Kinh tạng Tây Tạng (Kangyur Đại Học) — 037_ཕལ་ཆེན།_ག

ུལ་ཤིན་ཏུ་ཕྲ་བ་སྙེད་ཀྱིས་རྒྱས་པར་འགེངས་པ་བྱེད་ཅིང་། མྱི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས་བཅོམ་ལྡན་འདས་གང་ན་བ་དེར་དོང་སྟེ། འཁོར་དང་བཅས་པས་
བཅོམ་ལྡན་འདས་ལ་ཕྱག་འཚལ་ནས། ནུབ་ཕྱོགས་སུ་བརྟེན་ཏེ། ཁང་པ་བརྩེགས་པ་སྤོས་ཀྱི་རྒྱལ་པོ་ཐམས་ཅད་ཀྱི་ལྷུན་དང་ལྡན་པ་མུ་ཏིག་གི་དྲ་བས་ཀུན་ནས་ཁྱབ་པ་དང་། སེང་གེའི་ཁྲི་ནོར་བུ་རིན་པོ་ཆེ་ལྷའི་དབང་པོ་རབ་ཏུ་སྣང་བའི་རྒྱལ་མཚན་གྱི་པདྨོའི་

སྙིང་པོ་ཅན་དག་མངོན་པར་སྤྲུལ་ནས། རིན་པོ་ཆེ་གསེར་གྱི་དྲ་བས་ཀུན་ནས་བརྒྱན་པ་དང་། ཡིད་བཞིན་གྱི་རྒྱལ་པོའི་ཅོད་པན་བཅིངས་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་འཁོད་དོ། །བྱང་ཕྱོགས་ཀྱི་འཇིག་རྟེན་གྱི་
ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་རིན་པོ་ཆེའི་གོས་ཡོངས་སུ་སྣང་བ་ཞེས་བྱ་བ་དེ་བཞིན་གཤེགས་པ་ཆོས་ཀྱི་དབྱིངས་ནམ་མཁའི་དཔལ་རྣམ་པར་སྣང་བའི་སངས་རྒྱས་ཀྱི་ཞིང་ནས་བྱང་ཆུབ་སེམས་
དཔའ་ཆགས་པ་མྱེད་པའི་དཔལ་གྱི་རྒྱལ་པོ་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོ་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་དེས་གནང་ནས་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། ནམ་མཁའི་དབྱིངས་
རིན་པོ་ཆེའི་སྣམ་བུའི་སྤྲིན་གྱི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། ནམ་མཁའི་དབྱིངས་རིན་པོ་ཆེའི་གོས་ཁ་དོག་སེར་པོ་དང་། མདོག་སེར་པོའི་སྤྲིན་གྱི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། ནམ་མཁའི་དབྱིངས་རིན་པོ་ཆེའི་གོས་སྤོས་སྣ་ཚོགས་ཀྱིས་དྲི་
ཞིམ་པོར་བྱས་པའི་སྤྲིན་གྱི་ཆར་རབ་ཏུ་འབབ་པའི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། ནམ་མཁའི་དབྱིངས་རིན་པོ་ཆེའི་རྒྱལ་པོ་ཉི་མའི་རྒྱལ་མཚན་གྱི་སྤྲིན་གྱི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། ནམ་མཁའི་དབྱིངས་ནོར་བུ་རིན་པོ་ཆེ་གསེར་གྱི་མདོག་ཤིན་ཏུ་
འབར་བའི་སྤྲིན་གྱི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། ནམ་མཁའི་དབྱིངས་ནོར་བུའི་རྒྱལ་པོ་རིན་པོ་ཆེ་འབར་བའི་གོས་ཀྱི་སྤྲིན་གྱི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། ནམ་མཁའི་དབྱིངས་རིན་པོ་ཆེ་སྐར་མ་ཐམས་ཅད་ཀྱི་གཟུགས་
བརྙན་གྱིས་སྣ་ཚོགས་སུ་གྱུར་པའི་གོས་ཀྱི་སྤྲིན་གྱི་རྒྱན་གྱིས་བརྒྱན་པར་བྱིན་གྱིས་བརླབ་པ་དང་། ནམ་མཁའི་དབྱིངས་ཕྱོགས་བཅུ་ཀུན་ནས་ནོར་བུ་རིན་པོ་ཆེ་སྣམ་བུ་ཁྲ་བོའི་རྡོ་ལྟར་སྣང་བའི་སྤྲིན་གྱིས་ཡོངས་སུ་རྒྱས་པར་བྱིན་གྱིས་བརླབ་པ་དང་། ནམ་མཁའི་དབྱིངས་ཕྱོགས་

བཅུ་ཀུན་ནས་རིན་པོ་ཆེའི་རྒྱལ་པོ་རྣམ་པར་སྣང་བའི་དཔལ་རབ་ཏུ་འབར་བའི་འོད་དང་ལྡན་པའི་གོས་ཀྱི་སྤྲིན་གྱིས་ཡོངས་སུ་རྒྱས་པར་བྱིན་གྱིས་བརླབ་པ་དང་། ནམ་མཁའི་དབྱིངས་ཕྱོགས་བཅུ་ཀུན་ནས་ནོར་བུའི་རྒྱལ་པོ་སྣང་བ་ཤིན་ཏུ་
གསལ་བས་ཕྱོགས་ཀྱི་དབྱིངས་རྣམ་པར་སྣང་བའི་གོས་ཀྱི་སྤྲིན་གྱིས་ཡོངས་སུ་རྒྱས་པར་བྱིན་གྱིས་བརླབ་པ་དང་། ནམ་མཁའི་དབྱིངས་རིན་པོ་ཆེའི་རྒྱལ་པོ་རྒྱ་མཚོའི་རྒྱན་གྱི་གོས་ཀྱི་སྤྲིན་གྱིས་ཀུན་ནས་ཡོག་པར་བྱིན་གྱིས་བརླབ་པ་བྱེད་ཅིང་། མྱི་མཇེད་
ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས། བཅོམ་ལྡན་འདས་གང་ན་བ་དེར་དོང་སྟེ། འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས། བྱང་ཕྱོགས་སུ་བརྟེན་ཏེ། རིན་པོ་ཆེའི་རྒྱལ་པོ་རྒྱ་མཚོ་ཡོངས་སུ་འབྱུང་བའི་ཁང་པ་བརྩེགས་པ་དང་།
སེང་གེའི་ཁྲི་བཻ་ཌཱུརྱའི་པདྨོའི་སྙིང་པོ་ཅན་དག་མངོན་པར་སྤྲུལ་ནས། ནོར་བུ་རིན་པོ་ཆེའི་རྒྱལ་པོ་སེང་གེ་མཛེས་པའི་དྲ་བས་ཡོངས་སུ་བརྒྱན་པ་དང་། རིན་པོ་ཆེ་སྐར་མའི་རྒྱལ་མཚན་མགོ་ལ་ཐོགས་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་
ཀྲུང་བཅས་ཏེ་འཁོད་དོ། །བྱང་དང་ཤར་གྱི་ཕྱོགས་མཚམས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་ས་ཆེན་པོ་ཐམས་ཅད་དུ་མཛེས་པའི་རིན་པོ་ཆེ་འོད་ཟེར་གྱི་དྲ་བ་རབ་ཏུ་འགྱེད་པ་ཞེས་བྱ་
བ་དེ་བཞིན་གཤེགས་པ་མྱི་དམྱིགས་པའི་སྤྱན་གྱི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་ཆོས་ཀྱི་དབྱིངས་སུ་ཤིན་ཏུ་འཕྲུལ་བའི་སྨོན་ལམ་ཟླ་བ་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོ་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་
ཏུ་བཅོམ་ལྡན་འདས་དེས་གནང་ནས་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་རིན་པོ་ཆེའི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་

འབྱམ་ཀླས་པ་ཐམས་ཅད་སྤོས་ཀྱི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་བདུག་སྤོས་ཀྱི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་
གྱི་ཁམས་འབྱམ་ཀླས་པ་ཐམས་ཅད་ཙན་དན་གྱི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་མེ་ཏོག་གི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་
པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་རིན་པོ་ཆེའི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་རྡོ་རྗེའི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་།
འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་གསེར་གྱི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་གོས་ཀྱི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་
དང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་པདྨོའི་ཁང་པ་བརྩེགས་པའི་སྤྲིན་གྱིས་ཀུན་ནས་ཁེབས་པར་བྱིན་གྱིས་བརླབ་པ་བྱེད་ཅིང་། མི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས། བཅོམ་ལྡན་འདས་གང་ན་བ་དེར་དོང་སྟེ། འཁོར་དང་
བཅས་པས་བཅོམ་ལྡན་འདས་ལ་ཕྱག་འཚལ་ནས་བྱང་དང་ཤར་གྱི་ཕྱོགས་མཚམས་སུ་བརྟེན་ཏེ། ནོར་བུ་རིན་པོ་ཆེའི་ཁང་པ་བརྩེགས་པ་སྒོ་ཆོས་ཀྱི་དབྱིངས་ཐམས་ཅད་ལ་མངོན་པར་ལྟ་བ་དང་། སེང་གེའི་ཁྲི་རིན་པོ་ཆེའི་རྒྱལ་པོ་སྤོས་མཚུངས་པ་མྱེད་པའི་
པད་མོའི་སྙིང་པོ་ཅན་དག་མངོན་པར་སྤྲུལ་ནས་རིན་པོ་ཆེའི་རྒྱལ་པོའི་མེ་ཏོག་གི་དྲ་བས་ཡོངས་སུ་བརྒྱན་པ་དང་། རིན་པོ་ཆེའི་རྒྱལ་པོ་མཛོད་སྣ་ཚོགས་ཀྱི་དྲ་བའི་ཅོད་པན་བཅིངས་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་

འཁོད་དོ། །ཤར་དང་ལྷོའི་ཕྱོགས་མཚམས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་སྤོས་ཀྱི་སྤྲིན་གྱིས་བརྒྱན་པའི་རྒྱལ་མཚན་ཞེས་བྱ་བ་དེ་བཞིན་གཤེགས་
པ་ཀླུ་དབང་གི་རྒྱལ་པོའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་ཆོས་ཀྱི་འོད་འཕྲོ་བ་དང་ལྡན་པའི་རྒྱལ་པོ་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོ་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་དེས་གནང་ནས་འཁོར་གྱི་
དཀྱིལ་འཁོར་རྒྱ་མཚོ་དེ་ནས་འཕགས་ཏེ། ནམ་མཁའི་དབྱིངས་ཐམས་ཅད་འོད་ཀྱི་དཀྱིལ་འཁོར་གསེར་གྱི་ཁ་དོག་ལྟ་བུའི་སྤྲིན་གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་རིན་པོ་ཆེ་ཁ་དོག་མཐའ་ཡས་པའི་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་ཏུ་ཁྱབ་པར་
བྱ་བ་དང་། ནམ་མཁའི་དབྱིངས་ཐམས་ཅད་དེ་བཞིན་གཤེགས་པའི་མཛོད་སྤུའི་ཁ་དོག་གི་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་རིན་པོ་ཆེ་སྣ་ཚོགས་ཀྱི་ཁ་དོག་ལྟ་བུའི་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་
ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་པདྨོའི་སྙིང་པོ་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་ནོར་བུའི་རྒྱལ་པོ་རིན་པོ་ཆེའི་ཤིང་གི་ཡལ་གའི་དཀྱིལ་འཁོར་ལྟ་བུའི་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་
ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་དེ་བཞིན་གཤེགས་པའི་གཙུག་ཏོར་ལྟ་བུའི་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་འཛམ་བུའི་ཆུ་ཀླུང་གི་གསེར་གྱི་ཁ་དོག་ལྟ་བུའི་འོད་ཀྱི་དཀྱིལ་འཁོར་གྱི་སྤྲིན་
གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་ཉི་མའི་ཁ་དོག་ལྟ་བུའི་འོད་ཀྱི་དཀྱིལ་འཁོར་གྱི་སྤྲིན་གྱིས་ཀུན་ཏུ་ཁྱབ་པར་བྱ་བ་དང་། ནམ་མཁའི་དབྱིངས་ཐམས་ཅད་ཟླ་བ་དང་། སྐར་མའི་ཚོགས་ཀྱི་ཁ་དོག་ལྟ་བུའི་འོད་ཀྱི་དཀྱིལ་འཁོར་གྱི་སྤྲིན་

གྱིས་ཀུན་ཏུ་ཁྱབ་པར་བྱེད་ཅིང་། མི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས་བཅོམ་ལྡན་འདས་གང་ན་བ་དེར་དོང་སྟེ། འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས། ཤར་དང་ལྷོའི་ཕྱོགས་མཚམས་སུ་བརྟེན་ཏེ། རིན་པོ་ཆེ་
རྡུལ་དང་བྲལ་ཞིང་རྣམ་པར་སྣང་བ་ཕུན་སུམ་ཚོགས་པའི་མེ་ཏོག་གི་ཁང་པ་བརྩེགས་པ་དང་། སེང་གེའི་ཁྲི་རིན་པོ་ཆེ་སེང་གེ་རྡོ་རྗེའི་པདྨོའི་སྙིང་པོ་ཅན་དག་མངོན་པར་སྤྲུལ་ནས་ནོར་བུའི་རྒྱལ་པོ་རིན་པོ་ཆེའི་འོད་ཟེར་རབ་ཏུ་འབར་བའི་དྲ་བས་ཡོངས་སུ་བརྒྱན་པའི་བྱང་ཆུབ་
སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་འཁོད་དོ། །ལྷོ་དང་ནུབ་ཀྱི་ཕྱོགས་མཚམས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་རིན་པོ་ཆེ་ཉི་མ་རབ་ཏུ་སྣང་
བའི་སྙིང་པོ་ཞེས་བྱ་བ་དེ་བཞིན་གཤེགས་པ་ཆོས་ཀྱི་འཁོར་ལོའི་ཡེ་ཤེས་ཀུན་ཏུ་སྣང་བའི་རྒྱལ་པོའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་བདུད་ཀྱི་དཀྱིལ་འཁོར་ཐམས་ཅད་རྣམ་པར་འཐོར་བའི་ཡེ་ཤེས་རྒྱལ་མཚན་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་
ཁམས་རྒྱ་མཚོ་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་དེས་གནང་ནས། འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། བ་སྤུའི་བུ་ག་ཐམས་ཅད་ནས་མེ་ཏོག་འོད་འཕྲོ་བའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་
དགྱེ་བ་དང་། བ་སྤུའི་བུ་ག་ཐམས་ཅད་ནས་རོལ་མོ་འོད་འཕྲོ་བའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་ནོར་བུ་རིན་པོ་ཆེ་འོད་འཕྲོ་བའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་
ཐམས་ཅད་ནས་རིན་པོ་ཆེའི་གོས་འོད་འཕྲོ་བའི་སྤོས་དང་། བདུག་སྤོས་སྣ་ཚོགས་ཀྱིས་རྣམ་པར་བདུགས་པའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་ཀླུས་རྣམ་པར་སྤྲུལ་པའི་གློག་གི་འོད་འཕྲོ་བའི་སྤྲིན་ནམ་མཁའི་དབྱིངས་

ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་ནོར་བུ་རིན་པོ་ཆེ་རྣམ་པར་སྣང་བ་འོད་འཕྲོ་བའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་ནོར་བུ་རིན་པོ་ཆེ་གསེར་རབ་
ཏུ་འབར་བ་འོད་རབ་ཏུ་འཕྲོ་བའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་རིན་པོ་ཆེའི་རྒྱལ་པོ་དཔལ་གྱི་སྙིང་པོ་འབར་བ་འོད་འཕྲོ་བའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་དང་། བ་སྤུའི་བུ་ག་ཐམས་ཅད་ནས་ནོར་བུ་རིན་པོ་ཆེ།
དེ་བཞིན་གཤེགས་པའི་དགོངས་པ་རྒྱ་མཚོ་ལྟར་དུས་གསུམ་གྱི་རྒྱུད་རབ་ཏུ་སྣང་བའི་ཚུལ་དང་ལྡན་པའི་འོད་འཕྲོ་བའི་སྤྲིན་ནམ་མཁའི་དབྱིངས་ལྟར་ཡངས་པ་རབ་ཏུ་དགྱེ་བ་བྱེད་ཅིང་། མྱི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས། བཅོམ་ལྡན་འདས་གང་ན་བ་དེར་དོང་སྟེ།
འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས། ལྷོ་དང་ནུབ་ཀྱི་ཕྱོགས་མཚམས་སུ་བརྟེན་ཏེ། ནོར་བུ་རིན་པོ་ཆེ་ཆེན་པོ་འོད་ཟེར་གྱི་དྲ་བ་ཕྱོགས་ཀུན་ཏུ་མངོན་པར་གཞོལ་བའི་ཐིག་ལེས་ཆོས་ཀྱི་དབྱིངས་ཐམས་ཅད་དུ་རབ་ཏུ་སྣང་བའི་ཁང་པ་བརྩེགས་པ་དང་།
སེང་གེའི་ཁྲི་ནོར་བུ་རིན་པོ་ཆེ་སྤོས་ཀྱི་སྒྲོན་མ་འོད་འཕྲོ་བའི་པདྨོའི་སྙིང་པོ་ཅན་དག་མངོན་པར་སྤྲུལ་ནས། རིན་པོ་ཆེའི་རྒྱལ་པོ་དྲི་མ་མེད་པའི་སྙིང་པོའི་དྲ་བས་ཡོངས་སུ་བརྒྱན་པ་དང་། རིན་པོ་ཆེའི་རྒྱལ་པོ་སེམས་ཅན་ཐམས་ཅད་རབ་ཏུ་འཛུད་པའི་དབྱངས་དང་ལྡན་པའི་ཅོད་
པན་བཅིངས་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་འཁོད་དོ། །ནུབ་དང་བྱང་གི་ཕྱོགས་མཚམས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་རྣམ་པར་
སྣང་མཛད་ཀྱི་སྙིང་པོ་ཞེས་བྱ་བ་དེ་བཞིན་གཤེགས་པ་དཔལ་གྱི་རི་བོ་ཀུན་ནས་རྣམ་པར་སྣང་བའི་རྒྱལ་པོའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་རྣམ་པར་སྣང་བའི་སྨོན་ལམ་ཡེ་ཤེས་དཔལ་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོ་བརྗོད་དུ་མེད་པའི་རྡུལ་

