Kinh tạng Tây Tạng (Kangyur Đại Học) — 041_དཀོན་བརྩེགས།_ག

་ཆོས། །རྒྱལ་བ་དང་ནི་ཞིང་དང་སེམས་ཅན་ལ། །ཐ་དད་འདུ་ཤེས་བདེ་བར་གཤེགས་ལ་མེད། །བསམ་པ་ཆེན་པོ་མཉམ་པ་ཉིད་ལ་གནས། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །དེ་དག་ལ་ནི་མ་བརྟགས་བཏང་
སྙོམས་མེད། །ཤིན་ཏུ་ངེས་པའི་ལམ་ནི་རབ་བསྒོམས་པས། །དེ་ལ་རྟོག་དང་རྣམ་པར་རྟོག་མེད་དེ། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །དགེ་བ་ལ་ནི་འདུན་པ་ཉམས་པ་མེད། །སྟོན་པ་རྟག་ཏུ་སྙིང་རྗེ་རབ་སྦྱོར་ཞིང་། །སེམས་ཅན་རྒྱ་ཆེན་དཔག་ཏུ་མེད་པ་འདུལ། །དེ་ནི་རྒྱལ་

བ་རྣམས་ཀྱི་མ་འདྲེས་ཆོས། །ནམ་ཡང་བརྩོན་འགྲུས་ལ་ནི་ཉམས་པ་མེད། །འདུལ་བ་མཐའ་དང་ཕ་རོལ་མེད་མཐོང་ནས། །ལུས་དང་ངག་རྣམས་དང་ནི་ཡིད་ཀྱིས་འདུལ། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །བྱང་ཆུབ་སྙིང་པོར་སངས་རྒྱས་བྱང་ཆུབ་པར། །
དེ་ཡིས་དྲན་པ་རྣམ་པར་ཆུད་མི་ཟ། །གང་ཆོས་རྟོགས་པ་དེ་ནི་རྟོགས་བྱ་མིན། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །རྟོག་པ་མེད་ཅིང་རྣམ་པར་རྟོག་མེད་པར། །རང་བྱུང་ཏིང་ངེ་འཛིན་ལ་མཉམ་གནས་ཏེ། །ཆོས་རྣམས་ཀུན་ལ་མི་གནས་བསམ་གཏན་བྱེད། །དེ་ནི་རྒྱལ་
བ་རྣམས་ཀྱི་མ་འདྲེས་ཆོས། །འདྲེན་པའི་ཤེས་རབ་ཀྱིས་ནི་རབ་སྟོན་ཅིང་། །སེམས་ཅན་ཀུན་གྱི་སྤྱོད་པ་རབ་མཁྱེན་ཏེ། །དེ་དག་ལ་ནི་བསམ་བཞིན་ཆོས་ཀྱང་འཆད། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །ཉན་ཐོས་རྣམས་ཀྱི་རྣམ་གྲོལ་སྒྲ་ཕྱིར་འགྲོ། །རང་རྒྱལ་གྱི་ནི་རྐྱེན་
གྱི་འདུ་ཤེས་ཏེ། །སངས་རྒྱས་རྣམས་ཀྱི་བཏང་སྙོམས་བསམ་མི་ཁྱབ། །ཆགས་ལས་རབ་འདས་དྲི་མེད་ནམ་མཁའ་བཞིན། །སེམས་ཀྱི་རྒྱུད་འདི་རང་བཞིན་རྣམ་གྲོལ་ཏེ། །སེམས་ནི་སྔོན་ནས་བཅིངས་པར་གྱུར་པ་མེད། །ཇི་ལྟར་རྣམ་གྲོལ་དེ་ལྟར་ཆོས་སྟོན་ཏེ། །དེ་ནི་
རྒྱལ་བ་རྣམས་ཀྱི་མ་འདྲེས་ཆོས། །གཤེགས་དང་བཞུགས་དང་གྲོང་ཁྱེར་འཇུག་པ་དང་། །སྤྱོད་ལམ་དག་ནི་མཐོང་ན་མིག་ཀྱང་འཕྲོག །སངས་རྒྱས་རྣམས་ཀྱི་དཔེ་བྱད་བཟང་པོ་དང་། །མཚན་དང་འོད་རྣམས་ཐམས་ཅད་འདུལ་བར་ཞུགས། །སེམས་ཅན་སྙིང་པོ་ནམ་ཞིག་
འོད་གཏོང་ཚེ། །སྲོག་ཆགས་བྱེ་བ་མང་པོར་བདེར་འགྱུར་ཏེ། །འོད་ཀྱིས་རེག་པ་དག་ནི་འདུལ་བར་འགྱུར། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །རང་བྱུང་བ་ནི་གསུང་གཅིག་བརྗོད་པས་ན། །སེམས་ཅན་བསམ་པ་བཞིན་དུ་གསུང་ཐོས་ཏེ། །བྲག་ཆ་ལྟ་བུ་དེའི་གསུང་
ཡང་ཐོས། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །ཡེ་ཤེས་ཀྱིས་ནི་འདྲེན་པའི་ལས་བྱས་ཏེ། །བདེ་བར་གཤེགས་ལ་སེམས་ལས་ཅུང་ཟད་མེད། །སེམས་ཅན་བསམ་ལ་ཡེ་ཤེས་རྗེས་སུ་ཞུགས། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །ཏིང་འཛིན་བསམ་གཏན་དང་ནི་རབ་

ལྡན་ཏེ། །སྤྲོས་པ་ཐམས་ཅད་ཀྱི་ཡང་རྒྱུ་བ་མེད། །ནམ་མཁའ་ལྟ་བུར་མཉམ་པ་ཉིད་དུ་གནས། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །འདས་པའི་དུས་ལ་དེ་ཡི་ཡེ་ཤེས་ཞུགས། །འགྲོ་བ་སྣ་ཚོགས་རྣམ་འབྱེད་ཤེས་པ་ཡི། །ཆོས་རྣམས་ཀུན་ལ་སྒྲིབ་པ་མེད་
པར་འཇུག །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །མ་འོངས་དུས་ན་གང་དག་འཇིག་རྟེན་དུ། །འབྱུང་བར་འགྱུར་དང་འབྱུང་བར་མི་འགྱུར་དང་། །སེམས་ཅན་ཞིང་དང་རྒྱལ་བ་བཤད་པ་དང་། །དེ་དག་ཐམས་ཅད་སངས་རྒྱས་མ་ལུས་མཁྱེན། །མ་འོངས་དེ་ལ་རྗེས་སུ་
རབ་ལྟ་ཞིང་། །དེ་བཞིན་སེམས་ཅན་རྣམས་ཀྱི་ཆོས་ཀྱང་མཁྱེན། །དེ་ཡི་སེམས་ནི་གཡེང་བར་མི་འགྱུར་ཏེ། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །ད་ལྟར་ལམ་གང་འཇུག་པར་འགྱུར་བ་དག །ཐམས་ཅད་རྒྱལ་བས་ཆགས་མེད་རབ་ཏུ་མཁྱེན། །འདྲེན་པའི་སྤྱོད་ཡུལ་ནམ་
མཁའ་ལྟ་བུ་སྟེ། །དེ་ནི་རྒྱལ་བ་རྣམས་ཀྱི་མ་འདྲེས་ཆོས། །དེ་བཞིན་གཤེགས་པའི་ཆོས་ནི་མ་འདྲེས་པ། །བཅྭ་བརྒྱད་གསུངས་པ་བསམ་གྱིས་མི་ཁྱབ་སྟེ། །དེ་བཞིན་གཤེགས་པ་ནམ་མཁའ་འདྲ་བར་ནི། །དད་མཁས་བྱང་ཆུབ་སེམས་དཔའ་དད་པར་བྱེད། །ཤཱ་རིའི་བུ་འདི་དག་ནི་སངས་
རྒྱས་ཀྱི་ཆོས་མ་འདྲེས་པ་བཅྭ་བརྒྱད་དེ། སངས་རྒྱས་ཀྱི་ཆོས་མ་འདྲེས་པ་དེ་དག་དང་ལྡན་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་གྱི་ནང་དུ་གཤེགས་ན་སེང་གེའི་སྒྲ་ཡང་དག་པར་སྒྲོག་ཅིང་ཁྱུ་མཆོག་གི་གནས་སུ་ཞལ་གྱིས་འཆེ་སྟེ། དགེ་སྦྱོང་
ངམ། བྲམ་ཟེ་འམ། ལྷ་འམ། བདུད་དམ། སུས་ཀྱང་འཇིག་རྟེན་དུ་ཆོས་དང་འཐུན་པར་མ་བསྐོར་བའི་ཚངས་པའི་འཁོར་ལོ་རབ་ཏུ་བསྐོར་ཏོ། །ཤཱ་རིའི་བུ་དེ་ལྟར་དད་པ་ལ་གནས་པའི་བྱང་ཆུབ་སེམས་དཔའ་ནི་བསམ་གྱིས་མི་ཁྱབ་པ་འདི་བཅུས་དེ་བཞིན་གཤེགས་པ་ལ་མངོན་པར་དད། ཡིད་
ཆེས། རབ་ཏུ་རྟོག །སོམ་ཉི་མི་བྱེད། ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་པ་རྙེད་ཅིང་། ངོ་མཚར་དང་། རྨད་དུ་འདུ་ཤེས་སྐྱེད་དོ། །དེ་བཞིན་གཤེགས་པའི་བསམ་གྱིས་མི་ཁྱབ་པའི་ལེའུ་སྟེ་བཞི་པའོ།། །།བམ་པོ་བརྒྱད་པ། གཞན་ཡང་ཤཱ་རིའི་བུ་དེ་ལྟར་

དད་པ་ལ་རབ་ཏུ་གནས་པའི་བྱང་ཆུབ་སེམས་དཔའ་ནི་སངས་རྒྱས་བཅོམ་ལྡན་འདས་རྣམས་ཀྱི་སྣོད་དུ་རིག །བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཀྱི་སྣོད་དུ་རིག །སངས་རྒྱས་ཀྱི་ཆོས་རྣམས་ཀྱི་སྣོད་དུ་རིག་ནས། དེའི་དྲུང་དུ་གཤེགས་ཏེ་བྱང་ཆུབ་སེམས་དཔའི་ལམ་ཡང་དག་
པར་རབ་ཏུ་སྟོན་ཏོ། །དེ་ལྟ་བས་ན་ཤཱ་རིའི་བུ་རྣམ་གྲངས་འདིས་ཀྱང་། དེ་ལྟར་དད་པ་ལ་རབ་ཏུ་གནས་པའི་བྱང་ཆུབ་སེམས་དཔའ་ནི་སངས་རྒྱས་བཅོམ་ལྡན་འདས་རྣམས་ཀྱིས་སྣོད་དུ་རིག །བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཀྱི་སྣོད་དུ་རིག །སངས་རྒྱས་ཀྱི་
ཆོས་རྣམས་ཀྱི་སྣོད་དུ་རིག་ནས། དེའི་དྲུང་དུ་གཤེགས་ཏེ། བྱང་ཆུབ་ཀྱི་ལམ་ཡང་དག་པར་རབ་ཏུ་སྟོན་པ་དེ་ལྟར་རིག་པར་བྱའོ། །ཤཱ་རིའི་བུ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་བས་ཀྱང་ཚེས་གྲངས་མེད་པ། ཡངས་པ་ཚད་མེད་པ། བསམ་གྱིས་མི་ཁྱབ་པ་དེའི་
ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཕུང་པོ་ཆེན་པོ་ཞེས་བྱ་བ། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་
རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། གང་འདི་ལྷར་བཅས་པའི་འཇིག་རྟེན་དང་། བདུད་དུ་བཅས་པ་དང་། ཚངས་པར་བཅས་པ་དང་། དགེ་སྦྱོང་དང་། བྲམ་ཟེར་བཅས་པའི་སྐྱེ་དགུ་དང་། ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་རང་གི་མངོན་པར་ཤེས་པས་
མངོན་སུམ་དུ་བྱས་ཏེ་བསྒྲུབས་ནས་གནས་སོ། །དེ་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་རབ་ཏུ་སྟོན་ཏོ། །
ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཕུང་པོ་ཆེན་པོའི་ཉན་ཐོས་ཁྲག་ཁྲིག་ཕྲག་བདུན་ཅུ་རྩ་གཉིས་ཀྱི་ཉན་ཐོས་ཀྱི་ཚོགས་ཆེན་པོ་བྱུང་སྟེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། སེམས་ཐམས་ཅད་

ཀྱི་དབང་དམ་པའི་ཕ་རོལ་ཏུ་སོན་པ་ཤ་སྟག་གོ །ཤཱ་རིའི་བུ་དེའི་དུས་ན་རྒྱལ་པོ་ཚེ་རྣམ་པར་རྒྱལ་བ་ཞེས་བྱ་བ་ཆོས་ཅན་ཆོས་ཀྱི་རྒྱལ་པོ་ཞིག་བྱུང་ངོ་། །ཡང་ཤཱ་རིའི་བུ་རྒྱལ་པོ་ཚེ་རྣམ་པར་རྒྱལ་བའི་གྲོང་ཁྱེར་རྣམ་པར་རྒྱལ་བའི་རྒྱལ་མཚན་ཞེས་བྱ་བ། རྒྱལ་པོའི་གནས་འབྱོར་པ་མོད་པ།
བདེ་བ། ལོ་ལེགས་པ། དགའ་བ་འགྲོ་བ་མང་པོ་དང་། མིས་གང་བ་ཞིག་ཡོད་དེ། ཡང་ཤཱ་རིའི་བུ་རྒྱལ་པོ་ཚེ་རྣམ་པར་རྒྱལ་བའི་ཁྱེའུ་གཞོན་ནུ་བརྩོན་འགྲུས་སྤྱོད་པ་ཞེས་བྱ་བ་སྔོན་དགེ་བའི་རྩ་བ་བསྐྲུན་པ། སྔོན་གྱི་སངས་རྒྱས་ལ་བྱ་བ་བྱས་པ། སྔོན་གྱི་སངས་རྒྱས་བྱེ་བ་ཁྲག་ཁྲིག་
བརྒྱ་སྟོང་ལ་བསྙེན་བཀུར་བྱས་པ། གཟུགས་བཟང་བ། མཛེས་པ། བལྟ་ན་སྡུག་པ། མདོག་བཟང་ཞིང་རྒྱས་པའི་མཆོག་དང་ལྡན་པ་ཞིག་བྱུང་སྟེ། ཡང་ཤཱ་རིའི་བུ་དེའི་དུས་ན་གཞོན་ནུ་བརྩོན་འགྲུས་སྤྱོད་བཙུན་མོའི་འཁོར་དང་ལྷན་ཅིག་ཏུ་སྐྱེད་མོས་ཚལ་གྱི་སར་བྱུང་བར་གྱུར་ཏོ། །
དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཕུང་པོ་ཆེན་པོས་ཨེ་མའོ་གཞོན་ནུ་འདི་ནི་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཀྱི་སྣོད་དོ། །ཨེ་མའོ་གཞོན་ནུ་བརྩོན་འགྲུས་སྤྱོད་འདི་ནི་སངས་རྒྱས་ཀྱི་ཆོས་རྣམས་ཀྱི་སྣོད་དོ་ཞེས་དེ་ལྟར་རིག་
ནས་སྐྱེད་མོས་ཚལ་གྱི་ས་ག་ལ་བ་དང་། གཞོན་ནུ་བརྩོན་འགྲུས་སྤྱོད་ག་ལ་བ་དེར་སོང་སྟེ་ཕྱིན་ནས་སྟེང་གི་ནམ་མཁའ་ལ་བཞུགས་ཏེ། གཞོན་ནུ་བརྩོན་འགྲུས་སྤྱོད་ལ་བྱང་ཆུབ་ཀྱི་ལམ་ཡང་དག་པར་རབ་ཏུ་སྟོན་ཏོ། །དེ་ལ་བྱང་ཆུབ་ཀྱི་ལམ་གང་ཞེ་ན། འདི་ལྟ་སྟེ། སེམས་ཅན་ཐམས་
ཅད་ལ་བྱམས་པ་དང་། ཕ་རོལ་ཏུ་ཕྱིན་པ་རྣམས་ལ་བརྩོན་པ་དང་། བསྡུ་བའི་དངོས་པོ་རྣམས་ཀྱི་རྗེས་སུ་འཇུག་པ་སྟེ། དེ་ནི་བྱང་ཆུབ་ཀྱི་ལམ་ཞེས་བྱའོ། །དེ་ལ་སེམས་ཅན་ཐམས་ཅད་ལ་བྱམས་པ་གང་ཞེ་ན། འདི་ལ་གཞོན་ནུ་བྱང་ཆུབ་སེམས་དཔའ་ནི་སེམས་ཅན་གྱི་ཁམས་ཇི་ཙམ་
པ་དེ་ཙམ་དུ་བྱམས་པས་ཁྱབ་པར་བྱེད་དོ། །སེམས་ཅན་གྱི་ཁམས་ཇི་ཙམ་ཞེ་ན། ནམ་མཁའི་ཁམས་ཇི་ཙམ་པ་སེམས་ཅན་གྱི་ཁམས་ཀྱང་དེ་ཙམ་མོ། །གཞོན་ནུ་འདི་ལྟ་སྟེ། དཔེར་ན་ནམ་མཁའི་ཁམས་འདིས་ཁྱབ་པར་མ་གྱུར་པ་གང་ཡང་མེད་དོ། །གཞོན་ནུ་དེ་བཞིན་དུ་བྱང་ཆུབ་

