Trưởng Lão Tăng Kệ (Theragāthā)

Theragāthā 1.100 
Ekakanipāta 
Dasamavagga 
(Dutiya) Devasabhattheragāthā 
“Sammappadhānasampanno, 
Satipaṭṭhānagocaro; 
Vimuttikusumasañchanno, 
Parinibbissatyanāsavo”ti. 
… Devasabho thero …. 
vaggo dasamo. 
Tassuddānaṁ 
Paripuṇṇako ca vijayo, 
erako mettajī muni; 
Cakkhupālo khaṇḍasumano, 
tisso ca abhayo tathā; 
Uttiyo ca mahāpañño, 
thero devasabhopi cāti. 

Theragāthā 1.101 
Ekakanipāta 
Ekādasamavagga 
Belaṭṭhānikattheragāthā 
“Hitvā gihittaṁ anavositatto, 
Mukhanaṅgalī odariko kusīto; 
Mahāvarāhova nivāpapuṭṭho, 
Punappunaṁ gabbhamupeti mando”ti. 
… Belaṭṭhāniko thero …. 

Theragāthā 1.102 
Ekakanipāta 
Ekādasamavagga 
Setucchattheragāthā 
“Mānena vañcitāse, 
Saṅkhāresu saṅkilissamānāse; 
Lābhālābhena mathitā, 
Samādhiṁ nādhigacchantī”ti. 
… Setuccho thero …. 

Theragāthā 1.103 
Ekakanipāta 
Ekādasamavagga 
Bandhurattheragāthā 
“Nāhaṁ etena atthiko, 
Sukhito dhammarasena tappito; 
Pitvā rasaggamuttamaṁ, 
Na ca kāhāmi visena santhavan”ti. 
… Bandhuro thero …. 

Theragāthā 1.104 
Ekakanipāta 
Ekādasamavagga 
Khitakattheragāthā 
“Lahuko vata me kāyo, 
Phuṭṭho ca pītisukhena vipulena; 
Tūlamiva eritaṁ mālutena, 
Pilavatīva me kāyo”ti. 
… Khitako thero …. 

Theragāthā 1.105 
Ekakanipāta 
Ekādasamavagga 
Malitavambhattheragāthā 
“Ukkaṇṭhitopi na vase, 
ramamānopi pakkame; 
Na tvevānatthasaṁhitaṁ, 
vase vāsaṁ vicakkhaṇo”ti. 
… Malitavambho thero …. 

Theragāthā 1.106 
Ekakanipāta 
Ekādasamavagga 
Suhemantattheragāthā 
“Sataliṅgassa atthassa, 
satalakkhaṇadhārino; 
Ekaṅgadassī dummedho, 
satadassī ca paṇḍito”ti. 
… Suhemanto thero …. 

Theragāthā 1.107 
Ekakanipāta 
Ekādasamavagga 
Dhammasavattheragāthā 
“Pabbajiṁ tulayitvāna, 
agārasmānagāriyaṁ; 
Tisso vijjā anuppattā, 
kataṁ buddhassa sāsanan”ti. 
… Dhammasavo thero …. 

Theragāthā 1.108 
Ekakanipāta 
Ekādasamavagga 
Dhammasavapituttheragāthā 
“Sa vīsavassasatiko, 
pabbajiṁ anagāriyaṁ; 
Tisso vijjā anuppattā, 
kataṁ buddhassa sāsanan”ti. 
… Dhammasavapitu thero …. 

Theragāthā 1.109 
Ekakanipāta 
Ekādasamavagga 
Saṅgharakkhitattheragāthā 
“Na nūnāyaṁ paramahitānukampino, 
Rahogato anuvigaṇeti sāsanaṁ; 
Tathāhayaṁ viharati pākatindriyo, 
Migī yathā taruṇajātikā vane”ti. 
… Saṅgharakkhito thero …. 

Theragāthā 1.10 
Ekakanipāta 
Paṭhamavagga 
Puṇṇamāsattheragāthā 
“Vihari apekkhaṁ idha vā huraṁ vā, 
Yo vedagū samito yatatto; 
Sabbesu dhammesu anūpalitto, 
Lokassa jaññā udayabbayañcā”ti. 
Itthaṁ sudaṁ āyasmā puṇṇamāso thero gāthaṁ abhāsitthāti. 
vaggo paṭhamo. 
Tassuddānaṁ 
Subhūti koṭṭhiko thero, 
kaṅkhārevatasammato; 
Mantāṇiputto dabbo ca, 
sītavaniyo ca bhalliyo; 
Vīro pilindavaccho ca, 
puṇṇamāso tamonudoti. 

Theragāthā 1.110 
Ekakanipāta 
Ekādasamavagga 
Usabhattheragāthā 
“Nagā nagaggesu susaṁvirūḷhā, 
Udaggameghena navena sittā; 
Vivekakāmassa araññasaññino, 
Janeti bhiyyo usabhassa kalyatan”ti. 
… Usabho thero … 
vaggo ekādasamo. 
Tassuddānaṁ 
Belaṭṭhāniko setuccho, 
Bandhuro khitako isi; 
Malitavambho suhemanto, 
Dhammasavo dhammasavapitā; 
Saṅgharakkhitatthero ca, 
Usabho ca mahāmunīti. 

Theragāthā 1.111 
Ekakanipāta 
Dvādasamavagga 
Jentattheragāthā 
“Duppabbajjaṁ ve duradhivāsā gehā, 
Dhammo gambhīro duradhigamā bhogā; 
Kicchā vutti no itarītareneva, 
Yuttaṁ cintetuṁ satatamaniccatan”ti. 
… Jento thero …. 

Theragāthā 1.112 
Ekakanipāta 
Dvādasamavagga 
Vacchagottattheragāthā 
“Tevijjohaṁ mahājhāyī, 
cetosamathakovido; 
Sadattho me anuppatto, 
kataṁ buddhassa sāsanan”ti. 
… Vacchagotto thero …. 

Theragāthā 1.113 
Ekakanipāta 
Dvādasamavagga 
Vanavacchattheragāthā 
“Acchodikā puthusilā, 
gonaṅgulamigāyutā; 
Ambusevālasañchannā, 
te selā ramayanti man”ti. 
… Vanavaccho thero …. 

Theragāthā 1.114 
Ekakanipāta 
Dvādasamavagga 
Adhimuttattheragāthā 
“Kāyaduṭṭhullagaruno, 
hiyyamānamhi jīvite; 
Sarīrasukhagiddhassa, 
kuto samaṇasādhutā”ti. 
… Adhimutto thero …. 

Theragāthā 1.115 
Ekakanipāta 
Dvādasamavagga 
Mahānāmattheragāthā 
“Esāvahiyyase pabbatena, 
Bahukuṭajasallakikena; 
Nesādakena girinā, 
Yasassinā paricchadenā”ti. 
… Mahānāmo thero …. 

Theragāthā 1.116 
Ekakanipāta 
Dvādasamavagga 
Pārāpariyattheragāthā 
“Chaphassāyatane hitvā, 
guttadvāro susaṁvuto; 
Aghamūlaṁ vamitvāna, 
patto me āsavakkhayo”ti. 
… Pārāpariyo thero …. 

Theragāthā 1.117 
Ekakanipāta 
Dvādasamavagga 
Yasattheragāthā 
“Suvilitto suvasano, 
sabbābharaṇabhūsito; 
Tisso vijjā ajjhagamiṁ, 
kataṁ buddhassa sāsanan”ti. 
… Yaso thero …. 

Theragāthā 1.118 
Ekakanipāta 
Dvādasamavagga 
Kimilattheragāthā 
“Abhisattova nipatati, 
Vayo rūpaṁ aññamiva tatheva santaṁ; 
Tasseva sato avippavasato, 
Aññasseva sarāmi attānan”ti. 
… Kimilo thero …. 

Theragāthā 1.119 
Ekakanipāta 
Dvādasamavagga 
Vajjiputtattheragāthā 
“Rukkhamūlagahanaṁ pasakkiya, 
Nibbānaṁ hadayasmiṁ opiya; 
Jhāya gotama mā ca pamādo, 
Kiṁ te biḷibiḷikā karissatī”ti. 
… Vajjiputto thero …. 

Theragāthā 1.11 
Ekakanipāta 
Dutiyavagga 
Cūḷavacchattheragāthā 
“Pāmojjabahulo bhikkhu, 
dhamme buddhappavedite; 
Adhigacche padaṁ santaṁ, 
saṅkhārūpasamaṁ sukhan”ti. 
… Cūḷavaccho thero …. 

Theragāthā 1.120 
Ekakanipāta 
Dvādasamavagga 
Isidattattheragāthā 
“Pañcakkhandhā pariññātā, 
tiṭṭhanti chinnamūlakā; 
Dukkhakkhayo anuppatto, 
patto me āsavakkhayo”ti. 
… Isidatto thero … 
vaggo dvādasamo. 
Tassuddānaṁ 
Jento ca vacchagotto ca, 
vaccho ca vanasavhayo; 
Adhimutto mahānāmo, 
pārāpariyo yasopi ca; 
Kimilo vajjiputto ca, 
isidatto mahāyasoti. 
Ekakanipāto niṭṭhito. 
Tatruddānaṁ 
Vīsuttarasataṁ therā, 
katakiccā anāsavā; 
Ekakeva nipātamhi, 
susaṅgītā mahesibhīti. 

Theragāthā 1.12 
Ekakanipāta 
Dutiyavagga 
Mahāvacchattheragāthā 
“Paññābalī sīlavatūpapanno, 
Samāhito jhānarato satīmā; 
Yadatthiyaṁ bhojanaṁ bhuñjamāno, 
Kaṅkhetha kālaṁ idha vītarāgo”ti. 
… Mahāvaccho thero …. 

Theragāthā 1.13 
Ekakanipāta 
Dutiyavagga 
Vanavacchattheragāthā 
“Nīlabbhavaṇṇā rucirā, 
sītavārī sucindharā; 
Indagopakasañchannā, 
te selā ramayanti man”ti. 
… Vanavaccho thero …. 

Theragāthā 1.14 
Ekakanipāta 
Dutiyavagga 
Sivakasāmaṇeragāthā 
“Upajjhāyo maṁ avaca, 
ito gacchāma sīvaka; 
Gāme me vasati kāyo, 
araññaṁ me gato mano; 
Semānakopi gacchāmi, 
natthi saṅgo vijānatan”ti. 
… Vanavacchassa therassa (siviko) sāmaṇero …. 

Theragāthā 1.15 
Ekakanipāta 
Dutiyavagga 
Kuṇḍadhānattheragāthā 
“Pañca chinde pañca jahe, 
pañca cuttari bhāvaye; 
Pañca saṅgātigo bhikkhu, 
oghatiṇṇoti vuccatī”ti. 
… Kuṇḍadhāno thero …. 

Theragāthā 1.16 
Ekakanipāta 
Dutiyavagga 
Belaṭṭhasīsattheragāthā 
“Yathāpi bhaddo ājañño, 
naṅgalāvattanī sikhī; 
Gacchati appakasirena, 
evaṁ rattindivā mama; 
Gacchanti appakasirena, 
sukhe laddhe nirāmise”ti. 
… Belaṭṭhasīso thero …. 

