Luận tạng Tây Tạng (Tengyur) — Tập 199

། ཐོགས་པ་དང་ནད་དུ་གྱུར་ནས་ན་ཞིང་སྐྲངས་ཏེ་རྒྱུ་མ་

ཐུར་དུ་རྣུ་ཞིང་ཆུ་སོ་ནས་ཕོ་མཚན་གྱི་འབྲས་བུའི་ནང་དུ་སོན་པ་དང་། ཕོ་མཚན་དང་ཕོ་མཚན་གྱི་པགས་པའི་རྩ་ཡང་རྒྱུ་མ་རླུགས་པས་བཙིར་ནས། ཕོ་མཚན་གྱི་པགས་པ་ཡང་ཆེར་སྐྱེ་བར་བྱེད་དོ། །རླིག་རླུགས་ཀྱི་ནད་དེ་ཡང་རྣམ་པ་བདུན་ཏེ། རླུང་དང་མཁྲིས་པ་དང་བད་
ཀན་གྱི་ནད་སྐྱེད་པ་དང་། ཁྲག་ནད་སྐྱེ་སྟེ་ལུད་པ་དང་ཚིལ་ནད་དུ་གྱུར་པ་དང་། ལྒང་པ་སྐྱེས་པ་དང་རྒྱུ་མ་སྐྱེས་པའི་ནད་དང་རྣམ་པ་འདི་བདུན་ནོ། །དེ་ལ་ལྒང་པ་སྐྱེས་པ་དང་རྒྱུ་མ་སྐྱེས་པ་འདི་གཉིས་ཀྱང་རླུང་ནད་ཀྱིས་སྐྱེ་བར་འགྱུར་ཏེ། རླིག་རླུགས་ཀྱི་ནད་ཀྱི་རྒྱུ་ནི་ཐ་དད་དོ། །དེ་ལ་
རླུང་ནད་ལས་གྱུར་པའི་རླིག་རླུགས་ཀྱི་ནད་ཐབས་ནི། རྐྱལ་པ་རླུང་གིས་གང་བ་འདྲ་ལ། རླུང་ལས་གྱུར་པས་ནན་པར་གྱུར་པའི་གཞི་མེད་པ་བཞིན་དུ་ནའོ། །མཁྲིས་པ་ལས་གྱུར་པའི་རླིག་རླུགས་ནི་རླིག་པའི་མདོག་ཤིང་ཨུ་དུམྦཱ་རའི་འབྲས་བུ་འདྲ་བར་དམར་པོར་སྣང་ལ་དྲོ་ཆེ་ཞིང་ཚལ་
འདྲུལ་བ་དེ་ལྟ་བུ་ཡིན་ནོ། །བད་ཀན་ལས་རླིག་རླུགས་སུ་གྱུར་པ་ནི་གྲང་ལ་ལྕི། འཇམ་ལ་གཡའ། སྲ་ལ་ནད་ཚབས་མི་ཆེ་བ་དེ་ལྟ་བུ་ཡིན་ནོ། །ཁྲག་ནད་རྒྱས་པ་ལས་རྒྱུ་རླུགས་སུ་གྱུར་པ་ནི་འབྲུམ་བུ་ནག་པོས་གང་བ་ཡོད་དེ། ཚུལ་གཞན་ནི་མཁྲིས་པ་ལས་རྒྱུ་རླུགས་ཀྱི་ནད་དུ་གྱུར་
པ་དང་འདྲའོ། །ཚིལ་ནད་ལས་རྒྱུ་མ་སྐྱེས་ཏེ་རྒྱུ་རླུགས་ཀྱི་ནད་དུ་གྱུར་པའི་ནད་ཐབས་ནི་སྤྱི་བད་ཀན་དང་འདྲ་སྟེ། འཇམ་ལ་རླིག་པའི་དབྱིབས་ནི་ཤིང་ཏ་ལའི་འབྲས་བུ་ལྟར་འདུག་གོ། །གཅིན་སྙོམས་ན་བརྣགས་པ་ཤ་སྟག་བྱེད་པ་དེས་གཅིན་སྩོགས་ཤིང་ལྒང་པ་ཆེར་སྐྱེས་པ་
ལས་རླིག་རླུགས་སུ་གྱུར་ན་རྐྱལ་པ་ཆུས་གང་བ་བཞིན་རྙོག་རྙོག་ཟེར་ལ་ན། རླིག་པའི་པགས་པ་འཇམ། ཆུ་འགག་པར་བྱེད། ཕོ་མཚན་གྱི་འོག་པགས་པའི་བར་དུ་གློ་གློ་བོར་འབྱུང་ངོ་། །རྒྱུ་མ་ནར་ཏེ་རླིག་རླུགས་སུ་གྱུར་པའི་ནད་ཐབས་ནི་རླུང་ནད་སླང་བར་གྱུར་པའི་ཁ་ཟས་དང་།
ཟས་བསིལ་བའི་བག་དང་། ཆུའི་ནང་དུ་རྐྱལ་བ་དང་། བཤང་གཅི་སྙོམས་ན་ནན་གྱིས་བརྣགས་པ་དང་། མི་བྲོ་བཞིན་བཙིར་པ་དང་། ཁུར་དང་ལམ་གྱིས་དུབ་པ་དང་ལུས་དང་ལུས་ཀྱི་ཡན་ལག་ལོག་པར་གཅུ་ཞིང་། སྐྱོད། གསིག་སྟེ། རྒྱུ་མའི་ནང་འཁྲུགས་པར་འགྱུར།

དེ་ལྟ་བུའི་བག་བྱས་པས། དེའི་ཚེ་རྒྱུ་མ་ཕྲེའུ་ཁ་ཅིག་རང་གི་གནས་ནས་རླུང་གིས་ཐུར་དུ་ལོག་པར་ཕུལ་ཏེ། ཆུ་སོ་དང་མདོམས་ཀྱི་ཕྲག་ཏུ་ཕྱིན་པར་བྱས་ནས་མདུད་པ་ལྟར་གློ་བོ་ཞིག་ཏུ་དེའི་ཚེ་སྐྲང་ངོ་། །འདི་ལྟར་གྱུར་ཀྱང་ཡལ་བར་བོར་ཏེ་སྨན་དཔྱད་མི་བྱེད་
ན་རླིག་རླུགས་ཆེར་སྐྱེས་ཏེ། ཁོང་སྦོ་ན་རེམ་རེམ་པོར་བྱེད་ལ་ནང་དུ་རླུང་གིས་རབ་ཏུ་གཟིར་བ་དང་། རྒྱུ་མ་སྒྲ་ཅན་ཁྲུ་ལུ་ལུ་ཟེར་ཞིང་རླིག་པའི་ནང་དུ་གང་བར་བྱེད། རྒྱུ་མ་ཁོང་པའི་ནང་དུ་སླར་ཕུལ་ཏེ་བཏང་ནས་ཡང་སླར་བཞིན་སྔ་མ་ཁོ་བ་བཞིན་གང་བར་འགྱུར་རོ། །དེ་ལྟ་བས་
ན་རྒྱུ་མ་ནར་ཞིང་སྐྱེས་པའི་རླིག་རླུགས་འདི་ནི་གསོ་དཀའ་སྟེ། རླུང་ནད་ལས་རླིག་རླུགས་སུ་གྱུར་པ་དང་འདྲ་ལ་རྩ་ཕྲ་མོ་དྲ་བ་སྐར་ཁུང་རིས་ལྟར་འདུག་པ་རྩ་ཀུན་རྩུབ་ལ་སྨུག་གོ། །སྐྲན་ནད་རྣམ་པ་བརྒྱད་ཀྱི་ནད་གཞི་དང་ནད་ཐབས་བཤད་པ་སྐྲན་རྣམ་པ་བརྒྱད་ཡོད་དོ། །རླུང་དང་
མཁྲིས་པ་དང་བད་ཀན་རེ་རེའི་སྐྲན་དང་རླུང་དང་མཁྲིས་པ་དང་བད་ཀན་གསུམ་ལས་གཉིས་གཉིས་སུ་འདྲེས་པ་ལས། སྐྲན་རྣམ་གསུམ་དུ་གྱུར་པ་དང་། འདུས་པའི་ནད་ལས་སྐྲན་དུ་གྱུར་པ་དང་། བུད་མེད་ཟླ་མཚན་མངལ་དུ་རླུང་ནད་དམ་མཁྲིས་པའམ་བད་ཀན་གྱི་ནད་ཀྱིས་
འགགས་ཏེ་སྐྲན་དུ་གྱུར་པ་དང་། སྐྲན་རྣམ་པ་དེ་བརྒྱད་དོ། །སྐྲན་ནད་དུ་གྱུར་པའི་ནད་གཞི་ནི། རིམས་ཀྱིས་བཏབ་པ་དང་། སློན་པ་དང་། ཚད་པ་ལ་སོགས་པས་འཁྲུ་བ་དང་། སྐྱུག་སྨན་དང་། བཀྲུ་སྨན་ལ་སོགས་པ་བཏང་བས། ལུས་ཀྱི་ཤ་ཟད་དེ་སྐམ་པོར་གྱུར་
པས། ལུས་རླུང་ཅན་དུ་གྱུར་པའི་སྟེང་དུ་བཀྲེས་པ་ལས་ཆུ་གྲང་འཐུངས་པ་དང་། ཟས་བཅད་དེ་སྨྱུང་བ་བྱས་པ་དང་། ཧ་ཅང་དྲགས་ཆེས་པ་ལས། ཆུའི་ནང་དུ་རྐྱལ་བ་ལ་སོགས་ཏེ་ལུས་ལ་གནོད་ཅིང་རླུང་ནད་སློང་བར་འགྱུར་བ་དེ་ལྟ་བུའི་བག་བསྟེན་པ་དང་ཡང་ན་སློན་མི་བྲོ་ཞིང་།
ནན་གྱིས་བཀུག་པ་དང་། ཡང་ན་སློན་བྲོ་ན་བརྣགས་ཏེ། མ་སློན་པ་དང་། བཤང་གཅི་དང་དབུགས་ཐུར་དུ་འབྱུང་བ་སྙོམས་ཤིང་འོང་ན་ཡང་བརྣགས་པ་དང་། འདི་དག་མི་འོང་བཞིན་དུ་ནན་གྱིས་བཙིར་བ་དང་། སྐྱུག་སྨན་དང་། བཀྲུ་སྨན་ཞིག་བཏང་ན་སྔར་སྨན་མར་གྱི་

དཔྱད་དང་། དུགས་ཀྱི་ཆོ་ག་མ་བྱས་པར་སྐྱུག་སྨན་དང་བཀྲུ་སྨན་བཏང་བ་དང་། ཡང་ན་ཆོ་ག་བཞིན་དུ་སྐྱུག་སྨན་དང་བཀྲུ་སྨན་བཏང་བའི་རྗེས་ལ་ཁ་ཟས་དྲོད་པོ་ཆེ་ཚ་བའི་ནད་མྱུར་དུ་ལྡང་བ་རྣམས་ཟོས་པའམ། ཡང་ན་བད་ཀན་སྐྱེ་བར་འགྱུར་བའི་ཁ་ཟས་འབྱིལ་བག་དེ་ལྟ་བུ་ཟོས་པ་ལས་ནད་
དཀྱེལ་དུ་འགྱུར་ཏེ། དེ་ལྟར་རླུང་ནད་ཆེར་སྐྱེས་པས་རླུང་དང་མཁྲིས་པ་དང་། བད་ཀན་གྱི་ནད་སོ་སོ་ན་འདོམས་པར་གྱུར་ཏམ། ཡང་ན་ནད་སྣ་གཉིས་སུ་གྱུར་ཏམ། ཡང་ན་རླུང་དང་མཁྲིས་པ་དང་བད་ཀན་གྱི་ནད་དུ་གྱུར་ཏམ། ཡང་ན་ཁྲག་ནད་དང་འདྲེས་པ་དེ་ལྟ་བུས་ལུས་ཀྱི་རྩ་ཆེན་པོ་བཅུའི་
ནང་དུ་ནད་ཞུགས་པ་དང་། ལུས་ཀྱི་སྟོད་སྨད་ཁ་ཟས་དང་བཤང་གཅི་རྒྱུ་ཞིང་འབྱུང་བའི་ལམ་སྲང་ཡང་ནད་ཀྱིས་ཆོད་དེ་འགགས་ནས་ན་ཞིང་མི་བདེ་བའི་ས་བོན་གྱིས་ལུས་ཀྱི་ཤ་བྲི་སྟེ་སྐམ་པར་གྱུར་པས་བད་ཀན་དང་མཁྲིས་པ་དང་། བཤང་གཅིའི་དྲི་མས་རྩ་སྒོ་དང་། བཤང་གཅི་རྒྱུ་བའི་
སྲང་འགགས་སམ། ཁོང་པ་ནང་གྲོལ་གྱི་ནང་དུ་རླུང་ཞེན་ཏེ། ལུས་ཀྱི་ནང་རྩུབ་ཅིང་སྲ་བར་གྱུར་པས་རླུང་དང་མཁྲིས་པ་དང་བད་ཀན་གསུམ་གྱི་རང་གི་གནས་སུ་སྐྲན་ཞུགས་ན་དེའི་མིང་ནི་སྐྲན་ནད་རང་དབང་ཅན་ཞེས་བྱའོ། །རླུང་དང་མཁྲིས་པ་དང་བད་ཀན་གྱི་སྐྲན་དེ་མཁྲིས་པའི་སར་རླུང་གི་སྐྲན་
ཞུགས་སམ་བད་ཀན་གྱི་སར་མཁྲིས་པའི་སྐྲན་ཞུགས་སམ་རླུང་གི་སར་བད་ཀན་གྱི་སྐྲན་ཞུགས་སམ་རླུང་གི་སར་མཁྲིས་པའི་སྐྲན་ཞུགས་པ་དེ་ལྟ་བུ་ནི་གཞན་གྱི་སར་སྐྲན་ཞུགས་པ་ཞེས་བྱའོ། །དེ་ལྟར་ནད་དཀྱེལ་འདུས་པ་ལས་ནད་དེ་གོང་གོང་པོར་གྱུར་པས་ནད་དེ་གཟུགས་ཡོད་པ་མ་ཡིན་
ཡང་གཟུགས་སུ་གྱུར་ནས། སྐྲན་རིལ་རིལ་པོ་ལག་གིས་མྱང་དུ་ཡོད་པ་རྡོག་རྡོག་པོ་མདུད་པ་ལྟར་འདུག་པ་འདིའི་མིང་ནི་སྐྲན་ནད་ཅེས་བྱའོ། །དེ་ལ་རླུང་ནད་ལས་གྱུར་པའི་སྐྲན་གྱི་ནད་ཐབས་ནི། ལྒང་པའི་ཆུ་སོ་དང་ལྟེ་བ་དང་སྙིང་ག་དང་རྩིབ་ལོགས་གཡས་གཡོན། འདི་རྣམས་
གང་ཡང་རུང་བར་སྐྲན་གནས་ཤིང་འདུག་སྟེ། རླུང་སྐྲན་དེ་དག་ཏུ་བྱུང་བས་མཇིང་བ་དང་ཀླད་པ་ན། རིམས་ནད་ཀྱིས་འདེབས། མཆེར་པ་ན། རྒྱུ་མའི་ནང་སྒྲ་ཁྲུ་ལུ་ལུ་ཟེར། ན་ཞིང་ཟུག །ཐུར་དུ་བཤང་བ་སྲི་ཞིང་འགགས། དབུགས་མི་བདེ་སྟེ། དབུགས་ཕྱིར་ཡང་དང་ཡང་

འབྱུང་བ་མི་ཕྱིན། ལུས་སྲ་བར་རེངས་བག་ཏུ་འགྱུར་ལ། ཁ་སྐམ། ལུས་རིད་ཅིང་སྐམ། ཕོ་བའི་མེ་དྲོད་མི་སྙོམས། ལུས་ཀྱི་པགས་པ་ཤ་མདོག་གནག་ལ་རྩུབ་པ་དེ་ལྟ་བུ་ནི་རླུང་སྐྲན་གྱི་ནད་ཐབས་ཡིན་ཏེ་རླུང་སྐྲན་དེ་ཁོང་པ་ནང་ན་དབྱིབས་ཚུལ་ཇི་ལྟ་བུ་ཞིག་
ཏུ་འདུག་པ་དང་། རླུང་སྐྲན་དེ་གང་ན་འདུག་པ་རྟག་ཏུ་མི་མངོན་ལ། རླུང་སྐྲན་དེ་རེས་འགའ་ནི་སྐྱེ། རེས་འགའ་ནི་འབྲི་ཞིང་ན་སྟེ། ཉམས་ལ་རླུང་སྐྲན་དེ་སྲོག་ཆགས་གྲོག་མ་ཞིག་གིས་གང་བ་སྙམ་དུ་པྲྭ་པྲྭ་བྱེད་པ་ཟུག་ཅིང་ན་བ་འདི་ལྟ་བུ་ནི་རླུང་སྐྲན་གྱི་ནད་ཐབས་ཡིན་ནོ། །དེ་ལ་མཁྲིས་
པ་ལས་སྐྲན་ནད་དུ་གྱུར་པའི་ནད་ཐབས་ནི། ལུས་ཚ་ལ་སྒྲེགས་པ་སྐྱུར་པོར་འོང་ངོ་། །བརྒྱལ། ཐུར་དུ་འཁྲུ། ལུས་རྔུལ། སྐོམ། རིམས་ནད་ཀྱིས་འདེབས་བཞིན་མདོག་དང་ལུས་ཀྱི་མདོག་དང་། སེན་མོ་རྣམས་སེར་པོར་སྣང་། མཁྲིས་པའི་སྐྲན་དེ་ལག་པས་རེག་ན་མི་
བཟོད། སྐྲན་དེ་རབ་རབ་བྱེད་ཅིང་མེ་བཞིན་འབར། སྐྲན་ཡོད་པའི་འཁོར་མེས་བསྲེགས་པ་བཞིན་ཆེའོ། །ནད་ཐབས་འདི་ལྟ་བུ་ནི་མཁྲིས་པའི་སྐྲན་ནད་ཅེས་བྱའོ། །དེ་ལ་བད་ཀན་ལས་སྐྲན་དུ་གྱུར་པའི་ནད་ཐབས་ནི་གློ་བག་ཏུ་གྱུར་ལ་ཁ་ཟས་ཡི་གར་མི་འོང་། ཕོ་བའི་དྲོད་
ཆུང་། གྲང་བའི་རིམས་ནད་དང་ཆམ་པས་འདེབས། ཁོང་སྙོམ། དང་ག་མེར་མེར་པོར་བྱེད། ལུད་པས་བཀར། བཞིན་མདོག་དང་། སེན་མོ་དང་། ཤ་མཐང་གི་མདོག་དཀར་པོར་འདུག །བད་ཀན་ལས་སྐྲན་དུ་གྱུར་པ་ཉིད་ནི། ཁོང་པའི་ནང་གི་ཕུགས་ན་སྐྲན་སྲ་ཞིང་
ལྕི་ལ། འཕོ་ཞིང་འགུལ་བ་དང་། སྐྱེད་དབྲི་མེད་དེ་མལ་གཅིག་ན་བརྟན་པར་འདུག་ལ། སྐྲན་བེམ་བེམ་པོར་འདུག །བད་ཀན་གྱི་སྐྲན་རང་གི་གནས་སུ་འདུག་པ་དེ་ན་བ་ནི་བད་ཀན་གྱི་ནད་ཀྱི་དུས་དུས་སུ་ལྡང་ཞིང་ནའོ། །དེ་ལ་རླུང་དང་མཁྲིས་པ་དང་བད་ཀན་གསུམ་གང་
ཡང་རུང་བ་ལས། རླུང་དང་མཁྲིས་པ་ལྟ་བུ་ནད་སྣ་གཉིས་ལས་སྐྲན་དུ་གྱུར་པ་ནི་སྐྲན་ན་བའི་ནད་ཐབས་ཀྱང་ནད་སྣ་གཉིས་འདྲེས་པའི་ནད་ཐབས་སུ་འགྱུར་རོ། །རླུང་དང་མཁྲིས་པ་དང་བད་ཀན་སྣ་གསུམ་ལས་སྐྲན་དུ་གྱུར་པའི་ནད་ཐབས་ནི། རབ་ཏུ་ན་ལ་ཚ། སྐྲན་དེ་སྟུག་

