Kinh tạng Tây Tạng (Kangyur Đại Học) — 041_དཀོན་བརྩེགས།_ག

 དགེ་སློང་ཚུར་ཤོག་ཅེས་བྱས་ན་སྐྲ་བྲེགས་པར་འགྱུར། ངུར་སྨྲིག་གྱོན་ཅིང་ལྷུང་བཟེད་ཐོགས་པར་
འགྱུར་ཏེ། ཡང་བ་གཉིས་པ་འདི་འཐོབ་བོ། །དགེ་བའི་རྩ་བ་དེ་ཉིད་དང་ལྡན་པས་དེ་བཞིན་གཤེགས་པས་སེམས་ཅན་ཐམས་ཅད་ཀྱི་དུས་གསུམ་གྱི་སེམས་རབ་ཏུ་མཁྱེན་ཏེ། ཡང་བ་གསུམ་པ་འདི་འཐོབ་བོ། །དགེ་བའི་རྩ་བ་དེ་ཉིད་དང་ལྡན་པས་དེ་བཞིན་གཤེགས་པ་སེམས་ཅན་
ཐམས་ཅད་ཀྱི་སྨན་ཇི་ལྟ་བ་བཞིན་དུ་རབ་ཏུ་མཁྱེན་ཏེ། ཡང་བ་བཞི་པ་འདི་འཐོབ་བོ། །དེ་དག་ནི་ཡང་བ་བཞི་སྟེ། དེ་ཅིའི་ཕྱིར་ཞེ་ན། དེ་ལྟར་དེ་ལེགས་པར་ཞུགས་པས་སློབ་དཔོན་དང་མཁན་པོ་ལ་ཐ་ན་ཆུ་བུམ་པ་གང་ཙམ་ཡང་འབུལ་བའི་ཕྱིར་རོ། །གཞན་ཡང་ཤཱ་རིའི་བུ་བྱང་ཆུབ་སེམས་
དཔའ་དགེ་བའི་རྩ་བ་དེ་ཉིད་དང་ལྡན་པས་གཞན་གྱིས་མི་ཚུགས་པའི་ཆོས་བཞི་འཐོབ་པར་འགྱུར་ཏེ། བཞི་གང་ཞེ་ན། ཤཱ་རིའི་བུ་དེ་བཞིན་གཤེགས་པའི་སྐུ་ལ་མེ་དང་། མཚོན་དང་། དུག་གིས་ཚུགས་པ་ནི་གནས་མ་ཡིན་ཞིང་སྐབས་མེད་པ་དང་། ཕ་རོལ་གྱི་གནོད་པ་བྱས་པས་
འཆི་བའི་དུས་བྱེད་པར་འགྱུར་བ་དེ་ལྟ་བུའི་གནས་མེད་དོ། །ཕ་རོལ་གྱིས་མི་ཚུགས་པའི་ཆོས་བཞི་པོ་དེ་དག་འཐོབ་པར་འགྱུར་རོ། །དེ་ཡང་ཕ་རོལ་གྱིས་མི་ཚུགས་པའི་ཆོས་བཞི་འཐོབ་པར་འགྱུར་ཏེ། བཞི་གང་ཞེ་ན། ཤཱ་རིའི་བུ་སེམས་ཅན་ཐམས་ཅད་ཀྱིས་དེ་བཞིན་གཤེགས་པས་
མ་གསན་པའི་ཆོས་ཐ་ན་ཆོས་ཀྱི་ཚིག་གཅིག་ཙམ་ཡང་ཐོས་པར་བྱེད་ནུས་པ་གནས་མ་ཡིན་ཞིང་སྐབས་མེད་དེ། དེ་ལྟ་བུའི་གནས་མེད་དོ། །སེམས་ཅན་ཐམས་ཅད་ཀྱིས་ཐ་ན་སེམས་བསྐྱེད་པ་གཅིག་ཙམ་ཡང་མཉམ་པར་མ་བཞག་པའི་སེམས་རྙེད་པར་འགྱུར་བའི་བར་དུ་དེ་ལྟ་བུའི་

གནས་མེད་དོ། །གཞན་ཡང་ཤཱ་རིའི་བུ་དེ་བཞིན་གཤེགས་པ་ནི་རྟག་ཏུ་མཉམ་པར་བཞག་པ་སྟེ། དེ་བཞིན་གཤེགས་པ་ནི་བྱམས་པ་ལ་གནས། སྙིང་རྗེ་ལ་གནས། དགའ་བ་གནས། བཏང་སྙོམས་ལ་གནས་སོ། །ཤཱ་རིའི་བུ་སེམས་ཅན་ཐམས་ཅད་
ཀྱིས་དེ་བཞིན་གཤེགས་པའི་ལུས་སམ། གཟུགས་ལ་མཚན་མར་འཛིན་ནུས་པ་ནི་གནས་མ་ཡིན་ཞིང་སྐབས་མེད་དེ། དེ་ལྟ་བུའི་གནས་མེད་དོ། །གཞན་གྱིས་མི་ཚུགས་པར་བྱེད་པའི་ཆོས་བཞི་པོ་དེ་དག་འཐོབ་པར་འགྱུར་རོ། །ཤཱ་རིའི་བུ་འདི་ལྔ་ནི་དེ་བཞིན་གཤེགས་པའི་ཚད་མེད་
པར་བྱེད་པའི་ཆོས་སོ། །ལྔ་གང་ཞེ་ན། ཤཱ་རིའི་བུ་དེ་བཞིན་གཤེགས་པའི་ཚུལ་ཁྲིམས་ཚད་མེད་པ་དང་། ཤཱ་རིའི་བུ་དེ་བཞིན་གཤེགས་པའི་ཐོས་པ་ཚད་མེད་པ་དང་། དེ་བཞིན་གཤེགས་པའི་ཏིང་ངེ་འཛིན་དང་། ཤེས་རབ་ཀྱིས་རྣམ་པར་གྲོལ་བ་དང་། རྣམ་པར་གྲོལ་བའི་
ཡེ་ཤེས་མཐོང་བ་ཚད་མེད་པ་སྟེ། ཤཱ་རིའི་བུ་ལྔ་པོ་དེ་དག་ནི་དེ་བཞིན་གཤེགས་པའི་ཚད་མེད་པར་བྱེད་པའི་ཆོས་སོ། །ཚུར་ཤོག་ཅེས་བྱས་ན་ཡང་འོང་བའི་དགེ་བའི་རྩ་བ་དེ་ཉིད་དང་ལྡན་པས་ཐོགས་པ་མེད་པའི་ཡེ་ཤེས་བཞི་འཐོབ་པར་འགྱུར་ཏེ། བཞི་གང་ཞེ་ན། སངས་རྒྱས་བཅོམ་
ལྡན་འདས་རྣམས་འདས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་པ་དང་། སངས་རྒྱས་བཅོམ་ལྡན་འདས་རྣམས་མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་པ་དང་། སངས་རྒྱས་བཅོམ་ལྡན་འདས་རྣམས་ད་ལྟར་བྱུང་བའི་དུས་ལ་མ་
ཆགས་མ་ཐོགས་པའི་ཡེ་ཤེས་མཐོང་བ་འཇུག་པ་དང་། དེ་བཞིན་གཤེགས་པའི་སེམས་མཉམ་པར་བསྒྲུབ་པ་སྟེ། སེམས་མཉམ་པར་བསྒྲུབ་པ་དེས་དེ་བཞིན་གཤེགས་པའི་དུས་གསུམ་མཉམ་པ་ཉིད་ཀྱི་ཡེ་ཤེས་དང་། ཡང་དག་པའི་ཡེ་ཤེས་དང་ལྡན་ནོ། །ཡང་དག་པའི་ཡེ་
ཤེས་དེས་གཞན་ལ་རག་མ་ལས། གཞན་གྱི་ཁར་མ་ལས་པར་ཆོས་ཐམས་ཅད་ཤེས་ཏེ། དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་བོ། །བསམ་གྱིས་མི་ཁྱབ་པའི་ཡེ་ཤེས་དེ་དང་ལྡན་པས་རླུང་དང་། ཆར་རབ་ཏུ་མཁྱེན་ཏེ། རྗེས་སུ་འཐུན་པ་ཞེས་བྱ་བའི་རླུང་ལྡང་སྟེ། སེམས་

ཅན་ཇི་སྙེད་པས་ཅུང་ཟད་སོ་སོར་རྗེས་སུ་མྱོང་བར་འགྱུར་ཏེ། རླུང་དེའི་འཕང་དུ་རྒྱང་གྲགས་གསུམ་མོ། །དེའི་སྟེང་གི་བར་སྣང་ལ་རླུང་སྤྲིན་ཅེས་བྱ་བའི་རླུང་ལྡང་སྟེ། དེའི་འཕང་དུ་རྒྱང་གྲགས་ལྔའོ། དེའི་སྟེང་གི་བར་སྣང་ལ་འཛོམས་པ་ཞེས་བྱ་བའི་རླུང་ལྡང་སྟེ། རླུང་དེའི་དཀྱིལ་འཁོར་
གྱི་འཕང་དུ་དཔག་ཚད་བཅུའོ། །དེའི་སྟེང་གི་བར་སྣང་ལ་སྐྱེ་བྲལ་ཞེས་བྱ་བའི་རླུང་ལྡང་སྟེ། རླུང་གི་དཀྱིལ་འཁོར་དེའི་འཕང་དུ་དཔག་ཚད་སུམ་ཅུའོ། །དེའི་སྟེང་གི་བར་སྣང་ལ་དེ་བཞིན་གཤེགས་པ་ཞེས་བྱ་བའི་རླུང་ལྡང་སྟེ། རླུང་གི་དཀྱིལ་འཁོར་དེའི་འཕང་དུ་དཔག་ཚད་བཞི་བཅུའོ། །
ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཤེས་རབ་ལ་རྟོན་པ་སྟེ། རླུང་གི་དཀྱིལ་འཁོར་བྱེ་བ་སྟོང་ཕྲག་དྲུག་ཅུ་རྩ་བརྒྱད་རབ་ཏུ་མཁྱེན་ཏོ། །དེ་ལ་ཐ་མའི་རླུང་གི་དཀྱིལ་འཁོར་ཀུན་ཏུ་ཁྱབ་ཅེས་བྱ་སྟེ། གང་ལ་ས་ཆེན་པོ་གནས་པའི་ཆུའི་ཕུང་པོ་
འཕང་དུ་དཔག་ཚད་སྟོང་ཕྲག་དྲུག་ཅུ་རྩ་བརྒྱད་ཡོད་དེ། ས་ཆེན་པོའི་འཕང་དུ་ཡང་དཔག་ཚད་སྟོང་ཕྲག་དྲུག་ཅུ་རྩ་བརྒྱད་དོ། །དེ་ལྟར་ཤཱ་རིའི་བུ་གྲངས་དང་། བགྲང་བ་བསྟན་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཏེ། དེ་ན་ཕུང་པོ་ཆེན་པོ་ཞེས་བྱ་བའི་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ལྟར་བཞུགས་ཏེ་འཚོ་ཞིང་བཞེས་སོ། །དེའི་ཚེའི་ཚད་ནི་ལོ་བྱེ་བ་ཕྲག་སུམ་ཅུ་འོ། །དེའི་འཁོར་ཉན་ཐོས་ནི་བྱེ་བ་ཁྲག་ཁྲིག་ཕྲག་སུམ་ཅུ་སྟེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་
དང་ལྡན་པར་གྱུར་པ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པའི་བར་ཏུ་སྟེ། ཉན་ཐོས་ཆེན་པོ་རྣམས་ཀྱི་ཉན་ཐོས་འདུས་པ་ཆེན་པོ་ཡོད་དོ། །དེའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཕྲག་བརྒྱ་བྱང་ཆུབ་སེམས་དཔའི་སྡེ་སྣོད་ཐོབ་པ། དོན་ལ་ཤིན་
ཏུ་རྣམ་པར་ངེས་པ། ཐོས་པ་རྒྱ་མཚོ་ཆོས་སྨྲ་བ། སྟོང་པ་ཉིད་ལ་གནས་པ། མཚན་མ་མེད་པ་ལ་གནས་པ། སྨོན་པ་མེད་པ་ལ་གནས་པ་ཆེན་པོ་ཤ་སྟག་འདུས་པ་ཡོད་དོ། །དེ་ཡོངས་སུ་མྱ་ངན་ལས་འདས་ནས་དམ་པའི་ཆོས་ལོ་སྟོང་དུ་གནས་པར་འགྱུར་རོ། །ང་ཡོངས་སུ་མྱ་ངན་ལས་

འདས་ནས་ལོ་སྟོང་ན་དེ་ཡོངས་སུ་མྱ་ངན་ལས་འདའ་བར་འགྱུར་ཏེ། དེའི་རིང་བསྲེལ་ཡང་རྒྱས་པར་འགྱུར་རོ། །འདི་ལྟ་སྟེ། དཔེར་ན། ང་ད་ལྟར་ཡོངས་སུ་མྱ་ངན་ལས་འདས་པའི་རིང་བསྲེལ་རབ་ཏུ་རྒྱས་པར་འགྱུར་བ་བཞིན་ནོ། ཤཱ་རིའི་བུ་དེ་བཞིན་གཤེགས་པ་ནི་ཡེ་
ཤེས་ཐོགས་པ་མེད་པ་སྟེ། དེ་བས་ཀྱང་ལྷག་པར་དེ་བཞིན་གཤེགས་པའི་ཡེ་ཤེས་དཔག་ཏུ་མེད་དོ། །རླུང་གི་དཀྱིལ་འཁོར་ཡོངས་སུ་ཁྱབ་པས་སངས་རྒྱས་ཀྱི་ཞིང་ཡོངས་སུ་ཁྱབ་བོ། །ཤཱ་རིའི་བུ་སྟེང་གི་ཕྱོགས་ཀྱི་འཇིག་རྟེན་གྱི་ཁམས་ནད་ལྟར་དེ་བཞིན་གཤེགས་པ་མེད་པ་ཡང་ཡོད་དོ། །
དེ་ན་རང་སངས་རྒྱས་བརྒྱ་ཕྲག་སྟོང་ཡོད་དེ། དེ་དག་ལ་སེམས་ཅན་རྣམས་དགེ་བའི་རྩ་བསྐྱེད་དོ། །ཤཱ་རིའི་བུ་དེ་བཞིན་གཤེགས་པ་ནི་ཡེ་ཤེས་ལ་རྟོན་པ་སྟེ། དེའི་ཡང་སྟེང་གི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་དང་མཉམ་པ་ད་ལྟར་བྱུང་བ་
རྣམས་རབ་ཏུ་མཁྱེན་ཏོ། །དེ་བཞིན་དུ་ཕྱོགས་བཅུ་ཀུན་ཏུ་ཚད་མེད་གྲངས་མེད་གཞལ་དུ་མེད་དཔག་ཏུ་མེད་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ལྟར་བྱུང་བ་དེ་དག་རབ་ཏུ་མཁྱེན་ཏེ། སངས་རྒྱས་ཀྱི་ཞིང་ཚིག་པ་དེ་སྙེད་ཀྱང་རབ་ཏུ་མཁྱེན་ཏོ། །དེ་
སྐད་ཅེས་བཀའ་སྩལ་ནས། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་བའི་རྩ་བ་གང་དང་ལྡན་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདི་ལྟ་བུར། སྒྲིབ་པ་མེད་པའི་ཡེ་ཤེས་དང་ལྡན།
བཅོམ་ལྡན་འདས་ཀྱིས་བཀའ་སྩལ་པ་ཤཱ་རིའི་བུ་ང་དབང་ལ་རབ་ཏུ་གནས་ཏེ། ཆོས་ལ་གུས་པའི་འདུ་ཤེས་དང་། རི་མོར་བྱས་ཏེ་སྨན་དུ་འདུ་ཤེས་པ་དང་། རིན་པོ་ཆེར་འདུ་ཤེས་པ་དང་། དཀོན་པར་འདུ་ཤེས་པ་དང་། དགེ་བའི་རྩ་བར་འདུ་ཤེས་པ་དང་། ཇི་ལྟ་བ་བཞིན་ཏུ་འདུ་ཤེས་
བསྐྱེད་ནས་གུས་པའི་འདུ་ཤེས་དང་། ཆོས་སུ་འདུ་ཤེས་ཡོངས་སུ་བཟུང་བ་ལ་གནས་ཏེ། ཤཱ་རིའི་བུ་དེ་ལྟར་དེ་བཞིན་གཤེགས་པའི་ཡེ་ཤེས་འབར་བས། ཤཱ་རིའི་བུ་དེ་བཞིན་གཤེགས་པས་ཤིན་ཏུ་མང་པོ་དང་དེ་བས་ཀྱང་ལྷག་པར་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་རྒྱུན་མི་འཆད།

