Kinh tạng Tây Tạng (Kangyur Đại Học) — 037_ཕལ་ཆེན།_ག

་། ཆོས་ཟབ་མོའི་ཚུལ་ལ་ཞུགས་པས་ཞི་བར་བྱེད་པའི་མོས་པ་དང་།
སེམས་རྒྱ་ཆེན་པོ་བསྐྱེད་པས་ཡངས་པའི་མོས་པ་དང་། སངས་རྒྱས་ཀྱི་བྱིན་གྱི་རླབས་ཀྱི་མཐུ་དང་། ཤུགས་སུ་ལྡན་པས་རང་གི་སྐབས་ཕྱེ་བའི་མོས་པ་དང་། བདུད་ཀྱི་ལས་ཐམས་ཅད་རབ་ཏུ་འཇོམས་པས་མི་འཕྲོགས་པའི་མོས་པ་དང་།

ལས་ཀྱི་རྣམ་པར་སྨིན་པ་ལ་གཅིག་ཏུ་ངེས་པས་ཤིན་ཏུ་གདོན་མི་ཟ་བའི་མོས་པ་དང་། ཅི་འདོད་པའི་ཆོ་འཕྲུལ་ཡོངས་སུ་སྟོན་པས་མངོན་དུ་གྱུར་པའི་མོས་པ་དང་སྟོབས་དང་མི་ལྡན་པ་མེད་པའི་ཕྱིར་དུས་གང་དུ་འདོད་
པར་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བས་སངས་རྒྱས་ཐམས་ཅད་ཀྱིས་ལུང་བསྟན་པ་ཡང་དག་པར་ནོད་པའི་མོས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མོས་པ་སྟེ་དེ་དག་ལ་གནས་ཤིང་བྱང་ཆུབ་
སེམས་དཔའ་རྣམས་དེ་བཞིན་གཤེགས་པའི་མོས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་འཇིག་རྟེན་གྱི་ཁམས་སུ་མོས་པ་ལ་འཇུག་པ་སྟེ། བཅུ་གང་ཞེ་ན་
འདི་ལྟར་འཇིག་རྟེན་གྱི་ཁམས་ཐམས་ཅད་འཇིག་རྟེན་གྱི་ཁམས་གཅིག་ཏུ་མོས་པ་ལ་འཇུག་པ་དང་། འཇིག་རྟེན་གྱི་ཁམས་གཅིག་འཇིག་རྟེན་གྱི་ཁམས་ཐམས་ཅད་དུ་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་པད་མོའི་གདན་གཅིག་ལ་
བཞུགས་པའི་དེ་བཞིན་གཤེགས་པའི་སྐུས་ཡོངས་སུ་ཁྱབ་པར་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་ནམ་མཁའི་རང་བཞིན་དུ་ཡང་དག་པར་བསྟན་པར་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་སངས་རྒྱས་
ཀྱི་རྒྱན་གྱིས་བརྒྱན་པར་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་བྱང་ཆུབ་སེམས་དཔའི་ལུས་ཀྱིས་རྒྱས་པར་དགང་བར་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་སྐྲའི་སྦུབས་གཅིག་ཏུ་དགོད་པར་མོས་པ་ལ་འཇུག་
པ་དང་། འཇིག་རྟེན་གྱི་ཁམས་ཐམས་ཅད་སེམས་ཅན་གཅིག་གི་ལུས་ཀྱི་རྒྱུད་ཀྱི་རྗེས་སུ་འབྲང་བར་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་དེ་བཞིན་གཤེགས་པ་གཅིག་གི་བྱང་ཆུབ་ཀྱི་ཤིང་དང་། དེ་བཞིན་གཤེགས་པ་གཅིག་གི་

སྙིང་པོ་བྱང་ཆུབ་ཀྱིས་ཡོངས་སུ་རྒྱས་པར་གང་བར་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་དུ་སྒྲའི་དབྱངས་གཅིག་གིས་གོ་བར་བྱ་བ་དང་། སེམས་ཅན་གྱི་ཁམས་ཐམས་ཅད་ཀྱི་སྒྲ་སྐད་རྣམ་པ་ཐ་དད་པ་ལ་འཇུག་པས་ཚིམ་པར་བྱ་བར་མོས་པ་ལ་
འཇུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་འཇིག་རྟེན་གྱི་ཁམས་སུ་མོས་པ་ལ་འཇུག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་སངས་རྒྱས་ཀྱི་ཞིང་ལ་མོས་པ་བླ་ན་མེད་
པ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་གྱི་ཁམས་སུ་མོས་པ་ལ་འཇུག་པ་སྟེ། བཅུ་གང་ཞེ་ན་འདི་ལྟར་སེམས་ཅན་གྱི་ཁམས་ཐམས་ཅད་རང་བཞིན་གྱིས་ལུས་མེད་པར་མོས་པ་ལ་
འཇུག་པ་དང་། སེམས་ཅན་གྱི་ཁམས་ཐམས་ཅད་སེམས་ཅན་གཅིག་གི་ལུས་ཀྱི་རྒྱུད་དུ་འདུས་པར་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་བྱང་ཆུབ་སེམས་དཔའི་ཁོང་དུ་འདུས་པར་མོས་པ་ལ་འཇུག་པ་དང་། སེམས་ཅན་
གྱི་ཁམས་ཐམས་ཅད་དེ་བཞིན་གཤེགས་པའི་སྐུར་འདུས་པར་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་དུ་སེམས་ཅན་གཅིག་གི་ལུས་ཡོངས་སུ་ཞུགས་པར་འགྱུར་བར་མོས་པ་ལ་འཇུག་པ་དང་། སེམས་ཅན་གྱི་ཁམས་
ཐམས་ཅད་སངས་རྒྱས་ཀྱི་ཆོས་ཀྱི་སྣོད་དུ་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་དང་། ཅི་འདོད་པ་དང་། གར་མོས་པའི་གཟུགས་དང་། ཁ་དོག་དང་ཆ་
བྱད་དུ་མངོན་པར་བལྟ་བར་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་ཉན་ཐོས་དང་། རང་སངས་རྒྱས་ཀྱི་གཟུགས་དང་ཁ་དོག་དང་ཆ་བྱད་དུ་ཡོངས་སུ་བསྟན་པར་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་བྱང་

ཆུབ་སེམས་དཔའི་ཡོན་ཏན་གྱིས་ཡོངས་སུ་བརྒྱན་པར་བྱིན་གྱིས་བརླབ་ཅིང་ཡོངས་སུ་བསྟན་པར་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་དེ་བཞིན་གཤེགས་པའི་སྐུ་གཟུགས་དང་། མཚན་དང་དཔེ་བྱད་བཟང་པོ་དང་། གཟུགས་
ཀྱི་སྐུ་སྣ་ཚོགས་ཀྱི་སྤྱོད་ལམ་དང་། ཚུལ་དང་སྤྱོད་པ་ཡོངས་སུ་བསྟན་ཅིང་གཞན་གྱིས་རིག་པར་བྱ་བར་མོས་པ་ལ་འཇུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་གྱི་ཁམས་སུ་མོས་པ་ལ་འཇུག་པ་སྟེ།
དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་དགྱེས་པ་དང་། ཁྱུ་མཆོག་གི་མཐུ་ཕྱུང་བ་བླ་ན་མེད་པ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བག་ཆགས་ཏེ། བཅུ་
གང་ཞེ་ན་འདི་ལྟར་བྱང་ཆུབ་ཀྱི་སེམས་ཀྱི་བག་ཆགས་དང་། དགེ་བའི་རྩ་བའི་བག་ཆགས་དང་། སེམས་ཅན་ཡོངས་སུ་སྨིན་པར་བྱ་བའི་བག་ཆགས་དང་། སངས་རྒྱས་བལྟ་བའི་བག་ཆགས་དང་། འཇིག་རྟེན་གྱི་ཁམས་ཡོངས་སུ་དག་པར་སྐྱེ་བའི་བག་ཆགས་
དང་། སྤྱོད་པའི་བག་ཆགས་དང་། སྨོན་ལམ་གྱི་བག་ཆགས་དང་། ཕ་རོལ་ཏུ་ཕྱིན་པའི་བག་ཆགས་དང་། ཆོས་མཉམ་པ་ཉིད་ངེས་པར་རྟོགས་པའི་བག་ཆགས་དང་། སྤྱོད་པ་རྣམ་པ་ཐ་དད་པའི་བག་ཆགས་སོ། །ཀྱེ་རྒྱལ་བའི་སྲས་བཅུ་པོ་
དེ་དག་ནི་བྱང་ཆུབ་སེམས་དཔའ་རྣམས་ཀྱི་བག་ཆགས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཉོན་མོངས་པའི་བག་ཆགས་མ་ལུས་པ་སྤངས་ནས། དེ་བཞིན་གཤེགས་པའི་ཡེ་ཤེས་ཆེན་པོའི་བག་ཆགས་ཐུགས་སུ་ཆུད་པ་བླ་ན་མེད་པ་
འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཉེ་བར་ལེན་པ་སྟེ། ཉེ་བར་ལེན་པ་དེ་དག་གིས་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་པའོ། །བཅུ་གང་ཞེ་ན་འདི་ལྟར་ཡོངས་སུ་སྨིན་པའི་མཐར་ཕྱིན་

པར་བྱ་བའི་ཕྱིར་སེམས་ཅན་གྱི་ཁམས་ཉེ་བར་ལེན་པ་དང་། ལྷག་མ་མེད་པར་ཡོངས་སུ་དག་པར་བྱ་བའི་ཕྱིར་འཇིག་རྟེན་གྱི་ཁམས་ཉེ་བར་ལེན་པ་དང་། བྱང་ཆུབ་སེམས་དཔའི་སྤྱོད་པས་མཉེས་པར་བྱ་བའི་ཕྱིར་དེ་བཞིན་གཤེགས་པ་ཉེ་བར་ལེན་པ་དང་། མཚན་
དང་དཔེ་བྱད་བཟང་པོ་དང་། སངས་རྒྱས་ཀྱི་ཡོན་ཏན་ཡང་དག་པར་བསྡུ་བའི་ཕྱིར་དགེ་བའི་རྩ་བ་ཉེ་བར་ལེན་པ་དང་། སེམས་ཅན་ཐམས་ཅད་ཀྱི་སྡུག་བསྔལ་གྱི་ཕུང་པོ་ཉེ་བར་བླངས་ཏེ། རབ་ཏུ་ཞི་བར་བྱ་བའི་ཕྱིར་སྙིང་རྗེ་ཆེན་པོ་ཉེ་བར་ལེན་པ་དང་།
སེམས་ཅན་ཐམས་ཅད་ཐམས་ཅད་མཁྱེན་པའི་བདེ་བ་ལ་རབ་ཏུ་དགོད་པའི་ཕྱིར་བྱམས་པ་ཆེན་པོ་ཉེ་བར་ལེན་པ་དང་། བྱང་ཆུབ་སེམས་དཔའི་རྒྱན་ཡང་དག་པར་བསྡུ་བའི་ཕྱིར་ཕ་རོལ་ཏུ་ཕྱིན་པ་ཉེ་བར་ལེན་པ་དང་། སྒོ་ཐམས་ཅད་ཡོངས་སུ་བསྟན་པའི་ཕྱིར་
ཐབས་མཁས་པ་ཉེ་བར་ལེན་པ་དང་། ཆགས་པ་མེད་པའི་ཡེ་ཤེས་ཀྱི་ཕྱིར་བྱང་ཆུབ་ཉེ་བར་ལེན་པ་དང་། མདོར་ན་ཐམས་ཅད་མངོན་སུམ་དུ་ཤེས་པས་མངོན་པར་ཤེས་པར་བྱ་བའི་ཕྱིར། བྱང་ཆུབ་སེམས་དཔའི་ཆོས་ཐམས་ཅད་ཉེ་བར་ལེན་པའོ། །
ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཉེ་བར་ལེན་པ་སྟེ། ཉེ་བར་ལེན་པ་དེ་དག་གིས་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་ཅིང་། དེ་བཞིན་གཤེགས་པ་ཐམས་ཅད་ཀྱི་ཉེ་བར་ལེན་པ་མེད་པ་བླ་ན་མེད་པ་འཐོབ་པར་འགྱུར།
བདག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ནན་ཏན་ཏེ། བཅུ་གང་ཞེ་ན་འདི་ལྟར་ཕ་རོལ་ཏུ་ཕྱིན་པའི་ནན་ཏན་དང་། བསླབ་པའི་ནན་ཏན་དང་། ཡེ་ཤེས་ཀྱི་ནན་ཏན་དང་། དོན་གྱི་ནན་ཏན་དང་། ཆོས་ཀྱི་ནན་ཏན་
དང་། མངོན་པར་བསྒྲུབ་པའི་ནན་ཏན་དང་། ཡང་དག་པར་བསྟན་པའི་ནན་ཏན་དང་། སྤྱོད་པས་མི་སྐྱོ་བའི་ནན་ཏན་དང་། མངོན་པར་རྫོགས་པར་བྱང་ཆུབ་པར་བྱ་བའི་ནན་ཏན་དང་། ཆོས་ཀྱི་འཁོར་ལོ་བསྐོར་བའི་ནན་ཏན་ནོ། །ཀྱེ་རྒྱལ་བའི་

སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ནན་ཏན་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཆོས་ཐམས་ཅད་ཀྱི་ནན་ཏན་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་
སེམས་དཔའ་རྣམས་ཀྱི་འགྲུབ་པ་སྟེ། བཅུ་གང་ཞེ་ན་འདི་ལྟར་དགེ་བའི་བཤེས་གཉེན་ལ་སེམས་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །དེ་བཞིན་གཤེགས་པའི་བཀའ་ལ་མངོན་པར་ཡིད་ཆེས་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །
དམ་པའི་ཆོས་ལ་མི་སྤོང་བ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །ཚད་མེད་པའི་སེམས་ཀྱིས་སངས་རྒྱས་སུ་དགེ་བའི་རྩ་བ་ཡོངས་སུ་བསྔོ་བ་མི་ཟད་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །དེ་བཞིན་གཤེགས་པའི་ཡུལ་ས་མཚམས་མེད་པར་ཡིད་
ཆེས་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །འཇིག་རྟེན་གྱི་ཁམས་ཀྱི་ཡུལ་ལ་འཇུག་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །ཆོས་ཀྱི་དབྱིངས་ཀྱི་ཡུལ་ལས་མི་གཡོ་བ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །བདུད་ཀྱི་ཡུལ་ལས་གྱེན་
དུ་སྤགས་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །སངས་རྒྱས་ཐམས་ཅད་ཀྱི་རྗེས་སུ་དྲན་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །དེ་བཞིན་གཤེགས་པའི་སྟོབས་བཅུའི་ཡུལ་ལ་མངོན་པར་མོས་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །ཀྱེ་
རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་འགྲུབ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་འགྲུབ་པ་བླ་ན་མེད་པ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་
ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ལས་གོལ་བའི་ལམ་སྟེ། དེ་དག་ནི་བྱང་ཆུབ་སེམས་དཔས་ཡོངས་སུ་སྤང་བར་བྱ་བདག་གོ། །བཅུ་གང་ཞེ་ན་འདི་ལྟར་དགེ་བའི་བཤེས་གཉེན་ལ་བརྙས་པ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །འཁོར་

