Luận tạng Tây Tạng (Tengyur) — Tập 199

དེ་བར་འཐོན། ཧར་མིག་ཏུ་ལྟ་ཞིང་འབྱེད་འཛུམས་མི་ཤེས། ཕུག་རོན་བཞིན་དུ་འཁུན། དྲན་པ་ཉམས་པར་འགྱུར་ཏེ། དེའི་མིང་ནི་གཞན་དབང་ཅན་ཞེས་བྱའོ། །སློབ་དཔོན་གཞན་དག་ན་རེ། ནད་དེའི་མིང་ཨ་བ་ད་ན་ཀ་ཞེས་བྱའོ་ཞེའོ། །གལ་ཏེ་རླུང་ནད་གཞན་
དབང་ཅན་དེ་སྙིང་གི་གནས་དང་། རེ་ཞིག་བྲལ་བ་ལྟ་ན་ནི། སྐད་ཅིག་ནད་མེད་ཅིང་བདེ་ལ། རླུང་དེ་སླར་སྙིང་ལ་ཞུགས་ན། ཡང་ནད་སྔ་མ་ལྡང་བར་འགྱུར་རོ། །བུད་མེད་བུ་བྱུང་བའི་འོག་ཏུ་ཁྲག་ཤས་ཆེར་འབྱུང་བའི་རྗེས་ལ་རླུང་ནད་གཞན་དབང་གི་ནད་བྱུང་བའམ། ཡང་ན་སྣད་
པའི་དབང་གིས་རླུང་ནད་བྱུང་ན་ནི་གསོ་དཀའ་བ་ཡིན་ནོ། །མགྲིན་པའི་གཡས་གཡོན་གྱི་འཕར་རྩ་གཉིས་ཀྱི་ནང་དུ་རླུང་ཞུགས་ན་ནི་ནམ་ཚོང་ཡན་ཆད་གུག་ཅིང་རྩ་རེངས་ཏེ་གཡོ་བར་གྱུར་པ་དང་། དེ་བཞིན་དུ་རྩ་ཆེན་པོ་གཞན་རྣམས་སུ་ཞུགས་ཏེ་ལུས་ཐམས་ཅད་ཁྱབ་པ་དེའི་ཚེ་ནི་ལུས་
ཐམས་ཅད་ཀྱང་གཞུ་ལྟར་འཁུམས་པར་འགྱུར་རོ། །རླུང་ནད་དེའི་ཤུགས་དྲག་ཏུ་སྐྱེ་ན་ནི། ཡན་ལག་ཆག་པ་སྙམ་བྱེད་ཅིང་ན། ཧར་མིག་ཏུ་ལྟ་ཞིང་འབྱེད་འཛུམས་མི་ཤེས། གླལ་བདེ་བར་མི་ཕྱིན། སོ་འཁྲིག །སྟོད་དུ་སྐྱུག །རྩིབ་ལོགས་གཉིས་སུ་ཟུག་ཅིང་ན། སྐད་

གསལ་པོར་མི་ཕྱིན། འགྲམ་པ་དང་། རྒྱབ་ཀྱི་སྒལ་ཚིགས་དང་མགོ་བོ་རྣམས་རེངས་ཤིང་བསྒུལ་དཀའ་བ་ཡིན་ཏེ། རླུང་དེའི་མིང་ནི་ད་རྒན་ལུས་ནང་དུ་གུག་པ་ཞེས་བྱའོ། །དེ་ལ་ད་རྒན་ཕྱིར་དགྱེ་བའི་རླུང་གི་མཚན་མ་ཡང་དེ་འདྲ་སྟེ། ཁྱད་པར་དུ་ལུས་ཕྱིར་གྱེད་ཅིང་རླུང་
གིས་མགོ་རྒྱབ་ཏུ་འདྲེན་ལ། བྲང་མདུན་དུ་འབུར། གཉའ་བ་སོས་འབྲད་པ་སྙམ་སེམས། བཞིན་མདོག་འགྱུར། ཚབས་ཆེར་རྔུལ་འབྱུང་། ཡན་ལག་ཐམས་ཅད་ལྷོད་པར་གྱུར་པ་དེ་ནི། དེ་རྒན་གྱི་ནད་ལུས་ཕྱིར་དགྱེ་བ་ཞེས་བྱའོ། །སློབ་དཔོན་ཁ་ཅིག་ན་རེ་རླུང་
དེའི་མིང་ནི་གཞུ་ལྟར་རེངས་པ་ཞེས་བྱའོ་ཞེའོ། །ཡང་སློབ་དཔོན་ཁ་ཅིག་ན་རེ་དེའི་མིང་ནི་རླུང་ནད་ཤུགས་དྲག་པོ་ཞེས་བྱའོ་ཞེས་ཟེར་རོ། །གནད་ཀྱི་སྟེང་དུ་རྨ་འབྱུང་སྟེ་དེར་རླུང་ལ་སོགས་པའི་ནད་གཞི་གཞན་དག་རླུང་གིས་ཕུལ་ཏེ། རྐང་པ་ཡན་ཆད་མགོ་བོ་མན་ཆད་ལུས་
ཀུན་ནད་ཀྱིས་ཁྱབ་པར་བྱས་ཏེ་དེ་ཡང་སྦོམ་པ་དང་། ལུས་སྐྱ་བོ་རྦབ་རྦབ་པོར་གྱུར་པ་ནི་རྨའི་ད་རྒན་ཞེས་བྱ་སྟེ་སྤང་བར་བྱའོ། །གོང་དུ་བཤད་པའི་རླུང་ནད་ལྔ་པོ་དེ་དག་ཐམས་ཅད་ཀྱང་རླུང་གི་ཤུགས་དང་བྲལ་ན་ནི་ནད་མེད་ཅིང་བདེ་བར་འགྱུར་རོ། །ལྕེ་ལ་སོ་ཤིང་ལ་སོགས་པས་
བཞར་དྲགས་པ་དང་། བཅའ་བ་སྐོམ་པོ་སྲ་བ་བཅས་པ་དང་། ཁུ་ཚུར་དང་རྡོ་བ་ལ་སོགས་པས་སྣད་པའི་དབང་གིས་འགྲམ་པའི་རྩ་བའི་རླུང་འཁྲུགས་ཏེ། འགྲམ་པ་གཡས་གཡོན་གཉིས་ཀྱི་རྩ་བ་ནས་བསྐྱོད་ཅིང་ཉམས་པར་བྱས་ཏེ། ཁ་རྟག་ཏུ་གདངས་པ་འམ་ཡང་
ན་འཛུམས་པར་བྱེད་དེ། བཟའ་བ་དང་། སྨྲ་བ་ཐམས་ཅད་ཀྱང་ཤིན་ཏུ་དཀའ་བ་དེ་ནི་འགྲམ་པ་རང་གི་གནས་ནས་ཉམས་པ་ཞེས་བྱ་བའི་རླུང་ནད་ཅེས་བྱའོ། །ལྕེའི་རྩེ་མོ་ན་སྨྲ་བར་བྱེད་པའི་རྩ་ཡོད་དེ། དེའི་ནང་དུ་རླུང་ཞུགས་ནས། ལྕེ་ལྡིབས་ཤིང་ལྐུགས་པར་འགྱུར་
ཏེ་བཟའ་བ་དང་བཏུང་བའི་རོ་ཡང་མི་ཚོར། སྨྲ་ཡང་མི་ནུས་པ་དེ་ནི་ལྕེ་ལྡིབས་པ་ཞེས་བྱ་བའི་རླུང་ནད་ཅེས་བྱའོ། །རླུང་ནད་ཀླད་པའི་གཞོགས་ཕྱེད་ན་བ་ཞེས་བྱ་བ་ནི། མགོས་ཁུར་ཆེན་པོ་ཁྱེར་བ་དང་། དགོད་དྲགས་པ་དང་། ཚིག་དྲག་ཏུ་སྨྲ་བ་དང་། དེ་བཞིན་དུ་སྡངས་

པ་དང་། གདོང་ཡོན་པོར་གཅུས་ནས་སྦྲིད་པ་གཏོང་བ་དང་། གཞུ་སྲ་སྟེ་མ་འདྲེན་པ་དང་། མལ་སྟན་མཐོན་དམན་མི་སྙོམས་པ་ལ་ཉལ་བ་དང་། བཅའ་བ་སྐམ་པོ་སྲན་ཏེ་མ་འཆའ་བ་དང་། དེ་བཞིན་དུ་རླུང་ནད་སྐྱེས་པའི་བག་བསྟེན་པས་རླུང་
འཕེལ་ཏེ། རོ་སྟོད་དུ་ཞུགས་ནས་ཁ་གདོང་གི་གཞོགས་ཕྱེད་ཡོན་པོར་བྱས་ཏེ། དེ་སྨྲ་བ་དང་། དགོད་པ་དང་། ལྟ་བ་རྣམས་ཀྱང་ཡོ་བར་བྱེད་དོ། །དེས་ན་ནད་པའི་མགོ་བོ་ཡང་འགུལ་ཞིང་དམ་པར་བྱེད་དོ། །དེ་བཞིན་དུ་སྐད་མི་ཕྱིན་པ་དང་། ཧར་མིག་ཏུ་ལྟ་ཞིང་འབྱེད་
འཛུམས་མི་ཤེས་པ་དང་། སོ་འགུལ་བ་དང་། སྐད་འཛེར་བ་དང་། སྒྲ་མི་ཐོས་པ་དང་། སྦྲིད་པ་མི་ཐོན་པ་དང་། དྲི་མི་ཚོར་བ་དང་། དྲན་པ་ཉམས་པ་དང་། རྨོངས་པ་དང་། གཉིད་ཀྱི་ནང་དུ་སྡངས་པ་དང་། མཆིལ་མ་གཡོན་ཕྱོགས་སུ་འདོར་བ་དང་། ལྟ་བ་ཡང་མིག་
ཡ་གཅིག་ལྟ་ཞིང་འཛུམས་པ་དང་། ནམ་ཚོང་ཡན་ཆད་མི་བཟད་པར་ན་བ་ཡིན་ནོ། །སློབ་དཔོན་ཁ་ཅིག་ན་རེ་ལུས་ཀྱི་རོ་སྨད་ཀྱི་གཞོགས་ཕྱེད་ཀྱང་དེ་ལྟར་ན་བ་ཡོད་ཅེས་ཟེར་རོ། །ཡང་གཞན་དག་ན་རེ་ད་རྒན་ཕྱོགས་གཅིག་ཏུ་གྱུར་པ་ཡང་དེའི་མཚན་ཉིད་དང་ལྡན་པ་ཡིན་ནོ་ཞེའོ། །
རླུང་ནད་ཁྲག་ལ་བརྟེན་ཏེ། སྐེ་རྩའི་ནང་དུ་ཞུགས་ནས་དེས་རྩ་རྣམས་རྩུབ་པ་དང་། ནད་དང་བཅས་པ་དང་། མདོག་གནག་པར་བྱེད་དེ། དེ་ནི་རྩ་འཛིན་པའི་རླུང་ནད་ཅེས་བྱ་སྟེ་གསོར་མི་རུང་ངོ་། །རླུང་གིས་ལུས་ཀྱི་གཞོགས་ཕྱེད་བཟུང་སྟེ་དེས་རྩ་དང་རྒྱུས་པ་བསྐམ་པར་བྱས་ནས།
གཞོགས་ཕྱེད་གང་ཡང་རུང་བ་ལ་གནོད་པར་བྱེད་དོ། །ཚིགས་ཀྱི་བོགས་རེ་ཡང་བྱེ་ཞིང་ལྷོད། གཞོགས་ཕྱེད་ཀྱི་ལས་ལ་སྦྱོར་མི་ནུས། ཚོར་བ་མེད་ཅིང་བེམ་བེམ་པོར་གྱུར་པ་ཡིན་ཏེ། དེ་ནི་སྨན་པ་ཁ་ཅིག་ན་རེ། ཡན་ལག་ཕྱོགས་གཅིག་གི་ནད་ཅེས་བྱའོ་ཞེས་ཟེར་རོ། །ཡང་
སྨན་པ་གཞན་དག་ན་རེ་གཞོགས་ཕྱེད་སྐམ་པ་ཞེས་ཟེར་རོ། །ལུས་ཐམས་ཅད་ལ་བརྟེན་པའི་རླུང་ནད་ཀྱང་ལུས་ལ་ཚོར་བ་མེད་པ་ལ་སོགས་པ་མཚན་མ་གོང་མ་དང་འདྲ་སྟེ། དེ་ནི་ཡན་ལག་ཐམས་ཅད་ཀྱི་ནད་ཅེས་བྱའོ་ཞེས་པས་དེ་རླུང་ནད་ཉི་ཚེ་གཞོགས་ཕྱེད་སྐམ་པ་ནི་གསོ་དཀའ་

བ་ཡིན་ནོ། །ནད་གཞི་གཞན་དང་འདྲེས་པས། གཞོགས་ཕྱེད་སྐམ་པ་ནི་ཤིན་ཏུ་དཀའ་བས་གསོར་མི་རུང་ངོ་། །གློ་གཅོང་ཟད་བྱེད་ཀྱིས་གཞོགས་ཕྱེད་སྐམ་པ་ནི་སྤང་བར་བྱའོ། །རླུང་ནད་མ་ཞུ་བ་དང་། བད་ཀན་དང་འདྲེས་ནས་རྩའི་རྒྱུན་སྲང་ཆོད་དེ། དེས་ལུས་ཐམས་ཅད་ཤིང་
བཞིན་དུ་རེངས་པར་བྱས་ནས། བརྐྱང་བསྐུམ་མི་ནུས་པ་ནི་ཤིང་ལྟར་རེངས་པའི་རླུང་ནད་ཅེས་བྱའོ། །རླུང་ནད་ཕྲག་པའི་རྩ་ལ་ཞུགས་པ་ནི་ཕྲག་པའི་རྩ་འཁུམས་ཏེ་ལག་ངར་མི་ཐེག་ཅིང་། འགུལ་བསྐྱོད་མི་ནུས་ཏེ། དེའི་མིང་ནི་དཔུང་པ་འཇས་པའི་རླུང་ནད་ཅེས་བྱའོ། །རླུང་
གིས་ལག་པའི་མཐིལ་ཕྱོགས་སོར་མོ་དང་འབྲེལ་པའི་ཆུ་བ་རྣམ་པར་འཁུམས་ཏེ། ན་བས་ཉམ་ཐག་ཅིང་ལག་པ་གཡོ་བ་ལ་སོགས་མི་ཤེས་པ་སྟེ། དེའི་མིང་ནི་རླུང་ནད་བི་ཤ་ཙེ་ཞེས་བྱའོ། །གང་གི་ཚེ་རླུང་རྐེད་པའི་གནས་སུ་བརྟེན་ཏེ་བརླའི་ཆུ་བའི་ནང་དུ་ཞུགས་ནས་འཐེང་བར་
འགྱུར་བ་དེ་ནི་རླུང་ནད་འཐེང་པོ་ཞེས་བྱའོ། །དེ་ལྟར་རླུང་དེ་བརླའི་ཆུ་བ་གཉིས་ཀ་ལ་ཞུགས་པ་ནི་འཕྱེ་བར་འགྱུར་ཏེ། དེའི་མིང་ནི་རླུང་ནད་འཕྱེ་བོ་ཞེས་བྱའོ། །ཡང་རླུང་ནད་འགྲོ་བར་རྩོམ་པ་ན་མི་བརྟེན་ཞིང་འདར་བ་དང་། འཐེང་བ་ལྟར་འགྲོ་བ་དེ་ནི་ཚིགས་ཀྱི་འབྱོར་མཚམས་
དབྱེ་བ་ཡིན་ཏེ། དེ་ནི་སྲན་མ་ལྟར་འཐེང་བ་ཞེས་བྱ་བའི་རླུང་ནད་ཅེས་བྱའོ། །ཅུང་ཟད་མ་ཞུ་བ་དང་ཅུང་ཟད་ཞུ་བའི་སྟེང་དུ་ཟས་ཟོས་པ་དང་། དྲོ་གྲང་འདྲེས་པར་ཟོས་པ་དང་། སྐམ་པ་དང་རློན་པ་འདྲེས་མར་བསྟེན་པ་དང་། དེ་བཞིན་དུ་ཁ་ཟས་ལྕི་བ་དང་། སྣུམ་ཆེས་པ་
བསྟེན་པ་དང་། འདུག་གནས་མི་བདེ་བ་ལ་འདུག་པ་དང་། མི་ནུས་བཞིན་དུ་ལས་རྩོམ་པ་དང་། ཉིན་པར་ཉལ་བ་དང་། མཚན་མོ་གཉིད་མི་ལོག་པ་དང་། རྒྱུ་དེ་དག་གིས་བད་ཀན་དང་ཚིལ་གཉིས། རླུང་དང་། མཁྲིས་པ་གང་ཡང་རུང་བ་དང་། བཅས་པར་འཁྲུགས་
ནས་མ་ཞུ་བ་ཚབས་ཆེར་སོགས་ཏེ། དེས་ལུས་ཉམ་ཐག་ཅིང་བད་ཀན་ཚོར་བ་མེད་པའི་བརླའི་རུས་པའི་ནང་དུ་ཞུགས་ནས་བརླ་རེངས་ཤིང་འདེགས་མི་ནུས་ལ་གྲང་བ་དང་། ཚོར་བ་མེད་པ་དང་། གཞན་གྱི་བརླ་སྙམ་སེམས་པ་དང་། ལྕི་བ་དང་། མི་བཟད་པར་ན་བ་དང་། འགྲོ་

