱི། འདི་དག་

ནི་ཉོན་མོངས་པ་འབར་བ་དང་འཐུན་པ་མ་ཡིན་པ་དང་། ངུར་སྨྲིག་འདི་དག་གིས་དཀྲིས་ཤིང་གཡོགས་ནས་སྡིག་པ་ལས་ལྡོག་པར་བྱ་བ་དང་། ལེགས་པར་བྱ་བའི་ལས་བྱ་བ་དང་། ཆོས་གོས་ཀྱིས་ཆ་བར་སྦྱོར་བ་ལ་བརྩོན་པ་མ་ཡིན་པ་དང་། ངུར་སྨྲིག་འདི་དག་འཕགས་པའི་ལམ་གྱི་ཚོགས་
དང་འཐུན་པ་ཡིན་པར་ཤེས་ནས་ཅི་ནས་སྐད་ཅིག་གཅིག་ལ་ཡང་རྙོག་པ་དང་། འགྲོགས་པར་མི་བྱ་བར་ངུར་སྨྲིག་རྣམས་བཅང་བར་བྱ་སྟེ། ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བས་ཕན་ཡོན་ལ་དགའ་བ་བཅུ་པོ་དེ་དག་གིས་ཆོས་གོས་ལུས་ལ་བཅང་བར་བྱའོ། །ཁྱིམ་བདག་གཞན་ཡང་
བྱང་ཆུབ་སེམས་དཔའ་རབ་ཏུ་བྱུང་བས་ཕན་ཡོན་བཅུ་མཐོང་ནས་ཇི་སྲིད་འཚོའི་བར་དུ་བསོད་སྙོམས་སྤྱོད་པ་གཏང་བར་མི་བྱ་སྟེ། བཅུ་གང་ཞེ་ན། རང་དབང་དུ་གྱུར་པའི་ཚུལ་གྱིས་འཚོ་བར་བྱའི་གཞན་ལ་རག་ལུས་པས་མ་ཡིན་པ་དང་། སེམས་ཅན་གང་དག་བདག་བསོད་སྙོམས་འདོད་པ་ལ་བསོད་
སྙོམས་བྱིན་པ་དེ་དག་ཀྱང་དཀོན་མཆོག་གསུམ་ལ་བཀོད་དེ་ཕྱིས་བསོད་སྙོམས་བླང་བར་བྱ་བ་དང་། སེམས་ཅན་གང་དག་བདག་བསོད་སྙོམས་འདོད་པ་ལ་བསོད་སྙོམས་མི་སྟེར་བ་དེ་དག་ལ་སྙིང་རྗེ་ཆེན་པོ་བསྐྱེད་ནས། སེམས་ཅན་དེ་དག་གཏོང་བ་ལ་གཟུང་བའི་ཕྱིར་བརྩོན་འགྲུས་བརྩམ་པར་བྱ་བ་དང་།
བྱ་བ་བྱས་ཏེ་བསོད་སྙོམས་བཟའ་བ་དང་། བདག་གིས་དེ་བཞིན་གཤེགས་པའི་བཀའ་དང་འཐུན་པར་བྱས་པར་འགྱུར་བ་དང་། དགང་སླ་ཞིང་གསོ་སླ་བར་བྱ་བའི་ཕྱིར་བདག་གིས་རྒྱུ་བསྐྱེད་པར་འགྱུར་བ་དང་། བདག་གིས་ང་རྒྱལ་བཅག་པ་བསྟན་པར་འགྱུར་བ་དང་། བདག་གི་སྤྱི་གཙུག་བལྟར་མི་མཐོང་
བའི་དགེ་བའི་རྩ་བ་བསགས་པར་འགྱུར་བ་དང་། བདག་མཐོང་ནས་དེ་བཞིན་དུ་སློབ་པར་འགྱུར་ཞིང་བདག་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ལ་བསྟེན་པར་མི་འགྱུར་བ་དང་། བསོད་སྙོམས་ཡང་དག་པར་བླང་བའི་སྤྱོད་པ་ཡང་བདག་སེམས་ཅན་ཐམས་ཅད་ལ་སེམས་སྙོམས་པས་ཐམས་ཅད་མཁྱེན་
པའི་ཡེ་ཤེས་ཀྱི་ཚོགས་སུ་འགྱུར་བ་སྟེ། ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བས་ཕན་ཡོན་བཅུ་པོ་དེ་དག་མཐོང་ནས་ཇི་སྲིད་འཚོ་བའི་མཐའི་བར་དུ་བསོད་སྙོམས་སྤྱོད་པ་མི་གཏང་བར་བྱའོ། །གལ་ཏེ་དེ་ལ་ལ་ཞིག་གིས་འགྲོན་དུ་བོས་ན་དེས་ལྷག་པའི་བསམ་པ་དང་། དད་པ་དང་། དང་བ་བསྐྱེད་པའི་

ཕྱིར་འགྲོ་བར་བྱ་སྟེ། འདྲིད་པ་དང་། འཆོས་པས་ནི་མ་ཡིན་ནོ། །གང་ལ་ལ་བསོད་སྙོམས་བླངས་ཏེ་བདག་དང་གཞན་གྱི་དོན་རྫོགས་པར་བྱེད་ནུས་ན། ངས་བྱང་ཆུབ་སེམས་དཔའ་དེ་འགྲོན་དུ་འགྲོ་བར་གནང་ངོ་། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བས་
ཕན་ཡོན་བཅུ་མཐོང་ནས་ཇི་སྲིད་འཚོ་བའི་བར་དུ་སྨན་བསྐུས་པས་ཆོག་ཤེས་པར་བྱ་སྟེ་བཅུ་གང་ཞེ་ན། དེ་བཞིན་གཤེགས་པའི་བསྟན་པ་ལ་ཞུགས་པར་འགྱུར་བ་དང་། གཞན་གྱི་ངོར་ལྟ་བར་མི་འགྱུར་བ་དང་། བདག་གིས་ནི་མི་སྡུག་པའི་འདུ་ཤེས་བསྟེན་པར་འགྱུར་བ་དང་། བདག་མི་འཐུན་པའི་
འདུ་ཤེས་སོ་སོར་ཉེ་བར་གནས་པར་འགྱུར་བ་དང་། རོ་བྲོ་བ་ལ་ཆགས་པ་ཡང་བདག་གིས་ཚེགས་ཆུང་ངུས་སྤངས་པར་འགྱུར་བ་དང་། བྱིས་པ་སོ་སོའི་སྐྱེ་བོ་ཐམས་ཅད་བདག་ལ་ཡིད་རྟོན་པར་འགྱུར་བ་དང་། བདག་ཁ་ཟས་བསྙུངས་པ་མངོན་དུ་གྱུར་པར་འགྱུར་བ་དང་། བདག་ལ་སྨན་ཡོངས་སུ་ཚོལ་
བའི་ཕོངས་པ་མེད་པར་འགྱུར་བ་དང་། བདག་གིས་སེམས་ལ་ཉོན་མོངས་པའི་ནད་ཀྱི་གནོད་པ་མེད་པར་བྱས་པར་འགྱུར་བ་དང་དེ་ལྟར་ཞུགས་ན་མྱུར་དུ་ཉོན་མོངས་པའི་ནད་དང་འབྲལ་བ་ཐོབ་པར་འགྱུར་བ་སྟེ། ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བས་ཕན་ཡོན་བཅུ་པོ་དེ་དག་
མཐོང་ནས་ཇི་སྲིད་འཚོའི་བར་དུ་སྨན་བསྐུས་པས་ཆོག་ཤེས་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བས་ཕན་ཡོན་བཅུ་མཐོང་ནས་ཇི་སྲིད་འཚོ་བའི་མཐའི་བར་དུ་དགོན་པ་ལ་གནས་པ་ཡོངས་སུ་མི་གཏང་བར་བྱ་སྟེ། བཅུ་གང་ཞེ་ན། བདག་གི་ཉམ་
རངས་དང་། བདག་གི་དབང་དུ་འགྲོ་བ་དང་། ངའི་བ་མེད་ཅིང་ཡོངས་སུ་འཛིན་པ་མེད་པ་དང་། མལ་ཆ་ལྷུག་པར་གཏོང་བ་དང་། དགོན་པའི་གནས་ལ་དགའ་བ་དང་མ་བྲལ་བ་དང་། གནས་རྣམས་སུ་དོན་ཉུང་ཞིང་བྱེད་པ་ཉུང་བ་དང་། གཡོག་གི་ཚོགས་འདོར་ཞིང་ལུས་དང་སྲོག་ལ་མི་
ལྟ་བ་དང་། དབེན་པར་དགའ་ཞིང་འདུ་འཛི་ཡོངས་སུ་སྤོང་བ་དང་། ལས་བྱས་པའི་ཡོན་ཏན་གྱི་ཕན་ཡོན་ཡོངས་སུ་གཏོང་བ་དང་། ཏིང་ངེ་འཛིན་དང་འཐུན་པའི་སེམས་རྩེ་གཅིག་པ་དང་། ཡིད་ལ་བྱེད་པ་བླ་གབ་མེད་པ་ཡིད་ལ་བྱེད་པའི་སྒྲིབ་པ་མེད་པ་སྟེ། ཁྱིམ་བདག་གཞན་ཡང་བྱང་ཆུབ་

