Luận tạng Tây Tạng (Tengyur) — Tập 196

ོས་པ་ཡིན། །ཞེས་སྨོས་ཏེ། དགོས་པ་ནི་སྨྲ་བ་པོའི་འདོད་པའི་དོན་ཡིན་ནོ། །དེ་འགྲུབ་པ་ནི་དགོས་པ་འགྲུབ་པ་ཡིན་ཏེ། གལ་ཏེ་དགོས་པ་འགྲུབ་པར་བྱ་ན་ཐ་ན་རི་བོང་གི་རྭ་དགག་པར་བྱ་ན་ཡུལ་ཐམས་ཅད་དུ་མེད་པར་

ཤེས་དགོས་ལ། གནས་སྐབས་ཀྱང་མེད་པའི་ངོ་བོར་ཤེས་པར་འདོད་པ་ཤེས་དགོས་ཏེ། ཡུལ་དང་དུས་ཁྱད་པར་དུ་བྱེད་པ་དང་། མ་ཡིན་པར་དགག་པ་ལ་ཚང་བར་དགོས་པ་སྨོས་ཅི་དགོས་ཏེ། ཐམས་ཅད་དུ་ལྟོས་དགོས་སོ་ཞེས་བྱ་བའི་དོན་ཏོ། །ད་ནི་ཡུལ་དང་དུས་དང་གནས་སྐབས་
གསུམ་དཔེ་དེ་དག་བྱེ་བྲག་མང་བས་གང་གི་དབང་དུ་བྱས་པ་མི་རྟོགས་པའི་ཕྱིར། ཡུལ་ནི་དགག་བྱའི་གཞི་ཡིན་ཏེ། །དུས་གསུམ་ད་ལྟའི་དབང་གིས་ཡིན། །གནས་སྐབས་གོ་བར་བྱ་བའི་དབང་། །ཞེས་བྱ་བ་སྨོས་སོ། །དེ་ལ་དགག་པའི་ཡུལ་ཡིན་པར་འདྲ་ཡང་ཐ་སྙད་ཀྱི་ཡུལ་གྱི་སྒོ་
ནས་དབྱེ་བ་མང་དུ་ཡོད་པས་འདིར་ནི་དགག་པ་ཉིད་ཀྱི་ཡུལ་གཟུང་ངོ་། །དེ་བསྟན་པའི་ཕྱིར། དགག་བྱའི་གཞི་ཞེས་སྨོས་ཏེ། འདི་ལྟར་བུམ་པ་མེད་ཅེས་དགག་པ་ནི་དགག་པར་བྱ་བ་བུམ་པ་ཡིན་ཏེ། བུམ་པ་མེད་པ་གང་ལ་ཡོད་པ་དེ་བཞི་ཡིན་ནོ། །བྲམ་ཟེ་ལ་རྒྱལ་རིགས་དགག་ན་
རྒྱལ་རིགས་མ་ཡིན་པ་ཡོད་ན་བྲམ་ཟེ་ཡིན་ནོ། །འདི་ནི་མེད་པའི་ཡུལ་ཡིན་ཏེ། མེད་པའི་ཐ་སྙད་ཀྱི་ཡུལ་ནི་མ་ཡིན་པ་ཡིན་ནོ་ཞེས་བྱ་བའི་ཐ་ཚིག་གོ། །དུས་གསུམ་ད་ལྟར་གྱི་དབང་གིས་ཡིན་ཏེ། དེ་ཡང་འདི་ལྟར་འདས་པའི་དུས་ཅན་རྣམས་རྒྱུ་ཡང་སྤྱད་ཟིན་ལ་འབྲས་བུ་ཡང་སྤྱད་ཟིན་
པ་ཡིན་ཏེ། དེའི་དབང་གིས་དབྱེར་ནི་མི་རུང་སྟེ། སྔར་ད་ལྟར་གྱི་ངོ་བོར་གནས་ལ་ཕྱིས་ནི་མེད་པ་ཡིན་པའི་ཕྱིར་དེས་གཞག་པར་མི་ནུས་སོ། །མ་འོངས་པས་ཀྱང་མི་ནུས་ཏེ། རྒྱུ་འབྲས་གཉིས་ཀ་མ་སྤྱད་པ་ཡིན་པས་ཕྱིས་ཙམ་ན་ནི་ད་ལྟར་གྱི་ངོ་བོར་གྱུར་པ་སྔར་ནི་མེད་དོ། །དེའི་
ཕྱིར་དེས་ཀྱང་མི་ནུས་སོ། །ད་ལྟར་གྱི་དུས་ཅན་རྣམས་རྒྱུ་ནི་སྤྱད་ཟིན་ལ། འབྲས་བུ་ནི་མ་སྤྱད་དེ། ད་ལྟར་བའི་ངོ་བོར་ཡོད་ལ། དུས་དེ་ཉིད་དེ་ལྟར་དུ་བརྗོད་དུ་ཡོད་དོ། །དེས་གཞག་ན་ནི་འདས་པ་དང་མ་འོངས་པ་ཡང་གདགས་སུ་རུང་ངོ་། །དེ་ལ་འདི་སྐད་དུ་ད་ལྟ་ལ་ལྟོས་ནས་འདས་
པ་གཞག་པ་ན་འདས་པ་ལས་ཀྱང་ད་ལྟ་ལྟོས་སུ་རུང་ངོ་ཞེ་ན། འདི་ལྟ་སྟེ་ཡོད་པ་དང་མེད་པ་ཡང་དང་པོར་ཡོད་པ་ལ་ལྟོས་ནས་མེད་པ་འགྲུབ་སྟེ། མེད་པ་ཡོད་པའི་གཞི་ལ་ལྟོས་པ་ཡིན་པ་དེ་བཞིན་དུ་མེད་པ་ནི་དེ་ལྟ་མ་ཡིན་ཏེ། འདི་ལྟར་ཡོད་པ་མངོན་སུམ་དུ་གྱུར་པ་མངོན་དུ་བྱས་པའི་

རྗེས་སུ་དཔག་ནས་མེད་པ་འགྲུབ་པར་བྱེད་དེ། མེད་པ་དེ་ཡང་ཡོད་པའི་དངོས་པོ་དེ་མེད་ཅེས་ཡོད་པས་འཇོག་གོ། །མེད་པ་ནི་ལུང་དེ་དག་ལས་བརྗོད་ཀྱི་ཤེས་པ་གང་གིས་ཀྱང་མངོན་སུམ་དུ་མ་བྱས་པ་སྟེ། མེད་པ་ཉིད་ཀྱང་མ་རྟོགས་ན་དེས་ཡོད་པ་ལྟ་ག་ལ་
གྲུབ། དེའི་ཕྱིར་ཡོད་པ་དང་མེད་པ་ཕན་ཚུན་ལྟོས་པར་བཤད་པ་ནི་ཡོད་པས་བཞག་པ་ཡིན་ནོ། །སྔར་མ་བྱུང་བ་ལས་བྱུང་བ་དག་ཀྱང་ནམ་བྱུང་བའི་དངོས་པོ་མངོན་དུ་བྱས་པ་ན་དེ་སྔར་མ་བྱུང་བ་ཞེས་གདོད་འཇོག་པར་བྱེད་དོ། །དེ་བཞིན་དུ་དུས་ཀྱང་འདས་པ་དང་། མ་འོངས་པ་ནི་
བཏགས་པ་ཙམ་སྟེ། མེད་པ་ཉིད་ཡིན་ལ་མེད་པས་གཞག་ཏུ་མི་ནུས་སོ། །ད་ལྟར་གྱི་དངོས་པོ་ནི་ཡོད་པ་ཡིན་ལ་མངོན་དུ་ཡང་བྱས་སོ། །དེས་གཞག་ན་ནི་འདས་པ་དང་མ་འོངས་པ་འགྲུབ་པོ། །དེའི་ཕྱིར་དུས་གསུམ་ནི་ད་ལྟར་གྱི་དབང་གིས་གཞག་པ་ཡིན་པར་ཤེས་པར་བྱའོ། །
གནས་སྐབས་ཀྱང་གོ་བར་བྱ་བའི་དོན་ཏེ། དགོས་པའི་དབང་དེ་ཉིད་ལ་འདིར་གནས་སྐབས་ཞེས་བྱ་སྟེ། སྤྱིར་ནི་དུས་ཉིད་སྐབས་ཡིན་ནོ། །འོན་ཀྱང་འདིར་དུས་ནི་དངོས་པོའི་དུས་ཡིན་ལ། གནས་སྐབས་ནི་སྨྲ་བ་པོའི་འདོད་པའི་དོན་གྱི་གནས་སྐབས་ཡིན་ནོ། །ད་ནི་དགག་པ་གོ་བར་
བྱེད་པའི་སྒྲ་དང་ཤེས་པའི་ཡུལ་མེད་པ་བཞི་ཡིན་པར་བསྟན་པའི་ཕྱིར། དགག་པ་གོ་བར་བྱེད་པ་ཡི། །ཡུལ་ནི་མེད་པ་བཞི་ཡིན་ཏེ། །སྔ་ན་མེད་དང་ཞིག་ནས་མེད། །གཅིག་ལ་གཅིག་མེད་ཤིན་ཏུ་མེད། །ཅེས་སྨོས་ཏེ། དགག་པ་ཐམས་ཅད་ཀྱང་མེད་པར་སྒྲུབ་པ་ཡིན་ལ།
དངོས་པོ་ཐ་དད་པའི་མེད་པ་ཐམས་ཅད་ཀྱང་བཞི་པོ་དེ་དག་ཏུ་འདུས་ཏེ། དེའི་ཕྱིར་དགག་པ་སྒྲུབ་པར་བྱེད་པའི་སྒྲ་དང་ཤེས་པ་ཐམས་ཅད་ཀྱི་དངོས་སུ་བསྒྲུབ་པར་བྱ་བ་མེད་པ་ཡིན་ན་མེད་པ་བཞི་པོ་དག་དགག་པ་གོ་བར་བྱེད་པའི་ཡུལ་ཡིན་ནོ། །དེ་ལྟར་གོ་བར་བྱེད་པའི་ཡུལ་བསྙད་
ནས། གོ་བར་བྱེད་པའི་གནས་སྐབས་བསྟན་པའི་ཕྱིར། གོ་བྱེད་སྐབས་ནི་གཉིས་ཡིན་ཏེ། །ཆེ་ལོང་དང་ནི་རྒྱས་པར་རོ། །ཞེས་སྨོས་ཏེ། དེ་ལ་ཆེ་ལོང་ནི་བྱེ་བྲག་རྒྱས་པར་མ་ཕྱེ་བ་སྟེ། ཕྱོགས་ཙམ་མཐོང་བར་བྱ་བ་ཞེས་བྱ་བའི་དོན་ཏོ། །རྒྱས་པ་ནི་ཐམས་ཅད་མཐོང་

བར་བྱེད་པ་ཞེས་བྱ་བའི་དོན་ཡིན་ཏེ། དེ་དག་བསྟན་པའི་ཕྱིར། ཆེ་ལོང་གི་དབང་ལ་བརྩམས་ནས་མེད་པ་རྣམ་པ་བཞི་ལ་ཕྱེ་བ་ནི། ཞིག་ནས་མེད་དང་ཤིན་ཏུ་མེད། །མེད་པར་དགག་པ་ཞེས་འདོད་དོ། །ལྷག་མ་མ་ཡིན་དགག་པར་ནི། །ཆེ་ལོང་དབང་གིས་འདོད་པ་སྟེ། །
ཡུལ་ན་མེད་དང་ཡོད་པ་ཡི། །དབང་ཙམ་དག་ཏུ་འདོད་པའོ། །ཞེས་བྱ་བ་ཡིན་ཏེ། འདི་ལྟར་བུམ་པ་ཞིག་སྟེ་མེད་པ་ཡང་ཡུལ་གང་ན་ཡང་བུམ་པའི་ངོ་བོ་མེད་དེ་མེད་པ་ཉིད་ཡིན་ལ། རི་བོང་གི་རྭ་ལ་སོགས་པ་ཡང་ཡུལ་གང་ན་ཡང་མེད་དེ། དེའི་ཕྱིར་དེ་གཉིས་ནི་མེད་པར་དགག་པར་
བསྡུའོ། །ལྷག་མ་ནི་སྔ་ན་མེད་པ་དང་། གཅིག་ལ་གཅིག་མེད་པ་ཡིན་ཏེ། སྔ་ན་མེད་པ་ཡང་ད་ལྟར་གྱི་ངོ་བོར་ཡོད་དེ། སྔ་ན་མེད་པའི་བུམ་པ་ལྟ་བུའོ། །གཅིག་ལ་གཅིག་མེད་པ་ཡང་རྟ་ནི་རྟའི་རང་བཞིན་དུ་ཡོད་ལ། བ་ལང་བ་ལང་གི་རང་བཞིན་དུ་ཡོད་དེ། འདི་གཉི་ག་ཡང་ད་
ལྟར་ཡུལ་ན་ཡོད་པ་ཡིན་པས་མ་ཡིན་པ་ཞེས་བྱའོ། །འོན་ཀྱང་དེ་དག་གི་ཕྱོགས་ཙམ་ཡིན་ཏེ་མེད་པ་ཉིད་ནི་མ་ཡིན་ནོ། །སྔ་མ་གཉིས་ནི་མེད་པ་ཉིད་ཡིན་ནོ། །གལ་ཏེ་མེད་པ་ཉིད་ཡིན་ན་ཕྱོགས་ཙམ་མཐོང་བ་ཞེས་གང་གི་ཕྱིར་བྱ་ཞེ་ན། དེ་ནི་འདི་ལྟར་མེད་པ་གཞི་མེད་པ་ཉིད་དུ་མཐུན་པ་
ཡང་ཡིན་ལ། རྟེན་བརྗོད་ན་ཀུན་ཀྱང་ཡིན་པ་ལས་སྒྲ་བརྗོད་པ་ན་སྔ་མ་གཉིས་ནི་མི་སྣང་བའི་དུས་ཉིད་ན་བརྗོད་ལ་གཞན་ནི་སྣང་བ་དེ་ཉིད་ལ་རྗོད་པར་བྱེད་དེ། དེའི་དུས་ན་ཡུལ་ན་སྣང་བ་དང་མི་སྣང་བའི་དབང་ཙམ་མཐོང་བར་བྱེད་པ་ནི་ཕྱོགས་ཡིན་ནོ། །རྒྱས་པར་ན་ནི་དེ་བཞི་ཆར་ཡང་མེད་པ་
ཁོ་ན་ཡིན་པའི་ཕྱིར་མེད་པར་དགག་པའི་དབྱེ་བ་ཡིན་ལ། དེ་ལས་བརྒྱུད་ནས་གཞན་སྟོན་པ་ཡང་ཡིན་པས་མ་ཡིན་པར་དགག་པ་ཡང་ཡིན་ནོ། །དེ་ཡང་ཡུལ་ན་ཡོད་པ་སྟེ། རང་གི་ངོ་བོ་ནི་དེར་སྒྲུབ་པར་བྱེད་པ་ཡིན་ནོ། །རྒྱས་པར་བསྟན་པ་ཉིད་བརྗོད་པར་འདོད་ནས། མེད་པ་བཞི་
ཉེད་མི་ཤེས་པའམ། །གལ་ཏེ་ཡོད་སོགས་འདོད་པ་ལ། །མེད་པ་ཙམ་ཞིག་སྒྲུབ་པ་ན། །མེད་པར་དགག་པ་བཞིར་འདོད་དོ། །ཞེས་བྱ་བ་ལ་སོགས་པ་བསྟན་ཏོ། །དེ་ལ་འདིར་ནི་མེད་པར་དགག་པའི་བྱེ་བྲག་དབྱེ་བ་ཡིན་ཏེ། ཇི་སྐད་སྨོས་པའི་མེད་པ་བཞིའི་རང་གི་ངོ་བོ་

མི་ཤེས་པའམ། ཡོད་དམ་མེད་ཐེ་ཚོམ་ཟ་བ་དང་། འདི་ལྟར་ཡོད་པར་རྟོགས་པ་ཡོད་དེ། །སྔ་ན་མེད་པ་ལ་ནི་ཁ་ཅིག་བུམ་པ་ལ་མི་རྟག་པ་ཉིད་སྔ་ནས་ཡོད་དེ། ནམ་ཐོ་བ་ལྟ་བུ་དང་ཕྲད་ནས་བསལ་བར་བྱས་པར་ཟད་དེ། དེ་བཞིན་དུ་འབྲས་བུ་ཐམས་ཅད་
ཀྱང་འབྲས་བུའི་བྱ་བ་མི་བྱེད་པ་ཙམ་དུ་ཟད་དེ། རྒྱུའི་དུས་ན་འབྲས་བུའི་ངོ་བོར་ཡོད་དོ་ཞེས་པ་དང་། ཞིག་ནས་མེད་པ་ལ་ཡང་རྒྱུན་ནི་རྒྱུའི་ངོ་བོར་དུས་ཐམས་ཅད་དུ་ཡོད་དེ། འཇིམ་པའི་གོང་བུ་ནི་བུམ་པ་ལ་ཡོད་དོ། །རྒྱུའི་རང་བཞིན་མི་འདོར་རོ། །ཞེས་བརྗོད་པ་དང་། གཅིག་ལ་
གཅིག་མེད་པ་དག་ལ་ཡང་རྟ་ལ་ཡང་བ་ལང་གི་རང་བཞིན་ཡོད་དེ། བ་ལང་གི་སྤྱི་ནི་ཡུལ་ཐམས་ཅད་ན་གནས་སོ་ཞེས་དངོས་པོ་ཐམས་ཅད་ཀྱི་ཐམས་ཅད་ལ་ཐམས་ཅད་ཀྱིས་ཁྱབ་པར་འདོད་པ་དང་། ཤིན་ཏུ་མེད་པ་དག་ལ་ཡང་རི་བོང་གི་རྭ་ནི་རྐྱེན་མེད་པའི་ཕྱིར་སྲ་བ་དང་རྣོ་བའི་བྱ་བ་བྱེད་པར་
མི་སྣང་བ་ཙམ་ལས་མ་གཏོགས་པའི་རྭའི་རང་བཞིན་མེད་པ་མ་ཡིན་ཏེ། དམིགས་སུ་ཡོད་པ་ནི་ཡོད་པ་ཉིད་ཡིན་ནོ་ཞེས་ལོག་པར་རྟོག་པ་དག་ལ་མེད་པ་ཙམ་ཞིག་གོ་བར་བྱེད་ན་མེད་པར་དགག་པའི་དབྱེ་བར་འདོད་པ་རྣམ་པ་བཞི་ཡིན་ནོ། །གལ་ཏེ་མེད་པ་བཞི་པོ་དེ་ཉིད་ཡུལ་དུ་བྱས་པ་ལས་
བརྒྱུད་དེ། དོན་ཞིག་སྟོན་ན་ནི་མ་ཡིན་པར་དགག་པར་འགྱུར་བར་བསྟན་ཏེ། དེའི་ཕྱིར། གལ་ཏེ་རི་བོང་རྭ་མེད་པས། །དངོས་མེད་དེ་ཉིད་སྒྲུབ་བྱེད་ན། །མ་ཡིན་དགག་པར་འདོད་པ་སྟེ། །ཚིག་གཅིག་རྣམ་པར་སྒྲུབ་པའོ། །ཞེས་བྱ་བ་ལ་སོགས་པ་སྨོས་སོ། །གལ་ཏེ་རི་བོང་
གི་རྭ་མེད་པ་ཙམ་ཞིག་སྒྲུབ་པར་བྱེད་ན་ནི་མེད་པར་དགག་པར་འགྱུར་ལ། དེས་རྭ་མེད་པའི་ཆོས་ཉིད་སྟོན་པར་བྱེད་ཅིང་སྒྲུབ་པར་བྱེད་ན་དེ་མ་ཡིན་པར་དགག་པའི་ནང་ནས་ཚིག་གཅིག་གིས་སྒྲུབ་པར་བྱེད་པ་ཡིན་ནོ་ཞེས་བྱའོ། །སྔ་ན་མེད་པ་དང་། ཞིག་ནས་མེད་པ་མ་ཡིན་པར་བསྟན་
པའོ། །དགག་པ་བསྟན་པ་ནི། རྒྱུ་ལ་འབྲས་བུ་མེད་ཅེས་དང་། །འབྲས་བུ་ལ་ཡང་རྒྱུ་མེད་ཅེས། །རྒྱུ་འབྲས་དངོས་པོ་སྒྲུབ་བྱེད་ན། །དེ་ཡང་དེ་བཞིན་ཤེས་པར་བྱ། །ཅེས་སྨོས་པ་ཡིན་ཏེ། འདི་ལྟར་ས་བོན་སྟོན་པ་ལ་མྱུ་གུ་མེད་པ་ཞེས་བྱ་བ་དང་། མྱུ་གུ་ལ་ས་བོན་

