Kinh tạng Tây Tạng (Kangyur Đại Học) — 042_དཀོན་བརྩེགས།_ང

ེས་ཆེན་པོ་དང་ལྡན་པ་ཡིན་པས་བདག་གིས་འདི་དག་གི་མཆོད་པ་བླང་བའི་མི་རིགས་སོ་སྙམ་དུ་སེམས་པར་གྱུར་ཏོ། །དྲང་སྲོང་
དེ་དག་ངས་རྗེས་སུ་བསྟན་པའི་ཕྱིར་དེ་ལྟ་བུའི་ཆོས་ཐོབ་པར་གྱུར་ཀྱང་ངས་ཐོབ་པར་མ་གྱུར་པས་ཆོས་དེ་ཐོབ་པར་བྱས་ཤིང་མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་ནན་ཏན་བརྩོན་འགྲུས་བསྐྱེད་པར་གྱུར་ཏོ། །གླང་པོ་ཆེའི་ལག་ངས་ནན་ཏན་བརྩོན་འགྲུས་བསྐྱེད་ནས་ཆོས་དེ་

མངོན་དུ་བྱས་པའི་ཚེ་གནས་གཙང་མའི་རིས་ཀྱི་ལྷ་ཞིག་འོངས་ཏེ་མངོན་དུ་ལུས་བསྟན་ནས་ང་ལ་འདི་སྐད་དུ་ཀྱེ་ཡེ་ཤེས་འདི་ལ་མངོན་པར་ཞེན་པར་མ་བྱེད་ཅིག །ཁྱོད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་ཚད་མེད་དཔག་
ཏུ་མེད་པ་རྣམས་ཡོངས་སུ་ཟློ་བར་འགྱུར་རོ་ཞེས་བསྒོའོ། །གླང་པོ་ཆེའི་ལག་ངས་དེའི་ཚེ་དེ་སྐད་བསྒོ་བ་ཐོས་ནས་ལམ་བསྒོམ་པ་བཏང་བས་སེམས་མཆོག་ཏུ་དགའ་བ་ཐོབ་པར་གྱུར་ནས་ཟླ་བ་ཕྱེད་ཀྱི་བར་དུ་དབེན་པར་འདུག་པའི་ཚེ་དགའ་བས་ལུས་ཀུན་དུ་ཁྱབ་པར་གྱུར་ཏོ། །གླང་
པོ་ཆེའི་ལག་བྱང་ཆུབ་སེམས་དཔའ་ཆོས་བཞི་དང་ལྡན་པར་གྱུར་ན་ལྷ་རྣམས་ཀྱིས་གོ་བར་བྱེད་ཅིང་རབ་ཏུ་དགའ་བའི་སེམས་ཀྱང་འཐོབ་པར་འགྱུར་ལ། བདག་ཉིད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་རིག་པར་བྱའོ། །བཞི་གང་ཞེ་ན། བྱང་ཆུབ་
སེམས་དཔའ་ནི་བདག་ཉིད་བླ་ན་མེད་པའི་བྱང་ཆུབ་ཏུ་སེམས་རབ་ཏུ་བསྐྱེད་ནས་གཞན་དག་ཀྱང་སེམས་བསྐྱེད་པར་སྐུལ་བ་ཡིན། ཐེག་པ་ཆེན་པོར་སེམས་བསྐྱེད་པ་དག་མཐོང་ན་ཕྲག་དོག་ཀྱང་མི་བྱེད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་བདག་གཅིག་པུས་ཐོབ་པར་
བྱ་བ་ཡིན་གྱི། གཞན་གྱིས་ཐོབ་པར་བྱ་བ་མ་ཡིན་ནོ་སྙམ་དུ་མི་སེམས་པ་ཡིན། སེམས་ཅན་ཉེས་པར་སྤྱོད་པ་དག་ལ་དུས་དུས་སུ་རྗེས་སུ་འདོམས་ཤིང་སེམས་བཟང་པོས་གཏམ་དག་སྨྲས་ནས་དེ་དག་གི་དགེ་བ་ཡོངས་སུ་སྲུང་བར་བྱེད་པ་ཡིན། བདག་ཉིད་རྟག་པར་རབ་
ཏུ་བརྩོན་པའི་སེམས་ཀྱིས་ཆོས་རྣམས་རྒྱ་ཆེར་གཉེར་ཞིང་གཞན་དག་ལ་བསྟན་ནས་སེར་སྣ་མེད་པར་གྱུར་པ་ཡིན་ཏེ། གླང་པོ་ཆེའི་ལག་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་བཞི་པོ་འདི་དག་དང་ལྡན་པར་གྱུར་ན་ལྷ་རྣམས་ཀྱིས་ཀྱང་གོ་བར་བྱེད་ལ། བདག་
ཉིད་ཀྱང་མངོན་པར་རྫོགས་པར་འཚང་རྒྱ་བར་འགྱུར་བར་རིག་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་དོན་འདི་ཉིད་རབ་ཏུ་གསལ་བར་བསྟན་པའི་ཕྱིར་ཚིགས་སུ་བཅད་དེ་བཀའ་སྩལ་པ། བྱང་ཆུབ་སེམས་དཔའ་བརྟན་སེམས་ཀྱིས། །བླ་མེད་ཐེག་ལ་རབ་གནས་ཤིང་། །

སེམས་ཅན་དག་ཀྱང་བསྐུལ་བྱས་ནས། །ཐེག་པ་དེ་ལ་འགོད་པར་བྱེད། །བྱང་ཆུབ་སེམས་དཔའ་སྤྱད་སྤྱོད་ཚེ། །རྟག་པར་ཕྲག་དོག་ཁོང་ཁྲོ་མེད། །ནན་ཏན་བརྩོན་འགྲུས་རྩོམ་བྱེད་པས། །དགའ་བའི་སེམས་ནི་འཕེལ་བར་འགྱུར། །
སེམས་ཅན་སྡིག་སྤྱོད་མཐོང་གྱུར་ན། །དུས་སུ་རྗེས་སུ་འདོམས་པར་བྱེད། །རྟག་པར་བྱམས་དང་སྙིང་རྗེར་ལྡན། །ཁོང་ཁྲོ་དག་ནི་མེད་པ་ཡིན། །རྟག་པར་ནན་ཏན་ཆོས་གཉེར་ནས། །སེམས་ཅན་རྣམས་ལ་སྤེལ་བར་བྱེད། །ཇི་ལྟར་ཆར་ནི་རླན་བྱེད་ལྟར། །ཆོས་
ཀྱིས་ཐམས་ཅད་ཚིམ་པར་བྱེད། །ཆོས་བཞི་འདི་དག་གང་སྤྱོད་པ། །ཁྱོད་ནི་སངས་རྒྱས་འགྲུབ་འགྱུར་བས། །ཐེ་ཚོམ་སེམས་ནི་མ་སྐྱེད་ཅེས། །ལྷ་རྣམས་ཀྱིས་ནི་གོ་བར་བྱེད། །བྱང་ཆུབ་སེམས་དཔས་དེ་ཐོས་ནས། །ནན་ཏན་བརྩོན་འགྲུས་སྐྱེད་པར་
བྱེད། །དངོས་པོ་འདི་ནི་ངེས་བདེན་པས། །བདག་ནི་སངས་རྒྱས་ངེས་འགྲུབ་སེམས། །བྱང་ཆུབ་སེམས་དཔའ་དེ་དག་ནི། །བརྩོན་འགྲུས་དང་ནི་སྨོན་ལམ་དང་། །དྲན་པ་དང་ནི་ཤེས་རབ་དག །བདག་ཉིད་རྒྱ་ཆེར་འཕེལ་བར་འགྱུར། །གལ་ཏེ་དེ་བཞིན་གཤེགས་
པ་རྣམས། །འཇིག་རྟེན་དུ་ནི་བྱུང་གྱུར་ན། །བྱང་ཆུབ་སེམས་དཔའ་དེ་དག་ནི། །འདི་འདྲའི་ཡོན་ཏན་ལྡན་པར་འགྱུར། །གང་ཟག་ཆེན་པོས་བཀུར་འགྱུར་ཞིང་། །རྒྱལ་པོ་བློན་པོ་དམངས་རྣམས་ཀྱང་། །ཐམས་ཅད་སེམས་ནི་རབ་དགའ་ཞིང་། །ལམ་ལྡན་
ཡིན་པར་རིག་པར་འགྱུར། །བསྟན་བཅོས་གཙུག་ལག་ཚིག་དང་དོན། །ཚིག་འབྲུ་ཚིགས་བཅད་རྩིས་དང་གྲངས། །དེ་དག་ཐམས་ཅད་ལེགས་རྟོགས་པས། །སེམས་ཅན་ཀུན་གྱི་མཆོག་ཏུ་འགྱུར། །དབང་པོ་རྣོ་ཞིང་ཤེས་རབ་ལྡན། །བྱ་བ་སྟོབས་ལ་མི་ལྟོས་
པར། །ཐབས་དང་ལྡན་པ་འབའ་ཞིག་གིས། །ཐམས་ཅད་ཡོངས་སུ་གྲུབ་པར་ནུས། །དགྲ་རྣམས་རབ་ཏུ་གདུལ་བ་ཡང་། །ལུས་ཀྱི་ཞོ་ཤ་མི་ལྟོས་པར། །ཤེས་རབ་སྟོབས་ནི་འབའ་ཞིག་གིས། །རང་གི་སེམས་ནི་འདུལ་བར་བྱེད། །སེམས་ཅན་རབ་

ཏུ་བརྩེ་བའི་ཕྱིར། །འཇིག་རྟེན་དུ་ནི་སྐྱེས་པས་ན། །རྒྱལ་པོ་བློན་པོ་དམངས་རྣམས་ཀྱང་། །ངོ་མཚར་ཆེ་ཞེས་བསྔགས་པར་འགྱུར། །ལྷ་རྣམས་ཀུན་ཀྱང་སྨྲ་བས་ན། །དེ་ཡི་ཡ་མཚན་ཀུན་གྱིས་རིག །ཅི་ཕྱིར་དེ་ལྟར་རིག་ཅེ་ན། །
བདག་སེམས་ཤེས་ཞེས་སེམས་ཕྱིར་རོ། །བྱང་ཆུབ་སེམས་དཔའ་དེ་རྟག་ཏུ། །སངས་རྒྱས་རྣམས་ནི་མཐོང་བས་ན། །དེར་སོང་ཆོས་ནི་རབ་ཞུས་ནས། །སེམས་ཅན་རྒྱ་ཆེར་ཕན་ཡང་འདོགས། །སངས་རྒྱས་ཞུས་ལན་གསུངས་པས་ན། །ཐེ་ཚོམ་དག་ནི་ཆད་པར་འགྱུར། །
སེམས་ཅན་རྣམས་ནི་ཕན་འདོགས་པས། །ཐམས་ཅད་དགའ་བ་ཐོབ་པར་འགྱུར། །སངས་རྒྱས་རྫུ་འཕྲུལ་མཐུ་བསྟན་ནས། །སངས་རྒྱས་འགྱུར་བར་ལུང་སྟོན་པས། །དེ་ཕྱིར་བྱང་ཆུབ་སེམས་དཔའ་དེ། །སེམས་ནི་དགའ་བ་ཐོབ་པར་འགྱུར། །
ཤིན་ཏུ་ཕངས་པའི་ནོར་རྣམས་དང་། །ཕྱི་ནང་ཀུན་ལ་ཆགས་མེད་པས། །དེ་ཕྱིར་དགའ་བ་ཆེན་པོ་ཡིས། །བདག་ཉིད་སངས་རྒྱས་འགྲུབ་པར་ཤེས། །སངས་རྒྱས་རྣམས་ཀྱིས་བསྔགས་པ་ཡི། །བཟོད་པ་གྱ་ནོམ་ཐོབ་པས་ན། །དེ་
ཕྱིར་དགའ་བ་ཆེན་པོ་ཡིས། །བདག་ཉིད་སངས་རྒྱས་འགྲུབ་པར་ཤེས། །ཆོས་རྣམས་ཀུན་ལ་མི་གནས་ཤིང་། །ཆོས་བརྟན་མི་རུང་རིག་པས་ན། །དེ་འདྲའི་ཤེས་རབ་ཐོབ་གྱུར་ནས། །ལུས་ནི་མཁའ་ལ་འཕགས་པར་འགྱུར། །དེ་ཡི་
སེམས་ནི་ནང་མི་གནས། །ཕྱི་རོལ་ན་ཡང་མི་གནས་ཏེ། །འདུ་ཤེས་ཐམས་ཅད་འདས་པས་ན། །དེ་ཕྱིར་བཟོད་པ་བླ་མེད་ཐོབ། །ཡུན་རིང་བྱམས་དང་སྙིང་རྗེ་ཡིས། །སེམས་ཅན་ཀུན་ལ་སེམས་པས་ན། །དེ་ཕྱིར་བསོད་ནམས་དེ་ཡི་དབང་། །
སངས་རྒྱས་ཚད་མེད་མཐོང་བར་འགྱུར། །དེ་ཡི་ལུས་ནི་ཐམས་ཅད་ཀུན། །སངས་རྒྱས་སྐུ་དང་ཁྱད་པར་མེད། །དེ་འདྲའི་བཟོད་པ་ཐོབ་པས་ནི། །ཆོས་ཀྱི་བདག་ཉིད་འཕེལ་བར་བྱེད། །བྱང་ཆུབ་ཏུ་ནི་སེམས་བསྐྱེད་ལ། །སུ་ཞིག་རྗེས་

སུ་སློབ་མི་བྱེད། །རབ་བརྟན་དམ་ཆོས་གང་གནས་པ། །འདི་འདྲའི་ཡོན་ཏན་ཐོབ་པར་འགྱུར། །དེ་ཕྱིར་ལམ་ནི་གཉེར་བ་དག །རྟག་པར་ནན་ཏན་ཆོས་གཉེར་བྱ། །ཆོས་ཀྱིས་བདག་གི་ཁེ་བཙལ་ནས། །བྱང་ཆུབ་ལ་
ནི་ཕན་གདགས་བྱ། །བརྒལ་བའི་ལན་གདབ་པའི་ལེའུ་སྟེ་བདུན་པའོ།། །།དེ་ནས་བཅོམ་ལྡན་འདས་ལ་ཚེ་དང་ལྡན་པ་བྱམས་མའི་བུ་གང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱིས་འདས་པའི་དུས་ན་བྱང་
ཆུབ་སེམས་དཔའི་སྤྱད་པ་སྤྱོད་པའི་ཚེ་དགེ་བའི་ཆོས་རྣམ་པ་སྣ་ཚོགས་ལ་ཤིན་ཏུ་བརྟན་པར་གནས་པར་གྱུར་པ་ནི་ངོ་མཚར་ཆེ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། །གང་པོ་དེ་དེ་བཞིན་ནོ། །དེ་དེ་བཞིན་ཏེ། ང་ནི་ཡུན་རིང་པོ་
ནས་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་དགེ་བའི་ཆོས་ལ་ཤིན་ཏུ་བརྟན་པར་གནས་པར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་དོན་འདི་ཉིད་རབ་ཏུ་གསལ་བར་བསྟན་པའི་ཕྱིར་ཚིགས་སུ་བཅད་དེ་བཀའ་སྩལ་པ། ཆོས་གཉེར་ཆོས་ནི་
གང་ཐོབ་པ། །དེ་ནི་སངས་རྒྱས་ལམ་གཞི་ཡིན། །རྟག་ཏུ་ཆོས་ལ་གང་བརྩོན་པ། །ཆོས་མ་ཡིན་པ་སྤོང་བར་འགྱུར། །རྟག་ཏུ་ཡང་དག་ལམ་སྤྱོད་པ། །ལོག་པའི་ལམ་ནི་སྤོང་བར་བྱེད། །སངས་རྒྱས་ཆོས་ལ་རྟག་བསྟེན་པ། །དེ་ནི་
ལམ་ལ་བསྟེན་པར་འགྱུར། །དེས་ན་མི་ཁོམ་རྣམས་སྤངས་ནས། །ཁོམ་ལྡན་དག་ནི་ཐོབ་པར་འགྱུར། །ཁོམ་ལྡན་གནས་ནི་ཐོབ་གྱུར་ན། །བརྩོན་འགྲུས་བརྩམས་པ་ཆུད་མི་ཟ། །གནས་གཉིས་སུ་ནི་མཆོག་ཏུ་བཙུན། །ཁ་དོག་གཟུགས་ནི་
མཆོག་ཏུ་འགྱུར། །གཡོག་འཁོར་དག་ནི་ཕུན་ཚོགས་ཤིང་། །ཐམས་ཅད་ཀུན་གྱི་མཆོག་ཏུ་འགྱུར། །བརྟན་པའི་སེམས་ཀྱིས་རྟག་ཏུ་ནི། །ཚུལ་ཁྲིམས་བཟོད་པའི་ཕྱོགས་ལ་གནས། །བརྩོན་འགྲུས་ཕྱོགས་ལ་རབ་གནས་ཤིང་། །བསམ་གཏན་

