Luận tạng Tây Tạng (Tengyur) — Tập 152

་པ། ལེན་པའི་
སྤང་བའི་གླེང་གཞི་ནི་བཅས་པ་དང་གནང་བའི་དབང་གིས་རྣམ་པ་གཉིས་ཏེ། བཅས་པའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་དགེ་སློང་མ་རྣམས་དགོན་པར་
གནས་པ་མ་བཀག་པ་དེའི་ཚེ་ན་དགེ་སློང་མ་རྣམས་ཀྱང་དགོན་པའི་གནས་སུ་དོང་སྟེ། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་བདེ་བ་དག་ཉམས་སུ་མྱོང་བར་བྱེད་དོ། །དེ་ནས་དགེ་སློང་མ་ཨུཏྤལའི་མདོག་འཁོར་ལྔ་བརྒྱ་དང་ནགས་མུན་པ་

ཅན་ག་ལ་བ་དེར་སོང་སྟེ་ཕྱིན་ནས། ཤིང་ལྗོན་པ་ཞིག་གི་དྲུང་དུ་བརྟེན་ཏེ་སྐྱིལ་མོ་ཀྲུང་ཕྱེད་ཀྱིས་འདུག་ནས་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་བདེ་བ་དག་ཉམས་སུ་མྱོང་བར་བྱེད་དོ། །དགེ་སློང་མ་དེ་དག་ཕྱི་འཕྲེང་མཉན་ཡོད་དུ་འཇུག་
འདོད་ནས་སྨྲས་པ། འཕགས་མ་ཨུཏྤལའི་མདོག་བསླང་བར་བྱའོ། །ཁ་ཅིག་གིས་སྨྲས་པ། འཕགས་མ་ཨུཏྤལའི་མདོག་ནི་མཐུ་ཆེ་བ་རྫུ་འཕྲུལ་ཆེ་བ་ཡིན་པས་དང་པོ་ཁོ་ནར་དབྱར་ཁང་དུ་འགྲོ་བར་འགྱུར་བའི་གནས་སྐབས་ཀྱང་ཡོད་དོ་ཞེས་ཟེར་ནས། དེ་དག་གིས་དེ་མ་བསླངས་པ་
ཁོ་ནར་དང་ངོ་། །ཨུཏྤལའི་མདོག་ཀྱང་ཕྱི་འཕྲེད་ལངས་ནས་དགེ་སློང་མ་དེ་དག་ཐམས་ཅད་དོང་བར་མཐོང་བ་དང་། དེས་བསམས་པ། ཅི་ད་འགྲོའམ་འོན་ཏེ་འདི་ཉིད་དུ་འདུག་སྙམ་ནས། དེ་དེ་ཉིད་དུ་འགོག་པ་ལ་སྙོམས་པར་ཞུགས་སོ། །ཆོམ་རྐུན་པ་གཡོན་ཅན་ལྔ་བརྒྱ་ཙམ་གྱིས་ཆོམ་རྐུན་གྱི་
ལས་དག་ཀྱང་བྱས་ནས་ནགས་མུན་པ་ཅན་དུ་ལྷགས་ཏེ། དེ་དག་གིས་སྨྲས་པ། བདག་ཅག་ལས་ཉིས་བརྒྱ་ལྔ་བཅུས་ནི་སྐལ་བ་དག་བགོ་བར་བྱས་ཏེ། ཉིས་བརྒྱ་ལྔ་བཅུས་ནི་ནགས་བྱུལ་བར་བྱའོ་ཞེས་དེ་དག་ལས་ཉིས་བརྒྱ་ལྔ་བཅུས་ནི་སྐལ་བ་དག་བགོ་བར་བརྩམས། ཉིས་བརྒྱ་ལྔ་
བཅུས་ནི་ནགས་བྱུལ་བར་བརྩམས་པ་དང་། དེ་དག་གིས་ཨུཏྤལའི་མདོག་འདུག་པ་མཐོང་ངོ་། །དེས་ན་ཁ་ཅིག་ན་རེ་ཤེས་ལྡན་དག་འདི་དག་མཐོ་ཡོར་ཞིག་ཡིན་ནོ་ཞེས་ཟེར། ཁ་ཅིག་ན་རེ་འདི་ནི་མི་ཞིག་ཡིན་ནོ་ཞེས་ཟེར་རོ། །ཁ་ཅིག་ན་རེ་འདི་ནི་དགེ་སློང་ཞིག་ཡིན་ནོ་ཞེས་ཟེར་རོ། །དེ་ན་
དགེ་སློང་གི་རྒྱུས་ཤེས་པ་གཅིག་འདུག་པ་དེས་སྨྲས་པ། འདི་ནི་དགེ་སློང་མ་ཞིག་ཡིན་གྱི། དགེ་སློང་ནི་མ་ཡིན་ནོ། །ཇི་ལྟར་ཤེས། དགེ་སློང་དག་ནི་སྐྱིལ་མོ་ཀྲུང་གིས་འདུག་ལ་དགེ་སློང་མ་རྣམས་ནི་སྐྱིལ་མོ་ཀྲུང་ཕྱེད་ཀྱིས་འདུག་གོ། །དེ་དག་ངོ་མཚར་སྐྱེས་ནས་ཤེས་ལྡན་དག་འདི་ལྟ་བུའི་
ནགས་འཇིགས་སུ་རུང་བའི་ནང་ན་དགེ་སློང་མ་གཅིག་པུ་མཚན་མོ་གནས་པར་ཁས་བླངས་པ་ལ་ལྟོས་ཞེས་ཟེར་རོ། །དེ་དག་དམག་དཔོན་གྱི་གན་དུ་དོང་བ་དང་། དམག་དཔོན་གྱིས་དེ་དག་ལ་དྲིས་པ། ཤེས་ལྡན་དག་ཁྱེད་ཀྱིས་ནགས་མུན་པ་ཅན་འདི་ན་ངོ་མཚར་ཅུང་ཟད་མཐོང་བ་ཡོད་དམ།

མཆིས་ཏེ་འདི་ལྟ་བུའི་ནགས་འཇིགས་སུ་རུང་བའི་ནང་ན་དགེ་སློང་མ་གཅིག་པུ་མཚན་མོ་གནས་པར་ཁས་བླངས་པ་མཆིས་སོ། །དེ་བལྟས་འདོང་ངོ་ཞེས་དེ་དག་དེའི་དྲུང་དུ་དོང་བ་དང་། དམག་དཔོན་གྱིས་དགེ་སློང་མ་ཨུཏྤལའི་མདོག །གཟུགས་བཟང་བ་བལྟ་ན་སྡུག་པ།
མཛེས་པ་མཐོང་ངོ་། །མཐོང་ནས་ཀྱང་མངོན་པར་དད་པར་གྱུར་ནས། དེ་མངོན་པར་དད་པ་སྐྱེས་ནས་སྨྲས་པ། ཀྱེ་མ་དགེ་སློང་མ་འདི་གཉི་ག་ནས་བཟང་བ་ཡིན་ཏེ། མཚན་མོ་ཟླ་ཉི་མོ་ལྟར་འདུག་པ་གང་ཡིན་པ་དང་། གཟུགས་བཟང་བ་བལྟ་ན་སྡུག་པ་མཛེས་པ་གང་ཡིན་པས་སོ་ཞེས་དེ་བསླང་བར་
བརྩམས་པ་དང་། དེ་དག་གིས་སྨྲས་པ། ཅིའི་ཕྱིར་འདི་སློང་བར་བྱེད། ཟན་སྦྱིན་པར་བྱའོ། །དགེ་སློང་གི་རྒྱུས་ཤེས་པ་གཅིག་གིས་སྨྲས་པ། འདི་ནི་དུས་མ་ཡིན་པར་མི་ཟའོ། །དམག་དཔོན་གྱིས་སྨྲས་པ། ཅིའི་ཕྱིར། དེས་སྨྲས་པ། འདིས་དུས་མ་ཡིན་པའི་ཟས་སྤངས་པ་ཡིན་ནོ། །དམག་
དཔོན་གྱིས་སྨྲས་པ། ཀྱེ་མ་དགེ་སློང་མ་འདི་ནི་གཉི་ག་ནས་བཟང་བ་ཡིན་ཏེ། གཟུགས་བཟང་བ་བལྟ་ན་སྡུག་པ་མཛེས་པ་གང་ཡིན་པ་དང་། དུས་མ་ཡིན་པའི་ཟས་སྤངས་པ་གང་ཡིན་པས་སོ། །ཡང་སྨྲས་པ་འདི་ལ་ཆང་བླུད་པར་བྱའོ། །དགེ་སློང་གི་རྒྱུས་ཤེས་པ་དེས་སྨྲས་པ། འདི་ནི་མྱོས་
པར་འགྱུར་བའི་ལྟུང་བ་སྤངས་པ་ཡིན་ནོ། །དམག་དཔོན་གྱིས་སྨྲས་པ། ཀྱེ་མ་དགེ་སློང་མ་འདི་ནི་གཉིས་ཀ་ནས་བཟང་བ་ཡིན་ཏེ། གཟུགས་བཟང་བ་བལྟ་ན་སྡུག་པ་མཛེས་པ་གང་ཡིན་པ་དང་། མྱོས་པར་འགྱུར་བའི་ལྟུང་བ་སྤངས་པ་གང་ཡིན་པས་སོ། །ཡང་སྨྲས་པ། ཁོ་བོས་ཡོན་གནས་
ཞིང་འདི་ལྟ་བུ་ལ་བསོད་སྙོམས་ཀྱིས་བསྒྲུབ་པར་མ་ནུས་སོ་ཞེས་དེས་རས་ཡུག་ཆེན་པོ་ལ་འོས་པ་ཅིག་དང་། བསོད་སྙོམས་ཀྱི་ཕུད་ཅིག་ཕུལ་ནས་ཤིང་ལྗོན་པའི་ཡལ་ག་ལ་བཏགས་ནས་སྨྲས་པ། འཕགས་མ་འདི་ལྟར་ཁྱོད་ལ་མི་མཁྱེན་པ་དང་། མི་གཟིགས་པ་དང་། མི་རིག་པ་དང་། རྣམ་པར་
མི་མཁྱེན་པ་ཅི་ཡང་མི་མངའ་བས་བདག་གིས་ཁྱོད་ལ་བསོད་སྙོམས་དང་ན་བཟའ་འདི་འབུལ་ལོ་ཞེས་སྨྲས་ཏེ་སོང་ངོ་། །ཨུཏྤ་ལའི་མདོག་ནང་པར་སྔར་ལངས་པས་སྐྱེ་བོ་ཕལ་པོ་ཆེའི་རྗེན་ཤུལ་མཐོང་ནས། དེས་བསམས་པ་དང་། ཆོམ་རྐུན་པ་གཡོན་ཅན་ལྔ་བརྒྱ་ཉེ་བར་འོངས་པར་མཐོང་ནས།

སྨྲས་པ། མི་མཛེས་པ་འགའ་ཞིག་རིག་པར་མ་བྱས་སམ་སྙམ་ནས་འགའ་ཡང་མ་བྱས་པར་མཐོང་ངོ་། །ཤིང་ལྗོན་པའི་ཡལ་ག་ལ་རས་ཡུག་ཆེན་དང་བསོད་སྙོམས་བཏགས་ཏེ་གཞག་པ་མཐོང་ནས། དེས་བསམས་པ། འདི་ནི་དད་པར་གྱུར་པ་རྣམས་ཀྱིས་དད་པའི་དབང་དུ་བྱས་པ་
ཡིན་ནོ་སྙམ་ནས་དེས་བསམས་པ། གལ་ཏེ་བྱིན་ལེན་སྟོབས་པ་ལ་བསྡད་ན་བྱའམ་སྤྲེའུས་ཆུད་གསན་པར་འགྱུར་བས་བདག་ནི་དགེ་འདུན་ལ་བསོད་སྙོམས་ཀྱི་ཕུད་འབུལ་བ་ཡིན་ལ། འདི་ལྟར་དགེ་སློང་རྣམས་ལ་མི་རུང་བ་གང་ཡིན་པ་དེ་ནི་དགེ་སློང་མ་རྣམས་ལ་རུང་བ་ཡིན་ལ། དགེ་
སློང་མ་རྣམས་ལ་མི་རུང་བ་གང་ཡིན་པ་དེ་ནི་དགེ་སློང་རྣམས་ལ་རུང་བ་ཡིན་པས་བདག་རང་ཉིད་ཀྱིས་འདི་ཁྱེར་ཏེ། དགེ་འདུན་ལ་བསོད་སྙོམས་ཀྱི་ཕུད་འབུལ་དུ་འགྲོའོ་སྙམ་ནས། དེས་དེ་ཁྱེར་ཏེ་རྒྱལ་བྱེད་ཀྱི་ཚལ་དུ་སོང་ངོ་། །དྲུག་སྡེ་རྣམས་ཀྱི་ཀུན་དུ་སྤྱོད་པ་ནི་དྲུག་སྡེ་ལས་གང་ཡང་རུང་བས།
རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཉེ་དགའ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་པ་དེས་ཨུཏྤལའི་མདོག་མཐོང་ནས་སྨྲས་པ། སྲིང་མོ་ཅིའི་ཕྱིར་ནང་པར་སྔར་མཉན་ཡོད་ཀྱི་སྒོ་དག་ཕྱེ་སྟེ་འོངས། དེས་སྨྲས་པ། བདག་མཉན་ཡོད་དུ་མ་མཆིས་ཀྱི། བདག་མདང་སུམ་ནགས་
མུན་པ་ཅན་དུ་མཆིས་པར་ཁས་བླངས་སོ། །ཉེ་དགས་སྨྲས་པ། ཉེ་དགའ་ནི་ཉིན་མོ་ཉིད་ནགས་མུན་པ་ཅན་དུ་ཞུགས་ན་ཡང་སྤུ་དག་གྱེན་དུ་འགྲེང་བར་འགྱུར་རོ། །སྲིང་མོ་ཁྱེར་བ་འདི་ཅི་ཡིན། དེས་སྨྲས་པ། ཆོམ་རྐུན་པ་ལྔ་བརྒྱ་ཙམ་དེར་མཆིས་ནས། དེ་དག་དད་པར་གྱུར་པས་བདག་
ཉིད་ལ་དད་པའི་དབང་དུ་བགྱིས་པ་ལ་སྩལ་ཏོ། །སྲིང་མོ་ཁྱོད་ནི་ཆོམ་རྐུན་པས་ཀྱང་དད་པར་བྱས་པ་ཡིན་གྱི། གལ་ཏེ་ཉེ་དགའ་དེ་དག་གིས་མཐོང་དུ་ཟིན་ན་ལྕག་རྒོད་མང་པོས་བརྡབས་ཏེ་ཁུར་ཙ་བར་ཁྲིད་པར་འགྱུར་རོ། །འདི་ལྟར་གང་ལ་རས་ཡུག་ཆེན་འདི་ལྟ་བུ་ཡོད་པ་དེ་ནི་གོས་སར་པ་
ལས་སྣམ་སྦྱར་ཉིས་རིམ་དུ་བྱས་ཏེ། སེམས་ལས་ཆུང་ངུས་དགེ་བའི་ཕྱོགས་ལ་ཏྲོན་བྱེད་པར་འགྱུར་རོ། །འཕགས་པ་ཁྱོད་རས་ཡུག་ཆེན་འདི་བཞེད་དམ། ལྷའི་གནས་ཀྱི་ལྷག་མ་བཞིན་དུའོ། །འཕགས་པ་བདག་གིས་དགེ་འདུན་ལ་བསོད་སྙོམས་ཀྱི་ཕུད་ཕུལ་ཏེ་སླར་མཆིས་ཀྱི་བར་

