Luận tạng Tây Tạng (Tengyur) — Tập 199

་དང་། བཏུང་བ་གནོད་པ་བསྟེན་པ་དང་། བཟའ་བ་དང་བཏུང་བ་གཡོས་རྙིངས་པར་གྱུར་པའི་ཟས་དང་། མི་འདོད་བཞིན་དུ་ཟོས་པ་དང་། ཟས་སྒོམ་མི་གཙང་བ་ཟོས་པ་དང་། ཁ་ཟས་མི་སྙོམས་པ་ཟོས་པ་དང་། ཁ་
ཟས་ཀྱི་སྦྱོར་བ་ལོག་པར་བྱས་པ་དང་། སེམས་གདུངས་པ་དང་། སྙིང་སྟོབས་ཆུང་བ་དང་། ནད་ཀྱི་ཤུགས་ཀྱིས་དྲན་པ་ཉམས་པ་དང་། གློ་གཅོང་ཟད་བྱེད་ཀྱི་ནད་ལ་མི་བཟད་པ་བསྟེན་པ་དང་། མཆོད་པར་འོས་པའི་ལྷ་དང་བླ་མ་ལ་སོགས་པ་ལ་མཆོད་པ་མི་བྱེད་པ་དང་། སྙིང་ན་བ་དང་།
སྙིང་མི་དྲན་པ་དང་། དུག་དང་། དབྱིག་དུག་དང་། ཉེས་པའི་དུག་ལ་བསྟེན་པས་སྨྱོ་བྱེད་ཀྱི་ནད་འབྱུང་བ་ཡིན་ནོ། །རྒྱུ་གོང་མ་དེ་དག་གིས་སྐྱེས་བུ་སྙིང་སྟོབས་ཞན་པའི་སྙིང་གི་ནང་དུ་ནད་གཞི་རྣམས་ཀྱིས་གནོད་པར་བྱས་པས་བློ་དྲི་མ་དང་བཅས་པར་འགྱུར་ཏེ། ཡིད་རྒྱུ་བའི་སྦུ་བུ་རྣམས་
བཀག་ནས་དེའི་འོག་ཏུ་སྨྱོ་བྱེད་དུ་འགྱུར་ཏེ། དེས་བློ་དང་རྣམ་པར་ཤེས་པ་དྲན་པ་རྣམས་འཁྲུགས་ཤིང་ལུས་ཀྱི་བདེ་བ་དང་སྡུག་བསྔལ་བ་ཡང་མི་ཚོར་ཏེ་ཉམས་ལ་ཤིང་རྟ་ཁ་ལོ་སྒྱུར་བ་དང་བྲལ་བ་བཞིན་དུ། རྩོམ་པ་ཐམས་ཅད་ཀྱང་མ་བསམས་བཞིན་དུ་གཏང་མེད་པར་
འགྱུར་རོ། །དེ་ལ་རླུང་ལས་གྱུར་པའི་སྨྱོ་བྱེད་ཀྱི་མཚན་མ་ལ་ནི་ལུས་ཤ་ཟད་དེ་རིད་པར་གྱུར་པ་དང་། གཞི་མེད་པར་ངུ་བ་དང་། དམོད་པ་དམོད་པ་དང་། དགོད་པ་དང་། འཛུམ་པ་དང་། གར་བྱེད་པ་དང་། གླུ་ལེན་པ་དང་། རོལ་མོ་བྱེད་པ་དང་། ལུས་འགུལ་སྐྱོད་བྱེད་པ་དང་། ཡན་
ལག་གི་ཚོགས་ཉེད་ཅིང་ཚེག་སྒྲ་འདོན་པ་དང་། གཞི་ཡོད་བཞིན་དུ་ཅིའང་མི་བྱེད་པ་དང་། གླིང་བུ་དང་། པི་ཝང་དང་། རྗེས་སུ་མཐུན་པའི་སྒྲ་ཡང་དང་ཡང་དུ་འདོན་པ་དང་། ཁ་ནས་ལྦུ་བ་རྒྱུན་དུ་འཛག་པ་དང་། ཁ་ནས་ཚིག་ཅལ་ཅོལ་མང་དུ་སྨྲ་བ་དང་། ལུས་ལ་རྒྱན་མེད་བཞིན་དུ་རྒྱན་

ཡོད་དོ་ཞེས་ཟེར་བ་དང་། བཞོན་པ་མ་ཡིན་པ་ལ་ཞོན་པ་ཡིན་ནོ་ཞེས་ཟེར་ཞིང་ཞོན་པར་རྩོལ་བ་དང་། ཟས་མེད་པ་ལ་ཟས་འདོད་པ་སྐད་ཟེར་བ་ལ་ཟས་རྙེད་ཅིང་མཐོང་ན་མི་འདོད་པ་དང་། མིག་ཤིན་ཏུ་ཟླུམ་ཤིང་རྩ་དམར་བ་དང་། ཁ་ཟས་ཞུ་བའི་འོག་ཏུ་ནད་ཆེ་བར་ལྡང་བ་ཡིན་ནོ། །མཁྲིས་
པས་སྨྱོས་པའི་མཚན་མ་ནི་གཞན་ལ་སྡིགས་མཛུབ་བསྒྲེང་བ་དང་། ཁྲོ་ཞིང་རྔམ་པ་དང་། ཁུ་ཚུར་དང་བོང་བས་གཞན་ལ་བརྡེག་ཅིང་སྐྲོད་པ་དང་། ཀྲང་བ་དང་། གྲིབ་མ་དང་། ཆུ་འདོད་པ་དང་། གཅེར་བུར་འདུག་པ་དང་། ལུས་ཀྱི་མདོག་སེར་བ་དང་། མེ་མི་སྣང་བར་མེ་འབར་
རོ་ཞེས་སྨྲ་བ་དང་། ཉིན་པར་སྐར་མ་མཐོང་བ་དང་། མར་མེ་མེད་པར་མར་མེ་མཐོང་བ་རྣམས་ཡིན་ནོ། །བད་ཀན་ལས་སྨྱོ་བྱེད་དུ་གྱུར་པའི་རྟགས་ནི་ཁ་ཟས་ཡི་གར་མི་འོང་བ་དང་། སློན་དང་ཁ་ཟས་ཉུང་ངུ་ཟ་ཞིང་སྨྲ་བ་ཉུང་བ་དང་། བུད་མེད་ཤས་ཆེར་འདོད་པ་དང་། གཅིག་པུ་དབེན་པ་ལ་
དགའ་བ་དང་། ཁ་ཆུ་དང་སྣབས་འཛག་པ་དང་། འཇིགས་སྐྱེན་པ་དང་། གཙང་བ་ལ་མི་དགའ་བ་དང་། གཉིད་ཆེ་བ་དང་། གདོང་སྐྲང་པ་དང་། ནད་དེ་ཡང་ནུབ་མོ་ཆེར་ལྡང་ཞིང་ཟས་ཟོས་མ་ཐག་ཤས་ཆེར་ལྡང་བ་རྣམས་ཡིན་ནོ། །མཚན་མ་ཐམས་ཅད་དང་ལྡན་ན་ནི་འདུས་པ་
ལས་གྱུར་པའི་སྨྱོ་བྱེད་ཀྱི་རྟགས་སུ་བལྟ་སྟེ། དེ་ནི་མི་བཟད་པ་ཡིན་པས་སྨན་པས་ཡོངས་སུ་སྤང་བར་བྱའོ། །སེམས་གདུངས་པ་ལས་སྨྱོ་བྱེད་དུ་གྱུར་པའི་མཚན་མ་ནི། ནོར་དང་སྙིང་དུ་སྡུག་པ་ལ་སོགས་པ་བྲལ་བར་དཀའ་བ་དང་བྲལ་ཏེ། དེའི་སྡུག་བསྔལ་གྱིས་ཟིལ་གྱིས་
མནན་ནས་ལུས་ཀྱི་དབལ་སྐྱ་ཞིང་བཞིན་ཤིན་དུ་ཞན་པས་ངུ་ཞིང་ཀྱི་ཧུད་ཅེས་སྨྲེ་སྔགས་འདོན་ཞིང་ཡང་དང་ཡང་དུ་དྲན་པ་སྟོར་བར་གྱུར་པ་དང་། གློ་བུར་དུ་བརྒྱལ་བར་གྱུར་ཏེ། ནོར་དང་སྙིང་དུ་སྡུག་པ་ལ་སོགས་པའི་ཡོན་ཏན་བརྗོད་ཅིང་མྱ་ངན་གྱིས་སེམས་ཉོན་མོངས་པ་དེ་ལ་རྩེ་གཅིག་ཏུ་མི་
སེམས་པ་དང་། མཚན་ཐོག་ཐག་ཏུ་མི་ཉལ་བར་སེམས་སྣ་ཚོགས་སུ་སེམས་པ་ཡིན་ནོ། །དུག་འཐུང་བ་ལས་སྨྱོ་བྱེད་དུ་གྱུར་པའི་རྟགས་ནི་གདོང་སྔོ་སྐྱར་འདུག་པ་དང་། གཟི་མདངས་ཉམས་པ་དང་། མིག་ལ་སོགས་པ་དབང་པོའི་སྟོབས་ཉམས་པ་དང་། དུག་གི་མཐུས་འཇུ་བའི་དུས་ན་

ཡང་དྲན་པ་ཉམས་ཤིང་མིག་དམར་བར་གྱུར་པ་ལ་ནི་གསོ་བའི་ཆོ་ག་མེད་དེ་སྤང་བར་བྱའོ། །དེ་ལ་རླུང་ལས་གྱུར་པའི་སྨྱོ་བྱེད་དུ་གྱུར་པའི་ནད་ལ་ནི་ཐོག་མར་སྨན་མར་སྦྱར་ཏེ་བཏུང་བར་བྱའོ། །རླུང་དང་གཞན་འདྲེས་པ་ཡིན་ན་ནི། བཀྲུ་སྨན་དང་སློན་སྨན་འཇམ་པོ་སྣུམ་དང་བཅས་པར་
གཏོང་ངོ་། །བད་ཀན་དང་མཁྲིས་པ་ལས་གྱུར་པའི་སྨྱོ་བྱེད་ལ་ནི་དང་པོ་སྣུམ་དང་དུགས་བྱ་སྟེ། དེའི་འོག་ཏུ་སློན་དང་ཁྲུས་བྱས་ཏེ། དེ་ནས་དུགས་བྱས་ནས་མས་གཏོང་བ་དང་མགོ་ཁྲུས་ཀྱང་བྱའོ། །དེ་ལྟར་སློན་ཁྲུས་ལ་སོགས་པས་ལུས་དག་པར་བྱས་ནས་དྲན་པ་རྙེད་པར་འགྱུར་རོ། །དེ་ལྟར་བྱས་པའི་
འོག་ཏུ་མིག་སྨན་དང་། སྣ་སྨན་རྣོན་པོ་ཡང་སྦྱར་ལ་གཏང་ངོ་། །དེ་བཞིན་དུ་སེམས་དགའ་བ་སྐྱེ་བ་དང་། དབུགས་དབྱུང་བ་དང་། སྔངས་སུ་གཞུག་པ་དང་། འཇིགས་པར་བྱ་བ་དང་། རྡེག་པ་དང་། བརྡེག་པར་བྱ་བ་དང་། དེ་བཞིན་དུ་བསྐུ་བྱུག་དང་། དྲིལ་བ་དང་། དུ་བ་རྔུབ་པ་དང་།
སྨན་མར་བཏུང་བ་ལ་སོགས་པ་སློན་ཁྲུས་ཀྱིས་ལུས་དག་པའི་འོག་ཏུ་སེམས་ཐ་མལ་པ་ལ་དེ་དག་སྦྱར་བར་བྱའོ། །ཤིང་ཀུན་དང་། ཁ་རུ་ཚ་དང་། ཚ་བ་གསུམ་དང་དེ་རྣམས་སྲང་གཉིས་གཉིས་བཏགས་པའི་ཕྱེ་མ་མར་སྲང་བརྒྱ་ཉི་ཤུ་རྩ་བརྒྱད་དང་། དེའི་བཞི་འགྱུར་གྱི་བ་གཅིན་དང་ལྷན་ཅིག་
བསྐོལ་ཏེ། མར་ལུས་པ་དེ་ལས་རན་པར་བསྟེན་ན། སྨྱོ་བྱེད་དང་། འབྱུང་པོ་དང་། བརྗེད་བྱེད་རྣམས་སེལ་བའི་མཆོག་ཡིན་ནོ། །བྲམྷི་རང་གི་ཁུ་བ་སྲང་དྲུག་ཅུ་རྩ་བཞི་དང་། མར་སྲང་སུམ་ཅུ་རྩ་གཉིས་དང་། ཚ་བ་གསུམ་དང་། ཤ་མ་དུར་བྱིད་དང་། བིམ་བི་ཏ་དང་། ཤང་ཁ་
པུཥྤ་དང་། དོང་ག་དང་། སབ་ཏ་ལ་དང་། བྱི་དང་ག་དང་། འདི་རྣམས་ཞོ་གཉིས་གཉིས་བཏགས་པའི་ཕྱེ་མ་དང་ཚུལ་བཞིན་བསྐོལ་ཏེ་མར་ལུས་པ་ནི་བྲམྷིའི་མར་ཞེས་བྱ་སྟེ། དེ་ལ་ཞག་རེ་སྲང་རེས་བསྐྱེད་དེ་སྲང་བཞིར་ཕྱིན་གྱི་བར་དུ་ཟོས་ན་སྨྱོ་བྱེད་དེ་འཕྲོག་པར་བྱེད་དོ། །བུད་མེད་བུ་མེད་
པ་ལ་བུ་སྟེར་བར་བྱེད་ཅིང་སྐད་སྙན་པ་དང་། ཚིག་གསལ་བ་དང་དྲན་པ་དང་ཡིད་གཞུངས་པར་བྱེད་ཅིང་དཔལ་སྐྱེད་པར་བྱེད་དོ། །འབྲས་བུ་གསུམ་དང་། བི་ཤ་ལ་དང་། ཧ་རེ་ཎུ་ཀ་དང་། ཐང་ཤིང་དང་། ཨེ་ལ་བ་ལུ་ཀ་དང་། ཐལ་ཏྲེས་རྣམ་གཉིས་དང་། སེར་པོ་རྣམ་གཉིས་དང་། སྠི་ར་རྣམ་གཉིས་

དང་། པྲི་ཡང་ཀུ་དང་། རྒྱ་སྤོས་དང་། བྲི་ཧ་ཏི་དང་། རུ་རྟ་དང་། བཙོད་དང་། དོང་ག་དང་། ནཱ་ག་གེ་སར་དང་། སེའུ་འབྲུ་དང་། བྱི་དང་ག་དང་། བལ་བུའི་ལོ་མ་དང་། སྣ་མའི་མེ་ཏོག་ཁ་མ་ཕྱེ་བ་དང་། ཨུཏྤ་ལ་དང་། དན་ཏི་དང་། ཤུག་པ་དང་། ཙནྡན་དཀར་པོ་དང་། འདི་རྣམས་ཞོ་གཉིས་གཉིས་དང་
བཏགས་ཏེ། མར་སྲང་སུམ་ཅུ་རྩ་གཉིས་དང་ཚུལ་བཞིན་བསྐོལ་བ་ནི་དགེ་བའི་སྨན་མར་ཞེས་བྱ་སྟེ། དེ་ལས་རན་པར་འཐུངས་ན་གདོན་གྱིས་ཟིན་པ་དང་། སྨྱོ་བྱེད་དང་། ལུད་པ་ལུ་བ་དང་། བརྗེད་བྱེད་དང་། སྡིག་པ་རྣམས་འཇོམས་པར་བྱེད་དེ། དེ་བཞིན་དུ་སྐྱ་རྦབ་དང་། གཡན་པ་དང་།
དུག་དང་། སྐེམ་བྱེད་དང་། རྨོངས་བག་དང་། གཅིན་ནད་དང་། རིམས་ནད་དང་། དབྱིག་དུག་དང་། ཁུ་ཆུ་ཟད་པའི་ནད་དང་། དྲན་པ་སྟོར་བ་དང་། ལྐུགས་པ་དང་། མེ་དྲོད་ཆུང་བ་རྣམས་ལ་ཕན་ཏེ། གཞན་ཡང་སྟོབས་སྐྱེད་པ་དང་། ཡིད་གཞུངས་པ་དང་། དྲན་པ་མྱུར་བ་
དང་། བཀྲ་ཤིས་པ་དང་། ཚེ་རིང་བ་དང་། ལུས་མཛེས་མདངས་དང་ལྡན་པ་དང་། སྐལ་བ་དང་ལྡན་པ་དང་། ལུས་བརྟས་པར་བྱེད་པ་དང་། བུ་སྐྱེད་པར་བྱེད་པའི་མཆོག་ཡིན་ནོ། །ཡང་ན་གོང་མའི་སྨན་ལས་ཨེ་ལ་བ་ལུ་ཀ་ཡན་ཆད་བདུན་མ་གཏོགས་པ་ཐལ་ཏྲེས་རྣམ་གཉིས་ལ་སོགས་
པ་སྨན་སྣ་ཉི་ཤུ་རྩ་གཅིག་རེ་རེ་ཡང་སྲང་ཕྱེད་དང་གཉིས་གཉིས་ཆམ་ཆོམ་བརྡུངས་ལ་སྲང་བརྒྱད་ལ་ཕུལ་གོང་དུ་བརྩིས་པའི་ཆུ་ཕུལ་དྲུག་ཅུ་རྩ་བཞི་དང་བསྐོལ་ཏེ། བཞི་ཆ་ལུས་པའི་ནང་དུ་མར་སྲང་སུམ་ཅུ་རྩ་གཉིས་དང་། བ་བེའུ་མང་དུ་སྐྱེས་པའི་འོ་མ་མར་གྱི་བཞི་འགྱུར་དང་། མེ་ད་རྣམ་གཉིས་
དང་། ར་མཉེ་བ་དང་། བུང་ཚང་རྡོ་དང་། ཁ་སྲལ་ཕྲེའུ་དང་། བུ་རམ་ཤིང་དང་། མུངྒ་པརྞི་དང་། འདི་རྣམས་ཀྱི་ཕྱེ་མས་བཏབ་སྟེ་ཡང་བསྐོལ་ལ་མར་ལུས་པ་ནི་དགེ་བ་ཆེན་པོའི་སྨན་མར་ཞེས་བྱ་སྟེ། གོང་མའི་ཕན་ཡོན་པས་ལྷག་སྟེ་ལུས་ཉམས་བརྟ་བར་བྱེད་ཅིང་ནད་གཞི་སེལ་བའི་མཆོག་ཡིན་
ནོ། །སྤང་སྤོས་རྣམ་གཉིས་དང་། ཆུ་རྩ་དང་། ཁ་སྲལ་ཕྲེའུ་དང་། ཤུ་དག་དང་། ཀྱི་ལྕེ་བ་དང་། ར་མཉེ་བ་དང་། ཙ་རོང་དང་། པུ་ཙེ་ཤེལ་དང་། སླེ་ཏྲེས་དང་། བར་ར་ཧེ་དང་། ཚད་ཏྲ་དང་། ཨ་ཏ་ཚིད་ཏྲ་དང་། བ་ལང་ག་ཤ་དང་། མ་ཧཱ་བུ་རུ་ཤན་དན་ཏ་དང་། སྐྱུ་རུ་ར་དང་།

