Kinh tạng Tây Tạng (Kangyur Đại Học) — 012_འདུལ་བ།_ན

། གཞན་ཟེར་བ་དང་། གཅིག་ནས་གཅིག་ཏུ་བརྒྱུད་དེ་བསྒོ་སྟེ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མ་སྨྱོན་མ་ཤོམ་ཞིང་མཆིས་པ་ལས་དགེ་སློང་དེ་དག་
གིས་མ་བསྒོ་བར་འཚལ་ན་ཅིར་འགྱུར། ཉེས་བྱས་སོ། །དེ་བཞིན་དུ་དགེ་སློང་མ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་དང་། འགྲོ་བ་གཞན་དུ་གནས་པ་རྣམས་ལ་མ་བསྒོ་བར་ཟོས་ན་ཐམས་ཅད་ཉེས་བྱས་སུ་འགྱུར་རོ། །བཙུན་པ་

དགེ་སློང་མས་དགེ་སློང་དག་གི་སླད་དུ་ཤོམ་པ་ན་གཉིད་ཀྱིས་ལོག་པ་ལ་དགེ་སློང་དེ་དག་གིས་ལོག་བཞིན་དུ་བསྒོ་སྟེ་འཚལ་ན་ཅིར་འགྱུར། ཉེས་བྱས་སོ། །དེ་བཞིན་དུ་ར་རོ་བ་དང་། མྱོས་པ་དང་། སྙོམས་པར་ཞུགས་པ་རྣམས་ལ་བསྒོ་སྟེ་ཟོས་ན་ཐམས་ཅད་ཉེས་བྱས་སུ་འགྱུར་རོ།། །།
མདོར་ན། སྐད་དང་ལུས་དང་དབེན་པ་དང་། །སྔགས་མཚན་དང་ནི་བཞི་པ་དང་། །མི་རུང་ཟས་དང་ཁྱིམ་པ་དང་། །བསླབ་པ་བྱིན་དང་དགེ་སློང་མའོ། །བཙུན་པ་དགེ་སློང་འཕགས་པས་འཕགས་པའི་སྐད་དུ་དགེ་སློང་མ་ལ་བསྒོ་བ་དང་། དགེ་སློང་མ་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་
བྱས་སོ། །འཕགས་པས་མཐའ་འཁོབ་པའི་སྐད་དུ་བསྒོ་བ་དང་། དགེ་སློང་མ་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །མཐའ་འཁོབ་པས་མཐའ་འཁོབ་པའི་སྐད་དུ་བསྒོ་བ་དང་། དགེ་སློང་མ་དེས་ཀྱང་མཐའ་འཁོབ་པའི་སྐད་མ་འཚལ་ན་ཅིར་འགྱུར། ཉེས་
བྱས་སོ། །མཐའ་འཁོབ་པས་འཕགས་པའི་སྐད་དུ་བསྒོ་སྟེ་འཚལ་བ་དང་། དགེ་སློང་མ་དེས་ཀྱང་འཕགས་པའི་སྐད་མ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ལུས་ཀྱི་དམིགས་པ་བསྒོ་སྟེ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་དག་གིས་
དགེ་སློང་མ་ཤོམ་པ་ལ་དབེན་པ་ལ་མི་དབེན་པར་འདུ་ཤེས་ཏེ་བསྒོས་ནས་འཚལ་ན་ཅིར་འགྱུར། ཉེས་པ་མེད་དོ། །བཙུན་པ་དགེ་སློང་གིས་སྔགས་སམ་སྨན་གྱིས་བདག་མི་སྣང་བར་བསྒྱུར་ཏེ་དགེ་སློང་མ་ལ་མ་བསྒོ་བར་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་སློང་མ་
ཤོམ་པའི་ཚེ་མ་བསྒོ་བར་མཚལ་བ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མས་དགེ་སློང་གི་སླད་དུ་ཤོམ་པའི་ཚེ་མ་བསྒོ་བར་འཚལ་ན་མཚན་འཕོས་ཏེ་དགེ་སློང་དུ་གྱུར་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དགེ་སློང་མ་བསྙེན་
པར་རྫོགས་མ་ལ་བསྙེན་པར་རྫོགས་མར་འདུ་ཤེས་ཏེ་མ་བསྒོ་བར་འཚལ་ན་ཅིར་འགྱུར། སོ་སོར་བཤགས་པར་བྱ་བའོ། །བསྙེན་པར་རྫོགས་མ་ལ་བསྙེན་པར་མ་རྫོགས་པར་འདུ་ཤེས་ཏེ་མ་བསྒོ་ན་ཉེས་བྱས་སུ་འགྱུར་རོ། །བསྙེན་པར་མ་རྫོགས་མ་ལ་བསྙེན་པར་རྫོགས་མར་འདུ་ཤེས་ན་ཉེས་བྱས་སུ་

འགྱུར་རོ། །བསྙེན་པར་མ་རྫོགས་མ་ལ་བསྙེན་པར་མ་རྫོགས་མར་འདུ་ཤེས་ན་ཉེས་བྱས་སུ་འགྱུར་རོ། །བཙུན་པ་དགེ་སློང་མས་མི་རུང་བའི་ཟས་སྦྱོར་ཅིག་པར་ཤོམ་ཞིང་མཆིས་པ་ན་དེ་ལ་དགེ་སློང་དག་གིས་མ་བསྒོ་བར་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་མས་ཟན་མ་གཏོགས་པར་དེ་
ལས་གཞན་པའི་བཅའ་བ་དང་། བཏུང་བ་དང་། བཟའ་བ་དང་། བལྡག་པ་ལ་སོགས་པ་སྦྱོར་ཅིག་པར་ཤོམ་ཞིང་མཆིས་པ་ན། དེ་ལ་དགེ་སློང་དག་གིས་མ་བསྒོ་བར་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་ཁྱིམ་པ་མོ་ཞིག་ཤོམ་པའི་ཚེ་མ་བསྒོ་བར་འཚལ་ན་ཅིར་འགྱུར། ཉེས་
བྱས་སོ། །དེ་བཞིན་དུ་དགེ་སློང་མ་སུན་ཕྱུང་བ་དང་། ཕ་དང་། མ་དང་། དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། སོ་སོར་གནས་པ་དང་། མི་གནས་པ་དང་། སྔར་
ཉེས་པ་བྱུང་བ་དང་། སྔར་འཁྲུགས་པ་རྣམས་ཤོམ་པ་ན་མ་བསྒོ་བར་ཟས་ཟོས་ན་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་དགེ་འདུན་གྱི་དབྱེན་བགྱིས་པ་མོ་དང་། ཉེ་བར་ཕྱོགས་པ་མོ་དང་། བསླབ་པ་སྩལ་བ་མོ་རྣམས་ཀྱིས་བསྒོ་བ་འཚལ་ན་ཅིར་འགྱུར། སོ་སོར་བཤགས་པར་
བྱ་བའོ། །བཙུན་པ་དགེ་སློང་གིས་དགེ་སློང་མ་དང་། དགེ་སློབ་མ་དང་། དགེ་ཚུལ་མས་བསྒོ་བ་འཚལ་ན་ཅིར་འགྱུར། ཉེས་བྱས་སོ། །བཙུན་པ་བསླབ་པ་སྩལ་བས་དགེ་སློང་མས་བསྒོ་བའི་ཟས་འཚལ་ན་ཅིར་འགྱུར། སོ་སོར་བཤགས་པར་བྱ་བའོ། །བཙུན་པ་དགེ་སློང་མས་བསྒོ་བའི་ཟས་འཚལ་ན་ཅིར་
འགྱུར། སོ་སོར་བཤགས་པར་བྱ་བའོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ཉེས་བྱས་སུ་འགྱུར་རོ།། །།མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པ་སེམས་འཁྲུགས་ན་བ་དང་། །འོན་པ་དང་ནི་གླེན་པའོ། །སངས་རྒྱས་བཅོམ་
ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ཡང་དགེ་འདུན་ལ་སློབ་པའི་གྲོང་དུ་གྱུར་པ་དེ་ལ་སློབ་པའི་སྡོམ་པ་སྩལ་བ་ལས་ཡང་དགེ་སློང་གང་གིས་སློབ་པའི་གྲོང་ལ་བསླབ་པའི་སྡོམ་པ་བཅས་པ་དེ་ལྟ་བུ་ལས་རང་གི་སུག་པས་བཅའ་བ་དང་། བཟའ་བ་བླངས་ཏེ་

འཚལ་ན་སོ་སོར་བཤགས་པར་བགྱི་བའོ་ཞེས་གསུངས་ན། བཙུན་པ་དགེ་སློང་གིས་བསླབ་པའི་སྡོམ་པ་སྩལ་བ་ལས་ཕྲིན་གྱིས་བཅའ་བ་དང་བཟའ་བ་བླངས་ཏེ་འཚལ་ན་ཅིར་འགྱུར། ཉེས་བྱས་སོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་
གཅིག་ཏུ་བརྒྱུད་ནས་བླངས་ཏེ་ཟོས་ན་ཐམས་ཅད་ཉེས་བྱས་སུ་འགྱུར་རོ། །བཙུན་པ་དགེ་སློང་གིས་བསླབ་པའི་སྡོམ་པ་སྩལ་བའི་སྨྱོན་པའི་གྲོང་ནས་བཟའ་བ་དང་བཅའ་བ་བླངས་ཏེ་འཚལ་ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་།
ལྐུགས་པ་དང་། འོན་པ་དང་། མ་ནིང་དང་། མ་ནིང་མོ་དང་། འགྲོ་བ་གཞན་དུ་གནས་པ་རྣམས་ལས་བཅའ་བ་དང་བཟའ་བ་བླངས་ཏེ་ཟོས་ན་ཐམས་ཅད་ཉེས་བྱས་སུ་འགྱུར་རོ།། །།མདོར་ན། གཞན་གྱིས་གཞན་ཕྱིར་དེ་བཞིན་ཏེ། །སྔགས་དང་ཁ་ཟས་དང་མི་རུང་དང་། །མགྲོན་པོས་མཚན་ཀྱང་དེ་བཞིན་
ཏེ། །དེ་ལྟར་བཞི་པ་དགེ་སློང་མའོ། །བཙུན་པ་དགེ་སློང་གིས་བསླབ་པའི་སྡོམ་པ་སྩལ་བའི་གྲོང་ནས་བཅའ་བ་དང་བཟའ་བ་གཞན་གྱིས་བླངས་ཏེ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བསླབ་པའི་སྡོམ་པ་སྩལ་པའི་གྲོང་ནས་གཞན་གྱི་སླད་དུ་བཅའ་བ་དང་བཟའ་བ་བླངས་ཏེ་བདག་
ཉིད་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་སྔགས་སམ་སྨན་གྱིས་བདག་མི་སྣང་བར་བསྒྱུར་ཏེ་བསླབ་པའི་སྡོམ་པ་སྩལ་བའི་གྲོང་ནས་བཅའ་བ་དང་བཟའ་བ་བླངས་ཏེ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བསླབ་པའི་སྡོམ་པ་སྩལ་བའི་གྲོང་ནས་ཟན་མ་གཏོགས་
པར་དེ་ལས་གཞན་པའི་བཅའ་བ་དང་། བཏུང་བ་དང་། བཞིབ་པ་དང་། བལྡག་པ་ལ་སོགས་པ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བསླབ་པའི་སྡོམ་པ་སྩལ་བའི་གྲོང་ནས་མི་རུང་བའི་ཟས་བླངས་ཏེ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་བསླབ་པའི་
སྡོམ་པ་སྩལ་བའི་གྲོང་ནས་བདག་གི་སུག་པས་བཅའ་བ་དང་བཟའ་བ་བླངས་ཏེ་འཚལ་ཀྱང་ནོངས་པ་ལྟུང་བར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་དགེ་སློང་སྔར་གྲོང་དུ་མགྲོན་དུ་བོས་པར་གྱུར་ལ་དེའི་འོག་ཏུ་དགེ་འདུན་གྱིས་བསླབ་པའི་སྡོམ་པ་བྱིན་པར་གྱུར་པའོ། བཙུན་

པ་དགེ་སློང་གིས་བསླབ་པའི་སྡོམ་པ་སྩལ་བའི་གྲོང་ནས་བཅའ་བ་དང་བཟའ་བ་འཚལ་བ་དང་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། སོ་སོར་བཤགས་པར་བྱ་བའོ། །བཙུན་པ་དགེ་སློང་མས་བསླབ་པའི་སྡོམ་པ་སྩལ་བའི་གྲོང་ནས་བཅའ་བ་དང་བཟའ་བ་འཚལ་བ་ན་མཚན་འཕོས་ཏེ་
དགེ་སློང་དུ་གྱུར་ན་ཅིར་འགྱུར། སོ་སོར་བཤགས་པར་བྱ་བའོ། །བཙུན་པ་དགེ་སློང་གིས་བསླབ་པའི་སྡོམ་པ་སྩལ་བའི་གྲོང་ནས་སྩལ་བར་འདུ་ཤེས་ཏེ་བཅའ་བ་དང་བཟའ་བ་བླངས་ཏེ་འཚལ་ན་ཅིར་འགྱུར། སོ་སོར་བཤགས་པར་བྱ་བའོ། །སྩལ་བ་ལ་མ་སྩལ་བར་འདུ་ཤེས་ཏེ་འཚལ་
ན་ཅིར་འགྱུར། ཉེས་བྱས་སོ། །མ་སྩལ་བ་ལ་སྩལ་བར་འདུ་ཤེས་ཏེ་འཚལ་ན་ཅིར་འགྱུར། ཉེས་བྱས་སོ། །མ་སྩལ་བ་ལ་མ་སྩལ་བར་འདུ་ཤེས་ན་ཅིར་འགྱུར། ཉེས་པ་མེད་དོ། །བཙུན་པ་དགེ་སློང་གིས་བསླབ་པའི་སྡོམ་པ་སྩལ་བའི་གྲོང་མི་ལ་མིར་འདུ་ཤེས་ནས་བཅའ་བ་དང་། བཟའ་བ་
ཞིག་བླངས་ཏེ་འཚལ་ན་ཅིར་འགྱུར། སོ་སོར་བཤགས་པར་བྱ་བའོ། །མི་ལ་མི་མ་ལགས་པར་འདུ་ཤེས་ན་ཅིར་འགྱུར། ཉེས་བྱས་སོ། །མི་མ་ལགས་པ་ལ་མིར་འདུ་ཤེས་ན་ཅིར་འགྱུར། ཉེས་བྱས་སོ། །མི་མ་ལགས་པ་ལ་མི་མ་ལགས་པར་འདུ་ཤེས་ན་ཅིར་འགྱུར། ཉེས་བྱས་སུ་འགྱུར་རོ། །
བཙུན་པ་བསླབ་པ་སྩལ་བས་བསླབ་པའི་སྡོམ་པ་སྩལ་བའི་གྲོང་ནས་བཅའ་བ་དང་བཟའ་བ་བླངས་ཏེ་འཚལ་ན་ཅིར་འགྱུར། སོ་སོར་བཤགས་པར་བྱ་བའོ། །བཙུན་པ་དགེ་སློང་མས་བསླབ་པའི་སྡོམ་པ་སྩལ་བའི་གྲོང་ནས་བཅའ་བ་དང་བཟའ་བ་བླངས་ཏེ་འཚལ་ན་ཅིར་འགྱུར། སོ་སོར་
བཤགས་པར་བྱ་བའོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ཀྱིས་འཚལ་ན་ཅིར་འགྱུར། ཉེས་བྱས་སོ།། །།མདོར་ན། ཕྲིན་པ་སྤྲིང་ཡིག་ལག་བརྡ་དང་། །གཞན་ཟེར་བ་དང་གཅིག་ནས་གཅིག །སྨྱོན་པར་གྱུར་དང་སེམས་འཁྲུགས་དང་། །ན་བ་འོན་པ་འགྲོ་བའོ། །
སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་ཡང་དགེ་འདུན་དགོན་པ་ལ་གནས་པར་གྱུར་པ་ན་དོགས་པ་དང་བཅས་པར་འཚལ། འཇིགས་པ་དང་བཅས་པར་འཚལ། འཇིགས་ཤིང་སྐྲག་པ་དང་བཅས་པར་འཚལ་བཞིན་དུ་

