Kinh tạng Tây Tạng (Kangyur Đại Học) — 041_དཀོན་བརྩེགས།_ག

ངོན་པར་དད། ཡིད་ཆེས། རབ་ཏུ་རྟོག །
སོམ་ཉི་མེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ནས་ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ངོ་མཚར་དང་རྨད་དུ་འདུ་ཤེས་སྐྱེད་དོ། །དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །
འཇིག་རྟེན་འདི་མོས་སྣ་ཚོགས་དང་། །དེ་བཞིན་བློ་གྲོས་ཚད་མེད་པ། །དེ་དག་གི་ནི་མོས་པའི་སེམས། །ཐམས་ཅད་འདྲེན་པས་རབ་ཏུ་མཁྱེན། །གང་དག་འདོད་ཆགས་མོས་པ་ལ། །ཞེ་སྡང་ལ་ནི་གནས་འགྱུར་དང་། །ཞེ་སྡང་གནས་ཤིང་གཏི་མུག་ལ། །གང་དག་མོས་པ་

རབ་ཏུ་མཁྱེན། །གཏི་མུག་གནས་ཤིང་འདོད་ཆགས་ཀྱི། །སེམས་རྒྱུད་བསམ་གྱིས་མི་ཁྱབ་པ། །བར་བར་དུ་ནི་འཇུག་པ་དག །དེ་དག་འདྲེན་པས་རབ་ཏུ་མཁྱེན། །གང་དག་སྦྱོར་བ་དམན་འགྱུར་ལ། །རྒྱ་ཆེན་ལ་ནི་མོས་པ་དང་། །སྦྱོར་བ་དམ་པ་དེ་དག་གི །
དམན་པར་འགྱུར་བ་འདྲེན་པས་མཁྱེན། །ལོག་པའི་རྗེས་སུ་སོང་བ་དང་། །འགྲོ་བ་མེད་པར་བྱུང་བ་དང་། །ཁམས་གསུམ་ལས་ནི་རྣམ་གྲོལ་བའི། །མོས་པ་དག་ཀྱང་རབ་ཏུ་མཁྱེན། །སྐྱེ་དང་ཁ་དོག་ཐ་དད་དང་། །ཉེ་བར་སྤྱོད་པའི་ཁྱད་པར་དང་། །གང་དག་སྤྱི་བོ་ལས་
ཉམས་པ། །རྐང་གཉིས་གཙོ་བོས་རབ་ཏུ་མཁྱེན། །མོས་པ་སྣ་ཚོགས་རབ་མཁྱེན་ནས། །འདྲེན་པ་ཆོས་རྣམས་སྟོན་པ་མཛད། །སངས་རྒྱས་ཀྱི་ནི་སྟོབས་གསུམ་ལ། །རྒྱལ་བའི་ཐུགས་སྲས་རབ་ཏུ་མོས། །ཤཱ་རིའི་བུ་འདི་ནི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་
པའི་སྟོབས་གསུམ་པ་སྟེ། དེ་བཞིན་གཤེགས་པའི་སྟོབས་དེ་དང་ལྡན་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཁྱུ་མཆོག་གི་གནས་སུ་ཞལ་གྱིས་འཆེ་ཞིང་འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་སྟེ། དགེ་སྦྱོང་ངམ། བྲམ་ཟེ་འམ། ལྷ་
འམ། བདུད་དམ། ཚངས་པའམ། སུས་ཀྱང་འཇིག་རྟེན་དུ་ཆོས་དང་འཐུན་པར་མ་བསྐོར་བ་ཚངས་པའི་འཁོར་ལོ་རབ་ཏུ་བསྐོར་ཏོ། །གཞན་ཡང་ཤཱ་རིའི་བུ་དེ་བཞིན་གཤེགས་པས་ཁམས་དུ་མ་དང་། །ཁམས་སྣ་ཚོགས་མཁྱེན་པའི་སྟོབས་ཀྱིས་འཇིག་རྟེན་རྣམས་ཡང་དག་པ་ཇི་ལྟ་བ་
བཞིན་རབ་ཏུ་མཁྱེན་ཏོ། །ཁམས་གང་གིས་འཇིག་རྟེན་བསོད་ནམས་ཀྱི་འདུ་བྱེད་སོགས་པ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཁམས་གང་གིས་བསོད་ནམས་མ་ཡིན་པའི་འདུ་བྱེད་སོགས་པ་དེ་ཡང་དེ་བཞིན་གཤེགས་པས་ཡང་དག་པ་ཇི་
ལྟ་བ་བཞིན་རབ་ཏུ་མཁྱེན་ཏོ། །ཁམས་གང་གིས་མི་གཡོ་བའི་འདུ་བྱེད་སོགས་པ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཁམས་གང་གིས་འབྱུང་བའི་ཁམས་སུ་འཇོག་པར་འགྱུར་བ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་

བཞིན་རབ་ཏུ་མཁྱེན་ཏོ། །གཞན་ཡང་ཤཱ་རིའི་བུ་དེ་བཞིན་གཤེགས་པས་མིག་གི་ཁམས་དང་། གཟུགས་ཀྱི་ཁམས་དང་། མིག་གི་རྣམ་པར་ཤེས་པའི་ཁམས་ཀྱང་རབ་ཏུ་མཁྱེན་ཏོ། །ཇི་ལྟར་རབ་ཏུ་མཁྱེན་ཅེ་ན། ནང་སྟོང་པ་ཉིད་དང་། ཕྱི་སྟོ་པ་ཉིད་
དང་། ཕྱི་ནང་སྟོང་པ་ཉིད་དུ་རབ་ཏུ་མཁྱེན་ཏོ། །ཡིད་ཀྱི་ཁམས་དང་། ཆོས་ཀྱི་ཁམས་དང་། ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུ་ཡང་རབ་ཏུ་མཁྱེན་ཏོ། །ཇི་ལྟར་རབ་ཏུ་མཁྱེན་ཅེ་ན། ནང་སྟོང་པ་ཉིད་དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དུ་རབ་ཏུ་མཁྱེན་ཏོ། །
སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་རབ་ཏུ་མཁྱེན་ཏོ། །ཇི་ལྟར་རབ་ཏུ་མཁྱེན་ཅེ་ན། ནམ་མཁའི་ཁམས་ཇི་ལྟ་བ་དེ་བཞིན་དུ་རབ་ཏུ་མཁྱེན་ཏོ། །འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་རབ་ཏུ་མཁྱེན་
ཏོ། །ཇི་ལྟར་རབ་ཏུ་མཁྱེན་ཅེ་ན། ཀུན་ཏུ་རྟོག་པ་ལས་བྱུང་བར་རབ་ཏུ་མཁྱེན་ཏོ། །འདུས་བྱས་ཀྱི་ཁམས་ནི་མངོན་པར་འདུ་བྱེད་པའི་མཚན་ཉིད་དུ་རབ་ཏུ་མཁྱེན་ཏོ། །འདུས་མ་བྱས་ཀྱི་ཁམས་ནི་མངོན་པར་འདུ་མི་བྱེད་པའི་མཚན་ཉིད་དུ་རབ་ཏུ་མཁྱེན་ཏོ། །ཀུན་ནས་ཉོན་མོངས་པའི་
ཁམས་ནི་ཕྱིས་འབྱུང་བའི་ཉོན་མོངས་པའི་མཚན་ཉིད་དུ་རབ་ཏུ་མཁྱེན་ཏོ། །རྣམ་པར་བྱང་བའི་ཁམས་ནི་རང་བཞིན་གྱིས་འོད་གསལ་བའི་མཚན་ཉིད་དུ་རབ་ཏུ་མཁྱེན་ཏོ། །འདུ་བྱེད་ཀྱི་ཁམས་ནི་ཚུལ་བཞིན་མ་ཡིན་པ་མ་རིག་པའི་མཚན་ཉིད་དུ་རབ་ཏུ་མཁྱེན་ཏོ། །མྱ་ངན་ལས་
འདས་པའི་དབྱིངས་ནི་ཚུལ་བཞིན་རིག་པའི་མཚན་ཉིད་དུ་རབ་ཏུ་མཁྱེན་ཏོ། །འདི་ལྟར་འཇིག་རྟེན་གནས་པའི་ཁམས་གང་ཡིན་པ་དང་། འཇིག་རྟེན་གནས་པ་ཁམས་གང་ལ་གནས་པ་དང་། ཁམས་གང་ལ་རྗེས་སུ་ཆགས་པ་དང་། ཁམས་གང་ལ་གནས་པ་དང་། ཁམས་
གང་ལ་སྦྱོར་བ་དང་། ཁམས་གང་གི་བསམ་པ་དང་། ཁམས་གང་ལ་ངེས་པར་སེམས་པ་དང་། ཁམས་གང་ལ་རྟེན་པ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །མཁྱེན་ནས་ཀྱང་ཆོས་སྟོན་ཏོ། །དེ་ལྟར་ཤཱ་རིའི་བུ་དེ་བཞིན་གཤེགས་པའི་ཁམས་

དུ་མ་དང་། ཁམས་སྣ་ཚོགས་མཁྱེན་པའི་སྟོབས་མཐའ་ཡས་མུ་མེད་དེ་ནམ་མཁའ་དང་མཚུངས་ཤིང་མཉམ་མོ། །བྱང་ཆུབ་སེམས་དཔའ་དེ་བཞིན་གཤེགས་པའི་ཁམས་དུ་མ་དང་། ཁམས་སྣ་ཚོགས་མཁྱེན་པའི་སྟོབས་ལ་མངོན་པར་དད། ཡིད་ཆེས། རབ་ཏུ་རྟོག །སོམ་
ཉི་མེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ནས་ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ངོ་མཚར་དང་། རྨད་དུ་འདུ་ཤེས་སྐྱེད་དོ། །འདི་ལ་ཆོས་ཉིད་ནི་འདི་ཡིན་ཏེ། དེ་ལ་འདི་སྐད་ཅེས་བྱའོ། །འཇིག་རྟེན་ཀུན་ན་སེམས་ཅན་གང་། །སྣ་ཚོགས་
ཁམས་ལ་གནས་པ་དག །ཁམས་གང་འཇུག་པ་ཅི་འདྲ་བ། །སངས་རྒྱས་ཀྱིས་ནི་རབ་ཏུ་མཁྱེན། །བསོད་ནམས་བསོད་ནམས་མིན་མི་གཡོ། །འབྱུང་བར་འགྱུར་བའང་དེ་བཞིན་ཏེ། །ཁམས་རྣམས་གང་ལ་གནས་ནས་སུ། །མྱ་ངན་འདས་པ་ཞི་ལ་རེག །མིག་གི་ཁམས་
དང་གཟུགས་ཀྱི་ཁམས། །མིག་གི་རྣམ་པར་ཤེས་ཉིད་དང་། །རྣ་བ་སྣ་དང་ལྕེ་དང་ལུས། །ཡིད་ཀྱི་ཁམས་ཀྱང་རབ་ཏུ་མཁྱེན། །ཆོས་ཀྱི་ཁམས་དང་ཡིད་ཀྱི་ནི། །རྣམ་པར་ཤེས་པ་ཉིད་ཀྱང་མཁྱེན། །ནང་གི་ཁམས་ནི་སྟོང་པ་དང་། །ཕྱི་རོལ་དག་ཀྱང་སྟོང་པར་མཁྱེན། །ས་དང་
ཆུ་དང་མེ་དག་དང་། །རླུང་གི་ཁམས་ཀྱང་དེ་བཞིན་ཏེ། །ཁམས་རྣམས་བཞི་པོ་དེ་དག་ནི། །ནམ་མཁའ་མཚུངས་པར་རབ་ཏུ་མཁྱེན། །འདོད་པའི་ཁམས་དང་གཟུགས་ཀྱི་ཁམས། །གཟུགས་མེད་པ་ཡི་ཁམས་ཉིད་ཀྱང་། །ཀུན་ཏུ་རྟོག་ལས་བྱུང་བར་ནི། །དེ་ལྟར་སངས་རྒྱས་
རབ་ཏུ་མཁྱེན། །ཇི་ལྟར་ནམ་མཁའ་མཐའ་ཡས་པ། །དེ་བཞིན་ཁམས་རྣམས་མུ་མེད་དེ། །ཐམས་ཅད་སངས་རྒྱས་རབ་མཁྱེན་ཀྱང་། །མཁྱེན་ཏོ་སྙམ་དུ་རློམ་སེམས་མེད། །ཁམས་ནི་སྐྱེ་བ་མ་ཡིན་ཞིང་། །རྣམ་པ་ཀུན་ཏུ་འགག་མེད་དེ། །ཁམས་འདི་མྱ་ངན་འདས་པར་
ནི། །སྐྱེས་བུ་དམ་པས་རབ་ཏུ་མཁྱེན། །ཇི་ལྟར་ནམ་མཁའ་མཐའ་ཡས་པ། །སངས་རྒྱས་ཡེ་ཤེས་དེ་འདྲ་སྟེ། །མོས་པ་སྣ་ཚོགས་རབ་སྤྲུལ་པ། །ཡེ་ཤེས་དེས་ནི་རབ་ཏུ་མཁྱེན། །མོས་པ་སྣ་ཚོགས་མཁྱེན་ནས་སུ། །སེམས་ཅན་བྱེ་བ་རྣམ་པར་འདུལ། །སངས་

རྒྱས་སྟོབས་ནི་བཞི་པ་ལ། །རྒྱལ་བའི་ཐུགས་སྲས་དད་པར་བྱེད། །ཤཱ་རིའི་བུ་འདི་ནི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བཞི་པ་སྟེ། སུས་ཀྱང་འཇིག་རྟེན་འདིར་ཆོས་དང་འཐུན་པ་ཞེས་བྱ་བའི་བར་དུ་རྒྱས་པར་བྱའོ། །
གཞན་ཡང་ཤཱ་རིའི་བུ་དེ་བཞིན་གཤེགས་པའི་དབང་པོ་དང་། བརྩོན་འགྲུས་ཀྱི་རིམ་པ་མཁྱེན་པའི་སྟོབས་ཀྱིས་སེམས་ཅན་གཞན་དང་། གང་ཟག་གཞན་རྣམས་ཀྱི་དབང་པོ་དང་། བརྩོན་འགྲུས་ཀྱི་རིམ་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཇི་ལྟར་
རབ་ཏུ་མཁྱེན་ཅེ་ན། དབང་པོ་རྟུལ་བའང་རབ་ཏུ་མཁྱེན་ཏོ། །དབང་པོ་བར་མའང་རབ་ཏུ་མཁྱེན་ཏོ། །དབང་པོ་རྣོ་བའང་རབ་ཏུ་མཁྱེན་ཏོ། །དབང་པོ་ཁྱད་པར་དུ་འཕགས་པ་ཡང་རབ་ཏུ་མཁྱེན་ཏོ། །དབང་པོ་དམན་པའང་རབ་ཏུ་མཁྱེན་ཏོ། །ཡོངས་སུ་རྟོག་པའི་དབང་པོ་ཇི་
ལྟ་བུས་མཐར་ཕྱིན་པའི་འདོད་ཆགས་སྐྱེ་བ་དང་། མཐར་ཕྱིན་པའི་ཞེ་སྡང་སྐྱེ་བ་དང་། མཐར་ཕྱིན་པའི་གཏི་མུག་སྐྱེ་བ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཡོངས་སུ་རྟོག་པའི་དབང་པོ་ཇི་ལྟ་བུས་འདོད་ཆགས་དང་། ཞེ་སྡང་དང་།
གཏི་མུག་བརྟན་པ་སྐྱེ་བ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཡོངས་སུ་རྟོག་པའི་དབང་པོ་ཇི་ལྟ་བུས་འདོད་ཆགས་དང་། ཞེ་སྡང་དང་། གཏི་མུག་ཡང་བ་སྐྱེ་བ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་
མཁྱེན་ཏོ། །ཡོངས་སུ་རྟོག་པའི་དབང་པོ་ཇི་ལྟ་བུས་སྣྲེལ་ཞིའི་འདོད་ཆགས་དང་། ཞེ་སྡང་དང་། གཏི་མུག་སྐྱེ་བ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཡོངས་སུ་རྟོགས་པའི་དབང་པོ་ཇི་ལྟ་བུས་ཚར་བཅད་ཅིང་འདོད་ཆགས་དང་།
ཞེ་སྡང་དང་། གཏི་མུག་སྐྱེ་བ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དབང་པོ་གང་དག་མི་དགེ་བའི་རྒྱུ་ལས་བྱུང་བ་དང་། དབང་པོ་གང་དག་དགེ་བའི་རྒྱུ་ལས་བྱུང་བ་དང་། དབང་པོ་གང་དག་མི་གཡོ་བའི་རྒྱུ་ལས་བྱུང་བ་དང་། དབང་