སེམས་དཔའི་བྱམས་པ་འདིས་སེམས་ཅན་གྱི་རིས་ན་གང་ཁྱབ་པར་མ་གྱུར་པའི་སེམས་ཅན་དེ་གང་ཡང་མེད་དོ། །འདི་ལྟ་སྟེ་གཞོན་ནུ་སེམས་ཅན་གྱི་ཁམས་དཔག་ཏུ་མེད་པ་དེ་བཞིན་དུ་གཞོན་ནུ་བྱང་ཆུབ་སེམས་དཔའི་བྱམས་པ་བསྒོམ་པ་ཡང་དཔག་ཏུ་མེད་དོ། །
གཞོན་ནུ་དེ་ལྟར་ན་ནམ་མཁའ་མཐའ་ཡས་པས་སེམས་ཅན་མཐའ་ཡས་སེམས་ཅན་མཐའ་ཡས་པས་བྱམས་པ་མཐའ་ཡས་སོ། །གཞོན་ནུ་ཡང་སེམས་ཅན་གྱི་ཁམས་ནི་ཆེས་མང་གི་སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་ནི་དེ་ལྟ་མ་ཡིན་
མོད་ཀྱི། འོན་ཀྱང་གཞོན་ནུ་སེམས་ཅན་གྱི་ཁམས་ཚད་མེད་པ་ཇི་ཙམ་པ་དེའི་དོན་ཤེས་པར་བྱ་བའི་ཕྱིར་དཔེ་བསྟན་ཏོ། གཞོན་ནུ་འདི་ལྟ་སྟེ། དཔེར་ན་ཤར་ཕྱོགས་སུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དང་། ལྷོ་དང་། ནུབ་དང་། བྱང་དང་། དེ་བཞིན་དུ་
ཕྱོགས་མཚམས་དང་། ཕྱོགས་བཅུ་ཀུན་ཏུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དང་མཉམ་པ་དེ་དག་ཐམས་ཅད་ཆུས་ཡོངས་སུ་གང་བའི་རྒྱ་མཚོར་གྱུར་པའི་རྒྱ་མཚོ་ཆེན་པོ་གཅིག་ཏུ་གྱུར་པ་ལ་ཡོངས་སུ་བརྟག་པ་བཟུང་སྟེ། དེ་ལ་སེམས་ཅན་གང་གཱའི་ཀླུང་གི་བྱེ་མ་སྙེད་
འདུས་ནས། བརྒྱར་བཙལ་བའི་སྐྲའི་རྩེ་མོས་ཆུའི་ཐིགས་པ་གཅིག་བླངས། གཞན་ཡང་སེམས་ཅན་གང་གཱའི་ཀླུང་གི་བྱེ་མ་སྙེད་འདུས་ནས་བརྒྱར་བཙལ་བའི་སྐྲའི་རྩ་མོས་ཆུའི་ཐིགས་པ་གཉིས་བླངས། གཞན་ཡང་སེམས་ཅན་གང་གཱའི་ཀླུང་གི་བྱེ་མ་སྙེད་འདུས་ནས། བརྒྱར་བཙལ་
བའི་སྐྲའི་རྩེ་མོས་ཆུའི་ཐིགས་པ་གསུམ་བླངས་ནས་གཞོན་ནུ་ཡོངས་སུ་བརྟག་པ་བཟུང་སྟེ། དེ་ལྟ་བུའི་ཐབས་ཀྱིས་ཆུའི་ཕུང་པོ་ཆེན་པོ་དེ་ཟད་པར་གྱུར་ཀྱང་སེམས་ཅན་གྱི་ཁམས་ནི་ཚད་དང་མཐའ་མེད་དེ། གཞོན་ནུ་སེམས་ཅན་གྱི་ཁམས་དེ་ལྟར་དཔག་ཏུ་མེད་ཅིང་དེ་ལྟར་མཐའ་ཡས་པ་དེ་
ཐམས་ཅད་ལ་བྱང་ཆུབ་སེམས་དཔའི་བྱམས་པས་ཁྱབ་པར་བྱེད་དོ། །གཞོན་ནུ་དེ་ཇི་སྙམ་དུ་སེམས། གང་དེ་ལྟར་དཔག་ཏུ་མེད་པར་བྱམས་པ་བསྒོམ་པའི་དགེ་བའི་རྩ་བ་དེའི་ཚད་གཟུང་བར་ནུས་སམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བདེ་བར་གཤེགས་པ་དེ་ནི་མ་

ལགས་སོ། །གཞོན་ནུ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱམས་པ་ཆེན་པོ་བསྒོམ་པའི་དགེ་བའི་རྩ་བ་ནི་དཔག་ཏུ་མེད་པ་ཡིན་ཏེ། གཞོན་ནུ་དེའི་བྱམས་པ་ནི་བདག་སྲུང་བ་ཡིན། གཞན་ལ་ཕན་པར་གནས་པ་ཡིན། མཆོག་ཏུ་གནོད་སེམས་མེད་པ། ཁྲོ་བ་དང་
གནོད་སེམས་ཀྱི་ཐབ་དང་བྲལ་བ། ཉེས་པ་འཇོམས་པ་རྗེས་སུ་ཆགས་པའི་ཀུན་ནས་ལྡང་བ་དང་བྲལ་བ། དད་པ་ཀུན་ཏུ་སྟོན་པ་འཁྲུལ་པ་ཐམས་ཅད་ལ་ཉེས་པར་ལྟ་བ། ཡོངས་སུ་གདུང་བ་མེད་པ། ལུས་དང་། ངག་དང་། སེམས་བདེ་བ་སྐྱེད་པ། གཞན་གྱི་གནོད་པར་བྱ་བ་ཐམས་ཅད་
དུ་མ་ལྷུང་བ། འཇིགས་པ་ཐམས་ཅད་དང་བྲལ་བ་འཕགས་པའི་ལམ་དང་འཐུན་པ། གཤེ་བ་དང་ཁྲོས་པ་ལ་དང་བསྐྱེད་པ། གཡུལ་ཐམས་ཅད་ལས་སྒྲོལ་བ། དབྱིག་པ་དང་མཚོན་ཆ་མི་ཐོགས་པ། སེམས་ཅན་རབ་ཏུ་ཐར་བར་བྱ་བ་ལ་དགའ་བ། ཁོང་ཁྲོ་བ་ཐམས་ཅད་དང་བྲལ་
བ། ཚུལ་འཆོས་པ་དང་། ཁ་གསག་དང་། འདྲིད་པ་དང་། གཞོགས་སློང་ཐམས་ཅད་དང་བྲལ་བ། རང་གི་རྙེད་པ་དང་། བཀུར་སྟི་དང་། ཚིགས་སུ་བཅད་པས་ཉེ་བར་འཚོ་བ། བརྒྱ་བྱིན་དང་། ཚངས་པས་ཕྱག་བྱས་པ། རང་གི་གཟི་བརྗིད་ཀྱིས་བརྒྱན་པ། མཁས་པས་བསྟོད་པ།
བྱིས་པ་ཐམས་ཅད་རྗེས་སུ་སྲུང་བ། ཚངས་པའི་ལམ་དང་འཐུན་པ། འདོད་པའི་ཁམས་དང་མ་འདྲེས་པ། ཐར་པའི་ལམ་གྱི་གཙོ་བོར་གྱུར་པ། ཐེག་པ་ཐམས་ཅད་ཀྱིས་ཡང་དག་པར་བཟུང་བ། ཟང་ཟིང་མེད་པའི་བསོད་ནམས་ཀྱི་ཚོགས་བསགས་པ། རྫས་ལས་བྱུང་བའི་བསོད་ནམས་བྱ་བའི་
དངོས་པོ་ཐམས་ཅད་ཀྱི་ཟིལ་གྱིས་མི་ནོན་པ། མཚན་སུམ་ཅུ་རྩ་གཉིས་དང་། དཔེ་བྱད་བཟང་པོས་ཡང་དག་པར་བརྒྱན་པ། དབང་པོ་ཉམས་ཤིང་མ་ཚང་བ་ཐམས་ཅད་སྤངས་པ། བདེ་འགྲོ་དང་། མྱ་ངན་ལས་འདའ་བའི་ལམ་ཐམས་ཅད་དུ་འགྲོ་བ། ངན་སོང་ཐམས་ཅད་དང་། མི་ཁོམ་པ་
བརྒྱད་ལས་ཟློག་པ། ཆོས་ཀྱི་ཀུན་དགའ་ལ་དགའ་ཞིང་མོས་པ། འདོད་པའི་ལོངས་སྤྱོད་ཐམས་ཅད་དང་། དབང་པོ་དང་། རྒྱལ་སྲིད་ལ་མངོན་པར་མི་དགའ་བ་དང་། སེམས་ཅན་ཐམས་ཅད་ལ་མཉམ་པའི་སེམས་ཀྱིས། སྦྱིན་པ་རབ་ཏུ་སྦྱོར་བ། ཐ་དད་པའི་འདུ་ཤེས་དང་བྲལ་བ། ཚུལ་

ཁྲིམས་དང་བསླབ་པ་ཐམས་ཅད་ཀྱི་སྒོ་དང་ལམ། ཚུལ་ཁྲིམས་འཆལ་པ་ཐམས་ཅད་ཀྱི་སྐྱབས། བཟོད་པའི་སྟོབས་ཀུན་ཏུ་སྟོན་པ། ང་རྒྱལ་དང་། རྒྱགས་པ་དང་། དྲེགས་པ་ཐམས་ཅད་དང་བྲལ་བ། མི་འཁྲུགས་པའི་བརྩོན་འགྲུས་རྩོམ་པ། ཡང་དག་པར་སྦྱོར་བའི་
བྱ་བ་སྒྲོལ་བ། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་རྩ་བ། ཉོན་མོངས་པ་ལས་བྱུང་བ། སེམས་ངེས་པར་རྟོགས་པ། ཐོས་པ་འཛིན་པ། ཤེས་རབ་ཀྱི་རྒྱུ་སྐྱེད་པའི་བྱམས་པ། བདག་གི་ཕྱོགས་དང་གཞན་གྱི་ཕྱོགས་འཇོམས་པ། བདུད་དང་
ཉོན་མོངས་པའི་ཕྱོགས་སེལ་བ། འགྲོགས་ན་བདེ་བ། ལྡང་བ་དང་། སློང་བ་དང་། འདུག་པ་དང་། ཉལ་བའི་སྤྱོད་ལམ་སྲུང་བར་བྱེད་པ། རྒོད་པའི་རང་བཞིན་ཡིད་ལ་བྱེད་པ་ཐམས་ཅད་སེལ་བ། དྲི་ཞིམ་པོས་བྱུགས་པ། ཁྲེལ་ཡོད་པ་དང་ངོ་ཚ་ཤེས་པས་བྱུགས་པ། མི་ཁོམ་པ་དང་། ཉོན་མོངས་
པ་དང་། ངན་འགྲོ་ཐམས་ཅད་སེལ་བའི་བྱམས་པ། འགྲོ་བ་ཐམས་ཅད་སྐྱོབ་པའི་བྱམས་པ་ཆེན་པོ། བདག་གི་བདེ་བ་བཏང་བ་དང་། སེམས་ཅན་ཐམས་ཅད་ལ་བདེ་བ་རབ་ཏུ་སྦྱིན་པ་སྟེ། གཞོན་ནུ་ཉན་ཐོས་རྣམས་ཀྱི་བྱམས་པ་ནི་བདག་སྐྱོབ་པའོ། །བྱང་ཆུབ་སེམས་དཔའ་རྣམས་ཀྱི་བྱམས་
པ་ནི་སེམས་ཅན་ཐམས་ཅད་ལ་སྐྱོབ་པའོ། །ཡང་གཞོན་ནུ་བྱང་ཆུབ་སེམས་དཔའ་སེམས་དང་པོ་བསྐྱེད་པ་རྣམས་ཀྱི་བྱམས་པ་ནི་སེམས་ཅན་ལ་དམིགས་པའོ། །བྱང་ཆུབ་སེམས་དཔའ་སྤྱོད་པ་ལ་ཞུགས་པ་རྣམས་ཀྱི་བྱམས་པ་ནི་ཆོས་ལ་དམིགས་པའོ། །བྱང་ཆུབ་སེམས་དཔའ་བཟོད་པ་
རབ་ཏུ་ཐོབ་པ་རྣམས་ཀྱི་བྱམས་པ་ནི་དམིགས་པ་མེད་པའོ། །གཞོན་ནུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱམས་པ་ཞེས་བྱ་སྟེ། །བྱང་ཆུབ་སེམས་དཔའ་བྱམས་པ་དེ་ལ་རབ་ཏུ་གནས་པས་སེམས་ཅན་ཐམས་ཅད་ལ་བྱམས་པས་ཁྱབ་པར་བྱེད་དོ། །དེ་ལ་གཞོན་ནུ་བྱང་ཆུབ་
སེམས་དཔའི་སྙིང་རྗེ་ཆེན་པོ་གང་ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པའི་སྔོན་དུ་འགྲོ་བ་ནི་སྙིང་རྗེ་ཆེན་པོའོ། །འདི་ལྟ་སྟེ། དཔེར་ན་གཞོན་ནུ་སྐྱེས་བུའི་སྲོག་གི་དབང་པོའི་སྔོན་དུ་འགྲོ་བ་ནི་དབུགས་འབྱུང་བ་དང་རྔུབ་པའོ། །

གཞོན་ནུ་དེ་བཞིན་དུ་ཐེག་པ་ཆེན་པོ་ཡང་དག་པར་སྒྲུབ་པའི་བྱང་ཆུབ་སེམས་དཔའི་སྔོན་དུ་འགྲོ་བ་ནི་སྙིང་རྗེ་ཆེན་པོའོ། །འདི་ལྟ་སྟེ། དཔེར་ན་གཞོན་ནུ་འཁོར་ལོས་སྒྱུར་བའི་རྒྱལ་པོའི་རིན་པོ་ཆེ་ཐམས་ཅད་ཀྱི་སྔོན་དུ་འགྲོ་བ་ནི་འཁོར་ལོ་རིན་པོ་ཆེ་ཡིན་ནོ། །གཞོན་ནུ་དེ་བཞིན་དུ་བྱང་ཆུབ་
སེམས་དཔའ་སེམས་དཔའ་ཆེན་པོའི་སངས་རྒྱས་ཀྱི་ཆོས་ཐམས་ཅད་ཀྱི་སྔོན་དུ་འགྲོ་བ་ནི་སྙིང་རྗེ་ཆེན་པོ་ཡིན་ཏེ། སྙིང་རྗེ་ཆེན་པོ་དེ་ཡང་སེམས་ཅན་ཐམས་ཅད་རྗེས་སུ་མི་གཏོང་བའོ། །གཞོན་ནུ་བྱང་ཆུབ་སེམས་དཔའི་སྙིང་རྗེ་ཆེན་པོ་སེམས་ཅན་ཐམས་ཅད་ལ་ཇི་ལྟར་འཇུག་ཅེ་ན།
གཞོན་ནུ་འདི་ལྟར་བྱང་ཆུབ་སེམས་དཔའ་འཇིག་ཚོགས་ལ་ལྟ་བས་བཅིངས་ཤིང་ལྟ་བར་གྱུར་པ་རྣམ་པ་མང་པོ་ལ་ཆགས་པའི་སེམས་ཅན་མཐོང་ན། དེ་དག་གི་འཇིག་ཚོགས་ལ་ལྟ་བས་བཅིངས་པ་སྤང་བའི་ཕྱིར་ཆོས་བསྟན་ཏོ་ཞེས་སེམས་ཅན་རྣམས་ལ་བྱང་ཆུབ་སེམས་དཔའི་
སྙིང་རྗེ་ཆེན་པོ་འཇུག་གོ །གཞན་ཡང་གཞོན་ནུ་བྱང་ཆུབ་སེམས་དཔས་སེམས་ཅན་ཡང་དག་པ་མ་ཡིན་པ་ཕྱིན་ཅི་ལོག་གི་གནས་ལ་གནས་ཏེ། མི་རྟག་པ་ལ་རྟག་པར་འདུ་ཤེས་པ་དང་། སྡུག་བསྔལ་བ་ལ་བདེ་བར་འདུ་ཤེས་པ་དང་། བདག་མེད་པ་ལ་བདག་ཏུ་འདུ་ཤེས་པ་
དང་། མི་སྡུག་པ་ལ་སྡུག་པར་འདུ་ཤེས་པ་མཐོང་ན། དེ་དག་གིས་ཡང་དག་པ་མ་ཡིན་པའི་ཕྱིན་ཅི་ལོག་སྤང་བའི་ཕྱིར་ཆོས་བསྟན་ཏོ་ཞེས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་འཇུག་གོ །གཞན་ཡང་གཞོན་ནུ་བྱང་ཆུབ་སེམས་དཔས་ཕྱིན་ཅི་ལོག་གི་འདོད་
པ་ལ་སྲེད་པའི་སེམས་ཅན་དེ་དག་མ་ལ་ཡང་གཡེམ་པ་དང་། སྲིང་མོ་ལ་ཡང་གཡེམ་པ་མཐོང་ན། བྱང་ཆུབ་སེམས་དཔའ་འདི་སྙམ་དུ་སེམས་ཏེ། ཀྱེ་མའོ་འཇིག་རྟེན་གནས་པ་འདི་དག་ནི་འཕགས་པ་མ་ཡིན་པ་འདུས་པ་སྟེ། མུ་ཅོར་སྨྲ་བས་ཡོངས་སུ་གང་ཞིང་ངོ་ཚ་མི་ཤེས་
པས་ཡོངས་སུ་གང་ངོ་། །འདི་ལྟར་མའི་རུམ་མངལ་གྱི་མལ་ན་འདུག་འདུག་སྟེ། དེ་ཉིད་ཀྱི་མངལ་གྱི་སྒོ་ནས་བྱུང་ལ་དེ་ཉིད་དང་ཡང་ལྷན་ཅིག་ཏུ་འདོད་པ་སྟེན་པར་བྱེད་པ་ལྟ་ག་ལ་སྲིད། མངལ་གཅིག་ན་ལྷན་ཅིག་ཏུ་འདུག་འདུག་པའི་སྲིང་མོ་དང་འདུ་ཞིང་འཁྲིག་པ་བྱེད་པ་ལྟ་ག་ལ་