བའི་སྡུག་བསྔལ་གྱིས་འཇིགས་པ་ནི་སངས་རྒྱས་ཀྱི་ཆོས་ལ་གོལ་བའི་ལམ་མོ། །བྱང་ཆུབ་སེམས་དཔའི་སྤྱོད་པས་སྐྱོ་བ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །འཇིག་རྟེན་གྱི་ཁམས་ན་གནས་པས་ཡོངས་སུ་སྐྱོ་བ་ནི་སངས་རྒྱས་ཀྱི་ཆོས་ལས་གོལ་
བའི་ལམ་མོ། །མཉམ་པར་གཞག་པ་ལ་གནས་སུ་བྱེད་པ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །དགེ་བའི་རྩ་བ་ལ་ཆགས་ཤིང་ཞེན་པ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །དམ་པའི་ཆོས་སྤོང་བ་ནི་སངས་རྒྱས་ཀྱི་ཆོས་ལས་གོལ་
བའི་ལམ་མོ། །བྱང་ཆུབ་སེམས་དཔའི་སྤྱོད་པ་ལས་དཔར་བས་འབྱེད་པ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །ཉན་ཐོས་དང་རང་སངས་རྒྱས་སུ་འདོད་པ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །བྱང་ཆུབ་སེམས་དཔའ་ལ་ཞེ་སྡང་ཞིང་ཁོང་
ཁྲོ་བ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ལས་གོལ་བའི་ལམ་རྣམས་ཏེ། དེ་དག་ནི་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །དེ་དག་ཡོངས་སུ་
སྤངས་ནས་དེའི་འོག་ཏུ་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སྐྱོན་མེད་པ་ཉིད་དུ་འདའ་བར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྐྱོན་མེད་པ་སྟེ། བཅུ་གང་ཞེ་ན་འདི་ལྟར་ཤེས་རབ་ཀྱི་ཕ་རོལ་
ཏུ་ཕྱིན་པའང་མངོན་པར་བསྒྲུབ་ལ་སེམས་ཅན་ཐམས་ཅད་ལའང་རྣམ་པར་ལྟ་བ་དང་། །ལྟ་བའི་རྣམ་པ་ཐམས་ཅད་དང་ཡང་བྲལ་ལ། ལྟ་བའི་བཅིང་བས་གླགས་པ་ཐམས་ཅད་ཀྱང་རབ་ཏུ་འབྲལ་བ་དང་། མཚན་མ་ཐམས་ཅད་ཀྱི་ཡིད་ལ་མི་བྱེད་ལ་
མཚན་མ་ལ་མངོན་པར་དགའ་བའི་སེམས་ཅན་ཐམས་ཅད་ཀྱང་མི་འདོར་བ་དང་། ཁམས་གསུམ་པ་ཐམས་ཅད་ལས་ཡང་དག་པར་འདས་ཏེ་འཇིག་རྟེན་གྱི་ཁམས་ཀྱི་གནས་ཐམས་ཅད་ན་གནས་པ་དང་། ཉོན་མོངས་པ་རྣམས་ཀྱང་རྣམ་པར་བཟློག་ལ།

སེམས་ཅན་རྣམས་དང་ཡང་ཕྲད་ཅིང་འགྲོགས་པ་དང་། ཆོས་རྣམས་ལ་ཡང་འདོད་ཆགས་དང་བྲལ་ལ། སེམས་ཅན་ཐམས་ཅད་ལ་ཡང་སྙིང་རྗེ་ཆེན་པོས་བྱམས་པ་དང་། དངོས་པོ་ཐམས་ཅད་ཀྱིས་ཀྱང་དབེན་ལ་འཁོར་ཐམས་ཅད་ཀྱང་
ཡོངས་སུ་སྟོན་པ་དང་། འཇིག་རྟེན་གྱི་ཁམས་ལས་ཀྱང་གྱེན་དུ་འཕགས་ལ་སྐྱེ་ཞིང་ཤི་འཕོ་པའི་སྤྱོད་པ་ཡང་མངོན་པར་བསྒྲུབ་པ་དང་། འཇིག་རྟེན་གྱི་ཆོས་ཐམས་ཅད་ཀྱིས་ཀྱང་མ་གོས་ལ། འཇིག་རྟེན་གྱི་བྱ་བ་ཐམས་ཅད་ལའང་ཐོགས་པ་མེད་པ་དང་།
སངས་རྒྱས་ཀྱི་བྱང་ཆུབ་ཀྱང་མངོན་དུ་གྱུར་ལ་སྤྱོད་པ་དང་སྨོན་ལམ་ཆེན་པོའི་ཉི་མ་ཡང་རྒྱུན་མི་གཅོད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྐྱོན་མེད་པ། འཕགས་པ་འཇིག་རྟེན་ལས་འདས་པ། འགྲོ་བ་ཐམས་ཅད་དང་།
ཐུན་མོང་མ་ཡིན་པ་ཉན་ཐོས་དང་། རང་སངས་རྒྱས་ཐམས་ཅད་དང་མ་འདྲེས་པ་སྟེ། སྐྱོན་མེད་པ་དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་ཆོས་ངེས་པ་རྣམ་པར་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་
དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ཆོས་ངེས་པ་འཐོབ་པ་སྟེ། བཅུ་གང་ཞེ་ན་འདི་ལྟར་དེ་བཞིན་གཤེགས་པའི་རིགས་སུ་སྐྱེས་པ་ཡིན། སངས་རྒྱས་ཀྱི་ཡུལ་ལ་གནས་པ་ཡིན། བྱང་ཆུབ་སེམས་དཔའི་ལས་ལ་ཞུགས་པ་
ཡིན། ཕ་རོལ་ཏུ་ཕྱིན་པ་ལ་ནན་ཏན་དུ་བྱེད་པ་ཡིན། སངས་རྒྱས་ཀྱི་རྒྱུད་ན་ས་བྱུང་བ་ཡིན། དེ་བཞིན་གཤེགས་པའི་གདུང་ལས་སྐྱེས་པ་ཡིན། སངས་རྒྱས་ཀྱི་སྟོབས་ལ་གནས་པ་ཡིན། དེ་བཞིན་གཤེགས་པའི་བྱང་ཆུབ་ཏུ་རྗེས་སུ་སོང་བ་ཡིན།
སངས་རྒྱས་ཐམས་ཅད་དང་སྐུ་དང་རང་བཞིན་གཅིག་པ་ཡིན། དེ་བཞིན་གཤེགས་པ་ཐམས་ཅད་ཀྱི་རྣམ་པར་སྤྱོད་པ་དང་མི་གཉིས་པ་ཡིན། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ཆོས་ངེས་པར་འཐོབ་པ་

སྟེ། དེ་དག་ནི་སྐྱོན་མེད་པ་ལ་གནས་པའི་བྱང་ཆུབ་སེམས་དཔའ་རྣམས་ཀྱི་འཐོབ་པ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ལ་འབྱུང་བའི་ལམ་སྟེ། བཅུ་གང་ཞེ་ན་འདི་ལྟར་དགེ་བའི་བཤེས་གཉེན་
རྣམས་དང་རྒྱུད་ཀྱི་ཚུལ་གཅིག་ཏུ་འགྱུར་བ་དང་། དགེ་བའི་རྩ་བ་ཐུན་མོང་དུ་མོས་པ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་དང་། ཚུལ་མཐུན་ཞིང་སྨོན་ལམ་ཆེན་པོ་ལ་དབུགས་ཕྱིན་པ་ཐོབ་པ་
ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །སེམས་རྒྱ་ཆེན་པོས་རང་གི་དགེ་བའི་རྩ་བའི་གོ་འབྱེད་པ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །ལས་ཇི་ལྟར་བྱས་པ་ཆུད་མི་ཟ་བས་བསྐལ་པ་འགྲངས་པ་ཐམས་ཅད་དུ་མི་སྐྱོ་བ་ནི། སངས་རྒྱས་ཀྱི་ཆོས་
ལས་འབྱུང་བའི་ལམ་མོ། །ཕྱི་མའི་མཐའི་མུར་ཐུག་པ་ཐམས་ཅད་དུ་ཡོངས་སུ་འཛིན་པས། འཇིག་རྟེན་གྱི་ཁམས་གྲངས་མེད་པར་གནས་པར་བྱ་བ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །སེམས་ཅན་གྱི་ཁམས་ཐམས་ཅད་ཡོངས་སུ་
སྨིན་པར་བྱ་བ་ལ་མཁས་པས་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་པ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །སྙིང་རྗེ་ཆེན་པོ་བསྐྱེད་དེ་སེམས་ཚད་མེད་པར་བྱེད་པ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །ནམ་མཁའི་དབྱིངས་ཐམས་
ཅད་སེམས་བསྐྱེད་པ་གཅིག་གིས་རྒྱས་པར་དགང་བས་སྤྱོད་པ་དང་སྨོན་ལམ་ཆེན་པོའི་ཁྱད་པར་ལ་འཇུག་པ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །སྔོན་མངོན་པར་བསྒྲུབས་པ་ཆུད་མི་ཟ་བར་དེ་བཞིན་གཤེགས་པའི་རིགས་ཡང་དག་པར་འཛིན་པ་ནི་
སངས་རྒྱས་ཀྱི་ཆོས་ལ་འབྱུང་བའི་ལམ་མོ། །འགྲོ་བ་ཐམས་ཅད་ལ་བྱང་ཆུབ་ཀྱི་སེམས་ཡོངས་སུ་སྟོན་ཅིང་། བྱང་ཆུབ་ཏུ་སེམས་བསྐྱེད་པ་རྣམས་ཀྱི་དགེ་བའི་རྩ་བ་ཐམས་ཅད་ཉེ་བར་སྟོན་པ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །ཀྱེ་རྒྱལ་བའི་

སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ལ་འབྱུང་བའི་ལམ་སྟེ། དེ་དག་གིས་བྱུང་བའི་བྱང་ཆུབ་སེམས་དཔའ་རྣམས་ཀྱི་སྐྱེས་བུ་དམ་པའི་མིང་བཅུ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་
དག་ནི་བྱང་ཆུབ་སེམས་དཔའ་རྣམས་ཀྱི་སྐྱེས་བུ་དམ་པའི་མིང་འཐོབ་པ་སྟེ། བཅུ་གང་ཞེ་ན། འདི་ལྟར་བྱང་ཆུབ་ཀྱི་ཡེ་ཤེས་ཀྱི་ལུས་དང་ལྡན་པས་བྱང་ཆུབ་སེམས་དཔའ་ཞེས་བྱ་བ་ཡིན། ཐེག་པ་ཆེན་པོ་ལ་རབ་ཏུ་གནས་པའི་ཕྱིར་སེམས་དཔའ་ཆེན་པོ་ཞེས་བྱ་བ་ཡིན།
ཆོས་ཀྱི་དམ་པ་མངོན་པར་རྟོགས་པས་དམ་པའི་སེམས་དཔའ་ཞེས་བྱ་བ་ཡིན། མཆོག་གི་ཆོས་མངོན་པར་འཚང་རྒྱ་བས་མཆོག་གི་སེམས་དཔའ་ཞེས་བྱ་བ་ཡིན། ཡེ་ཤེས་ཀྱི་ཁྱད་པར་རབ་དང་ལྡན་པས་རབ་ཀྱི་སེམས་དཔའ་ཞེས་བྱ་བ་ཡིན། ཕུལ་དུ་བརྩོན་
འགྲུས་རྩོམ་པས་ཕུལ་གྱི་སེམས་དཔའ་ཞེས་བྱ་བ་ཡིན། གོང་ན་མེད་པའི་ཆོས་ཡང་དག་པར་སྟོན་པས་བླ་ན་མེད་པའི་སེམས་དཔའ་ཞེས་བྱ་བ་ཡིན། སྟོབས་བཅུའི་ཡེ་ཤེས་ཡངས་པ་དང་ལྡན་པས་སྟོབས་ཀྱི་སེམས་དཔའ་ཞེས་བྱ་བ་ཡིན། འགྲོ་བ་
ཐམས་ཅད་ན་དཔེ་མེད་པས་མི་མཉམ་མི་འདྲ་བའི་སེམས་དཔའ་ཞེས་བྱ་བ་ཡིན། ནམ་འདོད་པའི་སེམས་ཀྱི་སྐད་ཅིག་ལ་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བས་བསམ་གྱིས་མི་ཁྱབ་པའི་སེམས་དཔའ་ཞེས་བྱ་བ་ཡིན། ཀྱེ་རྒྱལ་བའི་སྲས་
བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྐྱེས་བུ་དམ་པའི་མིང་འཐོབ་པ་རྣམས་སོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལམ་སྟེ། བཅུ་གང་ཞེ་ན་འདི་ལྟར་གཅིག་པུ་གྲོགས་མེད་པར་བྱང་ཆུབ་ཀྱི་སེམས་མི་གཏོང་
བས་བྱང་ཆུབ་སེམས་དཔའ་རྣམས་ཀྱི་ལམ་གཅིག་ལ་རྟེན་པ་དང་། ཐབས་དང་ཤེས་རབ་ཀྱིས་མངོན་པར་བསྒྲུབ་པས། བྱང་ཆུབ་སེམས་དཔའ་རྣམས་ཀྱི་ལམ་ཡན་ལག་གཉིས་པ་དང་། སྟོང་བ་ཉིད་ཀྱི་སྦྱོར་བ་དང་། མཚན་མ་མེད་པའི་མཐའི་རྩེ་

མོར་ཕྱིན་པ་དང་། སྨོན་པ་མེད་པའི་ཕྱིར་ཁམས་གསུམ་དང་མི་འདྲེ་བས་བྱང་ཆུབ་སེམས་དཔའི་ལམ་རྣམ་པ་གསུམ་པ་དང་། ཉེས་པ་བཤགས་པའི་ཚུལ་དང་། བསོད་ནམས་ཐམས་ཅད་ལ་རྗེས་སུ་ཡི་རང་བ་དང་། དེ་བཞིན་གཤེགས་པ་ལ་གསོལ་བ་
གདབ་པའི་རིམ་གྲོ་རྒྱུན་མི་གཅོད་པ་དང་། ཡོངས་སུ་བསྔོ་བ་ལ་མཁས་པས་ཤིན་ཏུ་བསྔོ་བའི་ཕྱིར་བྱང་ཆུབ་སེམས་དཔའི་ལམ་སྤྱོད་པ་བཞིས་སྨོས་པ་དང་དད་པའི་རྩ་བ་ཚུགས་ཏེ། ཤིན་ཏུ་བརྟན་པ་དང་། བརྩོན་འགྲུས་ཆེན་པོ་ལས་ཕྱིར་མི་ལྡོག་པ་དང་།
དྲན་པ་རྩེ་གཅིག་པ་དང་ཏིང་ངེ་འཛིན་གྱི་ཚུལ་མ་འཁྲུགས་པ་དང་། རབ་ཏུ་རྟོགས་པའི་ཤེས་རབ་ཀྱི་སྤྱོད་ཡུལ་ལ་མཁས་པས། བྱང་ཆུབ་སེམས་དཔའ་རྣམས་ཀྱི་ལམ་དབང་པོ་ལྔས་རྣམ་པར་སྤེལ་བ་དང་། འདི་ལྟ་སྟེ་ལྷའི་མིག་གིས་འཇིག་རྟེན་གྱི་ཁམས་
ཐམས་ཅད་ཀྱི་གཟུགས་ཀྱི་རྣམ་པ་ཐམས་ཅད་དང་། སེམས་ཅན་གྱི་ཤི་འཕོ་དང་། སྐྱེ་བ་ཐམས་ཅད་ཡོངས་སུ་མཐོང་བའི་རང་བཞིན་དང་ལྡན་པ་དང་། ལྷའི་རྣ་བས་དེ་བཞིན་གཤེགས་པ་ཐམས་ཅད་ཀྱི་ཆོས་བསྟན་པ་མཉན་ཅིང་དྲན་པར་བྱ་བ་དང་།
ཡོངས་སུ་གཟུང་བར་བྱ་བས་སེམས་ཅན་ཕ་རོལ་གྱི་དབང་པོ་ལ་ཡང་དག་པར་ཕྱིན་པར་བྱེད་པ་དང་བདག་གི་སེམས་ཆགས་པ་མེད་པས། ཕ་རོལ་གྱི་སེམས་ཤེས་པས་མཐོང་བ་ལ་དབང་བསྒྱུར་བ་མངོན་པར་བསྒྲུབ་པ་དང་། སྔོན་གྱི་གནས་རྗེས་སུ་དྲན་པས་
བསྐལ་པ་འགྲངས་པ་ཐམས་ཅད་རྗེས་སུ་དྲན་ཞིང་དགེ་བའི་རྩ་བ་རྣམ་པར་འཕེལ་བར་བྱེད་པ་དང་། རྫུ་འཕྲུལ་དང་རྣམ་པར་འཕྲུལ་པ་ཆེན་པོ་བསྒྲུབས་པས་སེམས་ཅན་ཇི་ལྟར་འདུལ་བ་བཞིན་དུ་ཆོ་འཕྲུལ་སྣ་ཚོགས་ཡོངས་སུ་སྟོན་ཅིང་། སེམས་ཅན་ཐམས་ཅད་ལ་ཆོས་
བརྗོད་པ་དང་། ཟག་པ་ཟད་པའི་ཡེ་ཤེས་དང་ལྡན་པས་ཡང་དག་པའི་མཐའ་མངོན་སུམ་དུ་མཐོང་ཞིང་བྱང་ཆུབ་སེམས་དཔའི་སྤྱོད་པ་བསྒྲུབ་པ་རྒྱུན་མི་གཅོད་པས། བྱང་ཆུབ་སེམས་དཔའ་རྣམས་ཀྱི་ལམ་མངོན་པར་ཤེས་པ་དྲུག་གིས་རྣམ་པར་འཕྲུལ་བ་དང་།