པོ་གང་དག་འབྱུང་བའི་རྒྱུ་ལས་བྱུང་བ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །གཞན་ཡང་ཤཱ་རིའི་བུ་དེ་བཞིན་གཤེགས་པས་མིག་གི་དབང་པོ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་པ་ནས་གོང་མ་བཞིན་དུ་སྦྱར་ཏེ། རྣ་བ་དང་། སྣ་
དང་། ལྕེ་དང་། ལུས་དང་། ཡིད་ཀྱི་དབང་པོ་ཡང་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཕོའི་དབང་པོ་དང་། མོའི་དབང་པོ་དང་། སྲོག་གི་དབང་པོ་དང་། བདེ་བའི་དབང་པོ་དང་། སྡུག་བསྔལ་གྱི་དབང་པོ་དང་། ཡིད་མི་བདེ་བའི་དབང་པོ་དང་། ཡིད་བདེ་བའི་དབང་པོ་དང་།
བཏང་སྙོམས་ཀྱི་དབང་པོ་ཡང་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དད་པའི་དབང་པོ་དང་། བརྩོན་འགྲུས་ཀྱི་དབང་པོ་དང་། དྲན་པའི་དབང་པོ་དང་། ཏིང་ངེ་འཛིན་གྱི་དབང་པོ་དང་། ཤེས་རབ་ཀྱི་དབང་པོ་ཡང་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །མི་ཤེས་པ་ཀུན་
ཤེས་པར་བྱེད་པའི་དབང་པོ་དང་། ཀུན་ཤེས་པའི་དབང་པོ་དང་། ཀུན་ཤེས་པ་དང་ལྡན་པའི་དབང་པོ་ཡང་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དབང་པོ་གང་མིག་གི་དབང་པོའི་རྒྱུ་ལས་བྱུང་ལ་རྣ་བའི་དབང་པོ་ལ་གནས་པར་འགྱུར་ཏེ། སྣ་ལ་མ་ཡིན། ལྕེ་ལ་མ་ཡིན། ལུས་
ཀྱི་དབང་པོ་ལ་མ་ཡིན་པ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །གང་རྣ་བའི་དབང་པོའི་རྒྱུ་ལས་བྱུང་ལ་སྣའི་དབང་པོ་ལ་གནས་པར་འགྱུར་བ་དང་། གང་སྣའི་དབང་པོའི་རྒྱུ་ལས་བྱུང་ལ་ལྕེའི་དབང་པོ་ལ་གནས་པར་འགྱུར་བ་དང་། གང་ལྕེའི་དབང་པོའི་
རྒྱུ་ལས་བྱུང་ལ་ལུས་ཀྱི་དབང་པོ་ལ་གནས་པར་འགྱུར་བ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །སེམས་ཅན་གང་སྦྱིན་པའི་དབང་པོ་ཅན་ཡིན་ལ་དེ་ཡང་ཚུལ་ཁྲིམས་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་། མཆོག་མ་ཡིན་པ་
མཁྱེན་པས་དེ་ལ་སྦྱིན་པའི་གཏམ་སྟོན་ཏོ། །གང་ཟག་གང་ཚུལ་ཁྲིམས་ཀྱི་དབང་པོ་ཅན་ཡིན་ལ་དེ་ཡང་སྦྱིན་པ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་། མཆོག་མ་ཡིན་པ་མཁྱེན་པས་ཚུལ་ཁྲིམས་ཀྱི་གཏམ་སྟོན་ཏོ། །སེམས་ཅན་གང་བཟོད་པའི་དབང་པོ་ཅན་

ཡིན་ལ་དེ་ཡང་བརྩོན་འགྲུས་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་། མཆོག་མ་ཡིན་པ་མཁྱེན་པས་བཟོད་པའི་གཏམ་སྟོན་ཏོ། །སེམས་ཅན་གང་བརྩོན་འགྲུས་ཀྱི་དབང་པོ་ཅན་ཡིན་ལ་དེ་ཡང་བཟོད་པ་ལ་སྦྱོར་བ་དེ་ལ་དེ་བཞིན་གཤེགས་
པས་དབང་པོ་མཆོག་དང་། མཆོག་མ་ཡིན་པ་མཁྱེན་པས་བརྩོན་འགྲུས་ཀྱི་གཏམ་སྟོན་ཏོ། །སེམས་ཅན་གང་བསམ་གཏན་གྱི་དབང་པོ་ཅན་ཡིན་ལ་དེ་ཡང་ཤེས་རབ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་། མཆོག་མ་ཡིན་པ་མཁྱེན་པས་བསམ་གཏན་གྱི་གཏམ་སྟོན་
ཏོ། །སེམས་ཅན་གང་ཤེས་རབ་ཀྱི་དབང་པོ་ཅན་ཡིན་ལ་དེ་ཡང་ཤེས་རབ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་། མཆོག་མ་ཡིན་པ་མཁྱེན་པས་ཤེས་རབ་ཀྱི་གཏམ་སྟོན་ཏོ། །གོང་མ་བཞིན་དུ་སྦྱར་ཏེ། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ལ་ཡང་
བྱའོ། །སེམས་ཅན་གང་ཉན་ཐོས་ཀྱི་ཐེག་པའི་དབང་པོ་ཅན་ཡིན་ལ། དེ་ཡང་རང་སངས་རྒྱས་ཀྱི་ཐེག་པ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་། མཆོག་མ་ཡིན་པ་མཁྱེན་པས་ཉན་ཐོས་ཀྱི་ཐེག་པའི་གཏམ་སྟོན་ཏོ། །སེམས་ཅན་གང་རང་སངས་རྒྱས་ཀྱི་
ཐེག་པའི་དབང་པོ་ཅན་ཡིན་ལ་དེ་ཡང་ཉན་ཐོས་ཀྱི་ཐེག་པ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་། མཆོག་མ་ཡིན་པ་མཁྱེན་པས་རང་སངས་རྒྱས་ཀྱི་ཐེག་པའི་གཏམ་སྟོན་ཏོ། །སེམས་ཅན་གང་ཐེག་པ་ཆེན་པོའི་དབང་པོ་ཅན་ཡིན་ལ། དེ་ཡང་རང་སངས་
རྒྱས་ཀྱི་ཐེག་པ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་། མཆོག་མ་ཡིན་པ་མཁྱེན་པས་ཐེག་པ་ཆེན་པོའི་གཏམ་སྟོན་ཏོ། །སེམས་ཅན་གང་ཐ་མའི་དབང་པོ་ཅན་ཡིན་ལ། དེ་ཡང་ཐེག་པ་ཆེན་པོ་ལ་སྦྱོར་བ་དེ་ལ་དེ་བཞིན་གཤེགས་པས་དབང་པོ་མཆོག་དང་།
མཆོག་མ་ཡིན་པ་མཁྱེན་པས་དབང་པོ་ཐ་མ་པའི་གཏམ་སྟོན་ཏོ། །སེམས་ཅན་སྐལ་བ་མེད་པའི་དབང་པོ་ཅན་སྐལ་བ་མེད་པར་སྣང་བ་དེ་དག་དེ་བཞིན་གཤེགས་པས་སྐལ་བ་མེད་ཅིང་སྣོད་མ་ཡིན་པར་རིག་ནས་བཏང་སྙོམས་སུ་འཇོག་གོ །སེམས་ཅན་སྐལ་བ་ཡོད་པའི་དབང་པོ་ཅན་

སྐལ་བ་ཡོད་པར་སྣང་བ་དག་ལ་དེ་བཞིན་གཤེགས་པས་སྐལ་བ་ཡོད་ཅིང་སྣོད་དུ་རིག་ནས་རི་མོར་བྱས་ཤིང་ཆོས་སྟོན་ཏེ། དེ་ལྟར་ཤཱ་རིའི་བུ་དེ་བཞིན་གཤེགས་པས་སེམས་ཅན་ཐམས་ཅད་ཀྱི་དབང་པོ་ཡོངས་སུ་སྨིན་པ་རྣམས་ཀྱང་རབ་ཏུ་མཁྱེན། དབང་པོ་ཡོངས་སུ་མ་སྨིན་པ་རྣམས་ཀྱང་
རབ་ཏུ་མཁྱེན། འབྱུང་བའི་དབང་པོ་རྣམས་ཀྱང་རབ་ཏུ་མཁྱེན། འབྱུང་བ་མ་ཡིན་པའི་དབང་པོ་རྣམས་ཀྱང་རབ་ཏུ་མཁྱེན་ཏོ། །སེམས་ཅན་གྱི་དབང་པོའི་རྣམ་པ་གང་ཡིན་པ་དང་། སྦྱོར་བ་གང་ཡིན་པ་དང་། བསམ་པ་གང་ཡིན་པ་དང་། གང་གི་རྒྱུ་ལས་བྱུང་བ་དང་། རྐྱེན་
གང་ཡིན་པ་དང་། དམིགས་པ་གང་ཡིན་པ་དང་། རྒྱུ་འཐུན་པ་གང་ཡིན་པ་དང་། སེམས་ཅན་གྱི་དབང་པོའི་མཐའ་གང་ཡིན་པ་དེ་དག་ཐམས་ཅད་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །བཅོམ་ལྡན་འདས་ཀྱིས་དེ་སྐད་གསུངས་ཏེ། བདེ་བར་
གཤེགས་པས་དེ་སྐད་བཀའ་སྩལ་ནས་སྟོན་པ་ཡང་འདི་སྐད་གསུང་ངོ་། །འགྲོ་བའི་དབང་པོ་དེ་ནི་དབང་པོའི་ཕ་རོལ་སོང་། །སེམས་ཅན་རྣམས་ཀྱི་སྤྱོད་དང་བསམ་པའི་ཆོ་ག་མཁྱེན། །འགྲོ་བ་གང་དག་གི་ནི་དབང་པོ་ཅི་འདྲ་བ། །དེ་འདྲར་མི་ཡི་སེང་གེ་དེ་ལ་ཆོས་འཆད་དོ། །
དབང་པོ་དག་ནི་རབ་འབྲིང་ཐ་མར་གྱུར་པ་རྣམས། །དེ་ལ་བདེ་གཤེགས་ཡེ་ཤེས་རྨད་དུ་བྱུང་བ་འཇུག །སེམས་ཅན་བསམ་པ་ཐར་པའི་སྣོད་དུ་གྱུར་མཁྱེན་ནས། །སྤྱོད་པ་མཁྱེན་ཅིང་མཁས་པ་མཆོག་གི་ཆོས་སྟོན་ཏོ། །གང་དག་མཐར་ཕྱིན་སྐྱེ་ཞིང་ཉོན་མོངས་བརྟེན་པ་དང་། །
མི་གང་རྣམས་ཀྱི་དབང་པོ་ཡང་བར་གྱུར་པ་དང་། །སྐྱེས་བུ་གང་གི་དབང་པོ་སྣྲེལ་ཞིར་གྱུར་པ་ཡི། །སྤྱོད་པ་མཁྱེན་ནས་དེ་ལྟར་འཐུན་པའི་ཆོས་སྟོན་ཏོ། །སྐྱེས་བུ་གང་གི་དགེ་བའི་དབང་པོར་གྱུར་པ་དང་། །མི་དགེའི་དབང་པོར་གྱུར་པ་རྣམས་ཀྱང་དེ་བཞིན་མཁྱེན། །མིག་
ནས་བཟུང་སྟེ་ཡིད་ཀྱི་བར་གྱི་དབང་པོ་དང་། །ཡིད་མི་བདེ་དང་སྡུག་བསྔལ་དབང་མཁྱེན་ཆོས་ཀྱང་སྟོན། །དད་བརྩོན་དྲན་དང་ཏིང་འཛིན་དེ་བཞིན་ཤེས་རབ་དག །སྐྱེས་བུ་གང་ལ་དབང་པོ་འདི་དག་ཡོད་པ་ནི། །དེ་ལ་དད་པའི་གཏམ་སྟོན་དེ་བཞིན་བརྩོན་འགྲུས་དང་། །བསམ་

གཏན་ཤེས་རབ་དག་ཀྱང་དམ་པའི་དོན་དུ་སྟོན། །མི་ཡི་དབང་པོའི་རྣམ་པ་སྤྱོད་པའི་བྱེ་བྲག་གང་། །མི་གང་བསམ་པ་ཅི་འཇུག་དེ་ཡི་དབང་པོ་ཡང་། །ཆོས་མཆོག་རྟོགས་པས་དེ་དག་གི་ནི་སྤྱོད་མཁྱེན་ནས། །སྡུག་བསྔལ་ཀུན་ལས་ཐར་བར་བྱེད་པའི་ཆོས་
འཆད་དོ། །གང་གི་དབང་པོ་སངས་རྒྱས་བྱང་ཆུབ་ཕྱིར་ངེས་པ། །ཉན་ཐོས་ཤེས་པའི་རྗེས་འཇུག་ཆོ་ག་མི་ཤེས་པ། །དེ་ལ་བྱང་ཆུབ་རེག་འགྱུར་རྒྱ་ཆེན་གཏམ་རབ་སྟོན། །བདེ་གཤེགས་སྟོབས་ནི་མཐའ་ཡས་ཐུབ་དཀའ་ལྔ་པའོ། །འདི་ནི་དེ་བཞིན་གཤེགས་པ་
རྣམས་ཀྱི་དེ་བཞིན་གཤེགས་པའི་སྟོབས་ལྔ་པ་སྟེ། སུས་ཀྱང་འཇིག་རྟེན་འདིར་ཆོས་དང་འཐུན་པར་ཞེས་བྱ་བའི་བར་དུའོ། །དེ་ལ་དེ་བཞིན་གཤེགས་པའི་ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་གང་ཞེ་ན། འདི་ལ་ཤཱ་རིའི་བུ་དེ་བཞིན་གཤེགས་པས་ཐམས་ཅད་དུ་
འགྲོ་བའི་ལམ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ཇི་ལྟར་རབ་ཏུ་མཁྱེན་ཅེ་ན། ཡང་དག་པར་ངེས་པའི་སེམས་ཅན་གྱི་ཁམས་རབ་ཏུ་མཁྱེན། ཡང་དག་པར་མ་ངེས་པའི་སེམས་ཅན་གྱི་ཁམས་རབ་ཏུ་མཁྱེན། ལོག་པར་ངེས་པའི་སེམས་ཅན་གྱི་ཁམས་རབ་ཏུ་
མཁྱེན། མ་ངེས་པའི་སེམས་ཅན་གྱི་ཁམས་ཀྱང་དེ་བཞིན་དུ་རབ་ཏུ་མཁྱེན་ཏོ། །རྒྱུའི་སྟོབས་ཅན་སྔོན་གྱི་སྦྱོར་བ་ཕུན་སུམ་ཚོགས་པ་ཟུར་ཙམ་གྱིས་གོ་བ་དབང་པོ་རྣོ་བའི་སེམས་ཅན་དེ་དག་ལ་དེ་བཞིན་གཤེགས་པས་ཆོས་བསྟན་ཀྱང་རུང་། མ་བསྟན་ཀྱང་རུང་། དེ་རྣམ་པར་གྲོལ་
བའི་སྐལ་བ་ཡོད་པ་དེ་དག་དེ་བཞིན་གཤེགས་པས་སྔོན་གྱི་རྒྱུའི་སྟོབས་མཁྱེན་ནས་དེ་བཞིན་དུ་འཐུན་པར་ཆོས་སྟོན་ཏོ། །མ་ངེས་པའི་སེམས་ཅན་གྱི་ཁམས་རྐྱེན་གྱི་སྟོབས་ཅན་ཡོངས་སུ་སྨིན་པར་བྱ་བའི་མཚན་ཉིད་ཅན། གལ་ཏེ་འཐུན་པར་འདོམས་ཤིང་རྗེས་སུ་སྟོན་པ་དང་ཕྲད་ན་རྣམ་
པར་གྲོལ་བར་འགྱུར་གྱི། རྗེས་སུ་སྟོན་པ་དང་མ་ཕྲད་ན་རྣམ་པར་གྲོལ་བར་མི་འགྱུར་བ་དེ་དག་ལ་ཡང་དེ་བཞིན་གཤེགས་པ་དེ་ལྟར་རྒྱུ་དང་རྐྱེན་དང་ལྡན་པའི་གཏམ་ཡང་དག་པར་གསུངས་ཏེ། འདི་ལྟར་དེ་བཞིན་གཤེགས་པ་ལས་ཆོས་དེ་ཐོས་ནས་ཚུལ་བཞིན་རབ་ཏུ་སྦྱོར་འབྲས་