Theragāthā 1.17 
Ekakanipāta 
Dutiyavagga 
Dāsakattheragāthā 
“Middhī yadā hoti mahagghaso ca, 
Niddāyitā samparivattasāyī; 
Mahāvarāhova nivāpapuṭṭho, 
Punappunaṁ gabbhamupeti mando”ti. 
… Dāsako thero …. 

Theragāthā 1.18 
Ekakanipāta 
Dutiyavagga 
Siṅgālapituttheragāthā 
“Ahu buddhassa dāyādo, 
bhikkhu bhesakaḷāvane; 
Kevalaṁ aṭṭhisaññāya, 
apharī pathaviṁ imaṁ; 
Maññehaṁ kāmarāgaṁ so, 
khippameva pahissatī”ti. 
… Siṅgālapitā thero …. 

Theragāthā 1.19 
Ekakanipāta 
Dutiyavagga 
Kulattheragāthā 
“Udakañhi nayanti nettikā, 
Usukārā namayanti tejanaṁ; 
Dāruṁ namayanti tacchakā, 
Attānaṁ damayanti subbatā”ti. 
… Kulo thero …. 

Theragāthā 1.1 
Ekakanipāta 
Paṭhamavagga 
Subhūtittheragāthā 
Nidānagāthā 
Namo tassa Bhagavato Arahato Sammāsambuddhassa. 
Sīhānaṁva nadantānaṁ, 
dāṭhīnaṁ girigabbhare; 
Suṇātha bhāvitattānaṁ, 
gāthā atthūpanāyikā. 
Yathānāmā yathāgottā, 
yathādhammavihārino; 
Yathādhimuttā sappaññā, 
vihariṁsu atanditā. 
Tattha tattha vipassitvā, 
phusitvā accutaṁ padaṁ; 
Katantaṁ paccavekkhantā, 
imamatthamabhāsisuṁ. 
Subhūtittheragāthā 
“Channā me kuṭikā sukhā nivātā, 
Vassa deva yathāsukhaṁ; 
Cittaṁ me susamāhitaṁ vimuttaṁ, 
Ātāpī viharāmi vassa devā”ti. 
Itthaṁ sudaṁ āyasmā subhūtitthero gāthaṁ abhāsitthāti. 

Theragāthā 1.20 
Ekakanipāta 
Dutiyavagga 
Ajitattheragāthā 
“Maraṇe me bhayaṁ natthi, 
nikanti natthi jīvite; 
Sandehaṁ nikkhipissāmi, 
sampajāno paṭissato”ti. 
… Ajito thero … 
vaggo dutiyo. 
Tassuddānaṁ 
Cūḷavaccho mahāvaccho, 
vanavaccho ca sīvako; 
Kuṇḍadhāno ca belaṭṭhi, 
dāsako ca tatopari; 
Siṅgālapitiko thero, 
kulo ca ajito dasāti. 

Theragāthā 1.21 
Ekakanipāta 
Tatiyavagga 
Nigrodhattheragāthā 
“Nāhaṁ bhayassa bhāyāmi, 
Satthā no amatassa kovido; 
Yattha bhayaṁ nāvatiṭṭhati, 
Tena maggena vajanti bhikkhavo”ti. 
… Nigrodho thero …. 

Theragāthā 1.22 
Ekakanipāta 
Tatiyavagga 
Cittakattheragāthā 
“Nīlā sugīvā sikhino, 
Morā kārambhiyaṁ abhinadanti; 
Te sītavātakīḷitā, 
Suttaṁ jhāyaṁ nibodhentī”ti. 
… Cittako thero …. 

Theragāthā 1.23 
Ekakanipāta 
Tatiyavagga 
Gosālattheragāthā 
“Ahaṁ kho veḷugumbasmiṁ, 
bhutvāna madhupāyasaṁ; 
Padakkhiṇaṁ sammasanto, 
khandhānaṁ udayabbayaṁ; 
Sānuṁ paṭigamissāmi, 
vivekamanubrūhayan”ti. 
… Gosālo thero …. 

Theragāthā 1.24 
Ekakanipāta 
Tatiyavagga 
Sugandhattheragāthā 
“Anuvassiko pabbajito, 
passa dhammasudhammataṁ; 
Tisso vijjā anuppattā, 
kataṁ buddhassa sāsanan”ti. 
… Sugandho thero …. 

Theragāthā 1.25 
Ekakanipāta 
Tatiyavagga 
Nandiyattheragāthā 
“Obhāsajātaṁ phalagaṁ, 
cittaṁ yassa abhiṇhaso; 
Tādisaṁ bhikkhumāsajja, 
kaṇha dukkhaṁ nigacchasī”ti. 
… Nandiyo thero …. 

Theragāthā 1.26 
Ekakanipāta 
Tatiyavagga 
Abhayattheragāthā 
“Sutvā subhāsitaṁ vācaṁ, 
buddhassādiccabandhuno; 
Paccabyadhiṁ hi nipuṇaṁ, 
vālaggaṁ usunā yathā”ti. 
… Abhayo thero …. 

Theragāthā 1.27 
Ekakanipāta 
Tatiyavagga 
Lomasakaṅgiyattheragāthā 
“Dabbaṁ kusaṁ poṭakilaṁ, 
usīraṁ muñjapabbajaṁ; 
Urasā panudissāmi, 
vivekamanubrūhayan”ti. 
… Lomasakaṅgiyo thero …. 

Theragāthā 1.28 
Ekakanipāta 
Tatiyavagga 
Jambugāmikaputtattheragāthā 
“Kacci no vatthapasuto, 
Kacci no bhūsanārato; 
Kacci sīlamayaṁ gandhaṁ, 
Kiṁ tvaṁ vāyasi netarā pajā”ti. 
… Jambugāmikaputto thero …. 

Theragāthā 1.29 
Ekakanipāta 
Tatiyavagga 
Hāritattheragāthā 
“Samunnamayamattānaṁ, 
usukārova tejanaṁ; 
Cittaṁ ujuṁ karitvāna, 
avijjaṁ bhinda hāritā”ti. 
… Hārito thero …. 

Theragāthā 1.2 
Ekakanipāta 
Paṭhamavagga 
Mahākoṭṭhikattheragāthā 
“Upasanto uparato, 
mantabhāṇī anuddhato; 
Dhunāti pāpake dhamme, 
dumapattaṁva māluto”ti. 
Itthaṁ sudaṁ āyasmā mahākoṭṭhiko thero gāthaṁ abhāsitthāti. 

Theragāthā 1.30 
Ekakanipāta 
Tatiyavagga 
Uttiyattheragāthā 
“Ābādhe me samuppanne, 
sati me udapajjatha; 
Ābādho me samuppanno, 
kālo me nappamajjitun”ti. 
… Uttiyo thero … 
vaggo tatiyo. 
Tassuddānaṁ 
Nigrodho cittako thero, 
gosālathero sugandho; 
Nandiyo abhayo thero, 
thero lomasakaṅgiyo; 
Jambugāmikaputto ca, 
hārito uttiyo isīti. 

Theragāthā 1.31 
Ekakanipāta 
Catutthavagga 
Gahvaratīriyattheragāthā 
“Phuṭṭho ḍaṁsehi makasehi, 
araññasmiṁ brahāvane; 
Nāgo saṅgāmasīseva, 
sato tatrādhivāsaye”ti. 
… Gahvaratīriyo thero …. 

Theragāthā 1.32 
Ekakanipāta 
Catutthavagga 
Suppiyattheragāthā 
“Ajaraṁ jīramānena, 
tappamānena nibbutiṁ; 
Nimiyaṁ paramaṁ santiṁ, 
yogakkhemaṁ anuttaran”ti. 
… Suppiyo thero …. 

Theragāthā 1.33 
Ekakanipāta 
Catutthavagga 
Sopākattheragāthā 
“Yathāpi ekaputtasmiṁ, 
piyasmiṁ kusalī siyā; 
Evaṁ sabbesu pāṇesu, 
sabbattha kusalo siyā”ti. 
… Sopāko thero …. 

Theragāthā 1.34 
Ekakanipāta 
Catutthavagga 
Posiyattheragāthā 
“Anāsannavarā etā, 
niccameva vijānatā; 
Gāmā araññamāgamma, 
tato gehaṁ upāvisi; 
Tato uṭṭhāya pakkāmi, 
anāmantetvā posiyo”ti. 
… Posiyo thero …. 

Theragāthā 1.35 
Ekakanipāta 
Catutthavagga 
Sāmaññakānittheragāthā 
“Sukhaṁ sukhattho labhate tadācaraṁ, 
Kittiñca pappoti yasassa vaḍḍhati; 
Yo ariyamaṭṭhaṅgikamañjasaṁ ujuṁ, 
Bhāveti maggaṁ amatassa pattiyā”ti. 
… Sāmaññakānitthero …. 

Theragāthā 1.36 
Ekakanipāta 
Catutthavagga 
Kumāputtattheragāthā 
“Sādhu sutaṁ sādhu caritakaṁ, 
Sādhu sadā aniketavihāro; 
Atthapucchanaṁ padakkhiṇakammaṁ, 
Etaṁ sāmaññamakiñcanassā”ti. 
… Kumāputto thero …. 

Theragāthā 1.37 
Ekakanipāta 
Catutthavagga 
Kumāputtasahāyakattheragāthā 
“Nānājanapadaṁ yanti, 
Vicarantā asaññatā; 
Samādhiñca virādhenti, 
Kiṁsu raṭṭhacariyā karissati; 
Tasmā vineyya sārambhaṁ, 
Jhāyeyya apurakkhato”ti. 
… Kumāputtattherassa sahāyako thero …. 

Theragāthā 1.38 
Ekakanipāta 
Catutthavagga 
Gavampatittheragāthā 
“Yo iddhiyā sarabhuṁ aṭṭhapesi, 
So gavampati asito anejo; 
Taṁ sabbasaṅgātigataṁ mahāmuniṁ, 
Devā namassanti bhavassa pāragun”ti. 
… Gavampatitthero …. 

Theragāthā 1.39 
Ekakanipāta 
Catutthavagga 
Tissattheragāthā 
“Sattiyā viya omaṭṭho, 
ḍayhamānova matthake; 
Kāmarāgappahānāya, 
sato bhikkhu paribbaje”ti. 
… Tisso thero …. 

Theragāthā 1.3 
Ekakanipāta 
Paṭhamavagga 
Kaṅkhārevatattheragāthā 
“Paññaṁ imaṁ passa tathāgatānaṁ, 
Aggi yathā pajjalito nisīthe; 
Ālokadā cakkhudadā bhavanti, 
Ye āgatānaṁ vinayanti kaṅkhan”ti. 
Itthaṁ sudaṁ āyasmā kaṅkhārevato thero gāthaṁ abhāsitthāti. 

