Luận tạng Tây Tạng (Tengyur) — Tập 210

ུ་བྱེད་ཡོངས་སུ་སྟོན་པའི་ཚིག་བླ་དགས་ཡིན་ཏེ། འདུ་བྱེད་འདས་པ་དང་མ་འོངས་པ་དང་ད་ལྟར་བ་རྣམས་མངོན་པར་གསལ་བར་
བྱ་བའི་ཕྱིར་དུས་ཞེས་བྱ་བའི་མིང་འདི་བཏགས་ཀྱི་རྟག་པ་དང་རྫས་ཞེས་བྱ་བ་ནི་མ་ཡིན་ནོ། །འདི་ལྟར་འདས་པའི་དུས་དང་མ་འོངས་པ་དང་ད་ལྟར་བྱུང་བ་ཞེས་བྱ་བ་ནི་འདུ་བྱེད་འདས་པ་དང་མ་འོངས་པ་དང་ད་ལྟར་བྱུང་བ་དག་ཁོ་ན་ཡིན་པར་རྟོགས་ཀྱི། རྟག་པའི་རྫས་གཞན་
ནི་མ་ཡིན་ཏེ། རྟག་པ་ལ་འདས་པ་དང་མ་འོངས་པ་དང་ད་ལྟར་བྱུང་བ་ཉིད་མི་སྲིད་པའི་ཕྱིར་རོ། །ཡང་དག་པར་བླངས་པ་ཡོད་ཀྱང་ཞེས་བྱ་བ་ནི། བདག་གིས་སྐྱེ་བ་གཞན་དུ་ཡང་དགེ་སློང་གི་སྡོམ་པ་དགེ་ཚུལ་གྱི་སྡོམ་པ་ཡང་དག་པར་བླང་བར་བྱའོ་སྙམ་དུ་ཡང་དག་
པར་བླངས་པ་དེ་ཡོད་ཀྱང་ངོ་། །སྐལ་བ་མི་འདྲ་བའི་ཕྱིར་ཞེས་བྱ་བ་ནི་རིས་མི་མཐུན་པ་གཞན་གྱིས་བསྡུས་པའི་ཕྱིར་རོ། །དེས་ཀྱང་དེར་སྦྱོར་བ་མ་བྱས་པའི་ཕྱིར་ཞེས་བྱ་བ་ནི། སྐལ་བ་མི་འདྲ་བའི་ལུས་དེས་དེར་ཏེ། ཡང་དག་པར་བླང་བ་ལ་སྦྱོར་བ་མ་བྱས་པའི་ཕྱིར་
རོ། །འདི་སྐད་བསྟན་པར་འགྱུར་ཏེ། ལུས་གང་གིས་སྡོམ་པ་ཡང་དག་པར་བླང་བ་ལ་སྦྱོར་བའི་ལུས་དེ་ཉིད་ལ་སྡོམ་པ་སྐྱེའི་ལུས་གཞན་ལ་ནི་མ་ཡིན་ནོ། །མི་དྲན་པའི་ཕྱིར་ཞེས་བྱ་བ་ནི་སྡོམ་པ་ཡང་དག་པར་ལན་པ་དེ་ལུས་གཞན་གྱིས་མི་དྲན་པའི་ཕྱིར་རོ། །སུ་
ཞིག་གེགས་བྱེད་ཅེས་བྱ་བ་ནི། དེ་ལ་རྟེན་སྐལ་བ་མི་ཉམས་པའི་གེགས་མེད་པའོ། །ཉིན་ཞག་གཉིས་པ་ལ་སོགས་པ་ལ་རྟེན་ཐ་དད་པའི་ཕྱིར་དེ་དག་ལ་དེ་དང་སྦྱོར་བའི་གེགས་མེད་པ་མ་ཡིན་ནོ། །རྟེན་དེ་ཉིད་ཀྱི་དེར་སྦྱོར་བ་ལས་གེགས་མི་དྲན་པ་མ་ཡིན་

ཏེ། སྡོམ་པ་ཡང་དག་པར་བླངས་པ་དྲན་པའི་ཕྱིར་རོ། །དེའི་ཕྱིར་ཇི་ལྟར་ཤི་བ་སྡོམ་པ་སྐྱེ་བར་རིགས་པ་དང་འགལ་བ་དེ་ལྟར་འདི་ནི་ཡོད་པ་མ་ཡིན་ཏེ། འདི་ལྟར། ཟླ་བ་ཕྱེད་ལ་སོགས་པར་
ཡང་དག་པར་ལེན་པའི་སེམས་སྟོབས་དང་ལྡན་པ་དེ་ལྟར་ཉིན་ཞག་པའི་སྡོམ་པ་ཡང་དག་པར་ལེན་པ་མ་ཡིན་པ་དེའི་ཕྱིར་ཉིན་ཞག་གི་འོག་ཏུ་སྡོམ་པ་སྐྱེ་བ་ཡང་མི་འགལ་ལོ། །སློབ་དཔོན་འདུས་བཟང་ན་རེ་འདུལ་བ་དང་ལྡན་པའི་དོན་དག་ལ་ནི་
ཐམས་ཅད་མཁྱེན་པ་མ་ཡིན་པ་རྟོག་གེས་དེ་ཁོ་ན་ཉིད་ཁོང་དུ་ཆུད་པར་མི་ནུས་ཏེ། གང་སྡོམ་པ་དེ་དག་ལས་ཁ་ཅིག་ནི་ཚོགས་ཀྱི་ནང་དུ་གསོལ་བ་དང་གཞིའི་ལས་ཀྱིས་འཐོབ་ལ། ཁ་ཅིག་ནི་གང་ཟག་གཅིག་ལས་གསོལ་བ་ཙམ་གྱིས་ཐོབ་ལ། ཁ་ཅིག་གིས་དེ་ཡང་མེད་པར་
ཐོབ་པ་འདི་ལ་རྒྱུ་ཅི་ཞིག་ཡོད་པ་ཞེས་ཟེར་རོ། །མཚམས་མེད་པ་བྱེད་པ་རྒྱུ་དང་འབྲས་བུའི་འབྲེལ་པ་ངེས་པ་རྣམས་ལ་རྟེན་པ་དང་བྲལ་བ་མེ་ཤི་བ་ལྟ་བུ་རྣམས་བཀག་སྟེ། མཚམས་མེད་པ་བྱེད་པ་རྣམས་ནི་རབ་ཏུ་དབྱུང་བར་མི་བྱ་བསྙེན་པར་རྫོགས་པར་མི་བྱའོ་ཞེས་
འབྱུང་ངོ་། །དེའི་ཕྱིར་གང་དེ་ལྟར་འཐོབ་ཀྱི་རྣམ་པ་གཞན་ནི་མ་ཡིན་ཞེས་སྟོན་པས་གཟིགས་ཤིང་དེ་ཁོ་ན་ལྟར་བསྟན་པ་འདི་ནི་སྡོམ་པའི་རིགས་ཁོ་ན་དེ་ལྟར་གནས་པ་ཡིན་པས་འདི་ལ་རྒྱུ་བཙལ་བར་མི་བྱའོ་ཞེས་སྨྲའོ། །ཉིན་ཞག་པའི་ཕྱིར་ཐམས་ཅད་བསྟན་པ་
ཉིད་དོ་ཞེ་ན་འདི་གྲུབ་པ་ལ་ལན་ཡིན་ནོ། །འདི་གྲུབ་མ་ཡིན་ནམ་ཞེ་ན། དེའི་ཕྱིར་འདི་ལན་མ་ཡིན་ནོ། །དགེ་འདུན་ཕལ་ཆེན་པའི་སྡེ་པ་དག་ཀྱང་། ཇི་སྲིད་འཚོ་དང་ཉིན་ཞག་པ། །ཇི་སྲིད་དུས་ཀྱི་སྡོམ་པའོ། །ཞེས་འདོན་ཏོ། །ཉིན་ཞག་པ་ཉིད་ཅེས་བྱ་བ་ནི།
གཞན་དུ་ན་ཞག་ལྔའམ་ཞག་བཅུ་པ་ཡང་བསྟན་པར་འགྱུར་རོ། །དེའི་ཕྱིར་ཐམས་ཅད་དུ་ནི་ཉིན་ཞག་པའི་སྡོམ་པ་བསྟན་པ་ལས་ངེས་པར་བྱའོ། །འདི་ཉིན་ཞག་པའི་སྡོམ་པ་ཡིན་པའི་ཕྱིར་དེ་ལྟར་བསྟན་ཏོ་ཞེས་སོ། །འོན་ཏེ་དབང་པོ་གདུལ་དཀའ་བ་རྣམས་ཞེས་བྱ་

བ་འབྱུང་སྟེ། སློབ་དཔོན་འདུས་བཟང་ནི། དེ་ནི་གལ་ཏེ་དབང་པོ་གདུལ་དཀའ་བ་ལ་བལྟོས་ནས་ཉིན་ཞག་པ་བསྟན་ནི་དབང་པོ་ཆེས་གདུལ་དཀའ་བ་ལ་བལྟོས་ནས་ཡུད་ཙམ་མམ་ཉིན་ཞག་པ་ཉིད་བཤད་པ་མ་ཡིན་ནོ། །དེ་དེ་ལྟར་བརྟག་ག་ལ་ནུས་ཞེས་བྱ་བ་ནི་ཐལ་
མ་ཐག་ཏུ་དབང་པོ་གདུལ་དཀའ་བ་རྣམས་ཞེས་བྱ་བ་ལ་སོགས་པ་གང་སྨྲས་པ་སྟེ། འདིས་ནི་ཉིན་ཞག་གི་འོག་ཏུ་ཡང་སྡོམ་པ་སྐྱེའོ་ཞེས་བྱ་བའི་ལུང་མེད་པར་སྟོན་ཏོ། །ཕྱིན་ཆད་སྡོམ་པ་སྐྱེ་བ་ལ་ཡང་ཞེས་སློབ་དཔོན་གྱིས་རྒྱས་པར་སྨོས་པ་ལ། ཡང་ཅི་ལྟར་
རིག་པ་དང་མི་འགལ་ཞེ་ན། ལུས་སྐལ་བ་འདྲ་བའི་ཕྱིར་དང་དེས་དེར་སྦྱོར་བ་བྱས་པའི་ཕྱིར་དྲན་པའི་ཕྱིར་རོ། །ཕྱིན་ཆད་སུ་ལ་ཡང་མི་བསྟན་པས་ཞེས་བྱ་བ་ནི་བྱེ་བྲག་ཏུ་སྨྲ་བ་རྣམས་ན་རེ་ཁྱིམ་པ་ཐམས་ཅད་དབང་པོ་གདུལ་དཀའ་བ་ནི་མ་ཡིན་ཏེ། དེའི་ཕྱིར་ཕྱིན་ཆད་
སྐྱེ་བ་མི་སྲིད་པས་ཉིན་ཞག་གི་འོག་ཏུ་སུ་ལ་ཡང་མ་བསྟན་ཏོ་ཞེས་བྱ་བར་ཤེས་སོ་ཞེས་ཟེར་རོ། །དེ་དེ་ལྟར་ནོད་མོད་ཅེས་གྲག །གྲག་ཅེས་བྱ་བའི་སྒྲ་ནི་མ་རངས་པར་བསྟན་པའི་ཕྱིར་རོ། །དུས་གཞན་གྱི་བར་དུ་ལོག་པར་ཞུགས་པས་ནི་མ་ཡིན་ནོ་ཞེས་བྱ་བ་ལ། ཉིན་ཞག་
ཏུ་སྡིག་པ་བྱ་བའི་བསམ་པས་སྡིག་པའི་བྱ་བ་བྱེད་པ་ནི་སྡོམ་པ་ཡང་མ་ཡིན་ལ། སྡོམ་པ་མ་ཡིན་པ་ཡང་མ་ཡིན་ནོ། །དེ་ལྟ་ན་ལོ་ནི་བསྙེན་གནས་ཀྱི་སྡོམ་པ་ལ་ཡང་ཉིན་ཞག་ཁོ་ནར་བསམ་པ་ལོག་པ་མ་ཡིན་པར་ཞུགས་པས་དེ་ཡང་ཐོབ་པར་མི་འགྱུར་རོ་ཞེ་ན། དེའི་ཕྱིར་
བསྙེན་གནས་ཀྱི་སྡོམ་པ་ནི་ཞེས་བྱ་བ་རྒྱས་པར་སྨོས་སོ། །སྡིག་པ་བྱ་བའི་བསམ་པས་ཞེས་བྱ་བ་ནི་སྡོམ་པ་བྱ་བའི་མནོ་བསམ་མོ། །རྗེས་སུ་འབྲེལ་པ་དང་བཅས་པ་ཞེས་བྱ་བ་ནི་བག་ཆགས་དང་བཅས་པ་སྟེ། དེ་ལས་སྐྱེས་པ་དང་དེའི་རྒྱུའི་བག་ཆགས་དེ་ཡོད་པས་
སེམས་དགེ་བ་ཡང་དེ་དང་ལྡན་པ་སྟེ། སྡོམ་པ་མ་ཡིན་པ་དང་ལྡན་པ་ཞེས་བྱ་བའོ། །དེ་མ་སྤངས་པའི་ཕྱིར་ཞེས་བྱ་བ་ནི་སྡིག་པ་བྱ་བའི་བསམ་པ་རྗེས་སུ་འབྲེལ་བ་དང་བཅས་པ་སྟེ། དེ་མ་སྤངས་པ་ནི་བསམ་པ་ཐག་པ་ནས་སྡིག་པའི་བྱ་བ་ཡོངས་སུ་མ་བཏང་

བའོ། །དེ་ནི་ཟས་ཟོས་ནས་ཀྱང་ནོད་པར་བྱ་བ་འབྱུང་ངོ་། །ཡང་ཅི་ནོད་པའི་སྔ་རོལ་ཏུ་ཟོས་པ་ལ་སྡོམ་པ་སྐྱེ་འམ་འོན་ཏེ་མི་སྐྱེ། གལ་ཏེ་སྐྱེ་ན་ནི་སྡོམ་པར་རྣམ་པར་རིག་བྱེད་ལ་རག་ལས་པ་ཉམས་པར་འགྱུར་ལ་ནད་པར་ཡང་དོན་མེད་པར་
འགྱུར་རོ། །སྔར་ཡང་དག་པར་བླངས་པའི་རྒྱུ་མཚན་ལས་ཁས་བླང་བར་བྱའོ། །དེའི་ཕྱིར་འདི་ཉིན་ཞག་པར་མི་འགྱུར་རོ། །ཅི་སྟེ་མི་སྐྱེ་བ་དེ་ལྟ་ན་ཡང་ཉིན་ཞག་པ་ཉིད་ལ་ནོད་པར་འགྱུར་རོ། །འབོགས་པ་དང་ནོད་པ་འགྲུབ་པར་མི་འགྱུར་ཞེས་བྱ་བ་ནི། སྔར་
རམ་མཉམ་དུ་སྨྲ་ནའོ། །ཡན་ལག་བརྒྱད་ཚང་བ་ཞེས་བྱ་བ་ནི། ཡན་ལག་བརྒྱད་ཁོ་ན་ཡང་དག་པར་ནོད་པར་བྱ་བ་སྟེ། སྤོང་བ་རྣམས་ཕན་ཚུན་རག་ལས་པའི་ཕྱིར་རོ། །དེ་ཉིད་ཀྱི་ཕྱིར་སྲོག་གཅོད་སྤོང་བ་པ་ལ་སོགས་པ་མཚན་ཉིད་ཐ་དད་པ་བཞི་པོ་ཡང་
རྒྱུད་གཅིག་ལ་ཅིག་ཅར་འགྱུར་གྱི། སྤོང་བ་ཉུང་ངུ་དང་ཆེས་མང་པོ་ལ་རག་ལས་པ་མ་ཡིན་པའི་ཕྱིར་རོ། །དེ་ལས་གཞན་དུ་མནོས་པ་ནི་ལེགས་པར་སྤྱད་པ་ཙམ་དུ་འགྱུར་གྱི་ཞེས་བྱ་བ་ལ། ཙམ་ཞེས་བྱ་བའི་སྒྲས་ནི་སྡོམ་པ་ལེགས་པར་སྤྱད་པ་ལས་ཁྱད་པར་དུ་བྱེད་
པ་སྟེ། འདི་ཡང་འབྲས་བུ་ཡིད་དུ་འོང་བ་འདྲེན་པར་བྱེད་པ་ཁོ་ནའོ། །གསོལ་བ་འདེབས་པའི་ཕྱིར་ཞེས་བྱ་བ་ནི་རྒྱས་པར་ཅེས་བྱ་བའི་ཐ་ཚིག་གོ། །གར་དང་གླུ་ལ་སོགས་པ་ཞེས་བྱ་བའི་སོགས་པའི་སྒྲས་ནི་རོལ་མོ་དང་སྤོས་དང་མེ་ཏོག་ཕྲེང་དང་བྱུག་པ་དང་
ཁ་དོག་བསྡུའོ། །དེ་མེད་ན་ཞེས་བྱ་བ་ནི་དུས་སུ་ཟ་བའོ། །གཉི་ག་ཡང་མེད་དོ་ཞེས་བྱ་བ་ནི་བསྙེན་གནས་དང་སྐྱོ་བའི་དྲན་པ་སྟེ། རབ་ཏུ་བྱུང་བ་རྣམས་ཀྱིས་དུས་སུ་ཟ་བའི་ཁྱིམ་པ་རྣམས་ཀྱི་སྐྱོ་བ་འདྲེན་པར་བྱེད་པ་ཡིན་ནོ། །གཉིས་སུ་བྱའོ་ཞེས་བྱ་བ་འབྱུང་སྟེ།
ཅིའི་ཕྱིར་གཉིས་སུ་བྱེད་ཅེ་ན། གཞན་དུ་ན་ནི་གསོ་བ་ཡན་ལག་བདུན་དུ་འགྱུར་གྱི་ཡན་ལག་བརྒྱད་དུ་ནི་མ་ཡིན་ནོ། །དཔེར་ན་ཡང་དག་པའི་ལྟ་བ་ལམ་ཡང་ཡིན་ལ་ལམ་གྱི་ཡན་ལག་ཀྱང་ཡིན་པ་ཞེས་བྱ་བ་རྒྱས་པར་འབྱུང་སྟེ། ལམ་ཡན་ལག་བརྒྱད་ཅེས་

