Luận tạng Tây Tạng (Tengyur) — Tập 152

ངོན་པར་མི་ཤེས་ཤིང་ཡོངས་སུ་མི་ཤེས་ལ་མིའི་ཆོས་བླ་མ་མཐའ་དང་། འཕགས་པ་དང་། བྱེ་བྲག་ཐོབ་པ་དང་། ཤེས་པ་དང་། མཐོང་བ་དང་། རེག་པ་སྤྱོད་པ་མེད་ལ་མེད་བཞིན་དུ་འདི་ཤེས་སོ་འདི་
མཐོང་ངོ་ཞེས་ཁས་འཆེས་པ་ལས་དེ་ལྟུང་བ་བྱུང་བ་རྣམ་པར་དག་པར་འདོད་ནས་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་། འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས། མ་མཐོང་བ་མཐོང་ངོ་ཞེས་སྨྲས་ཏེ། གསོག་གསོབ་བརྫུན་
དུ་སྨྲས་སོ་ཞེས་ཟེར་ན་མངོན་པའི་ང་རྒྱལ་མ་གཏོགས་ཏེ། དགེ་སློང་དེ་ཡང་ཕམ་པར་གྱུར་པ་ཡིན་གྱི་གནས་པར་མི་བྱའོ་ཞེས་བཅའ་བ་མཛད་དེ། ཡུལ་ནི་ཡངས་པ་ཅན། གང་ཟག་ནི་དགེ་སློང་རབ་ཏུ་མང་པོ། ཉོན་མོངས་པ་ནི་མངོན་པའི་ང་རྒྱལ། ཉེས་པ་ནི་མེད་དོ། །དེ་ལ་ཡང་
དགེ་སློང་གང་ཞེས་བྱ་བ་ནི་སྔ་མ་བཞིན་ནོ། །མངོན་པར་མི་ཤེས་ཤིང་ཞེས་བྱ་བ་ནི་བསམ་གཏན་དང་གཟུགས་མེད་པའི་ས་པའི་ཤེས་པ་ཟག་པ་དང་བཅས་པས་གཟུགས་མངོན་པར་མི་ཤེས་པ་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མངོན་པར་

མི་ཤེས་ཤིང་ངོ་། །ཡོངས་སུ་མི་ཤེས་ལ་ཞེས་བྱ་བ་ནི་བསམ་གཏན་དང་། གཟུགས་མེད་པའི་ས་པའི་ཤེས་པ་ཟག་པ་མེད་པས་གཟུགས་ཉིད་ཡོངས་སུ་མི་ཤེས་པ་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡོངས་སུ་མི་ཤེས་
པ་ལའོ། །ཡང་ན་བར་ཆད་མེད་པ་དང་། རྣམ་པར་གྲོལ་བའི་ལམ་མངོན་པར་མི་ཤེས་པ་དང་། ཡོངས་སུ་མི་ཤེས་པར་གོ་རིམས་བཞིན་ནོ། །ཡང་ན་ཤེས་བྱ་དེ་དག་ཇི་ལྟར་གནས་དེ་ལྟར་རྗེས་སུ་འགྲོ་བའི་སྒོ་ནས་མི་ཤེས་པ་ནི་མངོན་པར་མི་ཤེས་པ་ཡིན་ལ། ལྡོག་པའི་
སྒོ་ནས་མི་ཤེས་པ་ནི་ཡོངས་སུ་མི་ཤེས་པ་ཡིན་ནོ། །མིའི་ཆོས་བླ་མ་ཞེས་བྱ་བ་ལ་མིའི་ཆོས་ཞེས་བྱ་བ་ནི་མི་རྣམས་ཀྱི་ཆོས་མྱ་ངན་ལས་འདས་པ་སྟེ། དེ་རྣམས་ཀྱིས་དེ་འཐོབ་ཀྱི་ཟ་མ་དང་། མ་ནིང་དང་། མཚན་གཉིས་པ་དག་གིས་ཀྱང་མི་འཐོབ་ན་སེམས་ཅན་དམྱལ་བ་དང་། དུད་
འགྲོ་དང་། ཡི་དགས་རྣམས་ཀྱིས་ལྟ་སྨོས་ཀྱང་ཅི་དགོས་པའི་ཕྱིར་རོ། །བླ་མ་ཞེས་བྱ་བ་ནི་འདོད་པའི་ཁམས་པས་གཟུགས་ཀྱི་ཁམས་བླ་མ་ཡིན་ལ། གཟུགས་ཀྱི་ཁམས་པས་གཟུགས་མེད་པའི་ཁམས་བླ་མ་ཡིན་པའོ། །ཡང་ན་མིའི་ཆོས་ཞེས་བྱ་བ་ནི་སྒྲིབ་པ་ལྔ་པོ་
འདོད་པ་ལ་འདུན་པ་དང་། གནོད་སེམས་དང་། རྨུགས་པ་དང་། གཉིད་དང་། རྒོད་པ་དང་། འགྱོད་པ་དང་། ཐེ་ཚོམ་དག་གོ། །བླ་མ་ཞེས་བྱ་བ་ནི་དེ་དག་སྤངས་པ་གང་ཡིན་པའོ། །མཐའ་ཞེས་བྱ་བ་ནི་མྱ་ངན་ལས་འདས་པ་སྟེ། མཐར་ཐུག་པ་ཡིན་པའི་ཕྱིར་རོ། །
འཕགས་པ་དང་བྱེ་བྲག་ཐོབ་པ་ཞེས་བྱ་བ་ནི་ཟག་པ་མེད་པ་ཐོབ་པ་སྟེ། འཕགས་པ་ཞེས་བྱ་བ་ནི་སངས་རྒྱས་དང་སངས་རྒྱས་ཀྱི་ཉན་ཐོས་རྣམས་སོ། །བྱེ་བྲག་ཐོབ་པ་ཞེས་བྱ་བ་ནི་དགེ་སྦྱོང་གི་འབྲས་བུ་བཞི་པོ་དག་སྟེ། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་
བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་དོ། །ཤེས་པ་ཞེས་བྱ་བ་ནི་ཤེས་པ་བཞི་པོ་དག་སྟེ། སྡུག་བསྔལ་ཤེས་པ་དང་། ཀུན་འབྱུང་ཤེས་པ་དང་། འགོག་པ་ཤེས་པ་དང་། ལམ་ཤེས་པ་སྟེ། རྗེས་སུ་མི་ཚོལ་བའི་ཤེས་རབ་བོ། །མཐོང་བ་ཞེས་བྱ་བ་ནི་

མཐོང་བ་བཞི་པོ་དག་སྟེ། སྡུག་བསྔལ་མཐོང་བ་དང་། ཀུན་འབྱུང་མཐོང་བ་དང་། འགོག་པ་མཐོང་བ་དང་། ལམ་མཐོང་བ་སྟེ། རྗེས་སུ་ཚོལ་བའི་ཤེས་རབ་བོ། །རེག་པར་སྤྱོད་པ་ཞེས་བྱ་བ་ནི་བསམ་གཏན་བཞི་པོ་དག་ལ་བདེ་བར་གནས་པ་སྟེ། སྙོམས་པར་འཇུག་པ་ལས་
ཡིན་གྱི་སྐྱེ་བ་ལས་ནི་མ་ཡིན་ནོ། །མེད་པ་ཞེས་བྱ་བ་ནི་དེའི་དངོས་པོ་མེད་པ་ལ་སྟེ། མངོན་སུམ་དུ་མ་གྱུར་པའམ་མི་སྲིད་པའོ། །མེད་བཞིན་དུ་ཞེས་བྱ་བ་ནི་བདག་ཉིད་ལ་མེད་བཞིན་དུ་སྟེ་མ་ཐོབ་པའོ། །འདི་ཤེས་སོ་ཞེས་བྱ་བ་ལ། ཅི་ཞིག་ཤེས་སོ་ཞེ་ན་སྡུག་བསྔལ་བ་དང་། ཀུན་
འབྱུང་བ་དང་། འགོག་པ་དང་ལམ་ཤེས་སོ་ཞེས་སོ། །འདི་མཐོང་ངོ་ཞེས་བྱ་བ་ལ། ཅི་ཞིག་མཐོང་ངོ་ཞེས་ཤེ་ན། ལྷ་རྣམས་དང་། ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མི་འམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་།
ཡི་དགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་མཐོང་ངོ་ཟེར་བ་དང་། དེ་རྣམས་ཀྱི་སྒྲ་ཐོས་ཞེས་ཟེར་བ་དང་། བདག་དེ་རྣམས་བལྟ་བའི་ཕྱིར་འགྲོའོ་ཞེས་ཟེར་བ་དང་། དེ་རྣམས་བདག་ལ་ལྟར་འོང་ངོ་ཞེས་ཟེར་བ་དང་།
བདག་དེ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ་ཞེས་ཟེར་བ་དང་། དེ་རྣམས་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་
བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ་ཞེས་ཟེར་བ་དང་། བདག་གིས་འདུ་ཤེས་ཉི་ཤུ་དང་། བསམ་གཏན་བཞི་དང་། ཚད་མེད་པ་བཞི་དང་། གཟུགས་མེད་པའི་སྙོམས་པར་འཇུག་པ་བཞི་དང་། དགེ་སྦྱོང་གི་འབྲས་བུ་བཞི་དང་། མངོན་པར་ཤེས་པ་དྲུག་དང་། རྣམ་
པར་ཐར་པ་བརྒྱད་ལ་བསམ་གཏན་དང་། གཉི་གའི་ཆ་ལས་རྣམ་པར་གྲོལ་བ་མ་ཐོབ་བཞིན་དུ་ཐོབ་བོ་ཞེས་ཟེར་བ་སྟེ། དེ་དག་ཀྱང་མངོན་སུམ་དུ་གྱུར་པ་ཉིད་ཀྱིས་མཐོང་བ་དང་འདྲ་བའི་ཕྱིར་འདི་མཐོང་བའི་སྒྲས་བསྡུས་སོ། །ཁས་འཆེས་པ་ལས་ཞེས་བྱ་བ་ནི་ཁས་བླངས་པ་ལས་སོ། །

དེ་ཞེས་བྱ་བ་ནི་དགེ་སློང་དེའོ། །ལྟུང་བ་བྱུང་བ་ཞེས་བྱ་བ་ནི་གཞི་དེའིའོ། །རྣམ་པར་དག་པར་འདོད་ནས་ཞེས་བྱ་བ་ནི་རྣམ་པར་ལྡང་བར་འདོད་ནས་སོ། །དུས་གཞན་ཞིག་ན་ཞེས་བྱ་བ་ནི་དུས་གཞན་ནའོ། །དྲིས་ཀྱང་རུང་ཞེས་བྱ་བ་ནི་གཞན་དག་གིས་
གླེངས་ཀྱང་རུང་ངོ་། །མ་དྲིས་ཀྱང་རུང་ཞེས་བྱ་བ་ནི་གཞན་དག་གིས་མ་གླེངས་པར་དེ་དག་ཉིད་འགྱོད་པ་དང་། ཅུང་ཟད་འགྱོད་པ་དང་། རྣམ་པར་འགྱོད་པ་དང་། རབ་ཏུ་འགྱོད་པ་སྐྱེས་ཀྱང་རུང་ངོ་། །འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པ་ཤེས་སོ་ཞེས་
སྨྲས་ཞེས་བྱ་བ་ནི་ཡིད་ཀྱི་རྣམ་པར་ཤེས་པས་སོ། །མ་མཐོང་བ་མཐོང་ངོ་ཞེས་སྨྲས་ཏེ་ཞེས་བྱ་བ་ནི་མིག་གི་རྣམ་པར་ཤེས་པས་སོ། །གསོབ་གསོག་བརྫུན་དུ་སྨྲས་སོ་ཞེས་བྱ་བ་དེ་དག་ནི་སྨྲས་པའི་རྣམ་གྲངས་ཀྱི་ཚིག་ཡིན་ཏེ། གསོབ་ཅེས་བྱ་བ་ནི་དོན་དེས་སྟོང་པའོ། །གསོག་ཅེས་བྱ་
བ་ནི་དེའི་ས་བོན་གྱིས་སྟོང་པ་སྟེ། གྲིབ་མ་ཙམ་དང་ཡང་བྲལ་བའོ། །བརྫུན་ཞེས་བྱ་བ་ནི་དེར་འདུ་ཤེས་པ་དང་ཡང་བྲལ་བའོ། །ཟེར་ན་ཞེས་བྱ་བ་ནི་བརྗོད་ནའོ། །མངོན་པའི་ང་རྒྱལ་མ་གཏོགས་སོ་ཞེས་བྱ་བ་ནི་མངོན་པའི་ང་རྒྱལ་བཞག་སྟེའོ། །མངོན་པའི་ང་རྒྱལ་ཞེས་བྱ་བ་
ནི་གྲིབ་མ་ཙམ་མཐོང་བ་ལས་ཡོན་ཏན་ཐོབ་པར་ང་རྒྱལ་བྱེད་པའོ། །མ་གཏོགས་ཏེ་ཞེས་བྱ་བ་ནི་མངོན་པའི་ང་རྒྱལ་ཅན་གྱིས་དོན་བརྫུན་པ་ཡང་དག་པའི་འདུ་ཤེས་ཀྱིས་བརྗོད་པ་ལ་ལྟུང་བ་མེད་པའི་ཕྱིར་རོ། །དགེ་སློང་དེ་ཡང་ཕམ་པར་གྱུར་པ་ཡིན་གྱི་གནས་པར་མི་བྱའོ་ཞེས་བྱ་བ་
ཡང་སྔ་མ་བཞིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན་འདིར་ཡང་དངོས་གཞི་དང་། སྦྱོར་བ་དང་། སྦྱོར་བའི་སྦྱོར་བས་ལྟུང་བ་རྣམ་པར་གཞག་པ་དང་། ལྟུང་བ་མེད་པ་དང་། བསླབ་པར་བྱ་བ་དང་། ཕྱིར་བཅོས་པ་རྣམས་ཀྱིས་འདིའི་མཚན་ཉིད་ཤེས་པར་བྱའོ། །དེ་ལ་འདིར་
དངོས་གཞིའི་ལྟུང་བ་རྣམ་པར་གཞག་པ་ནི་འདུ་ཤེས་བསྒྱུར་ཏེ་བདག་ཉིད་མིའི་ཆོས་བླ་མ་དང་ལྡན་པ་ཉིད་དུ་སྨྲས་ན་ཕམ་པར་འགྱུར་རོ། །དེའི་བྱེ་བྲག་ནི་འདུ་ཤེས་བསྒྱུར་ཏེ་བདག་ཉིད་མིའི་ཆོས་བླ་མ་དང་ལྡན་པ་ཉིད་དུ་སྨྲས་ཏེ་གཞན་གྱིས་དོན་གོ་ན་ཕམ་པར་འགྱུར་རོ། །མིའི་ཆོས་