མེད་པ་ཞེས་བྱ་བས་སྟོན་པ་དེ་བཞིན་དུ་མ་ཡིན་པར་དགག་པའི་ཚིག་གཅིག་གིས་སྒྲུབ་པར་འགྱུར་ཞེས་བྱ་བ་ཡིན་ནོ། །གཅིག་ལ་གཅིག་མེད་པའི་ཡུལ་ལ་མ་ཡིན་པར་དགག་པར་འགྱུར་བ་སྟོན་པ་ནི། རྟ་ལ་བ་ལང་མེད་ཅེས་པ། །རྟ་ཉིད་སྒྲུབ་པར་བྱེད་པ་ནི། །མ་
ཡིན་དགག་པ་ཞེས་འདོད་དོ། །ཞེས་བྱ་བ་ཡིན་ཏེ། དེ་ནི་སྔ་མ་བཞིན་དུ་ཤེས་པར་བྱའོ། །དེ་ལྟར་མེད་པ་རྣམ་པ་བཞི་ལས་མ་ཡིན་པར་དགག་པ་ཚིག་གཅིག་གིས་སྒྲུབ་པར་བྱེད་པ་བཤད་ནས། ད་ནི་དོན་གྱིས་གོ་བ་བསྟན་པའི་ཕྱིར། གང་ཞིག་བཀག་པར་གྱུར་པ་ཡིས། །
གཞན་དུ་འགལ་བར་འགྱུར་བ་དང་། །གང་ཞིག་ངེས་པར་སྒྲུབ་བྱེད་པ། །དགག་པ་དོན་གྱིས་གོ་བའོ། །ཞེས་སྨོས་སོ། །འདིར་ཡང་། མེད་པ་བཞི་ཉིད་ཡུལ་དུ་བྱས། །ཞེས་བྱ་བའི་དོན་ཏོ། །དེའི་དོན་ནི་འདི་ཡིན་ཏེ། ལྷས་བྱིན་མ་ཤི་ལ་ཁྱིམ་ན་མེད་ན་གཞན་ན་ཡོད་པར་དོན་
གྱིས་གོ་བ་ལྟ་བུ་སྟེ། ལྷས་བྱིན་ཤི་བ་དང་ཁྱིམ་ན་གནས་པ་བཀག་པས་གཞན་ན་གནས་པ་མ་ཡིན་པ་གཞན་དུ་སྒྲུབ་པ་འགལ་ཏེ་མི་རུང་བའི་ཕྱིར་གཞན་ན་གནས་པར་ངེས་པར་སྒྲུབ་པ་ཡིན་ཏེ་དེ་ལྟ་བུ་དག་གོ། །རང་གི་ཚིག་གིས་མི་སྟོན་པའི་སྒྲུབ་པར་བྱེད་པའི་ཚུལ་བསྟན་པ་ནི། མིང་
གཞན་དགག་པས་བསྟན་པའི་དངོས། །འགལ་དང་ངེས་པ་མེད་པ་ནི། །རང་གི་ཚིག་གིས་མི་སྟོན་པའོ། །ཞེས་བྱ་བ་སྨོས་པ་ཡིན་ཏེ། མིང་གཞན་བཀག་པས་གཞན་བསྟན་པ་ནི་དངོས་ཏེ། ལྷས་བྱིན་མ་ཡིན་པ་ཞེས་ལྷས་བྱིན་གྱི་མིང་བཀག་པས་བསྟན་པའི་དངོས་མཆོད་
སྦྱིན་ཏེ། དེ་ལ་ལྷས་བྱིན་བཀག་པས་མཆོད་སྦྱིན་མ་ཡིན་པ་གཞན་དུ་འགལ་བ་ཡང་མེད་ཅིང་མཆོད་སྦྱིན་དང་ངེས་པར་གཟུང་བ་ཡང་མེད་ལ། ངོ་བོ་དེ་ལྟ་བུར་སྟོན་པ་ནི་རང་གི་ཚིག་གིས་མི་སྟོན་པ་ཞེས་བྱའོ། །དེ་དག་གི་མཇུག་བསྡུ་བ་ནི། གང་ཞིག་སྒྲུབ་པ་དེ་ལྟ་བུས། །
དངོས་དང་དངོས་པོ་མེད་པ་ཡི། །དེ་ཁོ་ན་ཉིད་སྒྲུབ་བྱེད་པ། །མ་ཡིན་དགག་པ་ཞེས་འདོད་དོ། །དེ་དག་ནི་སྔར་དཔྱད་ཟིན་ཏོ། །མེད་པ་དག་ནི་དེ་ལས་གཞན། །ཞེས་བྱ་བ་ནི་སྒྲུབ་པ་རྣམ་པ་བཞི་པོ་དེ་དག་གིས་སྒྲུབ་པ་དེ་ལྟར་བསྒྲུབ་པ་ལས། གཞན་དེ་དངོས་སུ་སྒྲུབ་པོ་ཞེས་

བྱ་བའི་དོན་ཏོ། །ད་ནི་མེད་པར་དགག་པ་ཡང་མེད་པ་བཞིར་བསྟན་པ་དང་། མ་ཡིན་པར་དགག་པ་ཡང་རྣམ་གྲངས་མང་དུ་བཤད་པ་རྣམས་ཚན་ཚན་དུ་བསྡུ་བ་བསྟན་པར་འདོད་ནས། མཚན་ཉིད་དབང་གིས་དབྱེ་
བ་ནི། །མ་ཡིན་དགག་པའི་དབྱེ་བ་སྟེ། །མེད་པ་དག་ནི་མཚན་ཉིད་གཅིག །ཅེས་བྱ་བ་ལ་སོགས་པ་སྨོས་ཏེ། མཚན་ཉིད་ཀྱི་སྒོ་ནས་དབྱེ་བ་ནི་ཆོས་ཀྱི་རང་གི་ངོ་བོ་སྟོན་པའི་ཕྱིར་མ་ཡིན་པར་དགག་པའི་དབྱེ་བ་ཡིན་ལ། མེད་པར་དགག་པ་ནི་མེད་པར་སྟོན་པས་མེད་པ་ལ་
རྣམ་གྲངས་ཀྱི་མཚན་ཉིད་ཐ་དད་པ་མེད་དོ། །དེའི་ཕྱིར། མཚན་བཞིའི་དབང་གིས་བཞི་ཡིན་ནོ། །ཞེས་སྨོས་ཏེ། མེད་པའི་མཚན་ཉིད་གང་ལ་ཡོད་པ་དེ་ནི་མཚན་གཞི་སྟེ། དེ་ཡིས་ཕྱེ་བས་མེད་པ་བཞིར་ཕྱེ་བ་ཡིན་ནོ་ཞེས་བྱ་བ་ཡིན་ནོ། །མ་ཡིན་པར་དགག་པ་ལ་མཚན་ཉིད་ཀྱི་དབང་
གིས་ཕྱེ་བ་ཡོད་པར་བསྟན་པ་ལ་ཡང་ཇི་ལྟར་གོ་བར་བྱེད་པའི་མཚན་ཉིད་དང་། གོ་བར་བྱ་བའི་མཚན་ཉིད་ཀྱིས་བཞག་སྟེ། དེ་ལས་ཇི་ལྟར་གོ་བར་བྱེད་པ་གང་དང་གང་བསྡུ་བ་བསྟན་པ་ནི། མ་ཡིན་དགག་པའི་མཚན་ཉིད་ནི། །བྱེད་པའི་དབང་གིས་བཞི་ཡིན་ཏེ། །དོན་གྱིས་གོ་བར་
བྱེད་པ་དང་། །ཚིག་གཅིག་སྒྲུབ་པར་བྱེད་པ་དང་། །དེ་དང་ལྡན་པའི་དགག་པ་དང་། །རང་གི་ཚིག་གིས་མི་སྟོན་པའོ། །ཞེས་སྨོས་པ་ཡིན་ཏེ། འདི་རྣམས་ནི་དོན་ཇི་ལྟར་གོ་བར་བྱེད་པའི་ཚུལ་ལམ་ཐབས་ཡིན་ཏེ། འདི་ལྟར་ཁ་ཅིག་ནི་དོན་གྱིས་གོ་བར་བྱེད། ཁ་ཅིག་ནི་ཚིག་
གཅིག་གིས་གོ་བར་བྱེད། ཁ་ཅིག་ནི་དེ་གཉིས་ཀ་དང་ལྡན་པས་གོ་བར་བྱེད། ཁ་ཅིག་ནི་གཞན་དགག་པའི་སྒོ་ནས་གོ་བར་བྱེད་དེ། དེའི་ཕྱིར་དེ་དག་ནི་གོ་བར་བྱེད་པའི་དབང་དུ་གཞག་པར་བསྡུ་བའོ། །ཇི་ལྟར་གོ་བར་བྱ་བའི་དབང་དུ་བརྗོད་པ་བསྟན་པའི་ཕྱིར། བྱ་བའི་དབང་གིས་བདུན་
ཡིན་ཏེ། །མེད་པ་ཉིད་ནི་མ་གཏོགས་པའོ། །ཞེས་བྱ་བ་ལ་སོགས་པ་སྨོས་ཏེ། འདིར་བདུན་ནི་གཟུང་བ་བདེ་བའི་ཕྱིར་སྨོས་པ་སྔ་མ་བཞིན་ནོ། །བདུན་པ་འབའ་ཞིག་མ་ཡིན་གྱི་དེའི་རིགས་སུ་བསྡུ་བ་ཀུན་ཀྱང་ཡིན་པར་བསྟན་པའི་ཕྱིར། མི་མཐུན་གཉེན་པོར་བསྡུ་བ་ཡིས། །

དྲུག་གམ་འགལ་དང་གཞན་པ་ཡིས། །གཉིས་སུ་བརྗོད་པར་རིག་པར་བྱ། །ཞེས་སྨོས་ཏེ། གོ་བར་བྱ་བའི་དབང་དུ་འདྲ་བ་ལས་བསྡུས་པར་རྒྱས་བར་རིག་པར་བྱའོ་ཞེས་བསྟན་པར་རིག་པར་བྱའོ། །དེ་ནི་འདི་ལྟར་ཡིན་ཏེ། ལ་ལ་ནི་གཞན་དུ་གོ་བར་བ་བ་ལ་ན་དགག་པར་བྱ་བ་
དང་མི་འདྲ་བ་གོ་བར་བྱ། །ལ་ལ་ནི་རྟག་པར་བྱ་བ་དང་དམན་པར་གོ་བར་བྱ་བ། ལ་ལ་ནི་བསྟན་པར་བྱ་བ་དང་ཆུང་བར་གོ་བར་བྱ་བ། ལ་ལ་ནི་དགག་པར་བྱ་བ་དང་། མི་མཐུན་པར་གོ་བར་བྱ་བ། ལ་ལ་ནི་དགག་པར་བྱ་བའི་གཉེན་པོར་གོ་བར་བྱ་བ་དང་། ལ་ལ་ནི་དགག་པར་བྱ་བ་
དང་བྲལ་བའི་ངོ་བོར་གོ་བར་བྱ་བ་སྟེ། བསྡུ་བ་དང་རྒྱས་པ་ཀུན་ཀྱང་རང་རང་གི་མིང་གི་སྒོ་ནས་དེ་ལྟར་གོ་བར་བྱ་བ་ཡིན་པས་གོ་བར་བྱ་བ་བསྡུ་བར་བྱའོ། །ད་ནི་དགག་པ་དེ་དག་གི་ཡུལ་དང་སྒྲ་དང་ངེས་པའི་ཚིག་བསྟན་པའི་ཕྱིར། དགག་པའི་ཡུལ་ཡང་རྣམ་གསུམ་སྟེ། །གཞི་ཡི་ཡུལ་
དང་བྱ་བའི་ཡུལ། །དགོས་པའི་ཡུལ་དུ་འདོད་པ་ཡིན། །ཞེས་སྨོས་ཏེ། འདིར་ཡང་ཡུལ་ནི་དགག་པའི་སྒྲའི་ཡུལ་ཡིན་ཏེ། ཡུལ་གཞན་ནི་མ་བསྙད་དོ། །དེ་ལས་གཞིའི་ཡུལ་ནི་དགག་པར་བྱ་བའི་གཞི་ཡིན་ཏེ་སྔར་བཤད་ཟིན་ཏོ། །བྱ་བའི་ཡུལ་ཞེས་བྱ་བ་ནི་དགག་པར་བྱ་བ་ཉིད་
ཡུལ་ཡིན་ཏེ། སྒྲས་དགག་པར་བྱ་བ་ཡིན་པས་སོ། །དགོས་པའི་ཡུལ་ནི་དགག་པའི་སྒྲའི་དགོས་ཆེད་ཡིན་ཏེ། དེས་བསྒྲུབ་པར་བྱ་བ་ཡིན་པའི་ཕྱིར་རོ། །དེའི་ཕྱིར། དགག་པའི་གཞི་དང་དགག་བྱ་དང་། །དགག་པའི་དགོས་ཆེད་གསུམ་གྱིས་སོ། །ཞེས་འབྱུང་བ་ཡིན་ནོ། །
སྒྲ་སྟོན་པ་ནི། །སྒྲ་ནི་བྱེ་བྲག་མེད་པ་སྟེ། དགོས་པའི་དབང་གིས་ཤེས་པར་བྱ། །ཞེས་བྱ་བ་ཡིན་ཏེ། འདི་ལྟར་མེད་པར་དགག་པ་སྟོན་པའི་སྒྲ་ནི་འདི་ལྟར་མ་ཡིན་པར་དགག་པ་སྟོན་པའི་སྒྲ་ནི་འདི་ལྟར་ཞེས་བྱེ་བྲག་མེད་དེ། མེད་དོ་ཞེས་བྱ་བ་དང་། མ་ཡིན་ནོ་ཞེས་བྱ་བ་དག་ཀྱང་ཐུན་མོང་གི་ཁྱད་པར་
ནི་དགོས་པའི་དབང་དུ་བསྟན་པ་ཉིད་ཀྱིས་སོ་ཞེས་བྱ་བ་ཡིན་ནོ། །ངེས་ཚིག་ནི། གང་ཕྱིར་གང་ཡང་ལྡོག་བྱེད་པས། །དགག་པ་ཞེས་ནི་བརྗོད་པ་ཡིན། །ཞེས་སྨོས་ཏེ། གང་གི་ཕྱིར་དགག་པ་ཞེས་བྱ་ཞེ་ན། སྒྲ་གང་ཡང་དགག་པའི་སྒྲ་འདིས་ལྡོག་པར་བྱེད་པས་དེའི་ཕྱིར་དགག་པ་ཞེས་བྱའོ། །

དེ་ཡང་གང་དང་སྒྲོགས་པ་ལྡོག་པར་བྱེད་དེ། འདི་ལྟར་མིང་དང་སྒྲོགས་ན་ནི་མིང་ཉིད་ལྡོག་པར་བྱེད་ལ། དེ་བཞིན་ཚིག་དང་། ངག་དག་གམ་ཇི་སྲིད་དུ་ཡང་རུང་སྟེ་ལྡོག་པར་བྱེད་དོ། །གཞན་ཡང་རང་གི་རིགས་དང་གཞན་དག་ཀྱང་རུང་སྟེ། དེ་དག་ཐམས་
ཅད་ལྡོག་པར་བྱེད་དོ། །དེ་ཡང་མི་ལྡོག་པར་བྱེད་པའི་དུས་ན་ངོ་བོ་ཉིད་ལྡོག་གོ། །ཚིག་ལྡོག་པར་བྱེད་པའི་དུས་ན་ཁྱད་པར་ལྡོག་པ་དང་། ཁ་ཅིག་ཏུ་ཁྱད་པར་ཅན་ལྡོག་གོ། །ངག་དང་། ཇི་སྲིད་པའི་བར་དུ་ཡང་དེ་བཞིན་ནོ། །གཞན་ལྡོག་པར་བྱེད་པའི་དུས་ན་སྔར་བརྗོད་པ་ཇི་ལྟ་བ་བཞིན་
ནོ། །རང་གི་རིགས་ལྡོག་པར་བྱེད་པའི་དུས་ན་མ་བཀག་པ་ཇི་ལྟ་བ་བཞིན་ནོ། །ལྡོག་པའི་ཚུལ་ཡང་རང་དང་སྒྲོགས་པའི་མིང་གྲུབ་པར་མི་བྱེད་པ་ཙམ་བྱེད་དེ། ཚིག་ཇི་ལྟ་བུ་དང་ཕྲད་ཀྱང་དེ་བཞིན་དུ་ཤེས་པར་བྱའོ། །ལྡོག་པ་བསྡུས་པ་རབ་ཏུ་བསྟན་པ་ཞེས་བྱ་བ་ལས་དགག་པའི་ལྟོས།
པ་བསྟན་པའི་ལེའུ་སྟེ་གསུམ་པའོ།། །།ད་ནི་རབ་ཏུ་གསལ་བར་བསྟན་པ་བརྗོད་པའི་ཕྱིར། དགག་པའི་ཡུལ་དང་དགོས་པ་དང་། །སྒྲ་དང་དུས་དང་གནས་སྐབས་དང་། །དགག་བྱ་ལྟོས་པ་ངེས་ཚིག་གིས། །རབ་ཏུ་གསལ་བར་བརྗོད་པ་ཡིན། །ཞེས་སྨོས་སོ། །
དེ་རྣམས་ཀྱིས་དགག་པའི་བྱེ་བྲག་ལེགས་པར་འགྱུར་རོ་ཞེས་པ་ཡིན་ནོ། །དེ་ཡང་མདོར་བསྡུ་བ་བསྟན་པའི་ཕྱིར། མདོར་ནི་ཡུལ་དང་ལྟོས་པ་དང་། །སྒྲ་དང་ངེས་པའི་ཚིག་གིས་སོ། །ཞེས་སྨོས་སོ། །འདི་དག་ཏུ་འདུས་ཏེ། འདི་དག་ཤེས་པས་གོང་མ་དག་ཀྱང་ཤེས་པར་འགྱུར་རོ་
ཞེས་བྱ་བ་ཡིན་ནོ། །དགག་པ་སྒྲུབ་པར་བྱེད་པའི་དུས་ཉིད་དུ་དངོས་སུ་མི་བརྗོད་དུ་རུང་བ་དུ་ཡོད་ཅེ་ན། དེ་བསྟན་པའི་ཕྱིར། དངོས་སུ་བརྗོད་པའི་དགོས་པ་ནི། དགག་པར་བྱ་དང་བྱེད་པ་དང་། །ཡུལ་དང་དུས་ཀྱི་ཁྱད་པར་དག །གཅིག་གམ་གཉིས་སམ་ཡང་ན་ནི། །སྤྱི་ལ་ལྟོས་ན་
མེད་ཀྱང་རུང་། །གཉིས་སམ་གསུམ་མམ་བཞི་ཡིན་ནོ། །ཞེས་སྨོས་ཏེ། ཉུང་ན་ནི་དགག་པར་བྱ་བ་དང་འགེགས་པར་བྱེད་པ་གཉིས་དང་ལྡན་ན་ཡུལ་དང་དུས་སྤྱི་ལ་ལྟོས་པས་སྨོས་པ་ཡང་ཡོད་དེ། འདི་ལྟར་རི་བོང་གི་རྭ་མེད་ཅེས་བརྗོད་ན་དགག་པར་བྱ་བའི་རི་བོང་གི་རྭ་དང་། འགེགས་