དུ་གཞེས་ཤིག་དང་། དེའི་འོག་ཏུ་ཁྱོད་ལ་རས་ཡུག་ཆེན་གསོལ་ལོ། །ཉེ་དགས་བསམས་པ། ལྷུང་བཟེད་ནག་པོ་ཅན་འགའ་ཞིག་གིས་འདི་ལ་བསླངས་པ་དང་། དེ་ལ་བྱིན་པར་འགྱུར་རོ་སྙམ་ནས། སྲིང་མོ་བདག་གིས་བསོད་སྙོམས་ཀྱི་ཕུད་ལེན་པ་དག་ཁྲིད་དེ་འོང་གི །
དེའི་བར་དུ་འདི་ཉིད་དུ་སྡོད་ཅིག །ཉེ་དགའ་རྒྱལ་བྱེད་ཀྱི་ཚལ་དུ་ཞུགས་པ་དང་། དེས་དགེ་སློང་བསོད་སྙོམས་ཀྱི་ཕུད་ལེན་པ་དག་སྙིང་ལས་ཆུང་ངུར་འཁོད་པ་དག་མཐོང་ནས་དེས་སྨྲས་པ། ཚེ་དང་ལྡན་པ་དག་སྦྱིན་བདག་གི་ཁུར་གྱིས་ངལ་ཞིང་སྡོད་ལ་ཁྱེད་ཅག་ནི་འདིར་སྙིང་ལས་ཆུང་
ངུར་འཁོད་ན་ཚུར་ཤེག །བསོད་སྙོམས་ཀྱི་ཕུད་ལོངས་ཤིག །དེ་དག་གིས་གཞོང་བུ་ཐོགས་ཏེ་དོང་བ་དང་། ཨུཏྤལའི་མདོག་གིས་དེ་དག་ལ་བསོད་སྙོམས་ཀྱི་ཕུད་ཕུལ་ནས་རས་ཡུག་ཆེན་སྤྲུགས་ཏེ་ཉེ་དགའ་ལ་ཕུལ་ལོ། །ཉེ་དགས་ཁྱོད་སྦྱིན་པ་འདིས་སེམས་ཀྱི་རྒྱན་དང་། སེམས་
ཀྱི་ཡོ་བྱད་དང་། རྣལ་འབྱོར་གྱི་ཚོགས་དང་། དོན་གྱི་མཆོག་དང་། ལྷ་དང་མི་རྣམས་ཀྱི་གོས་ཀྱི་མཆོག་དག་ཐོབ་པར་གྱུར་ཅིག་ཅེས་སྨྲས་སོ། །ཨུཏྤལའི་མདོག་གིས་བསམས་པ། ད་དབྱར་ཁང་དུ་སོང་སྟེ་ཅི་རུང་། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་འགྲོ་བར་བྱའོ་
སྙམ་ནས། དེས་ཨུཏྤལའི་མདོག་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ། །དེའི་ཚེ་ཨུཏྤ་ལའི་མདོག་གི་ཆོས་གོས་ལྔ་ངན་ཅིང་སྣམ་སྦྱར་ཡང་རྙིངས་པར་གྱུར་ནས། དེ་ནས་
བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་མ་རྣམས་ཀྱིས་དབྱར་གྱི་གོས་ཀྱི་རྙེད་པ་མ་གྲུབ་སམ། བཙུན་པ་གྲུབ་བོ། །འོ་ན་ཅིའི་ཕྱིར་དགེ་སློང་མ་ཨུཏྤལའི་མདོག་གི་ཆོས་གོས་ལྔ་ངན་ཅིང་སྣམ་སྦྱར་ཡང་རྙིངས་པར་གྱུར། བཙུན་
པ་སྲིང་མོ་འདི་ནི་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ལགས་ཏེ། འདིས་སངས་རྒྱས་སམ། ཆོས་སམ། དགེ་འདུན་ནམ། དགེ་སློང་ཡིད་དུ་འཐད་པ་དག་ལ་མ་ཕུལ་བའམ། ཡོངས་སུ་མ་བཏང་བ་ཅི་ཡང་མ་མཆིས་ཏེ། འདིས་དེང་ཡང་རས་ཡུག་ཆེན་རྙེད་ནས། དེ་

ཡང་འདིས་བཙུན་པ་ཉེ་དགའ་ལ་སྩལ་ཏོ། །ཀུན་དགའ་བོ་དགེ་སློང་དག་དགེ་སློང་མ་ཉེ་དུ་མ་ཡིན་པ་ལས་གོས་ལྷག་མ་ལེན་ཏམ། བཙུན་པ་ལེན་ཏོ། །ཀུན་དགའ་བོ་དགེ་སློང་མ་ཉེ་དུ་མ་ཡིན་པ་ནི་འདི་སྙམ་དུ་འདིའི་ཆོས་གོས་ལྔ་ཚང་ངམ། འོན་ཏེ་མ་ཚང་སྙམ་དུ་མི་སེམས་པར་འདི་ལྟར་ཐོབ་
བོ་ཅོག་ལེན་པར་བྱེད་ཀྱི། ཉེ་དུ་ལ་ནི་བྱིན་ཡང་ལེན་པར་མི་བྱེད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་མ་ཨུཏྤལའི་མདོག་ལ་གཙུག་ལག་ཁང་ཆེན་པོ་ནས་ཆོས་གོས་ལྔ་བྱིན་ཅིག །ཚེ་དང་ལྡན་པ་ཀུན་དགའ་བོས་
དགེ་སློང་མ་ཨུཏྤལའི་མདོག་ལ། གཙུག་ལག་ཁང་ཆེན་པོ་ནས་ཆོས་གོས་ལྔ་བྱིན་ནོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དེ། ཉེ་དགའ་ལ་རྨས་ནས་རྣམ་གྲངས་དུ་མར་སྨད་དེ། བསླབ་པ་
བཅའ་བའི་ཕན་ཡོན་བཅུ་ཡང་དག་པར་གཟིགས་པས། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལས་གོས་ལེན་ན་སྤང་བའི་ལྟུང་བྱེད་དོ་ཞེས་བཅའ་བ་མཛད་དེ། ཡུལ་ནི་མཉན་ཡོད། གང་
ཟག་ནི་ཉེ་དགའ། ཉོན་མོངས་པ་ནི་འདོད་ཞེན། ཉེས་པ་ནི་དགེ་སློང་མ་ཉེ་དུ་མ་ཡིན་པ་ལས་གོས་ལེན་པའོ། །གནང་བའི་གླེང་གཞི་ནི། སངས་རྒྱས་བཅོམ་ལྡན་འདས་མཉན་ཡོད་ན། རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་
ཁྱིམ་བདག་གཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་ཏུ་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་དོ། །དེ་བདག་གི་ཁྱིམ་ནོར་དུ་མ་དང་ལྡན་ན། བདག་གིས་འཇིག་རྟེན་ཕ་རོལ་གྱི་ལམ་བརྒྱགས་ཅུང་ཟད་ཀྱང་མ་ཁྱེར་རོ་སྙམ་ནས།
ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་འདུག་པ་ཆུང་མས་མཐོང་ནས་སྨྲས་པ། རྗེའི་སྲས་ཁྱོད་ཅིའི་སླད་དུ་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་བཞུགས། བཟང་མོ་ཁོ་བོའི་ཁྱིམ་ནོར་དུ་མ་དང་ལྡན་ན་བདག་གིས་འཇིག་རྟེན་ཕ་རོལ་གྱི་ལམ་བརྒྱགས་

ཅུང་ཟད་ཀྱང་མ་ཁྱེར་ཏེ། གལ་ཏེ་བདག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་བཤོས་གསོལ་ཏེ། རེ་རེ་ལ་རས་བཅོས་བུ་སར་པ་ཕྲུགས་རེ་རེ་བསྐོན་ན་དེས་བདག་གིས་འཇིག་རྟེན་ཕ་རོལ་གྱི་ལམ་བརྒྱགས་ཁྱེར་བར་འགྱུར་རོ། །ཆུང་མས་སྨྲས་པ།
རྗེའི་སྲས་དེ་བཞིན་མཛོད་ཅིག །དེ་ནས་ཁྱིམ་བདག་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས། བཅོམ་ལྡན་འདས་ཀྱིས་ཁྱིམ་བདག་དེ་ལ་ཆོས་དང་ལྡན་པའི་
བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་
འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་ཁྱིམ་བདག་དེ་སྟན་ལས་ལངས་ནས། བླ་གོས་ཕྲག་པ་གཅིག་ཏུ་བྱས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་
ཅེས་གསོལ་ཏོ། །བཅོམ་ལྡན་འདས་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབས་ཅིག་ཏུ་གདུགས་ཚོད་གསོལ་བར་ཅི་གནང་། བཅོམ་ལྡན་འདས་ཀྱིས་ཁྱིམ་བདག་དེ་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་དེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་
རིག་ནས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བར་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་ཁྱིམ་བདག་དེས་དེ་ཉིད་ཀྱི་མཚན་མོ་བཅའ་བ་དང་། བཟའ་བ་
གཙང་ཞིང་བསོད་པ་ལེགས་པར་སྤྱད་ནས་ནང་པར་སྔར་ལངས་ཏེ། གདན་བཤམས་ནས་ཆུར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱི། བཙུན་པ་གདུགས་ཚོད་སྦྱར་བའི་དུས་ལགས་ན། དེ་བཅོམ་ལྡན་འདས་ཀྱིས་དེའི་དུས་ལ་བབ་པར་མཁྱེན་པར་མཛད་དུ་གསོལ་ཞེས་གདུགས་

ཚོད་ལ་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཞིང་། དགེ་སློང་གི་དགེ་འདུན་གྱིས་མདུན་དུ་བདར་ཏེ། ཁྱིམ་བདག་དེའི་བཀད་ས་ག་ལ་བ་དེར་གཤེགས་ཏེ་བྱོན་ནས། དགེ་སློང་
གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་ཁྱིམ་བདག་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས། རང་གི་ལག་ནས་བཅའ་བ་དང་། བཟའ་བ་གཙང་ཞིང་བསོད་པས་ཚིམ་པར་བྱེད། སྟོབས་པར་བྱེད་དོ། །རྣམ་
གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་རེ་རེ་ལ་རས་བཅོས་བུ་སར་པ་ཕྲུགས་རེ་རེ་ཕུལ་ལོ། །དེ་ནས་ཁྱིམ་བདག་དེས་སྟན་ཆེས་དམའ་བ་ཞིག་བླངས་ནས། བཅོམ་ལྡན་
འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་དེ་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་
མཛད་དེ། རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་ཁྱིམ་བདག་དེས་བཅོམ་ལྡན་འདས་
ཀྱི་སླད་བཞིན་ཕ་ཟད་ཙམ་དུ་སོང་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔ་ནས་ཕྱིར་ལོག་སྟེ་རང་གི་ཁྱིམ་ག་ལ་བ་དེར་སོང་སྟེ་ཕྱིན་པ་དང་། སྟེང་གི་ཁང་བཟངས་ཀྱི་
གཞིར་གཏོགས་པ་ན་གཏོང་བ་རྗེས་སུ་དྲན་པ་བསྒོམ་པའི་ཚེ། ཆུང་མ་ལ་སྨྲས་པ། བཟང་མོ་བདག་གིས་འཇིག་རྟེན་ཕ་རོལ་གྱི་ལམ་བརྒྱགས་མང་དུ་ཁྱེར་གྱིས། མཆོག་ཏུ་དགའ་བ་དང་རྗེས་སུ་ཡི་རང་བར་གྱིས་ཤིག །ཆུང་མས་སྨྲས་པ། རྗེའི་སྲས་ཀྱིས་ནི་འཇིག་རྟེན་ཕ་རོལ་གྱི་ལམ་

བརྒྱགས་བསྣམས་ན་བདག་གིས་མ་འཚལ་ཏོ། །བཟང་མོ་བདག་ཅག་གཉིས་ཀྱི་ལོངས་སྤྱོད་དག་ཐུན་མོང་མ་ཡིན་ནམ། རྗེའི་སྲས་འདི་ལྟར་འོ་སྐོལ་ཅག་གི་ལོངས་སྤྱོད་དག་ཐུན་མོང་ལགས་ཏེ། འདི་ལྟར་བདག་གིས་ཀྱང་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་
སོགས་པ་དགེ་སློང་མའི་དགེ་འདུན་བཤོས་གསོལ་ཏེ་ཆེན་པོ་ལ་འོས་པའི་གོས་དག་ཕུལ་ན། དེ་ལྟ་ན་བདག་གིས་ཀྱང་འཇིག་རྟེན་ཕ་རོལ་གྱི་ལམ་བརྒྱགས་པ་ཚལ་བར་འགྱུར་རོ། །ཁྱིམ་བདག་གིས་སྨྲས་པ། བཟང་མོ་ཅི་སྔར་སྦྱིན་པ་བྱིན་པས་ཕྱིས་སྦྱིན་པ་བྱར་མེད་དམ། དེ་བཞིན་གྱིས་
ཤིག །དེ་ནས་ཁྱིམ་བདག་གི་ཆུང་མ་དེ་སྐྱེ་དགུའི་བདག་མོ་ཆེན་མོ་གཽ་ཏ་མཱི་ག་ལ་བ་དེར་སོང་སྟེ་ཕྱིན་ནས། སྐྱེ་དགུའི་བདག་མོ་ཆེན་མོ་གཽ་ཏ་མཱིའི་རྐང་པ་གཉིས་ལ་མགོ་བོས་ཕྱག་འཚལ་ནས་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས། སྐྱེ་དགུའི་བདག་མོ་ཆེན་མོ་གཽ་ཏ་
མཱིས་ཁྱིམ་བདག་གི་ཆུང་མ་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུག་པར་བྱེད། ཡང་དག་པར་གཟེངས་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དེ་རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན།
ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་ཅང་མི་སྨྲའོ། །དེ་ནས་ཁྱིམ་བདག་གི་ཆུང་མ་དེ་སྟན་ལས་ལངས་ཏེ། སྐྱེ་དགུའི་བདག་མོ་ཆེན་མོ་གཽ་ཏ་མཱི་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས། སྐྱེ་དགུའི་བདག་མོ་ཆེན་མོ་
གཽ་ཏ་མཱི་ལ་འདི་སྐད་ཅེས་སྨྲས་སོ། །འཕགས་མ་སང་བདག་གི་སྡུམ་པར་དགེ་སློང་མའི་དགེ་འདུན་དང་ཐབས་ཅིག་གདུགས་ཚོད་གསོལ་བར་ཅི་གནང་། སྐྱེ་དགུའི་བདག་མོ་ཆེན་མོ་གཽ་ཏ་མཱིས། ཁྱིམ་བདག་གི་ཆུང་མ་དེ་ལ་ཅང་མི་སྨྲ་བས་དང་དུ་བླངས་སོ། །དེ་ནས་ཁྱིམ་བདག་གི་ཆུང་མ་དེས་
སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཅང་མི་སྨྲ་བར་དང་དུ་བླངས་པར་རིག་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་སྨྲས་པ་ལ་མངོན་པར་དགའ་བ་དང་རྗེས་སུ་ཡི་རང་བར་བྱས་ཏེ། སྐྱེ་དགུའི་བདག་མོ་ཆེན་མོ་གཽ་ཏ་མཱིའི་རྐང་པ་གཉིས་ལ་མགོ་བོས་ཕྱག་འཚལ་ནས། སྐྱེ་དགུའི་བདག་མོ་

