Luận tạng Tây Tạng (Tengyur) — Tập 204

་རྙེད་པ་དང་བཀུར་སྟིའི་ཕྱིར་འབྲས་བུ་ཐོབ་པར་ཁས་འཆེ་བ་དང་བདག་བསྟོད་ཅིང་གཞན་སྨོད་པའོ། །དཔེར་ན་དུག་གསོ་བའི་སྔགས་དང་སྨན་ལ་མཁས་པ་གཉིས་ཤིག་ཡོད་པ་དེ་ལས་གཅིག་གིས་མི་མང་པོ་མང་བར་བྱ་བའི་ཕྱིར་དུག་ཟོས་ནས་ལན་ཅིག་ཐབས་དེས་གསོས་སོ། །
ཡང་དེ་ལྟར་བྱ་ཞེས་དུག་ཟོས་པ་ལས་བཅོས་མ་ཁོམ་པར་ཤི་བ་དང་། ཅིག་ཤོས་ན་རེ་ཁོ་བོ་ནི་མི་དག་མི་མང་ཡང་བླའི་དུག་ཀྱང་མི་ཟ་སྨན་ཡང་མི་གཏང་ངོ་ཞེས་ཟེར་ཏེ། བདེ་བླག་ཏུ་འདུག་ནས་ཚེའི་མཐར་ཕྱིན་པ་དང་འདྲ་བར་ཕྱི་མའི་དུས་ན་རབ་ཏུ་བྱུང་བ་ཁ་ཅིག་ནི་ཉེས་པ་བྱས་པ་ལས་
སྤྱོད་ཞེས་ཟེར་བ་དང་། ཁ་ཅིག་སྔ་ནས་སྡོམ་པ་གཉིས་འབྱུང་བ་ཡང་དེ་དང་འདྲའོ། །བྱང་ཆུབ་སེམས་དཔའ་བཞི་པོ་འདི་ལ་དཔག་ཚད་བརྒྱར་འབྱོལ་བར་བྱ་སྟེ། བཞིན་རྙེད་པ་དང་། བཀུར་སྟི་དང་། ཚིགས་སུ་བཅད་པ་དང་། སྡིག་པའི་གྲོགས་པོ་དང་འདུ་འཛི་ལས་འབྱོལ་བར་
བྱ། གནས་གང་ན་བྱང་ཆུབ་སེམས་དཔའི་ཐེག་པ་ཞིག་གནས་ལ། དེ་ལ་ཞེ་སྡང་གི་སེམས་འགའ་ཙམ་སྐྱེ་བར་འགྱུར་བ་ལྟ་ན་ཡང་དཔག་ཚད་བརྒྱར་འབྱོལ་བར་བྱའོ། །བྱམས་པ་བྱང་ཆུབ་སེམས་དཔས་སྟོང་གསུམ་གྱི་སེམས་ཅན་ཐམས་ཅད་སྤྱོས་སམ་བརྒྱད་དམ་མཚོན་གྱིས་
བཏབ་པས་ནི་བྱང་ཆུབ་སེམས་དཔའ་གཞན་ཞིག་ལ་ཞེ་སྡང་འགའ་བསྐྱེད་པ་དེ་ཉམས་པར་འགྱུར་ཏེ་གལ་ཏེ་ཞེ་སྡང་བསྐྱེད་ན་སེམས་ཇི་སྙེད་ཀྱི་བསྐལ་བར་གོ་བགོས་སོ། །དཔེར་ན་ལྕགས་ནི་ལྕགས་ཀྱིས་ཆོད་ཀྱི་བོང་བའམ་ཤིང་ངམ་རྩྭས་གཅོད་མི་ནུས་པ་ལྟར། བྱང་ཆུབ་སེམས་དཔའ་དགེ་
བའི་རྩ་བ་ཡང་ཟླ་ལ་ཞེ་སྡང་བསྐྱེད་པ་མ་ཡིན་པ་གཞན་གྱིས་ཟད་པར་མི་འགྱུར་རོ། །དེ་བས་ན་སེམས་དང་པོ་བསྐྱེད་པ་ལ་ཡང་སྟོན་པའི་འདུ་ཤེས་བསྐྱེད་པར་བྱའོ། །གང་ཞིག་ཁྱིམ་ན་གནས་ནས་ནི། །སྟོང་གསུམ་ཐམས་ཅད་རིན་ཆེན་གྱིས། །རབ་ཏུ་བཀང་སྟེ་འཇིག་རྟེན་གྱི། །མགོན་
ལ་ཡོན་དུ་འབུལ་བྱེད་ན། །མཁས་པ་གང་ཞིག་ཡིད་འབྱུང་ཞིང་། །ཉེས་པ་ཤེས་ནས་ཁྱིམ་སྤངས་ཏེ། །སངས་རྒྱས་རྗེས་སུ་སློབ་བྱེད་ལ། །རབ་ཏུ་འབྱུང་བ་ཚོལ་བྱེད་ཅིང་། །རབ་ཏུ་འབྱུང་བ་བཙལ་ནས་ཀྱང་། །གཡེལ་བ་མེད་པར་འདོད་རྣམས་དང་། །ཁྱིམ་གྱི་གནས་ལ་མི་ལྟ་བར། །

གོམ་པ་བདུན་ནི་འདོར་བྱེད་ན། །བསོད་ནམས་ཕུང་པོ་དེ་ལ་ནི། །སྔ་མས་རིན་གྱི་ཆར་མི་ཕོད། །དེ་བཞིན་གཤེགས་པ་ཏོག་སྣ་ཚོགས་ཀྱི་ཚེ་འཁོར་ལོས་སྒྱུར་བ་མུ་ཁྱུད་ཀྱིས་སྣ་དྲངས་ནས། གླིང་བཞི་པའི་མི་རིལ་རབ་ཏུ་འབྱུང་བ་དང་། མ་རྨོས་མ་བཏབ་པའི་འབྲས་དང་དཔག་བསམ་གྱི་
ཤིང་ཡང་བྱུང་། གཡོག་ཀྱང་ལྷས་བྱས་སོ། །ཆོས་ཀྱི་དབྱིངས་ཀྱི་རང་བཞིན་དབྱེར་མེད་པ་བསྟན་པ་ལས། འཇིག་རྟེན་གྱི་ཁམས་དགའ་བ་བཀོད་པ་ན། མི་རྣམས་ཀྱི་བཟའ་བ་དང་བཏུང་བ་ཡིད་ལ་བསམས་པ་ཙམ་གྱིས་འབྱོར་པར་འགྱུར། སངས་རྒྱས་རྣམས་ནི། ཆོས་
ཀྱི་དབྱིངས་ཀྱི་རང་བཞིན་དབྱེར་མེད་པ་ཉིད་ཀྱིས་ཆོས་སྟོན་པར་མཛད་ཀྱི། སྐྱེ་བ་མེད་པ་འགག་པ་མེད་པ་ནས། མྱ་ངན་ལས་འདའ་བར་བྱ་བའི་ཕྱིར་ཆོས་སྟོན་པར་ནི་མི་མཛད་དེ། བཅོམ་ལྡན་འདས་རྣམས་ནི་དེ་ལྟར་ཆོས་སྟོན་པར་མཛད་དོ། །མར་མེ་དབུལ་བ་ལས་དེ་བཞིན་གཤེགས་
པ་ལ་མཆོད་པའི་བསམ་པས་མར་མེ་ཐ་ན་གློག་གི་རྒྱུན་ཙམ་མམ། ཐ་ན་ཐེམ་སྐས་ཀྱི་གཞི་གཅིག་ཙམ་ཡང་སྣང་བར་བྱེད་ན། དེའི་རྣམ་པར་སྨིན་པ་ཉན་ཐོས་དང་རང་སངས་རྒྱས་རྣམས་ཀྱིས་བསམ་པར་མི་ནུས་སོ། །དེ་བཞིན་གཤེགས་པའི་མཆོད་རྟེན་ལ་མར་མེ་ཕུལ་ན་འཆི་
བའི་ཚེ་སྣང་བ་བཞི་འཐོབ་སྟེ། གང་ཞེ་ན་མདུན་ན་ཉི་མའི་དཀྱིལ་འཁོར་འཆར་བ་དང་། ཟླ་བ་འཆར་བ་དང་། ལྷའི་འཁོར་གནས་པ་དང་། དེ་བཞིན་གཤེགས་པ་མཐོང་བའོ། །མཆོག་ཏུ་རྙེད་པར་དཀོན་པ་ནི་ལྔ་སྟེ། མིར་སྐྱེ་བ་དང་དེ་བཞིན་གཤེགས་པའི་བསྟན་པ་ལ་
རབ་ཏུ་འབྱུང་བ་དང་། དེ་ལ་མངོན་པར་དགའ་བ་དང་། ཚུལ་ཁྲིམས་ཡོངས་སུ་རྫོགས་པ་དང་། ཟག་པ་ཟད་པའོ། །ཕ་རོལ་ཏུ་ཕྱིན་པ་ལྔ་ལས། བྱང་ཆུབ་སེམས་དཔའ་ནམ་ཡང་འགོག་པའི་སྙོམ་པར་འཇུག་པ་ལ་མི་འཇུག་སྟེ། འཇུག་པར་དེ་བཞིན་གཤེགས་པས་ཀྱང་
མ་གནང་ངོ་། །བྱང་ཆུབ་སེམས་དཔའ་འགོག་པ་ལ་སྙོམས་པར་འཇུག་པའི་དུས་དང་སྐབས་དེ་ནི་ཕྱིར་འོང་བར་འགྱུར་ཏེ། གང་གི་ཚེ་བྱང་ཆུབ་ཀྱི་སྙིང་པོ་ལ་འདུན་པར་འགྱུར་བ་དེ་ནི་དེའི་དུས་དང་སྐབས་ཡིན་ནོ། །འདུ་ཤེས་དང་ཚོར་བ་ཐམས་ཅད་ལས་བཟླ་བའི་ཕྱིར་དེ་ལ་

སྙོམས་པར་ཞུགས་ཏེ། བླ་ན་མེད་པ་ཡང་དག་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་རྣམ་པ་བཅུ་གཉིས་པ་སྐོར་བར་བྱེད་དོ། །མཐར་གྱིས་གནས་པའི་སྙོམས་པར་འཇུག་པ་བརྒྱད་ལ་ནི། སྙོམས་པར་ཡང་འཇུག་པ་འབྱུང་
སེམས་ཅན་གང་དག་དགྲ་བཅོམ་པའི་འབྲས་བུ་མངོན་དུ་བྱ་བར་འདོད་པའི་ཕྱིར། བསྐལ་པ་གང་གཱའི་བྱེ་མ་སྙེད་དུ་སེམས་ཅན་རྣམས་སམ། ཉན་ཐོས་སམ་རང་སངས་རྒྱས་རྣམས་ལ་སྦྱིན་པ་བྱིན་ལ། སྦྱིན་པ་དེ་ལ་བྱང་ཆུབ་སེམས་དཔའ་བསམས་ཏེ། རྗེས་སུ་ཡི་རངས་ནས་
དགེ་བའི་རྩ་བ་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་ཕྱིར་མི་ལྡོག་པ་དང་། ཕྱིར་མི་ལྡོག་པ་རྣམས་མྱུར་དུ་ཐམས་ཅད་མཁྱེན་པ་ཉིད་ཐོབ་པར་བསྔོ་ན། དེ་ལ་བསོད་ནམས་སྔ་མས་དཔེ་དང་ཆར་ཡང་མི་ཕོད་དོ། །མི་ཞིག་ཆོམ་རྐུན་གྱིས་ཡ་ང་བ་ལས། ཕྱིས་དེ་འོངས་པ་ནི་བླའི་བཅོམ་སྟེ་མྱུར་དུ་
འོངས་པ་ནི་དེ་ལྟ་མ་ཡིན་ནོ། །དེ་བཞིན་དུ་རིང་མོ་ཞིག་སྟེ་མངོན་པར་རྫོགས་པར་འཚང་རྒྱ་བ་ནི་བླའི། ཉན་ཐོས་ཀྱི་སའམ་རང་སངས་རྒྱས་ཀྱི་སར་ལྟུང་བ་ནི་དེ་ལྟ་མ་ཡིན་ནོ། །གང་པོས་གསོལ་པ། མི་ཤེས་པ་ནི་རྟེན་ཅིང་འབྲེལ་བར་འབྱུང་བ་ལགས་ཏེ། སུས་ཀྱང་མ་བསྐྱེད་ལགས་སོ། །རྒྱུ་
ཚོགས་ཤིང་འདུས་པ་ལས་འབྱུང་ལ་རྒྱུ་མ་མཆིས་པར་གྱུར་པས་ནི་འགག་པར་འགྱུར་རོ། །ཆོས་རྣམས་ནི་རང་གི་ངང་གིས་འགགས་པས་ན་སུས་ཀྱང་འགག་པ་མ་མཆིས་སོ། །དངོས་པོ་འདི་དག་སྒྱུ་མ་ལྟ་བུར་མི་ཤེས་པས་དེ་དག་ལས་ཤས་ཆེར་ཞེན་པར་གྱུར་ཏེ། ཡོངས་སུ་མི་
གཏོང་བའི་བློར་འགྱུར། ཡོངས་སུ་མི་གཏོང་བས་སེར་སྣ་འཛིན་ཏོ། །སེར་སྣ་དེས་ཀྱང་ངན་སོང་རྣམས་སུ་སྐྱེ་བར་འགྱུར་ལ། དངོས་པོ་དེ་དང་འབྲེལ་པར་འགྱུར་རོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་བསམ་གཏན་བཞི་ལ་སྙོམས་པར་འཇུག་ཏུ་ནི་གནད་ལ་གནས་པར་
ནི་མ་གནང་ངོ་། །དེ་ཅིའི་ཕྱིར་ཞེ་ན། ལྷ་ཚེ་རིང་པོ་རྣམས་སུ་སྐྱེ་བར་དོགས་པས་ཏེ། འདོད་པར་སྐྱེས་ན་མྱུར་དུ་ཐམས་ཅད་མཁྱེན་པར་རྫོགས་པར་འགྱུར་རོ། །ཆོས་ཐམས་ཅད་ཀྱི་ཡོན་ཏན་བཀོད་པའི་རྒྱལ་པོ་ལས། བཀའ་སྩལ་པ། རྒྱལ་བ་ཅན་ཞེས་བྱ་བའི་གཟུངས་ཡོད་དེ། དེ་ནི་བྱང་ཆུབ་

སེམས་དཔར་གྱུར་པ་ན་དེ་བཞིན་གཤེགས་པ་རྒྱལ་བའི་དབྱངས་ལས་བླངས་ཏེ་ཐོབ་པའི་མོད་ལ་ཡང་ས་བཅུ་ཐོབ་པར་གྱུར་ལ། སྲོག་ཆགས་སྟོང་ཕྲག་དུ་མས་ཀྱང་ཆོས་ལ་བཟོད་པ་ཐོབ་པར་འགྱུར་ཏོ། །དེ་ནས་བྱང་ཆུབ་སེམས་དཔའ་དེ་དག་གིས་འདི་སྐད་ཅེས་གསོལ་
ཏོ། །བཅོམ་ལྡན་འདས་གཟུངས་མཐུ་ཆེན་པོ་བསྟན་པར་གསོལ། དེ་ནས་བཅོམ་ལྡན་འདས་ཀྱིས་གཟུངས་འདི་བཀའ་སྩལ་པ། ཏདྱ་ཐཱ། ཛ་ཡ་ཛ་ཡ། ཛ་ཡ་བ་ཧ། ཁ་བ་ཧ། ཧུ་ལུ་ཧུ་ལུ། པདྨ་བྷེ། ཨ་བ་མ་བ་མེ། ས་རཱ་ས་རཱ་ཎེ། དྷི་རི་དྷི་རི། དྷི་རི་དྷི་རི། དེ་བ་ཏཱ་ཨ་
ནུ་པཱ་ལ་ཎ། ཡུཏྟོཏྟཱ་ར་ཎི། པ་ར་ཙ་ཀྲ་ནི་བར་ཎི། པུ་ར་ཡ་བྷ་ག་བཱ་ན། སརྦ་ཨཱ་ཤ་ན། མ་མ་སརྦ་ཀརྨ་ཀྵ་པ་ཡ། བུདྡྷ་ཨ་ཏི་ཤ་ནེ་ཎ་སྭཱཧཱ། རིགས་ཀྱི་བུ་འདི་ནི་རྒྱལ་བ་ཅན་ཞེས་བྱ་བའི་གཟུངས་ཡིན་ཏེ། སྡིག་པ་ཐམས་ཅད་ཟད་པར་བྱེད་པ་ནོར་དང་འབྲུ་རྣམ་པར་འཕེལ་བར་བྱེད་པ། ཕ་
རོལ་གྱི་དམག་ཚོགས་ཟློག་པར་བྱེད་པ། མུ་གེའི་གནོད་པ་རབ་ཏུ་ཞི་བར་བྱེད་པ་ཚེ་ནུར་བར་བྱེད་པ་སྟེ། འདི་ནི་དེ་བཞིན་གཤེགས་པ་རྣམས་ཀྱི་ཡབ་ཡུམ་དང་འདྲ་བའི་ཆོས་ཀྱི་རྣམ་གྲངས་ཡིན་ནོ། །དེ་ནས་བྱང་ཆུབ་སེམས་དཔའ་ལག་ན་རྡོ་རྗེས་གཟུངས་སྔགས་ཀྱི་
ཚིག་འདི་དག་སྨྲས་སོ། །ན་མཿ་སརྦ་ཏ་ཐཱ་ག་ཏཱ་ནཱཾ། ན་མོ་ཨ་མི་ཏ་བྷཱ་ཡ་ཏ་ཐཱ་ག་ཏཱ་ཡ། ན་མཿསརྦ་བོ་དྷི་སཏྭཱ་ནཱན། ན་མཿསརྦ་མ་ཧརྟེ་ཀེ་བྷྱཿ། ཏདྱ་ཐཱ། ཧུ་ཧུ་ཧེ་ཧེ། མ་ཏི་མ་ཏི། མ་ཧཱ་བཛྲ་མ་ཏི། དྲྀ་ཌྷ་པ་ར་བཛྲ་མ་ཏི། ཏ་ཐཱ་ག་ཏ། ཨ་ནུ་པ་རི་བ་ལེ་ཊི། ས་ར་ས་
ར་ཨ་ཡོ་ཁི། བྷྲྀ་ཀུ་ཊི། བྷྲྀ་ཀུ་ཊི་མུ་ཁི། ཀྲི་པི་ཀྲི་པ་ལུ་ཀེ །ས་ཏྱ་པཱ་ཙ་ན། མ་ནུ་སྨ་ར་བྷ་ག་བཱན། བཛྲ་པཱ་ཎི་སརྦ་ཀརྨ། ཨཱ་པ་ར་ཎི་ཀྵ་བ་ཡ། སརྦ་ཨརྠ་མ་པ་རི་པཱུ་རཱ་ཡ། དེ་ཧི་མེ་བ་རམ། བུདྡྷ་ས་ཏྱེན། བོ་དྷི་སཏྭ་ས་ཏྱེ་ན་སྭཱ་ཧཱ། གང་ལ་ལ་བདག་མཐོང་བར་འཚལ་བ་དང་།
སྟོབས་ཀྱིས་འཁོར་ལོས་སྒྱུར་བར་འགྱུར་བ་དང་། ཏིང་ངེ་འཛིན་ཐོབ་པ་དང་། ཐོས་པ་འཛིན་པར་འགྱུར་བ་དང་། ཁམས་རྣམ་པར་སྨིན་པར་འགྱུར་བ་དང་། ལུས་མི་སྣང་བར་འགྱུར་བ་དང་། ནམ་མཁའ་ལ་མཆི་བར་འཚལ་བ་དེས་ནི། ཟླ་བ་ཡར་གྱི་ངོ་ཚེས་བརྒྱད་ལ། ཉིན་