མི་ནུས་པ་དང་། ཡན་ལག་བརྡུངས་པ་སྙམ་སེམས་པ་དང་། བདོ་བག་ཏུ་འདུག་པ་དང་། སྙོམ་བག་ཏུ་སྐྱུགས་བྲོ་བ་དང་། ཡི་ག་འཆུས་པ་དང་། རིམས་ཀྱིས་འདེབས་པ་དང་། རྐང་པ་སྒྱིད་ཞན་ཅིང་ཞིག་པ་སྙམ་སེམས་པ་དང་། རྐང་པ་འདེགས་
པ་དཀའ་བ་དང་། ཚོར་བ་མེད་ཅིང་བེམ་བེམ་པོར་འདུག་པ་དང་། མཚན་མ་དེ་དག་དང་ལྡན་པའི་རླུང་ནད་ནི་བརླ་རེངས་པ་ཞེས་བྱའོ་ཞེས་བཤད་དོ། །སྨན་པའི་སློབ་དཔོན་གཞན་དག་ན་རེ་ཕྱུག་པོའི་རླུང་ནད་ཅེས་བྱའོ་ཞེས་ཟེར་རོ། །པུས་མོའི་དབུས་སུ་རླུང་དང་ཁྲག་འདྲེས་ཏེ་ཞུགས་
ནས་པུས་མོའི་སྟེང་དུ་སྐྲངས་ཏེ་ཟུག་གཟེར་ཆེ་བ་ཅེ་སྤྱང་གི་མགོ་ལྟར་སྦོམ་པར་གྱུར་པ་ནི་རླུང་ནད་ཅེ་སྤྱང་གི་མགོ་ལྟ་བུ་ཞེས་བྱའོ། །རྐང་པ་བབ་ཅོལ་དུ་བོར་བའམ། ཡང་ན་ཆད་ཅིང་ངལ་བ་ལས་རླུང་སྐྱེས་ཏེ་རབ་ཏུ་ཟུག་ཅིང་ན་ལ་ལོང་མོ་ལ་བརྟེན་པ་ནི་རླུང་ནད་ཚེར་མ་ལྟ་བུ་ཞེས་བྱའོ། །རྐང་
པའི་རྟིང་པ་དང་སོར་མོར་འབྲེལ་པའི་ཆུ་བ་ལ་རླུང་གིས་གནོད་ཅིང་ཉམ་ཐག་པར་བྱས་ཏེ་བརླ་ནས་ཡར་འཇུག་ཅིང་འགྲོ་བ་དེ་ནི་རླུང་ནད་གྲི་ཏྲ་སི་ཞེས་བྱའོ། །ཞེས་བཤད་དོ། །གོང་དུ་སྨོས་པའི་རླུང་ནད་བི་ཤ་ཙེ་ཞེས་བྱ་བ་ལག་དར་གྱི་ནད་དང་། གྲི་ཏྲ་སི་ཞེས་བྱ་བའི་བརླའི་ནད་དེ་གཉིས་
ཀ་ཡང་ཟུག་གཟེར་ཤིན་ཏུ་དྲག་པ་ཡིན་ཏེ་དེ་གཉིས་ཀྱི་མིང་ནི་རླུང་ནད་ཁ་ལི་ཏི་ཞེས་བྱའོ། །རྐང་པ་གཉིས་བརྩེ་སྟེ་ཚོར་བ་བེམ་བེམ་པོར་གྱུར་པ་ནི། བད་ཀན་དང་རླུང་འཁྲུགས་པ་ཡིན་ཏེ། དེ་ནི་རྐང་པ་བརྩེ་བའི་རླུང་ནད་ཅེས་བྱའོ། །གང་གི་ཁྲག་དང་མཁྲིས་པ་དང་རླུང་འཁྲུགས་པས་
རྐང་པ་ཚ་འུར་འུར་པོར་འདུག་པ་དང་། འཆག་པ་དང་འགྲོ་བའི་དུས་སུ་ཆེར་ཚ་བ་དེ་ནི་རླུང་ནད་རྐང་པ་ཚ་བ་ཞེས་བྱའོ། །རླུང་གི་ནད་གཞི་བཤད་པའི་ལེའུ་སྟེ་བཅོ་ལྔ་པ་རྫོགས་སོ།། །།དེ་ནས་དྲེག་ནད་ཀྱི་ནད་གཞི་བཤད་པའི་ལེའུ་བརྗོད་པར་བྱ་སྟེ། དེ་ལ་
ཁྲག་འཁྲུགས་པར་བྱེད་ཅིང་ཚ་བ་སྐྱེད་པའི་ཟས་དང་། སྲོག་ཆགས་ཆུ་ན་སྤྱོད་པའི་ཤ་དང་། རྒྱ་སྲན་དང་། མོན་སྲན་སྡེའུ་དང་། འབྲས་ནིས་པ་དང་། སྐྱུར་དང་། ཆང་དང་། དར་བ་སྐྱུར་པོ་དང་། ཞོ་སྐྱུར་པོ་ལ་སོགས་པ་བསྟེན་པ་དང་། གང་ཡང་མི་མཐུན་པའི་

རྫས་ཡུལ་སེར་ཆེ་བ་ནས་བྱུང་བའི་ཤ་དང་། མོན་སྲན་གྲེའུ་དང་། སྦྲང་རྩི་ལྷན་ཅིག་ཟོས་པ་དང་། འོ་མ་དང་འབྲུའི་མྱུ་གུ་ལྷན་ཅིག་ཟོས་པ་དང་། སྦྱོར་བ་དེ་དག་ལོག་པར་བསྟེན་པ་དང་། འདི་བཞིན་ཉིན་པར་གཉིད་ལོག་པ་དང་། མཚན་མོ་གཉིད་མི་ལོག་བ་དང་། ཉལ་པོ་དྲགས་
པ་དང་། སྐྱིད་དེ་བ་འགྲོ་བ་ལ་སོགས་དྲག་ཤུལ་མ་མྱོང་བ་དང་། ལུས་སྣད་པ་དང་ལུས་མ་དག་པ་དག །སྐྱོན་དེ་རྣམས་ཀྱིས་མི་དག་གི་ཁྲག་འཁྲུགས་པ་དང་། གཞན་ཡང་རླུང་སྐྱེ་བའི་ཟས་བསྟེན་པས་རླུང་ལམ་གཞན་དུ་སོང་སྟེ་ཁྲག་དང་རླུང་གཉིས་གཅིག་ལ་གཅིག་གནོད་པར་
བྱེད་ཅིང་མི་བདེ་བ་སྐྱེད་པ་ཡིན་ཏེ། དེའི་མིང་ནི་ཕྱུག་པོའི་ནད་ཅེས་ཀྱང་བྱ། འཐེང་བའི་ནད་ཅེས་ཀྱང་བྱ། བ་ས་ལ་ཞེས་ཀྱང་བྱ། རླུང་དང་ཁྲག་འདྲེས་པའི་དྲེག་ནད་ཅེས་ཀྱང་བྱ་སྟེ། དེ་དག་ནི་མིང་གི་རྣམ་གྲངས་སོ། །ནད་དེ་ཡང་ཐོག་མར་རྐང་པ་གཉིས་སུ་རྒྱུག་སྟེ། ཁྱད་པར་དུ་
རྟ་ལ་སོགས་པ་ལ་ཞོན་པའི་རྐང་པ་འཕྱང་བ་ལ་སོགས་པའི་བདག་ཉིད་ཅན་ཡིན་ནོ། །དེ་ལ་དྲེག་ནད་ཐོག་མར་འབྱུང་བའི་ཚུལ་ནི་ཤིན་ཏུ་རྩུབ་པ་དང་། ཡང་ན་ཤིན་ཏུ་འཇམ་པ་དང་། རབ་ཏུ་རྔུལ་བའམ། ཡང་ན་ལུས་ཀྱི་མདོག་འགྱུར་བ་ལ་སོགས་པ་མཛེའི་ནད་ཐོག་
མ་འབྱུང་བའི་ཚུལ་དང་འདྲ་བར་འབྱུང་ངོ་། །དེ་བཞིན་དུ་ལུས་ཤིན་ཏུ་མ་རུངས་པ་དང་། ཡན་ལག་ལྷོད་པ་དང་། པུས་མོ་དང་བྱིན་པ་དང་བརླ་དང་། རྐེད་པ་དང་། ཕྲག་གོང་དང་། ལག་པ་དང་། རྐང་པ་ལ་སོགས་པའི་ཚིགས་རྣམས་སུ་གཡའ་བ་དང་།
འགུལ་བ་དང་། ན་བ་དང་། ཆག་པ་སྙམ་བྱེད་པ་དང་། ལུས་ལྕི་བ་དང་། ཚོར་བ་ཆུང་བ་དང་། ནད་ཡང་དང་ཡང་ལྡང་དུབ་བྱེད་པ་རྣམས་ཡིན་ནོ། །དྲེག་དེ་རྣམས་རྐང་པ་གཉིས་ལ་གནས་པའམ། ཡང་ན་ལག་པ་གཉིས་ལ་གནས་པ་ཡང་ཡོད་དེ། དེ་གཉིས་
གང་ཡང་རུང་བ་ལས་ལུས་ཐམས་ཅད་དུ་ཁྱབ་པར་འགྲོ་སྟེ། ཅི་ལྟར་བྱི་བ་ཁྲོས་པའི་མཆེ་བའི་དུག་གིས་ལུས་ཐམས་ཅད་དུ་ཁྱབ་པར་འགྲོ་བ་བཞིན་ནོ། །དེ་ཡང་དང་པོ་ཤ་དང་པགས་པའི་ཕྱི་རིམ་ཐམས་ཅད་དུ་ཁྱབ་པར་འགྲོ་སྟེ། དེའི་མིང་ནི་རྟོགས་པར་སླ་ཞེས་བྱའོ། །དེ་ནས་

རིམ་གྱིས་ཐ་མར་ལུས་ཟུངས་ཐམས་ཅད་དུ་ཡང་ཁྱབ་པར་འགྲོ་སྟེ། དེ་ནི་རྟོགས་པར་དཀའ་བའི་དྲེག་ནད་ཅེས་བྱའོ། །དེ་ལ་རྟོགས་སླ་བའི་དྲེག་ནད་ནི་གོང་གི་གཡའ་བ་ལ་སོགས་པའི་མཚན་མ་དང་ལྡན་པ་དང་། གཞན་ཡང་པགས་པ་བྱེར་བ་དང་། མདོག་
སྨུག་ནག་ཏུ་འཇུག་པ་དང་། དམར་བ་དང་། བྱ་རྨྱང་དང་བཅས་པ་དང་། རབ་ཏུ་ཚ་བ་འུར་འུར་པོར་འདུག་པ་དང་དྲོ་བ་རྣམས་ཡིན་ནོ། །དེ་ལ་རྟོགས་པར་དཀའ་བའི་དྲེག་ནད་ནི་གོང་མ་པས་ཤས་ཆེར་ན་ཞིང་ཟུག་པ་དང་། སྐྲང་བ་དང་། མཁྲང་བ་དང་། ཚོས་པ་སྙམ་བྱེད་པ་
དང་། རླུང་ཚིགས་དང་། རུས་པ་དང་རྐང་གི་ནང་དུ་ཞུགས་ཏེ། བཅད་པ་སྙམ་སེམས་ཤིང་ནང་དུ་རྒྱུ་ཞིང་ནད་ཀྱི་ཤུགས་དྲག་པའི་ཚེ་ལུས་སྒུར་བ་དང་། ཞ་བ་དང་འཐེང་བར་བྱེད། ལུས་ཐབས་སུ་རྒྱུ་བ་ཡིན་ནོ། །དེ་ལ་རླུང་ཤས་ཆེ་བའི་དྲེག་ནད་ནི་ཟུག་གཟེར་བ་དང་། པར་
པར་བྱེད་པ་དང་། ན་བ་དང་། ལུས་སྐྲང་ཞིང་རྩུབ་པ་དང་། མདོག་གནག་པ་དང་། སྔོ་བསངས་སུ་འདུག་པ་དང་། ཡང་དང་ཡང་ན་ཞིང་ཞི་བར་བྱེད་པ་དང་། རྩ་ཆེན་པོ་དང་ཚིགས་དང་སོར་མོ་རྣམས་འཁུམས་པ་དང་། ལུས་བཅིངས་པ་སྙམ་བྱེད་ཅིང་ཤིན་ཏུ་ན་བ་དང་།
གྲང་བ་ལ་ཞེ་སྡང་བ་དང་། ལུས་ལ་གྲང་བས་རེག་ན་བདེ་བ་དང་། རེངས་པ་དང་། ལུས་ལ་ཚོར་བ་མེད་ཅིང་བེམ་བེམ་པོར་འདུག་པ་རྣམས་ཡིན་ནོ། །ཁྲག་གི་ཤས་ཆེ་བའི་དྲེག་ནད་ནི་རབ་ཏུ་སྐྲང་བ་དང་། ཟུག་ཅིང་ན་བ་དང་། ཟངས་མའི་མདོག་འདྲ་བ་དང་། ལུས་བེམ་བེམ་
པོར་ཡུངས་ཀར་གྱི་འདག་གུས་བསྐུས་པ་བཞིན་ཆ་ཙེག་ཙེག་སེམས་པ་དང་། སྣུམ་པ་དང་། རྩུབ་པས་ཞི་བར་མི་འགྱུར་བ་དང་། གཡའ་བ་དང་རུལ་བ་དང་ལྡན་པ་ཡིན་ནོ། །མཁྲིས་པ་ཤས་ཆེ་བའི་དྲེག་ནད་ལ་ནི་ཚ་བ་འུར་འུར་པོར་འདུག་པ་དང་། རྨོངས་བག་ཏུ་འདུག་པ་
པ་དང་། རྔུལ་ཆེ་བ་དང་། བརྒྱལ་བ་དང་། མྱོས་པ་དང་། སྐོམ་དད་ཆེ་བ་དང་། རེག་མི་བཟོད་པ་དང་། ན་བ་དང་། མདོག་དམར་བ་དང་། སྐྲང་བ་དང་། ཚོས་པ་དང་། རབ་ཏུ་དྲོ་བ་རྣམས་ཡིན་ནོ། །བད་ཀན་ཤས་ཆེ་བའི་དྲེག་ནད་ནི་ལུས་འགུལ་མི་ཤེས་པ་དང་། ལུས་

ལྕི་བ་དང་། ཚོར་བ་མེད་ཅིང་བེམ་བེམ་པོར་འདུག་པ་དང་། མདོག་སྣུམ་པ་དང་། ལུས་གྲང་བ་དང་། གཡའ་བ་དང་ཅུང་ཟད་ན་བ་རྣམས་ཡིན་ནོ། །དྲེག་ནད་ཉེས་པ་འདྲེས་པའི་ལས་གཉིས་ལྡན་པའམ། གསུམ་འདུས་པའི་མཚན་མ་ཡང་ཅི་རིགས་པར་ཤེས་པར་བྱའོ། །དེ་ལས་ནད་གཅིག་ཤས་ཆེ་བའམ་གསར་དུ་བྱུང་
བ་ནི་གསོར་རུང་ངོ་། །ནད་གཞི་གཉིས་དང་ལྡན་པ་ནི་མི་ལ་ཙམ་དུ་གསོར་ནུས་སོ། །ནད་གཞི་གསུམ་གྱི་དྲེག་ནད་ཆུ་སེར་འཛག་པ་དང་། རེངས་པ་དང་ཐོར་བུ་འཕྱང་བ་དེ་ནི་སྤང་བར་བྱའོ། །རྐང་ལག་གི་ཚིགས་རྣམས་སུ་ཁྲག་རྒྱུ་བའི་རྩ་རླུང་གིས་བཀག་ན་རླུང་དང་ཁྲག་ཕན་ཚུན་ཕྲད་ནས་ཟུག་གཟེར་ཤིན་ཏུ་ཆེ་བ་ཡིན་
ཏེ། དེ་ནི་མྱུར་དུ་སྲོག་འདོར་བའི་བདག་ཉིད་ཅན་ཡིན་ནོ། །དེ་ལ་རླུང་གི་བདག་ཉིད་རྣམ་པ་ལྔ་ལས། སྲོག་ཅེས་བྱ་བའི་རླུང་ནི་ཁ་ཟས་རྩུབ་པ་དང་། རྩོལ་བ་དྲགས་པ་དང་། སྨྱུང་བར་འདུག་པ་དང་། ཁ་ཟས་དྲགས་པ་དང་། འགྲངས་ཆེས་པ་དང་། སྣང་བ་དང་། ལམ་གྱིས་དུག་པ་དང་ཤུགས་དྲག་ཏུ་སྨྲ་བ་དང་། འབྱུང་བའི་
ཤུགས་འགགས་པ་དང་། རྒྱུ་དེ་དག་གིས་རླུང་འཁྲུགས་ཏེ། མིག་ལ་སོགས་པ་དབང་པོ་རྣམས་ལ་གནོད་པར་བྱས་ཏེ། སྣ་ཆུ་འཛག་པ་དང་། ཉམ་ཐག་པར་ན་བ་དང་། སྐོམ་དད་ཆེ་བ་དང་། ལུད་པ་དང་། དབུགས་མི་བདེ་བ་ལ་སོགས་པ་རྣམས་བསྐྱེད་དོ། །དེ་ལ་སྟོད་དུ་རྒྱུ་བའི་རླུང་ཞེས་བྱ་བ་ནི་སྦྲིད་པ་དང་། །སྒྲེགས་པ་དང་། སྐྱུག་པ་
དང་། གཉིད་དང་དེ་རྣམས་དགག་པ་དང་། ཁུར་ལྕི་བ་ཁུར་བ་དང་། ངུ་དྲགས་པ་དང་། དགོད་དྲགས་པ་ལ་སོགས་པའི་རྒྱུས་རླུང་འཁྲུགས་ཏེ། མགུལ་པ་འགགས་པ་དང་། སེམས་ཉམས་པ་དང་། སྐྱུག་པ་དང་ཁ་ཟས་ཡི་གར་མི་འོང་བ་དང་། ཆམ་པས་བཏབ་པ་དང་། དེ་བཞིན་དུ་མགུལ་པའི་སྦ་བ་ལ་སོགས་པ་ནམ་
ཚོང་ཡན་ཆད་ཀྱི་ནད་དེ་དང་དེ་ལ་སོགས་པ་སྐྱེད་པར་བྱེད་དོ། །ཁྱབ་བྱེད་ཅེས་བྱ་བའི་རླུང་ནད་ནི་འགྲོ་དྲགས་པས་རང་གི་གནས་ཉམས་པ་དང་། རྩེད་མོ་ཤིན་ཏུ་དྲགས་པ་མི་བཟད་པ་བྱེད་པ་དང་། ཁ་ཟས་མི་མཐུན་པ་དང་། རྩུབ་པ་བསྟེན་པ་དང་། འཇིགས་པ་དང་། དགའ་ཆེས་པ་དང་། ཡི་བསད་པ་ལ་སོགས་པའི་རྒྱུས་ཁྱབ་བྱེད་ཀྱི་རླུང་
འཁྲུགས་ཏེ། རྒ་བ་དང་ཉམས་སྟོབས་འཇིག་པར་བྱེད་ཅིང་། ལུས་སྐྲང་བ་དང་། སེམས་གཡེངས་པ་དང་། རིམས་ཀྱིས་འདེབས་པ་དང་། ཡན་ལག་ཐམས་ཅད་ན་ཞིང་ཟུག་པ་དང་། སྤུ་ཟིང་ཞེས་བྱེད་པ་དང་། ལུས་ཚོར་བ་མེད་ཅིང་བེམ་བེམ་པོར་གྱུར་པ་དང་། མཛེ་ནད་དང་ཤུ་བ་མཆེད་པ་དང་། གཞན་ཡང་ལུས་ཐམས་