ཤིན་ཏུ་ཕྲ་བ་སྙེད་དང་ལྷན་ཅིག་ཏུ། བཅོམ་ལྡན་འདས་དེས་གནང་ནས་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་
དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱི་སྐུ་གཟུགས་བརྙན་གྱི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་བྱུང་བའི་བྱང་
ཆུབ་སེམས་དཔའ་ཐམས་ཅད་ཀྱི་ལུས་ཀྱི་གཟུགས་བརྙན་གྱི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་གཤེགས་པའི་དེ་བཞིན་
གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ཐམས་ཅད་ཀྱི་ལུས་ཀྱི་གཟུགས་བརྙན་གྱི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་
ནས་དུས་གསུམ་དུ་གཤེགས་པའི་སངས་རྒྱས་ཐམས་ཅད་ཀྱི་སྤྲུལ་པའི་ཚོགས་ཀྱི་གཟུགས་བརྙན་མང་པོའི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་
གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱི་སྔོན་གྱི་སྦྱོར་བའི་གཟུགས་བརྙན་མང་པོའི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་
བྱུང་བའི་ཉན་ཐོས་དང་། རང་སངས་རྒྱས་ཐམས་ཅད་ཀྱི་ལུས་ཀྱི་གཟུགས་བརྙན་རབ་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་གཤེགས་པའི་དེ་

བཞིན་གཤེགས་པ་ཐམས་ཅད་ཀྱི་སྙིང་པོ་བྱང་ཆུབ་དང་། བྱང་ཆུབ་ཀྱི་ཤིང་གི་གཟུགས་ཀྱི་གཟུགས་བརྙན་གྱི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་གཤེགས་
པའི་སངས་རྒྱས་ཐམས་ཅད་ཀྱི་རྣམ་པར་འཕྲུལ་པའི་གཟུགས་བརྙན་མང་པོའི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་བྱུང་བའི་འཇིག་རྟེན་གྱི་དབང་པོ་ཐམས་ཅད་ཀྱི་ལུས་ཀྱི་
གཟུགས་བརྙན་གྱི་སྤྲིན་ཀུན་ཏུ་དགྱེ་བ་དང་། མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་ནས་དུས་གསུམ་དུ་བྱུང་བའི་སངས་རྒྱས་ཀྱི་ཞིང་ཡོངས་སུ་དག་པ་ཐམས་ཅད་ཀྱི་གཟུགས་བརྙན་གྱི་སྤྲིན་ཀུན་ཏུ་དགྱེ་བས། སྐད་ཅིག་
སྐད་ཅིག་ཏུ་ནམ་མཁའི་དབྱིངས་ཐམས་ཅད་རྒྱས་པར་འགེངས་ཤིང་མི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས། བཅོམ་ལྡན་འདས་གང་ན་བ་དེར་དོང་སྟེ། འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས། ནུབ་དང་བྱང་གི་ཕྱོགས་མཚམས་སུ་
བརྟེན་ཏེ། རིན་པོ་ཆེའི་རྒྱལ་པོ་ཕྱོགས་ཀུན་ནས་རྣམ་པར་སྣང་བའི་སྙིང་པོའི་སེང་གེའི་ཁྲི་རིན་པོ་ཆེ་འགྲོ་བ་རྣམ་པར་སྣང་བའི་པདྨོའི་སྙིང་པོ་ཅན་དག་མངོན་པར་སྤྲུལ་ནས་མུ་ཏིག་འོད་ཐུབ་པ་མེད་པའི་དྲ་བས་ཡོངས་སུ་བརྒྱན་པ་དང་། རིན་པོ་ཆེ་འོད་ཀུན་ཏུ་སྣང་བའི་ཅོད་པན་བཅིངས་
པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་འཁོད་དོ། །འོག་གི་ཕྱོགས་ཀྱི་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་མ་རོལ་གྱི་འཇིག་རྟེན་གྱི་ཁམས་དེ་བཞིན་གཤེགས་པ་ཐམས་ཅད་ཀྱི་
འོད་ཀྱི་དཀྱིལ་འཁོར་རྣམ་པར་སྣང་བ་ཞེས་བྱ་བ་དེ་བཞིན་གཤེགས་པ་ཡེ་ཤེས་ནམ་མཁའ་ལྟ་བུར་ཆགས་པ་མེད་པའི་དཔལ་གྱི་རྒྱལ་མཚན་རྒྱལ་པོའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་བསྒྲིབས་པ་ཐམས་ཅད་རྣམ་པར་འཐོར་བའི་ཡེ་ཤེས་ཀྱིས་རྣམ་པར་ནོན་པ་ཞེས་བྱ་བ་བྱང་

ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོ་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་དེས་གནང་ནས་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། བ་སྤུའི་བུ་ག་ཐམས་ཅད་ནས་འགྲོ་བ་ཐམས་ཅད་ཀྱི་སྐད་དང་སྒྲ་དང་དབྱངས་དང་ངེས་
པའི་ཚིག་མངོན་པར་བསྒྲུབ་པ་རྒྱ་མཚོ་རབ་ཏུ་བརྗོད་པ་དང་། དུས་གསུམ་གྱི་བྱང་ཆུབ་སེམས་དཔའ་ཐམས་ཅད་འབྱུང་བའི་ཚུལ་རྒྱ་མཚོའི་སྤྲིན་གྱི་འབྲུག་སྒྲ་རབ་ཏུ་བསྒྲག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་མངོན་པར་བསྒྲུབ་པའི་ཚུལ་རྒྱ་མཚོའི་དབྱངས་རབ་ཏུ་
བསྒྲག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡོངས་སུ་རྫོགས་པར་བྱ་བའི་ཚུལ་རྒྱ་མཚོའི་སྤྲིན་གྱི་སྒྲ་རབ་ཏུ་བསྒྲག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པའི་དཀྱིལ་འཁོར་ཞིང་ཐམས་ཅད་དུ་རྒྱས་པར་འགེངས་པའི་ཚུལ་རྒྱ་མཚོའི་དབྱངས་རབ་ཏུ་
བསྒྲག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་ཡང་དག་པར་བསྒྲུབ་པ་དང་། རྣམ་པར་འཕྲུལ་པའི་ཚུལ་རྒྱ་མཚོའི་དབྱངས་རབ་ཏུ་བསྒྲག་པ་དང་། དེ་བཞིན་གཤེགས་པ་ཐམས་ཅད་སྙིང་པོ་བྱང་ཆུབ་ཏུ་གཤེགས་པ་དང་བདུད་ཀྱི་དཀྲུགས་མ་རྣམ་པར་འཐོར་བ་དང་། སྙིང་
པོ་བྱང་ཆུབ་ཏུ་རྣམ་པར་འཚང་རྒྱ་བ་དང་། རྣམ་པར་འཕྲུལ་པ་མཛད་པའི་དབྱངས་རྒྱ་མཚོ་རབ་ཏུ་བསྒྲག་པ་དང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་འཁོར་བ་དང་། མདོ་སྡེའི་ཚུལ་དང་མིང་རྒྱ་མཚོའི་དབྱངས་ཀྱི་སྤྲིན་གྱི་འབྲུག་སྒྲ་བསྒྲགས་པ་དང་། འགྲོ་
བ་འདུལ་བ་ཐམས་ཅད་དུས་ལ་བབ་པའི་འཁོར་ལོས་འདུལ་བའི་ཆོས་ཀྱི་ཚུལ་དང་ཐབས་ཀྱི་སྒྲ་རབ་ཏུ་བསྒྲག་པ་དང་། ཡེ་ཤེས་ཐམས་ཅད་ཁོང་དུ་ཆུད་པར་བྱ་བའི་ཕྱིར་སྨོན་ལམ་ཇི་ལྟར་བཏབ་པ་དང་། དགེ་བའི་རྩ་བའི་ཁྱད་པར་དང་དུས་དང་ཐབས་དང་། ཆོས་ཀྱི་
ཚུལ་རྒྱ་མཚོའི་དབྱངས་རབ་ཏུ་བསྒྲག་པ་བྱེད་ཅིང་། མི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས། བཅོམ་ལྡན་འདས་གང་ན་བ་དེར་དོང་སྟེ། འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས། འོག་གི་ཕྱོགས་སུ་བརྟེན་ཏེ། དེ་

བཞིན་གཤེགས་པ་ཐམས་ཅད་ཀྱི་གཞལ་མེད་ཁང་གཟུགས་བརྙན་རབ་ཏུ་སྣང་བ་རིན་པོ་ཆེ་སྣ་ཚོགས་ཐམས་ཅད་ཀྱི་མཛོད་ཀྱི་ཁང་བ་བརྩེགས་པ་དང་། སེང་གེའི་ཁྲི་རིན་པོ་ཆེ་ཐམས་ཅད་ཀྱི་གཟུགས་ཀྱི་པད་མོའི་སྙིང་པོ་ཡོངས་སུ་བཟུང་བ་དག་མངོན་
པར་སྤྲུལ་ནས། རིན་པོ་ཆེའི་སྙིང་པོ་བྱང་ཆུབ་ཐམས་ཅད་ཀྱི་གཟུགས་བརྙན་རབ་ཏུ་སྣང་བའི་རྒྱལ་མཚན་གྱི་ཅོད་པན་མགོ་ལ་བཅིངས་པའི་བྱང་ཆུབ་སེམས་དཔའི་ལུས་སུ་བྱིན་གྱིས་བརླབས་ནས། སྐྱིལ་མོ་ཀྲུང་བཅས་ཏེ་འཁོད་དོ། །སྟེང་གི་ཕྱོགས་ཀྱི་འཇིག་རྟེན་གྱི་ཁམས་
རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་སངས་རྒྱས་ཀྱི་རིགས་མི་ཟད་པ་ཤིན་ཏུ་སྟོན་པ་ཞེས་བྱ་བ་དེ་བཞིན་གཤེགས་པ་ཡེ་ཤེས་ཀྱི་དཀྱིལ་འཁོར་ཀུན་ཏུ་སྣང་བའི་དབྱངས་ཀྱི་སངས་རྒྱས་ཀྱི་ཞིང་ནས་བྱང་ཆུབ་སེམས་
དཔའ་ཆོས་ཀྱི་དབྱིངས་ཀྱི་སྨོན་ལམ་གྱི་གཞི་རབ་ཏུ་རྟོགས་པ་ཞེས་བྱ་བ་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོ་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དང་། ལྷན་ཅིག་ཏུ་བཅོམ་ལྡན་འདས་དེས་གནང་ནས། འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ།
མཚན་དང་དཔེ་བྱད་བཟང་པོ་ཐམས་ཅད་དང་། བ་སྤུའི་སྒོ་ཐམས་ཅད་དང་། ལུས་ཐམས་ཅད་དང་། ཡན་ལག་དང་ཉིང་ལག་ཐམས་ཅད་དང་། ཚིག་གི་ལམ་ཐམས་ཅད་དང་། གོས་དང་སྨད་གཡོགས་ཐམས་ཅད་ནས་བྱང་ཆུབ་སེམས་དཔའི་འཁོར་ཐམས་ཅད་དང་།
བདག་དང་བཅོམ་ལྡན་འདས་རྣམ་པར་སྣང་མཛད་དང་། སྔོན་གྱི་མཐའི་མུར་ཐུག་པའི་དེ་བཞིན་གཤེགས་པ་འདས་པ་ཐམས་ཅད་དང་། ཕྱི་མའི་མཐའི་མུར་ཐུག་པའི་དེ་བཞིན་གཤེགས་པ་ལུང་བསྟན་པ་དང་། ལུང་མ་བསྟན་པ་མ་བྱོན་པ་ཐམས་ཅད་དང་། ད་ལྟར་བྱུང་བ་
ཕྱོགས་བཅུའི་སངས་རྒྱས་ཀྱི་ཞིང་འབྱམ་ཀླས་པ་ཐམས་ཅད་ན་བཞུགས་པ་རྣམས་ཀྱི་སྔོན་སྦྱིན་པའི་ཕ་རོལ་ཏུ་ཕྱིན་པ་མཛད་པ་དང་ལྡན་པའི་སྔོན་གྱི་སྦྱོར་བ་རྒྱ་མཚོ་དང་། ལེན་པ་དང་སྦྱིན་པའི་དངོས་པོ་ཐམས་ཅད་ཀྱི་གཟུགས་བརྙན་མཚན་དང་དཔེ་བྱད་བཟང་པོ་དང་། བ་སྤུའི་

སྒོ་དང་ལུས་ཐམས་ཅད་དང་། ཡན་ལག་དང་ཉིང་ལག་དང་ཚིག་གི་ལམ་དང་གོས་དང་སྨད་གཡོགས་ཐམས་ཅད་ལ་རབ་ཏུ་སྣང་བར་གྱུར་པར་རྣམ་པར་བསྟན་པ་དང་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཐམས་ཅད་དང་ལྡན་པའི་སྔོན་གྱི་སྦྱོར་བ་རྒྱ་མཚོ་དག་ཀྱང་རབ་ཏུ་སྣང་བར་ཡོངས་སུ་བསྟན་
པ་དང་། བཟོད་པའི་ཕ་རོལ་ཏུ་ཕྱིན་པ་དང་ལྡན་པར་ཡན་ལག་དང་ཉིང་ལག་ཐམས་ཅད་འཐུབ་པ་རབ་ཏུ་བསྟན་པ་དང་ལྡན་པའི་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་བ་ཡོངས་སུ་བསྟན་པ་དང་། བྱང་ཆུབ་སེམས་དཔའ་ཐམས་ཅད་ཀྱི་བརྩོན་འགྲུས་དང་དྲག་ཤུལ་དང་། རྣམ་
པར་གནོན་པ་དང་ལྡན་པའི་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་པ་ཡོངས་སུ་བསྟན་པ་དང་། དེ་བཞིན་གཤེགས་པ་ཐམས་ཅད་ཀྱི་བསམ་གཏན་རྒྱ་མཚོ་ཡོངས་སུ་ཚོལ་ཞིང་རབ་ཏུ་བསྒྲུབ་པ་དང་ལྡན་པའི་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་པ་ཡོངས་སུ་བསྟན་པ་དང་།
དེ་བཞིན་གཤེགས་པ་ཐམས་ཅད་ཆོས་ཀྱི་འཁོར་ལོ་བསྐོར་བའི་ཚུལ་ཡོངས་སུ་བསྒྲུབ་ཅིང་། ཆོས་ཡོངས་སུ་ཚོལ་བ་དང་ལྡན་པ་དང་། བདོག་པ་ཐམས་ཅད་ཡོངས་སུ་གཏོང་ཞིང་ཤིན་ཏུ་ཞེ་ནོན་པའི་ལུས་དང་ངོའི་གཟུགས་བརྙན་རྣམ་པར་དམྱིགས་པར་བྱ་བས་སྔོན་གྱི་
སྦྱོར་བ་རྒྱ་མཚོ་རབ་ཏུ་སྣང་བར་གྱུར་པ་ཡོངས་སུ་བསྟན་པ་དང་། དེ་བཞིན་གཤེགས་པ་ཐམས་ཅད་མཐོང་ཞིང་དགའ་བ་དང་། བྱང་ཆུབ་སེམས་དཔའ་ཐམས་ཅད་ཀྱི་ལམ་ལ་འགྲོ་བ་ཐམས་ཅད་མངོན་པར་མོས་པར་བྱེད་པ་དང་ལྡན་པའི་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་
པ་ཡོངས་སུ་བསྟན་པ་དང་། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་རྒྱ་མཚོ་མངོན་པར་བསྒྲུབ་པའི་སྒོ་ཡོངས་སུ་དག་པའི་རྒྱན་དང་ལྡན་པའི་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་པ་ཡོངས་སུ་བསྟན་པ་དང་། བྱང་ཆུབ་སེམས་དཔའ་ཐམས་ཅད་ཀྱི་སྟོབས་
ཀྱི་ཕ་རོལ་ཏུ་ཕྱིན་པ་རབ་ཏུ་གྲུབ་པ་དང་། རྣམ་པར་མནན་པ་དང་། རྣམ་པར་དག་པར་བྱས་པ་དང་ལྡན་པའི་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་པ་ཡོངས་སུ་བསྟན་པ་དང་། ཆོས་ཀྱི་དབྱིངས་རྒྱ་ཆེན་པོ་རྣམ་པར་འཕྲུལ་པ་ཐམས་ཅད་ཀྱི་སྤྲིན་གྱིས་རྒྱས་པར་བཀང་སྟེ། བྱང་