ཅིང་སྲ་ལ་འབུར་འབུར་པོ་མཐོར་འགྱུར། སྐྲན་དེ་མྱུར་དུ་སྨིན་པར་འགྱུར་རོ། །ནད་འདུས་པ་ཚང་བའི་ནད་འདི་ནི་གསོར་མི་རུང་ངོ་། །དེ་ལ་ཁྲག་སྐྲན་ནི་བུད་མེད་འབའ་ཞིག་ལ་འབྱུང་སྟེ། ཟླ་མཚན་ཟག་གམ་གསར་དུ་བུ་བཅས་སམ། འོན་ཏེ་མངལ་གྱི་ནད་དང་གཅིག་
ཡོད་པ་ལས་ཁ་ཟས་རླུང་ནད་དུ་འགྱུར་བའི་བག་ཟོས་པ་དང་། རླུང་ནད་སློང་བར་འགྱུར་བའི་བག་བསྟེན་པས་རླུང་ནད་ལངས་ནས་ཟླ་མཚན་ཟླ་རེ་ཞིང་དུས་སུ་འོང་བ་ནང་དུ་འགགས་ཏེ། ལྟོ་བ་ཆེར་སྐྱེས་ཏེ། རུམ་ན་བུ་ཆགས་པ་འདྲ་བར་སྣང་། སྙིང་ན། ཁ་ཟས་ཀྱི་རོ་ཁ་ཅིག་
ཡིད་ལ་འདོད་པ་སྙམ་བྱེད། ནུ་ཞོ་ཡང་ཆང་ཆུང་སྣང་། ཁོང་རྨྱ་སྟེ། དེ་ལྟ་བུ་ལས་བགས་ཀྱིས་རླུང་ནད་དང་ཕྲད་པ་དང་སྐྲན་དེ་མཁྲིས་པའི་གནས་སུ་ཞེན་ནས་ཁྲག་སྐྲན་ཏེ། རླུང་དང་མཁྲིས་པ་ལས་འབྱུང་བ་ན་ལ་ཁོང་པའི་ནང་སྲ་བ་མེར་མེར་པོའི་བག་དང་ཁོང་ཚབ་དང་། ཚད་པས་
འཁྲུ། སྐོམ། རིམས་ནད་ཀྱིས་འདེབས། འདི་ལྟ་བུའི་ནད་བླ་ཐབས་སུ་ཡང་འགྱུར་རོ། །ཡང་ན་མངལ་གྱི་ནང་ན་ཁྲག་ཡོད་པ་བས་ནད་ཚབས་རབ་ཏུ་ཆེའོ། །མངལ་གྱི་ནང་ནས་ཀྱང་ཟག་ལ་དྲི་མི་ཞིམ་པ་དང་། ཟུག་པའི་ནད་ཐབས་དང་། ན་ལ་གཡོ་ཞིང་འཕར་བ་ཡང་།
དེ་ནི་མངལ་དུ་བུ་ཆགས་པ་ཞེས་མི་བྱའི་སྐྲན་མངལ་དུ་ཆགས་པ་ཡིན་ཏེ། སྐྲན་དེ་ལ་པྲྭ་པྲྭ་བྱེད། སྐྲན་དེ་ཉིད་གོང་བུར་གྱུར་ཏེ་འདུག་ཀྱང་གལ་ཏེ་ཚིགས་རིང་ཞིག་ལོན་ཞིང་འགུལ་ཏེ་པར་པར་བྱེད་ན་ཡང་དེ་ལྟ་བུ་ཡང་རུམ་ན་བུ་ཡོད་ཅེས་མི་བྱའི་མངལ་དུ་སྐྲན་དེ་ཉིད་ཆེར་སྐྱེས་ཞེས་བྱའོ། །
ཡང་ན་སྐྲན་ནོ་ཅོག་རླུང་དང་མཁྲིས་པ་དང་བད་ཀན་སོ་སོའི་ནད་ཀྱི་གནས་ལ་བརྟེན་ཏེ་སྐྲན་དུ་གྱུར་པ་དང་། འདུས་པའི་སྐྲན་དུ་གྱུར་པ་དེ་དག་ནི་གལ་ཏེ་ཡུན་རིང་པོ་ཞིག་ན་སྐྲན་སྨིན་ཏེ་རྡོལ་བར་འགྱུར་རོ། །ཡང་ན་ནི་སྨིན་ཅིང་རྡོལ་དུ་མི་རུང་ངོ་། །ཁོང་འབྲས་ཀྱི་ནད་བྱུང་བ་ནི་སྐྲན་དང་མི་
འདྲ་སྟེ། དེ་ནད་ཁྲག་ངན་པ་ལ་བརྟེན་པས། མྱུར་དུ་སྨིན་ཅིང་རྡོལ་བར་འགྱུར་རོ། །དེ་བས་ན་དེ་ནི་མྱུར་དུ་ཚ་བར་བྱེད་པས་ན་དེའི་ཕྱིར་ཞེས་བྱའོ། །དེ་ལ་སྐྲན་གྱི་ཕྱི་ནང་གི་བར་ན་ཡོད་པའི་ནད་ཐབས་ནི་ཆུ་སོ་དང་། ལྟོ་བ་དང་། སྙིང་དང་། མཆེར་པ་དང་། ཁོང་པའི་དྲོད་ཆུང་ཞིང་མདོག་

ཉམས། ཉམས་འཚག་བྲི། བཤང་གཅི་སྲི་ཞིང་འགགས། ཕྱི་རོལ་དུ་སྐྲན་འབྱུང་བ་ནི་ནད་ཐབས་འདི་དང་མི་འདྲའོ། །ནང་གྲོལ་གྱི་མཐའ་མ་ན་སྐྲན་ཡོད་པ་ནི། ནད་ཚབས་མི་ཆེའོ། །སྐྲན་འདུག་པ་དེའི་འཁོར་ན་ཤ་མདོག་ཀྱང་འགྱུར་ལ་ཕྱི་རོལ་དུ་གློ་གློ་བོར་
ཆེར་སྣང་ངོ་། །དེ་ལ་རླུང་ནད་ལས་ཧེན་ཀྱིར་འགྱུར་བ་ཡང་ཡོད་དེ། དེ་ནི་རླུང་གྱེན་དུ་རྒྱུ་བ་དང་། ཐུར་དུ་རྒྱུ་བ་རྣམས་འགྱིལ་ཏེ་འགགས་པས་ལྟོ་བ་རབ་ཏུ་ཆེར་གྱུར་ལ་ཧེན་གྱིས་བྱུང་སྟེ། ཤིན་ཏུ་ན་བ་དེ་ནི་རླུང་ནད་ཀྱིས་ཧེན་ཀྱིར་གྱུར་པ་ཞེས་བྱའོ། །དེ་ཡང་རྡོ་བའི་གཏུན་བུ་འཇོང་པོ་
ལྟར་ལྟོ་བ་ནས་ཡར་གྱེན་དུ་སྲ་ཞིང་མཁྲང་བ་སྟུག་པོ་མདུད་པ་ཅན་རྡོ་བའི་གཏུན་བུ་འཇོང་འཇོང་པོ་ལྟར་ཕྱིར་འབུར་ཞིང་གློ་བར་འབྱུང་བ་དེ་ནི་ཧེན་གྱི་གྱེན་དུ་བྱུང་བ་ཞེས་བྱའོ། །ཧེན་གྱི་ལྟོ་བ་ནས་དྲང་པོར་འདུག་པ་ནི། ཧེན་གྱི་ཐད་ཀར་འདུག་པ་ཞེས་བྱའོ། །ལོང་ཀ་ནས་རྒྱུ་
ཞབས་གཞང་དང་། དཀུ་དོའི་བར་དུ་ཐུར་དུ་ཟུག་ཅིང་གསང་ལ་བར་དུ་ན་བ་དེ་ནི་ཐུར་དུ་ཟུག་པའི་རླུང་ནད་ཅེས་བྱའོ། །ནད་ཐབས་དེ་ལས་བཟློག་སྟེ་ཚུལ་དེ་འདྲ་བ་ལས་ཐད་ཀར་ཟུག་སྟེ་ནའམ་གྱེན་དུ་ཟུག་སྟེ་ན་བ་དེ་ནི་གྱེན་དུ་ཟུག་པའི་རླུང་ནད་ཅེས་བྱའོ། །སྦྲགས་པ་རབ་ཏུ་
མང་བ་དང་། བཤང་བ་འོང་དུ་མི་རུང་སྟེ། འགགས་པ་དང་ཁ་ཟས་འགྲངས་ཤིང་ཚིམ་པར་ཟ་བའི་ནུས་པ་དང་། རྒྱུ་མའི་ནང་ན་སྒྲ་ཁྲུ་ལུ་ལུ་ཟེར་ཞིང་དྲོད་ཆུང་སྟེ། ཟས་མི་འཇུ་བ་དང་། ཧེན་གྱིས་འབུར་འབུར་པོར་བྱུང་ན། དེ་ལྟ་བུའི་སྐྲན་ཉེ་བར་འོངས་པའི་ནད་ཐབས་
ཡིན་ཞེས་ཟེར་རོ། །འབྲས་ནད་དང་། རྒྱུ་རླུགས་དང་། སྐྲན་དང་། འདི་སྣ་གསུམ་གྱི་ནད་གཞི་བཤད་པ་སྟེ་ལེའུ་བཅུ་གཅིག་པ་རྫོགས་སོ།། །།དམུ་རྫིང་གི་ནད་གཞི་བཤད་པའི་ལེའུ་བཅུ་གཉིས་པ་བཤད་པར་བྱའོ། །ཡང་ན་ནད་དོ་ཅོག་ཐམས་ཅད་ཀྱང་
ཕོ་བའི་མ་དྲོད་ཆུང་བ་ལས་ནད་དུ་འགྱུར་རོ། །ཕོ་བའི་མེ་དྲོད་ཆུང་ན་དམུ་རྫིང་གི་ནད་དུ་འགྱུར་རོ། །དེ་ལ་དམུ་རྫིང་གི་ནད་དུ་གྱུར་པའི་ནད་གཞི་ནི་ཟས་མ་ཞུ་བ་དང་། ཁ་ཟས་མི་འཕྲོད་པའི་བག་དང་། ཁ་ཟས་རྩུབ་མོ་ཁེངས་བུ་ཞག་ལོན་པ་དང་། ཟས་ཀྱི་རོ་དང་མདོག་

འགྱུར་བ་དང་། བུད་མེད་ཀྱི་སྐྲ་དང་། སེན་མོ་དང་། ཤིང་ཚེར་ལྟ་བུས་རྒྱུ་མ་བརྟོལ་བ་དང་། དྲི་མ་ལྟར་སོང་བ་དང་། རླུང་དང་མཁྲིས་པ་ལ་སོགས་པ་དང་། བཤང་གཅི་ལྟ་བུའི་དྲི་མ་འདི་རྣམས་ཁོང་དུ་བསགས་པས་ལུས་ཀྱི་སྲོག་ཟུངས་བདུན་སྟོད་སྨད་དུ་རྒྱུ་བ་དང་།
བད་ཀན་རྒྱུ་བའི་རྩ་རྣམས་འགགས་ཏེ། ལུས་ཁོང་ན་ཡོད་པའི་རླུང་སྲོག་ཅེས་བྱ་བ་དང་། ཕོ་བའི་དྲོད་ཀྱིས་མེ་དང་ཐུར་དུ་སེལ་བ་ཞེས་བྱ་བའི་རླུང་འདི་རྣམས་ལ་གནོད་པར་བྱས། པགས་པ་དང་ཤ་མཐངས་ཀྱི་བར་དུ་ཡང་ནད་ཞུགས་ནས་གསུས་པ་ཆེར་སྐྱེས་པ་དེ་ནི་དམུ་རྫིང་
གི་ནད་ཅེས་བྱའོ། །དེ་ལ་ཡང་རྣམ་པ་བརྒྱད་དེ། རླུང་གི་དམུ་རྫིང་དང་། མཁྲིས་པའི་དམུ་རྫིང་དང་། བད་ཀན་གྱི་དམུ་རྫིང་དང་། འདུས་པའི་དམུ་རྫིང་དང་། མཛེར་པ་ལས་དམུ་རྫིང་དུ་གྱུར་པ་དང་། སྤུ་དང་སྐྲ་དང་རྟ་རྔའི་བག་ལྟ་བུ་དང་། ཁ་ཟས་འདྲེས་པ་ཟོས་
པ་དང་། རྒྱུ་མའི་ནང་དུ་འཁྲིས་ཏེ་བཤང་བ་འགགས་ནས། བཤང་བ་དེ་མང་དུ་འཁྱིལ་པ་ལས་དམུ་རྫིང་དུ་གྱུར་པ་དང་། ཁ་ཟས་ཀྱི་ནང་དུ་རུས་པ་དང་། གྲ་མ་དང་། ཉའི་གྲ་མ་དང་། རྩ་དང་། ཤིང་བུ་དང་། གསེག་མ་རྣོན་པོའི་བག་ལྟོར་སོང་བ་དེས་རྒྱུ་མ་རྡོལ་ཏེ་བུ་བྱུང་
ངམ་ཧ་ཅང་འགྲངས་ཆེས་པ་ཞིག་ལས་གླལ་བའི་དབུགས་ནང་དུ་རྔུབས་དྲགས་པས་རྒྱུ་མ་གས་ཏེ་ལྟོ་བའི་ནང་དུ་ཟག་ཅིང་འཁྱིལ་བས་དམུ་རྫིང་ཆགས་པ་དང་། ཟས་མ་ཞུ་སྟེ་ཕོ་བར་བེའུ་སྣབས་ཆགས་པའི་སྟེང་དུ་སྣུམ་བག་དང་། འཚལ་ནན་དུ་ཆུའི་བག་འཐུངས་པ་དང་། འཚལ་
ནན་དུ་ཆུ་ཧ་ཅང་མང་དུ་འཐུངས་པ་དང་། ཕོ་བའི་དྲོད་ཆུང་བས་མ་ཞུ་བའམ། ཡང་ན་ཧ་ཅང་སྐེམ་པོར་གྱུར་པ་དེ་ལྟ་བུ་ལས་དྲོད་ཆུང་ཞིང་གྲང་ནད་རླུང་སྐྱེས་པས་ཁ་ཟས་ཟོས་པའི་བཅུད་དངས་མ་རྩ་སོ་སོར་འགྲོ་བའི་རྩ་སྒོ་ཡང་འགགས་ལ་བད་ཀན་གྱིས་ཀྱང་ཆོད་ལ་བད་ཀན་དང་།
དམུ་ཆུར་འདྲེས་ནས་ཆེར་སྐྱེས་པ་དེ་ནི་དམུ་རྫིང་ཞེས་བྱའོ། །དེ་ལྟར་དམུ་རྫིང་རྣམ་པ་དེ་བརྒྱད་གང་ལྟར་གྱུར་ཀྱང་རུང་སྟེ་དམུ་རྫིང་དུ་གྱུར་པའི་ནད་ཐབས་ནི། རྐན་དང་མཆུ་སྐམ། རྐང་ལག་དང་ལྟོ་བ་སྐྲངས། སེམས་དྲན་པ་དང་ཉམས་འཚག་དང་ཁ་ཟས་འདི་རྣམས་ལྔ་ལས་བྲི་སྟེ་

ཉམས། ལུས་ཤ་རིད་དེ་སྐེམ། གསུས་པ་ཆེར་སྐྱེ་སྟེ་ལུས་གཟུགས་སྤྱིར་བལྟས་ན་དམུ་རྫིང་གིས་བཏབ་པའི་མི་དེ་ཡི་དགས་འདྲའོ། །དེ་ལྟར་དམུ་རྫིང་གི་ནད་དུ་གྱུར་པ་དེ་བཀྲེས་ཏེ་ཁ་ཁ་བྱེད་པ་ཡང་ཉམས་ཏེ་མེད། ཁ་ཟས་ཟོས་ན་ཡང་ཡུན་རིང་དུ་མི་འཇུ་
ལ་འཇུ་བའི་ཚེ་ན་ཡང་དང་ག་ཚ་ཞིང་སྐྱུར་བཞིན་དུ་འཇུ་ལ་ཁ་ཟས་ཞུའམ། མ་ཞུ་བའི་དྲོད་ཀྱང་མ་ཟིན་ལ་འགྲངས་པར་མི་ནུས། ཉམས་འཚག་ཀྱང་ཉིན་གཅིག་པས་ཉིན་གཅིག་ཅིང་བྲི་ལ་ཅུང་ཟད་ཅིག་ལས་བྱས་པས་བསྐྱོད་ན་ཡང་དབུགས་མི་བདེ་སྟེ་རྔམ་པ་དྲག་ཏུ་འབྱུང་།
བཤང་བ་ཁོང་དུ་བསོགས་ཤིང་སྲི་ལ་རྐང་པ་ཅུང་ཟད་སྐྲང་། ཆུ་སོའི་མཚམས་སུ་ན་ཞིང་གང་སྟེ་རྒྱས། ཁ་ཟས་ཡང་བ་ཅུང་ཟད་ཟོས་ཀྱང་སྦོས་པ་བཞིན་དུ་འགྱུར་ཏེ། གསུས་པའི་གཉེར་མ་ནི་རངས། རྩ་ནི་རྒྱས། དམུ་རྫིང་དུ་གྱུར་པའི་ནད་ཐབས་འདྲ་སྟེ། མྱོས་ཤིང་
སློན་བག་ཏུ་འགྱུར་ལ་ཁོང་པའི་དྲོད་ནི་དྲོ། བཤང་བའི་དྲི་མ་སྲི་ཞིང་འགགས་ན་དྲོད་ཆུང་བར་འགྱུར་རོ། །ལུས་ནི་ཚ་ཞིང་སྐྲངས་ལ་གསུས་པ་ཆེར་སྐྱེས་ཏེ། མཇུག་ཏུ་ལྟོ་བའི་ནང་དུ་འབྱུང་བར་འགྱུར་རོ། །དེ་ལ་དམུ་རྫིང་གི་ནད་རླུང་ལས་གྱུར་པའི་ཤས་ཆེ་ན་ཤ་མདོག་སྨུག་
སྐྲང་པ་མེད། གསུས་པ་ཁུར་ཐོགས་པ་བཞིན་ལྕི་བ་ཡིན། རྩ་མང་པོའི་དྲ་བ་སྐར་ཁུང་རིས་བཞིན་དུ་གསུས་པ་བཀྲ། ལྟོ་བའི་ནང་ན་རྟག་པར་སྒྲ་འུ་རུ་རུ་ཟེར། ལྟེ་བ་དང་རྒྱུ་མར་ཟུག་ཅིང་རབ་ཏུ་ན། རླུང་ནད་ལས་གྱུར་ན་སྙིང་དང་རྐེད་པ་དང་ལྟ་བ་དང་གཞང་དང་ཆུ་སོ་གཡས་
གཡོན་དུ་ཟུག་ཅིང་ན། དབུགས་ཐུར་དུ་སྒྲ་ཅན་དུ་འབྱུང་། གཅིན་སྲི་སྟེ་ཅུང་ཟད་ཙམ་དུ་འབྱུང་། ཕོ་བའི་དྲོད་ཧ་ཅང་ཆེ་བ་ཡང་མ་ཡིན། ཁར་རོ་མི་བྲོ་བ་ཡང་མ་ཡིན་ཏེ། ཟས་ཡི་གར་འོང་ཞིང་འདོད་དེ་འདི་ལྟ་བུ་ནི་རླུང་ནད་ཀྱི་ཤས་ཆེ་བ་ལས་དམུ་རྫིང་དུ་གྱུར་པ་ཞེས་བྱའོ། །དེ་ལ་རླུང་
ནད་ཀྱི་དམུ་རྫིང་ནི་ལག་པ་དང་། གཞང་དང་ཕོ་མཚན་གྱི་འབྲས་བུ་དང་ལྟོ་བ་འདི་རྣམས་སྐྲང་། ལྟོ་བའི་སྟོད་དང་ལྟོ་བའི་སྨད་དང་། རྩིབ་ལོགས་དང་རྐེད་པ་དང་རྒྱབ་དང་། འདི་རྣམས་སུ་ན། རུས་པའི་ཚིགས་བྱ་བ་སྙམ་བྱེད། ལུད་པ་སྐམ་ལུད་ཀྱིས་བཀར། ལུས་ཀྱི་ཡན་ལག་