པར་བྱེད་པ་མེད་ཅེས་བྱ་བ་གཉིས་ཀྱིས་གྲུབ་པོ་ཞེས་བྱ་བའོ། །ལ་ལ་ནི་ཡུལ་གྱི་ཁྱད་པར་དང་། གསུམ་བརྗོད་དགོས་པ་ཡོད་དེ། མནར་མེད་པའི་སེམས་ཅན་དམྱལ་བ་ལ་བདེ་བའི་སྐབས་མེད་དོ་ཞེས་བྱ་བ་ལྟ་བུའོ། །ལ་ལ་ནི་ཡུལ་གྱི་ཁྱད་པར་མི་དགོས་ལ་
དུས་ཁྱད་པར་དང་གསུམ་བརྗོད་དགོས་པ་ཡོད་དེ། བསྐལ་པའི་མེ་འབར་བའི་ཚེ་མངོན་པར་འདུ་བྱེད་པའི་གནས་མེད་དོ་ཞེས་བྱ་བ་ལྟ་བུའོ། །ལ་ལ་ནི་དེ་དག་བཞི་ཆར་ཡང་བརྗོད་དགོས་པ་ཡོད་དེ། ཕྱོགས་འདི་ན་སྔོན་བུམ་པ་མེད་དོ་ཞེས་བརྗོད་པ་ལྟ་བུའོ། །སྒྲ་དངོས་སུ་མི་བརྗོད་དུ་
མི་རུང་བ་ནི་སྐབས་ཀྱི་ཚུལ་དེ་ལྟར་འབྱུང་བ་ཡིན་ནོ་ཞེས་བྱ་བའི་དོན་ཏོ། །ད་ནི་དེ་ལྟར་དགག་པའི་ཡུལ་བསྟན་པའི་སྐབས་སུ་དགག་པ་མེད་པའམ། མ་ཡིན་པ་གང་ལ་ཡོད་པ་དེ་གཞིའི་ཡུལ་ཡིན་ནོ་ཞེས་བསྟན་པ་ལ། འདི་སྐད་དུ་དགག་པའི་དུས་ན་ད་ལྟ་ཡིན་ན་གལ་ཏེ་ངོ་བོའི་ཚིག་
མ་ཡིན་པ་ལ་སོགས་པ་བྱེད་པའི་ཚིག་དགག་པར་བྱེད་པའི་དུས་ན་ནི་དགག་པར་བྱ་བ་ཉིད་ཡིན་ཏེ། དངོས་པོ་མ་ཡིན་ན་དེའི་གཞིའི་ཡུལ་གང་ལ་གཟུང་བར་བྱ་སྙམ་དུ་དོགས་པ་བསལ་བའི་ཕྱིར། དགག་བྱ་དངོས་པོ་མ་ཡིན་པའི། །ལས་ལ་སོགས་པ་དགག་པ་དག །དགག་བྱ་
བྱ་བ་ཉིད་ཡིན་ན། །བྱ་བ་གང་གི་ཡིན་པ་དེའི། །གང་ལ་ཡོད་པའི་དངོས་པོ་དེ་འདིར་བྱ་བ་དགག་པའི་གཞིའི་ཡུལ་ཡང་ཡིན་ནོ་ཞེས་བྱ་བ་ཡིན་ནོ། །དེ་ལ་བྱ་བ་སྟོན་པ་ནི་ཚིག་གི་ཕྲད་ཡིན་ཏེ། དེ་ལ་རེ་ཞིག་ལས་དགག་པ་ནི་དཔེར་ན་ཤིང་མི་གཅོད་ཅེས་བྱ་བ་ལྟ་བུ་ཡིན་ཏེ། ལས་
ནི་ཤིང་དང་། སྐྱེ་བུ་དང་། ལག་ཆའི་ཚོགས་ཀྱི་འདུ་བྱེད་པ་ཡིན་ཏེ། འདུ་བྱེད་དེ་ནི་ཤིང་དང་སྐྱེས་བུ་དང་ལག་ཆ་ལ་ཡོད་ཀྱི་གཞན་ལ་མ་ཡིན་ནོ། །དེ་ཡང་ཤིང་ལ་ཡོད་པའི་འདུ་བྱེད་ལ་ནི་བྱ་བའི་གཞི་ལ་ཡོད་པའི་ལས་ཞེས་བྱའོ། །སྐྱེས་བུ་ལ་ཡོད་པ་ལ་ནི་བྱེད་པ་པོ་ལ་ཡོད་པའི་
ལས་ཞེས་བྱའོ། །ལག་ཆ་ལ་ཡོད་པ་ལ་ནི་བྱེད་པ་ལ་ཡོད་པའི་ལས་ཞེས་བྱའོ། །ལས་དེ་དག་དགག་པ་ན་ཡང་གཞིའི་ཡུལ་ནི་དེ་དག་ཉིད་ཡིན་ནོ། །དེ་བཞིན་དུ་འོག་མ་ཀུན་ལ་ཡང་སྦྱར་བར་བྱའོ། །བྱེད་པ་དགག་པ་ནི་སྟ་རེས་མི་གཅོད་ཅེས་བྱ་བ་ནས་གཅོད་པ་མ་ཡིན་ཞེས་བྱ་

བའི་བར་དུའོ། །གཞན་དུ་ཡང་དེ་བཞིན་ནོ། །གཞི་ནི་སྔ་མ་བཞིན་ནོ། །ཆེད་དགག་པ་ནི། བདེ་ཕྱིར་མཆོད་སྦྱིན་མི་བྱེད་པ། །འཇིག་རྟེན་དག་ན་སྨད་པའི་རྒྱུ། །ཞེས་བྱ་བ་ལྟ་བུ་ཡིན་ནོ། །འབྱུང་ཁུངས་དགག་པ་ནི། རྒྱུ་ལས་ཀུན་དུ་མ་བྱུང་བའི། །འབྲས་
བུ་འདོད་པ་ལྟ་བར་དམན། །ཞེས་བྱ་བ་ལྟ་བུ་ཡིན་ནོ། །འབྲེལ་པ་དགག་པ་ནི། འདི་ལྟར་འགྲོ་བའི་སྡུག་བསྔལ་ནི། །ཡང་དག་ལྟ་བའི་འབྲས་བུ་ཡིན། །ཞེས་བྱ་བ་ལྟ་བུའོ། །རྟེན་གནས་དགག་པ་ནི། གང་ཞིག་བདག་དང་བཅས་འདོད་པ། །ཡང་དག་ལྟ་ལ་དེ་མི་གནས། །ཞེས་བྱ་བ་ལྟ་བུ་ཡིན་ནོ། །བོད་པ་དགག་པ་ནི་
མེད་དེ། གང་བརྗོད་པ་དེ་ཐམས་ཅད་ལ་བོད་པས་གཞི་བྱེད་པ་མེད་པའི་ཕྱིར་རོ། །དགག་པ་ལ་བོད་པ་ནི་ཡོད་དེ། གང་བརྗོད་པ་དེ་ཐམས་ཅད་ལ་བོད་པ་འཇུག་པའི་ཕྱིར་རོ། །ངེས་པར་གཟུང་བ་དགག་པ་ནི་ལྷས་བྱིན་ཁོ་ནའི་བུ་དཀར་ཤམ་མ་ཡིན་ཞེས་བྱ་བ་དང་། ལྷས་བྱིན་གྱི་བུ་དཀར་ཤམ་ཁོ་ན་
མ་ཡིན་ཞེས་བྱ་བ་དང་། ལྷས་བྱིན་གྱི་བུ་དཀར་ཤམ་བཟང་པོ་ཁོ་ན་མེད་ཅེས་བྱ་བ་ལྟ་བུ་ཡིན་ནོ། །དེ་དག་ལ་ཡང་ངེས་པར་བཟུང་སྟེ་དགག་པ་དང་། ངེས་པར་འཛིན་པ་དགག་པ་གཉིས་སོ། །དེ་ལ་ངེས་པར་བཟུང་སྟེ་བཀག་ན་ནི་ལྷ་སྦྱིན་ཁོ་ནའི་བུ་དཀར་ཤམ་མ་ཡིན་ཞེས་གཞན་ལ་བུ་དཀར་
ཤམ་མེད་པར་སྟོན་པ་དགག་པ་དེ་ཡང་ལྷ་སྦྱིན་ལ་བུ་དཀར་ཤམ་མེད་པར་སྟོན་ལ། གཞན་ཐམས་ཅད་ནི་ཡོད་དོ་བར་སྟོན་ཏོ། །ངེས་པར་འཛིན་པ་བཀག་ན་ལྷ་སྦྱིན་དང་གཞན་ཀུན་ལ་དཀར་ཤམ་ཐུན་མོང་དུ་ཡོད་དེ། ལྷ་སྦྱིན་གཅིག་པུ་ལ་ཡོད་པ་ཡང་མ་ཡིན་ཞེས་བྱ་བ་དང་། གཞན་
ལ་མེད་པ་ཡང་མ་ཡིན་ཞེས་དགག་པ་ཡིན་ཏེ། དེ་ནི་གཞན་ལ་མི་ལྡན་པར་ངེས་པར་བཟུང་བའི་དགག་པ་ཡིན་ནོ། །གཞན་ཡང་ལྷ་སྦྱིན་གྱི་བུ་དཀར་ཤམ་ཁོ་ན་མ་ཡིན་ཞེས་གཞན་མི་ལྡན་པ་ངེས་པར་གཟུང་བ་འདི་དགག་པ་ན་ངེས་པར་བཟུང་སྟེ་བཀག་ན་ནི་ལྷ་སྦྱིན་གྱི་བུ་དཀར་ཤམ་མ་ཡིན་པ་
གཞན་སྔོ་བསངས་ལ་སོགས་པ་ནི་ཡིན་ནོ་ཞེས་བྱ་བར་འགྱུར་རོ། །གལ་ཏེ་ངེས་པར་འཛིན་པ་དགག་ན་ནི་ལྷ་སྦྱིན་གྱི་བུ་དཀར་ཤམ་དང་སྔོ་བསངས་ལ་སོགས་པ་ཐུན་མོང་ཡིན་ཏེ། དཀར་ཤམ་གཅིག་པུ་ཡིན་པ་ནི་མ་ཡིན་ནོ་ཞེས་བྱ་བར་འདིར་འགྱུར་རོ། །གཞན་ཡང་ལྷ་སྦྱིན་གྱི་བུ་

དཀར་ཤམ་བཟང་པོ་ཁོ་ན་མེད་ཅེས་ལྡན་པ་ཙམ་དུ་འཛིན་པ་དགག་པ་ན་ངེས་པར་བཟུང་སྟེ་བཀག་ན་ནི་ལྷ་སྦྱིན་གྱི་བུ་དཀར་ཤམ་ནི་མེད་པར་འགྱུར་རོ། །གཞན་གྱི་བུ་ནི་ཀུན་ཡོད་དོ་བ་འདིར་འགྱུར་རོ། །གལ་ཏེ་ངེས་པར་བཟུང་སྟེ་བཀག་ན་ནི་ལྷ་སྦྱིན་གྱི་བུ་དཀར་ཤམ་གཅིག་པུ་མ་ཡིན་གྱི་གཞན་
གྱི་བུ་དང་ཡོད་པ་ཐུན་མོང་དུ་གནས་སོ་ཞེས་བྱ་བ་འདིར་འགྱུར་རོ། །གཞན་ཡང་ངེས་པར་འཛིན་པར་གཏོགས་པ་རྣམས་ཀྱི་དགག་པ་ཀུན་ཀྱང་ཚུལ་དེ་ལྟ་བུ་དག་ཏུ་འགེགས་པར་བྱེད་དེ། དེ་ལ་ངེས་པར་བཟུང་སྟེ་དགག་པའི་ཕྱོགས་ནི་ཚིག་ཕྲད་དགག་པ་མ་ཡིན་ཏེ། ཕྲད་ཀྱིས་ཁྱད་པར་དུ་
བྱས་ཏེ་དགག་པ་ཡིན་པས་བྱ་བ་དགག་པར་མི་འགྱུར་ཏེ། དེ་བཞིན་དུ་ལས་ལ་སོགས་པ་ལ་ཡང་ངེས་པར་བཟུང་བ་དང་བཅས་ཏེ་བཀག་ན་དེ་དག་ཇི་ལྟར་དེ་ལྟར་བརྟག་གོ། །དེ་ལྟར་འགྱུར་བ་དེ་དག་ཐམས་ཅད་ཀྱང་དགག་པས་སྦྱོར་བའི་ཚེ་ན་ཡིན་ཏེ། དགག་པ་ལ་སྦྱོར་བའི་ཚེ་ན་ནི་མ་ཡིན་ནོ་
ད་ནི་རབ་ཏུ་གསལ་བ་བརྗོད་པའི་དགག་པའི་ཡུལ་དང་རང་གི་ངོ་བོ་ལ་སོགས་པ་རྣམ་གྲངས་དེ་དག་རེ་རེ་ནས་བཤད་པར་བྱ་བའི་ཕྱིར་རེ་ཞིག་དང་པོར་ཡུལ་ལས་བརྩམས་ནས། མེད་དང་དེ་ཡི་ཐ་སྙད་ཀྱི། །ཡུལ་ནི་བྱེ་བྲག་སོ་སོ་སྟེ། །ཞེས་བྱ་བ་ལ་སོགས་པ་སྨོས་སོ། །དེ་ལ་མེད་པའི་ཐ་སྙད་
ཀྱི་ཡུལ་ཞེས་སྤྱིར་བརྗོད་ཀྱང་མེད་པ་དང་དེའི་ཐ་སྙད་ཀྱང་ཐ་དད་ལ། དེ་དག་གི་ཡུལ་ཡང་ཐ་དད་དོ་ཞེས་བྱ་བ་ཡིན་ནོ། །ཇི་ལྟར་ཞེ་ན། མེད་པ་ནི་གང་ན་གང་མེད་པ་དེ་ཉིད་ཡིན་ལ་དེའི་ཐ་སྙད་ནི་གསུམ་སྟེ། མེད་དོ་སྙམ་དུ་རྟོགས་པ་དང་། མེད་དོ་ཞེས་བརྗོད་པ་དང་། མེད་པས་ཐོགས་པ་མེད་
པར་འཇུག་པའི་བདག་ཉིད་ཤེས་པ་དང་། བརྗོད་པ་དང་། འཇུག་པའི་ཐ་སྙད་རྣམ་པ་གསུམ་མོ། དེ་ཡང་རྣམ་པར་རྟོག་པ་ཉིད་དང་། དེ་ལ་སྣང་བའི་རྣམ་པ་སྒྲ་ལ་སོགས་པ་བརྟག་པའི་བདག་ཉིད་དང་། ལུས་ངག་གི་འཇུག་པ་དང་བརྗོད་པ་ཐམས་ཅད་ཡིན་ཏེ། གང་གི་ཕྱིར་ཐམས་ཅད་ཀྱང་
དོན་རང་གི་ངོ་བོ་མ་ཡིན་པ་དང་། དེ་ལ་ཡོད་པ་ཡང་མ་ཡིན་བཞིན་དུ་ནན་གྱིས་རྟོག་པ་དང་། བརྟག་པ་ཁོ་ན་ཡིན་པའི་ཕྱིར་དེ་དག་མེད་པའི་ཐ་སྙད་ཅེས་བྱའོ། ཐམས་ཅད་དུ་ཡང་དེ་བཞིན་དུ་ཤེས་པར་བྱའོ། །དེ་དག་གི་ཡུལ་གྱི་བྱེ་བྲག་གང་ཞེ་ན། འདི་བསྟན་པའི་ཕྱིར། མེད་པའི་ཡུལ་ནི་གཅིག་

ཡིན་ཏེ། །གང་ལ་ཡོད་པ་དེ་ཡིན་ནོ། །ཞེས་སྨོས་ཏེ། མེད་པ་ཉིད་ཀྱི་ཡུལ་ནི་གཅིག་སྟེ་མེད་པ་གང་ལ་ཡོད་པའི་དངོས་པོ་དེ་ཁོ་ན་ཡིན་ཏེ། འདི་ལྟར་བུམ་པ་མེད་པ་གང་ལ་ཡོད་པའི་ས་གཞི་ལྟ་བུ་ཉིད་དོ། །དེའི་ཐ་སྙད་ཀྱི་ཡུལ་བསྟན་པ་ནི། ཐ་སྙད་ཡུལ་གྱི་བྱེ་བྲག་དག །
ཅེས་བྱ་བ་ལ་སོགས་པ་སྨོས་ཏེ། ཐ་སྙད་རྣམ་པ་གསུམ་གྱི་བྱེ་བྲག་ལས་ཞེས་བྱ་བའོ། །དེ་ལས་རེ་ཞིག་བརྗོད་པའི་ཐ་སྙད་ཀྱི་ཡུལ་སྟོན་པ་ནི། རྗོད་པའི་ཡུལ་ནི་གསུམ་ཡིན་ཏེ། །གཞི་སོགས་བསྟན་པ་ཉིད་ཡིན་ནོ། །ཞེས་སྨོས་པ་ཡིན་ཏེ། གཞི་དང་། བྱ་བ་དང་། དགོས་པ་རྣམས་
གོང་དུ་བསྟན་པ་ཉིད་ཡིན་ནོ་ཞེས་བྱ་བའི་དོན་ཏོ། །དེ་ལ་གཞི་ནི་སྒྲའི་རྟེན་ཡིན་པའི་ཕྱིར་གཞིའི་ཡུལ་ལོ། བྱ་བ་ནི་སྒྲས་དགག་པར་བྱ་བ་ཡིན་པས་བྱ་བའི་ཡུལ་ལོ། །དགོས་པ་ནི་སྒྲ་བརྗོད་པའི་དགོས་པ་ཡིན་པས་དགོས་པའི་ཡུལ་ལོ། །ཤེས་པའི་ཐ་སྙད་ཀྱི་ཡུལ་གང་ཡིན་པ་བསྟན་པའི་ཕྱིར་
ཤེས་པའི་ཡུལ་ནི་དྲུག་ཡིན་ཏེ། །མེད་པར་རང་གི་ངོ་བོ་དང་། །དེ་ཡི་གཞི་དང་དགག་བྱ་དང་། །དགོས་ཆེད་སྒྲ་དང་འཇུག་པ་ནི། །ཤེས་པའི་ཡུལ་དུ་འདོད་པ་ཡིན། །ཞེས་སྨོས་ཏེ། མེད་པ་ཉིད་ལ་སོགས་པ་དྲུག་ཅར་ཡང་ཤེས་པས་དམིགས་པར་བྱ་བའི་ཡུལ་དུ་བྱེད་པའི་ཕྱིར་ཡུལ་
ཡིན་ལ། འདི་དག་ཤེས་པས་ཡུལ་དུ་བྱས་པ་མ་ཡིན་ན་ཐ་སྙད་གཞན་ཡང་འབྱུང་བར་མི་འགྱུར་རོ། །ད་ནི་འཇུག་པའི་ཐ་སྙད་ཀྱི་ཡུལ་བསྟན་པའི་ཕྱིར། འཇུག་པའི་ཡུལ་ནི་གཉིས་ཡིན་ཏེ། །དེ་ལ་འཇུག་དང་ལྡོག་པའོ། །ཞེས་སྨོས་ཏེ། དེ་ལ་དོན་དགོས་པ་ལ་འཇུག་པའི་
བྱེད་པ་དང་། ལྡོག་པའི་བྱེད་པ་ནི་འཇུག་པ་སྟེ། བུམ་པ་མེད་པའི་ཡུལ་ནི་ཐོགས་པ་མེད་པར་འགྲོ་བ་དང་། བླང་བར་འདོད་པའི་ཚེ་ནི་ལྡོག་པའི་འཇུག་པ་བྱེད་དེ། དེའི་ཕྱིར་འཇུག་པ་དང་ལྡོག་པ་ནི་བྱེད་པའི་ཡུལ་ཡིན་ནོ། །བྱེད་པ་ཡང་གང་གི་ཞེ་ན། སྒྲ་དང་ཤེས་པ་ལུས་རྣམས་ཀྱི། །བྱེད་པ་འཇུག་
པ་ཞེས་འདོད་དོ། །ཞེས་སྨོས་ཏེ་འདིར་སྒྲའི་བྱེད་པ་ནི་སྒྲའི་ལས་ཡིན་ལ། ལས་སུ་བྱ་བ་ནི་མེད་པ་ཉིད་ཡིན་ཏེ། མེད་ཅེས་བྱ་བའི་སྒྲའི་རང་གི་ངོ་བོ་ནི་བརྗོད་པའི་ཐ་སྙད་ཡིན་ལ། མེད་པ་ཉིད་སྟོན་པའི་བྱེད་པའི་ལས་ནི་ངག་གི་འཇུག་པའི་ཐ་སྙད་ཅེས་བྱའོ། །ཤེས་པ་ཡང་འདི་ལྟར་མེད་དོ་སྙམ་