ཆུབ་སེམས་དཔའ་ཐམས་ཅད་ཀྱི་ཡེ་ཤེས་ཀྱི་དཀྱིལ་འཁོར་དང་ལྡན་པའི་སྔོན་གྱི་སྦྱོར་བ་རྒྱ་མཚོ་རབ་ཏུ་སྣང་བར་གྱུར་པ་ཡོངས་སུ་བསྟན་པ་བྱེད་ཅིང་། མྱི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་ལྷགས་ནས། བཅོམ་ལྡན་འདས་གང་ན་བ་དེར་དོང་སྟེ།
འཁོར་དང་བཅས་པས་བཅོམ་ལྡན་འདས་ལ་ཕྱག་འཚལ་ནས། སྟེང་གི་ཕྱོགས་སུ་བརྟེན་ཏེ། རྡོ་རྗེའི་དབང་པོ་སྣ་ཚོགས་ཐམས་ཅད་ཀྱི་རྒྱན་གྱི་སྙིང་པོ་ཅན་གྱི་ཁང་པ་བརྩེགས་པ་དང་། སེང་གེའི་ཁྲི་རྡོ་རྗེ་དང་། ཨིན་དྲ་ནཱི་ལའི་པདྨོའི་སྙིང་པོ་ཅན་དག་མངོན་པར་སྤྲུལ་
ནས་ནོར་བུའི་རྒྱལ་པོ་རིན་པོ་ཆེ་ཐམས་ཅད་རབ་ཏུ་འབར་བའི་དྲ་བས་ཀུན་ནས་བརྒྱན་པ་དང་། རིན་པོ་ཆེའི་རྒྱལ་པོ་དུས་གསུམ་གྱི་དེ་བཞིན་གཤེགས་པའི་མཚན་དབྱངས་སུ་སྒྲོག་པའི་ཕྲེང་བ་རབ་ཏུ་འཕྱང་བ་དང་། མགོ་ལ་རིན་པོ་ཆེའི་ཅོད་པན་ཐོགས་པའི་བྱང་ཆུབ་
སེམས་དཔའི་ལུས་སུ་བྱིན་གྱིས་བརླབས་ནས་སྐྱིལ་མོ་ཀྲུང་བཅས་ཏེ་འཁོད་དོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་ཉི་ཤུ་ལྔ་པ། བྱང་ཆུབ་སེམས་དཔའ་དེ་དག་ཐམས་ཅད་ཀྱང་འཁོར་དང་བཅས་པར་
བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་གྱིས་བྱུང་བ་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ནས་ཞལ་དུ་ལྟ་བ། ཡེ་ཤེས་ཡོངས་སུ་དག་པའི་མྱིག་དང་ལྡན་པ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་དང་། མདོ་སྡེའི་ཚུལ་
གྱི་གསུང་རྒྱ་མཚོ་ལ་རྣ་བ་ཡོངས་སུ་གཞོལ་བ། བྱང་ཆུབ་སེམས་དཔའ་ཐམས་ཅད་ཀྱི་དབང་རབ་ཏུ་ཐོབ་པར་བྱ་བ་ལ། དམ་པའི་ཕ་རོལ་ཏུ་བགྲོད་པར་ཕྱིན་པའི་མཆོག་ཐོབ་པ། དེ་བཞིན་གཤེགས་པ་ཐམས་ཅད་ཀྱི་དྲུང་དུ་འདོང་བ།
སྐད་ཅིག་སྐད་ཅིག་ཏུ། ཡོངས་སུ་བསྟན་པར་རྣམ་པར་འཕྲུལ་བས་བྱུང་བ། འཇིག་རྟེན་གྱི་ཁམས་ཐམས་ཅད་ལུས་གཅིག་གིས་རྒྱས་པར་དགང་བའི་ཡུལ་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་ལུས་

མངོན་པར་འབྱུང་ཞིང་རྣམ་པར་སྣང་བ། རྡུལ་ཤིན་ཏུ་ཕྲ་བ་གཅིག་ལ་འཇིག་རྟེན་གྱི་ཁམས་ཐམས་ཅད་ཁམས་གཅིག་ཏུ་སྣང་ཞིང་ཁོངས་སུ་ཆུད་པར་ཡང་དག་པར་སྟོན་པའི་ཡུལ་དང་ལྡན་པ་འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། འདུལ་བའི་དུས་ལ་སྡོང་བར་
གཞོལ་བ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་སྤྲིན་གྱི་འབྲུག་སྒྲ་བ་སྤུའི་བུ་ག་ཐམས་ཅད་ནས་རབ་ཏུ་སྒྲོག་པའི་ཡུལ་དང་ལྡན་པ། སེམས་ཅན་གྱི་ཁམས་ཐམས་ཅད་སྒྱུ་མ་ལྟ་བུར་ཡོངས་སུ་ཤེས་པ་རབ་ཏུ་ཐོབ་པ། དེ་བཞིན་གཤེགས་པ་ཐམས་
ཅད་མིག་ཡོར་ལྟ་བུར་ཁོང་དུ་ཆུད་པ། སྲིད་པའི་རྒྱུད་དུ་སྐྱེ་བ་ཐམས་ཅད་རྨི་ལམ་ལྟ་བུ་ཤེས་པར་བྱུང་བ་ལས་དང་རྣམ་པར་སྨིན་པ་ཐམས་ཅད་གཟུགས་བརྙན་ལྟ་བུར་ཤེས་པས་རྣམ་པར་དག་པ། ཡེ་ཤེས་མངོན་པར་གྲུབ་པ་ཐམས་ཅད་སྨིག་རྒྱུ་ལྟ་བུར་མངོན་
པར་ཤེས་པ། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་སྤྲུལ་པ་ལྟ་བུར་ཁོང་དུ་ཆུད་པ་དང་། དེ་བཞིན་གཤེགས་པའི་སྟོབས་བཅུ་དང་ཡེ་ཤེས་ཀྱི་སྣང་བ་རབ་ཏུ་ཐོབ་པ། མྱི་འཇིགས་པའི་ཁྱུ་མཆོག་དང་། སེང་གེའི་ང་རོས་རྣམ་པར་གནོན་པ། སོ་སོ་ཡང་
དག་པར་རིག་པ་མྱི་ཟད་པའི་རྒྱ་མཚོར་ཞུགས་པ། འགྲོ་བ་ཐམས་ཅད་ཀྱི་སྐད་རྒྱ་མཚོ་དང་། ཆོས་ཀྱི་ངེས་པའི་ཚིག་གི་ཡེ་ཤེས་རབ་ཏུ་ཐོབ་པ། ཆོས་ཀྱི་དབྱིངས་དང་ནམ་མཁའ་ལྟར་ཆགས་པ་མྱེད་པའི་ཡེ་ཤེས་ཀྱི་སྤྱོད་ཡུལ་དང་ལྡན་པ། ཆོས་ཐམས་ཅད་
ལ་སྒྲིབ་པ་མེད་པའི་ཡེ་ཤེས་རབ་ཏུ་ཐོབ་པ། བྱང་ཆུབ་སེམས་དཔའ་ཐམས་ཅད་ཀྱི་མངོན་པར་ཤེས་པ་ལ་ཡེ་ཤེས་ཀྱི་དཀྱིལ་འཁོར་རྣམ་པར་དག་པ་བདུད་ཀྱི་དཀྱིལ་འཁོར་ཐམས་ཅད་རྣམ་པར་དཀྲུག་པའི་བརྩོན་འགྲུས་དང་ལྡན་པ། དུས་གསུམ་ཐམས་ཅད་ཤེས་པའི་སྟོབས་ལ་རབ་ཏུ་གནས་པ།
ཆོས་ཐམས་ཅད་ལ་ཡེ་ཤེས་སྒྲིབ་པ་མེད་པ་རབ་ཏུ་ཐོབ་པ། གནས་མྱེད་པས་ནམ་མཁའི་སྤྱོད་ཡུལ་དང་ལྡན་པ། ཐམས་ཅད་མཁྱེན་པའི་ས་ལེན་པ་མྱེད་པ། ནམ་མཁའ་ལྟ་བུའི་བརྩོན་འགྲུས་དང་ལྡན་པ། སྲིད་པ་ཐམས་ཅད་མྱི་དམྱིགས་པའི་ཡེ་ཤེས་ཀྱི་

སྤྱོད་ཡུལ་ཅན། ཆོས་ཀྱི་དབྱིངས་ཐམས་ཅད་ཀྱི་ཚུལ་རྒྱ་མཚོ་ལ་རབ་ཏུ་ཞུགས་པ། འཇིག་རྟེན་གྱི་ཁམས་ཐམས་ཅད་ཐ་མྱི་དད་པའི་ཡེ་ཤེས་ཀྱི་སྒོར་ཞུགས་པ། འཇིག་རྟེན་གྱི་ཁམས་ཐམས་ཅད་གཅིག་ནས་གཅིག་ཏུ་གཟུང་བའི་རྣམ་པར་
འཕྲུལ་པས་བྱུང་བ། འཇིག་རྟེན་གྱི་ཁམས་ཀྱི་རྒྱུད་ཐམས་ཅད་དུ་སྐྱེས་པའི་ལུས་ཡོངས་སུ་སྟོན་པ། འཇིག་རྟེན་གྱི་ཁམས་ཐམས་ཅད་ཀྱི་དབྱིབས་ཕྲ་བ་དང་། རྒྱ་ཆེ་བ་དང་ཡངས་པ་དང་། དོག་པ་སྣ་ཚོགས་རབ་ཏུ་རྟོགས་པ་ཤིན་ཏུ་ཕྲ་ཞིང་རྒྱ་ཆེན་པོ་ཡང་དག་
པར་གཟུད་པའི་ཡེ་ཤེས་ཁོང་དུ་ཆུད་པ། དམྱིགས་པ་རྒྱ་ཆེན་པོ་ཤིན་ཏུ་ཕྲ་བར་ཤེས་པ་དང་ལྡན་པ། སངས་རྒྱས་ཐམས་ཅད་དང་སེམས་ཀྱི་སྐད་ཅིག་ལ་འགྲོགས་པ་རབ་ཏུ་ཐོབ་པ། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱི་ཡེ་ཤེས་ཀྱི་ལུས་དང་ལྡན་པ།
ཕྱོགས་རྒྱ་མཚོ་ཐམས་ཅད་དུ་མགོ་རྨོངས་པ་མྱེད་པའི་ཡེ་ཤེས་རབ་ཏུ་ཐོབ་པ་སེམས་ཀྱི་སྐད་ཅིག་གིས་ཕྱོགས་རྒྱ་མཚོ་ཐམས་ཅད་དུ་རྣམ་པར་འཕྲུལ་པས་རྒྱས་པར་འགེངས་པ་ཤ་སྟག་སྟེ། དེ་བཞིན་གཤེགས་པའི་བྱིན་གྱི་རླབས་ཀྱིས་དེ་ལྟ་བུའི་ཡོན་ཏན་ཚད་མྱེད་པ་དང་ལྡན་པའི་
བྱང་ཆུབ་སེམས་དཔའ་ཤ་སྟག་གིས་ཛེ་ཏའི་ཚལ་ཐམས་ཅད་ཡོངས་སུ་རྒྱས་པར་གྱུར་ཀྱང་། ཉན་ཐོས་ཆེན་པོ་ཤ་རིའི་བུ་དང་། མོའུ་དགལ་གྱི་བུ་དང་འོད་སྲུངས་ཆེན་པོ་དང་། ནམ་འགྲུ་དང་། རབ་འབྱོར་དང་། འགག་མྱེད་དང་། མོས་པ་དང་། ཀ་ཏྱའི་བུ་དང་། བྱམས་གང་གི་བུ་ལ་སྩོགས་
པས་ཛེ་ཏའི་ཚལ་ན་འཁོད་བཞིན་དུ་དེ་བཞིན་གཤེགས་པའི་རྣམ་པར་འཕྲུལ་པ་དེ་དག་མ་མཐོང་ངོ་། །སངས་རྒྱས་ཀྱི་བཀོད་པ་དེ་དག་དང་། སངས་རྒྱས་ཀྱི་ཁྱུ་མཆོག་གི་མཐུ་དང་། སངས་རྒྱས་ཀྱི་རྣམ་པར་རོལ་བ་དང་། སངས་རྒྱས་ཀྱི་ཆོ་འཕྲུལ་དང་། སངས་རྒྱས་ཀྱི་
མངའ་ཆེན་པོ་དང་། སངས་རྒྱས་སྦྱོང་བའི་རྣམ་པར་འཕྲུལ་པ་དང་། སངས་རྒྱས་ཀྱི་མཐུ་དང་། སངས་རྒྱས་ཀྱི་བྱིན་གྱི་རླབས་དང་། སངས་རྒྱས་ཀྱི་ཞིང་ཡོངས་སུ་དག་པ་ཡང་མ་མཐོང་ངོ་། །བྱང་ཆུབ་སེམས་དཔའི་ཡུལ་བསམ་གྱིས་མྱི་ཁྱབ་པ་དེ་དག་དང་། བྱང་ཆུབ་

སེམས་དཔའ་ཀུན་ནས་འོངས་པ་དང་། བྱང་ཆུབ་སེམས་དཔའ་ཀུན་ནས་འདུས་པ་དང་། བྱང་ཆུབ་སེམས་དཔའ་ཀུན་ནས་ཚོགས་པ་དང་། བྱང་ཆུབ་སེམས་དཔའ་ཉེ་བར་འོངས་པ་དང་། བྱང་ཆུབ་སེམས་དཔའི་རྣམ་པར་འཕྲུལ་པ་དང་། བྱང་ཆུབ་སེམས་དཔའི་ཆོ་འཕྲུལ་
དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་། བྱང་ཆུབ་སེམས་དཔའི་ཕྱོགས་སུ་འཁོད་པ་དང་། བྱང་ཆུབ་སེམས་དཔའི་སེང་གེའི་ཁྲི་བཀོད་པ་དང་། བྱང་ཆུབ་སེམས་དཔའི་ཁང་པ་དང་། བྱང་ཆུབ་སེམས་དཔའི་རྣམ་པར་སྤྱོད་པ་དང་། བྱང་
ཆུབ་སེམས་དཔའི་ཏིང་ངེ་འཛིན་གྱིས་རྣམ་པར་རྩེ་བ་དང་། བྱང་ཆུབ་སེམས་དཔའི་རྣམ་པར་ལྟ་བ་དང་། བྱང་ཆུབ་སེམས་དཔའི་རྣམ་པར་བསྒྱིངས་པ་དང་བྱང་ཆུབ་སེམས་དཔའི་རྣམ་པར་གནོན་པ་དང་། བྱང་ཆུབ་སེམས་དཔའི་དེ་བཞིན་གཤེགས་པ་མཆོད་པ་དང་།
བྱང་ཆུབ་སེམས་དཔའི་ལུང་བསྟན་པ་དང་། བྱང་ཆུབ་སེམས་དཔའི་ཡོངས་སུ་སྨིན་པར་གྱུར་པ་དང་། བྱང་ཆུབ་སེམས་དཔའི་སྔོན་དུ་འདོར་བ་དང་། བྱང་ཆུབ་སེམས་དཔའི་ཆོས་ཀྱི་ལུས་རྣམ་པར་དག་པ་དང་། བྱང་ཆུབ་སེམས་དཔའི་ཡེ་ཤེས་ཀྱི་ལུས་ཡོངས་སུ་རྫོགས་
པ་དང་། བྱང་ཆུབ་སེམས་དཔའི་སྨོན་ལམ་གྱི་ལུས་རྣམ་པར་དམྱིགས་པ་དང་། བྱང་ཆུབ་སེམས་དཔའི་གཟུགས་ཀྱི་ལུས་ཡོངས་སུ་གྲུབ་པ་དང་། བྱང་ཆུབ་སེམས་དཔའི་མཚན་ཕུན་སུམ་ཚོགས་པ་ཡོངས་སུ་དག་པ་དང་། བྱང་ཆུབ་སེམས་དཔའི་འོད་ཀྱི་དཀྱིལ་
འཁོར་ཁ་དོག་མཐའ་ཡས་པའི་བཀོད་པ་དང་། བྱང་ཆུབ་སེམས་དཔའི་འོད་ཟེར་གྱི་དྲ་བ་རབ་ཏུ་འགྱེད་པ་དང་། བྱང་ཆུབ་སེམས་དཔའི་སྤྲུལ་པའི་སྤྲིན་ཀུན་ཏུ་འགྱེད་པ་དང་། བྱང་ཆུབ་སེམས་དཔའི་ཕྱོགས་ཀྱི་དྲ་བ་རྒྱས་པར་འགེངས་པ་དང་། བྱང་ཆུབ་སེམས་དཔའ་སྤྱོད་
པའི་དཀྱིལ་འཁོར་རྣམ་པར་སྤྲུལ་པ་ཡང་མ་མཐོང་ངོ་། །དེ་ཅིའི་ཕྱིར་ཞེ་ན། དགེ་བའི་རྩ་བ་མྱི་མཚུངས་པའི་ཕྱིར་ཏེ། དེ་དག་གིས་ནི་སྔོན་སངས་རྒྱས་ཀྱི་རྣམ་པར་འཕྲུལ་པ་མཐོང་བའི་རྒྱུར་འགྱུར་བའི་དགེ་བའི་རྩ་བ་མ་བསྩགས་སོ། །དེ་དག་ལ་ནི་སྔོན་སངས་རྒྱས་