Theragāthā 1.40 
Ekakanipāta 
Catutthavagga 
Vaḍḍhamānattheragāthā 
“Sattiyā viya omaṭṭho, 
ḍayhamānova matthake; 
Bhavarāgappahānāya, 
sato bhikkhu paribbaje”ti. 
… Vaḍḍhamāno thero … 
vaggo catuttho. 
Tassuddānaṁ 
Gahvaratīriyo suppiyo, 
sopāko ceva posiyo; 
Sāmaññakāni kumāputto, 
kumāputtasahāyako; 
Gavampati tissatthero, 
vaḍḍhamāno mahāyasoti. 

Theragāthā 1.41 
Ekakanipāta 
Pañcamavagga 
Sirivaḍḍhattheragāthā 
“Vivaramanupatanti vijjutā, 
Vebhārassa ca paṇḍavassa ca; 
Nagavivaragato ca jhāyati, 
Putto appaṭimassa tādino”ti. 
… Sirivaḍḍho thero …. 

Theragāthā 1.42 
Ekakanipāta 
Pañcamavagga 
Khadiravaniyattheragāthā 
“Cāle upacāle sīsūpacāle (…), 
Patissatā nu kho viharatha; 
Āgato vo vālaṁ viya vedhī”ti. 
… Khadiravaniyo thero …. 

Theragāthā 1.43 
Ekakanipāta 
Pañcamavagga 
Sumaṅgalattheragāthā 
“Sumuttiko sumuttiko, 
Sāhu sumuttikomhi tīhi khujjakehi; 
Asitāsu mayā naṅgalāsu mayā, 
Khuddakuddālāsu mayā. 
Yadipi idhameva idhameva, 
Atha vāpi alameva alameva; 
Jhāya sumaṅgala jhāya sumaṅgala, 
Appamatto vihara sumaṅgalā”ti. 
… Sumaṅgalo thero …. 

Theragāthā 1.44 
Ekakanipāta 
Pañcamavagga 
Sānuttheragāthā 
“Mataṁ vā amma rodanti, 
Yo vā jīvaṁ na dissati; 
Jīvantaṁ maṁ amma passantī, 
Kasmā maṁ amma rodasī”ti. 
… Sānutthero …. 

Theragāthā 1.45 
Ekakanipāta 
Pañcamavagga 
Ramaṇīyavihārittheragāthā 
“Yathāpi bhaddo ājañño, 
khalitvā patitiṭṭhati; 
Evaṁ dassanasampannaṁ, 
sammāsambuddhasāvakan”ti. 
… Ramaṇīyavihāritthero …. 

Theragāthā 1.46 
Ekakanipāta 
Pañcamavagga 
Samiddhittheragāthā 
“Saddhāyāhaṁ pabbajito, 
Agārasmānagāriyaṁ; 
Sati paññā ca me vuḍḍhā, 
Cittañca susamāhitaṁ; 
Kāmaṁ karassu rūpāni, 
Neva maṁ byādhayissasī”ti. 
… Samiddhitthero …. 

Theragāthā 1.47 
Ekakanipāta 
Pañcamavagga 
Ujjayattheragāthā 
“Namo te buddha vīratthu, 
vippamuttosi sabbadhi; 
Tuyhāpadāne viharaṁ, 
viharāmi anāsavo”ti. 
… Ujjayo thero …. 

Theragāthā 1.48 
Ekakanipāta 
Pañcamavagga 
Sañjayattheragāthā 
“Yato ahaṁ pabbajito, 
Agārasmānagāriyaṁ; 
Nābhijānāmi saṅkappaṁ, 
Anariyaṁ dosasaṁhitan”ti. 
… Sañjayo thero …. 

Theragāthā 1.49 
Ekakanipāta 
Pañcamavagga 
Rāmaṇeyyakattheragāthā 
“Cihacihābhinadite, 
sippikābhirutehi ca; 
Na me taṁ phandati cittaṁ, 
ekattanirataṁ hi me”ti. 
… Rāmaṇeyyako thero …. 

Theragāthā 1.4 
Ekakanipāta 
Paṭhamavagga 
Puṇṇattheragāthā 
“Sabbhireva samāsetha, 
paṇḍitehatthadassibhi; 
Atthaṁ mahantaṁ gambhīraṁ, 
duddasaṁ nipuṇaṁ aṇuṁ; 
Dhīrā samadhigacchanti, 
appamattā vicakkhaṇā”ti. 
Itthaṁ sudaṁ āyasmā puṇṇo mantāṇiputto thero gāthaṁ abhāsitthāti. 

Theragāthā 1.50 
Ekakanipāta 
Pañcamavagga 
Vimalattheragāthā 
“Dharaṇī ca siñcati vāti, 
Māluto vijjutā carati nabhe; 
Upasamanti vitakkā, 
Cittaṁ susamāhitaṁ mamā”ti. 
… Vimalo thero … 
vaggo pañcamo. 
Tassuddānaṁ 
Sirīvaḍḍho revato thero, 
sumaṅgalo sānusavhayo; 
Ramaṇīyavihārī ca, 
samiddhiujjayasañjayā; 
Rāmaṇeyyo ca so thero, 
vimalo ca raṇañjahoti. 

Theragāthā 1.51 
Ekakanipāta 
Chaṭṭhavagga 
Godhikattheragāthā 
“Vassati devo yathā sugītaṁ, 
Channā me kuṭikā sukhā nivātā; 
Cittaṁ susamāhitañca mayhaṁ, 
Atha ce patthayasi pavassa devā”ti. 
… Godhiko thero …. 

Theragāthā 1.52 
Ekakanipāta 
Chaṭṭhavagga 
Subāhuttheragāthā 
“Vassati devo yathā sugītaṁ, 
Channā me kuṭikā sukhā nivātā; 
Cittaṁ susamāhitañca kāye, 
Atha ce patthayasi pavassa devā”ti. 
… Subāhutthero …. 

Theragāthā 1.53 
Ekakanipāta 
Chaṭṭhavagga 
Valliyattheragāthā 
“Vassati devo yathā sugītaṁ, 
Channā me kuṭikā sukhā nivātā; 
Tassaṁ viharāmi appamatto, 
Atha ce patthayasi pavassa devā”ti. 
… Valliyo thero …. 

Theragāthā 1.54 
Ekakanipāta 
Chaṭṭhavagga 
Uttiyattheragāthā 
“Vassati devo yathā sugītaṁ, 
Channā me kuṭikā sukhā nivātā; 
Tassaṁ viharāmi adutiyo, 
Atha ce patthayasi pavassa devā”ti. 
… Uttiyo thero …. 

Theragāthā 1.55 
Ekakanipāta 
Chaṭṭhavagga 
Añjanavaniyattheragāthā 
“Āsandiṁ kuṭikaṁ katvā, 
ogayha añjanaṁ vanaṁ; 
Tisso vijjā anuppattā, 
kataṁ buddhassa sāsanan”ti. 
… Añjanavaniyo thero …. 

Theragāthā 1.56 
Ekakanipāta 
Chaṭṭhavagga 
Kuṭivihārittheragāthā 
“Ko kuṭikāyaṁ bhikkhu kuṭikāyaṁ, 
Vītarāgo susamāhitacitto; 
Evaṁ jānāhi āvuso, 
Amoghā te kuṭikā katā”ti. 
… Kuṭivihāritthero …. 

Theragāthā 1.57 
Ekakanipāta 
Chaṭṭhavagga 
Dutiyakuṭivihārittheragāthā 
“Ayamāhu purāṇiyā kuṭi, 
Aññaṁ patthayase navaṁ kuṭiṁ; 
Āsaṁ kuṭiyā virājaya, 
Dukkhā bhikkhu puna navā kuṭī”ti. 
… Dutiyakuṭivihāritthero …. 

Theragāthā 1.58 
Ekakanipāta 
Chaṭṭhavagga 
Ramaṇīyakuṭikattheragāthā 
“Ramaṇīyā me kuṭikā, 
Saddhādeyyā manoramā; 
Na me attho kumārīhi, 
Yesaṁ attho tahiṁ gacchatha nāriyo”ti. 
… Ramaṇīyakuṭiko thero …. 

Theragāthā 1.59 
Ekakanipāta 
Chaṭṭhavagga 
Kosalavihārittheragāthā 
“Saddhāyāhaṁ pabbajito, 
araññe me kuṭikā katā; 
Appamatto ca ātāpī, 
sampajāno patissato”ti. 
… Kosalavihāritthero …. 

Theragāthā 1.5 
Ekakanipāta 
Paṭhamavagga 
Dabbattheragāthā 
“Yo duddamiyo damena danto, 
Dabbo santusito vitiṇṇakaṅkho; 
Vijitāvī apetabheravo hi, 
Dabbo so parinibbuto ṭhitatto”ti. 
Itthaṁ sudaṁ āyasmā dabbo thero gāthaṁ abhāsitthāti. 

Theragāthā 1.60 
Ekakanipāta 
Chaṭṭhavagga 
Sīvalittheragāthā 
“Te me ijjhiṁsu saṅkappā, 
yadattho pāvisiṁ kuṭiṁ; 
Vijjāvimuttiṁ paccesaṁ, 
mānānusayamujjahan”ti. 
… Sīvalitthero … 
vaggo chaṭṭho. 
Tassuddānaṁ 
Godhiko ca subāhu ca, 
valliyo uttiyo isi; 
Añjanavaniyo thero, 
duve kuṭivihārino; 
Ramaṇīyakuṭiko ca, 
kosalavhayasīvalīti. 

Theragāthā 1.61 
Ekakanipāta 
Sattamavagga 
Vappattheragāthā 
“Passati passo passantaṁ, 
apassantañca passati; 
Apassanto apassantaṁ, 
passantañca na passatī”ti. 
… Vappo thero …. 

Theragāthā 1.62 
Ekakanipāta 
Sattamavagga 
Vajjiputtattheragāthā 
“Ekakā mayaṁ araññe viharāma, 
Apaviddhaṁva vanasmiṁ dārukaṁ; 
Tassa me bahukā pihayanti, 
Nerayikā viya saggagāminan”ti. 
… Vajjiputto thero …. 

Theragāthā 1.63 
Ekakanipāta 
Sattamavagga 
Pakkhattheragāthā 
“Cutā patanti patitā, 
giddhā ca punarāgatā; 
Kataṁ kiccaṁ rataṁ rammaṁ, 
sukhenanvāgataṁ sukhan”ti. 
… Pakkho thero …. 

Theragāthā 1.64 
Ekakanipāta 
Sattamavagga 
Vimalakoṇḍaññattheragāthā 
“Dumavhayāya uppanno, 
jāto paṇḍaraketunā; 
Ketuhā ketunāyeva, 
mahāketuṁ padhaṁsayī”ti. 
… Vimalakoṇḍañño thero …. 

Theragāthā 1.65 
Ekakanipāta 
Sattamavagga 
Ukkhepakatavacchattheragāthā 
“Ukkhepakatavacchassa, 
Saṅkalitaṁ bahūhi vassehi; 
Taṁ bhāsati gahaṭṭhānaṁ, 
Sunisinno uḷārapāmojjo”ti. 
… Ukkhepakatavaccho thero …. 

Theragāthā 1.66 
Ekakanipāta 
Sattamavagga 
Meghiyattheragāthā 
“Anusāsi mahāvīro, 
sabbadhammāna pāragū; 
Tassāhaṁ dhammaṁ sutvāna, 
vihāsiṁ santike sato; 
Tisso vijjā anuppattā, 
kataṁ buddhassa sāsanan”ti. 
… Meghiyo thero …. 