ཅད་དུ་འགྲོ་བའི་ནད་སྐྱེད་པར་བྱེད་དོ། །དེ་ལ་མེ་དང་མཉམ་དུ་གནས་པ་ཞེས་བྱ་བའི་རླུང་ནི་ཟས་མ་སྙོམས་པ་དང་། སྔ་མ་མ་ཞུ་བར་ཟ་བ་དང་། ཟས་རྙིང་པ་ཟ་བ་དང་། དུས་མ་ཡིན་པར་གཉིད་ལོག་པ་དང་། མཚན་མོ་གཉིད་མ་ལོག་པ་དང་། རྒྱུ་དེ་དག་གིས་འཁྲུག་
པར་བྱེད་དེ། གཟེར་བ་དང་། སྐྲན་དང་། ཕོ་བའི་ནད་དང་། ཞུ་བ་དང་། མ་ཞུ་བའི་གནས་སུ་ནད་རྣམས་སྐྱེད་པར་བྱེད་དོ། །ཐུར་དུ་སེལ་བའི་རླུང་ཞེས་བྱ་བ་ནི་ཁ་ཟས་རྩུབ་པ་དང་། འཇུ་དཀའ་བ་ཟོས་པ་དང་། རྟ་ལ་སོགས་པ་བཞོན་པའི་སྟེང་ནས་ལྷུང་བ་དང་། བཞོན་པ་ལ་
རྟག་ཏུ་བརྟེན་པ་དང་། གནས་གཅིག་ཏུ་ཡུན་རིངས་བ་དང་། འགྲོ་བ་ལ་རྟག་པ་དང་། རྒྱུ་དེ་དག་གིས་ནད་འཁྲུགས་ཏེ། མ་ཞུ་བའི་གནས་ལ་བརྟེན་ནས་གཅིན་ནད་དང་། ཁུ་ཆུའི་ནད་དང་། གཞང་འབྲུམ་དང་། གཞང་ཕྱིར་བྱུང་བ་ལ་སོགས་པའི་ནད་གསོ་དཀའ་བ་མང་དུ་སྐྱེད་
དོ། །སྲོག་ཅེས་བྱ་བ་ལ་སོགས་པའི་རླུང་ལྔ་པོ་དེ་དག་གང་ཡང་རུང་བ་མ་ཞུ་བ་དང་། ལྷན་ཅིག་ལྡན་ན་ནི་ལུས་སྙོམ་པ་དང་། འགུལ་མི་ཤེས་པ་དང་། ཁོང་ལྕི་བ་དང་། སྣུམ་པ་དང་། ཁ་ཟས་ཡི་གར་མི་འོང་བ་དང་། སྒྱིད་ཞན་པ་དང་། གྲང་བ་དང་། སྐྲང་བ་དང་།
མེའི་དྲོད་ཉམས་པ་དང་། ཚ་བ་དང་རྩུབ་པ་ལ་མངོན་པ་ཆགས་པ་དང་། དེ་ཉིད་ཟོས་ན་བདེ་བ་དང་། རྟགས་འདི་དག་དང་ལྡན་པ་ཡིན་པར་ཤེས་པར་བྱའོ། །མ་ཞུ་བ་དང་མི་ལྡན་ན་ནི་རྟགས་དེ་དག་དང་ལྡན་པ་མ་ཡིན་པར་ཤེས་པར་བྱའོ། །རླུང་དེ་མཁྲིས་པ་ལ་སོགས་པ་ནད་གཞན་
དང་ལྡན་པ་ཡིན་ན་ཡང་དེའི་དབྱེ་བ་དམིགས་ཀྱིས་བཤད་པར་བྱ་སྟེ། དེ་ལ་རླུང་ནད་མཁྲིས་པ་དང་ལྡན་པའི་རྟགས་ནི་ལུས་ཚ་བ་འུར་འུར་པོར་འདུག་པ་དང་། སྐོམ་དད་ཆེ་བ་དང་། ཟུག་གཟེར་ཆེ་བ་དང་། མགོ་འཁོར་བ་དང་། མུན་འཐིབས་ཞེས་བྱེད་པ་དང་། ཁ་ཟས་ཚ་བ་དང་།
དྲོ་བ་དང་། སྐྱུར་བ་དང་། ལན་ཚྭ་རྣམས་ཟོས་ན་ལུས་ཚ་བ་སྐྱེད་པ་དང་། བསིལ་བ་འདོད་པ་རྣམས་ཡིན་ནོ། །རླུང་དང་བད་ཀན་དང་ལྡན་པའི་རྟགས་ནི་ལུས་བསིལ་བ་དང་། ཁོང་གྲང་བ་དང་། ཟུག་གཟེར་ཆེ་བ་དང་། ཁ་ཟས་ཚ་བ་དང་། དྲོ་བ་ཟོས་ན་ལྷག་པར་བདེ་བ་

དང་། སྨྱུང་བ་དང་། རྩོལ་བ་དང་། ཁ་ཟས་རྩུབ་པ་དང་། དྲོ་བ་དང་འདི་རྣམས་འདོད་པ་ཡིན་ནོ། །རླུང་ཁྲག་དང་བཅས་པའི་རྟགས་ནི། ཤ་དང་པགས་པའི་ནང་དུ་ཚ་ཤས་ཆེ་ཞིང་ཟུག་པ་དང་། མདོག་དམར་པོར་སྐྲང་བ་དང་། ལུས་ལ་ཐིག་ལེ་
དམར་པོ་འབྱུང་པ་ཡིན་ནོ། །རླུང་ཤ་དང་ལྷན་ཅིག་འཁྲུགས་པ་ཡིན་ན་ནི་སྐྲང་ཞིང་མཁྲང་བ་དང་། མདོག་འགྱུར་བ་དང་། དེ་བཞིན་དུ་འབྲུམ་བུ་ཕྲ་མོ་འབྱུང་ཞིང་མཁྲང་ལ་མདོག་འགྱུར་བ་དང་། ལུས་བརྩེ་བ་དང་། ལུས་ལ་གྲོག་མ་རྒྱུ་བ་སྙམ་
བྱེད་པ་ཡིན་ནོ། །རླུང་དེ་ཚིལ་དང་ལྡན་པར་འཁྲུགས་པ་ཡིན་ན་ནི། ལུས་སྐྲང་ཞིང་མི་བརྟན་པ་དང་། སྣུམ་པ་དང་། རེག་ན་འཇམ་པ་དང་། གྲང་བ་དང་། ཟས་ཡི་གར་མི་འོང་བ་དེ་ནི་གསོ་དཀའ་བའི་ཕྱུག་པོའི་ནད་ཅེས་བྱའོ། །དེ་ལ་རླུང་
རུས་པ་དང་ལྡན་པར་འཁྲུགས་ན་ནི། རེག་ན་ཤིན་ཏུ་ཚ་བ་དང་། བཙིར་ན་མངོན་པར་དགའ་བ་དང་། ཁབ་ཀྱིས་གཙགས་པ་སྙམ་བྱེད་པ་དང་། ཡན་ལག་རྣམས་ན་ཞིང་ཟུག་པ་ཡིན་ནོ། །རླུང་ནད་རྐང་དང་ལྷན་ཅིག་འཁྲུགས་པ་ནི་ལུས་སྒུ་བ་དང་།
ཡང་ནས་ཡང་དུ་གླལ་འབྱུང་བ་དང་། ལུས་གཅུས་པ་སྙམ་བྱེད་པ་དང་། ལུས་རབ་ཏུ་ན་བ་དང་། ལག་པ་གཉིས་ཀྱིས་བཙིར་ཞིང་མཉེས་ན་བདེ་བར་འགྱུར་བ་ཡིན་ནོ། །རླུང་ཁུ་བ་དང་ལྷན་ཅིག་འཁྲུགས་པ་ཡིན་ན་ནི། ཁུ་བ་ཤུགས་དྲག་ཏུ་
འབྱུང་བ་དང་། ཡང་ན་ས་བོན་གྱི་བྱ་བ་བྱེད་མི་ནུས་པ་ཡིན་ནོ། །རླུང་ཟས་དང་ལྷན་ཅིག་འདྲེས་ཏེ་འཁྲུགས་ན་ནི། ཟས་དེ་ཁོང་པར་ཇི་སྲིད་གནས་ཀྱི་བར་དུ་ནི་ན་ལ། དེ་ཞུ་བ་ཙམ་གྱི་ཚོད་ན་ནི་བདེ་བ་ཡིན་ནོ། །རླུང་དེ་གཅིན་དང་ལྷན་ཅིག་འཁྲུགས་
པར་གྱུར་པ་ཡིན་ན་ནི། གཅིན་སྲི་ཞིང་འགགས་ལ་ཆུ་སོར་རླུང་གིས་གང་བ་ཡིན་ནོ། །ཕྱི་ས་སྟེ་བཤང་བ་དང་ལྡན་ཏེ་འཁྲུགས་པ་ཡིན་ན་ནི། ཕྱི་ས་ཐུར་དུ་འབྱུང་བ་འགགས་ལ་རང་གི་གནས་སུ་ཐོགས་ཏེ་འབྱུང་དུ་མི་རུང་བ་དང་། སྣུམ་

བག་ཟོས་ན་མྱུར་དུ་འབྱུང་ལ་ཁོང་སྦོ་བར་ཡང་འགྱུར་ལ། ཟས་དེ་ཁོང་དུ་ཕུལ་ཏེ་འབྱུང་བ་ཡང་ཤིན་ཏུ་དཀའ་བས་ཐོགས་ཏེ་འབྱུང་བ་ཡིན་ནོ། །རླུང་དེ་ལུས་ཟུངས་ཐམས་ཅད་དང་ལྷན་ཅིག་འཁྲུགས་པ་ཡིན་ན་ནི་བརླ་དང་ཆུ་སོའི་བར་དང་། རྒྱབ་ཀྱི་སྒལ་
ཚིགས་ན་བ་དང་། རླུང་ལུགས་སུ་མི་འབྱུང་སྟེ། ལོག་པར་སོང་བ་དང་། སྙིང་མི་བདེ་ཞིང་རབ་ཏུ་ན་བ་རྣམས་ཡིན་ནོ། །སྲོག་ཅེས་བྱ་བའི་རླུང་དེ་མཁྲིས་པ་དང་ལྷན་ཅིག་འཁྲུགས་པ་ཡིན་ན་ནི་མགོ་འཁོར་བ་དང་། བརྒྱལ་བ་དང་། ཟུག་པ་དང་། ཆ་འུར་འུར་པོར་འདུག་པ་དང་།
ཟས་ཕྱེད་ཙམ་ཞུ་སྟེ་སྐྱུར་པོར་འགྱུར་ཙམ་ན་སློན་པ་ཡིན་ནོ། །སྟོད་དུ་རྒྱུ་བའི་རླུང་མཁྲིས་པ་དང་འདྲེས་ཏེ་འཁྲུགས་ན་ནི་མགོ་འཁོར་བ་ལ་སོགས་པ་གོང་མའི་མཚན་ཉིད་དང་ལྡན་པའི་སྟེང་དུ་ཁོང་ཚ་བ་འུར་འུར་པོར་འདུག་ཅིང་ཉམས་སྟོབས་ཟད་པ་ཡིན་ནོ། །ཁྱབ་བྱེད་ཀྱི་རླུང་མཁྲིས་པ་དང་
འདྲེས་ཏེ་འཁྲུགས་པ་ཡིན་ན་ནི་ལུས་ཐམས་ཅད་ཚ་བ་དང་། ངལ་བ་དང་ལུས་ཀྱི་སྤྱོད་པ་མི་ནུས་ཤིང་ལྡོག་པ་དང་། ལུས་ཚ་ཞིང་ནད་དང་བཅས་པ་ཡིན་ནོ། །མེ་དང་མཉམ་དུ་གནས་པའི་རླུང་དང་མཁྲིས་པ་དང་ལྷན་ཅིག་འཁྲུགས་པ་ཡིན་ན་ནི། ཁོང་པའི་མེ་དྲོད་ཉམས་པར་བྱེད་ཅིང་
ལྷག་པར་ཆེ་བ་དང་། སྙིང་མི་དགའ་བ་དང་། སྐོམ་དད་ཆེ་ཞིང་ཚ་བ་དང་བཅས་པ་ཡིན་ནོ། །ཐུར་དུ་སེལ་བའི་རླུང་མཁྲིས་པ་དང་ལྷན་ཅིག་འཁྲུགས་ན་ནི་ཕྱི་སའི་མདོག་སེར་པོར་འབྱུང་ཞིང་། ཟླ་མཚན་ཤས་ཆེར་འཛག་པ་དང་། བུད་མེད་ཀྱི་མོ་མཚན་དང་ཕོ་མཚན་དང་། རྐུབ་རྣམས་
སུ་ཚ་བ་ཆེ་བ་དེ་རྣམས་ཡིན་ནོ། །སྲོག་ཅེས་བྱ་བའི་རླུང་བད་ཀན་དང་ལྷན་ཅིག་འཁྲུགས་ན་ནི་ལུས་ལ་གནོད་པའི་སྙོམ་པ་དང་། ཁ་ཟས་ཡི་གར་མི་འོང་བ་དང་། སྐྱུག་བྲོ་བ་དང་མཆིལ་མ་མང་བ་དང་། སྦྲིད་པ་དང་སྒྲེགས་པ་དང་། དབུགས་འབྱུང་རྔུབ་འགགས་པ་ཡིན་ནོ། །
སྟོད་དུ་རྒྱུ་བའི་རླུང་བད་ཀན་དང་ལྷན་ཅིག་འཁྲུགས་པ་ཡིན་ན་ནི་ལུས་ལྕི་བ་དང་། ཁ་ཟས་ཡི་གར་མི་འོང་བ་དང་། ཚིག་དང་སྒྲ་འཚུབས་ཤིང་འགགས་པ་དང་། ཉམས་སྟོབས་རྣམས་འཇོམས་པར་བྱེད་པ་ཡིན་ནོ། །ཁྱབ་བྱེད་ཀྱི་རླུང་བད་ཀན་དང་ལྷན་ཅིག་འཁྲུགས་པ་ཡིན་

ན་ནི་རུས་པའི་ཚིགས་རྣམས་བརྐྱང་བསྐུམ་མི་ཤེས་པ་དང་། ཡན་ལག་ཐམས་ཅད་ལྕི་བ་དང་། འགྲོ་བ་མི་བརྟན་ཞིང་འཁྱོར་འགྲོ་བ་ཡིན་ནོ། །མེ་དང་མཉམ་དུ་གནས་པའི་རླུང་བད་ཀན་དང་ལྷན་ཅིག་འཁྲུགས་པ་ཡིན་ན་ནི་ལུས་ཀུན་གྲང་ཞིང་རྔུལ་མེད་ལ་མེ་དྲོད་ཆུང་བ་ཡིན་ནོ། །ཐུར་
དུ་སེལ་བའི་རླུང་བད་ཀན་དང་འདྲེས་པ་ཡིན་ན་ནི་བཤང་གཅི་མི་འབྱུང་ཞིང་འགགས་པ་ཡིན་ནོ། །དེ་ལྟར་རླུང་ནད་ཀྱི་དབྱེ་བ་གཞན་དང་འབྲེལ་བ་ཉི་ཤུ་རྩ་གཉིས་སུ་ཤེས་པར་བྱའོ། །དེ་ལ་སྲོག་ཅེས་བྱ་བའི་རླུང་ལ་སོགས་པ་ལྔ་པོ་གང་ཡང་རུང་བ་རླུང་ནད་ལྷག་མ་བཞི་ལ་ལྡན་པ་ཞེས་བྱ་སྟེ།
དེ་བཞིན་དུ་རེ་རེ་ལ་ཡང་རྣམ་པ་བཞི་བཞི་སྟེ་ཉི་ཤུར་འགྱུར་རོ། །དེ་ལ་སྲོག་ཅེས་བྱ་བའི་རླུང་བད་ཀན་དང་འགྱུར་བའི་རླུང་དང་ལྷན་ཅིག་འཁྲུགས་ན། དེའི་རྟགས་ནི་དབུགས་འབྱུང་རྔུབ་དཀའ་བ་དང་། ཆམ་པས་འདེབས་པ་དང་། མགོ་བསྒྱུར་དཀའ་བ་དང་། གློ་སྙིང་ན་བ་དང་། ཁའི་
ནང་སྐམ་པ་རྣམས་ཡིན་ནོ། །སྟོད་དུ་རྒྱུ་བའི་རླུང་སྲོག་ཅེས་བྱ་བའི་རླུང་དང་ལྷན་ཅིག་འཁྲུགས་ན་ནི་མདོག་དང་ཉམས་སྟོབས་ཟད་པར་བྱེད་དོ། །འདི་ལ་ཇི་ལྟར་སྦྱར་བ་བཞིན་དུ་རླུང་ནད་ལྷག་མ་རྣམས་ལ་ཡང་དེ་ལྟར་སྦྱར་བར་བྱའོ། །རླུང་རྣམ་པ་ལྔ་པོ་དེ་དག་གི་གནས་ནི་ནད་གཞི་གསུམ་
གང་དང་གང་ན་གནས་པ་དང་། ནད་དམིགས་ཅིར་འགྱུར་བའི་ལེའུ་ལ་བལྟ་བར་བྱའོ། །རླུང་ནད་དེ་དག་གི་ལས་དང་། ཤས་ཆེ་ཆུང་ཡང་དེ་ལ་ལྟོས་ཤིག །སྲོག་ཅེས་བྱ་བ་ལ་སོགས་པའི་རླུང་རྣམ་པ་ལྔ་དང་གང་ཡང་རུང་བ་ནང་འདྲེས་པའི་སྟེང་དུ་ནད་གཞན་གྱིས་འདྲེས་པའམ།
རླུང་ནད་ཉི་ཚེ་དང་ལྡན་པ་གང་ཡིན་པ་སྨན་པ་རྣམས་ཀྱིས་ལེགས་པར་རྟོགས་ཤིག །མཁྲིས་པ་དང་བད་ཀན་གཉིས་ལ་རླུང་རྣམ་པ་ལྔ་པོ་དང་། རེ་རེར་སྦྱར་བའི་རྣམ་པ་བཅུ་དང་། བད་ཀན་དང་མཁྲིས་པ་བཤང་གཅི་གཉིས་དང་ལྡན་པ་དང་བཅུ་གཉིས་པོ་དེ་དག་ཀྱང་བརྟག་གོ། །དེ་
ལས་བཟློག་པ་བཅུ་གཉིས་ཏེ་ཇི་རིགས་སུ་རྟོགས་པར་བྱའོ། །བད་ཀན་དང་མཁྲིས་པ་གཉིས་ཀྱི་རླུང་ནད་ལྔ་པོ་རེ་རེ་ལ་ཡང་འདྲེས་པར་རྟོགས་ཤིག །དེ་ལྟར་རླུང་རྣམ་པ་ལྔ་དང་མཁྲིས་པ་དང་བད་ཀན་ནད་ཕན་ཚུན་འདྲེས་པར་བྱས་ནས་ནི་དུ་མར་འགྱུར་ཏེ་དེ་དག་རེ་རེ་ལ་ཡང་དབྱེ་ན་