བླ་མའི་འབྲས་བུ་ལ་ན་སྨད་པ་མེད་དེ། དེ་གང་ཞེ་ན། ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། ཡི་དགས་དང་། ཤ་ཟ་དང་། གྲུལ་བུམ་དང་། སྲུལ་པོ་དང་། ལུས་སྲུལ་པོ་རྣམས་བདག་གིས་མཐོང་བ་དང་། དེ་རྣམས་ཀྱིས་བདག་མཐོང་
བ་དང་། བདག་གིས་དེ་རྣམས་ཀྱི་སྒྲ་ཐོས་པ་དང་། དེ་རྣམས་ཀྱིས་བདག་གི་སྒྲ་ཐོས་པ་དང་། བདག་དེ་རྣམས་ལ་ལྟར་འགྲོ་བ་དང་། དེ་རྣམས་བདག་ལ་ལྟར་འོང་བ་དང་། བདག་དེ་རྣམས་དང་ལྷན་ཅིག་གཏམ་འདྲེ། ཕེབས་པར་སྨྲས། སོ་སོར་ཀུན་དགའ་བར་བྱེད། རྟག་ཏུ་
ལྷན་ཅིག་གནས་པ་དང་། དེ་རྣམས་བདག་དང་ལྷན་ཅིག་གཏམ་འདྲེ་ཕེབས་པར་སྨྲ། སོ་སོར་ཀུན་དགའ་བར་བྱེད། རྟག་ཏུ་ལྷན་ཅིག་གནས་པ་ཞེས་བྱ་བ་སྟེ་དེ་དག་ལ་ན་སྨད་པ་མེད་དོ། །མིའི་ཆོས་བླ་མའི་རང་བཞིན་ལ་ན་སྨད་པ་མེད་དོ། །དེ་གང་ཞེ་ན། མི་རྟག་པ་ལ་སོགས་པའི་
འདུ་ཤེས་དང་། བསམ་གཏན་རྣམས་དང་། ཚད་མེད་པ་རྣམས་དང་། གཟུགས་མེད་པ་རྣམས་དང་། དགེ་སྦྱོང་གི་འབྲས་བུ་རྣམས་དང་། མངོན་པར་ཤེས་པ་རྣམས་དང་། ཟག་པ་དང་བཅས་པ་དང་། ཟག་པ་མེད་པའི་ཡོན་ཏན་ཐམས་ཅད་དེ། དེ་དག་ལ་ན་སྨད་པ་མེད་དོ། །
མིའི་ཆོས་བླ་མ་དང་ལྡན་པ་རྒྱུན་དུ་ཞུགས་པ་ལ་སོགས་པའི་ཆོས་དགོན་པར་མི་མ་ཡིན་པ་དག་མི་འཚེ་བ་དང་། གྲོང་དུ་སྟན་ཁྲ་བོ་བཀྲ་བ་བཏིང་བ་ལ་སོགས་པ་དང་། བདག་ཉིད་ལྡན་པར་སྨྲ་བ་ལ་ན་སྨད་པ་མེད་དོ། །མིའི་ཆོས་བླ་མ་དང་ལྡན་པ་དེ་ཡོད་དོ་ཞེས་གཞན་ལ་སྦྱར་ནས་
དེའི་འོག་ཏུ་རང་ལ་སྦྱོར་བར་བྱེད་པ་ལ་ན་སྨད་པ་མེད་དོ། །མིའི་ཆོས་བླ་མ་མ་ཐོབ་པར་བདག་གིས་ཐོབ་སྟེ། ཡོངས་སུ་ཉམས་སོ་ཞེས་ཟེར་བ་དང་། ཐོབ་པ་ཡོངས་སུ་ཉམས་པ་ལ་མ་ཉམས་སོ་ཞེས་ཟེར་བ་ལ་ན་སྨད་པ་མེད་དོ། །ཁྱོད་ནི་མིའི་ཆོས་བླ་མ་དང་ལྡན་པའོ་ཞེས་ཟེར་
བའི་ཚིག་གིས་དང་དུ་བླངས་པ་ལ་ན་སྨད་པ་མེད་དོ། །དགེ་སློང་འགྲོ་བ་གཞན་གྱི་རྣམ་པ་བསྟེན་པ་དང་། དགེ་སློང་གི་འདུ་ཤེས་ཡོད་པ་ལ་ན་སྨད་པ་མེད་དོ། །དངོས་པོ་བཟང་ངན་འདྲ་བ་ལ་ན་སྨད་པ་མེད་དོ། །མཚན་གྱུར་པ་ལྟུང་བ་ཐུན་མོང་གི་ཡུལ་ལ་ན་སྨད་པ་མེད་དོ། །

འགྲོ་བ་གཞན་ལས་སྐྱེས་པ་དང་། འགྲོ་བ་གཞན་གྱིས་སྐྱེས་པ་དང་། འགྲོ་བ་གཞན་གྱི་རྣམ་པ་བསྟེན་པ་ལ་ན་སྨད་པ་མེད་དོ། །གནས་སྐབས་གཞན་ཐོབ་པ་ལ་ན་སྨད་པ་མེད་དོ། །གཞི་གཅིག་ལ་བསླབ་པ་དུ་མ་བཅས་པ་ཉིད་ལ་ན་སྨད་པ་མེད་དོ། །དངོས་
པོ་ལ་ཐེ་ཚོམ་ཟ་བས་བསམས་པ་དང་བཅས་པས་ཞུགས་པ་ལ་ན་སྨད་པ་མེད་དོ། །ཡུལ་བསམས་པ་དང་མ་བསམས་པ་ལ་ན་སྨད་པ་མེད་དོ། །རང་དང་གཞན་གྱི་དོན་དུ་བྱེད་པ་ལ་ན་སྨད་པ་མེད་དོ། །ཉན་པ་པོ་དོན་གོ་བར་འགྲོ་བ་གང་ཡང་རུང་བ་དང་འཕགས་པ་ལ་ན་སྨད་པ་མེད་དོ། །
དགེ་སློང་གི་དངོས་པོར་མི་ཤེས་ན་རང་བཞིན་གྱིས་ཉམས་པ་ཡིན་ནོ། །འདིའི་བྱེད་པ་པོ་ནི་འདུ་ཤེས་བསྒྱུར་བ་དང་། མིའི་ཆོས་བླ་མ་བདག་ཉིད་ཀྱི་ཕྱིར་རང་གི་ཚིག་གིས་སྨྲས་ཏེ་གཞན་གྱི་དོན་གོ་བའོ། །འདི་ལ་ཡན་ལག་ལྔས་དངོས་གཞིའི་ལྟུང་བར་འགྱུར་ཏེ་འདུ་ཤེས་བསྒྱུར་བ་
དང་། མིའི་ཆོས་བླ་མ་དེ་ཉིད་དང་། བདག་ཉིད་ཀྱི་ཕྱིར་དང་། རང་གི་ཚིག་དང་། གཞན་གྱིས་གོ་བའོ། །དེ་དག་ལས་ཡན་ལག་མ་ཚང་ན་ཅི་རིགས་པར་ན་སྨད་དོ། །དེ་ལ་འདུ་ཤེས་བསྒྱུར་ན་ཕམ་པར་འགྱུར་བའི་བརྫུན་ནམ། ཉེས་པ་སྦོམ་པོའི་བརྫུན་ནམ། དགེ་འདུན་
ལྷག་མའི་བརྫུན་ནམ། ལྟུང་བྱེད་ཀྱི་བརྫུན་ནམ། ཉེས་བྱས་ཀྱི་བརྫུན་གཅིག་ཏུ་འགྱུར་གྱི། འདུ་ཤེས་མ་བསྒྱུར་བ་ལ་དེ་དག་གི་ལྟུང་བ་མེད་པའི་ཕྱིར་རོ། །མིའི་ཆོས་བླ་མ་དེ་ཉིད་སྨྲས་ན་དངོས་གཞིར་འགྱུར་གྱི་གཞན་ན་ནི་སྨད་པའི་ཕྱིར་རོ། །བདག་ཉིད་ཀྱི་ཕྱིར་སྨྲས་ན་
དངོས་གཞིར་འགྱུར་གྱི་གཞན་ལ་སྦྱོར་བ་ན་སྨད་པའི་ཕྱིར་རོ། །རང་གི་ཚིག་ཡིན་ན་དངོས་གཞིར་འགྱུར་གྱི། རང་གིས་མ་སྨྲས་ན་ཉེས་པ་མེད་པའི་ཕྱིར་རོ། །གཞན་གྱིས་དོན་གོ་ན་དངོས་གཞིར་འགྱུར་གྱི། མ་གོ་ན་ཉེས་པ་སྦོམ་པོར་འགྱུར་བའི་ཕྱིར་རོ། །སྦྱོར་བའི་ལྟུང་བ་
ནི་འདུ་ཤེས་བསྒྱུར་ཏེ་བདག་ཉིད་མིའི་ཆོས་བླ་མ་དང་ལྡན་པ་ཉིད་དུ་སྨྲ་བའི་ཕྱིར་སྦྱོར་བ་བརྩམས་ནས་དངོས་གཞི་ལ་མ་ཐུག་གི་བར་དུ་ཉེས་པ་སྦོམ་པོར་འགྱུར་རོ། །མིའི་ཆོས་བླ་མ་དངོས་གཞིར་མ་གཏོགས་པ་དག་ལ་ཉེས་པ་སྦོམ་པོའོ། །གཞན་གྱིས་དོན་མ་གོ་ན་ཉེས་པ་སྦོམ་

པོའོ། །རྡུལ་ཁྲོད་ཀྱི་ཤ་ཟ་ཡང་ཉེས་པ་སྦོམ་པོའོ། །ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཉོན་མོངས་པ་རྣམ་པར་གནོན་པ་ཡང་ཉེས་པ་སྦོམ་པོའོ། །མིའི་ཆོས་བླ་མ་དང་ལྡན་པ་དེ་ཡོད་དོ་ཞེས་རང་ལ་འདུན་པའི་བསམ་པ་གཞན་ལ་སྦྱོར་ཞིང་སྟོན་ན་ཉེས་པ་སྦོམ་པོའོ། །
མིའི་ཆོས་བླ་མ་བརྗོད་པའི་འདུན་པས་མི་མཐུན་པ་རྒྱུ་དང་འབྲས་བུ་དང་། སློབ་པ་དང་མི་སློབ་པ་ཞེས་བྱ་བ་ལ་སོགས་པའི་དོན་བརྗོད་ན་ཉེས་པ་སྦོམ་པོའོ། །མིའི་ཆོས་བླ་མ་གང་བརྗོད་པར་འདོད་པ་དེ་ནོར་ཏེ། དེ་ལས་གཞན་བརྗོད་ན་ཉེས་པ་སྦོམ་པོའོ། །གཞོགས་སྨོས་བྱེད་
ན་ཉེས་པ་སྦོམ་པོའོ། །གཞོགས་སྨོས་བྱས་ནས་མཇུག་ཁས་མི་ལེན་ན་ཉེས་པ་སྦོམ་པོའོ། །ཁྱོད་ནི་མིའི་ཆོས་བླ་མ་དང་ལྡན་པའོ་ཞེས་ཟེར་བ་ཅང་མི་སྨྲ་བས་དང་དུ་བླངས་ན་ཉེས་པ་སྦོམ་པོའོ། །ཁྱོད་ནི་མིའི་ཆོས་བླ་མ་དང་ལྡན་པ་ཡིན་ནོ། །འདི་དང་འདི་རྗེས་སུ་སྒྲུབས་ཤིག་ཅེས་
ཟེར་བ་རྗེས་སུ་བསྒྲུབས་ན་ཉེས་པ་སྦོམ་པོའོ། །དགེ་སློང་འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་མེད་པ་ལ་ཉེས་པ་སྦོམ་པོའོ། །དངོས་གཞི་ལ་སྦྱོར་བ་ཇི་སྙེད་བྱས་པ་རེ་རེ་ལ་ཉེས་པ་སྦོམ་པོ་རེ་རེར་འགྱུར་རོ། །སྦྱོར་བའི་སྦྱོར་བའི་ལྟུང་བ་ནི་སྦྱོར་བའི་ཕྱིར་བརྩལ་
ཅིང་ཇི་སྲིད་དུ་སྦྱོར་བ་ཉིད་ལ་མ་ཐུག་གི་བར་དུ་ཉེས་བྱས་སུ་འགྱུར་རོ། །སྦྱོར་བའི་ལྟུང་བ་ཇི་སྐད་བསྟན་པ་དེ་དག་རེ་རེ་ལ་སྦྱོར་བའི་སྦྱོར་བ་གཅིག་ན་ཉེས་བྱས་གཅིག་ཏུ་འགྱུར་རོ། །སྦྱོར་བའི་སྦྱོར་བ་ཐ་དད་ན་རེ་རེ་ལ་ཉེས་བྱས་རེ་རེར་འགྱུར་རོ། །ལྟུང་བ་མེད་པ་ནི་མངོན་པའི་ང་རྒྱལ་ལ་
ཉེས་པ་མེད་དེ་འདུ་ཤེས་བསྒྱུར་བ་མེད་པའི་ཕྱིར་རོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པར་བྱ་བ་ནི་ཡུལ་ཐམས་ཅད་ལ་གནས་སྐབས་ཐམས་ཅད་དུ་མིའི་ཆོས་བླ་མ་སྨྲ་བའི་སྦྱོར་བའི་སྦྱོར་བ་ཉེས་
བྱས་དང་། སྦྱོར་བ་སྦོམ་པོ་དང་། དངོས་གཞིར་འགྱུར་བ་རྣམ་པ་ཐམས་ཅད་བརྟེན་པར་མི་བྱ་བར་བསླབ་པར་བྱའོ། །འདས་པ་དང་མ་འོངས་པ་ལ་སོགས་པའི་ཡུལ་མ་བསམས་པར་བསྟན་པར་མི་བྱའོ། །ཕྱིར་བཅོས་པ་ནི་སྔ་མ་བཞིན་ནོ། །སྨྲ་བའི་ཕམ་པར་འགྱུར་བ་སྟེ་

བཞི་པ་བཤད་ཟིན་ཏོ།། །།ཚེ་དང་ལྡན་པ་དག་བདག་གིས་ཕམ་པར་འགྱུར་བའི་ཆོས་བཞི་པོ་དག་བསྟན་ཟིན་ཏོ་ཞེས་བྱ་བ་ནི་གདོན་བའི་མཇུག་བསྡུ་བ་ཡིན་ནོ། །དགེ་སློང་གིས་དེ་དག་ལས་ལྟུང་བ་གང་ཡང་རུང་བ་ཞིག་བྱས་ན་ཞེས་བྱ་བ་ནི་ཕམ་པར་འགྱུར་
བ་བཞི་པོ་དེ་དག་ལས་སོ། །ཐོག་མ་ཇི་ལྟ་བར་ཕྱིས་ཀྱང་དེ་བཞིན་ཞེས་བྱ་བ་ནི་དང་པོ་ཁྱིམ་པའི་གནས་སྐབས་ན་སྡོམ་པ་མེད་པ་ཇི་ལྟ་བར་ལྟུང་བ་དེ་བྱུང་བའི་གནས་སྐབས་ན་ཡང་དེ་བཞིན་པ་སྟེ། འདིར་ནི་སྡོམ་པ་ཉམ་ཆུང་བ་ལ་བྱའི་སྡོམ་པ་གཏན་མེད་པ་ནི་མ་ཡིན་ཏེ། འཕགས་
པ་གཞི་ཐམས་ཅད་ཡོད་པར་སྨྲ་བའི་འདུལ་བའི་སྡེ་སྣོད་ཀྱི་ལུང་ཉིད་ལས། བུ་ལོན་ནོར་བཞིན་ཁ་ཆེ་དག །བྱུང་བ་ལ་ནི་གཉིས་སུ་འདོད། །ཅེས་གསུངས་པས་སྡོམ་པ་ནི་སེམས་སྐྱེས་པའི་བྱ་བ་ཡིན་ལ། བསླབ་པའི་གཞི་ནི་ལུས་དང་ངག་གིས་བསླབ་པའི་རྣམ་པར་རིག་བྱེད་གཟུགས་
ཅན་ཡིན་ཏེ་དེ་ཡང་སེམས་ཀྱིས་ཕྱིར་བཅོས་ན་མཐའི་ལྟུང་བ་ལས་ལྡང་བའི་ཐབས་ཀྱང་ཡོད་པའི་ཕྱིར་རོ། །ཕམ་པར་གྱུར་པ་ཡིན་ཏེ་ཞེས་བྱ་བ་ནི་ལྟུང་བའི་སྡེ་ཚན་གྱི་མིང་བསྟན་པ་ཡིན་ཏེ། ཚིག་གི་དོན་ནི་སྔར་བཤད་ཟིན་ཏོ། །དགེ་སློང་རྣམས་དང་ལྷན་ཅིག་གནས་པ་དང་། ལོངས་
སྤྱོད་དུ་མའི་དབང་གིས་གནས་པར་མི་བྱའོ་ཞེས་བྱ་བ་ནི་མ་དག་པའི་ཉེས་དམིགས་བསྟན་པ་སྟེ། དེ་ཡང་བསླབ་པ་སྦྱིན་པའི་ཕྱིར་མ་བཅོས་པ་རྣམས་ཀྱི་དབང་དུ་མཛད་དེ་གསུངས་པ་ཡིན་གྱི་བསླབ་པ་བྱིན་པས་ཕྱིར་བཅོས་པའི་བྱ་བ་བྱས་ན་ནི་མ་ཡིན་ནོ། །ལྷན་ཅིག་གནས་པ་ཞེས་བྱ་བ་ནི་
གནས་གཅིག་ནའོ། །ལོངས་སྤྱོད་པ་ཞེས་བྱ་བ་ནི་ཆོས་དང་ཟང་ཟིང་གིས་སོ། །མི་དབང་གིས་ཞེས་བྱ་བ་ནི་དེའི་འོས་མ་ཡིན་པའོ། །གནས་པར་མི་བྱའོ་ཞེས་བྱ་བ་ནི་དགེ་སློང་རྣམས་ཀྱིས་དེ་དང་ལྷན་ཅིག་གསོ་སྦྱོང་དང་། དགག་དབྱེ་དང་། གསོལ་བ་དང་། གསོལ་བ་དང་
གཉིས་དང་། གསོལ་བ་དང་བཞིའི་ལས་ལ་གནས་པར་མི་བྱ་བ་དང་། དེ་གང་ཟག་བཅུ་གཉིས་ཀྱི་ལས་སུ་བསྒོ་བར་མི་བྱ་བའོ། །དེ་ལ་བདག་གིས་ཚེ་དང་ལྡན་པ་དག་ལ་ཅི་འདི་ལ་ཁྱེད་ཡོངས་སུ་དག་གམ་ཞེས་དྲིའོ། །ཅི་འདི་ལ་ཁྱེད་ཡོངས་སུ་དག་གམ་ཞེས་ལན་གཉིས་ལན་གསུམ་