ཆེན་མོ་གཽ་ཏ་མཱིའི་དྲུང་ནས་སོང་ངོ་། །དེ་ནས་ཁྱིམ་བདག་གི་ཆུང་མ་དེས་དེ་ཉིད་ཀྱི་མཚན་མོ་བཅའ་བ་དང་། བཟའ་བ་གཙང་ཞིང་བསོད་པ་ལེགས་པར་སྦྱར་ནས། ནང་པར་སྔར་ལངས་ཏེ། སྟན་བཤམས་ནས་ཆུར་བཞག་སྟེ། སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་སྤྱན་འདྲེན་གྱི་
འཕགས་མ་གདུགས་ཚོད་སྦྱར་བའི་དུས་ལགས་ན། ད་འཕགས་མས་དེའི་དུས་ལ་བབ་པར་མཁྱེན་པར་མཛད་དུ་གསོལ་ཞེས་དྲོ་ལ་བོས་སོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། དགེ་སློང་མའི་ཚོགས་ཀྱིས་ཡོངས་
སུ་བསྐོར་ཞིང་། དགེ་སློང་མའི་དགེ་འདུན་གྱིས་མདུན་དུ་བདར་ཏེ། ཁྱིམ་བདག་གི་ཆུང་མ་དེའི་བཀད་ས་ག་ལ་བ་དེར་སོང་སྟེ་ཕྱིན་ནས་དགེ་སློང་མའི་དགེ་འདུན་གྱི་གུང་ལ་སྟན་བཤམས་པ་ཉིད་ལ་འདུག་གོ། །དེ་ནས་ཁྱིམ་བདག་གི་ཆུང་མ་དེས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་སོགས་པ་
དགེ་སློང་མའི་དགེ་འདུན་བདེ་བར་འདུག་པར་རིག་ནས། རང་གི་ལག་ནས་བཅའ་བ་དང་། བཟའ་བ་གཙང་ཞིང་བསོད་པས་ཚིམ་པར་བྱེད་སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། དེས་ཆེན་
པོ་ལ་འོས་པའི་གོས་དག་གི་སྤྲོག་མ་ཕྱེ་ནས། ཆེན་པོ་ལ་འོས་པའི་གོས་དག་ཐོགས་ཏེ། རྒན་པའི་མཐའ་ལོགས་སུ་འདུག་གོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་དགེ་སློང་མ་རྣམས་ལ་ཆེན་པོ་ལ་འོས་པའི་གོས་དག་དགག་པ་མཛད་
པས། གལ་ཏེ་རེ་ཞིག་བླངས་པར་གྱུར་ན་ནི་བསླབ་པའི་གཞི་འཁྲུགས་པར་ཡང་འགྱུར། གལ་ཏེ་མ་བླངས་ན་ནི་ཁྱིམ་བདག་གི་ཆུང་མའི་བསོད་ནམས་ཀྱི་བར་ཆད་དང་། དགེ་སློང་མའི་དགེ་འདུན་གྱི་རྙེད་པའི་བར་ཆད་དུའང་འགྱུར་རོ་སྙམ་མོ། །དགེ་སློང་མ་རྣམས་ཀྱིས་བསམས་པ། ཀྱེ་མ་འཕགས་
མ་སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཆེན་པོ་ལ་འོས་པའི་གོས་དག་བླངས་པར་གྱུར་ཅིང་། བདག་ཅག་གིས་བླངས་པར་གྱུར་ན་བཅོམ་ལྡན་འདས་ཀྱིས་ཀྱང་དུས་ལགས་པའི་སླད་དུ་གནང་བར་འགྱུར་རོ་སྙམ་མོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས། ཆེན་པོ་ལ་འོས་པའི་གོས་དག་

བླངས་ནས་ཁྱིམ་བདག་གི་ཆུང་མ་ལ་ཡོན་བཤད་པར་བྱས་ཏེ། སྟན་ལས་ལངས་ནས་སོང་སྟེ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་
ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་སྐབས་དེ་བཅོམ་ལྡན་འདས་ལ་རྒྱས་པར་གསོལ་ཏོ། །དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་འདི་སྐད་ཅེས་བཀའ་སྩལ་ཏོ། །གཽ་ཏ་མཱི་ངས་གནང་བ་གང་ཡིན་པ་དེ་ཁྱོད་ཀྱིས་ཤེས་པ་ལེགས་སོ། །
ལེགས་སོ། །དེ་ལྟ་བས་ན་ངས་དགེ་སློང་མ་རྣམས་ཀྱིས་ཆེན་པོ་ལ་འོས་པའི་གོས་དག་བླངས་ནས་དགེ་སློང་རྣམས་དང་ལྷན་ཅིག་བརྗེ་བར་བྱ་བར་རྗེས་སུ་གནང་ངོ་། །དེ་ནས་དགེ་སློང་མ་བཅུ་གཉིས་སྡེ་དག་གིས་གོས་དེ་དག་ཁྱེར་ཏེ་དྲུག་སྡེ་དག་གི་གན་དུ་དོང་ནས་སྨྲས་པ། འཕགས་པ་དག་
བཅོམ་ལྡན་འདས་ཀྱིས་དགེ་སློང་མ་རྣམས་ལ་ཆེན་པོ་ལ་འོས་པའི་གོས་དག་དགག་པ་མཛད་དེ། བདག་ཅག་གིས་ཆེན་པོ་ལ་འོས་པའི་གོས་དག་རྙེད་པ་འདི་དག་ཁྱེད་བཞེས་ལ་བདག་ཅག་ལ་ངན་པ་དག་སྩོལ་ཅིག །དྲུག་སྡེ་དག་གིས་སྨྲས་པ། སྲིང་མོ་དག་བདག་ཅག་ལ་དགེ་སློང་མའི་རས་མ་
དག་དགོས་པ་མེད་དོ། །དེའི་ཚེ་ཡང་བདག་ཅག་བྱིས་པ་རྨོངས་པ། མི་གསལ་བ། མི་མཁས་པ་དག་ལ་ཁུར་དག་བསླང་བར་གྱུར་གྱིས་བདག་ཅག་མི་ལེན་ཏོ། །དགེ་སློང་མ་གཞན་དག་གནས་བརྟན་གནས་བརྟན་རྣམས་ཀྱི་དྲུང་དུ་སོང་སྟེ། སྨྲས་པ། འཕགས་པ་དག་བཅོམ་ལྡན་འདས་ཀྱིས་དགེ་
སློང་མ་རྣམས་ལ་ཆེན་པོ་ལ་འོས་པའི་གོས་དག་དགག་པ་མཛད་དེ། བདག་ཅག་གིས་ཆེན་པོ་ལ་འོས་པའི་གོས་དག་རྙེད་པ་འདི་དག་ཁྱེད་བཞེས་ལ་བདག་ཅག་ལ་ངན་པ་དམན་པ་དག་སྩོལ་ཅིག །སྲིང་མོ་དག་བཅོམ་ལྡན་འདས་ལ་ཞུའོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་
གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་བ། དེ་ལྟ་བས་ན་བརྗེས་པ་མ་གཏོགས་ཏེ། དེ་ལ་བརྗེ་བ་ནི་འདི་ཡིན་ཏེ། དེ་ཙམ་གྱིས་སམ་ཇི་ཙམ་གྱིས་དགེ་སློང་མ་དགའ་བར་འགྱུར་བས་བརྗེ་བར་བྱའོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པའི་བསྔགས་པ་བརྗོད་དེ་བསླབ་པ་

ལ་གུས་པ་དང་། བསླབ་པ་ལ་ཡོ་བྱད་བསྙུངས་པ་དང་། སྦྱངས་པའི་ཡོན་ཏན་དང་། ཕྲི་བ་དང་། དྲོད་རིག་པའི་བསྔགས་པ་བརྗོད་དེ། དགེ་སློང་མ་རྣམས་ལ་ཡང་དེ་དང་མཐུན་པ་དང་། དེ་དང་འཚམ་པ་དང་། དེའི་ཤས་ཆེ་བ་དང་། དེ་དང་ལྡན་པའི་ཆོས་དང་མཐུན་པའི་བཀའ་མཆིད་བཀའ་
སྩལ་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ་འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལས་གོས་ལེན་ན་བརྗེས་པ་མ་གཏོགས་
ཏེ་སྤང་བའི་ལྟུང་བྱེད་དོ་ཞེས་གནང་བ་མཛད་དེ། ཡུལ་ནི་མཉན་ཡོད། གང་ཟག་ནི་དགེ་སློང་རབ་ཏུ་མང་པོ། །ཉོན་མོངས་པ་དང་ཉེས་པ་ནི་མེད་དོ། །དེ་ལ་ཡང་དགེ་སློང་གང་ཞེས་བྱ་བ་ནི་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །ཉེ་དུ་
མ་ཡིན་པ་ལས་ཞེས་བྱ་བ་ནི་ཕྱི་མོ་དང་། མེས་པོ་དང་། ཕྲུགས་ཀྱི་བདུན་པ་ཚུན་ཆད་ནི་ཉེ་དུ་ཡིན་ལ། དེ་ཕན་ཆད་ནི་ཉེ་དུ་མ་ཡིན་ནོ། །གོས་ཞེས་བྱ་བ་ནི་གོས་བདུན་པོ་བལ་གོས་དང་། ཤ་ནའི་གོས་དང་། གསོ་མའི་གོས་དང་། དུ་གུ་ལའི་གོས་དང་། རས་བལ་གྱི་གོས་དང་། ཀོ་ཏམ་པའི་གོས་དང་།
ཉི་འོག་གི་གོས་ལས་གང་ཡང་རུང་བའོ། །ལེན་ན་ཞེས་བྱ་བ་ནི་བདག་གིར་བྱེད་ནའོ། །བརྗེས་པ་མ་གཏོགས་ཏེ་ཞེས་བྱ་བ་ནི་བརྗེས་པ་གཞག་སྟེའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས། ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་
གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། འདིར་ཡང་དངོས་གཞི་དང་། སྦྱོར་བ་དང་། སྦྱོར་བའི་སྦྱོར་བས་ལྟུང་བ་རྣམ་པར་གཞག་པ་དང་། ལྟུང་བ་མེད་པ་དང་། བསླབ་པར་བྱ་བ་དང་། ཕྱིར་བཅོས་པ་རྣམས་ཀྱིས་འདིའི་མཚན་ཉིད་ཤེས་པར་བྱའོ། །དེ་ལ་འདིར་དངོས་གཞིའི་
ལྟུང་བ་རྣམ་པར་གཞག་པ་ནི་དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཉེ་དུ་མ་ཡིན་པར་འདུ་ཤེས་པས་གོས་དག་ངག་གི་རྣམ་པར་རིག་བྱེད་ཀྱིས་ལེན་ན་ལག་ཏུ་འོངས་པའམ། བལྟ་བའི་ཉེ་འཁོར་དུ་གྱུར་པ་ན་ལེན་པའི་སྤང་བའི་ལྟུང་བྱེད་ཀྱི་དངོས་གཞིར་འགྱུར་རོ། །དགེ་སློང་ལ་ལེན་པའི་

སྤང་བའི་ལྟུང་བྱེད་བྱུང་ན། དེ་མ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་རམ། སྤངས་ཤིང་མ་བྲལ་བར་མ་བྱས་ལ་ལྟུང་བ་མ་བཤགས་པར་རམ། སྤངས་ཤིང་བྲལ་བར་བྱས་ལ་ལྟུང་བ་མ་བཤགས་པར་གོས་བླང་བར་འོས་པ་དེ་ལྟ་བུ་གཞན་ཞིག་རྙེད་ན།
དེ་ཡང་སྔ་མའི་ཤུགས་ཀྱིས་སྤང་བར་འགྱུར་ཏེ། དེ་ལས་ལྟུང་བར་ནི་མི་འགྱུར་རོ། །དགེ་སློང་གིས་ལེན་པའི་སྤང་བའི་ལྟུང་བྱེད་བྱུང་ལ་ཇི་སྲིད་དུ་སྤང་བའི་དངོས་པོ་ལས་མ་བཤགས་ཤིང་། སོ་སོར་མ་བཤགས་པར་ལྷུང་བཟེད་དམ། ཆོས་གོས་སམ། དྲ་བའམ། ཕོར་བུའམ། སྐ་རགས་
སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་གཞན་ཉེ་བར་འཇོག་ན་དེ་ཡང་སྔ་མའི་ཤུགས་ཀྱིས་སྤང་བར་འགྱུར་ཏེ། དེ་ལས་ལྟུང་བར་ནི་མི་འགྱུར་རོ། །རུང་བ་ཉིད་དང་། ཚད་དང་ལྡན་པ་དང་། ཚད་ལས་ལྷག་པ་ལ་ན་སྨད་པ་མེད་དོ། །དགེ་སློང་མ་ཉེ་དུ་མ་ཡིན་པར་བསྙེན་པར་
རྫོགས་པ་མ་ཉམས་པ་ལ་ན་སྨད་པ་མེད་དོ། །ལག་ཏུ་འོངས་པ་ཉིད་དང་། བལྟ་བའི་ཉེ་འཁོར་དུ་གྱུར་པ་ཉིད་ལ་ན་སྨད་པ་མེད་དོ། །ངག་གི་རྣམ་པར་རིག་བྱེད་ལ་ན་སྨད་པ་མེད་དོ། །འདིའི་བྱེད་པ་པོ་ཡང་སྔ་མ་བཞིན་ཏེ། དགེ་སློང་མ་ཉེ་དུ་མ་ཡིན་པའི་ཡུལ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །
ཉེ་དུ་མ་ཡིན་པ་དང་། འདུ་ཤེས་ཀྱི་མཚན་ཉིད་ནི་སྔ་མ་བཞིན་ནོ། །འདི་ལ་ཡན་ལག་ལྔས་དངོས་གཞིའི་ལྟུང་བར་འགྱུར་ཏེ། དགེ་སློང་མ་ཉེ་དུ་མ་ཡིན་པ་དང་། གོས་དང་། རུང་བ་དང་། ངག་གི་རྣམ་པར་རིག་བྱེད་དང་ལེན་པའོ། །དེ་དག་ལས་ཡན་ལག་མ་ཚང་ན་ཅི་རིགས་པར་ན་སྨད་དོ། །དེ་
ལ་དགེ་སློང་མ་ཉེ་དུ་མ་ཡིན་པ་ཞེས་སྨོས་པས་ནི་དགེ་སློང་མ་ཉེ་དུ་མ་ཡིན་པ་ལ་དེར་འདུ་ཤེས་པའམ། ཡིད་གཉིས་ཟ་བ་ཡན་ལག་ཏུ་བསྟན་ཏོ། །གོས་ཞེས་སྨོས་པས་ནི་ལྷུང་བཟེད་དང་། སྨན་ལ་སོགས་པ་སེལ་ཏོ། །རུང་བ་ཞེས་སྨོས་པས་ནི་རྒྱུ་དག་རུང་བ་དང་། ཚད་དང་ལྡན་པ་ཡན་ལག་ཏུ་
བསྟན་ཏོ། །ངག་གི་རྣམ་པར་རིག་བྱེད་ཅེས་སྨོས་པས་ནི་ཅང་མི་སྨྲ་བས་དང་དུ་ལེན་པ་དང་། ངག་ལས་གཞན་པའི་རྣམ་པར་རིག་བྱེད་སེལ་ཏོ། །ལེན་པ་ཞེས་སྨོས་བས་ནི་ལག་ཏུ་མ་འོངས་པ་ཉིད་དང་། བལྟ་བའི་ཉེན་ཀོར་དུ་མ་གྱུར་པ་སེལ་ཏོ། །སྦྱོར་བ་གཅིག་གིས་གོས་གཅིག་གམ།

