Luận tạng Tây Tạng (Tengyur) — Tập 210

ིན་ན་འདྲི་བ་པོའི་མངོན་པར་འདོད་པའི་དོན་ཁོང་དུ་ཆུད་པས་དེ་ལུང་བསྟན་པར་འགྱུར་རོ། །གང་ཞིག་མ་བཤད་པར་འདི་མི་རྟོགས་
ལ། བཤད་པས་རྟོགས་པ་དེ་ལ་དེ་ལུང་བསྟན་པས་ལུང་བསྟན་པར་བྱ་སྟེ། དེས་ཞེས་བྱ་བ་ནི་བཙུན་པ་དགའ་བྱེད་དོ། །འདི་ལྟར་གང་ཞིག་ལམ་སྨྲོས་ཤིག་ཅེས་སྨྲ་བ་ལ་དེ་མི་ཤེས་པས་དྲིས་ནས་ལུང་སྟོན་པ་སྟེ་འདི་ནི་ཁྱད་པར་རོ། །དེ་ཉིད་ལ་དྲིས་ནས་རང་གིས་ལུང་སྟོན་

པ་སྟེ། ཇི་ལྟར་ཁྱོད་ཉིད་ལ་དྲིས། ཁྱོད་ཀྱིས་ཇི་ལྟར་ནུས་པ་དེ་བཞིན་དུ་ལན་ཐོབ་ཅིག །དེ་ཇི་སྙམ་དུ་སེམས། གཟུགས་མི་རྟག་པའམ་རྟག་པ་ཡིན་ཞེས་བྱ་བ་དེ་ལྟ་བུ་ལ་སོགས་པ་རྣམས་སོ། །དེ་བཞིན་གཤེགས་པ་ལ་དྲིས་པ་ཁོང་དུ་མི་ཆུད་པ་ལ་ནི་བཅོམ་ལྡན་འདས་ཀྱིས་འདི་
ལུང་དུ་མི་སྟོན་ཏེ་ཅང་མི་གསུང་བར་གྱུར་པ། འདི་ལུང་དུ་སྟོན་པ་གཞན་ཡིན་ནོ། །དེའི་ཕྱིར་འདི་ཁྱད་པར་དང་བཅས་པའི་ལུང་སྟོན་པ་སྟེ་ལུང་སྟོན་པའི་ཐབས་སུ་གྱུར་པ་དྲིས་ནས་ལུང་སྟོན་པ་ཞེས་བྱའོ། །དེ་བཞིན་དུ་གཉིས་ལ་ཞེས་ཚིག་རྣམ་པར་སྦྱར་ཏེ། དེ་རིག་པར་
བྱ་བ་ལ་དྲི་བས་ལུང་བསྟན་པར་བྱ་སྟེ། དྲི་བས་ལུང་སྟོན་པས་ན་འདི་ནི་དྲི་བས་ཞེས་བྱའོ། །ཆེད་དུ་བསམ་པར་བྱ་བའི་ལས་བྱས་ནས་ཅི་ཞིག་སོ་སོར་ཡང་དག་པར་མྱོང་བར་འགྱུར་ཞེས་བྱ་བ་ནི། ཅི་བདེ་བའམ། སྡུག་བསྔལ་ལམ་བདེ་བ་ཡང་མ་ཡིན་སྡུག་བསྔལ་ཡང་
མ་ཡིན་པ་ཞིག་ཅེས་བྱ་བའོ། །རྣམ་པར་ཕྱེ་སྟེ་ལུང་བསྟན་པར་བྱ་སྟེ། ཆེད་དུ་བསམ་པར་བྱ་བའི་ལས་ནི་རྣམ་པ་གསུམ་ཡིན་པའི་ཕྱིར་རོ། །བསམ་གཏན་གསུམ་པའི་བར་གྱི་ཆེད་དུ་བསམ་པར་བྱ་བའི་ལས་དགེ་བ་ཟག་པ་བཅས་པ་བྱས་ནས་ནི་བདེ་བ་ཁོ་ན་སོ་སོར་
ཡང་དག་པར་མྱོང་བར་འགྱུར་རོ། །གཞན་དག་ན་རེ་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ཡང་ངོ་ཞེའོ། །བསམ་གཏན་བཞི་པ་ལ་སོགས་པའི་ཆེད་དུ་བསམ་པར་བྱ་བའི་ལས་བྱས་ནས་ནི་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའོ། །ཆེད་དུ་བསམ་པར་བྱ་
བའི་ལས་མི་དགེ་བ་བྱས་ནས་ནི་སྡུག་བསྔལ་སོ་སོ་ཡང་དག་པར་མྱོང་བར་འགྱུར་རོ། །རགས་པ་ཞེས་བྱ་བ་ནི་གཟུགས་ཅན་ཞེས་བྱ་བའི་དོན་ཏོ། །དེའི་དངོས་པོ་མ་ཡིན་པ་ལ་རྒྱུད་ཀྱི་སྒོ་ནས་ཞེས་བྱ་བ་ལ་དངོས་པོ་རྣམ་པ་དུ་མ་ཡོད་མོད་ཀྱི། འདིར་ནི་ལྡན་པའི་དངོས་པོ་ཁོ་
ན་མངོན་པར་འདོད་དོ། །དེ་ཡང་རྣམ་པ་གཉིས་ཏེ། རྟེན་དང་དམིགས་པ་ངེས་པ་དང་རྣམ་པར་ངེས་པས་སོ། །དེ་ལ་རེ་ཞིག་རྟེན་དང་དམིགས་པ་ངེས་པས་ནི་མིག་གི་རྣམ་པར་ཤེས་པའི་ཕྲ་རྒྱས་རྣམས་ཀྱིས་ནི་དམིགས་པའི་སྒོ་ནས་གཟུགས་དག་དང་ལྡན་པར་བྱེད་ལ། དེ་

དང་མཚུངས་པར་ལྡན་པ་དག་དང་ནི་མཚུངས་པར་ལྡན་པའི་སྒོ་ནས་ལྡན་པར་བྱེད་དོ། །ལུས་ཀྱི་རྣམ་པར་ཤེས་པའི་ཕྲ་རྒྱས་རྣམས་ཀྱིས་ནི་དམིགས་པའི་སྒོ་ནས་རེག་བྱ་དང་ལྡན་པར་བྱེད་ལ། དེ་དང་མཚུངས་པར་ལྡན་པ་དག་དང་ནི་མཚུངས་པར་ལྡན་པའི་སྒོ་
ནས་ལྡན་པར་བྱེད་པའི་བར་དུ་ཡང་དེ་དང་འདྲའོ། །ཡིད་ཀྱི་རྣམ་པར་ཤེས་པའི་ཕྲ་རྒྱས་རྣམས་ཀྱིས་ནི་དམིགས་པའི་སྒོ་ནས་སྐྱེ་མཆེད་བཅུ་གཉིས་དང་ལྡན་པར་བྱེད་ལ། དེ་དང་མཚུངས་པར་ལྡན་པ་དག་དང་ནི་མཚུངས་པར་ལྡན་པའི་སྒོ་ནས་ལྡན་པར་བྱེད་དོ། །ཀུན་འགྲོ་
བ་མ་ཡིན་པ་རྣམས་ཀྱིས་ནི་དམིགས་པའི་སྒོ་ནས་ནི་རང་གི་ས་པ་དག་དང་ལྡན་པར་བྱེད་དོ། །དེ་དག་མཚུངས་པར་ལྡན་པ་དག་ནི་མཚུངས་པར་ལྡན་པའི་སྒོ་ནས་ལྡན་པར་བྱེད་དོ། །དེ་བཞིན་དུ་ཐམས་ཅད་ལ་ཅི་རིགས་པར་ཁོང་དུ་ཆུད་པར་བྱའོ། །འདས་པ་དང་མ་འོངས་
པ་དང་ད་ལྟར་བྱུང་བའི་ངེས་པས་འདས་པ་ནི་གང་དང་ལྡན་ཞེས་བྱ་བ་ནས་ད་ལྟར་བྱུང་བས་ནི་གང་དང་ལྡན་ཞེས་བྱ་བའི་བར་དེ་བརྗོད་པར་བྱ་སྟེ། རང་གི་མཚན་ཉིད་པའི་ཉོན་མོངས་པ་ཞེས་བྱ་བ་ལ། འདོད་ཆགས་ནི་རང་གི་མཚན་ཉིད་པའི་ཉོན་མོངས་པ་ཞེས་བྱ་སྟེ། རང་གི་
མཚན་ཉིད་པའི་ཉོན་མོངས་པ་རྣམས་ནི་དེ་ལ་དམིགས་པའི་བདེ་བ་མྱོང་བར་འགྱུར་བ་ལ་སོགས་པའི་དངོས་པོ་རང་གི་ངོ་བོ་ལས་བདེ་བ་མྱོང་བར་འགྱུར་བ་ཉིད་ཀྱིས་དངོས་པོ་ལ་དམིགས་ཏེ་སྐྱེའོ། །དེ་བཞིན་དུ་ང་རྒྱལ་ཡང་བདེ་བ་མྱོང་བར་འགྱུར་བའི་དངོས་པོ་ལ་དམིགས་པའི་
སེམས་མཐོ་བ་ཡིན་ལ། ཁོང་ཁྲོ་ཡང་སྡུག་བསྔལ་མྱོང་བར་འགྱུར་བའི་དངོས་པོ་ལ་དམིགས་ཏེ་སྐྱེ་བས་དེ་དག་རང་གི་མཚན་ཉིད་པའི་ཉོན་མོངས་པ་ཡིན་ནོ། །ཉོན་མོངས་པ་སྤྱི་པ་ཞེས་བྱ་བ་ལ། དེ་ལ་དམིགས་པའི་ཕྱིར་དེ་དག་ཁྱད་པར་མེད་པར་བདེ་བ་མྱོང་བར་
འགྱུར་བ་ལ་སོགས་པའི་དངོས་པོ་ཐམས་ཅད་ལས་སྐྱེ་བས་ཉོན་མོངས་པ་སྤྱི་པ་ཞེས་བྱའོ། །འདས་པ་དང་ད་ལྟར་བྱུང་བའི་འདོད་ཆགས་དང་ཁོང་ཁྲོ་བ་དང་ང་རྒྱལ་རྣམས་ཞེས་ཁྱད་པར་མེད་པར་བརྗོད་པས་ཅི་རིགས་པར་རྣམ་པར་ཤེས་པའི་ཚོགས་དྲུག་པ་དག་ཡིན་

པར་ཤེས་པར་བྱའོ། །དངོས་པོ་གང་ལ་ཞེས་བྱ་བས་སྡུག་བསྔལ་དང་ཀུན་འབྱུང་དང་། འགོག་པ་དང་ལམ་མཐོང་བས་སྤང་བར་བྱ་བ་དུས་གསུམ་པ་དང་བསྒོམ་པ་དང་སྤང་བར་བྱ་བའི་དངོས་པོ་ལ་ཞེས་སྟོན་ཏོ། །དངོས་པོ་དེ་དང་ཞེས་བྱ་བ་ནི་བཤད་མ་ཐག་པའི་དངོས་པོ་ཁོ་ན་དང་
སྦྱར་ཏེ། དེ་དག་ནི་རང་གི་མཚན་ཉིད་པའི་ཉོན་མོངས་པ་ཡིན་པའི་ཕྱིར་ཐམས་ཅད་ཀྱི་ཐམས་ཅད་ལ་གདོན་མི་ཟ་བར་མི་སྐྱེ་བས་གང་ལ་སྐྱེས་པ་ཞེས་ཁྱད་པར་དུ་བྱས་སོ། །ཡིད་ཀྱི་དེ་དག་མ་འོངས་པས་ཀུན་དང་ཞེས་བྱ་བ་ལ། ཉོན་མོངས་པ་གང་ཞིག་འདས་པའི་རྣམ་པ་སྤང་པ་
དང་མ་འོངས་པ་དེ་དང་དེ་སྤང་བ་ཉིད་ཡིན་པས་དེའི་ཕྱིར་ཁྱད་པར་དུ་བྱས་སོ། །གང་དུ་སྤངས་པ་དེ་ཞེས་བྱ་བ་ལ་དངོས་པོ་ཐམས་ཅད་ལ་ཞེས་བྱ་བ་ནི། དེ་ལ་དམིགས་པ་རྣམས་ལ་སྐྱེ་བ་སྲིད་པའི་ཕྱིར་ཏེ། ཡིད་ཀྱི་ཡུལ་ནི་དུས་གསུམ་ཡིན་པའི་ཕྱིར་རོ། །གཞན་གྱིས་རང་དུས་པ་
ཞེས་བྱ་བ་ལ། རྣམ་པར་ཤེས་པའི་ཚོགས་ལྔ་པའི་འདོད་ཆགས་ལ་སོགས་པ་དག་ནི་རང་གི་དུས་པ་ཁོ་ན་ལ་དམིགས་ནས་སྐྱེ་སྟེ། དེའི་ཕྱིར་མ་འོངས་པ་དེ་དག་གི་དམིགས་པ་ནི་མ་འོངས་པ་ཁོ་ནའོ། །ད་ལྟར་བ་རྣམས་ཀྱི་ནི་ད་ལྟར་བ་ཡིན་ལ། འདས་པ་རྣམས་ཀྱི་ནི་འདས་པ་
མ་ཡིན་པས། དེ་དག་གིས་རང་གི་ས་པའི་དམིགས་པ་ཁོ་ན་དང་ལྡན་ནོ། །མི་སྐྱེ་བ་རྣམས་ཀྱི་ཐམས་ཅད་དང་ཞེས་བྱ་བ་ལ། རྣམ་པར་ཤེས་པའི་ཚོགས་ལྔ་པའི་འདོད་ཆགས་ལ་སོགས་པ་མི་སྐྱེ་བའི་ཆོས་ཅན་རྣམས་ལས་ནི། ཁ་ཅིག་གི་དམིགས་པ་ནི་འདས་པ་ཡིན་
ལ། ཁ་ཅིག་གི་ནི་ད་ལྟར་བ་ཡིན་ཞིང་ཁ་ཅིག་གི་ནི་མ་འོངས་པ་ཡིན་ནོ། །དེའི་ཕྱིར་དེ་དག་གིས་ཐམས་ཅད་དང་ལྡན་པར་བརྗོད་དོ། །ལྷག་མ་ཀུན་གྱིས་ཀུན་དང་ལྡན་ཞེས་བྱ་བ་ལ། འདས་པ་དང་མ་འོངས་པ་དང་ད་ལྟར་བ་རྣམས་ཀྱིས་སོ། །ཀུན་དང་ལྡན་ཞེས་བྱ་བ་ནི་དངོས་
པོ་དུས་གསུམ་པ་རྣམ་པ་ལྔ་ཆར་ཡང་ངོ་། །དེ་ཉིད་ལ་རྒྱུ་སྨྲས་པ་ནི། ཉོན་མོངས་པ་སྤྱི་པ་ཡིན་པའི་ཕྱིར་ཞེས་བྱ་བའོ། །དེ་དག་ནི་ཐམས་ཅད་ཀྱི་དངོས་པོ་ཐམས་ཅད་ལས་སྐྱེ་སྟེ། དེས་ན་འདས་པ་རྣམས་ཀྱང་འདས་པ་དང་མ་འོངས་པ་དང་ད་ལྟར་འབྱུང་བའི་དངོས་པོ་དང་ལྡན་

ནོ། །དེ་བཞིན་དུ་མ་འོངས་པ་རྣམས་དང་ད་ལྟར་བ་རྣམས་ཀྱིས་ཀྱང་འདས་པ་དང་མ་འོངས་པ་དང་ད་ལྟར་བའི་དངོས་པོ་དང་ལྡན་ནོ། །ཅི་འདས་པ་དང་མ་འོངས་པ་འདི་རྫས་སུ་ཡོད་དམ་ཞེས་བྱ་བ་ནི་ད་ལྟར་བ་དང་འདྲ་བར་རང་གི་ངོ་བོ་དང་རང་གི་མཚན་ཉིད་ཀྱིས་
ཡོད་དམ་འོན་ཏེ་མེད་ཅེས་བྱ་བ་ནི་ད་ལྟར་བ་ལྟར་རང་གི་ངོ་བོས་མེད་ཅེས་བྱ་བའོ། །འོ་ན་མ་འོངས་པ་ནི་རང་གི་ངོ་བོས་མ་ཐོབ་པའི་ཕྱིར་དང་། འདས་པ་ནི་རང་གི་ངོ་བོ་འགག་པའི་ཕྱིར་དུས་ཐམས་ཅད་དུ་ཡོད་པ་ཞེས་བྱ་བ་ཅི། ད་ལྟར་བ་ཉིད་འདས་པ་དང་མ་འོངས་པའི་གནས་སྐབས་
དག་ན་ཡང་ཡོད་ན་རྟག་པ་ཉིད་དུ་ཐལ་བར་འགྱུར་རོ། །ཇི་ལྟར་དེ་དང་ཞེས་བྱ་བ་ནི་འདས་པ་དང་མ་འོངས་པའི་དངོས་པོ་དང་ངོ་། །དེས་ཞེས་བྱ་བ་ནི་འདས་པ་དང་མ་འོངས་པའི་ཉོན་མོངས་པས་སོ། །ལྡན་པ་འམ་བྲལ་བ་མ་ཡིན་ཞེས་བྱ་བ་ལ། མེད་པ་ནི་མེད་པ་དང་ལྡན་པའམ་
བྲལ་བར་མི་རུང་སྟེ། གཉི་ག་ཡང་ཅི་ཡང་མེད་པའི་ཕྱིར་རོ། །འདུས་བྱས་ཀྱི་མཚན་ཉིད་དང་ལྡན་པའི་ཕྱིར་འདུས་བྱས་རྣམས་རྟག་པ་ཉིད་དུ་དམ་མི་འཆའི་ཞེས་བྱ་བ་ལ་འདུས་བྱས་ཀྱི་ཆོས་རྣམས་ནི་འདུས་བྱས་ཀྱི་མཚན་ཉིད་ཀྱི་སྒོ་ནས་དུས་སུ་འཕོ་བར་འཇུག་པ་ཡིན་
ལ། དུས་དག་ལ་འཇུག་པ་རྣམས་ནི་རྟག་པ་ཉིད་དུ་ཡང་མི་རུང་ངོ་། །གསལ་བ་དམ་འཆའོ་ཞེས་བྱ་བ་ནི་ད་ལྟར་བ་ལྟར་རང་གི་ངོ་བོས་ཡོད་པ་ཉིད་དུའོ། །ཅིའི་ཕྱིར་དེ་རྣམས་ཀྱིས་དེ་དེ་ལྟར་དམ་འཆའ་སྟེ་ཅི་ལུང་ངམ་རིགས་པའམ། གཉི་ག་ལ་བརྟེན་ནས་ཡིན་ཞེས་བྱ་བ་ནི་
འདྲི་བའི་བསམ་པའོ། །གསུངས་ཕྱིར་ཞེས་བྱ་བས་རེ་ཞིག་ལུང་སྟོན་པ་སྟེ། གང་གི་ཕྱིར་འདས་པའི་གཟུགས་ཡོད་ཅིང་མ་འོངས་པའི་གཟུགས་ཡོད་པ་ཞེས་མགུར་ནས་འདས་པ་དང་མ་འོངས་པ་ཡོད་པ་ཉིད་དུ་གསུངས་སོ། །ཅིའི་ཕྱིར་ད་ལྟར་བྱུང་བ་ཉེ་བར་མ་བཀོད་ཅེ་ན།
དགེ་སློང་དག་ད་ལྟར་བྱུང་བའི་གཟུགས་ཡོད་པར་མ་གྱུར་ན་འཕགས་པ་ཉན་ཐོས་ཐོས་པ་དང་ལྡན་པ་དག་ཡིད་འབྱུང་བ་དང་འདོད་ཆགས་དང་བྲལ་བ་དང་འགག་པའི་ཕྱིར་འཇུག་པར་མི་འགྱུར་རོ་ཞེས་གཉི་ག་ལ་མི་མཐུན་པ་སྨྲ་བ་མེད་པའི་ཕྱིར་རོ། །གཉིས་ལ་བརྟེན་ནས་ཞེས་བྱ་