སྲིད་དེ། ཀྱེ་མའོ་སེམས་ཅན་འདི་དག་ནི་བརླག་གོ །རྣམ་པར་བརླག་གོ །རབ་ཏུ་བརླག་གོ །འདོད་ཆགས་ཀྱིས་གཡེན་སྤྱོའོ། །ཞེ་སྡང་གིས་གཡེན་སྤྱོའོ། །གཏི་མུག་གིས་གཡེན་སྤྱོའོ། །མི་ཤེས་པས་གཡེན་སྤྱོའོ། །ཆོས་ལས་ཉམས་ཤིང་ཆོས་མ་
ཡིན་པ་ལ་གནས་སོ། །མི་འཐུན་པའི་ཆོས་ལ་རབ་ཏུ་སྤྱོད་དོ། །སེམས་ཅན་དམྱལ་བའི་སྤྱོད་ཡུལ་པའོ། །དུད་འགྲོའི་སྐྱེ་གནས་ཀྱི་སྤྱོད་ཡུལ་པའོ། །གཤིན་རྗེའི་འཇིག་རྟེན་གྱི་སྤྱོད་ཡུལ་པའོ། །ལོག་པའི་ལམ་ལ་སྤྱོད་ཡུལ་པའོ་སྙམ་མོ། །གཞོན་ནུ་འདི་ལྟ་སྟེ་དཔེར་ན་ཝ་དུར་ཁྲོད་ཀྱི་
མཐར་གཡང་ས་ཆེན་པོ་དང་ཉེ་བ་ཞིག་ན་མཚན་མོ་ཁྱིས་གཙེས་ནས་གཡང་ས་ཆེན་པོ་ནས་ལྷུང་བ་དེ་བཞིན་དུ་གཞོན་ནུ་སེམས་ཅན་འདི་དག་ཀྱང་ཝ་དང་འདྲའོ། །གཞོན་ནུ་འདི་ལྟ་སྟེ། དཔེར་ན་དམུས་ལོང་ཁྱིས་གཙེས་ནས་གཡང་ས་ཆེན་པོ་དང་ཉེ་བར་གྱུར་པ་དེ་བཞིན་དུ། ཀྱེ་མའོ་
གཞོན་ནུ་སེམས་ཅན་འདི་དག་ཀྱང་དམུས་ལོང་དང་འདྲའོ། །གཞོན་ནུ་འདི་ལྟ་སྟེ། དཔེར་ན་ཕག་ནི་མི་གཙང་བ་ཟ་ཞིང་མི་གཙང་བ་ལ་སྤྱོད་ཡུལ་པ་སྟེ། གཞོན་ནུ་ཀྱེ་མའོ་དེ་བཞིན་དུ་སེམས་ཅན་འདི་དག་ཀྱང་ཕག་དང་འདྲ་སྟེ། དེ་ཉིད་མ་ཡིན། དེ་ཉིད་སྲིང་མོ་ཡིན་ན། དེ་ཆུང་མར་བྱ་བ་
ལྟ་ག་ལ་སྲིད་སྙམ་སྟེ། སེམས་ཅན་ཉོན་མོངས་པས་གཡེན་སྤྱོ་བ་དང་། བདུད་ཀྱི་ཕྱོགས་ཀྱི་སྤྱོད་ཡུལ་པ་དང་། བདུད་ཀྱི་ཞགས་པས་བཅིངས་པ་དང་། འདོད་པའི་འདམ་དུ་བྱིང་བ་དེ་དག་གི་འདོད་པ་ཐམས་ཅད་སྤང་བའི་ཕྱིར་ཆོས་བསྟན་ཏོ། །ཞེས་སེམས་ཅན་རྣམས་ལ་བྱང་ཆུབ་
སེམས་དཔའི་སྙིང་རྗེ་ཆེན་པོ་འཇུག་གོ །གཞོན་ནུ་གཞན་ཡང་བྱང་ཆུབ་སེམས་དཔས་སྒྲིབ་པ་ལྔས་བསྒྲིབས་པའི་སེམས་ཅན་འདོད་པའི་ཟུག་རྔུས་ཟུག་པ་མཐོང་ན། སྐྱེ་མཆེད་དྲུག་ལ་ཆགས་ཤིང་ཞེན་པ། མིག་གིས་གཟུགས་མཐོང་ན། མཚན་མར་འཛིན་པར་འགྱུར་ཞིང་མངོན་རྟགས་སུ་
འཛིན་པ་དང་། རྣ་བས་སྒྲ། སྣས་དྲི། ལྕེས་རོ། ལུས་ཀྱིས་རེག་པ་ལ་རེག་ན་མཚན་མར་འཛིན་ཅིང་མངོན་རྟགས་སུ་འཛིན་པར་འགྱུར་ཏེ། ཀྱེ་མའོ་སེམས་ཅན་འདི་དག་ནི་ཁོང་ཁྲོ་བ་མང་ཞིང་ཕན་ཚུན་མི་མཛའ་སྟེ། དེ་དག་དོན་རྙེད་པའི་ཕྱིར་ནི་མཛའ་བོར་ཡང་མི་ཤེས། གནོད་པར་

འགྱུར་བའི་ཕྱིར་ནི་གཅིག་ལ་གཅིག་གསོད་དོ། །ཀྱེ་མའོ་སེམས་ཅན་འདི་དག་ནི་གཉིད་དང་རྨུགས་པ་མང་བ་སྟེ། ཞེན་ཅིང་སྤོང་བ་མི་ཤེས་པའི་ལིང་ཏོག་གིས་ཁེབས་ཤིང་མི་དགེ་བའོ། །ཀྱེ་མའོ་སེམས་ཅན་འདི་དག་ནི་འགྱོད་པས་ཀུན་ནས་བསྐོར་བ་སྟེ། བློ་བུར་གྱི་ཉོན་
མོངས་པས་སེམས་ཀུན་ནས་ཉོན་མོངས་པའོ། །ཀྱེ་མའོ་སེམས་ཅན་འདི་དག་ནི་ཐེ་ཚོམ་གྱིས་ཡོངས་སུ་དཀྲིས་པ་ཆོས་ཟབ་མོ་ལ་ངེས་པར་མ་གྱུར་པ་སྟེ། དེ་དག་གི་སྒྲིབ་པ་ཐམས་ཅད་སྤང་བའི་ཕྱིར་ཆོས་བསྟན་ཏོ་ཞེས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་
འཇུག་གོ །གཞོན་ནུ་གཞན་ཡང་བྱང་ཆུབ་སེམས་དཔའ་སེམས་ཅན་ང་རྒྱལ་གྱིས་ནོན་པ། ཆེ་བའི་ང་རྒྱལ་གྱིས་ནོན་པ། ང་རྒྱལ་ལས་ཀྱང་ང་རྒྱལ་གྱིས་ནོན་པ། ངའོ་སྙམ་པའི་ང་རྒྱལ་གྱིས་ནོན་པ། མངོན་པའི་ང་རྒྱལ་གྱིས་ནོན་པ། ཅུང་ཟད་སྙམ་པའི་ང་རྒྱལ་གྱིས་ནོན་པ། ལོག་
པའི་ང་རྒྱལ་གྱིས་ནོན་པ། དམའ་བ་བས་བདག་མཐོ་བར་སེམས་པ། མཚུངས་པ་བས་ཀྱང་བདག་ཆེས་ལྷག་པར་ལྟ་བ་དེ་དག་གཟུགས་ལ་བདག་ཅེས་ཁས་ལེན་པ་ནས། རྣམ་པར་ཤེས་པའི་བར་ལ་བདག་ཅེས་ཁས་ལེན་པ། ཁོང་དུ་མ་ཆུད་པར་ཁོང་དུ་ཆུད་སྙམ་དུ་ཤེས་པ། གུས་པར་སྨྲ་
བར་འོས་པ་ལ་གུས་པར་མི་སྨྲ་བ། ཕྱག་བྱ་བར་འོས་པ་ལ་ཕྱག་མི་འཚལ་བ། རྒན་པ་དང་། གཞོན་པ་ལ་མི་འདུད་པ། བླ་མ་ལ་རིམ་གྲོ་མི་བྱེད་པ། མཁས་པ་ལ་དགེ་བ་གང་། མི་དགེ་བ་གང་། བསྟེན་པར་བྱ་བ་གང་། བསྟེན་པར་མི་བྱ་བ་གང་། བྱ་བ་གང་། མི་བྱ་བ་གང་།
ཁ་ན་མ་ཐོ་བ་དང་བཅས་པ་གང་། ཁ་ན་མ་ཐོ་བ་མེད་པ་གང་། ལམ་གང་། ཏིང་ངེ་འཛིན་གང་། རྣམ་པར་གྲོལ་བ་གང་ཞེས་མི་འདྲི་བ་དང་། བདག་ཉིད་ལ་བདག་ཉིད་ནི་གཙོ་བོའོ། །བདག་ནི་མཆོག་གོ་སྙམ་དུ་རློམ་སེམས་སུ་བྱེད་པ་མཐོང་ན་འདི་ལྟར་ང་རྒྱལ་གྱི་རྣམ་པ་ཐམས་
ཅད་སྤང་བའི་ཕྱིར་ཆོས་བསྟན་ཏོ་ཞེས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་འཇུག་གོ །གཞོན་ནུ་གཞན་ཡང་བྱང་ཆུབ་སེམས་དཔས་སྲེད་པའི་བཅིང་བས་བཅིངས་པ། སྲེད་པས་འཁོལ་བ། ཆུང་མ་དང་། བུ་ཕོ་དང་། བུ་མོས་ཟིན་པ། གནོད་བས་ཟིན་པ།

དོན་མེད་པས་ཟིན་པ། འཁོར་བའི་གཏན་ཟིན་པ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་གྱི་ལམ་གྱིས་ཟིན་པ། སྲིད་པའི་བཅིང་བས་ཟིན་པ། རང་ཉམ་མེད་པ། རང་དབང་མེད་པའི་སེམས་ཅན་མཐོང་ན། དེ་དག་
རང་ཉམ་དང་། རང་དབང་དང་། གང་དུ་དགའ་བར་འགྲོ་བ་དང་། མྱ་ངན་ལས་འདའ་བར་འགྲོ་བར་བྱ་བའི་ཕྱིར་ཆོས་བསྟན་ཏོ་ཞེས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་འཇུག་གོ །གཞོན་ནུ་གཞན་ཡང་བྱང་ཆུབ་སེམས་དཔས་དགེ་བའི་བཤེས་གཉེན་
དང་བྲལ་བ། སྡིག་པའི་གྲོགས་པོས་འཁོལ་བ་དེ་དག་སྡིག་པའི་གྲོགས་པོས་ནོན་པས་མི་དགེ་བའི་ལས་ལ་ཆགས་པ་འདི་ལྟ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་པོ་དང་། ཚིག་
ཀྱལ་བ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བའི་སེམས་ཅན་མཐོང་ན་འདི་ལྟར་དགེ་བའི་བཤེས་གཉེན་བསྡུ་བ་དང་། མི་དགེ་བའི་ལས་ལས་བཟློག་པ་དང་། དགེ་བའི་བཅུའི་ལས་ཀྱི་ལམ་ཡང་དག་པར་བཟུང་སྟེ། སྤྱོད་པར་བྱ་བའི་ཕྱིར་ཆོས་བསྟན་ཏོ་
ཞེས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་འཇུག་གོ །གཞོན་ནུ་གཞན་ཡང་བྱང་ཆུབ་སེམས་དཔས་གཏི་མུག་གིས་བསྒྲིབས་པ། མ་རིག་པའི་མུན་པ་མུན་ནག་གི་ལིང་ཏོག་གིས་ཀུན་ཏུ་བསྒྲིབས་པ། བདག་དང་། སེམས་ཅན་དང་། སྲོག་དང་། སྐྱེ་བ་པོ་དང་།
ཤེད་ལས་སྐྱེས་པ་དང་། ཤེད་བུ་དང་། སྐྱེས་བུ་དང་། གང་ཟག་དང་། བྱེད་པ་པོ་དང་། ཚོར་བ་པོ་དང་། ངར་འཛིན་པ་དང་། ང་ཡིར་འཛིན་པ་ལ་མངོན་པར་ཆགས་པའི་སེམས་ཅན་མཐོང་ན་དེ་དག་འཕགས་པའི་ཤེས་རབ་ཀྱི་མིག་རྣམ་པར་སྦྱངས་ཞིང་ལྟ་བར་གྱུར་པ་ཐམས་ཅད་སྤང་བའི་ཕྱིར་
ཆོས་བསྟན་ཏོ་ཞེས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་འཇུག་གོ །གཞོན་ནུ་གཞན་ཡང་བྱང་ཆུབ་སེམས་དཔས་འཁོར་བ་ལ་མངོན་པར་དགའ་བའི་སེམས་ཅན་མཐོང་ན་དེ་དག་ཕུང་པོ་ལྔའི་གཤེད་མ་ལས་རབ་ཏུ་ཐར་བར་བྱ་བ་དང་། འཁོར་བའི་འབྲོག་དགོན་པ་ལས་རབ་ཏུ་

བཟླ་བ་དང་། ཁམས་གསུམ་ཐམས་ཅད་ལས་གདོན་པའི་ཕྱིར་ཆོས་བསྟན་ཏོ་ཞེས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་འཇུག་གོ །གཞོན་ནུ་གཞན་ཡང་བྱང་ཆུབ་སེམས་དཔས་སེམས་ཅན་འཁྲུགས་པར་གྱུར་པ། རྩྭ་མུན་ཛ་དང་། བལ་བ་ཛ་ལྟ་བུ་མི་དྲང་བ་
དྲང་བ་ལྟར་འཆོས་པ། འཇིག་རྟེན་འདི་ནས་འཇིག་རྟེན་ཕ་རོལ་དུ། འཇིག་རྟེན་ཕ་རོལ་ནས་འཇིག་རྟེན་འདིར་ཀུན་ཏུ་རྒྱུག་ཅིང་འཁོར་བ། འགྲོ་བ་ལྔར་འགྲོ་བ་ལ་ཕྱོགས་པ། མྱ་ངན་ལས་འདས་པར་འགྲོ་བ་ལ་ཕྱིར་བལྟས་པ་མཐོང་ན་དེ་དག་གི་མྱ་ངན་ལས་འདའ་བའི་སྒོ་དབྱེ་བའི་ཕྱིར་ཆོས་
བསྟན་ཏོ་ཞེས་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་འཇུག་གོ །གཞོན་ནུ་དེ་ལྟར་བྱང་ཆུབ་སེམས་དཔས་སེམས་ཅན་གྱི་ཁམས་མཐོང་ན་རྣམ་པ་བཅུ་པོ་འདི་དག་གིས་སྙིང་རྗེ་ཆེན་པོ་འཇུག་གོ །བསམ་པ་ལས་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་གཡོ་བ་
མེད་པར་འཇུག་གོ །ལྷག་པའི་བསམ་པ་ལས་ཤིན་ཏུ་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་མཉམ་པར་འཇུག་གོ །ལམ་ལས་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་དྲང་པོ་བཅོས་མ་མ་ཡིན་པར་འཇུག་གོ །སེམས་གྱ་གྱུ་མེད་པའི་སེམས་ལས་ཤིན་ཏུ་གནས་པ་ལས་བྱུང་
བའི་ཕྱིར་དེའི་སྙིང་རྗེ་ཆེན་པོ་དེ་ཡང་གྱ་གྱུ་མེད་པར་འཇུག་གོ །འདི་ལྟ་སྟེ། སེམས་ཅན་ཐམས་ཅད་ལ་འདུད་པ་དང་། ཕྱག་འཚལ་བ་ལས་ཤིན་ཏུ་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་བདག་གི་བདེ་བ་གཏོང་བར་འཇུག་གོ །འདི་ལྟ་སྟེ། བདག་གི་སེམས་ཡོངས་སུ་དག་
པ་ལས་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་ཕ་རོལ་རྗེས་སུ་སྲུང་བར་འཇུག་གོ །འདི་ལྟ་སྟེ། གཡོ་ཞིང་འགུལ་བའི་སེམས་དང་བྲལ་བ་རབ་ཏུ་གནས་པའི་སེམས་ལས་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་ཤེས་རབ་བརྟན་པར་འཇུག་གོ །འདི་ལྟ་སྟེ། ཕ་རོལ་ལ་བདེ་བ་སྦྱིན་པ་
ལས་རབ་ཏུ་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་བདག་གི་བདེ་བ་གཏོང་བར་འཇུག་གོ །བརྩོན་འགྲུས་བརྟན་པ་ལས་བྱུང་བའི་ཕྱིར་དེའི་སྙིང་རྗེ་ཆེན་པོ་དེ་ཡང་སེམས་ཅན་ཐམས་ཅད་ཀྱི་ཁུར་ཁྱེར་བར་འཇུག་སྟེ། གཞོན་ནུ་འདི་ལྟར་བྱང་ཆུབ་སེམས་དཔའི་སྙིང་རྗེ་ཆེན་པོ་ནི་རྣམ་པ་འདི་དག་