དུ་དྲིའོ། །འདི་ལ་ཚེ་དང་ལྡན་པ་དག་ཡོངས་སུ་དག་ན་འདི་ལྟར་ཅང་མི་སྨྲ་བས་དེ་དེ་བཞིན་དུ་འཛིན་ཏོ་ཞེས་བྱ་བ་ནི་རྣམ་པར་གཞག་པ་བསྒྲག་པར་བྱ་བ་ཡིན་ཏེ། དེ་ལ་ཞེས་བྱ་བ་ནི་ཕམ་པར་འགྱུར་བའི་ཆོས་བཞི་པོ་བསྟན་པ་དེ་ལའོ། །ལྷག་མ་ནི་སྔ་མ་ཡིན་ནོ། །ཕམ་པར་འགྱུར་
བའི་ཆོས་བཞི་པོ་གདོན་པ་བཤད་ཟིན་ཏོ།། །།ད་ནི་དགེ་འདུན་ལྷག་མ་གདོན་པ་བཤད་པར་བྱ་སྟེ། དེའི་ཕྱིར། སྡོམ་ལ། ཁུ་བ་འཛིན་པ་འཁྲིག་ཚིག་བསྙེན་བཀུར་སྨྱན། །ཁང་པ་ཁང་ཆེན་དང་ནི་གཞི་མེད་པ། །བག་ཙམ་དགེ་འདུན་དབྱེན་དང་དེ་རྗེས་ཕྱོགས། །
ཁྱིམ་སུན་འབྱིན་དང་བཀའ་བློ་མི་བདེ་བའོ། །ཞེས་བྱ་བ་གསུངས་སོ། །སྡོམ་ལ་ཞེས་བྱ་བའི་དགོས་པ་དང་ཚིག་གི་དོན་ནི་སྔ་མ་བཞིན་ནོ། །དགེ་འདུན་ལྷག་མ་ནི་བཅུ་གསུམ་སྟེ། ཁུ་བ་འབྱིན་པ་དང་། ལུས་ཀྱི་རེག་པ་དང་། འཁྲིག་པ་དང་ལྡན་པ་སྨྲ་བ་དང་། བསྙེན་བཀུར་
བསྔགས་པ་དང་། སྨྱན་བྱེད་པ་དང་། ཁང་པ་དང་། གཙུག་ལག་ཁང་དང་། གཞི་མེད་པར་སྐུར་པ་འདེབས་པ་དང་། གཞན་གྱི་ཆ་མ་ཡིན་པ་དང་མཐུན་པ་དང་། དགེ་འདུན་གྱི་དབྱེན་བྱེད་པ་དང་། དེའི་རྗེས་སུ་ཕྱོགས་པ་དང་། ཁྱིམ་སུན་འབྱིན་པ་དང་། བཀའ་བློ་མི་བདེ་
བའོ། །ཚེ་དང་ལྡན་པ་དག་དགེ་འདུན་ལྷག་མའི་ཆོས་བཅུ་གསུམ་པོ་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་ལས་འབྱུང་ངོ་ཞེས་བྱ་བ་ནི་དགེ་འདུན་ལྷག་མ་གདོན་པ་འདིའི་ལུང་དབོག་པ་བསྟན་ཏོ། །དགེ་འདུན་ལྷག་མའི་ཆོས་ཞེས་བྱ་བ་ནི་ལྟུང་བ་དེ་དགེ་འདུན་
ལ་རག་ལུས་པ་དང་། དགེ་འདུན་དང་འབྲེལ་པ་དང་། དགེ་འདུན་ལ་བརྟེན་པ་ཡིན་ཏེ། ལྟུང་བ་དེ་དགེ་འདུན་ལས་རྣམ་པར་ལྡང་བར་འགྱུར་གྱི་གང་ཟག་ལས་མ་ཡིན་པའོ། །གཞན་ཡང་ཕམ་པར་འགྱུར་བའི་ཆོས་བཞི་པོ་དག་ནི་ལྷག་མ་མེད་པ་ཡིན་གྱི། འདི་ནི་ལྷག་མ་དང་བཅས་
པ་སྟེ། དེས་ན་དགེ་འདུན་ལྷག་མ་ཞེས་གསུངས་སོ། །དེ་ཉིད་ཁ་ན་མ་ཐོ་བའི་མཚན་ཉིད་འཛིན་པས་ཆོས་ཞེས་བྱའོ། །བཅུ་གསུམ་པོ་འདི་དག་ནི་ཞེས་བྱ་བ་ནི་ཁུ་བ་འབྱིན་པ་ལ་སོགས་པ་གོང་དུ་བསྟན་པ་དག་གོ། །ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་ལས་

འབྱུང་ངོ་ཞེས་བྱ་བ་ནི་སྡེ་སྣོད་གསུམ་ལས་འདུལ་བའི་སྡེ་སྣོད་ནི་ཡི་གེར་མ་བྲིས་པ་ཡིན་པས་ཐམས་ཅད་ཀྱི་མངོན་སུམ་དུ་མ་གྱུར་པའི་ཕྱིར་གསོ་སྦྱོང་འདོན་པས་དགེ་འདུན་ལྷག་མ་འདོན་པ་འདི་ག་ལས་ཤེས་སྙམ་པ་ལ། ཟླ་བ་ཕྱེད་ཕྱེད་ཅིང་གསོ་སྦྱོང་འདོན་
པའི་ཚེ་འདུལ་བ་འཛིན་པའི་ཁ་ཏོན་ལས་འབྱུང་ངོ་ཞེས་བསྟན་པ་ཡིན་ནོ། །ད་ལྟར་འདུལ་བའི་སྡེ་སྣོད་ཡང་དག་པར་བསྡུས་པའི་གཞུང་འདི་ནི་མ་འོངས་པའི་སྐྱེ་བོ་དབང་པོ་རྟུལ་པོ་ཚིག་དང་དོན་གྱི་བདག་ཉིད་འཛིན་མི་ནུས་པ་རྣམས་ལ་ཕན་གདགས་པའི་ཕྱིར་བཅོམ་ལྡན་འདས་
ཀྱིས་ཡང་དག་པར་བསྡུ་བར་གནང་བ་ཡིན་ཏེ། དེ་བས་ན་འདུལ་བའི་སྡེ་སྣོད་ཀྱིས་ལས་གསང་བ་འདི་ནི་བསྙེན་པར་མ་རྫོགས་པ་རྣམས་ཀྱིས་ཐོས་པར་མི་བྱའོ་ཞེས་སྔར་བསྟན་པ་བཞིན་འདིར་ཡང་སྦྱར་རོ། །དེ་ལ་ཁུ་བ་འབྱིན་པའི་དགེ་འདུན་ལྷག་མའི་གླེང་གཞི་ནི་བཅས་པ་དང་གནང་
བའི་དབང་གིས་རྣམ་པ་གཉིས་ཏེ། དེ་ལ་བཅས་པའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འཆར་ཀ་ལུས་མ་བསྲུངས། དབང་པོ་རྣམས་ཀྱིས་མ་བསྡམས།
དྲན་པ་ཉེ་བར་མ་བཞག་པར་གྲོང་དང་གྲོང་རྡལ་དག་ཏུ་བསོད་སྙོམས་ལ་ཞུགས་ཏེ་ཕྱིར་ལོག་ནས་དེའི་སེམས་འདོད་པ་ལ་འདོད་ཆགས་ཀྱིས་ཀུན་ནས་དཀྲིས་པར་གྱུར་ནས། དེས་རང་གི་ཡན་ལག་གི་རྣམ་པ་ལས་སུ་རུང་བར་བྱས་ཏེ། ལག་པ་གཉིས་ཀྱིས་བཟུང་ནས་རྩོལ་བར་བྱེད་
ཅིང་ཁུ་བ་འབྱིན་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དེ། བསླབ་པ་བཅའ་བའི་ཕན་ཡོན་བཅུ་ཡང་དག་པར་
གཟིགས་པས་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། བསམས་བཞིན་དུ་ཁུ་བ་ཕྱུང་ན་དགེ་འདུན་ལྷག་མའོ་ཞེས་བཅའ་བ་མཛད་དེ། ཡུལ་ནི་མཉན་ཡོད། གང་ཟག་ནི་འཆར་ཀ །ཉོན་མོངས་པ་ནི་འདོད་ཆགས། ཉེས་པ་ནི་ཁུ་བ་

འབྱིན་པའོ། །གནང་བའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་དགེ་སློང་རབ་ཏུ་མང་པོ་ཉལ་བ་དག་གི་རྨི་ལམ་ན་ཁུ་བ་བྱུང་བར་གྱུར་ཏེ། དེ་དག་ལ་འདུ་ཤེས་ཀྱང་ཡོད།
སེམས་པ་ཡང་ཡོད་པས་དེ་དག་འགྱོད་པ་སྐྱེས་པར་གྱུར་ནས། འདི་ལྟར་བཅོམ་ལྡན་འདས་ཀྱིས་བསམས་བཞིན་དུ་ཁུ་བ་ཕྱུང་ན་དགེ་འདུན་ལྷག་མའོ་ཞེས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་ན། བདག་ཅག་ལ་དགེ་འདུན་ལྷག་མའི་ལྟུང་བ་
མ་བྱུང་ངམ་སྙམ་ནས། ཚེ་དང་ལྡན་པ་ཀུན་དགའ་བོ་ལ་དྲིས་སོ། །ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་ལྟ་བས་ན་རྨི་ལམ་གྱི་མ་གཏོགས་སོ། །དེ་ལྟ་བས་ན་སྔ་མ་ནི་བཅས་པ་ཡིན་ལ།
འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། བསམས་བཞིན་དུ་ཁུ་བ་ཕྱུང་ན་རྨི་ལམ་གྱི་མ་གཏོགས་ཏེ་དགེ་འདུན་ལྷག་མའོ་ཞེས་གནང་བ་མཛད་དེ། ཡུལ་ནི་མཉན་ཡོད། གང་ཟག་ནི་དགེ་སློང་རབ་ཏུ་མང་པོ།
ཉོན་མོངས་པ་ནི་ལུང་དུ་མ་བསྟན་པ། ཉེས་པ་ནི་མེད་དོ། །དེ་ལ་བསམས་བཞིན་དུ་ཞེས་བྱ་བ་ནི་རྣམ་པར་བརྟགས་ནས་སོ། །ཁུ་བ་ཞེས་བྱ་བ་ནི་ཁུ་བ་རྣམ་པ་ལྔ་སྟེ། སྔོན་པོ་དང་། སེར་པོ་དང་། དམར་པོ་དང་། སྐ་བ་དང་། སླ་བའོ། །དེ་ལ་སྔོན་པོ་ནི་འཁོར་ལོས་སྒྱུར་བའི་རྒྱལ་
པོའིའོ། །འཁོར་ལོས་སྒྱུར་བའི་རྒྱལ་པོའི་བུ་ཐུ་བོ་དབང་བསྐུར་བར་འོས་ལ་དབང་མ་བསྐུར་བར་གནས་པ་མཚན་ཐོབ་པ་གང་ཡིན་པ་དེའི་ཁུ་བ་ཡང་སྔོན་པོ་ཡིན་ནོ། །སེར་པོ་ནི་འཁོར་ལོས་སྒྱུར་བའི་རྒྱལ་པོའི་བུ་དེ་ལས་གཞན་པ་དག་གིའོ། །དམར་པོ་ནི་སྣ་ཆེན་པོ་ལ་གཏོགས་པ་
འཁོར་ལོའི་མཐའ་པའིའོ། །སྐ་བ་ནི་དབང་པོ་ཡོངས་སུ་སྨིན་པ་རྣམས་ཀྱིའོ། །སླ་བ་ནི་དབང་པོ་ཡོངས་སུ་མ་སྨིན་པ་རྣམས་ཀྱིའོ། །ཡང་ན་སླ་བ་ནི་བུད་མེད་ཀྱིས་དུབ་པ་དང་། ཁུར་གྱིས་དུབ་པ་དང་། ལམ་གྱིས་དུབ་པ་དང་། གཏའ་གམ་པ་དང་། ཡ་ཟ་མ་ལུག་གང་

ཡིན་པ་དེའི་ཡང་སླ་བ་ཡིན་ནོ། །ཕྱུང་ན་ཞེས་བྱ་བ་ནི་དེ་མ་ཐག་ཏུ་ཕྱུང་བ་སྟེ། གཞན་གྱིས་བར་དུ་མཆོད་པ་ཁོ་ནར་རང་གི་གནས་ནས་འཕྲལ་ལ་ཕྱུང་བ་སྟེ། དང་པོ་ཁོ་ནར་གནས་ནས་འཐོན་ཅེས་བྱ་བའི་ཐ་ཚིག་གོ། །རྨི་ལམ་གྱི་མ་གཏོགས་ཏེ་ཞེས་བྱ་བ་
ནི་རྨི་ལམ་གྱི་གཞག་སྟེའོ། །དེ་ནི་ཐ་སྙད་དུ་བྱར་རུང་བ་མ་ཡིན་པས་དེ་ལས་ལྟུང་བ་རྣམ་པར་མི་གཞག་གོ། །དགེ་འདུན་ལྷག་མའོ་ཞེས་བྱ་བ་ནི་ལྟུང་བ་དེ་དགེ་འདུན་ལ་རག་ལུས་པ་དང་། དགེ་འདུན་དང་འབྲེལ་པ་དང་། དགེ་འདུན་ལ་བསྟེན་པ་ཡིན་ཏེ། ལྟུང་བ་དེ་དགེ་
འདུན་ལས་རྣམ་པར་ལྡང་བར་འགྱུར་གྱི་གང་ཟག་ལས་མ་ཡིན་པའོ། །གཞན་ཡང་ཕམ་པར་འགྱུར་བའི་ཆོས་བཞི་པོ་དག་ནི་ལྷག་མ་མེད་པ་ཡིན་གྱི། འདི་ནི་ལྷག་མ་དང་བཅས་པ་ཡིན་པ་སྟེ། དེས་ན་དགེ་འདུན་ལྷག་མའོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་ཞེ་ན།
འདིར་ཡང་དངོས་གཞི་དང་། སྦྱོར་བ་དང་། སྦྱོར་བའི་སྦྱོར་བས་ལྟུང་བ་རྣམ་པར་གཞག་པ་དང་། ལྟུང་བ་མེད་པ་དང་། བསླབ་པར་བྱ་བ་དང་། ཕྱིར་བཅོས་པ་རྣམས་ཀྱིས་འདིའི་མཚན་ཉིད་ཤེས་པར་བྱའོ། །དེ་ལ་འདིར་དངོས་གཞིའི་ལྟུང་བ་རྣམ་པར་གཞག་པ་ནི་བསམས་
བཞིན་དུ་ཁུ་བ་ཕྱུང་ན་དགེ་འདུན་ལྷག་མར་འགྱུར་རོ། །དེའི་བྱེ་བྲག་ནི་དེར་འདུན་པས་རང་གི་ཡན་ལག་གི་རྣམ་པ་ལ་ཕྱི་ནང་གི་རེག་པ་སེམས་ཅན་དུ་བགྲང་བ་དེའི་རྣམ་པར་གནས་པས་བརྩལ་ཏེ་རང་གི་ཁུ་བ་དང་པོ་ཕྱུང་ན་དངོས་གཞིར་འགྱུར་རོ། །ཁུ་བ་དབྱུང་བའི་བསམ་པས་རང་གི་
ཡན་ལག་གི་རྣམ་པ་ལས་ཁུ་བ་དང་པོ་ཕྱུང་ངོ་ཅོག་ལ་ན་སྨད་པ་མེད་དོ། །བདེ་བ་དང་། རིག་སྔགས་དང་། ས་བོན་དང་། སྨན་དང་། བརྟག་པའི་ཕྱིར་འབྱིན་པ་ལ་ན་སྨད་པ་མེད་དོ། །རིལ་གྱིས་བཅངས་པ་དང་དམ་དུ་བཅངས་པ་གཉིས་མེད་པར་འབྱིན་པ་ལ་ན་སྨད་པ་མེད་དོ། །བྱེ་
བྲག་ངེས་པར་མྱོང་བའི་བདེ་བ་དང་། བྱུང་ལ་ཐུག་པའི་བདེ་བ་དང་། ངད་ལས་པའི་བདེ་བ་དག་མེད་པར་འབྱིན་པ་ལ་ན་སྨད་པ་མེད་དོ། །དེ་ལ་བྱེ་བྲག་ངེས་པར་མྱོང་བའི་བདེ་བ་ཞེས་བྱ་བ་ནི་བུད་མེད་དང་སྐྱེས་པ་ཀུན་དུ་སྤྲད་པའི་གནས་སྐབས་ན་བདེ་བ་གང་ཡོད་པའོ། །བྱུང་བ་ཐུག་