བ་རྒྱས་པར་འབྱུང་བ་ལ། འདིར་འདས་པ་དང་མ་འོངས་པ་ཡོད་པ་ཉིད་དུ་དོན་གྱིས་གསུངས་སོ་ཞེས་བྱ་བ་ནི་སྔར་དངོས་སུ་གསུངས་པ་ལས་ཁྱད་པར་ཡིན་ནོ། །འདིར་ནི་མིག་དང་གཟུགས་ལ་བརྟེན་ནས་ཡིད་དང་ཆོས་ཀྱི་བར་ལ་བརྟེན་ནས་ཞེས་རྣམ་པར་ཤེས་པ་དྲུག་གིས་རྟེན་དང་
དམིགས་པ་ངེས་པར་བརྗོད་ན། གལ་ཏེ་ཁྱད་པར་མེད་པར་བརྗོད་ཀྱང་། ཡུལ་མེད་པར་ཡང་རྣམ་པར་ཤེས་པ་སྐྱེ་བར་རྟོག་ན་ནི། དེ་ལྟར་ན་ལོང་བ་ལ་སོགས་པ་རྣམས་ལ་རྟེན་མེད་པར་ཡང་རྣམ་པར་ཤེས་པ་སྐྱེ་བར་ཅི་སྟེ་མི་རྟོག །ཁྱད་པར་གྱི་རྒྱུ་མེད་པའི་ཕྱིར་རོ། །དངོས་པོ་
མེད་པ་ཡུལ་དྲུག་གི་ཁོངས་སུ་མ་འདུས་པས་དངོས་པོ་མེད་པའི་ཡུལ་ཅན་གྱི་བློ་ཡོད་པ་མ་ཡིན་ནོ། །དེ་བས་ན་དམིགས་པ་མེད་པའི་ཕྱིར་རྣམ་པར་ཤེས་པ་ཉིད་དུ་ཡང་མི་འགྱུར་རོ་ཞེས་བྱ་བ་ལ། རྣམ་པར་ཤེས་པ་ནི་དངོས་པོ་སོ་སོར་རྣམ་པར་རིག་པ་ཡིན་ན་རྣམ་པར་ཤེས་པར་
བྱ་བ་མེད་ན་ནི་འདིས་ཅུང་ཟད་ཀྱང་རྣམ་པར་མི་ཤེས་པས་དེས་ན་རྣམ་པར་ཤེས་པ་ཉིད་དུ་ཡང་མི་འགྱུར་རོ། །རང་དང་སྤྱིའི་མཚན་ཉིད་མེད་ན་དེས་ཅི་ཞིག་ཁོང་དུ་ཆུད་པར་བྱ་ཞིང་རྣམ་པར་ཤེས་པར་བྱ་བ་ཡིན། འབྲས་བུ་སྐྱེ་བའི་ཚེ་ནི་ཞེས་བྱ་བ་རྒྱས་པར་འབྱུང་སྟེ། དགེ་བ་
དང་མི་དགེ་བའི་ལས་འགགས་ནས་ཡུན་རིང་དུ་ལོན་པའི་ཕྱིར་འགགས་ན་ནི་ཡོད་པ་མ་ཡིན་ལ། དེ་ལྟ་ཡིན་ན་རྒྱུ་མེད་པའི་ཕྱིར་རྣམ་པར་སྨིན་པའི་འབྲས་བུ་མི་སྐྱེ་བ་ཞིག་གོ །རྒྱུ་མེད་པ་ནི་སྐྱེ་བར་མི་འགྱུར་ཏེ་ཧ་ཅང་ཐལ་བར་འགྱུར་བའི་ཕྱིར་རོ། །གདོན་མི་ཟ་བར་འདི་ཁས་
བླང་བར་བྱ་བ་དགོས་སོ་ཞེས་གྲག་སྟེ་ཞེས་བྱ་བ་རྒྱས་པར་འབྱུང་སྟེ། ཐམས་ཅད་ཡོད་པར་སྨྲ་བ་ཞེས་བྱ་བའི་སྒྲ་ནི་བྱ་བའི་རྒྱུ་མཚན་ཅན་ཡིན་པའི་ཕྱིར་རོ། །དེ་ཉིད་ཀྱི་ཕྱིར། དེ་ཡོད་སྨྲ་བའི་ཕྱིར་ཐམས་ཅད་ཡོད་པར་སྨྲ་བ་ཞེས་བྱ་བ་སྨོས་སོ། །དུས་གསུམ་ལ་ཐམས་ཅད་ཀྱི་
སྒྲ་ངེས་པར་བཀོད་པའི་ཕྱིར་ཐམས་ཅད་ཀྱི་སྒྲས་དུས་གསུམ་བརྗོད་དོ། །སྡེ་པ་གཞན་འབྲས་བུ་མ་སྐྱེས་པ་ཡོད་པ་ཉིད་སྨྲ་བ་རྣམས་ནི་རྣམ་པར་ཕྱེ་སྟེ་སྨྲ་བའོ། །མདོ་སྡེ་པ་རྣམས་ནི་ད་ལྟར་བྱུང་བ་ཙམ་སྨྲ་བའོ། །ཆོས་དུས་རྣམས་སུ་འཇུག་པ་ན་དངོས་པོ་གཞན་དུ་འགྱུར་གྱི་ཞེས་

བྱ་བ་ནི་མ་འོངས་པ་ལ་སོགས་པའི་དངོས་པོ་གཞན་དུ་འགྱུར་བ་སྟེ། འདིར་མ་འོངས་པའི་དངོས་པོ་འདོར་ཞིང་ད་ལྟར་བའི་དངོས་པོར་འགྱུར་ལ། ད་ལྟར་བྱུང་བའི་དངོས་པོ་འདོར་ཞིང་འདས་པའི་དངོས་པོར་འགྱུར་རོ། །རྫས་གཞན་དུ་འགྱུར་བ་ནི་མ་ཡིན་ནོ་ཞེས་
བྱ་བ་ནི་རྫས་ཀྱི་རང་གི་མཚན་ཉིད་གཞན་དུ་འགྱུར་བ་མ་ཡིན་པ་སྟེ། དངོས་པོ་དུས་རྣམས་སུ་འཇུག་པ་ནི་རང་བཞིན་འཁྲུལ་པ་མེད་པའི་ཕྱིར་རོ། །གཞན་དུ་གཞན་ཉིད་དུ་སྟེ། མ་འོངས་པ་ལས་གཞན་ད་ལྟར་བྱུང་བ་ལ་སོགས་པ་དང་འདས་པ་ཞེས་བྱ་བར་དེ་ཐལ་བར་འགྱུར་རོ། །
ཡང་མ་འོངས་པ་ལ་སོགས་པའི་དངོས་པོ་འདི་ཅི་ཞིག་ཅེ་ན། གང་ལས་འདས་པ་དང་མ་འོངས་པ་དང་ད་ལྟར་བྱུང་བའི་ཤེས་པ་དང་བརྗོད་པ་འཇུག་པའི་ཡོན་ཏན་གྱི་ཁྱད་པར་རོ། །དཔེར་ན་གསེར་གྱི་སྣོད་ཅེས་བྱ་བ་ནི་དེ་ཉིད་ལ་དཔེ་གཉིས་པོ་གསེར་དང་འོ་མ་སྟེ། འདི་ལྟར་གཉི་
ག་ཡང་ཁ་དོག་ལ་སོགས་པ་ཚོགས་པའི་བདག་ཉིད་ཡིན་ལ། དེ་ལ་ཡང་དཔུང་རྒྱན་དང་གདུ་བུ་ལ་སོགས་པ་བརྗོད་པའི་རྒྱུ་མཚན་ཡོན་ཏན་དང་དབྱིབས་ཀྱི་བདག་ཉིད་ཙམ་ཁོ་ན་ཞིག་གཞན་དུ་འགྱུར་བ་ཡིན་གྱི་ཁ་དོག་ནི་མ་ཡིན་ནོ། །དེ་བཞིན་དུ་འོ་མ་དང་ཞོ་དང་དར་བ་ལ་སོགས་
པ་བརྗོད་པའི་རྒྱུ་མཚན་རོ་དང་ནུས་པ་དང་སྨིན་པར་བྱེད་པ་དང་། མཐུ་རྣམས་གཞན་དུ་འགྱུར་བ་ཉིད་ཡིན་གྱི་ཁ་དོག་ནི་མ་ཡིན་ནོ། །མཚན་ཉིད་གཞན་དུ་འགྱུར་བ་ནི་མཚན་ཉིད་འཇུག་པ་ལ་ཐོབ་པ་ལ་བལྟོས་ནས་ཐ་སྙད་འདོགས་ཏེ། དཔེར་ན་སྐྱེས་བུ་ཞེས་བྱ་བ་ལ། དེའི་
རང་བཞིན་གྱི་ཁྱད་པར་གྱིས་འདོད་ཆགས་དང་བྲལ་བའི་འཇུག་པ་ཐོབ་པ་དང་མ་ཐོབ་པ་ནི་ཁྱད་པར་རོ། །གལ་ཏེ་མ་འོངས་པ་དང་འདས་པ་དང་ད་ལྟར་བྱུང་བ་དག་མི་ལྡན་པར་གྱུར་པ་དེ་ལྟ་ན་མ་འོངས་པ་ཉིད་འབྱུང་བ་མ་ཡིན་ཞིང་འདས་པར་ཡང་མི་འགྱུར་རོ། །འདས་
པ་དང་མ་འོངས་པ་ད་ལྟར་བྱུང་བ་མི་ལྡན་པར་གྱུར་པས་མ་འོངས་པ་དང་ད་ལྟར་བྱུང་བ་དང་འདས་པར་ཡང་མི་འགྱུར་ཞིང་། གལ་ཏེ་ད་ལྟར་བྱུང་བ་དང་འདས་པ་དང་མ་འོངས་པ་དག་མི་ལྡན་པར་གྱུར་པས་མ་འོངས་པ་ཉིད་ད་ལྟར་བྱུང་བ་དང་ད་ལྟར་བྱུང་བ་ཉིད་འདས་པ་

ཞེས་བྱ་བར་མི་འགྱུར་རོ། །གནས་སྐབས་ལས་གནས་སྐབས་ཐོབ་པ་སྟེ། མ་འོངས་པའི་གནས་སྐབས་ལ་མ་འོངས་པ་ཞེས་བྱའི་དེ་ད་ལྟར་བྱུང་བ་མ་ཡིན་ཞིང་འདས་པ་མ་ཡིན་ནོ། །དེ་བཞིན་དུ་ད་ལྟར་བྱུང་བ་དང་འདས་པ་ལ་ཡང་བརྗོད་པར་བྱའོ། །རྫས་གཞན་ཞེས་བྱ་བ་
རྫས་གཞན་གྱི་སྒོ་ནས་ནི་མ་ཡིན་ཏེ་ཞེས་བྱ་བ་ནི་རྫས་ནི་དུས་གསུམ་ཆར་དུ་ཡང་ཐ་དད་པའི་ཕྱིར་རོ། །འདི་གནས་སྐབས་ལ་བལྟོས་ནས་ཐ་སྙད་བརྗོད་དེ། དེ་ཉིད་ཀྱི་ཕྱིར་དཔེར་ན་རི་ལུ་གཅིག་ཅེས་བྱ་བ་ལ་སྨོས་ཏེ་སའི་རི་ལུའོ། །གཅིག་གི་ཤོང་མིག་ཏུ་ཞེས་བྱ་བ་ནི་གཅིག་གི་གནས་
སུའོ། །བརྒྱའི་ཤོང་མིག་ཏུ་ཞེས་བྱ་བ་ནི་བརྒྱའི་གནས་སུའོ། །སྟོང་གི་ཤོང་མིག་ཏུ་ཞེས་བྱ་བ་ནི་སྟོང་གི་གནས་སུའོ། །དེ་རང་བཞིན་གཞན་དུ་འགྱུར་བ་ནི་མ་ཡིན་གྱི། འོ་ན་ཅི་ཞེ་ན། གནས་ཀྱི་ཁྱད་པར་དང་འབྲེལ་པ་ལས་གྲངས་སྟོན་པར་བྱེད་པའི་མིང་གཞན་དུ་འབྱུང་
ངོ་། །གཞན་དང་གཞན་དུ་འགྱུར་བ་ནི་ཞེས་བྱ་བ་ལ་སོགས་པ་ལ། སྔ་མ་དང་ཕྱི་མ་ལ་བལྟོས་ནས་གཞན་དང་གཞན་ཞེས་བརྗོད་ཀྱི། རང་བཞིན་གཞན་དུ་འགྱུར་བ་མ་ཡིན་ཞིང་། རྫས་གཞན་དུ་འགྱུར་བ་ནི་མ་ཡིན་ཏེ། འདས་པ་དང་ད་ལྟར་བ་ལ་བལྟོས་ནས་ཕྱི་མ་མ་འོངས་
པ་ཞེས་བྱ་བ་ལ། ད་ལྟར་བ་དང་མ་འོངས་པ་ལ་བལྟོས་ནས་སྔ་མ་འདས་པ་ཞེས་བྱ་ཞིང་། སྔ་མ་དང་ཕྱི་མ་སྟེ་འདས་པ་དང་མ་འོངས་པ་ལ་བལྟོས་ནས་ད་ལྟར་བ་ཞེས་བྱའོ། །འདི་ནི་སྔ་མ་དང་ཕྱི་མ་ལ་བལྟོས་ནས་ཐ་སྙད་བརྗོད་དོ། །གང་ལ་སྔ་མ་ཁོ་ན་ཡོད་ཀྱི། ཕྱི་མ་མེད་
པ་དེ་ནི་མ་འོངས་པ་ཡིན་ལ། གང་ལ་ཕྱི་མ་ཁོ་ན་ཡོད་ཀྱི་སྔ་མ་མེད་པ་དེ་ནི་འདས་པ་ཡིན་ཞིང་། གང་ལ་སྔ་མ་དང་ཕྱི་མ་ཡོད་པ་དེ་ནི་ད་ལྟར་བ་ཡིན་ནོ། །གཞན་དག་ན་རེ་དུ་ཙམ་གྱི་སྔ་མ་དང་ཕྱི་མ་ནི་འདིས་འཆད་པར་འདོད་པ་མ་ཡིན་ནོ་ཞེས་ཟེར་རོ། །དེ་ཉིད་ཀྱི་ཕྱིར་བུད་མེད་
གཅིག་ལ་མ་ཞེས་ཀྱང་བྱ་བུ་མོ་ཞེས་ཀྱང་བྱ་བ་བཞིན་ནོ་ཞེས་བྱ་བ་བརྗོད་དེ། སྔ་མ་དང་ཕྱི་མ་ལ་བལྟོས་ནས་ཡིན་གྱི་རྫས་ནི་མ་ཡིན་ནོ། །ཡོངས་སུ་འགྱུར་བར་སྨྲ་བའི་ཕྱིར་ཞེས་བྱ་བ་ལ་སོགས་པ་འབྱུང་སྟེ། གྲངས་ཅན་གྱི་བཞིན་དུ་འོ་མའི་ཆོས་བཏང་ནས་ཞོའི་ཆོས་ཀྱི་

བདག་ཉིད་དུ་རྣམ་པར་གནས་པར་འགྱུར་ལ། ཞོའི་ཆོས་ཡོངས་སུ་བཏང་ནས། དར་བ་ལ་སོགས་པའི་བདག་ཉིད་དུ་ཡོངས་སུ་འགྱུར་རོ་ཞེས་བྱ་བ་ཡིན་པ་དེ་བཞིན་དུ་འདིའི་ཡང་རྫས་ནི་མ་འོངས་པའི་དངོས་པོ་ཡོངས་སུ་དོར་ནས་ད་ལྟར་བའི་དངོས་པོར་
འགྱུར་ལ། ད་ལྟར་བའི་དངོས་པོ་ཡོངས་སུ་དོར་ནས་ཀྱང་འདས་པའི་དངོས་པོར་འགྱུར་ཞིང་། མ་འོངས་པ་ལ་སོགས་པའི་དངོས་པོ་རྣམས་རྫས་ལ་དོན་གཞན་ཉིད་ཀྱང་མ་ཡིན་ནོ་ཞེས་བྱ་བ་ཡིན་ནོ། །གྲངས་ཅན་གྱི་ཕྱོགས་ལ་བསླན་པར་བྱའོ་ཞེས་བྱ་བ་ནི་དེའི་དགག་པ་
གང་ཡིན་པ་དེ་ནི་འདིའི་ཡང་ཡིན་ནོ་ཞེས་བསྟན་པ་ཡིན་ལ། སློབ་དཔོན་འདུས་བཟང་ན་རེ། མ་མ་ཏུ་ནི་ཏཏྤྲ་ཏི་བྷཱ་ཏི་ཞེས་ཟེར་རོ། །ཅིའི་ཕྱིར་ཞེ་ན། འདྲ་བ་རྗེས་སུ་འཇུག་པ་ལ་དགོངས་ནས་དེ་ལྟར་བཤད་དོ། །གནས་པའི་ཆོས་གཞན་ལྡོག་པ་དང་ཆོས་གཞན་སྐྱེ་བ་ནི་མ་ཡིན་
ནོ། །བཙུན་པ་དབྱིག་བཤེས་ཀྱི་འདོད་པའི་རྣམ་གྲངས་འདི་ཉིད་གསེར་དང་འོ་མའི་དཔེས་བསྟན་བདག་ནི་གསལ་བ་མིན་ནོ། པའི་ཕྱིར། འདི་ཡོངས་སུ་འགྱུར་བ་སྨྲ་བ་མ་ཡིན་ཞེས་བྱ་བ་ཚིག་ཙམ་མོ། བཙུན་པ་དབྱིག་བཤེས་ཀྱི་ཕྱོགས་ལས་ཡང་གལ་ཏེ་སྔ་མའི་ཆོས་ཀྱི་གནས་
སྐབས་བཏང་ནས་ཕྱི་མའི་གནས་སྐབས་སྒྲུབ་པ་འདི་ཡང་ཡོངས་སུ་འགྱུར་བར་སྨྲ་བ་ལས་ཐ་དད་པ་མ་ཡིན་ནོ། །འོན་ཏེ་སྔ་མའི་གནས་སྐབས་ཡོངས་སུ་བཏང་བ་དེ་ལྟ་ན་ཡང་གནས་སྐབས་འཆོལ་བས་དུས་འཆོལ་བར་ཐལ་བར་འགྱུར་རོ། །ཅི་སྟེ་ད་ལྟར་བྱུང་བ་ཅུང་ཟད་ཀྱང་
འབྱུང་བ་དང་ལྡོག་པ་མེད་པ་དེ་ལྟ་ན་ཡང་ཇི་ལྟར་སྔ་མ་དང་ཕྱི་མར་ཁྱད་པར་རྣམ་པར་གཞག་ཅེས་བརྗོད་པར་བྱ། ཐམས་ཅད་ལ་མཚན་ཉིད་ཐམས་ཅད་དང་ལྡན་པའི་ཕྱིར་ཞེས་བྱ་བ་ནི། ལྡན་པ་དང་མི་ལྡན་པའི་སྒྲ་དག་དོན་གཅིག་པའི་ཕྱིར་ཐམས་ཅད་ལ་མཚན་ཉིད་ཐམས་ཅད་ལྡན་
ནོ། །ཅི་སྟེ་ཐོབ་པའི་འཇུག་པ་ལྡན་པར་བརྗོད་ན། ཅིག་ཤོས་དང་ཅིག་ཤོས་མི་ལྡན་པ་ཞེས་བྱ་བའི་དོན་མཚུངས་པ་ཉིད་མེད་དོ། །དེ་ལ་ཁ་ཅིག་ལ་མཚན་ཉིད་ཅུང་ཟད་ཀུན་ཏུ་སྤྱོད་པ་དོན་གཞན་དུ་གྱུར་པ་མེད་པས་དེ་ག་ལ་ལྡན་ཏེ་ཅིག་ཤོས་ལ་མི་ལྡན་ནོ། །སྐྱེས་བུ་ཞེས་བྱ་བ་