དང་གཞན་ཡང་རྣམ་པ་བཅུས་འཇུག་གོ །གཞོན་ནུའི་འདི་ལྟར་གང་ལ་ལ་ཐེག་པ་ཆེན་པོས་ངེས་པར་འབྱུང་བར་འགྱུར་བ་དེ་དག་ཐམས་ཅད་ཀྱང་སྙིང་རྗེ་ཆེན་པོས་འབྱུང་སྟེ། དེའི་ཕྱིར་སྙིང་རྗེ་ཆེན་པོ་ཞེས་བྱའོ། །སྦྱིན་པ་བྱེད་པ་དང་། ཚུལ་ཁྲིམས་བྱེད་པ་
དང་། བཟོད་པ་བྱེད་པ་དང་། བརྩོན་འགྲུས་བྱེད་པ་དང་། བསམ་གཏན་བྱེད་པ་དང་། ཤེས་རབ་བྱེད་པ་ནི་སྙིང་རྗེ་ཆེན་པོ་ཞེས་བྱ་སྟེ། དེའི་ཕྱིར་སྙིང་རྗེ་ཆེན་པོ་ཞེས་བྱའོ། །དྲན་པ་ཉེ་བར་གཞག་པ་བྱེད་པ་དང་། ཡང་དག་པར་སྤོང་བ་བྱེད་པས་སྙིང་རྗེ་ཆེན་པོའོ། །དབང་པོ་དང་།
སྟོབས་དང་། བྱང་ཆུབ་ཀྱི་ཡན་ལག་དང་། ལམ་དང་། མཆོག་ཏུ་དགའ་བར་བྱ་བའི་ལས་དང་། མཐར་གྱིས་སྙོམས་པར་འཇུག་པ་དང་། དགེ་བ་བཅུའི་ལས་ཀྱི་ལམ་དང་། ཚིག་དེ་དག་ཐམས་ཅད་ཀྱང་རྒྱས་པར་བྱའོ། །སྙིང་རྗེ་ཆེན་པོ་ནི་རང་བྱུང་གི་ཡེ་ཤེས་སྒྲུབ་པར་བྱེད་པས་ན་
དེའི་ཕྱིར་སྙིང་རྗེ་ཆེན་པོ་ཞེས་བྱའོ། །རང་གི་བྱ་བ་དང་། ལེགས་པར་བྱེད་པའི་བྱ་བ་དང་། མི་འགྱུར་བའི་བྱ་བ་དང་། སེམས་ཅན་ཐམས་ཅད་ལ་བྱ་བ་ཅི་ཡོད་སྙམ་པ་སྟེ། དེའི་སྙིང་རྗེ་ཆེན་པོ་དེ་ཡང་སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་ཡོངས་སུ་རྫོགས་པར་བྱེད་པས་
འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་སྙིང་རྗེ་ཆེན་པོ་ཞེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་དེ་དང་ལྡན་པས་སེམས་ཅན་འདི་འདྲ་བའི་གནས་ཐོབ་པ་མཐོང་ན་དེ་དག་ལ་སྙིང་བརྩེ་བ་དང་སྙིང་རྗེའི་སེམས་སྐྱེད་དོ། །དེ་ལ་བྱང་ཆུབ་སེམས་དཔའི་དགའ་བ་
གང་ཞེ་ན། གང་དགེ་བའི་ཆོས་རྣམས་དྲན་པ་དང་། རྗེས་སུ་དྲན་པ་དང་། དགའ་བ་དང་། དད་པ་དང་། རབ་ཏུ་དགའ་བ་དང་། དགེ་བའི་ཆོས་ལ་མི་ཞུམ་པ་དང་། མི་འགོང་བ་དང་། ཡོངས་སུ་མི་སྐྱོ་བ་དང་། མི་དགའ་བ་ཐམས་ཅད་སྤོང་བ་དང་། ཆོས་ཐམས་ཅད་ལ་དགའ་བར་
གནས་པ་དང་། སེམས་རབ་ཏུ་དགའ་བ་དང་། ལུས་རབ་ཏུ་སིམ་པ་དང་། བློ་རབ་ཏུ་དགའ་བ་དང་། ཡིད་རབ་ཏུ་མགུ་བ་དང་། དེ་བཞིན་གཤེགས་པའི་སྐུ་ལ་མངོན་པར་དགའ་ཞིང་མོས་པ་དང་། མཚན་དང་། དཔེ་བྱད་བཟང་པོའི་རྒྱན་ཀུན་ཏུ་ཚོལ་བ་ལ་དགའ་བ་དང་། ཆོས་ཉན་པས་

ཡོངས་སུ་མི་སྐྱོ་ཞིང་དགའ་བ་དང་། ཆོས་ཀྱི་ཕྱིར་འབྲང་བའི་ནན་ཏན་ལ་རབ་ཏུ་དགའ་བ་དང་། རབ་ཏུ་དགའ་བའི་ཆོས་ལ་མགུ་བ་དང་། སེམས་ཅན་རྣམས་ལ་ཁོང་ཁྲོ་བ་མེད་པ་དང་། བྱང་ཆུབ་ལ་དགའ་བ་དང་། ཆོས་རྒྱ་ཆེན་པོ་ལ་མོས་པ་དང་། ཉི་ཚེ་བའི་ཐེག་པ་སེལ་བར་
སེམས་བསྐྱེད་པ་དང་། སེར་སྣ་ཚར་གཅོད་པ་དང་། སློང་བ་ལ་དགའ་བ་དང་། གཏོང་བ་ལ་རབ་ཏུ་དགའ་བ་དང་། ཚུལ་ཁྲིམས་འཆལ་པ་དག་སྡུད་ཅིང་བྱམས་པ་དང་། ཚུལ་ཁྲིམས་དང་ལྡན་པ་ལ་རྟག་ཏུ་དད་པ་དང་། བདག་གི་ཚུལ་ཁྲིམས་ཡོངས་སུ་དག་པས་ངན་འགྲོ་དང་།
འཇིགས་པ་ཐམས་ཅད་ལས་རབ་ཏུ་འདའ་བར་དབུགས་འབྱིན་པ་ལ་རབ་ཏུ་དགའ་བ་དང་། ཕ་རོལ་ངན་དུ་ཟེར་བ་དང་། ངན་པར་བརྗོད་པའི་ཚིག་གི་ལམ་བཟོད་ཅིང་རབ་ཏུ་དགའ་བ་དང་། ལག་པ་དང་། རྐང་པ་དང་། མིག་དང་མགོ་བཅད་ཀྱང་བཟོད་པར་ནུས་ཏེ། སེམས་མི་ཉམས་
ཤིང་རབ་ཏུ་དགའ་བ་དང་། རྒན་རབས་ལ་འདུད་ཅིང་ཞེས་བྱེད་པ་ལ་དགའ་བ་དང་། རྟག་ཏུ་བཞིན་འཛུམ་པ་ལ་དགའ་བ་དང་། ཁྲོ་གཉེར་མེད་ཅིང་གསོང་པོར་སྨྲ་བ་ལ་དགའ་བ་དང་། ཚུལ་འཆོས་པ་དང་། ཁ་གསག་དང་། གཞོགས་སློང་མེད་པ་ལ་རབ་ཏུ་དགའ་བ་དང་།
སྙིང་པོ་དང་ལྡན་པའི་ཆོས་ལ་འཇུག་པར་རབ་ཏུ་དགའ་བ་དང་། བྱང་ཆུབ་སེམས་དཔའ་ལ་སྟོན་པ་བཞིན་དུ་ཕངས་པ་དང་། ཆོས་ལ་བདག་བཞིན་དུ་ཕངས་པ་དང་། དེ་བཞིན་གཤེགས་པ་ལ་སྲོག་བཞིན་དུ་ཕངས་པ་དང་བླ་མ་ལ་ཕ་མ་བཞིན་དུ་ཕངས་པ་དང་། སེམས་ཅན་ཐམས་
ཅད་ལ་བུ་བཞིན་དུ་ཕངས་པ་དང་། སློབ་དཔོན་ལ་མིག་བཞིན་དུ་ཕངས་པ་དང་། ནན་ཏན་ལ་ཡན་ལག་གི་དམ་པ་མགོ་བཞིན་དུ་ཕངས་པ་དང་། ཕ་རོལ་ཏུ་ཕྱིན་པ་ལ་ལག་པ་དང་། རྐང་པ་བཞིན་དུ་ཕངས་པ་དང་། ཆོས་སྨྲ་བ་ལ་རིན་པོ་ཆེ་ཐམས་ཅད་བཞིན་དུ་ཕངས་པ་དང་།
ཆོས་ཡོངས་སུ་ཚོལ་བ་ལ་སྨན་བཞིན་དུ་ཕངས་པ་དང་། སྐུལ་ཞིང་དྲན་པར་བྱེད་པ་ལ་སྨན་པ་བཞིན་དུ་ཕངས་པར་སེམས་པའོ། །གཞོན་ནུ་འདི་ནི་དགའ་བ་ཞེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བ་དེ་ལ་རབ་ཏུ་གནས་ནས་རྟག་ཏུ་ཆོས་ཚོལ་བ་ལ་དགའ་བར་

འགྱུར་ཏེ། བྱང་ཆུབ་སེམས་དཔའི་སྤྱད་པ་སྤྱོད་པ་ལ་མི་སྐྱོའོ། །དེ་ལ་བྱང་ཆུབ་སེམས་དཔའ་རྣམས་ཀྱི་བཏང་སྙོམས་གང་ཞེ་ན། བཏང་སྙོམས་རྣམ་པ་གསུམ་སྟེ། རྣམ་པ་གསུམ་གང་ཞེ་ན། འདི་ལྟ་སྟེ། ཉོན་མོངས་པ་ལ་བཏང་སྙོམས་པ་དང་། བདག་
དང་གཞན་རྗེས་སུ་སྲུང་བའི་བཏང་སྙོམས་པ་དང་། དུས་དང་དུས་མ་ཡིན་པར་བཏང་སྙོམས་པའོ། །དེ་ལ་ཉོན་མོངས་པའི་བཏང་སྙོམས་པ་གང་ཞེ་ན། གང་བཀུར་སྟི་བྱས་ཀྱང་མཐོར་མི་སེམས་པ་དང་། བཀུར་སྟི་མ་བྱས་ཀྱང་དམའ་བར་མི་སེམས་པ་དང་། རྙེད་པས་སྙེམས་པ་
མེད་པ་དང་། མ་རྙེད་པས་ཡི་མི་འཆད་པ་དང་། ཚུལ་ཁྲིམས་དང་ལྡན་པ་དང་། ཚུལ་ཁྲིམས་འཆལ་པ་ལ་བློ་མཉམ་པ་དང་། གྲགས་པ་ལ་དགའ་བ་མེད་པ་དང་། མ་གྲགས་པ་ལ་ཞུམ་པ་མེད་པ་དང་། སྨད་པ་ལ་ཡི་མི་གསོད་པ་དང་། བསྟོད་པ་ལ་ཆོས་ཉིད་དུ་ཤིན་ཏུ་གནས་
པ་དང་། སྡུག་བསྔལ་ལ་སོ་སོར་རྟོག་པའི་སྟོབས་དང་། བདེ་བ་ལ་མི་རྟག་པར་རྟོག་པའི་སྟོབས་དང་། རྗེས་སུ་ཆགས་པ་འདོར་བ་དང་། ཁོང་ཁྲོ་བ་སྤོང་བ་དང་། མཛའ་བ་དང་མི་མཛའ་བ་ལ་སེམས་མཉམ་པ་དང་། ལེགས་པར་བྱས་པ་དང་། ཉེས་པར་བྱས་པ་ལ་གཉིས་སུ་
མི་འབྱེད་པ་དང་། སྡུག་པ་དང་མི་སྡུག་པ་ལ་མི་ལྟ་བ་དང་། བསྙེན་བཀུར་བྱེད་པ་དང་། བསྙེན་བཀུར་མི་བྱེད་པ་ལ་དགའ་བ་དང་མི་དགའ་བར་བྱ་བ་མེད་པ་དང་། སྙན་པར་སྨྲ་བ་དང་། མི་སྙན་པར་སྨྲ་བ་ལ་རྗེས་སུ་ཆགས་པ་དང་། ཁོང་ཁྲོ་བ་མེད་པ་དང་། ཀུན་མྱང་བའི་ཉེས་པ་ལ་མཚུངས་པར་
ཡོངས་སུ་འཇལ་བ་དང་། བདག་དང་སེམས་ཅན་གཞན་ལ་བསམ་པ་མཉམ་པ་དང་། ལུས་དང་སྲོག་ལ་མི་ལྟ་བ་དང་། སེམས་ཅན་རབ་འབྲིང་ཐ་མ་ལ་འོད་ཟེར་མཉམ་པ་དང་། བསྔགས་པ་དང་མ་བསྔགས་པ་ལ་ཆོས་ཉིད་མཉམ་པ་དང་། བདེན་པ་དང་། མི་བདེན་པ་ལ་
བདག་གི་བདེན་པ་ཡོངས་སུ་དག་པ་སྟེ། གཞོན་ནུ་འདི་ལྟར་གང་བདག་ལ་གནོད་པར་བྱེད་པ་དེ་ལ་བྱང་ཆུབ་སེམས་དཔའ་བཏང་སྙོམས་པ་ཡིན་ནོ། །དེ་ལ་བདག་དང་གཞན་རྗེས་སུ་སྲུང་བའི་བཏང་སྙོམས་གང་ཞེ་ན། གང་ཡན་ལག་དང་ཉིང་ལག་གི་ཤ་བཅད་ཀྱང་བཏང་སྙོམས་པ་

ཡིན་ནོ། །ཡན་ལག་དང་ཉིང་ལག་གི་ཤ་བཅད་ཀྱང་། འདོད་པ་མེད་ཅིང་ཚོལ་བ་མེད་དེ་བཏང་སྙོམས་པ་ཡིན་ནོ། །ལུས་ཀྱང་མི་འགྱུར། ངག་ཀྱང་མི་འགྱུར་ཏེ། གཉི་ག་བཟོད་པས་དེའི་ཕྱིར་བཏང་སྙོམས་ཞེས་བྱའོ། །མིག་གི་རྣམ་པས་མ་ཡིན། གཟུགས་ཀྱི་
རྣམ་པས་མ་ཡིན་ཏེ། གཉི་གས་ཀྱང་རྨ་མི་ཕྱིན་པ་ནས། ཡིད་ཀྱི་རྣམ་པ་དང་། ཆོས་ཀྱི་རྣམ་པའི་བར་གྱིས་རྨ་མི་ཕྱིན་པས་དེའི་ཕྱིར་བཏང་སྙོམས་ཞེས་བྱའོ། །རྨ་མི་ཕྱིན་ཅིང་སྣང་བ་མེད་པས་དེའི་ཕྱིར་བཏང་སྙོམས་ཞེས་བྱའོ། །རྨ་ཕྱུང་བ་ལ་རྨ་མི་འབྱིན་པས་དེའི་ཕྱིར་
བཏང་སྙོམས་ཞེས་བྱའོ། །བདག་དང་ཕ་རོལ་གཉི་ག་ལས་བཟོད་པས་དེའི་ཕྱིར་བཏང་སྙོམས་ཞེས་བྱའོ། །ཕན་པར་བྱེད་པ་དང་། ཕན་པར་མི་བྱེད་པ་ལ་མཉམ་པར་སྦྱོར་བས་དེའི་ཕྱིར་བཏང་སྙོམས་ཞེས་བྱའོ། །བཏང་སྙོམས་ནི་རྩོད་པ་མེད་པ་ལྷུར་བྱེད་པའོ། །བཏང་སྙོམས་
ནི་རང་གི་སེམས་ངེས་པར་རྟོག་པའོ། །བཏང་སྙོམས་ནི་བདག་ལ་སོ་སོར་རྟོག་པའོ། །བཏང་སྙོམས་ནི་གཞན་ལ་གནོད་པ་མེད་པའོ། །བྱང་ཆུབ་སེམས་དཔའ་རྣམས་ཀྱི་བཏང་སྙོམས་ནི་མཉམ་པར་གཞག་པའི་དངོས་པོ་སྟེ། སངས་རྒྱས་བཅོམ་ལྡན་འདས་རྣམས་ནི་བྱང་ཆུབ་
སེམས་དཔའ་སེམས་དཔའ་ཆེན་པོ་ལ་བཏང་སྙོམས་པ་གནང་བར་མི་མཛད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔས་རྟག་ཏུ་འབད་པར་བྱའོ། །རྟག་པར་རྒྱུན་མི་འཆད་པར་དགེ་བ་ཡོངས་སུ་བཙལ་བ་ལ་བརྩོན་པར་བྱ་སྟེ། དུས་དུས་སུ་བཏང་སྙོམས་བསྒོམ་པར་བྱའོ། །
དེ་ལ་དུས་དུས་སུ་བཏང་སྙོམས་བསྒོམ་པ་གང་ཞེ་ན། འདི་ལྟ་སྟེ། སྣོད་མ་ཡིན་པའི་སེམས་ཅན་ལ་བཏང་སྙོམས་པ་དང་། བསྙེན་བཀུར་མི་བྱེད་པ་ལ་བཏང་སྙོམས་པ་དང་། མ་རྙེད་པ་དང་། སྨད་པ་དང་། མ་གྲགས་པ་དང་། སྡུག་བསྔལ་བ་ལ་བཏང་སྙོམས་པ་དང་། ཉན་
ཐོས་ཀྱི་ཐེག་པར་ངེས་པར་འགྱུར་བ་ལ་ཞུགས་པ་རྣམས་ལ་བཏང་སྙོམས་པ་དང་། སྦྱིན་པའི་དུས་ན་ཚུལ་ཁྲིམས་ཉེ་བར་བསྒྲུབ་པ་བཏང་སྙོམས་པ་དང་། ཚུལ་ཁྲིམས་ཀྱི་དུས་ན་སྦྱིན་པ་ཉེ་བར་བསྒྲུབ་པ་བཏང་སྙོམས་པ་དང་། བཟོད་པའི་དུས་ན་སྦྱིན་པ་དང་། ཚུལ་ཁྲིམས་དང་། བརྩོན་