ན་ཀུ་ལ་རྣམ་གཉིས་དང་། ཀ་ཏམ་བྷ་ར་དང་། བཱི་ཤྩི་ཀ་ལི་དང་། ས་ལ་པརྞི་དང་། འདི་རྣམས་ཆ་སྙོམས་ཏེ་མར་དང་ཚུལ་བཞིན་བསྐོལ་བ་ནི་ཤ་ཟ་ཆེན་པོའི་མར་ཞེས་བྱ་སྟེ། དེ་ལས་རན་པར་འཐུངས་ན། ཉིན་བཞི་པའི་རིམས་དང་། སྨྱོ་བྱེད་ཀྱི་གདོན་དང་།
བརྗེད་བྱེད་ཀྱི་གདོན་འཇོམས་ཏེ་བློ་གསལ་བ་དང་། དྲན་པ་དང་། ཡིད་གཞུངས་པ་དང་། བྱིས་པ་རྣམས་ཀྱི་ལུས་བརྟ་ཞིང་འཕེལ་བར་བྱེད་པ་ནི་བདུད་རྩི་དང་འདྲའོ། །བྲ་ཧྨི་དང་། ཨིནྡྲ་བཱ་རུ་ནི་དང་། བྱི་དང་ག་དང་། ཚ་བ་གསུམ་དང་། ཤིང་ཀུན་དང་། སྤང་སྤོས་དང་།
མུར་བ་དང་། ར་སྣ་དང་། བོང་ང་དཀར་པོ་དང་། སྒོག་སྐྱ་དང་། བི་ཤ་ལ་དང་། བྱེའུ་རུག་པ་དང་། ཤུ་དག་དང་། ཁྲེ་དང་། ནཱ་ག་དན་ཏྲ་དང་། བྱི་ཚེར་བ་དང་། ཨ་རུ་ར་དང་། བིག་པན་འདི་རྣམས་གླང་པོ་ཆེའི་གཅིན་དང་བཏགས་ཏེ། ཆང་བུར་བྱས་ནས་གྲིབ་
མ་ལ་བསྐམས་ཏེ། དེ་ནས་སྣར་བླུགས་པ་དང་། མིག་ཏུ་བསྐུ་བ་དང་། ལུས་ལ་བྱུག་པ་དང་། དུད་པས་བདུགས་པ་བྱས་ན་སྨྱོ་བྱེད་སེལ་བར་བྱེད་དོ། །སྣར་རྔུབ་པའི་སྨན་སྣ་ཚོགས་ཡུངས་ཀར་གྱི་མར་དང་སྦྱར་བ་སྣར་བླུགས་པར་བྱའོ། །ཡུངས་ཀར་གྱི་མར་
གྱིས་ལུས་བསྐུ་བྱུག་བྱས་ལ། ཡུངས་ཀར་དེ་ཉིད་ཀྱི་ཕྱེ་མ་སྣར་བླུག་གོ། །ཡང་ན་མདོའི་གནས་སུ་བསྟན་པའི་དུད་པའི་སྨན་རྣོན་པོ་ཤིང་ཀུན་དང་སྦྱར་བའི་དུད་པས་བདུགས་ན་ཕན་ནོ། །ཝ་དང་། ཤ་ལྱ་ཀ་དང་། འུག་པ་དང་། ཛ་དུ་ཀ་དང་། བྱི་བ་དང་། ར་
ཐུག་དང་། འདི་རྣམས་ཀྱི་གཅིན་དང་། རྟུག་པ་དང་། སྤུ་དང་། པགས་པ་དང་། མཁྲིས་པ་དང་། སེན་མོ་དང་། འདི་རྣམས་ཀྱི་དུད་པས་སྣ་དང་ལུས་ལ་བྱུག་པ་དང་། མིག་ལ་བསྐུ་བ་དང་། ལུས་བཀྲུ་བ་དང་བླུགས་པ་ལ་སོགས་པ་སྨྱོ་བྱེད་ཅན་ལ་སྤྱད་དོ། །རླུང་དང་བད་ཀན་
གྱི་ཤས་ཆེ་བའི་སྨྱོ་བྱེད་ལ་ནི་ཁྱི་དང་། བ་ལང་དང་ཉ་རྣམས་ཀྱི་ཤ་རུལ་པའི་དུད་པས་རྟག་ཏུ་བདུག་གོ། །མཁྲིས་པ་ལས་གྱུར་པའི་སྨྱོ་བྱེད་ལ་ནི། ཏིག་ཏའི་མར་དང་། སྨན་འཚོ་བྱེད་ཀྱི་མར་དང་། སྣུམ་སྣ་གཉིས་དང་། དེ་བཞིན་དུ་བཟའ་བཏུང་ཡང་བསིལ་བ་དང་།

མངར་བ་དང་། ཡང་བ་རྣམས་བསྔགས་སོ། །གཞན་ཡང་གཏར་ག་གདབ་པའི་ཆོ་ག་བཞིན་དུ་བྱས་ཏེ། བྲང་དང་། མིག་འགྲམ་དང་། དཔྲལ་བའི་དབྱེས་ལས་ཁྲག་གཏར་བ་དང་། ཡང་ན་ཤ་གཙང་མ་ཚིམ་ཚད་དུ་བཟའ་བ་དང་། རླུང་མེད་པའི་ཕྱོགས་སུ་མལ་བཅས་ཏེ་གཞག་
པ་དང་ཡང་སེམས་རྨོངས་པའི་ནད་ལས་གྲོལ་བར་བྱེད་དོ། །ཡང་སྨྱོ་བྱེད་ཀྱི་ནད་ཀྱིས་ཟིན་པའི་ནད་པ་དེ་ཆུའི་ནང་དུ་བསྐྱུར་བ་དང་། ཁྲོན་པའི་ནང་དུ་བཅུག་པ་དང་ཡང་ན་ལྟོགས་ལྟོགས་སུ་ལུས་དབྲི་བར་བྱའོ། །ཡང་ན་གྲོགས་པོ་སྙིང་དུ་སྡུག་པས་ཆོས་དང་དོན་དང་ལྡན་པའི་གཏམ་གྱིས་
དབུགས་དབྱུང་ཞིང་དྲུང་དུ་བསྡད་དེ་སེམས་དགའ་བར་བྱའོ། །ཡང་ན་ཉེ་བ་སྡུག་པ་ཤི་བའམ། རྨད་དུ་བྱུང་བའི་གཏམ་རྣམས་བརྗོད་པར་བྱའོ། །ཡང་ན་རྐང་ལག་བཅིངས་ལ་ཡུངས་ཀར་གྱིས་བྱུགས་ཏེ་གན་རྐྱལ་དུ་ཉི་མ་དྲོན་པོ་ལ་གཞག་པར་བྱའོ། །ཡང་ན་ཁ་སྲལ་ཕྲེའུ་བཏགས་
པའི་ལྡེ་གུས་བསྐུས་པ་འམ། ཡང་ན་ལྕགས་བསྲེགས་པའམ། ཆུ་བསྐོལ་བའམ། ཏིལ་ལམ་མར་གང་ཡང་རུང་བས་ལུས་བསྲེག་གོ། །ཡང་ན་ལྕག་གིས་གཞུ་བའམ། ཡང་ན་ཐག་པས་བཏགས་ཏེ་གཡང་སར་བསྐྱུར་བ་འམ། ཡང་ན་མཚོན་དང་རྡོ་དང་མི་མེད་
པའི་ཁང་པ་སྟོང་པ་གཅིག་པུར་གཞག་པར་བྱའོ། །ཡང་ན་སྦྲུལ་ཆེན་པོ་སྔོན་མེད་པ་བསྟན་ལ་འཇིགས་སུ་གཞུག་གོ། །དེ་བཞིན་དུ་གླང་དང་། སེང་གེ་དང་། གླང་པོ་ཆེ་ལ་སོགས་པ་གང་ཡང་རུང་བས་འཇིགས་སུ་གཞུག་གོ། །ཡང་ན་རྒྱལ་པོའི་སྐྱེས་བུས་ལེགས་པར་
བཅིངས་ནས་རྒྱབ་ཏུ་ཕྱུང་ལ་གསད་སར་ཁྱེར་བ་ཡིན་ནོ། །ཞེས་སྨྲས་ན་སྡིགས་མཛུབ་ལ་སོགས་པས་བསྡིགས་ཏེ་འཇིགས་སུ་གཞུག་གོ། །གང་གི་ཕྱིར་སྦྱོར་བ་དེ་དག་བྱས་ན། ལུས་ཀྱི་སྡུག་བསྔལ་དང་སྲོག་གི་འཇིགས་པས་དྲན་པ་རྙེད་པར་འགྱུར་རོ། །ཞེས་སྔོན་གྱི་སློབ་
དཔོན་དག་བཞེད་དོ། །འོན་ཀྱང་སྦྱོར་བ་དེ་དག་ཐམས་ཅད་བྱས་ན་སྨྱོ་བྱེད་ཀྱི་ནད་ཐམས་ཅད་ལས་རྒྱལ་བར་བྱེད་དོ། །གསོ་བ་གྲུབ་པ་དེ་དག་ཀྱང་ཡུལ་དང་དུས་ལ་སོགས་པ་ལ་བརྟག་ལེགས་པར་སྦྱར་བར་བྱའོ། །གང་ཞིག་གཉེན་སྡུག་པ་དང་ནོར་བཟང་པོ་དང་བྲལ་ཏེ་དྲན་པ་སྟོར་

བར་གྱུར་པ་ལ་ནི་ནོར་དང་གཉེན་སྡུག་པ་ལ་སོགས་པ་དེ་ཉིད་ཡོད་དོ་ཞེས་བརྗོད་ཅིང་དབུགས་དབྱུང་ངོ་། །འདོད་པ་དང་། མྱ་ངན་དང་། འཇིགས་པ་དང་། ཁྲོ་བ་དང་། དགའ་བ་དང་། ཕྲག་དོག་དང་། ཆགས་པ་ལས་གྱུར་པའི་སྨྱོ་བྱེད་ལ་ནི་དེ་གཉིས་
གཅིག་ལ་གཅིག་ཕན་ཚུན་གཉེན་པོར་བྱས་ཏེ་ཞི་བར་བྱའོ། །སྨྱོ་བྱེད་ཀྱི་ནད་དེ་ཡང་གདོན་དང་འབྲེལ་པ་ཡིན་ཏེ། གདོན་དང་སྨྱོ་བྱེད་གང་གི་ཤས་ཆེ་བའི་མཚན་མ་དང་། རང་བཞིན་བརྟགས་ཏེ། དེའི་འོག་ཏུ་གདོན་ནད་དང་སྨྱོ་བྱེད་ཀྱི་སྨན་ཅི་རིགས་པར་སྦྱར་རོ། །གལ་ཏེ་གདོན་དང་འབྲེལ་པ་
ཡིན་ན་ནི་གཏོར་མ་སྦྱིན་པར་བྱ་སྟེ། ཏིལ་གྱི་ཕྱེ་མ་དང་། ནས་ཀྱི་ཕྱེ་མའི་ཟན་དང་། ཆང་བུ་དང་། ཟས་སྣུམ་ཞིང་མངར་བ་དང་། འབྲས་ཆན་ཁྲག་གིས་བསྒོས་པ་དང་། ཤ་རྗེན་པ་དང་། བཙོས་པ་དང་། འབྲུའི་ཆང་དང་། སྦྱར་བའི་ཆང་དང་། ཨ་སའི་ཆང་དང་། མེ་ཏོག་ཨ་ཏི་མུག་ཏ་
དང་། སྲི་ཤིང་གི་མེ་ཏོག་དང་། ས་ཧ་ཙ་རའི་མེ་ཏོག་དང་བཅས་པའི་གཏོར་མ་བ་ལང་གི་སྟེགས་དང་ཆུ་ཀླུང་དང་ཟམ་ངོགས་ལས་གཏང་བར་བྱའོ། །སྐྱེས་བུ་གང་ཤ་དང་ཆང་སྤངས་པ་དང་། སྡོམ་པ་ལ་གནས་པ་དང་། ལུས་ངག་ཡིད་གསུམ་གཙང་ཞིང་དག་པ་དང་།
སྙིང་སྟོབས་དང་ལྡན་པའི་བློ་ཅན་ལ་ནི་ལྷན་ཅིག་སྐྱེས་པ་དང་། གློ་བུར་ལས་བྱུང་བའི་སྨྱོ་བྱེད་རྣམས་ཀྱིས་ནམ་ཡང་ཚུགས་པར་མི་འགྱུར་རོ། །དབང་པོ་རྣམས་ཀྱི་ཡུལ་ཇི་ལྟ་བ་བཞིན་དུ་གསལ་བར་བྱེད་ཅིང་། དེ་བཞིན་དུ་ལུས་དང་སེམས་ཀྱང་དངས་ལ་ལུས་ཟུངས་རྣམས་རང་
བཞིན་དུ་གནས་པར་གྱུར་ན་སྨྱོ་བྱེད་དང་བྲལ་བའི་མཚན་མ་ཡིན་ནོ། །སྨྱོ་བྱེད་ཀྱི་ནད་གསོ་བའི་ལེའུ་སྟེ་དྲུག་པ་རྫོགས་སོ།། །།དེ་ནས་བརྗེད་བྱེད་ཀྱི་ནད་གསོ་བའི་ལེའུ་བཤད་པར་བྱ་སྟེ། དེ་ལ་བརྗེད་བྱེད་ཅེས་བྱ་བ་ནི་དྲན་པ་ཉམས་པའི་བདག་ཉིད་ཡིན་ཏེ།
དེས་བློ་དང་སེམས་ཡོངས་སུ་འཁྲུགས་པ་ཡིན་ལ། དེ་ཡང་སེམས་ལས་དྲགས་པ་དང་། མྱ་ངན་དང་འཇིགས་པ་ལ་སོགས་པ་འབྱུང་བ་ཡིན་ནོ། །ནད་གཞི་རྣམས་ནི་སྨྱོ་བྱེད་དང་འདྲ་སྟེ། ཉེས་པ་འཁྲུགས་ནས་ལུས་དང་སེམས་ལ་ཞུགས་ཏེ། སྙིང་ལ་གཡོགས་པས་

སེམས་ཀྱི་བདག་ཉིད་ཉམས་པར་བྱས་ཏེ། འདུ་ཤེས་རྒྱུ་བའི་རྒྱུན་རྣམས་བཀག་པས་མུན་པར་ཞུགས་པ་སྙམ་བྱེད་ཅིང་བློ་རྨོངས་པར་འགྱུར་ཏེ། ལས་ཀྱི་བྱ་བ་ཅི་བྱེད་ཀྱང་སྨད་ཅིང་འཇིགས་སུ་རུང་བའི་ལས་བྱེད་ཅིང་སོ་འཁྲིགས་པ་དང་། ཁ་ནས་ལྦུ་བ་འབྱུང་བ་དང་ལག་པ་དང་རྐང་
པ་འགུལ་ཞིང་བསྐྱོད་པ་དང་། གཟུགས་མེད་པ་མཐོང་ཞིང་ཡོད་པ་མི་མཐོང་བ་དང་། འདར་ཞིང་ས་ལ་འགྱེལ་བ་དང་། མིག་དང་སྨིན་མ་ཡོ་བར་གྱུར་པ་དང་། ནད་སྟོབས་དང་བྲལ་ནས་བཟོད་ཟད་པ་ཡིན་ནོ། །དེ་ཡང་བརྗེད་བྱེད་དེ་ཡུན་རིང་དུ་ལོན་པ་ནི་འགྱུར་བ་དེ་དག་
ཚབས་ཆེ་བ་ཡིན་ནོ། །དེ་ལྟར་གྱུར་པའི་བརྗེད་བྱེད་དེ་ཡང་རླུང་དང་། མཁྲིས་པ་དང་། བད་ཀན་དང་། འདུས་པ་དང་བཞིའོ། །དེ་ལ་བརྗེད་བྱེད་ཀྱིས་ཐོག་མར་ཟིན་པའི་ཚུལ་ནི་སྙིང་འདར་ཞིང་སྟོང་པ་སྙམ་བྱེད་པ་དང་། མགོ་འཁོར་བ་དང་མུན་ཐིབས་ཞེས་བྱེད་ཅིང་མུན་པར་མཐོང་
བ་དང་། མིག་ཟམ་ཟིམ་དུ་འདུག་པ་དང་། རྫི་མ་འཁྲུགས་པ་དང་། མིག་གྱུར་པ་དང་། སྒྲ་མི་གྲག་བཞིན་དུ་ཐོས་པ་དང་། རྔུལ་འབྱུང་བ་དང་། ཁ་ཆུ་དང་སྣབས་འཛག་པ་དང་། ཁ་ཟས་མི་འཇུ་ཞིང་ཡི་གར་མི་འོང་བ་དང་། ཁོང་པ་འཁྲུགས་ཤིང་ཁྲུ་ལུ་ལུ་ཟེར་བ་དང་། ཉམས་
འཚག་ཟད་པ་དང་། གཉིད་མེད་པ་དང་། ཡན་ལག་བརྡུང་བརྡུང་བ་སྙམ་བྱེད་པ་དང་། སྐོམ་དད་ཆེ་བ་དང་། དེ་རྨི་ལམ་ན་ཡང་གླུ་ལེན་པ་དང་། གར་བྱེད་པ་དང་། ཏིལ་མར་དང་། ཆང་འཐུང་བ་དང་། ཏིལ་མར་དང་ཆང་གི་གཅིན་འབྱུང་བར་རྨི་བ་རྣམས་ཡིན་ནོ། །དེ་ལ་རླུང་ལས་
གྱུར་པའི་བརྗེད་བྱེད་ཀྱི་མཚན་མ་ནི་བརླ་གཉིས་འགུལ་བ་དང་། ཡང་དང་ཡང་ས་ལ་འགྱེལ་བ་དང་། ཡང་དང་ཡང་དྲན་པ་སྟོར་ཞིང་རྙེད་པ་དང་། ཚིག་མི་གསལ་བ་སྨྲ་བ་དང་། མིག་ཟླུམ་ལ་ཕྱིར་འབུར་བ་དང་། རྔམ་པ་དྲག་ཏུ་འདོན་ཅིང་དབུགས་མི་བདེ་བ་དང་། ཁ་ནས་ལྦུ་བ་
འབྱུང་བ་དང་། མགོ་འགུལ་ཞིང་འདོམ་པ་དང་། སོ་འཁྲིགས་པ་དང་། གྲེ་བ་རླུང་གིས་གང་བ་དང་། ཡན་ལག་ཕན་ཚུན་བརྡེག་པ་དང་། ཁུ་ཚུར་བསྡམས་ནས་མཐེའུ་ཆུང་ནས་བཟུང་སྟེ། སོར་མོ་རྣམས་རིམ་གྱིས་རྐྱོང་བ་དང་། ལུས་རྩུབ་པ་དང་། མིག་དང་། པགས་