དུ་རྟོག་པ་ནི་ཤེས་པའི་ཐ་སྙད་ཡིན་ལ། རྣམ་རྟོག་གི་བྱེད་པ་ནི་བྱེད་པའི་ལས་ཡིན་ཏེ། རྣམ་རྟོག་གི་འཇུག་པའི་ཐ་སྙད་ཅེས་བྱའོ། །ལུས་ཀྱི་འཇུག་པ་ལ་ནི་དབྱེ་བ་མེད་དོ། །གནས་སྐབས་ཁ་ཅིག་ཏུ་ནི་རྣམ་པར་རྟོག་པའི་བྱེད་པ་ནི་དཔྱོད་པ་ཡིན་ཞིང་། སྒྲའི་བྱེད་པ་ནི་ཚིག་གི་སྦྱོར་བ་ཡིན་ལ། ལུས་
ཀྱི་བྱེད་པ་ནི་འཇུག་པ་ཡིན་ཏེ། དེའི་ཕྱིར་སྒྲ་དང་ཤེས་པ་བྱེད་པ་དང་བཅས་པ་ནི་རྗོད་པ་དང་ཤེས་པའི་ཐ་སྙད་ཡིན་ལ། ལུས་ཀྱི་འཇུག་པ་ནི་འཇུག་པའི་ཐ་སྙད་ཡིན་ནོ་ཞེས་བྱ་བར་སྒྲུབ་སྟེ། དེའི་ཕྱིར། ཁ་ཅིག་ཏུ་ནི་ལུས་ལའང་འཇུག །དེ་ཡང་ཤེས་པ་དང་བཅས་པའོ། །ཞེས་སྨོས་པ་
ཡིན་ནོ། །དེ་ལ་ཤེས་པ་དང་བཅས་པ་ཞེས་བྱ་བ་ནི་འདི་ལྟར་སེམས་གང་གཡོས་ན་དེའི་མཐུས་ལུས་གཞན་དུ་གཡོ་བའི་ནུས་པ་འབྱུང་སྟེ། ལུས་གང་གཡོ་བ་དེ་ནི་ཤེས་པ་དང་བཅས་པ་བཞིན་དུའོ། །བཅས་པ་དེས་དོན་གང་བསྒྲུབ་པར་བྱ་བ་ལ་ཐོགས་པ་མེད་པར་འགྲོ་བ་དང་ལྡོག་པའི་མཚན་
ཉིད་ནི་བྱེད་པ་འདིའི་བྱ་བ་ཡིན་པའི་ཕྱིར་ཡུལ་ཡིན་ནོ། །གལ་ཏེ་འདི་སྐད་དུ་འགྲོ་བར་བྱེད་པ་ཡང་ལུས་ཉིད་ཡིན་ལ་འགྲོ་བར་བྱ་བ་ཡང་ལུས་ཉིད་ཡིན་ན་དེ་ལྟ་ན་ནི་སྟ་རེ་ཇི་ལྟར་རྣོ་ཡང་རང་གཅོད་པར་མི་རིགས་ལ་གལ་ཏེ་གཅོད་ན་ཡང་བྱ་བར་འགྱུར་གྱི་བྱེད་པར་མི་འགྱུར་ཏེ། རང་ལ་རང་བྱེད་པ་འགལ་ལོ་ཞེ་ན་འདི་ནི་འགལ་བ་མེད་
དེ། ཇི་ལྟར་སྲ་བ་ཉིད་ནི་མཚོན་པར་བྱེད་པ་རང་ཉིད་ཡིན་ལ་བྱ་བ་ཡང་རང་ཉིད་དེ། འདི་ལ་དོན་གཞན་བྱེད་པ་ནི་མེད་དོ། །དེ་བཞིན་དུ་ལྷ་སྦྱིན་གྲོང་དུ་འགྲོ་བར་བྱ་བ་དང་བྱེད་པ་གཉི་ག་ལྷ་སྦྱིན་ཉིད་ཡིན་ནོ་ཞེས་བྱ་བ་དང་། དགེ་སློང་དག་སེམས་བསྲུང་བར་བྱ་བ་དང་བྱེད་པ་ཡང་སེམས་ཉིད་ཡིན་ཞེས་
གསུངས་པ་དང་། སྣང་བ་དག་རང་གིས་རང་སྣང་བར་བྱེད་པ་དང་། དེ་བཞིན་དུ་རང་ལ་རང་བྱེད་པ་ཡང་ཐམས་ཅད་དུ་མི་འཐད་པ་ནི་མ་ཡིན་ནོ། །སྟ་རེ་དང་ཤིང་ལྟ་བུ་དངོས་པོ་ཐ་དད་པའི་བྱ་བ་དང་བྱེད་པར་སྦྱོར་བ་གཅོད་པའི་བྱ་བ་དང་བྱེད་པར་འགྱུར་བ་ནི་གཅིག་ཏུ་མི་རུང་ངོ་། །གཡོ་བའི་བྱ་བ་ལ་ནི་སྟ་རེ་
ཡང་གཡོ་བའི་ལས་སྟ་རེ་ཉིད་ལ་ཡོད་པའི་ཕྱིར་རོ། །བྱ་བ་དང་བྱེད་པ་གཉི་ག་ཡང་སྟ་རེ་དེ་ཉིད་ལས་གུད་ན་མེད་དོ། །དེ་བཞིན་དུ་ལུས་ཀྱི་འཇུག་པ་འདི་ཡང་འཇུག་པར་བྱ་བ་དང་བྱེད་པ་གཉི་ག་ལུས་ཉིད་ཡིན་མོད་ཀྱི། འོན་ཀྱང་ཐོགས་པ་མེད་པར་འགྲོ་བ་དང་ལྡོག་པའི་མཚན་ཉིད་སྐྱེས་བུའི་འདོད་པ་

ཡིན་པའི་སྒོ་ནས་ནི་བྱ་བར་བཞག་ལ། ཡན་ལག་གི་གཡོ་བ་དེ་ཉིད་འདོད་པ་སྒྲུབ་པ་ཡིན་པའི་སྒོ་ནས་དབྱེ་བར་གཞག་པ་ཡང་ཡིན་ནོ། །དེ་བཞིན་དུ་རང་ལ་བྱེད་པ་ཐམས་ཅད་ཀྱང་ཚུལ་འགའི་སྒོ་ནས་ནི་བྱེད་པ་ཡིན་ལ། ཚུལ་འགའི་སྒོ་ནས་ནི་བྱ་བར་གཞག་པ་ཡིན་པར་ཤེས་པར་བྱའོ། །དེ་
ལྟར་དགག་པའི་ཡུལ་བཤད་ནས། ད་ནི་དགག་པ་རང་གི་ངོ་བོ་བསྟན་པའི་ཕྱིར། རང་གི་ངོ་བོའི་དབྱེ་བ་ནི། རང་བཞིན་ཇི་ལྟར་མེད་པ་དང་། །ཇི་ལྟར་གོ་བར་བྱེད་པ་དང་། །ཇི་ལྟར་གོ་བར་བྱ་བ་ཡིས། །དགག་པའི་དབྱེ་བ་བསྟན་པ་ཡིན། །ཞེས་སྨོས་ཏེ། དགག་པ་རང་གི་ངོ་བོའི་
དབྱེ་བ་ནི་མེད་པའི་རང་བཞིན་ཇི་ལྟར་མེད་པའི་ཚུལ་དང་། ཚུལ་ཇི་ལྟར་གོ་བར་བྱེད་པ་དང་། ཚུལ་ཇི་ལྟར་གོ་བར་བྱ་བ་ཡིས་ཕྱེ་བ་ཤེས་པར་བྱ་སྟེ། དེ་ཡང་ཇི་ལྟར་ཡིན་ཞེ་ན། འདི་ལྟར་ཚུལ་འདི་དག་གིས་གཞག་པ་སྟེ་གང་ཞེ་ན། རང་བཞིན་ཇི་ལྟར་མེད་པ་ནི། །མེད་པ་རྣམ་པ་བཞི་ཡིན་ཏེ། །
ངོ་བོ་ཉིད་ཀྱིས་གཞག་པ་ཡིན། །ཞེས་སྨོས་ཏེ། དེ་ལ་ཚུལ་ནི་འདི་ཡིན་ཏེ། མེད་པ་ཚུལ་གཅིག་ཀྱང་མེད་པའི་ལུགས་ཐ་དད་དེ། མེད་པ་ལ་ལ་ནི་སྔ་ན་མེད། དེ་བཞིན་དུ་ལ་ལ་ནི་ཞིག་ནས། ལ་ལ་ནི་དངོས་པོ་ཕན་ཚུན་གཅིག་ལ་གཅིག །ལ་ལ་ནི་གཏན་དུ་སྟེ་ལུགས་ཀྱི་ཚུལ་ཐ་དད་དོ། །དེ་དག་
ནི་རང་གི་ངོ་བོས་གཞག་པ་ཞེས་བྱ་བ་སྟེ་བྱ་བའམ་བྱེད་པ་གང་ལ་ཡང་ལྟོས་པ་མེད་ཀྱི། མེད་པ་རང་གི་ངོ་བོ་ཉིད་དེ་ལྟ་ཡིན་ཏེ། དེའི་ཕྱིར་དེ་དག་ལ་དེ་སྐད་ཅེས་བྱའོ། །ཚུལ་ཇི་ལྟར་གོ་བར་བྱེད་པའི་དབྱེ་བ་དང་ཚུལ་ནི། ཇི་ལྟར་གོ་བར་བྱེད་པ་ནི། །དོན་གྱིས་གོ་བ་ལ་སོགས་པའི། །དགག་པ་རྣམ་
པ་ལྔ་ཡིན་ཏེ། །སྒྲ་དང་སྐབས་ཀྱིས་གཞག་པ་ཡིན། །ཞེས་བྱ་བ་ཡིན་ཏེ། དོན་ཇི་ལྟར་སྟོན་པ་བྱེད་པའི་སྐབས་ཀྱི་སྒྲས་བྱེད་པའི་ལུགས་འདི་དག་ཡིན་ཏེ། ལ་ལ་ནི་དགག་པའི་དོན་སྟོབས་ཀྱིས། ལ་ལ་ནི་དགག་པའི་ཚིག་གིས། ལ་ལ་ནི་དེ་གཉི་ག་དང་ལྡན་པས། ལ་ལ་ནི་གཞན་གྱི་
ཚིག་གིས། ལ་ལ་ནི་སྒྲ་དངོས་སུ་བྱེད་པས་སྒྲུབ་པར་བྱེད་དེ། དེའི་ཕྱིར་དེ་དག་ནི་སྒྲ་དང་། སྐབས་ཀྱིས་གཞག་པ་སྟེ། ཇི་ལྟར་གོ་བར་བྱེད་པ་ཡིན་ནོ། །གོ་བར་བྱེད་པའི་དབང་གིས་འདི་སྐད་དུ། ཇི་ལྟར་གོ་བར་བྱ་བ་ནི། །མེད་དང་མ་ཡིན་དབྱེ་བ་ཡི། །དགག་པ་བརྒྱད་སོགས་དབྱེ་བ་སྟེ། །

གོ་བར་བྱ་བའི་དངོས་པོས་གཞག །ཅེས་སྨོས་ཏེ། སོགས་ཞེས་བྱ་བའི་བསྡུ་བ་ནི་དེ་ལས་རྒྱས་པ་དང་བསྡུས་པ་དག་གི་རྣམ་གྲངས་དག་སྟེ། ཁ་ཅིག་མེད་པར་གོ་བར་བྱ་བ། ཁ་གཅིག་གཞན་པར་ཞེས་བྱ་བ་ནས། བྲལ་བར་གོ་བར་བྱ་བའི་བར་དུ་སྔར་བརྗོད་པ་ལྟ་བུ་སྟེ། དེ་དག་ཀུན་ཀྱང་ཇི་ལྟར་གོ་བར་བྱ་བ་ཤ་སྟག་ཡིན་པའི་ཕྱིར་རོ་ཞེས་བྱ་བར་འགྱུར་
རོ། །འོ་ན་ནི་མེད་པ་རྣམ་པ་བཞི་ཡང་མེད་པ་རང་གི་ངོ་བོར་བཤད་ལ། ཇི་ལྟར་གོ་བར་བྱ་བ་ཡང་གོ་བར་བྱ་བའི་ངོ་བོས་གཞག་པ་ཡིན་ནོ། །དེ་ལྟ་ན་ནི་གོ་བར་བྱ་བའི་ངོ་བོ་དེ་ཡང་རང་གི་ངོ་བོ་ཡིན་ཏེ། བྱེ་བྲག་མེད་པར་འགྱུར་རོ་ཞེ་ན་དེ་བསྟན་པའི་ཕྱིར། ངོ་བོ་གཉིས་ཀྱི་བྱེ་བྲག་ནི། །མེད་པའི་དངོས་པོ་མེད་པ་སྟེ། །ཡུལ་དང་
དུས་ལ་བརྟེན་པ་ཡི། །བྱེ་བྲག་གིས་ནི་གཞི་ཞེས་བྱ། །ཞེས་སྨོས་ཏེ། ངོ་བོ་འདི་ནི་མེད་པའི་ངོ་བོ་ཁོ་ན་ཡིན་ལ། དེའི་དབྱེ་བ་ཡང་ཡུལ་དང་དུས་ཀྱི་མཚན་གཞི་བརྟེན་པས་གཞི་ཡིན་ནོ། །གཞན་ནི་འདི་ཡིན་ཏེ། གོ་བར་བྱ་བའི་དངོས་པོ་ནི། །མེད་དམ་གལ་ཏེ་ཡོད་ཀྱང་རུང་། །སྐྱེས་བུའི་འདོད་པའི་དབང་བྱས་པའི། །དངོས་པོ་ཉིད་ཀྱི་
སྟོབས་ཡིན་ནོ། །ཞེས་པ་སྟེ། འདི་ནི་མེད་ཀྱང་རུང་ཡོད་ཀྱང་རུང་སྟེ། སྨྲ་བ་པོའི་གོ་བར་འདོད་པས་ཡུལ་དུ་བྱས་པའི་དངོས་པོ་ལ་ཇི་ལྟ་བའི་སྟོབས་ཡོད་པར་འདོད་པ་ཡིན་ཏེ། དེ་ལྟ་ན་སྔ་མ་ནི་མེད་པ་ཉིད་ཡིན་ཞིང་བྱེ་བྲག་ཀྱང་དངོས་པོའི་ཡུལ་དང་དུས་ལ་བརྟེན་པ་ཡིན་ལ། འདི་ནི་དངོས་པོ་ཡང་ཐམས་ཅད་ཡིན་ལ་སྐྱེས་
བུའི་འདོད་པ་ལ་ཡང་བརྟེན་པ་ཡིན་ཏེ། དེའི་ཕྱིར་བྱེ་བྲག་མེད་པ་མ་ཡིན་ནོ། །དེ་ལྟ་མ་ཡིན་ན་མེད་པ་རྣམ་པ་བཞི་པོ་དགག་པའི་ཡུལ་དུ་ཡང་ཅི་ལ་འགྱུར། དེའི་བྱེ་བྲག་ཡུལ་དུ་བྱས་པ་ལ་གོ་བར་བྱ་བ་ཚོལ་བར་ཡང་ཅི་ལ་འགྱུར་ཏེ། འདི་གཉིས་ལ་ནི་བྱེ་བྲག་ཡོད་པ་ཉིད་དོ། །ད་ནི་དགག་པའི་དགོས་པ་བསྟན་པའི་ཕྱིར།
དགོས་པ་དགག་བྱ་བཟློག་པ་སྟེ། །བྱེད་དང་བྱེད་པོའི་འདོད་པའོ། །ཕྱོགས་འགའ་དགག་པའམ་གཞན་སོགས་པས། །འདོད་པ་བརྒྱུད་པ་ཡིན་ཡང་ངོ་། །ཞེས་བྱ་བ་སྨོས་ཏེ། དགག་པར་བྱ་བ་བཟློག་པས་བྱེད་པ་པོའི་འདོད་པ་ཇི་ལྟར་སྒྲུབ་པར་བྱེད་པའི་དོན་ནི་བྱེད་པ་དང་བྱེད་པ་པོའི་འདོད་པ་ཡིན་ནོ། །ཕྱོགས་དགག་
པ་ནི་ཐམས་ཅད་དགག་པས་དོན་མི་འགྱུར་བར་བྱེད་པའི་མེད་པའི་སྒྲ་ཡིན་ཏེ། དེ་དང་གཞན་དགག་པ་ལྟ་བུས་བསྒྲུབ་པར་འདོད་པའི་དོན་བརྒྱུད་པས་སྟོན་ཀྱང་རུང་སྟེ། དེ་དག་ནི་དགག་པའི་དགོས་པ་ཡིན་ནོ། །དགག་པའི་སྒྲ་སྟོན་པ་ནི། སྒྲ་ནི་བྱེད་པའི་བདག་ཉིད་དེ། །ཞེས་སྨོས་ཏེ། བྱེད་པ་ནི་འགེགས་པར་