སེམས་དཔའ་རབ་ཏུ་བྱུང་བས་ཕན་ཡོན་བཅུ་པོ་དེ་དག་མཐོང་ནས་ཇི་སྲིད་འཚོ་བའི་མཐའི་བར་དུ་དགོན་པ་ལ་གནས་པ་ཡོངས་སུ་མི་གཏོང་བར་བྱའོ། །ཁྱིམ་བདག་གལ་ཏེ་བྱང་ཆུབ་སེམས་དཔའ་དགོན་པ་ལ་གནས་པ་ཆོས་ཉན་པར་འདོད་དམ། སློབ་དཔོན་དང་། མཁན་པོ་བལྟ་བར་འདོད་
དམ། ན་བ་དྲི་བའི་ཕྱིར་གྲོང་གི་གནས་སུ་འོངས་ན། དེས་དགོངས་སུ་སླར་ལྡོག་པར་བྱ་བའི་ཕྱིར་འགྲོ་བའི་སེམས་བསྐྱེད་པར་བྱའོ། །དེ་གལ་ཏེ་ལུང་མནོད་པ་དང་། ཁ་ཏོན་བྱ་བ་གཞན་ལ་རག་ལས་ཏེ། གཙུག་ལག་ཁང་ན་གནས་ན་ཡང་དེས་དགོན་པ་ལ་གཞོལ་བའི་སེམས་ཀྱིས་གང་དངོས་པོ་
ཐམས་ཅད་ལ་དགོན་པར་འདུ་ཤེས་པ་དང་། ཆོས་ཚོལ་བས་མི་ངོམས་པ་དེ་ཉིད་དགོན་པ་ལ་གནས་པ་ཡིན་ནོ་སྙམ་དུ་བསམ་མོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པས་འདི་ལྟར་བདག་ཅིའི་ཕྱིར་དགོན་པ་ལ་གནས། དགོན་པ་ལ་གནས་པ་འབའ་
ཞིག་ནི་དགེ་སྦྱོང་མ་ཡིན་ཏེ། འདི་ན་ནི་མ་བྱང་བ། མ་སྦས་པ། མ་ཞི་བ། མ་དུལ་བ། མི་འགྲུས་པ། རབ་ཏུ་མི་བརྩོན་པ་འདི་ལྟ་སྟེ། རི་དགས་དང་། སྤྲེའུ་དང་། བྱ་མང་པོ་དང་། ཆོམ་རྐུན་དང་། གདོལ་པ་དག་ཀྱང་མང་དུ་གནས་ཏེ། དེ་དག་ཀྱང་དགེ་སྦྱོང་གི་ཡོན་ཏན་དང་ལྡན་པ་མ་ཡིན་
པས་གང་གི་ཕྱིར་བདག་དགོན་པ་ལ་གནས་པ་འདི་ལྟ་སྟེ། དགེ་སྦྱོང་གི་དོན་དེ་ཡོངས་སུ་རྫོགས་པར་བྱའོ་སྙམ་དུ་བརྟག་པར་བྱའོ། །ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བའི་དགེ་སྦྱོང་གི་དོན་གང་ཞེ་ན། འདི་ལྟ་སྟེ་དྲན་པ་དང་། ཤེས་བཞིན་དང་། མི་གཡེང་བ་དང་། གཟུངས་རབ་
ཏུ་ཐོབ་པ་དང་། བྱམས་པ་བསྟེན་པ་དང་། སྙིང་རྗེ་བསྟེན་པ་དང་། མངོན་པར་ཤེས་པ་རྣམས་ལ་དབང་བསྒྱུར་བ་དང་། ཕ་རོལ་དུ་ཕྱིན་པ་དྲུག་བསྒོམ་པ་ཡོངས་སུ་རྫོགས་པར་བྱ་བ་དང་། ཐམས་ཅད་མཁྱེན་པ་ཉིད་ཀྱི་སེམས་ཡོངས་སུ་མི་གཏོང་བ་དང་། ཐབས་མཁས་པའི་ཡེ་ཤེས་བསྒོམ་
པ་དང་། སེམས་ཅན་བསྡུ་བ་དང་། སེམས་ཅན་ཡོངས་སུ་སྨིན་པར་བྱ་བ་དང་། བསྡུ་བའི་དངོས་པོ་བཞི་ཡོངས་སུ་མི་གཏང་བ་དང་། རྗེས་སུ་དྲན་པ་དྲུག་རྗེས་སུ་དྲན་པ་དང་། ཐོས་པ་དང་། བརྩོན་འགྲུས་མི་འདོར་བ་དང་། ཚུལ་བཞིན་དུ་ཆོས་རབ་ཏུ་རྣམ་པར་འབྱེད་པ་དང་། ཡང་དག་པར་

རྣམ་པར་གྲོལ་བའི་ཕྱིར་བརྩོན་པ་དང་། འབྲས་བུ་ཐོབ་པ་རྣམས་ཤེས་པ་དང་། སྐྱོན་མེད་པ་ལ་འཇུག་པར་གནས་པ་དང་། དམ་པའི་ཆོས་བསྲུང་བ་དང་། ལས་ཀྱི་རྣམ་པར་སྨིན་པ་ལ་ཡིད་ཆེས་པས་ཡང་དག་པར་ལྟ་བ་དང་། རྟོག་པ་དང་། རྣམ་པར་རྟོག་པ་ཐམས་ཅད་རབ་ཏུ་
ཆད་པས་ཡང་དག་པའི་རྟོག་པ་དང་། མོས་པ་ཇི་ལྟ་བ་བཞིན་དུ་ཆོས་སྟོན་པས་ཡང་དག་པའི་ངག་དང་། ལས་ཟད་པ་ཡོངས་སུ་རྫོགས་པས་ཡང་དག་པའི་ལས་ཀྱི་མཐའ་དང་། བག་ཆགས་ཀྱི་མཚམས་སྦྱོར་ཡང་དག་པར་བཅོམ་པས་ཡང་དག་པའི་འཚོ་བ་དང་། རྫོགས་པའི་བྱང་ཆུབ་ཁོང་དུ་ཆུད་
པས་ཡང་དག་པའི་རྩོལ་བ་དང་། བརྗེད་པ་མེད་པའི་ཆོས་ཉིད་ཀྱིས་ཡང་དག་པའི་དྲན་པ་དང་། ཐམས་ཅད་མཁྱེན་པའི་ཡེ་ཤེས་ཡོངས་སུ་ཐོབ་པས་ཡང་དག་པའི་ཏིང་ངེ་འཛིན་དང་། སྟོང་པ་ཉིད་ཀྱིས་མི་སྐྲག་པ་དང་། མཚན་མ་མེད་པ་ལ་མི་ཞུམ་པ་དང་། སྨོན་པ་མེད་པ་ལ་མི་འགོང་བ་
དང་། བསམས་བཞིན་དུ་ཡེ་ཤེས་ཀྱིས་སྲིད་པ་ཡོངས་སུ་འཛིན་པ་དང་། དོན་ལ་རྟོན་གྱི་ཡི་གེ་ལ་མི་རྟོན་པ་དང་། ཡེ་ཤེས་ལ་རྟོན་གྱི་རྣམ་པར་ཤེས་པ་ལ་མི་རྟོན་པ་དང་། ཆོས་ལ་རྟོན་གྱི་གང་ཟག་ལ་མི་རྟོན་པ་དང་། ངེས་པའི་དོན་གྱི་མདོ་སྡེ་ལ་རྟོན་གྱི་དྲང་བའི་མདོ་སྡེ་ལ་མི་རྟོན་པ་དང་། ཐོག་
མ་ནས་མ་བྱུང་ཞིང་མི་འཇིག་པའི་ཚུལ་གྱིས་ཆོས་ཀྱི་ངོ་བོ་ཉིད་ལ་མི་རྟོག་པ་དེ་ནི་ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བའི་དགེ་སྦྱོང་གི་དོན་ཅེས་བྱའོ། །ཁྱིམ་བདག་ཡང་བྱང་ཆུབ་སེམས་དཔའ་རབ་ཏུ་བྱུང་བས་འགྲོགས་པ་མེད་པ་མང་དུ་བྱའོ། །དེས་འདི་ལྟར་ཡང་བདག་ནི་སེམས་ཅན་དང་
འདྲེ་བར་མི་བྱ་སྟེ། བདག་གིས་སེམས་ཅན་གཅིག་གི་དགེ་བའི་རྩ་བ་བསྐྱེད་པར་མི་བྱའི། བདག་གིས་སེམས་ཅན་ཐམས་ཅད་ཀྱི་དགེ་བའི་རྩ་བ་བསྐྱེད་པར་བྱའོ་སྙམ་དུ་བརྟག་པར་བྱའོ། །དེ་ལྟ་མོད་ཀྱི་ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བའི་འགྲོགས་པ་བཞི་པོ་འདི་དག་ནི་དེ་
བཞིན་གཤེགས་པས་གནང་སྟེ། བཞི་གང་ཞེ་ན། ཆོས་མཉན་པའི་ཕྱིར་འགྲོགས་པ་དང་། སེམས་ཅན་ཡོངས་སུ་སྨིན་པར་བྱ་བའི་ཕྱིར་འགྲོགས་པ་དང་། དེ་བཞིན་གཤེགས་པ་ལ་མཆོད་པ་དང་། རིམ་གྲོ་བྱ་བའི་ཕྱིར་འགྲོགས་པ་དང་། ཐམས་ཅད་མཁྱེན་པ་ཉིད་ཀྱི་སེམས་

