Luận tạng Tây Tạng (Tengyur) — Tập 210

ལོག་པ་ལ་བདེ་བའི་བློར་འགྱུར་གྱི་བདེ་བ་ཞེས་བྱ་བ་དོན་དམ་
པར་ཡོད་པ་མ་ཡིན་ནོ། །ཆོས་མངོན་པ་པ་རྣམས་ན་རེ་ཡོད་པ་ཉིད་དོ་ཞེས་ཟེར་རོ། །འདི་ཉིད་རིགས་པས་ཡིན་ནོ་ཞེས་བྱ་བ་ནི་སློབ་དཔོན་ཆོས་མངོན་པའི་ལུགས་ལ་རྗེས་སུ་ཡི་རང་བའོ། །ཚིག་ཙམ་གྱིས་གུས་པར་མི་འགྱུར་བས་འདྲི་བ་ནི་ཇི་ལྟར་བྱས་པས་ཞེས་བྱ་བའོ། །སྡུག་
བསྔལ་དང་བདེ་བ་སྐྱེ་བའི་རྒྱུ་ཐ་དད་པའི་ཕྱིར་ཏེ། འབྱུང་བ་མ་སྙོམས་པ་ལས་ནི་སྡུག་བསྔལ་སྐྱེ་ལ། དེ་སྙོམས་པ་ལས་ནི་བདེ་བ་སྐྱེ་བས་སྡུག་བསྔལ་ལས་བདེ་བ་གཞན་ཡིན་ཏེ་འདོད་ཆགས་དང་ཞེ་སྡང་ལ་སོགས་པ་བཞིན་ནོ། །འདོད་ཆགས་དང་ཞེ་སྡང་གཉིས་བཞིན་དུ་རང་གི་ངོ་
བོ་ཐ་དད་པ་དང་། ནུས་པ་ཐ་དད་པ་ལས་ཀྱང་དངོས་པོ་རྣམས་ཐ་དད་པར་མཐོང་ལ། སྡུག་བསྔལ་དང་བདེ་བའི་རང་གི་ངོ་བོ་དང་ནུས་པ་ཐ་དད་པ་ཡིན་ཏེ། དེ་ལྟར་ན་བདེ་བླག་ཏུ་རྟོགས་པར་འགྱུར་བས་དེའི་ཕྱིར་རེ་ཞིག་བདེ་བ་ལ་སྐུར་པ་འདེབས་པ་དེ་ལ་འདི་དྲི་བར་བྱ་སྟེ་ཞེས་བྱ་བ་རྒྱས་པར་

སྨོས་སོ། །གལ་ཏེ་གནོད་པའི་བདག་ཉིད་གང་ཡིན་པའོ་ཞེས་བྱ་བ་ནི་གཟིར་བའི་བདག་ཉིད་དོ། །གལ་ཏེ་གནོད་པར་བྱེད་པ་ཡིན་ནོ་ཞེས་བྱ་བ་ནི་ལུས་དང་སེམས་ལ་གནོད་པར་བྱེད་པ་གང་ཡིན་པ་དེ་གནོད་པའི་བདག་ཉིད་ཡིན་ནའོ། །ཕན་པར་བྱེད་པ་བདེ་བ་ཡིན་ནོ་ཞེས་
བྱ་བར་གྲུབ་སྟེ། གང་ཞིག་ལུས་དང་སེམས་དག་ལ་ཕན་པ་འདོགས་པར་འཇུག་པ་དེ་སྡུག་བསྔལ་ལས་ནུས་པ་ཐ་དད་པའི་ཕྱིར་བདེ་བ་ཡིན་ནོ་ཞེས་བྱ་བར་གྲུབ་བོ། །གལ་ཏེ་མི་འདོད་པ་ཡིན་ནོ་ཞེས་བྱ་བ་ནི། དེའི་རང་གི་ངོ་བོ་ཡིད་དུ་མི་འོང་བ་ཡིན་པའི་ཕྱིར་རོ། །འདོད་པ་བདེ་བ་ཡིན་ནོ་ཞེས་
བྱ་བ་གྲུབ་སྟེ་དེ་ནི་ཡིད་དུ་འོང་བའི་རང་གི་ངོ་བོ་ཅན་ཡིན་པའི་ཕྱིར་འདོད་པ་ཡིན་པས་སྡུག་བསྔལ་དང་བདག་ཉིད་ཐ་དད་པ་ཡིན་པ་དང་། ཇི་ལྟར་སྡུག་བསྔལ་ཁོ་ན་ཡིན་པར་འགྱུར་རོ། །མི་གནས་པའི་ཕྱིར་འདི་མཚན་ཉིད་མ་ཡིན་ནོ་ཞེས་བསྟན་པའི་ཕྱིར། གལ་ཏེ་འདོད་པ་དེ་ཉིད་ཞེས་རྒྱས་
པར་སྨྲས་སོ། །འཕགས་པ་རྣམས་ཀྱི་ནི་ཕྱིན་ཅི་མ་ལོག་པའི་ཕྱིར་ཕྱིན་ཅི་ལོག་དེ་ཉིད་ལས་གཞན་ནོ། །ཇི་ལྟར་འཕགས་པ་རྣམས་ཀྱིས་དེ་གཟིགས་པ་དེ་བཞིན་ཁོ་ན་དེའི་རང་བཞིན་དུ་རིགས་ཀྱི་གཞན་ནི་ཇི་ལྟ་བ་མ་ཡིན་ནོ། །ཕན་པར་བྱེད་པ་ལ་ནི་འཁྲུལ་པ་མེད་དེ་འཕགས་པ་རྣམས་
ལ་ཡང་དེ་ཕན་པར་བྱེད་པའི་ཕྱིར་རོ། །རྣམ་པ་གཞན་གྱིས་ཞེས་བྱ་བ་ནི་རང་གི་ངོ་བོ་མ་ཡིན་པའོ། །ཇི་ལྟར་བྱས་ནས་ཤེ་ན་འདི་ལ་བག་མེད་པའི་གནས་དང་ཞེས་བྱ་བ་ནི་འདོད་ཆགས་རྒྱས་པའི་ཕྱིར་རོ། །མངོན་པར་འདུ་བྱ་བ་ཆེན་པོས་བསྒྲུབ་པར་བྱ་བ་ནི་འབད་པ་ཆེན་པོས་བསྒྲུབ་པར་བྱ་
བའོ། །རྣམ་པར་འགྱུར་བ་ཅན་ཞེས་བྱ་བ་ནི་རྒྱུན་གཞན་དུ་འགྱུར་བའི་ཕྱིར་རོ། །ཞན་པ་ཉིད་ཀྱིས་དེ་མ་ཐག་ཏུ་སྡུག་བསྔལ་འབྱུང་བའི་ཕྱིར་རོ། །གཞན་དག་ན་རེ་སྡུག་བསྔལ་ལས་བདེ་བ་སྐྱེ་བར་རིག་པར་བྱའོ་ཞེས་ཟེར་རོ། །མི་རྟག་པར་ཞེས་བྱ་བ་ནི་སྐད་ཅིག་མར་འཇིག་པ་དང་ལྡན་པ་དང་
རྒྱུན་ཆད་པའི་ཕྱིར་རོ། །རང་གི་བདག་ཉིད་ཀྱིས་མི་འདོད་པ་ཡིན་པའི་ཕྱིར་ན་སྡུག་བསྔལ་ལྟར་དེ་ལ་སུ་ཡང་འདོད་ཆགས་སྐྱེད་པར་མི་འགྱུར་ཏེ། དེའི་ཕྱིར་དེ་ལས་འདོད་ཆགས་དང་བྲལ་བའི་ཆེད་དུ་རྣམ་པ་གཞན་གྱིས་ཀྱང་སྐྱོན་ཅན་དུ་ལྟ་བར་མི་འགྱུར་ཏེ་སྡུག་བསྔལ་བཞིན་ནོ། །དེ་ནི་

བཅོམ་ལྡན་འདས་ཁོ་ནས་ཞེས་བྱ་བ་རྒྱས་པར་འབྱུང་སྟེ། སྡུག་བསྔལ་གཉིས་ཉིད་བསྟན་པའི་ཕྱིར་སྡུག་བསྔལ་གྱི་སྡུག་བསྔལ་ལ་དགོངས་ནས་འདི་གསུངས་པ་ནི་མ་ཡིན་ནོ་ཞེས་བྱ་བ་དེ་སྐད་དུ་གསུངས་པ་ཡིན་ནོ། །འདུ་བྱེད་མི་རྟག་པ་ཉིད་ནི་སྔ་ན་ཡོད་ན་ཡོད་པ་མ་ཡིན་པ་རྣམས་རྒྱུ་དང་རྐྱེན་ལ་
རག་ལུས་ཏེ་སྐྱེ་བ་ཉིད་དང་སྐད་ཅིག་རེ་རེ་ལ་འཇིག་པ་ཉིད་དོ། །འདུ་བྱེད་རྣམ་པར་འགྱུར་བ་ཉིད་ཅེས་བྱ་བ་ནི་མི་འདྲ་བར་ཡོངས་སུ་འགྱུར་བ་ནི་རྣམ་པར་འགྱུར་བ་ཡིན་ཞིང་གཞན་དུ་འགྱུར་བ་ཞེས་པའི་ཐ་ཚིག་གོ། །དེ་ནི་དེ་མ་ཐག་ཏུ་ཚོར་བ་གཞན་སྐྱེ་པ་འམ་གཞན་པའོ། །གལ་ཏེ་ཐམས་ཅད་རང་
བཞིན་གྱིས་སྡུག་བསྔལ་བ་ཞིག་ཡིན་པར་གྱུར་ན་ནི་ཞེས་བྱ་བ་རྒྱས་པར་འབྱུང་ངོ་། །ངེས་པར་ཚོར་བ་གསུམ་རྣམ་པར་གཞག་པ་ཡིན་ན། གང་གི་ཕྱིར་གནས་བརྟན་གྱིས་བཅོམ་ལྡན་འདས་ལ་བཅོམ་ལྡན་འདས་ཀྱིས་ཅི་ལ་དགོངས་ནས་ཚོར་བ་གསུམ་གསུངས་ཞེས་དྲིས་པ་དེ་ཡིད་ཚོར་བ་གསུམ་
ཞེས་བྱ་བའི་མདོ་འདི་ངེས་པར་དགོངས་པ་ཅན་ནོ་ཞེས་ཤེས་པར་བྱེད་པས། ཚོར་བ་གང་ཅི་ཡང་རུང་བ་དེ་ནི་འདིར་སྡུག་བསྔལ་ལོ་ཞེས་བྱ་བ་འདི་དགོངས་པ་ཅན་ཏེ་འདི་ཉིད་གནས་བརྟན་གྱིས་དགོངས་པ་ཅན་དུ་ཡོངས་སུ་བསམ་པའི་ཕྱིར་རོ། །རྣམ་པར་འགྱུར་བ་དང་མི་རྟག་པའི་ཆོས་ཅན་ཡིན་
པའི་ཕྱིར་ཞེས་བྱ་བ་ནི། རྣམ་པར་འགྱུར་བའི་ཆོས་ཅན་ཡིན་པའི་ཕྱིར་དང་། མི་རྟག་པའི་ཆོས་ཅན་ཡིན་པའི་ཕྱིར་རོ། །ཡ་ཏོ་ཏོ་ཧི་སུ་ཁཱ་དྷཱན་དཱ་ཧི་ཏསྱ་བཱན་བསྠ་ནཱ་དྱོ་གི་ནཿསུ་ཁཱ་དུརྦེ་ག་མཱ་པཱ་དྱེནྟན་ཏུ་དུཿཁ་དུཿ། བཏྨ་ཀ་ཏྭཱ་དེ་བ་ཧི། ཏེ་ཥཱཾ་བྷ་བ་ཏི་དུཿཁཾ་ཧི་ཏཱ་མེ་བ་ཅ་ཡཏྣ་སྙ་དྷྱཾ་ཡ་དྲིཙྪ་ཏཿ།
སཻཙྪ་ས་ནི་གྲ་ཧི་ད་བྱ་ཏཱི་བྲ་ཟེར་བ་མུཏྤ་དྱ་ཏི། ཏ་ད་བྷཱ་བཱ་ཡ་བྲ་ཏི་བནྣི་ཙི་ཏཱ་མ་པི་པྲི་ཀྲཥྟ་ཀཱ་ལ་མ་བ་ཏིཥྛ་ཏེ། སུ་ཥནྟུ་ཤྲ་མ་ཎ་ཏེ་ར་སྱ་ཧི་ཏ་མ་བ་སྠཱ་ནཱ་ཡ་ཙ་ཏ་མ་སི་ན་ཙི་ར་མ་བ་ཏིཥྛ་ཏེ། ཨི་ཏི་སུ་ཏ་ར་བ་རི་ཀྵ་ཀཱཿབདེ་བའི་ཚོར་བ་ཉིད་སྡུག་བསྔལ་དུ་མཐོང་། སྟག་ལུང་རྒྱ་དཔེ་ནནྣཱ་ཟེར་བདེ་བའི་ཚོར་
སྟག་ལུང་སྭཙྪོ་ཟེར་བ་སྡུག་བསྔལ་དུ་བཟུང་ན་ཅི་ལྟར་ཡིད་ལ་བྱེད་པ་ཕྱིན་ཅི་ལོག་ཏུ་མི་འགྱུར་ཞེ་ན། འདུ་བྱེད་རྣམ་པར་འགྱུར་བ་སྡུག་བསྔལ་ཉིད་པྲ་པནྣ་ཀྱི་རང་བཞིན་ཡིན་པའི་ཕྱིར་རོ། །འདི་ཅི་ལྟར་རྟོགས་པར་བྱ་ཞེ་ན། རང་གི་ངོ་བོའི་སྒོ་ནས་དེ་བདེ་བ་ཞེས་བྱའོ། །གང་གི་ཚེ་ཞེས་བྱ་བ་

རྒྱས་པར་འབྱུང་སྟེ། གལ་ཏེ་བདེ་བའི་ཚོར་བ་རང་གི་ངོ་བོའི་སྒོ་ནས་མི་འགྱུར་ན། དེ་ཡི་སྡུག་བསྔལ་གྱིས་སྡུག་བསྔལ་ཉིད་དོ། །སྡུག་བསྔལ་དུ་བསྟན་པས་ཀྱང་འདུ་བྱེད་རྣམ་པར་འགྱུར་བ་སྡུག་བསྔལ་དག་གོ། །དེ་ལ་བདེ་བའི་ཚོར་བ་ནི་རྣམ་གྲངས་ཀྱི་སྡུག་བསྔལ་ཏེ།
བདེ་བ་ལ་སོགས་པའི་ཚོར་བ་མདོ་ལས་རྣམ་གྲངས་ཀྱི་སྡུག་བསྔལ་དུ་བཤད་ཀྱི་རང་གི་མཚན་ཉིད་ཀྱིས་ནི་མ་ཡིན་ནོ། །བདེ་བའི་ཚོར་བ་སྐྱེ་བ་ན་བདེ་བ་དང་གནས་པ་ན་བདེ་བར་འགྱུར་བའི་སྡུག་བསྔལ་ཡིན་ནོ། །དེ་མཐའ་གཅིག་ཏུ་བདེ་བར་མཐོང་ན་ཇི་ལྟར་ཕྱིན་ཅི་ལོག་ཏུ་འགྱུར་ཞེ་ན་བྱིས་པ་རྣམས་
ལྟ་བ་མཆོག་ཏུ་འཛིན་པའི་ཕྱིར་རོ། །ཉོན་མོངས་པའི་མེ་ཐམས་ཅད་ཀྱིས་ཡོངས་སུ་གདུངས་པའི་ཟག་པ་དང་བཅས་པའི་འདུ་བྱེད་རྣམས་ཞི་བ་ལས་ཡོན་ཏན་དུ་མཐོང་སྟེ། དེ་ལྟར་ན་སྡུག་བསྔལ་ལ་བདེ་བའི་འདུ་ཤེས་ནི་ཕྱིན་ཅི་ལོག་ཏུ་རིགས་སོ། །གལ་ཏེ་བདག་རྟག་པར་འདུ་ཤེས་པ་བཞིན་
གཅིག་ཏུ་སྡུག་བསྔལ་བའི་འདུ་བྱེད་རྣམས་ལ་བདེ་བར་འདུ་ཤེས་སོ་ཞེ་ན་མ་ཡིན་ཏེ་གཟུགས་ལ་སོགས་པ་གཅིག་ཏུ་སྡུག་བསྔལ་བ་བཀག་པའི་ཕྱིར་རོ། །ཡོན་ཏན་ཅི་ཞིག་ཡོད་པར་འགྱུར་ཞེས་བྱ་བ་ནི། བདེ་བ་དང་སྡུག་བསྔལ་དང་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་ཚོར་བ་
གསུངས་པས་ནི་ཉོན་མོངས་པ་ཉིད་དུ་འགྱུར་གྱི་འདོད་ཆགས་དང་བྲལ་བ་མ་ཡིན་པས་ཡོན་ཏན་ཅི་ཞིག་ཐོབ་པར་འགྱུར་ཞེས་བྱ་བའོ། །གལ་ཏེ་འཇིག་རྟེན་དང་མཐུན་པར་གསུངས་པ་ཡིན་ནོ་ཞེས་བྱ་བ་ནི། འཇིག་རྟེན་གྱིས་ཚོར་བ་གསུམ་རྟོགས་པ་མ་ཡིན་པས། དེས་ན་འཇིག་རྟེན་དང་མཐུན་
པར་ཚོར་བ་གསུམ་མོ་ཞེས་གསུངས་པར་རུང་ངོ་ཞེ་ན་མ་ཡིན་ཏེ། ཚོར་བ་ཐམས་ཅད་སྡུག་བསྔལ་བ་ཉིད་ནི་དགོངས་ནས་གསུངས་སོ་ཞེས་བཀའ་སྩལ་པའི་ཕྱིར་རོ། །ཇི་ལྟར་ཞེ་ན་ཀུན་དགའ་བོ་གང་ཅི་ཚོར་ཡང་རུང་བ་ནི་འདིར་སྡུག་བསྔལ་ལོ་ཞེས་བྱ་བ་ནི་དེས་འདུ་བྱེད་མི་རྟག་པ་ཉིད་དང་རྣམ་
པར་འགྱུར་བ་ཉིད་ལ་དགོངས་ནས་གསུངས་སོ་ཞེས་བྱ་བའོ། །དེའི་ཕྱིར་རང་བཞིན་ཁོ་ནས་ཚོར་བ་གསུམ་ཡང་དག་པ་ཇི་ལྟ་བ་བཞིན་དུ་གསུངས་པའི་ཕྱིར་ཚོར་བ་གསུམ་དོན་དམ་པ་ཁོ་ནར་ཡོད་ཀྱི་འཇིག་རྟེན་དང་མཐུན་པར་མ་ཡིན་ནོ། །བདེ་བའི་ཚོར་བ་མྱོང་བ་ན་བདེ་བའི་ཚོར་བར་རིག་པར་