Theragāthā 1.67 
Ekakanipāta 
Sattamavagga 
Ekadhammasavanīyattheragāthā 
“Kilesā jhāpitā mayhaṁ, 
bhavā sabbe samūhatā; 
Vikkhīṇo jātisaṁsāro, 
natthi dāni punabbhavo”ti. 
… Ekadhammasavanīyo thero …. 

Theragāthā 1.68 
Ekakanipāta 
Sattamavagga 
Ekudāniyattheragāthā 
“Adhicetaso appamajjato, 
Munino monapathesu sikkhato; 
Sokā na bhavanti tādino, 
Upasantassa sadā satīmato”ti. 
… Ekudāniyo thero …. 

Theragāthā 1.69 
Ekakanipāta 
Sattamavagga 
Channattheragāthā 
“Sutvāna dhammaṁ mahato mahārasaṁ, 
Sabbaññutaññāṇavarena desitaṁ; 
Maggaṁ papajjiṁ amatassa pattiyā, 
So yogakkhemassa pathassa kovido”ti. 
… Channo thero …. 

Theragāthā 1.6 
Ekakanipāta 
Paṭhamavagga 
Sītavaniyattheragāthā 
“Yo sītavanaṁ upagā bhikkhu, 
Eko santusito samāhitatto; 
Vijitāvī apetalomahaṁso, 
Rakkhaṁ kāyagatāsatiṁ dhitimā”ti. 
Itthaṁ sudaṁ āyasmā sītavaniyo thero gāthaṁ abhāsitthāti. 

Theragāthā 1.70 
Ekakanipāta 
Sattamavagga 
Puṇṇattheragāthā 
“Sīlameva idha aggaṁ, 
paññavā pana uttamo; 
Manussesu ca devesu, 
sīlapaññāṇato jayan”ti. 
… Puṇṇo thero … 
vaggo sattamo. 
Tassuddānaṁ 
Vappo ca vajjiputto ca, 
pakkho vimalakoṇḍañño; 
Ukkhepakatavaccho ca, 
meghiyo ekadhammiko; 
Ekudāniyachannā ca, 
puṇṇatthero mahabbaloti. 

Theragāthā 1.71 
Ekakanipāta 
Aṭṭhamavagga 
Vacchapālattheragāthā 
“Susukhumanipuṇatthadassinā, 
Matikusalena nivātavuttinā; 
Saṁsevitavuddhasīlinā, 
Nibbānaṁ na hi tena dullabhan”ti. 
… Vacchapālo thero …. 

Theragāthā 1.72 
Ekakanipāta 
Aṭṭhamavagga 
Ātumattheragāthā 
“Yathā kaḷīro susu vaḍḍhitaggo, 
Dunnikkhamo hoti pasākhajāto; 
Evaṁ ahaṁ bhariyāyānitāya, 
Anumaññaṁ maṁ pabbajitomhi dānī”ti. 
… Ātumo thero …. 

Theragāthā 1.73 
Ekakanipāta 
Aṭṭhamavagga 
Māṇavattheragāthā 
“Jiṇṇañca disvā dukhitañca byādhitaṁ, 
Matañca disvā gatamāyusaṅkhayaṁ; 
Tato ahaṁ nikkhamitūna pabbajiṁ, 
Pahāya kāmāni manoramānī”ti. 
… Māṇavo thero …. 

Theragāthā 1.74 
Ekakanipāta 
Aṭṭhamavagga 
Suyāmanattheragāthā 
“Kāmacchando ca byāpādo, 
Thinamiddhañca bhikkhuno; 
Uddhaccaṁ vicikicchā ca, 
Sabbasova na vijjatī”ti. 
… Suyāmano thero …. 

Theragāthā 1.75 
Ekakanipāta 
Aṭṭhamavagga 
Susāradattheragāthā 
“Sādhu suvihitāna dassanaṁ, 
Kaṅkhā chijjati buddhi vaḍḍhati; 
Bālampi karonti paṇḍitaṁ, 
Tasmā sādhu sataṁ samāgamo”ti. 
… Susārado thero …. 

Theragāthā 1.76 
Ekakanipāta 
Aṭṭhamavagga 
Piyañjahattheragāthā 
“Uppatantesu nipate, 
nipatantesu uppate; 
Vase avasamānesu, 
ramamānesu no rame”ti. 
… Piyañjaho thero …. 

Theragāthā 1.77 
Ekakanipāta 
Aṭṭhamavagga 
Hatthārohaputtattheragāthā 
“Idaṁ pure cittamacāri cārikaṁ, 
Yenicchakaṁ yatthakāmaṁ yathāsukhaṁ; 
Tadajjahaṁ niggahessāmi yoniso, 
Hatthippabhinnaṁ viya aṅkusaggaho”ti. 
… Hatthārohaputto thero …. 

Theragāthā 1.78 
Ekakanipāta 
Aṭṭhamavagga 
Meṇḍasirattheragāthā 
“Anekajātisaṁsāraṁ, 
sandhāvissaṁ anibbisaṁ; 
Tassa me dukkhajātassa, 
dukkhakkhandho aparaddho”ti. 
… Meṇḍasiro thero …. 

Theragāthā 1.79 
Ekakanipāta 
Aṭṭhamavagga 
Rakkhitattheragāthā 
“Sabbo rāgo pahīno me, 
sabbo doso samūhato; 
Sabbo me vigato moho, 
sītibhūtosmi nibbuto”ti. 
… Rakkhito thero …. 

Theragāthā 1.7 
Ekakanipāta 
Paṭhamavagga 
Bhalliyattheragāthā 
“Yopānudī maccurājassa senaṁ, 
Naḷasetuṁva sudubbalaṁ mahogho; 
Vijitāvī apetabheravo hi, 
Danto so parinibbuto ṭhitatto”ti. 
Itthaṁ sudaṁ āyasmā bhalliyo thero gāthaṁ abhāsitthāti. 

Theragāthā 1.80 
Ekakanipāta 
Aṭṭhamavagga 
Uggattheragāthā 
“Yaṁ mayā pakataṁ kammaṁ, 
appaṁ vā yadi vā bahuṁ; 
Sabbametaṁ parikkhīṇaṁ, 
natthi dāni punabbhavo”ti. 
… Uggo thero … 
vaggo aṭṭhamo. 
Tassuddānaṁ 
Vacchapālo ca yo thero, 
ātumo māṇavo isi; 
Suyāmano susārado, 
thero yo ca piyañjaho; 
Ārohaputto meṇḍasiro, 
rakkhito uggasavhayoti. 

Theragāthā 1.81 
Ekakanipāta 
Navamavagga 
Samitiguttattheragāthā 
“Yaṁ mayā pakataṁ pāpaṁ, 
pubbe aññāsu jātisu; 
Idheva taṁ vedanīyaṁ, 
vatthu aññaṁ na vijjatī”ti. 
… Samitigutto thero …. 

Theragāthā 1.82 
Ekakanipāta 
Navamavagga 
Kassapattheragāthā 
“Yena yena subhikkhāni, 
sivāni abhayāni ca; 
Tena puttaka gacchassu, 
mā sokāpahato bhavā”ti. 
… Kassapo thero …. 

Theragāthā 1.83 
Ekakanipāta 
Navamavagga 
Sīhattheragāthā 
“Sīhappamatto vihara, 
rattindivamatandito; 
Bhāvehi kusalaṁ dhammaṁ, 
jaha sīghaṁ samussayan”ti. 
… Sīho thero …. 

Theragāthā 1.84 
Ekakanipāta 
Navamavagga 
Nītattheragāthā 
“Sabbarattiṁ supitvāna, 
divā saṅgaṇike rato; 
Kudāssu nāma dummedho, 
dukkhassantaṁ karissatī”ti. 
… Nīto thero …. 

Theragāthā 1.85 
Ekakanipāta 
Navamavagga 
Sunāgattheragāthā 
“Cittanimittassa kovido, 
Pavivekarasaṁ vijāniya; 
Jhāyaṁ nipako patissato, 
Adhigaccheyya sukhaṁ nirāmisan”ti. 
… Sunāgo thero …. 

Theragāthā 1.86 
Ekakanipāta 
Navamavagga 
Nāgitattheragāthā 
“Ito bahiddhā puthu aññavādinaṁ, 
Maggo na nibbānagamo yathā ayaṁ; 
Itissu saṅghaṁ bhagavānusāsati, 
Satthā sayaṁ pāṇitaleva dassayan”ti. 
… Nāgito thero …. 

Theragāthā 1.87 
Ekakanipāta 
Navamavagga 
Paviṭṭhattheragāthā 
“Khandhā diṭṭhā yathābhūtaṁ, 
bhavā sabbe padālitā; 
Vikkhīṇo jātisaṁsāro, 
natthi dāni punabbhavo”ti. 
… Paviṭṭho thero …. 

Theragāthā 1.88 
Ekakanipāta 
Navamavagga 
Ajjunattheragāthā 
“Asakkhiṁ vata attānaṁ, 
uddhātuṁ udakā thalaṁ; 
Vuyhamāno mahogheva, 
saccāni paṭivijjhahan”ti. 
… Ajjuno thero …. 

Theragāthā 1.89 
Ekakanipāta 
Navamavagga 
(Paṭhama) Devasabhattheragāthā 
“Uttiṇṇā paṅkapalipā, 
pātālā parivajjitā; 
Mutto oghā ca ganthā ca, 
sabbe mānā visaṁhatā”ti. 
… Devasabho thero …. 

Theragāthā 1.8 
Ekakanipāta 
Paṭhamavagga 
Vīrattheragāthā 
“Yo duddamiyo damena danto, 
Vīro santusito vitiṇṇakaṅkho; 
Vijitāvī apetalomahaṁso, 
Vīro so parinibbuto ṭhitatto”ti. 
Itthaṁ sudaṁ āyasmā vīro thero gāthaṁ abhāsitthāti. 

Theragāthā 1.90 
Ekakanipāta 
Navamavagga 
Sāmidattattheragāthā 
“Pañcakkhandhā pariññātā, 
tiṭṭhanti chinnamūlakā; 
Vikkhīṇo jātisaṁsāro, 
natthi dāni punabbhavo”ti. 
… Sāmidatto thero … 
vaggo navamo. 
Tassuddānaṁ 
Thero samitigutto ca, 
kassapo sīhasavhayo; 
Nīto sunāgo nāgito, 
paviṭṭho ajjuno isi; 
Devasabho ca yo thero, 
sāmidatto mahabbaloti. 

Theragāthā 1.91 
Ekakanipāta 
Dasamavagga 
Paripuṇṇakattheragāthā 
“Na tathā mataṁ satarasaṁ, 
Sudhannaṁ yaṁ mayajja paribhuttaṁ; 
Aparimitadassinā gotamena, 
Buddhena desito dhammo”ti. 
… Paripuṇṇako thero …. 