འདྲེས་པ་མེད་པ་དང་འགྲོགས་པ་སྟེ། ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བའི་འགྲོགས་པ་བཞི་པོ་དེ་དག་ནི་དེ་བཞིན་གཤེགས་པས་གནང་བའོ། །ཁྱིམ་བདག་དེ་བས་ན་བྱང་ཆུབ་སེམས་དཔའ་རབ་ཏུ་བྱུང་བས་འགྲོགས་པ་ལས་རྣམ་པར་གྲོལ་བར་བྱའོ། །ཁྱིམ་བདག་
གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ན་གནས་པས་བདག་ཅིའི་ཕྱིར་དགོན་པར་འོངས་སྙམ་དུ་བརྟག་པར་བྱ་སྟེ། དེས་ཡང་འདི་ལྟར་བདག་ནི་འཇིགས་ཤིང་སྐྲག་པའི་ཕྱིར་དགོན་པར་འོངས་སོ། །ཅི་ཞིག་གིས་འཇིགས་ཤིང་སྐྲག་ཅེ་ན། འདུ་འཛིས་འཇིགས་ཤིང་སྐྲག་གོ །
འགྲོགས་པས་འཇིགས་ཤིང་སྐྲག་གོ །འདོད་ཆགས་དང་། ཞེ་སྡང་དང་། གཏི་མུག་གིས་འཇིགས་ཤིང་སྐྲག་གོ །ང་རྒྱལ་དང་། རྒྱགས་པ་དང་། འཆབ་པས་འཇིགས་ཤིང་སྐྲག་གོ །ཆགས་པ་དང་། ཕྲག་དོག་དང་། སེར་སྣས་འཇིགས་ཤིང་སྐྲག་གོ །གཟུགས་དང་། སྒྲ་དང་། དྲི་དང་།
རོ་དང་། རེག་བྱས་འཇིགས་ཤིང་སྐྲག་གོ །ཕུང་པོའི་བདུད་ཀྱིས་འཇིགས་ཤིང་སྐྲག་གོ །ཉོན་མོངས་པའི་བདུད་ཀྱིས་འཇིགས་ཤིང་སྐྲག་གོ །འཆི་བདག་གི་བདུད་ཀྱིས་འཇིགས་ཤིང་སྐྲག་གོ །ལྷའི་བུའི་བདུད་ཀྱིས་འཇིགས་ཤིང་སྐྲག་གོ །མི་རྟག་པ་ལ་རྟག་པར་ཅི་ལོག་པས་འཇིགས་
ཤིང་སྐྲག་གོ། །སྡུག་བསྔལ་ལ་བདེ་བར་ཕྱིན་ཅི་ལོག་པས་འཇིགས་ཤིང་སྐྲག་གོ། །བདག་མེད་པ་ལ་བདག་ཏུ་ཕྱིན་ཅི་ལོག་པས་འཇིགས་ཤིང་སྐྲག་གོ། །མི་གཙང་བ་ལ་གཙང་བར་ཕྱིན་ཅི་ལོག་པས་འཇིགས་ཤིང་སྐྲག་གོ། །སེམས་དང་ཡིད་དང་རྣམ་པར་ཤེས་པས་འཇིགས་ཤིང་སྐྲག་གོ །
སྲེད་པས་འཇིགས་ཤིང་སྐྲག་གོ །འཁོར་བས་འཇིགས་ཤིང་སྐྲག་གོ །སྒྲིབ་པ་དང་ཆོད་པ་དང་ཀུན་ནས་ལྡང་བས་འཇིགས་ཤིང་སྐྲག་གོ །འཇིག་ཚོགས་ལ་ལྟ་བས་འཇིགས་ཤིང་སྐྲག་གོ །བདག་ཏུ་འཛིན་པ་དང་། བདག་གིར་འཛིན་པས་འཇིགས་ཤིང་སྐྲག་གོ །རྒོད་པས་འཇིགས་ཤིང་
སྐྲག་གོ །འགྱོད་པ་དང་ཐེ་ཚོམ་གྱིས་འཇིགས་ཤིང་སྐྲག་གོ །སྡིག་པའི་གྲོགས་པོས་འཇིགས་ཤིང་སྐྲག་གོ །རྙེད་པ་དང་བཀུར་སྟིས་འཇིགས་ཤིང་སྐྲག་གོ །མི་དགེ་བའི་བཤེས་གཉེན་གྱིས་འཇིགས་ཤིང་སྐྲག་གོ །མ་མཐོང་བར་མཐོང་ངོ་སྙམ་དུ་འཛིན་པས་འཇིགས་ཤིང་སྐྲག་གོ །

མ་ཐོས་པར་ཐོས་སོ་སྙམ་དུ་འཛིན་པས་འཇིགས་ཤིང་སྐྲག་གོ །མ་དྲན་པར་དྲན་ནོ་སྙམ་དུ་འཛིན་པས་འཇིགས་ཤིང་སྐྲག་གོ །བྱེ་བྲག་མ་ཕྱེད་པར་བྱེ་བྲག་ཕྱེད་དོ་སྙམ་དུ་འཛིན་པས་འཇིགས་ཤིང་སྐྲག་གོ །མི་ཤེས་པར་ཤེས་སོ་སྙམ་དུ་འཛིན་པས་འཇིགས་ཤིང་སྐྲག་
གོ །དགེ་སྦྱོང་གི་དྲི་མས་འཇིགས་ཤིང་སྐྲག་གོ །གཅིག་ལ་གཅིག་གནོད་པར་སེམས་པས་འཇིགས་ཤིང་སྐྲག་གོ །འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་ཀྱིས་འཇིགས་ཤིང་སྐྲག་གོ །སྲིད་པའི་འགྲོ་བ་ཐམས་ཅད་དུ་འཆི་འཕོ་བ་དང་
སྐྱེ་བས་འཇིགས་ཤིང་སྐྲག་གོ །སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་ཀྱི་ཡུལ་དུ་འགྲོ་བས་འཇིགས་ཤིང་སྐྲག་གོ །མི་ཁོམ་པས་འཇིགས་ཤིང་སྐྲག་གོ །མདོར་ན་མི་དགེ་བའི་ཆོས་ཐམས་ཅད་ཡིད་ལ་བྱེད་པས་འཇིགས་ཤིང་སྐྲག་སྟེ། བདག་
དེ་ལྟ་བུས་འཇིགས་ཤིང་སྐྲག་པ་དེ་དག་གིས་འཇིགས་ནས་དགོན་པར་འོངས་ཏེ། ཁྱིམ་ན་གནས་པ་དང་། འདུ་འཛི་ལ་གནས་པ་དང་། མི་འགྲུས་ཤིང་རྣལ་འབྱོར་ལ་མི་བརྩོན་པ་དང་། ཚུལ་བཞིན་མ་ཡིན་པའི་ཡིད་ལ་བྱེད་པས་གནས་པ་ནི་འདི་ལྟ་བུའི་འཇིགས་སྐྲག་པ་དེ་དག་ལས་
ཡོངས་སུ་ཐར་བར་མི་ནུས་ཏེ། གང་དག་འདས་པའི་དུས་ན་བྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱང་དགོན་པ་ལ་གནས་ནས་འཇིགས་པ་ཐམས་ཅད་ལས་རྣམ་པར་གྲོལ་ཏེ། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཇིགས་པ་
མེད་པ་ཐོབ་བོ། གང་དག་མ་འོངས་པའི་དུས་ན་འབྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱང་དགོན་པ་ལ་གནས་ནས་འཇིགས་པ་ཐམས་ཅད་ལས་རྣམ་པར་གྲོལ་ཏེ། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཇིགས་པ་མེད་པ་
ཐོབ་པར་འགྱུར་རོ། །གང་དག་ད་ལྟར་བྱུང་བའི་དུས་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པ། དེ་དག་ཐམས་ཅད་ཀྱང་དགོན་པ་ལ་གནས་ནས་འཇིགས་པ་ཐམས་ཅད་ལས་རྣམ་པར་གྲོལ་ཏེ། འདི་ལྟ་སྟེ། བླ་ན་མེད་པ་ཡང་

དག་པར་རྫོགས་པའི་བྱང་ཆུབ་འཇིགས་པ་མེད་པ་ཐོབ་བོ། །དེ་བས་ན་བདག་ཀྱང་འདི་ལ་འཇིགས་ཤིང་སྐྲག་སྟེ། འཇིགས་པ་ཐམས་ཅད་ལས་ནི་ཤིན་ཏུ་འདའ་བར་འདོད། མི་འཇིགས་པ་ནི་རྗེས་སུ་ཐོབ་པར་འདོད་པས་དགོན་པ་ལ་གནས་པར་བྱའོ་སྙམ་དུ་ཡོངས་སུ་དཔྱད་པར་བྱའོ། །
ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་འཇིགས་ཤིང་སྐྲག་ནས་དགོན་པའི་གནས་ལ་གནས་པས་འདི་ལ་ཅུང་ཟད་འཇིགས་པ་སྐྱེས་པ་དེ་དག་ཐམས་ཅད་ནི་བདག་ཏུ་འཛིན་པ་ལས་སྐྱེས་སོ། །བདག་ཏུ་མངོན་པར་ཆགས་པ་དང་། བདག་ཏུ་ཡོངས་སུ་འཛིན་པ་དང་། བདག་
གི་གཞི་དང་། བདག་སྲེད་པ་དང་། བདག་འདུ་ཤེས་པ་དང་། བདག་ཏུ་སྨྲ་བ་ཉེ་བར་ལེན་པ་དང་། བདག་ཏུ་ལྟ་བ་དང་། བདག་གི་གནས་དང་། བདག་ཏུ་ཡོངས་སུ་རྟོག་པ་དང་། བདག་བསྲུང་བ་ལས་སྐྱེས་ཏེ། གལ་ཏེ་བདག་དགོན་པ་ལ་གནས་ལ་བདག་ཏུ་འཛིན་པ་ཡོངས་སུ་མ་
སྤངས། བདག་ཏུ་མངོན་པར་ཆགས་པ་དང་། བདག་ཏུ་ཡོངས་སུ་འཛིན་པ་དང་། བདག་གི་གཞི་དང་། བདག་ལ་སྲེད་པ་དང་། བདག་ཏུ་འདུ་ཤེས་པ་དང་། བདག་ཏུ་སྨྲ་བ་ཉེ་བར་ལེན་པ་དང་། བདག་ཏུ་ལྟ་བ་དང་། བདག་གི་གནས་དང་། བདག་ཏུ་ཡོངས་སུ་རྟོག་པ་དང་། བདག་
སྲུང་བ་ཡོངས་སུ་མ་སྤངས་ན་ནི་བདག་དགོན་པ་ལ་གནས་པ་དོན་མེད་པར་འགྱུར་རོ་སྙམ་དུ་བསླབ་པར་བྱ་སྟེ། བདག་ཏུ་འདུ་ཤེས་པ་ལ་ནི་དགོན་པ་ལ་གནས་པ་མེད་དོ། །གཞན་དུ་འདུ་ཤེས་པ་ལ་ཡང་མེད་དོ། །ངར་འཛིན་པ་དང་། ང་ཡིར་འཛིན་པ་ལ་མངོན་པར་ཞེན་པ་ལ་ནི་དགོན་པ་ལ་གནས་
པ་མེད་དོ། །དམིགས་པར་ལྟ་བ་ལ་ནི་དགོན་པ་ལ་གནས་པ་མེད་དོ། །ཕྱིན་ཅི་ལོག་ཏུ་ལྟ་བ་ལ་ནི་དགོན་པ་ལ་གནས་པ་མེད་དོ། །ཁྱིམ་བདག་མྱ་ངན་ལས་འདས་པར་འདུ་ཤེས་པ་ལ་ཡང་དགོན་པ་ལ་གནས་པ་མེད་ན་ཉོན་མོངས་པ་ཐམས་ཅད་ཀྱི་འདུ་ཤེས་ཅན་ལ་ལྟ་ཅི་སྨོས། ཁྱིམ་
བདག་དགོན་པ་ལ་གནས་པ་ཞེས་བྱ་བ་ནི་ཆོས་ཐམས་ཅད་ལ་མི་རྟེན་པར་གནས་པའོ། །ཆོས་ཐམས་ཅད་ལ་མི་འཛིན་པར་གནས་པའོ། །མཚན་མ་ཐམས་ཅད་ལ་མི་ཆགས་པར་གནས་པའོ། །གཟུགས་ཐམས་ཅད་ལ་མི་རྟེན་པར་གནས་པའོ། །སྒྲ་དང་། དྲི་དང་། རོ་དང་།