པ་དང་། སེན་མོ་རྣམས་རྩ་གནག་ཅིང་དངོས་པོ་རྣམས་ནག་པོར་མཐོང་བ་དང་། རང་བཞིན་གྱིས་མིག་བསྟན་པ་དང་། ལུས་རྩུབ་པ་རུད་རུད་པོར་འདུག་ཅིང་གཡོ་བ་དང་། མདོག་མི་སྡུག་པ་དང་། བཞིན་འགྱུར་བ་རྣམས་ཡིན་ནོ། །མཁྲིས་པ་ལས་གྱུར་པའི་བརྗེད་
བྱེད་ཀྱི་རྟགས་ནི། དྲན་པ་ཡང་དང་ཡང་ཉམས་ཤིང་ཡང་དང་ཡང་འདུས་ཤིང་རྙེད་པ་དང་། མིག་དང་གདོང་དང་། པགས་པའི་མདོག་སེར་ཞིང་ལྦུ་བ་སེར་པོར་འབྱུང་བ་དང་། ས་ལ་རྐང་ལག་གིས་བརྡེག་པ་དང་། མིག་ལམ་དུ་འཇིགས་སུ་རུང་བ་དང་། འཚེར་བ་དང་། ཁྲོ་བོའི་གཟུགས་
མཐོང་ཞིང་སྐོམ་དད་དང་བཅས་པ་ཡིན་ནོ། །བད་ཀན་ལས་བརྗེད་བྱེད་དུ་གྱུར་པའི་མཚན་མ་ནི་ཡུན་རིང་པོ་ནས་དྲན་པ་སྟོར་ཞིང་དྲན་པ་རྙེད་པ་ཡང་བུལ་བ་དང་། ཁ་ཟས་ཉུང་ངུ་ཟ་ཞིང་བྱེད་སྤྱོད་ཉུང་བ་དང་། ཁ་ཆུ་ཡང་དང་ཡང་དུ་འབྱུང་བ་དང་། མིག་དང་། སེན་མོ་དང་། ཁའི་ནང་
དཀར་བ་དང་། གཟུགས་རྣམས་དཀར་པོར་མཐོང་བ་ཡིན་ནོ། །འདུས་པ་ལས་གྱུར་པའི་བརྗེད་བྱེད་ཀྱི་མཚན་མ་ཐམས་ཅད་དང་ལྡན་པ་ནི་སྤང་བར་བྱའོ། །དེ་ལ་གློ་དང་སྙིང་དང་དྲན་པའི་སྦུ་བུ་རྣམས་སུ་དྲི་མ་འགགས་པའི་བརྗེད་བྱེད་ལ་ནི་ཐོག་མར་དེ་དག་པར་བྱ་བའི་ཕྱིར་སྨན་
རྣོན་པོ་དང་བཅས་པའི་སློན་ལ་སོགས་པའི་ལུམས་བྱའོ། །རླུང་ལས་གྱུར་པའི་བརྗེད་བྱེད་ལ་ནི་ཕལ་ཆེར་སྨན་མས་གཏོང་བ་རྣམས་བྱའོ། །མཁྲིས་པ་ལས་གྱུར་པ་ལ་ནི་ཕལ་ཆེར་བཀྲུ་སྨན་སྦྱར་རོ། །དེ་ལྟར་གོང་དུ་སློན་ཁྲུས་ཀྱིས་ལུས་དག་པར་བྱས་ནས་སྤྲོ་བ་
བསྐྱེད་དོ། །དེའི་འོག་ཏུ་བརྗེད་བྱེད་ཀྱི་སྨན་བཤད་པར་བྱ་སྟེ། བའི་ལྕི་བའི་ཁུ་བ་དང་། འོ་མ་དང་། ཞོ་དང་། གཅིན་དང་། མར་དང་། དེ་རྣམས་ཆ་སྙོམས་ཏེ་བསྐོལ་བ་བའི་རྣམ་ལྔའི་མར་ཞེས་བྱ་སྟེ། དེ་ལས་རན་པར་འཐུངས་ན། བརྗེད་བྱེད་དང་། རིམས་དང་།
སྨྱོ་བྱེད་དང་། མིག་སེར་རྣམས་སེལ་ལོ། །རྩ་བ་རྣམ་པ་ལྔ་པ་གཉིས་དང་། འབྲས་བུ་གསུམ་དང་། སེར་པོ་རྣམ་གཉིས་དང་། དུགས་མོ་ཡུངས་ཀྱི་ཤུན་ཕྲགས་དང་། ལོ་མ་བདུན་པ་དང་། ཨ་པ་མརྒ་དང་། ནི་ལི་ནི་དང་། པུ་ཙེ་ཤེལ་དང་། དོང་ག་དང་། མ་ནུ་དང་།

ཤིང་ཕལ་གུའི་རྩ་བ་དང་། བྱི་ཚེར་བ་དང་། སྨན་དེ་རྣམས་ཆུ་སྲང་གཉིས་གཉིས་ཆུ་སྲང་བརྒྱད་ལ་ཆུ་ཕུལ་གང་དུ་བརྩིས་པའི་ཆུ་ཕུལ་དྲུག་ཅུ་རྩ་བཞི་དང་བསྐོལ་ཏེ། བཞི་ཆ་ལུས་པའི་ནང་དུ་ག་བྲའི་རྩ་བ་དང་། པ་ཐ་དང་། ཨ་ཏ་ཀ་ཞེས་བྱ་བ་རུ་བ་རི་དང་། དན་ཏི་དང་། དུར་བྱིད་དང་།
ཚ་བ་གསུམ་དང་། རོ་ཧ་ཤ་དང་། བྷུ་ཏི་ཀ་དང་། མུར་པ་དང་། ཅི་སྐྲིགས་དང་། ཧ་ཏི་པི་པི་ལིང་དང་། ཐལ་ཏྲེས་རྣམ་གཉིས་དང་། མ་ནུ་ཡན་ཏི་ཞེས་བྱ་བ་སེན་རྩི་དང་། ཙི་ཏྲ་ཀ་དང་། ལྕང་མ་དང་། འདི་རྣམས་ཞོ་གཉིས་དང་། མར་སྲང་སུམ་ཅུ་རྩ་གཉིས་དང་།
བའི་རྣམ་ལྔ་རེ་རེ་ཡང་དེ་དང་ལྷན་ཅིག་བསྐོལ་ཏེ་མར་ལུས་པ་ནི་བའི་རྣམ་ལྔ་ཆེན་པོའི་མར་ཞེས་བྱ་སྟེ། དེ་ལས་རན་པར་འཐུངས་ན། བརྗེད་བྱེད་དང་། རིམས་དང་། དམུ་རྫིང་དང་། མཚན་པར་རྡོལ་བ་འཕྲོག་པའི་མཆོག་ཡིན་ཏེ། སྐྲན་ནད་དང་། གཞང་
འབྲུམ་དང་། མིག་སེར་དང་། སྐྱ་རྦབ་དང་། སྐྲན་དང་། ལུད་པ་དང་། གདོན་རྣམས་འཇོམས་པར་བྱེད་དོ། །ཤུ་དག་དང་། རུ་རྟ་དང་། ད་ཤང་ཁ་པུཥྤ་དང་། མར་རྙིང་པ་དང་། མར་གྱི་བཞི་འགྱུར་གྱི་སྨན་བྲམྷི་རང་གི་ཁུ་བ་དང་། དེ་རྣམས་ལྷན་
ཅིག་བསྐོལ་ཏེ། དེ་ལས་རན་པར་འཐུངས་ན། ཡིད་གཞུངས་ཤིང་སྨྱོ་བྱེད་དང་། བཀྲ་མི་ཤིས་པ་རྣམས་དང་། བརྗེད་བྱེད་དང་བསྡིགས་པ་རྣམས་ལས་རྒྱལ་བར་བྱེད་དོ། །ཡང་ན་འཚོ་བྱེད་སྡེ་བཅུ་སྲང་རེ་རེ་བཏགས་པའི་ཕྱེ་མ། ཏིལ་མར་དང་། མར་སྲང་སུམ་ཅུ་
སུམ་ཅུ་དང་། འོ་མ་ཕུལ་དྲུག་ཅུ་རྩ་བཞི་དང་འདི་རྣམས་ཆུ་དང་ཚུལ་བཞིན་བསྐོལ་ཏེ་མར་ལུས་པ་ལས་རན་པར་འཐུངས་ན་བརྗེད་བྱེད་ལས་གྲོལ་བར་བྱེད་དོ། །ཡང་ན་འོ་མ་དང་། བུ་རམ་ཤིང་གི་ཁུ་བ་སྲང་ཉི་ཤུ་རྩ་བརྒྱད་དང་། མར་སྲང་སུམ་ཅུ་རྩ་གཉིས་དང་། དེའི་
བརྒྱད་འགྱུར་གྱི་ཏང་པལ་གྱི་ཁུ་བ་དང་། འཚོ་བྱེད་སྡེ་བཅུ་ཞོ་གཉིས་གཉིས་ཀྱི་ཕྱེ་མ་ཚུལ་བཞིན་བསྐོལ་ཏེ་མར་ལུས་པ་ལས་རན་པར་འཐུངས་ན་རླུང་དང་མཁྲིས་པ་ལས་གྱུར་པའི་བརྗེད་བྱེད་མྱུར་དུ་འཇིག་པར་བྱེད་དོ། །ཡང་ན་རྩྭ་ཀ་ཤ་དང་། ཀུ་ཤ་དང་། བི་ད་རི་

དང་། བུ་རམ་ཤིང་དང་དེ་རྣམས་འོ་མ་དང་ལྷན་ཅིག་བསྐོལ་ཏེ། འོ་མ་ལུས་པ་ལས་རན་པར་འཐུངས་ན་ཡང་ཕན་ཡོན་དེ་དང་འདྲ་སྟེ། ཤིང་མངར་གྱི་ཕྱེ་མ་དང་། མར་དང་། མར་གྱི་བཅོ་བརྒྱད་འགྱུར་གྱི་སྨན་དའི་ཁུ་བ་དང་ཚུལ་བཞིན་དུ་བསྐོལ་ཏེ་མར་ལུས་པ་ལས་
རན་པར་འཐུངས་ན་བརྗེད་བྱེད་འཕྲོག་པར་བྱེད་དོ། །ཡང་ན་བ་སེར་སྐྱའི་སྣ་ནས་བླུགས་ན་བརྗེད་བྱེད་ལས་རྒྱལ་བའི་མཆོག་ཡིན་ནོ། །ཁྱི་དང་། ཝ་དང་། བྱི་ལ་དང་། སེང་གེ་ལ་སོགས་པ་གང་ཡང་རུང་བའི་མཁྲིས་པ་གོང་མ་ལྟར་བཏང་ན་ཡང་བསྔགས་སོ། །སྲོག་ཆགས་གོ་
དྷ་དང་། སྲེ་མོ་དང་། གླང་པོ་ཆེ་དང་། ཁྱུ་མཆོག་དང་། དྲེད་དང་། བ་ལང་དང་། དེ་རྣམས་ཀྱི་མཁྲིས་པ་གང་ཡང་རུང་བ་དང་ཏིལ་མར་བསྐོལ་ཏེ། ཏིལ་མར་ལུས་པ་ལས་བསྐུ་བ་དང་། སྣ་ནས་བླུགས་པ་བྱས་ན་ཡང་བསྔགས་སོ། །འབྲས་བུ་གསུམ་དང་། ཚ་བ་གསུམ་
དང་། ཀོ་ཉོན་ཙེ་དང་། ནས་ཚིག་འཁུས་པའི་ཐལ་བ་དང་། ཕ་ནིད་ཙ་དང་། སུ་ཤཱ་ཧཱ་དང་། ཨ་པ་མརྒ་དང་། ཀ་རཉྫའི་ས་བོན་དང་། འདི་རྣམས་ཏིལ་མར་ར་གཅིན་དང་བསྐོལ་ལ་མར་ལུས་པ་ལས་སྣར་བླུགས་པའམ། ཡང་ན་སྨན་དེ་རྣམས་ཀྱི་ཕྱེ་མ་སྦུ་གུ་ནས་སྨན་པས་
སྣར་བུད་པར་བྱའོ། །ཡང་ན་སྲེ་མོ་དང་། འུག་པ་དང་། སྤྲེའུ་དང་། བྱ་རྒོད་དང་། སྦྲུལ་དང་། བྱ་རོག་དང་། སྲོག་ཆགས་ཀ་ཊི་ཀ་དང་དེ་རྣམས་གང་རྙེད་པའི་མཆུ་དང་། སྒྲོ་དང་། རྟུག་པ་རྣམས་ཀྱི་དུད་པས་བརྗེད་བྱེད་ཅན་ལ་བདུག་གོ། །ཡང་ན་ཏིལ་མར་རམ། སྒོག་
སྐྱ་འམ། འོ་མའམ་ཉེའུ་ཤིང་གང་ཡང་རུང་བ་བསྟེན་ན་ཕན་ནོ། །ཡང་ན་སྨན་བྲམྷི་དང་། རུ་རྟ་དང་། ཤུ་དག་གང་ཡང་རུང་བའི་ཁུ་བ་སྦྲང་རྩི་དང་ལྡན་པ་བསྟེན་ན་ཕན་ནོ། །ནད་གཞི་གསུམ་མཉམ་དུ་འཁྲུགས་ཏེ། གནད་ཆེན་པོ་སྙིང་དང་སེམས་ལ་བརྟེན་ནས་ལུས་དང་སེམས་ལ་
གནོད་པར་བྱས་ཏེ། བརྗེད་བྱེད་ཀྱི་ནད་འབྱུང་ན་ནི་སྨན་གཞན་གྱིས་གསོ་བར་དཀའ་སྟེ། དེ་ལ་ནི་བཅུད་ཀྱི་ཆོ་གས་གསོ་བར་བྱའོ། །དེ་བས་ན་བརྗེད་བྱེད་ཀྱི་ནད་ཀྱིས་ཉམ་ཐག་པའི་ནད་པ་དེ་ལ་ནི། མེ་དང་། ཆུ་དང་། གཡང་ས་ལ་སོགས་པ་མི་བཟད་པ་རྣམས་ལས་དུས་ཐམས་ཅད་

དུ་བསྲུང་ཞིང་བསྐྱང་བར་བྱའོ། །དེ་ལྟར་སེམས་གྱུར་པའི་ནད་པ་དེ་བརྗེད་བྱེད་ཀྱིས་སེམས་གྱུར་པའི་ནད་ལས་གྲོལ་མ་ཐག་ནི་ཁྱོད་འདི་ལྟར་འབྱུང་པོས་ཟིན་པར་འགྱུར་རོ་ཞེས་བྱ་བ་ལ་སོགས་པའི་ཚིག་བརྗོད་པར་མི་བྱ་སྟེ། ལུས་དང་སེམས་ཉོན་མོངས་པའི་སྐྱེས་བུ་དེ་ལ་ནི་ཡུལ་ཡིད་
དུ་འོང་བ་ལ་སོགས་པས་སེམས་བརྟ་ཞིང་གསོ་བར་བྱའོ། །བརྗེད་བྱེད་ཀྱི་ནད་གསོ་བའི་ལེའུ་སྟེ་བདུན་པ་རྫོགས་སོ།། །།དེ་ནས་རྫི་མ་དང་མིག་མཆུའི་ནད་ངོ་ཤེས་པར་བྱ་བའི་ལེའུ་བཤད་པར་བྱ་སྟེ། དེ་ལ་མིག་ནད་དོ་ཅོག་སློང་བར་བྱེད་པའི་ཁ་ཟས་ལ་སོགས་
པ་ཟོས་པ་དང་། ཁྱད་པར་དུ་མིག་ལ་གནོད་པའི་ཟས་ཟོས་པ་དང་། གཞན་ཡང་མིག་ནི་ཕལ་ཆེར་མཁྲིས་པ་འཁྲུགས་ན་མིག་ཀྱང་དེའི་རྗེས་སུ་ན་བར་བྱེད་པས་ན་ནད་གཞི་གང་ལས་གྱུར་ཀྱང་རུང་སྟེ། ཉེས་པའི་དྲི་མ་རྩའི་སྡུབས་ནས་གྱེན་དུ་འབྱུང་སྟེ། མིག་མཆུ་དང་།
མིག་གི་གྲྭ་མཚམས་དང་། མིག་གི་འབྲས་བུ་དཀར་པོ་དང་། ནག་པོ་དང་། མཐོང་བའི་མིག་དང་། དེ་དག་གང་ཡང་རུང་བའམ། ཡང་ན་ཐམས་ཅད་ལ་ཡང་རུང་སྟེ་བརྟེན་ནས་ནད་གཞི་ཇི་ལྟ་བ་བཞིན་དུ་ནད་སྐྱེད་དོ། །དེ་ལ་རླུང་ལས་གྱུར་པའི་མིག་ནད་ཀྱི་མཚན་མ་ནི་མིག་
ཆུའི་རྩ་ལ་རླུང་ཞུགས་པར་གྱུར་ཏེ། དེ་ཡང་གཉིད་ལོག་པ་ལས་སད་ན་དབྱེར་མི་འདོད་ཅིང་ནད་དང་བཅས་པ་དང་། མིག་བྱེ་མས་གང་བ་སྙམ་བྱེད་པ་དང་། འབྱེད་པའི་དུས་སུ་ཡང་དཀའ་བས་འབྱེད་ཅིང་མཆི་མ་ཟག་པ་དང་། མིག་མཉེས་ན་ཅུང་ཞིག་ཕན་པ་སྙམ་བྱེད་པ་
དེ་ནི་མིག་ནད་འབྱེད་དཀའ་བ་ཡིན་ནོ། །ཞེས་སྔོན་གྱི་དྲང་སྲོང་དག་འཆད་དོ། །དེ་ལ་མིག་ནད་འཛུམས་པ་ཞེས་བྱ་བའི་མཚན་མ་ནི། རླུང་གིས་མཆུ་བསྐྱོད་དེ་ཡང་དང་ཡང་དུ་མིག་འབྱེད་ཅིང་འཛུམས་པ་སྟེ། དེ་ཡང་ནད་མེད་པའོ། །དེ་ལ་རླུང་གིས་མིག་ནད་ཉམས་པ་ཞེས་བྱ་བ་ནི་རླུང་
གིས་མིག་གི་འགུལ་རྩ་ཉམས་པར་བྱས་པས་འབྱེད་འཛུམས་ཀྱི་རྩོལ་བ་མི་ཤེས་ཏེ། དེ་ཡང་མིག་མཆུ་འོག་མ་རྟག་ཏུ་ལྷོད་པར་བྱེད་པའོ། །དེ་ལ་མཁྲིས་པ་ལས་གྱུར་པའི་མིག་མཆུའི་ནད་ཀྱི་མཚན་མ་ནི། མིག་མཆུའི་ནད་དམ་ཕྱི་རོལ་གང་ཡང་རུང་བ་ཀུ་མུ་ཏའི་ས་བོན་གྱི་མདོག་