བྱེད་པའི་བདག་ཉིད་དོ། །དུས་སྟོན་པ་ནི། དུས་ནི་རྒྱུན་ཅེས་བྱ་བའོ། །ཞེས་བྱ་བ་ཡིན་ཏེ། དུས་ནི་སྐད་ཅིག་མང་དུ་འདུས་པའི་བདག་ཉིད་རྒྱུན་གྱི་དབང་ཙམ་ལ་བྱ་སྟེ། རང་གི་ངོ་བོ་ནི་གཞན་འདོད་པ་ལྟར་རྫས་སུ་མེད་དོ། །གནས་སྐབས་ནི་དགོས་པ་ཇི་ལྟར་སྒྲུབ་པའི་དུས་ལ་བྱ་སྟེ། དེའི་ཕྱིར། དགོས་པའི་དུས་
ལ་སྐབས་ཤེས་བྱ། །ཞེས་འབྱུང་བ་ཡིན་ནོ། །དགག་པར་བྱ་བ་ནི། བཟློག་པར་བྱ་བ་དགག་བྱའོ། །ཞེས་འབྱུང་བས་སྒྲ་གང་གིས་གང་བཟློག་པར་བྱ་བ་དེ་ནི་དགག་པར་བྱ་བ་ཡིན་ནོ་ཞེས་བྱ་བ་ཡིན་ནོ། །དགག་པའི་ལྟོས་པ་ཞེས་བྱ་བ་གང་ལ་བྱ་ཞེ་ན། གང་གི་དབང་གིས་གཞག་པ་ནི། །དགག་པའི་ལྟོས་པ་ཞེས་བྱའོ། །ཞེས་སྨོས་ཏེ་ཡུལ་ལ་སོགས་པ་གང་གི་དབང་གིས་
དགག་པ་གྲུབ་པར་བྱེད་པ་དེ་དེའི་ལྟོས་པ་ཞེས་བྱ་བར་འགྱུར་ཏེ་དཔེར་ན་རྒྱལ་པོ་ལ་བརྟེན་པའི་མི་བཞིན་ནོ། །དགག་པའི་ངེས་ཚིག་ནི་ལྡོག་པ་ཉིད་ཡིན་ནོ་ཞེས་པ་སྟེ། གོང་དུ་བཤད་ཟིན་ཏོ། །ད་ནི་རབ་ཏུ་གསལ་བར་བརྗོད་པ་བསྟན་པ་ལ་དགག་པ་རང་གི་ངོ་བོ་བསྟན་པའི་སྐབས་སུ་མེད་པ་རྣམ་པ་བཞི་བསྟན་པ་ལ། དེའི་དབྱེ་བ་མ་
བསྟན་པས་དེ་བསྟན་པར་འདོད་ནས་དང་པོ་སྔ་ན་མེད་པ་ལ་བརྩམས་ནས་འདི་ལྟར། སྔ་ན་མེད་པའི་བྱེ་བྲག་ནི། །རྒྱུན་འདྲ་བ་དང་རང་བཞིན་དང་། །སྐབས་དང་རྟེན་ལ་མེད་པའོ། །ཞེས་སྨོས་ཏེ། འདི་ལྟར་རྒྱུན་འདྲ་བ་སྔ་ན་མེད་པ་དང་། རང་བཞིན་སྔ་ན་མེད་པ་དང་། གནས་སྐབས་སྔ་ན་མེད་པ་དང་། རྟེན་ལ་སྔ་ན་མེད་པ་སྟེ་འདི་
རྣམས་སྔ་ན་མེད་པའི་བྱེ་བྲག་རྣམ་པ་བཞིའོ། །ཞིག་ནས་མེད་པའི་བྱེ་བྲག་ནི་འདི་སྐད་དུ། རྒྱུན་ཞིག་པ་དང་རང་བཞིན་དང་། །སྐབས་དང་རྟེན་ལས་བྲལ་པ་ཡིས། །ཞིག་ནས་མེད་པ་བཞི་ཡིན་ནོ། །ཞེས་སྨོས་པ་ཡིན་ཏེ། འདི་ལྟར་རྒྱུན་ཞིག་ནས་མེད་པ་དང་། རང་བཞིན་ཞིག་ནས་མེད་པ་དང་། གནས་སྐབས་ཞིག་
ནས་མེད་པ་དང་། རྟེན་ལས་བྲལ་ཏེ་མེད་པ་སྟེ། ཞིག་ནས་མེད་པ་རྣམ་པ་བཞི་ཡིན་ནོ། །གཅིག་ལ་གཅིག་མེད་པ་ནི་མཚན་ཉིད་གཅིག་ལ་གཅིག་མེད་པ་དང་། ཁྱད་པར་གཅིག་ལ་གཅིག་མེད་པ་དང་། རང་བཞིན་གཅིག་ལ་གཅིག་མེད་པའི་དབྱེ་བ་ཡོད་མོད་ཀྱི་རང་བཞིན་གཅིག་ལ་གཅིག་མེད་པར་འདུ་སྟེ། གང་གི་ཕྱིར་
མཚན་ཉིད་དང་ཁྱད་པར་ནི་མཚན་གཞི་དང་ཁྱད་པར་ཅན་མེད་པར་མི་གནས་ལ། མཚན་གཞི་དང་ཁྱད་པར་ཅན་ནི་རང་བཞིན་ཡིན་ཏེ། དེ་བས་ན་གཞི་ཐ་དད་པ་ན་མཚན་ཉིད་ཐ་མི་དད་ཀྱང་དེ་དག་འདྲ་བ་ཞེས་བྱ་བར་འགྱུར་རོ། །དེ་ལ་རང་བཞིན་གཅིག་ལ་གཅིག་མེད་པ་ནི་ཤིན་ཏུ་མཚུངས་པའི་གསེར་གྱི་གདུབ་རྒྱན་ལྟ་

བུའོ། །མཚན་ཉིད་གཅིག་ལ་གཅིག་མེད་པ་ནི་སྲ་བ་དང་། གཤེར་བ་དང་། ཚ་བ་དང་། གྲང་བ་ལྟ་བུའོ། །ཁྱད་པར་གཅིག་ལ་གཅིག་མེད་པ་ནི་རིང་པོ་དང་ཐུང་ངུ་ལྟ་བུའོ། །གང་རང་ལས་ལོག་པ་དེ་ནི་གཞན་ཡིན་ལ། གཞན་པ་དང་བདག་ཏུ་ནི་གཅིག་ལ་གཅིག་གིས་སྟོང་སྟེ་རང་ཉིད་ལས་གཞན་པ་དེ་ཡང་རང་བཞིན་དང་།
མཚན་ཉིད་དང་། ཁྱད་པར་གསུམ་ཡིན་ཏེ། དེ་ལྟར་ཡང་། དེ་ལ་གཞན་ནི་རྣམ་གསུམ་སྟེ། །ངོ་བོ་ཁྱད་པར་མཚན་ཉིད་དག །རང་ལས་ལོག་པ་གཞན་དུ་འདོད། །ཅེས་འབྱུང་བ་ལྟ་བུ་ཡིན་ནོ། །དེ་ལ་ཤིན་ཏུ་མཚུངས་པའི་གསེར་གྱི་གདུབ་རྒྱན་ལ་ནི་རིགས་ཀྱི་མཚན་ཉིད་དང་། སྲ་བ་དང་། མཉན་པ་དང་། སར་བ་དང་། དབྱིབས་
དང་། བོང་ཚོད་དག་ལ་ཁྱད་པར་ཅུང་ཟད་ཀྱང་མེད་ཅིང་མཚུངས་ཀྱང་རང་བཞིན་ཐ་དད་དོ། །ཚོགས་པ་གཅིག་པ་དག་ནི་ཁྱད་པར་ཐ་དད་པ་དང་མཚན་ཉིད་ཐ་དད་པར་དབྱེ་བ་ཡང་ཡོད་དེ། ཚོགས་པ་ཐ་དད་ན་མཚན་ཉིད་གཅིག་པ་དག་ཀྱང་ཡོད་དོ། །དེ་ལྟར་དབྱེ་བ་དུ་མ་ཡོད་ཀྱང་རང་བཞིན་ཉིད་དུ་བསྡུ་པའི་ཕྱིར། ཕན་ཚུན་གཅིག་ལ་
གཅིག་མེད་པ། །མཚན་ཉིད་དབྱེ་བ་ཡོད་མོད་ཀྱི། །རང་བཞིན་ཉིད་དུ་བསྡུ་བྱ་སྟེ། །ཇི་ལྟར་གསེར་གྱི་གདུབ་རྒྱན་དག །རིགས་དང་བཟོ་དང་བོང་ཚོད་དང་། །ཁ་དོག་དབྱིབས་རྣམས་མཚུངས་མོད་ཀྱི། །གཅིག་གི་རང་བཞིན་གཅིག་མ་ཡིན། །ཡིན་ན་ཅིག་ཅར་གཟུང་བར་འགྱུར། །ཞེས་བྱ་བ་སྨོས་པ་ཡིན་ནོ། །ཡིན་
ན་ཅིག་ཅར་གཟུང་བར་འགྱུར། །ཞེས་བྱ་བ་ནི་འདིའི་གཏན་ཚིགས་ཡིན་ཏེ། འདི་ལྟར་གལ་ཏེ་གཅིག་པར་གྱུར་ཅིང་གཅིག་གིས་གཅིག་སྟོང་པ་མ་ཡིན་ན་གཟུང་བས་ཐམས་ཅད་གཟུང་བར་འགྱུར་རོ། །དེ་ལྟ་ན་ནི་དངོས་པོ་ཐ་དད་པ་ཐམས་ཅད་ཀྱང་གཅིག་པའི་ཕྱིར་སྨན་ཟོས་ན་དུག་ཀྱང་ཟོས་པར་འགྱུར་རོ། །དེའི་ཕྱིར་
ཤིན་ཏུ་མཚུངས་པ་དག་ཀྱང་གཅིག་གིས་གཅིག་སྟོང་བར་ཤེས་པར་བྱའོ། །ཇི་ལྟར་རང་བཞིན་ཐ་དད་པའི་སྒོ་ནས་རང་བཞིན་གྱིས་སྟོང་པའི་མཚན་ཉིད་ཐ་དད་པ་མ་ཡིན་ནོ། །འདི་ལྟར་འདོད་ཆགས་རང་བཞིན་གྱིས་སྟོང་པ་དང་། མ་ཆགས་པ་རང་བཞིན་གྱིས་སྟོང་པ་འདི་ལ་ཡང་ཐ་དད་ཅུང་ཟད་ཀྱང་མེད་དོ། །དེའི་ཕྱིར་
སྟོང་པ་ཉིད་ཀྱི་དབང་དུ་བྱས་ནས་གཅིག་གིས་གཅིག་སྟོང་ཞེས་བཞག་པ་མ་ཡིན་ཏེ་དངོས་པོ་ཁོ་ནའི་དབང་དུ་བྱས་པ་ཡིན་ནོ། །ད་ནི་ཤིན་ཏུ་མེད་པའི་བྱེ་བྲག་བསྟན་པ་ན། ཤིན་ཏུ་མེད་པའི་བྱེ་བྲག་ནི། །རྒྱུ་དང་རང་བཞིན་གཉིས་སུ་ཤེས། །ཞེས་བྱ་བ་ཡིན་ཏེ། འདི་ལྟར་རང་བཞིན་ཤིན་ཏུ་མེད་པ་དང་། རྒྱུ་

ཤིན་ཏུ་མེད་པ་གཉིས་སོ། །ད་ནི་བྱེ་བྲག་དེ་དག་བཤད་པའི་ཕྱིར། སེམས་ཅན་སྐྱེ་བ་ལ་སོགས་པ། །རྒྱུན་དམིགས་པ་ཡི་རང་བཞིན་ནི། །རྒྱུན་འདྲ་སྔ་ན་མེད་པའོ། །ཞེས་བྱ་བ་ལ་སོགས་པ་སྨོས་ཏེ། སེམས་ཅན་སྐྱེ་བ་ནི་མ་བྱུང་བ་ལས་འབྱུང་བའི་འདུ་བྱེད་དེ། སྐྱེ་བའི་ཚེ་དམིགས་པ་
དེའི་རྒྱུན་ནི་མ་དམིགས་ཏེ་རྒྱུན་འདྲ་བ་མེད་པ་ཡིན་ནོ། །འཇིག་རྟེན་དག་ན་ཡང་འཆགས་པའི་ཚེ་མ་བྱུང་བ་ལས་བྱུང་བ་སྟེ་གནས་པའི་རྒྱུན་འདྲ་བ་མེད་དོ། །དེ་བཞིན་དུ་ཤིང་ལ་སོགས་པའི་རང་བཞིན་གྱི་རྒྱུ་མ་དམིགས་པ་ལས་རང་བཞིན་མི་དམིགས་པ་དང་། སྔ་ན་མེད་པ་ཞེས་རྗོད་པར་བྱེད་དེ། དེ་ནི་རྒྱུན་འདྲ་བ་
སྔ་ན་མེད་པ་ཡིན་ནོ། །རང་བཞིན་སྔ་ན་མེད་པ་ནི། །ས་བོན་ས་དང་འོ་མ་ལ། །མྱུ་གུ་བུམ་པ་མར་རྣམས་ནི། །རང་བཞིན་སྔ་ན་མེད་པའོ། །ཞེས་སྨོས་ཏེ། འདི་ལྟར་ས་བོན་གྱི་དུས་ན་མྱུ་གུའི་རང་བཞིན་དང་། དེ་བཞིན་དུས་དང་འོ་མའི་དུས་ན་བུམ་པ་དང་མར་རྣམས་ཀྱི་རང་བཞིན་མེད་དེ། དེ་ལྟ་བུ་དག་ནི་རང་བཞིན་
སྔ་ན་མེད་པ་ཡིན་ནོ། །གནས་སྐབས་སྔ་ན་མེད་པ་ནི། །ཇི་ལྟར་གསེར་ལས་རྒྱན་སོགས་ནི། །གནས་སྐབས་སྔ་ན་མེད་པའོ། །ཞེས་བྱ་བ་ཡིན་ཏེ། ཇི་ལྟར་གསེར་དང་རང་བཞིན་གཅིག་པ་ལས་གནས་སྐབས་བཟོ་ཐ་དད་པར་བྱས་པ་ལྟ་བུ་དག་གོ་ཞེས་བྱ་བའོ། །རྟེན་ལ་སྔ་ན་མེད་པ་ནི། །ས་ཕྱོགས་འདི་
ན་བ་ལང་དག །སྔོན་ཆད་མེད་པ་རྟེན་ལའོ། །ཞེས་བྱ་བ་ཡིན་ཏེ། ཕྱོགས་གང་ན་སྔར་བ་ལང་གི་སྟོང་པ་ལས་ཕྱིས་བ་ལང་དམིགས་ན་དེ་སྔ་ན་མེད་པའི་བ་ལང་ཞེས་བརྗོད་དོ། །དེ་ནི་རྟེན་ལ་མེད་པ་ཡིན་ཏེ། སྔ་ན་མེད་ཅེས་ཐུན་མོང་དུ་བརྗོད་པ་ཐམས་ཅད་ཀྱང་བྱེ་བྲག་གིས་དེ་ལྟར་གནས་པ་ཤ་སྟག་སྟེ། དེ་ལ་སྨྲ་བར་
བྱེད་པས་བྱེ་བྲག་དབྱེ་བར་བྱའོ། །དེ་བཞིན་དུ་འོག་མ་ཀུན་ལ་ཡང་སྦྱར་བར་བྱའོ། །ད་ནི་ཞིག་ནས་མེད་པའི་བྱེ་བྲག་བཤད་པར་འདོད་ནས། ལྗོན་པའམ་སྐྱེས་བུ་ལ་སོགས་པ། །ཚིག་གམ་ཤི་བར་གྱུར་པ་དག །རྒྱུན་ཞིག་གྱུར་ཏེ་མེད་པའོ། །ཞེས་སྨོས་ཏེ། འདི་ལྟར་ཤིང་ལྗོན་པ་ཚིག་སྟེ་ཤིང་གི་བྱ་བ་མི་བྱེད་པ་
དང་། སྐྱེས་བུ་ཤི་ནས་སྐྱེས་བུའི་བྱ་བ་མི་བྱེད་པ་ལྟ་བུ་ནི་རྒྱུན་ཞིག་ནས་མེད་པའོ། །མྱུ་གུ་བུམ་པ་མར་རྣམས་ལ། །ས་བོན་ས་དང་འོ་མ་ནི། །རང་བཞིན་ཞིག་ནས་མེད་པའོ། །ཞེས་སྨོས་ཏེ། མྱུ་གུ་དང་བུམ་པའི་དུས་ནས་བོན་དང་སའི་རང་བཞིན་ཞིག་ནས་མེད་པ་དང་། དེ་བཞིན་དུ་འབྲས་བུ་

མར་གྱི་དུས་ན་རྒྱུའི་འོ་མ་རང་བཞིན་ཞིག་ནས་མེད་པ་སྟེ། དེ་ལྟ་བུ་དག་ནི་རང་བཞིན་ཞིག་ནས་མེད་པ་ཞེས་བྱའོ། །གནས་སྐབས་ཞིག་ནས་མེད་པ་ནི། །ཇི་ལྟར་གསེར་གྱི་གདུབ་རྒྱན་ལས། །རྣ་ཆ་དག་ནི་སྐབས་ཞིག་པ། །ཞེས་བྱ་བ་ཡིན་ཏེ། སྔར་གདུབ་རྒྱན་དམིགས་ནས་དེ་དག་རྣ་ཆར་བྱས་
པ་དམིགས་པ་ལས་རྣ་ཆའི་དུས་ན་གདུབ་རྒྱན་ཞིག་ནས་མེད་དེ། དེ་ལྟ་བུ་དག་ནི་གནས་སྐབས་ཞིག་ནས་མེད་པ་ཡིན་ནོ། །དེ་ལ་གསེར་གྱི་གདུབ་རྒྱན་མེད་ཅེས་བརྗོད་ན་མེད་པའི་མཚན་ཉིད་དེ་དེ་ལྟར་ཤེས་པར་བྱའོ། །རྟེན་ལས་བྲལ་ཏེ་མེད་པ་སྟོན་པ་ནི། ས་ཕྱོགས་འདི་ནས་བུམ་པ་དག །གཞན་
དུ་འཕོས་ཏེ་མེད་པ་ནི། །རྟེན་ལས་བྲལ་ཏེ་མེད་པའོ། །ཞེས་སྨོས་ཏེ། ཕྱོགས་འདི་ནས་བུམ་པ་ཕྱོགས་གཞན་དུ་འཕོས་ཏེ་མེད་པ་ནི་རྟེན་ལས་བྲལ་ཏེ་མེད་པ་ཞེས་བྱ་བའི་དོན་ཏོ། །ཤིན་ཏུ་མེད་པ་ལས་རང་བཞིན་དང་རྒྱུ་མེད་པ་གཉི་ག །རི་བོང་རྔ་མོ་བོང་བུ་ལ། །རྭ་དང་རྭ་ཡི་རྒྱུ་མེད་ཅེས། །
རང་བཞིན་དགག་དང་རྒྱུ་དགག་པའོ། །ཞེས་བྱ་བས་བསྟན་པ་ཡིན་ཏེ། རི་བོང་ལ་རྭ་མེད་དོ། །དེ་བཞིན་དུ་རི་བོང་ལ་རྭ་ཐམས་ཅད་དུ་ཐམས་ཅད་མེད་པའི་ཕྱིར་རྒྱུ་ཡང་མེད་དེ། གལ་ཏེ་རྒྱུ་ཡོད་ན་རྐྱེན་འབྲས་བུ་འབྱུང་བ་ཡང་སྲིད་པ་ཞིག་ན། རི་བོང་ལ་རྭ་མི་སྲིད་པའི་ཕྱིར་
རྒྱུ་ཡང་མེད་དོ། །མདོར་ན་རྒྱུ་མེད་པས་འབྲས་བུ་མི་སྐྱེད་པའི་ཕྱིར། རྒྱུ་མེད་པར་ཤེས་ན་འབྲས་བུའང་མེད་པར་བརྗོད་དུ་རུང་ངོ་། །འབྲས་བུ་ནི་ཐམས་ཅད་དུ་ཐམས་ཅད་མེད་པར་ཤེས་ན་རྒྱུ་ཡང་མེད་པར་བརྗོད་དུ་རུང་གི །འགས་ནི་མ་ཡིན་ནོ། །ད་ནི་དགག་པའི་དུས་ཅན་
བསྟན་པའི་ཕྱིར། དགག་པ་དུས་ལ་ལྟོས་པ་ནི། །དངོས་པོའི་དུས་ལ་ལྟོས་པ་སྟེ། །སྨྲ་བ་པོ་ཡི་དུས་ལ་ནི། །ནམ་ཡང་ཁོང་དུ་ཆུད་པ་འཛིན། །ཅེས་སྨོས་པ་ཡིན་ཏེ། དུས་ལ་ལྟོས་པ་ནི་ཁྱད་པར་སྔ་ན་མེད་པ་དང་། ཞིག་ནས་མེད་པ་ཡིན་ལ། དེ་ནི་དངོས་པོ་ཉིད་ཀྱི་དུས་ཡིན་ཏེ།
སྨྲ་བ་པོའི་དུས་ནི་འདི་ལྟར་འདི་ན་བུམ་པ་མེད་ཅེའམ། སྔོན་ཆད་ཅེས་བྱ་བ་ནི་ཁོང་དུ་ཆུད་པའི་དུས་ཡིན་ཏེ། དེ་མ་བཟུང་བར་ནི་གྲུབ་པར་མི་བྱེད་མོད་ཀྱི། སྨྲ་བ་པོ་དེ་ཡང་དངོས་པོའི་དུས་ལ་བྱེད་དོ། །དེའི་ཕྱིར་ནམ་ཡང་ཞེས་སྨོས་པ་ཡིན་ཏེ། ནམ་ཡང་རུང་སྟེ་རྟོགས་པ་ཇི་