རེག་བྱ་ཐམས་ཅད་ལ་མི་རྟེན་པར་གནས་པའོ། །ཆོས་ཐམས་ཅད་མཉམ་པ་ཉིད་དང་མི་འགལ་བར་གནས་པའོ། །སེམས་ཤིན་ཏུ་ཞི་བས་ཤིན་ཏུ་སྦྱངས་པར་གནས་པའོ། །འཇིགས་པ་ཐམས་ཅད་སྤངས་པས་མི་འཇིགས་པར་གནས་པའོ། །ཉོན་
མོངས་པ་ཐམས་ཅད་ལས་རྣམ་པར་གྲོལ་བས་ཆུ་བོ་ལས་རྒལ་བར་གནས་པའོ། །བརྟན་པར་གནས་པའོ། ངན་ངོན་གྱིས་ཆོག་ཤེས་པར་འཛིན་ཅིང་འདོད་པ་ཆུང་བས་འཕགས་པའི་རིགས་རྣམས་ལ་རབ་ཏུ་དགའ་བར་གནས་པའོ། །དགང་སླ་ཞིང་གསོ་སླ་བས་ཆོག་པར་འཛིན་པར་གནས་
པའོ། །ཤེས་རབ་ཀྱི་ཕྱིར་ཚུལ་བཞིན་ལ་སྦྱོར་བས་ཐོས་པ་ལ་གནས་པའོ། །རྣམ་པར་ཐར་པའི་སྒོ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ལ་སོ་སོར་རྟོག་པས་ཐར་པ་གནས་པའོ། བཅིངས་པ་བཅད་པས་རྣམ་པར་གྲོལ་བར་གནས་པའོ། །རྟེན་ཅིང་འབྲེལ་བར་འབྱུང་
བ་དང་འཐུན་པས་མ་དུལ་བ་རྣམས་ཉེ་བར་ཞི་བར་གནས་པའོ། །ཤིན་ཏུ་རྣམ་པར་དག་པས་བྱ་བ་བྱས་པར་གནས་པའོ། །ཁྱིམ་བདག་འདི་ལྟ་སྟེ་དཔེར་ན་དགོན་པ་ལ་རྩྭ་དང་། ཤིང་གེལ་པ་དང་། ནགས་ཚལ་གནས་ཀྱང་འཇིགས་པ་མེད་ཅིང་སྐྲག་པར་མི་འགྱུར་རོ། །ཁྱིམ་བདག་དེ་བཞིན་དུ་བྱང་
ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་ཀྱང་ལུས་ལ་རྩྭ་དང་། ཤིང་གེལ་པ་དང་། སྨན་དང་། རྩིག་པ་དང་། ཤིང་དང་། མིག་ཡོར་ལྟ་བུ་དང་། སྒྱུ་མ་དང་མཚུངས་པའི་འདུ་ཤེས་བསྐྱེད་པར་བྱ་སྟེ། འདི་ལ་སུ་ཞིག་འཇིགས་པར་འགྱུར། འདི་ལ་སུ་ཞིག་སྐྲག་པར་འགྱུར་སྙམ་པའི་
སེམས་བསྐྱེད་པར་བྱའོ། །དེ་འཇིགས་ཤིང་སྐྲག་པ་ལྟ་ན། འདི་ལྟར་ལུས་འདི་ལ་ནི་བདག་གམ། སེམས་ཅན་ནམ། སྲོག་གམ། སྐྱེ་བ་པོའམ། གསོ་བའམ། སྐྱེས་བུ་འམ། གང་ཟག་གམ། ཤེད་ལས་སྐྱེས་སམ། ཤེད་བུ་མེད་དེ། འདི་ལྟར་འཇིགས་པ་ཞེས་བྱ་བ་འདི་ནི་ཡང་དག་
པ་མ་ཡིན་པ་ཀུན་བརྟགས་པ་ཡིན་གྱིས་བདག་གིས་ནི་ཡང་དག་པ་མ་ཡིན་པ་ཀུན་བརྟགས་པར་དེ་ལ་བརྟག་པར་མི་བྱའོ་སྙམ་དུ་ལུས་ལ་ཚུལ་བཞིན་བརྟག་པར་བྱའོ། །དེས་ཇི་ལྟར་དགོན་པ་ལ་རྩྭ་དང་། ཤིང་གེལ་པ་དང་། སྨན་དང་། ནགས་ཚལ་གནས་པ་རྣམས་ངའི་བ་མེད་པ། ཡོངས་སུ་

འཛིན་པ་མེད་པ་དེ་བཞིན་དུ་བྱང་ཆུབ་སེམས་དཔའ་ཡང་ངའི་བ་མེད་པ། ཡོངས་སུ་འཛིན་པ་མེད་པས་ཆོས་ཐམས་ཅད་དགོན་པ་ཉིད་དོ་སྙམ་དུ་ཤེས་ནས་ཉེ་བར་བསྒྲུབས་ཏེ་གནས་པར་བྱའོ། །དེ་ཅིའི་ཕྱིར་ཞེ་ན། དགོན་པ་ལ་གནས་པ་ནི་ཉོན་མོངས་པ་གཅོད་པ་སྟེ། ངའི་བ་མེད་པ། ཡོངས་སུ་
འཛིན་པ་མེད་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པས་འདི་ལ་དགོན་པ་ལ་གནས་པ་ནི་ཚུལ་ཁྲིམས་ཀྱི་ཕུང་པོ་དང་འཐུན་པའོ། །དགོན་པ་ལ་གནས་པ་ནི་ཏིང་ངེ་འཛིན་གྱི་ཕུང་པོ་ལ་གཞོལ་བའོ། །དགོན་པ་ལ་གནས་པ་ནི་ཤེས་རབ་ཀྱི་
ཕུང་པོ་ཚོགས་པའོ། །དགོན་པ་ལ་གནས་པ་ནི་རྣམ་པར་གྲོལ་བའི་ཕུང་པོ་འགྲུབ་པའོ། །དགོན་པ་ལ་གནས་པ་ནི་རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་སྐྱེ་བའོ། །དགོན་པ་ལ་གནས་པ་ནི་བྱང་ཆུབ་ཀྱི་ཕྱོགས་ཀྱི་ཆོས་རྣམས་རབ་ཏུ་སྟེན་པའོ། །དགོན་པ་ལ་གནས་པ་ནི་སྦྱངས་པའི་
ཡོན་ཏན་བཅུ་གཉིས་པོ་དག་སྡུད་པའོ། །དགོན་པ་ལ་གནས་པ་ནི་བདེན་པ་རྣམས་རྟོགས་པའོ། །དགོན་པ་ལ་གནས་པ་ནི་ཕུང་པོ་རྣམས་ཡོངས་སུ་ཤེས་པའོ། །དགོན་པ་ལ་གནས་པ་ནི་ཁམས་རྣམས་ཆོས་ཀྱི་དབྱིངས་དང་མཉམ་པར་འཇལ་བའོ། །དགོན་པ་ལ་གནས་པ་
ནི་སྐྱེ་མཆེད་རྣམས་སེལ་བའོ། །དགོན་པ་ལ་གནས་པ་ནི་བྱང་ཆུབ་ཀྱི་སེམས་མི་བརྗེད་པའོ། །དགོན་པ་ལ་གནས་པ་ནི་སྟོང་པ་ཉིད་ལ་སོ་སོར་རྟོག་པས་སྐྲག་པ་མེད་པའོ། །དགོན་པ་ལ་གནས་པ་ནི་ཆོས་ཀུན་ཏུ་འཛིན་པའོ། །དགོན་པ་ལ་གནས་པ་ནི་དགེ་བའི་རྩ་བ་ཐམས་ཅད་
ཆུད་མི་གཟོན་པའོ། །དགོན་པ་ལ་གནས་པ་ནི་སངས་རྒྱས་རྣམས་ཀྱིས་བསྔགས་པའོ། །དགོན་པ་ལ་གནས་པ་ནི་བྱང་ཆུབ་སེམས་དཔའ་རྣམས་ཀྱིས་བསྟོད་པའོ། །དགོན་པ་ལ་གནས་པ་ནི་འཕགས་པ་རྣམས་ཀྱིས་བཀུར་བའོ། །དགོན་པ་ལ་གནས་པ་ནི་ཐར་པ་འདོད་པ་
རྣམས་ཀྱིས་བསྟེན་པའོ། །དགོན་པ་ལ་གནས་པ་ནི་ཐམས་ཅད་མཁྱེན་པའི་ཡེ་ཤེས་ཁོང་དུ་ཆུད་པར་བྱ་བའི་ཕྱིར་བསྙེན་པའོ་སྙམ་དུ་བསླབ་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པ་ནི་ཚེགས་ཆུང་ངུས་ཕ་རོལ་ཏུ་ཕྱིན་པ་དྲུག་བསྒོམ་པ་