བྱ་བ་འདིར་ནི་ཡང་དག་པའི་ལྟ་བ་ལམ་ཡང་ཡིན་ལ་ལམ་གྱི་ཡན་ལག་ཀྱང་ཡིན་ཏེ། ལམ་ནི་ཤེས་པའི་མཚན་ཉིད་ཅན་ཡིན་པའི་ཕྱིར་རོ། །ཟད་པ་དང་མི་སྐྱེ་བ་ཤེས་པ་དག་ནི་བྱང་ཆུབ་ཡན་ལག་གོ། །བསམ་གཏན་ཡན་ལག་ལྔ་པ་དང་བསམ་
གཏན་ཡན་ལག་བཞི་པ་ཞེས་བྱ་བ་དེར་ཡང་ཏིང་ངེ་འཛིན་ཁོ་ན་བསམ་གཏན་གྱི་ཡན་ལག་ཏུ་བཤད་དོ། །སྡུག་བསྔལ་ལ་ཆོས་ཤེས་པའི་བདག་ཉིད་ཀྱི་ཡན་ལག་བརྒྱད་པར་མི་འགྱུར་ཏེ། དེར་སྔར་སྐྱེས་པའི་ཡང་དག་པའི་ལྟ་བ་ལ་ཡན་ལག་མེད་པས་ཡན་ལག་
བདུན་པར་འགྱུར་རོ། །སྐད་ཅིག་མ་དང་པོ་སྨོས་པ་ནི། སྡུག་བསྔལ་ལ་ཆོས་ཤེས་པ་ལ་སོགས་པ་ལས་ཁྱད་པར་དུ་བྱ་བའི་ཕྱིར་ཏེ། དེ་ལ་ནི་སྔར་སྐྱེས་པའི་ཡང་དག་པའི་ལྟ་བ་ཡོད་པས་ཡན་ལག་བདུན་པར་མི་འགྱུར་རོ། །བྱང་ཆུབ་ཀྱི་ཡན་ལག་རྣམས་ལ་
ཡང་ངོ་། །སྐད་ཅིག་མ་ཕྱི་མ་བྱང་ཆུབ་ཀྱི་ཡན་ལག་མ་ཡིན་ཏེ། དེ་ལས་ཕྱི་མར་བྱང་ཆུབ་གཞན་ཡོད་པ་མ་ཡིན་པས་གང་གི་ཡན་ལག་ཡིན་པ་དེར་འགྱུར་རོ། །གནས་བརྟན་འདུས་བཟང་ན་རེ། ཅིག་ཅར་སྐྱེ་བ་ཉིད་ཀྱིས་ཡང་དག་པའི་ལྟ་བའི་མི་མཐུན་པའི་མཚན་ཉིད་ཀྱི་
ཕྱིར་ལམ་དང་ལམ་གྱི་ཡན་ལག་རྣམ་པར་གཞག་གོ། །ཆོལ་བའི་རང་བཞིན་གྱི་ཕྱིར་ལམ་ཞེས་བྱ་བ་མ་ཡིན་ནོ་ཞེས་ཟེར་རོ། །དེ་ལྟ་ན་འོ་ན་ཡང་དག་པའི་ལྟ་བ་ལམ་གྱི་ཡན་ལག་མ་ཡིན་ན་ཡང་དག་པའི་རྟོག་པ་ལ་སོགས་པ་རྣམས་ཀྱང་ལམ་མ་ཡིན་ཏེ། ཡང་དག་པར་
མཐོང་བ་གཅིག་ཉིད་ཀྱི་ཕྱིར་རོ། །གལ་ཏེ་ཡང་དག་པའི་རྟོག་པ་ལ་སོགས་པ་རྣམས་ཉེ་བར་བཏགས་པ་ལས་ལམ་ཉིད་དུ་འདོད་ཀྱི། དོན་དམ་ལས་ནི་མ་ཡིན་ནོ་ཞེ་ན། དེ་ལྟ་འོ་ན་ཡང་དག་པའི་ལྟ་བ་ཡང་ཉེ་བར་བཏགས་པ་ལས་ལམ་གྱི་ཡན་ལག་ཉིད་མིན་གྱི། དོན་
དམ་པ་ལས་མ་ཡིན་ནོ། །ལམ་གྱི་ཡན་ལག་བརྒྱད་དུ་འགྱུར་བར་འདོད་ཀྱི་ནི་དོན་དམ་པ་ཉིད་ལས་ཡན་ལག་བརྒྱད་དོ། །ཐམས་ཅད་ཀྱི་རང་གི་བདག་ཉིད་ཀྱི་ཡན་ལག་ཉིད་མི་ལྡན་པ་ལས་ཡན་ལག་བདུན་ཉིད་དོ། །མཱརྒ་སྱ་ན་བི་ནི་བརྟ་ལམ་གྱི་ཟློག་པ་མ་ཡིན་པ་ལ་མ་ཡིན་ཏེ་ན་

ཙནྱ་ཏ་ཀིཉྩི་པ་དེ་ཤྱ་ཏེ། ཡ་སྱ་ཏཱ་ནྱཱཥྞཱི་གཱ་ནི་སྱུ་རི་ཏི། མི་ཤེས་པ་ནི་མ་གཏོགས་སོ། །ཞེས་བྱ་བ་ནི་འབོགས་པར་བྱེད་པ་དང་ནོད་པར་བྱེད་པ་བརྗོད་པ་དང་མ་བྱང་བ་སྟེ། དཀོན་མཆོག་གསུམ་ལ་ཐེ་ཚོམ་ཟ་བ་དང་། ལོག་པར་ཞུགས་པའི་བསམ་
པ་ཅན་ལ་ནི་སྡོམ་པ་གཞན་ཅུང་ཟད་ལྡན་པ་གང་གི་དེ་རྣམས་ཡན་ལག་བརྒྱད་དུ་འགྱུར་ཞེས། མི་སྐྱེ་སྟེ། གང་ཞིག་མི་ཤེས་པས་སྐྱབས་སུ་མི་འགྲོ་བ་ཡིན་གྱི་ལོག་པར་ཞུགས་པ་འམ། ཐེ་ཚོམ་ཟ་བས་སྐྱབས་སུ་མི་འགྲོ་བ་མ་ཡིན་པ་དེ་ལ་ནི་སྐྱབས་སུ་མ་སོང་ཡང་བསྙེན་
གནས་ཀྱི་སྡོམ་པ་སྐྱེའོ། །ཁྱིམ་པ་ཞེས་བྱ་བ་ནི་བསྟན་པའི་ཚིག་གོ། །གོས་དཀར་པོ་བགོས་པ་ཞེས་བྱ་བ་ནི་བཤད་པའོ། །སྐྱེས་པ་ཞེས་བྱ་བ་ནི་བསྟན་པའི་ཚིག་གོ། །ཕོའི་དབང་པོ་དང་ལྡན་པ་ཞེས་བྱ་བ་ནི་བཤད་པའི་ཚིག་གོ། །ཁ་ཆེ་བ་རྣམས་ན་རེ་སྡོམ་པ་མེད་
པར་མི་འགྱུར་ཏེ། དགེ་སློང་དང་དགེ་ཚུལ་བཞིན་ནོ་ཞེས་ཟེར་རོ། །གལ་ཏེ་སྐྱབས་སུ་འགྲོ་བ་ཁས་བླངས་པ་ཁོ་ནས་དགེ་བསྙེན་གྱི་སྡོམ་པ་ཐོབ་ན་ནི། འོ་ན་ཅིའི་ཕྱིར་སྐྱབས་སུ་འགྲོ་བའི་འོག་ཏུ་ཡང་དགེ་བསྙེན་གྱི་སྡོམ་པ་ལེན་ཞེ་ན། དེའི་ཕྱིར་སྡོམ་པ་ཐོབ་ཀྱང་
ཞེས་བྱ་བ་རྒྱས་པར་སྨོས་ཏེ། དགེ་སློང་གིས་ནི་གསོལ་བ་དང་གཞིའི་ལས་ཀྱིས་སྡོམ་པ་ཐོབ་ལ། དགེ་ཚུལ་གྱིས་ཀྱང་བདག་མིང་འདི་ཞེས་བགྱི་བ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་
ཤཱཀྱའི་རྒྱལ་པོ་དེ་རབ་ཏུ་བྱུང་བའི་རྗེས་སུ་རབ་ཏུ་འབྱུང་སྟེ། ཁྱིམ་པའི་རྟགས་ནི་རབ་ཏུ་སྤོང་ངོ་། །རབ་ཏུ་བྱུང་བའི་རྟགས་ནི་ཡང་དག་པ་ལེན་ཏོ། །བདག་དགེ་ཚུལ་ལེགས་པར་གཟུང་དུ་གསོལ། དེ་སྐད་དུ་ལན་གཉིས་ལན་གསུམ་གྱི་བར་དུ་བརྗོད་དོ་ཞེས་ཁས་
བླངས་པ་འདིས་སྡོམ་པ་འཐོབ་པོ། དེ་ལྟར་དགེ་སློང་དང་དགེ་ཚུལ་སྔར་སྡོམ་པ་ཐོབ་ཟིན་པ་དེ་གཉིས་ཤེས་པར་བྱ་བའི་ཕྱིར་ཕྱིས་བསླབ་པའི་གཞི་རྣམས་འཛིན་དུ་འཇུག་པ་དེ་བཞིན་དུ་དགེ་བསྙེན་ཡང་ཡིན་ནོ། །སྣ་གཅིག་སྤྱོད་པ་ནི་གང་ཞིག་བསླབ་པའི་གཞི་གཅིག་

སྲུང་བའོ། །ཕྱོགས་གཅིག་སྲུང་བའི་ནི་གང་ཞིག་གཉིས་སམ་གསུམ་སྲུང་བའོ། །ཕལ་ཆེར་སྤྱོད་པ་ནི་གང་ཞིག་བཞི་སྲུང་བའོ། །ཡོངས་སུ་རྫོགས་པར་སྤྱོད་པ་ནི་གང་ཞིག་བསླབ་པའི་གཞི་ལྔ་པོ་ཐམས་ཅད་སྲུང་བའོ། །མདོའི་ཚིག་ནི་དེ་ལྟ་མ་ཡིན་ནོ་ཞེས་
བྱ་བ་ནི་མིང་ཆེན་གྱི་མདོའི་ཚིག་སྟེ། དེ་ལས་ནི་བདག་ལ་དགེ་བསྙེན་དུ་གཟུང་དུ་གསོལ། དེང་སླན་ཆད་ནམ་འཆིའི་བར་དུ་སྲོག་གཅོད་པ་སྤང་ངོ་ཞེས་བྱ་བ་དེ་ལྟར་མི་འདོད་པའི་ཕྱིར་རོ། །དེ་ཉིད་ལས་དགེ་བསྙེན་གྱི་མཚན་ཉིད་བསྟན་གྱི་ཞེས་བྱ་བ་ནི། མིང་
ཆེན་གྱི་མདོ་ལས་ཏེ། དེའི་ཕྱིར་ཚིག་འདི་ལས་སྐྱབས་སུ་འགྲོ་བ་ཙམ་གྱིས་དགེ་བསྙེན་གྱི་སྡོམ་པ་མི་ཐོབ་སྟེ། མིང་ཆེན་གྱི་མདོ་ལས་མི་འདོན་པའི་ཕྱིར་རོ། །ཤེས་ནས་དད་པའི་རྒྱུས་ཞེས་བྱ་བ་ནི། ཤེས་ནས་དད་པ་ལས་བྱུང་བ་ཞེས་བྱ་བའི་
དོན་ཏོ། །གང་ནས་ཀྱང་མི་འབྱུང་ན་ཞེས་བྱ་བ་ནི་མིང་ཆེན་གྱི་མདོ་འམ་གཞན་ནས་སོ། །སུ་ཞིག་ཡོངས་སུ་མི་གསལ་བའི་དོན་འདི་འདོན་པར་བྱེད་ཅེས་བྱ་བ་ནི། ཅི་སྲོག་སྤོང་ངམ་འོན་ཏེ་སྲོག་གཅོད་པ་སྤོང་ཞེས་མི་ཤེས་པའོ། །ཞུ་བ་ཉིད་ཀྱང་མི་འཐད་ན་
ཞེས་བྱ་བ་ནི། བཙུན་པ་ཇི་ཙམ་གྱིས་ན་དགེ་བསྙེན་གྱི་སྡོམ་པ་ལ་སྣ་གཅིག་སྤྱོད་པར་འགྱུར་བ་ལགས་ཞེས་བྱ་བ་ནས་ཡོངས་སུ་རྫོགས་པར་སྤྱོད་པ་ལགས་ཞེས་བྱ་བའི་བར་གྱི་ཞུ་བ་དེ་ནི་མི་འཐད་པ་སྟེ། གང་དུ་ཞུ་བ་མི་འཐད་པར་དེར་ལན་ཇི་ལྟར་འཐད་པར་འགྱུར།
མིང་ཆེན་འདི་ནི་དགེ་བསྙེན་སྲོག་གཅོད་པ་སྤངས་ནས་སྲོག་གཅོད་པ་ལས་སླར་ལོག་པ་ཡིན་ཏེ། མིང་ཆེན་འདི་ཙམ་གྱིས་ནི་དགེ་བསྙེན་གྱི་བསླབ་པ་ལས་སྣ་གཅིག་སྤྱོད་པ་ཡིན་ཞེས་བྱ་བ་ནས་ཇི་སྲིད་ལྔ་སྤོང་བ་ལས་ཡོངས་སུ་རྫོགས་པའི་བར་དུ་འགྱུར་རོ། །གཞི་
དེ་ཙམ་ཞིག་བཟོད་པ་ལ་ནི་བསླབ་པའི་གཞི་གཅིག་བཟོད་པ་ནས་ལྔ་ཆར་ཡང་བཟོད་པའི་བར་ལའོ། །ཡན་ལག་ངེས་པ་ཡིན་ཞེས་བྱ་བ་ནི་ཡན་ལག་ལྔ་དང་བཅུ་དང་ཡན་ལག་ཐམས་ཅད་དོ། །སློབ་དཔོན་འདུས་བཟང་ན་རེ། །མིང་ཆེན་གྱི་མདོ་འདི་ཁ་ཆེ་བ་རྣམས་ཀྱང་

འདོན་ཏེ། །འདོན་པ་འདི་ལ་རིག་པ་དང་འགལ་བ་མེད་དོ་ཞེས་ཟེར་རོ། །བཅོམ་ལྡན་འདས་ཀྱིས་གསུངས་པ་ཉིད་དོ། །ཉི་འོག་པ་གང་དག་དེ་ཉིད་མི་འདོན་ནོ། །འདོན་པ་གཞན་མ་ཡིན་ནོ་ཞེས་རྟོགས་པར་ནུས་པས་ཁ་ཆེ་བ་རྣམས་སྲོག་དང་
ལྡན་པ་བྱུང་བ་ལས་དགེ་བསྙེན་གྱི་སྡོམ་པ་ཐོབ་པ་ཞེས་མི་ཟེར་རོ། །འོ་ན་ཅི་བདག་དགེ་བསྙེན་དུ་གཟུང་དུ་གསོལ་ཞེས་འབྱུང་བས་དགེ་བསྙེན་ཁས་བླངས་ཏེ། དཔེར་ན་འོད་སྲུངས་ཆེན་པོ་ནི་ཉན་ཐོས་དེ་རྣམས་ལ། དེ་ལྟར་ཁས་བླངས་པས་དགེ་
བསྙེན་གྱི་བསླབ་པའི་གཞི་རྣམས་བཅོམ་ལྡན་འདས་ཀྱིས་གསུངས་པས་དེའི་ཕྱིར་དེ་ཁས་བླངས་པས་དེ་དག་ཁས་བླངས་པར་འགྱུར་རོ་ཞེས་སོ། །འདི་རྒྱས་པ་ལས་རབ་ཏུ་བྱུང་བ་ཉིད་དུ་ཉེ་བར་བསྡུ་བར་བྱའོ། །སྲོག་སྡོང་ངོ་ཞེས་བྱ་བ་དེ་གལ་ཏེ་ངེས་པར་བསྟན་པ་ཡང་
མདོ་སྡེ་པ་རྣམས་ནི་མི་འདོན་ན་ད་ཅི་ཞིག་བྱ། གལ་ཏེ་དགེ་བསྙེན་ཉིད་དུ་ཁས་བླངས་པ་ཁོ་ནས་སྡོམ་པ་ཐོབ་ན། དེ་ལྟར་མདོ་ལས་གསུངས་པ་ལ་དོན་ཅི་ཞིག་ཅེ་ན། ཇི་ཙམ་གྱིས་དགེ་བསྙེན་ཚུལ་ཁྲིམས་ཕུན་སུམ་ཚོགས་པར་འགྱུར་བའོ། །འདིར་དགེ་བསྙེན་
གྱིས་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག་པ་ནས་ཇི་སྲིད་ཆང་འཐུང་བའི་བར་ལས་སོ། །དེའི་ཕྱིར་སྡོམ་པ་མེད་པར་ཡང་དགེ་བསྙེན་ཡོད་དོ་ཞེས་བྱ་བར་ཤེས་སོ། །གལ་ཏེ་ཡང་ཆོས་མངོན་པ་ལས་བཤད་པའི་ཚུལ་གྱིས་དྲི་བ་འདི་རུང་ན།
བསླབ་པའི་གཞི་གཅིག་ལས་འདས་ན་བསླབ་པ་ཐམས་ཅད་ལས་འདས་པར་འགྱུར་རམ་ཅི་ཞེ་ན། དྲི་བ་འདི་ནི་སྐྱབས་སུ་སོང་བ་ཙམ་ལས་དགེ་བསྙེན་སོ་སོར་གྲུབ་པ་མ་བསླབ་པའི་གཞི་བླངས་པ་ལས་ཀྱང་དེའི་དབྱེ་བ་གྲུབ་པ། བསླབ་པའི་གཞི་དུ་བླངས་པ་ལས་
སྣ་གཅིག་སྤྱོད་པ་ནས་ཡོངས་སུ་རྫོགས་པའི་བར་དུ་འགྱུར་བ་འཐད་དོ། །ནཱ་ནྱ་ཐ་ཏྱ་ནྱ་ད་སྱ་ཏྭ་པ་རི་ཧཱ་རེ་ཙྪ་ཡཱ་བ་དུཀྟི། ཏ་ཏྭ་པཱ་རཱ་དི་ཏི། རྣམ་པ་གཞན་དུ་མ་ཡིན་པ་ཞེས་པ་གཞན་ལས་ཀྱང་འདིར་ལན་ལ་གྲིབ་མ་བཞིན་ཞེས་སྨྲས་སོ། །དེ་ཁོ་ན་ཉིད་སྙིང་པོ་ལས་ཞེས་སོ། །གཞུང་མངས་པའི་འཇིགས་

པས་དགག་པ་མ་བྱས་སོ། །ཆུང་ངུ་ལ་སོགས་ཡིད་ཇི་བཞིན་ཞེས་བྱ་བ་ནི། ཇི་ལྟར་དེའི་དགེ་བ་ཉིད་སེམས་ལ་རག་ལས་པ་དེ་བཞིན་དུ་ཆུང་ངུ་ལ་སོགས་པ་ཉིད་ཀྱང་ཡིན་ནོ། །དེའི་ཕྱིར་མི་ཤེས་པ་ནི་མ་གཏོགས་སོ་ཞེས་བྱ་བ་ནི། འབོགས་པ་པོ་དང་ནོད་པ་པོ་སྟེ།
ཐེ་ཚོམ་ཟ་ན་སྐྱབས་སུ་མི་འགྲོ་བ་ལ་དགེ་བསྙེན་གྱི་སྡོམ་པ་མེད་དོ། །བྱེད་པའི་ཆོས་ཞེས་བྱ་བ་ནི་སངས་རྒྱས་སུ་བཏགས་སུ་རྒྱུ་སྟེ། དེ་ཉིད་ཀྱི་ཕྱིར་གང་དག་གཙོ་བོར་གྱུར་པས་ཞེས་བྱ་བ་སྨོས་ཏེ། ཡང་དག་ན་གང་དག་བརྙེས་པས་ཐམས་ཅད་ཐུགས་སུ་ཆུད་པར་སྤྱོད་
པའི་སངས་རྒྱས་ཡིན་པའོ་ཞེས་བྱ་བ་ནི། དེ་དག་ཐམས་ཅད་ཐུགས་སུ་ཆུད་པར་སྤྱོད་པ་དེ་ཡིན་པ་དེའི་ཕྱིར་ཆོས་དེ་དག་ནི་སངས་རྒྱས་སུ་བྱེད་པ་ཞེས་བྱའོ། །དེ་གང་ཞེ་ན་ཟད་པ་ཤེས་པ་ལ་སོགས་པ་ཞེས་བྱ་བ་ལ། སོགས་པ་ཞེས་བྱ་བའི་སྒྲས་ནི་མི་སྐྱེ་བ་ཤེས་པ་
དང་། མི་སློབ་པའི་ཡང་དག་པའི་ལྟ་བ་བསྡུའོ། །འཁོར་སྨོས་པ་ནི་ཟག་པ་མེད་པའི་ཕུང་པོ་ལྔ་བསྡུའོ། །གཟུགས་ཀྱི་སྐུ་ནི་སྔ་མ་བྱང་ཆུབ་སེམས་དཔའི་གནས་སྐབས་དང་། ཕྱི་མ་སངས་རྒྱས་ཉིད་ཀྱི་གནས་སྐབས་སུ་བྱེ་བྲག་མེད་པའི་ཕྱིར་རོ་སྟེ། གཟུགས་
གྱི་སྐུ་ལ་སྐྱབས་སུ་འགྲོ་བ་མ་ཡིན་ནོ་ཞེས་བྱ་བར་སྦྱར་རོ། །མཚན་ཉིད་ཀྱི་སྒོ་ནས་ནི་སངས་རྒྱས་ཐམས་ཅད་ལ་ཞེས་བྱ་བ་ནི་བསམ་པའི་སྒོ་ནས་མ་ཡིན་པ་སྟེ། དེ་ཉིད་ལ་རྒྱུ་ལ་མ་མཚན་ཉིད་མི་འདྲ་བ་མེད་པའི་ཕྱིར་རོ་ཞེས་བྱ་བ་སྨོས་ཏེ་ཐ་མི་དད་པའི་ཕྱིར་རོ་ཞེས་
བྱ་བའི་དོན་ཏེ། ལམ་སྨོས་པ་ནི་སྐུ་ཚེ་ལ་སོགས་པ་རྣམས་མཚན་ཉིད་མི་འདྲ་བའི་ཕྱིར་རོ། །མི་ཕྱེད་པའི་ཕྱིར་དགེ་འདུན་དུ་འགྱུར་རོ་ཞེས་བྱ་བ་ནི་ལྷ་དང་བཅས་པའི་འཇིག་རྟེན་གྱིས་ཀྱང་ཆོས་ཉིད་ལས་མི་ཕྱེད་པའི་ཕྱིར་རོ། །ཅི་དགེ་འདུན་ཐམས་ཅད་ལ་ཞེས་བྱ་བ་
ནི། འདས་པ་དང་མ་འོངས་པ་དང་ད་ལྟར་བྱུང་བ་དག་ལའོ། །ལམ་མཚན་ཉིད་མི་འདྲ་བ་མེད་པའི་ཕྱིར་རོ་ཞེས་བྱ་བ་ནི། ཡན་ལག་བརྒྱད་ཉིད་དང་། ཟག་པ་མེད་པ་ཉིད་དང་། ངེས་པར་འབྱིན་པ་ཉིད་དུ་ཁྱད་པར་མེད་པའི་ཕྱིར་རོ། །གལ་ཏེ་དགེ་འདུན་

