Luận tạng Tây Tạng (Tengyur) — Tập 210

་ཏེ་ཞེས་
བྱ་བ་ནས་རྒྱས་པར་དུས་དང་སྦྱོར་བ་ཡིད་དུ་འོང་བའི་སེམས་རྣམ་པར་གྲོལ་བ་ལུས་ཀྱིས་མངོན་སུམ་དུ་བྱས་པ་དེ་ད་ལས་ཡོངས་སུ་ཉམས་སོ། །དེ་ནས་ཚེ་དང་ལྡན་པ་གནག་ཚོགས་ཅན་འདི་སྙམ་དུ་གྱུར་ཏེ་ཞེས་བྱ་བ་ནས་རྒྱས་པར་དགྲ་བཅོམ་པ་ཉིད་ལ་མཚོན་ཆས་གདབ་སྟེ་ལན་བདུན་
གྱི་བར་དུ་ཡོངས་སུ་ཞེས་བྱ་བ་ནས་རྒྱས་པར་ཚེ་དང་ལྡན་པ་གནག་ཚོགས་ཅན་གྱིས་མཚོན་བཏབ་པའི་བར་དུ་སྟེ། དེ་ནི་འཆི་བའི་དུས་སུ་དབང་པོ་རྣམས་རྣམ་པར་དངས་ཤིང་བཞིན་གྱི་མདོག་ཡོངས་སུ་དག་ལ་པགས་པའི་མདོག་ནི་དཀར་བར་གྱུར་ཏོ། དེར་བཅོམ་ལྡན་འདས་ཀྱིས་
དགེ་སློང་རྣམས་ལ་བཀའ་སྩལ་པ་རྒྱ་ཆེར་གསུངས་ཏེ། དགེ་སློང་དག་རི་དགས་ཀྱི་བུ་གནག་ཚོགས་ཅན་གྱིས་རབ་ཏུ་མི་གནས་པའི་རྣམ་པར་ཤེས་པ་ལ་མཚོན་གྱིས་བཏབ་པ་སྟེ་ཞེས་བྱ་བ་ནས་རྒྱ་ཆེར་བཅོམ་ལྡན་འདས་ཀྱིས་ཚེ་དང་ལྡན་པ་གནག་ཚོགས་ཅན་མཆོག་ཉིད་དུ་ལུང་བསྟན་
པའི་བར་དུ་འབྱུང་ངོ་། །ལུང་འདིའི་དགོངས་པ་ནི་ཚེ་དང་ལྡན་པ་གནག་ཚོགས་ཅན་དགྲ་བཅོམ་པ་ལས་ཡོངས་སུ་ཉམས་ཏེ་ཞེས་གཞན་གྱིས་སྨྲས་པའི་ལན་གྱི་ཕྱིར་རོ། །མཚོན་གྱིས་འདེབས་པར་བྱེད་ལ་ཞེས་བྱ་བ་ནི་མགྲིན་པ་ལ་མཚོན་གྱིས་འདེབས་པར་བྱེད་ཅེས་བྱ་བའི་ཐ་ཚིག་གོ། །

ལུས་དང་སྲོག་ལ་མི་ལྟ་བའི་ཕྱིར་ཞེས་བྱ་བ་ནི་རྒྱུ་འདིས་ན་ཞེས་བྱ་བའི་དོན་ཏོ། །ཅིའི་ཕྱིར་བཅུ་ཚན་དེ་ཁོ་ན་ལས་ཞེས་བྱ་བ་རྒྱས་པར་འབྱུང་སྟེ། ཚེ་དང་ལྡན་པ་དག་ཆོས་གཅིག་མང་དུ་བྱ་བ་གང་ཞེ་ན། འདི་ལྟ་སྟེ། དགེ་བའི་ཆོས་རྣམས་ལ་བག་ཡོད་པའོ། །ཆོས་གཅིག་
བསྒོམ་པར་བྱ་སྟེ་ལུས་སུ་གཏོགས་པའི་དྲན་པའོ། །ཆོས་གཅིག་ཡོངས་སུ་ཤེས་པར་བྱ་སྟེ་ཟག་པ་དང་བཅས་པའི་རིགས་པའོ། །ཆོས་གཅིག་སྤང་བར་བྱ་སྟེ་ངའོ་སྙམ་པའི་ང་རྒྱལ་ལོ། །ཆོས་གཅིག་ཉམས་པའི་ཆ་དང་མཐུན་པ་སྟེ། ཚུལ་བཞིན་མ་ཡིན་པ་ཡིད་ལ་བྱེད་པའོ། །
ཆོས་གཅིག་རྟོགས་པར་དཀའ་བ་སྟེ། བར་ཆད་མེད་པའི་སེམས་ཀྱི་ཏིང་ངེ་འཛིན་ནོ། །ཆོས་གཅིག་བསྐྱེད་པར་བྱ་སྟེ། དུས་དང་སྦྱོར་བ་ཕོངས་པའི་སེམས་རྣམ་པར་གྲོལ་བའོ། །ཆོས་གཅིག་མངོན་པར་ཤེས་པར་བྱ་སྟེ་སེམས་ཅན་ཐམས་ཅད་ཀྱི་ཟས་དང་གནས་རྣམས་སོ། །ཆོས་གཅིག་
མངོན་དུ་བྱ་སྟེ་མི་གཡོ་བའི་སེམས་རྣམ་པར་གྲོལ་བའོ། །ཚེ་དང་ལྡན་པ་དག་དེ་ལྟར་འདི་དག་ནི་ཆོས་བཅུའོ་ཞེས་རྒྱ་ཆེར་འབྱུང་ངོ་། །བཅུ་ཚན་གཅིག་ལས་དགྲ་བཅོམ་པ་དེ་ཉིད་ལན་གཉིས་བརྗོད་པར་རིགས་པ་མ་ཡིན་ཏེ། དགྲ་བཅོམ་པ་ཉིད་བསྐྱེད་པར་བྱ་བ་ཡིན་པ་ནི་གང་དུ་ཡང་མ་
གསུངས་སོ། །འོ་ན་ཅི་ཞེ་ན། མངོན་སུམ་དུ་བྱ་བ་ཡིན་ནོ་ཞེས་བྱ་བ་སྨོས་ཏེ། དེའི་ཕྱིར་ཡང་སེམས་རྣམ་པར་གྲོལ་བའི་དུས་དང་སྦྱོར་བ་པ་དགྲ་བཅོམ་པ་ཉིད་མ་ཡིན་ནོ་ཞེས་བྱ་བར་སེམས་སོ། །གལ་ཏེ་དུས་དང་སྦྱོར་བ་འཕངས་པའི་སེམས་རྣམ་པར་གྲོལ་བ་དབང་པོ་རྟུལ་པོས་བསྡུས་
པའི་དགྲ་བཅོམ་པ་ཉིད་ཁོ་ན་བསམ་གཏན་གྱི་དངོས་གཞིའི་ཏིང་ངེ་འཛིན་མ་ཡིན་པ་དེ་ལྟ་ན་དབང་པོ་རྟུལ་པོས་བསྡུས་པའི་ཞེས་བྱ་བ་རྒྱས་པར་འབྱུང་ངོ་། །འདིས་ཅི་ཞིག་ཤེས་པར་བྱས་པ་ཡིན་ཞེས་བྱ་བ་ནི་ཅི་ཡང་ཤེས་པར་བྱས་པ་མ་ཡིན་ནོ་སྙམ་དུ་བསམས་པའོ། །ཇི་ལྟར་
ཅི་ཡང་ཤེས་པར་བྱས་པ་ཡིན་པ་དེ་བསྟན་པའི་ཕྱིར། གལ་ཏེ་རེ་ཞིག་ཅེས་བྱ་བ་རྒྱས་པར་སྨོས་སོ། །གཞན་ཡང་ནུས་སོ་ཞེས་བྱ་བ་ནས་དེ་བསྐྱེད་པ་དབང་པོ་རྣོན་པོས་བསྡུས་པ་ཉིད་ཀྱིས་ཀྱང་སྟེ། སྦྱོར་བ་གཞན་ཡང་དབང་པོ་རྟུལ་པོས་བསྡུས་པ་མ་ཡིན་ནོ། །འོན་ཏེ་བསྐྱེད་

པར་འོས་པ་མ་ཡིན་ནོ་ཞེ་ན་ཞེས་བྱ་བ་ནི་དབང་པོ་རྟུལ་པོས་བསྡུས་པས་བསྐྱེད་པར་འོས་པར་བཤད་པ་དེ་ལྟ་ན། གཞན་ཆེས་ཤིན་ཏུ་འོས་པ་ཡིན་ཏེ་ཞེས་བྱ་བ་དབང་པོ་རྣོན་པོས་བསྡུས་པ་སྟེ། ཁྱད་པར་དུ་འཕགས་པ་འདོད་པ་ནི་དམན་པ་ལ་སྦྱོར་བར་འོས་པ་མ་ཡིན་ནོ། །གལ་ཏེ་དུས་
དང་སྦྱོར་བ་ཕོངས་པའི་སེམས་རྣམ་པར་གྲོལ་བ་དགྲ་བཅོམ་པ་ཉིད་མ་ཡིན་ནོ། །འོ་ན་དུས་ཀྱི་རྣམ་པར་གྲོལ་བ་ཞེས་རྒྱས་པར་འབྱུང་སྟེ། ཡོངས་སུ་ཉམས་པ་སྲིད་པའི་ཕྱིར་དུས་ཀྱིས་རྣམ་པར་གྲོལ་བ་ཤིན་ཏུ་མ་ཡིན་ཞེས་བྱ་སྟེ། དུས་ཀྱི་རྣམ་པར་གྲོལ་བར་མི་རུང་བ་སྟེ། གཞན་
དུ་ནི་མ་ཡིན་ཞེས་བསམས་པའོ། །དབང་པོ་རྟུལ་པོའི་ཕྱིར་ཞེས་བྱ་བ་རྒྱས་པར་འབྱུང་བ་ལ་བཟློག་པའི་ཕྱིར་དུས་དང་མི་སྦྱོར་བ་རྣམ་པར་གྲོལ་བ་སྟེ། དབང་པོ་རྣོན་པོ་གང་ཞིག་ཡུལ་དང་དུས་དང་ནད་མེད་པ་ལ་སོགས་པ་ལ་མ་ལྟོས་པར་ཏིང་ངེ་འཛིན་མངོན་དུ་འགྱུར་བ་སྟེ། དུས་ལ་
མ་བལྟོས་པར་རྣམ་པར་གྲོལ་བས་ན་དུས་དང་མི་སྦྱོར་བ་རྣམ་པར་གྲོལ་བའོ། །ཅིག་ཤོས་ནི་འཚོ་བ་དང་ཡོ་བྱད་དང་ནད་མེད་པ་ལ་སོགས་པའི་དུས་ལ་བལྟོས་ཏེ་རྣམ་པར་གྲོལ་བས་ན་དུས་དང་སྦྱོར་བས་རྣམ་པར་གྲོལ་བ་ཞེས་བྱ་བའོ། །ཡོངས་སུ་ཉམས་པ་དང་ཡོངས་
སུ་མི་ཉམས་པའི་སྒོ་ནས་དགྲ་བཅོམ་པ་ནི་མ་ཡིན་པའི་ཕྱིར་རོ། །རེ་ཞིག་མདོ་ལས་དགྲ་བཅོམ་པ་ལས་ཡོངས་སུ་ཉམས་པ་མེད་པ་ནི་དེ་ལྟ་བུའོ། །ཆོས་མངོན་པ་ལས་ཀྱང་དགྲ་བཅོམ་པ་ལས་ཡོངས་སུ་ཉམས་པ་མེད་པ་ཡིན་ནོ་ཞེས་བསྟན་པའི་ཕྱིར། ཆོས་
མངོན་པ་ལས་ཀྱང་ཞེས་བྱ་བ་རྒྱས་པར་འབྱུང་ངོ་། །གནས་གསུམ་གྱིས་ཞེས་བྱ་བ་ནི་རྒྱུ་གསུམ་གྱིས་སོ། །མ་སྤངས་ཤིང་ཡོངས་སུ་མ་ཤེས་ཞེས་བྱ་བ་ནི་དེའི་ཐོབ་པ་རྗེས་སུ་འབྲེལ་པའི་སྒོ་ནས་སོ། །དེ་སྤངས་པ་དང་རྗེས་སུ་འབྲེལ་པ་ནི་དེའི་ཐོབ་པ་མི་སྐྱེ་བའི་སྒོ་ནས་སོ། །སྣང་
བར་གྱུར་པ་ཡིན་ཞེས་བྱ་བ་ནི་ཡུལ་གྱི་དངོས་པོར་གནས་པ་ཉིད་དོ། །དེ་ལ་ཚུལ་བཞིན་མ་ཡིན་པ་ཞེས་བྱ་བ་ནི་ཚུལ་བཞིན་མ་ཡིན་པའི་ཉོན་མོངས་པ་ཅན་ཞེས་བྱ་བའི་དོན་ཏོ། །འདོད་པའི་འདོད་ཆགས་དང་རྗེས་སུ་མཐུན་པའི་ཕྱིར་རོ། །གལ་ཏེ་དེ་ལྟ་བུ་ནི་ཡོངས་སུ་ཚང་བ་ལས་

སྐྱེ་བ་ཡིན་ནོ་ཞེས་བྱ་བ་ལ། གལ་ཏེ་ཞེས་བྱ་བ་ནི་ཉོན་མོངས་པ་ཁ་ཅིག་ནི་རྒྱུའི་སྟོབས་ཁོ་ན་ལས་རབ་ཏུ་འཇུག་གོ། །ཁ་ཅིག་ནི་དམིགས་པའི་སྟོབས་ལས་སོ། །ཁ་ཅིག་ནི་གཉིས་ཀ་ལས་ཏེ་འདིར་ནི་རྒྱུ་ཡོངས་སུ་ཚང་བ་ལས་སྐྱེ་བ་ཡིན་ཞེས་པའོ། །འདི་
ཤེས་བྱེད་མ་ཡིན་པར་བསྟན་པའི་ཕྱིར་རྒྱུ་ཡོངས་སུ་མ་ཚང་བ་ལས་གང་ཞིག་སྐྱེ་ཞེས་སྨོས་སོ། །རྐྱེན་ཇི་སྙེད་གཅིག་གིས་འབྲས་བུ་སྐྱེད་པར་གྲགས་པ་དེ་དག་མ་ཚང་ན་དེ་བསྐྱེད་པར་མི་འགྱུར་ཏེ། དཔེར་ན་མིག་དང་གཟུགས་དང་སྣང་བ་དང་། ཡིད་ལ་བྱེད་པ་མ་ཚང་བ་དག་
གིས་མིག་གི་རྣམ་པར་ཤེས་པ་བསྐྱེད་པ་མ་ཡིན་པ་བཞིན་ནོ། །དེའི་ཕྱིར་དགྲ་བཅོམ་པ་ཉིད་ལས་ཡོངས་སུ་ཉམས་པ་མེད་དེ། ཉོན་མོངས་པའི་ཕྲ་རྒྱས་ཐམས་ཅད་སྤང་བའི་ཕྱིར་རོ། །རྒྱུན་ཏུ་ཞུགས་པའི་འབྲས་བུ་བཞིན་ཉོན་མོངས་པར་མི་འཐད་པའི་ཕྱིར་རོ། །དེ་ལྟ་བུ་ཞེས་
བྱ་བ་ནི་དེའི་རང་བཞིན་ཏེ། ཉོན་མོངས་པའི་ས་བོན་དང་འགལ་བ་གང་ཡིན་པའོ། །གང་གིས་ན་ཉོན་མོངས་པ་རྣམས་གཏན་དུ་མི་སྐྱེ་བའི་ཆོས་ཉིད་དུ་འགྱུར་བ་ཞེས་བྱ་བ་ལ། ཟག་པ་མེད་པའི་ལམ་གྱི་གནས་གྱུར་པའི་ཕྱིར། རང་གི་རྟེན་ལས་ཉོན་མོངས་པའི་ས་བོན་རྩ་ནས་
འདོན་པ་ཡིན་ལ། ས་བོན་མེད་པས་རྒྱུད་ལ་དེས་སྤང་བར་བྱ་བའི་ཉོན་མོངས་པ་རྣམས་གཏན་དུ་མི་སྐྱེ་བའི་ཆོས་ཉིད་འཐོབ་བོ། །ཇི་ལྟར་ན་ཡང་ཡོངས་སུ་ཉམས་པར་འགྱུར་ཞེས་བྱ་བ་ལ། ས་བོན་མེད་པ་ནི་འགའ་ཡང་སྐྱེ་བར་མི་རུང་ལ། ཉོན་མོངས་པ་སྐྱེ་བ་མེད་པར་ཡང་དེ་
ཡོངས་སུ་ཉམས་པ་ཡོད་པ་མ་ཡིན་ནོ། །འོན་ཏེ་མ་སྐྱེས་ཏེ་ཞེས་བྱ་བ་ནི་གང་གིས་ཉོན་མོངས་པའི་ས་བོན་རྩ་ནས་འདོན་པའོ། །དེའི་ས་བོན་གྱི་ཆོས་ཉིད་ཅེས་བྱ་བ་ནི་ཉོན་མོངས་པའི་ས་བོན་གྱི་རང་བཞིན་ཞེས་བྱ་བའི་དོན་ཏོ། །སློབ་དཔོན་འདུས་བཟང་ན་རེ། འཇིག་རྟེན་པའི་
ལམ་གྱིས་འབྲས་བུ་གཉིས་ཐོབ་པ་བཞིན་དུ་གལ་ཏེ་དེའི་གེགས་སུ་གྱུར་པའི་ཉོན་མོངས་པ་རྣམས་ཀྱིས་ས་བོན་གྱི་ཆོས་རྩ་བ་ནས་ཕྱུང་བ་ཐོབ་པར་བྱེད་པ་དེ་ལྟ་ཡིན་ནོ། །འབྲས་བུ་གཉིས་བཞིན་དུ་གྲུབ་པའི་ཕྱིར་དགྲ་བཅོམ་པ་ལས་ཡོངས་སུ་ཉམས་ཏེ། གཉེན་པོས་ས་བོན་རྩ་བ་