འགྲུས་ཉེ་བར་བསྒྲུབ་པ་བཏང་སྙོམས་པ་དང་། བརྩོན་འགྲུས་ཀྱི་དུས་ན་ཚུལ་ཁྲིམས་ཀྱི་རྗེས་སུ་འཇུག་པ་བཏང་སྙོམས་པ་དང་། བསམ་གཏན་གྱི་དུས་ན་སྦྱིན་པའི་ཕ་རོལ་ཏུ་ཕྱིན་པ་ཉེ་བར་བསྒྲུབ་པ་བཏང་སྙོམས་པ་དང་། ཤེས་རབ་དུས་ན་ཕ་རོལ་ཏུ་ཕྱིན་པ་ལྔ་ལ་
དམིགས་པ་ཉེ་བར་བསྒྲུབ་པ་བཏང་སྙོམས་པ་སྟེ། འདི་ནི་དུས་དུས་སུ་བཏང་སྙོམས་པ་ཞེས་བྱའོ། །དེ་ལྟར་གང་མི་བྱ་བའི་ཆོས་མི་བྱེད་པ་འདི་ནི་བཏང་སྙོམས་ཞེས་བྱ་སྟེ། དེ་ལ་གནས་པའི་བྱང་ཆུབ་སེམས་དཔའ་ནི་མི་དགེ་བའི་ཕྱོགས་ཐམས་ཅད་ལ་བཏང་སྙོམས་སུ་བྱེད་དོ། །གཞོན་ནུ་འདི་
ནི་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་ཅན་ཐམས་ཅད་ལ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཞེས་བྱའོ། །དེ་ལྟར་ཤཱ་རིའི་བུ་བཅོམ་ལྡན་འདས་དེ་བཞིན་གཤེགས་པ་ཕུང་པོ་ཆེན་པོ་དེས་གཞོན་ནུ་བརྩོན་འགྲུས་སྤྱོད་ལ་བྱམས་པ་དང་། སྙིང་
རྗེ་དང་དགའ་བ་དང་། བཏང་སྙོམས་མདོར་བསྟན་པ་དང་བཅས། རྒྱས་པར་བསྟན་པ་དང་བཅས་ཏེ། རྒྱ་ཆེར་ཡང་དག་པར་བསྟན་ཏོ། །གཞོན་ནུ་བརྩོན་འགྲུས་སྤྱོད་དེས་དེ་ཐོས་ནས་ཕ་རོལ་ཏུ་ཕྱིན་པ་ལ་བརྩོན་འགྲུས་བརྩམས་པར་གྱུར་ཏོ། །བྱམས་པ་དང་། སྙིང་རྗེ་དང་། དགའ་
བ་དང་། བཏང་སྙོམས་ཀྱི་ལེའུ་སྟེ་ལྔ་པའོ།། །།དེ་ལ་ཤཱ་རིའི་བུ་ཕ་རོལ་ཏུ་ཕྱིན་པ་རྣམས་ལ་བརྩོན་པ་གང་ཞེ་ན། ཤཱ་རིའི་བུ་ཕ་རོལ་ཏུ་ཕྱིན་པ་དྲུག་པོ་འདི་དག་ཉིད་ཡིན་ཏེ། གང་ཕ་རོལ་ཏུ་ཕྱིན་པ་དྲུག་པོ་འདི་དག་ལ་བརྩོན་པའི་བྱང་ཆུབ་སེམས་དཔའ་ནི་བྱང་
ཆུབ་སེམས་དཔའི་སྤྱད་པ་སྤྱོད་དོ། །དྲུག་གང་ཞེ་ན། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་
ཕ་རོལ་ཏུ་ཕྱིན་པ་སྟེ། དེ་དག་ནི་ཕ་རོལ་ཏུ་ཕྱིན་པ་དྲུག་རྣམས་སོ། །དེ་ལ་སྦྱིན་པའི་ཕ་རོལ་ཏུ་ཕྱིན་པ་གང་ཞེ་ན། ཤཱ་རིའི་བུ་འདི་ལ་བྱང་ཆུབ་སེམས་དཔའ་ནི་དགེ་སྦྱོང་དང་། བྲམ་ཟེ་དང་། ཕོངས་པ་རྣམས་ཀྱི་སྦྱིན་བདག་ཡིན་ཏེ། འདི་ལྟ་སྟེ། ཟས་ཀྱིས་ཕོངས་པ་ལ་ཟས། སྐོམ་གྱིས་

ཕོངས་པ་ལ་སྐོམ། བཞོན་པ་དང་། གོས་དང་། སྤོས་དང་། ཕྲེང་བ་དང་། བྱུག་པ་དང་། གནས་དང་། ཡོ་བྱད་དང་། ན་བའི་གསོས་སྨན་དང་། མར་མེ་དང་། སིལ་སྙན་དང་། བྲན་ཕོ་དང་། བྲན་མོ་དང་། གསེར་དང་། ནོར་བུ་དང་། མུ་ཏིག་དང་། །བཻ་དཱུརྱ་དང་། དུང་དང་།
མན་ཤེལ་དང་། བྱི་རུ་དང་། རིན་པོ་ཆེ་ཐམས་ཅད་དང་། རྟ་དང་། གླང་པོ་ཆེ་དང་། ཤིང་རྟ་དང་། སྐྱེད་མོས་ཚལ་དང་། དཀའ་ཐུབ་ཀྱི་ནགས་ཚལ་དང་། བུ་དང་། བུ་མོ་དང་། ཆུང་མ་དང་། ནོར་དང་། འབྲུ་དང་། མཛོད་དང་། བང་བ་དང་། གླིང་བཞིའི་རྒྱལ་པོའི་ལོངས་སྤྱོད་
ཀྱི་བདེ་བ་ཐམས་ཅད་དང་། རྩེ་བ་དང་། དགའ་བ་ཐམས་ཅད་དང་། ལག་པ་དང་། རྐང་པ་དང་། རྣ་བ་དང་། སྣ་དང་། མིག་དང་། མགོ་དང་། ཤ་དང་། ཁྲག་དང་། རྐང་དང་། རུས་པ་དང་། འཇིག་རྟེན་གྱི་ཡོ་བྱད་གང་ཡང་སློང་བ་ལ་ཡོངས་སུ་མི་གཏོང་བ་མེད་དོ། །སྦྱིན་པ་དེ་རྣམ་
པ་བཅུས་ཡོངས་སུ་དག་པར་སྦྱིན་པར་བྱེད་དེ། བཅུ་གང་ཞེ་ན། བྱང་ཆུབ་སེམས་དཔའ་རྣམས་ལ་མི་འཐུན་པའི་ལོངས་སྤྱོད་ཡོངས་སུ་ཚོལ་ཞིང་སྦྱིན་པ་མེད། །བྱང་ཆུབ་སེམས་དཔའ་རྣམས་ལ་སེམས་ཅན་ལ་གནོད་པའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་འཇིགས་ཤིང་
སྐྲག་ནས་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཡོངས་སུ་མ་བཏང་བ་ལ་འགྲོན་དུ་གཉེར་བའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་གདོང་དུ་ལྟ་ཞིང་སྦྱིན་པ་མེད། བྱང་ཆུབ་སེམས་དཔའ་རྣམས་ལ་སེམས་ཅན་ལ་ཐ་དད་པར་སྦྱིན་པ་མེད། བྱང་ཆུབ་སེམས་
དཔའ་རྣམས་ལ་མཛའ་བས་སྦྱིན་པ་མེད། བྱང་ཆུབ་སེམས་དཔའ་རྣམས་ལ་སྡང་བས་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཞིང་ཚོལ་ཞིང་སྦྱིན་པ་མེད། བྱང་ཆུབ་སེམས་དཔའ་རྣམས་ལ་སེམས་ཅན་ཐམས་ཅད་ལ་སྦྱིན་གནས་མ་ཡིན་ཞེས་བརྙས་ཤིང་སྦྱིན་པ་མེད་དེ། ཤ་
རིའི་བུ་བྱང་ཆུབ་སེམས་དཔའ་སྦྱིན་པ་དེ་རྣམ་པ་དེ་བཅུས་ཡོངས་སུ་དག་པར་སྦྱིན་པར་བྱེད་དོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་སྦྱིན་པ་དེ་གཞན་རྣམ་པ་བཅུས་ཡོངས་སུ་དག་པར་སྦྱིན་པར་བྱེད་དེ། བཅུ་གང་ཞེ་ན། བྱང་ཆུབ་སེམས་དཔའ་རྣམས་ལ་ལས་ཀྱི་རྣམ་

པར་སྨིན་པ་འདོད་ཅིང་སྦྱིན་པ་མེད། བྱང་ཆུབ་སེམས་དཔའ་རྣམས་ལ་བསམ་པ་ལོག་པར་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཡོངས་སུ་སྐྱོ་བའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཉེ་བར་བསྟན་ནས་སྦྱིན་པ་མེད། བྱང་ཆུབ་སེམས་
དཔའ་རྣམས་ལ་རྗེས་སུ་མི་དགའ་བའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་འགྱོད་པའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཚུལ་ཁྲིམས་དང་ལྡན་པ་ལ་བཀུར་ཏེ་སྦྱིན་པ་མེད། ཚུལ་ཁྲིམས་འཆལ་པ་ལ་བརྙས་ཏེ་སྦྱིན་པ་མེད། བྱང་ཆུབ་སེམས་དཔའ་
རྣམས་ལ་རྣམ་པར་སྨིན་པ་རེ་བའི་སྦྱིན་པ་མེད་དེ། ཤཱ་རིའི་བུ་བྱང་ཆུབ་སེམས་དཔའ་སྦྱིན་པ་དེ་རྣམ་པ་དེ་བཅུས་ཡོངས་སུ་དག་པར་སྦྱིན་པར་བྱེད་དོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་སྦྱིན་པ་དེ་གཞན་རྣམ་པ་བཅུས་ཡོངས་སུ་དག་པར་སྦྱིན་པར་བྱེད་དེ། བཅུ་གང་ཞེ་ན།
བྱང་ཆུབ་སེམས་དཔའ་རྣམས་ལ་སྨད་ནས་སྦྱིན་པ་མེད། བྱང་ཆུབ་སེམས་དཔའ་རྣམས་ལ་གཞན་དུ་ཕྱོགས་ནས་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཉོན་མོངས་ཤིང་སྦྱིན་པ་མེད། ཁྲོ་བ་དང་། ཕྲག་དོག་དང་། གནོད་སེམས་སྟོན་ཅིང་སྦྱིན་པ་མེད། རི་མོར་མི་
བྱེད་པར་སྦྱིན་པ་མེད། རང་གི་ལག་ནས་མ་ཡིན་པར་སྦྱིན་པ་མེད། ཅི་ཙམ་དཔགས་པ་ལས་དབྲི་ཞིང་སྦྱིན་པ་མེད། བྱང་ཆུབ་སེམས་དཔའ་རྣམས་སྐྱེ་བ་འདོད་ཅིང་སྦྱིན་པ་མེད་དེ། ཤཱ་རིའི་བུ་བྱང་ཆུབ་སེམས་དཔའ་སྦྱིན་པ་དེ་རྣམ་པ་དེ་བཅུས་ཡོངས་སུ་དག་པར་སྦྱིན་པར་བྱེད་
དོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་སྦྱིན་པ་དེ་གཞན་རྣམ་པ་བཅུས་ཡོངས་སུ་དག་པར་སྦྱིན་པར་བྱེད་དེ། བཅུ་གང་ཞེ་ན། བྱང་ཆུབ་སེམས་དཔའ་རྣམས་ལ་མི་བརྟན་པར་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཚོད་འཛིན་ཅིང་སྦྱིན་པ་མེད། ཡོངས་སུ་
ཆད་པར་སྦྱིན་པ་མེད། གཞན་གྱི་དྲིང་འཇོག་སྟེ་སྦྱིན་པ་མེད། ཉུང་ཞེས་ཅུང་ཟད་ཙམ་སྦྱིན་པ་མེད། གཟུགས་དང་། ལོངས་སྤྱོད་དང་། དབང་ཕྱུག་ལ་མངོན་པར་དགའ་བའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་བརྒྱ་བྱིན་དང་། ཚངས་པ་དང་། འཇིག་རྟེན་

སྐྱོང་བ་དང་། ལྷར་སྐྱེ་བ་ཐམས་ཅད་འདོད་པའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཉན་ཐོས་དང་། རང་སངས་རྒྱས་ཀྱི་སར་བསྔོ་ཞིང་སྦྱིན་པ་མེད། བྱང་ཆུབ་སེམས་དཔའ་རྣམས་ལ་མཁས་པས་སྨད་པའི་སྦྱིན་པ་མེད། བྱང་ཆུབ་སེམས་དཔའ་རྣམས་ལ་ཐམས་
ཅད་མཁྱེན་པར་མ་བསྔོས་པའི་སྦྱིན་པ་མེད་དེ། ཤཱ་རིའི་བུ་བྱང་ཆུབ་སེམས་དཔའ་སྦྱིན་པ་དེ་རྣམ་པ་དེ་བཅུས་ཡོངས་སུ་དག་པར་སྦྱིན་པར་བྱེད་དོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་སྦྱིན་པ་དེ་གཞན་རྣམ་པ་བཅུས་ཡོངས་སུ་དག་པར་སྦྱིན་པར་བྱེད་དེ། བཅུ་གང་ཞེ་
ན། ཇི་ཙམ་འདུས་བྱས་ལས་ངེས་པར་འབྱུང་བ་དང་། འདུས་མ་བྱས་ཐོབ་པར་བྱ་བའི་ཕྱིར་དེ་ལྟར་སྦྱིན་པ་བྱིན་ན། ཤཱ་རིའི་བུ་བྱང་ཆུབ་སེམས་དཔའི་སྦྱིན་པའི་ཕན་ཡོན་བཅུ་འཐོབ་པར་འགྱུར་རོ། །བཅུ་གང་ཞེ་ན། བཟའ་བ་བྱིན་པས་ཚེ་དང་། སྤོབས་པ་དང་། བདེ་བ་
དང་། སྟོབས་དང་། ཁ་དོག་ཕུན་སུམ་ཚོགས་པ་རབ་ཏུ་འཐོབ་བོ། །བཏུང་བ་བྱིན་པས་ཉོན་མོངས་པ་དང་། སྲེད་པ་ཐམས་ཅད་བསལ་བ་ཕུན་སུམ་ཚོགས་པ་རབ་ཏུ་འཐོབ་བོ། །བཞོན་པ་བྱིན་པས་བདེ་བ་ཐམས་ཅད་ཀྱི་དངོས་པོ་ཕུན་སུམ་ཚོགས་པ་རབ་ཏུ་འཐོབ་བོ། །བགོ་བ་བྱིན་
པས་ཁྲེལ་ཡོད་པ་དང་། ངོ་ཚ་ཤེས་པ་དང་། གསེར་ལྟར་ཁ་དོག་ཡོངས་སུ་དག་པ་ཕུན་སུམ་ཚོགས་པ་རབ་ཏུ་འཐོབ་བོ། སྤོས་དང་ཕྲེང་བ་བྱིན་པས་ཚུལ་ཁྲིམས་དང་། ཐོས་པ་དང་། ཏིང་ངེ་འཛིན་གྱི་དྲི་དང་། བྱུག་པ་ཕུན་སུམ་ཚོགས་པ་རབ་ཏུ་འཐོབ་བོ། །དྲི་རབ་ཏུ་
ཞིམ་པའི་སྤོས་དང་། ཕྱེ་མ་དང་། བྱུག་པ་བྱིན་པས་ལུས་ཀྱི་ནན་ཏན་གྱི་དྲི་ཞིམ་པོ་ཕུན་སུམ་ཚོགས་པ་རབ་ཏུ་འཐོབ་བོ། །རོ་བྱིན་པས་རོ་བྲོ་བའི་ནང་ན་མཆོག་གི་རོ་བྲོ་བའི་སྐྱེས་བུ་ཆེན་པོའི་མཚན་ཕུན་སུམ་ཚོགས་པ་རབ་ཏུ་འཐོབ་བོ། །གནས་བྱིན་པས་སེམས་ཅན་ཐམས་ཅད་
ཀྱི་གནས་དང་། རྟེན་དང་། གླིང་དང་། སྐྱབས་དང་། དཔུང་གཉེན་ཕུན་སུམ་ཚོགས་པ་རབ་ཏུ་འཐོབ་བོ། ནད་པ་ལ་སྨན་བྱིན་པས་མི་རྒ་མི་འཆི་ཤི་བ་མེད་པའི་བདེ་བ་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་བོ། །ཡོ་བྱད་སྣ་ཚོགས་བྱིན་པས་བྱང་ཆུབ་ཀྱི་ཕྱོགས་ཀྱི་