ལྟ་བུའི་འབྲུམ་བུ་ཕྲ་མོ་འབྱུང་ཞིང་དེ་ཡང་བརྟོལ་ན་ཡང་གང་བ་ནི་ཀུ་མུ་ཏའི་ས་བོན་ལྟ་བུའི་མིག་མཆུའི་ནད་ཅེས་བྱའོ། །དེ་ལ་མཁྲིས་པས་སློང་བ་ཞེས་བྱ་བའི་མིག་མཆུའི་ནད་ནི་མིག་མཆུ་རབ་ཏུ་ཚ་ཞིང་ཤིན་ཏུ་ན་ལ་མདོག་དམར་ཞིང་རེག་པར་མི་བཟོད་པ་ཡིན་ནོ། །གཞན་ཡང་
མིག་མཆུའི་ནད་ནི་ནད་གཞི་རྫི་མའི་ནང་དུ་ཞུགས་ནས་གཡའ་ཞིང་ཚ་སྟེ། དེའི་འོག་ཏུ་རྫི་མ་བྱི་བར་བྱེད་དེ། དེའི་མིང་ནི་རྫི་མ་འབྱི་བ་ཞེས་བྱ་བའི་མིག་མཆུའི་ནད་ཡིན་ནོ། །བད་ཀན་ལས་གྱུར་པའི་མིག་མཆུའི་ནད་ནི་འབྲུམ་བུ་ཕྲ་མོ་དཀར་པོ་ཡུངས་ཀར་ཙམ་ལ་མ་ཐུག་པར་འབྱུང་བ་དང་།
སྐྲང་པ་དང་། མིག་རུས་ཁྱབ་པ་དང་། ན་བ་དང་། གཡའ་བ་དང་། མཆི་མ་སྤྱི་བག་ཅན་དང་ལྡན་པ་དེ་ནི་མིག་མཆུའི་ནད་ཤ་སྐྱེས་པ་ཞེས་བྱ་བར་བཤད་དོ། །བད་ཀན་གྱིས་སློང་བ་ཞེས་བྱ་བའི་མིག་མཆུའི་ནད་ནི་འབྱེད་འཛུམས་མི་ཤེས་པ་དང་། མིག་རྔུས་ཁྱབ་པར་འདུག་པ་ཡིན་
ནོ། །གཞན་ཡང་བད་ཀན་ལས་གྱུར་པའི་མིག་མཆུའི་ནད་ནི་ཐོར་བུ་རྒྱ་ཤུག་ཙམ་མམ། དེ་བས་ཡིད་ཙམ་ཆུང་བར་འབྱུང་སྟེ། དེ་ཡང་དཀར་ལ་ན་ཞིང་སྨན་པ་དང་། གཡའ་བ་དང་། སྲ་བ་རྣམས་ཡིན་ཏེ། མིག་མཆུའི་ནད་དེ་ལ་ནི་ལག་གྷ་ན་ཞེས་བྱ་བ་ཡིན་ནོ། །ཁྲག་ལས་གྱུར་
པའི་མིག་མཆུའི་ནད་ཀྱི་མཚན་མ་ནི་འབྲུམ་བུ་ཁྲག་འདྲ་བ་སྟུག་པོ་མང་དུ་འབྱུང་སྟེ། དེའི་མིང་ནི་མིག་མཆུ་ཁྱབ་པར་བྱེད་པ་ཞེས་བྱའོ། །གཞན་ཡང་དམར་པོ་ཤར་ཤར་པོ་ཁྲག་གི་མདོག་ཏུ་སྣང་ཞིང་དེ་ཡང་རེག་པར་མི་བཟོད་པ་ཡིན་ཏེ། དེ་ནི་ཁྲག་གིས་སློད་བའི་མིག་
མཆུའི་ནད་ཅེས་བྱའོ། །མིག་མཆུའི་ནད་ཤ་ཆེ་བའི་འབྲུམ་བུ་སྲ་བ་དང་། སྣུམ་པ་དང་། ཚ་བ་དང་། ན་བ་དང་། མདོག་དམར་ཞིང་ཁྲག་གི་མདོག་ཏུ་གྱུར་ཞིང་ཁྲག་འཛག་ལ་བཅད་པ་བཞིན་དུ་འཕེལ་བ་ནི་ཁྲག་ལས་བྱུང་བ་ཡིན་ནོ། །དེའི་མིང་ནི་ཁྲག་གི་མིག་
མཆུའི་ནད་ཅེས་བྱའོ། །ཡང་ན་ཁྲག་ལས་གྱུར་པའི་མིག་མཆུའི་ནད་ནི་མིག་མཆུའི་དཀྱིལ་ལམ། མིག་མཆུའི་མཐའ་མ་ལ་མོན་སྲན་སྡེའུ་ཙམ་གྱི་ཚད་ཙམ་ཟངས་མའི་མདོག་འདྲ་བར་འབྱུང་ཞིང་གཡའ་བ་དང་། ཟུག་གཟེར་དང་བཅས་པ་ལ་བརྟན་པར་གནས་པ་དེ་ནི་སྟང་

ཟིལ་ལྟ་བུའི་མིག་མཆུའི་ནད་ཅེས་བྱའོ། །དེ་ལ་འདུས་པ་ལས་གྱུར་པའི་མིག་མཆུའི་ནད་ནི་མིག་མཆུའི་ཕྱི་རོལ་སྐྲང་བ་ལྟར་འདུག་ལ་ནང་དུ་སྦུ་བུ་ཕྲ་མོས་ཁྱབ་པར་འདུག་སྟེ། ནང་ཆུས་ཁེངས་ཤིང་དེ་ཡང་འཛག་པ་དང་། པད་མའི་རྩ་བ་དང་འདྲ་བ་ནི་པད་མའི་རྩ་བ་ལྟ་བུའི་
མིག་མཆུའི་ནད་ཅེས་བྱའོ། །ཁྲག་གིས་ནད་གཞི་རྣམས་བསླངས་ཏེ་མིག་མཆུའི་ནད་དུ་གྱུར་པ་ནི་ནད་གཞི་རྣམས་ལྷན་ཅིག་འཁྲུགས་ཏེ། རྒྱུ་མེད་པར་རྣག་དང་ཆུ་སེར་རེས་འགའ་མི་འཛག་པ་དང་། རེས་འགའ་འཛག་པ་ནི་མིག་མཆུའི་ནད་ཁྲག་གིས་སློང་བ་ཞེས་བྱའོ། །
ནད་གཞི་གསུམ་ཁྲག་དང་བཅས་པའི་མིག་མཆུའི་ནད་ནི་སྔོ་བསངས་སུ་འདུག་པ་དང་། ཟུག་གཟེར་བྱེད་པ་དང་། རྣག་དང་བཅས་ཤིང་སྐྲང་པ་དང་ལྡན་པ་ནི་སྔོ་བསངས་ལྟ་བུའི་མིག་མཆུའི་ནད་ཅེས་བྱའོ། །ཁྲག་དང་ནད་གཞི་རྣམས་འདྲེས་པ་ལས་གྱུར་པའི་མིག་མཆུའི་ནད་ནི་མིག་
མཆུ་གཉིས་འབྱར་བ་དང་། གཡའ་བ་དང་། མདོག་དམར་ཞིང་སྐྲང་པ་དང་བཅས་པ་ནི། མིག་མཆུའི་ནད་འབྱར་བག་ཅེས་བྱའོ། །མིག་མཆུའི་ནད་འབྲུམ་བུ་ཕྲ་མོ་བྱེ་མ་འདྲ་བས་ནང་དུ་ཁེངས་ཤིང་སྲ་བ་དང་རྩུབ་པ་དེ་ནི་མིག་མཆུའི་ནད་བྱེ་མ་ལྟ་བུ་ཞེས་བྱའོ། །གང་ཞིག་མཆུ་
གནག་ཅིང་འདམ་ལྟར་འདུག་པ་དེ་ནི་མིག་མཆུའི་ནད་འདམ་ལྟ་བུ་ཞེས་བྱའོ། །སྐྱེས་བུ་གང་གི་མིག་མཆུའི་ཤ་ཆེར་སྐྱེས་ཞིང་མཐུག་ལ་མཐོན་དམན་མེད་ཅིང་རང་གི་མདོག་གཞན་དང་མ་འདྲེས་པར་འདུག་པ་དེ་ནི་མིག་མཆུའི་ནད་ཤས་ཆེ་བ་ཞེས་བྱའོ། །ཡང་ན་མིག་མཆུའི་
ནད་ནི་བྱིས་པ་སོ་སྐྱེས་པའི་མཚན་མའི་རྟགས་སུ་འབྱུང་སྟེ། རྒྱུ་དེས་མིག་མཆུ་སྐྲང་ཞིང་མིག་དམར་བ་དང་། བལྟར་མི་བཟོད་པ་དང་། མིག་མཆུ་ཟུག་གཟེར་དང་བཅས་ཤིང་འབྱར་བར་འདུག་པ་དང་། རྣ་བ་དང་སྣ་དང་མིག་རྣམས་ལག་པས་ཉེད་པ་ཡིན་ཏེ། དེ་ནི་མིག་
མཆུའི་ནད་ཀུ་ཀུན་ཀ་ཞེས་བྱ་བ་ཡིན་ནོ། །མིག་མཆུའི་ནད་རྫི་མ་འཁྲུགས་ཏེ་མིག་མཆུའི་སྤུ་ཞུམ་པར་གྱུར་ནས། མིག་མཆུ་ལ་ནང་དུ་ལྟ་ཞིང་མིག་མཆུ་འདེབས་མི་ནུས་པ་དང་། རྫི་མ་བཏོགས་ན་རེས་འགའ་ནད་ཞི་ལ་ཡང་སྤུ་སར་པ་སྐྱེས་པ་དང་། ཚེར་མའི་རྩེ་མོ་བཞིན་

དུ་རྣོ་བ་དེས་མིག་ལ་ཟུག་པ་སྐྲང་བར་འགྱུར་ཏེ། དེ་ནི་མིག་མཆུའི་ནད་རྫི་མ་འཁྲུགས་པ་ཞེས་བྱའོ། །ཡང་མིག་མཆུའི་ནད་སྣ་གོང་ཕྱོགས་ཀྱི་མིག་གི་གྲྭ་མཚམས་ཀྱི་མིག་མཆུའི་ཕྱི་རོལ་དུ་ཐོར་བུ་འབྱུང་ཞིང་སྲ་ལ་མཐོན་པོར་འདུག་པ་དང་། སྨིན་པའི་དུས་སུ་ཁྲག་
དང་རྣག་འཛག་ཅིང་ཡང་དང་ཡང་དུ་རྣག་ཁྲག་གིས་ཁེངས་པ་དེ་ནི་མིག་མཆུའི་ནད་མེ་དབལ་ཆུང་ངུ་ཞེས་བྱའོ། །ནད་གཞི་གསུམ་དང་ཁྲག་ལས་གྱུར་པའི་ནད་ནི་མིག་མཆུའི་དབུས་སུ་ཤའི་མཛེར་པ་ལྟ་བུ་འབྱུང་ཞིང་མཁྲང་བ་དང་། སྲ་བ་དང་། ནད་མེད་ཅིང་རིང་པོར་འཕྱང་བ་
དེ་ནི་མིག་མཆུའི་ནད་ཐོར་བུ་ལྟ་བུ་ཞེས་བྱའོ། །ཉི་ཤུ་རྩ་བཞི་པོ་དེ་དག་ནི་མིག་མཆུ་ལ་བརྟེན་པའི་ནད་དུ་བཤད་དོ། །དེ་རྣམས་ལས་དང་པོ་ནི་འབྱེད་དཀའ་ཞེས་བྱ་བའི་མིག་མཆུའི་ནད་ནི་སྨན་གྱིས་གསོ་བར་བྱ་བ་ཡིན་ནོ། །དེའི་འོག་མ་གཉིས་དང་མིག་ཏུ་འབྲུམ་བུ་བྱུང་བ་ནི་སྤང་བར་
བྱའོ། །དེ་ལྟར་རྫི་མ་འཁྲུགས་པ་ཞེས་བྱ་བའི་ནད་ནི་ལན་འགའ་གསོར་རུང་ཞིང་རེས་འགའ་ཐུ་བར་བྱེད་པ་ནི། ཡུན་རིང་དུ་ན་བར་བྱེད་པ་ཡིན་ནོ། །ལྷག་མ་རྣམས་ནི་མཚོན་གྱི་ལས་ཀྱིས་གསོ་བར་བྱ་སྟེ། དེ་ཡང་རྫི་མ་འབྱི་བ་ཞེས་བྱ་བའི་མིག་མཆུའི་ནད་ནི་མཚོན་གྱིས་གཙགས་
བར་བྱའོ། །མིག་མཆུའི་ནད་ཐོར་བུ་ནི་གཅད་པར་བྱའོ། །དེ་ལ་ལག་གྷ་ན་དང་། ཀུ་མུ་ཏའི་ས་བོན་ལྟ་བུ་དང་། པད་མའི་རྩ་བ་ལྟ་བུ་དང་། ཨུད་ཙང་ག་ཞེས་བྱ་བ་ལྟ་བུ་དང་། དངུལ་རྡོ་ལྟ་བུ་ཞེས་བྱ་བ་དང་། མེ་དབལ་ཕྲ་མོ་ལྟ་བུ་རྣམས་ནི་མཚོན་གྱིས་དྲལ་བར་བྱའོ། །མིག་
མཆུའི་ཤས་སྐྱེས་པ་དང་། སྔོ་བསངས་དང་། བྱེ་མ་ལྟ་བུ་དང་། ཁྲག་གིས་ནད་གཞི་སློང་བར་བྱེད་པ་ཞེས་བྱ་བ་དང་། འདམ་བུ་ལྟ་བུ་ཞེས་བྱ་བ་དང་། ཤ་ཆེ་བ་ཞེས་བྱ་བ་དང་། ཀུ་ཀུ་ན་ཞེས་བྱ་བ་དང་། དེ་རྣམས་ནི་མཚོན་གྱིས་བཞར་བར་བྱའོ། །མིག་མཆུའི་ནད་དམིགས་
བརྟག་པའི་ལེའུ་སྟེ་བརྒྱད་པ་རྫོགས་སོ།། །།དེ་ནས་མིག་མཆུའི་ནད་བསལ་བའི་ལེའུ་བཤད་པར་བྱའོ། །དེ་ལ་མིག་མཆུའི་ནད་འབྱེད་དཀའ་བ་ཞེས་བྱ་བ་ལ་ནི་མར་རྙིང་པ་དང་། རྒུན་འབྲུ་དང་། ཆུ་ཚུལ་བཞིན་བསྐོལ་ཏེ་ཁ་ར་བཏབ་པ་བཏུང་བར་བྱ་སྟེ།

དེ་བཞིན་དུ་སྣར་བླུགས་པ་དང་། དུད་པ་དང་། མིག་སྨན་སྣུམ་དང་སྦྱར་བ་གཏང་ངོ་། །ཀུ་མུ་ཏའི་ས་བོན་ལྟ་བུའི་མིག་མཆུའི་ནད་ལ་ནི་མཚོན་གྱིས་གཙགས་ལ། དེའི་སྟེང་དུ་རྒྱམ་ཚའི་ཕྱེ་མས་གདབ་པར་བྱའོ། །ཤིང་མངར་དང་། སྐྱུ་རུ་ར་དང་། པ་ཏོ་ལ་རྣམས་བསྐོལ་
བའི་ཆུས་ཀྱང་བླུགས་སོ། །དེ་ལ་མཚོན་གྱི་ལས་བྱ་དགོས་པའི་མིག་མཆུའི་ནད་ལ་ནི་ཐོག་མར་སློན་ཁྲུས་ཀྱིས་ལུས་དག་པར་བྱས་ལ། དེའི་འོག་ཏུ་ནད་པ་རླུང་མེད་པའི་གནས་སུ་གན་རྐྱལ་དུ་བཞག་ལ་ནད་གཡོག་གིས་མི་འགུལ་བར་བཟུང་ལ་རས་འཇམ་པོ་ཆུ་དྲོན་དུ་བཅུག་པས་
མིག་མཆུའི་ཕྱི་རོལ་དུ་དུགས་བྱས་ལ། དེའི་འོག་ཏུ་ལག་པ་གཡོན་པའི་མཐེ་བོང་དང་མཛུབ་མོ་གཉིས་གོང་མའི་རས་ཀྱིས་དཀྲིས་ལ་དེས་མིག་མཆུ་གཉིས་ཕྱེ་ཞིང་ཕྱིར་བཟློག་པར་བྱའོ། །དེ་ལྟར་བྱས་ན་མི་འཇིལ་ཞིང་བརྟན་པར་བྱས་པའི་ཕྱིར་རོ། །དེ་ནས་མཚོན་རྩེ་མོ་
དཀྱིལ་འཁོར་ལྟ་བུ་འམ། ཤ་ཁ་ཏྲ་འམ། ཤེ་ཕ་ལིའི་ལོ་མ་ལྟ་བུའམ། རྒྱ་མཚོའི་ལྦུ་བ་གང་ཡང་རུང་བའི་མཚོན་གྱིས་ཡིད་འཕྲེད་དུ་རྒྱ་གྲམ་དུ་གདབ་པོ། །དེ་ནས་ཁྲག་བྱུང་བ་དང་། རས་བལ་གྱིས་ཕྱིའོ། །གལ་ཏེ་ཁྲག་མ་བྱུང་ན་ནི། ཡང་མཚོན་གྱིས་ལེགས་
པར་དྲལ་ཏེ་ཕྱིས་ལ། དེའི་འོག་ཏུ་ནད་གཞི་རང་རང་དང་མཐུན་པའི་སྨན་སྦྲང་རྩི་དང་སྦྱར་བ་རྨར་གདབ་པོ། །དེའི་འོག་ཏུ་ཆུ་དྲོན་གྱིས་བཀྲུའོ། །དེ་ནས་མར་དང་སྦྲང་རྩི་དང་ནས་ཕྱེ་བསྲེས་ལ་ཟན་ཐབས་སུ་བྱས་པས་མིག་ལ་གླན་ལ། དེའི་སྟེང་དུ་རས་མར་གྱིས་བྱུགས་པས་
དཀྲིས་ཏེ་རྣ་བའི་གོང་འོག་ཏུ་བརྟོད་ལ་བཞག་གོ། །རས་དེ་ཡང་ཞག་རེར་བཀྲོལ་ཞིང་རང་རང་དང་མཐུན་པའི་སྨན་ཡང་བླུགས་སོ། །ཞག་བཞི་ལོན་ནས་སྣར་བླུགས་པ་ལ་སོགས་པ་ཡང་བྱའོ། །ཞག་ལྔ་པ་ལ་ནི་རས་བཀྲོལ་ལ་བཏང་སྟེ་གླན་མི་དགོས་སོ། །དེ་ལྟར་
མཚོན་གྱིས་ལེགས་པར་བཞར་ལེགས་པའི་མཚན་མ་ནི། མིག་མཆུ་ནི་མཐོན་དམན་མེད་ཅིང་མཉམ་པ་དང་། དམར་སྐྱར་འདུག་ཅིང་སེན་མོའི་མདོག་ཏུ་སྣང་བ་དང་། སྐྲང་པ་དང་། གཡའ་བ་དང་། རེག་ཅིང་བསྒུལ་ན་ཡང་ན་བ་མེད་པར་རིག་པར་བྱའོ། །དེ་ལས་