ཤེས་རབ་འཕེལ་བར་བྱེད། །རྟག་ཏུ་སེམས་ཅན་ཐམས་ཅད་ཀྱི། །གཙོ་མཆོག་དག་ནི་བྱེད་པར་འགྱུར། །ཡོན་ཏན་ཀུན་གྱི་མཆོག་གྱུར་པས། །དོན་རིག་འཇིགས་པ་ཅི་ཡང་མེད། །དེ་ནས་བཅོམ་ལྡན་འདས་ལ་ཚེ་དང་ལྡན་པ་གང་པོས་འདི་སྐད་
ཅེས་གསོལ་ཏོ། །བཅོམ་ལྡན་འདས་འདི་ལྟ་བུའི་ཆོས་གྱ་ནོམ་པ་དག་ལ་སུ་ཞིག་སློབ་པར་མི་བགྱིད་དེ། བདག་ཅག་ནི་སྔོན་དང་དང་པོ་ནས་ལེ་ལོ་ཅན་དུ་གྱུར་པས་སངས་རྒྱས་ཀྱི་མཁྱེན་པ་ལ་རེ་བ་མ་མཆིས་ཤིང་བདག་ཅག་སངས་རྒྱས་ཀྱི་མཁྱེན་པ་འདི་ལྟ་བུ་ཐོབ་
པར་འགྱུར་བར་མངོན་པར་ཡིད་ཆེས་པ་མ་མཆིས་པ་ན། འདི་ལྟར་ཉན་ཐོས་ཀྱི་ཐེག་པས་བདག་ཉིད་ངེས་པར་བྱུང་བར་གྱུར་པ་ལགས་སོ་སྙམ་སེམས་སོ། །བཅོམ་ལྡན་འདས་བདག་ནི་དེང་སླན་ཆད་བྱང་ཆུབ་སེམས་དཔའ་རྣམས་ལ་གཟེངས་སྟོད་ཅིང་། སྤྲོ་བ་
བསྐྱེད་ནས་སངས་རྒྱས་ཀྱི་ཆོས་ལ་དགོད་པར་བགྱིད་ལགས་སོ། །དེའི་སླད་དུ་ཞེ་ན། སངས་རྒྱས་བཅོམ་ལྡན་འདས་རྣམས་ནི་ཤིན་ཏུ་དཀའ་བ་མཛད་པ་ལགས་པས་བཅོམ་ལྡན་འདས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་སེམས་ཅན་གྱི་ཆེད་དུ་རྟག་པར་
དེ་ལྟ་བུའི་ཤིན་ཏུ་དཀའ་བའི་དངོས་པོ་ཤ་སྟག་མཛད་དེ། དེ་ལྟ་བུའི་དངོས་པོ་དེ་ནི་དགྲ་བཅོམ་པ་དང་། རང་སངས་རྒྱས་ཐམས་ཅད་ལ་ཡང་མ་མཆིས་ན། སེམས་ཅན་གཞན་ལ་ལྟ་སྨོས་ཀྱང་ཅི་འཚལ་བས་སོ། །བཅོམ་ལྡན་འདས་དེ་ལྟ་བུའི་ཤིན་ཏུ་དཀའ་བའི་དངོས་པོ་
ཆེན་པོ་དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོར་གྱུར་པ་འབའ་ཞིག་གིས་སེམས་ཅན་ཐམས་ཅད་ལ་སྙིང་བརྩེ་བའི་སླད་དུ། བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་ཤིན་ཏུ་དཀའ་བའི་དངོས་པོ་ཆེན་པོ་དེ་ལྟ་བུ་ཚད་མ་མཆིས། དཔག་ཏུ་མ་མཆིས། གྲངས་
མ་མཆིས་པ་དག་སྤྱད་པས་བཅོམ་ལྡན་འདས་བྱང་ཆུབ་སེམས་དཔའ་དེ་དག་དེ་ལྟ་བུའི་ཤིན་ཏུ་དཀའ་བའི་དངོས་པོ་ཆེན་པོ་སྤྱད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ཆོས་ཀྱི་འཁོར་ལོ་ཡོངས་སུ་བསྐོར་ཏེ། སེམས་ཅན་

སྡུག་བསྔལ་གྱིས་གཟིར་བ་རྣམས་ཡོངས་སུ་བཟླ་བར་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གང་པོ་དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་ཇི་སྐད་སྨྲས་པ་དེ་བཞིན་དུ། བྱང་ཆུབ་སེམས་དཔའ་
སེམས་དཔའ་ཆེན་པོ་རྣམས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། སེམས་ཅན་ཐམས་ཅད་ཀྱི་ཕན་པ་དང་། བདེ་བ་ཡོངས་སུ་གཉེར་བའི་ཕྱིར། སེམས་ཅན་ཐམས་ཅད་ལ་བྱམས་པ་དང་། སྙིང་རྗེ་ཆེན་པོ་དང་ལྡན་
པ་ཡིན་པས། སེམས་ཅན་ཐམས་ཅད་ཀྱི་ཆེད་དུ་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། དེ་ལྟ་བུའི་སྨོན་ལམ་ཆེན་པོ་དང་། དཀའ་བའི་དངོས་པོ་ཆེན་པོ་ཤིན་ཏུ་ཟབ་པ། ཤིན་ཏུ་དཀའ་བ། ཚད་མེད། དཔག་ཏུ་མེད། གྲངས་མེད་
པ་དང་ལྡན་པར་གྱུར་བ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་གང་པོ་དང་། འཁོར་བཞི་པོ་རྣམས་དང་། ལྷ་དང་། མི་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དུ་བཅས་
པ་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་རབ་ཏུ་དགའ་ཞིང་ཡིད་ཆེས་པས་མངོན་པར་བསྟོད་དོ།། །།ཚེ་དང་ལྡན་པ་གང་པོའི་ལེའུ་སྟེ་བརྒྱད་པའོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་
ཕྲག་བརྒྱ་པ་ལས་གང་པོས་ཞུས་པའི་ལེའུ་སྟེ་བཅུ་བདུན་པ་རྫོགས་སོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཅྭ་བརྒྱད་པ་སྟེ། ཡུལ་འཁོར་སྐྱོང་གིས་ཞུས་
པ། །བམ་པོ་དང་པོ། །རྒྱ་གར་སྐད་དུ། ཨཱརྱ་རཱཥྚྲ་པཱ་ལ་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཡུལ་འཁོར་སྐྱོང་གིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ།། །།སངས་རྒྱས་དང་བྱང་ཆུབ་སེམས་དཔའ་ཐམས་ཅད་

ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་ལྔ་སྟོང་ཐམས་ཅད་
ཀྱང་སྤོབས་པ་ཐོགས་པ་མེད་པ། བཟོད་པ་ཐོབ་པ། བདུད་ཕྱིར་རྒོལ་བ་བཅོམ་པ། སངས་རྒྱས་ཀྱི་ཆོས་ཐམས་ཅད་ལ་ཤིན་ཏུ་ཉེ་བར་གྱུར་པ། སྐྱེ་བ་གཅིག་གིས་ཐོགས་པ། གཟུངས་ཐོབ་པ། ཏིང་ངེ་འཛིན་ཐོབ་པ། སྤོབས་པ་
མཐའ་ཡས་པ་ཐོབ་པ། མི་འཇིགས་པ་ཐོགས་པ་མེད་པ་ཐོབ་པ། རྫུ་འཕྲུལ་གྱི་སྟོབས་དང་། དབང་དམ་པའི་ཕ་རོལ་དུ་སོན་པ་ནས། ཡོན་ཏན་གྱི་ཚོགས་ཐམས་ཅད་ཟད་མི་ཤེས་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་
དཔའ་ཆེན་པོ་ཀུན་ཏུ་བཟང་པོ་དང་། ཀུན་ཏུ་མིག་དང་། ཀུན་ཏུ་ལྟ་བ་དང་། ཀུན་ཏུ་འོད་ཟེར་དང་། ཀུན་ཏུ་འོད་དང་། བློ་གྲོས་མཆོག་དང་། བློ་གྲོས་འཕེལ་དང་། བློ་གྲོས་མཐའ་ཡས་དང་། བློ་གྲོས་རྒྱ་ཆེན་དང་། བློ་གྲོས་མི་
ཟད་པ་དང་། ས་འཛིན་དང་། འགྲོ་བ་འཛིན་དང་། རྒྱལ་བའི་བློ་གྲོས་དང་། ཁྱད་པར་བློ་གྲོས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ཀྱི་དབང་ཕྱུག་གི་རྒྱལ་པོ་དང་། འཇམ་དཔལ་ལ་སོགས་པ་བྱང་ཆུབ་སེམས་དཔའ་དཔེ་མེད་པ་དྲུག་
ཅུ་དང་། བཟང་སྐྱོང་ལ་སོགས་པ་སྐྱེས་བུ་དམ་པ་བཅུ་དྲུག་དང་། མི་མཇེད་ཀྱི་བདག་པོ་ཚངས་པ་དང་། ལྷ་ཡི་དབང་པོ་བརྒྱ་བྱིན་དང་། འཇིག་རྟེན་སྐྱོང་བ་བཞི་དང་། ལྷའི་བུ་མཚན་བཟངས་དང་། ལྷའི་བུ་བློ་གྲོས་ལེགས་གནས་དང་། ལྷ་ཡི་དབང་
པོ་ཐམས་ཅད་དང་། ཀླུ་ཡི་དབང་པོ་ཐམས་ཅད་དང་། མིའམ་ཅིའི་དབང་པོ་དང་། དྲི་ཟའི་དབང་པོ་དང་། གནོད་སྦྱིན་གྱི་དབང་པོ་དང་། ལྷ་མ་ཡིན་གྱི་དབང་པོ་དང་། ནམ་མཁའ་ལྡིང་གི་དབང་པོ་འཁོར་བརྒྱ་སྟོང་དུ་མ་ཡོད་པ་ཐམས་ཅད་དང་། འཁོར་དེ་ཉིད་

དུ་འདུས་ཏེ་འཁོད་པ་རྣམས་དང་ཐབས་གཅིག་ཏུ་བཞུགས་སོ། །དེ་ནས་བཅོམ་ལྡན་འདས་དཔལ་གྱི་སྙིང་པོའི་སེང་གེའི་ཁྲི་ལ་བཞུགས་ཏེ། ལྷུན་པོ་ལྟར་འཁོར་གྱི་དཀྱིལ་འཁོར་ཐམས་ཅད་ལས་ནི་མངོན་པར་འཕགས། ཉི་མ་ལྟར་འཇིག་
རྟེན་ཐམས་ཅད་ལ་ནི་སྣང་། ཟླ་བ་ལྟར་འགྲོ་བ་ཐམས་ཅད་ལ་སྣང་བ་ནི་མཛད། ཚངས་པ་ལྟར་རབ་ཏུ་ཞི་བར་ནི་བཞུགས། བརྒྱ་བྱིན་ལྟར་སྐུ་ནི་བསྙེན་པར་དཀའ། འཁོར་ལོས་སྒྱུར་བ་ལྟར་བྱང་ཆུབ་ཀྱི་ཡན་ལག་གི་རིན་པོ་ཆེ་བདུན་དང་ནི་ལྡན། སེང་གེ་ལྟར་
ཆོས་ཐམས་ཅད་བདག་མེད་པ་དང་སྟོང་པར་ནི་སྒྲོགས། མེའི་ཕུང་པོ་ཆེན་པོ་ལྟར་འགྲོ་བ་ཐམས་ཅད་ལ་སྣང་བའི་སྐུ་དང་ནི་ལྡན། ལྷ་ཐམས་ཅད་སྣང་བའི་ནོར་བུ་རིན་པོ་ཆེ་ཀུན་ནས་བསྡུས་པའི་ནོར་བུ་རིན་པོ་ཆེའི་རྒྱལ་པོ་ལྟར་གཟི་བརྗིད་ཀྱིས་ནི་ཤིན་ཏུ་འབར་ཞིང་སྟོང་གསུམ་གྱི་སྟོང་
ཆེན་པོའི་འཇིག་རྟེན་གྱི་ཁམས་ཐམས་ཅད་སྣང་བས་ཁྱབ་པར་མཛད་ནས། དོན་ཤིན་ཏུ་རྣམ་པར་ངེས་པ། ཆོས་ཐམས་ཅད་ཀྱི་དམ་པའི་ཕ་རོལ་དུ་བྱོན་པ། འཁོར་གྱི་ནང་ན་བཞུགས་ཤིང་ཚངས་པའི་སྒྲ་དབྱངས་བསྒྲགས་པས་སེམས་ཅན་ཐམས་ཅད་གོ་བར་བྱེད་པ་དང་ལྡན་པའི་དབྱངས་
ཀྱིས་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་རབ་ཏུ་སྟོན་ཏོ། །དེ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་མཆོག་ཏུ་དགའ་བའི་རྒྱལ་པོ་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་པ་དེས་བཅོམ་ལྡན་འདས་སེང་གེའི་ཁྲི་ལ་བཞུགས་པ། ཉི་མ་སྟོང་བས་ལྷག་པའི་འོད་ཀྱིས་འཁོར་གྱི་དཀྱིལ་འཁོར་ཐམས་ཅད་ཟིལ་དུ་བརླག་པར་མཛད་ནས་ཤིན་ཏུ་ལྷང་ངེར་བཞུགས་པ་མཐོང་སྟེ།
དགའ་བ་དང་། མགུ་བ་དང་། དད་པས་འདུན་པའི་སེམས་ཀྱིས་སྟན་ལས་ལངས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་ཚུལ་དང་འཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ལྷ་ཚོགས་ལྷ་མ་ཡིན་དང་མིའམ་ཅི། ཀླུ་དང་ཉན་ཐོས་དག་དང་སངས་

རྒྱས་སྲས། །འགྲོ་བ་འདི་དག་རྒྱལ་བས་གཟི་ཡངས་ཀྱིས། །ཟིལ་མནན་ཁྱོད་ནི་གསེར་གྱི་རི་ལྟར་གསལ། །རྒྱ་མཚོའི་དབུས་ན་གནས་ཀྱང་རྣམ་མཛེས་པ། །ལྷུན་པོ་ལྷ་ཡི་ཚོགས་ཀྱི་གནས་ལྟ་བུར། །ཐུགས་རྗེའི་རྒྱ་མཚོའི་དབུས་སུ་དེ་བཞུགས་ཏེ། །འོད་ཟེར་སྟོང་ཕྲག་བརྒྱ་དག་
འགྱེད་པར་མཛད། །ཚངས་པའི་གནས་ལ་གནས་པའི་ཚངས་པ་དེ། །ཚངས་པའི་མདུན་ན་གནས་ཏེ་མངོན་མཛེས་ལྟར། །བསམ་གཏན་རྣམ་ཐར་ཏིང་ངེ་འཛིན་བཞུགས་པ། །སེམས་ཅན་དམ་པ་འགྲོ་བ་ཀུན་ལ་གསལ། །བརྒྱ་བྱིན་སུམ་ཅུ་རྩ་གསུམ་ལྷ་ནང་དུ། །གནས་ནས་
གཟི་བརྗིད་ཡངས་པས་མཛེས་པ་ལྟར། །མཚན་གྱིས་སྤྲས་པ་ཡེ་ཤེས་ཡོན་ཏན་ཕྱུག །ཐུབ་པའི་རྒྱལ་པོ་འགྲོ་བ་ཀུན་ལ་གསལ། །གླིང་བཞི་མི་ཡི་བདག་པོ་སྣང་ལྡན་པ། །འཇིག་རྟེན་འདི་ལ་སྟོན་པ་མཛེས་པ་ལྟར། །འཕགས་པའི་ལམ་དུ་འཛུད་པ་རབ་མཛད་ཅིང་། །ཐུགས་
རྗེའི་དགོངས་པའི་ཐུགས་མངའ་འདི་ཡང་མཛེས། །མཁའ་ལ་ཉི་མ་ལམ་མེ་ཐལ་ལེ་བ། །ནོར་བུ་མེ་འོད་མོག་མོག་བྱེད་འདི་ལྟར། །ཉི་མ་སྟོང་བས་ཁྱད་པར་འཕགས་པའི་འོད། །སངས་རྒྱས་ཉི་མ་འགྲོ་བ་འདི་ན་གསལ། །དྲི་མེད་ཟླ་བ་ནམ་གྱི་གུང་གསལ་ལྟར། །ཤིན་ཏུ་རྣམ་དག་
འགྲོ་བ་ཀུན་ལ་གསལ། །རྒྱལ་བའི་ཞལ་རས་ཟླ་བ་ཉ་བ་འདྲ། །ཀུན་འོད་ཟིལ་གྱིས་མནན་ནས་རྣམ་པར་མཛེས། །ཇི་ལྟར་རི་བོའི་ཟོམ་ལ་མེ་འབར་བ། །མཚན་མོ་མི་ཉལ་ཙམ་ན་ཀུན་སྣང་ལྟར། །གཏི་མུག་མུན་པ་མ་ལུས་བཅོམ་ནས་ནི། །དྲང་སྲོང་ཆེན་པོའི་ཡེ་ཤེས་འོད་ཀྱང་གསལ།།
སེང་གེ་རི་སུལ་བརྟེན་པའི་སྒྲ་སྒྲོག་ཅིང་། །ས་ལ་རི་དགས་ཚོགས་རྣམས་སྐྲག་བགྱིད་ལྟར། །མི་དབང་སྟོང་པ་བདག་མེད་གསུང་སྒྲོག་ཅིང་། །ཕ་རོལ་མུ་སྟེགས་ཅན་རྣམས་སྐྲག་པར་མཛད། །ནོར་བུའི་རྒྱལ་པོ་བཟང་པོ་གཟི་བརྗིད་འབར། །ནོར་བུ་ཐམས་ཅད་ཟིལ་མནན་
ལམ་མེ་ལྟར། །རྒྱལ་བའི་སྐུ་ནི་གསེར་གྱི་མདོག་འདྲ་བ། །འགྲོ་ཀུན་ཟིལ་གྱིས་མནན་ནས་ལམ་མེར་བཞུགས། །འཇིག་རྟེན་གང་ནའང་ཁྱོད་དང་མཚུངས་མ་མཆིས། །ལྷག་པའི་སེམས་ཅན་མཆིས་པར་ག་ལ་འགྱུར། །བསོད་ནམས་ཡེ་ཤེས་བརྩོན་འགྲུས་ཐབས་རྣམས་དང་། །ཡོན་ཏན་