པའི་བདེ་བ་ཞེས་བྱ་བ་ནི་ཁུ་བ་བྱུང་ཀའི་གནས་སྐབས་ན་བདེ་བ་གང་སྐྱེ་བའོ། །ངད་ལས་པའི་བདེ་བ་ཞེས་བྱ་བ་ནི་འདོད་ཆགས་ཀྱིས་གདུང་བ་དང་བྲལ་བའི་གནས་སྐབས་ན་བདེ་བ་གང་བྱུང་བའོ། །དེ་དག་དང་ལྡན་བཞིན་དུ་འབྱིན་པ་ལ་ཡང་ན་སྨད་པ་མེད་དོ། །རིལ་དང་དམ་དུ་
བཅངས་པས་འབྱིན་པ་ལ་ན་སྨད་པ་མེད་དོ། །རྣམ་པར་བསྔོས་པ་ལ་སོགས་པ་དང་། རྣམ་པར་ཞིག་པ་དང་། ཀེང་རུས་དག་དང་། མགོ་དང་། རྣ་བ་དང་། སྣ་དག་དང་། མགུལ་པའི་བར་དག་དང་། རྩིབ་ལོགས་དང་། རྒྱབ་དང་། བྲང་དང་། གཉེར་མ་དག་དང་། སྐྲའི་
གསེབ་དང་། ལག་པ་དང་། ཕྲག་པ་དང་། དཔུང་པ་དག་དང་། དཔུང་པའི་བར་དག་དང་། རྐེད་པ་དང་། བརླ་དང་། རྐང་པ་དང་། སྒྱིད་པ་དག་དང་། སྒྱིད་པའི་བར་དུ་འབྱིན་པ་ལ་ན་སྨད་པ་མེད་དོ། །དགེ་སློང་འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་ཡོད་པ་ལ་
ན་སྨད་པ་མེད་དོ། །དངོས་པོ་བཟང་ངན་དང་འདྲ་བ་ལ་ན་སྨད་པ་མེད་དོ། །དངོས་པོ་ལ་ཐེ་ཚོམ་ཟ་བའི་བསམས་པ་དང་བཅས་པར་ཞུགས་པ་ལ་ན་སྨད་པ་མེད་དོ། །ཡུལ་བསམས་པ་དང་མ་བསམས་པ་ལ་ན་སྨད་པ་མེད་དོ། །རང་དང་གཞན་གྱི་དོན་དུ་བྱེད་པ་ལ་ན་སྨད་པ་མེད་དོ། །
ཕྱུང་བ་ཐམས་ཅད་ལ་ཕམ་པར་འགྱུར་བ་མ་གཏོགས་པ་ལ་ན་སྨད་པ་མེད་དོ། །འདིའི་བྱེད་པ་པོ་ནི་འབྱིན་པའི་བསམ་པ་དང་། རང་གི་ཁུ་བ་ཕྱུང་བའོ། །འདི་ལ་ཡན་ལག་བཅུའི་དངོས་གཞིའི་ལྟུང་བར་འགྱུར་ཏེ། ཕྱུང་བ་དང་། དེར་འདུན་པ་དང་། རང་གི་ཁུ་བ་དང་། དང་པོ་དང་།
རེག་པ་དང་། ཕྱི་རོལ་གྱིས་དང་། སེམས་ཅན་དུ་བགྲང་བས་དང་། དེའི་རྣམ་པར་གནས་པས་དང་། བརྩལ་བ་དང་། ཡན་ལག་གི་རྣམ་པ་ལའོ། །དེ་ལ་ཕྱུང་བ་ཞེས་བྱ་བ་ནི་ཁུ་བ་ཕྱུང་བ་སྟེ། མ་བྱུང་ན་ཡང་ཉེས་པ་སྦོམ་པོ་ཡིན་པའི་ཕྱིར་རོ། །དེར་འདུན་པ་ཞེས་བྱ་བ་ནི་ཁུ་
བ་དབྱུང་བར་འདུན་པ་སྟེ། འདུན་པ་མེད་ན་ཉེས་པ་སྦོམ་པོ་ཡིན་པའི་ཕྱིར་རོ། །རང་གི་ཁུ་བ་ཞེས་བྱ་བ་ནི་རང་གི་ཁུ་བ་ལས་དངོས་གཞིར་འགྱུར་གྱི། གཞན་གྱི་ལས་ཉེས་པ་སྦོམ་པོ་ཡིན་པའི་ཕྱིར་རོ། །དང་པོ་ཞེས་བྱ་བ་ནི་ལུས་འདི་ལ་ཁུ་བའི་གནས་སུ་གྱུར་པ་ལོགས་ཤིག་

ན་འཁྲིས་པ་ལྟ་བུ་མེད་དེ། འོན་ཀྱང་དཔེར་ན་བུ་རམ་ཤིང་ལས་ཁུ་བ་དང་། འབྲུ་ལས་འབྲུ་མར་བཞིན་དུ་ལུས་ཐ་དག་ལས་འབྱུང་ངོ་། །དེ་ལས་འབྱུང་བ་ནི་མང་དུ་ཡོད་དེ་གནས་ནས་འབྱུང་བ་དང་། སྦུབས་སུ་འོངས་པ་ལས་འབྱུང་བ་དང་། དབང་པོའི་
མཐའ་ནས་འབྱུང་བའོ། །དེ་ལ་གནས་ནས་འབྱུང་བ་ནི་སྦུབས་སུ་མ་འོངས་པར་དང་པོར་རང་གི་གནས་ནས་འབྱུང་བ་སྟེ། དེ་མྱོང་བའི་གནས་སྐབས་ན་འདོད་ཆགས་ཤས་ཆེར་རབ་ཏུ་འགྱུར་བ་དང་། བདེ་བ་ཉམས་སུ་མྱོང་བ་ཤས་ཆེན་པོ་སྐྱེ་བ་དང་སྙིང་འདར་བ་ལ་སོགས་
པ་ལུས་འགྱུར་བ་འབྱུང་བ་སྟེ། འདིར་དང་པོ་ཞེས་སྨོས་པ་ནི་གནས་སྐབས་དེ་ལ་བྱའོ། །སྦུབས་སུ་འོངས་པ་དང་། དབང་པོའི་མཐའ་ནས་འབྱུང་བ་དག་ལ་ན་སྨད་པར་འགྱུར་རོ། །རེག་པ་ཞེས་བྱ་བ་ནི་ཚུལ་བཞིན་མ་ཡིན་པ་ཡིད་ལ་བྱེད་པ་ལ་སོགས་པ་ཙམ་གྱིས་མ་ཡིན་གྱི།
ནང་གི་རང་དང་གཞན་གྱི་ལག་པ་ལ་སོགས་པའི་རེག་པས་སོ། །དེའི་བྱེ་བྲག་གཞན་བསྟན་པའི་ཕྱིར་ཕྱི་རོལ་གྱིས་དང་། སེམས་ཅན་དུ་བགྲང་བས་དང་། དེའི་རྣམ་པར་གནས་པས་ཞེས་བྱ་བ་སྨོས་ཏེ། ཕྱི་རོལ་གྱིས་ཞེས་བྱ་བ་ནི་ནང་གི་རང་དང་གཞན་གྱི་ལག་པ་ལ་སོགས་པ་
འབའ་ཞིག་ཏུ་མ་ཟད་ཀྱི་ཕྱི་རོལ་གྱི་རེག་པས་རེག་ན་ཡང་ཡན་ལག་ཏུ་འགྱུར་བར་སྟོན་ཏོ། །ཕྱི་རོལ་ཡང་རྣམ་པ་གཉིས་ཏེ། སེམས་ཅན་དུ་བགྲང་བ་ཤི་བའི་ལུས་དང་། སེམས་ཅན་དུ་བགྲང་བ་མ་ཡིན་པ་གོས་ལ་སོགས་པ་སྟེ། དེ་ལ་སེམས་ཅན་དུ་བགྲང་བ་ཤི་བའི་ལུས་འདིར་ཡན་ལག་
ཏུ་གཞག་གི་སེམས་ཅན་དུ་བགྲང་བ་མ་ཡིན་པ་གོས་ལ་སོགས་པ་འདིར་ཡན་ལག་ཏུ་མི་གཞག་པ་བསྟན་པའི་ཕྱིར། སེམས་ཅན་དུ་བགྲང་བ་ཞེས་བྱ་བ་སྨོས་ཏེ། སེམས་ཅན་དུ་བགྲང་བ་མ་ཡིན་པ་གོས་ལ་སོགས་པ་ལ་ན་སྨད་དོ། །ཕྱི་རོལ་དུ་གྱུར་པ་སེམས་ཅན་དུ་བགྲང་བ་ཤི་
བའི་ལུས་ལ་ཡང་སེམས་ཅན་གྱི་རྣམ་པར་མི་གནས་པ་དུམ་གྲུགས་ཕྲ་མོར་གྱིས་པ་དག་ཡོད་པས་དེ་འདིར་ཡན་ལག་ཏུ་མི་གཞག་གི་སེམས་ཅན་གྱི་རྣམ་པར་གནས་པ་ཡན་ལག་ཏུ་གཞག་པར་བསྟན་པའི་ཕྱིར་དེའི་རྣམ་པར་གནས་པས་སོ་ཞེས་བྱ་བ་སྨོས་ཏེ། ཕྱི་རོལ་དུ་གྱུར་པ་

སེམས་ཅན་དུ་བགྲང་བ་ཤི་བའི་ལུས་རྣམ་པར་བསྔོས་པ་ལ་སོགས་པ་དང་། རྣམ་པར་ཞིག་པ་དང་། ཀེང་རུས་དག་དང་། མགོ་དང་། རྣ་བ་དང་། སྣ་དག་དང་། མགུལ་པའི་བར་དང་། རྩིབ་ལོགས་དང་། རྒྱབ་དང་། བྲང་དང་། གཉེར་མ་དང་། སྐྲའི་གསེབ་དང་། ལག་པ་
དང་། ཕྲག་པ་དང་། དཔུང་པ་དག་དང་། དཔུང་པའི་བར་དག་དང་། རྐེད་པ་དང་། བརླ་དང་། རྐང་པ་དང་། སྒྱིད་པ་དང་། སྒྱིད་པའི་བར་ལ་སོགས་པ་སེམས་ཅན་གྱི་རྣམ་པར་གནས་པ་དག་གི་རེག་པ་འདིར་ཡན་ལག་ཏུ་གཞག་གི །ཕྱི་རོལ་དུ་གྱུར་པ་སེམས་ཅན་དུ་བགྲང་བ་ཤི་བའི་ལུས་
སེམས་ཅན་གྱི་རྣམ་པར་མི་གནས་པ་དུམ་གྲུགས་ཕྲ་མོར་གྱེས་པ་དག་གིས་རེག་པ་ནི་ཕྱི་རོལ་གྱི་གོས་ལ་སོགས་པ་དང་འདྲ་བས་འདིར་ཡན་ལག་ཏུ་མི་གཞག་གོ། །དེ་ལྟར་ན་འདིར་རེག་པ་དང་ཕྱི་རོལ་གྱིས་དང་། སེམས་ཅན་དུ་བགྲང་བས་དང་། དེའི་རྣམ་པར་གནས་པ་ཞེས་བྱ་བའི་
ཡན་ལག་བཞི་ནི་རེག་པའི་བྱེ་བྲག་ཡིན་ཏེ། དེ་དག་ལས་གང་ཡང་རུང་བ་ཅིག་གཟུང་ངོ་། །བརྩལ་བ་ཞེས་བྱ་བ་ནི་བརྩལ་བས་དྲུད་པ་སྟེ། གྱི་ན་བརླ་དང་གོས་དང་གཞན་གྱི་རེག་པ་དང་། གཡན་པ་ཕྲུག་པ་དག་གིས་བབ་ཅོལ་དུ་དེའི་དོན་མ་ཡིན་པར་ཞུགས་པ་ལ་ལྟུང་བ་
མེད་པའི་ཕྱིར་རོ། །ཡན་ལག་གི་རྣམ་པ་ལ་ཞེས་བྱ་བ་ནི་ཕོ་མཚན་ལ་སྟེ། བརླ་ལ་སོགས་པ་ཕྱོགས་གཞན་དུ་རེག་པ་ལ་ན་སྨད་པ་མེད་པའི་ཕྱིར་རོ། །དེ་དག་ལས་ཡན་ལག་མ་ཚང་ན་ཅི་རིགས་པར་ན་སྨད་དོ། །སྦྱོར་བའི་ལྟུང་བ་ནི་བསམས་བཞིན་དུ་ཁུ་བ་དབྱུང་བའི་ཕྱིར་
སྦྱོར་བ་བརྩམས་ནས་ཇི་སྲིད་དུ་དངོས་གཞི་ལ་མ་ཐུག་གི་བར་དུ་ཉེས་པ་སྦོམ་པོར་འགྱུར་རོ། །འབྱུང་དུ་ཉེ་བའི་ཤུགས་ཀྱིས་གནས་སྐབས་སུ་བརྩལ་བ་བཏང་ན་ཉེས་པ་སྦོམ་པོའོ། །གར་བྱེད་པ་དང་རབ་ཏུ་གར་བྱེད་པས་ཁུ་བ་ཕྱུང་ན་ཉེས་པ་སྦོམ་པོའོ། །ནམ་མཁའ་ལ་
བསྐྱོད་པས་ཁུ་བ་ཕྱུང་ན་ཉེས་པ་སྦོམ་པོའོ། །ཡན་ལག་གི་རྣམ་པ་ལས་གཞན་པའི་ཕྱོགས་གཞན་དུ་རེག་པས་ཁུ་བ་ཕྱུང་ན་ཉེས་པ་སྦོམ་པོའོ། །ཡན་ལག་གི་རྣམ་པ་ཆུའི་རྒྱུན་ལས་བཟློག་པའི་ཕྱོགས་དང་། རྫི་ཕྱོགས་མ་ཡིན་པར་གཏད་དེ་ཁུ་བ་ཕྱུང་ན་ཉེས་པ་སྦོམ་པོའོ། །