མཚན་དུ་སྨྱུང་བ་བགྱིས་ལ། གཟུགས་བགྱིད་དུ་སྩལ་ཏེ། རྡོ་རྗེ་འཆང་གི་གཟུགས་འོད་མ་མདའ་རྒྱུའི་མདོག་ཅན་དང་། རྒྱན་ཐམས་ཅད་ཀྱིས་བརྒྱན་པ། ཞི་བའི་ཚུལ་ཅན་སྐུ་གདུང་དང་ལྡན་པར་བགྱིའོ། །དབུས་སུ་ནི་དེ་བཞིན་གཤེགས་པ་ཤཱཀྱ་ཐུབ་པ་
བཞུགས་པར་བགྱིའོ། །གཡས་ལོགས་སུ་ནི་འཕགས་པ་སྤྱན་རས་གཟིགས་དབང་ཕྱུག་ལག་བ་བཞི་པ། རྒྱན་ཐམས་ཅད་ཀྱིས་བརྒྱན་པ། སྐུ་གདུང་དང་བཅས་པ་གཞག་གོ། །གཡས་གཡོན་དག་ཏུ་ནི་རྒྱལ་པོ་ཆེན་པོ་བཞི་མཆོད་པ་བགྱིད་པ་གཞག་གོ། །སྒྲུབ་པ་
པོའི་རིགས་ཀྱི་བུ་དེས་ཀྱང་གཙང་སྦྲ་བགྱི་བ་དང་། དུས་གསུམ་དུ་ཁྲུས་བགྱི་བ་དང་། དུས་ལྔའི་བར་དུ་ཟས་སུ་ནས་ཀྱི་འོ་ཐུག་འཚལ་ཞིང་། དུས་གསུམ་བཟླས་བརྗོད་བགྱིའོ། །བདུག་པ་ནི་ཨ་ཀ་རུ་དང་། ཙནྡན་དང་། པོག་དང་གུ་གུལ་དབུལ་ལོ། །ལན་སུམ་
འབུམ་གྱི་བར་དུ་བཟླས་བརྗོད་བགྱིས་ཏེ། དེ་ནི་འདི་ལྟར་གཟུགས་བརྙན་བགྱི་བ་ལགས་སོ། །སྐུ་གདུང་དང་ལྡན་པའི་མཆོད་རྟེན་ནམ། དགོན་པའི་གནས་སུ་སྤོས་དང་། བདུག་པ་དང་། མེ་ཏོག་སྣ་ཚོགས་དང་། བ་དན་སྣ་ཚོགས་ཀྱིས་ཀྱང་མཆོད་པར་བགྱིའོ། །དཀར་
བག་གི་ལྷ་བཤོས་ཀྱང་དབུལ་བར་བགྱིའོ། །ཆོས་ཀྱི་རྣམ་པ་འདི་ཡང་ཡི་གེར་འདྲིར་སྩལ་ཞིང་གོས་དང་རྒྱན་དང་ལྷབ་ལྷུབ་དང་། གདུགས་དང་བཞོན་པ་རྣམ་པ་སྣ་ཚོགས་ཀྱིས་མཆོད་པར་བགྱིའོ། །དེ་ནས་ཟླ་བ་ཉ་བ་ཚེས་བཅོ་ལྔའི་བར་དུ་སེམས་ཅན་ཐམས་ཅད་ལ་
སྙིང་རྗེའི་སེམས་དང་ལྡན་པ་དང་། དུས་གསུམ་དུ་ཁྲུས་བགྱི་བ་དང་། དུས་གསུམ་དུ་གོས་བརྗེ་བར་བགྱི་སྟེ། དཀྱིལ་འཁོར་གྲུ་བཞི་པ་བ་ལང་གི་ལྕི་བས་བསྐུས་ལ་མེ་ཏོག་སྣ་ཚོགས་ཀྱིས་ཁེབས་པར་བགྱིས་ཏེ། བུམ་པ་གང་བ་བཅུ་དྲུག་དང་། མར་མེ་བཅུ་དྲུག་ཀྱང་གཞག་
པར་བགྱིའོ། །གདུགས་དང་རྒྱལ་མཚན་དང་བ་དན་སྣ་ཚོགས་ཀྱིས་ཀྱང་ས་ཕྱོགས་དེ་བརྒྱན་པར་བགྱིའོ། །རོ་སྣ་ཚོགས་སྦྱར་བའི་ལྷ་བཤོས་རྒྱ་ཆེན་པོ་ཕབ་ལ་སྤོས་ཆབ་ཀྱིས་ཕྱོགས་དེར་ཆག་ཆག་བཏབ་ནས། ནམ་སྐུ་གཟུགས་དང་ས་གཞི་འགུལ་བ་དང་། བདག་ཉིད་ཀྱང་དགའ་

བར་གྱུར་པའི་བར་དུ་བཟླས་བརྗོད་བགྱིའོ། །དེ་ནས་ངེས་འདི་ནི་གཅིག་ཏུ་ངེས་པར་འགྲུབ་པར་འགྱུར་རོ་སྙམ་དུ་ཤེས་པར་བགྱིའོ། །དེ་ནས་དེའི་འོག་ཏུ་བདག་གི་རྨི་ལམ་དུ་བསྟན་པར་བགྱི་ཞིང་འབེལ་བའི་གཏམ་བགྱིའོ། །བསམ་པ་ཐམས་ཅད་ཀྱང་རྫོགས་པར་བགྱིའོ། །བུ་གཅིག་པ་
བཞིན་དུ་ཡོངས་སུ་བསྐྱང་བར་བགྱིའོ། །དམ་པ་ཅི་འཚལ་བ་ཡང་སྩལ་བར་བགྱི་སྟེ། ཆོས་ཀྱི་རྣམ་གྲངས་འདི་ལ་མ་དད་ཅིང་སྤང་བར་བགྱིད་པ་ནི་མ་གཏོགས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་
སྤྱན་རས་གཟིགས་དབང་ཕྱུག་སྤྱན་རས་གཟིགས་དབང་ཕྱུག་ཅེས་བགྱི་བ། ཅིའི་སླད་དུ་དེ་སྐད་ཅེས་བགྱི་ལགས། བཀའ་སྩལ་པ། གང་གི་ཕྱིར་འདི་ལྟར་འཇིག་རྟེན་ཐམས་ཅད་ལྟ་བར་བྱེད། རྟོག་པར་བྱེད། ཚིམ་པར་བྱེད། ཡོངས་སུ་སྐྱོང་བར་བྱེད། ཡང་དག་པར་དབུགས་འབྱིན་
པར་བྱེད་ཅིང་། སྙིང་རྗེའི་སེམས་དང་། བདེ་བའི་སེམས་དང་། བྱམས་པའི་སེམས་དང་། སྙིང་བརྩེ་བའི་སེམས་དང་ལྡན་ལ། བསམ་པ་ཐམས་ཅད་ཡོངས་སུ་རྫོགས་པར་བྱེད་པས་ན། དེའི་ཕྱིར་སྤྱན་རས་གཟིགས་དབང་ཕྱུག་ཅེས་བྱའོ། །ནམ་མཁའ་མཛོད་ལས། བྱང་ཆུབ་སེམས་
དཔའ་བསོད་ནམས་ཀྱིས་བརྒྱན་པས་གསོལ་པ། བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོ་གང་འདི་ལྟ་བུའི་མདོ་སྡེ་ཟབ་མོ་དེ་བཞིན་གཤེགས་པས་གསུངས་པ་ངེས་པའི་དོན་བལྟ་དཀའ་བ། སངས་རྒྱས་ཐམས་ཅད་ཀྱིས་བསྟན་ཅིང་བསྔགས་པ་འདི་ཀུན་ཆུབ་
པ་དང་གཞན་དག་ལ་ཡང་རྒྱ་ཆེར་སྟོན་པ་དེ་དག་བསོད་ནམས་ཅི་ཙམ་ཞིག་སྐྱེད་པར་འགྱུར། དེ་ནས་སངས་རྒྱས་ཀྱིས། བསོད་ནམས་དཔག་ཏུ་མེད་པར་གསུངས། །རྣམ་པར་རིག་པའི་མཚན་ཉིད་པས། །ཆོས་ཐམས་ཅད་ནི་དངོས་པོ་མེད་པའོ། །རྒྱལ་བ་ཆོས་ཀྱི་སྐུས་ནི་
རབ་ཕྱེད་སྐུ་མཉམ་ཡང་། །གཟུགས་མཛེས་ལྡན་ཞིང་གཟུགས་བཟང་སྐུ་ཡང་སྟོན་པར་མཛད། །སེམས་ཅན་རྣམས་ལ་ཕན་པའི་ཐུགས་རྗེ་རབ་བསྐྱེད་ནས། །བསོད་ནམས་བརྒྱ་ཡི་མཚན་གྱི་སྐུ་ཡི་མཆོག་ཀྱང་སྟོན། །ཆོས་འདི་ཐམས་ཅད་རྒྱུ་དང་རྐྱེན་ལས་སྐྱེས་པ་སྟེ། །

བྱེད་མེད་ངོ་བོ་ཉིད་མེད་ཀུན་དུ་རྟོག་ལས་སྐྱེས། །བདེ་བར་གཤེགས་པ་དེ་འདྲའི་ཆོས་ཀྱི་ཚུལ་རྣམས་མཁྱེན་ནས་སུ། །བྱང་ཆུབ་མི་འགྱུར་ཞི་བ་བླ་ན་མེད་པ་བརྙེས། །དེ་ལ་རིགས་ཀྱི་བུ་ཇི་ལྟར་ན་བྱང་ཆུབ་སེམས་དཔའ་རྟེན་ཅིང་འབྲེལ་པར་འབྱུང་བའི་ཡེ་
ཤེས་ལ་མཁས་ཤིང་། མཐར་ལྟ་བ་ཐམས་ཅད་དང་བྲལ་བ་ཡིན་ཞེ་ན། རིགས་ཀྱི་བུ་བྱང་ཆུབ་སེམས་དཔའ་འདི་སྙམ་དུ་སེམས་ཏེ། གང་རྟེན་ཅིང་འབྲེལ་པར་འབྱུང་བ་དེ་ཅི་ཡང་མ་ཡིན་ཏེ། གང་རྐྱེན་ལ་བརྟེན་པ་དེ་དངོས་པོ་མེད་པའོ། །གང་རྐྱེན་ལ་བརྟེན་པ་དེ་
ཡོངས་སུ་མ་གྲུབ་པའོ། །གང་རྐྱེན་ལ་བརྟེན་པ་དེ། བདག་མེད། སེམས་ཅན་མེད། སྲོག་མེད། གསོ་བ་མེད། སྐྱེས་བུ་མེད། གང་ཟག་མེད། ཤེད་ལས་སྐྱེས་པ་མེད། ཤེད་བུ་མེད་དོ། །གང་རྐྱེན་ལ་བརྟེན་པ་དེ་ལ་ཡང་དག་པར་ན་གང་ཡང་སྐྱེས་པ་མེད་དོ། །ཆོས་
གང་རྐྱེན་ལ་བརྟེན་པ་དེ་ལ་སྤྲོས་པ་མེད་པ་སྟེ། དེའི་ཕྱིར་སྤྲོས་པ་མེད་པ་མ་སྤྲོས་པ་ནི། སྐྱེ་བ་ནི་ཡང་ཆོས་ཉིད་སྐྱེ། འགག་པ་ནི་ཡང་ཆོས་ཉིད་འགག །ཅེས་བྱ་སྟེ། དེ་ལ་བདག་གམ། སེམས་ཅན་ནམ། ཤེད་བུའི་བར་གང་ཡང་མེད་དོ། །ཆོས་གང་རྐྱེན་ལས་བྱུང་བ་དེ་དག་
ལ་བདག་པོ་མེད་པའི་ཕྱིར་སྐྱེ་བ་གང་ཡང་མེད་དེ། དེའི་ཕྱིར་ཆོས་ཐམས་ཅད་ནི་རྩྭ་དང་ཤིང་དང་རྩིག་པ་དང་། རྨི་ལམ་དང་མིག་ཡོར་ལྟ་བུ་ཞེས་བྱའོ། །ཇི་ལྟར་ཕྱི་རོལ་གྱི་དངོས་པོ་རྣམས་སྐྱེ་བ་ལ་ཡང་བསྐྱེད་པ་མེད། འགག་པ་ལ་ཡང་འགོག་པར་བྱེད་པ་མེད་པ་དེ་བཞིན་དུ། རྐྱེན་
རྣམས་ཡོད་ན་སྐྱེ་བ་དང་། མ་ཚང་ན་འགག་པར་འགྱུར་བ་མ་གཏོགས་པར་ནང་གི་ཆོས་རྣམས་ཀྱང་སྐྱེ་བ་ལ་བསྐྱེད་པ་མེད། འགག་པ་ལ་འགོག་པར་བྱེད་པ་མེད་དེ། །དེ་ལྟར་ཡེ་ཤེས་ལ་རབ་ཏུ་སྦྱོར་བ་ནི་མཐར་ལྟ་བ་ཐམས་ཅད་རབ་ཏུ་སྤོང་ངོ་། །དེ་ལ་མཐར་ལྟ་བ་གང་ཞེ་ན། མཐའ་ཞེས་
བྱ་བ་ནི་རྟག་པ་དང་ཆད་པ་སྟེ། གང་དེ་ལ་སྐྱེ་བར་ཡང་མི་བྱེད། འཇིག་པར་ཡང་མི་བྱེད་དོ། །གང་སྐྱེ་བ་མེད་ཅིང་འཇིག་པ་མེད་པ་དེ་ནི། རྟག་པ་དང་ཆད་པ་མེད་པའོ། །དེ་བས་ན་དག་པ་སྟེ། མཐར་ལྟ་བ་ཐམས་ཅད་རྣམ་པར་དག་པ་ཡིན་ནོ། །དེ་ལྟར་ན་རྟེན་ཅིང་འབྲེལ་པར་

འབྱུང་བ་དང་། འཇུག་པའི་ཡེ་ཤེས་ལ་མཁས་ཤིང་། མཐར་ལྟ་བ་ཐམས་ཅད་དང་འབྲེལ་བ་ཡིན་ནོ། །ཐེག་པ་ཆུང་ངུ་འདོད་པ་ནི་བདུད་ཀྱི་ལས་སོ། །བྱང་ཆུབ་མཆོག་གི་སེམས་ནི་བསྐྱེད་པར་བགྱི། །སེམས་ཅན་ཐམས་ཅད་བདག་གིས་རབ་ཏུ་གཉེར། །བྱང་ཆུབ་སྤྱོད་
མཆོག་ཡིན་པར་སྤྱོད་པར་བགྱི། །འགྲོ་བ་བླ་མེད་སངས་རྒྱས་འགྱུར་བར་བགྱི། །དཔེར་ན་ནམ་མཁའ་ལ་གཉེན་པོ་མེད་པ་དེ་བཞིན་དུ། ཆོས་ཐམས་ཅད་ལ་ཡང་གཉེན་པོ་མེད་དོ། །གང་དག་གཉེན་པོས་མྱ་ངན་ལས་འདས་པ་ཚོལ་བ་དེ་དག་ནི། སྐྱེ་བ་དང་འཇིག་པར་ལྟ་བ་
ཡིན་ཏེ། ཆོས་འདི་དག་ནི་བསྐྱེད་པར་བྱ་ཞེས་སྐྱེ་བ་དང་འཇིག་པ་ལ་སྤྱོད་པས། དེ་དག་མྱ་ངན་ལས་འདས་པའི་མཉམ་པ་ཉིད་མི་ཤེས་སོ། །དེ་བས་ན་བཅོམ་ལྡན་འདས་ཀྱིས་ཀྱང་འདི་སྐད་ཅེས་ཤེས་པར་གྱིས་ཤིག །མ་རྩོད་ཅིག །རྩོད་པ་མེད་པ་ནི་དགེ་སྦྱོང་གི་ཡོན་ཏན་གྱི་མཆོག་
རྣམས་ཡོངས་སུ་རྫོགས་པར་གྱིས་ཤིག་ཅེས་གསུངས་སོ། །དམིགས་པ་དག་ལ་རབ་གནས་པ། །བདུད་ཀྱི་ཕོ་ཉ་བདུད་ཀྱི་ཕྱོགས། །དམ་པའི་ཆོས་ལ་སྐུར་འདེབས་པའི། །དགེ་སློང་དག་ནི་འབྱུང་བར་འགྱུར། །ངང་ཚུལ་ངན་པ་སྡིག་ཆོས་ཅན། །ཁྱིམ་པ་དང་ནི་རྟེན་ཅིང་གནས། །བཀུར་
སྟི་དག་དང་རྙེད་ལ་བརྐམ། །ཚུལ་འདི་ཚོལ་བར་མི་བྱེད་དོ། །འཇིག་རྟེན་རྒྱང་པན་རྣམས་དང་འདྲེ། །བདག་ལ་རབ་ཏུ་སྟོད་བྱེད་ཅིང་། །རབ་ཏུ་ངེས་པ་རྣམས་ལ་སྨོད། །མི་མཁས་ང་རྒྱལ་ཅན་དག་འབྱུང་། །དགོན་པའི་གནས་རི་སྤངས་ནས་སུ། །རྟག་ཏུ་འདུ་འཛི་རྣམས་ལ་དགའ། །འཇིག་
རྟེན་པ་ཡི་གསང་ཚིག་བརྩོན། །འཇིག་ཚོགས་ལ་ནི་རབ་ཏུ་གནས། །མི་མཁས་དེ་དག་དགེ་འདུན་ལ། །ཞལ་ཏ་བྱེད་ལ་རབ་ཏུ་བརྩོན། །མདོ་སྡེ་རྣམས་ཀྱང་ཕན་ཚུན་དུ། །མཐུན་པར་དཔྱོད་པར་མི་བྱེད་དེ། །རང་རང་གིས་ནི་སྨྲ་རྣམས་ལ། །དེ་དག་རྟག་ཏུ་མོས་པར་བྱེད། །དམིགས་པ་
ཡིས་ནི་རབ་ཏུ་འགྱིང་། །ལྟ་བ་ཐ་དད་ཀུན་དུ་གནས། །སྟོང་པ་ཉིད་ཀྱི་ཆོས་ཐོས་ནས། །དེ་དག་གཡང་ས་བཞིན་དུ་སེམས། །འདི་འདྲ་བ་ཡི་དུས་འདི་ན། །དོན་བཅས་ཡི་གེ་ལྡན་པ་ཡིན། །ལེགས་པར་གསུངས་པའི་ཆོས་རྣམས་ནི། །རབ་ཏུ་རྣམ་པར་འཇིག་པར་འགྱུར། །ཆོས་རྣམས་ལ་

