Kinh tạng Tây Tạng (Kangyur Đại Học) — 037_ཕལ་ཆེན།_ག

༄༅། །ཕལ་ཆེན་ག་བ་བཞུགས་སོ། །

༄༅། །ཤིན་ཏུ་རྒྱས་པ་ཆེན་པོའི་མདོ་སངས་རྒྱས་ཕལ་པོ་ཆེ་ཞེས་བྱ་བ། བམ་པོ་དང་པོ། །དེ་ནས་བྱང་ཆུབ་སེམས་དཔའི་ཚོགས་ཆེན་པོ་དེའི་ནང་ནས་
བྱང་ཆུབ་སེམས་དཔའ་ཁ་ཅིག་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཞིང་ནི་ཅི་ཙམ་ཞིག་ཏུ་བསམ་གྱིས་མི་ཁྱབ། སངས་རྒྱས་བཅོམ་
ལྡན་འདས་རྣམས་ཀྱི་སྔོན་གྱི་སྨོན་ལམ་དང་འབྱུང་བ་རྣམ་པར་དག་པ་ནི་ཇི་ཙམ་ཞིག་ཏུ་བསམ་གྱིས་མྱི་ཁྱབ། སངས་རྒྱས་བཅོམ་ལྡན་འདས་རྣམས་ཀྱི་དེ་བཞིན་གཤེགས་པའི་གདུང་ནི་ཇི་ཙམ་
ཞིག་ཏུ་བསམ་གྱིས་མྱི་ཁྱབ། སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་སྐྱེ་བ་ནི་ཇི་ཙམ་ཞིག་ཏུ་བསམ་གྱིས་མི་ཁྱབ། སངས་རྒྱས་བཅོམ་ལྡན་འདས་རྣམས་ཀྱི་དེ་བཞིན་གཤེགས་
པའི་སྐུ་ནི་ཇི་ཙམ་ཞིག་ཏུ་བསམ་གྱིས་མྱི་ཁྱབ། སངས་རྒྱས་བཅོམ་ལྡན་འདས་རྣམས་ཀྱི་དེ་བཞིན་གཤེགས་པའི་གསུང་ནི་ཇི་ཙམ་ཞིག་ཏུ་བསམ་གྱིས་མྱི་ཁྱབ། སངས་རྒྱས་བཅོམ་ལྡན་

འདས་རྣམས་ཀྱི་དེ་བཞིན་གཤེགས་པའི་ཡེ་ཤེས་ནི་ཅི་ཙམ་ཞིག་ཏུ་བསམ་གྱིས་མི་ཁྱབ། སངས་རྒྱས་བཅོམ་ལྡན་འདས་རྣམས་ཀྱི་དེ་བཞིན་གཤེགས་པའི་རྣམ་པར་འཕྲུལ་བ་ནི་ཇི་ཙམ་ཞིག་ཏུ་བསམ་གྱིས་མི་ཁྱབ།
སངས་རྒྱས་བཅོམ་ལྡན་འདས་རྣམས་ཀྱི་ཆགས་པ་མྱི་མངའ་བའི་རྣམ་པར་སྤྱོད་པ་ནི་ཇི་ཙམ་ཞིག་ཏུ་བསམ་གྱིས་མྱི་ཁྱབ། སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་རྣམ་པར་ཐར་པ་ནི་ཇི་ཙམ་ཞིག་ཏུ་བསམ་གྱིས་མྱི་ཁྱབ་སྙམ་པ་དང་།
དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་གི་སེམས་ཐུགས་ཀྱིས་ཐུགས་སུ་ཆུད་ནས། བྱང་ཆུབ་སེམས་དཔའ་ཨུཏྤ་ལའི་སྙིང་པོ། སངས་རྒྱས་ཀྱི་བྱིན་གྱི་རླབས་ཀྱིས་བྱིན་དུ་བརླབས་སོ། །སངས་རྒྱས་ཀྱི་ཡེ་
ཤེས་ཀྱིས་བྱིན་དང་ལྡན་པར་མཛད་དོ། །དེ་བཞིན་གཤེགས་པའི་འོད་ཀྱིས་སྣང་བར་མཛད་དོ། །སངས་རྒྱས་ཀྱི་གཟི་བརྗིད་ཀྱིས་ཡོངས་སུ་རྒྱས་པར་མཛད་དོ། །སངས་རྒྱས་ཀྱི་མྱི་འཇིགས་པ་ལ་རབ་ཏུ་གཞོག་གོ །སངས་རྒྱས་ཀྱི་
ཆོས་ཀྱི་དབྱིངས་ལ་འཇུག་པ་ཁོང་དུ་ཆུད་པར་མཛད་དོ། །སངས་རྒྱས་ཀྱི་བདག་ཉིད་ཆེ་བ་ཉིད་དང་། རྫུ་འཕྲུལ་གྱི་ཡུལ་རབ་ཏུ་རྟོགས་པར་མཛད་དོ། །ཆགས་པ་མྱེད་པའི་རྒྱུད་འབྱམ་ཀླས་པ་ལ་རབ་ཏུ་གཞོག་གོ །སངས་རྒྱས་ཐམས་ཅད་
གཅིག་ནས་གཅིག་ཏུ་བརྒྱུད་པའི་རིགས་རབ་ཏུ་རྟོགས་པར་མཛད་དོ། །སངས་རྒྱས་ཀྱི་ཚུལ་གྱི་གནས་བརྗོད་དུ་མེད་པ་ལ་རབ་ཏུ་གཞག་པ་མཛད་དོ། །དེ་ནས་བྱང་ཆུབ་སེམས་དཔའ་ཨུཏྤ་ལའི་སྙིང་པོས་ཆོས་ཀྱི་དབྱིངས་ལ་འཇུག་པ་རིག་

ཅིང་ཁོང་དུ་ཆུད་པས་ཆགས་པ་མེད་པའི་དབྱིངས་སུ་སྒྲུབ་པའི་ཡིད་དང་། ཆོས་ཐམས་ཅད་ལ་བསྒྲིབས་པ་མེད་པར་གནས་པའི་བྱང་ཆུབ་སེམས་དཔའི་སྤྱོད་པ་དང་། ཀུན་ཏུ་བཟང་པོའི་སྨོན་ལམ་དང་ལྡན་པའི་ཡང་དག་པར་འཇུག་པ་དང་། སངས་རྒྱས་ཐམས་ཅད་ཀྱི་
རྗེས་སུ་སོང་བའི་སངས་རྒྱས་བལྟ་བ་དང་། སྙིང་རྗེ་ཆེན་པོས་ལྟ་བའི་སེམས་ཅན་ཐམས་ཅད་ཡོངས་སུ་སྦྱོང་བའི་གོ་ཆ་ཆེན་པོ་དང་། བྱང་ཆུབ་སེམས་དཔའི་ཡི་དམ་དང་། སྤྱོད་པའི་དཀྱིལ་འཁོར་རྒྱུན་ཆད་པ་མྱེད་པ་དང་། སངས་རྒྱས་ཀྱི་ཡེ་ཤེས་མངོན་པར་བསྒྲུབ་པ་སྐད་
ཅིག་གི་ཆ་ཤས་ལ་རྣམ་པར་སྤྱོད་པ་དང་། ཐམས་ཅད་མཁྱེན་པ་ཉིད་ཀྱི་སྒོ་མཐོང་བ་མི་ཟད་པ་དང་། སོ་སོ་ཡང་དག་པར་རིག་པའི་རྣམ་པ་གཟུངས་ཐམས་ཅད་ཀྱིས་སྣང་བར་བྱས་པ་དང་ལྡན་པས་སངས་རྒྱས་ཀྱི་མཐུས་བྱང་ཆུབ་སེམས་དཔའ་པད་མོའི་སྙིང་པོ་ལ་
འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས། སངས་རྒྱས་བཅོམ་ལྡན་འདས་རྣམས་ནི། ཚད་མེད་པ་ལ་རྣམ་པར་སྤྱོད་པ་སྟེ། ཀྱེ་རྒྱལ་བའི་སྲས། སངས་རྒྱས་བཅོམ་ལྡན་འདས་རྣམས་ནི་རྣམ་པར་འཕྲུལ་པ་ཆེན་པོ་ལ་རྣམ་པར་སྤྱོད་པའོ། །ཀྱེ་རྒྱལ་བའི་
སྲས། སངས་རྒྱས་བཅོམ་ལྡན་འདས་རྣམས་ནི་སངས་རྒྱས་ཀྱི་མཛད་པ་ཐམས་ཅད་ལ། སྐུའི་མཚན་ཐམས་ཅད་རབ་ཏུ་བརྙེས་པའོ། །སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་འཁོར་ལོ་འཁོར་བ་ནི་ཏིང་ངེ་འཛིན་དང་། དགོངས་པས་སྦྱར་
བའོ། །སངས་རྒྱས་བཅོམ་ལྡན་འདས་རྣམས་ཀྱི་སོ་སོ་ཡང་དག་པར་རིག་པ་བཞི་ནི་བརྗོད་དུ་མེད་པ་ཡང་བརྗོད་དུ་མེད་པ་ཤིན་ཏུ་བསྟན་པའོ། །སངས་རྒྱས་བཅོམ་ལྡན་འདས་རྣམས་ནི་སངས་རྒྱས་ཀྱི་ཆོས་ཐམས་ཅད་ལ་བསམ་གྱིས་མི་ཁྱབ་པར་རྣམ་པར་སྤྱོད་པའོ། །སངས་
རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་གསུང་དང་དབྱངས་ནི་ཚད་མེད་པའོ། །སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་དབྱིངས་ཐུགས་སུ་ཆུད་པ་ནི་བརྗོད་དུ་མྱེད་པའོ། །སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་ནི་ཐམས་ཅད་

མངོན་པར་མཁྱེན་པའོ། །ཀྱེ་རྒྱལ་བའི་སྲས་དག །སངས་རྒྱས་བཅོམ་ལྡན་འདས་རྣམས་ཀྱིས་ཆོས་ཀྱི་དབྱིངས་ཐུགས་སུ་ཆུད་ཅིང་། བསྟན་པ་ནི་བསྒྲིབས་པ་མེད་པའི་མཐར་ཐུག་པའོ། །ཀྱེ་རྒྱལ་བའི་སྲས། བཅུ་
པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་དབྱིངས་མཐའ་དང་དབུས་མེད་པའི་སངས་རྒྱས་ཀྱི་ཆོས་རྣམས་ཏེ། བཅུ་གང་ཞེ་ན། སངས་རྒྱས་བཅོམ་ལྡན་འདས་རྣམས་ཀྱི་གཟུགས་ཀྱི་སྐུ་རྣམ་པར་དག་པ་ནི་རྙོག་པ་མེད་པར་
རྒྱུད་ཐམས་ཅད་དུ་བྱུང་བས་མཐའ་དང་དབུས་མེད་པའོ། །སངས་རྒྱས་བཅོམ་ལྡན་འདས་རྣམས་ཀྱི་ཆགས་པ་མེད་པའི་སྤྱན་ནི་ཆོས་ཐམས་ཅད་མཉམ་པ་ཉིད་ཀྱི་སྤྱན་མངོན་པར་སངས་རྒྱས་པས་མཐའ་དང་དབུས་མེད་པའོ། །སངས་
རྒྱས་བཅོམ་ལྡན་འདས་རྣམས་ཀྱི་ཆགས་པ་མེད་པའི་སྙན་ནི་འགྲོ་བ་ཐམས་ཅད་ཀྱི་སྒྲ་བསྒྲིབས་པ་མེད་པར་ཐུགས་སུ་ཆུད་པས་མཐའ་དང་དབུས་མེད་པའོ། །སངས་རྒྱས་བཅོམ་ལྡན་འདས་རྣམས་ཀྱི་ཤངས་ཀྱི་སྐྱེ་མཆེད་ནི་སངས་རྒྱས་ཀྱི་མངའ་ཐམས་
ཅད་ཀྱི་ཕ་རོལ་ཏུ་ཕྱིན་པ་བརྙེས་པས་མཐའ་དང་དབུས་མེད་པའོ། །སངས་རྒྱས་བཅོམ་ལྡན་འདས་རྣམས་ཀྱི་ལྗགས་ཤིན་ཏུ་ཡངས་པ་ནི་ཆོས་ཀྱི་དབྱིངས་ཐམས་ཅད་དུ་གསུང་གི་དབྱངས་རྗེས་སུ་འགྲོ་བས་མཐའ་དང་དབུས་མེད་པའོ། །སངས་རྒྱས་
བཅོམ་ལྡན་འདས་རྣམས་ཀྱི་སྐུའི་ཆོས་ཉིད་ནི་སེམས་ཅན་ཐམས་ཅད་མ་ལུས་པའི་སེམས་ཀྱི་རྣམ་པ་ལ་དེ་བཞིན་གཤེགས་པ་མཐོང་བ་རྣམ་པར་དམྱིགས་པས་མཐའ་དང་དབུས་མེད་པའོ། །སངས་རྒྱས་བཅོམ་ལྡན་འདས་རྣམས་ཀྱི་ཐུགས་ཀྱི་འཕྲིན་
ལས་ནི་ཆོས་ཀྱི་སྐུ་དང་ཐ་མི་དད་ཅིང་དུས་གསུམ་ཆགས་པ་མེད་པར་ཐུགས་སུ་ཆུད་ཅིང་རྣམ་པར་དག་པས་མཐའ་དང་དབུས་མེད་པའོ། །སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་རྣམ་པར་ཐར་པ་བསྒྲིབས་པ་མི་མངའ་བ་

ལ་རྣམ་པར་སྤྱོད་པ་ནི་སངས་རྒྱས་ཀྱི་གོ་འཕང་དང་རྣམ་པར་འཕྲུལ་པ་དང་། ཆོ་འཕྲུལ་མི་ཟད་པ་ཡང་དག་པར་སྟོན་པས་མཐའ་དང་དབུས་མེད་པའོ། །སངས་རྒྱས་བཅོམ་ལྡན་འདས་རྣམས་ཀྱི་འཇིག་རྟེན་གྱི་ཁམས་ཐམས་ཅད་རྣམ་པར་དག་པ་ནི་བརྗོད་དུ་
མེད་པའི་རྒྱན་བྱིན་གྱིས་བརླབས་པས། སངས་རྒྱས་ཀྱི་ཞིང་ཉེ་བར་ཉོན་མོངས་པ་མེད་པ་ཡང་དག་པར་བསྟན་ཏེ། བསམ་པ་ཇི་ལྟ་བ་བཞིན་དུ་རྣམ་པར་དམྱིགས་པར་མཛད་པས་མཐའ་དང་དབུས་མེད་པའོ། །སངས་རྒྱས་བཅོམ་ལྡན་འདས་རྣམས་ཀྱི་
བྱང་ཆུབ་སེམས་དཔའི་སྤྱོད་པའི་ཁྱད་པར་དང་། སྨོན་ལམ་ཐམས་ཅད་ཡོངས་སུ་རྫོགས་པ་ནི་རྣམ་པར་རོལ་བའི་ཡེ་ཤེས་ཀྱིས་ཆོས་ཡོངས་སུ་རྫོགས་ཏེ། ཆོས་ཐམས་ཅད་རྫོགས་པར་བྱང་ཆུབ་པར་བྱ་བ་ལ་མཐའ་དང་དབུས་མེད་པ་སྟེ། ཀྱེ་རྒྱལ་བའི་སྲས།
བཅུ་པོ་དེ་དག་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཆོས་ཀྱི་དབྱིངས་མཐའ་དང་དབུས་མེད་པའི་སངས་རྒྱས་ཀྱི་ཆོས་རྣམས་སོ། །ཀྱེ་རྒྱལ་བའི་སྲས་བཅུ་པོ་འདི་དག་ནི། སངས་རྒྱས་བཅོམ་ལྡན་འདས་རྣམས་ཀྱི་
སངས་རྒྱས་ཀྱི་སྐད་ཅིག་ལ་ཡེ་ཤེས་ཀྱི་མངོན་པར་སྒྲུབ་པ་ཡང་དག་པར་བསྟན་པའོ། །བཅུ་གང་ཞེ་ན། སྐད་ཅིག་གཅིག་ལ་འཇིག་རྟེན་གྱི་ཁམས་ཐམས་ཅད་དུ་དགའ་ལྡན་གྱི་གནས་ནས་འཕོ་བ་ཡོངས་སུ་བསྟན་པ་དང་། སྐད་ཅིག་གཅིག་ལ་འཇིག་རྟེན་
གྱི་ཁམས་ཐམས་ཅད་དུ་བྱང་ཆུབ་སེམས་དཔའི་ཚེ་ཡོངས་སུ་བསྟན་པ་དང་། སྐད་ཅིག་གཅིག་ལ་འཇིག་རྟེན་གྱི་ཁམས་ཐམས་ཅད་དུ་མངོན་པར་འབྱུང་བ་ཡོངས་སུ་བསྟན་པ་དང་། སྐད་ཅིག་གཅིག་ལ་འཇིག་རྟེན་གྱི་ཁམས་ཐམས་ཅད་དུ་བྱང་ཆུབ་ཀྱི་ཤིང་
དྲུང་དུ་བཞུགས་ཤིང་མངོན་པར་འཚང་རྒྱ་བ་ཡོངས་སུ་བསྟན་པ་དང་། སྐད་ཅིག་གཅིག་ལ་འཇིག་རྟེན་གྱི་ཁམས་ཐམས་ཅད་དུ་ཆོས་ཀྱི་འཁོར་ལོ་བསྐོར་བ་ཡོངས་སུ་བསྟན་པ་དང་། སྐད་ཅིག་གཅིག་ལ་འཇིག་རྟེན་གྱི་ཁམས་ཐམས་ཅད་དུ་འདུལ་བའི་སེམས་