བྱེད་དོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ་ཞེས་གསུངས་སོ། །དེ་བཞིན་དུ་སྡུག་བསྔལ་དང་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་ཡང་ངོ་། །དེ་བཞིན་དུ་བདེ་བའི་དབང་པོ་གང་ཡིན་པ་ཞེས་རྒྱས་པར་འབྱུང་སྟེ། འདི་ཇི་སྲིད་རྒྱུན་ཏུ་ཞུགས་པ་ཞེས་བྱ་བའི་བར་དུ་བརྗོད་
དོ། །གལ་ཏེ་བདེ་བའི་ཚོར་བ་ཙམ་ཁོ་ན་ཞིག་ཡིན་ནི་སྡུག་བསྔལ་ལོ་བདེ་བར་མཐོང་བ་ཡང་དག་པ་ཇི་ལྟ་བ་ཡིན་པར་ཇི་ལྟར་རིགས། འཇིག་རྟེན་ཡང་ཇི་ལྟར་ན་སྡུག་བསྔལ་གྱི་ཚོར་བ་ལ་གསུམ་དུ་རྟོག་པར་འགྱུར་ཞེས་བྱ་བ་ནི། གལ་ཏེ་ཚོར་བ་རྣམ་པ་གསུམ་མ་ཡིན་ནོ་སྙམ་དུ་བསམས་
པའོ། །གལ་ཏེ་ཆུང་ངུ་དང་ཆེན་པོ་དང་འབྲིང་པོ་དག་ལ་ཞེས་བྱ་བ་རྒྱས་པར་འབྱུང་སྟེ་སྡུག་བསྔལ་ཆུང་ངུ་ལ་ནི་བདེ་བའི་བློའོ། །ཆེན་པོ་ལ་ནི་སྡུག་བསྔལ་གྱི་བློའོ། །འབྲིང་པོ་ལ་ནི་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་བློའོ། །འདི་མི་རིགས་ཏེ་སྡུག་བསྔལ་ཆུང་ངུ་ལ་བདེ་བ་ཆེན་པོའི་བློ་འབྱུང་ཞིང་།
ཆེན་པོ་ལ་བདེ་བ་ཆུང་ངུའི་བློར་འགྱུར་བ་དེ་ལྟར་ན། དེའི་ཆེན་པོ་ཉིད་དང་ཆུང་ངུ་ཉིད་ཀྱང་ཉམས་པར་འགྱུར་རོ། །དེའི་ཕྱིར་ཆུང་ངུ་ལ་སོགས་པའི་རིགས་གཞན་དམིགས་པར་རིགས་ཏེ། རིགས་སོ་སོར་རྣམ་པ་གསུམ་ཡིན་པའི་ཕྱིར་རོ། །བསོད་ནམས་མ་ཡིན་པའི་ཡང་འབྲས་བུ་
ཡིད་དུ་འོང་བ་ཉིད་དུ་ཐལ་བར་འགྱུར་ཏེ། བསོད་ནམས་མ་ཡིན་པ་ཡང་ཆུང་ངུ་ལ་སོགས་པའི་དབྱེ་བས་རྣམ་པ་གསུམ་དུ་འདོད་དོ། །བསོད་ནམས་མ་ཡིན་པ་ཆུང་ངུ་ནི་སྡུག་བསྔལ་གྱི་ཚོར་བའི་འབྲས་བུ་ཆུང་བ་ཉིད་དུ་རིགས་སོ། །དེ་ཡང་བདེ་བས་མངོན་པར་འདོད་པ་སྟེ། ཇི་ལྟ་ཇི་
ལྟར་སྡུག་བསྔལ་ཆུང་བ་ཉིད་དེ་ལྟ་དེ་ལྟར་བདེ་བ་ཆེ་བ་ཉིད་དོ། །དེ་བཞིན་དུ་བསོད་ནམས་མ་ཡིན་པ་ཆུང་ངུའི་ཆུང་ངུ་ལས་ནི་བདེ་བའི་འབྲས་བུ་ཉིད་ཆེ་བ་ཉིད་དེ། དགེ་བའི་ཕྱིར་འབད་པ་རྩོམ་པ་མེད་དོ། །བསོད་ནམས་ཆེན་པོའི་ཆེན་པོ་ནི་བསོད་ནམས་མ་ཡིན་པ་ཆུང་ངུའི་ཆུང་ངུ་སྟེ་
སྡུག་བསྔལ་གྱི་ཚོར་བའི་འབྲས་བུ་ཡང་ཆུང་ངུའི་ཆུང་ངུ་ཡིན་ནོ། །འདི་ནི་བསོད་ནམས་དང་བསོད་ནམས་མ་ཡིན་པ་དག་ལ་ཁྱད་པར་མེད་པར་དགོངས་ཏེ་གསུངས་པའོ། །བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པའི་མཇུག་ཐོགས་སུ་བདེ་བ་སོ་སོར་མྱོང་བའི་ཕྱིར་སྡུག་

བསྔལ་མཐོང་བས་གང་གི་ཚེ་དྲི་དང་རོ་དང་རེག་བྱའི་ཁྱད་པར་ལས་སྐྱེས་པའི་ཞེས་བྱ་བ་ལ་སོགས་པ་སྨོས་ཏེ། ཚོར་བ་འབྲིང་ནི་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་ལ། གང་གི་ཚེ་དེའི་མཇུག་ཐོགས་སུ་དྲི་ལ་སོགས་པའི་ཁྱད་པར་ལས་སྐྱེས་པའི་བདེ་བ་སྐྱེ་
བ་དེའི་ཚེ་ནི་ཆུང་བ་ཡིན་པའི་ཕྱིར་གང་ལ་བདེ་བའི་བློར་འགྱུར་གྱི་སྡུག་བསྔལ་ཡོད་པ་མ་ཡིན་ནོ། །མ་སྐྱེས་པ་དང་འགགས་པ་ན་ཞེས་བྱ་བ་རྒྱས་པར་འབྱུང་བ་ནི་གལ་ཏེ་སྡུག་བསྔལ་ཆུང་ངུ་ལ་བདེ་བའི་བློར་འགྱུར་ན་ནི། མ་སྐྱེས་པ་དང་འགག་པའི་ཚེ་སྡུག་བསྔལ་ཆུང་ངུ་ལ་བདེ་
བ་ཡང་མ་ཡིན་པའི་གནས་སྐབས་སུ་སྐྱེས་ལ་བདེ་བའི་བློར་འགྱུར་རོ། །ཅིའི་ཕྱིར་ཞེ་ན། དེ་ཉིད་ཀྱི་ཕྱིར་སྡུག་བསྔལ་མ་ལུས་པ་དང་བྲལ་བའི་ཕྱིར་ཏེ་ཞེས་སྨོས་སོ། །གང་ལ་བདེ་བའི་བློ་ཆུང་བ་དེ་ལ་སྡུག་བསྔལ་མ་ལུས་པ་དང་ཆེས་ཤིན་ཏུ་བྲལ་བའི་ཕྱིར་བདེ་བར་ཐལ་བར་འགྱུར་
རོ། །འདོད་པའི་བདེ་བ་མངོན་སུམ་དུ་གྱུར་པ་ལ་ཡང་དེ་བཞིན་དུ་བརྗོད་པར་བྱའོ་ཞེས་བྱ་བ་ལ། གལ་ཏེ་འདོད་ཆགས་ཀྱི་སྡུག་བསྔལ་ཆུང་ངུ་ལ་འདོད་པའི་བདེ་བའི་བློར་འགྱུར་བས་འདོད་ཆགས་ཀྱི་སྡུག་བསྔལ་དེ་མ་སྐྱེས་པ་དང་འགག་པའི་ཚེ་ཡང་ཆེས་ཤིན་ཏུ་འདོད་པའི་བདེ་བ་མངོན་
དུ་འགྱུར་བ་ཞེས་གང་ཁོ་ན་ཚོར་བ་ཆུང་བ་དེ་ཉིད་ཆེས་གསལ་བར་སྐྱེས་པ་མེད་དོ། །གསལ་བ་ཉིད་དང་ཆུང་བ་ཉིད་དག་ལྷན་ཅིག་གནས་པ་མ་ཡིན་ནོ། །བསམ་གཏན་གསུམ་པ་ན་བདེ་བ་ཡོད་དོ་ཞེས་རྒྱས་པར་འབྱུང་བ་ནི་བསམ་གཏན་གསུམ་ན་སྡུག་བསྔལ་གྱི་ཚོར་བ་ཆུང་
ངུ་དང་བསམ་གཏན་བཞི་པ་ལ་སོགས་པ་ན་སྡུག་བསྔལ་འབྲིང་པོ་ཡོད་དོ་ཞེས་ཤེས་པར་བྱས་ནས་སུ་ཞིག་དེ་ཐོབ་པར་བྱ་བའི་ཕྱིར་འོག་མའི་བསམ་གཏན་ལས་འདོད་ཆགས་དང་བྲལ་བ་ལ་འབད་པ་བྱེད་པར་འགྱུར། གལ་ཏེ་བདེ་བའི་རྒྱུ་རྣམ་པར་མི་གནས་པའི་ཕྱིར་བདེ་བ་མེད་
ན། དེ་ལྟ་ན་ནི་འོ་ན་སྡུག་བསྔལ་གྱི་རྒྱུ་རྣམས་ཀྱང་རྣམ་པར་མི་གནས་པས་སྡུག་བསྔལ་ཡང་མེད་པར་འགྱུར་རོ། །ཡུལ་འབའ་ཞིག་ནི་མ་ཡིན་ནོ་ཞེས་བྱ་བ་ནི་ཡུལ་ཙམ་ལས་བདེ་བ་དང་སྡུག་བསྔལ་སྐྱེ་བར་ནི་ཁས་མི་ལེན་ནོ། །སྐད་ཅིག་མ་དང་པོ་ཁོ་ནར་བདེ་བ་དང་སྡུག་

བསྔལ་ཆེན་པོ་སྐྱེ་བར་ཐལ་བའི་ཕྱིར་རོ། །གང་ཁོ་ན་ཡུལ་གྱི་རྐྱེན་གྱིས་མཐར་སྡུག་བསྔལ་ཆེན་པོ་སྐྱེ་བ་དེ་ཉིད་ཀྱི་ཐོག་མར་ཡང་སྟེ། ཡུལ་ཉེ་བའི་ཕྱིར་བར་མ་ཆད་དུ་སྡུག་བསྔལ་ཆེན་པོ་སྐྱེ་ལ་ཡང་མཐར་མི་སྐྱེའོ། །ཡུལ་གྱི་ཁྱད་པར་ལས་ཡིན་པ་དེའི་ཕྱིར་ལུས་ཡོངས་སུ་འགྱུར་བའི་
ཁྱད་པར་ལ་བལྟོས་པའི་ཡུལ་ཉིད་བདེ་བའམ་སྡུག་བསྔལ་གྱི་རྒྱུར་འགྱུར་གྱི་ཡུལ་འབའ་ཞིག་ནི་མ་ཡིན་ནོ། །འདི་ལྟར་དྲོ་བའི་གནས་སྐབས་རེག་པ་རྟེན་གྱི་འབྱུང་བའི་གནས་སྐབས་གང་དང་ཕྲད་ན་བདེ་བའི་རྒྱུ་ཡིན་པ་ནི་དེ་ཉིད་དང་ཕྲད་ན་ཡང་རྒྱུ་མ་ཡིན་པ་མ་ཡིན་ཏེ། གཞན་ལ་
ཡང་དེ་བཞིན་དུ་བརྗོད་པར་བྱའོ། །དེ་བཞིན་དུ་རྒྱུ་གཞན་ལ་བལྟོས་པའི་ཡུལ་བདེ་བ་དང་སྡུག་བསྔལ་གྱི་རྒྱུར་རྣམ་པར་གནས་པ་ལ་ཡང་བདེ་བ་དང་སྡུག་བསྔལ་གྱི་རྒྱུ་དག་གི་མཐར་སྡུག་བསྔལ་ཆེན་པོ་བསྐྱེད་པས། དེ་ན་བདེ་བའི་ཚོར་བ་མེད་པ་མ་ཡིན་ནོ། །གལ་ཏེ་མཐར་
སྡུག་བསྔལ་ཆེན་པོ་བསྐྱེད་དོ་ཞེས་ཅིའི་ཕྱིར་རྟོགས་ནུས་ཤེ་ན། སྤྱོད་ལམ་ལ་སོགས་པ་གོམས་པ་དང་དལ་བའི་རྣམ་པ་དག་ལ་ཡང་འབྱུང་བ་གཞན་བསྐྱེད་པའི་རྒྱུ་གཞན་ཉིད་ཀྱི་ཕྱིར་མཐར་བདེ་བ་ཆེན་པོ་བསྐྱེད་དོ། །བསམ་གཏན་དག་ན་ཡོད་པའི་རྒྱུ་ཅི་ལྟར་རྣམ་པར་མི་གནས་པ་ཡིན་
ཞེས་བྱ་བ་ལ། གཞན་དག་ན་རེ། ཤིན་ཏུ་སྦྱངས་པ་དང་བཅས་པའི་སེམས་ནི་བདེ་བའི་རྒྱུར་རྣམ་པར་གནས་པ་ཡིན་པས། དེར་དུས་རིང་པོར་སྙོམས་པར་ཞུགས་པ་རྣམས་ལ་ཕྱིས་སྡུག་བསྔལ་གྱི་བློར་འགྱུར་བ་ནི་མ་ཡིན་ནོ་ཞེས་ཟེར་རོ། །གང་ཡང་མཐར་སྡུག་བསྔལ་
མངོན་པར་འཕེལ་ལོ་སྙམ་ན། ཐོག་མར་ཡང་སྡུག་བསྔལ་བ་རྩོམ་ལ། མཱནྡྱཏྟུ། ཉེ་བར་མི་དམིགས་སོ་ཞེས་སོ། །བསམ་གཏན་རྣམས་ལ་བརྟེན་པ་ན་ཐོག་མ་དང་མཐར་ཡང་སྡུག་བསྔལ་བར་འབྲེལ་པ་མེད། དེ་ཉིད་དུ་སྡུག་བསྔལ་རྩོམ་པ་མེད་པས་བསམ་
གཏན་རྣམས་སུ་བདེ་བ་ཡོད་དོ་ཞེས་གྲུབ་པོ། ཇི་སྲིད་འདི་དེ་འདྲ་བའི་ལུས་ཀྱི་སྟག་ལུང་དཔེར་ལྡན་ནཱུ་ཟེར་རོ། །གནས་སྐབས་མི་སྣང་ན་འགའ་ཞིག་བདེ་བ་སྐྱེད་པ་དང་རྗེས་སུ་མཐུན། དེ་ལྟ་མ་ཡིན་ན་ཕྱིས་བདེ་བའི་བློ་ཇེ་མང་དུ་ཞེས་བྱ་བ་ནི། གལ་ཏེ་ཚོར་བ་འདི་ཁུར་སྤོས་པ་ཙམ་ལ་

སྐྱེས་པ་ཡིན་ན་ནི། སྤོས་ནས་ཡུན་རིང་དུ་ལོན་པའི་ཕྱིར་བདེ་བའི་བློ་མང་དུ་སྐྱེ་བར་འགྱུར་རོ། །ངལ་བའི་སྤྱོད་ལམ་གྱི་རྣམ་པ་དག་ལ་ཡང་དེ་བཞིན་དུ་རིག་པར་བྱའོ་ཞེས་བྱ་བ་ནི་དེར་གནས་སྐབས་གཞན་ལས་སྐྱེས་པའི་བདེ་བ་ཁོ་ན་སྐྱེའོ་ཞེས་རྒྱས་པར་བྱའོ། །མངར་བའི་
མཇུག་ཏུ་སྐྱུར་པོར་འགྱུར་བ་བཞིན་ནོ་ཞེས་བྱ་བ་ནི་དཔེར་ན་ཆང་དང་འོ་མ་དང་བུར་ཤིང་གི་ཁུ་བ་རྣམས་མངར་བའི་གནས་སྐབས་ལས་ཡོངས་སུ་འགྱུར་བའི་ཁྱད་པར་ལས་སྔར་ཡོད་པ་མ་ཡིན་པའི་རོར་འགྱུར་བ་དེ་བཞིན་དུ་བདེ་བའི་ཚོར་བའི་གནས་སྐབས་སམ་བདེ་བ་ཡང་མ་ཡིན་སྡུག་
བསྔལ་ཡང་མ་ཡིན་པའི་ཚོར་བའི་གནས་སྐབས་ལས་ལུས་ཀྱི་ཡོངས་སུ་འགྱུར་བའི་ཁྱད་པར་ལས་སྔར་ཡོད་པ་མ་ཡིན་པའི་སྡུག་བསྔལ་སྐྱེའོ། །ཀུན་འབྱུང་གི་བདེན་པ་གང་ཡིན་པ་ཞེས་བྱ་བ་ལ། དེ་ཉིད་ཅེས་བྱ་བ་ནི་སྡུག་བསྔལ་གྱི་བདེ་བ་ཁོ་ན་ཡིན་པའོ། །ཡང་གཉི་ག་ཉེ་
བར་ལེན་པའི་ཕུང་པོའི་རང་བཞིན་ཡིན་པའི་ཕྱིར་དང་། སྡུག་བསྔལ་དང་ཀུན་འབྱུང་དག་རྒྱུ་དང་འབྲས་བུར་གྱུར་པའི་ཕྱིར་མིང་གི་སྒོ་ནས་ཐ་དད་ཀྱི་རྫས་སུ་ནི་མ་ཡིན་ནོ་ཞེས་གསུངས་པ་ཡང་མ་ཡིན་ནོ། །འདི་ནི་མདོ་ལས་ཐལ་བ་མ་ཡིན་ནོ། །ཅིའི་ཕྱིར་ཞེ་ན། མདོ་ལས་སྡུག་བསྔལ་
གྱི་བདེན་པ་གང་ཞེ་ན། ཉེ་བར་ལེན་པའི་ཕུང་པོ་ལྔའོ། །ཀུན་འབྱུང་གི་བདེན་པ་གང་ཞེ་ན། གང་འདི་དགའ་བའི་འདོད་ཆགས་དང་ལྷན་ཅིག་པའི་སྲེད་པ་སྟེ། དེ་དང་དེ་ལ་མངོན་པར་དགའ་བ་ཅན་ཡིན་ནོ་ཞེས་གཞན་དུ་བཤད་པའི་ཕྱིར་རོ། །གཞན་ལས་གཞན་ཡང་ཡིན་པར་
གསུངས་པའི་ཕྱིར་ཏེ། མདོ་གཞན་ལས་ལས་ལ་སོགས་པ་གཞན་ཡང་གསུངས་པའི་ཕྱིར་ཏེ། ལས་དང་སྲེད་པ་དང་ནི་ཞེས་བྱ་བ་རྒྱས་པར་འབྱུང་ངོ་། །ཕྱི་མའི་ཚེ་ན་ཞེས་བྱ་བ་ནི་འཇིག་རྟེན་ཕ་རོལ་ཏུའོ། །ཡང་ས་བོན་གྱི་ཞེས་བྱ་བ་རྒྱས་པར་འབྱུང་བ་ནི་འདི་ལྟར་དགེ་སློང་དག་ས་
བོན་གྱི་རྣམ་པ་ལྔ་མ་གྲུགས་མ་སྨས་མ་རུལ་རླུང་དང་ཉི་མས་མ་ཉམས་ཤིང་གྲུང་པོ་ལེགས་པར་གནས་ལ། སའི་ཁམས་དང་ཆུའི་ཁམས་ཀྱང་ཡོད་ན། དེ་ལྟ་ན་ས་བོན་དེ་དག་འབྲེལ་ཞིང་རྒྱས་པ་དང་མཆེད་པར་འགྱུར་རོ། །དགེ་སློང་དག་དེ་ལྟ་ན་དོན་འདི་ཁོང་དུ་ཆུད་པར་བྱ་བའི་ཕྱིར་