གཉིས་སམ། མང་པོ་ཞིག་ལེན་ན་ལྟུང་བའི་དངོས་གཞི་གཅིག་ཏུ་རྣམ་པར་གཞག་གོ། །སྦྱོར་བའི་ལྟུང་བ་ནི་ཉེས་བྱས་ཏེ། ཇི་སྲིད་དུ་ལེན་པའི་སྤང་བའི་ལྟུང་བྱེད་ཀྱི་སྦྱོར་བ་བརྩམས་ནས། དངོས་གཞི་ལ་མ་ཐུག་གི་བར་དུ་ཉེས་བྱས་སོ། །དངོས་གཞི་ལ་སྦྱོར་བ་ཐ་དད་པ་ཇི་སྙེད་བརྩམས་པ་རེ་རེ་ལ་ཉེས་
བྱས་རེ་རེའོ། །དགེ་སློང་མ་ཉེ་དུ་ལ་ཉེ་དུ་མ་ཡིན་པར་འདུ་ཤེས་པ་དང་། ཉེ་དུ་ལ་ཡིད་གཉིས་ཟ་བ་ལ་ཉེས་བྱས་སོ། །གོས་མ་ཡིན་པ་ལ་ཉེས་བྱས་སོ། །མི་རུང་བ་ལ་ཉེས་བྱས་སོ། །ངག་གི་རྣམ་པར་རིག་བྱེད་མ་ཡིན་པ་ལ་ཉེས་བྱས་སོ། །ཉེ་བར་མ་གྱུར་པ་ནོད་པ་ལ་ཉེས་བྱས་སོ། །ཕྱི་རོལ་པའི་རབ་
ཏུ་བྱུང་བ་དང་། མ་ཆགས་པ་དང་། ཉམས་པ་ལ་ཉེས་བྱས་སོ། །སྦྱོར་བའི་སྦྱོར་བའི་ལྟུང་བ་ནི་ཉེས་བྱས་ཕྲ་མོ་སྟེ། སྦྱོར་བ་ཇི་སྙེད་པ་ལ་སྦྱོར་བའི་སྦྱོར་བ་ཡང་དེ་སྙེད་དེ། སྦྱོར་བའི་ཉེས་བྱས་ཀྱི་སྦྱོར་བའི་སྦྱོར་བ་ཡང་ཉེས་བྱས་ཏེ། ཉེས་བྱས་ཕྲ་མོའོ། །དེ་ཡང་དང་པོ་ཡིད་ལ་སེམས་པ་ནི་སྦྱོར་བའི་སྦྱོར་
བའི་ཉེས་བྱས་ཕྲ་མོའོ། །དེ་ནས་ལུས་དང་ངག་གིས་སྦྱོར་བ་ནི་སྦྱོར་བའི་ཉེས་བྱས་དངོས་སོ། །དེ་ནས་མཐར་ཐུག་པ་ནི་སྤང་བའི་ལྟུང་བྱེད་ཀྱི་དངོས་གཞིའོ་ཞེས་བྱ་བར་ཤེས་པར་བྱའོ། །ཁྱིམ་པའི་རྟགས་ཅན་ལ་ཉེས་བྱས་ཕྲ་མོའོ། །ལྟུང་བ་མེད་པ་ནི་ཉེ་དུ་ལ་ཉེ་དུར་འདུ་ཤེས་པ་ལ་ལྟུང་བ་མེད་དོ། །
དགེ་འདུན་ལ་གོས་འབུལ་བ་དང་། ལེགས་པར་སྨྲ་བ་ལ་འབུལ་བ་ལ་ལྟུང་བ་མེད་དོ། །བསྙེན་པར་རྫོགས་པར་བྱེད་པ་དང་པོར་རླག་བྱུང་བ་དག་ལ་ལྟུང་བ་མེད་དོ། །དད་རྫས་བརྗོད་དེ་མདུན་དུ་བཞག་ནས་མི་ལྟོས་པར་རང་སོང་བ་ལ་ལྟུང་བ་མེད་དོ། །དགེ་སློང་མ་རྒྱ་ཆེ་བ་དང་ཉོ་ཚོང་གི་ཐ་སྙད་
དང་བྲལ་བས་གོས་ལ་སོགས་པ་བྱིན་པ་ལ་ལྟུང་བ་མེད་དོ། །རེ་ཞིག་གི་སེམས་ཀྱིས་ལེན་པ་ལ་ལྟུང་བ་མེད་དོ། །རིན་སྦྱིན་པ་བརྗེད་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པར་བྱ་བ་ནི་དགེ་
སློང་གིས་ཡུལ་ཐམས་ཅད་ལ་གནས་སྐབས་ཐམས་ཅད་དུ་ལེན་པའི་སྤང་བར་འགྱུར་བ་རྣམ་པ་ཐམས་ཅད་མི་བསྟེན་པར་བསླབ་པར་བྱའོ། །དགེ་སློང་མས་གོས་རིན་ཆེན་པོ་དགེ་སློང་དང་བརྗེ་བར་བྱ་བའི་ཕྱིར་སྦྱིན་བདག་ལས་བླང་བར་བྱའོ། །དགེ་སློང་གིས་དགེ་སློང་མ་དང་ལྷན་ཅིག་གོས་ལ་

སོགས་པ་བརྗེ་བར་བྱའོ། །རིན་མཉམ་པས་སམ་ཡང་ན་དེ་དགའ་བ་ཉིད་ཀྱིས་བརྗེ་བར་བྱའོ། །ཕྱིར་བཅོས་པ་ནི་སྔ་མ་བཞིན་ནོ། །ལེན་པའི་སྤང་བ་སྟེ་ལྔ་པ་བཤད་ཟིན་ཏོ།། །།སློང་བའི་སྤང་བའི་གླེང་གཞི་ཡང་བཅས་པ་དང་། གནང་བའི་དབང་གིས་རྣམ་པ་གཉིས་ཏེ།
བཅས་པའི་གླེང་གཞི་ནི། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད།
དགའ་མགུར་སྤྱོད་པར་བྱེད་པ་ལས་དེས་ཆུང་མ་ལ་སྨྲས་པ། བཟང་མོ་ཁོ་བོ་ཟོང་ཐོགས་ཏེ་ཡུལ་གཞན་དུ་འགྲོའོ། །རྗེའི་སྲས་རེ་ཞིག་གཞོན་པའི་གནས་སྐབས་སུ་རོལ་པ་དང་དགྱེས་པ་དང་དགྱེས་དགུར་སྤྱོད་པ་མཛོད་ལ་བགྲེས་པའི་གནས་སྐབས་སུ་ནོར་བསྒྲུབ་པ་མཛོད་ཅིག །བཟང་མོ་ཅི་ཙམ་
དུ་གཞོན་པའི་འབྱུང་བ་ཆེན་པོ་དེ་དག་ནི་གྲང་བ་དང་ཚ་བ་བཟོད་པ་ཡིན་པས། ཇི་ནོར་བསྒྲུབ་པར་བྱ་ཞིང་རྒས་པའི་གནས་སྐབས་སུ་བདེ་བ་སྤྱད་ཅིང་འདུག་པར་བྱའོ། །ཆུང་མས་བསམས་པ། བདག་གིས་བསྐུལ་བར་བྱ་བ་གང་ཡིན་པ་དེ་རང་ཉིད་བྱེད་དོ་སྙམ་ནས། སྨྲས་པ། རྗེའི་སྲས་དེ་ལྟར་
མཛོད་ཅིག །ཁྱིམ་བདག་དེས་ཆུང་མ་དེ་ལ་ཁ་ཟས་ཙམ་བྱིན་ནས། ཟོང་ཁྱེར་ཏེ་ཡུལ་གཞན་དུ་སོང་ངོ་། །དེའི་ཆུང་མ་དེས་བསམས་པ། བདག་གི་ཁྱིམ་ཐབ་གྲང་བ་ན་གྲང་བས་སྦྲེབས་བཞིན་པ་དང་། ཚ་བ་ན་ཚ་བས་གདུངས་བཞིན་པ་དང་། བཀྲེས་པ་དང་སྐོམ་པ་དག་གིས་གནོད་བཞིན་པ་
དང་། ཤ་སྦྲང་དང་། སྦྲང་བུ་དང་། རླུང་དང་ཉི་མ་དང་སྡིག་སྦྲུལ་གྱི་རེག་པ་དག་གིས་ཉེན་བཞིན་དུ་ལོངས་སྤྱོད་དག་མངོན་པར་བསྒྲུབ་པའི་ཕྱིར་སྤྲོ་བར་བྱེད། འབད་པར་བྱེད། རྩོལ་བར་བྱེད་པ་གང་ཡིན་པ་དེ་དག་ཐམས་ཅད་བདག་གི་ཕྱིར་བྱའོ་སྙམ་པ་ཡིན་པས། བདག་ལས་མེད་པར་
འདུག་པ་ནི་བདག་གི་ཚུལ་དང་མཐུན་པ་མ་ཡིན་ནོ་སྙམ་ནས་དེས་ཚོང་དུས་སུ་སོང་སྟེ། རས་བལ་བཟང་པོ་བླངས་ནས་དོག་པ་བཟང་པོ་བཀལ་ཏེ། ཐག་པ་མཁས་པ་ལ་རས་ཟུང་བཟང་པོ་འཐག་ཏུ་བཅུག་ནས། དེས་རས་དེ་སྤོས་སྣ་ཚོགས་ཀྱིས་བསྒོས་ཏེ། གོས་ཀྱི་ཟ་མ་ཏོག་ཏུ་བཅུག་

སྟེ་བཞག་གོ། །ཁྱིམ་བདག་དེས་ཀྱང་དོན་ལེགས་པར་གྲུབ་ནས་ཁེ་སྤོགས་རྙེད་དེ་ལེགས་པར་འོངས་ནས། ཆུང་མ་དེས་ཁྱིམ་བདག་དེ་ཁྲུས་བྱས་ནས་དེ་ལ་རས་ཟུང་དེ་ཕུལ་ལོ། །ཁྱིམ་བདག་དེས་བསམས་པ། བདག་གིས་འདི་ལ་ཁ་ཟས་ཙམ་བཞག་པ་གང་ཡིན་པ་དེ་དག་ཐམས་ཅད་
ཀྱིས་ཀྱང་རས་ཟུང་འདི་མི་རྙེད་དོ་སྙམ་དུ་རིག་ནས། ཆུང་མ་ལ་སྨྲས་པ། བཟང་མོ་རས་ཟུང་འདི་ག་ལས་རྙེད། རྗེའི་སྲས་ཇེ་གསོལ་ཅིག །ཁྱིམ་བདག་དེས་དེ་གྱོན་ནས་ཡང་དྲིས་པ། བཟང་མོ་རས་ཟུང་འདི་ག་ལས་རྙེད། རྗེའི་སྲས་ཇེ་བཤོས་གསོལ་ཅིག །དེས་ཟན་ཟོས་ནས་ཡང་དྲིས་པ།
བཟང་མོ་རས་ཟུང་འདི་ག་ལས་རྙེད། དེས་སྐབས་དེ་རྒྱས་པར་བརྗོད་པ་དང་། ཁྱིམ་བདག་གིས་སྨྲས་པ། བཟང་མོ་ལེགས་སོ། །ཁོ་བོ་ནི་བསྒྲུབ་པ་ཡིན་ལ་ཁྱོད་ཀྱང་འདི་ལྟར་སྲེད་པ་ཡིན་ན་བདག་ཅག་གི་ལོངས་སྤྱོད་དག་རིང་པོ་མི་ཐོགས་པ་ཁོ་ནར་འཕེལ་ཞིང་རྒྱས་པ་དང་ཡངས་པར་
འགྱུར་རོ། །ཆུང་མས་སྨྲས་པ། རྗེའི་སྲས་འདི་ནི་བདག་གི་དཀའ་བས་བསྒྲུབས་པ་ལགས་ཀྱི། ཁྱོད་ཀྱིས་སུ་ལ་ཡང་མ་སྩལ་ཅིག །ཁྱིམ་བདག་དེ་དད་པ་དང་ལྡན་ཞིང་བཟང་ལ། དགེ་བའི་བསམ་པ་ཅན་ཡིན་པས་དེ་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་རྒྱལ་བྱེད་ཀྱི་ཚལ་དུ་བྱུང་སྟེ་
འགྲོ་བ་ན་མི་སྒོ་བས་མཐོང་ནས་དེས་བསམས་པ། ཁྱིམ་བདག་འདི་རས་ཟུང་འདི་ལྟ་བུ་གྱོན་པ་ལས་ན་འདིས་ནི་རྙེད་པ་མང་པོ་རྙེད་པ་ཡིན་ནོ་སྙམ་མོ། །དྲུག་སྡེ་དག་གི་ཀུན་དུ་སྤྱོད་པ་ནི་དྲུག་སྡེ་དག་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས། ཉེ་དགའ་རྒྱལ་བྱེད་ཀྱི་ཚལ་གྱི་
སྒོ་ན་འཆག་ཅིང་འདུག་པ་དེས་ཁྱིམ་བདག་དེ་མཐོང་ནས་དེས་བསམས་པ། ཁྱིམ་བདག་འདི་རས་ཟུང་འདི་ལྟ་བུ་གྱོན་པ་ལས་ན་འདིས་ནི་རྙེད་པ་མང་པོ་རྙེད་པ་ཡིན་གྱི། གལ་ཏེ་བདག་གིས་འདི་མ་ཕྲོགས་ན་ཉེ་དགའ་ཞེས་བྱ་བའི་མིང་མི་བཟུང་ངོ་སྙམ་ནས། དེས་དེ་ལ་སྨྲས་པ། ཁྱིམ་བདག་འོངས་པ་
ལེགས་སོ་འོངས་པ་ལེགས་སོ། །ཁྱོད་ཡུན་རིང་མོ་རིང་མོ་ནས་ཟླ་བ་བཞིན་དུ་ག་ལས་འཁོར་འཁོར། འཕགས་པ་དག་ཟོང་ཐོགས་ཏེ་ཡུལ་གཞན་དུ་མཆིས་པར་གྱུར་ཏོ། །ཁྱིམ་བདག་ཁྱོད་ཀྱིས་རྙེད་པ་མང་པོ་གྲུབ་བམ། འཕགས་པ་ཆང་ཆུང་ཙམ་མོ། །ཁྱིམ་བདག་མཚེའུ་ནི་རྙོག་པ་ཅན་

ནམ། དང་བའི་རྒྱུ་མཐུན་པས་རིག་པར་བྱ་སྟེ། ཁྱོད་རས་ཟུང་འདི་ལྟ་བུ་གྱོན་པ་ལས་ན་ཁྱོད་ཀྱིས་རྙེད་པ་མང་པོ་གྲུབ་པར་མངོན་གྱི་ཚུར་ཤོག་ཆོས་བསྟན་པར་བྱའོ། །དྲུག་སྡེ་དག་གི་ཀུན་དུ་སྤྱོད་པ་ནི་གལ་ཏེ་ཚུལ་ཁྲིམས་ཀྱི་གཏམ་དག་བྱེད་ན་ཉན་པ་པོ་དག་བདག་ཅག་ལྷ་
རྣམས་སུ་སྐྱེས་སོ་སྙམ་དུ་སེམས་ལ། གལ་ཏེ་སྦྱིན་པའི་གཏམ་དག་བྱེད་ན་ཉན་པ་པོ་དག་རང་གི་ཤ་གང་ཡིན་པ་དེ་ཡང་བཅད་ཅིང་བཅད་ཅིང་སྦྱིན་པར་བྱའོ་སྙམ་དུ་སེམས་སོ། །གལ་ཏེ་ངན་སོང་གི་གཏམ་དག་བྱེད་ན་ཉན་པ་པོ་དག་བདག་ཅག་ངན་སོང་རྣམས་སུ་སྐྱེས་སོ་སྙམ་དུ་སེམས་པར་
འགྱུར་བ་ཡིན་ནོ། །ཁྱིམ་བདག་དེས་ཉེ་དགའི་རྐང་པ་གཉིས་ལ་ཕྱག་འཚལ་ཏེ། ཆོས་མཉན་པའི་ཕྱིར་མདུན་དུ་འདུག་པ་དང་། ཉེ་དགས་དེ་ལ་ཆོས་བསྟན་པར་བརྩམས་ནས། དེས་དེ་ལ་ཅི་ནས་ཀྱང་དེའི་སེམས་དད་པར་འགྱུར་བ་དེ་ལྟར་ཆོས་ཀྱི་གཏམ་བྱས་སོ། །དེ་དད་པར་གྱུར་ནས་སྨྲས་
པ། བདག་གིས་འཕགས་པ་ལ་ལེགས་པར་གསུངས་པའི་ན་བཟའ་ཕྲུགས་ཅིག་འབུལ་ལོ། །བཞིན་བཟངས་ཨ་རོག་གྱ་སྦྱིན་པ་འདིས་ཁྱོད་ཀྱི་སེམས་ཀྱི་རྒྱན་དང་། སེམས་ཀྱི་ཡོ་བྱད་དང་། རྣལ་འབྱོར་གྱི་ཚོགས་དང་། དོན་གྱི་མཆོག་ཐོབ་པར་གྱུར་ཅིག །བཞིན་བཟངས་བཅོམ་ལྡན་འདས་
ཀྱིས་ཀྱང་འདི་སྐད་ཅེས། སང་དག་འཆི་ཡང་སུས་ཤེས་ཀྱི། །དེ་རིང་ཉིད་དུ་བརྟུན་ཏེ་བྱ། །འཆི་བདག་སྡེ་ཅན་དེ་དང་ནི། །ཁྱེད་ཅག་བཤེས་པ་མ་ཡིན་ནོ། །ཞེས་གསུངས་སོ། །བཞིན་བཟངས་ཁྱོད་ཀྱིས་རས་ཟུང་བཟང་པོ་གྱོན་པ་འདི་ཉིད་ཁོ་བོ་ལ་བྱིན་ཅིག་དང་། ཁོ་བོས་འདི་ལས་སྣམ་སྦྱར་ཉིས་
རིམ་བྱས་ཏེ། སེམས་ལས་ཆུང་ངུས་དགེ་བའི་ཕྱོགས་ལ་བདེ་བར་ཏྲོན་བྱའོ། །འཕགས་པ་ཁྱོད་འདི་བཞེད་དམ། ལྷའི་གནས་ཀྱི་ལྷག་མ་ཇི་ལྟ་བ་བཞིན་དུའོ། །འཕགས་པ་བདག་ཁྱོད་ལ་མི་འབུལ་བ་ནི་མ་ལགས་ན། འདི་ལྟར་འདི་ནི་མཆིས་བྲང་གིས་བདག་ལ་སྩལ་བ་ལགས་སོ། །ཁྱིམ་བདག་
ཁོ་བོས་ཁྱོད་གཞན་ལ་དད་པར་བྱས་ན། ཁྱོད་ཀོ་བུད་མེད་ཁོ་ནའི་དབང་ཡིན་ནམ་ཞེས་ཉེ་དགས་དང་ན་དུས་ཀྱི་ཕྱེད་ཀྱིས་དེའི་བླ་གོས་བླངས་ནས། དེ་ལག་པ་གཉིས་འདྲིལ་བར་བྱེད་བཞིན་སྒྱུར་བར་བྱེད་དོ། །ཁྱིམ་བདག་གིས་དེ་ལ་སྨྲས་པ། འཕགས་པ་འདི་ཅིའི་ཐ་ཚིག །ཁྱིམ་བདག་འདི་ནི་