ཐམས་ཅད་ལ་སྐྱབས་སུ་འགྲོ་ན་མདོ་ལས། གལ་ཏེ་བཅོམ་ལྡན་འདས་ཀྱིས་མངོན་པར་རྫོགས་པར་བྱང་ཆུབ་ནས། རིང་པོ་མ་ལོན་པར། མ་འོངས་པའི་དགེ་འདུན་གཅིག་པུའི་དབང་དུ་མཛད་ནས་གང་ཡང་མ་འོངས་པའི་དུས་ན་དགེ་
འདུན་ཞེས་བྱ་བ་འབྱུང་བར་འགྱུར་བ་དེ་ལ་ཡང་སྐྱབས་སུ་སོང་ཞིག་ཅེས་གང་གསུངས་པ་དེ་ཇི་ལྟར་ཞེ་ན། དེའི་ཕྱིར་གང་མདོ་ལས་ཞེས་བྱ་བ་ལ་སོགས་པ་སྨོས་སོ། །དེ་དག་གི་མངོན་སུམ་ཞེས་བྱ་བ་ནི་ག་གོན་དང་བཟང་པོ་གཉིས་ཀྱིས་མངོན་སུམ་དུ་འགྱུར་བའོ། །དགེ་
འདུན་དཀོན་མཆོག་ཅེས་བྱ་བ་ནི། དགེ་འདུན་དཀོན་མཆོག་གང་ཞིག་ཆོས་ཀྱི་འཁོར་ལོ་བསྐོར་བའི་མཇུག་ཐོགས་སུ་འབྱུང་བར་འགྱུར་བ་དེ་སྟེ། བརྗོད་པའི་ཕྱིར་ཞེས་བྱ་བ་ནི། དེ་ལྟར་མཐུ་དང་ལྡན་པ་དེ་འབྱུང་བར་འགྱུར་རོ་ཞེས་ཡོན་ཏན་གྱི་སྒོ་ནས་གསལ་བར་
བྱ་བའི་ཕྱིར་རོ་ཞེས་བྱ་བའི་དོན་ཏོ། །ཞི་བར་མཚན་ཉིད་གཅིག་པ་ཉིད་ཀྱི་ཕྱིར་རོ་ཞེས་བྱ་བ་ནི། བདག་དང་གཞན་གྱི་རྒྱུད་ཀྱི་ཉོན་མོངས་པ་དང་སྡུག་བསྔལ་དག་ཞི་བར་མཚན་ཉིད་ཐ་མི་དད་པའི་ཕྱིར་ན་གང་ཆོས་ལ་སྐྱབས་སུ་འགྲོ་བ་དེ་ནི་མྱ་ངན་ལས་འདས་པ་
ཐམས་ཅད་ལ་སྐྱབས་སུ་འགྲོའོ། །རྟེན་ལ་གནོད་པར་བྱས་པས་ཞེས་བྱ་བ་ལ། རྟེན་ནི་གང་ན་སངས་རྒྱས་སུ་བྱེད་པའི་ཆོས་མི་སློབ་པ་རྣམས་ཡོད་པས་གཟུགས་ཀྱི་སྐུ་སྟེ། དེ་ལ་གནོད་པ་བྱས་པ་ནི་འདིར་ཉམས་པར་བྱས་པ་ལ་མངོན་པར་འདོད་དོ། །དེ་དག་ལ་
ཡང་གནོད་པ་བྱས་པ་ཡིན་ནོ་ཞེས་བྱ་བ་ནི་རྟེན་ལ་གནོད་པ་བྱས་པས་བརྟེན་པ་ལ་ཡང་གནོད་པ་བྱས་པར་འགྱུར་བ་སྟེ། དཔེར་ན་མིག་ལ་གནོད་པ་བྱས་པས་དེ་ལ་བརྟེན་པ་རྣམ་པར་ཤེས་པ་ལ་ཡང་གནོད་པ་བྱས་པར་འགྱུར་བ་བཞིན་ནོ། །དེ་སྐད་དུ་མི་འབྱུང་ངོ་ཞེས་
བྱ་བ་རྒྱས་པར་འབྱུང་ངོ་། །མི་སློབ་པའི་ཆོས་སངས་རྒྱས་ཡིན་ནོ་ཞེས་བྱ་བ་དེ་སྐད་དུ་ནི་མི་འབྱུང་ངོ་། །མི་སློབ་པའི་ཆོས་གང་ཡིན་པ་ལས་སངས་རྒྱས་ལ་སྐྱབས་སུ་འགྲོ་བར་བྱེད་པ་མ་ཡིན་གྱི། མི་སློབ་པའི་ཆོས་སངས་རྒྱས་སུ་བྱེད་པའི་ཆོས་ལ་སྐྱབས་སུ་

འགྲོའོ། །འདིར་མི་སློབ་པའི་ཆོས་སངས་རྒྱས་སུ་བྱེད་པ་ཞེས་བཤད་ཀྱི། སངས་རྒྱས་མ་ཡིན་པས་དེའི་ཕྱིར་ཀླན་ཀ་མེད་དོ། །དེ་ལྟ་མ་ཡིན་ནོ་ཞེས་བྱ་བ་ནི། གལ་ཏེ་མི་སློབ་པའི་ཆོས་ཁོ་ན་སངས་རྒྱས་ཡིན་ཞིང་། སློབ་པ་དག་མི་སློབ་པའི་ཆོས་དག་དགེ་
འདུན་ཡིན་གྱི་རྟེན་མ་ཡིན་ཏེ། དེ་ལྟར་ན་འཇིག་རྟེན་པའི་སེམས་ལ་གནས་པས་སངས་རྒྱས་མ་ཡིན་ཞིང་དགེ་འདུན་མ་ཡིན་པར་འགྱུར་རོ། །འདི་ལྟར་སློབ་པ་དང་མི་སློབ་པ་འཇིག་རྟེན་པ་ནི་ཅུང་ཟད་ཀྱང་ཡོད་པ་མ་ཡིན་ཞིང་། འཇིག་རྟེན་པའི་སེམས་འབྱུང་བའི་
གནས་སྐབས་སུ་སློབ་པ་དང་མི་སློབ་པའི་ཆོས་འབྱུང་བ་ཡང་མ་ཡིན་ལ། གང་དག་ལ་ཡོད་པ་དེ་དག་ཀྱང་སངས་རྒྱས་སུ་བྱེད་པ་མ་ཡིན་ཞིང་། དགེ་འདུན་དུ་བྱེད་པའི་ཚུལ་ཁྲིམས་ཁོ་ན་སྟེ་སྡོམ་པ་ཞེས་བྱ་བ་ཡང་དགེ་སློང་དུ་གྱུར་གྱི་རྟེན་ནི་མ་ཡིན་ཏེ། དེ་ལྟ་ཡིན་
དང་དགེ་སློང་ཚུལ་ཁྲིམས་དང་ལྡན་ནོ་ཞེས་ཐ་དད་ཀྱི་སྒོ་ནས་སྟོན་པར་མི་འགྱུར་བ་ཞིག་ལ། གང་ན་ཚུལ་ཁྲིམས་ཉིད་ཡོད་པ་དེ་ནི་དགེ་སློང་ཡིན་ནོ་ཞེས་བྱ་བ་ལ་སོགས་པ་འབྱུང་བ་ཡང་ཡིན་ནོ། །ཇི་ལྟར་གང་ཞིག་ཅེས་བྱ་བ་རྒྱས་པར་འབྱུང་སྟེ། གང་ཞིག་དགེ་
སློང་མཆོད་པར་བྱེད་པ་དེ་དགེ་སློང་དུ་བྱེད་པའི་ཚུལ་ཁྲིམས་མཆོད་པར་བྱེད་དོ་ཞེས་ཚུལ་ཁྲིམས་ཀྱི་སྒོ་ནས་དགེ་སློང་མཆོད་པར་བྱེད་དོ་ཞེས་བྱ་བ་ཡིན་གྱི། ཚུལ་ཁྲིམས་ཉིད་དགེ་སློང་ནི་མ་ཡིན་པ་དེ་བཞིན་དུ་མི་སློབ་པའི་ཆོས་ཀྱི་སྒོ་ནས་སངས་རྒྱས་ལ་སྐྱབས་སུ་འགྲོའོ། །
གང་ཞིག་སངས་རྒྱས་ལ་སྐྱབས་སུ་འགྲོ་བ་ནི་མི་སློབ་པ་ལ་སྟེ། འདི་སངས་རྒྱས་སུ་བྱེད་པའི་ཆོས་ལ་སྐྱབས་སུ་འགྲོ་བ་ཡིན་ནོ། །ཡང་མི་སློབ་པའི་ཆོས་ཁོ་ན་སངས་རྒྱས་མ་ཡིན་ཏེ། དེའི་ཕྱིར་ཅི་ལྟར་དེ་བཞིན་གཤེགས་པ་ལ་ངན་སེམས་ཀྱིས་ཞེས་བྱ་བ་འདི་ཡང་
ཞེས་སོ། །དེ་ནི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་ཞེས་བྱ་བ་ནི། དེ་དག་ཐུན་མོང་མ་ཡིན་པའི་ཕྱིར་རོ་སྙམ་དུ་བསམས་པའོ། །ངག་གི་རྣམ་པར་རིག་བྱེད་ཀྱི་ངོ་བོ་ཉིད་དག་ཡིན་ན་ཞེས་བྱ་བ་ནི་ནོད་པའི་དུས་ཀྱི་དབང་དུ་བྱས་ནས་ཡིན་ཏེ། ཁས་ལེན་

པའི་བདག་ཉིད་ཡིན་པའི་ཕྱིར་རོ། །འཁོར་དང་བཅས་ན་ནི་ཕུང་པོ་ལྔའི་རང་བཞིན་ཡིན་ཏེ། སེམས་ཀྱིས་ཀུན་ནས་བསླང་བའི་ཚིག་གིས་སྐྱབས་སུ་འགྲོའོ། །སེམས་མེད་པར་ནི་མ་ཡིན་ནོ། །དེ་ལ་བརྟེན་ནས་སྡུག་བསྔལ་ཐམས་ཅད་
ལས་གཏན་དུ་ངེས་པར་ཐར་པའི་ཕྱིར་རོ་ཞེས་བྱ་བ་ལ། སྐྱབས་སུ་འགྲོ་བ་ནི་ཡང་དག་པར་བསྒྲུབ་པའི་ས་བོན་ཡིན་ལ། ཡང་དག་པར་བསྒྲུབ་པ་ནི་བདེན་པ་མཐོང་བ་སྟེ། དེ་ལྟར་འཁོར་བའི་སྡུག་བསྔལ་དཔག་ཏུ་མེད་པ་ལྡོག་པའི་རྒྱུའི་གཙོ་བོ་ཡིན་པའི་ཕྱིར་རོ།
སྐྱབས་ཀྱི་དོན་ཞེས་བྱ་བ་ལ། གང་དག་སྐྱབས་སུ་སོང་བས་སྐྱེ་བ་དེ་ལ་བདེན་པ་མཐོང་བ་འམ། ཡང་ན་ངན་སོང་དུ་སོང་ཡང་དེ་དག་སྐྱབས་སུ་སོང་བ་དེ་ཉིད་ཀྱིས་ཚེ་རབས་གཞན་ལ་བདེན་པ་མཐོང་བའི་ས་བོན་དུ་འགྱུར་བ་ལ་འཁྲུལ་པ་མེད་དོ། །དོན་དེ་ཉིད་
བསྟན་པའི་ཕྱིར་བཅོམ་ལྡན་འདས་ཀྱིས་ཞེས་བྱ་བ་རྒྱས་པར་སྨོས་སོ། །སྒོར་གྱུར་པ་ཡིན་ནོ་ཞེས་བྱ་བ་ནི། སྒོ་དང་ཐབས་དང་རྒྱུ་ཞེས་བྱ་བའི་དོན་གང་ཡིན་པའོ། །ཡང་སྐྱབས་དེ་དག་གིས་ཐ་དད་དུ་བྱ་བ་ནི། མི་སློབ་པ་ནི་སངས་རྒྱས་སོ། །སློབ་པ་ཡང་
མ་ཡིན་མི་སློབ་པ་ཡང་མ་ཡིན་པ་ནི་ཆོས་སོ། །སློབ་པ་དང་མི་སློབ་པ་ནི་དགེ་འདུན་ནོ། །དབང་པོ་བཅུའི་ཕྱོགས་ནི་སངས་རྒྱས་སོ། །བཅུ་གཉིས་ཀྱི་ཕྱོགས་ནི་དགེ་འདུན་ནོ། །མྱ་ངན་ལས་འདས་པ་ནི་དབང་པོ་མ་ཡིན་ནོ། །གང་དག་སངས་རྒྱས་ལ་སྐྱབས་སུ་
འགྲོ་བ་དེ་ནི་གཅིག་ཏུ་འདུས་བྱས་སུ་གྱུར་པའི་དགེ་སློང་གི་ཚུལ་གྱིས་འབྲས་བུ་ལ་སྐྱབས་སུ་འགྲོའོ། །གང་དག་ཆོས་ནི་བདེན་པ་བཞི་སྟེ། དགེ་སློང་གི་ཚུལ་གྱི་འབྲས་བུ་རྣམས་སོ། །གང་དག་དགེ་འདུན་ནི་དགེ་སྦྱོང་གི་ཚུལ་གྱིས་འབྲས་བུ་འདུས་བྱས་བཞི་རྣམས་
དང་དེ་ལ་ཞུགས་པའི་ལམ་ལ་ཡང་ངོ་། །ཡང་ཅིའི་ཕྱིར་ཟག་པ་མེད་པ་ལས་རང་སངས་རྒྱས་ཀྱི་ཆོས་རྣམས་དང་བྱང་ཆུབ་སེམས་དཔའ་སློབ་པའི་ཆོས་རྣམས་སྐྱབས་ཉིད་དུ་མ་བཞག་ཅེ་ན། བྱེ་བྲག་ཏུ་སྨྲ་བ་རྣམས་ན་རེ། འཁོར་བའི་འཇིགས་པ་ལས་སྐྱོབ་མི་

ནུས་པའི་ཕྱིར་ཏེ། རང་སངས་རྒྱས་རྣམས་ནི་རྗེས་སུ་བསྟན་པ་ལ་ནུས་པ་ཡོད་པ་མ་ཡིན་ལ། བྱང་ཆུབ་སེམས་དཔའ་སློབ་པ་ནི་ལུས་མི་ལྡང་བའི་ཕྱིར་མ་ཡིན་ན་ཞེས་ཟེར་རོ། །ཤིན་ཏུ་སྨད་ཕྱིར་ཞེས་བྱ་བ་ལ། གཞན་དག་གི་ཆུང་མ་སུན་འབྱིན་པའི་
ཕྱིར་འཇིག་རྟེན་པ་དག་གིས་སྨད་པ་ཡིན་ལ། ངན་སོང་བའི་རྒྱུ་ཡིན་པའི་ཕྱིར་ཡོངས་སུ་དཔྱད་པ་པོ་དག་གིས་སྨད་པའོ། །མི་ཚངས་པར་སྤྱད་པ་ནི། དེ་ལྟར་འཇིག་རྟེན་པ་དང་ཡོངས་སུ་རྟོགས་པ་པོ་དག་གིས་ཤིན་ཏུ་སྨད་པ་མ་ཡིན་ནོ། །མི་ཚངས་པར་སྤྱོད་པ་ལས་ནི་
དཀའ་བའི་ཕྱིར་ཞེས་བྱ་བ་ནི། སྔོན་གོམས་པའི་དབང་གིས་ཏེ་པོར་ཉོན་མོངས་ཀུན་ཏུ་སྤྱོད་པའི་ཕྱིར་དང་། ཉེས་པར་སྤྱོད་པ་དང་མཐུན་པའི་རྐྱེན་ཉེ་བའི་ཕྱིར་རོ། །འདོད་པས་ལོག་པར་གཡེམ་པར་མི་བྱེད་པའི་སྡོམ་པ་འཐོབ་ཀྱི་ཞེས་བཤད་ན། དེ་ནི་མི་ཤེས་སོ་ཞེ་ན། མི་
བྱེད་པར་ངེས་པ་ནི་མི་བྱེད་པའི་སྡོམ་པའོ་ཞེས་བྱ་བ་སྨོས་ཏེ། མི་བྱེད་པའི་ཕྱིར་སྡོམ་པ་ནི་མི་བྱེད་པའི་ངེས་པ་སྟེ། མི་བྱེད་པའི་ཕྱིར་ངེས་ཤིང་གཅིག་ཏུ་ངེས་པ་གང་ཡིན་པ་སྟེ། དེ་ནི་མདོ་སྡེ་པའི་ཚུལ་དུ་མི་བྱེད་པའི་སྡོམ་པ་ཡིན་ནོ། །བྱེ་བྲག་ཏུ་སྨྲ་བ་རྣམས་ཀྱི་ལྟར་ན་
ནི་ཚུལ་ཁྲིམས་ཀྱི་ཡན་ལག་རྣམ་པར་རིག་བྱེད་མ་ཡིན་པ་ཡིན་ནོ། །ཆུང་མ་ལེན་པར་བྱེད་ན་ཞེས་བྱ་བ་ལ། སྡོམ་པ་ནི་སེམས་ཅན་ཐམས་ཅད་ལས་ཡིན་པ་དེའི་ཕྱིར་རང་གི་ཆུང་མ་ལས་ཀྱང་ཡན་ལག་མ་ཡིན་པའི་རྣམ་པར་རིག་བྱེད་ལ་སོགས་པ་འཐོབ་པོ། ཆུང་མར་
གྱུར་པ་ལ་ཞེས་བྱ་བ་ནི། དེའི་ཚེ་གཞན་གྱིས་ཡོངས་སུ་བཟུང་བ་མེད་པའི་ཕྱིར་ཐོབ་པར་གྱུར་པའི་རྫས་ལོངས་སྤྱོད་པ་ལྟར་སྡོམ་པ་ཉམས་པ་མེད་དོ། །བརྫུན་སྨྲ་ཤིན་ཏུ་སྨད་ཕྱིར་དང་། །ཞེས་བྱ་བ་ནི་གཞན་སླུ་བའི་ཕྱིར་དང་ངན་སོང་གི་རྒྱུ་ཡིན་པའི་ཕྱིར་འཇིག་རྟེན་པ་དང་
ཡོངས་སུ་སྤྱོད་པ་པོ་དག་གིས་ཕྲ་མ་ལ་སོགས་པ་དག་པས་བརྫུན་དུ་སྨྲས་པ་ཤིན་ཏུ་སྨད་པ་ཡིན་ནོ། །ཁྱིམ་ན་གནས་པས་སེམས་ཅན་ལོག་པར་བསྒྲུབ་པ་རྣམས་ལ་ཕྲ་མ་ལ་སོགས་པ་སྤོང་བ་དཀའི་བརྫུན་དུ་སྨྲ་བ་ལ་སོགས་པ་སྤོང་བ་ནི་མ་ཡིན་ནོ། །གཞན་བསྲུང་