བྱེ་བྲག་ངེས་པར་མྱོང་བའི་བདེ་བ་དང་། བྱུང་ལ་ཐུག་པའི་བདེ་བ་དང་། ངད་ལས་པའི་བདེ་བ་ལ་ཡིད་ཀྱིས་དམིགས་པས་ཁུ་བ་ཕྱུང་ན་ཉེས་པ་སྦོམ་པོའོ། །སྔར་སྦུབས་སུ་འོངས་པའི་ཁུ་བ་ཕྱུང་ན་ཉེས་པ་སྦོམ་པོའོ། །ཆགས་པའི་སེམས་དང་ལྡན་པ་ཉིད་
ན་ཡན་ལག་གི་རྣམ་པ་ལ་གཞལ་བའི་ཆེད་ཉིད་ཀྱིས་རེག་ན་ཉེས་པ་སྦོམ་པོའོ། །དབྱུང་བའི་ཆེད་དུ་བརྩམས་པ་ཙམ་བྱས་ནས་བརྩལ་བ་གཏང་ན་ཉེས་པ་སྦོམ་པོའོ། །གཉིད་ལོག་པའི་གནས་སྐབས་ན་ཁུ་བ་བྱུང་བ་ལས་སད་ནས་རོ་མྱོང་བར་བྱེད་ན་ཉེས་པ་སྦོམ་པོའོ། །
ཡན་ལག་གི་རྣམ་པ་ཅུང་ཟད་མཉེད་པ་དང་། ཡོངས་སུ་མཉེད་པ་དང་། འཚིར་ན་ཉེས་པ་སྦོམ་པོའོ། །ཡན་ལག་གི་རྣམ་པ་ལས་སུ་རུང་བ་ལ་སེམས་ཅན་དུ་བགྲང་བའི་ལག་པ་ལ་སོགས་པའི་རེག་པས་ནོམ་ན་ཉེས་པ་སྦོམ་པོའོ། །སྨན་ཟོས་པས་འབྱིན་ན་ཉེས་པ་སྦོམ་པོའོ། །
གཞན་གྱི་ཡན་ལག་གི་རྣམ་པ་ལས་འབྱིན་ན་ཉེས་པ་སྦོམ་པོའོ། །ལ་བ་དང་། ཕྱིང་བ་དང་། དྲེའུ་རྔོག་དང་། སྔས་ནང་ཚངས་ཅན་དང་། ཁྲི་དང་ཁྲིའུ་དང་། སྟན་ནང་ཚངས་ཅན་དང་། ཁྲིའི་གསེབ་དང་། བུམ་པ་དང་། བུམ་བུ་དང་། བུམ་པའི་བར་དང་། བྱ་མ་བུམ་དང་།
ཆོལ་ཟངས་དང་། རྡོ་བ་དང་། སྐྱོང་ནུལ་དང་། སྐྱོང་ནུལ་གྱི་བར་དང་། སྒོ་གཏན་དང་། ཤིང་བུ་དང་། ཕྱི་རོལ་གྱི་གོས་ལ་སོགས་པ་སེམས་ཅན་དུ་བགྲང་བ་མ་ཡིན་པ་དག་གི་བར་དུ་ཕྱུང་ན་ཉེས་པ་སྦོམ་པོའོ། །ཕྱི་རོལ་དུ་གྱུར་པ་སེམས་ཅན་དུ་བགྲང་བ་ཤི་བའི་ལུས་སེམས་ཅན་གྱི་
རྣམ་པར་མི་གནས་པ་དུམ་གྲུགས་ཕྲ་མོར་གྱེས་པ་དག་གིས་རེག་པས་ཕྱུང་ན་ཉེས་པ་སྦོམ་པོའོ། །ཡན་ལག་གི་རྣམ་པའི་སྦུ་གུ་འཚིར་ན་ཉེས་པ་སྦོམ་པོའོ། །དབྱུང་བའི་དོན་དུ་ཉེ་བར་འགྲོ་བ་ལ་ཁུ་བ་ཤོར་ན་ཉེས་པ་སྦོམ་པོའོ། །དབྱུང་བའི་དོན་དུ་གནས་ནས་གནས་སུ་འཕོ་བ་
ལ་ཁུ་བ་ཕྱུང་ན་ཉེས་པ་སྦོམ་པོའོ། །དབྱུང་བའི་དོན་དུ་བཞིན་དང་། སྐྲ་དང་སེན་མོ་དང་། སོ་དང་། རྐེད་པ་དང་། བརླ་དང་། རྐང་པ་དང་། ཟག་བྱེད་ལ་སོགས་པ་ཡིད་ལ་བྱེད་པ་ལས་ཁུ་བ་ཕྱུང་ན་ཉེས་པ་སྦོམ་པོའོ། །དབྱུང་བ་དང་དེར་འདུན་པས་ཡན་ལག་གི་རྣམ་པ་གཟུང་

བ་ལས་ཁུ་བ་ཕྱུང་ན་ཉེས་པ་སྦོམ་པོའོ། །དགེ་སློང་འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་མེད་པ་ལ་ཉེས་པ་སྦོམ་པོའོ། །དངོས་གཞི་ལ་སྦྱོར་བ་ཐ་དད་པ་ཇི་སྙེད་བྱས་པ་རེ་རེ་ལ་ཉེས་པ་སྦོམ་པོ་རེ་རེར་འགྱུར་རོ། །སྦྱོར་བའི་སྦྱོར་བའི་ལྟུང་བ་ནི་
བསམས་བཞིན་དུ་ཁུ་བ་དབྱུང་བའི་ཕྱིར་བརྩམས་ནས་ཇི་སྲིད་ཅིག་ཏུ་སྦྱོར་བ་ལ་མ་ཐུག་གི་བར་དུ་ཉེས་བྱས་སུ་འགྱུར་རོ། །ཆགས་པའི་སེམས་དང་ལྡན་པས་ཡན་ལག་གི་རྣམ་པ་ལ་ལྟ་ན་ཉེས་བྱས་སོ། །ཡན་ལག་གི་རྣམ་པ་ཆུའི་རྒྱུན་ཕྱོགས་དང་རྫི་ཕྱོགས་སུ་གཏོད་
ན་ཉེས་བྱས་སོ། །ཆགས་པར་འགྱུར་བའི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་དག་ལ་བལྟའོ་སྙམ་པ་ལ་སོགས་པས་དབྱུང་བའི་དོན་མ་ཡིན་པར་ཞུགས་པ་ལ་བབ་ཆོལ་དུ་ཁུ་བ་ཕྱུང་ན་ཉེས་བྱས་སོ། །ཡན་ལག་གི་རྣམ་པ་ལས་སུ་རུང་བ་ལ་སེམས་ཅན་དུ་བགྲང་
བ་མ་ཡིན་པའི་རེག་པས་ནོམ་ན་ཉེས་བྱས་སོ། །གཞན་གྱི་ཡན་ལག་གི་རྣམ་པའི་བུ་གུ་འཚིར་ན་ཉེས་བྱས་སོ། །ལག་པའི་རེག་པ་ལ་སོགས་པས་བརྩལ་བ་མེད་པར་ཡན་ལག་གི་རྣམ་པ་འགུལ་བ་ལ་ཁུ་བ་ཕྱུང་ན་ཉེས་བྱས་སོ། །སྦྱོར་བའི་ལྟུང་བ་ཇི་སྐད་བསྟན་པ་དེ་དག་རེ་རེ་ལ་
སྦྱོར་བའི་སྦྱོར་བ་གཅིག་ན་ཉེས་བྱས་གཅིག་ཏུ་འགྱུར་རོ། །སྦྱོར་བའི་སྦྱོར་བ་ཐ་དད་ན་རེ་རེ་ལ་ཉེས་བྱས་རེ་རེར་འགྱུར་རོ། །ལྟུང་བ་མེད་པ་ནི་རྨི་ལམ་ལ་ལྟུང་བ་མེད་དོ། །བརླ་དང་གོས་དང་གཞན་གྱི་རིག་པ་དང་། གཡན་པ་ཕྲུག་པ་དག་གིས་བབ་ཅོལ་དུ་དབྱུང་བའི་དོན་མ་ཡིན་པར་
ཞུགས་པས་ཁུ་བ་བྱུང་བ་ལ་ལྟུང་བ་མེད་དོ། །རེག་བྱའི་ཡུལ་མ་གཏོགས་པ་གཟུགས་དང་སྒྲ་དང་། དྲི་དང་། རོ་དག་ཉམས་སུ་མྱོང་བ་ན་དབྱུང་བའི་དོན་མ་ཡིན་པར་ཞུགས་པ་ལ་བབ་ཅོལ་དུ་ཁུ་བ་བྱུང་བ་ལ་ལྟུང་བ་མེད་དོ། །འཛག་སྣོད་དུ་འདྲུད་པས་ཁུ་བ་བྱུང་བ་ལ་ལྟུང་བ་མེད་དོ། །
དབྱུང་བའི་དོན་དུ་ཞུགས་པ་མ་ཡིན་པ་ལ་སྔོན་གྱི་ཆུང་མས་འཁྱུད་པ་ལས་ཁུ་བ་བྱུང་བ་ལ་ལྟུང་བ་མེད་དོ། །དབྱུང་བའི་དོན་དུ་ཞུགས་པ་མ་ཡིན་པ་ལ་བུད་མེད་ཀྱི་རྐང་པ་ལ་སོགས་པ་ནས་བཟུང་བས་བབ་ཅོལ་དུ་ཁུ་བ་བྱུང་བ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་

འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པར་བྱ་བ་ནི་ཡུལ་ཐམས་ཅད་ལ་གནས་སྐབས་ཐམས་ཅད་དུ་ཁུ་བ་འབྱིན་པའི་སྦྱོར་བའི་སྦྱོར་བ་ཉེས་བྱས་དང་། སྦྱོར་བ་སྦོམ་པོ་དང་། དངོས་གཞིར་འགྱུར་བ་རྣམ་པ་ཐམས་
ཅད་དུ་མི་བསྟེན་པར་བསླབ་པར་བྱའོ། །གྲོང་དང་གྲོང་རྡལ་དག་ཏུ་ལུས་མ་བསྲུངས། དབང་པོ་རྣམས་ཀྱིས་མ་བསྡམས། དྲན་པ་ཉེ་བར་མ་བཞག་པར་བསོད་སྙོམས་ལ་འཇུག་པར་མི་བྱའོ། །ཕྱིར་བཅོས་པ་ནི་དགེ་འདུན་ལྷག་མ་བཅུ་གསུམ་རྫོགས་པའི་རྗེས་ལ་འོག་ནས་སྟོན་ཏོ། །
ཁུ་བ་འབྱིན་པའི་དགེ་འདུན་ལྷག་མ་སྟེ། དང་པོ་བཤད་ཟིན་ཏོ།། །།ལུས་ཀྱི་རེག་པའི་དགེ་འདུན་ལྷག་མའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དེ་དག་གི་ཀུན་དུ་སྤྱོད་པ་ནི་
འདིར་བདག་ཅག་གིས་བྲམ་ཟེ་དང་། ཁྱིམ་བདག་འོངས་ཤིང་ལྷགས་པ་རྣམས་ལ་ཡང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱའོ་སྙམ་པས་དྲུག་སྡེ་ལས་གང་ཡང་རུང་བ་ཅིག་གིས་རྒྱལ་བྱེད་ཚལ་གྱི་སྒོ་སྟོང་པར་མི་འཇོག་
པས་ཚེ་དང་ལྡན་པ་འཆར་ཀ་ནང་པར་སྔར་ལངས་ཏེ། སོ་ཤིང་བོར་ནས་སྣམ་སྦྱར་དམར་སེར་གྱོན་ཏེ། རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་གོ། །མཉན་ཡོད་ན་གནས་པའི་བྲམ་ཟེ་དང་ཁྱིམ་བདག་གི་ཆུང་མ་རྣམས་ཀྱི་ཀུན་དུ་སྤྱོད་པ་ནི་སྐྱེད་མོས་ཚལ་དུ་སོང་སྟེ་རྒྱལ་བྱེད་
ཀྱི་ཚལ་དུ་འཇུག་པ་དང་། གཙུག་ལག་ཁང་བལྟ་བ་དང་། བཅོམ་ལྡན་འདས་དང་དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་དུ་འགྲོ་བ་ཡིན་པས་བྲམ་ཟེ་དང་ཁྱིམ་བདག་གི་ཆུང་མ་རབ་ཏུ་མང་པོ་དག་རྒྱལ་བྱེད་ཀྱི་ཚལ་དུ་འོངས་པ་རྣམས་ཚེ་དང་ལྡན་པ་འཆར་
ཀས་བཅོམ་ལྡན་འདས་དང་། དགེ་སློང་གནས་བརྟན་གནས་བརྟན་རྣམས་ཀྱི་གཙུག་ལག་ཁང་དུ་རིམ་གྱིས་ཁྲིད་དེ་ཡོན་ཏན་བརྗོད་ཅིང་ཕྱག་འཚལ་དུ་བཅུག་ནས་རང་གི་གཙུག་ལག་ཁང་དུ་འོངས་པ་ན་དེས་དེ་དག་ལ་ཆོས་བསྟན་པར་བརྩམ་མོ། །ཇི་ལྟ་ཇི་ལྟར་ཆོས་བསྟན་པ་དེ་ལྟ་

དེ་ལྟར་ཀུན་དུ་ཆགས་སོ། །ཇི་ལྟ་ཇི་ལྟར་ཀུན་དུ་ཆགས་པ་དེ་ལྟ་དེ་ལྟར་དྲལ་ཏོ། །ཇི་ལྟ་ཇི་ལྟར་དྲལ་བ་དེ་ལྟ་དེ་ལྟར་དེ་དག་གི་ཡན་ལག་དང་ཉིང་ལག་དག་ལ་ཉུག་པར་བརྩམས་སོ། །དེ་དག་ལ་གང་དག་བདག་གིར་བྱེད་པ་དེ་དག་ནི་དེ་དག་དང་ལྷན་ཅིག་གཞོགས་སྟེགས་དང་འཕྱར་
གཡེང་དང་། ཐོ་འཚམས་པ་དང་། ཀུན་དུ་རྩེ་བ་དང་། ཀུན་དུ་ཅ་ཅོ་འདོན་པ་དང་། ལུས་ལ་རྡེག་པ་དག་བྱེད་དོ། །གང་དག་བདག་གིར་མི་བྱེད་པ་དེ་དག་ནི་དེ་ནས་ཕྱིར་བྱུང་སྟེ། འཆགས་དང་། །དག་ར་དང་། སྒོ་གང་དག་ན་བདག་ཅག་གི་ཡན་ལག་དང་ཉིང་ལག་ཁྱིམ་ཐབས་
ཀྱིས་ཀྱང་མ་བྱུགས་པ་གང་ཡིན་པ་དེ་དག་འཕགས་པ་འཆར་ཀས་བྱུགས་སོ། །གལ་ཏེ་བདག་ཅག་གི་ཕ་མ་དང་ཕུ་ནུ་མོ་དག་གིས་ཐོས་པར་གྱུར་ན་རྒྱལ་བྱེད་ཀྱི་ཚལ་ག་ལ་བ་དེར་ལྟར་ཡང་མི་སྟེར་ན། འགྲོར་ལྟ་སྨོས་ཀྱང་ཅི་དགོས་ཞེས་སྨོད་པར་བྱེད། ཕྱར་ཀ་གཏོད་བར་བྱེད། ཁ་ཟེར་
བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དེ། བསླབ་པ་བཅའ་བའི་ཕན་ཡོན་བཅུ་ཡང་དག་པར་གཟིགས་པས་ངའི་ཉན་
ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དྲལ་ཅིང་གྱུར་པའི་སེམས་ཀྱིས་བུད་མེད་དང་ལྷན་ཅིག་ལུས་རེག་པར་བྱེད་དམ། ལག་པ་ནས་བཟུང་ངམ། དཔུང་པ་ནས་བཟུང་ངམ། ལན་བུ་ནས་བཟུང་ངམ། ཡན་ལག་
དང་ཉིང་ལག་གང་ཡང་རུང་བ་ལ་ནོམ་པ་དང་ཉུག་པ་བདག་གིར་བྱེད་ན་དགེ་འདུན་ལྷག་མའོ་ཞེས་བཅའ་བ་མཛད་དེ། ཡུལ་ནི་མཉན་ཡོད། གང་ཟག་ནི་འཆར་ཀ །ཉོན་མོངས་པ་ནི་འདོད་ཆགས། ཉེས་པ་ནི་ལུས་ཀྱིས་རེག་པའོ། །དེ་ལ་ཡང་དགེ་སློང་གང་ཞེས་བྱ་བ་ནི་སྔ་མ་
བཞིན་ནོ། །དྲལ་ཅིང་གྱུར་པའི་སེམས་ཀྱིས་ཞེས་བྱ་བ་ནི་སེམས་དྲལ་ཅིང་མ་གྱུར་པ་ཡང་ཡོད། གྱུར་ཅིང་མ་དྲལ་བ་ཡང་ཡོད། དྲལ་ཅིང་གྱུར་པ་ཡང་ཡོད། མ་དྲལ་ཅིང་མ་གྱུར་པ་ཡང་ཡོད་དོ། །དེ་ལ་རེ་ཞིག་དྲལ་ཅིང་མ་གྱུར་པ་ནི་སེམས་ཆགས་པ་དང་། ཀུན་དུ་ཆགས་པ་