ཆོས་ཀྱི་ཡོ་བྱད་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་སྟེ། ཤྭ་རིའི་བུ་བྱང་ཆུབ་སེམས་དཔའ་བྱང་ཆུབ་འདོད་པས་དེ་ལྟར་སྦྱིན་པ་བྱིན་ན་སྦྱིན་པའི་ཕན་ཡོན་བཅུ་པོ་དེ་དག་ཡོངས་སུ་གཟུང་བར་འགྱུར་རོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་
ཕན་ཡོན་གཞན་བཅུ་རབ་ཏུ་འཐོབ་བོ། །བཅུ་གང་ཞེ་ན། འདི་ལྟ་སྟེ། མར་མེ་བྱིན་པས་དེ་བཞིན་གཤེགས་པའི་སྤྱན་ལྔ་ཡོངས་སུ་དག་པ་ཕུན་སུམ་ཚོགས་པ་རབ་ཏུ་འཐོབ་བོ། །སིལ་སྙན་བྱིན་པས་ལྷའི་རྣ་བ་ཡོངས་སུ་དག་པ་ཕུན་སུམ་ཚོགས་པ་རབ་ཏུ་འཐོབ་བོ། །གསེར་དང་།
ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། རིན་པོ་ཆེ་ཐམས་ཅད་བྱིན་པས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་བོ། །རིན་པོ་ཆེ་ཐ་དད་པ་སྣ་ཚོགས་དང་། མེ་ཏོག་སྣ་ཚོགས་
བྱིན་པས་དཔེ་བྱད་བཟང་པོ་བརྒྱད་ཅུ་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་བོ། །རྟ་དང་། གླང་པོ་ཆེ་དང་། ཤིང་རྟ་བྱིན་པས་རྒྱས་པ་དང་། ཡངས་པ་དང་ཆེ་བ་ཕུན་སུམ་ཚོགས་པ་རབ་ཏུ་འཐོབ་བོ། །སྐྱེད་མོས་ཚལ་དང་། དཀའ་ཐུབ་ཀྱི་ནགས་ཚལ་བྱིན་པས་
བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་བོ། །ནོར་དང་། འབྲུ་དང་། མཛོད་དང་། བང་བ་བྱིན་པས་ཆོས་རིན་པོ་ཆེ་ཐམས་ཅད་ཀྱི་མཛོད་ཡོངས་སུ་རྫོགས་པ་ཕུན་སུམ་
ཚོགས་པ་རབ་ཏུ་འཐོབ་བོ། །བྲན་ཕོ་དང་། བྲན་མོ་དང་། ལས་བྱེད་པའི་མི་བྱིན་པས་རང་ཉམ་དང་། རང་དབང་དང་། རང་བྱུང་གི་ཡེ་ཤེས་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་བོ། །བུ་ཕོ་དང་། བུ་མོ་བྱིན་པས་མཛའ་བ་དང་། སྡུག་པ་དང་། འདོད་པའི་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་བོ། །གླིང་བཞིའི་རྒྱལ་པོའི་ལོངས་སྤྱོད་ཐམས་ཅད་བྱིན་པས་བྱང་ཆུབ་སེམས་དཔའ་རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཕུན་སུམ་ཚོགས་

པ་རབ་ཏུ་འཐོབ་སྟེ། ཤ་རིའི་བུ་ཕན་ཡོན་བཅུ་པོ་དེ་དག་ཡོངས་སུ་གཟུང་བར་འགྱུར་རོ། །ཤཱ་རིའི་བུ་བྱང་ཆུབ་སེམས་དཔའ་བྱང་ཆུབ་འདོད་པས་དེ་ལྟར་སྦྱིན་པ་བྱིན་ན་ཕན་ཡོན་གཞན་ཡང་བཅུ་འཐོབ་བོ། །བཅུ་གང་ཞེ་ན། འདོད་པའི་ཡོན་ཏན་ལྔ་བྱིན་པས་ཚུལ་ཁྲིམས་དང་།
ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཡོངས་སུ་དག་པ་ཕུན་སུམ་ཚོགས་པ་རབ་ཏུ་འཐོབ་བོ། །དགའ་བའི་རྩེད་མོ་ཐམས་ཅད་ཡོངས་སུ་གཏོང་བའི་སྦྱིན་པས་དམ་པའི་ཆོས་ཀྱི་དགའ་བ་དང་། རྩེ་བ་ཡོངས་སུ་
དག་པ་ཕུན་སུམ་ཚོགས་པ་རབ་ཏུ་འཐོབ་བོ། །རྐང་པ་བྱིན་པས་ཆོས་ཀྱི་དོན་གྱི་རྐང་པ་བྱང་ཆུབ་ཀྱི་སྙིང་པོར་འགྲོ་བ་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་བོ། །ལག་པ་བྱིན་པས་སེམས་ཅན་ཐམས་ཅད་ལ་ཆོས་ཀྱི་ལག་པ་རབ་ཏུ་སྦྱིན་པ་ཡོངས་སུ་རྫོགས་པ་ཕུན་
སུམ་ཚོགས་པ་རབ་ཏུ་འཐོབ་བོ། །རྣ་བ་དང་། སྣ་བྱིན་པས་དབང་པོ་མ་ཚང་བ་མེད་ཅིང་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་བོ། །ཡན་ལག་དང་ཉིང་ལག་བྱིན་པས་ཁ་ན་མ་ཐོ་བ་མེད་ཅིང་མཛེས་པའི་ཡན་ལག་སངས་རྒྱས་ཀྱི་སྐུ་ཡོངས་སུ་རྫོགས་པ་ཕུན་
སུམ་ཚོགས་པ་རབ་ཏུ་འཐོབ་བོ། །མིག་བྱིན་པས་སེམས་ཅན་ཐམས་ཅད་ལ་ཆོས་ཀྱི་མིག་མི་སྒྲིབ་པ་ཡོངས་སུ་དག་པ་ཕུན་སུམ་ཚོགས་པ་རབ་ཏུ་འཐོབ་བོ། །ཤ་དང་ཁྲག་བྱིན་པས་སེམས་ཅན་ཐམས་ཅད་ཀྱི་ལུས་དང་སྲོག་སྙིང་པོ་མེད་པ་ལས་སྙིང་པོ་ལེན་པས་ཉེ་བར་འཚོ་བ་ལ་
མཁས་པ་ཕུན་སུམ་ཚོགས་པར་རབ་ཏུ་འཐོབ་བོ། །རྐང་བྱིན་པས་རྡོ་རྗེ་ལྟར་མི་ཤིགས་པའི་ལུས་འཐོབ་པ་ཕུན་སུམ་ཚོགས་པ་རབ་ཏུ་འཐོབ་བོ། །ཡན་ལག་གི་དམ་པ་མགོ་བྱིན་པས་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གསུམ་གྱི་མཆོག་བླ་ན་མེད་ཅིང་ལྟག་ན་མེད་
པའི་ཐམས་ཅད་མཁྱེན་པའི་ཡེ་ཤེས་ཁོང་དུ་ཆུད་པ་ཡོངས་སུ་རྫོགས་པ་ཕུན་སུམ་ཚོགས་པ་རབ་ཏུ་འཐོབ་སྟེ། ཤྭ་རིའི་བུ་བྱང་ཆུབ་སེམས་དཔའ་བྱང་ཆུབ་འདོད་པས་དེ་ལྟར་སྦྱིན་པ་བྱིན་ན་འདི་ལྟ་བུའི་སངས་རྒྱས་ཀྱི་ཆོས་ཡོངས་སུ་རྫོགས་པའི་ཕན་ཡོན་དེ་དག་ཡོངས་སུ་གཟུང་བར་འགྱུར་

རོ། །ཤཱ་རིའི་བུ་བྱང་ཆུབ་སེམས་དཔའ་མཁས་པ་ཟབ་པ་ཤེས་རབ་ཀྱི་སྣང་བ་ནི་འཇིག་རྟེན་གྱི་ཟང་ཟིང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད། བདུད་རྩི་འདོད། སྙིང་པོ་འདོད། བྱང་ཆུབ་འདོད་དེ། ཡང་ཤཱ་རིའི་བུ་མྱ་ངན་ལས་འདས་པ་
འདོད་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གནས་ཏེ། འཇིག་རྟེན་གྱི་ཟང་ཟིང་སྦྱིན་པ་ན་འཇིག་རྟེན་གྱི་བདེ་བ་ཐམས་ཅད་ཡོངས་སུ་མི་གཏོང་བ་གང་ཡང་མེད་དོ། །འདི་ལྟ་སྟེ། ཤཱ་རིའི་བུ་ཁྱིམ་བདག་ཆུན་པ་ཞིང་སྐམས་ལ་གནས་ནས་བ་ལང་དང་།
གནམ་སྡོང་མ་ཡིན་པའི་ཞིང་གི་རྨོ་བརྐོ་རྫོགས་པར་བྱས་ཏེ། ས་བོན་བཏབ་ནས་རྣམ་གྲངས་འདིས་གཤོལ་གྱིས་འཚོ་བས་གསེར་དང་། དངུལ་ཡང་འགྲུབ་བོ། །དངོས་པོ་སྣ་ཚོགས་གཞན་ཡང་འགྲུབ་བོ། །དེ་ཅིའི་ཕྱིར་ཞེ་ན། ཤཱ་རིའི་བུ་འབྲུ་དང་མཚུངས་པའི་ནོར་མེད་དོ། །
ཤཱ་རིའི་བུ་དེ་བཞིན་དུ་བྱང་ཆུབ་སེམས་དཔའ་འདི་ལྟར་འཇིག་རྟེན་གྱི་ཟང་ཟིང་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བའི་དུས་དང་ཚོད་ཡོད་དོ། །འདི་ལྟ་སྟེ། ཤཱ་རིའི་བུ་བས་རྩྭ་སྐམ་པོ་དང་། གཤེར་བ་
ཟོས་པ་དང་། ཆུ་གྲང་མོ་དང་། དྲོན་མོ་འཐུངས་པ་དེ་ལས་འོ་མ་འགྲུབ་སྟེ། ཞོ་དང་། མར་སར་པ་དང་། མར་གྱི་སྙིང་པོ་ཡང་འགྲུབ་བོ། ཤཱ་རིའི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གནས་ཏེ།
འཇིག་རྟེན་གྱི་ཟང་ཟིང་སྦྱིན་པ་ན། དེ་མི་འདོད་ཀྱང་འཁོར་ལོས་སྒྱུར་བའི་རྒྱལ་པོ་ཡང་ཡོངས་སུ་འགྲུབ་བོ། །བརྒྱ་བྱིན་དང་། ཚངས་པ་ཡང་འགྲུབ་བོ། །གནས་དེ་གསུམ་ཡོངས་སུ་གྲུབ་ནས་བྱང་ཆུབ་སེམས་དཔའི་ས་བཅུ་ཡོངས་སུ་འགྲུབ་བོ། །དེ་བཞིན་
གཤེགས་པའི་སྟོབས་བཅུ་དང་། མི་འཇིགས་པ་བཞི་ཡང་ཡོངས་སུ་འགྲུབ་བོ། །ལས་སྟོང་གིས་འགྲུབ་པའི་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་རྣམས་ཀྱང་ཡོངས་སུ་འགྲུབ་བོ། །ལས་སྟོང་གིས་འགྲུབ་པའི་རྣམ་པ་དྲུག་ཅུ་དང་ལྡན་པའི་དབྱངས་ཕུན་སུམ་ཚོགས་

པ་ཡང་ཡོངས་སུ་འགྲུབ་བོ། ལས་བརྒྱས་འགྲུབ་པའི་སྐྱེས་བུ་ཆེན་པོའི་མཚན་གཅིག་ཡོངས་སུ་འགྲུབ་བོ། །ལས་ཉིས་བརྒྱས་འགྲུབ་པའི་གཙུག་ཏོར་སྤྱི་བོར་འགྲུབ་བོ། །རྣམ་པ་དང་ཡོན་ཏན་བརྒྱས་ཡོངས་སུ་རྫོགས་པའི་དེ་བཞིན་གཤེགས་པའི་ཆོས་ཀྱི་དུང་
ཆེན་པོ་ཡང་འགྲུབ་བོ། །རྣམ་པ་བྱེ་བ་དང་། ཡོན་ཏན་བརྒྱ་ཕྲག་སྟོང་དང་ལྡན་པའི་ཚེམས་ཀྱི་ཕྲེང་བ་ཐགས་བཟང་བ། ཕྲག་མེད་པ་སྙོམས་ཤིང་དཀར་བ་ཡང་ཡོངས་སུ་འགྲུབ་སྟེ། དེ་ལྟར་ཤཱ་རིའི་བུ་དེ་བཞིན་གཤེགས་པ་རྣམས་དེ་བཞིན་གཤེགས་པའི་ལས་ཀྱི་འབྲས་
བུ་རྣམ་པར་སྨིན་པས་མངོན་པར་འགྲུབ་བོ། །ཡང་ཤཱ་རིའི་བུ་གང་བྱམས་པའི་སེམས་བསྐྱད་ནས་སློང་བ་ལ་སྦྱིན་པ་བྱིན་པ་དེ་ནི་གང་གཱའི་ཀླུང་གི་བྱེ་མ་སྙེད་དུ་སེམས་བསྐྱེད་པས་སངས་རྒྱས་ཀྱི་ཏིང་ངེ་འཛིན་རྒྱུན་མི་འཆད་པ་གཅིག་འགྲུབ་སྟེ། ཏིང་ངེ་འཛིན་དེ་ལ་གནས་ནས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བ་སྤུའི་བུ་ག་རེ་རེ་ནས་ཏིང་ངེ་འཛིན་བརྒྱ་གང་གཱའི་རྒྱུན་ལྟར་མངོན་པར་སྤྲུལ་པ་མཛད་དེ། །ཤཱ་རིའི་བུ་དེ་བཞིན་གཤེགས་པ་ནི་རྫུ་འཕྲུལ་གྱི་བྱ་བ་ཐམས་ཅད་ལ་དབང་ཐོབ་པའོ། །ཤཱ་རིའི་བུ་གང་འདི་ལྟ་
བུའི་སངས་རྒྱས་ཀྱི་ཆོས་དེ་དག་ནི་དེ་བཞིན་གཤེགས་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་འཇིག་རྟེན་གྱི་ཟང་ཟིང་གི་སྦྱིན་པས་ཡོངས་སུ་བཟུང་བ་ཡིན་ནོ། །ཤཱ་རིའི་བུ་བྱང་ཆུབ་སེམས་དཔའ་མི་འཆི་བ་འདོད་པ་དང་། བྱང་ཆུབ་འདོད་པ་དང་། །མྱ་ངན་ལས་འདས་པ་
འདོད་པ་ནི་འཇིག་རྟེན་གྱི་ཟང་ཟིང་སྦྱིན་པར་བྱེད་དོ། །ཤཱ་རིའི་བུ་རྣམ་གྲངས་དེས་ན་ཁྱོད་ཀྱིས་བྱང་ཆུབ་སེམས་དཔའ་འཇིག་རྟེན་གྱི་ཟང་ཟིང་ལ་གནས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་རིག་པར་གྱིས་ཤིག །ཤཱ་རིའི་བུ་སྔོན་བྱུང་བ་འདས་
པའི་དུས་ཀྱི་བསྐལ་པ་གྲངས་མེད་པ་ཤིན་ཏུ་གྲངས་མེད་པ་ཚད་མེད་པ། བསམ་གྱིས་མི་ཁྱབ་པ་གང་བྱུང་བ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་མོས་ཞེས་བྱ་བ། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་

རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ་། །ཡང་ཤཱ་རིའི་བུ་བཅོམ་ལྡན་འདས་དེ་བཞིན་གཤེགས་པ་ཆོས་མོས་ཀྱི་ཚེའི་ཚད་ནི་ལོ་སྟོང་ཕྲག་བཅུར་གྱུར་ཏོ། །ཡང་ཤཱ་རིའི་
བུ་དེ་བཞིན་གཤེགས་པ་ཆོས་མོས་དེའི་དགེ་སློང་སྟོང་ཕྲག་བརྒྱ་ནི་དགྲ་བཅོམ་པ། ཉོན་མོངས་པ་མེད་པ། དབང་དང་ལྡན་པར་གྱུར་པ་ནས། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པའི་བར་དུ་སྟེ། དགྲ་བཅོམ་པ་ཤ་སྟག་གི་འདུས་པ་ཆེན་པོ་བྱུང་ངོ་། །ཤཱ་རིའི་བུ་དེའི་ཚེ་ཐག་
པ་ཞེས་བྱ་བ་ཐགས་འཐག་པ། གཟུགས་བཟང་བ། མཛེས་པ། བལྟ་ན་སྡུག་པ། མདོག་བཟང་ཞིང་རྒྱས་པའི་མཆོག་དང་ལྡན་པ་ཞིག་བྱུང་སྟེ། དེ་དེ་བཞིན་གཤེགས་པ་ཆོས་མོས་གང་ན་བཞུགས་པའི་ས་ཕྱོགས་དེ་ནས་ཧ་ཅང་ཡང་མི་རིང་བའི་ས་ཕྱོགས་ཞིག་ན་རང་གི་ལས་བྱེད་དོ། །
དེ་ཉིན་པར་ལས་བྱས་ནས་ནུབ་ཀར་ཁྱིམ་དུ་འགྲོ་བའི་ཚེ་རྟག་ཏུ་དུས་ཐམས་ཅད་དུ་བཅོམ་ལྡན་འདས་དེ་བཞིན་གཤེགས་པ་ཆོས་མོས་དེའི་དྲུང་དུ་འོངས་ནས་རས་ཀྱི་ཁ་ཚར་གཅིག་འབུལ་ཅིང་འདི་སྐད་ཅེས་གསོལ་ཏོ། །བཅོམ་ལྡན་འདས་བསྡུ་བའི་གནས་ཀྱིས་བདག་བཅོམ་ལྡན་འདས་ལ་རས་ཀྱི་
ཁ་ཚར་ཕུལ་བའི་དགེ་བའི་རྩ་བ་དེས་བདག་མ་འོངས་པའི་དུས་ན་བསྡུ་བ་ཐམས་ཅད་དང་ལྡན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་གྱུར་ཅིག་ཅེས་དེས་རིམ་གྱིས་རས་ཀྱི་ཁ་ཚར་སྟོང་ལྔ་བརྒྱ་ཕུལ་ཏེ། དེས་བསྐལ་པ་བྱེ་བ་ཕྲག་བཅོ་ལྔར་ངན་འགྲོ་ལོག་པར་
ལྟུང་བར་མ་སོང་ངོ་། །དགེ་བའི་རྩ་བ་དེ་ཉིད་ཀྱིས་འཁོར་ལོས་སྒྱུར་བའི་རྒྱལ་པོ་བྱེ་བ་ཕྲག་སྟོང་མྱོང་ངོ་། །དེ་དགེ་བའི་རྩ་བ་དེ་ཉིད་ཀྱིས་བརྒྱ་བྱིན་གྱི་བདག་པོ་བྱེ་བ་ཕྲག་སྟོང་མྱོང་ངོ་། །དགེ་བའི་རྩ་བ་འཇམ་པ་ཡིད་དུ་འོང་བ་དང་པོ་པའི་ལས་དེ་ཉིད་ཀྱིས་སངས་རྒྱས་བྱེ་བ་ཕྲག་སྟོང་མཉེས་པར་བྱས་ཏེ།
དེས་ཐམས་ཅད་ལ་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། བ་དན་དང་། གོས་དང་། ཞལ་ཟས་དང་། མལ་ཆ་དང་། ན་བའི་གསོས་སྨན་དང་། ཡོ་བྱད་ཀྱིས་བསྟི་སྟང་དུ་བྱས།

བླ་མར་བྱས། རི་མོར་བྱས་ནས་མཆོད་དོ། །དེ་ཕྱིར་བསྐལ་པ་གྲངས་མེད་པ་ཞིག་ན་བླ་ན་མེད་པ་ཡང་དག་པར་བྱང་ཆུབ་མངོན་པར་རྫོགས་པར་སངས་རྒྱས་ནས། རབ་ཏུ་བསྡུས་པ་ཞེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་བ་ནས།
སངས་རྒྱས་བཅོམ་ལྡན་འདས་ཞེས་བྱ་བའི་བར་དུ་སྟེ། དེ་ལོ་བྱེ་བ་ཕྲག་ཉི་ཤུའི་བར་དུ་གནས་སོ། །དེའི་དགྲ་བཅོམ་པ་བྱེ་བ་ཁྲག་ཁྲིག་ཕྲག་ཉི་ཤུ་ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ་ནས། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པའི་བར་
གྱི་ཉན་ཐོས་འདུས་པ་ཆེན་པོ་བྱུང་ངོ་། །བྱང་ཆུབ་སེམས་དཔའ་བྱེ་བ་ཕྲག་ལྔ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་དོ། །དེས་ཆོས་བསྟན་ཏེ་སེམས་ཅན་གྲངས་མེད་དཔག་ཏུ་མེད་པའི་དོན་བྱས་ནས་ཡོངས་སུ་མྱ་ངན་ལས་འདས་སོ། །དེར་བཅོམ་ལྡན་འདས་དེ་ཡོངས་སུ་
མྱ་ངན་ལས་འདས་ནས། ལོ་སྟོང་གི་བར་དུ་དམ་པའི་ཆོས་གནས་སོ། །དེའི་སྐུ་གདུང་ཡང་རྒྱས་པར་གྱུར་ཏེ། འདི་ལྟ་སྟེ། དཔེར་ན་ཤཱ་རིའི་བུ་ང་ད་ཡོངས་སུ་མྱ་ངན་ལས་འདའ་བར་འགྱུར་བ་བཞིན་ནོ། །ཤཱ་རིའི་བུ་རས་ཀྱི་ཁ་ཚར་ཕུལ་བ་དང་། སེམས་བསྐྱེད་པས་ཀྱང་མཐར་གྱིས་
སངས་རྒྱས་ཀྱི་ཆོས་ཡོངས་སུ་རྫོགས་པ་ལ་ལྟོས། ཤཱ་རིའི་བུ་སེམས་ནི་རྒྱ་ཆེ་བའི་སྦྱིན་པ་ནི་མ་ཡིན་ནོ། །ཤཱ་རིའི་བུ་གལ་ཏེ་སྦྱིན་པ་རྒྱ་ཆེ་ལ་སེམས་ཀྱིས་མ་ཡིན་ན་ནི་སྦྱིན་བདག་རྩུབ་མོ་ཞེས་བྱ་བ་ལྟར་འགྱུར་ཏེ། དེས་སྦྱིན་པ་དེ་སྙེད་བྱིན་ཡང་སེམས་ཡོངས་སུ་མ་སྦྱངས་སོ། །ཤཱ་རིའི་
བུ་འཇིག་རྟེན་གྱི་ཟང་ཟིང་ལ་གནས་ཏེ། ཐམས་ཅད་ཡོངས་སུ་ཐོབ་པར་གྱུར་པ་ལ་ལྟོས། ཤཱ་རིའི་བུ་བྱང་ཆུབ་སེམས་དཔའ་མཁས་པ་ནི་སྦྱིན་པ་ཉུང་ངུ་ཡང་མང་པོར་བྱེད་དོ། །ཡེ་ཤེས་ཀྱི་སྟོབས་ཀྱིས་ལྷག་པར་བྱེད་དོ། །ཤེས་རབ་ཀྱི་སྟོབས་ཀྱིས་རྒྱས་པར་བྱེད་དོ། །བསྔོ་བའི་སྟོབས་
ཀྱིས་དཔག་ཏུ་མེད་པར་བྱེད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་རབ་ཏུ་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །གཟུགས་འདོད་ཕྱིར་ནི་སྦྱིན་པ་སྦྱིན་མི་བྱེད། །ལོངས་སྤྱོད་མཐོ་རིས་འདོད་ཕྱིར་མ་ཡིན་གྱི། །བླ་ན་མེད་པའི་སངས་རྒྱས་མཆོག་

འདོད་ཕྱིར། །དེ་ཕྱིར་སྦྱིན་པ་ཆུང་ཡང་དུ་མར་འགྱུར། །གྲགས་དང་བརྗོད་པ་དག་དང་སྒྲ་དག་དང་། །གཡོག་དང་བདེ་བ་ནམ་ཡང་མི་འདོད་ཅིང་། །འཆི་འཕོ་སྐྱེ་བ་ཀུན་ཀྱང་མི་འདོད་དེ། །དེ་ཕྱིར་སྦྱིན་ཉུང་འབྲས་བུ་ཆེན་པོར་འགྱུར། །ཟས་དང་སྐོམ་དང་ཆོས་
གོས་གང་སྦྱིན་པ། །སྲིད་པའི་འགྲོ་བ་འདོད་ཕྱིར་མ་ཡིན་ཏེ། །སྦྱིན་པས་འཆི་བ་མེད་པའི་སྒོ་བཙལ་ཕྱིར། །དེ་ནི་སྐྲ་རྩེ་ཙམ་ཡང་སྦྱིན་པ་སྦྱིན། །འཕྱར་བ་མེད་ཅིང་ཁེངས་པ་མེད་པར་འགྱུར། །གཡོ་དང་སེར་སྣ་དག་ནི་ཐམས་ཅད་སྤོང་། །དེ་དག་ལེ་ལོ་ནམ་ཡང་ཡོད་མིན་ཏེ། དེ་
ལྟར་དེ་དག་འཇིག་རྟེན་ཕན་ཕྱིར་སྤྲོ། །རྒྱལ་པོའི་སྲིད་དང་ནོར་དང་འབྲུ་སྲོག་གཏོང་། །དེ་དག་སེམས་ནི་གཞན་དུ་མི་འགྱུར་ཏེ། །བྱིན་ནས་དགའ་ཆེན་པོ་རྙེད་པར་འགྱུར། །སྦྱིན་ཞིང་གཏོང་ལ་བྱང་ཆུབ་རྙེད་མི་དཀའ། །ཕ་དང་མ་དང་བུ་ནི་སྡུག་པ་ལྟར། །སློང་དང་འཇིག་རྟེན་
ཀུན་ལ་དེ་བཞིན་ཏེ། །གང་གིས་བྱང་ཆུབ་སྤྱོད་མཆོག་སྤྱད་པ་རྣམས། །སྦྱིན་ཚེ་རྟག་ཏུ་ཕྲག་དོག་མེད་པར་འགྱུར། །དེ་དག་མཐོང་ན་མི་ཁྲོ་སྟེ། །ཇི་ལྟར་སྔོན་གྱི་བཞིན་དུ་སྨྲ། །མི་མཛའ་དག་དང་རྟག་མཛའ་ཞིང་། །སྐྲག་པ་རྣམས་ལ་འཇིགས་མེད་སྦྱིན། །དེ་ལ་དངོས་པོ་
གང་ཡོད་པ། །སློང་བ་ལ་ནི་སྲི་བ་མེད། །ཆོས་འདོད་པར་ནི་རྟག་འགྱུར་ཏེ། །རྒྱལ་སྲིད་འདོད་པར་མི་འགྱུར་རོ། །འབྱུང་བར་རྟག་ཏུ་སྨྲ་བྱེད་ཅིང་། །ཆོས་ཀྱི་སྦྱིན་པའང་སྦྱིན་པར་བྱེད། འདོད་ལ་བརྐམ་པ་མ་གཏོགས་པར། །སུ་ཞིག་རྒྱལ་སྲིད་འདོད་པར་འགྱུར། །འདོད་པའི་
རྒྱལ་སྲིད་མི་འདོད་ཅིང་། །མཐོ་རིས་བདེ་བ་འདོད་མ་ཡིན། །སངས་རྒྱས་བྱང་ཆུབ་ཡོངས་ཚོལ་ཞིང་། །གྲགས་པ་ཆེན་པོ་སྦྱིན་པ་སྦྱིན། བདག་དང་ནོར་རྫས་གཞན་དག་ཀྱང་། །མང་པོ་མྱུར་དུ་གཏོང་བ་ནི། །དེ་དག་བྱང་ཆུབ་དམ་པའི་མཆོག །ནམ་ཡང་གཏོང་བར་མི་འགྱུར་རོ། །
མཁས་པ་གཟུགས་ནི་མི་འདོད་དེ། །ལོངས་སྤྱོད་དག་ཀྱང་འདོད་མ་ཡིན། །མཐོ་རིས་དག་ཀྱང་དེ་མི་འདོད། །མྱ་ངན་འདའ་བའང་འདོད་མ་ཡིན། །ལམ་ཤེས་ལམ་ལ་མཁས་པ་དག །གང་དག་བཤེས་པར་གྱུར་པ་ལ། །བརྟེན་པ་དག་ཏུ་མི་བྱེད་དེ། །སྲིད་པ་མེད་པ་འདོད་པར་

འགྱུར། །ཤཱ་རིའི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྦྱིན་པའི་ཕ་རོལ་ཏུ་ཕྱིན་པ་སྟེ། དེ་ལ་བརྩོན་པའི་བྱང་ཆུབ་སེམས་དཔའ་དག་བྱང་ཆུབ་ཀྱི་སྤྱད་པ་སྤྱོད་དོ། །སྦྱིན་པའི་ཕ་རོལ་ཏུ་ཕྱིན་པའི་ལེའུ་སྟེ་དྲུག་པའོ།། །།བམ་པོ་དགུ་པ། དེ་ལ་
གང་ལ་བརྩོན་པས་བྱང་ཆུབ་སེམས་དཔའ་བྱང་ཆུབ་ཀྱི་སྤྱད་པ་སྤྱོད་པར་འགྱུར་བའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གང་ཞེ་ན། ཤཱ་རིའི་བུ་འདི་གསུམ་ནི། བྱང་ཆུབ་སེམས་དཔའ་རྣམས་ཀྱི་ལེགས་པར་སྤྱོད་པ་སྟེ། གསུམ་གང་ཞེ་ན། ལུས་ཀྱིས་
ལེགས་པར་སྤྱོད་པ་དང་། ངག་གིས་ལེགས་པར་སྤྱོད་པ་དང་། ཡིད་ཀྱིས་ལེགས་པར་སྤྱོད་པའོ། །དེ་ལ་ལུས་ཀྱིས་ལེགས་པར་སྤྱོད་པ་གང་ཞེ་ན། འདི་ལ་ཤཱ་རིའི་བུ་བྱང་ཆུབ་སེམས་དཔའི་ནི། སྲོག་གཅོད་པ་སྤངས་པ་ཡིན། མ་བྱིན་པར་ལེན་པ་སྤངས་པ་ཡིན། འདོད་པ་ལ་ལོག་
པར་གཡེམ་པ་སྤངས་པ་ཡིན་ཏེ། འདི་ནི་ལུས་ཀྱིས་ལེགས་པར་སྤྱོད་པ་ཞེས་བྱའོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་ནི། བརྫུན་དུ་སྨྲ་བ་སྤངས་པ་ཡིན། ཕྲ་མ་དང་ངག་རྩུབ་པོ་དང་། ཚིག་ཀྱལ་པ་སྤངས་པ་ཡིན་ཏེ། འདི་ནི་ངག་གིས་ལེགས་པར་སྤྱོད་པ་ཞེས་བྱའོ། །
གཞན་ཡང་ཤཱ་རིའི་བུ་བྱང་ཆུབ་སེམས་དཔའ་ནི། བརྣབ་སེམས་མེད། གནོད་སེམས་མེད་ཅིང་། ཡང་དག་པར་ལྟ་བ་ཡིན་ཏེ། འདི་ནི་ཡིད་ཀྱིས་ལེགས་པར་སྤྱོད་པ་ཞེས་བྱའོ། །དེ་འདི་སྙམ་དུ་སེམས་ཏེ། ལུས་ཀྱིས་ལེགས་པར་སྤྱོད་པ་གང་། ངག་གིས་ལེགས་པར་སྤྱོད་པ་གང་།
ཡིད་ཀྱིས་ལེགས་པར་སྤྱོད་པ་གང་ཡིན་སྙམ་མོ། །དེ་ཡང་འདི་སྙམ་དུ་སེམས་ཏེ། ལུས་ཀྱི་ལས་གང་། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་མ་བྱས་པ་དེ་ནི། ལུས་ཀྱིས་ལེགས་པར་སྤྱོད་པ་ཞེས་བྱའོ་སྙམ་མོ། །དེ་ལ་ངག་གིས་ལེགས་
པར་སྤྱོད་པ་གང་ཞེ་ན། དེ་འདི་སྙམ་དུ་སེམས་ཏེ། ངག་གི་ལས་གང་བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་པོ་དང་། ཚིག་ཀྱལ་པ་མ་སྨྲས་པ་དེ་ནི། ངག་གིས་ལེགས་པར་སྤྱོད་པ་ཞེས་བྱའོ་སྙམ་མོ། །དེ་ལ་ཡིད་ཀྱིས་ལེགས་པར་སྤྱོད་པ་གང་ཞེ་ན། དེ་འདི་སྙམ་དུ་སེམས་ཏེ།