ཀུན་གྱིས་ཁྱོད་དང་མཚུངས་མ་མཆིས། །མི་ཡི་དཔའ་བོ་འགྲོ་ལ་ལམ་མེ་བ། །མགོན་པོ་ཡོན་ཏན་རྒྱ་མཚོ་བདག་གིས་མཐོང་། །གུས་པ་སྐྱེས་ཤིང་དགའ་བ་རྣམ་པར་འཕེལ། །རྒྱལ་བའི་ཞབས་ཀྱི་མཐིལ་ལ་བདག་གིས་གཏུགས། །ཡོན་ཏན་ཀུན་གྱི་འབྱུང་གནས་འཇིག་
རྟེན་སྒྲོན། །གྲགས་པ་དམ་པ་རྒྱ་ཆེན་ཐུགས་མངའ་ལ། །བདག་གིས་བསྟོད་དེ་བསོད་ནམས་འདིར་ཐོབ་དེས། །འགྲོ་བ་ཐམས་ཅད་བྱང་ཆུབ་མཆོག་རེག་ཤོག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མཆོག་ཏུ་དགའ་བའི་རྒྱལ་པོས་བཅོམ་ལྡན་འདས་ལ་ཚིགས་སུ་བཅད་
པ་འདི་དག་གིས་མངོན་པར་བསྟོད་ནས་ཐལ་མོ་སྦྱར་ཏེ། མིག་གཉིས་མི་འཛུམས་པར་དེ་བཞིན་གཤེགས་པའི་སྐུ་ལ་ནི་ལྟ། ཆོས་ཀྱི་དབྱིངས་ཉིད་ལ་ནི་རྣམ་པར་དཔྱོད། ཟབ་པ་དང་གཏིང་དཔག་དཀའ་བ་དང་། མཐོང་བར་དཀའ་བ་དང་། ཁོང་དུ་ཆུད་པར་དཀའ་བ་དང་། བརྟག་པར་མི་ནུས་པ་དང་
རྟོག་གེའི་སྤྱོད་པ་མ་ཡིན་པ་དང་། ཞི་བ་དང་། ཕྲ་བ་ལ་ནི་འཇུག །སངས་རྒྱས་ཀྱི་སྤྱོད་ཡུལ་བསམ་གྱིས་མི་ཁྱབ་པ་ལ་ནི་རྗེས་སུ་རྣམ་པར་དཔྱོད། དེ་བཞིན་གཤེགས་པའི་ཡེ་ཤེས་ཆོས་ཀྱི་དབྱིངས་ཐམས་ཅད་དུ་ཞུགས་པ་ལ་ནི་རྗེས་སུ་རྣམ་པར་སེམས། སངས་རྒྱས་ཀྱི་ཡུལ་མི་མཉམ་པ་
དང་མཉམ་པ་ལ་ནི་ཡང་དག་པར་ལྟ། དེ་བཞིན་གཤེགས་པའི་ཐབས་ཀྱི་ཡུལ་གྱི་སྤྱོད་ཡུལ་བསམ་གྱིས་མི་ཁྱབ་པ་ལ་ནི་འཇུག །སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་དབྱིངས་གཅིག་གི་ཚུལ་གྱི་ངོ་བོ་ཉིད་ལ་འཇུག་པ་ལ་ནི་རྟོག །སངས་རྒྱས་བཅོམ་ལྡན་འདས་རྣམས་ནི་
གནས་མེད་པ་ནམ་མཁའ་སྤྱོད་ཡུལ་དུ་ནི་ཡང་དག་པར་ལྟ། ཆོས་ཐམས་ཅད་ཡང་དག་པའི་མཐའ་མཐའ་མ་ཡིན་པའི་རང་བཞིན་ལ་འཇུག་པ་ལ་ནི་མོས། སངས་རྒྱས་ཀྱི་རྣམ་པར་ཐར་པ་སྒྲིབ་པ་མེད་པ་ལ་ནི་མངོན་པར་འདོད། སངས་རྒྱས་བཅོམ་ལྡན་འདས་ཀྱི་སྐུ་རྟག་པ་དང་། ཞི་བ་དང་།
ཐེར་ཟུག་པ་ལ་ནི་འཇུག །དེ་བཞིན་གཤེགས་པའི་སྐུ་ཞིང་རབ་འབྱམ་ཐམས་ཅད་ཀྱི་རྗེས་སུ་སོང་བ་དང་། སེམས་ཅན་ཐམས་ཅད་ལ་མངོན་དུ་ཕྱོགས་པ་ལ་ནི་འཇུག །སངས་རྒྱས་བཅོམ་ལྡན་འདས་རྣམས་ཀྱི་ཡོན་ཏན་ཕྱི་མའི་མཐའི་བསྐལ་བའི་མུར་ཐུག་པ་མེད་པ་ནི་རྗེས་སུ་དྲན་པར་

བྱེད། ཆོས་ཀྱི་དབྱིངས་ཉིད་ལ་ནི་རྣམ་པར་དཔྱོད་ཅིང་བྱང་ཆུབ་སེམས་དཔའ་སེམས་དཔའ་ཆེན་པོ་མཆོག་ཏུ་དགའ་བའི་རྒྱལ་པོ་ཅང་མི་སྨྲ་བར་འདུག་པར་གྱུར་ཏོ། །དེའི་ཚེ་ཚེ་དང་ལྡན་པ་ཡུལ་འཁོར་སྐྱོང་མཉན་ཡོད་དུ་དབྱར་ཟླ་བ་གསུམ་གནས་པར་དམ་བཅས་ཏེ། དེ་ཟླ་བ་གསུམ་
འདས་ནས་ཆོས་གོས་བྱས་ཏེ། ཆོས་གོས་ཟིན་ནས་དེ་ལྷུང་བཟེད་དང་ཆོས་གོས་ཐོགས་ཏེ། དགེ་སློང་གི་དགེ་འདུན་དང་། གསར་བུ་ལས་དང་པོ་པ་རབ་ཏུ་བྱུང་ནས་རིང་པོ་མ་ལོན་པ་དག་དང་ལྷན་ཅིག་ཏུ་མཐར་གྱིས་ཡུལ་རྒྱུ་བ་རྒྱུ་ཞིང་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་། བྱ་
རྒོད་ཀྱི་ཕུང་པོའི་རི་ག་ལ་བ་དེར་སོང་ངོ་། །དེ་ནས་ཚེ་དང་ལྡན་པ་ཡུལ་འཁོར་སྐྱོང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་
ཏུ་འདུག་ནས་ཀྱང་ཚེ་དང་ལྡན་པ་ཡུལ་འཁོར་སྐྱོང་གིས་ཐལ་མོ་སྦྱར་ཏེ་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །མི་མཆོག་འོད་མཛད་པ་ལ་ཕྱག་འཚལ་ལོ། །ནམ་མཁའ་མཚུངས་པའི་ཐུགས་ལ་ཕྱག་འཚལ་ལོ། །རྒྱལ་བ་ཡིད་གཉིས་གཅོད་ལ་
ཕྱག་འཚལ་ལོ། །སྲིད་གསུམ་མཐར་བྱོན་ཐུབ་ལ་ཕྱག་འཚལ་ལོ། །ཞིང་རྣམས་བྱེ་བ་རབ་འབྱམ་ཀུན་ཏུ་ཡང་། །འདྲེན་པ་དག་ནི་ཁྱོད་ཀྱི་བསྔགས་པ་གསུང་། །རྒྱལ་བའི་སྲས་ཀྱིས་ཐོས་ནས་རབ་དགའ་ཞིང་། །ཡོན་ཏན་རྒྱ་མཚོ་ཐུབ་པ་མཆོད་དུ་མཆི། །བདེ་གཤེགས་ཚུལ་དང་
འཐུན་པས་མཆོད་བགྱིས་ཏེ། །ཐུབ་པ་ཆེ་ལས་རྡུལ་བྲལ་ཆོས་ཐོས་ནས། །དེ་དག་ཁྱོད་ཀྱི་ཡོན་ཏན་ཕྲེང་རྗོད་ཅིང་། །ཡིད་རབ་དགའ་ནས་རང་གི་ཞིང་དུ་མཆི། །བྱང་ཆུབ་དམ་པ་མཆོག་ནི་ཚོལ་བ་ན། །ཁྱོད་ཀྱི་ཐུགས་ནི་སྐྱོ་བ་མི་མངའ་བར། །བསྐལ་པ་བྱེ་བ་ཁྲག་ཁྲིག་བསམ་ཡས་
སུ། །སེམས་ཅན་རྣམས་ཀྱི་ཆེད་དུ་སྤྱོད་པ་སྤྱད། །འདྲེན་པ་ཁྱོད་ཀྱིས་སྦྱིན་དང་ཚུལ་ཁྲིམས་སྤྱད། །བཟོད་དང་བརྩོན་འགྲུས་དང་ནི་བསམ་གཏན་བསླབས། །ཤེས་རབ་ཐབས་དང་དབང་གི་ཕ་རོལ་གཤེགས། །དེས་ན་རྣམ་འདྲེན་ཆེ་ལ་ཕྱག་འཚལ་ལོ། །རྫུ་འཕྲུལ་རྐང་དང་

མངོན་ཤེས་མཆོག་ལ་མཁས། །དབང་པོ་སྟོབས་དང་རྣམ་པར་ཐར་པ་བསླབས། །སེམས་ཅན་ཀུན་གྱི་སྤྱོད་པ་ཐུགས་ཆུད་རྟོགས། །མཉམ་མེད་ཡེ་ཤེས་མཚོ་ལ་ཕྱག་འཚལ་ལོ། །འགྲོ་བ་རྣམས་ཀྱི་སེམས་རྒྱུད་རབ་ཏུ་མཁྱེན། །སྤྱོད་པ་གང་དང་ཇི་ལྟར་ལས་འབྱུང་དང་། །
ཚུལ་སྒོ་གང་གིས་རྣམ་པར་གྲོལ་འགྱུར་བ། །དེ་ནི་བཅོམ་ལྡན་མི་ཡི་མཆོག་གིས་མཁྱེན། །འདོད་ཆགས་ཞེ་སྡང་གཏི་མུག་འབྱུང་བ་སྤོང་། །གང་གིས་སེམས་ཅན་ངན་སོང་གསུམ་མཆི་དང་། །གང་གིས་བདེ་འགྲོར་མཆི་བར་འགྱུར་བའི་ལས། །འགྲོ་བས་ལེགས་པར་བགྱིས་དང་ནོངས་
བགྱིས་མཁྱེན། །འགྲོ་ལ་ཕན་མཛད་གང་དག་འདས་རྣམས་དང་། །ད་ལྟར་ལྷ་དང་མི་ཡིས་མཆོད་རྣམས་དང་། །གང་དག་མ་བྱོན་ཡོན་ཏན་མཆོག་མཐར་ཕྱིན། །བདེ་གཤེགས་དེ་དག་ཐམས་ཅད་རབ་ཏུ་མཁྱེན། །དག་པའི་ཞིང་དང་ཕུན་སུམ་ཚོགས་འཁོར་དང་། །བྱང་ཆུབ་སེམས་
དཔའི་ཚོགས་དང་ཉན་ཐོས་དང་། །དྲང་སྲོང་ཆེན་པོ་རྣམས་ཀྱི་སྐུ་ཚེའི་ཚད། །རྣམ་པ་ཀུན་ཏུ་མ་ལུས་རྣམ་པར་མཁྱེན། །མྱ་ངན་འདས་ནས་ཆོས་གནས་ཅི་འདྲ་དང་། །རྒྱལ་བའི་རིང་བསྲེལ་མཆོད་པ་ཅི་འདྲ་དང་། །དེར་ནི་ཆོས་མཛོད་འཛིན་པ་ཅི་འདྲ་བ། །དེ་དག་མ་ལུས་མི་ཡི་དམ་པས་
མཁྱེན། །དུས་གསུམ་རྣམས་སུ་རྟག་པར་སྟོབས་བཅུ་ཡི། །ཡེ་ཤེས་མཁྱེན་པ་སྒྲིབ་པ་མི་མངའ་འཇུག །ཆོས་རྣམས་ཀུན་ལ་ཐུགས་ནི་ཆགས་མི་མངའ། །ཕྱག་འཚལ་རྒྱལ་བ་ཡེ་ཤེས་མཚོ་ཁྱོད་ལ། །ཁྱོད་དང་མཚུངས་མཉམ་མ་མཆིས་ག་ལ་ལྷག །སྐར་མ་རྣམས་ཀྱིས་ནམ་
མཁར་སྤྲས་པ་ལྟར། །མཚན་རྣམས་ཀྱིས་ཀྱང་སྐུ་ནི་རབ་སྤྲས་པ། །མི་མཆོག་ཐུབ་པ་མཆོག་ལ་ཕྱག་འཚལ་ལོ། །གཟུགས་ཀྱང་མཚུངས་པ་མ་མཆིས་ཡིད་དུ་མཆི། །ལྷར་བཅས་འགྲོ་བ་ཟིལ་དུ་རླག་པར་བགྱིད། །ཚངས་པ་བརྒྱ་བྱིན་འོག་མིན་ལྷ་ཡི་རྣམས། །ཁྱོད་ཀྱི་སྤྱན་སྔ་
དེ་དག་མཛེས་མ་ལགས། །ཁྱོད་ནི་གསེར་གྱི་རི་ལྟར་དྲི་མི་མངའ། །དབུ་སྣུམ་འཇམ་ཞིང་གཡས་སུ་འཁྱིལ་པར་གནས། །ལྷུན་པོའི་རྒྱལ་པོ་ལྟ་བུར་སྤྱི་གཙུག་འཕགས། །བསོད་ནམས་རྒྱ་ཆེན་བྱུང་བ་ལམ་མེར་བཞུགས། །འོད་ཟེར་བྱེ་བ་ཁྲག་ཁྲིག་རབ་འགྱེད་ཅིང་། །ཁྱོད་

ཀྱི་སྨིན་མའི་མཚམས་ཀྱི་མཛོད་སྤུ་མཛེས། །འགྲོ་ལ་ཐུགས་རྗེ་དགོངས་པས་གང་གཟིགས་པ། །སྤྱན་ནི་ཨུད་པལ་འདྲ་ཞིང་ཡིད་དུ་མཆི། །ཟླ་ཉ་དྲི་མེད་མཁའ་ལ་ཇི་ལྟ་བ། །རྣམ་འདྲེན་ཁྱོད་ཀྱི་ཞལ་ནི་ལམ་མེ་སྟེ། །ལྟ་བའི་སྐྱེ་བོ་ངོམས་པར་མི་འགྱུར་བ། །ཞལ་བཟངས་མི་ཡི་
མཆོག་ལ་ཕྱག་འཚལ་ལོ། །ངང་པ་རྨ་བྱ་རི་དགས་རྒྱལ་གྱི་སྟབས། །གླང་པོ་དྲེགས་པ་དལ་གྱིས་མཆི་སྟབས་ཀྱིས། །ས་རྣམས་གཡོ་བར་མཛད་ཅིང་རབ་གཤེགས་པ། །སྟོབས་བཅུ་བརྟུལ་ཞུགས་བརྟན་ལ་ཕྱག་འཚལ་ལོ། །ཕྱག་གི་སོར་མོ་རིང་ཞིང་ཟླུམ་ལ་མཛེས། །སེན་
མོ་ཟངས་མདོག་དག་ཅིང་དྲ་བས་སྤྲས། །བཞེངས་ཀྱང་པུས་མོའི་ལྷ་དང་རིག་ཅིང་སླེབ། །སྐུ་མདོག་གསེར་མདོག་འདྲ་ལ་ཕྱག་འཚལ་ལོ། །འཁོར་ལོ་དྲ་བས་ཁྱབ་པའི་ཞབས་འདོར་བས། །ས་སྟེང་རི་མོར་མཛད་ཅིང་རབ་ཏུ་གཤེགས། །ཞབས་ཀྱི་འོད་ཟེར་གྱིས་ནི་ཡོངས་སྨིན་པའི། །མི་རྣམས་
གུམ་ནས་ལྷ་ཡི་འཇིག་རྟེན་མཆི། །ཆོས་ཀྱི་རྒྱལ་པོ་ནོར་བདུན་སྦྱིན་པ་པོ། །ཆོས་ཀྱི་སྦྱིན་བདག་དུལ་བའི་ཐུགས་མངའ་བ། །ཆོས་ཀྱི་སྤྱད་པས་འགྲོ་བ་རྗེས་སྟོན་པ། །འདྲེན་པ་ཆོས་ཀྱི་རྗེ་ལ་ཕྱག་འཚལ་ལོ། །བྱམས་པའི་གོ་ཆ་དྲན་པའི་རལ་གྲི་མཆོག །ཚུལ་ཁྲིམས་གཞུ་དང་ཤེས་
རབ་ཐབས་ཀྱི་མངའ། །དེ་ཡིས་སྐྱེ་འཆི་སྲིད་སྲེད་འཕེལ་བགྱིད་པ། །ཉོན་མོངས་དགྲ་དག་རྣམ་པར་བཅོམ་པར་འགྱུར། །རྒལ་ནས་སེམས་ཅན་ཁྲག་ཁྲིག་རྣམས་ཀྱང་སྒྲོལ། །གྲོལ་ནས་འཆིང་བ་ལས་ནི་འགྲོ་བ་འགྲེལ། །བདེ་གཤེགས་གང་གི་ཞི་བའི་གནས་མཆི་བ། །བདེ་བ་
རིམས་ནད་མ་མཆིས་ལམ་ཡང་སྟོན། །གང་ན་སྐྱེ་དང་འཆི་བ་མ་མཆིས་ཤིང་། །འབྲལ་བའི་སྡུག་བསྔལ་འབྱུང་བར་མི་འགྱུར་བ། །གནས་མཆོག་ཞི་བ་འདུས་མ་བགྱིས་པ་དེ། །ཐུགས་རྗེས་བརྙེས་ནས་ཁྱོད་ཀྱིས་བསྟན་པ་མཛད། །ཆོས་ཀུན་དབང་གི་ཕ་རོལ་གཤེགས་པའི་རྒྱལ། །
ཐུབ་པ་ཆེན་པོ་འཇིག་རྟེན་མཆོག་བསྟོད་པས། །བདག་གིས་འདིར་ནི་བསོད་ནམས་གང་བསགས་དེས། །འགྲོ་བ་བྱང་ཆུབ་མངོན་པར་འཚང་རྒྱ་ཤོག །དེ་ནས་ཚེ་དང་ལྡན་པ་ཡུལ་འཁོར་སྐྱོང་གིས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གི་མངོན་པར་བསྟོད་ནས་ཐལ་མོ་སྦྱར་ཏེ་

སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་
བཅོམ་ལྡན་འདས་ཀྱི་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཡུལ་འཁོར་སྐྱོང་ལ་འདི་སྐད་
ཅེས་བཀའ་སྩལ་ཏོ། །ཡུལ་འཁོར་སྐྱོང་ཁྱོད་ཅི་དང་ཅི་འདོད་པ་དྲིས་ཤིག་དང་། ངས་དྲིས་པ་དེ་དང་དེ་ཉིད་ཀྱི་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་ཡུལ་འཁོར་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དུ་དང་ལྡན་ན་ཆོས་ཐམས་ཅད་ཀྱི་ཡོན་ཏན་གྱི་ཁྱད་པར་ཐོབ་པར་འགྱུར། གཞན་ལ་རག་མ་ལས་པའི་ཤེས་པ་འཐོབ། མྱུར་བའི་ཤེས་རབ་འཐོབ། སྤོབས་པ་རྣམ་པར་ངེས་པ་འཐོབ། སྣང་བ་འཐོབ། ཐམས་
ཅད་མཁྱེན་པ་ཉིད་ལ་འཇུག་པ་དང་། སེམས་ཅན་ཡོངས་སུ་སྨིན་པར་བགྱིད་པ་དང་། ཡིད་གཉིས་སྤོང་བ་དང་། སོམ་ཉི་སྤོང་བ་དང་། ཐམས་ཅད་མཁྱེན་པ་ཉིད་དུ་རྣམ་པར་ངེས་པ་འཐོབ། སེམས་ཅན་འཛུད་པ་ལ་མཁས་པ་དང་། ཇི་སྐད་སྨྲས་པ་དེ་བཞིན་དུ་བགྱིད་པ་དང་། ལྡེམ་
པོ་དག་ཡང་དག་པ་དང་། སེམས་ཅན་གྱི་ཁམས་ལ་མཁས་པ་དང་། སངས་རྒྱས་རྗེས་སུ་དྲན་པ་འཐོབ་པ་དང་། ཞུ་བ་ཐམས་ཅད་ཞུ་བ་དང་། ཆོས་ཐམས་ཅད་འཛིན་པ་དང་། མྱུར་དུ་ཐམས་ཅད་མཁྱེན་པ་ཉིད་འཐོབ་པར་འགྱུར། དེ་ནས་ཚེ་དང་ལྡན་པ་ཡུལ་འཁོར་སྐྱོང་གིས་དེའི་ཚེ་
ཚིགས་སུ་བཅད་པ་འདི་དག་གསོལ་ཏོ། །བྱང་ཆུབ་སེམས་དཔའི་སྤྱོད་པ་རབ་ངེས་པ། །ཡང་དག་ཉིད་དུ་ཇི་ལྟར་དེ་འབྱུང་དང་། །ཡེ་ཤེས་རྒྱ་མཚོའི་བཀའ་མཆིད་རྣམ་ངེས་པ། །མི་མཆོག་རྒྱལ་བས་བདག་ལ་བཤད་དུ་གསོལ། །ཤིན་ཏུ་སྦྱངས་པའི་གསེར་གྱི་གཟུགས་ལྟ་བུ། །

སེམས་ཅན་དམ་པ་བསོད་ནམས་མཆོག་བསགས་པ། །ཁྱོད་ནི་སྐྱབས་དང་གནས་དང་དཔུང་གཉེན་ལགས། །བྱང་ཆུབ་སྤྱོད་མཆོག་དྲི་མེད་དེང་བདག་གསུངས། །གཟུངས་དང་བདུད་རྩི་བྱང་ཆུབ་འབྱུང་བ་ཡི། །ཡེ་ཤེས་མི་ཟད་ཇི་ལྟར་འཐོབ་པར་འགྱུར། །གང་གིས་སྐྱེ་བོའི་དོགས་
པ་གཅོད་འགྱུར་བ། །ཤེས་རབ་རྒྱ་མཚོ་ཇི་ལྟར་རྣམ་པར་དག །འཁོར་བར་བསྐལ་བ་བྱེ་བ་མང་པོར་ནི། །འཇིག་རྟེན་སྡུག་བསྔལ་ཉེན་ལ་ལྟ་བགྱིད་ཀྱང་། །སྐྱོ་བའི་བློ་ནི་ནམ་ཡང་མི་སྐྱེད་ཅིང་། །དེ་དག་དོན་དགེ་སྟོན་པར་འགྱུར་བ་དང་། །དག་པའི་ཞིང་དང་ཕུན་སུམ་ཚོགས་
འཁོར་དང་། །ཚེ་མཆོག་དང་ནི་ཕུན་སུམ་ཚོགས་ཞིང་དང་། །སེམས་ཅན་ཆེད་ཀྱི་བཀའ་མཆིད་བླ་མེད་དང་། །བྱང་ཆུབ་སྤྱོད་པ་དྲི་མེད་བཤད་དུ་གསོལ། །བདུད་འཇོམས་མཛད་པ་ལྟ་ངན་སྦྱོང་བ་བོ། །སྲེད་པ་སྐེམས་པ་རྣམ་གྲོལ་རེག་མཛད་པས། །ཆོས་ཀྱི་ཚུལ་ཡང་བསྐྱུད་པར་
མི་འགྱུར་བར། །སེམས་ཅན་རིན་ཆེན་སྤྱོད་མཆོག་བསྟན་དུ་གསོལ། །གཟུགས་དང་ལོངས་སྤྱོད་སྤོབས་པ་ཕུན་སུམ་ཚོགས། །སྣུམ་པའི་གསུང་གིས་འཁོར་རྣམས་ཚིམ་མཛད་པ། །བདེ་གཤེགས་སྤྲིན་ལྟར་འགྲོ་བ་ཚིམ་མཛད་པ། །སངས་རྒྱས་སྤྱོད་ཡུལ་ལེགས་
པར་བསྟན་དུ་གསོལ། །ཀ་ལ་པིང་ཀའི་སྒྲ་སྙན་གསུང་འབྱིན་པ། །ཚངས་པའི་དབྱངས་ཀྱིས་བློ་ངན་རབ་འཇིག་པ། །ཆོས་འཚལ་གྱུར་པའི་འཁོར་རྣམས་ལྷགས་ལགས་ཀྱིས། །གཙོ་བོ་བདུད་རྩིའི་རོ་ཡིས་ཚིམ་པར་མཛོད། །བྱང་ཆུབ་དམ་པ་མཆོག་ལ་འདུན་པ་མཆིས། །ཆོས་
ལ་འདུན་པ་བཟློག་པ་མི་རིགས་ཏེ། །འདྲེན་པ་བསྟན་པ་མཛད་པའི་དུས་འདི་ལགས། །རིན་ཆེན་དམ་པ་བསྒྲག་པའི་དུས་ལ་བབ། །ཐུབ་པ་བདག་ནི་བྱང་ཆུབ་རེ་བ་མཆིས། །བདག་གི་བསམ་པ་རྒྱལ་བས་རབ་ཏུ་མཁྱེན། །རྒྱལ་བ་ཅོ་འདྲི་མ་ལགས་དོན་དུ་གཉེར། །སྤྱོད་པ་དམ་
པ་ལེགས་པར་བཤད་དུ་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཡུལ་འཁོར་སྐྱོང་ལ་འདི་སྐད་ཅེས་བཀའ་སྩལ་ཏོ། །ཡུལ་འཁོར་སྐྱོང་ཁྱོད་ལེགས་སོ། །ཡུལ་འཁོར་སྐྱོང་ཁྱོད་སྐྱེ་བོ་མང་པོ་ལ་ཕན་པའི་ཕྱིར་ཞུགས་པ་དང་། ཡུལ་འཁོར་སྐྱོང་

ཁྱོད་སྐྱེ་བོ་མང་པོ་ལ་བདེ་བ་དང་། ལྷ་དང་མི་རྣམས་ཀྱི་དོན་དང་། ཕན་པ་དང་། ད་ལྟར་དང་། མ་འོངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡོངས་སུ་གཟུང་བའི་ཕྱིར་དེ་བཞིན་གཤེགས་པ་ལ་དོན་འདི་འདྲི་བར་སེམས་པ་ནི་ལེགས་སོ། །ཡུལ་
འཁོར་སྐྱོང་ཁྱོད་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་ལེགས་སོ་ཞེས་གསོལ་ཏེ། །ཚེ་དང་ལྡན་པ་ཡུལ་འཁོར་སྐྱོང་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཡུལ་འཁོར་སྐྱོང་
བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་ཡོངས་སུ་དག་པ་འདི་དག་འཐོབ་པོ། །བཞི་གང་ཞེ་ན། འདི་ལྟ་སྟེ། བསམ་པ་དང་ལྷག་པའི་བསམ་པས་ནན་ཏན་བྱེད་པ་དང་། སེམས་ཅན་ཐམས་ཅད་ལ་སེམས་མཉམ་པ་དང་། སྟོང་པ་ཉིད་སྒོམ་པ་དང་།
ཇི་སྐད་སྨྲས་པ་དེ་བཞིན་བྱེད་པ་སྟེ་ཡུལ་འཁོར་སྐྱོང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན་ཡོངས་སུ་དག་པ་འདི་དག་འཐོབ་བོ། །འདི་ལ་འདི་ནི་ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །བསམ་པ་ཐག་པས་རྟག་ཏུ་མངོན་བརྩོན་པ། །བྱང་ཆུབ་ལམ་
ལས་མི་ལྡོག་ཡིད་ལྡན་པ། །གཡོ་མེད་ཐ་བ་མེད་ཅིང་སྒྱུ་མེད་པ། །ཡེ་ཤེས་མཐའ་ཡས་ལྡན་ལ་དེ་དག་ཡོད། །སྐྱེ་དང་ན་དང་རྒ་དང་འཆིས་གཟིར་བ། །སེམས་ཅན་མགོན་མེད་སྡུག་བསྔལ་མཐོང་ནས་ནི། །སྲིད་པའི་མཚོ་ལས་འགྲོ་བ་སྒྲོལ་བའི་ཕྱིར། །དེ་དག་ཆོས་ཀྱི་གྲུ་ནི་ཡང་དག་
སྦྱོར། །དེས་པ་སེམས་ཅན་ཀུན་ལ་སེམས་མཉམ་པ། །བུ་གཅིག་པ་བཞིན་འགྲོ་བ་རྣམས་ལ་ལྟ། །འདི་དག་ཐམས་ཅད་བདག་གིས་དགྲོལ་ལོ་ཞེས། །གང་ཟག་མཆོག་གི་བསམ་པ་དེ་འདྲའོ། །སྟོང་ཉིད་རྟག་ཏུ་རྟོགས་པར་ཁོང་དུ་ཆུད། །བདག་ཡོད་མ་ཡིན་སེམས་ཅན་ཡོད་
མ་ཡིན། །འདུས་བྱས་སྒྱུ་མ་རྨི་ལམ་འདྲ་བ་ལ། །བྱིས་པ་མི་མཁས་འདི་ལ་རྣམ་པར་རྨོངས། །མཁས་པ་དེ་དག་ཇི་སྐད་ཚིག་སྨྲས་པ། །དེ་ལ་ནན་ཏན་བྱེད་ཅིང་ཀུན་ཏུ་གནས། །དུལ་ཞིང་ཞི་ལ་རྟག་ཏུ་སྐྱོན་རྣམས་སྤངས། །རྒྱལ་བའི་སྲས་རྣམས་བྱང་ཆུབ་ལམ་ལ་དགའ། །

ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དབུགས་འབྱིན་པ་འཐོབ་པ་སྟེ། བཞི་གང་ཞེ་ན། གཟུངས་ཐོབ་པ་དང་། དགེ་བའི་བཤེས་གཉེན་རྙེད་པ་དང་། །ཆོས་ཟབ་མོ་ལ་བཟོད་པ་ཐོབ་པ་དང་། ཚུལ་ཁྲིམས་ཡོངས་སུ་དག་པ་ཡང་དག་པར་སྤྱོད་པ་སྟེ། ཡུལ་
འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དབུགས་འབྱིན་པ་འཐོབ་པའོ། །འདི་ལ་འདི་ནི་ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །གང་གིས་སངས་རྒྱས་ཀུན་གྱིས་གསུངས་པའི་ཆོས་མཆོག་འཛིན་འགྱུར་བ། །གཟུངས་རྣམས་གྲགས་པ་ཆེན་པོ་དེ་དག་གིས་
ནི་རྟག་ཏུ་ཐོབ། །ནམ་ཡང་ཆུད་ཟར་མི་འགྱུར་ཕྱིར་ཞིང་བློ་གྲོས་རབ་ཏུ་འཕེལ། །དེ་དག་ཡེ་ཤེས་ཆགས་པ་མེད་ཅིང་ཆོས་ཀུན་ཕ་རོལ་ཕྱིན། །བྱང་ཆུབ་ཡན་ལག་འཕེལ་བར་བྱེད་པའི་དགེ་བའི་བཤེས་གཉེན་རྙེད། །དེ་དག་འདྲེན་པ་རྣམས་ནི་གང་ནས་བཞུད་པའི་ལམ་མཆོག་སྟོན། །
དེ་དག་སྡིག་པའི་གྲོགས་པོ་དག་ལ་སྟེན་པ་མ་ཡིན་ཏེ། །ཚིག་བྱེད་བདག་ཉིད་མེ་ལྟར་དེ་དག་རིང་དུ་རྣམ་པར་སྤོང་། །དཔའ་བོ་སྟོང་པ་ཉིད་དང་ལྡན་པའི་ཟབ་མོའི་ཆོས་ཐོས་ནས། །དེ་དག་བདག་དང་སེམས་ཅན་སྲོག་ཏུ་ལྟ་བ་ཀུན་མི་འབྱུང་། །དེ་དག་ཚུལ་ཁྲིམས་སྐྱོན་མེད་དུལ་ཞིང་ཞི་བའི་ཡིད་
དང་ལྡན། །སངས་རྒྱས་ཚུལ་ཁྲིམས་བླ་ན་མེད་ལ་སེམས་ཅན་རྣམས་ཀྱང་སྦྱོར། །ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་ཏེ། བཞི་གང་ཞེ་ན། ཡུལ་འཁོར་སྐྱོང་སངས་རྒྱས་མཐོང་བ་བྱང་ཆུབ་སེམས་དཔའ་
འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་དང་། ཡུལ་འཁོར་སྐྱོང་རྗེས་སུ་འཐུན་པའི་ཆོས་ཐོས་པ་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་དང་། ཡུལ་འཁོར་སྐྱོང་བདོག་པ་ཐམས་ཅད་ཡོངས་སུ་གཏོང་བ་བྱང་ཆུབ་སེམས་དཔའ་འཁོར་བ་ན་
འཁོད་པ་རྣམས་དགའ་བར་བྱེད་པའི་ཆོས་དང་། ཡུལ་འཁོར་སྐྱོང་དམིགས་སུ་མེད་པའི་ཆོས་ལ་བཟོད་པ་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་ཏེ། ཡུལ་འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་