དཔག་ཏུ་མེད། གྲངས་མེད། གཞལ་དུ་མེད། བརྗོད་དུ་མེད་པར་རབ་ཏུ་མཁྱེན་ཏོ། །ཚུར་ཤོག་ཅེས་བྱས་ན་ཡང་འོང་བའི་དབང་དེས་སེ་གོལ་གཏོགས་པ་སྲིད་ཀྱིས་དེ་བཞིན་གཤེགས་པ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་དང་མཉམ་པར་འཆག་ཅིང་སླར་ཡང་འོང་ངོ་། །ཤཱ་རིའི་
བུ་ངས་མོས་པས་ཐོས་པ་བཟུང་བས་དེ་ཉིད་ཀྱིས། མྱུར་དུ་རྣམ་པར་གྲོལ་བ་ཐོབ་སྟེ། རྣམ་པར་གྲོལ་བ་དེས་ཤིན་ཏུ་རྣམ་པར་གྲོལ་ལོ། །ཅི་ལས་རྣམ་པར་གྲོལ་ཞེ་ན། སྡུག་བསྔལ་ཐམས་ཅད་ལས་ཤིན་ཏུ་རྣམ་པར་གྲོལ་ལོ། །ཤཱ་རིའི་བུ་གང་ལ་ལས་གུས་པའི་གནས་བཞི་ཐོབ་པ་ཙམ་གྱིས་དང་བ་
ཐོབ་ནས་ཇི་ལྟར་སངས་རྒྱས་ཀྱི་ཆོས་དང་འབྲལ་བར་མི་འགྱུར་བ་དེ་ལྟར་གནས། དེ་བཞིན་དུ་གནས་དེ་ལྟ་བུའི་ཚུལ་དུ་གནས་པར་བྱའོ། །སྙམ་དུ་སེམས་བསྐྱེད་ན་ཡང་འདི་ལྟ་བུའི་མདོ་སྡེའི་ཆོས་ཀྱི་རྣམ་གྲངས་ཀྱི་ཚིག་དང་ཡི་གེ་མི་འཛིན་ཀྱང་དེ་དགེ་བའི་རྩ་བ་དེ་ཉིད་ཀྱིས་ཤེས་རབ་བྱེད་པའི་
ཆོས་བཞི་འཐོབ་པར་འགྱུར་ཏེ། བཞི་གང་ཞེ་ན། ཤེས་རབ་ཅན་ཤེས་རབ་ཆེན་པོ་དང་ལྡན་པར་འགྱུར་བ་དང་། ཤེས་རབ་ཅན་སངས་རྒྱས་མཐོང་ཞིང་ཕྲད་ནས་མཉེས་པར་བྱེད་པ་དང་། ཤེས་རབ་ཅན་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བ་དང་། ཤེས་རབ་ཅན་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བ་སྟེ། ཤེས་རབ་བྱེད་པའི་ཆོས་བཞི་པོ་དེ་དག་འཐོབ་པར་འགྱུར་རོ། །དེ་མང་པོར་བྱེད་པའི་ཆོས་བཞི་འཐོབ་པར་འགྱུར་ཏེ། བཞི་གང་ཞེ་ན། མིར་འགྱུར་བ་མང་པོ་རྙེད་པ་དང་། སངས་རྒྱས་འབྱུང་བ་མཉེས་པར་བྱེད་པ་མང་པོ་དང་། དད་
པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བ་མང་པོ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་མང་པོ་སྟེ། མང་པོར་བྱེད་པའི་ཆོས་བཞི་པོ་དེ་དག་འཐོབ་པར་འགྱུར་རོ། །དེ་ཡན་ལག་བཞི་རྗེས་སུ་འཐོབ་པར་འགྱུར་ཏེ། བཞི་གང་ཞེ་ན། འཁོར་ལོས་
སྒྱུར་བའི་ཡན་ལག་རྗེས་སུ་འཐོབ་སྟེ། འཁོར་ལོས་སྒྱུར་བའི་རྒྱལ་པོར་འགྱུར་བ་དང་། ཚངས་པའི་འཇིག་རྟེན་དུ་ཚངས་པར་འགྱུར་བ་དང་། ལྷའི་དབང་པོ་བརྒྱ་བྱིན་དུ་འགྱུར་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ཆོས་ཐམས་ཅད་ཡོངས་

སུ་རྫོགས་པ་རྗེས་སུ་འཐོབ། སྟོབས་བསྔགས་པ་རྗེས་སུ་འཐོབ། སེམས་ཅན་ཡོངས་སུ་རྟོགས་པའི་ཡེ་ཤེས་རྗེས་སུ་འཐོབ། རྫུ་འཕྲུལ་གྱི་སྤྱོད་ཡུལ་ཡང་རབ་ཏུ་མཁྱེན་ཅིང་ལྷར་བཅས་པའི་འཇིག་རྟེན་གྱི་མིག་ཏུ་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་
ཆེར་རབ་ཏུ་བསྟན་པའི་ཕྱིར། དེའི་ཚེ་ཚིགས་སུ་བཅད་པ་འདི་དག་གསུངས་སོ། །འཇིག་རྟེན་གྱི་ནི་སྐྱབས་དང་མིག །སེམས་ཅན་ཀུན་གྱི་དམ་པ་སྟེ། །གང་རེག་མྱ་ངན་འདའ་འགྱུར་བའི། །གསོ་བ་ཐམས་ཅད་རབ་ཏུ་ཤེས། །ཚུར་ཤོག་ཅེས་བྱས་འོང་གྱུར་པའི། །རྣམ་པར་སྨིན་
པ་འདི་འདྲ་སྟེ། །ནམ་ཡང་སྡུག་བསྔལ་མི་འགྱུར་ཞིང་། །བཀའ་བློ་མི་བདེར་ཡོང་མི་འགྱུར། །ལྷ་ཡི་ནང་དུ་མྱུར་འགྲོ་ཞིང་། །མི་ཡི་ནང་དུའང་མྱུར་དུ་འགྲོ། །སངས་རྒྱས་དག་ཀྱང་མྱུར་མཐོང་ཞིང་། །མི་ཁོམ་རྣམ་པར་སྤོང་བར་འགྱུར། །འབྱོར་ཅིང་ནོར་ཡང་ཆེན་པོར་
འགྱུར། །གཏེར་གྱི་རྣམས་ནི་མང་མཐོང་ཞིང་། །གང་དུ་ལག་པ་བཅུག་པ་རྣམས། །ཐམས་ཅད་རིན་ཆེན་གང་བར་འགྱུར། །ཡན་ལག་བརྒྱད་ཀྱི་ཆུས་གང་བའི། །རྫིང་བུ་རབ་ཏུ་བསགས་པར་འགྱུར། །ནམ་ཡང་མྱ་ངན་མི་མྱོང་སྟེ། །བཀའ་བློ་བདེ་བའི་འབྲས་བུ་འདི། །
ཐིང་བོ་ཞ་བོར་མི་འགྱུར་ཞིང་། །རྐང་པ་འཁུམས་དང་འབུབ་པ་དང་། །ཡན་ལག་སྐམ་པར་མི་འགྱུར་ཞིང་། །ཡན་ལག་ཉམས་པར་མི་འགྲོའོ། །སོར་མོ་དགུ་བར་མི་འགྱུར་ཞིང་། །སྒུར་པོ་ཞར་བར་མི་འགྱུར་རོ། །གླང་པོའི་མགོ་ལྟར་མི་འགྱུར་ཏེ། །བཀའ་བློ་བདེ་བའི་འབྲས་བུ་
འདི། །དེ་ཡི་ཡན་ལག་རྒྱས་ཤིང་དཀར། །ལྕགས་ཀྱི་དངོས་པོ་འདྲ་བར་འགྱུར། །རབ་ཏུ་མཛེས་ཤིང་བལྟ་ན་སྡུག །ཁ་དོག་ལྡན་ཞིང་མཛེས་པར་གནས། །ལྷ་ཡིས་མངོན་པར་མཆོད་པར་འགྱུར། །མི་རྣམས་ཤིན་ཏུ་བསྟི་སྟང་བྱེད། །ཀླུ་རྣམས་ཀྱིས་ནི་མངོན་མཆོད་འགྱུར། །
བཀའ་བློ་བདེ་བའི་འབྲས་བུ་འདི། །ངན་འགྲོ་ཐམས་ཅད་སྤངས་ནས་ནི། །མི་དེ་མཐོ་རིས་འགྲོ་བར་འགྱུར། །མྱུར་དུ་བྱང་ཆུབ་འཚང་རྒྱ་སྟེ། །བཀའ་བློ་བདེ་བའི་འབྲས་བུ་འདི། །མི་དེས་སེམས་ཅན་ཐམས་ཅད་ཀྱི། །སེམས་རྣམས་ཐམས་ཅད་རབ་ཏུ་ཤེས། །གོམ་པ་དག་ནི་

བདུན་བོར་ནས། །འཇིག་རྟེན་དབྱངས་ཀྱིས་གོ་བར་བྱེད། །དེ་ཡི་ཡེ་ཤེས་མཆོག་འགྱུར་ཞིང་། །ཤེས་རབ་དག་ཀྱང་མཆོག་ཏུ་འགྱུར། །རྣམ་པར་གྲོལ་བ་མཆོག་འགྱུར་ཏེ། །སེམས་ཅན་རྣམས་ནི་ཀུན་གྱི་མཆོག །ཤེས་རབ་ཀྱིས་ནི་ཤེས་རབ་སྦྱོང་། །ཤེས་རབ་ཡེ་ཤེས་གནས་
པ་སྟེ། །ཤེས་རབ་ཡེ་ཤེས་རྣམ་པར་གྲོལ། །སངས་རྒྱས་ཀུན་གྱིས་བརྙེས་པ་ཡིན། །ཤེས་རབ་ཀྱིས་ནི་རང་བཞིན་ཤེས། །ཡེ་ཤེས་ཀྱིས་ནི་ཤེས་བྱ་ཤེས། །གང་དག་ཤེས་རབ་ཡེ་ཤེས་དག །ཐམས་ཅད་དེ་ལ་དཀོན་མི་འགྱུར། །འདི་འདྲའི་དགེ་བ་འདི་དག་གི །དོན་
ནི་ཁྱོད་ལ་ངས་བཤད་དོ། །དེ་ནི་མོས་པ་ཆུང་བ་ཡི། །སེམས་ཅན་རྣམས་ཀྱི་དོན་མ་ཡིན། །གཏི་མུག་གིས་ནི་རྨོངས་པ་དང་། །སྡིག་པས་མངོན་པར་གཙེས་པ་རྣམས། །ཞེ་སྡང་ཁྲོ་བ་བསྐྱེད་བྱས་ནས། །ཆོས་ལ་གུས་པར་མི་འགྱུར་རོ། །ནམ་ཞིག་སེམས་ཅན་མོས་ཆུང་
ཚེ། །འདི་འདྲ་བ་ཡི་ཆོས་འབྱུང་སྟེ། །དེ་ན་ཕྱིར་ཞིང་གཅིག་ལ་གཅིག །གུས་པ་བྱེད་པར་མི་འགྱུར་ཏེ། །གང་ཚེ་སེམས་ཅན་མི་གུས་ཤིང་། །ཁྲོ་བའི་ཉེས་ལ་ཡིད་དགའ་སྟེ། །ཀུན་ནས་ཉོན་མོངས་སེམས་ཀྱིས་ཀྱང་། །དེ་དག་བདག་ཅག་དགྲ་བཅོམ་འཛེར། །གནས་
བརྟན་གང་དག་རྒས་པ་དང་། །རྒས་ཤིང་འཁོགས་པ་གཏུགས་པ་དག །དེ་དག་འཆི་བའི་དུས་བྱེད་ཚེ། །སྲིད་པའི་ཐ་མར་གྱུར་ཅེས་ཟེར། །གནས་བརྟན་གང་དག་རྒས་པ་དང་། །རྒས་ཤིང་འཁོགས་པ་གཏུགས་པ་དག །དགྲ་བཅོམ་བསོད་སྙོམས་ཟོས་གྱུར་ནས། །སེམས་ཅན་
དམྱལ་བར་མྱུར་དུ་འགྲོ། །དེ་དག་ཚུལ་ཁྲིམས་རབ་དཀོན་ན། །དགྲ་བཅོམ་པར་ལྟ་ག་ལ་འགྱུར། །དད་པས་མཆོད་རྟེན་བྱེད་འགྱུར་ཏེ། །དེ་དག་ངན་འགྲོ་རྣམས་སུ་འགྲོ །ཤཱ་རིའི་བུ་དེ་ལྟར་ཚུལ་ཁྲིམས་སྤྱོད་པའི་བྱང་ཆུབ་སེམས་དཔའི་སྡེ་སྣོད་ཀྱི་དོན་གྱི་ཕྱིར་སློབ་
དཔོན་ལ་བསྙེན་བཀུར་དང་། །རིམ་གྲོ་བྱེད་པ་ནི་འདི་འདྲ་བའི་ཕན་ཡོན་དེ་དག་དང་། །དེ་བས་ཀྱང་ལྷག་པ་དཔག་ཏུ་མེད། །བསམ་གྱི་མི་ཁྱབ། །ཚད་མེད་པ་འཐོབ་པར་འགྱུར་རོ། །དེ་ལྟར་ཤཱ་རིའི་བུ་བྱང་ཆུབ་སེམས་དཔའི་སྡེ་སྣོད་ལ་རབ་ཏུ་གནས་པའི་བྱང་ཆུབ་སེམས་དཔའ་རབ་ཏུ་དབང་དུ་གྱུར་པ།

ཚུལ་ཁྲིམས་ཡོངས་སུ་དག་པ། བྱང་ཆུབ་སེམས་དཔའི་སྤྱད་པ་སྤྱོད་དོ། །དེ་ལ་ཚུལ་ཁྲིམས་ཡོངས་སུ་དག་པ་གང་ཞེ་ན། ཤཱ་རིའི་བུ་རྣམ་པ་བཅུས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ། །བཅུ་གང་ཞེ་ན། སེམས་ཅན་ཐམས་ཅད་ལ་མི་
འཚེ་བ་ཡིན། གཞན་གྱི་རྫས་ལ་མི་རྐུ་བ་ཡིན། གཞན་གྱི་ཆུང་མ་སྤངས་པ་ཡིན། སེམས་ཅན་ཐམས་ཅད་ལ་མི་སླུ་བ་ཡིན། གཞན་གྱི་གཡོག་འཐུན་པ་ལ་ཕྲ་མ་མི་ཟེར་བ་ཡིན། ཚིག་དྲག་པོ་བཟོད་པའི་ཕྱིར་ངག་མི་རྩུབ་པ་ཡིན། ཚིག་བསྡམས་པས་ཚིག་འཁྱལ་པ་སྤངས་པ་
ཡིན། གཞན་གྱི་ལོངས་སྤྱོད་ལ་ང་ཡིར་མི་འཛིན་པས་བརྣབ་སེམས་མེད་པ་ཡིན། ཚིག་ངན་པར་སྨྲས་པ་བཟོད་པས་གནོད་སེམས་སྤངས་པ་ཡིན། ལྷ་གཞན་མི་འདོད་པས་ལོག་པར་ལྟ་བ་སྤངས་པ་ཡིན་ཏེ། ཤཱ་རིའི་བུ་རྣམ་པ་བཅུ་པོ་དེ་དག་གིས་བྱང་ཆུབ་སེམས་དཔའི་ཚུལ་ཁྲིམས་
ཡོངས་སུ་དག་པར་རིག་པར་བྱའོ། །ཤཱ་རིའི་བུ་གཞན་ཡང་རྣམ་པ་བཅུས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱ་སྟེ། བཅུ་གང་ཞེ་ན། མི་ཤེས་པ་མི་འདོད་པས་མ་ཉམས་པའི་ཚུལ་ཁྲིམས་ཡིན། ངན་པར་སྐྱེ་བ་ཡོངས་སུ་སྤངས་པས་སྐྱོན་མེད་པའི་ཚུལ་ཁྲིམས་
ཡིན། ཉོན་མོངས་པ་ཐམས་ཅད་དང་མ་འདྲེས་པས་འདྲེན་མ་མ་ཡིན་པའི་ཚུལ་ཁྲིམས་ཡིན། གཅིག་ཏུ་དཀར་པོའི་ཆོས་རྣམ་པར་སྤེལ་བས་སྲ་སྲེ་མེད་པའི་ཚུལ་ཁྲིམས་ཡིན། ཇི་ལྟར་འདོད་པ་བཞིན་དུ་འགྲོ་བས་རང་དབང་གི་ཚུལ་ཁྲིམས་ཡིན། མཁས་པས་མ་སྨད་པས་བསྔགས་
པའི་ཚུལ་ཁྲིམས་ཡིན། ཉེས་པ་ཐམས་ཅད་མི་སྒྲུབ་པས་མ་སྨད་པའི་ཚུལ་ཁྲིམས་ཡིན། དབང་པོ་བསྲུངས་པས་ཤིན་ཏུ་སྦས་པའི་ཚུལ་ཁྲིམས་ཡིན། དྲན་པ་དང་། ཤེས་བཞིན་གྱི་ཕྱིར་ཤིན་ཏུ་བསྲུངས་པའི་ཚུལ་ཁྲིམས་ཡིན་ཏེ། ཤཱ་རིའི་བུ་རྣམ་པ་བཅུ་པོ་དེ་དག་གིས་བྱང་ཆུབ་
སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ། །ཤཱ་རིའི་བུ་གཞན་ཡང་རྣམ་པ་བཅུས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱ་སྟེ། བཅུ་གང་ཞེ་ན། རུང་བའི་ཚོད་ཤེས་པས་འདོད་པ་ཉུང་བའི་ཚུལ་ཁྲིམས་ཡིན། འདོད་པ་སྤོང་བས་ཆོག་