བུ་ཐོབ་པར་འགྱུར་ཏེ། དེ་དག་གི་དོན་དུ་སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་འབྱུང་ངོ་། །ལོག་པར་ངེས་པའི་སེམས་ཅན་གྱི་ཁམས་ཡོངས་སུ་སྦྱོང་བར་མ་བྱས་པ། ཁོ་རེ་ཆུང་བ་བླུན་པ་སྣོད་དུ་མ་གྱུར་པའི་སེམས་ཅན་དེ་དག་ལ་དེ་བཞིན་གཤེགས་པས་ཆོས་
བསྟན་ཀྱང་རུང་། མ་བསྟན་ཀྱང་རུང་སྟེ། རྣམ་པར་གྲོལ་བའི་སྐལ་བ་མེད་པ་དེ་དག་ཀྱང་དེ་བཞིན་གཤེགས་པས་སྣོད་མ་ཡིན་པར་རིག་ནས་བཏང་སྙོམས་སུ་འཇོག་སྟེ། དེ་དག་གི་ཕྱིར་བྱང་ཆུབ་སེམས་དཔའ་རྣམས་གོ་གྱོན་ཏོ། །གཞན་ཡང་ཤཱ་རིའི་བུ་དེ་བཞིན་གཤེགས་
པས་འདོད་ཆགས་ཀྱི་ལམ་རྣམ་པ་གསུམ་རབ་ཏུ་མཁྱེན་ཏེ། འདོད་ཆགས་ཀྱི་ལམ་སྡུག་པའི་རྣམ་པ་ལས་སྐྱེ་བ་ཡང་ཡོད། འདོད་ཆགས་ཀྱི་ལམ་རྗེས་སུ་ཆགས་པའི་རྣམ་པ་ལས་སྐྱེ་བ་ཡང་ཡོད། འདོད་ཆགས་ཀྱི་ལམ་སྔོན་གྱི་རྒྱུ་ལས་སྐྱེ་བ་ཡང་ཡོད་དོ། །ཞེ་སྡང་གི་
ལམ་རྣམ་པ་གསུམ་ཡང་རབ་ཏུ་མཁྱེན་ཏེ། ཞེ་སྡང་གི་ལམ་ཁོང་ཁྲོ་བའི་མཚན་མ་ལས་སྐྱེ་བ་ཡང་ཡོད། བསམ་པ་ཡོངས་སུ་རྫོགས་པ་ལས་སྐྱེ་བ་ཡང་ཡོད། སྔོན་གྱི་བག་ལ་ཉལ་ལས་སྐྱེ་བ་ཡང་ཡོད་དོ། །གཏི་མུག་གི་ལམ་རྣམ་པ་གསུམ་ཡང་རབ་ཏུ་མཁྱེན་ཏེ། །གཏི་མུག་
གི་ལམ་མ་རིག་པའི་རྒྱུ་ལས་སྐྱེ་བ་ཡང་ཡོད། གཏི་མུག་གི་ལམ་འཇིག་ཚོགས་ལ་ལྟ་བའི་རྒྱུ་ལས་སྐྱེ་བ་ཡང་ཡོད། །གཏི་མུག་གི་ལམ་ཐེ་ཚོམ་གྱི་རྒྱུ་ལས་སྐྱེ་བ་ཡང་ཡོད་དེ། དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །གཞན་ཡང་
ཤཱ་རིའི་བུ་དབང་པོ་རྣོ་བའི་ཕྱིར་མངོན་པར་ཤེས་པ་མྱུར་ལ་སླ་བའི་ལམ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །དབང་པོ་རྟུལ་བའི་ཕྱིར་མངོན་པར་ཤེས་པ་བུལ་ལ་དཀའ་བའི་ལམ་ཡང་རབ་ཏུ་མཁྱེན་ཏོ། །དབང་པོ་རྣོ་བའི་ཕྱིར་མངོན་པར་ཤེས་པ་མྱུར་ལ་སླ་བའི་ལམ་ཡང་རབ་
ཏུ་མཁྱེན་ཏོ། །དབང་པོ་རྟུལ་བའི་ཕྱིར་མངོན་པར་ཤེས་པ་བུལ་ལ་སླ་བའི་ལམ་ཡང་རབ་ཏུ་མཁྱེན་ཏོ། །དམིགས་པ་བོར་བའི་ཕྱིར་མངོན་པར་ཤེས་པ་བུལ་ལ་བུལ་བའི་ལམ་ཡང་རབ་ཏུ་མཁྱེན་ཏོ། །ལམ་གྱི་རྒྱུན་མ་བཅད་པའི་ཕྱིར་མངོན་པར་ཤེས་པ་མྱུར་ལ་བུལ་བའི་ལམ་ཡང་རབ་ཏུ་

མཁྱེན་ཏོ། །ཡོངས་སུ་ཐུག་པ་མེད་པར་དབུགས་འབྱིན་པའི་ཕྱིར་མངོན་པར་ཤེས་པ་བུལ་ལ་མྱུར་བའི་ལམ་ཡང་རབ་ཏུ་མཁྱེན་ཏོ། །དེ་ལ་མ་ཆགས་པའི་ཕྱིར་མངོན་པར་ཤེས་པ་མྱུར་ལ་བུལ་བའི་ལམ་ཡང་རབ་ཏུ་མཁྱེན་ཏོ། །སོ་སོར་རྟོག་པའི་སྟོབས་ཡོངས་
སུ་རྫོགས་པར་བྱེད་ལ་སྒོམ་པའི་སྟོབས་ལ་མ་ཡིན་པའི་ལམ་ཡང་ཡོད། སྒོམ་པའི་སྟོབས་ཡོངས་སུ་རྫོགས་པར་བྱེད་ལ། སོ་སོར་རྟོག་པའི་སྟོབས་ལ་མ་ཡིན་པའི་ལམ་ཡང་ཡོད། སྒོམ་པའི་སྟོབས་དང་། སོ་སོར་རྟོག་པའི་སྟོབས་ཡོངས་སུ་རྫོགས་པར་བྱེད་པའི་ལམ་ཡང་
ཡོད། སོ་སོར་རྟོག་པའི་སྟོབས་དང་། སྒོམ་པའི་སྟོབས་ཡོངས་སུ་རྫོགས་པར་མི་བྱེད་པའི་ལམ་ཡང་ཡོད་དེ་དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །བསམ་པ་ཕུན་སུམ་ཚོགས་ལ་སྦྱོར་བ་ཕུན་སུམ་ཚོགས་པ་མ་ཡིན་པའི་ལམ་ཡང་ཡོད་
སྦྱོར་བ་ཕུན་སུམ་ཚོགས་ལ་བསམ་པ་ཕུན་སུམ་ཚོགས་པ་མ་ཡིན་པའི་ལམ་ཡང་ཡོད། བསམ་པ་ཡང་ཕུན་སུམ་ཚོགས་པ་མ་ཡིན་ལ་སྦྱོར་བའང་ཕུན་སུམ་ཚོགས་པ་མ་ཡིན་པའི་ལམ་ཡང་ཡོད། བསམ་པ་ཡང་ཕུན་སུམ་ཚོགས་ལ་སྦྱོར་བའང་ཕུན་སུམ་ཚོགས་པའི་ལམ་ཡང་
ཡོད་དེ། དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །ལུས་སྦྱོང་ལ་ངག་ལ་མ་ཡིན། སེམས་ལ་མ་ཡིན་པའི་ལམ་ཡང་ཡོད། ངག་སྦྱོང་ལ་ལུས་ལ་མ་ཡིན། སེམས་ལ་མ་ཡིན་པའི་ལམ་ཡང་ཡོད། སེམས་སྦྱོང་ལ་ལུས་ལ་མ་ཡིན།
ངག་ལ་མ་ཡིན་པའི་ལམ་ཡང་ཡོད། ལུས་ལ་མ་ཡིན། ངག་ལ་མ་ཡིན་ལ་སེམས་ཀྱང་མི་སྦྱོང་བའི་ལམ་ཡང་ཡོད། ལུས་དང་། ངག་དང་། སེམས་སྦྱོང་བའི་ལམ་ཡང་ཡོད་དེ། དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་ལྟར་ཤཱ་རིའི་བུ་
སེམས་ཅན་ཐམས་ཅད་ཀྱི་འཇུག་པའི་རྒྱུ་དང་། ལྡོག་པའི་རྒྱུའི་ལམ་ཇི་སྙེད་པ་ཐམས་ཅད་དུ་དེ་བཞིན་གཤེགས་པའི་ཡེ་ཤེས་ཐོགས་པ་མེད་པ་འཇུག་གོ །དེ་ལྟར་ཤཱ་རིའི་བུ་དེ་བཞིན་གཤེགས་པའི་ཀུན་ཏུ་འགྲོ་བའི་ལམ་མཁྱེན་པའི་སྟོབས་དེ་ནི་མཐའ་ཡས་མུ་མེད་དེ་ནམ་མཁའ་

དང་མཚུངས་ཤིང་མཉམ་མོ། །བྱང་ཆུབ་སེམས་དཔས་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག །སོམ་ཉི་མེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ཅིང་ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ངོ་མཚར་དང་རྨད་དུ་འདུ་ཤེས་
སྐྱེད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཐམས་ཅད་ལམ་ནི་བདེ་གཤེགས་རབ་ཏུ་མཁྱེན། །སེམས་ཅན་ཁམས་ནི་ངེས་རྒྱུ་བཅས་པ་མཁྱེན། །ཡོངས་སུ་སྨིན་པའི་མཚན་ཉིད་མ་
ངེས་དང་། །དེ་བཞིན་དབང་པོ་རྒྱུ་དང་ལྡན་པ་མཁྱེན། །འདོད་ཆགས་ལམ་ནི་རྣམ་པ་གསུམ་ལྡན་དང་། །ཞེ་སྡང་ལམ་གསུམ་དེ་བཞིན་གཏི་མུག་ལྡན། །རྣམ་གསུམ་རྒྱ་ཆེན་མཐའ་ཡས་ཉོན་མོངས་ལྡན། །ལམ་ལ་རྐྱེན་དང་རྒྱུ་ནི་སྟོན་པས་མཁྱེན། །དཀའ་བའི་ལམ་ལ་རྣོ་བར་
འགྱུར་བ་དང་། །དེ་བཞིན་དབང་པོ་རྟུལ་ཞིང་བུལ་བ་དང་། །སླ་བའི་ལམ་ལ་རྣོ་བར་འགྱུར་བ་དང་། །དེ་བཞིན་བུལ་བའང་འཇིག་རྟེན་མགོན་པོས་མཁྱེན། །བུལ་བའི་ལམ་ལ་སྦྱོར་བ་བུལ་བ་ཡོད། །དེ་བཞིན་བུལ་བ་ཡིན་ལ་སྦྱོང་བ་རྣོ། །མྱུར་བའི་ལམ་ལ་བུལ་བར་འགྱུར་
བ་དང་། །དེ་བཞིན་དེ་ལ་མ་ཆགས་མྱུར་བ་འང་ཡོད། །ལམ་ནི་སོ་སོར་རྟོག་པ་སྐྱེད་བྱེད་ལ། །ཡང་དག་སྒོམ་པ་སྐྱེད་པ་མ་ཡིན་དང་། །སྒོམ་པ་དག་ནི་སྐྱེད་པར་བྱེད་པ་དང་། །གཉི་ག་ཁྱད་པར་སྦྱོར་ལྡན་སྐྱེད་པ་ཡོད། །ལམ་ནི་བསམ་པ་ཡོངས་སུ་སྦྱོང་བྱེད་ལ། །སྦྱོར་བ་དག་ནི་
སྦྱོང་བར་མི་བྱེད་ཡོད། །རེས་འགའ་གཉི་ག་སྦྱོང་བར་བྱེད་པའང་ཡོད། དེ་དག་སངས་རྒྱས་ཐམས་ཅད་གཟིགས་པས་མཁྱེན། །ལུས་ལ་རྣམ་པར་སྦྱོང་ལ་ངག་མི་སྦྱོང་། །སེམས་ཀྱང་རྣམ་པར་སྦྱོང་བ་མ་ཡིན་དང་། །ངག་རྣམས་དང་ནི་ལུས་ཀྱང་རབ་སྦྱོང་ལ། །སེམས་ནི་
རེས་འགའ་མི་སྦྱོང་བ་ཡང་ཡོད། །སེམས་ནི་རབ་སྦྱོང་ངག་ལ་མ་ཡིན་ཏེ། །ལུས་ཀྱང་རྣམ་པར་སྦྱོང་བ་མ་ཡིན་དང་། །ངག་དང་དེ་བཞིན་སེམས་ཀྱང་རབ་སྦྱོང་ལ། །རེས་འགའ་ལུས་ནི་སྦྱོང་བར་མི་འགྱུར་ཡོད། །ལུས་དང་དེ་བཞིན་ངག་སེམས་སྦྱོང་ལམ་དང་། །ཇི་ལྟར་ལྡོག་

དང་འཇུག་པར་འགྱུར་བ་རྣམས། །སངས་རྒྱས་ཐམས་ཅད་གཟིགས་པས་རབ་མཁྱེན་ཏེ། །འདི་ནི་དེ་བཞིན་གཤེགས་པའི་སྟོབས་དྲུག་པ། །ཤཱ་རིའི་བུ་འདི་ནི་དེ་བཞིན་གཤེགས་པའི་སྟོབས་དྲུག་པ་སྟེ། སྟོབས་དེ་དང་ལྡན་པས་དེ་བཞིན་གཤེགས་པ་ཁྱུ་མཆོག་གི་
གནས་སུ་ཞལ་གྱིས་འཆེ་བ་ནས་སུས་ཀྱང་འཇིག་རྟེན་དུ་ཆོས་དང་འཐུན་པར་ཞེས་བྱ་བའི་བར་དུའོ། །དེ་ལ་དེ་བཞིན་གཤེགས་པའི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་ཀུན་ནས་ཉོན་མོངས་པ་དང་། རྣམ་པར་བྱང་བ་དང་།
ལྡང་བ་མཁྱེན་པའི་སྟོབས་གང་ཞེ་ན། འདི་ལ་ཤཱ་རིའི་བུ་དེ་བཞིན་གཤེགས་པ་བདག་དང་ཕ་རོལ་གྱི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་ཀུན་ནས་ཉོན་མོངས་པ་དང་། རྣམ་པར་བྱང་བ་དང་། ལྡང་བ་ཡང་དག་པ་ཇི་ལྟ་བ་
བཞིན་རབ་ཏུ་མཁྱེན་ཏོ། །ཇི་ལྟར་རབ་ཏུ་མཁྱེན་ཅེ་ན། སེམས་ཅན་རྣམས་ཀྱི་ཀུན་ནས་ཉོན་མོངས་པའི་རྒྱུ་གང་ཡིན་པ་དང་། རྐྱེན་གང་ཡིན་པ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །སེམས་ཅན་རྣམས་ཀྱི་རྣམ་པར་དག་པའི་རྒྱུ་གང་ཡིན་
པ་དང་། རྐྱེན་གང་ཡིན་པ་དེ་ཡང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་ལ་རྒྱུ་གང་། རྐྱེན་གང་ཞེ་ན། སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པའི་རྒྱུ་ནི་ཚུལ་བཞིན་མ་ཡིན་པ་ཡིད་ལ་བྱེད་པའོ། །སེམས་ཅན་ཐམས་ཅད་ཀྱི་
ཀུན་ནས་ཉོན་མོངས་པའི་རྐྱེན་ནི་མ་རིག་པའོ། །མ་རིག་པ་ནི་རྒྱུའོ། །འདུ་བྱེད་ནི་རྐྱེན་ཏོ། །འདུ་བྱེད་ནི་རྒྱུའོ། །རྣམ་པར་ཤེས་པ་ནི་རྐྱེན་ཏོ། །རྣམ་པར་ཤེས་པ་ནི་རྒྱུའོ། །མིང་དང་གཟུགས་ནི་རྐྱེན་ཏོ། །མིང་དང་གཟུགས་ནི་རྒྱུའོ། །སྐྱེ་མཆེད་དྲུག་ནི་རྐྱེན་ཏོ། །
སྐྱེ་མཆེད་དྲུག་ནི་རྒྱུའོ། །རེག་པ་ནི་རྐྱེན་ཏོ། །རེག་པ་ནི་རྒྱུའོ། །ཚོར་བ་ནི་རྐྱེན་ཏོ། །ཚོར་བ་ནི་རྒྱུའོ། །སྲེད་པ་ནི་རྐྱེན་ཏོ། །སྲེད་པ་ནི་རྒྱུའོ། །ལེན་པ་ནི་རྐྱེན་ཏོ། །ལེན་པ་ནི་རྒྱུའོ། །སྲིད་པ་ནི་རྐྱེན་ཏོ། །སྲིད་པ་ནི་རྒྱུའོ། །སྐྱེ་བ་ནི་རྐྱེན་ཏོ། །སྐྱེ་བ་ནི་རྒྱུའོ། །རྒ་ཤི་ནི་

རྐྱེན་ཏོ། །ཉོན་མོངས་པ་ནི་རྒྱུའོ། །ལས་ནི་རྐྱེན་ཏོ། །ལྟ་བ་ནི་རྒྱུའོ། །སྲེད་པ་ནི་རྐྱེན་ཏོ། །བག་ལ་ཉལ་ནི་རྒྱུའོ། །ཀུན་ནས་ལྡང་བ་ནི་རྐྱེན་ཏོ། །སེམས་ཅན་རྣམས་ཀྱི་ཀུན་ནས་ཉོན་མོངས་པར་འགྱུར་བའི་རྒྱུ་ནི་འདི་རྐྱེན་ནི་འདི་ཡིན་ཏེ་དེ་དག་ཀྱང་དེ་བཞིན་གཤེགས་
པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་ལ་སེམས་ཅན་རྣམས་ཀྱི་རྣམ་པར་དག་པར་འགྱུར་བའི་རྒྱུ་གང་། རྐྱེན་གང་ཞེ་ན། སེམས་ཅན་རྣམས་ཀྱི་རྣམ་པར་དག་པར་འགྱུར་བའི་རྒྱུ་གཉིས་རྐྱེན་གཉིས་ཏེ། གཞན་ལས་རྗེས་སུ་འཐུན་པའི་སྒྲ་དང་། སོ་སོ་བདག་ཉིད་ཚུལ་
བཞིན་ཡིད་ལ་བྱེད་པའོ། །འདི་ལྟ་སྟེ། ཞི་གནས་ལ་རྩེ་གཅིག་པ་དང་། ལྷག་མཐོང་ལ་མཁས་པའོ། །གཞན་ཡང་རྒྱུ་གཉིས་དང་། རྐྱེན་གཉིས་ཏེ། འགྲོ་བ་མེད་པར་ཤེས་པ་དང་། འོང་བ་མེད་པར་ཤེས་པའོ། །གཞན་ཡང་རྒྱུ་གཉིས་དང་། རྐྱེན་གཉིས་ཏེ། སྐྱེ་བ་
མེད་པར་རབ་ཏུ་རྟོགས་པ་དང་། ངེས་པར་གྱུར་པ་ལ་མི་རེག་པའོ། །གཞན་ཡང་རྒྱུ་གཉིས་དང་། རྐྱེན་གཉིས་ཏེ། རྐང་པར་ལྡན་པ་དང་། རིག་པས་རྣམ་པར་གྲོལ་བ་མངོན་སུམ་དུ་བྱེད་པའོ། །གཞན་ཡང་རྒྱུ་གཉིས་དང་། རྐྱེན་གཉིས་ཏེ། རྣམ་པར་ཐར་པའི་སྒོ་ལ་སྒོམ་
པ་དང་། རང་བཞིན་གྱིས་རྣམ་པར་གྲོལ་བར་ཤེས་པའོ། །གཞན་ཡང་རྒྱུ་གཉིས་དང་། རྐྱེན་གཉིས་ཏེ། ཟད་པ་ཤེས་པ་དང་། མི་སྐྱེ་བ་ཤེས་པའོ། །གཞན་ཡང་རྒྱུ་གཉིས་དང་། རྐྱེན་གཉིས་ཏེ། བདེན་པ་རྗེས་སུ་རྟོགས་པ་དང་། བདེན་པ་རྗེས་སུ་ཐོབ་པའོ། །
རྒྱུ་དེ་དང་རྐྱེན་དེ་དག་ནི་སེམས་ཅན་རྣམས་རྣམ་པར་དག་པར་འགྱུར་བ་སྟེ། དེ་དག་ཀྱང་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །གཞན་ཡང་ཤཱ་རིའི་བུ་སེམས་ཅན་རྣམས་ཀྱི་ཀུན་ནས་ཉོན་མོངས་པ་ལ་དམིགས་པ་ཡང་ཚད་མེད། རྣམ་པར་དག་པར་
དམིགས་པ་ཡང་ཚད་མེད་དེ། ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པས་ཀུན་ནས་ཉོན་མོངས་པ་ལ་དམིགས་པ། རྣམ་པར་དག་པའི་དམིགས་པ་ལ་འཇོག་པ་ཡང་ཡོད་དོ། །ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པས་རྣམ་པར་དག་པ་ལ་དམིགས་པ་ཡང་ཀུན་ནས་ཉོན་མོངས་