ཁྱོད་ལ་ཡོངས་སུ་བཏང་བ་ལས་བྱུང་བའི་བསོད་ནམས་བྱ་བའི་གཞི་ནི་ཡོད་ན་ཡོངས་སུ་ལོངས་སྤྱོད་པ་ལས་བྱུང་བའི་བསོད་ནམས་བྱ་བའི་གཞི་ནི་མེད་དེ། ནམ་ཞིག་ན་འདི་དང་འདྲ་བ་རྙེད་ན། འདི་ལས་ཆོས་གོས་བྱེད་པར་འགྱུར་བས་འདི་ནི་ཆོས་གོས་ཀྱི་གདང་ཁོ་ན་ལ་ཟད་པར་འགྱུར་རོ། །
འཕགས་པ་ཅི་བདག་སྒྲེན་མོར་མཆི་བར་བགྱིའམ། ཁྱིམ་བདག་ཁྱོད་ལ་གོས་གྱོན་པས་ཅི་ཞིག་བྱ། ཚུལ་ཁྲིམས་དང་རིགས་དང་། སྤྱོད་པ་གྱོན་པས་ཆོག་མོད་གཅེར་བུ་པ་ངོ་ཚ་ཤེས་པ་དང་། ཁྲེལ་ཡོད་པ་ཉམས་པ་དེ་དག་ནི་སྒྲེན་མོར་འགྲོ་ན་མི་སྡུག་པ་ཡིན་གྱི་ཁྱོད་ལྟ་བུ་ངོ་ཚ་ཤེས་པ་དང་།
ཁྲེལ་ཡོད་པ་དང་ལྡན་པ་ལ་སྒྲེན་མོར་འགྲོ་བ་མི་སྡུག་པ་ཅི་ཡོད། ཁྱིམ་བདག་ཁྱོད་དོར་ཐུང་མི་གྱོན་ནམ། འཕགས་པ་འཚལ་ལོ། །ཁྱིམ་བདག་ཁྱིམ་བདག་རྣམས་ཀྱི་ཀུན་དུ་སྤྱོད་པ་ནི། དོར་ཐུང་གྱོན་ཏེ་ཤིང་ཚལ་ཐོགས་ནས་བ་ལང་གི་ཕྱི་བཞིན་འགྲོ་བ་ཡིན་པས་ཁྱོད་ཀྱང་ཤིང་ཚལ་ཐོགས་
ལ་བ་ལང་གི་ཕྱི་བཞིན་སོང་ཤིག་དང་། སྐྱེ་བོ་དག་གིས་བ་ལང་བསྩུར་འགྲོ་བ་ཕྱིར་བྱུང་བ་ཞིག་ཡིན་པར་ཤེས་པར་འགྱུར་རོ་ཞེས། ཉེ་དགས་དངན་དུས་ཀྱི་ཕྱེད་ཀྱིས་དེའི་སྨད་གཡོགས་ཀྱང་བླངས་སོ། །ཁྱིམ་བདག་དེ་ཤིང་ཚལ་ཐོགས་ཏེ་བ་ལང་གི་ཕྱི་བཞིན་དུ་ཞུགས་པ་དང་། མི་སྒོ་བས་
མཐོང་ནས་སྨྲས་པ། ཁྱིམ་བདག་ཁོ་བོས་ད་ཅི་ཁོ་ན་ཁྱོད་ཆེན་པོ་ལ་འོས་པའི་རས་ཟུང་གྱོན་པར་མཐོང་ན། ཅི་དེ་དག་ཆོམ་རྐུན་པ་དག་གིས་བཅོམ་བའམ། བཞིན་བཟངས་ཁོ་བོ་ཆོམ་རྐུན་པ་དག་གིས་ནི་མ་བཅོམ་མོད་ཀྱི་འདི་ལྟར་བཙུན་པ་ཉེ་དགས་ཁའི་ཆོས་ཀྱིས་བཅོམ་མོ། །ཁྱིམ་བདག་
མགོན་མེད་ཟས་སྦྱིན་གྱི་ཀུན་དུ་སྤྱོད་པ་ནི་ནང་པར་སྔར་ལངས་ཏེ་འཁོར་ལྔ་བརྒྱ་དང་ལྷན་ཅིག་བཅོམ་ལྡན་འདས་དང་དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་དུ་འགྲོ་བ་ཡིན་པས། ཁྱིམ་བདག་མགོན་མེད་ཟས་སྦྱིན་ནང་པར་སྔར་ལངས་ཏེ། འཁོར་ལྔ་བརྒྱ་དང་ལྷན་
ཅིག་མཉན་ཡོད་ནས་བྱུང་སྟེ། འགྲོ་བ་མི་སྒོ་བས་མཐོང་ནས། དེས་སྨྲས་པ། ཁྱིམ་བདག་ཁྱོད་ཀྱིས་དོན་མཐུན་མང་དུ་ཁྲིད་དེ་འོངས་ཀྱིས་ཅི་ནས་ཀྱང་མི་ཆོམ་པར་བག་གྱིས་ཤིག །ཀྱེ་ནང་རྗེ་རྒྱལ་བྱེད་ཀྱི་ཚལ་དང་ལམ་གྱི་བར་ན་ཆོམ་རྐུན་པ་དག་འཁོད་དམ་ཅི། ལམ་གྱི་བར་མ་ཡིན་གྱི།

རྒྱལ་བྱེད་ཀྱི་ཚལ་ཉིད་ན་འཁོད་དོ། །ཀྱེ་ནང་རྗེ་ཁྱེད་ནི་བལ་གྱི་རིགས་ནག་པོ་དང་འདྲ་སྟེ། སྒོ་འདི་ནས་བཅོམ་ལྡན་འདས་དང་དགེ་སློང་གནས་བརྟན་གནས་བརྟན་དག་གཤེགས་པ་གང་གིས་ཀྱང་ཁྱོད་དཀར་པོར་མཛད་མ་སྤྱོད་དོ། །བཅོམ་ལྡན་འདས་དང་དགེ་སློང་གནས་བརྟན་
གནས་བརྟན་རྣམས་ཀྱི་ཞབས་ཀྱི་རྡུལ་ནི་བདག་གིས་མགོ་བོས་བླང་བ་ཡིན་ན། ཁར་སང་གི་ཉིན་མོ་ཁྱིམ་བདག་ཅིག་ཆེན་པོ་ལ་འོས་པའི་རས་ཟུང་གྱོན་ཏེ་བྱུང་བ་དེའི་རས་དེ་ཉེ་དགས་ཁའི་ཆོས་ཀྱིས་ཕྲོགས་ནས་ཁྱིམ་བདག་དེ་སྨོད་ཅིང་དོར་ཐུང་གིས་ཞུགས་པར་གྱུར་ཏོ། །དེ་ནས་ཁྱིམ་བདག་མགོན་
མེད་ཟས་སྦྱིན་འདི་སྙམ་དུ་སེམས་ཏེ། དེ་ནི་བདག་གི་བྱ་བ་ཡིན་ནོ་སྙམ་ནས། རྒྱལ་བྱེད་ཀྱི་ཚལ་དུ་སོང་བ་དང་། ཉེ་དགས་མཐོང་ནས་སྨྲས་པ། ཁྱིམ་བདག་ཨ་རོག་གྱ་ཁྱིམ་བདག་གིས་སྨྲས་པ། ཨ་རོག་གམ་གྱ་ཡང་རུང་ངོ་། །ཁྱིམ་བདག་ཁྱོད་ཁོ་བོ་ལ་སྔོན་ཆད་དུ་བ་འཐུལ་ན་ད་ནི་མེ་ཁོ་ནར་
འབར་རོ། །ཁོ་བོ་མེ་མི་འབར་དུ་ཇི་ལྟར་རུང་། གཞན་དག་རབ་ཏུ་བྱུང་བ་ནི་འདི་འདོད་པ་སྤང་བའི་ཕྱིར་ཡིན་ན། བཙུན་པ་ཉེ་དགའ་ནི་འདོད་པ་མངོན་པར་སྤེལ་བའི་ཕྱིར་ཁོ་ནར་ཡིན་ནོ། །ཁོ་བོས་ཅི་བྱས། ཁྱོད་ཀྱིས་ཁྱིམ་བདག་ཅིག་རྒྱལ་བྱེད་ཀྱི་ཚལ་བལྟར་འོངས་པ་དེའི་རས་ཟུང་དང་ན་
དུས་ཀྱིས་ཕྲོགས་ནས། ཁྱིམ་བདག་དེ་སྨོད་པར་མི་བྱེད་དམ། ཉེ་དགས་སྨྲས་པ། དེ་ནི་འཇིག་རྟེན་ན་ལྷ་ནི་སྦྱིན་པར་བྱེད་ལ། ཡི་དགས་ནི་ཟློག་པར་བྱེད་དོ་ཞེས་ཟེར་བ་ཡིན་ནོ། །ཅི་དེས་ཁྱོད་ལ་རིལ་བ་བྷྲྀང་ག་ར་ཐོགས་ཏེ་ཕུལ་ལམ། ཁྱིམ་བདག་གལ་ཏེ་མི་བཟོད་ན་བསླབ་པའི་གཞི་འཆར་ཆུག་
ཤིག །ཅི་ཁོ་བོས་དེ་ཡལ་བར་བོར་དུ་རེའམ། དེ་ནས་ཁྱིམ་བདག་མགོན་མེད་ཟས་སྦྱིན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས། བཅོམ་ལྡན་འདས་ལ་
ཁྱིམ་བདག་མགོན་མེད་ཟས་སྦྱིན་གྱིས་འདི་སྐད་ཅེས་གསོལ་ཏོ། །བཙུན་པ་འཕགས་པ་འདི་དག་ཁྱིམ་བདག་གམ། ཁྱིམ་བདག་གི་མཆིས་བྲང་ཉེ་དུ་མ་ལགས་པ་ལས་གོས་སློང་བར་བགྱིད་ན། ཀྱེ་མ་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ། གང་གིས་འཕགས་པ་དག་ཁྱིམ་བདག་གམ།

ཁྱིམ་བདག་གི་མཆིས་བྲང་ཉེ་དུ་མ་ལགས་པ་ལ་གོས་སློང་བར་མི་འགྱུར་བར་འཕགས་པ་རྣམས་ལ་དྲན་པར་བགྱི་བ་ཅུང་ཞིག་བཅའ་བ་མཛད་པའི་རིགས་སོ། །བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་མགོན་མེད་ཟས་སྦྱིན་
གྱིས། བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་
འདི་ལ་དགེ་སློང་གི་དགེ་འདུན་བསྡུ་བ་མཛད་དེ། ཉེ་དགའ་ལ་རྨས་ནས་རྣམ་གྲངས་དུ་མར་སྨད་དེ། བསླབ་པ་བཅའ་བའི་ཕན་ཡོན་བཅུ་ཡང་དག་པར་གཟིགས་པས་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཁྱིམ་བདག་གམ། ཁྱིམ་བདག་
གི་ཆུང་མ་ཉེ་དུ་མ་ཡིན་པའི་གན་དུ་སོང་སྟེ། གོས་སློང་ན་སྦང་བའི་ལྟུང་བྱེད་དོ་ཞེས་བཅའ་བ་མཛད་དེ། ཡུལ་ནི་མཉན་ཡོད། གང་ཟག་ནི་ཉེ་དགའ། ཉོན་མོངས་པ་ནི་འདོད་ཞེ་ན། ཉེས་པ་ནི་ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པ་ལས་གོས་སློང་བའོ། །གནང་བའི་གླེང་གཞི་
ནི་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གྲོང་ཕྲེང་བ་ཅན་པའི་དགེ་སློང་བཞི་བཅུ་དོན་མཐུན་དང་ལྷན་ཅིག་ལྗོངས་རྒྱུ་ཞིང་འདོང་པ་ན་ཆོམ་རྐུན་པ་དག་གིས་བཅོམ་ནས་དེ་དག་འདི་སྙམ་དུ་སེམས་ཏེ། བཅོམ་ལྡན་
འདས་ཀྱིས་ཡང་དགེ་སློང་གང་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་སྟེ་གོས་སློང་ན་སྤང་བའི་ལྟུང་བྱེད་དོ་ཞེས་བསླབ་པའི་གཞི་བཅའ་བར་མཛད་པས། འདི་ན་བདག་ཅག་ལ་ཉེ་དུ་འགའ་ཡང་མེད་ཀྱི། བདག་ཅག་མཉན་ཡོད་དུ་སོང་ན་དེར་བདག་ཅག་ལ་
ཚངས་པ་མཚུངས་པར་སྤྱོད་པ་རྣམས་ཀྱིས་གོས་དག་གི་བགོ་བཤའ་བྱེད་པར་འགྱུར་རོ་སྙམ་ནས། དེ་དག་གིས་སྨྲས་པ། ཅི་བདག་ཅག་སྒྲེན་མོར་འདོང་བར་བྱའམ། མཚན་མོ་འགེབས་པས་འདོང་བར་བྱ་ཞིང་ཉིན་མོ་ཚང་ཚིང་གི་ནང་དུ་ཞུགས་ཏེ། འཁོད་ལ་མཚན་མོ་ལམ་དུ་འཇུག་

པར་བྱའོ་ཞེས་དེ་དག་མཚན་མོ་འགེབས་བས་རྒྱལ་བྱེད་ཀྱི་ཚལ་དུ་འདོང་བ་དང་། དགེ་སློང་ནམ་གྱི་ཆ་སྟོད་དང་། ནམ་གྱི་ཆ་སྨད་ལ་མི་ཉལ་བར་སྦྱོར་བའི་རྗེས་སུ་བརྩོན་བ་དག་གིས་དེ་དག་མཐོང་ནས་སྨྲས་པ། གཅེར་བུ་པ་སྒྲེ་བྱི་དག་འདི་ཁྱེད་ཀྱི་འདུག་གནས་ཀྱང་མ་
ཡིན། གཙུག་ལག་ཁང་ཡང་མ་ཡིན་ན་ཁྱོད་ག་ལས་འོངས། ཚེ་དང་ལྡན་པ་དག་བདག་ཅག་ནི་གཅེར་བུ་བ་མ་ཡིན་ནོ། །འོ་ན་ཁྱེད་ཅག་སུ་ཡིན། དགེ་སློང་དག་གོ། །དགེ་སློང་ལ་འདི་ལྟ་བུ་དག་ཡོད་དམ། གང་དག་ཆོམ་རྐུན་པ་དག་གིས་བཅོམ་པ་དག་ཅི་འདྲ་བ་ཡིན། ཁྱེད་ཅག་ཅི་
མིང་། གྲོང་ཕྲེང་བ་ཅན་པའི་དགེ་སློང་བཞི་བཅུ་པོའོ། །ཚེ་དང་ལྡན་པ་དག་འོངས་པ་ལེགས་སོ་འོངས་པ་ལེགས་སོ་ཞེས་དེ་དག་གིས་དེ་དག་ལ་ལ་ལས་ནི་སྣམ་སྦྱར་བྱིན། ལ་ལས་ནི་བླ་གོས་བྱིན། ལ་ལས་ནི་མཐང་གོས་བྱིན། ལ་ལས་ནི་རྔུལ་གཟན་བྱིན་པའི་སྐབས་དེ་དགེ་སློང་རྣམས་ཀྱིས་
བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་བ། དེ་ལྟ་བས་ན་དུས་མ་གཏོགས་ཏེ། དེ་ལ་དུས་ནི་འདི་ཡིན་ཏེ། དགེ་སློང་གོས་ཕྲོགས་སམ། གོས་རླག་གམ། གོས་ཚིག་གམ། གོས་རླུང་གིས་ཁྱེར་རམ། གོས་ཆུས་ཁྱེར་རམ། དེ་ལ་དེ་ནི་དུས་ཡིན་ནོ། །དེ་ནས་
བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས། དགེ་སློང་རྣམས་ལ་ཡང་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་ལྡན་པའི་ཆོས་དང་མཐུན་པའི་བཀའ་མཆིད་མཛད་ནས། དགེ་སློང་རྣམས་
ལ་བཀའ་སྩལ་པ། དགེ་སློང་དག་ད་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་སྟེ། གོས་སློང་ན་དུས་མ་
གཏོགས་ཏེ་སྤང་བའི་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། དགེ་སློང་གོས་ཕྲོགས་སམ། གོས་རླག་གམ། གོས་ཚིག་གམ། གོས་རླུང་གིས་ཁྱེར་རམ། གོས་ཆུས་ཁྱེར་ན་དེ་ལ་དེ་ནི་དུས་ཡིན་ནོ་ཞེས་གནང་བ་མཛད་དེ། ཡུལ་ནི་མཉན་ཡོད། གང་ཟག་ནི་གྲོང་ཕྲེང་བ་ཅན་པའི་དགེ་སློང་