ཙམ་པ་དེ་ཙམ་དུ་འཛིན་པར་བྱེད་དོ། །དེ་མ་བཟུང་བར་ནི་ཡིད་ཆེས་པ་དང་། དེར་རུང་བའི་བརྗོད་པ་འབྱུང་བར་མི་འགྱུར་རོ། །སྨྲ་བ་པོ་སྒྲ་རྗོད་པར་བྱེད་པ་ན་ཕ་རོལ་པོས་དོན་གྱི་སྤྱི་ཙམ་ཤེས་པར་བྱའོ་སྙམ་དུ་རྟོག་པ་དང་། བྱེ་བྲག་ཤེས་པར་བྱའོ་སྙམ་དུ་
རྟོག་པའི་བསམ་པ་གཉིས་འབྱུང་སྟེ། དེ་གང་བྱུང་བ་དེས་སྒྲ་དེའི་མིང་ཡང་འདོགས་པར་བྱེད་དེ། དེ་བསྟན་པའི་ཕྱིར། སྤྱི་ཙམ་ཁོང་དུ་ཆུད་བྱ་དང་། །ཁྱད་པར་ཁོང་དུ་ཆུད་བྱ་དག །སྨྲ་བའི་བསམ་པའང་གཉིས་སུའོ། །ཞེས་སྨོས་པ་ཡིན་ནོ། །ད་ནི་དགག་
པའི་སྒྲ་དེ་དག་ཁོ་ན་ཡིན་ནམ། འོན་ཏེ་དེ་བས་རྒྱས་པ་ཡང་ཡོད་སྙམ་དུ་ལ་ལ་དག་རྟོག་པ་སྲིད་པས། དེའི་ཕྱིར། ངོ་བོ་སྟོན་པ་ཇི་སྙེད་པ། །དེ་དག་དགག་པའང་དེ་སྙེད་ཀྱི། །ཞེས་སྨོས་ཏེ། ངོ་བོ་སྟོན་པའི་སྒྲ་ནི་དགག་པ་མ་གཏོགས་པའི་རྗོད་པ་ཐམས་ཅད་ཡིན་ཏེ། ཐམས་
ཅད་ཀྱང་དོན་གྱི་ངོ་བོ་ཉིད་སྟོན་ཅིང་སྒྲུབ་པར་བྱེད་པའི་ཕྱིར་ཏེ། དེ་དག་ཇི་སྙེད་པ་དེ་དག་ཀུན་ཀྱང་དེ་དགག་པའི་སྒྲ་ཡིས་དགག་ཏུ་རུང་བ་ཅན་ཤ་སྟག་སྟེ། མི་རུང་བ་འགའ་ཡང་ཡོད་པ་མ་ཡིན་ཏེ། དབྱེ་བ་དེ་ལྟར་ཡོད་ན་ཡང་བསྡུ་ན་འདི་དག་ཏུ་འདུས་པའི་ཕྱིར། འོན་
ཀྱང་མདོ་རུ་བསྡུ་བ་ནི། །འདི་དག་ཙམ་དུ་ཤེས་པར་བྱ། །ཞེས་སྨོས་པ་ཡིན་ཏེ། བསྡུ་བ་ནི་འདི་དག་ཙམ་ལས་ལྷག་ཏུ་བསྟན་དུ་མེད་དེ། འགའ་ཡང་མ་འདུས་པ་མེད་དོ་ཞེས་བྱ་བ་ཡིན་ནོ། །ལྡོག་པ་བསྡུས་བར་བསྟན་པ་ལས་རབ་ཏུ་གསལ་བར་བསྟན་པ་བརྗོད་
པའི་ལེའུ་སྟེ་བཞི་པའོ།། །།ལྡོག་པ་རབ་བསྟན་བློ་དམན་དོན་དུ་བསྟན་པའི་ཕྱིར། །དཔེ་གསལ་བརྗོད་དང་ངེས་ཐོབ་གང་ཡིན་དང་། །བསྔོ་བའི་དགེ་བ་གང་ཡིན་དེས་ནི་བཤེས་གཉེན་ཀུན། །དཔལ་མགོན་འཇམ་པའི་དབྱངས་ཀྱི་
ཞབས་ལ་གཏུག་གྱུར་ཅིག། །།ལྡོག་པ་བསྡུས་པ་བསྟན་པའི་རྣམ་འགྲེལ་སློབ་དཔོན་ན་བི་དྷ་རྨཱས་བློ་དམན་པའི་དོན་ཆེད་དུ་གསལ་ཚིག་ཏུ་བྱས་པ་རྫོགས་སོ།། །།

༄༅༅། །རྒྱ་གར་སྐད་དུ། ཝ་ཙ་ན་མུ་ཁ་ཡུ་དྷོ་པ་མ་ནཱ་མ། བོད་སྐད་དུ། སྨྲ་བའི་སྒོ་མཚོན་ཆ་ལྟ་བུ་ཞེས་བྱ་བ། སྨྲ་བའི་མཆོག་ཐམས་ཅད་མཁྱེན་པ་ལ་ཕྱག་འཚལ་ལོ། །སྨྲ་མཆོག་གཙོ་ལ་ཕྱག་འཚལ་ནས། །སྨྲ་བའི་ཡན་ལག་རྫོགས་དོན་དུ། །ངག་གི་འདུ་བྱེད་
གང་དེ་ཡི། །ཚོགས་པ་བདག་གིས་བཤད་པར་བྱ། །ཁོག་པ་མགྲིན་པ་རྐན་དང་ལྕེ། །སྣ་དང་སྤྱི་བོ་སོ་དང་མཆུ། །ཕྱི་དང་རེ་རེའི་ཆ་དག་ལས། །ཕྲད་དང་ཅུང་ཟད་ཕྲད་པ་དང་། །དོག་པ་དང་ནི་ཡངས་པ་ནས། །དྲང་པོ་བསྒྲེང་དང་བཀུག་པ་དང་། །བསྟོད་པ་དང་ནི་སྨད་པ་དང་། །བསྒྲིམས་
དང་གློད་པའི་ང་རོ་འབྱུང་། །དྲང་པོ་བཀུག་དང་སྨད་པ་དང་། །བསྒྲིམས་པ་དང་ནི་གློང་པ་ལ། །གྲྭར་དང་ཙྭང་གིས་ཕྱེ་བ་དང་། །བསྒྲེང་དང་བསྒྲེངས་ཏེ་བཀུག་པ་དང་། །བསྟོད་དང་བསྟོད་དེ་སྨད་པ་དང་། །སྣ་ལྡན་རྣམ་པར་གཅད་པ་ཡིས། །ང་རོ་བཅུ་དྲུག་དག་ཏུ་འདོད། །ང་རོ་དག་གི་གསལ་
བྱེད་ནི། །དྲང་པོ་བཀུག་དང་སྨད་པ་ལ། །འདྲེན་པ་རིང་ཐུང་གསུམ་ཡོད་དེ། །དེ་ལའང་ཆེ་འབྲིང་རྣམ་པ་གསུམ། །དེ་དགུ་སྣ་ལྡན་བཅོ་བརྒྱད་དོ། །གསལ་བར་བྱ་བ་འདི་ལྟ་སྟེ། །བསྒྲེང་དང་བསྟོད་ལ་ཐུང་བ་སྟེ། །བསྒྲིམས་དང་གློད་ལ་རིང་བའོ། །བཅུ་གཉིས་ཡིན་ཏེ་བརྒྱ་རྩ་གཉིས། །སྤྱིར་
ན་བརྒྱ་དང་བཅུ་རྩ་གཅིག །རང་གནས་དང་ནི་བཅུ་གཉིས་ཏེ། །ཡི་གེ་གཅིག་གི་རྣམ་པའི་ཆ། །ངག་གི་འདུ་བྱེད་ཚོགས་པའོ། །དུས་གཅིག་ཏུ་ནི་བཅུ་གཅིག་གམ། །སྣ་ལྡན་དང་ནི་བཅུ་གཉིས་ཏེ། །རང་གི་གནས་དང་བཅུ་གསུམ་མོ། །མཚོན་འདེབས་གར་དང་ལས་བྱེད་དང་། །
སྟབས་འགྲོས་ལྟ་སྟངས་བྱེ་བྲག་དག། །རྐང་ལག་མིག་གི་འགྱུར་བག་གི། །ལུས་ཀྱི་འདུ་བྱེད་བདུན་པོ་ནི། །ཐད་ཀར་ལྟ་དང་གྱེན་དུ་ལྟ། །དེ་བཞིན་བཟློག་སྟེ་ལྟ་བ་དང་། །བསྟོད་དེ་ལྟ་དང་སྨད་དེ་ལྟ། །བསྒྲིམས་དང་གློད་དེ་ལྟ་བ་ལྟར། །གར་ལ་སོགས་པའང་དེ་བཞིན་ཏེ། །ལུས་ཀྱི་འདུ་
བྱེད་བདུན་པོ་ལྟར། །ངག་གི་འདུ་བྱེད་དེ་བཞིན་ནོ། །དེ་སྟོན་དབྱིབས་ཀྱི་གནས་ལུགས་ཀྱང་། །མདའ་དང་བསེ་རུ་གླང་ཆེན་སྣ། །གདུགས་དང་རྐང་རྟེན་ལྟ་བུ་དང་། །མེ་རི་ཆུ་ཡི་དཀྱིལ་འཁོར་ལྟར། །ཐད་ཀར་ཟུར་དང་ཟུར་ལོགས་དང་། །སྟེང་འོག་རང་གི་ལུས་རྣམས་ལ། །གནས་

པའི་བརྡས་འདི་ཤེས་པར་བྱ། །དེས་འདི་བརྡ་ཅན་འབྱུང་བ་ན། །ལྕགས་རྣམས་ལ་ནི་ཁབ་ལེན་བཞིན། །རྣམ་རྟོག་དབང་གིས་གནས་རྣམས་གཡོ། །ཇི་ལྟར་གནས་གཞི་མེད་བཞིན་དུ། །མཁའ་ལ་འདབ་སྐྱོད་རླུང་བྱུང་ལྟར། །རྣམ་པར་རྟོག་པས་བསྐྱོད་པ་ན། །
བཱ་ཡ་ཏ་ཞེས་བྱ་བའི་རླུང་། །ལུས་ལ་རབ་ཏུ་གཡོ་བར་འགྱུར། །གཡོ་རླུང་རབ་ཏུ་གཡོས་པ་ཡིས། །བྱེད་པ་ཀུན་དུ་བསྐྱོད་པ་ན། །དོག་དང་ཡངས་པའི་གནས་རྣམས་སུ། །ཕྲད་དང་ཅུང་ཟད་ཕྲད་པར་བྱེད། །དེ་ཚེ་ནིཿཤྭཱ་སཱ་ཞེས་པའི། །རླུང་དང་ལྷན་ཅིག་འབྱུང་བ་སྟེ། །ཇི་ལྟར་གཟུགས་ལ་
འབྱུང་བ་བཞིན། །ང་རོ་ལ་ནི་བརྟེན་བཞིན་དུ། །རྣམ་རྟོག་རང་གི་སྣང་ཆ་ལས། །གཟུགས་བརྙན་བཞིན་དུ་ཆ་མཉམ་སྐྱེ། །གནས་རྣམས་དང་ནི་བྱེད་པ་དང་། །རྣམ་པར་རྟོག་དང་རླུང་གཉིས་དང་། །ང་རོ་གསལ་བྱེད་སྣང་ཆ་ཡིས། །ངག་གི་འདུ་བྱེད་ཀུན་དུ་བསྐྱེད། །རྒྱུ་བདུན་དག་ལས་འབྱུང་
བ་ནི། །གནས་རྣམས་བཞི་ཡི་རྒྱུ་ཡིན་ཏེ། །བྱེད་པ་འབྱིན་པར་བྱེད་པའི་རྒྱུ། །དེ་བཞིན་རྣམ་རྟོག་བསྐུལ་བའི་རྒྱུ། །ཇི་ལྟར་ཤིང་ལ་རླུང་བཞིན་དུ། །བྱེད་པ་བསྐྱོད་རྒྱུ་བཱ་ཡ་ཏའོ། །སྐྱེས་བུ་དང་ནི་བཞོན་པ་བཞིན། །ལྷན་ཅིག་འབྱུང་རྒྱུ་ནིཿཤྭཱ་སཱ། །ང་རོ་རྣམས་དང་གསལ་བྱེད་ནི། །ཀུན་དུ་ཁྱབ་
པར་འགྲོ་བའི་རྒྱུ། །སྣང་ཆ་འདྲ་བར་འབྱུང་བ་ནི། །སྐལ་བ་མཉམ་པའི་རྒྱུ་ཞེས་བྱ། །དེ་ལ་གདངས་ཀྱི་བྱེ་བྲག་ནི། །རྒྱུ་རྣམས་དག་གིས་ཕྱེ་བ་སྟེ། །སྔོན་དུ་སོང་བར་རིག་པར་བྱ། །དེ་ལ་རྒྱུ་དང་རང་བཞིན་ནི། །ང་རོ་དྲང་པོ་ལས་བྱུང་བ། །ཀ་སོགས་སྡེ་ནས་རིམ་བཞིན་དུ། །སྡེ་ལྔ་དག་དང་
ཨནྟསྠ། །ཨཱུཥྨ་ཎ་དང་མཐར་ཟད་དེ། །གནས་ཀྱི་ཡི་གེ་སུམ་ཅུ་བཞི། །མིང་དང་ཕོ་ཞེས་བྱ་བ་སྟེ། །དེ་ལ་དང་པོའི་སྡེ་པ་དང་། །ཨཱུཥྨ་ཎ་ཡི་བཞི་པ་ནི། །བཅད་པར་བཅས་པ་མགྲིན་པ་ལས། །གཉིས་པ་དག་དང་ཨནྟསྠའི། །དང་པོ་ཨུཤྨའི་གསུམ་པ་རྣམས། །རྐན་ལས་རབ་ཏུ་འབྱུང་བ་
ཡིན། །གསུམ་པ་དག་དང་ཨནྟསྠའི། །གཉིས་པ་ཨུཥྨའི་གཉིས་པ་རྣམས། །སྤྱི་བོ་ལས་ནི་རབ་ཏུ་འབྱུང་། །བཞི་པ་དང་ནི་ཨནྟསྠའི། །གསུམ་པ་ཨུཥྨའི་གསུམ་པ་རྣམས། །སོ་ཡི་ཆ་ལས་ཀུན་དུ་འབྱུང་། །ལྔ་པ་དང་ནི་ཨནྟསྠའི། །བཞི་པ་མཆུ་ལས་བྱུང་བ་ཡིན། །མཐར་ཟད་

མགུལ་དང་སྤྱི་བོ་ལས། །སྡེ་ལྔ་དག་ལས་ལྔ་ལྔ་ཡང་། །དང་པོ་རང་གནས་དྲག་པ་སྟེ། །གཉིས་པ་འབྲིང་དང་སྤྱི་བོའི་ཆ། །གསུམ་པ་རྣམས་ནི་ཞན་པ་སྟེ། །མ་ཧཱ་པྲཱ་ཎ་ཞེས་བྱ་བ། །བཞི་པ་རང་གནས་ཁོང་ནས་སོ། །ཨ་ནུ་སྭ་ར་ཞེས་བྱ་བ། །ལྔ་པ་རང་གནས་སྣ་ནས་འབྱུང་། །མགུལ་
པ་སྣ་དང་གླད་པའི་སྦུབས། །དོག་པ་ཡིན་ཏེ་ཡངས་བ་གཞན། །རྐན་དང་སོ་དང་ལྕེ་དང་མཆུ། །ཕྲད་པ་ཡིན་ཏེ་གཞན་ཞེས་བྱ། །གནས་ཆའི་ཡི་གེ་ཇི་སྙེད་ཀྱང་། །ང་རོ་གཅིག་གིས་བཅིངས་པ་ལ། །དེ་ལའང་ཡི་གེ་གཅིག་ཅེས་བརྗོད། །ཤིན་ཏུ་ཕྲ་བའི་རྣམ་པའི་ཆ། །དེ་ལའང་ཡི་
གེ་གཅིག་ཅེས་བྱ། །སྒྲ་འདི་དག་ལ་འདྲེན་པའི་ཆ། །ཨལྤ་པྲཱ་ཎ་གཉིས་གཅིག་ཡིན། །མ་ཧཱ་པྲཱ་ཎ་གཅིག་ཉིད་ཡིན། །ཨ་ནུ་སྭ་ར་རྔུབ་པའི་སྒྲ། །བི་སརྫྫ་ནི་བཅད་པའོ། །ཧྲ་སྭ་ཐ་མལ་སྒྲ་ཡིན་ཏེ། །དཱི་རྒྷ་ཏ་ནི་གཉིས་ཀྱི་ཡུན། །པླུ་ཏ་ནི་དེ་བཞིན་གསུམ། །ཨུ་དཱཏྟ་ནི་མཚུངས་གཉིས་
གཅིག །ཨ་ནུ་དཱཏྟ་ཕྱེད་ཆ་ཡིན། །སྭ་རི་ཏ་ནི་རང་སྒྲའོ། །སྣ་ལྡན་ཨ་ནུ་སྭ་རའི་ཆ། །ཨ་ལྡན་ཨ་མེད་ཅེས་བྱ་བ། །ཆེ་བ་དག་དང་ཆུང་བའི་མིང་། །དྲང་པོ་དག་ལ་ཇི་ལྟ་བ། །ང་རོ་གཞན་ལའང་དེ་བཞིན་ཏེ། །དེ་ལ་ཅུང་ཟད་གནས་ཆ་ནི། །རྐན་དང་མགུལ་པའི་ཆ་དག་ལས། །བསྒྲེང་
དང་བཀུག་པའི་ང་རོ་འབྱུང་། །དེ་བཞིན་མཆུ་ལས་བསྟོད་སྨད་དོ། །བསྒྲིམས་པ་སྤྱི་བོའི་ཆ་ལས་ཏེ། །གློད་པ་དག་ནི་སོ་ཡིན་ནོ། །འདི་དག་གིས་ནི་བཅིངས་པ་ན། །ཆ་ནི་སྔོན་དུ་བརྗོད་པ་བཞིན། །མི་དེ་མུ་དོ་རྀ་ལི་ཡི། །སྒྲ་ཡི་ཆ་དང་ཅི་རིགས་སྦྱར། །ཨ་ཡི་ཆ་ནི་མདུན་དུ་དཔྱད། །ལྷག་
མ་རྣམ་པའི་ཆ་ཞེས་བྱ། །དེ་དག་རེ་རེའི་ཆ་ཡིན་ཏེ། །གང་ཡང་ཕན་ཚུན་བརྟེན་པ་ནི། །ཀུན་དུ་ཁྱབ་ཕྱིར་སྤྱི་ཡི་ཆ། །དེ་དག་ཡི་གེའི་བྱེ་བྲག་སྟེ། །རྣམ་གྲངས་དུ་མ་མེད་པ་དང་། །མིང་ཚིག་གསལ་བར་བྱེད་པ་དང་། །དོན་རྣམས་རྗོད་པར་བྱེད་པའི་ཕྱིར། །ཡི་གེ་ཞེས་ནི་བརྗོད་པ་ཡིན། །རང་
བཞིན་ལས་དང་དགོས་ཆེད་ཀྱི། །ངེས་ཚིག་ཡིན་ཏེ་གོ་རིམས་བཞིན། །ཚོགས་དང་ལུས་དང་འདུས་པ་ནི། །རྣམ་གྲངས་དག་སྟེ་དེ་བཞིན་སྦྱར། །ཇི་ལྟར་རྡུལ་ལས་གོང་བུ་བཞིན། །ཡི་གེ་འདུས་པར་གྱུར་པ་ན། །མིང་ནི་རབ་ཏུ་འགྲུབ་པར་འགྱུར། །གང་ཞིག་རྣམ་ཆ་འདུས་པ་ཡིས། །དོན་གྱི་ངོ་བོ་