བྱེད་པའི་ཆོས་སོ། །འདི་ལ་འདི་ནི་ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །གཟི་བརྗིད་ཀྱིས་ནི་འཇིག་རྟེན་ཐམས་ཅད་ཀུན་ནས་སྣང་མཛད་པའི། །རྫོགས་པའི་སངས་རྒྱས་མི་མཆོག་ཚེ་རབས་ཀུན་དུ་དེ་དག་མཐོང་། །བྱང་ཆུབ་དམ་པ་མཆོག་ཚོལ་ཚེ་ན་སེམས་ཅན་
དགྲོལ་བའི་ཕྱིར། དགའ་ཞིང་གུས་པར་གནས་ནས་དེ་ལྟར་མི་དབང་རྒྱལ་པོ་མཆོད། །འདྲེན་པ་རྣམས་ལས་ཞི་བ་རྗེས་སུ་འཐུན་པའི་ཆོས་ཀྱང་ཉན། །ཐོས་ནས་བསམ་པ་ཐག་པས་བརྟན་པ་ཚུལ་བཞིན་རབ་ཏུ་སྦྱོར། །དམིགས་མེད་ཆོས་ཐོས་ཆོས་འདི་ཐམས་ཅད་སེམས་ཅན་
མེད་པ་དང་། །འདི་ལ་བདག་མེད་པར་ནི་ཆོས་ལ་སོམ་ཉི་དེ་མི་སྐྱེད། །དེ་ནི་བདོག་པ་ཐམས་ཅད་ཡོངས་གཏོང་རྟག་ཏུ་ཀུན་འཛིན་མེད། །སློང་བ་ཉེ་བར་འོངས་པ་མཐོང་ན་སེམས་ནི་རབ་ཏུ་དགའ། །གྲོང་དང་ཡུལ་འཁོར་ས་དང་སྲོག་དང་བུ་དང་ཆུང་མ་དང་། །ཐམས་ཅད་གཏོང་ཞིང་དེ་ཡི་
སེམས་ནི་གང་དུའང་གཡོ་བ་མེད། །ཡུལ་འཁོར་སྐྱོང་བྱང་ཆུབ་སེམས་དཔས་ཆོས་བཞི་ལ་བལྟ་བར་མི་བྱ་སྟེ། བཞི་གང་ཞེ་ན་ཡུལ་འཁོར་སྐྱོང་བྱང་ཆུབ་སེམས་དཔས་ཁྱིམ་གྱི་གནས་ལ་བལྟ་བར་མི་བྱ་བ་དང་། ཡུལ་འཁོར་སྐྱོང་བྱང་ཆུབ་སེམས་དཔས་རབ་ཏུ་བྱུང་ནས་རྙེད་པ་དང་། བཀུར་
སྟི་ལ་བལྟ་བར་མི་བྱ་བ་དང་། ཡུལ་འཁོར་སྐྱོང་བྱང་ཆུབ་སེམས་དཔས་ཁྱིམ་ལ་འདྲིས་པར་བྱ་བ་ལ་བལྟ་བར་མི་བྱ་བ་དང་། ཡུལ་འཁོར་སྐྱོང་བྱང་ཆུབ་སེམས་དཔས་ལུས་དང་སྲོག་ལ་བལྟ་བར་མི་བྱ་བ་སྟེ། ཡུལ་འཁོར་སྐྱོང་བྱང་ཆུབ་སེམས་དཔས་ཆོས་བཞི་པོ་དེ་དག་ལ་བལྟ་བར་མི་བྱའོ། །
འདི་ལ་འདི་ནི་ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །སྐྱོན་གྱིས་གཟིངས་པ་མཐའ་ཡས་ལྡན་པའི་ཁྱིམ་སྤངས་རྟག་ཏུ་ནོར་མི་བལྟ། །ཡོན་ཏན་ལྡན་པ་དེས་པ་དེ་དག་དགོན་པར་དགའ་ཞིང་དབང་པོ་དུལ། །དེ་དག་གང་དུའང་བུད་མེད་རྣམས་དང་སྐྱེས་པ་དག་དང་འདྲིས་མི་བྱེད། བསེ་
ལྟར་གཅིག་པུར་གནས་ཤིང་བསམ་པ་དྲི་མེད་དག་ལ་དྲི་མ་བྲལ། །དེ་དག་རྙེད་པ་རྣམས་ཀྱིས་དགའ་བར་མི་འགྱུར་མ་ཐོབ་ཡིད་ཞུམ་མེད། །འདོད་པ་ཆུང་སྟེ་ངན་ངོན་ཙམ་ལ་དགའ་ཞིང་སྒྱུ་དང་ཚུལ་འཆོས་སྤངས། །སེམས་ཅན་དོན་ཕྱིར་བརྩོན་འགྲུས་ཡིད་ལྡན་སྦྱིན་དང་དུལ་ལ་རབ་ཏུ་

གནས། །སངས་རྒྱས་ཡེ་ཤེས་དོན་གཉེར་བསམ་གཏན་བརྩོན་འགྲུས་ཡོན་ཏན་ཕ་རོལ་ཕྱིན། །ལུས་དང་དེ་བཞིན་སྲོག་ལ་མི་ལྟ་སྡུག་པའི་རྩ་ལག་རྣམ་སྤངས་ཏེ། །བསམ་པ་རྡོ་རྗེ་ལྟ་བུར་རབ་བརྟན་རྟག་ཏུ་བྱང་ཆུབ་ལམ་ལ་སྦྱོར། ལུས་ནི་དུམ་བུ་དུམ་བུར་བཅད་ཀྱང་དེ་དག་སེམས་ལ་གཡོ་
བ་མེད། །ཐམས་ཅད་མཁྱེན་ཉིད་རེ་བ་ཕྱིར་ཞིང་བརྩོན་འགྲུས་ཤིན་ཏུ་བརྟན་འདིར་རྩོམ། །ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་ཏེ། བཞི་གང་ཞེ་ན། ཡུལ་འཁོར་སྐྱོང་ཚུལ་ཁྲིམས་སྐྱོན་མེད་པ་བྱང་ཆུབ་སེམས་དཔའ་རྣམས་
ཀྱི་གདུང་བ་མེད་པར་བྱེད་པའི་ཆོས་དང་། ཡུལ་འཁོར་སྐྱོང་དགོན་པ་ལ་གནས་པ་མི་གཏོང་བ་བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་དང་། ཡུལ་འཁོར་སྐྱོང་འཕགས་པའི་རིགས་བཞི་དང་འཐུན་པར་བྱེད་པ་བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་
བྱེད་པའི་ཆོས་དང་། ཡུལ་འཁོར་སྐྱོང་མང་དུ་ཐོས་པ་ཐོབ་པར་བྱེད་པ་བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་ཏེ། ཡུལ་འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་གདུང་བ་མེད་པར་བྱེད་པའི་ཆོས་སོ། །འདི་ལ་འདི་ནི་ཆོས་ཉིད་ཡིན་ཏེ། དེ་ལ་
འདི་སྐད་ཅེས་བྱའོ། །སངས་རྒྱས་ཚུལ་ཁྲིམས་དམ་པ་འདི་ལ་འདོད་བྱེད་ཅིང་། །ཚུལ་ཁྲིམས་དྲི་མེད་ནོར་བུར་རིན་ཆེན་འདྲ་བ་སྲུང་། །དེ་དག་ང་ནི་ཁྲིམས་ལྡན་ལེགས་སྡོམ་ཡིན་མི་སེམས། །ཚུལ་ཁྲིམས་དེ་ཉིད་ལ་ནི་རྟག་ཏུ་སེམས་ཅན་སྦྱོར། །དེ་དག་སྟོང་པ་དགོན་པར་རྟག་ཏུ་གནས་
པར་བྱེད། །དེ་དག་བདག་གི་འདུ་ཤེས་སྲོག་གི་འདུ་ཤེས་མེད། །གཟུགས་ཀུན་རྩྭ་དང་ཤིང་དང་བརྩིག་པ་འདྲ་བར་མཐོང་། །འདི་ལ་སྐྱེས་བུ་བུད་མེད་བདག་གི་མེད་པར་མཐོང་། །འཕགས་རིགས་བཞི་ལ་དགའ་ཞིང་གཡོ་མེད་ཚུལ་འཆོས་མེད། །བག་ཡོད་དེ་དག་བསམ་པ་ཐག་པས་
རབ་ཏུ་སྦྱོར། ཐོས་དང་ཡོན་ཏན་རྣམས་ལ་རྟག་ཏུ་བརྩོན་པར་བྱེད། བདེ་བར་གཤེགས་པའི་ཡོན་ཏན་མཐུ་ཆེན་དོན་དུ་གཉེར། །སྐྱེ་རྒ་འཆི་བས་བཅོམ་ཞིང་ནད་ཀྱིས་གཟིར་གྱུར་པ། །འགྲོ་བ་མགོན་མེད་སྲིད་པའི་བརྩོན་ར་འདིར་བལྟས་ནས། །ཞི་བ་དམ་པ་མཆོག་གི་

ཆོས་ཀྱི་གྲུ་སྦྱར་ཏེ། །སྲིད་པའི་རྒྱ་མཚོའི་ཆུ་ལས་སྐྱེ་བོ་སྒྲོལ་བར་བྱེད། །འདུས་བྱས་གྱུར་པར་འཇིག་རྟེན་འཁྱམས་པས་སྐྱབས་མགོན་དང་། །དཔུང་གཉེན་བྱེད་པ་གཞན་ནི་གང་ཡང་ཡོད་མིན་གྱིས། །བདག་གིས་སེམས་ཅན་འདི་དག་ཐམས་ཅད་ཡོངས་དགྲོལ་
ཞེས། །དེ་ཕྱིར་བྱང་ཆུབ་མཆོག་ཏུ་བདག་གིས་སྨོན་ལམ་བཏབ། །ཡུལ་འཁོར་སྐྱོང་བྱང་ཆུབ་སེམས་དཔས་བཞི་པོ་འདི་དག་ནི་ཅང་ཤེས་ཀྱི་འགྲོས་སུ་ཤེས་པར་བྱ་སྟེ། བཞི་གང་ཞེ་ན། བདེ་འགྲོ་ཐོབ་སྟེ། དེ་ཡང་སངས་རྒྱས་འབྱུང་བ་དང་ཕྲད་པ་དང་། བླ་མ་ལ་སྲི་ཞུ་བྱེད་དེ།
དེ་ཡང་ཟང་ཟིང་མེད་པའི་སེམས་ཀྱིས་བསྟེན་པ་དང་། བས་མཐའི་གནས་མལ་ལ་མངོན་པར་དགའ་སྟེ། དེ་ཡང་རྙེད་པ་དང་བཀུར་སྟི་ལ་མི་ལྟ་བ་དང་། སྤོབས་པ་ཐོབ་སྟེ། དེ་ཡང་ཟབ་མོ་ལ་བཟོད་པ་དང་ལྡན་པ་སྟེ། ཡུལ་འཁོར་སྐྱོང་བྱང་ཆུབ་སེམས་དཔས་ཆོས་བཞི་པོ་དེ་དག་ནི་ཅང་
ཤེས་ཀྱི་འགྲོས་སུ་ཤེས་པར་བྱའོ། །འདི་ལ་འདི་ནི་ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །བརྟན་པ་ནགས་དང་སུལ་ན་རྟག་ཏུ་གནས་པར་བྱེད། དེ་དག་རྟག་ཏུ་ཁོར་མོར་རྙེད་པ་དོན་གཉེར་མིན། །ཆགས་མེད་བློ་ཅན་རྟག་ཏུ་སྤོབས་དང་ལྡན་པ་ཡིན། །ཟབ་མོའི་ཆོས་ལ་
མཁས་ཤིང་སྤྲོས་པ་རྣམས་དང་བྲལ། །རྟག་ཏུ་ཁོར་མོར་བླ་མ་རྣམས་ལ་སྲི་ཞུ་བྱེད། །དེ་དག་ཇི་སྐད་སྨྲས་པ་དེ་བཞིན་དེ་དག་སྦྱོར། །བདེ་གཤེགས་དཔག་ཏུ་མེད་པ་མང་པོ་མཉེས་པར་བྱེད། །རྒྱལ་བའི་ཡེ་ཤེས་ཆེད་དུ་མཆོད་པ་རྒྱ་ཆེར་བྱེད། །གྲགས་པ་ཆེན་པོ་རྣམས་ཀྱི་འགྲོ་བ་
གཙོ་བོར་འགྱུར། །ལྷ་མི་རྣམས་ཀྱི་ནང་ན་སྤྱི་བོར་ཕྱིན་པ་ཡིན། །རྫོགས་པའི་བྱང་ཆུབ་ལམ་ལ་རྟག་ཏུ་སེམས་ཅན་འཛུད། །དགེ་བ་བཅུ་པོ་དག་ལའང་ཡང་དག་སྦྱོར་བར་བྱེད། །སངས་རྒྱས་ཡོན་ཏན་ཐོས་ནས་དེ་དག་དགར་འགྱུར་ཏེ། །དེ་དག་རིང་པོར་མི་ཐོགས་ང་དང་ཉེ་བར་གྱུར། །
དེ་དག་བྱང་ཆུབ་རྡུལ་བྲལ་དམ་པ་སངས་རྒྱས་ནས། །སེམས་ཅན་ཁྲག་ཁྲིག་སྡུག་བསྔལ་མཐའ་ཡས་རྣམས་ལས་འགྲེལ། །ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པ་ཡོངས་སུ་སྦྱོང་བའི་ཆོས་ཏེ། བཞི་གང་ཞེ་ན། ཁོང་ཁྲོ་

བ་མེད་པའི་སེམས་བྱང་ཆུབ་སེམས་དཔའི་སྤྱོད་པ་དང་། ཚུལ་འཆོས་པ་དང་། ཁ་གསག་དང་། ཐོབ་ཀྱིས་འཇལ་བ་ཡོངས་སུ་སྤངས་ཏེ་དགོན་པར་གནས་པ་དང་། བདོག་པ་ཐམས་ཅད་ཡོངས་སུ་གཏོང་ཞིང་རྣམ་པར་སྨིན་པ་ལ་རེ་བ་མེད་པ་དང་། ཉིན་མཚན་དུ་ཆོས་འདོད་ཅིང་
ཆོས་སྨྲ་བ་རྣམས་ལ་འཁྲུལ་པ་མི་ཚོལ་བ་སྟེ། ཡུལ་འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པ་ཡོངས་སུ་སྦྱོང་བའི་ཆོས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བླ་ན་མེད་པའི་བྱང་ཆུབ་
འདོད་པ་ན། །ཐ་བ་དྲི་མ་མེད་ཅིང་ཁྲོ་སེམས་མེད། །དེ་ནི་སུ་ལའང་སྐྱོན་ཚོལ་བྱེད་མ་ཡིན། །གཡོ་མེད་ཚུལ་འཆོས་མེད་ཅིང་སྤྲོས་སེམས་མེད། །ཁྱིམ་གྱི་བློ་གྲོས་ཡ་ང་མྱ་ངན་རྩ། །སྐྱེ་བོ་ངན་འགྲོགས་ཚུལ་བཞིན་རིང་འགྱུར་བ། །སྤངས་ཏེ་དེ་ལ་མི་ལྟ་རབ་བྱུང་ནས། །ཐར་
པ་འདོད་པ་རི་ཁྲོད་གནས་པར་བྱེད། །དགོན་པ་བས་མཐའི་རྣམས་པ་བསྟན་པས་ན། །ཤེས་ཁེ་འཐོབ་པ་ཀུན་ལ་མི་རྟོན་ཞིང་། །ལུས་དང་སྲོག་ལའང་ལྟ་བར་མི་བྱེད་ལ། །སེང་གེ་ལྟ་བུར་གནས་ཤིང་དགྲ་ལས་རྒྱལ། །བྱང་ཆུབ་ལམ་ཕྱིར་ཡེ་ཤེས་ཚོལ་བ་ན། །ངན་ངོན་ཙམ་གྱིས་
ཆོག་པར་འཛིན་བྱེད་ཅིང་། །རྟག་ཏུ་བྱ་ལྟར་སོགས་པ་སྤངས་ནས་ནི། །འཇིག་རྟེན་ཀུན་ལ་གནས་པ་མ་ཡིན་ནོ། །དཔེར་ན་བསེ་ལྟར་གཅིག་བུ་གནས་བྱེད་ཅིང་། །སེང་གེ་ལྟ་བུར་འཇིགས་པ་ཡོད་མ་ཡིན། །རི་དགས་ལྟ་བུར་སར་འཇིགས་ཡིད་མི་རྟོན། །དེ་ནི་མཆོད་པས་ཁེངས་
པར་འགྱུར་བ་མེད། །གཡང་སར་ལྟུང་བའི་འགྲོ་བ་འདི་བལྟས་ནས། །རབ་ཏུ་ཐར་བར་བྱ་ཕྱིར་འབད་པར་བྱེད། །གལ་ཏེ་བག་ཡོད་དགེ་བའི་ཆོས་སྤྱོད་ན། །བདག་ཀྱང་འགྲོ་བ་འདི་ཡི་དཔུང་གཉེན་འགྱུར། །མི་མཆོག་སྤྱོད་པ་འདི་དག་འདོད་པ་ན། །འཛུམ་པའི་བཞིན་གྱིས་རབ་
བསྟན་ཚིག་སྨྲ་ཞིང་། །སྡུག་དང་མི་སྡུག་རྟག་ཏུ་རྙོག་སེམས་མེད། །རླུང་དང་འདྲ་བར་ཆགས་པ་མེད་པར་གནས། །སྟོང་པ་ཉིད་དང་མཚན་མ་མེད་ལ་མོས། །འདུས་བྱས་ཀུན་ལ་སྒྱུ་མ་ལྟ་བུར་རྟོག །ཡངས་པའི་བློ་ཅན་ཞི་དང་དུལ་ལ་དགའ། །དེ་ནི་རྟག་ཏུ་བདུད་རྩིའི་རོ་ཡིས་