ཅན་ཡོངས་སུ་སྨིན་པའི་ཚུལ་ཇི་ལྟ་བ་བཞིན་དུ། དུས་བབ་པ་ཤེས་པས་སངས་རྒྱས་བསྙེན་བཀུར་བ་ཡོངས་སུ་བསྟན་པ་དང་། སྐད་ཅིག་གཅིག་ལ་འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཇི་ལྟར་འདུལ་བའི་ཚུལ་
བཞིན་དུ་དེ་བཞིན་གཤེགས་པ་བརྗོད་དུ་མེད་པ་དང་། སངས་རྒྱས་ཀྱི་སྐུ་སྣ་ཚོགས་རྣམ་པར་དམིགས་པ་ཡོངས་སུ་བསྟན་པ་དང་། སྐད་ཅིག་གཅིག་ལ་འཇིག་རྟེན་གྱི་ཁམས་ཐམས་ཅད་དུ། རྒྱན་སྣ་ཚོགས་དང་རྒྱན་བརྗོད་དུ་མེད་པས། དེ་བཞིན་
གཤེགས་པའི་ཁྱུ་མཆོག་གི་མཐུ་ཕྱུང་བ་དང་། ཐམས་ཅད་མཁྱེན་པའི་མཛོད་ཡོངས་སུ་བསྟན་པ་དང་། སྐད་ཅིག་གཅིག་ལ་འཇིག་རྟེན་གྱི་ཁམས་ཐམས་ཅད་དུ་རྣམ་པར་དག་པ་གཅིག་མ་ཡིན་པ་ཐམས་ཅད་ཡོངས་སུ་བསྟན་པ་དང་། སྐད་ཅིག་
གཅིག་ལ་འཇིག་རྟེན་གྱི་ཁམས་ཐམས་ཅད་དུ་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་སྐྱེ་བ་ཐམས་ཅད་དུ་དབང་པོ་དང་། བརྩོན་འགྲུས་རྣམ་པ་ཐ་དད་པ་བྱུང་བ་དང་། མོས་པ་དང་། སྤྱོད་པ་རྣམ་པ་ཐ་དད་པ་བྱུང་བ་ལ་དུས་
གསུམ་གྱི་སངས་རྒྱས་ཀྱི་རྒྱུད་དུ་མངོན་པར་འཚང་རྒྱ་བ་ཡོངས་སུ་བསྟན་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་སྐད་ཅིག་ལ་ཡེ་ཤེས་མངོན་པར་བསྒྲུབ་པ་ཡང་དག་བསྟན་པའོ། །ཀྱེ་རྒྱལ་
བའི་སྲས་བཅུ་པོ་འདི་དག་ནི། སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་དུས་ལས་མི་འདའ་བ་སྟེ། བཅུ་གང་ཞེ་ན། སངས་རྒྱས་བཅོམ་ལྡན་འདས་རྣམས་ཀྱི་མངོན་པར་འཚང་རྒྱ་བ་ནི། དེའི་དུས་ལས་མི་འདའ་བས་དུས་ལ་བབ་པ་ཡིན།
སངས་རྒྱས་བཅོམ་ལྡན་འདས་རྣམས་ཀྱི་དགེ་བ་རྣམ་པར་སྨིན་པ་དང་། རྣམ་པར་མ་སྨིན་པ་མཉམ་པ་ཉིད་ནི་དེའི་དུས་ལས་མི་འདའ་བས་དུས་ལ་བབ་པ་ཡིན། སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་སྨིན་པའི་བྱང་ཆུབ་སེམས་

དཔའ་རྣམས་ལུང་བསྟན་པ་ནི་དེའི་དུས་ལས་མི་འདའ་བས་དུས་ལ་བབ་པ་ཡིན། སངས་རྒྱས་བཅོམ་ལྡན་འདས་རྣམས་ཀྱིས་སེམས་ཅན་གྱི་བསམ་པའི་རྒྱུད་དུ་ཆོ་འཕྲུལ་ཡོངས་སུ་བསྟན་པ་ནི་དེའི་དུས་ལས་མི་འདའ་བས་དུས་ལ་བབ་པ་ཡིན། སངས་རྒྱས་བཅོམ་ལྡན་འདས་རྣམས་ཀྱིས་
སེམས་ཅན་མོས་པ་ཇི་ལྟ་བུ་དང་ལྡན་པའི་ཚུལ་བཞིན་དུ་སྐུ་ཡོངས་སུ་བསྟན་པ་ནི་དེའི་དུས་ལས་མི་འདའ་བས་དུས་ལ་བབ་པ་ཡིན། སངས་རྒྱས་བཅོམ་ལྡན་འདས་རྣམས་བཏང་སྙོམས་སུ་བཞུགས་པ་ནི་དེའི་དུས་ལས་མི་འདའ་བས་དུས་ལ་བབ་པ་ཡིན། སངས་
རྒྱས་བཅོམ་ལྡན་འདས་རྣམས་ཡུལ་དང་། གྲོང་དང་། གྲོང་རྡལ་དུ་གཤེགས་པ་དེ་ནི་དེའི་དུས་ལས་མི་འདའ་བས་དུས་ལ་བབ་པ་ཡིན། སངས་རྒྱས་བཅོམ་ལྡན་འདས་རྣམས་དད་པ་ཇི་ལྟ་བུ་དང་ལྡན་པའི་ཚུལ་བཞིན་དུ་སེམས་ཅན་ཡོངས་སུ་འཛིན་པ་ནི། དེའི་
དུས་ལས་མི་འདའ་བས་དུས་ལ་བབ་པ་ཡིན། སངས་རྒྱས་བཅོམ་ལྡན་འདས་རྣམས་སེམས་ཅན་ཀུན་ནས་ཉོན་མོངས་པ་དང་ལྡན་ཞིང་གདུལ་དཀའ་བ་ལ་གཞན་ལ་ལྟོས་པ་མི་མངའ་བར་འདུལ་བ་ནི་དེའི་དུས་ལས་མི་འདའ་བས་དུས་ལ་བབ་པ་ཡིན། སངས་རྒྱས་
བཅོམ་ལྡན་འདས་རྣམས་ཀྱི་སངས་རྒྱས་ཀྱི་རྣམ་པར་འཕྲུལ་པ་བསམ་གྱིས་མི་ཁྱབ་པས། རྣམ་པར་འཕྲུལ་པ་བསྟན་པ་ནི་དེའི་དུས་ལས་མི་འདའ་བས་དུས་ལ་བབ་པ་ཡིན། ཀྱེ་རྒྱལ་བའི་སྲས་བཅུ་པོ་དེ་དག་ནི། སངས་རྒྱས་བཅོམ་ལྡན་འདས་རྣམས་ཀྱི་
སངས་རྒྱས་ཀྱི་དུས་ལས་མི་འདའ་བའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཡུལ་དཔེ་མེད་ཅིང་བསམ་གྱིས་མི་ཁྱབ་པ་སྟེ། བཅུ་གང་ཞེ་ན། འཇིག་རྟེན་གྱི་ཁམས་ཐམས་ཅད་མ་ལུས་པར་
སྐྱིལ་མོ་ཀྲུང་གཅིག་གིས་རྒྱས་པར་དགང་བ་དང་། དུས་གཅིག་ཏུ་སངས་རྒྱས་ཐམས་ཅད་ཡོངས་སུ་བསྟན་པ་དང་། འོད་གཟེར་གཅིག་གིས་འཇིག་རྟེན་གྱི་ཁམས་མ་ལུས་པ་ཐམས་ཅད་སྣང་བར་བྱ་བ་དང་། སྐུ་གཟུགས་གཅིག་གིས་ལུས་དང་།

གཟུགས་ཐམས་ཅད་ཡོངས་སུ་བསྟན་པ་དང་། གནས་གཅིག་ན་བཞུགས་ཀྱང་འཇིག་རྟེན་གྱི་ཁམས་ཐམས་ཅད་མ་ལུས་པར་བྱོན་པའི་སྐུར་འགྱུར་བ་དང་། ཡེ་ཤེས་གཅིག་རྟོགས་པས་ཆོས་ཐམས་ཅད་ལ་བསྒྲིབས་པ་
མེད་པར་འགྱུར་བ་དང་། ཐུགས་གཅིག་བསྐྱེད་པས་ཆོས་ཀྱི་དབྱིངས་ཐམས་ཅད་མ་ལུས་པར་རྒྱས་པར་འགེངས་པ་དང་། སངས་རྒྱས་ཀྱི་ཆེ་བ་ཉིད་ཚད་མེད་པ་དང་ལྡན་པའི་གཤེགས་སྟབས་གཅིག་གིས་དེ་ཁོ་ན་ཉིད་ཡང་དག་པར་བསྟན་པ་དང་།
དུས་གསུམ་ཐམས་ཅད་སངས་རྒྱས་ཀྱི་གོ་འཕང་གིས་རྒྱས་པར་འགེངས་པ་དང་། འགྲོ་བ་ཐམས་ཅད་དང་མ་འདྲེས་པར་བཞུགས་ཤིང་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་དང་། མྱི་དམྱིགས་
པའི་ཚུལ་གྱིས་རྒྱུད་ཀྱི་ཚུལ་གཅིག་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཡུལ་དཔེ་མེད་ཅིང་བསམ་གྱིས་མྱི་ཁྱབ་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་དེ་བཞིན་གཤེགས་པ་རྣམས་ཀྱི་
སངས་རྒྱས་ཀྱི་བྱིན་གྱི་རླབས་མངོན་པར་བསྒྲུབ་པའི་ཡེ་ཤེས་ཏེ། བཅུ་གང་ཞེ་ན། འཇུག་པ་མྱེད་པའི་ཆོས་ཐམས་ཅད་ལ་འཇུག་པས། སྨོན་ལམ་མངོན་པར་བསྒྲུབ་པའི་ཡེ་ཤེས་དང་། ལུས་མེད་པ་ལ་ལུས་མངོན་པར་བསྒྲུབ་པའི་ཡེ་ཤེས་དང་།
ཆོས་ཐམས་ཅད་མི་གཉིས་པ་ལ་མངོན་པར་འཚང་རྒྱ་བ་མངོན་པར་བསྒྲུབ་པའི་ཡེ་ཤེས་དང་། སེམས་ཅན་གྱི་མཐར་ཐུག་པར་བདག་མེད་པ་ལ་སེམས་ཅན་འདུལ་བར་མངོན་པར་བསྒྲུབ་པའི་ཡེ་ཤེས་དང་། ཆོས་ཐམས་ཅད་མཚན་མ་མེད་པ་ལ་མཚན་མ་སྣ་ཚོགས་མངོན་པར་
བསྒྲུབ་པའི་ཡེ་ཤེས་དང་། འཇིག་རྟེན་གྱི་ཁམས་ཀྱི་ཡུལ་མ་སྐྱེས་པ་ལ་འཇིག་རྟེན་གྱི་ཁམས་འདུ་བ་དང་། འཇིག་པ་མངོན་པར་བསྒྲུབ་པའི་ཡེ་ཤེས་དང་། ཡུལ་ཐམས་ཅད་མངོན་པར་འདུ་བྱ་བ་མེད་པ་ལ། ལས་ཀྱི་རྣམ་པར་སྨིན་པ་མངོན་པར་བསྒྲུབ་

པའི་ཡེ་ཤེས་དང་། ཆོས་ཐམས་ཅད་བརྗོད་དུ་མེད་པ་ལ། ཆོས་ཀྱི་དབྱིངས་སུ་གསུང་མངོན་པར་བསྒྲུབ་པའི་ཡེ་ཤེས་དང་། ཆོས་ཐམས་ཅད་ཀུན་ནས་ཉོན་མོངས་པ་དང་། རྣམ་པར་བྱང་བས་འཇུག་པ་མེད་པ་ལ་ཀུན་ནས་ཉོན་མོངས་པ་དང་། རྣམ་པར་
བྱང་བ་མངོན་པར་བསྒྲུབ་པའི་ཡེ་ཤེས་དང་། ཆོས་ཐམས་ཅད་མ་སྐྱེས་པ་ལ་སྐྱེ་བ་དང་། འཇིག་པའི་མཚན་ཉིད་རྟེན་ཅིང་འབྲེལ་བར་འབྱུང་བ་མངོན་པར་བསྒྲུབ་པའི་ཡེ་ཤེས་ཏེ། ཀྱེ་རྒྱལ་བའི་སྲས་བཅུ་པོ་དེ་དག་ནི་དེ་བཞིན་གཤེགས་པ་རྣམས་ཀྱི་སངས་རྒྱས་ཀྱི་
མངོན་པར་བསྒྲུབ་པའི་ཡེ་ཤེས་སོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་ཚད་མེད་པའི་ཁོངས་སུ་ཆུད་པ་དག་སྟེ། བཅུ་གང་ཞེ་ན། སངས་རྒྱས་བཅོམ་ལྡན་འདས་རྣམས་ཀྱི་སྐུ་ནི་དུས་གསུམ་ཐམས་ཅད་ཀྱི་རྗེས་སུ་འབྲང་
བའི་ཁོངས་སུ་ཆུད་པ་ཡིན། །སངས་རྒྱས་བཅོམ་ལྡན་འདས་རྣམས་སེམས་ཅན་ཐམས་ཅད་འདུལ་བ་མཛད་པ་ནི། ཆོ་འཕྲུལ་ཆེན་པོ་གསུམ་གྱི་ཁོངས་སུ་ཆུད་པ་ཡིན། སངས་རྒྱས་བཅོམ་ལྡན་འདས་རྣམས་ཚིག་རབ་ཏུ་དབྱེ་བ་ཐམས་ཅད་ལ་མཁས་པ་ནི་
སངས་རྒྱས་ཀྱི་ཆོས་ཀྱི་གཟུངས་ཐམས་ཅད་ཀྱི་ཁོངས་སུ་ཆུད་པ་ཡིན། སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་འཁོར་ལོ་ཐམས་ཅད་ནི་དེ་བཞིན་གཤེགས་པའི་སོ་སོ་ཡང་དག་པར་རིག་པ་བཞིའི་ཁོངས་སུ་ཆུད་པ་ཡིན། སངས་རྒྱས་བཅོམ་ལྡན་
འདས་རྣམས་སེམས་ཅན་ཐམས་ཅད་ཡོངས་སུ་མི་གཏོང་བ་ནི་ཐུགས་རྗེ་ཆེན་པོའི་ཁོངས་སུ་ཆུད་པ་ཡིན། སངས་རྒྱས་བཅོམ་ལྡན་འདས་རྣམས་རྟག་ཏུ་མཉམ་པར་གཞག་པ་ནི་དུས་ཐམས་ཅད་དུ་སེམས་ཅན་ཐམས་ཅད་ལ་རྣམ་པར་གཟིགས་པའི་ཁོངས་སུ་
ཆུད་པ་ཡིན། སངས་རྒྱས་བཅོམ་ལྡན་འདས་རྣམས་ཀྱི་དགེ་བའི་རྩ་བ་ནི་སེམས་ཅན་རྣམ་པར་འདུལ་བ་ཐམས་ཅད་ཁོངས་སུ་ཆུད་པ་ཡིན། སངས་རྒྱས་བཅོམ་ལྡན་འདས་ཀྱི་ཆགས་པ་མི་མངའ་བར་སྤྱོད་པ་ནི་ཆོས་ཀྱི་དབྱིངས་ཐམས་ཅད་ཁོངས་སུ་ཆུད་པ་

ཡིན། །སངས་རྒྱས་བཅོམ་ལྡན་འདས་རྣམས་ཀྱི་སྐད་ཅིག་གཅིག་ཏུ་ནི་འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་སྐྱེ་བ་ཐམས་ཅད་ཁོངས་སུ་ཆུད་པ་ཡིན། སངས་རྒྱས་བཅོམ་ལྡན་འདས་རྣམས་ཀྱི་ཉི་མ་གཅིག་ཏུ་ནི་
དུས་གསུམ་གྱི་བསྐལ་པའི་གྲངས་ཁོང་དུ་ཆུད་པར་བསྟན་པ་ཐམས་ཅད་ཁོངས་སུ་ཆུད་པ་ཡིན། ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་ཚད་མེད་པའི་ཁོངས་སུ་ཆུད་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་
རྒྱས་བཅོམ་ལྡན་འདས་རྣམས་ཀྱི་ཤིན་ཏུ་རྒྱ་ཆེ་བའི་ཆོས་བཟོད་པར་དཀའ་བ་རྣམས་ཏེ། བཅུ་གང་ཞེ་ན། བདུད་ཀྱི་དཀྲུགས་མ་རབ་ཏུ་འཇོམ་ཞིང་རྣམ་པར་འཐོར་བ་ནི་སངས་རྒྱས་བཅོམ་ལྡན་འདས་རྣམས་ཀྱི་ཤིན་ཏུ་རྒྱ་ཆེ་བའི་ཆོས་བཟོད་པར་དཀའ་བའོ། །
མུ་སྟེགས་ཅན་གཞན་དང་ཕས་ཀྱི་རྒོལ་བ་ཚར་གཅད་པ་ནི་སངས་རྒྱས་བཅོམ་ལྡན་འདས་རྣམས་ཀྱི་ཤིན་ཏུ་རྒྱ་ཆེ་བའི་ཆོས་བཟོད་པར་དཀའ་བའོ། །འདུལ་བའི་སེམས་ཅན་ཐམས་ཅད་རབ་ཏུ་ཚིམ་པར་མཛད་པ་ནི། སངས་རྒྱས་བཅོམ་ལྡན་འདས་རྣམས་ཀྱི་ཤིན་ཏུ་
རྒྱ་ཆེ་བའི་ཆོས་བཟོད་པར་དཀའ་བའོ། །སེམས་ཅན་འདུལ་བའི་དབང་གིས་འཇིག་རྟེན་གྱི་ཁམས་ཐམས་ཅད་ཏུ་གཤེགས་པ་ནི་སངས་རྒྱས་བཅོམ་ལྡན་འདས་རྣམས་ཀྱི་ཤིན་ཏུ་རྒྱ་ཆེ་བའི་ཆོས་བཟོད་པར་དཀའ་བའོ། །ཆོས་ཀྱི་དབྱིངས་ཐུགས་སུ་ཆུད་པའི་
ཡེ་ཤེས་ནི་སངས་རྒྱས་བཅོམ་ལྡན་འདས་རྣམས་ཀྱི་ཤིན་ཏུ་རྒྱ་ཆེ་བའི་ཆོས་བཟོད་པར་དཀའ་བའོ། །འཇིག་རྟེན་གྱི་ཁམས་ཐམས་ཅད་མ་ལུས་པར་སྐུས་ཁྱབ་ཅིང་སངས་རྒྱས་ཀྱི་སྐུ་རྣམ་པར་ཕྱེ་བ་སྣ་ཚོགས་ཐམས་ཅད་དུ་མི་གཉིས་པ་ནི། སངས་རྒྱས་བཅོམ་ལྡན་
འདས་རྣམས་ཀྱི་ཤིན་ཏུ་རྒྱ་ཆེ་བའི་ཆོས་བཟོད་པར་དཀའ་བའོ། །གསུང་གི་ཡན་ལག་ཐམས་ཅད་ལ་སེམས་ཅན་མོས་པར་བྱ་བ་དང་། ཐོས་པར་བྱ་བ་དང་། གདུལ་བར་བྱ་བ་དོན་ཡོད་པར་སོ་སོ་ཡང་དག་པར་རིག་པ་ཐོགས་པ་མེད་པས་བསྟན་པའི་ཚུལ་དུ་སོ་སོ་