ཕྱིར་རོ་ཞེས་བྱ་བ་ལ་ཆང་འཐུངས་ནས་སྲོག་གཅོད་པ་ལ་སོགས་པ་དག་ལ་ཡང་འཇུག་པར་འགྱུར་ཏེ། གང་གི་ཕྱིར་དྲན་པ་དང་ཤེས་བཞིན་འཇོམས་པར་བྱེད་པའི་ཕྱིར་རང་བཞིན་གྱི་ཁ་ན་མ་ཐོ་བ་རྣམས་ཀྱི་ཡང་རྒྱུར་འགྱུར་བ་ཡིན་ནོ། །གཉེན་
པོའི་བློ་ཁོ་ནས་ཞེས་བྱ་བ་ལ་སྨན་པའི་ངག་གིས་སོ། །གང་མྱོས་པར་འགྱུར་བ་ཡིན་པར་ཤེས་ནས་ངོ་ཚ་བ་མེད་པར་འཐུང་བ་འང་། གང་ཁ་ན་མ་ཐོ་བ་དང་བཅས་པ་ལ་ཁ་ན་མ་ཐོ་བ་མེད་དོ་སྙམ་པའི་སེམས་དེ་ཉིད་ཉོན་མོངས་པ་ཅན་ནོ། །གང་མྱོས་པར་མི་འགྱུར་
བའི་ཞེས་བྱ་བ་རྒྱས་པར་འབྱུང་སྟེ། གང་སྐྱོན་བསལ་བར་བྱ་བའི་ཕྱིར་སྨན་པའི་ངག་གིས་དུག་ལྟར་མྱོས་པར་མི་འགྱུར་བའི་དྲོད་རིག་ནས་འཐུང་བ་དེ་ནི་ཉོན་མོངས་པ་ཅན་མ་ཡིན་ལ། གང་དག་ཇི་ལྟར་ན་འགལ་བར་འགྱུར་སྙམ་སྟེ་མྱོས་པར་བྱས་པའི་ཕྱིར་འཐུང་བ་
དེ་དག་སེམས་དེ་ནི་ཉོན་མོངས་པ་ཅན་ཡིན་ནོ། །ཡང་ཁྱད་པར་དུ་ཆང་འཐུང་བ་ཉེས་པར་སྤྱོད་པ་ཉིད་དུ་བསྒྲུབ་པའི་ཕྱིར་དུ་འདུལ་བ་འཛིན་པ་རྣམས་ན་རེ། མྱོས་པར་འགྱུར་བ་ནི་རང་བཞིན་གྱི་ཁ་ན་མ་ཐོ་བ་ཡིན་ཏེ་ཞེས་སྨྲས་སོ། །གལ་ཏེ་མྱོས་པར་འགྱུར་བ་རང་བཞིན་
གྱི་ཁ་ན་མ་ཐོ་བ་མ་ཡིན་ན་ནི། མྱོས་པར་འགྱུར་བ་དང་། འཕྲོད་པའི་ཤཱཀྱ་ནད་པ་རྣམས་ལ་གནང་བར་འགྱུར་བ་ཞིག་ན། གནང་བ་ཡང་མ་ཡིན་ཏེ། དེའི་ཕྱིར་རང་བཞིན་གྱི་ཁ་ན་མ་ཐོ་བ་ཡིན་ཏེ། སྲོག་ཆགས་བསད་པ་ལ་སོགས་པ་བཞིན་ནོ། །གང་ཞིག་
འཕགས་པ་རྣམས་ཚེ་རབས་གཞན་དུ་མི་བྱེད་པའི་སྡོམ་པ་ཐོབ་པ་དེ་ནི་རང་བཞིན་གྱི་ཁ་ན་མ་ཐོ་བ་ཡིན་ཏེ། སྲོག་གཅོད་པ་ལ་སོགས་པ་ལེན་པར་ལ་སོགས་པ་བཞིན་ནོ། །ལུས་ཀྱིས་ཉེས་པར་སྤྱོད་པ་ཞེས་ཀྱང་འབྱུང་བའི་ཕྱིར་རང་བཞིན་གྱི་ཁ་ན་མ་ཐོ་བ་ཡིན་ཏེ། དེ་ལས་
གཞན་པའི་ལུས་ཀྱིས་ཉེས་པར་སྤྱད་པ་བཞིན་ནོ། །ལུས་ཀྱིས་ཉེས་པར་སྤྱོད་པ་ནི་རྣམ་པ་བཞི་གསུངས་ཏེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། མྱོས་པར་འགྱུར་བ་འཐུང་བའོ། སྤྱིར་བསྟན་མོད་

ཀྱི་ཞེས་བྱ་བ་རྒྱས་པར་འབྱུང་སྟེ། ཐུན་མོང་དུ་བསྟན་མོད་ཀྱི་བཙུན་པ་ཇི་ལྟར་བྲོ་གཡོག་བགྱི། རང་བཞིན་གྱི་ཁ་ན་མ་ཐོ་བ་མ་གཏོགས་པ་ཞེས་བྱ་བ་འདི་ནི་ཕྱིར་བསྟན་པ་ཡིན་ལ། ཤཱཀྱ་ནད་པ་རྣམས་ལ་ནི་དམིགས་ཀྱིས་བསལ་བ་ཡིན་ཏེ། འདིས་ནི་བཅོམ་ལྡན་འདས་
ཀྱི་བཀའ་ལས་སྔ་ཕྱི་འགལ་བ་སྤང་པ་ཡིན་ཏེ། ཐལ་བར་འགྱུར་བ་ཡོངས་སུ་སྤང་བའི་ཕྱིར་ཞེས་བྱ་བ་ལ་ཆང་ནི་ལན་ཅིག་འཐུངས་ཀྱང་ཞེན་པ་ཅན་དུ་འགྱུར་ཏེ། བཅོམ་ལྡན་འདས་ཀྱིས་ཀྱང་གནས་གསུམ་པོ་ཆང་དང་། མི་ཚངས་པར་སྤྱོད་པ་དང་། རྨུགས་པ་དང་གཉིད་
བརྟེན་པ་ནི་ཚིམ་པ་མེད་དོ་ཞེས་གསུངས་སོ། །གང་དག་ཕྱིར་བཅོ་བའི་ཕྱིར་མྱོས་པར་མི་འགྱུར་བའི་ཚད་དུ་འཐུང་བ་ཁ་ཅིག་ཡོད་པ་དེ་དག་ལ་ཅིའི་ཕྱིར་མ་གནང་ཞེ་ན། དེའི་ཕྱིར་མྱོས་པར་འགྱུར་བའི་དྲོད་མ་ངེས་པར་ཞེས་བྱ་བ་སྨོས་སོ། །ཆང་དེ་ཉིད་རྫས་དང་རང་
བཞིན་དང་ལུས་ཀྱི་གནས་སྐབས་ལ་བལྟོས་ནས་མྱོས་པར་འགྱུར་བ་ཡང་ཡིན་ལ་མྱོས་པར་མི་འགྱུར་བ་ཡང་ཡིན་ནོ། །དེ་ཉིད་ཀྱི་ཕྱིར་རྩྭའི་རྩེ་མོས་འཐུང་བ་བཀག་པ་ཡིན་ནོ་ཞེས་བྱ་བ་ནི། ཐལ་བར་འགྱུར་བ་སྤང་བའི་ཕྱིར་རྩྭའི་རྩེ་མོས་འཐུང་བ་བཀག་པ་ཡིན་
ཏེ། དེ་ལྟ་ན་ནི་ཐལ་བར་འགྱུར་བ་ཉིད་གཅོད་པ་ཡིན་ནོ། །འཕགས་པ་རྣམས་མི་སྤྱོད་པ་ནི་ངོ་ཚ་དང་ལྡན་པའི་ཕྱིར་ཞེས་བྱ་བ་ནི། མདོ་ལས་སློབ་པའི་སྟོབས་ལྔ་འབྱུང་སྟེ། དད་པའི་སྟོབས་དང་བརྩོན་འགྲུས་ཀྱི་སྟོབས་དང་། ངོ་ཚ་ཤེས་པའི་སྟོབས་དང་།
ཁྲེལ་ཡོད་པའི་སྟོབས་དང་། ཤེས་རབ་ཀྱི་སྟོབས་ཞེས་བྱ་བ་ཡིན་ནོ། །དེའི་ཕྱིར་ངོ་ཚ་དང་ལྡན་པའི་ཕྱིར་མི་འཐུང་བར་ཟད་དོ། །ངོ་ཚ་དང་ལྡན་པ་དག་གིས་བཏུང་བར་བྱ་བ་མ་ཡིན་ནོ་ཞེས་བྱ་བ་ལ་རྒྱུ་ཅི་ཞིག་ཡོད་ཅེ་ན། དེའི་ཕྱིར་དེས་ཀྱང་དྲན་པ་ཉམས་པར་བྱེད་
པའི་ཕྱིར་ཞེས་བྱ་བ་སྨོས་ཏེ། ཆང་འཐུང་བ་ནི་བྱ་བ་དང་བྱ་བ་མ་ཡིན་པའི་དྲན་པ་ཉམས་པར་འགྱུར་རོ། །གལ་ཏེ་དེ་ལྟར་ན་ཇི་ཙམ་གྱིས་དྲན་པ་ཉམས་པར་མི་འགྱུར་བ་ཅུང་ཟད་ཅིག་ཅི་སྟེ་མི་འཐུང་ཞེ་ན། དེའི་ཕྱིར་ཅུང་ཟད་ཀྱང་མི་གསོལ་ཏེ། དུག་བཞིན་དུ་

མ་ངེས་པའི་ཕྱིར་ཞེས་བྱ་བ་སྨོས་ཏེ། དཔེར་ན་དུས་དང་རང་བཞིན་དང་མཐུ་དང་ལྡན་པས་དུག་ཆུང་ངུས་ཀྱང་རེས་འགའ་འཆི་བར་བྱེད་པ་དེ་བཞིན་དུ་ཆང་ཡང་མྱོས་པར་བྱེད་དོ། །འཕགས་པ་རྣམས་མི་སྤྱོད་པའི་ཕྱིར་བཅས་པའི་ཁ་ན་མ་ཐོ་
བ་དང་བཅས་པ་སྟེ། དུས་མ་ཡིན་པའི་ཁ་ཟས་བཞིན་དུ་ཆང་ཡང་ངོ་ཞེས་སློབ་དཔོན་འདུས་བཟང་ཟེར་རོ། །འདི་ཡང་མྱོས་པར་འགྱུར་བར་ཤེས་ནས་ལྷག་པར་མི་སྤྱོད་པའི་ཕྱིར་རོ། །ཉེས་པར་སྤྱོད་པ་ཞེས་འབྱུང་བ་ནི། བག་མེད་པའི་གནས་ཡིན་པའི་ཕྱིར་ཏེ། རང་
བཞིན་གྱི་ཁ་ན་མ་ཐོ་བ་ཡིན་པའི་ཕྱིར་ནི་མ་ཡིན་ནོ་སྙམ་དུ་བསམས་པའོ། །དེ་ཉིད་ཀྱི་ཕྱིར་འདི་ལ་ཞེས་བྱ་བ་ནི་བསླབ་པའི་གཞི་འདི་ལ། འབྲུའི་ཆང་དང་སྦྱར་བའི་ཆང་བག་མེད་པའི་གནས་སྤངས་ཏེ་ཞེས་སྨོས་སོ། །གཞན་ལ་མ་ཡིན་ཏེ་ཞེས་བྱ་བ་ནི་སྲོག་གཅོད་པ་
སྤོང་བ་ལ་སོགས་པ་དག་ལའོ། །མ་སྨོས་པའི་རྒྱུ་བཤད་པ་ནི་དེ་དག་ནི་རང་བཞིན་གྱི་ཁ་ན་མ་ཐོ་བ་ཡིན་པའི་ཕྱིར་རོ། །ཧ་ཅང་ཀུན་ཏུ་བསྟེན་པས་ཞེས་བྱ་བ་རྒྱས་པར་འབྱུང་བ་ནི། བཅོམ་ལྡན་འདས་ཀྱིས་མདོ་ལས་འབྲུའི་ཆང་དང་སྦྱར་བའི་ཆང་བག་མེད་པའི་
གནས་ཀུན་དུ་བསྟེན་ཅིང་གོམས་པར་བྱས་ལན་མང་དུ་བྱས་པས་ལུས་ཞིག་ནས་དམྱལ་བ་དག་ཏུ་སྐྱེའོ་ཞེས་གསུངས་སོ། །འཕེན་པ་ནི་སྔོན་མེད་པའོ། །སྔོན་བསགས་པ་ནི་འཇུག་པ་ཐོབ་པའི་ཕྱིར་ཏེ། འཆི་བའི་གནས་སྐབས་སུ་འཇུག་པ་ཐོབ་པའི་ཕྱིར་རོ། །བག་
མེད་པ་ཐམས་ཅད་ཀྱི་གནས་སུ་གྱུར་པས་ཞེས་བྱ་བ་ནི། བརྗེད་ངེས་པའི་བག་མེད་པ་དང་། སྲོག་གཅོད་པ་ལ་སོགས་པ་མི་དགེ་ཐམས་ཅད་ཀྱི་གནས་དང་གཞི་དང་རྟེན་ཅེས་བྱ་བའི་ཐ་ཚིག་གོ། །བྱ་བ་ལ་བལྟོས་པ་མེད་པར་བྱ་བ་མ་ཡིན་པ་ལ་གཞོལ་བ་ཉིད་ནི་བག་མེད་
པར་ཏེ། དེའི་རྒྱུ་ནི་བག་མེད་པའི་གནས་སོ། །ཆང་ནི་དེ་སྤང་བའི་སྡོམ་པ་ཅན་ལ་སྦྱིན་པར་མི་བྱ་སྟེ་བག་མེད་པའི་གནས་ཡིན་པའི་ཕྱིར་རོ། །གང་ལས་གཅིག་འཐོབ་པ་ཞེས་བྱ་བ་ལ། དྲི་བའི་དོན་ནི་ལས་སྦྱོར་བ་དང་དངོས་དང་མཇུག་རྣམས་དང་། སེམས་ཅན་

དང་སེམས་ཅན་མ་ཡིན་པར་སྟོན་པའི་གཞི་དག་དང་། རང་བཞིན་དང་བཅས་པའི་ཁ་ན་མ་ཐོ་བ་དག་ལས་ཞེས་བྱ་བའོ། །སྦྱོར་བ་དང་དངོས་དང་མཇུག་ལས་སོ་ཞེས་བྱ་བ་ནི་ལས་ཀྱི་ལམ་གྱི་ལམ་རྣམས་ཀྱི་ཞེས་བྱ་བར་སྦྱར་ཏེ། མི་དགེ་བའི་ལས་ཀྱི་ལམ་རྣམས་ཀྱི་ཞེས་
བྱ་བར་སྦྱར་ཏེ། མི་དགེ་བའི་ལས་ཀྱི་ལམ་རྣམས་ཀྱི་སྦྱོར་བ་དང་དངོས་དང་མཇུག་དག་ལས་ཅི་རིགས་པར་དེ་དག་གི་གཉེན་པོར་སོ་སོར་ཐར་པའི་སྡོམ་པའི་རྣམ་པར་རིག་བྱེད་མ་ཡིན་པ་དག་སྐྱེའོ། །སེམས་ཅན་དང་སེམས་ཅན་མ་ཡིན་པར་སྟོན་པ་ཞེས་བྱ་བ་ནི་གཞིའོ། །
རང་བཞིན་དང་བཅས་པའི་ཁ་ན་མ་ཐོ་བ་ལས་སོ་ཞེས་བྱ་བ་ནི་ལས་དག་ལས་ཏེ་འདི་ནི་རེ་རེ་དང་སྦྱར་བར་བྱའོ། །སེམས་ཅན་དང་སེམས་ཅན་མ་ཡིན་པར་སྟོན་པ་ཞེས་བྱ་བ་ལ། རང་བཞིན་གྱི་ཁ་ན་མ་ཐོ་བ་དང་བཅས་པ་སེམས་ཅན་མ་ཡིན་པར་སྟོན་པ་ཇི་ལྟ་བུ་ཞེ་ན་
ས་ལེ་སྦྲམ་བརྐུ་བ་ལ་སོགས་པ་ལྟ་བུའོ། །སེམས་ཅན་དུ་སྟོན་པ་ཇི་ལྟ་བུ་ཞེ་ན། བུད་མེད་ཀྱི་ཡུལ་མི་ཚངས་པར་སྤྱོད་པ་ལྟ་བུའོ། །བཅས་པའི་ཁ་ན་མ་ཐོ་བ་ནི་ཁྱིམ་དུ་ལྷན་ཅིག་ཉལ་བ་ལྟ་བུའོ། །ཁྱད་པར་རང་བཞིན་གྱི་ཁ་ན་མ་ཐོ་བ་སེམས་ཅན་རྟེན་ཅན་གྱི་
སྲོག་གཅོད་པའོ། །བཅས་པའི་ཁ་ན་མ་ཐོ་བ་སེམས་ཅན་མ་ཡིན་པའི་རྟེན་ཅན་ནི་རྩྭ་གཅོད་པ་ལ་སོགས་པའོ། །སེམས་ཅན་གྱི་རྟེན་ལ་འཇུག་པའི་ཕྱིར་ཞེས་བྱ་བ་འབྱུང་ངོ་། །གལ་ཏེ་འདས་པ་དང་མ་འོངས་པ་ལས་ཀྱང་འཐོབ་ན་ནི། དེ་ལྟར་ན་སྲོག་
གཅོད་པ་ལ་སོགས་པ་སྤོང་བའི་རང་བཞིན་གང་ཞིག་སེམས་ཅན་དུ་སྟོན་པ་རྣམས་ལས་ཐོབ་པ་དེ་ཉིད་སེམས་ཅན་དུ་སྟོན་པ་མ་ཡིན་པ་རྣམས་ལས་ཀྱང་འཐོབ་པར་འགྱུར་བས་འཚོལ་བར་འགྱུར་རོ། །གལ་ཏེ་ཡང་སོ་སོར་ཐར་པའི་སྡོམ་པ་སེམས་ཅན་དུ་སྟོན་
པ་ཡང་མ་ཡིན་པའི་རྟེན་ཅན་ཡང་ཡོད་མོད་ཀྱི། དེ་ནི་སེམས་ཅན་ལྟར་ཕུང་པོ་དང་ཁམས་དང་སྐྱེ་མཆེད་ད་ལྟར་བ་དག་ཁོ་ན་ལས་འཐོབ་པས་སེམས་ཅན་གྱི་རྟེན་ཅན་ཞེས་པ་རྙེད་ཀྱི། དེ་སེམས་ཅན་མ་ཡིན་པའི་རྟེན་ཅན་ཉིད་ཡིན་པས་འགོག་པ་ནི་མ་ཡིན་ནོ། །ཡང་