པར་དམིགས་པ་ལ་འཇོག་པ་ཡང་ཡོད་མངོན་པའི་ང་རྒྱལ་གྱི་འཛིན་པས་ཀུན་ནས་ཉོན་མོངས་པར་དམིགས་པ་ལ་འཇོག་པ་དང་། རྣམ་པར་དག་པའི་དམིགས་པ་ལ་འཇོག་པའང་ཡོད་དེ། དེ་ལས་སྣྲེལ་ཞིའི་རྣམ་གྲངས་ཀྱིས་དེ་བཞིན་གཤེགས་པའི་ཡེ་ཤེས་འཇུག་
གོ །ཤཱ་རིའི་བུ་དེ་བཞིན་གཤེགས་པ་ནི་ཡེ་ཤེས་འདི་ལྟ་བུ་དང་ལྡན་པས་འདོད་པ་དག་ལས་དབེན་པ། སྡིག་པ་མི་དགེ་བའི་ཆོས་རྣམས་ལས་དབེན་པ། རྟོག་པ་དང་བཅས་པ་དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་། བདེ་བ་ཅན་བསམ་གཏན་དང་པོ་
རྫོགས་པར་བྱས་ཏེ་གནས་སོ། །བསམ་གཏན་དང་པོ་རྫོགས་པར་བྱས་ཏེ་གནས་ནས་འགོག་པ་ལས་ལྡང་བ་དང་། འགོག་པ་ལ་སྙོམས་པར་ཞུགས་ནས་བསམ་གཏན་དང་པོ་ལས་ལྡང་བའི་བར་དུའོ། །རྣམ་པར་ཐར་པ་བརྒྱད་ལ་རྗེས་སུ་འཐུན་པར་སྙོམས་པར་འཇུག་གོ །
མི་འཐུན་པར་ཡང་སྙོམས་པར་འཇུག་གོ །རྗེས་སུ་འཐུན་པ་དང་མི་འཐུན་པར་སྙོམས་པར་འཇུག་སྟེ། བརྒྱད་གང་ཞེ་ན། །འདི་ལྟ་སྟེ། གཟུགས་ཅན་གཟུགས་རྣམས་ལ་ལྟ་བ་འདི་ནི་རྣམ་པར་ཐར་པ་དང་པོའོ། །ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་
རྣམས་ལ་ལྟ་བ་འདི་ནི་རྣམ་པར་ཐར་པ་གཉིས་པའོ། །སྡུག་པའི་རྣམ་པར་ཐར་པ་སྡུག་པ་ཉིད་དུ་མོས་པར་འགྱུར་བ་དེ་ནི་རྣམ་པར་ཐར་པ་གསུམ་པའོ། །ནམ་མཁའ་མཐའ་ཡས་སྐྱེ་མཆེད་ལ་སྙོམས་པར་འཇུག་པ་དེ་ནི་རྣམ་པར་ཐར་པ་བཞི་པའོ། །རྣམ་ཤེས་མཐའ་ཡས་སྐྱེ་
མཆེད་ལ་སྙོམས་པར་འཇུག་པ་དེ་ནི་རྣམ་པར་ཐར་པ་ལྔ་པའོ། ཅི་ཡང་མེད་པའི་སྐྱེ་མཆེད་ལ་སྙོམས་པར་འཇུག་པ་དེ་ནི་རྣམ་པར་ཐར་པ་དྲུག་པའོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་སྙོམས་པར་འཇུག་པ་དེ་ནི་རྣམ་པར་ཐར་པ་བདུན་པའོ། །འདུ་ཤེས་དང་ཚོར་བ་འགོག་
པ་དེ་ནི་རྣམ་པར་ཐར་པ་བརྒྱད་པ་སྟེ། རྣམ་པར་ཐར་པ་བརྒྱད་པོ་འདི་དག་ལ་རྗེས་སུ་འཐུན་པ་དང་། མི་འཐུན་པར་ཡང་སྙོམས་པར་འཇུག་སྣྲེལ་ཞིར་ཡང་སྙོམས་པར་འཇུག་གོ །ཏིང་ངེ་འཛིན་ལ་ཡང་ཏིང་ངེ་འཛིན་སྟོན་ལ་སྙོམས་པར་འཇུག་པས་རྟོགས་པར་སྟོན་ཀྱང་དེ་བཞིན་གཤེགས་

པའི་ཏིང་ངེ་འཛིན་ལ་ཐ་དད་པར་འགྱུར་བ་གང་ཡང་མེད། དེ་བཞིན་གཤེགས་པ་ནི་ཏིང་ངེ་འཛིན་ལ་དམིགས་པ་ལས་ཏིང་ངེ་འཛིན་ལ་མཉམ་པར་གཞག་པར་བྱ་བ་མེད། དེ་བཞིན་གཤེགས་པ་ནི་ཏིང་ངེ་འཛིན་གཅིག་གིས་ཏིང་ངེ་འཛིན་ཐམས་ཅད་འགྲུབ་བོ། །དེ་བཞིན་གཤེགས་
པ་ནི་ཏིང་ངེ་འཛིན་ལས་མ་བཞེངས་པར་ཏིང་ངེ་འཛིན་ཐམས་ཅད་ལ་སྙོམས་པར་འཇུག་ཀྱང་དེ་བཞིན་གཤེགས་པ་ནི་སེམས་གཅིག་ནས་གཅིག་ཏུ་འཇུག་པ་མེད་དོ། །དེ་བཞིན་གཤེགས་པ་ལ་སེམས་མཉམ་པར་མ་བཞག་པ་མི་དམིགས་སོ། །དེ་བཞིན་གཤེགས་པའི་ཏིང་ངེ་འཛིན་ནི་སུས་ཀྱང་
བལྟ་མི་ནུས་ཏེ། ཉན་ཐོས་ཀྱི་ཏིང་ངེ་འཛིན་ནི་རང་སངས་རྒྱས་ཀྱི་ཏིང་ངེ་འཛིན་གྱིས་ཟིལ་གྱིས་ནོན་ཏོ། །རང་སངས་རྒྱས་ཀྱི་ཏིང་ངེ་འཛིན་ནི་བྱང་ཆུབ་སེམས་དཔའི་ཏིང་ངེ་འཛིན་གྱིས་ཟིལ་གྱིས་ནོན་ཏོ། །བྱང་ཆུབ་སེམས་དཔའི་ཏིང་ངེ་འཛིན་ནི་སངས་རྒྱས་ཀྱི་ཏིང་ངེ་འཛིན་གྱིས་ཟིལ་གྱིས་
ནོན་ཏོ། །དེ་བཞིན་གཤེགས་པའི་ཏིང་ངེ་འཛིན་ནི་ཟིལ་གྱིས་མ་ནོན་པ་སྟེ། དེ་བཞིན་གཤེགས་པའི་ཡེ་ཤེས་ནི་ཟིལ་གྱིས་མ་ནོན་པར་འཇུག་གོ །གདམས་པ་གང་དང་རྗེས་སུ་བསྟན་པ་གང་གིས་ཉན་ཐོས་རྣམས་ཀྱི་ཏིང་ངེ་འཛིན་སྐྱེད་པ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏོ། །དེ་བཞིན་དུ་
རང་སངས་རྒྱས་ཀྱི་དང་། དེ་བཞིན་དུ་བྱང་ཆུབ་སེམས་དཔའི་དེ་དག་ཀྱང་དེ་བཞིན་གཤེགས་པས་རབ་ཏུ་མཁྱེན་ཏོ། །མཁྱེན་ནས་ཀྱང་དེ་བཞིན་དུ་འདོམས་ཤིང་དེ་བཞིན་དུ་རྗེས་སུ་སྟོན་ཏོ། །དེ་ལྟར་ཤཱ་རིའི་བུ་དེ་བཞིན་གཤེགས་པའི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་།
སྙོམས་པར་འཇུག་པའི་ཀུན་ནས་ཉོན་མོངས་པ་དང་། རྣམ་པར་བྱང་བ་དང་། ལྡང་བ་མཁྱེན་པའི་སྟོབས་དེ་ནི་མཐའ་ཡས་མུ་མེད་དེ། ནམ་མཁའ་དང་མཚུངས་ཤིང་མཉམ་མོ། །བྱང་ཆུབ་སེམས་དཔའ་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག །
སོམ་ཉི་མེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ཅིང་ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ངོ་མཚར་དང་། རྨད་དུ་འདུ་ཤེས་སྐྱེད་དོ། །འདི་ལ་ཆོས་ཉིད་ནི་འདི་ཡིན་ཏེ། དེ་ལ་འདི་སྐད་ཅེས་བྱའོ། །གང་གིས་སེམས་ཅན་ཉོན་མོངས་ཤིང་། །གང་

གིས་སེམས་ཅན་རྣམ་དག་འགྱུར། །དེ་ཡང་དཔའ་བོ་ཆེན་པོས་མཁྱེན། །མཁྱེན་ནས་གཏམ་རྣམས་སྟོན་པར་མཛད། །གང་དུ་མ་རིག་སྐྱེ་འགྱུར་བ། །ཉོན་མོངས་རྒྱུ་ནི་ཚུལ་བཞིན་མིན། །དེ་ཡི་རྐྱེན་ནི་འདུ་བྱེད་དེ། །སྡུག་བསྔལ་རབ་ཏུ་སྐྱེ་བར་འགྱུར། །
སྲིད་པའི་ཡན་ལག་སྐྱེད་པ་ཡི། །ཐམས་ཅད་རྩ་བ་ཚུལ་བཞིན་མིན། །དེ་ཉིད་སངས་རྒྱས་རབ་མཁྱེན་ནས། །དེ་བཞིན་དུ་ཡང་སྟོན་པར་མཛད། །ལས་ཀྱི་རྩ་བ་ཉོན་མོངས་པ། །མི་མཁས་མངོན་པར་འདུ་བྱེད་དེ། །སྡུག་བསྔལ་འབྱུང་བར་འགྱུར་བའི་བར། །དེ་ཡི་རྐྱེན་ནི་
རྣམ་པར་ཤེས། །གང་གིས་སེམས་ཅན་དག་འགྱུར་པ། །རྒྱུ་གཉིས་དང་ནི་རྐྱེན་གཉིས་ཏེ། །གཞན་ལས་རྗེས་སུ་འཐུན་སྒྲ་དང་། མང་དུ་ཚུལ་བཞིན་ལྟ་བའོ། །ཚུལ་བཞིན་རྒྱུ་ནི་ཞི་གནས་ཏེ། །ལྷག་མཐོང་ཡང་ནི་རྐྱེན་ཡིན་ནོ། །སེམས་ཅན་གང་གིས་འགྲོར་
འགྱུར་བ། །དེ་ཡང་འདྲེན་པས་རབ་ཏུ་མཁྱེན། །ཚུལ་ཁྲིམས་ལ་ནི་རྣལ་འབྱོར་གནས། །ཆོས་རྣམས་སྟོང་པར་རབ་ཏུ་རྟོག །ཐར་པའི་ལམ་ནི་བསྒོམས་པས་ན། །སྲིད་པ་དོག་ལས་ཐར་བར་འགྱུར། །དེ་དག་སངས་རྒྱས་རབ་མཁྱེན་ནས། །རྣམ་སྦྱོང་སྐྱེས་པ་བུད་མེད་
ལ། །སྟོང་པ་ཉིད་དང་མཚན་མེད་དང་། །རྣམ་པར་ཐར་པ་རབ་ཏུ་སྟོན། །བསམ་གཏན་ལ་ནི་སྙོམས་ཞུགས་པ། །རང་རྒྱལ་དང་ནི་ཉན་ཐོས་རྣམས། །དེ་དག་རྣམས་ཀྱང་དོག་པར་བཤད། །དེ་ནི་འགྲན་ཟླ་ཡོད་པར་གསུངས། །སངས་རྒྱས་བསམ་གཏན་རྣམ་ཐར་
ལ། །དགྲ་དང་བཅས་མེད་དོག་པ་མེད། །སངས་རྒྱས་ཀྱི་ནི་སྟོབས་བདུན་པ། །ཕ་རོལ་རྒོལ་བས་ཐུལ་བར་དཀའ། །ཤཱ་རིའི་བུ་འདི་ནི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བདུན་པ་སྟེ་སྟོབས་དེ་དང་ལྡན་པས་དེ་བཞིན་གཤེགས་པ་ཁྱུ་མཆོག་གི་གནས་སུ་ཞལ་གྱིས་འཆེ་
བ་ནས་སུས་ཀྱང་འཇིག་རྟེན་འདིར་ཆོས་དང་འཐུན་པར་ཞེས་བྱ་བའི་བར་དུའོ། །དེ་ལ་དེ་བཞིན་གཤེགས་པའི་སྔོན་གྱི་གནས་རྗེས་སུ་དྲན་པ་མངོན་སུམ་དུ་བྱེད་པ་མཁྱེན་པའི་སྟོབས་གང་ཞེ་ན། འདི་ལ་ཤཱ་རིའི་བུ་དེ་བཞིན་གཤེགས་པས་བླ་ན་མེད་པའི་ཡེ་ཤེས་ཀྱིས་བདག་དང་སེམས་ཅན་གཞན་

རྣམས་དང་། གང་ཟག་གཞན་དག་གི་སྔོན་གྱི་གནས་རྣམ་པ་དུ་མ་རྗེས་སུ་དྲན་ནོ། །འདི་ལྟ་སྟེ། སྐྱེ་བ་གཅིག་གམ། །གཉིས་སམ། །གསུམ་མམ། བཞིའམ། ལྔ་འམ། བཅུ་འམ། ཉི་ཤུ་འམ། སུམ་ཅུ་འམ། བཞི་བཅུ་འམ། ལྔ་བཅུ་འམ། སྐྱེ་བ་བརྒྱ་འམ། སྐྱེ་བ་སྟོང་ངམ།
སྐྱེ་བ་བརྒྱ་སྟོང་ནས་སྐྱེ་བ་བྱེ་བ་ཁྲག་ཁྲིག་བརྒྱ་སྟོང་གི་བར་དུ་རྗེས་སུ་དྲན་ནོ། །འཇིག་པའི་བསྐལ་པའམ། འཆགས་པའི་བསྐལ་པའམ། འཇིགས་པ་དང་། འཆགས་པའི་བསྐལ་པ་འམ། འཇིག་པའི་བསྐལ་པ་དུ་མ་འམ། འཆགས་པའི་བསྐལ་པ་དུ་མ་འམ། འཇིག་པ་དང་། འཆགས་
པའི་བསྐལ་པ་དུ་མ་ཞིག་ནང་སྔོན་ཆེ་གེ་མོ་ཞིག་ཏུ་བྱུང་སྟེ། མིང་ནི་འདི་ཞེས་བྱ། རུས་ནི་འདི་ཞེས་བྱ། རིགས་ནི་འདི་ཞེས་བྱ། ཟས་ནི་འདི་ལྟ་བུ་ཞིག་ཟ་ཟ། ཁ་དོག་ནི་འདི་ལྟ་བུ། མཚན་མ་ནི་འདི་ལྟ་བུ། དབྱིབས་ནི་འདི་ལྟ་བུ། ཚེ་ནི་འདི་ཙམ་ཞིག་ཐུབ། ཡུན་ནི་འདི་སྲིད་ཅིག་གནས་
གནས། བདེ་བ་དང་སྡུག་བསྔལ་ནི་འདི་ལྟ་བུ་ཞིག་མྱོང་སྟེ། བདག་དེ་ནས་ཤི་འཕོས་ནས་ཆེ་གེ་མོ་ཞིག་ཏུ་སྐྱེས་སོ། །བདག་དེ་ནས་ཤི་འཕོས་ནས་འདིར་སྐྱེས་སོ། །ཞེས་འདི་ལྟ་བུའི་རྣམ་པ་དང་བཅས། ཡུལ་ཕྱོགས་དང་བཅས། གཞི་ཅི་ལས་གྱུར་པ་དང་བཅས་པར་བདག་དང་གཞན་གྱི་སྔོན་གྱི་
གནས་དུ་མ་རྗེས་སུ་དྲན་ནོ། །སེམས་ཅན་གང་གི་སྔོན་གྱི་རྒྱུ་ཇི་ལྟ་བུ་དང་། རྒྱུ་གང་གིས་སེམས་ཅན་དུ་གྱུར་པའི་རྒྱུ་དེ་ཡང་དེ་བཞིན་གཤེགས་པས་རབ་ཏུ་མཁྱེན་ཏེ། མཁྱེན་ནས་ཀྱང་དེ་བཞིན་དུ་ཆོས་སྟོན་ཏོ། །འདས་པའི་སེམས་ཅན་ཐམས་ཅད་ཀྱི་འདས་པའི་སེམས་ཅན་གྱི་རྒྱུད་ཀྱང་རབ་ཏུ་
མཁྱེན་ཏོ། །སེམས་གང་གི་འོག་ཏུ་གང་ལ་དམིགས་པའི་སེམས་སྐྱེས་པ་དང་། དམིགས་པ་གང་མ་ཚང་བས་འགགས་པ་དེ་ཐམས་ཅད་ཀྱང་དེ་བཞིན་གཤེགས་པས་རབ་ཏུ་མཁྱེན་ཏོ། །དེ་ལྟར་ཤཱ་རིའི་བུ་གང་སེམས་ཅན་གཅིག་གི་སེམས་གཅིག་ནས་གཅིག་ཏུ་སེམས་འདི་ལྟ་བུ་ཞིག་
གི་འོག་ཏུ་སེམས་འདི་ལྟ་བུ་ཞིག་བྱུང་ངོ་། །ཞེས་བྱ་བ་དེ་ནི་བསྐལ་པ་གང་གཱའི་ཀླུང་གི་བྱེ་མ་སྙེད་དུ་ཡང་ཚིག་གིས་བཤད་པས་སྟོན་མི་ནུས་ཏེ། དེ་བཞིན་དུ་སེམས་ཅན་ཐམས་ཅད་ཀྱི་ཡང་ཐམས་ཅད་དེ་བཞིན་དུ་དེ་བཞིན་གཤེགས་པས་རབ་ཏུ་མཁྱེན་ཏོ། །ཐ་མའི་མཐའི་བར་གྱི་བསྐལ་པར་