ཡང་དག་པར་རིག་པ་བཞི་འབྱུང་བ་ནི། སངས་རྒྱས་བཅོམ་ལྡན་འདས་རྣམས་ཀྱི་ཤིན་ཏུ་རྒྱ་ཆེ་བའི་ཆོས་བཟོད་པར་དཀའ་བའོ། །སངས་རྒྱས་བཅོམ་ལྡན་འདས་ཀྱི་བ་སྤུའི་བུ་ག་གཅིག་ནས་དེ་བཞིན་གཤེགས་པ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་
ཏུ་ཕྲ་བ་སྙེད་བསམ་གྱིས་མི་ཁྱབ་ཅིང་། ཐོགས་པ་མེད་པའི་ཚུལ་དུ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ཐབས་ཀྱིས། འབྱུང་ཞིང་དེ་བཞིན་དུ་སངས་རྒྱས་ཀྱི་སྐུའི་བ་སྤུའི་བུ་ག་ཐམས་ཅད་ནས་འབྱུང་བ་ནི་སངས་རྒྱས་བཅོམ་ལྡན་འདས་རྣམས་ཀྱི་ཤིན་
ཏུ་རྒྱ་ཆེ་བའི་ཆོས་བཟོད་པར་དཀའ་བའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡུལ་ཤིན་ཏུ་ཕྲ་བ་གཅིག་ལ་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཡོངས་སུ་སྟོན་ཅིང་། སངས་
རྒྱས་ཀྱི་རྒྱན་དང་རང་བཞིན་གྱི་ལྷབ་ལྷུབ་དང་། ཆོས་ཀྱི་འཁོར་ལོ་བསྐོར་བ་རྒྱུན་མི་འཆད་ཅིང་སེམས་ཅན་རྣམ་པར་འདུལ་བ་ཐོགས་པ་མེད་པ་ལ་འཇིག་རྟེན་གྱི་ཁམས་དེ་དག་ཏུ་གཏོགས་པ་རྣམས་ལའང་མི་བདེ་བ་དང་། གནོད་པ་མེད་ཀྱང་རྡུལ་ཤིན་ཏུ་ཕྲ་བ་དེའང་ཡངས་
པར་མ་བྱས། འཇིག་རྟེན་གྱི་ཁམས་དེ་དག་ཀྱང་ཆུང་བར་མ་བྱས་པར་ཇི་ལྟར་གནས་པའི་ཆོས་ཀྱི་དབྱིངས་ཀྱང་ཐུགས་སུ་ཆུད་པའི་ཡེ་ཤེས་མངའ་བ་ནི། སངས་རྒྱས་བཅོམ་ལྡན་འདས་རྣམས་ཀྱི་ཤིན་ཏུ་རྒྱ་ཆེ་བའི་ཆོས་བཟོད་པར་དཀའ་བའོ། །མུན་པ་མེད་པའི་
ཁམས་དེ་བཞིན་གཤེགས་པས་མངོན་པར་སངས་རྒྱས་ཏེ། སངས་རྒྱས་ཀྱི་ཆོས་ཐམས་ཅད་ལ་མུན་པ་མེད་ཅིང་བསྒྲིབས་པ་མི་མངའ་ལ་སེམས་ཅན་ཕ་རོལ་གྱི་བསྒྲིབས་པ་སྣ་ཚོགས་ཀྱི་གནས་རྣམ་པར་སེལ་ན། དེ་ལ་དེ་བཅོམ་ལྡན་འདས་དེ་བཞིན་གཤེགས་པའི་སྟོབས་
བཅུ་དང་ལྡན་པ་ནི། སངས་རྒྱས་བཅོམ་ལྡན་འདས་རྣམས་ཤིན་ཏུ་རྒྱ་ཆེ་བའི་ཆོས་བཟོད་པར་དཀའ་བ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་ཤིན་ཏུ་རྒྱ་ཆེ་བའི་ཆོས་བཟོད་པར་དཀའ་བའོ། །ཀྱེ་རྒྱལ་བའི་སྲས་དག་བཅུ་བོ་

འདི་དག་ནི། སངས་རྒྱས་བཅོམ་ལྡན་འདས་རྣམས་ཀྱི་བདག་ཉིད་ཆེ་བ་རྣམ་པ་ཐམས་ཅད་དུ་ཁ་ན་མ་ཐོ་བ་མེད་ཅིང་ཤིན་ཏུ་དག་པ་སྟེ། བཅུ་གང་ཞེ་ན། སངས་རྒྱས་བཅོམ་ལྡན་འདས་རྣམས་ཀྱི་ཡང་དག་པར་བསྒྲུབས་པ་བདག་ཉིད་ཆེ་བ་
ནི་སྔོན་གྱི་མཐའ་ནས་རྣམ་པ་ཐམས་ཅད་དུ་ཁ་ན་མ་ཐོ་བ་མེད་ཅིང་རྣམ་པར་དག་པའོ། །སངས་རྒྱས་བཅོམ་ལྡན་འདས་རྣམས་ཀྱི་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་ཀྱི་རྒྱུད་དུ་རིགས་དང་ལྡན་པར་འབྱུང་བའི་བདག་ཉིད་ཆེ་བ་ནི། དེ་བཞིན་གཤེགས་པའི་རིགས་
རྣམ་པར་དག་པས། རྣམ་པ་ཐམས་ཅད་དུ་ཁ་ན་མ་ཐོ་བ་མེད་ཅིང་ཤིན་ཏུ་རྣམ་པར་དག་པའོ། །སངས་རྒྱས་བཅོམ་ལྡན་འདས་རྣམས་ནི་རྣམ་པར་ཤེས་པ་ལ་མི་གནས་པ་སྟེ། སངས་རྒྱས་བཅོམ་ལྡན་འདས་རྣམས་ཀྱི་བདག་ཉིད་ཆེ་བ་ནི་ཕྱི་མའི་མཐའི་མུར་ཐུག་
པར་གནས་པས། རྣམ་པ་ཐམས་ཅད་དུ་ཁ་ན་མ་ཐོ་བ་མེད་ཅིང་། ཤིན་ཏུ་རྣམ་པར་དག་པའོ། །སངས་རྒྱས་བཅོམ་ལྡན་འདས་རྣམས་ནི་དུས་གསུམ་ལ་མི་གནས་པར་རྣམ་པར་སྤྱོད་ཅིང་ཆོས་ཐམས་ཅད་ལ་རྟེན་པ་ཡང་དག་པར་བཅོམ་པས་སངས་
རྒྱས་བཅོམ་ལྡན་འདས་རྣམས་ཀྱི་བདག་ཉིད་ཆེ་བ་ནི། རྣམ་པ་ཐམས་ཅད་དུ་ཁ་ན་མ་ཐོ་བ་མེད་ཅིང་ཤིན་ཏུ་རྣམ་པར་དག་པའོ། །སངས་རྒྱས་བཅོམ་ལྡན་འདས་རྣམས་ནི་དངོས་པོ་རྣམ་པ་ཐ་དད་པ་ལ་རྣམ་པར་གཞག་པ་གཅིག་གིས་ལེན་པ་མེད་པས་སངས་
རྒྱས་བཅོམ་ལྡན་འདས་རྣམས་ཀྱི་བདག་ཉིད་ཆེ་བ་ནི་རྣམ་པ་ཐམས་ཅད་དུ་ཁ་ན་མ་ཐོ་བ་མེད་ཅིང་ཤིན་ཏུ་རྣམ་པར་དག་པའོ། །སངས་རྒྱས་བཅོམ་ལྡན་འདས་རྣམས་ནི་སྔོན་གྱི་མཐའ་དང་། ཕྱི་མའི་མཐར་ཆོས་ཀྱི་དབྱིངས་ལ་གནས་པས། མཉམ་པའི་བསོད་
ནམས་མི་ཟད་པ་དང་ལྡན་པས་མི་ཟད་པའི་བསོད་ནམས་མངའ་བ་སྟེ། སངས་རྒྱས་བཅོམ་ལྡན་འདས་ཀྱི་བདག་ཉིད་ཆེ་བ་ནི་རྣམ་པ་ཐམས་ཅད་དུ་ཁ་ན་མ་ཐོ་བ་མེད་ཅིང་ཤིན་ཏུ་རྣམ་པར་དག་པའོ། །སངས་རྒྱས་བཅོམ་ལྡན་འདས་རྣམས་ནི་སྐུ་གཟུགས་

དང་ཁ་དོག་མཐའ་ཡས་པ། འཇིག་རྟེན་གྱི་ཁམས་ཐམས་ཅད་ན་སེམས་ཅན་འདུལ་བའི་དུས་དང་དབང་གིས་ཆགས་པ་མེད་པར་བཞུགས་པས། སངས་རྒྱས་བཅོམ་ལྡན་འདས་རྣམས་ཀྱི་བདག་ཉིད་ཆེ་བ་ནི་རྣམ་པ་ཐམས་ཅད་དུ་ཁ་ན་མ་ཐོ་བ་མེད་ཅིང་
ཤིན་ཏུ་རྣམ་པར་དག་པའོ། །སངས་རྒྱས་བཅོམ་ལྡན་འདས་རྣམས་ནི་མི་འཇིགས་པ་བཞི་བརྙེས་པས་བག་ཚ་བ་མི་མངའ་བར་བཞུགས་ཤིང་། ཁྱུ་མཆོག་དང་སེང་གེའི་ང་རོ་འབྱིན་ཏེ་རྒོལ་བའི་ནང་ན་སྟག་ལྟ་བུའི་མཐུ་དང་ལྡན་ལ་ཆོས་ཐམས་ཅད་བསྟན་པ་
ལ་ཐུགས་སྒྲོན་མ་ལྟ་བུ་མངའ་བས། སངས་རྒྱས་བཅོམ་ལྡན་འདས་རྣམས་ཀྱི་བདག་ཉིད་ཆེ་བ་ནི་རྣམ་པ་ཐམས་ཅད་དུ་ཁ་ན་མ་ཐོ་བ་མེད་ཅིང་ཤིན་ཏུ་རྣམ་པར་དག་པའོ། །སངས་རྒྱས་བཅོམ་ལྡན་འདས་རྣམས་ནི་ཡོངས་སུ་མྱ་ངན་ལས་འདས་ནས་བསྐལ་པ་
བརྗོད་དུ་མེད་པའི་ཡང་བརྗོད་དུ་མེད་པ་ཞིག་ལོན་ཡང་མཚན་གྱི་ཚིག་ཐོས་པ་ཙམ་གྱིས་བཞུགས་པ་དང་འདྲ་བར་སེམས་ཅན་རྣམས་ཀྱི་ཡོན་ཤིན་ཏུ་སྦྱོང་ཞིང་མྱ་ངན་ལས་འདས་ནས། དེ་སྲིད་ཀྱི་ཡུན་རིང་པོ་འདས་ཀྱང་སངས་རྒྱས་ལ་བསྐྱེད་པའི་ཡོན་ཏན་ཟད་པར་
མི་འགྱུར་བས། སངས་རྒྱས་ཀྱི་བདག་ཉིད་ཆེ་བ་ནི་རྣམ་པ་ཐམས་ཅད་དུ་ཁ་ན་མ་ཐོ་བ་མེད་ཅིང་ཤིན་ཏུ་རྣམ་པར་དག་པའོ། །སངས་རྒྱས་བཅོམ་ལྡན་འདས་རྣམས་ནི་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་དག་ན་
བཞུགས་ཤིང་འཇིག་རྟེན་གྱི་ཁམས་རྒྱང་རིང་པོ་ན་བཞུགས་ཀྱང་འཇིག་རྟེན་གྱི་ཁམས་འདི་སེམས་ཅན་རྣམས་ཀྱིས་རྗེས་སུ་དྲན་པར་བྱས་ནས་སྐུ་མངོན་པར་སྟོན་པ་མཛད་པས། སངས་རྒྱས་བཅོམ་ལྡན་འདས་རྣམས་ཀྱི་བདག་ཉིད་ཆེ་བ་ནི་རྣམ་པ་ཐམས་ཅད་དུ་ཁ་
ན་མ་ཐོ་བ་མེད་ཅིང་ཤིན་ཏུ་རྣམ་པར་དག་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་བདག་ཉིད་ཆེ་བ་ནི་རྣམ་པ་ཐམས་ཅད་དུ་ཁ་ན་མ་ཐོ་བ་མེད་ཅིང་ཤིན་ཏུ་རྣམ་པར་དག་པའོ། །ཀྱེ་རྒྱལ་བའི་སྲས་དག་བཅུ་པོ་འདི་དག་ནི་

སངས་རྒྱས་བཅོམ་ལྡན་འདས་རྣམས་ཀྱི་ཤིན་ཏུ་རྣམ་པར་དག་པ་སྟེ། བཅུ་གང་ཞེ་ན། སངས་རྒྱས་བཅོམ་ལྡན་འདས་རྣམས་ནི། སངས་རྒྱས་ཀྱི་ཚངས་པའི་སྤྱོད་པ་རྣམ་པར་དག་པ་ལ་སྔོན་གྱི་སྨོན་ལམ་གྱིས་ཤིན་ཏུ་རྣམ་པར་དག་
པ་ཡིན། །སངས་རྒྱས་བཅོམ་ལྡན་འདས་རྣམས་ནི་ཆགས་པ་མེད་པའི་ཚུལ་ཁྲིམས་ཀྱིས་ཤིན་ཏུ་རྣམ་པར་དག་པ་ཡིན། སངས་རྒྱས་བཅོམ་ལྡན་འདས་རྣམས་ནི་སེམས་ཅན་ཐམས་ཅད་ཀྱི་ཉོན་མོངས་པ་སེལ་བས་ཤིན་ཏུ་རྣམ་པར་དག་པ་ཡིན། སངས་རྒྱས་
བཅོམ་ལྡན་འདས་རྣམས་ནི་སངས་རྒྱས་ཀྱི་ཞིང་གིས་ཤིན་ཏུ་རྣམ་པར་དག་པ་ཡིན། སངས་རྒྱས་བཅོམ་ལྡན་འདས་རྣམས་ནི་འཁོར་གྱིས་ཤིན་ཏུ་རྣམ་པར་དག་པ་ཡིན། སངས་རྒྱས་བཅོམ་ལྡན་འདས་རྣམས་ནི་རིགས་རྣམ་པར་དག་པས་ཤིན་ཏུ་རྣམ་པར་
དག་པ་ཡིན། སངས་རྒྱས་བཅོམ་ལྡན་འདས་རྣམས་ནི་གཟུགས་ཀྱི་སྐུའི་མཚན་དང་། དཔེ་བྱད་བཟང་པོ་རྣམ་པར་དག་པས་ཤིན་ཏུ་རྣམ་པར་དག་པ་ཡིན། སངས་རྒྱས་བཅོམ་ལྡན་འདས་རྣམས་ནི་ཆོས་ཀྱི་སྐུ་རྙོག་པ་མེད་པས་ཤིན་ཏུ་རྣམ་པར་དག་པ་ཡིན།
སངས་རྒྱས་བཅོམ་ལྡན་འདས་རྣམས་ནི་ཐམས་ཅད་མཁྱེན་པའི་ཡེ་ཤེས་ཀྱི་ཕུང་པོ་བསྒྲིབས་པ་མེད་པས་ཤིན་ཏུ་རྣམ་པར་དག་པ་ཡིན། སངས་རྒྱས་བཅོམ་ལྡན་འདས་རྣམས་ནི་སངས་རྒྱས་ཀྱི་རྣམ་པར་ཐར་པ་ཐམས་ཅད་ལ་མཐུ་ཆེན་པོ་བརྙེས་ཤིང་། ཕ་རོལ་ཏུ་
ཕྱིན་པ་དམ་པ་བརྙེས་པས་ཤིན་ཏུ་རྣམ་པར་དག་པ་ཡིན་ཏེ། ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་ཤིན་ཏུ་རྣམ་པར་དག་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་མཛད་པ་འཇིག་
རྟེན་གྱི་ཁམས་ཐམས་ཅད་དུ་འབྱུང་ཞིང་དུས་ཐམས་ཅད་དུ་གནས་པ་སྟེ། བཅུ་གང་ཞེ་ན། སངས་རྒྱས་རྗེས་སུ་དྲན་པ་ཐོབ་པའི་སེམས་ཅན་རྣམས་ལ་དུས་ཐམས་ཅད་དུ་སངས་རྒྱས་བསྟན་པ་དང་། སེམས་ཅན་སེམས་ཅང་ཤེས་དང་ལྡན་པ་རྣམས་ལ།