ཤེས་པའི་ཚུལ་ཁྲིམས་ཡིན། ལུས་དང་སེམས་རབ་ཏུ་དབེན་པས་ནན་ཏན་གྱི་ཚུལ་ཁྲིམས་ཡིན། འདུ་འཛི་ལ་སྨོད་པས་དགོན་པར་གནས་པའི་ཚུལ་ཁྲིམས་ཡིན། བདག་གི་ཁར་ལས་པའི་དགེ་བའི་རྩ་བ་བསྒྲུབ་པའི་ཕྱིར་སྦྱངས་པའི་ཡོན་ཏན་དང་། ཡོ་བྱད་བསྙུངས་པའི་ཚུལ་ཁྲིམས་
ཡིན། ཕ་རོལ་གྱི་གདོང་དུ་མི་ལྟ་བས་འཕགས་པའི་རིགས་ལ་དགའ་བའི་ཚུལ་ཁྲིམས་ཡིན། ལྷ་དང་མི་རྣམས་ལ་མི་སླུ་བས་ཇི་ལྟར་སྨྲས་པ་དེ་ལྟར་བྱེད་པའི་ཚུལ་ཁྲིམས་ཡིན། རང་གི་སེམས་ངེས་པར་རྟོག་པས་བདག་གི་འཁྲུལ་པ་ལ་སོ་སོར་རྟོག་པའི་ཚུལ་ཁྲིམས་ཡིན། ཕ་རོལ་གྱི་སེམས་
སྲུང་བས་གཞན་གྱི་འཁྲུལ་པ་ལ་ཉེས་པར་མི་ལྟ་བའི་ཚུལ་ཁྲིམས་ཡིན། བསྡུ་བའི་དངོས་པོ་རྗེས་སུ་མི་གཏོང་བས་སེམས་ཅན་ཡོངས་སུ་སྨིན་པར་བྱེད་པའི་ཚུལ་ཁྲིམས་ཡིན་ཏེ། ཤཱ་རིའི་བུ་རྣམ་པ་བཅུ་པོ་དེ་དག་གིས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ། །
ཤཱ་རིའི་བུ་གཞན་ཡང་རྣམ་པ་བཅུས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱ་སྟེ། བཅུ་གང་ཞེ་ན། འདི་ལྟ་སྟེ། ཐ་བའི་སེམས་མེད་པས་སངས་རྒྱས་ལ་དད་པའི་ཚུལ་ཁྲིམས་ཡིན། དམ་པའི་ཆོས་སྲུང་བས་ཆོས་ལ་དད་པའི་ཚུལ་ཁྲིམས་ཡིན། འཕགས་
པ་འདུས་པ་ལ་གུས་པས་དགེ་འདུན་ལ་དད་པའི་ཚུལ་ཁྲིམས་ཡིན། སངས་རྒྱས་དང་བྱང་ཆུབ་སེམས་དཔའ་ཡིད་ལ་བྱེད་པ་དང་མ་བྲལ་བས་འདུད་པའི་ཚུལ་ཁྲིམས་ཡིན། བྱང་ཆུབ་ཀྱི་ཡན་ལག་གི་ཚོགས་བསགས་པས་དགེ་བའི་བཤེས་གཉེན་ལ་བསྟེན་པའི་ཚུལ་ཁྲིམས་ཡིན། མི་དགེ་
བའི་ཆོས་ཐམས་ཅད་ཡོངས་སུ་སྤངས་པས་སྡིག་པའི་གྲོགས་པོ་ཡོངས་སུ་སྤོང་བའི་ཚུལ་ཁྲིམས་ཡིན། སེམས་ཅན་ཐམས་ཅད་ཡོངས་སུ་སྨིན་པར་བྱེད་པས་བྱམས་པའི་ཚུལ་ཁྲིམས་ཡིན། ཉམ་ཐག་པར་གྱུར་པའི་སེམས་ཅན་ཡོངས་སུ་སྨིན་པར་བྱེད་པས་སྙིང་རྗེའི་ཚུལ་ཁྲིམས་ཡིན། ཆོས་ལ་
དགའ་ཞིང་རབ་ཏུ་མོས་པས་དགའ་བའི་ཚུལ་ཁྲིམས་ཡིན། རྗེས་སུ་ཆགས་པ་དང་། ཁོང་ཁྲོ་བ་སྤངས་པས་བཏང་སྙོམས་ཀྱི་ཚུལ་ཁྲིམས་ཡིན་ཏེ། ཤཱ་རིའི་བུ་རྣམ་པ་བཅུ་པོ་དེ་དག་གིས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ། །ཤཱ་རིའི་བུ་གཞན་ཡང་

རྣམ་པ་བཅུས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱ་སྟེ། བཅུ་གང་ཞེ་ན། སེམས་ཅན་ཡོངས་སུ་སྨིན་པར་བྱེད་པས་སྦྱིན་པའི་ཚུལ་ཁྲིམས་ཡིན། སེམས་ཀུན་ཏུ་སྲུང་བས་བཟོད་པའི་ཚུལ་ཁྲིམས་ཡིན། མི་ཟློགས་པས་བརྩོན་འགྲུས་
ཀྱི་ཚུལ་ཁྲིམས་ཡིན། བསམ་གཏན་གྱི་ཚོགས་ཡང་དག་པར་རྫོགས་པར་བྱེད་པས་བསམ་གཏན་གྱི་ཚུལ་ཁྲིམས་ཡིན། ཐོས་པ་དང་ཚུལ་ཁྲིམས་ཀྱིས་མི་ངོམས་པས་ཤེས་རབ་ཀྱི་ཚུལ་ཁྲིམས་ཡིན། བྱང་ཆུབ་སེམས་དཔའི་སྡེ་སྣོད་ཡོངས་སུ་ཚོལ་བས་ཐོས་པ་ཡོངས་སུ་ཚོལ་བའི་
ཚུལ་ཁྲིམས་ཡིན། མི་རྟག་པའི་འདུ་ཤེས་སོ་སོར་རྟོག་པས་ལུས་ལ་མི་ལྟ་བའི་ཚུལ་ཁྲིམས་ཡིན། སེམས་ལ་སྒྱུ་མ་ལྟ་བུར་སོ་སོར་རྟོག་པས་སྲོག་ལ་ཡིད་མི་རྟོན་པའི་ཚུལ་ཁྲིམས་ཡིན། ཐོག་མ་ནས་ཚུལ་ཁྲིམས་ཡོངས་སུ་དག་པས་བསམ་པ་ཐམས་ཅད་ཡོངས་སུ་རྫོགས་པར་བྱེད་
པའི་ཚུལ་ཁྲིམས་ཡིན། ཚུལ་ཁྲིམས་ཐམས་ཅད་ཡོངས་སུ་བསྔོ་བས་དེ་བཞིན་གཤེགས་པ་དང་ཕྲད་པའི་ཚུལ་ཁྲིམས་ཡིན་ཏེ། ཤྭ་རིའི་བུ་རྣམ་པ་བཅུ་པོ་དེ་དག་གིས་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པར་རིག་པར་བྱའོ། །ཤཱ་རིའི་བུ་དེ་ལྟར་ཚུལ་ཁྲིམས་ཤིན་ཏུ་
ཡོངས་སུ་དག་པའི་བྱང་ཆུབ་སེམས་དཔས་ལྷ་དང་མིའི་དཔལ་ཕུན་སུམ་ཚོགས་པར་མྱོང་བར་མི་འགྱུར་བ་གང་ཡང་མེད་དོ། །འཇིག་རྟེན་གྱི་བཟོའི་གནས་དང་། ལས་ཀྱི་གནས་མི་ཤེས་པ་གང་ཡང་མེད་དེ། དེས་སེམས་ཅན་ཐམས་ཅད་ལོངས་སྤྱོད་དང་། ཉེ་བར་སྤྱོད་པ་ཐོབ་པར་མི་
བྱེད་པ་གང་ཡང་མེད་དོ། །སོ་སོའི་སྐྱེ་བོ་ཕན་ཚུན་མི་མཛའ་བར་མི་འགྱུར་བ་དེ་གང་ཡང་མེད་དེ། དེ་ལ་བྱང་ཆུབ་སེམས་དཔའ་ཁོང་ཁྲོ་བ་མེད་དོ། །གང་ལ་བྱང་ཆུབ་སེམས་དཔའ་མ་དད་པར་འགྱུར་བའི་བརྫུན་དུ་སྨྲ་བ་དེ་གང་ཡང་མེད་དོ། །དེ་སེམས་ཅན་གང་ལ་ཡང་མར་འདུ་
ཤེས་མི་སྐྱེད་པ་མེད་དོ། །དེ་སེམས་ཅན་གྱི་རིས་ན་སེམས་ཅན་གང་ལ་ཡང་ཕར་འདུ་ཤེས་མི་སྐྱེད་པ་མེད་དོ། །དེ་སེམས་ཅན་གང་ལ་ཡང་ཡིད་རྟོན་པའི་འདུ་ཤེས་མི་སྐྱེད་པ་མེད་དོ། །དེ་འདུས་བྱས་ཀྱི་ཆོས་གང་ལ་ཡང་མི་རྟག་པར་འདུ་ཤེས་མི་སྐྱེད་པ་མེད་དོ། །དེ་ཐམས་ཅད་འདུ་བྱེད་དུ་

གཏོགས་པར་ཤེས་ནས་ལུས་དང་སྲོག་ལ་མི་ལྟ་སྟེ། ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་དོ། །བཅོམ་ལྡན་འདས་ཀྱིས་དེ་སྐད་གསུངས་ཏེ། བདེ་བར་གཤེགས་པས་དེ་སྐད་བཀའ་སྩལ་ནས་སྟོན་པ་ཡང་འདི་སྐད་གསུང་ངོ་། །
ཚུལ་ཁྲིམས་འདི་ལ་གང་གནས་པ། །སྐྱོབ་པ་ཡི་ནི་ཆོས་སྐུ་དང་། །དབྱངས་དང་ཁ་དོག་གཟུགས་རྣམས་ནི། །དེ་དག་ལ་ནི་རྙེད་མི་དཀའ། །མདོངས་ཤིང་དམུས་ལོང་མི་འགྱུར་ལ། །ཞར་སྒུར་ཞ་བར་མི་འགྱུར་རོ། །འབྱུང་བ་རྣམ་པར་དག་འགྱུར་ཞིང་། །དེ་ཡི་ལུས་ནི་མཛེས་
པར་འགྱུར། །སྟོབས་ཆེ་ཞིང་ནི་མཐུ་ཆེ་སྟེ། །གཟི་ཆེ་ཞིང་ནི་གཟི་བརྗིད་རབ། །ཤེས་རབ་དང་ནི་བརྩོན་འགྲུས་ཀྱིས། །སྡིག་ཅན་བདུད་ནི་སྐྲག་པར་བྱེད། །རྒྱལ་པོ་ཡིས་ནི་མངོན་མཆོད་ཅིང་། །ལྷ་ཀླུ་རྣམས་ཀྱིས་བཀུར་སྟི་བྱས། །ཐེ་ཚོམ་ཐམས་ཅད་ཆད་པར་འགྱུར། །དེ་དག་
བྱམས་པ་ཤིན་ཏུ་བསྒོམས། །ཚུལ་ཁྲིམས་ཕུང་པོར་རབ་གནས་ནས། །གསོད་པར་བྱེད་ཀྱང་འཇིགས་པ་མེད། །གྲགས་པ་ཆེན་པོ་ཆོས་སྤྱོད་པ། །ངན་འགྲོ་དག་ཏུ་མི་འགྲོའོ། །སེམས་ཅན་ཐམས་ཅད་གཉིད་ལོག་ཀྱང་། །སྙོམ་པ་མེད་ཅིང་མི་ཉལ་ཏེ། །ཕྱོགས་བཞི་དག་ནི་ཀུན་ཏུ་
ཡང་། །ལེགས་པར་བཤད་པ་ཡོངས་སུ་ཚོལ། །ཚུལ་ཁྲིམས་ཕུང་པོར་གནས་པ་དག །རིན་ཆེན་མཆོག་དང་ཆུང་མ་དང་། །བདག་གི་ཤ་ཡང་རབ་གཏོང་ཞིང་། །བྱང་ཆུབ་ལམ་ནི་ཀུན་ཏུ་ཚོལ། །སངས་རྒྱས་ཆོས་ནི་བླ་མེད་པ། །མཆོག་གི་ཆོས་རྣམས་ཡོངས་སུ་ཚོལ། །འཇིག་རྟེན་
དག་གི་མགོན་འགྱུར་ཞིང་། །མཆོད་རྟེན་དང་ནི་སྦྱིན་པར་འོས། །གཤེ་ཞིང་ཡོངས་སུ་སྤྱོ་བ་དང་། །ཉེས་པ་བྱས་པ་ཐམས་ཅད་བཟོད། །བཟོད་པ་ཉིད་ལ་རབ་གནས་ཤིང་། །བཟོད་པ་ཡི་ནི་བསྔགས་པ་རྗོད། །མི་བདེན་པར་ནི་མི་སྨྲ་སྟེ། །ཇི་ལྟར་སྨྲས་པ་དེ་བཞིན་བྱེད། བྱང་ཆུབ་
སྙིང་པོར་འདུག་ནས་ནི། །ས་འདི་དག་ཀྱང་གཡོ་བར་བྱེད། །སངས་རྒྱས་ཆོས་ལ་ནེམ་ནུར་མེད། །ལྷ་གཞན་དག་ནི་རབ་ཏུ་སྤོང་། །རྟག་ཏུ་སངས་རྒྱས་བཅོམ་ལྡན་ལས། །ལྷ་གཞན་ཡོད་པར་མི་འགྱུར་རོ། །མཚོན་དག་དང་ནི་དུག་རྣམས་ཀྱིས། །ཕན་ཚུན་གནོད་པར་བྱེད་པ་ཡི། །

སྡུམས་ནི་བྱེད་པར་འགྱུར་བ་དག །དེ་ནི་མཁས་པའི་མཚན་ཉིད་དོ། །སེམས་ཅན་སྡུག་བསྔལ་རྣམས་མཐོང་ན། །བསྐལ་པ་བྱེ་བ་མང་པོར་ཡང་། །བདག་གི་དོན་ནི་མེད་གྱུར་ཀྱང་། །ཡལ་བར་འདོར་བར་མི་འགྱུར་རོ། །དོན་རྙེད་ན་ནི་མཛའ་བོ་ཞེས། །ཕན་
ཚུན་དུ་ནི་རབ་ཏུ་སྨྲ། །དོན་ནི་བྱེད་པར་མ་གྱུར་ན། །གཅིག་ལ་གཅིག་ནི་གསོད་པར་བྱེད། །འཛམ་བུ་ཡི་ནི་གླིང་འདི་དང་། །སངས་རྒྱས་ཀྱི་ནི་ཞིང་ཀུན་ཏུ། །རིན་ཆེན་བཀང་སྟེ་སྦྱིན་བྱས་ནས། །རྟག་ཏུ་བདག་གི་གྲོགས་སུ་འགྱུར། །གང་དག་མཚོན་རྣམས་རྣོན་པོ་ཡིས། །
ཡན་ལག་ཉིང་ལག་གཅོད་པ་ཡི། །སེམས་ཅན་དག་ནི་ཐམས་ཅད་ལ། །སེམས་ནི་མཉམ་པར་རབ་ཏུ་འཇུག །སངས་རྒྱས་དག་གི་ཆོས་རྣམས་ཕྱིར། །བྱིས་པ་རྣམས་ཀྱི་ཆོས་སྤོང་སྟེ། །ཆོས་ལ་ཤིན་ཏུ་གནས་གྱུར་པས། །ཚུལ་ཁྲིམས་རྟག་ཏུ་དག་པར་འགྱུར། །ཆོས་
ཀྱི་རྗེས་འཐུན་ཆོས་ཞུགས་ནས། །བྱང་ཆུབ་ཀྱི་ནི་སྤྱད་པ་སྤྱོད། །སངས་རྒྱས་ཀྱི་ནི་བྱང་ཆུབ་ཕྱིར། །རིགས་གསུམ་བདུད་རྩི་རབ་ཏུ་སྦྱིན། །ཚུལ་ཁྲིམས་ཕུང་པོར་གནས་བྱས་ནས། །ཆོས་རྣམས་ཐམས་ཅད་མངོན་པར་བསླབས། །མཁས་པ་ལྷ་དང་བཅས་པ་ཡི། །འཇིག་
རྟེན་ནི་མཆོད་པར་འོས། །ཆོས་རྣམས་ཀུན་ལ་ཐེ་ཚོམ་མེད། །བཟོ་ཀུན་ལ་ཡང་རབ་ཏུ་མཁས། །སེམས་ཅན་བསམ་པ་ཤེས་གྱུར་ནས། །སྙན་པའི་ཚིག་ནི་སྟོན་པར་བྱེད། །ཚུལ་ཁྲིམས་ཕུང་པོ་རྣམས་སྦྱངས་ནས། །བྱང་ཆུབ་དམ་པ་སངས་རྒྱས་ཏེ། །ཤིང་མཆོག་དྲུང་དུ་
འདུག་བྱས་ནས། །སྡིག་ཅན་བདུད་ནི་སྐྲག་པར་བྱེད། །ཉི་ཟླ་དག་ནི་སྣང་བ་ལྟར། །གཟི་བརྗིད་དྲག་པོའི་འོད་བྱེད་པ། །དེ་ལྟར་སེམས་ཅན་མཆོག་འགྱུར་ཞིང་། །ཤེས་རབ་ཀྱི་ནི་མིག་ལས་བྱུང་། །སེམས་ཅན་རྣམས་ལ་ལག་བྱིན་ཏེ། །དྲིས་པ་ལ་ནི་ལམ་རྣམས་སྟོན། །
རྟག་ཏུ་གསོང་པོར་སྨྲ་འགྱུར་ཏེ། །དེ་དག་ལ་ནི་ཕྲག་དོག་མེད། །བདག་དང་རིན་ཆེན་གཞན་དག་ཀྱང་། །མང་པོ་རྣམས་ནི་མྱུར་དུ་གཏོང་། །དེ་ནི་བརྒྱ་ལམ་བྱང་ཆུབ་མཆོག །གཏོང་བར་འགྱུར་བ་མ་ཡིན་ནོ། །དད་དང་ཚུལ་ཁྲིམས་ཕུན་སུམ་ཚོགས། །བདེན་པའི་ཚིག་ལ་