ནས་ཕྱུང་ཡང་སླར་ཉོན་མོངས་པ་སྐྱེ་བར་ཁས་བླངས་པའི་ཕྱིར་རོ། །ཅི་སྟེ་འདོད་པ་ན་སྤྱོད་པའི་ཉོན་མོངས་པའི་ས་བོན་མ་ཕྱུང་བ་ཁོ་ནར་ཕྱིར་མི་འོང་བའི་འབྲས་བུ་ཐོབ་བོ་ཞེ་ན། ཅིའི་ཕྱིར་འདོད་པ་ན་སྤྱོད་པའི་ཉོན་མོངས་པའི་ས་བོན་གྱི་ཆོས་ཉིད་མ་ཕྱུང་བ་ཁོ་ནར་ཕྱིར་མི་འོང་བའི་འབྲས་བུ་ཐོབ་
པར་འགྱུར། འཇིག་རྟེན་པའི་ལམ་གྱིས་འདོད་པ་ན་སྤྱོད་པའི་བསྒོམ་པས་སྤང་བར་བྱ་བའི་ཉོན་མོངས་པ་རྣམས་ཀྱི་ས་བོན་མ་ཕྱུང་བ་ཁོ་ནར་ལན་ཅིག་ཕྱིར་འོང་བ་དང་འབྲས་བུ་ཡང་འདོད་དེ། དེ་བས་ན་དེ་ཉིད་ཀྱི་ཕྱིར་ཡོངས་སུ་ཉམས་པར་འདོད་དོ་ཞེས་ཟེར་རོ། །གང་གི་ཕྱིར་
སྤང་བ་ནི་རྣམ་པ་གཉིས་ཏེ། འཇིག་རྟེན་པ་དང་འཇིག་རྟེན་ལས་འདས་པའི་ལམ་དག་གིས་རིམ་པ་བཞིན་དུ་མངོན་དུ་རྒྱུ་སྤངས་པ་དང་ས་བོན་སྤངས་པའོ། །དེ་ལ་ཡོད་པའི་ས་བོན་ཡང་ས་འོག་མའི་ཉོན་མོངས་པ་ནི་རྣམ་པར་གནོན་པའི་ཕྱིར་དང་ས་གོང་མའི་ཉོན་མོངས་པ་མངོན་དུ་
རྒྱུ་བའི་ཕྱིར་དང་དེར་སྐྱེ་བ་འཕགས་པ་རྣམས་ཀྱིས་མཐོང་བས་སྤང་བར་བྱ་བའི་ཉོན་མོངས་པ་སྤངས་པའི་ཕྱིར་སླར་ཡང་ས་འོག་མར་འགྲོ་བ་ཡིན་ནོ། །ཟག་པ་མེད་པའི་ལམ་གྱིས་ཁམས་གསུམ་པའི་བསྒོམ་པས་སྤང་བར་བྱ་བའི་ཉོན་མོངས་པའི་ས་བོན་རྩ་ག་ནས་གཏོན་པའི་ཕྱིར་དགྲ་
བཅོམ་པ་ཐོབ་པ་ལས་ཡོངས་སུ་ཉམས་ཀྱང་སྐྱོ་བ་ཤས་ཆེ་བའི་ཕྱིར་སླར་ཡང་རྟོགས་པས་འདི་ལ་འགལ་བ་ཅི་ཞིག་ཡོད། སོལ་བའི་ཕུང་པོ་ལྟ་བུའི་མདོའི་ལན་གདབ་དགོས་ཞེས་བྱ་བ་ལ། དེ་ལས་ནི་དགྲ་བཅོམ་པ་ཁོ་ན་ལ་སྡིག་པ་མི་དགེ་བའི་རྣམ་པར་རྟོག་པ་དག་སྐྱེ་བར་བཤད་ལ།
དེ་ཡང་དགྲ་བཅོམ་པ་ཉིད་ལས་ཡོངས་སུ་མ་ཉམས་པ་ལ་མི་སྲིད། དེའི་ཕྱིར་དགྲ་བཅོམ་པ་ཉིད་ལས་ཡོངས་སུ་ཉམས་པ་མེད་པས་སྨྲ་བ་རྣམས་ཀྱིས་དེའི་ལན་གདབ་དགོས་སོ། །དེ་ཉིད་བསྟན་པའི་ཕྱིར་གང་ལས་ཞེས་བྱ་བ་རྒྱས་པར་འབྱུང་ངོ་། །དེ་ལྟར་སྤྱོད་པ་དང་དེ་ལྟར་
གནས་པ་ཞེས་བྱ་བ་ནི་འཕགས་པ་ཉན་ཐོས་ཐོས་པ་དང་ལྡན་པ་དེ་གྲོང་ངམ་གྲོང་རྡལ་ལ་བརྟེན་ཅིང་གནས་ཏེ། དེ་སྔ་དྲོ་ཤམ་ཐབས་དང་ཆོས་གོས་བགོས་ཏེ་ལྷུང་བཟེད་ཐོགས་ནས་གྲོང་ངམ་གྲོང་རྡལ་དེ་ཉིད་དུ་བསོད་སྙོམས་ལ་འཇུག་སྟེ་ལུས་ལེགས་པར་བསྡམས་པ་དང་དབང་པོ་

ལེགས་པར་བསྡམས་པ་དང་དྲན་པ་ཤིན་ཏུ་གནས་པ་དེ་ཉིད་དུ་དྲན་བཞིན་དུ་འཇུག །དྲན་བཞིན་དུ་ལྡོག །དྲན་བཞིན་དུ་ལྟ་བར་བྱེད། དྲན་བཞིན་དུ་རྣམ་པར་ལྟ་བར་བྱེད། དྲན་བཞིན་དུ་སྐུམ་པར་བྱེད། དྲན་བཞིན་དུ་རྐྱོང་བར་བྱེད་དོ། །དེ་ཅིའི་ཕྱིར་ཞེ་ན།
བདག་ཅུང་ཟད་ཚེར་མ་ཅན་དུ་འགྱུར་རོ་སྙམ་མོ། །དགེ་སློང་དག་འཕགས་པའི་ཆོས་འདུལ་བ་ལ་ཚེར་མ་ཅན་དུ་བརྗོད་པ་གང་ཡིན་པ་འཇིག་རྟེན་ན་གཟུགས་སྡུག་པ་འདོད་པའི་ཡོན་ཏན་ལྔ་རྣམས་ཏེ། མིག་གིས་ཤེས་པར་བྱ་བའི་གཟུགས་འདོད་པ་དང་མཛེས་པ་དང་སྡུག་པ་དང་ཡིད་
དུ་འོང་བ་འདོད་པ་དང་ལྡན་པ་རྣམས་ལ་ཆགས་པར་བྱེད་དོ། །དེ་བཞིན་དུ་ལུས་ཀྱིས་ཤེས་པར་བྱ་བ་རེག་བྱ་ཞེས་བྱ་བ་རྒྱས་པར་འབྱུང་སྟེ། འདི་ནི་འཇིག་རྟེན་ན་གཟུགས་སྡུག་པ་ཞེས་བྱའོ། །དེ་ལ་དགེ་སློང་དག་ལ་འཕགས་པ་ཉན་ཐོས་ཐོས་པ་དང་ལྡན་པ་དེ་ལྟར་སྤྱོད་ཅིང་དེ་
ལྟར་གནས་པ་དེ་བརྒྱ་ལ་རེས་འགའ་ཞིག་དྲན་པ་ཉམས་པས་སྡིག་པ་མི་དགེ་བའི་རྣམ་པར་རྟོག་པ་འདོད་ཆགས་དང་ལྡན་པའམ་ཞེ་སྡང་དང་ལྡན་པའམ་གཏི་མུག་དང་ལྡན་པའི་འཆིང་བ་དག་སྐྱེའོ། །དགེ་སློང་དག་ལ་འཕགས་པ་ཉན་ཐོས་དྲན་པ་ཉམས་པ་དེ་ཅི་ནས་ཀྱང་སླར་མྱུར་
བ་ཁོ་ནར་ཟད་པ་དང་ཡོངས་སུ་གཏུགས་པ་ཡང་བྱེད་དོ་ཞེས་འབྱུང་ངོ་། །ནམ་ཡང་ཡོངས་སུ་མི་ཉམས་པར་སྨྲ་བས་དེ་ལྟར་སྨྲ་བ་ལས་སྤྱོད་པ་དང་གནས་པ་འདིས་བསླབ་པ་ཁོ་ན་གསུངས་སོ་སྙམ་པ་བསལ་བའི་ཕྱིར། དེ་ནི་དེ་ལས་ཏེ་སོལ་བའི་ཕུང་པོ་ལྟ་བུའི་མདོ་དེ་ལས་དགྲ་
བཅོམ་པ་ཁོ་ན་ཡིན་པར་ཤེས་པར་བྱས་སོ། །ཡང་ཅི་ལྟར་ཤེས་པ་བྱ་ཞེ་ན། དེའི་ཕྱིར་ཡུན་རིང་པོ་ནས་སེམས་དབེན་པ་ལ་གཞོལ་བ་ཡིན་ཞེས་བྱ་བ་ནས། མྱ་ངན་ལས་འདས་པ་ལ་བབ་པ་ཡིན་ཞེས་པའི་བར་དུ་གསུངས་པ་ཡིན་ནོ་ཞེས་བྱ་བ་སྨོས་ཏེ། དེ་ལ་ཡང་དགེ་སློང་
དག་འཕགས་པ་ཉན་ཐོས་ཐོས་པ་དང་ལྡན་པ་དེ་ལྟར་གནས་པ་ན་རྒྱལ་པོའམ་བློན་པོ་དག་ཉེ་བར་འོངས་ནས་ལོངས་སྤྱོད་ལ་མགྲོན་དུ་གཉེར་བ་ན་ཞེས་བྱ་བ་རྒྱས་པར་དགེ་སློང་དག་དེ་སྙམ་དུ་སེམས། འཕགས་པ་ཉན་ཐོས་ཐོས་པ་དང་ལྡན་པ་ལ་དེ་ལྟར་རྒྱལ་པོའི་བློན་པོ་དག་གིས་

ལོངས་སྤྱོད་ལ་མགྲོན་དུ་གཉེར་བ་ན་བསླབ་པ་སྤོང་བ་ལ་འཇུག་པ་ཞེས་བྱ་བ་ནས་རྒྱས་པར་དེ་ནི་གནས་མེད་ཅིང་སྐབས་སུ་མེད་དོ། །གང་འཕགས་པ་ཉན་ཐོས་ཐོས་པ་དང་ལྡན་པ་ལ་དེ་ལྟར་རྒྱལ་པོའམ་བློན་པོ་དག་གིས་ལོངས་སྤྱོད་ལ་མགྲོན་དུ་གཉེར་བ་ན་ཞེས་བྱ་བ་རྒྱས་པར་དེ་ཅིའི་
ཕྱིར་ཞེ་ན། འདི་ལྟར་འཕགས་པ་ཉན་ཐོས་ཐོས་པ་དང་ལྡན་པ་ཡུན་རིང་པོ་ནས་སེམས་དབེན་པ་ལ་གཞོལ་བ་ཡིན། དབེན་པ་ལ་འབབ་པ་ཡིན། དབེན་པ་ལ་བབ་པ་ཡིན། ཞི་བ་ལ་རྣམ་པར་དགའ་བ། ངེས་པར་འབྱུང་བ་ལ་མངོན་པར་དགའ་བ། ཟག་པའི་གནས་ལྟ་བུའི་
ཆོས་ཐམས་ཅད་བསིལ་བར་གྱུར་པ་བསིལ་བར་གྱུར་པའོ་ཞེས་ང་སྨྲའོ་ཞེས་འབྱུང་སྟེ། འདི་ག་ལས་ཤེས་པར་བྱ་ཞེ་ན། འདི་དགྲ་བཅོམ་པའི་སྟོབས་ཏེ་སློབ་པའི་མ་ཡིན་ནོ་ཞེས་བྱ་བའོ། །དེའི་ཕྱིར་འདིའི་སྟོབས་ནི་དགྲ་བཅོམ་པ་ཡིན་ཏེ་མདོ་གཞན་ལས་ཀྱང་གསུངས་སོ། །
གང་ཞེ་ན་ཟག་པའི་གནས་ལྟ་བུའི་ཆོས་ཐམས་ཅད་ཅེས་བྱ་བ་རྒྱས་པར་སྨོས་སོ། །དེའི་ཕྱིར་འདིར་ཡང་དགྲ་བཅོམ་པ་ཁོ་ན་ལ་དགོངས་སོ་ཞེས་བྱ་བར་ཤེས་སོ། །མཉན་ཡོད་དུ་གསུངས་པ། དགེ་སློང་དག་དགེ་སློང་དགྲ་བཅོམ་པའི་ཟག་པ་ཟད་པའི་སྟོབས་ནི་བརྒྱད་དེ།
བརྒྱད་གང་ཞེ་ན། དགེ་སློང་དགྲ་བཅོམ་པའི་ཟག་པ་ཟད་པ་ནི་སེམས་དབེན་པ་ལ་གཞོལ་བ་ཡིན་ཞེས་བྱ་བ་ནས་མྱ་ངན་ལས་འདས་པ་ལ་བབ་པ་ཡིན་ཞེས་པའི་བར་དང་། འདིས་ནི་འདོད་པ་རྣམས་སོལ་བའི་ཕུང་པོ་ལྟ་བུར་མཐོང་བ་ཡིན་ཏེ། ཇི་ལྟར་འདོད་པ་རྣམས་ཤེས་ཤིང་འདོད་
པ་རྣམས་མཐོང་བ་འདི་ཞེས་འདོད་པ་ལ་འདོད་པའི་འདུན་པ་དང་། འདོད་པའི་ཆགས་པ་དང་། འདོད་པ་ལ་འཆུམས་པ་དང་། འདོད་པ་ལ་བབ་པ་དང་། འདོད་པ་ལ་ལྷག་པར་ཞེན་པ་གང་ཡིན་པ་དེ་ལ་འདིའི་སེམས་ཡོངས་སུ་གཏུགས་ཏེ་མི་གནས་པ་དེ་ལྟར་འདིས་འདོད་པ་རྣམས་
མཐོང་བ་ཡིན་ནོ། །འདིས་ནི་དྲན་པ་ཉེ་བར་གཞག་པ་བཞི་བསྒོམས་ཤིང་ཤིན་ཏུ་བསྒོམ་པ་ཡིན་ནོ། །ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་

ལག་བརྒྱད་བསྒོམས་ཤིང་ཤིན་ཏུ་བསྒོམས་པ་ཡིན་ཞེས་འབྱུང་ངོ་། །འདིར་ཟག་པ་མེད་པའི་གནས་ལྟ་བུའི་ཆོས་ཐམས་ཅད་སོལ་བའི་ཕུང་པོ་ལྟ་བུར་གསུངས་ཤིང་། བསིལ་བར་གྱུར་པ་བསལ་བར་གྱུར་པ་ཞེས་གསུངས་པ་དེའི་ཕྱིར་ཡང་དགྲ་བཅོམ་པ་ཁོ་ན་
ལ་དགོངས་སོ། །ཞེས་བྱ་བར་ཤེས་སོ། །དེ་སྐད་འབྱུང་བ་ཡང་ཡོད་མོད་ཀྱི་ཞེས་བྱ་བ་རྒྱས་པར་འབྱུང་བ་ནི་དེ་ལྟར་སྤྱོད་ཅིང་དེ་ལྟར་གནས་པ་ཞེས་བྱ་བ་ནས་བཟུང་སྟེ། མི་དགེ་བའི་རྣམ་པར་རྟོག་པ་ཞེས་བྱ་བའི་མཐར་ཐུག་པས་དང་པོ་ནས་འདིར་སློབ་པའི་གནས་སྐབས་
གསུངས་སོ། །དགྲ་བཅོམ་པའི་གནས་སྐབས་ནི་ཡུན་རིང་པོ་ནས་སེམས་དབེན་པ་ལ་གཞོལ་བ་ཡིན་ཞེས་བྱ་བ་ནས་བཟུང་སྟེ། བསིལ་བར་གྱུར་པ་བསལ་བར་གྱུར་པ་ཞེས་བྱ་བའི་བར་གྱིས་གསུངས་སོ། །དེ་ལྟར་ཡོངས་སུ་བརྟགས་པ་ཅི་ཞེ་ན། གང་གི་ཕྱིར་དེ་ལྟ་
མ་ཡིན་ན་མདོ་དང་འགལ་ཞིང་རིགས་པ་དང་འགལ་བར་ཡང་འགྱུར་རོ། །དེ་ཉིད་ཀྱི་ཕྱིར་ཇི་སྲིད་དུ་སྤྱོད་པ་ལེགས་པར་མ་བརྟགས་པ་ཞེས་སྨོས་ཏེ། སྤྱོད་པ་ནི་བསོད་སྙོམས་ཀྱི་ཕྱིར་གྲོང་ལ་སོགས་པར་རྒྱུ་བའོ། །ལེགས་པར་མ་བརྟགས་པ་ནི་ལེགས་པར་ཡོངས་སུ་མ་ཤེས་
པའོ། །དེ་སྲིད་སློབ་པ་དེ་ལྟར་སྤྱོད་པ་ལ་ཡང་ཞེས་བྱ་བ་ནི། དེ་སྲིད་དུ་དེ་ལྟར་མི་སློབ་པ་ཡང་དྲན་པ་དང་ལྡན་པའི་སྒོ་ནས་སྤྱོད་ཅེས་བྱ་བའི་དོན་ཏོ། །གཞན་དག་ཀྱང་ཞེས་བྱ་བ་ནི་སློབ་པ་དང་སོ་སོ་སྐྱེ་བོའོ། །དེ་དག་སྔོན་དུ་འགྲོ་བ་ཡིན་ནོ་ཞེས་བྱ་བ་ནི། སློབ་པ་སྔོན་དུ་འགྲོ་བ་ནི་
དགྲ་བཅོམ་པ་རྣམས་ཡིན་ལ། སོ་སོ་སྐྱེ་བོ་སྔོན་དུ་འགྲོ་བ་ནི་སློབ་པ་རྣམས་ཏེ། དེའི་ཕྱིར་དགྲ་བཅོམ་པ་རྣམས་བཞིན་དུ་སློབ་པ་དང་སོ་སོ་སྐྱེ་བོ་རྣམས་ཀྱང་རིགས་དྲུག་གོ། །སློབ་པ་དང་མི་སློབ་པའི་གང་ཟག་རྣམས་དབང་པོ་སྦྱངས་པས་རིགས་འཕོ་བར་བཤད་ལ། དེ་དག་ཀྱང་
མཐོང་བ་དང་བསྒོམ་པ་དང་མི་སློབ་པའི་ལམ་ལ་གནས་པའི་ཕྱིར་ཐམས་ཅད་དུ་དབང་པོ་འཕོ་བར་ཐལ་བར་འགྱུར་རོ་ཞེ་ན། དེའི་ཕྱིར་གཞན་ཡང་མཐོང་བ་ལ་ནི་འཕོ་བ་མེད་དོ་ཞེས་བྱ་བ་སྨོས་ཏེ། སྦྱོར་བ་མི་སྲིད་པའི་ཕྱིར་ཞེས་བྱ་བ་ནི་གང་གི་ཕྱིར་ལམ་གྱི་ནུས་པས་དབང་པོ་རྟུལ་