དེ་བཞིན་གཤེགས་པས་སེམས་ཅན་དག་གི་སེམས་རྣམས་བཤད་ཀྱང་དེ་བཞིན་གཤེགས་པའི་ཡེ་ཤེས་མཐར་ཐུག་པར་མི་འགྱུར་རོ། །དེ་ལྟར་ཤཱ་རིའི་བུ་དེ་བཞིན་གཤེགས་པའི་སྔོན་གྱི་གནས་རྗེས་སུ་དྲན་པ་མངོན་སུམ་དུ་བྱེད་པ་མཁྱེན་པའི་སྟོབས་ནི་བསམ་གྱིས་མི་ཁྱབ།
མཚུངས་པ་མེད། ཚད་མེད། གྲངས་མེད། བརྗོད་དུ་མེད་དེ་དེའི་མཐའི་གནས་ནི་བདེ་བར་བསྟན་མི་ནུས་སོ། །སངས་རྒྱས་ཀྱི་ཁྱུ་མཆོག་ཏུ་གྱུར་པས་དེ་བཞིན་གཤེགས་པ་སེམས་ཅན་དེ་དག་ལ་ཀྱེ་སེམས་ཅན་རྣམས་དགེ་བའི་རྩ་བ་དེ་དང་དེ་སངས་རྒྱས་ལ་བསྐྱེད་པའམ། ཉན་ཐོས་ལ་བསྐྱེད་པའམ། །
རང་སངས་རྒྱས་ལ་བསྐྱེད་པའམ། ཆོས་ལ་བསྐྱེད་པ་དེ་དག་དྲན་པར་གྱིས་ཤིག་ཅེས་དྲན་པར་མཛད་དོ། །འདི་ལྟ་སྟེ། དེ་དག་ཀྱང་སངས་རྒྱས་ཀྱི་མཐུས་དྲན་པར་འགྱུར་རོ། །དེ་བཞིན་གཤེགས་པས་དེ་དག་ལ་དགེ་བའི་རྩ་བ་ལ་དམིགས་པ་དེ་ལས་ཆོས་འདི་ལྟ་འདི་ལྟ་བུར་སྟོན་ཏེ། །ཅི་ནས་
སེམས་ཅན་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཞིང་མོས་པ་ཇི་ལྟ་བ་བཞིན་དུ་ལ་ལ་ནི་ཉན་ཐོས་ཀྱི་ཐེག་པས། ལ་ལ་ནི་རང་སངས་རྒྱས་ཀྱི་ཐེག་པས་འབྱུང་བར་འགྱུར་རོ། །ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
སྐྱེད་དོ། །དེ་ལྟར་ཤཱ་རིའི་བུ་དེ་བཞིན་གཤེགས་པའི་སྔོན་གྱི་གནས་རྗེས་སུ་དྲན་པ་མངོན་སུམ་དུ་བྱེད་པ་ཤེས་པའི་སྟོབས་ནི་མཐའ་ཡས་མུ་མེད་དེ་ནམ་མཁའ་དང་མཚུངས་ཤིང་མཉམ་མོ། །བྱང་ཆུབ་སེམས་དཔའ་དེ་ཐོས་ནས། མངོན་པར་དད། ཡིད་ཆེས། །རབ་ཏུ་རྟོག །སོམ་ཉི་མེད། ཐེ་
ཚོམ་མི་ཟ་བ་ནས། ནམ་མཁའ་ལྟ་བུར་བསམ་གྱིས་མི་ཁྱབ་པའི་བར་དུའོ། །བཅོམ་ལྡན་འདས་ཀྱིས་དེ་སྐད་གསུངས་ཏེ། བདེ་བར་གཤེགས་པས་དེ་སྐད་བཀའ་སྩལ་ནས་སྟོན་པ་ཡང་འདི་སྐད་གསུང་ངོ་། །བདག་གི་དང་ནི་དེ་བཞིན་གཞན་དག་གི། འཇིག་རྟེན་སྒྲོན་མས་སྔོན་གྱི་དྲན་པ་ནི། །
བསྐལ་པ་བྱེ་བ་ཁྲག་ཁྲིག་མཐའ་ཡས་པ། །སྐྱུ་རུ་ར་ལྔ་ལག་མཐིལ་བཞག་པ་བཞིན། །མིང་རུས་དེ་བཞིན་ཁ་དོག་རྣམ་པར་རྟོག །ཚེ་དང་གནས་དང་འཆི་འཕོ་འགྲོ་བ་དང་། །གང་གི་རྒྱུ་ལ་སེམས་ཅན་བརྩོན་ལྡན་པ། །དུས་མཁྱེན་པ་ནི་དེ་ལ་ཆོས་ཀྱང་འཆད། །འགྲོ་བ་རྣམས་ཀྱི་སེམས་

དང་སེམས་བྱུང་ཆོས། །གང་དག་འདས་པ་མཐའ་ཡས་མུ་མེད་པ། །གང་གི་འོག་ཏུ་སེམས་གང་བྱུང་བ་ཀུན། །རྒྱལ་བ་ཡེ་ཤེས་ཆེན་པོ་མངའ་བས་མཁྱེན། །སེམས་ཅན་གཅིག་གི་སེམས་རྒྱུ་སྔོན་འདས་པ། །བདེ་བར་གཤེགས་པས་རབ་ཏུ་མཁྱེན་པ་ན་པ་ནི། །བསྐལ་པ་གང་གཱའི་ཀླུང་
གི་བྱེ་སྙེད་དུ། །བཤད་ཀྱང་དེ་ཡི་མཐའ་མར་ཕྱིན་མི་འགྱུར། །སྔོན་གྱི་སྤྱོད་པ་ཇི་སྙེད་དེ་དག་ནི། །ཕྱི་མའི་མཐའ་ཡི་བར་དུ་ངས་བཤད་ཀྱང་། །མཚུངས་པ་མེད་པའི་ཡེ་ཤེས་མི་ཟད་དེ། །བཅོམ་ལྡན་ཡེ་ཤེས་རྒྱ་མཚོ་འདི་འདྲའོ། །སྔོན་གྱི་རྒྱལ་ལ་བསྟི་སྟང་གང་བྱས་ཤིང་། །
སེམས་ཅན་གང་དག་དགེ་བའི་བསམ་གྱུར་པ། །སངས་རྒྱས་རྫུ་འཕྲུལ་སྟོབས་ཀྱི་ཤུགས་ལ་གནས། །སྔོན་དག་དགེ་བ་བྱས་པ་རྣམས་ཀྱང་དྲན། །སྔོན་ནི་བསོད་ནམས་ཅི་འདྲ་བྱས་པ་རྣམས། །དེ་དག་རྣམས་ཀྱང་སྟོན་པའི་མཐུས་དྲན་ཏེ། །དེ་དག་དྲན་ནས་གནས་ནི་གསུམ་ལ་འཁོད། །
ཐར་པའི་གནས་ལས་ཕྱིར་ཡང་མི་ལྡོག་འགྱུར། །བདེ་གཤེགས་སྔོན་གྱི་སྦྱོར་བ་མཐའ་ཡས་ཏེ། །སེམས་ཅན་ཐམས་ཅད་ཀྱིས་ནི་བསམ་མི་ནུས། །མཐའ་ཡས་གྲགས་པའི་སྟོབས་ནི་བརྒྱད་པ་ལ། །རྒྱལ་སྲས་བདག་ཉིད་ཆེན་པོ་དད་པར་འགྱུར། །ཤཱ་རིའི་བུ་འདི་ནི་དེ་བཞིན་
གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བརྒྱད་པ་སྟེ། སྟོབས་དེ་དང་ལྡན་པས་ཞེས་བྱ་བ་ནས་ཆོས་དང་འཐུན་པར་ཞེས་བྱ་བའི་བར་དུའོ། །དེ་ལ་དེ་བཞིན་གཤེགས་པའི་ལྷའི་མིག་རྗེས་སུ་དྲན་པ་མངོན་སུམ་དུ་བྱེད་པ་མཁྱེན་པའི་སྟོབས་གང་ཞེ་ན། འདི་ལ་ཤཱ་རིའི་བུ་དེ་བཞིན་
གཤེགས་པས་བླ་ན་མེད་པའི་ཡེ་ཤེས་དང་། མིའི་ལས་ཤིན་ཏུ་འདས་པའི་ལྷའི་མིག་རྣམ་པར་དག་པས་སེམས་ཅན་རྣམས་འཆི་འཕོ་བ་དང་། སྐྱེ་བ་དང་། བཟང་པོ་དང་། ངན་པ་དང་། ཁ་དོག་མཛེས་པ་དང་། ཁ་དོག་མི་སྡུག་པ་དང་། བདེ་འགྲོར་འགྲོ་བ་དང་། ངན་འགྲོར་འགྲོ་བ་
རྣམས་གཟིགས་སོ། །སེམས་ཅན་འདི་དག་ནི་ལུས་ཀྱིས་ཉེས་པར་སྤྱོད་པ་དང་ལྡན། ངག་གིས་ཉེས་པར་སྤྱོད་པ་དང་ལྡན། ཡིད་ཀྱིས་ཉེས་པར་སྤྱོད་པ་དང་ལྡན་པ། འཕགས་པ་ལ་སྐུར་པ་འདེབས་པ། ལོག་པར་ལྟ་བ་དག་སྟེ། དེ་དག་ལོག་པར་ལྟ་བའི་ལས་ཡང་དག་པར་བླངས་

པའི་རྒྱུས་ལུས་ཞིག་སྟེ། ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བར་སྐྱེའོ། །དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུའང་དེ་བཞིན་ནོ། །ཡང་སེམས་ཅན་འདི་དག་ནི་ལུས་ཀྱིས་ལེགས་པར་སྤྱོད་པ་དང་ལྡན། ངག་གིས་
ལེགས་པར་སྤྱོད་པ་དང་ལྡན། ཡིད་ཀྱིས་ལེགས་པར་སྤྱོད་པ་དང་ལྡན་ཏེ། འཕགས་པ་རྣམས་ལ་སྐུར་པ་མི་འདེབས་པ་ཡང་དག་པར་ལྟ་བ་སྟེ། དེ་དག་ཡང་དག་པར་ལྟ་བ་ཡང་དག་པར་བླངས་པའི་རྒྱུས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷར་སྐྱེའོ། །ཞེས་སེམས་
ཅན་རྣམས་ཀྱི་ལས་ཇི་ལྟར་བསགས་པ་རྣམས་རབ་ཏུ་མཁྱེན་ཏོ། །དེ་ལ་དེ་བཞིན་གཤེགས་པའི་ལྷའི་མིག་དེ་ནི་ཕྱོགས་བཅུའི་སངས་རྒྱས་ཀྱི་ཞིང་ནམ་མཁའི་མཐའ་ཆོས་ཀྱི་དབྱིངས་ཚད་མེད་པ། བརྗོད་དུ་མེད་པ། གང་གཱའི་ཀླུང་གི་བྱེ་མ་ལས་ཀྱང་ཤིན་ཏུ་འདས་པ་ཐམས་ཅད་ན་སངས་རྒྱས་ཀྱི་
ཞིང་གང་ཇི་སྙེད་སྣང་བར་གྱུར་པ་དེ་དག་ཐམས་ཅད་ནི་འཚིག་པ་དང་། འཇིག་པ་དང་། འཆགས་པར་གཟིགས་སོ། །སེམས་ཅན་གང་དག་ཁ་ཅིག་སྣང་བར་གྱུར་པ་དེ་དག་ཐམས་ཅད་ནི་འཆི་འཕོ་བ་དང་སྐྱེ་བར་གཟིགས་སོ། །བྱང་ཆུབ་སེམས་དཔའ་གང་དག་ཁ་ཅིག་སྣང་བར་གྱུར་པ་དེ་
དག་ཐམས་ཅད་ནི་དགའ་ལྡན་གནས་ནས་འཆི་འཕོ་བ་དང་། མའི་རུམ་དུ་འཇུག་པ་དང་། བཙའ་བ་དང་གོམ་པ་བདུན་འདོར་བ་དང་། བཙུན་མོའི་འཁོར་གྱི་ནང་དུ་འཇུག་པ་དང་། མངོན་པར་འབྱུང་བར་གཟིགས་སོ། །སངས་རྒྱས་བཅོམ་ལྡན་འདས་གང་དག་ཁ་ཅིག་སྣང་བར་གྱུར་པ་དེ་
དག་ཐམས་ཅད་ནི་བྱང་ཆུབ་མངོན་པར་རྫོགས་པར་འཚང་རྒྱ་བར་གཟིགས་སོ། །ཆོས་ཀྱི་འཁོར་ལོ་རབ་ཏུ་སྐོར་བ་དང་། ཚེའི་འདུ་བྱེད་འདོར་བ་དང་། ཡོངས་སུ་མྱ་ངན་ལས་འདའ་བར་ཡང་གཟིགས་སོ། །ཉན་ཐོས་གང་དག་ཁ་ཅིག་སྣང་བར་གྱུར་པ་དེ་དག་ཐམས་ཅད་ནི་ཤིན་ཏུ་ཡོངས་སུ་མྱ་ངན་ལས་
འདས་པས་ཡོངས་སུ་མྱ་ངན་ལས་འདའ་བར་གཟིགས་སོ། །རང་སངས་རྒྱས་གང་དག་ཁ་ཅིག་སྣང་བར་གྱུར་པ་དེ་དག་ཐམས་ཅད་ནི་རྫུ་འཕྲུལ་སྟོན་ཅིང་ཡོན་སྦྱོང་བར་གཟིགས་སོ། །སེམས་ཅན་གང་དག་སྣང་བར་མ་གྱུར་པ་ཕྱི་རོལ་གྱི་དྲང་སྲོང་མངོན་པར་ཤེས་པ་ལྔ་དང་ལྡན་པ་རྣམས་ཀྱི་མིག་གི་ལམ་དུ་མི་འགྲོ་བ་དང་།