དཔེ་འདི་བསྟན་པ་ཡིན་ཏེ། འདིར་དོན་འདི་ཡིན་པར་བལྟ་བར་བྱའོ། །དགེ་སློང་དག་ས་བོན་གྱི་རྣམ་པ་ལྔ་ཞེས་བྱ་བ་ལ་ས་བོན་ནི་རྒྱུ་ཡིན་ནོ། །རྒྱུ་གང་ཡིན་པ་དེ་ཀུན་འབྱུང་ཡིན་ནོ། །དེ་ལྟ་ན་དེའི་ཚེ་རྣམ་པར་ཤེས་པ་ཀུན་འབྱུང་བ་ཉིད་དུ་བསྟན་པ། རྣམ་པར་ཤེས་པ་གནས་པ་དག་ཀྱང་
རྟེན་གྱི་རྒྱུར་བསྟན་པས་གཟུགས་དང་ཚོར་བ་དང་འདུ་ཤེས་དང་འདུ་བྱེད་དག་ཀྱང་ཀུན་འབྱུང་བ་ཉིད་དུ་གསུངས་སོ། །ཚིགས་སུ་བཅད་པ་ལ། ལས་ལ་སོགས་པ་རྣམས་ཀྱང་རྒྱུར་གསུངས་པས་ཀུན་འབྱུང་བ་ཉིད་དུ་གྲུབ་བོ། །དེའི་ཕྱིར་མདོ་ལས་བསྟན་པ་ནི་དགོངས་པ་ཅན་ཡིན་
ཏེ། སྲེད་པ་ཀུན་འབྱུང་བ་ཡིན་ནོ་ཞེས་བྱ་བ་ནི་འདུལ་བའི་ཁྱད་པར་ལ་བལྟོས་པའི་ཕྱིར་སྲེད་པ་ལྷག་པའི་གང་ཟག་གི་དབང་དུ་མཛད་ནས་བསྟན་པ་ཡིན་ནོ། །ཆོས་མངོན་པ་ལས་ཟག་པ་དང་བཅས་པའི་དངོས་པོ་ཐམས་ཅད་ཀུན་འབྱུང་བ་ཡིན་ནོ་ཞེས་བསྟན་པ་ནི་མཚན་ཉིད་པ་ཡིན་
ནོ། །ད་ནི་བྱེ་བྲག་ཏུ་སྨྲ་བས་མདོ་ལས་བསྟན་པ་དགོངས་པ་ཅན་ཉིད་ཡིན་པར་བསྟན་པའི་ཕྱིར་གཞན་ཡང་མངོན་པར་འགྲུབ་པའི་རྒྱུ་ཞེས་བྱ་བ་རྒྱས་པར་སྨོས་སོ། །མངོན་པར་འགྲུབ་པའི་རྒྱུ་ནི་བདག་ཉིད་རྙེད་པ་ཙམ་གྱི་རྒྱུ་སྟེ། འདི་ལྟར་སྲེད་པ་ནི་བདག་ཉིད་རྙེད་པ་ཐམས་ཅད་ལ་
ཁྱད་པར་མེད་པར་རྐྱེན་ཡིན་ནོ། །སྐྱེ་བ་དང་མངོན་པར་འགྲུབ་པའི་རྒྱུ་དང་བཅས་པར་ཞེས་བྱ་བ་ལ་འགྲོ་བ་ལ་སོགས་པའི་བྱེ་བྲག་གིས་བདག་ཉིད་རྙེད་པ་ནི་སྐྱེ་བ་ཡིན་ལ་དེར་སྐྱེ་བའི་རྒྱུ་ནི་ལས་ཡིན་ནོ། །མངོན་པར་འགྲུབ་པའི་རྒྱུ་ནི་སྲེད་པའོ། །ཡང་ཚིགས་སུ་བཅད་པ་ལས།
སྐྱེ་བའི་རྒྱུ་ལས་ཡིན་པ་དང་། །མངོན་པར་འགྲུབ་པའི་རྒྱུ་སྲེད་པ་ཡིན་པར་བཤད་དོ་ཞེས་བྱ་བ་འདི་ཇི་ལྟར་ཤེས་ཤེ་ན། དེའི་ཕྱིར་མདོ་ལས་ལས་ནི་སྐྱེ་བོའི་རྒྱུ་ཡིན་ལ་སྲེད་པ་མངོན་པར་འགྲུབ་པའི་རྒྱུ་ཡིན་ནོ་ཞེས་འབྱུང་བའི་ཕྱིར་རོ་ཞེས་བྱ་བ་སྨོས་སོ། །ཡང་ན་མདོ་ལས་རྒྱུ་
དང་བཅས་རྐྱེན་དང་བཅས་གཞི་དང་བཅས་ཞེས་འབྱུང་བའི་རིམ་པར་བསྟན་པ་ཡིན་ནོ་ཞེས་བྱ་བ་ནི། ཡང་ན་ཚིགས་སུ་བཅད་པ་ལས་རྒྱུའི་བརྒྱུད་པའི་རིམ་པ་འདིས་ལས་དང་སྲེད་པ་དང་མ་རིག་པ་ཕྱི་མའི་ཚེ་ལ་འདུ་བྱེད་མིག་ལ་སོགས་པ་རྣམས་ཀྱི་རྒྱུ་ཡིན་ནོ་ཞེས་བསྟན་པ་ཡིན་

ནོ། །དེ་ལས་རིམ་པ་ཇི་ལྟར་འབྱུང་ཞེ་ན། དགེ་སློང་དག་མིག་གི་རྒྱུ་ནི་གང་ཡིན། རྐྱེན་ནི་གང་ཡིན། གཞི་ནི་གང་ཡིན། དགེ་སློང་དག་མིག་གི་རྒྱུ་ནི་ལས་ཡིན་ནོ། །རྐྱེན་ནི་ལས་ཡིན་ནོ། །གཞི་ནི་ལས་ཡིན་ནོ་ཞེས་འབྱུང་སྟེ། ལས་ཀྱི་རྒྱུ་སྲེད་པ་ཡིན་
པ་དང་། སྲེད་པའི་རྒྱུ་མ་རིག་པ་དང་། མ་རིག་པའི་རྒྱུ་ཚུལ་བཞིན་མ་ཡིན་པ་ཡིད་ལ་བྱེད་པ་ཡིན་པ་ཡང་དེ་དང་འདྲའོ། །རྣམ་པར་ཤེས་པ་ལ་སོགས་པ་དག་ཀྱང་གསུངས་སོ་ཞེས་བྱ་བ་ནི་ཀུན་འབྱུང་བ་དག་ཏུ་སྟེ། ལས་ལ་སོགས་པ་འབའ་ཞིག་ནི་མ་ཡིན་ནོ་སྙམ་དུ་
དགོངས་པའོ། །དེ་ལྟར་སྲིད་པ་ལ་སོགས་རྣམས་ཀྱང་ཀུན་འབྱུང་བ་ཉིད་དུ་བསྒྲུབས་པ་དགོངས་པ་ཅན་ཏེ། སྡུག་བསྔལ་གྱི་རྒྱུ་ཐམས་ཅད་ཀུན་འབྱུང་བ་མཚན་ཉིད་པའི་ངོ་བོའོ། །སྐྱེ་གནས་ལ་སོགས་པ་ཞེས་བྱ་བ་ལ་སོགས་པ་སྨོས་པས་བུད་མེད་དང་སྐྱེས་པ་ལ་སོགས་
པའི་བྱེ་བྲག་བཟུང་ངོ་། །འདིར་ནི་ལས་དང་སྲེད་པ་སྲིད་པར་ཉིང་མཚམས་སྦྱོར་བ་ལ་བྱེ་བྲག་དང་ཐུན་མོང་གི་རྐྱེན་ཉིད་ཡིན་པར་བསྟན་ཏོ། །སྲེད་པ་དང་བྲལ་བ་དང་སྐྱེ་བ་མེད་པའི་ཕྱིར་ཏེ་ཞེས་བྱ་བ་ནི་སྲིད་པ་དང་བྲལ་བ་སྐྱེ་བ་མེད་པའི་ཕྱིར་ཏེ། དེ་ཡོད་ན་ཡོད་ལ། དེ་མེད་ན་མེད་པ་
སྲིད་པ་ནི་སྐྱེ་བ་མངོན་པར་འགྲུབ་པའི་རྒྱུ་ཡིན་ནོ་ཞེས་བྱ་བར་རྟོགས་སོ། །དེ་ཉིད་རབ་ཏུ་དབྱེ་བར་བྱ་བའི་ཕྱིར་གཉི་ག་འཆི་བ་ལས་ཞེས་བྱ་བ་རྒྱས་པར་འབྱུང་ངོ་། །གཟུགས་ལ་སོགས་པའི་ཡུལ་གང་ལ་སྲེད་པ་དང་ལྷན་ཅིག་ཡིན་པས་སྲིད་པ་དང་བཅས་པ་དེར་སེམས་ཀྱི་རྒྱུན་
ཡང་དང་ཡང་དུ་གཞོལ་ཞིང་འཇུག་པར་མཐོང་ངོ་། །ཡང་སྲིད་པ་ལ་ཡང་དེ་དང་འདྲའོ་ཞེས་བྱ་བ་ནི་ཤེས་སོ་ཞེས་བྱ་བ་ནི་འཆི་བ་ན་ཡང་སྲེད་པའི་ཕུང་པོ་དག་ལ་སྲེད་པའི་སྟོབས་ཀྱི་ཡང་སྲིད་པར་ཡང་དེའི་སེམས་ཀྱི་རྒྱུན་འཇུག་གོ་ཞེས་བྱ་བར་ངེས་སོ། །དེ་ལྟར་ན་གང་གིས་ཀྱང་
ལུས་ཀུན་ཏུ་མ་བཟུང་སྟེ། ཞེས་བྱ་བ་འདི་ནི་ལུས་སྲེད་པའི་དབང་དུ་གྱུར་པ་ཉིད་དུ་སྟོན་ཏོ། །རྒྱུ་གཞན་ནི་ཞེས་བྱ་བ་འདིས་ནི་ལུས་ལ་སྲེད་པ་རྟག་ཏུ་རྗེས་སུ་འབྲེལ་པར་སྟོན་པའོ། །གང་ལ་བཅོམ་དང་བློ་ཡིས་གཞན། །ཞེས་རྒྱས་པར་འབྱུང་སྟེ། འདིར་བཅོམ་པ་ནི་ཅི་རིགས་

པར་རྣམ་པ་གཉིས་སུ་དབྱེ་སྟེ། ཆ་ཤས་དང་རྣམ་པར་དབྱེ་བའོ། །བློ་ཆོས་གཞན་བསལ་ན་དེར་གང་ལ་གཟུགས་བཅོམ་པས་ཆ་ཤས་བཅོམ་པ་སྟེ་སྔར་གྱི་བློ་མི་འཇུག་པ་དེ་ནི་ཀུན་རྫོབ་ཏུ་ཡོད་པ་སྟེ་དཔེར་ན་བུམ་པ་བཞིན་ནོ། །ཁ་ཅིག་ཏུ་ཚོགས་པ་ལ་ཚོགས་པ་ལས་
གཞན་དུ་བཅོམ་ན་སྔ་མའི་བློ་ཉིད་དུ་འཇུག་པ་ནི་དཔེར་ན་ཆུ་ལྟ་བུའོ། །དེ་ལ་བློས་ཆོས་གཞན་དང་མཐུན་པ་གཟུགས་དང་དྲི་དང་རེག་བྱ་དག་བསལ་ཏེ་འདི་ཆུའོ་སྙམ་དུ་ཆུའི་བློ་མི་འཇུག་པ་དེའི་ཕྱིར་རྣམ་པར་མ་བྱེ་བ་ན་གྱོ་མོའི་གཟུགས་ལ་སོགས་པ་རྣམས་ཉིད་ལ་བུམ་པ་དང་ཆུའི་འདུ་ཤེས་
སུ་བྱེད་དེ། ཀུན་རྫོབ་ཏུ་ཡོད་པ་དེ་ནི་བུམ་པ་དང་ཆུ་ལྟ་བུའོ། །ཀུན་རྫོབ་རྣམ་པ་གཉིས་ཏེ་དབྱིབས་ཀྱི་ཀུན་རྫོབ་ནི་བུམ་པ་ལ་སོགས་པ་རྣམས་སོ། །ཚོགས་པའི་ཀུན་རྫོབ་ནི་ཆུ་ལ་སོགས་པ་རྣམས་སོ། །དེའི་ཕྱིར་གཞན་དག་ན་རེ་གཉིས་ཀ་གཟུང་ངོ་ཞེས་ཟེར་རོ། །གཞན་
དག་ན་རེ། ཀུན་རྫོབ་རྣམ་པ་གཉིས་ཏེ། ཀུན་རྫོབ་གཞན་ལ་བརྟེན་པ་ནི་བུམ་པ་ལྟ་བུའོ། །རྫས་གཞན་ལ་བརྟེན་པ་རྟག་པའི་སྒོ་ནས་ཏེ་རྣམ་པ་གཉིས་ཉེ་བར་བཀོད་དོ་ཞེས་ཟེར་རོ། །ཚོར་བ་ལ་སོགས་པ་ལ་ཡང་དེ་བཞིན་དུ་བལྟ་བར་བྱའོ། །ཆ་ཤས་མེད་པའི་ཕྱིར་དེ་
དག་ལ་ཆ་ཤས་ཐ་དད་པ་མེད་པའོ། །བློས་སྐད་ཅིག་མར་ཕྱེ་བ་ན་འདུ་ཤེས་ལ་སོགས་པའི་ཆོས་གཞན་བསལ་ཡང་ཚོར་བ་ལ་སོགས་པའི་རང་བཞིན་གྱི་བློ་འཇུག་པས་ན། འདི་དོན་དམ་པའི་བདེན་བ་རྟག་པ་སྟེ་དེ་རང་བཞིན་གྱིས་ཡོད་པའི་ཕྱིར་རོ། །གཞན་དག་ན་རེ་གང་དུ་མ་
ཉེ་བར་བླངས་ཏེ་བཏགས་པ་དེ་ནི་ཀུན་རྫོབ་པའོ། །གང་གཅིག་ཉིད་ཡིན་པ་དེ་ནི་དོན་དམ་པའོ། །གང་དུ་མིང་ལ་སོགས་པ་རྣམ་པར་དཔྱད་ན་མི་དམིགས་པ་དེ་ཀུན་རྫོབ་པོ། །གང་དུ་དམིགས་པ་དེ་དོན་དམ་པའོ་ཞེས་ཟེར་རོ། །སློབ་དཔོན་འདུས་བཟང་ན་རེ་གང་ཅི་ཀུན་རྫོབ་ཀྱི་
བདག་ཉིད་ཀྱི་དོན་དམ་པ་ཀུན་རྫོབ་ཏུ་ཡོད་དམ་མེད། གལ་ཏེ་ཡོད་ན་བདེན་པ་གཅིག་ཉིད་དུ་འགྱུར་རོ། །ཅི་སྟེ་མེད་ན་ཡང་བདེན་པ་གཅིག་ཉིད་དུ་འགྱུར་རོ། །ཡོད་པ་ཞེས་བྱ་བར་ཉེ་བར་འགྲོའོ་ཞེས་ཟེར་རོ། །དེ་སྐད་སྨྲ་བ་ལ་གནས་བརྟན་དབྱིག་བཤེས་ན་རེ། ཕྱིན་ཅི་མ་

ལོག་པའི་དོན་རྟོགས་པར་བྱེད་པའི་མིག་ནི་ཀུན་རྫོབ་ཀྱི་ནུས་པའོ། །དོན་དམ་པའི་བདེན་པ་ཞེས་བྱ་བ་ནི་རབ་ཏུ་བསྒྲུབས་པའི་མིང་རྫས་ཀྱི་སྒོ་ནས་ཡོད་པ་ཉིད་དོ། །བདེན་པ་གཅིག་ཉིད་དུ་བཤད་པ་མ་ཡིན་ནམ་ཞེ་ན་དེ་ལྟ་བུ་ཉིད་དོ། །དོན་དམ་པ་སྟོང་པ་བདེན་
པར་འགྱུར་བར་འོས་པ་མ་ཡིན་ནོ། །འོ་ན་ཅི་ལྟར་བདེན་པ་ཉིད་རྣམ་པར་གཞག་པར་འགྱུར། དོན་དམ་པའི་ཁྱད་པར་གང་ཡང་རུང་བ་ཀུན་རྫོབ་ཉིད་དུ་ཉེ་བར་བཀོད་པ་དེའི་ལས་ལ་སོགས་པ་དག་གི་དངོས་པོའི་ཐ་སྙད་ཀྱི་བདག་ཉིད་ལས་ཀུན་རྫོབ་དང་དོན་དམ་པ་ཡོད་ཀྱི།
དོན་དམ་པ་ཀུན་རྫོབ་ནི་མ་ཡིན་ནོ། །མིང་མ་གཏོགས་པ་གལ་ཏེ་རྫས་གཞན་ཁོ་ན་ཡིན་པ་དེ་ལྟ་ན་འོ་ན་བུམ་པ་དང་སྣམ་བུ་ལ་སོགས་པ་བདེན་པ་གཉིས་ཀྱི་ནང་དུ་འདུས་པ་མི་སྲིད་པའི་ཕྱིར་དེ་དག་ལ་འཇིག་རྟེན་གྱི་ཐ་སྙད་རིག་པ་མ་ཡིན་ནོ། །རྣམ་པར་གཞག་པ་ཐ་དད་པའི་
འབྲས་བུ་དེ་དག་ཉེ་བར་ལེན་པའི་བདག་ཉིད་མ་ཡིན་ལ། རང་ཉེ་བར་ལེན་པ་རྣམས་དེ་ཉིད་དང་གཞན་དུ་བརྗོད་དུ་མེད་པའི་ཕྱིར་རྣམ་པ་ཐ་དད་པ་ཡོད་པ་མ་ཡིན་ཞིང་དེའི་དབྱེ་བ་ལས་ཀྱང་མ་ཡིན་ནོ། །རྫས་ཀྱི་སྒོ་ནས་དེའི་དབྱེ་བ་ཡོད་པ་མ་ཡིན་པས་བུམ་པ་ལ་སོགས་པའི་
བློ་མེད་པའི་ཕྱིར་དཔེར་ན་ཀུན་རྫོབ་དང་ཀུན་རྫོབ་ཀྱི་བདག་ཉིད་འཁྲུལ་པ་མེད་པས་བདེན་པ་སྐྱེའོ། །ཡང་རྫས་ཀྱི་སྒོ་ནས་ཡོད་པ་མ་ཡིན་པའི་ཕྱིར་དོན་དམ་པའི་རྫས་དེ་ཡང་རྫས་ཀྱི་བདག་ཉིད་དུ་འཁྲུལ་པ་མེད་པས་དེའི་ཕྱིར་བདེན་པ་གཅིག་ཉིད་དུ་ཐལ་བ་མེད་དོ། །གང་བཤད་པའི་དོན་དམ་པ་
དེ་ཉིད་ཡོད་པའི་དོན་ཏེ། བྱེ་བྲག་ཁ་ཅིག་ཀུན་རྫོབ་ཀྱི་བདེན་པ་དང་ཁ་ཅིག་ནི་དོན་དམ་པའི་བདེན་པ་ཞེས་བྱའོ། །དོན་བསྡུས་ཏེ་ངེས་པར་མ་བཟུང་བ་འཛིན་པ་ནི་ཀུན་རྫོབ་ཀྱི་བདེན་པ་ཞེས་བྱ་ཞིང་། དོན་ངེས་པར་གཟུང་བའི་རྣམ་པའི་སྒོ་ནས་སམ་རྫས་ཀྱི་སྒོ་ནས་འཛིན་པ་ནི་དོན་དམ་
པའི་བདེན་པ་ཞེས་བྱ་སྟེ། དཔེར་ན་ཟག་པ་དང་བཅས་པའི་དངོས་པོའི་འབྲས་བུའི་སྒོ་ནས་འཛིན་པ་ནི་སྡུག་བསྔལ་གྱི་བདེན་པ་དང་། རྒྱུའི་སྒོ་ནས་འཛིན་པ་ནི་ཀུན་འབྱུང་གི་བདེན་པ་ཞེས་བྱ་བ་ལྟ་བུའོ། །དེ་ཡང་སྦྱར་བར་བྱ་བ་མ་ཡིན་ཏེ་ཡོད་པ་ནི་ཟག་པ་དང་བཅས་པའི་དངོས་པོ་