རྩིས་ཀྱིས་མི་ལང་སྟེ་གྲངས་མེད་པར་འགྱུར་རོ། །དེ་བས་ན་འདྲེས་པའི་ནད་དེ་ནི་ཤིན་ཏུ་རྟོགས་པར་དཀའ་བ་ཡིན་པས་སྨན་པ་མཁས་པ་གཞན་གྱི་ནད་རིག་པ་དག་གིས་རང་རང་གི་ནད་གཞིའི་སྐྱེ་བ་དང་འབྲི་བའི་ཚུལ་བཟའ་བ་དང་། བཏུང་བ་དང་སྤྱོད་ལམ་ལ་སོགས་
པ་གང་གིས་སློང་བ་ཡང་དང་ཡང་དུ་བརྟག་ཅིང་ཤེས་པར་བྱའོ། །རླུང་ལྔ་པོ་དེ་དག་ལས་ཀྱང་ཁྱད་པར་དུ་སྲོག་ཅེས་བྱ་བའི་རླུང་དེ་ནི་སྐྱེ་དགུ་རྣམས་ཀྱི་འཚོ་བ་ཡིན་ལ་སྟོད་དུ་རྒྱུ་བའི་རླུང་ནི་ཉམས་སྟོབས་ཡིན་པར་བརྗོད་དོ། །རླུང་གཉིས་པོ་དེ་དག་ཉམས་ཤིང་གནོད་པར་གྱུར་ན་ནི་ཚེ་དང་སྟོབས་
ཀྱང་ཟད་པར་འགྱུར་རོ། །རླུང་རྣམ་པ་ལྔ་པོ་དེ་དག་གཅིག་ལ་གཅིག་འདྲེས་ཏེ་ལྡན་པའམ་ཡང་ན་མཁྲིས་པ་ལ་སོགས་པ་ནད་གཞན་དུ་མ་དང་འདྲེས་ཤིང་ལྡན་པ་ཡང་རུང་སྟེ། ནད་ཀྱི་མཚན་ཉིད་ཤེས་པ་ཡིན་ན་ནི་ལོ་གཅིག་མ་ལོན་ཀྱང་རུང་སྟེ། དེ་ཡང་ཤིན་ཏུ་གསོ་དཀའོ། །ནད་ཀྱི་མཚན་ཉིད་
མ་ཤེས་ཏེ་ལོ་གཅིག་འདས་པ་ཕན་ཆད་ནི་གསོ་དཀའ་བ་མེད་དོ། །དེ་ལྟར་འདྲེས་པའི་ནད་དེ་དག་གསོ་བ་མ་བྱས་ཏེ་ཡལ་བར་བོར་ན་ཁོང་འབྲས་དང་། ནད་གཞི་མཆེར་པའི་ནད་དང་། སྙིང་ནད་དང་། སྐྲན་དང་། མེ་དྲོད་ཉམས་པ་ལ་སོགས་པ་བླ་བརྣན་འབྱུང་བར་འགྱུར་རོ། །དྲེག་ནད་
ཀྱི་ནད་གཞི་བཤད་པའི་ལེའུ་སྟེ་བཅུ་དྲུག་པ་རྫོགས་སོ།། །།སྨན་པའི་བདག་པོ་སེང་གེ་སྦས་པའི་བུ་སྨན་པ་ཆེན་པོ་ཕ་ཁོལ་ཞེས་བྱ་བས། ཡན་ལག་བརྒྱད་པའི་སྙིང་པོ་མཛད་པ་ལས་ནད་གཞིའི་གནས་ཞེས་བྱ་བ་བཅུ་དྲུག་པ་རྫོགས་ཏེ། ཡན་ལག་བརྒྱད་པའི་སྙིང་པོའི་
གནས་གསུམ་པའོ།། །།སྨན་དཔྱད་ཡན་ལག་བརྒྱད་པའི་སྙིང་པོ་ལས་གསོ་བའི་དཔྱད་ཉི་ཤུ་རྩ་གཉིས་ཞེས་བྱ་བ། རིམས་ནད་གསོ་བའི་ལེའུ་དང་པོ་བཤད་པར་བྱ་སྟེ། དེ་ཡང་དྲང་སྲོང་ཆེན་པོ་རྒྱུན་ཤེས་ཀྱི་བུ་ལ་སོགས་པས་བཤད་པ་ན་རེ་རིམས་ནི་ཁ་ཟས་མ་ཞུ་བའི་གནས་སུ་
ཞུགས་ནས་རླུང་ལ་སོགས་པ་དང་ལྷན་ཅིག་གནས་ཏེ། མེ་དྲོད་ཉམས་པར་བྱས་ནས་ནང་གི་རྩའི་ལམ་བཀག་སྟེ། རིམས་ནད་སྐྱེད་པ་ཡིན་ནོ། །དེ་ལ་ཐོག་མར་རིམས་མ་སྨིན་པ་ལ་ནི་སྨྱུང་བ་བྱས་ལ། ཉམས་སྟོབས་བསྲུང་བ་ལ་འབད་དོ། །ཉམས་སྟོབས་དང་ལྡན་ན་ནི་ནད་མེད་པ་

ཡིན་པས་ཐོག་མར་གསོ་བའི་ཆོ་ག་འདི་དག་བྱའོ། །དང་པོ་སྨྱུང་བ་བྱས་པས་ནི་ཉེས་པ་རྣམས་ཟད་པར་བྱེད་དེ། མེ་དྲོད་སྐྱེད་ཅིང་ལུས་ཡང་ལ་ནད་མེད་པ་དང་། བཀྲེས་པ་དང་། སྐོམ་པ་དང་། ཟས་ཡི་གར་འོང་ཞིང་ཁ་ཟས་འཇུ་ལ་ཉམས་སྟོབས་དང་གཟི་མདངས་རྣམས་སྐྱེ་བར་འགྱུར་
རོ། །དེ་ལ་བད་ཀན་ཚབས་ཆེ་སྟེ། རང་གི་གནས་ལས་ལུད་ནས་བད་ཀན་ཕྱི་རོལ་ཏུ་འབྱུང་ཞིང་དེ་ཡང་གཉིད་ནད་དང་། ཆམ་པ་དང་ཡི་ག་འཆུས་པ་དང་། ལུད་པ་དང་། གསུད་པ་དང་། ལྷན་ཅིག་འབྱུང་ཞིང་ཟས་ཟོས་མ་ཐག་ལྡང་བའི་རིམས་ནད་མ་ཞུ་བ་དང་བཅས་པ་དེ་ལ་ནི་སྐྱུག་སྨན་
གཏང་བར་འོས་ཏེ་སློན་བྱའོ། །རིམས་ནད་གཞན་ལ་སྐྱུག་སྨན་བཏང་ན་ནི་དབུགས་མི་བདེ་བ་དང་། འཁྲུ་བ་དང་། རྨོངས་པ་དང་། སྙིང་ནད་དང་། རིམས་མི་ཟད་པ་རྣམས་ཀྱིས་འདེབས་སོ། །པོ་སོན་ཆ་དང་། དུག་མོ་ཡུངས་དང་། ཤིང་མངར་གང་ཡང་རུང་བ།
པི་པི་ལིང་དང་ལྷན་ཅིག་གམ། ཡང་ན་ཆུ་དྲོན་པོ་དང་སྦྲང་རྩི་ལན་ཚྭ་དང་བཅས་པ་བླུད་ལ་སྐྱུག་ཏུ་གཞུག་གོ། །ཡང་ན་པ་ཏོ་ལ་དང་། ནིམ་པ་དང་། ག་གོན་དང་། སྦ་དང་། འདི་རྣམས་ཀྱི་ལོ་མ་གང་ཡང་རུང་བ་བསྐོལ་བའི་ཁུ་བ་དང་། འབྲས་ཡོས་ཀྱི་སྐྱོ་མ་དང་། བུ་རམ་ཤིང་གི་ཁུ་
བ་དང་། ཆང་དང་དེ་དག་གང་ཡང་རུང་བའི་ནང་དུ་པོ་སོན་ཆའི་ཕྱེ་མས་བཏབ་པ་བླུད་དོ། །ཡང་ན་ཉམས་སྟོབས་དང་། དུས་ཀྱི་བྱེ་བྲག་ཤེས་པའི་སྨན་པས་ཆོ་ག་གྲུབ་པའི་ནང་དུ་བཤད་པའི་སྐྱུག་སྨན་གཏང་བར་བྱའོ། །གོང་མའི་སྐྱུག་སྨན་བྱས་ཀྱང་རུང་། མ་བྱས་ཀྱང་རུང་། རིམས་
ནད་ཅན་གྱི་སྐྱེས་བུ་ལ་ནི་ཉེས་པ་རྣམས་རང་གི་གནས་ལས་ཉམས་ཤིང་དྲོད་སྐྱེད་པས་ནད་སྨིན་པ་དང་ཞི་བར་བྱ་བའི་ཕྱིར་ཁྱད་པར་དུ་སྨྱུང་བ་བྱས་ན་ཕན་ནོ། །དཔེར་ན་ཕྱི་རོལ་གྱི་མེ་མདག་ལ་ཐལ་བས་གཡོགས་ན། ཁ་ཟས་ལ་སོགས་པ་འཚོར་མི་ནུས་པ་དང་འདྲ་བར། ཁོང་པའི་རླུང་ལ་སོགས་
པའི་ཉེས་པས་གཡོགས་ན་ཁ་ཟས་འཇུ་མི་ནུས་ཏེ། དེ་བས་ན་སློན་བྱས་པའི་འོག་ཏུ་སྨིན་པར་གྱུར་པའི་ཕྱིར་སྨྱུང་བ་ལ་སོགས་པ་བྱའོ། །བད་ཀན་དང་རླུང་ལས་གྱུར་པའི་རིམས་སྐོམ་དད་ཆེ་བ་ལ་ནི། ཆུ་དྲོན་པོ་ཉུང་ངུ་ཉུང་ངུ་བྱིན་ན་བད་ཀན་སྐམ་པོ་སླ་བར་བྱའོ། །སྐོམ་དད་མྱུར་དུ་

འཇིལ་བར་བྱེད་ན་མེ་དྲོད་དང་རྩའི་རྒྱུན་སྲང་ཡང་འཇམ་ཞིང་དག་པ་དང་། མཁྲིས་པ་དང་། རླུང་དང་། རྔུལ་དང་། ཕྱི་ས་དང་། གཅིན་དང་། འདི་རྣམས་ཀྱང་ལེགས་པར་འབྱུང་བར་བྱེད་ལ་གཉིད་དང་། རྨོངས་བག་དང་། ཡི་ག་འཆུས་པ་རྣམས་འཕྲོག་
ཅིང་སྲོག་འཛིན་པར་བྱེད་དོ། །གལ་ཏེ་ཆུ་གྲང་འཐུངས་ན་ཕན་ཡོན་གོང་མ་ལོག་པར་འགྱུར་ཏེ། ནད་ཀྱི་ཚོགས་སྐྱེད་པར་བྱེད་དོ། །ཆུ་དྲོན་པོ་འཐུངས་ན་ཕན་ཡོན་གོང་མ་ལྟར་ཡོད་ན་ཡང་གཅིག་ཏུ་མཁྲིས་པ་ཅན་ལ་ནི་མ་ཡིན་ཏེ། དེ་ཡང་མཁྲིས་པ་ཤས་ཆེ་བ་དང་། མིག་ལ་སོགས་
པ་དབང་པོའི་ནད་དང་། ལུས་ཚ་བ་དང་། རྨོངས་བག་ཏུ་འདུག་པ་དང་། འཁྲུ་བ་དང་། དུག་དང་ཆང་ལས་གྱུར་པའི་རིམས་དང་། སོས་ཀ་ཚ་བའི་དུས་དང་། ལུས་ཟད་ཅིང་སྐེམ་པ་དང་། མཁྲིས་པ་དང་ཁྲག་ལ་ནི་ཆུ་དྲོན་པོ་མི་སྦྱར་རོ། །གླ་སྒང་དང་། ཙནྡན་དང་། བཅའ་སྒ་
དང་། པར་པ་ཏ་དང་། པུ་ཤེལ་ཙི་དང་། བ་ལེ་ཀ་དང་། འདི་རྣམས་གང་ཡང་རུང་བ་བསྐོལ་བའི་ཁུ་བ་མཁྲིས་པ་ལས་གྱུར་པའི་རིམས་ནད་ཀྱི་སྐོམ་དད་ཅན་ལ་སྦྱར་ན་ཁ་ཟས་འཇུ་བར་བྱེད་ཅིང་སྐོམ་དད་འཇོམས་སོ། །མཁྲིས་པ་མེད་ན་དྲོད་མེད། དྲོད་མེད་ན་རིམས་མེད་དེ། དེ་
བས་ན་མཁྲིས་པ་དང་མི་མཐུན་པའི་བཟའ་བ་དང་། སྤྱོད་ལམ་ཐམས་ཅད་ཤས་ཆེར་སྤང་བར་བྱའོ། །མདོར་ན་རིམས་ནད་ཐམས་ཅད་ལ་སྨྱུང་བ་མ་གཏོགས་པར་ལུས་ཀྱི་ཁྲུས་དང་། བསྐུ་བ་དང་བྱུག་པ་ལ་སོགས་པའི་བྱ་བ་ཐམས་ཅད་སྤང་ངོ་། །རིམས་མ་སྨིན་པ་མི་ཟད་པར་ན་བ་ལ་
ནི། སྨན་གྱི་ཁུ་བ་དང་འདག་གུ་ལ་སོགས་པ་མི་བླུད་དེ། ཅི་ལྟར་མ་ཞུ་བ་ལ་ཟུག་གཟེར་འཇོམས་པའི་སྨན་མི་བླུད་པ་དང་འདྲའོ། །གལ་ཏེ་བླུད་པར་གྱུར་ན་ནི་ཕྱིར་ཞིང་ནད་སྐྱེད་པར་བྱེད་དེ། སྦྲུལ་ལ་འོ་མ་བླུད་པ་བཞིན་ནོ། །བད་ཀན་དང་རླུང་ལས་གྱུར་པའི་རིམས་སྙོམ་པ་དང་།
སྣ་ཆུ་འཛག་པ་དང་། དབུགས་མི་བདེ་བ་དང་། རྗེ་ངར་དང་རུས་ཚིགས་སུ་ཟུག་ཅིང་ན་བ་ལ་ནི་དུགས་བྱ་བར་རབ་ཏུ་བསྔགས་ཏེ། རྔུལ་དང་། བཤང་གཅི་དང་། འཕྱེན་བདེ་བར་འབྱུང་སྟེ། མེའི་དྲོད་ཀྱང་སྐྱེད་པར་བྱེད་དོ། །སྣུམ་ཆོས་ཀྱི་ཆོ་གར་བཤད་པའི་ནང་དུ་ཆུ་དྲོན་ལས་

བྱས་པའི་དུགས་ཐམས་ཅད་འདིར་སྤྱད་པར་བྱའོ། །རིམས་གསར་པ་ལ་ནི་ཐོག་མར་སྨྱུང་བ་དང་། དུགས་འབའ་ཞིག་བྱའོ། །དེ་ནས་ཞག་དྲུག་གི་བར་དུ་སྨིན་པར་བྱ་བའི་ཆོ་ག་ལ་སོགས་པ་ཐམས་ཅད་སྤང་ངོ་། །ཞག་བདུན་པ་ནས་ནི་མ་སྨིན་པ་སྨིན་པར་བྱ་བའི་ཕྱིར། ནས་
ཐུག་དང་ཏིག་ཏའི་ཁུ་བ་བླུད་དེ། གནས་སྐབས་ཇི་ལྟ་བ་བཞིན་དུ་གསོའོ། །རླུང་ཉི་ཚེའི་རིམས་དང་། ལུས་ཟད་པའམ། གློ་བུར་ལས་གྱུར་པའི་རིམས་དང་། རིམས་རྙིང་པ་རྣམས་ལ་སྨྱུང་བ་མི་བྱ་སྟེ། དེ་ལ་ནི་ཉམས་སྟོབས་སྐྱེད་པའི་ཆོ་ག་ཐམས་ཅད་སྦྱར་རོ། །དེ་ལ་ཐོག་མར་
རིམས་སྨིན་པ་དང་། མ་སྨིན་པའི་རང་བཞིན་ཤེས་པར་བྱ་སྟེ། དེ་ཡང་ཉམས་བརྟ་བ་དང་སྤང་བར་བྱ་བའི་ལེའུ་ལ་བལྟས་ནས་སྨྱུང་བ་བྱས་ལ་ལེགས་པར་འགྱུར་ན་ལུས་རྗུད་པར་སྣང་སྟེ་དེ་ལ་ཐུག་པ་རྐྱང་རྐྱང་པོ་ལ་སོགས་པ་ནད་གཞི་སོ་སོ་དང་མཐུན་པའི་སྨན་སྦྱར་ལ་རིམ་གྱིས་གཏང་ངོ་། །
དེ་ནས་ཐུག་པའི་ཁུ་བ་བླུད་པ་ནི་སྨན་པ་མཁས་པས་ཇི་སྲིད་དུ་རིམས་རྩེ་ཞིལ་ནས་སམ། ཞག་དྲུག་ལོན་པའི་འོག་ཏུ་བླུད་པར་བྱའོ། །ཐུག་པའི་རིམ་པ་དེ་ལྟར་བྱས་ན། ཕོ་བའི་མེ་དྲོད་སྐྱེད་པར་བྱེད་དོ། །ཇི་ལྟར་བུད་ཤིང་ལ་མེ་བཞིན་ནོ། །ཐུག་པའི་ཁུ་བ་དྲོ་བའི་ཕྱིར་རྔུལ་
འབྱིན་པར་བྱེད་དོ། །སྨན་དང་སྦྱར་བ་སྤང་བའི་ཕྱིར་དང་མེ་དྲོད་སྐྱེད་པའི་ཕྱིར། ཁུ་བ་ཡིན་པའི་ཕྱིར་སྐོམ་པ་ཞི་བར་བྱེད་དོ། །ཁ་ཟས་ཡིན་པའི་ཕྱིར་ཉམས་སྟོབས་སྐྱེད་པར་བྱེད་དོ། །རྩར་མྱུར་དུ་འགྲོ་བའི་ཕྱིར་ཡང་བ་ཉིད་དོ། །རིམས་ལ་ཕན་པར་བྱེད་པའི་ཕྱིར་རིམས་འཇོམས་སོ། །
དེ་བས་ན་ཐོག་མར་ཐུག་པས་རིམས་གསོ་བར་བྱའོ་ཞེས་ཟེར་རོ། །དེ་ལ་ཐུག་པ་ནི་ཐོག་མ་འབྲས་ཡོས་ཀྱི་ཐུག་པ་དང་། དེའི་འོག་ཏུ་འབྲས་བརྔོས་པ་བཏགས་པའི་ཐུག་པའི་ནང་དུ་སྤོད་བཅའ་སྒ་དང་། འུ་སུ་དང་། པི་པི་ལིང་དང་། རྒྱམ་ཚས་བཏབ་པ་བླུད་དོ། །གལ་ཏེ་སྐྱུར་ལ་
གོམས་པ་ཡིན་ན། སེའུ་འབྲུ་བཏབ་སྟེ་ལྷན་ཅིག་བླུད་དོ། །མཁྲིས་པ་ཤས་ཆེ་སྟེ། ཕྱི་ས་སླ་བར་འབྱུང་བ་ལ་ནི་ཐུག་པ་བཅའ་སྒས་བཏབ་སྟེ་བསྒྲངས་པའི་ནང་དུ་སྦྲང་རྩི་བཏབ་པ་བླུད་དོ། །ཆུ་སོ་དང་། རྩིབ་ལོགས་དང་། མགོ་བོ་རྣམས་སུ་ཟུག་ཅིང་ན་བ་ལ་ནི་ཀཎྜ་ཀ་རི་དང་།