ནི་གནས་པ་ལས། །དེད་ལ་འདྲ་བའི་ཆོས་རྣམས་ནི། །ཇི་ལྟ་བུར་ན་ཡོད་མེད་ཅེས། །གཤེད་མ་དག་ཀྱང་འགྱེད་པར་འགྱུར། བདག་ཅག་མིང་གི་དགེ་སྦྱོང་སྟེ། །དགེ་སྦྱོང་ཡོན་ཏན་མེད་དོ་ཞེས། །ཡང་དག་བསྐུལ་བ་ཐོབ་པ་དང་། །མདོ་སྡེ་འདི་ལ་སྨོན་པར་
འགྱུར། །རྣ་བ་དང་ནི་སྣ་ཆད་རྣམས། །མེ་ལོང་བལྟས་ཀྱང་མི་སྡུག་ཅེས། །ཡང་དག་བསྐུལ་བ་ཐོས་པ་དང་། །དེ་དག་དམ་ཆོས་སྨོན་པར་འགྱུར། །དགེ་སྦྱོང་གང་དག་དམ་པའི་ཆོས། །རབ་ཏུ་འཛིན་པ་འབྱུང་འགྱུར་ཏེ། །དེ་དག་གཞན་དུ་ཚུལ་འཆོས་ཀྱང་། །གང་ཡང་ཆོས་འདི་
མི་ཉན་ཏོ། །རྒྱལ་པོ་རྣམས་ཀྱང་སླུ་བར་བགྱི། །སྐྱེ་བོ་ཕལ་ཆེན་འབྱེད་འགྱུར་ཡང་། །སངས་རྒྱས་ཀྱི་ནི་བྱིན་རླབས་ཀྱིས། །སེམས་ཅན་དེ་དག་ཆོས་ཉན་འགྱུར། །དུས་དེ་ཚེ་ན་བདག་ཅག་རྣམས། །སེམས་ཅན་རྣམས་ལ་ཕན་སླད་དུ། །ལུས་དང་སྲོག་ཀྱང་རབ་བཏང་སྟེ། །
དམ་པའི་ཆོས་ནི་གཟུང་བར་བགྱི། །བྱང་ཆུབ་སེམས་དཔའི་ལས་ནི་བཞི་སྟེ། བདུད་དང་ཉོན་མོངས་པ་ཐམས་ཅད་ཚར་གཅོད་པ་དང་། ཕ་རོལ་རྒོལ་བ་ཐམས་ཅད་ཆོས་དང་མཐུན་པར་ཟིལ་གྱིས་མནན་པ་དང་། སེམས་ཅན་ཡོངས་སུ་སྨིན་པར་བྱ་བ་དང་། དམ་པའི་ཆོས་ཡོངས་
སུ་བཟུང་བའོ། །ལས་བཞི་པོ་དེ་དག་ཀྱང་ལས་གཅིག་གིས་ཡོངས་སུ་བསྡུས་ཏེ། གང་གིས་ཤེ་ན། འདི་ལྟ་སྟེ། དམ་པའི་ཆོས་ཡོངས་སུ་འཛིན་པའོ། །བྱང་ཆུབ་སེམས་དཔའ་ནམ་མཁའ་མཛོད་ཀྱི་བྱིན་གྱི་རླབས་ཀྱིས་ནམ་མཁའ་ལས་ཆོས་ཟབ་མོ་སྟོན་པའི་
ཚིགས་སུ་བཅད་པ་མང་པོ་ཞིག་གྲག་པ་དང་། བྱང་ཆུབ་སེམས་དཔའ་ངོ་མཚར་དང་ལྡན་པས་ནམ་མཁའ་མཛོད་ལ་སྨྲས་པ། སྒྲ་འདི་དག་ག་ལས་བྱུང་སྙམ་བདག་ངོ་མཚར་དུ་གྱུར་ཏོ། །ནམ་མཁའ་མཛོད་ཀྱིས་སྨྲས་པ། རིགས་ཀྱི་བུ་ཇི་སྙམ་དུ་སེམས། བྲག་ཅའི་
སྒྲ་ག་ལས་བྱུང་། སྨྲས་པ། ཕ་རོལ་གྱི་སྒྲ་གོ་བར་བྱེད་པ་ལས་བྱུང་ངོ་། །སྨྲས་པ། བྲག་ཅ་ལས་ལུས་སམ་སེམས་སམ། གཟུགས་སམ་ཁ་དོག་དང་། དབྱིབས་གང་ཡང་ཡོད་དམ། སྨྲས་པ། མེད་པ་དེ་བཞིན་ཏེ། བྲག་ཅ་མ་གྲུབ་ཀྱང་གོ་བར་བྱེད་པ་དེ་བཞིན་དུ་ནམ་མཁའ་

མ་གྲུབ་སྟེ། སྒྲ་དང་སྐད་གོ་བར་བྱེད་པར་འགྱུར་རོ། །སྨྲས་པ། སྒྲ་འདི་གོ་བར་བྱེད་པ་སུ། གང་ནས་དབྱངས་འདི་བྱུང་། སྨྲས་པ། ཡེ་ཤེས་ཀྱི་གོ་བར་བྱེད་པ་བསམ་གྱིས་མི་ཁྱབ་སྟེ། ངས་ཡིད་ཀྱི་སེམས་པས་བསམས་ན། བདེ་བར་སྣང་བ་འདི་ལས་བྱུང་ཡང་
སེམས་དེར་འགྲོ་བ་ཡང་མེད། དེ་འདི་ལྟར་འོང་བ་ཡང་མེད་མོད་ཀྱི། སྒྲའི་སྒྲ་བརྙན་ཡང་འབྱུང་ངོ་། །རིགས་ཀྱི་བུ་རྟེན་ཅིང་འབྲེལ་པར་འབྱུང་བ་ཇི་ཙམ་དུ་ཟབ་པ་ལྟོས། གང་རྒྱུ་ལས་འབྲས་བུ་འབྱུང་ཡང་། རྒྱུ་འབྲས་བུ་གྲུ་པར་མི་འཕོ་ལ། རྒྱུ་མེད་པ་ལས་ཀྱང་འབྲས་བུ་འབྱུང་
བ་མ་ཡིན་ནོ། །འདི་ལྟ་སྟེ། རྒྱུ་རྐྱེན་ལས་འབྲས་བུ་འགྲུབ་པའི་ཆོས་འདི་གཉིས་ཀ་ཡང་གཡོ་བ་མེད་ཅིང་བྱེད་པ་མེད་དོ། །གང་དེ་ལྟ་བུའི་འདུ་བ་ཤེས་པ་དེ་དག་ནི་འབྲལ་བ་སྟེ། ཅིའི་ཕྱིར་ཞེ་ན། བཅོམ་ལྡན་འདས་ཀྱིས་ཀྱང་གང་ཀུན་ནས་ཉོན་མོངས་པ་ཤེས་པ་དེ་ཉིད་དེའི་རྣམ་པར་བྱང་བ་
ཞེས་གསུངས་སོ། །གཙུག་ན་རིན་པོ་ཆེས་ཞུས་པ་ལས། བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་བརྒྱད་དེ་གང་ཞེ་ན། ཟང་ཟིང་མེད་པའི་སེམས་ཀྱིས་ཚུལ་མི་འཆོས་པ་དང་། ཡོངས་སུ་འཛིན་པ་ཐམས་ཅད་འདོར་བས་ཁ་གསག་
མེད་པ་དང་། རང་བཞིན་གྱིས་ཆོག་ཤེས་པས་གཞོགས་སློང་མི་བྱེད་པ་དང་། སྦྱངས་པའི་ཡོན་ཏན་དང་ཡོ་བྱད་བསྙུངས་པས་འཕགས་པའི་རིགས་ཡང་དག་པར་འཛིན་པ་ཡོངས་སུ་རྫོགས་པ་དང་། དགོན་པ་ལ་གནས་པ་རྗེས་སུ་མི་གཏོང་བས་ལུས་ལ་མི་ལྟ་བ་
དང་། དམ་པའི་ཆོས་ཡོངས་སུ་འཛིན་པས་སྲོག་ལ་མི་ལྟ་བ་དང་། འདུ་འཛི་སྤོང་བས་གཅིག་པུར་དགའ་བ་དང་། ཁམས་གསུམ་ཐམས་ཅད་ཀྱིས་འཇིགས་པས་ཆོས་ཀྱི་དཔའ་བ་མོས་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ནི། ཕ་རོལ་ཏུ་འགྲོ་བར་གསུངས་
ཏེ། དེའི་ཕྱིར་ཕ་རོལ་ཏུ་ཕྱིན་པ་ཞེས་བྱའོ། །མཚན་མ་ཐམས་ཅད་དང་། དམིགས་པ་ཐམས་ཅད་དང་། སེམས་ཅན་གྱི་སེམས་ཀྱི་སྤྱོད་པ་ཐམས་ཅད་ཀྱི་ཕ་རོལ་ཏུ་སོང་བས་དེའི་ཕྱིར་ཕ་རོལ་ཏུ་ཕྱིན་པ་ཞེས་བྱའོ། །དེའི་ཤེས་རབ་ཡོངས་སུ་དག་པ་གཉིས་ཏེ། གང་ཞེ་ན། ཆགས་པ་མེད་

པའི་མཚན་ཉིད་ཡོངས་སུ་དག་པ་དང་། ཐོགས་པ་མེད་པའི་མཚན་ཉིད་ཡོངས་སུ་དག་པའོ། །བཀའ་སྩལ་པ། རིག་ས་ཀྱི་བུ་མངོན་པར་ཤེས་པ་རྣམས་ཞེས་བྱ་བ་ནི། ཟག་པ་མེད་པའི་ཡེ་ཤེས་ཀྱི་ཚིག་བླ་དགས་སོ། །བྱང་ཆུབ་སེམས་དཔའ་ནི་མངོན་པར་
ཤེས་པ་ལྔ་པོ་འདི་དག་གིས། རྣམ་པར་རོལ་ཅིང་ཟག་པ་མེད་པའི་ཡེ་ཤེས་ལ་ཡང་རབ་ཏུ་གནས་སོ། །བྱང་ཆུབ་སེམས་དཔའི་ཆོས་བཞི་དང་ལྡན་ན། སེམས་ཅན་ཡོངས་སུ་སྨིན་པར་བྱེད་ནུས་ཏེ། བཞི་ནི་མི་སྐྱོ་བ་དང་། བདག་བདེ་བ་ལ་མི་ཆགས་པ་དང་། དུས་དང་དུས་
མ་ཡིན་པར་བསྐུལ་བ་དང་། བསམ་པ་ཡོངས་སུ་ཤེས་པའོ། །ཡང་བཞི་སྟེ། བཀའ་བློ་བདེ་བ་དང་། སྙན་པར་སྨྲ་བ་དང་། ངང་ཚུལ་མཉེན་པ་དང་། བཞིན་འཛུམ་ཞིང་ཁྲོ་གཉེར་མེད་པའོ། །བྱང་ཆུབ་སེམས་དཔའ་ལུས་དྲན་པ་ཉེ་བར་གཞག་པ་བཞི་ནི། རྣམ་པ་གཉིས་དང་
ལྡན་པའི་དྲན་པ་ཉེ་བར་གཞག་པའོ། །གཉིས་ནི་མི་སྡུག་པ་དང་། སྡུག་པར་སོ་སོར་རྟོག་པའོ། །དེ་ལ་མི་སྡུག་པ་ནི་ཀྱེ་མ་ལུས་འདི་མི་གཙང་བས་གང་བ། ཡུན་ཐུང་བ། བྱིས་པ་འདྲིད་པའོ་སྙམ་མོ། །སྡུག་པ་ནི་ལུས་འདིས་དེ་བཞིན་གཤེགས་པའི་སྐུ། ཆོས་ཀྱི་སྐུ།
བསོད་ནམས་ཀྱི་སྐུ། ཡེ་ཤེས་ཀྱི་སྐུ། རྡོ་རྗེའི་སྐུ། མི་ཤིགས་པའི་སྐུ། ཟག་པ་མེད་པའི་སྐུ་གཟུགས་མཐོང་ན། སེམས་ཅན་ཐམས་ཅད་ཚིམ་པར་འགྱུར་བ་ཐོབ་པར་བྱའོ་སྙམ་མོ། །ཡང་རྣམ་པ་གཉིས་ཏེ། མི་རྟག་པ་དང་། རྟག་པའི་རྣམ་པར་རོ། །དེ་ལ་མི་རྟག་པའི་
རྣམ་པར་ནི། ཀྱེ་མ་ལུས་འདི་མི་རྟག་པ། འཇིག་པའི་ཆོས་ཅན་ཡིན་པས། ལུས་ཀྱི་ཕྱིར་ཡ་ང་བས་མི་འཚེའོ། །རྟག་པ་ནི་ལུས་ཀྱི་རྗེས་སུ་ལྟ་ཞིང་གནས་པའི་དགེ་བའི་རྩ་བ་ཐམས་ཅད། དཀོན་མཆོག་གསུམ་གྱི་གདུད་མི་འཆད་པ་དང་། སེམས་ཅན་ཐམས་ཅད་ཡོངས་
སུ་བསྐྱབ་པའི་ཕྱིར། བླ་ན་མེད་པའི་བྱང་ཆུབ་ཏུ་ཡོངས་སུ་བསྔོ་བའོ། །དྲན་པ་ཉེ་བར་གཞག་པ་བཞི་ལ་གནས་པས། ཕྱིན་ཅི་ལོག་བཞི་སྤོང་སྟེ། ལུས་ཀྱི་གཙང་བ་སྤོང་། ཚོར་བས་བདེ་བ། སེམས་ཀྱིས་རྟག་པ། ཆོས་ཀྱིས་བདག་ཏུ་ཕྱིན་ཅི་ལོག་པ་སྤོང་བའོ། །

གསེར་འོད་དམ་པ་ལས། སྐུ་ལ་རུས་པ་ཁྲག་མེད་ན། །རིང་བསྲེལ་ཡོད་པར་ག་ལ་འགྱུར། །སེམས་ཅན་རྣམས་ལ་ཕན་པའི་ཕྱིར། །ཐབས་ཀྱི་རིང་བསྲེལ་གཞག་པ་མཛད། །སྐབས་གཞན་དག་ཏུ་མྱ་ངན་ལས་འདས་པ་དང་། རིང་བསྲེལ་འཇིག་རྟེན་དུ་བཞག་
པ་ཞེས་བྱ་བ་ནི། དེ་བཞིན་གཤེགས་པའི་ཐབས་མཁས་པ་སྟེ། སེམས་ཅན་རྣམས་ཀྱིས་མཆོད་པ་དང་། རིམ་གྲོ་བྱེད་པ་དེ་དག་ཀྱང་དེ་བཞིན་གཤེགས་པའི་ཐུགས་རྗེ་དང་དགེ་བའི་རྩ་བའི་མཐུ་ཡིན་པར་བལྟ་བར་བྱའོ། །དེ་ལ་གང་ཞིག་མཆོད་པ་དང་རིམ་གྲོ་བྱེད་པ་
དེ་ནི་མ་འོངས་པའི་དུས་ན། མི་ཁོམ་པ་བརྒྱད་ཡོངས་སུ་སྤངས་ཏེ། དེ་བཞིན་གཤེགས་པ་རྣམས་དང་ཕྲད་ཅིང་དགེ་བའི་བཤེས་གཉེན་དང་ལྡན་པ་དང་། བྱང་ཆུབ་ཀྱི་སེམས་མི་སྟོར་བ་དང་། བསོད་ནམས་དཔག་ཏུ་མེད་པ་འཕེལ་བ་དང་། འཁོར་བ་ལས་མྱུར་
དུ་འདའ་ཞིང་འཁོར་བའི་འཆིང་བས་གླགས་པར་མི་འགྱུར་བའི་སྤྱོད་པ་དམ་པ་འདི་ཡིན་པས་ཁྱེད་ཀྱིས་ནན་ཏན་དུ་སྒྲུབ་ཅིང་གཡེལ་བ་མེད་པར་བྱའོ། །དེ་ཁོ་ན་ཉིད་དང་། ཡང་དག་པའི་ཡེ་ཤེས་ཉིད་ཙམ་དུ་གནས་པ་དེ་ནི། ཆོས་ཀྱི་སྐུ་ཞེས་བྱའོ། །སྐུ་སྔ་མ་གཉིས་
ནི་བཏགས་པ་ཙམ་མོ། །ཆོས་ཀྱི་སྐུ་ནི་ཡང་དག་པ་སྟེ། སྐུ་དེ་ཉིད་ཀྱི་གཞི་བྱེད་དོ། །ཅིའི་ཕྱིར་ཞེ་ན། ཆོས་ཀྱི་དེ་བཞིན་ཉིད་དང་། རྣམ་པར་རྟོག་པའི་ཡེ་ཤེས་ལས་གུད་ན། སངས་རྒྱས་ཀྱི་ཆོས་གང་ཡང་མེད་པའི་ཕྱིར་རོ། །རིགས་ཀྱི་བུ་དཔེར་ན་རྣམ་པར་
རྟོག་པའི་སེམས་ལ་བརྟེན་ནས། ཉོན་མོངས་པ་དང་ལས་དང་འབྲས་བུ་རྣམ་པ་མང་པོ་སྟོན་པ་བཞིན་དུ། ཆོས་ཀྱི་ཆོས་ཉིད་དང་། དེ་བཞིན་ཉིད་ཀྱི་ཡེ་ཤེས་ལ་བརྟེན་ནས། ཐེག་པ་གསུམ་གྱི་ཆོས་རྣམས་སྣ་ཚོགས་སྟོན་ཏོ། །དཔེར་ན་ཉི་མ་དང་ཟླ་བ་
ལ་ཡང་རྟོག་པ་མེད། ཆུ་དང་མེ་ལོང་ལ་ཡང་རྟོག་པ་མེད། སྣང་བ་ལ་ཡང་རྟོག་པ་མེད་མོད་ཀྱི། གསུམ་འདུས་པ་ལས་གཟུགས་བརྙན་འབྱུང་ངོ་། །དེ་བཞིན་དུ་དེ་བཞིན་ཉིད་དང་། དེ་བཞིན་ཉིད་ཀྱི་ཡེ་ཤེས་ལ་ཡང་རྣམ་པར་རྟོག་པ་མེད་མོད་ཀྱི། སྨོན་ལམ་