བཅོམ་ལྡན་འདས་རྣམས་ཀྱིས་ཕྱོགས་བཅུའི་འཇིག་རྟེན་གྱི་ཁམས་སུ་གཏོགས་པའི་སངས་རྒྱས་ཀྱི་ཞིང་ཐམས་ཅད་ཀྱི་ཡོན་ཏན་དང་། བཀོད་པ་ཡོངས་སུ་དག་པ་ཡང་དག་པར་བསྟན་པ་མཛད་དོ། །དེ་དག་ལ་ནི་སངས་རྒྱས་བཅོམ་
ལྡན་འདས་རྣམས་ཀྱིས་སངས་རྒྱས་ཀྱི་རྣམ་པར་འཕྲུལ་པ་ཡང་དག་པར་བརྗོད་པ་མ་མཛད་དོ། །དེ་དག་གིས་ནི་སྔོན་འཁོར་བ་ན་འཁོར་བའི་ཚེ་སེམས་ཅན་རྣམས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་བསྐུལ་བ་མ་བྱས་སོ། །དེ་དག་གིས་
ནི་གཞན་གྱི་སེམས་ཀྱི་རྒྱུད་ལ་བྱང་ཆུབ་ཏུ་སེམས་བསྐྱེད་པ་རབ་ཏུ་བཞག་པ་མ་བྱས་སོ། །དེ་དག་གིས་ནི་དེ་བཞིན་གཤེགས་པའི་གདུང་རྒྱུན་མྱི་གཅོད་པའི་ཕྱིར་ཞུགས་པ་མ་ཡིན་ནོ། །དེ་དག་གིས་ནི་སེམས་ཅན་ཐམས་ཅད་ཡོངས་སུ་བསྡུ་བའི་ཕྱིར་བརྩོན་པ་མ་ཡིན་ནོ། །དེ་དག་གིས་
ནི་བྱང་ཆུབ་སེམས་དཔའ་རྣམས་ཕ་རོལ་ཏུ་ཕྱིན་པ་ལ་ཡང་དག་པར་བསྐུལ་བ་མ་བྱས་སོ། །དེ་དག་གིས་ནི་སྔོན་འཁོར་བ་ན་འཁོར་བའི་ཚེ། འགྲོ་བ་ཐམས་ཅད་ལས་ཁྱད་པར་དུ་འཕགས་པའི་ཡེ་ཤེས་ཀྱིས་ལ་དམིགས་པ་མ་བྱས་སོ། །དེ་དག་གིས་ནི་ཐམས་ཅད་
མཁྱེན་པ་ཉིད་དུ་འགྱུར་བའི་དགེ་བའི་རྩ་བ་ཉེ་བར་བསྩགས་པ་མ་བྱས་སོ། །དེ་དག་གིས་ནི་དེ་བཞིན་གཤེགས་པའི་འཇིག་རྟེན་ལས་འདས་པའི་དགེ་བའི་རྩ་བ་ཡོངས་སུ་མ་བསྒྲུབས་སོ། །དེ་དག་གིས་ནི་སངས་རྒྱས་ཀྱི་ཞིང་ཡོངས་སུ་དག་པ་ཐམས་ཅད་དུ་རྣམ་པར་འཕྲུལ་
པའི་མངོན་པར་ཤེས་པ་ཁོང་དུ་མ་ཆུད་དོ། །དེ་དག་གིས་ནི་བྱང་ཆུབ་སེམས་དཔའི་མིག་གི་ལམ་གྱིས་རྣམ་པར་དམིགས་པར་བྱ་བ་འཇིག་རྟེན་ལས་འདས་པ་ཐུན་མོང་མ་ཡིན་པའི་བྱང་ཆུབ་ཏུ་དམིགས་པའི་དགེ་བའི་རྩ་བ་བྱང་ཆུབ་སེམས་དཔའི་སྨོན་ལམ་ཆེན་པོ་ལས་བྱུང་
བ་ཁོང་དུ་མ་ཆུད་དོ། །ཉན་ཐོས་དང་རང་སངས་རྒྱས་ཀུན་གྱིས་ནི་བྱང་ཆུབ་སེམས་དཔའ་ཀུན་ཏུ་བཟང་པོའི་ཡེ་ཤེས་ཀྱི་མིག་གི་ལམ་གྱིས་རྣམ་པར་དམིགས་པ་ཐུན་མོང་མ་ཡིན་པ་དེ་བཞིན་གཤེགས་པའི་བྱིན་གྱི་རླབས་ལས་བྱུང་བའི་སྒྱུ་མའི་རྣམ་པའི་ཆོས་ཉིད་ཀྱིས་གྲུབ་པ།

བྱང་ཆུབ་སེམས་དཔའ་འདུ་ཤེས་སྣ་ཚོགས་ཡོངས་སུ་འཛིན་པ་བྱིན་གྱིས་རློབ་པ། བྱང་ཆུབ་སེམས་དཔའི་དགའ་བའི་ཤུགས་ཆེན་པོ་རྣམ་པར་འཕེལ་བར་བྱེད་པ་ཁོང་དུ་མ་ཆུད་དོ། །དེ་བས་ན་ཉན་ཐོས་ཆེན་པོ་མཆོག་གི་ཟུང་དང་། བཟང་པོའི་ཟུང་ལ་སོགས་པ་དེ་དག་
གིས་དེ་བཞིན་གཤེགས་པའི་རྣམ་པར་འཕྲུལ་པ་དེ་མི་མཐོང་ངོ་། །མི་ཤེས་སོ། །ཁོང་དུ་མི་ཆུད་དོ། །མི་རྟོགས་སོ། །མི་རིག་གོ །ཡིད་མི་ཆེས་སོ། །མི་སེམས་སོ། །རྣམ་པར་མི་ལྟའོ། །རྟོགས་པར་མི་ལྟའོ། །ངེས་པར་མི་སེམས་སོ། །ཉེ་བར་མི་སེམས་སོ། །དེ་
ཅིའི་ཕྱིར་ཞེ་ན། དེ་ནི་སངས་རྒྱས་ཀྱི་སྤྱོད་ཡུལ་ཏེ་ཉན་ཐོས་ཀྱི་སྤྱོད་ཡུལ་མ་ཡིན་ནོ། །དེ་བས་ན་ཉན་ཐོས་ཆེན་པོ་དེ་དག་ཛེ་ཏའི་ཚལ་དེ་ཉིད་ན་འཁོད་ཀྱང་། སངས་རྒྱས་ཀྱི་རྣམ་པར་འཕྲུལ་པ་དེ་དག་མི་མཐོང་སྟེ། དེ་དག་ལ་དེ་དང་མཐུན་པའི་དགེ་བའི་རྩ་བ་མེད་དོ། །
དེ་དག་གིས་སངས་རྒྱས་ཀྱི་རྣམ་པར་འཕྲུལ་པ་དེ་དག་མཐོང་དུ་དེ་ལྟ་བུའི་ཡེ་ཤེས་ཀྱི་མྱིག་རྣམ་པར་མ་དག་གོ །དམྱིགས་པ་ཆུང་ངུ་ལ་རྒྱ་ཆེན་པོའི་བྱིན་གྱི་རླབས་ཀྱིས་འཇུག་ཏུ་ཏིང་ངེ་འཛིན་དེ་ལྟ་བུ་དེ་མེད་དོ། །དེ་དག་ཤེས་པ་དང་། བལྟ་བ་འམ། ཁོང་དུ་ཆུད་པར་བྱ་བའམ། རྟོགས་པར་བྱ་
བ་འམ། རྒྱས་པར་དགང་པར་བྱ་བའམ། འཇུག་པར་བྱ་བའམ། རྣམ་པར་བལྟ་བའམ། ཉམས་སུ་མྱོང་བར་བྱ་བའམ། གནན་པའམ། རྣམ་པར་གནན་པའམ། གཞན་གྱིས་ཐོས་པར་བྱ་བའམ། བསྟན་པར་བྱ་བའམ། སྨོས་པར་བྱ་བའམ། ཡང་དག་པར་
བསྟན་པར་བྱ་བའམ། བསྟབས་པར་བྱ་བའམ། སྦྱིན་པར་བྱ་བའམ། དེ་ལ་སེམས་ཅན་རྣམས་ཡོངས་སུ་བསྐུལ་བར་བྱ་བའམ། སྦྱར་བར་བྱ་བའམ། རབ་ཏུ་དགོད་པར་བྱ་བའམ། སངས་རྒྱས་ཀྱི་རྣམ་པར་འཕྲུལ་པའི་ཆོས་ཉིད་ལ་སེམས་ཅན་དགོད་པར་བྱར་
ཡང་དེ་དག་ལ་དེ་ལྟ་བུའི་རྣམ་པར་ཐར་པ་མེད་དོ། །དེ་ལྟ་བུའི་རྫུ་འཕྲུལ་མེད་དོ། །དེ་ལྟ་བུའི་ཁྱུ་མཆོག་གི་མཐུ་མེད་དོ། །དེ་ལྟ་བུའི་སྟོབས་མེད་དོ། །དེ་ལྟ་བུའི་དབང་མེད་དོ། །དེ་ལྟ་བུའི་གནས་མེད་དོ། །དེ་ལྟ་བུའི་འདུ་ཤེས་མེད་དོ། །དེ་ལྟ་བུའི་མྱིག་གི་མཐུ་མེད་དོ། །དེ་ལྟ་བུའི་ཡེ་ཤེས་

མེད་དོ། །དེ་ཅིའི་ཕྱིར་ཞེ་ན། དེ་དག་ནི་དེ་ལྟར་ཉན་ཐོས་ཀྱི་ཐེག་པས་བྱུང་བ་ཉན་ཐོས་ཀྱི་ལམ་གྱིས་ཡོངས་སུ་གྲུབ་པ། ཉན་ཐོས་ཀྱི་སྤྱོད་པའི་དཀྱིལ་འཁོར་ཡོངས་སུ་རྫོགས་པ། ཉན་ཐོས་ཀྱི་འབྲས་བུ་ལ་གནས་པ།
བདེན་པ་སྣང་བ་ཤེས་པས་ངེས་པར་རྟོགས་པ། ཡང་དག་པའི་མཐའ་ལ་གནས་པ། ཤིན་ཏུ་ཞི་བའི་མཐར་ཐུག་པ། སྙིང་རྗེ་ཆེན་པོའི་བསམ་པ་མེད་པ། འཇིག་རྟེན་གྱི་ཁམས་ཐམས་ཅད་ལ་མྱི་ལྟ་མི་སྡོད་པ། རང་གི་དོན་གྲུབ་པ་དག་སྟེ། དེ་དག་ནི་ཛེ་ཏའི་ཚལ་དེ་
ཉིད་དུ་ཀུན་ནས་འདུས་ཏེ་འཁོད་ལ། བཅོམ་ལྡན་འདས་ཀྱི་སྤྱན་སྔར་དང་གཡས་གཡོན་དང་། སྣམ་ལོགས་ན་བཅོམ་ལྡན་འདས་ལ་མངོན་དུ་ལྟ་བར་གནས་ཀྱང་། ཛེ་ཏའི་ཚལ་དེར་སངས་རྒྱས་ཀྱི་རྣམ་པར་འཕྲུལ་བ་དེ་དག་མཐོང་བར་མ་གྱུར་ཏོ། །དེ་ཅིའི་ཕྱིར་ཞེ་ན། ཐམས་
ཅད་མཁྱེན་པའི་ཡེ་ཤེས་ཡང་དག་པར་མ་བསྒྲུབས་པ་དང་། ཐམས་ཅད་མཁྱེན་པའི་ཡེ་ཤེས་ཡང་དག་པར་མ་བསྡུས་པ་དང་། ཐམས་ཅད་མཁྱེན་པའི་ཡེ་ཤེས་ལ་ཡང་དག་པར་མ་ཞུགས་པ་དང་། ཐམས་ཅད་མཁྱེན་པའི་ཡེ་ཤེས་ལ་སྨོན་ལམ་ཡང་དག་པར་མ་བཏབ་པ་
དང་། ཐམས་ཅད་མཁྱེན་པའི་ཡེ་ཤེས་མངོན་པར་མ་བསྒྲུབས་པ་དང་། ཐམས་ཅད་མཁྱེན་པའི་ཡེ་ཤེས་ཡོངས་སུ་མ་བསྒོམས་པ་དང་། ཐམས་ཅད་མཁྱེན་པའི་ཡེ་ཤེས་མ་སྦྱངས་པ་དེ་དག་གིས་ནི། དེ་བཞིན་གཤེགས་པའི་ཏིང་ངེ་འཛིན་གྱི་རྣམ་པར་འཕྲུལ་པ་དེ་ལ་
འཇུག་ཅིང་རྟོགས་པར་བྱ་བའམ། བལྟ་ཞིང་ཁོང་དུ་ཆུད་པར་བྱ་བར་མྱི་ནུས་སོ། དེ་ཅིའི་ཕྱིར་ཞེ་ན། དེ་ནི་བྱང་ཆུབ་སེམས་དཔའ་རིགས་དང་ལྡན་པ་རྣམས་ཀྱི་མྱིག་གི་ལམ་གྱིས་བལྟ་བ་ཡིན་གྱིས། ཉན་ཐོས་ཀྱི་མྱིག་གིས་བལྟ་བ་མ་ཡིན་ནོ། །དེ་བས་ན་ཉན་ཐོས་
ཆེན་པོ་དེ་དག་ཛེ་ཏའི་ཚལ་དེ་ཉིད་ན་འཁོད་ཀྱང་དེ་བཞིན་གཤེགས་པའི་རྣམ་པར་འཕྲུལ་པ་དང་། སངས་རྒྱས་ཀྱི་བྱིན་གྱི་རླབས་དང་། སངས་རྒྱས་ཀྱི་ཞིང་ཡོངས་སུ་དག་པ་དང་། བྱང་ཆུབ་སེམས་དཔའ་ཀུན་ནས་འདུས་པ་ཡང་མཐོང་བར་མ་གྱུར་ཏོ། །