ཉན་ཐོས་དང་། རང་སངས་རྒྱས་དང་། །བྱང་ཆུབ་སེམས་དཔའ་རྣམས་ཀྱིས་ཀྱང་མཐོང་བར་མི་འགྱུར་བ་དེ་དག་དེ་བཞིན་གཤེགས་པའི་ལྷའི་མིག་གིས་གཟིགས་སོ། །ཡང་དེ་བཞིན་གཤེགས་པས་ཤིང་རྟའི་འཕང་ལོའི་ཚད་ཙམ་ལ་སྣང་བར་མ་གྱུར་པའི་སེམས་ཅན་རྣམས་གཟིགས་པ་དེ་དག་
ནི་ཤིན་ཏུ་མང་གི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ལྷ་དང་། མི་རྣམས་ནི་དེ་ལྟ་མ་ཡིན་ཏེ། དེ་ལྟར་མི་སྣང་བར་གྱུར་པའི་སེམས་ཅན་གྱི་ཁམས་ཀྱང་ཚད་མེད་དོ། །འདི་ལྟར་ཤཱ་རིའི་བུ་དེ་བཞིན་གཤེགས་པ་ནི་ལྷའི་མིག་གིས་སངས་རྒྱས་ཀྱི་ཞིང་ན་སེམས་ཅན་
གང་སངས་རྒྱས་ཀྱིས་འདུལ་བར་འགྱུར་ཞེས་སེམས་ཅན་གྱི་ཁམས་ལ་གཟིགས་ཏེ། སེམས་ཅན་ཇི་ཙམ་སངས་རྒྱས་ཀྱིས་འདུལ་བར་འགྱུར་བ་དེ་དག་གི་མདུན་ན་དེ་བཞིན་གཤེགས་པ་བཞུགས་ཤིང་སེམས་ཅན་དེ་དག་འདུལ་ཡང་སེམས་ཅན་གཞན་གྱིས་མི་ཤེས་སོ། །དེ་ལྟར་ཤཱ་རིའི་བུ་དེ་བཞིན་
གཤེགས་པའི་ལྷའི་མིག་རྗེས་སུ་དྲན་པ་མངོན་སུམ་དུ་བྱེད་པ་མཁྱེན་པའི་སྟོབས་ནི་མཐའ་ཡས་མུ་མེད་དེ། ནམ་མཁའ་དང་མཚུངས་ཤིང་མཉམ་མོ། །བྱང་ཆུབ་སེམས་དཔས་དེ་ཐོས་ནས་མངོན་པར་དད་པ་ནས། ནམ་མཁའ་ལྟ་བུར་བསམ་གྱིས་མི་ཁྱབ་པའི་ཕྱིར་ཞེས་བྱ་བའི་བར་དུའོ། །
དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱ་ཆེར་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །བདེ་བར་གཤེགས་པའི་ལྷ་མིག་དྲི་མེད་དེ། །བསྐལ་པ་བྱེ་བར་དགེ་བའི་ལས་ཀྱིས་སྦྱངས། །དེས་ནི་རྒྱལ་བས་ཕྱོགས་བཅུ་སངས་རྒྱས་ཞིང་། །རྒྱ་ཆེན་བསམ་གྱིས་
མི་ཁྱབ་རྣམས་ཀྱང་གཟིགས། །འབྱུང་བ་དང་ནི་འཇིག་པ་ཇི་སྙེད་པ། །ཁ་ཅིག་མེ་ཡིས་འཁོར་ཅིང་སེམས་ཅན་གནས། །ཁ་ཅིག་སངས་རྒྱས་ལྡན་ཞིང་ཁ་ཅིག་སྟོང་། །ཐམས་ཅད་རང་བྱུང་གི་ནི་སྤྱན་གྱིས་གཟིགས། །སེམས་ཅན་ཁམས་ནི་རྒྱ་ཆེན་བསམ་མི་ཁྱབ། །གཟུགས་
ཅན་གཟུགས་མེད་གང་དག་ཇི་སྙེད་དང་། །གང་དག་ངན་འགྲོར་ལྟུང་དང་བདེར་འགྲོ་བ། །ཐམས་ཅད་རང་བྱུང་གི་ནི་སྤྱན་གྱིས་གཟིགས། །སངས་རྒྱས་བྱེ་བ་མང་པོ་གང་བཞུགས་དང་། །རང་བྱུང་འདྲེན་པ་མྱ་ངན་གང་འདས་དང་། །རང་རྒྱལ་གང་དང་ཉན་ཐོས་གང་ཡོད་པ། །

ཐམས་ཅད་རང་བྱུང་གི་ནི་སྤྱན་གྱིས་གཟིགས། །བྱང་ཆུབ་སེམས་དཔའ་སྲོག་ཆགས་ཕན་འདོད་པ། །གང་དག་བྱང་ཆུབ་སྤྱོད་པ་མཆོག་སྤྱོད་ཅིང་། །ལ་ལ་གཞི་མེད་གནས་ནི་རྟོག་གྱུར་པ། །ཐམས་ཅད་རང་བྱུང་འདྲེན་པ་དག་གིས་གཟིགས། །གང་གིས་སྲོག་
ཆགས་ཤིན་ཏུ་ཕྲ་མཐོང་བ། །བདེ་གཤེགས་མིག་ནི་འདི་འདྲ་དྲི་མ་མེད། །མིག་སྟོབས་བསམ་གྱིས་མི་ཁྱབ་དགུ་པ་སྟེ། །རྒྱལ་སྲས་དེས་པ་རྣམས་ནི་མངོན་པར་དད། །ཤ་རིའི་བུ་འདི་ནི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་དགུ་པ་སྟེ། སྟོབས་དེ་དང་
ལྡན་པས་ཁྱུ་མཆོག་གི་གནས་སུ་ཞལ་གྱིས་འཆེ་ཞིང་འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་པ་ནས། སུས་ཀྱང་འཇིག་རྟེན་འདིར་ཆོས་དང་འཐུན་པ་ཞེས་བྱ་བའི་བར་དུའོ། །དེ་ལ་དེ་བཞིན་གཤེགས་པའི་ཟག་པ་ཟད་པ་མངོན་སུམ་དུ་བྱེད་པ་མཁྱེན་པའི་སྟོབས་གང་ཞེ་ན། འདི་ལ་
ཤཱ་རིའི་བུ་དེ་བཞིན་གཤེགས་པ་བླ་ན་མེད་པའི་དེ་བཞིན་གཤེགས་པའི་ཡེ་ཤེས་ཀྱི་སྟོབས་ཀྱིས་ཟག་པ་ཐམས་ཅད་ཟད་པས་བདག་སྐྱེ་བ་ནི་ཟད། ཚངས་པར་སྤྱོད་པ་ལ་ནི་བསྟེན། བྱ་བ་ནི་བྱས་ཏེ། འདི་ལས་སྲིད་པ་གཞན་མི་ཤེས་སོ་ཞེས་ཟག་པ་མེད་པ། སེམས་རྣམ་པར་གྲོལ་བ། རང་གི་མངོན་
པར་ཤེས་པས་མངོན་སུམ་དུ་བྱས་ནས་རྫོགས་པར་བྱས་ཏེ་གནས་སོ། །དེ་ལ་དེ་བཞིན་གཤེགས་པའི་ཟག་པ་ཟད་པ་མཁྱེན་པའི་སྟོབས་དེ་ནི་བག་ཆགས་ཀྱི་མཚམས་སྦྱོར་བ་ཐམས་ཅད་ཡང་དག་པར་བཅོམ་པའོ། །ཉན་ཐོས་ཀྱི་ཐེག་པ་པའི་ཟག་པ་ཟད་པ་ནི་ཚད་དུ་བྱས་པའི་བག་ཆགས་ཡང་དག་
པར་བཅོམ་པའོ། །རང་སངས་རྒྱས་ཀྱི་ཐེག་པ་ཟག་པ་ཟད་པ་ནི་ཚད་ཡོད་པ་སྟེ། སྙིང་རྗེ་ཆེན་པོ་དང་བྲལ་བ། སྤོབས་པ་དང་བྲལ་བའོ། །དེ་བཞིན་གཤེགས་པའི་ཟག་པ་ཟད་པ་ནི་རྣམ་པ་ཐམས་ཅད་ཀྱི་མཆོག་དང་ལྡན་པ་བག་ཆགས་ཀྱི་མཚམས་སྦྱོར་བ་ཐམས་ཅད་ཡང་དག་པར་
བཅོམ་པ། སྙིང་རྗེ་ཆེན་པོས་ཀུན་ཏུ་བཟུང་བ། མི་འཇིགས་པ་དང་། སྤོབས་པ་ལ་ལྟ་བ་འཇིག་རྟེན་ཐམས་ཅད་ཀྱིས་ཟིལ་གྱིས་མི་ནོན་པ་སྟེ། སྐད་ཅིག་གཅིག་དང་ལྡན་པའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ལ་ལས་ཀྱི་བག་ཆགས་མེད། ཉོན་མོངས་པའི་བག་ཆགས་

མེད། སྤྱོད་ལམ་འཁྲུལ་པའི་བག་ཆགས་མེད་དོ། །འདི་ལྟ་སྟེ། །ཤཱ་རིའི་བུ་ནམ་མཁའ་ཡོངས་སུ་དག་པས་རྡུལ་དང་དུ་བའི་འཁྲུག་པ་དང་ལྷན་ཅིག་ཏུ་མི་གནས་པ་དེ་བཞིན་དུ་ཤཱ་རིའི་བུ་དེ་བཞིན་གཤེགས་པའི་ཟག་པ་ཟད་པ་མཁྱེན་པའི་སྟོབས་ཀྱང་ཉོན་མོངས་པའི་བག་ཆགས་ཐམས་
ཅད་དང་ལྷན་ཅིག་ཏུ་མི་གནས་སོ། །དེ་ཟག་པ་ཟད་པར་མཁྱེན་པ་དེ་ལྟ་བུ་ལ་རབ་ཏུ་གནས་ནས་ཟག་པ་དང་བཅས་པ་ལེན་པ་དང་བཅས་པའི་སེམས་ཅན་རྣམས་ལ་ཟག་པ་ཟད་པར་བྱ་བའི་ཕྱིར་ཆོས་སྟོན་ཏོ། །ལེན་པ་སྤང་བའི་ཕྱིར་ཆོས་སྟོན་ཏོ། །ཀྱེ་མ་སེམས་ཅན་རྣམས་ནི་ཡང་དག་པ་
མ་ཡིན་པ་ཀུན་རྟོག་པ་ལས་བྱུང་སྟེ། ཟག་པ་དང་། ལེན་པ་རྣམས་མི་བསྐྱེད་པའི་ཕྱིར་ཡང་དག་པ་ཇི་ལྟ་བ་བཞིན་དུ་ཁྱེད་ཀྱིས་རབ་ཏུ་རྟོགས་ཤིག་ཅེས། དེ་དག་ལ་དེ་བཞིན་གཤེགས་པས་དཔེ་དང་ཚུལ་གྱིས་ཅི་ནས་ཀྱང་ཟག་པ་རྣམས་ཡང་དག་པ་མ་ཡིན་པའོ་ཞེས་ཡང་དག་པར་
ཇི་ལྟ་བ་བཞིན་རབ་ཏུ་ཤེས་པར་འགྱུར་ཞིང་ཤེས་ནས་ཀྱང་ཆོས་གང་ཡང་མི་ལེན་ཏེ། ལེན་པ་མེད་པར་ཡོངས་སུ་མྱ་ངན་ལས་འདའ་བར་འགྱུར་བ་དེ་ལྟ་བུ་དེ་ལྟ་བུར་ཆོས་སྟོན་ཏོ། །དེ་ལྟར་ཤཱ་རིའི་བུ་དེ་བཞིན་གཤེགས་པས་སེམས་ཅན་ཐམས་ཅད་ཀྱི་ཟག་པ་རྣམས་རབ་ཏུ་མཁྱེན་ཏོ། །
ཟག་པ་ཀུན་འབྱུང་བ་དང་། ཟག་པ་འགག་པ་དང་། ཟག་པ་འགག་པར་འགྱུར་བའི་ལམ་ཡང་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ་མཁྱེན་ནས་ཀྱང་དེ་བཞིན་དུ་ཆོས་སྟོན་ཏོ། །བྱང་ཆུབ་སེམས་དཔས་དེ་བཞིན་གཤེགས་པའི་ཟག་པ་ཟད་པ་མངོན་སུམ་དུ་བྱེད་པ་མཁྱེན་པའི་
སྟོབས་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག །སོམ་ཉི་མེད་ཅིང་ཐེ་ཚོམ་མི་ཟ་བ་ནས་ངོ་མཚར་དང་རྨད་ཀྱི་བར་དུ་འདུ་ཤེས་སྐྱེད་དོ། །འདི་ལ་ཆོས་ཉིད་ནི་འདི་ཡིན་ཏེ། དེ་ལ་འདི་སྐད་ཅེས་བྱའོ། །འདྲེན་པའི་ཟག་པ་མེད་པའི་ཡེ་ཤེས་ནི། །རྒྱ་ཆེན་སྒྲིབ་མེད་དག་པ་ཚད་
མེད་དེ། །སྟོབས་བཅུའི་སྟོབས་ནི་དེ་དང་ལྡན་པས་ན། །ཞི་བའི་བྱང་ཆུབ་མཆོག་འདི་རབ་ཏུ་གསུང་། །ཉན་ཐོས་རྣམས་ཀྱི་ཟག་ཟད་ཡེ་ཤེས་ནི། །བག་ཆགས་མ་བཅོམ་ཚད་དང་ལྡན་པ་ཡིན། །མི་ཡི་དམ་པ་འདྲེན་པ་མཆོག་རབ་ཀྱི། །བག་ཆགས་བཅོམ་ཞིང་ཚད་དང་ལྡན་མ་ཡིན། །

དེ་བཞིན་རང་རྒྱལ་བྱང་ཆུབ་གང་རེག་པ། །དེ་ལ་སྙིང་རྗེ་ཆེ་དང་སྤོབས་པ་མེད། །བཅོམ་ལྡན་འདས་ནི་ཟག་པ་ཡོངས་ཟད་པ། །སྙིང་རྗེ་ཆེ་དང་སྤོབས་པ་ཚད་མེད་དོ། །སངས་རྒྱས་ཟག་ཟད་མཁྱེན་ལ་གནས་ནས་ནི། །འགྲོ་བའི་ཟག་པ་ཡང་དག་མ་ཡིན་ཞིང་། །རིགས་
པའི་གནས་ཀྱི་ཚུལ་འདི་མ་ཤེས་པས། །ཆོས་འདི་ཐམས་ཅད་ལོག་པར་ཞུགས་མཁྱེན་ཏེ། དེ་ལ་རྒྱལ་བ་སྙིང་རྗེ་ཆེར་བསྐྱེད་ནས། །ཆོས་འདི་མི་རྟག་སྟོང་པ་བདག་མེད་ཆོས། །དངོས་མེད་གསོག་སྟེ་མཆོག་ཏུ་ཞི་བ་ཡི། །ས་ལ་རྟོགས་ཤིང་ལྟོས་ཤེས་རབ་ཏུ་སྟོན། །འདི་ལ་
སྐྱེས་བུ་སྲོག་དང་གང་ཟག་དང་། །ཤེད་སྐྱེས་ཤེད་བུ་བྱེད་པ་པོ་ཡང་མེད། །ཆོས་འདི་ཐམས་ཅད་ལོག་པར་ཆགས་པས་ན། །སྟོན་པ་སྙིང་རྗེ་བསྐྱེད་ནས་ཐར་སྟོན་ཀྱང་། །བདེ་བར་གཤེགས་ལ་སྐྱོ་བ་ཡོད་མེད་དེ། །ཡང་དག་ཡེ་ཤེས་ནམས་ཀྱང་ཉམས་པ་མེད། །དེའི་ཕྱིར་
རྒྱལ་བ་རྟག་ཏུ་རྣལ་འབྱོར་སྦྱོར། །འགྲོ་ལ་ཕན་ཕྱིར་ཆོས་རྣམས་རབ་ཏུ་སྟོན། །འདི་ནི་ཕ་རོལ་སྨྲ་བ་འཇོམས་པའི་སྟོབས། །མཐའ་ཡས་ནམ་མཁའ་འདྲ་བ་བཅུ་པ་སྟེ། །མགོན་པོ་སྟོབས་བཅུ་དེ་ལ་གནས་གྱུར་ནས། །མཚུངས་མེད་འཁོར་ལོ་དམ་པ་རབ་ཏུ་བསྐོར། །ཤ་རིའི་བུ་
འདི་ནི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བཅུ་པ་སྟེ། སྟོབས་དེ་དང་ལྡན་པས་དེ་བཞིན་གཤེགས་པ་ཁྱུ་མཆོག་གི་གནས་སུ་ཞལ་གྱིས་འཆེ་ཞིང་འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོག་སྟེ། འཇིག་རྟེན་འདིར་དགེ་སྦྱོང་ངམ། བྲམ་ཟེའི་བར་དུ་
སུས་ཀྱང་ཆོས་དང་འཐུན་པར་རབ་ཏུ་མ་བསྐོར་བ། ཚངས་པའི་འཁོར་ལོ་རབ་ཏུ་བསྐོར་ཏོ། །དེ་ལྟར་ཤ་རིའི་བུ་བྱང་ཆུབ་སེམས་དཔའ་དེ་བཞིན་གཤེགས་པའི་ཡོན་ཏན་བསམ་གྱིས་མི་ཁྱབ་པའི་ཕྱིར་དེ་བཞིན་གཤེགས་པའི་སྟོབས་རྣམས་ལ་མངོན་པར་དད། ཡིད་ཆེས། རབ་
ཏུ་རྟོག་པ་ནས་ངོ་མཚར་དང་། རྨད་ཀྱི་བར་དུ་འདུ་ཤེས་སྐྱེད་དོ།། །།བམ་པོ་དྲུག་པ། ཡང་ཤཱ་རིའི་བུ་ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས་