གཟེ་མ་ལས་གཞི་བླངས་པའི་ཐུག་པ་བླུད་དོ། །ཀྲྀཥྞ་པརྞི་དང་། བ་ལ་དང་། བིལ་བ་དང་། དོང་གྲ་དང་། ཨུཏྤ་ལ་དང་། འུ་སུ་དང་། འདི་རྣམས་ལས་གཞི་བླངས་པའི་ཐུག་པ་སྐྱུར་གྱིས་བཏབ་པ་བླུད་ན་རིམས་དང་འཁྲུ་བ་ལ་ཕན་ཏེ། མེའི་དྲོད་སྐྱེད་ཅིང་
སྨིན་པར་བྱེད་དོ། །དབུགས་མི་བདེ་བ་དང་། སྐྱིགས་བུ་དང་། གཟེར་བ་དང་། ལུད་པ་ལ་ནི་རྩ་བ་ལྔ་པ་ཆུང་ངུ་ལས་གཞི་བླངས་པའི་ཐུག་པ་བླུད་དོ། །རིམས་ནད་བད་ཀན་ཤས་ཆེ་བས་ཉམ་ཐག་པ་ལ་ནི་རྩ་བ་ཆེན་པོ་ལྔ་པ་དང་། ནས་ལས་གཞི་བླངས་པའི་ཐུག་པ་བླུད་དོ། །
རིམས་རྟུག་པ་འགག་པ་ལ་ནི་པི་པི་ལིང་དང་སྐྱུ་རུ་ར་ལས་གཞི་བླངས་པའི་ནས་ཐུག་གི་ནང་དུ་མར་བསྐོལ་བ་བཅུག་སྟེ་འཐུངས་ན་དྲི་མ་འགགས་པ་ཚུལ་བཞིན་འབྱུང་ངོ་། །ཁོང་པར་འཁྱིལ་ཞིང་ཟུག་གཟེར་དང་བཅས་པ་ལ་ནི་དབྱི་མོང་དང་། པི་པི་ལིང་གི་རྩ་བ་དང་། རྒུན་འབྲུམ་
དང་། སྐྱུ་རུ་ར་དང་། དོང་གྲ་ལས་གཞི་བླངས་པའི་ཐུག་པ་བླུད་དོ། །ཁོང་པ་འཁྲོག་པ་ལ་ནི་རྒྱ་ཤུག་དང་། ད་ཏྲིག་དང་། ས་ལ་པརྞི་དང་། ཀྲྀཥྞ་པརྞི་དང་། བིལ་བ་དང་། བ་ལ་དང་། དེ་རྣམས་ལས་གཞི་བླངས་པའི་ཐུག་པ་བླུད་དོ། །རྔུལ་དང་གཉིད་མེད་ཅིང་
སྐོམ་པས་གདུངས་པ་ལ་ནི་ཁ་ར་དཀར་པོ་དང་། སྐྱུ་རུ་ར་དང་། དོང་གྲ་ལས་གཞི་བླངས་པའི་ཐུག་པ་བླུད་དོ། །སྐོམ་དད་ཆེ་བ་དང་། སྐྱུག་བྲོ་བ་ལས་ཁྱབ་པའི་རིམས་ནད་ལ་ནི་ཁ་ར་དཀར་པོ་དང་། རྒྱ་ཤུག་དང་། རྒུན་འབྲུམ་དང་། ཐལ་ཏྲེས་དང་། གླ་སྒང་དང་། ཙནྡན་
དཀར་པོ་དང་། འདི་རྣམས་ལས་གཞི་བླངས་པའི་ཐུག་པ་སྦྲང་རྩིས་བཏབ་པ་བླུད་དོ། །གོང་གི་ཐུག་པ་ལ་སྨོས་པའི་སྨན་རྣམས་དང་། ཤ་ཁུ་དང་། སྲན་མུངྒ་ལ་སོགས་པའི་ཁུ་བཅུད་ལ་སོགས་པ་ལ་ཡང་ཅི་རིགས་པར་སྦྱར་རོ། །དེ་ལ་ཐུག་པ་བླུད་དུ་མི་རུང་བ་ནི་ཆང་ལས་
རིམས་སུ་གྱུར་པ་དང་། ཆང་རྟག་ཏུ་འཐུངས་པ་དང་། སོ་ག་ཚ་བའི་དུས་དང་། མཁྲིས་པའི་གནས་སུ་བད་ཀན་ཞུགས་ཏེ། ལྷག་པར་ཤས་ཆེར་ན་བ་དང་། སྐོམ་དད་ཆེ་བ་དང་། སྐྱུག་བྲོ་བ་དང་། ལུས་ཚ་བ་དང་། སྟོད་དུ་ཁྲག་ལུད་པ་རྣམས་ལ་ནི་ཐུག་པ་མི་བླུད་དེ།

དེ་ལ་ནི་རིམས་འཇོམས་པའི་ཤིང་ཏོག་རྒུན་འབྲུམ་ལ་སོགས་པའི་ཁུ་བ་དང་འབྲས་ཡོས་བཏགས་པའི་ཕྱེའི་སྐྱོ་མ་སྦྲང་རྩི་དང་ཁ་ར་དང་ལྡན་པར་བླུད་དོ། །སྨན་དེ་དག་ཞུ་བའི་ཚོད་ཙམ་ན། ནས་ཐུག་དང་། འབྲས་བརྔོས་པའི་ཆན་དང་། ཁྱིམ་བྱ་ལ་སོགས་པ་མཆུས་གཟས་ཚོལ་
བའི་ཤ་ཁུ་དང་། སྲན་མུངྒའི་འུ་ཤ་དང་བཅས་པ་སྦྱིན་ནོ། །དེ་ལྟར་ཐུག་པ་ལ་སོགས་པའི་རིམ་པ་གོང་དུ་བསྟན་པ་དེ་དག་ཀྱང་ཉམས་སྟོབས་བྲི་བ་དང་བསྲུང་བ་དང་། ནད་གཞི་རྣམས་མི་འོང་བར་བྱ་བའི་ཕྱིར་ཞག་དྲུག་གི་བར་དུ་སྤྱད་དོ། །དེའི་འོག་ཏུ་རིམས་སྨིན་པ་དང་། སྨྱུང་
བ་ལ་སོགས་པ་རབ་ཏུ་བསྔགས་ཏེ། ཉེས་པའི་ལྷག་མ་ལུས་པ་ལ་ནི་སྨིན་པ་དང་། ཞི་བར་བྱ་བའི་ཕྱིར་སྨན་བསྐོལ་བའི་ཁུ་བ་དྲོན་པོ་དེ་ཉིད་གྲང་མོར་བྱས་པ་དང་། སྨན་རང་གི་ཁུ་བ་དང་། ཐུག་པ་རྐྱང་རྐྱང་བོ་ལ་སོགས་པའི་སྐྱོ་མ་ལ་སོགས་པའི་ནད་གཞི་ཇི་ལྟ་བ་བཞིན་དུ་བླུད་དོ། །མཁྲིས་
པ་ལས་གྱུར་པའི་རིམས་ནད་ལ་ནི་ཁྱད་པར་དུ་ཁ་བའི་སྨན་སྦྱར་ཏེ། བད་ཀན་ལས་གྱུར་པའི་རིམས་ལ་ཡང་སྨན་ཁ་བ་དང་ཚ་བ་རྣམས་སྦྱར་རོ། །མཁྲིས་པ་དང་བད་ཀན་ལས་གྱུར་པའི་རིམས་ལ་ནི། རོ་བསྐ་བ་ཕན་མོད་ཀྱི་རིམས་སར་པ་ལ་ནི་མི་བསྔགས་སོ། །ཇི་ལྟ་ཞེ་ན། རོ་བསྐ་
བས་ནི་རྟུག་པ་འགགས་པ་དང་། རིམས་མི་ཟད་པ་དང་། བྲང་ཚ་ཞིང་ཁ་ནས་ཆུ་སྐྱུར་འབྱུང་བ་དང་། ལྟོ་སྦོ་བ་ལ་སོགས་པ་སྐྱེད་པར་བྱེད་དོ། །འདིར་སྨན་པ་ཁ་ཅིག་ན་རེ་ཞག་དྲུག་ཕན་ཆད་རིམས་འཇོམས་པའི་སྨན། གླ་སྒང་དང་། ལྡུམ་བུ་སྐྲ་བཟངས་ལ་སོགས་པ་གཟོད་གཏང་ངོ་
ཞེས་ཟེར་རོ། །གཞན་དག་ན་རེ་ཞག་བཅུ་ཕན་ཆད་སྨན་དཔྱད་གཟོད་བྱའོ་ཞེས་ཟེར་རོ། །ཡང་སྨན་པ་ཁ་ཅིག་ན་རེ་ཟས་ཡང་བ་ཐུག་པ་ལ་སོགས་པ་ཞག་དྲུག་གི་བར་དུ་བྱིན་ལ། དེ་ཕན་ཆད་སྨན་དཔྱད་གཟོད་བྱའོ་ཞེས་ཟེར་རོ། །ཡང་གཞན་དག་ན་རེ་གོང་མ་དེ་དག་ནི་ངེས་
པ་མ་ཡིན་ཏེ་ནད་ཀྱི་གནས་སྐབས་ལས་ལྟོས་ཏེ། སྨན་དཔྱད་བྱའོ་ཞེས་ཟེར་རོ། །རིམས་མ་སྨིན་པ་ནི་ཞག་བཅུ་ལོན་ན་ཡང་སྨན་དཔྱད་མི་བྱ་སྟེ། ཟླ་བ་ཕྱེད་དང་གཉིས་ཀྱི་བར་དུ་ཡང་དགག་གོ། །གང་གི་ཕྱིར་ནད་གཞི་ཤུགས་དྲག་པས་རིམས་མ་སྨིན་ཏེ། ཤས་

ཆེར་ན་བ་ལ་སྨན་བཏང་ན་ཕྱིར་ཞིང་ཐུ་བར་བྱེད་དོ། །གཞན་ཡང་རིམས་གསར་པ་ན་ཞིང་སྙོམ་ལ་རྨོངས་བག་ཏུ་འདུག་པ་ལ་སྨན་བྱིན་ན་ཡང་རིམས་མཆེད་པར་བྱེད་དོ། །དུས་གང་དག་གི་ཚེ་སྨན་བྱིན་ཞེ་ན། དྲག་པོའི་ཟུག་གཟེར་ལྷོད་པ་དང་། ལུས་ཡང་བ་
དང་། དྲི་མ་རྣམས་བསྐྱོད་པར་གྱུར་ན་དེའི་ཚེ་ཞག་དྲུག་ལ་སོགས་པ་མ་ལོན་ཏེ། ཡུན་རིང་བ་ཡིན་ན་ཡང་སྨན་བླུད་པ་ལ་སོགས་པ་བྱའོ། །དེ་ལྟར་ནད་གཞི་སོ་སོའི་བྱེ་བྲག་ཤེས་པར་བྱས་ནས་སྨིན་པར་བྱ་བའི་སྨན་སྐྲ་ལོ་དང་། བཅའ་སྒ་དང་། བྱི་ཚེར་བ་དང་། དེ་གསུམ་གང་
ཡང་རུང་བ་གླ་སྒང་དང་ལྡན་པར་བསྐོལ་བའི་ཁུ་བའམ། ཡང་ན་བ་ལ་དང་། པུ་ཤེལ་ཙི་དང་། བ་ལ་ཀ་འདི་གསུམ་བསྐོལ་བའི་ཁུ་བ་གྲང་མོའམ། ཡང་ན་ཏིག་ཏ་དང་། སླེ་ཏྲེས་དང་། གླ་སྒང་དང་། དོང་གྲ་དང་། འདི་རྣམས་བསྐོལ་བའི་ཁུ་བ་གྲང་མོ་བླུད་དོ། །འདིར་
སྨན་བསྐོལ་བའི་ཚད་ནི་སྨན་སྲང་གཅིག་ཆུ་སྲང་བཅུ་དྲུག་དང་བསྐོལ་ཏེ། བཞི་ཆ་སྲང་བཞི་ལུས་པར་བྱའོ། །བསྒྲངས་པ་ཞེས་སྨོས་པ་ནི་ཆུ་བསྐོལ་བ་སྲང་དྲུག་གི་ནང་དུ་སྨན་སྲང་གཅིག་བཅུག་པའོ། །འདི་དག་ཇི་ལྟར་རིགས་པ་བཞིན་སྦྱར་བས་བླུད་ན། ནད་རྣམས་སྨིན་པར་བྱེད་པ་
ཡིན་ཏེ། རིམས་དང་། ཡི་ག་འཆུས་པ་དང་། སྐོམ་དད་ཆེ་བ་དང་། ཁ་ཟས་ཀྱི་རོ་མི་ཚོར་བ་དང་། མ་ཞུ་བ་རྣམས་འཇོམས་སོ། །དུག་མོ་ཡུངས་དང་། པ་ཏོ་ལའི་ལོ་མ་དང་། པུ་ཙེ་ཤེལ་དང་། འདི་རྣམས་བསྐོལ་བའི་ཁུ་བ་བླུད་ན་རྒྱུན་གྱི་རིམས་ལ་ཕན་ནོ། །
པ་ཏོ་ལ་དང་། ཐལ་ཏྲེས་དང་། གླ་སྒང་དང་། པ་ཐ་དང་། པུ་ཙེ་ཤེལ་དང་། འདི་རྣམས་བསྐོལ་བ་བླུད་ན་རྟག་པའི་རིམས་ལ་ཕན་ནོ། །པ་ཏོ་ལ་དང་། ནིམ་པ་དང་། འབྲས་བུ་གསུམ་དང་། རྒུན་འབྲུམ་དང་། དུག་མོ་ཡུངས་ཀྱི་ཤུན་ཕྲགས་དང་འདི་རྣམས་
བསྐོལ་བའི་ཁུ་བ་བླུད་ན། ཉིན་གཅིག་པའི་རིམས་ལ་ཕན་ནོ། །ཏིག་ཏ་དང་། སླེ་ཏྲེས་དང་། ཙནྡན་དཀར་པོ་དང་། བཅའ་སྒ་དང་འདི་རྣམས་བསྐོལ་བའི་ཁུ་བ་བླུད་ན་ཉིན་གསུམ་པའི་རིམས་ལ་ཕན་ནོ། །སྐྱུ་རུ་ར་དང་། གླ་སྒང་དང་། སླེ་ཏྲེས་རྣམས་བསྐོལ་

བའི་ཁུ་བའི་ནང་དུ་སྦྲང་རྩི་བཏབ་སྟེ་བླུད་ན་ཉིན་བཞི་པའི་རིམས་ཞི་བར་བྱེད་དོ། །དེ་ལ་རླུང་ལས་གྱུར་པའི་རིམས་ལ་ནི། བྱི་ཚེར་བ་དང་། སླེ་ཏྲེས་དང་། བཅའ་སྒ་དང་། དོང་གྲ་རྣམས་བསྐོལ་བའི་ཁུ་བའམ། ཡང་ན་པི་པི་ལིང་གི་རྩ་བ་དང་། སླེ་ཏྲེས་དང་། བཅའ་
སྒ་རྣམས་ལྷན་ཅིག་བསྐོལ་བའམ། ཡང་ན་རྩ་བ་ཆུང་ངུ་ལྔ་བསྐོལ་བའི་ཁུ་བ་བླུད་ན་ཕན་ནོ། །མཁྲིས་པ་ལས་གྱུར་པའི་རིམས་ལ་ནི་དུག་མོ་ཡུངས་དང་། གླ་སྒང་དང་། པུ་ཙེ་ཤེལ་བསྐོལ་བའི་ཁུ་བ་གྲང་མོའི་ནང་དུ་སྦྲང་རྩི་བཏབ་པ་བླུད་པའམ། ཡང་ན་གླ་སྒང་དང་།
སྐྲ་ལོ་དང་། བྱི་ཚེར་བ་དང་། ཏིག་ཏ་རྣམས་བསྐོལ་བའི་ཁུ་བ་བླུད་ན་ཕན་ནོ། །བད་ཀན་ལས་གྱུར་པའི་རིམས་ལ་ནི་དུག་མོ་ཡུངས་ཀྱི་སྡེ་ཚན་བསྐོལ་བའམ། ཡང་ན་བ་ཤ་ཀ་དང་། གླ་སྒང་དང་། བཅའ་སྒ་དང་། བྱི་ཚེར་བ་རྣམས་བསྐོལ་བའི་ཁུ་བ་བཏང་ན་ཕན་
ནོ། །རླུང་དང་བད་ཀན་དུ་འདྲེས་པའི་རིམས་ལ་ནི་མེ་དྲོད་སྐྱེད་པ་དང་། སྨིན་པར་བྱེད་པའི་སྨན་ཨ་རུ་ར་དང་། པི་པི་ལིང་གི་རྩ་བ་དང་། དོང་གྲ་དང་། པུ་ཙེ་ཤེལ་རྣམས་བསྐོལ་བ་བླུད་དོ། །རླུང་དང་མཁྲིས་པ་འདྲེས་པའི་རིམས་ལ་ནི་རྒུན་འབྲུམ་དང་། ཤིང་
མངར་དང་། ཤིང་ཏོག་མ་རུ་ཀ་དང་། སེང་ཕྲོམ་དང་། ཏང་པལ་དང་། ཐལ་ཏྲེས་དང་། གླ་སྒང་དང་། སྐྱུ་རུ་ར་དང་། བལ་ཀ་དང་། པདྨའི་གེ་སར་དང་། ཤུག་པ་དང་། པདྨའི་རྩ་བ་དང་། ཙནྡན་དང་། པུ་ཤེལ་ཙེ་དང་། ཨུཏྤལ་སྔོན་པོ་
དང་། པ་རུ་ཤ་ཀ་དང་། འདི་རྣམས་ཕྱེ་མར་བཏགས་པ་ཆུ་དང་བསྐོལ་བ་སྐན་ཏེར་གྱུར་པའམ། ཡང་ན་བསྐོལ་བའི་ཁུ་བ་བསྒྲངས་ནས་མེ་ཏོག་ཀུ་སུ་མའི་དྲིས་བསྒོས་ལ་སྦྲང་རྩི་དང་། ཁ་ར་དཀར་པོ་དང་། འབྲས་ཡོས་བཏགས་པའི་ཕྱེ་མས་བཏབ་པ་འཐུངས་ན་
མྱུར་དུ་ཞི་བར་བྱེད་དོ། །དེ་བཞིན་དུ་རིམས་དང་། ཆང་ནད་དང་། སྐྱུག་བྲོ་བ་དང་། བརྒྱལ་བ་དང་། ལུས་ཚ་བ་དང་། མགོ་འཁོར་བ་དང་། ཁྲག་སྟོད་དུ་ལུད་པ་དང་། མིག་སེར་རྣམས་འཇོམས་སོ། །པུ་ཙེ་ཤེལ་བཏགས་པའི་ཕྱེ་མ་ཆུ་དང་དོག་ལེ་སར་པ་

གཙང་མའི་ནང་དུ་བསྐོལ་ལ། རས་དང་བཙགས་ཏེ། ཚིགས་མ་བོར་ལ། ཁུ་བ་དངས་མའི་ནང་དུ་མར་གྱིས་བཏབ་པའི་ཁུ་བ་དེ་འཐུངས་ན་རིམས་དང་ལུས་ཚ་བ་རྣམས་འཇོམས་སོ། །བད་ཀན་དང་རླུང་འདྲེས་པའི་རིམས་ལ་ནི་ཤུ་དག་དང་།
པུ་ཙེ་ཤེལ་དང་། པ་ཐ་དང་། དོང་ག་དང་། དུག་མོ་ཡུངས་ཀྱི་ཤུན་པ་རྣམས་བསྐོལ་ལ་བླུད་དོ། །ཡང་ན་སླེ་ཏྲེས་བསྐོལ་བའི་ཁུ་བའི་ནང་དུ་པི་པི་ལིང་གི་ཕྱེ་མ་བཏབ་པ་འཐུངས་ན་ཡང་ཕན་ནོ། །ཡང་ཀཎྜ་ཀ་རི་དང་། བཅའ་སྒ་དང་། སླེ་ཏྲེས་བསྐོལ་
བའི་ཁུ་བའི་ནང་དུ་པི་པི་ལིང་གི་ཕྱེ་མས་བཏབ་པ་འཐུངས་ན་རླུང་དང་བད་ཀན་ལས་གྱུར་པའི་རིམས་དང་། ལུད་པ་དང་། དབུགས་མི་བདེ་བ་དང་། སྣ་ཆུ་འཛག་པ་དང་། ཟུག་གཟེར་རྣམས་འཇོམས་སོ། །ཨ་རུ་ར་དང་། འུ་སུ་དང་། གླ་སྒང་དང་། བཅའ་
སྒ་དང་། བུ་ཏི་ཀ་དང་། པར་པ་ཏ་ཞེས་བྱ་བ་སྲོ་ལོ་དང་། ཀད་ཕ་ལ་དང་། ཤུ་དག་དང་། ག་བྲའི་རྩ་བ་དང་། ཐང་ཤིང་དང་། འདི་རྣམས་བསྐོལ་བའི་ནང་དུ་ཤིང་ཀུན་དང་། སྦྲང་རྩི་དང་ལྡན་པར་བྱས་ཏེ་འཐུངས་ན། རླུང་དང་བད་ཀན་གྱི་རིམས་དང་། ལྟོ་
བ་དང་། སྙིང་དང་། རྩིབ་ལོགས་སུ་ཟུག་ཅིང་ན་བ་དང་། ལྐོག་མ་དང་། སྐྲན་ནད་དང་། ལུད་པ་དང་། དབུགས་མི་བདེ་བ་རྣམས་སེལ་ཏོ། །བད་ཀན་དང་མཁྲིས་པ་ལས་གྱུར་པའི་རིམས་ལ་ནི་དོང་གའི་སྡེ་ཚན་བསྐོལ་བའི་ཁུ་བའི་ནང་དུ་སྦྲང་རྩི་བཏབ་པ་བླུད་ན་
ཕན་ནོ། །ཡང་ན་པུ་ཙེ་ཤེལ་དང་། བ་ཤ་ཀ་དང་། པུ་ཤེལ་ཙེ་དང་། འབྲས་བུ་གསུམ་དང་། སླེ་ཏྲེས་དང་། པ་ཏོ་ལ་དང་། བོང་ང་དཀར་པོ་དང་། ནིམ་པ་དང་། མུར་བ་དང་། བྱི་ཚེར་བ་རྣམས་བསྐོལ་བའི་ནང་དུ་སྦྲང་རྩིས་བཏབ་པ་འཐུངས་ན་ཡང་
བད་ཀན་དང་མཁྲིས་པའི་རིམས་ལ་ཕན་ནོ། །འདུས་པ་ལས་གྱུར་པའི་རིམས་ལ་ནི། ཀཎྜ་ཀ་རི་དང་། ཐང་ཤིང་དང་། སྐྱེར་བ་དང་། གླ་སྒང་དེ་རྣམས་བསྐོལ་བའི་ནང་དུ་པ་ཏོ་ལ་དང་། ནིམ་པ་དང་། འབྲས་བུ་གསུམ་དང་། པུ་ཙེ་ཤེལ་རྣམས་