ཡོངས་སུ་རྫོགས་པར་འགྱུར་རོ། །དེ་ཅིའི་ཕྱིར་ཞེ་ན། གང་དགོན་པ་ལ་གནས་པའི་བྱང་ཆུབ་སེམས་དཔའ་ནི་ལུས་དང་སྲོག་ལ་ཡང་མི་ལྟ་བ་ཡིན་ཏེ། དེ་ལྟར་དགོན་པ་ལ་གནས་པ་དེའི་སྦྱིན་པའི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །ཁྱིམ་
བདག་ཇི་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་ཞེ་ན། ཁྱིམ་བདག་གང་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པ་ནི་སྦྱངས་པའི་ཡོན་ཏན་དང་། ཡོ་བྱད་བསྙུངས་པ་ལ་རབ་ཏུ་
གནས་ནས་སྡོམ་པ་གསུམ་གྱིས་ཡང་དག་པ་སྒྲུབ་སྟེ། དེ་ལྟར་དགོན་པ་ལ་གནས་པ་དེའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པའི་བཟོད་པའི་ཕ་རོལ་ཏུ་ཕྱིན་པ་བསྒོམ་པ་
ཡོངས་སུ་རྫོགས་པར་འགྱུར་ཞེ་ན། ཁྱིམ་བདག་གང་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པ་ནི་སེམས་ལ་གནོད་སེམས་མེད་ཅིང་སེམས་ཅན་ཐམས་ཅད་ལ་བྱམས་པར་བྱེད། དེ་ཐམས་ཅད་མཁྱེན་པ་ཉིད་ལ་ཡང་བཟོད་པ་ཡིན་ཏེ། དེ་ལྟར་དགོན་པ་ལ་གནས་པ་དེའི་བཟོད་
པའི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་ཞེ་ན། ཁྱིམ་བདག་འདི་ལ་བྱང་ཆུབ་སེམས་དཔའ་རབ་ཏུ་བྱུང་བ་
ནི་མི་སྐྱེ་བ་ལ་བཟོད་པ་རབ་ཏུ་ཐོབ་པར་བྱ་བའི་ཕྱིར་བདག་དགོན་པ་འདི་ལས་ལྡོག་པར་མི་བྱའོ་སྙམ་དུ་སློབ་སྟེ། དེ་ལྟར་དགོན་པ་ལ་གནས་པ་དེའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམ་པ་ཡོངས་སུ་རྫོགས་པར་འགྱུར་རོ། །ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་
དགོན་པ་ལ་གནས་པའི་བསམ་གཏན་གྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་ཞེ་ན། ཁྱིམ་བདག་གང་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པ་ནི་བསམ་གཏན་གྱི་ཕ་རོལ་ཏུ་ཕྱིན་པ་རབ་ཏུ་འཐོབ་སྟེ། སེམས་ཅན་ཡོངས་སུ་སྨིན་པར་བྱེད་པ་

ཡང་ཡལ་བར་མི་འདོར་ལ། འདི་ལྟར་དགེ་བའི་རྩ་བ་ཡང་སོགས་པར་འདོད་པ་ཡིན་ཏེ། དེ་ལྟར་དགོན་པ་ལ་གནས་པ་དེའི་བསམ་གཏན་གྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་
གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་ཞེ་ན། ཁྱིམ་བདག་གང་བྱང་ཆུབ་སེམས་དཔའ་རབ་ཏུ་བྱུང་བ་ནི་འདི་ལ་ལུས་ཇི་ལྟ་བ་དགོན་པ་ཡང་དེ་བཞིན་ནོ། །ལུས་ཇི་ལྟ་བ་བྱང་ཆུབ་ཀྱང་དེ་བཞིན་ནོ་སྙམ་དུ་སློབ་ཅིང་དེ་བཞིན་ཉིད་ཀྱིས་མི་རྟོག་རྣམ་
པར་མི་རྟོག་སྟེ། དེ་ལྟར་དགོན་པ་ལ་གནས་པ་དེའི་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །ཁྱིམ་བདག་དེ་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པ་ཚེགས་ཆུང་ངུས་ཕ་རོལ་ཏུ་ཕྱིན་པ་དྲུག་བསྒོམ་པ་ཡོངས་སུ་རྫོགས་
པར་འགྱུར་རོ། །ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བ་ཆོས་བཞི་དང་ལྡན་ན་དགོན་པ་ལ་གནས་པར་གནང་བ་ཡིན་ནོ། །བཞི་གང་ཞེ་ན། ཁྱིམ་བདག་འདི་ལ་བྱང་ཆུབ་སེམས་དཔའ་རབ་ཏུ་བྱུང་བ་མང་དུ་ཐོས་པ་ཡིན་ཏེ། ཐོས་པ་འཛིན་པ། ཆོས་རྣམ་པར་ངེས་པ་ལ་
མཁས་པ། ཚུལ་བཞིན་ཡིད་ལ་བྱེད་པ་ལ་བརྩོན་ཞིང་། ཆོས་དང་ཆོས་ཀྱི་རྗེས་སུ་འཐུན་པ་སྒྲུབ་པ་དེས་དགོན་པ་ལ་གནས་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་ཉོན་མོངས་པའི་ཤས་ཆེ་ན་དེས་ཉོན་མོངས་པ་རྣམས་ཞི་བར་བྱ་བའི་ཕྱིར་འགྲོགས་པ་
མེད་པར་དགོན་པ་ལ་གནས་པར་བྱ་སྟེ། དེས་ཉོན་མོངས་པ་ཚར་གཅད་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་ནི་མངོན་པར་ཤེས་པ་ལྔ་པོ་དག་ཐོབ་པ་ཡིན་ཏེ། དེས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་རྣམས་ཡོངས་སུ་སྨིན་པར་བྱ་བའི་ཕྱིར་དགོན་
པ་ལ་གནས་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བས་སངས་རྒྱས་ཀྱིས་དགོན་པ་ལ་གནང་བར་བཀའ་སྩལ་བར་ཤེས་ནས་དགོན་པ་ལ་གནས་པར་བྱ་སྟེ། དེར་དགེ་བའི་ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །དགེ་བའི་རྩ་བས་ཉེ་བར་

བརྟན་ནས་ཕྱིར་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། ཕོ་བྲང་འཁོར་དག་ཏུ་ཞུགས་ཏེ་ཆོས་བསྟན་པར་བྱའོ། །ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བ་ཆོས་བཞི་པོ་དེ་དག་དང་ལྡན་ན་དགོན་པ་ལ་
གནས་པར་གནང་ངོ་། །ཁྱིམ་བདག་གལ་ཏེ་བྱང་ཆུབ་སེམས་དཔའ་རབ་ཏུ་བྱུང་བ་ལུང་དང་ཁ་ཏོན་མནོད་པའི་ཕྱིར་ཚོགས་ཀྱི་ནང་དུ་འཇུག་ན་ཡང་དེས་དེར་གུས་པ་དང་བཅས་པར་བྱ་སྟེ། སློབ་དཔོན་དང་། མཁན་པོ་རྣམས་དང་། གནས་བརྟན་དང་། བར་མ་དང་།
དགེ་སློང་གསར་བུ་རྣམས་ལ་ཞེ་ས་དང་བཅས་པར་བྱ། ཚུལ་མཁས་པར་བྱའོ། །སྙོམ་ལས་མེད་པར་རང་གིས་བྱ་བ་དང་། གཞན་ལ་གདུང་བ་མེད་པར་བྱའོ། །དེས་བསྙེན་བཀུར་ལ་གདུ་བར་མི་བྱའོ། །དེས་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ལྷ་དང་བཅས་པའི་འཇིག་རྟེན་དང་། བདུད་དང་བཅས་པ་དང་། ཚངས་པ་དང་བཅས་པ་དང་། དགེ་སྦྱོང་དང་། བྲམ་ཟེའི་སྐྱེ་དགུ་དང་བཅས་པ་དང་། ལྷ་དང་། མི་དང་། ལྷ་མ་ཡིན་དུ་བཅས་པས་མཆོད་པ་སྦྱིན་གནས་སུ་གྱུར་པ་དེ་ཡང་སེམས་ཅན་ཐམས་ཅད་
ལ་གང་ལས་ཀྱང་རིམ་གྲོར་བྱ་བ་བདག་གིར་མི་མཛད་ན། བདག་ཅག་མ་བསླབས་པ་སློབ་འདོད་པ་རྣམས་ལྟ་ཅི་སྨོས་ཏེ། བདག་གིས་ནི་སེམས་ཅན་ཐམས་ཅད་ལ་བསྙེན་བཀུར་བྱའི། གང་ལས་ཀྱང་བསྙེན་བཀུར་བྱ་བ་བདག་གིར་མི་བྱའོ་སྙམ་དུ་བརྟག་པར་བྱའོ། །དེ་ཅིའི་ཕྱིར་ཞེ་ན། ཁྱིམ་
བདག་དགེ་སློང་བསྙེན་བཀུར་ལ་གདུ་བ་ནི་ཡོན་ཏན་གྱི་ཆོས་རྗེས་སུ་བཟུང་བ་ཆུད་གཟོན་པ་ཡིན་ཏེ། དེས་གང་དག་སྡུད་པ་དེ་དག་ཀྱང་འདི་སྙམ་དུ་སེམས་ཏེ། བདག་ཅག་ནི་བསྙེན་བཀུར་གྱི་ཕྱིར་སྡུད་ཀྱི། ཆོས་ཀྱི་ཕྱིར་ནི་མ་ཡིན་ནོ་སྙམ་སྟེ། དེ་བདག་ཉིད་ཀྱི་དད་པ་ཆུད་གསོན་ཏོ། །གང་
དག་དེ་ལ་བསྙེན་བཀུར་བྱེད་པ་འཇིག་རྟེན་གྱི་ཟང་ཟིང་དང་ལྡན་པ་དེ་དག་གི་ཡང་དོན་ཆེན་པོར་མི་འགྱུར་རོ། །འབྲས་བུ་ཆེན་པོར་མི་འགྱུར་རོ། །དེ་སློབ་དཔོན་དང་། མཁན་པོའི་གན་དུ་འགྲོ་ན་ཡང་སློབ་དཔོན་དང་། མཁན་པོས་མ་དད་པའི་བག་གང་ཡང་རུང་བ་ཞིག་ལས་བརྟགས་ནས་