དུས་ཐམས་ཅད་དུ་ཆོས་བསྟན་པ་དང་། སེམས་ཅན་སངས་རྒྱས་ལ་དད་པའི་སེམས་དང་ལྡན་པའི་དགེ་བའི་རྩ་བ་དུས་ཐམས་ཅད་དུ་བསྐྱེད་པ་དང་། ཆོས་སྐྱོན་མེད་པར་འདས་པའི་སེམས་ཅན་རྣམས་དུས་ཐམས་ཅད་དུ་ཡེ་ཤེས་ཁོང་དུ་ཆུད་པར་བྱ་བ་དང་།
འགྲོ་བ་ཐམས་ཅད་དུ་སངས་རྒྱས་ཀྱི་མཛད་པ་དུས་ཐམས་ཅད་དུ་རྒྱུན་མི་འཆད་པ་དང་། དེ་བཞིན་གཤེགས་པ་རྣམས་འཇིག་རྟེན་གྱི་ཁམས་ཐམས་ཅད་དུ་དུས་ཐམས་ཅད་དུ། ཆགས་པ་མི་མངའ་བར་གཤེགས་པ་དང་། སེམས་ཅན་ཐམས་ཅད་ལ་
ཐུགས་རྗེ་ཆེན་པོ་དུས་ཐམས་ཅད་དུ་མི་གཏོང་བ་དང་། སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་སྤྲུལ་པ་དུས་ཐམས་ཅད་དུ་ཐོགས་པ་མེད་པ་དང་། སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་རྣམ་པར་འཕྲུལ་པ་སྣ་ཚོགས་དུས་
ཐམས་ཅད་དུ་ཐོགས་པ་མེད་པ་དང་། སངས་རྒྱས་བཅོམ་ལྡན་འདས་རྣམས་ཆོས་ཀྱི་དབྱིངས་གནས་པའི་སངས་རྒྱས་དུས་ཐམས་ཅད་དུ་འབྱུང་བ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་མཛད་པ་འཇིག་རྟེན་གྱི་
ཁམས་ཐམས་ཅད་དུ་འབྱུང་ཞིང་དུས་ཐམས་ཅད་དུ་གནས་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡེ་ཤེས་རྒྱ་མཚོ་མི་ཟད་པའི་ཚུལ་རྣམས་ཏེ། བཅུ་གང་ཞེ་ན། སངས་རྒྱས་བཅོམ་ལྡན་འདས་
རྣམས་ནི་དེ་བཞིན་གཤེགས་པའི་སྐུས་ཡེ་ཤེས་རྒྱ་མཚོ་མི་ཟད་པའོ། །སངས་རྒྱས་བཅོམ་ལྡན་འདས་རྣམས་ནི་སངས་རྒྱས་ཀྱི་ཕྲིན་ལས་ཚད་མེད་པ་བརྙེས་པས་ཡེ་ཤེས་རྒྱ་མཚོ་མི་ཟད་པའོ། །སངས་རྒྱས་བཅོམ་ལྡན་འདས་རྣམས་ནི་སངས་རྒྱས་ཀྱི་སྤྱན་གྱི་
ཡུལ་མངའ་བས་ཡེ་ཤེས་རྒྱ་མཚོ་མི་ཟད་པའོ། །སངས་རྒྱས་བཅོམ་ལྡན་འདས་རྣམས་ནི་དགེ་བའི་རྩ་བ་ཚད་མེད་པ་བསམ་གྱིས་མི་ཁྱབ་པ་མངའ་བས་ཡེ་ཤེས་རྒྱ་མཚོ་མི་ཟད་པའོ། །སངས་རྒྱས་བཅོམ་ལྡན་འདས་རྣམས་ནི་ཆོས་ཀྱི་ཆར་མངོན་པར་འབེབས་

པས་ཡེ་ཤེས་རྒྱ་མཚོ་མི་ཟད་པའོ། །སངས་རྒྱས་བཅོམ་ལྡན་འདས་རྣམས་ནི་སངས་རྒྱས་ཀྱི་ཡོན་ཏན་དང་ལེགས་པ་མང་པོ་མངའ་བས་ཡེ་ཤེས་རྒྱ་མཚོ་མི་ཟད་པའོ། །སངས་རྒྱས་བཅོམ་ལྡན་འདས་རྣམས་ནི་སྔོན་གྱི་མཐའ་
ཐམས་ཅད་མཁྱེན་པའི་སྨོན་ལམ་དང་ཁྱད་པར་མངའ་བས་ཡེ་ཤེས་རྒྱ་མཚོ་མི་ཟད་པའོ། །སངས་རྒྱས་བཅོམ་ལྡན་འདས་རྣམས་ནི་ཕྱི་མའི་མཐའི་མུར་འགྲོ་བ་ཐམས་ཅད་སངས་རྒྱས་ཀྱི་ཕྲིན་ལས་རྒྱུན་མི་འཆད་པར་སྒྲུབ་པས་ཡེ་ཤེས་རྒྱ་མཚོ་མི་ཟད་པའོ། །
སངས་རྒྱས་བཅོམ་ལྡན་འདས་རྣམས་ནི་སེམས་ཅན་གྱི་རིགས་ཐམས་ཅད་མ་ལུས་པའི་སེམས་དང་སྤྱོད་པ་ལ་ཡེ་ཤེས་རྒྱ་མཚོ་མི་ཟད་པའོ། །སངས་རྒྱས་བཅོམ་ལྡན་འདས་རྣམས་ནི་ཐམས་ཅད་མཁྱེན་པའི་བསོད་ནམས་ཟིལ་གྱིས་མི་ནོན་པས་ཡེ་ཤེས་རྒྱ་མཚོ་
མི་ཟད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡེ་ཤེས་རྒྱ་མཚོ་མི་ཟད་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་
རྒྱས་ཀྱི་ཚུལ་རྣམས་ཏེ། བཅུ་གང་ཞེ་ན། འདི་ལྟ་སྟེ། ཕ་རོལ་ཏུ་ཕྱིན་པ་ཐམས་ཅད་ཀྱིས་མངོན་པར་བྱུང་བ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཚུལ་ཡིན་ནོ། །འདི་ལྟ་སྟེ་ཆོས་ཐམས་ཅད་ལ་མི་མཁྱེན་པ་གང་ཡང་མི་མངའ་བ་འདི་ནི་
སངས་རྒྱས་བཅོམ་ལྡན་འདས་རྣམས་ཀྱི་ཚུལ་ཡིན་ནོ། །འདི་ལྟ་སྟེ། ཐམས་ཅད་ཀྱང་ཐུགས་རྗེ་ཆེན་པོ་དང་ལྡན་པ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཚུལ་ཡིན་ནོ། །འདི་ལྟ་སྟེ་ཐམས་ཅད་ཀྱང་སྟོབས་བཅུ་ཚད་མེད་པ་དང་ལྡན་པ་འདི་ནི་
སངས་རྒྱས་བཅོམ་ལྡན་འདས་རྣམས་ཀྱི་ཚུལ་ཡིན་ནོ། །འདི་ལྟ་སྟེ་ཐམས་ཅད་ཀྱང་བླ་ན་མེད་པའི་ཆོས་ཀྱི་འཁོར་ལོ་རབ་ཏུ་བསྐོར་བ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཚུལ་ཡིན་ནོ། །འདི་ལྟ་སྟེ་ཐམས་ཅད་ཀྱང་སེམས་ཅན་འདུལ་བ་ལ་ཡང་དག་

པར་ཞུགས་པ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཚུལ་ཡིན་ནོ། །འདི་ལྟ་སྟེ་ཐམས་ཅད་ཀྱང་འགྲོ་བ་ཐམས་ཅད་ཀྱི་དོན་དུ་མངོན་པར་སངས་རྒྱས་པ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཚུལ་ཡིན་ནོ། །འདི་ལྟ་སྟེ་འདུལ་བའི་སེམས་
ཅན་རྣམས་འདུལ་བ་ལ་ཐོགས་པ་མི་མངའ་བ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཚུལ་ཡིན་ནོ། །འདི་ལྟ་སྟེ་མི་གཉིས་པར་ཡང་དག་པར་སྤྱོད་པའི་མཚན་ཉིད་ཀྱི་ཆོས་ལ་རབ་ཏུ་གཞོལ་བ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཚུལ་ཡིན་
ནོ། འདི་ལྟ་སྟེ་ཇི་ལྟར་ཡོངས་སུ་སྨིན་པར་འགྱུར་བ་དང་། དུལ་བར་གྱུར་པའི་སེམས་ཅན་རྣམས་ལ་སངས་རྒྱས་ཀྱི་ཡུལ་མུ་མེད་པས་སངས་རྒྱས་ཀྱི་ཡོངས་སུ་མྱ་ངན་ལས་འདའ་བ་སྟོན་པ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཚུལ་ཡིན་ཏེ། ཀྱེ་
རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཚུལ་ལོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཆོས་མཐའ་ཡས་པ་ཤིན་ཏུ་བསྟན་པའི་སྒོ་རྣམས་ཏེ། བཅུ་གང་ཞེ་ན །
སངས་རྒྱས་བཅོམ་ལྡན་འདས་རྣམས་ནི་སེམས་ཅན་གྱི་ཁམས་ཤིན་ཏུ་བསྟན་པའི་སྒོར་མཐའ་ཡས་པའོ། །སངས་རྒྱས་བཅོམ་ལྡན་འདས་རྣམས་ནི་སེམས་ཅན་གྱི་སྤྱོད་པ་སྣ་ཚོགས་ཤིན་ཏུ་བསྟན་པའི་སྒོར་མཐའ་ཡས་པའོ། །སངས་རྒྱས་བཅོམ་
ལྡན་འདས་རྣམས་ནི་སེམས་ཅན་ཐམས་ཅད་ཀྱི་ལས་དང་རྣམ་པར་སྨིན་པ་ཤིན་ཏུ་བསྟན་པའི་སྒོར་མཐའ་ཡས་པའོ། །སངས་རྒྱས་བཅོམ་ལྡན་འདས་རྣམས་ནི་སེམས་ཅན་ཐམས་ཅད་ལ་གདམས་ངག་དང་མན་ངག་ཤིན་ཏུ་བསྟན་པའི་སྒོར་མཐའ་ཡས་
པའོ། །སངས་རྒྱས་བཅོམ་ལྡན་འདས་རྣམས་ནི་སེམས་ཅན་མཐའ་ཡས་པ་རྣམ་པར་སྦྱོང་བའི་ནན་ཏན་གྱི་སྒོར་མཐའ་ཡས་པའོ། །སངས་རྒྱས་བཅོམ་ལྡན་འདས་རྣམས་ནི་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་གདམས་ངག་དང་མན་ངག་གིས་

ཡོངས་སུ་གཞོག་པའི་སྒོར་མཐའ་ཡས་པའོ། །སངས་རྒྱས་བཅོམ་ལྡན་འདས་རྣམས་ནི་བྱང་ཆུབ་སེམས་དཔའ་ཁྱད་པར་གྱི་སྨོན་ལམ་རྣམ་པ་ཐ་དད་པས་འབྱུང་བ་ཤིན་ཏུ་བསྟན་པའི་སྒོར་མཐའ་ཡས་པའོ། །སངས་རྒྱས་
བཅོམ་ལྡན་འདས་རྣམས་ནི་འཇིག་རྟེན་གྱི་ཁམས་ཐམས་ཅད་མ་ལུས་པའི་འདུ་བ་དང་འཇིག་པ་ཤིན་ཏུ་བསྟན་པའི་སྒོར་མཐའ་ཡས་པའོ། །སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཞིང་རྣམ་པར་དག་པ་ནི་བྱང་ཆུབ་སེམས་དཔའི་བསམ་པ་དང་མོས་
པ་ཇི་ལྟ་བ་བཞིན་དུ་ཡོངས་སུ་བསྟན་པའི་སྒོར་མཐའ་ཡས་པའོ། །སངས་རྒྱས་བཅོམ་ལྡན་འདས་རྣམས་ཀྱི་འཇིག་རྟེན་གྱི་ཁམས་མ་ལུས་པ་ཐམས་ཅད་དུ་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་གཅིག་ནས་གཅིག་ཏུ་བརྒྱུད་པ་
ནི་བསྐལ་པ་ཡངས་པ་དེ་དང་དེ་དག་ཏུ་བསྟན་ཅིང་བརྗོད་པ་དང་། ཡོངས་སུ་བཤད་པས། སངས་རྒྱས་ཀྱི་ཡེ་ཤེས་ཐམས་ཅད་ཁོང་དུ་ཆུད་པར་བྱ་བའི་སྒོར་མཐའ་ཡས་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་
ཀྱི་སངས་རྒྱས་ཀྱི་ཆོས་མཐའ་ཡས་པ་ཤིན་ཏུ་བསྟན་པའི་སྒོའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཕྲིན་ལས་སེམས་ཅན་རྣམས་ལ་སྒྲུབ་པ་སྟེ། བཅུ་གང་ཞེ་ན། སངས་རྒྱས་བཅོམ་ལྡན་
འདས་རྣམས་ཀྱི་སྐུ་ཡོངས་སུ་བསྟན་པ་ནི་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་སྒྲུབ་བོ། །སངས་རྒྱས་བཅོམ་ལྡན་འདས་རྣམས་ཀྱི་གསུང་ཡང་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་སྒྲུབ་བོ། །སངས་རྒྱས་བཅོམ་ལྡན་འདས་
རྣམས་ལེན་པ་མཛད་པ་ཡང་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་སྒྲུབ་བོ། །སངས་རྒྱས་བཅོམ་ལྡན་འདས་རྣམས་ལེན་པ་མི་མཛད་པ་ཡང་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་སྒྲུབ་བོ། །ས་དང་ཆུ་དང་མྱེ་དང་། རླུང་གིས་

ཀྱང་སངས་རྒྱས་བཅོམ་ལྡན་འདས་རྣམས་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་སྒྲུབ་བོ། །སངས་རྒྱས་བཅོམ་ལྡན་འདས་རྣམས་ནི་བྱིན་གྱི་རླབས་ཀྱི་ཡུལ་དང་མི་དམིགས་པ་ཐམས་ཅད་ཡུལ་དུ་མཛད་པས་ཀྱང་སེམས་ཅན་རྣམས་ལ་
སངས་རྒྱས་ཀྱི་ཕྲིན་ལས་སྒྲུབ་བོ། །སངས་རྒྱས་བཅོམ་ལྡན་འདས་རྣམས་ཀྱི་མཚན་ཀྱང་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་སྒྲུབ་བོ། །སངས་རྒྱས་བཅོམ་ལྡན་འདས་རྣམས་ནི་ཞིང་ལ་དམྱིགས་པར་མཛད་པས་ཀྱང་སེམས་ཅན་
རྣམས་ལ་སངས་རྒྱས་ཀྱི་ཕྲིན་ལས་སྒྲུབ་བོ། །སངས་རྒྱས་བཅོམ་ལྡན་འདས་རྣམས་ནི་སངས་རྒྱས་ཀྱི་ཞིང་རྣམ་པར་དག་པས་ཀྱང་སེམས་ཅན་རྣམས་ལ་སངས་རྒྱས་ཀྱི་ཕྲིན་ལས་སྒྲུབ་བོ། །སངས་རྒྱས་བཅོམ་ལྡན་འདས་རྣམས་མི་གསུང་བར་བཞུགས་པ་ཡང་སེམས་ཅན་རྣམས་ལ་སངས་
རྒྱས་ཀྱི་ཕྲིན་ལས་སྒྲུབ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་ཀྱི་སངས་རྒྱས་ཀྱི་ཕྲིན་ལས་སེམས་ཅན་རྣམས་ལ་སྒྲུབ་པའོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་གཉིས་
པ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སེམས་ཅན་གྱི་གཙོ་བོའི་ཆོས་ཏེ། །བཅུ་གང་ཞེ་ན། སྨོན་ལམ་ཆེན་པོ་ལ་རབ་ཏུ་བརྟེན་ཞིང་སྨོན་ལམ་ཞིག་པ་མི་མངའ་བས་ཇི་སྐད་དུ་གསུང་བ་
དེ་ལྟར་མཛད་ཅིང་གཉིས་སུ་མི་གསུང་བ་འདི་ནི་སེམས་ཅན་གྱི་གཙོ་བོའི་ཆོས་དང་པོའོ། །ཕྱི་མའི་མཐའི་མུར་ཐུག་པའི་བསྐལ་པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ལ་ཡོན་ཏན་ཐམས་ཅད་ཡོངས་སུ་རྫོགས་པར་མཛད་པས་རབ་ཏུ་བརྩོན་
ཞིང་སྒྱིད་ལུག་པ་མི་མངའ་བ་འདི་ནི་སེམས་ཅན་གྱི་གཙོ་བོའི་ཆོས་གཉིས་པའོ། །སེམས་ཅན་འདུལ་བར་འགྱུར་བ་གཅིག་གཅིག་གཟིགས་ཀྱང་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པར་གཤེགས་ཤིང་འཇིག་རྟེན་གྱི་ཁམས་