བཏགས་པའི་ཕྱེ་མས་བཏབ་པ་བླུད་དོ། །འདུས་པའི་རིམས་དང་རླུང་དང་བད་ཀན་ཤས་ཆེ་བ་དང་། ལུད་པ་དང་། དབུགས་མི་བདེ་བ་དང་། རྩིབ་ལོགས་ན་བ་རྣམས་ལ་ནི་དོང་གྲ་དང་། མ་ནུ་དང་། སླེ་ཏྲེས་དང་། ཀཎྜ་ཀ་རི་རྣམས་བསྐོལ་བའི་ཁུ་བ་བླུད་དོ། །
མ་དུ་ཀའི་མེ་ཏོག་དང་། རྒུན་འབྲུམ་དང་། ཀྱི་ལྕེ་བ་དང་། པ་རུ་ཤ་ཀ་དང་། པུ་ཤེལ་ཙེ་དང་། པུ་ཙེ་ཤེལ་དང་། འབྲས་བུ་གསུམ་དང་། ཏང་པལ་དང་། འདི་རྣམས་ཆོ་ག་བཞིན་དུ་བསྐོལ་ཏེ་བསྒྲངས་པ་དུས་སུ་འཐུངས་ན་འདུས་པ་དང་ལྡན་པའི་རིམས་
ཐམས་ཅད་སེལ་ཏོ། །ཛཱ་ཏི་ཞེས་བྱ་བ་སུ་མ་ནའི་མེ་ཏོག་དང་། སྐྱུ་རུ་ར་དང་། གླ་སྒང་དང་། བི་ཙར་བ་གོང་མ་བཞིན་བསྐོལ་བ་དུས་སུ་འཐུངས་ན་རིམས་ནད་ཐམས་ཅད་སེལ་ཏོ། །རིམས་ནད་རྟུག་པ་འགགས་པ་ལ་ནི། པུ་ཙེ་ཤེལ་དང་། རྒུན་འབྲུམ་
དང་། ཀྱི་ལྕེ་བ་དང་། འབྲས་བུ་གསུམ་བསྐོལ་བའི་ནང་དུ་བུ་རམ་བཏབ་པ་བཏུང་ན་ཕན་ནོ། །སྨན་དེ་དག་ཞུ་བའི་ཚོད་ཙམ་ན། ཟས་སུ་ཐུག་པ་ལ་སོགས་པའི་རིམ་པ་སྨན་དང་ལྡན་པར་སྦྱིན་ནོ། །རིམས་ནད་བད་ཀན་ཅན་ལ་ནི་ཐུག་པ་ལ་སོགས་པ་མི་བླུད་དོ། །
ཇི་ལྟར་རྔུལ་གྱི་སྟེང་དུ་ཆར་བབ་ན་འདམ་དུ་འགྱུར་བ་དང་འདྲ་བར་བད་ཀན་འཕེལ་བར་འགྱུར་བའི་ཕྱིར་རོ། །དེ་བས་ན་བད་ཀན་ལས་གྱུར་པའི་རིམས་ལ་ཐོག་མར་སྨྱུང་བ་ལེགས་པའི་མཚན་མ་དང་། དང་པོ་ཐུག་པ་ལ་སོགས་པ་མི་བླུད་པར་རྒྱ་སྲན་དང་། མོན་སྲན་
ཙ་ན་ཀ་དང་། མོན་སྲན་ལས་བྱས་པའི་ཁུ་བཅུད་ཡང་བ་ཉུང་བ་དང་། སྣུམ་མེད་པ་སྨན་ཁ་བ་དང་བཅས་པ་ཡི་གར་འོང་བ་ལན་ཚྭ་དང་ལྡན་པ་སྦྱིན་ནོ། །ཁ་ཟས་ནི་འབྲས་དམར་པོ་ལ་སོགས་པ་རྙིང་པ་དང་། འབྲས་དྲུག་ཅུ་པ་ལ་སོགས་པ་ཕན་ནོ། །བད་ཀན་
ཤས་ཆེ་བའི་རིམས་ལ་ནི་བད་ཀན་འཇོམས་པའི་མཐུ་དང་ལྡན་པའི་སྨན་བསྐོལ་བའི་ནང་ན་གོང་དུ་སྨོས་པའི་འབྲས་དམར་པོའམ། ནས་ཕུབ་མ་མེད་པར་བྱས་པ་ལན་གཉིས་གསུམ་བཀྲུས་ལ་ནད་དང་མཐུན་པར་འབྲས་ཆན་དང་། ནས་ཆན་དུ་བྱས་ཏེ་ཟའོ། །

སྲན་མུངྒ་དང་། སྲན་ཆུང་དང་། རྒྱ་སྲན་ལ་སོགས་པ་ཡང་ཞིང་ཉུང་བའི་ཁུ་བཅུད་ནད་པ་གང་ལ་གོམས་པ་འཐུངས་ན་རིམས་འཇོམས་སོ། །ཚོད་མར་ནི་ཀ་ར་ཝེལ་ལ་དང་། རྒྱལ་མོ་ག་གོན་དང་། ལ་ཕུག་གཞོན་ནུ་དང་། པར་
པ་ཏ་དང་། བར་ད་ཀ་དང་། ནིམ་པ་དང་། ཀུ་སུ་མ་དང་། པ་ཏོ་ལའི་འབྲས་བུ་དང་། ལོ་མ་དང་འདི་རྣམས་གང་རྙེད་པ་ལ་ཚོད་མར་བྱའོ། །ཤ་ཁུ་ནི་ཤ་ཡང་བ་རྣམས་དང་། སྲོག་ཆགས་ཐང་ལ་གནས་པ་སྲེག་པ་ལ་སོགས་པའི་ཤ་ཁུ་ཀཎྜ་ཀ་རི་དང་།
པ་རུ་ཤ་ཀ་དང་། ཨག་ནི་མན་ཐ་དང་། རྒུན་འབྲུམ་དང་། སྐྱུ་རུ་ར་དང་། སེའུ་འབྲུ་དང་། པི་པི་ལིང་དང་། བཅའ་སྒ་དང་། འུ་སུ་དང་། ཟི་ར་དང་། རྒྱམ་ཚ་རྣམས་དང་། ཁ་ར་དཀར་པོ་དང་། སྦྲང་རྩི་དང་། འདི་རྣམས་རླུང་དང་། སྣུམ་
མེད་ན་ཡང་རུང་སྟེ། ལེགས་པར་སྦྱར་བ་གཏང་ངོ་། །ཚོད་མའི་ནང་དུ་སྦྱར་བ་ནི་དར་བ་ཧ་ཅང་མི་སྐྱུར་བ་ཡི་གར་འོང་བའི་དངས་མ་མེ་མི་ཆེ་བ་དང་བསྐོལ་ཏེ། ཟས་ཀྱི་འོག་ཏུ་གཏང་ངོ་། །ཡང་ན་སྨན་བསྐོལ་བའི་ཆུ་བསྒྲངས་པའམ། གལ་ཏེ་ཆང་ལ་གོམས་པ་
ཡིན་ན་ནི། ཆང་སྐོམ་དུ་བླུད་དོ། །རིམས་བྱང་བའམ། མ་བྱང་ཡང་རུང་སྟེ། ཉི་མ་ནུབ་པའི་དུས་སུ་བད་ཀན་ཟད་ཅིང་མེའི་དྲོད་ཆེ་བའི་དུས་ཡིན་པས་དེའི་ཚེ་ན་ཟས་ཡང་ཟའོ། །ཡང་ན་ནད་དང་རྗེས་སུ་མཐུན་པར་ཟས་བཟའ་སྟེ། དེ་ཡང་བད་ཀན་ལ་
སྔ་དྲོ། མཁྲིས་པ་ལ་ཉི་མ་ཕྱེད། རླུང་ལ་ཕྱི་དྲོ་སྦྱིན་ནོ། །ནད་པ་དེ་མེ་དྲོད་ཆུང་བ་ལ་སྔ་དྲོ་ཟས་སྦྱིན་ན་དེས་ནི་ནད་ཕྱིར་ཐུ་བར་འགྱུར་རོ། །སྨན་བསྐོལ་བའི་ཁུ་བ་དང་། ཕན་པའི་ཟས་ཀྱིས་ལུས་ཡང་བར་འགྱུར་ཏེ། བད་ཀན་དང་མེ་དྲོད་ཆུང་སྟེ། མཁྲིས་པ་དང་
རླུང་ཤས་ཆེ་ན་ཞག་བཅུ་པ་ཡན་ཆད་མར་སྦྱིན་ནོ། །རིམས་སྨིན་པ་ལ་མར་བཏང་ན་ནི་བདུད་རྩི་དང་འདྲའོ། །མ་སྨིན་པ་ཡིན་ན་ནི་ཞག་བཅུ་པ་ལས་འདས་པ་ཡིན་ན་ཡང་ལུད་པ་དང་། ཡི་ག་འཆུས་པ་ལ་སོགས་པ་ཉེས་པ་སྣ་ཚོགས་སྐྱེད་དོ། །བད་ཀན་ཤས་

ཆེ་བའི་རིམས་ལ་ནི། དང་པོ་སྨྱུང་བ་དང་སྨན་ཁ་བའི་ཁུ་བ་ལ་སོགས་པས་བད་ཀན་ཟད་པར་བྱའོ། །ལུས་ཟུངས་དང་ཉམས་སྟོབས་འཕེལ་བའི་ཕྱིར་རིམས་རྙིང་པ་བསྲུང་བར་བྱའོ། །གང་གི་ཕྱིར་མཁྲིས་པ་མེའི་རང་བཞིན་སྨིན་པར་བྱེད་པ་ནི་རྩུབ་པ་དང་གཤེར་བག་
སྤངས་པ་ཡིན་ཏེ། དེས་མཁྲིས་པ་སྐྱེས་པ་དེ་ལས་ནི་སློན་ན་དུགས་བསྐོལ་བའི་ཆུ་དང་། རོ་བསྐ་བ་དང་། ཡང་བའི་ཟས་ཀྱིས་ལུས་ཤས་ཆེར་རྩུབ་སྟེ། རླུང་སྟོབས་ཆེ་བ་འཁྲུག་པར་བྱས་པ་དེ་ལ་ནི་མར་མཆོག་ཏུ་ཕན་ཏེ། ཁོང་པའི་ནང་དུ་མེ་འབར་བ་ལ་ཆུས་
བསད་པ་དང་འདྲའོ། །མར་ནི་རླུང་དང་མཁྲིས་པ་སེལ་བའི་མཆོག་ཡིན་ཏེ། རང་རང་དང་མཐུན་པའི་སྨན་དང་སྦྱར་ན་ནི་ནད་ཀུན་ལ་ཡང་ཕན་ནོ། །མར་དེ་བསིལ་བའི་སྨན་དང་སྦྱར་ན་ནི་རིམས་ཚ་བ་འཇོམས་ལ། དྲོ་བའི་སྨན་དད་སྦྱར་ན་ནི་གྲང་བའི་
རིམས་སེལ་ཏོ། །རྩུབ་པའི་སྨན་དང་སྦྱར་ན་ནི་བད་ཀན་ཞི་བར་བྱེད་དོ། །དེ་ལྟ་བས་ན་གོང་དུ་སྨོས་པའི་སྐྲ་ལོ་དང་། གླ་སྒང་བསྐོལ་བའི་ཁུ་བ་ལ་སོགས་པ་ནད་གཞི་སོ་སོ་དང་མཐུན་པའི་སྨན་མར་དང་ཅི་རིགས་སུ་སྦྱར་ཏེ་གཏང་ངོ་། །འབྲས་བུ་གསུམ་དང་།
ནིམ་པའི་ཤུན་ཕྲགས་དང་། ཤིང་མངར་དང་། བྲི་ཧ་ཏི་རྣམ་གཉིས་ཕྱིར་སྲང་གཅིག་དང་། སྲན་ཆུང་སྲང་གཅིག་དང་། དེ་རྣམས་བསྐོལ་བའི་ནང་དུ་མར་སྲང་ཕྱེད་བཅུག་སྟེ་འཐུངས་ན་རིམས་དང་ལུད་པ་ལ་ཕན་ནོ་ཞེས་སྨན་པ་རྒན་པོ་རྣམས་འཆད་དོ། །པི་པི་ལིང་
དང་། དུག་མོ་ཡུངས་དང་། ད་བ་ནི་ཞེས་བྱ་བ་ཀཎྜ་ཀ་རི་དང་། པུ་ཙེ་ཤེལ་དང་། ཐལ་ཏྲེས་དང་། སྐྱུ་རུ་ར་དང་། ཏ་མ་ལ་ཀ་དང་། བིལ་བ་དང་། གླ་སྒང་དང་། ཙནྡན་དང་། པ་ལ་ནི་ཞེས་བྱ་བ་ཀྱི་ལྕེ་བ་དང་། པུ་ཤེལ་ཙི་དང་། རྒུན་འབྲུམ་དང་།
བོང་ང་དཀར་པོ་དང་། ས་ལ་པརྞི་དང་། འདི་རྣམས་མར་དང་མར་གྱི་བཞི་འགྱུར་གྱི་ཆུ་དང་ལྷན་ཅིག་བསྐོལ་བ་ལས་རན་པར་འཐུངས་ན་རིམས་དང་མེའི་དྲོད་མ་སྙོམས་པ་དང་། ཧ་ལི་མ་ཀ་ཞེས་བྱ་བའི་ནད། ཡི་ག་འཆུས་པ་དང་། ཚ་བ་ཤས་ཆེ་བ་དང་། སྲིན་

ཤ་ཡ་དང་། སློན་པ་དང་། རྩིབ་ལོགས་དང་། མགོ་ན་བ་དང་། ཟད་བྱེད་ཀྱི་ནད་མྱུར་དུ་འཇོམས་སོ། །རླུང་ལས་གྱུར་པའི་རིམས་ལ་ནི་རླུང་ནད་གསོ་བའི་སྐབས་སུ་བཤད་པའི་སེང་ཕྲོམ་གྱི་སྨན་མར་ལས་དུར་བྱིད་མ་གཏོགས་པ་ལྷག་
མ་སྦྱར་བར་བྱའོ། །མཁྲིས་པ་ལས་གྱུར་པའི་རིམས་ལ་ནི་ཏིག་ཏའི་སྨན་མར་མཛེ་ནད་ཀྱི་སྐབས་སུ་བཤད་པ་དང་། བ་ཤ་ཀའི་སྨན་མར་ཁྲག་མཁྲིས་ཀྱི་སྐབས་སུ་བཤད་པ་དང་། ཀྱི་ལྕེ་བིའི་སྨན་མར་ཁོང་འབྲས་ཀྱི་ནང་དུ་སྨོས་པ་དང་སྦྱར་ན་ཕན་ནོ། །བད་ཀན་
ལས་གྱུར་པའི་རིམས་རྙིང་པ་ལ་ནི་བྱི་དང་ག་དང་། ཁ་རུ་ཚ་དང་། དབྱི་མོ་དང་། པ་ཐ་དང་། ཚ་བ་གསུམ་དང་། ཙི་ཏྲ་ཀ་དང་། རྒྱམ་ཚ་དང་། ནས་ཚིག་འཁུས་པའི་ཐལ་བ་དང་། འདི་རྣམས་སྲང་རེ་རེ་དང་། མར་སྲང་སུམ་ཅུ་རྩ་གཉིས་དང་། དེ་དང་
མཉམ་པའི་འོ་མ་དང་། ཆུ་སྲང་དགུ་བཅུ་རྩ་དྲུག་དང་བསྐོལ་ཏེ་དེ་ལས་རན་པར་འཐུངས་ན་བད་ཀན་ལས་གྱུར་པའི་རིམས་རྙིང་པ་འཇོམས་སོ། །སླེ་ཏྲེས་ཆམ་ཆོམ་བརྡུངས་ལ་བསྐོལ་ཏེ། བཞི་ཆ་ལུས་པ་དང་དེ་ཉིད་ཀྱི་ཕྱེ་མ་བཏབ་སྟེ། སྨན་གྱི་བཞི་འགྱུར་གྱི་
མར་དང་ཡང་བསྐོལ་ཏེ་བཟའ་བའམ། དེ་བཞིན་དུ་འབྲས་བུ་གསུམ་དང་། བ་ཤ་ཀ་དང་། རྒུན་འབྲུམ་དང་། བ་ལ་རྣམས་རེ་རེ་ནས་གོང་མ་སླེ་ཏྲེས་ཀྱི་སྦྱོར་བ་ལྟར་འཐུངས་ན་རིམས་གཅོད་པར་འགྱུར་རོ། །གོང་གི་མར་དེ་ཞུ་བའི་ཚད་ཙམ་ན། ཤ་འཇམ་
པའི་ཁུ་བ་དང་ལྷན་ཅིག་ཟན་ཟོས་ན་སྟོབས་སྐྱེད་དོ། །དེས་ཉེས་པ་འཇོམས་པའི་མཆོག་ཡིན་ནོ། །སྲན་མུངྒ་དང་། ཀ་ར་བིར་ལ་སོགས་པའི་ཁུ་བཅུད་ནི་བད་ཀན་དང་མཁྲིས་པ་འཇོམས་སོ། །ཤས་ཆེར་བྱིན་ན་ནི་རླུང་ལས་གྱུར་པའི་རིམས་རྙིང་པ་ལ་
མི་ཕན་ཏེ། ཟུག་གཟེར་དང་ལྟོ་བ་ན་སྲ་བར་བྱེད་ཅིང་རིམས་འཕེལ་བར་བྱེད་དོ། །གལ་ཏེ་གོང་དུ་སྨོས་པའི་སྦྱོར་བ་དེ་དག་གིས་ཀྱང་རིམས་མ་ཞི་ན་གོང་དུ་སྨོས་པའི་སློན་དང་འོག་ནས་སྨོས་པའི་བཀྲུ་སྨན་གྱིས་ལུས་དག་པར་བྱ་སྟེ། སྦྲུམ་མ་དང་། མེ་དྲོད་ཆུང་