བཟློག་པ་ནི་མ་ལེགས་པའི་མཚན་མ་ཡིན་ཏེ། དེ་ལ་ནི་ཡང་མཚོན་གྱིས་བཞར་ཏེ་བཟླ་བར་བྱའོ། །གལ་ཏེ་མཚོན་གྱིས་བཞར་དྲགས་ན་ནི་མིག་མཆུ་ན་ཞིང་ཟུག་པ་དང་། རྫི་མ་འབྱི་བ་དང་། འཛག་པ་མང་བར་འགྱུར་ཏེ། དེ་ལ་ནི་སྣུམ་ཆོས་དང་།
དུགས་ལ་སོགས་པ་རླུང་ལ་ཕན་པའི་སྦྱོར་བ་བྱས་ན་ཕན་ནོ་ཞེས་སྨན་པ་རྣམས་འདོད་དོ། །དེའི་འོག་ཏུ་སེང་ཕྲོམ་དཀར་པོ་མར་སར་གྱིས་བསྐུས་ཏེ། ཨེ་རཎྜའི་རྩ་བའི་ཕྱེ་མའི་ལྡེ་གུས་བྱུགས་པ་རྫེའུ་ཁ་སྦྱར་གྱི་ནང་དུ་བསྲེགས་ཏེ་ཚོས་པ་དང་། ཆུས་བཀྲུས་ཏེ་སྐམས་ལ་
བཏགས་པའི་ཕྱེ་མ་བུད་མེད་དང་རའི་འོ་མ་གང་ཡང་རུང་བ་དང་སྦྲུས་ལ་རས་ཀྱི་ནང་དུ་ཐུམ་བུར་བྱས་ཏེ་མིག་ལ་དུགས་བྱའོ། །ཡང་ན་སེང་ཕྲོམ་དཀར་པོ་ལ་འབྲས་ཐུག་པོ་ཆེའི་ཕྱེ་མའི་ལྡེ་གུས་ཆོ་ག་གོང་མ་ལྟར་བྱས་པ་ལས་དེའི་ཕྱེ་མ་ཞོ་ག་ཆུ་དང་མཉེས་ཏེ། དུགས་བྱས་ན་མཚོན་གྱིས་
བཞར་དྲགས་པ་ལ་ཕན་ནོ། །ཡང་ན་ཞོ་ག་ཆུ་ཉི་ཚེས་བླུགས་པ་བྱ་ཞིང་སྲོག་ཆགས་སྐམ་ན་གནས་པའི་ཤ་དང་ལྷན་ཅིག་བཟའ་བར་བྱའོ། །མིག་མཆུ་ལ་འབྲུམ་བུ་ཕྲ་མོ་སྲ་ཞིང་མཐོན་པོ་བྱུང་བ་ལ་ནི་འབྲས་ཀྱི་སོ་འདྲ་བའི་མཚོན་གྱིས་དྲལ་ཏེ་དེ་བཙིར་ལ་སྨན་གྱིས་བཏབ་པ་དང་། བསྐུ་
བ་ལ་སོགས་པ་ནི་སྔ་མ་བཞིན་དུ་སྦྱར་རོ། །གོང་དུ་སྨོས་པའི་བཞར་བ་ལ་སོགས་པའི་དཔྱད་ཐམས་ཅད་ཀྱང་དྲལ་བ་འདིར་སྦྱར་བར་བྱའོ། །མཁྲིས་པ་དང་ཁྲག་ལས་གྱུར་པའི་མིག་མཆུའི་ནད་ལ་ནི། སྨན་མངར་བའི་སྡེ་ཚན་དང་མར་སྦྱར་བས་དང་པོ་བཏུང་བ་ལ་སོགས་
པ་སྣུམ་ཆོས་དང་སྦྱར་ཏེ། དེའི་འོག་ཏུ་ཁྲག་གཏར་རོ། །དེ་ནས་ཤིང་ཉེ་རོང་གི་བཀྲུ་སྨན་གཏང་ངོ་། །མིག་མཆུའི་ནད་མཚོན་གྱིས་བཞར་ཏེ་ཁྲག་བྱུང་བ་དང་། ཤིང་མངར་བསྐོལ་བའི་ཆུས་བཀྲུས་ཏེ། ཙནྡན་དཀར་པོ་འོ་མ་དང་སྦྱར་བས་བླུགས་པ་བྱས་ན་ཕན་ནོ། །རྫི་མ་
འབྱི་བའི་མིག་མཆུའི་ནད་ལ་ནི་སྤུ་ཐོག་མ་གང་ནས་འབྱི་བའི་སྤུའི་ཁུང་བུ་ཁབ་ཀྱིས་གཙགས་ཏེ་ཁྲག་དབྱུང་བའམ། ཡང་ན་སྲིན་བུ་པད་པས་ཁྲག་དབྱུང་བ་ཕན་ནོ། །ཡང་ན་རྫི་མའི་ནད་ལ་འོ་མ་དང་། བུ་རམ་ཤིང་གི་ཁུ་བ་དང་སྦྱར་བའི་མར་གྱིས་སློན་བྱ་བ་དང་། མངར་

བ་དང་། བསིལ་བའི་སྨན་དང་བསྐོལ་བའི་མར་གྱི་སྣ་སྨན་བཏང་ན་ཕན་ནོ། །ཡང་ན་ནག་ཚུར་དཀར་པོའི་ཕྱེ་མ་ཟངས་མའི་སྣོད་ཀྱི་ནང་དུ་བཅུག་ལ་བྱིའུ་རུག་པའི་སྨན་གྱི་ཁུ་བས་ཞག་བཅུའི་བར་དུ་བྲན་ཅིང་དེའི་འོག་ཏུ་བསྐམས་ལ་དེའི་འོག་ཏུ་མིག་ཏུ་བསྐུས་ན། རྫི་མ་
འབྱེ་བའི་ནད་ལ་ཕན་པའི་མཆོག་ཡིན་ནོ། །མིག་མཆུའི་ནད་ཤ་སྐྱེས་པ་ལ་འབྲུམ་བུ་ཕྲ་མོ་འབྱུང་བའི་ནད་ལ་ནི་ཐོག་མར་མཚོན་གྱིས་བཞར་ལ་བཅའ་སྒ་དང་། རྒྱམ་ཚ་གཉིས་ཀྱི་ཕྱེ་མ་བཏབ་སྟེ། དེའི་འོག་ཏུ་ཆུ་དྲོན་གྱིས་བཀྲུའོ། །སེང་ལྡེང་དང་། ཨཊྚ་ཀ་ཞེས་བྱ་བ་ཏུ་བ་རི་དང་།
ན་ལེ་ཤམ་དཀར་པོ་ཆུ་དང་ལྷན་ཅིག་བསྐོལ་བའི་ཆུའམ། ཡང་ན་སེར་པོ་རྣམ་གཉིས་དང་། འབྲས་བུ་གསུམ་དང་། ཤིང་མངར་རྣམས་བསྐོལ་བའི་ཁུ་བ་སྦྲང་རྩི་དང་སྦྱར་བས་བླུགས་པར་བྱའོ། །བད་ཀན་ལས་གྱུར་པའི་མིག་མཆུའི་ནད་ལ་ནི་ནག་ཚུར་དང་། རྒྱམ་ཚ་དང་། ལྡོང་རོས་
དང་། པི་པི་ལིང་དང་། སྐྱེར་ཁཎྜ་དང་འདི་རྣམས་ཞིབ་ཏུ་བཏགས་པའི་ཕྱེ་མ་སྦྲང་རྩི་དང་སྦྱར་བས་བླུགས་པར་བྱའོ། །གཞན་ཡང་བད་ཀན་ལ་ཕན་པའི་སྨན་སྐྱུག་སྨན་དང་། མིག་སྨན་དང་། སྣ་ནས་གཏོང་བ་ཐམས་ཅད་ཀྱང་འདིར་བྱའོ། །མིག་མཆུའི་ནད་གྷ་ན་ཞེས་བྱ་བ་ལ་ནི། བད་
ཀན་ལས་གྱུར་པའི་མིག་མཆུའི་ནད་ལ་ཕན་པའི་སྨན་ཐམས་ཅད་འདི་ལ་ཡང་ཕན་ཏེ། གལ་ཏེ་དེས་མ་ཞི་ན་མེའི་ལས་ཐམས་ཅད་བྱའོ། །ཀུ་ཀུ་ན་ཀ་ཞེས་བྱ་བ་བྱིས་པའི་མིག་མཆུའི་ནད་ལ་ནི་སེང་ལྡེང་དང་། འབྲས་བུ་གསུམ་དང་། ནིམ་པའི་ལོ་མ་རྣམས་ལྷན་ཅིག་ཡུངས་
ཀར་གྱི་མར་དང་སྦྱར་བས་བཏུང་བ་ལ་སོགས་པ་སྣུམ་ཆོས་བྱས་ཏེ། པི་པི་ལིང་དང་། ཤིང་མངར་དང་། རྒྱམ་ཚ་དང་། ཞུན་མར་རྣམས་སྦྱར་བས་ནུ་མ་བསྣུན་པའི་མ་ལ་སློན་བྱའོ། །དེའི་འོག་ཏུ་ཨ་རུ་ར་དང་། པི་པི་ལིང་དང་། རྒུན་འབྲུ་བསྐོལ་བའི་བཀྲུ་སྨན་བྱས་ན་ཡང་
ཕན་ནོ། །དེ་ནས་མ་མ་དེ་ལ་གླ་སྒང་དང་། སེར་པོ་རྣམ་གཉིས་དང་། པི་པི་ལིང་རྣམས་བཏགས་པའི་འདག་གུས་ནུ་མ་ལ་བྱུག་གོ། །ཡུངས་ཀར་མར་དང་བསྲེས་པའི་དུད་པས་ནུ་མ་ལ་བདུག་གོ། །དེ་ལྟར་ན་སློན་ཁྲུས་ལ་སོགས་པས་ནུ་མ་བསྣུན་པའི་མ་མའི་ལུས་དག་པ་དང་། པ་

ཏོ་ལ་དང་། གླ་སྒང་དང་། རྒུན་འབྲུ་དང་། སླེ་ཏྲེས་དང་། འབྲས་བུ་གསུམ་དང་། འདི་རྣམས་བསྐོལ་བའི་བཏུང་བ་བླུད་དོ། །དེའི་འོག་ཏུ་བྱིས་པའི་མིག་མཆུ་མཚོན་གྱིས་བཞར་བའམ། ཡང་ན་སྲིན་བུ་པད་པས་འཇིབ་ཏུ་གཞུག་སྟེ། དེ་ནས་སྐྱུ་རུ་ར་དང་
ཨ་སྨན་ཏ་ག་དང་། ཤིང་འཛམ་བུ་དང་། དེ་རྣམས་ཀྱི་འོ་མ་བསྐོལ་བའི་ཁུ་བས་བླུགས་པར་བྱའོ། །ཡང་ན་བྱིས་པ་ལ་ནི་ཕལ་ཆེར་སྣུམ་དང་འོ་མས་བསྐྱེད་པ་ཡིན་པས་བད་ཀན་གྱི་ནད་འབྱུང་སྟེ། དེ་བས་ན་བྱིས་པའི་ནད་ཐམས་ཅད་ལ་ཐོག་མར་སློན་སྨན་བཏང་ན་མཆོག་ཏུ་
བསྔགས་སོ། །དེ་ཡང་འོ་མ་ཉི་ཚེ་འཐུངས་པའི་བྱིས་པ་ལ་ནི། རྒྱམ་ཚ་དང་། པི་པི་ལིང་དང་། ཨ་པ་མརྒའི་འབྲས་བུ་དང་། མར་དང་འོ་མ་དང་། སྦྲང་རྩི་དང་ལྡན་པའི་སློན་སྨན་གཏང་ངོ་། །འོ་མ་དང་ཟས་འདྲེས་མར་བསྟེན་པའི་བྱིས་པ་ལ་ནི་ཤུ་དག་གི་ཕྱེ་མ་སྦྲང་རྩི་དང་བཅས་པའི་
སློན་སྨན་གཏང་ངོ་། །ཟས་ཉི་ཚེ་བསྟེན་པའི་བྱིས་པ་ལ་ནི་པོ་སོན་ཆ་ཤིང་མངར་དང་སྦྱར་བ་གཏང་ངོ་། །སྐྱུག་སྨན་དེ་དག་བྱིས་པའི་ནད་ཐམས་ཅད་ལ་ཕན་པའི་སྟེང་དུ་ཁྱད་པར་དུ་ཀུ་ཀུ་ན་ཀ་ཞེས་བྱ་བའི་བྱིས་པའི་ནད་ལ་ཕན་ནོ། །ཡང་ན་སྨན་སབ་ཏ་དང་མར་ལྷན་ཅིག་བསྐོལ་
བའི་མར་བླུད་ན་གོང་འོག་གཉིས་ཀ་སྦྱོར་རུང་བར་བྱེད་དོ། །སེར་པོ་རྣམ་གཉིས་དང་། སེང་ཕྲོམ་དང་། ཤིང་མངར་དང་། པུ་ཙེ་ཤེལ་དང་། ནིམ་པའི་ལོ་མ་དང་། འདི་རྣམས་སྦྲང་རྩི་དང་འོ་མ་དང་ལྡན་པའི་ཟངས་མའི་ཕྱེ་མ་འམ། ལྕགས་ཀྱི་ཕྱེ་མ་གང་ཡང་རུང་
བ་དང་བསེས་པའི་རི་ལུ་བྱས་ཏེ་བཏང་ན་བྱིས་པའི་མིག་མཆུའི་ནད་ལ་ཕན་ནོ། །ཡང་ན་སུག་སྨེལ་དང་། སྒོག་སྐྱ་དང་། ཀ་ཏ་ཀ་དང་། དུང་དང་། ནལ་ཤམ་དང་། ཕ་ནི་ཛ་ཀ་དང་། འདི་རྣམས་ཆང་ལ་བདར་ལ་ཀད་ཕ་ལ་དང་བཅས་པའི་བདར་བུ་བྱས་ཏེ་བཏང་ན།
ཀུ་ཀུ་ན་ཀ་ཞེས་བྱ་བའི་བྱིས་པའི་ནད་དང་། ཤ་སྐྱེས་པ་ཞེས་བྱ་བའི་མིག་མཆུའི་ནད་ལ་ཕན་ནོ། །རྫི་མ་འཁྲུགས་པ་ཞེས་བྱ་བའི་ནད་ལ་ནི་ཐོག་མར་སློན་ཁྲུས་ཀྱིས་ལུས་དག་པར་བྱས་ཏེ། དེའི་འོག་ཏུ་མིག་གི་རྫི་མ་ཡར་བཏེག་ལ་རྫི་མ་ཆ་གསུམ་དུ་བགོས་པའི་ཆ་གཉིས་སྨིན་

མ་དང་སྦྱར། ཆ་གཅིག་ཙམ་བཞག་དེ་ནས་ནས་གང་ཙམ་ནས་ཀྱི་དབྱིབས་འདྲ་བར་འཕྲེད་དུ་མཚོན་གྱིས་དྲལ་ལ་ཁྲག་གཟགས་སོ། །ཁྲག་གི་ཤུགས་ཟད་པ་དང་། འཕྲལ་བ་ལ་རས་ཀྱིས་དམ་དུ་དཀྲིས་ལ་རྫི་མ་ཚོམ་བུར་བྱས་ཏེ་དེའི་བར་མཚམས་མོན་སྲན་སྡེའུ་ཙམ་བཞག་ལ།
གླད་པའི་རྫི་མའི་ཚོམ་བུ་འཕྲལ་བའི་རས་ལ་རྫི་མ་བརྟོད་དེ། བ་ལང་ངམ་རྟའི་སྤུ་འམ། ཟར་མའི་སྐུད་པས་བཙེམས་ཏེ། ཁབ་སྐུད་གཞུ་འདྲ་བས་དྲུབ་པོ། དེ་ཡང་ཧ་ཅང་དམ་ལྷོད་དུ་མ་སོང་བར་རན་པར་བྱའོ། །དེ་ནས་རས་འཇམ་པོ་མར་དང་སྦྲང་རྩི་བྱུགས་པས་བཅིང་
བ་མེད་པར་སྟེང་ནས་གཡོགས་སོ། །གལ་ཏེ་ཟུག་གཟེར་ཡོད་ན་ནི་ནྱ་གྲོ་དྷའི་སྡེ་ཚན་བསྐོལ་བའི་ཁུ་བ་འོ་མ་དང་བཅས་པས་བླུགས་སོ། །དེ་ནས་བརྟན་པར་གྱུར་ཏེ་ཞག་ལྔ་ལོན་པ་དང་སྐུད་པ་བཀྲོལ་ཏེ་བཙག་ཡུག་སྣམ་གྱི་ཕྱེ་མས་གདབ་པོ། །དེའི་འོག་ཏུ་སྣ་སྨན་དང་
མིག་སྨན་རྣོན་པོ་སྦྱར་རོ། །ཆོ་ག་དེ་དག་གིས་ཀྱང་རྫི་མ་འཁྲུགས་པའི་ནད་ཞིར་མ་འདོད་ན། རྫི་མ་གང་རིང་བ་སྐམ་པས་བཟུང་སྟེ། ཕྱུང་སྟེ་དེའི་བུ་གའི་རྗེས་ལ་ཐལ་སྨན་རྣོན་པོའམ། ཁབ་རྩེ་འདྲ་བའི་མཚོན་རྣོན་པོ་མེའི་མདོག་འདྲ་བར་བྱས་པས་བསྲེག་གོ། །
མིག་མཆུའི་ནད་མེ་དབལ་ལྟ་བུ་ལ་ཡང་དང་པོ་མཚོན་གྱིས་དྲལ་ལ། ཐལ་སྨན་རྣོན་པོ་འམ་མེས་བསྲེག་གོ། །ཐོར་བུ་བྱུང་བ་ལ་ནི་ཐོར་བུ་བཅད་ལ། དེའི་འོག་ཏུ་ཐལ་སྨན་ནམ་མེས་བསྲེག་གོ། །མིག་མཆུའི་ནད་གསོ་བའི་ལེའུ་སྟེ་དགུ་པ་རྫོགས་སོ།། །།
དེ་ནས་མིག་གི་གྲྭ་མཚམས་དང་། མིག་གི་འབྲས་བུ་དཀར་པོ་དང་ནག་པོའི་ནད་དམིགས་ཤེས་པར་བྱ་བའི་ལེའུ་བཤད་པར་བྱ་སྟེ། དེ་ལ་རླུང་ལས་གྱུར་པའི་མིག་གི་གྲྭ་མཚམས་ཀྱི་ནད་ཀྱི་མཚན་མ་ནི་རླུང་གིས་མཆི་མ་འབྱུང་བའི་རྒྱུན་བཀག་པས་མིག་མཆུའི་གྲྭ་
མཚམས་དང་། མིག་གི་འབྲས་བུ་དཀར་པོའི་མཚམས་སྣ་གོང་ཕྱོགས་ནས་ཆུ་དང་འདྲ་བའི་མཆི་མ་འབྱུང་ལ། དེ་ཡང་མིག་ནད་མེད་ཅིང་རྩ་དམར་ལ་སྐྲང་བ་ཡིན་ཏེ། དེ་ནི་མིག་ནད་ཀྱི་ཆུ་འཛག་པ་ཞེས་བྱའོ། །བད་ཀན་ལས་གྱུར་པའི་མིག་ནད་ཀྱི་མཚན་མ་ནི་མཆིལ་