ལས་རྒྱུའི་ངོ་བོའོ། །འབྲས་བུའི་ངོ་བོ་ཡང་གཟུགས་ལ་སོགས་པ་རྣམས་ཏེ་བུམ་པ་དང་སྣམ་བུ་ལ་སོགས་པའི་རྣམ་པ་ཡོད་པའོ། །གང་གི་ཕྱིར་གཟུགས་ལ་སོགས་གནས་པ་རྣམས་བསྡུས་ཏེ་གཟུང་བར་གྱུར་པ་དེ་ཡོད་པ་ཉིད་ཀྱི་གྲངས་སུ་བགྲང་བའི་ཕྱིར་ཡན་ལག་དང་ཡན་ལག་
ཅན་གཅིག་པ་ཉིད་དུ་སྨྲ་བར་འགྱུར་རོ་ཞེས་པའོ། །བདེན་པ་རྣམས་མཐོང་བར་འདོད་པས་ཞེས་བྱ་བ་ནི་སྡུག་བསྔལ་ལ་སོགས་པ་རྣམས་མང་པོའི་ཚིག་གིས་བསྟན་པའི་ཕྱིར་དང་། ཉོན་མོངས་པ་སྤང་བའི་དབང་དུ་མཛད་པའི་ཕྱིར་རོ། །དེ་ཉིད་ཀྱི་ཕྱིར་བདེན་པ་གཞན་ལས་ཁྱད་
པར་དུ་བྱ་བའི་ཕྱིར་འདིར་འཕགས་པའི་སྒྲ་སྨོས་པའོ། །ཆོས་ཐམས་ཅད་ནི་རང་གི་མཚན་ཉིད་ཀྱི་བདེན་པ་ཡང་དག་པ་ཕྱིན་ཅི་མ་ལོག་པ་ཞེས་བྱ་སྟེ། དེ་རྟོག་པ་ལས་འཕགས་པ་ཉིད་ནི་མ་ཡིན་ཏེ་རང་གི་ཡུལ་ཤེས་པས་ངེས་པ་ལ་འཇུག་པ་མི་སྲིད་པའི་ཕྱིར་རོ། །རང་གི་མཚན་
ཉིད་ཀྱི་དགེ་བ་ཡང་ཡིན་པ་རྟོགས་པ་ལས་ནི་འཕགས་པ་ཉིད་དོ། །དེ་འཕགས་པ་རྣམས་ཡང་དག་པར་བཞེད་ཅིང་བདེན་པས་སོ། །དེ་ཡང་སྡུག་བསྔལ་གྱི་བདེན་པ་ལ་སོགས་པ་བཞི་པོ་རྣམ་པ་ཉིད་དོ། །དང་པོ་ཁོ་ནར་ཞེས་བྱ་བ་ནི་བཅོམ་ལྡན་འདས་ཀྱིས་ཚུལ་ཁྲིམས་ལ་
བརྟེན་ཅིང་ཚུལ་ཁྲིམས་ལ་གནས་ནས་ཆོས་ཉིད་བསྒོམ་པར་བྱ་སྟེ་ཞེས་གསུངས་པའོ། །དེས་ན་དང་པོ་ཁོ་ནར་ཚུལ་ཁྲིམས་ལ་ཤིན་ཏུ་གུས་པར་བྱ་སྟེ་བསྒོམ་པར་བྱའོ། །ཚུལ་ཁྲིམས་ཀྱང་འདིར་སོ་སོར་ཐར་པའི་སྡོམ་པའི་ཚུལ་ཁྲིམས་མངོན་པར་འདོད་ཀྱི་བསམ་གཏན་དང་
ཟག་པ་མེད་པའི་བདག་ཉིད་ནི་མ་ཡིན་ནོ། །དེ་ལ་ཚུལ་ཁྲིམས་ནི་མི་གཡོ་བའི་རྒྱུ་དང་རྣམ་པར་མི་གཡེང་བའི་རྒྱུའོ། །ཐོས་པ་ནི་མི་རྨོངས་པའི་རྒྱུའོ། །བསམ་པ་ནི་གཏན་ལ་ཕེབས་པའི་རྒྱུའོ། །མི་གཡོ་ཡང་བསྒོམ་པས་རྣམ་པར་འཇོམས་པའི་རྒྱུ་སྟེ་ཚུལ་ཁྲིམས་ལ་སོགས་པ་
རྣམས་ཀྱིས་དེ་དག་བསལ་ཏེ་བསྒོམ་པ་ལ་རབ་ཏུ་སྦྱོར་རོ། །དེ་ལྟ་ན་འདིའི་བསྒོམ་པ་ནི་ཤིན་ཏུ་སླ་བར་འགྱུར་རོ། །བདེན་པ་མཐོང་བ་དང་མཐུན་པའི་ཐོས་པ་འཛིན་པ་ཞེས་རྒྱས་པར་འབྱུང་བ་ལ། ཐོས་པ་དང་ལྡན་པ་ནི་བསྒོམ་པ་རྫོགས་པར་འགྱུར་ཏེ། ཐོས་པས་ཆོས་རྣམས་

ཤེས་པར་བྱེད། །ཐོས་པས་སྡིག་ལས་ལྡོག་པར་འགྱུར། །ཐོས་པས་དོན་མ་ཡིན་པ་སྤང་། །ཐོས་པས་མྱ་ངན་འདས་པ་ཐོབ། །ཅེས་ཚིགས་སུ་བཅད་དེ་འབྱུང་བའི་ཕྱིར་རོ། །དོན་ཉན་པར་བྱེད་དོ་ཞེས་བྱ་བ་ནི། གལ་ཏེ་གཞུང་འཛིན་པར་མི་ནུས་ན་སྙམ་དུ་
དགོངས་པའོ། །རེས་འགའ་ནི་ཡི་གེས་དོན་འདྲེན་པར་བྱེད་ཅེས་བྱ་བ། མིང་གང་གིས་དོན་གསལ་བར་བྱེད་པ་དེ་འདིར་ཡི་གེར་མངོན་པར་འདོད་དེ། དོན་བཟང་པོ་ཚིག་འབྲུ་བཟང་པོ་ཞེས་མདོ་ལས་འབྱུང་བས་སོ། །མིང་ལ་དམིགས་པ་ཞེས་གྲག་གོ་ཞེས་བྱ་བ་ལ་གྲག་གོའི་སྒྲ་ནི་
དེ་ལྟར་བསམ་པ་ལས་བྱུང་བ་གསུམ་པར་མི་འགྲུབ་པོ་ཞེས་མ་རངས་པ་མཚོན་པའི་དོན་ཏོ། །གཞན་དག་ན་རེ། སྦྱོར་བ་པའི་དུས་ཀྱི་དབང་དུ་བྱས་ནས་བརྗོད་དེ། མིང་དང་གཉི་གའི་ཡུལ་ཉིད་དེ་ཐོས་པ་དང་བསམ་པའི་རྒྱུ་དང་ཐོབ་པ་དག་ཡོངས་སུ་གྲུབ་པས་འདི་དག་ཐམས་ཅད་དོན་ཁོ་
ནའི་ཡུལ་དུ་མི་འགྱུར་རོ། །མིང་ཙམ་ལས་ནི་ངེས་པ་སྐྱེ་བ་མ་ཡིན་པས་དེའི་ཕྱིར་མིང་ལ་དམིགས་པ་ཉིད་ཐོབ་པ་ལས་འབྱུང་བའོ། །གང་ཞིག་ཤེས་རབ་ཀྱི་སྦྱོར་བའི་དུས་སུ་མིང་གི་དབང་གིས་དོན་འདྲེན་པར་བྱེད་པ་དེ་ཐོས་པ་ལས་བྱུང་བའོ། །གང་ཞིག་དོན་གྱི་དབང་གིས་མིང་འདྲེན་
པ་དེ་བསམ་པ་ལས་བྱུང་བའོ། །གང་ཞིག་མིང་ལ་མ་ལྟོས་པར་དེ་ལྟར་དོན་གྱི་བློ་སྐྱེད་པ་དེ་བསྒོམ་པ་ལས་བྱུང་བའོ། །དེ་ལྟར་འདི་ནི་ཁྱད་པར་གྱི་མཚན་ཉིད་དེ་འདི་བྱེ་བྲག་ཏུ་སྨྲ་བའི་བསམ་པའོ། །འདི་ལྟར་བཅོམ་ལྡན་འདས་ཀྱིས་གཏན་ལ་ཕབ་པའི་ཁྱད་པར་ཤེས་རབ་གསུམ་
པོ་རྣམས་ནི་ཡིད་ཆེས་པའི་ཚིག་གིས་བསྟན་པ་བསམ་གཏན་དང་ཏིང་ངེ་འཛིན་ལས་སྐྱེས་པའི་ཁྱད་པར་གསུམ་ཉིད་དུ་འགྱུར་རོ། །འདུ་འཛི་དང་མི་དགེ་བའི་རྣམ་པར་རྟོག་པ་ཐག་བསྲིང་བའི་ཕྱིར་ཞེས་བྱ་བ་ལ་བསྲིང་བ་དག་ནི་འདུ་འཛི་ལས་རིང་དུ་གྱུར་པས་སེམས་བསྲིང་བ་སྟེ་སྡིག་
པའི་རྣམ་པར་རྟོག་པ་དང་འདུ་འཛིའི་རྣམ་པར་རྟོག་པ་དང་བྲལ་བ་ཉིད་ཀྱིས་སེམས་ནི་ཏིང་ངེ་འཛིན་དུ་བྱེད་དོ། །ཆོག་མི་ཤེས་པ་དང་འདོད་ཆེན་ཅན་ལ་མ་ཡིན་ནོ་ཞེས་བྱ་བ་ནི་ཡོ་བྱད་ལ་དོན་དུ་གཉེར་བ་མང་པོས་ནི་ཉིན་པར་འདུ་འཛི་ལ་སེམས་ཤིན་ཏུ་གཞོལ་བར་འགྱུར་རོ། །མཚན་

མོ་ནི་རྣམ་པར་རྟོག་པས་འདིའི་སེམས་ལ་ཏིང་ངེ་འཛིན་གྱི་སྐབས་རྙེད་པར་མི་འགྱུར་རོ། །ཡོངས་སུ་དལ་བ་ནི་ཡིད་མི་བདེ་བའོ། །གཞན་དག་ན་རེ། གལ་ཏེ་སྡུག་བསྔལ་འཆོས་པར་ནུས་པའི་དངོས་པོ་ཐོབ་པ་ན་འདི་མགུ་བར་མི་འགྱུར་ལ། དེ་ནུས་པའི་དངོས་པོ་ཐོབ་པ་ནི་རྣམ་པར་འཇོམས་
པ་ཐོབ་པ་མ་ཡིན་པས་ཏིང་ངེ་འཛིན་གྱི་བར་དུ་གཅོད་པ་མ་ཡིན་ཞེ་ན། འདི་ལ་སྐྱོན་མེད་དེ་འདི་ལྟར་སྡུག་བསྔལ་འཆོས་པར་ནུས་པའི་དངོས་པོ་ལས་གོང་དུ་འདོད་པས་དགེ་བའི་རྩ་བ་ལས་རིང་དུ་བྱེད་པས་དེའི་ཕྱིར་གང་ལས་གསུངས་པ་དེ་བཞིན་དུ་སྦྱར་རོ་ཞེས་འདི་རྒྱ་ཆེར་སྨྲས་སོ། །ཨ་ཏྲ་
ཧི་པྲ་རི་ཏཱ་པོ་ནི་ཝཪྻ་ཏེ། པ་རི་ཏཱ་སཤྩ་ཏིང་ངེ་འཛིན་ལ་བར་དུ་གཅོད་པར་འགྱུར་བ་ཉིད་དོ་ཞེ་ན། གཞན་དག་ན་རེ་འདི་མི་རིགས་སོ་ཞེས་ཟེར་རོ། །ཆོས་མངོན་པ་པ་རྣམས་ནི་སྨྲ་བ་མ་ཡིན་ནོ། །ཆོས་གོས་ལ་སོགས་པ་གྱ་ནོམ་པ་དང་མང་པོ་རྙེད་པ་ན་ཆོས་གོས་ལ་སོགས་པ་གཞན་ཐོབ་པར་
འདོད་པ་ནི་ཆོག་མི་ཤེས་པའོ། །འོ་ན་ཅི་ཇི་ལྟར་སྡུག་བསྔལ་འཆོས་པའི་ཆོས་གོས་གོས་ལ་སོགས་པ་རྙེད་པ་དག་ལ་ཕྱིར་ཞིང་ཁ་དོག་ལ་སོགས་པ་ཕུན་སུམ་ཚོགས་པ་འདོད་པ་ཉིད་ཉེ་བར་བཟུང་ནས་འདི་དང་འདི་ལྟ་བུ་བདག་གིས་ཅིའི་ཕྱིར་མ་ཐོབ་སྙམ་པ་འདི་ནི་ཆོག་མི་ཤེས་པ་སྟེ། དེའི་ཕྱིར་ཆོག་
མི་ཤེས་པ་དང་འདོད་ཆེན་དག་ལ་ཁྱད་པར་ཆེའོ། །གཞན་དག་ན་རེ། སྡུག་བསྔལ་འཆོས་པར་ནུས་པའི་དངོས་པོ་རྙེད་པ་དག་ལ་ཕྱིར་ཞིང་མི་འདོད་པ་ནི་ཆོག་ཤེས་པ་ཡིན་ལ། མ་རྙེད་པ་དག་ལྷག་པར་དོན་དུ་མི་གཉེར་བ་ནི་འདོད་པ་ཆུང་བ་ཡིན་ནོ་ཟེར་རོ། །དེ་གཉིས་ཁམས་གསུམ་གཏོགས་
དྲི་མེད། །ཅེས་བྱ་བ་ནི་མ་ཆགས་པའི་རང་བཞིན་ཡིན་པའི་ཕྱིར་འདོད་པ་ན་སྤྱོད་པའི་དགེ་བའི་སེམས་དང་མཚུངས་པར་ལྡན་པ་ནི་ཆོག་ཤེས་པ་དང་འདོད་པ་ཆུང་བ་སྟེ། འདོད་པ་དང་མཚུངས་པར་ལྡན་པ་དག་གོ། །དེ་བཞིན་དུ་གཞན་པ་ཡང་བརྗོད་པར་བྱའོ། །འདོད་པ་སྤྱོད་པ་དག་ཁོ་
ན་ཡིན་ནོ་ཞེས་བྱ་བ་ནི་ཆགས་པ་ནི་མི་དགེ་བའི་རྩ་བའི་རང་བཞིན་ཡིན་པའི་ཕྱིར་རོ། །འདི་རྟོགས་པར་བྱ་སྟེ་གཟུགས་དང་གཟུགས་མེད་པའི་ཁམས་དག་ན་ཞེས་བྱ་བ་ནི། ཆོག་ཤེས་པ་འདོད་པ་ཆུང་བ་དག་ཡོད་དེ། འདོད་པའི་ཁམས་སུ་སྐྱེས་པ་ཡང་དེའི་སེམས་ཀུན་ནས་སློང་བ་ཆོག་མི་ཤེས་

པ་དང་འདོད་པ་ཆེ་བ་ཆ་ཀུན་ཏུ་སྤྱོད་པ་བསྲིང་བའི་ཕྱིར་དང་། ཆོག་ཤེས་པ་དང་འདོད་པ་ཆུང་བ་དག་ཆེས་རྒྱས་པར་ཀུན་ཏུ་སྤྱོད་པ་མཐོང་བའི་ཕྱིར་འདི་དག་གི་མཚན་ཉིད་ཁྱད་པར་དུ་བཤད་དོ། །སྤྱིའི་མཚན་ཉིད་མི་ཤེས་པས་དེའི་ཕྱིར་འདོད་ཆེན་ཆུང་བ་དང་ཆོག་ཤེས་པ་འདི་གཉིས་
ཀྱི་ཞེས་རྒྱས་པར་སྨོས་ཏེ། ཆགས་པ་རྣམ་པ་མང་པོའི་གཉེན་པོ་ཡིན་པའི་ཕྱིར་མ་ཆགས་པའི་རང་བཞིན་ཏེ་འདི་དག་འཕགས་པའི་རིགས་ཡིན་པའི་ཕྱིར། གཞན་དག་ན་རེ། ཁམས་གསུམ་གཏོགས་དྲི་མེད། མ་ཆགས་པའི་བདག་ཉིད་ཀྱང་ངོ་ཞེས་སྦྱར་རོ་ཞེས་ཟེར་རོ། །ཆོས་གོས་
ལ་སོགས་པ་མ་རྙེད་པ་ཡང་ཞེ་སྡང་མེད་པའི་དགེ་བའི་རྩ་བ་བཞིན་ནོ། །གཟུགས་མེད་པར་སྐྱེས་པ་རྣམས་ཇི་ལྟར་ལུས་ལ་དོན་དུ་གཉེར་བ་མེད་པ་དེ་བཞིན་དུ་འདོད་པའི་མངོན་སྤྱོད་ཉེ་བར་མཁོ་བ་རྣམས་ལ་ཡང་ཡིན་ནོ། །སློབ་པ་རྣམས་ཀྱང་དེ་དག་ལ་བསམ་པའི་སྒོ་ནས་ཡིན་གྱི་སྦྱོར་བའི་སྒོ་
ནས་མ་ཡིན་ནོ། །འཕགས་པ་རྣམས་ཁོ་ན་དེ་དག་ལས་རབ་ཏུ་སྐྱེ་བའི་ཕྱིར་ཞེས་བྱ་སྟེ། བརྒྱུད་པས་འབྲེལ་པ་ནི་སྐྱེས་བུའི་རྒྱུད་ཀྱི་རིམ་པའི་དབང་ངོ་ཞེས་འཇིག་རྟེན་ན་རབ་ཏུ་གྲགས་སོ། །འཕགས་པ་ཡང་ལུས་ཀྱི་ཆོས་གང་ཡང་རུང་བ་ཆོས་གོས་ཀྱིས་ཆོག་ཤེས་པ་ལ་སོགས་པ་རིགས་ཀྱི་
རང་བཞིན་ནོ། །དེ་ལས་སྐྱེས་པ་འཕགས་པའི་རིགས་དང་པོ་གསུམ་ཆོག་ཤེས་པ་ལ་སོགས་པའི་རང་བཞིན་ནོ་ཞེས་རྒྱས་པར་འབྱུང་སྟེ། རྣམ་པ་མང་པོ་ལས་མ་ཆགས་པ་ནི་ཆོག་ཤེས་པའི་མཚན་ཉིད་དེ་ཆགས་པའི་གཉེན་པོ་ཡིན་ནོ། །དེ་ནི་འཕགས་པའི་རིགས་དང་པོ་གསུམ་གྱི་
མཚན་ཉིད་དོ། །སྤོང་བ་དང་བསྒོམ་པ་ལ་དགའ་བ་ཉིད་ཡིན་ནོ་ཞེས་བྱ་བ་ལ་སྤོང་བ་དང་བསྒོམ་པ་ནི་སྤོང་བ་དང་བསྒོམ་པའོ། །དེ་ལ་ན་དགའ་བ་ནི་སྤོང་བ་དང་བསྒོམ་པ་ལ་དགའ་བའོ། །འདི་ལ་དགའ་བས་ན་དགའ་སྟེ་དེའི་དངོས་པོ་ནི་སྤོང་བ་དང་བསྒོམ་པ་ལ་དགའ་བ་ཉིད་དོ། །སྤོང་བ་
དང་བསྒོམ་པ་ཞེས་བྱ་བ་བྲལ་བ་དང་ལམ་མོ་ཞེས་བྱ་བའི་དོན་ཏོ། །ཡང་ན་སྤོང་བའི་ཆེད་དུ་བསྒོམ་པ་ནི་སྤོང་བའི་བསྒོམ་པ་ཡིན་ལ། སྤོང་བའི་བསྒོམ་པ་ལ་དགའ་བ་ནི་སྤོང་བའི་བསྒོམ་པ་ལ་དགའ་བ་སྟེ། ཉོན་མོངས་པའི་འགོག་པ་མངོན་སུམ་དུ་བྱ་བའི་ཐབས་ལ་གོམས་པ་ལྷུར་ལེན་