བ་དང་། ལུས་རྩུབ་པ་རྣམས་ལ་ནི་མི་བྱའོ། །ཕོ་བའི་ནང་དུ་བད་ཀན་ཞུགས་པའི་ནད་གཞི་སྟོབས་ཆེ་བ་ལ་ནི་སྨན་པས་ནད་པའི་ཉམས་སྟོབས་བསྲུང་བར་བྱའོ། །རིམས་སྨིན་ཏེ་རང་རང་གི་གནས་ནས་བསྐྱོད་པ་དང་། རིམས་མི་ཟད་པ་མ་གཏོགས་པ་གཞན་ལ་བཀྲུ་
སྨན་གཏང་སྟེ། འབྲས་བུ་གསུམ་དང་། ཤ་མ་དུར་བྱིད་དང་། པི་པི་ལིང་དང་། ནཱ་ག་གེ་སར་དང་། ཁ་ར་དཀར་པོ་དང་། འདི་རྣམས་བཏགས་པ་སྦྲང་རྩི་དང་རི་ལུར་བྱས་པ་བཏང་བའམ། ཡང་ན་དྲི་སྣ་གསུམ་ལ་སོགས་པ་ཚ་བ་གསུམ་གྱི་བཀྲུ་སྨན་
ཆོ་ག་གྲུབ་པའི་གནས་སུ་བསྟན་པ་བཏང་བའམ། ཡང་ན་རྒུན་འབྲུམ་སྐྱུ་རུ་རའི་ཁུ་བ་དང་སྦྱར་བའམ། ཡང་ན་རྒུན་འབྲུམ་དང་། ཨ་རུ་ར་སྦྱར་བའམ། ཡང་ན་སྐྱུ་རུ་ར་རང་གི་ཁུ་བའི་ནང་དུ་མར་བརྔོས་པ་བླུད་ན་ཡང་རིམས་འཇོམས་སོ། །ཡང་ན་སྐྱུ་རུ་
རའི་ཕྱེ་མ་མར་དང་སྦྲང་རྩི་དང་སྦྱར་བ་བལྡག་པའམ་དོང་ཀ་འོ་མའམ་རྒུན་འབྲུའི་ཁུ་བ་བཏུང་བའམ། ཡང་ན་འབྲས་བུ་གསུམ་མམ། ཀྱི་ལྕེ་བ་འོ་མ་དང་སྦྱར་བ་རིམས་ནད་ཅན་ལ་བླུད་དོ། །དེ་ལྟར་ཁྲུས་དང་སློན་བྱས་པའི་འོག་ཏུ་ཐུག་པ་རྐྱང་རྐྱང་པོ་ལ་སོགས་པ་
རིམ་པས་བླུད་དོ། །རིམས་རང་གི་གནས་ནས་བསྐྱེད་དེ་གོང་འོག་གཉིས་སུ་འཁྲུ་སྟེ་འབྱུང་བར་འགྱུར་ན། སྨིན་པ་ཡིན་ན་ཡང་མི་གཅད་པར་གཞག་གོ། །གལ་ཏེ་བཅད་ན་ནི་ཁོང་པའི་ནང་དུ་གནས་རྙེད་དེ་ངེས་པར་གནོད་པར་བྱེད་དོ། །རིམས་སྨིན་ཏེ་ཚབས་
ཆེར་འཁྲུ་བ་ལ་ནི་གཅད་བར་བྱའོ། །མ་ཞུ་བར་རང་འཁྲུ་སྟེ། ཚབས་ཆེ་བར་འབྱུང་བ་ལ་ནི། མདོའི་གནས་ནད་གཞི་གསུམ་གྱི་མཚན་ཉིད་བསྟན་པ་ནས་འབྱུང་བ་བཞིན་དུ་བྱའོ། །མ་སྨིན་པའི་རིམས་དང་འཁྲུ་བ་ཡིན་ན་ནི་མི་གཅད་དེ། གལ་ཏེ་སྨན་གྱིས་
གཅད་པར་གྱུར་ན་ནད་སྐྱེད་དོ། །གལ་ཏེ་སྨན་པ་རྨོངས་པ་མི་མཁས་པས་རིམས་ནད་མ་སྨིན་པ་ལ་བཀྲུ་སྨན་གཏོང་བ་ནི་རང་ཉིད་ཕུང་བར་བྱེད་པ་ཡིན་ཏེ། ཇི་ལྟར་སྦྲུལ་ནག་པོ་གཉིད་ལོག་པ་ལ་ལག་པའི་རྩེ་མོས་ཉུག་པ་དང་འདྲའོ། །རིམས་ནད་ལུས་ཟད་པ་ལ་ནི་

སློན་ཁྲུས་མི་ཕན་ཏེ། གལ་ཏེ་བཀྲུ་སྨན་དང་འབྱོར་པ་ཡིན་ན་ནི་འོ་མའི་བཏུང་བ་ཅི་འདོད་པ་དང་། ནི་རུ་ཧ་བཏང་སྟེ་འཁྲུ་བ་ཞི་བར་བྱའོ། །ནད་པ་འོ་མ་ལ་གོམས་ཤིང་བད་ཀན་ཟད་པ་དང་། ལུས་ཚ་བ་དང་། སྐོམ་དད་ཆེ་བ་དང་། རླུང་
དང་མཁྲིས་པས་ཉམ་ཐག་པ་ལ་ནི་འོ་མ་རབ་ཏུ་ཕན་ཏེ། འཁྲུ་བ་ལ་ཡང་ཕན་ནོ། །སྨྱུང་བས་ཉམ་ཐག་པ་ལ་ནི་འོ་མ་མཆོག་ཏུ་བཟང་སྟེ། ནགས་མེས་ཆག་པ་ལ་ནི་ཆར་བབས་ནས་ས་བོན་ཆེར་འཕེལ་བ་དང་འདྲ་བར་རིམས་མྱུར་དུ་ཞི་བར་བྱེད་དོ། །འོ་མ་དེ་ཡང་སོ་སོའི་
སྨན་དང་ལེགས་པར་སྦྱར་ཏེ། དྲོ་བ་དང་གྲང་བ་དང་། བཞོས་མ་ཐག་པ་ལ་སོགས་པ་དུས་ཀྱི་བྱེ་བྲག་ཤེས་པར་བྱ་སྟེ། ཅི་རིགས་པར་བླུད་ན་རིམས་ལ་ཕན་ནོ། །ལོག་པར་བྱས་ན་ནི་མ་ཡིན་ནོ། །འོ་མ་དེ་བཅའ་སྒ་དང་། འབྲ་གོ་དང་། རྒུན་འབྲུམ་དང་།
ཤ་ཁ་ར་དང་མར་དང་ལྷན་ཅིག་བསྐོལ་ཏེ་བསྒྲངས་པའི་ནང་དུ་སྦྲང་རྩི་དང་ལྡན་པར་འཐུངས་ན་སྐོམ་དད་ཆེ་བ་དང་ལུས་ཚ་བ་དང་རིམས་འཇོམས་སོ། །སྦྱོར་བ་གོང་མའི་སྟེང་དུ་རྒུན་འབྲུམ་དང་། བ་ལ་དང་། ཤིང་མངར་དང་། ཐལ་ཏྲེས་དང་། པི་པི་ལིང་དང་།
ཙནྡན་རྣམས་བསྐོལ་ཏེ་བསྒྲངས་པའི་ནང་དུ་སྦྲང་རྩི་བཏབ་པ་བླུད་ན་ཡང་ཕན་ཡོན་གོང་མ་དང་འདྲའོ། །ཡང་ན་འོ་མ་ཏི་ཚེ་འོ་མའི་བཞི་འགྱུར་གྱི་ཆུ་དང་བསྐོལ་བ་བླུད་པའམ། ཡང་ན་པི་པི་ལིང་དང་། འོ་མ་བསྐོལ་བ་བླུད་དོ། །ཡང་ན་འོ་མ་རྩ་བ་ལྔ་དང་བསྐོལ་
བ་འཐུངས་ན་ལུད་པ་དང་། དབུགས་མི་བདེ་བ་དང་། མགོ་ན་བ་དང་། རྩིབ་ལོགས་ན་བ་དང་ཟུག་པ་དང་རིམས་རྙིང་པ་རྣམས་སེལ་བར་བྱེད་དོ། །ཡང་ན་ཨེ་རཎྜའི་རྩ་བ་དང་། བ་ལ་དང་། བིལ་བ་གང་ཡང་རུང་བ་བསྐོལ་བའི་ཁུ་བ་འོ་མ་བཞོས་མ་ཐག་པའི་དྲོན་
པོ་དང་ལྷན་ཅིག་འཐུངས་ན་རིམས་ནད་ལས་གྲོལ་བར་བྱེད་དོ། །ཁྱད་པར་དུ་རླུང་གིས་ཕྱི་ས་འགགས་པ་དང་། བེའུ་སྣབས་ཁྲག་དང་བཅས་པར་འབྱུང་བ་དང་། སྐོམ་པ་དང་། ཟུག་གཟེར་དང་། སྲ་བ་ཧི་ཀ་ལ་ནི་ནད་ལས་གྲོལ་བར་བྱེད་དོ། །ཡང་ན་

བཅའ་སྒ་དང་། བ་ལ་དང་། ཀཎྜ་ཀ་རི་དང་། གཟེ་མ་དང་། བུ་རམ་དང་། འོ་མ་སྦྱར་བ་འཐུངས་ན་སྐྲང་བ་དང་། ཕྱི་ས་དང་། གཅིན་དང་། འཕྱེན་འགགས་པ་དང་། རིམས་ལས་རྒྱལ་བར་བྱེད་དོ། །བ་སྤྲུ་བ་མེ་ཏོག་དཀར་པོ་ཅན་དང་།
བིལ་བ་དང་། བཪྴ་བྷུ་ཞེས་བྱ་བ་བ་སྦྲུ་བ་མེ་ཏོག་དམར་པོ་ཅན་རྣམས་འོ་མ་དང་བསྐོལ་བ་འཐུངས་ན་རིམས་དང་གྲང་བ་སེལ་ལོ། །ཤིང་ཤ་པའི་སྙིང་པོ་དང་། འོ་མ་སྦྱར་བ་འཐུངས་ན་ཡང་རིམས་མྱུར་དུ་འཇོམས་སོ། །རིམས་ཞུ་བའི་གནས་སུ་ཞུགས་ནས། ནི་
རུ་ཧ་བཏང་བར་གྱུར་ན་མྱུར་དུ་མེའི་སྟོབས་སྐྱེད་པ་དང་། རིམས་དང་བྲལ་བ་དང་། དགའ་བར་བྱེད་པ་དང་། ཟས་ཡི་གར་འོང་བར་བྱེད་དོ། །མཁྲིས་པ་ལས་གྱུར་པའི་རིམས་སམ། མཁྲིས་པ་དང་། བད་ཀན་ལས་གྱུར་པའི་རིམས་ཁུ་བའི་གནས་སུ་
ཞུགས་པ་ལ་ནི་བཀྲུ་སྨན་གཏོང་ངོ་། །ནད་གཞི་གསུམ་ཆར་སྨིན་པའི་གནས་སུ་སོང་བ་ལ་ནི་འཇམ་རྩིས་ཞི་བར་བྱའོ། །བད་ཀན་དང་མཁྲིས་པ་ཟད་པའི་ནད་ལ་མཇུག་ཏོ་དང་། རྒྱབ་དང་། རྐེད་པ་ན་བ་དང་། མེ་དྲོད་ཆེ་བ་དང་། རྟུག་པ་འགགས་པ་ལ་ནི་
འཇམ་རྩི་མས་གཏོང་བར་བྱའོ། །པ་ཏོ་ལ་དང་། ནིམ་པའི་ལོ་མ་དང་། པུ་ཙེ་ཤེལ་དང་། དོང་ག་དང་། ཏི་ར་དང་། བ་ལ་དང་། གཟེ་མ་དང་། པོ་སོན་ཆ་དང་། པུ་ཤེལ་ཙེ་དང་། བ་ལ་ཀ་དང་། འདི་རྣམས་ཆུ་དང་། སྨན་སྤྱི་དང་མཉམ་
པའི་འོ་མ་དང་ལྷན་ཅིག་བསྐོལ་ལ། འོ་མ་ལུས་པའི་ནང་དུ་གླ་སྒང་དང་། པོ་སོན་ཆ་དང་། པི་པི་ལིང་དང་། ཤིང་མངར་དང་། དུག་མོ་ཡུངས་ཀྱི་ཤུན་ཕྲགས་རྣམས་ཀྱི་ཕྱེ་མ་བཏབ་སྟེ། མར་དང་སྦྲང་རྩི་བསྲེས་པས་སྡུད་པའི་འཇམ་རྩི་མས་གཏོང་ན་
རིམས་འཇོམས་པར་བྱེད་དོ། །ཡང་ན་དོང་ག་དང་། པུ་ཤེལ་ཙེ་དང་། ཤིང་མངར་དང་། པོ་སོན་ཆ་དང་། འདབ་མ་རྣམ་བཞི་དང་། འདི་རྣམས་བསྐོལ་བའི་ཁུ་བའི་ནང་དུ་པྲི་ཡང་ཀུ་དང་། པོ་སོན་ཆ་དང་། གླ་སྒང་དང་། ཉེའུ་ཤིང་དང་། ཤིང་

མངར་དང་། འདི་རྣམས་ཀྱི་ཕྱེ་མ་བཏབ་ལ། མར་དང་བསྐོལ་ཏེ་སྨན་གཏོང་ཀ་ར་བུ་རམ་དང་སྦྲང་རྩི་བཏབ་སྟེ་མས་གཏོང་ན་རིམས་སེལ་ཏོ། །ཡང་ན་ཛི་བནྟི་དང་། ཤིང་མངར་དང་། མེ་ད་དང་། པི་པི་ལིང་དང་། པོ་སོན་ཆ་དང་། ཤུ་དག་
དང་། རིད་ཏི་དང་། ར་སྣ་དང་། བ་ལ་དང་། བིལ་བ་དང་། ཤུ་ཏི་དང་། ཉེའུ་ཤིང་རྣམས་བཏགས་ལ་སྨན་སྤྱིའི་བཞི་འགྱུར་གྱི་མར་དང་། ཏིལ་མར་བསྲེས་པ་དང་། མར་གྱི་བཞི་འགྱུར་གྱི་འོ་མ་དང་། ཆུ་ཉིས་འགྱུར་དང་བསྐོལ་བ་ནད་གཞི་ཇི་ལྟ་བ་བཞིན་དུ་འཇམ་
རྩི་མས་གཏོང་ན་རིམས་འཇོམས་སོ། །གཞན་ཡང་ཆོ་ག་གྲུབ་པའི་སྐབས་སུ་བཤད་པའི་འཇམ་རྩི་ཡང་འདིར་རིམས་ནད་ལ་སྦྱར་རོ། །རིམས་རྙིང་པ་ལ་སྣ་སྨན་བཏང་ན་ཡི་ག་འབྱེ་བ་དང་། མགོ་ནད་དང་། ལུས་ལྕི་བ་དང་། བད་ཀན་འཕྲོག་ལ་དབང་པོ་གསལ་
བར་བྱེད་དོ། །སྣུམ་དང་བཅས་པའི་སྣ་སྨན་བཏང་ན་ནི་མགོ་སྟོང་པ་སྙམ་བྱེད་པ་དང་། ལུས་ཚ་བ་དང་། མཁྲིས་པ་རྣམས་འཇོམས་སོ། །གཞན་ཡང་ཆམ་པ་དང་། མགོ་དང་། མགུལ་པའི་ནད་དང་། ལྕེས་རོ་མི་ཚོར་བ་རྣམས་ལ་ནི་དུད་པ་བརྔུབ་པ་དང་།
སྨན་ཁུས་མཁུར་བ་བཀང་སྟེ་མི་བསྐྱོད་པར་བཞག་པ་དང་། གཡས་གཡོན་སྤོ་བའི་སྨན་ཁུ་བཅང་བ་རྣམས་མདོའི་གནས་སུ་ཇི་ལྟར་བསྟན་པ་རྣམས་ནད་གཞི་དང་སྦྱར་ཏེ་བཏང་ངོ་། །རིམས་རྙིང་པ་ཟས་ཡི་གར་མི་འོང་བ་ལ་ནི་ཁ་ལུང་གི་གེ་སར་མར་དང་། རྒྱམ་ཚར་
བཅས་པའི་ལྡེ་གུའམ། ཡང་ན་རྒུན་འབྲུམ་དང་། ཁ་ར་དཀར་པོ་དང་། སྐྱུ་རུ་རའི་ཁུ་བ་བཅངས་ན་ཕན་ནོ། །པགས་པ་ལ་བརྟེན་པའི་རིམས་རྙིང་པ་ལ་ནི་ཇི་ལྟར་རིགས་པ་བཞིན་དུ་དྲོ་བ་དང་གྲང་བའི་སྨན་བསྐོལ་བས་བསྐུ་བ་དང་། བྱུག་པ་དང་། བླུགས་
པ་ལ་སོགས་པ་བྱའོ། །དེ་བཞིན་དུ་མིག་སྨན་དང་དུད་པ་བརྔུབ་པ་ལ་སོགས་པ་བྱ་སྟེ། གློ་བུར་དུ་བྱུང་བའི་རིམས་ལ་ཡང་ཚུལ་དེ་ལྟར་བྱའོ། །རིམས་རྙིང་པ་ལ་ལུས་ཚ་བ་ལ་ནི་མར་ལན་སྟོང་གི་བར་དུ་ཆུ་གྲང་མོར་བཅུག་པ་ལ་ཡང་བཞུ་ཡང་བཅུག་བྱས་པའི་མར་