རྒྱས་པར་འབྱུང་སྟེ། སྐྱེས་བུ་བུད་མེད་ཀྱི་གོང་དུ་གཞན་ལ་འདོད་ཆགས་ཀུན་ཏུ་འབྱུང་ཞིང་ཤས་ཆེ་བ་ནི་བུད་མེད་ལ་ཆགས་པ་ཞེས་བྱ་ལ། ལྡན་པའི་སྒོ་ནས་ནི་འདོད་ཆགས་དང་བྲལ་བ་ཞེས་བྱ་ན། ཆོས་ལ་ནི་མཚན་ཉིད་ཀུན་ཏུ་འབྱུང་བ་འམ་མཚན་ཉིད་དང་མི་ལྡན་པ་མེད་དེ། ཆོས་
རྣམས་ཀྱི་མཚན་ཉིད་དག་ནི་དུས་རྣམས་སུ་འཁྲུལ་པ་མེད་པའི་ཕྱིར་རོ། །དེའི་ཕྱིར་འདིར་དཔེ་ལ་དངོས་དང་མཚུངས་པ་ཅི་ཞིག་ཡོད། གང་གི་ཚེ་ཆོས་དེ་བྱ་བ་མི་བྱེད་པ་དེའི་ཚེ་ནི་མ་འོངས་པ་ཡིན་ལ་ཞེས་བྱ་བ་རྒྱས་པར་འབྱུང་སྟེ། བྱ་བ་ཡང་མི་ལ་སོགས་པ་རྣམས་ཀྱི་ནི་ལྟ་བ་
ལ་སོགས་པའོ། །རྣམ་པར་ཤེས་པའི་ནི་རྣམ་པར་ཤེས་པའོ། །གཟུགས་ལ་སོགས་པ་རྣམས་ཀྱིས་ནི་རང་གི་དབང་པོའི་སྤྱོད་ཡུལ་ཉིད་དོ། །གལ་ཏེ་འདས་པ་ཡང་རྫས་སུ་ཡོད་ལ་ཞེས་བྱ་བ་རྒྱས་པར་འབྱུང་སྟེ། གལ་ཏེ་འདས་པ་དང་མ་འོངས་པ་ད་ལྟར་བ་བཞིན་དུ་
རང་གི་ངོ་བོ་ནས་ཡོད་ན་ནི། ད་ལྟར་བ་དང་ཁྱད་པར་འགའ་ཡང་ཡོད་པ་མ་ཡིན་པས་དེའི་འདས་པ་དང་མ་འོངས་པ་ཉིད་འདས་པར་འགྱུར་རོ་སྙམ་དུ་དགོངས་སོ། །ཡོད་ཀྱང་ད་ལྟར་ལས་ཁྱད་པར་ཡོད་པར་བསྟན་པའི་ཕྱིར་བྱའི་དུས་རྣམས་རྣམ་གཞག་ཅེས་བཤད་པ་མ་
ཡིན་ནམ་ཞེས་བྱ་བ་རྒྱས་པར་སྨྲས་སོ། །གལ་ཏེ་དེ་ལྟ་ན་ད་ལྟར་བྱུང་བའི་ཞེས་བྱ་བ་ལ་སོགས་པ་ལ་མིག་གི་བྱ་བ་ནི་ལྟ་བ་ཡིན་ན་དེ་ཡང་དེ་དང་མཚུངས་པར་བྱེད་པ་མ་ཡིན་པས་དེའི་ཚེ་ད་ལྟར་བ་ཡང་མ་འོངས་པར་འགྱུར་བའི་ཕྱིར་བྱ་བའི་དུས་རྣམ་པར་གཞག་པ་མི་རིགས་སོ་ཞེས་
བྱ་བ་ནི་འདྲི་བའི་བསམས་པའོ། །འབྲས་བུ་འབྱིན་པ་དང་འཛིན་པ་ཡིན་ནོ་ཞེས་བྱ་བས་ནི། འདི་སྐད་དུ་ལྟ་བ་ལ་སོགས་པའི་བྱ་བས་ནི་དུས་རྣམ་པར་གཞག་པ་མ་ཡིན་གྱི། འོ་ན་ཅི་ཞེ་ན་འབྲས་བུ་འབྱིན་པ་དང་འཛིན་པའི་བདག་ཉིད་ཀྱིས་ཡིན་ཏེ། འཁྲུལ་པ་མེད་པའི་ཕྱིར་
རོ་ཞེ་ན་བསྟན་པར་འགྱུར་ཏེ་ལྷན་ཅིག་འབྱུང་བའི་ཆོས་རྣམས་ནི་དེའི་སྐྱེས་བུ་བྱེད་པའི་འབྲས་བུ་ཡིན་ལ། དེ་མ་ཐག་ཏུ་འབྱུང་བའི་མིག་གི་དབང་པོ་ནི་སྐྱེས་བུ་བྱེད་པའི་འབྲས་བུ་དང་རྒྱུ་མཐུན་པའི་འབྲས་བུ་ཡིན་ནོ། །འབྲས་བུ་དེ་ཡང་འབྱིན་པ་དང་འཛིན་པ་ན་ད་ལྟར་བ་ཞེས་

བྱའོ། །འོ་ན་ནི་སྐལ་བ་མཉམ་པའི་རྒྱུ་ལ་སོགས་པ་ཞེས་བྱ་བ་ནི། སྐལ་བ་མཉམ་པ་དང་། ཀུན་ཏུ་འགྲོ་བ་དང་། རྣམ་པར་སྨིན་པའི་རྒྱུ་རྣམས་སོ། །འབྲས་བུ་འབྱིན་པའི་ཕྱིར་དང་ཞེས་བྱ་བ་ལ་རྒྱུ་མཐུན་པ་དང་། གལ་ཏེ་བྱ་བ་སོ་སོ་བར་འདོད་ན་བྱ་བ་ཡོད་
པར་ཐལ་བར་འགྱུར་ལ། དེའི་ཕྱིར་འདས་པ་ཡང་ད་ལྟར་བ་ཉིད་དུ་ཐལ་བར་འགྱུར་རོ། །བྱ་བ་བྱེད་དུ་ཞེས་བྱ་བ་ལ་གལ་ཏེ་འབྲས་བུ་འབྱིན་པ་དང་འཛིན་པ་མཐའ་དག་བྱ་བར་འདོད་ན། དེ་ལྟ་ན་བྱ་བ་ཡང་སྔ་མ་བཞིན་དུ་སྔ་མ་ཉིད་དུ་འགྱུར་རོ། །སློབ་དཔོན་འདུས་བཟང་ན་རེ། དངོས་པོ་
རྣམས་ཀྱིས་བྱ་བའི་འབྲས་བུ་འཕེན་པའི་ནུས་པ་ནི་འབྲས་བུ་འབྱིན་པ་མ་ཡིན་པས་མཚན་ཉིད་འཆོལ་བ་མེད་དོ་ཞེས་ཟེར་རོ། །ནུས་པ་འབའ་ཞིག་བྱ་བ་ཉིད་མ་ཡིན་ཏེ། འོ་ན་ཅི་ཞེ་ན། དེ་ལས་ཐ་དད་པའི་ནུས་པ་ཡང་ཡོད་དོ། །དེ་བཞིན་དུ་མིན་པ་ལ་མིག་ལས་ཐ་དད་པའི་ནུས་
པ་འཇོམས་པའི་བྱ་བ་མེད་པས། །གང་ཡང་འགགས་པ་སྐྱེས་པ་འདུས་བྱས་ཀྱི་ཆོས་རྣམས་ཀྱི་མཐུའི་ཁྱད་པར་དངོས་པོ་གཞན་སྐྱེས་པ་ལ་རྒྱུར་གྱུར་པ་འདི་དག་གི་ནུས་པ་ཉིད་བྱ་བ་མ་ཡིན་པ་ད་ལྟར་བའི་གནས་སྐབས་ཁོ་ན་འཕངས་པའི་ཕྱིར། འདུས་མ་
བྱས་རྣམས་ཀྱིས་འབྲས་བུ་འཕེན་པ་མི་འཐད་པའི་ཕྱིར་རོ། །འབྲས་བུ་འཕེན་པའི་བྱ་བ་ཉིད་ཡིན་གྱི། འབྲས་བུ་འབྱིན་པའི་བྱ་བ་མ་ཡིན་ནོ། །ཡང་ཅི་བྱ་བ་ཞེས་བྱ་བའི་ནུས་པ་དེ་ལས་གཞན་པའི་དངོས་པོ་རྣམས་མ་བྱུང་བ་ལས་བྱུང་ཞིང་། བྱུང་
ནས་ཀྱང་འཇིག་པའི་ཕྱིར་རྫས་དེ་རྟག་པ་ཉིད་ཡོད་པ་མ་ཡིན་ནོ། །གལ་ཏེ་མ་བྱུང་བ་ལས་བྱུང་ཞིང་བྱུང་ནས་འཇིག་པའི་རྫས་ལས་གཞན་མ་ཡིན་པའི་རྫས་སུ་ཡོད་པ་དེ་སྐྱེ་བ་དང་འཇིག་པ་ཉིད། སྐྱེ་བ་དང་འཇིག་པར་ཁས་བླང་བར་བྱ་ན་འདི་ཉིད་ལ་སྐྱེ་བ་དང་མི་སྐྱེ་བ་
དང་འཇིག་པ་དང་མི་འཇིག་པ་ཞེས་བྱ་བ་དག་མི་རིགས་སོ། །ནུས་པ་སྔ་མ་དང་ནུས་པ་ཕྱི་མ་ཡོངས་སུ་འགྱུར་བར་རྟོག་པ་ལ་ནུས་པ་ཐམས་ཅད་ངེས་པའི་རྒྱུ་མེད་པའི་ཕྱིར་དང་། ནུས་པ་དང་ནུས་པ་མ་ཡིན་པ་མེད་པ་དེའི་ཕྱིར་གཞན་ཉིད་དུ་ཁས་བླང་བར་བྱ་སྟེ། འདས་

པ་དང་མ་འོངས་པའི་གནས་སྐབས་ཀྱི་ངོ་བོ་མེད་པའི་ཕྱིར་རོ། །དེ་བཞིན་དུ་ནུས་པ་ཉིད་འདས་པ་དང་མ་འོངས་པ་དག་ཏུ་འགྱུར་གྱི་རྫས་ནི་མ་ཡིན་པས་འགོག་པ་བཞིན་རྣམ་པར་འགྱུར་བ་མེད་པ་གཞན་ནུས་པའི་རྒྱུའོ། །དེ་ལ་ཡང་ནུས་པ་གཞན་ཁས་བླང་བར་བྱ་བ་ནི་གནས་
སྐབས་མ་ཡིན་ནོ། །ཅི་སྟེ་རྫས་བཞིན་རྟག་པ་དེ་ལྟ་ན་ཡང་རྫས་བཞིན་དུ་བྱ་བ་རྟག་ཏུ་ཡོད་པས་དེའི་ཕྱིར་དུས་སུ་རྣམ་པར་གཞག་པ་མི་རིགས་སོ། །མཚན་ཉིད་ཐ་མི་དད་པའི་རྣམ་པ་གཅིག་ཉིད་དུས་ཐམས་ཅད་དུ་བྱ་བ་བྱེད་པ་ལ་གེགས་མི་སྲིད་དོ་སྙམ་སྟེ། འདྲི་བ་ནི་འདི་ཡང་
བརྗོད་པར་བྱ་དགོས་ཏེ་ཞེས་བྱ་བའོ། །དེའི་བདག་ཉིད་ཁོ་ནར་ཞེས་བྱ་བ་རྒྱས་པར་འབྱུང་སྟེ། ས་ལ་སོགས་པ་མཚན་ཉིད་ཐ་དད་པ་རྣམས་ཀྱང་མིག་ལ་སོགས་པས་རྣམ་པ་ཐ་དད་པ་མཐོང་བའི་ཕྱིར་འདི་མཐའ་གཅིག་ཏུ་མ་ཡིན་ཞེས་སློབ་དཔོན་འདུས་བཟང་ཟེར་རོ། །
དེར་ནི་རྫས་ཐ་དད་པ་རྣམ་པ་ཐ་དད་པ་བཤད་དོ། །ས་ལ་སོགས་པ་རྫས་ཀྱི་སྒོ་ནས་ཐ་དད་པ་རྣམས་ཀྱི་འབྲེལ་པ་གང་ལས་བརྗོད་པར་བྱ་ཞེ་ན། ས་ལ་སོགས་པ་མཚན་ཉིད་ཐ་མི་དད་པ་རྣམས་ཀྱང་རྣམ་པ་ཐ་དད་པ་མཐོང་བས་སོ། །གལ་ཏེ་རྐྱེན་རྣམས་མ་ཚོགས་པ་ཡིན་ནོ་
ཞེས་བྱ་བ་ལ། འདས་པ་དང་མ་འོངས་པའི་གནས་སྐབས་དག་ཏུ་རྐྱེན་རྣམས་མ་ཚོགས་པར་བྱ་བ་བྱེད་ན། དེ་ལ་གེགས་མེད་པར་རེས་འགའ་བྱ་བ་བྱེད་ལ་རེས་འགའ་མི་བྱེད་དོ་ཞེས་བྱ་བ་མེད་དོ། །རྟག་ཏུ་ཡོད་པ་ཉིད་དུ་ཁས་བླངས་པའི་ཕྱིར་རོ། །རྐྱེན་རྣམས་ཀྱང་རྐྱེན་ཅན་
བཞིན་དུ་ཁས་བླངས་པ་དེ་དག་གི་ཡོད་པ་རྣམས་ལ་མ་ཚོགས་པ་མི་རིགས་པར་བཤད་དོ། །ཡ་ད་པྱུཀྟ་མ་པི་ཙི་ན་བ་གཙྪ་མ་སྟསྱ་ཡུཥྨ་ཏོ་བྷཱ་བཾ་ཀཏ་མསྱ་པྲ་ཏྱུཏྤནྡ་སྱ་ཨེ་ཏཏྟེ་ན་ཀ་རི་ཏྲཱཾ་གྲྀ་ཧཱི་ཏ་ཡ་ཏཱོ་ནཱ་ག་ཏ་ཏ་སྱ་ཏ་སྱ་ཀསྨཱཏྟནྣ་བྷ་བ་ཏཱི་ཀལྤཡ་ཏི། དེ་ནི་མ་འོངས་པའི་ཆོས་ཡོད་པ་
ཉིད་ཁྱད་པར་གྱིས་གནས་པའི་ཁྱད་པར་དེ་ལ་ད་ལྟར་བྱུང་བ་ཞེས་བྱའོ་ཞེ་ན་མ་ཡིན་ཏེ། རང་བཞིན་ གང་ཡང་བཤད། མ་རྙོག་པ། དེའི་ཚེ་དང་ལྡན་པ། དངོས་པོ། གང་། ད་ལྟར་བྱུང་བ་ འདི་ དེ་ཡིས བྱེད་པ་ བཟུང་བ་གང་ལས མ་འོངས་པ་ འདས་པ ཅི་ལ་ཡང་མེད་པར རྟོག་པར་བྱེད། དེའི་ཁྱད་པར་བྲལ་བའི་

ཕྱིར་རོ། །འདས་པ་ཞེས་བྱའོ་ཞེ་ན་མ་ཡིན་ཏེ་རང་བཞིན་དང་བྲལ་བའི་ཕྱིར་རོ། །དོན་གྱི་སྒོ་ནས་དེ་ཉིད་ནི་མ་འོངས་པའི་ཆོས་ཀྱི་བྱ་བ་འཇུག་སྟེ། འཇུག་པའི་བྱ་བ་ནི་དེའི་བྱ་བའོ། །མ་འོངས་པ་ནི་མ་ཡིན་ཏེ་ཞིག་པའི་ཕྱིར་འདས་པའོ། །དེའི་ཕྱིར་འདི་
སྐད་བརྗོད་དེ། བྱ་བ་ནི་དུས་ཀྱིས་རྣམ་པར་གཞག་པས་དེའི་ཕྱིར་ཤེས་པར་བྱ་བའི་ཕྱིར་འདི་ལན་མ་ཡིན་ནོ། །རྟག་ཏུ་བྱ་བ་བྱེད་པ་གེགས་མེད་པ་ཞེས་བྱ་བ་ནི། འདིར་མདོ་ལས་རྣམ་པར་ཤེས་པ་བྱའོ་སྙམ་དུ་དགོངས་པའོ། །འབྲས་བུ་འཕངས་པ་དེའི་དངོས་པོ་ནི་ད་
ལྟར་བ་དང་། དེའི་འབྲས་བུ་འཕེན་པ་ནི་བྱ་བའོ། །ད་ནི་སྔ་མ་དང་ཕྱི་མ་ཁྱད་པར་མེད་པའི་ཕྱིར་མ་འོངས་པ་ཡང་འདས་པ་དེར་འགྱུར་རོ་ཞེས་བྱའོ། །གནས་བརྟན་རྣམས་ཀྱིས་ནི་དངོས་པོ་ཤེས་པ་མ་ཡིན་ནོ། །ད་ལྟར་བྱུང་བ་ཞེས་བྱའི་ཁྱད་པར་འདི་ཅི། ཁྱད་པར་བཅས་པ་དེ་
རྣམ་པར་དབྱེ་བའི་རང་བཞིན། པ་རི་ཏྱཱ་གེན་བྷཱ་བ་ཏྱ་ཐཱ་པ་རི་ཏྱཱ་ག་ན་པ་རི་ཏྱཱ་གེ་ན། དེ་ལྟར་ཡོད་ན་གཞན་ཉིད་མ་འོངས་པ་ལས་སྐྱེས་པ་ཞེས་བྱ་བར་འགྱུར་རོ། །མ་འོངས་པ་ཡང་མ་སྐྱེས་པ་ཁོ་ནར་འཇིག་པ་ཞེས་བྱ་བ་རང་བཞིན་མེད་པའི་དངོས་པོས་མེད་པ་མ་ཡིན་ནོ། །
ཇི་ལྟར་ཡོངས་སུ་བཏང་བ་དེ་བཞིན་དངོས་པོའི་རང་བཞིན་དངོས་པོ་ཡོངས་སུ་གཏོང་བས་ཅི་སྟེ་ཡོངས་སུ་མི་གཏོང་མིན་གལ་ཏེ་ཡོངས་སུ་གཏོང་། ལས་ཁྱད་པར་གཞན་དུ་འགྱུར་རོ། །དུས་གསུམ་དུ་ཡང་གང་ཞིག་འཁྲུལ་པ་དེའི་ངོ་བོའི་རང་བཞིན་ནི་མ་སྐྱེས་པའི་ངོ་བོ་ཡིན་པའི་ཕྱིར་དང་དངོས་པོ་
གཞན་ཡིན་པའི་དངོས་པོ་གཞན་བཞིན་ནོ། །རེས་འགའ་འདི་དམན་པ་དེའི་ཕྱིར་དུས་གསུམ་གྱི་དངོས་པོ། །དེ་བཞིན་དུ་འདས་པ་ལ་ཡང་བརྗོད་པར་བྱའོ། །རེས་འགའ་བ་ཉིད་ཀྱིས་དངོས་པོ་ཐམས་ཅད་ཡོད་པ་སྨྲ་བའོ། །གལ་ཏེ་ཁྱད་པར་ཡོད་པ་ལས་སྐྱེས་པ་དེ་ཉིད་
ཁྱད་པར་ཞེས་བྱ་བ་དེ་ལྟ་ན་དངོས་པོ་ཐམས་ཅད་གཅིག་པ་ཉིད་དུ་འགྱུར་ཏེ། ཁྱད་པར་ཡོད་པ་ལས་ཡང་ཁྱད་པར་ཡོད་པའི་ཕྱིར་རོ། །བྱ་བ་འདས་པ་དང་ཞེས་བྱ་བ་རྒྱས་པར་འབྱུང་བ་ལ། འདི་སྐད་བསྟན་པར་འགྱུར་ཏེ། གལ་ཏེ་བྱ་བ་ལ་བྱ་བ་གཞན་མེད་པར་མ་འོངས་པ་ལ་