བཞི་བཅུ། ཉོན་མོངས་པ་དང་ཉེས་པ་ནི་མེད་དོ། །དེ་ལ་ཡང་དགེ་སློང་གང་ཞེས་བྱ་བ་ནི་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །ཁྱིམ་བདག་གམ་ཞེས་བྱ་བ་ནི་སྐྱེས་པའོ། །ཁྱིམ་བདག་གི་ཆུང་མ་ཞེས་བྱ་བ་ནི་བུད་མེད་དོ། །ཉེ་དུ་མ་ཡིན་པའི་ཞེས་བྱ་བ་ནི་ཕྱི་མོ་དང་། མེས་པོ་དང་། ཕྲུགས་
ཀྱི་བདུན་པ་ཚུན་ཆད་ནི་ཉེ་དུ་ཡིན་ལ། དེ་ཕན་ཆད་ནི་ཉེ་དུ་མ་ཡིན་ནོ། །གན་དུ་སོང་སྟེ་ཞེས་བྱ་བ་ནི་དྲུང་དུ་སོང་སྟེའོ། །གོས་ཞེས་བྱ་བ་ནི་བདུན་པོ་བལ་གོས་དང་། ཤ་ནའི་གོས་དང་། ཟར་མའི་གོས་དང་། རས་བལ་གྱི་གོས་དང་། དུ་གུ་ལའི་གོས་དང་། ཀོ་ཏམ་པའི་གོས་དང་། ཉི་འོག་གི་གོས་ལས་གང་
ཡང་རུང་བའོ། །སློང་ན་ཞེས་བྱ་བ་ནི་སློང་མོ་བྱེད་ནའོ། །དུས་མ་གཏོགས་ཏེ་ཞེས་བྱ་བ་ནི་དུས་གཞག་སྟེའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱའོ། །དེ་ལ་དུས་ནི་འདི་ཡིན་ཏེ། དགེ་སློང་གོས་ཕྲོགས་སམ་ཞེས་བྱ་བ་ནི་འདི་ལྟ་སྟེ། དགེ་སློང་
གི་གོས་དག་ཆོམ་རྐུན་པ་དག་གམ། གཡོན་ཅན་དག་གིས་ཕྲོགས་པར་གྱུར་པའོ། །གོས་རླག་གམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་རླག་པར་གྱུར་བའམ། འཁྱམས་པར་གྱུར་པའོ། །གོས་ཚིག་གམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་མེས་ཚིག་པར་གྱུར་པའོ། །
གོས་རླུང་གིས་ཁྱེར་རམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་རླུང་གིས་ཁྱེར་བར་གྱུར་པའོ། །གོས་ཆུས་ཁྱེར་ན་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་ཆུས་ཁྱེར་བར་གྱུར་ནའོ། །དེ་ལ་དེ་ནི་དུས་ཡིན་ནོ་ཞེས་བྱ་བ་ནི་བསླབ་པའི་གཞི་དེ་ལ་དེ་ནི་གནང་བའི་དུས་ཡིན་པའོ། །དེ་ལ་
ལྟུང་བ་ཇི་ལྟར་འགྱུར་ཞེ་ན། འདིར་ཡང་དངོས་གཞི་དང་། སྦྱོར་བ་དང་། སྦྱོར་བའི་སྦྱོར་བས་ལྟུང་བ་རྣམ་པར་གཞག་པ་དང་། ལྟུང་བ་མེད་པ་དང་། བསླབ་པར་བྱ་བ་དང་། ཕྱིར་བཅོས་པ་རྣམས་ཀྱིས་འདིའི་མཚན་ཉིད་ཤེས་པར་བྱའོ། །དེ་ལ་འདིར་དངོས་གཞིའི་ལྟུང་བ་རྣམ་པར་གཞག་པ་ནི་དགེ་
སློང་གོས་ཕྲོགས་པ་དང་། རླག་པ་དང་། ཚིག་པ་དང་། རླུང་གིས་ཁྱེར་བ་དང་། ཆུས་ཁྱེར་བར་མ་གྱུར་པ་སློང་བར་མི་རིགས་པས་མིའི་འགྲོ་བར་གཏོགས་པ་ཁྱིམ་པར་གྱུར་པ་སྲོག་དང་ལྡན་པ་ཉེ་དུ་མ་ཡིན་པ་ལས་གོས་རུང་བ་ཚད་དང་ལྡན་པ་ལས་མི་ཆུང་བ། རིན་ཐང་དང་། ཁ་དོག་དང་། ཁྲུ་ཚད་ལས་རྣམ་པ་གང་

བསླངས་པ་དེ་ཉིད་ཐོབ་ནས། སློང་བའི་སྤང་བའི་ལྟུང་བྱེད་ཀྱི་དངོས་གཞིར་འགྱུར་རོ། །དགེ་སློང་ལ་སློང་བའི་སྤང་བའི་ལྟུང་བྱེད་བྱུང་ན་དེ་མ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་རམ། སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་རམ།
སྤངས་ཤིང་བྲལ་བར་བྱས་ལ་ལྟུང་བ་མ་བཤགས་པར་གོས་རིན་ཐང་དང་། ཁ་དོག་དང་། ཁྲུ་ཚད་དེ་ལྟ་བུ་གཞན་ཞིག་རྙེད་ན། དེ་ཡང་སྔ་མའི་ཤུགས་ཀྱིས་སྤང་བར་འགྱུར་ཏེ། དེ་ལས་ལྟུང་བར་ནི་མི་འགྱུར་རོ། །དགེ་སློང་གིས་སློང་བའི་སྤང་བའི་ལྟུང་བྱེད་བྱུང་ལ་ཇི་སྲིད་དུ་སྤང་བའི་དངོས་པོ་ལས་མ་
བཤགས་ཤིང་སོ་སོར་མ་བཤགས་པར་ལྷུང་བཟེད་དམ། ཆོས་གོས་སམ། དྲ་བའམ། ཕོར་བུའམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་གཞན་ཉེ་བར་འཇོག་ན། དེ་ཡང་སྔ་མའི་ཤུགས་ཀྱིས་སྤང་བར་འགྱུར་ཏེ། དེ་ལས་ལྟུང་བར་ནི་མི་འགྱུར་རོ། །རིན་ཐང་དང་།
ཁ་དོག་དང་། ཁྲུ་ཚད་ལས་རྣམ་པ་གང་བསླངས་པ་དེ་ལྟ་བུ་ཉིད་ཐོབ་པ་ལ་ན་སྨད་པ་མེད་དོ། །རིན་ཐང་དང་ཁ་དོག་དང་། ཁྲུ་ཚད་ཀྱི་དབྱེ་བ་མ་བྱས་པར་སྤྱིར་བསླངས་པ་ན་གང་ཡང་རུང་བ་ཞིག་ཐོབ་པ་ལ་ན་སྨད་པ་མེད་དོ། །རུང་བ་ཉིད་དང་ཚད་དང་ལྡན་པ་དང་ཚད་ལས་ལྷག་པ་ལ་ན་སྨད་པ་མེད་དོ། །འདིའི་
བྱེད་པ་པོ་ནི་མིའི་འགྲོ་བར་གཏོགས་པ་ཁྱིམ་པར་གྱུར་པ་སྲོག་དང་ལྡན་པ་ཉེ་<དུམ་‚དུ་མ་>ཡིན་པའོ། །དེ་ལ་དགེ་སློང་ཇི་ལྟ་བུ་ལ་ལྟུང་བ་འདིའི་བྱེད་པ་པོ་ཡིན་ཞེ་ན། གོས་ཕྲོགས་པ་དང་། རླག་པ་དང་། ཚིག་པ་དང་། རླུང་གིས་ཁྱེར་བ་དང་། ཆུས་ཁྱེར་བར་མ་གྱུར་པ་སློང་བར་མི་རིགས་པ་ལའོ། །འདི་ལ་ཡན་
ལག་ལྔས་དངོས་གཞིའི་ལྟུང་བར་འགྱུར་ཏེ། དགེ་སློང་གོས་ཕྲོགས་པ་དང་། རླག་པ་དང་། ཚིག་པ་དང་། རླུང་གིས་ཁྱེར་བ་དང་། ཆུས་ཁྱེར་བར་མ་གྱུར་པ་སློང་བར་མི་རིགས་པ་དང་། སྦྱིན་བདག་མིའི་འགྲོ་བར་གཏོགས་པ་ཁྱིམ་པར་གྱུར་པ་སྲོག་དང་ལྡན་པ་ཉེ་དུ་མ་ཡིན་པ་དང་། གོས་རུང་
བ་ཚད་དང་ལྡན་པ་ལས་མི་ཆུང་བ་དང་། རིན་ཐང་དང་། ཁ་དོག་དང་། ཁྲུ་ཚད་ལས་རྣམ་པ་གང་བསླངས་པ་དང་། དེ་ཉིད་ཐོབ་པའོ། །དེ་དག་ལས་ཡན་ལག་མ་ཚང་ན་ཅི་རིགས་པར་ན་སྨད་དོ། །དེ་ལ་དགེ་སློང་གོས་ཕྲོགས་པ་ལ་སོགས་པར་མ་གྱུར་པའོ་ཞེས་སྨོས་པས་ནི་དེ་དགེ་སློང་བར་མི་

རིགས་པའི་ཕྱིར་རོ། །སྦྱིན་བདག་མིའི་འགྲོ་བར་གཏོགས་པ་ཁྱིམ་པར་གྱུར་པ་སྲོག་དང་ལྡན་པ་ཉེ་དུ་མ་ཡིན་པ་ཞེས་སྨོས་པ་ནི་དེ་ལས་བཟློག་པ་ལ་ཉེས་བྱས་སུ་འགྱུར་བའི་ཕྱིར་རོ། །གོས་རུང་བ་དང་། ཚད་དང་ལྡན་པ་ལས་མི་ཆུང་བ་ཞེས་སྨོས་པ་ནི་ཞུ་བ་ལས་ཉེ་དུ་མ་ཡིན་པ་ལས་ཆོས་གོས་མི་རུང་བ་དང་།
མི་ཆོག་པ་ཉིད་སློང་ན་ཉེས་བྱས་སོ་ཞེས་གསུངས་པའི་ཕྱིར་རོ། །རིན་ཐང་དང་། ཁ་དོག་དང་། ཁྲུ་ཚད་ལས་རྣམ་པ་གང་བསླངས་པ་དང་། དེ་ཉིད་ཐོབ་པ་ཞེས་སྨོས་པ་ནི་གཞན་ཐོབ་པ་དང་། དེ་ཉིད་མ་ཐོབ་པ་ལ་ལྟུང་བ་མེད་དོ་ཞེས་གསུངས་པའི་ཕྱིར་རོ། །སྦྱོར་བ་གཅིག་གིས་གོས་གཅིག་གམ། གཉིས་
སམ། མང་པོ་ཞིག་ཐོབ་པ་ན་ཡང་ལྟུང་བའི་དངོས་གཞི་གཅིག་རྣམ་པར་གཞག་གོ། །སྦྱོར་བའི་ལྟུང་བ་ནི་ཉེས་བྱས་ཏེ། ཇི་སྲིད་དུ་སློང་བའི་སྤང་བའི་ལྟུང་བྱེད་ཀྱི་སྦྱོར་བས་བརྩམས་ནས། དངོས་གཞི་ལ་མ་ཐུག་གི་བར་དུ་ཉེས་བྱས་སོ། །དངོས་གཞི་ལ་སྦྱོར་བ་ཐ་དད་པ་ཇི་སྙེད་པ་བརྩམས་པ་རེ་རེ་ལ་
ཉེས་བྱས་རེ་རེའོ། །མིའི་འགྲོ་བར་གཏོགས་པ་དང་། ཁྱིམ་པར་གྱུར་པ་དང་། སྲོག་དང་ལྡན་པ་དང་། ཉེ་དུ་མ་ཡིན་པ་ལས་བཟློག་པ་ལ་ཉེས་བྱས་སོ། །མ་གྲུབ་པ་ལ་ཉེས་བྱས་སོ། །སློང་བའི་ཚེ་ཉིད་ན་ཉེས་བྱས་སོ། །མི་རུང་བ་ལ་ཉེས་བྱས་སོ། །ཆུང་ངུ་ལ་ཉེས་བྱས་སོ། །རྒྱུ་སྤུན་ལ་ཉེས་བྱས་
སོ། །རྒྱུ་སྤུན་གྱི་རང་བཞིན་བལ་དང་། རས་བལ་ལ་སོགས་པ་ལ་ཉེས་བྱས་སོ། །ཁྱིམ་བདག་དང་ཁྱིམ་བདག་གི་ཆུང་མ་གཉི་གའམ། གཅིག་མ་ནིང་དང་མཚན་གཉིས་པ་ལ་ཉེས་བྱས་སོ། །ཕྱི་རོལ་པའི་རབ་ཏུ་བྱུང་བ་དང་མ་ཆགས་པ་དང་། ཉམས་པ་ལ་ཡང་ཉེས་བྱས་སོ། །སྦྱོར་བའི་སྦྱོར་བའི་
ལྟུང་བ་ནི་ཉེས་བྱས་ཕྲ་མོ་སྟེ། སྦྱོར་བ་ཇི་སྙེད་པ་ལ་སྦྱོར་བའི་སྦྱོར་བ་ཡང་དེ་སྙེད་དོ། །སྦྱོར་བ་ཉེས་བྱས་ཀྱི་སྦྱོར་བའི་སྦྱོར་བ་ཡང་ཉེས་བྱས་ཏེ་ཉེས་བྱས་ཕྲ་མོའོ། །དེ་ཡང་དང་པོ་ཡིད་ལ་སེམས་པ་ནི་སྦྱོར་བའི་སྦྱོར་བའི་ཉེས་བྱས་ཕྲ་མོའོ། །དེ་ནས་ལུས་དང་ངག་གིས་སྦྱོར་བ་ནི་སྦྱོར་བའི་ཉེས་བྱས་དངོས་སོ། །
དེ་ནས་མཐར་ཐུག་པ་ནི་སྤང་བའི་ལྟུང་བྱེད་ཀྱི་དངོས་གཞིའོ་ཞེས་བྱ་བར་ཤེས་པར་བྱའོ། །ལྟུང་བ་མེད་པ་ནི་དགེ་སློང་གོས་ཕྲོགས་པ་དང་། རླག་པ་དང་། ཚིག་པ་དང་། རླུང་གིས་ཁྱེར་བ་དང་། ཆུས་ཁྱེར་བ་དག་ནི་སློང་བར་རིགས་པ་ཡིན་པས་དེ་དག་ལ་ལྟུང་བ་མེད་དོ། །རིན་ཐང་གཞན་ནམ་ཁ་དོག་