འདི་ལྟ་སྟེ། སེམས་ཅན་གྱི་གཙོ་བོ་མཐའ་ཡས་པ་ཐམས་ཅད་སྐྲའི་རྩེ་མོ་གཅིག་ལ་བཞུགས་པར་མཐོང་སྟེ། ཡང་དག་པར་ཡོངས་སུ་གཟུང་ཞིང་སེམས་ཅན་གྱི་བསམ་པས་རྣམ་པར་རིག་པར་བྱ་བ་ལ་འཇུག་པས་སངས་རྒྱས་རྗེས་སུ་དྲན་པ་དང་།
དེ་བཞིན་གཤེགས་པ་གཅིག་གི་འཁོར་གྱི་དཀྱིལ་འཁོར་ནས་མ་གཡོས་པར་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་མངོན་དུ་ཞལ་ནས་ཆོས་བསྟན་པ་བསྒྲགས་པ་མི་ཟད་པས་འགྲོ་བ་ཐམས་ཅད་ཀྱི་བསམ་པ་དང་། དབང་པོ་ཇི་ལྟ་བ་བཞིན་དུ་
རྣམ་པར་རིག་པར་བྱ་བ་ལ་འཇུག་པས་ཆོས་རྗེས་སུ་དྲན་པ་དང་། ཕྱིར་མི་ལྡོག་པའི་བྱང་ཆུབ་སེམས་དཔའི་ཚོགས་མཐོང་བ་དང་མི་འབྲལ་ཞིང་འགྲོ་བ་ཐམས་ཅད་ལ་བྱང་ཆུབ་སེམས་དཔའི་ལུས་ཡོངས་སུ་སྟོན་པས་དགེ་འདུན་རྗེས་སུ་དྲན་པ་དང་། བྱང་ཆུབ་སེམས་
དཔའ་ཐམས་ཅད་ཀྱི་སྦྱིན་པ་ཡོངས་སུ་གཏོང་བ་ལ་ཡང་དག་པར་གཞོལ་ཞིང་གཏོང་བ་ཆེན་པོས་རྣམ་པར་སྤེལ་བ་ཡིད་ལ་བྱེད་པས་གཏོང་བ་རྗེས་སུ་དྲན་པ་དང་། བྱང་ཆུབ་ཀྱི་སེམས་དང་མི་འབྲལ་བས་དགེ་བའི་རྩ་བ་ཐམས་ཅད་འགྲོ་བ་ཐམས་ཅད་ལ་སྟོབས་པས། ཚུལ་
ཁྲིམས་རྗེས་སུ་དྲན་པ་དང་། དགའ་ལྡན་གྱི་ཕོ་བྲང་གི་མཆོག་ན་བྱང་ཆུབ་སེམས་དཔའ་ཚེ་གཅིག་གིས་ཐོགས་པ་བཞུགས་པ་རྗེས་སུ་དྲན་པས་ལྷ་རྗེས་སུ་དྲན་པ་དང་། ཐབས་ཀྱི་ཡེ་ཤེས་ཆེན་པོས་འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་རྒྱུན་
མི་འཆད་པ་ལ་ཞུགས་ཏེ། སེམས་ཅན་རྗེས་སུ་དྲན་པའི་ཕྱིར་དགེ་འདུན་རྗེས་སུ་དྲན་པས་བྱང་ཆུབ་སེམས་དཔའི་ལམ་རྗེས་སུ་དྲན་པ་བདུན་གྱིས་མངོན་པར་བསྒྲུབས་པ་དང་། འདི་ལྟ་སྟེ་ལོག་པར་ལྟ་བ་ཐམས་ཅད་ཡོངས་སུ་སྤངས་པས་ཡང་དག་པའི་ལྟ་བའི་ལམ་དུ་
འབྱུང་བ་དང་། རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོགས་པ་དང་བྲལ་བས་ཐམས་ཅད་མཁྱེན་པ་ཉིད་དང་མཐུན་ཞིང་དོན་ཡོད་ལ་ཡིད་ལ་བྱ་བ་མེད་པས་བྱུང་བ་དང་། ངག་གི་ཉེས་པ་བཞི་དང་བྲལ་བས་འཕགས་པ་དང་མཐུན་

ཞིང་ཡང་དག་པའི་ངག་རབ་ཏུ་བརྗོད་པ་དང་། ལུས་ཀྱི་ལས་ཐམས་ཅད་སེམས་ཅན་ཉེ་བར་འཚོ་བས་འགྲོ་བ་ཐམས་ཅད་ཐོགས་པ་མེད་པར་ཡོངས་སུ་སྨིན་པར་བྱེད་ཅིང་འདུལ་བས་མངོན་པར་བསྒྲུབས་པ་དང་། འཕགས་པའི་རིགས་ལ་རབ་ཏུ་གནས་ཤིང་སྦྱངས་
པའི་ཡོན་ཏན་གྱིས་སྡོམ་པ་བྱང་ཆུབ་ཀྱི་ལམ་དང་ལྡན་པའི་སྤྱོད་ལམ་དང་། སྤྱོད་པ་དང་ཚུལ་ལ་རབ་ཏུ་གནས་ཤིང་ཐམས་ཅད་དུ་ཁ་ན་མ་ཐོ་བ་མེད་པས་ཡང་དག་པའི་འཚོ་བ་དང་། བྱང་ཆུབ་སེམས་དཔའ་ཐམས་ཅད་ཀྱི་བརྟུལ་ཞུགས་དང་། དཀའ་ཐུབ་ཀྱིས་
ཀུན་ནས་གདུངས་པ་དང་། ཡོངས་སུ་གདུངས་པ་ཡང་དག་པར་སྟོན་ཅིང་། དེ་བཞིན་གཤེགས་པའི་སྟོབས་བཅུའི་རང་བཞིན་ཐོགས་པ་མེད་པ་དང་ལྡན་པའི་ཕྱིར་ཡང་དག་པའི་རྩོལ་བ་དང་། སྒྲ་ཐམས་ཅད་འཛིན་ཅིང་དྲན་པ་འཇིག་རྟེན་གྱི་རྣམ་པར་འཁྲུག་
པ་ཐམས་ཅད་ཀྱིས་བར་དུ་མི་ཆོད་པའི་ཕྱིར་ཡང་དག་པའི་དྲན་པ་དང་། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པའི་ཏིང་ངེ་འཛིན་གཅིག་གིས་ཏིང་ངེ་འཛིན་ཐམས་ཅད་མངོན་པར་བསྒྲུབ་པ་ལ་མཁས་པའི་ཕྱིར་ཡང་དག་པའི་ཏིང་ངེ་འཛིན་
དང་ལྡན་པས་བྱང་ཆུབ་སེམས་དཔའ་རྣམས་ཀྱི་ལམ་ནི་འཕགས་པའི་ལམ་གྱི་ཡན་ལག་བརྒྱད་དང་ལྡན་ཞིང་བྱང་ཆུབ་དང་མཐུན་པར་གྱུར་པ་དང་། འདི་ལྟ་སྟེ་འདོད་པ་དང་གནོད་སེམས་དང་། འཚོ་བ་མེད་པ་དང་ངག་གི་ལས་ཐམས་ཅད་ཀྱིས་མ་བསྒྲིབས་
པར་ཆོས་སྟོན་པའི་ཚུལ་དང་ལྡན་པས་རྣམ་པར་རྟོག་པ་དང་། རྣམ་པར་དཔྱོད་པ་གསལ་བ་དང་། ཐམས་ཅད་མཁྱེན་པའི་ཡེ་ཤེས་ལ་སེམས་ཅན་ཡོངས་སུ་སྨིན་པར་བྱ་བའི་བསམ་པ་ཡོངས་སུ་མི་གཏོང་ཞིང་དགའ་བ་ཟིང་ཟིང་པོ་དང་བྲལ་བ་དང་།
དེ་བཞིན་གཤེགས་པ་ཐམས་ཅད་མཐོང་བས་དགའ་བའི་ཡིད་བདེ་བ་ཡང་རྒྱུན་མི་འཆད་ཅིང་འཇིག་རྟེན་པའི་བདེ་བ་དང་། སྡུག་བསྔལ་དང་བྲལ་བས་འཕགས་པ་འཇིག་རྟེན་ལས་འདས་པའི་བྱང་ཆུབ་སེམས་དཔའི་ལམ་དང་མཐུན་པ་དང་། མི་གཡོ་བའི་གཟུགས་

མེད་པའི་སྙོམས་པར་ཞུགས་པས་མངོན་པར་བསྒྲུབས་པ་དང་། འདོད་པའི་ཁམས་དང་གཟུགས་ཀྱི་ཁམས་སུ་སྐྱེས་པ་ལས་མ་གཡོས་པར་འདུ་ཤེས་པ་དང་། ཚོར་བ་ཐམས་ཅད་འགོག་པའི་སྙོམས་པར་འཇུག་པས་མངོན་པར་བསྒྲུབས་
ཤིང་། བྱང་ཆུབ་སེམས་དཔའི་སྤྱོད་པ་བསྒྲུབ་པ་རྒྱུན་མི་གཅོད་པས། བྱང་ཆུབ་སེམས་དཔའ་རྣམས་ཀྱི་ལམ་མཐར་གྱིས་སྤྱོད་ཅིང་སྙོམས་པར་འཇུག་པ་དགུས་མངོན་པར་བསྒྲུབས་པ་དང་། འདི་ལྟ་སྟེ་གནས་དང་གནས་མ་ཡིན་པ་ལ་མཁས་པའི་ཡེ་ཤེས་དང་
ལྡན་པ་དང་། འགྲོ་བ་ཐམས་ཅད་ཀྱི་འདས་པ་དང་། མ་འོངས་པ་དང་། ད་ལྟར་བྱུང་བའི་ལས་དང་། རྒྱུ་དང་རྣམ་པར་སྨིན་པ་ཡོངས་སུ་ལེན་པ་ཤིན་ཏུ་རྟོགས་པ་དང་། དབང་པོ་ཇི་ལྟ་བ་བཞིན་དུ་ཆོས་སྟོན་ཅིང་གོ་བར་བྱེད་པས་སེམས་ཅན་གྱི་ཁམས་
ཐམས་ཅད་ཀྱི་དབང་པོ་རབ་དང་ཐ་མ་ཤེས་པའི་ཡེ་ཤེས་ཀྱིས་ཤིན་ཏུ་བརྟགས་པ་དང་ཁམས་ཐ་དད་པ་དང་ཁམས་དུ་མ་ལ་མཁས་པ་དང་ལྡན་པ་དང་། རབ་དང་ཐ་མ་དང་། འབྲིང་ལ་མོས་པ་རབ་ཏུ་རྟོགས་པའི་ཆོས་ཀྱི་ཚུལ་ལ་ཞུགས་པ་དང་། འགྲོ་བ་ཐམས་ཅད་
དང་ཞིང་དང་དུས་དང་། བསྐལ་པ་ཐམས་ཅད་བྱང་ཆུབ་སེམས་དཔའི་ལུས་དང་། གཟུགས་ཀྱིས་རྒྱས་པར་དགང་ཞིང་དེ་བཞིན་གཤེགས་པའི་ཚུལ་ཡོངས་སུ་བསྟན་པས། བྱང་ཆུབ་སེམས་དཔའི་སྤྱོད་པ་བསྒྲུབ་པ་ཡོངས་སུ་མི་གཏོང་བ་དང་། བསམ་
གཏན་དང་རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་ཐམས་ཅད་ལས་རྣམ་པར་ལྡང་བ་དུས་ལ་བབ་པ་དང་། དུས་ལ་མ་བབ་པ་རྟོགས་པའི་ཡེ་ཤེས་ཀྱི་
ཚུལ་གྱིས་མངོན་པར་བསྒྲུབས་པའི་བྱང་ཆུབ་སེམས་དཔའི་རྣམ་པར་ཐར་པ་ལ་རབ་ཏུ་གནས་པ་དང་། སེམས་ཅན་ཐམས་ཅད་ཀྱི་སྐྱེ་བ་དང་། ཤི་འཕོ་བ་དང་ལམ་གྱི་རྒྱུད་དང་། འཕོ་བ་ཐ་དད་པའི་གནས་ལ་མཁས་པ་དང་ལྡན་པ་དང་། དུས་གསུམ་གྱི་བསྐལ་པ་འགྲངས་