སོགས་པ་ཉིད་དུ་འདོད་ན། དེ་ལྟ་ན་བྱ་བས་དུས་རྣམ་པར་གཞག་པ་ཞེས་བརྗོད་པར་མི་བྱ་སྟེ་འཁྲུལ་པའི་ཕྱིར་རོ། །ཇི་ལྟར་བྱ་བ་ནི་མ་འོངས་པ་ལ་སོགས་པ་ཉིད་ཀྱི་རང་གི་ངོ་བོའི་རྒྱུད་ལ་བལྟོས་ནས་རྣམ་པར་འཇོག་པས་དངོས་པོ་རྣམས་ཀྱང་དེ་ལྟར་མ་འོངས་པ་ལ་སོགས་པར་
འགྱུར་ཏེ། བྱ་བ་བཏགས་པས་ཅི་ཞེས་བྱ་བ་ཇི་སྟེ་འཁྲུལ་པའི་སྐྱོན་དུ་འགྱུར་དུ་འོང་བས་བྱ་བ་ལ་ཡང་བྱ་བ་གཞན་འདོད་ན་ནི། དེ་ལྟ་ན་ཡང་ཐུག་པ་མེད་པར་ཐལ་བར་འགྱུར་ཏེ། དེ་ཡང་འདས་པ་དང་མ་འོངས་པ་དང་ད་ལྟར་བྱུང་བ་ཞེས་བྱ་བ་ལ། སློབ་དཔོན་འདུས་བཟང་
ན་རེ་དེ་ཡང་བྱ་བ་གཞན་གྱིས་འགྱུར་བ་ཡིན་ན་དེ་ཡང་གཞན་གྱིས་སོ་ཞེས་ཟེར་རོ། །འདས་པ་དང་མ་འོངས་པའི་བྱ་བ་ཁྱེད་ཅག་གིས་བརྗོད་པ་མ་ཡིན་ནོ། །འོ་ན་ཅི་ཞེ་ན། བྱུང་བའི་ཁྱད་པར་མ་འོངས་པའི་ཆོས་ནི་ད་ལྟར་བྱུང་བ་ཞེས་བྱའོ། །ཁྱད་པར་གྲུབ་ཟིན་པ་ནི་འདས་པ་
ཡིན་ནོ། །མ་སྐྱེས་པ་སྐྱེས་པ་གྲུབ་ཟིན་པའི་གནས་སྐབས་ཀྱི་དབྱེ་བ་ཁས་བླངས་པའི་ཕྱིར་ཁྱད་པར་ནི་ཅི་ལྟར་འདས་པ་དང་མ་འོངས་པ་དང་ད་ལྟར་བའི་བྱ་བ་མ་བཤད་དོ། །དེའི་ཕྱིར་ཕྱོགས་སུ་ལྷུང་བའི་མུན་པ་ཞེས་ལེགས་པར་བརྗོད་དོ། །འོན་ཏེ་དེ་ནི་འདས་པ་ཡང་མ་
ཡིན་ཞེས་བྱ་བ་རྒྱས་པར་འབྱུང་ངོ་། །གང་གི་ཚེ་བྱ་བ་མི་བྱེད་དེ་ཞེས་བྱ་བ་ལ། ཐམས་ཅད་ཀྱི་ཚེ་འདི་བྱ་བ་མི་བྱེད་པས་དེ་འདུས་མ་བྱས་ཡིན་པའི་ཕྱིར་ཐམས་ཅད་ཀྱི་ཚེ་ཡོད་པར་ཐལ་བར་འགྱུར་རོ། །སྐྱོན་དེར་ཡང་འགྱུར་བ་ཞིག་ན་ཞེས་བྱ་བ་ནི་བྱ་བ་ལ་ཡང་བྱ་བ་ཡོད་པར་
ཐལ་བ་དང་འདུས་མ་བྱས་ཉིད་དོ། །གལ་ཏེ་ཆོས་ལས་བྱ་བ་གཞན་ཞིག་ཡིན་ན་ནི་ཞེས་བྱ་བ་ལ། ཆོས་ལས་གཞན་མ་ཡིན་པའི་ཕྱིར་ན་ནི་བྱ་བ་ཆོས་བཞིན་དུ་འདུས་མ་བྱས་མ་ཡིན་ལ། ཆོས་ལྟར་དེ་ལ་བྱ་བ་གཞན་ཡོད་པ་མ་ཡིན་པས་ཐུག་པ་མེད་པ་ཡང་མ་ཡིན་
ནོ། །དེ་ལྟ་ན་ནི་འོ་ན་དུས་སུ་མི་རུང་བ་ཉིད་དུ་འགྱུར་ཏེ་དེ་ཉིད་ནི་དེ་ཉིད་ཀྱིས་དུས་རྣམ་པར་གཞག་པའི་རྒྱུར་མི་རུང་བའི་ཕྱིར་རོ། །དེ་ཉིད་བསྟན་པའི་ཕྱིར་གལ་ཏེ་ཆོས་ཁོ་ན་བྱ་བ་ཡིན་ན་ཞེས་བྱ་བ་རྒྱས་པར་སྨོས་སོ། །མི་འགྲུབ་པ་ཅི་ཞིག་ཡོད་ཅེས་བྱ་བ་འབྱུང་སྟེ། དངོས་པོའི་

རང་གི་ངོ་བོ་ཉིད་ནི་དུས་རྣམ་པར་གཞག་པའི་རྒྱུ་ཉིད་དུ་མི་འདོད་དོ། །འོ་ན་ཅི་ཞེ་ན། སྐྱེས་པ་དང་མ་སྐྱེས་པ་ཞིག་པའི་གནས་སྐབས་དག་དུས་རྣམ་པར་གཞག་པའི་རྒྱུ་ཉིད་དུ་ཁས་ལེན་ནོ། །སློབ་དཔོན་འདུས་བཟང་ན་རེ། ཇི་ལྟར་ཁྱད་པར་གྱི་རྒྱུས་
འཕངས་པ་ཁྱད་པར་གྱི་འབྲས་བུ་བསྐྱེད་པའི་རྒྱུ་མཚན་དུ་གྱུར་པ་ཆོས་གཞན་ཉིད་ཀྱི་ཁྱད་པར་དུ་འདོད་པ་དེ་བཞིན་དུ། འདིར་ཡང་ཆོས་གཞན་ཉིད་བྱ་བའི་ཁྱད་པར་དུ་འགྱུར་རོ་ཞེས་ཟེར་རོ། །འདི་ཡང་རང་གི་ཕྱོགས་ལ་དགའ་བ་ཉིད་ཀྱིས་ལྷག་པར་སྒྲོ་བཏགས་ཏེ་བཤད་ཀྱི།
ནུས་པའི་ཁྱད་པར་གྱི་ཆོས་འགའ་ཞིག་གཞན་དུ་བསྒྲུབ་པ་མ་ཡིན་ནོ། །དེའི་ཕྱིར་འབྲས་བུ་བསྐྱེད་པ་བཏགས་པར་ཡོད་པ་འདི་ཡང་ཁོ་བོ་ཅག་གིས་མཛོད་ཀྱི་གནས་གཉིས་པ་ཉིད་དུ་བསྟན་ཟིན་ཏོ། །ཡང་དེ་ཉིད་ལ་སྨྲས་པ། བྱ་བ་ཆོས་ལས་གཞན་དེ་ལས་ཐ་དད་པ་མ་
ཡིན་པ། རང་བཞིན་མེད་པའི་ཕྱིར་ཆོས་ཙམ་མ་ཡིན་ནོ། །རང་བཞིན་ཡོད་པ་ཉིད་ལ་ཡང་རེས་འགའ་མེད་པའི་ཕྱིར་བྱ་བའི་ཁྱད་པར་སྔ་ན་མེད་པའི་རྒྱུད་བཞིན་མ་ཡིན་ནོ། །དཔེར་ན་བར་མེད་པར་སྐྱེ་བའི་ཆོས་ལ་རྒྱུད་ཅེས་བརྗོད་པ་བཞིན་ནོ། །འདི་ནི་དེའི་ལས་དེ་ལས་ཐ་དད་
པ་མ་ཡིན་ཏེ་དེའི་རང་བཞིན་ཡིན་པའི་ཕྱིར་རོ། །ཆོས་ཙམ་གྱི་སྐད་ཅིག་མ་གཅིག་ཀྱང་རྒྱུད་དུ་ཐལ་བ་མ་ཡིན་པའི་ཕྱིར་དང་དེའི་བྱ་བ་ཡོད་པའི་ཕྱིར་མེད་པ་མ་ཡིན་ནོ། །ཡང་སྨྲས་པ། རྒྱུད་ཀྱི་ལས་དང་ཐ་སྙད་འགའ་ཞིག་དེ་ལྟར་རྫས་ཀྱི་སྒོ་ནས་ཡོད་པ་རྟོགས་པ་མ་ཡིན་པས་
རིགས་པའི་བྱེད་པས་དུས་རྣམས་གྲུབ་པོ་ཞེ་ན། དེའི་ཕྱིར་ཁོ་བོ་ཅག་གིས་འདས་པ་གཞན་ཉིད་ཀྱི་བདག་ཉིད་དང་མ་འོངས་པ་གཞན་དང་ད་ལྟར་བྱུང་བ་གཞན་ཉིད་དུས་རྣམ་པར་གཞག་པས་གང་འདི་ཅུང་ཟད་རྒྱུད་ལས་ནི་ཡོད་པ་ཉིད་ལ་སོགས་པ་རྣམས་དེ་ཉིད་དང་གཞན་
ཉིད་དུ་བརྗོད་པར་བྱ་བ་མ་ཡིན་པའི་ཕྱིར་རང་བཞིན་མེད་དེ་གང་ཟག་བཞིན་ནོ། །རང་བཞིན་ཡོད་པ་དེ་ཉིད་དང་གཞན་ཉིད་དུ་མཐོང་བ་སྟེ་འབྱུང་བར་འགྱུར་བ་རང་བཞིན་མེད་པའི་ལུས་སུ་འདོད་དོ། །བྱ་བ་ཡང་བཏགས་པར་ཡོད་པའི་ཕྱིར་སྔོན་བཞིན་དུ་ཕྱིས་ཀྱང་དེ་བཞིན་ཏེ།

གང་མེད་པ་དེ་ཅི་ལྟར་ཁྱད་པར་དུ་འགྱུར། དེའི་ཕྱིར་དེ་ལྟར་འདས་པ་དང་མ་འོངས་པ་དང་ད་ལྟར་བྱུང་བ་རྣམས་བདག་ཉིད་ཐ་དད་པར་ཡོད་དོ། །བདག་ཉིད་ཐ་དད་པར་མེད་ན་དུས་རྣམས་སུ་རྣམ་པར་གཞག་པ་མི་གྲུབ་པོ། །གང་གསུངས་པ་ཡང་སྣ་ཚོགས་སྡུག་བསྔལ་རྣམས་
ཀྱིས་ནི། སྡུག་བསྔལ་གཟུགས་སོགས་ཇི་ལྟ་བར། །གང་གི་ཐ་དད་ཡོད་དེ་བཞིན། །སྐྱེས་སོགས་ཡོད་པ་མ་ཡིན་བརྗོད། །འདིར་ཡང་དཔེ་དང་དཔེ་ཅན་མཚུངས་པ་མ་ཡིན་པས་སྐྱེས་པའི་རང་བཞིན་འཇིགས་པ་ལ་བལྟོས་ནས་སྡུག་བསྔལ་ཉིད་དུ་རྣམ་པར་གཞག་
གོ། །སྐྱེས་པ་ལ་སོགས་པ་རྣམས་ལ་དེའི་ཁྱད་པར་ཡོད་པ་མ་ཡིན་ཡང་དེ་མིང་བཏགས་པ་ལ་འགལ་བ་མེད་དེ། འདས་པ་དང་མ་འོངས་པ་རྫས་ཀྱི་སྒོ་ནས་ཡོད་པ་ཉིད་དུ་ཁས་བླངས་པ་ལ་ད་ལྟར་བྱུང་བ་བཞིན་འདས་པ་དང་མ་འོངས་པ་ཉིད་མི་གྲུབ་པོ། །ཁྱད་པར་ཁས་
བླངས་པ་ཉིད་ཀྱིས་མ་འོངས་པ་ཉིད་ད་ལྟར་བྱུང་བ་དང་ད་ལྟར་བྱུང་བ་ཡང་འདས་པ་ཡིན་ནོ་ཞེས་མི་རུང་སྟེ། དེ་ལྟར་འདི་ནི་རྒྱས་པར་བསྟན་ཟིན་ཏོ། །ཚིག་གི་ཚུལ་འདི་ནི་སྔོན་མ་བྱུང་བ་ཡིན་ནོ་ཞེས་བྱ་བ་ལ། སྔ་མ་དང་འགལ་བའི་ཕྱིར་རམ། སྔོན་མ་ཐོས་པས་སྔོན་མེད་པའི་
རང་བཞིན་ནོ། །གཟུགས་ལ་སོགས་པའི་རང་གི་མཚན་ཉིད་གང་ཡིན་པ་དེ་ནི་དུས་ཐམས་ཅད་ན་ཡོད་པར་འདོད་དོ། །དེ་ལྟ་ན་འོ་ན་གཟུགས་ལ་སོགས་པའི་དངོས་པོ་ཐམས་ཅད་ཀྱི་ཚེ་ཡོད་པའི་ཕྱིར་རྟག་པར་ཐལ་བར་འགྱུར་རོ་ཞེ་ན། དེའི་ཕྱིར་སྨྲས་པ། དངོས་པོ་ཡང་མི་
རྟག་མི་འདོད། དེ་ལྟ་ན་ཡང་རང་བཞིན་ལས་དངོས་པོ་གཞན་དུ་ཐལ་ལོ་ཞེ་ན། དེའི་ཕྱིར། རང་བཞིན་ལས་ཀྱང་དངོས་མི་གཞན། །ཞེས་བྱ་བ་སྨྲས་སོ། །དབང་ཕྱུག་ཐ་སྙད་ཡིན་པར་གསལ། །ཞེས་བྱ་བ་ནི། འཇིག་རྟེན་ན་རིགས་པ་ལ་མི་བལྟོས་པར་འདོད་རྒྱལ་ཙམ་དུ་
ཟད་པའི་ཕྱིར་རོ། །སྔོན་བྱུང་བ་གང་ཡིན་པ་ནི་འདས་པ་མ་ཡིན་གྱི། རང་གི་མཚན་ཉིད་ཀྱིས་གནས་པ་ནི་མ་ཡིན་ནོ་ཞེས་སྟོན་ཏོ། །རྐྱེན་ཡོད་ན་འབྱུང་བར་འགྱུར་བ་ནི་མ་འོངས་པ་སྟེ། ཡོད་པ་མ་ཡིན་ཡང་སྙམ་དུ་བསམས་པའོ། །དེ་ལྟར་བྱས་ནས་ཡོད་དོ་ཞེས་བྱའི་

ཞེས་བྱ་བ་ནི་སྔོན་བྱུང་བ་དང་འབྱུང་བར་འགྱུར་རོ། །སློབ་དཔོན་འདུས་བཟང་ན་རེ། མདོ་སྡེ་པས་ད་ལྟར་བྱུང་བའི་རྣམ་གྲངས་གཞན་ཡོད་པ་ཉིད་དུ་སྨྲ་བར་བལྟ་སྟེ། འདས་པ་དང་མ་འོངས་པ་མ་ཡིན་ཞེས་བྱ་བས་སོ། །འདིར་ད་ལྟར་བྱུང་བའི་སྔ་ན་མེད་པ་
དང་ཞིག་ནས་མེད་པ་ལས་འདས་པ་དང་མ་འོངས་པ་རྣམ་པར་གཞག་སྟེ། དེ་དག་ཀྱང་ད་ལྟར་བྱུང་བ་ལ་མ་བལྟོས་པར་བསྟན་པ་མེད་པའི་ཕྱིར་རོ། །ད་ལྟར་བྱུང་བ་ལ་བཏགས་པར་ཡོད་པ་ཉིད་སྔ་ན་མེད་པ་དང་ཞིག་ནས་མེད་པར་ཤེས་པར་བྱ་བའི་ཕྱིར་འདས་པ་ཡོད་དོ་མ་
འོངས་པ་ཡོད་དོ་ཞེས་བཤད་དོ། །གལ་ཏེ་དེ་མ་འོངས་པའམ་འདས་པར་མ་གྱུར་ན་རྟག་ཏུ་ད་ལྟར་བ་ཉིད་དུ་འགྱུར་བས་དེ་བྱེ་བྲག་ཏུ་རྟོགས་པའི་ཕྱིར་ཡང་བརྗོད་དོ། །སྔོན་བྱུང་བ་གང་ཡིན་པ་ནི་འདས་པ་ཡིན་ལ་ཞེས་བྱ་བ་རྒྱས་པར་འབྱུང་སྟེ། ཡོད་པ་དེ་དང་དེ་སྔོན་བྱུང་བར་གྱུར་
པ་དང་ཕྱིས་འབྱུང་བར་འགྱུར་བ་དེ་ཡིས་ཏེ། དེ་ལྟ་ན་མ་ཡིན་ན་རྟག་པར་འགྱུར་བས་སོ། །འདས་པ་དང་མ་འོངས་པའི་བདག་ཉིད་དུ་ཡོད་མོད་ཅེས་བྱ་བ་ནི། འདས་པ་དང་མ་འོངས་པའི་རང་བཞིན་གྱིས་སོ། །ཡང་དེ་ཉིད་རྒྱུ་དང་འབྲས་བུ་ལ་སྐུར་པ་འདེབས་པའི་ལྟ་བ་
དགག་པའི་ཕྱིར་དེ་ལྟར་ཡོད་པར་གསུངས་ཏེ། འདས་པ་ནི་རྒྱུ་དང་མ་འོངས་པ་ནི་འབྲས་བུ་སྟེ། དེ་མེད་པར་ལྟ་བ་ནི་རྒྱུ་དང་འབྲས་བུ་ལ་སྐུར་པ་འདེབས་པར་འགྱུར་རོ། །མེད་པ་ཉིད་དེ་དག་གི་རྒྱུ་དང་འབྲས་བུ་དག་ལའོ། །གལ་ཏེ་ཡང་མེད་པ་ཉིད་མེད་པའི་སྒོ་ནས་ལྟ་བར་བྱེད་པ་
དེ་ལ་སྐུར་པ་འདེབས་པ་དགག་པར་བྱ་བའི་ཕྱིར་འདས་པ་ཡོད་དོ་མ་འོངས་པ་ཡོད་དོ་ཞེས་བཅོམ་ལྡན་འདས་ཀྱིས་གསུངས་པ་ཅི་ཞེ་ན། གང་འདས་པ་དང་མ་འོངས་པ་དག་གི་རྒྱུ་དང་འབྲས་བུ་དག་མ་ངེས་པའི་ཕྱིར་རྒྱུ་དང་འབྲས་བུ་ལ་སྐུར་པ་འདེབས་པས་དེ་དག་པའི་ཕྱིར་འདས་པ་
ཡོད་པ་ནི་རྒྱུའི་ངོ་བོས་དེས་འཕངས་པའི་ནུས་པའི་ཁྱད་པར་ལས་འབྲས་བུ་སྐྱེད་པའོ། །མ་འོངས་པ་ཡོད་པ་ནི་འབྲས་བུའི་ངོ་བོ་དེས་འཕངས་པའི་ནུས་པའི་ཁྱད་པར་ལས་བྱུང་བར་འགྱུར་རོ་ཞེ་ན། དེ་དག་བཤད་དོ། །གལ་ཏེ་ཡང་འདས་པ་དང་མ་འོངས་པ་རྫས་ཀྱི་སྒོ་ནས་