ན། རོ་སྨད་ལྕི། བཤང་བ་སྲི་ཞིང་འགགས། ལུས་ཀྱི་པགས་པའི་ཤ་མདོག་དང་། སྐྲ་དང་སེན་མོ་ལ་སོགས་པ་གནག་ལ་རྩ་དམར། གསུས་པ་གློ་བུར་དུ་རེས་འགའ་ནི་སྐྱེ། རེས་འགའ་ནི་འབྲི། གསུས་པ་ཟུག་ཅིང་ན། རྩ་ཕྲ་མོ་ཟུག་ཅིང་རྒྱས། གསུས་པ་རྐྱལ་པ་བུས་པ་
བཞིན་དུ་རྒྱས་ཏེ། གསུས་པ་རྒྱས་ན་རྐྱལ་པ་བུས་པ་བརྡབས་པ་སྐད་ཟེར་ལ་ལྟོ་བའི་ནང་ཕན་ཚུན་ཡན་མན་ཀུན་དུ་རླུང་རྒྱུ་ལན་ཞིང་ཟུག །དེ་ལ་མཁྲིས་པ་ལས་དམུ་རྫིང་དུ་གྱུར་པའི་ནད་ཐབས་ནི། རིམས་ནད་ཀྱིས་འདེབས། བརྒྱལ། ཁོང་ཚ། སྐོམ་དད་ཆེ། ཁའི་ནང་ཚ། མགོ་
འཁོར། ཚད་པས་རབ་ཏུ་འཁྲུ། པགས་པའི་ཤ་མདོག་དང་སེན་མོ་ལ་སོགས་པ་སེར་པོར་སྣང་། གསུས་པའི་མདོག་ཀྱང་སེར། ལྟོ་བའི་རྩ་རྣམས་ཀྱི་མདོག་ཀྱང་སེར་ལ་ཟངས་ཀྱི་ཁ་དོག་བཞིན་དམར། ལུས་རྔུལ་ལ་ཚ་ཞིང་བསྲེགས་པ་སྙམ་བྱེད་ལ་ལུས་ཀྱི་ངད་པར་
འགྱུར། རེག་ན་འཇམ། མྱུར་དུ་སྨིན་ཅིང་རྣགས་ཏེ་ཟག་པར་འགྱུར་རོ། །བད་ཀན་ལས་དམུ་རྫིང་དུ་གྱུར་པའི་ནད་ཐབས་ནི། རྐང་ལག་གི་ལྷུ་ཚིགས་ན། རྐང་ལག་ཚོར་བའི་བག་མེད་དེ་བེམ་བེམ་པོར་འདུག །གསུས་པ་སྐྲངས་ལ་ལྕི། གཉིད་ཆེ། རྟག་ཏུ་སློན། ཟས་
ཡི་གར་མི་འོང་། དབུགས་མི་བདེ། ལུད་པ་ལུ། པགས་པ་དང་སེན་མོ་ལ་སོགས་པའི་མདོག་སྐྱ་བོར་འགྱུར་རོ། །དམུ་རྫིང་སྐྱེས་པའི་ལྟོ་བ་སྲ་ཞིང་མཁྲང་ལ་འཇམ། གསུས་པའི་སྟེང་དུ་རྩ་དཀར་པོ་ཆེན་པོས་གང་། གསུས་པ་བགས་ཀྱིས་ཆེར་སྐྱེས་ཏེ་སྲ་ཞིང་མཁྲང་།
ལག་པས་མྱངས་ན་གྲང་། གསུས་པ་ལྕི། རླུང་དང་མཁྲིས་པ་དང་བད་ཀན་གསུམ་ཅར་འདུས་པ་ལས་དམུ་རྫིང་དུ་གྱུར་པའི་ནད་ཐབས་ནི། རླུང་དང་མཁྲིས་པ་དང་བད་ཀན་སོ་སོའི་དམུ་རྫིང་གི་ནད་ཐབས་བཤད་པ་སྟེ། དེ་ལྟ་བུའི་ནད་སྣ་ཚང་བའི་དམུ་རྫིང་དེ་ནི་འདུས་པའི་དམུ་
རྫིང་ཞེས་ཀྱང་བྱ་སྟེ། འདུས་པའི་དམུ་རྫིང་གི་ནད་དུ་གྱུར་པ་ནི་བུད་མེད་ཀྱི་ཁ་ཟས་ཀྱི་ནང་དུ་སྐྲ་དང་། སེན་མོ་དང་དྲི་མ་དང་གནོད་པར་འགྱུར་བའི་དབྱིག་དུག་དང་། དུག་ལ་སོགས་པས་ཁོང་པ་ནང་དུ་ཁྲག་དང་ནད་རྣམས་བསྩགས་པས། གསུས་པ་ཡང་དམུ་རྫིང་ལྟར་སྐྱེལ།

ཁ་སྐམ། མགོ་འཁོར། བརྒྱལ་བའི་ནད་ཐབས་འདི་ལྟ་བུ་ནི་འདུས་པའི་དམུ་རྫིང་གི་ནད་ཐབས་ཡིན་ཏེ། གྲང་ལྷགས་དང་། རླུང་དང་ནམ་རྨུས་ན་ནད་ན་བར་འགྱུར། མྱུར་དུ་སྨིན་ཅིང་རྣགས་ཏེ་མི་བཟད་པར་ན་བར་འགྱུར་རོ། །དེ་ལས་མཆེར་པ་ལས་དམུ་
རྫིང་དུ་གྱུར་པ་ནི་ཁ་ཟས་ཧ་ཅང་ཆེར་ཟོས་པས་ནང་དུ་འཁྲུགས་ཏེ་མི་བདེ་བ་དང་། ཕན་ཚུན་དུ་སོང་ཞིང་དྲག་ཤུལ་ཆེར་བསྐྱོད་པ་བྱས་པས་བུད་མེད་ལ་ཧ་ཅང་དྲགས་པ་དང་། ལས་ཆེས་པས་དུབ་པ་དང་། ལམ་རིངས་ཀྱིས་དུབ་པ་དང་། བཀྲུ་སྨན་དང་སྐྱུག་སྨན་ལྟ་བུ་དྲགས་པས་ལུས་རྐེ་
སྟེ་མཆེར་པ་གློ་གཡོན་ན་འདུག་པ་ཐུར་དུ་ལྷུང་ནས་མཆེར་པ་སྐྲངས་སམ། ཁྲག་གིས་རྒྱས་སམ་ཡང་ན་ཟས་ཀྱི་བཅུད་ཁུ་བ་མ་ཞུ་བས་ཆེར་སྐྲངས་པས་རྡོ་བའི་གཏུན་བུ་བཞིན་སྲ་བར་འགྱུར་ཏེ། རུས་སྦལ་གྱི་རྒྱབ་བཞིན་དུ་སྔར་མཁྲང་བར་གྱུར་པ་ལས་བགས་ཀྱིས་ཆེར་སྐྱེས་ནས་ལྟོ་བར་
དམུ་རྫིང་ལྟར་ཆགས་པ་དང་། ན་བའི་ཐབས་ནི་དབུགས་མི་བདེ། ལུད་པ་ལུ། སྐོམ་དད་ཆེ། ཁ་ཟས་ཁར་རོ་ཅི་བྲོ་མི་ཚོར། ལྟོ་བ་ཆེར་རྒྱས་ལན། རིམས་ཀྱིས་འདེབས། ཁ་གདོང་གི་ཤ་མདོག་སྐྱ་བོ་རྦབ་རྦབ་པོར་འདུག །བརྒྱལ། སློན། ཁོང་ཚ་ཞིང་མྱོས་པ་དེ་ལྟ་བུར་འགྱུར་
རོ། །རྩ་རྣམས་ནི་དམར་ཞིང་སྨུག་པའམ། སྔོ་ཞིང་སེར་ལ་མི་སྡུག་པ་དེ་ལྟ་བུར་འགྱུར་རོ། །བཤང་བ་ཐུར་དུ་འོང་དུ་མི་རུང་སྟེ། འགག་ཅིང་ན། གསུས་པ་ཆེར་སྐྱེས་པ་དང་། མོང་མོང་པོར་གྱུར་པ་དང་། སྐོམ་དང་སྐྱེས་པ་དང་། ཁོང་ཚ་ཞིང་རིམས་ཀྱིས་འདེབས་པ་དང་། ལུས་ལྕི་ཞིང་
ཟས་ཡི་གར་མི་འོང་བ་དང་། གསུས་པ་རྒྱས་ཏེ་སྲ་བར་འགྱུར་བ་དང་། འདི་ལྟ་བུའི་བྱེ་བྲག་ལས་མཆེར་པའི་དམུ་རྫིང་དེ་རླུང་དང་མཁྲིས་པའམ་བད་ཀན་གྱིས་གང་ཆེ་བ་ལས་མཆེར་པའི་དམུ་རྫིང་དང་འདྲ་བར་གློ་གཡས་ན་མཆིན་པ་འདུག་པ་དེ་ཡང་ཁ་ཟས་ཧ་ཅང་ཆེར་ཟོས་པས་ནད་དུ་འཁྲུགས་ཏེ་མི་བདེ་
བ་དང་། ཕན་ཚུན་དུ་སོང་ཞིང་དྲག་ཤུལ་ཆེར་བསྐྱོད་པ་བྱས་པ་དང་། བུད་མེད་ལ་ཧ་ཅང་དྲགས་པ་དང་། ལས་ཆེན་པོས་དུབ་པ་དང་། ལམ་རིངས་ཀྱིས་དུབ་པ་དང་། བཀྲུ་སྨན་དང་། སྐྱུག་སྨན་ལྟ་བུ་དྲགས་པས་ལུས་ཤ་རྐེ་སྟེ་མཆིན་པ་གཡས་ན་འདུག་པ་དེ་ཐུར་དུ་ལྷུང་ནས་མཆེད་པ་བཞིན་སྐྲངས་

ཏེ་དམུ་རྫིང་དུ་འགྱུར་རོ། །དེ་ལ་བྱ་སྒྲོ་དང་སྐྲ་དང་རྟ་རྔ་ལ་སོགས་པ་ཁ་ཟས་དང་འདྲེས་ཏེ་ཟོས་པ་དེས། རྒྱུ་མའི་ནང་འཁྲིས་ཏེ་འཁུམས་པས་བཤང་བ་ཀུན་ནང་དུ་འཁྱིལ་ཞིང་འགགས་པ་དང་གཞང་འབྲུམ་གྱི་ནད་ཀྱིས་བཏབ་བམ། བཤང་བ་འགགས་ཏེ་འབྱུང་དུ་མི་རུང་བའམ་ཁ་ཟས་ཀྱིས་རྒྱུ་མའི་
ནང་གི་ངོས་ལ་ཆགས་པས་མཁྲིས་པ་དང་། བད་ཀན་དང་བཤང་གཅི་རྣམས་འགགས་ཏེ། འཁྱིལ་བས་རླུང་ཐུར་དུ་སེལ་བ་ཞེས་བྱ་བ་ཞིག །ལྟོ་ན་གནས་པ་དེ་འགགས་ཤིང་འཁྱིལ་བས་ནད་དུ་གྱུར་ཏེ། རླུང་དེས་ལུས་ཀྱི་ཁོང་ཚ། རིམས་ནད་ཀྱིས་འདེབས། སྐོམ། སྦྲིད་པ་འབྱུང་། ལུད་
པ་ལུ། དབུགས་མི་བདེ། བརླ་ན། ཀླད་པ་ན། སྙིང་ན། ལྟེ་བ་ན། གཞང་དང་འདི་རྣམས་ན་བས་བཤང་བ་འགག་ཅིང་འཁྱིལ། ཟས་ཡི་གར་མི་འོང་། སློན། ལྟོ་བའི་ནང་དུ་རླུང་སྒྲ་འུ་རུ་རུ་ཟེར། རྩ་ཀུན་རྒྱས་ཏེ་སྔོ་ལ་སྨུག །ལྟེ་བའི་གོང་དུ་བ་མཇུག་འདྲ་བ་ཤུར་ཤུར་པོ་སྣང་བའི་ཧེན་
གྱི་འབྱུང་བ་འདི་ནི། སྐྲ་དང་རྟ་རྔ་ལ་སོགས་པ་རྒྱུ་མའི་ནང་དུ་མཁྲིས་པའི་དམུ་རྫིང་ཞེས་བྱའོ། །དེ་ལ་རྒྱུ་མ་རལ་བ་ལས་དམུ་རྫིང་དུ་གྱུར་པ་ནི་རྣམ་པ་གཉིས་ཏེ། ཁ་ཟས་དང་རུས་པ་རྣོན་པོས་སམ། གསེག་མ་རྣོན་པོའི་བག་དང་འདྲེས་པས་རྒྱུ་མ་རྡོལ་བའམ། ཧ་ཅང་མ་འོས་པར་དྲགས་ཆེས་
པས་རྒྱུ་མ་གས་པར་གྱུར་པ་དེ་ལྟ་བུ་ལས། ཁོང་པའི་ནང་དུ་ཡང་ཁ་ཟས་ཀྱི་སྙགས་སྙིགས་དང་། བེའུ་སྣབས་སུ་བཅས་ཏེ་ལུག་པར་གྱུར་པ་དང་། ཐུར་དུ་ཡང་བཤང་བ་ཉུང་ཤས་ཉུང་ཤས་མནམ་པོ་ཤེའུ་རུལ་ལྟ་བུ་སྤྱི་བག་ཏུ་འབྱུང་བ་མདོག་དམར་སེར་ཅན་དུ་འབྱུང་སྟེ། དེ་ལྟ་བུས་ལྟོ་བའི་
ནང་ཡང་གང་། ཐུར་དུ་ཡང་འདི་བཞིན་དུ་འབྱུང་སྟེ། ལྟེ་བ་མན་ཆད་ལྟེ་བ་ཆུས་གང་བ་བཞིན་ཆེར་སྐྱེ་ལ་ལུས་ཀུན་ཁྱབ། དབུགས་མི་བདེ། སྐོམ་དད་ཆེ། མགོ་འཁོར་བ་འདི་ལྟ་བུའི་ནད་ཐབས་ནི་རྒྱུ་མ་རྡོལ་བའི་དམུ་རྫིང་ཞེས་བྱའོ། །ཡང་ཁ་ཅིག་ན་རེ་ནད་དེ་ལྟ་བུ་ལ་རྒྱུ་མ་ཟག་པའི་དམུ་རྫིང་ཞེས་
ཀྱང་ཟེར་རོ། །དེ་ལ་དམུ་ཆུའི་དམུ་རྫིང་ཞེས་བྱ་བ་ནི། སྣུམ་བག་ལ་སོགས་པ་རྟག་ཏུ་འཐུང་བ་ལ་ཞུགས་པ་དང་། འཕྲལ་དུ་ཆུ་མང་དུ་འཐུངས་པ་དང་། ཧ་ཅང་ཆུ་མ་འོས་པར་དྲག་ཏུ་འཐུངས་པ་དང་། འདི་ལྟ་བུས་ཁོང་པའི་དྲོད་བྲི་སྟེ་ཕོ་བའི་དྲོད་ཆུང་བ་དང་ཡང་ན་ཧ་ཅང་སྐེམ་པར་གྱུར་པའམ་

འདི་ལྟ་བུའི་ཁོང་གྲང་ཞིང་རླུང་བག་ཆེར་སྐྱེས་པས་བད་ཀན་དང་ཆུ་འདྲེས་པ་འཁྱིལ་ཏེ་རྫིང་བ་ལས་ཇེ་ཆེ་ཇེ་ཆེར་སྐྱེས་པ་དེ་ཉིད་དམུ་རྫིང་ཞེས་བྱའོ། །དེ་ལྟར་དམུ་རྫིང་དུ་གྱུར་པ་དང་། སྐོམ་དད་ཆེ། རྐུབ་ཏུ་ཆུ་ཟག་ཅིང་ན། ལུད་པས་བཀར། དབུགས་མི་བདེ། ཟས་ཡི་
གར་མི་འོང་། རྩ་རྣམས་མདོག་སྣ་ཚོགས་སུ་བཀྲ་ལ་རྒྱས་ཤིང་གང་། གསུས་པ་ལ་མྱངས་ཤིང་བལྟས་ན་རྐྱལ་པ་ཆུས་གང་བ་བཞིན་འདུག་ལ། བསྐྱོད་ན་ཁོང་ན་སྐྱོག་སྐྱོག་ཟེར། ལུས་འདར། དེ་ལྟར་གསུས་པ་དམུ་རྫིང་དུ་གྱུར་ན་ཆེ་ལ་འཇམ། སྲ། ལྟེ་བའི་ཐད་ཀར་ཟླུམ། ནད་འདི་ལྟ་
བུ་ལ་དཔྱད་མི་བྱེད་ཅིང་མི་གསོ་བར་ཡལ་བར་བོར་ན་ནད་དཀྱེལ་སྐྱེས་ཏེ། ཁོང་དུ་རུལ་ཏེ་རྣགས་ནས་རྣག་སླ་མོར་ཟག་ལ་རུས་པའི་ཚིགས་དང་རྩ་ཀུན་གྱི་ནང་དུ་ཡང་འགྲོ། ཁར་ཡང་འབྱུང་། ལུས་ཀྱི་རྔུལ་དུ་ཡང་འབྱུང་ངོ་། །ཡང་དམུ་རྫིང་དེ་གལ་ཏེ་ཐུར་དུ་འབྱུང་དུ་མི་རུང་ཞིང་འགགས་ན་རྒྱུ་མའི་
ནང་དུ་འཁྱིལ་ཏེ། ལྟོ་བ་གཡས་གཡོན་དུ་ཐད་ཀར་གང་ཞིང་འདུག་གོ། །དེ་ལྟར་གྱུར་ན་གསུས་པ་ལྕི་ལ་སྲ་ཞིང་ཟླུམ། བརྡབས་ན་སྒྲ་འབྱུང་། གསུས་པ་མདོག་འཇམ། གསུས་པའི་རྩ་མི་སྣང་སྟེ་ལྟེ་བའི་ཐད་ཀར་བསྒུལ་ན་མེར་མེར་བྱེད་དེ་འདི་ལྟ་བུའི་ནད་ནི་ཆུའི་དམུ་རྫིང་ཞེས་བྱའོ། །
དེ་ལྟར་དམུ་རྫིང་གི་ནད་རྣམ་པ་དེ་སྙེད་ལ་གསོ་དཀའ་སླའི་བྱེ་བྲག་ནི། རླུང་ལས་དམུ་རྫིང་དུ་གྱུར་པ་དང་། མཁྲིས་པ་ལས་དམུ་རྫིང་དུ་གྱུར་པ་དང་། དེ་བཞིན་དུ་བད་ཀན་ལས་དམུ་རྫིང་དུ་གྱུར་པ་དང་། འདུས་པ་ལས་གྱུར་པ་དང་། མཆེར་པ་ལས་གྱུར་པ་དང་། ཆུ་ལས་དམུ་རྫིང་དུ་གྱུར་པ་
འདི་རྣམས་ནི་གོང་མ་བས་འོག་མ་རིམ་བཞིན་དུ་གསོ་དཀའོ། །དེ་ལྟར་དམུ་རྫིང་ངོ་ཅོག་གི་ནད་ནི། ཟླ་བ་ཕྱེད་ལོན་ཕན་ཆད་དམུ་རྫིང་གི་ནད་གང་ཡིན་པ་རྟོགས་པར་འགྱུར་རོ། །འདུས་པའི་དམུ་རྫིང་དང་ལྟོ་བར་ཆུ་འཁྱིལ་བའི་དམུ་རྫིང་དང་། དམུ་རྫིང་ལྟ་བུར་གྱུར་པ་ལས་ནད་བླ་བརྣན་ལྟ་བུས་
བཏབ་པ་དང་། དམུ་རྫིང་གི་ནད་གང་ཡང་རུང་མི་འཚོ་བར་འགྱུར་བའི་འཆི་ལྟས་བྱུང་བ་དང་། དང་པོ་སྐྱེས་པ་ནས་དམུ་རྫིང་དུ་གྱུར་པ་འདི་རྣམས་ལྟ་བུ་ནི་གསོ་དཀའོ། །དེ་ལ་གསོ་སླ་བ་ནི་དམུ་རྫིང་གསར་དུ་བྱུང་བ་དང་། ཆུའི་དམུ་རྫིང་ལྟ་བུར་གྱུར་པ་དང་། ནད་པའི་ཉམས་འཚག་གིས་ཐུབ་པ་