དེའང་འདི་ལྟ་སྟེ་དཔེར་ན། གང་གཱའི་ཆུ་ཀླུང་ཆེན་པོའི་ངོགས་ཕ་རོལ་ཚུར་རོལ་དུ་ཡི་དགས་བཀྲེས་པ་དང་། སྐོམ་པས་རབ་ཏུ་མནར་བ་གཅེར་བ་གོས་མྱེད་པ། ལུས་ཀྱི་མདོག་དང་ཁ་དོག་ཚིག་ཅིང་འཇུམ་པ་རླུང་དང་ཉི་མས་བསྐམས་པ། བྱ་རོག་མང་
པོས་གཙེ་བ། སྤྱང་ཀི་དང་། ཝས་ཐོ་བཙམས་པ། བརྒྱ་སྟོང་མང་པོ་ཀུན་ནས་འདུས་ཀྱང་། གང་གཱའི་ཆུ་ཀླུང་ཆེན་པོ་མྱི་མཐོང་སྟེ། སྒྲིབ་པའི་ལས་ཀྱིས་བསྒྲིབས་པའི་ཕྱིར་ལ་ལས་ནི་བསྐམས་ཏེ་ཆུ་མེད་པ་མཐོང་ངོ་། །ལ་ལས་ནི་ཐལ་བས་ཡོངས་སུ་གང་བར་མཐོང་ངོ་། །
དེ་བཞིན་དུ་ཉན་ཐོས་ཆེན་པོ་གནས་བརྟན་དེ་དག་ཛེ་ཏའི་ཚལ་དེ་ཉིད་ན་འཁོད་ཀྱང་ཐམས་ཅད་མཁྱེན་པ་ཉིད་དང་མྱི་མཐུན་པའི་ཕྱོགས་མ་རིག་པའི་ལིང་ཏོག་གིས་མྱིག་ཀུན་ནས་ཁེབས་པ་དང་། ཐམས་ཅད་མཁྱེན་པ་ཉིད་ཀྱི་སའི་དགེ་བའི་རྩ་བའི་མཐུས་ཡོངས་སུ་མ་བཟུང་
བའི་ཕྱིར། དེ་བཞིན་གཤེགས་པའི་རྣམ་པར་འཕྲུལ་པ་དེ་དག་མ་མཐོང་མ་ཤེས་སོ། །འདི་ལྟ་སྟེ་དཔེར་ན་འདུན་མ་ཆེན་པོ་འདུས་པའི་སྐྱེ་བོ་མང་པོའི་དབུས་སུ་མྱི་ལ་ལ་ཞིག་གཉིད་ཀྱིས་མྱོས་ཏེ། ལོག་པར་གྱུར་ནས་དེ་གཉིད་ཀྱིས་ལོག་པའི་རྨྱི་ལམ་དུ་གནས་དེ་ཉིད་ན་
ལྷའི་གྲོང་རྡལ་བརྒྱ་བྱིན་གྱི་གནས་བལྟ་ན་མཛེས་པ་དང་། རི་རབ་ཀྱི་སྟེང་ཤིང་དང་བཅས་པ། བཟའ་ཤིང་གི་ར་བའི་འཁོར་དང་བཅས་པ། ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་གིས་གང་བ། ལྷའི་བུ་ཁྲག་ཁྲིག་བརྒྱ་ཕྲག་སྟོང་སྙེད་གནས་པ་ལྷའི་མེ་ཏོག་སྣ་ཚོགས་
ཀྱིས་ཡོངས་སུ་གང་བ་དང་། ཡིད་བཞིན་གྱི་ཤིང་ལྷ་རྫས་ཀྱི་གོས་དང་མུ་ཏིག་གི་ཕྲེང་བ་དང་། རིན་པོ་ཆེའི་རྒྱན་དང་། སེ་མོ་དོ་སྣ་ཚོགས་མང་པོ་འབྱིན་པ་དང་། ལྷ་རྫས་ཀྱི་སིལ་སྙན་རྣམ་པ་སྣ་ཚོགས་རླུང་གིས་ཡོངས་སུ་བསྐྱོད་ཅིང་སྒྲ་དབྱངས་ཡིད་དུ་འོང་ལ་སྙན་པ་
འབྱིན་པའི་སིལ་སྙན་གྱི་ཤིང་མང་པོ་དང་། དགའ་བའི་རྩེད་མོའི་བཀོད་པ་རྣམ་པ་སྣ་ཚོགས་མཐོང་བར་གྱུར་ལ། ལྷའི་བུ་མོ་མང་པོས་གླུ་བླངས་པ་དང་། ལྷ་རྫས་ཀྱི་རོལ་མོ་བྱས་པའི་སྒྲ་ཡིད་དུ་འོང་ཞིང་སྙན་པ་ཐོས་པར་གྱུར་ཏེ། བདག་ཉིད་ཀྱང་དེ་ན་

འདུག་པ་སྙམ་བྱེད་ལ། ལྷ་རྫས་ཀྱི་བཀོད་པས་ཀླུབས་པའི་གནས་དེ་དག་ཐམས་ཅད་མཐོང་བར་གྱུར་ཀྱང་། སྐྱེ་བོའི་ཚོགས་མང་པོ་དེ་དག་གིས་གནས་དེ་ཉིད་ན་འཁོད་བཞིན་དུ་མྱི་མཐོང་། མི་ཤེས། ཁོང་དུ་མི་ཆུད་དོ། །དེ་ཅིའི་ཕྱིར་ཞེ་ན།
དེ་ནི་སྐྱེས་བུ་གཉིད་ཀྱི་ལོག་པ་དེ་ཉིད་ཀྱི་རྨྱི་ལམ་གྱིས་བལྟ་བ་ཡིན་གྱི། གནས་དེ་ཉིད་ན་འཁོད་ཀྱང་སྐྱེ་བོ་མང་པོ་དེ་དག་གིས་བལྟ་བ་མ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་དེ་དག་དང་། འཇིག་རྟེན་གྱི་དབང་པོ་བྱང་ཆུབ་ལ་མངོན་པར་མོས་པ་དེ་དག་སངས་རྒྱས་ཀྱི་
བྱིན་གྱི་རླབས་རྒྱ་ཆེན་པོ་དང་། རང་གི་དགེ་བའི་རྩ་བའི་སྟོབས་མ་ནོར་བར་ཤིན་ཏུ་བསྩགས་པ་དང་། ཐམས་ཅད་མཁྱེན་པ་ཉིད་དུ་སྨོན་ལམ་ཤིན་ཏུ་མངོན་པར་བསྒྲུབས་པ་དང་། དེ་བཞིན་གཤེགས་པའི་ཡོན་ཏན་ཐམས་ཅད་ལ་ཤིན་ཏུ་ཞུགས་པ་དང་། བྱང་ཆུབ་
སེམས་དཔའི་ལམ་བཀོད་པ་ཆེན་པོ་དང་ལྡན་པ་ལ་ཤིན་ཏུ་གནས་པ་དང་། ཐམས་ཅད་མཁྱེན་པའི་ཡེ་ཤེས་ཀྱི་ཆོས་ཉིད་དང་། ཡན་ལག་རྣམ་པ་ཐམས་ཅད་དུ་ཤིན་ཏུ་རྫོགས་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པའི་ཁྱད་པར་དང་། སྨོན་ལམ་
ཡོངས་སུ་རྫོགས་པར་བྱ་བ་རྣམ་པར་དག་པ་དང་། བྱང་ཆུབ་སེམས་དཔའི་ས་ཐམས་ཅད་ཀྱི་ཡེ་ཤེས་ཀྱི་དཀྱིལ་འཁོར་ཡོངས་སུ་གནོན་པ་དང་། བྱང་ཆུབ་སེམས་དཔའི་ཏིང་ངེ་འཛིན་གྱིས་རྣམ་པར་སྤྱོད་པ་ཐམས་ཅད་ལ་རྣམ་པར་རྩེ་བ་དང་། བྱང་ཆུབ་སེམས་
དཔའི་ཡེ་ཤེས་ཀྱི་སྤྱོད་ཡུལ་ཐམས་ཅད་ལ་ཆགས་པ་མྱེད་པར་རྣམ་པར་སྤྱོད་པས་བསམ་གྱིས་མྱི་ཁྱབ་པའི་སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་དེ་དག་དང་། སངས་རྒྱས་ཀྱི་རྣམ་པར་རོལ་པ་དེ་དག་མཐོང་ཞིང་ཁོང་དུ་ཆུད་ལ་ཉམས་སུ་མྱོང་བར་གྱུར་ཀྱང་། ཉན་ཐོས་ཆེན་
པོ་མཆོག་གི་ཟུང་དང་། བཟང་པོའི་ཟུང་ལ་སྩོགས་པ་དེ་དག་ལ་བྱང་ཆུབ་སེམས་དཔའི་མྱིག་མྱེད་པས་མཐོང་བར་མ་གྱུར་ཤེས་པར་མ་གྱུར་ཏོ། །འདི་ལྟ་སྟེ་དཔེར་ན། རིའི་རྒྱལ་པོ་ཁ་བ་ཅན་སྨན་གྱི་འབྱུང་གནས་ཀྱིས་གང་བ་ལ་སྔགས་དང་། རིག་སྔགས་དང་། སྨན་གྱི་ཚུལ་

དང་། བླང་བའི་རྒྱུས་ཤེས་ཤིང་རིག་སྔགས་གྲུབ་པའི་སྐྱེས་བུ་གནས་པ། སྨན་གྱི་ཆོ་ག་ཐམས་ཅད་ཤེས་པ་སྨན་བླང་བའི་ལས་བྱེད་ཀྱང་། རི་བོའི་དབང་པོ་དེ་ཉིད་ལ་གནས་པའི་ཕྱུགས་དང་། བ་ལང་དང་ར་ལུག་འཚོ་བ་དང་། རྔོན་པ་དང་དེ་མ་ཡིན་པའི་མྱི་སྨན་གྱི་ཚུལ་
མྱི་ཤེས་པ་གཞན་དག་གིས། སྨན་དེ་དག་གི་ཆོ་ག་དང་། སྨན་གྱི་རོ་དང་མཐུ་དང་ཡོན་ཏན་དང་བྱིན་དང་། ཐབས་དང་འཕྲོད་པ་མི་ཤེས་སོ། །དེ་བཞིན་དུ་བྱང་ཆུབ་སེམས་དཔའ་དེ་བཞིན་གཤེགས་པའི་ཡེ་ཤེས་ཀྱི་ཡུལ་ལ་ཞུགས་པ་བྱང་ཆུབ་སེམས་དཔའི་
རྣམ་པར་འཕྲུལ་པའི་ཡུལ་གྱིས་བྱུང་བ། དེ་དག་གིས་དེ་བཞིན་གཤེགས་པའི་ཏིང་ངེ་འཛིན་གྱི་རྣམ་པར་འཕྲུལ་པའི་ཡུལ་དེ་དག་མཐོང་ཡང་ཉན་ཐོས་ཆེན་པོ་མཆོག་གི་ཟུང་དང་། བཟང་པོའི་ཟུང་ལ་སྩོགས་པ་རང་གི་དགོས་པས་ཚིམ་པར་གྱུར་པ། གཞན་གྱི་དགོས་
པ་ཡལ་བར་གཞོག་པ། བཏང་སྙོམས་ཅན་དེ་དག་ཛེ་ཏའི་ཚལ་དེ་ཉིད་ན་གནས་ཀྱང་། ཚེ་འདི་ལ་བདེ་བར་སྤྱོད་པས་བདེ་ཞིང་དགའ་བར་གནས་པ་ལས་ཕར་དེ་བཞིན་གཤེགས་པའི་ཏིང་ངེ་འཛིན་གྱི་རྣམ་པར་འཕྲུལ་པའི་ཡུལ་དེ་དག་ཁོང་དུ་མི་ཆུད་དོ། །འདི་ལྟ་
སྟེ་དཔེར་ན། ས་ཆེན་པོ་རིན་པོ་ཆེ་ཐམས་ཅད་ཀྱི་འབྱུང་གནས་ཕུན་སུམ་ཚོགས་པ། གཏེར་བརྒྱ་སྟོང་དུ་མས་གང་བ་རིན་པོ་ཆེ་སྣ་ཚོགས་རྣམ་པ་ཐ་དད་པས་ཡོངས་སུ་གང་བ་འདི་ལའང་རིན་པོ་ཆེའི་འབྱུང་གནས་དང་། གཏེར་གྱི་རྒྱུས་ལ་མཁས་ཤིང་བྱང་
བའི་མྱི་རིན་པོ་ཆེ་བརྟག་པའི་གཙུག་ལག་གིས་བློ་ཤིན་ཏུ་བྱང་བ་གཏེར་གྱི་གཙུག་ལག་དང་རྒྱུས་དང་། དན་རྟགས་གྱ་ནོམ་པར་ལོབས་པ། བསོད་ནམས་རྒྱ་ཆེན་པོའི་སྟོབས་ཀྱིས་བརྟན་པ་དག་དེ་ལས་རིན་པོ་ཆེ་ཅི་འདོད་པར་བླངས་ཤིང་། བདག་ཀྱང་ཡོངས་སུ་
ཚིམ་པར་བྱེད། ཕ་དང་མ་ལའང་ལེགས་པར་རིམ་གྲོ་བྱེད། བུ་ཕོ་སྨོས་ཀྱང་ལེགས་པར་གསོ་བར་བྱེད་ཅིང་། དེ་མ་ཡིན་པའི་སེམས་ཅན་རྒན་པ་དང་། ན་བ་དང་། དབུལ་བ་དང་། ཉམ་ཉེས་པ་དང་། ཁ་ཟས་དང་། གོས་ཀྱིས་མྱི་འབྱོར་པ་རྣམས་

ལ་སྡུད་ཅིང་ཁྱབ་པར་བགོ་བཤའ་བྱེད་ལ། ནོར་གྱི་དགའ་བ་སྣ་ཚོགས་ཉམས་སུ་མྱོང་བར་བྱེད་ཀྱང་། སེམས་ཅན་རིན་པོ་ཆེའི་འབྱུང་གནས་དང་། གཏེར་གྱི་རྒྱུས་མྱི་ཤེས་པ་བསོད་ནམས་མ་བྱས་པ། རིན་པོ་ཆེ་ལ་ཤེས་པའི་མྱིག་
ཡོངས་སུ་མ་དག་པ། དེ་དག་ཉིད་ན་འཁོད་ཀྱང་། རིན་པོ་ཆེའི་འབྱུང་གནས་དེ་དག་དང་རིན་པོ་ཆེའི་གཏེར་དེ་དག་ཁོང་དུ་མྱི་ཆུད་མྱི་ཤེས་པས་རིན་པོ་ཆེའང་བླང་དུ་མྱེད་དོ། །རིན་པོ་ཆེའི་དོན་ཀྱང་བྱར་མེད་དོ། །དེ་བཞིན་དུ་བྱང་ཆུབ་སེམས་དཔའ་དེ་བཞིན་གཤེགས་པའི་
ཡུལ་བསམ་གྱིས་མྱི་ཁྱབ་པ་ལ་ཡེ་ཤེས་ཀྱི་མྱིག་ཤིན་ཏུ་རྣམ་པར་དག་པ་དེ་བཞིན་གཤེགས་པའི་ཡེ་ཤེས་ཀྱི་ཡུལ་བསམ་གྱིས་མྱི་ཁྱབ་པ་ལ་ཞུགས་པ། དེ་དག་ཛེ་ཏའི་ཚལ་ན་འཁོད་ཅིང་སངས་རྒྱས་ཀྱི་རྣམ་པར་འཕྲུལ་པ་དེ་དག་མཐོང་ལ་ཆོས་ཀྱི་ཚུལ་
རྒྱ་མཚོ་ལ་འཇུག་ཅིང་ཏིང་ངེ་འཛིན་གྱི་ཕྱག་རྒྱ་ཡོངས་སུ་སྒྲུབ་སྟེ། དེ་བཞིན་གཤེགས་པའི་མཆོད་པ་དང་། རིམ་གྲོ་ལ་བརྩོན་ཞིང་དམ་པའི་ཆོས་ཡོངས་སུ་གཟུང་བ་ལ་མངོན་པར་བརྩོན་ཏེ། བསྡུ་བའི་དངོས་པོ་བཞིས་སེམས་ཅན་དེ་དག་ཡོངས་སུ་སྡུད་ཀྱང་། ཉན་
ཐོས་ཆེན་པོ་དེ་དག་གིས་དེ་བཞིན་གཤེགས་པའི་རྣམ་པར་འཕྲུལ་པ་དེ་དག་དང་། བྱང་ཆུབ་སེམས་དཔའི་ཚོགས་ཆེན་པོ་ཀུན་ནས་འདུས་པ་དེ་ལྟ་བུའང་མ་མཐོང་མ་ཤེས་སོ། །འདི་ལྟ་སྟེ་དཔེར་ན། སྐྱེས་བུ་ལ་ལ་ཞིག་མྱིག་གཉིས་གོས་ཀྱིས་བཀབ་སྟེ། རིན་
པོ་ཆེའི་གླིང་དུ་ཕྱིན་པར་གྱུར་ན། དེས་རིན་པོ་ཆེའི་གླིང་དེར་ཕན་ཚུན་འགྲོ་བ་དང་། འགྲེང་བ་དང་འདུག་པ་དང་ཉལ་བ་བྱས་ཀྱང་རིན་པོ་ཆེའི་འབྱུང་གནས་དེ་མྱི་མཐོང་ངོ་། །རིན་པོ་ཆེའི་ཤིང་དང་གོས་ཀྱི་རིན་པོ་ཆེ་དང་། སྤོས་ཀྱི་རིན་པོ་ཆེ་དང་། རིན་པོ་ཆེ་ཐམས་ཅད་
ཀྱང་མྱི་མཐོང་ལ། རིན་པོ་ཆེ་དེ་དག་གི་སྤྱོད་ཡུལ་ལམ། རིན་ཐང་ངམ། ཡོངས་སུ་སྤྱོད་པའི་རྒྱུས་ཀྱང་མི་ཤེས་པས། དེ་ནི་རིན་པོ་ཆེ་དེ་དག་ལེན་ཀྱང་མྱི་ལེན་ལ། རིན་པོ་ཆེའི་དོན་ཀྱང་ཉམས་སུ་མྱོང་པར་མྱི་བྱེད་དོ། །གང་གི་མྱིག་ལ་བསྒྲིབས་པ་མེད་པ་དེ་དག་གིས་ནི་དེ་