ཡོད་པ་དེ་ལྟ་ན་དེ་ལྟར་བྱུང་བ་བཞིན་འདས་པ་དང་མ་འོངས་པ་ཉིད་དུ་མི་འགྱུར་བ་དེའི་ཕྱིར་བཅོམ་ལྡན་འདས་ཀྱིས་འདས་པ་ཡོད་དོ་མ་འོངས་པ་ཡོད་ཞེས་བྱ་བའི་གསུང་སྐབས་འབྱེད་པར་མི་འགྱུར་རོ། །གང་གསུངས་པ། རྒྱུས་འཕངས་པའི་འབྲས་བུ་འབྱིན་པ་ནུས་པ་ལ་གུས་པས་
རྣམ་པར་དཔྱད་པར་མི་དམིགས་སོ། །དེ་ལ་འདི་ནི་ཡང་དག་པར་རྣམ་པར་དཔྱད་པ་ལ་གུས་པས་དེའི་ཕྱིར་གནས་བརྟན་རྣམས་ཀྱིས་རྟོགས་པ་མ་ཡིན་ནོ། །ནུས་པ་མེད་པར་དངོས་པོ་སོ་སོར་ངེས་པ་རྒྱུ་དང་འབྲས་བུའི་འབྲེལ་པ་མི་རུང་ངོ་། །དེ་ཡང་ནུས་པ་མེད་ན་དངོས་པོ་
རྣམས་ཀྱི་རང་བཞིན་ཐམས་ཅད་ལ་ཐམས་ཅད་ནུས་པར་ཐལ་བར་དེའི་ཕྱིར་རྒྱུ་ཉིད་ལས་འབྲས་བུ་བཞིན་དུ་དེའི་ཁྱད་པར་ཁས་བླང་བར་བྱའོ། །དེའི་ཕྱིར་ཡིད་ཅེས་བྱ་བའི་སྒྲ་ནི་ཚིག་གི་ཕྲད་ཡིན་པའི་ཕྱིར་ཏེ་ཞེས་བྱ་བ་སྨོས་ཏེ། ཚིག་ཕྲད་སྨོས་པ་ནི་བརྗོད་པའི་ངོ་བོ་དགག་
པའི་ཕྱིར་ཏེ། དུས་གསུམ་གྱི་ཡུལ་ཅན་ཉིད་དུ་ཤེས་པར་བྱ་བའི་ཕྱིར་རོ། །གལ་ཏེ་འདི་བརྗོད་པ་ཡིན་ན་ནི་འདིར་འདིའི་འདས་པ་ཡོད་དོ། །མ་འོངས་པ་ཡོད་དོ་ཞེས་བྱ་བའི་སྦྱོར་བ་ཉིད་དུ་མི་འགྱུར་ཏེ་ད་ལྟར་གྱི་དུས་ཡིན་པའི་ཕྱིར་རོ། །མར་མེ་སྔ་ན་མེད་པ་ཡོད་དོ་ཞེས་བྱ་བ་
རྒྱས་པར་འབྱུང་སྟེ། མར་མེ་སྔ་ན་མེད་པ་དང་ཞིག་ནས་མེད་པ་དང་རྫས་སུ་ཡོད་པ་མ་ཡིན་མོད་ཀྱི། འོན་ཀྱང་ཡོད་པར་སྨྲའོ། །འདི་ནི་དེ་ལྟ་མ་ཡིན་ཏེ། མ་སྐྱེས་པ་དང་ཞིག་པའི་མར་མེ་ནི་སྔ་ན་མེད་པ་དང་ཞིག་ནས་མེད་པར་སྨྲའོ། །དེ་ལྟ་ཡིན་ན་མར་མེ་ཉིད་མར་མེའི་
སྔ་ན་མེད་པ་དང་ཞིག་ནས་མེད་པ་སྟེ། ད་ལྟར་བ་ལས་ཡང་ཐལ་བར་འགྱུར་རོ། །ད་ལྟར་བའི་གནས་སྐབས་ན་མ་སྐྱེས་པ་དང་འདས་པའི་གནས་སྐབས་སྔ་ན་མེད་པ་དང་ཞིག་ནས་མེད་པའོ། །འདི་ལ་སྐྱོན་མེད་དེ། གཅིག་གི་སྔ་མའི་གནས་སྐབས་ཉམས་ནས་གནས་
སྐབས་གཞན་སྒྲུབ་པ་མི་རིགས་པས་སྔ་མ་ཁོ་ན། ནིརློ་ཐི་ཏཾ། དེའི་ཕྱིར་སྔ་ན་མེད་པ་དང་ཞིག་ནས་མེད་པའི་དངོས་པོའི་རང་བཞིན་ཡང་ཡིན་ནོ་ཞེས་སྨྲ་བ་འདིས་མི་གཡོའོ། །ཇི་ལྟར་འགགས་པ་ཡོད་ཅེས་བྱ་བ་ལ་སོགས་པ་ལ་འགགས་པའི་མར་མེ་ཡོད་དོ་ཞེས་བྱ་བ་བྱེ་བྲག་ཏུ་

སྨྲ་བའི་མ་ཡིན་ནམ་ཞེ་ན་མ་ཡིན་ཏེ། དེ་ལ་འདིར་འདིའི་དོན་ནི་མར་མེ་འགགས་པ་ཡོད་དོ་ཞེས་བྱ་བར་རྟོགས་སོ། །འོ་ན་ཅི་བདེན་པར་འགོག་ཅེ་ན་དེའི་ཕྱིར་ཡོད་དོ་ཞེས་བྱ་བའི་སྒྲ་ནི་དོན་མེད་པ་ཅན་འབའ་ཞིག་ཏུ་མ་ཟད་དོ་ཞེས་བྱ་བར་རྟོགས་སོ། །དེ་ལྟ་མ་ཡིན་
ན་ཞེས་བྱ་བ་ལ་གལ་ཏེ་བྱུང་བ་ནི་འདས་པ་ཡིན་ལ། རྐྱེན་ཡོད་ན་འབྱུང་བར་འགྱུར་བ་མ་འོངས་པ་ཡིན་ཞེས་བྱ་བ་དེ་ལྟར་ཡོད་པའི་སྒྲ་བརྗོད་པར་མི་འདོད་པར་གྱུར་ནའོ། །བྱུང་བར་གྱུར་པ་འདས་པ་དེ་ཡོད་ལ་གང་རྒྱུ་ཡོད་ན་འབྱུང་བར་འགྱུར་བ་མ་འོངས་པ་དེ་ཡང་ཡོད་དོ་ཞེས་བྱའོ། །
དེ་ཉིད་ཀྱི་ཕྱིར་འདས་པ་དང་མ་འོངས་པ་མི་འགྲུབ་པ་ཁོ་ནར་འགྱུར་རོ་ཞེས་བྱ་བ་སྨོས་སོ། །ད་ལྟར་བ་བཞིན་དུ་ཐམས་ཅད་ཀྱི་ཚེ་རང་གི་མཚན་ཉིད་ཀྱིས་ཡོད་པའི་ཕྱིར་རོ། །འོ་ན་བཅོམ་ལྡན་འདས་ཀྱིས་ཞེས་བྱ་བ་རྒྱས་པར་འབྱུང་སྟེ། འདི་ལྟར་མདོ་ལས་ཤཱ་རིའི་བུ་
གང་དག་གིས་ལས་སྤངས་པ་དང་ཟད་པ་དང་། འགགས་པ་དང་། བྲལ་བ་དང་རྣམ་པར་གྱུར་པ་གང་ཡིན་པ་དེ་ནི་མེད་དོ་ཞེས་དེ་སྐད་དུ་སྨྲས་པའི་ཚིག་དེའི་རང་བཞིན་མ་ཡིན་པ་དེ་ནི་བྱིས་པ་བླུན་པ་མི་གསལ་བ་མི་དགེ་བ་རྣམས་ཇི་ལྟ་བ་བཞིན་དུ་ཀུན་ཏུ་རྒྱུ་དབྱུག་ཐོགས་ཐོར་
ཚུགས་ཅན་རྣམས་ཀྱིས་བབ་ཆོལ་དུ་སོ་སོར་མ་བརྟགས་པར་སྨྲས་པ་ཡིན་ཞེས་བྱ་བ་རྒྱས་པར་གསུངས་ནས། དེ་ཅིའི་ཕྱིར་ཞེ་ན། ཤཱ་རིའི་བུ་ལས་འདས་པ་དང་ཟད་པ་དང་འགགས་པ་དང་བྲལ་བ་དང་། རྣམ་པར་འགྱུར་བ་གང་ཡིན་པ་དེ་ནི་ཡོད་དོ་ཞེས་གསུངས་ན། ཅི་
དེ་དག་ལས་དེ་སྔོན་བྱུང་བ་ཉིད་དུ་མི་འདོད་པར་གྱུར་ཏམ། དེ་དག་གིས་ནི་ལས་སྔོན་བྱུང་བ་ཉིད་དུ་རྟོགས་པ་ཁོ་ན་ཡིན་གྱི། དེའི་རྣམ་པར་སྨིན་པས་འཇིགས་པས་འགགས་པ་ནི་རྫས་སུ་ཡོད་པ་ཉིད་དུ་མ་རྟོགས་སོ། །དེའི་ཕྱིར་བཅོམ་ལྡན་འདས་ཀྱིས་ཡོད་པ་ཉིད་དུ་བསྟན་
པའི་ཕྱིར་དེ་ནི་ཡོད་དོ་ཞེས་གསུངས་ཏེ། དེ་ལྟ་མ་ཡིན་ན་བསྟན་པ་དོན་མེད་པ་ཉིད་དུ་འགྱུར་རོ་ཞེས་བྱ་བ་འདི་ནི་རེ་ཞིག་བྱེ་བྲག་ཏུ་སྨྲ་བའི་མདོའི་དོན་བསྟན་པའོ། །སློབ་དཔོན་གྱིས་རྣམ་པ་གཞན་དུ་བསྟན་པའི་ཕྱིར་དེ་ལས་ནི་ཞེས་བྱ་བ་རྒྱས་པར་སྨོས་སོ། །དེ་ལས་ནི་ཞེས་

བྱ་བ་ནི་ལས་དེ་རྒྱུད་གང་དུ་གཏོགས་པའོ། །དེས་ཀུན་ཏུ་དྲངས་པ་ནི་ལས་དེས་ཀུན་ཏུ་དྲངས་ཤིང་བསྐྱེད་པའོ། །དེ་ཡང་གང་ཞེ་ན། འབྲས་བུ་སྐྱེད་པའི་མཐུ་ཡོད་པའོ། །འདི་ལྟར་ལས་དེས་རྒྱུད་འབྲས་བུ་ཁྱད་པར་ཅན་བསྐྱེད་པར་ནུས་པར་བྱེད་དེ། དེའི་ཕྱིར་བཅོམ་ལྡན་འདས་ཀྱིས་
ལས་དེ་འགགས་ཀྱང་དེས་ཀུན་ཏུ་དྲངས་པ་འབྲས་བུ་སྐྱེད་པའི་མཐུ་ཡོད་པ་ཉིད་དུ་བསྟན་པའི་ཕྱིར་དེ་ནི་ཡོད་དོ་ཞེས་གསུངས་སོ། །དེ་ལྟ་མ་ཡིན་ཏེ་ཞེས་བྱ་བ་ནི་གལ་ཏེ་འདས་པ་ཡོད་པ་ཉིད་དུ་སྟོན་ནའོ། །རང་གི་ངོ་བོ་ཁོ་ནར་ཡོད་ན་ཞེས་བྱ་བ་ལ་སོགས་པ་ལ། ལས་དེ་རང་གི་མཚན་
ཉིད་ཀྱིས་ཡོད་ན་ནི་དེ་ལྟར་བྱུང་བ་ཇི་ལྟ་བ་བཞིན་ཡིན་པས་འདས་པ་འགྲུབ་པར་མི་འགྱུར་རོ། །དེའི་ཕྱིར་འདི་ལས་དོན་དུ་བཞེད་ཀྱི་སྔ་མ་ནི་མ་ཡིན་ནོ། །དེ་ནི་གདོན་མི་ཟ་བར་དེ་ལྟ་བུ་ཡིན་པར་ཞེས་བྱ་བ་ལ། གང་གི་ཕྱིར་བཅོམ་ལྡན་འདས་ཀྱི་མགུར་ཉིད་ནས་འདས་པ་དང་མ་འོངས་
པ་མེད་དོ་ཞེས་གསུངས་པ་དེའི་ཕྱིར་མདོ་འདིའི་དོན་ནི་འདི་ཁོ་ན་ཡིན་གྱི་བྱེ་བྲག་ཏུ་སྨྲ་བས་ཡོངས་སུ་བཏགས་པ་ནི་མ་ཡིན་ནོ་ཞེས་བྱ་བར་ཤེས་སོ། །གལ་ཏེ་ད་ལྟར་གྱི་དུས་སུ་ཞེས་བྱ་བ་ནི། ད་ལྟར་གྱི་དུས་སུ་ད་ལྟར་གྱི་དངོས་པོར་མ་བྱུང་བ་ལས་བྱུང་ངོ་ཞེས་བྱ་བའི་དོན་ཏོ། །མི་
རུང་སྟེ་དུས་ནི་དངོས་པོ་ལས་དོན་གཞན་མ་ཡིན་པའི་ཕྱིར་རོ། །གང་དེ་ལྟར་བྱུང་བའི་དུས་འདི་མིག་ལ་སོགས་པ་རྣམས་ལས་དོན་གཞན་དུ་གྱུར་པ་མ་ཡིན་པར་ཡོད་ཅེས་བྱའོ། །ཇི་ལྟར་དེའི་བདག་ཉིད་དུ་མ་བྱུང་བ་ལས་འབྱུང་བར་འགྱུར་ཞེ་ན། དེ་ལས་གཞན་མ་ཡིན་
པའི་ཕྱིར་རོ། །དེ་སྐད་དུ། དེ་དག་ཉིད་དུས་གཏམ་གཞི་དང་། །ཞེས་བཤད་དོ། །མ་འོངས་པའི་མིག་མེད་དོ་ཞེས་བྱ་བ་འདི་གྲུབ་པ་ཡིན་ནོ་ཞེས་བྱ་བ་ལ། གལ་ཏེ་རང་གི་བདག་ཉིད་ལ་མ་བྱུང་བ་ལས་བྱུང་ན་ནི་དེ་ལྟར་ན་མིག་མ་བྱུང་བ་ལས་བྱུང་ངོ་ཞེས་བྱ་བར་འགྱུར་ལ། དེའི་
ཕྱིར་མ་འོངས་པའི་མིག་མེད་དོ་ཞེས་བྱ་བར་གྲུབ་པ་ཡིན་ནོ། །སློབ་དཔོན་འདུས་བཟང་ན་རེ། གང་ཟག་ལ་སོགས་པ་བཞིན་འགའ་ཞིག་ཏུ་མ་བཀག་པས་འདས་པ་དང་མ་འོངས་པ་ཡོད་པ་ཉིད་ཀྱི་ལུང་འདི་ནི་ངེས་པའི་དོན་ཏོ་ཞེ་ན། ངེས་པའི་དོན་ནི་རྣམ་པ་གཞན་དུ་བརྟག་

པར་མི་རིགས་ལ། གང་ཟག་ཡོད་པ་ཞེས་བྱ་བ་དེ་དང་དེར་གསུངས་པ་ནི་མ་ནུ་ཥྱ་ཀ་མི་ཅན་གྱིས་མདོ་ལ་སོགས་པ་རྣམས་སུ་ཡོད་པ་ཉིད་བཀག་པའི་ཕྱིར་དེ་ཡོད་པ་ཉིད་རྗོད་པར་བྱེད་པའི་ལུང་རྣམས་ནི་དྲང་བའི་དོན་ཉིད་དུ་རིགས་སོ། །དེ་བཞིན་དུ་ཕ་དང་མ་ནི་
གསད་བྱ་ཞིང་། །ཞེས་བྱ་བ་ལ་སོགས་པ་ཡང་དྲང་བའི་དོན་ཉིད་རིགས་ཏེ། གཞན་དུ་མཚམས་མེད་པའི་བྱེད་པ་རྣམས་དེ་མ་ཐག་ཏུ་དམྱལ་བར་སྐྱེ་བར་གསུངས་པའི་ཕྱིར་དེ་ལྟར་ཡང་མ་ཡིན་ནོ། །རང་གིས་གསལ་བར་འདས་པ་དང་མ་འོངས་པ་ཡོད་པ་ཉིད་སྨྲས་པ་དང་།
ཁ་ཅིག་གིས་དེ་བཞིན་ཁོ་ནར་གསལ་བར་བཀག་པ་དམིགས་པས། གང་ཞིག་འདས་པ་དང་མ་འོངས་པ་ཡོད་པ་ཉིད་དུ་སྒྲུབ་པའི་ལུང་འདི་ནི་དྲང་བའི་དོན་ཏོ། །འདིར་སྨྲས་པ་ཅི་རྣམ་པ་གཞན་དུ་ན་འདས་པ་དང་མ་འོངས་པའི་དངོས་པོ་ཉིད་མི་གྲུབ་སྟེ། འདས་པ་དང་མ་འོངས་
པའི་འདུ་བྱེད་ཀྱི་དངོས་པོ་སྐྱེ་བ་མེད་དོ། །སྡུག་བསྔལ་དང་ཀུན་འབྱུང་བའི་བདེན་པའི་དངོས་པོ་དེ་མེད་པའི་ཕྱིར་དང་། འགོག་པ་དང་ལམ་དག་ཀྱང་དེ་བཞིན་ཏེ་བདེན་པ་བཞི་མེད་པའི་ཕྱིར་ཡོངས་སུ་ཤེས་པ་དང་སྤངས་པ་དང་མངོན་དུ་བྱ་བ་དང་བསྒོམ་པ་དག་ཀྱང་མི་རུང་ལ། དེ་
མེད་པའི་ཕྱིར་འབྲས་བུ་ལ་གནས་པ་དང་ཞུགས་པའི་གང་ཟག་རྣམས་ཀྱང་མེད་དོ། །དེ་ལྟར་སྒྲ་ཇི་བཞིན་པའི་དོན་ཡོངས་སུ་བརྟགས་པས་འདས་པ་དང་མ་འོངས་པ་ཡོད་པ་ཉིད་དུ་སྒྲུབ་པའི་ལུང་རྣམས་མཐའ་དག་གསུང་རབ་དང་འགལ་ལོ། །དེའི་ཕྱིར་ལུང་འདི་ནི་དྲང་བའི་
དོན་ཏེ་ངེས་པའི་དོན་མ་ཡིན་ཞེས་བྱ་བར་ངེས་སོ། །གཞན་ཡང་དོན་དམ་པ་སྟོང་པ་ཉིད་ཀྱི་མདོ་ལས་འདས་པ་དང་མ་འོངས་པ་དེ་ཉིད་རྫས་ཀྱི་སྒོ་ནས་བཀག་གོ། །མིག་མ་བྱུང་བ་ལས་བྱུང་ཞིང་བྱུང་ནས་འཇིག་པ་ཞེས་བྱ་བ་ལ། དེའི་ཕྱིར་གང་གནས་བརྟན་རྣམས་ཀྱིས་སྒྲུབ་
བྱེད་སྨྲས་པ་དེ་འབྲེལ་པ་མེད་པས་གཞུང་མངས་པའི་འཇིགས་པས་དགག་པ་རྒྱས་པར་མ་བྱས་སོ། །འགའ་ཞིག་འདི་སྐད་དུ། མིག་མེའི་རང་བཞིན་ཡིན་པའི་ཕྱིར་ཉི་མའི་དཀྱིལ་འཁོར་ལས་འབྱུང་ཞིང་ཡང་དེ་ཉིད་དུ་ཐིམ་པར་འགྱུར་རོ། །དེ་བཞིན་དུ་གཞན་ཡང་རིག་པར་བྱ་སྟེ།