རབ་ཏུ་རྟོག་སོམ་ཉི་མི་བྱེད། ཐེ་ཚོམ་མི་ཟ་བ་ནས། ངོ་མཚར་དང་། རྨད་ཀྱི་བར་དུ་འདུ་ཤེས་སྐྱེད་ཅེ་ན། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་ནི་བཞི་པོ་འདི་དག་སྟེ། མི་འཇིགས་པ་དེ་དག་དང་ལྡན་པས་དེ་བཞིན་གཤེགས་པ་འཁོར་གྱི་ནང་དུ་སེང་གེའི་
སྒྲ་ཡང་དག་པར་སྒྲོག་ཅིང་ཁྱུ་མཆོག་གི་གནས་སུ་ཞལ་གྱིས་འཆེ་སྟེ། དགེ་སྦྱོང་ངམ། བྲམ་ཟེ་འམ། ལྷའམ། བདུད་དམ། སུས་ཀྱང་འཇིག་རྟེན་དུ་ཆོས་དང་འཐུན་པར་མ་བསྐོར་བ་ཚངས་པའི་འཁོར་ལོ་རབ་ཏུ་བསྐོར་ཏོ། །བཞི་གང་ཞེ་ན། འདི་ལ་ཤཱ་རིའི་བུ་དེ་བཞིན་གཤེགས་པ་
བླ་ན་མེད་པའི་དེ་བཞིན་གཤེགས་པའི་ཡེ་ཤེས་དང་ལྡན་པས་འཁོར་གྱི་ནང་དུ་ང་ཡང་དག་པར་རྫོགས་པའི་སངས་རྒྱས་སོ་ཞེས་ཞལ་གྱིས་འཆེ་བ་དེ་ལ་ལྷ་དང་བཅས་པའི་འཇིག་རྟེན་གྱིས་དེ་བཞིན་གཤེགས་པ་ལ་ཁྱོད་ཀྱིས་ཆོས་འདི་མངོན་པར་རྫོགས་པར་སངས་མ་རྒྱས་སོ་ཞེས་ཆོས་དང་འཐུན་པར་
རྒོལ་བར་བྱེད་མི་ནུས་སོ། །དེ་ལ་ཇི་ལྟར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་ཞེ་ན། དེ་བཞིན་གཤེགས་པས་ཆོས་ཐམས་ཅད་མི་མཉམ་པ་མེད་པར་ཡང་དག་པར་མངོན་པར་སངས་རྒྱས་ཏེ། སོ་སོའི་སྐྱེ་བོའི་ཆོས་རྣམས་གང་ཡིན་པ་
དང་། འཕགས་ཆོས་པའི་རྣམས་གང་ཡིན་པ་དང་། སངས་རྒྱས་ཀྱི་ཆོས་རྣམས་གང་ཡིན་པ་དང་། སློབ་པའི་ཆོས་རྣམས་གང་ཡིན་པ་དང་། མི་སློབ་པའི་ཆོས་རྣམས་གང་ཡིན་པ་དང་། རང་སངས་རྒྱས་ཀྱི་ཆོས་རྣམས་གང་ཡིན་པ་དང་། བྱང་ཆུབ་སེམས་དཔའི་ཆོས་རྣམས་
མཉམ་པ་ཉིད་ཀྱིས་མཉམ་པ་གང་ཡིན་པ་དང་། འཇིག་རྟེན་གྱི་ཆོས་རྣམས་གང་ཡིན་པ་དང་། འཇིག་རྟེན་ལས་འདས་པའི་ཆོས་རྣམས་གང་ཡིན་པ་དང་། །ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དང་། ཟག་པ་དང་བཅས་པ་དང་། ཟག་པ་མེད་པ་དང་། འདུས་
བྱས་དང་། འདུས་མ་བྱས་དེ་དག་ཐམས་ཅད་མཉམ་པ་ཉིད་ཀྱིས་མཉམ་པར་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་ཏེ། དེའི་ཕྱིར་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཤེས་བྱའོ། །དེ་ལ་མཉམ་པ་ཉིད་གང་ཞེ་ན། ལྟ་བའི་ངོ་བོ་ཉིད་

ཀྱིས་སྟོང་པ་ཉིད་ཏུ་མཉམ་མོ། །མཚན་མའི་ངོ་བོ་ཉིད་ཀྱིས་མཚན་མ་མེད་པར་མཉམ་མོ། །ཁམས་གསུམ་པའི་ངོ་བོ་ཉིད་ཀྱིས་སྨོན་པ་མེད་པར་མཉམ་མོ། །སྐྱེ་བའི་ངོ་བོ་ཉིད་ཀྱིས་མི་སྐྱེ་བར་མཉམ་མོ། །མངོན་པར་འདུ་བྱེད་པའི་ངོ་བོ་ཉིད་ཀྱིས་མངོན་པར་
འདུ་མི་བྱེད་པར་མཉམ་མོ། །འབྱུང་བའི་ངོ་བོ་ཉིད་ཀྱིས་མི་འབྱུང་བར་མཉམ་མོ། །ཀུན་གཞིའི་ངོ་བོ་ཉིད་ཀྱིས་ཀུན་གཞི་མེད་པར་མཉམ་མོ། །དུས་གསུམ་གྱི་ངོ་བོ་ཉིད་ཀྱིས་ཇི་ལྟ་བ་བཞིན་དུ་མཉམ་མོ། །མ་རིག་པ་དང་། སྲིད་པ་དང་། སྲེད་པའི་ངོ་བོ་ཉིད་ཀྱིས་རིག་པ་དང་།
རྣམ་པར་གྲོལ་བར་མཉམ་མོ། །འཁོར་བའི་ངོ་བོ་ཉིད་ཀྱིས་མྱ་ངན་ལས་འདས་པར་མཉམ་མོ། །དེ་ལྟར་ཤཱ་རིའི་བུ་དེ་བཞིན་གཤེགས་པས་ཆོས་ཐམས་ཅད་མཉམ་པར་མངོན་པར་རྫོགས་པར་སངས་རྒྱས་ཏེ། དེའི་ཕྱིར་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཞེས་བྱའོ། །
དེ་བཞིན་གཤེགས་པའི་མི་འཇིགས་པ་དེ་ཡང་འཁོར་ཐམས་ཅད་ཤེས་པར་བྱེད་པ། འཁོར་ཐམས་ཅད་མགུ་བར་བྱེད་པ། འཁོར་ཐམས་ཅད་ཀྱི་ལུས་སིམ་པར་བྱེད་པ། འཁོར་ཐམས་ཅད་ཀྱི་སེམས་ཚིམ་པ་སྐྱེད་པ། འཁོར་ཐམས་ཅད་དགའ་བ་དང་། རབ་ཏུ་དགའ་བ་དང་དད་པ་སྐྱེད་པ།
སྙིང་རྗེ་ཆེན་པོས་སྦྱོར་བ། དེ་བཞིན་ཉིད་ཀྱིས་མཉམ་པ། དེ་ཁོ་ན་ཉིད། དེ་བཞིན་ཉིད། གཞན་མ་ཡིན་པ་ཉིད། མི་འགྱུར་བ་ཉིད། མི་འཁྲུགས་པ་ཉིད། འབྱུང་བ་མེད་པ་ཉིད། འཇིག་པ་མེད་པ་ཉིད། རྩོད་པ་མེད་པ་ཉིད་དེ་དེ་བཞིན་གཤེགས་པའི་མི་འཇིགས་པ་ལ་རྩོད་པ་གང་ཡང་མེད་དོ། །
དེ་བཞིན་གཤེགས་པའི་མི་འཇིགས་པ་ནི་རྩོད་པ་མེད་པ་འཐབ་པ་མེད་པའོ། །དེ་བཞིན་ཉིད་ཀྱིས་མཉམ་ཞིང་ཆོས་ཀྱི་དབྱིངས་ངོས་མཉམ་པ། ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་མ་ལུས་པ་ཐམས་ཅད་ལ་ཐོགས་པ་མེད་པའོ། །ཇི་ལྟར་དེ་བཞིན་གཤེགས་པས་འདི་ལྟ་བུའི་ཆོས་ཟབ་
མོ་ཕྲ་བ། ཤེས་པར་དཀའ་བ་དེ་དག་མངོན་པར་རྫོགས་པར་སངས་རྒྱས་པ་དེ་བཞིན་དུ་སྙིང་རྗེ་ཆེན་པོ་ལ་གནས་ནས་བསྟན་པ་སྣ་ཚོགས་དང་། རྣམ་གྲངས་སྣ་ཚོགས་ཀྱི་སེམས་ཅན་གཞན་རྣམས་དང་། གང་ཟག་གཞན་དག་ལ་ཆོས་ཐམས་ཅད་ཡང་དག་པར་རབ་ཏུ་སྟོན་ཏེ། དེའི་ཆོས་དེ་

ཡང་དེ་བྱེད་པའི་སྡུག་བསྔལ་ཡང་དག་པར་ཟད་པའི་ཕྱིར་འབྱུང་ངོ་། །གང་སྟོན་པ་མ་ཡིན་ལ་སྟོན་པའོ་ཞེས་ཁས་འཆེ་བ་ཡང་དག་པར་རྫོགས་པའི་སངས་རྒྱས་མ་ཡིན་ལ། ཡང་དག་པར་རྫོགས་པའི་སངས་རྒྱས་སོ་ཞེས་ཁས་འཆེ་བ་དེ་དག་དེ་བཞིན་གཤེགས་པའི་མི་འཇིགས་པས་ཟིལ་གྱིས་
ནོན་ནས་དེ་དག་རྒྱགས་པ་ཆད་དེ་ཕན་ཚུན་དུ་འབྲོས་སོ། འདི་ལྟར་ཤཱ་རིའི་བུ་དེ་བཞིན་གཤེགས་པའི་མི་འཇིགས་པ་མཐའ་ཡས་མུ་མེད་དེ། འདི་ལྟ་སྟེ། ནམ་མཁའ་མཐའ་ཡས་མུ་མེད་པ་དེ་བཞིན་དུ་ཤཱ་རིའི་བུ་དེ་བཞིན་གཤེགས་པའི་མི་འཇིགས་པ་ཡང་མཐའ་ཡས་མུ་མེད་དོ། ཤཱ་རིའི་བུ་གང་དེ་བཞིན་
གཤེགས་པའི་མི་འཇིགས་པའི་མཐའ་འདོད་པ་ནི་ནམ་མཁའི་མཐའ་འདོད་དོ། །བྱང་ཆུབ་སེམས་དཔས་དེ་བཞིན་གཤེགས་པའི་མི་འཇིགས་པའི་བསམ་གྱིས་མི་ཁྱབ་པ་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག་པ་ནས་ངོ་མཚར་དང་། རྨད་ཀྱི་བར་དུ་འདུ་ཤེས་སྐྱེད་དེ་འདི་
ནི་མི་འཇིགས་པ་དང་པོའོ། །གཞན་ཡང་ཤཱ་རིའི་བུ་དེ་བཞིན་གཤེགས་པ་བླ་ན་མེད་པའི་དེ་བཞིན་གཤེགས་པའི་ཡེ་ཤེས་དང་ལྡན་པས་འཁོར་གྱི་ནང་དུ་གཤེགས་ནས་ངའི་ཟག་པ་ཟད་དོ་ཞེས་ཞལ་གྱིས་འཆེ་སྟེ། དེ་ལ་ཁྱོད་ཀྱི་ཟག་པ་འདི་དག་མ་ཟད་དོ་ཞེས་དེ་བཞིན་གཤེགས་པ་ལ་ལྷ་དང་
བཅས་པའི་འཇིག་རྟེན་གྱིས་ཆོས་དང་འཐུན་པས་རྩོད་པར་བྱེད་པ་མེད་དོ། །དེ་བཞིན་གཤེགས་པའི་ཟག་པ་ཟད་པ་ནི་འདི་དག་སྟེ། དེ་བཞིན་གཤེགས་པའི་འདོད་པའི་ཟག་པ་ལས་སེམས་རྣམ་པར་གྲོལ་བས་འདོད་ཆགས་ལ་སྤྱོད་པའི་བག་ཆགས་ཐམས་ཅད་བཅོམ་མོ། །སྲིད་པའི་ཟག་
པ་ལས་སེམས་རྣམ་པར་གྲོལ་བས་ཞེ་སྡང་ལ་སྤྱོད་པའི་བག་ཆགས་ཐམས་ཅད་བཅོམ་མོ། །མ་རིག་པའི་ཟག་པ་ལས་སེམས་རྣམ་པར་གྲོལ་བས་གཏི་མུག་ལ་སྤྱོད་པའི་བག་ཆགས་ཐམས་ཅད་བཅོམ་མོ། །ལྟ་བའི་ཟག་པ་ལས་སེམས་རྣམ་པར་གྲོལ་བས་ཉོན་མོངས་པ་སྤྱོད་པའི་བག་ཆགས་
ཐམས་ཅད་བཅོམ་སྟེ། དེའི་ཕྱིར་འཇིག་རྟེན་གྱི་ཀུན་རྫོབ་བཟུང་སྟེ། དེ་བཞིན་གཤེགས་པ་ཟག་པ་ཟད་པའོ་ཞེས་བྱའོ། །དོན་དམ་པར་ན་འཕགས་པའི་ཤེས་རབ་དང་། ཡེ་ཤེས་ཀྱི་མདུན་ན་ཆོས་གང་ཡོངས་སུ་ཤེས་པའམ། སྤང་བའམ། བསྒོམ་པ་འམ། མངོན་དུ་བྱ་བར་འགྱུར་

བའི་ཆོས་གང་ཡང་མི་འདུག་གོ །དེ་ཅིའི་ཕྱིར་ཞེ་ན། གང་ཟད་པ་ཞེས་བྱ་བ་དེ་ནི་ནམ་དུ་ཡང་མི་ཟད་པ་མ་ཡིན་ནོ། །དེ་ནི་ཤིན་ཏུ་ཟད་པ་ཉིད་ཡིན་གྱི། གཉེན་པོས་ཟད་པ་ཞེས་མི་བྱ་སྟེ། དེ་ནི་ཇི་ལྟ་བ་བཞིན་དུ་ཟད་པའོ། །གང་ཇི་ལྟ་བ་བཞིན་དུ་ཟད་པ་དེ་
ལ་ཟད་པ་གང་ཡང་མེད་དོ། །གང་ལ་ཟད་པ་གང་ཡང་མེད་པ་དེ་འདུས་མ་བྱས་པའོ། །དེ་ལ་སྐྱེ་བ་མེད་པ། འཇིག་པ་མེད་པ། གནས་པ་མེད་དེ། དེའི་ཕྱིར་དེ་བཞིན་གཤེགས་པ་བྱུང་ཡང་རུང་། མ་བྱུང་ཡང་རུང་སྟེ། ཆོས་ཉིད་ཆོས་ཀྱི་དབྱིངས་ནི་གནས་པ་ཉིད་དེ། དེ་
བཞིན་དུ་དེ་ལ་ཡེ་ཤེས་ཞུགས་སོ། །གང་ལ་འཇུག་པ་མེད་ཅིང་མི་འཇུག་པ་ཡང་མེད་པ་ཡང་དེ་ལྟར་ཞུགས་ཏེ། དེ་ལྟ་བུའི་ཆོས་ཀྱི་ཚུལ་གྱིས་ཟག་པ་དང་ཟད་པ་སྤོང་བ་མི་དམིགས་ཏེ། དེ་བཞིན་གཤེགས་པ་ནི་སྙིང་རྗེ་ཆེན་པོ་ལ་གནས་ནས་ཟག་པ་སྤང་བའི་ཕྱིར་ཆོས་སྟོན་ཏོ། །དེ་བཞིན་
གཤེགས་པའི་མི་འཇིགས་པ་དེ་ནི་འཁོར་ཐམས་ཅད་ཤེས་པར་བྱེད་པ། འཁོར་ཐམས་ཅད་མགུ་བར་བྱེད་པ། འཁོར་ཐམས་ཅད་ཀྱི་ལུས་སིམ་པར་བྱེད་པ། འཁོར་ཐམས་ཅད་ཀྱི་སེམས་ཚིམ་པ་སྐྱེད་པ། འཁོར་ཐམས་ཅད་དགའ་བ་དང་། རབ་ཏུ་དགའ་བ་དང་། དད་པ་སྐྱེད་པ། སྙིང་
རྗེ་ཆེན་པོས་སྦྱོར་བ། དེ་བཞིན་ཉིད་ཀྱིས་མཉམ་པ། དེ་ཁོ་ན་ཉིད། དེ་བཞིན་ཉིད། གཞན་མ་ཡིན་པ་ཉིད། མི་འགྱུར་བ་ཉིད། མི་འཁྲུགས་པ་ཉིད། འབྱུང་བ་མེད་པ་ཉིད། འཇིག་པ་མེད་པ་ཉིད། །རྩོད་པ་མེད་པ་ཉིད་དེ། དེ་བཞིན་གཤེགས་པའི་མི་འཇིགས་པ་ལ་རྩོད་པ་
གང་ཡང་མེད་དོ། །དེ་བཞིན་གཤེགས་པའི་མི་འཇིགས་པ་ནི་རྩོད་པ་མེད་པ་འཐབ་པ་མེད་པའོ། །དེ་བཞིན་ཉིད་ཀྱིས་མཉམ་ཞིང་ཆོས་ཀྱི་དབྱིངས་ངོས་མཉམ་པ། འཇིག་རྟེན་གྱི་ཁམས་རབ་འབྱམ་མ་ལུས་པ་ཐམས་ཅད་ལ་ཐོགས་པ་མེད་དོ། །དེ་ལྟར་དེ་བཞིན་གཤེགས་པ་ཚད་
མེད་བསམ་གྱིས་མི་ཁྱབ། གྲངས་མེད། དཔག་ཏུ་མེད་པའི་ཆོས་དང་ལྡན་ཞིང་སྙིང་རྗེ་ཆེན་པོས་ཡང་དག་པར་ཟིན་པའི་སེམས་ཀྱིས་ཟག་པ་སྤང་བའི་ཕྱིར་སེམས་ཅན་རྣམས་ལ་ཆོས་སྟོན་ཏོ། །དེ་ལྟར་ཤཱ་རིའི་བུ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་མཐའ་ཡས་པ་