རབ་ཏུ་གནས། །ཚུལ་ཁྲིམས་ཕུང་པོ་རབ་གནས་པས། །དེ་དག་ལ་ནི་རྒྱུ་མེད་དོ། །བརྫུན་ཟེར་བ་དག་འོངས་གྱུར་ནས། །སྦྱིན་ཞིང་བྱ་ཞེས་ཟེར་ཡང་ནི། །བདེན་པའི་ཚིག་ལ་གནས་པས་ན། །དད་པས་དེ་ལ་དད་པར་འགྱུར། །ཕན་ཚུན་གཅིག་ལ་གཅིག་སྨྲ་བ། །ཆོས་གོས་
དང་ནི་བསོད་སྙོམས་རྣམས། །འདི་སྦྱིན་སྨྲས་ཏེ་མ་བྱིན་ཡང་། །དེ་ལ་ཡིད་ནི་འཁྲུག་པ་མེད། །གཞན་ཡང་ཤཱ་རིའི་བུ་དེ་ལྟར་ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་ནི་འདུ་བྱེད་ཐམས་ཅད་ལ་མངོན་པར་མི་དགའ་བའི་འདུ་ཤེས་སྐྱེད་དོ། །སེམས་ཅན་ཐམས་ཅད་ལ་ཕ་མར་
འདུ་ཤེས་སྐྱེད་དོ། །འདོད་པའི་ཡོན་ཏན་ལྔ་ལ་ཡོན་ཏན་མེད་པར་འདུ་ཤེས་སྐྱེད་དོ། །ཚོར་བ་དང་། རྣམ་པར་རིག་པ་ལ་རྣམ་པར་རིག་པ་མེད་པར་འདུ་ཤེས་སྐྱེད་དོ། །དེ་མཉམ་པ་དང་། མི་མཉམ་པར་ཡང་སེམས་ཀྱིས་མངོན་པར་མི་སྒྲུབ་བོ། །དེ་ཅིའི་ཕྱིར་ཞེ་ན། གལ་ཏེ་སེམས་
ཀྱིས་མཉམ་པར་བྱེད་ན་མྱ་ངན་ལས་འདས་པ་སེམས་ལས་འདས་པར་འགྱུར་རོ། །སེམས་ཀྱིས་མི་མཉམ་པར་བྱེད་ན་ནི་ཆགས་པའི་སེམས་སུ་གྱུར་པས་ཆེས་མི་མཉམ་པར་འགྱུར་རོ། །མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་སྟེ། ཆགས་པའི་སེམས་བསྐྱེད་ནས་
འགགས་པ་དེའི་བག་ལ་ཉལ་གྱིས་སེམས་དེའི་རང་བཞིན་དུ་སྐྱེ་སྟེ། མི་བདེན་པའི་དམིགས་པ་ལ་མི་བདེན་པའི་སེམས་སྡུག་གོ་ཞེས་རྟོག་སྟེ། དེ་ནི་ཚུལ་བཞིན་མ་ཡིན་པའོ། །མི་སྡུག་པའོ་ཞེས་མོས་པར་བྱེད་པ་ནི་རྣམ་པར་གྲོལ་བའོ། །རྣམ་པར་གྲོལ་བ་གང་ན་བདེན་ཟད་པའོ། །
ཅི་ཟད་ཅེ་ན། གང་ཟད་པ་དེ་ནི་འདོད་ཆགས་ཟད་པ། ཞེ་སྡང་ཟད་པ། གཏི་མུག་ཟད་པའོ། །དེ་ཅིའི་ཕྱིར་ཞེ་ན། འདོད་ཆགས་སྐད་ཅིག་གིས་ཟད་པར་འགྱུར་ཏེ། འདོད་ཆགས་ཀྱང་གཞན་ལ་ཟད་པ་ཡང་གཞན་ཞིག་ཡིན་དུ་ཟིན་ན་འདོད་ཆགས་ཡང་དག་པ་ཉིད་དུ་འགྱུར་རོ། །དེ་
ལྟར་འདོད་ཆགས་ཡང་དག་པ་མ་ཡིན་པས་ཟད་པར་འགྱུར་ཡང་ཤཱ་རིའི་བུ་འདོད་ཆགས་ནི་ཚུལ་བཞིན་མ་ཡིན་པ་ཡིད་ལ་བྱེད་པ་ལས་བྱུང་བ། ཀུན་ཏུ་རྟོག་པས་ཕྱེ་བ་སྟེ། གང་ཀུན་ཏུ་མི་རྟོག་པ་དེ་ནི་མི་རྟོག་གོ །རྟོག་པ་སྤངས་པ་ནི་ཡང་དག་པ་མ་ཡིན་པ་སྟེ། དེ་ལ་འདོད་ཆགས་བྱེད་པ་དེ་ནི་

ཡང་དག་པ་མ་ཡིན་ནོ། །གང་ཡང་དག་པ་མ་ཡིན་པ་དེ་ལ་སྡུག་བསྔལ་མེད། ཡོངས་སུ་གདུང་བ་མེད་དོ། །གང་ཡོངས་སུ་གདུང་བ་མེད་པ་དེ་ནི་ཡང་དག་པ་མ་ཡིན་པའོ། །གང་ཡང་དག་པ་མ་ཡིན་པ་དེ་ལ་གདུང་བ་མེད་དེ། དེ་ནི་བསིལ་བར་གྱུར་པ་མྱ་ངན་
ལས་འདས་པ་ཡིན་པས་དེ་ལ་འདོད་ཆགས་མེད་དོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པ་ནི་སེམས་དང་ལྡན་པ་མ་ཡིན་ཏེ། འདི་ལྟར་འདོད་ཆགས་ཟད་པ་བྱེད་པར་འགྱུར་རོ། །མྱ་ངན་ལས་འདས་པ་ནི་འདོད་ཆགས་ཟད་པ་སྟེ། དེ་ལྟར་འདོད་ཆགས་ཀྱང་གཞན། མྱ་ངན་ལས་འདས་
པ་ཡང་གཞན་ཏེ། གང་གཞན་ཡིན་པ་དེ་ནི་ཕ་རོལ་བས་ཀྱང་ཕ་རོལ་ལོ། །ཕ་རོལ་བས་ཀྱང་ཕ་རོལ་གང་ཡིན་པ་དེ་ནི་མཁས་པ་རྣམས་ཡོངས་སུ་ཚོལ་ཏེ་ཡོངས་སུ་ཚོལ་བ་ན་སྙིང་པོ་མི་དམིགས་སོ། །གང་སྙིང་པོ་མེད་པ་དེ་ནི་གསོག་གོ །གསོག་གང་ཡིན་པ་དེ་ནི་གསོབ་བོ། །གསོབ་གང་
ཡིན་པ་དེ་ནི་སྟོང་པའོ། །ཅིས་སྟོང་ཞེ་ན། བདག་དང་བདག་གི་དང་། རྟག་པ་དང་། བརྟན་པ་དང་། ཐེར་ཟུག་དང་། མི་འགྱུར་བའི་ཆོས་ཀྱིས་སྟོང་སྟེ། གང་སེམས་ཅན་མེད་པ་དེ་ནི་སྲོག་མེད་པ་སྟེ། དེ་ལས་འདོད་ཆགས་མི་སྐྱེ་ཞེ་སྡང་མི་སྐྱེ། གཏི་མུག་མི་སྐྱེའོ། །ཅི་ཡོད་པས་ང་ཞེས་བྱ་བའམ། ངའི་ཞེས་བྱ་
བའམ། འདི་ནི་ང་། འདི་ནི་ངའི་འོ་ཞེས་ངར་འཛིན་པ་དང་། ང་ཡིར་འཛིན་པ་ལོག་པ་འདི་འབྱུང་ཞེ་ན། ང་ཡིར་འཛིན་པ་ལས་མངོན་པར་འདུ་བྱེད་པ་འབྱུང་སྟེ། དེ་ལ་མངོན་པར་འདུ་བྱེད་པ་ནི་བཞིའོ། །བཞི་གང་ཞེ་ན། ལུས་ཀྱིས་མངོན་པར་འདུ་བྱེད་དོ། །ངག་གིས་མངོན་པར་འདུ་བྱེད་དོ། །
ཡིད་ཀྱིས་བརྟགས་ནས་ངག་རྩུབ་པོ་སྨྲས་ཏེ། དེ་ནས་ཕྱིས་ལུས་ཀྱིས་གནོད་པར་བྱེད་དོ། །དེ་ལྟར་བདག་དང་གཞན་དུ་འདུ་ཤེས་པ་ལ་འདུ་ཤེས་འཛིན་པར་འགྱུར་རོ། །ཡང་ཤཱ་རིའི་བུ་བྱིས་པ་སོ་སོའི་སྐྱེ་བོ་ཐམས་ཅད་ནི་འདུ་ཤེས་ཀྱིས་མདུད་པ་ཡིན་ཏེ། ཤཱ་རིའི་བུ་དེ་ལ་བྱང་ཆུབ་སེམས་དཔས་ཕྱིན་ཅི་
ལོག་གི་འདུ་ཤེས་འདི་ལྟ་བུ་རིག་ནས་སུ་ཡང་སྟེན་པར་མི་བྱེད་དོ། །དེ་ཅིའི་ཕྱིར་ཞེ་ན། སྟེན་པ་ལས་དེའི་འཇིགས་པ་འབྱུང་སྟེ། བདག་ནི་འཇིགས་པ་མི་འདོད་དོ་ཞེས་ཤཱ་རིའི་བུ་དེའི་ཕྱིར་བྱང་ཆུབ་སེམས་དཔའ་སེམས་ཅན་ཐམས་ཅད་ལ་ཡིད་མི་རྟོན་པ་ཡིན་ནོ། །ཤཱ་རིའི་བུ་ཇི་ལྟར་ན་བྱང་ཆུབ་སེམས་

དཔའ་སེམས་ཅན་ཐམས་ཅད་ལ་ཕ་མར་འདུ་ཤེས་སྐྱེད་ཅེ་ན། ཤཱ་རིའི་བུ་འདི་ལ་ཡུན་རིང་པོའི་དུས་ན་མར་མ་གྱུར་པ་དང་། ཕར་མ་གྱུར་པའི་སེམས་ཅན་གང་ཡང་རྙེད་པར་སླ་བ་མ་ཡིན་ཏེ། སེམས་ཅན་ཐམས་ཅད་ཀྱང་ཕ་མར་གྱུར་ཏོ། །དེ་དག་ལ་འདོད་ཆགས་ཀྱི་སེམས་སྐྱེས་ན་མར་འདུ་
ཤེས་པས་སྤོང་ངོ་། །ཞེ་སྡང་གི་སེམས་སྐྱེས་ན་ཕར་འདུ་ཤེས་པས་སྤོང་སྟེ། ཤཱ་རིའི་བུ་རྣམ་གྲངས་འདིས་ཅི་ནས་སེམས་ཅན་ཐམས་ཅད་བྱང་ཆུབ་སེམས་དཔའི་གཉེན་ཡིན་པར་དེ་ལྟར་རིག་པར་བྱའོ། །ཤཱ་རིའི་བུ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་བས་ཀྱང་ཆེས་
གྲངས་མེད་པ་ཡངས་པ། ཚད་མེད་པ། བསམ་གྱིས་མི་ཁྱབ་པ་དེའི་དུས་དེའི་ཚེ་ན། མཆོག་གི་ཚོགས་ཅན་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་
བུ་འདུལ་བའི། ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་ལོ་བྱེ་བ་ཕྲག་དགུ་བཅུའི་བར་དུ་བཞུགས་སོ། །དེའི་ཉན་ཐོས་བྱེ་བ་ཁྲག་ཁྲིག་ཕྲག་དགུ་བཅུའི་འདུས་པ་ཆེན་པོ་བྱུང་ངོ་། །ཡང་དེའི་ཚེ་བྱང་ཆུབ་སེམས་
དཔའ་དྲན་པ་རྙེད་ཅེས་བྱ་བ་ཞིག་རྒྱལ་པོའི་རིགས་སུ་སྐྱེས་ཏེ། གཟུགས་བཟང་ཞིང་མཛེས་ལ་བལྟ་ན་སྡུག་སྟེ། ཁ་དོག་བཟང་པོ་རྒྱས་པའི་མཆོག་དང་ལྡན་པ་ཞིག་བྱུང་སྟེ། དེ་བཙས་མ་ཐག་ཏུ་མས་བུ་མོ་བརྒྱད་ཁྲི་བཞི་སྟོང་བྱིན། ཕས་བུ་མོ་བརྒྱད་ཁྲི་བཞི་སྟོང་བྱིན། མཛའ་བོ་དང་།
ཉེ་དུ་དང་། སྣག་གི་གཉེན་མཚམས་ཀྱིས་བུ་མོ་བརྒྱད་ཁྲི་བཞི་སྟོང་བྱ་ན། ཕ་མའི་གཉེན་བཤེས་ཀྱིས་ཀྱང་བུ་མོ་བརྒྱད་ཁྲི་བཞི་སྟོང་གཉེན་གྱི་གཡོག་དུ་བྱིན་ནོ། །ཤཱ་རིའི་བུ་བྱང་ཆུབ་སེམས་དཔའི་ཕས་ཁང་པ་གསུམ་བྱེད་དུ་བཅུག་པ་འདི་ལྟ་སྟེ། དཔྱིད་ས་དང་། དབྱར་ས་དང་། དགུན་
ས་བྱས་སོ། །བྱང་ཆུབ་སེམས་དཔའ་དུས་བཞིན་དུ་ཁང་པའི་སྟེང་ན་འདུག་སྟེ། གང་ན་འདུག་པ་དེར་སིལ་སྙན་ཐོགས་པ་བརྒྱ་སྟོང་དུ་མ་འོངས་ནས། བསྙེན་བཀུར་དང་། རིམ་གྲོ་བྱེད་དེ། རོལ་མོའི་སྒྲ་ཕྱུང་མ་ཐག་ཏུ་བྱང་ཆུབ་སེམས་དཔའ་དེ་སྐྱེ་བ་དང་། འཇིག་པའི་འདུ་ཤེས་སྐྱེས་སོ། །

སྒྲ་འགགས་མ་ཐག་ཏུ་སྒྲ་འདི་ག་ལས་བྱུང་། གང་དུ་བྱུང་། གང་ནས་འགགས། གང་དུ་འགགས་ཞེས་ཡོངས་སུ་ཚོལ་ཏེ། དེ་མཚན་མོའི་འདུ་ཤེས་ཀྱང་མི་སྐྱེ། ཉིན་མོའི་འདུ་ཤེས་ཀྱང་མི་སྐྱེ་ཞིང་། གཞན་དུ་ན་མི་རྟག་པར་འདུ་ཤེས་སྐྱེ་སྟེ། དེ་མངོན་པར་མི་
དགའ་བའི་འདུ་ཤེས་སྐྱེའོ། །ཤཱ་རིའི་བུ་དེ་ལྟར་བྱང་ཆུབ་སེམས་དཔའ་དྲན་པ་ཐོབ་པ་དེ་ལོ་སྟོང་ཕྲག་བཞི་བཅུར་ནམ་ཡང་ཡིད་རོལ་མོ་ལ་ཆགས་པར་མ་གྱུར་ཏོ། །ལོ་སྟོང་ཕྲག་བཞི་བཅུར་ནམ་ཡང་འདོད་པ་ལ་མ་སྤྱད་དོ། །དེ་ཉིད་ན་དེ་ཁྱིམ་ན་གནས་བཞིན་དུ་བསམ་གཏན་བཞི་
རྣམས་ལ་བསམ་གཏན་བྱེད་དེ། མངོན་པར་ཤེས་པ་ལྔ་བསྒྲུབས་ནས་དེ་ཁྱིམ་དེ་ནས་རྫུ་འཕྲུལ་གྱིས་སྟེང་གི་བར་སྣང་ལས་བཅོམ་ལྡན་འདས་མཆོག་གི་ཚོགས་ཅན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ག་ལ་བ་དེར་སོང་སྟེ་བཅོམ་ལྡན་འདས་
མཆོག་གི་ཚོགས་ཅན་དེ་བཞིན་གཤེགས་པ་ལ་དགེ་བའི་རྩ་བའི་དངོས་པོ་ཅུང་ཟད་ཅིག་ཞུའོ་སྙམ་པ་དང་། ཤཱ་རིའི་བུ་བཅོམ་ལྡན་འདས་མཆོག་གི་ཚོགས་ཅན་དེ་བཞིན་གཤེགས་པ་དེ་ཉིད་ཀྱི་ཉིན་པར་ཡོངས་སུ་མྱ་ངན་ལས་འདས་ཏེ། དེ་ཡོངས་སུ་མྱ་ངན་ལས་འདས་པའི་དྲུང་དུ་ཕྱིན་ནས་
དགེ་སློང་དག་དེ་བཞིན་གཤེགས་པ་ལ་བསྙེན་བཀུར་བགྱིའོ་ཞེས་དྲིས་ན། དེ་ལ་དགེ་སློང་དེ་དག་ན་རེ་རིགས་ཀྱི་བུ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་སོ་ཞེས་ཟེར་རོ། །དེ་ཡོངས་སུ་མྱ་ངན་ལས་འདས་ཞེས་ཐོས་ནས་ས་ཕྱོགས་དེ་ཉིད་དུ་ངུ་ཞིང་བརྒྱལ་ཏེ། ཁ་བུབ་ཏུ་སའི་སྟེང་དུ་
འགྱེལ་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་སྒྲོན་མཛད་འདི་ལྟ་བུ། །ཆོས་རྣམས་ཀུན་གྱི་ཕ་རོལ་ཕྱིན། བག་མེད་གནས་སུ་བདག་སོང་བས། །བདག་ཉིད་ཡོངས་སུ་བསླུ་པར་གྱུར། །བསྐལ་པ་བྱེ་བ་ཕྲག་སྟོང་གིས། །དེ་བཞིན་གཤེགས་པ་འབྱུང་འགྱུར་
ན། །མགོན་པོ་བདག་གིས་མཉེས་མ་བྱས། །བདག་གི་སྐྱབས་གྱུར་སུ་ཞིག་ཡོད། །བདག་ལ་སངས་རྒྱས་མ་བརྗོད་པ། །མ་ནི་བདག་གི་དགྲ་ཡིན་སྙམ། །སྐྱེས་མ་ཐག་ཏུ་དེ་ཡི་ཚེ། །དེ་བཞིན་གཤེགས་པ་བལྟ་བ་ཞིག །གང་གིས་འདོད་ལ་བདག་སྦྱར་བ། །ཕ་ནི་བདག་གི་དགྲར་