ཅེས་བྱ་བའི་ཐ་ཚིག་གོ། །སྲིད་པ་དང་འདོད་པའི་འདོད་ཆགས་ལ་རྒྱབ་ཀྱིས་ཕྱོགས་པའི་ཕྱིར་རོ་ཞེས་བྱ་བའི་ནི་སྲིད་པ་ལ་རྒྱབ་ཀྱིས་ཕྱོགས་པའི་ཕྱིར་དང་འདོད་ཆགས་ལ་རྒྱབ་ཀྱིས་ཕྱོགས་པའི་ཕྱིར་ཏེ། སྲིད་པའི་སྲིད་པ་ལ་རྒྱབ་ཀྱིས་ཕྱོགས་པའི་ཕྱིར་ཞེས་བྱ་བའི་ཕྱིར་རོ། །ཡང་ན་སྲིད་པའི་འདོད་
ཆགས་ལ་རྒྱབ་ཀྱིས་ཕྱོགས་པའི་ཕྱིར་དང་འདོད་པའི་འདོད་ཆགས་ལ་རྒྱབ་ཀྱིས་ཕྱོགས་པའི་ཕྱིར་རྒྱབ་ཀྱིས་ཕྱོགས་པ་དང་མ་ཆགས་པ་ཡང་ཡིན་ནོ། །ཞེ་སྡང་གི་གཉེན་པོ་ཡིན་པའི་ཕྱིར་ཞེ་སྡང་མེད་པའི་བདག་ཉིད་ཀྱང་བཞི་པར་འགྱུར་བ་མ་ཡིན་ནམ་ཞེ་ན་མི་འགྱུར་ཏེ། གསུམ་པ་དེའི་
ཚོགས་སུ་འགྱུར་བའི་ཕྱིར་དང་། དེ་དག་མ་ཆགས་པའི་བདག་ཉིད་ཡིན་པའི་ཕྱིར་དང་། སཏྶྭྰ་ཡཉྩ། སྭ་ཡཉྩ། ཆགས་པའི་གཉེན་པོ་ཡིན་པས་ཆེས་ཤིན་ཏུ་མ་ཆགས་པའི་བདག་ཉིད་ཅེས་བྱ་བའོ། །མགུ་བ་མ་ཡིན་པའི་སྔོན་དུ་འགྲོ་བའི་ཕྱིར་མགུ་བ་ཡོད་པ་ལ་ཡང་འདོད་ཆེན་ཆེ་
བ་མེད་པའི་ཕྱིར་ཆོག་ཤེས་པ་ཁོ་ན་འཕགས་པའི་རིགས་སུ་རྣམ་པར་གཞག་གི་འདོད་ཆེན་སྟག་ལུང་པ་ཟེར། ཆུང་བ་ཉིད་མ་ཡིན་ནོ། །ཡང་ཇི་ལྟར་ཆོག་ཤེས་པ་འདི་ཟག་པ་མེད་པ་དང་ལྡན་ཞེ་ན། ཁ་ཅིག་ནི་དེ་ལྟར་ཟག་པ་མེད་པའོ་ཞེས་སྨྲའོ། །འོ་ན་ཇི་ལྟར་ཟག་པ་མེད་པ་འཕགས་པའི་
རིགས་སུ་འགྱུར། དེའི་དབང་དུ་བྱས་ཏེ་སྐྱེས་པའི་ལས་ལ་དེར་བཤད་པའི་ཕྱིར་རོ། །ཟག་པ་མེད་པར་ཡོད་པས་འཕགས་པའི་རིགས་ཞེས་བྱའོ། །གང་ཁ་ཅིག་ཏུ་ཆོག་ཤེས་པ་ཐམས་ཅད་ཟག་པ་མེད་པ་ཞེས་བྱ་བ་ལ། འདིས་ནི་འདོད་པ་ཆུང་བ་ཉིད་བཤད་པ་ཡིན་ནོ། །འབྱུང་བ་དང་འཇིག་
པ་དེ་ལྟ་བུའི་ཕྱིར་ཞེས་བྱ་བ་ལ། དེ་ལྟར་གྱི་སྒྲ་ནི་འབྱུང་བ་དང་འཇིག་པའི་བྱེ་བྲག་གསལ་བར་བྱེད་པ་སྟེ། ཀྱེ་མ་བདག་ལྷར་གྱུར་ཀྱང་ཅི་མ་རུང་། །ལྷ་གང་ཡང་རུང་བར་གྱུར་ཀྱང་ཅི་མ་རུང་ཞེས་བྱ་བ་དང་། འཇིག་པ་ནི་རྣམ་པར་འཇིག་པ་སྟེ། ཀྱེ་མ་བདག་ཤི་ཕན་ཆད་རྒྱུན་ཆད་ཀྱང་ཅི་
མ་རུང་ངོ་། །བརླག་ཀྱང་ཅི་མ་རུང་མ་བྱུང་ཡང་ཅི་མ་རུང་སྙམ་པ་ལ་སོགས་པའོ། །གཞན་དག་ན་རེ་དེ་དག་གིས་འཕགས་པའི་བདེན་པ་སྐྱེ་བའི་རྒྱུ་ཡོངས་སུ་རྫོགས་པའི་རྒྱུ་བཞི་པོ་ཉིད་དོ་ཞེས་ཟེར་རོ། །མདོར་བསྡུས་ན་འཕགས་པ་ཉིད་ཀྱི་རྒྱུ་རྣམ་པ་གཉིས་ཏེ། སྐྱོན་བཟློག་པར་

བྱེད་པ་དང་ཡོན་ཏན་འཛིན་པར་བྱེད་པའོ། །སྐྱོན་ཟློག་པར་བྱེད་པ་གསུམ་མོ། །ཡོན་ཏན་འཛིན་པར་བྱེད་པ་བཞིའོ། །ཅིའི་ཕྱིར་ནད་དང་སྨན་གྱི་གཞི་ལས་འཕགས་པའི་རིགས་རྣམ་པར་མ་བཞག་ཅེ་ན། དེ་དག་ནི་ཆོས་གོས་ལ་སོགས་པའི་ནང་དུ་འདུས་པའི་ཕྱིར་དེ་དག་
ལས་ཐ་དད་པའི་ནད་དང་སྨན་ཡོད་པ་མ་ཡིན་ནོ། །ཆོས་གོས་ལ་སོགས་པ་ཁོ་ན་ལས་རྒྱགས་པ་ལྷག་པར་འབྱུང་བའི་ཕྱིར་རོ། །འདི་ཐམས་ཅད་རྟག་ཏུ་ཡང་སྲིད་པའི་ཕྱིར་གཞི་ཉིད་དོ། །སྨན་ནི་རེས་འགའ་བ་ཡིན་པས་དེ་ལ་མ་བཤད་དོ། །གཞན་དག་ན་རེ་དེའི་གནས་ཀྱང་
རྣམ་པར་མ་བཞག་གོ་ཞེས་ཟེར་རོ། །གཞན་དག་ན་རེ་དེ་ལ་བསླབ་པ་འདོད་པ་རྣམས་ལ་ཆོག་ཤེས་པ་དང་ཚངས་པར་སྤྱོད་པའི་བར་ཆད་བསྟན་པའི་ཕྱིར་རོ་ཞེས་ཟེར་རོ། །ང་ཡིར་འཛིན་པ་བཟློག་པའི་ཕྱིར་ཆོས་གོས་ལ་སོགས་པས་ཆོག་ཤེས་པ་བདག་པོར་གྱུར་པའི་ལམ་ནི་
འཕགས་པའི་རིགས་གསུམ་མོ། །ངར་འཛིན་པ་བཟློག་པའི་ཕྱིར་སྤོང་བ་དང་བསྒོམ་པ་ལ་དགའ་བ་བདག་པོར་གྱུར་པ་གང་ཡིན་པ་ནི་བཞི་པའོ། །འཇིག་ཚོགས་ལ་ལྟ་བ་རྣམ་པར་སེལ་བ་དང་ཤིན་ཏུ་བཟློག་པའི་ཕྱིར་འཕགས་པའི་རིགས་བཞི་བསྟན་པས་རྣམ་གྲངས་གཞན་གསུངས་
པ་ཡིན་ནོ། །རྣམ་གྲངས་སྔ་མ་ཁོ་ན་མ་ཡིན་ཞེས་བྱ་བ་ནི་འཇུག་པ་དང་རྗེས་སུ་འཇུག་པའོ། །སྣ་ཚོགས་ལ་ནི་མི་དམིགས་པའི་ཕྱིར་ཞེས་བྱ་བ་རླུང་ལ་ཁ་དོག་དང་དབྱིབས་མེད་པའི་ཕྱིར་རོ། །ཡང་ན་རེག་བྱ་ཙམ་ལ་དམིགས་པའི་ཕྱིར་རོ། །མི་སྡུག་པར་སྒོམ་པ་ལ་རུས་པ་ནི་རྐང་རུས་
ལ་སོགས་པ་ལ་དམིགས་པའི་ཕྱིར་ཁ་དོག་དང་དབྱིབས་ཀྱི་ཁྱད་པར་ལ་དམིགས་པའོ། །ཁ་ཕྱིར་མ་བལྟས་པའི་ཕྱིར་ཏེ་ཞེས་བྱ་བ་ནི་ཕྲ་བ་ངང་གིས་གྱུར་པ་ལ་རག་ལས་པའི་ཡུལ་ཅན་ཡིན་པའི་ཕྱིར་མི་སྡུག་པའི་ངོ་བོ་ཧ་ཅང་མང་ཞིང་སྣ་ཚོགས་པའི་རྒྱུ་ལས་སྐྱེས་པ་ཡང་མ་ཡིན་
ནོ། །རྣམ་པར་རྟོག་པ་གཅོད་པའི་ཕྱིར་རྗེས་སུ་འཇུག་གོ། །མི་སྡུག་པ་ནི་ཡིད་ཀྱི་ས་པ་ཡིན་ཡང་མིག་གི་རྣམ་པར་ཤེས་པ་བཞིན་དུ་ཁ་ཕྱིར་བལྟས་པ་ཡིན་ཏེ། གང་ལས་ཤེ་ན། དེའི་ཡུལ་ལ་ཉེ་བར་རྟོག་པའི་ཕྱིར་ཞེས་བྱ་བ་འབྱུང་སྟེ། མིག་གི་རྣམ་པར་ཤེས་པའི་ཡུལ་

ངེས་པར་རྟོག་པའི་ཕྱིར་རོ་ཞེས་བྱ་བའི་དོན་ཡིན་གྱི། རྣམ་པར་རྟོག་པ་གཅོད་པའི་ཕྱིར་རྗེས་སུ་འཇུག་པ་མ་ཡིན་ནོ། །ཆོས་ཉེ་བའི་ཚུལ་གྱིས་འདོད་ཆགས་ཀྱི་གཉེན་པོ་ནི་མི་སྡུག་པ་སྟེ། གཞན་མ་ཡིན་པས་འདི་ནི་ནད་ཉེ་བར་ཞི་བར་བྱ་བ་ལ་སྨན་ལྟ་བུ་ཉིད་ཡིན་ནོ། །དེ་བཞིན་དུ་དབུགས་
འབྱུང་བ་དང་རྔུབ་པ་དྲན་པ་ཡང་ཡིན་ནོ། །རྣམ་པར་འབུས་གཞིག་པ་ཞེས་བྱ་བ་ལ། འབུས་ཞེས་བྱ་བ་ནི་མངོན་པར་སྐྱེས་པའི་འབུ་སྲིན་གྱིས་སོ་ཞེས་བྱ་བའི་དོན་ཏོ། །དེས་ལུས་བཅོམ་པ་དང་འདྲ་བར་མོས་པའི་ཕྱིར་དང་གཟུགས་ཀྱི་ཕུང་པོའི་ཕྱོགས་གཅིག་ལ་དམིགས་པའི་ཕྱིར་རོ། །
ལྷག་པར་མོས་པ་དང་ཉི་ཚེ་བ་ཡིད་ལ་བྱེད་པ་མི་སྡུག་པའི་དེ་ཁོ་ན་ཉིད་ཡིད་ལ་བྱེད་པ་ན་ཁྱབ་པ་མ་ཡིན་པས་ཉོན་མོངས་པ་སྤོང་བར་མི་འགྱུར་རོ། །དེའི་ཕྱིར་མི་སྡུག་པའི་ཡེ་ཤེས་ཀྱིས་ཉོན་མོངས་པ་སྤོང་བ་ནི་མ་ཡིན་ནོ། །ཡང་ཅི་དེས་ཇི་ལྟར་མགོ་མནན་པར་གསུངས་ཤེ་ན་བཅོམ་ལྡན་འདས་
ཀྱིས། དགེ་སློང་སློབ་པ་གཞོན་པའི་རིགས། །སེམས་མ་བྱང་བ་གང་ཞིག་ལ། །གལ་ཏེ་འདོད་ཆགས་འཇོམས་འདོད་ན། །དེ་ནི་དུར་ཁྲོད་འགྲོ་བར་འགྱུར། །དེ་ནས་རྣམ་པར་བསྔོས་པ་ལྟ། །དེ་ནས་རྣམ་པར་གནག་པར་ལྟ། །དེ་ནས་པགས་པ་རུས་པ་ཡི། །རུས་གོང་
ལ་སོགས་ལྟ་བར་བྱེད། །ཅེས་གསུངས་སོ། །ཡིད་ལ་བྱེད་པ་སྦྱང་བ་བྱས་པ་དང་། སྦྱང་བ་མ་བྱས་པ་དག་དང་ཞེས་བྱ་བ་རྒྱས་པར་འབྱུང་བ་ནི་ཡིད་ལ་བྱེད་པ་སྦྱང་བ་བྱས་པའི་མི་སྡུག་པ་རང་གི་ལུས་ལ་དམིགས་པ་ཆུང་བས་ཆུང་བ་ཡིན་གྱི་དབང་ཆུང་བས་ནི་མ་ཡིན་ནོ། །ཡིད་ལ་
བྱེད་པ་སྦྱང་བ་མ་བྱས་པའི་རྒྱ་མཚོའི་མཐའ་ཀླས་པའི་བར་ལ་དམིགས་པ་ནི་དབང་ཆུང་བས་ཆུང་བ་ཡིན་གྱི་དམིགས་པ་ཆུང་བས་ཆུང་བ་ནི་མ་ཡིན་ནོ། །ཡིད་ལ་བྱེད་པ་སྦྱང་བ་མ་བྱས་པའི་རང་གི་ལུས་ལ་དམིགས་པ་ནི་དམིགས་པ་ཆུང་བས་ཀྱང་ཆུང་བ་ཡིན་ལ་དབང་ཆུང་བས་ཀྱང་ཆུང་
བ་ཡིན་ནོ། །ཡིད་ལ་བྱེད་པ་སྦྱང་བ་བྱས་པའི་རྒྱ་མཚོའི་མཐས་ཀླས་པའི་བར་ལ་དམིགས་པ་ནི་དམིགས་པ་ཆུང་བས་ཆུང་བ་མ་ཡིན་ལ་དབང་ཆུང་བས་ཆུང་བ་ཡང་མ་ཡིན་ནོ། །རང་བཞིན་ནི་མ་ཆགས་པའོ་ཞེས་བྱ་བ་ནི། མི་སྡུག་པ་ནི་མི་མཐུན་པར་ཡིད་ལ་བྱེད་པ་སྟེ། འདི་སྨད་པ་དང་

བཙོག་པའི་ཀུན་ཏུ་ཆགས་པ་ལ་རྒྱབ་ཀྱིས་ཕྱོགས་པ་ཞེས་བྱའོ། །ཐམས་ཅད་དུ་མི་སྡུག་པ་ནི་མ་ཆགས་པ་ཡིན་ན་འོ་ན་མ་ཆགས་པ་དང་ཐམས་ཅད་མི་སྡུག་པ་ཡིན་ནམ་ཞེ་ན། ཁ་དོག་གི་འདོད་ཆགས་སེལ་བའི་གཉེན་པོ་ཁོ་ན་མི་སྡུག་པ་ཡིན་པའི་ཕྱིར། འདི་འཁོར་
དང་བཅས་པ་ནི་ཕུང་པོ་བཞི་དང་ལྔའི་རང་བཞིན་ཉེར་བསྡོགས་དང་ལྷན་ཅིག་པའི་བསམ་གཏན་ཁྱད་པར་ཅན་ཏེ་ཉེར་བསྡོགས་དང་བཅས་པའི་བསམ་གཏན་ཁྱད་པར་ཅན་རྣམས་སོ། །འདི་སྐད་བསྟན་པར་འགྱུར་ཏེ། ཉེར་བསྡོགས་དང་བཅས་པའི་བསམ་གཏན་བཞི་དང་ཁྱད་
པར་ཅན་དུ་སྟེ། བསམ་གཏན་བཞི་རྣམས་སུ་སྟེ་གཞན་དུ་མ་ཡིན་པའོ། །ལྷ་རྣམས་སུ་ཡང་མ་ཡིན་ཏེ་སྔོན་པོ་ལ་སོགས་པ་ལ་དམིགས་པ་མེད་པའི་ཕྱིར་རོ། །དམྱལ་བ་དང་ཡི་དགས་དང་དུད་འགྲོ་རྣམས་སུ་མ་ཡིན་ཏེ། དེ་དག་ཏུ་འདོད་ཆགས་དང་བྲལ་བ་མེད་པའི་ཕྱིར་རོ། །
བྱང་གི་སྒྲ་མི་སྙན་དུ་མ་ཡིན་ནོ་ཞེས་བྱ་བ་ནི་མི་རྣམས་ཀྱི་ནང་ཁོ་ནར་བསྐྱེད་ཀྱི་ཞེས་སྤྱིར་བཏང་བ་འདིའི་དམིགས་ཀྱིས་བསལ་བའོ། །དེ་ན་འདོད་ཆགས་དང་བྲལ་བ་མེད་པའི་ཕྱིར་དང་། དེ་འདོད་ཆགས་དང་བྲལ་བར་བྱ་བའི་ཐབས་ཡིན་པའི་ཕྱིར་རོ། །ཐོག་མར་ནི་མི་རྣམས་ཀྱི་ནང་
ཁོ་ནར་བསྐྱེད་ལ། སྔར་བསྐྱེད་ཟིན་པ་ནི་ལྷ་རྣམས་ཀྱི་ནང་དུ་ཡང་མངོན་དུ་བྱེད་པ་ཡིན་ནོ། །མི་སྐྱེ་བའི་ཆོས་ཅན་གྱི་ནི་དུས་གསུམ་ལ་དམིགས་ཏེ། གཟུགས་ཀྱི་སྐྱེ་མཆེད་ངེས་པས་དེའི་རྫས་ངེས་པར་བྱས་ནས་དོན་ལ་དམིགས་པར་བྱེད་ཀྱི་མིང་ལ་དམིགས་པ་ནི་མ་ཡིན་
ནོ། །མོས་པ་ཡིད་ལ་བྱེད་པ་ཡིན་པའི་ཕྱིར་ཟག་པ་དང་བཅས་པ་སྟེ། དེ་ཁོ་ན་ཉིད་ཡིད་ལ་བྱེད་པ་ནི་ཟག་པ་མེད་པ་ཡིན་པའི་ཕྱིར་རོ། །མོས་པ་ལས་བྱུང་བས་ནི་ཕྱིན་ཅི་མ་ལོག་པར་ཉོན་མོངས་པ་འགོག་པའི་ཕྱིར་དང་དེར་འདུ་ཤེས་པའི་ཕྱིར་རོ། །རང་གི་མཚན་ཉིད་
ཡིད་ལ་བྱེད་པ་གང་ཡིན་པ་འདི་ལྟར་ལུས་ལ་ཡོད་པའི་སྐྲ་དང་བ་སྤུ་དང་ཞེས་བྱ་བ་ལ་སོགས་པ་དེ་ཡིས་ཉོན་མོངས་པ་སྤོང་བ་མ་ཡིན་ཏེ། ཐུན་མོང་དུ་ཡིད་ལ་བྱེད་པས་སྤང་བའི་ཕྱིར་རོ། །འདི་ནི་ལུས་དྲན་པ་ཉེ་བར་གཞག་པའི་སྦྱོར་བ་ཡིན་གྱི་དངོས་གཞི་ལུས་དྲན་པ་ཉེ་