མ་འོངས་པའི་དུས་ཀྱི་མིག་ནི་ད་ལྟར་བྱུང་བའི་དུས་སུ་འགྱུར་ཞིང་། ད་ལྟར་བྱུང་བ་ལས་འདས་པར་འགྱུར་ཏེ། དེའི་ཕྱིར་གཞན་གྱི་དངོས་པོ་གཞན་རྟོགས་པའི་ཕྱིར་གཞན་ལ་ཡང་ཞུགས་པའི་རང་བཞིན་ལས་མིག་འབྱུང་ཞིང་ཡང་དེ་ཉིད་དུ་ཐིམ་མོ་ཞེས་ཟེར་རོ། །དེ་དགག་པའི་
ཕྱིར་མིག་ནི་སྐྱེ་བ་ན་གང་ནས་ཀྱང་མི་འོང་ལ། འགག་པ་ན་གང་དུ་ཡང་སོགས་པར་མི་འགྱུར་རོ་ཞེས་སྨོས་སོ། །རང་གི་ལུགས་བསྟན་པའི་ཕྱིར། དེ་ལྟ་བས་ན་དགེ་སློང་དག་མིག་ནི་མ་བྱུང་བ་ལས་བྱུང་ཞིང་བྱུང་ནས་ཀྱང་སླར་འཇིག་པར་འགྱུར་རོ་ཞེས་གསུངས་ཏེ། ཟིན་པའི་རང་
བཞིན་ཡོངས་སུ་བཏང་ནས་ཞེས་བྱ་བ་དེ་ལྟར་མདོའི་དོན་རྣམ་པར་གཞག་གོ །སློབ་དཔོན་འདུས་བཟང་ན་རེ། གཞན་དུ་བརྗོད་པ་མ་བྱུང་བ་ལས་བྱུང་ཞེས་བྱ་བ་ནི། མ་བྱུང་བ་དང་འགའ་ཞིག་ཏུ་སོགས་པ་ནི་རང་གི་རྒྱུ་དང་རྐྱེན་རྣམས་ལས་འབྱུང་ངོ་ཞེས་བྱ་བའི་དོན་ཏོ། །འགའ་ཞིག་
ནི་ལུས་ཀྱི་དཀྱིལ་རྒྱུར་འདོད་པས་དེའི་ཕྱིར་མ་བྱུང་བ་ནི་རྒྱུ་ལ་བརྗོད་དེ། དེའི་རྒྱུ་ཅན་གཞན་ཉིད་ལས་དེ་སྐྱེའོ་ཞེས་བྱའོ། །མ་བྱུང་བ་ལས་བྱུང་བ་ནི། གནས་སྐབས་སྔ་མ་ཐོབ་པོ་ཞེས་བྱ་བའི་དོན་ཏོ། །བྱུང་ནས་ཀྱང་འཇིག་ཅེས་བྱ་བ་ནི་སྔ་མ་བཞིན་དུ་འབྲས་བུ་འཕངས་པ་བྱ་བ་མེད་
པའི་གནས་སྐབས་ཐོབ་པོ་ཞེས་བྱ་བར་བསམས་པའོ་ཞེས་ཟེར་རོ། །འདི་དག་ཀྱང་མདོའི་དོན་བསྟན་པ་མཐའ་དག་གི་དོན་དང་འགལ་བའི་ཕྱིར་དང་རིག་པ་དང་འགལ་བའི་ཕྱིར་མི་འཐད་དོ། །གང་བཤད་པ། བྱུང་བ་ལས་མ་བྱུང་ཞེས་མ་བཤད་པའི་ཕྱིར་འདིའི་དོན་རྟོགས་སོ་ཞེ་ན། འདི་
ཡང་མི་རིགས་ཏེ། འདིར་དངོས་པོ་རྣམས་ཀྱི་མ་བྱུང་བ་ནི་རང་བཞིན་སྒྲུབ་པ་དང་ཟིན་པའི་རང་བཞིན་ཡོངས་སུ་བཏང་བར་འཆད་པར་འདོད་པས་དེ་ཉིད་ཀྱི་ཕྱིར་དེ་ལྟར་བཤད་དོ། །རེ་ཞིག་འདིར་ཞེས་བྱ་བ་རྒྱས་པར་འབྱུང་ངོ་། །མིག་གི་རྣམ་པར་ཤེས་པ་ལ་སོགས་པ་རྣམས་ནི་ཡུལ་ད་
ལྟར་བ་ཡིན་པའི་ཕྱིར་རྟེན་ལྟར་དམིགས་པ་ཡང་སྐྱེད་པར་བྱེད་པ་ཉིད་ཀྱིས་ཡིད་ཀྱི་རྣམ་པར་ཤེས་པ་ཁོ་ནར་ཉེ་བར་བཀོད་དོ། །ཡིད་ད་ལྟར་བ་ཁོ་ན་དེའི་རྐྱེན་ཉིད་དུ་གནས་པས་སྐྱེད་པར་བྱེད་པའི་རྐྱེན་ཡིན་པ་ལྟར་ཆོས་རྣམས་ཀྱང་དེ་དང་འདྲའམ་ཞེ་ན། དེ་ལྟ་ན་འདས་པ་དང་

མ་འོངས་པ་རྫས་སུ་ཡོད་པར་འགྲུབ་པོ། །དེ་ལྟར་འདས་པ་དང་མ་འོངས་པ་རྫས་སུ་ཡོད་ན་དེ་ལ་དམིགས་པའི་རྣམ་པར་ཤེས་པ་སྐྱེ་བའི་ཕྱིར། རྫས་ཉིད་བསྐྱེད་པ་པོར་འདོད་དོ། །འོན་ཏེ་རྫས་མ་ཡིན་གྱི་དམིགས་པ་ཙམ་ཡིན་ན། སྐྱེད་པར་བྱེད་པའི་རྐྱེན་མ་ཡིན་
ནོ། །དེ་ལྟར་འདས་པ་དང་མ་འོངས་པ་རྫས་ཀྱི་སྒོ་ནས་ཡོད་པ་མ་ཡིན་པ་ཉིད་ཀྱང་དམིགས་པའི་དངོས་པོར་མི་འགལ་ལོ། །བསྐལ་པ་སྟོང་ན་འབྱུང་བ་ཞེས་བྱ་བ་ནི་མ་འོངས་པ་ཉེ་བ་ཡང་སྐྱེད་པར་བྱེད་པའི་རྐྱེན་དུ་མི་འདོད་ན། ཤིན་ཏུ་བསྐལ་པ་ལྟ་སྨོས་ཀྱང་ཅི་དགོས་སྙམ་དུ་དགོངས་
ཏེ། འབྲས་བུ་སྔ་ལ་རྒྱུ་ཕྱིའོ་སྙམ་དུ་རྟོག་པ་ནི་རིག་པ་དང་ལྡན་པ་མ་ཡིན་ནོ། །གལ་ཏེ་མེད་པ་ཇི་ལྟར་དམིགས་པ་ཡིན་ཞེ་ན། སྐྱེད་པར་བྱེད་པ་མ་འོངས་པའི་རྫས་ཀྱི་སྒོ་ནས་འདོད་པ་མ་ཡིན་ནོ། །འོ་ན་ཅི་ཞེ་ན། དམིགས་པ་ཉིད་ཀྱི་ཕྱིར་ཡོད་པ་མ་ཡིན་པ་ནི་ཉེ་བར་མ་བཤད་པས་
དམིགས་པའི་དངོས་པོར་མི་རུང་ངོ་། །གཟུགས་འདས་པ་དང་མ་འོངས་པ་ཞེས་བྱ་བ་ནི་གཟུགས་འདས་པ་དང་མ་འོངས་པ་མ་ཡིན་པ་མེད་པའོ། །ད་ནི་འདིར་ཇི་ལྟར་དམིགས་པ་ཞེས་རྒྱས་པར་འབྱུང་བ་ལ། ཁོ་བོ་ཅག་གིས་དེའི་དམིགས་པ་སྨྲས་པ་ཇི་ལྟ་བ་དེ་ལྟར་མེད་པ་མ་ཡིན་ནོ། །
འོ་ན་ཅི་ཞེ་ན། ཁྱེད་ཅག་རྣམས་ཀྱིས་རྫས་ཀྱི་སྒོ་ནས་བཏགས་པ་ཇི་ལྟ་བ་དེ་ལྟར་མེད་ཅེས་བྱའོ། །བྱུང་ཞེས་བྱ་བ་ནི་འདས་པ་ལ་དམིགས་པ་ཡིན་ནོ། །དེ་བཞིན་དུ་དེ་ཡོད་པ་ཉིད་འབྱུང་བར་འགྱུར་རོ་ཞེས་བྱ་བ་ནི་མ་འོངས་པ་ལ་དམིགས་པ་ཡིན་ནོ། །དེ་ཡང་དེ་བཞིན་དུ་ཡོད་པ་ཉིད་
ཡིན་ན། ཅི་ལྟར་ཡང་འདི་ཤེས་པར་བྱ་ཞེ་ན། བྱུང་བ་དང་འབྱུང་བར་འགྱུར་རོ་ཞེས་བྱ་བ་ལ་དམིགས་པར་བྱེད་དོ། །ཡང་ཡོད་པ་མ་ཡིན་པ་དེའི་ཕྱིར་འདས་པའི་གཟུགས་སམ་ཚོར་བ་ཞེས་བྱ་བ་རྒྱས་པར་གསུངས་ཏེ། ཡང་ཇི་ལྟར་ད་ལྟར་གྱི་གཟུགས་ཉམས་སུ་མྱོང་བ་ནི་མིག་གིས་སོ། །
རྣ་བ་དང་སྣ་དང་ལྕེ་དང་ལུས་དང་རྣམ་པར་ཤེས་པ་རྣམས་ཀྱིས་དེ་ལྟར་འདས་པ་དྲན་ནོ། །དེ་ཉིད་དུ་ཉེ་བར་བསགས་པ་ལས་གཞན་དེ་ནི་ཇི་ལྟར་ཉམས་སུ་མྱོང་བ་དེ་ཉིད་ཀྱིས་བདག་ཉིད་འདས་སོ་ཞེས་བྱ་བ་དང་བྱུང་བར་གྱུར་ཏོ་ཞེས་འཛིན་ནོ། །ཉམས་སུ་མྱོང་བ་དང་མཐུན་པར་དྲན་པར་བྱེད་

དོ། །དེ་ལྟ་བུ་ནི་སངས་རྒྱས་རྣམས་ཀྱིས་མཁྱེན་ཏོ་ཞེས་བྱ་བ་ནི། ཐམས་ཅད་དུ་ཐོགས་པ་མེད་པའི་ཡེ་ཤེས་དང་ལྡན་པའི་ཕྱིར་གཞན་དང་གཞན་འབྱུང་བར་འགྱུར་རོ་ཞེས་བྱ་བ་དེ་ལྟར་མཁྱེན་ཏོ། །གལ་ཏེ་ཡང་འདས་པ་དང་མ་འོངས་པ་དེ་དེ་བཞིན་དུ་ཡོད་དོ་ཞེ་ན། ཇི་ལྟར་
ཉམས་སུ་མྱོང་བ་དེ་ལྟར་འབྱུང་བར་འགྱུར་བས་ད་ལྟར་བྱུང་བར་འགྱུར་ཏེ་འདས་པ་དང་མ་འོངས་པ་དང་ད་ལྟར་བྱུང་བ་དག་ལ་ཁྱད་པར་མེད་པའི་ཕྱིར་རོ། །འོན་ཏེ་མེད་དོ་ཞེ་ན། ཇི་ལྟར་ཉམས་སུ་མྱོང་བ་ཇི་ལྟར་འབྱུང་བར་འགྱུར་བ་དེ་བཞིན་དུ་ཡོད་པས་ཟིན་པའི་
གཟུགས་ཀྱི་རང་བཞིན་ཡོངས་སུ་བཏང་བའི་ཕྱིར་འདས་པ་དང་མ་འོངས་པའི་གཟུགས་ཡོད་པ་མ་ཡིན་པས། དེ་ལྟར་ན་མེད་པ་ཡང་དམིགས་པ་ཡིན་ནོ་ཞེས་བྱ་བ་གྲུབ་པ་ཡིན་ནོ། །སློབ་དཔོན་འདུས་བཟང་ན་རེ། རྫས་དང་བཏགས་པ་ཉེ་བར་ལེན་པའི་ཡུལ་ཉིད་
ཤེས་པ་ནི་ཡུལ་མེད་པ་མ་ཡིན་ཏེ། མེད་པ་གཉིས་སྨོས་པ་མེད་པའི་ཕྱིར་རོ། །དེའི་ཕྱིར་མ་སྦྲེལ་བར་སྨྲས་སོ། །འདས་པ་དང་མ་འོངས་པ་ཡང་དམིགས་ཞེས་བྱ་བ་ནི། གཉི་ག་ཡིད་ཀྱི་རྣམ་པར་ཤེས་པ་སྐྱེད་པར་བྱེད་པའི་རྐྱེན་ཏེ། ཡིད་ནི་རྟེན་གྱི་ངོ་བོ་དང་ཆོས་ནི་
དམིགས་པའི་ངོ་བོ་ཡིན་ཏེ། ཇི་ལྟར་རྟེན་མེད་པར་ཡང་སྐྱེ་བ་མི་འཐད་པར་དེ་བཞིན་དུ་དམིགས་པ་མེད་པར་ཡང་སྟེ་བྱ་བ་མེད་པའི་ཕྱིར་རོ། །ཆོས་ཐམས་ཅད་ཐམས་ཅད་ཉིད་ལ་དམིགས་པ་ཙམ་གྱིས་འགའ་ཞིག་ཏུ་ཅུང་ཟད་སྐྱེད་པར་བྱེད་པ་ཙམ་གྱི་སྒྲ་སྨོས་པ་དོན་མེད་
དོ། །ཤེས་བྱའི་ཐིབས་པོ་རྣམས་ལ་འཇིག་རྟེན་པའི་ཚད་མ་ནི་ཤིན་ཏུ་རྣམ་པར་དག་པའི་བློ་མ་ཡིན་པའི་ཕྱིར་དེ་དག་ཉམས་སུ་མྱོང་བ་ཉིད་དང་དྲན་པས་ཇི་ལྟར་དུས་རྣམ་པར་འབྱེད་པར་བྱེད། འདི་ནི་འདི་ལྟར་གང་ཉམས་སུ་མྱོང་བ་མ་འོངས་པ་ནི་ཡུལ་ཅན་དུ་མི་འགྱུར་ལ།
བློ་རྣམ་པར་དག་པའི་ཡུལ་ནི་འགྱུར་རོ། །དེའི་རྣམ་པ་གཞན་ཉིད་ཀྱིས་འདས་པ་དང་མ་འོངས་པ་ལ་དམིགས་སོ། །རྣམ་པ་གཞན་དུ་དེ་ཡོད་པ་ཉིད་ཀྱིས་སྔ་ནས་མེད་པ་དང་ཞིག་ནས་མེད་པ་དག་བརྟགས་པར་ཡོད་པ་སྟེ། དེའི་ངོ་བོ་དངོས་པོ་ལ་མ་བལྟོས་པར་བརྟགས་པ་སྟེ།

བུམ་པ་ལ་སོགས་པ་བཞིན་ནོ། །དེའི་ཕྱིར་གཉིས་ཀྱི་ཁོངས་སུ་འདུས་པར་གྲུབ་པོ། །དེ་བས་ན་འདས་པ་དང་མ་འོངས་པ་ལ་དམིགས་སོ་ཞེས་བྱ་བ་འདི་ནི་མ་འབྲེལ་པའོ། །གལ་ཏེ་མ་འོངས་པའི་ཆོས་ད་ལྟར་བྱུང་བའི་རྣམ་པར་ཤེས་པ་ཡིན་བཞིན་དུ་སྐྱེད་པར་
བྱེད་པར་འདོད་པ་དེ་ལྟ་ན། སྐྱེས་བུ་བྱེད་པ་མེད་པའི་ཕྱིར་མ་འོངས་པ་མ་གཟུང་བ་ཁོ་ནར་འབྲས་བུ་འབྱིན་པར་འགྱུར་རོ། །རྣམ་པར་ཤེས་པ་མ་སྐྱེས་པ་ཡང་མ་འོངས་པའི་ཆོས་ཀྱི་བདག་པོའི་འབྲས་བུ་རུང་གི་སྐྱེས་བུ་བྱེད་པ་ནི་མ་ཡིན་ནོ། །བདག་པོའི་འབྲས་བུ་ནི། སྔར་བྱུང་
ལས་གཞན་འདུས་བྱས་ཆོས། །འདུས་བྱས་ཀྱི་ནི་བདག་པོའི་འབྲས་བུ་ཞེས་བཤད་པའི་ཕྱིར་རོ། །སྐྱེས་བུ་བྱེད་པའི་འབྲས་བུ་ཡང་རྒྱུ་ལས་སྔར་སྐྱེས་པ་ཉིད་དུ་མི་འདོད་དོ། །དེའི་ཕྱིར་མ་འོངས་པའི་ཆོས་ཀྱིས་ད་ལྟར་བའི་རྣམ་པར་ཤེས་པ་སྐྱེད་པར་བྱེད་པ་ནི་རང་གི་
གྲུབ་པའི་མཐའ་ལ་གནོད་པས། སྐྱེད་པར་བྱེད་པ་མ་ཡིན་ལ་བསྐྱེད་པར་བྱ་བ་ཡང་མི་འགྱུར་རོ་ཞེས་རིགས་སོ། །དམིགས་པ་ཙམ་ཁས་བླངས་པ་ལ་ནི་གྲུབ་པའི་མཐའ་དང་འགལ་བ་ཡོད་པ་མ་ཡིན་ནོ། །ཆོས་ཐམས་ཅད་བྱེད་པ་མེད་པ་ཡིན་པས་འདིས་བྱ་བ་གང་ཅི་ཡང་
རུང་བ་དགག་པ་ནི་རྒྱུའི་ངོ་བོ་དགག་པ་མ་ཡིན་ནོ། །གལ་ཏེ་འདས་པ་དང་མ་འོངས་པ་རྣམས་གཞན་དུ་དམིགས་ཤིང་གཞན་དུ་ཡོད་པ་ཉིད་ན། ད་ལྟར་བྱུང་བ་ཁོ་ནར་འགྱུར་ཏེ། བྱུང་བ་དང་འབྱུང་བར་འགྱུར་བ་འགའ་ཡང་མེད་དོ། །དེའི་ཕྱིར་རྣམ་པ་གཞན་དུ་ཤེས་པ་
འབྱུང་བར་འགྱུར་རོ་ཞེས་ཁས་བླངས་སོ། །དེ་ཉིད་སིལ་བུ་ཡིན་ནོ་ཞེ་ན། གང་ད་ལྟར་བྱུང་བ་དེ་ཉིད་སིལ་བུ་སྟེ། འདས་པ་དང་མ་འོངས་པ་དག་ནི་མ་ཡིན་ཏེ་སིལ་བུ་མི་འཛིན་པའི་ཕྱིར་རོ། །གལ་ཏེ་དེ་སིལ་བུར་གྱུར་པས་སིལ་བུ་ཉིད་འཛིན་ཅིང་ད་ལྟར་བྱུང་བ་
ཉམས་སུ་མྱོང་བས་དྲན་པ་མ་ཡིན་ནམ་ཞེ་ན། བྱུང་བ་ཞེས་བྱ་བ་ལ། དཔེར་ན་ད་ལྟར་བྱུང་བའི་གནས་སྐབས་ཀྱི་ཚོགས་པ་ནི་སིལ་བུ་ཡིན་ལ། ཚོགས་པའི་གནས་སྐབས་ལ་མ་བལྟོས་པར་སིལ་བུ་འཛིན་པ་ཉིད་བཞིན་ནོ། །གལ་ཏེ་དེ་ཡང་དེ་འདས་པ་དང་མ་འོངས་པ་