ཡང་དགེ་སློང་གིས་དེ་ལྟ་བུ་དགེ་འདུན་དགོན་པ་ལ་གནས་ཤིང་དོགས་པ་དང་བཅས་པར་འཚལ། འཇིགས་པ་དང་བཅས་པར་འཚལ། འཇིགས་ཤིང་སྐྲག་པ་དང་བཅས་པར་འཚལ་བཞིན་དུ་ཀུན་དགའ་ར་བའི་སླད་རོལ་ནས་བཅའ་བ་དང་། བཟའ་བ་བླངས་ཏེ།
ཀུན་དགའ་ར་བའི་ནང་ན་བཅའ་བ་དང་བཟའ་བ་འཚལ་ན་སོ་སོར་བཤགས་པར་བགྱིའོ་ཞེས་གསུངས་ན། བཙུན་པ་དགེ་སློང་གིས་དེ་ལྟ་བུར་དགོན་པ་ལ་གནས་པ་ན་ཀུན་དགའ་ར་བའི་སླད་རོལ་ནས་བཅའ་བ་དང་བཟའ་བ་བླངས་ཏེ་ཀུན་དགའ་ར་བའི་ནང་ན་བཅའ་བ་དང་བཟའ་བ་ཕྲིན་གྱིས་བླངས་ཏེ་འཚལ་
ན་ཅིར་འགྱུར། ཉེས་བྱས་སོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་བརྒྱུད་ནས་བླངས་ཏེ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དེ་ལྟ་བུར་དགོན་པ་ལ་གནས་པ་ན་ཀུན་དགའ་ར་བའི་སླད་རོལ་ནས་སྨྱོན་པ་
ཞིག་ལས་བཅའ་བ་དང་བཟའ་བ་རྣམས་བླངས་ཏེ་འཚལ་ན་ཅིར་འགྱུར། ཉེས་བྱས་སོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་དང་། མ་ནིང་དང་། མ་ནིང་མོ་དང་། མཚན་གཉིས་པ་དང་། འགྲོ་བ་གཞན་དུ་གནས་པ་
རྣམས་ལ་ཀུན་དགའ་ར་བའི་སླད་རོལ་ནས་བཅའ་བ་དང་བཟའ་བ་བླངས་ཏེ་ཟོས་ན་ཐམས་ཅད་ཉེས་བྱས་སུ་འགྱུར་རོ།། །།མདོར་ན། གཞན་གྱིས་གཞན་ཕྱིར་དེ་བཞིན་ཏེ། །སྔགས་དང་ཟས་དང་མི་རུང་བ། །རབ་ཏུ་རྟོགས་དང་དེ་བཞིན་དུ། །རྐུན་པོ་མཚན་དང་བཞི་པའོ། །བཙུན་པ་དགེ་སློང་
གིས་དེ་ལྟ་བུར་དགོན་པ་ལ་གནས་པ་ན་ཀུན་དགའི་ནང་དུ་གཞན་གྱིས་བཅའ་བ་དང་བཟའ་བ་བླངས་ཏེ་བདག་ཉིད་ཀྱིས་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དེ་ལྟ་བུར་དགོན་པ་ལ་གནས་པ་ན་གཞན་དག་གི་སླད་དུ་བཅའ་བ་དང་བཟའ་བ་བདག་ཉིད་ཀྱིས་བླངས་ཏེ་ཀུན་
དགའི་ནང་དུ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་དེ་ལྟ་བུར་དགོན་པ་ལ་གནས་པ་ན་སྔགས་དང་སྨན་གྱིས་བདག་ཉིད་མི་སྣང་བར་བསྒྱུར་ཏེ་ཀུན་དགའི་ནང་ན་བཅའ་བ་དང་བཟའ་བ་བླངས་ཏེ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དེ་ལྟ་བུར་

དགོན་པ་ལ་གནས་པ་ན་ཟས་མ་གཏོགས་པའི་དེ་ལས་གཞན་བཅའ་བ་དང་། བཏུང་བ་དང་། བཞིབ་པ་དང་། བལྡག་པ་བླངས་ཏེ་འཚལ་ན་ཅིར་འགྱུར། ཉེས་བྱས་སོ། །བཙུན་པ་དགེ་སློང་གིས་དེ་ལྟ་བུར་དགོན་པ་ན་གནས་པ་ན་ཀུན་དགའི་ནང་དུ་མི་རུང་བའི་ཟས་བླངས་ཏེ་འཚལ་ན་ཅིར་
འགྱུར། ཉེས་བྱས་སོ། །བཙུན་པ་དགེ་སློང་གིས་དེ་ལྟ་བུར་དགོན་པ་ན་གནས་པ་ན་ཀུན་དགའི་ནང་ན་བཅའ་བ་དང་བཟའ་བ་བླངས་ཏེ་འཚལ་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། རབ་ཏུ་ཡང་དག་པར་རྟོགས་པའི་ནགས་སུ་ཟོས་ན་ཉེས་པ་མེད་དོ། །བཙུན་
པ་དགེ་སློང་གིས་དེ་ལྟ་བུར་དགོན་པ་ལ་གནས་པ་ན་ཡང་དག་པར་རྟོགས་པའི་ནགས་དང་ཀུན་དགའི་ནང་དུ་བཅའ་བ་དང་བཟའ་བ་བླངས་ཏེ་འཚལ་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་ཡང་དགེ་སློང་དེས་རྐུན་པོའི་སྡེ་ཉེ་བར་གནས་བཞིན་དུ་ཟོས་ནའོ། །
བཙུན་པ་དགེ་སློང་གིས་ཀུན་དགའི་ནང་དུ་བཅའ་བ་དང་བཟའ་བ་བླངས་ཏེ་འཚལ་བ་ན་མཚན་འཕོས་ཏེ་དགེ་སློང་མར་གྱུར་ན་ཅིར་འགྱུར། སོ་སོར་བཤགས་པར་བྱ་བའོ། །བཙུན་པ་དགེ་སློང་མས་ཀུན་དགའི་ནང་དུ་བཟའ་བ་དང་བཅའ་བ་བླངས་ཏེ་འཚལ་བ་ན་མཚན་འཕོས་ཏེ་དགེ་སློང་དུ་
གྱུར་ན་ཅིར་འགྱུར། སོ་སོར་བཤགས་པར་བྱ་བའོ། །བཙུན་པ་དགེ་སློང་གིས་རབ་ཏུ་ཡང་དག་པར་རྟོགས་པ་ལ་རབ་ཏུ་ཡང་དག་པར་རྟོགས་པར་འདུ་ཤེས་ཏེ་བཅའ་བ་དང་བཟའ་བ་བླངས་ཏེ་འཚལ་ན་ཅིར་འགྱུར། ཉེས་པ་མེད་དོ། །རབ་ཏུ་ཡང་དག་པར་རྟོགས་པ་ལ་རབ་ཏུ་ཡང་
དག་པར་མ་རྟོགས་པར་འདུ་ཤེས་ན་ཉེས་བྱས་སུ་འགྱུར་རོ། །རབ་ཏུ་ཡང་དག་པར་མ་རྟོགས་པ་ལ་རབ་ཏུ་ཡང་དག་པར་རྟོགས་པར་འདུ་ཤེས་ཏེ་འཚལ་ན་ཅིར་འགྱུར། ཉེས་པ་མེད་དོ། །རབ་ཏུ་ཡང་དག་པར་མ་རྟོགས་པ་ལ་རབ་ཏུ་ཡང་དག་པར་མ་རྟོགས་པར་འདུ་ཤེས་ཏེ་འཚལ་
ན་ཅིར་འགྱུར། སོ་སོར་བཤགས་པར་བྱ་བའོ། །དེ་བཞིན་དུ་མི་ལ་མིར་འདུ་ཤེས་པ་ཡང་བརྗོད་པར་བྱའོ། །བཙུན་པ་བསླབ་པ་སྩལ་བས་རབ་ཏུ་ཡང་དག་པར་མ་རྟོགས་པའི་ནགས་སུ་བཅའ་བ་དང་བཟའ་བ་བླངས་ཏེ་འཚལ་ན་ཅིར་འགྱུར། སོ་སོར་བཤགས་པར་བྱ་བའོ། །

བཙུན་པ་དགེ་སློང་མས་རབ་ཏུ་ཡང་དག་པར་མ་གཏོགས་པའི་གནས་ཀྱི་ཀུན་དགའི་ནང་དུ་བཅའ་བ་དང་བཟའ་བ་བླངས་ཏེ་འཚལ་ན་ཅིར་འགྱུར། སོ་སོར་བཤགས་པར་བྱ་བའོ། །དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་རྣམས་ལ་ཉེས་བྱས་སུ་འགྱུར་
རོ། །འདུལ་བའི་གཞུང་དམ་པ་ལས་སོ་སོར་ཐར་པ་རྣམ་པར་འབྱེད་པའི་བསླབ་པ་རྫོགས་སྷོ།། །།མདོར་ན། དབྱིབས་དང་ཁ་དོག་བར་ཆད་དང་། །མཁན་པོ་གཉིས་དང་སུན་ཕྱུང་དང་། །གནས་དང་གང་ཟག་གླིང་རྣམས་དང་། །ས་དང་མཚམས་དང་བསྙེན་པར་
རྫོགས། །ལྔ་པ་དང་ནི་ལས་གསུམ་དང་། །ཁྱིམ་པ་མཐའ་འཁོབ་ཐ་མའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་ཀྱིས་སྐྱེས་པ་བུད་མེད་འདྲ་བ་རབ་ཏུ་དབྱུང་ཞིང་བསྙེན་པར་རྫོགས་པར་མ་བྱེད་ཅིག་ཅེས་གསུངས་ན།
བཙུན་པ་སྐྱེས་པ་མདོག་བུད་མེད་འདྲ་བ། མཚན་མ་བུད་མེད་འདྲ་བ། སྐད་བུད་མེད་འདྲ་བ། དབྱིབས་བུད་མེད་འདྲ་བ་ཞིག་དགེ་སློང་གི་དངོས་པོར་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་
པར་རྫོགས་པར་བྱེད་པ་ནི་འདས་པ་དང་བཅས་པའོ། །བཙུན་པ་བུད་མེད་གཅིག་མདོག་སྐྱེས་པ་དང་འདྲ་བ། མཚན་མ་སྐྱེས་པ་དང་འདྲ་བ། སྐད་སྐྱེས་པ་དང་འདྲ་བ། དབྱིབས་སྐྱེས་པ་དང་འདྲ་བ་ཞིག་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ།
ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཙུན་པ་བར་ཆད་ཀྱི་ཆོས་དང་ལྡན་པ་ཞིག་བདག་བར་ཆད་ཀྱི་ཆོས་དང་ལྡན་ནོ་ཞེས་སྨྲ་བའི་གང་ཟག་དེ་དགེ་སློང་རྣམས་ཀྱིས་དགེ་སློང་གི་དངོས་པོར་བསྙེན་པར་རྫོགས་པར་
བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བར་ཆད་ཀྱི་ཆོས་རྣམས་དང་ལྡན་པ་ཞིག་བདག་ནི་བར་ཆད་ཀྱི་ཆོས་དང་མི་ལྡན་ནོ་ཞེས་སྨྲ་བའི་གང་ཟག་དེ་དགེ་སློང་རྣམས་ཀྱིས་

དགེ་སློང་གི་དངོས་པོར་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བར་ཆད་ཀྱི་ཆོས་རྣམས་དང་མི་ལྡན་པ་ལ་བདག་ནི་ལྡན་ནོ་ཞེས་སྨྲ་བའི་
གང་ཟག་དེ་དགེ་སློང་དག་གིས་དགེ་སློང་གི་དངོས་པོར་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བར་ཆད་ཀྱི་ཆོས་རྣམས་དང་མི་ལྡན་པ་བདག་མི་ལྡན་ནོ་ཞེས་
སྨྲ་བའི་གང་ཟག་དེ་དགེ་སློང་རྣམས་ཀྱིས་དགེ་སློང་གི་དངོས་པོར་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་ནི་བྱ་སྟེ། བསྙེན་པར་རྫོགས་པར་བྱེད་པ་ཡང་འདས་པ་དང་བཅས་པར་མི་འགྱུར་རོ། །བཙུན་པ་བསྙེན་
པར་རྫོགས་པར་བགྱིད་པས་བར་ཆད་ཀྱི་ཆོས་རྣམས་མ་དྲིས་པར་བསྙེན་པར་རྫོགས་པར་བགྱིད་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པར་འགྱུར་རོ། །བཙུན་པ་ལོ་ཉི་ཤུར་
མ་ལགས་པ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་ཤེས་པར་ནུས་པ་མ་གཏོགས་པར་ལྷག་མ་རྣམས་ནི་བསྙེན་པར་རྫོགས་པ་ཞེས་བྱའོ། །བཙུན་པ་ལྷུང་བཟེད་མ་མཆིས། ཆོས་གོས་མ་མཆིས་པར་བསྙེན་པར་རྫོགས་པར་བགྱིས་ན་
བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཙུན་པ་ཕ་དང་མས་མ་གནང་བར་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་
རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཙུན་པ་ཕ་དང་མས་མ་གནང་བར་བསྙེན་པར་རྫོགས་པར་བགྱིས་ཀྱང་ནོངས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། དེའི་ཕ་དང་མ་དུས་ལས་འདས་པར་གྱུར་ཏམ། བྱོལ་