གྱི་དབང་གིས་སེམས་ཅན་སྐལ་བ་ཅན་དག་ལ་ལོངས་སྤྱོད་རྫོགས་པ་དང་། སྤྲུལ་པའི་སྐུ་ཡང་ཉི་ཟླའི་གཟུགས་བརྙན་བཞིན་དུ་རྒྱུ་དང་རྐྱེན་འདུས་པ་ལས་བྱུང་ངོ་། །རིགས་ཀྱི་བུ་གཞན་ཡང་དཔེར་ན་ཚད་མེད་གྲངས་མེད་པའི་ཆུ་དང་
མེ་ལོང་དག་ནི་སྣང་བ་ལ་བརྟེན་ནས་སྟོང་པའི་གཟུགས་བརྙན་མཚན་ཉིད་ཐ་དད་པ་དག་སྣང་ངོ་། །སྟོང་པ་ཞེས་བྱ་བ་ནི་མཚན་ཉིད་མེད་པའོ། །དེ་བཞིན་དུ་ལོངས་སྤྱོད་རྫོགས་པ་དང་སྤྲུལ་པའི་སྐུས་ནི་འཁོར་རྣམས་ལ་ཆོས་ཀྱི་སྐུའི་གཟུགས་བརྙན་སྟོན་པར་
སྨོན་ལམ་གྱི་དབང་གིས་སྐུ་དེ་གཉིས་སྣང་སྟེ། མཚན་མ་སྣ་ཚོགས་སུ་སྣང་ཡང་ཆོས་ཀྱི་སྐུའི་གནས་པ་ནི་མཚན་ཉིད་ཐ་དད་པ་མེད་དོ། །རིགས་ཀྱི་བུ་སྐུ་དེ་ཉིད་ལ་གནས་ཏེ། སངས་རྒྱས་བཅོམ་ལྡན་འདས་རྣམས་ཕུང་པོའི་ལྷག་མ་དང་བཅས་པའི་མྱ་
ངན་ལས་འདས་པ་ཞེས་གསུངས་སོ། །ཆོས་ཀྱི་སྐུ་ལ་གནས་ཏེ། ཕུང་པོ་ལྷག་མ་མེད་པའི་མྱ་ངན་ལས་འདས་པ་ཞེས་གསུངས་སོ། །སྐུ་འདི་གསུམ་ལ་བརྟེན་ནས། སངས་རྒྱས་རྣམས་མི་གནས་པའི་མྱ་ངན་ལས་འདས་པ་ཞེས་བཤད་དོ། །རིགས་ཀྱི་བུ་སངས་
རྒྱས་ཀྱི་སྤྲུལ་པའི་སྐུ་ནི་སོ་སོའི་སྐྱེ་བོའི་ཡིད་དང་མཐུན་པར་རྣམ་པ་མང་པོས་མཚན་མ་སྣ་ཚོགས་སྟོན་པའི་ཕྱིར་མང་པོ་ཞེས་བྱའོ། །ལོངས་སྤྱོད་རྫོགས་པའི་སྐུ་ནི་འཁོར་རྣམས་ཀྱི་བསམ་པ་གཅིག་པས་མཚན་ཉིད་གཅིག་པའི་ཕྱིར་གཅིག་ཅེས་བྱའོ། །ཆོས་ཀྱི་སྐུ་ནི་མཚན་
མ་སྣ་ཚོགས་ལས་ཡང་དག་པར་འདས་པ་མཚན་མར་གཟུང་བའི་སྤྱོད་ཡུལ་མ་ཡིན་པ་སྟེ། དེ་བས་ན་གཅིག་པ་ཡང་མ་ཡིན། ཐ་དད་པ་ཡང་མ་ཡིན་པ་ཞེས་བྱའོ། །རིགས་ཀྱི་བུ་སྤྲུལ་པའི་སྐུ་ནི་ལོངས་སྤྱོད་རྫོགས་པའི་སྐུ་ལ་བརྟེན་ཏེ་སྣང་ངོ་། །ལོངས་སྤྱོད་རྫོགས་
པའི་སྐུ་ནི་ཆོས་ཀྱི་སྐུ་ལ་བརྟེན་ཏེ་སྣང་ངོ་། །ཆོས་ཀྱི་སྐུ་ཡང་དག་པ་སྟེ་ཅི་ལ་ཡང་མི་གནས་སོ། །རིགས་ཀྱི་བུ་སྐུ་དེ་གསུམ་ནི་རྟག་པར་བཤད་པའི་རྣམ་གྲངས་ཀྱང་ཡོད། མི་རྟག་པར་བཤད་པའི་རྣམ་གྲངས་ཀྱང་ཡོད་དོ། །སྟོབས་དང་མི་འཇིགས་པ་དང་

སོ་སོ་ཡང་དག་པར་རིག་པ་ལ་སོགས་པ་མ་འདྲེས་པའི་ཆོས་བརྒྱད་ཅུ། གསེར་དང་ཆུ་དང་ནམ་མཁའ་དག་དྲི་མ་དང་རྙོག་པ་དང་སྤྲིན་དང་བྲལ་ན་གསེར་ལ་སོགས་པ་མེད་པ་ཡིན་པ་བཞིན་དུ། ཆོས་ཀྱི་སྐུ་ཉོན་མོངས་པ་ཐམས་ཅད་ཟད་པའི་ཕྱིར། རྣམ་པར་དག་
པ་ཞེས་བྱ་བའི་སྐུ་ཉིད་མེད་པར་གྱུར་པ་ནི་མ་ཡིན་ནོ། །རྣམ་པར་རྟོག་པ་ཡོད་པར་སྣང་ཡང་ངོ་བོ་ཉིད་ལ་ནི་རྣམ་པར་རྟོག་པ་ཡང་མེད་དོ། །གསུམ་དུ་བགྲང་བ་ཡོད་མོད་ཀྱི། དངོས་པོ་གསུམ་དུ་ཡང་མེད་དེ་འཕེལ་བ་དང་འགྲིབ་པ་མེད་པ་དེ་ནི་རྨི་ལམ་དང་སྒྱུ་མ་
དང་སྨིག་རྒྱུ་ལྟ་བུ་སྟེ། གཟུང་བ་ཡང་མེད་འཛིན་པ་ཡང་མེད་དོ། །ཤཱ་རིའི་བུ་སྦྱིན་པ་རྣམས་ཀྱི་ནང་ན་ཆོས་ཀྱི་སྦྱིན་པ་མཆོག་ཅེས་ངས་བཤད་དོ། །ལུས་ནི་གཡོ་བ་མེད་ཅིང་བྱེད་པ་མེད། །སྙིང་པོ་མེད་ཅིང་རྐྱེན་ལས་བྱུང་བ་སྟེ། །ཡང་དག་མ་ཡིན་ཡོངས་སུ་
རྟོག་ལས་བྱུང་། །གྲོང་སྟོང་ལས་ཀྱི་འཁྲུལ་འཁོར་འདྲ་བར་གནས། །ཆོས་རྣམས་འདི་དག་ཐམས་ཅད་སྟོང་པ་སྟེ། །མ་རིག་པ་ཡི་རྐྱེན་ལས་བྱུང་བ་ཡིན། །འབྱུང་བ་ཆེན་པོ་འདི་དག་ཆེས་འབྱུང་མིན། །མ་བྱུང་བ་ལས་བྱུང་ཞིང་མི་འབྱུང་སྟེ། །གང་གི་ཕྱིར་ནི་འབྱུང་བ་མི་
འབྱུང་བ། །དེ་ཕྱིར་འབྱུང་བ་ཆེ་ཞེས་ངས་བརྗོད་དོ། །ཡོད་པ་མིན་ཞིང་ནམ་ཡང་ཡོད་མིན་ལ། །མ་རིག་པ་ཡི་རྐྱེན་ལས་བྱུང་བ་ཡིན། །མ་རིག་འདི་ནི་ཡོད་པ་མ་ཡིན་ཏེ། །དེ་བས་ངས་ནི་མ་རིག་འདི་བཤད་དོ། །རྡོ་རྗེ་རི་རབ་ཆེན་པོའི་རྩེ་མོའི་ཁང་བ་བརྩེགས་
པའི་གཟུངས་ལས། ཡོངས་སུ་བརྟགས་པ་ཡིན་པའི་ཕྱིར་བརྟགས་པ་ཡང་སྟོང་པའོ། །རྟེན་ཅིང་འབྲེལ་པར་འབྱུང་བའི་ཕྱིར། གཞན་གྱི་དབང་ཉིད་ཀྱང་སྟོང་པའོ། །རྒྱུ་དང་རྐྱེན་ལས་བྱུང་བའི་ཕྱིར། རྟེན་ཅིང་འབྲེལ་པར་འབྱུང་བ་ཡང་སྟོང་པའོ། །གློ་བུར་དུ་རྒྱུ་
དང་རྐྱེན་གྱིས་བསྐྱེད་པའི་ཕྱིར། འབྱུང་བའི་བདག་ཉིད་ཀྱིས་སྟོང་ངོ་། །དེ་ལ་རྟེན་ཅིང་འབྲེལ་པར་འབྱུང་བ་ནི། རང་གི་མཚན་ཉིད་ཀྱིས་སྟོང་ངོ་། །རང་གི་མཚན་ཉིད་ཀྱིས་སྟོང་པ་གང་ཡིན་པ་དེ་མཚན་ཉིད་མེད་པའོ། །སྐུ་གསུམ་རྣམ་པར་གཞག་པ་ཞེས་བྱ་བ་དེ་

ནི་ཚོགས་གཉིས་ཀྱིས་སྤྲུལ་པའི་མཚན་ཉིད་དོ། །དེ་བཞིན་གཤེགས་པ་སྐྱེ་བ་འབྱུང་བ་ལས། བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་ཡེ་ཤེས་ཀྱི་རང་བཞིན་གྱི་ལུས་གཅིག་ཅིང་ཐ་མི་དད་པས་གཟུགས་ཀྱི་ལུས་མཐའ་ཡས་པའི་
སྒོ་ཀུན་དུ་སྟོན་པ་ཤ་སྟག་འདི་ལྟ་སྟེ། བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་པ་སངས་རྒྱས་ཀྱི་ཞིང་ཕྲག་བཅུའི་རྡུལ་ཕྲ་རབ་སྙེད་དང་ཐབས་ཅིག་ཏུ་བཞུགས་སོ། །ལྷའི་རྒྱལ་པོ་དབང་སྒྱུར་གྱི་ལྷའི་བུ་མོ་བཟང་མོའི་དབུགས་གཅིག་
གིས་ལྷ་རྫས་ཀྱི་རོལ་མོའི་སྒྲ་ཡན་ལག་བརྒྱ་ཕྲག་སྟོང་དང་ལྡན་པའི་ང་རོ་འབྱུང་སྟེ། སྒྲ་དེ་བྱུང་བ་ནི་སྒྲ་རྣམ་པ་ཐ་དད་པ་བརྒྱ་ཕྲག་སྟོང་གི་དབྱངས་སུ་གྲག་གོ། །དེ་བཞིན་དུ་དེ་བཞིན་གཤེགས་པའི་གསུང་གཅིག་འབྱུང་ཡང་སེམས་ཅན་གྱི་བསམ་པ་
བཞིན་ཚད་མེད་པའི་སྒྲ་རྣམ་པར་གྲག་གོ། །དཔེར་ན་འོག་གི་ཆུའི་ཕུང་པོ་ཉེ་བར་བཟུང་བ་ཡན་ཆད་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་སྲིད་པའི་རྩེ་མོའི་བར་གྱི་སྟོང་གསུམ་གྱི་སྟོང་ཆེན་པོ་ཐམས་ཅད་ནམ་མཁའ་ལ་གནས་ཏེ། གཟུགས་མེད་པ་ལ་
སྤྱོད་པའི་སེམས་ཅན་གྱི་གནས་དང་། འདོད་པ་ན་སྤྱོད་པའི་སེམས་ཅན་གྱི་གནས་ཇི་སྙེད་པ་དེ་དག་ཐམས་ཅད་ནམ་མཁའ་ལ་གནས་ཤིང་། ནམ་མཁའི་དབྱིངས་ལས་བྱུང་བའོ། །དཔེར་ན་རི་མོའི་གཞི་ཆེན་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཙམ་
ཞིག་ཡོད་པར་གྱུར་ལ། གཞི་དེ་ལ་སྟོང་གསུམ་གྱི་སྟོང་ཆེན་པོ་རིལ་གྱིས་རྫོགས་པར་བྲིས་ཏེ། འདོད་པ་ན་སྤྱོད་པའི་ལྷའི་གཞལ་མེད་ཁང་གི་ཚད་དང་། གཟུགས་ན་སྤྱོད་པའི་ལྷའི་གཞལ་མེད་ཁང་དང་། གཟུགས་མེད་པ་ན་སྤྱོད་པའི་ལྷའི་གཞལ་མེད་ཁང་གི་
ཚད་ལ་སོགས་པ་དེའི་ཚད་དུ་བྲིས་ལ། རི་མོའི་གཞི་དེ་རྡུལ་ཕྲ་རབ་གཅིག་གི་ནང་དུ་ཆུད་པར་བྱས་པ་སེམས་ཅན་གང་གིས་ཀྱང་མཐོང་བའམ། ཤེས་པར་མ་གྱུར་ལ་འཕྲུལ་གྱི་མིག་ཅན་འགའ་ཞིག་གིས་མཐོང་ནས། རྡུལ་དེ་ཕྱེ་སྟེ་སེམས་ཅན་ལ་བསྟན་ཏེ་

ཕན་བཏགས་པ་ཞིག་ཡོད་ན། དེ་དང་འདྲ་བར་དེ་བཞིན་གཤེགས་པའི་ཡེ་ཤེས་སེམས་ཅན་ཐམས་ཅད་ཉེ་བར་འཚོ་བ་ཡང་སེམས་ཅན་ཐམས་ཅད་ཀྱི་སེམས་ལ་རིལ་གྱིས་ཆུད་པར་གནས་པ་བྱིས་པས་མི་ཤེས་པས་མི་ཤེས་པ་རྣམས་ལ་དེ་བཞིན་གཤེགས་
པས་བྱིས་པའི་འདུ་ཤེས་ཀྱི་མདུད་པ་བཀྲོལ་ནས། ཡེ་ཤེས་ཁོང་དུ་ཆུད་ཅིང་མཉམ་པ་ཉིད་རྟོགས་པར་བྱེད་པ་ཡང་དེ་དང་འདྲ་སྟེ། དཔེ་འདིས་དེ་བཞིན་གཤེགས་པའི་ཡེ་ཤེས་འབྱུང་བ་ཤེས་པར་བྱའོ། །དམ་པའི་ཆོས་པདྨ་དཀར་པོ་ལས། བྱམས་མའི་བུ་གང་པོ་
མ་འོངས་པའི་དུས་ན། འཇིག་རྟེན་གྱི་ཁམས་མི་མཇེད་འདི་ཉིད་དུ་མངོན་པར་འཚང་རྒྱ་སྟེ། དེའི་ཚེ་སངས་རྒྱས་ཀྱི་ཞིང་འདི་ནང་ན་སོང་མེད། བུད་མེད་ཀྱང་མེད་དོ། །སེམས་ཅན་དེ་དག་ཐམས་ཅད་རྫུས་ཏེ་སྐྱེ་བར་ཚངས་པར་སྤྱོད་པ་ཡིད་ལས་བྱུང་བའི་ལུས་འོད་རང་ལ་ཡོད་པ།
རྫུ་འཕྲུལ་ཅན་ནམ་མཁའ་ལ་འགྲོ་བ་ལུས་གསེར་གྱི་མདོག་ཅན་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པར་འགྱུར་བའོ། །སྐྱེས་བུ་དམ་པ་བཅུ་དྲུག་ལ། བཟང་སྐྱོང་། དཀོན་མཆོག་འབྱུང་གནས། དེད་དཔོན་བཟང་པོ། །མིས་བྱིན། ཕུག་སྦས། ཆུས་བྱིན། དབང་པོས་བྱིན། བླ་མའི་བློ་གྲོས། ཁྱད་
པར་བློ་གྲོས། འཕེལ་བའི་བློ་གྲོས། མཐོང་བ་དོན་ཡོད། ཤིན་ཏུ་ཡང་དག་ཞུགས། རབ་ཀྱི་རྩལ་གྱིས་རྣམ་པར་གནོན་པ། དཔེ་མེད་བློ་གྲོས། ཉི་མའི་སྙིང་པོ། ས་འཛིན། ཕྱོགས་བཅུའི་དེ་བཞིན་གཤེགས་པ་རྣམས་བདག་གི་ཞམ་རིང་བ་དང་ལྷན་ཅིག་ཏུ་བདག་དང་གཅིག་གམ་བདག་དང་གཉིས་མི་མཇེད་ཀྱི་
འཇིག་རྟེན་གྱི་ཁམས་འདིར་གཤེགས་སོ། །དེའི་ཚེ་ཐམས་ཅད་དང་ལྡན་པའི་འཇིག་རྟེན་གྱི་ཁམས་མི་མཇེད་འདི་རིན་པོ་ཆེའི་ཤིང་ལྗོན་པས་རབ་ཏུ་བརྒྱན་པར་གྱུར་ཏོ། །བཻ་ཌཱུརྱའི་གཞི་ལ་རིན་པོ་ཆེ་སྣ་བདུན་དང་གསེར་གྱི་དྲ་བས་བྲེས། དྲིལ་བུ་གཡེར་ཀའི་དྲ་བས་བརྒྱན་པ། མེ་ཏོག་སྣ་
ཚོགས་བཀྲམ་པ། གསེར་གྱི་སྐུད་པས་མིག་མངས་རིས་སུ་བྲེས་པར་གྱུར་ཏེ། གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་ཡང་མེད་པར་གྱུར། རི་ནག་པོ་ཡང་མེད་པར་གྱུར། བཏང་བཟུང་དང་། བཏང་བཟུང་ཆེན་

པོ་དང་། ཁོར་ཡུག་དང་། ཁོར་ཡུག་ཆེན་པོ་དང་། རི་རབ་ཀྱང་མེད་པར་གྱུར། རི་རབ་ཆེན་པོ་དང་། རི་གཞན་ཡང་མེད་པར་གྱུར། རྒྱ་མཚོ་ཡང་མེད་པར་གྱུར། འབབ་ཆུ་དང་། འབབ་ཆུ་ཆེན་པོ་ཡང་མེད་པར་ཡོངས་སུ་གནས་པར་གྱུར་ཏོ། །ལྷ་
དང་མི་དང་ལྷ་མ་ཡིན་གྱི་ཚོགས་ཀྱང་མེད་པར་གྱུར། སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ཡང་མེད་པར་གྱུར་ཏོ། །འདི་ལྟར་དེའི་ཚེ་འཇིག་རྟེན་གྱི་ཁམས་མི་མཇེད་འཁོར་འགྲོ་བ་དྲུག་ཏུ་སྐྱེས་པའི་སེམས་ཅན་དེ་དག་ཐམས་ཅད་
འཇིག་རྟེན་གྱི་ཁམས་གཞན་དག་ཏུ་བཀོད་པར་གྱུར་ཏེ། གང་དག་འཁོར་དེར་འདུས་པ་དེ་དག་མ་གཏོགས་སོ། །འདུ་ཤེས་ཕྱིན་ཅི་ལོག་ལས་བྱུང་བར་དེ་ལྟར་འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ཆོས་ཐམས་ཅད་ལ་ལྟ་ཞིང་གནས་པ་
འདིས་གནས་ན། བྱང་ཆུབ་སེམས་དཔའ་ཆེན་པོ་སྤྱོད་ཡུལ་ལ་གནས་པ་ཡིན་ནོ། །གང་ཞིག་མདོ་འདི་འཆད་འདོད་ཆོས་སྨྲ་བས། །གཡོ་དང་ང་རྒྱལ་དེ་བཞིན་འཕྱ་བ་དག །མ་ལུས་པར་ནི་ཡོངས་སུ་སྤང་བར་བྱ། །དེ་བཞིན་མཁས་པས་ཕྲག་དོག་གཞན་མི་བྱ། །
ནམ་དུ་སུ་ལ་འང་མི་སྙན་བརྗོད་མི་བྱ། །ལྟ་བས་རྩོད་པ་ནམ་ཡང་མི་བྱའོ། །བླ་མེད་ཡེ་ཤེས་ཐོབ་པར་མི་འགྱུར་ཞེས། །ཐེ་ཚོམ་གནས་ནི་ནམས་ཀྱང་མི་བྱའོ། །འཇམ་དཔལ་འདི་ནི་དེ་བཞིན་གཤེགས་པ་རྣམས་ཀྱི་ཆོས་བསྟན་པའི་མཆོག་སྟེ། ཆོས་ཀྱི་རྣམ་གྲངས་ཀྱི་མཐའོ། །ཆོས་ཀྱི་
རྣམ་གྲངས་ཐམས་ཅད་ཀྱི་ནང་ན་ཆོས་ཀྱི་རྣམ་གྲངས་འདི་ཟབ་སྟེ། འཇིག་རྟེན་ཐམས་ཅད་དང་མི་མཐུན་པའོ། །འཇིག་རྟེན་གྱི་ཁམས་གཞན་ནས་ལྷགས་པའི་བྱང་ཆུབ་སེམས་དཔའ་མང་པོ་ཞིག་གིས་ཆོས་ཀྱི་རྣམ་གྲངས་
འདི་དེ་བཞིན་གཤེགས་པ་མྱ་ངན་ལས་འདས་པ་དང་མི་མཇེད་འདིར་བསྟན་པ་ལ་སོགས་པར་བགྱི་བར་འཚལ་ན། བཅོམ་ལྡན་འདས་ཀྱིས་གདམས་སུ་གསོལ་ཞེས་བྱ་བ་དང་། བཀའ་སྩལ་པ། ཁྱོད་ཀྱིས་བྱ་ཅི་དགོས། འཇིག་རྟེན་གྱི་ཁམས་འདི་ཉིད་ན་ངས་