བར་བཞག་པ་མ་ཡིན་ནོ། །བདེ་བ་དང་ཡིད་བདེ་བ་དང་བཏང་སྙོམས་ཀྱི་དབང་པོ་རྣམས་དང་མཚུངས་པར་ལྡན་པའི་སྡུག་བསྔལ་དང་ཀུན་འབྱུང་གི་བཟོད་པ་དང་ཤེས་པ་བཞིན་ངེས་པར་འབྱུང་བ་ཡིད་ལ་བྱེད་པའོ། །འདྲིས་པ་དང་མ་འདྲིས་པ་ཡིན་པའི་ཕྱིར་ཞེས་བྱ་བ་ལ། འདྲིས་པ་ནི་
འདོད་ཆགས་དང་བྲལ་བས་ཐོབ་པ་ཡིན་ནོ། །མ་འདྲིས་པ་ནི་སྦྱོར་བ་ལས་བྱུང་བ་ཡིན་ནོ། །འདོད་ཆགས་དང་བྲལ་བས་ཐོབ་པ་ཡང་སྦྱོར་བའི་སྒོ་ནས་མངོན་དུ་བྱེད་དོ། །མི་སྡུག་པའི་མཚན་ཉིད་རབ་ཏུ་དབྱེ་བ་དང་བཅས་པ་བཤད་ཟིན་ཏེ། དབུགས་རྔུབ་དབུགས་འབྱུང་ཞེས་
བྱ་བ་རྒྱས་པར་འབྱུང་བ་ལ། དབུགས་རྔུབ་པ་ཞེས་བྱ་བ་ནི་ནང་དུ་འདྲེན་པ་སྟེ་གང་གི་ཡན་ལག་འཇུག་པའོ། །དབུགས་འབྱུང་བ་ཞེས་བྱ་བ་ནི་ཕྱིར་གཏོང་བ་སྟེ། གང་གི་ཡན་ལག་འབྱིན་པར་བྱེད་པའོ་ཞེས་གཞན་དག་ཟེར་རོ། །འདི་ལྟར་གསུངས་ཏེ། དགེ་སློང་དག་
དབུགས་རྔུབ་པ་ཞེས་བྱ་བ་ནི་ནང་དུ་རླུང་རྣམས་འཇིབ་པ་ལྟ་བུ་དང་འཐུང་བ་ལྟ་བུར་རབ་ཏུ་འཇུག་པར་བྱེད་པའོ། །དགེ་སློང་དག་དབུགས་འབྱུང་བ་ཞེས་བྱ་བ་ནི་རླུང་རྣམས་ཕྱི་རོལ་ཏུ་མངོན་པར་འཕྲོ་བར་བྱེད། མངོན་པར་འབྱིན་པར་བྱེད། མངོན་པར་འབབ་པར་བྱེད་པའོ་ཞེས་སོ། །
གཞན་དག་ན་རེ། མི་རྟག་པ་དང་མི་རྟག་པ་མ་ཡིན་པ་ནི་དབུགས་རྔུབ་པ་དང་དབུགས་འབྱུང་བའི་དོན་ཏོ་ཞེས་ཟེར་རོ། །དེའི་སྟོབས་བསྐྱེད་པས་འཇུག་པའི་ཕྱིར་རོ་ཞེས་བྱ་བ་ནི། དྲན་པའི་སྟོབས་བསྐྱེད་པས་དེ་ལ་འཇུག་པར་ཤེས་པར་བྱ་བའི་ཕྱིར་རོ། །ཤེས་རབ་ཀྱི་རང་
བཞིན་ཡིན་པས་དྲན་པ་ཞེས་བཤད་དེ། འདི་ལས་རླུང་རྣམས་འཇུག་པ་དང་འདི་ལས་རླུང་རྣམས་འབྱུང་བས་དེར་དྲན་པ་བདག་པོར་བྱས་ཏེ་དྲན་པའི་སྟོབས་བསྐྱེད་པས་ན་དྲན་པའི་སྟོབས་བསྐྱེད་པའོ། །གཞན་དག་ན་རེ་དེ་ལ་དམིགས་པའི་ཤེས་རབ་པོ་ཞེས་ཟེར་རོ། །ཇི་ལྟར་
ཆོས་རྣམས་ཤེས་རབ་ཀྱིས་སྡོམ་པར་བྱེད་པ་དེ་བཞིན་དུ་དེ་འཁོར་དང་བཅས་པ་མི་སྡུག་པ་བཞིན་ཕུང་པོ་ལྔ་དང་བཞིའི་བདག་ཉིད་དོ། །ཉེར་བསྡོགས་གསུམ་ན་ཞེས་བྱ་བ་ནི། བསམ་གཏན་དང་པོ་དང་གཉིས་པ་དང་གསུམ་པའི་ཉེར་བསྡོགས་དག་ནའོ། །བསམ་གཏན་

བཞི་པའི་ཉེར་བསྡོགས་ན་མེད་དེ། དབུགས་འབྱུང་བ་དང་རྔུབ་པ་དག་མེད་པའི་ཕྱིར་རོ། །ཅིའི་ཕྱིར་བསམ་གཏན་གྱི་དངོས་གཞི་དག་ཏུ་མི་འདོད་ཅེ་ན་བཏང་སྙོམས་དང་མཚུངས་པར་ལྡན་པའི་ཕྱིར་རོ། །འདོད་པ་ན་སྤྱོད་པའི་སེམས་ལ་འཇུག་སྟེ། འདིས་དེ་ལྟར་དེ་
དག་ཉེ་བར་མཚོན་ཏེ་འདོད་པའི་ཁམས་སུ་སྐྱེས་པ་དང་བསམ་གཏན་དང་པོའི་ས་པའི་སེམས་མངོན་དུ་འགྱུར་རོ། །འདོད་པ་ན་སྤྱོད་པའི་ལུས་ཞེས་བྱ་བ་ནི་འདོད་པ་ན་སྤྱོད་པའི་དབུགས་རྔུབ་པ་དང་འབྱུང་བ་དག་གོ། །བསམ་གཏན་གྱི་དངོས་གཞིའི་སྙོམས་པར་འཇུག་པ་ན་བཏང་
སྙོམས་ཡོད་པ་མ་ཡིན་ནོ། །ཅིའི་ཕྱིར་ཚོར་བ་གཞན་དང་མཚུངས་པར་མི་ལྡན་ཞེ་ན། རྣམ་པར་རྟོག་པ་དང་མཐུན་པའི་ཕྱིར་ཞེས་བྱ་བ་རྒྱས་པར་འབྱུང་སྟེ། དེའི་གཉེན་པོ་ནི་རྣམ་པར་རྟོག་པའི་གཉེན་པོའོ། །དེ་དག་དང་མཚུངས་པར་མི་ལྡན་ནོ་ཞེས་བྱ་བ་ནི་བདེ་བ་དང་སྡུག་
བསྔལ་དག་དང་ངོ་། །དེ་ལྟ་ན་འོ་ན་བསམ་གཏན་གཉིས་པའི་ཡིད་བདེ་བ་དང་བསམ་གཏན་གསུམ་པའི་བདེ་བ་དང་མཚུངས་པར་ལྡན་པར་འགྱུར་རོ་ཞེ་ན། དེའི་ཕྱིར་བདེ་བ་དང་ཡིད་བདེ་བ་དག་ཀྱང་གཏོང་བ་ལ་བར་ཆད་བྱེད་པའི་ཕྱིར་ཞེས་བྱ་བ་ལ་སོགས་པ་སྨོས་ཏེ། བཟོད་
པའི་དགྲ་ཡིན་པའི་ཕྱིར་ཞེས་བྱ་བའི་དོན་ཏོ། །གཏོད་པ་དང་གཟོ་བ་དང་ལྷུར་ལེན་པ་ཞེས་བྱ་བ་ནི་རྣམ་གྲངས་ཏེ། དབུགས་རྔུབ་པ་དང་འབྱུང་བ་དྲན་པ་ལ་གཏད་དེ་འཐོབ་པའི་ཕྱིར་རོ། །བདེ་བ་དང་ཡིད་བདེ་བ་དག་དང་ཡང་མཚུངས་པར་ལྡན་པར་མི་རུང་ངོ་། །ཆོས་འདི་པ་རྣམས་ཀྱི་ཞེས་
བྱ་བ་ལ་ཆོས་འདི་པ་རྣམས་ནི་བདེ་བར་གཤེགས་པ་བ་རྣམས་སོ། །ཆོས་འདི་པ་རྣམས་ཀྱི་ཡིན་གྱི་ཕྱི་རོལ་པ་རྣམས་ཀྱི་ནི་མ་ཡིན་ཏེ། བདག་ཏུ་འཛིན་པ་དང་འགལ་བའི་ཕྱིར་དང་ཟབ་པའི་ཕྱིར་རོ། །བདག་ཉིད་ཀྱི་ཆོས་ཟབ་མོ་མངོན་པར་མི་རྟོགས་པའི་ཕྱིར་ཞེས་བྱ་བ་ལ་ཟབ་པ་ཉིད་ནི་རྒྱུ་
དྲུག་དང་ལྡན་པའི་ཕྱིར་རོ། །ལུང་མེད་པ་ནི་བགྲངས་པ་ཙམ་ཡང་མི་ཤེས་ན། རྗེས་སུ་འགྲོ་བ་ལ་སོགས་པ་དག་ལྟ་སྨོས་ཀྱང་ཅི་དགོས། དེ་དག་གི་ལྟར་ན་ས་བརྒྱད་པ་ཡིན་ནོ་ཞེས་བྱ་བ་ནི་བསམ་གཏན་གསུམ་བསྣན་པའོ། །རླུང་ལ་དམིགས་པ་ཞེས་བྱ་བ་ནི། དབུགས་རྔུབ་

པ་དང་འབྱུང་བ་ལ་དམིགས་པའི་ཕྱིར་རོ། །འདོད་པའི་རྟེན་ཅན་ཞེས་བྱ་བ་ནི་དེ་ལྟ་ན་རྟོགས་པ་མེད་པའི་ཕྱིར་རོ། །སྦྱོར་བ་ལས་བྱུང་བ་ནི་སྦྱོར་བ་ཐོབ་པ་ཡིན་ལ་འདོད་ཆགས་དང་བྲལ་བས་ཐོབ་པ་ནི་འདོད་ཆགས་དང་བྲལ་བས་ཐོབ་པ་ཡིན་ནོ། །སྦྱོར་བས་ཐོབ་པ་ཉིད་ལས་གཞན་དུ་འདོད་
ཆགས་དང་བྲལ་བ་རྣམས་ལ་ཡང་སྦྱོར་བའི་སྒོ་ནས་མངོན་དུ་འགྱུར་བ་སྲིད་པའི་ཕྱིར་འདོད་ཆགས་དང་མ་བྲལ་བའི་ས་ལ་འདི་ཉེར་བསྡོགས་རྣམས་ལ་གཞན་དུ་མ་ཡིན་པར་རིགས་སོ། །མཛའ་བཤེས་དང་ཡུལ་འཁོར་ལ་སོགས་པའི་རྣམ་པར་རྟོག་པ་རྣམས་ལ་བརྩོན་པ་ཤས་ཆེ་
བར་འཇུག་པའི་ཕྱིར་རྩོལ་བ་མེད་པར་གྱུར་པ་ཁོ་ནའི་སེམས་ནི་རྣམ་པར་རྟོག་པའི་གཉེན་པོར་རིགས་སོ། །ལུས་དང་སེམས་རྣལ་དུ་བཞག་སྟེ་ཞེས་བྱ་བ་ནི་ལུས་དང་སེམས་མངོན་པར་འདུ་མི་བྱེད་པ་སྟེ། འདི་ལྟར་ལུས་གློད་པ་དང་སེམས་གློད་པ་ཡིན་ནོ། །གཞན་དག་ན་རེ།
སྦྱོར་བ་གློད་པ་དང་བསྡམས་པ་ལས་རྣམ་པར་གཡེང་བ་དང་དེ་ལྟར་སྐྱོན་གསུམ་མོ་ཞེས་ཟེར་རོ། །སྦྱོར་བ་གློད་པ་ལས་ནི་ལེ་ལོ་དང་རྨུགས་པ་དང་གཉིད་ལ་འཇུག་གོ། །ཕྱི་རོལ་དུ་སེམས་རྣམ་པར་གཡེང་བར་བྱེད་དོ། །གཞན་དུ་སྦྱོར་བ་བསྡམས་པ་ལས་ནི་ལུས་ཉམ་ང་བ་དང་
སེམས་ཉམ་ང་བ་སྐྱེ་བར་འགྱུར་ཞིང་སེམས་རྣམ་པར་གཡེང་བ་ལས་ཉོན་མོངས་པ་རྣམས་ཀྱིས་ཟིལ་གྱིས་ནོན་པར་འགྱུར་རོ། །སྔར་འཇུག་པ་བགྲང་བར་བྱ་བ་ལ། ཕྱིས་འབྱུང་བ་བགྲང་བར་བྱ་སྟེ། སྐྱེ་བ་ལ་སྔར་འཇུག་ལ། འཆི་བ་ལ་ཕྱིས་འབྱུང་ངོ་ཞེས་དེ་ལྟར་སྐྱེ་བ་དང་།
འཆི་བ་རྟོགས་པ་ལས་མི་རྟག་པ་ལ་འདྲིས་པ་བྱས་པར་འགྱུར་རོ། །རླུང་གི་དཀྱིལ་འཁོར་དང་ཞེས་བྱ་བ་ནི་འོག་ཏུ་རྗེས་སུ་འགྲོ་བའོ། །འཐོར་བྱེད་ཀྱི་རླུང་གི་བར་ཞེས་བྱ་བ་ནི་གྱེན་དུ་འགྲོ་བའོ། །དེ་ཁོ་ན་ཉིད་ཡིད་ལ་བྱེད་པའི་ཕྱིར་དེ་ལྟར་མོས་པ་ཡིད་ལ་བྱེད་པ་ཉིད་ཡིན་གྱི། དེ་
ཁོ་ན་ཉིད་ཡིད་ལ་བྱེད་པ་མ་ཡིན་ཏེ། དབུགས་འབྱུང་བ་དང་རྔུབ་པ་ཡུལ་གྱིས་བསྐལ་པར་རྒྱུ་བ་མི་སྲིད་པའི་ཕྱིར་རོ། །གཞན་དག་ན་རེ། གཞན་ཉིད་དུ་མོས་པ་ཡིད་ལ་བྱེད་པས་དེ་དེ་བཞིན་དུ་རྗེས་སུ་འགྲོ་བའོ་ཞེས་ཟེར་རོ། །དེ་ཁོ་ན་ཉིད་ཡིད་ལ་བྱེད་པ་མངོན་པར་བསྒྲུབ་

པའི་ཕྱིར་ལྡང་བར་ཐལ་བར་འབྱུང་བ་ཡོད་པ་མ་ཡིན་ནོ། །དེའི་སྦྱོར་བའི་བསམ་པའི་རྒྱུ་ལས་ཞེས་བྱ་བ་ལ་དབུགས་འབྱུང་བ་དང་རྔུབ་པ་དག་ནི་ལུས་དང་སེམས་གང་ཡིན་པ་སྟེ། དེ་ཉིད་ལ་རྒྱུ་ནི་ལུས་ཀྱི་ཕྱོགས་གཅིག་ཡིན་པའི་ཕྱིར་ཞེས་བྱ་བའོ། །ལུས་ནི་འདོད་པ་ན་སྤྱོད་
པ་ནས་བསམ་གཏན་གསུམ་པའི་ས་པའི་བར་རོ། །གོང་དུ་དབུགས་འབྱུང་བ་དང་རྔུབ་པ་མེད་པའི་ཕྱིར་གཟུགས་མེད་པ་དང་ནུར་ནུར་པོ་ལ་སོགས་པར་གྱུར་པ་རྣམས་ལ་མེད་པའི་ཕྱིར་ཞེས་བྱ་བ་ལ། གཟུགས་མེད་པ་རྣམས་ལ་ནི་རེ་ཞིག་གཟུགས་ཉིད་ཡོད་པ་མ་ཡིན་པས་ལུས་ལ་
བརྟེན་པ་སྨོས་སོ། །ནུར་ནུར་པོ་ལ་སོགས་པར་གྱུར་པ་རྣམས་ལ་ལུས་ཡོད་མོད་ཀྱི། སྦུབས་ཅན་མ་ཡིན་པས་ལུས་ཁྱད་པར་ཅན་ལ་བརྟེན་པ་སྨོས་སོ། །སེམས་མེད་པའི་སྙོམས་པར་འཇུག་པའི་ས་ལ་སྙོམས་པར་ཞུགས་པ་རྣམས་ལ་སེམས་ཉིད་ཡོད་པ་མ་ཡིན་པས་སེམས་
ལ་བརྟེན་པ་སྨོས་སོ། །བསམ་གཏན་བཞི་པ་ལ་སྙོམས་པར་ཞུགས་པ་རྣམས་ལ་སེམས་ཡོད་མོད་ཀྱི། དབུགས་འབྱུང་བ་དང་རྔུབ་པའི་རྟེན་མ་ཡིན་པས་སེམས་ཁྱད་པར་ཅན་ལ་བརྟེན་པ་སྨོས་ཏེ། དེ་ཉིད་ཀྱི་ཕྱིར་གལ་ཏེ་ལུས་ཀྱང་སྦུབས་ཡོད་པ་ཡིན་ལ་ཞེས་བྱ་བ་རྒྱས་པར་
སྨོས་སོ། །སྐྱེ་བ་ཞེས་བྱ་བ་ནི་མངལ་ནས་འབྱུང་བའོ། །མ་གང་བ་ནི་སྦུབས་ཅན་དུ་གྱུར་པའོ། །གཞན་དག་ནི་སེམས་ཅན་དུ་བགྲང་བ་མ་ཡིན་པ་དེ་དག་དེའི་ནང་གི་བདག་ཉིད་མ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ་ཞེས་ཟེར་རོ། །རིམ་ཟིན་པ་དག་ནི་ཟིན་པའི་མཚན་ཉིད་
མེད་པའི་ཕྱིར་རོ། །དེ་ཉིད་ཀྱི་ཕྱིར་དབང་པོ་དང་ཐ་དད་པའི་ཕྱིར་རོ་ཞེས་སྨོས་ཏེ། རྒྱུ་མཐུན་པ་དང་སྐལ་བ་མཉམ་པའི་རྒྱུ་ཐོབ་པའི་ཕྱིར་རོ། །ལུས་རྒྱས་པས་འགྲིབ་པར་འགྱུར་བའི་ཕྱིར་དང་ལུས་འགྲིབ་ལས་རྒྱས་པར་འགྱུར་བའི་ཕྱིར་རྒྱས་པ་ལས་བྱུང་བ་མ་ཡིན་ནོ། །ཆགས་ནས་
ཡང་ཉིང་མཚམས་སྦྱོར་བའི་ཕྱིར་རྣམ་པར་སྨིན་པ་ལས་སྐྱེས་པ་མ་ཡིན་ནོ། །རྣམ་པར་སྨིན་པའི་གཟུགས་ལ་ནི་ཆགས་ནས་ཡང་མཚམས་སྦྱོར་བ་མེད་དོ། །འོག་མ་པའི་ཡིད་ཀྱིས་དེ་གཉིས་མི་རྟོགས་སོ་ཞེས་བྱ་བ་ལ་འདོད་པའི་ཁམས་སུ་སྐྱེས་པ་ནི་འདོད་པ་ན་སྤྱོད་པའི་