མགུ། །ཅི་ནས་བྱང་ཆུབ་ལམ་ནི་སྒྲུབ་བྱེད་ཅིང་། །དེ་ནི་རྟག་ཏུ་བསམ་པ་ཡོངས་སུ་སྦྱོང་། །གཟུངས་དང་སྤོབས་པ་ཚོལ་བར་བྱེད་པ་ན། །ཡོན་ཏན་འདོད་པ་སྡུག་བསྔལ་བརྒྱ་དག་བཟོད། །བྱང་ཆུབ་སེམས་དཔའི་སྤྱོད་པ་འདི་བལྟས་ནས། །གང་ཞིག་དོན་དུ་གཉེར་དེ་
དགར་འགྱུར་རོ། །གང་ཞིག་བྱང་ཆུབ་འདི་ལ་མ་མོས་པ། །བློ་ཆུང་དེ་ནི་ཉེས་པ་བརྒྱ་ཡང་སྐྱེད། །ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའི་གཡང་ས་སྟེ། བཞི་གང་ཞེ་ན། ཡུལ་འཁོར་སྐྱོང་མ་གུས་པ་བྱང་ཆུབ་སེམས་དཔའ་རྣམས་ཀྱི་གཡང་ས་དང་། ཡུལ་འཁོར་
སྐྱོང་བྱས་པ་མི་གཟོ་ཞིང་གཡོ་ལ་སྟེན་པ་བྱང་ཆུབ་སེམས་དཔའ་རྣམས་ཀྱི་གཡང་ས་དང་། ཡུལ་འཁོར་སྐྱོང་རྙེད་པ་དང་བཀུར་སྟི་ལ་ཆགས་པ་བྱང་ཆུབ་སེམས་དཔའ་རྣམས་ཀྱི་གཡང་ས་དང་། ཡུལ་འཁོར་སྐྱོང་ཚུལ་འཆོས་པ་དང་ཁ་གསག་གིས་རྙེད་པ་དང་བཀུར་སྟི་སྒྲུབ་པ་བྱང་ཆུབ་སེམས་དཔའ་
རྣམས་ཀྱི་གཡང་ས་སྟེ། ཡུལ་འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་གཡང་སའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །འཕགས་པ་བླ་མ་རྣམས་དང་ཕ་མ་ལ། །དེ་དག་རྟག་ཏུ་གུས་པ་མེད་པ་ཡིན། །དེ་དག་བྱས་
པ་མི་གཟོ་གཡོན་ཅན་ཏེ། །རྟག་ཏུ་ཀུན་ཏུ་མ་བསྡམས་སྤྱོད་ཅིང་རྨོངས། །རྙེད་ལ་རྟག་ཏུ་ཆགས་ཤིང་ཞེན་པ་སྟེ། །དེ་དག་ཚུལ་འཆོས་པ་དང་གཡོ་སྦྱོར་དགའ། །ཁ་ཅིག་ཚུལ་ཁྲིམས་བརྟུལ་ཞུགས་ཇི་ལྟས་ཀྱང་། །འདི་ན་བདག་དང་མཚུངས་པ་མེད་ཅེས་སྨྲ། །དེ་དག་ཕན་ཚུན་སྡང་བར་
སེམས་པ་སྟེ། །གླགས་ཚོལ་བ་ལ་རྟག་ཏུ་བརྩོན་པ་ཡིན། །དེ་དག་ཞིང་གི་ལས་དང་ཚོང་ལ་དགའ། །དེ་དག་དགེ་སྦྱོང་ཡོན་ཏན་ཤིན་ཏུ་རིང་། །ཕྱི་མའི་དུས་ན་འདི་ལྟར་མ་བསྡམས་པའི། །དགེ་སློང་ཚུལ་ཁྲིམས་ཡོན་ཏན་རབ་རིང་བ། །དེ་དག་མཚང་འདྲུ་བ་དང་འཐབ་པ་དང་། །ཕྲག་
དོག་དབང་གིས་ཆོས་འདི་ནུབ་པར་བྱེད། །བྱང་ཆུབ་ལམ་ལས་རྟག་པར་ཤིན་དུ་རིང་། །འཕགས་པའི་ནོར་ལས་དེ་དག་ཤིན་ཏུ་རིང་། །འཕགས་ལམ་གྱ་ནོམ་རྣམ་པར་སྤངས་ནས་ནི། །དེ་དག་འགྲོ་བ་ལྔར་ནི་འཁྱམ་པར་འགྱུར། །ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་

དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་ཏེ། བཞི་གང་ཞེ་ན། ཡུལ་འཁོར་སྐྱོང་ལེ་ལོ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་དང་། ཡུལ་འཁོར་སྐྱོང་མ་དད་པ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་དང་། ཡུལ་
འཁོར་སྐྱོང་ང་རྒྱལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་དང་། ཡུལ་འཁོར་སྐྱོང་ཕ་རོལ་གྱི་མཆོད་པ་ལ་ཕྲག་དོག་དང་སེར་སྣའི་སེམས་དང་ལྡན་པ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་ཏེ། ཡུལ་འཁོར་སྐྱོང་བཞི་པོ་
དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ལ་བགེགས་བྱེད་པའི་ཆོས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མ་དད་ལེ་ལོ་རྟག་ཏུ་རྨོངས་པའི་སེམས། །དེ་དག་མངོན་པའི་ང་ཅན་རྟག་ཏུ་ཁྲོ། །བཟོད་ལྡན་རྟག་བརྩོན་དགེ་
སློང་མཐོང་ནས་ནི། །གཙུག་ལག་ཁང་ནས་འགྲོ་ཚེ་དབྱུག་པ་རྡེག །ཕ་རོལ་མཆོད་ཕྱིར་འདི་ནི་ཕྲག་དོག་སྐྱེ། །དེ་དག་སེམས་ནི་གནས་པ་ཡོད་མ་ཡིན། །གླགས་ལྟ་བྱེད་ཅིང་འཁྲུལ་པ་ཚོལ་བ་ཅན། །སུ་ལ་འཁྲུལ་ཡོད་གང་ལ་གླེང་བྱ་སྙམ། །དེ་དག་ང་ཡི་བསྟན་པ་འདི་ལས་རིང་། །
དེ་དག་ཡོན་ཏན་དངང་ཞིང་ངན་སོང་གཞོལ། །དེ་དག་རྒྱལ་བའི་བསྟན་པ་བོར་ནས་ནི། །ངན་སོང་ཤིན་ཏུ་མི་བཟད་འབར་བར་འགྲོ། །དེ་དག་རྣམས་ཀྱི་སྡིག་པའི་སྤྱོད་པ་དང་། །ཆོས་མིན་ལྡན་འགྲོ་རབ་སྡིག་འདི་ཐོས་ནས། །རྟག་ཏུ་འཁོར་མོར་བྱང་ཆུབ་ལམ་ལ་སྦྱོར། །ངན་འགྲོར་
སྐྱེས་ཤིང་གདུང་བར་གྱུར་ཏ་རེ། །སངས་རྒྱས་འཇིག་རྟེན་ཕན་པ་དྲང་སྲོང་ཆེ། །བསྐལ་པ་བྱེ་མང་བརྒྱ་ལམ་འབྱུང་བར་འགྱུར། །ད་ལྟར་དལ་བ་དམ་པ་རྙེད་པ་ལ། །གལ་ཏེ་ཐར་འདོད་བག་མེད་སྤོང་བར་གྱིས། །ཡུལ་འཁོར་སྐྱོང་གང་ཟག་བཞི་པོ་འདི་དག་ནི་བྱང་ཆུབ་སེམས་དཔས་
བསྟེན་པར་མི་བྱ་བ་སྟེ། བཞི་གང་ཞེ་ན། ཡུལ་འཁོར་སྐྱོང་བྱང་ཆུབ་སེམས་དཔས་སྡིག་པའི་བཤེས་གཉེན་གྱི་གང་ཟག་བསྟེན་པར་མི་བྱ་བ་དང་། ཡུལ་འཁོར་སྐྱོང་བྱང་ཆུབ་སེམས་དཔས་དམིགས་པར་ལྟ་བ་ཅན་གྱི་གང་ཟག་བསྟེན་པར་མི་བྱ་བ་དང་། ཡུལ་འཁོར་སྐྱོང་བྱང་ཆུབ་སེམས་

དཔས་དམ་པའི་ཆོས་སྤོང་བའི་གང་ཟག་བསྟེན་པར་མི་བྱ་བ་དང་། ཡུལ་འཁོར་སྐྱོང་བྱང་ཆུབ་སེམས་དཔས་ཟང་ཟིང་ལ་བརྐམ་པའི་གང་ཟག་བསྟེན་པར་མི་བྱ་བ་སྟེ། ཡུལ་འཁོར་སྐྱོང་གང་ཟག་བཞི་པོ་དེ་དག་ནི་བྱང་ཆུབ་སེམས་དཔས་བསྟེན་པར་མི་བྱ་བའོ། །དེ་ནས་
བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གང་དག་སྡིག་པའི་བཤེས་གཉེན་རྣམ་སྤོང་ཞིང་། །གང་དག་དགེ་བའི་བཤེས་གཉེན་སྟེན་བྱེད་པ། །དེ་དག་རྟག་ཏུ་བྱང་ཆུབ་ལམ་ལ་འཕེལ། །དཔེར་ན་མཁའ་ལས་ཟླ་བ་ཡར་ངོ་བཞིན། །དམིགས་
པར་ལྟ་ལ་རྟག་ཏུ་ཞེན་པ་དང་། །བདག་དང་སྲོག་དང་གསོ་བར་ཞེན་པ་དག །དེ་དག་དུག་ཕྱིས་བཞིན་དུ་རྟག་ཏུ་སྤོང་། །གང་དག་སངས་རྒྱས་ཡེ་ཤེས་དོན་མི་གཉེར། །གང་དག་མི་མཆོག་རྣམས་ཀྱི་ཞི་བའི་ཆོས། །འདོད་ཆགས་བྲལ་བ་བདུད་རྩི་འཐུང་སྤོང་བ། །དེ་དག་དཔེར་ན་ངན་
སྐྱུགས་རྫབ་བཞིན་སྤོང་། །གང་ཞིག་བྱང་ཆུབ་དམ་པ་འཚང་རྒྱར་འདོད། །ཟང་ཟིང་དག་དང་ཆོས་གོས་ལྷུང་བཟེད་ཆགས། །རྟག་ཏུ་ཁྱིམ་ལ་འདྲིས་པར་བྱེད་བརྩོན་པ། །དེ་དག་རྣམས་དང་འདྲིས་པར་མི་བྱ་སྟེ། །དེ་དག་མེ་ཡི་འོབས་བཞིན་སྤང་བར་བྱ། །གང་ཞིག་བདུད་ནི་གདུལ་བར་
བྱ་བ་དང་། །འཁོར་ལོ་དམ་པ་བླ་མེད་བསྐོར་བ་དང་། །དེ་ལྟར་སེམས་ཅན་དོན་ཡང་བྱེད་འདོད་པ། །དེས་ནི་སྡིག་པའི་བཤེས་གཉེན་སྤང་བར་བྱ། །གང་ཞིག་བྱང་ཆུབ་དམ་པ་འཚང་རྒྱར་འདོད། །དེ་ཡིས་རྙེད་དང་སྡུག་དང་མི་སྡུག་དང་། །གྲགས་དང་མཚང་འདྲུ་ཕྲག་དོག་ང་སྤངས་
ཏེ། །སངས་རྒྱས་ཡེ་ཤེས་རྟག་ཏུ་བཙལ་བར་བྱ། །ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་ཏེ། བཞི་གང་ཞེ་ན། ཡུལ་འཁོར་སྐྱོང་ཤེས་པས་མངོན་པར་རློམ་སེམས་སུ་བྱེད་པ་བྱང་ཆུབ་སེམས་དཔའ་རྣམས་ཀྱི་
སྡུག་བསྔལ་རྣམ་པར་སྨིན་པའི་ཆོས་དང་། ཡུལ་འཁོར་སྐྱོང་ཕྲག་དོག་དང་སེར་སྣ་དང་ལྡན་པའི་སེམས་བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་དང་། ཡུལ་འཁོར་སྐྱོང་མ་མོས་པ་བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་དང་། ཡུལ་

འཁོར་སྐྱོང་ཡོངས་སུ་མ་དག་པའི་ཤེས་པ་དང་། །བཟོད་པའི་ལོངས་སྤྱོད་ཡོངས་སུ་ཚོལ་བ་བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་ཏེ། ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྡུག་བསྔལ་རྣམ་པར་སྨིན་པའི་ཆོས་སོ། །དེ་ནས་བཅོམ་
ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གང་དག་ས་ལ་ཆོས་ནི་འཛིན་གྱུར་ཞིང་། །འགྲོ་བ་ཐམས་ཅད་ཀྱིས་ཀྱང་མཆོད་འགྱུར་བ། །དེ་ལ་མི་ཤེས་པས་ནི་བརྙས་བྱེད་ན། །དེས་ན་དེ་ནི་སྡུག་བསྔལ་མཐའ་ཡས་རྙེད། ཡ་ང་བས་ནི་གང་ཞིག་ལོངས་སྤྱོད་ཚོལ། །
ཤེས་པ་མ་དག་རྟག་ཏུ་འདུན་ཅིང་འདོད། །གང་ཞིག་རྟག་ཏུ་ང་རྒྱལ་ཁེངས་གྱུར་ལ། །བླ་མ་འཕགས་པའི་སྐྱེ་བོ་མི་འདུད་ཅིང་། །སངས་རྒྱས་ལ་ཡང་མོས་པ་ཡོད་མིན་ལ། །ཆོས་དང་ཚོགས་ལ་དེ་ནི་མོས་པ་མེད། །བསླབ་དང་སྦྱངས་པ་རྣམས་ལ་དེ་མི་མོས། །སྡིག་པའི་བློ་ཅན་
ངན་སོང་གསུམ་ཕྱོགས་པ། །དེ་ནི་མི་ནང་འདི་ནས་ཤི་འཕོས་ནས། །ལས་ཀྱི་དབང་གིས་མི་མཁས་རྣམ་པར་རྨོངས། །དམྱལ་བའམ་འོན་ཏེ་དུད་འགྲོའི་འགྲོ་རྣམས་སམ། །ཡི་དགས་འགྲོ་བ་རྣམས་སུ་སྡུག་བསྔལ་རྙེད། །གང་ཞིག་འཇིག་རྟེན་སྒྲོན་འགྱུར་བློ་ལྡན་ཞིང་། །མི་ཡི་
དཔའ་བོ་སྡུག་བསྔལ་མཐར་ཕྱིན་པ། །དེ་ཡིས་ངན་སོང་ལམ་རྣམས་རབ་སྤངས་ཏེ། །བྱང་ཆུབ་ལམ་ནི་རྟག་ཏུ་བསྟེན་པར་བྱ།། །།བམ་པོ་གཉིས་པ། ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་འཆིང་བ་སྟེ། བཞི་གང་ཞེ་ན། ཕ་རོལ་
ལ་བརྙས་པ་བྱང་ཆུབ་སེམས་དཔའ་རྣམས་ཀྱི་འཆིང་བ་དང་། འཇིག་རྟེན་པའི་ཐབས་ཀྱིས་བསྒོམ་པ་ལ་སྦྱོར་བ་དང་། མཚན་མའི་འདུ་ཤེས་བྱང་ཆུབ་སེམས་དཔའ་རྣམས་ཀྱི་འཆིང་བ་དང་། ཀུན་འཛིན་པའི་སེམས་དང་ལྡན་པ་དང་། ཡེ་ཤེས་དང་བྲལ་བ་དང་། བག་མེད་པ་ལ་སྟེན་པར་
བྱེད་པ་བྱང་ཆུབ་སེམས་དཔའ་རྣམས་ཀྱི་འཆིང་བ་དང་། ཕྱིར་འབྲང་བའི་སེམས་ཀྱིས་ཁྱིམ་ལ་འདྲིས་པར་བྱེད་པ་བྱང་ཆུབ་སེམས་དཔའ་རྣམས་ཀྱི་འཆིང་བ་སྟེ། ཡུལ་འཁོར་སྐྱོང་བཞི་པོ་དེ་དག་གི་བྱང་ཆུབ་སེམས་དཔའ་རྣམས་ཀྱི་འཆིང་བའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་