སྨིན་པར་བྱས་པའི་བྱང་ཆུབ་སེམས་དཔའ་སྟོང་ཕྲག་གང་གཱའི་ཀླུང་དྲུག་ཅུའི་བྱེ་མ་སྙེད་ཡོད་དེ་དེ་དག་སྟོན་པ་ལ་སོགས་པ་བྱེད་པར་འགྱུར་རོ། །དེ་སྐད་གསུངས་མ་ཐག་ཏུ་བྱང་ཆུབ་སེམས་དཔའ་མང་པོ་ཞིག་ས་རུམ་ནས་འཐོན་ཏེ། དེ་བཞིན་གཤེགས་པ་རིན་ཆེན་
མང་དང་། ཤཱཀྱ་ཐུབ་པ་དང་ཕྱོགས་བཅུ་ནས་གཤེགས་པ་རྣམས་ལ་ཕྱག་འཚལ་ཏོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ས་རུམ་ནས་འཐོན་ནས་བར་གྱི་བསྐལ་པ་ལྔ་བཅུ་རྫོགས་པར་འདས་ཀྱི་བར་དུ་དེ་བཞིན་གཤེགས་པ་རྣམས་
ལ་ཕྱག་འཚལ་ཞིང་བྱང་ཆུབ་སེམས་དཔའི་བསྟོད་པ་རྣམ་པ་དུ་མས་བསྟོད་དོ། །བར་གྱི་བསྐལ་པ་ལྔ་བཅུ་པོ་དེ་དག་ལ་བཅོམ་ལྡན་འདས་ཤཱཀྱ་ཐུབ་པ་དེ་ཅང་མི་གསུང་བར་གྱུར་ཏོ། །འཁོར་བཞི་པོ་དེ་དག་ཀྱང་བར་གྱི་བསྐལ་པ་ལྔ་བཅུ་པོ་དེ་དག་ལ་ཅང་མི་སྨྲ་བར་འཁོད་
པར་གྱུར་ཏོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་བྱ་བ་འདི་ལྟ་བུ་མངོན་པར་འདུ་མཛད་དོ། །རྫུ་འཕྲུལ་ཇི་ལྟ་བུ་མངོན་པར་འདུ་བྱ་བ་མངོན་པར་མཛད་པས་འཁོར་བཞི་པོ་དེ་དག་གིས་ཕྱི་དྲོ་གཅིག་ཁོ་ན་སྙམ་དུ་ཤེས་སོ། །རྟག་ཏུ་ང་བྱིན་རླབས་དེ་
འདྲ་སྟེ། །བསྐལ་པ་བསམ་ཡས་བྱེ་བ་སྟོང་དུ་ནི། །བྱ་རྒོད་ཕུང་པོ་འདི་ལས་མི་འཕོ་ཡང་། །གུད་ན་འང་བྱེ་བ་སྙེད་ཀྱི་མལ་ཆ་ཡོད། །གང་ཚེ་འཇིག་རྟེན་ཁམས་འདི་སེམས་ཅན་གྱི། །བསྐལ་པས་བསྲེག་པར་མཐོང་ཞིང་རྟོག་པ་ནི། །དེ་ཚེ་ང་ཡི་སངས་རྒྱས་ཞིང་འདི་
ནི། །ལྷ་དང་མི་ཡིས་ཡོངས་སུ་གང་བར་འགྱུར། །དེ་དག་རྩེ་ཞིང་དགའ་བ་སྣ་ཚོགས་ལྡན། །སྐྱེད་མོས་ཁང་བཟངས་གཞལ་མེད་ཆེ་བ་ཡོད། །རིན་ཆེན་རི་བོ་རྣམས་དང་དེ་བཞིན་དུ། །མེ་ཏོག་འབྲས་ལྡན་ཤིང་ལྗོན་རྣམས་ཀྱིས་བརྒྱན། །སྟེང་ནས་ལྷ་རྣམས་རྔ་ཆེན་རབ་ཏུ་བརྡུང་། །
མནྡཱ་ར་ཡི་ཆར་ཀྱང་རབ་ཏུ་འབེབས། །མཁས་པ་གཞན་གང་བྱང་ཆུབ་འདིར་ཞུགས་དང་། །ང་དང་ཉན་ཐོས་རྣམས་ལས་མངོན་པར་འཐོབ། །ང་ཡི་ཞིང་འདི་དེ་ལྟར་རྟག་གནས་ཀྱང་། །གཞན་དག་འདི་ལ་བསྐལ་པས་བསྲེག་པར་རྟོག །མྱ་ངན་བརྒྱ་ཡིས་གང་ཞིང་

གཙེས་པ་དང་། །འཇིག་རྟེན་ཁམས་ནི་ཤིན་ཏུ་འཇིགས་པར་མཐོང་། །ལོ་མང་བྱེ་བར་དེ་བཞིན་གཤེགས་རྣམས་དང་། །ཆོས་དང་ང་ཡི་དགེ་འདུན་ཚོགས་རྣམས་ཀྱི། །མིང་ནི་ནམས་ཀྱང་ཐོས་པར་མི་འགྱུར་ཏེ། །སྡིག་པའི་ལས་ཀྱི་འབྲས་བུ་དེ་
འདྲའོ། །ནམ་ཞིག་སེམས་ཅན་འཇམ་ཞིང་མཉེན་པ་རྣམས། །མི་ཡི་འཇིག་རྟེན་འདིར་ནི་སྐྱེས་གྱུར་ཏེ། །དགེ་བའི་ལས་ཀྱིས་དེ་ལྟར་སྐྱེས་མ་ཐག །ད་ནི་ཆོས་རྣམས་རབ་ཏུ་འཆད་པར་མཐོང་། །དེ་བཞིན་གཤེགས་པ་སྐུ་ཚེ་དཔག་ཏུ་མེད། །མྱ་ངན་ལས་འདའ་བར་
བསྟན་པ་ཐམས་ཅད་ཡིན་པར་བཤད་པའི་རྗེས་ལ་བཀའ་སྩལ་པ། མ་ཕམ་པ་གང་གི་ཚེ་རིགས་ཀྱི་བུའམ། རིགས་ཀྱི་བུ་མོ་དེ་བཞིན་གཤེགས་པའི་ཚེའི་ཚད་བསྟན་པའི་ཆོས་ཀྱི་རྣམ་གྲངས་འདི་ཐོས་ནས་ལྷག་པའི་བསམ་པས་མོས་པར་བྱེད་པ་དེའི་ཚེ། དེའི་ལྷག་པའི་
བསམ་པའི་མཚན་ཉིད་འདི་ཡིན་པར་རིག་པར་བྱ་སྟེ། འདི་ལྟ་སྟེ། བྱ་རྒོད་ཀྱི་ཕུང་པོའི་རི་ལ་འདུག་སྟེ། བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་བ་དང་། བྱང་ཆུབ་སེམས་དཔའི་ཚོགས་ཀྱིས་མདུན་གྱིས་བལྟ་བ་དང་། ཉན་ཐོས་ཀྱི་དགེ་འདུན་གྱི་དབུས་ན་འདུག་
ཅིང་ཆོས་སྟོན་པར་མཐོང་བ་དང་། ངའི་སངས་རྒྱས་ཀྱི་ཞིང་མི་མཇེད་ཀྱི་འཇིག་རྟེན་གྱི་ཁམས་འདི་གཞི་བཻ་ཌཱུརྱ་ལས་གྲུབ་ཅིང་མཉམ་པར་གནས་ལ། གསེར་སྐུད་མིག་མངས་རིས་སུ་བྲེས་ཤིང་རིན་པོ་ཆེའི་ཤིང་ལྗོན་པ་རྣམས་ཀྱིས་རྣམ་པར་བཀྲ་བར་མཐོང་བ་དང་།
འདི་ནི་ཡོངས་སུ་སྤྱད་པའི་ཁང་པ་བརྩེགས་པ་དག་ན། བྱང་ཆུབ་སེམས་དཔའ་དག་གནས་པར་མཐོང་བ་སྟེ། མ་ཕམ་པ་འདི་ནི་ལྷག་པའི་བསམ་པས་མོས་པའི་རིགས་ཀྱི་བུའམ་རིགས་ཀྱི་བུ་མོའི་ལྷག་པའི་བསམ་པའི་མཚན་ཉིད་རིག་པར་བྱའོ། །རིགས་
ཀྱི་བུ་དག་མདོར་ན་སངས་རྒྱས་ཀྱི་ཆོས་ཐམས་ཅད་དང་། སངས་རྒྱས་ཀྱི་ཁྱུ་མཆོག་ཏུ་གྱུར་པ་ཐམས་ཅད་དང་། སངས་རྒྱས་ཀྱི་ཆོས་ཟབ་མོའི་གནས་ཐམས་ཅད་ངས་ཆོས་ཀྱི་རྣམ་གྲངས་འདི་ལས་བཤད་དོ། །རིགས་ཀྱི་བུའམ་རིགས་ཀྱི་བུ་མོ་བླ་ན་མེད་པ་ཡང་དག་

པར་རྫོགས་པའི་བྱང་ཆུབ་འདི་འདོད་པས། དེ་བཞིན་གཤེགས་པའི་མཆོད་རྟེན་དག་ལ་རྐང་པའི་མཐེ་བོང་འབར་བར་བྱའོ། །ལག་པའི་སོར་མོའམ། རྐང་པའི་སོར་མོ་གཅིག་གམ། ཡན་ལག་གཅིག་གམ། ལག་པ་འབར་བར་བྱའོ། །བྱང་ཆུབ་སེམས་དཔའི་ཐེག་པ་ལ་
ཞུགས་པའི་རིགས་ཀྱི་བུའམ་རིགས་ཀྱི་བུ་མོ་འདི་ནི་བསོད་ནམས་འདུ་བྱེད་པ་ཆེས་མང་དུ་བསྐྱེད་ཀྱི། རྒྱལ་སྲིད་དང་། བུ་དང་། ཆུང་མ་དང་། སྟོང་གསུམ་གྱི་འཇིག་རྟེན་གྱི་ཁམས་ཡོངས་སུ་གཏང་བ་ནི་དེ་ལྟ་མ་ཡིན་ནོ། །དེ་བཞིན་གཤེགས་པས་བཤད་པའི་
མདོ་སྡེ་ཐམས་ཅད་ཀྱི་ནང་ན་དམ་པའི་ཆོས་པདྨ་དཀར་པོའི་ཆོས་ཀྱི་རྣམ་གྲངས་འདི་མཆོག་ཏུ་གྱུར་པ་ཡིན་ནོ། །བྱང་ཆུབ་སེམས་དཔའ་ཀུན་དུ་བཟང་པོས་གསོལ་པ། སུ་ཆོས་ཀྱི་རྣམ་གྲངས་འདི་སྤྱོད་པ་དེ་བསྲུང་བའི་ཕྱིར། བདག་གླང་པོ་ཆེ་དཀར་པོ་མཆེ་བ་དྲུག་པ་
འཚལ་ཏེ་དེར་མཆིའོ། །དེའི་ཚེ་ན་བཅོམ་ལྡན་འདས་འཁོར་བཞི་པོ་རྣམས་ཀྱིས་ཡོངས་སུ་བསྐོར་ཅིང་མདུན་གྱིས་བལྟས་ཏེ། བསྟི་སྟང་དུ་བྱས་བཙུན་པར་བྱས་ཏེ། ངེས་པར་བསྟན་པ་ཆེན་པོ་ཞེས་བྱ་བའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བྱང་ཆུབ་
སེམས་དཔའ་ལ་གདམས་པ་སངས་རྒྱས་ཐམས་ཅད་ཀྱིས་ཡོངས་སུ་གཟུང་བར་བཤད་དོ། །ནམ་མཁའི་སྤྱན་ལས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་མ་འོངས་པའི་དུས་ན། གང་དེ་བཞིན་གཤེགས་པས་ཉན་ཐོས་རྣམས་ལ་བསླབ་པའི་
ཁྲིམས་སུ་བཅའ་བ་འཆའ་བར་འགྱུར་བའི་རྐྱེན་དེ་ལྟ་བུ་དག་འབྱུང་བར་འགྱུར་ཏེ། གང་ཟག་གནོད་མི་བཀུར་བ་རྣམས་ཚར་གཅད་པའི་ཕྱིར་དང་། ངོ་ཚ་ཤེས་པ་རྣམས་བདེ་བ་ལ་རེག་པར་གནས་པར་བྱ་བའི་ཕྱིར་དང་། ཚེ་འདིའི་ཟག་པ་རྣམས་སྤང་བའི་ཕྱིར་དང་། ཚེ་ཕྱི་མའི་
ཟག་པ་རྣམས་བསྡམས་པའི་ཕྱིར་དང་། ངའི་བསྟན་པ་ཡུན་རིང་དུ་གནས་པར་བྱ་བའི་ཕྱིར་གང་ཟག་ལམ་གོལ་བར་ཞུགས་པ་ཁ་ཅིག་ལ་ནི་ལུས་དུབ་པ་སྤྱད་པའི་ཆད་པ་བཅའོ། །ཁ་ཅིག་ལ་ནི་ཡིད་དུ་མི་འོང་བ་དང་འཕྲད་པའི་ཆད་པའོ། །ཁ་ཅིག་ལ་ནི་མཚམས་

ཀྱི་ཕྱི་རོལ་དུ་དབྱུང་ཞིང་ཐ་དད་དུ་གནས་པར་བྱ་བའི་ཆད་པའོ། །ཁ་ཅིག་ལ་ནི་དགེ་སློང་གི་ཐ་མར་གཞག་པའི་ཆད་པའོ། །ཁ་ཅིག་ལ་ནི་སངས་རྒྱས་ཀྱི་བསྟན་པ་ཐམས་ཅད་ལ་བསྙིལ་ཞིང་སྨད་པར་འོས་པའི་ཆད་པ་བཅད་དེ། རྒྱལ་རིགས་ད་
ལྟར་བྱུང་པ་ཁྱེད་དང་མ་འོངས་པ་ཐམས་ཅད་ཀྱི་ལག་ཏུ་ཉན་ཐོས་ཀྱི་བསླབ་པ་ཁྲིམས་སུ་བཅའ་བ་གཏོད་དོ། །དེ་ཅིའི་ཕྱིར་ཞེ་ན། གང་ད་ལྟར་དང་མ་འོངས་པའི་དུས་ན་ངའི་བསྟན་པ་ལ། གང་ཟག་ལམ་གོལ་བ། གདུལ་དཀའ་བ། ངོ་ཚ་དང་། ཁྲེལ་སྤངས་པ།
སྤྱོད་པ་མ་དག་པ་འབྱུང་བར་འགྱུར་ལ། གང་དག་ཉེ་དུའི་སྟོབས་སམ། ནོར་གྱི་སྟོབས་སམ། ཁྱིམ་པའི་དཔུང་ངམ། མང་དུ་ཐོས་པའི་སྟོབས་སམ། ཁ་སྟོབས་ཀྱིས་བསླབ་པ་དག་ལ་སྐྱོན་ཡོད་པར་སྤྱོད་ཅིང་། ཁྱིམ་ན་གནས་པའི་རྟགས་དང་། ཁྱིམ་གྱི་
ལོངས་སྤྱོད་དག་ལ་སྣང་ལ་ཡོངས་སུ་གཟུང་བ་བསྡུས་པ་དེ་དག་དགེ་སློང་དོན་ཉུང་ངུ་རྣམས་ཀྱིས་མྱུར་དུ་དགེ་འདུན་གྱི་ནང་ནས་བསྐྲད་པ་དང་། བསླབ་པ་ཇི་ལྟར་བཅད་པ་བཞིན་ཆད་པས་གཅད་པར་མི་ནུས་པས། དེ་དག་བསླབ་པའི་ཁྲིམས་སུ་
བཅའ་བ་བཞིན་བྱ་བར་རྒྱལ་རིགས་ཀྱི་ལག་ཏུ་གཏད་དེ།རྒྱལ་རིགས་དེ་དག་གང་ཟག་དེ་ལྟ་བུ་རྣམས་ལ་ཇི་ལྟར་ཁྲིམས་བཅས་པ་བཞིན་ཆད་པས་གཅོད་པར་འགྱུར་རོ། །རྒྱལ་རིགས་གང་དག་ད་ལྟར་དང་མ་འོངས་པའི་དུས་ལྔ་བརྒྱ་ཐ་མའི་བར་དུ་དེ་ལྟ་བུའི་
བརྩོན་པ་དང་། ཕ་རོལ་གནོན་པས་ངའི་བསྟན་པ་བསྲུང་ཞིང་ཡོངས་སུ་སྐྱོང་བ་དང་། ཆོས་ཀྱི་ཚུལ་འབར་བར་བྱེད་པ་དང་། དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱེད་པ་དེ་དག་ནི་སངས་རྒྱས་ཀྱི་བསྟན་པ་བསྲུང་བ་ཡིན་ཏེ། ལྷ་རྣམས་ཀྱང་བསྲུང་
ཞིང་ཡོངས་སུ་སྐྱོང་བར་འགྱུར་རོ། །རྒྱལ་རིགས་དེ་དག་ནི་རྒྱལ་སྲིད་ཀྱང་ཡུན་རིང་དུ་བྱེད་དུ་འཇུག་གོ། །བསོད་ནམས་ཀྱང་ཤིན་ཏུ་འཕེལ་བར་འགྱུར་རོ། །དེ་ནས་བསྐལ་པ་བརྒྱར་བྱང་ཆུབ་ཀྱི་སྤྱད་པ་སྤྱོད་པར་འགྱུར་རོ། །རྒྱལ་རིགས་གང་དག་ད་ལྟར་དང་མ་འོངས་