ཉིད་བརྗོད་ན། །རྣམ་ཆ་མང་ངམ་ཉུང་གྱུར་ཀྱང་། །དེ་ནི་མིང་ཞེས་རབ་ཏུ་བརྗོད། །དེ་ཡང་མིང་གི་ཐོག་མ་དང་། །རྗེས་སུ་གྲུབ་པ་རྣམ་པ་གཉིས། །ཐོག་མ་འདོད་རྒྱལ་མིང་ཡིན་ཏེ། །རྗེས་གྲུབ་དག་ནི་དོན་ལྡན་དང་། །རྣམ་པ་གཉིས་ཀར་འདོད་པ་ཡིན། །དེ་ནི་ངེས་ཚིག་ཡོད་
མེད་དོ། །གང་ཞིག་གཞན་ལ་མ་བརྟེན་པར། །བླ་དྭགས་གང་བྱས་ཐོག་མའོ། །དེ་ལ་བརྟེན་པ་རྗེས་གྲུབ་པ། །འདོད་རྒྱལ་དོན་ལྡན་གཉིས་སུ་འདོད། །འདོད་རྒྱལ་དག་ཏུ་མཚུངས་མོད་ཀྱི། །མ་བརྟེན་ཕྱིར་ན་གྲུབ་པ་སྟེ། །མིང་གཞན་གང་ལའང་མ་བརྟེན་པ། །གཞན་གྱིས་འགལ་བ་མེད་
ཕྱིར་རོ། །འཐད་པར་སྒྲུབ་པའི་རིགས་པ་དག །ཆོས་ཉིད་ལ་ནི་བརྟེན་པ་བཞིན། །དོན་ལྡན་མིང་ཡང་དེ་བཞིན་དུ། །འདོད་རྒྱལ་ཐོག་མ་ཉིད་ལ་བརྟེན། །རྗེས་སུ་གྲུབ་པའི་འདོད་རྒྱལ་ནི། །ལོག་པར་སྒྲུབ་ཕྱིར་ངེས་ཚིག་བཞག །འདོད་རྒྱལ་ཐོག་མའི་མིང་གང་ཡིན། །ངེས་ཚིག་གཞི་
མེད་ཆོས་ཉིད་བཞིན། །དེ་ལྡན་དོན་ལྡན་ངེས་ཚིག་ནི། །དེ་ཡིན་ཕྱིར་དང་དེ་ཡོད་ཕྱིར། །དེ་ལ་ཕན་ཕྱིར་དེ་བྱེད་ཕྱིར། །དེ་བྱའི་ཕྱིར་དང་དེ་འདྲའི་ཕྱིར། །དེ་དེའི་ཕྱིར་དང་དེ་ཉིད་ཕྱིར། །དེ་ཡི་མིང་ནི་དེ་སྐད་ཅེས། །རྟགས་ཀྱི་སྒོ་འམ་མེད་ཀྱང་རུང་། །སྐབས་ཀྱི་མཐུ་ཡིས་ངེས་ཚིག་བརྗོད། །ཡིན་དང་
ངོ་བོ་བསྒྲུབ་པ་དང་། །དངོས་པོའི་རྐྱེན་ནི་དངོས་ཀྱི་མིང་། །ལྷག་མ་བཏགས་པ་ཞེས་བྱའོ། །རང་གི་ངོ་བོའི་ངེས་ཚིག་དང་། །བཏགས་པའི་མིང་གཞན་སྤོང་བྱེད་དང་། །རང་གི་ཁྱད་པར་གཞན་སེལ་བས། །ཡིན་དང་ངོ་བོ་སྒྲུབ་པ་དང་། །དངོས་པོའི་རྐྱེན་རྣམས་གོ་རིམས་བཞིན། །རྟེན་ལ་
བརྟེན་པ་བཏགས་པ་དང་། །བརྒྱུད་པའི་རྒྱུ་ལ་འབྲས་བུ་དང་། །དངོས་ཀྱི་རྒྱུ་ལ་དེ་བཞིན་དང་། །འབྲས་བུའམ་བྱ་བར་གྱུར་པ་ལ། །དེ་ལ་རྒྱུ་ཡི་མིང་བཏགས་པའམ། །དཔེ་གཞན་གྱི་ནི་མིང་དག་དང་། །དོན་འདི་དག་གི་སྒོ་ནས་ནི། །ཡོད་དང་དེ་ལ་ཕན་པ་དང་། །བྱེད་དང་ལས་སུ་བསྒྲུབ་པ་དང་། །
འདྲ་བར་སྦྱར་དང་རིམ་བཞིན་ནོ། །གལ་ཏེ་མིང་གཉིས་འདུས་པའམ། །འོན་ཏེ་མང་པོ་འདུས་ཀྱང་རུང་། །དེ་དག་ཁྱད་པར་རྗོད་བྱེད་ན། །ཚིག་ཅེས་རབ་ཏུ་བརྗོད་པ་སྟེ། །ཕྲད་རྣམས་དག་དང་བཅས་པའང་ཡིན། །དེ་ལ་ཚིག་གི་སྦྱོར་བ་བཅུ། །འབྲུ་མང་པོ་དང་ཚིག་སྡུད་དང་། །ཁྱད་པར་

དག་དང་ཡན་ལག་དང་། །གཞི་དང་གཞི་གཅིག་བསྡུ་བ་དང་། །གཞི་མཐུན་པ་དང་དེའི་སྐྱེས་བུ། །ཟླས་དབྱེ་བ་དང་ཕྱོགས་ཙམ་མོ། །ཚིག་གཉིས་མང་པོའི་རབ་དབྱེ་བ། །རང་མིང་ལྡན་དང་མི་ལྡན་དང་། །ཕྱོགས་དང་རྣམ་གྲངས་ཕན་ཚུན་དང་། །ཚིག་མང་པོ་སྟེ་རྣམ་མང་པོ། །མཐུན་
དང་ཐ་དད་དབྱེ་བ་ཡིས། །ཕྱོགས་ཀུན་དང་ནི་ཕྱོགས་གཅིག་ལས། །རབ་ཏུ་དབྱེ་བ་བཞིར་འདོད་དོ། །བྱེད་པ་དྲུག་གིས་སྦྱར་བ་ནི། །ཀུན་ལ་རབ་ཏུ་ལྡན་པ་སྟེ། །བརྒྱ་དང་དྲུག་ཅུ་རྩ་བརྒྱད་ལས། །དུས་གཅིག་ཏུ་ནི་སུམ་ལྡན་གཟུང་། །ཚིག་བསྡུ་བ་ནི་རྣམ་པ་ལྔ། །གཉིས་དང་རྣམ་
གྲངས་བྱེ་བྲག་དང་། །གཞན་དང་བྱེད་པའི་ཚིག་ཡིན་ནོ། །ལས་ལ་སོགས་པའི་དབྱེ་བ་ཡིས། །གཉིས་པ་ལ་སོགས་བདུན་པའི་མཐའ། །བྱེད་པ་དྲུག་ཏུ་འདོད་པ་སྟེ། །ཚིག་སྡུད་ཙམ་དུ་ཤེས་པར་བྱ། །སྔ་མ་ཕྱི་མའི་སྦྱོར་བ་ཡིས། །ཁྱད་པར་བསྡུ་བ་རྣམ་པ་གཉིས། །འབྲེལ་པ་
དག་དང་གོ་རིམས་དང་། །དོན་དང་གྲགས་པའི་ཡན་ལག་ནི། །བསྡུ་བ་བཞིའོ་གྲགས་པ་ཡང་། །འཇིག་རྟེན་བསྟན་བཅོས་དག་ལ་གཉིས། །རིགས་གསལ་བྱས་དང་མ་བྱས་པའི། །གཞི་བསྡུ་བ་ནི་གཉིས་ཡིན་ནོ། །ཕྱོགས་གཅིག་དག་ཏུ་བྱེད་པ་དང་། །སོ་སོ་ཕྱོགས་གཅིག་བྱེད་པ་
ཡིས། །གཞི་གཅིག་བསྡུ་བ་གཉིས་སུའོ། །ཁྱད་པར་ཁྱད་པར་ཅན་གཉིས་དང་། །ཁྱད་པར་རྣམ་གཉིས་གཞི་གཅིག་ཏུ། །མཐུན་པར་གོ་བར་བྱ་བ་ལ། །སྦྱོར་བའི་གཞི་མཐུན་རྣམ་པ་གཉིས། ངོ་བོ་འམ་ནི་ཆོས་ཀྱང་རུང་། །ཐ་དད་གོ་བར་བྱེད་པ་ཡི། །དེ་ཡི་སྐྱེས་བུ་གསུམ་
ཡིན་ཏེ། །བྱེད་པའི་ཚིག་དང་ལས་འཛིན་དང་། །བ་གཉིས་པ་ཞེས་བྱ་བའོ། །དེ་ལ་བྱེད་པ་བརྒྱད་ཡིན་ཏེ། །དང་པོ་ལ་སོགས་བདུན་པའི་མཐའ། །རྣམ་དབྱེ་སྦྱོར་བ་བདུན་པོ་དང་། །ཕྲད་དང་སྦྱོར་བ་བྲལ་བའི་ཕྱིར། །གཞན་དང་སྦྱོར་མེད་བོད་པ་སྤང་། །དགག་པ་དང་ནི་བརྒྱད་དུ་
འདོད། །མཚན་ཉིད་དབང་གིས་ཕྱེ་བ་ཡིས། །མ་ཡིན་དགག་པ་བཅུ་བཞི་དང་། །མཚན་ཉིད་དབྱེ་བ་མེད་མོད་ཀྱི། །ཡུལ་དང་དུས་ཀྱི་ཕྱེ་བ་ཡིས། །མེད་པར་དགག་པ་བཅུ་གཅིག་དག །གང་ལྡན་དགག་པར་འདོད་པའོ། །གཞན་དང་མི་མཐུན་གཉེན་པོ་དང་། །ཆུང་དང་ཕྲ་

དང་ཉུང་བ་དང་། །ཡུན་ཐུང་ལྷག་མ་མེད་པ་དང་། །མཐའ་དག་མིན་དང་བྲལ་བ་དང་། །དམན་དང་ཞན་དང་ཞུམ་པ་དང་། །འདྲ་བ་དག་ལས་དགག་པ་ནི། །མ་ཡིན་དགག་པར་འདོད་པའོ། །རྒྱུ་འདྲ་བ་དང་རང་བཞིན་དང་། །སྐབས་དང་རྟེན་གྱི་དབྱེ་བ་ཡིས། །སྔ་དང་
ཞིག་ནས་མེད་པ་དང་། །དབྱེ་བ་རྣམ་པ་བརྒྱད་ཡིན་ཏེ། །ཕན་ཚུན་དག་ལ་རང་བཞིན་དང་། །རྒྱུ་དང་རང་བཞིན་གཉིས་དབྱེ་བའི། །ཤིན་ཏུ་མེད་དང་བཅུ་གཅིག་ནི། །མེད་པར་དགག་པར་འདོད་པའོ། །ཀུན་ཏུ་ལྡོག་ཕྱིར་དགག་པ་ཡིན། །དེ་ཉིད་གཞན་དུ་མི་བརྗོད་དང་། །འདྲ་བ་གཞན་
དང་བྱེ་བྲག་གི། །ཚིག་སྦྱོར་དབྱེ་བ་ལས་འཛིན་ནོ། །གྲངས་དང་བསྡུས་དོན་སྦྱོར་བ་ཡིས། །གཅིག་དང་ཐ་དད་སྦྱོར་བྱེད་པ། །བ་གཉིས་པར་ནི་འདོད་པའོ། །བསྡུ་བའི་ཕྱིར་དང་དབྱེ་ཕྱིར་དང་། །ཉེ་བར་ཐ་དད་སྦྱོར་བའི་ཕྱིར། །འདས་མ་ཐག་དང་གཞན་དག་དང་། །ལན་གྲངས་གཞན་
ལ་སྦྱོར་བྱེད་པ། །ཟླས་དབྱེ་བ་ཞེས་འདོད་པ་ཡིན། །རང་གི་རིགས་ཙམ་སྡུད་བྱེད་ཅིང་། །ཕྱོགས་གཞན་ཀུན་དུ་སྤོང་བ་དང་། །རིགས་ཀྱི་ཚད་ཀྱང་མི་འཛིན་པ། །ཕྱོགས་ཙམ་སྟོན་པའི་སྦྱོར་བའོ། །གང་ཞིག་རང་གི་དོན་མེད་ཅིང་། །དོན་གྱི་མིང་ལ་གསལ་བྱེད་པ། །ཚིག་གི་ཕྲད་ཅེས་བྱ་བ་
སྟེ། །དེ་ལྡན་ཕྲད་དང་བཅས་པ་ཡིན། །དེ་ལ་ཕྲད་ཀྱི་འཇུག་པ་ནི། །གང་ནི་འདྲི་བའི་ཚིག་གི་དོན། །སྤྱི་ལ་ཁྱབ་པར་སྦྱོར་བ་སྟེ། །ཟླ་སྡུད་པ་ལ་ཀུན་དུ་སྤང་། །ཅི་ལ་སོགས་པའང་དེ་བཞིན་ཏེ། །ཁྱབ་པ་སྐབས་ཀྱིས་བརྩི་བར་བྱ། །དེ་ཞེས་བྱ་བའི་ཚིག་གི་དོན། །ཐ་སྙད་དངོས་
དང་དུས་འཇུག་གསུམ། །འདས་དང་རྣམ་གྲངས་གཞན་ཅན་དང་། །ལྷག་མ་དག་དང་བཅས་པའོ། །བདེན་པ་དག་དང་གསང་བ་དང་། །བདག་གི་བ་དང་ཕ་རོལ་པོ། །དངོས་པོ་དག་ལ་འཇུག་པ་བཞི། །འདས་པ་དང་ནི་མ་འོངས་པའི། །དུས་གཉིས་ལ་ནི་འཇུག་པ་གཉིས། །
བདག་ཉིད་ད་ལྟར་ཉིད་ལ་སྤང་། །དངོས་པོའི་དུས་ནི་མི་འདོར་ཏེ། །ཀུན་ལ་རབ་ཏུ་སྦྱར་བར་བྱ། །འདི་ཚིག་འདས་དང་མ་འོངས་དང་། །སྐབས་ཀྱི་དངོས་གཞན་དག་ལ་འཇུག །གང་ཞིག་ལ་ནི་ལྟོས་བྱས་པའི། །ཉེ་བ་དག་དང་མངོན་སུམ་པའི། །དངོས་པོ་དག་ཀྱང་གཉིས་ཡིན་ནོ། །

སྤང་བར་བྱ་བ་འདི་ལྟ་སྟེ། །ལྐོག་ཏུ་གྱུར་དང་རིང་བ་དང་། །གལ་ཏེ་བསྟན་བྱ་དུས་ཉིད་ན། །འདས་དང་མ་འོངས་སྤང་བར་བྱ། །དེ་རྣམས་ཀུན་ལ་བསྒྱུར་བ་ལྡན། །ད་ནི་སྐབས་སུ་བབ་པའི་ཚིག །ད་ལྟར་བྱུང་ལ་སྦྱོར་བ་སྟེ། །འདས་པའི་སྐབས་ལ་རྣམ་པར་སྤང་། །ན་ཞེས་བྱ་
བའི་ཚིག་གི་དོན། །དམིགས་ཀྱིས་འབྱེད་དང་རྒྱུ་མཚན་དང་། །རྒྱུ་མཚན་དོན་གྱིས་བསྟན་པ་དང་། །ལས་དང་ཆེད་དང་རྟེན་གནས་དང་། །ཕྱི་ཚིག་དེ་གཞན་སོགས་སྟོན་དང་། །འོས་པར་དཀའ་བ་ཆག་འཛིན་ལས། །ཕྱི་ཚིག་ངེས་པར་བྱེད་པ་དང་། །དེ་ལས་བཟློག་པ་ཉིད་དང་
ནི། །འགལ་བའམ་མི་འགལ་སྟོན་པ་དང་། །སྨོན་དང་འདྲི་དང་ཐེ་ཚོམ་གཞི། །ཚེ་སྐབས་རྣམས་ལ་འདི་མཐོང་ངོ་། །སྟེ་ནི་ལྷག་མ་ཡོད་པ་སྟེ། །མཚམས་སྦྱོར་བ་དང་དམ་འཆའ་དང་། །གཞན་འདྲེན་པ་དང་གསུམ་དུ་འདོད། །བྱེད་དང་བྱ་བའམ་ཡང་ན་ནི། །བྱ་བ་ཉིད་དུ་སྦྱོར་བ་
གང་། །ཚིག་གཉིས་རིམ་མམ་དུས་གཅིག་ཏུ། །སྦྱོར་བར་བྱེད་པ་མཚམས་སྦྱོར་ཡིན། །གང་ཞིག་གིས་ནི་སྔ་མ་ལ། །གསལ་བར་བྱེད་པ་དམ་འཆའ་བ། །ལྷག་མ་ཡོད་ཙམ་སྟོན་གྱུར་ཅིང་། །དེ་ལས་གཞན་གྱུར་གཞན་འདྲེན་པའོ། །ད་ནི་འབྱེད་དང་སྡུད་པ་དང་། །རྒྱུ་མཚན་ཚེ་
སྐབས་གདམས་ངག་ལྔ། །དེ་ཉིད་དང་ནི་གཞན་དག་དང་། །ལན་གྲངས་གཞན་ལ་སྦྱོར་བ་ཡི། །སྡུད་པའི་དང་ཡང་གསུམ་དུ་འདོད། །ནི་ནི་དགར་དང་བསྣན་པའི་ཚིག །དམིགས་སམ་ངེས་པར་འཛིན་པ་སྟེ། །ཕྱི་མའི་ཚིག་དང་སྦྱར་བར་བྱ། །ཀྱང་དང་ཡང་ནི་སྡུད་པའི་ཚིག །
མི་མཐུན་མཐུན་པར་སྟོན་པའང་ཡིན། །འདས་པའམ་མ་འོངས་གཞན་དག་ལས། །ཅི་རིགས་དག་ཏུ་བསྡུ་བར་བྱ། །ཅི་རིགས་དག་ཏུ་བསྡུ་བར་བྱ། །ཡང་ཞེས་བྱ་བ་བསྣན་པ་ཡིན། །ངེས་པར་གཟུང་བའི་ཚིག་གི་དོན། །གཞན་མི་ལྡན་དང་གཞན་ལ་མིན། །ལྡན་པ་ཙམ་དུ་འཛིན་བ་དང་། །མ་ངེས་པ་ནི་རྣམ་པ་
གཉིས། །བདེན་ཞིང་མི་སླུ་བ་ཉིད་དང་། །ཁོ་ན་དག་ནི་རྣམ་པ་དྲུག །ཉིད་ནི་དེ་བཞིན་ཅུང་ཟད་དུ། །ཕྱི་ཚིག་ཐ་དད་མིན་པ་དང་། །དངོས་པོའི་རྐྱེན་དུ་འགྱུར་པའོ། །ཚད་འཛིན་ལྷག་པ་འདོད་པ་ཡིན། །ཚད་འཛིན་ལྷག་པ་འགོག་པ་ཡི། །ཙམ་ཞེས་བྱ་བ་རྣམ་པ་གཉིས། །འབའ་ཞིག་ལ་སོགས་དེ་བཞིན་སྦྱར། །ཁྱབ་