དང་། གསོས་དང་སྨན་དཔྱད་དུ་ཡང་རུང་བ་འདི་རྣམས་ལྟ་བུ་ནི་གསོ་སླའོ། །དམུ་རྫིང་རྣམ་པ་བརྒྱད་བཤད་པ་སྟེ་ལེའུ་བཅུ་གཉིས་པ་རྫོགས་སོ།། །།སྐྱ་རྦབ་དང་། འོར་ནད་དང་། མེ་དབལ་གྱི་ནད་གཞི་བསྟན་པ་སྟེ་ལེའུ་བཅུ་གསུམ་པ་བཤད་པར་བྱའོ། །དེ་ལ་སྐྱ་རྦབ་
ཀྱི་ནད་ནི་སྔར་ཇི་སྐད་དུ་བཤད་པ། ཁ་ཟས་ཚ་བ་དང་། སྐྱུར་བ་དང་། ལན་ཚྭ་ལ་སོགས་པ་དེ་ལྟ་བུས་མཁྲིས་པའི་ནད་ལྷག་པར་སློང་བར་བྱེད་པས་མཁྲིས་པའི་ནད་ཆེར་ལངས་པ་དང་། མཁྲིས་པ་སྙིང་ལ་གནས་པ་དེ་རླུང་གི་སྟོབས་ཀྱིས་རྩ་ཆེན་པོ་བཅུའི་ནང་དུ་བཀྲམ་སྟེ་གྱེས་ནས་ལུས་
ཐམས་ཅད་དུ་ཁྱབ་སྟེ། བད་ཀན་དང་། པགས་པ་དང་། ཁྲག་དང་། ཤ་རྣམས་ཀྱི་ནང་དུ་ཞུགས་ཏེ་གནོད་པའི་ནད་དུ་གྱུར་ན། མཁྲིས་པ་དང་ཤ་དང་པགས་པའི་ནང་ན་བརྟེན་ཅིང་འདུག་པ་དེས་པགས་པའི་མདོག་ཀྱང་འགྱུར་ཏེ་སྐྱ་བ། སེར་བ། ལྗང་སྔོན་གྱི་བག་ཡོད་པ་དེ་ནི་སྐྱ་
རྦབ་ཀྱི་ནད་ཅེས་བྱ་སྟེ། ཁ་དོག་དེ་གསུམ་གྱི་ནང་ནས་སྐྱ་བའི་ཤས་ཆེ་བས་དེའི་ཕྱིར་སྐྱ་རྦབ་ཀྱི་ནད་ཅེས་བྱའོ། །དེའི་ཕྱིར་ནད་དེས་ལུས་ལྕི་བ་དང་། སྲོག་ཟུངས་ཀྱི་ཁམས་རྣམས་ལྷོད་པ་དང་། མདངས་དང་ཡོན་ཏན་ཡང་ཟད་པས། ཁྲག་དང་ཚིལ་རྣམས་ཀྱང་བྲི་སྟེ། ཆུང་དུ་གྱུར། ལུས་
ཀྱི་སྙིང་པོ་ཡང་མེད། དབང་པོ་རྣམས་ཀྱང་ལྷོད། ལུས་ཀྱི་ཡན་ལག་ཀྱང་བརྡུང་བ་སྙམ་བྱེད། ནད་པ་དེ་ཉམས་ལ་སྙིང་གནས་ཟག་པ་སྙམ་བྱེད། མིག་དང་མིག་ཕུགས་སྐྲངས། ཉམས་ལ་བྱིང་བ་སྙམ་བྱེད་ཅིང་ན། མཆིལ་མ་མང་། གཅོམ་ཆུང་སྟེ་མང་དུ་སྨྲ་མི་ཕོད། ཁ་ཟས་ལ་
ཚིག་པ་ཟ་ཞིང་མི་འདོད། གྲང་བའི་བག་མི་བཟོད། བ་སྤུ་རྣམས་ཀྱི་ཕོ་བའི་དྲོད་ཉམས། དཔྱི་མན་ཆད་རོ་སྨད་ཐུར་དུ་བྱིང་བ་སྙམ་བྱེད་དེ་ལྕི། རིམས་ཀྱིས་འདེབས། དབུགས་མི་བདེ། རྣ་བ་འབོད་ཅིང་སྒྲ་ཙི་རི་རི་ཟེར། ཁོང་ངལ། མགོ་འཁོར་ཏེ། སྐྱ་རྦབ་ཀྱི་ནད་ཐབས་སྤྱི་ནི་དེ་ལྟ་བུ་ཡིན་
ནོ། །སྐྱ་རྦབ་ཀྱི་ནད་དེ་ཡང་རྣམ་པ་ལྔ་སྟེ། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་པ་དང་། འདུས་པ་ལས་གྱུར་པ་དང་། ས་ཞག་ལྟ་བུ་ཟོས་པ་ལས་སྐྱ་རྦབ་ཏུ་གྱུར་པ་རྣམ་པ་དེ་ལྔའོ། །སྐྱ་རྦབ་ཀྱི་ཐོག་མའི་ནད་ཐབས་ནི་སྙིང་འཕར། པགས་

པའི་ཤ་མདངས་རྩུབ། ཡི་ག་འཆུས། གཅིན་གྱི་མདོག་སེར། རྔུལ་མེད་ཁོང་པའི་ཕོ་བའི་དྲོད་ཆུང་། ཉམས་བྱིང་སྟེ་ལྕི། ཁོང་ངལ་ལོ། །རླུང་ནད་ལས་གྱུར་པའི་སྐྱ་རྦབ་ཀྱི་ནད་ཐབས་ནི། ལུས་ཀུན་ན་ཞིང་ཟུག་ལ་འདར། མདོག་གནག་ཅིང་རྩུབ། རྩ་རྣམས་
དང་སེན་མོ་དང་མིག་དང་བཤང་གཅི་རྣམས་ཀྱི་མདོག་སྨུག །ལུས་ནི་སྐྲང་། ལྟོ་བ་ན་ཞིང་སྦོ། ཁར་རོ་བྲོ་བ་མི་ཚོར། རྟུག་སྐམ་དུ་འབྱུང་། རྩིབ་ལོགས་དང་། ཀླད་པའི་སྤྱི་བོར་ཟུག་ཅིང་ན་བ་དེ་ལྟ་བུ་ཡིན་ནོ། །མཁྲིས་པ་ལས་སྐྱ་རྦབ་ཏུ་གྱུར་པའི་ནད་ཐབས་ནི་རྩ་དང་སེན་མོ་དང་མིག་ལ་
སོགས་པའི་མདོག་ལྗང་སྔོན་ལས་རྩ་སེར་པོར་སྣང་། རིམས་ཀྱིས་འདེབས། དབུགས་མི་བདེ་སྟེ་མུན་པ་བཞིན་རྨུགས་ཞེས་བྱེད་པ་དང་། སྐོམ་དད་སྐྱེ། ལུས་རྔུལ། བརྒྱལ། ཉམས་ལ་བསིལ་བའི་བག་འདོད། ལུས་མནམ་སྟེ་དྲི་མི་ཞིམ། ཁའི་ནང་ཚ། ཐུར་དུ་འཁྲུ། སྒྲེགས་པ་སྐྱུར་
ལ་ཚ་བར་འབྱུང་བ་འདི་ལྟ་བུ་ཡིན་ནོ། །བད་ཀན་ལས་གྱུར་པའི་སྐྱ་རྦབ་ཀྱི་ནད་ཐབས་ནི་རྩ་དང་སེན་མོ་ལ་སོགས་པའི་མདོག་དཀར་པོར་སྣང་། ཉམས་གློ་བག་ཏུ་འདུག །ཁའི་ནང་ལན་ཚྭའི་རོ་བྲོ། བ་སྤུ་རྣམས་ལངས་ཏེ་བརྩེ། སྐད་འགག །ལུད་པས་བཀར། སློན་པར་བྱེད་དོ། །འདུས་པ་
ལས་གྱུར་པའི་སྐྱ་རྦབ་ཀྱི་ནད་ཐབས་ནི་རླུང་དང་མཁྲིས་པ་དང་བད་ཀན་གསུམ་གྱི་སྐྱ་རྦབ་ཀྱི་ནད་ཐབས་ཀྱི་སྣ་གྲངས་འདྲེས་པར་ན་ལ་ཚབས་ཆེ་སྟེ་བརྣགས་པར་དཀའ་བ་དེ་ལྟ་བུ་ཡིན་ནོ། །ས་ཞག་སྦྱིན་པོ་ཟོས་པ་ལས་སྐྱ་རྦབ་ཀྱི་ནད་ཐབས་སུ་གྱུར་པ་ནི། ས་ཞག་རོ་བསྐ་བ་ཟོས་ན་རླུང་ནད་ཀྱི་སྐྱ་རྦབ་ཏུ་འགྱུར་
རོ། །ཚ་བྲོ་བའི་ས་ཞག་ཟོས་ན་མཁྲིས་པའི་ནད་ཀྱི་སྐྱ་རྦབ་ཏུ་འགྱུར་རོ། །ས་ཞག་རོ་མངར་བ་ཟོས་ན་བད་ཀན་གྱི་ནད་ཀྱི་སྐྱ་རྦབ་ཏུ་འགྱུར་རོ། །དེ་ལྟར་ས་དེ་ལྟ་བུའི་བག་ཟོས་པས་ལུས་ཀྱི་སྲོག་ཟུངས་རྣམས་ལ་ཡང་གནོད་པའི་ནད་དུ་འགྱུར་བར་བྱེད་དོ། །ཁམ་པའི་ས་ཞག་རྩུབ་མོ་ཟོས་ན་ལུས་
ཀྱང་རྩུབ་པར་འགྱུར་ལ། ནང་གི་རྒྱུ་མ་ཡང་བཙོས་པ་སྙམ་བྱེད་ཅིང་གང་ལ། ཁོང་པ་ནང་དུ་འགགས་ཏེ་ནད་ཐབས་ནི་གོང་མ་དང་འདྲའོ། །དེ་ལྟར་ཁམ་པའི་ས་ཞག་ཟོས་པས་རྐང་པ་དང་། ལྟེ་བ་དང་། ཁ་དང་ཕོ་མཚན་རྣམས་སྐྲང་། བཤང་བ་ཐུར་དུ་སྲིན་བུ་ཅན་དུ་འབྱུང་ཞིང་བཀྲ་བག་དང་

འདྲེས་པར་འོང་། ཁར་བད་ཀན་དང་ཁྲག་ཏུ་འདྲེས་པར་འོང་ངོ་། །སྐྱ་རྦབ་ཀྱི་ནད་ཀྱིས་བཏབ་པའི་ནད་པ་དེ་ལ། མཁྲིས་པ་སྐྱེ་བར་འགྱུར་བའི་ཁ་ཟས་བསྟེན་ན་མཁྲིས་པའི་ནད་ཆེར་སྐྱེས་པས། ཁོང་པའི་ནང་གྲོལ་དང་། ལུས་ཀྱི་ཡན་ལག་གི་ཤ་ཁྲག་རྣམས་མཁྲིས་པ་ལས་བསྲེགས་
ནས། མིག་སེར་གྱི་ནད་དུ་འགྱུར་ཏེ་མིག་དང་། གཅིན་དང་། པགས་པ་དང་། སེན་མོ་དང་། ཁ་གདོང་དང་། བཤང་བ་རྣམས་ཀྱི་མདོག་སེར་པོར་སྣང་། ལུས་ཚལ་ཟས་མི་འཇུ། སྐོམ་དད་ཆེ། ལུས་ཀྱི་མདོག་ནི་སྦལ་པ་བཞིན་སེར་པོར་སྣང་། དབང་པོ་རྣམས་ཉམས་པ་འདི་ལྟ་བུ་ཡིན་
ནོ། །མཁྲིས་པའི་ནད་རྒྱས་ན། སྐྱ་རྦབ་ཀྱི་ནད་ཀྱིས་བཏབ་པར་མིག་སེར་གྱི་ནད་ཀྱིས་འདེབས་སོ། །འོར་ནད་ཀྱིས་བཏབ་པ་ཞིག་ལ་དཔྱད་མི་བྱེད་པར་ཡལ་བར་བོར་ན་ལུས་ཕྱོགས་སུ་ཆེར་སྐྲང་སྟེ། ནད་གསོ་དཀའ་བ་མིག་སེར་འོར་ཐབས་ཞེས་བྱ་བ་དེ་ལྟ་བུར་འགྱུར་རོ། །མིག་སེར་འོར་
ཐབས་ཀྱི་ནད་དེ་ལ་དཔྱད་འཕྱིས་ན། ནད་ཧ་ལི་མ་ཀ་ཞེས་བྱ་བར་འགྱུར་ཏེ། དེའི་ནད་ཐབས་ནི་གདོང་པ་དང་། ཤ་མདོག་ལྗང་ནག་སེར་བར་སྣང་སྟེ། རླུང་དང་མཁྲིས་པ་གཉིས་ཀྱི་ནད་ཀྱིས་མགོ་འཁོར། སྐོམ་དད་ཆེ། བུད་མེད་ལ་འདོད་པའི་བག་མེད། རིམས་ནད་ཀྱིས་ཅུང་ཟད་འདེབས། ཁོང་
སྙོམ། ཉམ་ཆུང་། ཕོ་བའི་དྲོད་བྲི། ཁྲག་ངན་པ་ནད་ཁྲག་ཏུ་འགྱུར། ཟས་མ་ཞུ་བའི་ཚུལ་དུ་སྦོ་ལ། མི་སློན་མི་འཁྲུ་བ་དེའི་ཚེ་ན། ནད་དེ་ནི་ཧ་ལི་མ་ཀ་ཞེས་བྱ་སྟེ། མིག་སེར་གྱི་ནད་འདི་རྣམས་ཀྱང་། སྐྱ་རྦབ་ཀྱི་ནད་ལས་དཔྱད་འཕྱིས་པའི་བླ་བརྣན་དང་མིག་སེར་གྱི་ནད་རྣམས་ལྟ་བུར་འགྱུར་
རོ། །མིག་སེར་གྱི་ནད་དེ་ལྟ་བུ་ལས་དཔྱད་འཕྱིས་ཏེ། བྱིང་ན་མིག་སེར་གྱི་ནད་དེ་ལྟ་བུ་དག་གི་བླ་བརྣན་གྱི་ནང་ན་གཙོར་ནི་འོར་ནད་དུ་འགྱུར་བའི་ནད་མང་བས་དེའི་ཕྱིར་འདིའི་རྗེས་ལ་འོར་ནད་ཀྱི་དམིགས་བསྟན་ཅིང་བཤད་དེ། འོར་ནད་དེ་ཡང་ཇི་ལྟ་བུ་ལས་འབྱུང་ཞེ་ན། མཁྲིས་པ་དང་། ཁྲག་དང་།
བད་ཀན་གྱིས་རླུང་གི་ནད་བསླང་སྟེ། འདུས་པའི་ནད་དཀྱེལ་དུ་བསགས་པ་དེ་ཡང་། རླུང་ནད་ཀྱིས་རྩ་རྣམས་ཀྱི་ནང་འཕྲོས་ཏེ། གྲམ་པ་ལས་རྩ་འགགས་ནས་ཤ་དང་པགས་པའི་ནང་དུ་ཞུགས་ཏེ། སྐྲངས་ལ་མཁྲང་བར་འགྱུར་བ་དེ་ནི་འོར་ནད་ཐམས་ཅད་ཀྱི་ཚུལ་ཡིན་ནོ། །འོར་ནད་དེ་ཡང་ནད་