ཐམས་ཅད་དུ་གཤེགས་པ་ལ་ཐག་ཐོགས་མེད་པ་འདི་ནི་སེམས་ཅན་གྱི་གཙོ་བོའི་ཆོས་གསུམ་པའོ། །ཞེ་སྡང་བའི་སེམས་ཅན་རྣམས་ལ་ཐུགས་རྗེ་ཆེན་པོས་སྙོམས་པ་དང་། དད་པའི་སེམས་ཅན་རྣམས་ལ་
ཐུགས་རྗེ་ཆེན་པོས་སྙོམས་པ་འདི་ནི་སེམས་ཅན་གྱི་གཙོ་བོའི་ཆོས་བཞི་པའོ། །གང་གི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་
ཀྱི་བར་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་མི་འགྱུར་རོ། །སྙམ་དུ་བྱང་ཆུབ་ཀྱི་སེམས་མ་ཉམས་པ་འདི་ནི་སེམས་ཅན་གྱི་གཙོ་བོའི་ཆོས་ལྔ་པའོ། །དགེ་བའི་རྩ་བ་ཐམས་ཅད་ཡང་དག་པར་སྒྲུབ་
ཅིང་། ཐམས་ཅད་མཁྱེན་པ་ཉིད་དུ་ཡོངས་སུ་བསྔོ་བས་འཇུག་གི །འཇིག་རྟེན་པའི་རྒྱུད་ལ་མ་ཡིན་པ་འདི་ནི་སེམས་ཅན་གྱི་གཙོ་བོའི་ཆོས་དྲུག་པའོ། །སངས་རྒྱས་ཐམས་ཅད་ཀྱི་རྗེས་སུ་སྔོན་སངས་རྒྱས་ཀྱིས་སྤྱད་པའི་སེམས་སུ་ལུས་ཀྱི་
ལས་དང་། ངག་གི་ལས་དང་། ཡིད་ཀྱི་ལས་ཀྱིས་སློབ་ཅིང་ཉན་ཐོས་དང་། རང་སངས་རྒྱས་ཀྱི་སྤྱོད་པས་ཐམས་ཅད་མཁྱེན་པ་ཉིད་དུ་ཡོངས་སུ་བསྔོ་བ་མེད་པས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་
རྒྱས་པ་འདི་ནི་སེམས་ཅན་གྱི་གཙོ་བོའི་ཆོས་བདུན་པའོ། །བྱང་ཆུབ་སེམས་དཔའི་སེམས་རྣམ་པར་དག་ཅིང་འོད་གསལ་བ་དང་། ཐམས་ཅད་དུ་སྣང་ཞིང་ཀུན་ཏུ་འོད་འབྱུང་བ། སངས་རྒྱས་ཀྱི་ཆོས་ཐམས་ཅད་ལ་སྣང་ཞིང་ཐམས་
ཅད་དུ་སྙོམས་པས། ཐམས་ཅད་མཁྱེན་པ་ཉིད་ཡོངས་སུ་རྫོགས་པར་བྱེད་པ་འདི་ནི་སེམས་ཅན་གྱི་གཙོ་བོའི་ཆོས་བརྒྱད་པའོ། །འཇིག་རྟེན་པའི་བདེ་བ་ཐམས་ཅད་ཡོངས་སུ་སྤངས་ཏེ། འཇིག་རྟེན་པའི་དགའ་བ་ཐམས་ཅད་ལ་མ་

ཆགས་པ་དང་། འཇིག་རྟེན་ཐམས་ཅད་ཀྱིས་གོས་པ་མེད་པའི་སྨོན་ལམ་ཐམས་ཅད་དུ་མཉམ་པ་ཉིད་ཀྱིས། འཇིག་རྟེན་ཐམས་ཅད་བདེ་བ་ཐམས་ཅད་དང་ལྡན་པར་བྱས་ཏེ། སྡུག་བསྔལ་དང་སྤྲོས་པ་ཐམས་ཅད་རབ་ཏུ་འཇོམས་པ་འདི་ནི་
སེམས་ཅན་གྱི་གཙོ་བོའི་ཆོས་དགུ་པའོ། །སྡུག་བསྔལ་གྱི་མྱི་བདེ་བ་ཐམས་ཅད་ཉམས་སུ་བབ་སྟེ། འགྲོ་བ་ཐམས་ཅད་ཀྱི་དོན་དུ་དཀའ་ཐུབ་ཀྱིས་ཤིན་ཏུ་གདུངས་ཀྱང་བླ་བར་སེམས་བསྐྱེད་པས། སངས་རྒྱས་ཐམས་ཅད་ཀྱི་རིགས་ཡོངས་སུ་
བསྲུང་བ་དང་ལྡན་པ་དང་། སྟོབས་བཅུའི་སའི་བར་དུ་སངས་རྒྱས་ཀྱི་ཡུལ་ལ་མོས་པས་མཐར་ཐུག་པ་འདི་ནི་སེམས་ཅན་གྱི་གཙོ་བོའི་ཆོས་བཅུ་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སེམས་ཅན་གྱི་
གཙོ་བོའི་ཆོས་སོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་རྣམ་པར་སྤྱོད་པ་ཆགས་པ་མེད་པ་རྣམས་ཏེ། བཅུ་གང་ཞེ་ན། སངས་རྒྱས་བཅོམ་ལྡན་འདས་རྣམས་ནི་འཇིག་རྟེན་གྱི་ཁམས་མ་ལུས་
པ་ཐམས་ཅད་དུ་གཤེགས་པས་ཆགས་པ་མི་མངའ་བར་རྣམ་པར་སྤྱོད་པ་ཡིན། སངས་རྒྱས་བཅོམ་ལྡན་འདས་རྣམས་ནི་འཇིག་རྟེན་གྱི་ཁམས་མ་ལུས་པ་ཐམས་ཅད་ན་བཞུགས་པས་ཆགས་པ་མྱི་མངའ་བར་རྣམ་པར་སྤྱོད་པ་ཡིན། སངས་རྒྱས་བཅོམ་ལྡན་
འདས་རྣམས་ནི་འཇིག་རྟེན་གྱི་ཁམས་ཐམས་ཅད་ན་བཞུགས་པ་དང་བཞེངས་པ་དང་། བཞུད་པ་ཆགས་པ་མི་མངའ་བར་རྣམ་པར་སྤྱོད་པ་ཡིན། སངས་རྒྱས་བཅོམ་ལྡན་འདས་རྣམས་ནི་འཇིག་རྟེན་གྱི་ཁམས་མ་ལུས་པ་ཐམས་ཅད་དུ་ཆོས་སྟོན་
པ་ཆགས་པ་མི་མངའ་བར་རྣམ་པར་སྤྱོད་པ་ཡིན། སངས་རྒྱས་བཅོམ་ལྡན་འདས་རྣམས་ནི་འཇིག་རྟེན་གྱི་ཁམས་མ་ལུས་པ་ཐམས་ཅད་ཀྱི་དགའ་ལྡན་གྱི་གནས་ན་བཞུགས་ཀྱང་ཆགས་པ་མི་མངའ་བར་རྣམ་པར་སྤྱོད་པ་ཡིན། སངས་རྒྱས་བཅོམ་

ལྡན་འདས་རྣམས་ནི་ཆོས་ཀྱི་དབྱིངས་མ་ལུས་པ་ཐམས་ཅད་ཀྱི་སྔོན་གྱི་མཐའ་དང་། ཕྱི་མའི་མཐའ་དང་། ད་ལྟར་བྱུང་བའི་མཐའ་ལ་ཆགས་པ་མི་མངའ་བར་རྣམ་པར་སྤྱོད་པ་ཡིན། སངས་རྒྱས་བཅོམ་ལྡན་འདས་རྣམས་
ནི་ཆོས་ཀྱི་དབྱིངས་མ་ལུས་པ་ཐམས་ཅད་ཙམ་གྱི་འཁོར་གྱི་དཀྱིལ་འཁོར་ན་བཞུགས་ཀྱང་ཆགས་པ་མི་མངའ་བར་རྣམ་པར་སྤྱོད་པ་ཡིན། སངས་རྒྱས་བཅོམ་ལྡན་འདས་རྣམས་ནི་སེམས་ཅན་མ་ལུས་པ་ཐམས་ཅད་ཀྱི་སེམས་དང་སྤྱོད་པ་ལ་གཟིགས་ཤིང་།
ཐུགས་ཀྱི་སྐད་ཅིག་གཅིག་ལ་ཆོ་འཕྲུལ་ཆེན་པོ་གསུམ་གྱིས་སེམས་ཅན་རྣམ་པར་འདུལ་ཡང་ཆགས་པ་མྱི་མངའ་བར་རྣམ་པར་སྤྱོད་པ་ཡིན། སངས་རྒྱས་བཅོམ་ལྡན་འདས་རྣམས་ནི་སྐུ་གཅིག་གིས་ཀྱང་ཚད་མྱེད་པ་བསམ་གྱིས་མི་ཁྱབ་པའི་སངས་
རྒྱས་ཀྱི་རྣམ་པར་སྤྱོད་པ་ཆེན་པོར་རྣམ་པར་སྤྱོད་ཀྱང་ཆགས་པ་མྱི་མངའ་བར་རྣམ་པར་སྤྱོད་པ་ཡིན། སངས་རྒྱས་བཅོམ་ལྡན་འདས་རྣམས་ནི་སེམས་ཅན་གྱི་ཁམས་འབྱམ་ཀླས་པ་མ་ལུས་པ་ཐམས་ཅད་དུ་དེ་བཞིན་གཤེགས་པའི་ཆོས་མ་ལུས་པ་ཐམས་
ཅད་ཀྱི་མཐར་ཐུག་པ་བསམ་གྱིས་མྱི་ཁྱབ་པར་སྟོན་ཅིང་གསུང་ཡང་ཆགས་པ་མི་མངའ་བར་རྣམ་པར་སྤྱོད་པ་ཡིན་ཏེ། ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་རྣམ་པར་སྤྱོད་པ་ཆགས་པ་མེད་པའོ། །
ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་རྒྱན་མཆོག་དམ་པ་བླ་ན་མེད་པ་རྣམས་ཏེ། བཅུ་གང་ཞེ་ན། སངས་རྒྱས་བཅོམ་ལྡན་འདས་རྣམས་ཀྱི་སྐུ་མཚན་དང་དཔེ་བྱད་བཟང་པོ་སྣ་ཚོགས་ཀྱིས་རྣམ་པར་བརྒྱན་པ་
ནི། སངས་རྒྱས་བཅོམ་ལྡན་འདས་རྣམས་ཀྱི་སྐུའི་རྒྱན་མཆོག་དམ་པ་བླ་ན་མེད་པའོ། །སངས་རྒྱས་བཅོམ་ལྡན་འདས་རྣམས་ཀྱི་གསུང་ཡན་ལག་གི་མཆོག་དམ་པ་དྲུག་ཅུ་དང་ལྡན་ཞིང་། ཡན་ལག་ལྔ་བརྒྱས་ཡོངས་སུ་བཟུང་བ་དང་།

རྒྱན་བརྒྱ་སྟོང་དུ་མས་རབ་ཏུ་བརྒྱན་པ་དང་། དབྱངས་ཀྱི་ཡན་ལག་མཐའ་ཡས་མུ་མེད་པས་རྣམ་པར་དག་པ་དང་། སངས་རྒྱས་ཀྱི་ཆོས་ཀྱི་དོན་དང་ཚིག་དང་ཡི་གེ་བརྗོད་དུ་མེད་པའི་ཡང་བརྗོད་དུ་མེད་པས་རབ་ཏུ་ཚིམ་པར་མཛད་པ་དང་། བག་
ཚ་བ་མི་མངའ་བར་སེང་གེའི་ང་རོ་ཆེན་པོ་སྒྲོག་པ་དང་། འཇིགས་པ་མྱེད་པ་ཆེན་པོས་བསྙེངས་པ་མི་མངའ་པར་གྱུར་པ་དང་། ཆོས་ཀྱི་དབྱིངས་མ་ལུས་པ་ཐམས་ཅད་དུ་སེམས་ཅན་ཐམས་ཅད་ལ་གྲག་ཅིང་གསལ་ཏེ། ཁོང་དུ་ཆུད་པར་འགྱུར་བ་
དང་། སེམས་ཅན་བསམ་པ་ཐ་དད་པ་དང་། དབང་པོ་ཐ་དད་པ་རྣམ་པ་སྣ་ཚོགས་འདུལ་བར་ཉེ་བར་གནས་པ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་གསུང་གི་རྒྱན་མཆོག་དམ་པ་བླ་ན་མེད་པའོ། །སངས་རྒྱས་བཅོམ་ལྡན་འདས་རྣམས་ཀྱི་
ཐུགས་ཀྱི་ཕྲིན་ལས་ནི་སྟོབས་བཅུས་བརྒྱན་པ་སངས་རྒྱས་ཀྱི་ཏིང་ངེ་འཛིན་ཆེན་པོ་ཐམས་ཅད་ཀྱི་མེ་ཏོག་ཤིན་ཏུ་རྒྱས་པ་སངས་རྒྱས་ཀྱི་ཆོས་མ་འདྲེས་པ་བཅྭོ་བརྒྱད་ཀྱི་རྒྱན་གྱིས་ཤིན་ཏུ་བརྒྱན་ཅིང་བསྒྲུབས་པས་ཆགས་པ་མེད་པའི་སྤྱོད་ཡུལ་དང་ལྡན་པ་ཆོས་ཀྱི་
དབྱིངས་ཀྱི་གཞི་ལ་རབ་ཏུ་རྟེན་པ། སངས་རྒྱས་ཐམས་ཅད་ཀྱི་ཆོས་གཏིང་མེད་པ་རབ་ཏུ་བརྙེས་པ། ཆོས་ཀྱི་དབྱིངས་མ་ལུས་པ་ཐམས་ཅད་ཀྱི་རྒྱན་དུ་གྱུར་པ། དུས་གསུམ་གྱི་ཆོས་ཀྱི་དབྱིངས་མ་ལུས་པ་ཐམས་ཅད་ཀྱི་སེམས་ཅན་ཀུན་གྱི་
སེམས་དང་སྤྱོད་པ་ཐམས་ཅད་སྐད་ཅིག་གཅིག་དང་ལྡན་པའི་ཤེས་རབ་ཀྱིས་རབ་ཏུ་མཁྱེན་པ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཐུགས་ཀྱི་རྒྱན་མཆོག་དམ་པ་བླ་ན་མེད་པའོ། །སངས་རྒྱས་བཅོམ་ལྡན་འདས་རྣམས་ནི་འོད་ཟེར་
བྱེ་བ་བརྗོད་དུ་མེད་པ་རབ་ཏུ་འགྱེད་པར་མཛད་དེ། འོད་ཟེར་དེ་དག་རེ་རེ་ལ་ཡང་འོད་ཟེར་གྱི་འཁོར་གྱི་དྲ་བ་བརྗོད་དུ་མེད་པ་དང་ལྡན་པ། སངས་རྒྱས་ཀྱི་ཞིང་འབྱམ་ཀླས་པ་ཐམས་ཅད་མ་ལུས་པར་སྣང་བར་བྱེད་ཅིང་འཇིག་རྟེན་གྱི་ཁམས་ཀྱི་རྒྱུད་ཐམས་

ཅད་མུན་པ་མེད་པར་སྟོན་པ། སངས་རྒྱས་སྐྱེ་བ་དང་མི་འབྲལ་བས། སངས་རྒྱས་ཀྱི་ཕྲིན་ལས་ལས་ཕྱིར་མི་ལྡོག་ཅིང་དོན་ཡོད་པ། སངས་རྒྱས་སྐྱེ་བ་བརྗོད་དུ་མེད་པས་གནས་པ་མེད་པ་རང་བཞིན་རྣམ་པར་དག་ཅིང་
ཀུན་ཏུ་སྙོམས་པར་འབྱུང་བ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་འོད་ཟེར་གྱི་རྒྱན་མཆོག་དམ་པ་བླ་ན་མེད་པའོ། །སངས་རྒྱས་བཅོམ་ལྡན་འདས་རྣམས་བཞད་མོ་འཛུམ་པར་སྟོན་ན། ཞལ་གྱི་སྒོ་ནས་འོད་ཟེར་ཁ་དོག་སྣ་ཚོགས་
ཁ་དོག་དུ་མ་དང་ལྡན་པ་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མྱེད་པ་ཕྱོགས་བཅུའི་འཇིག་རྟེན་གྱི་ཁམས་མ་ལུས་པ་ཐམས་ཅད་སྣང་བར་བྱེད་པ་སེམས་ཅན་གྱི་ཁམས་ཚད་མེད་གྲངས་མེད་བསམ་གྱིས་མྱི་ཁྱབ་པ་རྣམ་པར་སྟོན་པ། བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་རྣམ་པ་གཞན་དུ་མི་འགྱུར་བར་ལུང་སྟོན་པ། འགྲོ་བ་ཐམས་ཅད་དུ་ཤིན་ཏུ་གསལ་བར་འབྱུང་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་བཞད་མོ་འཛུམ་པ་བསྟན་པའི་རྒྱན་མཆོག་དམ་པ་བླ་ན་མེད་པའོ། །སངས་
རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་སྐུ་ནི་ཚད་མེད་པ་སྟེ། བསྒྲིབས་པ་མེད་པས་རྣམ་པར་དག་པ་ཆོས་ཐམས་ཅད་ཆགས་པ་མེད་པ་ཉིད་ཀྱི་མཐར་ཐུག་པ་མཐའ་དང་དབུས་མེད་པའི་ཆོས་ཀྱི་དབྱིངས་ལ་གནས་པ། འཇིག་རྟེན་ཐམས་ཅད་
དང་མ་འདྲེས་པའི་འཇིག་རྟེན་ཐམས་ཅད་དང་འཛི་བ་མེད་པ། འཇིག་རྟེན་ཐམས་ཅད་ཀྱི་དེ་ཁོ་ན་ཉིད་ལ་ཡང་དག་པར་ཞུགས་པ། འཇིག་རྟེན་ཐམས་ཅད་ལས་གྱེན་དུ་འཕགས་པ། འཇིག་རྟེན་ཐམས་ཅད་ལས་འདས་པའི་ཆོས་ཀྱིས་ཡང་དག་པར་
སྤྱོད་པ། ཚིག་གི་ལམ་དང་བྲལ་བ། བརྗོད་དུ་མེད་པའི་མཐར་ཕྱིན་པ། ཕུང་པོ་དང་ཁམས་དང་། སྐྱེ་མཆེད་དང་བྲལ་བ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་སྐུའི་རྒྱན་མཆོག་དམ་པ་བླ་ན་མེད་པའོ། །སངས་རྒྱས་