སེམས་ཏེ། །དེ་དག་དབང་དུ་གྱུར་པས་ན། །འཇིག་རྟེན་མགོན་པོ་མ་མཉེས་བྱས། །འདི་ལྟར་སངས་རྒྱས་གསུང་སྒྲ་ནི། །ཡན་ལག་དྲུག་ཅུ་བདག་མ་ཐོས། །བདག་གིས་ངས་རྒྱས་མ་མཉེས་བྱས། །བདག་ལ་ཉམས་པ་ཆེན་པོ་བྱུང་། །འཇིག་རྟེན་ཕན་མཛད་ཐུགས་བརྩེ་དེ་ལྟ་
བུ། །ཆོས་རྣམས་ཀུན་གྱི་ཕ་རོལ་ཕྱིན་པ་ནི། །བག་མེད་པ་ཡིས་དེ་རིང་དུས་འདས་ཏེ། །རྐང་གཉིས་གཙོ་བོ་བདག་གིས་མ་མཉེས་བྱས། །བསྐལ་པ་ཁྲག་ཁྲིག་བྱེ་བ་ཕྲག་བརྒྱར་ཡང་། །སངས་རྒྱས་བརྒྱ་ལམ་མཐོང་བ་རྙེད་པར་དཀའ། །བདེ་གཤེགས་མྱ་ངན་འདས་
ནས་ཕྱིན་པ་ནི། །རྒྱལ་བ་དེང་འདིར་བདག་གིས་མ་མཉེས་བྱས། །སྐྱེས་མ་ཐག་ཏུ་སངས་རྒྱས་མ་བརྗོད་པ། །ཕ་དང་མ་ནི་དེ་རིང་དགྲ་ཡིན་སྙམ། །གལ་ཏེ་རྒྱལ་བ་བཞུགས་པ་མཐོང་གྱུར་ན། །ཆོས་རྣམས་ཉན་ཅིང་མཆོད་པ་བྱ་བ་ཞིག །བདེ་གཤེགས་མྱ་ངན་འདས་ནས་གདོད་
འོངས་པས། །དེ་བཞིན་གཤེགས་པའི་ཡན་ལག་དྲུག་ཅུ་པོ། །དེ་དག་ཀུན་དང་ལྡན་པའི་དབྱངས་འབྱུང་བ། །རྒྱལ་བའི་དེ་དག་བདག་གིས་དེང་མ་ཐོས། །མྱ་ངན་འདས་ནས་འདིར་ནི་བདག་ཕྱིན་པ། །དེ་རིང་བདག་ལ་ཉམས་པ་ཆེན་པོ་བྱུང་། །སྔོན་གྱི་སངས་རྒྱས་དག་གིས་
རྟག་བསྟན་པ། །གྱ་ནོམ་ཆོས་རྣམས་བདག་ལ་མི་སྟོན་ཏོ། །དེ་ནས་ཤཱ་རིའི་བུ་བྱང་ཆུབ་སེམས་དཔའ་དེ་ས་ཕྱོགས་དེ་ནས་མྱུར་དུ་ལངས་ཏེ། བཅོམ་ལྡན་འདས་མཆོག་གི་ཚོགས་ཅན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གལ་བ་དེར་སོང་སྟེ་ཕྱིན་ནས་
དེ་བཞིན་གཤེགས་པའི་ཁྲི་ལ་ངུ་ཞིང་ལན་བརྒྱ་སྟོང་དུ་མ་བསྐོར་བ་བྱས་ནས་ས་ཕྱོགས་གཅིག་ཏུ་འདུག་སྟེ། ཚིགས་སུ་བཅད་པ་འདི་དག་གསོལ་ཏོ། །སེམས་ཅན་མཆོག་ནི་ཡང་དག་སྟེ། །ཡང་དག་ཆོས་རྣམས་བསྟན་པ་མཛད། །བྱང་ཆུབ་དམ་པ་མཆོག་གི་ཕྱིར། །བདག་གི་
སེམས་ནི་ཡང་དག་སྐྱེས། །ཤེས་རབ་ཆེན་པོ་ཡང་དག་གསུང་། །དེ་བཞིན་གཤེགས་པ་མི་མཐོང་སྟེ། །རྒྱལ་བ་ཁྱོད་ཀྱི་ཅི་འདྲ་བ། །བདག་གི་ཤེས་པའང་དེ་འདྲར་གྱུར། །བདག་སྔོན་སྟོབས་ཀྱང་ཆུང་བ་སྟེ། །ཤེས་རབ་ཞན་པ་བདུད་ཀྱི་ཕྱོགས། །ཁྱིམ་གྱི་གནས་ན་མཆིས་པས་

ན། །མི་ཡི་གཙོ་བོ་མ་མཉེས་བགྱིས། །སྔོན་བགྱིས་བསོད་ནམས་མཆིས་པས་ནི། །དེ་བཞིན་གཤེགས་པ་བདག་གིས་མཐོང་། །ཆོས་རྣམས་བདག་ལ་མི་སྟོན་པས། །དེ་ཕྱིར་ཤིན་ཏུ་སྡུག་བསྔལ་ལོ། །ལྷ་དང་ཀླུ་ཡི་མདུན་དུ་ནི། །བདེན་པའི་
ཚིག་རྣམས་བདག་གིས་བརྗོད། །ཇི་སྟེ་བདག་ནི་ཡང་དག་ཏུ། །ཇི་སྐད་སྨྲས་པ་བཞིན་གྱུར་ཏེ། །མ་འོངས་པ་ཡི་དུས་ཀྱི་ཚེ། །གླང་པོ་ཆེན་པོ་དོན་གཟིགས་པ། །ཡང་དག་ཉིད་ཀྱི་ཆོས་སྟོན་པ། །མི་མཆོག་སངས་རྒྱས་འགྱུར་བར་བགྱི། །མི་ཁོམ་པར་ནི་མི་སྐྱེ་ཞིང་། །སྐྱེས་ནས་
འདོད་པ་སྟེན་མི་བགྱིད། །བུད་མེད་དངོས་པོར་མི་འགྱུར་ཞིང་། །བདུད་ཀྱི་བཅིངས་པ་གཅད་པར་བགྱི། །མངོན་སུམ་དུ་ནི་ཆོས་སྟོན་པ། །སངས་རྒྱས་རྣམས་ནི་རྟག་ཏུ་བལྟ། །མཐོང་ནས་རབ་ཏུ་དད་པར་བགྱི། །དད་ནས་བསྟི་སྟང་རིམ་གྲོ་བགྱི། །བདག་གིས་གང་སྨྲས་ཚིག་འདི་
ནི། །ཡང་དག་བདེན་པར་འགྱུར་ཞེ་ན། །བདེན་པ་དེས་ནི་སངས་རྒྱས་འདི། །བྱང་ཆུབ་བཞིན་དུ་བཞུགས་པར་ཤོག །ཚིག་འདི་རྣམས་ནི་སྨྲས་པ་དང་། །དེ་བཞིན་གཤེགས་པ་ཅོག་གེར་བཞུགས། །ལྷ་རྣམས་བྱེ་བ་སྟོང་ཕྲག་གིས། །དེ་ཚེ་རབ་ཏུ་གོས་རབ་གཏོར། །དེ་ནི་
རབ་ཏུ་ཡིད་དགའ་ནས། །བར་སྣང་ལ་ནི་འདུག་གྱུར་ཏེ། །བར་སྣང་ལ་ནི་འདུག་ནས་སུ། །རྒྱལ་བ་དེ་ལ་ཚིགས་བཅད་བསྟོད། །སྣང་བར་གྱུར་པ་ཕན་པའི་ཐུགས། །རྫུ་འཕྲུལ་ཆེན་པོ་དམ་པ་གསུང་། །མཆོག་གི་ཆོས་རྣམས་སྟོན་མཛད་པ། །སངས་རྒྱས་སྨྲ་བ་མགོན་པོ་
དྲན། །དེས་ཚིགས་སུ་བཅད་པ་དེ་དག་སྨྲས་ནས་འཁོར་རྣམས་རྒྱ་ཆེར་ཚིམ་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བདག་ནི་མི་གཙོས་ལུང་བསྟན་ཏེ། །འཇིག་རྟེན་དུ་ཡང་སངས་རྒྱས་འགྱུར། །བདག་གིས་རྗེས་སུ་སློབ་གྱིས་ལ། །དེ་བཞིན་གཤེགས་ལ་
རིམ་གྲོ་གྱིས། །བདག་ལ་རྗེས་སུ་ཐུགས་བརྩེའི་ཕྱིར། །མྱ་ངན་འདས་པའང་བཞེངས་གྱུར་ན། །འཇིག་རྟེན་མགོན་པོ་བསམ་མི་ཁྱབ། །སུ་ཞིག་སངས་རྒྱས་དད་མི་བྱེད། །དེ་བཞིན་གཤེགས་པ་ལ་དེས་དགེ་བའི་རྩ་བ་བསྐྱེད་དེ་མཆོད་པ་དང་། རིམ་གྲོ་ཆེར་བྱས་ནས་དགེ་

བའི་རྩ་བ་དེ་ཉིད་ཀྱིས་དེ་ནས་ཤི་འཕོས་པ་དང་། བདེ་འགྲོ་མཐོ་རིས་སུ་སྐྱེས་ཏེ། དེ་བསྐལ་པ་བྱེ་བ་ཕྲག་ཉི་ཤུར་ངན་འགྲོ་ལོག་པར་ལྟུང་བར་མ་སོང་ངོ་། །བསྐལ་པ་བྱེ་བ་ཕྲག་ཉི་ཤུར་འདོད་པ་ལ་ནམ་ཡང་ཡོངས་སུ་མ་སྤྱད་དོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་རབ་ཏུ་
འདོད་པའི་ཕྱིར་དེ་དག་ཐམས་ཅད་ལ་ཡང་མཆོད་པ་དང་། རིམ་གྲོ་ཆེར་བྱས་ཏེ་ཐམས་ཅད་དུ་ཡང་ཚངས་པར་སྤྱོད་པ་སྤྱད་ནས། དེ་བསྐལ་པ་ཐ་མ་དུས་ཐ་མ་ལུས་ཐ་མ་ལ་བདག་གི་དངོས་པོ་ཐ་མ་ཐོབ་པའི་ཚེ་རང་གི་དགེ་བའི་རྩ་བས་བསྐུལ་ནས་ས་ལའི་རྒྱལ་པོ་ཞེས་བྱ་བ་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི། །ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་
དུ་བྱུང་སྟེ། ཤཱ་རིའི་བུ་བཅོམ་ལྡན་འདས་ས་ལའི་རྒྱལ་པོའི་ཚེའི་ཚད་ནི་བསྐལ་པ་བྱེ་བ་ཕྲག་ཉི་ཤུར་གྱུར་ཏོ། །ཤཱ་རིའི་བུ་དེ་བཞིན་གཤེགས་པ་ས་ལའི་རྒྱལ་པོའི་ཉན་ཐོས་འདུས་པ་ནི་གཉིས་བྱུང་སྟེ། ཉན་ཐོས་འདུས་པ་གཅིག་ལ་ནི་དགེ་སློང་བྱེ་བ་ཕྲག་ཉི་ཤུ་ཡོད་དོ། །ཉན་
ཐོས་འདུས་པ་གཉིས་པ་ལ་ནི་དགེ་སློང་སྟོང་ཕྲག་བཞི་བཅུ་ཡོད་དེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ་ནས། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པའི་བར་དུའོ། །ཡོངས་སུ་མྱ་ངན་ལས་
འདས་པའི་རིང་བསྲེལ་ཡང་རྒྱས་པར་གྱུར་ཏོ། །ཤཱ་རིའི་བུ་དེ་བཞིན་གཤེགས་པ་སཱ་ལའི་རྒྱལ་པོ་ཡོངས་སུ་མྱ་ངན་ལས་འདས་པའི་དམ་པའི་ཆོས་ནི་ལོ་སྟོང་ཕྲག་བཅུར་གནས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །བསྐལ་པ་བྱེ་བ་ཉི་
ཤུར་ནི། །ངན་འགྲོར་ནམ་ཡང་མ་སོང་སྟེ། །བསྐལ་པ་བྱེ་བ་ཉི་ཤུར་ཡང་། །འདོད་པ་དག་ལ་ཡོང་མ་བསྟེན། །དེ་ཡི་བར་དུ་སངས་རྒྱས་ནི། །སྟོང་ཕྲག་བདུན་རྣམས་མྱ་ངན་འདས། །དེར་ནི་ཚངས་པར་སྤྱོད་སྤྱད་དེ། །ཆོས་འདོད་པར་ཡང་རྟག་ཏུ་གྱུར། །དེ་ཕྱིར་བྱང་ཆུབ་

སངས་རྒྱས་ནས། །རྒྱལ་བ་སཱ་ལའི་དབང་པོར་གྱུར། །བྱེ་བ་སྟོང་ཕྲག་སུམ་ཅུ་རྣམས། །བྱང་ཆུབ་མཆོག་ལ་རབ་ཏུ་བཀོད། །སྲོག་ཆགས་ཀུན་ལ་ཕན་པའི་ཕྱིར། །བྱང་ཆུབ་དམ་པ་སངས་རྒྱས་ནས། །བསྐལ་པ་བྱེ་བ་ཉི་ཤུར་ནི། །སྲོག་ཆགས་
རྣམས་ལ་ཆོས་བསྟན་ཏོ། །སྟོང་ཕྲག་དག་ནི་བཞི་བཅུ་དང་། །གཞན་ཡང་བྱེ་བ་ཉི་ཤུ་རྙེད། །ཐམས་ཅད་ཟག་ཟད་དྲང་སྲོང་གི། །དགེ་འདུན་དེ་ཚེ་དེ་སྙེད་བྱུང་། །སྟོན་པ་མྱ་ངན་འདས་ནས་ཀྱང་། །རིང་བསྲེལ་ཤིན་ཏུ་རྒྱས་པར་གྱུར། །མཆོད་རྟེན་སྟོང་ཕྲག་དྲུག་ཅུ་དང་། །
བྱེ་བ་དག་ཀྱང་དེར་བྱུང་ངོ་། །མྱ་ངན་འདས་ནས་དམ་པའི་ཆོས། །ལོ་ནི་སྟོང་ཕྲག་བཅུར་གནས་ཏེ། །རྒྱལ་བའི་བསྟན་པ་ཐོས་ནས་ནི། །སུ་ཞིག་དེ་ལ་དད་མི་བྱེད། །སངས་རྒྱས་ཀྱི་ནི་ཆོས་ཐོས་ནས། །མཁས་པ་སུ་དག་ནེམ་ནུར་མེད། །དེ་དག་ངན་འགྲོར་མི་འགྲོ་སྟེ། །
མྱུར་དུ་མྱ་ངན་འདས་ལ་རེག །ཤ་རིའི་བུ་དེ་ལྟར་ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་སེམས་ཅན་ཐམས་ཅད་ལ་མ་དང་ཕར་འདུ་ཤེས་སྐྱེད་དེ། འདོད་ཆགས་ཀྱི་སེམས་སྐྱེས་པ་ནི་མར་འདུ་ཤེས་པས་སྤོང་ངོ་། ཞེ་སྡང་གི་སེམས་སྐྱེས་པ་ནི་ཕར་འདུ་ཤེས་པས་
སྤོང་ངོ་།། །།བམ་པོ་བཅུ་གཅིག་པ། ཤཱ་རིའི་བུ་གཞན་ཡང་ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་བདག་ཉིད་ལ་མི་འཐུན་པ་མང་དུ་གནས་པ་ཡིན་ཏེ། དེ་ལ་འདོད་ཆགས་ཀྱི་ཕྱིར་ཚུལ་བཞིན་ཡིད་ལ་བྱེད་པས་འདོད་པ་ལ་ཡང་དག་པར་མི་འཐུན་པ་
སྐྱེད་དོ། །དེ་འདོད་པ་དང་། འདོད་པའི་མི་འཐུན་པ་ཡང་རབ་ཏུ་ཤེས་སོ། །དེ་ལ་འདོད་པ་གང་། འདོད་པའི་མི་འཐུན་པ་གང་ཞེ་ན། འདོད་པ་ཞེས་བྱ་བ་ནི་གང་མིག་གིས་ཤེས་པར་བྱ་བའི་གཟུགས་ལ་མངོན་པར་ཆགས་པ་དེ་ནི་འདོད་པ་ཞེས་བྱའོ། །གཞན་ཡང་འདོད་པ་ཞེས་བྱ་བ་ནི་
གང་རྣ་བས་ཤེས་པར་བྱ་བའི་སྒྲ་ལ་མངོན་པར་ཆགས་པའོ། །དེ་བཞིན་དུ་སྦྱར་ཏེ། གང་སྣས་ཤེས་པར་བྱ་བའི་དྲི་དང་། ལྕེས་ཤེས་པར་བྱ་བའི་རོ་དང་། ལུས་ཀྱིས་ཤེས་པར་བྱ་བའི་རེག་བྱ་ལ་མངོན་པར་ཆགས་པ་དེ་ནི་འདོད་པ་ཞེས་བྱའོ། །དེ་ལ་གང་མངོན་པར་ཆགས་པ་དེ་ནི་ལྷག་