པ་ཐམས་ཅད་སྐད་ཅིག་གཅིག་དུ་གཟུང་བ་རྟོགས་པའི་ཡེ་ཤེས་སྣང་བས་མངོན་པར་བསྒྲུབས་པ་དང་། འགྲོ་བ་ཐམས་ཅད་ཀྱི་ཉོན་མོངས་པ་དང་བག་ཆགས་དང་བསམ་པ་དང་། བག་ལ་ཉལ་བ་བྱང་བར་ཐོབ་པའི་ཡེ་ཤེས་ཀྱི་ཚུལ་གྱིས་མངོན་པར་བསྒྲུབས་པའི་བྱང་ཆུབ་
སེམས་དཔའི་སྤྱོད་པ་བསྒྲུབ་པ་མི་གཏོང་བས་བྱང་ཆུབ་སེམས་དཔའ་རྣམས་ཀྱི་ལམ་ནི་དེ་བཞིན་གཤེགས་པའི་སྟོབས་བཅུ་རབ་ཏུ་རྟོགས་པ་ལ་ཡང་དག་པར་བཏང་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལམ་སྟེ། དེ་དག་ལ་
གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པ་ཐམས་ཅད་ཀྱི་ལམ་ལ་མཁས་པ་བླ་ན་མེད་པ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་རྣམས་ཀྱི་ལམ་ནི་ཚད་མེད་པའོ། །ལམ་གྱི་ཚོགས་ནི་ཚད་
མེད་པའོ། །ལམ་བསྒོམ་པ་ནི་ཚད་མེད་པའོ། །ལམ་གྱི་རྒྱན་ནི་ཚད་མེད་པའོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་དེ་ལ་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལམ་ཚད་མེད་པ་སྟེ། བཅུ་གང་ཞེ་ན་འདི་ལྟར་ནམ་མཁའི་
དབྱིངས་ཚད་མེད་པ་དང་། མཐའ་དང་དབུས་མེད་པའི་ཆོས་ཀྱི་དབྱིངས་ཚད་མེད་པ་དང་། མི་ཟད་པའི་སེམས་ཅན་གྱི་ཁམས་ཚད་མེད་པ་དང་། མུ་མེད་པའི་འཇིག་རྟེན་གྱི་ཁམས་ཚད་མེད་པ་དང་། མི་ཟད་པའི་བསྐལ་པ་འགྲངས་པ་ཚད་མེད་པ་
དང་། འགྲོ་བ་ཐམས་ཅད་ཀྱི་ཐ་སྙད་མཐའ་ཡས་ཤིང་ཚད་མེད་པ་དང་། དེ་བཞིན་གཤེགས་པའི་སྐུ་ཚད་མེད་པ་དང་། དེ་བཞིན་གཤེགས་པའི་གསུང་གི་དབྱངས་ཚད་མེད་པ་དང་། དེ་བཞིན་གཤེགས་པའི་སྟོབས་ཚད་མེད་པ་དང་། ཐམས་ཅད་
མཁྱེན་པའི་ཡེ་ཤེས་ཚད་མེད་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལམ་ཚད་མེད་པ་རྣམས་སོ། །ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། ནམ་མཁའི་དབྱིངས་ཅི་ཙམ་དུ་ཚད་མེད་པ་དེ་ཙམ་དུ་ཚད་མེད་པའི་བྱང་ཆུབ་

སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་ཆོས་ཀྱི་དབྱིངས་མཐའ་དང་དབུས་མེད་པ་དེ་ལྟར་མཐའ་དང་དབུས་མེད་པར་བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་སེམས་ཅན་གྱི་ཁམས་མི་ཟད་པ་དེ་ལྟར་མི་ཟད་
པར་བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་འཇིག་རྟེན་གྱི་ཁམས་མུ་མེད་པ་དེ་ལྟར་མུ་མེད་པར་བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་བསྐལ་པ་གྲངས་སུ་བགྲང་ཞིང་བསྟན་པ་མི་ཟད་
པ་དེ་ལྟར་འགྲོ་བ་ཐམས་ཅད་མི་ཟད་པར་བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་འགྲོ་བ་ཐམས་ཅད་ཀྱི་ཐ་སྙད་མཐའ་ཡས་པ་དེ་ལྟར་འགྲོ་བ་ཐམས་ཅད་ཀྱི་སྒྲ་དང་ཐ་སྙད་ལ་འཇུག་པའི་ཡེ་ཤེས་ཀྱིས་མངོན་པར་བསྒྲུབས་པ་མཐའ་ཡས་
པར་བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་དེ་བཞིན་གཤེགས་པའི་སྐུ་ཚད་མེད་པ་དེ་ལྟར་འགྲོ་བ་དང་ཞིང་དང་དུས་དང་། སེམས་ཅན་དང་བསྐལ་པ་ཐམས་ཅད་དུ་རྒྱས་པར་འགེངས་ཞིང་ཚད་མེད་པར་བྱང་ཆུབ་སེམས་དཔས་ལམ་
གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་སངས་རྒྱས་ཀྱི་གསུང་གི་དབྱངས་ཚད་མེད་པ་དེ་ལྟར་བྱང་ཆུབ་སེམས་དཔས་ཚིག་གི་ལས་གཅིག་བརྗོད་པས་ཆོས་ཀྱི་དབྱིངས་མ་ལུས་པ་ཐམས་ཅད་དུ་རྒྱས་པར་ཁྱབ་ཅིང་སེམས་ཅན་གྱི་ཁམས་ཐམས་ཅད་གོ་བར་བྱེད་པའི་
ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་དེ་བཞིན་གཤེགས་པའི་སྟོབས་ཚད་མེད་པ་དེ་ལྟར་དེ་བཞིན་གཤེགས་པའི་སྟོབས་ཀྱིས་བསྟན་པའི་བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་ཐམས་ཅད་མཁྱེན་པའི་ཡེ་ཤེས་ཚད་
མེད་པ་དེ་ལྟར་ཚད་མེད་པར་བྱས་ཏེ། བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལམ་གྱི་ཚོགས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་

གཤེགས་པའི་ཡེ་ཤེས་མཐའ་དང་དབུས་མེད་པ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལམ་བསྒོམ་པ་སྟེ། བཅུ་གང་ཞེ་ན་འདི་ལྟར་ལུས་དང་ངག་དང་སེམས་ཀྱིས་མི་ལོངས་པ་མེད་པས་བླང་བ་མེད་པ་དང་། དོར་
བ་མེད་པ་བསྒོམ་པ་དང་། ཡང་དག་པ་ཇི་ལྟ་བ་བཞིན་དུ་འཇུག་པའི་ཡེ་ཤེས་དང་ལྡན་པས་བསྣན་པ་མེད་པ་དང་། དབྲི་བ་མེད་པར་བསྒོམ་པ་དང་། རང་བཞིན་གྱིས་འཇུག་པ་མེད་པས་བསྒོམ་པ་མེད་པ་དང་། རྣམ་པར་བསྒོམ་པ་མེད་པ་བསྒོམ་པ་དང་། མངོན་པར་ཞེན་པ་
ཐམས་ཅད་དང་བྲལ་བས་སྒྱུ་མ་དང་རྨི་ལམ་དང་མིག་ཡོར་དང་། སྒྲ་བརྙན་དང་གཟུགས་བརྙན་དང་སྨིག་རྒྱུ་དང་ཆུའི་ཟླ་བ་ལྟ་བུར་བསྒོམ་པ་དང་། ཁམས་གསུམ་པའི་བསོད་ནམས་བལྟ་བས་བསྩགས་པ་བསྩལ་བའི་ཕྱིར་སྟོང་པ་ཉིད་དང་། མཚན་མ་མེད་པ་དང་
སྨོན་པ་མེད་པ་དང་། མངོན་པར་འདུ་བྱ་བ་མེད་པ་བསྒོམ་པ་དང་། ཆོས་སུ་གདགས་པ་རྣམ་པར་དགོད་པ་དང་བྲལ་བས་བརྗོད་དུ་མེད་པ་དང་། བསྟན་དུ་མེད་པ་དང་སྨོས་སུ་མེད་པ་དང་། བཤད་དུ་མེད་པ་བསྒོམ་པ་དང་། ཆོས་ཐམས་ཅད་ལ་ཞུགས་པའི་ཡེ་ཤེས་
མངོན་སུམ་དང་ལྡན་པས། ཆོས་ཀྱི་དབྱིངས་ཐ་མི་དད་པ་བསྒོམ་པ་དང་། དེ་ཁོ་ན་ཉིད་དང་། དེ་བཞིན་ཉིད་ནམ་མཁའི་མཐའ་དང་མཉམ་པ་ཁོང་དུ་ཆུད་པས་དེ་བཞིན་ཉིད་དང་། ཡང་དག་པའི་མཐའ་མ་ཉམས་པར་བསྒོམ་པ་དང་། མངོན་པར་འདུ་བྱེད་པའི་
སྟོབས་རྒྱུན་མི་འཆད་པའི་ཕྱིར་བྱང་ཆུབ་སེམས་དཔའི་ཡེ་ཤེས་ཡངས་པ་བསྒོམ་པ་དང་། ཆོས་ཐམས་ཅད་མངོན་སུམ་དུ་གྱུར་ཏེ། ཐེ་ཙོམ་མེད་པས་དེ་བཞིན་གཤེགས་པའི་སྟོབས་བཅུ་དང་། མི་བསྙེངས་པ་བཞི་དང་སོ་སོ་ཡང་དག་པར་རིག་པ་དང་།
ཐམས་ཅད་མཁྱེན་པའི་ཡེ་ཤེས་དང་མཚུངས་པ་མེད་པ་བསྒོམ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལམ་བསྒོམ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཐམས་ཅད་མཁྱེན་པའི་ཡེ་ཤེས་བསྒོམ་

པ་ལ་མཁས་པ་བླ་ན་མེད་པ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལམ་གྱི་རྒྱན་ཏེ་བཅུ་གང་ཞེ་ན། ཀྱེ་རྒྱལ་བའི་སྲས། འདི་ལ་བྱང་ཆུབ་སེམས་དཔའ་འདོད་པའི་ཁམས་
ནས་ཀྱང་མི་གཡོ་ལ། གཟུགས་དང་གཟུགས་མེད་པ་ལ་སྤྱོད་པའི་བསམ་གཏན་དང་། རྣམ་པར་ཐར་པ་དང་ཏིང་ངེ་འཛིན་དང་སྙོམས་པར་འཇུག་པ་ལ་སྙོམས་པར་འཇུག་ཀྱང་། དེ་དག་གི་དབང་གིས་མི་སྐྱེ་བ་འདི་ནི་ལམ་གྱི་རྒྱན་དང་པོའོ། །ཀྱེ་རྒྱལ་བའི་སྲས་
གཞན་ཡང་བྱང་ཆུབ་སེམས་དཔའ་ཉན་ཐོས་ཀྱི་ལམ་མངོན་སུམ་དུ་གྱུར་པའི་ཡེ་ཤེས་ལ་ཞུགས་ཀྱང་ལམ་དེས་འབྱུང་བ་འང་མ་ཡིན་པ་འདི་ནི་ལམ་གྱི་རྒྱན་གཉིས་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་རང་སངས་རྒྱས་ཀྱི་ལམ་ལ་མངོན་སུམ་དུ་
གྱུར་པའི་ཡེ་ཤེས་སྣང་བ་ལ་མཁས་ཀྱང་སྙིང་རྗེ་ཆེན་པོའི་སྟོབས་རྒྱུན་མི་གཅོད་པ་འདི་ནི་ལམ་གྱི་རྒྱན་གསུམ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་གཡོག་འཁོར་མང་པོ་དང་ལྡན་ཞིང་གཡོག་འཁོར་ལྷ་དང་མིའི་རྣམ་པར་དག་པ་དང་ལྡན་ཞིང་།
ལྷའི་བུ་མོ་བརྒྱ་སྟོང་གིས་རོལ་མོ་བརྡུང་བ་དང་དཀྲོལ་བའི་སྒྲ་ཕྱུང་སྟེ་བརྗོད་པ་ལ་སྤྱོད་ཀྱང་བྱང་ཆུབ་སེམས་དཔའི་ལམ་དང་ལྡན་པའི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་མི་འདོར་བ་འདི་ནི་ལམ་གྱི་རྒྱན་བཞི་པའོ། །
ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འགྲོ་བ་ཐམས་ཅད་ཀྱི་རྩེ་རྒལ་དཀའ་དགོད་པ་དང་། སེམས་ཅན་དང་འདྲེས་ཤིང་འབུར་ལྡོག་པ་བྱེད་ཀྱང་སེམས་ཀྱི་སྐད་ཅིག་གཅིག་ལ་ཡང་བྱང་ཆུབ་སེམས་དཔའི་ཏིང་ངེ་འཛིན་མཉམ་པ་ཉིད་མི་འདོར་བ་འདི་ནི་ལམ་གྱི་
རྒྱན་ལྔ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འཇིག་རྟེན་གྱི་ཆོས་ཐམས་ཅད་དང་མ་འདྲེས་ཤིང་འཇིག་རྟེན་གྱི་ཕ་རོལ་ཏུ་ཕྱིན་པ་ཡིན་ཡང་། སེམས་ཅན་བསྒྲལ་བའི་ཕྱིར་ཕ་རོལ་ཏུ་མི་འགྲོ་བའི་ལམ་ཡང་མི་གཏོང་བ་འདི་ནི་ལམ་གྱི་རྒྱན་དྲུག་

པའོ། ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཡང་དག་པ་ཇི་ལྟ་བ་བཞིན་གྱི་ཡེ་ཤེས་སྣང་བ་ལ་ཞུགས་པའི་ལམ་ལ་གནས་ཀྱང་ལམ་ངན་པར་ཞུགས་པའི་སེམས་ཅན་ཕྱིར་བཟློག་པའི་ཕྱིར་ལམ་མ་ཡིན་པ་དང་། ལམ་ངན་པ་ཡང་གནོན་ལ། ལམ་
དེས་འཁོར་བ་འཛིན་པའང་མ་ཡིན་ཏེ། དེས་དག་པར་ཡང་མི་སེམས་པ་འདི་ནི་ལམ་གྱི་རྒྱན་བདུན་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་རྟག་ཏུ་ཚུལ་ཁྲིམས་ལེགས་པར་བསྲུངས་པ་དང་ལྡན་ཞིང་དེ་བཞིན་གཤེགས་པའི་ཚུལ་ཁྲིམས་རྣམ་
པར་དག་པ་ལ་རྟེན་པས། ལུས་དང་ངག་དང་ཡིད་ཀྱི་ལས་ཀྱི་མཐའ་ཁ་ན་མ་ཐོ་བ་མེད་པ་དང་ལྡན་ཡང་ཚུལ་ཁྲིམས་ངན་པ་དང་ལྡན་པའི་སེམས་ཅན་ཡོངས་སུ་སྨིན་པར་བྱ་བའི་ཕྱིར་སོ་སོའི་སྐྱེ་བོ་ཐ་མལ་པའི་སྤྱོད་པ་ཐམས་ཅད་སྟོན་ཅིང་། བྱང་ཆུབ་སེམས་དཔའི་
ལམ་ལ་རྟེན་པས། བསོད་ནམས་ཀྱི་ཚོགས་རྣམ་པར་དག་པ་ཐམས་ཅད་ཡོངས་སུ་རྫོགས་པ་ཡིན་ཡང་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དང་། མི་ཁོམ་པ་དང་དབུལ་བར་སྐྱེས་པའི་ལམ་དུ་ཞུགས་པའི་སེམས་
ཅན་ཐམས་ཅད་རྣམ་པར་བཟློག་པའི་ཕྱིར། དེ་དག་གི་ལམ་དུ་སྐྱེས་པ་ཡང་སྟོན་ལ། ལམ་དེ་དག་ལ་ཡང་དག་པར་གཞོལ་བ་ཡང་མ་ཡིན་པ་འདི་ནི་ལམ་གྱི་རྒྱན་བརྒྱད་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་
ལ་གཞན་གྱི་དྲིང་མི་འཇོག་ཅིང་ཐོགས་པ་མེད་པའི་སྤོངས་པ་ཐོབ་པ་སངས་རྒྱས་ཀྱི་ཆོས་ཐམས་ཅད་ལ་ཡེ་ཤེས་སྣང་བས་རྣམ་པར་ལྟ་བ། དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་པ། སངས་རྒྱས་ཐམས་ཅད་ཀྱི་ཆོས་ཀྱི་སྐུ་དང་། ལུས་གཅིག་ཏུ་གྱུར་
པ་སེམས་ཅན་ཐམས་ཅད་ཀྱི་ཆོས་ཀྱི་སྙིང་པོའི་ཚུལ་ཅན་དགོངས་པའི་སྣང་བ་ཁོང་དུ་ཆུད་པ། ཐེག་པ་ཐམས་ཅད་ཀྱི་མཉམ་པ་ཉིད་ལ་རབ་ཏུ་གནས་པ་སངས་རྒྱས་ཐམས་ཅད་ཀྱི་སྤྱོད་ཡུལ་ལ་མངོན་པར་མོས་པ་འགྲོ་བ་ཐམས་ཅད་ཀྱི་ཡིད་དུ་འོང་བ། སེམས་