པོའི་རྒྱུད་བཏང་ནས་དབང་པོ་འབྲིང་པོ་དང་རྣོན་པོའི་རྒྱུད་ཐོབ་པ་ལས་དབང་པོའི་འཕོ་བ་ཞེས་བཤད་ལ། དེ་དག་གཏོང་བ་དང་ཐོབ་པ་ཡང་རྒྱུན་ཏུ་སྦྱོར་བ་དང་གུས་པར་སྦྱོར་བ་མེད་པས་མི་ནུས་སོ། །མཐོང་བའི་ལམ་ནི་མྱུར་དུ་འགྲོ་བའི་ཕྱིར་དང་བྱ་བ་གཞན་ལ་ཞུགས་པའི་ཕྱིར་རྒྱུན་ཏུ་
སྦྱོར་བ་དང་གུས་པར་སྦྱོར་བ་མེད་པའི་ཕྱིར་དེར་དབང་པོ་འཕོ་བ་མེད་དོ། །མྱུར་བར་འགྲོ་བ་ནི་སྐད་ཅིག་མ་བཅོ་ལྔ་ལས་ལྡང་བ་མེད་པའི་ཕྱིར་རོ། །བྱ་བ་གཞན་ལ་ཞུགས་པ་ནི་བདེན་པ་མངོན་པར་རྟོགས་པར་ཞུགས་པའི་ཕྱིར་རོ། །ལ་ལ་ནི་དད་པས་མོས་པའི་གནས་སྐབས་ནའོ་
ཞེས་བྱ་བ་ནི་བསྒོམ་པའི་ལམ་ན་ཞེས་བྱ་བའི་ཐ་ཚིག་གོ། །འདིར་མི་སློབ་པ་དབང་པོ་འཕོ་བ་ནི་མ་བཤད་དེ་གོང་དུ་བཤད་ཟིན་པའི་ཕྱིར། མདོ་ལས་འདི་སྐད་དུ་ཞེས་བྱ་བ་རྒྱས་པར་འབྱུང་བ་ནི། ཀུན་དགའ་བོ་དགྲ་བཅོམ་པ་ལ་ཡང་རྙེད་པ་དང་བཀུར་སྟིར་བར་ཆད་བྱེད་པ་ཡིན་པར་
ང་སྨྲའོ་ཞེས་བྱ་བའི་མདོ་དེ་ལས་སོ། །མཐོང་བའི་ཆོས་ལ་བདེ་བར་གནས་པ་ལྷག་པའི་སེམས་ལས་བྱུང་བ་ནི་བསམ་གཏན་བཞིའོ། །དབང་པོ་རྣོན་པོ་ཡིན་པའི་ཕྱིར་ཡོངས་སུ་ཉམས་པ་མི་སྲིད་དོ་སྙམ་སྟེ་འདྲི་བ་ནི་ཇི་ལྟར་མི་གཡོ་བའི་ཆོས་ཅན་ཞེས་བྱ་བ་རྒྱས་པར་འབྱུང་བའོ། །
སངས་རྒྱས་ལ་ནི་ཉེ་བར་སྤྱད་པ་ལས་ཡོངས་སུ་ཉམས་པ་ཁོ་ན་མངའི་གཞན་ཐོབ་པ་དང་མ་ཐོབ་པ་ལས་ཡོངས་སུ་ཉམས་པ་ཡིན་པ་ནི་མི་མངའ་སྟེ། གདུལ་བྱའི་དོན་ལ་ཞུགས་པ་ནི་སངས་རྒྱས་ཀྱི་ཆོས་གྱ་ནོམ་པ་རྣམས་བརྙེས་ཀྱང་མངོན་དུ་མི་མཛད་པའི་ཕྱིར་རོ། །དེ་དང་ཞེས་བྱ་བ་
ནི་ཉེ་བར་སྤྱད་པ་ལས་ཉམས་པ་སྟེ་བྱ་བ་གཞན་ལ་གཡེངས་པས་ཇི་ལྟར་རྟོགས་པའི་ཡོན་ཏན་མངོན་དུ་མི་བྱེད་པའི་ཕྱིར་རོ། །གང་ཟག་ཁྱད་པར་ཅན་གྱི་ཆོས་མ་ཐོབ་པའི་ཕྱིར་རོ་ཞེས་བྱ་བ་ནི་སངས་རྒྱས་དང་རང་སངས་རྒྱས་ཀྱི་རྒྱུད་ལ་མངའ་བའི་ཡོན་ཏན་མ་ཐོབ་པའི་ཕྱིར་རོ། །
ཐམས་ཅད་ཀྱི་རྣམ་པར་གྲོལ་བ་ཟག་པ་མེད་པ་ནི་མི་གཡོ་བ་ཡིན་ལ། འདི་ཅི་ཞིག་འབྲེལ་ཞེ་ན། སྔར་བྱེ་བྲག་ཏུ་སྨྲ་བས་དུས་དང་མི་སྦྱོར་བར་རྣམ་པར་གྲོལ་བའི་རྣམ་པར་གྲོལ་བ་ཟག་པ་མེད་པ་ནི་མི་གཡོ་བའོ་ཞེས་སྨོས་པས་སོ། །དེ་ཉིད་ཀྱི་དབང་དུ་བྱས་ཏེ་མདོ་ལ་བརྟེན་ཏེ་

དྲི་བ་ནི། ཀྲྀ་ཏོ་བི་ས་རྫི་ཏཤྩ། ཏེ་ནེ་ཙ་ཏྱ་ཏོ་ཏྲ་མདོ་སྡེ་པ་རྣམས་སོ། །ཡོངས་སུ་ཉམས་པར་སྨྲ་བ་ན་རེ། དགྲ་བཅོམ་པ་དྲུག་པོ་ཐམས་ཅད་ཀྱི་ཟག་པ་མེད་པའི་རྣམ་པར་གྲོལ་བ་མི་གཡོ་བ་ཡིན་གྱི། མི་གཡོ་བའི་ཆོས་ཅན་འབའ་ཞིག་གིས་ནི་མ་ཡིན་ནོ་ཞེས་ཟེར་རོ། །
བྱེ་བྲག་ཏུ་སྨྲ་བ་རྣམས་ན་རེ། གལ་ཏེ་ཐམས་ཅད་ཅི་ཟག་པ་མེད་པའི་རྣམ་པར་གྲོལ་བ་མི་གཡོ་བ་ཡིན་ནོ། །ཅིའི་ཕྱིར་དུས་དང་མི་སྦྱོར་བ་ཁོ་ན་མི་གཡོ་བའི་ཆོས་ཅན་དུ་རྣམ་པར་གཞག་ལ་གཞན་དག་མ་ཡིན་ཞེ་ན། དེའི་ཕྱིར་མི་གཡོ་བའི་ཆོས་ཅན་དུ་ཇི་ལྟར་རྣམ་པར་གཞག་པ་ནི་
དེ་བཞིན་དུ་བཤད་ཟིན་ཞེས་བྱ་བ་སྨོས་ཏེ། གང་ཞིག་དབང་པོ་རྣོན་པོའི་ཕྱིར་མཐོང་བའི་ཆོས་ལ་བདེ་བར་གནས་པ་དག་ལས་ཡོངས་སུ་མི་ཉམས་པ་དེ་ནི་མི་གཡོ་བའི་ཆོས་ཅན་དུ་རྣམ་པར་གཞག་གོ། །ཀླན་ཀར་མི་རུང་ངོ་ཞེས་བྱ་བ་ནི་མདོ་ལ་བརྟེན་ནས་ཇི་ལྟར་ན་མི་གཡོ་བའི་ཆོས་
ཅན་མཐོང་བའི་ཆོས་ལ་བདེ་བར་གནས་པ་དག་ལས་ཡོངས་སུ་ཉམས་པར་འགྱུར་ཞེས་གང་སྨྲས་པའོ། །ཇི་ལྟར་ཀླན་ཀར་མི་རུང་ཞེ་ན། གང་གི་ཕྱིར་དགྲ་བཅོམ་པ་ཐམས་ཅད་སེམས་ཀྱིས་རྣམ་པར་གྲོལ་བ་མི་གཡོ་བ་ཡིན་པ་དེའི་ཕྱིར། དེ་ལས་ཡོངས་སུ་ཉམས་པར་མི་
འདོད་ཀྱི། བསམ་གཏན་དག་ལས་ནི་འགའ་ཞིག་ཡོངས་སུ་ཉམས་པར་འགྱུར་ལ། འགའ་ཞིག་ནི་མ་ཡིན་པ་དེའི་ཕྱིར་འདི་ནི་ཀླན་ཀར་མི་རུང་ངོ་། །ཁམས་གསུམ་ལས་འདོད་ཆགས་དང་བྲལ་བ་ལས་ཡོངས་སུ་ཉམས་པ་དང་། ཉོན་མོངས་པ་དང་བཅས་པའི་ཕྱིར་གདོན་མི་
ཟ་བར་སྐྱེ་ལ། ཚངས་པར་སྤྱོད་པ་ཡང་ཡིད་བརྟན་པའི་གནས་སུ་བཤད་པས། ཡང་གང་ཞིག་དགྲ་བཅོམ་པའི་འབྲས་བུ་ལས་ཡོངས་སུ་ཉམས་ན་ཞེས་བྱ་བ་དྲིས་སོ། །དེ་ནི་མེད་དེ་ཞེས་བྱ་བ་ནི་ཡང་སྐྱེ་བ་མེད་པའོ། །ཉོན་མོངས་པ་དང་བཅས་ན་ཇི་ལྟར་མི་སྐྱེ་ཞེ་ན། འདི་ལྟར།
འབྲས་ལས་ཉམས་པ་འཆི་བ་མེར། །ཅེས་བྱ་བ་འབྱུང་སྟེ། གང་ཞིག་དེ་ལྟར་ཚེ་ཡོངས་སུ་ཟད་པར་གྱུར་པ་གང་ཡོངས་སུ་ཟད་པའི་ལྷག་མ་ལ་དེ་ཉིད་ཉམས་པར་གྱུར་ན། ཡོངས་སུ་ཉམས་པ་དེ་ཡང་རིང་དུ་མི་གནས་ཏེ། མདོ་ལས་དགེ་སློང་དག་འཕགས་པ་ཉན་ཐོས་ཐོས་པ་

དང་ལྡན་པ་ཞེས་རྒྱས་པར་གསུངས་པའི་ཕྱིར་རོ། །དེ་ལྟ་མ་ཡིན་པར་གལ་ཏེ་ཁམས་གསུམ་པའི་འདོད་ཆགས་དང་བྲལ་བ་ལས་ཡོངས་སུ་ཉམས་ཏེ་འདོད་པའི་ཁམས་ཀྱི་འདོད་ཆགས་དང་བྲལ་བ་སླར་འདོད་པའི་ཁམས་སུ་སྐྱེ་བ་ལྟ་བུ་ཡིན་ན་ཚངས་པར་སྤྱོད་པ་ལ་ཡིད་བརྟན་མེད་པར་
འགྱུར་རོ། །རྩལ་པོ་ཆེ་གྲོང་བརྡེག་མི་འཚལ་བ་བཞིན་ནོ་ཞེས་བྱ་བ་ལ། རྩལ་པོ་ཆེ་ནི་འདིར་སྟོབས་དང་ལྡན་པ་ལ་དགོངས་སོ། །འདི་བརྗོད་པར་བྱེད་དེ། དེ་ལ་མི་དགེ་བ་སྔར་ཞུགས་པ་ཉམས་པ་དང་ཐེག་པ་སྣ་ཚོགས་ལ་དྲན་པ་འཇུག་པ་དང་། ཤ་མ་ཐ་ཀུ་རུ་ཀོན་བི་དཪྴྱཱ་ན་གུ་རུ་
ཀཿཨ་ལོ་བྷོཏྶ་དོ་མོ་ཧོཏྶ་དོ་མི་རྣམས་ཁོ་ནར་ཡོངས་སུ་ཉམས་པར་བྱེད་ཅི་འདོད་པ་ན་སྤྱོད་པའི་ལྷ་རྣམས་སུ་མ་ཡིན་ཏེ། དབང་པོ་རྣོན་པོས་དེར་འབྲས་བུ་ཐོབ་པ་དང་ཡུལ་ཤིན་ཏུ་ཡངས་པ་ལས་ཡང་བྱུང་བས་དེ་ཡང་ཡོངས་སུ་ཉམས་པའི་ཆོས་ཅན་མ་ཡིན་ནོ། །གཞན་དག་ན་རེ།
ཡོ་བྱད་མ་ཚང་བའི་ཕྱིར་རམ་རྟེན་མི་མཐུན་པས་ཡོངས་སུ་ཉམས་པར་འགྱུར་བ་ལས་དེར་གཉི་ག་ཡང་མེད་པས་དད་པས་རྗེས་སུ་འབྲང་བའི་རིགས་ཅན་ཡང་མི་ཉམས་སོ་ཞེས་ཟེར་རོ། །ཡང་གང་ཞིག་ཉོན་མོངས་པ་མངོན་དུ་གྱུར་པས་ཡོངས་སུ་ཉམས་པར་འདོད་པ་དེ་དག་སེམས་
གཅིག་འདྲ་བ་ཞིག་གི་མཇུག་ཐོགས་སུ་ཉོན་མོངས་པ་མངོན་དུ་བྱེད་ཅེ་ན། གལ་ཏེ་གཟུགས་དང་གཟུགས་མེད་པ་ན་སྤྱོད་པའི་ཀུན་ནས་དཀྲིས་པས་ཡོངས་སུ་ཉམས་ནས་གང་གིས་ཀུན་ནས་དཀྲིས་པས་ཉམས་པའི་ས་གང་ཡིན་པ་དེ་ཉིད་ཀྱི་དགེ་བ་ཉམས་པའི་ཆ་དང་མཐུན་པའི་མཇུག་
ཐོགས་སུ་ཡོངས་སུ་ཉམས་པར་བྱེད་དོ། །འདོད་པའི་ཁམས་སུ་གནས་པས་ས་གོང་མ་པའི་ལུང་མ་བསྟན་གྱི་སེམས་མངོན་དུ་བྱེད་པ་མ་ཡིན་པས་འདིར་སྤྲུལ་པའི་སེམས་རྣམས་ལ་སྟེ་དེ་ལ་གནས་པ་ཡོངས་སུ་ཉམས་པར་མི་བྱེད་དོ། །ཡང་ཉམས་པའི་ཆ་དང་མཐུན་པ་འདོད་ཆགས་
དང་བྲལ་བའི་ཕྱིར་སྤངས་པ་མ་ཡིན་ནམ། དེ་ཇི་ལྟར་མ་སྤངས་པར་མངོན་དུ་བྱེད་ཅེ་ན། གནས་པའི་ཆ་དང་མཐུན་པའི་ཕྱོགས་ཁོ་ན་ལ་ཡོད་པ་ཅུང་ཟད་སྤང་བ་དང་རྗེས་སུ་མཐུན་ལ་ཅུང་ཟད་ནི་ཁྱད་པར་དང་རྗེས་སུ་མཐུན་ནོ། །དེ་ལ་གང་སྤངས་པ་དང་རྗེས་སུ་མཐུན་པ་གང་ཡིན་

པ་དེས་ནི་ཉམས་པའི་ཆ་དང་མཐུན་པའི་མིང་འཐོབ་ལ། གནས་པའི་ཕྱོགས་དེ་ནི་ཕལ་ཆེར་བརྟེན་པས་གནས་པའི་ཆ་དང་མཐུན་པ་ཞེས་བྱའོ། །འདོད་པ་ན་སྤྱོད་པའི་ཀུན་ནས་དཀྲིས་པས་ཡོངས་སུ་ཉམས་པར་བྱེད་པ་ན་དགེ་བ་དང་མ་བསྒྲིབས་ལ་ལུང་དུ་མ་བསྟན་
པའི་སེམས་དག་གིས་མཇུག་ཐོགས་སུ་ཉོན་མོངས་པ་མངོན་དུ་བྱེད་དོ། །གལ་ཏེ་སློབ་པས་ས་གོང་མ་དག་ལས་ནི་ས་གང་ལས་འདོད་ཆགས་དང་བྲལ་བའི་ས་དེའི་ཀུན་ནས་དཀྲིས་པས་ཉམས་པར་བྱེད་དེ། དགེ་བ་ཁོ་ནའི་མཇུག་ཐོགས་སུ་འདོད་པ་ལ་འདོད་ཆགས་དང་བྲལ་བ་དང་
དགེ་བ་དང་ལུང་མ་བསྟན་གྱི་མཇུག་ཐོགས་སུའོ། །གཞན་དག་ན་རེ། ཡོངས་སུ་ཉམས་པ་ཉོན་མོངས་པ་མངོན་དུ་བྱེད་པ་དེ་མངོན་དུ་གྱུར་པ་ལས་མ་ཡིན་ཏེ། ཡོངས་སུ་ཉམས་པ་ན་ངའོ་སྙམ་པ་ལ་རག་ལས་པས་བར་ཆད་མེད་པ་དང་རྣམ་པར་གྲོལ་བའི་ལམ་དགུ་ཡང་དྲན་པ་ཉམས་
པ་གཞུང་ཁ་དོན་བྱེད་པའི་དུས་དང་འདྲའོ་ཞེས་ཟེར་རོ། །རྟོགས་པའི་སྐལ་བ་ཅན་གྱི་བར་ཆད་མེད་པའི་ལམ་དགུ་ནི་རྟོགས་པའི་སྐལ་བ་ཅན་གྱི་རིགས་ཅན་ཁོ་ནར་རྒྱུན་དུ་སྦྱོར་བ་དང་གུས་པར་སྦྱོར་བའི་ནུས་པས་ཁྱད་པར་སོ་སོར་ཤེས་རབ་ཀྱི་སྐད་ཅིག་སྐྱེ་བས་གང་དག་གིས་རིགས་ཅན་ཁོ་ནའི་དབང་
པོ་རྟུལ་པོ་རྣམས་ཀྱི་ཐོབ་པ་དེ་དགག་པར་བྱེད་དེ་དེས་ན་དེ་དག་བར་ཆད་མེད་པའི་ལམ་ཞེས་བྱའོ། །དབང་པོ་རྟུལ་པོའི་ཐོབ་པ་དང་བྲལ་བས་དེའི་མཇུག་ཐོགས་སུ་སྐྱེ་བའི་ཕྱིར་རྣམ་པར་གྲོལ་བའི་ལམ་ཞེས་བྱའོ། །དེ་ལ་བར་ཆད་མེད་པའི་ལམ་ཐམས་ཅད་རྟོགས་པའི་སྐལ་བ་ཅན་གྱི་
རིགས་ཅན་ནོ། །རྣམ་པར་གྲོལ་བའི་ལམ་བརྒྱད་པ་དང་དགུ་པ་ལ་ནི་མི་གཡོ་བའི་ཆོས་ཅན་གྱི་རིགས་ཅན་ཉིད་སྐྱེའོ། །དེར་མི་སློབ་པའི་ཀུན་རྫོབ་ཤེས་པ་ཡང་ཐོབ་པར་བྱེད་དོ། །དང་པོའི་ཟད་པ་ཤེས་པ་དང་སློབ་པའི་འབྲས་བུ་དང་པོ་ཐོབ་པ་བཞིན་ཐམས་ཅད་ཟག་པ་མེད་པ་ཉིད་དོ། །
དེ་ལྟར་འདི་དག་མི་སློབ་པའི་འབྲས་བུའི་ལམ་གྱིས་བསྡུས་པ་ཉིད་དུ་ཤེས་པར་བྱའོ། །སློབ་པ་དང་མི་སློབ་པའི་ལམ་གྱིས་བརྟན་པར་བྱས་པའི་ཕྱིར་རོ་ཞེས་བྱ་བ་ནི་གནས་སྐབས་གཉིས་སུ་གོམས་པའི་ཕྱིར་ཤིན་ཏུ་གོམས་པའོ་ཞེས་སྟོན་པར་བྱེད་དོ། །མཐོང་བས་ཐོབ་ལ་རེ་རེའོ་ཞེས་