གཞིའི་བྱེ་བྲག་དང་། ནད་ཐབས་ཀྱི་བྱེ་བྲག་ལས། འོར་ནད་རྣམ་པ་དགུར་ཡང་བཤད་དེ། དེ་ནི་རླུང་དང་། མཁྲིས་པ་དང་། བད་ཀན་ལས་གྱུར་པའི་འོར་ནད་སྣ་གསུམ་དང་། རླུང་དང་མཁྲིས་པ་དང་བད་ཀན་ནང་གི་གཉིས་གཉིས་སུ་འདྲེས་པའི་འོར་ནད་སྣ་གསུམ་
དང་། འདུས་པའི་འོར་ནད་དང་དུག་གིས་ཕོག་པའི་འོར་ནད་རྣམ་པ་དགུའོ། །ཡང་ན་རྟག་ཏུ་འོར་ནད་དུ་སྐྲང་བ་དང་། གློ་བུར་དུ་འོར་ཐབས་སུ་སྐྲང་བ་དང་གཉིས་སོ། །ཡང་ལུས་ཐམས་ཅད་འོར་ཐབས་སུ་སྐྲང་བའི་ནད་དང་། ཡན་ལག་རྐང་ལག་སྐྲང་པའི་འོར་ནད་རྣམ་པ་གཉིས་སོ། །ཡང་
འོར་ནད་རྣམས་གསུམ་ཡོད་དེ། ཕྱོགས་སུ་རྒྱས་པར་ཁྱབ་པའི་འོར་ནད་དང་། མི་ན་བར་གློ་བོར་སྐྲང་བའི་འོར་ནད་དང་། མདུད་པ་བཞིན་འབར་འབུར་དུ་སྐྲང་བའི་འོར་ནད་ཀྱི་བྱེ་བྲག་རྣམ་པ་གསུམ་མོ། །དེ་ལྟར་སྣ་ཚོགས་རྣམ་པ་འདི་ནི་འོར་ནད་དོ་ཅོག་གི་སྤྱིའི་ནད་དུ་འགྱུར་བའི་གཞི་ལས་འབྱུང་ངོ་། །
དེ་ལ་འོར་ནད་སོ་སོའི་ནད་གཞིའི་རྒྱུ་ཐ་དད་པས། འོར་ནད་སོ་སོའི་འགྱུར་བ་ནི་འོར་ནད་དུ་འགྱུར་བའི་ནད་ཀྱིས་བཏབ་པ་དང་། ལས་དང་། ཟས་སྨྱུང་བ་ལ་སོགས་པ་བྱས་པ་དང་། རིད་ཅིང་ཉམ་ཆུང་ལ། ཟས་སླ་བག་ཟོས་པ་དང་། ཟས་ཀྱི་ཚོད་ཧ་ཅང་དྲགས་པ་དང་། ཡང་ཟས་སྤྱི་བག་དང་།
སྐྱུར་བག་དང་། སྣུམ་བག་དང་། བསིལ་བག་དང་། ལན་ཚྭ་ཆེས་པ་དང་། ཐལ་སྨན་རྣོན་པོ་ཀྵ་ར་ལྟ་བུ་བཏང་བ་དང་། ཟས་ཚ་བའི་བག་དང་། ཧ་ཅང་དྲོ་ཆེས་པ་དང་། མྱ་ངན་གྱིས་བཏབ་པ་དང་། ཆུ་མང་དུ་འཐུངས་པ་དང་། ཉིན་པར་ཉལ་ཞིང་མཚན་མོ་མི་ཉལ་བ་དང་། ཁམ་པ་སྦྱིན་
པོ་ཟོས་པ་དང་། གྲོང་ཁྲོད་ན་གནས་པ་བྱ་ཕག་ལ་སོགས་པའི་ཤ་ཟ་བ་དང་། ཤ་སྐམ་ཟ་བ་དང་། ཟས་མ་ཞུ་བ་དང་། ཁོང་ངལ་བ་དང་། བུད་མེད་ལ་དྲགས་པ་དང་། རྐང་པས་ལམ་རིང་པོར་སོང་སོང་བ་དང་། རྟ་མི་བདེ་བ་ལས་ལུས་གསིགས་པ་དང་། དབུགས་མི་བདེ་བ་དང་། ལུད་པས་
བཀར་བ་དང་། ཚད་པས་བཏབ་པ་དང་། གཞང་འབྲུམ་གྱི་ནད་དང་། ལྟོ་བའི་ནད་དང་། མངལ་ནས་ཁྲག་ཟག་པ་དང་། རིམས་ནད་ཀྱིས་བཏབ་པ་དང་། སྦོས་ཏེ་ཟུག་པ་དང་། སྦོས་ཏེ་འཁྱིལ་ནས་མི་སློན་པའི་འཁྲུ་བ་དང་། སློན་པ་དྲགས་པ་དང་། བུད་མེད་སྦྲུམ་མ་དང་། མེ་དབལ་གྱི་ནད་ཀྱིས་

བཏབ་པ་དང་། སྐྱ་རྦབ་ཀྱི་ནད་དང་། འདི་ལྟ་བུའི་བག་གཞན་ཡང་ལུས་ལ་གནོད་པར་འགྱུར་བ་ལོག་པར་བསྟེན་པ་བྱས་པས་འོར་ནད་ཀྱི་དཀྱེལ་འབྲས་བུ་འདུས་ཤིང་བབས་ན། རོ་སྟོད་ཡན་ཆད་འོར་ནད་སྐྲང་ངོ་། །རོ་སྨད་དུ་ཆུ་སོར་ནད་བབས་ཏེ་དཀྱེལ་དུ་ཞུགས་ན། རོ་སྨད་མན་ཆད་སྐྲང་ངོ་། །
རྐེད་པར་བབས་ན་ལུས་ཀྱི་བར་རྐེད་པའི་འཁོར་སྐྲང་ངོ་། །འོར་ནད་ལུས་ཀུན་དུ་ཞུགས་ན་ལུས་ཐམས་ཅད་སྐྲང་ངོ་། །ལུས་ཀྱི་ཡན་ལག་རྐང་པའམ་ལག་པ་ལ་བབས་ན་ཡན་ལག་ཏུ་སྐྲང་ངོ་། །དེ་ལྟར་འོར་ནད་ཀྱིས་འདེབས་ན་ནད་ཐབས་སྔར་རྩ་རྣམས་ཚ། ལུས་དང་རྐང་ལག་ལྕི་བ་དེ་རྣམས་
ལྟར་ལྟར་བྱེད་དོ། །དེ་ལས་གྱུར་པའི་འོར་ཐབས་ནི་སྐྲང་བ་མལ་གཅིག་ཏུ་མི་སྐྲང་བར་ཕན་ཚུན་དུ་འཕོ་ལ་ལུས་དང་བ་སྤུ་རྩུབ། ཤ་མདོག་རྩ་གནག་ལ་དམར། ལུས་ཀྱི་པགས་པ་འཁུམས། རྐང་ལག་འདར། བ་སྤུ་བརྩེ་ཞིང་ཤ་མཐངས་ལ་རེག་ན་ན་ཞིང་མི་བདེ། ཟུག་ལ་རུས་པ་ཀུན་ཁ་བྱེ་
བའམ་ཆག་པ་ཙམ་དུ་ན། ཤ་མདངས་བེམ་བེམ་པོར་འགྱུར་ཏེ་རེག་པ་མི་ཚོར། ནད་མྱུར་དུ་ལྡང་ཞིང་མྱུར་དུ་ཞི། སྐྲངས་པའི་སྟེང་དུ་མནན་ཅིང་བཙིར་ན་ཁུང་བུ་ངོར་ཞེས་འབྱུང་། ཏིལ་གྱི་འབྲུ་མར་རམ། འབྲི་མར་ལྟ་བུ་དྲོན་པོར་བྱས་ཏེ། བསྐུ་ཞིང་མཉེས་ན་ཞི་བར་འགྱུར་རོ། །མཚན་
མོ་ནི་སྐྲང་བ་བྲི། ཉིན་པར་ནི་ཆེར་སྐྲང་། པགས་པའི་ཤ་མདངས་ཡུངས་མར་གྱིས་བསྐུས་པ་བཞིན་ཚ་བར་བྱེད། ཤ་མདངས་ཀྱི་མདོག་ནི་རྩ་སེར་དམར་གྱི་མདོག་ལ་ནག་པོར་སྣང་ངོ་། །མཁྲིས་པ་ལས་འོར་ནད་དུ་གྱུར་པའི་ནད་ཐབས་ནི་པགས་པ་དང་བ་སྤུ་ཟངས་མདོག་ཏུ་སྣང་། སྐྲང་བ་
མྱུར་དུ་ལུས་ལ་མཆེད་ཅིང་མྱུར་དུ་ཞེ་ན། སྔར་ལུས་ཀྱི་རྐེད་པར་འོར་ནད་འབྱུང་། སྐོམ་དད་ཆེ། ལུས་ཚ། རིམས་ནད་ཀྱིས་འདེབས། ལུས་རྔུལ། ལུས་རྔུལ་བག་ཏུ་མནམ། མྱོས་བག་ལ་མིག་འཁོར། གྲང་ཞིང་བསིལ་བའི་བག་འདོད། ཚད་པས་ཐུར་དུ་འཁྲུ་ཞིང་མནམ། ཤ་མཐངས་
ལ་རེག་ན་མི་བཟོད་ལ་མདོག་འཇམ་མོ། །བད་ཀན་ལས་འོར་ནད་དུ་གྱུར་པའི་ནད་ཐབས་ནི་ལུས་གཡའ། ཤ་མཐངས་དང་། བ་སྤུ་རྣམས་མདོག་དཀར། ཤ་མཐངས་ཁོང་མཁྲང་ཞིང་གྲང་ལ་ལྕི། མདོག་སྣུམ། འཇམ། ན་བ་ལ་ལྡང་དུབ་མེད་པར་རྟག །གློང་བག་ཏུ་འདུག་ལ་གཉིད་ཆེ།

སློན། ཕོ་བའི་མེ་དྲོད་ཉམས། སྐྲངས་པའི་སྟེང་དུ་མནན་ན་ཁུང་བུ་ལྕོངས་ཞེས་བྱེད། བད་ཀན་གྱི་འོར་ནད་འདི་འབྱུང་བ་ཡང་དཀོན། བྱུང་ན་ཡང་གསོ་དཀའ། མཚན་མོ་ནི་ཚབས་ཆེར་སྐྲང་། བད་ཀན་གྱི་འོར་ནད་ལ་གཏར་ག་བཏབ་ན་ཡང་ཁྲག་མྱུར་དུ་མི་ཕྱིན། དྲོ་ཞིང་
ཚ་བའི་བག་རག་ན་དགའོ། །རླུང་དང་མཁྲིས་པ་དང་། བད་ཀན་ལྟ་བུ་གཉིས་གཉིས་སུ་འདྲེས་པའི་ནད་ཐབས་ནི་བད་ཀན་དང་། མཁྲིས་པའི་འོར་ནད་སྣ་གཉིས་ཀྱི་ནད་ཐབས་སུ་ན་བ་ཡིན་ནོ། །འདུས་པའི་འོར་ནད་ཀྱི་ནད་ཐབས་ནི་རླུང་དང་མཁྲིས་པ་དང་། བད་ཀན་གྱི་འོར་ནད་སྣ་གསུམ་
གྱི་ནད་སྣ་ཚང་བའི་ནད་ཐབས་སུ་ན་བ་ཡིན་ན། དེ་ལ་སྣད་པའི་འོར་ནད་ཀྱི་ནད་ཐབས་ནི་མཚོན་ལ་སོགས་པས་ཚད་དམ་དྲལ་ཏམ། རྨས་སམ། ལྷགས་པའམ་ཁ་བས་རུལ་ཏམ་མེས་ཚིག་གམ། མཚོར་ཞུགས་ཏེ་ལུས་སྐྲངས་སམ། བསེ་རྩིའི་འབྲས་བུ་གོ་བེའམ། སྨན་ཀ་པི་ཀ་ཙུའམ།
གྲ་མ་ལ་སོགས་པས་རེག་ཅིང་ཕོག་ན་སྐྲངས་པ་མཆེད་པར་འགྱུར་ཏེ། མདོག་དམར་པོར་སྣང་ལ་རབ་ཏུ་ཚ་སྟེ། འདི་ལྟ་བུ་སྣང་བའི་རྟགས་ཚང་བ་མཁྲིས་པའི་བག་ཏུ་གཏོགས་སོ། །དུག་གིས་ཕོག་པའི་འོར་ཞེས་བྱ་བ་ནི་སྲོག་ཆགས་གདུག་པའི་བག་ལུས་ལ་སོང་བའི་གཅིན་གྱིས་ཕོག་པ་དང་།
སོ་དང་མཆེ་བ་དང་། སེན་མོས་ཟུག་ཅིང་སྐྲངས་པ་དང་། སྲོག་ཆགས་གདུག་པའི་བག་མ་ཡིན་པས་རྟུག་གཅིན་དང་། ཁུ་བ་ལྟ་བུའི་དྲི་མ་ཕོག་པ་དང་། དུག་གི་ཤིང་གི་རླུང་ཁར་བབས་པ་དང་། དབྱིག་དུག་གམ་དུག་སྦྱར་མའི་ཕྱེ་མ་རེག་པ་འདི་ལྟ་བུ་ལས་འོར་ནད་དུ་འགྱུར་རོ། །དེ་ལ་འོར་ནད་
གསོ་བ་ནི། སྐྲང་བ་ཕན་ཚུན་དུ་འཕོ་བ་མི་མཁྲང་སྟེ་སྙི། ལུས་མྱུར་དུ་ཚ་ཞིང་རྩེ་འཇིལ། འོར་གསར་དུ་བྱུང་མ་ཐག་ལ་དེའི་སྟེང་དུ་ནད་བླ་བརྣན་གྱི་བག་མེད་པ་དེ་ལྟ་བུ་ནི་གསོ་སླའོ། །འོར་ནད་གསོ་དཀའ་བ་ནི་སྔར་ལོགས་ཤིག་ཏུ་བཤད་པ་ཡིན་ནོ། །དེ་ལ་མེ་དབལ་གྱི་ནད་ཐབས་ནི་རྣམ་པ་
གཉིས་ཏེ། མཚོན་དང་རྡོ་དབྱུག་གིས་སྣད་པ་ལས་མེ་དབལ་གྱི་ནད་དུ་འགྱུར་བ་དང་། རླུང་ངམ་མཁྲིས་པའམ་བད་ཀན་གྱིས་ནད་བསླང་སྟེ། མེ་དབལ་དུ་འགྱུར་བ་ནི་འོར་ནད་ཀྱི་ནད་གཞི་ལས་འོར་ནད་དུ་གྱུར་པ་དང་འདྲའོ། །མེ་དབལ་དེ་ཡང་རྣམ་པ་གསུམ་སྟེ། ཕྱི་རོལ་ན་གནས་པ་དང་།

ནང་ན་གནས་པ་དང་། གཉི་ག་ན་གནས་པ་དང་གསུམ་མོ། །འདི་གསུམ་ལ་གསོ་དཀའ་སླ་ཡང་རིམ་བཞིན་ཏེ། ཕྱིའི་མེ་དབལ་ནི་གསོ་སླ། ནང་གི་མེ་དབལ་ནི་གསོ་དཀའ། ཕྱི་ནང་གཉིས་ཀའི་མེ་དབལ་ནི་དེ་བས་ཀྱང་གསོ་དཀའོ། །ཡང་ན་མེ་དབལ་གྱི་ནད་ཀྱང་རླུང་དང་མཁྲིས་པ་དང་།
བད་ཀན་གྱིས་ནད་སློང་བར་འགྱུར་བའི་ནད་ལངས་ཏེ། མེ་དབལ་གྱི་ནད་དུ་འགྱུར་མོད་ཀྱི། ལྷག་པར་ནི་ཚ་བའི་བག་གིས་ནད་བསླང་སྟེ། ལུས་ཀུན་ལ་མེ་དབལ་གྱིས་ཁྱབ་པར་བྱེད་དེ། ནང་གི་མེ་དབལ་ནང་ན་གནས། ཕྱིའི་མེ་དབལ་ཕྱི་ན་གནས། ཕྱི་ནང་གཉིས་ཀའི་མེ་དབལ་ཡང་ཕྱི་ནང་གི་
བར་ན་གནས་ཏེ། ནད་དེས་ལུས་ཀྱི་ནད་རྣམས་ལ་ཚ་བས་གདུངས་ལ་མྱོས་བག་ཏུ་བྱེད། རྩ་རྣམས་ཀྱི་སྒོ་འགག །སྐོམ་དད་ལྷག་པར་ཆེ། བཤང་གཅི་རེས་འགའ་ནི་མང་དུ་འོང་། །རེས་འགའ་ནི་འགག་པར་བྱེད་ཅིང་སྲི། ཕོ་བའི་དྲོད་དང་ཉམས་འཚག་མྱུར་དུ་ཉམས་ཏེ། བྲི་བ་ཡིན་ཏེ་ནད་
ཐབས་འདི་ལྟ་བུ་ནི་ནང་གི་མེ་དབལ་ཞེས་བྱའོ། །ཕྱིའི་མེ་དབལ་ནི་ནད་ཐབས་འདི་རྣམས་ལྟ་བུ་ལས་ཚུལ་བཟློག་སྟེ་ཤེས་པར་བྱའོ། །ཕྱི་ནང་གཉིས་ཀའི་མེ་དབལ་ནི་ནད་ཐབས་དེ་རྣམ་གཉིས་ལྟར་ནའོ། །མེ་དབལ་གྱི་ནད་ཐབས་སྤྱི་ནི་དེ་ལྟ་བུར་བལྟའོ། །རླུང་ནད་ལས་མེ་དབལ་དུ་གྱུར་པའི་ནད་
ཐབས་ནི། རླུང་ནད་ལས་རིམས་སུ་གྱུར་པའི་ནད་ཐབས་དང་འདྲ་སྟེ། ཚ་བའི་ནད་ལུས་ཀུན་ཏུ་མཆེད་ལ་སྐྲང་། ཟུག་ཅིང་ཕྲྭ་ཕྲྭ་བྱེད། ལུས་དང་ཡན་ལག་རྣམས་བརྡུང་བརྡུང་བ་སྙམ་བྱེད། བ་སྤུ་རྣམས་ལངས་ཤིང་བརྩེ་བ་འདི་ལྟ་བུར་བྱེད་དོ། །མཁྲིས་པ་ལས་མེ་དབལ་དུ་གྱུར་པའི་ནད་
ཐབས་ནི་ལུས་ཀུན་ཏུ་མེ་དབལ་གྱི་ནད་མྱུར་དུ་མཆེད་ཅིང་འགྲོ། སྤྱི་ནི་མཁྲིས་པ་ལས་རིམས་ཚ་བར་གྱུར་པ་དང་ཐབས་གཅིག་སྟེ། ལུས་དང་བཞིན་མདོག་རབ་ཏུ་དམར་རོ། །བད་ཀན་ལས་མེ་དབལ་དུ་གྱུར་པའི་ནད་ཐབས་ནི་མེ་དབལ་གྱི་འབྲུམ་བུའི་འཁོར་གཡའ་ལ་པགས་པ་འཇམ་སྟེ། ནད་ཐབས་
སྤྱི་ནི་བད་ཀན་གྱི་རིམས་དང་འདྲའོ། །དེ་ལྟར་མེ་དབལ་དང་འབྲས་ལ་སོགས་པ་བྱུང་ན་སྨན་དང་དཔྱད་མི་བྱེད་པར་ཡལ་བར་བཞག་ན་རླུང་དང་མཁྲིས་པ་དང་བད་ཀན་སོ་སོའི་ནད་ཀྱི་ཚུལ་ལས་བསགས་པ་སྨིན་ཏེ་རྡོལ་བ་དང་རྨའི་ཚུལ་ལ་སོ་སོའི་ནད་གང་ཡིན་པ་གསལ་བར་ཤེས་པར་འགྱུར་རོ། །དེ་ལ་