ནས། གང་དེ་བཞིན་གཤེགས་པའི་མི་འཇིགས་པའི་མཐའ་འདོད་པ་དེ་ནམ་མཁའི་མཐའ་འདོད་དོ་ཞེས་བྱ་བའི་བར་དུ་སྟེ་བྱང་ཆུབ་སེམས་དཔའ་དེ་བཞིན་གཤེགས་པའི་མི་འཇིགས་པ་བསམ་གྱིས་མི་ཁྱབ་པ་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག་པ་ནས། ངོ་མཚར་དང་
རྨད་ཀྱི་བར་གྱི་འདུ་ཤེས་སྐྱེད་དོ། །ཤཱ་རིའི་བུ་འདི་ནི་དེ་བཞིན་གཤེགས་པའི་མི་འཇིགས་པ་གཉིས་པ་སྟེ། དེ་བཞིན་གཤེགས་པའི་མི་འཇིགས་པ་དེ་དང་ལྡན་ཞེས་བྱ་བ་ནས། འཇིག་རྟེན་འདིར་ཆོས་དང་འཐུན་པར་ཞེས་བྱ་བའི་བར་དུའོ། །གཞན་ཡང་ཤཱ་རིའི་བུ་དེ་བཞིན་གཤེགས་པ་
བླ་ན་མེད་པའི་དེ་བཞིན་གཤེགས་པའི་ཡེ་ཤེས་དང་ལྡན་པས། འཁོར་གྱི་ནང་དུ་གཤེགས་ནས་བར་དུ་གཅོད་པའི་ཆོས་རྣམས་ལ་བར་དུ་གཅོད་དོ་ཞེས་ཞལ་གྱིས་འཆེ་བ་དེ་ལ་གོང་མ་བཞིན་དུ་སྦྱར་ཏེ། དེ་བཞིན་གཤེགས་པ་ལ་ལྷར་བཅས་པའི་འཇིག་རྟེན་གྱིས་འདི་ནི་བར་དུ་གཅོད་པའི་
ཆོས་མ་ཡིན་ནོ་ཞེས་རྒོལ་བར་བྱེད་པ་མེད་པའི་བར་དུའོ། །དེ་ལ་བར་དུ་གཅོད་པའི་ཆོས་གང་ཞེ་ན། འདི་ལྟ་སྟེ། བར་དུ་གཅོད་པར་འགྱུར་བའི་ཆོས་གཅིག་སྟེ། གཅིག་གང་ཞེ་ན། འདི་ལྟ་སྟེ། བག་མེད་པའི་སེམས་སོ། །བར་དུ་གཅོད་པར་འགྱུར་བའི་ཆོས་གཉིས་ཏེ། གཉིས་
གང་ཞེ་ན། འདི་ལྟ་སྟེ། ངོ་ཚ་མི་ཤེས་པ་དང་། ཁྲེལ་མེད་པའོ། །བར་དུ་གཅོད་པར་འགྱུར་བའི་ཆོས་གསུམ་སྟེ། གསུམ་གང་ཞེ་ན། འདི་ལྟ་སྟེ། ལུས་ཀྱིས་ཉེས་པར་སྤྱད་པ་དང་། ངག་གིས་ཉེས་པར་སྤྱད་པ་དང་། ཡིད་ཀྱིས་ཉེས་པར་སྤྱད་པའོ། །བར་དུ་གཅོད་པར་འགྱུར་
བའི་ཆོས་བཞི་སྟེ། བཞི་གང་ཞེ་ན། འདི་ལྟ་སྟེ། འགྲོ་བ་མ་ཡིན་པར་འགྲོ་བ་བཞི་ལ་འདུན་པས་འགྲོ་བ་མ་ཡིན་པར་འགྲོ་བ་དང་། ཞེ་སྡང་དང་། གཏི་མུག་དང་། འཇིགས་པས་འགྲོ་བ་མ་ཡིན་པར་འགྲོ་བའོ། །བར་དུ་གཅོད་པར་འགྱུར་བའི་ཆོས་ལྔ་སྟེ། ལྔ་གང་ཞེ་ན། འདི་ལྟ་སྟེ།
སྲོག་གཅོད་པ་དང་། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཆང་འཐུང་བའོ། །བར་དུ་གཅོད་པར་འགྱུར་བའི་ཆོས་དྲུག་སྟེ། དྲུག་གང་ཞེ་ན། འདི་ལྟ་སྟེ། སངས་རྒྱས་ལ་མ་གུས་པ་དང་། ཆོས་དང་། དགེ་འདུན་དང་།

བསླབ་པ་དང་། ཏིང་ངེ་འཛིན་དང་། གཏོང་བ་ལ་མ་གུས་པའོ། །བར་དུ་གཅོད་པར་འགྱུར་བའི་ཆོས་བདུན་སྟེ། བདུན་གང་ཞེ་ན། འདི་ལྟ་སྟེ། ང་རྒྱལ་དང་། ཆེ་བའི་ང་རྒྱལ་དང་། ང་རྒྱལ་ལས་ཀྱང་ང་རྒྱལ་དང་། ངའོ་སྙམ་པའི་ང་རྒྱལ་དང་། ལོག་
པའི་ང་རྒྱལ་དང་། མངོན་པའི་ང་རྒྱལ་དང་། ཆུང་ཟད་སྙམ་པའི་ང་རྒྱལ་ལོ། །བར་དུ་གཅོད་པར་འགྱུར་བའི་ཆོས་བརྒྱད་དེ། བརྒྱད་གང་ཞེ་ན། འདི་ལྟ་སྟེ། ལོག་པའི་ལྟ་བ་དང་། ལོག་པའི་རྟོག་པ་དང་། ལོག་པའི་ངག་དང་། ལོག་པའི་ལས་ཀྱི་མཐའ་དང་། ལོག་པའི་འཚོ་བ་དང་།
ལོག་པའི་རྩོལ་བ་དང་། ལོག་པའི་དྲན་པ་དང་། ལོག་པའི་ཏིང་ངེ་འཛིན་ཏོ། །བར་དུ་གཅོད་པར་འགྱུར་བའི་ཆོས་དགུ་སྟེ། དགུ་གང་ཞེ་ན། འདི་ལྟ་སྟེ། བདག་ལ་གནོད་པ་བྱས་སོ་ཞེས་ཀུན་ནས་མནར་སེམས་སྐྱེད་པ་དང་། གནོད་པ་བྱེད་དོ་ཞེས་ཀུན་ནས་མནར་སེམས་སྐྱེད་པ་དང་།
གནོད་པ་བྱེད་པར་འགྱུར་རོ་ཞེས་ཀུན་ནས་མནར་སེམས་སྐྱེད་པ་དང་། བདག་གི་མཛའ་བོ་ལ་གནོད་པ་བྱས་སོ། །བྱེད་དོ། །བྱེད་པར་འགྱུར་རོ་ཞེས་སེམས་ལ་ཀུན་ནས་མནར་སེམས་སྐྱེད་པ་དང་། བདག་དང་མི་མཛའ་བའི་དོན་བྱས་སོ། །བྱེད་དོ། །བྱེད་པར་འགྱུར་རོ་ཞེས་ཀུན་ནས་མནར་སེམས་
སྐྱེད་པའོ། །བར་དུ་གཅོད་པར་འགྱུར་བའི་ཆོས་བཅུ་སྟེ། བཅུ་གང་ཞེ་ན། འདི་ལྟ་སྟེ། མི་དགེ་བ་བཅུའི་ལས་ཀྱི་ལམ་རྣམས་ཡིན་ཏེ། འདི་ལྟ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་
མོ་དང་། ཚིག་ཀྱལ་པ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བའོ། །དེ་ལྟར་ཤཱ་རིའི་བུ་ཚུལ་བཞིན་མ་ཡིན་པ་ཡིད་ལ་བྱེད་པ་དང་ལྡན་པའི་ཀུན་ཏུ་སྦྱོར་བ་ཇི་སྙེད་པའི་ཆོས་དེ་དག་གིས་རོ་མྱང་བ་ལ་རྗེས་སུ་ལྟ་ཞིང་གནས་པ་དང་། །ཕྱིན་ཅི་ལོག་དང་ལྡན་པ་དང་། འབྱུང་བ་ལ་ཀུན་
ནས་ལྡང་བ་དང་། སྲེད་པ་དང་། ལྟ་བ་ལ་མངོན་པར་ཞེན་པའི་ཟང་ཟིང་དང་བཅས། ཕུང་པོ་དང་བཅས་པའི་ལུས་ཀྱི་ལས་དང་། ངག་གི་ལས་དང་། ཡིད་ཀྱི་ལས་དེ་དག་ཐམས་ཅད་དེ་བཞིན་གཤེགས་པས་བར་དུ་གཅོད་པར་མཁྱེན་ཏེ། བར་དུ་གཅོད་པར་མཁྱེན་ནས་ཀྱང་ཡང་དག་པ་ཇི་

ལྟ་བ་བཞིན་དུ་སྟོན་ཏོ། །ཆོས་བཅུ་པོ་དེ་དག་ནི་བར་དུ་གཅོད་པར་འགྱུར་བ་སྟེ། དེ་དག་ཞི་བར་བྱ་བ་དང་། ཉེ་བར་ཞི་བར་བྱ་བ་དང་། སྤོང་བའི་ཕྱིར་དེ་བཞིན་གཤེགས་པ་ཆོས་སྟོན་ཏོ། །དེ་བཞིན་གཤེགས་པའི་མི་འཇིགས་པ་དེ་ཡང་འཁོར་ཐམས་ཅད་ཤེས་པར་བྱེད་པ། འཁོར་
ཐམས་ཅད་མགུ་བར་བྱེད་པ། འཁོར་ཐམས་ཅད་ཀྱི་ལུས་སིམ་པར་བྱེད་པ། འཁོར་ཐམས་ཅད་ཀྱི་སེམས་ཚིམ་པ་སྐྱེད་པ། འཁོར་ཐམས་ཅད་དགའ་བ་དང་། རབ་ཏུ་དགའ་བ་དང་། དད་པ་སྐྱེད་པ་དང་། སྙིང་རྗེ་ཆེན་པོས་སྦྱོར་བ། དེ་བཞིན་ཉིད་ཀྱིས་མཉམ་པ། དེ་ཁོ་ན་ཉིད།
གཞན་མ་ཡིན་པ་དེ་བཞིན་ཉིད། མི་འགྱུར་བ་ཉིད། མི་འཁྲུགས་པ་ཉིད། འབྱུང་བ་མེད་པ་ཉིད། འཇིག་པ་མེད་པ་ཉིད། རྩོད་པ་མེད་པ་ཉིད་དེ། དེ་བཞིན་གཤེགས་པའི་མི་འཇིགས་པ་ལ་རྩོད་པ་གང་ཡང་མེད་དོ། །དེ་བཞིན་གཤེགས་པའི་མི་འཇིགས་པ་ནི་རྩོད་པ་མེད་པ་
འཐབ་པ་མེད་པའོ། །དེ་བཞིན་ཉིད་དང་མཉམ་ཞིང་ཆོས་ཀྱི་དབྱིངས་ངོས་མཉམ་པ། འཇིག་རྟེན་གྱི་ཁམས་རབ་འབྱམ་མ་ལུས་པ་ཐམས་ཅད་ལ་ཐོགས་པ་མེད་དོ། །དེ་ལྟར་དེ་བཞིན་གཤེགས་པ་ཚད་མེད། གྲངས་མེད། བསམ་གྱིས་མི་ཁྱབ། གཞལ་དུ་མེད། བརྗོད་དུ་མེད་པའི་ཆོས་
དང་ལྡན་ཞིང་སྙིང་རྗེ་ཆེན་པོས་ཡང་དག་པར་ཟིན་པའི་སེམས་ཀྱིས་བར་དུ་གཅོད་པའི་ཆོས་རྣམས་ཞི་བར་བྱ་བ་དང་། སྤང་བར་བྱ་བའི་ཕྱིར་ཆོས་སྟོན་ཏོ། །དེ་ལྟར་ཤཱ་རིའི་བུ་དེ་བཞིན་གཤེགས་པའི་མི་འཇིགས་པ་མཐའ་ཡས་མུ་མེད་པ་ནས་གང་དེ་བཞིན་གཤེགས་པའི་མི་འཇིགས་པའི་མཐའ་འདོད་
པ་དེ་ནམ་མཁའི་མཐའ་འདོད་པ་ཞེས་བྱ་བའི་བར་དུ་སྟེ། བྱང་ཆུབ་སེམས་དཔའ་དེ་བཞིན་གཤེགས་པའི་མི་འཇིགས་པ་བསམ་གྱིས་མི་ཁྱབ་པ་དེ་ཐོས་ནས་མངོན་པར་དད། ཡིད་ཆེས། རབ་ཏུ་རྟོག །སོམ་ཉི་མེད། ཐེ་ཚོམ་མི་ཟ་བ་ནས། ངོ་མཚར་དང་རྨད་ཀྱི་བར་དུ་འདུ་ཤེས་སྐྱེད་དོ། །
ཤཱ་རིའི་བུ་འདི་ནི་དེ་བཞིན་གཤེགས་པའི་མི་འཇིགས་པ་གསུམ་པ་སྟེ། མི་འཇིགས་པ་དེ་དང་ལྡན་པས་དེ་བཞིན་གཤེགས་པ་འཁོར་གྱི་ནང་དུ་གཤེགས་ན་ཞེས་བྱ་བ་ནས། སུས་ཀྱང་འཇིག་རྟེན་དུ་ཆོས་དང་འཐུན་པར་ཞེས་བྱ་བའི་བར་དུའོ། །གཞན་ཡང་ཤཱ་རིའི་བུ་དེ་བཞིན་གཤེགས་པ་

བླ་ན་མེད་པའི་ཡེ་ཤེས་དེ་བཞིན་གཤེགས་པའི་ཡེ་ཤེས་དང་ལྡན་པས་སེམས་ཅན་རྣམས་གང་ལ་བསྟེན་པས་ངེས་པར་འབྱུང་བར་འགྱུར་བ་འཕགས་པའི་ངེས་པར་འབྱུང་བ་དེ་བྱེད་པའི་སྡུག་བསྔལ་ཡང་དག་པར་ཟད་པར་འགྱུར་བའི་ལམ་རབ་ཏུ་མཁྱེན་ཏེ། དེ་ལ་འདི་ནི་ངེས་པར་འབྱུང་བའི་
ལམ་མ་ཡིན་ནོ། །ཞེས་དེ་བཞིན་གཤེགས་པ་ལ་ལྷ་དང་བཅས་པའི་འཇིག་རྟེན་གྱིས་ཆོས་དང་འཐུན་པར་རྒོལ་བར་བྱེད་མི་ནུས་སོ། །ངེས་པར་འབྱུང་བའི་ལམ་གཅིག་སྟེ་གཅིག་གང་ཞེ་ན། འདི་ལྟ་སྟེ། བགྲོད་པ་གཅིག་པུའི་ལམ་སྟེ། གང་སེམས་ཅན་རྣམས་རྣམ་པར་དག་པར་འགྱུར་བའོ། །
ངེས་པར་འབྱུང་བའི་ཆོས་གཉིས་ཏེ་གཉིས་གང་ཞེ་ན། འདི་ལྟ་སྟེ། ཞི་གནས་དང་། ལྷག་མཐོང་ངོ་། །ངེས་པར་འབྱུང་བའི་ཆོས་གསུམ་སྟེ། གསུམ་གང་ཞེ་ན། འདི་ལྟ་སྟེ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའོ། །ངེས་པར་འབྱུང་བའི་ཆོས་བཞི་སྟེ། བཞི་གང་ཞེ་ན།
འདི་ལྟ་སྟེ། ལུས་སུ་གཏོགས་པའི་དྲན་པ་དང་། ཚོར་བར་གཏོགས་པའི་དྲན་པ་དང་། སེམས་སུ་གཏོགས་པའི་དྲན་པ་དང་། ཆོས་སུ་གཏོགས་པའི་དྲན་པ་སྟེ་འདི་ནི་ངེས་པར་འབྱུང་བའི་ཆོས་བཞིའོ། །ངེས་པར་འབྱུང་བའི་ཆོས་ལྔ་སྟེ། ལྔ་གང་ཞེ་ན། འདི་ལྟ་སྟེ། དད་པའི་དབང་པོ་དང་།
བརྩོན་འགྲུས་ཀྱི་དབང་པོ་དང་། དྲན་པའི་དབང་པོ་དང་། ཏིང་ངེ་འཛིན་གྱི་དབང་པོ་དང་། ཤེས་རབ་ཀྱི་དབང་པོ་སྟེ། འདི་ནི་ངེས་པར་འབྱུང་བའི་ཆོས་ལྔའོ། །ངེས་པར་འབྱུང་བའི་ཆོས་དྲུག་སྟེ། དྲུག་གང་ཞེ་ན། འདི་ལྟ་སྟེ། སངས་རྒྱས་རྗེས་སུ་དྲན་པ་དང་། ཆོས་རྗེས་སུ་དྲན་པ་དང་། དགེ་འདུན་
རྗེས་སུ་དྲན་པ་དང་། ཚུལ་ཁྲིམས་རྗེས་སུ་དྲན་པ་དང་། གཏོང་བ་རྗེས་སུ་དྲན་པ་དང་། ལྷ་རྗེས་སུ་དྲན་པ་སྟེ། འདི་ནི་ངེས་པར་འབྱུང་ཆོས་དྲུག་གོ །ངེས་པར་བའི་འབྱུང་བའི་ཆོས་བདུན་ཏེ། བདུན་གང་ཞེ་ན། འདི་ལྟ་སྟེ། དྲན་པ་ཡང་དག་བྱང་ཆུབ་ཀྱི་ཡན་ལག་དང་། ཆོས་རྣམ་པར་
འབྱེད་པ་ཡང་དག་བྱང་ཆུབ་ཀྱི་ཡན་ལག་དང་། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང་། དགའ་བ་ཡང་དག་བྱང་ཆུབ་ཀྱི་ཡན་ལག་དང་། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་དང་། ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་དང་། བཏང་སྙོམས་ཡང་དག་བྱ