པ་དང་། ཀུན་ནས་དཀྲིས་པ་གང་ཡིན་པའོ། །གྱུར་ཅིང་མ་དྲལ་བ་ནི་སེམས་ལྟོས་པ་དང་ལྡན་ཞིང་སེམས་འབྲེལ་པ་གང་ཡིན་པའོ། །དྲལ་ཅིང་གྱུར་པ་ནི་སེམས་ཆགས་པ་དང་ཀུན་དུ་ཆགས་པ་དང་། ཀུན་ནས་དཀྲིས་ཤིང་སེམས་ལྟོས་པ་དང་ལྡན་པ་
དང་སེམས་འབྲེལ་པ་གང་ཡིན་པའོ། །མ་བྲལ་ཅིང་མ་གྱུར་པ་ནི་རྣམ་པ་དེ་དག་མ་གཏོགས་པའོ། །དེ་ལ་དྲལ་ཞེས་བྱ་བ་ནི་འདོད་ཆགས་ཀྱིས་ངོ་ཚ་ཤེས་པའི་ཆོས་དྲལ་བ་སྟེ། སེམས་ཆགས་པ་དང་། ཀུན་དུ་ཆགས་པ་དང་། ཀུན་ནས་དཀྲིས་པར་གྱུར་པ་གང་ཡིན་པ་སྟེ། དེ་དག་
ནི་ཆུང་ངུ་དང་འབྲིང་དང་ཆེན་པོའི་གནས་སྐབས་སུ་ཤེས་པར་བྱའོ། །གྱུར་ཅེས་བྱ་བ་ནི་རྣམ་པར་གྱུར་ཏེ། ཡུལ་དེ་དང་འབྲེལ་པར་འདོད་པར་གྱུར་ཅིང་། ཡུལ་ལ་ལྟོས་པ་དང་ལྡན་པ་དང་། ཡུལ་དང་འབྲེལ་པ་གང་<ཡིང་‚ཡང་>བྱའོ། །བུད་མེད་དང་ལྷན་ཅིག་ཅེས་བྱ་བ་ནི་བུད་མེད་དམ་
གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ནུས་པ་གང་ཡིན་པ་དང་ངོ་། །ལུས་རེག་པར་ཞེས་བྱ་བ་ནི་ལུས་ལ་ལུས་གཞོལ་བར་རོ། །བྱེད་དམ་ཞེས་བྱ་བ་ནི་བྱེད་པར་གྱུར་ཏམ་མོ། །ལག་པ་ནས་བཟུང་ངམ་ཞེས་བྱ་བ་ནི་མཁྲིག་མ་མན་ཆད་ཀྱི་ལག་པ་ནས་སོ། །དཔུང་
པ་ནས་བཟུང་ངམ་ཞེས་བྱ་བ་ནི་མཁྲིག་མ་ཡན་ཆད་ནས་སོ། །ལན་བུ་ནས་བཟུང་ངམ་ཞེས་བྱ་བ་ལ་ལན་བུ་ཞེས་བྱ་བ་ནི་སྐྲ་དག་དང་དེ་དང་འབྲེལ་པའི་གོས་སོ། །ཡན་ལག་དང་ཉིང་ལག་གང་ཡང་རུང་བ་ལ་ཞེས་བྱ་བ་ནི་ལག་པ་ནས་བཟུང་བ་དང་དཔུང་པ་ནས་བཟུང་བ་མ་གཏོགས་པ་
དེ་ལས་གཞན་པའི་ཡན་ལག་གི་རྣམ་པ་གང་ཡིན་པ་ལ་སྟེ། ཡན་ལག་ཅེས་བྱ་བ་ནི་ལུས་སོ། །ཉིང་ལག་ཅེས་བྱ་བ་ནི་རྐང་ལག་ལ་སོགས་པའོ། །ནོམ་པ་དང་ཉུག་པ་བདག་གིར་བྱེད་ན་ཞེས་བྱ་བ་ནི་རོ་མྱོང་བར་བྱེད་པ་སྟེ། ནོམ་པ་ཞེས་བྱ་བ་ནི་ཅུང་ཞིག་རེག་ནའོ། །ཉུག་པ་ཞེས་
བྱ་བ་ནི་ཕྱོགས་ཐམས་ཅད་ཀྱིས་རེག་པའོ། །དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན། འདིར་ཡང་དངོས་གཞི་དང་། སྦྱོར་བ་དང་སྦྱོར་བས་ལྟུང་བ་རྣམ་པར་གཞག་པ་དང་། ལྟུང་བ་མེད་པ་དང་། བསླབ་པར་བྱ་བ་དང་། ཕྱིར་

བཅོས་པ་རྣམས་ཀྱིས་འདིའི་མཚན་ཉིད་ཤེས་པར་བྱའོ། །དེ་ལ་འདིར་དངོས་གཞིའི་ལྟུང་བ་རྣམ་པར་གཞག་པ་ནི་ལུས་ཀྱི་རེག་པ་བདག་གིར་བྱེད་ན་དགེ་འདུན་ལྷག་མར་འགྱུར་རོ། །དེའི་བྱེ་བྲག་ནི་བུད་མེད་དམ་གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ནུས་པའི་
ལུས་དང་སྐྲ་དང་། དེ་དང་འབྲེལ་པའི་གོས་ལ་རེག་པའི་བདེ་བ་ཉམས་སུ་མྱོང་བར་བྱ་བའི་འདུན་པ་དང་ཀུན་དུ་འདོད་ཆགས་དང་ལྡན་པས་རེག་པ་བདག་གིར་བྱེད་པ་ན་དངོས་གཞིར་འགྱུར་རོ། །མིའི་འགྲོ་བར་གཏོགས་པ་བུད་མེད་མི་ཚངས་པར་སྤྱོད་པ་འཁྲིག་པའི་ཆོས་བསྟེན་
པར་བྱ་བའི་མཐུ་ཡོད་པ་གང་ཡང་རུང་བ་ལ་ན་སྨད་པ་མེད་དོ། །རྫུ་འཕྲུལ་གྱི་ཆོས་ཅན་མོ་ལ་ན་སྨད་པ་མེད་དོ། །དགེ་སློང་འགྲོ་བ་གཞན་གྱི་རྣམ་པར་སྟེན་པ་ན་དགེ་སློང་གི་འདུ་ཤེས་ཡོད་པ་ལ་ན་སྨད་པ་མེད་དོ། །དངོས་པོ་བཟང་ངན་དང་འདྲ་བ་ལ་ན་སྨད་པ་མེད་དོ། །འགྲོ་བ་
གཞན་ལས་སྐྱེས་པ་དང་འགྲོ་བ་གཞན་གྱི་རྣམ་པ་བསྟེན་པ་ལ་ན་སྨད་པ་མེད་དོ། །གནས་སྐབས་གཞན་ཐོབ་པ་ལ་ན་སྨད་པ་མེད་དོ། །གཞི་གཅིག་ལ་བསླབ་པ་དུ་མ་བཅས་པ་ཉིད་ལ་ན་སྨད་པ་མེད་དོ། །དངོས་པོ་ལ་ཐེ་ཚོམ་ཟ་བས་བསམ་པ་དང་བཅས་པར་ཞུགས་པ་ལ་ན་
སྨད་པ་མེད་དོ། །ཡུལ་བསམས་པ་དང་མ་བསམས་པ་ལ་ན་སྨད་པ་མེད་དོ། །རང་གི་དོན་དུ་བྱེད་པ་ལ་ན་སྨད་པ་མེད་དོ། །ལན་བུ་ལ་ན་སྨད་པ་མེད་དོ། །ལན་བུ་དང་འབྲེལ་པའི་གོས་ལ་ན་སྨད་པ་མེད་དོ། །ནོམ་པ་དང་ཉུག་པ་དང་སྤྲོད་པ་དང་། འཛིན་པ་དང་འདྲེན་
པ་དང་ཡོངས་སུ་འདྲེན་པ་དང་། འོག་ནས་འཁྱུད་པ་དང་སྟེང་ནས་འཁྱུད་པ་དང་། དམ་དུ་སྦྱོར་བ་དག་ལ་ན་སྨད་པ་མེད་དོ། །བསྟེན་པར་བྱ་བ་བུད་མེད་དམ་གཞོན་ནུ་མས་ནོམ་པ་དང་ཉུག་པ་ལ་སོགས་པ་བྱས་པ་ལ་དེའི་བདེ་བ་ཉམས་སུ་མྱོང་བར་བྱ་བའི་འདུན་པ་ཀུན་དུ་འདོད་ཆགས་
དང་ལྡན་པས་རེག་པ་བདག་གིར་བྱེད་པ་ལ་ན་སྨད་པ་མེད་དོ། །དེ་ལ་ནོམ་པ་ཞེས་བྱ་བ་ནི་སྤྱི་བོ་ནས་རྐང་པའི་མཐེ་བོའི་བར་གྱི་ལུས་གང་ཡང་རུང་བ་ལ་དང་པོར་ལན་ཅིག་སྦྱོར་བ་ཉིད་དོ། །ཉུག་པ་ཞེས་བྱ་བ་ནི་སྤྱི་བོ་ནས་རྐང་པའི་མཐེ་བོའི་བར་གྱི་ལུས་གང་ཡང་རུང་བ་ལ་

ཡང་དང་ཡང་དུ་སྦྱོར་བ་ཉིད་དོ། །སྤྲོད་པ་ཞེས་བྱ་བ་ནི་མཐང་སྦྱར་བའི་བསམ་པས་རང་གི་ལུས་གང་ཡང་རུང་བ་བུད་མེད་ཀྱི་ལུས་གང་ཡང་རུང་བ་དང་བར་དུ་མ་བཅད་པར་སྤྲོད་པའོ། །འཛིན་པ་ཞེས་བྱ་བ་ནི་རང་གི་ལག་པ་ལ་སོགས་པས་བུད་མེད་ཀྱི་ལག་
པ་ལ་སོགས་པ་འཆང་བའོ། །འདྲེན་པ་ཞེས་བྱ་བ་ནི་ལག་པ་ལ་སོགས་པ་ནས་བཟུང་སྟེ། ཐག་རིང་པོ་ནས་དྲུང་དུ་འམ་དྲུང་ནས་ཐག་རིང་པོར་འདྲེན་པའོ། །ཡོངས་སུ་འདྲེན་པ་ཞེས་བྱ་བ་ནི་ལག་པ་ལ་སོགས་པ་ནས་བཟུང་སྟེ། རྐང་པའི་མཐའ་ནས་མགོའི་མཐར་རམ། མགོའི་
མཐའ་ནས་རྐང་པའི་མཐར་རམ། གློ་གཡས་པ་ནས་གཡོན་པར་རམ། གློ་གཡོན་པ་ནས་གཡས་པར་ཡོངས་སུ་འདྲེན་པའོ། །འོག་ནས་འཁྱུད་པ་ཞེས་བྱ་བ་ནི་ས་ནས་རྐང་པའི་རྩེ་མོའི་སྟེང་ངམ། རྐང་པའི་རྩེ་མོ་ནས་སྤྱི་བོའི་བར་གྱི་སྟེང་ངམ། སྤྱི་བོ་ནས་ཁྲིའུའི་སྟེང་
ངམ། ཁྲིའུའི་སྟེང་ནས་ཁང་བཟངས་ཀྱི་བར་གྱི་སྟེང་དུ་འཇོག་ཅིང་འོག་ནས་འཁྱུད་པར་བྱེད་པའོ། །སྟེང་ནས་འཁྱུད་པ་ཞེས་བྱ་བ་ནི་ཁང་བཟངས་ཀྱི་སྟེང་ནས་ཁྲིའུའི་བར་གྱི་སྟེང་ངམ་ཁྲིའུའི་སྟེང་ནས་སྤྱི་བོའི་སྟེང་ངམ། སྤྱི་བོའི་སྟེང་ནས་རྐང་པའི་རྩེ་མོའི་བར་གྱི་སྟེང་ངམ།
རྐང་པའི་རྩེ་མོའི་སྟེང་ནས་སའི་འོག་ཏུ་འཇུག་ཅིང་སྟེང་ནས་འཁྱུད་པར་བྱེད་པའོ། །དམ་དུ་སྦྱོར་བ་ཞེས་བྱ་བ་ནི་སྤྱི་བོ་ནས་རྐང་པའི་རྩེ་མོའི་བར་གྱི་ལུས་གང་ཡང་རུང་བ་དང་མཐང་དམ་དུ་སྦྱོར་བར་བྱེད་པའོ། །འདིའི་བྱེད་པ་པོ་ནི་ལུས་ཀྱི་རེག་པའི་བདེ་བ་ཉམས་སུ་མྱོང་བར་
བྱེད་པའི་འདུན་པ་ཀུན་ནས་འདོད་ཆགས་དང་ལྡན་པ་དང་། མིའི་འགྲོ་བར་གཏོགས་པའི་བུད་མེད་དམ་གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་བསྟེན་པར་བྱ་བའི་མཐུ་ཡོད་པ་ཉིད་དོ། །འདི་ལ་ཡན་ལག་དྲུག་གི་དངོས་གཞིའི་ལྟུང་བར་འགྱུར་ཏེ། རེག་པའི་བདེ་བ་
ཉམས་སུ་མྱོང་བར་འགྱུར་བའི་འདུན་པ་ཀུན་དུ་འདོད་ཆགས་དང་ལྡན་པ་དང་། མོ་ཉིད་དང་། བསྟེན་ནུས་པ་དང་། བར་དུ་མ་ཆོད་པ་དང་མ་ཉམས་པ་དང་། རེག་པ་བདག་གིར་བྱས་པའོ། །དེ་དག་ལས་ཡན་ལག་མ་ཚང་ན་ཅི་རིགས་པར་ན་སྨད་དོ། །སྦྱོར་བའི་ལྟུང་བ་ནི་ལུས་ཀྱིས་

རེག་པ་བདག་གིར་བྱ་བའི་ཕྱིར་སྦྱོར་བ་བརྩམས་ནས་ཇི་སྲིད་དུ་དངོས་གཞི་ལ་མ་ཐུག་གི་བར་དུ་ཉེས་པ་སྦོམ་པོར་འགྱུར་རོ། །བུད་མེད་དམ་གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ནུས་པ་གོས་ཀྱིས་བར་དུ་ཆོད་པ་དང་ཉམས་པ་ལ་ཉེས་པ་སྦོམ་པོའོ། །བུད་མེད་
དམ་གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་བསྟེན་མི་ནུས་པ་གོས་ཀྱིས་བར་དུ་མ་ཆོད་པ་དང་མ་ཉམས་པ་ལ་ཉེས་པ་སྦོམ་པོའོ། །སྐྱེས་པ་དང་སྤྲུལ་པ་དང་། ཟ་མ་དང་མ་ནིང་དང་། མཚན་གཉིས་པ་བསྟེན་ནུས་པ་གོས་ཀྱིས་བར་དུ་མ་ཆོད་པ་དང་། མ་ཉམས་པ་ལ་
ཉེས་པ་སྦོམ་པོའོ། །བུད་མེད་དམ་གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ནུས་པ་གོས་ཀྱིས་བར་དུ་མ་ཆོད་པ་དང་། མ་ཉམས་པ་ལ་འཇམ་པ་དང་དྲོ་བ་དང་སྙི་བའི་བསམ་པ་ཉིད་ནི་ཉེས་པ་སྦོམ་པོའོ། །ཟས་དང་བོང་བ་ལ་སོགས་པ་བུད་མེད་ཀྱི་དབང་པོར་
འཕེན་ན་ཉེས་པ་སྦོམ་པོའོ། །རང་དང་གཅིག་གི་ཉམས་ན་ཉེས་པ་སྦོམ་པོའོ། །རྣམ་པར་བསྔོས་པ་མོ་ལ་སོགས་པ་ཉེས་པ་སྦོམ་པོའོ། །ཅོད་པན་དང་ཁུ་ཚུར་ལ་སོགས་པ་ལ་ཉེས་པ་སྦོམ་པོའོ། །སེན་མོ་དང་སོ་དང་ཤ་མེད་པའི་རུས་པ་དང་སྤུ་དག་ལ་ཉེས་པ་སྦོམ་
པོའོ། །མི་མ་ཡིན་པའི་འགྲོ་བ་མོ་ལ་ཉེས་པ་སྦོམ་པོའོ། །རང་བཞིན་ཉམས་པ་ལ་ཉེས་པ་སྦོམ་པོའོ། །དགེ་སློང་འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་མེད་པ་ལ་ཉེས་པ་སྦོམ་པོའོ། །གཞན་གྱི་དོན་དུ་བྱེད་པ་ལ་ཉེས་པ་སྦོམ་པོའོ། །དངོས་གཞི་
ལ་སྦྱོར་བ་ཐ་དད་པ་ཇི་སྙེད་བྱས་པ་རེ་རེ་ལ་ཉེས་པ་སྦོམ་པོ་རེ་རེར་འགྱུར་རོ། །སྦྱོར་བའི་སྦྱོར་བའི་ལྟུང་བ་ནི་ལུས་ཀྱིས་རེག་པ་བདག་གིར་བྱ་བའི་ཕྱིར་བརྩམས་ནས་ཇི་སྲིད་དུ་སྦྱོར་བ་ལ་མ་ཐུག་གི་བར་དུ་ཉེས་བྱས་སོ། །བུད་མེད་དམ་གཞོན་ནུ་མ་མི་ཚངས་པར་སྤྱོད་པ་འཁྲིག་པའི་
ཆོས་བསྟེན་མི་ནུས་པ་གོས་ཀྱིས་བར་དུ་ཆོད་པ་དང་ཉམས་པ་ལ་ཉེས་བྱས་སོ། །སྐྱེས་པ་དང་སྤྲུལ་པ་དང་ཟ་མ་དང་མ་ནིང་དང་མཚན་གཉིས་པ་བསྟེན་མི་ནུས་པ་གོས་ཀྱིས་བར་དུ་མ་ཆོད་པ་དང་མ་ཉམས་པ་ལ་ཉེས་བྱས་སོ། །སྐྱེས་པ་དང་སྤྲུལ་པ་དང་ཟ་མ་དང་མ་ནིང་དང་