བདག་ལ་ལུང་འབོག་པ་དང་། ཁ་ཏོན་བྱ་བ་དང་། རྗེས་སུ་བསྟན་པས་ཕན་འདོགས་པར་མི་འགྱུར་དུ་འོང་ཞེས་ལུས་དང་སེམས་ལས་སུ་རུང་བ་དང་། སེམས་ཅང་ཤེས་པས་འགྲོ་བར་བྱའོ། །དེ་ལུང་མནོད་པ་དང་། ཁ་ཏོན་གྱི་ཕྱིར་ལུས་དང་སྲོག་ལ་ཡང་མི་བལྟ་བར་བྱའོ། །ཆོས་
འདོད་པས་སློབ་དཔོན་དང་། མཁན་པོ་རྣམས་ཀྱི་བསམ་པ་ཡོངས་སུ་རྫོགས་པར་བྱའོ། །ཡོན་ཏན་དོན་དུ་གཉེར་བས་རྙེད་པ་དང་། བཀུར་སྟི་དང་། ཚིགས་སུ་བཅད་པ་ཐམས་ཅད་དོན་དུ་མི་གཉེར་བར་བྱའོ། །ཁྱིམ་བདག་གལ་ཏེ་བྱང་ཆུབ་སེམས་དཔའ་ལུང་མནོད་པ་དང་།
ཁ་ཏོན་དུ་བྱ་བ་དོན་དུ་གཉེར་བས་གཞན་དག་ལས་ཚིག་བཞི་པའི་ཚིགས་སུ་བཅད་པ་ཙམ་འམ། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་ལྡན་པའམ། བྱང་ཆུབ་སེམས་དཔའི་ལམ་གྱི་ཚོགས་སོགས་
པ་དང་ལྡན་པའི་ཚིག་བཞི་པའི་ཚིགས་སུ་བཅད་པ་སུ་ལས་མཉན་ཏམ། ལུང་མནོས་སམ། བཟུང་ན་དེས་སློབ་དཔོན་དེ་ལ་ཆོས་ཀྱི་ཕྱིར་གུས་པར་བྱའོ། །མིང་དང་། ཚིག་དང་། ཡི་གེ་ཇི་སྙེད་ཀྱིས་ཚིགས་སུ་བཅད་པ་བསྟན་པ་དེ་སྙེད་ཀྱི་བསྐལ་པར་གལ་ཏེ་སློབ་དཔོན་
དེ་ལ་གཡོ་མེད་པས་བསྙེན་བཀུར་དང་། གཡོག་བྱས་ཤིང་རྙེད་པ་དང་། བཀུར་སྟི་ཐམས་ཅད་ཀྱིས་མཆོད་པ་བྱས་སུ་ཟིན་ཀྱང་། ཁྱིམ་བདག་ད་དུང་དུ་དེས་སློབ་དཔོན་ལ་སློབ་དཔོན་དུ་རི་མོ་བྱ་བ་རྫོགས་པར་མི་འགྱུར་ན་ཆོས་མ་ཡིན་པའི་གུས་པས་ལྟ་ཅི་སྨོས། ཁྱིམ་
བདག་དད་པས་མཉན་ཅིང་བསྒོམ་པ་དང་། ཁ་ཏོན་ལ་འཇུག་པ་དེའི་སེམས་དང་། སེམས་ལས་བྱུང་བ་དགེ་བ་དང་ལྡན་པའམ། སངས་རྒྱས་དང་ལྡན་པའམ། ཆོས་དང་ལྡན་པའམ། དགེ་འདུན་དང་ལྡན་པའམ། སྐྱོ་ཞིང་འདོད་ཆགས་དང་བྲལ་བ་དང་ལྡན་པའམ།
བྱང་བ་དང་། དུལ་བ་དང་། ཞི་བ་དང་ལྡན་པའི་འཇུག་པ་ཇི་སྙེད་པ་གལ་ཏེ་དེ་སྙེད་ཀྱི་བསྐལ་པར་སློབ་དཔོན་ལ་བསྙེན་བཀུར་བྱས་སུ་ཟིན་ཀྱང་། ཁྱིམ་བདག་ད་དུང་དུ་སློབ་དཔོན་ལ་སློབ་དཔོན་དུ་རི་མོ་བྱ་བ་རྫོགས་པ་མ་ཡིན་ནོ། །ཁྱིམ་བདག་རྣམ་གྲངས་འདིས་ཀྱང་ཇི་

ལྟར་རྣམ་པར་སྨིན་པའི་ཆོས་ཚད་མེད་ཅིང་ཡེ་ཤེས་ཁོང་དུ་ཆུད་པ་ཚད་མེད་པ་དེ་ལྟར་རིག་པར་བྱའོ། །ཁྱིམ་བདག་དེ་ལྟ་བས་ན་རྣམ་པར་སྨིན་པའི་ཆོས་ཚད་མེད་པ་དང་། ཡེ་ཤེས་ཁོང་དུ་ཆུད་པ་ཚད་མེད་པ་དྲིས་པས་བདག་གི་སློབ་དཔོན་
ཡང་ཚད་མེད་དོ་སྙམ་ནས་བྱང་ཆུབ་སེམས་དཔའ་ཆོས་ལ་རི་མོ་ཚད་མེད་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བས། རབ་ཏུ་བྱུང་བའི་སྒྲུབ་པ་ལ་གནས་པར་བྱའོ། །ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་རབ་ཏུ་
བྱུང་བའི་སྒྲུབ་པ་ལ་གནས་པ་ཡིན་ཞེ་ན། ཁྱིམ་བདག་འདི་ལ་བྱང་ཆུབ་སེམས་དཔའ་རབ་ཏུ་བྱུང་བ་ཚུལ་ཁྲིམས་ཡོངས་སུ་དག་པ་ཐོས་ན་དེ་ལ་སློབ་སྟེ། བཞི་པོ་འདི་དག་ནི་ཚུལ་ཁྲིམས་ཡོངས་སུ་དག་པའོ། །བཞི་གང་ཞེ་ན། འཕགས་པའི་རིགས་རྣམས་ལ་གནས་པ་དང་།
སྦྱངས་པའི་ཡོན་ཏན་དང་ཡོ་བྱད་བསྙུངས་པ་ལ་མངོན་པར་དགའ་བ་དང་། ཁྱིམ་ན་གནས་པ་དང་། རབ་ཏུ་བྱུང་བ་རྣམས་དང་མི་འདྲེ་བ་དང་། ཚུལ་འཆོས་པ་མེད་པར་དགོན་པ་ལ་གནས་པ་སྟེ། བཞི་པོ་དེ་དག་ནི་ཚུལ་ཁྲིམས་ཡོངས་སུ་དག་པའོ། །ཁྱིམ་བདག་གཞན་ཡང་ཚུལ་
ཁྲིམས་ཡོངས་སུ་དག་པ་བཞི་སྟེ། བཞི་གང་ཞེ་ན། ལུས་བསྡམས་པས་ལུས་མི་དམིགས་པ་དང་། ངག་བསྡམས་པས་ངག་མི་དམིགས་པ་དང་། ཡིད་བསྡམས་པས་ཡིད་མི་དམིགས་པ་དང་། ལྟ་བ་དང་བྲལ་བས་ཐམས་ཅད་མཁྱེན་པར་སེམས་བསྐྱེད་པ་སྟེ། བཞི་པོ་
དེ་དག་ནི་ཚུལ་ཁྲིམས་ཡོངས་སུ་དག་པའོ། །ཁྱིམ་བདག་གཞན་ཡང་ཚུལ་ཁྲིམས་ཡོངས་སུ་དག་པ་བཞི་སྟེ། བཞི་གང་ཞེ་ན། ངར་འཛིན་པ་སྤངས་པ་དང་། ང་ཡིར་འཛིན་པ་བོར་བ་དང་། ཆད་པ་དང་། རྟག་པ་དང་བྲལ་བ་དང་། རྟེན་པའི་ཆོས་ལ་འཇུག་པ་སྟེ། བཞི་པོ་
དེ་དག་ནི་ཚུལ་ཁྲིམས་ཡོངས་སུ་དག་པའོ། །ཁྱིམ་བདག་གཞན་ཡང་ཚུལ་ཁྲིམས་ཡོངས་སུ་དག་པ་བཞི་སྟེ། བཞི་གང་ཞེ་ན། ཕུང་པོ་རྣམས་ལ་འབྱུང་བ་དང་འཇིག་པར་རྟོག་པ་དང་། ཁམས་རྣམས་ལ་ཆོས་ཀྱི་དབྱིངས་སུ་ཡོངས་སུ་འཇལ་བ་དང་། སྐྱེ་

མཆེད་རྣམས་ལ་གྲོང་སྟོང་པར་འདུ་ཤེས་པ་དང་། ཐ་སྙད་བཏགས་པ་རྣམས་ལ་མངོན་པར་མ་ཞེན་པ་སྟེ། བཞི་པོ་དེ་དག་ནི་ཚུལ་ཁྲིམས་ཡོངས་སུ་དག་པའོ། །ཁྱིམ་བདག་གཞན་ཡང་ཚུལ་ཁྲིམས་ཡོངས་སུ་དག་པ་བཞི་སྟེ། བཞི་གང་ཞེ་ན། བདག་
ལ་བདག་མེད་པར་འདུ་ཤེས་པས་བདག་ལ་མི་སྟོད་པ་དང་། གཞན་མི་དམིགས་པས་གཞན་ལ་མི་སྨོད་པ་དང་། སེམས་ཤིན་ཏུ་སྦྱངས་པས་རློམ་སེམས་མེད་པ་དང་། ཆོས་ཐམས་ཅད་མཉམ་པ་ཉིད་པས་གཡོ་བ་མེད་པ་སྟེ། བཞི་པོ་དེ་དག་ནི་ཚུལ་ཁྲིམས་
ཡོངས་སུ་དག་པའོ། །ཁྱིམ་བདག་གཞན་ཡང་ཚུལ་ཁྲིམས་ཡོངས་སུ་དག་པ་བཞི་སྟེ། བཞི་གང་ཞེ་ན། སྟོང་པ་ཉིད་ལ་མོས་པ་དང་། མཚན་མ་མེད་པས་མི་སྐྲག་པ་དང་། སེམས་ཅན་ཐམས་ཅད་ལ་ཆེར་སྙིང་རྗེ་བ་དང་། བདག་མེད་པ་ལ་བཟོད་པ་སྟེ།
བཞི་པོ་དེ་དག་ནི་ཚུལ་ཁྲིམས་ཡོངས་སུ་དག་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་ཏིང་ངེ་འཛིན་ཡོངས་སུ་དག་པ་ཐོས་ན་དེ་ལ་སློབ་སྟེ། ཏིང་ངེ་འཛིན་ཡོངས་སུ་དག་པ་གང་ཞེ་ན། གང་ཆོས་ཐམས་ཅད་ལ་རྩོལ་བ་མེད་པ་
དང་། ཆོས་ཐམས་ཅད་མཉམ་པ་ཉིད་པས་གཉིས་སུ་དབྱེར་མེད་པ་དང་། སེམས་ལས་སུ་རུང་བ་དང་། སེམས་རྩེ་གཅིག་པ་དང་། སེམས་ངེས་པར་བྱུང་བ་དང་། སེམས་མི་འཕྲོ་བ་དང་། སེམས་ཀུན་ཏུ་མི་རྒྱུག་པ་དང་། སེམས་མི་གནས་པ་དང་།
སེམས་ངེས་པར་སེམས་པར་བྱིན་གྱིས་རློབ་པ་དང་། སེམས་ལ་དབང་སྒྱུར་བ་དང་། སེམས་འདོད་པའི་ཡོན་ཏན་རྣམས་ལ་མི་ཆགས་པ་དང་། སེམས་ཆོས་ལ་སྒྱུ་མར་སོ་སོར་རྟོག་པ་དང་། ཇི་ལྟར་ཆོས་ཀྱི་དབྱིངས་མངོན་པར་འདུ་མི་བྱེད་པ་དང་། ཇི་ལྟར་མི་སྐྱེ་
མི་འབྱུང་ཞིང་མཉམ་པ་ཉིད་པ་དེ་ལྟར་ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བ་ཏིང་ངེ་འཛིན་ཡོངས་སུ་དག་པ་ལ་སོ་སོར་རྟོག་གོ །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཐོས་ན་དེ་ལ་སློབ་སྟེ།