སོང་དུ་གྱུར་ཏམ། ཇོ་བོས་གནང་བར་གྱུར་པའོ། །བཙུན་པ་བུ་སྐལ་ཞིག་ན་དེ་གང་ལ་གསོལ། གང་གི་བུ་ཡིན་པར་ཁས་བླངས་པའོ། །བཙུན་པ་བྲན་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་
པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཙུན་པ་བརྐུས་པ་དང་། རྙེད་བརྩོན་དང་། རྒྱལ་པོ་ལ་གཅེས་པ་དང་། རྒྱལ་པོ་དང་འཁོན་པ་དང་། རྒྱལ་པོ་ལ་གནོད་པའི་ལས་བྱེད་པ་བསྙེན་པར་རྫོགས་པར་བགྱིས་ན་བསྙེན་པར་རྫོགས་
པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཙུན་པ་ཟ་མ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་
པར་རྫོགས་པར་བྱེད་པ་ཡང་འདས་པ་དང་བཅས་པའོ། །བཙུན་པ་མ་ནིང་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཙུན་པ་
དགེ་སློང་མ་སུན་ཕྱུང་བ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་ཁ་ཅིག་ནི་བསྙེན་པར་རྫོགས་པ་ཞེས་བྱའོ། །ཁ་ཅིག་ནི་བསྙེན་པར་མ་རྫོགས་པ་སྟེ། གང་གིས་དགེ་སློང་མ་ལ་མི་ཚངས་པར་སྤྱད་པས་སུན་ཕྱུང་བར་གྱུར་པ་
འདི་ནི་བསྙེན་པར་མ་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལམ་ན་ཡང་མི་སྣང་བར་བྱོས་ཤིག །གང་གིས་དགེ་སློང་མ་ལུས་ལ་རེག་པ་ཙམ་གྱིས་སུན་ཕྱུང་བར་གྱུར་པ་ནི་བསྙེན་པར་རྫོགས་པ་ཞེས་བྱ་སྟེ། མ་བསྐྲད་ཅིག །བཙུན་པ་མ་བསད་པའི་གང་
ཟག་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་ཁ་ཅིག་ནི་བསྙེན་པར་རྫོགས་པ་ཞེས་བྱའོ། །ཁ་ཅིག་ནི་བསྙེན་པར་མ་རྫོགས་པ་སྟེ། གང་གིས་གཞན་དུ་འདུ་ཤེས་ནས་མ་འཚོ་བ་དང་ཕྲལ་བར་གྱུར་ཏམ། གཞན་དུ་སྦྱོར་བ་ཡང་རུང་སྟེ།

འདི་ནི་བསྙེན་པར་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལམ་ན་མི་སྣང་བར་མ་བྱེད་ཅིག །གང་གིས་ཤེས་བཞིན་དུ་མའི་འཚོ་བ་དང་ཕྲལ་བར་གྱུར་པ་འདི་ནི་བསྙེན་པར་མ་རྫོགས་པ་ཞེས་བྱ་སྟེ། ཉེ་བར་གནས་ན་མིག་ལམ་ན་སྣང་བར་མ་བྱེད་ཅིག །ཇི་ལྟར་
མ་བསད་པ་དེ་བཞིན་དུ་ཕ་བསད་པ་དང་། དགྲ་བཅོམ་པ་བསད་པ་ལ་ཡང་བརྗོད་པར་བྱའོ། །བཙུན་པ་དགེ་འདུན་གྱི་དབྱེན་བགྱིས་པའི་གང་ཟག་གིས་བསླབ་པ་ཕུལ་ཏེ་ཉམས་པར་བགྱིས་པ་དང་། དེས་སླར་ཡང་ལེགས་པར་གསུངས་པའི་ཆོས་འདུལ་བ་ལ་དད་དེ་
རབ་ཏུ་བྱུང་ནས་བསྙེན་པར་རྫོགས་ཏེ་དགེ་སློང་གི་དངོས་པོར་འཚལ་བ་དེ་དགེ་སློང་གིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་ཁ་ཅིག་ནི་བསྙེན་པར་རྫོགས་པ་ཞེས་བྱའོ། །ཁ་ཅིག་ནི་བསྙེན་པར་མ་རྫོགས་པ་སྟེ། གང་གིས་ཆོས་
མ་ཡིན་པར་འདུ་ཤེས་པས་དགེ་འདུན་ཕྱེ་བར་གྱུར་པ་འདི་ནི་བསྙེན་པར་མ་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལམ་ན་མི་སྣང་བར་བྱོས་ཤིག །གང་གིས་ཆོས་སུ་འདུ་ཤེས་ཏེ་དགེ་འདུན་ཕྱེ་བར་གྱུར་པ་འདི་ནི་བསྙེན་པར་རྫོགས་པ་ཞེས་བྱ་སྟེ། ཉེ་བར་
གནས་ན་ཡང་མིག་ལམ་ན་མི་སྣང་བར་མ་བྱེད་ཅིག །བཙུན་པ་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་ཁ་ཅིག་ནི་བསྙེན་པར་རྫོགས་པ་ཞེས་བྱའོ། །ཁ་ཅིག་ནི་བསྙེན་
པར་མ་རྫོགས་པ་ཞེས་བྱའོ། །གང་གིས་དེ་བཞིན་གཤེགས་པ་ལ་ཤེས་བཞིན་དུ་ངན་སེམས་ཀྱིས་ཁྲག་ཕྱུང་བར་གྱུར་པ་འདི་ནི་བསྙེན་པར་མ་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལམ་ན་ཡང་མི་སྣང་བར་བྱོས་ཤིག །གང་གིས་དེ་བཞིན་གཤེགས་པ་ལ་ཤེས་
བཞིན་མ་ཡིན་པར་ངན་སེམས་མེད་པས་ཁྲག་ཕྱུང་བར་གྱུར་ན་འདི་ནི་བསྙེན་པར་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལམ་ན་མི་སྣང་བར་མ་བྱེད་ཅིག །བཙུན་པ་མུ་སྟེགས་ཅན་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཁ་ཅིག་ནི་བསྙེན་

པར་རྫོགས་པ་ཞེས་བྱའོ། །ཁ་ཅིག་ནི་བསྙེན་པར་མ་རྫོགས་པ་སྟེ། གང་དེས་ལྟ་བ་མ་སྤངས་པ་འདི་ནི་བསྙེན་པར་མ་རྫོགས་པ་ཞེས་བྱ་སྟེ། ཉེ་བར་གནས་པ་ན་མིག་ལམ་ན་མི་སྣང་བར་བྱོས་ཤིག །དེ་སྟེ་དེས་ལྟ་བ་སྤངས་ན་བསྙེན་པར་རྫོགས་པ་ཞེས་བྱ་
སྟེ། ཉེ་བར་གནས་ན་མིག་ལམ་ན་མི་སྣང་བར་མ་བྱ་ཞིག །བཙུན་པ་མུ་སྟེགས་ཅན་དུ་སོང་བའི་གང་ཟག་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཁ་ཅིག་ནི་བསྙེན་པར་རྫོགས་པ་ཞེས་བྱའོ། །ཁ་ཅིག་ནི་བསྙེན་པར་མ་རྫོགས་པ་ཞེས་བྱ་སྟེ། གང་
གིས་བསླབ་པ་མ་ཕུལ་བར་མུ་སྟེགས་ཅན་གྱི་རྒྱལ་མཚན་བཟུང་བར་གྱུར་ལ། དེའི་ལྟ་བ་ལ་ཡང་དགའ་བ་འདི་ནི་བསྙེན་པར་མ་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལམ་ན་ཡང་མི་སྣང་བར་བྱོས་ཤིག །གང་གིས་བསླབ་པ་ཕུལ་ལ་མུ་སྟེགས་ཀྱི་རྒྱལ་མཚན་
བཟུང་བར་གྱུར་ནས་ཀྱང་དེའི་ལྟ་བ་ལ་ཡང་མི་དགའ་བར་གྱུར་པ་དེ་ནི་བསྙེན་པར་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལམ་ན་མི་སྣང་བར་མ་བྱ་ཞིག །བཙུན་པ་རྐུ་ཐབས་སུ་གནས་པ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཁ་
ཅིག་ནི་བསྙེན་པར་མ་རྫོགས་པའོ། །ཁ་ཅིག་ནི་བསྙེན་པར་རྫོགས་པ་ཞེས་བྱ་སྟེ། གང་གིས་བརྐུ་སེམས་ཀྱིས་རང་གི་མཚན་མ་བླངས་ཏེ། ལན་གཉིས་ལན་གསུམ་དུ་གསོ་སྦྱོང་གི་ལས་ཉམས་སུ་མྱོང་བར་གྱུར་པ་འདི་ནི་བསྙེན་པར་མ་རྫོགས་པ་ཞེས་བྱ་སྟེ། ཉེ་བར་གནས་ནའང་
མིག་ལམ་ན་མི་སྣང་བར་བྱོས་ཤིག །གང་གིས་བརྐུ་སེམས་ཀྱིས་རབ་ཏུ་མ་བྱུང་ལ་གསོ་སྦྱོང་གི་ལས་ལན་གཅིག་མྱོང་ངམ་མ་མྱོང་བར་གྱུར་པ་འདི་ནི་བསྙེན་པར་རྫོགས་པ་ཞེས་བྱ་སྟེ། ཉེ་བར་གནས་ན་ཡང་མིག་ལམ་ན་མི་སྣང་བར་མ་བྱ་ཞིག །བཙུན་པ་སོ་སོར་གནས་པའི་གང་
ཟག་བསླབ་པ་ཕུལ་ནས་ཁྱིམ་པའི་དངོས་པོར་མཆིས་པ་ལས་དེ་སླར་ལེགས་པར་གསུངས་པའི་ཆོས་འདུལ་བ་ལ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་ནི་བྱ་སྟེ། བསྙེན་པར་རྫོགས་པར་བྱེད་པ་ནི་འདས་

པ་དང་བཅས་པའོ། །བཙུན་པ་སྔར་ནོངས་པ་བྱུང་བ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ཡང་འདས་པ་དང་བཅས་པའོ། །བཙུན་པ་ཇི་ཙམ་གྱིས་ན་སྔར་ནོངས་
པ་བྱུང་བ་ཞེས་བགྱི། །ཨུ་པཱ་ལི་གང་གིས་སྔར་རབ་ཏུ་བྱུང་ལ་བསླབ་པ་མ་ཕུལ་བར་ཕས་ཕམ་པ་བཞི་ལས་གང་ཡང་རུང་བའི་ཕས་ཕམ་པ་བྱུང་བར་གྱུར་པ་དང་། དེས་བསླབ་པ་མ་ཕུལ་ནས་ཁྱིམ་པའི་དངོས་པོར་སོང་བ་ལས་དེས་སླར་ཡང་ལེགས་པར་གསུངས་པའི་ཆོས་འདུལ་
བ་ལ་རབ་ཏུ་བྱུང་བསྙེན་པར་རྫོགས་ནས་དགེ་སློང་གི་དངོས་པོར་འདོད་པ་འདི་ནི་སྔོན་ཉེས་པ་བྱུང་བའི་གང་ཟག་ཅེས་བྱའོ། །བཙུན་པ་བཅོམ་ལྡན་འདས་ཀྱིས་སྔོན་ནོངས་པ་བྱུང་བའི་གང་ཟག་བསྙེན་པར་རྫོགས་པར་མ་བྱ་ཞིག་ཅེས་གསུངས་ན། བཙུན་པ་སྔོན་ནོངས་པ་བྱུང་
བའི་གང་ཟག་བསྙེན་པར་རྫོགས་པར་བགྱིས་ན་བསྙེན་པར་རྫོགས་པར་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་ཡང་དེས་དགེ་སློང་མ་ཐུན་མོང་མ་ཡིན་པའི་ཕས་ཕམ་པར་གྱུར་པ་དང་། དེས་བསླབ་པ་ཕུལ་ཏེ་ཁྱིམ་པའི་དངོས་པོར་སོང་ན་དེར་མཚན་འཕོས་ཏེ་སྐྱེས་པར་
གྱུར་ནས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ཏེ་དགེ་སློང་གི་དངོས་པོར་འདོད་པ་དང་། དགེ་སློང་གིས་བསྙེན་པར་རྫོགས་པར་བྱས་ན་འདི་ནི་བསྙེན་པར་རྫོགས་པ་ཞེས་བྱའོ། །བཙུན་པ་བཅོམ་ལྡན་འདས་ཀྱིས་དགེ་སློང་མ་ལན་གཅིག་
སླར་བབས་པ་རབ་ཏུ་དབྱུང་ཞིང་བསྙེན་པར་རྫོགས་པར་མ་བྱ་ཞིག་ཅེས་གསུངས་ན། དེ་སྟེ་བཙུན་པ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་
བྱེད་པ་ཡང་འདས་པ་དང་བཅས་པའོ། །བཙུན་པ་སྔར་འཁྲུགས་པའི་གང་ཟག་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཁ་ཅིག་ནི་བསྙེན་པར་རྫོགས་པ་ཞེས་བྱ། ཁ་ཅིག་ནི་བསྙེན་པར་མ་རྫོགས་པ་ཞེས་