མ་དང་འདྲ་བ་སྤྱི་བག་ཏུ་འདུག་པ་དང་། མདོག་དཀར་བ་དང་། འཛག་པ་དཀའ་བ་དང་། མང་དུ་འཛག་པ་ཡིན་ཏེ། དེ་ནི་བད་ཀན་འཛག་པ་ཞེས་བྱ་བའི་ནད་ཡིན་ནོ། །ཡང་ན་བད་ཀན་ལས་གྱུར་པའི་རྟགས་ནི། མིག་གི་གྲྭ་མཚམས་སུ་མཐོན་པོ་ཙོག་ཙོག་
པོར་སྐྲང་པ་དང་། ཆུ་ལན་ཚྭ་ཅན་གྱི་ཆུ་བུར་འདྲ་བར་སྟེང་དུ་འབྱུང་ཞིང་ཆུ་བུར་དེ་ཡང་རྩ་བ་ཆེན་པོ་དང་། སྣུམ་པ་དང་། འགུལ་བ་དང་། མདོག་དཀར་བ་དང་། འཇམ་པ་དང་། འབྱིལ་བག་ཏུ་འདུག་པ་དང་། ཡུན་རིང་དུ་མི་ཤེས་པ་དང་། གཡའ་བ་དང་། ཟུག་གཟེར་
བ་མེད་པ་དེ་ནི་ཨུ་པ་ན་ཧ་ཞེས་བྱ་བའི་མིག་གི་གྲྭ་མཚམས་ཀྱི་ནད་ཡིན་ནོ། །ཁྲག་ལས་གྱུར་པའི་མཚན་མ་ནི་མཆི་མ་མང་དུ་འཛག་ཅིང་ཚ་བ་དང་། ཟངས་མའི་མདོག་འདྲ་བ་དམར་པོར་འབྱུང་བ་ཡིན་ཏེ། དེ་ནི་མིག་གི་ནད་དམར་པོར་འཛག་པ་ཞེས་བྱའོ། །མིག་མཆུའི་གྲྭ་
མཚམས་དང་། མིག་གི་འབྲས་བུ་དཀར་པོའི་མཚམས་ལ་བརྟེན་པའི་འབྲུམ་བུ་ཕྲ་མོ་ནི་སྲན་སྡེའུ་ཙམ་འབྱུང་སྟེ། དེ་ཡང་མདོག་ཟངས་མ་བཞིན་དུ་དམར་ལ་ཚ་ཞིང་ཟུག་གཟེར་དང་ལྡན་པ་དང་། བརྟོལ་ན་ཁྲག་འཛག་པ་ཡིན་ཏེ། དེ་ནི་པར་པ་ནི་ཞེས་བྱ་བའི་མིག་ནད་ཡིན་
ནོ། །ནད་གཞི་གསུམ་དང་ཁྲག་ལས་གྱུར་པའི་མིག་ནད་ཀྱི་རྟགས་ནི། མིག་གི་སྣ་ཕྱོགས་ནས་པགས་པ་དང་། ཤ་སྨིན་པའི་དབང་གིས་མཆི་མ་རྣག་དང་བཅས་པ་ཡང་འཛག་སྟེ། དེའི་མིང་ནི་རྣག་འཛག་པའི་མིག་ནད་ཅེས་བྱའོ། །གཞན་ཡང་མིག་སྣ་ཕྱོགས་ཀྱི་
གྲྭ་སྐྲང་པ་དང་། ན་བ་དང་། རྨ་ཕྲ་མོ་འབྱུང་བ་དང་། ཡང་དང་ཡང་ཆུ་སེར་དང་། རྣག་འཛག་པ་དང་། ནད་དང་བཅས་པ་དེ་ནི་རྣག་གར་པོ་འཛག་པའི་མིག་ནད་ཅེས་བྱའོ། །སྣ་ཕྱོགས་ཀྱི་མིག་འགྲམ་གྱི་ནང་དུ་སྐྲང་པ་དང་། ཟུག་གཟེར་ཆེ་བ་དང་། ཚ་བ་འབྱུང་བའི་ནད་ནི་མེ་
དབལ་ཕྲ་མོའི་ནད་ཅེས་བྱའོ། །མིག་ཟུར་གང་ཡང་རུང་བར་མིག་མཛེར་འབྱུང་སྟེ། དེ་ཡང་གཡའ་བ་དང་། རྫི་མ་འབྱི་བ་དང་། རྣག་འཛག་པ་དང་། སྲིན་ཡོད་པ་དང་། ནད་དང་བཅས་པ་དེ་ནི་མིག་མཛེར་གྱི་ནད་སྲིན་བུ་ཅན་ཞེས་བྱའོ། །དེ་ལ་མིག་གི་གྲྭ་མཚམས་ཀྱི་

ནད་དགུ་ལས། ཨུ་པ་ན་ཧ་དང་། མིག་མཛེར་གྱི་ནད་སྲིན་བུའི་ནད་དང་། མཆི་མ་རྣག་གར་པོར་འཛག་པ་དང་། པརྦ་ནི་དང་། བཞི་པོ་དེ་དག་ནི་མཚོན་གྱི་ལས་ཀྱིས་གསོ་བར་བྱའོ། །ལྷག་མ་ལྔ་ལས་བཞི་ནི་སྨན་གྱིས་གསོ་བར་བྱའོ། །མེ་དབལ་ཕྲ་མོའི་མིག་ནད་ནི་
སྤང་བར་བྱའོ། །ད་ནི་མིག་གི་འབྲས་བུ་དཀར་པོའི་ནད་དམིགས་བརྟག་པ་བཤད་དེ། དེ་ལ་མཁྲིས་པ་ལས་གྱུར་པའི་མིག་ནད་ནི་མིག་གི་འབྲས་བུ་དཀར་པོའི་སྟེང་དུ་ནག་པོའམ། སྔོ་བསངས་སམ་སེར་པོ་ལྟ་བུར་ཐིག་ལེ་བྱུང་བ་འམ། ཡང་ན་མེ་ལོང་གཡའ་དང་
བཅས་པ་ལྟར་སྣང་ལ་ཚ་བ་དང་། ནད་མེད་ཅིང་ཅུང་ཟད་འཁྲུ་བ་དང་། སྐོམ་དད་ཆེ་བ་དང་བཅས་པ་ཡིན་ཏེ། དེའི་མིང་ནི་ཉ་ཕྱིས་ལྟ་བུའི་མིག་ནད་ཅེས་བྱའོ། །དེ་ལ་བད་ཀན་ལས་གྱུར་པའི་ནད་མིག་གི་འབྲས་བུ་དཀར་པོའི་སྟེང་དུ་ཤ་མདོག་དཀར་པོ་ཅུང་ཞིག་སྐྱེས་
ཏེ། དེ་ཡང་རིམ་གྱིས་ཡུན་རིང་པོ་ནས་འཕེལ་བ་དེ་ནི་མིག་མཛེར་དཀར་བའི་ནད་ཅེས་བྱའོ། །ཡང་ན་མིག་གི་འབྲས་བུ་དཀར་པོ་ལ་ཆུའི་ཐིགས་པ་འདྲ་བའི་ནད་འབྱུང་སྟེ། དེ་ལ་སྐྲང་པ་དང་། ཟུག་གཟེར་ཆུང་བ་དང་། མདོག་དཀར་བ་དང་། མཐུག་པ་དང་།
འཇམ་པ་དང་། ལྕི་བ་དང་། སྣུམ་པ་གང་ཡིན་པ་དེ་ནི་བད་ཀན་གྱིས་བསྒོངས་པའི་མིག་ནད་ཅེས་བྱའོ། །ཡང་མིག་གི་འབྲས་བུ་དཀར་པོའི་སྟེང་དུ་ཕྱེ་མ་ལྟ་བུའི་ཐིག་ལེ་འབྱུང་ཞིང་དེ་ཡང་མཐོན་པོར་འདུག་པ་ཡིན་ཏེ། དེ་ནི་འབྲས་ཕྱེའི་ཐིག་ལེ་ལྟ་བུ་ཞེས་བྱ་བའི་
མིག་ནད་ཅེས་བྱའོ། །ཁྲག་ལས་གྱུར་པའི་མིག་གི་འབྲས་བུ་དཀར་པོའི་ནད་མདོག་དམར་པོ་ཤར་ཤར་པོར་འགྱུར་ཞིང་ཚ་འུར་འུར་པོར་འདུག་ལ་ན་བ་དང་བཅས་པ་དང་། མཆི་མ་དང་སྐྲང་པ་མེད་པ་ཡིན་ཏེ། དེའི་མིང་ནི་མིག་རྩ་འགྱུར་བ་ཞེས་བྱའོ། །དེ་ཉིད་གསོ་བ་
མ་བྱས་པར་བཞག་ན་ནི་ཁྲག་ཆེར་སྐྱེས་ཏེ་ཁྲག་དང་བཅས་པ་ནི་མིག་གི་རྩ་བ་བརྩེ་བ་ཞེས་བྱ་བའི་ནད་ཡིན་ཏེ། ལྟ་བ་ལ་སོགས་པའི་རྩོལ་བ་མི་ནུས་པར་འགྱུར་རོ། །མིག་གི་འབྲས་བུ་དཀར་པོའི་སྟེང་དུ་ཁྲག་གིས་གང་བའི་རྩའི་དྲ་བས་གཡོགས་ཏེ། དེ་ཡང་སྟུག་པ་དང་མཐོན་

པོར་འདུག་པ་དེ་ནི་རྩའི་དྲ་བ་ལྟ་བུའི་མིག་ནད་ཅེས་བྱའོ། །ཡང་མིག་གི་འབྲས་བུ་དཀར་པོའི་སྟེང་དུ་ཤ་མ་ཐུག་པོར་འབྱུང་ཞིང་དེ་མཐོ་དམན་མེད་པ་འཇམ་པ་པད་མ་འདྲ་བ་ཡིན་ཏེ། དེའི་མིང་ནི་ཁྲག་ལས་གྱུར་པའི་མིག་མཛེར་གྱི་ནད་ཅེས་བྱའོ། །ཡང་ན་མིག་གི་འབྲས་
བུ་དཀར་པོའི་སྟེང་དུ་ཐིག་ལེ་དམར་པོ་རི་བོང་གི་ཁྲག་ལྟ་བུ་དམར་པོར་སྣང་ཞིང་ནད་མེད་པ་འཇམ་པོར་འདུག་པ་དེ་ནི་ལིང་ཏོག་དམར་པོ་ཞེས་བྱའོ། །མིག་གི་འབྲས་བུ་དཀར་པོའི་སྟེང་དུ་ནད་གཞི་གསུམ་ལས་གྱུར་པའི་མཛེར་མདོག་དམར་པོ་དང་། སྔོ་བསངས་སུ་འདུག་པ་དང་།
འཇམ་པ་དང་། མྱུར་དུ་མཆེད་པ་དང་། ཤས་ཀུན་དུ་ཁྱབ་པ་ལ་དེ་ནི་ཁྱབ་བྱེད་ཀྱི་མིག་ནད་ཅེས་བྱའོ། །ཡང་མིག་འབྲས་དཀར་པོ་ལ་ནད་གཞི་འདུས་པ་དང་། ཁྲག་ལས་གྱུར་པའི་ནད་རྒྱུས་པ་ལྟ་བུ་ནར་ནར་པོར་གྱུར་པ་ནི་རྒྱུས་པ་ལྟ་བུའི་མིག་མཛེར་གྱི་ནད་ཅེས་བྱའོ། །ཡང་
ན་མིག་འབྲས་དཀར་པོའི་སྟེང་དུ་ཤའི་རིལ་རིལ་པོར་ཁྲག་སྐམ་གྱི་མདོག་ལྟར་སྔོ་བསངས་སུ་འདུག་ཅིང་མཐུག་ལ་རྒྱ་ཆེ་བར་སྣང་བ་དེ་ནི་ཤའི་མིག་མཛེར་ཅེས་བྱའོ། །ཡང་མིག་གི་འབྲས་བུ་དཀར་པོའི་སྟེང་དུ་འབྲས་བུ་ཕྲ་མོ་ཡུངས་ཀར་གྱི་འབྲུ་ཙམ་མདོག་གནག་པ་དང་། ཚ་བ་
དང་། རེག་ན་རྩུབ་པ་དང་། རྩ་མང་པོས་གཡོགས་པར་སྣང་བ་དེ་ནི་འབྲུམ་ཕྲན་རྩས་གཡོགས་པའི་མིག་ནད་ཅེས་བྱའོ། །དེ་དག་ལས་མིག་ནད་ཉ་ཕྱིས་ལྟ་བུ་དང་། མིག་རྩ་བརྩེ་བའི་ནད་དང་། མིག་རྩ་འགྱུར་བའི་ནད་དང་། འབྲས་ཕྱེའི་ཐིག་ལེ་ལྟ་བུ་དང་། བད་
ཀན་གྱིས་བསྒོངས་པའི་མིག་ནད་དང་། ལིང་ཐོག་དམར་པོ་དང་དྲུག་པོ་དེ་དག་ནི་སྨན་གྱིས་གསོ་བར་བྱའོ། །ལྷག་མ་བདུན་ནི་མཚོན་གྱི་ལས་ཀྱིས་གསོ་བར་བྱའོ། །བདུན་པོ་དེ་དག་སར་པའི་དུས་ན་ནི་སྨན་གྱིས་གསོའོ། །མིག་མཛེར་གྱི་ནད་རྣམ་པ་ལྔར་བཤད་པ་དེ་དག་མིག་གི་འབྲས་
བུ་ནག་པོའི་སྟེང་དུ་འབྱུང་སྟེ། རྒྱུས་པ་དང་རྩས་གཡོགས་པར་སྣང་ན་དེ་ནི་མཚོན་གྱིས་གཅད་པར་བྱའོ། །མཐོང་མིག་གི་སྟེང་དུ་པགས་པ་ལ་ཤ་འབྱར་བ་ལྟ་བུ་མཐོན་པོར་ཕྱིན་པར་སྣང་ན་དེ་ནི་སྤང་བར་བྱའོ། །མིག་གི་འབྲས་བུ་ནག་པོའམ། མཐོང་གི་སྟེང་དུ་མཁྲིས་པ་ལས་

གྱུར་པའི་ལིང་ཏོག་འབྱུང་སྟེ། མིག་གི་པགས་པ་རྡོལ་ནས་ཟུག་གཟེར་དང་བཅས་ཤིང་མཆི་མ་འབྱུང་བ་དང་། ན་བ་དང་། དམར་བ་ཡིན་ཏེ། དེའང་འཛམ་བུའི་འབྲས་བུ་སྨིན་པ་དང་འདྲ་བར་སྣང་ཞིང་ཅུང་དམར་བར་འདུག་པ་དེ་ནི་ཟད་བྱེད་ཀྱི་ལིང་ཏོག་ཅེས་བྱ་སྟེ། གསོ་དཀའ་བ་ཡིན་
ནོ། །ལིང་ཏོག་གི་ནད་དེ་ཆེར་སྐྱེས་ནས་ནི་ཆེར་ཟབས་སུ་པགས་པའི་རིམ་པ་གཉིས་ཕུག་ནས་འདུག་པ་ཡིན་ཏེ། དེའི་མཚན་མ་ནི་ན་བ་དང་། གཟེར་བ་དང་། མཆི་མ་ལ་སོགས་པ་ཤས་ཆེར་འབྱུང་བ་དང་། ཁབ་ཀྱིས་ཕུག་པ་ལྟར་སྣང་བ་ཡིན་ཏེ། དེ་ནི་མི་ལ་བ་ཙམ་དུ་གསོར་
རུང་ངོ་། །ལིང་ཏོག་དེ་ཡང་སྔ་མ་བས་ཤས་ཆེར་སྐྱེས་ཏེ། པགས་པའི་རིམ་པ་གསུམ་ཕུག་ནས་རྨས་ཀུན་དུ་ཁྱབ་པར་སྣང་བ་ནི། གསོ་བར་མི་ནུས་སོ། །ཡང་མིག་གི་འབྲས་བུ་ནག་པོ་བད་ཀན་ལས་གྱུར་པའི་ལིང་ཏོག་ཧ་ཅང་མི་དཀར་བར་དུང་གི་མདོག་ལྟར་སྣང་བ་དེ་ནི། ལིང་ཏོག་
མ་འདྲེས་པ་ཞེས་བྱ་སྟེ། གསོ་བར་སླ་བ་ཡིན་ནོ། །ཡང་མིག་གི་འབྲས་བུ་ནག་པོ་ལ་ཁྲག་ལས་གྱུར་པའི་ལིང་ཏོག་འབྲུམ་བུ་ཕྲ་མོ་ཟངས་མའི་མདོག་ལྟ་བུ་འབྱུང་བ་དང་། མཆི་མའི་མདོག་ཀྱང་ཟངས་མའི་མདོག་ལྟར་དམར་ཞིང་འབྱར་བག་ཏུ་འབྱུང་བ་དང་། རབ་ཏུ་ན་བ་དང་།
རའི་རིལ་མ་དང་འདྲ་བའི་འབྲུམ་བུ་ཕྱིར་འབུར་བར་བྱུང་ལ་ཅུང་ཟད་ནག་པ་དེ་ནི་རིལ་མ་ལྟ་བུ་ཞེས་བྱ་བའི་ལིང་ཏོག་ཡིན་ཏེ་སྤང་བར་བྱའོ། །ཡང་ན་ནད་གཞི་གསུམ་དང་ཁྲག་ལས་གྱུར་པའི་ལིང་ཏོག་འབྱུང་སྟེ། དེ་ཡང་ཚ་བ་དང་། ན་བ་དང་། ཟངས་མའི་མདོག་འདྲ་བའི་རྩས་གཡོགས་
པར་འདུག་པ་དང་། རྒྱུ་མེད་པར་མཆི་མ་གྲང་བ་དང་དྲོ་བ་རེས་ཀྱིས་འཛག་པ་དང་། ཡང་ན་སྐ་བ་དང་སླ་བ་རེས་ཀྱིས་འཛག་པ་ཡིན་ཏེ། དེའི་མིང་ནི་ལིང་ཏོག་རྩས་གཡོགས་པ་ཞེས་བྱ་བ་ཡིན་ཏེ་སྤང་བར་བྱའོ། །ཡང་ན་ནད་གཞི་གསུམ་དང་། ཁྲག་ལས་གྱུར་པའི་ལིང་ཏོག་
མཐོང་བའི་མིག་སྟེང་དུ་འབྱུང་སྟེ། འབྲས་བུ་ནག་པོ་ཐམས་ཅད་དཀར་པོར་བསྒྱུར་ཏེ། མདོག་དཀར་པོ་སྤྲིན་ལྟ་བུས་ཡོགས་པའམ་ཡང་ན་འབྲས་ནིས་པ་བའི་ལོ་མ་ལྟ་བུས་ཡོགས་ལ་ཤིན་ཏུ་མི་བཟད་པར་ན་ཞིང་རྩ་དམར་བ་དང་། ཚ་ཞིང་སྐྲང་པས་ཉེན་པ་ཡིན་ཏེ། དེའི་མིང་ནི་ལིང་