གཞན་ནམ་ཁྲུ་ཚད་གཞན་ཐོབ་པ་ལ་ལྟུང་བ་མེད་དོ། །རས་མ་དང་ཁ་ཚར་སློང་བ་ལ་ལྟུང་བ་མེད་དོ། །ཁ་ཚར་བསླངས་པ་ལས་རས་མ་ཐོབ་པ་ལ་ལྟུང་བ་མེད་དོ། །རས་མ་བསླངས་ན་རས་ཡུག་ཆེན་དང་། རས་ཡུག་ཕྲན་དག་འཐོབ་བོ་སྙམ་ནས་བསླངས་ཤིང་ཐོབ་ན་ཡང་ལྟུང་
བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པར་བྱ་བ་ནི་དགེ་སློང་གིས་ཡུལ་ཐམས་ཅད་ལ་གནས་སྐབས་ཐམས་ཅད་དུ་སློང་བའི་སྤང་བར་འགྱུར་བ་རྣམ་པ་ཐམས་ཅད་མི་བསྟེན་པར་བསླབ་པར་བྱའོ། །ཕྱིར་བཅོས་པ་ནི་
སྔ་མ་བཞིན་ནོ། །སློང་བའི་སྤང་བ་སྟེ་དྲུག་པ་བཤད་ཟིན་ཏོ།། །།སློང་བར་རིགས་པའི་སྤང་བའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཉེ་དགའ་ལ་བློ་སྐྱེས་པ་འདི་དག་ཐམས་ཅད་ཁྱིམ་བདག་མགོན་
མེད་ཟས་སྦྱིན་གྱིས་བསླབ་པའི་གཞི་དག་གིས་བསྡམས་པས་ཕྱིན་ཆད་གང་ནས་ཀྱང་བཅའ་བའི་རིན་ཙམ་ཡང་བསླང་བར་མི་ནུས་ན། འདི་ལྟར་བཅོམ་ལྡན་འདས་ཀྱིས་གྲོང་ཕྲེང་བ་ཅན་པའི་དགེ་སློང་བཞི་བཅུ་ལ་བརྟེན་ནས་བསླབ་པའི་གཞི་བག་ཡངས་སུ་མཛད་པ་ཡོད་པས། བདག་གིས་གྲོང་
ཕྲེང་བ་ཅན་པའི་དགེ་སློང་བཞི་བཅུ་པོ་དག་སྔོན་དུ་བཏང་སྟེ། རྙེད་པ་བསྒྲུབ་པར་བྱའོ་སྙམ་ནས་དེ་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་ག་ལ་བ་དེར་སོང་བ་དང་། ཇི་ཙམ་ན་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་རྙང་རྙིང་དག་འཚེམ་ཞིང་འཁོད་པ་མཐོང་ནས་དེས་དེ་དག་ལ་སྨྲས་པ། ཚེ་དང་ལྡན་པ་
དག་བདག་གིས་གཞན་ཐོས་ལ་གཞན་མཐོང་སྟེ། བདག་ཀོ་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པའི་བདེ་བ་དག་ཉམས་སུ་མྱོང་བར་བྱེད་ཅིང་འདུག་པར་སེམས་ཀྱི། བདག་ཚེ་དང་ལྡན་པ་དག་འདི་ལྟར་
རྙང་རྙིང་དག་འཚེམ་ཞིང་འཁོད་པར་ནི་མི་སེམས་སོ། །གནས་བརྟན་བདག་ཅག་ཆོམ་རྐུན་པ་དག་གིས་བཅོམ་མོ། །ཀྱེ་མ་མ་ལེགས་སོ་མ་ལེགས་སོ། །གནས་བརྟན་སུའི་མྱ་ངན་བྱེད་ཅི་ཁོ་བོ་ཅག་གིའམ། མ་ཡིན་ཏེ། གང་དག་གིས་ཁྱེད་ཅག་བཅོམ་པའི་མ་བྱིན་པར་ལེན་པ་དེ་དག་སྒྲེན་མོ་ཁོ་ནར་

སྐྱེ་བར་འགྱུར་ཞིང་སྒྲེན་མོ་ཁོ་ནར་དུས་བྱེད་པར་འགྱུར་བས་དེ་དག་གི་མྱ་ངན་བྱེད་དོ། །ཚེ་དང་ལྡན་པ་དག་ཁྱོད་ཅིའི་ཕྱིར་གོས་དག་མི་སློང་། གནས་བརྟན་སུ་ཞིག་སངས་རྒྱས་དང་། ཆོས་དང་། དགེ་འདུན་སྤངས་ཏེ་ཁོ་བོ་ཅག་ལ་སྦྱིན་པ་དག་བྱ་བར་སེམས་པར་འགྱུར། ཚེ་དང་ལྡན་པ་དག་ཁྱེད་ཅག་
བཅོམ་ལྡན་འདས་ཀྱིས་མདོ་སྡེའི་མཐའ་དེ་དང་དེ་དག་ཏུ་ངེས་པར་བསྟོད་པ་དང་། བཀུར་བ་དང་། བསྔགས་པ་དང་། རབ་ཏུ་བསྔགས་པ་དག་མ་ཡིན་ནམ། གནས་བརྟན་ཁོ་བོ་ཅག་གིས་གོས་སུ་ལ་བསླང་བར་ཡང་མི་ཤེས་སོ། །ཚེ་དང་ལྡན་པ་དག་དགེ་སློང་རབ་ཏུ་ཤེས་པ་གང་གིས་ཁྱེད་ཅག་གི་གོས་
དག་སློང་བར་འགྱུར་བ་འགའ་ཞིག་ལ་ཅིའི་ཕྱིར་མི་བཅོལ། གནས་བརྟན་དགེ་སློང་རབ་ཏུ་ཤེས་པ་སུ་ཞིག་བདག་ཉིད་ཀྱི་དགེ་བའི་ཕྱོགས་ཡོངས་སུ་ཉམས་པར་བྱས་ཏེ། ཁོ་བོ་ཅག་གི་དོན་དུ་གོས་དག་སློང་བར་འགྱུར། ཚེ་དང་ལྡན་པ་དག་རེ་ཞིག་ཁོ་བོ་བདག་ཉིད་དང་བཅུ་པ་ལ་ཡང་ཐབས་ཡོད་ལ།
གཞན་ཡང་ཁོ་བོ་ཅག་མི་དྲུག་རེ་རེ་ལ་ཡང་བདག་ཉིད་དང་བཅུ་པ་ཡིན་པས་ཁོ་བོ་ཅག་མི་དྲུག་ཅུ་ལ་ཡང་ཐབས་ཡོད་དོ། །གཞན་ཡང་གལ་ཏེ་ཁྱེད་ཅག་ལ་མི་གནོད་ན་ཁོ་བོ་ཅག་ཀྱང་གཞོན་ནུ་དག་གི་དོན་དུ་རས་ཡུག་ཕྲན་དང་། རས་ཡུག་ཆེན་སློང་བར་བྱེད་དོ། །གནས་བརྟན་དེ་ལ་ཁོ་བོ་ཅག་ལ་
གནོད་པ་ཅི་ཡོད། རེ་ཞིག་རེ་རེ་ཀྱང་ཆོས་གོས་གསུམ་གསུམ་སློང་ལ་རག་གོ། །ཚེ་དང་ལྡན་པ་དག་ཁོ་བོ་ཅག་གིས་བསོད་སྙོམས་ལ་རྒྱུ་བ་དང་། གོས་དག་བསློང་བ་གཉི་ག་མི་ནུས་ཀྱི་འདི་ལྟར་གང་གི་ཚེ་ཕྱི་རོལ་དུ་ཟས་ལ་བོས་པ་དེའི་ཚེ་བསླང་བར་བྱའོ་ཞེས་ཉེ་དགའ་དེ་གཙུག་ལག་ཁང་གི་ཕྱི་རོལ་དུ་རྐང་
པ་གཉིས་བཀྲུས་ནས། གཙུག་ལག་ཁང་གི་ནང་དུ་ཞུགས་ཏེ་འདུག་ནས་དེས་བསམས་པ། ཐབས་ཅི་ཞིག་བྱས་ན་དེས་མཉན་ཡོད་ཐམས་ཅད་ཆུབ་པར་འགྱུར་སྙམ་ནས་དེས་ཡང་བསམས་པ། ཇེ་དང་པོ་ཁོ་ནར་དབུལ་པོའི་སྲང་དུ་འགྲོ་བར་བྱ་ཞིང་དེའི་འོག་ཏུ་ཕྱུག་པོའི་སྲང་དུ་འགྲོ་བར་བྱ། དེའི་འོག་
ཏུ་ཀོ་ས་ལའི་རྒྱལ་པོ་གསལ་རྒྱལ་གྱི་ཕོ་བྲང་དང་། བཙུན་མོ་རྒྱལ་རིགས་དབྱར་ཚུལ་མའི་ཁྱིམ་དང་། བཙུན་མོ་ཕྲེང་ལྡན་མའི་ཁྱིམ་དང་། ཁྱིམ་བདག་མགོན་མེད་ཟས་སྦྱིན་གྱི་ཁྱིམ་དང་། བཙུན་མོའི་འཁོར་གྱི་ཞལ་ཏ་པ་དྲང་སྲོང་བྱིན་དང་། རྙིང་པ་གཉིས་ཀྱི་ཁྱིམ་དང་། དགེ་བསྙེན་མ་རི་དགས་འཛིན་གྱི་མ་

ས་གའི་ཁྱིམ་དང་། དགེ་བསྙེན་མ་ཁྱིམ་བདག་གི་ཆུང་མ་ལེགས་སྐྱེས་ཀྱི་ཁྱིམ་དག་ཏུ་འགྲོ་བར་བྱའོ་སྙམ་མོ། །དེའི་ཚེ་ན་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས། ཉེ་དགས་གཞོན་ནུ་རྣམས་ལ་སྨྲས་པ།
ཚེ་དང་ལྡན་པ་དག་གལ་ཏེ་ཁྱེད་ཅག་ལ་ལས་སུ་བསྐོ་བ་དག་འོང་བར་གྱུར་ན། ཁྱེད་ཅག་གིས་མི་གནོད་པར་འདི་སྐད་ཅེས་བདག་ཅག་ལ་མཁན་པོ་དང་། སློབ་དཔོན་དག་གི་བྱ་བ་ཅུང་ཞིག་ཡོད་དོ་ཞེས་བརྗོད་པར་བྱའོ། །ཉེ་དགས་ཕྱི་དེ་ཉིན་པར་གཞོན་ནུ་ཞིག་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་
དག་གི་གན་དུ་བཏང་སྟེ། ཆོས་གོས་དག་བསླང་གི་ཚུར་ཤེག་ཤིག་ཅེས་སྤྲིང་ངོ་། །གཞོན་ནུ་དེ་དེར་མ་སོང་བ་དང་། ཉེ་དགས་སྨྲས་པ། བཀྲེན་པ་ཁྱོད་བརྩོན་འགྲུས་འདི་ལྟ་བུས་ཟག་པ་ཟད་པ་མངོན་སུམ་དུ་བྱེད་པར་འགྱུར་རམ། ཉེ་དགའ་རང་ཉིད་འགྲོའོ་ཞེས་དེ་སོང་ནས། དཔོང་སའི་ཁང་པའི་སྒོ་
གླེགས་ལ་རྟིང་པས་བརྡབས་པ་དང་། དབོང་སའི་ཁང་པ་ཐམས་ཅད་འགུལ་ནས། དེ་དག་ཏིང་ངེ་འཛིན་དེ་ལས་ལངས་ནས་སྨྲས་པ། ཚེ་དང་ལྡན་པ་དགེ་སློང་བཞི་བཅུ་པོ་དག་ཆོས་གོས་གསུམ་བསླང་བར་བྱ་ན། ཁྱེད་ཅག་སྙིང་ལས་ཆུང་ངུར་འཁོད་དམ་ཚུར་ཤེག་འདོང་ངོ་། །གནས་བརྟན་ཇེ་སོ་
ཤིང་པོར་ནས་འདོང་ངོ་། །ཚུར་ཤེག་ལམ་ཀ་ཉིད་དུ་འོར་ཅིག །དེ་དག་འཕགས་པ་དང་ཉེ་དགས་སྨྲས་པ། ཚེ་དང་ལྡན་པ་དག་ཁོ་བོ་ཅག་དྲུག་སྡེ་དག་ནི་བྱ་རོག་དཀར་པོ་དང་འདྲ་བས་ཁོ་བོ་ཅག་གིས་རྒན་རིམས་བཞིན་དུ་འཁོད་པར་མི་བྱ་བར། བར་བར་དུ་རྒན་པ་དག་གིས་འཁོད་པར་བྱའོ། །དེ་དག་
དབུལ་པོའི་སྲང་དུ་དོང་ནས་དངར་ཀ་བྱས་ཏེ་བསྡད་པ་དང་། དེ་དག་གིས་དེ་དག་མཐོང་ནས་ཉམ་ང་བར་གྱུར་ཏེ་སྨྲས་པ། འཕགས་པ་དག་ཉེས་དམིགས་འགའ་ཞིག་མ་བྱུང་ངམ། བཞིན་བཟངས་དག་ཉེས་དམིགས་བྱུང་ངོ་། །ཅི་ནོངས་ཁྱེད་ཀྱིས་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་གང་
<དག་‚དགྲ་>བཅོམ་ལྡན་འདས་ཀྱིས་མདོ་སྡེའི་མཐའ་དེ་དང་དེ་དག་ཏུ་བསྟོད་པ། བཀུར་བ། བསྔགས་པ། རབ་ཏུ་བསྔགས་པ་དེ་དག་ཐོས་སམ། ཐོས་སོ། །དེ་དག་ཆོམ་རྐུན་པ་དག་གིས་བཅོམ་མོ། །དེ་དག་གིས་སྨྲས་པ། ཤེས་ལྡན་དག་མདའ་གཞུ་ལོང་ཤིག །ཕུབ་དང་དབྱུག་པ་དག་ལོང་ཤིག །

ཆོམ་རྐུན་པ་དག་འཛིན་དུ་འདོང་ངོ་། །དྲུག་སྡེ་དག་གིས་སྨྲས་པ། དེ་དག་བཅོམ་ནས་ཡུན་རིང་དུ་ལོན་ཅིང་ཡུལ་འཁོར་གཞན་དུ་བཅོམ་པར་གྱུར་ཏོ། །འོ་ན་ཇི་ལྟར་བགྱི། དེ་དག་ལ་གོས་དག་བྱིན་ཅིག །དེ་དག་གིས་དེ་དག་ལ་གོས་སར་པ་དང་རྙིང་པ་དག་བྱིན་ནོ། །དེ་དག་གིས་གོས་དག་
ཁུར་དུ་དྲགས་ཏེ། གཞོན་ནུ་དག་ལ་གཏད་ནས་སྨྲས་པ། དེང་ལ་འདི་དག་གཙུག་ལག་ཁང་དུ་སྐྱོལ་ཅིག །གཞོན་ནུ་དག་གིས་དེ་དག་ཁྱེར་ཏེ། གཙུག་ལག་ཁང་དུ་དོང་བ་དང་། དེ་དག་ཕྱུག་པོའི་སྲང་དུ་དོང་ནས་དངར་ཀ་བྱས་ཏེ་བསྡད་པ་དང་། དེ་དག་ཉམ་ང་བར་གྱུར་ཏེ་སྨྲས་པ། འཕགས་
པ་དག་ཉེས་དམིགས་འགའ་ཞིག་མ་བྱུང་ངམ། བཞིན་བཟངས་དག་ཉེས་དམིགས་བྱུང་ངོ་། །ཅི་ནོངས། ཁྱེད་ཀྱིས་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་གང་དག་བཅོམ་ལྡན་འདས་ཀྱིས་མདོ་སྡེའི་མཐའ་དེ་དང་དེ་དག་ཏུ་བསྟོད་པ། བཀུར་བ། བསྔགས་པ། རབ་ཏུ་བསྔགས་པ་དེ་
དག་ཐོས་སམ། ཐོས་སོ། །དེ་དག་ཆོམ་རྐུན་པ་དག་གིས་བཅོམ་མོ། །དེ་དག་གིས་སྨྲས་པ། ཤེས་ལྡན་དག་མདའ་གཞུ་ལོང་ཤིག །ཕུབ་དང་དབྱུག་པ་དག་ལོང་ཤིག །ཆོམ་རྐུན་པ་དག་འཛིན་དུ་འདོང་ངོ་། །དྲུག་སྡེ་དག་གིས་སྨྲས་པ། དེ་དག་བཅོམ་ནས་ཡུན་རིང་དུ་ལོན་ཅིང་ཡུལ་
འཁོར་གཞན་དུ་བཅོམ་པར་གྱུར་ཏོ། །འོ་ན་ཇི་ལྟར་བགྱི། དེ་དག་ལ་གོས་དག་བྱིན་ཅིག །དེ་དག་གིས་དེ་དག་ལ་ཆེན་པོ་ལ་འོས་པའི་གོས་དག་བྱིན་ནོ། །དྲུག་སྡེ་དག་གིས་གོས་དེ་དག་ཁུར་དུ་དྲགས་ཏེ་གཞོན་ནུ་དག་ལ་གཏད་ནས་སྨྲས་པ། དེང་ལ་འདི་དག་གཙུག་ལག་ཁང་དུ་སྐྱོལ་ཅིག །
གཞོན་ནུ་དག་གིས་དེ་དག་ཁྱེར་ཏེ་གཙུག་ལག་ཁང་དུ་དོང་བ་དང་། དེ་དག་ཀོ་ས་ལའི་རྒྱལ་པོ་གསལ་རྒྱལ་གྱི་ཕོ་བྲང་དུ་དོང་ནས་དངར་ཀ་བྱས་ཏེ་བསྡད་པ་དང་། ཀོ་ས་ལའི་རྒྱལ་པོ་གསལ་རྒྱལ་གྱིས་དེ་དག་མཐོང་ནས་ཉམ་ང་བར་གྱུར་ཏེ་སྨྲས་པ། འཕགས་པ་དག་ཉེས་དམིགས་འགའ་
ཞིག་མ་བྱུང་ངམ། ལྷ་ཉེས་དམིགས་བྱུང་ངོ་། །ཅི་ནོངས། ལྷས་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་གང་དག་བཅོམ་ལྡན་འདས་ཀྱིས་མདོ་སྡེའི་མཐའ་དེ་དང་དེ་དག་ཏུ་བསྟོད་པ། བཀུར་བ། བསྔགས་པ། རབ་ཏུ་བསྔགས་པ་དེ་དག་གསན་ཏམ། ཐོས་སོ། །དེ་དག་ཆོམ་རྐུན་པ་