སེམས་མངོན་དུ་གྱུར་ན་འདོད་པ་ན་སྤྱོད་པའོ། །འདོད་པ་ན་སྤྱོད་པའི་དབུགས་འབྱུང་བ་དང་རྔུབ་པ་དག་བསམ་གཏན་དང་པོའི་ས་པའི་སེམས་རྗེས་སུ་འཇུག་ན་དེ་ཉིད་ཀྱིས་དེ་དག་ཉེ་བར་རྟོགས་སོ། །དེ་བཞིན་དུ་བསམ་གཏན་གཉིས་པ་དང་གསུམ་པའི་ས་པའི་སེམས་མངོན་དུ་གྱུར་པ་ལ་ཡང་བརྗོད་
པར་བྱའོ། །བསམ་གཏན་དང་པོར་སྐྱེས་པ་ནི་བསམ་གཏན་དང་པོ་དང་གཉིས་པ་དང་གསུམ་པ་རྣམས་མངོན་དུ་གྱུར་པ་ལ་བརྗོད་པར་བྱའོ། །དེ་བཞིན་དུ་བསམ་གཏན་གསུམ་པའི་བར་དུ་སྐྱེས་པ་ནི་རང་གི་ས་པའི་སེམས་མངོན་དུ་གྱུར་པ་ནའོ། །གོང་མར་སྐྱེས་པ་ལ་ས་འོག་མ་པའི་སེམས་མངོན་
དུ་གྱུར་པའི་རང་གི་ས་པའི་དབུགས་འབྱུང་བ་དང་རྔུབ་པ་དག་ལ་ས་འོག་མ་པའི་སེམས་རྗེས་སུ་འཇུག་གོ། །དེ་ཡིས་དེ་དག་ཉེ་བར་མི་རྟོགས་པ་ཉིད་ཡིན་པས་འདོད་པ་ན་སྤྱོད་པའི་དབུགས་འབྱུང་བ་དང་རྔུབ་པ་ནི་སེམས་པ་ཞེས་རྟོགས་ལ། བསམ་གཏན་དང་པོ་དང་གཉིས་པ་དང་གསུམ་པའི་ས་པ་རྣམས་ནི་གོ་རིམས་བཞིན་དུ་
སེམས་གསུམ་དང་གཉིས་དང་གཅིག་གིས་རྟོགས་སོ། །རང་གི་ས་པ་ཉིད་ཀྱིས་རྟོགས་སོ་ཞེས་བྱ་བ་ལ་དབུགས་རྔུབ་པའི་ས་རྣམ་པ་བཞི་དང་། དབུགས་རྔུབ་པ་མ་ཡིན་པའི་ས་རྣམ་པ་ལྔའོ། །དབུགས་རྔུབ་པའི་ས་ལ་གནས་པ་ནི་དབུགས་རྔུབ་པ་དང་འབྱུང་བ་མ་ཡིན་པའི་སེམས་མངོན་དུ་
གྱུར་པ་ན་དབུགས་རྔུབ་པ་དང་འབྱུང་བ་མི་འཇུག་གོ། །དབུགས་རྔུབ་པ་མ་ཡིན་པའི་ས་ལ་གནས་པ་ནི་དབུགས་རྔུབ་པ་དང་འབྱུང་བའི་ས་པའི་སེམས་མངོན་དུ་གྱུར་པ་ན་དབུགས་རྔུབ་པ་དང་འབྱུང་བ་དག་མི་འཇུག་གོ། །དབུགས་རྔུབ་པའི་ས་ལ་གནས་པ་ནི་དབུགས་རྔུབ་པ་དང་འབྱུང་བའི་ས་པའི་སེམས་མངོན་དུ་གྱུར་
པ་ན་དབུགས་རྔུབ་པ་དང་འབྱུང་བ་དག་འཇུག་གོ། །འོག་མ་པ་སྤྱོད་ལམ་པ་དང་སྤྲུལ་པའི་སེམས་ཀྱིས་ཞེས་བྱ་བ་ནི། བསམ་གཏན་གྱི་ས་འོག་མ་པར་སྐྱེས་པ་ལ་སེམས་རྣམ་པ་གཉིས་པོ་འདི་མངོན་དུ་གྱུར་པའི་ཕྱིར་རོ། །དེའི་ཕྱིར་འོག་མ་པ་སྤྱོད་ལམ་པ་དང་སྤྲུལ་པའི་སེམས་
ཀྱིས་མ་རྟོགས་སོ་ཞེས་སྨོས་སོ། །ཡང་ཅི་ཙམ་གྱིས་དབུགས་རྔུབ་པ་དང་འབྱུང་བ་དྲན་པ་ཡོངས་སུ་གྲུབ་པར་བརྗོད་པར་བྱ་ཞེ་ན་འདི་ལྟར་བཤད་པར་བྱ་སྟེ། གང་གི་ཚེ་རྣལ་འབྱོར་སྤྱོད་པ་དབུགས་རྔུབ་པ་དང་འབྱུང་བའི་རྒྱུ་ནི་གཅིག་ཏུ་འདུ་ཤེས་ཤིང་། ལུས་ཐམས་ཅད་འོད་མ་

བཞིན་སྦུབས་གཅིག་པར་མོས་པར་བྱེད་ཅིང་། རླུང་གི་རྒྱུད་ཀྱི་རྒྱུན་ནོར་བུའི་སྐུད་པའི་རྒྱུད་བཞིན་མོས་ཏེ། དབུགས་རྔུབ་པ་དང་འབྱུང་བ་ལུས་ལས་མི་གཡོ་བའི་ལུས་ཀྱི་རྣམ་པར་ཤེས་པ་དང་ཡིད་སྐྱེ་ན། འདི་ཙམ་གྱིས་དབུགས་རྔུབ་པ་དང་འབྱུང་བ་ཡོངས་སུ་
གྲུབ་པར་བརྗོད་པར་བྱ། གཞན་དག་ན་རེ་རྣམ་པར་འཕེལ་བ་དང་དབང་དུ་གྱུར་པ་དང་ཡོངས་སུ་གྲུབ་པར་རིག་པར་བྱའོ་ཞེས་ཟེར་རོ། །རྣམ་པར་འཕེལ་བ་ཞེས་བྱ་བ་ནི་ཆུང་ངུ་དང་འབྲིང་དང་ཆེན་པོའི་གནས་སྐབས་སོ། །དབང་དུ་གྱུར་པ་ནི་ཇི་སྲིད་གང་གི་ཚེ་ཇི་ལྟར་འདོད་པ་དེ་སྲིད་
དེ་ལྟར་སྙོམས་པར་འཇུག་ཅིང་ལྡང་བའི་བྱ་བའི་མིང་དང་རྒྱུད་ལ་ཕན་འདོགས་པ་དང་ཞེན་པ་བརྟེན་པའི་རྣམ་པར་རྟོག་པ་ལས་རིང་དུ་བྱེད་པའོ། །ལྷག་མཐོང་བསྒྲུབ་པར་བྱ་བའི་ཕྱིར་ཞེས་བྱ་བ་ནི་མཉམ་པར་མ་བཞག་ན་ཡང་དག་པ་ཇི་ལྟ་བ་བཞིན་མཐོང་བའི་ནུས་པ་ཡོད་པ་མ་ཡིན་ལ། །
ཡང་དག་པ་ཇི་ལྟ་བ་བཞིན་མ་མཐོང་བས་ཉོན་མོངས་པ་སྤོང་བ་ཡོད་པ་མ་ཡིན་པས་དེའི་ཕྱིར་ཏིང་ངེ་འཛིན་བསྒྲུབ་པར་བྱ་བའི་ཕྱིར་སྒོ་གཉིས་བསྟན་པའོ། །ད་ནི་ལྷག་མཐོང་བསྒྲུབ་པར་བྱ་བའི་ཕྱིར་དྲན་པ་ཉེ་བར་གཞག་པ་བསྒོམ་པ་བརྗོད་པར་བྱ་སྟེ། ལུས་དང་ཚོར་བ་དང་སེམས་
དང་ཆོས་རྣམས་ལ་རང་དང་སྤྱིའི་མཚན་ཉིད་ཅེས་བྱ་བ་རྒྱས་པར་འབྱུང་བ་ལ། ཆོས་གཞན་ལས་ལྡོག་པའི་རང་བཞིན་དུ་རྟོག་པ་ནི་རང་གི་མཚན་ཉིད་ཡོངས་སུ་བརྟག་གོ། །རྣམ་པར་ཕྱེ་བ་དེ་དག་ཁོ་ནའི་ཐུན་མོང་བའི་རང་བཞིན་དུ་རྟོག་པ་སྤྱིའི་མཚན་ཉིད་དུ་བརྟག་གོ། །ལུས་ཀྱི་སྒྲ་ནི་དབང་
པོ་རྣམས་ལ་ཡང་འཇུག་པས་དེའི་ཕྱིར་ལུས་ཀྱི་རང་གི་ངོ་བོ་ཅི་ཞེ་ན་ཞེས་བྱ་བ་སྨྲས་སོ། །ཡང་ན་ལུས་ནི་རྫས་དུ་མའི་བདག་ཉིད་ཡིན་པའི་ཕྱིར་རྫས་གཅིག་གི་རང་བཞིན་མི་སྲིད་པས་འདྲི་བ་ནི་རང་བཞིན་སྤྱི་ཞེ་ན་ཞེས་བྱ་བའོ། །འབྱུང་བ་དང་འབྱུང་བ་ལས་གྱུར་པ་རྣམས་ཞེས་བྱ་བ་ལ། །
འབྱུང་བ་དང་འབྱུང་བ་ལས་གྱུར་པ་རྣམས་ཚོགས་པ་ན་ལུས་ཞེས་བྱ་སྟེ། ཚོགས་པ་ཅན་ལས་ཐ་དད་པའི་ཚོགས་པ་ཡོད་པ་མ་ཡིན་པས་དེའི་ཕྱིར་འབྱུང་བ་དང་འབྱུང་བ་ལས་གྱུར་པ་དག་ཁོ་ན་འདིའི་རང་བཞིན་དུ་བཤད་དོ། །དེར་ཡང་ལུས་ཀྱི་འབྱུང་བ་ལས་ཅི་འབྱུང་བ་ལས་གྱུར་པའོ། །

འབྱུང་བ་ལས་གྱུར་པ་ལས་ཀྱང་འབྱུང་བ་རྣམས་ཏེ་རང་བཞིན་ཐ་དད་པ་རྣམས་ཉེ་བར་བརྟག་སྟེ་དེ་ལྟར་རྣམ་པར་ཕྱེ་སྟེ་ལུས་ཡོངས་སུ་ཤེས་པའི་ངེས་པ་དེ་ནི་རང་གི་མཚན་ཉིད་ཡོངས་སུ་བརྟགས་པའོ། །མངོན་པར་གྲུབ་པའི་ལམ་གང་ཡིན་པའི་རང་བཞིན་དུ་སྐྱེ་བ་དེ་ནི་རང་གི་མཚན་ཉིད་ཀྱི་རིགས་
ཅན་ལུས་ཉེ་བར་གཞག་པ་ཞེས་བྱའོ། །དེས་ཀྱང་ཆོས་དེའི་རང་གི་མཚན་ཉིད་ཡོངས་སུ་ཤེས་པར་གྱུར་པ་དེའི་ཕྱིར་དེ་སོ་སོར་སྐྱེའི། འདི་ཐམས་ཅད་གཅིག་མ་ཡིན་ནོ། །ཡོངས་སུ་བརྟག་པ་འདི་ལ་རྣམ་པར་རིག་བྱེད་མ་ཡིན་པ་ཡོངས་སུ་རྟོག་པར་གསུངས་པ་མ་ཡིན་ཏེ། གཟུགས་
མེད་པའི་ཆོས་ཀྱི་ཕྱོགས་བརྟེན་པའི་ཕྱིར་རོ། །མཚན་ཉིད་སོ་སོ་ཐ་དད་པའི་སྐྱེ་མཆེད་རྣམས་ལ་ལུས་ཞེས་ཁྱད་པར་མེད་པར་སྤྱིར་ཡོངས་སུ་བརྟགས་སོ་ཞེས་གཞན་དག་ཟེར་རོ། །དེའི་ཚེ་ཡང་གཟུགས་སུ་ཁྱད་པར་མེད་པའི་ཕྱིར་སྐྱེ་མཆེད་བཅུ་གཅིག་ཏུ་ཡོངས་སུ་བརྟག་པར་གྱུར་པ་དེ་
དག་གཟུགས་གཉིས་ཏེ། འདི་ལྟ་སྟེ་འབྱུང་བ་དང་འབྱུང་བ་ལས་གྱུར་པའོ། །དེ་ཡོངས་སུ་བརྟགས་པས་གྲུབ་པའི་ལམ་ལ་གཟུགས་སྤྱིའི་རིགས་ནི་ལུས་དྲན་པ་ཉེ་བར་གཞག་པ་ཞེས་བྱའོ། །དེ་ཉིད་ཀྱིས་དེ་ཉིད་གང་དང་གང་ཐུན་མོང་གི་སྒོ་ནས་ཡོངས་སུ་ཤེས་པར་གྱུར་པ་ནི་ཐམས་
ཅད་འབྱུང་བས་ལུས་དང་ཚོར་བ་ལ་སོགས་པ་རྣམས་ལ་ཡང་ཇི་ལྟར་རིགས་པར་སྦྱར་བར་བྱའོ། །གསུམ་ལས་གཞན་པ་དག་ནི་ཆོས་སོ་ཞེས་བྱ་བ་ནི་ལུས་དང་ཚོར་བ་དང་སེམས་ལས་གཞན་པ་འདུས་བྱས་དང་འདུས་མ་བྱས་ཐམས་ཅད་ཉིད་དོ། །མཉམ་པར་གཞག་ཅེས་བྱ་བ་ནས་
གྲག་གོ་ཞེས་བྱ་བ་ལ། རྡུལ་ཕྲ་རབ་ཀྱི་སྐད་ཅིག་མ་ཐམས་ཅད་ལ་དེར་མཐོང་བ་ཡོད་པ་མ་ཡིན་པས་མ་རངས་པ་མཚོན་པའི་ཕྱིར་དུ་གྲག་གོ་ཞེས་བྱ་བའི་སྒྲའོ། །རང་བཞིན་གྱི་དྲན་པ་ཉེ་བར་གཞག་པ་ནི་ཤེས་རབ་ཅེས་བྱ་བ་ནི་འབྲེལ་པ་དང་དམིགས་པའི་དངོས་པོ་ལ་བལྟོས་པ་པ་
མེད་པའི་ཕྱིར་རང་བཞིན་གྱི་དྲན་པ་ཉེ་བར་གཞག་པ་ནི་ཤེས་རབ་པོ། །གང་གི་ཕྱིར་བསྟན་བཅོས་ལས་ལུས་དྲན་པ་ཉེ་བར་གཞག་པ་གང་ཞེ་ན། ལུས་ལ་དམིགས་པའི་ཤེས་རབ་ཅེས་རྒྱས་པར་གསུངས་སོ། །ཐོས་སོགས་ལས་བྱུང་བའོ་ཞེས་བྱ་བ་ནི་དྲན་པ་ཉེ་བར་གཞག་པ་

རྣམས་སྦྱོར་བ་ལས་བྱུང་བ་ཡིན་པའི་ཕྱིར་སྐྱེ་བས་ཐོབ་པ་མ་ཡིན་ནོ། །གཞན་དུ་འབྲེལ་པ་དང་དམིགས་པ་ལས་ཞེས་བྱ་བ་ལ། གང་དག་གི་རང་བཞིན་དྲན་པ་ཉེ་བར་གཞག་པ་དང་ལྷན་ཅིག་འབྱུང་བ་དེ་དག་ནི་དྲན་པ་ཉེ་བར་གཞག་པ་དང་འབྲེལ་པའི་ཕྱིར་དྲན་པ་ཉེ་བར་གཞག་
པ་ཞེས་བྱའོ། །དེ་དག་གི་དམིགས་པ་ཞེས་བྱ་བ་ནི་རང་བཞིན་གྱི་དྲན་པ་ཉེ་བར་གཞག་པའི་དམིགས་པའོ། །དེས་དེ་དང་ལྡན་པ་རྗེས་སུ་ལྟ་བར་བྱེད་ཅེས་བྱ་བ་ནི་ཤེས་རབ་དང་ལྡན་ཞེས་བྱ་བའི་དོན་ཏོ། །དྲན་པའི་སྟོབས་བསྐྱེད་པས་འཇུག་པའི་ཕྱིར་ཞེས་བྱ་བ་ལ། སྟོབས་བསྐྱེད་པ་
ནི་སྟོབས་བསྐྱེད་པའོ། །འདི་དྲན་པའི་སྟོབས་བསྐྱེད་དེ་འཇུག་པས་ན་དེ་ལ་འདི་ནི་དྲན་པའི་སྟོབས་བསྐྱེད་པས་འཇུག་པ་ཤིང་གཤགས་པའི་ཁྱེའུས་འཛིན་པ་ལྟར་རོ། །གལ་ཏེ་དྲན་པས་དམིགས་པ་བཟུང་ན་དེ་ལྟ་ན་ཤེས་རབ་ཀྱིས་རབ་ཏུ་ཤེས་ཏེ། དེའི་དེ་ལྟ་ན་དྲན་པ་ཉེ་བར་གཞག་
པས་ཤེས་རབ་དྲན་པ་ཉེ་བར་གཞག་པ་ཡིན་ནོ། །གཞན་དག་ན་རེ། དྲན་པ་ལ་ཉེ་བར་གནས་པའི་ཤེས་རབ་སྟེ། འདི་ལྟར་དྲན་པ་དང་ལྡན་པའི་ཤེས་རབ་འབྱུང་བས་དེའི་ཕྱིར་འདི་ལ་དྲན་པ་ཉེ་བར་གནས་སོ། །འདི་ལྟ་སྟེ་ཤེས་རབ་ཉེ་བར་གནས་པའི་འབྲས་བུ་ཞེས་བྱ་བའི་ཐ་ཚིག་
གོ། །ཇི་ལྟར་མཐོང་བ་མངོན་པར་བརྗོད་པའི་ཕྱིར་ཞེས་བྱ་བ་ནི་རྗེས་སུ་དྲན་པའི་ཕྱིར་རོ། །ཇི་ལྟར་རང་བཞིན་གྱིས་དྲན་པ་ཉེ་བར་གཞག་པ་ལ་བྱེད་པ་དང་བྱེད་པ་པོ་བྱས་པ་དེ་བཞིན་དུ་འདྲེས་པའི་དྲན་པ་ཉེ་བར་གཞག་པ་ལ་ཡང་ངོ་། །དམིགས་པའི་དྲན་པ་ཉེ་བར་གཞག་པའི་དབང་
དུ་བྱས་ནས་མཐོང་བར་འདོད་པ་གསུངས་སོ། །གང་ལས་ཞེས་རྒྱས་པར་འབྱུང་བ་ལ། རེག་པ་ཀུན་ཏུ་འབྱུང་བས་ནི། ཚོར་བ་དྲན་པ་ཉེ་བར་གཞག་པ་ཀུན་ཏུ་འབྱུང་བ་ཡིན་ལ། རེག་པ་འགགས་པས་ནི་ཚོར་བ་དྲན་པ་ཉེ་བར་གཞག་པ་ནུབ་པ་ཡིན་ནོ། །མིང་དང་གཟུགས་ཀུན་
ཏུ་འབྱུང་བས་ནི་སེམས་དྲན་པ་ཉེ་བར་གཞག་ལ་ཀུན་ཏུ་འབྱུང་བ་ཡིན་ལ་ཞེས་བྱ་བ་སྔ་མ་བཞིན་ནོ། །ཡིད་ལ་བྱེད་པ་ཀུན་ཏུ་འབྱུང་བས་ཆོས་དྲན་པ་ཉེ་བར་གཞག་པ་ཀུན་ཏུ་འབྱུང་བ་ཡིན་ནོ་ཞེས་བྱ་བ་ཡང་སྔ་མ་བཞིན་ནོ། །ཇི་ལྟར་ན་འདི་དག་གི་མིང་འཐོབ་ཅེས། ལུས་དྲན་པ་