རླུང་དང་མཁྲིས་པ་སྣ་གཉིས་འདྲེས་པ་ལས་མེ་དབལ་དུ་གྱུར་པའི་ནད་ཐབས་ནི། རིམས་ནད་ཀྱིས་འདེབས། སློན། བརྒྱལ། ཚད་པས་རབ་ཏུ་འཁྲུ། སྐོམ་དད་ཆེ། མགོ་འཁོར། ལྷུ་ཚིགས་ཀྱི་རུས་པ་ཆག་
པ་སྙམ་བྱེད། ཕོ་བའི་མེ་དྲོད་ཉམས། དབུགས་མི་བདེ། སྙིང་མུག་མུག་བྱེད་ཅིང་མུན་ཐིབས་ཐིབས་བྱེད་པ་བཞིན་དུ་མི་དྲན། ཁ་ཟས་ཡི་གར་མི་འོང་། ལུས་དང་ཡན་ལག་ལ་མེ་དབལ་མཆེད་དོ་ཅོག་མེ་དབལ་གྱི་ནད་རྒྱ་སོལ་གྱི་མེ་མདག་འབར་བ་བཞིན་དུ་ཚ།
ཤ་མདོག་གནག་ལ་སྔོ། ཡང་ན་ཁྲག་ནག་རྒྱས་པའི་དཀྱིལ་དུ་ཡང་སྩོགས་ཤིང་མེ་དབལ་གྱི་འབྲུམ་བུ་དེ་མེས་ཚིག་པ་འདྲ་བ་ཞིག་ཡོད་དེ། དེས་ལུས་ཐོག་ཐག་ཏུ་མྱུར་དུ་མཆེད་དེ་ཁྱབ་པ་དང་གནད་ཀུན་གྱི་ནང་དུ་ཡང་འཇུག་ཅིང་འགྲོ་ལ་ཆུ་སེར་ལྟ་བུའི་བག་ཟག་གོ། །གལ་ཏེ་མེ་དབལ་རླུང་ནད་ཀྱི་ཤས་
ཆེ་ན། ལུས་དང་ཡན་ལག་རབ་ཏུ་ན་ལ། མི་དྲན་ཏེ་མྱོས། གཉིད་ཆེ། དབུགས་མི་བདེ། དབུགས་ཀྱི་རྔམ་པ་དྲག་ཏུ་འབྱུང་། སྐྱིགས་བུས་འདེབས་པའི་ནད་ཐབས་འདི་ལྟ་བུར་གྱུར་ན། ནད་པ་དེ་སྔས་གར་བོར་ཡང་དགའ་བ་དང་བདེ་བ་མེད་དོ། །སྐབས་སྐབས་སུ་རྐང་ལག་བརྐྱང་
ཞིང་བྱ་རྨྱང་བྱས་ན་ཡང་། ལུས་དང་སེམས་མི་བདེ་ཞིང་ཁོང་ངལ་བར་འགྱུར། སེམས་རྨོངས་བག་གིས་གསལ་ཏེ་གོ་དཀའ། གཉིད་ཆེ་བ་དེ་ལྟ་བུ་ནི་མེ་དང་འདྲ་བར་མེ་དབལ་ཞེས་བྱའོ། །དེ་ལ་མཛེར་བ་འདྲ་བར་འབྱུང་བ་ལས་མེ་དབལ་དུ་འགྱུར་བའི་ནད་ཐབས་ནི། བད་ཀན་ཆེར་སྐྱེས་པས་
རླུང་འཁྱིལ་ཞིང་འགག་སྟེ། རླུང་འགགས་ཤིང་འཁྱིལ་བ་དེས། བད་ཀན་རྡོལ་ཏེ་རླུང་དེ་ཁྲག་གི་ནང་དུ་ཞུགས་ཏེ། ཁྲག་ནད་བསླངས་ནས་པགས་པ་དང་། རྩ་ཕྲན་དང་། ཆུ་བ་དང་། ཤ་ཀུན་གྱི་ནང་དུ་ཁྲག་ནད་ཞུགས་ནས་ཐོར་བུ་ཕྲ་མོ་རིང་པོ་དང་། ཐོར་བུ་སྦོམ་པོ་སྲ་བ་མཛེར་བ་དང་
འདྲ་བར་འབྱུང་སྟེ། མང་པོ་ཕྲེང་བ་བཞིན་དུ་ཆགས་ཏེ་མདོག་དམར་པོར་འདུག་པ་སྡེ་ལྟ་བུར་བྱུང་རབ་ཏུ་ན། རིམས་ཀྱིས་འདེབས། དབུགས་མི་བདེ། ལུད་པས་བཀར། ཚད་པས་རབ་ཏུ་འཁྲུ། ཁ་སྐམ། སྐྱིགས་བུས་འདེབས། སློན། མགོ་འཁོར། རྨོངས་བག་ཏུ་

འགྱུར། པགས་པའི་ཤ་མདོག་མི་སྡུག །བརྒྱལ། ལུས་དང་ཡན་ལག་ཀུན་བརྡུང་བརྡུང་བ་སྙམ་བྱེད། ཕོ་བའི་མེ་དྲོད་ཉམས་པར་གྱུར་པའི་ནད་ཐབས་འདི་ལྟ་བུ་ནི་མཛེར་པ་ལྟ་བུའི་མེ་དབལ་གྱི་ནད་བད་ཀན་དང་རླུང་གཉིས་ཀྱིས་སློང་སྟེ་བད་ཀན་དང་མཁྲིས་པ་ལས་ནི་རིམས་སུ་འགྱུར་རོ། །
བད་ཀན་གྱིས་ནི་ལུས་དང་ཡན་ལག་རེངས་པའི་བག་ལ་གཉིད་ཆེ། གློ་བག་ཏུ་འདུག །ཀླད་པ་ན། ལུས་ཀྱི་ཡན་ལག་ན་ཞིང་བརྐྱང་བསྐུམ་བྱེད་འདོད། ཚིག་མང་དུ་སྨྲ། ཟས་ཡི་གར་མི་འོང་། མགོ་འཁོར། བརྒྱལ། ཕོ་བའི་མེ་དྲོད་ཉམས། རྐང་ལག་གི་རུས་པ་རྣམས་ཆག་པ་
སྙམ་བྱེད། སྐོམ་དད་ཆེ། དབང་པོ་རྣམས་མི་གསལ་ལ་ལྕི། ཚད་པ་བེའུ་སྣབས་སུ་འཁྲུ། དང་ག་རྫིང་ཞིང་གང་བ་སྙམ་བྱེད། དེ་ནས་རྩ་ཆེན་པོ་ཀུན་གྱི་ནང་དུ་ཞུགས་ཤིང་འགྲོ་ལ། ཕལ་ཆེར་ནི་ཕོ་བའི་ནང་དུ་ནད་ཞུགས་ནས། ལུས་ཀྱི་ཕྱོགས་ཡན་གར་ན་བ་ནི་མ་ཡིན་གྱི། ལུས་
ཀུན་དུ་ན་སྟེ། དེས་ན་ཐོར་བུ་སེར་པོ་དང་། དམར་པོ་དང་། དཀར་པོས་གང་བས་ན། ནོར་བུ་སྐར་ཕྲན་ལྟར་སྣང་སྟེ། ལུས་མདོག་གནག་ལ་འཇམ། དྲི་མ་ཅན་དུ་འགྱུར། འོར་ཐབས་སུ་སྐྲང་། ལུས་ལྕི། ཐོར་བུ་རྣགས་པའི་ཟབས་ཆེ། རབ་ཏུ་དྲེད་ཆེ་སྟེ་ཚ་ལ་རུལ་ཞིང་རྣགས།
ཤ་ཀུན་ཀྱང་རུལ་ཞིང་རྣགས་ཞིག་ནས། རྩ་རྒྱུས་ཉི་ཚེ་གསལ་བར་སྣང་སྟེ། ལུས་མི་རོ་ལྟར་གྱུར་པ་འདི་ནི་འདམ་འདྲ་བའི་མེ་དབལ་གྱི་ནད་ཅེས་བྱའོ། །རླུང་དང་མཁྲིས་པ་དང་བད་ཀན་གསུམ་འདུས་པའི་མེ་དབལ་གྱི་ནད་ནི། མེ་དབལ་གྱི་ནད་ཐབས་ཐམས་ཅད་ཚང་བར་ན་སྟེ། འདུས་
པའི་མེ་དབལ་གྱི་ནད་དེས། ལུས་ཀྱི་སྲོག་ཟུངས་བདུན་ལ་མྱུར་དུ་ཁྱབ་པར་བྱེད་དོ། །མཚོན་གྱིས་རྨས་པ་ལས་ཁྲག་ནད་ལངས་ཏེ། ཆུ་སེར་དང་ཚ་བ་སྐྱེས་ན་མེ་དབལ་གྱི་ནད་ཐབས་སུ་འགྱུར་ཏེ། དེ་ལ་རླུང་ནད་ཀྱིས་ཀྱང་མཆེད་ནས། མོན་སྲན་དཀར་རུ་འདྲ་བར་འབྱུང་སྟེ། སྐྲངས་ལ་
རིམས་ནད་ལྟ་བུར་འགྱུར་རོ། །ཚ་ལ་དམར་སྨུག་ཏུ་འགྱུར་རོ། །མེ་དབལ་གྱི་ནད་དེ་ལ་གསོ་དཀའ་སླའི་བྱེ་བྲག་ཏུ་རླུང་དང་མཁྲིས་པ་དང་བད་ཀན་སྣ་རེའི་མེ་དབལ་ནི་གསོ་སླའོ། །རླུང་དང་མཁྲིས་པ་ལྟ་བུ་སྣ་གཉིས་ལས་མེ་དབལ་དུ་གྱུར་ལ་ནད་བླ་བརྣན་གྱིས་བཏབ་ན་ཡང་གསོ་སླའོ། །མེ་

དབལ་གྱི་ནད་དེ་ལ་གསོ་དཀའ་བ་ནི། རླུང་དང་མཁྲིས་པ་ལྟ་བུ་སྣ་གཉིས་ལས་མེ་དབལ་དུ་གྱུར་པ་མཚོན་གྱིས་རྨས་ཏེ་རྨ་རེད་པའི་མེ་དབལ་དང་། ནད་ཐམས་ཅད་འདུས་པའི་མེ་དབལ་གྱིས་ལུས་ཀྱི་གནས་ཀུན་དུ་ཁྱབ་པ་དང་། རྩ་དང་། ཆུ་བ་དང་། ཤ་དང་འདི་རྣམས་
ཀུན་རུལ་ཏེ། རོ་བཞིན་མནམ་པོར་གྱུར་པ་འདི་ལྟ་བུའི་མེ་དབལ་ནི་གསོ་དཀའོ། །སྐྱ་རྦབ་དང་། འོར་ནད་དང་། མེ་དབལ་གྱི་ནད་གཞི་བཤད་པ་སྟེ་ལེའུ་བཅུ་གསུམ་པ་རྫོགས་སོ།། །།མཛེ་ནད་དང་། ལྟོར་སྲིན་བུ་འཇུག་པའི་ནད་གཞི་བཤད་པ་སྟེ། ལེའུ་བཅུ་བཞི་
པ་བཤད་པར་བྱའོ། །དེ་ལ་མཛེ་ནད་ཀྱིས་འདེབས་པའི་ནད་གཞི་ནི། ཁ་ཟས་མི་འཕྲོད་པ་གནོད་པ་ལྟ་བུ་ལ་སོགས་པ་ཟོས་པ་དང་ལུས་ཀྱི་བྱ་བ་བསྐྱོད་པ་དང་། འདུག་པ་དང་། ཉལ་བ་ལ་སོགས་པ་གནོད་པ་མི་འཕྲོད་པར་འགྱུར་བའི་བག་བྱས་པ་དང་། དགེ་བའི་མི་དམ་པ་དག་ལ་སྨོད་པ་
དང་། སྲོག་གཅོད་པ་དང་། གཞན་གྱི་ནོར་འཕྲོག་པ་ལ་སོགས་སྡིག་པའི་ལས་ལ་བརྟེན་པ་དང་། འདི་ལྟ་བུ་སྔོན་གྱི་ཚེ་བྱས་སམ། ད་ལྟ་འཕྲལ་དུ་བྱས་པའི་སྡིག་གིས། ཁོང་ནས་ནད་བསླང་། ནད་རྩ་ཀུན་གྱི་ནང་དུ་གྲམ་སྟེ་ཞུགས་ནས། ཤ་དང་པགས་པ་དང་། ཁྲག་དང་ཆུ་སེར་གྱི་
ནད་ལངས་ཏེ་ནང་གི་ཤ་རྣམས་ཀྱང་ཁོང་སླ་བར་གྱུར་ནས། མཛེ་ནད་ལུས་ཀྱི་ཕྱིར་འབྱུང་ངོ་། །མཛེ་ནད་འབྱུང་བའི་ཐབས་ནི་མཛེ་ནད་ངན་པས་པགས་པའི་མདོག་མི་སྡུག་པར་བྱེད་དོ། །མཛེ་ནད་ཀྱིས་ཐེབས་པ་ལས་སྨན་དཔྱད་མི་བྱེད་པར་ཡལ་བར་བོར་ན། ལུས་ཐམས་ཅད་མ་རུངས་
པར་གྱུར་ནས། ལུས་ཀྱི་ནང་གི་སྲོག་ཟུངས་བདུན་ཡང་མཛེ་ནད་ཀྱིས་རྒྱས་ཏེ། ནང་ཐམས་ཅད་རུལ་བར་འགྱུར་བ་དང་། ལུས་ཀྱི་ཕྱི་ཡང་རུལ་ཏེ་རྣགས་ཤིང་རུལ་ནས་དེའི་ནང་དུ་འབུ་ཕྲ་མོ་ཞུགས་ནས་ལུས་ཀྱི་སྤུ་དང་། པགས་པ་དང་། ཆུ་བ་ཕྲ་མོ་དང་། རྩ་ཆེན་པོ་དང་རུས་པ་ལ་སོགས་
པ་ཀུན་གྱི་ནང་དུ་ཞུགས་ཏེ། ལུས་ལ་ཟ་བར་བྱེད་པ་འདི་ནི་མཛེ་ནད་ཅེས་བྱའོ། །ཤ་བཀྲ་གཟི་གུའི་ནད་ནི་གོང་མ་ལྟ་བུའི་ནད་དེ་མ་ཡིན་ཏེ། ཕྱི་རོལ་གྱི་ནད་ཅེས་བྱའོ། །ཡང་ན་མཛེ་ནད་གསོ་དཀའ་བ་རྣམ་པ་བདུན་ཡོད་དེ། རླུང་དང་མཁྲིས་པ་དང་བད་ཀན་སྣ་རེའི་མཛེ་ནད་རྣམ་གསུམ་

དང་། རླུང་དང་མཁྲིས་པ་ལ་སོགས་པ་གཉིས་གཉིས་ནད་འདྲེས་པའི་མཛེ་ནད་རྣམ་གསུམ་དང་། འདུས་པའི་མཛེ་ནད་དང་བདུན་ནོ། །མཛེ་ནད་གང་གིས་བཏབ་ཀྱང་རུང་། རླུང་དང་མཁྲིས་པ་དང་བད་ཀན་གསུམ་ལས་འགྱུར་ཏེ། དེ་གསུམ་ལ་རླུང་ངམ་མཁྲིས་པ་ལྟ་བུ་ལ་སོགས་པ་
ཤས་གང་ཆེ་བ་ལས་མཛེ་ནད་ཀྱི་མིང་དུ་འདོགས་སོ། །དེ་ལ་རླུང་ནད་ལས་མཛེར་གྱུར་པའི་མིང་ནི་ཐོད་པ་ལྟ་བུ་ཞེས་བྱའོ། །མཁྲིས་པ་ལས་གྱུར་པའི་མཛེ་ནད་ནི། ཤིང་ཨུ་དུམྦཱ་རའི་འབྲས་བུ་སྨིན་པ་འདྲའོ། །བད་ཀན་ལས་གྱུར་པའི་མཛེ་ནད་དང་། རྐང་ཤུ་གཉིས་ནི་ཟླུམ་པོ་གོར་གོར་
པོར་འབྱུང་ངོ་། །མཛེ་རི་ཤ་ཞེས་བྱ་བ་ནི་རླུང་དང་མཁྲིས་པ་གཉིས་ལས་འབྱུང་ངོ་། །མཛེ་ནད་པགས་པ་གཅིག་པ་དང་། མཛེ་ནད་དུ་གཏོགས་པ་འབྲུམ་བུ་ཕྲ་མོ་དང་། ཤ་བཀྲ་དང་། འབྲས་བྱེར་བ་དང་། འདི་རྣམས་ནི་རླུང་དང་བད་ཀན་གཉིས་ལས་འབྱུང་ངོ་། །ཤུ་བ་དང་། ཤ་
ཏ་རུ་ཤིང་དང་། པུཎྜ་རཱི་ཀ་དང་། འབྲུམ་བུ་ཙག་ཙག་པོར་འབྱུང་བ་དང་། གཡན་པ་དང་། ཙར་མ་ད་ལ་དང་། འདི་རྣམས་ནི་བད་ཀན་དང་མཁྲིས་པ་གཉིས་ལས་འབྱུང་ངོ་། །རླུང་དང་མཁྲིས་པ་དང་བད་ཀན་གསུམ་འདུས་པ་ལས་མཛེར་གྱུར་པ་ནི་ཀ་ཀ་ན་ཞེས་བྱའོ། །དེ་ལ་མཛེ་
ནད་ཐོད་པ་ལྟ་བུ་དང་། ཤིང་ཐོག་ཨུ་དུམྦཱ་ར་སྨིན་པ་ལྟ་བུ་དང་། ཟླུམ་པོ་གོར་གོར་པོར་འབྱུང་བ་དང་། གསུམ་མཛེ་ཀ་ཀ་ན་དང་། པུཎྜ་རཱི་ཀ་འདྲ་བ་དང་། ཨ་རི་ཤྱའི་ལྕེ་དང་། ཤ་དང་། འདི་བདུན་ནི་མཛེ་ནད་ཆེན་པོ་ཞེས་བྱ་སྟེ་གསོ་དཀའ་བ་ཡིན་ནོ། །མཛེ་ནད་འདི་ལྟ་བུ་འབྱུང་ན།
སྔར་ན་བའི་ནད་ཐབས་ནི་ཤ་མཐངས་རབ་ཏུ་འཇམ། ཡང་ན་རེག་ན་རབ་ཏུ་རྩུབ། ཡང་ན་ནི་ལུས་རབ་ཏུ་རྔུལ། ཡང་ན་ནི་རྔུལ་མེད། པགས་པའི་ཤ་མདོག་མི་སྡུག །ལུས་ཚ། ཕྱོགས་སུ་གཡའ། ཡང་ལུས་ཀྱི་ཤ་མཐངས་བེམ་བེམ་པོར་གྱུར་ཏེ་ཚོར་བའི་བག་མེད། ཁོང་དུ་ཟུག་ཅིང་
ན། ཁོང་དུ་ཐོར་བུ་ལས་རྨར་གྱུར་པ་ཀུན་ལྷག་པར་རབ་ཏུ་ན། མཛེ་ནད་མྱུར་དུ་འབྱུང་ལ་ནད་མི་འབྱང་སྟེ། ཡུན་རིང་དུ་ན། མཛེ་ནད་བྱུང་སྟེ་ཆེར་སྐྱེས་པའི་ཉེན་ཀོར་གྱི་པགས་པ་རྩུབ། ནད་ལྡང་བའི་གཞི་ཆུང་། ཅུང་ཟད་ཙམ་གྱིས་ཀྱང་ནད་ཆེ་བར་འགྱུར་བ་སྤུ་ལངས་ཤིང་འགྲེང་ལ་རེག་ན་བརྩེ།