ན་སེམས་ཅན་གྱི་རྟེན་ཅན་གཙོ་བོ་ཡིན་པའི་ཕྱིར་དང་། ཅིག་ཤོས་ནི་དེའི་ཡན་ལག་ཏུ་ཉེ་བར་བླངས་པའི་ཕྱིར་སེམས་ཅན་གྱི་རྟེན་ཅན་ཞེས་བསྟན་ཏོ། །སྦྱོར་བ་དང་མཇུག་ལས་ཀྱང་མ་ཡིན་ན་ཞེས་བྱ་བ་ནི། མཉམ་པར་གཞག་པའི་གནས་
སྐབས་ན་སྡོམ་པ་མེད་པའི་ཕྱིར་རོ། །བཅས་པའི་ཁ་ན་མ་ཐོ་བ་ལས་ལྟ་སྨོས་ཀྱང་ཅི་དགོས་ཞེས་བྱ་བ་ནི་ཁས་བླངས་པ་མེད་པའི་ཕྱིར་རོ་སྙམ་དུ་དགོངས་པའོ། །དུས་ཐམས་ཅད་ཅེས་བྱ་བ་རྒྱས་པར་འབྱུང་བ་ནི། དེ་དག་དང་ལྷན་ཅིག་འབྱུང་བའི་སེམས་བཞིན་དུ་འདས་
པ་དང་། མ་འོངས་པའི་སྡོམ་པ་གཉིས་ཀྱང་འཐོབ་པའི་ཕྱིར་རོ། །དེ་ཉིད་ཀྱི་ཕྱིར་ཞེས་བྱ་བ་རྒྱས་པར་འབྱུང་བ་ནི། གང་གི་ཕྱིར་སོ་སོར་ཐར་པའི་སྡོམ་པ་ད་ལྟར་བ་ཁོ་ན་དང་། དངོས་ལྟར་སྦྱོར་བ་དང་། མཇུག་དང་། རང་བཞིན་གྱི་ཁ་ན་མ་ཐོ་བ་ལྟར་བཅས་པའི་
ཁ་ན་མ་ཐོ་བ་དག་ལས་ཀྱང་འཐོབ་ལ། བསམ་གཏན་དང་། ཟག་པ་མེད་པའི་སྡོམ་པ་གཉིས་ནི་ད་ལྟར་བ་བཞིན་དུ་འདས་པ་དང་མ་འོངས་པ་དག་ལས་ཀྱང་འཐོབ་པའི་ཕྱིར་རོ། །བཅས་པའི་ཁ་ན་མ་ཐོ་བ་རྣམས་ལས་ནི་དངོས་གཞི་ཁོ་ན་ལས་ཏེ། སྦྱོར་བ་དང་
མཇུག་དག་ལས་མ་ཡིན་ནོ། །གཞན་དག་ནི་སྡོམ་པ་ཐོབ་པའི་དུས་སུ་ད་ལྟར་བྱུང་བའི་ལས་ཀྱི་ལམ་དག་མེད་པས་ཞེས་མི་འདོན་ཏེ། རྣམ་པར་རྟོག་པར་བྱེད་པའི་ཆོས་རྣམས་ལས་སོ་སོར་ཐར་པའི་སྡོམ་པ་འཐོབ་ཀྱི། བསམ་གཏན་དང་ཟག་པ་མེད་པའི་སྡོམ་པ་དག་
མ་ཡིན་པ་ནི་མུ་དང་པོའོ། །གང་ད་ལྟར་བྱུང་བ་དང་སྦྱོར་བ་དང་མཇུག་སྤོང་བ་ལས་བཅས་པའི་ཁ་ན་མ་ཐོ་བ་སྤོང་བ་འཐོབ་བོ། །འདས་པ་དང་མ་འོངས་པའི་ལས་ཀྱི་ལམ་དངོས་གཞི་སྤོང་བ་ལས་བསམ་གཏན་དང་ཟག་པ་མེད་པའི་སྡོམ་པ་ཁོ་ན་འཐོབ་ཀྱི། སོ་སོར་ཐར་
པའི་སྡོམ་པ་ནི་མ་ཡིན་ནོ། །གསུམ་པ་ནི་ད་ལྟར་བའི་ལས་ཀྱི་ལམ་དག་སྤོང་བ་ལས་སོ། །བཞི་པ་ནི་འདས་པ་དང་མ་འོངས་པའི་ཉེར་བསྡོགས་དང་དངོས་གཞི་དག་སྤོང་ངོ་། །འདིར་ཐམས་ཅད་དུ་ལས་ཀྱི་ལམ་གྱི་གཞི་ལ་ལས་ཀྱི་སྒྲ་འཇུག་པ་སྔ་མའི་བཞི་པ་ཡང་

དཀའ་བ་མ་ཡིན་སྙམ་དུ་སེམས་སོ། །དེ་ལྟར་བྱས་ན་ད་ལྟར་བྱུང་བ་དང་འདས་པའི་ལས་ཀྱི་ལམ་དག་སྡོམ་པར་མི་རུང་ལ། མ་འོངས་པའི་བདག་ཉིད་ཀྱི་ལས་ཀྱི་ལམ་གྱི་གཞི་ལ་དེའི་སྒྲ་འཇུག་པ་མ་ཡིན་པས། རྣམ་པ་གཞན་དུ་མ་འོངས་པ་ཁོ་ན་སྡོམ་པ་རུང་ངོ་། །
སྡོམ་པར་ནུས་པས་མ་འོངས་པ་འདོད་པའི་ལས་ཀྱི་ལམ་འཐད་པའི་ཕྱིར་རོ། །འདས་པ་དང་མ་འོངས་པ་རྣམས་མ་ཡིན་ཞེས་བྱ་བ་ནི། དེ་ལས་གཞན་པ་ཞེས་བྱ་སྟེ། དགེ་སློང་གི་སྡོམ་པ་ལས་གཞན་པ་རྣམ་པ་གསུམ་གཟུང་ངོ་། །དེ་ལ་རྣམ་པ་གསུམ་
ཡང་ལུས་ཀྱི་སྒོ་ནས་སྲོག་གཅོད་པ་ལ་སོགས་པ་རྣམ་པ་གསུམ་དང་། ངག་གི་སྒོ་ནས་བརྫུན་དུ་སྨྲ་བ་སྤོང་བ་ཁོ་ན་ཡན་ལག་ཏུ་རྣམ་པར་གཞག་གོ། །མ་ཆགས་པ་དང་ཞེ་སྡང་མེད་པ་དང་གཏི་མུག་མེད་པ་ནི་དགེ་བའི་སེམས་ཐམས་ཅད་ལ་ལྷན་ཅིག་འབྱུང་
ལ་སེམས་ཆུང་ངུ་དང་འབྲིང་དང་། ཆེན་པོ་དག་ནི་རྣམ་གྲངས་ཀྱིས་འབྱུང་གི་ཅིག་ཅར་མ་ཡིན་པས། དེའི་ཕྱིར་རྒྱུ་ལས་ཀྱང་ཞེས་བྱ་བ་རྒྱས་པར་སྨོས་སོ། །སྡོམ་པ་ལ་གནས་པ་ཞེས་བྱ་བ་ནི་ཐམས་ཅད་ལ་དབང་དུ་བྱ་བར་རིག་པར་བྱའོ། །ཡན་ལག་ཐམས་ཅད་
ཀྱིས་མ་ཡིན་པ་ནི་བསྙེན་གནས་དང་། དགེ་བསྙེན་དང་། དགེ་ཚུལ་གྱི་སྡོམ་པ་དག་ལ་ཕྲ་མ་དང་ཚིག་རྩུབ་པོ་དང་ཀྱལ་པ་སྤོང་བ་རྣམས་མི་སྲིད་པའི་ཕྱིར་རོ། །རྒྱུ་ཐམས་ཅད་ཀྱིས་མ་ཡིན་པ་ཞེས་བྱ་བ་ནི། སེམས་ཆུང་ངུ་ལ་སོགས་པ་རྣམས་ལས་སེམས་གང་ཡང་
རུང་བ་ཞིག་གིས་དགེ་བསྙེན་གྱི་སྡོམ་པའམ། བསྙེན་གནས་ཀྱི་སྡོམ་པའམ། དགེ་ཚུལ་གྱི་སྡོམ་པ་ཡང་དག་པར་ལེན་པ་གང་ཡིན་པ་དེའོ། །སེམས་ཅན་ཐམས་ཅད་ཀྱི་རྗེས་སུ་སོང་བ་ནི་སེམས་ཅན་ཐམས་ཅད་ལ་དམིགས་པའོ། །སེམས་ཅན་དགེ་བ་ནི་གནོད་པ་
མེད་པའི་སེམས་སམ་ཕན་འདོགས་པའི་སེམས་ཏེ། ལོག་པར་མ་ཞུགས་པའི་ཕྱིར་དགེ་བ་ཞེས་བྱའོ། །སྡིག་པའི་བསམ་པ་དང་མ་བྲལ་བའི་ཕྱིར་རོ་ཞེས་བྱ་བ་ནི། གནོད་པའི་བསམ་པ་དང་མ་བྲལ་བའི་ཕྱིར་རོ། །ཇི་ལྟར་མི་ནུས་པ་དག་ལས་ཞེས་བྱ་བ་རྒྱས་པར་འབྱུང་

སྟེ། གང་ཞིག་གང་དག་གི་སྲོག་དང་ལོངས་སྤྱོད་དང་ཆུང་མ་འཕྲོག་པར་མི་ནུས་པ་དེ་ལ་དེ་དག་གི་ཡུལ་ཅན་སྲོག་གཅོད་པ་ལ་སོགས་པ་མི་སྲིད་པས་དེ་དག་ལས་སྲོག་གཅོད་པ་སྤོང་བའི་བདག་ཉིད་ཀྱི་སྡོམ་པ་མི་རུང་ངོ་སྙམ་དུ་སེམས་སོ། །
སེམས་ཅན་ཐམས་ཅད་ཀྱི་སྲོག་ལ་མི་གནོད་པའི་བསམ་པས་ཁས་བླངས་པའི་ཕྱིར་རོ་ཞེས་བྱ་བ་ལ། སེམས་ཅན་ཐམས་ཅད་ལ་མི་གནོད་པའི་བསམ་པ་ཁྱད་པར་མེད་པའི་ཕྱིར་ནུས་པ་དག་བཞིན་མི་ནུས་པ་དག་ལས་ཀྱང་འཐོབ་བོ། །དེ་ལྟ་མ་ཡིན་ན་གཉིད་ལོག་པ་དང་
མྱོས་པ་དང་བརྒྱལ་བ་ལ་སོགས་པ་རྣམས་ཀྱིས་ཐམས་ཅད་དུ་མི་ནུས་པའི་ཕྱིར་སྡོམ་པ་གཏོང་བར་འགྱུར་རོ། །ཅི་འདུ་ཤེས་ལ་རག་ལས་ཏེ་འཐོབ་པས་དེ་ལ་གནོད་པར་ནུས་པ་ཡོད་དོ་ཞེས་བྱ་བ་ནི་ནུས་པ་རྣམས་འཐོབ་པའི་ནུས་པ་བཞིན་དུ་མི་ནུས་པ་རྣམས་ལ་ཡང་སྟེ། འདི་
མཚུངས་པར་འཕེལ་བ་དང་འགྲིབ་པ་དང་ལྡན་པར་འགྱུར་རོ་ཞེས་བྱ་བའོ། །ལྷ་ལ་སོགས་པ་མི་ནུས་པ་རྣམས་མི་རྣམས་ལ་སོགས་པ་ནུས་པ་དག་གི་ནང་དུ་འཕོ་བས་འཕེལ་བ་དང་ལྡན་པར་འགྱུར་ཏེ། སྔོན་མེད་པར་སྡོམ་པ་ཐོབ་པའི་ཕྱིར་རོ། །མི་ལ་སོགས་པ་ནུས་
པ་རྣམས་ལ་སོགས་པ་མི་ནུས་པ་དག་གི་ནང་དུ་འཕོ་བས་འགྲིབ་པ་དང་ལྡན་པར་འགྱུར་རོ། །སྔར་ཐོབ་པའི་སྡོམ་པ་དང་བྲལ་བའི་དེ་ལྟར་ན་འཐོབ་པའི་རྒྱུ་གཞན་གྱི་རྣམ་པར་རིག་པར་བྱེད་པ་ལ་སོགས་པ་དག་དང་། གཏོང་བའི་རྒྱུ་བསླབ་པ་འབུལ་བ་ལ་སོགས་པ་དག་
མེད་པར་ཡང་སྡོམ་པ་འཐོབ་པ་དང་གཏོང་བ་འགྱུར་རོ། །སེམས་ཅན་རྣམས་ནི་སྔོན་ཡང་ཡོད་ལ་ཕྱིས་ཀྱང་ཡོད་པའི་ཕྱིར་ལ་ཞེས་བྱ་བ་ལ། ཇི་ལྟར་ཁྱད་པར་འདི་ལྟ་བུ་གཞན་ཡང་འབྱུང་བར་འགྱུར་རོ་སྙམ་དུ་སེམས་སོ། །དེ་ལ་འདི་ཆོས་མི་མཐུན་པ་ཙམ་གྱིས་གནས་
སྐབས་མ་ཡིན་པར་ནུས་པ་མེད་དོ། །ཅི་སྟེ་རྩྭ་ལ་སོགས་པ་ལ་སྔོན་མེད་པའི་ཕྱིར་ཕྱིས་ཀྱང་སྡོམ་པ་མེད་པ་ཉིད་དུ་འདོད་པ་དེ་ལྟ་ན་འདིར་ཡང་སྡོམ་པ་འགྲིབ་པ་དང་འཕེལ་བའི་ཚུལ་གྱིས་སམ་རྩྭ་ལ་སོགས་པ་རྣམས་ཐམས་ཅད་ལས་སྡོམ་པ་དེ་ལྟར་ཐལ་བར་འགྱུར་རོ། །

ཅི་ལྟར་སྡོམ་པ་འགྲིབ་པར་མི་འགྱུར་ཞེས་བྱ་བ་ནི། ཡུལ་མེད་པའི་ཕྱིར་སྙམ་དུ་དགོངས་པའོ། །གལ་ཏེ་ཡོངས་སུ་མྱ་ངན་ལས་འདས་ནས་སྡོམ་པ་མེད་ན། དེ་ལྟ་ན་འོ་ན་ཞེས་རྒྱ་ཆེར་འབྱུང་སྟེ། འདི་ལ་སློབ་དཔོན་གྱིས་ལན་གསུངས་པ། ཐམས་ཅད་ཀྱིས་སེམས་
ཅན་ཐམས་ཅད་ལས་ཐོབ་པའི་ཕྱིར་ཏེ་ཞེས་བྱ་བ་ལ་སོགས་པ་ལ། ད་ནི་འདི་བརྗོད་པར་བྱ་སྟེ། སངས་རྒྱས་ཀྱི་རྒྱུ་དང་གྲོག་སྦུར་གྱི་རྒྱུད་ལས་ཀྱང་སྲོག་གཅོད་པ་སྤང་བའི་ཕྱིར། ཅི་ཁྱད་པར་ཡོད་དམ་འོན་ཏེ་ཅུང་ཟད་ཀྱང་མེད། གལ་ཏེ་ཡོད་ན་འགྲོ་བ་མ་ངེས་པའི་ཕྱིར་
སེམས་ཅན་རྣམས་ཀྱི་སྡོམ་པ་འཕེལ་བ་དང་འགྲིབས་པར་ཐལ་བར་འགྱུར་རོ། །ཅི་སྟེ་མེད་ན་ཅི་ལྟར་མི་བསད་པ་ལས་ཕས་ཕམ་པ་དང་། མི་མ་ཡིན་པ་བསད་པ་ལས་སྦོམ་པོ་དང་དུད་འགྲོའི་སྐྱེ་གནས་པ་བསད་པ་ལས་ལྟུང་བྱེད་དུ་འགྱུར། དེའི་ཕྱིར་རྒྱུད་ཀྱི་སྒོ་ནས་སྡོམ་
པ་ལ་ཁྱད་པར་མེད་དོ་སྙམ་དུ་སེམས་སོ། །ཆད་པའི་ལས་ཀྱི་ཁྱད་པར་ལས་ནི་སྦྱོར་བའི་ཁྱད་པར་ལས་སོ་ཞེས་ཟེར་རོ། །གཞན་དག་ནི་མི་ལ་ཀུན་ཏུ་སྦྱོར་བ་གཞན་ནི་ཇི་སྲིད་གྲོག་སྦུར་ལ་མཚུངས་པ་དེ་སྲིད་འགྲོ་བ་མཚུངས་པ་ལ་སྐྱེ་བ་སྦྱོར་བའི་སྒོ་ནས་ལས་རྣམས་ཀྱི་ཁྱད་པར་
ཡིན་ནོ། །ཇི་ལྟར་གླང་པོ་ཆེ་བསད་པ་ནི་བསོད་ནམས་མ་ཡིན་པ་ཆེས་མང་ལ་གྲོག་སྦུར་ནི་ཆེས་ཉུང་ན་མཚུངས་པ་ལྟ་ཅི་སྨོས། སྡོམ་པ་ནི་བསམ་པའི་སྒོ་ནས་རྣམ་པར་གཞག་སྟེ། སེམས་ཅན་ཐམས་ཅད་ཀྱི་རྗེས་སུ་སོང་བའི་དགེ་བའི་བསམ་པས་རྣམ་པར་གཞག་གོ། །དེ་ནི་དེ་
ལས་ཐོབ་པོ་ཞེས་བྱ་བ་ནི། རང་གི་རྒྱུད་ལས་ལས་ཀྱི་ལམ་དངོས་གཞིས་བསྡུས་པའི་སྡོམ་པའི་ཐོབ་པ་མ་ཡིན་ནོ། །སེམས་དང་ཆོས་ལ་སོགས་པ་མ་གྱུར་པར་རང་གསད་པ་ལས་མཚམས་མེད་པ་ལ་སོགས་པ་ཐོབ་པར་འགྱུར་རོ། །ཉེར་བསྡོགས་ཀྱིས་བསྡུས་པའི་ནི་
མི་འགོག་སྟེ། ཁུ་བ་འབྱིན་པ་སྤོང་བ་ལ་སོགས་པའོ། །སྡོམ་པ་མིན་པ་ཐམས་ཅད་དང་ཞེས་བྱ་བ་ལ་སྡོམ་པ་མ་ཡིན་པ་ནི་ལས་ཀྱི་ལམ་ཐམས་ཅད་ཀྱི་སྒོར་གྱུར་པ་ཉེས་པར་སྤྱོད་པ་ལ་བྱ་སྟེ། གང་གི་ཚེ་སྡོམ་པ་མ་ཡིན་པ་ཐོབ་ནས་བསམས་བཞིན་དུ་སྲོག་ཆགས་ཀྱི་སྲོག་