དག་ཐམས་ཅད་མཐོང་ཞིང་ཤེས་སོ། །དེ་བཞིན་དུ་བྱང་ཆུབ་སེམས་དཔའ་ཆོས་རིན་པོ་ཆེའི་གླིང་ཆེན་པོར་ཕྱིན་པ་དེ་དག་གིས་བླ་ན་མེད་པའི་དེ་བཞིན་གཤེགས་པ་རིན་པོ་ཆེ་འཇིག་རྟེན་ཐམས་ཅད་ཀྱི་རྒྱན་དུ་གྱུར་པ་མངོན་དུ་གྱུར་ཏེ། ཛེ་ཏའི་ཚལ་ན་བཞུགས་
ཤིང་སངས་རྒྱས་ཀྱི་རྣམ་པར་འཕྲུལ་པ་བསམ་གྱིས་མྱི་ཁྱབ་པ་ཡོངས་སུ་སྟོན་པ་མཐོང་ཡང་ཉན་ཐོས་ཆེན་པོ་དེ་དག །དེ་བཞིན་གཤེགས་པའི་ཞབས་ཀྱི་དྲུང་དེ་ཉིད་ན་གནས་ཤིང་སྤྱོད་ཀྱང་། དེ་བཞིན་གཤེགས་པའི་ཏིང་ངེ་འཛིན་གྱི་ཡུལ་རྣམ་པར་འཕྲུལ་པའི་ཆོ་འཕྲུལ་
དེ་དག་མ་མཐོང་ངོ་། །བྱང་ཆུབ་སེམས་དཔའི་ཚོགས་མང་པོ་དེ་ལྟ་བུའི་རིན་པོ་ཆེའི་འབྱུང་གནས་ཆེན་པོ་ཡང་མཐོང་བར་མ་གྱུར་ཏོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་ཏིང་ངེ་འཛིན་གྱི་ཁྱུ་མཆོག་གི་མཐུ་ཕྱུང་བ་དང་། ཆོ་འཕྲུལ་བསམ་གྱིས་མྱི་ཁྱབ་
པ་དེ་དག་ལྟར་ཐམས་ཅད་མཁྱེན་པ་ཉིད་དང་མི་མཐུན་པའི་ཕྱོགས་ཀྱི་མ་རིག་པའི་གོས་ཀྱིས་ཡེ་ཤེས་ཀྱི་མིག་བཀབ་པ། དེ་དག་ལ་བྱང་ཆུབ་སེམས་དཔའི་ཡེ་ཤེས་ཀྱི་མིག་ཡོངས་སུ་དག་པ་དེ་ལྟ་བུ་མེད་དོ། །དེ་དག་གིས་ཆོས་ཀྱི་དབྱིངས་གཅིག་ནས་གཅིག་ཏུ་བརྒྱུད་པ་ལ་
འཇུག་པ་དེ་ལྟ་བུ་ཁོང་དུ་མ་ཆུད་དོ། །འདི་ལྟ་སྟེ་དཔེར་ན། མྱིག་ཡོངས་སུ་དག་པ་རྡུལ་དང་བྲལ་བས་རབ་ཏུ་སྣང་བ་དང་ལྡན་པ་ཞེས་བྱ་བ་རབ་རིབ་དང་། མུན་པ་ཐམས་ཅད་དང་མི་འགྲོགས་པ་ཡོད་དེ། དེ་མྱི་ལ་ལ་ཞིག་གིས་ཐོབ་པར་གྱུར་ན། དེ་རྡུལ་དང་
བྲལ་བས་རབ་ཏུ་སྣང་བ་དང་ལྡན་པའི་མིག་ཡོངས་སུ་དག་པ་དང་ལྡན་པས་མཚན་མོ་མུན་པའི་མུན་ནག་ཤིན་ཏུ་གནག་པར་གྱུར་པའི་ནང་ན་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཀུན་ནས་འདུས་པ་དང་། ཆོ་ག་དང་སྤྱོད་ལམ་རྣམ་པ་སྣ་ཚོགས་དང་ལྡན་ཞིང་མུན་པའི་རབ་
རིབ་ཀྱིས་མྱིག་ཡོངས་སུ་འཁྲུགས་པར་གྱུར་པ་མྱིའི་ཁྲོད་ན་འདུག་ཅིང་རྣམ་པར་རྒྱུ་ལ་ཕན་ཚུན་འགྲོ་བ་དང་། འགྲེང་བ་དང་སྤྱོད་ལམ་རྣམ་པ་སྣ་ཚོགས་ཀྱིས་སྤྱོད་ཀྱང་མི་དེ་དག་གིས་སྐྱེས་བུ་སྤྱོད་ལམ་སྣ་ཚོགས་ཀྱི་སྤྱོད་པ་དེ་མི་མཐོང་མྱི་ཤེས་སོ། །སྐྱེས་བུ་

དེས་ནི་འགྲོ་བའི་ཚོགས་ཆེན་པོ་སྤྱོད་ལམ་དང་ཆོ་ག་སྣ་ཚོགས་ཀྱིས་རྣམ་པར་སྤྱོད་པ། ཕྱོགས་ཐ་དད་དུ་མངོན་པར་བལྟས་པ། དབྱིབས་ཀྱི་རྣམ་པ་ཐ་དད་པ་ཁ་དོག་གི་རྣམ་པ་ཐ་དད་པ་དམིགས་པའི་ཚུལ་ཐ་དད་པ་ཐམས་
ཅད་ཀྱང་མི་མཐོང་བ་མེད་དོ། །དེ་བཞིན་དུ་དེ་བཞིན་གཤེགས་པ་བྱང་ཆུབ་སེམས་དཔའི་ཚོགས་ཀྱི་འཁོར་མངའ་བ། རྣམ་པར་དག་ཅིང་ཆགས་པ་མི་མངའ་བའི་སྤྱན་དང་ལྡན་པས་འཇིག་རྟེན་ཐམས་ཅད་མཁྱེན་ཅིང་གཟིགས་ཏེ། སངས་རྒྱས་ཀྱི་ཏིང་ངེ་འཛིན་གྱི་
རྣམ་པར་འཕྲུལ་པ་དང་ཆོ་འཕྲུལ་ཆེན་པོ་བསྟན་པ་མཛད་ཀྱང་། ཉན་ཐོས་ཆེན་པོ་དེ་དག་གིས་དེ་བཞིན་གཤེགས་པའི་ཡེ་ཤེས་དང་ཏིང་ངེ་འཛིན་གྱིས་རྣམ་པར་སྤྲུལ་པའི་ཆོ་འཕྲུལ་ཆེན་པོ་དེ་དག་མཐོང་བར་མ་གྱུར་ཏོ། །བྱང་ཆུབ་སེམས་དཔའ་
ཆེན་པོའི་ཚོགས་ཆེན་པོ་དེ་ལྟ་བུ་ཡང་མཐོང་བར་མ་གྱུར་ཏོ། །འདི་ལྟ་སྟེ་དཔེར་ན། དགེ་སློང་ལ་ལ་ཞིག་སྐྱེ་བོ་མང་པོའི་ཚོགས་ཀྱི་དབུས་སུ་སས་ཁྱབ་པའི་ཏིང་ངེ་འཛིན་ལ་སྙོམས་པར་ཞུགས་པ་འམ། ཆུས་ཁྱབ་པའམ། མེས་ཁྱབ་པ་འམ། རླུང་གིས་
ཁྱབ་པ་འམ། སྔོན་པོས་ཁྱབ་པའམ། སར་པོས་ཁྱབ་པ་འམ། དམར་པོས་ཁྱབ་པ་འམ། དཀར་པོས་ཁྱབ་པ་འམ། ལྷས་ཁྱབ་པ་འམ། སེམས་ཅན་སྣ་ཚོགས་ཀྱི་ལུས་ཀྱིས་ཁྱབ་པ་འམ། སྒྲ་དང་དབྱངས་ཀུན་གྱིས་ཁྱབ་པ་འམ། དམིགས་
པ་ཐམས་ཅད་ཀྱིས་ཁྱབ་པའི་ཏིང་ངེ་འཛིན་ལ་སྙོམས་པར་ཞུགས་ན་འགྲོ་བ་མང་པོའི་ཚོགས་དེ་དག་གིས་ཆུའི་ཕུང་པོ་དེ་མི་མཐོང་ངོ་། །མེའི་སྣང་བ་དེ་ཡང་མི་མཐོང་ངོ་། །སེམས་ཅན་སྣ་ཚོགས་ཀྱི་ལུས་ཀྱིས་ཁྱབ་པ་དང་། དམིགས་པ་ཐམས་ཅད་ཀྱིས་ཁྱབ་པའི་བར་
དུ་ཡང་མི་མཐོང་སྟེ། ཏིང་ངེ་འཛིན་དེ་ལ་སྙོམས་པར་ཞུགས་ཤིང་རྣམ་པར་སྤྱོད་པ་རྣམས་ནི་མ་གཏོགས་སོ། །དེ་བཞིན་དུ་དེ་བཞིན་གཤེགས་པས་སངས་རྒྱས་ཀྱི་ཏིང་ངེ་འཛིན་གྱི་ཡུལ་གྱི་རྣམ་པར་སྤྲུལ་པ་བསམ་གྱིས་མི་ཁྱབ་པ་དེ་དག་ཡོངས་སུ་བསྟན་

པ་མཛད་ན་ཉན་ཐོས་ཆེན་པོ་དེ་དག་གིས་མཐོང་ཞིང་ཤེས་པར་མ་གྱུར་ཏེ། བྱང་ཆུབ་སེམས་དཔའ་དེ་བཞིན་གཤེགས་པའི་ལམ་ལ་ཞུགས་པ་དེ་དག་གིས་ནི་དེ་བཞིན་གཤེགས་པའི་ཡུལ་དེ་དག་མཐོང་ངོ་། །ཁོང་དུ་ཆུད་དོ། །འདི་ལྟ་སྟེ་དཔེར་ན། བསྐུ་བ་གྲུབ་པའི་མྱི་ནི་མིག་གཉིས་
བསྐུས་མ་ཐག་ཏུ། སྐྱེ་བོ་མང་པོ་ཐམས་ཅད་ཀྱིས་ལུས་མི་མཐོང་ངོ་། །དེས་ནི་འགྲོ་འམ་འདུག་གམ། འགྲེང་ཡང་རུང་སྟེ། འགྲོ་བ་མང་པོ་ཐམས་ཅད་མཐོང་ངོ་། །དེ་བཞིན་དུ་དེ་བཞིན་གཤེགས་པ་འཇིག་རྟེན་ལས་འདས་པ་འགྲོ་བ་ཐམས་ཅད་ཀྱི་ཡུལ་ལས་
ཡོངས་སུ་འདས་པ་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་དུ་བཞུགས་པ། བྱང་ཆུབ་སེམས་དཔའི་ཡེ་ཤེས་ཀྱི་མིག་གིས་ཤེས་པར་བྱ་བ་དེས་འགྲོ་བ་ཐམས་ཅད་གཟིགས་ཀྱང་ཉན་ཐོས་ཆེན་པོ་དེ་དག་གིས་དེ་བཞིན་གཤེགས་པའི་རྣམ་པར་འཕྲུལ་པ་དེ་དག་མ་མཐོང་ངོ་། །
འདི་ལྟ་སྟེ་དཔེར་ན། མྱིའི་ཚེར་འགྲོགས་པའི་ལྷ་རྟག་ཏུ་རྗེས་སུ་འབྲང་བ་ནི། དེས་མྱི་དེ་མཐོང་ཡང་མྱིས་ལྷ་དེ་མི་མཐོང་ངོ་། །དེ་བཞིན་དུ་དེ་བཞིན་གཤེགས་པ་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལ་ཞུགས་པ། བྱང་ཆུབ་སེམས་དཔའི་ཚོགས་ཀུན་ནས་འདུས་པ་
ཆེན་པོའི་དབུས་སུ་སངས་རྒྱས་ཀྱི་རྣམ་པར་འཕྲུལ་པ་ཆེན་པོ་ཡོངས་སུ་བསྟན་པ་མཛད་ཀྱང་། ཉན་ཐོས་ཆེན་པོ་དེ་དག་གིས་དེ་བཞིན་གཤེགས་པའི་རྣམ་པར་འཕྲུལ་པ་དང་། ཆོ་འཕྲུལ་ཆེན་པོ་དང་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་གྱི་རྣམ་པར་འཕྲུལ་
པ་དེ་དག་ཀྱང་མ་མཐོང་ངོ་། །མ་ཤེས་སོ། །འདི་ལྟ་སྟེ་དཔེར་ན། དགེ་སློང་སེམས་ཅན་ཐམས་ཅད་ལ་དབང་གི་དམ་པའི་ཕ་རོལ་ཏུ་བགྲོད་པར་ཕྱིན་པའི་མཆོག་ཐོབ་པ་འདུ་ཤེས་དང་ཚོར་བ་འགོག་པ་ལ་སྙོམས་པར་ཞུགས་པ་ནི་ཤེས་པ་མེད་ལ་ཚོར་བ་མེད་པས་དབང་པོ་དྲུག་གིས་ཀྱང་བྱ་
བ་གང་ཡང་ཉམས་སུ་མི་མྱོང་སྟེ། མྱ་ངན་ལས་འདས་པའང་མ་ཡིན་ལ་འཇིག་རྟེན་གྱི་ཐ་སྙད་ཐམས་ཅད་གནས་དེ་ཡོད་ཀྱང་སྙོམས་པར་ཞུགས་པ་དེ་ཉིད་ཀྱི་བྱིན་གྱི་རླབས་དང་མཐུས་དེས་མི་ཤེས་མྱི་མཐོང་ངོ་། །དེ་བཞིན་དུ་ཉན་ཐོས་ཆེན་པོ་དེ་དག་ཛེ་ཏའི་ཚལ་