Theragāthā 1.92 
Ekakanipāta 
Dasamavagga 
Vijayattheragāthā 
“Yassāsavā parikkhīṇā, 
āhāre ca anissito; 
Suññato animitto ca, 
vimokkho yassa gocaro; 
Ākāseva sakuntānaṁ, 
padaṁ tassa durannayan”ti. 
… Vijayo thero …. 

Theragāthā 1.93 
Ekakanipāta 
Dasamavagga 
Erakattheragāthā 
“Dukkhā kāmā eraka, 
Na sukhā kāmā eraka; 
Yo kāme kāmayati, 
Dukkhaṁ so kāmayati eraka; 
Yo kāme na kāmayati, 
Dukkhaṁ so na kāmayati erakā”ti. 
… Erako thero …. 

Theragāthā 1.94 
Ekakanipāta 
Dasamavagga 
Mettajittheragāthā 
“Namo hi tassa bhagavato, 
sakyaputtassa sirīmato; 
Tenāyaṁ aggappattena, 
aggadhammo sudesito”ti. 
… Mettaji thero …. 

Theragāthā 1.95 
Ekakanipāta 
Dasamavagga 
Cakkhupālattheragāthā 
“Andhohaṁ hatanettosmi, 
kantāraddhānapakkhando; 
Sayamānopi gacchissaṁ, 
na sahāyena pāpenā”ti. 
… Cakkhupālo thero …. 

Theragāthā 1.96 
Ekakanipāta 
Dasamavagga 
Khaṇḍasumanattheragāthā 
“Ekapupphaṁ cajitvāna, 
asīti vassakoṭiyo; 
Saggesu paricāretvā, 
sesakenamhi nibbuto”ti. 
… Khaṇḍasumano thero …. 

Theragāthā 1.97 
Ekakanipāta 
Dasamavagga 
Tissattheragāthā 
“Hitvā satapalaṁ kaṁsaṁ, 
Sovaṇṇaṁ satarājikaṁ; 
Aggahiṁ mattikāpattaṁ, 
Idaṁ dutiyābhisecanan”ti. 
… Tisso thero …. 

Theragāthā 1.98 
Ekakanipāta 
Dasamavagga 
Abhayattheragāthā 
“Rūpaṁ disvā sati muṭṭhā, 
Piyaṁ nimittaṁ manasikaroto; 
Sārattacitto vedeti, 
Tañca ajjhosa tiṭṭhati; 
Tassa vaḍḍhanti āsavā, 
Bhavamūlopagāmino”ti. 
… Abhayo thero …. 

Theragāthā 1.99 
Ekakanipāta 
Dasamavagga 
Uttiyattheragāthā 
“Saddaṁ sutvā sati muṭṭhā, 
Piyaṁ nimittaṁ manasikaroto; 
Sārattacitto vedeti, 
Tañca ajjhosa tiṭṭhati; 
Tassa vaḍḍhanti āsavā, 
Saṁsāraṁ upagāmino”ti. 
… Uttiyo thero …. 

Theragāthā 1.9 
Ekakanipāta 
Paṭhamavagga 
Pilindavacchattheragāthā 
“Svāgataṁ na durāgataṁ, 
Nayidaṁ dumantitaṁ mama; 
Saṁvibhattesu dhammesu, 
Yaṁ seṭṭhaṁ tadupāgamin”ti. 
Itthaṁ sudaṁ āyasmā pilindavaccho thero gāthaṁ abhāsitthāti. 

Theragāthā 10.1 
Dasakanipāta 
Paṭhamavagga 
Kāḷudāyittheragāthā 
“Aṅgārino dāni dumā bhadante, 
Phalesino chadanaṁ vippahāya; 
Te accimantova pabhāsayanti, 
Samayo mahāvīra bhāgī rasānaṁ. 
Dumāni phullāni manoramāni, 
Samantato sabbadisā pavanti; 
Pattaṁ pahāya phalamāsasānā, 
Kālo ito pakkamanāya vīra. 
Nevātisītaṁ na panātiuṇhaṁ, 
Sukhā utu addhaniyā bhadante; 
Passantu taṁ sākiyā koḷiyā ca, 
Pacchāmukhaṁ rohiniyaṁ tarantaṁ. 
Āsāya kasate khettaṁ, 
bījaṁ āsāya vappati; 
Āsāya vāṇijā yanti, 
samuddaṁ dhanahārakā; 
Yāya āsāya tiṭṭhāmi, 
sā me āsā samijjhatu. 
Punappunaṁ ceva vapanti bījaṁ, 
Punappunaṁ vassati devarājā; 
Punappunaṁ khettaṁ kasanti kassakā, 
Punappunaṁ dhaññamupeti raṭṭhaṁ. 
Punappunaṁ yācanakā caranti, 
Punappunaṁ dānapatī dadanti; 
Punappunaṁ dānapatī daditvā, 
Punappunaṁ saggamupenti ṭhānaṁ. 
Vīro have sattayugaṁ puneti, 
Yasmiṁ kule jāyati bhūripañño; 
Maññāmahaṁ sakkati devadevo, 
Tayā hi jāto muni saccanāmo. 
Suddhodano nāma pitā mahesino, 
Buddhassa mātā pana māyanāmā; 
Yā bodhisattaṁ parihariya kucchinā, 
Kāyassa bhedā tidivamhi modati. 
Sā gotamī kālakatā ito cutā, 
Dibbehi kāmehi samaṅgibhūtā; 
Sā modati kāmaguṇehi pañcahi, 
Parivāritā devagaṇehi tehi”. 
“Buddhassa puttomhi asayhasāhino, 
Aṅgīrasassappaṭimassa tādino; 
Pitupitā mayhaṁ tuvaṁsi sakka, 
Dhammena me gotama ayyakosī”ti. 
… Kāḷudāyī thero …. 

Theragāthā 10.2 
Dasakanipāta 
Paṭhamavagga 
Ekavihāriyattheragāthā 
“Purato pacchato vāpi, 
aparo ce na vijjati; 
Atīva phāsu bhavati, 
ekassa vasato vane. 
Handa eko gamissāmi, 
araññaṁ buddhavaṇṇitaṁ; 
Phāsu ekavihārissa, 
pahitattassa bhikkhuno. 
Yogi-pītikaraṁ rammaṁ, 
mattakuñjarasevitaṁ; 
Eko attavasī khippaṁ, 
pavisissāmi kānanaṁ. 
Supupphite sītavane, 
sītale girikandare; 
Gattāni parisiñcitvā, 
caṅkamissāmi ekako. 
Ekākiyo adutiyo, 
ramaṇīye mahāvane; 
Kadāhaṁ viharissāmi, 
katakicco anāsavo. 
Evaṁ me kattukāmassa, 
adhippāyo samijjhatu; 
Sādhayissāmahaṁyeva, 
nāñño aññassa kārako. 
Esa bandhāmi sannāhaṁ, 
pavisissāmi kānanaṁ; 
Na tato nikkhamissāmi, 
appatto āsavakkhayaṁ. 
Mālute upavāyante, 
sīte surabhigandhike; 
Avijjaṁ dālayissāmi, 
nisinno nagamuddhani. 
Vane kusumasañchanne, 
pabbhāre nūna sītale; 
Vimuttisukhena sukhito, 
ramissāmi giribbaje. 
Sohaṁ paripuṇṇasaṅkappo, 
cando pannaraso yathā; 
Sabbāsavaparikkhīṇo, 
natthi dāni punabbhavo”ti. 
… Ekavihāriyo thero …. 

Theragāthā 10.3 
Dasakanipāta 
Paṭhamavagga 
Mahākappinattheragāthā 
“Anāgataṁ yo paṭikacca passati, 
Hitañca atthaṁ ahitañca taṁ dvayaṁ; 
Viddesino tassa hitesino vā, 
Randhaṁ na passanti samekkhamānā. 
Ānāpānasatī yassa, 
paripuṇṇā subhāvitā; 
Anupubbaṁ paricitā, 
yathā buddhena desitā; 
Somaṁ lokaṁ pabhāseti, 
abbhā muttova candimā. 
Odātaṁ vata me cittaṁ, 
appamāṇaṁ subhāvitaṁ; 
Nibbiddhaṁ paggahītañca, 
sabbā obhāsate disā. 
Jīvate vāpi sappañño, 
api vittaparikkhayo; 
Paññāya ca alābhena, 
vittavāpi na jīvati. 
Paññā sutavinicchinī, 
Paññā kittisilokavaddhanī; 
Paññāsahito naro idha, 
Api dukkhesu sukhāni vindati. 
Nāyaṁ ajjatano dhammo, 
nacchero napi abbhuto; 
Yattha jāyetha mīyetha, 
tattha kiṁ viya abbhutaṁ. 
Anantaraṁ hi jātassa, 
jīvitā maraṇaṁ dhuvaṁ; 
Jātā jātā marantīdha, 
evaṁdhammā hi pāṇino. 
Na hetadatthāya matassa hoti, 
Yaṁ jīvitatthaṁ paraporisānaṁ; 
Matamhi ruṇṇaṁ na yaso na lokyaṁ, 
Na vaṇṇitaṁ samaṇabrāhmaṇehi. 
Cakkhuṁ sarīraṁ upahanti tena, 
Nihīyati vaṇṇabalaṁ matī ca; 
Ānandino tassa disā bhavanti, 
Hitesino nāssa sukhī bhavanti. 
Tasmā hi iccheyya kule vasante, 
Medhāvino ceva bahussute ca; 
Yesaṁ hi paññāvibhavena kiccaṁ, 
Taranti nāvāya nadiṁva puṇṇan”ti. 
… Mahākappino thero …. 

Theragāthā 10.4 
Dasakanipāta 
Paṭhamavagga 
Cūḷapanthakattheragāthā 
“Dandhā mayhaṁ gatī āsi, 
paribhūto pure ahaṁ; 
Bhātā ca maṁ paṇāmesi, 
‘gaccha dāni tuvaṁ gharaṁ’. 
Sohaṁ paṇāmito santo, 
saṅghārāmassa koṭṭhake; 
Dummano tattha aṭṭhāsiṁ, 
sāsanasmiṁ apekkhavā. 
Bhagavā tattha āgacchi, 
sīsaṁ mayhaṁ parāmasi; 
Bāhāya maṁ gahetvāna, 
saṅghārāmaṁ pavesayi. 
Anukampāya me satthā, 
pādāsi pādapuñchaniṁ; 
‘Etaṁ suddhaṁ adhiṭṭhehi, 
ekamantaṁ svadhiṭṭhitaṁ’. 
Tassāhaṁ vacanaṁ sutvā, 
vihāsiṁ sāsane rato; 
Samādhiṁ paṭipādesiṁ, 
uttamatthassa pattiyā. 
Pubbenivāsaṁ jānāmi, 
dibbacakkhu visodhitaṁ; 
Tisso vijjā anuppattā, 
kataṁ buddhassa sāsanaṁ. 
Sahassakkhattumattānaṁ, 
nimminitvāna panthako; 
Nisīdambavane ramme, 
yāva kālappavedanā. 
Tato me satthā pāhesi, 
dūtaṁ kālappavedakaṁ; 
Paveditamhi kālamhi, 
vehāsādupasaṅkamiṁ. 
Vanditvā satthuno pāde, 
ekamantaṁ nisīdahaṁ; 
Nisinnaṁ maṁ viditvāna, 
atha satthā paṭiggahi. 
Āyāgo sabbalokassa, 
āhutīnaṁ paṭiggaho; 
Puññakkhettaṁ manussānaṁ, 
paṭiggaṇhittha dakkhiṇan”ti. 
… Cūḷapanthako thero …. 