མདོག་གནག་ལ་འདི་ལྟ་བུར་གྱུར་ན་མཛེ་ནད་གང་ཡང་རུང་བ་དང་པོ་འོང་བའི་ནད་ཐབས་ནི་ནའོ། །དེ་ལ་མི་ཐོད་ལྟ་བུར་འབྱུང་བའི་ནད་ཐབས་ནི་ཤ་མདོག་སྨུག །པགས་པའི་མདོག་རྩུབ། བེམ་བེམ་པོར་གྱུར་ཏེ་ཚོར་བའི་བག་མེད། ལུས་རྩུབ། ལུས་ཐོག་ཐག་ཀུན་
ཏུ་མཛེ་ནད་ཀྱིས་ཁྱབ་པར་གང་། ལུས་ཀུན་གྱི་བ་སྤུ་ལངས་ཤིང་བརྩེ། ཟུག་ཅིང་ན་བའི་ཚབས་ཆེ། ལུས་ཕྱོགས་སུ་གཡའ་བ་ནི་ཆུང་ལ། མཛེ་ནད་ཀྱིས་མྱུར་དུ་མཆེད་ཅིང་ཁྱབ་པར་འགྱུར་བའི་ནད་ཐབས་ནི་ཐོད་པ་ལྟ་བུ་ཞེས་བྱའོ། །མཛེ་ནད་ཤིང་ཏོག་ཨུ་དུམྦཱ་ར་ལྟ་བུའི་ནད་
ཐབས་ནི། བ་སྤུ་པགས་པའི་མདོག་ནི་ཟངས་བཞིན་དམར། རྩ་རྣམས་ནི་སྐྱ་བོར་གྱུར། ལུས་ཀྱི་ཤ་ཁྲག་རུལ། ལུས་ཚལ་ན་བའི་ཚབས་ཆེ། མཛེ་ནད་མྱུར་དུ་འབྱུང་ལ་ལུས་འཇིག་ཅིང་འདྲུལ། འབུ་སྲིན་གྱིས་གང་བའི་ནད་ཐབས་འདི་ལྟ་བུ་ནི། མཛེ་ནད་ཤིང་ཨུ་དུམྦཱ་རའི་འབྲས་
བུ་སྨིན་པ་ལྟ་བུ་ཞེས་བྱའོ། །མཛེ་ནད་ཟླུམ་པོ་གོར་གོར་པོར་འབྱུང་བའི་ནད་ཐབས་ནི། ཕན་ཚུན་དུ་མི་འཕོ་བར་མལ་གཅིག་ན་འདུག །ཉམས་ཤིག་ཤིག་པོ་གློང་བག་ཏུ་འདུག་ལ། ལུས་ལྕི། ལུས་ཀྱི་ཤ་མཐངས་འཇམ། ཤ་མདོག་དཀར་ལ་རྩ་དམར། མཛེ་ནད་ལུས་
ཀུན་དུ་མྱུར་དུ་མཆེད་ཅིང་འགྲོ་བ་མ་ཡིན། མཛེ་ནད་ཐོར་བུ་འདྲ་བར་འབྱུང་བ་དེ་དང་ཕན་ཚུན་འདབ་འབྲེལ་ཞིང་འབྱར་ལ། མཛེའི་ཤུ་བ་གློ་ཞིང་འབུར། ལུས་ཕྱོགས་སུ་གཡའ། རྣག་དང་ཆུ་སེར་ཟག །ནང་འབུས་གང་། ཤུ་བའི་མཐའ་མ་ཀུན་འཇམ་ལ་སེར་པོར་སྣང་བ་ཟླུམ་པོ་གོར་
གོར་པོ་ཤ་སྟག་ཏུ་འདུག་པའི་ནད་ཐབས་འདི་ལྟ་བུ་ནི་བད་ཀན་གྱི་མཛེ་ནད་ཟླུམ་པོ་གོར་གོར་པོར་འབྱུང་བའི་ནད་ཐབས་ཞེས་བྱའོ། །གཡའ་ལ་ཐོར་བུ་རྩ་གནག་པ་ཞིག་བྱུང་། དེ་ལས་ཆུ་སེར་ཟག་པ་ནི་གླང་ཤུ་བའི་རྩར་རྩི་ཞེས་བྱའོ། །མཛེ་ནད་རི་ཤྱའི་ལྕེ་འདྲ་བའི་ནད་ཐབས་ནི་ལུས་རྩུབ་
ལ་ཤུ་བ་འདྲ་བར་འབྱུང་བའི་མཐའ་དམའ། ནང་གནག །དབུས་གློ་ལ་མཐོ། ཟུག་ཅིང་ན། ལུས་ཚ། རྣགས་ཏེ་ལུས་ཚ། ལུས་ཀུན་ན་ཞིང་རྩུབ་པས་གང་ལ། འབུ་ཡང་མང་དུ་ཞུགས་པ་འདི་ནི་རི་ཤྱ་ལ་ལི་འདྲ་བའི་མཛེ་ནད་ཅེས་བྱའོ། །མཛེ་ནད་པགས་པ་གཅིག་པུ་

ཞེས་བྱ་བ་ནི་པགས་པ་གླང་པོ་ཆེའི་ཀོ་བ་འདྲ་བར་རེག་ཅིང་མྱངས་ན་སྲ་ལ་སྟུག་པ་འདི་ནི་མཛེ་ནད་བཞི་ཆར་འོང་བ་ཡིན་ཏེ། ལུས་ལས་རྔུལ་མི་འབྱུང་། མདོག་ནི་ཉ་ལྤགས་འདྲའོ། །འབྲུམ་བུ་ཕྲ་མོ་ཙིག་ཙིག་པོ་འབྱུང་བའི་ནད་ཐབས་ནི་ལུས་ཀྱི་ཤ་མཐངས་རྩུབ་ལ་ལུས་ལ་ཐུག་ཐུག་པོར་བྱུང་
བ་མྱངས་ན་སྲ། གཡའ་ཞིང་རྩུབ་ལ་པགས་པའི་མདོག་ནག་གོ། །ཤ་བཀྲ་ནི་ནང་རྩུབ་ལ་ཕྱི་རོལ་འཇམ། ཕུག་ན་གློག་པ་འབྱུང་། རེག་ན་འཇམ་ལ་པགས་པའི་མདོག་དཀར། ལ་ལ་ནི་ཟངས་ལྟར་དམར་བ་ཡང་ཡོད། ཁ་དོག་ནི་ཤིང་ཀི་ནའི་མེ་ཏོག་འདྲ། ཤ་བཀྲའི་ནད་
འདི་ནི་རོ་སྟོད་དུ་ཕལ་ཆེར་འབྱུང་ངོ་། །འབྲས་བྱུང་སྟེ་དེ་ནས་གཡའ་ཞིང་དམར་པོར་གྱུར་པ་དེ་ནི་མི་འབྱེར་བའི་འབྲས་ཞེས་བྱའོ། །ཞིག་སྟེ་རབ་ཏུ་ན་ལ་ཆེན་པོ་མི་གཡའ་བར། ཐོར་བུ་འདྲ་བའི་ཕོལ་མིག་དམར་པོས་གང་བ་འདི་ནི་རྐང་ལག་ཞིག་པ་ཞེས་བྱའོ། །ཤུ་བའི་ནད་
ཐབས་ནི་རིང་ལ་མཆེད་པ། པགས་པའི་མདོག་ནི་རྩ་དཱུར་བའི་འདབ་མ་ལྟར་ལྗང་སྔོན་ནམ། ཟར་མའི་མེ་ཏོག་ལྟར་རྩ་སྔོ་ལ། ཤུ་བ་གོར་གོར་པོ་འབུར་ལ་ལིང་ལིང་པོར་འབྱུང་། ཅུང་ཟད་གཡའ་བ་ནི་ཤུ་བ་ཞེས་བྱའོ། །རྨ་ཁ་བརྒྱ་པའི་མཛེ་ནད་ནི་ལྷུ་ཚིགས་ལ་འབྱུང་སྟེ། སྔར་ལུས་
ཚ་ཞིང་ན། མཛེ་ནད་འབྱུང་བའི་དྲུང་གི་འཁོར་སྦོམ་ལ་ནང་དུ་ནི་གནག །རྨ་ཁ་མང་དུ་འབྱུང་། རྣགས་ཤིང་རུལ་ཏེ། འབུ་འཇུག་པའི་ནད་འདི་ནི་རྨ་ཁ་བརྒྱ་པའི་མཛེ་ནད་ཅེས་བྱའོ། །མཛེ་ནད་པདྨ་པུཎྜ་རཱི་ཀ་འདྲ་བ་འབྱུང་བའི་ནད་ཐབས་ནི་ལུས་གཡའ་ལ་ཚ་ཞིང་ན། འབུར་འབུར་
པོར་སྐྲང་བའི་མཐའ་དམར། དབུས་དཀར། ཁྲག་གིས་རྒྱས་ཏེ། མེ་ཏོག་པདྨའི་འདབ་མ་ལྟར་རྒྱས་ལ་སྟུག་པོ་དེ་རྡོལ་ཏེ་ཁྲག་དང་ཆུ་སེར་འཛག་པ་འདི་ནི་པུཎྜ་རཱི་ཀ་ལྟ་བུའི་མཛེ་ནད་ཅེས་བྱའོ། །མཛེ་ནད་འབྲུམ་བུ་ལྟ་བུའི་ནད་ཐབས་ནི་ལུས་ཀྱི་ཤ་མཐངས་འབྲུམ་བུ་དཀར་པོ་དང་། སྨུག་
པོས་གང་བ་འདི་ནི་མཛེ་ནད་འབྲུམ་བུ་ལྟ་བུ་ཞེས་བྱའོ། །མཛེ་ནད་གཡན་པའི་ཕོལ་མིག་ལྟ་བུ་ཕྲ་མོ་གནག་ལ་རྩ་སྨུག་པོ་ཕྲ་མོ་མང་པོ་ཤ་སྟག་བྱུང་བ་རབ་ཏུ་གཡའ་ཞིང་ན་ལ་རྣག་ཞུགས་པ་ལྟ་བུ་ནི་རྐུབ་ཚོས་དང་། དཀུ་དོ་དང་། ལག་སོར་གྱི་བར་དང་། གྲུ་མོར་འབྱུང་བ་འདི་ནི་

མཛེ་ནད་གཡན་པ་ཞེས་བྱའོ། །མཛེ་ནད་ཁྲག་གིས་པགས་པ་མྱགས་པ་ཞེས་བྱ་བ་ནི། ལུས་གཡའ་བར་རབ་ཏུ་དྲོ་ཞིང་ཚ། ཐོར་བུ་རེག་མི་བཟོད་པ་དེ་ལྟ་བུ་བྱུང་བ་ལས་ཁྲག་གིས་རྒྱས་ན་པགས་པ་ཕྱོགས་སུ་མྱགས་པ་འདི་ནི་པགས་པ་མྱགས་པའི་མཛེ་ནད་ཅེས་
བྱའོ། །འབྲས་བུ་ཀ་ཀ་ནན་ཏི་ལྟ་བུའི་མཛེ་ནད་སྔར་ནི་མདོག་དམར་ལ་གནག །དེའི་རྗེས་ལ་རབ་ཏུ་ཚ་ཞིང་ན་ནས་མཛེ་ནད་ཐམས་ཅད་ནི་ཚུལ་དང་རྟགས་དང་ལྡན་པ་དེ་ཤ་མདོག་ཀྱང་སྣ་གཅིག་ཏུ་མ་ཟད་དེ། རྣམ་པ་སྣ་ཚོགས་སུ་བཀྲ་བར་སྣང་བ་འདི་ནི་མཛེ་ནད་ཀ་ཀ་ནན་ཏིའི་འབྲས་བུ་
ཞེས་བྱའོ། །ཡང་མཛེ་ནད་ཐམས་ཅད་ཀྱི་ནད་དམིགས་གང་ཡིན་པའི་བྱེ་བྲག་ནི་གོང་དུ་རླུང་དང་མཁྲིས་པ་ལ་སོགས་པ་ནད་གཞི་ཐ་དད་པ་ལས་མཛེ་ནད་དུ་གྱུར་པའི་དམིགས་བསྟན་པ་དང་། མཛེ་ནད་ཀྱི་དབྱིབས་དང་། མདོག་ཇི་འདྲ་བ་དང་། ཇི་ལྟར་ན་བའི་དམིགས་དང་། རླུང་དང་
མཁྲིས་པ་ལ་སོགས་པ་ཤས་གང་ཆེ་བ་དེ་ལྟ་བུ་ལས་མཛེའི་ནད་དམིགས་ཤེས་པར་གྱིས་ཤིག །དེ་ལ་མཛེ་ནད་གསོར་མི་རུང་བའི་ནད་ནི་རླུང་དང་མཁྲིས་པ་དང་བད་ཀན་འདུས་པའི་ནད་གཞི་ཆེན་པོར་གྱུར་ལ། མི་འཚོ་བའི་མཚན་མ་དང་། ལྟས་ངན་པ་ཡང་བྱུང་བ་དང་། མཛེ་རུས་པའི་
ནང་དུ་ཞེན་པ་དང་། རྐང་པ་ལ་ཞེན་པ་དང་། ཁུ་བ་ལ་ཞེན་པ་དང་། འདི་རྣམས་ལྟ་བུ་ནི་གསོ་དཀའ་སྟེ་མི་འཚོའོ། །དེ་ལ་ཚིལ་གྱི་ནང་དུ་ཞུགས་པའི་མཛེ་ནད་ནི། ནད་དེ་ལས་མི་ལ་མི་སྐྱེ་བ་ཙམ་དུ་གསོར་རུང་ངོ་། །མཁྲིས་པའི་ནད་ལས་མཛེར་གྱུར་པ་དང་། རླུང་དང་མཁྲིས་པ་
ལྟ་བུ་གང་ཡང་རུང་བ་སྣ་གཉིས་འདྲེས་པ་ལས་མཛེར་གྱུར་པ་དང་། ཁྲག་དང་ཤ་ལ་མཛེ་ཞུགས་པ་འདི་ལྟ་བུ་ནི་གསོ་དཀའ་བ་ཞེས་བྱའོ། །བད་ཀན་དང་རླུང་ནད་ཤས་ཆེ་བའི་མཛེ་ནད་དང་། པགས་པ་ཉི་ཚེ་ལ་མཛེ་ནད་བྱུང་བ་དང་། རླུང་ངམ། མཁྲིས་པའམ་བད་ཀན་གང་ཡང་
རུང་བ་སྣ་གཅིག་ལས་མཛེ་ནད་དུ་གྱུར་པ་འདི་རྣམས་ལྟ་བུའི་མཛེ་ནད་ནི་གསོ་དཀའ་བ་མ་ཡིན་ནོ། །དེ་ལ་མཛེ་ནད་པགས་པ་ཉི་ཚེ་ལ་བྱུང་བ་ནི། ཟུག་ཐབས་སུ་ན། པགས་པའི་མདོག་མི་སྡུག །པགས་པའི་མདོག་རྩུབ་པ་ཡིན་ནོ། །མཛེ་ནད་ཁྲག་ལ་བབས་པར་གྱུར་ན་ལུས་རྔུལ་ཆེ།

གཉིད་ཆེ་སྐྲང་བ་ཡིན་ནོ། །མཛེ་ནད་ཤ་ལ་བྱུང་ན་རྐང་པ་དང་། ལག་པ་དང་། རྐང་ལག་གི་ཚིགས་སུ་འབྲུམ་བུ་ཙིག་ཙིག་པོ་འབྱུང་ཞིང་རྣགས་ཏེ་རྐང་ལག་གི་ཚིགས་སུ་ནད་ཚབས་ལྷག་པར་ཆེའོ། །མཛེ་ནད་ཚིལ་ལ་བབས་པར་གྱུར་ན་ལག་པ་ཞ །འགྲོ་མི་ནུས། རྐང་པའམ། ལག་
པ་རྣགས་ཏེ་ཞིག་པར་འགྱུར་རོ། །མཛེ་ནད་རུས་པ་རྐང་པ་ལ་བབས་པར་གྱུར་ན་སྣའི་རུས་པ་ཞོམ། མིག་དམར། སྐད་འགགས། མཛེ་ནད་རྡོལ་བའི་རྨ་ཁར་འབུ་འཇུག་གོ། །མཛེ་ནད་ཁུ་བ་ལ་བབས་པར་གྱུར་ན། ཆུང་མ་དང་བུ་ལ་ཡང་འབྱུང་བར་འགྱུར་རོ། །དེ་ལྟ་བས་ན་མདོར་ན་ལུས་
ཀྱི་སྲོག་ཟུངས་བདུན་པོ་ཁྲག་དང་ཤ་དང་། ཚིལ་ལ་སོགས་པར་མཛེ་ནད་གང་ལ་བྱུང་ཡང་རུང་། མཛེ་ནད་ཀྱི་ནད་ཐབས་རིམ་པ་བདུན་དུ་ཤེས་པར་གྱིས་ཤིག །ཤ་བཀྲ་གཟི་གུར་འདུག་པ་ནི་མཛེ་ནད་གཅིག་པུ་ལས་འོངས་ཏེ། དེའི་ནང་ན་ཡང་ཤ་བཀྲ་གཟི་གུ་ཚབས་ཆེན་པོ་མི་སྡུག་པར་
གྱུར་པ་ནི་བསལ་བའི་དཔྱད་དཀའ་སྟེ། ཤ་བཀྲ་སྐམ་པོ་རྣག་ཁྲག་མི་ཟག་པ་ནི་ཁྲག་དང་ཤ་དང་། ཚིལ་ལས་འབྱུང་བར་འགྱུར་རོ། །རླུང་ནད་ལས་ཤ་བཀྲར་གྱུར་པ་ནི། ཤ་མདོག་རྩུབ་ལ་དམར་བའོ། །མཁྲིས་པ་ལས་ཤ་བཀྲར་གྱུར་པ་ནི་ཟངས་མདོག་དང་། པདྨའི་
མདོག་ལྟར་རྩ་དམར། ལུས་ཚ། སྤུ་ཀུན་འབྱིའོ། །བད་ཀན་ལས་ཤ་བཀྲར་གྱུར་པ་ནི་མདོག་དཀར་ལ་སྟུག །ལུས་ལྕི་ཞིང་གཡའ་བ་ཡིན་ནོ། །ནད་ཁྲག་དང་། ཤ་དང་། ཚིལ་དང་། འདི་གསུམ་ལས་ཤ་བཀྲ་གཟི་གུར་གྱུར་པའི་ཤ་མདོག་སོ་སོར་བསྟན་པ་དེ་ལ་
ཤ་བཀྲའི་ནད་རྣམ་གཉིས་གཅིག་ཏུ་གྱུར་པ་ནི་གསོ་དཀའོ། །རླུང་གི་ཤ་བཀྲ་བས་མཁྲིས་པའི་ཤ་བཀྲ་གསོ་དཀའོ། །མཁྲིས་པའི་ཤ་བཀྲ་བས་བད་ཀན་གྱི་ཤ་བཀྲ་གསོ་དཀའོ། །ཤ་བཀྲ་དཀར་པོ་མ་ཡིན་པ་དང་། བ་སྤུ་མ་བྱི་སྟེ། ཕལ་ཆེ་བ་དང་། ཤ་བཀྲ་ནད་འདབ་མ་
འདྲེས་ཏེ། སོ་སོ་ན་འདུག་པ་དང་། གསར་དུ་བྱུང་མ་ཐག་པ་དང་། མེའམ་སྨན་གྱིས་བསྲེགས་པ་འདི་ལྟ་བུ་ནི་གསོ་སླའོ། །འདི་ལྟ་བུ་མ་ཡིན་པ་གཞན་ནི་གསོ་དཀའོ། །མདོམས་དང་། ལག་པ་དང་། མཆུར་བྱུང་ན་གསེར་ཡང་རུང་སྟེ། སྨན་དཔྱད་ཀྱིས་བསྩལ་དཀའོ། །