གཅོད་པར་བྱེད་པ་དེ་ནི་དེའི་ལས་ཀྱི་ལམ་ཡིན་ནོ། །རྒྱས་པར་ཐམས་ཅད་བརྗོད་པར་བྱའོ། །སེམས་ཞན་པ་ལ་སོགས་པ་ཅིག་ཅར་མི་འབྱུང་བའི་ཕྱིར་རོ་ཞེས་བྱ་བ་འབྱུང་ངོ་། །གལ་ཏེ་འདོད་ཆགས་དང་ཞེ་སྡང་དག་ལྷན་ཅིག་མི་འབྱུང་བས་མི་
དགེ་བའི་རྩ་བ་རྣམས་ཀྱང་ཅིག་ཅར་མི་འབྱུང་བས་མ་ཡིན་ནམ། ཅིའི་ཕྱིར་སེམས་ཞན་པ་ལ་སོགས་པ་ཁོ་ན་བརྗོད་ཅེ་ན། རྣམ་གྲངས་ཐ་མ་ངེས་པ་ལ་བརྟེན་ཏེ་བརྗོད་པས་སྐྱོན་མེད་དོ། །དེ་ལྟར་ཐམས་ཅད་ཀྱི་སྡོམ་པ་མ་ཡིན་པའི་རྒྱུ་གཅིག་ཉིད་ལ་ཤེན་པ་དང་བྱ་གག་
གསོད་པ་དང་ཕག་གསོད་པ་ཞེས་པར་འགྱུར་བ་ཅི་ཞེ་ན། སྡོམ་པ་བཞིན་དུ་ཐོབ་པས་འདིས་སྔོན་མེད་པའི་སྡོམ་པ་མ་ཡིན་པ་འཐོབ་པ་མ་ཡིན་ལ། སྲོག་གཅོད་པའི་རྣམ་པར་རིག་བྱེད་གང་ཡིན་པ་དེ་ནི་འབྱུང་ངོ་ཞེས་ཟེར་རོ། །འདིས་སྔར་ཉིད་དུ་སེམས་ཅན་ཐམས་ཅད་
ལ་མ་བསྡམས་ཏེ། དེའི་སྲོག་ལ་གནོད་པར་ཁས་བླང་བའི་ཕྱིར་རོ། །དེ་ནི་སྔོན་མེད་པའི་སྡོམ་པ་མ་ཡིན་པ་ཐོབ་པ་གང་ལས་ཤེ་ན། དགེ་བསྙེན་གྱིས་ནི་དགེ་ཚུལ་གྱི་སྡོམ་པའི་སྔོན་དང་། དགེ་ཚུལ་གྱི་ཡང་དགེ་སློང་གི་སྡོམ་པའི་སྔོན་དུ་སྐྱེའོ། །ཡང་དག་པར་
བླངས་པའི་ལམ་དེའི་འཁོར་གྱི་ཁྱད་པར་ལས་ཞེས་བྱ་བ་སྟེ། ཆེན་པོ་ནི་སྲོག་གཅོད་པའི་རྣམ་པར་རིག་བྱེད་དོ། །རྣམ་པར་རིག་བྱེད་མ་ཡིན་པ་ཡང་རྟོག་པར་བྱའོ། །གླང་པོ་ཆེ་འཆོར་བ་ན་ནི་བ་གླང་འཆོར་བ་རྣམས་སོ། །བློན་པོ་ནི་ཆོས་བཞིན་འདོན་པ་དག་གོ །ཡང་ན་བློན་པོ་ནི་བཀའ་
པ་གཏོགས་པའོ། །དོན་གྱིས་ན་ཞེས་བྱ་བ་ནི་དེ་ལས་མི་འབྱུང་ཡང་འཇུག་པ་མཐུན་པའི་ཕྱིར་སྡོམ་པ་མ་ཡིན་པ་ཅན་དུ་ཁོང་དུ་ཆུད་པར་བྱའོ། །དེ་ལ་གནས་པ་ཞེས་བྱ་བ་ནི། དེ་དག་ནི་སྡོམ་པ་མ་ཡིན་པ་ནི་ཡོད་པ་མ་ཡིན་ཏེ་འོ་ན་ཞེ་ན་དེ་ལ་གནས་པས་སོ། །ཤེས་ན་ནི་ཞེས་བྱ་
བ་ཤེས་བཞིན་དུའོ། །འཕགས་པར་གྱུར་པ་རྣམས་ལ་ཡང་ཞེས་བྱ་བ་རྒྱས་པར་འབྱུང་སྟེ། བདེན་མ་མཐོང་བ་ངན་སོང་དུ་སྐྱེ་བ་མེད་ཅེས་བྱའོ། །བུར་གྱུར་པའི་ལུག་རྣམས་ཀྱང་ཞེས་བྱ་བ་རྒྱས་པར་འབྱུང་སྟེ། འདིར་སློབ་དཔོན་འདུས་བཟང་གིས་ལན་སྨྲས་པ། དཔེར་ན་

ཤེན་པ་འགའ་ཞིག་གཞན་གྱི་ནོར་མ་བྱིན་པར་རང་གིར་མི་བྱེད་ཅིང་། རང་གི་ཆུང་མས་ཆོག་ཤེས་པ་ཡང་བསམ་པ་ལོག་པར་ཞུགས་པའི་ཕྱིར་ཡན་ལག་ཐམས་ཅད་ལ་སྡོམ་པ་མ་ཡིན་པ་འཐོབ་པོ། །དེ་བཞིན་དུ་སེམས་ཅན་ཐམས་ཅད་ལ་ཡང་འགྱུར་ཏེ། བསམ་པ་ལོག་
པར་ཞུགས་པའི་ཕྱིར་རོ། །ཨཱ་ཏྲ་ཙ་བྲིཏྟི་ཀཱི་རེ་ཎཻ་བ་ད་ནྟ་མུཏྟ་མི་ཏི་ནཱ་ཏྲཱ་ད་ར་ཀྲི་ཡ་ཏེ། སྡོམ་པ་མ་ཡིན་པ་མ་ཚང་བ་དང་ཉི་ཚེ་བ་ནི་རྣམ་པ་ཐམས་ཅད་དུ་མེད་དོ་ཞེས་བྱ་བ་ལ། ལས་ཀྱི་ལམ་གྱི་ཡན་ལག་མ་ཚང་བའི་ཕྱིར་མ་ཚང་བའོ། །ཉི་ཚེ་བ་ནི་སེམས་ཅན་དང་ཡུལ་དང་དུས་
དང་ཚེ་ངེས་པ་དང་ལྡན་པའོ། །རྣམ་པ་བརྒྱད་མ་གཏོགས་པ་ཞེས་བྱ་བ་ལ། སོ་སོར་ཐར་པའི་སྡོམ་པ་རྣམ་པ་བརྒྱད་མ་གཏོགས་པ་གཞན་ནི་ཉི་ཚེ་བ་དང་མ་ཚང་བ་ཡང་ཡོད་དོ། །ཚུལ་ཁྲིམས་དང་འཆལ་བའི་ཚུལ་ཁྲིམས་དེ་ཙམ་གྱིས་གེགས་བྱེད་པའི་ཕྱིར་རོ་ཞེས་བྱ་བ་དེ་ཉིད་ལ་
སྨྲས་པ། དེ་ལྟ་ན་སྡོམ་པ་མིན་ཅན་གྱི་དགེ་བསྙེན་དང་དགེ་བསྙེན་སྡོམ་མིན་ཅན་ཞེས་བྱ་བ་ཐལ་བར་འགྱུར་རོ། །འདི་ནི་མདོ་སྡེ་པ་ལ་གནོད་བྱེད་དེ། དེ་དག་ནི་སྐྱབས་སུ་འགྲོ་བ་ཙམ་ལས་སྡོམ་པ་མེད་པར་ཡང་དེ་དགེ་བསྙེན་ནོ་ཞེས་སོ། །ད་ནི་གང་ལ་སྲོག་གཅོད་པ་ལ་
སོགས་པ་ལས་ལྡོག་པ་དང་དེ་ལ་འཇུག་པར་བྱེད། དེ་ནི་གལ་ཏེ་བསྡམས་པ་དང་མ་བསྡམས་པ་ལས་ཡིན་ཏེ། འདི་ལ་ཅི་ཞིག་གནོད། དེའི་རིགས་སུ་སྐྱེས་པ་རྣམས་ནི་ཞེས་བྱ་བ་ནི་ཤེན་པ་ལ་སོགས་པ་སྡོམ་པ་མ་ཡིན་པ་ཅན་གྱི་རིགས་སུ་སྐྱེས་པ་རྣམས་སོ། །ཞིང་
དང་ལེན་པ་དང་གུས་པར་བྱེད་པས་འཐོབ་ཅེས་བྱ་བ་ལ་བྱེད་པ་ཞེས་བྱ་བའི་སྒྲ་ནི་རེ་རེ་དང་སྦྱར་ཏེ། ཞིང་བྱེད་པ་དང་། ལེན་པར་བྱེད་པ་དང་། གུས་པར་བྱེད་པ་ནི་ཞིང་དང་ལེན་པ་དང་གུས་པར་བྱེད་པའོ། །ཡང་འདིར་ལེན་པ་ཉིད་བྱེད་པའོ་ཞེས་བྱ་བར་ཚིག་བསྡུའོ། །བྱེད་
པ་ནི་གཡོ་བ་སྟེ། བྱེད་པ་ནི་གཡོ་བ་ལའོ་ཞེས་འབྱུང་ངོ་། །མི་བརྡ་ཕྲད་པའོ་ཞེས་བྱ་བ་ལ། མི་བརྡ་ཕྲད་པ་ནི་འདིར་གང་ཞིག་འདིས་བསླབ་པ་ཕུལ་ལོ་སྙམ་དུ་དེའི་ཚིག་ཤེས་པ་དེ་ལ་མངོན་པར་འདོད་དོ། །བསམ་པ་ཐག་པ་ནི་སྡོམ་པ་དོན་དུ་མི་གཉེར་བའོ། །དེ་དང་འགལ་

བའི་རྣམ་པར་རིག་བྱེད་ཀྱི་ཁྱད་པར་ནི་བསླབ་པ་ཕུལ་བ་སྟེ་སེམས་བསྐྱེད་པ་ཙམ་གྱིས་ནི་མ་ཡིན་ཏེ། དེ་ཐོབ་པ་བཞིན་དུ་བསླབ་པ་འབུལ་བའི་སེམས་ཀྱང་ནུས་པ་དང་མི་ལྡན་པའི་ཕྱིར་རོ། །རྨི་ལམ་གྱི་ནང་དུ་བཏང་བ་ལས་རྣམ་པར་རིག་བྱེད་ཙམ་མ་
ཡིན་ནོ། །ཁྲོ་བ་དང་མྱོས་པ་ལ་སོགས་པས་ཀྱང་ཕྱིར་ཕུལ་བ་མ་ཡིན་པས་གཉི་ག་མ་ཡིན་པ་ཙམ་མོ། །དུད་འགྲོའི་སྐྱེ་གནས་པ་ལ་སོགས་པའི་མདུན་དུ་བསླབ་པ་ཕུལ་བ་མེད་དོ། །རྟེན་ཉམས་པ་དང་ཞེས་བྱ་བ་ནི་སྐྱེས་པའམ། བུད་མེད་ཀྱི་རྟེན་ཇི་ལྟ་བུ་སྡོམ་པ་བླངས་པ་
དེ་ལྟ་བུས་དེ་ཉམས་པ་སྟེ། འདི་ནི་གཏོང་བའི་རྒྱུ་གསུམ་པའོ། །གཞི་ཆད་པ་དང་ཞེས་བྱ་བ་ལ་སྡོམ་པའི་གཞི་སྟེ་རྒྱུ་ནི་དགེ་བའི་རྩ་བ་གསུམ་ཡིན་ལ། དེ་དག་ཆད་པས་སྡོམ་པ་ཡང་འཆད་དེ། འདི་ནི་གཏོང་བའི་རྒྱུ་བཞི་པའོ། །ཉིན་ཞག་ཏུ་འཕངས་པའི་ཕྱིར་ཏེ། འདི་གཏོང་
བའི་རྒྱུ་ལྔ་པའོ། །ཁ་ཅིག་ལྟུང་བར་གྱུར་ལས་སྨྲ་ཞེས་བྱ་བ་ནི་མི་ཚངས་པར་སྤྱོད་པ་ལ་སོགས་པ་ཕམ་པ་ལས་ཏེ། འདི་ལྟུང་བར་བྱེད་པས་ན་ལྟུང་བར་གྱུར་པའོ། །ཁ་ཆེ་རྣམས་ནི་བྱུང་བ་ལ། བུ་ལོན་ནོར་བཞིན་གཉིས་སུ་འདོད། ཅེས་བྱ་བ་ལ་བུ་ལོན་དང་ནོར་ནི་བུ་ལོན་ནོར་
ཏེ། དེ་དག་དང་འདྲ་བ་ནི་བུ་ལོན་ནོར་བཞིན་ནོ། །ཡང་ཅིའི་ཕྱིར་དེ་རྣམས་དེ་ལྟར་འདོད་ཅེ་ན། དེའི་ཕྱིར་ཕྱོགས་གཅིག་ཉམས་པས་སྡོམ་པ་ཟད་པར་གཏོང་བ་མི་རིགས་སོ་ཞེས་བྱ་བ་སྨོས་སོ། །ལྟུང་བ་གཞན་ཞེས་བྱ་བ་ནི་དགེ་འདུན་ལྷག་མའི་ལྟུང་བའོ། །རྟེན་ཉམས་
པ་དང་ཞེས་བྱ་བ་ནི། མཚན་གཉིས་ཅིག་ཅར་བྱུང་བ་སྟེ། ཇི་ལྟར་རང་གི་རྟེན་ལས་སྡོམ་པ་སྐྱེ་བའི་རྗེས་སུ་འཇུག་པ་དེ་ཉམས་པས་ཇི་ལྟར་མི་སྐྱེ་བ་དེ་བཞིན་དུ་རྗེས་སུ་མི་འཇུག་པ་སྟེ། ལུས་རྣམ་པར་འགྱུར་བ་ལ་སེམས་རྣམ་པར་འགྱུར་བ་སྲིད་པའི་ཕྱིར་དང་བདག་པོ་ཡིན་པའི་ཕྱིར་
འདི་ནི་གཏོང་བའི་རྒྱུ་གསུམ་པའོ། །གཞི་ཆད་པ་དང་ཞེས་བྱ་བ་ནི། སྡོམ་པའི་གཞི་རྣམ་པར་རིག་བྱེད་དང་། རྣམ་པར་རིག་བྱེད་མ་ཡིན་ཀུན་སློང་གི་སེམས་ཆད་པ་ལས་སྡོམ་པ་ཡང་ཆད་པར་འགྱུར་ཏེ། དེས་ན་འདི་ནི་གཏོང་བའི་རྒྱུ་བཞི་པའོ། །དེ་སྲིད་དུ་འཕངས་པའི་ཕྱིར་རོ་ཞེས་བྱ་བ་ནི།

ཉིན་ཞག་ཏུ་འཕངས་པའི་ཕྱིར་ཉིན་ཞག་པའི་སྡོམ་པ་སྟེ། ཉིན་ཞག་གིས་ཡོངས་སུ་འདོར་ཞིང་སླར་སྐྱ་རེངས་ཤར་བས་གཏོང་ངོ་། །བུ་ལོན་དང་ནོར་ནི་བུ་ལོན་ནོར་ཏེ་དེ་དག་དང་འདྲ་བ་ནི་བུ་ལོན་ནོར་བཞིན་ནོ། །ཕྱོགས་གཅིག་ཉམས་པར་སྡོམ་པ་ཟད་པར་གཏོང་བ་མི་རིགས་སོ་ཞེས་བྱ་
བ་སྟེ། ཇི་ལྟར་རེ་རེ་ཡང་དག་པར་བླངས་པས་སྡོམ་པ་མཐའ་དག་བླངས་པར་མི་འགྱུར་བ་བཞིན་དུ་རེ་རེ་ལས་འདས་པས་མཐའ་དག་གཏོང་བར་མི་རིགས་ཞེས་བྱའོ། །སེམས་ཅན་ཐམས་ཅད་ཀྱི་ཞིང་ལས་ཐོབ་པས་རྒྱུད་གཅིག་ལས་འདས་པས་ཐམས་ཅད་གཏོང་བར་མི་རུང་ངོ་། །
ནམ་ཞིག་འདི་རིགས་པར་མི་རུང་ན། གང་གི་ཚེ་ལྟུང་བ་གཅིག་གི་དབང་གིས་སྡོམ་པ་གཏོང་བར་འགྱུར་རོ། །འོ་ན་སྐྱོན་མེད་པར་འགྱུར་རོ་ཞེ་ན། དེའི་ཕྱིར་འདི་ལ་ཚུལ་ཁྲིམས་དང་འཆལ་བའི་ཚུལ་ཁྲིམས་གཉི་ག་ཡང་ཡོད་དེ་ཞེས་འབྱུང་སྟེ། པྲ་ཏི་དེ་ཤ་ནཱརྡཱ་ཡཱནྟུ་ཤི་ཀྵ་ཡ་མ་ཏིཀྲནྟཱ་
བི་ཀྲྀ་ཏ་ཡཾ། ཚུལ་ཁྲིམས་དང་ལྡན་པ་ཉིད་ཡིན་གྱི་ཚུལ་ཁྲིམས་འཆལ་བ་མ་ཡིན་ནོ། །གཞན་ནི་རྟག་ཏུ་གཉིས་ཀ་ཇི་ལྟ་བར་དོན་དམ་པའི་དགེ་སློང་ལ་དགོངས་ནས་དེ་སྐད་གསུངས་སོ་ཞེས་སོ། ཚུལ་ཁྲིམས་རྣམ་པར་དག་པའི་ནི་འཇིག་རྟེན་ལས་འདས་པའི་ཡོན་ཏན་རྟོགས་པའི་དོན་
ཏེ། རྩ་བའི་ལྟུང་བ་བྱུང་བ་ལ་ཚུལ་ཁྲིམས་རྣམ་པར་དག་པ་ཡོད་པ་མ་ཡིན་ནོ། །བཤགས་པ་མེད་པའི་ལྡང་བའི་སྐལ་བ་མེད་པའི་ཕྱིར་སྡོམ་པ་གཞན་དང་རྗེས་སུ་འབྲེལ་བ་ཡོད་ཀྱང་འདི་འཇིག་རྟེན་ལས་འདས་པའི་ཡོན་ཏན་གྱི་སྣོད་དུ་མ་གྱུར་པས་དགེ་སློང་མ་ཡིན་ཞེས་གསུངས་
སོ་ཞེས་སོ། །བྱེ་བྲག་ཏུ་སྨྲ་བ་རྣམས་ན་རེ་སྟོན་པས་སྡོམ་པ་ལྷག་མ་དང་བཅས་པ་དགེ་སློང་གིས་དགོངས་པ་བསྒྲུབ་པའི་སྐལ་བ་དང་མི་ལྡན་པ་ལ་དགེ་སློང་མ་ཡིན་ཞེས་གསུངས་པ་འཐད་པ་ཡིན་ཏེ། བུའི་དོན་དང་བྲལ་བ་ལ་བུ་མ་ཡིན་ནོ་ཞེས་བྱ་བའི་སྒྲ་འགོད་པ་དང་། མིའི་
དོན་དང་བྲལ་བ་མཚན་དང་བྲལ་བ་མཚན་དང་མི་ལྡན་པ་ལ་མི་མ་ཡིན་པར་བརྗོད་པ་བཞིན་ནོ། །གསོལ་བ་དང་བཞིའི་ལས་ཀྱིས་བསྙེན་པར་རྫོགས་པ་རྩ་བའི་ལྟུང་བ་ལྷག་པར་སྤྱད་པ་ཉིད་དགེ་སློང་མ་ཡིན་པ་འབའ་ཞིག་ཏུ་མ་ཟད་ཀྱི། འོ་ན་ཅི་ཞེ་ན། སྐྱབས་སུ་འགྲོ་བ་གསུམ་བརྗོད་པས་