བྱ་བ་ལ། གཞན་དུ་མ་ཡིན་པར་གོམས་པའི་ཕྱིར་དེའི་རིགས་ནི་དད་པས་མོས་པ་སྟེ། གང་གི་ཚེ་རྟོགས་པའི་སྐལ་བ་ཅན་གྱི་རིགས་མཐོང་བས་ཐོབ་པ་རྟོགས་པར་བྱེད་པ་ན་སྟེ། གལ་ཏེ་འབྲས་བུའི་ཁྱད་པར་གྱི་ལམ་ཐོབ་པར་གྱུར་པ་ན། དེ་ནི་འབྲས་བུའི་ལམ་གྱིས་བསྡུས་པ་རྣམ་པར་
གྲོལ་བའི་ལམ་གཅིག་ཉིད་ཡིན་ནོ། །བར་ཆད་མེད་པའི་ལམ་ཡང་གཅིག་ཉིད་དོ། །ཡོངས་སུ་ཉམས་པའི་ཆོས་ཅན་ཡང་གང་གི་ཚེ་མི་གཡོ་བའི་ཆོས་ཅན་ཉིད་རྟོགས་པར་བྱེད་པ་དེའི་ཚེ་མཐར་གྱིས་པའི་རིམ་གྱིས་རིགས་ལྔའི་དབང་པོ་རྣམས་འཕོས་ཏེ་མི་གཡོ་བའི་ཆོས་ཅན་དུ་
འགྱུར་རོ། །དེ་ལྟ་མ་ཡིན་ན་ཡོངས་སུ་ཉམས་པའི་ཆོས་ཅན་ལ་སོགས་པ་རྣམས་ཀྱང་རྟོགས་པའི་སྐལ་བ་ཅན་དུ་འགྱུར་རོ། །དེ་བཞིན་དུ་མཐོང་བས་ཐོབ་པ་རྟོགས་པར་བྱེད་པ་ལ་ཡང་སྦྱར་རོ། །གང་ཡང་རྣམ་པར་གྲོལ་བའི་ལམ་ལས་ཡོངས་སུ་ཉམས་པ་དེ་གཞན་དུ་རྣམ་པར་
གྲོལ་བའི་ལམ་ཉིད་ལ་གནས་ན་ཇི་ལྟར་ཡང་དེའི་རིགས་ཅན་གྱིས་བར་ཆད་མེད་པའི་ལམ་གྱིས་རང་གི་རིགས་དང་ཉེ་བའི་ཐོབ་པ་འདྲེན་པར་རིགས་ཤེ་ན། ཇི་ལྟར་འཇིག་རྟེན་ཆོས་མཆོག་སོ་སོ་སྐྱེ་བོའི་རྒྱུད་ཅན་གྱིས་ཀྱང་དེ་དང་ཉེ་བའི་ཆོས་འདྲེན་ལ། ཇི་ལྟར་འདོད་པ་ལ་འདོད་ཆགས་
དང་བྲལ་བ་དབང་པོ་སྦྱངས་པ་བར་ཆད་མེད་པའི་ལམ་གྱིས་དབང་པོ་མ་སྦྱངས་པར་བསྡུས་པ་རྣམས་ཀྱིས་ཀྱང་དབང་པོ་སྦྱོང་བ་ཡིན་པས་ན་ཐམས་ཅད་དུ་གཅིག་ཉིད་དོ། །མི་གཡོ་བ་རྟོགས་པ་ལ་མཐོང་བས་ཐོབ་པ་ལ་ཡང་ངོ་། །གཞན་དག་ན་རེ་དབང་པོ་འཕོ་བས་ནི་མཐོང་བ་
དང་བསྒོམ་པས་སྤང་བར་བྱ་བའི་ཉོན་མོངས་པ་ཀུན་ནས་ལྡང་བ་དང་བསྒྲིབས་ལ་ལུང་དུ་མ་བསྟན་པ་ཤེས་པས་མངོན་དུ་རྒྱུ་བ་ཟློག་པར་བྱེད་ལ། མཐོང་བས་སྤང་བར་བྱ་བའི་ཉོན་མོངས་པ་ཀུན་ནས་ལྡང་བ་ནི་སློབ་པས་ཟློག་པར་བྱེད་ཅིང་། བསྒོམ་པས་སྤང་བར་བྱ་བའི་ཉོན་
མོངས་པ་ཀུན་ནས་ལྡང་བ་ནི་མི་སློབ་པས་བཟློག་པས་སོ། །དེའི་ཕྱིར་ཇི་ལྟར་ཀུན་ནས་སློང་བ་པོ་སྤངས་པ་དེ་ལྟར་དེའི་ཀུན་ནས་ལྡང་བ་ཡང་སྤངས་པས་མི་སློབ་པའི་བར་ཆད་མེད་པའི་ལམ་དང་རྣམ་པར་གྲོལ་བའི་ལམ་དགུ་ཡིན་ནོ། །སློབ་པའི་ནི་གཅིག་ཁོ་ན་ཡིན་ནོ་ཞེས་

ཟེར་རོ། །དེ་བཞིན་དུ་ཡོངས་སུ་ཉམས་པའི་ཆོས་ཅན་ལ་སོགས་པ་རྣམས་ཀྱང་འཆི་བར་སེམས་པའི་ཆོས་ཅན་ལ་སོགས་པའི་དབང་པོ་འཕོ་བས་སོ་ཞེས་བཤད་པ་ཡིན་ནོ། །ཁ་ཅིག་ནི་འདི་དག་ཐམས་ཅད་བསྒོམ་པས་སྤང་བར་བྱ་བའི་ཉོན་མོངས་པ་ཀུན་ནས་
ལྡང་བ་ཤེས་པས་བྲལ་བའི་ཕྱིར་རེ་རེ་བ་ཉིད་དོ་ཞེས་འཆད་པར་བྱེད་དོ། །འཕགས་པ་རྣམས་ཀྱི་དབང་པོ་ནི་ཟག་པ་དང་བཅས་པའི་ལམ་གྱིས་འཕོ་བ་མེད་དོ་ཞེས་བྱ་བ་ནི། འཕགས་པའི་ལམ་ཐམས་ཅད་ཀྱི་ནང་ན་ཆུང་བ་ཡང་འཇིག་རྟེན་པའི་ལམ་ཐམས་ཅད་ལས་ཆེས་གསལ་བའི་
ཕྱིར་རོ། །དེའི་ནུས་པ་ཁོ་ནས་འཕགས་པ་རྣམས་དེས་དབང་པོ་འཕོ་བ་མ་ཡིན་ནོ། །གཞན་དུ་ནི་མ་ཡིན་ཏེ་ཞེས་བྱ་བ་ནི་འདོད་པ་ན་སྤྱོད་པའི་ལྷ་དྲུག་པོ་རྣམས་སུའོ། །གཟུགས་དང་གཟུགས་མེད་པའི་ཁམས་དག་ཏུ་ཡང་མ་ཡིན་ཏེ། དེར་ཉམས་པ་མི་སྲིད་པའི་ཕྱིར་རོ། །སྦྱངས་
པ་ཞེས་བྱ་བ་འདི་ཅི་ཞེ་ན། དབང་པོ་རྣམས་འཕོ་བ་སྟེ། ལམ་གྱི་ནུས་པས་དབང་པོ་རྟུལ་པོའི་རྒྱུད་དོར་ཏེ་འབྲིང་པོའམ་ཆེན་པོ་ཐོབ་པ་འདི་ནི་དབང་པོ་འཕེལ་བ་དང་སྦྱངས་པ་དང་འཕོ་བ་ཞེས་བྱའོ། །མི་སློབ་ས་དགུ་ལ་བརྟེན་ཏེ། །ཞེས་བྱ་བ་ནི་དེའི་འབྲས་བུ་ས་དགུས་བསྡུས་པའི་ཕྱིར་རོ། །
སློབ་པ་དྲུག་ལ་ཞེས་བྱ་བ་ནི་སྲིད་པའི་དབང་དུ་བྱས་ནས་བཤད་དེ། ཕྱིར་མི་འོང་བའི་འབྲས་བུ་ས་དྲུག་གིས་བསྡུས་པས་སོ། །འབྲས་བུ་ཁྱད་པར་ཅན་བཏང་སྟེ་ཞེས་བྱ་བ་ལ། དེ་ལྟ་ན་འོ་ན་ཁྱད་པར་དང་བཅས་པའི་འབྲས་བུ་བཏང་བའི་ཕྱིར་སོ་སོ་སྐྱེ་བོ་ཡང་འབྲས་བུ་ཐོབ་པར་ཐལ་བར་
འགྱུར་རོ་ཞེ་ན། དེ་ལྟ་མ་ཡིན་ཏེ་བཏང་བ་དང་ཐོབ་པ་དག་དུས་རྣམ་པར་ཆད་པ་མ་ཡིན་པའི་ཕྱིར་རོ། །ཏུ་ལཱ་ནཱ་མོ་ནཱ་མ་པ་དེ་ཏི། འབྲས་བུའི་ལམ་ཁོ་ན་ཐོབ་པར་འགྱུར་ན་ཞེས་བྱ་བ་ནི་འདོད་པའི་ཁམས་ལ་འདོད་ཆགས་དང་བྲལ་བ་ཙམ་གྱིས་བསྡུས་པ་ཞེས་བྱ་བའི་ཐ་ཚིག་གོ། །སློབ་པ་
གང་ཞིག་གཟུགས་ལ་མེད་པའི་ས་ལ་བརྟེན་ནས་དབང་པོ་འཕོ་བ་དེ་ངེས་པར་ཕྱིར་མི་འོང་བའི་འབྲས་བུའི་ཁྱད་པར་གྱི་ལམ་ལ་གནས་པར་འགྱུར་རོ། །ཕྱིར་མི་འོང་བའི་འབྲས་བུ་གཟུགས་མེད་པའི་སས་བསྡུས་པ་ཡོད་པ་མ་ཡིན་ཏེ། མཐར་གྱིས་པས་ནི་མི་ལྕོགས་པ་མེད་པས་

བསྡུས་པའི་ལམ་གྱིས་ཕྱིར་མི་འོང་བའི་འབྲས་བུ་ཐོབ་ལ། འདོད་པ་དང་འདོད་ཆགས་དང་བྲལ་བ་ཡང་ས་དྲུག་ལས་གང་ཡང་རུང་བས་བསྡུས་པས་དེ་གཟུགས་མེད་པས་བསྡུས་པ་མེད་དེ། དེ་ལ་མཐོང་བའི་ལམ་མེད་པའི་ཕྱིར་རོ། །ཉན་ཐོས་བདུན་གང་ཞེ་ན་ཞེས་བྱ་བ་ནི་མདོ་ལས་དྲུག་
ཏུ་གསུངས་པ་ཞེས་བྱས་ཏེ་དྲི་བའོ། །མདོ་ལས་སློབ་པ་དྲུག་ཉིད་དུ་བསྟན་པ་དེར་ཡང་འདི་དག་མ་བསྡུས་པའི་ཕྱིར་ཡོན་གནས་མ་ཡིན་པར་ཐལ་བར་འགྱུར་རོ་ཞེ་ན། དེའི་ཕྱིར་སངས་རྒྱས་གཉིས་ནི་མི་གཡོ་བའི་བྱེ་བྲག་ཁོ་ན་ཡིན་ཏེ་ཞེས་བྱ་བ་སྨོས་ཏེ། དབང་པོའི་བྱེ་བྲག་གི་དབང་
དུ་བྱས་ནས་རྣམ་པ་གསུམ་མོ། །དབང་པོ་ཆེན་པོ་ནི་མི་གཡོ་བའི་ཆོས་ཅན་དུ་རྣམ་པར་གཞག་ལ། ཆེན་པོའི་བྱེ་བྲག་གི་ནང་དུ་འདུས་པའི་དབྱེ་བའི་དབང་དུ་བྱས་ཏེ་ཉན་ཐོས་དང་རང་སངས་རྒྱས་དང་སངས་རྒྱས་རྣམ་པར་གཞག་སྟེ། དེ་ལྟར་མི་གཡོ་བའི་བྱེ་བྲག་ཁོ་ན་ལས་སངས་རྒྱས་
གཉིས་ཡིན་ནོ། །ཆུང་ངུའི་ཆུང་ངུ་ལ་སོགས་པ་དབང་པོ་རྣམ་པ་དགུའི་བྱེ་བྲག་ལས་གང་ཟག་དགུར་འགྱུར་རོ། །དབང་པོ་ཆུང་ངུའི་ཆུང་ངུ་ནི་ཡོངས་སུ་ཉམས་པའི་ཆོས་ཅན་ནོ། །ཆུང་ངུའི་འབྲིང་ནི་འཆི་བར་སེམས་པའི་ཆོས་ཅན་ནོ། །ཆུང་ངུའི་ཆེན་པོ་ནི་རྗེས་སུ་བསྲུང་བའི་ཆོས་ཅན་ནོ། །
དེ་བཞིན་དུ་གནས་པ་ལས་མི་བསྐྱོད་པ་དང་རྟོགས་པའི་སྐལ་བ་ཅན་དང་། སྦྱངས་པ་ལས་གྱུར་པའི་མི་གཡོ་བའི་ཆོས་ཅན་རྣམས་དབང་པོ་འབྲིང་པོའི་རྣམ་པ་དག་ཏུ་སྦྱར་བར་བྱའོ། །དང་པོ་ཉིད་ནས་མི་གཡོ་བའི་ཆོས་ཅན་གྱི་ཉན་ཐོས་དང་རང་སངས་རྒྱས་དང་སངས་རྒྱས་རྣམས་
ནི་དབང་པོ་ཆེན་པོའི་རྣམ་པ་དག་ཏུ་སྦྱར་བར་བྱའོ། །དེ་ལྟར་ན་འདི་དག་ནི་མི་སློབ་པའི་གང་ཟག་དབང་པོ་རྣམ་པ་དགུའི་དབྱེ་བས་དགུ་ཡིན་ནོ། །སློབ་པ་དང་མི་སློབ་པའི་དབྱེ་བའི་དབང་དུ་མ་བྱས་ན་འཕགས་པའི་གང་ཟག་ཐམས་ཅད་བདུན་ཡིན་ནོ། །དང་པོ་ཉིད་ནས་ཞེས་བྱ་བ་ནི་སོ་
སོ་སྐྱེ་བོའི་གནས་སྐབས་ན་གཞན་གྱི་དྲིང་མི་འཇོག་པས་ཆོས་ཀྱི་རྗེས་སུ་འབྲང་བས་དོན་ལ་སྦྱར་ཏེ། གཞན་ལས་དྲན་པ་ཉེ་བར་གཞག་པ་ལ་སོགས་པའི་ཆོས་ཐོས་ནས་དེའི་རྐྱེན་གྱིས་བསམ་པ་དང་བསྒོམ་པ་ལ་སྦྱོར་བ་དང་ཆོས་ཀྱི་རྗེས་སུ་འབྲང་བ་ནི་རང་ཉིད་ཁོ་ནས་ཏེ། གཞན་གྱི་དྲིང་

མི་འཇོག་པར་བྱང་ཆུབ་ཀྱི་ཕྱོགས་ལ་སོགས་པའི་ཆོས་ཀྱི་རྗེས་སུ་འབྲངས་ཏེ་བསམ་པ་དང་བསྒོམ་པས་བརྟེན་ཏེ་དོན་ལ་སྦྱོར་བའི་ཕྱིར་ཏེ། དེ་ལྟར་སྦྱོར་བའི་སྒོ་ནས་དད་པ་དང་ཆོས་ཀྱི་རྗེས་སུ་འབྲང་བ་དག་གོ། །དད་པས་མོས་པ་དང་ཤེས་རབ་ལྷག་པའི་སྒོ་ནས་
ཞེས་བྱ་བ་ལ། དད་པས་མོས་པ་ལྷག་པས་ན་དད་པས་མོས་པ་སྟེ། དད་པ་ལྷག་པ་ནི་དབང་པོ་རྟུལ་པོ་ཉིད་དེ། དེ་ནི་དད་པ་ལྷག་པ་ཡིན་གྱི་ཤེས་རབ་ནི་མ་ཡིན་ནོ། །དེ་བཞིན་དུ་ཤེས་རབ་ལྷག་པ་ནི་དབང་པོ་རྣོན་པོ་ཉིད་དེ། དེ་ནི་ཤེས་རབ་ལྷག་པ་ཡིན་གྱི་དད་པ་ནི་མ་
ཡིན་ནོ། །དད་པ་དང་ཆོས་ཀྱི་རྗེས་སུ་འབྲང་བ་དག་ལ་ཡང་དབང་པོའི་དབྱེ་བ་ཡོད་པ་མ་ཡིན་ནམ་ཞེ་ན་ཡོད་མོད་ཀྱི། དེ་ལྟ་ན་ཡང་དད་པས་མོས་པ་དང་མཐོང་བས་ཐོབ་པ་དག་དབང་པོའི་སྒོ་ནས་དབྱེ་བ་མ་ཡིན་ཏེ་མཐོང་བའི་ལམ་ནི་ཅིག་ཤོས་དག་དང་གཉི་གས་ཀྱང་མཐོང་བས་སྤང་
བར་བྱ་བའི་ཉོན་མོངས་པ་སྤོང་བ་དུས་མཚུངས་པའི་ཕྱིར་དང་། བསྒོམ་པའི་ལམ་ལ་ནི་མཚུངས་པར་མངོན་པར་འདུ་བྱེད་པ་ཆེན་པོས་ཉོན་མོངས་པ་སྤོང་བའི་ཕྱིར་རོ་མྱོང་བ་དང་རོ་མྱོང་བ་མ་ཡིན་པ་དག་དབང་པོའི་བྱེ་བྲག་གིས་རབ་ཏུ་ཕྱེ་བའི་ཕྱིར་རོ། །སྙོམས་པར་འཇུག་པ་ལས་
ནི་ལུས་ཀྱིས་མངོན་དུ་བྱེད་པ་སྟེ་ཞེས་བྱ་བ་ནི་དབང་པོ་རྟུལ་པོ་དང་རྣོན་པོ་འགོག་པའི་སྙོམས་པར་འཇུག་པ་ཐོབ་པ་དག་ཁྱད་པར་མེད་པར་མྱ་ངན་ལས་འདས་པ་དང་འདྲ་བའི་ཆོས་ལུས་ཀྱིས་མངོན་སུམ་དུ་བྱས་པའི་ཕྱིར། ལུས་ཀྱིས་མངོན་སུམ་དུ་བྱེད་པ་ཡིན་པས་སྙོམས་པར་འཇུག་པ་
ལས་རྣམ་པར་གཞག་གི་དབང་པོ་དང་སྦྱོར་བ་ལས་ནི་མ་ཡིན་ནོ། །རྣམ་པར་གྲོལ་བ་ལས་ནི་ཤེས་རབ་ཀྱིས་རྣམ་པར་གྲོལ་བའོ་ཞེས་བྱ་བ་ནི་དུས་ཀྱིས་རྣམ་པར་གྲོལ་བ་དང་། རྣམ་པར་གྲོལ་བ་དུས་དང་མི་སྦྱོར་བ་སྟེ། རྣམ་པར་གྲོལ་བ་ཙམ་ལ་བལྟོས་ནས་ཤེས་རབ་ཀྱིས་
རྣམ་པར་གྲོལ་བར་གཞག་པའི་ཕྱིར་རོ། །སྙོམས་པར་འཇུག་པ་དང་རྣམ་པར་གྲོལ་བ་ལས་ནི་ཞེས་བྱ་བ་ལ། དེ་ནི་འགོག་པའི་སྙོམས་པར་འཇུག་པ་ཐོབ་པའི་ཕྱིར་རྣམ་པར་ཐར་པའི་སྒྲིབ་པ་ལས་རྣམ་པར་གྲོལ་ལོ། །རྣམ་པར་ཐར་པ་ནི་གཟུགས་ཅན་གཟུགས་ལ་བལྟ་བ་