བསྐུས་ན་ཚ་བའི་རིམས་ཞི་བར་བྱེད་དོ། །ཡང་ན་མདོའི་གནས་སུ་བསྟན་པའི་མངར་བའི་སྡེ་ཚན་གེ་སར་ལ་སོགས་པའམ། ཡང་ན་སྐྱུར་བའི་སྡེ་ཚན་སྐྱུ་རུ་ར་ལ་སོགས་པའམ། བསྐ་བའི་སྡེ་ཚན་ཨ་རུ་ར་ལ་སོགས་པའམ། རྩྭ་དཱུར་བའི་སྡེ་ཚན་ནམ། མཁྲིས་
པ་འཇོམས་པའི་སྡེ་ཚན་ནྱ་གྲོ་དྷ་ལ་སོགས་པ་འམ། ཤུག་པའི་སྡེ་ཚན་ནམ། སྨན་གྱི་སྡེ་ཚན་དེ་དག་གང་ཡང་རུང་བ་འོ་མ་དང་། ཏིལ་མར་དང་། བསྐོལ་བ་ཡང་རུང་མ་བསྐོལ་བ་ཡང་རུང་སྟེ། འདག་གུ་དང་སྨན་མར་གྱི་བསྐུ་བ་ལ་སོགས་པ་ཆོ་ག་ཇི་ལྟ་
བ་བཞིན་དུ་བྱས་ན་དེ་མ་ཐག་པའི་རིམས་འཇོམས་སོ། །ཡང་ན་གོང་གི་སྨན་གྱི་སྦྱོར་བ་དེ་ཉིད་ཅུང་ཟད་རྩིང་ཙམ་དུ་བཏགས་པའི་ལྡེ་གུས་ལུས་བསྐུ་བར་བྱའོ། །གལ་ཏེ་ཞི་བར་དྲགས་ན་ནི་ཚ་བ་ཕྱིར་མི་འབྱུང་སྟེ། སླར་ཁོང་དུ་ཞུགས་ནས་ཚ་བ་སྐྱེ་བའི་ཕྱིར་རོ། །
གོང་མའི་སྨན་དེ་ཉིད་བསྐོལ་བའི་ནང་དུ་ལུས་གཞུག་པའམ་བླུགས་པ་ཡང་བྱའོ། །དེ་བཞིན་དུ་རྩབ་མོ་དང་། ཆང་སྐྱུར་དང་། འོ་མ་དང་། མར་དང་། ཆུ་ལ་སོགས་པའི་ནང་དུ་བླུགས་པ་དང་། ལུས་སྤྱིང་བར་བྱའོ། །ཀ་པིད་ཏ་དང་། ཁ་ལུང་དང་།
ཨ་མྲ་དང་། བི་ད་རི་དང་། སེང་ཕྲོམ་དང་། སེའུ་འབྲུ་དང་། རྒྱ་ཤུག་གི་མྱུ་གུ་དང་། འདི་རྣམས་ཨ་རིཥྚའི་ནང་དུ་བྱས་ལ་དེའི་སྦུ་བས་ལུས་བསྐུས་ན་ལུས་ཚ་བ་དང་། ན་བ་དང་། རྨོངས་བག་ཏུ་འདུག་པ་དང་། སྐོམ་དད་ཆེ་བ་རྣམས་ཞི་བར་
བྱེད་དོ། །དེ་བཞིན་དུ་མཁྲིས་པས་ལུས་འགྱུར་བ་བསྟན་པའི་ལེའུ་ལས་འབྱུང་བའི་གསོ་བ་འདིར་བྱས་ན། ཚ་བའི་རིམས་མྱུར་དུ་སེལ་ཏོ། །དྲོ་བའི་ནུས་པ་དང་རེག་པ་དང་ལྡན་པའི་སྨན་རྒྱ་སྤོས་དང་། ཨ་ཀ་རུ་དང་། རུ་རྟ་དང་། སྟོན་དང་། རྡོ་དྲེག་
དང་། ཀོ་ཉོན་ཙེ་དང་། ཐང་ཤིང་དང་། ཆུ་སྲིན་སེན་མོ་དང་། ར་སྣ་དང་། གུ་གུལ་དང་། ཤུ་དག་དང་། རྩ་རོང་དང་། སུག་སྨེལ་རྣམ་གཉིས་དང་། ཙནྡན་དང་། སིབ་དང་། ཤི་ཀྲུ་དང་། བྱེའུ་རུག་པ་དང་། སྤང་སྤོས་དང་། བྱ་མ་

ཀ་དང་། ཡུངས་ཀར་དང་། སླེ་ཏྲེས་དང་། ཨེ་རཎྜ་རྣམ་གཉིས་དང་། བ་རུ་ར་དང་། རོ་ཧི་ཤ་དང་། །ཏ་མ་ལའི་ལོ་མ་དང་། བྷུ་ཏི་ཀ་དང་། ས་ལི་ཀ་དང་། འུ་སུ་དང་། ཏི་མུ་ས་དང་། ཤུ་ཏི་དང་། རྒྱ་སྲན་དང་། མོན་སྲན་མ་
ཤ་དང་། ཀྲུ་ཏྲུག་ཏྲེས་དང་། པུ་ཏི་ཀ་རཉྫ་དང་། ན་གུ་ལ་རྣམ་གཉིས་དང་། གཞན་ཡང་བསིལ་བའི་ནུས་པ་དང་ལྡན་པའི་སྨན་རྣམས་ཞིབ་ཏུ་བཏགས་ལ་ཆང་དང་རྩབས་སྐྱུར་པོ་དང་ཏིལ་མར་དང་ལྷན་ཅིག་བསྐོལ་ཏེ། དྲོ་འཇམ་ཙམ་བྱས་པས་བསྐུ་
བའམ། ཡང་ན་ཞིབ་ཏུ་བཏགས་པའི་ལྡེ་གུས་བྱུག་པ་བྱས་ན། རིམས་གྲང་བ་ཞི་བར་བྱེད་དོ། །ཡང་ན་རྒྱ་སྤོས་ལ་སོགས་པ་གོང་གི་སྦྱོར་བ་དེ་ཉིད་ཀྱིས་བླུགས་པ་དང་། ལུས་སྤྱིང་བ་ལ་སོགས་པ་བྱའོ། །དེ་བཞིན་དུ་ཆང་སྐྱུར་དང་། བ་གཅིན་
དང་། ཞོ་ག་ཆུ་ལ་སོགས་པ་སྨན་མེད་པའི་ཉི་ཚེའི་བླུགས་པ་ལ་སོགས་པ་བྱའོ། །ཡང་ན་དོང་ཀ་ལ་སོགས་པའི་སྡེ་ཚན་གྱི་བཏུང་བ་དང་། བསྐུ་བ་དང་བྱུག་པ་ལ་ཡང་སྦྱར་རོ། །ཨ་ཀ་རུའི་དུད་པ་དང་། པ་ལ་ཀའི་དུད་པ་འོག་ནས་སྨོས་པ་གང་
ཡིན་པ་ཡང་རིམས་གྲང་མོ་འདི་ལ་སྦྱར་རོ། །མེའི་དྲོད་བསྐྱེད་པར་བྱ་བའི་ཕྱིར་དུགས་ཀྱི་ཆོ་ག་བསྟེན་པར་བྱའོ། །དེ་བཞིན་དུ་རླུང་མེད་པའི་ཁང་པར་འདུག་པ་དང་། རྩོལ་བ་དང་གོས་ལྕི་བ་བགོ་བ་ལ་སོགས་པ་ཡང་བྱའོ། །རྔུལ་དབྱུང་བར་བྱ་བའི་
ཕྱིར་མཁྲིས་པ་སྐྱེད་པའི་སྨན་བཟའ་བར་བྱ་སྟེ། རྒྱ་སྲན་ཀུ་ལངྠ་དང་། མ་ཤ་དང་། ནིམ་པ་ཝ་ས་ཞེས་བྱ་བའི་ཟས་དང་། ཤ་རྣམས་སྦྱར་རོ། །གནས་ནི་ཁང་པའི་དབུས་དང་། ས་ཁང་གི་ནང་དུ་རྩྭ་ཀུ་ཤ་དང་། ལྷྭམ་དང་། ར་ལ་ཀ་ཞེས་བྱ་
བའི་སྟན་བྱ་སྟེ། ཁང་པ་དེའི་ནང་དུ་མདག་མ་དུད་པ་མེད་ཅིང་དམར་རུག་གེ་བ་ཞུགས་ལིང་གི་ནང་དུ་བཅུག་སྟེ་བསྲོ་བར་བྱའོ། །གྲང་བའི་དབང་གིས་ཤིན་ཏུ་འདར་བར་གྱུར་པ་ལ་ནི་ཆང་ངམ། དར་བའམ། རྒྱ་སྲན་དང་། ཁྲེ་རྒོད་ལ་སོགས་པ་

འབྲུའི་ཁུ་བའི་ནང་དུ་ཚ་བ་གསུམ་བཏབ་པའམ། གཞན་ཡང་མཁྲིས་པ་སྐྱེད་པའི་སྨན་རྣམས་བསྟེན་པར་བྱའོ། །དེ་བཞིན་དུ་བུད་མེད་ཤིན་ཏུ་ནུ་མ་མཛེས་ཤིང་ཤ་རྒྱས་པ་ལུས་ལ་བྱུག་པ་དང་། རྒྱན་ཐམས་ཅད་ཀྱིས་བརྒྱན་པ་ལང་ཚོ་ལ་བབ་པ་དང་།
ཆང་གིས་ཤིན་ཏུ་དྲེགས་པ་ཡིད་དུ་འོང་ཞིང་ཤིན་ཏུ་འགྱིང་བག་དང་ལྡན་པའི་བུད་མེད་དང་མཐང་སྦྱར་བའི་དུགས་བྱ་སྟེ། ནམ་གྲང་བར་གྱུར་པའི་དུས་ན་བུད་མེད་དེ་སྤང་བར་བྱའོ། །འདུས་པ་ལས་གྱུར་པའི་རིམས་ལ་ནི་ཉེས་པ་གཅིག་ཤས་ཆུང་ཞིང་
གཉིས་ཤས་ཆེ་ན་ནི་གཉིས་ཟད་པར་བྱ་ཞིང་གཅིག་གསོ་བར་བྱའོ། །གཉིས་ཤས་ཆེ་ཞིང་གཅིག་ཤས་ཆུང་ན་ནི་གཉིས་བྲི་ཞིང་གཅིག་བསྐྱེད་པར་བྱའོ། །ཉེས་པ་གསུམ་ཆ་མཉམ་ན་ནི་དང་པོ་བད་ཀན་གསོ་ཞིང་དེ་ནས་རླུང་དང་མཁྲིས་པ་རིམ་བཞིན་
དུ་གསོའོ། །འདུས་པ་ལས་གྱུར་པའི་རིམས་ནད་ཀྱིས་ལུས་ཟད་ཅིང་རྣ་རྩ་གཉིས་སུ་ཤིན་ཏུ་མི་བཟད་པར་ན་བ་སྐྲངས་པར་གྱུར་པ་ནི་འཚོ་བར་དཀའ་སྟེ། ཕལ་ཆེར་འཆི་བར་འགྱུར་བས་དེ་ལ་ནི་མྱུར་དུ་ཁྲག་གཏར་བ་དང་། མར་བླུད་པ་དང་། བད་
ཀན་དང་མཁྲིས་པ་འཇོམས་པའི་སྨན་གྱིས་བྱུག་པ་དང་། སྣ་ནས་བཏང་བའི་སྨན་དང་། མཁུར་བར་བཅང་བ་རྣམས་བྱས་ན་ཕན་ནོ། །ལུས་ཟུངས་རྣམས་ལ་བརྟེན་པའི་རིམས་གྲང་བ་དང་། དྲོ་བ་དང་། སྣུམ་པ་དང་། རྩུབ་པ་ལ་སོགས་
པའི་ཆོ་ག་བྱས་ཀྱང་མ་ཞི་ན་དེ་ལ་ནི་ལག་པ་གཉིས་ལས་རིམ་གྱིས་ཁྲག་དབྱུང་བར་བྱའོ། །རིམས་མི་བཟད་པ་ལ་ཆོ་ག་གོང་མ་དེས་ཀྱང་ཞིར་མི་འདོད་ན་ནད་གཞི་ཇི་ལྟ་བ་བཞིན་དུ། རླུང་ལ་སོགས་པའི་ནད་གང་ཤས་ཆེ་བ་བརྟགས་ཏེ། སོ་སོའི་བྱ་བ་
བཞིན་དུ་སྤང་བར་བྱ་ཞིང་འོག་ནས་སྨོས་པ་བཞིན་དུ་གསོ་བར་བྱ་སྟེ། དེ་ཡང་པ་ཏོ་ལ་དང་། པུ་ཙེ་ཤེལ་དང་། གླ་སྐང་དང་། ཨ་རུ་ར་དང་། ཤིང་མངར་དང་། འདི་རྣམས་ལན་བཞི་ལྔ་བསྐོལ་བའི་རྗེས་སུ་བླུད་ན་རིམས་མི་བཟད་པ་རྣམས་སེལ་

བར་བྱེད་དོ། །འབྲས་བུ་གསུམ་དང་། ཨ་རུ་ར་དང་། སླེ་ཏྲེས་དང་། པི་པི་ལིང་དང་། འདི་རྣམས་གང་ཡང་རུང་བའི་ཁུ་བ་བསྐོལ་བ་དྲོན་མོའམ་གྲང་མོ་ཡང་རུང་སྟེ། དེ་བཞིན་དུ་མར་དང་། འདག་གུ་དང་། ཕྱེ་མ་དང་།
རི་ལུ་ལ་སོགས་པ་རེ་རེའི་སྦྱོར་བ་བཅུད་ཀྱིས་ལེན་གྱི་ཆོ་ག་བཞིན་དུ་བྱ་བའམ་ཡང་ན་གོ་བྱེའུ་གཉིས་དང་སྦྱར་བ་བྱིན་ན་ནི་རིམས་མི་བཟད་པ་ཞི་བར་བྱེད་དོ། །ཉི་མ་གང་ལ་ཉིན་བཞི་པའི་རིམས་ལ་སོགས་པས་བཏབ་པའི་དུས་སུ་ནད་གཞི་རྣམས་བརྟག་སྟེ། ལུས་
འཕེལ་བར་བྱ་བའི་ཆོ་ག་ཚུལ་བཞིན་དུ་བྱའོ། །སྒོག་སྐྱའི་ཏིལ་མར་དང་བཅས་པ་ཐོ་རངས་སམ་ཁ་ཟས་ཀྱི་གོང་དུ་བཏུང་བའམ་དེ་བཞིན་དུ་མར་རྙིང་པ་དང་། ཞོ་དང་། འོ་མ་དང་། དར་བ་དང་། སྲང་དྲུག་པ་ཞེས་བྱ་བའི་མར་གཅོང་ཆེན་པོའི་སྐབས་སུ་
བཤད་པ་དང་། དགེ་བའི་སྨན་མར་སྨྱོ་བྱེད་ཀྱི་སྐབས་སུ་འབྱུང་བ་དང་། བའི་རྣམ་ལྔའི་སྨན་མར་བརྗེད་བྱེད་ཀྱི་སྐབས་སུ་འབྱུང་བ་དང་། ཏིག་ཏའི་སྨན་མར་མཛེ་ནད་ཀྱི་སྐབས་སུ་བཤད་པ་དང་། བ་ཤ་ཀའི་སྨན་མར་ཁྲག་མཁྲིས་ཀྱི་ནང་ནས་འབྱུང་
བའམ། འདི་རྣམས་གང་ཡང་རུང་བ་ནང་པར་རམ་ཟས་ཀྱི་གོང་དུ་རིམས་མི་བཟད་པ་ལ་སྦྱར་བར་བྱའོ། །འབྲས་བུ་གསུམ་དང་། རྒྱ་ཤུག་དང་། ཨག་ནི་མནྠ་དང་། འདི་རྣམས་བསྐོལ་བའི་ནང་དུ་མར་དང་མར་གྱི་ཉིས་འགྱུར་གྱི་ཞོ་དང་། མར་གྱི་བཞི་
ཆའི་སེང་ཕྲོམ་གྱི་ཤུན་ཕྲགས་གི་ཕྱེ་མ་བཏབ་སྟེ། ཡང་བསྐོལ་བའི་མར་ལས་རན་པར་འཐུངས་ན་རིམས་མི་བཟད་པ་འཇོམས་པའི་མཆོག་ཡིན་ནོ། །འབྲས་བུའི་ཆང་དང་། འབྲུའི་ཆང་ལེགས་པར་སྨིན་པ་དང་། རྨ་བྱ་དང་། སྲེག་པ་དང་། ཁྱིམ་
བྱའི་ཤ་གཙང་བ་དྲོ་བའི་ནུས་པ་དང་ལྡན་པ་ཟས་དང་ལྷན་ཅིག་ཅི་འདོད་པ་ཚིམ་ཚད་དུ་ཟོས་ལ། ཞག་དེ་ཉིད་ལ་གཉིད་ལོག་པའམ། ཡང་ན་སློན་དུ་གཞུག་གོ། །ཡང་ན་སྨན་མར་ཐུན་ཚད་ཆེན་པོ་འཐུངས་ལ་དེའི་འོག་ཏུ་སྐྱུག་སྨན་བྱའོ། །ཐོག་མར་སྣུམ་ཆོས་དང་

དུགས་བྱས་ལ། དེ་ནས་ནི་ལི་ནི་དང་། ཨ་ཛ་གནྡྷ་དང་། དུར་བྱིད་དང་། པུ་ཙེ་ཤེལ་དང་། འདི་རྣམས་བཏགས་པའི་ཕྱེ་མ་ཆུ་དང་བསྐྱོས་ཏེ། རིམས་ཀྱིས་བཏབ་པའི་ཞག་བཏུང་ངོ་། །ལྡོང་རོས་དང་། རྒྱམ་ཚ་དང་། པི་པི་ལིང་དང་། ཏིལ་མར་དང་
ལྷན་ཅིག་སྦྱར་བའི་མིག་སྨན་ཡང་གཞུག་གོ། །ཤིང་ཀུན་དང་། སྟག་གི་ཚིལ་ཆ་མཉམ་པ་རྒྱམ་ཚ་དང་སྦྱར་བའི་སྣ་སྨན་གཏང་ངོ་། །ཡང་ན་མར་རྙིང་པ་གཅིག་པུའམ། ཡང་ན་སེང་གེའི་ཚིལ་རྒྱམ་ཚ་དང་སྦྱར་ཏེ་སྣ་སྨན་གཏང་ངོ་། །ཡང་ན་བ་ལ་ཀ་ཤ་དང་།
ནིམ་པའི་ལོ་མ་དང་། ཤུ་དག་དང་། རུ་རྟ་དང་། ཨ་རུ་ར་དང་། ཡུངས་ཀར་དང་། ནས་དང་། མར་དང་སྦྱར་བས་བདུག་པར་བྱས་ན་རིམས་མ་རུངས་པ་སེལ་ཏོ། །ཡང་ན་བྱི་ལའི་རྟུག་པའི་བདུག་པ་ཡང་དེ་བཞིན་དུ་ཕན་ནོ། །བྱ་མ་ཀ་དང་། ཤུ་དག་
དང་། སྲ་རྩི་པོག་དང་། ནིམ་པ་དང་། ཨ་ཀ་དང་། ཨ་ཀ་རུ་དང་། ཐང་ཤིང་དང་། འདི་རྣམས་སྦྱར་བའི་དུད་པ་ནི་གཞན་གྱིས་མི་ཐུབ་པའི་བདུག་པ་ཞེས་བྱ་སྟེ། རིམས་ཐམས་ཅད་ལ་སྦྱར་རོ། །གཞན་ཡང་འཇིགས་པ་ལས་རིམས་སུ་གྱུར་པ་
དང་། སེམས་བསྒྱུར་བ་ལས་རིམས་སུ་གྱུར་པ་དང་། འབྱུང་པོ་དང་། སྨྱོ་བྱེད་དང་། བརྗེད་བྱེད་ཀྱི་ནད་དུ་བཤད་པའི་བདུག་པ་དང་། སྣ་སྨན་དང་མིག་སྨན་དུ་བཤད་པ་རྣམས་སྐབས་འདིར་རིམས་ཐམས་ཅད་ལ་སྦྱར་རོ། །གཞན་ཡང་ལྷ་བསྟན་པ་དང་ནོར་
བུ་བཅང་བ་དང་། སྔགས་དང་། གཏོར་མ་གཏོང་བ་དང་། ལྷ་མཆོད་པ་དང་། སྦྱིན་སྲེག་དང་། ཉེ་བར་གསོ་སྦྱོང་བྱ་བ་དང་། བདེ་ལེགས་དང་ཕྱག་འཚལ་བ་ལ་སོགས་པ་བྱས་ན། རིམས་ནད་ཐམས་ཅད་སེལ་ཏོ། །གློ་བུར་དུ་བྱུང་བའི་རིམས་མི་བཟད