དེ་ནའང་རྣམ་པར་སྤྱོད་ལ་དེ་དག་ལ་དབང་པོ་དྲུག་ཀྱང་ཡོད་དེ། དེ་བཞིན་གཤེགས་པའི་ཏིང་ངེ་འཛིན་དང་། རྣམ་པར་འཕྲུལ་པ་དང་ཁྱུ་མཆོག་གི་མཐུ་ཕྱུང་བ་དང་། ཆོ་འཕྲུལ་དེ་དག་མཐོང་བར་མ་གྱུར། ཁོང་དུ་ཆུད་པར་མ་གྱུར་ཤེས་པར་མ་གྱུར་ཏོ། །
བྱང་ཆུབ་སེམས་དཔའི་ཆོ་འཕྲུལ་ཆེན་པོ་དེ་དག་དང་། བྱང་ཆུབ་སེམས་དཔའི་རྣམ་པར་འཕྲུལ་པ་དེ་དག་ཀྱང་ཁོང་དུ་མ་ཆུད་མ་མཐོང་མ་ཤེས་སོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་ཡུལ་ནི་ཟབ་ཅིང་ཡངས་ལ་ཚད་མེད་དེ། བལྟ་བར་དཀའ་ཞིང་རྟོགས་པར་
དཀའ་སྟེ། ཁོང་དུ་ཆུད་པར་དཀའ་ལ་འཇིག་རྟེན་ཐམས་ཅད་ལས་ཡོངས་སུ་འདས་པའོ། །སངས་རྒྱས་ཀྱི་ཡུལ་ནི་བསམ་གྱིས་མི་ཁྱབ་སྟེ། ཉན་ཐོས་དང་། རང་སངས་རྒྱས་ཐམས་ཅད་ཀྱིས་མི་འདུས་པའོ། །དེ་བས་ན་ཉན་ཐོས་ཆེན་པོ་དེ་དག་ཛེ་ཏའི་ཚལ་དེ་
ཉིད་ན་འཁོད་ཅིང་། བཅོམ་ལྡན་འདས་ཀྱི་ཞབས་ཀྱི་དྲུང་ན་སྤྱོད་ཀྱང་སངས་རྒྱས་ཀྱི་རྣམ་པར་འཕྲུལ་པ་དེ་དག་དང་བྱང་ཆུབ་སེམས་དཔའི་ཚོགས་ཆེན་པོ་དེ་དག་ཀྱང་མ་མཐོང་ངོ་། །ཛེ་ཏའི་ཚལ་འཇིག་རྟེན་གྱི་ཁམས་གྲངས་མེད་པ་བསམ་གྱིས་མི་ཁྱབ་པ་རྣམ་པར་
དག་པའི་ཡོན་ཏན་དང་། རྒྱན་ཡོངས་སུ་འདུས་པ་དེ་དག་ཀྱང་མ་མཐོང་མ་ཤེས་ཏེ། དེ་ནི་སྣོད་དུ་མ་གྱུར་པའི་ཕྱིར་རོ། །དེ་ནས་བྱང་ཆུབ་སེམས་དཔའ་རྣམ་པར་སྣང་མཛད་ཀྱི་སྨོན་ལམ་གྱི་གཙུག་གི་འོད་ཟེར་རབ་ཏུ་སྣང་བས་སངས་རྒྱས་ཀྱི་བྱིན་གྱི་རླབས་
ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ལྟོས་ཤིག་སེམས་ཅན་དམ་པ་ཡི། །སངས་རྒྱས་བྱང་ཆུབ་བསམ་མྱི་ཁྱབ། །རྒྱལ་བས་སངས་རྒྱས་རྣམ་འཕྲུལ་བ། ཛེ་ཏའི་རྒྱལ་མཚན་འདིར་བསྟན་ཏོ། །རང་བྱུང་རྣམས་ཀྱི་བྱིན་གྱི་
རླབས། །བགྲང་དུ་མེད་པར་འབྱུང་བ་ལ། །སངས་རྒྱས་ཆོས་ཚུལ་མི་ཤེས་པའི། །འཇིག་རྟེན་ཀུན་ཀྱང་མགོ་རྨོངས་སོ། །ཆོས་ཀྱི་རྒྱལ་པོའི་ཆོ་འཕྲུལ་དག །ཚད་མེད་བསམ་གྱིས་མི་ཁྱབ་ཅིང་། །ཤིན་ཏུ་ཟབ་པ་འབྱུང་བ་ནི། །དེ་ལ་འཇིག་

རྟེན་འབབ་མི་ནུས། རྫོགས་པའི་སངས་རྒྱས་ཁ་དོག་མདོག །མཚན་གྱིས་ཤིན་ཏུ་རྣམ་པར་ཀླུབས། །ཡང་དག་སངས་རྒྱས་བསྐྱེད་པ་ཡིས། ཆོས་རབ་དེ་དག་མཚན་ཉིད་མེད། །རྣམ་འཕྲུལ་མཐའ་དང་དབུས་མྱེད་ལ། །ཚིག་གི་ལམ་གྱིས་བརྗོད་
དཀའ་བའི། །རྣམ་འཕྲུལ་ཤིན་ཏུ་ཟབ་པ་དག །རྒྱལ་བས་ཛེ་ཏའི་ཚལ་དུ་བསྟན། །རྒྱལ་སྲས་བདག་ཉིད་ཆེ་བའི་རྣམས། །ཞིང་རྣམས་བསམ་ཡས་བྱེ་བ་ནས། །རྒྱལ་བའི་ཞལ་ལྟར་མོས་དགའ་སྟེ། །ཀུན་ནས་འདུས་པའི་ཚོགས་ལ་ལྟོས། །སྨོན་ལམ་
ཡོངས་སུ་ཕུན་སུམ་ཚོགས། །སྤྱོད་ལམ་སྤྱོད་པ་ཆགས་མེད་པ། །དེ་དག་བསམ་པ་ཤེས་པར་ནི། །འཇིག་རྟེན་ཀུན་གྱིས་མི་ནུས་སོ། །དེ་དག་སེམས་དང་སྤྱོད་ཡུལ་དང་། །སྤྱོད་པ་དག་ཀྱང་ཉན་ཐོས་དང་། །རང་རྒྱལ་ཐམས་ཅད་ཡོངས་ཀྱིས་ཀྱང་། །
རྣམ་པ་ཀུན་ཏུ་ཤེས་མི་ནུས། །རྒྱལ་སྲས་ཤེས་རབ་ཆེན་པོ་རྣམས། །གཞན་གྱིས་ཐུབ་དཀའ་ཕམ་བྱེད་ལ། །དཔའ་བའི་རྒྱལ་མཚན་མ་འདྲེས་ཤིང་། །ཡེ་ཤེས་ས་ལ་གཞོལ་གྱུར་པ། །ཏིང་འཛིན་དཔག་ཏུ་ཚད་མེད་ལ། །གྲགས་ཆེན་མཉམ་པར་གཞག་
པ་རྣམས། །ཆོས་དབྱིངས་ཐམས་ཅད་རྒྱས་བཀང་ཞིང་། རྣམ་པར་འཕྲུལ་པ་ཀུན་ཀྱང་སྟོན། །དེ་ནས་བྱང་ཆུབ་སེམས་དཔའ་ཐུབ་པར་དཀའ་བའི་བརྩོན་འགྲུས་ཀྱི་ཤུགས་ཀྱི་རྒྱལ་པོས་སངས་རྒྱས་ཀྱི་བྱིན་གྱི་རླབས་ཀྱིས། ཕྱོགས་བཅུར་རྣམ་པར་བལྟས་
ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བསོད་ནམས་སྙིང་པོ་ཤེས་རབ་ཆེ། །བྱང་ཆུབ་སྤྱོད་པའི་ཚུལ་རྟོགས་ཤིང་། །འཇིག་རྟེན་ཀུན་ལ་བདེ་བྱེད་པའི། །བདེ་གཤེགས་སྐུ་ལས་སྐྱེས་པ་ལྟོས། །ཡིད་གཞུངས་བློ་གྲོས་མཐའ་ཡས་ཤིང་། །
ཤིན་ཏུ་མཉམ་གཞག་སེམས་ལྡན་པ། །མཐའ་དང་དབུས་མེད་ཟབ་པ་ཡི། །ཡེ་ཤེས་རྒྱ་ཆེན་སྤྱོད་ཡུལ་ཅན། །རྒྱན་རབ་མང་པོས་མཛེས་བྱས་པའི། །ཛེ་ཏའི་ནགས་ཚལ་རྒྱ་ཆེ་བ། །བྱང་ཆུབ་སེམས་དཔས་ཀུན་རྒྱས་ཤིང་། །བདེ་གཤེགས་བཞུགས་པའི་

གནས་གྱུར་པ། །གནས་མེད་མི་གནས་གྱུར་བ་རྣམས། །ཕྱོགས་རྣམས་བཅུ་ནས་ཀུན་འདུས་ཏེ། །པདྨོའི་སྟན་ལ་འཁོད་པ་དག །རྒྱ་མཚོ་མང་ལ་བལྟ་བགྱིས། །གནས་མྱེད་ལེན་པ་མེད་པ་རྣམས། །སྤྲོས་པ་མེད་ཅིང་མྱི་རྟེན་
ལ། །རྡུལ་བྲལ་ཆགས་པའི་སེམས་མེད་པ། །ཆོས་ཀྱི་དབྱིངས་ལ་གཞོལ་བ་དང་། །ཡེ་ཤེས་རྒྱལ་མཚན་རབ་དཔའ་བ། །རྡོ་རྗེའི་སེམས་ནི་མི་གཡོ་ཞིང་། །གྲུབ་པ་མེད་པའི་ཆོས་རྣམས་ལ། །མྱ་ངན་འདའ་བར་གང་སྟོན་པ། །ཕྱོགས་བཅུའི་ཞིང་མང་བྱེ་བ་
རྣམས། །གྲངས་ཀྱིས་མྱི་ཆོད་ཀུན་ནས་འདུས། །ཡང་དག་སངས་རྒྱས་དྲུང་དུ་ལྷགས། གཉིས་ཀྱི་འདུ་ཤེས་རྣམ་པར་སྤངས། །རང་འབྱུང་ཤཱཀྱ་སེང་གེ་ཡི། །རྣམ་པར་འཕྲུལ་པ་འདི་དག་མཐོང་། །དེ་ཡི་བྱིན་རླབས་དམ་པ་ཡི། །བྱང་ཆུབ་སེམས་
དཔའ་འདི་དག་ལྷགས། །སངས་རྒྱས་ཆོས་ལ་འབྱེད་པ་མེད། །ཆོས་དབྱིངས་གཞི་ལའང་དེ་བཞིན་ཏེ། །ཐ་སྙད་ཙམ་དུ་ཡོངས་འབྱེད་པའི། །ཕ་རོལ་ཕྱིན་པ་རྒྱལ་བའི་སྲས། །ཆོས་ཀྱི་དབྱིངས་ལ་དབྱེར་མེད་པའི། །མཐའ་ལ་ཐུགས་པ་དེ་དག་གནས། །
ཚིག་རྣམས་ཡོངས་སུ་ཟད་མེད་པས། ཆོས་ལ་དབྱེ་བའང་རབ་ཏུ་བྱེད། དེ་ནས་བྱང་ཆུབ་སེམས་དཔའ་ཀུན་ནས་འཕགས་པའི་གཟི་བརྗིད་རྒྱལ་པོས། །སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། །དེའི་ཚེ་ཚིགས་
སུ་བཅད་པ་འདི་དག་སྨྲས་སོ། །ལྟོས་ཤིག་སེམས་ཅན་དམ་པ་ཡི། །ཡེ་ཤེས་དཀྱིལ་འཁོར་ཤིན་ཏུ་ཡངས། །དུས་དང་དུས་མྱིན་མཁྱེན་མཛད་ཅིང་། །སེམས་ཅན་རྣམས་ལ་ཆོས་ཀྱང་སྟོན། །མུ་སྟེགས་ལྡན་པ་ཚོགས་འདུས་པའི། །རྒོལ་བ་
ཐམས་ཅད་རབ་ཏུ་འཇོམས། །སེམས་ཅན་བསམ་པ་ཇི་བཞིན་དུ། །རྣམ་པར་འཕྲུལ་བ་ཡོངས་སུ་སྟོན། །ཕྱོགས་ན་མི་བཞུགས་བདེ་གཤེགས་རྣམས། །སངས་རྒྱས་ཡུལ་གྱི་རྗེས་མི་བཞུད། །ཚད་མེད་པ་དང་ཚད་ཡོད་ལས། །ཐུབ་པ་ཆེན་

པོ་འདས་པ་མྱིན། །ཉི་མ་མཁའ་ལས་འགྲོ་བ་ནི། །ཉིན་པར་འགྲངས་པ་སྨོས་པ་བྱེད། །དེ་བཞིན་མཁྱེན་པས་མཁས་སྟོན་པ། །དུས་གསུམ་ཆགས་པ་མེད་པས་བརྗོད། །ཟླ་བ་ཉ་བའི་མཚན་མོ་ལ། །ཟླ་བའི་དཀྱིལ་འཁོར་འཕགས་པར་སྣང་། །དེ་
བཞིན་ཆོས་དཀར་ཡོངས་རྫོགས་པའི། །མགོན་པོ་རྣམས་ཀྱང་མཐོང་བ་ཡིན། །བར་སྣང་ནམ་མཁའི་དབྱིངས་འདི་ལས། །ཉི་མའི་དཀྱིལ་འཁོར་རྒྱུ་བ་ནི། །གར་ཡང་ཐོགས་པ་མེད་པར་འགྲོ། །སངས་རྒྱས་རྣམ་འཕྲུལ་དེ་བཞིན་ནོ། །ཇི་ལྟར་ནམ་
མཁའི་ཕྱོགས་རྣམས་ཀྱི། །ཞིང་རྣམས་ཀུན་ལ་མི་གནས་པ། །དེ་བཞིན་འཇིག་རྟེན་སྒྲོན་མ་ཡི། །སངས་རྒྱས་རྣམ་འཕྲུལ་ཤེས་པར་བྱ། །ཇི་ལྟར་ས་ནི་འཇིག་རྟེན་ན། །ལུས་ཅན་ཀུན་གྱི་གནས་ཡིན་པ། འཇིག་རྟེན་སྒྲོན་མའི་འཇིག་རྟེན་ན། །
ཆོས་ཀྱི་འཁོར་ལོ་དེ་ལྟར་གནས། །ཇི་ལྟར་རླུང་ནི་ཆགས་མེད་པར། །མཁའ་ལས་མགྱོགས་པར་རབ་རྒྱུ་བ། །དེ་བཞིན་སངས་རྒྱས་ཆོས་ཉིད་ཀྱང་། །འཇིག་རྟེན་ཁམས་སུ་རབ་ཏུ་རྒྱུ། །ཇི་ལྟར་ཆུ་ཡི་ཕུང་པོ་ལ། །ཞིང་རྣམས་བགྲངས་པ་ཀུན་
གནས་པ། །དེ་བཞིན་དུས་གསུམ་སངས་རྒྱས་ཀྱང་། །ཡེ་ཤེས་ཚོགས་ལ་རབ་ཏུ་གནས། །དེ་ནས་བྱང་ཆུབ་སེམས་དཔའ་དཔལ་གྱི་སྙིང་པོ་ཆགས་པ་མེད་པའི་རྒྱལ་པོས། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ།
དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཇི་ལྟར་རྡོ་རྗེའི་རི་དང་བྲག །ཟང་ཡག་ཤིན་ཏུ་མཐོ་ཡོད་པ། །ད་ལྟར་འཇིག་རྟེན་ཀུན་སྐྱོབ་པའི། །སངས་རྒྱས་མངོན་པར་འཕགས་པས་མཐོ། །ཇི་ལྟར་རྒྱ་མཚོའི་ཆུ་ཆེན་དག །ཚད་མེད་རྙོག་
པ་མེད་པ་ལྟར། །སངས་རྒྱས་མཐོང་བའང་དེ་བཞིན་ཏེ། །འཇིག་རྟེན་ཀུན་གྱི་སྐོམ་པ་གཅོད། །རྒྱ་མཚོའི་ཆུ་ལས་འཕགས་པ་ཡི། །རི་བོ་རི་རབ་ཅི་འདྲ་བ། །དེ་བཞིན་འཇིག་རྟེན་སྒྲོན་ན་ཡང་། ཆོས་ཀྱི་མཚོ་ལས་མངོན་པར་འཕགས། །རིན་ཆེན་

ཀུན་གྱི་འབྱུང་གནས་ཀྱིས། །རྒྱ་མཚོ་རྒྱས་པ་ཇི་བཞིན་དུ། །རང་བྱུང་ཡེ་ཤེས་དེ་བཞིན་ཏེ། མི་ཟད་སྐད་ཅིག་རབ་མཁྱེན་པ། །མགོན་པོའི་ཡེ་ཤེས་ཤིན་ཏུ་ཟབ། །ཚད་མེད་དེ་བཞིན་བགྲང་དུ་མྱེད། དེ་བས་སངས་རྒྱས་རྣམ་འཕྲུལ་པ། །
བསམ་གྱིས་མྱི་ཁྱབ་ཚད་མེད་སྟོན། །སྒྱུ་མའི་མཚན་ཉིད་སྟོན་པ་ཡི། །སྒྱུ་མཁན་མཁས་པ་ཇི་ལྟ་བ། །དེ་ལྟར་སངས་རྒྱས་མཁྱེན་དབང་ཡང་། །རྣམ་པར་འཕྲུལ་པ་རབ་ཏུ་སྟོན། །ཡིད་བཞིན་ནོར་བུ་རྣམ་དག་པ། །བསམ་དོན་རྫོགས་བྱེད་ཇི་ལྟ་བ། །དེ་བཞིན་
བསམ་པ་དག་པ་ལ། །རྒྱལ་བ་སྨོན་ལམ་རྫོགས་པ་མཛད། །འོད་སྣང་གསལ་བ་བྱེད་པ་ཡི། །རིན་ཆེན་རྣམ་སྣང་ཇི་ལྟ་བ། །དེ་ལྟར་ཐམས་ཅད་མཁྱེན་པ་དག །འགྲོ་བའི་བསམ་པ་གསལ་བར་མཛད། །ཇི་ལྟར་ཕྱོགས་ལ་མངོན་ལྟ་བའི། །རིན་ཆེན་
ཟུར་བརྒྱད་རབ་གནས་པ། དེ་བཞིན་ཆགས་མེད་སྒྲོན་མ་ཡང་། །ཆོས་དབྱིངས་རབ་ཏུ་སྣང་བ་མཛད་དུ། །ཆུ་འདང་རིན་ཆེན་འོད་གསལ་བ། །ཇི་ལྟར་དྲི་མེད་ཆུ་འདང་བྱེད། །དེ་བཞིན་སངས་རྒྱས་མཐོང་བས་ཀྱང་། །འགྲོ་བའི་དབང་པོ་དག་པར་འགྱུར། །དེ་ནས་
བྱང་ཆུབ་སེམས་དཔའ་ཆོས་ཀྱི་དབྱིངས་སུ་སྨོན་ལམ་རབ་ཏུ་འཕྲུལ་བའི་ཟླ་བའི་རྒྱལ་པོས། །སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། །དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཕྱོགས་འདི་ཨིན་དྲ་ནཱི་ལ་ཡི། །ཁ་དོག་
མདོག་གཅིག་བྱས་པ་ལྟར། སངས་རྒྱས་མཐོང་བས་སྐྱེ་དགུ་རྣམས། །དེ་བཞིན་བྱང་ཆུབ་མདོག་ཏུ་འགྱུར། །སངས་རྒྱས་རྡུལ་ཕྲན་རེ་རེ་ལ། །རྣམ་པར་འཕྲུལ་པ་སྣ་ཚོགས་རྣམས། །ཚད་ཀྱིས་གཞལ་དུ་མེད་པ་སྟོན། །བྱང་ཆུབ་སེམས་དཔའ་རྣམ་དག་
མཛད། །དེ་ནི་རྨད་བྱུང་ཤིན་ཏུ་ཟབ། །མཐའ་ཡས་བསྒྲུབ་པར་དཀའ་བ་སྟེ། །བློ་ལྡན་ཡེ་ཤེས་ཡུལ་དེ་ལ། །འཇིག་རྟེན་རྣམས་ནི་འབབ་མི་ནུས། །བྱང་ཆུབ་སེམས་དཔའ་བསྒྲུབ་དོན་དུ། །བཀོད་པ་ཕུན་སུམ་ཚོགས་པ་དང་། །སངས་རྒྱས་ཚུལ་