ཡིད་ཀྱི་ལས་གང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་མ་བྱས་པ་དེ་ནི་ཡིད་ཀྱིས་ལེགས་པར་སྤྱོད་པ་ཞེས་བྱའོ་སྙམ་མོ། །དེ་འདི་ལྟར་ཚུལ་བཞིན་སོ་སོར་རྟོག་སྟེ། །ལས་གང་ལུས་ཀྱིས་མ་བྱས་པ་དང་། ལས་གང་ངག་དང་། ཡིད་
ཀྱིས་མ་བྱས་པ་དེ་ཅི་གདགས་པར་ནུས་སམ། དེ་འདི་ལྟར་ཚུལ་བཞིན་གྱིས། རྟོག་པ་ན་འདི་སྙམ་དུ་སེམས་ཏེ། ལས་གང་ལུས་ཀྱིས་མ་བྱས་པ་དང་། ལས་གང་ངག་དང་ཡིད་ཀྱིས་མ་བྱས་པ་དེ་སྔོན་པོ་འམ། སེར་པོ་འམ། དམར་པོ་འམ། དཀར་པོ་འམ། ལེབ་རྒན་ནམ།
ཤེལ་གྱི་ཁ་དོག་ཏུ་གདགས་པར་མི་ནུས་ཏེ། མིག་གིས་ཤེས་པར་བྱ་བ་མ་ཡིན། རྣ་བས་ཤེས་པར་བྱ་བ་མ་ཡིན། སྣས་ཤེས་པར་བྱ་བ་མ་ཡིན། ལྕེས་ཤེས་པར་བྱ་བ་མ་ཡིན། ལུས་ཀྱིས་ཤེས་པར་བྱ་བ་མ་ཡིན། ཡིད་ཀྱིས་ཤེས་པར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན།
འདི་ལྟར་དེ་ནི་སྐྱེས་པ་མ་ཡིན། བསྐྱེད་པ་མ་ཡིན། བྱུང་བ་མ་ཡིན། ཟིན་པ་མ་ཡིན་ཏེ། དེ་ནི་ལས་གང་གིས་ཀྱང་ཤེས་པར་བྱ་བ་མ་ཡིན་ནོ། །དེ་འདི་སྙམ་དུ་སེམས་ཏེ། ཚུལ་ཁྲིམས་དེ་ནི། གང་མངོན་པར་འདུས་མ་བྱས་པའོ། །གང་མངོན་པར་འདུ་མི་བྱེད་པ་དེ་ལ་གདགས་
པ་གང་ཡང་མེད་དོ། །གང་གདགས་པ་མེད་པ། དེ་ལ་བདག་མངོན་པར་ཆགས་པར་མི་བྱའོ་སྙམ་ནས། དེ་འདི་ལྟར་ལེགས་པར་སྤྱད་པའི་ཚུལ་ཁྲིམས་ཀྱང་ཡང་དག་པར་རྗེས་སུ་མི་མཐོང་། གང་གི་ཚུལ་ཁྲིམས་དེ་དང་། ཚུལ་ཁྲིམས་དེ་གང་དུ་བསྔོ་བ། དེ་ཡང་ཡང་
དག་པར་རྗེས་སུ་མི་མཐོང་ངོ་། །དེ་དེ་ལྟར་མཐོང་བས། འཇིག་ཚོགས་ལ་ལྟ་བ་གང་གིས། ཚུལ་ཁྲིམས་སམ། འཆལ་པའི་ཚུལ་ཁྲིམས་ལ། སོ་སོར་རྟོག་པར་འགྱུར་བའི་འཇིག་ཚོགས་ལ་ལྟ་བ་མི་སློང་ངོ་། དེ་དེ་ལྟར་མཐོང་བས་སྡོམ་པ་དང་། ཆོ་ག་དང་། སྤྱོད་པ་དང་།
སྤྱོད་ཡུལ་ཤེས་བཞིན་དུ་སྤྱོད་པར་འགྱུར་ཏེ། ཤེས་བཞིན་དུ་སྤྱོད་པས་ཚུལ་ཁྲིམས་དང་ལྡན་པ་ཞེས་བྱའོ། །དེ་བདག་ཏུ་དམིགས་ཤིང་མི་སྤྱོད། ཕ་རོལ་ཏུ་དམིགས་ཤིང་མི་སྤྱོད་དེ། དེ་ཚུལ་ཁྲིམས་མ་ཉམས་པ་དང་། ཚུལ་ཁྲིམས་མཆོག་ཏུ་མི་འཛིན་པ་ཡིན་ནོ། །བདག་ཏུ་

དམིགས་ན་ཚུལ་ཁྲིམས་སུ་དམིགས་པར་འགྱུར་གྱི། གང་བདག་ཏུ་མི་དམིགས་པ་དེ་ནི་ཚུལ་ཁྲིམས་སུ་མི་དམིགས་སོ། །གང་ཚུལ་ཁྲིམས་སུ་མི་དམིགས་པ་དེ་ནི་བསླབ་པ་ཉམས་པར་མི་བྱེད་དོ། །གང་སླབ་པ་ཉམས་པར་མི་བྱེད་པ་དེ་ཚུལ་ཁྲིམས་ཉམས་པར་མི་བྱེད་དེ། ཚུལ་
ཁྲིམས་མཆོག་ཏུ་མི་འཛིན་ཏོ། །ཅིའི་ཕྱིར་མཆོག་ཏུ་མི་འཛིན་ཅེ་ན། དེས་གཞན་ལས་ཆོས་ཐམས་ཅད་ཤེས་སོ། །གཞན་གང་ཡིན་པ་དེ་ལ་བདག་མེད་དོ། །གང་བདག་མེད་པ་དེ་ལ་ཅི་ཞིག་ཡོངས་སུ་གཟུང་བར་བྱ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་
གསུངས་སོ། །ལུས་ཀྱིས་དག་ཅིང་ངག་གིས་དག་པ་དང་། །ཡིད་ཀྱིས་དག་ཅིང་རྟག་ཏུ་སྤྱོད་པ་དག །དག་པའི་བརྟུལ་ཞུགས་ལ་ནི་རྟག་གནས་པ། །དེ་ནི་བྱང་ཆུབ་སེམས་དཔའ་ཚུལ་ཁྲིམས་ལྡན། །ཤིན་ཏུ་བཟང་པོའི་ལས་ལམ་བཅུ་པོ་འདི། །གང་དག་སྲུང་བ་བྱང་ཆུབ་སེམས་
དཔའ་མཁས། །ལུས་དང་ངག་དང་ཡིད་ཀྱིས་གང་མ་བྱས། །དེ་ནི་མཁས་པ་ཚུལ་ཁྲིམས་ལྡན་ཞེས་བྱ། །གང་དག་མ་བྱས་མ་བསྐྱེད་མི་ལེན་པ། །དེ་ལ་ཁ་དོག་མེད་ཅིང་དབྱིབས་ཀྱང་མེད། །གང་ལ་ཁ་དོག་མེད་ཅིང་དབྱིབས་མེད་པ། །དེ་ལ་གདགས་པ་ནམ་ཡང་མི་དམིགས་སོ། །
རྟག་ཏུ་ཚུལ་ཁྲིམས་མ་བྱས་འདུས་མ་བྱས། །དེ་ནི་མིག་གིས་བལྟ་བར་མི་ནུས་ཏེ། །རྣ་བ་སྣ་དང་ལྕེ་ཡིས་ཤེས་མ་ཡིན། །ལུས་དང་ཡིད་ཀྱིས་ཤེས་པར་བྱ་མ་ཡིན། །གང་དེ་དབང་པོས་ཤེས་པར་མི་ནུས་པ། །དེ་ལ་སྙིང་རྗེ་འཇུག་པ་ནུས་མ་ཡིན། །དེ་ལྟར་ཚུལ་ཁྲིམས་ཡང་དག་མཐོང་
བ་དེ། །ནམ་ཡང་ཚུལ་ཁྲིམས་དམིགས་པར་མི་གནས་སོ། །ཚུལ་ཁྲིམས་ལྡན་ཞེས་ཡིད་ཀྱིས་མི་སྙེམས་ཤིང་། །བདག་ཏུ་འཛིན་པས་ཚུལ་ཁྲིམས་མི་སྲུང་སྟེ། །ཚུལ་ཁྲིམས་སྲུང་ཡང་ཚུལ་ཁྲིམས་འདུ་ཤེས་མེད། །དེ་ནི་ཁྲིམས་ལྡན་བྱང་ཆུབ་སྤྱད་སྤྱོད་པ། །འཇིག་ཚོགས་ལ་ནི་
ལྟ་བ་གང་སེལ་བ། །དེ་ནི་ལྟ་བར་ནམ་དུའང་མི་འགྱུར་རོ། །གང་ལ་ལྟ་མེད་དེ་ལ་གནས་མེད་དེ། །ཚུལ་ཁྲིམས་འཆལ་དང་ཚུལ་ཁྲིམས་དེ་མི་སྙེམས། །ཆོས་ཀྱི་ཚུལ་ལ་འཇུག་པ་ཀུན་སྲུང་བ། །དེ་ཡི་ཆོ་ག་བསམ་དུ་མེད་པར་འགྱུར། །རབ་ཏུ་འབྱུང་ཞིང་རབ་ཏུ་བསྲུངས་པ་ནི། །

ཚུལ་ཁྲིམས་ལྡན་ཏེ་གཞན་ལ་རྩོད་མི་བྱེད། །བདག་མེད་འདུ་ཤེས་ཚུལ་ཁྲིམས་མི་དམིགས་ཏེ། །བདག་མེད་དེ་ལ་ཚུལ་ཁྲིམས་དམིགས་པའང་མེད། །བདག་དང་དེ་བཞིན་ཚུལ་ཁྲིམས་གང་སྙེམས་པ། །རྟག་ཏུ་འཇིག་པའི་མཐའ་ཞེས་ངས་བཤད་དོ། །བདག་
མེད་སྨྲ་བ་ཚུལ་ཁྲིམས་མི་སེམས་ཏེ། །བདག་མེད་སྨྲ་བ་ཚུལ་ཁྲིམས་གནས་མ་ཡིན། །བདག་མེད་སྨྲ་བ་ཚུལ་ཁྲིམས་མི་སེམས་ཏེ། །བདག་མེད་སྨྲ་བ་ཚུལ་ཁྲིམས་རྟོག་མ་ཡིན། །ཚུལ་ཁྲིམས་མ་ཉམས་ཚུལ་ཁྲིམས་སྐྱོན་མེད་པ། །བདག་ནི་ཚུལ་ཁྲིམས་ལྡན་ཞེས་མི་སློང་ངོ་། །
བདག་ལ་བདག་མེད་ཚུལ་ཁྲིམས་འདུ་ཤེས་མེད། །ཤེས་རབ་ཟབ་མོ་བྱང་ཆུབ་སྤྱད་པ་སྤྱོད། །འཇིགས་མེད་གང་དག་ཚུལ་ཁྲིམས་འདི་འདྲ་བ། །ནམ་ཡང་ཚུལ་ཁྲིམས་འཆལ་པར་དེ་མི་འགྱུར། །ཐམས་ཅད་ཆོས་ནི་གང་དག་མི་དམིགས་པ། །དེ་ཡི་ཚུལ་ཁྲིམས་དེ་ནི་འཕགས་པས་
བསྔགས། །བྱིས་པ་གང་དག་བདག་ཏུ་ལྟ་གནས་ཏེ། །བདག་ནི་ཚུལ་ཁྲིམས་ལྡན་ཞེས་ཁྲིམས་སྲུང་ཞིང་། །བསྲུངས་ནས་ཚུལ་ཁྲིམས་འབྲས་བུ་མྱོང་བ་དེ། །ངན་འགྲོ་གསུམ་པོ་ཀུན་ལས་མི་ཐར་ཏོ། །གང་དག་བདག་ཏུ་ལྟ་བ་ཀུན་སྤངས་པ། །དེ་ནི་ང་དང་ང་ཞེས་བྱ་མི་འབྱུང་། །
ཚུལ་ཁྲིམས་ལྡན་པ་དེ་ལ་ལྟ་མེད་དེ། །དེ་ནི་ཕྱིར་ཡང་ལོག་ལྟུང་མི་འཇིགས་སོ། །འདི་འདྲ་བ་ཡི་ཚུལ་ཁྲིམས་གང་ཤེས་པ། །དེ་ལ་འཆལ་པའི་ཚུལ་ཁྲིམས་བལྟ་མི་ནུས། །སྲིད་པ་གསུམ་ན་དེ་བདག་མི་མཐོང་ན། །ཁྲིམས་དང་ཚུལ་འཆལ་མ་ཐོང་འགྱུར་སྨོས་ཅི་དགོས། །ཤཱ་
རིའི་བུ་དེ་ལྟར་ཚུལ་ཁྲིམས་སྤྱོད་པའི་བྱང་ཆུབ་སེམས་དཔའི་བསམ་པའི་ཆོས་བཅུ་འདུས་པར་འགྱུར་རོ། །བཅུ་གང་ཞེ་ན། དད་པའི་བསམ་པ་འདུས་པར་འགྱུར་བ་དང་། བརྩོན་འགྲུས་ཀྱི་བསམ་པ་འདུས་པར་འགྱུར་བ་དང་། རབ་ཏུ་འདུན་པ་དང་། ལས་ཀྱི་རྣམ་པར་སྨིན་པ་རྒྱ་
ཆེན་པོ་ལ་དད་པ་དང་། འཕགས་པ་ལ་ལྡང་བ་བྱེད་པ་དང་། བླ་མ་ལ་རིམ་གྲོ་བྱེད་པ་དང་། སློབ་དཔོན་ལ་བསྙེན་བཀུར་བྱེད་པ་དང་། ཆོས་ཚོལ་བ་ལ་འཇུག་པར་བྱེད་པ་དང་། བྱང་ཆུབ་ཡོངས་སུ་ཚོལ་ཞིང་ལུས་དང་སྲོག་ལ་མི་ལྟ་བར་བྱེད་པ་སྟེ། ཤཱ་རིའི་བུ་དེ་ལྟར་ཚུལ་ཁྲིམས་སྤྱོད་

པའི་བྱང་ཆུབ་སེམས་དཔའི་བསམ་པ་ཆོས་བཅུ་པོ་དེ་དག་འདུས་པར་འགྱུར་རོ། །དེ་ཆོས་བཅུ་པོ་དེ་དག་ལ་རབ་ཏུ་གནས་ནས་དགེ་བའི་ཆོས་རྣམས་ཡང་དག་པར་སྒྲུབ་བོ། །དགེ་བའི་ཆོས་གང་ཞེ་ན། འདི་ལྟ་སྟེ། ལེགས་པར་སྤྱོད་པ་གསུམ་པོ་འདི་དག་ཉིད་དེ་ལུས་དང་ངག་དང་ཡིད་ཀྱིས་
ལེགས་པར་སྤྱོད་པའོ། །ལེགས་པར་སྤྱོད་པ་གསུམ་པོ་དེ་དག་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་དེའི་བྱང་ཆུབ་གང་དང་འབྲེལ་པའི་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཡོངས་སུ་ཚོལ་ལོ། །འདི་ལ་དེའི་ཆོས་ཉིད་ནི་འདི་ཡིན་ཏེ། དེ་ལ་འདི་
སྐད་ཅེས་བྱའོ། །སངས་རྒྱས་དག་གིས་བསྔགས་པ་ཡི། །དགེ་བའི་ལས་རྣམས་ལུས་ཀྱིས་བྱེད། གང་ལས་ཐོས་པ་རྙེད་འགྱུར་བའི། །སློབ་དཔོན་ལ་ཡང་རིམ་གྲོ་བྱེད། །སེམས་ཅན་ཐམས་ཅད་དོན་གྱི་ཕྱིར། །བྱམས་པའི་སེམས་ལྡན་ཕྲག་དོག་མེད། །ཆོས་ལས་བརྩམས་ཏེ་གང་
ཟག་ལ། །རི་མོ་དག་ནི་རབ་ཏུ་བྱེད། །ངག་ནི་ཤིན་ཏུ་སྡོམ་གྱུར་ཏེ། །དེ་ནི་མི་སྙན་ཚིག་མི་སྨྲ། །འདི་ནི་འདུན་དང་ལྡན་པའི་མཚན། །ནམ་དུའང་ངག་རྩུབ་མི་སྨྲའོ། །ཡིད་ནི་དགེ་བའི་ཡིད་དུ་འགྱུར། །ནམ་དུའང་སྡིག་པ་མི་འདོད་དོ། །བྱམས་སེམས་གུས་དང་བཅས་པ་ཡི། །བསམ་པ་
ཉིད་ཀྱིས་རྟག་ཏུ་ལྟ། །རྒྱལ་བས་བསྟན་པ་ཐོས་གྱུར་ནས། །ཆོས་འདི་ལ་ནི་གུས་དང་བཅས། །ཆོས་ལ་གུས་པར་བྱས་པས་ན། །མྱུར་དུ་བྱང་ཆུབ་རྣམ་འཚང་རྒྱ། །ཆོས་བཅུ་པོ་དེ་དག་ལ་རབ་ཏུ་གནས་པའི་བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཡོངས་སུ་
ཚོལ་བས་སློབ་དཔོན་ལ་རིམ་གྲོ་དང་བསྙེན་བཀུར་བྱེད་དེ། ཐ་ན་ཆུ་རྫ་གང་ཙམ་ཡང་འབུལ་ལོ། །གཞན་ཡང་ཤྭ་རིའི་བུ་བྱང་ཆུབ་སེམས་དཔའ་སེམས་བསྐྱེད་པ་བཅུ་བསྐྱེད་དེ། བཅུ་གང་