མཚན་གཉིས་པ་བསྟེན་ནུས་པ་གོས་ཀྱིས་བར་དུ་ཆོད་པ་དང་ཉམས་པ་ལ་ཉེས་བྱས་སོ། །རྐང་པ་དང་ཕྲག་པ་ལ་སོགས་པས་བུད་མེད་ལ་ཕུལ་ན་ཉེས་བྱས་སོ། །བུད་མེད་ཀྱི་སྟན་དེ་དང་བཅས་པའམ་དེ་མེད་པ་རྐང་པ་ལ་སོགས་པས་འཕུལ་ན་ཉེས་བྱས་སོ། །
འདྲེད་པར་སྒྱེལ་བའི་བུད་མེད་ལྡང་ནུས་པ་སློང་ན་ཉེས་བྱས་སོ། །བུད་མེད་དམ་གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ནུས་པ་ལ་ཉེས་པ་སྦོམ་པོ་གང་ཡིན་པ་དེ་ནི་མི་ནུས་པ་ལ་ཉེས་བྱས་སོ། །སྐྱེས་པ་དང་སྤྲུལ་པ་དང་ཟ་མ་དང་མ་ནིང་དང་མཚན་གཉིས་པས་
བསྟེན་ནུས་པ་ལ་ཉེས་བྱས་གང་ཡིན་པ་དེ་ནི་མི་ནུས་པ་ལ་ཉེས་བྱས་ན་སྨད་དོ། །ཉེས་བྱས་ལ་ན་སྨད་ན་ཡང་ཉེས་བྱས་ཉིད་དེ་ཉེས་བྱས་ཕྲ་མོ་དང་ཡིད་ཀྱིས་བསྡམ་པར་བྱ་བ་ཞེས་བྱ་བ་དག་ཏུ་འགྱུར་རོ། །གཉིས་ཀའི་ལུས་ཉམས་ན་ཉེས་བྱས་སོ། །སེན་མོ་དང་སོ་དང་ཤ་
མེད་པའི་རུས་པ་དང་། སྤུ་དག་གིས་བསྟེན་པར་བྱ་བའི་སོ་དང་། སེན་མོ་དང་སོ་དང་ཤ་མེད་པའི་རུས་པ་དང་སྤུ་དག་ལ་རེག་པ་ན་ཉེས་བྱས་སོ། །མི་མ་ཡིན་པའི་འགྲོ་བར་གཏོགས་པ་ཕོ་ལ་ཉེས་བྱས་སོ། །དུད་འགྲོའི་འགྲོ་བར་གཏོགས་པ་མོ་ལ་ཉེས་བྱས་སོ། །དུད་འགྲོའི་
འགྲོ་བར་གཏོགས་པ་ཕོ་ལ་ཉེས་བྱས་ན་སྨད་དོ། །རྣམ་པར་འབྱེད་པ་ལས་དུད་འགྲོའི་སྐྱེ་གནས་སུ་སྐྱེས་པ་ལ་ཡང་ཉེས་བྱས་ཉིད་དོ་ཞེས་བྱ་བ་གཉིས་གསུངས་པ་ནི་དུད་འགྲོ་ཕོ་དང་ཟ་མ་དང་མ་ནིང་དང་མཚན་གཉིས་པ་བསྟེན་མི་ནུས་པ་གོས་ཀྱིས་བར་དུ་མ་ཆོད་པ་དང་མ་ཉམས་
པ་ལ་ཉེས་བྱས་སུ་འགྱུར་བ་དང་། གོས་ཀྱིས་བར་དུ་ཆོད་པ་དང་ཉམས་པ་ལ་ཉེས་བྱས་ཕྲ་མོར་འགྱུར་བར་གསུངས་པ་ཡིན་ནོ། །སྦྱོར་བའི་ལྟུང་བ་ཇི་སྐད་བསྟན་པ་ལ་སྦྱོར་བའི་སྦྱོར་བ་ཐ་དད་པ་ཇི་སྙེད་བྱས་པ་ལ་ཉེས་བྱས་རེ་རེར་འགྱུར་རོ། །ལྟུང་བ་མེད་པ་ནི་མེར་མཆོང་བ་དང་
ཆུས་ཁྱེར་བ་དང་། དུག་ཟ་བ་དང་། མཚོན་འབྱིན་པ་དང་། གཡང་ས་ནས་མཆོང་བ་དང་། ཐག་པས་འཆིང་བ་དང་། འཆི་བ་ལ་མངོན་པར་ཕྱོགས་པ་སྡུག་བསྔལ་ལས་ཐར་བར་བྱ་བའི་ཕྱིར་སྙིང་བརྩེ་བས་རེག་པ་ལ་ལྟུང་བ་མེད་དོ། །སེམས་དག་པས་སྙིང་བརྩེ་བའི་བུད་མེད་

འཁྱུད་པ་ལ་ཉེས་པ་མེད་དོ། །མ་དང་སྲིང་མོ་དང་བུ་མོ་དག་ལ་དེ་དག་ཏུ་འདུ་ཤེས་པས་རེག་པ་ལ་ཉེས་པ་མེད་དོ། །སྔོན་ཡིད་གཅུགས་པའི་བུད་མེད་མཐོང་ནས་ཀུན་དགའ་བར་བྱ་བའི་ཕྱིར་རེག་པ་ལ་ལྟུང་བ་མེད་དོ། །བུད་མེད་ཀྱིས་དགེ་སློང་དང་དེའི་སྟན་དང་དགེ་སློང་འདྲེད་པར་སྒྱེལ་
བ་སློང་བ་ལ་ལྟུང་བ་མེད་དོ། །མི་འདོད་བཞིན་དུ་བུད་མེད་ཀྱིས་བཟུང་བ་ལ་ལྟུང་བ་མེད་དོ། །མས་འཁྱུད་པ་ལ་ལྟུང་བ་མེད་དོ། །བུ་མོ་པང་པར་འོངས་པ་ལ་འཁྱུད་པ་ལ་ལྟུང་བ་མེད་དོ། །བུད་མེད་འཁྲུལ་པ་སྟེང་དུ་འགྱེལ་བ་ལ་ལྟུང་བ་མེད་དོ། །ལས་དང་པོ་པ་དང་སྨྱོས་པ་དང་
སེམས་འཁྲུགས་པ་དང་ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པར་བྱ་བ་ནི་ཡུལ་ཐམས་ཅད་ལ་གནས་སྐབས་ཐམས་ཅད་དུ་ལུས་ཀྱིས་རེག་པའི་སྦྱོར་བའི་སྦྱོར་བ་ཉེས་བྱས་དང་། སྦྱོར་བ་སྦོམ་པོ་དང་། དངོས་གཞིར་འགྱུར་བ་རྣམ་པ་ཐམས་ཅད་མི་བསྟེན་པར་བསླབ་
པར་བྱའོ། །དགེ་སློང་མ་ལ་རེག་པར་མི་བྱའོ། །བུད་མེད་ལ་རེག་པར་མི་བྱའོ། །མེར་འཆོང་བ་དང་། ཆུས་ཁྱེར་བ་ལ་སོགས་པ་སྡུག་བསྔལ་ལས་ཐར་བར་བྱ་བའི་ཕྱིར་སྙིང་བརྩེ་བས་རེག་པར་བྱ་བ་ནི་མ་དང་སྲིང་མོ་དང་བུ་མོའི་འདུ་ཤེས་ཉེ་བར་གཞག་སྟེ་ལག་པའམ་སྐྲ་དག་
ལས་རེག་པར་བྱའོ། །ཆུར་ཉམ་ཐག་པ་བསྒྲལ་བའི་ཕྱིར་རེག་པར་བྱ་བ་ཡང་དེ་བཞིན་ནོ། །ཆུ་ནས་ཕྱུང་བ་དྲན་པ་རྙེད་པར་བྱ་བའི་ཕྱིར་བྱེ་མ་བདལ་བའི་སྟེང་དུ་ཁས་བུབ་ཏུ་གཞག་པར་བྱའོ། །དེ་བསྲུང་བ་ན་ཕྱོགས་གཅིག་ཏུ་འདུག་སྟེ་རང་གི་ཁ་ཏོན་དང་ཡིད་ལ་བྱ་བ་ལ་
སོགས་པ་ཡང་མི་ཤོར་བར་བྱའོ། །དྲོ་ཁར་བ་ལང་རྫི་དང་ཕྱུག་རྫི་དག་ལ་གཏད་དེ་ཟན་ལ་འགྲོ་བར་བྱའོ། །འཚོའམ་འོན་ཏེ་མི་འཚོ་བ་ཡང་དང་ཡང་དུ་བརྟག་པར་བྱའོ། །ཀུན་དུ་ཆགས་པར་འགྱུར་བའི་ཡུལ་ལ་བརྟག་པར་མི་བྱའོ། །ཕྱིར་བཅོས་པ་ནི་འོག་ནས་སྟོན་ཏོ། །
ལུས་ཀྱི་རེག་པའི་དགེ་འདུན་ལྷག་མ་སྟེ་གཉིས་པ་བཤད་ཟིན་ཏོ།། །།འཁྲིག་པ་དང་ལྡན་པ་སྨྲ་བའི་དགེ་འདུན་ལྷག་མའི་གླེང་གཞིའི་མགོ་ནི་ལུས་ཀྱི་རེག་པའི་དགེ་འདུན་ལྷག་མའི་གླེང་གཞིའི་མགོ་དང་འདྲའོ། །བྱེ་བྲག་ཏུ་ན་འཆར་ཀས་བྲམ་ཟེ་དང་ཁྱིམ་བདག་གི་

ཆུང་མ་དེ་དག་ལ་ཆོས་བསྟན་པར་བརྩམས་ནས་དེ་ཇི་ལྟ་ཇི་ལྟར་དྲལ་བ་དེ་ལྟ་དེ་ལྟར་དེ་དག་ལ་གནས་ངན་ལེན་གྱི་ཚིག་སྡིག་པ་ཅན་ཚོགས་པར་མི་དབྱུང་བ་འཁྲིག་པ་དང་ལྡན་པ་དག་སྐྱེས་བུས་ན་ཆུང་ལ་ཇི་ལྟ་བ་བཞིན་དུ་སྨྲ་བར་བརྩམས་སོ། །དེ་དག་
ལས་གང་དག་བདག་གིར་བྱེད་པ་དེ་དག་ནི་དེ་དང་ལྷན་ཅིག་གཞོགས་སྟེགས་དང་ཕྱར་གཡེང་དང་། ཐོ་འཚམས་པ་དང་། ཀུན་དུ་རྩེ་བ་དང་། ཀུན་དུ་ཅ་ཅོ་འདོན་པ་དང་། ལུས་ལ་རྡེག་པ་དག་བྱེད་དོ། །གང་དག་བདག་གིར་མི་བྱེད་པ་དེ་དག་ནི་དེ་ནས་ཕྱིར་བྱུང་སྟེ། འཆགས་
དང་། དག་ར་དང་། སྒོ་གང་དག་ན་བདག་ཅག་གིས་དྭ་རྣམས་དང་། རྒྱན་པོ་པ་རྣམས་དང་། ནལ་གྱི་བུ་རྣམས་ལས་ཀྱང་ཚིག་གང་དག་སྔོན་མ་ཐོས་པ་དེ་དག་འཕགས་པ་འཆར་ཀ་ལས་ཐོས་སོ། །གལ་ཏེ་བདག་ཅག་གི་ཕ་མ་དང་ཕུ་ནུ་མོ་དག་གིས་ཐོས་པར་གྱུར་ན་རྒྱལ་བྱེད་
ཀྱི་ཚལ་ག་ལ་བ་དེར་ལྟར་ཡང་མི་སྟེར་ན་འགྲོ་བར་ལྟ་སྨོས་ཀྱང་ཅི་དགོས་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་སྐབས་
འདི་ལ་དགེ་སློང་གི་དགེ་འདུན་བསྡུ་བ་མཛད་དེ་བསླབ་པ་བཅའ་བའི་ཕན་ཡོན་བཅུ་ཡང་དག་པར་གཟིགས་པས་ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དྲལ་ཅིང་གྱུར་པའི་སེམས་ཀྱིས་བུད་མེད་དག་ལ་གནས་ངན་ལེན་གྱི་
ཚིག་སྡིག་པ་ཅན་ཚོགས་པར་མི་དབྱུང་བ་འཁྲིག་པ་དང་ལྡན་པ་དག་སྐྱེས་བུས་ན་ཆུང་ལ་ཇི་ལྟ་བ་བཞིན་དུ་སྨྲས་ན་དགེ་འདུན་ལྷག་མའོ་ཞེས་བཅའ་བ་མཛད་དེ། ཡུལ་ནི་མཉན་ཡོད། གང་ཟག་ནི་འཆར་ཀ །ཉོན་མོངས་པ་ནི་འདོད་ཆགས། ཉེས་པ་ནི་འཁྲིག་པ་དང་ལྡན་པ་སྨྲ་
བའོ། །དེ་ལ་ཡང་དགེ་སློང་གང་ཞེས་བྱ་བ་ནི་སྔ་མ་བཞིན་ནོ། །དྲལ་ཅིང་གྱུར་པའི་སེམས་ཀྱིས་ཞེས་པ་བྱ་ཡང་སྔ་མ་བཞིན་ནོ། །བུད་མེད་དང་ཞེས་བྱ་བ་ནི་བུད་མེད་དམ་གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་གང་ཡིན་པ་ལའོ། །

གནས་ངན་ལེན་ཅེས་བྱ་བ་ནི་གནས་ངན་ལེན་གཉིས་ཏེ། ཕམ་པར་འགྱུར་བ་ཀུན་ནས་སློང་བ་དང་། དགེ་འདུན་ལྷག་མ་ཀུན་ནས་སློང་བའོ། །ཅིའི་ཕྱིར་དེ་དག་གནས་ངན་ལེན་ཅེས་བྱ་ཞེ་ན། ངོ་བོ་ཉིད་ལས་དང་ཀུན་ནས་སློང་བ་ལས་སོ། །ངོ་བོ་ཉིད་ལས་གནས་ངན་ལེན་
ཅེས་བྱ་བ་ལ། གནས་ངན་ལེན་ཅེས་བྱ་བ་ནི་ཉེས་པའོ། །དེ་ལ་ལེན་པ་ནི་ཉེས་པ་སྐྱེད་པ་སྟེ་སྐྱོན་ཆགས་པའོ། །ཀུན་ནས་སློང་བ་ལས་གནས་ངན་ལེན་ཅེས་བྱ་བ་ནི་ཕམ་པར་འགྱུར་བ་ཀུན་ནས་སློང་བ་མིའི་ཆོས་བླ་མ་སྨྲ་བ་དང་། དགེ་འདུན་ལྷག་མ་ཀུན་ནས་སློང་བ་འཁྲིག་པ་དང་
ལྡན་པ་སྨྲ་བ་དང་། དོན་འདིར་ནི་དགེ་འདུན་ལྷག་མ་ཀུན་ནས་སློང་བ་ཡིན་པར་དགོངས་སོ། །ཚིག་ཅེས་བྱ་བ་ནི་བརྗོད་པའོ། །སྡིག་པ་ཅན་ཞེས་བྱ་བ་ལ། སྡིག་པ་ཞེས་བྱ་བ་ནི་ཁ་ན་མ་ཐོ་བའོ། །ཅན་ཞེས་བྱ་བ་ནི་སྡིག་པའི་དོན་དང་ལྡན་པའོ། །ཚོགས་པར་མི་དབྱུང་བ་ཞེས་
བྱ་བ་ནི་དབུས་པའི་མཚམས་ལས་འདས་པ་སྟེ་ཚུལ་དང་མི་མཐུན་པའོ། །འཁྲིག་པ་དང་ལྡན་པ་དག་ཅེས་བྱ་བ་ནི་མི་ཚངས་པར་སྤྱོད་པ་དང་ལྡན་པ་སྟེ། གཉིས་ཀྱིས་གཉིས་སྤྲོད་པ་ལས་བྱུང་བའི་ཆོས་ཀྱི་མིང་དང་ལྡན་པའི་ཚིག་གོ། །སྐྱེས་བུས་ན་ཆུང་ལ་ཇི་ལྟ་བ་བཞིན་དུ་ཞེས་བྱ་
བ་ལ་སྐྱེས་བུ་ཞེས་བྱ་བ་ནི་སྐྱེས་པའོ། །ན་ཆུང་ཞེས་བྱ་བ་ནི་བུད་མེད་དོ། །སྨྲས་ན་ཞེས་བྱ་བ་ནི་བུད་མེད་ཀྱིས་མ་སྨྲས་པ་ལ་སྨྲ་བ་དང་། །བུད་མེད་ཀྱིས་སྨྲས་པ་ལ་ཕྱིར་སྨྲ་ནའོ། །དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན། འདིར་ཡང་
དངོས་གཞི་དང་། སྦྱོར་བ་དང་། སྦྱོར་བའི་སྦྱོར་བས་ལྟུང་བ་རྣམ་པར་གཞག་པ་དང་། ལྟུང་བ་མེད་པ་དང་། བསླབ་པར་བྱ་བ་དང་ཕྱིར་བཅོས་པ་རྣམས་ཀྱིས་འདིའི་མཚན་ཉིད་ཤེས་པར་བྱའོ། །དེ་ལ་འདིར་དངོས་གཞིའི་ལྟུང་བ་རྣམ་པར་གཞག་པ་ནི་འཁྲིག་པ་དང་ལྡན་པའི་
ཚིག་སྨྲ་ན་དགེ་འདུན་ལྷག་མར་འགྱུར་རོ། །དེའི་བྱེ་བྲག་ནི་བུད་མེད་དམ་གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་ལ་སྨྲ་བའི་བདེ་བ་ཉམས་སུ་མྱོང་བར་བྱ་བའི་འདུན་པ་ཀུན་དུ་འདོད་ཆགས་དང་ལྡན་པ་མི་ཚངས་པར་སྤྱོད་པ་འཁྲིག་པ་དང་