བྱ་སྟེ། གང་གིས་ལོ་ཉི་ཤུར་མ་ལོན་པར་ཤེས་པ་དང་། དེས་ཆོས་དང་འདུལ་བ་འདི་ཡིན་ཞེས་ཁས་བླངས་པའི་གང་ཟག་དེ་དགེ་སློང་གིས་བསྙེན་པར་རྫོགས་པར་བྱས་ན་འདི་ནི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་དེ་ནི་འདས་
པ་དང་བཅས་པར་མི་འགྱུར་རོ། །བཙུན་པ་ཉེ་བར་ཕྱོགས་པས་བསླབ་པ་ཕུལ་ཏེ་ཁྱིམ་པའི་དངོས་པོར་མཆིས་ནས་ལེགས་པར་གསུངས་པའི་ཆོས་འདུལ་བ་ལ་བསྙེན་པར་རྫོགས་པར་བགྱིས་ན། བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་
པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཙུན་པ་བསླབ་པ་སྩལ་བས་བསླབ་པ་ཕུལ་ཏེ་ཁྱིམ་པའི་དངོས་པོར་མཆིས་པ་ལས། དེ་སླར་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ཏེ་དགེ་སློང་
གི་དངོས་པོར་འཚལ་བ་དང་དེ་དགེ་སློང་གིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཙུན་པ་བུ་ལོན་ཆགས་པ་བསྙེན་པར་རྫོགས་
པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཙུན་པ་ནད་པ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་
རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཙུན་པ་མཁན་པོ་མ་མཆིས་པར་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་
བྱེད་པ་ནི་འདས་པ་དང་བཅས་པའོ། །བཙུན་པ་བསྙེན་པར་རྫོགས་ཀར་མཁན་པོ་སྤོང་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་ཁ་ཅིག་ནི་བསྙེན་པར་རྫོགས་པ་ཞེས་བྱའོ། །ཁ་ཅིག་ནི་བསྙེན་པར་མ་རྫོགས་པ་ཞེས་བྱ་སྟེ། གང་གིས་དགེ་སློང་ཉིད་ལ་མི་རིགས་

པའོ། །ངོ་ཚ་མེད་པའོ། །འཛེམ་པ་མེད་པའོ་ཞེས་སྨོད་ཅིང་མཁན་པོ་སྤོང་བ་འདི་ནི་བསྙེན་པར་མ་རྫོགས་པ་ཞེས་བྱའོ། །གང་གིས་མཁན་པོ་ལ་མི་རིགས་པའོ། །ངོ་ཚ་མེད་པའོ་ཞེས་སྨོད་ཀྱིས་དགེ་སྦྱོང་ཉིད་ལ་མ་ཡིན་པ་མཁན་པོ་སྤངས་པ་འདི་ནི་བསྙེན་པར་རྫོགས་
པ་ཞེས་བྱའོ། །བཙུན་པ་བཅོམ་ལྡན་འདས་ཀྱིས་འཁོར་སུན་འབྱིན་པའི་གང་ཟག་རབ་ཏུ་དབྱུང་ཞིང་བསྙེན་པར་རྫོགས་པར་མ་བྱ་ཞིག་ཅེས་གསུངས་ན། བཙུན་པ་དེས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་འཁོར་སུན་
འབྱིན་པ་བཞི་སྟེ། སྔར་འཁྲུགས་པ་མ་གཏོགས་པའི་ལྷག་མ་རྣམས་ནི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཙུན་པ་ལས་བགྱིད་པ་ཕྱོགས་གཅིག་ཏུ་མཆིས་ལ་གནས་བཞིར་གང་ཟག་བཞི་བསྙེན་པར་
རྫོགས་པར་བགྱིད་དུ་གནང་ངམ། གནང་སྟེ། དེ་ཡང་འདི་ལྟར་ལས་བྱེད་པའི་དགེ་སློང་གནས་བཞི་ཆར་གྱི་མཚམས་སུ་ཤིང་ངམ། ཁར་བའམ། རེ་ལྡེ་རྣམས་ཀྱིས་མནན་ཏེ་རེ་རེ་ནས་སམ། གཉིས་གཉིས་ནས་སམ། གསུམ་གསུམ་ནས་བསྙེན་པར་རྫོགས་
པར་བྱ་སྟེ། བཞིར་མ་ཚང་ནའོ། །བཙུན་པ་ལས་གཅིག་གིས་གཉིས་སམ་གསུམ་བསྙེན་པར་རྫོགས་པར་གནང་ངམ། ཨུ་པཱ་ལི་གནང་ངོ་། །བཙུན་པ་ལས་བགྱིད་པའི་དགེ་སློང་ཕྱོགས་གཅིག་ཏུ་མཆིས་ན་གསོལ་བ་གཅིག་དང་ལས་གཅིག་གིས་གང་ཟག་བཞི་
བསྙེན་པར་རྫོགས་པར་བགྱིས་ན་ལས་ཀྱང་བགྱིས་ལ་དགེ་སློང་དེ་དག་ཀྱང་འདས་པ་དང་བཅས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་ཡང་ལས་བྱེད་པའི་དགེ་སློང་གིས་མཚམས་མནན་ཏེ། མཚམས་སུ་གནས་སམ། མཚམས་སུ་འགྲེང་
ངམ། མཚམས་སུ་འདུག་ནས། གཉིས་ནི་མཚམས་ཀྱི་ནང་དུ་བཞག་གཉིས་ནི་མཚམས་ཀྱི་ཕྱི་རོལ་དུ་བཞག་སྟེ་ལས་བྱེད་པའོ། །བཙུན་པ་ནུབ་ཀྱི་བ་ལང་སྤྱོད་པའམ། ཤར་གྱི་ལུས་འཕགས་ཀྱི་གང་ཟག་བསྙེན་པར་རྫོགས་པར་བགྱིས་ན་བསྙེན་པར་རྫོགས་

པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཙུན་པ་བྱང་གི་སྒྲ་མི་སྙན་གྱི་གང་ཟག་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་
བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ཡང་འདས་པ་དང་བཅས་པའོ། །བཙུན་པ་དོག་ས་ལ་མཆིས་པས་གྲངས་སུ་བསྐངས་ཏེ་ནམ་མཁའ་ལ་མཆིས་པ་བསྙེན་པར་རྫོགས་པར་གནང་ངམ། ཨུ་པཱ་ལི་མི་གནང་ངོ་། །བཙུན་པ་ནམ་མཁའ་
ལ་མཆིས་པས་གྲངས་སུ་བསྐངས་ཏེ་དོག་ས་ལ་མཆིས་པ་བསྙེན་པར་རྫོགས་པར་གནང་ངམ། ཨུ་པཱ་ལི་མི་གནང་ངོ་། །བཙུན་པ་དོག་ས་ལ་མཆིས་པའི་ལས་བགྱིད་པས་ནམ་མཁའ་ལ་མཆིས་པའི་ལས་བགྱིད་པར་གནང་ངམ། ཨུ་པཱ་ལི་མི་གནང་ངོ་། །བཙུན་པ་ནམ་
མཁའ་ལ་མཆིས་པའི་ལས་བགྱིད་པས་དོག་ས་ལ་མཆིས་པའི་ལས་བགྱིད་དུ་གནང་ངམ། ཨུ་པཱ་ལི་མི་གནང་ངོ་། །དེ་བཞིན་དུ་མཚམས་ཀྱི་ནང་ན་འདུག་པ་དང་། མཚམས་ཀྱི་ཕྱི་རོལ་ན་འདུག་པ་ཡང་བཞིར་བྱའོ།། །།འདུལ་བ་གཞུང་དམ་པ། བམ་
པོ་བཅུ་དྲུག་པ། བཙུན་པ་བཅོམ་ལྡན་འདས་ཀྱིས་ལྗོངས་མཐའ་འཁོབ་ཏུ་འདུལ་བ་འཛིན་པ་དང་ལྔས་བསྙེན་པར་རྫོགས་པར་བྱོས་ཤིག་ཅེས་གསུངས་ན། བཙུན་པ་བཅུར་ཡང་མཆིས་ལ། མཆིས་བཞིན་དུ་འདུལ་བ་འཛིན་པ་དང་བཞིས་བསྙེན་པར་རྫོགས་པར་བགྱིས་
ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་བཅོམ་ལྡན་འདས་ཀྱིས་ལྗོངས་ཀྱི་དབུས་སུ་འདུལ་བ་འཛིན་པ་དང་གྲངས་བཅུས་ལྷག་པ་ཡང་རུང་བས་
བསྙེན་པར་རྫོགས་པར་འགྱུར་རོ་ཞེས་གསུངས་ན། བཙུན་པ་གྲངས་ཉི་ཤུའམ་ལྷག་པར་ཀྱང་རུང་སྟེ། མཆིས་བཞིན་པ་ལས་གྲངས་ཉི་ཤུ་ལས་ཉུང་བས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། ཨུ་

པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་བཅོམ་ལྡན་འདས་ཀྱིས་རྣམ་པ་ལྔས་ནི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་འདོད་པའི་མིང་ནས་བརྗོད་ནས་ལས་མི་ཉམས་པར་བྱེད་
པའི་བར་དུའོ་ཞེས་གསུངས་ན། བཙུན་པ་ལས་བགྱིད་པས་བསྙེན་པར་རྫོགས་པར་བགྱིད་པ་ན་བསྙེན་པར་རྫོགས་པར་འཚལ་བའི་མིང་ནས་མ་བརྗོད་ལ། མཁན་པོའི་མིང་ནས་བརྗོད། དགེ་འདུན་གྱི་མིང་ནས་བརྗོད། གསོལ་བ་ཡང་བགྱིས། ལས་ཀྱང་མ་ཉམས་
ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བསྙེན་པར་རྫོགས་པར་འཚལ་བའི་མིང་ནས་བརྗོད། དགེ་འདུན་གྱི་མིང་ནས་བརྗོད་ལ། མཁན་པོའི་མིང་ནས་
མ་བརྗོད། གསོལ་བ་ཡང་བགྱིས། ལས་ཀྱང་མ་ཉམས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བསྙེན་པར་རྫོགས་པར་འཚལ་བའི་མིང་ནས་བརྗོད།
མཁན་པོའི་མིང་ནས་བརྗོད་དེ། དགེ་འདུན་གྱི་མིང་ནས་མ་བརྗོད་ལ། གསོལ་བ་ནི་བགྱིས། ལས་ཀྱང་མ་ཉམས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་
པའོ། །བསྙེན་པར་རྫོགས་པར་འཚལ་བའི་མིང་ནས་བརྗོད། མཁན་པོའི་མིང་ནས་བརྗོད། དགེ་འདུན་གྱི་མིང་ནས་ཀྱང་བརྗོད། གསོལ་བ་ནི་མ་བགྱིས་ལ། ལས་ཀྱང་མ་ཉམས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ།
བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བསྙེན་པར་རྫོགས་པར་འཚལ་བའི་མིང་ནས་བརྗོད། མཁན་པོའི་མིང་ནས་བརྗོད། དགེ་འདུན་གྱི་མིང་ནས་བརྗོད། གསོལ་བ་ཡང་བགྱིས་ལ། ལས་ནི་ཉམས་ན་བསྙེན་པར་རྫོགས་པ་ཞེས་

བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བཙུན་པ་དགེ་ཚུལ་ཕ་དགེ་སློང་མའི་ལས་ཀྱིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་
ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་དགེ་སློབ་མ་དགེ་སློང་གི་ལས་ཀྱིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་
པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་ལས་བགྱིད་པ་བསྙེན་པར་རྫོགས་པར་བགྱིད་པའི་ཚེ་དུས་ལས་འདས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་དེ་སྟེ་ལས་མང་དུ་བྱས་པར་གྱུར་ན་ནི་བསྙེན་པར་རྫོགས་པ་ཞེས་བྱའོ། །བཙུན་པ་བསྙེན་
པར་རྫོགས་ཀར་ངག་གཅོག་ཅིང་བདག་བསྙེན་པར་རྫོགས་པར་མ་བགྱི་ཤིག་ཅེས་སླར་སྨྲ་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་བསྙེན་པར་
རྫོགས་ཀར་ཁྱིམ་པ་ལགས་པར་འཚལ་ན་བསྙེན་པར་རྫོགས་པ་ཞེས་བགྱིའམ། བསྙེན་པར་མ་རྫོགས་པ་ཞེས་བགྱི། མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་མཐའ་འཁོབ་པ་འཕགས་པའི་སྐད་དུ་བསྙེན་
པར་རྫོགས་པར་བགྱིས་པ་དང་། མཐའ་འཁོབ་པ་དེས་ཀྱང་འཕགས་པའི་སྐད་མ་འཚལ་ན་བསྙེན་པར་རྫོགས་པ་ཞེས་བགྱིའམ། དེ་སྟེ་གསུང་རབ་འདི་དང་ལྡན་ཞིང་རབ་ཏུ་ལྡན་ལ་ཁས་ལེན་པའི་སེམས་ཡོད་ན་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་
རྣམས་ནི་མི་བྱ་བ་མངོན་པར་སྤྱད་དེ་བསྙེན་པར་རྫོགས་པར་བྱས་པས་འདས་པ་དང་བཅས་པར་འགྱུར་རོ།། །།མདོར་ན། སྨྱོན་པ་སེམས་འཁྲུགས་ན་བ་དང་། །འོན་པ་གླེན་པ་གཉིད་ལོག་དང་། །ར་རོ་བ་དང་མྱོས་པ་དང་། །སྙོམས་པར་ཞུགས་དང་འགྲོ་བ་མཚན། །

བཙུན་པ་སྨྱོན་པ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་དེ་སྟེ་བསྙེན་པར་རྫོགས་པའི་འདུ་ཤེས་ཡོད་ལ་ལུས་སམ་ཚིག་གིས་དམིགས་པས་ཁས་བླངས་ན་བསྙེན་པར་རྫོགས་པ་ཞེས་བྱའོ། །ཇི་ལྟར་སྨྱོན་པ་བཞིན་དུ་སེམས་འཁྲུགས་པ་
དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་རྣམས་ཀྱང་རྒྱས་པར་བརྗོད་པར་བྱའོ། །བཙུན་པ་གཉིད་ལོག་པ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་དེ་སྟེ་ལུས་དང་ཚིག་གིས་དམིགས་ལ་གསོལ་བ་
དང་ལས་བྱེད་པའི་ཚེ་གཉིད་ཀྱིས་ལོག་ཀྱང་བསྙེན་པར་རྫོགས་པ་ཞེས་བྱའོ། །ཇི་ལྟར་གཉིད་ཀྱིས་ལོག་པ་དེ་བཞིན་དུ་ར་རོ་བ་དང་། སྙོམས་པར་ཞུགས་པ་རྣམས་ལ་ཡང་བརྗོད་པར་བྱའོ། །བཙུན་པ་འགྲོ་བ་གཞན་དུ་གནས་པ་བསྙེན་པར་རྫོགས་པར་བགྱིས་ན་བསྙེན་པར་
རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་བསྙེན་པར་རྫོགས་ཀར་མཚན་འཕོས་ན་བསྙེན་པར་རྫོགས་པ་ཞེས་བགྱིའམ། བསྙེན་པར་རྫོགས་པ་ཞེས་བྱ་སྟེ།
དགེ་སློང་མའི་ནང་དུ་སྤོས་ཤིག། །།མདོར་ན། སྨྱོན་པར་གྱུར་དང་སེམས་འཁྲུགས་དང་། །ན་བ་འོན་པ་གླེན་པ་དང་། །ཁྱིམ་པ་དག་ལ་སོགས་པ་རྣམས། །བསླབ་པ་བྱིན་དང་དེ་ལྟར་མཚན། །བཙུན་པ་ལས་བགྱིད་པའི་སྨྱོན་པས་བསྙེན་པར་རྫོགས་པར་བགྱིས་ན་
བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་གལ་ཏེ་ལས་བྱེད་པའི་དགེ་སློང་གིས་དགེ་འདུན་གྱི་འདུ་ཤེས་དང་ལྡན་ཞིང་གསོལ་བ་བྱས་ལ་ལས་ཀྱང་མ་ཉམས་ན་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །དེ་བཞིན་
དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། ལྐུགས་པ་དང་། འོན་པ་དང་། དེ་བཞིན་དུ་ར་རོ་བ་རྣམས་ལ་ཡང་བརྗོད་པར་བྱའོ། །བཙུན་པ་ལས་བགྱིད་པ་ཁྱིམ་པས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་

མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །དེ་བཞིན་དུ་མ་ནིང་དང་། དགེ་སློང་མ་སུན་ཕྱུང་བ་དང་། ཕ་དང་མ་དང་དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་
དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། མི་གནས་པ་དང་། སོ་སོར་གནས་པ་དང་། སྔར་ཉེས་པ་བྱུང་བ་དང་། སྔར་འཁྲུགས་པས་ལས་བགྱིད་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ།
བསྙེན་པར་རྫོགས་པར་བྱེད་པ་རྣམས་ཀྱང་འདས་པ་དང་བཅས་པའོ། །བཙུན་པ་ལས་བགྱིད་པ་ཟ་མས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ཀྱང་འདས་པ་
དང་བཅས་པའོ། །བཙུན་པ་ལས་བགྱིད་པ་དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ཀྱིས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་
རྫོགས་པར་བྱེད་པ་རྣམས་ནི་འདས་པ་དང་བཅས་པའོ། བཙུན་པ་ལས་བགྱིད་པ་འགྲོ་བ་གཞན་དུ་གནས་པས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་མ་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་
དང་བཅས་པའོ། །བཙུན་པ་བསྙེན་པར་རྫོགས་པར་བགྱིད་པ་ན་ལས་བགྱིད་པའི་མཚན་འཕོས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ།། །།མདོར་ན།
སྨྱོན་པ་སེམས་འཁྲུགས་ན་བ་དང་། །འོན་པ་གླེན་པ་གཉིད་ལོག་དང་། །ར་རོ་བ་དང་མྱོས་པ་དང་། །སྙོམས་པར་ཞུགས་དང་འགྲོ་བ་མཚན། །ཁྱིམ་པ་དག་ལ་སོགས་པ་རྣམས། །བསླབ་པ་བྱིན་པ་ཐ་མའོ། །བཙུན་པ་མཁན་པོ་སྨྱོན་པས་བསྙེན་པར་རྫོགས་པར་བགྱིས་

ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །དེ་བཞིན་དུ་མཁན་པོ་སེམས་འཁྲུགས་པ་དང་། ནད་ཀྱིས་གཟིར་བ་ནས། སྙོམས་པར་ཞུགས་པའི་བར་རྣམས་སོ། །
བཙུན་པ་མཁན་པོ་འགྲོ་བ་གཞན་དུ་གནས་པས་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་དགེ་ཚུལ་ཕ་བསྙེན་པར་
རྫོགས་པར་བགྱིད་པ་ན་མཁན་པོའི་མཚན་འཕོས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །བཙུན་པ་མཁན་པོ་ཁྱིམ་པས་བསྙེན་པར་རྫོགས་པར་བགྱིས་ན་
བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །དེ་བཞིན་དུ་མཁན་པོ་ཟ་མ་དང་། མ་ནིང་ནས་རྒྱས་པར་བསླབ་པ་སྩལ་བའི་བར་དུ་དེ་རྣམས་ཀྱིས་བསྙེན་པར་རྫོགས་པར་བགྱིས་ན་
བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་རྣམས་ནི་འདས་པ་དང་བཅས་པའོ། །འདུལ་བ་གཞུང་དམ་པ་ལས་བསྙེན་པར་རྫོགས་པའི་དངོས་པོ་རྫོགས་སྷོ།། །།མདོར་ན། ཕྱེད་
དང་གསུམ་དང་བསྐོར་བ་དང་། །བཞི་པ་དང་ནི་མཚམས་དང་མཚན། །ཞིག་དང་སྔ་མ་མཚམས་དང་ཤིང་། །དབྱུང་དང་མི་རུང་ཁྱིམ་པ་དང་། །དབྱུང་བ་ཐ་མ་སྨྲས་པའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་བཅོམ་ལྡན་འདས་
ཀྱིས་མཚམས་ཆེན་པོ་ཆོད་ཅིག་ཅེས་གསུངས་ན། བཙུན་པ་མཚམས་ཆེན་པོ་ཚད་ཇི་ཙམ། ཨུ་པཱ་ལི་དཔག་ཚད་ཕྱེད་དང་གསུམ་མོ། །དེ་ཚུན་ཆད་ནི་ཐམས་ཅད་ཀྱང་ཆུང་ངུ་སྟེ། དཀྱིལ་འཁོར་གང་དུ་གྲངས་བཞི་བཅུ་བསྐོར་བར་ཤོང་བའོ། །བཙུན་པ་དཔག་ཚད་ཕྱེད་

དང་གསུམ་ལས་འདས་པར་མཚམས་བཀུམ་ན་དེ་མཚམས་ཞེས་བགྱིའམ། ཨུ་པཱ་ལི་མ་ཡིན་ཏེ། དཔག་ཚད་ཕྱེད་དང་གསུམ་ནི་མཚམས་སོ། །དེ་ལས་འདས་པ་ནི་མཚམས་མ་ཡིན་ནོ། །དེ་སྟེ་མཚམས་བཅད་ན་ཡང་མ་བཅད་པ་ཞེས་
བྱའོ། །དགེ་སློང་རྣམས་ཀྱང་འདས་པ་དང་བཅས་པ་སྟེ། དེ་བཞིན་དུ་ཐམས་ཅད་ཤེས་པར་བྱའོ། །བཙུན་པ་འོག་གི་མཚམས་གང་ལགས། ཨུ་པཱ་ལི་ཆུ་ཡོད་པའི་བར་དུའོ། །བཙུན་པ་དཔག་ཚད་ཕྱེད་དང་གསུམ་ལས་འདས་པ་ན་ཆབ་མཆིས་ན་དེ་མཚམས་
ཞེས་བགྱིའམ། ཨུ་པཱ་ལི་མ་ཡིན་ཏེ། དཔག་ཚད་ཕྱེད་དང་གསུམ་ནི་མཚམས་སོ། །དེ་མན་ཆད་ནི་མཚམས་མ་ཡིན་ནོ། །བཙུན་པ་སྟེང་གི་ནམ་མཁའ་ལ་མཚམས་གང་ལགས། ཨུ་པཱ་ལི་ཇི་ཙམ་རྩིག་རྒལ་ལམ་ཤིང་གི་རྩེ་མོ་ཡོད་པའོ། །བཙུན་པ་དཔག་ཚད་ཕྱེད་
དང་གསུམ་ལས་འདས་པ་ན་རྩིག་རྒལ་ལམ་ཤིང་གི་རྩེ་མོ་མཆིས་ན་དེ་མཚམས་ཞེས་བགྱིའམ། ཨུ་པཱ་ལི་མ་ཡིན་ཏེ། དཔག་ཚད་ཕྱེད་དང་གསུམ་ནི་མཚམས་ཞེས་བྱའི། དེ་ཡན་ཆད་ནི་མཚམས་མ་ཡིན་ནོ། །བཙུན་པ་རིའི་རྩེ་མོའི་མཚམས་གང་ལགས། ཨུ་པཱ་ལི་ཆུ་མིག་
ཡོད་པའོ། །བཙུན་པ་དཔག་ཚད་ཕྱེད་དང་གསུམ་ལས་འདས་པ་ན་ཆབ་མིག་མཆིས་ན་དེ་མཚམས་ཞེས་བགྱིའམ། ཨུ་པཱ་ལི་མ་ཡིན་ཏེ། དཔག་ཚད་ཕྱེད་དང་གསུམ་ནི་མཚམས་སོ། །དེ་ཡན་ཆད་ནི་མཚམས་མ་ཡིན་ནོ། །བཙུན་པ་མཚམས་ལ་ཡང་མཚམས་ཀྱིས་
བསྐོར་བར་གནང་ངམ། ཨུ་པཱ་ལི་མི་གནང་སྟེ། རྒྱང་གྲགས་ཀྱི་མཚམས་དང་། རྩིག་པའི་མཚམས་དང་། ཆུས་བསྐོར་བའི་དཀྱིལ་འཁོར་ནི་མ་གཏོགས་སོ། །བཙུན་པ་ལས་བགྱིད་པ་འཕགས་པས་འཕགས་པའི་སྐད་དུ་མཚམས་བཀུམ་པ་དང་། དགེ་སློང་དེ་དག་
གིས་འཕགས་པའི་སྐད་མ་འཚལ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མཚམས་བཅད་པ་ཞེས་བྱ་སྟེ། ལས་བྱེད་པ་ནི་འདས་པ་དང་བཅས་པའོ། །བཙུན་པ་འཕགས་པས་མཐའ་འཁོབ་པའི་སྐད་དུ་མཚམས་བཀུམ་པ་དང་། དགེ་སློང་དེ་དག་གིས་

མཐའ་འཁོབ་པའི་སྐད་མ་འཚལ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་བཅད་པ་ཞེས་བྱ་སྟེ། ལས་བྱེད་པ་ནི་འདས་པ་དང་བཅས་པའོ། །བཙུན་པ་མཐའ་འཁོབ་པས་མཐའ་འཁོབ་པའི་སྐད་དུ་མཚམས་བཀུམ་པ་དང་། དགེ་སློང་དེ་དག་གིས་མཐའ་འཁོབ་
པའི་སྐད་མ་འཚལ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མཚམས་བཅད་པ་ཞེས་བྱ་སྟེ། ལས་བྱེད་པ་ནི་འདས་པ་དང་བཅས་པའོ། །བཙུན་པ་མཐའ་འཁོབ་པས་འཕགས་པའི་སྐད་དུ་མཚམས་བཀུམ་པ་དང་། དགེ་སློང་དེ་དག་གིས་འཕགས་པའི་སྐད་མ་
འཚལ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མཚམས་བཅད་པ་ཞེས་བྱ་སྟེ། ལས་བྱེད་པ་ནི་འདས་པ་དང་བཅས་པའོ། །བཙུན་པ་སྟེང་གི་ནམ་མཁའ་ལ་མཚམས་དགུམ་པར་རུང་ངམ། ཨུ་པཱ་ལི་མི་རུང་སྟེ། ཨུ་པཱ་ལི་དེ་ཅིའི་ཕྱིར་ཞེ་ན། མཚམས་བསྟན་
དུ་མེད་པའི་ཕྱིར་རོ། །བཙུན་པ་ཉི་མ་དང་ཟླ་བ་དང་སྐར་མས་མཚམས་དགུམ་དུ་རུང་ངམ། ཨུ་པཱ་ལི་མི་རུང་ངོ་། །ཨུ་པཱ་ལི་དེ་ཅིའི་ཕྱིར་ཞེ་ན། དེ་ནི་འདི་ལྟར་ཉི་མ་དང་། ཟླ་བ་དང་། སྐར་མ་ནི་མི་བརྟན་ཞིང་གཡོ་བའི་ཕྱིར་རོ། །བཙུན་པ་ཆུ་རླབས་དང་། ཆུ་རླབས་ཀྱི་རྒྱུད་
དམ། ཀླུང་གི་འགྲམ་དུ་མཚམས་དགུམ་དུ་རུང་ངམ། ཨུ་པཱ་ལི་མི་རུང་ངོ་། །ཨུ་པཱ་ལི་དེ་ཅིའི་ཕྱིར་ཞེ་ན། དེ་ནི་འདི་ལྟར་ཆུ་རླབས་དང་། ཆུ་རླབས་ཀྱི་རྒྱུད་དང་། ཀླུང་གི་འགྲམ་ནི་གཡོ་ཞིང་མི་བརྟན་པའི་ཕྱིར་རོ། །བཙུན་པ་དེ་སྟེ་ཀླུང་གི་འགྲམ་བརྟན་པར་གྱུར་ན་མཚམས་དགུམ་
དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་རྫུ་འཕྲུལ་ལམ་སྒྱུ་མས་མཚམས་དགུམ་དུ་རུང་ངམ། ཨུ་པཱ་ལི་མི་རུང་ངོ་། །ཨུ་པཱ་ལི་དེ་ཅིའི་ཕྱིར་ཞེ་ན། དེ་ནི་འདི་ལྟར་རྫུ་འཕྲུལ་དང་སྒྱུ་མ་ནི་ཐ་སྙད་དུ་མི་འདོགས་པའི་ཕྱིར་རོ། །བཙུན་པ་ཀླུང་ངམ། ཡུར་བ་ལས་མཚམས་བཟླར་
རུང་ངམ། ཨུ་པཱ་ལི་མི་རུང་སྟེ། དེ་ཀླུང་ངམ་ཡུར་ཆུ་རྟག་ཏུ་མི་འབབ་པར་གྱུར་པའོ། །བཙུན་པ་རྟག་ཏུ་འབབ་པའི་ཆུ་གཏིང་ཟབ་པ་ལས་མཚམས་བཟླ་བར་རུང་ངམ། ཨུ་པཱ་ལི་རུང་སྟེ། འདི་ལྟར་ཡང་ཀླུང་དང་ཡུར་ཆུ་དེ་ལས་ཤིང་ངམ་རྩིག་པ་འམ་རེ་ལྡེ་རྣམས་ཀྱིས་བཀབ་པར་གྱུར་