Theragāthā 10.5 
Dasakanipāta 
Paṭhamavagga 
Kappattheragāthā 
“Nānākulamalasampuṇṇo, 
mahāukkārasambhavo; 
Candanikaṁva paripakkaṁ, 
mahāgaṇḍo mahāvaṇo. 
Pubbaruhirasampuṇṇo, 
gūthakūpena gāḷhito; 
Āpopaggharaṇo kāyo, 
sadā sandati pūtikaṁ. 
Saṭṭhikaṇḍarasambandho, 
maṁsalepanalepito; 
Cammakañcukasannaddho, 
pūtikāyo niratthako. 
Aṭṭhisaṅghātaghaṭito, 
nhārusuttanibandhano; 
Nekesaṁ saṅgatībhāvā, 
kappeti iriyāpathaṁ. 
Dhuvappayāto maraṇāya, 
maccurājassa santike; 
Idheva chaḍḍayitvāna, 
yenakāmaṅgamo naro. 
Avijjāya nivuto kāyo, 
catuganthena ganthito; 
Oghasaṁsīdano kāyo, 
anusayajālamotthato. 
Pañcanīvaraṇe yutto, 
vitakkena samappito; 
Taṇhāmūlenānugato, 
mohacchādanachādito. 
Evāyaṁ vattate kāyo, 
kammayantena yantito; 
Sampatti ca vipatyantā, 
nānābhāvo vipajjati. 
Yemaṁ kāyaṁ mamāyanti, 
andhabālā puthujjanā; 
Vaḍḍhenti kaṭasiṁ ghoraṁ, 
ādiyanti punabbhavaṁ. 
Yemaṁ kāyaṁ vivajjenti, 
Gūthalittaṁva pannagaṁ; 
Bhavamūlaṁ vamitvāna, 
Parinibbissantināsavā”ti. 
… Kappo thero …. 

Theragāthā 10.6 
Dasakanipāta 
Paṭhamavagga 
Vaṅgantaputtaupasenattheragāthā 
“Vivittaṁ appanigghosaṁ, 
vāḷamiganisevitaṁ; 
Seve senāsanaṁ bhikkhu, 
paṭisallānakāraṇā. 
Saṅkārapuñjā āhatvā, 
susānā rathiyāhi ca; 
Tato saṅghāṭikaṁ katvā, 
lūkhaṁ dhāreyya cīvaraṁ. 
Nīcaṁ manaṁ karitvāna, 
sapadānaṁ kulā kulaṁ; 
Piṇḍikāya care bhikkhu, 
guttadvāro susaṁvuto. 
Lūkhenapi vā santusse, 
nāññaṁ patthe rasaṁ bahuṁ; 
Rasesu anugiddhassa, 
jhāne na ramatī mano. 
Appiccho ceva santuṭṭho, 
pavivitto vase muni; 
Asaṁsaṭṭho gahaṭṭhehi, 
anāgārehi cūbhayaṁ. 
Yathā jaḷo va mūgo va, 
attānaṁ dassaye tathā; 
Nātivelaṁ sambhāseyya, 
saṅghamajjhamhi paṇḍito. 
Na so upavade kañci, 
upaghātaṁ vivajjaye; 
Saṁvuto pātimokkhasmiṁ, 
mattaññū cassa bhojane. 
Suggahītanimittassa, 
cittassuppādakovido; 
Samathaṁ anuyuñjeyya, 
kālena ca vipassanaṁ. 
Vīriyasātaccasampanno, 
yuttayogo sadā siyā; 
Na ca appatvā dukkhantaṁ, 
vissāsaṁ eyya paṇḍito. 
Evaṁ viharamānassa, 
suddhikāmassa bhikkhuno; 
Khīyanti āsavā sabbe, 
nibbutiñcādhigacchatī”ti. 
… Upaseno vaṅgantaputto thero …. 

Theragāthā 10.7 
Dasakanipāta 
Paṭhamavagga 
(Apara) Gotamattheragāthā 
“Vijāneyya sakaṁ atthaṁ, 
Avalokeyyātha pāvacanaṁ; 
Yañcettha assa patirūpaṁ, 
Sāmaññaṁ ajjhupagatassa. 
Mittaṁ idha ca kalyāṇaṁ, 
Sikkhā vipulaṁ samādānaṁ; 
Sussūsā ca garūnaṁ, 
Etaṁ samaṇassa patirūpaṁ. 
Buddhesu sagāravatā, 
Dhamme apaciti yathābhūtaṁ; 
Saṅghe ca cittikāro, 
Etaṁ samaṇassa patirūpaṁ. 
Ācāragocare yutto, 
Ājīvo sodhito agārayho; 
Cittassa ca saṇṭhapanaṁ, 
Etaṁ samaṇassa patirūpaṁ. 
Cārittaṁ atha vārittaṁ, 
Iriyāpathiyaṁ pasādaniyaṁ; 
Adhicitte ca āyogo, 
Etaṁ samaṇassa patirūpaṁ. 
Āraññakāni senāsanāni, 
Pantāni appasaddāni; 
Bhajitabbāni muninā, 
Etaṁ samaṇassa patirūpaṁ. 
Sīlañca bāhusaccañca, 
Dhammānaṁ pavicayo yathābhūtaṁ; 
Saccānaṁ abhisamayo, 
Etaṁ samaṇassa patirūpaṁ. 
Bhāveyya ca aniccanti, 
Anattasaññaṁ asubhasaññañca; 
Lokamhi ca anabhiratiṁ, 
Etaṁ samaṇassa patirūpaṁ. 
Bhāveyya ca bojjhaṅge, 
Iddhipādāni indriyāni balāni; 
Aṭṭhaṅgamaggamariyaṁ, 
Etaṁ samaṇassa patirūpaṁ. 
Taṇhaṁ pajaheyya muni, 
Samūlake āsave padāleyya; 
Vihareyya vippamutto, 
Etaṁ samaṇassa patirūpan”ti. 
… Gotamo thero … 
Dasakanipāto niṭṭhito. 
Tatruddānaṁ 
Kāḷudāyī ca so thero, 
ekavihārī ca kappino; 
Cūḷapanthako kappo ca, 
upaseno ca gotamo; 
Sattime dasake therā, 
gāthāyo cettha sattatīti. 

Theragāthā 11.1 
Ekādasakanipāta 
Paṭhamavagga 
Saṅkiccattheragāthā 
“Kiṁ tavattho vane tāta, 
ujjuhānova pāvuse; 
Verambhā ramaṇīyā te, 
paviveko hi jhāyinaṁ”. 
“Yathā abbhāni verambho, 
vāto nudati pāvuse; 
Saññā me abhikiranti, 
vivekapaṭisaññutā. 
Apaṇḍaro aṇḍasambhavo, 
Sīvathikāya niketacāriko; 
Uppādayateva me satiṁ, 
Sandehasmiṁ virāganissitaṁ. 
Yañca aññe na rakkhanti, 
yo ca aññe na rakkhati; 
Sa ve bhikkhu sukhaṁ seti, 
kāmesu anapekkhavā. 
Acchodikā puthusilā, 
gonaṅgulamigāyutā; 
Ambusevālasañchannā, 
te selā ramayanti maṁ. 
Vasitaṁ me araññesu, 
kandarāsu guhāsu ca; 
Senāsanesu pantesu, 
vāḷamiganisevite. 
‘Ime haññantu vajjhantu, 
dukkhaṁ pappontu pāṇino’; 
Saṅkappaṁ nābhijānāmi, 
anariyaṁ dosasaṁhitaṁ. 
Pariciṇṇo mayā satthā, 
kataṁ buddhassa sāsanaṁ; 
Ohito garuko bhāro, 
bhavanetti samūhatā. 
Yassa catthāya pabbajito, 
agārasmānagāriyaṁ; 
So me attho anuppatto, 
sabbasaṁyojanakkhayo. 
Nābhinandāmi maraṇaṁ, 
nābhinandāmi jīvitaṁ; 
Kālañca paṭikaṅkhāmi, 
nibbisaṁ bhatako yathā. 
Nābhinandāmi maraṇaṁ, 
nābhinandāmi jīvitaṁ; 
Kālañca paṭikaṅkhāmi, 
sampajāno patissato”ti. 
… Saṅkicco thero … 
Ekādasakanipāto niṭṭhito. 
Tatruddānaṁ 
Saṅkiccathero ekova, 
katakicco anāsavo; 
Ekādasanipātamhi, 
gāthā ekādaseva cāti. 

Theragāthā 12.1 
Dvādasakanipāta 
Paṭhamavagga 
Sīlavattheragāthā 
“Sīlamevidha sikkhetha, 
asmiṁ loke susikkhitaṁ; 
Sīlañhi sabbasampattiṁ, 
upanāmeti sevitaṁ. 
Sīlaṁ rakkheyya medhāvī, 
patthayāno tayo sukhe; 
Pasaṁsaṁ vittilābhañca, 
pecca sagge pamodanaṁ. 
Sīlavā hi bahū mitte, 
saññamenādhigacchati; 
Dussīlo pana mittehi, 
dhaṁsate pāpamācaraṁ. 
Avaṇṇañca akittiñca, 
dussīlo labhate naro; 
Vaṇṇaṁ kittiṁ pasaṁsañca, 
sadā labhati sīlavā. 
Ādi sīlaṁ patiṭṭhā ca, 
kalyāṇānañca mātukaṁ; 
Pamukhaṁ sabbadhammānaṁ, 
tasmā sīlaṁ visodhaye. 
Velā ca saṁvaraṁ sīlaṁ, 
cittassa abhihāsanaṁ; 
Titthañca sabbabuddhānaṁ, 
tasmā sīlaṁ visodhaye. 
Sīlaṁ balaṁ appaṭimaṁ, 
sīlaṁ āvudhamuttamaṁ; 
Sīlamābharaṇaṁ seṭṭhaṁ, 
sīlaṁ kavacamabbhutaṁ. 
Sīlaṁ setu mahesakkho, 
sīlaṁ gandho anuttaro; 
Sīlaṁ vilepanaṁ seṭṭhaṁ, 
yena vāti disodisaṁ. 
Sīlaṁ sambalamevaggaṁ, 
sīlaṁ pātheyyamuttamaṁ; 
Sīlaṁ seṭṭho ativāho, 
yena yāti disodisaṁ. 
Idheva nindaṁ labhati, 
peccāpāye ca dummano; 
Sabbattha dummano bālo, 
sīlesu asamāhito. 
Idheva kittiṁ labhati, 
pecca sagge ca summano; 
Sabbattha sumano dhīro, 
sīlesu susamāhito. 
Sīlameva idha aggaṁ, 
paññavā pana uttamo; 
Manussesu ca devesu, 
sīlapaññāṇato jayan”ti. 
… Sīlavo thero …. 