པའི་དུས་ན་ངའི་བསྟན་པ་ཡལ་བར་འདོར་ཞིང་འདུག་པའི་རྒྱལ་རིགས་དེ་དག་ནི་ལྷ་ཐམས་ཅད་ཀྱིས་བོར་བ་ཡིན། ཉན་ཐོས་དང་རང་རྒྱལ་བ་ཐམས་ཅད་ཀྱིས་ཀྱང་ཡོངས་སུ་གཏང་བ་ཡིན་ཏེ། རྒྱལ་རིགས་དེ་ནི་འཇིག་རྟེན་ཕ་རོལ་ཏུ་ཕྱིན་པ་ལྷ་དང་མིར་སྐྱེ་བ་ཡང་མེད་དོ། །
གང་ངའི་བསྟན་པ་ཡལ་བར་འདོར་བ་དེ་ནི་དཀོན་མཆོག་གསུམ་གྱི་གདུང་གཅོད་པར་ཞུགས་པ་ཡིན། ཆོས་ཀྱི་སྒྲོན་མ་གསད་པར་ཞུགས་པ་ཡིན། ཆོས་ཀྱི་ཆུ་བསྐམ་པར་ཞུགས་པ་ཡིན། སེམས་ཅན་ཐམས་ཅད་ཀྱི་ཆོས་ཀྱི་མིག་འབྱིན་པར་ཞུགས་པ་ཡིན་
ནོ། །རྒྱལ་པོ་ཆེན་པོ་དེ་ཇི་སྙམ་དུ་སེམས། གང་ཟག་གང་ཞིག་སེམས་ཅན་ཐམས་ཅད་ཀྱི་མིག་འབྱིན་པར་བྱེད་ན། གང་ཟག་དེ་བསོད་ནམས་མ་ཡིན་པ་ཇི་ཙམ་ཞིག་དང་ལྡན་པར་འགྱུར། རྒྱལ་པོ་གཟུགས་ཅན་སྙིང་པོས་མཆི་མ་བླགས་ཏེ་འདི་སྐད་ཅེས་གསོལ་
ཏོ། །གང་ཟག་དེ་ནི་བསོད་ནམས་མ་ལགས་པ་ཟླ་མ་མཆིས་པ་གྲངས་མ་མཆིས་པ། ཚད་མ་མཆིས་པ་འཕེལ་བར་འགྱུར་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བས་རྒྱལ་རིགས་གང་དག་ད་ལྟ་དང་མ་འོངས་པའི་དུས་ན། ངའི་
བསྟན་པ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་འབར་གྱི་བར་དུ་གང་ཟག་ཆོས་ཀྱིས་གནས་པ་རྣམས་མི་སྲུན་ཞིང་ལམ་གོལ་བ་ལ་གནས་པའི་གང་ཟག་རྣམས་ཆོས་བཞིན་མི་སློབ་པ་དེ་དག་ལ་བསོད་ནམས་མ་ཡིན་པ་ཆེས་མང་དུ་
འཕེལ་བར་འགྱུར་ཏེ། རྒྱལ་རིགས་དེས་སྔ་མ་བསྐལ་བ་བརྒྱར་སྦྱིན་པ་བྱིན། ཚུལ་ཁྲིམས་བསྲུངས་པ་ནས་ཤེས་རབ་བསྒོམས་པའི་བར་དུ་གྱུར་ལ། ཐེག་པ་གསུམ་ལས་ཐེག་པ་གང་ཡང་རུང་བ་ཞིག་གིས་ཞུགས་པར་གྱུར་ན། ཡང་དམ་པའི་ཆོས་ཡལ་
བར་འདོར་བའི་རྒྱུས་དེའི་དགེ་བའི་རྩ་བ་སྔོན་བསགས་པ་དེ་དག་ཐམས་ཅད་ཡོངས་སུ་ཟད་ཅིང་གཏུགས་པར་འགྱུར་རོ། །དེའི་ཡུལ་དུ་ཆོས་གསུམ་དུ་ཡང་འབྱུང་བར་འགྱུར་ཏེ། ལོ་ཉེས་དང་། འཐབ་མོ་དང་། ནད་འབྱུང་བར་འགྱུར་རོ། །ལྷས་ཀྱང་ཡལ་བར་འདོར་

ཞིང་བཏང་བར་འགྱུར་རོ། །དེའི་ཡུལ་དུ་བཀའ་མི་བརྩན་ཞིང་གཡོ་དང་སླུ་བ་དང་། བརྫུན་སྣ་ཚོགས་ཀྱང་འབྱུང་བར་འགྱུར་རོ། །གཞན་གྱི་དམག་གིས་ཀྱང་དེའི་ནོར་གྱི་ཕུང་པོ་ཕྲོགས་པར་འགྱུར་རོ། །ཡང་ན་མེས་ཚིག་པར་འགྱུར་རོ། །
ཡང་ན་ཆུས་ཁྱེར་བར་འགྱུར་རོ། །རྒྱལ་རིགས་དེ་རིང་པོར་མི་ཐོགས་པར་ནད་ཚབ་པོ་ཆེས་ཐེབས་ནས། སྡུག་པ་ཡིད་དུ་འོང་བ་དང་བྲལ་བར་འགྱུར་རོ། །ཤི་ནས་ཀྱང་དམྱལ་བ་དག་ཏུ་སྐྱེ་བར་འགྱུར་རོ། །བརྒྱ་ལ་རེས་འགའ་ཞིག་རིང་མོ་ཞིག་ན། ལེགས་པར་སྤྱད་པས་
མི་ཉིད་ཐོབ་ན་མྱུར་དུ་མིག་མེད་པ་དང་། ལོངས་སྤྱོད་དང་། ཉེ་བར་སྤྱོད་པ་ཐམས་ཅད་དང་བྲལ་བར་འགྱུར་རོ། །ཉམ་ང་བར་གནས་ཤིང་ཡུན་རིང་དུ་འཚོ་བར་འགྱུར་རོ། །ཤི་ནས་ཡང་དམྱལ་བ་དག་གི་ནང་དུ་སྐྱེ་བར་འགྱུར་རོ། །དེ་གནས་མ་ཡིན་པ་ཡོངས་སུ་
བརྟགས་པས་སངས་རྒྱས་འབྱུང་བའི་ཚེ་ཡང་མི་ལུས་མི་འཐོབ་པོ། །རྒྱལ་རིགས་ཇི་ལྟར་བྲམ་ཟེ་དང་། རྗེའུ་རིགས་དག་ཀྱང་དེ་བཞིན་ཏེ། གྲོང་ཁྱེར་གྱི་གཙོ་བོའམ། ཡུལ་གྱི་གཙོ་བོའམ། རི་ཁྲོད་ཀྱི་གཙོ་བོའམ། ལྗོངས་ཀྱི་གཙོ་བོ་ཡང་རུང་། གང་ཞིག་བག་མེད་
པའི་རྒྱུའམ། ནོར་གྱི་ཕྱིར་ངའི་བསྟན་པ་ལ་ཆོས་ཀྱིས་གནས་པའི་གང་ཟག་རྣམས་ཅི་ནུས་ཀྱིས་མི་སླུ་ཞིང་ལམ་གོལ་བ་ལ་གནས་པའི་གང་ཟག་རྣམས་ཆོས་བཞིན་དང་འདུལ་བ་བཞིན་ཚར་མི་གཅོད་པ་དེ་ཐམས་ཅད་ལས་ཀྱི་སྒྲིབ་པ་དེ་ལྟ་བུ་དང་ལྡན་པར་འགྱུར་རོ། །
རྒྱལ་པོ་གཟུགས་ཅན་སྙིང་པོས་གསོལ་པ། བཅོམ་ལྡན་འདས་ད་ལྟར་དང་མ་མཆིས་པའི་དུས་ན། རྒྱལ་རིགས་རྣམས་ཀྱིས་མི་ཉིད་འཐོབ་པ་ནི་དཀའ་ལགས་ཏེ། གང་དག་མྱོས་ཤིང་བག་མ་མཆིས་པར་མང་དུ་གནས་ལ། དམ་པའི་ཆོས་ཡུན་རིང་དུ་
གནས་པ་དང་། དཀོན་མཆོག་གསུམ་གྱི་གདུང་རྒྱུན་མི་འཆད་པར་བགྱི་བའི་སླད་དུ་ཆོས་ལ་གནས་པ་ཚུལ་ཁྲིམས་དང་ལྡན་པ། ཡོན་ཏན་གྱིས་ཕྱུག་པ་རྣམས་མཆོད་གནས་སུ་མི་བགྱིད་པ་དང་། ལམ་གོལ་བ་ལ་གནས་པ་ངོ་ཚ་དང་ཁྲེལ་བོར་བ་རྣམས་

ཆོས་དང་མཐུན་པའི་ཆད་པས་མི་འགུམས་པ་དེ་དག་ནི་ཕུང་བར་འགྱུར་ལགས་སོ། །ལྷའི་བུ་སྐྱ་རེངས་ནི་སྨོན་ལམ་གྱི་དབང་གིས་རྒྱལ་ཆེན་བཞིའི་རིས་ཀྱི་ལྷའི་ནང་དུ་སྐྱེས་ཏེ། དེ་ཉི་མའི་མདུན་དཔག་ཚད་ཁྲིས་བཅད་ནས་འགྲོའོ། །དེའི་གཞལ་མེད་ཁང་ནི་
དཔག་ཚད་ཉི་ཤུ་པའོ། །དེ་ཉིན་མཚན་གཅིག་ལ་གླིང་བཞི་དང་བར་གྱི་གླིང་བརྒྱད་ཁྲི་དང་། ཀླུའི་གླིང་དྲུག་ཁྲི་དང་། ལྷ་མ་ཡིན་གྱི་གླིང་བཞི་ཁྲི་དང་། ནམ་མཁའ་ལྡིང་གི་གླིང་བརྒྱ་དང་། མིའམ་ཅིའི་གླིང་ལྔ་སྟོང་ཉིས་བརྒྱ་དང་། ལྟོ་འཕྱེ་ཆེན་པོའི་གླིང་བཞི་སྟོང་
དྲུག་བརྒྱ་དང་། གྲུལ་བུམ་གྱི་གླིང་བརྒྱད་བརྒྱ་དང་། ཡི་དགས་ཀྱི་གླིང་བརྒྱད་ཁྲི་བཞི་སྟོང་དང་། ཤ་ཟ་དང་། སྲུལ་པོ་དང་། ལུས་སྲུལ་པོའི་གླིང་སུམ་སྟོང་དག་ཏུ་གླིང་རེ་རེ་ཞིང་ཡང་སྲོག་ཆགས་བྱེ་བ་ཁྲག་ཁྲིག་ཕྲག་བརྒྱ་སྟོང་མང་པོ་དག་ཡོངས་སུ་སྨིན་པར་བྱེད་དོ། །
འཛམ་བུའི་གླིང་འདིའི་ནང་ཤར་ཕྱོགས་ཀྱི་ཆ་རྒྱ་མཚོ་ཆེན་པོ་ནི་བཻ་ཌཱུརྱ་འབའ་ཞིག་གི་རི་ཨརྞ་པ་ཞེས་བྱ་བ་ཡོད་དེ། དེ་ནི་ཆུའི་ནང་ནས་དཔག་ཚད་ཉི་ཤུ་གྱེན་དུ་འཕགས་སོ། །རི་དེ་ལ་རི་ཕུག་ཤིན་ཏུ་བཀྲ་བ་ཞེས་བྱ་བ་སྔོན་གྱི་བྱང་ཆུབ་སེམས་དཔའ་རྣམས་གནས་ནས་གནས།
འཕང་དང་རྒྱར་དཔག་ཚད་རེ་རེ་བ་ཞིག་ཡོད་དེ། ཕུག་དེ་ན་ཛན་དུར་གནས་སོ། །དེ་ནི་ཉན་ཐོས་དང་ཐུན་མོང་གི་བྱམས་པ་ལེགས་པར་སྦྱང་བར་བྱས་པ་ཡིན་ནོ། །རི་ཕུག་གཉིས་པ་ཨ་མ་ར་ཞེས་བྱ་བ་འཕང་དང་རྒྱར་དཔག་ཚད་གཅིག་ཡོད་དེ། ཕུག་དེ་ན་རྟའི་
གནས་སོ། །རི་ཕུག་གསུམ་པ་རབ་ཏུ་གནས་པ་ཞེས་བྱ་བ་འཕང་དང་རྒྱར་དཔག་ཚད་རེ་རེ་བ་ཞིག་ཡོད་དེ། ཕུག་དེ་ན་ཕྱུགས་གནས་སོ། །རི་དེ་ལ་ཤིང་གི་ལྷ་རྒྱལ་བའི་བློ་གྲོས་ཞེས་བྱ་བ་དང་། སྲིན་མོ་ཆེན་མོ་མགྲིན་བཟངས་མ་ཞེས་བྱ་བ་གནས་ཏེ། གཉིས་ཀ་
ཡང་འཁོར་ལྔ་སྟོང་ལྔ་སྟོང་དང་བཅས་པར་དུད་འགྲོའི་སྐྱེ་གནས་སུ་གཏོགས་པ་དེ་གསུམ་གྱི་སྦྱིན་བདག་བྱེད་ཅིང་ཉིན་མཚན་རྟག་ཏུ་བཀུར་སྟི་བྱ་བར་བརྩོན་ནོ། །འཛམ་བུའི་གླིང་འདི་ན་ལྷོ་ཕྱོགས་ཀྱི་ཆ་རྒྱ་མཚོ་ན་ཤེལ་འབའ་ཞིག་གི་རི་སྐྱེ་བོའི་དཔལ་ཞེས་བྱ་བ་ཡོད་དོ། །

དེ་ནི་ཆུའི་ནང་ནས་དཔག་ཚད་ཉི་ཤུ་གྱེན་དུ་འཕགས་སོ། །རི་དེ་ལ་རི་ཕུག་མདོག་བཟངས་ཞེས་བྱ་བ་རྒྱ་དང་འཕང་དུ་དཔག་ཚད་རེ་རེ་ལ་སྤྲེའུ་གནས། རི་ཕུག་གཉིས་པ་སྤྲ་བའི་ཧན་བཟང་པོ་ཞེས་བྱ་བ་རྒྱ་དང་འཕང་དུ་དཔག་ཚད་
རེ་རེ་བ་ལ་ཁྱིམ་བྱ་གནས། རི་ཕུག་གསུམ་པ་དྷརྨ་པ་ཧ་ཞེས་བྱ་བརྒྱ་དང་འཕང་དུ་དཔག་ཚད་རེ་རེ་བ་ལ་ཁྱི་གནས། རི་དེ་ལ་སྦྱིན་གནས་སྲིན་མོ་སྣང་བ་དང་། ཉེ་སྣང་བ་ཞེས་བྱ་བ་འཁོར་ལྔ་སྟོང་དང་གནས་ཏེ་སྦྱིན་བདག་བྱེད། འཛམ་བུའི་གླིང་གི་ནུབ་ཕྱོགས་རྒྱ་མཚོའི་
ནང་ན་གསེར་འབའ་ཞིག་གི་རི་བྱང་ཆུབ་ཀྱི་ཟླ་བ་ཞེས་བྱ་བ་ཡོད་དེ། དེ་ནས་དཔག་ཚད་ཉི་ཤུ་ནས་གྱེན་དུ་འཕགས་སོ། །རི་དེ་ལ་རི་ཕུག་མི་ལན་ཏྲ་ཞེས་བྱ་བ་ལ་འཕང་དང་རྒྱར་དཔག་ཚད་རེ་རེ་བ་ལ་ཕག་གནས་སོ། །ཕུག་གཉིས་པ་དྲི་དཔལ་ཞེས་བྱ་བ་འཕང་དང་རྒྱར་དཔག་ཚད་རེ་
རེ་བ་ལ་བྱི་བ་གནས། ཕུག་གསུམ་པ་ཨུདྨ་ཤྲཱི་ཞེས་བྱ་བ་འཕང་དང་རྒྱར་དཔག་ཚད་རེ་རེ་བ་ལ་གླང་གནས། རི་དེ་ལ་སྲིན་མོ་ཆེན་མོ་ལེགས་སྲུང་ཞེས་བྱ་བ་དང་། བེའུ་སུ་རཱ་ཀྵ་ཞེས་བྱ་བ་འཁོར་སྔ་མ་སྙེད་དང་། རི་དེ་རླུང་ལྷ་གཡོག་པ་ཞེས་བྱ་བ་འཁོར་སྔ་མ་སྙེད་དང་བཅས་པ་
སྔ་མ་བཞིན་སྦྱིན་བདག་བྱེད། འཛམ་བུའི་གླིང་གི་ནང་བྱང་ཕྱོགས་ཀྱི་ཆ་རྒྱ་མཚོ་ན་འཛམ་བུ་ཆུ་བོ་འབའ་ཞིག་གི་རི་ཏོག་དཔལ་གྱི་མཚན་ཉིད་ཅེས་བྱ་བ་ཡོད་དེ། དེ་ནི་དཔག་ཚད་ཉི་ཤུ་ཆུ་ནས་གྱེན་དུ་འཕགས་སོ། །རི་དེ་ལ་རི་ཕུག་ཨ་རུ་ན་གེན་གོ་ལ་ཞེས་བྱ་བ་ཚད་སྔ་མ་ཙམ་ལ་སེང་གེ་
གནས། ཕུག་གཉིས་པ་ལཾ་ཀ་ར་ཞེས་བྱ་བ་ཚད་སྔ་མ་ཙམ་ལ་རི་བོང་གནས། ཕུག་གསུམ་པ་དགའ་བར་འབྱུང་ཞེས་བྱ་བ་ཚད་སྔ་མ་ཙམ་ལ་སྦྲུལ་གནས། རི་དེ་ལ་སྲིན་མོ་དུང་ཅན་མ་ཞེས་བྱ་བ་དང་། ཤ་ཏ་དྲང་སྲུང་ཞེས་བྱ་བ་འཁོར་སྔ་མ་སྙེད་དང་། ཆུ་ལྷ་འབེབས་བྱེད་ཅེས་བྱ་བ་འཁོར་
སྔ་མ་སྙེད་དང་། གནས་སྔ་མ་བཞིན་ཡོན་བདག་བྱེད་དོ། །དུད་འགྲོའི་སྐྱེ་གནས་སུ་སོང་བ་བཅུ་གཉིས་པོ་དེ་དག་ནི་བསོད་ནམས་ཆེ་བསྐལ་བ་ཆེ་བ་ཡིན་ནོ། །སྨོན་ལམ་གྱི་དབང་གིས་ཉིན་མཚན་རེ་རེ་ཞིང་སེམས་ཅན་རྣམས་ཡོངས་སུ་སྨིན་པར་བྱེད་དོ། །བྱི་བ་དང་། ག་བ་དང་། སྟག་