ཏོག་ཚོས་པ་ཞེས་བྱ་སྟེ། ཡོངས་སུ་སྤང་བར་བྱའོ། །གང་གི་མིག་གིས་མཐོང་བ་ཉམས་ཤིང་མིག་གི་མཐའ་སྔོ་བསངས་སུ་འདུག་པ་དང་། ཡང་ན་དམར་བའམ། ཡང་ན་ཕྱིར་འབུར་བར་འདུག་པའམ། ཡང་ན་ཟབས་སུ་ཞུགས་པའམ། ཡང་ན་
མཆི་མ་འཛག་ཅིང་རྨ་འཁྱིམས་པ་འམ། ཡང་ན་རྙིངས་པ་འམ། ཡང་ན་མཐོན་དམན་དུ་འདུག་སྟེ་མི་མཉམ་པ་དང་། ཡང་ན་དབུས་སུ་ཆད་པ་ལྟར་སྣང་བའམ། མཚན་མ་དེ་དག་གང་ཡང་རུང་བ་དང་ལྡན་པའི་ལིང་ཏོག་ནི་ཡོངས་སུ་སྤང་བར་བྱའོ། །དེ་ལྟར་མིག་གི་
འབྲས་བུ་ནག་པོའི་ནང་དུ་ནད་གསོར་རུང་བ་དང་མི་རུང་བ་རྣམ་པ་ལྔར་བཤད་པ་ཡིན་ནོ། །མིག་མཆུའི་ནད་དང་། མིག་གི་འབྲས་བུ་དཀར་པོ་དང་། མིག་གི་འབྲས་བུ་ནག་པོའི་ནད་དམིགས་ཤེས་པར་བྱ་བའི་ལེའུ་སྟེ་བཅུ་པ་རྫོགས་སོ།། །།
དེ་ནས་མིག་ཟུར་གཉིས་དང་། མིག་གི་འབྲས་བུ་དཀར་པོ་དང་ནག་པོ་རྣམས་ཀྱི་གསོ་བའི་ལེའུ་བཤད་པར་བྱའོ། །དེ་ལ་མུན་པ་ན་ཧ་ཞེས་བྱ་བའི་ནད་ལ་ནི་ཐོག་མར་སྨན་པས་དུགས་བྱས་ལ། དེའི་འོག་ཏུ་གཙགས་བུ་འབྲས་ཀྱི་རྩེ་མོ་འདྲ་བས་ཕུག་ལ། དེ་ནས་རྩེ་མོ་
དཀྱིལ་འཁོར་འདྲ་བའི་མཚོན་གྱིས་བཞར་བར་བྱའོ། །དེའི་འོག་ཏུ་པི་པི་ལིང་དང་། རྒྱམ་ཚྭ་གཉིས་ཀྱི་ཕྱེ་མ་སྦྲང་རྩི་དང་སྦྱར་བས་བསྐུས་ལ། མིག་མཆུའི་ཆོ་ག་བཞིན་དུ་རས་ཀྱིས་བཅིང་བ་ལ་སོགས་པ་བྱའོ། །དེ་ནས་པ་ཏོ་ལའི་ལོ་མ་དང་། སྐྱུ་རུ་རའི་ལོ་མ་བསྐོལ་
བས་བླུགས་སོ། །པར་པ་ནི་ཞེས་བྱ་བའི་ནད་ཀྱི་ཐུར་བུ་ནི་ལྕགས་ཀྱུ་གུག་པོས་ཆ་དང་པོ་ནས་བཟུང་སྟེ། འཕེལ་གཙགས་ཀྱིས་ཕྱེད་དུ་བཅད་དོ། །གཞན་ལྟར་བྱས་ན་ནི་མཆི་མ་རྒྱུ་བའི་སྦུ་གུ་ལ་གནོད་པར་འགྱུར་རོ། །དེ་ནས་སྦྲང་རྩི་དང་རྒྱམ་ཚྭ་སྦྱར་བས་གདབ་བོ། །
གསོ་བ་ལྷག་མ་ནི་མིག་མཛེར་གྱི་ཆོ་ག་བཞིན་དུ་བྱའོ། །མཆི་མ་རྣག་གར་པོར་འཛག་པའི་ནད་ལ་ནི་ཐོག་མར་རྩ་གཏར་ཏེ་ཁྲག་ཕྱུང་ལ། དེའི་འོག་ཏུ་སྨན་གྱི་བྱུག་པས་བྱུག་གོ། །དེའི་གསོ་བ་ནི་མིག་སྨིན་པའི་ཆོ་ག་མ་ནོར་བར་འདིར་བྱའོ། །དེ་བཞིན་དུ་རྒྱམ་ཚ་དང་།

སྒེའུ་གཤེར་དང་། ནག་ཚུར་དང་། ལྕགས་དང་ཟངས་མ་ལེགས་པར་བཏགས་པའི་ཕྱེ་མས་བཏབ་པའམ་ཡང་ན་སྨན་དེ་རྣམས་སྦྲང་རྩི་དང་མིག་སྨན་དུ་སྦྱར་བས་གཏང་ངོ་། །མིག་མཛེར་གྱི་ནད་སྲིན་བུ་ཅན་ལ་ཐོག་མར་བ་ལང་གི་ལྕི་བ་ལ་སོགས་པས་དུགས་བྱས་ལ། མཚོན་
འབྲས་ཀྱི་རྩེ་མོ་འདྲ་བས་དབུག་ལ་མཚོན་རྩེ་དཀྱིལ་འཁོར་འདྲ་བས་ཕྱི་བར་བྱའོ། །འབྲས་བུ་གསུམ་དང་། ནག་ཚུར་དང་། རྒྱམ་ཚ་རྣམས་སྦྲང་རྩི་དང་སྦྱར་བས་གདབ་བོ། །ཉ་ཕྱིས་ལྟ་བུའི་མིག་ནད་ལ་ནི་བད་ཀན་འཛག་པ་ཞེས་བྱ་བའི་གསོ་བ་ཐམས་ཅད་འདིར་བྱའོ། །
བད་ཀན་བསྒོངས་པ་ཞེས་བྱ་བའི་མིག་ནད་དང་། འབྲས་ཀྱི་ཐིག་ལེ་ལྟ་བུ་ཞེས་བྱ་བའི་མིག་ནད་གཉིས་ནི་གཏར་ག་མ་གཏོགས་པ་ལྷག་མ་བད་ཀན་འཛག་པའི་ཆོ་ག་བཞིན་དུ་བྱའོ། །དེ་བཞིན་དུ་གཉིས་པོ་དེ་ལ་ནི་ཚ་བ་གསུམ་དང་། ཀད་ཕ་ལ་དང་འདི་རྣམས་བཏགས་
པའི་ཕྱེ་མ་ཁ་ལུང་གི་ཁུ་བས་བསྒོས་ཏེ། མིག་སྨན་དུ་གཏང་ངོ་། །སྲི་ཤིང་གི་མེ་ཏོག་ཁ་མ་བྱེ་བ་དང་། རྒྱམ་ཚ་དང་། ཐང་ཤིང་དང་། བཅའ་སྒ་དང་། འདི་རྣམས་བཏགས་པའི་ཕྱེ་མ་ཆང་གི་དངས་མ་དང་མིག་སྨན་དུ་སྦྱར་ན་སྐྲང་པ་དང་། གཡའ་བ་སེལ་བར་བྱེད་དོ། །
མིག་ནད་རྩ་འགྱུར་བ་དང་། བརྩེ་བ་དང་རྩ་འདྲ་བས་གཡོགས་པ་དང་། ལིང་ཏོག་དམར་པོ་དང་། དྲ་བའི་དྲ་བ་ལྟ་བུ་སྟེ་བཞི་པོ་དེ་དག་ནི་ཁྲག་འཛག་པའི་ཆོ་ག་བཞིན་དུ་བྱའོ། །ཁྱད་པར་དུ་རྩ་འགྱུར་བའི་མིག་ནད་ལ་ནི་མར་དང་སྦྲང་རྩི་སྦྱར་བས་བསྐུའོ། །རྩ་བརྩེ་བ་ཞེས་
བྱ་བའི་མིག་ནད་ལ་ནི་སྐྱེར་ཁཎྜ་ཞིབ་ཏུ་བདར་ལ་སྦྲང་རྩི་དང་སྦྱར་བས་མིག་ལ་བསྐུའོ། །ལིང་ཏོག་དམར་པོ་ལ་ནི་སྦྲང་རྩི་དང་། ཁ་ར་དང་ཞོ་ག་ཆུ་དང་སྦྱར་བ་བླུགས་ན་ཕན་ནོ། །དེ་བཞིན་དུ་ལིང་ཏོག་དམར་པོ་ལ་ནི། ཤེལ་དང་། དུང་དང་། ཤིང་མངར་དང་། གུར་ཀུམ་དང་། འདི་
རྣམས་སྦྲང་རྩི་དང་སྦྱར་བའི་མིག་སྨན་གཏང་ངོ་། །ཡང་ན་ལིང་ཏོག་དམར་པོ་ལ་ནི། དུང་དང་། སྦྲང་རྩི་སྦྱར་བའམ། ཡང་ན་ཁ་ར་དང་རྒྱ་མཚོའི་ལྦུ་བ་སྦྱར་བ་བླུགས་ན་ཕན་ནོ། །གོང་དུ་མིག་མཛེར་གྱི་ནད་རྣམ་པ་ལྔ་བཤད་པ་ལས། དུད་ཀ་ལྟ་བུ་དང་། དམར་བ་དང་། ཞོ་འདྲ་བའི་

ནད་གང་ཡིན་པ་དེ་དག་ནི་ལིང་ཏོག་གསོ་བའི་ཆོ་ག་བཞིན་དུ་བྱའོ། །མིག་མཛེར་ལྔ་པོ་གང་བྱུང་ཡང་རུང་སྟེ། ཐོག་མར་ནད་པ་གན་རྐྱལ་དུ་བཞག་ལ་དུགས་བྱ་སྟེ། ཁ་ལུང་དང་། རྒྱམ་ཚྭ་སྦྱར་བས་མིག་བསྐུས་ལ་ལག་པས་མཉེ་བར་བྱའོ། །དེ་ལྟར་མིག་
མཛེར་ཤས་ཆེར་བྱུང་སྟེ། རང་གི་གནས་ནས་བསྐྱོད་པ་དང་། ནད་གཡོག་གིས་འདིར་ཁྱད་པར་དུ་མགོ་བོ་མི་འགུལ་བར་དམ་དུ་བཟུང་ལ་མིག་མཛེར་གང་ཕྱོགས་ན་ཆེར་ཡོད་པ་བརྟགས་ཏེ། མཐོང་བའི་མིག་བསྲུང་ཞིང་གང་དུ་ཆེར་སྐྱེས་པ་དེ་དང་དེར་མཚོན་ལྕགས་ཀྱུ་རབ་ཏུ་གུག་པ་འམ།
མཚོན་མུ་ཙ་ཏྱ་ཞེས་བྱ་བ་དང་། མཚོན་སེའུ་ཙི་ཙི་ཏྲ་ཞེས་བྱ་བ་གང་ཡང་རུང་བ་ལེགས་པར་བཟུང་ནས་རྨ་ཆེར་མི་གདོད་ཅིང་མཚོན་རྩེ་དཀྱིལ་འཁོར་ལྟ་བུས་བཅད་དེ། དེ་ཡང་སྣ་གོང་གཡས་ཀྱི་མིག་ཕུགས་ཀྱི་འགྲམ་ནས་ཆ་བཞིར་བགོས་ཏེ། ཆ་གཅིག་ལུས་པ་ཙམ་ནས་བཅད་
དེ་སྣ་གོང་ཕྱོགས་ཀྱི་མིག་ཟུར་ནས་མཆི་མ་བྱུང་བའི་སྦུ་བུ་ཡོད་དེ། དེ་བསྲུང་བར་བྱའོ། །གལ་ཏེ་དེར་མཚོན་གྱིས་ཕོག་ན་ནི་རྟག་ཏུ་མཆི་མ་འཛག་པའི་སྐྱོན་དུ་འགྱུར་རོ། །གལ་ཏེ་མིག་གི་འགྲམ་ཕྱོགས་སུ་མིག་མཛེར་ཡོད་ན་ནི་ནད་པ་སྣ་གོང་ཕྱོགས་སུ་བལྟར་བཅུག་ནས་ཡང་ཆ་
བཞིར་བགོས་ཏེ། ཆ་གཅིག་ལུས་པ་ཙམ་ནས་གཅད་པར་བྱ་སྟེ། དེར་ཡང་མཆི་མ་འཛག་པ་བསྲུང་བར་བྱའོ། །དེ་ལྟར་ན་མཚོན་གྱིས་ལེགས་པར་བཅད་པའི་འོག་ཏུ་ཚ་བ་གསུམ་དང་། རྒྱམ་ཚྭ་དང་། སྦྲང་རྩི་དང་སྦྱར་བས་བསྐུའོ། །དེའི་འོག་ཏུ་ཞུན་མར་དྲོན་
པོས་བླུགས་སོ། །དེ་ནས་ཞུན་མར་སྦྲང་རྩི་དང་སྦྱར་བས་བསྐུའོ། །དེའི་འོག་ཏུ་རས་ཀྱིས་གོང་མ་ལྟར་ཆིངས་ཤིག །དེ་ནས་ཞག་གསུམ་པ་ལ་རས་བཀྲོལ་ནས་ཀ་རཉྫ་འོ་མ་དང་བསྒྲུབས་པ་བསྐོལ་ཏེ་བླུགས་པར་བྱའོ། །ཡང་ན་སེར་པོ་རྣམ་གཉིས་དང་། པ་ཏོ་ལ་དང་།
ཤིང་མངར་དང་། རྒྱ་སྐྱེགས་ཤིང་དང་འདི་རྣམས་བསྐོལ་བའི་ཁུ་བའི་ནང་དུ་ཀ་རཉྫའི་མེ་ཏོག་ཁ་མ་བྱེ་བ་དང་། སྦྲང་རྩི་བཏབ་པས་བླུགས་པར་བྱའོ། །དེ་ནས་ཞག་ལྔ་འམ་བདུན་ནམ་མིག་གི་ནད་རུང་བ་འདྲ་ན་རས་དགྲོལ་བར་བྱའོ། །དེ་མཚོན་གྱིས་ལེགས་པར་

བཅད་ན་ནི་ནད་མེད་ཅིང་བདེ་བར་འགྱུར་རོ། །བཅད་མ་ལེགས་ན་ནི་ནད་འབྱུང་བར་འགྱུར་རོ། །དེ་ལ་ནི་སྨན་གྱིས་བླུགས་པ་དང་། བསྐུ་བ་དང་། བཞར་བ་དང་མིག་བརྟ་བའི་ཆོ་ག་རྣམས་ལེགས་པར་གྱིས་ཤིག། ཁ་ར་དཀར་པོ་དང་། ལྡོང་རོས་དང་། ཨེ་ལ་བ་ལུ་ཀ་དང་།
ཚ་མཆོག་རྒྱམ་ཚྭ་དང་། བཅའ་སྒ་དང་། དེ་རྣམས་ཞོ་རེ་རེ་དང་། སྐྱེར་ཁཎྜ་སྲང་ཕྱེད་དང་། འདི་རྣམས་སྦྲང་རྩི་དང་སྦྱར་བ་མིག་ཏུ་བསྐུས་ན། བད་ཀན་ལས་གྱུར་པའི་རབ་རིབ་དང་། མིག་ཆུ་སེར་གྱིས་གང་བ་དང་། ལིང་ཏོག་དང་། མིག་མཛེར་བཅས་པའི་ལྷག་མ་
ལུས་པ་ལ་ཕན་ནོ། །འབྲས་བུ་གསུམ་གྱི་ཤུན་པ་རེ་རེ་ནས་ཆུ་ཐགས་སུ་བྱས་ཏེ། ལྡེ་གུ་འདྲ་བར་གྱུར་པ་དང་། རྫེའུ་ཁ་སྦྱར་གྱིས་བསྲེགས་པ་རང་གི་ཁུ་བ་དང་སྦྲུས་ཏེ་སྐམ། དེ་ནས་བཏགས་ཏེ་དེ་ལྟར་ཡང་དང་ཡང་བྱས་ན་སྣག་ཚ་འདྲ་བར་གྱུར་པ་དང་། རྒྱམ་ཚྭ་ཉིས་འགྱུར་
དང་སོ་སོར་བསྲེས་ལ་ཡང་བཏགས་ཏེ། ཕྱེ་མ་གསུམ་པོ་དེ་དག་ནི་བཞར་ཞིང་ཕྱི་བའི་འོག་ཏུ་བསྐུ་བའི་སྨན་གྱི་མཆོག་དྲང་སྲོང་ཆེན་པོ་མུ་ཁྱུད་ཀྱིས་བཤད་དོ། །རྩའི་དྲ་བས་གཡོགས་པ་ལྟ་བུ་ཞེས་བྱ་བའི་ནད་རྩ་རྣམས་ཤིན་ཏུ་སྲ་བར་འདུག་པ་ཡང་སྨན་གོང་མས་བསྐུའོ། །
དེས་ཞིར་མ་འདོད་ན་ནི་མིག་མཛེར་དང་འབྲུམ་བུའི་ཆོ་ག་བཞིན་དུ་གསོ་བར་བྱའོ། །ལིང་ཏོག་ཐམས་ཅད་ལ་ནི་ཐོག་མར་ནད་གཞི་གང་ཡིན་པ་བརྟགས་ཏེ། སྣུམ་པའམ་རྩུབ་པ་གང་དང་སྦྱོར་བ་དང་། འབྲས་བུ་གསུམ་དང་སྦྱར་བ་ཡིན་ནོ། །དེ་བཞིན་དུ་ཏིག་ཏ་ཆེན་པོའི་
སྨན་མར་ཡང་བླུད་དེ་གཏར་ག་བྱའོ། །བཀྲུ་སྨན་དང་བླུགས་པ་ལ་སོགས་པ་ཡང་འདོད་པ་ཡིན་ནོ། །ལིང་ཏོག་ཟད་བྱེད་ལ་ནི་དེ་བཞིན་དུ་ཏིག་ཏ་ཆེན་པོའི་སྨན་མར་ཡང་བླུད་དེ་གཏར་ག་བྱའོ། །བཀྲུ་སྨན་དང་བླུགས་པ་ལ་སོགས་པ་ཡང་འདོད་པ་ཡིན་ན་དུར་བྱིད་དང་
ལན་གསུམ་བསྐོལ་བའི་ཁུ་བ་མར་དང་ཡང་བསྐོལ་ཏེ། མར་ལུས་པ་ལས་རན་པར་བླུད་དོ། །དེའི་འོག་ཏུ་སྲིན་བུ་པད་པའམ། གཏར་གས་ཁྲག་དབྱུང་ངོ་། །ཨུཏྤ་ལ་དང་། ར་མཉེ་བ་རྣམ་པ་གཉིས་དང་། རྒུན་འབྲུ་དང་། ཤིང་མངར་དང་། བི་ད་རི་དང་། འདི་