Theragāthā 12.2 
Dvādasakanipāta 
Paṭhamavagga 
Sunītattheragāthā 
“Nīce kulamhi jātohaṁ, 
daliddo appabhojano; 
Hīnakammaṁ mamaṁ āsi, 
ahosiṁ pupphachaḍḍako. 
Jigucchito manussānaṁ, 
paribhūto ca vambhito; 
Nīcaṁ manaṁ karitvāna, 
vandissaṁ bahukaṁ janaṁ. 
Athaddasāsiṁ sambuddhaṁ, 
bhikkhusaṅghapurakkhataṁ; 
Pavisantaṁ mahāvīraṁ, 
magadhānaṁ puruttamaṁ. 
Nikkhipitvāna byābhaṅgiṁ, 
vandituṁ upasaṅkamiṁ; 
Mameva anukampāya, 
aṭṭhāsi purisuttamo. 
Vanditvā satthuno pāde, 
ekamantaṁ ṭhito tadā; 
Pabbajjaṁ ahamāyāciṁ, 
sabbasattānamuttamaṁ. 
Tato kāruṇiko satthā, 
sabbalokānukampako; 
‘Ehi bhikkhū’ti maṁ āha, 
sā me āsūpasampadā. 
Sohaṁ eko araññasmiṁ, 
viharanto atandito; 
Akāsiṁ satthu vacanaṁ, 
yathā maṁ ovadī jino. 
Rattiyā paṭhamaṁ yāmaṁ, 
Pubbajātimanussariṁ; 
Rattiyā majjhimaṁ yāmaṁ, 
Dibbacakkhuṁ visodhayiṁ; 
Rattiyā pacchime yāme, 
Tamokhandhaṁ padālayiṁ. 
Tato ratyā vivasāne, 
sūriyassuggamanaṁ pati; 
Indo brahmā ca āgantvā, 
maṁ namassiṁsu pañjalī. 
‘Namo te purisājañña, 
namo te purisuttama; 
Yassa te āsavā khīṇā, 
dakkhiṇeyyosi mārisa’. 
Tato disvāna maṁ satthā, 
devasaṅghapurakkhataṁ; 
Sitaṁ pātukaritvāna, 
imamatthaṁ abhāsatha. 
‘Tapena brahmacariyena, 
saṁyamena damena ca; 
Etena brāhmaṇo hoti, 
etaṁ brāhmaṇamuttaman’”ti. 
… Sunīto thero … 
Dvādasakanipāto niṭṭhito. 
Tatruddānaṁ 
Sīlavā ca sunīto ca, 
therā dve te mahiddhikā; 
Dvādasamhi nipātamhi, 
gāthāyo catuvīsatīti. 

Theragāthā 13.1 
Terasanipāta 
Paṭhamavagga 
Soṇakoḷivisattheragāthā 
“Yāhu raṭṭhe samukkaṭṭho, 
rañño aṅgassa paddhagū; 
Svajja dhammesu ukkaṭṭho, 
soṇo dukkhassa pāragū. 
Pañca chinde pañca jahe, 
pañca cuttari bhāvaye; 
Pañca saṅgātigo bhikkhu, 
oghatiṇṇoti vuccati. 
Unnaḷassa pamattassa, 
bāhirāsassa bhikkhuno; 
Sīlaṁ samādhi paññā ca, 
pāripūriṁ na gacchati. 
Yañhi kiccaṁ apaviddhaṁ, 
akiccaṁ pana karīyati; 
Unnaḷānaṁ pamattānaṁ, 
tesaṁ vaḍḍhanti āsavā. 
Yesañca susamāraddhā, 
niccaṁ kāyagatā sati; 
Akiccaṁ te na sevanti, 
kicce sātaccakārino; 
Satānaṁ sampajānānaṁ, 
atthaṁ gacchanti āsavā. 
Ujumaggamhi akkhāte, 
gacchatha mā nivattatha; 
Attanā codayattānaṁ, 
nibbānamabhihāraye. 
Accāraddhamhi vīriyamhi, 
satthā loke anuttaro; 
Vīṇopamaṁ karitvā me, 
dhammaṁ desesi cakkhumā; 
Tassāhaṁ vacanaṁ sutvā, 
vihāsiṁ sāsane rato. 
Samathaṁ paṭipādesiṁ, 
uttamatthassa pattiyā; 
Tisso vijjā anuppattā, 
kataṁ buddhassa sāsanaṁ. 
Nekkhamme adhimuttassa, 
pavivekañca cetaso; 
Abyāpajjādhimuttassa, 
upādānakkhayassa ca. 
Taṇhakkhayādhimuttassa, 
asammohañca cetaso; 
Disvā āyatanuppādaṁ, 
sammā cittaṁ vimuccati. 
Tassa sammā vimuttassa, 
santacittassa bhikkhuno; 
Katassa paṭicayo natthi, 
karaṇīyaṁ na vijjati. 
Selo yathā ekagghano, 
vātena na samīrati; 
Evaṁ rūpā rasā saddā, 
gandhā phassā ca kevalā. 
Iṭṭhā dhammā aniṭṭhā ca, 
nappavedhenti tādino; 
Ṭhitaṁ cittaṁ visaññuttaṁ, 
vayañcassānupassatī”ti. 
… Soṇo koḷiviso thero … 
Terasanipāto niṭṭhito. 
Tatruddānaṁ 
Soṇo koḷiviso thero, 
ekoyeva mahiddhiko; 
Terasamhi nipātamhi, 
gāthāyo cettha terasāti. 

Theragāthā 14.1 
Cuddasakanipāta 
Paṭhamavagga 
Khadiravaniyarevatattheragāthā 
“Yadā ahaṁ pabbajito, 
agārasmānagāriyaṁ; 
Nābhijānāmi saṅkappaṁ, 
anariyaṁ dosasaṁhitaṁ. 
‘Ime haññantu vajjhantu, 
dukkhaṁ pappontu pāṇino’; 
Saṅkappaṁ nābhijānāmi, 
imasmiṁ dīghamantare. 
Mettañca abhijānāmi, 
appamāṇaṁ subhāvitaṁ; 
Anupubbaṁ paricitaṁ, 
yathā buddhena desitaṁ. 
Sabbamitto sabbasakho, 
sabbabhūtānukampako; 
Mettacittañca bhāvemi, 
abyāpajjarato sadā. 
Asaṁhīraṁ asaṅkuppaṁ, 
cittaṁ āmodayāmahaṁ; 
Brahmavihāraṁ bhāvemi, 
akāpurisasevitaṁ. 
Avitakkaṁ samāpanno, 
sammāsambuddhasāvako; 
Ariyena tuṇhībhāvena, 
upeto hoti tāvade. 
Yathāpi pabbato selo, 
acalo suppatiṭṭhito; 
Evaṁ mohakkhayā bhikkhu, 
pabbatova na vedhati. 
Anaṅgaṇassa posassa, 
niccaṁ sucigavesino; 
Vālaggamattaṁ pāpassa, 
abbhamattaṁva khāyati. 
Nagaraṁ yathā paccantaṁ, 
guttaṁ santarabāhiraṁ; 
Evaṁ gopetha attānaṁ, 
khaṇo vo mā upaccagā. 
Nābhinandāmi maraṇaṁ, 
nābhinandāmi jīvitaṁ; 
Kālañca paṭikaṅkhāmi, 
nibbisaṁ bhatako yathā. 
Nābhinandāmi maraṇaṁ, 
… pe 
… 
sampajāno patissato. 
Pariciṇṇo mayā satthā, 
kataṁ buddhassa sāsanaṁ; 
Ohito garuko bhāro, 
bhavanetti samūhatā. 
Yassa catthāya pabbajito, 
agārasmānagāriyaṁ; 
So me attho anuppatto, 
sabbasaṁyojanakkhayo. 
Sampādethappamādena, 
esā me anusāsanī; 
Handāhaṁ parinibbissaṁ, 
vippamuttomhi sabbadhī”ti. 
… Khadiravaniyarevato thero …. 

Theragāthā 14.2 
Cuddasakanipāta 
Paṭhamavagga 
Godattattheragāthā 
“Yathāpi bhaddo ājañño, 
dhure yutto dhurassaho; 
Mathito atibhārena, 
saṁyugaṁ nātivattati. 
Evaṁ paññāya ye tittā, 
samuddo vārinā yathā; 
Na pare atimaññanti, 
ariyadhammova pāṇinaṁ. 
Kāle kālavasaṁ pattā, 
bhavābhavavasaṁ gatā; 
Narā dukkhaṁ nigacchanti, 
tedha socanti māṇavā. 
Unnatā sukhadhammena, 
dukkhadhammena conatā; 
Dvayena bālā haññanti, 
yathābhūtaṁ adassino. 
Ye ca dukkhe sukhasmiñca, 
majjhe sibbinimaccagū; 
Ṭhitā te indakhīlova, 
na te unnataonatā. 
Na heva lābhe nālābhe, 
na yase na ca kittiyā; 
Na nindāyaṁ pasaṁsāya, 
na te dukkhe sukhamhi ca. 
Sabbattha te na limpanti, 
udabinduva pokkhare; 
Sabbattha sukhitā dhīrā, 
sabbattha aparājitā. 
Dhammena ca alābho yo, 
yo ca lābho adhammiko; 
Alābho dhammiko seyyo, 
yañce lābho adhammiko. 
Yaso ca appabuddhīnaṁ, 
viññūnaṁ ayaso ca yo; 
Ayasova seyyo viññūnaṁ, 
na yaso appabuddhinaṁ. 
Dummedhehi pasaṁsā ca, 
viññūhi garahā ca yā; 
Garahāva seyyo viññūhi, 
yañce bālappasaṁsanā. 
Sukhañca kāmamayikaṁ, 
dukkhañca pavivekiyaṁ; 
Pavivekadukkhaṁ seyyo, 
yañce kāmamayaṁ sukhaṁ. 
Jīvitañca adhammena, 
dhammena maraṇañca yaṁ; 
Maraṇaṁ dhammikaṁ seyyo, 
yañce jīve adhammikaṁ. 
Kāmakopappahīnā ye, 
santacittā bhavābhave; 
Caranti loke asitā, 
natthi tesaṁ piyāpiyaṁ. 
Bhāvayitvāna bojjhaṅge, 
indriyāni balāni ca; 
Pappuyya paramaṁ santiṁ, 
parinibbantināsavā”ti. 
… Godatto thero … 
Cuddasakanipāto niṭṭhito. 
Tatruddānaṁ 
Revato ceva godatto, 
therā dve te mahiddhikā; 
Cuddasamhi nipātamhi, 
gāthāyo aṭṭhavīsatīti. 