ཅན་གྱི་ཁམས་ཐམས་ཅད་ཀྱིས་ངོར་ལྟ་བ། འགྲོ་བ་ཐམས་ཅད་ཀྱི་སློབ་དཔོན་དུ་བྱ་བ་ཡིན་ཡང་། ཆོས་ཡོངས་སུ་བཙལ་བར་བྱ་བ་རྒྱུན་མི་གཅོད་ཅིང་ངོ་མཚར་གྱིས་ཡོངས་སུ་ཟིན་པར་སྣང་བས་སྲི་ཞུའི་ལས་ཐམས་ཅད་ལ་གནས་ཏེ།
མཁན་པོ་དང་སློབ་དཔོན་དུ་སྟོན་ཀྱང་དེ་ཉིད་འགྲོ་བ་ཐམས་ཅད་ཀྱི་སློབ་དཔོན་དུ་འགྱུར་བ་ཡིན་ཏེ། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་རྣམས་ནི་ཐབས་མཁས་པ་དང་ལྡན་པར་བྱང་ཆུབ་སེམས་དཔའི་ལམ་ལ་ཤིན་ཏུ་གནས་པ་ཡིན་པས། དེ་དག་ནི་ཐབས་
གང་དང་གང་གིས་སེམས་ཅན་རྣམས་འདུལ་བར་འགྱུར་བ་དེ་དང་དེ་ཐབས་སེམས་ཅན་རྣམས་ལ་ཡོངས་སུ་སྟོན་ཏེ། འདི་ནི་ལམ་གྱི་རྒྱན་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་དགེ་བའི་རྩ་བ་ཐམས་ཅད་ཡོངས་སུ་འདུས་ཤིང་བྱང་
ཆུབ་སེམས་དཔའི་སྤྱོད་པ་དང་རྫུ་འཕྲུལ་ཐམས་ཅད་ཐོབ་པ། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བས་མངོན་པར་དབང་བསྐུར་བ། ཆོས་ཐམས་ཅད་ལ་དབང་བའི་དབང་ཕྱུག་གི་ཕ་རོལ་ཏུ་ཕྱིན་པའི་མཆོག་ཐོབ་པ། ཆགས་པ་མེད་ཅིང་དྲི་མ་མེད་པའི་ཐབས་དང་ལྡན་པ། འཇིག་
རྟེན་གྱི་ཁམས་ཐམས་ཅད་དུ་ཐོགས་པ་མེད་པར་དེ་བཞིན་གཤེགས་པའི་སྐུ་ཡང་དག་པར་སྟོན་པ། ཆོས་ཀྱི་འཁོར་ལོ་ཐོགས་པ་མེད་པར་བསྐོར་བའི་བྱིན་གྱི་རླབས་དང་ལྡན་པ། འཇིག་རྟེན་གྱི་ཁམས་ཐམས་ཅད་དུ་ཁྱབ་པའི་ལུས་དང་གཟུགས་བདོག་པ། ཆོས་
ཐམས་ཅད་ཀྱི་དབང་ཕྱུག་གི་ཕ་རོལ་ཏུ་ཕྱིན་པ་དམ་པ་དང་ལྡན་པ། བྱང་ཆུབ་སེམས་དཔའི་དབང་ཐམས་ཅད་རབ་ཏུ་ཐོབ་པ། འགྲོ་བ་ཐམས་ཅད་ཀྱི་ཞིང་དུ་སྐྱེ་བ་ཡོངས་སུ་སྟོན་པ་ལ་མཁས་པ་འདས་པ་དང་མ་འོངས་པ་དང་། ད་ལྟར་བྱུང་བའི་དེ་བཞིན་གཤེགས་
པ་ཐམས་ཅད་དང་ཡུལ་གཅིག་ཏུ་གྱུར་པ་འདི་ཡིན་ལ། བྱང་ཆུབ་སེམས་དཔའི་སྤྱོད་པའང་རྒྱུན་མི་གཅོད་ཅིང་། བྱང་ཆུབ་སེམས་དཔའི་ཆོས་ཉིད་ཀྱང་རྣམ་པར་མི་སྤོང་། བྱང་ཆུབ་སེམས་དཔའི་ལས་ལས་ཀྱང་རྣམ་པར་མི་ལྡོག །བྱང་ཆུབ་སེམས་དཔའི་

ལམ་ལས་ཀྱང་ཕྱིར་མི་ལྡོག །བྱང་ཆུབ་སེམས་དཔའི་སྤྱོད་པའང་རྒྱུན་མི་གཅོད། བྱང་ཆུབ་སེམས་དཔའི་ཉེ་བར་ལེན་པའང་འཆད་པར་མི་བྱེད། བྱང་ཆུབ་སེམས་དཔའི་ཐབས་མཁས་པ་ལས་ཀྱང་ཕྱིར་མི་ལྡོག །བྱང་ཆུབ་སེམས་དཔའི་བྱ་བ་ཡང་ཐོགས་པར་མི་
བྱེད། བྱང་ཆུབ་སེམས་དཔའི་མངོན་པར་འདུ་བྱེད་པའི་སྟོབས་ཀྱིས་ཀྱང་ཡོངས་སུ་སྐྱོ་བ་མེད་ཅིང་བྱང་ཆུབ་སེམས་དཔའི་སྤྱོད་པའི་བྱིན་གྱི་རླབས་ལས་ཀྱང་རིང་དུ་འཕང་བ་མ་ཡིན་ཏེ། ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། དེ་ལྟར་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་
པ་དང་། ཐམས་ཅད་མཁྱེན་པ་ཉིད་ཀྱི་སྒོ་ལ་རྣམ་པར་ལྟ་བ་དེ་ལྟ་བུས་ནི་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མྱུར་དུ་འབྱུང་བའི་ཕྱིར་ཏེ། འདི་ནི་ལམ་གྱི་རྒྱན་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་
རྣམས་ཀྱི་ལམ་གྱི་རྒྱན་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ལམ་རིན་པོ་ཆེའི་རྒྱན་བླ་ན་མེད་པ་ཐོབ་པར་གྱུར་ཀྱང་། བྱང་ཆུབ་སེམས་དཔའི་ལམ་གྱི་རྒྱུན་མི་གཅོད་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་
ཆུབ་སེམས་དཔའ་རྣམས་ཀྱི་རྐང་པ་སྟེ། བཅུ་གང་ཞེ་ན། འདི་ལྟར་སྨོན་ལམ་ཆེན་པོའི་ཁྱད་པར་ཡོངས་སུ་བསྡུ་བ་ཤིན་ཏུ་རྫོགས་པར་བྱ་བའི་ཕྱིར་ཚུལ་ཁྲིམས་ཀྱི་རྐང་པ་དང་། བྱང་ཆུབ་ཀྱི་ཡན་ལག་ཐམས་ཅད་ཡང་དག་པར་བསྡུ་བ་ལས་ཕྱིར་མི་ལྡོག་པའི་ཕྱིར་བརྩོན་
འགྲུས་ཀྱི་རྐང་པ་དང་། སེམས་ཅན་རྣམས་བསམ་པ་ཇི་ལྟ་བ་བཞིན་དུ་ཡོངས་སུ་ཚིམ་པར་བྱ་བའི་ཕྱིར་མངོན་པར་ཤེས་པའི་རྐང་པ་དང་། སངས་རྒྱས་ཀྱི་ཞིང་ཐམས་ཅད་དུ་འགྲོ་ཡང་ཞིང་གཅིག་ནས་མི་གཡོ་བའི་ཕྱིར་རྫུ་འཕྲུལ་གྱི་རྐང་པ་དང་། ཁྱད་པར་དུ་འགྲོ་བའི་
ཕྱིར་ལྷག་པའི་བསམ་པའི་རྐང་པ་དང་། བརྩམས་པ་ཐམས་ཅད་མཐར་ཕྱིན་པར་བྱ་བའི་ཕྱིར་དམ་བཅས་པ་བརྟན་པའི་རྐང་པ་དང་། བླ་མ་ཐམས་ཅད་ཀྱི་བསྒོ་བ་ལས་འགལ་བར་མི་བྱེད་པའི་ཕྱིར་མཐུན་པར་འཛིན་པའི་རྐང་པ་དང་། དེ་བཞིན་གཤེགས་པ་ཐམས་

ཅད་ཀྱིས་གསུངས་པ་ཡང་དག་པར་གཟུང་བས་མི་སྐྱོ་བའི་ཕྱིར་ཆོས་མཉན་པ་མི་ངོམས་པར་ཚོལ་བའི་རྐང་པ་དང་། ཚངས་པའི་གནས་ནས་འཁོར་གྱི་དཀྱིལ་འཁོར་ཐམས་ཅད་དུ་འགྲོ་བར་སྒྱིད་ལུག་པ་མེད་པའི་ཕྱིར་ཆོས་ཀྱི་ཆར་འབེབས་
པའི་རྐང་པ་དང་། ཐམས་ཅད་དུ་ཁ་ན་མ་ཐོ་བ་མེད་པའི་ཕྱིར་བྱང་ཆུབ་སེམས་དཔའི་སྤྱོད་པ་ཆེན་པོ་ལ་ནན་ཏན་དུ་བྱེད་པའི་རྐང་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྐང་པ་སྟེ། དེ་དག་ལ་གནས་ཤིང་བྱང་ཆུབ་སེམས་
དཔའ་རྣམས་དེ་བཞིན་གཤེགས་པའི་ཞབས་ཀྱི་མཆོག་གིས། འཇིག་རྟེན་གྱི་ཁམས་ཐམས་ཅད་དུ་འགྲོ་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལག་པ་སྟེ། བཅུ་གང་ཞེ་ན་འདི་ལྟར་དེ་
བཞིན་གཤེགས་པ་ཐམས་ཅད་ཀྱིས་གསུངས་པ་ལ་གཅིག་ཏུ་མོས་ཤིང་ཡིད་ཆེས་པས་མཐར་ཕྱིན་པར་བྱ་བའི་ཕྱིར་དད་པའི་ལག་པ་དང་། སློང་བ་ཐམས་ཅད་ཡིད་བཞིན་དུ་ཚིམ་པར་བྱ་བའི་ཕྱིར་གཏོང་བ་རབ་ཏུ་གཏོང་བའི་ལག་པ་དང་། ལག་པ་གཡས་
པ་བརྐྱང་བའི་ཕྱིར་ཚུར་ཤོག་བདེ་བར་འོངས་སམ་ཞེས་འདོར་ཏེ། གསོང་པོར་སྨྲ་བའི་ལག་པ་དང་། བསོད་ནམས་བསགས་པ་རྣམ་པར་སྤེལ་བ་ལས་མི་གཡོ་བའི་ཕྱིར་དེ་བཞིན་གཤེགས་པ་ཐམས་ཅད་མཆོད་ཅིང་རིམ་གྲོ་བྱེད་པའི་ལག་པ་དང་། སེམས་
ཅན་ཐམས་ཅད་ཀྱི་ཐེ་ཙོམ་གཅད་པའི་ཕྱིར་ཐོས་པ་ཐམས་ཅད་ལ་མཁས་པའི་ལག་པ་དང་། འདོད་པའི་འདམ་དུ་ཐོགས་པའི་སེམས་ཅན་གྱི་ཁམས་ལ་ལག་པ་རིང་དུ་བརྐྱང་སྟེ། འཇུ་བར་རྙེབ་པའི་ཕྱིར་ཁམས་གསུམ་དང་བྲལ་ཞིང་ཤིན་ཏུ་འབྱུང་བར་
བྱེད་པའི་ལག་པ་དང་། ཆུ་བོ་ཆེན་པོ་བཞིས་ཁྱེར་བ་ལས་ལག་པ་རིང་དུ་བརྐྱང་ཞིང་གདོན་བའི་ཕྱིར་བདེ་བའི་ཐང་ལ་གཞོག་པའི་ལག་པ་དང་། འགྲོ་བ་ཐམས་ཅད་ལ་གནོད་པ་མེད་པར་བསྟན་པའི་ཆོས་རབ་ཏུ་བསྟན་པའི་ཕྱིར་ཡང་དག་པར་སྦྱོར་བའི་ཆོས་ལ་སློབ་

དཔོན་གྱིས་མི་འཆབ་པའི་ལག་པ་དང་། ལུས་དང་སེམས་ཀྱི་ནད་རབ་ཏུ་བསལ་བའི་ཕྱིར་འཇིག་རྟེན་པ་དང་། འཇིག་རྟེན་ལས་འདས་པའི་གཙུག་ལག་ཐམས་ཅད་ཤེས་པའི་ལག་པ་དང་། ཉོན་མོངས་པའི་མུན་པ་ཐམས་ཅད་དང་བྲལ་བའི་ཆོས་
ཀྱི་སྣང་བ་མཚུངས་པ་མེད་པ་ཡོངས་སུ་བསྟན་པའི་ཕྱིར་ཤེས་རབ་དང་ཡེ་ཤེས་རིན་པོ་ཆེའི་ལག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་
གཤེགས་པའི་ཕྱག་འཇིག་རྟེན་གྱི་ཁམས་ཐམས་ཅད་ཀུན་ནས་ཡོག་པར་སྐྱོབ་པ་བླ་ན་མེད་པ་འཐོབ་པར་འགྱུར་བ་དག་གོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་ཉི་ཤུ་པ། །
ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལྟོ་སྟེ། བཅུ་གང་ཞེ་ན་འདི་ལྟར་བསམ་པ་དག་པས་གཡོ་བ་མེད་པའི་ལྟོ་དང་དྲང་བས་སྒྱུ་མེད་པའི་ལྟོ་དང་། ཐིབས་པོ་མེད་པས་འཆོས་པ་མེད་པའི་ལྟོ་དང་། དངོས་པོ་ཐམས་ཅད་ལ་མངོན་
བར་ཆགས་པ་མེད་པས་ཡུལ་ལ་མི་འཛིན་པའི་ལྟོ་དང་། ཤེས་པའི་ཕྱིར་ཉོན་མོངས་པ་ཐམས་ཅད་སེལ་བའི་ལྟོ་དང་། སྐྱོན་མེད་པའི་ཕྱིར་སེམས་དག་པའི་ལྟོ་དང་། ཆོས་ཇི་ལྟ་བ་བཞིན་དུ་ཡིད་ལ་བྱ་བའི་ཕྱིར་ཁ་ཟས་ཐམས་ཅད་ཡོངས་སུ་ཤེས་པར་བྱ་བ་
སོ་སོར་རྟོག་པའི་ལྟོ་དང་། རྟེན་ཅིང་འབྲེལ་བར་འབྱུང་བ་རྗེས་སུ་རྟོགས་པར་བྱ་བའི་ཕྱིར་མངོན་པར་འདུ་མི་བྱེད་པ་སོ་སོར་རྟོག་པའི་ལྟོ་དང་། བསམ་པ་ཤིན་ཏུ་སྨིན་པས་འབྱུང་བ་ཐམས་ཅད་ཤེས་པའི་ལྟོ་དང་། སེམས་ཅན་ཐམས་ཅད་སངས་རྒྱས་
ཀྱི་སྐུའི་ནང་དུ་ཆུད་པ་ཁོང་དུ་ཆུད་པའི་ཕྱིར་དྲི་མ་མཐའ་ཡས་པའི་ལྟ་བ་ཐམས་ཅད་དང་བྲལ་བའི་ལྟོའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལྟོ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་