པའོ། །བཙུན་པ་དེ་སྟེ་ཤིང་ངམ་རེ་ལྡེ་འཇིག་པའི་ཆོས་སུ་གྱུར་ན་ཞིག་པ་ཞེས་བགྱིའམ། དེ་སྟེ་སྦྱོར་བ་བཏང་ན་ཞིག་པ་ཞེས་བྱའོ། །འོན་ཏེ་སླར་དགབ་པར་སྦྱོར་བ་མ་བཏང་ན་མ་ཞིག་པ་ཞེས་བྱའོ། །བཙུན་པ་ལས་བགྱིད་པ་མཚམས་གཅོད་པ་ན་མཚན་གྱུར་ན་མཚམས་
བཅད་པ་ཞེས་བགྱིའམ། ཨུ་པཱ་ལི་མཚམས་བཅད་པ་ཞེས་བྱའོ། །བཙུན་པ་མཚམས་ཀྱིས་མཚམས་དགྲོལ་དུ་རུང་ངམ། ཨུ་པཱ་ལི་རྒྱང་གྲགས་ཀྱི་མཚམས་དང་། རྩིག་པའི་མཚམས་མ་གཏོགས་པ་གཞན་མི་རུང་ངོ་། །བཙུན་པ་མཚམས་འཇིག་པ་རྣམ་པ་དུ་མཆིས། ཨུ་པཱ་
ལི་ལྔ་སྟེ། མཚམས་མེད་པ་དང་། དགེ་སློང་མེད་པ་དང་། རེ་བ་མེད་པ་དང་། གསོལ་བ་དང་། ལས་དང་ལྔ་ཡིན་ནོ། །བཙུན་པ་སྔོན་གྱི་མཚམས་མ་བཀྲོལ་བར་མཚམས་གཞན་དགུམ་དུ་རུང་ངམ། ཨུ་པཱ་ལི་རྒྱང་གྲགས་ཀྱི་མཚམས་དང་། རྩིག་པའི་མཚམས་དང་།
དཀྱིལ་འཁོར་གྱི་མཚམས་མ་གཏོགས་པར་མི་རུང་ངོ་། །ཨུ་པཱ་ལི་དེ་ཅིའི་ཕྱིར་ཞེ་ན། གསོལ་བ་དང་ལས་ཀྱིས་མཚམས་བཅད་དོ། །གསོལ་བ་དང་ལས་ཀྱིས་མཚམས་དགྲོལ་ལོ། །བཙུན་པ་མཚམས་བཀུམ་པས་མཚམས་དགྲོལ་བའམ། མཚམས་བཀྲོལ་བས་མཚམས་
བཀུམ་པར་འགྱུར་བ་མཆིས་སམ། ཨུ་པཱ་ལི་ཡོད་དེ། ལས་ཀྱིས་མཚམས་བཅད་ན་རྒྱང་གྲགས་དང་། རྩིག་པའི་མཚམས་དགྲོལ་བ་ཞེས་བྱའོ། །ལས་ཀྱིས་མཚམས་བཀྲོལ་ན་རྒྱང་གྲགས་ཀྱི་མཚམས་དང་། རྩིག་པའི་མཚམས་བཅད་པ་ཞེས་བྱའོ། །བཙུན་པ་མཆི་
བའི་རྗེས་སུ་མཆི་བ་གང་ཨུ་པཱ་ལི་མཚམས་སོ། །བཙུན་པ་མཆིས་པའི་རྗེས་སུ་མཆིས་པ་གང་། ཨུ་པཱ་ལི་མཚམས་སོ། །བཙུན་པ་གནས་བཞི་འམ། ལྔ་འམ། དེ་ལས་མང་ཡང་རུང་ཤིང་གཅིག་གིས་མཚམས་དགུམ་པར་རུང་ངམ། ཨུ་པཱ་ལི་རུང་སྟེ། ཇི་ཙམ་དུ་མཚམས་
བསྒྲགས་ཤིང་གཞག་པར་ནུས་པའི་བར་དུའོ། །བཙུན་པ་མཚམས་ནས་མཚམས་སྤོ་བར་རུང་ངམ། ཨུ་པཱ་ལི་མི་རུང་སྟེ། རྒྱང་གྲགས་ཀྱི་མཚམས་དང་། རྩིག་པའི་མཚམས་ནི་མ་གཏོགས་སོ། །བཙུན་པ་སྤོ་མི་འཚལ་བའི་མཚམས་དུ། ཨུ་པཱ་ལི་གཅིག་སྟེ། ལས་ཀྱི་

མཚམས་སམ་ཆུ་མིག་གམ་ཁྲོན་པའོ། །བཙུན་པ་རུང་བའི་ས་དང་། མི་རུང་བའི་སའོ་ཞེས་བགྱི་ན། བཙུན་པ་རུང་བའི་ས་གང་ལགས་ཨུ་པཱ་ལི་གནས་གང་ན་མཚམས་ཀྱི་ནང་ན་རུང་བའི་གནས་སུ་བྱིན་གྱིས་བརླབས་པར་གྱུར་པ་འདི་ནི་རུང་བའི་ས་ཞེས་བྱའོ། །བཙུན་པ་མི་རུང་
བའི་ས་གང་ལགས། ཨུ་པཱ་ལི་མཚམས་ཀྱི་ནང་དུ་རུང་བའི་གནས་བྱིན་གྱིས་མ་རླབས་པར་གྱུར་པ་འདི་ནི་མི་རུང་བའི་ས་ཞེས་བྱའོ། །ཨུ་པཱ་ལི་དམ་པའི་ཆོས་ཡོད་པའི་བར་དུ་མི་རུང་བའི་ས་ཡང་ཡོད་དོ། །ཨུ་པཱ་ལི་དམ་པའི་ཆོས་མེད་པར་གྱུར་ན་ཐམས་ཅད་ཀྱང་རུང་བའི་
སའོ། །བཙུན་པ་ཇི་ཙམ་གྱིས་ན་དམ་པའི་ཆོས་མཆིས་པ་ཞེས་བགྱི། ཨུ་པཱ་ལི་གང་གི་ཚེ་ནན་ཏན་བྱེད་པ་རྣམས་ནན་ཏན་བྱེད་ཅིང་ལས་ཀྱང་བྱེད་དེ་ནན་ཏན་དུ་བྱ་བས་ནན་ཏན་བྱེད་ལ་ལས་ཀྱང་བྱེད་པའི་བར་དུ་ནི་དམ་པའི་ཆོས་ཡོད་པ་ཞེས་བྱའོ། །བཙུན་པ་ཇི་ཙམ་གྱིས་ན་
དམ་པའི་ཆོས་མ་མཆིས་པར་གྱུར་པ་ཞེས་བགྱི། ཨུ་པཱ་ལི་གང་གི་ཚེ་ནན་ཏན་བྱེད་པ་རྣམས་ནི་ནན་ཏན་མི་བྱེད་ཅིང་ལས་ཀྱང་མི་བྱེད་དེ་ནན་ཏན་བྱེད་པས་ནན་ཏན་མི་བྱེད་ལ་ལས་ཀྱང་མི་བྱེད་པའི་ཚེ། དམ་པའི་ཆོས་མེད་པར་གྱུར་པ་ཞེས་བྱའོ། །བཙུན་པ་ལས་བགྱིད་པ་ཁྱིམ་
པས་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་བཞིན་དུ་ལས་བྱེད་པ་ཟ་མ་དང་མ་ནིང་དང་། དགེ་སློང་མ་སུན་ཕྱུང་བ་དང་། ཕ་དང་། མ་དང་དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་།
མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། མི་གནས་པ་དང་། སོ་སོར་གནས་པ་དང་། སྔར་འཁྲུགས་པ་རྣམས་ཀྱིས་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་ལས་བགྱིད་པ་དགེ་འདུན་གྱི་དབྱེན་
བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ཀྱིས་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མཚམས་བཅད་པ་ཞེས་ནི་བྱ་ལ། དགེ་འདུན་རྣམས་ནི་འདས་པ་དང་བཅས་པའོ། །བཙུན་པ་ལས་བགྱིད་པ་སྨྱོན་པས་མཚམས་

བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་དེ་སྟེ་དགེ་སློང་གི་འདུ་ཤེས་དང་ལྡན་ལ་མཚན་མ་རྣམས་ཀྱང་སྟོན་ནུས་ཤིང་གསོལ་བ་ཡང་བྱས་ཏེ་ལས་མ་ཉམས་ན་མཚམས་བཅད་པ་ཞེས་བྱའོ། །དེ་བཞིན་དུ་ལས་བྱེད་པ་སེམས་འཁྲུགས་པ་དང་། ནད་ཀྱིས་
གཟིར་བ་དང་། གླེན་པ་དང་། འོན་པ་རྣམས་ཀྱང་བརྗོད་པར་བྱའོ། །བཙུན་པ་ལས་བྱེད་པ་འགྲོ་བ་གཞན་དུ་གནས་པས་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་མཚམས་བཀུམ་པ་ན་ལས་བགྱིད་པའི་དགེ་སློང་དུས་ལས་འདས་
ན་མཚམས་བཀུམ་པ་ཞེས་བགྱིའམ། ཨུ་པཱ་ལི་དེ་སྟེ་མཚམས་བསྒྲགས་པར་ཡང་རྟོགས་ལ། ལས་ཀྱང་མང་དུ་བྱས་པར་གྱུར་ན་མཚམས་བཅད་པ་ཞེས་བྱའོ། །ཨུ་པཱ་ལི་དེ་སྟེ་མཚམས་བསྒྲགས་པར་ཡང་མ་རྟོགས་ལ་ལས་ཀྱང་མང་དུ་མ་བྱས་པར་གྱུར་ན་མཚམས་མ་བཅད་
པ་ཞེས་བྱའོ། །དེ་བཞིན་དུ་ཁྱིམ་པ་ཡིན་པར་ཤེས་པ་དང་། མ་ནིང་ཡིན་པ་དང་། དགེ་སློང་མ་སུན་ཕྱུང་བ་དང་། ཕ་དང་མ་དང་། དགྲ་བཅོམ་པ་བསད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ཡིན་པ་དང་། མུ་སྟེགས་ཅན་དང་། མུ་སྟེགས་ཅན་
དུ་སོང་བ་ཡིན་པ་དང་། རྐུན་གནས་དང་། མི་གནས་པ་ཡིན་པ་དང་། སོ་སོར་གནས་པ་ཡིན་པ་དང་། སྔར་ཉེས་པ་བྱུང་བ་ཡིན་པ་དང་། སྔར་འཁྲུགས་པ་ཡིན་པར་ཤེས་པ་ནས། དེ་བཞིན་དུ་འགྲོ་བ་གཞན་དུ་གནས་པ་བདག་ཉིད་ཡིན་པར་ཤེས་པའང་རྒྱས་པར་བརྗོད་པར་
བྱའོ། །བཙུན་པ་མཚམས་འགུམས་པ་ན་དགེ་འདུན་གྱི་དབྱེན་བགྱིས་པར་འཚལ་བ་དང་ཉེ་བར་ཕྱོགས་པ་དང་། བསླབ་པ་སྩལ་བ་ལགས་པར་འཚལ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མཚམས་བཅད་པ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །
བཙུན་པ་ཁྱིམ་པས་གྲངས་སུ་བསྐངས་ཏེ་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མ་ཡིན་ནོ། །དེ་བཞིན་དུ་མ་ནིང་ནས་སྔར་འཁྲུགས་པ་རྣམས་ཀྱི་བར་དུ་དེ་དག་གིས་གྲངས་སུ་བསྐངས་ཏེ་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་

མ་ཡིན་ནོ། །བཙུན་པ་དགེ་སློང་ཟ་མས་གྲངས་སུ་བསྐངས་ཏེ་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་བཅད་པ་ཞེས་མི་བྱ་སྟེ། དགེ་འདུན་ཡང་འདས་པ་དང་བཅས་པའོ། །དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་
པ་སྩལ་བ་རྣམས་ཀྱིས་གྲངས་སུ་བསྐངས་ཏེ་མཚམས་བཀུམ་ན་མཚམས་བཀུམ་པ་ཞེས་བགྱིའམ། ཨུ་པཱ་ལི་མཚམས་བཅད་པ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ།། །།མདོར་ན། མཚམས་དང་རུང་བའི་གནས་དག་དང་། །ལས་གཅིག་
ཀླུང་ཡང་དེ་བཞིན་ཏེ། །ཞིག་པ་དང་ནི་གླིང་གསུམ་དང་། །གྲོང་དང་གསུམ་པ་དེ་བཞིན་ནོ། །བཙུན་པ་མཚམས་ཀྱི་མཚན་མ་མཆིས་པར་གྱུར་ན་མཚམས་ཞིག་པ་ཞེས་བགྱིའམ། ཨུ་པཱ་ལི་ཞིག་པ་ཞེས་བྱའོ། །བཙུན་པ་མཚམས་ཞིག་ན་རུང་བའི་གནས་ཀྱང་ཞིག་
པ་ཞེས་བགྱིའམ། ཨུ་པཱ་ལི་ཞིག་པ་ཞེས་བྱའོ། །བཙུན་པ་ལས་གཅིག་དང་གསོལ་བ་གཅིག་གིས་ལས་བགྱིད་པ་ཕྱོགས་གཅིག་ཏུ་མཆིས་ཏེ་གནས་བཞིར་མཚམས་དགུམ་པར་རུང་ངམ། ཨུ་པཱ་ལི་རུང་སྟེ། ཇི་ལྟར་ཡང་ལས་བྱེད་པའི་དགེ་སློང་དེས་གནས་བཞིའི་
མཚམས་སུ་ཤིང་ངམ། དབྱིག་པ་འམ། རེ་ལྡེ་ལ་མནན་ཏེ་མཚམས་བཅད་པའོ། །བཙུན་པ་མཚམས་དགུམ་པའི་གནས་སུ་ཀླུང་ངམ་ཡུར་ཆུས་མཚམས་ནོན་ན་མཚམས་ཞིག་པ་ཞེས་བགྱིའམ། ཨུ་པཱ་ལི་དེ་སྟེ་མཚམས་ཀྱི་མཚན་མ་བརྟན་པ་ཡོད་ན་མ་ཞིག་པ་ཞེས་
བྱའོ། །དེ་སྟེ་མཚམས་ཀྱི་མཚན་མ་མེད་པར་གྱུར་ན་ཞིག་པ་ཞེས་བྱའོ། །བཙུན་པ་མཚམས་ཞིག་ན་ཆོས་གོས་དང་མི་འབྲལ་བའི་སྡོམ་པ་ཡང་མ་མཆིས་པ་ཞེས་བགྱིའམ། མཆིས་པ་ཞེས་བགྱི། ཨུ་པཱ་ལི་ཡོད་པ་ཞེས་བྱའོ། །བཙུན་པས་ནི་ལས་ཀྱི་མཚམས་སུ་ཆོས་
གོས་དང་མི་འབྲལ་བའི་སྡོམ་པ་སྐོས་ཤིག་ཅེས་གསུངས་ན། བཙུན་པ་རྒྱང་གྲགས་ཀྱི་མཚམས་དང་། རྩིག་པའི་མཚམས་ལ་ཡང་ཆོས་གོས་དང་མི་འབྲལ་བའི་སྡོམ་པ་བསྐོ་བར་བགྱིའམ། དེ་སྟེ་དགོས་པར་གྱུར་ན་སྐོས་ཤིག །བཙུན་པ་གྲོང་དང་གཙུག་ལག་ཁང་