བཅད་པ་འདི་དག་བཀའ་སྩལ་ཏོ། །རྟག་ཏུ་གཞན་དག་ལ་ནི་བརྙས་བྱེད་ཅིང་། །རྟག་ཏུ་འཇིག་རྟེན་པ་ཡི་བསམ་གཏན་སྒོམ། །ལྟར་གྱུར་འདི་དག་གིས་ནི་དེ་བཅིངས་ཏེ། །གླང་པོ་ལུས་རིང་འདམ་དུ་སོང་བ་བཞིན། །ཁྱིམ་ལ་འདྲིས་བྱེད་འཆིང་དང་ལྡན་པ་དང་། །
གང་ཞིག་བག་མེད་རྟག་ཏུ་ཀུན་འཛིན་སེམས། །ཡེ་ཤེས་སྤངས་ཤིང་བློ་གྲོས་རྨོངས་གྱུར་པ། །མི་རིགས་སྤྱོད་པ་འདི་དག་རྣམས་ཀྱིས་བཅིངས། །གང་ཞིག་སྡུག་བསྔལ་འཇིགས་པ་འདི་དག་དང་། །སྐྱེ་རྒ་འཆི་ལ་སོགས་ལས་གྲོལ་འདོད་པ། །བརྙས་པར་བྱེད་དང་རློམ་སེམས་
བོར་ནས་ནི། །བྱང་ཆུབ་ལམ་ལ་རྟག་ཏུ་བརྩོན་པར་འགྱུར། །སྡུག་བསྔལ་མཐའ་ཡས་མ་ལུས་བཟོད་བྱས་ཏེ། །བདེ་བ་ཀུན་ལ་ཆགས་པ་མེད་གྱུར་ནས། །སྡུག་དང་མི་སྡུག་གཉེན་པ་མ་ལུས་བཏང་། །བརྟན་པ་དག་ནི་སྡིག་བྲལ་སངས་རྒྱས་འགྱུར། །ཕ་རོལ་ཕྱིན་དྲུག་ས་
དང་ཡོན་ཏན་དང་། །སྟོབས་དང་དབང་པོ་དག་དང་ཤིས་ལ་སྦྱོར། །ཡོན་ཏན་ཀུན་དང་རྟག་ཏུ་ལྡན་གྱུར་ནས། །རྒ་བའི་དྲ་བ་གྲོལ་བའི་སངས་རྒྱས་འགྱུར། །བསྐལ་པ་བསམ་གྱིས་མི་ཁྱབ་སྔོན་སྤྱད་ཚེ། །སེམས་ཅན་ཕན་ཕྱིར་བྱང་ཆུབ་མཆོག་དོན་དུ། །སྦྱིན་དང་དུལ་དང་དེས་ལ་རྟག་
ཏུ་སྤྱད། །གཉེན་པ་སྤངས་ནས་བདེ་བར་གནས་པར་གྱུར། །བས་མཐའ་ནགས་སུ་རྟག་པར་ང་དགའ་སྟེ། །བྱང་ཆུབ་ཆེད་དུ་བསམ་པ་རྣམ་པར་སྦྱངས། །བརྒྱ་ལམ་ན་ཡང་བརྩོན་འགྲུས་ཉམས་མ་གྱུར། །སྐྱེས་ཆེན་རྣམས་ཀྱི་ཡེ་ཤེས་དེ་འདྲའོ། །སྲིད་པའི་བརྩོན་རར་འགྲོ་བ་ལྔ་འཁྱམས་
པས། །སེམས་ཅན་འཁྱམ་པའི་འགྲོ་བ་མཐོང་ནས་ནི། །སྔོན་ཆད་འདིར་ནི་སྙིང་རྗེ་རྒྱ་ཆེན་བསྐྱེད། །འགྲོ་བའི་དོན་དུ་བྱང་ཆུབ་དམ་པ་བསྒྲུབས། །བསྐལ་པ་མང་པོར་བྱང་ཆུབ་མཆོག་ཚོལ་ཞིང་། །རང་གི་བུ་ཕོ་བུ་མོ་ཆུང་མ་སྡུག །ཕངས་པའི་སྲོག་དང་ཤིན་ཏུ་འབྱོར་ས་དང་། །གྲོང་ཁྱེར་ནོར་དང་འབྲུ་
རྣམས་མང་པོ་བཏང་། །མེ་ཏོག་འབྲས་བུ་ཆུ་འབྱོར་ཉམས་དགའ་བའི། །ནགས་སུ་ཐུབ་པ་ང་ནི་བཟོད་དགར་གྱུར། །ཀ་ལིང་རྒྱལ་པོས་ལག་པ་རྐང་པ་བཅད། །དེ་ཚེ་ང་ནི་ལྡང་བའི་ཡིད་མ་གྱུར། །ནགས་དང་སུལ་ན་སྔོ་བསངས་ཞེས་བྱ་བའི། །ཐུབ་པས་བླ་མ་རྒས་པ་གསོ་བ་ན། །

མི་ཡི་དབང་པོས་སྲ་བའི་མདས་བསྣུན་ཀྱང་། །ཡིད་ནི་ཡོངས་སུ་གནོད་པར་སེམས་མ་གྱུར། །ལེགས་པར་གསུངས་པའི་ཆེད་དུ་གཡང་ས་ནས། །ལུས་ལ་མ་བལྟས་རབ་ཏུ་མཆོངས་པར་གྱུར། །ངས་ནི་བྱང་ཆུབ་མཆོག་གི་རྒྱུ་ཡི་ཕྱིར། །ལུས་དང་སྲོག་ལ་བལྟས་པར་མ་གྱུར་ཏོ། །སྟག་མོ་
བུ་དང་བཅས་པའི་སྲོག་གི་ཕྱིར། །ལུས་བཏང་ནས་ནི་སྟག་མོ་ཚིམ་པར་བྱས། །ནམ་མཁའ་ལས་ནི་ལྷ་ཡི་ཚོགས་རྣམས་ཀྱི། །སྐྱེས་ཆེན་བརྩོན་འགྲུས་བརྟེན་པ་ལེགས་ཤེས་བསྒྲགས། །གང་ཚེ་སྔོན་ཆད་སྲིད་པར་སྤྱོད་པ་ན། །སྦྱིན་ལ་རབ་དགའ་བྲམ་ཟེ་ཁྱེའུར་གྱུར་ཚེ། །རིན་ཆེན་ཆེད་
དུ་རྒྱ་མཚོ་བསྐམས་ནས་ནི། །ནོར་བུ་རྙེད་ནས་སེམས་ཅན་བདེ་བར་བྱས། །རྒྱལ་པོ་ཟླ་བའི་བུ་ཞེས་བྱར་གྱུར་ཏེ། །རྗོད་པ་གྲགས་ཤིང་ང་ནི་སྤྱོད་པའི་ཚེ། །ང་ཡིས་བདེན་པའི་ཚུལ་གྱིས་རྒྱལ་པོ་བརྒྱ། །བསད་པར་བྱས་པ་མྱུར་དུ་ཐར་བར་བྱས། །དབུལ་ཞིང་སྡུག་བསྔལ་བ་ཡི་མི་མཐོང་
ནས། །ང་ཡིས་ཕངས་པའི་ལུས་ནི་བཏང་བྱས་ཏེ། །ང་ཡིས་ནོར་རྙེད་དེ་ནི་ཕྱུག་པོར་བྱས། །དེ་ཚེ་ང་ནི་ཀུན་སྦྱིན་རྒྱལ་པོར་གྱུར། །ང་འདིར་མི་ཡི་རྒྱལ་པོར་གྱུར་པའི་ཚེ། །སྐྱབས་སུ་འོངས་པའི་ཕུག་རོན་མཐོང་ནས་ནི། །རང་གི་ལུས་ལས་ཤ་ཡང་བཅད་བྱས་ཏེ། །རང་ལུས་ངས་
བཏང་འཇིགས་པས་ཕོངས་མ་བཏང་། །རྒྱལ་པོ་རལ་པ་ཅན་ཞེས་སྔོན་གྱུར་ཚེ། །སྨན་པ་མཆོག་གིས་ང་ཡི་ཆེད་དུ་ནི། །མཚུངས་མེད་སྨན་རྣམས་མ་ལུས་སྦྱར་བ་ཡང་། །སྲོག་བཏང་ནས་ནི་དེ་དག་གཞན་ལ་བྱིན། །འགྲོ་བའི་དོན་ཕྱིར་སྔོན་ཆད་སྤྱོད་པ་ན། །རྒྱལ་བུ་མཆེ་བ་
བཟང་ཞེས་བྱ་གྱུར་ཚེ། །ཆུང་མ་མ་དྲི་ཁྱོ་ལས་མི་འཕྱོ་བ། །བུར་བཅས་བུ་མོ་མ་ཆགས་མ་བལྟས་བཏང་། །གང་ཚེ་བརྩོན་འགྲུས་འབར་ཞེས་བྱར་གྱུར་ཚེ། །ང་སྔོན་ལོ་ནི་སྟོང་དུ་ཚད་བར་ཡང་། །བྱ་དཀའ་བརྒྱད་ཅུ་རྩ་བཞི་བཟོད་པར་བྱས། །ནོར་དང་དཔལ་ཡང་སྔན་ཆད་ངས་བཏང་ངོ་། །རྒྱལ་
བུ་གཟི་བརྗིད་དྲི་མ་མེད་གྱུར་ཚེ། །ང་ཡིས་རྒྱལ་བའི་རིང་བསྲེལ་མཆོད་རྟེན་མདུན། །མཆོག་ཏུ་གུས་པས་ལུས་ལ་མེ་བཏང་སྟེ། །སྟོབས་བཅུ་མངའ་བ་རྣམས་ལ་མཆོད་པ་བྱས། །ང་ནི་རྒྱལ་པོ་ཟླ་འོད་གྱུར་པའི་ཚེ། །མི་བཟད་མིག་ཅན་ཁྲོས་པར་གྱུར་ནས་ནི། །དེ་ཡིས་ང་ཡི་མགོ་བོ་

བསླངས་པ་ན། །དེ་ཚེ་ང་ཡིས་མགོ་བོ་བཅད་དེ་བྱིན། །ང་ནི་བསོད་ནམས་མཉམ་ཞེས་བྱར་གྱུར་ཚེ། །གྲོང་དང་གྲོང་ཁྱེར་དག་དང་ལམ་སྲང་སྒོ། །ཐམས་ཅད་དུ་ཡང་རྒྱ་ཆེ་སྨན་གྱི་རྣམས། །དེ་དག་སེམས་ཅན་དོན་ཕྱིར་ངས་བཞག་གོ །སྲིད་པ་རྣམས་ལ་སྤྱོད་པ་གང་
གི་ཚེ། །ང་སྔོན་རྒྱལ་པོ་དགེ་བར་གྱུར་པ་ན། །བུད་མེད་གཟུགས་བཟང་གསེར་དང་མུ་ཏིག་གིས། །ལུས་བརྒྱན་སྟོང་དག་ངས་ནི་བཏང་བ་བྱས། །གང་ཚེ་ང་སྔོན་མི་ཡི་རྒྱལ་པོ་ནི། །རིན་ཆེན་གཙུག་ཕུད་གྱུར་ཚེ་མེ་ཏོག་དང་། །སྤོས་མཆོག་རྣམས་དང་གསེར་གྱིས་བརྒྱན་པ་ཡི། །
ཅོད་པན་དཔལ་ལྡན་དམ་པ་ངས་བཏང་ངོ་། །ང་སྔོན་རྒྱལ་པོ་མོས་ལྡན་གྱུར་པའི་ཚེ། །ཤིང་བལ་འདའ་བ་འཇམ་པ་ལྟ་བུ་དང་། །པད་མའི་འདབ་མཉེན་ལྟ་བུར་འཇམ་གཞོན་པའི། །ལག་པ་རྐང་པ་དག་ཀྱང་ངས་བཏང་ངོ་། །དེད་དཔོན་སེང་གེ་འཛིན་དུ་གྱུར་པ་ན། །སྙིང་རྗེ་མེད་ཅིང་
མི་བཟད་རབ་གཏུམ་པའི། །སྲིན་མོ་བརྒྱ་དག་ཤིན་ཏུ་ཚར་བཅད་ནས། །རྒྱ་ཤུག་གླིང་དུ་མི་རྣམས་བཀོད་པར་གྱུར། །གང་ཚེ་མིག་བཟངས་ཞེས་བྱར་གྱུར་པ་ན། །བྱིས་པ་འདོད་དང་ལྡན་ཞིང་ཡིད་རྨོངས་པ། །སྲིན་མོ་དག་ལ་ན་ཆུང་འདུ་ཤེས་པ། །ཚོང་པ་ལྔ་བརྒྱ་དེ་དག་ཐར་
བར་བྱས། །གང་ཚེ་བསོད་ནམས་འོད་ཟེར་གྱུར་པ་ན། །ལྷ་ཡི་བུ་མོ་ལྟ་བུའི་གཟུགས་ལྡན་པའི། །བུད་མེད་བྱེ་བ་ཕྲག་བཞི་སྤངས་ནས་སུ། །རྒྱལ་བའི་བསྟན་པ་ལ་ནི་རབ་ཏུ་བྱུང་། །སེམས་ཅན་དོན་ཕྱིར་ང་ནི་སྤྱོད་པ་ན། །དྲི་མེད་དག་པའི་གསེར་གྱི་མདོག་ཅན་གྱི། །རྒྱལ་
པོར་གང་ཚེ་ང་ནི་གྱུར་པ་ན། །སོར་མོ་དྲ་བས་འབྲེལ་བ་རྒྱ་ཆེན་བཏང་། །རྒྱལ་པོ་ཨུད་པལ་མིག་ཅེས་བྱར་གྱུར་ཚེ། །པད་མ་སྔོན་པོ་བཟང་པོའི་མདོག་འདྲའི་མིག །ཡིད་དུ་འོང་ཞིང་སྙིང་དུ་སྡུག་གྱུར་པ། །འགྲོ་བའི་དོན་དུ་ང་ཡིས་བཏང་བ་བྱས། །སྨན་པའི་རྒྱལ་པོ་སྐྲ་འདྲར་གྱུར་
པའི་ཚེ། །སྡུག་དང་བྲལ་བས་ཉེན་པ་མཐོང་ནས་ནི། །བུད་མེད་ཆ་བྱད་གཟུགས་ལ་བློ་ཉམས་པ། །ངས་ནི་སྙིང་རྗེས་ཡོངས་སུ་ཐར་བར་བྱས། །སྔོན་གྱི་སྲིད་པར་ཀུན་མཐོང་གྱུར་པ་ནི། །ནད་ཀྱིས་བཏབ་པའི་ནད་པའི་མི་མཐོང་ནས། །ང་ཡིས་རང་གི་ཁྲག་ཀྱང་བྱིན་གྱུར་ཏེ། །མི་

དེ་ངས་ནི་ནད་དང་བྲལ་བར་བྱས། །རྒྱལ་པོ་མེ་ཏོག་བཟང་ཞེས་བྱར་གྱུར་ཚེ། །ང་ཡིས་ལུས་ལས་རུས་པ་ཕྱུང་ནས་ནི། །ནད་ཀྱིས་རིང་པར་གྱུར་ལ་རྐང་བྱིན་ཏེ། །ངས་ནི་ནམ་ཡང་སེམས་ཅན་མ་བཏང་ངོ་། །རྒྱལ་པོ་དོན་གྲུབ་ཅེས་བྱར་སྔོན་གྱུར་ཚེ། །རང་གི་མཛོད་རྣམས་ཐམས་ཅད་
ངས་བཏང་ཞིང་། །ཕངས་ཤིང་ཡིད་དུ་འོང་བའི་སྲོག་བཏང་སྟེ། །ཕོངས་པར་གྱུར་པའི་མི་ནི་ཐར་བར་བྱས། །རྒྱལ་པོ་ཕྱོགས་ཀྱི་ཏོག་དུ་གྱུར་པའི་ཚེ། །བྱང་ཆུབ་འདོད་ནས་འགྲོ་བའི་དོན་གྱི་ཕྱིར། །འཁོར་ལོའི་མཚན་ཅན་པད་མ་ལྟ་བུ་ཡི། །ལག་པ་ཕྲུགས་ཀྱང་མ་བལྟས་རབ་ཏུ་བྱིན། །
རྒྱལ་པོ་ཐམས་ཅད་མཐོང་དུ་གྱུར་པའི་ཚེ། །སྙིང་རྗེ་ལྡན་ཞིང་འགྲོ་དོན་ཕན་འདོད་དོ། །སྐྱེས་པ་བུད་མེད་དག་གིས་རྒྱས་པ་ཡི། །གླིང་བཞི་པ་ཡང་ངས་ནི་བཏང་བ་བྱས། །རྒྱལ་པོའི་བུ་མོ་ཡེ་ཤེས་ལྡན་གྱུར་ཚེ། །འཇམ་ཞིང་མཉེན་ལ་དྲི་མེད་དཀར་བའི་བརླ། །དགའ་ཞིང་མགུ་བའི་
ཡིད་ཀྱིས་བཅད་ནས་ནི། །རང་གི་ཤ་དང་ཁྲག་ཀྱང་ངས་བྱིན་ནོ། །བུད་མེད་གཟུགས་ལྡན་ཞེས་ནི་བྱར་གྱུར་ཚེ། །བུད་མེད་བཀྲེས་སྐོམ་ཉམ་ཐག་ངས་མཐོང་ནས། །གསེར་ལྟར་སེར་ཞིང་ཤིན་ཏུ་གཞོན་པ་ཡི། །ནུ་མ་སྙིང་དུ་སྡུག་པ་གཉི་ག་བཏང་། །རྒྱལ་པོ་དཔལ་གྲགས་ཞེས་བྱར་
གྱུར་པ་ན། །ཤིན་ཏུ་ཉམས་དགའ་བ་ཡི་རྒྱན་མཆོག་དང་། །རིན་ཆེན་དུ་མ་གོས་དང་ཤིང་རྟ་བཞོན། །གཏང་བར་དཀའ་བ་རྣམ་པ་དུ་མ་གཏང་། །རྒྱལ་བུ་བྱས་པ་གཟོ་བར་གྱུར་པའི་ཚེ། །རྒྱ་མཚོ་ལས་ནི་བྱས་པ་མི་གཟོ་བསྒྲལ། །རིན་ཆེན་ཕྱིར་ནི་དེ་ཡིས་ང་མིག་ཕྱུང་། །འོན་
ཀྱང་ང་ལ་ཁྲོས་པའི་སེམས་མེད་དོ། །སྲོག་ཆགས་གོ་དྷར་སྔོན་སྲིད་གྱུར་པའི་ཚེ། །སྲོག་སྦུར་དག་ནི་འཆི་བར་འགྱུར་དོགས་ནས། །ལུས་ཀྱི་དམ་པ་མ་བལྟས་བཏང་བ་བྱས། །དེ་ཚེ་ང་ཡི་སེམས་ནི་གཡོ་བ་མེད། །སྤྱད་པ་སྤྱོད་ཚེ་བྱ་སྲེག་གྱུར་པ་ན། །རྒན་ལ་བསྙེན་བཀུར་བྱ་
བར་རྟག་དགའ་སྟེ། །ང་ནི་རིམ་གྲོ་གུས་ལ་རབ་ཏུ་དགའ། །ང་རྒྱལ་ལྡན་པ་མ་ཡིན་ཁེངས་པ་མེད། །སྐྱབས་སུ་འོངས་པའི་དོན་ཕྱིར་ང་ཡིས་ནི། །སྙིང་རྗེ་བསྐྱེད་པ་བྱས་ནས་ལུས་བཏང་སྟེ། །གདོལ་བའི་མི་ཡིས་མདའ་རྣམས་བསྣུན་ཀྱང་ནི། །སྤྲེའུར་གྱུར་ངས་ནི་མི་དེ་མ་