ཉེ་བར་གཞག་པས་ན་ལུས་དྲན་པ་ཉེ་བར་གཞག་པ་ཅེས་བྱ་སྟེ་དེ་བཞིན་དུ་གཞན་ལ་ཡང་བརྗོད་པར་བྱའོ། །གཞན་དག་ནི་ཡང་འབྲེལ་པ་ཞེས་བྱ་བ་རྣམས་རྣམ་པ་གཞན་དུ་རྟོགས་སོ་ཞེས་ཟེར་རོ། །འདི་དག་དང་དྲན་པ་ལྷན་ཅིག་གནས་པས་ཞེས་བྱ་བ་ནི་དྲན་པ་སྟེ་ཉེ་བར་གཞག་པ་
ཤེས་རབ་ཉིད་དོ། །ཡང་ཏིང་ངེ་འཛིན་ལ་སོགས་པ་རྣམས་ཀྱང་དེ་དང་ལྷན་ཅིག་གནས་པས་ཏིང་ངེ་འཛིན་ལ་སོགས་པ་དྲན་པ་ཉེ་བར་གཞག་པར་གྱུར་པ་མ་ཡིན་ནོ་ཞེ་ན་མི་འགྱུར་ཏེ་དྲན་པ་གཙོ་བོར་ཤེས་པར་བྱ་བའི་ཕྱིར་རོ། །ཤེས་རབ་ཀྱིས་ནི་རང་དང་སྤྱིའི་སྒོ་ནས་ཐ་དད་པའི་ལུས་
ལ་སོགས་པ་རྣམས་ལ་དྲན་པའི་དབང་གིས་དེ་མི་བརྗེད་པས་དེའི་ཕྱིར་ས་རབ་ཏུ་རྣམ་པར་འབྱེད་པས་ས་གཞན་བགྲོད་ཅིང་ཆོས་རབ་ཏུ་རྣམ་པར་འབྱེད་པའི་དྲན་པ་དང་ལྷན་ཅིག་པར་གྱུར་པས་དེའི་ཕྱིར་དེ་དང་ལྷན་ཅིག་པ་ཁོ་ནའི་ཤེས་རབ་བསྟན་གྱི་གཞན་དང་ལྷན་ཅིག་པ་མ་ཡིན་ནོ། །
དམིགས་པར་བཤད་པ་རྣམས་ངེས་པའི་ཚིག་ནི་དྲན་པ་རྣམས་ཤེས་རབ་མཐུན་པར་གནས་པས་དྲན་པ་ཉེ་བར་གཞག་པ་རྣམས་སོ། །དེ་བཞིན་དུ་ཤེས་རབ་ཁོ་ན་འདིར་གཙོ་བོ་ཞེས་བྱ་སྟེ། ཤེས་རབ་ཀྱི་བདག་ཉིད་རྣམ་པ་གསུམ་ཡང་དྲན་པ་ཉེ་བར་གཞག་པ་རྣམས་ཞེས་བྱ་སྟེ།
འབྲེལ་པ་ཁོ་ནས་ཉོན་མོངས་པ་སྤོང་གི་གཞན་གྱིས་ནི་མ་ཡིན་ནོ། །ཡང་ཤེས་རབ་ཀྱང་གཞན་དང་འབྲེལ་བའི་ཕྱིར་དྲན་པ་ཉེ་བར་གཞག་པ་དང་འབྲེལ་བ་ཉིད་དུ་མི་རུང་བ་མ་ཡིན་ནམ་ཞེ་ན། ཆོས་རབ་ཏུ་རྣམ་པར་འབྱེད་པའི་བདག་ཉིད་ཡིན་པའི་ཕྱིར་དང་དེ་ཡིན་པར་ཉོན་མོངས་པ་སྤོང་བ་ཡོད་
པ་མ་ཡིན་པའི་ཕྱིར་རོ། །དེའི་ཕྱིར་རང་བཞིན་དང་འབྲེལ་པ་ཞེས་བརྗོད་པར་བྱའི་ཞེ་ན། འདི་ལ་སྐྱོན་མེད་དེ། ཉོན་མོངས་པ་ཟད་པའི་དུས་སུ་ཤེས་རབ་ལ་དེར་བཤད་པ་འཐད་པའི་ཕྱིར་རོ། །ཞི་གནས་དང་ལྷག་མཐོང་མཉམ་པ་མ་ཐོབ་པའི་ལམ་གྱིས་ཉོན་མོངས་པ་ཟག་པ་མ་
ཡིན་ནོ། །ངེས་པ་དེ་ལ་མ་བལྟོས་པས་དྲན་པ་ཉེ་བར་གཞག་པས་འགའ་ཞིག་རང་བཞིན་གྱི་སྒོ་ནས་ཡོད་པས་ཉོན་མོངས་པ་ཟད་པའི་དུས་སུ་དེ་ལས་གཞན་དང་འབྲེལ་པ་ཡང་དྲན་པ་ཉེ་བར་གཞག་པ་ཞེས་བྱའོ། །དེའི་ཕྱིར་འཐད་པ་འདིས་འབྲེལ་པ་ཉིད་ཀྱིས་ཉོན་མོངས་པ་སྤོང་ངོ་། །

དེ་ལ་བསྒོམ་པ་ལས་བྱུང་བ་དྲན་པ་ཉེ་བར་གཞག་པ་ཉིད་ཀྱིས་ཕུང་པོ་བཞི་དང་ལྔའི་མྱ་ངན་ལས་འདས་པ་ལ་དམིགས་ཏེ་ཉོན་མོངས་པ་སྤོང་བར་ནུས་པའི་ཕྱིར་སྤྱི་ཡིད་ལ་བྱེད་པ་ཉིད་ཀྱིས་ཉོན་མོངས་པ་སྤོང་ངོ་། །རང་གི་མཚན་ཉིད་ཡིད་ལ་བྱེད་པ་ནི་ཆ་ཤས་ལ་དམིགས་པའི་ཕྱིར་
ཞེས་བྱ་བ་ལ། རང་དང་གཞན་དང་གཉིས་ཀ་ལ་དམིགས་པའི་ཕྱིར་ཞེས་བྱ་བ་ཇི་ལྟར་བྱས་ནས་ཤེ་ན། རྟུན་པ་དང་ཤེས་བཞིན་དང་དྲན་པ་དང་ལྡན་པར་གྱུར་ནས་འཇིག་རྟེན་ལ་བརྣབ་སེམས་དང་ཡིད་མི་བདེ་བ་རྣམས་སྤང་སྟེ་ནང་གི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ་ཞེས་བྱ་བ་
དང་། དེ་བཞིན་དུ་ཕྱིའི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ་ཞེས་བྱ་བ་ནི་སྔ་མ་བཞིན་ནོ། །ནང་དང་ཕྱིའི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ་ཞེས་སྔ་མ་བཞིན་ཏེ། དེ་ལྟ་ན་ཚུལ་འདིས་རྣམ་པ་གསུམ་ཡིན་ནོ། །དེ་ལ་ནང་ཞེས་བྱ་བ་ནི་རང་གི་རྒྱུད་དུ་གཏོགས་པའོ། །
ཕྱི་ཞེས་བྱ་བ་ནི་གཞན་གྱི་རྒྱུད་དུ་གཏོགས་པའོ། །ཕྱི་ནང་ཞེས་བྱ་བ་ནི་བདག་ཏུ་སྲེད་པ་ལྷོད་པའི་ཕྱིར་ཕྱི་བཞིན་དང་ནང་ཉིད་དུ་མཐོང་བའི་ཕྱིར་ནང་བཞིན་ཏེ་སྔ་མ་བཞིན་ནོ། །ནང་ཞེས་བྱ་བ་ནི་མ་ཟིན་པའི་ནང་ངོ་། །ཕྱི་ཞེས་བྱ་བ་ནི་གཞན་གྱི་རྒྱུད་དུ་གཏོགས་པ་དང་ལྷན་ཅིག་པའོ། །
ནང་ལས་གཞན་པ་ནི་ཕྱི་ཞེས་བྱ་སྟེ། དབང་པོ་དང་ཡུལ་དང་གཉི་ག་ལ་དམིགས་པའི་སྒོ་ནས་སོ། །སྔར་རགས་པ་མཐོང་བའི་ཕྱིར་རོ་ཞེས་བྱ་བ་ལ་ལུས་ནི་འབྱུང་བ་དང་འབྱུང་བ་ལས་གྱུར་པ་ཡིན་པའི་ཕྱིར་རགས་པས་དེ་སྔར་མཐོང་ངོ་། །དེ་ནས་ཚོར་བ་སྟེ་རྒྱུ་བ་རགས་པའི་ཕྱིར་རོ། །
དེའི་མཇུག་ཐོགས་སུ་ནི་སེམས་ཡིན་ཏེ། ཆོས་རྣམ་པས་སོ་སོ་རྣམ་པར་རིག་པའི་རྣམ་པར་མཚོན་སླ་བའི་ཕྱིར་རོ། །ཆོས་ནི་འདུས་བྱས་དང་འདུས་མ་བྱས་དང་མཚུངས་པར་ལྡན་པ་དང་མི་ལྡན་པ་ལ་སོགས་པའི་དབྱེ་བས་ཤིན་ཏུ་ཕྲ་བ་ཡིན་ཏེ། མྱ་ངན་ལས་འདས་པ་ཤིན་ཏུ་ཕྲ་
བའི་ཕྱིར་རོ། །སེམས་མ་ཞི་བའི་ཕྱིར་ཞེས་བྱ་བ་ནི་ཚོར་བ་མངོན་པར་འདོད་པའོ། །དེ་ཉོན་མོངས་པས་སྤངས་པའི་ཕྱིར་ཞེས་བྱ་བ་ནི་སེམས་མ་ཞི་བ་ཉིད་དོ། །གོ་རིམས་བཞིན་དུ་ཞེས་བྱ་བ་ནི་ལུས་དྲན་པ་ཉེ་བར་གཞག་པ་ནི་གཙང་བར་ཕྱིན་ཅི་ལོག་པའི་གཉེན་པོར་བསྟན་ཏེ།

ལུས་ནི་ཕྱི་ས་དང་འདྲ་བར་མི་གཙང་བའི་བདག་ཉིད་ཡིན་ན། ཆོས་ལྷག་མ་རྣམས་ནི་དེ་དང་འབྲེལ་བས་མི་གཙང་བ་ཡིན་ཏེ། ཕྱི་ས་དང་འབྱར་བའི་ཕྱག་དར་བཞིན་ནོ། །ཚོར་བ་དྲན་པ་ཉེ་བར་གཞག་པ་ནི་བདེ་བར་ཕྱིན་ཅི་ལོག་པའི་གཉེན་པོར་ཏེ། གང་ཅི་ཚོར་ཡང་རུང་དེ་ཐམས་ཅད་ནི་
འདིར་སྡུག་བསྔལ་ཞེས་འབྱུང་བས་སོ། །འདུས་བྱས་ལྷག་མ་ནི་དེ་དང་འབྲེལ་བས་སྡུག་བསྔལ་ལོ། །རྟོག་པར་ཕྱིན་ཅི་ལོག་པའི་གཉེན་པོར་སེམས་དྲན་པ་ཉེ་བར་གཞག་པ་སྟེ། ཚོར་བ་ལ་རབ་ཏུ་སྡང་བས་དེའི་རྟེན་སེམས་རྣམ་པ་དུ་མར་དབྱེ་བ་ཐ་དད་པ་མཐོང་བས་འདི་རྟག་གོ་སྙམ་
དུ་རྟག་པར་འདུ་ཤེས་ཕྱིན་ཅི་ལོག་པའི་གཉེན་པོར་འདི་མི་རྟག་གོ་སྙམ་པ་མངོན་དུ་བྱེད་དོ། །ཆོས་དྲན་པ་ཉེ་བར་གཞག་པ་ནི་བདག་ཏུ་ཕྱིན་ཅི་ལོག་པའི་གཉེན་པོར་བསྟན་ཏེ། སེམས་ཀྱིས་གང་བྱས་པའི་ཁྱད་པར་མཚུངས་པ་ལ་བདག་ཏུ་འགྱུར་རོ་སྙམ་དུ་ཁྱད་པར་དུ་ཉེ་བར་རྟོགས་
པར་བྱེད་དོ། །དེ་ལ་ཆོས་རྣམས་རིལ་པོར་རྣམ་པར་དབྱེ་བའི་སྒོ་ནས་འདི་ནི་ཆོས་ཙམ་དུ་ཟད་ཀྱི། འདི་ནི་བདག་མ་ཡིན་ནོ་ཞེས་བདག་ཏུ་འདུ་ཤེས་པ་ཕྱིན་ཅི་ལོག་གི་གཉེན་པོ་ཡིན་ནོ། །གཞན་དག་ན་རེ་ཁམ་གྱི་ཟས་དང་རེག་པ་དང་རྣམ་པར་ཤེས་པ་དང་ཡིད་ལ་སེམས་པའི་གཉེན་
པོའི་སྒོ་ནས་རིམ་པ་བཞིན་དུ་བཞིའོ་ཞེས་ཟེར་རོ། །འདིར་མ་འདྲེས་པ་ལ་དམིགས་པ་གསུམ་རྣམས་ཏེ་དེ་ཡང་དག་པ་ཇི་ལྟ་བ་བཞིན་མ་འདྲེས་པ་ལ་དམིགས་པས་ཉོན་མོངས་པ་རབ་ཏུ་སྤོང་ངོ་། །མ་འདྲེས་པ་ལ་དམིགས་པའི་ཤེས་པ་གསུམ་གྱིས་ནི་འགོག་པ་ཤེས་པ་ཉིད་
ཀྱིས་སོ། །འདྲེས་པ་ལ་དམིགས་པས་ཀྱང་མ་ཡིན་ཏེ། ཕུང་པོ་གསུམ་ལ་དམིགས་པ་ཐམས་ཅད་ཀྱིས་དེ་མི་ནུས་པའི་ཕྱིར་རོ། །མ་འདྲེས་པ་ལ་དམིགས་པ་དོན་མེད་པ་ཡང་མ་ཡིན་ཏེ། སོ་སོར་འཇུག་པའི་ཕྱིར་དང་རྒྱུན་འགྲོ་བར་བྱེད་པའི་ཕྱིར་རོ། །དེའི་ཕྱིར་དེ་རྣམས་
སྦྱོར་བ་དང་ཁྱད་པར་གྱི་ལམ་གྱི་རང་བཞིན་རྣམས་ཆོས་སུ་བཤད་ཅིང་སྤོང་བ་དང་རྣམ་པར་གྲོལ་བའི་ལམ་དུ་བཤད་དོ། །དེ་བཞིན་དུ་ལུས་ལ་ལྷག་པར་དམིགས་པ་ཞེས་རྒྱས་པར་འབྱུང་སྟེ། དེ་བཞིན་དུ་འདི་མི་སྡུག་པ་དང་དབུགས་རྔུབ་པ་དང་འབྱུང་བ་དྲན་པའི་སྦྱོར་བ་གོམས་པའི་ཕྱིར་

རང་གི་མཚན་ཉིད་ཀྱི་རིགས་ཅན་ལུས་དྲན་པ་ཉེ་བར་གཞག་པ་ཉིད་ལ་འཇུག་གོ། །དེའི་མཇུག་ཐོགས་སུ་ཚོར་བ་དྲན་པ་ཉེ་བར་གཞག་པ་དང་། དེ་ནས་སེམས་དང་རྗེས་སུ་དེའི་རིགས་ཅན་ཉིད་ཀྱི་ཆོས་དྲན་པ་ཉེ་བར་གཞག་པའོ། །དེའི་ཕྱིར་རང་གི་མཚན་ཉིད་ཀྱི་རིགས་ཅན་
ཆོས་དྲན་པ་ཉེ་བར་གཞག་པ་ལས་མཇུག་ཐོགས་སུ་འདྲེས་པ་ལ་དམིགས་པའི་ཆོས་དྲན་པ་ཉེ་བར་གཞག་པ་སྐྱེད་པར་བྱེད་དོ། །དེའི་མཇུག་ཐོགས་སུ་སྤྱི་ལ་དམིགས་པའོ། །དེ་ནི་ཆོས་དྲན་ཉེར་གཞག་པ། །སྤྱི་ལ་དམིགས་པ་ལ་གནས་ཏེ། །ཞེས་བྱ་བ་ལ་འདྲེས་པ་ལ་དམིགས་
པའི་ཆོས་དྲན་པ་ཉེ་བར་གཞག་པ་རྣམ་པ་གསུམ་སྟེ་ཕུང་པོ་བཞི་དང་ལྔ་ལ་དམིགས་པའི་དབྱེ་བ་ལས། ཕུང་པོ་ལྔ་ལ་དམིགས་པ་ཉིད་ནི་སྤྱི་ལ་དམིགས་པར་བརྗོད་ལ། དེ་ལ་གནས་པ་ཐམས་ཅད་ཉིད་ལུས་ལ་སོགས་པའི་སྤྱི་མི་རྟག་པ་ལ་སོགས་པའི་རྣམ་པ་བཞིར་ལྟ་བར་བྱེད་དོ། །དེ་ལས་
དྲོ་བར་གྱུར་པ་འབྱུང་། །ཞེས་བྱ་བ་ལ་དྲོ་བར་གྱུར་པ་ནི་དྲོ་བའི་རྣམ་པའོ། །འདི་སྐད་བརྗོད་པར་འགྱུར་ཏེ་འདྲེས་པ་ལ་དམིགས་པའི་ཆོས་དྲན་པ་ཉེ་བར་གཞག་པ་ལས་འདྲེས་པར་བྱས་ཏེ། སྔར་རེ་ཞིག་དམིགས་པ་ཐམས་ཅད་ཀྱི་བདག་ཉིད་ཀྱི་རྣམ་པ་ལ་གོམས་པར་བྱེད་དོ། །དེ་ནས་སྐྱེ་
བ་དང་འཇིག་པ་ལ་ཡོངས་སུ་རྟོག་གོ། །དེ་ནས་རྟེན་ཅིང་འབྲེལ་པར་འབྱུང་བ་ལ་སོ་སོར་ལྟ་བར་བྱེད་དོ། །སྒོམ་པ་ནི་རྒྱུའི་སྒོ་ནས་སྐྱེ་བ་དང་འཇིག་པ་དག་ལ་བལྟ་སྟེ། བདེ་བ་ལ་རྒྱུ་དང་འབྲས་བུ་འབྲེལ་པར་ཡོངས་སུ་རྟོག་པ་ལ་འཇུག་གོ། །འགའ་ཞིག་སྔར་རྟེན་ཅིང་འབྲེལ་པར་
འབྱུང་བ་ལ་རྟོག་པར་འདོད་པ་དེ་དག་སྐྱེ་བ་དང་འཇིག་པ་མཐོང་བའི་མཇུག