ལྷན་ཅིག་ཏུ་མཆིས་ཏེ་མཚམས་འབྲེལ་བར་གྱུར་ན་དེ་ལ་ཆོས་གོས་དང་མི་འབྲལ་བར་གང་ཚུན་ཆད་བསྐོ་བར་བགྱི། གྲོང་གི་ཉེན་ཀོར་མ་གཏོགས་པའོ། །བཙུན་པ་བཅོམ་ལྡན་འདས་ཀྱིས་ནི་གྲོང་ངམ་གྲོང་གི་ཉེན་ཀོར་མ་གཏོགས་པར་ཆོས་གོས་དང་མི་འབྲལ་བའི་
སྡོམ་པའོ་ཞེས་གསུངས་ན། ཆོས་གོས་དང་མི་འབྲལ་བའི་སྡོམ་པ་བསྐོས་པ་ལས་གྲོང་ཞིག་དེར་བཙུགས་ན་དེ་ཕྱོགས་སུ་ཆོས་གོས་དང་མི་འབྲལ་བའི་སྡོམ་པ་ཞིག་པར་འགྱུར་རམ། ཨུ་པཱ་ལི་ཞིག་པ་ཞེས་བྱའོ། །བཙུན་པ་ཆོས་གོས་དང་མི་འབྲལ་བའི་སྡོམ་པ་བསྐོས་
པ་ལས་གྲོང་གུད་དུ་འཕོས་ན་བཙུན་པ་ཅིའི་ཕྱིར་ཕྱོགས་དེར་ཡང་ཆོས་གོས་དང་མི་འབྲལ་བར་སྡོམ་པར་བསྐོ་བར་བགྱིའམ། ཨུ་པཱ་ལི་མི་དགོས་ཏེ། སྔོན་གྱི་སྡོམ་པ་གསོས་པས་ཆོག་གོ།། །།མདོར་ན། དྲན་པ་བཞི་པ་གསུམ་པ་དང་། །ལྔ་པ་དང་ནི་གཉིས་མཚན་
དང་། །ཉེས་པ་གཉིས་དང་སྐབས་འབྱེད་དང་། །སེམས་པ་འདུག་པ་ལངས་པ་དང་། །ཁྱིམ་པ་དག་ལ་སོགས་པ་དང་། །སྨྱོན་པ་འཆད་དང་མང་པོའོ། །བཙུན་པ་དགེ་འདུན་གྱིས་སྐྱ་རེངས་ཤར་བའི་ཚེ་དེང་ནི་བདག་ཅག་གི་གསོ་སྦྱོང་ངོ་ཞེས་དྲན་པར་གྱུར་ན། དགེ་
སློང་དེ་དག་གིས་གསོ་སྦྱོང་ཇི་ལྟར་བགྱི། དེང་བདག་ཅག་གི་གསོ་སྦྱོང་ངོ་ཞེས་སེམས་ལས་ཚིག་ཏུ་བརྗོད་ཅིང་། འོན་ཏེ་དེ་ན་སོ་སོར་ཐར་པ་ཀློག་ན་བཀླགས་པ་ཞེས་བྱ་སྟེ། དགེ་སློང་དེ་དག་གིས་གསོ་སྦྱོང་ཡང་བྱས་མོད་ཀྱི་འདས་པ་དང་བཅས་པར་འགྱུར་རོ། །བཙུན་
པ་བཅོམ་ལྡན་འདས་ཀྱིས་གསོ་སྦྱོང་གི་ལས་ལ་རྣམ་པ་བཞི་སྟེ། ཆོས་བཞིན་མ་ཡིན་པར་བྱེད་ཅིང་མ་འདུས་པ་དང་། ཆོས་བཞིན་མ་ཡིན་པ་ལ་འདུས་པ་དང་། ཆོས་བཞིན་ལ་མ་འདུས་པ་དང་། ཆོས་བཞིན་ལ་འདུས་པ་རྣམས་སོ་ཞེས་གསུངས་ན། ཆོས་བཞིན་མ་ཡིན་
པར་བྱེད་ཅིང་མ་འདུས་པ་གང་ཞེ་ན། གང་གི་ཚེ་སོ་སོར་ཐར་པ་བཀླག་པར་བྱ་བ་དེའི་ཚེ་མི་ཀློག །གང་གིས་བཀླག་པར་བྱ་བ་དེས་མི་ཀློག །ཇི་ལྟར་བཀླག་པར་བྱ་བ་དེ་ལྟར་མི་ཀློག །ཇི་སྲིད་དུ་བཀླག་པར་བྱ་བ་དེ་སྲིད་དུ་མི་ཀློག་པ་དང་མ་འདུས་པར་གྱུར་པའོ། །ཆོས་བཞིན་

མ་ཡིན་པ་ལ་འདུས་པ་གང་ཞེ་ན། གང་གི་ཚེ་ན་སོ་སོར་ཐར་པ་བཀླག་པར་བྱ་བ་དེའི་ཚེ་མི་ཀློག་པ་ནས་རྒྱས་པར་ཇི་སྲིད་དུ་བཀླག་པར་བྱ་བ་དེ་སྲིད་དུ་མི་ཀློག་ཅིང་འདུས་པར་གྱུར་པའོ། །ཆོས་བཞིན་ལ་མ་འདུས་པ་གང་ཞེ་ན། གང་གི་ཚེ་སོ་སོར་ཐར་པ་བཀླག་པར་བྱ་བ་དེའི་ཚེ་
ཀློག །གང་གིས་བཀླག་པར་བྱ་བ་དེས་ཀློག །ཇི་ལྟར་བཀླག་པར་བྱ་བ་དེ་ལྟར་ཀློག །ཇི་ཙམ་དུ་བཀླག་པར་བྱ་བ་དེ་ཙམ་དུ་བཀླགས་པ་དང་མ་འདུས་པར་གྱུར་པའོ། །ཆོས་བཞིན་ལ་འདུས་པ་གང་ཞེ་ན། གང་གི་སོ་སོར་ཐར་པ་བཀླག་པར་བྱ་བ་དེའི་ཚེ་ཀློག་པ་ནས་རྒྱས་
པར་ཇི་སྲིད་དུ་བཀླག་པ་དེ་སྲིད་དུ་ཀློག་ཅིང་འདུས་པར་གྱུར་པའི་བར་དུའོ། །བཙུན་པ་འཕགས་པས་འཕགས་པའི་སྐད་དུ་སོ་སོར་ཐར་པ་བཀླགས་པ་དང་། དགེ་སློང་དེ་དག་གིས་འཕགས་པའི་སྐད་མ་འཚལ་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་
བྱ་སྟེ། སོ་སོར་ཐར་པའི་མདོ་ཀློག་པ་ཡང་འདས་པ་དང་བཅས་པའོ། །མཐའ་འཁོབ་པས་འཕགས་པའི་སྐད་དུ་སོ་སོར་ཐར་པ་བཀླགས་པ་དང་། དགེ་སློང་དེ་དག་གིས་འཕགས་པའི་སྐད་མ་འཚལ་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་
བྱ་སྟེ། སོ་སོར་ཐར་པ་ཀློག་པ་ཡང་འདས་པ་དང་བཅས་པའོ། །འཕགས་པས་མཐའ་འཁོབ་པའི་སྐད་དུ་སོ་སོར་ཐར་པ་བཀླགས་པ་དང་། དགེ་སློང་དེ་དག་གིས་མཐའ་འཁོབ་པའི་སྐད་མ་འཚལ་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་མི་བྱ་སྟེ།
སོ་སོར་ཐར་པའི་མདོ་ཀློག་པ་ཡང་འདས་པ་དང་བཅས་པའོ། །མཐའ་འཁོབ་པས་མཐའ་འཁོབ་པའི་སྐད་དུ་སོ་སོར་ཐར་པའི་མདོ་བཀླགས་པ་དང་། དགེ་སློང་དེ་དག་གིས་མཐའ་འཁོབ་པའི་སྐད་མ་འཚལ་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་མི་བྱ་སྟེ།
སོ་སོར་ཐར་པའི་མདོ་ཀློག་པ་ཡང་འདས་པ་དང་བཅས་པའོ། །བཙུན་པ་ས་ལ་གནས་པའི་གྲངས་ནམ་མཁའ་ལ་གནས་པས་བསྐངས་ཏེ་སོ་སོར་ཐར་པའི་མདོ་ཀློག་པ་བཀླགས་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱ་སྟེ། དགེ་སློང་དེ་དག་ཀྱང་འདས་པ་

དང་བཅས་པའོ། །བཙུན་པ་ནམ་མཁའ་ལ་གནས་པའི་གྲངས་ས་ལ་གནས་པས་བསྐངས་ཏེ་སོ་སོར་ཐར་པའི་མདོ་ཀློག་པ་བཀླགས་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱ་སྟེ། དགེ་སློང་དེ་དག་ཀྱང་འདས་པ་དང་བཅས་པའོ། །བཙུན་
པ་ས་ལ་གནས་པ་རྣམས་ལ་ནམ་མཁར་གནས་པས་སོ་སོར་ཐར་པའི་མདོ་ཀློག་ཅིང་གསོ་སྦྱོང་བགྱིས་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱ་སྟེ། དགེ་འདུན་དེ་དག་ཀྱང་འདས་པ་དང་བཅས་པའོ། །བཙུན་པ་ནམ་མཁའ་ལ་གནས་པ་རྣམས་ལ་ས་
ལ་གནས་པས་སོ་སོར་ཐར་པའི་མདོ་ཀློག་ཅིང་གསོ་སྦྱོང་བགྱིས་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་མ་བྱས་པ་ཞེས་བྱ་སྟེ། དགེ་སློང་དེ་དག་ཀྱང་འདས་པ་དང་བཅས་པའོ། །དེ་བཞིན་དུ་མཚམས་ཀྱི་ནང་ན་འདུག་པ་དང་། མཚམས་ཀྱི་ཕྱི་རོལ་ན་འདུག་པར་ལྷན་ཅིག་
རྒྱས་པར་བཞིར་བྱའོ། །བཙུན་པ་སོ་སོར་ཐར་པ་བཀླག་པ་ལ་རྣམ་པ་དུ་མཆིས། ཨུ་པཱ་ལི་རྣམ་པ་ལྔ་སྟེ། གསོལ་བ་བྱས་ནས་གླེང་གཞི་བཀླགས་ཏེ་ལྷག་མ་རྣམས་ཐོས་པར་ཟད་དོ་ཞེས་བསྒྲགས་པ་འདི་ནི་སོ་སོར་ཐར་པའི་མདོ་བཀླག་པ་དང་པོའོ། །གསོལ་བ་བྱས་ནས་གླེང་གཞི་
བཀླགས་ཏེ་ཕས་ཕམ་པ་བཞི་བཀླགས་ནས་ལྷག་མ་རྣམས་ཐོས་པའོ་ཞེས་བསྒྲགས་པ་འདི་ནི་སོ་སོར་ཐར་པའི་མདོ་ཀློག་པ་གཉིས་པའོ། །གསོལ་བ་བྱས་ཏེ་གླེང་གཞི་བཀླགས་ཏེ་ཕས་ཕམ་པ་བཞི་བཀླགས། དགེ་འདུན་གྱི་ལྷག་མ་བཅུ་གསུམ་བཀླགས་ལ་ལྷག་མ་རྣམས་ཐོས་
པའོ་ཞེས་བསྒྲགས་པ་འདི་ནི་སོ་སོར་ཐར་པའི་མདོ་བཀླག་པ་གསུམ་པའོ། །གསོལ་བ་བྱས་ཏེ་གླེང་གཞི་བཀླགས། ཕས་ཕམ་པ་བཞི་དང་། དགེ་འདུན་གྱི་ལྷག་མ་བཅུ་གསུམ་དང་། མི་མངོན་པ་གཉིས་བཀླགས་ནས་ལྷག་མ་རྣམས་ཐོས་པའོ་ཞེས་བསྒྲགས་པ་འདི་ནི་སོ་སོར་
ཐར་པའི་མདོ་བཀླག་པ་བཞི་པ་སྟེ། རྒྱས་པར་ཀློག་པ་དང་འདི་ལྔའོ། །བཙུན་པ་གསོ་སྦྱོང་གི་ལས་ལ་རྣམ་པ་དུ། ཨུ་པཱ་ལི་ལྔ་སྟེ། བཀླགས་པ་དང་། མི་བཀླག་པར་སེམས་བསྐྱེད་པ་དང་། བྱིན་གྱིས་བརླབས་པ་དང་། ཡོངས་སུ་དག་པ་དང་། སྐབས་འབྱེད་པ་དང་རྣམ་