ཞེས་རྒྱས་པར་འབྱུང་བའོ། །རྣམ་པར་ཐར་པ་ལ་བསྒྲིབས་པས་ན་རྣམ་པར་ཐར་པའི་སྒྲིབ་པ་སྟེ། དེ་ཡང་གང་གིས་བསམ་གཏན་དག་སྐྱེད་པར་མི་ནུས་པ་ལུས་དང་སེམས་དག་ལས་སུ་མི་རུང་བ་ཉིད་དོ། །དགྲ་བཅོམ་པའི་རྣམ་པར་གྲོལ་བ་ཐོབ་པས་ཉོན་མོངས་པའི་སྒྲིབ་པའི་ཆ་ལས་རྣམ་
པར་གྲོལ་ཏེ། དེའི་ཕྱིར་སྙོམས་པར་འཇུག་པའི་རྣམ་པར་གྲོལ་བ་ལས་གཉི་གའི་ཆ་ལས་རྣམ་པར་གྲོལ་བ་རྣམ་པར་གཞག་གོ། །རྫས་སུ་ནི་དེ་དག་རྣམ་པ་དྲུག་ཡིན་ཏེ་ཞེས་བྱ་བ་ནི་ལུས་ཀྱིས་མངོན་དུ་བྱེད་པ་ནི་དད་པས་མོས་པ་དང་། མཐོང་བས་ཐོབ་པ་གཉིས་ཀྱི་ཁོངས་སུ་འདུས་
པའི་ཕྱིར་དང་། གཉི་གའི་ཆ་ལས་རྣམ་པར་གྲོལ་བ་ནི་དུས་དང་མི་སྦྱོར་བ་རྣམ་པར་གྲོལ་བ་གཉིས་ཀྱི་ཁོངས་སུ་འདུས་པའི་ཕྱིར་རྫས་སུ་ནི་དྲུག་ཡིན་ནོ། །དབང་པོའི་སྒོ་ནས་ནི་གསུམ་མོ་ཞེས་བྱ་བ་ནི་དད་པའི་རྗེས་སུ་འབྲང་བ་དབང་པོ་རྟུལ་པོ་ཡིན་མོད་ཀྱི། སླར་ཆུང་ངུ་དང་ཆེན་
པོའི་བྱེ་བྲག་གིས་དབྱེ་སྟེ། དེ་དག་དབང་པོ་རྟུལ་པོར་མཚུངས་ཀྱང་ཤིན་ཏུ་རྟུལ་བ་དང་ཆེས་ཤིན་ཏུ་རྟུལ་བའི་བྱེ་བྲག་ཡོད་པས་སོ། །རིགས་ཀྱི་སྒོ་ནས་ནི་ལྔའོ་ཞེས་བྱ་བ་ནི་མི་གཡོ་བའི་ཆོས་ཅན་གྱི་རིགས་མ་གཏོགས་པ་ལྷག་མ་ལྔའོ། །སྔར་བཤད་པ་གསུམ་པོ་རེ་རེ་ལ་རིགས་ཀྱི་
བྱེ་བྲག་ཡོད་དེ། དེ་ལྟར་ན་རིགས་དང་དབང་པོའི་སྒོ་ནས་བཅོ་ལྔ་ཡིན་ནོ། །དེ་བཞིན་དུ་བཅོ་ལྔ་པོ་དེ་དག་རེ་རེ་ཞིང་ལམ་གྱི་སྒོ་ནས་ནི་བཅོ་ལྔ་བཅོ་ལྔ་ཡིན་ནོ། །ཤེས་པ་བདུན་ལ་གནས་པའོ་ཞེས་བྱ་བ་ནི་ལམ་ལ་རྗེས་སུ་ཤེས་པ་ནི་བསྒོམ་པའི་ལམ་ཡིན་པའི་ཕྱིར་རོ། །དེ་དག་ཉིད་
ལམ་གྱི་སྒོ་ནས་ནི་ཡང་རེ་རེ་ཞིང་བཅོ་ལྔ་བཅོ་ལྔ་ཡིན་ནོ། །འདོད་ཆགས་དང་བྲལ་བའི་སྒོ་ནས་ནི་རེ་རེ་ཡང་བདུན་ཅུ་རྩ་གསུམ་གསུམ་ཡིན་ནོ། །ཇི་ལྟར་ཞེ་ན། འདོད་པའི་ཁམས་ན་འཆིང་བ་མཐའ་དག་དང་ལྡན་པ་གཅིག་དང་། འདོད་པའི་ཁམས་ལ་རྣམ་པ་གཅིག་སྤངས་པ་
ནས་རྣམ་པ་དགུ་སྤངས་པའི་བར་དང་། དེ་བཞིན་དུ་ཅི་ཡང་མེད་པའི་སྐྱེ་མཆེད་ཀྱི་རྣམ་པ་གཅིག་སྤངས་པ་ནས་རྣམ་པ་དགུ་སྤངས་པའི་བར་ཏེ། དེ་དག་ནི་འདོད་པའི་ཁམས་དང་། བསམ་གཏན་བཞི་དང་། གཟུགས་མེད་པ་གསུམ་ན་དགུ་ཚན་བརྒྱད་ལ་བདུན་ཅུ་རྩ་གཉིས་ཡིན་

ལ། འདོད་པའི་ཁམས་ཀྱི་འཆིང་བ་མཐའ་དག་དང་ལྡན་པས་བསྣན་ན་བདུན་ཅུ་རྩ་གསུམ་ཡིན་ནོ། །སྲིད་པའི་རྩེ་མོ་འདོད་ཆགས་དང་བྲལ་བ་ནི་འདིར་མི་བརྩི་སྟེ། མཐོང་བའི་ལམ་སྔ་རོལ་དུ་དེ་ལས་འདོད་ཆགས་དང་བྲལ་བ་མེད་པའི་ཕྱིར་རོ། །རྟེན་གྱི་སྒོ་ནས་
ནི་དགུ་སྟེ་ཞེས་བྱ་བ་ནི་རེ་རེ་ཞིང་སྟེ། རྟེན་ནི་བསྐྱེད་པའི་སྐྱེ་བ་ཞེས་བྱ་བའི་ཐ་ཚིག་གོ། །གླིང་གསུམ་དང་ཞེས་བྱ་བ་ནི་བྱང་གི་སྒྲ་མི་སྙན་མ་གཏོགས་པ་སྟེ་དེ་ན་ལམ་མེད་པའི་ཕྱིར་རོ། །ལྷའི་རིས་དྲུག་ཏུ་སྐྱེས་པའོ་ཞེས་བྱ་བ་ནི་འདོད་པ་ན་སྤྱོད་པའི་ལྷའི་རིས་དྲུག་ཏུ་སྐྱེས་པ་སྟེ།
དེའི་གོང་ན་མཐོང་བའི་ལམ་མེད་པའི་ཕྱིར་དད་པའི་རྗེས་སུ་འབྲང་བ་མེད་དོ། །དབང་པོ་དང་རིགས་དང་ལམ་དང་འདོད་ཆགས་དང་བྲལ་བ་དང་རྟེན་གྱི་སྒོ་ནས་ནི་ཞེས་བྱ་བ་རྒྱས་པར་འབྱུང་བས་ནི་དེ་ཉིད་ཀྱིས་སྡུད་པའོ། །གང་ཟག་གཞན་དག་ཀྱང་ཅི་རིགས་པར་དེ་བཞིན་དུ་
བརྩི་བར་བྱའོ་ཞེས་བྱ་བ་ནི་ཆོས་ཀྱི་རྗེས་སུ་འབྲང་བ་ལ་སོགས་པ་སྟེ། ཇི་ལྟར་དད་པས་རྗེས་སུ་འབྲང་བ་དབང་པོ་དང་རིགས་དང་ལམ་དང་འདོད་ཆགས་དང་བྲལ་བ་དང་རྟེན་གྱི་སྒོ་ནས་བརྩིས་པ་བཞིན་དུ་བརྩི་བར་བྱའོ། །ཅི་རིགས་པར་ཞེས་བྱ་བ་ནི་ཆོས་ཀྱི་རྗེས་སུ་འབྲང་བ་དང་།
མཐོང་བས་ཐོབ་པ་དང་དུས་དང་མི་སྦྱོར་བར་རྣམ་པར་གྲོལ་བ་རྣམས་ལ་ནི་རིགས་ཀྱི་ཁྱད་པར་མེད་དོ། །དེ་ལ་རིགས་ཀྱི་སྒོ་ནས་གཅིག་གོ། །ཆོས་ཀྱི་རྗེས་སུ་འབྲང་བ་དབང་པོའི་སྒོ་ནས་གསུམ་མོ། །ལམ་གྱི་སྒོ་ནས་རེ་རེ་ཞིང་བཅོ་ལྔ་སྟེ་བཟོད་པ་བརྒྱད་དང་ཤེས་པ་བདུན་ལ་
གནས་པའོ། །འདོད་ཆགས་དང་བྲལ་བའི་སྒོ་ནས་ནི་བདུན་ཅུ་རྩ་གསུམ་སྟེ་སྔར་བཤད་དོ། །བཅོ་ལྔ་པོ་རེ་རེ་ཞིང་རྟེན་གྱི་སྒོ་ནས་དགུར་འགྱུར་རོ། །དེ་བཞིན་དུ་དབང་པོ་དང་འདོད་ཆགས་དང་བྲལ་བ་དང་གནས་ཀྱི་སྒོ་ནས་བསྡོམས་ན་དགུ་སྟོང་དང་བརྒྱད་བརྒྱ་ལྔ་བཅུའོ། །དེ་བཞིན་
དུ་གཞན་ལ་ཡང་བརྩི་བར་བྱའོ། །རྣམ་པར་ཐར་པ་ནི་བརྒྱད་དེ། གཟུགས་ཅན་གཟུགས་རྣམས་ལ་བལྟ་བ་ཞེས་བྱ་བ་དེ་ལྟ་བུ་ལ་སོགས་པའོ། །ཡང་རྣམ་པར་ཐར་པའི་སྒྲིབ་པ་འདི་གང་ཞིག་ཅེ་ན། གང་གིས་རྣམ་པར་ཐར་པ་དག་སྐྱེད་པར་མི་ནུས་ཏེ། ལུས་དང་སེམས་

ལས་སུ་མི་རུང་བ་ཉིད་དོ། །ཡང་དེས་རྣམ་པར་ཐར་པ་ལ་ཅིའི་ཕྱིར་སྒྲིབ་ཅེ་ན། གང་གི་ཕྱིར་དགྲ་བཅོམ་པ་སེམས་རྣམ་པར་གྲོལ་ཡང་རྣམ་པར་ཐར་པ་མ་སྐྱེད་པའི་ཕྱིར་ཡང་རྣམ་པར་གྲོལ་བར་བྱ་བས་ན་རྣམ་པར་ཐར་པ་ལ་སྒྲིབ་ཅེས་བྱ་སྟེ། རྫུ་འཕྲུལ་ཤེས་པ་ལ་མ་བསྒྲིབས་ལུང་མ་བསྟན་
ནོ། །གཞན་དག་ན་རེ་སྔར་ཉིད་དུ་ངེས་སྤངས་པ་ཁམས་ལས་འདོད་ཆགས་དང་བྲལ་བ་ཉིད་ལས་རྣམ་པར་ཐར་པ་མ་ལུས་པ་བསྐྱེད་དེ་ཀུན་ཏུ་མི་སྤྱོད་པ་ལས་རྣམ་པར་གཞག་གོ་ཞེས་ཟེར་རོ། །གཞན་དག་ནི་སྙོམས་པར་འཇུག་པ་ལ་མི་དབང་བ་རྣམ་པར་ཐར་པའི་སྒྲིབ་པའོ་ཞེས་ཟེར་རོ། །གཞན་
དག་ནི་སྙོམས་པར་འཇུག་པ་མ་ཐོབ་པ་ཉིད་དོ་ཞེས་ཟེར་རོ། །གཞན་དག་ན་རེ། ཨུ་དཱ་སཱི་ན་ཏྭཏ། སྦྱོར་བ་མཉན་པ་ལ་མ་གོམས་པའི་ཕྱིར་རྣམ་པར་ཐར་པ་སྐྱེད་པར་མི་བྱེད་པ་དེ་ཉིད་འདིའི་སྒྲིབ་པ་ཡིན་ཏེ་སྔ་མ་ཉིད་རིགས་སོ་ཞེས་ཟེར་རོ། །འདི་ལ་གང་ཞིག་ཉོན་མོངས་པ་ལྔ་སྤངས་ཏེ་ཞི་
ཞེས་བྱ་བ་ནི་ཀུན་ཏུ་སྦྱོར་བའི་ཐ་མའི་ཆ་དང་མཐུན་པ་ལྔའོ། །མི་འཕྲོགས་ཆོས་ཅན་ཞེས་བྱ་བ་ནི་ཡོངས་སུ་མི་ཉམས་པའི་ཆོས་ཅན་ནོ། །ཕྱིར་མི་འོང་བ་དད་པས་མོས་པ་ལུས་ཀྱིས་མངོན་སུམ་དུ་བྱེད་པ་མ་ཡིན་པ་ནི་འབྲས་བུ་ཁོ་ན་ལས་སོ། །དབང་པོ་རྟུལ་པོ་ཡིན་པའི་ཕྱིར་དབང་པོའི་
སྒོ་ནས་ཡོངས་སུ་རྫོགས་པ་མ་ཡིན་ནོ། །འགོག་པའི་སྙོམས་པར་འཇུག་པ་མེད་པའི་ཕྱིར་སྙོམས་པར་འཇུག་པའི་སྒོ་ནས་ཀྱང་མ་ཡིན་ནོ། །སློབ་པའི་འབྲས་བུའི་མཐར་གནས་པའི་ཕྱིར་འབྲས་བུ་ཁོ་ནའི་སྒོ་ནས་ཡོངས་སུ་རྫོགས་པ་ཡིན་ནོ། །མཐོང་བས་ཐོབ་པ་འདོད་ཆགས་དང་མ་
བྲལ་བ་ནི་དབང་པོ་ཁོ་ན་ལས་སོ་ཞེས་བྱ་བ་ནི་དེ་ནི་དབང་པོ་རྣོན་པོ་ཡིན་པའི་ཕྱིར་དབང་པོ་ཁོ་ནའི་སྒོ་ནས་ཡོངས་སུ་རྫོགས་ཀྱི། འདོད་ཆགས་དང་མ་བྲལ་བའི་ཕྱིར་སྙོམས་པར་འཇུག་པ་དང་འབྲས་བུའི་སྒོ་ནས་ཡོངས་སུ་རྫོགས་པ་ནི་མ་ཡིན་ནོ། །ཕྱིར་མི་འོང་བ་མཐོང་བས་ཐོབ་པ་
ལུས་ཀྱིས་མངོན་སུམ་དུ་བྱེད་པ་མ་ཡིན་པ་ནི་འབྲས་བུ་དང་དབང་པོ་ལས་སོ་ཞེས་བྱ་བ་ནི་དེ་དབང་པོ་རྣོན་པོ་ཡིན་པའི་ཕྱིར་དང་། སློབ་པའི་འབྲས་བུའི་མཐར་གནས་པའི་ཕྱིར་དབང་པོ་དང་འབྲས་བུའི་སྒོ་ནས་ཡོངས་སུ་རྫོགས་པ་ཡིན་གྱི། ལུས་ཀྱིས་མངོན་སུམ་དུ་མ་བྱས་པའི་

ཕྱིར་སྙོམས་པར་འཇུག་པའི་སྒོ་ནས་ནི་མ་ཡིན་ནོ། །དད་པས་མོས་པ་ལུས་ཀྱིས་མངོན་དུ་བྱེད་པ་ནི་འབྲས་བུ་དང་སྙོམས་པར་འཇུག་པ་ལས་སོ་ཞེས་བྱ་བ་ནི་དབང་པོ་རྟུལ་པོ་ཡིན་པའི་ཕྱིར་དབང་པོའི་སྒོ་ནས་ཡོངས་སུ་རྫོགས་པ་ནི་མེད་དོ། །ཕྱིར་མི་འོང་བ་ལུས་ཀྱིས་
མངོན་དུ་བྱེད་པ་ནི་འབྲས་བུ་དང་དབང་པོ་དང་སྙོམས་པར་འཇུག་པ་ལས་སོ་ཞེས་བྱ་བ་ནི་དབང་པོ་རྣོན་པོ་ཡིན་པའི་ཕྱིར་དང་། འགོག་པའི་སྙོམས་པར་འཇུག་པ་ཐོབ་པའི་ཕྱིར་དང་། སློབ་པའི་འབྲས་བུ་ཐམས་ཅད་ཐོབ་པའི་ཕྱིར་རོ། །སྙོམས་པར་འཇུག་པ་ཁོ་ན་དང་སྙོམས་པར་
འཇུག་པ་དང་དབང་པོ་ལས་ཡོངས་སུ་རྫོགས་པ་ཉིད་ནི་མེད་དོ་ཞེས་བྱ་བ་ནི་གང་གི་ཕྱིར་ཕྱིར་མི་འོང་བའི་འབྲས་བུ་མེད་པར་སློབ་པ་འགོག་པ་ལ་སྙོམས་པར་འཇུག་པ་མེད་དེ། གང་གི་ཕྱིར་འབྲས་བུ་མེད་པར་མི་སློབ་པ་ཉིད་ཡོད་པ་མ་ཡིན་པའི་ཕྱིར་རོ། །ཤེས་རབ་ཀྱིས་རྣམ་པར་
གྲོལ་བ་དུས་དང་མི་སྦྱོར་བར་རྣམ་པར་གྲོལ་བ་ནི་དབང་པོ་ཁོ་ན་ལས་སོ་ཞེས་བྱ་བ་ནི་འགོག་པའི་སྙོམས་པར་འཇུག་པ་མེད་པའི་ཕྱིར་སྙོམས་པར་འཇུག་པའི་སྒོ་ནས་ནི་མ་ཡིན་ནོ། །གཉི་གའི་ཆ་ལས་རྣམ་པར་གྲོལ་བ་ཞེས་བྱ་བ་རྒྱས་པར་འབྱུང་བ་ནི་དབང་པོ་རྟུལ་པོ་ཡིན་པའི་
ཕྱིར་དབང་པོའི་སྒོ་ནས་ནི་མ་ཡིན་ནོ། །གཉི་གའི་ཆ་ལས་རྣམ་པར་གྲོལ་བ་དུས་དང་མི་སྦྱོར་བ་ཞེས་བྱ་བ་ལ་སོགས་པ་ལ་དབང་པོ་རྣོན་པོ་ཡིན་པའི་ཕྱིར་དང་། འགོག་པའི་སྙོམས་པར་འཇུག་པ་ཐོབ་པའི་ཕྱིར་གཉིས་ཀྱིས་ཡོངས་སུ་རྫོགས་པ་ཉིད་དོ། །སྦྱོར་བའི་ལམ་ནི་གང་
གིས་མཇུག་ཐོགས་སུ་བར་ཆད་མེད་པའི་ལམ་སྐྱེ་བའོ་ཞེས་བྱ་བ་ནི་དཔེར་ན་ཆོས་ཀྱི་མཆོག་རྣམས་ལྟ་བུའོ། །མདོར་བྱས་པ་ལས་གོ་བཟློག་ནས་བསྟན་པ་ནི་ཚིག་ལེའུར་བྱས་པ་བསྡེབ་པ་དང་མཐུན་པར་བྱ་བའི་ཕྱིར་ཡིན་ནོ། །བར་ཆད་མེད་པའི་ལམ་ནི་གང་གིས་སྒྲིབ་པ་རབ་
ཏུ་སྤོང་བ་སྟེ་སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་པའོ། །དེ་སྤང་བར་བྱ་བའི་སྒྲིབ་པ་ལས་ངེས་པར་གྲོལ་བ་ཞེས་བྱ་བ་ནི། བར་ཆད་མེད་པའི་ལམ་དེས་སྤང་བར་བྱ་བའི་སྒྲིབ་པ་གང་ཡིན་པ་དེ་ལས་ངེས་པར་གྲོལ་བའོ། །དབང་པོ་ཉིད་དུ་སྐྱེ་བ་གང་ཡིན་པའོ་ཞེས་