ཤེས་རབ་ཡོངས་སུ་དག་པ་དེ་གང་ཞེ་ན། དེ་འདི་ལྟར་སོ་སོར་རྟོག་སྟེ། ཆོས་ཐམས་ཅད་མངོན་སུམ་དུ་ཤེས་པ་དང་། ཚིག་རབ་ཏུ་དབྱེ་བ་ཤེས་པ་དང་། སོ་སོ་ཡང་དག་པར་རིག་པ་འཇུག་པ་ཤེས་པ་དང་། སེམས་ཅན་གཞན་དག་ལ་ཆོས་གོ་
བར་བྱེད་པ་ཤེས་པ་སྟེ། ཁྱིམ་བདག་དེ་ལྟར་བྱང་ཆུབ་སེམས་དཔའ་རབ་ཏུ་བྱུང་བ་ཤེས་རབ་ཡོངས་སུ་དག་པ་ལ་སོ་སོར་རྟོག་གོ །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་འདི་ལ་ཤེས་རབ་འདི་ནི་ལུས་མེད་པས་ཐོགས་པ་མེད་པའི་མཚན་ཉིད་དོ། །
རྒྱུ་བ་མེད་པས་གཟུང་བ་མེད་པའི་མཚན་ཉིད་དོ། །སྐྱེ་བ་མེད་པས་གནས་པ་མེད་པའི་མཚན་ཉིད་དོ། །ནམ་མཁའ་ལྟར་ངོ་བོ་ཉིད་མེད་པས་མངོན་པར་འདུ་མི་བྱེད་པའི་མཚན་ཉིད་དོ་སྙམ་དུ་རབ་ཏུ་སློབ་བོ། །ཁྱིམ་བདག་དེ་ལྟར་ན་གང་འདི་ལྟར་ཆོས་ལ་སོ་སོར་རྟོག་པ་འདི་
ནི་བྱང་ཆུབ་སེམས་དཔའ་རབ་ཏུ་བྱུང་བའི་སྒྲུབ་པའོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན་སྲོག་ཆགས་བརྒྱ་སྟོང་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཁྱིམ་བདག་དེ་དག་ཐམས་ཅད་ལས་ཕལ་ཆེར་
ནི་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་བོ། །སྲོག་ཆགས་སུམ་ཁྲི་ཉིས་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་དང་བྲལ་ཞིང་དྲི་མ་མེད་པ་རྣམ་པར་དག་གོ །དེ་ནས་ཁྱིམ་བདག་དྲག་ཤུལ་ཅན་དགའ་ལ་ཡི་རངས་ཏེ། རབ་ཏུ་དགའ་ནས་མགུ་བ་དང་ཡིད་བདེ་བ་སྐྱེས་ཏེ། བརྒྱ་
སྟོང་རི་བའི་རས་བཅོས་བུའི་ཟུང་བཅོམ་ལྡན་འདས་ཀྱི་སྐུ་ལ་གསོལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་དགེ་བའི་རྩ་བ་འདི་སེམས་ཅན་རྣམས་ལ་སྩལ་ཏོ། །བདག་གི་དགེ་བའི་རྩ་བ་འདིས་བྱང་ཆུབ་སེམས་དཔའ་ཁྱིམ་པ་རྣམས་ཀྱི་བསླབ་པ་ཇི་ལྟར་
བཅས་པ་དེ་ལྟར་བྱང་ཆུབ་སེམས་དཔའ་ཁྱིམ་པ་གང་ལགས་པ་དེ་དག་གི་ཆོས་ཡོངས་སུ་རྫོགས་པར་གྱུར་ཅིག །བཅོམ་ལྡན་འདས་ཀྱིས་ཇི་ལྟར་བྱང་ཆུབ་སེམས་དཔའ་རབ་ཏུ་བྱུང་བ་རྣམས་ཀྱི་བསླབ་པ་བཅས་པ་ཡང་དེ་ལྟར་བྱང་ཆུབ་སེམས་དཔའ་རབ་ཏུ་བྱུང་བ་

གང་དག་ལགས་པ་དེ་དག་གི་ཆོས་ཡོངས་སུ་རྫོགས་པར་གྱུར་ཅིག །བཅོམ་ལྡན་འདས་ལ་ཡང་ཞུ་བར་འཚལ་ཏེ། བཅོམ་ལྡན་འདས་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་ཆོས་དུ་ཞིག་དང་ལྡན་ན་རབ་ཏུ་བྱུང་བའི་བསླབ་པ་ལ་སློབ་པ་ལགས།
དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་འདི་ལ་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་ཆོས་ལྔ་དང་ལྡན་ན་རབ་ཏུ་བྱུང་བའི་བསླབ་པ་ལ་སློབ་པ་ཡིན་ཏེ། ལྔ་
གང་ཞེ་ན། ཁྱིམ་བདག་འདི་ལ་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་མི་ལྟ་བར་དངོས་པོ་ཐམས་ཅད་ཡོངས་སུ་གཏོང་བ་ཡིན་ཏེ། ཐམས་ཅད་མཁྱེན་པ་ཉིད་ཀྱི་ཡེ་ཤེས་དང་ལྡན་པས་རྣམ་པར་སྨིན་པ་ལ་རེ་བ་མེད་པ་དང་། ཁྱིམ་བདག་གཞན་
ཡང་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་ཚངས་པར་སྤྱོད་ཅིང་གཙང་མ་ཡིན་ཏེ། ཡིད་ཀྱི་དགུ་ལ་ཡང་འདོད་པ་མི་སྐྱེད་ན་མཚན་གཉིས་སྤྲོད་པའམ། ཡན་ལག་མ་ཡིན་པར་འཇུག་པ་ལྟ་ཅི་སྨོས་པ་དང་། ཁྱིམ་བདག་གཞན་ཡང་བྱང་ཆུབ་
སེམས་དཔའ་ཁྱིམ་པ་ཁྱིམ་ན་གནས་པ་ཡང་དག་པ་སྐྱོན་མེད་པ་ལ་མི་རེག་ཅིང་ཁྱིམ་སྟོང་པར་ཞུགས་ནས་ཐབས་ཀྱིས་མངོན་པར་བསྒྲུབས་པ་བསམ་གཏན་བཞི་པོ་དག་ལ་སྙོམས་པར་འཇུག་པ་དང་། ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ཁྱིམ་
ན་གནས་པ་སེམས་ཅན་ཐམས་ཅད་བདེ་བར་བྱེད་པ་ལ་བརྩོན་པ་ཤེས་རབ་ཀྱི་ཕ་རོལ་ཏུ་ཕྱིན་པས་ངེས་པར་འབྱུང་བར་བརྩོན་འགྲུས་རྩོམ་པ་དང་། ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་དག་ཀྱང་དམ་པའི་ཆོས་ཡོངས་སུ་འཛིན་
ཅིང་གཞན་ཡང་ཡང་དག་པའི་ཆོས་ལ་སྦྱོར་བར་བྱེད་པ་སྟེ། ཁྱིམ་བདག་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་ཆོས་ལྔ་པོ་དེ་དག་དང་ལྡན་ན་རབ་ཏུ་བྱུང་བའི་བསླབ་པ་ལ་སློབ་པ་ཡིན་ནོ། །དེ་ནས་བཅོམ་ལྡན་འདས་ལ་ཁྱིམ་བདག་དྲག་ཤུལ་ཅན་

གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་རྣམས་ཀྱི་བཀའ་བཞིན་དུ་བགྱི་བར་འཚལ་ལོ། །རབ་ཏུ་བྱུང་བའི་བསླབ་པ་ལ་བསླབ་བོ། །ཆོས་མཉམ་པ་ཉིད་འདི་ལྟ་བུ་ལ་ཡང་འཇུག་པར་བགྱིའོ། །དེ་ནས་
དེའི་ཚེ་བཅོམ་ལྡན་འདས་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་གང་གི་ཚེ་འཛུམ་པ་མཛད་པའི་ཆོས་ཉིད་དེ། དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་འཕྲོ་བ་ཁ་དོག་དུ་མ་ཁ་དོག་སྣ་ཚོགས་བྱུང་བ་འདི་ལྟ་སྟེ། སྔོན་པོ་དང་། སེར་
པོ་དང་། དམར་པོ་དང་། དཀར་པོ་དང་། ལེ་བརྒན་དང་། ཤེལ་དང་། དངུལ་གྱི་ཁ་དོག་ལྟ་བུ་སྟེ། དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་རྣམས་སུ་འོད་ཀྱིས་སྣང་བས་ཁྱབ་པར་བྱས་ནས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་
ཏེ། སླར་ལོག་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་དབུའི་གཙུག་ཏུ་ནུབ་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སངས་རྒྱས་ཀྱི་མཐུས་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་
པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱུ་མ་མཆིས་རྐྱེན་མ་མཆིས་པར་ནི་དེ་བཞིན་གཤེགས་པ་འཛུམ་པ་མི་མཛད་ན་འཛུམ་པ་
མཛད་པའི་རྒྱུ་གང་ལགས། རྐྱེན་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཀྱིས་ཁྱིམ་བདག་དྲག་ཤུལ་ཅན་འདིས་དེ་བཞིན་གཤེགས་པ་ལ་
མཆོད་པ་བྱས་ཏེ་ཆོས་བསྒྲུབ་པའི་ཕྱིར་སེང་གེའི་སྒྲ་བསྒྲགས་པ་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱིམ་བདག་