བཅོམ་ལྡན་འདས་རྣམས་ནི་འོད་ཚད་མེད་པ་མངའ་བ་སྟེ། འཇིག་རྟེན་གྱི་ཁམས་མ་ལུས་པ་ཐམས་ཅད་དུ་འོད་མ་འདྲེས་ཤིང་། རྒྱན་དུ་མ་དང་ལྡན་པ་ཁ་དོག་སྣ་ཚོགས་བརྗོད་དུ་མེད་པའི་ཡང་བརྗོད་དུ་མེད་པའི་རྒྱན་དང་ལྡན་པ། འོད་ཀྱི་སྣང་བ་ཀུན་ཏུ་ཐོགས་
པ་མེད་ཅིང་། ཐམས་ཅད་དུ་ཆགས་པ་མེད་པ་འོད་ཀྱི་དཀྱིལ་འཁོར་བསྒྲིབས་པ་མེད་པ་ཚད་མེད་པའི་མཛོད་དུ་གྱུར་པ། འོད་ཐམས་ཅད་ཀྱི་འབྱུང་གནས་སུ་གྱུར་པ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་འོད་ཀྱི་རྒྱན་མཆོག་དམ་པ་བླ་ན་མེད་པའོ། །
སངས་རྒྱས་བཅོམ་ལྡན་འདས་རྣམས་ནི་ཁ་དོག་མཐའ་ཡས་པ་མངའ་བ་སྟེ། ཁ་དོག་ཡིད་དུ་འོང་བ་མངའ་བའོ། །ཁ་དོག་འོད་གསལ་བ་མངའ་བའོ། །ཁ་དོག་ཚད་མེད་པ་མངའ་བའོ། །སེམས་ཅན་གྱི་ཁམས་མ་ལུས་པ་ཐམས་ཅད་ཀྱི་
བསམ་པ་དང་། མོས་པ་བཞིན་དུ་རྣམ་པར་དམིགས་པའི་ཁ་དོག་མངའ་བའོ། །དེ་མ་ཡིན་པའི་ཁ་དོག་གཞན་ཁམས་གསུམ་དུ་གཏོགས་པ་ཐམས་ཅད་ཟིལ་གྱིས་གནོན་པའི་ཁ་དོག་མངའ་བའོ། །ཁ་དོག་ཐམས་ཅད་ཀྱི་ཕ་རོལ་ཏུ་ཕྱིན་པ་
བརྙེས་པས་སངས་རྒྱས་བཅོམ་ལྡན་འདས་རྣམས་ནི་ཁ་དོག་བླ་ན་མེད་པ་མངའ་བ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཁ་དོག་གི་རྒྱན་མཆོག་དམ་པ་བླ་ན་མེད་པའོ། །སངས་རྒྱས་བཅོམ་ལྡན་འདས་རྣམས་ནི་དགེ་བས་ཤིན་ཏུ་རྣམ་པར་
དག་པ་སྟེ། འདས་པ་དང་། མ་བྱོན་པ་དང་ད་ལྟར་བྱུང་བའི་སངས་རྒྱས་ཐམས་ཅད་ཀྱི་རིགས་དགེ་བ་རིན་པོ་ཆེའི་འབྱུང་གནས་སུ་གྱུར་པ་ལ་ཤིན་ཏུ་བྱུང་བའོ། །ཆོས་ཉིད་ཀྱི་རྣམ་པ་ཐམས་ཅད་དུ་ཁྱད་པར་ཡོད་པ་དང་ཁྱད་པར་མེད་པའི་སྤྱོད་པས་
རྣམ་པར་དག་པའི་རྒྱན་གྱི་ཡེ་ཤེས་སྐྱེ་བ་ཐམས་ཅད་ཀྱི་ནང་དུ་གཏོགས་པ་དང་། དེ་བཞིན་གཤེགས་པའི་རིགས་བསྒྲིབས་པ་མེད་པའི་རྒྱུད་རྣམ་པར་དག་པས། འཇིག་རྟེན་གྱི་མི་སྙན་པ་ཐམས་ཅད་ཀྱིས་མི་སྙན་པར་བརྗོད་དུ་མེད་པ་སྟེ། འདི་ནི་སངས་

རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་རིགས་དང་། རྒྱུད་རྣམ་པར་དག་པའི་རྒྱན་མཆོག་དམ་པ་བླ་ན་མེད་པའོ། །སངས་རྒྱས་བཅོམ་ལྡན་འདས་རྣམས་ནི་བྱམས་པ་ཆེན་པོའི་མཐུ་དང་རང་བཞིན་གྱི་རྒྱན་མངའ་བ་སྟེ།
ཤིན་ཏུ་དང་བ་ཡོངས་སུ་རྟོག་པའི་རྙོག་པ་མྱི་མངའ་བ་སྐུའི་ཕྲིན་ལས་ཡོངས་སུ་གསལ་བ་བལྟ་བས་མི་སྐྱོ་བ། དགོངས་པ་ཤིན་ཏུ་རྣམ་པར་གསལ་བ། ཐུགས་རྗེ་ཆེན་པོ་མངའ་བ། འགྲོ་བ་ཐམས་ཅད་སྐྱོབ་པ་ཡོན་གྱི་གནས་ཀྱི་དམ་པ་བླ་ན་མེད་པ་
ཡོངས་སུ་འཛིན་པའི་ནང་ན་ཐུགས་བརྩེ་བ་ཅན་ཕན་པར་མཛད་པ་སེམས་ཅན་ཐམས་ཅད་ཀྱི་དོན་ཏུ་ཡེ་ཤེས་ཆེན་པོ་བྱིན་གྱིས་བརླབ་སྟེ། བསོད་ནམས་ཆེན་པོས་ཡོངས་སུ་འཕགས་པ་འགྲོ་བ་ཐམས་ཅད་ཀྱི་བསོད་ནམས་ཀྱི་ཞིང་དུ་གྱུར་པ་སེམས་ཅན་
རྣམས་ཀྱི་ཡོན་ཏན་དང་། ཡེ་ཤེས་ཀྱི་ཕུང་པོ་ཐམས་ཅད་རྣམ་པར་འཕེལ་བར་མཛད་པ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་བྱམས་པ་ཆེན་པོ་དང་། ཐུགས་རྗེ་ཆེན་པོའི་མཐར་ཐུག་པའི་བསོད་ནམས་ཀྱི་རྒྱན་མཆོག་དམ་པ་བླ་ན་མེད་
པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་རྒྱན་མཆོག་དམ་པ་བླ་ན་མེད་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་མངའ་ཆེན་པོས་མངའ་
བསྒྱུར་བའི་ཆོས་རྣམས་ཏེ། བཅུ་གང་ཞེ་ན། སངས་རྒྱས་བཅོམ་ལྡན་འདས་རྣམས་ནི་ཆོས་ཐམས་ཅད་ལ་མངའ་བ་དང་། ཆོས་ཐམས་ཅད་ལ་སྣང་བར་མཛད་པའི་མངའ་བསྒྱུར་བས། ཚིག་དང་ཡི་གེ་མཐའ་ཡས་པ་ལ་ཐོགས་པ་མི་མངའ་བའི་
སྤོབས་པ་མངའ་བ་དང་། ཆོས་ཐམས་ཅད་མ་ལུས་པར་ཡོངས་སུ་བརྗོད་པས་མངའ་ཆེ་བ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་མངའ་ཆེན་པོས་མངའ་བསྒྱུར་བའི་ཆོས་དང་པོའོ། །སངས་རྒྱས་བཅོམ་ལྡན་འདས་

རྣམས་ནི་སེམས་ཅན་ཇི་ལྟར་ཡོངས་སུ་སྨིན་པ་དང་། སྨོན་ལམ་ཇི་ལྟར་བཏབ་པའི་ཚུལ་བཞིན་དུ། འདུལ་བ་ལ་ཐོགས་པ་མི་མངའ་བས་མངའ་ཆེ་བ་སྟེ། འདི་ནི་སངས་རྒྱས་ཀྱི་མངའ་ཆེན་པོས་མངའ་བསྒྱུར་བའི་ཆོས་གཉིས་པའོ། །སངས་རྒྱས་
བཅོམ་ལྡན་འདས་རྣམས་ནི་འཇིག་རྟེན་གྱི་ཁམས་མ་ལུས་པ་ཐམས་ཅད་སེམས་ཅན་གཅིག་ལ་ཡང་གནོད་པ་མེད་པར་རྣམ་པ་དྲུག་ཏུ་རབ་ཏུ་བསྐྱོད་པ་དང་། འཇིག་རྟེན་གྱི་ཁམས་རྒྱན་རྣམ་པར་བཀོད་པ་གྲངས་མེད་ཚད་མེད་པ་དང་ལྡན་པ་ནམ་མཁའི་དབྱིངས་
ཀྱི་མཐས་གཏུགས་པ་ཐམས་ཅད་གཅིག་ནས་གཅིག་ཏུ་འཕང་བ་དང་། གཅིག་ནས་གཅིག་ཏུ་གཞུག་པ་དང་། གཅིག་ནས་གཅིག་ཏུ་བསྡུ་བ་དང་། གཅིག་ནས་གཅིག་ཏུ་བསྲེ་བས་འཇིག་རྟེན་གྱི་ཁམས་གཞན་དང་གཞན་དག་གཞན་དང་གཞན་གྱི་ཕྱོགས་
སུ་རབ་ཏུ་བཞག་ཀྱང་སེམས་ཅན་གྱི་ཁམས་རྣམས་འཁོར་ཞིང་རྨོངས་པར་མི་འགྱུར་ལ། ཐེ་ཙོམ་དུ་མི་འགྱུར་བར་མཛད་པས་མངའ་ཆེ་བ་སྟེ། འདི་ནི་སངས་རྒྱས་ཀྱི་མངའ་ཆེན་པོས་མངའ་བསྒྱུར་བའི་ཆོས་གསུམ་པའོ། །སངས་རྒྱས་བཅོམ་ལྡན་
འདས་རྣམས་ནི་འཇིག་རྟེན་གྱི་ཁམས་མ་ལུས་པ་ཐམས་ཅད་བྱིན་གྱིས་རློབ་པའི་ཡེ་ཤེས་ཀྱིས་འཇིག་རྟེན་གྱི་ཁམས་ཀྱི་རྒྱན་ཕན་ཚུན་དུ་བྱིན་གྱིས་བརླབ་པ་དང་། དགོངས་པའི་སྐད་ཅིག་གིས་འཇིག་རྟེན་གྱི་ཁམས་ཐམས་ཅད་ཀྱི་རྒྱན་ཡང་དག་པར་
བསྟན་པ་དང་། བསྐལ་པ་གྲངས་མེད་པར་བརྗོད་ཀྱང་ཡི་གེ་ཤིན་ཏུ་བསྟན་པ་ཟད་མི་ཤེས་པ་དང་། འཇིག་རྟེན་གྱི་ཁམས་མ་ལུས་པ་ཐམས་ཅད་རྒྱན་ཐམས་ཅད་ཀྱིས་རྣམ་པར་བརྒྱན་པ་དང་། མི་མཐུན་པ་མེད་ཅིང་ཉེ་བར་ཉོན་མོངས་པ་མེད་པ་དང་།
སངས་རྒྱས་ཀྱི་ཞིང་གཅིག་ཏུ་ཡོངས་སུ་འདུ་བར་སངས་རྒྱས་ཀྱི་ཞིང་རྣམ་པར་དག་པ་ཐམས་ཅད་བྱིན་གྱིས་བརླབ་པ་ལ་མངའ་ཆེ་བ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་མངའ་ཆེན་པོས་མངའ་བསྒྱུར་བའི་ཆོས་བཞི་པའོ། །སངས་རྒྱས་

བཅོམ་ལྡན་འདས་རྣམས་ནི་སངས་རྒྱས་ཀྱིས་འདུལ་བའི་སེམས་ཅན་གཟིགས་ན་སེམས་ཅན་གཅིག་གི་དོན་དུ་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་སྐྱིལ་མོ་ཀྲུང་གཅིག་གིས་བཞུགས་ན་ཡང་དེ་བཞིན་གཤེགས་པའི་སྐུ་ལ་མྱི་
བདེ་བ་མི་མངའ་ཞིང་ཐུགས་ལ་མི་བདེ་བ་མི་མངའ་སྟེ། གང་ཟག་དེ་ཡང་མི་བསྙེལ་བས་འདུལ་བའི་དུས་ལས་མི་འདའ་བ་དང་། གང་ཟག་གཅིག་ལ་ཇི་ལྟ་བ་དེ་བཞིན་དུ་རིམ་པ་རིམ་པས། འཇིག་རྟེན་གྱི་ཁམས་མ་ལུས་པ་ཐམས་ཅད་དུ་ཕྱི་མའི་མཐའི་
མུར་ཐུག་པའི་སྐུ་ཚེ་ལ་མངའ་བར་བྱིན་གྱིས་བརླབས་ཏེ་བཞུགས་ཀྱང་། སངས་རྒྱས་བཅོམ་ལྡན་འདས་རྣམས་ལ་སྐྱོ་བ་མི་མངའ་སྟེ། དེ་ལྟར་སེམས་ཅན་གྱི་ཁམས་ཐམས་ཅད་མཐར་གྱིས་རིམ་པས་སངས་རྒྱས་ཀྱིས་འདུལ་བའི་གང་ཟག་གི་
དོན་དུ་ཡོངས་སུ་སྐྱོ་བར་མཛད་པ་ལ་མངའ་ཆེ་བ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་མངའ་ཆེན་པོས་མངའ་བསྒྱུར་བའི་ཆོས་ལྔ་པའོ། །སངས་རྒྱས་བཅོམ་ལྡན་འདས་རྣམས་ནི་འཇིག་རྟེན་གྱི་ཁམས་མ་ལུས་པ་ཐམས་ཅད་དུ་
ཡང་དག་པར་གཞོལ་བའི་དེ་བཞིན་གཤེགས་པ་བཞུད་པས་འཇིག་རྟེན་གྱི་ཁམས་ཐམས་ཅད་དུ་བཞུད་པ་ལ་ཐག་ཐོགས་མི་མངའ་བ་དང་། ཕྱོགས་བཅུའི་ཆོས་ཀྱི་དབྱིངས་མ་ལུས་པ་ཐམས་ཅད་ཀྱི་འཇིག་རྟེན་གྱི་ཁམས་ཀྱི་རྒྱུད་རྒྱ་མཚོ་འབྱམ་ཀླས་པ་
དང་། ཕྱོགས་ཀྱི་དྲ་བའི་རྒྱུད་ཐམས་ཅད་དུ་དགོངས་པའི་སྐད་ཅིག་གཅིག་དང་ལྡན་པའི་བཞུད་པར་བྱིན་གྱིས་རློབ་ཅིང་། ཆོས་ཀྱི་དབྱིངས་ཤིན་ཏུ་བསྟན་པ་ཁོང་དུ་ཆུད་པར་བྱ་བས་ཆོས་ཀྱི་འཁོར་ལོ་ཐོགས་པ་མེད་པ་རབ་ཏུ་བསྐོར་བ་ལ་མངའ་
ཆེ་བ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་མངའ་ཆེན་པོས་མངའ་བསྒྱུར་བའི་ཆོས་དྲུག་པའོ། །སངས་རྒྱས་བཅོམ་ལྡན་འདས་རྣམས་ནི་འདུལ་བའི་སེམས་ཅན་གྱི་ཁམས་ཐམས་ཅད་ཀྱི་དོན་དུ་དགོངས་པའི་སྐད་ཅིག་རེ་རེ་ལ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་མངའ་ཆེ་བ་སྟེ། དེ་ལ་ཆོས་ཐམས་ཅད་མངོན་པར་སངས་མ་རྒྱས་པ་གང་ཡང་མེད་ལ། གང་མངོན་པར་སངས་རྒྱས་པ་གང་ཡང་མེད་ལ། གང་གིས་མངོན་པར་སངས་
རྒྱས་པའང་མེད་དེ། །མངོན་པར་འཚང་རྒྱ་བར་འགྱུར་བ་མེད་ཀྱང་སློབ་པའི་ས་ལ་གནས་ཤིང་། མངོན་པར་འཚང་རྒྱ་བར་ཡང་མི་བརྗོད་པ་དང་། སངས་རྒྱས་ཀྱི་ཆོས་ཐམས་ཅད་ཀྱང་བསྒྲིབས་པ་མེད་པར་རྟོགས་པར་ཐུགས་སུ་ཆུད་པས་
སེམས་ཅན་ཐམས་ཅད་གདུལ་བའི་དོན་དུ་ཡེ་ཤེས་ཚད་མེད་པའི་ཚུལ་གྱིས་སངས་རྒྱས་ཀྱི་རྣམ་པར་འཕྲུལ་པ་ཆེན་པོའི་ཡུལ་ཡོངས་སུ་རྒྱུན་མི་གཅོད་པ་འདི་ནི། སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་མངའ་ཆེན་པོས་མངའ་
བསྒྱུར་བའི་ཆོས་བདུན་པའོ། །སངས་རྒྱས་བཅོམ་ལྡན་འདས་རྣམས་ནི་སྤྱན་གྱི་སྐྱེ་མཆེད་ཀྱིས་སངས་རྒྱས་ཀྱི་ཕྲིན་ལས་གང་བསྒྲུབ་པ་དེ་སྙན་གྱི་སྐྱེ་མཆེད་ཀྱིས་ཡོངས་སུ་གྲུབ་པར་མཛད་དོ། །སྙན་གྱི་སྐྱེ་མཆེད་ཀྱིས་སངས་རྒྱས་ཀྱི་ཕྲིན་ལས་
གང་བསྒྲུབ་པ་དེ་ཤངས་ཀྱི་སྐྱེ་མཆེད་ཀྱིས་ཡོངས་སུ་གྲུབ་པར་མཛད་དོ། །ཤངས་ཀྱི་སྐྱེ་མཆེད་ཀྱིས་སངས་རྒྱས་ཀྱི་ཕྲིན་ལས་གང་བསྒྲུབ་པ་དེ་ལྗགས་ཀྱི་སྐྱེ་མཆེད་ཀྱིས་ཡོངས་སུ་གྲུབ་པར་མཛད་དོ། །ལྗགས་ཀྱི་སྐྱེ་མཆེད་ཀྱིས་སངས་རྒྱས་
ཀྱི་ཕྲིན་ལས་གང་བསྒྲུབ་པ་དེ་ནི་སྐུའི་སྐྱེ་མཆེད་ཀྱིས་ཡོངས་སུ་གྲུབ་པར་མཛད་དོ། །སྐུའི་སྐྱེ་མཆེད་ཀྱིས་སངས་རྒྱས་ཀྱི་ཕྲིན་ལས་གང་བསྒྲུབ་པ་དེ་ཐུགས་ཀྱི་སྐྱེ་མཆེད་ཀྱིས་ཡོངས་སུ་གྲུབ་པར་མཛད་དོ། །ཐུགས་ཀྱི་སྐྱེ་མཆེད་ཀྱིས་སངས་རྒྱས་ཀྱི་
ཕྲིན་ལས་གང་བསྒྲུབ་པ་དེ་འཇིག་རྟེན་གྱི་ཁམས་མ་ལུས་པ་ཐམས་ཅད་ཀྱི་དམིགས་པ་འཇིག་རྟེན་པ་དང་། འཇིག་རྟེན་ལས་འདས་པ་སྣ་ཚོགས་རྣམ་པར་ཕྱེ་བ་ཐམས་ཅད་དུ་གྲུབ་པར་མཛད་དོ། །དེ་བཞིན་དུ་དམིགས་པ་ཐམས་ཅད་རེ་རེ་ཡང་སྣྲེལ་