དང་། རི་བོང་དང་། གླང་པོ་དང་། ཛན་དུ་དང་། རྟ་དང་། པ་ཤུ་དང་། སྤྲེའུ་དང་། ཁྱིམ་བྱ་དང་། ཁྱི་དང་། ཕག་སྟེ། དེ་དག་ནི་ལྷ་དང་མིའི་མཆོད་པ་ཡོན་ཏན་ཐོབ་པ་ཡིན་ནོ། །སྐད་ཅིག་མ་དང་པོ་ལ་མའི་མངལ་དུ་ས་བོན་གྱི་རྣམ་པར་ཤེས་བ་ནུར་ནུར་པོར་གནས་པར་འགྱུར་ཏེ།
དཔེར་ན་ཡུངས་ཀར་གྱི་འབྲུའི་ཚད་ཙམ་གྱི་ཆུང་ངུའོ། །ཞག་བདུན་པ་དྲུག་པ་ལ། ནུར་ནུར་པོར་གྱུར་ནས། མེར་མེར་པོར་འགྱུར་ཏེ། དཔེར་ན་རྒྱ་ཤུག་གི་ས་བོན་ཙམ་དུ་ཆུང་བའི་ཞག་བདུན་པ་ལས་མེར་མེར་པོར་གྱུར་ནས་ནར་ནར་བོར་འགྱུར་ཏེ་སྟར་ག་ཙམ་མོ། །ཞག་བདུན་པ་བརྒྱད་པ་ལ་ནར་
ནར་པོར་གྱུར་ནས། གོར་གོར་པོར་འགྱུར་ཏེ་བིལ་བའི་འབྲས་བུ་ཙམ་མོ། །དེ་ནས་ཞག་བདུན་ཐལ་ནས་ཞག་བདུན་པ་བཅུ་གསུམ་གྱི་བར་དུ་མགོའི་མཚན་མ་དང་། ལག་པ་དང་བརླ་དང་གནས་ཀྱི་མཚན་མ་དག་དོད་པར་འགྱུར་རོ། །ཞག་བདུན་པ་ཉི་ཤུ་པ་ལ་ཕོ་དང་མོའི་མཚན་མ་དོད་པར་འགྱུར་རོ། །ཞག་བདུན་པ་ཉི་ཤུ་
རྩ་གཅིག་པ་ལ་རུས་པ་རྫོགས་པར་འགྱུར་རོ། །ཞག་བདུན་པ་སུམ་ཅུ་པ་ལ་ཡན་ལག་ཐམས་ཅད་དང་། ཁྲག་དང་། པགས་པ་དང་། བ་སྤུའི་བུ་ག་ཀུན་རྫོགས་པར་འགྱུར་རོ། །དེ་ནས་མའི་ལྟོ་ན་ཁྲག་དང་དྲི་མི་ཞིམ་པའི་ནང་ན་གནས་སོ། །གང་མའི་ལྟོ་ན་གནས་པ་ན་ཚེ་རབས་
སྔ་མ་དྲན་ནས་མཆོག་ཏུ་སྐྱོ་བར་འགྱུར་ཏེ། བདག་མའི་ལྟོ་འདི་ནས་ནམ་འབྱུང་ཞིག་གུ། ཕྱིས་མའི་མངལ་དུ་སྐྱེ་བར་མི་འགྱུར་བ་དེ་ལྟ་བུའི་དགེ་བ་དག་ལ་བརྩོན་འགྲུས་དང་། ཕ་རོལ་གནོན་པ་བརྟན་པོར་བྱའོ་སྙམ་པ་ལས་བཅས་པ་དང་། མའི་ལུས་ཀྱིས་གཟིར་བ་དང་། སའི་རེག་
པ་དང་། ལག་པའི་རེག་པ་དང་། དྲི་མ་བཀྲུ་བའི་སྡུག་བསྔལ་ལུས་དང་སེམས་ལ་མཆོག་ཏུ་གནས་པ་དག་གིས་ཚེ་རབས་སྔ་མ་རིལ་བརྗེད་དོ། །དེའི་ཚེ་ལྷའི་དབང་པོ་ནས། ཤ་ཟའི་དབང་པོའི་བར་ནམ་མཁའ་ལ་རྒྱུ་བ་དང་། ས་ལ་རྒྱུ་བ་ཐམས་ཅད་ཀྱིས་མགྲིན་གཅིག་ཏུ་
གསོལ་པ། བཅོམ་ལྡན་འདས་དེ་ལྟར་འཚལ་ལོ། །བདེ་བར་གཤེགས་པ་དེ་ལྟར་འཚལ་ཏེ། མ་མཆིས་པའི་དུས་ན་ཇི་སྲིད་དུ་དེ་བཞིན་གཤེགས་པས་བྱིན་གྱིས་བརླབས་པའི་ཆོས་ཀྱི་ཚུལ་འབར་ཤིང་ཇི་སྲིད་དུ་བཅོམ་ལྡན་འདས་ཀྱིས་ཉན་ཐོས་རྣམས་རྣམ་པ་ཐམས་ཅད་དུ་ཡོངས་

སུ་འཛིན་པ་མ་མཆིས་པས་ཆོས་ལ་མངོན་པར་དགའ་བ་དེ་སྲིད་དུ། བདག་ཅག་གིས་རང་གི་སུག་ལས་བཏང་སྟེ། དེ་བཞིན་གཤེགས་པས་གསུངས་པའི་ཆོས་འདུལ་བ་བསྲུང་བར་འཚལ་ལོ། །ཆོས་ཀྱིས་གནས་པའི་གང་ཟག་ཚུལ་ཁྲིམས་ཀྱིས་ཕྱུག་པ་ཡོན་ཏན་
ཕུན་སུམ་ཚོགས་པ་དག་དང་། དེ་དག་གི་འཁོར་དང་ཡོངས་སུ་བཟུང་བ་ཐམས་ཅད་ཀྱང་ཡོངས་སུ་བསྲུང་ཞིང་བསྐྱང་བར་འཚལ་ལོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཇི་སྲིད་དུ། བཅོམ་ལྡན་འདས་ཀྱི་ཉན་ཐོས་རྣམས་རྣམ་པ་ཐམས་ཅད་དུ་ཡོངས་སུ་འཛིན་པ་
མ་མཆིས་པར་ཆོས་ལ་གནས་ཤིང་ཆོས་དང་མཐུན་པའི་ཆོས་སྒྲུབ་པ་དེ་སྲིང་སའི་མདངས་དང་། སེམས་ཅན་གྱི་མདངས་དང་། ཆོས་ཀྱི་མདངས་ནུབ་པར་མི་འགྱུར་བར་གནས་ལགས་སོ། །དེ་སྲིད་དུ་ལྷ་དང་། ཀླུ་ད་ང་། གནོད་སྦྱིན་རྣམས་མིའི་འཇིག་རྟེན་འདིར་མངོན་པར་
དགའ་ལགས་སོ། །དེ་སྲིད་དུ་སེམས་ཅན་རྣམས་ཤི་འཕོས་ནས། ལྷ་དང་མི་རྣམས་ཀྱི་ནང་དུ་དབང་ཆེ་བར་གྲགས་པ་དག་ཏུ་སྐྱེ་བར་འགྱུར་ལགས་སོ། །དེ་སྲིད་དུ་ལྷ་རྣམས་ཀྱི་ནང་ན་སེམས་ཅན་དབང་ཆེ་བར་གྲགས་པ་དག་གིས་གང་བར་འགྱུར་ལགས་སོ། །དེ་སྲིད་དུ་བྱང་
ཆུབ་སེམས་དཔའ་ཆོས་ཀྱིས་གནས་པ་རྣམས་གནས་ལགས་སོ། །དེ་སྲིད་དུ་བདག་ཅག་གི་སྟོབས་དང་བརྩོན་པ་འདི་ལྟར་ཆོས་མ་ལགས་པའི་ཕྱོགས་ཚར་དགུམ་པར་ཕ་རོལ་གནོན་པར་འགྱུར་ལགས་སོ། །དེ་སྲིད་དུ་སེམས་ཅན་དེ་བཞིན་གཤེགས་པའི་
བསྟན་པ་ལ་དད་པར་བགྱི་བར་རྔོ་ཐོགས་ལགས་སོ། །བཙུན་པ་བཅོམ་ལྡན་འདས་མ་འོངས་པའི་དུས་ན། བཅོམ་ལྡན་འདས་ཀྱི་ཉན་ཐོས་ཡོངས་སུ་འཛིན་པ་དང་བཅས་པ། རྣལ་འབྱོར་ཡིད་ལ་བྱེད་པའི་ཆོས་ཀྱིས་གནས་པའི་དགོན་པ་དང་།
ནགས་མཐའ་དང་། བས་མཐའི་གནས་མལ་བོར་བ། ཕྲག་དོག་ཅན་ལ་སོགས་པ། མང་པོས་གནས་པ། བསླབ་པ་དང་ངོ་ཚ་དང་ཁྲེལ་བོར་བ། ཁྱིམ་པ་དང་འདྲེ་བ། རྙེད་པ་དང་བཀུར་སྟི་ལ་དགའ་བ་དག་འབྱུང་བར་འགྱུར་ལགས་ཏེ། དེ་དག་ཁྱིམ་པའི་དཔུང་དང་

ནོར་གྱི་ཕུང་པོའི་སྟོབས་ཀྱིས་ཕན་ཚུན་སྙེམས་ཤིང་འཐབ་མོ་ལ་དགའ་བས་ཁྱིམ་པ་རྣམས་ཀྱི་མདུན་དུ་ཡང་རྩོད་ཅིང་ཚིག་རྩུབ་མོ་དང་། བརྫུན་དག་མི་སྲུང་ལགས་སོ། །དེའི་ཚེ་ཁྱིམ་པ་རྒྱལ་རིགས་དང་བྲམ་ཟེ་ནས་ལྗོངས་དང་། ཡུལ་ན་གནས་པའི་བར་རྣམས་བཅོམ་
ལྡན་འདས་ཀྱི་བསྟན་པ་ལ་ཆེ་ཐོང་དུ་མ་དད་པར་འགྱུར་ཞིང་། གང་དག་བདེ་བར་གཤེགས་པའི་བསྟན་པ་ལ་དད་པ་སྐྱེས་པ་དེ་དག་ཀྱང་རྒྱུན་ཆད་པར་འགྱུར་ལགས་སོ། །དཀར་པོའི་ཕྱོགས་ཟད་པའི་དུས་དེ་ལྟ་བུ་ཉེ་བར་གནས་པན། བྱང་ཆུབ་སེམས་
དཔའ་སེམས་དཔའ་ཆེན་པོ་རྣམས་ཀྱང་ཐུགས་དགྱེས་ཤིང་། འཇིག་རྟེན་གྱི་ཁམས་གཞན་དག་ཏུ་གཤེགས་སོ། །ལྷ་དང་གནོད་སྦྱིན་ཆོས་ཀྱིས་གནས་པ་དབང་ཆེ་བར་གྲགས་པ་རྣམས་ཀྱང་བཏང་སྙོམས་སུ་གནས་པའམ། དེ་ནས་འོང་བར་འགྱུར་ལགས་ཏེ།
དེའི་ཚེ་ནི་བདག་ཅག་གིས་སྡིག་པ་ཅན་གྱི་གནོད་སྦྱིན་དང་། ལུས་སྲུལ་པོ་ནས་སྡིག་པ་ཅན་གྱི་མི་རྣམས་ཀྱི་བར་བཟློག་པའི་རྡོ་ཡང་མི་ཐོགས་ལ། དེའི་ཚེ་བདག་ཅག་གིས་དཀར་པོའི་ཕྱོགས་ཟད་པ་དང་། འཇིགས་པ་སྣ་ཚོགས་ཀྱང་བཟློག་པའི་རྔོ་མི་ཐོགས་
ལགས་སོ། །དགོངས་པ་ངེས་པར་འགྲེལ་པ་ལས། སེམས་ཅན་རྣམས་ནི་གཞན་གྱི་དབང་དུ་ཡོངས་སུ་གྲུབ་པའི་ངོ་བོ་ཉིད་ལ་ཀུན་བརྟགས་པའི་ངོ་བོ་ཉིད་དུ་སྒྲོ་བཏགས་ནས། གཞན་གྱི་དབང་དང་ཡོངས་སུ་གྲུབ་པའི་ངོ་བོ་ཉིད་ལ་ཀུན་བརྟགས་པའི་ངོ་བོ་
ཉིད་རྗེས་སུ་ཐ་སྙད་འདོགས་ཏེ། ཇི་ལྟ་ཇི་ལྟར་རྗེས་སུ་ཐ་སྙད་བཏགས་པས་སེམས་ཡོངས་སུ་སྒོམ་ཞིང་ཐ་སྙད་བཏགས་པའི་རྗེས་སུ་འབྲེལ་པའམ། ཐ་སྙད་བཏགས་པའི་བག་ལ་ཉལ་གྱིས་གཞན་གྱི་དབང་དང་ཡོངས་སུ་གྲུབ་པའི་ངོ་བོ་ཉིད་ལ་ཀུན་བརྟགས་
པའི་ངོ་བོ་ཉིད་ཀྱི་མཚན་ཉིད་དུ་མངོན་པར་ཞེན་ཏོ། །ཇི་ལྟ་ཇི་ལྟར་མངོན་པར་ཞེན་པ་དེ་ལྟ་དེ་ལྟ་བུར་གཞན་གྱི་ངོ་བོ་ཉིད་ལ་ཀུན་བརྟགས་པའི་ངོ་བོ་ཉིད་དུ་མངོན་པར་ཞེན་པའི་རྒྱུ་དེ་དང་རྐྱེན་དེས་ཕྱི་མ་ལ་གཞན་གྱི་དབང་གིས་ངོ་བོ་ཉིད་རབ་ཏུ་བསྐྱེད་དོ། །གཞི་དེས་ན་

ཉོན་མོངས་པ་རྣམ་པ་གསུམ་གྱིས་ཀུན་ནས་ཉོན་མོངས་ཤིང་། འགྲོ་བ་རིས་ལྡར་འཁོར་ཞིང་ཀུན་དུ་རྒྱུ་སྟེ་འཁོར་བ་ལས་མི་འདའོ། །གལ་ཏེ་མིག་གི་རྣམ་པར་ཤེས་པ་གཅིག་ལན་ཅིག་འབྱུང་བར་གྱུར་ན་རྣམ་པར་རྟོག་པའི་ཡིད་ཀྱི་རྣམ་པར་ཤེས་པ་
མིག་གི་རྣམ་པར་ཤེས་པ་དང་སྤྱོད་ཡུལ་མཐུན་པ་གཅིག་ཀྱང་ལན་ཅིག་འབྱུང་ངོ་། །གལ་ཏེ་ལན་གཅིག་གཉིས་དང་གསུམ་དང་བཞི་དང་། ལན་ཅིག་རྣམ་པར་ཤེས་པའི་ཚོགས་ལྔ་རྣམས་འབྱུང་བར་གྱུར་ན་ཡང་དེ་ལ་རྣམ་པར་རྟོག་པའི་ཡིད་ཀྱི་རྣམ་པར་ཤེས་པ།
རྣམ་པར་ཤེས་པའི་ཚོགས་ལྔ་དང་སྤྱོད་ཡུལ་མཐུན་པ་གཅིག་ཀྱང་ལན་ཅིག་འབྱུང་ངོ་། །བྱམས་པ་གཞན་གྱི་དབང་གི་མཚན་ཉིད་དང་། ཡོངས་སུ་གྲུབ་པའི་མཚན་ཉིད་ལ་རྣམ་པ་ཐམས་ཅད་དུ་ཀུན་ནས་ཉོན་མོངས་པ་དང་། རྣམ་པར་བྱང་བའི་ཀུན་བརྟགས་པའི་
མཚན་ཉིད་དང་། ཤིན་ཏུ་བྲལ་བ་དེ་ལ་དེ་ཡང་མི་དམིགས་པ་འདི་ནི། ཐེག་པ་ཆེན་པོ་ལ་སྟོང་པ་ཉིད་ཀྱི་མཚན་ཉིད་རྫོགས་པ་ཞེས་བྱའོ། །ཉི་མའི་སྙིང་པོ་ལས། འཛམ་བུའི་གླིང་འདི་ན་མཆོད་རྟེན་དྲང་སྲོང་ཐུབ་པའི་གནས་ཀུན་རྟེན་འདི་ནི་སྔོན་གྱི་སངས་རྒྱས་དང་།
བྱང་ཆུབ་སེམས་དཔའ་དང་། རང་རྒྱལ་བ་དང་། ཉན་ཐོས་མང་པོ་གནས་ཤིང་། མ་འོངས་པའི་དུས་ན་ཡང་གནས་པར་འགྱུར་བ་སྟེ། རྗེས་སུ་བསྟན་པ་ཆེན་པོ་ཡུན་རིང་དུ་གནས་པར་མཛད་པའི་ཕྱིར་དྲང་སྲོང་ཐུབ་པའི་གནས་ཀུན་རྟེན་འདི་སྔོན་གྱི་ཡང་དག་
པར་རྫོགས་པའི་སངས་རྒྱས་རྣམས་ཀྱིས་ཆུ་ལྷའི་ལག་ཏུ་ཡོངས་སུ་གཏད་པ་མཛད་དོ། །ངས་ཀྱང་དེ་ཉིད་ཀྱི་ལག་ཏུ་ཡོངས་སུ་གཏད་དེ། འདི་ཡང་སྤྲོ་བར་འགྱུར་ཞིང་གང་ཟག་ཆོས་ཀྱིས་གནས་པ་རྣལ་འབྱོར་ཡིད་ལ་མངོན་པར་བརྩོན་པ་དག་ཡོངས་སུ་སྨིན་པར་
འགྱུར་རོ། །གང་དག་གང་ཟག་ཆོས་ཀྱིས་གནས་པ་རྣམས་ལ་བསྙེན་བཀུར་ལ་མངོན་པར་བརྩོན་པའི་སྦྱིན་པ་པོ་དང་། སྦྱིན་བདག་དེ་དག་ཀྱང་ཡོངས་སུ་བསྲུང་བར་འགྱུར་རོ། །ཀླུའི་རྒྱལ་པོ་ཆུ་ལྷས་གསོལ་བ་དེ་ལྟ་ལགས་སོ། །བ་ལོང་སྤྱོད་ཀྱི་གླིང་ན་རྡུལ་གྱི་རི་ལ་