དྲག་ཤུལ་ཅན་འདི་ནི་གང་དག་བསྐལ་པ་བཟང་པོ་འདི་ལ་འབྱུང་བའི་དེ་བཞིན་གཤེགས་པ་དེ་དག་ཐམས་ཅད་ལ་རིམ་གྲོ་བྱེད་པར་འགྱུར་རོ། །བསྟི་སྟང་དང་། མཆོད་པ་ཐམས་ཅད་ཀྱིས་མཆོད་པར་འགྱུར་རོ། །དམ་པའི་ཆོས་ཀྱང་འཛིན་པར་འགྱུར་རོ། །
རྟག་ཏུ་ཡང་ཁྱིམ་བདག་ཏུ་གྱུར་ནས་རབ་ཏུ་བྱུང་བའི་བསླབ་པ་ལ་གནས་སོ། །དེ་བཞིན་གཤེགས་པའི་བྱང་ཆུབ་དེ་ཡང་རྒྱས་པར་བྱེད་པར་འགྱུར་རོ། །དེ་ནས་ཚེ་དང་ལྡན་པ་ཀུན་དགའ་བོས་ཁྱིམ་བདག་དྲག་ཤུལ་ཅན་ལ་འདི་སྐད་ཅེས་སྨྲས་སོ། །ཁྱིམ་བདག་རྒྱུ་
གང་དང་རྐྱེན་གང་གིས་གང་ཁྱིམ་ན་གནས་ཤིང་རྡུལ་ལ་གནས་པ་ལ་དགའ་བར་བྱེད། དྲག་ཤུལ་ཅན་གྱིས་སྨྲས་པ། །བཙུན་པ་ཀུན་དགའ་བོ་རྡུལ་ལ་ནི་རྡུལ་ཅུང་ཟད་ཀྱང་མེད་དོ། །སྙིང་རྗེ་ཆེན་པོ་དང་ལྡན་པས་བདག་བདེ་བ་ལ་མི་རེ་བ་ཡིན་ནོ། །བཙུན་པ་ཀུན་
དགའ་བོ་བྱང་ཆུབ་སེམས་དཔའ་ནི་སྡུག་བསྔལ་ཐམས་ཅད་ཀྱིས་གཟིར་ཀྱང་བཟོད་དེ། སེམས་ཅན་རྣམས་ཡོངས་སུ་མི་གཏོང་ངོ་། །དེ་སྐད་ཅེས་སྨྲས་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་
དགའ་བོ་ཁྱིམ་བདག་དྲག་ཤུལ་ཅན་འདི་ཁྱིམ་གྱི་ས་ལ་གནས་ནས་བསྐལ་པ་བཟང་པོ་འདི་ལ་སེམས་ཅན་རབ་ཏུ་མང་པོ་ཡོངས་སུ་སྨིན་པར་བྱེད་པར་འགྱུར་ཏེ། རབ་ཏུ་བྱུང་བའི་བྱང་ཆུབ་སེམས་དཔས་ནི་བསྐལ་པ་སྟོང་ངམ། བསྐལ་པ་བརྒྱ་སྟོང་དུ་མར་ཡང་དེ་
ལྟར་མི་ནུས་སོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་ཁྱིམ་བདག་འདི་ལ་ཡོད་པའི་ཡོན་ཏན་རྣམས་ནི་རབ་ཏུ་བྱུང་བའི་བྱང་ཆུབ་སེམས་དཔའ་སྟོང་ལ་ཡང་མེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་
འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་དྲག་ཤུལ་

ཅན་གྱིས་ཞུས་པ་ཞེས་བྱ་བར་ཟུང་ཤིག །ཁྱིམ་པ་དང་རབ་ཏུ་བྱུང་བའི་བསླབ་པ་སྒྲུབ་པ་ཞེས་བྱ་བར་ཡང་ཟུང་ཤིག །ལྷག་པའི་བསམ་པས་བླ་མ་ལ་བསྙེན་བཀུར་བྱ་བའི་ལེའུ་ཞེས་བྱ་བར་ཡང་ཟུང་ཤིག །ཀུན་དགའ་བོ་
ཆོས་ཀྱི་རྣམ་གྲངས་འདི་ཐོས་མ་ཐག་ཏུ་བྱང་ཆུབ་སེམས་དཔའི་ཡོན་ཏན་དང་། བརྩོན་འགྲུས་དང་། ཆོས་མང་པོ་རབ་ཏུ་འཐོབ་སྟེ། བརྩོན་འགྲུས་ཞན་པས་བསྐལ་པ་བརྒྱར་ཚངས་པར་སྤྱད་པ་ལ་གནས་པས་ནི་དེ་ལྟ་མ་ཡིན་ནོ། །ཀུན་དགའ་བོ་དེ་
བས་ན་བདག་ཀྱང་འདི་ལ་བརྩོན་འགྲུས་བསྐྱེད་པར་འདོད་པ་དང་། གཞན་ཡང་བརྩོན་འགྲུས་ལ་གཟུད་པར་འདོད་པ་དང་། བདག་ཀྱང་ཡོན་ཏན་གྱི་ཆོས་མཉམ་པ་ཉིད་ཐམས་ཅད་ལ་གནས་པར་འདོད་པ་དང་། གཞན་ཡང་ཡོན་ཏན་གྱི་ཆོས་མཉམ་
པ་ཉིད་ཐམས་ཅད་ལ་དགོད་པར་འདོད་པས་ཆོས་ཀྱི་རྣམ་གྲངས་འདི་མཉན་པར་བྱ། ཀུན་ཆུབ་པར་བྱ། བཀླག་པར་བྱ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །ཀུན་དགའ་བོ་ངས་ཆོས་ཀྱི་རྣམ་གྲངས་འདི་ཡང་དང་ཡང་རྒྱ་ཆེར་
ཡང་དག་པར་རབ་ཏུ་བསྟན་པར་བྱ་བའི་ཕྱིར་ཁྱོད་ལ་ཡོངས་སུ་གཏད་དོ། །དེ་ཅིའི་ཕྱིར་ཞེ་ན། ཆོས་ཀྱི་རྣམ་གྲངས་འདིའི་ནང་དུ་ཡོན་ཏན་ཐམས་ཅད་འདུས་པར་དེ་བཞིན་གཤེགས་པས་བཤད་པའི་ཕྱིར་རོ། །ཀུན་དགའ་བོ་བྱང་ཆུབ་སེམས་དཔའ་གང་ཆོས་ཀྱི་
རྣམ་གྲངས་འདི་དང་མི་འབྲལ་བར་གནས་པ་དེ་སངས་རྒྱས་འབྱུང་བ་དང་མི་འབྲལ་ལོ། །ཀུན་དགའ་བོ་བྱང་ཆུབ་སེམས་དཔའ་གང་ཆོས་ཀྱི་རྣམ་གྲངས་འདི་ཉན་ཏམ། འཛིན་ཏམ། ཀློག་པ་དང་མི་འབྲལ་བ་དེ་སངས་རྒྱས་འབྱུང་བ་དང་། སངས་རྒྱས་
ཐམས་ཅད་མཐོང་བ་དང་མི་འབྲལ་ལོ། །དེ་ཅིའི་ཕྱིར་ཞེ་ན། ཀུན་དགའ་བོ་ཆོས་ཀྱི་རྣམ་གྲངས་འདིའི་ནང་དུ་ཡོན་ཏན་ཐམས་ཅད་འདུས་ཤིང་ཆོས་ཀྱི་རྣམ་གྲངས་འདིའི་ནང་དུ་བསླབ་པ་བསྒྲུབ་པའི་ལམ་གྱི་ཡོན་ཏན་ཐམས་ཅད་འདུས་པར་དེ་བཞིན་གཤེགས་

པས་ཡང་དག་པར་རབ་ཏུ་བཤད་པའི་ཕྱིར་རོ། །ཀུན་དགའ་བོ་རིགས་ཀྱི་བུའམ་རིགས་ཀྱི་བུ་མོ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མེས་རབ་ཏུ་གང་བ་ཡང་འབོགས་ཏེ། ཆོས་
ཀྱི་རྣམ་གྲངས་འདི་མཉན་པར་བྱ། ཀུན་ཆུབ་པར་བྱའོ། །ཀུན་དགའ་བོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་རབ་ཏུ་གང་བ་ཙམ་ཡང་རི་མོར་བྱས་ཏེ་སློབ་དཔོན་ལ་ཕུལ་ནས་ཆོས་ཀྱི་རྣམ་གྲངས་འདི་མཉན་པར་
བྱའོ། །ཀུན་ཆུབ་པར་བྱའོ། །ཀུན་དགའ་བོ་བྱང་ཆུབ་སེམས་དཔའ་གང་གིས་འདས་པའི་སངས་རྒྱས་བཅོམ་ལྡན་འདས་རྣམས་ཀྱི་མཆོད་རྟེན་རིན་པོ་ཆེ་ལས་སོ་སོར་བྱས་ཏེ་མཆོད་པ་ཐམས་ཅད་ཀྱིས་མཆོད་ལ། དེ་བཞིན་དུ་ད་ལྟར་བྱུང་
བའི་སངས་རྒྱས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་རྣམ