གཤེགས་པའི་སྐུ། འགྲོ་བ་ཐམས་ཅད་ཡོངས་སུ་འཛིན་པ་བླ་ན་མེད་པ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་པོ་སྟེ། བཅུ་གང་ཞེ་ན་འདི་ལྟར་དེ་བཞིན་གཤེགས་པ་ཐམས་ཅད་ཀྱི་
ཚུལ་གྱི་མཐུ་ཚད་མེད་པ་ཡོངས་སུ་བསྐྱེད་པའི་ཕྱིར་བྱང་ཆུབ་སེམས་དཔའ་རྣམས་ཀྱི་སྙིང་པོ། སངས་རྒྱས་ཀྱི་རིགས་རྒྱུན་མི་གཅོད་པར་ཀུན་ནས་གནས་པ་དང་། ཡེ་ཤེས་སྣང་བ་ཆེན་པོ་ཡོངས་སུ་བསྟན་པའི་ཕྱིར་བྱང་ཆུབ་སེམས་དཔའི་སྙིང་པོ་ཆོས་ཀྱི་རིགས་རབ་ཏུ་གསལ་བར་
བྱེད་པར་ཀུན་ནས་གནས་པ་དང་། ཕྱིར་མི་ལྡོག་པའི་འཁོར་ལོ་ཡང་དག་པར་གཞོལ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སྙིང་པོ་དགེ་འདུན་གྱི་རིགས་ཡོངས་སུ་སྡུད་པར་ཀུན་ནས་གནས་པ་དང་། དུས་ཇི་ལྟ་བ་བཞིན་ལས་མི་འདའ་བར་བྱ་བའི་ཕྱིར་བྱང་
ཆུབ་སེམས་དཔའ་རྣམས་ཀྱི་སྙིང་པོ་ཆོས་ཐམས་ཅད་ངེས་པར་གླེང་བར་བྱེད་པ་དང་། རྒྱུ་གཅིག་ནས་གཅིག་ཏུ་བརྒྱུད་པའི་རྒྱུན་མི་འཆད་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སྙིང་པོ་ངེས་པ་མེད་པར་ཡོངས་སུ་སྨིན་པར་བྱེད་པར་གནས་པ་དང་། མ་འོངས་པའི་
རྒྱུ་སྐྱོན་མེད་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སྙིང་པོ་སེམས་ཅན་ལོག་པར་ངེས་པ་རྣམས་ལ་སྙིང་རྗེ་ཆེན་པོ་སྐྱེ་བར་ཀུན་ནས་གནས་པ་དང་བདུད་ཀྱི་སྡེ་ཐམས་ཅད་བཏུལ་ཏེ། དགེ་བའི་རྩ་བ་མི་འཕྲོགས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་
ཀྱི་སྙིང་པོ་དེ་བཞིན་གཤེགས་པའི་སྟོབས་བཅུ་ཐུབ་པ་མེད་པའི་རྒྱུ་ཡོངས་སུ་རྫོགས་པར་བྱེད་པར་ཀུན་ནས་གནས་པ་དང་། འགྲོ་བ་མ་ལུས་པ་ཐམས་ཅད་ཡོངས་སུ་ཚིམ་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སྙིང་པོ་མི་འཇིགས་པ་ཆེན་པོའི་སེང་གེ་དང་། ཁྱུ་མཆོག་
གི་ང་རོ་འབྱིན་པར་ཀུན་ནས་གནས་པ་དང་། ཐམས་ཅད་དུ་ཡེ་ཤེས་ཡང་དག་པར་གཞོལ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སྙིང་པོ་སངས་རྒྱས་ཀྱི་ཆོས་མ་འདྲེས་པ་བཅྭོ་བརྒྱད་འཐོབ་པའི་ཕྱིར་ཀུན་ནས་གནས་པ་དང་། སྐད་ཅིག་གཅིག་ཏུ་མི་མཉམ་པར་

མེད་པར་ཞུགས་པས། བྱང་ཆུབ་སེམས་དཔའ་རྣམས་ཀྱི་སྙིང་པོ་ཞིང་ཐམས་ཅད་དང་། ཆོས་ཐམས་ཅད་དང་སངས་རྒྱས་ཐམས་ཅད་མཉམ་པ་ཉིད་དུ་ཁོང་དུ་ཆུད་པར་གནས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་པོ་སྟེ། དེ་དག་
ལ་གནས་ཤིང་བྱང་ཆུབ་སེམས་དཔའ་རྣམས་དགེ་བའི་རྩ་བ་ཐམས་ཅད་མ་ལོག་པས་དེ་བཞིན་གཤེགས་པའི་ཡེ་ཤེས་ཆེན་པོའི་སྙིང་པོ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་སྟེ། བཅུ་གང་
ཞེ་ན་བརྩམས་པ་ཐམས་ཅད་མཐར་ཕྱིན་པར་བྱ་བའི་ཕྱིར་ཞེ་ནོན་པའི་སྙིང་དང་། མཚན་དང་དཔེ་བྱད་བཟང་པོའི་བསོད་ནམས་ཀྱི་ཚོགས་ཡོངས་སུ་བསྡུ་བའི་ཕྱིར་སེམས་ཞུམ་པ་མེད་པའི་སྙིང་དང་། བདུད་ཀྱི་སྡེ་ཐམས་ཅད་རབ་ཏུ་གཞོམ་པའི་ཕྱིར་རྣམ་པར་གནོན་པ་ཆེན་
པོའི་སྙིང་དང་། ཉོན་མོངས་པ་ཐམས་ཅད་ཀྱིས་མི་ཚུགས་པའི་ཕྱིར་ཚུལ་བཞིན་དུ་སྦྱོར་བའི་སྙིང་དང་། སྙིང་པོ་བྱང་ཆུབ་ཀྱི་བར་དུ་ཕྱིན་པར་བྱ་བའི་ཕྱིར་ཕྱིར་མི་འགྱུར་ཞིང་། ཕྱིར་མི་ལྡོག་པའི་སྙིང་དང་། སེམས་འཕོ་བ་མེད་པར་ཁོང་དུ་ཆུད་པས་མངོན་
པར་ཆགས་པ་མེད་པའི་ཕྱིར་རང་བཞིན་གྱི་འོད་གསལ་བའི་སྙིང་དང་། ཇི་ལྟར་མོས་པའི་ཚུལ་བཞིན་དུ་རྣམ་པར་ཐར་པ་འཐོབ་པ་བྱ་བའི་ཕྱིར། སེམས་ཅན་གྱི་ཚུལ་ཤེས་པའི་སྙིང་དང་། ཐེག་པ་གཞན་ལ་མོས་པ་མེད་པར་སེམས་ཅན་གྱི་ཁམས་ཡོངས་སུ་བསྐྱབ་
པའི་ཕྱིར། ཚངས་པའི་རྣམ་པར་སྤྱོད་པ་རྒྱ་ཆེན་པོས་སངས་རྒྱས་ཀྱི་ཆོས་ལ་འཇུག་པའི་སྙིང་དང་། ལྟ་བའི་མཚན་མས་ཁམས་གསུམ་ལ་མངོན་པར་ཆགས་པ་མེད་པར་བྱ་བའི་ཕྱིར་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་
པར་འདུ་བྱ་བ་མེད་པའི་སྙིང་དང་། སེམས་ཅན་ཐམས་ཅད་བདུད་དུ་གྱུར་པའི་སྒོས་བདུད་ཐམས་ཅད་འོངས་པར་གྱུར་ཀྱང་། སྤུ་གཅིག་ཀྱང་མི་གཡོ་བས་དཔལ་གྱི་བེའུས་བརྒྱན་ཅིང་རྡོ་རྗེའི་ཁམས་ལྟར་སྲ་ཞིང་བརྟན་པའི་སྙིང་པོ་དམ་པ་དང་ལྡན་པའི་སྙིང་ངོ་། །ཀྱེ་

རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་སྣང་བ་ཆེན་པོའི་སྙིང་པོ་དང་ལྡན་པའི་སྙིང་བླ་ན་མེད་པ་འཐོབ་པར་འགྱུར་བ་
དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གོ་ཅ་སྟེ། བཅུ་གང་ཞེ་ན་འདི་ལྟར་འགྲོ་བ་ཐམས་ཅད་ཡོངས་སུ་བསྐྱབ་པའི་ཕྱིར་བྱམས་པ་ཆེན་པོའི་གོ་ཅ་དང་། མི་དགའ་བ་ཐམས་ཅད་བཟོད་པར་བྱ་བའི་ཕྱིར་སྙིང་རྗེ་ཆེན་པོའི་
གོ་ཅ་དང་། བརྩམས་པ་ཐམས་ཅད་མཐར་ཕྱིན་པར་བྱ་བའི་ཕྱིར་སྨོན་ལམ་གྱི་གོ་ཅ་དང་། སངས་རྒྱས་ཐམས་ཅད་ཀྱི་རྒྱན་འབྱུང་བར་བྱ་བའི་ཕྱིར་ཡོངས་སུ་བསྔོ་བའི་གོ་ཅ་དང་། འགྲོ་བ་ཐམས་ཅད་ཉེ་བར་འཚོ་བར་བྱ་བའི་ཕྱིར་བསོད་ནམས་ཀྱི་གོ་ཅ་དང་། འགྲོ་བ་ཐམས་
ཅད་བསྒྲལ་བའི་ཕྱིར་ཕ་རོལ་ཏུ་ཕྱིན་པའི་གོ་ཅ་དང་། འགྲོ་བ་ཐམས་ཅད་ཀྱི་ཉོན་མོངས་པའི་མུན་པ་རབ་ཏུ་ཞི་བར་བྱ་བའི་ཕྱིར་ཡེ་ཤེས་ཀྱི་གོ་ཅ་དང་། སྒོ་ཀུན་དང་ལྡན་པའི་དགེ་བའི་རྩ་བ་མངོན་པར་བསྒྲུབ་པའི་ཕྱིར་ཐབས་མཁས་པའི་གོ་ཅ་དང་། ཐེག་པ་གཞན་
ལ་མོས་པ་མེད་པའི་ཕྱིར་ཐམས་ཅད་མཁྱེན་པ་ཉིད་ཀྱི་སེམས་བརྟན་ཞིང་འཁྲུག་པ་མེད་པའི་གོ་ཅ་དང་། ཆོས་ཀྱི་རློམ་སེམས་མེད་པས་གཅིག་ཏུ་ངེས་པའི་གོ་ཅའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་གོ་ཅ་སྟེ། དེ་དག་
ལ་གནས་ཤིང་བྱང་ཆུབ་སེམས་དཔའ་རྣམས་བདུད་ཀྱི་སྡེ་ཐམས་ཅད་སྤ་འགོང་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མཚོན་ཅ་སྟེ། བཅུ་གང་ཞེ་ན། འདི་ལྟར་སེར་སྣའི་སྐྱོན་རབ་ཏུ་གཞོམ་
པའི་ཕྱིར་གཏོང་བའི་མཚོན་ཅ་དང་། ཚུལ་ཁྲིམས་ངན་པ་ཐམས་ཅད་བསལ་བའི་ཕྱིར་ཚུལ་ཁྲིམས་ཀྱི་མཚོན་ཅ་དང་། རྣམ་པར་རྟོག་པ་ཐམས་ཅད་བསྩལ་བའི་ཕྱིར་ཆོས་མཉམ་པ་ཉིད་ཀྱི་མཚོན་ཅ་དང་། འགྲོ་བ་ཐམས་ཅད་ཀྱི་ཉོན་མོངས་པ་ཡོངས་སུ་གཅད་པའི་ཕྱིར་

ཤེས་རབ་དང་ཡེ་ཤེས་ཀྱི་མཚོན་ཅ་དང་། འཚོ་བ་ཐམས་ཅད་ལ་ཁ་ན་མ་ཐོ་བ་མེད་པར་བྱ་བའི་ཕྱིར། ཡང་དག་པར་འཚོ་བའི་མཚོན་ཅ་དང་། སྒོ་ཐམས་ཅད་ཡོངས་སུ་བསྟན་པའི་ཕྱིར་ཐབས་མཁས་པའི་མཚོན་ཅ་དང་། ཉོན་མོངས་པའི་སྒོ་ནས་སེམས་ཅན་
བཟློག་པའི་ཕྱིར། འདོད་ཆགས་དང་། ཞེ་སྡང་དང་། གཏི་མུག་དང་། མདོར་བསྡུ་ན་ཉོན་མོངས་པ་ཐམས་ཅད་ཀྱི་མཚོན་ཅ་དང་། སྤྱོད་པ་རྒྱུན་མི་འཆད་པས་སེམས་ཅན་གྱི་ཁམས་ཡོངས་སུ་སྨིན་པར་བྱ་བའི་ཕྱིར་འཁོར་བའི་མཚོན་ཅ་དང་། མངོན་པར་
ཞེན་པ་ཐམས་ཅད་རབ་ཏུ་བསྩལ་བའི་ཕྱིར། ཆོས་ཚུལ་གཅིག་པ་བསྟན་པའི་མཚོན་ཅ་དང་། སྤྱོད་པའི་སྒོ་ལས་ཕྱིར་ཕྱོགས་སུ་མི་བལྟ་བའི་ཕྱིར་ཐམས་ཅད་མཁྱེན་པ་ཉིད་ཀྱི་མཚོན་ཅའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མཚོན་
ཅ་སྟེ། མཚོན་ཅ་དེ་དག་གིས་བྱང་ཆུབ་སེམས་དཔའ་རྣམས་སེམས་ཅན་ཐམས་ཅད་ཀྱི་སེམས་དང་བསམ་པ་ལ་ཡུན་རིང་པོའི་ཉེ་བར་ཉོན་མོངས་པ་དང་། བག་ལ་ཉལ་བ་ཡོད་པ་ཐམས་ཅད་རབ་ཏུ་འཇོམས་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་
ནི་བྱང་ཆུབ་སེམས་དཔའ་རྣམས་ཀྱི་མགོ་སྟེ། བཅུ་གང་ཞེ་ན། འདི་ལྟར་སྤྱི་གཙུག་ལྟར་མི་སྣང་བའི་ཕྱིར་མྱ་ངན་ལས་འདས་པའི་མགོ་དང་། ལྷ་དང་བཅས་པའི་འཇིག་རྟེན་ཐམས་ཅད་འདུད་པར་བྱ་བའི་ཕྱིར་བླ་མ་ལ་འདུད་པའི་མགོ་དང་། སྟོང་གསུམ་ཐམས་
ཅད་ཀྱི་བདག་པོར་འགྱུར་བར་བྱ་བའི་ཕྱིར་མོས་པ་ཡངས་པའི་མགོ་དང་། ཁམས་གསུམ་གྱིས་མཆོད་པར་བྱ་བའི་ཕྱིར་དགེ་བའི་རྩ་བ་ཐམས་ཅད་སྔོན་དུ་འགྲོ་བའི་མགོ་དང་། གཙུག་ཏོར་དང་ལྡན་པའི་སྤྱི་བོ་འཐོབ་པར་བྱ་བའི་ཕྱིར། སེམས་ཅན་ཐམས་ཅད་ཀྱི་
ཁུར་ཁྱེར་བའི་མགོ་དང་། ཐམས་ཅད་དུ་ཁྱད་པར་དུ་འགྲོ་བར་བྱ་བའི་ཕྱིར་གཞན་གྱི་ལྟུང་བ་ལ་བརྙས་པ་མེད་པའི་མགོ་དང་། སྤྱི་བོ་ལ་གནས་པའི་ཆོས་ཐོབ་པར་བྱ་བའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པའི་མགོ་དང་། སེམས་ཅན་ཐམས་ཅད་ཀྱི་མགོ་མཉམ་