པར་ཞེན་པའོ། །གང་ལྷག་པར་ཞེ་ན་པ་དེ་ནི་ཀུན་ཏུ་སྦྱོར་བའོ། །གང་ཀུན་ཏུ་སྦྱོར་བ་དེ་ནི་མངོན་པར་འགྲུབ་པའོ། །གང་མངོན་པར་འགྲུབ་པ་དེ་ནི་འཆིང་བ་སྟེ། དེ་ཡང་དག་པ་མ་ཡིན་པ་འདྲིད་པའོ། །དེ་ལྟར་ཀྱེ་མའོ་སེམས་ཅན་འདི་དག་ནི་ཡང་དག་པ་མ་ཡིན་པ་འདྲིད་པའི་
འཆིང་བས་བཅིངས་པ་སྟེ། བཅིངས་པ། ངེས་པར་བཅིངས་པ། ཤིན་ཏུ་ངེས་པར་བཅིངས་པའོ། །ཅིས་བཅིངས་ཤེ་ན། གཟུགས་ཀྱི་བཅིང་བས་བཅིངས་པ་ནི་བཅིངས་ཞེས་བྱ་བ་ནས་སྒྲ་དང་། དྲི་དང་། རོ་དང་། རེག་གི་བར་གྱི་འཆིང་བས་བཅིངས་པ་ནི་བཅིངས་ཞེས་བྱའོ། །
གཟུགས་ཀྱིས་བཅིངས་པ་གང་ཞེ་ན། འདི་ལྟ་སྟེ། ལུས་ཐོབ་པའི་གཟུགས་དེ་ལ་གང་བདག་ཏུ་འདུ་ཤེས་པ་དང་། སྲོག་ཏུ་འདུ་ཤེས་པ་དང་། གང་ཟག་ཏུ་འདུ་ཤེས་པ་དང་། རྟག་པར་འདུ་ཤེས་པ་དང་། བརྟན་པར་འདུ་ཤེས་པ་དང་། ཐེར་ཟུག་ཏུ་འདུ་ཤེས་པ་དང་།
རྫས་སུ་འདུ་ཤེས་པ་དང་། རིལ་པོར་འདུ་ཤེས་པ་དང་། གོང་བུར་འདུ་ཤེས་པ་དེ་ནི་གཟུགས་ཀྱིས་བཅིངས་པ་ཞེས་བྱའོ། །ཡང་གཟུགས་ཀྱི་འཆིང་བ་གང་ཞེ་ན། འདི་ལྟ་སྟེ། ལུས་མངོན་པར་གྲུབ་པ་དེ་ལ་རིམ་གྲོ་བྱའོ་སྙམ་ནས། དེ་བདག་ལ་བྱམས་པས་ཆུང་མ་ལ་མངོན་པར་
ཆགས་པར་བྱེད་དེ། གཟུགས་ཀྱི་འཆིང་བས་བཅིངས་ནས། འདོད་པའི་ལོངས་སྤྱོད་ཐོབ་པས་མི་དགེ་བའི་ལས་མངོན་པར་འདུ་བྱེད་དེ། འདོད་པའི་ཉེས་པ་མི་ཤེས་སོ། །དེ་ལ་འདོད་པའི་ཉེས་པ་གང་ཞེ་ན། ཉེས་པ་དག་ལ་འདོད་པ་དང་། ཉེས་པ་ལ་འདོད་པ་མེད་མོད་
ཀྱིས། གང་ངན་སོང་དུ་གཞོལ་བའི་འདོད་པའི་ཉེས་པ་དེ་དག་བསྟན་པར་བྱའོ་སྙམ་མོ། །དེ་ལ་ངན་སོང་དུ་གཞོལ་བའི་འདོད་པའི་ཉེས་པ་གང་ཞེ་ན། ཤཱ་རིའི་བུ་འདོད་པ་བསྟེན་པ་ནི་སྡིག་པ་མི་བྱེད་པ་ཅུང་ཟད་ཀྱང་མེད་དེ། དེའི་རྣམ་པར་སྨིན་པས་སྡུག་བསྔལ་ཡོངས་སུ་བཟུང་བར་
མ་གྱུར་པ་གང་ཡང་མེད་ཅེས་བཤད་དོ། །དེ་ལྟར་ཤཱ་རིའི་བུ་སྟོང་གི་འཇིག་རྟེན་གྱི་ཁམས་སུ་རབ་ཏུ་བརྟགས་ན། ཇི་ལྟར་བདག་གི་ཆུང་མ་ལྟ་བུར་དགྲར་གྱུར་པ་ནི་གཞན་གང་ཡང་མེད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ་དེ་བཞིན་གཤེགས་པ་ནི་ཡེ་ཤེས་དང་ལྡན་ནོ།།སེམས་ཅན་

ཐམས་ཅད་ནི་མི་ཤེས་པ་སྟེ། གང་ཡེ་ཤེས་དང་ལྡན་པས་མེད་པ་དེ་ནི་རབ་ཏུ་ཡང་དག་པའོ། །གང་མི་ཤེས་པས་ཡོངས་སུ་ཟིན་པ་དེ་ནི་ཡང་དག་པ་མ་ཡིན་པའོ། །མི་ཤེས་པས་གང་ཡོངས་སུ་བཟུང་ཞེ་ན། འདུས་བྱས་ཡོངས་སུ་བཟུང་ངོ་། །བུ་དང་། བུ་
མོ་དང་། ཆུང་མ་ཡོངས་སུ་བཟུང་ངོ་། །དེས་དེ་ལྟར་ཡོངས་སུ་བཟུང་། ཕན་ཚུན་དུ་དེ་ལྟར་ཡོངས་སུ་བཟུང་། འཕགས་པའི་ལམ་གྱིས་ཀུན་ཏུ་མ་བཟུང་སྟེ། བུ་ཕོ་དང་། བུ་མོ་དང་། ཆུང་མས་ཀུན་ཏུ་བསྐོར་ཅིང་། སྲེད་པ་ཉེ་བར་ལེན་པ་ནི་རབ་ཏུ་འབྱུང་བའི་བར་དུ་གཅོད་
དོ། ཚུལ་ཁྲིམས་ཀྱི་བར་དུ་གཅོད། བསམ་གཏན་གྱི་བར་དུ་གཅོད། མཐོ་རིས་ཀྱི་བར་དུ་གཅོད། མྱ་ངན་ལས་འདས་པའི་བར་དུ་གཅོད་པའོ། །བྲན་ཕོ་དང་། བྲན་མོ་ཡོངས་སུ་འཛིན་པ་དང་། བུ་ཕོ་དང་། བུ་མོ་དང་། ཆུང་མ་ཡོངས་སུ་འཛིན་པ་ནི་དགེ་
བའི་ཆོས་ཐམས་ཅད་ཀྱི་བར་དུ་གཅོད་པའོ། །གོང་མ་བཞིན་དུ་སྦྱར་ཏེ། བུ་ཕོ་དང་། བུ་མོ་དང་། ཆུང་མ་ཡོངས་སུ་འཛིན་པ་ནི་དགྲར་གྱུར་པ་ཡོངས་སུ་འཛིན་པའོ། །སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ཡོངས་སུ་འཛིན་པའོ། །མདོར་
ན་མི་དགེ་བ་ཐམས་ཅད་ཡོངས་སུ་འཛིན་པ་སྟེ། ཐ་ན་ཟས་བཟང་པོའི་ཡང་བར་དུ་གཅོད་པའོ། །སངས་རྒྱས་མཐོང་བའི་བར་དུ་གཅོད་པའོ། །གོང་མ་བཞིན་དུ་སྦྱར་ཏེ། ཆོས་མཉན་པ་དང་། དགེ་འདུན་ལ་བསྙེན་བཀུར་བྱ་བ་དང་། སངས་རྒྱས་བལྟ་བར་དད་པ་རྙེད་པ་དང་།
ཆོས་ཉན་པར་དད་པ་རྙེད་པ་དང་། དགེ་འདུན་ལ་བསྙེན་བཀུར་བྱ་བར་དད་པ་རྙེད་པ་དང་། དལ་བ་འབྱོར་བ་རྙེད་པའི་བར་དུ་གཅོད་པའོ། །གོང་མ་བཞིན་དུ་སྦྱར་ཏེ། དད་པའི་ནོར་དང་། ཚུལ་ཁྲིམས་ཀྱི་ནོར་དང་། ཐོས་པའི་ནོར་དང་། ཤེས་རབ་ཀྱི་ནོར་དང་། གཏོང་བའི་ནོར་
དང་། ཁྲེལ་ཡོད་པའི་ནོར་དང་། ངོ་ཚ་ཤེས་པའི་ནོར་རྙེད་པའི་བར་དུ་གཅོད་པའོ། །ཆུང་མ་དང་། བུ་དང་། བུ་མོ་ཡོངས་སུ་འཛིན་པ་ནི་མ་དད་པ་ཡོངས་སུ་འཛིན་པའོ། །ཆུང་མ་དང་། བུ་དང་། བུ་མོ་ཡོངས་སུ་འཛིན་པ་ནི་འཆལ་བའི་ཚུལ་ཁྲིམས་དང་། སེར་སྣ་དང་།

འཆལ་བའི་ཤེས་རབ་དང་། ཁྲེལ་མེད་པ་དང་། ངོ་ཚ་མི་ཤེས་པ་ཡོངས་སུ་འཛིན་པའོ། །ཆུང་མ་དང་། བུ་དང་། བུ་མོ་ཡོངས་སུ་འཛིན་པ་ནི་ནད་དང་། འབྲས་དང་། ཟུག་རྔུ་ཡོངས་སུ་འཛིན་པའོ། །མེའི་ཕུང་པོ་ཡོངས་སུ་འཛིན་པའོ། །སྦྲུལ་གདུག་པ་ཡོངས་སུ་
འཛིན་པའོ། །ཁྱིམ་གྱི་གནས་ནི་དུར་ཁྲོད་ཀྱི་གནས་སོ། །དུར་ཁྲོད་དང་། ཁྱིམ་ནི་མྱ་ངམ་དགོན་པ་སྨྲེ་བའི་ས་མེད་པ་སྟེ། ཆོས་དཀར་པོ་ཐམས་ཅད་རྒུད་པའོ་ཞེས་ངས་བཤད་དོ། །བུ་དང་། བུ་མོ་དང་། ཆུང་མ་ལ་ཆགས་པ་ནི་རྡོའི་སེར་བ་འབབ་པ་ལ་ཆགས་པའོ། །
རལ་གྲིའི་སོ་ལ་ཆགས་པའོ། །ལྕགས་ཀྱི་ཁྲི་བསྲེགས་པ་ལ་ཆགས་པའོ། །དེའི་མེ་ཏོག་དང་། སྤོས་དང་། ཕྲེང་བ་དང་། བྱུག་པ་ལ་ཆགས་པ་ནི་ལྕགས་ཀྱི་ཁྲི་དང་། ལྕགས་ཀྱི་ཐུ་ལུམ་གྱི་ཕྲེང་བ་དང་། བཤང་གཅིས་བྱུགས་པ་ལ་ཆགས་པའོ། །ཁྱིམ་ཡོངས་སུ་
འཛིན་པ་ནི་ལྕགས་ཟངས་ཡོངས་སུ་འཛིན་པའོ། །བྲན་ཕོ་དང་། བྲན་མོ་དང་། ལས་བྱེད་པའི་མི་ཡོངས་སུ་འཛིན་པ་ནི་སེམས་ཅན་དམྱལ་བའི་སྲུངས་མ་ཡོངས་སུ་འཛིན་པའོ། །གླང་པོ་ཆེ་དང་། རྟ་དང་། རྔ་མོ་དང་། བ་ལང་དང་། བོང་བུ་དང་། ལུག་དང་། ཁྱིམ་བྱ་དང་།
ཕག་ཡོངས་སུ་འཛིན་པ་ནི་སྲོག་ཆགས་སྲེ་བོ་དང་། ཁྲ་བོ་དཔག་ཚད་བརྒྱ་པ་ཡོངས་སུ་འཛིན་པའོ། །ཆུང་མ་དང་། བུ་དང་། བུ་མོ་ཡོངས་སུ་འཛིན་པ་ནི་སྡུག་བསྔལ་དང་། ཡིད་མི་བདེ་བ་དང་། འཁྲུག་པ་ཐམས་ཅད་ཡོངས་སུ་འཛིན་པའོ། །ཤཱ་རིའི་བུ་ལྕགས་ཀྱི་ཁྲི་དཔག་ཚད་སྟོང་
པ་རབ་ཏུ་ཚ་བ། ཀུན་ཏུ་རབ་ཏུ་འབར་བ། མེ་དང་འདྲ་བར་གྱུར་པ་དང་མཐང་སྦྱར་ཀྱང་བླའི། ཕ་དང་མས་བྱིན་པའི་ཆུང་མ་ལ་རྒྱང་རིང་པོ་ནས་ཀུན་ཏུ་ཆགས་པའི་སེམས་ཀྱིས་ལྟ་བ་ཡང་དེ་ལྟ་མ་ཡིན་ན་མཐང་སྦྱར་བ་ལྟ་ཅི་སྨོས། དེ་ཅིའི་ཕྱིར་ཞེ་ན། ཆུང་མ་ནི་སྡུག་བསྔལ་གྱི་རྩ་བའོ། །
ཆུང་མ་ནི་སྡིག་པའི་རྩ་བའོ། །ཆུང་མ་ནི་ཀུན་ནས་མནར་སེམས་ཀྱི་རྩ་བའོ། །ཆུང་མ་ནི་འཆིང་བའི་རྩ་བའོ། །ཆུང་མ་ནི་མྱ་ངན་གྱི་རྩ་བའོ། །ཆུང་མ་ནི་དགྲའི་རྩ་བའོ། །ཆུང་མ་ནི་དམུས་ལོང་གི་རྩ་བའོ། །ཆུང་མ་ནི་ཤེས་རབ་ཀྱི་མིག་དང་མི་འཐུན་པའི་རྩ་བའོ། །ཆུང་མ་ནི་

ལྕགས་དང་རྡོ་བསྲེགས་པ་བཀྲམ་པའི་སའོ། །ཆུང་མ་ནི་ཕ་རོལ་གནོད་པར་བྱེད་པ་དང་འདྲའོ། །ཆུང་མ་ནི་ལོག་པའི་ལས་ཀྱིས་རབ་ཏུ་གཟིར་བའོ། །ཅིའི་ཕྱིར་ཆུང་མ་ཞེས་བྱ་ཞེ་ན། ཁུར་སྐུར་བ་དང་། ཁུར་ཁྱེར་བ་དང་། ཁུར་རབ་ཏུ་ལེན་པ་དང་།
ཁུར་ཐོགས་པ་དང་། ཁུར་ཡོངས་སུ་ཐོགས་པ་དང་། ཁུར་གྱིས་ཉོན་མོངས་པ་དང་། ཁུར་གྱིས་ཉེན་པ་དང་། ཁུར་གྱིས་བསྲབས་པས་ན་དེའི་ཕྱིར་ཆུང་མ་ཞེས་བྱའོ། །སེམས་ཅན་དག་དེ་ལ་གསོ་བར་བྱེད་པ་ཞེས་ཀྱང་བྱ་སྟེ། །སྲེད་པས་འཁོལ་བས་ཆུང་མ་ལ་གཞོལ་
ཞིང་ཆུང་མས་ཡོངས་སུ་ཟིན། ཆུང་མས་ཕམ་པར་བྱས། ཆུང་མས་ཡོངས་སུ་བསྡུས། ཆུང་མས་དབང་བྱས། ཆུང་མས་འཁོལ། ཆུང་མའི་རྗེས་སུ་འབྲང་སྟེ། དེའི་ཕྱིར་ཆུང་མ་ཞེས་བྱའོ། །ཆུང་མའི་ཕྱིར་ཁུར་ཆེན་པོ་མི་འདོར་རོ། །ཁུར་གང་མི་འདོར་ཞེ་ན། འདི་ལྟ་
སྟེ། ཕུང་པོ་ལྔའོ། །ཕུང་པོ་ལྔ་གང་ཞེ་ན། གཟུགས་ཀྱི་ཕུང་པོ་དང་། ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་སྟེ། ཕུང་བོ་ལྔ་པོ་དེ་དག་གི་ཁུར་མི་འདོར་བས་དེའི་ཕྱིར་ཆུང་མ་ཞེས་བྱའོ། །ཅིའི་ཕྱིར་
གོང་རྙིང་གཉིས་པ་ཞེས་བྱ་ཞེ་ན། འདི་ལྟར་ཤཱ་རིའི་བུ་ཚུལ་ཁྲིམས་ཉམས་པ་གཉིས་པའོ། །ཆོ་ག་ཉམས་པ་གཉིས་པའོ། །ཡང་དག་པའི་ལྟ་བ་ཉམས་པ་གཉིས་པའོ། །བཟའ་བ་དང་། བཏུང་བ་གཉིས་པའོ། །སེམས་ཅན་དམྱལ་བ་དང་། དུད་འགྲོའི་སྐྱེ་གནས་
དང་། གཤིན་རྗེའི་འཇིག་རྟེན་དུ་འགྲོ་བ་གཉིས་པའོ། །འཕགས་པའི་ཤེས་རབ་ཀྱི་བར་ཆད་བྱེད་པའོ། །མྱ་ངན་ལས་འདའ་བའི་བདེ་བ་ལ་མི་འཐུན་པའི་ཕྱོགས་བྱེད་པའོ། །སྡུག་བསྔལ་ཐམས་ཅད་ཡང་དག་པར་སྡུད་པ་གཉིས་པ་སྟེ། དེའི་ཕྱིར་གོང་རྙིང་གཉིས་པ་ཞེས་
བྱའོ། །ཅིའི་ཕྱིར་བུད་མེད་ཅེས་བྱ་ཞེ་ན། ཉེས་པ་མང་ཞིང་སྒྱུ་མཐའ་ཡས་པས་དེའི་ཕྱིར་འདི་ནི་སྒྱུ་མ་སྟེ་བུད་མེད་ཅེས་བྱའོ། །གང་བུད་མེད་ཀྱི་ལག་ཏུ་སོང་བ་དེ་དག་བདུད་ཀྱི་ལག་ཏུ་སོང་བའོ། །གང་བདུད་ཀྱི་ལག་ཏུ་སོང་བ་དེ་དག་སྡིག་ཅན་གྱི་དབང་དུ་སོང་བ་སྟེ། བུད་མེད་ནི་