Theragāthā 15.1 
Soḷasakanipāta 
Paṭhamavagga 
Aññāsikoṇḍaññattheragāthā 
“Esa bhiyyo pasīdāmi, 
sutvā dhammaṁ mahārasaṁ; 
Virāgo desito dhammo, 
anupādāya sabbaso”. 
“Bahūni loke citrāni, 
asmiṁ pathavimaṇḍale; 
Mathenti maññe saṅkappaṁ, 
subhaṁ rāgūpasaṁhitaṁ. 
Rajamuhatañca vātena, 
yathā meghopasammaye; 
Evaṁ sammanti saṅkappā, 
yadā paññāya passati. 
Sabbe saṅkhārā aniccāti, 
yadā paññāya passati; 
Atha nibbindati dukkhe, 
esa maggo visuddhiyā. 
Sabbe saṅkhārā dukkhāti, 
yadā paññāya passati; 
Atha nibbindati dukkhe, 
esa maggo visuddhiyā. 
Sabbe dhammā anattāti, 
yadā paññāya passati; 
Atha nibbindati dukkhe, 
esa maggo visuddhiyā. 
Buddhānubuddho yo thero, 
koṇḍañño tibbanikkamo; 
Pahīnajātimaraṇo, 
brahmacariyassa kevalī. 
Oghapāso daḷhakhilo, 
Pabbato duppadālayo; 
Chetvā khilañca pāsañca, 
Selaṁ bhetvāna dubbhidaṁ; 
Tiṇṇo pāraṅgato jhāyī, 
Mutto so mārabandhanā. 
Uddhato capalo bhikkhu, 
mitte āgamma pāpake; 
Saṁsīdati mahoghasmiṁ, 
ūmiyā paṭikujjito. 
Anuddhato acapalo, 
nipako saṁvutindriyo; 
Kalyāṇamitto medhāvī, 
dukkhassantakaro siyā. 
Kālapabbaṅgasaṅkāso, 
kiso dhamanisanthato; 
Mattaññū annapānasmiṁ, 
adīnamanaso naro. 
Phuṭṭho ḍaṁsehi makasehi, 
araññasmiṁ brahāvane; 
Nāgo saṅgāmasīseva, 
sato tatrādhivāsaye. 
Nābhinandāmi maraṇaṁ, 
… pe 
… 
nibbisaṁ bhatako yathā. 
Nābhinandāmi maraṇaṁ, 
… pe 
… 
sampajāno patissato. 
Pariciṇṇo mayā satthā, 
… pe 
… 
bhavanetti samūhatā. 
Yassa catthāya pabbajito, 
agārasmānagāriyaṁ; 
So me attho anuppatto, 
kiṁ me saddhivihārinā”ti. 
… Aññāsikoṇḍañño thero …. 

Theragāthā 15.2 
Soḷasakanipāta 
Paṭhamavagga 
Udāyittheragāthā 
“Manussabhūtaṁ sambuddhaṁ, 
Attadantaṁ samāhitaṁ; 
Iriyamānaṁ brahmapathe, 
Cittassūpasame rataṁ. 
Yaṁ manussā namassanti, 
sabbadhammāna pāraguṁ; 
Devāpi taṁ namassanti, 
iti me arahato sutaṁ. 
Sabbasaṁyojanātītaṁ, 
vanā nibbanamāgataṁ; 
Kāmehi nekkhammarataṁ, 
muttaṁ selāva kañcanaṁ. 
Sa ve accaruci nāgo, 
himavāvaññe siluccaye; 
Sabbesaṁ nāganāmānaṁ, 
saccanāmo anuttaro. 
Nāgaṁ vo kittayissāmi, 
na hi āguṁ karoti so; 
Soraccaṁ avihiṁsā ca, 
pādā nāgassa te duve. 
Sati ca sampajaññañca, 
caraṇā nāgassa tepare; 
Saddhāhattho mahānāgo, 
upekkhāsetadantavā. 
Sati gīvā siro paññā, 
vīmaṁsā dhammacintanā; 
Dhammakucchisamāvāso, 
viveko tassa vāladhi. 
So jhāyī assāsarato, 
ajjhattaṁ susamāhito; 
Gacchaṁ samāhito nāgo, 
ṭhito nāgo samāhito. 
Sayaṁ samāhito nāgo, 
nisinnopi samāhito; 
Sabbattha saṁvuto nāgo, 
esā nāgassa sampadā. 
Bhuñjati anavajjāni, 
sāvajjāni na bhuñjati; 
Ghāsamacchādanaṁ laddhā, 
sannidhiṁ parivajjayaṁ. 
Saṁyojanaṁ aṇuṁ thūlaṁ, 
sabbaṁ chetvāna bandhanaṁ; 
Yena yeneva gacchati, 
anapekkhova gacchati. 
Yathāpi udake jātaṁ, 
puṇḍarīkaṁ pavaḍḍhati; 
Nopalippati toyena, 
sucigandhaṁ manoramaṁ. 
Tatheva ca loke jāto, 
buddho loke viharati; 
Nopalippati lokena, 
toyena padumaṁ yathā. 
Mahāgini pajjalito, 
anāhāropasammati; 
Aṅgāresu ca santesu, 
nibbutoti pavuccati. 
Atthassāyaṁ viññāpanī, 
upamā viññūhi desitā; 
Viññissanti mahānāgā, 
nāgaṁ nāgena desitaṁ. 
Vītarāgo vītadoso, 
Vītamoho anāsavo; 
Sarīraṁ vijahaṁ nāgo, 
Parinibbissatyanāsavo”ti. 
… Udāyī thero … 
Soḷasakanipāto niṭṭhito. 
Tatruddānaṁ 
Koṇḍañño ca udāyī ca, 
therā dve te mahiddhikā; 
Soḷasamhi nipātamhi, 
gāthāyo dve ca tiṁsa cāti. 

Theragāthā 16.10 
Vīsatinipāta 
Paṭhamavagga 
Pārāpariyattheragāthā 
Samaṇassa ahu cintā, 
pupphitamhi mahāvane; 
Ekaggassa nisinnassa, 
pavivittassa jhāyino. 
“Aññathā lokanāthamhi, 
tiṭṭhante purisuttame; 
Iriyaṁ āsi bhikkhūnaṁ, 
aññathā dāni dissati. 
Sītavātaparittāṇaṁ, 
hirikopīnachādanaṁ; 
Mattaṭṭhiyaṁ abhuñjiṁsu, 
santuṭṭhā itarītare. 
Paṇītaṁ yadi vā lūkhaṁ, 
appaṁ vā yadi vā bahuṁ; 
Yāpanatthaṁ abhuñjiṁsu, 
agiddhā nādhimucchitā. 
Jīvitānaṁ parikkhāre, 
bhesajje atha paccaye; 
Na bāḷhaṁ ussukā āsuṁ, 
yathā te āsavakkhaye. 
Araññe rukkhamūlesu, 
kandarāsu guhāsu ca; 
Vivekamanubrūhantā, 
vihaṁsu tapparāyaṇā. 
Nīcā niviṭṭhā subharā, 
mudū atthaddhamānasā; 
Abyāsekā amukharā, 
atthacintā vasānugā. 
Tato pāsādikaṁ āsi, 
gataṁ bhuttaṁ nisevitaṁ; 
Siniddhā teladhārāva, 
ahosi iriyāpatho. 
Sabbāsavaparikkhīṇā, 
mahājhāyī mahāhitā; 
Nibbutā dāni te therā, 
parittā dāni tādisā. 
Kusalānañca dhammānaṁ, 
paññāya ca parikkhayā; 
Sabbākāravarūpetaṁ, 
lujjate jinasāsanaṁ. 
Pāpakānañca dhammānaṁ, 
kilesānañca yo utu; 
Upaṭṭhitā vivekāya, 
ye ca saddhammasesakā. 
Te kilesā pavaḍḍhantā, 
āvisanti bahuṁ janaṁ; 
Kīḷanti maññe bālehi, 
ummattehiva rakkhasā. 
Kilesehābhibhūtā te, 
tena tena vidhāvitā; 
Narā kilesavatthūsu, 
sasaṅgāmeva ghosite. 
Pariccajitvā saddhammaṁ, 
aññamaññehi bhaṇḍare; 
Diṭṭhigatāni anventā, 
idaṁ seyyoti maññare. 
Dhanañca puttaṁ bhariyañca, 
chaḍḍayitvāna niggatā; 
Kaṭacchubhikkhahetūpi, 
akicchāni nisevare. 
Udarāvadehakaṁ bhutvā, 
sayantuttānaseyyakā; 
Kathaṁ vattenti paṭibuddhā, 
yā kathā satthugarahitā. 
Sabbakārukasippāni, 
cittiṁ katvāna sikkhare; 
Avūpasantā ajjhattaṁ, 
sāmaññatthotiacchati. 
Mattikaṁ telacuṇṇañca, 
udakāsanabhojanaṁ; 
Gihīnaṁ upanāmenti, 
ākaṅkhantā bahuttaraṁ. 
Dantaponaṁ kapitthañca, 
pupphaṁ khādaniyāni ca; 
Piṇḍapāte ca sampanne, 
ambe āmalakāni ca. 
Bhesajjesu yathā vejjā, 
kiccākicce yathā gihī; 
Gaṇikāva vibhūsāyaṁ, 
issare khattiyā yathā. 
Nekatikā vañcanikā, 
kūṭasakkhī apāṭukā; 
Bahūhi parikappehi, 
āmisaṁ paribhuñjare. 
Lesakappe pariyāye, 
parikappenudhāvitā; 
Jīvikatthā upāyena, 
saṅkaḍḍhanti bahuṁ dhanaṁ. 
Upaṭṭhāpenti parisaṁ, 
kammato no ca dhammato; 
Dhammaṁ paresaṁ desenti, 
lābhato no ca atthato. 
Saṅghalābhassa bhaṇḍanti, 
saṅghato paribāhirā; 
Paralābhopajīvantā, 
ahirīkā na lajjare. 
Nānuyuttā tathā eke, 
muṇḍā saṅghāṭipārutā; 
Sambhāvanaṁyevicchanti, 
lābhasakkāramucchitā. 
Evaṁ nānappayātamhi, 
na dāni sukaraṁ tathā; 
Aphusitaṁ vā phusituṁ, 
phusitaṁ vānurakkhituṁ. 
Yathā kaṇṭakaṭṭhānamhi, 
careyya anupāhano; 
Satiṁ upaṭṭhapetvāna, 
evaṁ gāme munī care. 
Saritvā pubbake yogī, 
tesaṁ vattamanussaraṁ; 
Kiñcāpi pacchimo kālo, 
phuseyya amataṁ padaṁ. 
Idaṁ vatvā sālavane, 
samaṇo bhāvitindriyo; 
Brāhmaṇo parinibbāyī, 
isi khīṇapunabbhavo”ti. 
… Pārāpariyo thero … 
Vīsatinipāto niṭṭhito. 
Tatruddānaṁ 
Adhimutto pārāpariyo, 
telakāni raṭṭhapālo; 
Mālukyaselo bhaddiyo, 
aṅguli dibbacakkhuko; 
Pārāpariyo dasete, 
vīsamhi parikittitā; 
Gāthāyo dve satā honti, 
pañcatālīsa uttarinti. 

Theragāthā 16.1 
Vīsatinipāta 
Paṭhamavagga 
Adhimuttattheragāthā 
“Yaññatthaṁ vā dhanatthaṁ vā, 
ye hanāma mayaṁ pure; 
Avasesaṁ bhayaṁ hoti, 
vedhanti vilapanti ca. 
Tassa te natthi bhītattaṁ, 
bhiyyo vaṇṇo pasīdati; 
Kasmā na paridevesi,