བྱ་བ་ལ། དང་པོ་ནི་ཐོག་མ་སྟེ་དཔེར་ན་སྡུག་བསྔལ་ལ་སོགས་པ་དག་ལ་ཆོས་ཤེས་པ་བཞིན་ནོ། །དེ་ནི་སྡུག་བསྔལ་ལ་སོགས་པ་ཆོས་ཤེས་པའི་བཟོད་པས་སྤང་བར་བྱ་བའི་སྒྲིབ་པ་ལས་ངེས་པར་གྲོལ་བར་སྐྱེའོ། །དང་པོ་ཞེས་བྱ་བ་ཅིའི་ཕྱིར་གཞན་དུ་ནི་གལ་ཏེ་དེ་ལྟར་བརྗོད།
གང་གི་ཕྱིར་དེ་སྤང་བྱའི་སྒྲིབ་པ་ལས་གྲོལ་བར་སྐྱེའོ་ཞེས་དེ་སྐད་བཤད་ན། འདི་ཡང་བར་ཆད་མེད་པའི་ལམ་རྣམས་ཀྱི་སྔ་རོལ་དུ་སྤང་བྱའི་སྒྲིབ་པ་ལས་གྲོལ་བའི་ཕྱིར་རྣམ་པར་གྲོལ་བའི་ལམ་དུ་ཐལ་བར་འགྱུར་རོ། །ཁྱད་པར་གྱི་ལམ་ནི་དེ་དག་ལས་གཞན་པའི་ལམ་གང་ཡིན་
པའོ་ཞེས་བྱ་བ་ནི་སྦྱོར་བ་དང་བར་ཆད་མེད་པ་དང་རྣམ་པར་གྲོལ་བའི་ལམ་དག་ལས་གཞན་པའོ། །ལམ་ལ་རྗེས་སུ་ཤེས་པ་ནི་རྒྱུན་ཆགས་པ་ཡིན་ཏེ། དེའི་སྐད་ཅིག་མ་དང་པོ་མ་གཏོགས་པ་ལྷག་མ་ནི་ཁྱད་པར་གྱི་ལམ་མོ། །རྣམ་པར་གྲོལ་བའི་ཤེས་པ་རྒྱུན་ཆགས་པ་གཞན་ཡང་
དེ་དང་འདྲ་བ་བརྗོད་པར་བྱ་སྟེ། དཔེར་ན་ཟད་པ་ཤེས་པ་ལ་སོགས་པ་དང་། དེ་བཞིན་དུ་དགྲ་བཅོམ་པའི་མཐོང་བའི་ཆོས་ལ་བདེ་བར་གནས་པ་དང་། ཡོན་ཏན་ཁྱད་པར་ཅན་མངོན་པར་སྒྲུབ་པར་བྱེད་པའི་ལམ་གསུམ་མ་གཏོགས་པ་གང་ཡིན་པ་ལྟ་བུའོ། །གལ་ཏེ་གང་གི་
མཇུག་ཐོགས་སུ་བར་ཆད་མེད་པའི་ལམ་སྦྱོར་བའི་ལམ་ཡིན་ན། དེ་ལྟ་ན་ཆོས་ཀྱི་མཆོག་གི་སྔ་རོལ་གྱི་ལམ་གང་ཡིན་པ་དེ་ལ་ཇི་སྐད་དུ་བརྗོད་པར་བྱ་ཞེ་ན། སྦྱོར་བའི་ལམ་ཁོ་ན་ཡིན་མོད་ཀྱི་དེ་ནི་ཐག་རིང་བ་ཡིན་ནོ་ཞེས་བྱ་བ་འདི་ནི་ཆོས་མཆོག་དག་ལས་འདིའི་ཁྱད་པར་ཡིན་ནོ། །
སྒྲ་བྱེ་བྲག་ཏུ་བཤད་པ་དྲི་བའི་ཕྱིར་ཅིའི་ཕྱིར་ལམ་ཞེས་བྱ་བ་སྨོས་སོ། །མྱ་ངན་ལས་འདས་པའི་ལམ་ཡིན་ནོ་ཞེས་བྱ་བ་ལ། ལམ་དང་བཤུལ་ཞེས་བྱ་བ་ནི་རྣམ་གྲངས་བསྟན་པའོ། །ཇི་ལྟར་འདི་མྱ་ངན་ལས་འདས་པའི་ལམ་ཡིན་ཞེ་ན། དེའི་ཕྱིར་དེ་ནས་དེར་འགྲོ་བའི་ཕྱིར་
ཞེས་བྱ་བ་སྨོས་སོ། །ལམ་དེ་ནས་མྱ་ངན་ལས་འདས་པར་འགྲོ་བའི་ཕྱིར་རོ། །འདིས་ནི་མྱ་ངན་ལས་འདས་པ་འཚོལ་བའི་ཕྱིར་འདི་ནི་ཞེས་བྱ་བ་ནི་མྱ་ངན་ལས་འདས་པ་རྗེས་སུ་ཚོལ་ཞེས་བྱ་བའི་དོན་ཏོ། །རྣམ་པར་གྲོལ་བ་དང་ཁྱད་པར་ཅན་དང་ལམ་དག་ཇི་ལྟར་ན་ལམ་

ཉིད་ཡིན་ཞེས་བྱ་བ་ནི་སྦྱོར་བ་དང་བར་ཆད་མེད་པའི་ལམ་དག་ཁོ་ནས་ཉོན་མོངས་པ་སྤོང་བར་ནུས་ཀྱི། རྣམ་པར་གྲོལ་བ་དང་ཁྱད་པར་གྱི་ལམ་དག་གིས་ནི་མ་ཡིན་ཏེ། ཉོན་མོངས་པ་རྣམས་སྤངས་ཟིན་པའི་ཕྱིར་རོ་སྙམ་དུ་བསམས་པའོ། །དེ་དང་འདྲ་བ་དང་ཆེས་ཆེ་
བ་ཡིན་པའི་ཕྱིར་ཏེ་ཞེས་བྱ་བ་ལ། དེ་དག་ནི་སྤངས་པའི་ལམ་དང་འདྲ་བ་ཡིན་ཏེ་རབ་ཏུ་དབྱེ་བ་དང་དམིགས་པ་དང་རྣམ་པ་འདྲ་བའི་ཕྱིར་རོ། །ཆེས་ཆེ་བ་ནི་རྒྱུ་རྒྱས་པའི་ཕྱིར་རོ། །དེའི་ཕྱིར་དེ་དག་ཀྱང་ལམ་ཉིད་ཡིན་ནོ། །དེ་དག་ནི་གོང་ནས་གོང་དུ་ཕྱིན་པར་བྱེད་པའི་ཕྱིར་ཡང་ལམ་
ཉིད་ཡིན་ནོ། །དེ་ལྟ་ན་ཁྱད་པར་གྱི་ལམ་ཉིད་ཡིན་པ་ཉམས་པར་འགྱུར་ཏེ་དེའི་གོང་ན་ལམ་མེད་པའི་ཕྱིར་རོ་ཞེ་ན། དེའི་ཕྱིར་ཕུང་པོ་ལྷག་མ་མ་ལུས་པར་འཇུག་པའི་ཕྱིར་རོ་ཞེས་བྱ་བ་སྨོས་ཏེ། གང་གི་ཕྱིར་ལམ་དུ་གྱུར་པ་དེ་དག་ནས་ཕུང་པོ་ལྷག་མ་མེད་པའི་དབྱིངས་སུ་འཇུག་པས་དེའི་
ཕྱིར་དེ་གཉིས་ཀྱང་ལམ་ཡིན་ནོ། །མྱ་ངན་ལས་འདས་པ་སྒྲུབ་པར་བྱེད་པའི་ཕྱིར་ཞེས་བྱ་བ་ནི་གང་གི་ཕྱིར་དེས་མྱ་ངན་ལས་འདས་པ་སྒྲུབ་པར་བྱེད་ཅེས་བྱ་བའི་དོན་ཏོ། །དེ་བཞིན་དུ་སླ་བ་ཡང་རྣམ་པ་གཉིས་སོ་ཞེས་བྱ་བ་ནི་མངོན་པར་ཤེས་པ་བུལ་བ་སླ་བའི་ལམ་ཡང་
ཡོད། མངོན་པར་ཤེས་པ་མྱུར་བ་སླ་བའི་ལམ་ཡང་ཡོད་ཞེས་བྱ་བའོ། །ཡང་ཇི་ལྟར་དེ་དག་རྣམ་པར་གཞག་ཅེ་ན། ས་དང་དབང་པོའི་སྒོ་ནས་སོ། །དེ་ཉིད་བསྟན་པའི་ཕྱིར། བསམ་གཏན་དག་གི་ལམ་རྣམས་སླ། །ཞེས་བྱ་བ་ལ་སོགས་པ་སྨོས་སོ། །ཡན་ལག་གིས་
ཡོངས་སུ་ཟིན་པ་དང་། ཞི་གནས་དང་ལྷག་མཐོང་མཉམ་པ་དག་གིས་ཞེས་བྱ་བ་ཡན་ལག་དག་གིས་ཡོངས་སུ་ཟིན་པ་ནི་ཡན་ལག་གིས་ཡོངས་སུ་ཟིན་པའོ། །ཡན་ལག་གིས་ཡོངས་སུ་ཟིན་པ་ཞི་གནས་ལྷག་མཐོང་མཉམ་པ་ཉིད་ཅེས་ཚིག་རྣམ་པར་སྦྱར་ཏེ། དེ་དག་གིས་
འབད་མི་དགོས་པར་ངང་གིས་འབྱུང་བའི་ཕྱིར་བསམ་གཏན་དག་གི་ལམ་ནི་ལམ་སླ་བ་ཡིན་ནོ། །བསམ་གཏན་དག་གི་ཡན་ལག་གིས་ཡོངས་སུ་ཟིན་པ་དང་། ཞི་གནས་དང་ལྷག་མཐོང་མཉམ་པ་ཉིད་དུ་གྱུར་པ་ཡིན་ནོ། །དེའི་ཕྱིར་དེའི་ལམ་ནི་འབད་མི་དགོས་པར་ངང་གིས་

འབྱུང་བ་ཡིན་ཏེ་ཆུ་ལ་གཟིངས་བཞིན་ནོ། །དེའི་ཕྱིར་དེ་ནི་ལམ་སླ་བ་ཡིན་ནོ། །བསམ་གཏན་གྱི་དངོས་གཞི་དག་ལས་གཞན་པའི་ས་ཟག་པ་མེད་པ་རྣམས་ཀྱི་ལམ་གང་ཡིན་པ་དེ་ནི་འབད་ནས་འབྱུང་བའི་ཕྱིར་ལམ་དཀའ་བ་ཡིན་ཏེ་ཐང་ལ་གཟིངས་བཞིན་ནོ། །འབད་ནས་འབྱུང་བ་ནི་
དེ་ན་ཡན་ལག་གིས་ཟིན་པ་མེད་པའི་ཕྱིར་དང་ཞི་གནས་དང་ལྷག་མཐོང་ཆུང་བའི་ཕྱིར་རོ། །འཕགས་པའི་ལམ་ནི་དཀའ་བའི་བདག་ཉིད་མ་ཡིན་པའི་ཕྱིར་དང་སྡུག་བསྔལ་བ་ཚོར་བ་དང་མཚུངས་པར་ལྡན་པ་མ་ཡིན་པའི་ཕྱིར་དཀའ་བར་མི་བརྗོད་དོ། །དེ་བཞིན་དུ་མི་
ལྕོགས་པ་མེད་པ་དང་བསམ་གཏན་ཁྱད་པར་ཅན་གྱི་ལམ་ནི་ཞི་གནས་ཆུང་ངུ་། གཟུགས་མེད་པ་དག་ན་ནི་ལྷག་མཐོང་ཆུང་ངུ་ཐམས་ཅད་ན་ཏིང་ངེ་འཛིན་ཡན་ལག་གིས་ཡོངས་སུ་མ་ཟིན་པ་ཡིན་ནོ། །སའི་བྱེ་བྲག་གིས་རྣམ་པ་གཉིས་སུ་ཕྱེ་བ་གང་ཡིན་པ་དེ་ཁོ་ན་རེ་རེ་ཞིང་དབང་
པོའི་བྱེ་བྲག་གིས་རྣམ་གཉིས་ཡིན་ཏེ། དེ་ཉིད་ཀྱི་ཕྱིར་ལམ་དེ་ཡང་རྣམ་པ་གཉིས་ཏེ་ཞེས་བྱ་བ་རྒྱས་པར་སྨོས་སོ། །ལམ་འདི་ལ་མངོན་པར་ཤེས་པ་བུལ་བ་ཡོད་པས་ན་མངོན་པར་ཤེས་པ་བུལ་བའོ། །བུལ་བ་ཞེས་བྱ་བ་ནི་ཆུང་བ་ཞེས་བྱ་བའི་དོན་གང་ཡིན་པའོ། །མངོན་
པར་ཤེས་པ་ནི་ཤེས་རབ་སྟེ། འདིས་མངོན་དུ་ཆོག་ནས་རབ་ཏུ་ཤེས་པས་ན་མངོན་པར་ཤེས་པའོ། །གཞན་དག་ན་རེ། འདིས་མྱུར་དུ་ཤེས་པས་མ་ཡིན་གྱི་བུལ་བར་ཤེས་པས་མངོན་པར་ཤེས་པ་བུལ་བའོ་ཞེས་ཟེར་རོ། །ཡང་ན་འདི་གང་ཟག་མོང་རྟུལ་པོ་ཡིན་པས་ཞེས་
བྱ་བ་ནི་བླུན་པོ་ཡིན་པས་ཞེས་བྱ་བའི་ཐ་ཚིག་གོ། །མོང་རྟུལ་བ་ཡང་གང་ཞིག་ཅེ་ན་དབང་པོ་རྟུལ་པོ་གང་ཡིན་པ་སྟེ། མངོན་པར་ཤེས་པ་མྱུར་བ་ནི་འདི་ལས་བཟློག་པ་ཡིན་པར་རིག་པར་བྱའོ། །དཀའ་བ་དང་སླ་བའམ་བུལ་བ་དང་མྱུར་བའི་ལམ་ནི་ཕུང་པོ་ལྔའི་རང་བཞིན་དུ་རིག་
པར་བྱས་ལ། ཤེས་རབ་གཙོ་བོར་བསྟན་པའི་ཕྱིར་ནི་མངོན་པར་ཤེས་པ་ཞེས་བཤད་དོ། །ཡང་ཅི་དབང་པོ་འབྲིང་པོ་ཡང་ཡོད་པ་མ་ཡིན་ནམ། གང་གི་ཕྱིར་ལམ་རྣམས་སུ་དབང་པོ་རྟུལ་པོ་དང་རྣོན་པོ་དག་ཁོ་ན་བཤད་ཅེ་ན། ཁ་ཅིག་ན་རེ་ཡོད་པ་མ་ཡིན་ཏེ་དད་པ་དང་ཆོས་

ཀྱི་རྗེས་སུ་འབྲང་བ་ལ་སོགས་པའི་དབྱེ་བས་ལམ་རྣམ་པ་གཉིས་བསྟན་པའི་ཕྱིར་རོ་ཞེས་ཟེར་རོ། །གཞན་དག་ནི་དབང་པོ་འབྲིང་པོ་ངེས་པར་ཁས་བླང་བར་བྱ་སྟེ། འདི་ལྟར་ཉན་ཐོས་ཆེན་པོ་དང་རང་སངས་རྒྱས་དང་སངས་རྒྱས་རྣམས་ཆོས་ཀྱི་རྗེས་སུ་འབྲང་
བའི་རིགས་ཅན་ཡིན་ཡང་དབང་པོ་མི་མཚུངས་པ་བཞིན་ནོ། །འོ་ན་ལམ་རྣམས་སུ་འབྲིང་པོ་ཅིའི་ཕྱིར་མ་སྨོས་ཤེ་ན། མངོན་པར་མི་གསལ་བ་ཡིན་ཏེ། འཇིག་རྟེན་ན་ཡང་མཆོག་དང་ཐ་མ་དག་གི་ཆོས་ཁོ་ནའི་དོན་རབ་ཏུ་གསལ་བ་ཡིན་གྱི་འབྲིང་པོ་ནི་མ་ཡིན་པ་བཞིན་ནོ་ཞེས་
ཟེར་རོ། །འདིས་ལམ་རྣམ་པ་གཉིས་སོ་སོར་བཤད་དོ། །དྲན་པ་ཉེ་བར་གཞག་པ་བཞི་ནི་ལུས་དང་ཚོར་བ་དང་སེམས་དང་ཆོས་དྲན་པ་ཉེ་བར་གཞག་གོ། །ཡང་དག་པར་སྤོང་བ་བཞི་ཞེས་བྱ་བ་ནི་སྡིག་པ་མི་དགེ་བའི་ཆོས་སྐྱེས་པ་རྣམས་སྤང་བའི་ཕྱིར་ཞེས་བྱ་བ་དང་།
མ་སྐྱེས་པ་རྣམས་མི་སྐྱེ་བའི་ཕྱིར་ཞེས་བྱ་བ་དང་། དགེ་བའི་ཆོས་མ་སྐྱེས་པ་རྣམས་བསྐྱེད་པའི་ཕྱིར་ཞེས་བྱ་བ་དང་། དགེ་བའི་ཆོས་སྐྱེས་པ་རྣམས་གནས་པ་དང་ཞེས་བྱ་བའོ། །རྫུ་འཕྲུལ་གྱི་རྐང་པ་བཞི་ཞེས་བྱ་བ་འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་
གྱི་རྐང་པ་དང་། བརྩོན་འགྲུས་ཀྱི་ཏིང་ངེ་འཛིན་དང་སེམས་ཀྱི་ཏིང་ངེ་འཛིན་དང་། སྤྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་རྣམས་སོ། །འདུན་པའི་བདག་པོའི་རྐྱེན་ལས་སྐྱེས་པའི་ཏིང་ངེ་འཛིན་ནི་འདུན་པའི་ཏིང་ངེ་འཛིན་ཏེ། དེ་བཞིན་དུ་
བརྩོན་འགྲུས་དང་སེམས་དང་སྤྱོད་པའི་ཏིང་ངེ་འཛིན་རྣམས་ལ་ཡང་བརྗོད་པར་བྱའོ། །འདུན་པ་དང་རྩོལ་བ་དང་དད་པ་དང་ཤིན་ཏུ་སྦྱངས་པ་དང་དྲན་པ་དང་ཤེས་བཞིན་དང་སེམས་པ་སྟེ། འདུན་པ་འདི་དག་ནི་སྤོང་བའི་འདུ་བྱེད་དོ། །སྤོང་བའི་འདུ་བྱེད་འདི་ཉིད་ལ་སྔོན་དུ་འགྲོ་བ་
འདུན་པའི་ཏིང་ངེ་འཛིན་ཏེ། གཉི་ག་ཡང་འདུན་པའི་ཏིང་ངེ་འཛིན་སྤང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་ཞེས་བྱ་སྟེ། དེ་བཞིན་དུ་ལྷག་མ་རྣམས་ལ་ཡང་བརྗོད་པར་བྱའོ། །རྫུ་འཕྲུལ་གྱི་རྐང་པ་ནི་རྫུ་འཕྲུལ་གྱི་རྒྱུ་ཞེས་བྱ་བའི་ཐ་ཚིག་གོ། །དབང་པོ་ལྔ་ནི་དད་པ་དང་།

བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ཀྱི་དབང་པོ་དག་གོ། །སྟོབས་ལྔ་ནི་དད་པ་དང་བརྩོན་འགྲུས་དང་དྲན་པ་དང་ཏིང་ངེ་འཛིན་དང་ཤེས་རབ་ཀྱི་སྟོབས་དག་གོ། །བྱང་ཆུབ་ཀྱི་ཡན་ལག་བདུན་ནི་དྲན་པ་དང་ཆོས་རབ་ཏུ་རྣམ་པར་འབྱེད་པ་དང་དགའ་བ་དང་ཤིན་ཏུ་སྦྱངས་
པ་དང་། ཏིང་ངེ་འཛིན་དང་བཏང་སྙོམས་ཡང་དག་བྱང་ཆུབ་ཀྱི་ཡན་ལག་དག་གོ། །འཕགས་པའི་ལམ་ཡན་ལག་བརྒྱད་ནི་ཡང་དག་པའི་ལྟ་བ་དང་། རྟོག་པ་དང་། ངག་དང་། ལས་ཀྱི་མཐའ་དང་། འཚོ་བ་དང་། རྩོལ་བ་དང་། དྲན་པ་དང་། ཏིང་ངེ་འཛིན་ཏོ། །གང་ཟག་གི་བྱེ་བྲག་
གིས་ཞེས་བྱ་བ་ནི་ཉན་ཐོས་དང་རང་སངས་རྒྱས་དང་རྫོགས་པའི་སངས་རྒྱས་ཏེ་དེ་ཉིད་ཀྱི་ཕྱིར་ཉན་ཐོས་ཀྱི་བྱང་ཆུབ་ཅེས་བྱ་བ་ལ་སོགས་པ་སྨོས་སོ། །མ་རིག་པ་མ་ལུས་པར་སྤང་བའི་ཕྱིར་ཞེས་བྱ་བ་ནི་ཁམས་གསུམ་པའི་མ་རིག་པ་སྤངས་པའི་ཕྱིར་དེ་གཉི་གའི་བྱང་ཆུབ་ཡིན་ནོ། །གཞན་
ཡང་དེ་གཉིས་ཀྱིས་རང་གི་དོན་ཞེས་བྱ་བ་རྒྱས་པར་འབྱུང་སྟེ། ཟད་པ་ཤེས་པས་རང་གི་དོན་བྱས་པ་རྟོགས་པའི་ཕྱིར་རོ། །ཇི་ལྟར་ཞེ་ན། བདག་གིས་སྡུག་བསྔལ་ཡོངས་སུ་ཤེས་སོ་ཞེས་བྱ་བ་རྒྱས་པར་འབྱུང་བའོ། །མི་སྐྱེ་བ་ཤེས་པས་རང་གི་དོན་ཡང་བྱར་མེད་པ་ཉིད་རྟོགས་
པའི་ཕྱིར་ཏེ། ཟད་པ་དང་མི་སྐྱེ་བ་ཤེས་པའི་ཕྱིར་བྱང་ཆུབ་ཅེས་སྦྱར་རོ། །ཇི་ལྟར་ཞེ་ན། ཡང་ཡོངས་སུ་ཤེས་པར་བྱར་མེད་དོ་ཞེས་བྱ་བ་ལ་སོགས་པའོ། །དེ་དང་མཐུན་ཉིད་ཕྱིར་ཞེས་བྱ་བ་ལ། །དེ་དང་མཐུན་པའི་དངོས་པོ་ནི་དེ་དང་མཐུན་པ་ཉིད་དེའི་ཚོགས་ཡིན་པའི་ཕྱིར་ཞེས་
བྱ་བའི་ཐ་ཚིག་གོ། །ཚུལ་ཁྲིམས་ཀྱི་ཡན་ལག་རྣམས་ཞེས་བྱ་བ་ནི་ཡང་དག་པའི་ངག་དང་ལས་ཀྱི་མཐའ་དང་འཚོ་བ་སྟེ་དེ་ནི་རྣམ་པར་རིག་བྱེད་མ་ཡིན་པའི་རང་བཞིན་དུ་ཁྱད་པར་མེད་པས་རྫས་གཅིག་གི་བདག་ཉིད་དུ་རྣམ་པར་གཞག་གོ། །བྱེ་བྲག་ཏུ་སྨྲ་བ་རྣམས་ཇི་ལྟར་ན་ལུས་
དང་ངག་གི་ལས་དག་ཐ་དད་ཅིང་ཞེས་བྱ་བ་ནི། མ་འཆོལ་པའི་ཕྱིར་ཞེས་བྱ་བའི་དོན་ཏོ། །རྣམ་པར་རིག་བྱེད་མ་ཡིན་པ་མཚུངས་ཀྱང་དེ་དག་མཚན་ཉིད་འཆོལ་པ་མེད་དེ། འདི་ལྟར་སྲོག་གཅོད་པ་ལ་སོགས་པ་སྤོང་བས་བསྡུས་པ་རྣམ་པ་གསུམ་ལུས་ཀྱི་ལས་ཁོ་ན་ཡིན་པས་

རྫས་གཅིག་གོ། །བརྫུན་སྨྲ་བ་ལ་སོགས་པ་སྤོང་བས་བསྡུས་པ་རྣམ་པ་བཞི་ཡང་ངག་གི་ལས་ཁོ་ན་ཡིན་པས་རྫས་གཅིག་སྟེ་དེ་ལྟར་རྫས་བཅུ་གཅིག་གོ་ཞེས་ཟེར་རོ། །གཙོ་བོ་སྨོས་པ་ཞེས་བྱ་བ་རྒྱས་པར་འབྱུང་བ་ལ། ཤེས་རབ་གཙོ་བོར་གྱུར་པ་ནི་དྲན་པ་ཉེ་བར་
གཞག་པ་སྟེ་དེའི་ཕྱིར་དྲན་པ་གཞག་ཤེས་རབ་སྟེ་ཞེས་བཤད་དོ། །ཡང་ཤེས་རབ་ཁོ་ན་ནི་མ་ཡིན་ཏེ་ཐམས་ཅད་དུ་ཤེས་རབ་དང་མཚུངས་པར་ལྡན་པའི་ཡོན་ཏན་དད་པ་དང་བརྩོན་འགྲུས་དང་དྲན་པ་དང་དགའ་བ་དང་བཏང་སྙོམས་ལ་སོགས་པ་རྣམས་སོ། །སྦྱོར་བ་ལས་བྱུང་བ་ནི་
ཟག་པ་དང་བཅས་པ་དང་ཟག་པ་མེད་པ་རྣམས་ཏེ། ཐོས་པ་དང་བསམ་པ་དང་བསྒོམ་པ་ལས་བྱུང་བ་ཅི་རིགས་པར་དྲན་པ་ཉེ་བར་གཞག་པ་རྣམས་སོ། །སྦྱོར་བ་ལས་བྱུང་བ་སྨོས་པ་ནི་སྐྱེ་བས་ཐོབ་པའི་དད་པ་ལ་སོགས་པ་ལས་ཁྱད་པར་དུ་བྱ་བའི་ཕྱིར་རོ། །དེ་བཞིན་དུ་ཡང་
དག་པར་སྤོང་བ་དང་རྫུ་འཕྲུལ་གྱི་རྐང་པ་རྣམས་ལ་ཡང་བརྗོད་པར་བྱའོ། །གཙོ་བོ་ནི་དེའི་སྟོབས་ཀྱིས་གཞན་དག་ཀྱང་གནས་པའོ། །རབ་ཏུ་འཇོག་པ་ཞེས་བྱ་བ་ནི་རབ་ཏུ་འབྱིན་པར་བྱེད་པ་དང་འཛིན་པ་དང་། རེས་འགའ་འཇུག་པ་དང་རེས་འགའ་ངེས་པར་འབྱེད་པ་ཞེས་བྱ་
བའི་ཐ་ཚིག་སྟེ། དེ་རབ་ཏུ་གནས་པའི་ཕྱིར་རོ། །དེ་ནི་ཡོན་ཏན་ཐམས་ཅད་འབྱོར་པའི་རྟེན་ཡིན་པའི་ཕྱིར་རོ་ཞེས་བྱ་བ་ནི་གཞི་ཡིན་པའི་ཕྱིར་རོ་ཞེས་བྱ་བའི་དོན་ཏོ། །དེ་ལྟར་ན་རྫུ་འཕྲུལ་ནི་འབྱོར་པར་བྱེད་པ་ཡིན་པ། དེའི་རྒྱུ་ཡིན་པའི་ཕྱིར་རྐང་པ་ནི་ཏིང་ངེ་འཛིན་རྣམས་ཏེ།
ཏིང་ངེ་འཛིན་ལ་རག་ལས་པས་ཡོན་ཏན་རྣམས་འབྱོར་པར་བྱེད་པ་ཡིན་ནོ། །བྱེ་བྲག་ཏུ་སྨྲ་བ་གང་དག་འདིས་འབྱོར་པར་བྱེད་པ་རྫུ་འཕྲུལ་ནི་ཏིང་ངེ་འཛིན་ཁོ་ན་ཡིན་ནོ་ཞེས་ཟེར་བ་དེ་དག་གི་ལྟར་ན། འདུན་པ་དང་སེམས་ལྷག་པའི་ཕྱིར་བརྩོན་འགྲུས་ནི་ཡང་དག་པར་སྤོང་བའི་
ནང་དུ་འདུས་ལ། དཔྱོད་པ་ནི་ཤེས་རབ་ཀྱི་རང་བཞིན་ཡིན་པའི་ཕྱིར་དྲན་པ་ཉེ་བར་གཞག་པ་དག་གི་ནང་དུ་འདུས་སོ། །འདུན་པ་དང་སེམས་ནི་སྔར་བཤད་པའི་བྱང་ཆུབ་ཀྱི་ཕྱོགས་དང་མཐུན་པ་དག་གི་ནང་དུ་བསྡུ་བར་མི་ནུས་སོ། །རྫུ་འཕྲུལ་གྱི་རྐང་པ་བྱང་ཆུབ་ཀྱི་ཕྱོགས་ཉིད་

དུ་འདོད་པས་འདུན་པ་དང་སེམས་དག་སྔར་བཤད་པ་བཅུ་གཅིག་གི་སྟེང་དུ་བསྣན་པས་བཅུ་གསུམ་དུ་འགྱུར་རོ། །རྫུ་འཕྲུལ་ཏིང་ངེ་འཛིན་ཁོ་ན་ཡིན་པ་ནི་མདོ་དང་འགལ་ཏེ། མཉན་ཡོད་དུ་གསུངས་པ་དགེ་སློང་དག་ངས་ཁྱེད་རྣམས་ལ་རྫུ་འཕྲུལ་དང་རྫུ་འཕྲུལ་གྱི་རྐང་པ་དང་རྫུ་འཕྲུལ་
གྱི་རྐང་པ་སྒོམ་པར་བྱེད་པའི་ལམ་དག་ཀྱང་བཤད་ཀྱིས་ལེགས་པར་རབ་ཏུ་ཉོན་ལ་ཡིད་ལ་གྱིས་ཤིག །རྫུ་འཕྲུལ་གང་ཞེ་ན་འདི་ན་དགེ་སློང་རྫུ་འཕྲུལ་གྱི་ཡུལ་རྣམ་པ་དུ་མ་ཉམས་སུ་མྱོང་བར་བྱེད་པ་ཡིན་ཏེ། གཅིག་ཏུ་གྱུར་ནས་མང་པོར་འགྱུར། མང་པོར་གྱུར་ནས་གཅིག་ཏུ་
འགྱུར། སྣང་བར་འགྱུར་བ་དང་མི་སྣང་བར་འགྱུར་བ་ཤེས་པ་དང་མཐོང་བས་ཉམས་སུ་མྱོང་བར་བྱེད། རྩིག་པ་ལ་ཡང་ཐད་ཀར་འགྲོ། ར་བ་ལ་ཡང་ཐད་ཀར་འགྲོ། རི་ལ་ཡང་ལུས་མི་ཐོགས་པར་འགྲོ་སྟེ། དཔེར་ན་མཁའ་ལ་བྱ་བ་བཞིན་ནོ། །ས་ལ་ཡང་སྟེང་དུ་འབྱུང་བ་དང་
འོག་ཏུ་འཛུལ་བར་བྱེད་དེ། དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་མི་ནུབ་པར་འགྲོ་སྟེ། དཔེར་ན་ས་ལ་བྱ་བ་བཞིན་ནོ། །ནམ་མཁའ་ལ་ཡང་སྐྱིལ་མོ་ཀྲུང་གིས་འགྲོ་སྟེ་དཔེར་ན་འདབ་ཆགས་བྱ་བཞིན་ནོ། །ཉི་མ་དང་ཟླ་བ་འདི་ལྟར་མཐུ་ཆེ་བ་འདི་ལྟར་རྫུ་འཕྲུལ་ཆེ་བ་ཡང་ལག་
པས་ཀུན་ཏུ་ཉུག་པར་བྱེད་ཅིང་ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་བསྒྱུར་བ་འདི་ནི་རྫུ་འཕྲུལ་ཞེས་བྱའོ། །རྐང་པ་རྣམས་གང་ཞེ་ན། འདུན་པའི་ཏིང་ངེ་འཛིན་ནས་དཔྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་ཞེས་རྒྱ་ཆེར་གསུངས་ཏེ།
འདིར་ཏིང་ངེ་འཛིན་གྱི་འབྲས་བུ་ལ་རྫུ་འཕྲུལ་གྱི་སྒྲས་གསུངས་ཀྱི། ཏིང་ངེ་འཛིན་ཉིད་ལ་ནི་མ་ཡིན་པས། དེའི་ཕྱིར་ཇི་སྐད་བཤད་པའི་ཏིང་ངེ་འཛིན་རྣམས་རྫུ་འཕྲུལ་གྱི་རྐང་པ་ཉིད་དོ། །འདུན་པ་ལ་སོགས་པའི་ཞེས་བྱ་བ་ནི་ཇི་སྐད་བཤད་པའི་ཏིང་ངེ་འཛིན་ནི་རྫུ་འཕྲུལ་གྱི་རྐང་པ་
སྟེ། འདུན་པ་ལ་སོགས་པ་བརྗོད་པ་ནི་ཏིང་ངེ་འཛིན་བཞི་ཚན་དུ་ཤེས་པར་བྱ་བའི་ཕྱིར་རོ། །བརྫི་བ་དང་བརྫི་བ་མེད་པའི་ཕྱིར་རོ་ཞེས་བྱ་བ་ལ། དབང་པོ་རྣམས་ནི་དེའི་མི་མཐུན་ཕྱོགས་ཀུན་ཏུ་འབྱུང་བས་བརྫི་བའི་ཕྱིར་རོ། །དེའི་མི་མཐུན་པའི་ཕྱོགས་ཀྱང་མ་དད་པ་དང་ལེ་ལོ་དང་

བརྗེད་པ་དང་རྣམ་པར་གཡེང་བ་དང་ཚུལ་བཞིན་མ་ཡིན་པ་ཡིད་ལ་བྱེད་པ་རྣམས་སོ། །དེ་དག་མི་མཐུན་པའི་ཕྱོགས་ཆེན་པོས་ཀྱང་མི་བརྫི་བའི་ཕྱིར་སྟོབས་ཞེས་བྱའོ། །རབ་ཏུ་འབྱེད་ཅེས་བྱ་བ་ནི་རྣམ་པར་འཇོག་པའོ། །ལས་དང་པོ་པའི་སྐབས་སུ་ཞེས་བྱ་བ་
རྒྱས་པར་འབྱུང་སྟེ། ལུས་དང་ཚོར་བ་དང་སེམས་དང་ཆོས་ཀྱི་རང་བཞིན་ཉེ་བར་བརྟག་པར་བྱ་བའི་ཕྱིར་རོ། །དྲོ་བར་གྱུར་པ་ལ་སོགས་པའི་སྔ་རོལ་གྱི་གནས་སྐབས་སུ་དྲན་པ་ཉེ་བར་གཞག་པ་རྣམས་རབ་ཏུ་འབྱེད་དོ་ཞེས་སྦྱར་རོ། །ཁྱད་པར་ཐོབ་
པའི་རྒྱུས་དེའི་ཁྱད་པར་ཐོབ་པར་འགྱུར་རོ་ཞེས་སྦྱར་ཏེ། གཏེར་བརྐོ་བ་བཞིན་ནོ། །དེའི་ཕྱིར་བརྩོན་འགྲུས་ཡང་དག་པར་འཕེལ་བས་དྲོ་བར་གྱུར་པ་རྣམས་སུ་ཡང་དག་པར་སྤོང་བ་རྣམས་འཐོབ་བོ། །ཅི་ལྟར་ཞེ་ན་དྲོ་བར་གྱུར་པ་ཁྱད་པར་ཐོབ་པ་ལམ་གྱི་སྔ་རོལ་དུ་མ་ཡིན་གྱི་བསྒོམ་
པ་དང་ལྡན་པའི་ཐོག་མ་ནས་ངེས་པར་འབྱེད་པའི་ཆ་དང་མཐུན་པའི་ཆོས་འཐོབ་པོ། །གཞན་དག་ན་རེ་དེའི་འཁོར་བ་དང་མྱ་ངན་ལས་འདས་པ་དག་གི་ཉེས་དམིགས་དང་ཕན་ཡོན་མཐོང་བ་ལས་བརྩོན་འགྲུས་སྟོབས་དང་ལྡན་པ་བརྩམ་པའི་ཕྱིར་འཁོར་བ་ལས་འདའོ་ཞེས་ཟེར་རོ། །
ཡོངས་སུ་མི་ཉམས་པའི་དགེ་བའི་རྩ་བ་ལ་འཇུག་པའི་ཕྱིར་ཞེས་བྱ་བ་ལ། གང་གི་ཕྱིར་ཡོངས་སུ་མི་ཉམས་པ་བཟོད་པས་བསྡུས་པའི་དགེ་བའི་རྩ་བ་རྣམས་ཀྱིས་རྩེ་མོ་ལ་འཇུག་སྟེ། རབ་ཏུ་འཇུག་པ་འདི་དག་གིས་ཞུགས་པས་དེའི་གནས་སྐབས་སུ་ཏིང་ངེ་འཛིན་ཡང་དག་པར་
འབྱོར་པའི་རྟེན་དུ་གྱུར་པས་ན། རྩེ་མོ་ལ་ནི་རྫུ་འཕྲུལ་གྱི་རྐང་པ་རྣམས་རྣམ་པར་གཞག་གོ། །གཞན་དག་ན་རེ་རྩེ་མོ་ལ་ཏིང་ངེ་འཛིན་གྱི་སྟོབས་ཀྱིས་སེམས་ཚར་གཅད་པ་དང་ཡོངས་སུ་གཟུང་བ་མེད་པས་ནམ་ཡང་དགེ་བའི་རྩ་བ་ཅུང་ཟད་ཀྱིས་དབུལ་བ་མ་ཡིན་པས། དེའི་
ཕྱིར་རྩེ་མོ་ལ་རྫུ་འཕྲུལ་གྱི་རྐང་པ་རབ་ཏུ་ཕྱེའོ་ཞེས་ཟེར་རོ། །དབང་ཐོབ་པའི་ཕྱིར་ཞེས་བྱ་བ་རྒྱས་པར་འབྱུང་བ་ལ། གང་གི་ཕྱིར་གནས་སྐབས་དེའི་དད་པ་ལ་སོགས་པ་དག་ལས་ཡོངས་སུ་ཉམས་པར་མི་འགྱུར་བ་དེའི་ཕྱིར་བཟོད་པ་དག་ལ་དབང་ཐོབ་པས་འཇིག་རྟེན་ལས་