མཛེ་ནད་འདི་ལྟ་བུས་བཏབ་པའི་མི་ལ་ལུས་རེག་གམ། ཟན་གཅིག་ཟ་འམ། མལ་གཅིག་གམ་སྟན་གཅིག་ལ་འདུག་པ་ལ་སོགས་པ་འདི་ལྟ་བུ་ཀུན་གྱི་ནད་འགོ་བར་འགྱུར་ཏེ། ལྷག་པར་མིག་ནད་དང་། མཛེ་དང་ཤ་བཀྲ་ལ་སོགས་པའི་ནད་ནི་འགོ་
ཞེས་བྱའོ། །མཛེ་ནད་རྣམ་པ་བཅྭ་བརྒྱད་བཤད་པ་རྫོགས་སོ།། །།ལུས་ཀྱི་སྲིན་བུ་སྣ་ཚོགས་བཤད་པ། མིའི་ལུས་ལ་སྲིན་བུ་རྣམ་པ་གཉིས་ཏེ། ཕྱི་དང་ནང་གི་སྲིན་བུའོ། །དེ་ལ་ཕྱི་རོལ་གྱི་སྲིན་བུ་ནི་དྲི་མ་དང་བད་ཀན་དང་ཁྲག་ལ་སོགས་པ་ལས་
འབྱུང་ཞིང་གནས་ཏེ། དེ་ལ་ཡང་མདོར་རྣམ་བཞིའོ། །མིང་གི་བྱེ་བྲག་ཏུ་དབྱེ་ན་རྣམ་པ་ཉི་ཤུ་ཡོད་དེ། དེ་ལ་ཁྲག་ལས་བྱུང་བ་ནི། ཕྱི་རོལ་གྱི་སྲིན་བུ་སྟེ། དབྱིབས་དང་། མདོག་ཀྱང་ཏིལ་འབྲུ་ཙམ་སྐྲ་དང་ལུས་ལ་གནས་པའི་སྲོ་ཤིག་རྣམ་གཉིས་ཡིན་ནོ། །སྲོ་ཤིག་གིས་
ཀྱང་ལུས་ལ་ཐོར་བུ་དང་འབྲུམ་བུ་དང་གཡན་པར་བྱེད་དོ། །ནང་གི་སྲིན་བུ་ནི་བད་ཀན་ལས་གྱུར་ཏེ། དེ་ཡང་མཛེ་ནད་འབྱུང་བའི་རྒྱུར་འགྱུར་རོ། །ནང་གི་སྲིན་བུ་དག་ནི་གཞན་པས་ལྷག་པར་མཛེ་ནད་ཀྱི་གཞིར་འགྱུར་རོ། །སྲིན་བུ་དེ་དག་གི་ཟས་ནི་བུ་རམ་དང་། འོ་མ་ལ་སོགས་
པ་མངར་བག་དང་། ཞོ་དང་ཚ་ལ་སོགས་པ་སྐྱུར་བག་དང་། འབྲས་ཆན་ལ་སོགས་པ་གསར་བག་དང་། ཉ་ལ་སོགས་པ་བད་ཀན་དུ་འགྱུར་བའི་ཟས་ལ་དགའོ། །མི་གཙང་བའི་བཤང་གཅིའི་ནང་ན་གནས་པའི་སྲིན་བུའི་ཟས་འབྲུ་བག་དང་། ཚོད་མ་ལོ་མ་བཏབ་པ་ལ་སོགས་
པའི་བག་ལ་དགའོ། །བད་ཀན་ཕོ་བའི་ནང་ནས་བྱུང་བའི་སྲིན་བུ་ནི་ཆེར་སྐྱེས་པ་དང་། ཁོང་པའི་ནང་ཕོ་བའི་ནང་དང་། ལོང་ཀའི་ནང་ཀུན་ཏུ་འགྲོའོ། །སྲིན་བུ་ལ་ལྕག་འདྲ་བ་ཕྲ་མོ་རིང་པོར་འདུག་གོ། །ལ་ལ་ནི་སྲིན་གྲོལ་མ་འདྲ་བ་འདུག་གོ། །སྲིན་བུ་ཁ་ཅིག་ནི་
མྱུ་གུ་ཁ་འབུས་པ་འདྲ་བ་གྲོལ་མ་དཀའ་རུ་ཡོད་དོ། །སྲིན་བུ་ཁ་ཅིག་ནི་སྐུད་པ་ཕྲ་མོ་རིང་པོ་འདྲ་བར་ཡོད་དོ། །སྲིན་བུ་ཁ་ཅིག་ནི་ཐུང་ལ་རབ་ཏུ་ཕྲ་བ་ཡོད་དེ། དེ་དག་ལ་ལ་ནི་དཀར། ལ་ལ་ནི་རྩ་དམར་བ་ཡོད་དོ། །སྲིན་བུ་དེ་རྣམས་ཀྱི་མིང་སྤྱིར་ནི་རྣམ་པ་བདུན་ཡོད་དེ། རྒྱུ་

མ་ཟ་བ་ཞེས་བྱ་བ་དང་། ལྟོ་བའི་ནང་ན་འཁྲུལ་བ་ཞེས་བྱ་བ་དང་། སྙིང་ལ་ཟ་བ་ཞེས་བྱ་བ་དང་། ཡ་མཚན་ཆེན་པོ་ཞེས་བྱ་བ་དང་། མི་མངོན་པར་རྐུ་བ་དང་། རྩྭ་དཱུར་བའི་མེ་ཏོག་ཅེས་བྱ་བ་དང་། དྲི་ཞིམ་པོ་ཞེས་བྱ་བ་དང་། སྲིན་བུ་འདི་རྣམས་ནི་སྙིང་ལ་ཟ་ཞིང་ཁ་ནས་ཆུ་ཟག་
པར་བྱེད། ཟས་མི་འཇུ་བར་བྱེད། ཁ་ཟས་ཡི་གར་མི་འོང་བར་བྱེད། བརྒྱལ་ཞིང་མི་དྲན་པར་བྱེད། སློན་པར་བྱེད། རིམས་ནད་ཀྱིས་འདེབས། གསུས་པ་ཆེར་སྐྱེ། ལུས་སྐེམ་ཞིང་རིད། སྦྲིད་པ་རྟག་པར་འོང་། ཆམ་པས་འདེབས། དེ་ལ་ཁྲག་རྒྱུ་བའི་རྩའི་ནང་ནས་ཁྲག་
ལས་བྱུང་བའི་སྲིན་བུ་ཕྲ་མོ་ཁྲག་གི་ནང་ན་གནས་ཏེ། ལུས་ཟུངས་ཟླུམ། རྐང་ལག་མེད། མདོག་ཟངས་ཁ་ལྟར་དམར་ལ་རབ་ཏུ་ཕྲ་བ་ཁ་ཅིག་ནི་བལྟར་ཡང་མི་མངོན་ཏེ་སྲིན་བུ་དེ་དག་གི་མིང་ནི་སྐྲའི་རྩ་བ་ཟ་བ་དང་། ལུས་སྤུ་བྱི་བར་བྱེད་པ་དང་། སྤུ་གླིང་ཆགས་པ་དང་། ཨུ་དུམྦཱ་
རའི་འབྲས་བུ་འདྲ་བ་དང་། ཞགས་པ་དང་བཅས་པ་ཞེས་བྱ་བ་དང་། སྲིན་བུ་མཐོང་ཀ་ཞེས་བྱ་བ་དང་། སྲིན་བུ་འདི་དྲུག་གིས་ནི་ལུས་ཀྱི་པགས་པ་ལ་མཛེ་ནད་ཀྱི་ནད་ཐབས་བཞིན་དུ་མཛེ་ལྟར་འབྱུང་བར་བྱེད་དོ། །ཟས་ཞུ་བའི་གནས་ལོང་ཀའི་ནང་ན་མི་གཙང་བ་ལས་བྱུང་བའི་སྲིན་བུ་ཡོད་
དེ། དེ་ཆེར་སྐྱེས་ན་ཐུར་དུ་བཤང་བ་དང་ལྷན་ཅིག་འབྱུང་བར་འགྱུར་རོ། །གལ་ཏེ་སྲིན་བུ་དེ་ཆེན་པོར་སྐྱེས་ན་ཕོ་བའི་ནང་དུ་འཇུག་པར་འགྱུར་ཏེ། ཕོ་བའི་ནང་དུ་འོངས་ན་དེའི་ཚེ་སྒྲེགས་པ་འབྱུང་བ་དང་། དབུགས་འབྱུང་བ་དྲི་མི་ཞིམ་སྟེ་ཕྱི་ས་བཞིན་དུ་མནམ་པར་འགྱུར་རོ། །ཡང་
གཞང་གི་ནང་མི་གཙང་བའི་ཁྲོད་ན་གནས་པའི་སྲིན་བུ་ལྔ་ཡོད་དེ་སྲིན་བུ་ཁམ་གྱིས་ཟ་བ་ཞེས་བྱ་བ་དང་། དལ་གྱིས་འགྲོ་བ་ཞེས་བྱ་བ་དང་། མྱོང་བར་བྱེད་ཅེས་བྱ་བ་དང་། བརྐམ་པ་ཞེས་བྱ་བ་དང་། ལུས་ལ་གནོད་པ་ཞེས་བྱ་བ་དང་། འདི་ལྔ་ཡོད་དེ། དེ་དག་གི་ལུས་
དབྱིབས་དང་ཁ་དོག་ནི་ཆེན་པོ་དང་། ཟླུམ་པོ་དང་། ཕྲ་མོ་དང་། སྦོམ་པོ་དང་། སྨུག་པོ་དང་། སེར་པོ་དང་། དཀར་པོ་དང་། དམར་པོར་འདུག་གོ། །སྲིན་བུ་དེ་དག་ནི་ཐུར་དུ་འཁྲུ་བར་བྱེད་དེ། རྟུག་སྐམ་གྱིས་འདེབས་ཤིང་སྲི་བར་བྱེད། ལུས་སྐེམ་པོར་འགྱུར། ལུས་ཁོང་

རྩུབ། སྐྱ་བོ་རྦབ་རྦབ་པོར་འགྱུར། བ་སྤུ་ལངས་ཤིང་འགྲེང་སྟེ། ཕོ་བའི་དྲོད་ཉམས། གཞང་གི་ནང་གཡའ། གཞང་ཕྱིར་འབྱུང་བར་བྱེད་དོ། །མཛེ་ནད་དང་། སྲིན་བུ་འབྱུང་བའི་ནད་གཞི་བཤད་པ་སྟེ། ལེའུ་བཅུ་བཞི་པ་རྫོགས་
སོ།། །།རླུང་ནད་དུ་གྱུར་པའི་ནད་གཞི་བསྟན་པ་སྟེ། ལེའུ་བཅོ་ལྔ་པ་བཤད་པར་བྱའོ། །རླུང་ནི་མི་འོ་ཅོག་གི་སྲོག་དང་། རྩི་ཤིང་ཐམས་ཅད་ལ་ཕན་པར་འགྱུར་བ་དང་། གནོད་པར་འགྱུར་བའི་རྒྱུ་ཡིན་ཏེ། དེ་བས་ན་ནད་དུ་གྱུར་པའི་རླུང་དང་། ནད་དུ་
གྱུར་པ་མ་ཡིན་པའི་རླུང་དང་། ལུས་ཀྱི་ཁྱད་པར་དུ་འགྱུར་བ་ཞེས་བྱའོ། །དེ་ལྟ་བས་ན་རླུང་འདི་ནི་ལུས་ཐམས་ཅད་པ་ཞེས་བྱའོ། །ཐམས་ཅད་ཀྱི་རང་བཞིན་པ་ཞེས་བྱའོ། །ཐམས་ཅད་ཀྱི་མཚན་ཉིད་ཅེས་བྱའོ། །ཇི་ལ་ཡང་དབང་བྱེད་པས་ན་སྐྱེ་དགུའི་བདག་ཅེས་
བྱའོ། །ཇི་ཡང་འབྱིན་པར་བྱེད་པ་འཛིན་པར་བྱེད། ཐམས་ཅད་དུ་འགྲོ་བ། ཁྱད་པར་དུ་འཇུག་པ། ཐམས་ཅད་དུ་འགྲོ་བ་ལ་ཁྱད་པར་འཇུག་པ། ཀུན་ནས་སྡུད་པ་འཆི་བདག་ཏུ་གྱུར་པ། གཤིན་རྗེར་གྱུར་པ་ལྟ་བུ་ཞེས་བྱའོ། །དེ་བས་ན་ནད་སློང་བའི་རླུང་
ནད་ངན་པར་མི་འགྱུར་བར་ནན་ཏན་གྱིས་ཤིག །དེ་ཡང་ནད་དམིགས་ཤེས་པར་བྱ་བའི་ལེའུ་ལས་རླུང་གི་བྱེ་བྲག་མདོ་དང་། ཞིབ་ཏུ་བསྟེན་པ་ནི། ན་བ་མེད་ཅིང་ཐ་མལ་པར་གནས་པའི་ཚེ། རླུང་གི་རང་བཞིན་ལས་གང་དང་གང་བྱེད་པ་དང་། རླུང་དེར་གྱུར་ན་ནད་ཅི་དང་ཅི་
སློང་བ་བཤད་པ་དང་། ཡང་ལྟག་པའི་ནད་དམིགས་ཀྱི་བྱེ་བྲག་བཤད་པའི་ནང་ནས་རླུང་གི་མིང་སོ་སོར་བཏགས་པ་དང་། རླུང་གང་དང་གང་ན་གནས་པ་དང་། ལུས་ལ་རླུང་ཐ་དད་པ་རྣམ་ལྔ་ཡོད་པ་གང་ནས་གང་དུ་རྒྱུ་བ་དང་། རླུང་རྣམ་པ་ལྔ་ལས། ཅི་དང་ཅི་བཤད་པ་
རྣམས་ཀྱང་ཤེས་པར་གྱིས་ཤིག །སྐབས་འདིར་ནི་རླུང་ནད་དུ་གྱུར་པ་ན་ནད་སློང་བར་བྱེད་པའི་ནད་སློང་བའི་གཞི་དང་མཚན་ཉིད་དུ་དབྱེ་བ་ནི་འདིར་བསྟན་པར་བྱའོ། །དེ་ལ་རླུང་ནད་ནི་རླུང་ནད་དུ་གྱུར་པའི་བག་བྱས་པའི་ལུས་ཀྱི་སྲོག་ཟུངས་ཟད་པར་བྱེད་པའི་རླུང་ནད་ལངས་

ནས། ནང་གྲོལ་གྱི་སྦུ་གུ་དང་། རྩ་ཆེན་པོའི་ནང་དུ་རླུང་ནད་ཕན་གནོད་གཞན་ཞིག་གིས་ཁོང་པའི་ནང་གང་བར་འགྱུར་བ་དེ་ལྟ་བུས་ནད་དེའི་ཐོག་ཏུ་བསྣན་ཏེ། ཡོག་ཅིང་ཁེབས་ནས་རླུང་ནད་དུ་འགྱུར་རོ། །དེ་ལ་རླུང་ནད་ཞུ་བའི་གནས་ཕོ་བ་མན་ཆད་དུ་ཞུགས་ཏེ་ན་ན་ལྟོ་སྦོ་ཞིང་ན།
རྒྱུ་མའི་ནང་ཁྲུ་ལུ་ལུ་ཟེར། ཐུར་དུ་བཤང་བ་འོང་དུ་མི་བཏུབ། ཆུ་སོར་རྡེའུ་ཆགས་ཏེ་རྡེའུ་སྐྱེ། གཞང་འབྲུམ་སྐྱེད། རྒྱབ་ན་ཞིང་རྐང་པ་ན། རོ་སྨད་མན་ཆད་དུ་དམིགས་སུ་རབ་ཏུ་ཟུག་ཅིང་ནའོ། །ཟས་མ་ཞུ་བའི་གནས་ཕོ་བ་ཡན་ཆད་དུ་ཞུགས་ཏེ་ན་ན་སྐོམ་དད་ཆེ། སློན་བྲོ།
དབུགས་མི་བདེ། ལུད་པ་ལུ། སྦོ་ཞིང་འཁྲུ། མགུལ་པ་དང་། གྲེ་བ་མི་བདེ། སྒྲེགས་པ་མང་ཞིང་ཟས་མ་ཞུ་བའི་སྒྲེགས་པ་འབྱུང་ངོ་། །དེ་ལྟར་ལྟོ་བ་ཡན་ཆད་དུ་རླུང་ནད་ལངས་ཏེ་ན་ན། རྣ་བ་ལ་སོགས་པ་དབང་པོ་རྣམས་མི་བདེ་ལ་མི་གསལ་ཞིང་རྟུལ་ལོ། །པགས་
པ་ལ་རླུང་ཞུགས་ན་པགས་པ་འགགས་ཤིང་རྩུབ་པའོ། །ཁྲག་ལ་རླུང་ནད་ཞུགས་ན་རབ་ཏུ་ན། གཉིད་ཆེ། ཤ་མདོག་དམར་ལ་ཁ་དོག་མི་སྡུག་པར་འགྱུར། ཐོར་བུ་འབྱུང་། ཁ་ཟས་ཟོས་པ་རྣམས་ལྟོ་ན་རེམ་རེམ་པོར་འདུག །ཡི་ག་འཆུ། སྐེམ་པོར་འགྱུར།
མགོ་འཁོར། ཚིལ་དང་ཤ་ལ་རླུང་ཞུགས་ན་རྨེན་བུ་ལྟ་བུར་འབྱུང་། རབ་ཏུ་ཟུག་ཅིང་ན། རྩུབ་ཅིང་ངལ་སྐྱེན། ལུས་ལྕི། ལུས་ཀྱི་ལྷུ་ཚིགས་ཡན་ལག་རེངས། ཁུ་ཚུར་དང་དབྱིག་པས་ཕོག་པ་སྙམ་བྱེད་དོ། །རུས་པ་ལ་རླུང་ནད་ཞུགས་ན་བརླ་དང་བྱིན་པ་རྗེ་ངར་རབ་ཏུ་
རྐང་ཟུག་ཕྱོགས་སུ་ན། རུས་པའི་ཚིགས་སུ་ན། ཉམས་སྟོབས་རབ་ཏུ་ཟད་པར་བྱེད་དོ། །རྐང་ལ་རླུང་ནད་ཞུགས་ན། རུས་པའི་ནང་སྟོང་པར་འགྱུར། གཉིད་མེད་རྒྱུན་དུ་ནའོ། །ཁུ་བ་ལ་རླུང་ནད་ཞུགས་ན་ཡང་ན་ཁུ་བ་མྱུར་དུ་འབྱུང་བར་འགྱུར་རོ། །ཡང་ན་ཁུ་བ་འབྱུང་དུ་
མི་རུང་བའམ། ཁུ་བའི་མདོག་གཞན་དུ་འགྱུར་བར་བྱེད་དོ། །དེ་དང་འདྲ་བར་བུད་མེད་ཀྱི་མངལ་དུ་ཁུ་བ་གནས་པ་ཡང་དེ་དང་འདྲ་བར་འགྱུར་རོ། །རྩ་ལ་རླུང་ནད་ཞུགས་ན་རྩ་སྦོ་བ་དང་། ནང་སྟོང་པར་འགྱུར་རོ། །ཆུ་བ་ལ་རླུང་ཞུགས་ན་དཔྱི་ནས་བརླར་ཟུག་ཅིང་ན་བ་དང་། གླང་

ཆངས་པ་དང་། ད་རྒན་གྱི་ནད་དུ་འགྱུར་རོ། །རུས་པའི་ཚིགས་སུ་རླུང་ནད་ཞུགས་ན། མྱངས་པ་ན་རྐྱལ་པ་རླུང་གིས་གང་བ་བཞིན་དུ་སྐྲང་། བརྐྱང་བསྐུམ་བྱས་ན་ནའོ། །ལུས་ཐམས་ཅད་ལ་རླུང་ནད་ཞུགས་ན་ཟུག་ཅིང་ན་ལ་ཆག་པ་སྙམ་བྱེད། རེངས་
ཤིང་རྐང་ལག་ཕྱིར་གཡབ་པར་འདོད། ཚོར་བའི་བག་མེད། བེམ་བག་ཏུ་འགྱུར། ཚིགས་འཁུམས་པ་དང་། འདའ་བར་འགྱུར་རོ། །ནམ་ཚོང་ཆེན་པོའི་ནང་ཀུན་དུ་རླུང་ནད་ཡང་དང་ཡང་ཞུགས་ཏེ་འགྲོ་བ་ན་ལུས་འགུལ་ཞིང་འདར་ལ་ནད་འཇུག་པར་བྱེད་དེ། དེ་ལ་མིང་ནི་
ལུས་ལ་ནད་འཇུག་པ་ཞེས་བྱའོ། །རོ་སྨད་མན་ཆད་དུ་རླུང་ནད་འགགས་པ་དང་། གྱེན་དུ་སོང་ན་སྙིང་ལ་གནས་ཏེ། སྦུ་གུར་ཞུགས་ནས་སྙིང་དང་། ཀླད་པ་དང་། མུར་འགྲམ་དུ་ཟུག་ཅིང་ན། དེ་བཞིན་དུ་ལུས་ཐམས་ཅད་གཞུ་ལྟར་གུག་སྟེ། སྒུར་པོར་འགྱུར། དབུགས་དང་
རྔམ་པ་མི་བ