རྣམས་ཆུ་དང་བསྐོལ་བའི་ཁུ་བ་འམ། ཡང་ན་རའི་འོ་མ་དང་བསྐོལ་ཏེ། འོ་མ་ལུས་པ་གང་ཡང་རུང་བའི་ནང་དུ་ཁ་ར་དཀར་པོ་བཏབ་སྟེ་མིག་ཏུ་བླུགས་ན་ལིང་ཏོག་ཟད་བྱེད་སེལ་ཏོ། །གལ་ཏེ་མིག་དམར་ཞིང་མཆི་མ་འཛག་སྟེ་ནད་དང་བཅས་པ་ལ་ནི་དྲང་སྲོང་མུ་ཁྱུད་
ཀྱི་མིག་སྨན་གྱིས་ཞི་བར་བྱའོ། །སྲིང་ཤིང་གི་མེ་ཏོག་དང་། རྒྱ་སྐྱེགས་དང་། བཙག་ཡུག་སྣམ་དང་། ཙནྡན་དཀར་པོ་རྣམས་རི་ལུར་བྱས་ཏེ་བསྐུས་ན་ཁྲག་དང་། མཁྲིས་པ་དག་པར་བྱེད་ཅིང་ཟད་བྱེད་ཀྱི་ལིང་ཏོག་འཇོམས་པར་འགྱུར་རོ། །ཡང་གླང་པོ་ཆེ་དང་། ཕག་དང་།
རྔ་མོ་དང་། བ་ལང་དང་། རྟ་དང་། ར་དང་། བོང་བུ་དང་། འདི་རྣམས་ཀྱི་སོ་དང་། དུང་དང་། མུ་ཏིག་དང་། རྒྱ་མཚོའི་ལྦུ་བ་དང་། དེ་རྣམས་ཆ་སྙོམས་ཏེ་སྨན་སྣ་གཅིག་གི་བཞི་ཆའི་ན་ལེ་ཤམ་རྣམས་ལྷན་ཅིག་རི་ལུར་བྱས་ཏེ་བསྐུས་ན། ལིང་ཏོག་ཟད་བྱེད་ཀྱིས་ཁྱབ་པར་གྱུར་པ་ལས་
ཟློག་པར་བྱེད་དོ། །ཡང་ན་ཏ་མ་ལའི་ལོ་མ་དང་། བ་ལང་གི་སོ་དང་། དུང་དང་། རྒྱ་མཚོའི་ལྦུ་བ་དང་། བོང་བུའི་རུས་པ་དང་། ཟངས་མ་དེ་རྣམས་བ་གཅིན་དང་རི་ལུར་བྱས་ཏེ། མིག་ལ་བསྐུས་ན་ལིང་ཏོག་ཐམས་ཅད་སེལ་ཏོ། །ཡང་ན་མརྒད་ལ་སོགས་པ་རིན་པོ་ཆེ་དང་།
གླང་པོ་ཆེ་ལ་སོགས་པའི་སོ་དང་། ཕྱུགས་ཀྱི་སོ་རྣམས་དང་། གསེར་ལ་སོགས་པའི་འབྱུང་ཁུངས་ཀྱི་ནོར་བུ་དང་། ཚ་བ་གསུམ་དང་། སུག་སྨེལ་དང་། ཀ་རཉྫའི་ས་བོན་དང་། སྒོག་སྐྱ་དང་། གང་ཡང་རྨ་འཚོ་བའི་སྨན་གྱི་རིགས་དང་འདི་རྣམས་རི་ལུར་བྱས་ཏེ་མིག་ལ་བསྐུས་
ན་ལིང་ཏོག་རྨ་དང་བཅས་པ་དང་། རྨ་ཟབ་པ་དང་། མིག་སྤྲིན་གྱི་སྟེང་གི་ལིང་ཏོག་ཐམས་ཅད་འཇོམས་པར་བྱེད་དོ། །ལིང་ཏོག་པགས་པ་ཕུག་ནས་ཟབས་སུ་སོང་ཞིང་ནད་དང་བཅས་པ་ལ་སྣུམ་གྱི་བཏུང་བ་དང་། སྣར་བླུགས་པ་དང་། ཟས་བཅུད་ཅན་ཟོས་ཀྱང་བརྟ་སྟེ་འཚོ་
བར་འགྱུར་རོ། །ནད་མེད་པ་ལ་སྨན་གྱི་ཕུར་མ་བསྲེག་ཅིང་བཙོས་པའི་ཁུ་བའི་ཐིགས་པ་མིག་ཏུ་བླུགས་ཤིང་ཚིམ་པར་བྱས་ན་ཕན་ནོ། །ལིང་ཏོག་ཉི་ཚེ་ལ་ནི་སྐྱེར་པ་དང་། ཤིང་མངར་དང་། ཐལ་ཏྲེས་དང་། སེང་ཕྲོམ་ཤ་ར་བ་དང་། དེ་རྣམས་བསྐོལ་བའི་ཁུ་བའམ་ཡང་ན་སེང་

ཕྲོམ་བཏགས་པའི་ཕྱེ་མ་ཆུ་དྲོན་གྱི་ནང་དུ་སྨྱུགས་ཤིང་དེའི་ཐིགས་པ་གང་ཡང་རུང་བ་བླུགས་ན་ཕན་ནོ། །ཡང་ན་བྲི་ཧ་ཏིའི་རྩ་བ་དང་། ཤིང་མངར་དང་། ཟངས་མའི་ཕྱེ་མ་དང་། རྒྱམ་ཚྭ་དང་། དོང་གྲ་དང་། སྐྱུ་རུ་རའི་འབྲས་བུ་བསྐོལ་བ་དེ་རྣམས་ཆུ་ཐགས་སུ་བྱས་བའི་ལྡེ་གུས་
ཟངས་མའི་སྣོད་ལ་བསྐུས་ཏེ། ནས་དང་། སྐྱུ་རུ་རའི་ལོ་མ་དང་། མར་གསུམ་བསྲེས་པའི་དུད་པས་ལན་མང་དུ་བདུགས་པའི་ཟངས་མའི་སྣོད་ཀྱི་སྨན་དང་བཅས་པའི་ནང་དུ་ཆུ་དང་སྦྲང་རྩི་བཅུག་ལ་མཉེས་ཏེ་རི་ལུར་བྱས་པ་དེ་ནི་མཐོན་ཁ་ཆེན་པོ་ལྟ་བུ་ཞེས་བྱ་སྟེ། ལིང་ཏོག་ཉི་ཚེ་
སེལ་བར་བྱེད་པའི་མཆོག་ཡིན་ནོ། །ཡང་ལིང་ཏོག་མ་འདྲེས་པར་བརྟན་ཞིང་མཐུག་པར་སྣང་བ་དེ་ལ་ནི་ལན་མང་དུ་ཁྲག་གཏར་ཞིང་མགོ་དང་ལུས་ཀྱི་ཁྲུས་དང་། སྨན་གྱི་ཕུར་མ་བཙོས་པའི་ཁུ་བའི་ཐིགས་པ་བླུགས་པ་ལན་མང་དུ་བྱའོ། །གཞན་ཡང་ན་ལེ་ཤམ་དང་། པི་པི་ལིང་དང་།
ཤྲི་ཤའི་འབྲས་བུ་དང་། རྒྱམ་ཚྭ་དང་དེ་རྣམས་ཀྱི་ཕྱེ་མ་འམ་ཡང་ན་འབྲས་བུ་གསུམ་བསྐོལ་བའི་ནང་དུ་རྒྱམ་ཚ་བཅུག་པས་བསྒོས་ན་གནས་ནས་སྐྱོད་པར་བྱེད་དོ། །ཡང་ན་དུང་དང་། རྒྱ་ཤུག་ཚི་གུ་དང་། ཀ་ཏ་ཀ་དང་། རྒུན་འབྲུ་དང་། ཤིང་མངར་དང་། སྦྲང་རྩི་
དང་། དེ་རྣམས་སྦྱར་བ་བསྐུ་བའམ། ཡང་ན་སོ་དང་། རྒྱ་མཚོའི་ལྦུ་བ་དང་། ཤྲི་ཤའི་མེ་ཏོག་དེ་དག་ཆང་དང་སྦྱར་ཏེ་བསྐུས་ན་ཡང་ལིང་ཏོག་ཉི་ཚེ་གནས་ནས་སྐྱོད་པར་བྱེད་དོ། །ཡང་ན་སྐྱུ་རུ་ར་དང་། ཕ་ནིད་ཛ་ཀའི་ཁུ་བའི་ནང་དུ་བ་ལང་གི་ལྕི་བ་ཐལ་བར་བྱས་པ་ནུབ་གཅིག་
སྦངས་ཏེ་སྐམས་ལ་བཏགས་པའི་ཕྱེ་མས་བསྐུས་ན་ཡང་ལིང་ཏོག་ཉི་ཚེ་གནས་ནས་སྐྱོད་པར་བྱེད་དོ། །ཡང་ན་མོན་སྲན་སྡེའུ་ཕུབ་མ་དང་བྲལ་བ་དང་། དུང་དང་ལྷན་ཅིག་བཏགས་ཏེ་སྦྲང་རྩི་དང་སྦྱར་བས་བསྐུས་ན་ཡང་ཕན་ནོ། །ཡང་ན་མ་དུ་ཀའི་སྙིང་པོ་སྦྲང་རྩི་དང་
སྦྱར་བ་འམ། ཡང་ན་བ་རུ་རའི་ཚི་གུ་སྦྲང་རྩི་དང་སྦྱར་བས་བསྐུས་ན་ལིང་ཏོག་ཉི་ཚེ་གནས་ནས་སྐྱོད་པར་བྱེད་དོ། །ཡང་ན་བ་ལང་དང་། བོང་བུ་དང་། རྟ་དང་། རྔ་མོ་དང་། དེ་རྣམས་ཀྱི་སོ་དང་། དུང་དང་། རྒྱ་མཚོའི་ལྦུ་བ་དང་། དེ་རྣམས་ཨརྫུ་ན་བསྐོལ་བའི་ཁུ་བ་དང་། རི་ལུར་

བྱས་པས་མིག་ལ་བསྐུས་ན་ལིང་ཏོག་གནས་ནས་སྐྱོད་དེ་འཇིག་པར་བྱེད་དོ། །ལིང་ཏོག་མཐོན་པོར་འདུག་པའམ། མཐུག་པ་འམ། ཟུག་རྔུ་འདྲ་བ་འམ། དེ་གསུམ་གང་ལྟར་འདུག་ཀྱང་རྟ་རྔ་ལ་སོགས་པས་བཞར་བར་བྱའོ། །ལིང་ཏོག་རྩས་གཡོགས་
པ་ཞེས་བྱ་བ་དེ་ནི་གལ་ཏེ་མཐོང་བ་མ་ཉམས་ན་མིག་རྨ་གསོ་བའི་ཆོ་ག་ལྟར་གྱིས་ཤིག །ཡང་ན་པྲ་པུཎྜ་རཱི་ཀ་དང་། ཤིང་མངར་དང་། བུང་ཚང་རྡོ་དང་། བྲི་ཧ་ཏི་དང་། ཨ་ཀ་རུ་དང་། ལིག་བུ་མིག་དང་དེ་རྣམས་རའི་འོ་མ་དང་བཏགས་པའི་ལྡེ་གུ་སྦྱར་ལ་ཐོག་མ་ནས་མར་གྱི་
དུད་པས་བདུག །དེའི་འོག་ཏུ་སྐྱུ་རུ་རའི་དུད་པས་ཡང་བདུགས་ལ། དེ་ནས་རི་ལུར་བྱས་ཏེ། མིག་ཏུ་བསྐུས་ན་ཕན་པར་བྱེད་པའི་མཆོག་ཡིན་ནོ། །སྦྱོར་བ་དེ་དག་གིས་ཀྱང་མ་ཞི་ན་མིག་མཆུའི་སྐབས་སུ་བཤད་བའི་མཚོན་གྱི་ལས་དང་། རའི་རིལ་མ་ལྟ་བུའི་ལིང་ཏོག་གི་ཆོ་ག་
བྱའོ། །རའི་རིལ་མ་ལྟ་བུའི་ལིང་ཏོག་དང་། དེ་བཞིན་དུ་གསོར་མི་རུང་བའི་ལིང་ཏོག་གཞན་དག་གལ་ཏེ་ཟུག་གཟེར་དང་བཅས་པ་ཡིན་ན་ནི་དེ་ཞི་བར་བྱ་བའི་ཕྱིར་སྣུམ་གྱི་བཏུང་བ་དང་། ཁྲག་དབྱུང་བ་ལ་སོགས་པས་ཞི་བར་བྱའོ། །དེ་བཞིན་དུ་ལིང་ཏོག་ཕྱིར་འབུར་
ཞིང་མཐོན་པོར་སྣང་བ་ཡང་དབྲི་བར་བྱ་ཞིང་འཇོམས་པའི་སྨན་བྱའོ། །རྒྱ་སྟར་དང་། གོ་བྱེ་དང་། ཤིང་ཏ་ལ་དང་། ཀ་རི་ར་དང་། སྨྱིག་མ་དང་དེ་རྣམས་ཀྱི་རུས་པ་བསྲེགས་པའི་ཐལ་བ་བཙགས་པའི་ཐལ་ཁུའི་ནང་དུ་རྔ་མོའི་རུས་པ་བཏགས་པའི་ཕྱེ་མ་བཏབ་སྟེ་བསྐོལ་ལ།
དེ་བཞིན་དུ་ཡང་དང་ཡང་དུ་བྱས་ལ་མིག་ཏུ་བསྐུས་ན། ལིང་ཏོག་གསོར་མི་རུང་ཞིང་མདོག་གྱུར་པ་ཡང་འཇོམས་སོ། །སྦྱོར་བ་དེ་དག་ནི་ལིང་ཏོག་གསོར་མི་རུང་བ་ཡང་འཇོམས་པར་བྱེད་ན་གསོར་རུང་བ་ལྟ་སྨོས་ཀྱང་ཅི་དགོས་ཏེ་ཡོན་ཏན་དཔག་ཏུ་མེད་དོ། །རའི་རིལ་མ་ལྟ་བུ་
ཞེས་བྱ་བའི་ལིང་ཏོག་གསོར་མི་རུང་བ་དེ་ནི་ངོས་གཉིས་ནས་གཙགས་བུ་ཁབ་རྩེ་འདྲ་བས་དྲལ་ཏེ་མཐེ་བོང་གཉིས་ཀྱིས་བཙིར་ལ་ཆུ་སེར་གཟག་གོ། །དེའི་རྨའི་ནང་དུ་བ་ལང་གི་ཤའི་ཕྱེ་མ་དང་ཚིལ་རློན་པས་རྨའི་ནང་དུ་བཅུག་སྟེ། དེའི་འོག་ཏུ་རས་ཀྱིས་དཀྲིས་ཏེ་བཅིང་

བ་དང་། དགྲོལ་བར་ཡང་དང་ཡང་བྱའོ། །དེ་ནས་ཞག་བདུན་ལོན་ཏེ་རྨ་རུབ་ཅིང་མིག་གི་འབྲས་བུ་ནག་པོ་མི་མཉམ་པ་མེད་ཅིང་བརྟན་པར་གྱུར་པ་དང་། སྣུམ་དང་བཅས་པའི་མིག་སྨན་བཏང་ཞིང་མར་དང་འོ་མར་སྦྱར་བའི་སྣ་སྨན་ཡང་བླུགས་སོ། །དེ་ལྟར་ཆོ་ག་བྱས་ཀྱང་ཆུས་
ཡང་ཁེངས་པ་ལྟ་ན་དབུག་པ་དང་། དྲལ་བ་ལ་སོགས་པའི་ཆོ་ག་ཅི་རིགས་པར་བྱ་སྟེ། ཅི་ནས་ཀྱང་གཅད་དྲགས་ཏེ། མཐོང་བའི་མིག་ནད་དུ་མ་ཞུགས་པའི་ཐབས་བྱའོ། །དེ་ལྟར་ལིང་ཏོག་ཐམས་ཅད་སོ་སོའི་ནད་དང་རྗེས་སུ་མཐུན་པའི་སྨན་དང་སྦྱར་བའི་མར་གྱིས་སྣར་བླུགས་
པ་ལ་སོགས་པ་རྟག་ཏུ་བསྟེན་པར་བྱ་སྟེ། དེ་བཞིན་དུ་མཐོང་བའི་མིག་ཉམས་པར་མི་འགྱུར་ཞིང་ནད་ཀྱི་སྟོབས་མི་རྙེད་པར་བྱ་བའི་ཆེད་དུ། དུས་རྟག་ཏུ་མིག་སྨན་རྣོན་པོ་བསྟེན་པར་བྱའོ། །མིག་གི་འབྲས་བུ་དཀར་ནག་དང་། མིག་གི་གྲ་མཚམས་ཀྱི་ནད་གསོ་བའི་ལེའུ་
སྟེ་བཅུ་གཅིག་པ་རྫོགས་སོ།། །།དེ་ནས་མིག་རབ་རིབ་ཏུ་གྱུར་ཏེ་མི་མཐོང་བའི་ནད་དམིགས་བརྟགས་པའི་ལེའུ་བཤད་པར་བྱའོ། །དེ་ལ་ནད་གཞི་གང་ཡང་རུང་བ་རྩའི་ནང་དུ་ཞུགས་ཏེ། རབ་རིབ་ཀྱི་རིམ་པ་དེ་ལྟར་དང་པོས་ཁེབས་པའི་རྟགས་ནི་རྒྱུ་མེད་
པར་དངོས་པོ་རྣམས་གསལ་བར་མི་མཐོང་བ་དང་། ཡང་ན་དངོས་པོ་མེད་པ་གསལ་བར་མཐོང་བ་ཡིན་ནོ། །མཐོང་བའི་མིག་ལ་རབ་རིབ་རིམ་པ་གཉིས་ཀྱིས་ཁེབས་པའི་རྟགས་ནི་རྒྱུ་མེད་པར་དངོས་པོ་རྣམས་གསལ་བར་མི་མཐོང་བ་དང་། དངོས་པོ་མི་སྣང་བ་ཐམས་ཅད་
མཐོང་ལ། དྲུང་ན་འདུག་པའི་དངོས་པོ་གསལ་བ་ནི་རབ་ཏུ་བསྒྲིམས་ཏེ་བརྟགས་ན་གཟོད་མཐོང་བ་དང་། ཐག་རིང་བ་དང་། ཕྲ་བའི་དངོས་པོ་མི་མཐོང་བ་དང་། རིང་བ་ནི་ཉེ་བར་མཐོང་ལ་ཉེ་བ་ནི་རིང་བར་མཐོང་བ་ཡིན་ནོ། །དེ་བཞིན་དུ་ནང་གི་གནང་ཟླུམ་པོ་ལ་སོགས་པ་ཇི་ལྟ་བ་བཞིན་
དུ་ཕྱིའི་གཟུགས་ཀྱང་དེ་བཞིན་དུ་མཐོང་བ་དང་། ཉེས་པ་དེ་མཐོང་བའི་མིག་གི་འབྲས་བུ་བརྟེན་པ་ཡིན་ན་ནི། དངོས་པོ་གཅིག་གཉིས་སུ་མཐོང་བ་དང་། མང་པོ་གཅིག་ཏུ་མཐོང་བ་དང་། ཉེས་པ་དེ་ལྟ་བུ་མིག་གི་ནང་དུ་ཞུགས་ན་ནི་དངོས་པོ་ཆེ་བ་ནི་ཆུང་བར་མཐོང་ལ། ཆུང་བ་ནི་

ཆེ་བར་མཐོང་བ་ཡིན་ནོ། །མཐོང་བའི་མིག་གི་འོག་ཕྱོགས་སུ་ཉེས་པ་བརྟེན་པ་ཡིན་ན་ནི་དྲུང་ན་འདུག་པ་མི་མཐོང་བ་ཡིན་ནོ། །ཉེས་པ་སྟེང་ཕྱོགས་སུ་བརྟེན་པ་ཡིན་ན་ནི་ཐག་རིང་བའི་དངོས་པོ་མཐོང་བ་ཡིན་ནོ། །མཐོང་བའི་མིག་གི་གཡས་གཡོན་གཉིས་ཀ་ལ་ཉེས་པ་བརྟེན་
པ་ཡིན་ན་ནི་གཡས་གཡོན་གྱི་དངོས་པོ་རྣམས་མི་མཐོང་བ་ཡིན་ནོ། །མཐོང་མིག་ལ་སྤྲིས་གཡོགས་པའི་རིམ་པ་གསུམ་དུ་གཡོགས་པ་ལ་ནི། སྟེང་འོག་གཉིས་སུ་མི་མཐོང་ཞིང་མཐོང་བ་ཡང་རས་སྲབ་མོས་མིག་བཀབ་པ་ཙམ་དུ་མཐོང་བ་ཡིན་ནོ། །ཇི་ལྟར་སྐྱི་མདོག་འགྱུར་
བ་བཞིན་དུ་མཐོང་བ་དེ་ཡང་དེ་ལྟར་འགེབས་པར་བྱེད་དོ། །གནས་སྐབས་རིམ་པ་དེ་དག་ཏུ་གསོ་བ་མ་བྱས་ན་ནི། གནས་སྐབས་བཞི་པ་ལ་ཉེས་པས་མཐོང་བའི་མིག་ཁྱབ་པར་འགེབས་ཏེ། གཏན་དུ་མི་མཐོང་བ་ཡིན་ཏེ། དེ་དག་ནི་རབ་རིབ་ཀྱི་མཚན་མ་སྤྱིར་བསྟན་པ་ཡིན་
ནོ། །དེ་ལ་རླུང་ལས་གྱུར་པའི་རབ་རིབ་ཀྱི་མཚན་མ་ནི་དངོས་པོ་རྣམས་འགྱུར་བར་མཐོང་བ་དང་། དངོས་པོ་