དྲང་སྲོང་ཐུབ་པའི་གནས་བཀྲ་བ་ཀླུའི་རྒྱལ་པོ་རིན་པོ་ཆེའི་འཕེལ་བལ་ཆད་ཁྱིར་གཏད། ལུས་འཕགས་ཀྱི་གླིང་ན་ནི་བ་ལང་གི་ནའི་རི་ལ་དྲང་སྲོང་འབྱུང་བ་ཀླུའི་རྒྱལ་པོ་ཟླ་སྲུང་ལ་གཏད། སྒྲ་མི་སྙན་གྱི་གླིང་ན་རྒྱལ་དགའི་རི་ལ་སྤོས་བརྩེགས་ཀླུའི་རྒྱལ་པོ་ལུས་འབིགས་
པའི་ཁབ་ལ་གཏད། བ་ལང་སྤྱོད་ཀྱི་གླིང་ན་འོད་ཟེར་འབྱུང་བ་ཀླུའི་རྒྱལ་པོ་བ་ལང་མགོ་ལ་གཏད། ཤར་ཕྱོགས་གླིང་ན་པདྨ་ཤིང་ནྱ་གྲོ་དྷ་ལྟ་བུ་ཀླུའི་རྒྱལ་པོ་དབྱིབས་སྟོང་ལ་གཏད། སྒྲ་མི་སྙན་གྱི་གླིང་ན་སྤོས་བརྩེགས་འོད་ཟེར་ཀླུའི་རྒྱལ་པོ་གནས་ན་རྒྱུ་ལ་གཏད། རྒྱ་མཚོ་
ཆེན་པོའི་ནང་ན་ནོར་བུའི་སྙིང་པོའི་འོད་འཕྲོ་བ་ཀླུའི་རྒྱལ་པོ་རྒྱ་མཚོ་ལ་གཏད། རི་རབ་ཀྱི་རྩེ་མོ་ན་སུམ་ཅུ་རྩ་གསུམ་པའི་གནས་ན་མེ་ཏོག་རབ་ཏུ་རྒྱས་པའི་སྙིང་པོ་ཀླུའི་རྒྱལ་པོ་ས་སྲུང་གི་བུ་ལ་གཏད། འཛམ་བུའི་གླིང་ན་དགའ་འཕེལ་ཞེས་བྱ་བ་ན་གནས་བརྟན་གྱི་ཕུག་
ཀླུའི་རྒྱལ་པོ་ཆེ་སྦྱང་ལ་གཏད། ཡངས་པ་ཅན་ན་ཤིན་ཏུ་བརྟན་ཀླུའི་རྒྱལ་པོ་ནོར་རྒྱས་ཀྱི་བུ་ལ་གཏད། སེར་སྐྱའི་གནས་ན་གསེར་སྒྲོན་དྲི་ཞིམ་ཀླུའི་རྒྱལ་པོ་མ་དྲོས་པ་ལ་གཏད། ཡུལ་མ་ག་དྷཱ་ན་རྒྱལ་ཆེན་ཀླུའི་རྒྱལ་པོ་རི་བོས་བྱིན་ལ་གཏད། བཅོམ་བརླག་
ན་སྡུག་པའི་སྤྲིན་ཀླུའི་རྒྱལ་པོ་ཅེ་སྤྱང་རྒྱུ་བ་ལ་གཏད། ཡུལ་འཁོར་ཀོ་ས་ལ་ན་རྒྱལ་བ་དག་པ་ཀླུའི་རྒྱལ་པོ་སྲིན་བུ་ལ་གཏད། ཕུག་གི་ཕ་རོལ་ན་བཏང་བཟུང་བདེན་པའི་དྲི་ཀླུའི་རྒྱལ་པོ་བཏང་བཟུང་ལ་གཏད། ཡུལ་འཁོར་ས་འཛིན་ན་མཐོང་བའི་ལམ་རྒྱགས་
ཀླུའི་རྒྱལ་པོ་ཨེ་ལའི་འདབ་ལས་གཏད། ཁ་ཆེའི་ཡུལ་ན་གུར་གུམ་གྱི་རྩེ་མོ་ཀླུའི་རྒྱལ་པོ་ཧུ་ལུ་ཧུ་ལུ་ལ་གཏད། ཡུལ་ཆུ་ལེན་ན་འོད་ཟེར་བྱེ་བའི་སྙིང་པོ་ཀླུའི་རྒྱལ་པོ་འཕྱང་བ་ལ་གཏད། རྒྱ་ཡུལ་ན་སྲེད་མེད་ཀྱི་བུའི་འོད་ཀྱི་རྒྱལ་པོ་རྒྱ་མཚོས་བྱིན་ལ་གཏད། ཁ་ཤའི་
ཡུལ་ན་སའི་ནུ་མའི་གནས་རི་གླང་རུའི་དྲུང་ཆུ་བོ་གོ་མ་ཏིའི་ངོགས་ན། གོ་མ་སཱ་ལ་གན་དྷ་ནི་ཀླུའི་རྒྱལ་པོ་ཁྱིམ་བདག་གིས་བྱིན་ལ་གཏད། དེ་གལ་ཏེ་ཕྱོགས་ཐམས་ཅད་དུ་ལྟ་བར་བྱེད་ན་ཐམས་ཅད་དུ་ནམ་མཁའ་ཐམས་ཅད་ལ་དེ་བཞིན་གཤེགས་པ་མཐོང་བར་འགྱུར་

རོ། །ཆུང་ངུར་ལྟ་བར་བྱེད་ན་དེ་བཞིན་གཤེགས་པ་ཆུང་ངུ་ཉིད་དུ་མཐོང་ངོ་། །ཚད་མེད་པར་ལྟ་བར་བྱེད་ན་ཚད་མེད་པར་མཐོང་ངོ་། །དེ་འདི་སྙམ་དུ་སེམས་ཏེ། དེ་བཞིན་གཤེགས་པ་འདི་ག་ལས་གཤེགས་སྙམ་མོ། །དེ་འདི་སྙམ་དུ་སེམས་ཏེ། དེ་བཞིན་
གཤེགས་པ་ནི་ག་ལས་ཀྱང་མ་གཤེགས་སོ། །གང་དུ་ཡང་མི་བཞུད་དོ། །དེ་གང་དུ་ཡང་དེ་བཞིན་གཤེགས་པ་བཞུད་པ་མི་དམིགས་བྱོན་པ་མི་དམིགས་སོ། །ཡང་དེ་འདི་སྙམ་དུ་སེམས་ཏེ། ལུས་ཀྱི་རྒྱུ་ཁམས་གསུམ་པ་འདི་ནི་སེམས་ཙམ་པས་སུས་ཇི་ལྟར་རྣམ་པར་བརྟགས་
པ་དེ་བཞིན་དུ་མཐོང་ངོ་། །བདག་གིས་རང་གི་སེམས་ཀྱིས་སངས་རྒྱས་སུ་བྱེད་དོ། །བདག་གི་སེམས་ཀྱིས་སངས་རྒྱས་མཐོང་ངོ་། །བདག་གི་སེམས་ཉིད་སངས་རྒྱས་སོ། །བདག་གི་སེམས་ཉིད་ལུས་སོ། །སེམས་ཉིད་ཀྱང་ནམ་མཁའོ། །བདག་གི་སེམས་ཀྱི་རྣམ་པར་རྟོག་པས་སངས་རྒྱས་མཐོང་ངོ་། །སེམས་
ཀྱིས་སེམས་མི་མཐོང་ངོ་། །སེམས་སུ་འདུ་ཤེས་པ་རྣམས་ནི་ཤེས་པ་མེད་པའོ། །སེམས་སུ་འདུ་ཤེས་པ་རྣམས་ནི་ལྡན་པའོ། །ལྡོག་པ་ནི་སྙིང་པོ་མེད་པའོ། །ཆོས་དེ་དག་ནི་ཤེས་པ་མེད་པའི་ཕྱིར་ཡང་དག་པར་མ་བྱུང་བའོ། །སུས་སྔོན་བྱང་ཆུབ་ཏུ་སེམས་བསྐྱེད་ཅིང་ཤེས་རབ་གང་
གིས་སྟོང་པ་རྟོགས་པ་དེ་ཡང་རང་བཞིན་གྱིས་སྟོང་པའོ་སྙམ་ནས། དམིགས་པ་ཡིད་ལ་བྱེད་པ་དེས་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འཐོབ་བོ། །འོན་ཀྱང་ཡང་ཉན་ཐོས་ཀྱི་ཐེག་པ་ཡིན་ཏེ། དེ་ལྟར་མཚན་མ་མེད་པའི་གཟུགས་ཐམས་ཅད་རྣམ་པར་
བསྒོམས་པས་ངེས་པར་འབྱེད་པ་ཡོངས་སུ་དག་པ་ཡིན། འདོད་ཆགས་དང་བྲལ་བ་ཡོངས་སུ་དག་པ་ཡིན། མ་རིག་པ་ཡོངས་སུ་དག་པ་ཡིན་ནོ། །མདོ་སྡེ་རབ་ཏུ་རྣམ་པར་འབྱེད་པ་ལས། ཤཱ་རིའི་བུ་སྐྱེས་བུ་དམ་པ་མ་ཡིན་པའི་འཚོ་བའི་ལམ་དང་བྱིང་བ་འཐབ་མོ་འཛིན་པས་བདག་
དང་གཞན་ཡང་ཕུང་བར་བྱེད་པ་དེ་ལྟ་བུས་འཛམ་བུའི་གླིང་འདི་གང་བར་འགྱུར་རོ། །གཞན་ཡང་ཤཱ་རིའི་བུ་བཅོམ་ལྡན་འདས་འོད་སྲུངས་ཀྱིས་ཀྱང་དེ་བཞིན་གཤེགས་པ་ཤཱཀྱ་ཐུབ་པའི་གསུང་རབ་ནི་རྙེད་པ་དང་བཀུར་སྟིས་མྱུར་དུ་ནུབ་པར་འགྱུར་ཞེས་བྱ་བ་འདི་ལུང་བསྟན་ཏེ། ཤཱ་རིའི་

བུ་རྙེད་པ་དང་བཀུར་སྟིས་ནི་ཆོས་འདུལ་བ་འདི་མྱུར་དུ་ནུབ་པར་འགྱུར་རོ། །ཤཱ་རིའི་བུ་དགེ་སློང་ཆོས་ཡོངས་སུ་མ་དག་པ་སྟོན་པ་ནི་དེ་བཞིན་གཤེགས་པས་དགོངས་ཏེ་གསུངས་པ་མི་ཤེས་པར་གཞན་དག་ལས་ཆོས་སྟོན་པར་བྱེད་དོ། །དེ་དེ་བཞིན་གཤེགས་པས་སེམས་ཅན་མེད་པ་
དང་། སྲོག་མེད་པ་དང་། གསོ་བ་མེད་པ་དང་། གང་ཟག་མེད་པའི་ཆོས་བསྟན་པ་དེ་དག་ལ་བདག་གོ་ཞེའམ། སེམས་ཅན་ནོ་ཞེའམ། གསོ་བའོ་ཞེའམ། གང་ཟག་གོ་ཞེས་ཆོས་སྟོན་པར་བྱེད་དོ། །དེས་ནི་ང་ལ་ཡང་སྐུར་པ་བཏབ་པ་ཡིན། ཆོས་ཀྱང་སྤངས་པ་ཡིན། དགེ་འདུན་
ལ་ཡང་མི་སྙན་པར་བརྗོད་པ་ཡིན་ཏེ། དེའི་རྣམ་པར་སྨིན་པ་གང་ཡིན་པ་དེ་ནི། དེ་བཞིན་གཤེགས་པ་མ་གཏོགས་པ་ལྷའི་དབང་པོ་དང་བཅས་པའི་འཇིག་རྟེན་གྱིས་ཤེས་པར་ནུས་པ་མ་ཡིན་ནོ། །ཤཱ་རིའི་བུ་ཁྱོད་མོས་པར་བྱ། ཁོང་དུ་ཆུད་པར་བྱ། ཆོས་ཡོངས་སུ་མ་དག་པར་
སྟོན་པའི་དགེ་སློང་དེ། མི་དགེ་བའི་བརྩོན་པ་ཇི་ཙམ་དང་ལྡན་པ་དེའི་བྱའོ། །ཤཱ་རིའི་བུ་དེ་ཇི་སྙམ་དུ་སེམས། འཛམ་བུའི་གླིང་གི་སེམས་ཅན་མང་ངམ། གསོལ་པ། བཅོམ་ལྡན་འདས་མང་ལགས་སོ། །བཀའ་སྩལ་པ། ཤཱ་རིའི་བུ་འགའ་ཞིག་གིས་འཛམ་བུའི་གླིང་
གི་སེམས་ཅན་རྣམས་བསད་ན་དེ་གཞི་དེས་མི་དགེ་བའི་རྩ་བ་མང་པོ་མངོན་པར་འདུས་བྱས་པར་མི་འགྱུར་རམ། གསོལ་པ་མང་ལགས་སོ། །བདེ་བར་གཤེགས་པ་མང་ལགས་སོ། །བཀའ་སྩལ་པ། གང་ཞིག་སངས་རྒྱས་ཀྱི་བྱང་ཆུབ་མི་ཤེས་པར་གཞན་དག་ལ་ཆོས་ཡོངས་སུ་མ་དག་པར་སྟོན་
པ་དེ་ནི་དེ་བས་ཀྱང་ཆོས་མི་དགེ་བ་མང་དུ་མངོན་པར་འདུས་བྱས་པར་འགྱུར་རོ། །དེ་ཅིའི་ཕྱིར་ཞེ་ན། གང་ཞིག་སངས་རྒྱས་ཀྱི་བྱང་ཆུབ་སྤོང་བ་དེས་ནི་འདས་པ་དང་མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་ལ་སྐུར་པ་བཏབ་པ་ཡིན་ནོ། །དེ་ཅིའི་ཕྱིར་ཞེ་ན། སྔོན་དང་མ་
འོངས་པ་དང་། ད་ལྟར་བྱུང་བ་དང་། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱང་དོན་དམ་པ་སྟོང་པ་ཉིད་ཁོ་ན་སྟོན་ཅིང་བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གསོ་བ་མེད་པ་དང་། གང་ཟག་མེད་པའི་ཆོས་སྟོན་ཏོ། །ཤཱ་རིའི་བུ་

སངས་རྒྱས་བཅོམ་ལྡན་འདས་རྣམས་ཀྱིས་དོན་དམ་པ་སྟོང་པ་ཉིད་ཀྱི་ཆོས་བསྟན་པ་འདི་ནི་ཡང་དག་ཕུལ་ཡིན་ཏེ། འདི་ལྟ་སྟེ། སངས་རྒྱས་ཀྱི་ཆོས་རྣམས་ནི་རང་གི་ངང་གིས་འཇིག་པ་ངོ་བོ་ཉིད་མེད་པ་དམིགས་པ་མེད་པ་སྟོང་པ་ཉིད་དོ། །
སྔོན་དེ་བཞིན་གཤེགས་པ་བཀོད་པ་ཆེན་པོ་བྱུང་སྟེ། དེ་ཡོངས་སུ་མྱ་ངན་ལས་འདས་ནས་སྐུ་གདུང་ནི་རྒྱས་པར་བྱས་ཏེ། དཔེར་ན་མ་འོངས་པའི་དུས་ན་ང་ཇི་ལྟ་བ་བཞིན་ནོ། །དམ་པའི་ཆོས་ནི་ལོ་ལྔ་བརྒྱར་གནས་པར་གྱུར་ཏེ། དཔེར་ན་མ་འོངས་པའི་དུས་
ན་ངའི་ཇི་ལྟ་བ་བཞིན་ནོ། །ཤཱ་རིའི་བུ་དེ་བཞིན་གཤེགས་པ་བཞུགས་པ་ན་ནི་སངས་རྒྱས་དཀོན་མཆོག་གཅིག །ཆོས་དཀོན་མཆོག་གཅིག །དགེ་འདུན་དཀོན་མཆོག་གཅིག་གོ། །ཡོངས་སུ་མྱ་ངན་ལས་འདས་ནས་ནི་བསྟན་པ་རྣམ་པ་ལྔར་འགྱུར་རོ། །
ཤཱ་རིའི་བུ་གང་ཡང་བསྟན་པ་འདི་ལ་བདུད་སྡིག་ཅན་དགེ་སློང་གི་གཟུགས་སུ་སྤྲུལ་ནས། ལོག་པར་འཛིན་པ་རྣམ་པ་དུ་མར་རབ་ཏུ་སྟོན་ཅིང་སྐྱེ་བོ་མང་པོ་དེ་ལ་འགོད་པའི་དུས་དེ་དང་དེ་ཡོད་དོ། །དེ་ལ་འདི་ལྟ་བུའི་ལོག་པར་འཛིན་པ་ཡང་དག་པར་རབ་ཏུ་སྟོན་
ཏོ། །འདི་ལྟ་སྟེ། ཡིད་ཀྱི་གཞི་དང་ལྔ་ཆ་མཐུན་པའི་གཞི་དང་སྐད་ཅིག་མ་དང་ཆ་མཐུན་པའི་གཞི་དང་། ཐམས་ཅད་ཡོད་པར་སྨྲ་བའི་གཞི་དང་། གང་ཟག་གི་གཞི་དང་། དམིགས་པའི་གཞིའོ། །ཤཱ་རིའི་བུ་སངས་རྒྱས་དང་། ཉན་ཐོས་རྣམས་ཀྱིས་རབ་ཏུ་མ་བསྟན་པ་
ལོག་པར་འཛིན་པ་དེ་ལྟ་བུ་རབ་ཏུ་སྟོན་པར་འགྱུར་རོ། །བཀའ་སྩལ་པ། ཤཱ་རིའི་བུ་ང་ནི་སྦྲུལ་རོ་མྱགས་པའམ། ཁྱི་རོ་མྱགས་པའམ། མི་རོ་མྱགས་པས་གང་བའི་ས་ཕྱོགས་སྤྱོད་ལམ་གང་ཡང་རུང་བས་གནས་པར་སྤྲོའི། ཤཱ་རིའི་བུ་དགེ་སློང་ཚུལ་ཁྲིམས་འཆལ་
པ། ཆོ་ག་ཉམས་པ། འཚོ་བ་ཉམས་པ། ལྟ་བ་ཉམས་པ་ནི་མཚན་གཅིག་གམ། ཉིན་གཅིག་གམ། སྐད་ཅིག་གམ། ཐ་ན་སེ་གོལ་གཏོགས་པ་ཙམ་ཡང་གནས་པར་མི་སྤྲོའོ། །ཤཱ་རིའི་བུ་བླུན་པོ་དེ་དག་གིས་དེ་བཞིན་གཤེགས་པས་གསུངས་པའི་མདོ་

སྡེ་འདི་ལྟ་བུ་ཐོས་ནས་སྐྲག་པར་འགྱུར། ཀུན་དུ་སྐྲག་པར་འགྱུར། ཀུན་དུ་དངང་བར་འགྱུར། གཡང་སའི་འདུ་ཤེས་སུ་འགྱུར། གཡངས་ས་ཆེན་པོའི་འདུ་ཤེས་སུ་འགྱུར་རོ། །དེ་ཅིའི་ཕྱིར་ཞེ་ན། མདོ་སྡེ་འདི་ལས་ཚུལ་ཁྲིམས་འཆལ་པའི་སྐྱོན་མ་ལུས་པར་བཤད་པས་སོ། །ཤཱ་རིའི་བུ་རྒྱུ་གང་དང་རྐྱེན་གང་
གིས་ཚུལ་ཁྲིམས་འཆལ་པ་ཞེས་བྱ་ཞེ་ན། འཆལ་པའི་ཚུལ་ཁྲིམས་སྤྱོད་པས་ན། ཚུལ་ཁྲིམས་འཆལ་པ་ཞེས་བྱའོ། །ཚིག་ངག་གི་སྤྱོད་པ་དང་། དུས་གསུམ་གྱི་སྤྱོད་པ་དང་། ལས་ཀྱི་མཐའ་མང་པོའི་སྤྱོད་པ་དང་། སྨྲ་བ་མང་པོའི་སྤྱོད་པ་དང་། གཉིད་ལ་དགའ་བ་དང