པ་ཡོངས་སུ་བསྟན་པའི་ཕྱིར་ཡེ་ཤེས་དང་ཐབས་སུ་ལྡན་པའི་མགོ་དང་། འགྲོ་བ་ཐམས་ཅད་སློབ་པར་བྱ་བའི་ཕྱིར་སེམས་ཅན་ཐམས་ཅད་ཡོངས་སུ་སྨིན་པར་བྱེད་པའི་མགོ་དང་། དཀོན་མཆོག་གསུམ་གྱི་གདུང་རྒྱུན་མི་གཅད་པའི་ཕྱིར་
དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཚུལ་ཡོངས་སུ་སྡུད་པའི་མགོའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མགོ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་
པོ་སྤྱི་བོར་གྱུར་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མིག་སྟེ། བཅུ་གང་ཞེ་ན། འདི་ལྟར་གཟུགས་ཐམས་ཅད་བལྟ་བའི་ཕྱིར་ཤའི་མིག་དང་། སེམས་ཅན་ཐམས་
ཅད་བལྟ་བའི་ཕྱིར་ལྷའི་མིག་དང་། སེམས་ཅན་ཐམས་ཅད་ཀྱི་དབང་པོ་དང་ཡུལ་བལྟ་བའི་ཕྱིར་ཤེས་རབ་ཀྱི་མིག་དང་། ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་བལྟ་བའི་ཕྱིར་ཆོས་ཀྱི་མིག་དང་། དེ་བཞིན་གཤེགས་པའི་སྟོབས་བཅུ་བལྟ་བའི་ཕྱིར་སངས་རྒྱས་ཀྱི་མིག་
དང་། ཆོས་ཡོངས་སུ་ཤེས་པ་བལྟ་བའི་ཕྱིར་ཡེ་ཤེས་ཀྱི་མིག་དང་། སངས་རྒྱས་ཀྱི་མཐུའི་འོད་སྣང་བ་བལྟ་བའི་ཕྱིར། སྣང་བའི་མིག་དང་། མྱ་ངན་ལས་འདའ་བར་བྱ་བའི་ཕྱིར་མངོན་པར་བསྒྲུབ་པའི་མིག་དང་། བསྒྲིབས་པ་མེད་པར་བྱ་བའི་ཕྱིར་
ཆགས་པ་མེད་པའི་མིག་དང་། ཆོས་ཀྱི་དབྱིངས་སྒོ་ཐམས་ཅད་ནས་བལྟ་བའི་ཕྱིར་ཐམས་ཅད་མཁྱེན་པའི་མིག་གོ །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མིག་སྟེ། མིག་དེ་དག་དང་ལྡན་པས་བྱང་ཆུབ་སེམས་དཔའ་
རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་སྤྱན་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྣ་བ་སྟེ། བཅུ་གང་ཞེ་ན། འདི་ལྟར་བསྔགས་པ་ཐོས་ནས་དགའ་བ་སྤོང་བ་དང་།

མི་སྙན་པ་ཐོས་ན་ཁོང་ཁྲོ་བ་སྤོང་བ་དང་། ཉན་ཐོས་དང་རང་སངས་རྒྱས་ཀྱི་གཏམ་ཐོས་ན་འདོད་པ་མེད་ཅིང་མི་སྨོད་པ་དང་། བྱང་ཆུབ་སེམས་དཔའ་འབྱུང་བའི་གཏམ་ཐོས་ན་དགའ་བ་དང་མོས་པ་དང་སྤྲོ་བ་ཆེན་པོ་སྐྱེ་བ་དང་། སེམས་ཅན་
དམྱལ་བ་དང་། །བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དང་། ཡི་དགས་དང་། ལྷ་མ་ཡིན་དང་། མི་ཁོམ་པ་དང་། དབུལ་པོར་སྐྱེས་པ་ཐོས་ན་སྙིང་རྗེ་ཆེན་པོའི་གོ་སྟོན་པ་དང་། ལྷ་དང་མིའི་རྒྱུད་ཀྱི་བྱེ་བྲག་ཐོས་ན།
རྟག་ཏུ་ཆོས་ལ་གཟུང་བའི་བློར་འགྱུར་བ་དང་། སངས་རྒྱས་ཀྱི་ཡོན་ཏན་དང་། བསྔགས་པ་ཐོས་ན་དེའི་ཡོན་ཏན་དང་། བསྔགས་པ་ཡོངས་སུ་རྫོགས་པར་བྱ་བའི་བརྩོན་འགྲུས་དང་། ཕ་རོལ་ཏུ་ཕྱིན་པ་དང་། བསྡུ་བའི་དངོས་པོ་དང་། བྱང་
ཆུབ་སེམས་དཔའི་སྡེ་སྣོད་ཀྱི་གཏམ་ཐོས་ན་ཐམས་ཅད་ཀྱི་ཕ་རོལ་ཏུ་འགྲོ་བ་དང་། ཀྱེ་རྒྱལ་བའི་སྲས་བྱང་ཆུབ་སེམས་དཔའི་རྣ་བའི་དབང་པོ་ལ་ནི་ཕྱོགས་བཅུའི་འཇིག་རྟེན་གྱི་ཁམས་ནས་བསྒྲགས་པའི་སྒྲ་ཐམས་ཅད་ཀྱང་གྲག་ཅིང་ཐོས་པར་འགྱུར་ཏེ།
སྒྲ་ཐམས་ཅད་སྒྲ་བརྙན་ལྟ་བུར་བརྗོད་དུ་མེད་པའི་དོན་དུ་ཁོང་དུ་ཆུད་ཅིང་ཤེས་པ་དང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་ཆོས་ཀྱི་རྣ་བ་མཉམ་པར་གཞག་པ་དང་ལྡན་ཏེ་ཐོག་མ་སེམས་བསྐྱེད་པ་ནས། སྙིང་པོ་བྱང་ཆུབ་ཀྱི་བར་དུ་བྱང་ཆུབ་སེམས་དཔའི་
ལམ་དང་མི་གནས་ཀྱང་སེམས་ཅན་ཡོངས་སུ་སྨིན་པར་བྱ་བ་མི་འདོར་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྣ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་
པོའི་སྙན་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྣ་སྟེ། བཅུ་གང་ཞེ་ན། འདི་ལྟར་འཐུན་པའི་དྲི་ལ་མི་མཐུན་པར་གནས་པ་དང་། མི་མཐུན་པའི་དྲི་ལ་འཐུན་པར་

གནས་པ་དང་། དྲི་འཐུན་པ་དང་། མི་འཐུན་པ་ལ་མཉམ་པ་ཉིད་དུ་གནས་པ་དང་། དྲི་འཐུན་པ་དང་། མི་འཐུན་པ་མ་ཡིན་པ་ལ་བཏང་སྙོམས་སུ་གནས་པ་དང་། གོས་དང་། མལ་ཅ་དང་།
ཡན་ལག་དང་། ཉིང་ལག་གི་དྲི་ལ་འདོད་ཆགས་དང་། ཞེ་སྡང་དང་། གཏི་མུག་དང་། ཆ་མཉམ་པ་སྤྱོད་པའི་སེམས་ཅན་གྱི་ཤེས་པར་གནས་པ་དང་། གཏེར་ཆེན་པོ་དེ་དག་དང་། རྩྭ་དང་། གེལ་བ་དང་། སྨན་དང་།
ནགས་ཚལ་ཇི་སྙེད་པ་དེ་དག་གི་དྲིས་གཏེར་ཐམས་ཅད་མངོན་སུམ་དུ་ཤེས་པར་གནས་པ་དང་། འོག་གི་སེམས་ཅན་དམྱལ་བ་ཆེན་པོ་མནར་མེད་པ་ཡན་ཅད་སྲིད་པའི་རྩེ་མོ་མན་ཅད་ན་གནས་པའི་སེམས་ཅན་རྣམས་ཀྱིས་དྲི་ཚོར་བ་ཙམ་
གྱིས་སྔོན་གྱི་སྤྱོད་པ་སྟོན་པར་གནས་པ་དང་། ཉན་ཐོས་ཀྱི་ཚུལ་ཁྲིམས་དང་། ཐོས་པ་དང་། གཏོང་བ་དང་། ཤེས་རབ་ཀྱི་དྲི་ཚོར་བས་ཐམས་ཅད་མཁྱེན་པ་ཉིད་ཀྱི་སེམས་མི་འཁྲུགས་པར་གནས་པ་དང་། བྱང་ཆུབ་སེམས་དཔའ་
ཐམས་ཅད་ཀྱི་སྤྱོད་པའི་དྲི་ཚོར་ཞིང་དེ་བཞིན་གཤེགས་པའི་ས་ལ་ཡང་དག་པར་གཞོལ་བའི་ཡེ་ཤེས་ལ་གནས་པ་དང་། དེ་བཞིན་གཤེགས་པ་ཐམས་ཅད་ཀྱི་ཡུལ་དང་ཡེ་ཤེས་ཀྱི་དྲི་ཚོར་ཞིང་བྱང་ཆུབ་སེམས་དཔའི་སྤྱོད་པ་རྒྱུན་མི་
གཅོད་པར་གནས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྣ་ཡོངས་སུ་དག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཤངས་མཐའ་དང་དབུས་མེད་པ་བླ་ན་མེད་པ་འཐོབ་པར་
འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལྕེ་སྟེ། བཅུ་གང་ཞེ་ན་འདི་ལྟར་སེམས་ཀྱི་སྤྱོད་པ་མི་ཟད་པ་རབ་ཏུ་སྟོན་པའི་ལྕེ་དང་། ཆོས་ཀྱི་ཚུལ་མི་ཟད་པ་རབ་ཏུ་སྟོན་པའི་ལྕེ་དང་། སངས་རྒྱས་ཀྱི་ཡོན་ཏན་དང་བསྔག་

པ་མི་ཟད་པ་རབ་ཏུ་སྟོན་པའི་ལྕེ་དང་། ངེས་པའི་ཚིག་དང་སྤོབས་པ་མི་ཟད་པ་སྟོན་པའི་ལྕེ་དང་། ཐེག་པ་ཆེན་པོའི་ཚོགས་མི་ཟད་པ་སྟོན་པའི་ལྕེ་དང་། དེའི་ལྕེ་དེ་ཕྱོགས་བཅུའི་ནམ་མཁའ་རྒྱས་པར་འགེངས་པ་དང་། དེའི་ལྕེ་དེ་སེམས་ཅན་ཐམས་ཅད་ལ་ཡང་དག་པར་གཞོལ་བ་དང་།
དེའི་ལྕེ་དེ་སངས་རྒྱས་ཀྱི་ཞིང་ཐམས་ཅད་དུ་འོད་ཀྱིས་སྣང་བར་བྱེད་པ་དང་། དེའི་ལྕེ་དེ་སངས་རྒྱས་ཐམས་ཅད་མཉེས་པར་བྱེད་ཅིང་ཕྱག་འཚལ་བ་དང་། དེའི་ལྕེ་དེ་བདུད་དང་། རྒོལ་བ་དང་། ཉོན་མོངས་པ་དང་། འཁོར་བ་ཐམས་ཅད་འཇིག་ཅིང་མྱ་ངན་ལས་འདའ་
བའི་ལམ་སྟོན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལྕེ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ལྗགས་སངས་རྒྱས་ཀྱི་ཞིང་ཐམས་ཅད་རྒྱས་པར་ཁྱབ་པ་བླ་ན་མེད་པ་འཐོབ་པར་
འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལུས་ཏེ། བཅུ་གང་ཞེ་ན། འདི་ལྟར་མི་ཡོངས་སུ་སྨིན་པར་བྱ་བའི་ཕྱིར། མིའི་ལུས་དང་། སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་།
གཤིན་རྗེའི་འཇིག་རྟེན་གྱི་སེམས་ཅན་གདུལ་བའི་ཕྱིར་མི་མ་ཡིན་པའི་ལུས་དང་། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པ་ན་སྤྱོད་པའི་སེམས་ཅན་གདུལ་བའི་ཕྱིར་ལྷའི་ལུས་དང་། སློབ་པའི་ས་བསྟན་པའི་ཕྱིར་སློབ་
པའི་ལུས་དང་། མི་སློབ་པའི་ས་བསྟན་པའི་ཕྱིར་མི་སློབ་པའི་ལུས་དང་། རང་སངས་རྒྱས་ཀྱི་སར་གདུལ་བའི་ཕྱིར་རང་སངས་རྒྱས་ཀྱི་ལུས་དང་། ཐེག་པ་ཆེན་པོ་ལ་ཡང་དག་པར་འབྱུང་བར་བྱ་བའི་ཕྱིར་བྱང་ཆུབ་སེམས་དཔའི་ལུས་དང་། དབང་བསྐུར་བའི་ཡེ་ཤེས་འཐོབ་
པར་བྱ་བའི་ཕྱིར་དེ་བཞིན་གཤེགས་པའི་སྐུ་དང་། མངོན་པར་བསྒྲུབ་པ་ལ་མཁས་པར་བྱ་བའི་ཕྱིར་ཡིད་ཀྱི་རང་བཞིན་གྱི་ལུས་དང་། ཟག་པ་མེད་ཅིང་ལྷུན་གྱིས་གྲུབ་པའི་བྱ་བས་ལུས་ཐམས་ཅད་ཡོངས་སུ་བསྟན་པའི་ཕྱིར་ཆོས་ཀྱི་ལུས་སོ། །ཀྱེ་རྒྱལ་བའི་སྲས་བཅུ་

པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལུས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་སྐུ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡིད་
རྣམ་པར་རྒྱུ་བ་སྟེ། བཅུ་གང་ཞེ་ན་འདི་ལྟར་དགེ་བའི་རྩ་བ་ཐམས་ཅད་བརྩམས་པ་ལ་ཡིད་ནི་སྔོན་དུ་འགྲོ་བའོ། །ནན་ཏན་ལྷུར་བླང་བ་ལ་ཡིད་ནི་གནས་སོ། །སངས་རྒྱས་ཀྱི་ཆོས་རྣམས་ལ་ཡིད་ནི་རྗེས་སུ་ཞུགས་པའོ། །སེམས་ཅན་རྣམས་ཀྱི་བསམ་པར་
ཡིད་ནི་ཁོང་དུ་ཆུད་པའོ། །ཉོན་མོངས་པ་ཐམས་ཅད་དང་མ་འདྲེས་པས་ཡིད་ནི་རྒྱུ་བ་མེད་པའོ། །གློ་བུར་གྱི་དྲི་མས་ཀུན་ནས་ཉོན་མོངས་པ་མེད་པའི་ཕྱིར་ཡིད་ནི་འོད་གསལ་བའོ། །དུས་ཇི་ལྟ་བའི་སྐད་ཅིག་ལས་ཀྱང་མི་འདའ་བའི་ཕྱིར་ཡིད་ནི་དཔྱད་པ་ཤིན་ཏུ་བརྟགས་
པའོ། །ཐམས་ཅད་དུ་ཁ་ན་མ་ཐོ་བ་མེད་པའི་ཕྱིར་ཡིད་ནི་ལས་ཀྱི་མཐའ་ཤིན་ཏུ་སྤྱད་པའོ། །དབང་པོ་ཤིན་ཏུ་དུལ་བས་ཡུལ་ལ་མི་རྒྱུག་པའི་ཕྱིར་ཡིད་ནི་དབང་པོ་རུབ་པའོ། །སངས་རྒྱས་ཀྱི་ཏིང་ངེ་འཛིན་ལ་བདག་གིར་མི་བྱེད་པའི་ཕྱིར་ཡིད་ནི་ཤིན་ཏུ་མཉམ་པར་གཞག་
པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཡིད་རྣམ་པར་རྒྱུ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཐུགས་རྣམ་པར་རྒྱུ་བ་བླ་ན་མེད་པ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་
བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་འགྲོ་བ་སྟེ། བཅུ་གང་ཞེ་ན་འདི་ལྟར་ཆོས་འདོད་པས་ཆོས་ཉན་དུ་འགྲོ་བ་དང་། སེམས་ཅན་གྱི་དོན་དུ་ཆོས་སྟོན་དུ་འགྲོ་བ་དང་། རང་གི་སེམས་ངེས་པར་རྟོགས་པས་འདོད་པ་མེད་པ་དང་། སྡང་བ་མེད་པ་དང་།
གཏི་མུག་མེད་པ་དང་། འཇིགས་པ་མེད་པར་འགྲོ་བ་དང་། སེམས་ཅན་ཡོངས་སུ་སྨིན་པར་བྱ་བའི་ཕྱིར་འདོད་པའི་ཁམས་སུ་འགྲོ་བ་དང་། མྱུར་དུ་ཕྱིར་ལྡོག་པར་བྱ་བས་གཟུགས་དང་གཟུགས་མེད་པའི་སྙོམས་པར་འཇུག་པར་འགྲོ་བ་དང་། ཤེས་རབ་མྱུར་བ་