ཞིར་བསྒྲུབ་པས་སངས་རྒྱས་ཀྱི་ཕྲིན་ལས་བསྒྲུབ་པ་ལ་མངའ་ཆེ་བ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་མངའ་ཆེན་པོས་མངའ་བསྒྱུར་བའི་ཆོས་བརྒྱད་པའོ། །སངས་རྒྱས་བཅོམ་ལྡན་འདས་རྣམས་ནི་རང་གི་སྐུའི་
བ་སྤུའི་བུ་ག་གཅིག་གི་ནང་དུ་སེམས་ཅན་གྱི་ཁམས་མ་ལུས་པ་ཐམས་ཅད་གཟུད་པ་མཛད་ཅིང་ཁོངས་སུ་ཆུད་པར་མཛད་པ་དང་། སེམས་ཅན་རེ་རེ་ཞིང་ཡང་ལུས་སངས་རྒྱས་ཀྱི་ཞིང་བརྗོད་དུ་མེད་པ་ཙམ་དུ་ཡངས་པར་མཛད་ཀྱང་སེམས་ཅན་དེ་དག་ལ་གནོད་པ་དང་
མི་བདེ་བར་མི་འགྱུར་བ་དང་། དེ་དག་ཏུ་ཡང་སེམས་ཅན་རེ་རེ་ཞིང་འཇིག་རྟེན་གྱི་ཁམས་གཅིག་ཏུ་བརྒྱུད་པས་བསྐལ་པ་གྲངས་མེད་པ་ཟད་པར་གནས་པར་བྱ་བ་དང་། འཇིག་རྟེན་གྱི་ཁམས་གྲངས་མེད་པར་གོམ་པ་གཅིག་གིས་ཕྱིན་པས། འཇིག་རྟེན་གྱི་
ཁམས་དེ་དག་ཏུ་སངས་རྒྱས་བྱུང་བ་རྣམས་ཀྱི་སྤྱན་སྔར་འགྲོ་བར་བྱ་བ་དང་། སངས་རྒྱས་དེ་དག་བྱུང་བའི་ཚེ་ཡང་བརྗོད་དུ་མེད་པའི་འཇིག་རྟེན་གྱི་ཁམས་ཀྱི་རྒྱུད་དང་། གླིང་དེ་དག་ན་སེམས་ཅན་གྱི་གཙོ་བོ་བརྗོད་དུ་མེད་པའི་ཡང་བརྗོད་དུ་མེད་པའི་ཆོས་ཀྱི་
འཁོར་ལོ་བསྐོར་བར་བྱ་བ་དང་། བ་སྤུའི་བུ་ག་དེ་ནས་སངས་རྒྱས་གཅིག་ནས་གཅིག་ཏུ་བརྒྱུད་པ་བརྗོད་དུ་མེད་པའི་ཡང་བརྗོད་དུ་མེད་པ་འབྱུང་བར་བྱ་བ་དང་། སེམས་ཅན་གཅིག་ནས་གཅིག་ཏུ་བརྒྱུད་པ་བརྗོད་དུ་མེད་པའི་ཡང་བརྗོད་དུ་མེད་པ་འབྱུང་བར་
བྱ་བ་དང་། ཆོས་ཀྱི་འཁོར་ལོ་གཅིག་ནས་གཅིག་ཏུ་བརྒྱུད་པ་བརྗོད་དུ་མེད་པའི་ཡང་བརྗོད་དུ་མེད་པ་བསྐོར་བར་བྱ་བ་དང་། ཆོས་ཀྱི་དབྱིངས་བསྟན་པ་གཅིག་ནས་གཅིག་ཏུ་བརྒྱུད་པ་བརྗོད་དུ་མེད་པའི་ཡང་བརྗོད་དུ་མེད་པ་ཤིན་ཏུ་བསྟན་པར་བྱ་བ་དང་། འདས་པ་གཅིག་ནས་
གཅིག་ཏུ་བརྒྱུད་པ་བརྗོད་དུ་མེད་པ་དང་། མ་འོངས་པ་གཅིག་ནས་གཅིག་ཏུ་བརྒྱུད་པ་བརྗོད་དུ་མེད་པ་དང་། ད་ལྟར་བྱུང་བ་གཅིག་ནས་གཅིག་ཏུ་བརྒྱུད་པ་བརྗོད་དུ་མེད་པ་ཡོངས་སུ་རྫོགས་པར་བྱ་བ་དང་། ནམ་མཁའི་དབྱིངས་མཐའ་དང་དབུས་མེད་པར་

བསྟན་པ་ཀུན་ཏུ་མཚམས་མེད་པར་སེམས་ཅན་ཐམས་ཅད་འོང་ཞིང་འགྲོ་བ་དང་། སྐྱེ་བའི་སྐྱེ་མཆེད་ཐམས་ཅད་དུ་འདོད་པའི་ལོངས་སྤྱོད་རྒྱ་ཆེན་པོ་བགེགས་མེད་པ་ཐམས་ཅད་འབྱུང་བར་བྱ་བ་ལ་མངའ་ཆེ་བ་སྟེ། འདི་ནི་སངས་རྒྱས་བཅོམ་ལྡན་འདས་
རྣམས་ཀྱི་སངས་རྒྱས་ཀྱི་མངའ་ཆེན་པོས་མངའ་བསྒྱུར་བའི་ཆོས་དགུ་པའོ། །སངས་རྒྱས་བཅོམ་ལྡན་འདས་རྣམས་ནི་ཆོས་ཀྱི་དབྱིངས་མ་ལུས་པ་ཐམས་ཅད་དུ་པདྨོའི་རྒྱན་ཆེན་པོས་བརྒྱན་བཱི་སེང་གེའི་ཁྲི་པད་མོའི་སྙིང་པོ་ཅན་ལ་དེ་བཞིན་
གཤེགས་པ་གཅིག་གི་ཆོས་ཀྱི་དབྱིངས་ཚད་མེད་པ་ཐམས་ཅད་དུ་ཁྱབ་པའི་སྐུས་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། སངས་རྒྱས་ཀྱི་རྣམ་པར་འཕྲུལ་པ་ཐམས་ཅད་ཡོངས་སུ་བསྟན་པར་མཛད་པ་དང་། དེ་བཞིན་གཤེགས་པ་གཅིག་
གིས་ཇི་ལྟ་བར་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་སེམས་ཅན་གྱི་གཙོ་བོ་ཐམས་ཅད་ཀྱང་དེ་བཞིན་དུ་དགོངས་པ་སྐད་ཅིག་མ་རེ་རེའི་བྱིན་གྱི་རླབས་ཀྱིས་བརླབས་པ་དང་། དགོངས་པ་སྐད་ཅིག་ལ་ཇི་ལྟ་བ་དེ་བཞིན་དུ་དགོངས་པ་
སྐད་ཅིག་མ་ཐམས་ཅད་ལ་ཡང་། པད་མོའི་རྒྱུད་ཀྱིས་ཡོངས་སུ་དག་པར་མངོན་པར་འཚང་རྒྱ་བར་བྱ་བ་དང་། དེ་བཞིན་དུ་ཆོས་ཀྱི་དབྱིངས་ཐམས་ཅད་མ་ལུས་པའི་སངས་རྒྱས་ཀྱི་ཞིང་བརྗོད་དུ་མེད་པ་རྣམ་པར་དག་པ། རྒྱན་སྣ་ཚོགས་དང་ལྡན་
པའི་འཇིག་རྟེན་གྱི་ཁམས་སུ་དམིགས་པ་རྣམ་པ་སྣ་ཚོགས་དང་ལྡན་པའི་ཞིང་རྣམ་པར་དག་པ་འབྱམ་ཀླས་པ། བརྗོད་དུ་མེད་པ་མཚན་ཉིད་ཐ་དད་པ་རྣམ་པ་ཐ་དད་པའི་རྒྱུད་ཚད་མེད་ཅིང་འབྱམ་ཀླས་པ། དུས་ཀྱི་རྒྱུད་གྲངས་མེད་པ་དང་ལྡན་པ་བསྟན་
པ་མ་འདྲེས་པ་དང་ལྡན་པ། བློ་ཚད་མེད་པ་དང་མོས་པ་ཤིན་ཏུ་ཡངས་པ་དང་ལྡན་པ། མཚན་ཉིད་སྣ་ཚོགས་ཀྱི་གནས་མེད་པ། མཚན་ཉིད་བསམ་གྱིས་མི་ཁྱབ་པ་དང་ལྡན་པ། ཚད་མེད་པ་ཐམས་ཅད་དགོངས་པ་སྐད་ཅིག་མ་ལས་དགོངས་པ་

སྐད་ཅིག་མ་གཅིག་གིས་ཐམས་ཅད་ཡོངས་སུ་བསྟན་ཀྱང་། སངས་རྒྱས་བཅོམ་ལྡན་འདས་རྣམས་ཆེད་དུ་བསྒྲུབ་པ་མི་མཛད་པ་ལ་མངའ་ཆེ་བ་སྟེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་མངའ་ཆེན་
པོས་མངའ་བསྒྱུར་བའི་ཆོས་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་མངའ་ཆེན་པོས་མངའ་བསྒྱུར་བའི་ཆོས་སོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་
ཆོས་ཡོངས་སུ་རྫོགས་པ་ཚད་མེད་པ་བསམ་གྱིས་མི་ཁྱབ་པ་རྣམས་ཏེ། བཅུ་གང་ཞེ་ན། མཚན་རེ་རེ་ཞིང་བསོད་ནམས་བརྒྱ་པའི་མཚན་ཡོངས་སུ་དག་པར་འགྱུར་བ་འདི་ནི་ཡོངས་སུ་རྫོགས་པ་དང་པོ་སྟེ། དེས་སངས་རྒྱས་བཅོམ་ལྡན་
འདས་རྣམས་བྱང་ཆུབ་ཏུ་མངོན་པར་འཚང་རྒྱའོ། །སངས་རྒྱས་ཀྱི་ཆོས་རྣམས་ཡོངས་སུ་རྫོགས་པས། སངས་རྒྱས་བཅོམ་ལྡན་འདས་རྣམས་བྱང་ཆུབ་ཏུ་མངོན་པར་འཚང་རྒྱའོ། །དགེ་བའི་རྩ་བ་ཐམས་ཅད་ཡོངས་སུ་རྫོགས་པས་སངས་རྒྱས་བཅོམ་ལྡན་
འདས་རྣམས་བྱང་ཆུབ་ཏུ་མངོན་པར་འཚང་རྒྱའོ། །ཡོན་ཏན་ཐམས་ཅད་ཀྱི་འབྱུང་གནས་ཕུན་སུམ་ཚོགས་པའི་སྤྱོད་པ་ཡོངས་སུ་དག་པ་ཡོངས་སུ་རྫོགས་པས། སངས་རྒྱས་བཅོམ་ལྡན་འདས་རྣམས་བྱང་ཆུབ་ཏུ་མངོན་པར་འཚང་རྒྱའོ། །སེམས་
ཅན་ཡོངས་སུ་སྨིན་པར་བྱ་བ་དང་། གདུལ་བ་ཡོངས་སུ་རྫོགས་པས་སངས་རྒྱས་བཅོམ་ལྡན་འདས་རྣམས་བྱང་ཆུབ་ཏུ་མངོན་པར་འཚང་རྒྱའོ། །སངས་རྒྱས་ཀྱི་མངའ་འགྲོ་བ་ཐམས་ཅད་ཀྱིས་ཟིལ་གྱིས་མི་ནོན་པ། ཡོངས་སུ་རྫོགས་པས་སངས་
རྒྱས་བཅོམ་ལྡན་འདས་རྣམས་བྱང་ཆུབ་ཏུ་མངོན་པར་འཚང་རྒྱའོ། །ཞིང་ཡོངས་སུ་དག་པར་བྱ་བ་ཡོངས་སུ་རྫོགས་པས་སངས་རྒྱས་བཅོམ་ལྡན་འདས་རྣམས་བྱང་ཆུབ་ཏུ་མངོན་པར་འཚང་རྒྱའོ། །ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་

པས་སངས་རྒྱས་བཅོམ་ལྡན་འདས་རྣམས་བྱང་ཆུབ་ཏུ་མངོན་པར་འཚང་རྒྱའོ། །མཚན་དང་དཔེ་བྱད་བཟང་པོ་དང་གཟུགས་ཀྱི་སྐུ་བལྟ་ན་དོན་ཡོད་པ་ཡོངས་སུ་རྫོགས་པས་སངས་རྒྱས་བཅོམ་ལྡན་འདས་རྣམས་བྱང་ཆུབ་ཏུ་མངོན་པར་འཚང་རྒྱའོ། །
དེ་བཞིན་གཤེགས་པ་ཐམས་ཅད་དང་མཉམ་པ་ཉིད་ཡོངས་སུ་རྫོགས་པས་སངས་རྒྱས་བཅོམ་ལྡན་འདས་རྣམས་བྱང་ཆུབ་ཏུ་མངོན་པར་འཚང་རྒྱ་སྟེ། སངས་རྒྱས་ཀྱི་ཕྲིན་ལས་ཐམས་ཅད་ཡོངས་སུ་རྫོགས་པར་མཛད་ནས་ཡོངས་སུ་མྱ་ངན་ལས་འདའ་འོ། །
ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཆོས་ཡོངས་སུ་རྫོགས་པ་ཚད་མེད་པ་བསམ་གྱིས་མི་ཁྱབ་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་སངས་རྒྱས་བཅོམ་ལྡན་འདས་རྣམས་ཀྱི་ཐབས་མཁས་
པ་སྟེ། བཅུ་གང་ཞེ་ན། སངས་རྒྱས་བཅོམ་ལྡན་འདས་རྣམས་ནི་ཆོས་ཐམས་ཅད་བྱིན་གྱིས་བརླབས་པ་མེད་ཅིང་སྤྲོས་པ་ཐམས་ཅད་མེད་པར་ཡང་ཐུགས་སུ་ཆུད་ལ། དགེ་བའི་སྒོ་ནས་སངས་རྒྱས་ཀྱི་བྱིན་གྱི་རླབས་ཀྱང་ཤིན་ཏུ་སྟོན་ཅིང་བརྗོད་དེ།
འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཐབས་མཁས་པ་དང་པོའོ། །སངས་རྒྱས་བཅོམ་ལྡན་འདས་རྣམས་ནི་ཆོས་ཐམས་ཅད་ལ་གཟིགས་པ་མེད་ཅིང་ཕན་ཚུན་དུ་མཁྱེན་པ་མེད་དོ། །མ་བཅིངས་མ་གྲོལ་བ་དང་གཟུང་བ་མེད་
ཅིང་བསྩགས་པ་མེད་དེ། ཡོངས་སུ་རྫོགས་པ་མེད་པར་ཡང་ཐུགས་སུ་ཆུད་ལ་སངས་རྒྱས་ཀྱི་ཆོས་ཐམས་ཅད་ལ་མངའ་དམ་པའང་བརྙེས་ཏེ། སངས་རྒྱས་བཅོམ་ལྡན་འདས་རྣམས་ཆོས་ཐམས་ཅད་ལ་མངའ་བསྒྱུར་བ་དེ་ཡང་། ཡང་དག་པ་
དེ་ཁོ་ན་ཉིད་མ་ནོར་བ་རྣམ་པ་གཞན་དུ་མི་འགྱུར་བ་དང་། ཆོས་ཐམས་ཅད་བདག་གི་མེད་ཅིང་ཡོངས་སུ་འཛིན་པ་མེད་ལ་དེ་ཁོ་ན་ཉིད་ཀྱི་མཐའ་ལས་རྣམ་པར་མི་འདའ་ཡང་། སངས་རྒྱས་བཅོམ་ལྡན་འདས་རྣམས་ནི་མངའ་ཆེན་པོས་ཆོས་ཀྱི་དབྱིངས་ཐམས་