ཉེས་པ་མང་བ། སྒྱུ་མཐའ་ཡས་པ། སེམས་ཡང་བ། སེམས་འགྱུར་བ། སེམས་མི་བརྟན་པ། སེམས་རབ་ཏུ་གཡོ་ཞིང་མི་བརྟན་པ། སྤྲེའུའི་སེམས། སྤྲེའུ་དང་མཚུངས་པ། སྒྱུ་མ་སྟོན་པ་ལ་མཁས་པ་སྟེ། དེའི་ཕྱིར་བུད་མེད་ཅེས་བྱའོ། །ཤཱ་རིའི་བུ་བུད་མེད་
ནི་སྒྱུ་མའི་གྲོང་ཁྱེར། སྒྱུ་མའི་རྒྱལ་པོའི་ཕོ་བྲང་འཁོར། སྒྱུ་མའི་གྲོང་རྡལ། སྒྱུ་མའི་རྒྱལ་པོའི་ཡུལ་འཁོར། སྒྱུ་མའི་རྒྱལ་སྲིད། སྒྱུ་མའི་ཡུལ། སྒྱུ་མའི་འཇིག་རྟེན། སྒྱུ་མའི་འཇིག་རྟེན་གྱི་ཁམས། སྒྱུ་མ་མཐའ་ཡས་པ། སྒྱུ་མ་རྒྱས་པ། སྒྱུ་མ་དཔག་ཏུ་མེད་པ།
སྒྱུ་མ་བསམ་གྱིས་མི་ཁྱབ་པ་སྟེ། དེའི་ཕྱིར་བུད་མེད་ཅེས་བྱའོ། །ཤཱ་རིའི་བུ་དེ་ལྟར་འདོད་པའི་ཉེས་པ་དེ་དག་ནི་ངན་སོང་དུ་འགྲོ་བའོ་ཞེས་བྱའོ། །འདི་ལྟ་སྟེ། ཤཱ་རིའི་བུ་སྒྱུ་མ་བྱེད་པ་ཤིན་ཏུ་བསླབས་པ་ཞིག་ལྟད་མོ་བའི་ནང་དུ་སོང་ནས་སྒྱུ་མ་རྣམ་པ་སྣ་ཚོགས་ཉེ་བར་སྟོན་པ་དེ་བཞིན་
དུ། ཤཱ་རིའི་བུ་བུད་མེད་བུད་མེད་ཀྱི་སྒྱུ་མ་ཤིན་ཏུ་བསླབས་པ་ཡང་མཐོང་བས་ཀྱང་སྐྱེས་བུ་འཆིང་བར་བྱེད། ཐོས་པས་ཀྱང་སྐྱེས་བུ་འཆིང་བར་བྱེད། རིག་པས་ཀྱང་སྐྱེས་བུ་འཆིང་ཞིང་དབང་དུ་བྱེད། གླུ་ལེན་པས་ཀྱང་སྐྱེས་བུ་ལ་དབང་དུ་བྱེད། གར་བྱེད་པས་ཀྱང་སྐྱེས་བུ་ལ་དབང་
དུ་བྱེད། རྒོད་པས་ཀྱང་སྐྱེས་བུ་ལ་དབང་དུ་བྱེད་པ་ནས་ངུ་བ་དང་། འགྲོ་བ་དང་། འོང་བ་དང་། འགྲེང་བ་དང་། འདུག་པ་དང་། ཉལ་བ་དང་། རྣམ་པ་ཐམས་ཅད་ཀྱིས་ཀྱང་སྐྱེས་བུ་ལ་འཆིང་ཞིང་དབང་དུ་བྱེད་དོ། །འདི་ལྟ་སྟེ། ཤཱ་རིའི་བུ་འབྲས་སཱ་ལུའི་ཞིང་ཕུན་སུམ་ཚོགས་
པ་སྨིན་པ་ལ་སེར་བ་ཆེན་པོ་བབ་ན་བརླག་པ་དེ་བཞིན་དུ། ཤཱ་རིའི་བུ་བུད་མེད་ཀྱི་སེར་བ་ཡང་དེ་དང་འདྲ་སྟེ། སྐྱེས་བུའི་ཞིང་ལ་བབ་ན་ཆོས་དཀར་པོ་ཐམས་ཅད་རྣམ་པར་འཇིག་པར་འགྱུར་རོ། །ཤཱ་རིའི་བུ་དེ་དག་ནི་ངན་སོང་དུ་གཞོལ་བའི་འདོད་པའི་ཉེས་པ་ཡིན་ན། གང་བྱིས་པ་སོ་
སོའི་སྐྱེ་བོ་ཐམས་ཅད་ཀྱིས་མི་ཤེས་པས་ཆུང་མ་ཡོངས་སུ་འཛིན་ཏོ། །དེ་ལ་ཤཱ་རིའི་བུ་བྱང་ཆུབ་སེམས་དཔའ་མཁས་པས་ནི་འདོད་པའི་ཉེས་པ་འདི་དག་རིག་ནས་འདུ་ཤེས་གཉིས་སྐྱེད་དེ། གཉིས་གང་ཞེ་ན། བྱིས་པ་སོ་སོའི་སྐྱེ་བོ་ཐམས་ཅད་ལ་སྐྱེས་བུ་ངན་པར་འདུ་ཤེས་སྐྱེད་པ་

དང་། འཕགས་པའི་སེམས་ཅན་ཐམས་ཅད་ལ་སྐྱེས་བུ་དམ་པར་འདུ་ཤེས་སྐྱེད་པའོ། །དེ་འདུ་ཤེས་འདི་གཉིས་བསྐྱེད་ནས། འདི་སྙམ་དུ་སེམས་ཏེ། བདག་ནི་སྐྱེས་བུ་དམ་པའི་འགྲོས་སུ་འགྲོ་བར་བྱའི། སྐྱེས་བུ་ངན་པའི་འགྲོས་སུ་ནི་མ་ཡིན་ནོ། །
བདག་སེམས་ཅན་དམྱལ་བའི་འགྲོས་སུ་འགྲོ་བར་མི་བྱ། དུད་འགྲོའི་སྐྱེ་གནས་ཀྱི་འགྲོས་སུ་མ་ཡིན། གཤིན་རྗེའི་འཇིག་རྟེན་གྱི་འགྲོས་སུ་འགྲོ་བར་མི་བྱ། བདག་འཆལ་བའི་ཚུལ་ཁྲིམས་ཀྱི་འགྲོས་སུ་འགྲོ་བར་མི་བྱ། བདག་ཚུལ་ཁྲིམས་འཆལ་པ་དང་འགྲོགས་ཤིང་འགྲོ་
བར་མི་བྱའི། མཆོག །དམ་པ། གཙོ་པོ། ཆོས་ཐམས་ཅད་སྒྲིབ་པ་མེད་པར་རྟོག་པ་སངས་རྒྱས་ཀྱི་ཡེ་ཤེས་ཀྱི་འགྲོས་སུ་འགྲོ་བར་བྱའོ། །བདག་རྒྱུན་ལས་བཟློག་པ་སྤྱོད་པར་བྱའི། རྒྱུན་གྱི་རྗེས་སུ་སྤྱོད་པར་མི་བྱ། བདག་སེང་གེའི་སྒྲ་སྒྲོག་པར་བྱའི། ཝའི་སྒྲ་སྒྲོག་པར་
མི་བྱ། བདག་ནམ་མཁའ་ལྡིང་གི་མཐུ་སྟོན་པར་བྱའི་སྲོག་ཆགས་ཕྲ་མོ་ལྟར་མི་བྱ། བདག་མི་ཅང་ཤེས་སུ་འགྱུར་བར་བྱའི། མི་མ་རུངས་པར་འགྱུར་བར་མི་བྱ། བདག་ཅང་ཤེས་ཀྱི་ཟས་དང་། ཟས་ངན་པ་མ་ཡིན་པ་བཟའ་བར་བྱ་སྟེ། བདག་ཅང་ཤེས་མ་ཡིན་པའི་ཟས་
དང་། ཟས་ངན་པ་བཟའ་བར་མི་བྱའོ། །བདག་བསམ་གཏན་བཟང་པོ་དང་། བསམ་གཏན་མཆོག་དང་། བསམ་གཏན་རབ་དང་། ཏིང་ངེ་འཛིན་དམ་པ་ཐོབ་པར་འགྱུར་བ་དེའི་རང་བཞིན་གྱི་བསམ་གཏན་དག་ལ་བསམ་གཏན་དུ་བྱ་སྟེ། དེའི་རང་བཞིན་མ་ཡིན་པའི་བསམ་
གཏན་དང་དམན་པའི་བསམ་གཏན་ལ་བསམ་གཏན་མི་བྱའོ། །བདག་སངས་རྒྱས་ཀྱི་བསམ་གཏན་གྱིས་རྩེ་བར་བྱའི། ཉན་ཐོས་དང་། རང་སངས་རྒྱས་དང་། བྱིས་པ་སོ་སོའི་སྐྱེ་བོ་ཐམས་ཅད་ཀྱི་བསམ་གཏན་གྱིས་ནི་མ་ཡིན་ནོ། །བདག་མི་གནས་པར་བསམ་གཏན་བྱ་སྟེ།
གཟུགས་ལ་མི་གནས། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་མི་གནས། སའི་ཁམས་ལ་མི་གནས་པར་བསམ་གཏན་བྱའོ། །ཆུའི་ཁམས་དང་། མེའི་ཁམས་དང་། རླུང་གི་ཁམས་ལ་མི་གནས་པར་བསམ་གཏན་བྱའོ། །འདོད་པའི་ཁམས་

ལ་མི་གནས། གཟུགས་ཀྱི་ཁམས་ལ་མི་གནས། གཟུགས་མེད་པའི་ཁམས་ལ་མི་གནས། འཇིག་རྟེན་འདི་ལ་མི་གནས། འཇིག་རྟེན་ཕ་རོལ་ལ་མི་གནས། གང་མཐོང་བ་དང་། ཐོས་པ་དང་། དྲན་པ་དང་། རྣམ་པར་ཤེས་པ་དང་། ཐོབ་པ་དང་། རེག་པ་དང་།
མངོན་སུམ་དུ་བྱས་པ་དེ་དག་ལ་ཡང་མི་གནས་པར་བསམ་གཏན་བྱའོ། །བསམ་གཏན་བྱེད་ན་ཇི་ལྟར་བདག་ལ་གནོད་པར་མི་འགྱུར་བ་དང་། གཞན་ལ་གནོད་པར་མི་འགྱུར་བ་དང་། གཉི་ག་ལ་གནོད་པར་མི་འགྱུར་བར་བྱའོ། །བདག་སངས་རྒྱས་ཀྱི་ཡེ་ཤེས་ཡོངས་སུ་གྲུབ་པ་ཀུན་
ཏུ་ཚོལ་གྱི། བདག་ལ་འདོད་པ་ཚོལ་བས་ནི་ཆོག་གོ །དེ་ལ་ཤཱ་རིའི་བུ་བྱང་ཆུབ་སེམས་དཔའ་མཁས་པས་ནི་ལྡོག་པ་བཞི་སྐྱེད་དེ། བཞི་གང་ཞེ་ན། འདོད་པ་ལས་ལྡོག་པ་དང་། སྲེད་པ་ལས་ལྡོག་པ་དང་། བྱས་པ་མི་གཟོ་བའི་སེམས་ལས་ལྡོག་པ་དང་། འདུ་བྱེད་དུ་
གཏོགས་པའི་སྡུག་བསྔལ་ཐམས་ཅད་ལས་ལྡོག་པ་སྟེ། ལྡོག་པ་བཞི་པོ་དེ་དག་བསྐྱེད་དོ། །ཤཱ་རིའི་བུ་བྱང་ཆུབ་སེམས་དཔའ་ངན་སོང་ན་གནས་པས་ཀྱང་ཁ་དོག་རྒྱས་པའི་བུད་མེད་མཐོང་ན་འདུ་ཤེས་བཞི་སྐྱེད་དེ། བཞི་གང་ཞེ་ན། ཉམས་པར་འདུ་ཤེས་པ་དང་། གཡང་སར་
འདུ་ཤེས་པ་དང་། ཕྱིས་ཁུང་དུ་འདུ་ཤེས་པ་དང་། རྣག་ཏུ་བློས་ཉེ་བར་དཔྱོད་ཅིང་འདུ་ཤེས་པའོ། །ཤཱ་རིའི་བུ་བྱང་ཆུབ་སེམས་དཔའ་ངན་སོང་ན་གནས་པ་ན་ཡང་ཁ་དོག་རྒྱས་པའི་བུད་མེད་མཐོང་ན་འདུ་ཤེས་འདི་བཞི་སྐྱེད་ན། མིར་གྱུར་པ་ན་ལྟ་ཅི་སྨོས་ཐེག་པ་ཆེན་པོ་ལ་ཞུགས་
པའི་རིགས་ཀྱི་བུས་ཁ་དོག་རྒྱས་པའི་བུད་མེད་མཐོང་ན་འདུ་ཤེས་འདི་བཞི་སྐྱེད་དེ། ཉམས་པར་འདུ་ཤེས་པ་དང་། གཡང་སར་འདུ་ཤེས་པ་དང་། ཕྱིས་ཁུང་དུ་འདུ་ཤེས་པ་དང་། རྣག་ཏུ་བློས་ཉེ་བར་དཔྱོད་ཅིང་འདུ་ཤེས་པའོ། །གལ་ཏེ་དེ་ལྟར་བརྟགས་ཀྱང་འདོད་ཆགས་ཀྱི་
སེམས་སྐྱེ་བ་ལྟ་ན། དེས་འདུ་ཤེས་གསུམ་བསྐྱེད་པར་བྱའོ། །གསུམ་གང་ཞེ་ན། མ་འདྲ་བ་ལ་མར་འདུ་ཤེས་པ་དང་། སྲིང་མོ་འདྲ་བ་ལ་སྲིང་མོར་འདུ་ཤེས་པ་དང་། བུ་མོ་འདྲ་བ་ལ་བུ་མོར་འདུ་ཤེས་པ་སྟེ། འདུ་ཤེས་འདི་གསུམ་བསྐྱེད་པར་བྱའོ་ཞེས་དེ་ལྟར་ཤཱ་རིའི་བུ་བྱང་

ཆུབ་སེམས་དཔའ་དེས་ལེགས་པར་བཤད་པ་ཁོང་དུ་ཆུད་ནས་མདོ་སྡེ་དང་འཐུན་པར་བྱའོ། །ཡུན་རིང་པོ་ནས་བདག་གི་མར་མ་གྱུར་པའམ། ཕར་མ་གྱུར་པའི་སེམས་ཅན་དེ་ལྟ་བུ་རྙེད་པར་སླ་བ་མ་ཡིན་ཏེ། སེམས་ཅན་ཐམས་ཅད་བདག་གི་མ་དང་། ཕར་
གྱུར་པས་མ་ཉིད་ཆུང་མར་བྱ་བའི་མི་རིགས་སོ་ཞེས་དེ་ལྟར་བསླབ་པར་བྱའོ། །བྱིས་པ་སོ་སོའི་སྐྱེ་བོ་ཐམས་ཅད་ནི་མི་འཐུན་པ་ལ་གནས་ཀྱིས། བདག་ནི་མི་འཐུན་པ་ལ་གནས་པར་མི་བྱའོ། །དེ་ལྟར་སྤྱད་ཀྱང་འདོད་ཆགས་ཀྱི་སེམས་དེ་ཉིད་རྗེས་སུ་འབྲང་བ་ལྟ་ན། དེས་
ཚུལ་བཞིན་དུ་སོ་སོར་བརྟག་པར་བྱའོ། །འདི་ལྟ་སྟེ། འདོད་ཆགས་ཀྱི་སེམས་སྐྱེས་ན་དེ་ཅི་མཐོང་བ་ལས་སྐྱེས། འོན་ཏེ་འདོད་ཆགས་དེ་མིག་ལས་གྱུར་ན་དེས་འདི་ལྟར་ཚུལ་བཞིན་དུ་སོ་སོར་བརྟག་པར་བྱའོ། །བདག་མིག་ལ་ཆགས་ན་ཅི་མིག་གིས་མིག་མཐོང་ངམ། །དེ་ཅི་རང་
བཞིན་གྱིས་རང་བཞིན་མཐོང་ངམ། དེ་ཅིའི་ཕྱིར་ཞེ་ན། དེ་ཡང་མིག །འདི་ཡང་མིག་གོ །དེ་ཡང་འབྱུང་བ་ཆེན་པོ་ལས་གྱུར་པ་སྟེ། དེ་ཡང་འབྱུང་བ་ཆེན་པོ་ལས་བྱུང་བའོ། །འདི་ཡང་འབྱུང་བ་ཆེན་པོ་ལས་བྱུང་བ་སྟེ། རང་བཞིན་གྱིས་རང་བཞིན་ལ་མི་ཆགས། བདག་གིས་
བདག་རང་ལ་འང་མ་ཡིན་ནོ། །དེ་ཅིའི་ཕྱིར་ཞེ་ན། དེ་ཇི་ཙམ་པ་འདི་ཡང་དེ་ཙམ་སྟེ། དེ་ལ་ཆགས་པ་དང་། འདི་ལ་ཆགས་པ་དེ་དག་ནི་ཁྱད་པར་མེད་དེ་བྱིས་པ་སོ་སོའི་སྐྱེ་བོ་ཐམས་ཅད་ནི་ཁྱད་པར་མེད་པར་གནས་སོ། །བདག་ནི་ཁྱད་པར་ཅན་དུ་འདོད་དོ། །དེ་ཅིའི་ཕྱིར་ཞེ་ན།
འདི་ལྟ་སྟེ། འདོད་པ་ལ་རྣམ་པར་རྟོག་པ་དེ་ལྟ་བུ་ནི་ཡོན་ཏན་མ་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཕན་ཚུན་དག་ནི་དོན་གཅིག་སྟེ། །དེ་ལ་ཁྱད་པར་ཡོད་མེད་པ། །དེ་ནི་ཚུལ་བཞིན་མ་ཡིན་འཛིན། །འདོད་ཆགས་སེམས་
ནི་ཀུན་ནས་ལངས། །འདི་ནི་འབྱུང་ལས་གྱུར་པ་སྟེ། །འབྱུང་བ་ཆེ་ལ་ཇི་ལྟར་ཆགས། །ཆོས་འདི་རྣམས་ནི་ཤིང་འདྲ་སྟེ། །དེ་ལ་ཆགས་འགྱུར་གང་ཡང་མེད། །འདི་ནི་བདག་གིས་བརྟགས་པ་སྟེ། །ཡང་དག་མིན་གྱིས་ཀུན་ནས་ལངས། །མེད་པ་ལས་ནི་འདོད་ཆགས་སྐྱེ། །