བསྙེན་པར་རྫོགས་པ་རྩ་བ་ལས་འདས་པ་ཡང་དགེ་སློང་མ་ཡིན་པ་ཉིད་དོ་ཞེས་དེ་ལྟར་འདས་པའི་དོན་འདི་སེམས་ལ་བཞག་ནས་འདྲི་བ་ནི། དེ་ཅི་ལྟར་ན་ངེས་དོན་ཡིན་ཞེ་ན་ཞེས་བྱ་བ་ནི། དེ་ལ་མིང་གི་དགེ་སློང་ཞེས་བྱ་བ་ནི་གང་ལ་དགེ་སློང་
ཞེས་འོལ་ཕྱིར་མིང་བཏགས་པའོ། །ཁས་འཆེས་པའི་དགེ་སློང་ཞེས་བྱ་བ་ནི་གང་ཞིག་ཚུལ་ཁྲིམས་འཆལ་བ་སྟེ། དེ་ནི་བདག་ཉིད་དགེ་སློང་ཡིན་ནོ་ཞེས་དམ་འཆའོ། །སློང་བས་ན་དགེ་སློང་ཞེས་བྱ་བ་ནི་སློང་བར་བྱེད་པའོ། །ཉོན་མོངས་པ་བཅོམ་པས་ན་དགེ་སློང་
ཞེས་བྱ་བ་ནི་ཁམས་གསུམ་ལས་འདོད་ཆགས་དང་བྲལ་བ་ལའོ། །དོན་འདི་ལ་ཞེས་བྱ་བ་ནི་བཅོམ་ལྡན་འདས་ཀྱིས་དགེ་སློང་མ་ཡིན་དགེ་སྦྱོང་མ་ཡིན་ཞེས་གང་གསུངས་པ་ལའོ། །གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའི་དགེ་སློང་ཞེས་བྱ་བ་ནི། སྔར་བཤད་
པ་བཞི་ལས་གཞན་པ་སོ་སོའི་སྐྱེ་བོ་ཚུལ་ཁྲིམས་ལ་གནས་པ་ལ་མངོན་པར་བཞེད་དོ། །གང་ཡང་དོན་དམ་པའི་དགེ་སློང་ལ་དགོངས་ཏེ་གསུངས་པ་ཡིན་ནོ་ཞེས་སྨྲས་པ་དེ་ལ་ཡང་བརྗོད་པ་ནི་དེ་སྔོན་ཞེས་བྱ་བ་སྟེ། ལྟུང་བར་འགྱུར་བ་ལྷག་པར་སྤྱོད་པའི་སྔ་རོལ་དུའོ། །
བྱེ་བྲག་དུ་སྨྲ་བ་རྣམས་ན་རེ་མ་ཐོབ་པ་དག་ལས་ཀྱང་ཉམས་པར་འདོད་དེ། ཇི་སྐད་དུ་མདོ་ལས། ལྷ་དང་བཅས་པའི་འཇིག་རྟེན་ན། །ཤེས་རབ་ཡོངས་སུ་ཉམས་པ་ལྟོས། །ཞེས་གསུངས་པ་ལྟ་བུའོ་ཞེས་ཟེར་རོ། །གསུངས་པ་ཡང་ཇི་ལྟར་དོན་དམ་པའི་དགེ་སློང་ཉིད་ལ་
དགོངས་ནས་དགེ་སློང་མ་ཡིན་པར་གསུངས་པ་ཡིན་ནོ། །རྩ་བར་གྱུར་པ་ཕྱོགས་གཅིག་ཆད་པས་ཀྱང་ཞེས་རྒྱས་པར་འབྱུང་བ་ལ། བྱེ་བྲག་ཏུ་སྨྲ་བ་རྣམས་ན་རེ། དེ་དཔེའི་དོན་འདི་ནུས་པ་མེད་དོ་ཞེས་ཟེར་རོ། །ཇི་ལྟར་བསླབ་པའི་གཞི་བཞི་པོ་འདི་མཐའ་དག་ནི་ཤིང་ཏཱ་ལའི་མགོ་ལྟ་
བུའོ། །གལ་ཏེ་མཐའ་དག་ལས་གང་ཡང་རུང་བ་རེ་རེ་ལས་འདས་པས་སྡོམ་པ་གཏོང་བར་མི་རུང་སྟེ། ཏཱ་ལ་རེ་རེ་ནས་མགོའི་ཕྱོགས་གཅིག་ཆད་ཀྱང་ཕྱོགས་གཞན་གནས་པ་མཐོང་བའི་ཕྱིར་རོ། །ཇི་སྟེ་རེ་རེ་བ་དེ་ལྟ་ན་ཡང་དེ་ལས་འདས་ན་སྡོམ་པ་ཐམས་ཅད་གཏོང་བ་མ་ཡིན་ཏེ།

ཡང་ཏཱ་ལའི་མགོ་ལྟ་བུ་གང་དག་ཡིན་པ་གསུམ་པོ་དག་ལས་མ་འདས་པས་གཏོང་བར་མི་འགྱུར་རོ་ཞེས་ཟེར་རོ། །འདི་ལ་དགོས་པ་ཅི་ཞེ་ན། དེའི་ཕྱིར་འདི་ལ་འདིར་དཔེའི་དོན་གྱི་ནུས་པ་སྨྲ་སྟེ། བསླབ་པའི་གཞི་གཞན་པོ་ཡལ་ག་དང་ལོ་མ་དང་འདྲ་བ་དག་ལས་འདས་ཀྱང་
བཤགས་ནས་ཡང་སྡོམ་པ་དེ་འཐོབ་ཀྱི། ཤིང་ཏཱ་ལའི་མགོ་དང་འདྲ་བ་བཞི་པོ་དག་གང་ཡང་རུང་བ་ལས་འདས་ན་ནི། སླར་སྡོམ་པ་ཐོབ་པ་མ་ཡིན་ནོ། །དེས་ན་ངེས་པ་འཇུག་པ་མེད་པས་དེ་ཉིད་ཀྱི་ཕྱིར་ཚུལ་ཁྲིམས་ལ་བརྟེན་ཅིང་གནས་པའི་ཞི་གནས་དང་ལྷག་མཐོང་དག་ཀྱང་
མེད་དོ། །སྲེ་ད་ནི་ནས་དང་འདྲ་བ་ཞིག་སྟེ་དེ་མ་རུང་བར་བྱེད་པའོ། །ཤིང་རུལ་པ་ཞེས་བྱ་བ་ནི་ཤིང་རུལ་པའོ། །སྙིང་པོ་མེད་པ་ཞེས་བྱ་བ་ནི་འབྲུ་ཁོང་ན་སྙིང་པོ་མེད་པའོ། །འདིར་དགེ་སློང་ཡང་དགེ་སློང་གི་ཤ་ཚུགས་ཅན་ཡིན་པའི་ཕྱིར་དང་། ཁོང་ན་སྙིང་པོ་མེད་པའི་ཕྱིར་
སྲེད་ལ་སོགས་པ་དག་དང་ཆོས་མཐུན་ནོ། །ཇི་ལྟར་སྲེད་ལ་སོགས་པ་དག་ནས་ལ་སོགས་པ་སྙིང་པོ་དང་ལྡན་པ་རྣམས་མ་རུང་བར་བྱེད་པས་དེ་རྣམས་ལས་སེལ་བར་བྱེད་པ་དེ་བཞིན་དུ་དེ་ཡང་དགེ་སློང་གི་ཚོགས་སྙིང་པོ་དང་ལྡན་པ་མ་རུང་བར་བྱེད་པས་དེ་དག་ལས་སེལ་
བར་བྱེད་པ་ཡིན་ནོ། །དེའི་ཕྱིར་ལམ་གྱིས་རྒྱལ་བ་ནི་མྱ་ངན་འདས་པ་སྟེ། ང་ནི་སྡིག་པའི་ཆོས་ལས་རྒྱལ། །དེ་བས་ཉེར་འགྲོ་ང་རྒྱལ་བ། །ཞེས་གསུངས་པ་ལྟ་བུའོ། །ལམ་སྟོན་པ་ནི་གང་ཞིག་ལམ་སྟོན་པར་བྱེད་པའོ། །ཁ་ཅིག་ལམ་གྱིས་འཚོ་བ་ནི་སློབ་པ་དང་མི་སློབ་
པའོ་ཞེས་ཟེར་རོ། །གཞན་དག་ནི་སློབ་པ་དང་མི་སློབ་པ་ནི་ལམ་གྱིས་རྒྱལ་བའོ་ཞེས་ཟེར་རོ། །ལམ་གྱི་ཕྱིར་འཚོ་བ་ནི་དགེ་སློང་ཚུལ་ཁྲིམས་དང་ལྡན་པ་སྟེ། ལམ་གྱི་ཆེད་དུ་འཚོ་བའི་ཕྱིར་རོ། །ལམ་སུན་འབྱིན་པ་ནི་དགེ་སློང་ཚུལ་ཁྲིམས་འཆལ་བ་སྟེ། འདིར་དཔེར་བརྗོད་
པ་ནི་འདི་ཡིན་ནོ། །འདུལ་བ་ལས་དགེ་སློང་མ་ཡིན་དགེ་སྦྱོང་མ་ཡིན་ཞེས་གསུངས་པ་ལ་ཡང་འདིར་དགེ་སྦྱོང་ཞེས་བཤད་ཅེ་ན། དེའི་ཕྱིར་དོན་དམ་པའི་དགེ་སློང་ལ་དགོངས་ནས་དགེ་སློང་མ་ཡིན་ཞེས་དེ་སྐད་བཤད་པ་རྟོགས་པར་བྱའོ། །ཤ་ཚུགས་ཙམ་ལུས་པའི་

ཕྱིར་ཞེས་བྱ་བ་ནི་དགེ་སྦྱོང་གི་རྟགས་ཙམ་ལུས་པའི་ཕྱིར་རོ། །བསམ་གཏན་ཏུ་གཏོགས་པའི་དགེ་བ་ཐམས་ཅད་ཅེས་བྱ་བ་ནི་སྡོམ་པའི་ངོ་བོ་དང་། དགེ་བ་གཞན་གཟུགས་ཀྱི་རང་བཞིན་མ་ཡིན་པའི་ཚོགས་པ་དེ་ཐམས་ཅད་བསྡུའོ། །
གོང་ངམ་འོག་ཏུ་ཞེས་བྱ་བ་ནི་གོང་དུ་སྐྱེས་ནས་འོག་མ་གཏོང་ལ། འོག་ཏུ་སྐྱེས་ནས་གོང་མ་གཏོང་ངོ་། །སྙོམས་པར་འཇུག་པ་ལས་ཡོངས་སུ་ཉམས་པ་ལས་ཞེས་བྱ་བ་ནི། གཟུགས་དང་གཟུགས་མེད་པ་ཇི་ལྟར་ཐོབ་པ་གཏོང་སྟེ་སྙོམས་པར་འཇུག་པ་ལ་རག་ལས་
པའི་ཕྱིར་རོ། །རིས་མཐུན་པ་བཏང་བས་ཀྱང་ཅུང་ཟད་གཏོང་བར་འགྱུར་རོ་ཞེས་བྱ་བ་ནི་སོ་སོའི་སྐྱེ་བོའི་གནས་སྐབས་ན་ངེས་པར་འབྱེད་པའི་ཆ་དང་མཐུན་པ་དྲོ་བ་ལ་སོགས་པ་བཟོད་པ་འབྲིང་བར་རོ། །འདིར་རིས་མཐུན་པ་བཏང་བ་ནི་འཆི་བའོ། །ཅུང་ཟད་ཅིག་ནི་ཉམས་
པའི་ཆ་དང་མཐུན་པ་ཇི་ལྟ་བ་བཞིན་དུ་འདོད་ཆགས་དང་བྲལ་བས་ཀྱང་གཏོང་ངོ་། །ལམ་སྔ་མ་གཏོང་བར་འགྱུར་རོ་ཞེས་བྱ་བ་ནི་ཞུགས་པའི་ལམ་མོ། །འབྲས་བུ་འམ་འབྲས་བུ་ཁྱད་པར་ཅན་ཞེས་བྱ་བ་ལ། འབྲས་བུ་ནི་རྒྱུན་ཏུ་ཞུགས་པའི་འབྲས་བུ་ལས་གཞན་རྣམ་པ་གསུམ་
ཡོངས་སུ་བཟུང་ངོ་། །འབྲས་བུ་ཁྱད་པར་ཅན་ནི་རྒྱུན་ཏུ་ཞུགས་པའི་འབྲས་བུའི་འོག་རོལ་གྱིས་ཞུགས་པའི་ལམ་མམ་ཁྱད་པར་གྱི་ལམ་མོ། །སློབ་དཔོན་འདུས་བཟང་ན་རེ་གཉིས་ཁོ་ན་བརྗོད་པར་བྱའོ་ཞེས་ཟེར་རོ། །དབང་པོ་སྦྱངས་པ་ནི་འབྲས་བུ་ཐོབ་པ་བརྗོད་དེ་གཟུང་བའི་ཕྱིར་
དེར་ཡང་འབྲས་བུ་ཐོབ་པས་ནི་ལམ་སྔ་མ་འདོར་རོ། །འདིར་འབྲས་བུ་འམ་འབྲས་བུ་ཁྱད་པར་ཅན་ལ་ཡང་རྣམ་པར་རྟོག་པ་གཉིས་ཏེ། མཐོང་བའི་ལམ་ནི་འབྲས་བུ་ཁྱད་པར་ཅན་ལམ་ལ་རྗེས་སུ་ཤེས་པ་ཐོབ་པས་འདོར་རོ། །མི་གཡོ་བར་བསྡུས་པའི་ཆོས་རྣམས་གཉི་ག་
ཇི་ལྟ་བར་ཁྱད་པར་ཅན་མ་ཡིན་ལ། སླར་ཡང་གཉི་ག་ཇི་ལྟ་བ་སྟེ། ད་ལྟ་མོད་ཀྱི་དབང་པོ་སྦྱངས་པས་འབྲས་བུ་ཙམ་ཐོབ་པ་དེ་ལྟ་ན་ཡང་དེར་དབང་པོ་སྦྱངས་པ་ཁོ་ན་རྒྱུ་ཡིན་པས་བར་ཆོད་མེད་པར་སོ་སོར་བཤད་པའི་ཕྱིར་རོ། །ཟག་པ་མེད་པ་ནི་མཚུངས་པར་ལྡན་པ་མ་ཡིན་

པའི་ཕྱིར་ས་འཕོས་པས་མི་གཏོང་ངོ་། །ཡང་སྡོམ་པ་མ་ཡིན་པ་ཅན་གྱི་སྡོམ་པ་ཇི་ལྟ་འཐོབ་ཅེ་ན། དེའི་ཕྱིར་གལ་ཏེ་སྡོམ་པ་ཡང་དག་པར་བླངས་པ་ལ་ཞེས་བྱ་བ་སྨོས་ཏེ་སོ་སོར་ཐར་པའི་སྡོམ་པའོ། །བསམ་གཏན་གྱི་སྡོམ་པ་ཐོབ་ན་ཞེས་བྱ་བ་ལ། ཟག་པ་མེད་པའི་
སྡོམ་པ་ཐོབ་ན་ཞེས་ཅིའི་ཕྱིར་མ་བརྗོད་ཅེ་ན། ཟག་པ་མེད་པའི་སྔོན་དུ་བསམ་གཏན་གྱི་སྡོམ་པ་འགྲོ་བའི་ཕྱིར་ལ། བསམ་གཏན་གྱི་སྡོམ་པ་ཁོ་ནས་བོར་བའི་ཕྱིར་ཟག་པ་མེད་པའི་སྡོམ་པ་ཐོབ་ན་ཞེས་མ་བརྗོད་དོ། །ཡང་སྡོམ་པ་མ་ཡིན་པ་ཅན་གྱིས་བསམ་གཏན་གྱི་སྡོམ་པ་
ཇི་ལྟར་འཐོབ་ཅེ་ན་རྒྱུ་དང་རྐྱེན་གྱི་སྟོབས་ཞེས་བྱ་བ་སྨོས་ཏེ། རྒྱུའི་སྟོབས་ནི་སྔར་གྱི་བསམ་གཏན་གོམས་པའོ། །རྐྱེན་གྱི་སྡོམ་པ་ནི་ས་དེ་པའི་ལས་རྣམ་པར་སྨིན་པ་ལ་མངོན་དུ་ཕྱོགས་པའོ། །གཞན་དག་ན་རེ་དམ་པའི་ཆོས་ཉན་པ་དང་། ཚུལ་བཞིན་ཡིད་ལ་
བྱེད་པའོ་ཞེས་ཟེར་རོ། །གཉེན་པོ་སྟོབས་དང་ལྡན་པའི་ཕྱིར་ཞེས་བྱ་བ་ནི་སྡོམ་པ་སྟོབས་དང་ལྡན་པའི་ཕྱིར་རོ། །ལུས་བོར་བའི་ཕྱིར་ཤི་བ་ཞེས་བྱ་བ་ནི། རིས་མཐུན་པའི་སྟོབས་ཀྱིས་ཐོབ་པའི་ཕྱིར་ལ། དེ་དང་བྲལ་ན་དེ་མེད་པའི་ཕྱིར་རོ། །རྫ་མཁན་གྱི་འཁོར་ལོ་དང་མདའི་
འགྲོས་བཞིན་ནོ་ཞེས་བྱ་བ་ནི་ཇི་ལྟར་རྫ་མཁན་གྱི་འཁོར་ལོ་འམ། མདའི་འགྲོས་འདུ་བྱེད་ཀྱི་ཁྱད་པར་གྱིས་འཕངས་པ་ནི་འདུ་བྱེད་ཀྱི་ཁྱད་པར་དེ་ཆད་པས་འཆད་དེ་དེ་དང་འདྲའོ། །གདོས་དང་རྒྱ་ལ་སོགས་པའི་དངོས་པོའོ་ཞེས་བྱ་བ་ལ། གང་གིས་གཞན་ལ་གདོས་སམ་རྒྱའམ་
མཚོན་ཆ་སྟེར་བ་ན་རྣམ་པར་རིག་བྱེད་མ་ཡིན་པ་དྲངས་པ་དེ་ནི་བདག་ཉིད་ཀྱི་དོན་དུ་ཡོངས་སུ་བཟུང་བ་དེ་ཆད་པས་དེ་ཡང་འཆད་དོ། །དགེ་བའི་རྩ་བ་རྣམས་ཞེས་བྱ་བ་རྒྱས་པར་འབྱུང་ངོ་། །སྟོབས་ཆུང་བའི་ཕྱིར་དགེ་བའི་རྩ་བ་གཅད་པའི་སྦྱོར་བ་ཁོ་ནས་བར་མ་མི་དགེ་
བའི་རྣམ་པར་རིག་བྱེད་མ་ཡིན་པས་ཏེ་དགེ་བའི་རྩ་བ་ཆད་པ་ལས་ཞེས་བརྗོད་པར་མི་བྱའོ་ཞེ་ན། སྦྱོར་བ་ལ་དེའི་སྒྲ་ཉེ་བར་བཏགས་པའི་ཕྱིར་རོ། །དྲུག་པོ་རྣམས་ཁོ་ནས་ཞེས་འདོད་དོ། །དེ་བཞིན་དུ་བསམ་གཏན་གྱི་སྡོམ་པའི་སྦྱོར་བས་ཀྱང་བར་མ་མི་དགེ་བའི་