ཅད་སྣང་བ་ལ་ཡང་། རབ་ཏུ་མཁྱེན་པ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི། སངས་རྒྱས་ཀྱི་ཐབས་མཁས་པ་གཉིས་པའོ། །སངས་རྒྱས་བཅོམ་ལྡན་འདས་རྣམས་ནི་མཚན་མའི་མཐའ་ཐམས་ཅད་མི་མངའ་སྟེ།
མཚན་མ་ཐམས་ཅད་དང་མི་འགྲོགས་ཤིང་། མཚན་མའི་མངོན་པར་ཤེས་པ་ཐམས་ཅད་དང་མ་འདྲེས་ལ་དེའི་རང་བཞིན་དུ་ངོ་བོ་ཉིད་མེད་པ་དང་། ཇི་ལྟར་ངོ་བོ་ཉིད་མེད་པའི་སྒྲའི་ཚུལ་ཐམས་ཅད་ཐུགས་སུ་ཆུད་ཀྱང་གཟུགས་ཀྱི་མཚན་མའི་སྐུ་
གཟུགས་རྣམ་པར་དག་པ་གྲངས་མེད་པ་དང་། ཞིང་གི་མཚན་མ་དང་རྣམ་པར་སྤྱོད་པའི་མཚན་མ་ཟད་མི་ཤེས་པ་རྣམ་པ་སྣ་ཚོགས་ཡང་དག་པར་བསྟན་ཅིང་བཤད་པའི་ཡེ་ཤེས་ཀྱི་ཕུང་པོ་མུན་པ་མེད་པ་འགྲོ་བ་ཐམས་ཅད་ཀྱི་སྒྲོན་མ་ཆེན་པོར་གྱུར་པས། མུན་
པ་མེད་པའི་སྣང་བ་སྟོན་པ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཐབས་མཁས་པ་གསུམ་པའོ། །ཆགས་པ་མེད་པའི་མཐའ་ནི་སྔོན་གྱི་མཐའ་ཡང་མ་ཡིན། ཕྱི་མའི་མཐའ་ཡང་མ་ཡིན། ད་ལྟར་བྱུང་བ་ཡང་མ་ཡིན་ཏེ། ཆོས་
ཀྱི་དབྱིངས་སུ་གནས་པ་ནི་འདས་པའམ། མ་འོངས་པའམ། ད་ལྟར་བྱུང་བ་ཡང་མ་ཡིན་པས་དེ་བཞིན་ཉིད་ཀྱི་མཚན་ཉིད་ཀྱིས་འབྱུང་བ་མེད་ཀྱང་། སངས་རྒྱས་འབྱུང་བ་རྣམས་ཀྱི་རིགས་ཚད་མེད་པའི་ཕྱིར་ཤིན་ཏུ་བསྟན་པ་བརྗོད་དུ་མེད་པས་
འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་སྐྱེ་བ་ཡང་རབ་ཏུ་བརྗོད་ཅིང་ཀུན་ཏུ་གཟིགས་པའི་སངས་རྒྱས་ཀྱི་ཡུལ་གྱིས་དེ་བཞིན་དུ་གཟིགས་པ་འདི་ནི། སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཐབས་མཁས་
པ་བཞི་པའོ། །སངས་རྒྱས་བཅོམ་ལྡན་འདས་རྣམས་ནི་སྐུའི་ཕྲིན་ལས་དང་གསུང་གི་ཕྲིན་ལས་དང་། ཐུགས་ཀྱི་ཕྲིན་ལས་ཀྱིས་མངོན་པར་འདུ་མཛད་པ་ཡང་མི་མངའ་ལ། ཡོངས་སུ་བླང་བ་མི་མངའ་བས་བཞུགས་ཤིང་། རྣམ་པར་ཕྱེ་བ་མེད་

པའི་མཐར་ཐུག་པ་སྟེ། དོར་བ་མེད་པའི་ཆོས་ཀྱི་གནས་ཀྱི་ཕ་རོལ་ཏུ་ཕྱིན་པ་ལ། བགྲང་བའི་ཚུལ་ལས་རྣམ་པར་འདས་ཀྱང་ཚུལ་དེས་བ་མེད་པའི་མཛོད་དུ་གྱུར་ཅིང་། བགྲང་བ་དང་མངོན་པར་བསྒྲུབ་པ་མཐའ་ཡས་པ་དང་། འཇིག་རྟེན་པ་དང་།
འཇིག་རྟེན་ལས་འདས་པ་རྣམ་པ་སྣ་ཚོགས་ཐ་དད་པའི་གྲངས་ཀྱི་ཚུལ་ཐུགས་སུ་ཆུད་པ་ཡེ་ཤེས་བསྒྲིབས་པ་མེད་པས་གཟིགས་པ་རྣམས་ཏེ། ཆོས་ཀྱི་དབྱིངས་མ་ལུས་པ་ཐམས་ཅད་ཀྱི་སེམས་ཅན་གདུལ་བ་རྣམ་པར་དམིགས་པ་ལ། རྫུ་འཕྲུལ་སྣ་ཚོགས་
ཚད་མེད་མུ་མེད་པར་མངོན་པར་སྒྲུབ་པར་མཛད་པ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཐབས་མཁས་པ་ལྔ་པའོ། །ཆོས་ཐམས་ཅད་ལྟ་བ་མེད་པས་ཐ་མི་དད་པ་དང་བྱེ་བྲག་མེད་པ་དང་། འབྱུང་བ་མེད་པ་དང་མཚན་ཉིད་མེད་པ་དང་། སྣ་ཚོགས་
མེད་པ་དང་། བླང་བ་མེད་པ་དང་། དོར་བ་མེད་པ་དང་། རང་བཞིན་མེད་པར་རབ་ཏུ་མཁྱེན་ཀྱང་། ཆོས་ཀྱི་རྒྱུད་ཤིན་ཏུ་ངེས་པ་ཡང་དག་པར་སྒྲུབ་ཅིང་། འཇིག་རྟེན་གྱི་ཚུལ་དང་འགལ་བ་མེད་པ་དང་། རང་བཞིན་མེད་པ་ཡང་ཡང་དག་པར་གཟིགས་
པས་ཐམས་ཅད་མཁྱེན་པ། ཐམས་ཅད་གཟིགས་པ་མཁྱེན་པར་བྱ་བ་ཐམས་ཅད་མ་ལུས་པར་གཟིགས་པས་ཆོས་ལ་མངའ་བསྒྱུར་བ་ཐམས་ཅད་ཀྱང་རབ་ཏུ་སྟོན་ལ། དེ་བཞིན་ཉིད་ཀྱི་རང་བཞིན་ལས་ཀྱང་མི་ཉམས་པ་འདི་ནི་སངས་རྒྱས་བཅོམ་
ལྡན་འདས་རྣམས་ཀྱི་སངས་རྒྱས་ཀྱི་ཐབས་མཁས་པ་དྲུག་པའོ། །སངས་རྒྱས་བཅོམ་ལྡན་འདས་རྣམས་ནི་ཐུགས་སུ་ཆུད་པའི་རྣམ་པ་གཅིག་གིས་གཞན་དང་གཞན་མཁྱེན་པར་བྱ་བ་ཆོས་དེའི་སྐྱོན་མེད་པ་ལས་རྣམ་པར་མ་འདས་པ་གནས་མེད་པ་དགེ་
བའི་རྩ་བ་རྣམ་པར་དག་པ་མཉམ་པ་ཉིད་ཀྱི་ཆོས་སྐྱོན་མེད་པས། དུས་ཐམས་ཅད་དུ་གནས་པ་རབ་ཏུ་མཁྱེན་ཏེ། དེ་ལ་ཡང་ཉི་མ་གཅིག་གམ། ཟླ་བ་ཕྱེད་དམ། ལོ་གཅིག་གམ། ལོ་བརྒྱ་འམ། བསྐལ་པ་འཇིག་པ་དང་། འདུ་

བས་རྗེས་སུ་བསྙག་པ་དང་། ཕྱིར་ཕྱོགས་པ་མི་མངའ་བར་དུས་ཚད་མེད་པ་དང་། ཉི་མ་གཅིག་དང་། ཡུད་ཙམ་གཅིག་གི་དུས་དང་སྔ་དྲོ་ནས་ཉི་མ་ཕྱེད་ཀྱི་དུས་དང་། ཕྱི་དྲོ་ནས་སྔ་དྲོའི་དུས་དང་། ཉི་མ་གུང་ནས་ཕྱི་དྲོའི་དུས་
དང་། ཉི་མ་བགྲངས་པའི་དུས་དང་། ཉི་མ་བདུན་དང་། ཟླ་བ་ཕྱེད་ཀྱི་དུས་དང་། ཟླ་བ་དང་། ལོ་དང་། ལོ་བརྒྱའི་དུས་དང་བསྐལ་པ་གཅིག་གི་དུས་དང་། ཚད་མེད་གྲངས་མེད་པ་བསམ་གྱིས་མི་ཁྱབ་པའི་དུས་ནས། ཕྱི་མའི་མཐའི་མུར་ཐུག་
པའི་དུས་སུ་ཆོས་བསྟན་པ་དང་། ཆོས་ཀྱི་འཁོར་ལོ་ཐོགས་པ་མེད་ཅིང་ཕྱིར་མི་ལྡོག །རྒྱུན་ཆད་པར་མི་འགྱུར། བྲལ་བར་མི་འགྱུར། བར་ཆད་པར་མི་འགྱུར། མེད་པར་མི་འགྱུར། འཇིག་པར་མི་འགྱུར། གཡོ་བར་མི་འགྱུར། རིང་དུ་མི་
འགྱུར། འཁོར་དེ་ན་གནས་པ་ཉིད་དུ་ཡང་རྒྱུན་ཆད་པར་མི་འགྱུར་ཏེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཐབས་མཁས་པ་བདུན་པའོ། །སངས་རྒྱས་བཅོམ་ལྡན་འདས་རྣམས་ནི་ཆོས་ཀྱི་དབྱིངས་མ་ལུས་པ་ཐམས་ཅད་དུ་རྟག་
ཏུ་དུས་ལ་བབ་པར་བཞུགས་པ་སྟེ། སངས་རྒྱས་བཅོམ་ལྡན་འདས་རྣམས་ནི་མི་འཇིགས་པ་ཚད་མེད་པ་མངའ་བའོ། །སོ་སོ་ཡང་དག་པར་རིག་པ་གྲངས་མེད་པ་མངའ་བའོ། །སོ་སོ་ཡང་དག་པར་རིག་པ་ཚད་མེད་པ་མངའ་བའོ། །སོ་སོ་ཡང་
དག་པར་རིག་པ་ཟད་མི་ཤེས་པ་མངའ་བའོ། །སོ་སོ་ཡང་དག་པར་རིག་པ་ཐོགས་པ་མེད་པ་མངའ་བའོ། །སོ་སོ་ཡང་དག་པར་རིག་པ་མཐའ་ཡས་པ་མངའ་བའོ། །ཐུན་མོང་མ་ཡིན་པའི་སོ་སོ་ཡང་དག་པར་རིག་པ་མངའ་བའོ། །སོ་སོ་
ཡང་དག་པར་རིག་པ་མཐར་ཐུག་པ་མེད་པ་མངའ་བའོ། །སོ་སོ་ཡང་དག་པར་རིག་པ་དེ་ཁོ་ན་དང་ལྡན་པ་མངའ་བའོ། །སོ་སོ་ཡང་དག་པར་རིག་པ་ཚིག་གི་ཚུལ་ཐམས་ཅད་རབ་ཏུ་རྟོགས་པ་མངའ་བའོ། །ཆོས་ཐམས་ཅད་

སོ་སོ་ཡང་དག་པར་རིག་པ་མངའ་བའོ། །བསམ་པ་དང་མོས་པ་དང་། དབང་པོ་ཇི་ལྟ་བ་བཞིན་དུ་ཆོས་ཀྱི་ཚུལ་དང་རྣམ་གྲངས་ཚུལ་ཇི་ལྟར་རྣམ་པར་བཀོད་པ་བཞིན་དུ་ས་མཚམས་མེད་པར་སྟོན་ཏེ། མདོ་སྡེ་བྱེ་བ་ཁྲག་ཁྲིག་བརྗོད་དུ་མེད་པའི་ཡང་
བརྗོད་དུ་མེད་པ་རྣམས་མདོ་སྡེ་དེ་དང་དེ་ལ་ཐོག་མ་དང་ཐ་མ་དང་དབུས་ཀྱི་ཚུལ་གྱིས་ཡང་དག་པར་སྟོན་ཏེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཐབས་མཁས་པ་བརྒྱད་པའོ། །སངས་རྒྱས་བཅོམ་ལྡན་འདས་རྣམས་ནི་མིང་མེད་ཀྱང་མྱིང་དང་རིགས་སུ་
འབྱུང་བའི་ཆོས་ཐམས་ཅད་ཚིག་དང་ཡི་གེས་ཤིན་ཏུ་དབྱངས་པའི་དབྱིངས་མངོན་པར་སངས་རྒྱས་པ་སྟེ། མྱིང་འདས་པ་མ་ཡིན་པ་དང་། མྱིང་མ་འོངས་པ་མ་ཡིན་པ་དང་། མྱིང་ད་ལྟར་བྱུང་བ་མ་ཡིན་པ་དང་། མྱིང་སེམས་ཅན་མ་ཡིན་པ་དང་། མྱིང་
ཞིང་མ་ཡིན་པ་དང་། མྱིང་ཆོས་མ་ཡིན་པ་དང་། མིང་ཡོན་ཏན་མ་ཡིན་པ་དང་། མྱིང་བྱང་ཆུབ་སེམས་དཔའ་མ་ཡིན་པ་དང་། མྱིང་སངས་རྒྱས་མ་ཡིན་པ་དང་། མྱིང་གྲངས་མ་ཡིན་པ་དང་། མྱིང་གྲངས་མེད་པ་མ་ཡིན་པ་དང་། མྱིང་སྐྱེ་བ་
མ་ཡིན་པ་དང་། མྱིང་འགག་པ་མ་ཡིན་པ་དང་། མྱིང་མྱེད་པ་མ་ཡིན་པ་དང་། མྱིང་ཡོད་པ་མ་ཡིན་པ་དང་། མྱིང་གཅིག་པ་མ་ཡིན་པ་དང་། མྱིང་ཐ་དད་པ་མ་ཡིན་པ་དང་། མྱིང་ཐམས་ཅད་མ་ཡིན་པ་དང་། ཆོས་ཐམས་ཅད་རང་བཞིན་གྱིས་
བརྗོད་དུ་མེད་པ་དང་། ཕྱོགས་མེད་པ་དང་། བརྡ་མེད་པ་དང་། ཚིག་གི་ལམ་མེད་པ། སྒྲ་དང་བྲལ་བ་དང་། སྒྲའི་རྣམ་པ་ཐམས་ཅད་མི་འབྱུང་བ། ཡོངས་སུ་བསྒྲུབས་པ་མེད་པ། བྱས་པ་དང་རྣམ་པར་བྱས་པ་མེད་པ་རྣམ་པ་གཅིག་མ་ཡིན་
པ། རྣམ་པ་མང་པོ་མ་ཡིན་པ་ཡང་ཐུགས་སུ་ཆུད་ལ། བརྗོད་པ་དང་སྤྱོད་པ་ཐམས་ཅད་ལ་ཡང་ཕ་རོལ་ཏུ་ཕྱིན་པའི་མཆོག་བརྙེས་པ་དག་སྟེ། རྣམ་པར་རྟོག་པའི་ཡུལ་མི་མངའ་བདག་གོ །མངོན་པར་འདུ་མཛད་པ་མེད་པ་ལ་རབ་ཏུ་བརྩོན་པ་དག་གོ །

རྟོག་པ་དང་ཀུན་ཏུ་རྟོག་པ་དང་ཡོངས་སུ་རྟོག་པ་འགགས་པ་དག་གོ །སྤྱོད་པ་ཐམས་ཅད་ལ་མི་གནས་པར་སྤྱོད་པ་དག་སྟེ། འདི་ནི་སངས་རྒྱས་བཅོམ་ལྡན་འདས་