དང་ད་ལྟར་བྱུང་བའི་ངོ་བོ་དེ་ནི་རྡུལ་ཕྲ་རབ་བྱས་པ་ལས་འདས་པ་དང་མ་འོངས་པར་བརྗོད་པར་ཟད་ཀྱི་ཆོས་གང་ཡང་སྐྱེ་བའམ་འགགས་པ་མེད་དོ་ཞེ་ན། དེ་ལྟ་ཡིན་ན་རྡུལ་ཕྲ་རབ་རྣམས་རྟག་པར་འགྱུར་ཏེ། དུས་གསུམ་དུ་ཡང་རྣམ་པར་འགྱུར་བ་མེད་པའི་རང་བཞིན་ཡིན་
པའི་ཕྱིར་རོ། །བསགས་པ་དང་གྱེས་པ་ཙམ་ལས་འགྱུར་བ་རྗེས་སུ་འཇུག་པས་གང་ད་ལྟར་བྱུང་བའི་གནས་སྐབས་ན་རྡུལ་ཕྲ་རབ་བསགས་པ་དང་གྱེས་པ་ཙམ་འདས་པ་དང་མ་འོངས་པར་འགྱུར་རོ། །དེ་ལྟ་ན་རྟག་ཏུ་རྡུལ་ཕྲ་རབ་བསགས་པ་དང་གྱེས་པ་ཙམ་འདི་འདས་པ་དང་
མ་འོངས་པར་འགྱུར་རོ། །རྡུལ་ཕྲ་རབ་བསགས་པ་ཙམ་ཁོ་ན་ལ་ད་ལྟར་བྱུང་བ་ཞེས་བྱའི་འགའ་ཡང་སྐྱེ་བ་མེད་དོ། །དེ་གྱེས་པ་ཙམ་ལ་འདས་པ་ཞེས་བྱའི་འགའ་ཡང་སྐྱེ་བ་མེད་དོ། །དེ་ལྟར་ན་འཚོ་བྱེད་ཀྱི་རྩོད་པ་བླངས་པ་ཡིན་ཏེ་དེ་དག་ནི་འདི་ལྟར་སྨྲ་སྟེའོ། །མདོ་ཡང་བོར་
བར་འགྱུར་རོ་ཞེས་བྱ་བ་ནི་འགལ་བར་བྱས་པ་ཡིན་ནོ། །ཇི་ལྟར་འགལ་བར་བྱས་ཤེ་ན། མིག་གི་དབང་པོའི་རྡུལ་ཕྲ་རབ་རྣམས་མ་འོངས་པའི་དུས་ན་སིལ་བུ་དང་ད་ལྟར་བྱུང་བའི་དུས་ན་བསགས་པ་ཡིན་ནོ་ཞེས་བྱ་བ་འདིས་ནི། མིག་ནི་སྐྱེ་བ་ན་གང་ནས་ཀྱང་མི་
འོངས་ཞེས་བྱ་བ་འདི་དང་འགལ་བར་བྱས་པ་ཡིན་ནོ། །དེ་བཞིན་དུ་མིག་གི་དབང་པོའི་རྡུལ་ཕྲ་རབ་རྣམས་བསགས་པ་དང་གྱེས་པ་ཙམ་དུ་ཁས་བླངས་པས་འགགས་པ་ན་གང་དུ་ཡང་སོགས་པར་མི་འགྱུར་རོ་ཞེས་བྱ་བ་དེ་དང་འགལ་བར་བྱས་པ་ཡིན་ནོ། །འགགས་
པ་མེད་པའི་ཕྱིར་ཞེས་བྱ་བས་མིག་མ་བྱུང་བ་ལས་བྱུང་ཞིང་བྱུང་ནས་ཀྱང་འཇིག་ཅེས་བྱ་བ་འདི་དང་འགལ་བར་བྱས་པ་ཡིན་ཏེ། མིག་གི་དབང་པོའི་རྡུལ་ཕྲ་རབ་རྣམས་རྟག་པའི་ཕྱིར་དང་བསགས་པ་དེ་རྣམས་ཀྱང་དངོས་པོ་མ་ཡིན་པའི་ཕྱིར་རོ། །རྡུལ་ཕྲ་རབ་བསགས་
པ་མ་ཡིན་པ་རྣམས་ཀྱང་ཞེས་བྱ་བ་ནི་རྡུལ་ཕྲ་རབ་རྣམས་ཀྱིས་བསགས་པ་མ་ཡིན་པ་རྣམས་ཞེས་བྱ་བའི་དོན་ཏོ། །ཅི་ལྟར་སིལ་བུ་ཉིད་ཡིན་ཞེ་ན། ཡུལ་ན་མི་གནས་པའི་ཕྱིར་སིལ་བུ་ཉིད་དེ་ཡོད་པ་མ་ཡིན་པ་ཉིད་དོ་ཞེས་བྱ་བར་དགོངས་པའོ། །དེ་དག་ཀྱང་ཞེས་བྱ་བ་

ནི་ཚོར་བ་ལ་སོགས་པ་རྣམས་སོ། །སྐྱེ་མཆེད་བཅུ་གསུམ་པ་ཡང་དམིགས་པ་ཡིན་པར་འགྱུར་རོ་ཞེས་བྱ་བ་ནི། གལ་ཏེ་ཡིད་ཀྱི་རྣམ་པར་ཤེས་པའི་དམིགས་པ་ཡོད་པ་དེ་བཞིན་དུ་སྐྱེ་མཆེད་བཅུ་གསུམ་པ་ཡོད་པ་མ་ཡིན་པས་འདས་པ་དང་མ་འོངས་པ་
བཞིན་དུ་དེ་ཡང་དམིགས་པ་མ་ཡིན་ནོ། །དེའི་ཕྱིར་དམིགས་པ་ཡོད་པ་མ་ཡིན་པའི་རྣམ་པར་ཤེས་པ་མེད་དེ་ཞེས་བྱ་བར་ངེས་སོ། །འོན་ཏེ་སྐྱེ་མཆེད་བཅུ་གསུམ་པ་ཞེས་བྱ་བ་རྒྱས་པར་འབྱུང་བ་ལ། སྐྱེ་མཆེད་བཅུ་གསུམ་པ་མེད་དོ་སྙམ་པའི་ཤེས་པ་འདིའི་དམིགས་པ་དངོས་
པོར་མི་རུང་སྟེ། སྐྱེ་མཆེད་བཅུ་གསུམ་པ་མིག་ལ་སོགས་པས་བལྟར་མེད་པའི་ཕྱིར་རོ། །དེའི་ཕྱིར་མེད་པ་ལས་ཐ་དད་པ་འདིའི་དམིགས་པ་ཅི་ཞིག་ཡིན་ཞེས་བརྗོད་པར་བྱའོ། །མིང་དེ་ཉིད་དམིགས་པ་ཡིན་ནོ་ཞེས་བྱ་བ་ལ། བྱེ་བྲག་ཏུ་སྨྲ་བ་རྣམས་ན་རེ། དོན་མེད་པའི་ཕྱིར་རོ་
ཞེས་ཟེར་རོ། །སློབ་དཔོན་འདུས་བཟང་ན་རེ། འདིར་ཡོད་པ་མ་ཡིན་ཞེས་བྱ་བ་འདི་མངོན་པར་བརྗོད་པའི་རྣམ་གྲངས་ཡོད་པས་འདི་མངོན་པར་བརྗོད་པ་དེའི་ཕྱིར་ཡོད་པ་མ་ཡིན་པ་ཞེས་བྱ་བ་འདི་བཤད་པ་དེའི་རྣམ་གྲངས་ཀྱང་བརྗོད་པའི་བློ་སྐྱེའོ་ཞེས་ཟེར་རོ། །མེད་པ་ཉིད་
ཡིན་ན་དེ་ལྟ་ན་ནི་འོ་ན་མིང་ཉིད་མེད་དོ་ཞེས་བྱ་བར་རྟོག་པར་འགྱུར་རོ། །དེ་དོན་མེད་དེ་མིང་ཡང་རྣ་བའི་རྣམ་པར་ཤེས་པའི་ཉམས་སུ་མྱོང་བ་ཉིད་མེད་པས་ཅི་ལྟར་རྟོག་པར་འགྱུར། སློབ་དཔོན་འདུས་བཟང་ན་རེ། དེ་ལ་ངེས་པ་མེད་དོ་སྙམ་པའི་བློ་སྐྱེ་བ་མ་ཡིན་ནོ། །འོ་ན་ཅི་ཞེ་ན་
ཡོད་དོ་སྙམ་པའི་བློ་སྐྱེས་པས་དེའི་དངོས་པོ་དགག་པའི་ཡུལ་རྣམས་དངོས་པོའི་ཡུལ་ཅན་ཏེ་དངོས་པོ་དགག་པའོ། །མེད་ཅེས་བརྗོད་པ་དེའི་ཕྱིར་བརྗོད་པའི་ཡུལ་གྱི་བློའོ། །གང་ལ་ཡུལ་མེད་པར་འབྱུང་བར་འོས་པ་མ་ཡིན་པས་དགག་པའི་དོན་ཏོ། །དེ་ལ་དོན་རྗོད་པར་བྱེད་
པ་དང་བློ་ནི་དཔེར་ན་བྲམ་ཟེ་རྟག་གོ་ཞེས་གང་བརྗོད་པ་བརྗོད་བྱ་མ་ཡིན་པ་ཇི་ལྟ་བར་ཡོད་པ་མ་ཡིན་ནོ། །དེ་ལ་དོན་མེད་པའི་ཕྱིར་ཡོད་པ་མ་ཡིན་ཞེས་རྗོད་པར་བྱེད་པ་ཉིད་ཀྱི་བློ་ལས། གལ་ཏེ་མེད་པ་བརྗོད་བྱར་གྱུར་ན་སྒྲ་གང་ཡང་རུང་བ་དོན་མེད་པ་ཅན་དུ་འགྱུར་རོ། །གལ་

ཏེ་དངོས་པོ་དགག་པའི་ཡུལ་ཡོད་པ་མ་ཡིན་པའི་བློ་ལས་མིང་གི་ཡུལ་དུ་མི་འགྱུར་རོ། །ཡང་ན་མིང་མེད་པའི་རང་བཞིན་དུ་ཐལ་བར་འགྱུར་བའི་ཕྱིར་རོ། །གལ་ཏེ་དངོས་པོ་དགག་པའི་ཡུལ་ཡང་དངོས་པོ་ཉིད་དུ་དམིགས་ན། བྲམ་ཟེ་ལ་སོགས་པ་དགག་པའི་
ཡུལ་ཡང་བྲམ་ཟེ་ཉིད་དུ་དམིགས་པར་ཐལ་བར་འགྱུར་རོ། །གང་བཤད་པ་དངོས་པོ་དགག་པ་མེད་པར་བཤད་པས་འདིར་དངོས་པོ་མེད་པའི་རང་བཞིན་གྱི་ཕྱིར་རམ་བརྗོད་བྱ་མ་ཡིན་པའི་ཕྱིར་དངོས་པོ་དགག་པ་བརྗོད་པར་བརྟག་ཅེ་ན། གཉི་ག་ལྟར་ཡང་སྐྱེ་བ་མེད་དེ་དེའི་
བདག་ཉིད་ཡིན་པའི་ཕྱིར་རོ། །འོན་ཏེ་དངོས་པོའི་སྒྲ་ནི་ཡོད་པའི་སྒྲར་བརྗོད་དོ་ཞེ་ན་དེ་ལྟ་ན་ཡང་མི་རིགས་ཏེ། འདིར་ཡོད་པ་མ་ཡིན་ཞེས་བྱ་བའི་སྒྲའི་ངོ་བོས་འཆད་པར་འདོད་པ་མ་ཡིན་ནོ། །འོ་ན་ཅི་ཞེ་ན། སྐྱེ་མཆེད་བཅུ་གསུམ་པའི་སྒྲའི་དོན་ནོ། །བྲམ་ཟེ་མ་ཡིན་ཞེས་
བྱ་བས་ཀྱང་བྲམ་ཟེ་དང་འདྲ་བར་གཞན་རྟོགས་ཏེ། གཞན་ཐམས་ཅད་མ་ཡིན་པ་ཉིད་ཅེས་བྱ་བ་འདིར་བྲམ་ཟེ་མ་ཡིན་པ་ཞེས་བྱ་བ་སྟེ། སྒྲ་ལ་ཤེས་པ་ཡོད་པ་མ་ཡིན་ནོ། །སྐྱེ་མཆེད་བཅུ་གསུམ་པ་ཡོད་པ་མ་ཡིན་ཞེས་བྱ་བ་འདིར་ཡང་སྐྱེ་མཆེད་བཅུ་གསུམ་པའི་སྒྲའི་
དོན་ཉིད་ཡོད་པ་མ་ཡིན་པར་སྒྲུབ་པར་བྱེད་དོ། །མེད་པའི་སྒྲའི་རང་བཞིན་གང་ཡིན་པ་འདི་གཉིས་བརྗོད་བྱར་འདོད་པས་དེའི་ཕྱིར་དངོས་པོ་དང་དངོས་པོ་མེད་པ་བརྗོད་པར་བྱེད་པའི་སྒྲ་དོན་མེད་པ་ཅན་དུ་འདོད་དོ། །གང་བཤད་པ་དངོས་པོ་ཅི་ཡང་མེད་པ་ནི་ཤེས་བྱ་མ་ཡིན་ཞིང་
བརྗོད་བྱ་མ་ཡིན་ནོ་ཞེ་ན། དེ་ལྟ་ན་བུམ་པ་དང་སྣམ་བུ་ལ་སོགས་པ་ཡང་ཤེས་བྱ་མ་ཡིན་པ་དང་བརྗོད་བྱ་མ་ཡིན་པར་ཐལ་བར་འགྱུར་རོ། །དངོས་པོ་ཅི་ཡང་མེད་པ་དག་ཀྱང་སྔ་ན་མེད་པ་ལ་སོགས་པའི་དབྱེ་བས་ཐ་དད་པ་ནི་མི་འགལ་ཏེ། བལྟོས་པས་ཐ་དད་པའི་བུམ་པ་དང་
སྣམ་བུ་ལ་སོགས་པ་བཞིན་ནོ། །སྒྲའི་སྔ་ན་མེད་པ་ལ་དམིགས་པ་གང་ཡིན་པ་ཞེས་བྱ་བ་ནི་མ་སྐྱེས་པ་ལ་དམིགས་པའོ། །དེ་ལ་དམིགས་པ་ཅི་ཞེ་ན། སྐྱེ་བ་དགག་པ་མ་གཏོགས་པ་གཞན་མ་ཡིན་པས་སྒྲའི་མ་སྐྱེས་པ་ཡོད་དོ་ཞེས་དགོངས་པའོ། །བྱེ་བྲག་ཏུ་སྨྲ་བ་

རྣམས་ནི་སྒྲ་ཁོ་ནའོ་ཞེས་ཟེར་རོ། །དུས་གསུམ་དུ་ཡང་སྒྲའི་རང་བཞིན་ཁྱད་པར་མེད་པའི་ཕྱིར་རོ། །དེ་ལྟ་ན་འོ་ན་ཞེས་རྒྱས་པར་འབྱུང་བ་ལ། གལ་ཏེ་གང་ཞིག་སྒྲའི་སྔ་ན་མེད་པ་ལ་དམིགས་ན་དེས་སྒྲ་ཁོ་ན་དམིགས་པས་དགག་པ་ཙམ་ཐོབ་ཀྱི་
གཞན་མ་ཡིན་ནོ། །དེ་ལྟ་ཡིན་ན་གང་ཞིག་སྒྲ་མེད་པ་དོན་དུ་གཉེར་བ་དེ་ལ་སྒྲ་དབྱུང་དགོས་པ་ཁོ་ནར་འགྱུར་རོ། །དེས་སྒྲ་དོན་དུ་གཉེར་བར་འགྱུར་གྱི་སྒྲ་མེད་པ་ནི་མ་ཡིན་ནོ། །གལ་ཏེ་མ་འོངས་པའི་གནས་སྐབས་ཡིན་ནོ་ཞེ་ན་ནི། མ་སྐྱེས་པའི་གནས་སྐབས་ཞེས་བྱ་བ་
སྒྲ་ཁོ་ནའི་སྒྲ་སྔ་ན་མེད་པའོ། །གང་ཞིག་སྒྲ་མེད་པ་དོན་དུ་གཉེར་བ་ནི་མ་སྐྱེས་པའི་གནས་སྐབས་ཀྱི་སྒྲ་དེ་ཉིད་དོན་དུ་གཉེར་བ་ཡིན་ལ་དེའི་བྱ་བ་འབྱུང་བ་མ་ཡིན་ནོ། །ཡོད་ན་ཇི་ལྟར་མེད་པའི་བློར་འགྱུར་ཞེས་བྱ་བ་ནི། སྔར་སྐྱེས་པའི་སྒྲ་མེད་པ་སྟེ་ད་ལྟར་བའི་སྒྲ་བཟུང་ནས་
མེད་དོ་སྙམ་པའི་བློ་འབྱུང་བ་མ་ཡིན་ནོ། །ད་ལྟར་བྱུང་བ་མེད་དོ་ཞེས་བྱ་བ་ལ་འདི་ད་ལྟར་བྱུང་བ་མེད་དོ་སྙམ་པའི་དེ་ལྟ་བུར་དེ་ལ་མེད་དོ་སྙམ་པའི་བློ་འཇུག་གི །ཡང་མེད་པ་ལ་དམིགས་པ་མ་ཡིན་ནོ། །གཅིག་པའི་ཕྱིར་རོ་ཞེས་བྱ་བ་ནི། གང་ཁོ་ན་མ་འོངས་པ་དེ་ཉིད་ད་ལྟར་
བྱུང་བ་ཡིན་ན། ཅི་ལྟར་ད་ལྟར་བྱུང་བ་མེད་ཅེས་བྱ་བ་དང་ད་ལྟར་བྱུང་ཡང་མ་འོངས་པ་མེད་པས་དེ་ལ་ཡང་མེད་པའི་བློ་ཡོད་པར་འགྱུར་ཏེ་ཁྱད་པར་མེད་པའི་ཕྱིར་རོ། །ཡང་ན་བྱེ་བྲག་གང་ཡིན་ཞེས་བྱ་བ་ནི། ད་ལྟར་བྱུང་བའི་གནས་སྐབས་ན་གང་མེད་པ་དེ་ནི་ད་ལྟར་བྱུང་བ་ལ་མེད་
པ་ཞེས་བྱའོ། །དེ་མ་བྱུང་བ་ལས་བྱུང་བར་གྲུབ་སྟེ་ཞེས་བྱ་བ་ནི། མ་འོངས་པའི་གནས་སྐབས་སུ་མ་བྱུང་བ་ལས་ད་ལྟར་བྱུང་བའི་གནས་སྐབས་སུ་བྱུང་བའི་ཕྱིར་རོ། །ཡོད་པ་དང་མེད་པ་གཉི་ག་ཞེས་བྱ་བ་ལ་ད་ལྟར་བྱུང་བའི་གནས་སྐབས་ན་ནི་ཡོད་པ་དམིགས་པ་ཡིན་ལ་མ་
འོངས་པའི་གནས་སྐབས་ན་ནི་མེད་པ་དམིགས་པ་ཡིན་ནོ། །གལ་ཏེ་མེད་པ་དམིགས་པ་ཡིན་ན་འོ་ན་བྱང་ཆུབ་སེམས་དཔའ་ཞེས་གསུངས་པ་ཇི་ལྟར་དྲང་། གང་འཇིག་རྟེན་ན་མེད་པ་གང་ཡིན་པ་ཞེས་བྱ་བ་རྒྱས་པར་འབྱུང་སྟེ། དེ་ལས་ནི་དེའི་དམིགས་པ་མེད་པ་ཉིད་ཡིན་པ་