རྣམ་པར་རིག་བྱེད་མ་ཡིན་པ་གཏོང་ངོ་། །གཞན་དག་ན་རེ་བདུན་པ་བརྗོད་པར་བྱའོ་ཞེས་ཟེར་རོ། །རྩ་བ་ཆད་པ་དང་གང་དུ་སྐྱེས་པ་ཞེས་བྱ་བ་དེ་ལ་འདོད་ཆགས་དང་བྲལ་བ་ལས་ཀྱང་ཅུང་ཟད་ཅིག་གཏོང་སྟེ། དཔེར་ན་ཡིད་མི་བདེ་བའི་དབང་པོ་
དབང་བ་ལྟ་བུའོ། །ཐམས་ཅད་ཅེས་བྱ་བ་ནི་ཁམས་གསུམ་པའོ། །ཉོན་མོངས་པ་གང་ཡིན་པ་དེ་ནི་ཉེ་བར་ཉོན་མོངས་པ་ཡང་ཡིན་ནོ། །སྤོང་བའི་ལམ་ནི་བར་ཆད་མེད་པའི་ལམ་སྟེ། དེ་ལ་ཆེན་པོའི་སྤོང་བ་ནི་ཆུང་ངུའི་ཆུང་ངུ་ཡིན་ལ། ཆུང་ངུའི་ཆུང་ངུ་ནི་ཆེན་པོའི་
ཆེན་པོའི་ཡིན་ནོ། །འཁོར་དང་བཅས་པ་ཞེས་བྱ་བ་ལ། དེའི་འཁོར་ནི་དེ་དང་ལྷན་ཅིག་འབྱུང་བ་དང་། དེའི་ཐོབ་པ་རྗེས་སུ་འབྲང་བ་དང་བཅས་པ་དག་གོ། །སྐྱེས་པ་ཕོའི་དབང་པོའི་དང་ལྡན་པ་ཞིག་ཅེས་བྱ་བ་འདི་ནི་འདིར་དཔེར་བརྗོད་པ་ཡིན་ནོ། །རྟེན་གཉིས་ཀའི་ཉོན་མོངས་པ་
ཤས་ཆེ་བའི་ཕྱིར་ཞེས་བྱ་བ་ལ། དེ་དག་ནི་སྐྱེས་པ་དང་ཡང་སྦྱོར་བར་འདོད་ལ། བུད་མེད་དང་ཡང་སྦྱོར་བར་འདོད་དེ། དེའི་ཕྱིར་སྐྱེས་པ་དང་བུད་མེད་ཀྱི་རྟེན་གྱི་ཉོན་མོངས་པ་ཤས་ཆེ་བའི་ཕྱིར་དེའི་གཉེན་པོར་གྱུར་པ་སོ་སོར་རྟོག་པ་མི་མཐོང་ངོ་། །བྱནྟ་ར་སྱ་ཧི་ཀླེ་ཤ་ས་མུ་ད་ཙཱ་རོ་པི་
བྱནྟར་ཨེ་བེ་ཏི། ཅི་རིགས་པར་སྦྱར་བར་བྱ་སྟེ། མཚན་གཉིས་པ་ལ་ནི་གཉི་གའི་ཉོན་མོངས་པ་ཤས་ཆེ་བའི་ཕྱིར་དང་། ངོ་ཚ་ཤེས་པ་དང་ཁྲེལ་ཡོད་པ་ཤས་ཆེན་པོ་མེད་པའི་ཕྱིར་སྡོམ་པ་མེད་ལ། ཟ་མ་དང་མ་ནིང་དག་ལ་ནི་ངོ་ཚ་ཤེས་པ་དང་ཉོན་མོངས་པ་ཀུན་ཏུ་སྤྱོད་པ་ཡང་། ཁྲེལ་
ཡོད་པ་ཤས་ཆེན་པོ་མེད་པའི་ཕྱིར་རོ། །སྡོམ་པ་མེད་པའི་རྒྱུར་བཤད་པ་གང་དག་ཡིན་པ་དེ་དག་ནི་སྡོམ་པ་མ་ཡིན་པ་དང་རྗེས་སུ་མཐུན་པ་ཡིན་པས། འོ་ན་སྡོམ་པ་མ་ཡིན་པ་ཞེས་བྱ་བ་རྒྱས་པར་དྲིས་སོ། །བྱང་གི་སྒྲ་མི་སྙན་པ་རྣམས་ལ་ནི་ཡང་དག་པར་ལེན་པ་མེད་པའི་ཕྱིར་སོ་
སོར་ཐར་པའི་སྡོམ་པ་མེད་དེ། །ཏིང་ངེ་འཛིན་མེད་པའི་ཕྱིར་བསམ་གཏན་དང་ཟག་པ་མེད་པའི་སྡོམ་པ་དག་མེད་དོ། །ཡང་ཅིའི་ཕྱིར། དེ་རྣམས་ལ་ཡང་དག་པར་ལེན་པ་དང་ཏིང་ངེ་འཛིན་དག་མེད་ཅེ་ན། ཤེས་རབ་ཞན་པས་དགེ་བ་ལ་སོགས་པའི་ཆོས་ལ་མ་བྱང་

བའི་ཕྱིར་རོ། །མི་རྣམས་ལ་གསུམ་མོ་ཞེས་བྱ་བ་ལ། སོ་སོར་ཐར་པའི་སྡོམ་པ་ནི་མི་རྣམས་ཁོ་ན་ལ་ཡོད་ཀྱི། སྐྱོ་བ་མེད་པའི་ཕྱིར་འདོད་པ་སྤྱོད་པའི་ལྷ་ཤེས་རབ་ཅན་རྣམས་ལ་ཡང་མེད་ན། གོང་དུ་སྐྱེས་པ་རྣམས་ལ་ལྟ་སྨོས་ཀྱང་ཅི་དགོས། འོ་ན་ཇི་ལྟར་ན་དེ་དག་ལ་
བསམ་གཏན་དང་ཟག་པ་མེད་པའི་སྡོམ་པ་དག་ཡོད་ཅེ་ན། ཅི་རིགས་པར་རྒྱུ་དང་ལས་ཀྱི་ཆོས་ཉིད་ཀྱིས་རྟོགས་སོ། །གོང་ན་ནི་མེད་དོ་ཞེས་བྱ་བ་ནི་གཟུགས་མེད་པའི་ཁམས་སུ་སྐྱེས་པ་རྣམས་ལའོ། །བསམ་གཏན་ཁྱད་པར་ཅན་དང་འདུ་ཤེས་མེད་པའི་སེམས་ཅན་དུ་སྐྱེས་
པ་རྣམས་མ་གཏོགས་པ་ཞེས་བྱ་བ་ལ། འཕགས་པ་ནི་བསམ་གཏན་ཁྱད་པར་དང་འདུ་ཤེས་མེད་པའི་སེམས་ཅན་དག་ཏུ་མི་སྐྱེའོ། །དེ་དག་གི་ནི་ལྡན་པའི་སྒོ་ནས་ཡོད་ཀྱི་ཞེས་བྱ་བ་ནི། གཟུགས་མེད་པར་སྐྱེས་པ་རྣམས་ལ་ནི་ཟག་པ་མེད་པའི་སྡོམ་པ་ལྡན་པའི་སྒོ་
ནས་ཡོད་ཀྱི་མངོན་སུམ་དུ་གྱུར་པ་ལས་ནི་མ་ཡིན་ཏེ་དེ་ན་གཟུགས་མེད་པའི་ཕྱིར་རོ། །གཞན་ན་ནི་རང་གི་ངོ་བོས་ཀྱང་ཡོད་དོ་ཞེས་བསྟན་པར་འགྱུར་རོ། །རེ་ཞིག་དང་གཏན་དུ་ཞེས་བྱ་བ་ལ། འབྲས་བུ་ཡིད་དུ་འོང་བ་ཅན་རེ་ཞིག་སྡུག་བསྔལ་ལས་ཡོངས་སུ་སྐྱོབ་པའི་
ཕྱིར་བདེ་བ་ཡིན་ཏེ། ཇི་སྲིད་དུ་རྣམ་པར་སྨིན་པ་ཡིད་དུ་འོང་བ་རྗེས་སུ་འཇུག་པའི་བར་དུའོ། །མྱ་ངན་ལས་འདས་པ་ཐོབ་པར་བྱེད་པ་ནི་གཏན་དུ་སྟེ། ཡོངས་སུ་མྱ་ངན་ལས་འདས་པ་གཏན་དུ་སྡུག་བསྔལ་མེད་པའི་ཕྱིར་རོ། །མི་དགེ་བ་ནི་མི་མཐུན་པའི་ཕྱོགས་
ཀྱིས་ཞེས་བྱ་བ་ནི་འབྲས་བུ་ཡིད་དུ་མི་འོང་བའི་ཕྱིར་དང་། མྱ་ངན་ལས་འདས་པའི་བགེགས་ཡིན་པ་ཉིད་ཀྱིས་སོ། །འདོད་པ་ན་སྤྱོད་པའི་དགེ་བའི་ལས་ནི་བསོད་ནམས་མ་ཡིན་པའི་གཉེན་པོར་གྱུར་པའི་ཕྱིར་བསོད་ནམས་ཞེས་བྱ་སྟེ། སྲུང་བའམ་ཚིམ་པར་བྱེད་
པས་ན་བསོད་ནམས་སོ། །འདི་ལ་རྣམ་པར་རྟོག་པ་དང་དཔྱོད་པ་གང་ཡིན་པ་ཞེས་བྱ་བ་རྒྱས་པར་འབྱུང་སྟེ། འདིར་སོགས་པ་ཞེས་བྱ་བའི་སྒྲས་ནི་བསམ་གཏན་གཉིས་པ་ལ་དགའ་བ་དང་མ་བྲལ་བ་གང་ཡིན་པ་འདི་ནི་འདིར་འཕགས་པ་རྣམས་ཀྱིས་གཡོ་

བའོ་ཞེས་གསུངས་སོ། །གསུམ་པ་ལ་ཡང་འདི་ལ་དབུགས་འབྱུང་བ་དང་རྔུབ་པ་དང་མ་བྲལ་བ་དང་། འདི་ལ་བདེའོ་སྙམ་དུ་སེམས་ཀྱི་གཏོད་པ་གང་ཡིན་པ་འདི་ནི་འདིར་འཕགས་པ་རྣམས་ཀྱིས་གཡོ་བའོ་ཞེས་གསུངས་པ་བསྡུའོ། །བསམ་
གཏན་གསུམ་པོ་ཞེས་བྱ་བ་རྒྱས་པར་འབྱུང་ལ། གཟུགས་དང་གཟུགས་མེད་པ་ན་སྤྱོད་པའི་དགེ་བ་ཐམས་ཅད་ནི་མི་གཡོ་བ་མ་ཡིན་གྱི། འོ་ན་ཅི་ཞེ་ན། བསམ་གཏན་གསུམ་པའི་གོང་ཡན་ཆད་ལ་ཡིན་ནོ་སྙམ་དུ་སེམས་སོ། །ཏིང་ངེ་འཛིན་སྐྱོན་དང་བཅས་པ་ལ་
ཞེས་བྱ་བ་ནི། ཏིང་ངེ་འཛིན་ཉེས་པ་དང་བཅས་པ་སྟེ། བསམ་གཏན་གསུམ་པོ་དེ་དག་གི་ཏིང་ངེ་འཛིན་སྐྱོན་དང་བཅས་པའི་དབང་དུ་མ་མཛད་ནས་འདི་ནི་འདིར་འཕགས་པ་རྣམས་ཀྱིས་མི་གཡོ་བར་གསུངས་སོ་ཞེས་དེ་སྐད་གསུངས་པར་ཟད་ཀྱི། མི་གཡོ་བའི་ལས་ཀྱི་དབང་
དུ་མཛད་ནས་ནི་མ་ཡིན་ནོ། །མི་གཡོ་བ་དང་མཐུན་པར་འགྲོ་བའི་ལས་ལས་བརྩམས་ཏེ་ཞེས་བྱ་བ་ནི། མི་སྒུལ་བ་དང་མཐུན་པར་འགྲོ་བའི་ལས་ལ་བརྩམས་ཏེ་ཞེས་བྱ་བའི་དོན་གང་ཡིན་པའོ། །ཡང་ཅིའི་ཕྱིར་ཏིང་ངེ་འཛིན་གྱི་སྐྱོན་དང་བཅས་པ་ཉིད་ཀྱིས་གཡོ་བ་
དང་བཅས་བཞིན་དུ་ཡང་འདི་མི་གཡོ་བར་གསུངས་ཤེ་ན། དེའི་ཕྱིར་རོ། གང་ཕྱིར་ས་ནི་དེ་དག་ཏུ། །ལས་རྣམས་སྨིན་ཕྱིར་མི་གཡོའི་ཕྱིར། །ཞེས་བྱ་བ་སྨོས་སོ། །འདོད་པ་ན་སྤྱོད་པའི་རྫོགས་པར་བྱེད་པའི་ལས་ནི་རྣམ་པར་སྨིན་པའི་ཕྱིར་གཡོ་བ་མ་ཡིན་ནོ། །བདེ་བ་
དང་ལོངས་སྤྱོད་ལ་སོགས་པར་འགྱུར་བའི་ལམ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་གཟུགས་བཟང་བ་དང་། སྐལ་བ་བཟང་བ་དང་སྐད་སྙན་པ་ལ་སོགས་པ་བསྡུའོ། །རེས་འགའ་རྐྱེན་གཞན་གྱི་དབང་གིས་ཞེས་བྱ་བ་ནི་རྐྱེན་གཞན་ཉོན་མོངས་པ་དང་ལས་དང་སྨོན་
ལམ་གྱི་མཐུས་ཞེས་བྱ་བའི་ཐ་ཚིག་སྟེ། མདོ་ལས། འདི་ལྟ་སྟེ། འདི་ནི་ལ་ལ་སྦྱིན་པ་པོ་ཡིན་ཞིང་སྦྱིན་བདག་ཡིན་ལ། དེ་ཡང་ཤིན་ཏུ་སྲོག་གཅོད་པ་ཡིན་ཞེས་བྱ་བ་རྒྱས་པར་བརྗོད་དེ། གླང་པོ་ཆེར་གྱུར་ན་གླང་པོ་ཆེའི་རྒྱན་རྣམ་པ་སྣ་ཚོགས་འཐོབ་པར་འགྱུར་རོ་ཞེས་

བྱ་བ་ལ་སོགས་པའི་བར་གསུངས་སོ། །ཡང་འདི་ལྟ་སྟེ། འདི་ན་ལ་ལས་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་ཆུང་ངུ་བརྟེན་ཅིང་བསྒོམས་ལ་ལན་མང་དུ་བྱས་པ་དང་། །དེ་བཞིན་དུ་ཚུལ་ཁྲིམས་ལས་བྱུང་བ་དང་བསྒོམ་པ་ལས་བྱུང་བ་ཆུང་ངུ་བརྟེན་
ཅིང་བསྒོམས་པས་དང་ལན་མང་དུ་བྱས་པ་ཡིན་ལ། དེ་འདི་སྙམ་དུ་ཀྱེ་མ་མ་ལ་མ་རིག་པས་ཡོག་པས་བདག་ལྷ་བཟང་པོ་རྣམས་སམ་མི་བཟང་པོ་རྣམས་དང་སྐལ་བ་མཉམ་པར་སྐྱེ་བར་གྱུར་ན་ཅི་མ་རུང་སྙམ་དུ་སེམས་ན་ཞེས་བྱ་བ་ནས་དེ་ནི་དེར་སྐྱེའོ་ཞེས་བྱ་བའི་བར་
གསུངས་སོ། །དེ་ལ་རྒྱུ་དང་འབྲས་བུ་ལ་ཀུན་ཏུ་རྨོངས་པ་བསོད་ནམས་མ་ཡིན་པའི་འདུ་བྱེད་ཀྱིས་དེ་དག་མཐའ་གཅིག་ཏུ་ཉོན་མོངས་པའི་ཕྱིར། མ་རིག་པས་ཡོག་པས་རྒྱུ་འབྲས་བུའི་འབྲེལ་པ་རབ་ཏུ་རྣམ་པར་འབྱིན་པ་ལ་མངོན་པར་ཡིད་ཆེས་པའི་སྐབས་
མེད་པས་འཕགས་པའི་བདེན་པ་རྣམས་ལ་ཀུན་ཏུ་རྨོངས་པའི་བསོད་ནམས་མི་གཡོ་བའོ། །རྨོངས་པ་གང་ཡིན་པ་དེས་སོ་སོ་སྐྱེ་བོ་རྣམས་དགེ་བའི་སེམས་དང་ཐོབ་པའི་སྒོ་ནས་རྗེས་སུ་འབྲེལ་བ་དེའི་དབང་གིས་ཡང་སྲིད་ཀྱི་རྒྱུར་གྱུར་པའི་བསོད་ནམས་མི་གཡོ་བའི་
འདུ་བྱེད་སློབ་པར་བྱེད་དོ། ཁམས་གསུམ་པ་སྡུག་བསྔལ་དུ་མ་ཡང་དག་པ་ཇི་ལྟ་བ་བཞིན་དུ་ཡོངས་སུ་མ་ཤེས་པ་ལས་དེ་དག་བདེན་པ་མཐོང་བ་དང་འདོད་ཆགས་དང་བྲལ་བ་ལ་མི་འཇུག་པར་གཟུགས་དང་གཟུགས་མེད་པའི་ཁམས་སུ་སྐྱེ་བ་ཡིན་ཏེ་སྔོན་གྱི་མངོན་པར་འདུ་
བྱེད་པའི་དབང་གིས་སོ། །ཚོགས་དང་བཅས་པ་ཡིན་ནོ་ཞེས་བྱ་བ་ནི། རྒྱུ་དང་བཅས་པ་ཡིན་ནོ་ཞེས་བྱ་བའི་ཐ་ཚིག་གོ། །ཚོགས་ནི་དེ་དང་ལྷན་ཅིག་འབྱུང་བ་དང་དབང་པོ་རྣམས་དང་ཡུལ་རྣམས་སོ། །འདི་འཚོགས་པར་བྱེད་པས་ན་ཚོགས་ཡིན་ཏེ་སྐྱེད་པར་བྱེད་ཅེས་བྱ་བའི་
དོན་ཏོ། །དེ་ནས་རྣམ་པར་སྨིན་པ་ཚོར་བ་ཁོ་ན་ཡོད་པ་ནི་མ་ཡིན་མོད་ཀྱི། གདུལ་བའི་དབང་གིས་ན་དེ་སྐད་དུ་གསུངས་ཏེ། དེ་ལྟ་མ་ཡིན་ན་ཞེས་བྱ་བ་ལ། གལ་ཏེ་བསམ་གཏན་བཞི་པ་མན་ཆད་ན་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་མྱོང་བར་འགྱུར་བའི་

ལས་མེད་ན་ནི་བསམ་གཏན་ཁྱད་པར་གྱི་ལས་མན་ཆད་དུ་རྣམ་པར་སྨིན་པའི་ཕྱིར་བསམ་གཏན་ཁྱད་པར་ཅན་གྱི་ལས་ཀྱི་རྣམ་པར་སྨིན་པ་དེ་ནི་བསམ་གཏན་ཁྱད་པར་ཅན་ཉིད་དོ། །ལས་ཁ་ཅིག་ནི་བདེ་བ་མྱོང་བར་འགྱུར་བའི་ལས་ཏེ་བསམ་གཏན་ཁྱད་
པར་ཅན་ནོ། །ཅིའི་ཕྱིར་ཞེ་ན། དེ་ན་བདེ་བ་དང་སྡུག་བསྔལ་དག་མེད་པའི་ཕྱིར་རོ། །བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་རྣམ་པར་སྨིན་པའི་ཉིད་བསམ་གཏན་ཁྱད་པར་ཅན་གྱི་ལས་ནི་བསམ་གཏན་ཉིད་དེ་བདེ་བའི་དབང་པོ་རྣམ་པར་སྨིན་པའོ་ཞེས་བྱ་བ་སྟེ། ས་དེ་དག་
ནི་རྟེན་ཐ་མི་དད་པའི་ཕྱིར་རོ། །དེའི་ཕྱིར་བསམ་གཏན་ཁྱད་པར་ཅན་གྱི་ལས་ནི་བདེ་བ་མྱོང་བར་འགྱུར་བ་ཁོ་ན་ཡིན་པས་འགལ་བ་མེད་དོ། །གཞན་དག་ན་རེ། དེའི་རྣམ་པར་སྨིན་པ་ཚོར་བ་མེད་པ་ཉིད་དེ་འོ་ན་ཅི་ཞེ་ན། མི་ལྡན་པའི་ཚེ་ལ་སོགས་པ་དང་གཟུགས་ཞེས་སོ། །
དེ་ལྟ་ཡིན་དང