བཏང་ངོ་། །རྒྱལ་པོ་དབང་དུ་གྱུར་ཚེ་ང་ཡིས་ནི། །གླང་པོ་བླ་མ་རྒན་དྲན་ལུས་བསྐམས་ཏེ། །ཤིན་ཏུ་ཡིད་འོང་ཟས་ཀྱང་ངས་མ་ཟོས། །དེ་ཚེ་གླང་པོ་བདག་ཉིད་ཐར་བར་འགྱུར། །བགྲོད་དཀའ་གངས་ཅན་རི་ལ་དྲེད་དབང་གྱུར། །ང་ཡིས་ཞག་བདུན་བར་དུ་བསྲུངས་པའི་
མི། །དེ་ཡིས་གསོད་པ་ང་ལ་བཏང་བྱས་ཀྱང་། །ངས་ནི་དེ་ཚེ་ཁོང་ཁྲོ་བྱས་པ་མེད། །ཁ་བ་ཀུན་ད་འདྲ་བའི་གླང་པོར་གྱུར། །བྱང་ཆུབ་མཆོད་རྟེན་སངས་རྒྱས་ཡོན་ཏན་ཚོལ། །དུག་དང་བཅས་པའི་མདའ་ཡིས་བསྣུན་ཀྱང་ནི། །མཆེ་བ་དམ་པ་བྱིན་གྱི་ཁྲོས་པ་མེད། །དུམ་བུའི་གླིང་དུ་
ནགས་ཚལ་སྤྱོད་ཡུལ་བ། །སྲེག་པའི་ཕྲུག་གུ་བྱམས་ལ་གནས་གྱུར་ཚེ། །མཐོང་བ་ཙམ་གྱིས་མེ་ནི་ཞི་གྱུར་ནས། །ལྷ་ཚོགས་དག་གིས་མེ་ཏོག་རྣམས་ཀྱང་གཏོར། །རི་དགས་གྱུར་ཚེ་གང་གཱའི་རླབས་ཤུགས་ཀྱིས། །ཁྱེར་བ་ཞིག་ནི་ང་ཡིས་བསྒྲལ་བྱས་པ། །དེ་ཡིས་
གསོད་པ་ང་གན་ཁྲིད་དེ་འོངས། །འོན་ཀྱང་དེ་ལ་ང་ནི་ཡིད་མ་ཁྲོས། །རྒྱ་མཚོའི་དབུས་སུ་སོན་སྟེ་མགོན་མེད་པ། །ཚོང་པ་ལྔ་བརྒྱ་དག་ནི་བསྒྲལ་བྱས་ནས། །བཀྲེས་པ་དེ་དག་རྣམས་ཀྱིས་བསད་གྱུར་ཚེ། །རུ་སྦལ་སྐྱེ་གནས་གྱུར་ཀྱང་བྱམས་དང་ལྡན། །ང་ནི་བྱང་ཆུབ་སྤྱད་
པ་སྤྱོད་པ་ན། །སྔོན་ཆད་ཆུ་ན་རྒྱུ་བའི་ཉར་གྱུར་ཚེ། །སེམས་ཅན་ཕན་ཕྱིར་ང་ཡིས་ལུས་བཏང་སྟེ། །སྲོག་ཆགས་བརྒྱ་སྟོང་དག་གིས་ཟོས་པར་གྱུར། །སྲོག་ཆགས་དེས་པར་གང་ཚེ་གྱུར་པ་ན། །ནད་བརྒྱས་གཟིར་བའི་འགྲོ་བ་མཐོང་ནས་སུ། །ལུས་ནི་སྨན་ལྟ་བུར་ཡང་བསྒྱུར་
བྱས་ཏེ། །སེམས་ཅན་བདེ་ཞིང་ནད་ཀྱང་མེད་པར་བྱས། །རི་དགས་རྒྱལ་པོ་སེང་གེར་གྱུར་པའི་ཚེ། །མཐུ་སྟོབས་ལྡན་པར་གྱུར་ཅིང་སྙིང་རྗེར་ལྡན། །མདའ་ཡིས་བསྣུན་ཀྱང་ཁྲོས་པའི་སེམས་མེད་དེ། །དེ་ཚེ་གསོད་ལ་ང་ཡིས་བྱམས་པ་བྱས། །དུང་དང་བ་མོ་ལྟ་བུའི་
རྟ་རྒྱལ་དུ། །ང་སྔོན་རྒྱ་མཚོའི་ངོགས་སུ་གྱུར་པའི་ཚེ། །སྲིན་མོའི་ནང་དུ་སོན་པའི་ཚོང་པ་རྣམས། །ང་ཡིས་སྙིང་བརྩེ་སྙིང་རྗེ་བསྐྱེད་ནས་བསྒྲལ། །འགྲོ་བའི་དོན་དུ་བྱང་ཆུབ་སྤྱད་སྤྱོད་ཚེ། །འདབ་ཆགས་ཀུན་{ལར་}ནི་ང་གྱུར་ཚེ། །འདོད་པའི་ཡོན་ཏན་ཉེས་པ་མང་སྤངས་ནས། །

བུད་མེད་དབང་དུ་ང་ནི་སོང་མ་གྱུར། །གེལ་བའི་ནགས་གནས་རི་བོང་གྱུར་པའི་ཚེ། །ལེགས་སྤྱོད་རི་བོང་ཚོགས་གྱུར་དེ་ལ་བསྟན། །ཐུབ་པ་གནས་ལ་གནས་པ་བཀྲེས་ཕོངས་པ། །དེ་ཡི་ཆེད་དུ་ངས་ནི་ལུས་ཀྱང་བཏང་། །སྡོང་པོ་མེ་ཏོག་འབྲས་རྒྱས་ནེ་ཙོའི་ཚེ། །སྡོང་པོ་སྐམས་
ཀྱང་ངས་ནི་དེ་མ་བཏང་། །དེ་ཚེ་བརྒྱ་བྱིན་བྱས་གཟོས་ང་མཐོང་ནས། །སྡོང་པོ་དེ་ནི་ལོ་འབྲས་རྒྱས་པར་བྱས། །ང་ནི་སྤྲ་ཡི་རྒྱལ་པོར་གྱུར་པའི་ཚེ། །མི་ཡི་རྒྱལ་པོ་ཀླུ་ཡིས་ཡུལ་བཅོམ་སྟེ། །སྤྲ་ཡི་ཚོགས་ལ་གནོད་པ་བྱུང་མཐོང་ནས། །རྒྱལ་པོའི་འཇིགས་ལས་དེ་དག་ངས་
བཏོན་ཏོ། །ང་སྔོན་ནེ་ཙོར་གྱུར་ཏེ་ཕ་མའི་ཕྱིར། །སཱ་ལུ་བླངས་ཚེ་མི་ཡིས་བཟུང་ནས་ནི། །ནེ་ཙོ་ཅི་ཕྱིར་ང་ཡི་སཱ་ལུ་ལེན། །ལོ་ཏོག་སྨིན་འདི་མ་རུང་བྱར་སེམས་སམ། །ནེ་ཙོ་དེས་སྨྲས་བཟང་པོ་གསན་དུ་གསོལ། །བདག་ནི་རྐུ་བས་ཁྱོད་ཀྱི་འབྲས་མི་ལེན། །ཕ་མ་རྒན་རྒོན་
གཉིས་ནི་གསོ་བའི་ཕྱིར། །དེ་ལ་སྙིང་རྗེས་བདག་གིས་སཱ་ལུ་བླངས། །གང་ཚེ་ཐོག་མས་ས་བོན་འདེབས་པའི་ཚེ། །འགྲོ་བ་ཀུན་ལ་ཆ་ཤས་སྦྱིན་ནོ་ཞེས། །དེ་སྐད་ཚིག་སྨྲས་དེ་ནི་བདག་ཐོས་ཏེ། །དེས་ན་བདག་ནི་རྐུ་བར་གཞར་མི་འགྱུར། །ནེ་ཙོ་ལེགས་སོ་སཱ་ལུ་ཅི་དགར་
ཁྱེར། །སྲིད་ཞུ་འདི་ནི་མི་ཡི་ནང་ནའང་དཀོན། །ཁྱོད་ནི་མི་ཡི་ནང་འདིར་དུད་འགྲོ་ཡིན། །ལེགས་སོ་ཁྱོད་ནི་དུལ་ཞིང་ཡང་དག་བསྡམས། །བྱང་ཆུབ་རྡུལ་བྲལ་དམ་པ་ཚོལ་བ་ན། །སྔོན་ཆད་སྤྱོད་པ་དེ་ལ་སོགས་པ་རྣམས། །སྤྱད་པའི་ཚེ་ན་དཀའ་བ་བརྒྱ་ལ་ཡང་། །ང་ཡི་
ཡིད་ནི་སྐྱོ་བར་གྱུར་པ་མེད། །ནང་གི་དག་གམ་འོན་ཏེ་ཕྱིར་ཡང་རུང་། །ང་ཡིས་དངོས་པོ་མ་བཏང་གང་ཡང་མེད། །ཚུལ་ཁྲིམས་བཟོད་དང་དེ་བཞིན་བརྩོན་འགྲུས་དང་། །བསམ་གཏན་ཐབས་དང་ཤེས་རབ་ངས་སྤྱད་དོ། །ཤ་དང་པགས་པ་དེ་བཞིན་རྐང་དང་ཁྲག །དེ་དག་རང་གི་
ལུས་ལས་སྦྱིན་པ་བྱས། །བས་མཐའ་དག་དང་ཕུག་ན་རྒྱུ་བའི་ཚེ། །ངས་ནི་དེ་ཚེ་ལུས་ནི་སྐམས་པར་བྱས། །གང་ལ་སྦྱར་ན་རྒྱལ་བར་འགྱུར་བ་ཡི། །སྦྱངས་པ་གང་དག་རྒྱལ་བས་བསྟན་མཛད་པ། །སྦྱངས་པ་དེ་ལ་རྟག་ཏུ་རབ་བརྩོན་ཏེ། །སྔོན་སྤྱོད་ཚེ་ན་ང་ནི་རྟག་ཏུ་འཇུག །སྤྱོད་པའི་

ཚེ་ན་ང་ཡིས་གང་བསྟེན་པ། །བརྟུལ་ཞུགས་རྒྱ་ཆེན་དེ་འདྲ་དེ་དག་དང་། །སྤྱོད་པ་འདི་ཐོས་ནས་ནི་དེ་དག་རྣམས། །ཚིག་གཅིག་ལ་ཡང་འདུན་པར་མི་འགྱུར་རོ། །འདི་ཐོས་གྱུར་ནས་དེ་ཡི་ཚེ་ན་ནི། །བསྟན་པ་འདི་ཉིད་ལ་ནི་འཕྱ་བར་འགྱུར། །དེ་དག་ཟས་དང་འཁྲིག་པ་
ལྷུར་ལེན་ཅིང་། །རྟག་ཏུ་གཉིད་ནོན་ཁྭ་ལྟར་གཡོ་ངན་འགྱུར། །རྟག་ཏུ་འཕགས་པ་མ་ཡིན་ཆོས་ལ་སྡང་། །བསྟན་པ་སུན་འབྱིན་བྱེད་ཅིང་ཡོན་ཏན་ཉམས། །ཞི་བའི་ཆོས་ནི་ཐོས་པར་གྱུར་པ་ན། །འདི་ནི་རྒྱལ་བས་གསུངས་པ་མིན་ཞེས་ཟེར། །ང་ཡི་སློབ་དཔོན་ཐོས་པ་རྒྱ་མཚོར་
གྱུར། །མང་དུ་ཐོས་པ་སྨྲ་བའི་གཙོ་བོ་ཡིན། །དེ་ཡིས་འདི་ནི་རྣམ་པ་ཇི་ལྟར་ཡང་། །སངས་རྒྱས་བཀའ་མ་ཡིན་ཞེས་དགག་པ་བྱས། །ཕ་རོལ་ལས་ཀྱང་རྒན་པར་གྱུར་དེ་ཡི། །བླ་མ་དེ་ནི་དཔག་མེད་ཡོན་ཏན་ཆུང་། །དེས་ཀྱང་འདི་ནི་བླང་བ་མ་བྱས་ཀྱི། །འདི་ལ་མ་འཇུག་
འདི་ནི་ནོར་བ་ཡིན། །གང་ལ་བདག་ཡོད་མ་ཡིན་སྲོག་མེད་དང་། །རྣམ་པ་ཅིས་ཀྱང་གང་ཟག་མེད་བསྟན་པ། །ཚུལ་ཁྲིམས་སྦྱོར་དང་སྡོམ་པའི་བྱ་བ་ལ། །གང་འབད་དེ་ཡི་ངལ་བ་དོན་མེད་འགྱུར། །གལ་ཏེ་ཐེག་པ་ཆེན་པོ་ཡོད་ན་ནི། །འདི་ལ་བདག་དང་སེམས་ཅན་
ཤིང་སྐྱེས་མེད། །གང་ལ་བདག་དང་སེམས་ཅན་མི་དམིགས་པ། །དེ་ལ་བདག་གིས་ངལ་བྱས་དོན་མེད་འགྱུར། །སྡིག་པའི་བློ་དང་མུ་སྟེགས་ངན་མཚུངས་པས། །རང་གི་བློ་ཡིས་རང་བཟོར་བྱེད་པ་སྟེ། །དགེ་སློང་འཁོར་གྱི་ནང་དུ་རྒྱལ་བ་ནི། །ཚིག་འདི་གསུང་བར་ནམ་ཡང་མི་
འགྱུར་རོ། །ངོ་ཚ་ཁྲེལ་དང་འཛེམ་དང་བྲལ་བ་དང་། །ཁྭ་ལྟར་སྤྱི་བརྟོལ་ཆེ་ལ་རྒོད་གཏུམ་ཞིང་། །ཕྲག་དོག་ང་རྒྱལ་རྒྱགས་པས་ཚིག་པ་ཡི། །དགེ་སློང་དག་ནི་ང་ཡི་བསྟན་ལ་འབྱུང་། །ལག་པ་དང་ནི་རྐང་པ་རྡོབ་བྱེད་ཅིང་། །ཆོས་གོས་གྲྭ་རྣམས་ཀྱང་ནི་སྐྱོག་པར་བྱེད། །
ཆོས་གོས་ཐོགས་ཤིང་ཆད་དང་རྒྱགས་མྱོས་ནས། །གྲོང་དང་ཁྱིམ་དག་ཏུ་ནི་རྣམ་པར་རྒྱུ། །དེ་དག་སངས་རྒྱས་རྒྱལ་མཚན་ཐོགས་ནས་ནི། །ཁྱིམ་ན་གནས་པའི་སྐྱེ་བོ་སྟེན་པར་བྱེད། །བསྟན་པ་ཡོན་ཏན་ཕུང་པོ་འདི་སྤངས་ནས། །དེ་དག་རྟག་ཏུ་ཕྲིན་ཡིག་ཁྱེར་བར་བྱེད། །དེ་དག་བ་

ལང་རྟ་དང་བོང་བུ་དང་། །དེ་དག་ཕྱུགས་དང་བྲན་ཕོ་བྲན་མོ་སྲེལ། །ཞིང་གི་ལས་དང་ཚོང་གི་སྦྱོར་བ་ལ། །བརྩོན་ཡིད་ལྡན་ཞིང་རྟག་ཏུ་འཕགས་མ་ཡིན། །དེ་དག་འཕགས་མིན་ཚིག་ཀྱང་མི་སྨྲ་མེད། །བྱ་བ་མ་ཡིན་པ་ཡང་གང་ཡང་མེད། །དེ་དག་རྣམས་ལ་མཆོད་རྟེན་ནོར་
དང་ནི། །དགེ་འདུན་གྱི་དང་གང་ཟག་ནོར་དེ་མཚུངས། །དགེ་སློང་ཡོན་ཏན་འབྱོར་པ་མཐོང་ནས་ནི། །དེ་དག་ལ་ཡང་མི་སྙན་རྗོད་བྱེད་དེ། །ཚུལ་ཁྲིམས་འཆལ་པ་སླུ་བ་ཞུགས་ནས་ནི། །བུད་མེད་འཇིགས་བྱེད་མི་བཟད་རབ་ཅེས་རྗོད། །རབ་ཏུ་བྱུང་བ་དེ་དག་བརྐམ་པ་
ལྟར། །ཁྱིམ་པ་འདོད་པས་བརྐམ་པ་དེ་ལྟར་མིན། །ཁྱིམ་པ་མཚུངས་པར་དེ་དག་ཆུང་མ་དང་། །བུ་དང་བུ་མོ་དག་ཀྱང་ཡོད་པར་འགྱུར། །གང་གི་ཁྱིམ་དུ་དེ་དག་ཆོས་གོས་དང་། །ལུས་དང་ལོངས་སྤྱོད་དག་གིས་བསྙེན་བཀུར་བ། །དེ་ཡི་ཆུང་མ་ལ་ནི་ཡོངས་ཆགས་ཤིང་། །ཉོན་
མོངས་དབང་འགྲོ་རྟག་ཏུ་འཕགས་པ་མིན། །འདོད་པ་འདི་དག་བསྟེན་བྱ་མ་ཡིན་ཏེ། །དུད་འགྲོ་ཡི་དགས་དམྱལ་བར་ལྟུང་བྱེད་ཅེས། །དེ་དག་ཁྱིམ་པ་རྣམས་ལ་རྟག་སྨྲ་ཞིང་། །དེ་དག་བདག་ཉིད་མ་དུལ་ཉེར་ཞི་མིན། །ཇི་ལྟར་དེ་དག་བདག་ཉིད་