དག་གིས་བཅོམ་མོ། །རྒྱལ་པོས་དམག་དཔོན་འཕགས་སྐྱེས་པོ་ལ་བསྒོ་བ། སོང་ལ་མྱུར་དུ་ཆོམ་རྐུན་པ་དག་དང་རྐུན་རྫས་དག་ཁུག་ཤིག །དྲུག་སྡེ་དག་གིས་སྨྲས་པ། ལྷ་དེ་དག་ནི་བཅོམ་ནས་ཡུན་རིང་དུ་ལོན་ཅིང་ཡུལ་འཁོར་གཞན་དུ་བཅོམ་པར་གྱུར་ཏོ། །འོ་ན་ཇི་ལྟར་བྱ།
ལྷ་དེ་དག་ལ་གོས་དག་སྩོལ་ཅིག །རྒྱལ་པོས་དགེ་སློང་རེ་རེ་ལ་ཡོ་བྱད་བཅུ་གསུམ་བཅུ་གསུམ་བྱིན་ནོ། །དྲུག་སྡེ་དག་གིས་གོས་དེ་དག་ཁུར་དུ་དྲགས་ཏེ་གཞོན་ནུ་རྣམས་ལ་གཏད་ནས་སྨྲས་པ། དེང་ལ་འདི་དག་གཙུག་ལག་ཁང་དུ་སྐྱོལ་ཅིག །གཞོན་ནུ་དག་གིས་དེ་དག་ཁྱེར་ཏེ་གཙུག་ལག་ཁང་དུ་
དོང་བ་དང་། གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་གིས་སྨྲས་པ། གནས་བརྟན་དག་ད་ཆོག་གིས་ཐོང་ཤིག །དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་ཧ་ཅང་བརྟབས་མང་ཤིག །ཁྱེད་ལ་ཁོ་བོ་ཅག་གིས་དང་པོ་ཉིད་ནས་ཚེ་དང་ལྡན་པ་དག་གལ་ཏེ་ཁྱེད་ལ་མི་གནོད་ན་ཁོ་བོ་ཅག་གཞོན་
ནུ་དག་གི་དོན་དུ་རས་ཡུག་ཕྲན་དང་། རས་ཡུག་ཆེན་དག་སློང་ངོ་ཞེས་མ་སྨྲས་སམ། དེ་དག་དགེ་སློང་དབང་ཆེ་བར་གྲགས་པས། བསྒོ་བས་ཅང་མི་སྨྲ་བར་འཁོད་དོ། །དེ་དག་བཙུན་མོ་རྒྱལ་རིགས་དབྱར་ཚུལ་མའི་ཁྱིམ་དང་། བཙུན་མོ་ཕྲེང་ལྡན་མའི་ཁྱིམ་དང་། ཁྱིམ་བདག་མགོན་མེད་ཟས་སྦྱིན་
གྱི་ཁྱིམ་དང་། བཙུན་མོའི་འཁོར་གྱི་ཞལ་ཏ་པ་དྲང་སྲོང་བྱིན་དང་། རྙིང་པ་གཉིས་ཀྱི་ཁྱིམ་དང་། དགེ་བསྙེན་མ་རི་དགས་འཛིན་གྱི་མ་ས་གའི་ཁྱིམ་དང་། དགེ་བསྙེན་མ་ཁྱིམ་བདག་གི་ཆུང་མ་ལེགས་སྐྱེས་ཀྱི་ཁྱིམ་དུ་མཐར་གྱིས་སོང་སྟེ། སྔར་བསྟན་པ་སྐད་བརྗོད་པ་དང་། དེ་དག་གིས་ཀྱང་དགེ་
སློང་རེ་རེ་ལ་ཡོ་བྱད་བཅུ་གསུམ་བཅུ་གསུམ་བྱིན་ནོ། །དེ་ནས་དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་གལ་ཏེ་དགེ་སློང་བརྒྱ་གྲལ་དུ་མ་བཀད་ན་གྲལ་སྟོང་པར་འགྱུར་གྱིས་དེང་ལ་གྲལ་དུ་བཀོད་ཅིག །མ་ཉེས་ཏེ་བདག་ཅག་ཀྱང་བསོད་སྙོམས་བླངས་ཏེ་འོང་ངོ་། །དྲུག་སྡེ་དག་གིས་གཙུག་
ལག་ཁང་དུ་དོང་སྟེ། རྙང་རྙིང་དག་ལས་བཞི་བཅུ་ཕུང་པོར་བྱས་ཏེ་གཞག་གོ། །དགེ་སློང་བཞི་བཅུ་པོ་དག་ཟས་ཀྱི་བྱ་བ་བྱས་ཏེ་འོངས་པ་དང་། དྲུག་སྡེ་དག་གིས་ལྷན་ཅིག་གནས་པ་དང་། ཉེ་གནས་དག་ལ་སྨྲས་པ། ཚེ་དང་ལྡན་པ་དག་ཚུར་ཤེག་དོན་ཉུང་ངུ་དག་བོས་ཤིག །དེ་དག་གིས་

དེ་དག་བོས་པ་དང་། དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་ཅི་ཁོ་བོ་ཅག་ཁྱེད་ཀྱི་གོས་སྲུང་བ་ཡིན་ནམ་རང་གི་གོས་དག་ལོང་ཤིག །དགེ་སློང་བཞི་བཅུ་པོ་དག་གིས་ཕན་ཚུན་གདོང་དུ་བལྟ་བར་བརྩམས་པ་དང་། དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་ཅིའི་ཕྱིར་ཕན་ཚུན་
གདོང་དུ་བལྟ། གནས་བརྟན་ཐམས་ཅད་རྙང་རྙིང་ཤ་སྟག་ཡིན་ནོ། །ཚེ་དང་ལྡན་པ་དག་འདི་དག་མདུད་པ་བོར་ཅིག་དང་སྣམ་སྦྱར་ཡིན་ནོ། །འདི་དག་ནི་དྲུབས་ཤིག་དང་བླ་གོས་ཡིན་ནོ། །འདི་དག་ནི་དྲུབས་ཤིག་དང་མཐང་གོས་ཡིན་ནོ། །འདི་དག་ནི་དྲུབས་ཤིག་དང་རྔུལ་གཟན་ཡིན་ནོ། །
གལ་ཏེ་མི་དགའ་ན་འདོང་དང་ཡང་བསློང་བར་བྱའོ། །ཀྱེ་མའོ་གནས་བརྟན་དག་འདི་དག་ཉིད་ཀྱང་མ་བསླངས་ཀྱང་རུང་ངོ་། །དེ་དག་གིས་རྙང་རྙིང་དེ་དག་ཁྱེར་ཏེ་དགོན་པར་དོང་ནས་འཚེམ་ཞིང་འཁོད་དོ། །ཐམས་ཅད་དུ་སྒྲ་གྲགས་པ་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་རེ་རེས་ཀྱང་ཡོ་བྱད་བཅུ་
གསུམ་བདུན་བདུན་རྙེད་དོ་ཞེས་གྲགས་སོ། །དེ་དག་དགེ་སློང་རྣམས་ཀྱིས་མཐོང་ནས་སྨྲས་པ། ཚེ་དང་ལྡན་པ་དག་བདག་ཅག་གིས་གཞན་ཐོས་ལ་གཞན་མཐོང་སྟེ། བདག་ཅག་གིས་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་རེ་རེས་ཀྱང་ཡོ་བྱད་བཅུ་གསུམ་བདུན་བདུན་རྙེད་དོ་ཞེས་ཐོས་ན། ཚེ་
དང་ལྡན་པ་དག་ཀོ་རྙང་རྙིང་དག་འཚེམ་ཞིང་འཁོད་དོ། །དེ་དག་གིས་སྨྲས་པ། ཁྱེད་ཅག་གིས་ལྟ་ཁོ་བོ་ཅག་རང་རང་གིས་ཕྲག་པ་དག་གིས་ཁྱེར་ཞེས་ཀྱང་ཐོས་སོ་ཞེས་ཟེར་བའི་སྐབས་དེ་དགེ་སློང་རྣམས་ལ་བརྗོད་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་
འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དེ། གྲོང་ཕྲེང་བ་ཅན་པའི་དགེ་སློང་བཞི་བཅུ་དང་དྲུག་སྡེ་རྣམས་ལ་རྨས་ནས་རྣམ་གྲངས་དུ་མར་སྨད་དེ། །བསླབ་པ་བཅའ་བའི་ཕན་ཡོན་བཅུ་ཡང་དག་པར་གཟིགས་པས། ངའི་ཉན་ཐོས་རྣམས་
ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གོས་ཕྲོགས་སམ། གོས་རླག་གམ། གོས་ཚིག་གམ། གོས་རླུང་གིས་ཁྱེར་རམ། གོས་ཆུས་ཁྱེར་ན་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་ལ་གོས་བསླང་བར་བྱའོ། །གལ་ཏེ་དེ་ལ་

བྲམ་ཟེའམ་ཁྱིམ་བདག་དད་པ་ཞིག་གིས་དུས་ཀྱིས་གོས་མང་པོ་སྟོབས་ལ་འདོད་ན་དགེ་སློང་དེས་དེ་ལས་གོས་སྟོད་གཡོགས་སྨད་གཡོགས་དང་བཅས་པའི་མཐར་ཐུག་པར་བླང་བར་བྱའོ། །དེ་ལས་ལྷག་པར་ལེན་ན་སྤང་བའི་ལྟུང་བྱེད་དོ་ཞེས་བཅའ་བ་མཛད་དེ།
ཡུལ་ནི་མཉན་ཡོད། གང་ཟག་ནི་གྲོང་ཕྲེང་བ་ཅན་པའི་དགེ་སློང་བཞི་བཅུ་དང་དྲུག་སྡེ་རྣམས། ཉོན་མོངས་པ་ནི་མ་བརྟགས་པར་སྤྱོད་པ་དང་འདོད་ཞེན། ཉེས་པ་ནི་ལེན་པའི་དྲོད་མི་ཤེས་པའོ། །དེ་ལ་དགེ་སློང་ཞེས་བྱ་བ་ནི་ཆོས་འདི་པའོ། །གོས་ཕྲོགས་སམ་ཞེས་བྱ་བ་ནི་འདི་ལྟ་སྟེ། དགེ་སློང་
གི་གོས་དག་ཆོམ་རྐུན་པ་དག་གམ། གཡོན་ཅན་དག་གིས་ཕྲོགས་པར་གྱུར་པའོ། །གོས་རླག་གམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་རླག་པར་གྱུར་པའམ། འཁྱམས་པར་གྱུར་པའོ། །གོས་ཚིག་གམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་མེས་ཚིག་པར་གྱུར་
པའོ། །གོས་རླུང་གིས་ཁྱེར་རམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་རླུང་གིས་ཁྱེར་བར་གྱུར་པའོ། །གོས་ཆུས་ཁྱེར་ན་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་ཆུས་ཁྱེར་བར་གྱུར་ནའོ། །ཁྱིམ་བདག་གམ་ཞེས་བྱ་བ་ནི་སྐྱེས་པའོ། །ཁྱིམ་བདག་གི་ཆུང་མ་ཞེས་བྱ་བ་ནི་བུད་
མེད་དོ། །ཉེ་དུ་མ་ཡིན་པ་ཞེས་བྱ་བ་ནི་ཕྱི་མོ་དང་། མེས་པོ་དང་། ཕྲུགས་ཀྱི་བདུན་པ་ཚུན་ཆད་ནི་ཉེ་དུ་ཡིན་ལ་དེ་ཕན་ཆད་ནི་ཉེ་དུ་མ་ཡིན་ནོ། །གན་དུ་སོང་ལ་ཞེས་བྱ་བ་ནི་དྲུང་དུ་སོང་ལའོ། །གོས་ཞེས་བྱ་བ་ནི་བདུན་པོ་བལ་གོས་དང་། ཤ་ནའི་གོས་དང་། ཟར་མའི་གོས་དང་། རས་བལ་གྱི་གོས་དང་། དུ་གུ་
ལའི་གོས་དང་། ཀོ་ཏམ་པའི་གོས་དང་། ཉི་འོག་གི་གོས་ལས་གང་ཡང་རུང་བའོ། །བསླང་བར་བྱའོ་ཞེས་བྱ་བ་ནི་སློང་མོ་བྱ་བའོ། །གལ་ཏེ་དེ་ལ་བྲམ་ཟེའམ་ཁྱིམ་བདག་དད་པ་ཞིག་གིས་དུས་ཀྱིས་གོས་མང་པོ་སྟོབས་ལ་ཞེས་བྱ་བ་ནི་འབུལ་བའོ། །འདོད་ན་ཞེས་བྱ་བ་ནི་དོན་དུ་གཉེར་ནའོ། །དགེ་སློང་
དེས་དེ་ལས་གོས་སྟོད་གཡོགས་སྨད་གཡོགས་དང་བཅས་པའི་མཐར་ཐུག་པ་བླང་བར་བྱའོ་ཞེས་བྱ་བ་ནི་སྟོད་གཡོགས་སྨད་གཡོགས་དང་བཅས་པ་ནི་གཉིས་ཏེ། དགེ་སློང་གི་སྟོད་གཡོགས་སྨད་གཡོགས་དང་བཅས་པ་དང་། ཁྱིམ་པའི་སྟོད་གཡོགས་སྨད་གཡོགས་དང་བཅས་པའོ། །

དགེ་སློང་གི་སྟོད་གཡོགས་སྨད་གཡོགས་དང་བཅས་པ་ནི་སར་པ་ལས་སྣམ་སྦྱར་ཉིས་རིམ་དང་། རས་ཡུག་ཕྲན་ཁྲུ་ལྔ་པ་དང་དོ་པའོ། །ཁྱིམ་པའི་སྟོད་གཡོགས་སྨད་གཡོགས་དང་བཅས་པ་ནི་རས་ཡུག་ཆེན་ཁྲུ་བཅུ་གཉིས་པ་དང་། རས་ཡུག་ཕྲན་ཁྲུ་བདུན་པ་དང་དོ་པའོ། །དེ་ལས་ལྷག་པར་
ལེན་ན་ཞེས་བྱ་བ་ནི་དེ་ལས་གོང་མའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན། འདིར་ཡང་དངོས་གཞི་དང་སྦྱོར་བ་དང་། སྦྱོར་བའི་སྦྱོར་བས་ལྟུང་
བ་རྣམ་པར་གཞག་པ་དང་། ལྟུང་བ་མེད་པ་དང་། བསླབ་པར་བྱ་བ་དང་། ཕྱིར་བཅོས་པ་རྣམས་ཀྱིས་འདིའི་མཚན་ཉིད་ཤེས་པར་བྱའོ། །དེ་ལ་འདིར་དངོས་གཞིའི་ལྟུང་བ་རྣམ་པར་གཞག་པ་ནི་དགེ་སློང་གོས་ཕྲོགས་པ་དང་། རླག་པ་དང་། ཚིག་པ་དང་། རླུ