པ་སྐབས་ཀྱིས་བརྩི་བར་བྱ། །ཡང་དག་ཡོངས་སུ་ཀུན་དུ་སོགས། །སྒྲ་བཞིན་དང་ནི་ཕྲད་དུའོ། །ཚུལ་ནི་འདྲ་དང་སྨད་པ་དང་། །སྒོ་དང་སྡོམ་པ་མཚན་ཉིད་དང་། །ཐབས་དང་རིགས་པ་དོན་དང་འདོད། །ལེགས་པ་དག་ལ་འཇུག་པ་ལས། །འདྲ་བར་སྦྱར་བ་
ཕྲད་དུ་འདོད། །བཞིན་ལ་སོགས་པའི་ཚིག་གི་དོན། །མ་ནོར་བ་དང་ཡིན་པ་དང་། །འདྲ་བ་དག་ཏུ་སྦྱོར་བའོ། །ཅིང་ལ་སོགས་པ་བསྡུ་བ་དང་། །མཚམས་སྦྱོར་དག་ཏུ་བྱེད་པ་ཡིན། །ལ་ནི་གཉིས་པ་བཞི་པ་དང་། །བདུན་པ་སྡུད་དང་སྦྱོར་བ་དང་། །སྨོན་དང་ཚད་འཛིན་གཞི་དང་ནི། །
ཚེ་སྐབས་དག་ཏུ་འདོད་པ་ཡིན། །ཀྱི་ནི་འབྲེལ་པའི་དོན་ཡིན་ཏེ། །ཀྱིས་ནི་བྱེད་པར་འདོད་པ་ཡིན། །མི་མཐུན་རྒྱན་ནི་གསུམ་ཆར་ལའོ། །ལས་ནི་རྒྱུ་དང་འབྱུང་ཁུངས་དང་། །དགར་བ་ཡིན་ཏེ་ནས་དེ་བཞིན། །སྡུད་པ་དག་དང་མཚམས་སྦྱོར་ནི། །ནས་ལ་ཅུང་ཟད་ལྷག་པ་ཡིན། །
གཏན་ཚིགས་དག་ཏུ་འགྱུར་བ་ནི། །དྲུག་པ་འབའ་ཞིག་མ་གཏོགས་པའོ། །དུ་ལ་སོགས་པ་ལ་དང་མཐུན། །དེ་ཉིད་དག་ནི་ལྷག་པ་ཡིན། །དེ་བཞིན་ལྷག་བཅས་ལ་ལའོ། །འོ་ལ་སོགས་པ་ཟླ་སྡུད་པའོ། །འོ་ན་ཁོང་དུ་ཆུད་པའི་ཚིག །འམ་ཞེས་བྱ་བ་འབྱེད་སྡུད་ཡིན། །
དག་དང་རྣམས་ནི་མང་པོའི་ཚིག །སོགས་ནི་མཐའ་དག་སྡུད་པ་ཡིན། །པ་འམ་ཅན་ནི་བདག་པོའམ། །ལྡན་པའི་དོན་དུ་སྦྱར་བར་བྱ། །བ་ནི་སྤྱི་རུ་གཞག་པ་སྟེ། །ཡུལ་དུ་ངེས་པར་མ་བཟུང་བའོ། །ཟ་བ་བཟའ་དང་ཟ་པོ་བཞིན། །མ་ནིང་དག་ཏུ་གཞག་པར་བྱ། །གལ་ཏེ་ཕྲད་གཉིས་
འདུས་པའམ། །ཡང་ན་མང་པོ་འདུས་པ་ན། །སྔ་ཕྱི་ཕན་ཚུན་ཟིལ་གནོན་དང་། །རང་གི་ཆ་ལྡན་དག་ཏུ་སྦྱར། །གང་ལ་དམིགས་འཛིན་མི་བྱེད་དང་། །དམིགས་འཛིན་ཏེ་ན་ཕྲད་གྱུར་ན། །གཉིས་པར་གྱུར་པའི་མཐུ་བཞིན་ནོ། །ཕྱོགས་གཅིག་ཁོང་དུ་ཆུད་པ་ལས། །ཕྱོགས་གཅིག་འདྲི་
པར་བྱེད་པ་ནི། །འོ་ན་ཞེས་པའི་ནུས་པའོ། །དེ་ལ་དམིགས་འཛིན་སྔ་མ་བཞིན། །གཞན་འདྲེན་བྱེད་པ་དེ་ཡིན་ཏེ། །ན་ཡིས་ཕྱོགས་གཅིག་དག་ཏུ་བྱེད། །དེ་གཉིས་ལྡན་པའི་ཕྲད་རྣམས་ནི། །དམིགས་འཛིན་ལྡན་མི་ལྡན་གཉིས་ཏེ། །སྔ་མ་དོན་གྱིས་བསྡུ་བར་བྱ། །ཡོད་ན་སྔ་

མ་དངོས་སུ་བསྡུ། །གལ་ཏེ་ཇི་སྟེ་འོན་ཏེ་དད། །དེ་སྟེ་ན་ཞེས་བྱ་བར་སྦྱར། །འོན་ཀྱང་འོ་ན་ཡང་ཞེས་པ། །བསྡུ་བ་གཉིས་ལྡན་གཉིས་བསྡུ་བྱ། །མཐུན་དང་ཐ་དད་སྐབས་ཀྱི་མཐུ། །གང་ལྟར་ཇི་ལྟར་དེ་ལྟར་དང་། །དེ་བཞིན་དེ་སྐད་ལ་སོགས་པ། །ཇི་སྐད་བསྣན་པའི་ཆ་གཉིས་
ལྡན། །དེ་ལ་སོགས་པའི་ཕྲད་རྣམས་ཀུན། །ཟིལ་གནོན་གྱུར་ཏམ་ཆ་ལྡན་ཡང་། །དགོས་པ་རེ་རེར་དྲིལ་བྱས་ཏེ། །དོན་ཚིག་སྦྱོར་བ་བཅུ་པོ་དག །ཕྲད་ཀྱི་སྦྱོར་བ་ཇི་ལྟ་བ། །དེ་ལྟར་ཕྲད་གཉིས་འདུས་པ་འམ། །མང་པོ་འདུས་པར་གྱུར་ཀྱང་རུང་། །དེ་ལྡན་ལྷག་པ་མི་སྟོན་ཕྱིར། །
སྐབས་དང་ཚིག་ཤུགས་བརྟགས་ནས་ནི། །བློ་ལྡན་རྣམས་ཀྱིས་གང་རིགས་སྦྱར། །དཔེར་ན་སྐྱེས་བུ་གང་ཞིག་གིས། །གཟུགས་ཀྱི་བྱེ་བྲག་ཤེས་འདོད་ན། །ཕྲ་རྡུལ་ཆོས་ལ་མཚན་ཉིད་དུ། །དེ་ཤེས་ཆེ་རྡུལ་གོང་བུ་དང་། །གོང་ཆེན་དག་གི་མཚན་ཉིད་དང་། །ལས་རྣམས་འབད་པ་
མེད་པར་ཤེས། །དེ་ཤེས་སྐབས་ཀྱི་བྱ་བ་གང་། །སྦྱོར་བ་དག་ལ་མི་འཇིགས་བཞིན། །སྐྱེས་བུ་སྨྲ་བར་འདོད་པ་ཡིས། །གཞི་མཐའི་ཡི་གེའི་བྱེ་བྲག་དག །ལེགས་པར་ཁོང་དུ་ཆུད་པ་ན། །དེ་འདུས་མིང་དང་དེ་བཞིན་ཚིག །ཤློཀ་དང་ནི་རབ་བྱེད་སོགས། །མིང་ཚིག་ཡི་གེ་མཚུངས་
པའི་ཕྱིར། །ཚིག་སྦྱོར་འབད་པ་མེད་པར་འགྱུར། །དེ་ཕྱིར་འདི་ནི་བསླབ་ནས་ཤེས། །སྨྲ་མཆོག་རྗེས་སྨྲ་རྣམས་ཀྱིས་བཤད། །དོན་ལ་འཇུག་བྱེད་སྨྲ་བ་རྣམས་ཀྱི་སྒོ། །བློ་འབྱེད་གཏི་མུག་གཅོད་པས་མཚོན་ཆ་འདྲ། །མི་འཇིགས་སྙེམས་པ་སྦྱིན་བྱེད་དཔུང་དང་གོ། །དོན་
ནོར་སྨྲ་བས་མི་ཉམས་བརྟན་པའི་མཁར། །སྨྲ་མཆོག་རྗེས་སྨྲ་རྣམས་ཀྱིས་རྗེས་སྨྲས་པས། །སྒྲ་ཉིད་དང་ནི་དོན་ལ་འཁྲིད་པ་ཡི། །འགྲོ་ཀུན་མཐུ་གཉིས་རབ་ཏུ་རྒྱས་པར་ཤོག །པཎྜི་ཏ་དྲན་པ་ཡེ་ཤེས་གྲགས་པས་མཛད་པ་སྨྲ་བའི་སྒོ་མཚོན་ཆ་ལྟ་བུ་ཞེས་བྱ་བ་རྫོགས་སོ།། །།
རྒྱ་གར་གྱི་མཁན་པོ་དྲན་པའི་ཡེ་ཤེས་གྲགས་པས། བླ་མ་ནོར་བཟངས་གྲགས་པ་ལས་ཐོས་ཏེ། སློབ་མ་གཞོན་ནུ་གྲགས་པའི་དོན་དུ། མིང་གི་སྦྱོར་བ་ནི་ཅུང་ཟད་གཞག །ཕྲད་ཀྱི་སྦྱོར་བ་ནི་ཅུང་ཟད་བཤད་ནས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།

༄༅། །རྒྱ་གར་སྐད་དུ། ཝ་ཙ་ན་མུ་ཁ་ཡུ་དྷོ་བ་མ་ནཱ་མ་པྲྀཏྟི། བོད་སྐད་དུ། སྨྲ་བའི་སྒོ་མཚོན་ཆ་ལྟ་བུ་ཞེས་བྱ་བའི་འགྲེལ་པ། སྨྲ་བའི་མཆོག་ཐམས་ཅད་མཁྱེན་པ་ལ་ཕྱག་འཚལ་ལོ། །འདིར་བསྟན་བཅོས་རྩོམ་པར་བཞེད་པས། བར་ཆད་སྤང་བར་བྱ་བ་དང་།
ཡ་རབས་ཀྱི་ཚུལ་དང་མཐུན་པའི་ཕྱིར། དང་པོར་ཕྱག་འཚལ་ཞིང་། དགོས་པ་ཁོང་དུ་ཆུད་པར་བྱ་བའི་ཕྱིར། གང་ཞིག་བཤད་པར་བྱ་བར་དམ་བཅས་ནས། བསྟན་བཅོས་ཀྱི་གཞུང་ཉིད་ལེགས་པར་བསྟན་པ་དང་། བསྟན་བཅོས་བརྩམས་པ་ཡང་དོན་ཆེན་པོར་འགྱུར་བར་བྱ་བའི་
ཕྱིར། དགེ་བའི་རྩ་བ་བསྔོ་བ་དང་བཅས་པ་སྟོན་པར་མཛད་དོ། །དེ་ལ་འདིའི་གཞུང་ཉིད་ཀྱང་ཡི་གེའི་ཚོགས་དང་། མིང་གི་ཚོགས་དང་། ཚིག་གི་ཚོགས་རྣམས་སྟོན་ཏེ། དེ་དག་གི་ཡན་ལག་ཇི་སྐད་དུ་བསྟན་པ་རྣམས་ཀྱང་མདོར་བསྡུ་ན། དེ་དག་གི་རྒྱུ་དང་། རང་གི་ངོ་བོ་དང་། ལྡང་
ཚད་དང་། ངེས་པའི་ཚིག་དང་། དབྱེ་བ་རྣམས་ཀྱིས་སྟོན་ཏོ། །དེ་ལ་རེ་ཞིག་འདིར་ཕྱག་འཚལ་བ་བསྟན་པའི་ཕྱིར། སྨྲ་མཆོག་གཙོ་ལ་ཕྱག་འཚལ་ནས། །ཞེས་བྱ་བ་སྨོས་ཏེ། དགེ་སྦྱོང་དང་། བྲམ་ཟེ་དང་། ལྷ་དང་། བདུད་ལ་སོགས་པ་རིགས་པ་དང་ལྡན་པར་སྨྲ་བ་རྣམས་ཀྱི་གཙོ་བོ་ནི་
སངས་རྒྱས་ཏེ། དེ་ལ་ཕྱག་འཚལ་ནས་བཤད་པར་བྱ་ཞེས་བསྟན་ཏོ། །གང་གི་ཕྱིར་ཞེ་ན། སྨྲ་བའི་ཡན་ལག་རྫོགས་དོན་དུ། །ཞེས་བྱ་བ་ལ་སོགས་པས་དམ་བཅའ་བ་དག་བསྟན་པར་མཛད་པ་ལས། འདིར་དགོས་པ་ནི་སྨྲ་བའི་རྒྱུ་རྐྱེན་མ་ལུས་པ་རྫོགས་པར་བྱ་བའི་དོན་དུའོ་ཞེས་སོ། །
གང་ཞིག་ཅེ་ན། ངག་གི་འདུ་བྱེད་གང་དེ་ཡི། །ཚོགས་པ་ཞེས་བྱ་བ་སྨོས་ཏེ། ངག་གི་བྱ་བ་ནི་འདུ་བྱེད་ཡིན་ཏེ། དེའི་ཚོགས་པ་ནི་རྒྱུ་རྐྱེན་ནོ། །དེ་བདག་གིས་བཤད་པར་བྱ་ཞེས་བྱ་བ་ཡིན་ནོ། །ད་ནི་གཞུང་ཉིད་བསྟན་པ་ལས། དང་པོར་ཡི་གེ་བསྟན་ཏེ། དེ་ཡང་སྤྱི་དང་ཁྱད་པར་གྱི་གནས་
ལས་བྱེད་པ་དང་ཕྲད་པས་སྒྲ་ཇི་ལྟར་འབྱུང་བ་བསྟན་པའི་ཕྱིར། ཁོག་པ་མགྲིན་པ་རྐན་དང་ལྕེ། །སྣ་དང་སྤྱི་བོ་སོ་དང་མཆུ། །སྤྱི་དང་རེ་རེར་ཆ་དག་ལས། །ཕྲད་དང་ཅུང་ཟད་ཕྲད་པ་དང་། །དོག་པ་དང་ནི་ཡངས་པ་ནས། །དྲང་པོ་བསྒྲེང་དང་བཀུག་པ་དང་། །བསྟོད་པ་དང་ནི་སྨད་པ་དང་། །

བསྒྲིམས་དང་ཀློད་པའི་ང་རོ་འབྱུང་། །ཞེས་བྱ་བ་སྨོས་ཏེ། དེ་ལ་སྤྱི་དང་ཞེས་བྱ་བ་ནི་གནས་འདི་རྣམས་སྤྱིའི་ཆ་ནས་འབྱུང་བ་ཞེས་བྱ་བ་སྟེ། དཔེར་ན་པི་ཝང་གི་སྒྲ་ཁོག་པ་དང་། པགས་པ་དང་། རྒྱུ་དང་། ལག་རྟེན་ལ་སོགས་པ་ཐམས་ཅད་ལས་སྒྲ་འབྱུང་སྟེ། དེ་བཞིན་དུ་གནས་
འདི་རྣམས་ཀྱི་སྤྱིའི་ཚོགས་པ་ནས་ཡི་གེ་རྣམས་ཀྱི་སྒྲ་འབྱུང་ངོ་། །རེ་རེའི་ཆ་དག་ཅེས་བྱ་བ་ནི་དཔེར་ན་པི་ཝང་གི་སྒྲ་དེ་དག་ཕོ་སྒྲ་ཕོ་རྒྱུད་ལས་འབྱུང་། མོ་སྒྲ་མོ་རྒྱུད་ལས་འབྱུང་བ་བཞིན། གནས་འདི་དག་སོ་སོ་ལས་ཡི་གེ་སོ་སོའི་སྒྲ་ཤས་ཆེར་འབྱུང་སྟེ། འདི་དག་ཞིབ་ཏུ་ནི་འོག་ནས་
འཆད་པའི་སྐབས་སུ་རིག་པར་བྱའོ། །ཕྲད་དང་ཅུང་ཟད་ཕྲད་པ་དང་། །དོགས་པ་དང་ནི་ཡངས་པ་ནས། །ཞེས་བྱ་བ་འདི་བཞི་ནི་བྱེད་པའི་རྐྱེན་ཡིན་ཏེ། དཔེར་ན་པི་ཝང་གི་སྒྲ་ལ་མཐེབ་མོ་དང་གཞུ་རྒྱུད་ཀྱིས་བསྐྱོད་པའི་ཚེ་སྒྲ་བྱེ་བྲག་ཏུ་འགྱུར་བ་ལྟར་གནས་འདི་རྣམས་སུ་ཕྲད་པ་ལ་
སོགས་པའི་རྐྱེན་གྱིས་སྒྲ་བྱེ་བྲག་ཏུ་འགྱུར་ཏེ། འདི་ཡང་ཞིབ་ཏུ་འོག་ནས་རིག་པར་བྱའོ། །དེ་དག་ལས་སྒྲ་ཇི་ལྟ་བུ་ཞིག་འབྱུང་ཞེ་ན། དྲང་པོ་བསྒྲེང་དང་བཀུག་པ་དང་། །ཞེས་བྱ་བ་ལ་སོགས་པ་སྨོས་ཏེ། འདིས་ནི་གནས་དང་བྱེད་པ་ཕྲད་པ་ལས་དབྱངས་ཀྱི་རྩ་བ་བདུན་འབྱུང་
བར་སྟོ