གྱིས་རྣམ་སྦྱངས་པའི། །ཆོས་ཀྱི་དབྱིངས་ལ་འཇུག་པ་སྟོན། །སངས་རྒྱས་ཞིང་རྣམས་བསམ་ཡས་པ། །བློ་ལྡན་བསྐོར་བའི་སངས་རྒྱས་ཀྱིས། །ཀུན་ནས་གང་བར་གྱུར་པ་ཡང་། །རྒྱལ་བ་དེ་ལ་སྟོན་པ་མཛད། །ཆོས་ཀུན་མངའ་སྒྱུར་སྟོན་པ་སྟེ། །ཤཱཀྱའི་
ཁྱུ་མཆོག་སྐྱེས་པར་གྱུར། །དེ་ཡི་ཆོ་འཕྲུལ་ཚད་མེད་པ། འདི་དག་རབ་ཏུ་བྱུང་བ་ཡིན། །བརྟན་པའི་སྤྱོད་པ་སྣ་ཚོགས་རྣམས། །ཚད་མེད་རྣམ་པར་གཟིགས་གྱུར་ནས། །རྣམ་པར་འཕྲུལ་པ་མཐའ་ཡས་པ། །ཚད་མེད་གཟི་ཅན་སྟོན་པ་མཛད། །འཇིག་
རྟེན་མགོན་པོ་རྒྱལ་སྲས་རྣམས། །ཆོས་ཀྱི་དབྱིངས་ལ་སློབ་པ་མཛད། །ཆོས་རྣམས་ཐམས་ཅད་ཡོངས་ལ་ཡང་། །ཆགས་མེད་ཡེ་ཤེས་སྤྱོད་ཡུལ་འགྱུར། །སྐྱེས་བུ་དབང་པོའི་བྱིན་རླབས་ཀྱིས། །ཆོ་འཕྲུལ་བརྒྱ་དང་རབ་ལྡན་ཞིང་། །འཇིག་རྟེན་ཐམས་ཅད་
རྣམ་སྤྱོད་པའི། །ཆོས་ཀྱི་འཁོར་ལོ་རབ་ཏུ་བསྐོར། །སེམས་ཅན་གཙོ་བོའི་ཡུལ་ལ་ཡང་། །ཡེ་ཤེས་དཀྱིལ་འཁོར་ཡོངས་སྦྱོངས་ཤིང་། །ཤེས་རབ་ཆེན་པོའི་ཀླུ་ཆེན་རྣམས། །འཇིག་རྟེན་ཐམས་ཅད་འགྲེལ་བར་འགྱུར། །དེ་ནས་བྱང་ཆུབ་སེམས་དཔའ་
ཆོས་ཀྱི་དོན་གྱི་བློ་གྲོས་གཟི་བརྗིད་རྒྱལ་པོས། །བཅོམ་ལྡན་འདས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དྲང་སྲོང་དམ་པའི་མཆོག་རྣམས་ཀྱི། །དུས་གསུམ་ཉན་ཐོས་གང་བྱུང་
བ། །དེ་དག་ཀུན་གྱིས་བདེ་གཤེགས་ཀྱི། །གཤེགས་ཐབས་འཇོག་འདེག་མི་ཤེས་སོ། །དུས་གསུམ་མ་ལུས་ཐམས་ཅད་ཀྱི། །མ་ནོར་རང་རྒྱལ་གང་བྱུང་བ། །དེ་དག་གིས་ཀྱང་མགོན་པོ་ཡི། །གཤེགས་ཐབས་འཇོག་འདེག་མི་རིག་གོ །
མ་རིག་མུན་པས་བསྒྲིབས་པ་རྣམས། །ཁྱི་ལྟར་ལྟོང་ལ་རྒྱུས་པ་ཡི། །སེམས་ཅན་དེ་འདྲ་ཀུན་གྱིས་ནི། །མགོན་པོ་མྱི་ཤེས་སྨོས་མི་དགོས། །རྒྱལ་བ་ཚད་མས་གཞལ་བ་མྱིན། །དེ་ནི་ཤེས་པར་མི་ནུས་ཏེ། །སངས་རྒྱས་ཆགས་མེད་ཡེ་ཤེས་ཅན། །

ཚིག་གི་ལམ་ལས་ཤིན་ཏུ་འདས། །ཟླ་བ་ཉ་རྒྱས་འོད་མངའ་བ། བརྟན་པ་མཚན་གྱིས་རྣམ་པར་བྲིས། །དེ་ནི་བསྐལ་པ་དཔག་ཡས་པར། །རྣམ་འཕྲུལ་ཐོགས་མེད་སྤྱོད་པ་མཛད། །ཚུལ་སྒོ་རེ་རེས་སངས་རྒྱས་ལ། །ཤིན་ཏུ་མཉམ་
བཞག་བསམ་བྱས་ཀྱང་། །བསྐལ་པ་བྱེ་བ་བསམ་ཡས་པ། །བརྗོད་དུ་མེད་པ་ཟད་འགྱུར་གྱི། །རང་བྱུང་རྣམས་ཀྱི་ཡོན་ཏན་ལས། །ཕྱོགས་གཅིག་ཆ་ཡི་མཐར་མྱི་ཕྱིན། །སངས་རྒྱས་དེ་ཡི་ཞལ་བལྟས་ཀྱང་། །སངས་རྒྱས་ཆོས་ནི་བསམ་མི་ཁྱབ། །གང་ཞིག་དེ་ལ་སྨོན་
བྱེད་ཅིང་། །གང་ཞིག་ཡིད་ཀྱིས་དགའ་མོས་པ། །དེ་དག་ཀུན་གྱི་དེ་འདྲ་བའི། །སྤྱོད་ཡུལ་བལྟ་དཀའ་འཐོབ་པར་འགྱུར། །བསོད་ནམས་ཡེ་ཤེས་མཐའ་ཡས་ཤིང་། །ཚོགས་ཅན་ཡངས་པས་རྣམ་གནོན་ལ། །དྲི་མེད་བློ་ལྡན་སེམས་གནས་པ། །དེ་དག་འདི་ཡི་ཚུལ་ལ་
འཇུག །དེ་དག་སྨོན་ལམ་རྒྱ་ཆེ་བས། །སེམས་དང་སྡོམ་པ་རྒྱ་ཆེ་སྟེ། །རྒྱལ་བའི་སྤྱོད་ཡུལ་ཐོབ་གྱུར་ཅིང་། །བྱང་ཆུབ་རྒྱ་ཆེན་གནོན་པར་འགྱུར། །དེ་ནས་བྱང་ཆུབ་སེམས་དཔའ་བདུད་ཀྱི་དཀྱིལ་འཁོར་རྣམ་པར་འཐོར་བའི་ཡེ་ཤེས་རྒྱལ་མཚན་གྱི་རྒྱལ་པོས།
སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། །དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆགས་མེད་ཡེ་ཤེས་སྐུ་མངའ་བས། །རང་བྱུང་རྣམས་ནི་སྐུ་མེད་དེ། །བསམ་ཡས་ཡེ་ཤེས་ཡུལ་མངའ་བས། །དེ་དག་བསམ་པར་མི་
ནུས་སོ། །ཕྲིན་ལས་དཀར་པོ་བསམ་ཡས་པས། །སངས་རྒྱས་སྐུ་རབ་བསྒྲུབ་པའི་ཕྱིར། །དེ་ལ་འཇིག་རྟེན་གསུམ་མི་འགོ །མཚན་དང་དཔེ་བྱད་བཟང་པོས་མཛེས། །ཆོས་ཀྱི་དབྱིངས་ཀྱིས་རྣམ་སྦྱངས་པས། །འཇིག་རྟེན་ཀུན་ཏུ་སྣང་བ་མཛད། །སངས་
རྒྱས་བྱང་ཆུབ་སྒོ་ཡིན་ཏེ། །ཡེ་ཤེས་ཀུན་གྱི་གནས་ཆེན་ནོ། །ཆགས་པ་ཐམས་ཅད་རྣམ་སྤངས་པས། །རྡུལ་མེད་སྤྲོས་པ་མི་མངའོ། །ཡེ་ཤེས་འོད་ཟེར་རབ་འགྱེད་པས། འཇིག་རྟེན་ཀུན་ཏུ་ཉི་མ་འདྲ། །ཁམས་གསུམ་ཐམས་ཅད་རྣམ་སྦྱོང་

པས། །སྲིད་པའི་འཇིགས་པ་རྣམ་པར་གཅོད། །བྱང་ཆུབ་སེམས་དཔའ་བསྒྲུབ་པ་མཛད། །བྱང་ཆུབ་འབྱུང་གནས་དེ་བཞིན་ནོ། །ཁ་དོག་མཐའ་ཡས་སྟོན་མཛད་ཀྱང་། །ཁ་དོག་ཀུན་ལ་གནས་པ་མེད། །སེམས་ཅན་ཀུན་གྱིས་བསམ་ཡས་པའི། །ཁ་དོག་
ཚད་མེད་ཡོངས་སུ་སྟོན། །སྐད་ཅིག་གཅིག་ལ་སངས་རྒྱས་ཀྱི། །བྱང་ཆུབ་བསམ་ཡས་སྦྱངས་པས་ན། །དེ་ཡི་ཡེ་ཤེས་མཐར་ཕྱིན་པར། །རྟག་པར་སུས་ཀྱང་མི་ནུས་སོ། །ཡེ་ཤེས་བསྟན་པ་ཟད་མྱི་ཤེས། །རང་བཞིན་རྣམ་པར་འགྱུར་བ་མེད། །དེ་ལ་
དུས་གསུམ་རྒྱལ་བ་ཀུན། །སྐད་ཅིག་གཅིག་གིས་རབ་ཏུ་བརྗོད། །རྟག་པར་ལས་གཞན་ཡོངས་བཏང་སྟེ། །ཤེས་ལྡན་བྱང་ཆུབ་དོན་གཉེར་བས། །སེམས་ལ་སེམས་ཤེས་བྱ་བ་ཡང་། དེ་ལ་སེམས་སྐྱེ་མེད་པར་བསམ། །གང་གི་སངས་རྒྱས་
བསྐྱེད་པ་ཡི། །སངས་རྒྱས་ཆོས་རྣམས་བསམ་མི་ཁྱབ། །དེ་དག་བརྗོད་པའི་ཡུལ་མ་ཡིན། །ཤིན་ཏུ་ཟབ་པས་ཚིག་ལམ་སྤངས། །དེ་ནས་བྱང་ཆུབ་སེམས་དཔའ་རྣམ་པར་སྣང་མཛད་ཀྱི་སྨོན་ལམ་དཔལ་གྱི་རྒྱལ་མཚན་གྱིས། སངས་རྒྱས་ཀྱི་བྱིན་གྱི་
རླབས་ཀྱིས་ཕྱོགས་བཅུར་རྣམ་པར་བལྟ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དྲན་པ་རྨོངས་མེད་དག་པ་རྣམས། །ཆོས་འཛིན་ཤིན་ཏུ་ངེས་རྟོགས་ཤིང་། །བློ་གྲོས་བསམ་གྱིས་མི་ཁྱབ་ལ། །བྱང་ཆུབ་རྒྱ་མཚོ་མྱི་ཟད་པ། །དེ་དག་ཡིད་ནི་འདི་
ལ་དེས། །དེ་དག་སྤྱོད་པའི་སྤྱོད་ཡུལ་ཡིན། །དེ་དག་ཤེས་པ་འདིར་མྱི་གཡོ། །དེ་དག་འདི་ལ་ཐེ་ཙོམ་འཆད། །དེ་དག་སྐྱོ་བར་མྱི་འགྱུར་ཏེ། །དེ་དག་ཡིད་ཀྱང་ཞུམ་མི་འགྱུར། །སངས་རྒྱས་ཆོས་ལ་རབ་གཞོལ་བར། །དེ་དག་སེམས་ཀྱང་རབ་ཏུ་འབྱུང་།
དེ་དག་དད་པ་རྟིང་ཚུགས་ཤིང་། །ཡང་དག་འཕགས་པ་རབ་ཏུ་བསྐྱེད། །དམིགས་མེད་གནས་པ་མེད་པ་ཡི། །ཡེ་ཤེས་འདི་ལ་དེ་དག་དགའ། །བསྐལ་པ་བྱེ་བར་བསྩགས་པ་ཡི། །ཡོངས་སུ་རྫོགས་པའི་དགེ་བའི་ཆོས། །ཡེ་ཤེས་འདི་འདོད་མཚུངས་

པ་མེད། །དེ་དག་ཐམས་ཅད་ཡོངས་སུ་སྔོ། །འཁོར་བའི་ནང་ན་རྣམ་རྒྱུ་ཡང་། །འཁོར་བ་དག་ལ་གནས་པ་མྱིན། །སངས་རྒྱས་ཆོས་རྣམས་རབ་རྟོགས་པས། །སངས་རྒྱས་ཡུལ་ལ་རབ་ཏུ་རྩེ། །སེམས་ཅན་ཁམས་ནི་ཇི་སྙེད་
དུ། །འཇིག་རྟེན་ཕུན་སུམ་ཚོགས་རྒྱུ་བ། །དེ་དག་ཐམས་ཅད་བརྟན་པས་སྤངས། །སངས་རྒྱས་ཕུན་སུམ་ཚོགས་ལ་གནས། །སངས་རྒྱས་རྟག་ཏུ་འབྱུང་འགྱུར་ཀྱང་། འཇིག་རྟེན་དོན་མེད་རབ་ཏུ་གནས། །ཆགས་མེད་སྤྱོད་པ་དེ་དག་ནི། །རྟག་ཏུ་སེམས་
ཅན་དོན་ལ་གནས། །དེ་དག་སྤྱོད་པ་མཚུངས་མེད་དེ། །ལུས་ཅན་ཀུན་གྱིས་བསམ་མི་ཁྱབ། །འཇིག་རྟེན་བདེ་བ་ཀུན་སེམས་པས། །དེ་དག་སྡུག་བསྔལ་རྣམ་པར་བཟློག །འཇིག་རྟེན་ཀུན་ལ་སྙིང་བརྩེ་ཞིང་། །བྱང་ཆུབ་ཡེ་ཤེས་རྣམ་དག་པས། །དེ་དག་
འཇིག་རྟེན་སྣང་བར་གྱུར། །འཇིག་རྟེན་ཐམས་ཅད་རབ་ཏུ་འགྲེལ། །དེ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་འཐོར་བའི་རྒྱལ་པོས། །སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་
དག་སྨྲས་སོ། །བསྐལ་པ་བྱེ་བ་ཕྲག་བརྒྱར་ཡང་། །སངས་རྒྱས་སྒྲ་ནི་རབ་དཀོན་ན། །ཐེ་ཙོམ་ཐམས་ཅད་གཅོད་པ་ཡི། །དམ་པ་མཐོང་བ་ཅི་ཞིག་སྨོས། །ཆོས་ཀུན་ཐུགས་སུ་ཆུད་རྟོགས་པ། །འཇིག་རྟེན་གསུམ་པོའི་བསོད་ནམས་སྟེགས། །སེམས་
ཅན་ཐམས་ཅད་