འདོད་ཆགས་ཉིད་ཀྱང་ཡོད་མ་ཡིན། །ཕྱོགས་བཅུ་རྣམས་སུ་བཙལ་ན་ཡང་། །འདོད་ཆགས་ཡོད་པ་མ་ཡིན་ཏེ། །ཡང་དག་མ་ཡིན་ཡོངས་བརྟགས་པས། །འདོད་ཆགས་སེམས་ནི་ཀུན་ནས་ལངས། །གལ་ཏེ་དེ་ལྟར་སོ་སོར་བརྟགས་ཀྱང་འདོད་ཆགས་ཀྱི་སེམས་དེ་ཉིད་རྗེས་སུ་འབྲང་
བ་ལྟ་ན་དེས་དམ་པ་རྒྱ་ཆེར་ལེགས་པར་བཤད་པ་ཁོང་དུ་ཆུད་ཅིང་མདོ་སྡེ་ལ་མཁས་པས་རབ་ཏུ་མདོ་སྡེ་དང་རྗེས་སུ་འཐུན་པར་བྱའོ། །མིག་འདི་ནི་དབུ་བ་དང་འདྲ་སྟེ། མ་ཉེར་མི་བཟོད་དོ། །དབུ་བ་ལ་ཡང་བདག་མེད། སེམས་ཅན་མེད། སྲོག་མེད། གང་ཟག་མེད། སྐྱེས་
བུ་མེད། ཤེད་ལས་སྐྱེས་མེད། ཤེད་བུ་མེད། བྱེད་པ་པོ་མེད། ཚོར་བ་པོ་མེད་དེ། དེ་ལྟར་བྱེད་པ་མེད་པའི་ཆོས་ལ་སུ་ཞིག་ཆགས་པར་འགྱུར། མིག་འདི་ནི་ཆུའི་ཆུ་བུར་དང་འདྲ་སྟེ། རང་བཞིན་གྱིས་སྙིང་པོ་མེད་པའོ། །ཆུའི་ཆུ་བུར་ལ་ཡང་བདག་མེད། སེམས་ཅན་
མེད། སྲོག་མེད། གང་ཟག་མེད། སྐྱེས་བུ་མེད། ཤེད་ལས་སྐྱེས་མེད། ཤེད་བུ་མེད་བྱེད་པ་པོ་མེད། ཚོར་བ་པོ་མེད་དེ། དེ་ལྟར་བྱེད་པ་མེད་པ། གཡོ་བ་མེད་པའི་ཆོས་ལ་སུ་ཞིག་ཆགས་པར་འགྱུར། མིག་འདི་ནི་སྨིག་རྒྱུ་དང་འདྲ་སྟེ། ལས་དང་། ཉོན་མོངས་
པ་དང་། སྲེད་པ་ལས་བྱུང་བའོ། །སྨིག་རྒྱུ་ལ་ཡང་བདག་མེད། སེམས་ཅན་མེད། སྲོག་མེད། གང་ཟག་མེད། སྐྱེས་བུ་མེད། ཤེད་ལས་སྐྱེས་མེད། ཤེད་བུ་མེད། བྱེད་པ་པོ་མེད། ཚོར་བ་པོ་མེད་དེ། དེ་ལྟར་བྱེད་པ་མེད་པ། གཡོ་བ་མེད་པའི་ཆོས་ལ་སུ་ཞིག་
ཆགས་པར་འགྱུར། མིག་འདི་ནི་ཆུ་ཤིང་དང་འདྲ་སྟེ། རང་བཞིན་གྱིས་སྙིང་པོ་མེད་པའོ། །ཆུ་ཤིང་ལ་ཡང་བདག་མེད། སེམས་ཅན་མེད་པ་ནས་སུ་ཞིག་ཆགས་པར་འགྱུར་བའི་བར་དུའོ། །མིག་འདི་ནི་སྒྱུ་མ་དང་འདྲ་སྟེ། ཕྱིན་ཅི་ལོག་ལས་བྱུང་བའོ། །སྒྱུ་མ་ལ་ཡང་
བདག་མེད། སེམས་ཅན་མེད་པ་ནས་སུ་ཞིག་ཆགས་པར་འགྱུར་བའི་བར་དུའོ། །མིག་འདི་ནི་རྨི་ལམ་དང་འདྲ་སྟེ། མི་བདེན་པ་ཡང་དག་པ་མ་ཡིན་པ་མཐོང་བའོ། །རྨི་ལམ་ལ་ཡང་བདག་མེད། སེམས་ཅན་མེད་པ་ནས་སུ་ཞིག་ཆགས་པར་འགྱུར། གང་དུ་ཆགས་པར་

འགྱུར་བའི་བར་དུའོ། མིག་འདི་ནི་བྲག་ཅ་དང་འདྲ་སྟེ། རྐྱེན་གྱི་ཁ་ན་ལུས་པའོ། །བྲག་ཅ་ལ་ཡང་བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི་གཟུགས་བརྙན་དང་འདྲ་སྟེ།
ལས་ཀྱི་གཟུགས་བརྙན་གྱིས་ཀུན་ཏུ་སྣང་བའོ། །གཟུགས་བརྙན་ལ་ཡང་བདག་མེད། སེམས་ཅན་མེད་པ་ནས་སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི་སྤྲིན་དང་འདྲ་སྟེ། གསལ་བ་འཁྲུག་པ་དང་བྲལ་བའི་མཚན་ཉིད་དོ། །སྤྲིན་
ལ་ཡང་བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུ་འོ། །མིག་འདི་ནི་གློག་དང་འདྲ་སྟེ། སྐད་ཅིག་གིས་འཇིག་པ་དང་ལྡན་པའོ། །གློག་ལ་ཡང་བདག་མེད། །སེམས་ཅན་མེད་པ་ནས། སུ་ཞིག་ཆགས་
པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི་སྟོང་པ་དང་འདྲ་སྟེ། བདག་དང་བདག་གི་དང་བྲལ་བའོ། །དེ་ལྟར་ཆོས་རྣམས་སྟོང་པ་སྟེ། བདག་མེད་སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །
མིག་འདི་ནི་བེམས་པོ་ལྟ་བུ་སྟེ། རྩྭ་དང་། ཤིང་དང་། རྩིག་པ་དང་། རྡོ་བ་དང་། མིག་ཡོར་ལྟ་བུའོ། །དེ་ལྟར་ཆོས་ཐམས་ཅད་བེམས་པོ་སྟེ། བདག་མེད། སེམས་ཅན་མེད་པ་ནས་སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི་
གཡོ་བ་མེད་པ་སྟེ། རླུང་གིས་འཁྲུལ་འཁོར་དང་ལྡན་པས་འདུག་པའོ། །དེ་ལྟར་ཆོས་ཐམས་ཅད་བྱེད་པ་མེད་དེ། བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི་གསོབ་སྟེ། མི་གཙང་བ་དང་།
རྣག་གི་ཚོགས་སོ། །དེ་ལྟར་ཆོས་ཐམས་ཅད་གསོབ་སྟེ། བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི་གསོག་སྟེ། འཇིག་པ་དང་། འགྱེས་པ་དང་། འབྱེ་བ་དང་། འཐོར་བ་དང་། འཛོམས་

པའི་ཆོས་ཅན་ནོ། །དེ་ལྟར་ཆོས་ཐམས་ཅད་གསོག་སྟེ། བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི་ཁྲོན་པ་རྙིང་བ་དང་འདྲ་སྟེ། རྟག་ཏུ་རྒ་བའི་ཟིལ་གྱིས་ནོན་ཏོ། །དེ་ལྟར་ཆོས་ཐམས་ཅད་
ཁྲོན་པ་རྙིང་བ་དང་འདྲ་སྟེ། བདག་མེད། སེམས་ཅན་མེད་པ་ནས། སུ་ཞིག་ཆགས་པར་འགྱུར། གང་དུ་ཆགས་པར་འགྱུར་བའི་བར་དུའོ། །མིག་འདི་ནི་ཐ་མར་མི་གནས་པ་སྟེ། ཐ་མར་འཆི་བའོ། །དེ་ལྟར་ཆོས་ཐམས་ཅད་ནི་མཐར་མི་གནས་པ་སྟེ། བདག་མེད།
སེམས་ཅན་མེད། སྲོག་མེད། གང་ཟག་མེད། སྐྱེས་བུ་མེད། ཤེད་ལས་སྐྱེས་མེད། ཤེད་བུ་མེད། བྱེད་པ་པོ་མེད། ཚོར་བ་པོ་མེད་དེ། དེ་ལྟར་བྱེད་པ་མེད་ཅིང་རྐྱེན་འདུས་པ་ལས་བྱུང་བ་དེ་ལ་སུ་ཞིག་ཆགས་པར་འགྱུར། གང་དུ་ཆགས་པར་འགྱུར། དེ་
བཞིན་དུ་ནང་དང་། ཕྱིའི་སྐྱེ་མཆེད་ཐམས་ཅད་ལ་ཡང་རྒྱས་པར་སྦྱར་བར་བྱའོ། །ཤཱ་རིའི་བུ་དེ་ལྟར་ཚུལ་བཞིན་རབ་ཏུ་སྦྱོར་བའི་བྱང་ཆུབ་སེམས་དཔའ་འདོད་ཆགས་ཀྱིས་མི་འཕྲོགས་ཏེ། དེ་ལྟ་བུའི་གནས་མེད་དོ། །དེ་ཆོས་ཐམས་ཅད་ལ་འདོད་ཆགས་དང་བྲལ་བ་ཡིན་ནོ། །ཤཱ་
རིའི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་ཁྲིམས་ཡོངས་སུ་དག་པའོ། །ཤཱ་རིའི་བུ་དེ་ལྟར་ཚུལ་ཁྲིམས་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་རྣམ་པ་ཐམས་ཅད་དུ་སྲོག་ཆགས་ལ་གསོད་པར་མི་བྱེད་དེ། སྲོག་ཆགས་སུ་གྱུར་པ་
ཐམས་ཅད་ལ་གནོད་པ་མ་ཡིན་ནོ། །སྲོག་གི་ཕྱིར་ཡང་རྣམ་པ་ཐམས་ཅད་དུ་མ་བྱིན་པར་མི་ཕེན་ཏེ། གཞན་གྱི་ལོངས་སྤྱོད་ལ་མི་རྐུ་བ་ཡིན་ནོ། །སྲོག་གི་ཕྱིར་ཡང་རྣམ་པ་ཐམས་ཅད་དུ་འདོད་པས་ལོག་པར་གཡེམ་པ་མི་སྟེན་ཏེ། གཞན་གྱི་ཆུང་མ་ལ་སྙིང་ཆགས་པར་མི་བྱེད་
དོ། །སྲོག་གི་ཕྱིར་ཡང་བརྫུན་གྱི་ཚིག་མི་སྨྲ་སྟེ། སེམས་ཅན་ཐམས་ཅད་ལ་མི་སླུ་བ་ཡིན་ནོ། །བདག་གི་གཡོག་གིས་ཆོག་པས་ཕྲ་མའི་ཚིག་མི་ཟེར་བ་ཡིན་ནོ། །སྲོག་གི་ཕྱིར་ཡང་ཕྲ་མའི་ཚིག་མེད་པ་ཡིན། ཚིག་གཞན་མི་སྨྲ་བས་ཚིག་ཚོད་བཟུང་བ་ཡིན། སྲོག་གི་ཕྱིར་ཡང་གཞན་

གྱི་ལོངས་སྤྱོད་ལ་བརྣབ་སེམས་མི་སྐྱེད་པས་གཞན་གྱི་ལོངས་སྤྱོད་ལ་བརྣབ་སེམས་མེད་པ་ཡིན། སྲོག་གི་ཕྱིར་ཡང་ངན་དུ་སྨྲ་བ་དང་། ངན་དུ་རྗོད་པའི་ཚིག་དང་དུ་ལེན་པས་མི་ཁྲོ་ཞིང་བཟོད་པ་ཡིན། སངས་རྒྱས་ལ་སྐྱབས་སུ་སོང་བས་སྲོག་གི་ཕྱིར་ཡང་ལོག་པར་ལྟ་བ་
མི་སྤྱོད་དེ། ལྷ་གཞན་མེད་པ་ཡིན། དེ་ཡེ་ཤེས་གཞན་ལ་རེ་བ་མེད་པས་མ་ཉམས་པའི་ཚུལ་ཁྲིམས་ཡིན། ངན་པར་སྐྱེ་བ་ཡོངས་སུ་སྤངས་པས་སྐྱོན་མེད་པའི་ཚུལ་ཁྲིམས་ཡིན། འགྲོ་བ་ངན་པ་ཉོན་མོངས་པ་རྣམས་དང་མ་འདྲེས་པས་འདྲེན་མ་མ་ཡིན་པའི་ཚུལ་ཁྲིམས་ཡིན། ཆོས་
དཀར་པོ་གཅིག་ཏུ་རྣམ་པར་འཕེལ་བས་སྲ་སྲེ་མེད་པའི་ཚུལ་ཁྲིམས་ཡིན། ཇི་ལྟར་འདོད་པ་བཞིན་དུ་འགྲོ་བས་རང་དབང་གི་ཚུལ་ཁྲིམས་ཡིན། འགྲོ་བ་མཁས་པས་མ་སྨད་པས་བསྔགས་པའི་ཚུལ་ཁྲིམས་ཡིན། དྲན་པ་དང་ཤེས་བཞིན་དང་ལྡན་པའི་ཤིན་ཏུ་བསྲུངས་པའི་ཚུལ་ཁྲིམས་
ཡིན། ཉེས་པ་ཐམས་ཅད་དུ་མི་སྐྱེ་བས་མ་སྨད་པའི་ཚུལ་ཁྲིམས་ཡིན། དབང་པོའི་སྒོ་བསྡམས་པས་ཤིན་ཏུ་སྦས་པའི་ཚུལ་ཁྲིམས་ཡིན། སངས་རྒྱས་ཐམས་ཅད་ཀྱིས་དགོངས་པས་རྣམ་པར་བསྒྲགས་པའི་ཚུལ་ཁྲིམས་ཡིན། རུང་བ་ལ་ཆོག་ཤེས་པས་འདོད་པ་ཉུང་བའི་ཚུལ་ཁྲིམས་
ཡིན། སྤོང་བ་ལ་དགའ་བའི་ཆོག་ཤེས་པའི་ཚུལ་ཁྲིམས་ཡིན། ལུས་དང་སེམས་རབ་ཏུ་དབེན་པས་ནན་ཏན་གྱི་ཚུལ་ཁྲིམས་ཡིན། འདུ་བ་ལ་མི་དགའ་བས་དགོན་པ་ལ་གནས་པའི་ཚུལ་ཁྲིམས་ཡིན། གཞན་གྱི་གདོང་དུ་མི་ལྟ་བས་འཕགས་པའི་རིགས་ལ་དགའ་བའི་ཚུལ་ཁྲིམས་ཡིན།
བདག་གི་ཁ་ན་ལས་པའི་དགེ་བའི་རྩ་བ་སྐྱེད་པས་སྦྱངས་པའི་ཡོན་ཏན་གྱི་ཚུལ་ཁྲིམས་ཡིན། ལྷ་དང་མི་རྣམས་ལ་མི་སླུ་བས་ཇི་ལྟར་སྨྲས་པ་དེ་ལྟར་བྱེད་པའི་ཚུལ་ཁྲིམས་ཡིན། སེམས་ཅན་ཐམས་ཅད་ལ་མི་འཚེ་བས་བྱམས་པའི་ཚུལ་ཁྲིམས་ཡིན། སྡུག་བསྔལ་ཐམས་ཅད་དང་དུ་ལེན་པས་སྙིང་
རྗེའི་ཚུལ་ཁྲིམས་ཡིན། ཆོས་ལ་དགའ་ཞིང་ཞུམ་པ་མེད་པས་དགའ་བའི་ཚུལ་ཁྲིམས་ཡིན། རྗེས་སུ་ཆགས་པ་དང་། ཁོང་ཁྲོ་བ་སྤངས་པས་བཏང་སྙོམས་ཀྱི་ཚུལ་ཁྲིམས་ཡིན། རང་གི་སེམས་ངེས་པར་རྟོགས་པས་བདག་གི་འཁྲུལ་པ་ལ་སོ་སོར་རྟོག་པའི་ཚུལ་ཁྲིམས་ཡིན། གཞན་གྱི་

སེམས་རྗེས་སུ་སྲུང་བས་གཞན་གྱི་འཁྲུལ་པ་ལ་ཉེས་པར་མི་ལྟ་བའི་ཚུལ་ཁྲིམས་ཡིན། སྦྱིན་པའི་ཕ་རོལ་ཏུ་ཕྱིན་པས་སེམས་ཅན་ཡོངས་སུ་སྦྱིན་པར་བྱེད་པའི་ཚུལ་ཁྲིམས་ཡིན། ཚུལ་ཁྲིམས་ཀྱི་ཕ་རོལ་ཏུ་ཕྱིན་པས་ཤིན་ཏུ་བསྲུངས་པའི་ཚུལ་ཁྲིམས་ཡིན། བཟོད་པའི་ཕ་རོལ་ཏུ་ཕྱིན་པས་ཁོང་
ཁྲོ་བ་མེད་པའི་ཚུལ་ཁྲིམས་ཡིན། བརྩོན་འགྲུས་ཀྱི་ཕ་རོལ་ཏུ་ཕྱིན་པས་དགེ་བའི་ཆོས་མི་ཟློགས་པའི་ཚུལ་ཁྲིམས་ཡིན། བསམ་གཏན་གྱི་ཕ་རོལ་ཏུ་ཕྱིན་པས་བསམ་གཏན་གྱི་ཡན་ལག་ཡོངས་སུ་རྫོགས་པའི་ཚུལ་ཁྲིམས་ཡིན། ཤེས་རབ་ཀྱི་ཕ་རོལ་ཏུ་ཕྱིན་པས་ཐོས་པ་རབ་ཀྱི་
ཚུལ་ཁྲིམས་ཡིན། བྱང་ཆུབ་ཀྱི་ཡན་ལག་གི་ཚོགས་བསགས་པས་དགེ་བའི་བཤེས་གཉེན་ལ་སྟེན་པའི་ཚུལ་ཁྲིམས་ཡིན། ལམ་ངན་པ་ཡོངས་སུ་སྤོང་བས་སྡིག་པའི་གྲོགས་པོ་ཡོངས་སུ་སྤོང་བའི་ཚུལ་ཁྲིམས་ཡིན། མི་རྟག་པའི་འདུ་ཤེས་སོ་སོར་རྟོག་པས་ལུས་ལ་མི་ལྟ་བའི་
ཚུལ་ཁྲིམས་ཡིན། ཡིད་མི་རྟོན་པས་སྲོག་ལ་མི་ལྟ་བའི་ཚུལ་ཁྲིམས་ཡིན། བསམ་པ་ཤིན་ཏུ་ཡོངས་སུ་དག་པས་མི་འགྱོད་པའི་ཚུལ་ཁྲིམས་ཡིན། རབ་ཏུ་སྦྱོར་བ་ཤིན་ཏུ་ཡ