འཐོབ་པར་བྱ་བའི་ཕྱིར་དོན་དང་། ཆོས་ཀྱི་རྒྱུད་དུ་འགྲོ་བ་དང་། འདུལ་བའི་དབང་གིས་སྐྱེ་བ་ཐམས་ཅད་དུ་འགྲོ་བ་དང་། དེ་བཞིན་གཤེགས་པ་བལྟ་བ་དང་། ཕྱག་བྱ་བ་དང་། བསྙེན་བཀུར་བའི་ཕྱིར་སངས་རྒྱས་ཀྱི་ཞིང་ཐམས་ཅད་དུ་མངོན་པར་ཤེས་པས་འགྲོ་བ་དང་།
འཁོར་བའི་རྒྱུད་ཀྱི་རྒྱུན་མི་གཅད་པའི་ཕྱིར་མྱ་ངན་ལས་འདས་པའི་རྒྱུད་དུ་འགྲོ་བ་དང་། བྱང་ཆུབ་སེམས་དཔའི་སྤྱོད་པ་རྒྱུན་མི་གཅད་པའི་ཕྱིར་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བར་འགྲོ་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་
སེམས་དཔའ་རྣམས་ཀྱི་འགྲོ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པ་བཞུད་པ་དང་གཤེགས་པ་དང་། བྱོན་པ་མེད་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་
རྣམས་ཀྱི་གནས་ཏེ། བཅུ་གང་ཞེ་ན་འདི་ལྟར་ཉམས་པ་མེད་པའི་ཕྱིར་བྱང་ཆུབ་ཀྱི་སེམས་ལ་གནས་པ་དང་། ཚོགས་ཀྱིས་མི་ངོམས་པའི་ཕྱིར་ཕ་རོལ་ཏུ་ཕྱིན་པ་ལ་གནས་པ་དང་། ཤེས་རབ་ཤིན་ཏུ་སྦྱངས་པའི་ཕྱིར་ཆོས་ཀྱི་གཏམ་ལ་གནས་པ་དང་།
བསམ་གཏན་ཆེན་པོ་ཁོང་དུ་ཆུད་པར་བྱ་བའི་ཕྱིར་བས་མཐའི་དགོན་པ་ལ་གནས་པ་དང་། བྱ་བ་ཉུང་བའི་ཕྱིར་ཐམས་ཅད་མཁྱེན་པ་ཉིད་དང་། མཐུན་པའི་སྦྱངས་པའི་ཡོན་ཏན་དང་ཆོག་ཤེས་པ་དང་འཕགས་པའི་རྒྱུད་ལ་གནས་པ་དང་། ཆོས་ཀྱི་བརྩོན་
འགྲུས་རྗེས་སུ་འབྲང་བར་བྱ་བའི་ཕྱིར་ནན་ཏན་ལ་གནས་པ་དང་། སངས་རྒྱས་ཀྱི་སྤྱོད་ལམ་ཡོངས་སུ་རྫོགས་པར་བྱ་བའི་ཕྱིར། དེ་བཞིན་གཤེགས་པ་བསྙེན་བཀུར་བ་ལ་གནས་པ་དང་། ཡེ་ཤེས་ཆེན་པོ་ཡོངས་སུ་རྫོགས་པར་བྱ་བའི་ཕྱིར་མངོན་པར་ཤེས་པས་འབྱུང་
བ་ལ་གནས་པ་དང་། ལུང་བསྟན་པ་ཡོངས་སུ་རྫོགས་པར་བྱ་བའི་ཕྱིར་བཟོད་པ་ཐོབ་པ་ལ་གནས་པ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་སྙིང་པོ་བྱང་ཆུབ་ལ་གནས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་

རྣམས་ཀྱི་གནས་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཐམས་ཅད་མཁྱེན་པའི་གནས་བླ་ན་མེད་པ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྟན་ལ་འདུག་པ་
སྟེ། བཅུ་གང་ཞེ་ན་འདི་ལྟར་དགེ་བ་བཅུའི་ལས་ཀྱི་ལམ་བསྒྲུབ་པའི་ཕྱིར་འཁོར་ལོས་སྒྱུར་བའི་སྟན་ལ་འདུག་པ་དང་། འཇིག་རྟེན་ཐམས་ཅད་སངས་རྒྱས་ཀྱི་ཆོས་ཀྱི་དབང་ཕྱུག་ལ་དགོད་པའི་ཕྱིར་འཇིག་རྟེན་གྱི་མགོན་པོའི་སྟན་ལ་འདུག་པ་དང་། འགྲོ་
བ་ཐམས་ཅད་ཀྱི་དབང་པོར་འགྱུར་བའི་ཕྱིར་བརྒྱ་བྱིན་གྱི་སྟན་ལ་འདུག་པ་དང་། རང་གི་སེམས་དང་། གཞན་གྱི་སེམས་ལ་དབང་བསྒྱུར་བའི་ཕྱིར་ཚངས་པའི་སྟན་ལ་འདུག་པ་དང་། ཆོས་ཀྱི་གཏམ་མ་ནོར་བར་བྱ་བའི་ཕྱིར་སེང་གེའི་སྟན་ལ་འདུག་པ་དང་།
གཟུངས་དང་སྤོབས་པའི་སྟོབས་ཀྱིས་བརྗོད་པའི་ཕྱིར་ཆོས་ཀྱི་སྟན་ལ་འདུག་པ་དང་། དམ་བཅས་པ་མཐར་ཕྱིན་པའི་ཕྱིར་ཡི་དམ་ལ་བརྟན་པའི་སྟན་ལ་འདུག་པ་དང་། གཤེ་བ་དང་། སྡང་བ་བྱམས་པར་བྱ་བའི་ཕྱིར་བྱམས་པ་ཆེན་པོའི་སྟན་ལ་འདུག་པ་དང་། མི་
དགའ་བ་ཐམས་ཅད་བཟོད་པར་བྱ་བས་མི་སྐྱོ་བར་བྱ་བའི་ཕྱིར་སྙིང་རྗེ་ཆེན་པོའི་སྟན་ལ་འདུག་པ་དང་། ཕས་ཀྱི་རྒོལ་བ་དང་བདུད་ཀྱི་སྡེ་ཐམས་ཅད་བཟློག་པའི་ཕྱིར་རྡོ་རྗེའི་སྟན་ལ་འདུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་
སྟན་ལ་འདུག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་སངས་རྒྱས་ཀྱི་གདན་ཆེན་པོ་བླ་ན་མེད་པ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མལ་ཏེ། བཅུ་གང་
ཞེ་ན་འདི་ལྟར་ལུས་དང་སེམས་དབེན་པར་བྱ་བའི་ཕྱིར་དབེན་པའི་མལ་དང་། ཚུལ་བཞིན་གྱི་སྦྱོར་བ་བསྒྲུབ་པའི་ཕྱིར་ནང་དུ་ཡང་དག་པར་གཞོག་པའི་མལ་དང་། ལུས་དང་སེམས་ལས་སུ་རུང་བར་བྱ་བའི་ཕྱིར་སྙོམས་པར་འཇུག་པའི་མལ་དང་། གཞན་དང་བདག་

ལ་གདུང་བ་མེད་པར་བྱ་བའི་ཕྱིར་ཚངས་པའི་མལ་དང་། ཕྱིས་འགྱོད་པ་མེད་པར་བྱ་བའི་ཕྱིར་ལེགས་པའི་ལས་ཀྱི་མལ་དང་། ཕྱིས་ཁྲོ་བ་མེད་པར་བྱ་བའི་ཕྱིར་ཡང་དག་པའི་ནན་ཏན་གྱི་མལ་དང་། དགེ་བའི་བཤེས་གཉེན་གྱིས་བསྐུལ་བར་བྱ་བའི་ཕྱིར་ལམ་གྱི་
མལ་དང་། ཡོངས་སུ་བསྔོ་བ་ལ་མཁས་པའི་ཕྱིར་ཤིན་ཏུ་མཉམ་པར་གཞག་པའི་མལ་དང་། བརྩམས་པ་མཐར་ཕྱིན་པར་བྱ་བའི་ཕྱིར་དགོས་པ་ཐམས་ཅད་ཡོངས་སུ་གྲུབ་པའི་མལ་དང་། སྔོན་ལས་ལེགས་པར་སྤྱད་པའི་ཕྱིར་ལྷུན་གྱིས་གྲུབ་པར་སྤྱོད་པའི་མལ་ལོ། །
ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མལ་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཆོས་ཀྱི་གཟིམས་མལ་ཆེན་པོར་རྣམ་པར་འཚང་རྒྱ་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་
སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་སྤྱོད་པ་སྟེ། བཅུ་གང་ཞེ་ན་འདི་ལྟར་སེམས་ཅན་ཐམས་ཅད་ལ་སེམས་མཉམ་པས་བྱམས་པ་ཆེན་པོ་ལ་རྣམ་པར་སྤྱོད་པ་དང་། མ་བསླབས་པ་ལ་བརྙས་པ་མེད་པའི་ཕྱིར་སྙིང་རྗེ་ཆེན་པོ་ལ་རྣམ་པར་
སྤྱོད་པ་དང་། མི་དགའ་བ་ཐམས་ཅད་བསྩལ་བའི་ཕྱིར་དགའ་བ་ཆེན་པོ་ལ་རྣམ་པར་སྤྱོད་པ་དང་། འདུས་བྱས་དང་འདུས་མ་བྱས་སུ་མཉམ་ཞིང་མཚུངས་པའི་ཕྱིར་བཏང་སྙོམས་ཆེན་པོ་ལ་རྣམ་པར་སྤྱོད་པ་དང་། བྱང་ཆུབ་ཀྱི་སེམས་སྔོན་དུ་འགྲོ་བས་ཕ་རོལ་ཏུ་ཕྱིན་པ་
ཐམས་ཅད་ལ་རྣམ་པར་སྤྱོད་པ་དང་། རབ་ཏུ་རྣམ་པར་དབྱེ་བ་ལ་མཁས་པས་རྣམ་པའི་མཆོག་ཐམས་ཅད་དང་ལྡན་པའི་སྟོང་པ་ཉིད་ལ་རྣམ་པར་སྤྱོད་པ་དང་། སྐྱོན་མེད་པ་ལ་ཐོགས་པ་མེད་པས་མཚན་མ་མེད་པ་ལ་རྣམ་པར་སྤྱོད་པ་དང་། ཆེད་དུ་བསམས་ཏེ་སྐྱེ་བ་འཛིན་
པའི་ཕྱིར་སྨོན་པ་མེད་པ་ལ་རྣམ་པར་སྤྱོད་པ་དང་། བཟོད་པ་ཡོངས་སུ་རྫོགས་པར་བྱ་བའི་ཕྱིར་དྲན་པ་དང་། ཤེས་བཞིན་ལ་རྣམ་པར་སྤྱོད་པ་དང་། ལུང་བསྟན་པ་ཐོབ་པར་བྱ་བའི་ཕྱིར་ཆོས་ཐམས་ཅད་མཉམ་པ་ཉིད་ལ་རྣམ་པར་སྤྱོད་པའོ། །ཀྱེ་རྒྱལ་བའི་སྲས་བཅུ་པོ་དེ་

དག་ནི་བྱང་ཆུབ་སེམས་དཔའི་རྣམ་པར་སྤྱོད་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་རྣམ་པར་སྤྱོད་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་
རྣམས་ཀྱི་སྤྱོད་ཡུལ་ཏེ། བཅུ་གང་ཞེ་ན་འདི་ལྟར་དྲན་པ་ཉེ་བར་གཞག་པ་ཡོངས་སུ་རྫོགས་པར་བྱ་བའི་ཕྱིར་དྲན་པའི་སྤྱོད་ཡུལ་དང་། ཆོས་ཀྱི་ཚུལ་རྟོགས་པར་བྱ་བའི་ཕྱིར་རྟོགས་པའི་སྤྱོད་ཡུལ་དང་། སངས་རྒྱས་ཐམས་ཅད་མཉེས་པར་བྱ་བའི་ཕྱིར་བློ་གྲོས་ཀྱི་སྤྱོད་ཡུལ་
དང་། ཐམས་ཅད་མཁྱེན་པ་ཉིད་ཀྱི་ཡེ་ཤེས་ཡོངས་སུ་རྫོགས་པར་བྱ་བའི་ཕྱིར་ཕ་རོལ་ཏུ་ཕྱིན་པའི་སྤྱོད་ཡུལ་དང་། སེམས་ཅན་ཡོངས་སུ་སྨྱིན་པར་བྱ་བའི་ཕྱིར་བསྡུ་བའི་དངོས་པོའི་སྤྱོད་ཡུལ་དང་། དགེ་བའི་རྩ་བ་ཐམས་ཅད་དྲན་པའི་ཕྱིར་འཁོར་བའི་སྤྱོད་ཡུལ་དང་།
འདུ་འཛི་བསལ་ཞིང་སེམས་ཅན་མོས་པ་ཇི་ལྟ་བ་བཞིན་དུ་གདུལ་བའི་ཕྱིར། སེམས་ཅན་ཐམས་ཅད་དང་འགྲོགས་པའི་སྤྱོད་ཡུལ་དང་། སེམས་ཅན་ཐམས་ཅད་ཀྱི་དབང་པོ་དང་། ཡུལ་ཁོང་དུ་ཆུད་པར་བྱ་བའི་ཕྱིར་མངོན་པར་ཤེས་པ་བསྐྱེད་པའི་སྤྱོད་ཡུལ་དང་།
ཤེས་རབ་ཀྱི་ཕ་རོལ་ཏུ་ཕྱིན་པའི་མཚོན་ཆ་གདགས་པའི་ཕྱིར་ཐབས་མཁས་པའི་སྤྱོད་ཡུལ་དང་། ཐམས་ཅད་མཁྱེན་པའི་ཡེ་ཤེས་མངོན་པར་སངས་རྒྱས་ཀྱང་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་པའི་ཕྱིར་སྙིང་པོ་བྱང་ཆུབ་ཀྱི་སྤྱོད་ཡུལ་ལོ། །ཀྱེ་རྒྱལ་བའི་སྲས་
བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་སྤྱོད་ཡུལ་བླ་ན་མེད་པ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་
དཔའ་རྣམས་ཀྱི་ལྟ་བ་སྟེ། བཅུ་གང་ཞེ་ན་འདི་ལྟར་གཟུགས་ཤིན་ཏུ་ཕྲ་བ་བལྟ་བའི་ཕྱིར་ལས་ལེགས་པར་བྱས་པས་ལྟ་བ་དང་། སེམས་ཅན་གྱི་གྲངས་ལ་མངོན་པར་ཆགས་པ་མེ