འདས་པའི་ལམ་འདྲེན་པ་ལ་དབང་ཐོབ་པར་བྱེད་དོ་ཞེས་ཟེར་རོ། །གཞན་དག་ན་རེ་འདིས་ངན་སོང་ཤིན་ཏུ་བཟློག་པ་ལ་དབང་ཐོབ་པས་སོ་ཞེས་ཟེར་རོ། ཉོན་མོངས་པ་རྣམས་ཀྱིས་མི་བརྫི་བའི་ཕྱིར་ཞེས་བྱ་བ་ནི། གནས་སྐབས་དེའི་དད་པ་ལ་སོགས་པ་རྣམས་ནི་ཉོན་མོངས་པ་རྣམས་
ཀྱིས་མི་བརྫི་བ་ཡིན་ནོ། །དེ་ལ་གནས་སྐབས་སུ་ཉོན་མོངས་པ་ཀུན་ཏུ་མི་འབྱུང་བ་བཟོད་པ་རྣམས་ལ་ཡང་ཡོད་སྲིད་པས་དེའི་ཕྱིར་འཇིག་རྟེན་པའི་ཆོས་གཞན་གྱིས་མི་བརྫི་བའི་ཕྱིར་ཞེས་བྱ་བ་སྨོས་སོ། །ཇི་ལྟར་མི་བརྫི་ཞེ་ན་དེའི་མཇུག་ཐོགས་སུ་སྡུག་བསྔལ་ལ་ཆོས་ཤེས་
པའི་བཟོད་པ་སྐྱེ་བའི་ཕྱིར་རོ། །བྱང་ཆུབ་དང་ཉེ་བའི་ཕྱིར་ཞེས་བྱ་བ་ནི་ཟད་པ་དང་མི་སྐྱེ་བ་ཤེས་པ་དང་ཉེ་བའི་ཕྱིར་ཞེས་བྱ་བའི་ཐ་ཚིག་གོ། །གཞན་དག་ན་རེ་བསྒོམ་པའི་ལམ་ལ་ཉོན་མོངས་པའི་རྣམ་པ་དགུ་སྤོང་བ་ཡོད་པ་ཡང་དང་ཡང་དུ་མངོན་པར་རྫོགས་པར་རྟོགས་པའི་ཕྱིར་བྱང་ཆུབ་
ཀྱི་ཡན་ལག་རྣམས་སོ་ཞེས་ཟེར་རོ། །འགྲོ་བས་རབ་ཏུ་ཕྱེ་བའི་ཕྱིར་མཐོང་བའི་ལམ་ལ་ལམ་གྱི་ཡན་ལག་རྣམས་སོ། །དེ་ནི་མྱུར་བར་འགྲོ་བའི་ཕྱིར་རོ་ཞེས་བྱ་བ་ནི་མཐོང་བའི་ལམ་གྱི་སྐད་ཅིག་མ་བཅོ་ལྔས་ཁམས་གསུམ་པའི་སྡུག་བསྔལ་ལ་སོགས་པའི་བདེན་པ་མངོན་
པར་རྟོགས་པས་དེ་མྱུར་དུ་འགྲོ་བ་ཉིད་དོ། །ཚོལ་བར་བྱེད་པས་ན་ལམ་ཞེས་བྱ་ལ། འགྲོ་བའི་དོན་གྱིས་ན་མཐོང་བའི་ལམ་སྟེ་འདི་གཉི་ག་ཡང་ཕུལ་དུ་བྱུང་བའོ། །གཞན་དག་ན་རེ་ཐོག་མ་ནས་ཟག་པ་མེད་པ་ཇི་ལྟར་མཐོང་བ་ཡང་དག་པ་ཇི་ལྟ་བ་བཞིན་ཡོངས་སུ་ཚོལ་བས་
མི་ལྡང་བའི་བསམ་པས་མྱུར་དུ་འགྲོ་བའི་ཕྱིར་རོ་ཞེས་ཟེར་རོ། །གྲངས་དང་རྗེས་སུ་མཐུན་པ་ཞེས་བྱ་བ་ནི། སྔར་བྱང་ཆུབ་ཀྱི་ཡན་ལག་བདུན་བསྟན་ལ་ཕྱིས་ལམ་གྱི་ཡན་ལག་བརྒྱད་བསྟན་ཏོ། །བྱང་ཆུབ་ཀྱི་ཡན་ལག་ལས་ཐ་དད་པའི་གཞན་གྱི་ཡན་ལག་མེད་པའི་ཕྱིར་འདི་
ཡན་ལག་ཏུ་མི་རིགས་སྙམ་པ་དེ་བསལ་བའི་ཕྱིར། དེ་ལ་ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ནི་ཞེས་བྱ་བ་རྒྱས་པར་སྨོས་སོ། །ཡང་དག་པའི་ལྟ་བ་ལ་སོགས་པ་དེ་དག་ཉིད་ཡན་ལག་གི་ཕྱིར་བརྟག་པ་མ་ཡིན་ནོ་ཟེར་ཞེས་བྱ་བ་ནི་བྱེ་བྲག་ཏུ་སྨྲ་བ་ལ་མ་

རངས་པའི་ཕྱིར་སྨོས་སོ། །གཞན་དག་ནི་ཞེས་བྱ་བ་ནི་སློབ་དཔོན་ནོ། །གོ་རིམས་མ་ཉམས་པ་ཁོ་ནར་ཞེས་བྱ་བ་ནི་སྔར་ལམ་གྱི་ཡན་ལག་རྣམས་དང་ཕྱིས་བྱང་ཆུབ་ཀྱི་ཡན་ལག་རྣམས་ཏེ་དེ་ལྟར་རིམ་པ་ལས་ཐ་དད་པ་མ་བྱས་སོ། །དང་པོ་ཁོ་ནར་ཞེས་རྒྱས་
པར་འབྱུང་བ་ལ། ཡུལ་རྣམ་པ་མང་པོ་ནི་གཟུགས་ལ་སོགས་པའི་དབྱེ་བ་སྟེ། སྔོན་པོ་ལ་སོགས་པ་ཐ་དད་པའོ། །དེ་རྣམ་པ་མང་པོ་ལ་འཕྲོ་བ་ནི་རྣམ་པར་གཡེང་བ་སྟེ། འདོར་ན་འཕྲོ་ཞིང་རྣམ་པར་གཡེང་བའི་ངང་ཚུལ་ཅན་གྱི་བློའོ། །ཚར་གཅད་པའི་ཕྱིར་ཞེས་བྱ་བ་ནི།
ཚོགས་པ་རེ་རེ་ལ་དམིགས་པའོ། །ཉེ་བར་འདོད་པའི་ཕྱིར་ཞེ་ན་བརྟེན་པ་ཞེས་བྱ་སྟེ་སྲེད་པ་ལ་བརྟེན་པའོ། །དྲན་པའི་ཀུན་ཏུ་རྟོག་པ་ཞེས་བྱ་བ་ནི། ཉམས་སུ་མྱོང་བའི་ཡུལ་རྗེས་སུ་དྲན་པའི་རྣམ་པར་རྟོག་པ་ཞེས་བྱ་བའི་ཐ་ཚིག་གོ། །བསལ་བའི་ཕྱིར་ཞེས་བྱ་བ་ནི་དེའི་
གེགས་ཀྱི་སྒྲིབ་པ་བསལ་བའི་ཕྱིར་ཞེས་བྱ་བའི་ཐ་ཚིག་གོ། །དེའི་སྟོབས་ཀྱིས་བརྩོན་འགྲུས་ཡང་དག་པར་འཕེལ་བས་ཞེས་བྱ་བ་ནི། དྲན་པ་ཉེ་བར་གཞག་པ་བཞིའི་སྟོབས་ཀྱིས་དགོས་པ་རྣམ་པ་བཞི་ཡང་དག་པར་བསྒྲུབ་པའི་ཕྱིར་ཞེས་པའོ། །དགོས་པ་རྣམ་པ་
བཞི་ནི། མི་དགེ་བའི་ཆོས་སྐྱེས་པ་རྣམས་སྤོང་བ་དང་། མ་སྐྱེས་པ་རྣམས་མི་སྐྱེད་པ་དང་། དགེ་བའི་ཆོས་སྐྱེས་པ་རྣམས་གནས་པ་དང་མ་སྐྱེས་པ་རྣམས་སྐྱེད་པ་རྣམས་སོ། །དེའི་འོག་ཏུ་ཏིང་ངེ་འཛིན་རྣམ་པར་སྤྱོད་པའི་ཕྱིར་ཞེས་བྱ་བ་ལ། ཡང་དག་པར་སྤོང་བ་དེ་དག་གི་
མཇུག་ཐོགས་སུ་ཏིང་ངེ་འཛིན་རྣམ་པར་སྤྱོད་པ་དེའི་ཕྱིར་དེའི་མཇུག་ཐོགས་སུ་ཏིང་ངེ་འཛིན་རྣམ་པར་སྤྱོད་པའི་ཕྱིར་རྫུ་འཕྲུལ་གྱི་རྐང་པ་རྣམས་ཏེ་རབ་ཏུ་ཕྱེའོ་ཞེས་སྐབས་དང་སྦྱར་བ་ཐམས་ཅད་དུ་རྗེས་སུ་འཇུག་གོ། །ཏིང་ངེ་འཛིན་ལ་བརྟེན་ནས་ཞེས་རྒྱས་པར་འབྱུང་བ་ལ། ཏིང་ངེ་
འཛིན་ལ་བརྟེན་ནས་དད་པ་ལ་སོགས་པ་ཟག་པ་མེད་པའི་ལམ་འདྲེན་པའི་ཕྱིར། འཇིག་རྟེན་ལས་འདས་པའི་ཆོས་ཀྱི་བདག་པོར་གྱུར་པས་ན། རྫུ་འཕྲུལ་གྱི་རྐང་པའི་རྗེས་སུ་དབང་པོ་རྣམས་བརྗོད་དོ། །དེ་བདག་ཉིད་ཅེས་བྱ་བ་ལ། དབང་པོ་དེ་དག་ཉིད་གང་གི་ཚེ་མི་མཐུན་པའི་

ཕྱོགས་ལས་ངེས་པར་རྒྱལ་བར་ཀུན་ཏུ་སྤྱོད་ཅིང་མངོན་དུ་གྱུར་པ་དེའི་ཚེ་སྟོབས་ཞེས་བྱ་སྟེ། དེ་དག་གི་མི་མཐུན་པའི་ཕྱོགས་ནི་མ་དད་པ་ལ་སོགས་པའོ། །གཉི་ག་ལ་ནི་ལམ་གྱི་ཡན་ལག་རྣམས་ཏེ་ཞེས་བྱ་བ་ནི་མཐོང་བའི་ལམ་མོ། །འདི་ལྟར་ཞེས་བྱ་བ་ནི་དེ་ཉིད་ཁུངས་རྒྱས་པར་
འབྱུང་བའོ། །མཐོང་བའི་ལམ་ལ་བསྒོམ་པའི་ལམ་ཡོངས་སུ་རྫོགས་པར་མི་འགྱུར་བས། ཇི་ལྟར་དེར་བྱང་ཆུབ་ཀྱི་ཡན་ལག་བདུན་བསྒོམ་པའི་ལམ་གྱིས་བསྡུས་པས་བསྒོམ་པ་ཡོངས་སུ་རྫོགས་པར་འགྱུར་ཞེ་ན། ཇི་སྐད་བཤད་པའི་དྲན་པ་ཉེ་བར་གཞག་པ་ལ་སོགས་པ་དག་
ཀྱང་བསྒོམ་པའི་ལམ་དུ་ཡོངས་སུ་རྫོགས་པར་འགྱུར་གྱི་མཐོང་བའི་ལམ་དུ་ནི་མ་ཡིན་ནོ། །མཐོང་བའི་ལམ་དུ་ནི་ལམ་བསྒོམ་པ་ཡོངས་སུ་རྫོགས་པར་མི་རུང་སྟེ། དེའི་ཕྱིར་མཐོང་བའི་ལམ་ནས་བཟུང་ནས་ལམ་གྱི་ཡན་ལག་དག་ཡོད་དོ་ཞེས་བྱ་བར་ཤེས་སོ། །དེ་ལྟར་
འཕགས་པའི་ལམ་ཡན་ལག་བརྒྱད་བསྒོམ་པ་ཡོངས་སུ་རྫོགས་པར་འགྱུར་རོ་ཞེས་གསུངས་པ་དེའི་ཕྱིར་མཐོང་ལམ་ནས་བརྩམས་ཏེ་བསྒོམ་པའི་ལམ་ལ་ལམ་ཡོངས་སུ་རྫོགས་པར་འགྱུར་རོ་ཞེས་བྱ་བར་ཤེས་སོ། །དེ་ལྟར་ཡིན་ན་མཐོང་བ་དང་བསྒོམ་པའི་ལམ་གཉིས་ཀ་
ལ་ཡང་ལམ་གྱི་ཡན་ལག་ཡོད་པར་འགྱུར་རོ། །ཡང་དགེ་སློང་ཞེས་བྱ་བ་རྒྱས་པར་འབྱུང་བ་ལ། འཕགས་པའི་བདེན་པ་བཞིའི་ཚིག་བླ་དགས་ཡིན་ནོ་ཞེས་བྱ་བ་འདིས་ནི་མཐོང་བའི་ལམ་བསྟན་ཏོ། །ཇི་ལྟར་རྟོགས་པའི་ལམ་གྱིས་འཇུག་ཅེས་བྱ་བ་ནི་བསྒོམ་པའི་ལམ་གྱིས་ཇི་
ལྟར་རྟོགས་པ་སྟེ། ཇི་ལྟར་ཐོབ་པའི་ལམ་གྱིས་ཞེས་བྱ་བའི་ཐ་ཚིག་གོ། །འཇུག་ཅེས་བྱ་བ་ནི་བྱང་ཆུབ་ཀྱི་བར་དུ་ངེས་པར་འབྱུང་བའོ། །དེ་ལྟ་བས་ན་གཉི་ག་ལ་འཕགས་པའི་ལམ་ཡན་ལག་བརྒྱད་པར་འདོད་པར་བྱ་དགོས་སོ། །བྱང་ཆུབ་ཡན་ལག་ལམ་ཡན་ལག །ཟག་པ་
མེད་ཅེས་བྱ་བ་ལ། །ཟག་པ་མེད་པ་ཁོ་ན་ཡིན་གྱི། དེ་དག་ཁོ་ན་ཟག་པ་མེད་པ་ནི་མ་ཡིན་ཏེ། དེ་གཉིས་བསྒོམ་པ་དང་མཐོང་བའི་ལམ་ལ་རྣམ་པར་གཞག་པའི་ཕྱིར་ལ། སྲིད་པའི་རྩེ་མོའི་གཉེན་པོ་ཡིན་པས་བསྒོམ་པའི་ལམ་ལ་བྱང་ཆུབ་ཀྱི་ཡན་ལག་རྣམས་རྣམ་པར་གཞག་

པའི་ཕྱིར་ཟག་པ་མེད་པ་ཉིད་དོ། །དེ་ཉིད་ཀྱི་ཕྱིར་ཐམས་ཅད་བྱང་ཆུབ་ཀྱི་ཕྱོགས་དང་མཐུན་པ་ཡིན་བཞིན་དུ་དེ་དག་ཁོ་ན་ལ་བྱང་ཆུབ་ཀྱི་ཡན་ལག་ཅེས་བྱའོ། །ལམ་གྱི་ཡན་ལག་རྣམས་ནི་མཐོང་བའི་ལམ་རྣམ་པར་གཞག་སྟེ། མཐོང་ལམ་གཅིག་ཏུ་ཟག་པ་མེད་
པ་ཡིན་པའི་ཕྱིར་དེ་རྣམས་ཀྱང་ཟག་པ་མེད་པ་ཉིད་དོ། །འཇིག་རྟེན་པའི་ཡང་དག་པའི་ལྟ་བ་ལ་སོགས་པ་ཡང་ཡོད་པ་མ་ཡིན་ནམ། ཇི་ལྟར་ཟག་པ་མེད་པ་རྣམས་ཁོ་ན་ལམ་གྱི་ཡན་ལག་ཅེས་བྱ་ཞེ་ན། ཡོད་པ་བདེན་མོད་ཀྱི་དེ་དག་ནི་འཕགས་པའི་ལམ་ཞེས་བྱ་བའི་སྒྲ་མི་
འཐོབ་སྟེ། ཉོན་མོངས་པ་རྒྱས་པར་འབྱུང་བའི་ཕྱིར་དེ་ལ་ལམ་གྱི་ཡན་ལག་ཉིད་དུ་ཐལ་བ་མེད་དོ། །བྱང་ཆུབ་ཀྱི་ཕྱོགས་དང་མཐུན་པར་གཞན་དག་ནི་ཟག་པ་དང་བཅས་པ་དང་ཟག་པ་མེད་པ་དག་ཡིན་ནོ་ཞེས་བྱ་བ་ནི་དྲན་པ་ཉེ་བར་གཞག་པ་ལ་སོགས་པ་སྟོབས་ལ་ཐུག་པ་
རྣམས་ཏེ། མཐོང་བ་དང་བསྒོམ་པ་དང་མི་སློབ་པའི་ལམ་གྱིས་བསྡུས་པ་དག་ནི་ཟག་པ་མེད་པའོ། །དེར་བདེན་པ་སོ་སོ་ལ་དམིགས་པའི་ཤེས་རབ་ཆོས་དྲན་པ་ཉེ་བར་གཞག་པ་མ་འོངས་པ་བཞིས་འཐོབ་བོ། །དགོས་པ་རྣམ་པ་བཞི་བསྒྲུབ་པའི་ཕྱིར་བརྩོན་འགྲུས་ཡང་
དག་པར་སྤོང་བ་རྣམས་སོ། །ཡང་དག་པར་འབྱོར་པ་ལ་བརྟེན་པའི་དོན་གྱིས་བདེན་པ་སོ་སོ་ལ་དམིགས་པའི་རྫུ་འཕྲུལ་གྱི་རྐང་པ་རྣམས་སོ། །དབང་ཐོབ་པའི་ཕྱིར་དད་པ་ལ་སོགས་པའི་དབང་པོ་རྣམས་སོ། །དེ་ཉིད་ཉོན་མོངས་པས་མི་བརྫི་བའི་དོན་གྱིས་སྟོབས་རྣམས་
སོ། །ཆོས་དྲན་པ་ཉེ་བར་གཞག་པའི་ཤེས་རབ་དེ་ནི་འདིའི་ཡང་ཆོས་དག་པའི་ལྟ་བའོ། །ཆོས་དྲན་པ་ཉེ་བར་གཞག་པ་དེ་ཉིད་བྱང་ཆུབ་ཀྱི་ཡན་ལག་རྣམས་ལས་ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་གོ། །དེ་བཞིན་དུ་ཡང་དག་པར་སྤོང་བ་ལ་
སོགས་པ་རྣམས་ལ་ཡང་ཇི་ལྟར་རིགས་པར་བརྗོད་པར་བྱ་སྟེ། རྫས་གཅིག་ཉིད་ཁྱད་པར་དེ་དང་དེས་དེ་ལྟ་དེ་ལྟར་བརྗོད་པ་ཡིན་ན་ཟག་པ་དང་བཅས་པ་ནི་དེ་ལས་གཞན་པ་རྣམས་སོ། །བསམ་གཏན་དང་པོ་ནས་ཐམས་ཅད་ཅེས་བྱ་བ་ལ། དེ་ནི་དགའ་བ་ཡང་ཡོད་ལ་

རྟོགས་པ་དང་བཅས་པའི་ཕྱིར་ཡང་དག་པའི་རྟོགས་པ་ཡང་ཡོད་དོ། །ཉེར་བསྡོགས་རྣམས་ནི་སྟོབས་ཀྱིས་དྲང་དགོས་པའི་ཕྱིར་ཞེས་བྱ་བ་ལ། དེ་ལ་བརྟེན་ནས་ས་འོག་མ་དང་འདོད་ཆགས་དང་བྲལ་བར་འགྱུར་བའི་ཕྱིར་ན། བརྩོན་འགྲུས་ཆེན་པོས་མངོན་དུ་བྱེད་པ་བདེ་བླག་
ཏུ་ཐོབ་པའི་སེམས་དགའ་བར་འགྱུར་བ་ཡིན་ཏེ། དེའི་ཕྱིར་དེ་རྣམས་ནི་དགའ་བ་མེད་དོ། །གཞན་ཡང་ས་འོག་མའི་དོགས་པ་དང་བཅས་པའི་ཕྱིར་རོ་ཞེས་བྱ་བ་ནི་ཡོངས་སུ་ཉམས་པར་དོགས་པ་དང་བཅས་ཞེས་བྱ་བའི་ཐ་ཚིག་གོ། །གཞན་དག་ན་རེ་འདོད་ཆགས་དང་མ་
བྲལ་བ་ཐུན་མོང་