བཀག་པ་ཡིན་ནོ། །མངོན་པའི་ང་རྒྱལ་ཅན་གཞན་ཞེས་བྱ་བ་རྒྱས་པར་འབྱུང་སྟེ། འདིར་མདོའི་དགོངས་པ་ནི་ཏིང་ངེ་འཛིན་ཡོངས་སུ་མ་དག་པ་རྣམས་སྣང་བ་མེད་བཞིན་དུ་སྟེ། སྦྱོར་བའི་གནས་སྐབས་ན་ལྷའི་མིག་གི་སྣང་བ་མེད་བཞིན་དུ་ཡོད་པར་ལྟའི་བདག་ནི་ལྷའི་
མིག་གི་སྣང་བ་གསལ་བའི་ངོ་བོར་ཡོད་པ་ཁོ་ན་ཡོད་པར་ལྟའི་ཞེས་བྱ་བ་འདི་ཡིན་ནོ། །རྟོག་པར་ཡང་ག་ལ་འགྱུར་ཞེས་བྱ་བ་ནི་ཡོད་དམ་མེད་ཅེས་ཐེ་ཚོམ་དུ་སྟེ། བློ་རྣམས་ཡོད་པ་དང་མེད་པའི་ཡུལ་ཅན་ཉིད་ཡིན་ན་ནི། གཉིས་ཀ་ལ་ལྟ་བའི་དགོས་པ་གྲུབ་ཀྱི། ཡོད་པའི་
ཡུལ་ཅན་ཉིད་ཡིན་ན་མི་གྲུབ་བོ། །ཡང་ན་ཁྱད་པར་ཅི་ཞིག་ཡོད་ཅེས་བྱ་བ་ལ། གལ་ཏེ་དེ་དག་ཀྱང་ཡོད་པའི་སྣང་བ་ཁོ་ན་ལྟའི་མེད་པ་མ་ཡིན་ན་ནི་གཞན་དག་ལས་བྱང་ཆུབ་སེམས་དཔའ་ལ་ཁྱད་པར་ཅི་ཞིག་ཡོད་འདི་ཡོད་པ་དང་མེད་པ་གཉིས་བློའི་ཡུལ་ཡིན་པ་ཉིད་ལ་
དཔེར་བརྗོད་པ་ནི་ཡོད་པ་ལ་ཡང་ཡོད་པར་ཤེས་ལ། མེད་པ་ལ་ཡང་མེད་པར་ཤེས་སོ་ཞེས་བྱ་བ་འདི་ཡིན་ནོ། །དེའི་ཕྱིར་རྣམ་པར་ཤེས་པ་ནི་ཡོད་པ་ལ་དམིགས་པའི་ཕྱིར་རོ་ཞེས་བྱ་བ་དེ་ཡང་གཏན་ཚིགས་སུ་མི་རུང་ངོ་། །སློབ་དཔོན་འདུས་བཟང་ན་རེ། བློ་སྐྱེ་བའི་རྒྱུ་
ཡོད་པ་དེ་ཡང་རྣམ་པ་གཉིས་ཏེ། རྫས་སུ་ཡོད་པ་དང་བཏགས་པར་ཡོད་པའོ། །གང་ལ་བལྟོས་པ་མེད་པར་བློ་སྐྱེ་བ་དེ་ནི་རྫས་སུ་ཡོད་པའོ། །གང་ལ་བལྟོས་པས་བློ་སྐྱེ་བ་དེ་ནི་བཏགས་པར་ཡོད་པའོ། །རྫས་སུ་ཡོད་པ་ཡང་རྣམ་པ་གཉིས་ཏེ། བྱ་བའི་ཁྱད་པར་དང་། དངོས་
པོ་ཙམ་མོ། །བཏགས་པར་ཡོད་པ་དེ་ཡང་རྣམ་པ་གཉིས་ཏེ་རྫས་ཉེ་བར་ལེན་པ་དང་། བཏགས་པ་ཉེ་བར་ལེན་པའོ། །གལ་ཏེ་བཏགས་པར་ཡོད་པའི་ཡུལ་ལ་ཡང་རྣམ་པར་ཤེས་པ་དངོས་པོ་མ་ཡིན་པ་དམིགས་ན། བཏགས་པར་ཡོད་པའི་དངོས་པོ་གཟུགས་ལ་སོགས་པ་
དང་འདྲ་བར་རང་བཞིན་མེད་པའི་ཕྱིར་དེ་ཉེ་བར་ལེན་པ་ལ་དམིགས་པ་མ་ཡིན་ནོ། །གལ་ཏེ་དེ་ལྟར་རྣམ་པར་ཤེས་པ་ལ་བཏགས་པར་ཡོད་པའི་དམིགས་པ་མེད་པ་ཉིད་ཡིན་ན། དེ་ཉེ་བར་ལེན་པ་རྫས་སུ་ཡོད་པའི་ཕྱིར། རྣམ་པར་ཤེས་པ་ལ་བུམ་པ་དང་སྣམ་བུ་ལ་སོགས་པའི་

རྣམ་པ་གཟུགས་ལ་སོགས་པ་ཡུལ་དུ་མི་རུང་ངོ་། །གཟུགས་ལ་སོགས་པ་དེའི་རྣམ་པ་མ་ཡིན་པའི་ཕྱིར་དེའི་རྣམ་པ་སོ་སོ་བ་ཉིད་ཀྱང་དེའི་རྣམ་པར་གཟུགས་ལ་སོགས་པར་ཐལ་བ་མ་ཡིན་ནོ། །རྒྱུ་ཙམ་ཉིད་ཀྱིས་ཡུལ་དམིགས་པར་ཐལ་བ་མ་ཡིན་ཏེ།
རྐྱེན་ཐམས་ཅད་དམིགས་པ་ཉིད་དུ་ཐལ་བའི་ཕྱིར་རོ། །དེའི་ཕྱིར་རང་དང་མཐུན་པའི་ཤེས་པ་སྐྱེད་པ་ནི་རྒྱུ་ཡིན་ལ། དེ་ཉིད་དམིགས་པ་ནི་རྒྱུ་རྐྱེན་ཡིན་ནོ། །དེ་ལྟར་མ་ཡིན་པར་གལ་ཏེ་སྣང་བ་མེད་པའི་ཤེས་པའི་དམིགས་པ་རྣམ་པ་གཞན་ཡིན་པར་འདོད་པ་དེ་ལྟ་ན། ཧ་ཅང་
ཐལ་བའི་ཕྱིར་བསྟན་པ་ཆེན་པོ་ལས་ཉེ་བར་འཁྱམ་པར་འགྱུར་རོ། །དེའི་ཕྱིར་གང་ཞིག་ཀ་བ་ལ་སྐྱེས་བུའི་རྣམ་པར་ཤེས་པ་དེ་ནི་ཀ་བ་ལ་དམིགས་པ་ལས་གཞན་མ་ཡིན་པའི་ཕྱིར་དང་དེར་ཡང་སྐྱེས་བུ་མེད་པའི་ཕྱིར་ཡུལ་མེད་པ་ཁོ་ན་ཡིན་ནོ། །དེ་སྔོན་དུ་འགྲོ་བའི་རྒྱུད་ཀྱི་ཁྱད་པར་
ལས་ཞེས་བྱ་བའི་དོན་ནི། དེ་སྔོན་དུ་འགྲོ་བ་ནི་རྒྱུ་མཐུན་པའི་འབྲས་བུ་དང་རྗེས་སུ་མཐུན་པའི་རྒྱུད་ཡིན་ནོ། །ཁྱད་པར་སྨོས་པ་ནི་རྣམ་པར་སྨིན་པའི་འབྲས་བུ་དང་རྗེས་སུ་མཐུན་པའི་རྒྱུད་བསྟན་པའི་ཕྱིར་རོ། །བདག་ཏུ་སྨྲ་བ་དགག་པ་ནས་བཤད་པར་བྱའོ་ཞེས་བྱ་བ་ནི་རྒྱུད་ཡོངས་
སུ་འགྱུར་བའི་ཁྱད་པར་ལས་ཏེ། ས་བོན་དང་འབྲས་བུ་བཞིན་ནོ་ཞེས་བྱ་བ་ལ་སོགས་པས་སོ། །གང་ཞིག་འདས་པ་དང་མ་འོངས་པ་རྫས་སུ་ཡོད་པ་ནི་བཏགས་པར་མ་ཡིན་ནོ། །དེ་ལ་ཞེས་བྱ་བ་ནི་འབྲས་བུ་ལའོ། །དེ་མེད་པར་དེ་ཡོད་པ་མེད་པའི་ཕྱིར་འབྲས་བུའི་
ཡོད་པ་སྐྱེ་བར་བྱ་བ་ལ་རྒྱུའི་ནུས་པ་ཡིན་པས་སོ། །གལ་ཏེ་འབྲས་བུ་རྟག་ཏུ་ཡོད་ན་ནི་དེ་ལ་ལས་ཀྱི་ནུས་པ་མེད་དེ། དེའི་ཕྱིར་དགེ་བ་དང་མི་དགེ་བའི་ལས་དོན་མེད་པར་ཐལ་བར་འགྱུར་བས་ཆེན་པོས་བསྟན་པ་ལས་ཉམས་སོ། །ཨཱ་ར་ཙི་ཏོ་བྷ་བ་ཏི། སྐྱེད་པར་ནུས་
སོ་ཞེས་བྱ་བ་ལ། ཡང་འདི་སྐྱེད་པ་ཅི་གལ་ཏེ། འབྲས་བུ་ཡོད་པ་སྐྱེད་ཅེ་ན་མ་ཡིན་ཏེ། འོ་ན་མ་འོངས་པས་རྫས་སུ་ཡོད་པར་འགྱུར་རོ། །གལ་ཏེ་སྐྱེད་པ་དེ་ཡོད་པ་ཉིད་ལས་ཐ་དད་པའི་འགའ་ཞིག་ཁྱད་པར་འཛིན་ནོ་ཞེ་ན། འོ་ན་ནི་སྐྱེ་བ་མ་བྱུང་བ་ལས་བྱུང་བ་ཞེས་བྱ་བ་གྲུབ་

པ་ཡིན་ཏེ། ཁྱད་པར་དེ་སྔར་མེད་པའི་ཕྱིར་རོ། །འབྲས་བུ་ལས་གཞན་དུ་བརྗོད་པར་མི་བྱ་སྟེ། གལ་ཏེ་འདི་ལས་གཞན་པ་ལས་དང་འབྲས་བུའི་ནུས་པ་མེད་པས་དེའི་གནས་སྐབས་ཁོ་ན་སྐྱེད་ན། སྔ་ན་མེད་པའི་ཕྱིར་དང་ཕྱིས་ཀྱང་ཐམས་ཅད་ཡོད་པར་སྨྲ་བས་ཡོངས་སུ་བཏང་
བས་དངོས་པོ་རེ་རེ་བ་གཞན་མ་ཡིན་པས་དེ་དག་ཀྱང་རྟག་པ་འམ་མི་རྟག་པར་ཐལ་བར་འགྱུར་རོ། །ཡང་ཆ་ཤས་ཀྱི་རྟག་པ་ཉིད་དུ་ཁས་ལེན་ན་གཞན་ཉིད་རྟག་ལ་གཞན་མི་རྟག་གོ་ཞེས་བྱ་བར་ཐལ་བར་འགྱུར་རོ། །བཏགས་པར་ཡོད་པའི་ཕྱིར་དངོས་པོ་མེད་པ་ཉིད་སྐྱེ་བར་བརྗོད་པར་
མི་བྱ་སྟེ། དེ་ལ་ལས་རྣམས་ཀྱི་ནུས་པ་མི་རིགས་སོ། །ཡང་ཐམས་ཅད་ཡོད་པ་ཁོ་ན་ཞེས་བྱ་བ་ནི་ལས་དེ་དང་འབྲས་བུ་སྐྱེ་བའོ། །ད་ནི་གང་ལ་ཞེས་བྱ་བ་སྟེ། སྐྱེ་བའམ་འབྲས་བུ་ལ་ལས་སམ་གཞན་ཡང་རུང་སྟེ་རྒྱུ་གང་ཞིག་ནུས་ཏེ། ཐམས་ཅད་ཀྱི་ཚེ་རྫས་སུ་ཡོད་པ་ཉིད་
ཀྱི་ཕྱིར་རོ། །དེ་ལྟ་ན་ལོ་རྩིས་པ་རྣམས་ཀྱི་རྩོད་པ་སྐད་དུ་ཞེས་བྱ་བ་ལ། འདི་ཉེ་བར་མི་དམིགས་སོ་ཞེས་སློབ་དཔོན་འདུས་བཟང་ཟེར་རོ། །རྣམ་གྲངས་ཀྱིས་འགགས་པའི་རིགས་རྣམས་ཡོད་པ་དང་མེད་པར་ཁས་བླངས་པའི་ཕྱིར་ཡོད་པའོ། །འདས་པ་དང་མ་འོངས་པ་དང་
འཇིག་པའི་ཆོས་ཅན་ཤེས་བྱའི་བདག་ཉིད་སྔར་སྐྱེས་པ་རྣམས་དང་ལྷན་ཅིག་སྤྱོད་པ་འབྲས་བུའི་བདག་ཉིད་ནི་མེད་པའོ། །ད་ལྟར་བྱུང་བའི་བདག་ཉིད་རབ་ཏུ་སྦྱོར་བ་ལ་མངོན་པར་འཇུག་པ་ནི་ད་ལྟར་བྱུང་བ་སྟེ། འདས་པ་དང་མ་འོངས་པ་ནི་དེ་ལྟར་མ་ཡིན་ནོ། །དེ་ལྟར་
ལོ་རྩིས་པ་རྣམས་ཀྱི་རྩོད་པ་སྐད་དུ་བྱུང་བ་དང་འབྱུང་བར་འགྱུར་བ་ཡོད་པའོ། །གལ་ཏེ་ཤེས་པའི་བདག་ཉིད་དུ་འདོད་ན། ལོ་རྩིས་པ་རྣམས་ཀྱི་རྩོད་པ་མེད་པ་བདེན་ནོ། །འོན་ཏེ་ཡང་ད་ལྟར་བྱུང་བ་བཞིན་རང་གི་ངོ་བོས་ཤེས་བྱའི་བདག་ཉིད་དུ་འདོད་ན། དེ་ལྟ་
ན་ཐམས་ཅད་ཀྱི་ཚེ་ཡོད་པའི་ཕྱིར་ཇི་ལྟར་ལོ་རྩིས་པ་རྣམས་ཀྱི་རྩོད་པར་ཐལ་བར་མི་འགྱུར། འོ་ན་ད་ལྟར་དུ་བྱེད་ནུས་པ་ཡིན་ནོ་ཞེས་བྱ་བ་ནི་ལས་དང་འབྲས་བུ་ཡོད་བཞིན་དུའོ། །ཡུལ་གཞན་དུ་འདྲེན་པ་ཡིན་ནོ་ཞེས་བྱ་བ་ནི་མ་འོངས་པ་ཡུལ་ན་མི་གནས་པས་ཞེས་

བྱ་བའི་བསམ་པ་འདིས་སྨྲས་པའོ། །རྟག་པར་ཐལ་བར་འགྱུར་རོ་ཞེས་བྱ་བ་ནི་དེ་འདྲེན་པའི་རྐྱེན་རྣམས་རྟག་ཏུ་ཉེ་བའི་ཕྱིར་རོ། །གཟུགས་ཅན་མ་ཡིན་པ་དེ་ཚོར་བ་ལ་སོགས་པ་རྣམས་ལ་དེ་ཇི་ལྟར་ཏེ། འདྲེན་ཞེས་བྱ་བ་དང་སྦྱར་ཏེ། དེ་རྣམས་ནི་རྟག་ཏུ་
ཡུལ་ན་མི་གནས་པས་དྲིས་པ་ཡིན་ནོ། །འབྲས་བུའི་འདྲེན་པ་བྱ་བའི་མིང་ཅན་གང་ཡིན་པ་དེ་ཡང་མ་བྱུང་བ་ལས་བྱུང་བ་ཡིན་ཏེ། དེ་ནི་སྔར་ཡོད་པ་མ་ཡིན་པའི་ཕྱིར་རོ། །འདིར་ཡང་སྔ་མ་བཞིན་དཔྱད་པར་བྱ་སྟེ། གལ་ཏེ་རང་གི་ངོ་བོའི་ཁྱད་པར་ཞིག་ཅེས་བྱ་བ་ལ། ད་ལྟར་
བ་བྱེད་པའི་རང་བཞིན་སྔར་ད་ལྟར་བྱུང་བ་མ་ཡིན་པ་ད་ལྟར་བྱུང་བར་བྱེད་པ་ཡིན་པ་དེ་ལྟ་ན་ལས་ཀྱིས་ནུས་པ་གྲུབ་པས། མ་བྱུང་བ་ལས་བྱུང་བ་ཞེས་བྱ་བ་གྲུབ་པོ། །དེ་ལྟར་དེ་ཡང་ད་ལྟར་བྱུང་བར་བྱས་པ་ཡིན་ནོ། །གལ་ཏེ་སྔར་མ་བྱུང་བ་ལས་ཕྱིས་བྱུང་བ་ཉིད་དམ། འོན་ཏེ་
སྔར་ཡོད་པ་ཁོ་ནའོ་ཞེ་ན། ད་ལྟར་བར་བྱས་པས་འདི་ལ་ཁྱད་པར་ཡོད་པ་མ་ཡིན་པས་ལས་ཀྱིས་ནུས་པ་མེད་པ་སོ་ན་འདུག་པ་ཉིད་དོ། །ཇི་ལྟར་མིང་མེད་པའི་ངོ་བོ་འབྱུང་བར་འགྱུར་ཞེ་ན། བཏགས་པ་དང་བཅས་པ་དང་བཏགས་པ་མེད་པ་ཉིད་ཀྱིས་ཤིན་ཏུ་ཐ་དད་པའི་ཕྱིར་
མེད་པའི་ངོ་བོར་འགྱུར་བ་ཡིན་ནོ། །འོ་ན་རྒྱུའི་རྐྱེན་ཡོད་པ་རྣམས་ལ་དངོས་པོར་འགྱུར་བ་ཅི་ཞེ་ན། དེ་ནི་སྔ་ན་ཡོད་པ་མ་ཡིན་པ་ལས་བྱ་སྟེ། གང་བཤད་པ་ཅི་ལྟར་མེད་པའི་ཁྱད་པར་ཡོངས་སུ་བརྟག་ཅེ་ན། འདི་དངོས་པོ་མེད་པ་རྒྱུ་དང་བཅས་པ་དང་འདི་རྒྱུ་མེད་
པ་ཅན་ཞེས་དེ་ལྟར་བཤད་དོ། །ཁ་ཅིག་མེད་པའི་རྒྱུ་ཡོངས་སུ་རྟོགས་པར་བྱེད་པ་མ་ཡིན་ནོ། །འོ་ན་དངོས་པོ་རྣམས་ཁོ་ནའི་རྒྱུ་ཁས་ལེན་པ་ཅི་ཞེ་ན། དེ་ནི་སྔར་བྱུང་བ་མ་ཡིན་པ་རྣམས་ཀྱི་སྟེ། དེ་ཡང་ཐམས་ཅད་ལ་ཐམས་ཅད་མ་ཡིན་ནོ། །འོ་ན་ཅི་ཞེ་ན་འདིར་ཡོད་
པ་གང་ཡིན་པ་དེ་ཉིད་གཞན་མ་ཡིན་ཏེ། དཔེར་ན་བྱ་བ་སྔ་ན་མེད་པའི་རྐྱེན་མི་འདོད་པ་བཞིན་ནོ། །འོ་ན་བྱ་བ་ཉིད་ཀྱིས་ཅི་ཞེ་ན། བྱ་བ་སྔ་ན་མེད་པ་ལ་རྐྱེ