པ་ལྔའོ། །བཙུན་པ་སོ་སོར་ཐར་པའི་མདོ་ཀློག་པས་ཀློག་པའི་ཚེ་མཚན་གྱུར་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱའོ། །བཙུན་པ་དགེ་སློང་ཕྱོགས་གཅིག་ཏུ་མཆིས་པས་གནས་བཞིར་སོ་སོར་ཐར་པའི་མདོ་བཀླགས་ལ་གསོ་སྦྱོང་ཡང་བགྱིས་ན་དགེ་སློང་དེ་
དག་འདས་པ་དང་བཅས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། འདི་ལྟར་སོ་སོར་ཐར་པའི་མདོ་ཀློག་པའི་དགེ་སློང་དེ་གནས་པའི་མཚམས་སུ་ཤིང་ངམ། དབྱིག་པའམ། རེ་ལྡེས་མནན་ཏེ་སོ་སོར་ཐར་པའི་མདོ་བཀླགས་པའོ། །བཙུན་པ་གནས་གཅིག་པའི་
མཚམས་ཀྱི་ནང་དུ་གནས་གཅིག་པའི་དགེ་སློང་རྣམས་ཀྱིས་ཕྱོགས་བཞིར་སོ་སོར་གསོ་སྦྱོང་བགྱིས་ན་གསོ་སྦྱོང་ཀྱང་བགྱིས་ལ། དགེ་སློང་དེ་དག་ཀྱང་འདས་པ་དང་བཅས་པར་མི་འགྱུར་བ་མཆིས་སམ། ཨུ་པཱ་ལི་ཡོད་དེ། གཅིག་གི་གཅིག་དད་པ་བྱིན་པའོ། །བཙུན་པ་སོ་སོར་
ཐར་པའི་མདོ་ཀློག་པའི་དགེ་སློང་ཕྱོགས་གཅིག་ཏུ་མཆིས་པ་མཚམས་ཀྱི་ནང་དང་མཚམས་ཀྱི་སླད་རོལ་ན་གནས་པ་རྣམས་ལ་སོ་སོར་ཐར་པ་བཀླགས་ན་གསོ་སྦྱོང་ཀྱང་བགྱིས་ལ། དགེ་སློང་དེ་དག་ཀྱང་འདས་པ་དང་བཅས་པར་མི་འགྱུར་བ་མཆིས་སམ། །ཨུ་པཱ་ལི་ཡོད་དེ། འདི་
ལྟར་ཡང་སོ་སོར་ཐར་པའི་མདོ་ཀློག་པའི་དགེ་སློང་གིས་མཚམས་ནོན་ཏེ་མནན་ནས་མཚམས་སུ་འགྲེང་ངམ་འདུག་ལ་མཚམས་ཀྱི་ནང་དང་མཚམས་ཀྱི་ཕྱི་རོལ་ན་གནས་པ་རྣམས་ལ་སོ་སོར་ཐར་པ་བཀླགས་པའོ། །བཙུན་པ་དགེ་སློང་གིས་སོ་སོར་ཐར་པའི་མདོ་ཀློག་པ་ལྔ་
ལས་གང་ཡང་རུང་སྟེ། སོ་སོར་ཐར་པའི་མདོ་ཀློག་པ་མ་བཀླགས་ཀྱང་གསོ་སྦྱོང་བགྱིས་པར་འགྱུར་བ་མཆིས་སམ། ཨུ་པཱ་ལི་ཡོད་དེ་སྐབས་འབྱེད་པའི་ཚེ་སྐབས་འབྱེད་པས་སྐབས་ཕྱེ་བའོ། །བཙུན་པ་དགེ་སློང་གིས་ཚིག་ཏུ་མ་སྨྲས་ཀྱང་གསོ་སྦྱོང་བགྱིས་པར་འགྱུར་བ་
མཆིས་སམ། ཨུ་པཱ་ལི་ཡོད་དེ། སེམས་བསྐྱེད་པས་སོ། །བཙུན་པས་འཁོར་རྣམས་མ་ལངས་དགེ་སློང་རྣམས་ནི་མ་དོང་པའོ་ཞེས་གསུངས་ན། བཙུན་པ་ཇི་ཙམ་གྱིས་ན་འཁོར་མ་ལངས་པ་ཞེས་བགྱི། ཨུ་པཱ་ལི་གང་དུ་དགེ་སློང་བཞི་འམ། དེ་ལས་མང་དུ་འདུག་པར་གྱུར་

ན་མ་ལངས་པ་ཞེས་བྱའོ། །བཞིར་མ་ཚང་ན་ནི་ལངས་པ་ཞེས་བྱའོ། །བཙུན་པ་དགེ་སློང་གིས་སོ་སོར་ཐར་པའི་མདོ་ཀློག་པ་བཀླགས་པ་དང་སྟན་ལས་ལངས་ཏེ་མཆིས་ནས་དགེ་སློང་མཆིས་བཞིན་དུ་འཚལ་བར་མ་བགྱིས་ཀྱང་ཀུན་དུ་ལྟུང་བར་མི་འགྱུར་བ་མཆིས་སམ།
ཨུ་པཱ་ལི་ཡོད་དེ། བཤང་བ་དང་གཅི་བའི་སར་སོང་སྟེ་དེ་ན་ཡང་ཐོས་པའི་ཉེ་འཁོར་ལས་མ་འདས་པའོ། །ཁྱིམ་པས་སོ་སོར་ཐར་པའི་མདོ་ཀློག་པ་བགྱིས་ཏེ་གསོ་སྦྱོང་བགྱིས་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་གསོ་སྦྱོང་མ་བྱས་པ་ཞེས་བྱ་སྟེ། དགེ་འདུན་ཡང་
འདས་པ་དང་བཅས་པའོ། །དེ་བཞིན་དུ་ཟ་མ་དང་། མ་ནིང་དང་། དགེ་སློང་མ་སུན་ཕྱུང་བ་དང་། མི་གནས་པ་དང་། སོ་སོར་གནས་པ་དང་། འགྲོ་བ་གཞན་དུ་གནས་པ་ནས། སྔར་འཁྲུགས་པའི་བར་དུ་དེ་དག་ནི། ཨུ་པཱ་ལི་གསོ་སྦྱོང་མ་བྱས་པ་ཞེས་བྱ་སྟེ། དགེ་འདུན་
ཡང་འདས་པ་དང་བཅས་པའོ། །བཙུན་པ་དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ཀྱིས་སོ་སོར་ཐར་པའི་མདོ་ཀློག་པ་བགྱིས་ཏེ་གསོ་སྦྱོང་བགྱིས་ན་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱ་སྟེ། དགེ་འདུན་རྣམས་ནི་འདས་པ་
དང་བཅས་པའོ། །བཙུན་པ་སྨྱོན་པས་སོ་སོར་ཐར་པའི་མདོ་ཀློག་པ་བགྱིས་ན་གསོ་སྦྱོང་བགྱིས་པ་ཞེས་བགྱིའམ། ཨུ་པཱ་ལི་བྱས་པ་ཞེས་བྱ་སྟེ། དགེ་འདུན་རྣམས་ནི་འདས་པ་དང་བཅས་པའོ། །བཙུན་པ་དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། འོན་པས་
སོ་སོར་ཐར་པའི་མདོ་ཀློག་པ་བགྱིས་ཏེ་གསོ་སྦྱོང་བགྱིས་ན་གསོ་སྦྱོང་བགྱིས་པ་ཞེས་བགྱིའམ། གསོ་སྦྱོང་བྱས་པ་ཞེས་བྱ་སྟེ། དགེ་འདུན་ནི་འདས་པ་དང་བཅས་པའོ། །ཇི་ལྟར་སོ་སོར་ཐར་པའི་མདོ་ཀློག་པ་དེ་བཞིན་དུ་མང་པོར་བསྐང་བ་ཡང་རྒྱས་པར་སྦྱར་རོ།། །།མདོར་ན།
མ་ཕུལ་བླངས་པ་དགེ་འདུན་དང་། །བཞི་པ་དང་ནི་གཉིས་པ་མཚན། །ཁོར་བ་དང་ནི་གཅིག་ནས་གཅིག །བྱིན་དང་ལམ་དང་དེ་བཞིན་མང་། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་ཞུས་པ། བཙུན་པ་དགེ་སློང་གིས་དད་པ་དང་ཡོངས་སུ་དག་པ་བླངས་ཏེ་

སྟེང་གི་ནམ་མཁའ་ལས་རེ་བ་མེད་པར་མཆིས་སམ། མཚམས་ཀྱི་སླད་རོལ་དུ་མཆིས་ན་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །བཙུན་པ་དེ་སྟེ་རེ་བ་དང་བཅས་པས་མཆི་ན་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ།
ཨུ་པཱ་ལི་མ་ཡིན་ནོ། །བཙུན་པ་ས་ལ་གནས་པས་ནམ་མཁའ་ལ་གནས་པ་རྣམས་ལ་དད་པ་དང་ཡོངས་སུ་དག་པ་སྩལ་དུ་རུང་ངམ། ཨུ་པཱ་ལི་མི་རུང་ངོ་། །བླང་དུ་རུང་ངམ། ཨུ་པཱ་ལི་མི་རུང་ངོ་། །བཙུན་པ་ནམ་མཁའ་ལ་གནས་པས་ས་ལ་གནས་པ་རྣམས་ལ་དད་པ་དང་ཡོངས་སུ་
དག་པ་སྩལ་བར་རུང་ངམ། ཨུ་པཱ་ལི་མི་རུང་ངོ་། །བླང་བར་རུང་ངམ། ཨུ་པཱ་ལི་མི་རུང་ངོ་། །དེ་བཞིན་དུ་མཚམས་ཀྱི་ནང་དུ་འདུག་པ་དང་མཚམས་ཀྱི་ཕྱི་རོལ་ན་འདུག་པ་རྣམས་ལ་ཡང་བཞིར་བྱའོ། །བཙུན་པ་དགེ་སློང་གིས་དགེ་འདུན་ཐམས་ཅད་འདུས་ཤིང་ཚོགས་པ་ལ་དད་པ་དང་
ཡོངས་སུ་དག་པ་ཕུལ་ན་དེས་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱའོ། །སུས་རྨ་བར་བགྱི། སུས་ཀྱང་མ་ཡིན་ནོ། །བཙུན་པ་དགེ་སློང་འཕགས་པས་འཕགས་པའི་སྐད་དུ་དད་པ་དང་ཡོངས་སུ་དག་པ་ཕུལ་བ་དང་། དགེ་སློང་དེས་ཀྱང་
འཕགས་པའི་སྐད་མ་འཚལ་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །འཕགས་པས་མཐའ་འཁོབ་པའི་སྐད་དུ་དད་པ་དང་ཡོངས་སུ་དག་པ་ཕུལ་བ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན་དད་པ་དང་ཡོངས་སུ་དག་པ་ཕུལ་བ་
ཞེས་བགྱིའམ། ཨུ་པཱ་ལི་མ་ཡིན་ནོ། །མཐའ་འཁོབ་པས་མཐའ་འཁོབ་པའི་སྐད་དུ་དད་པ་དང་ཡོངས་སུ་དག་པ་ཕུལ་བ་དང་། དགེ་སློང་དེས་ཀྱང་མཐའ་འཁོབ་པའི་སྐད་མ་འཚལ་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །མཐའ་འཁོབ་པས་
འཕགས་པའི་སྐད་དུ་དད་པ་དང་ཡོངས་སུ་དག་པ་ཕུལ་བ་དང་། དགེ་སློང་དེས་ཀྱང་འཕགས་པའི་སྐད་དུ་མ་འཚལ་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དགེ་སློང་གིས་ལུས་ཀྱི་དམིགས་པས་སྐད་མ་བརྗོད་ན་དད་པ་དང་ཡོངས་སུ་དག་པ་

ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱའོ། །ཚིག་གིས་སྨྲས་པ་ལུས་ཀྱིས་མ་ལགས་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱའོ། །ལུས་དང་ཚིག་གིས་སྨྲས་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ།
ཨུ་པཱ་ལི་ཕུལ་བ་ཞེས་བྱའོ། །ལུས་ཀྱིས་ཀྱང་མ་ལགས་ཚིག་གིས་ཀྱང་མ་ལགས་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་དད་པ་དང་ཡོངས་སུ་དག་པ་སྩལ་བ་ལས་དད་པ་དང་ཡོངས་སུ་དག་པ་ལེན་པའི་དགེ་སློང་མཚན་འཕོས་ན་མ་ཕུལ་བ་
ཞེས་བགྱིའམ། ཨུ་པཱ་ལི་མ་ཡིན་ནོ། །བཙུན་པ་གཅིག་ནས་གཅིག་ཏུ་བརྒྱུད་དེ་དད་པ་དང་ཡོངས་སུ་དག་པ་ཕུལ་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱ་སྟེ། དགེ་སློང་དེ་དག་ནི་འདས་པ་དང་བཅས་པའོ། །བཙུན་པ་ཆད་པ་ཁོར་བས་དད་པ་དང་ཡོངས་སུ་
དག་པ་ཕུལ་ན་དད་པ་དང་ཡོངས་སུ་དག་པ་ཕུལ་བ་ཞེས་བགྱིའམ། ཨུ་པཱ་ལི་ཕུལ་བ་ཞེས་བྱ་སྟེ། དགེ་སློང་དེ་དག་ནི་འདས་པ་དང་བཅས་པའོ། །བཙུན་པ་དགེ་སློང་གིས་དད་པ་དང་ཡོངས་སུ་དག་པ་ཕུལ་ནས་ཁྱིམ་པར་ཁས་བླངས་ན་དད་པ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་
ཞེས་བྱའོ། །དེ་བཞིན་དུ་མ་ནིང་ལགས་པར་ཁས་བླངས་པ་ནས། སྔར་འཁྲུགས་པ་ལགས་པར་ཁས་བླངས་པའི་བར་དུ་རྒྱས་པར་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །བཙུན་པ་དགེ་སློང་གིས་དད་པ་དང་ཡོངས་སུ་དག་པ་ཕུལ་ནས་ཟ་མ་
ལགས་པར་ཁས་བླངས་ན་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །དེ་སྟེ་དགེ་འདུན་གྱི་དབྱེན་བགྱིས་པ་དང་། ཉེ་བར་ཕྱོགས་པ་དང་། བསླབ་པ་སྩལ་བ་རྣམས་ལགས་པར་ཁས་བླངས་ན་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ།
ཨུ་པཱ་ལི་མ་ཡིན་ནོ། །བཙུན་པ་དགེ་སློང་གིས་དད་པ་དང་ཡོངས་སུ་དག་པ་བླངས་ནས་ཁྱིམ་པ་ལགས་པར་ཁས་བླངས་ན་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །དེ་བཞིན་དུ་མ་ནིང་ལགས་པར་ཁས་བླངས་པ་ནས། སྔར་འཁྲུགས་པ་

ལགས་པར་ཁས་བླངས་པའི་བར་དུ་རྒྱས་པར་དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །བཙུན་པ་དགེ་སློང་གིས་དད་པ་དང་ཡོངས་སུ་དག་པ་བླངས་པ་དང་། ཟ་མ་དང་། མི་གནས་པ་དང་། སོ་སོར་གནས་པ་རྣམས་ལགས་པར་ཁས་བླངས་ན་
དད་པ་དང་ཡོངས་སུ་དག་པ་མ་ཕུལ་བ་ཞེས་བགྱིའམ། ཨུ་པཱ་ལི་མ་ཕུལ་བ་ཞེས་བྱའོ། །བཙུན་པ་དགེ་སློང་གིས་དགེ་འདུན་གྱི་དབྱེན་བགྱིས་པ་ལགས་པར་ཁས་བླངས་པའམ། ཉེ་བར་ཕྱོགས་པ་དང་། བསླབ་པ་སྩལ་བ་ལགས་པར་ཁས་བླངས་ན་དད་པ་དང་ཡོངས་སུ་དག་པ་མ་ཕུལ་བ་
ཞེས་བགྱིའམ། ཨུ་