ལྡན་པའི་ཚིག་སྨྲས་ན་དངོས་གཞིར་འགྱུར་རོ། །མིའི་འགྲོ་བར་གཏོགས་པ་བུད་མེད་དམ་གཞོན་ནུ་མ་ལེགས་པར་སྨྲས་པ་དང་། ཉེས་པར་སྨྲས་པ་དག་གི་དོན་ཀུན་ཤེས་པར་ནུས་པ་གང་ཡང་རུང་བ་ལ་ན་སྨད་པ་མེད་དོ། །དགེ་སློང་འགྲོ་བ་གཞན་གྱི་རྣམ་པ་བསྟེན་
པ་ན་དགེ་སློང་གི་འདུ་ཤེས་ཡོད་པ་ལ་ན་སྨད་པ་མེད་དོ། །དངོས་པོ་བཟང་ངན་དང་འདྲ་བ་ལ་ན་སྨད་པ་མེད་དོ། །འགྲོ་བ་གཞན་ལས་སྐྱེས་པ་དང་འགྲོ་བ་གཞན་གྱི་རྣམ་པ་བསྟེན་པ་ལ་ན་སྨད་པ་མེད་དོ། །གནས་སྐབས་གཞན་ཐོབ་པ་ལ་ན་སྨད་པ་མེད་དོ། །གཞི་གཅིག་ལ་བསླབ་པ་
དུ་མ་བཅས་པ་ཉིད་ལ་ན་སྨད་པ་མེད་དོ། །དངོས་པོ་ལ་ཐེ་ཚོམ་ཟ་བས་བསམ་པ་དང་བཅས་པར་ཞུགས་པ་ལ་ན་སྨད་པ་མེད་དོ། །ཡུལ་བསམས་པ་དང་མ་བསམས་པ་ལ་ན་སྨད་པ་མེད་དོ། །རང་གི་དོན་དུ་བྱེད་པ་ལ་ན་སྨད་པ་མེད་དོ། །དོན་གོ་བ་ལ་ན་སྨད་པ་མེད་དོ། །རྒྱ་ལ་སོགས་
པའི་དོན་རྒྱའི་རྣ་རུ་དང་མི་ཚངས་པར་སྤྱོད་པ་དང་། འཁྲིག་པ་དང་། ཉལ་པོ་ཞེས་བྱ་བ་ལ་སོགས་པ་ལ་ན་སྨད་པ་མེད་དོ། །རྒྱ་ལ་སོགས་པའི་དོན་དང་ལྡན་པའི་ཚིག་གིས་བསྔགས་པ་དང་བསྔགས་པ་མ་ཡིན་པ་དང་། གསོལ་པ་དང་། ཉེ་བར་གསོལ་པ་དང་། འདྲི་བ་དང་། ཡོངས་སུ་
འདྲི་བ་དང་། བརྗོད་པ་དང་། སྨོན་པ་དང་། གཤེ་བ་དག་ལ་ན་སྨད་པ་མེད་དོ། །བུད་མེད་ཀྱིས་བསྔགས་པ་ལ་སོགས་པ་དེ་དག་སྨྲས་པ་ལ་རྒྱ་ལ་སོགས་པའི་དོན་དང་ལྡན་པའི་ཚིག་གིས་ཕྱིར་སྨྲས་པ་ལ་ན་སྨད་པ་མེད་དོ། །དེ་ལ་བསྔགས་པ་ཞེས་བྱ་བ་ནི་སྲུའི་རྨའི་སྒོ་གསུམ་
པོ་དག་ནི་ཏེ་པོར་ལེགས་པར་དོད་པ་དང་། ལེགས་པར་གནས་པ་དང་། ལེགས་པར་གྱུར་པ་དག་ཡིན་ནོ་ཞེས་ཟེར་བའོ། །བསྔགས་པ་མ་ཡིན་པ་ཞེས་བྱ་བ་ནི་དེ་ལས་བཟློག་པ་དག་ཟེར་བའོ། །གསོལ་པ་ཞེས་བྱ་བ་ནི་སྲུ་ཚུར་ཤོག་དེ་དང་དེ་བྱའོ་ཞེས་ཟེར་བའོ། །ཉེ་བར་གསོལ་
པ་ཞེས་བྱ་བ་ནི་སྲུ་བུད་མེད་དང་། སྐྱེས་པ་དེ་དང་དེ་བྱེད་པ་གང་ཡིན་པ་དེ་ནི་དེའི་དགའ་བ་དང་། ཡིད་དུ་འོང་བ་ཡིན་གྱི་སྲུ་བདག་ཅག་ཀྱང་དེ་དང་དེ་བྱས་ན་སྲུ་བདག་གི་དགའ་བ་དང་ཡིད་དུ་འོང་བར་འགྱུར་རོ་ཞེས་ཟེར་བའོ། །འདྲི་བ་ཞེས་བྱ་བ་ནི་སྲུ་སྐྱེས་པ་གང་བུད་མེད་གང་ལ་དེ་དང་

དེ་བྱེད་པ་དེའི་དགའ་བ་དང་ཡིད་དུ་འོང་བར་འགྱུར་ན་ཁོ་བོས་ཀྱང་སྲུ་ལ་དེ་དང་དེ་བྱ་ན་སྲུ་ཁོ་བོའི་དགའ་བ་དང་ཡིད་དུ་འོང་བར་འགྱུར་རམ་ཞེས་ཟེར་བའོ། །ཡོངས་སུ་འདྲི་བ་ཞེས་བྱ་བ་ནི་སྲུ་སྐྱེས་པ་གང་བུད་མེད་དེ་དང་དེ་བྱེད་པ་གང་ཡིན་པ་དེ་ནི་དེའི་དགའ་བ་དང་ཡིད་དུ་འོང་བར་འགྱུར་ན་ཁོ་བོས་
ཀྱང་སྲུ་ལ་དེ་དང་དེ་བྱ་ན་སྲུ་ཁོ་བོ་ལ་དགའ་བ་དང་ཡིད་དུ་འོང་བར་འགྱུར་བ་དེ་དེ་བཞིན་ནམ་འོན་ཏེ་མ་ཡིན། དེ་ལ་སྲུ་ཇི་སྙམ་བྱེད་ཅེས་ཟེར་བའོ། །བརྗོད་པ་ཞེས་བྱ་བ་ནི་སྲུ་མོ་དང་སྲུ་མོ་ཁོ་བོའི་གན་དུ་སྐྱེད་མོས་ཚལ་ལམ་ལྷའི་གནས་སམ་དུས་མལ་ཆེ་གེ་མོ་ཞིག་ཏུ་བུད་མེད་དེ་ལྟ་བུ་ཞིག་དོན་དེའི་
ཕྱིར་འོངས་པར་གྱུར་ནས་ཁོ་བོས་མལ་མེ་ཏོག་གིས་བཀྲམ་པ་བཤམས་ཤིང་མཚན་ཐོག་ཐག་ཏུ་འབྲུ་མར་གྱི་མར་མེ་བཙུགས་ནས་ཁོ་བོས་དེ་དང་ལྷན་ཅིག་བཅའ་བ་དེ་དང་དེ་ལྟ་བུའི་འཆོས་ཤིང་བཟའ་བ་དེ་དང་དེ་ལྟ་བུ་ཡང་ཟོས། བཏུང་བ་དེ་དང་དེ་ལྟ་བུ་ཡང་འཐུངས་ཤིང་། ཁོ་བོས་དེ་དང་ལྷན་
ཅིག་དེ་དང་དེ་ཡང་བྱས་ཏེ། སྲུ་ཡང་དོན་དེའི་ཕྱིར་འོངས་པར་གྱུར་ན་ཁོ་བོས་སྲུ་དང་ལྷན་ཅིག་དེ་དག་བྱས་པར་འགྱུར་རོ་ཞེས་ཟེར་བའོ། །སྨོན་པ་ཞེས་བྱ་བ་ནི་སྲུ་གང་དག་སྲུ་དང་ལྷན་ཅིག་དེ་ལྟ་དེ་ལྟར་དེ་དག་བྱེད་པ་ནི་བདེ་བར་གྱུར་ཅིང་མཐོ་རིས་ཐོབ་པ་ཡིན་པས་ཁོ་བོས་ཡང་གལ་ཏེ་
སྲུ་དང་ལྷན་ཅིག་དེ་དང་དེ་ཡང་བྱས་ན་བདེ་བར་འགྱུར་ཞིང་མཐོ་རིས་ཀྱང་ཐོབ་པར་འགྱུར་རོ་ཞེས་ཟེར་བའོ། །གཤེ་བ་ཞེས་བྱ་བ་ནི་རོ་ལྟ་བུ་ཁྱོད་ལ་བོང་བུ་དག་དེ་ལྟར་བྱེད་པར་གྱུར་ཅིག །ཁྱོད་ཀྱིས་དེར་མགལ་དུམ་དག་ཆུག་ཤིག་ཅེས་བྱ་བས་སྤྱོ་བར་བྱེད་པའོ། །འདིའི་བྱེད་པ་
པོ་ནི་འཁྲིག་པ་དང་ལྡན་པ་སྨྲ་བའི་བདེ་བ་ཉམས་སུ་མྱོང་བར་བྱ་བའི་འདུན་པ་ཀུན་དུ་འདོད་ཆགས་དང་ལྡན་པ་དང་། མིའི་འགྲོ་བར་གཏོགས་པའི་བུད་མེད་དམ་གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པའོ། །འདི་ལ་ཡན་ལག་
ལྔའི་དངོས་གཞིའི་ལྟུང་བར་འགྱུར་ཏེ། སྨྲ་བའི་བདེ་བ་ཉམས་སུ་མྱོང་བར་བྱ་བའི་འདུན་པ་ཀུན་དུ་འདོད་ཆགས་དང་ལྡན་པ་དང་། བུད་མེད་ཉིད་དང་། ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་དང་། དོན་གོ་བ་དང་། འཁྲིག་པ་དང་ལྡན་

པའི་ཚིག་སྨྲས་པའོ། །དེ་དག་ལས་ཡན་ལག་མ་ཚང་ན་ཅི་རིགས་པར་ན་སྨད་དོ། །སྦྱོར་བའི་ལྟུང་བ་ནི་འཁྲིག་པ་དང་ལྡན་པའི་ཚིག་སྨྲ་བའི་ཕྱིར་སྦྱོར་བ་བརྩམས་ནས་ཇི་སྲིད་དུ་དངོས་གཞི་ལ་མ་ཐུག་གི་བར་དུ་ཉེས་པ་སྦོམ་པོར་འགྱུར་རོ། །རྒྱ་ལ་སོགས་པའི་དོན་
དང་ལྡན་པའི་ཚིག་མེད་པར་རྨའི་སྒོ་དང་ཟག་བྱེད་དང་བཤང་བའི་ལམ་ཞེས་བྱ་བ་ལ་སོགས་པ་ཕོ་དང་མོའི་རྨའི་སྒོ་གསུམ་པོ་དག་གི་མིང་གི་ཚིག་སྨྲས་ན་ཉེས་པ་སྦོམ་པོའོ། །རྒྱ་ལ་སོགས་པའི་དོན་དང་ལྡན་པའི་ཚིག་མེད་པར་བསྔགས་པ་དང་བསྔགས་པ་མ་ཡིན་པ་དང་། གསོལ་བ་
དང་ཉེ་བར་གསོལ་བ་དང་། འདྲི་བ་དང་ཡོངས་སུ་འདྲི་བ་དང་། བརྗོད་པ་དང་སྨོན་པ་དང་། གཤེ་བ་དག་ལ་ཉེས་པ་སྦོམ་པོའོ། །བུད་མེད་ཀྱི་བསྔགས་པ་ལ་སོགས་པ་དེ་དག་སྨྲས་པ་ལ་རྒྱ་ལ་སོགས་པའི་དོན་དང་ལྡན་པའི་ཚིག་མེད་པའི་ཕྱིར་སྨྲས་པ་ལ་ཉེས་པ་སྦོམ་པོའོ། །ཁྱོད་
ནི་མཛེས་པ་ཅན་ཡིན་ནོ། །ཁྱོད་ནི་སྡིག་པ་ཅན་ཡིན་ནོ། །ཁྱོད་ཀྱི་རྨའི་སྒོ་གསུམ་པོ་དག་ནི་མཛེས་པ་ཅན་ཡིན་ནོ། །ཁྱོད་ཀྱི་རྨའི་སྒོ་གསུམ་པོ་དག་ནི་སྡིག་པ་ཅན་ཡིན་ནོ། །བགོ་བཤའ་གྱིས་ཤིག །ཁོ་བོ་ལ་བགོ་བཤའ་གྱིས་ཤིག །ཁོ་བོ་དང་ལྷན་ཅིག་ཉོལ་ཅིག །ཁོ་བོ་དང་ཕྲད་པར་གྱིས་ཤིག་ཅེས་སྨྲས་ན་
ཉེས་པ་སྦོམ་པོའོ། །རྫུ་འཕྲུལ་གྱི་རྣམ་པར་འཕྲུལ་བའི་ཆོས་ཅན་ལ་རྒྱ་ལ་སོགས་པའི་དོན་དང་ལྡན་པའི་ཚིག་སྨྲས་ན་ཉེས་པ་སྦོམ་པོའོ། །སྲུ་ཁོ་བོ་ལ་ནས་བྱིན་ཅིག །སྲུ་ཁྱོད་ལ་ཅི་མཐོང་བ་དེ་བྱིན་ཅིག །སྲུ་ཁྱོད་ཀྱི་མདུན་ན་མོ་གང་ཡིན་པ་དེ་བྱིན་ཅིག །སྲུ་ཁྱོད་ཀྱི་ཡིད་དུ་འོང་
བ་གང་ཡིན་པ་དེ་བྱིན་ཅིག །སྲུ་ཁྱོད་ལ་ཁོ་བོ་དགའོ། །སྲུ་ཁོ་བོ་ལ་ཆུ་དང་བཅའ་བ་དང་། ནས་ཐུག་དང་། བཟའ་བ་བྱིན་ཅིག །ཁྱོད་ཉིད་དེ་དག་ཡིན་ནོ་ཞེས་སྨྲས་ན་ཉེས་པ་སྦོམ་པོའོ། །ཁྱོད་ལ་བོང་བུ་དག་དེ་བྱེད་པར་གྱུར་ཅིག་ཅེས་བྱ་བ་ལ་སོགས་པ་སྨྲས་ན་ཉེས་པ་སྦོམ་པོའོ། །
དེར་མགལ་དུམ་དག་ཆུག་ཤིག་ཅེས་བྱ་བ་ལ་སོགས་པ་སྨྲས་ན་ཉེས་པ་སྦོམ་པོའོ། །ཁྱེད་སྐྱེས་བུ་འཕྱོན་མ་དག་གི་ཕྱིར་བསོད་སྙོམས་ལ་རྒྱུ་བའམ་ཞེས་བྱ་བ་ལ་སོགས་པ་སྨྲས་ན་ཉེས་པ་སྦོམ་པོའོ། །དགེ་སློང་རང་བཞིན་གྱིས་གནས་ངན་ལེན་བརྗོད་པས་གནས་ངན་ལེན་སྨྲས་ན་ཉེས་

པ་སྦོམ་པོའོ། །བུད་མེད་དམ་གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་དུ་ཀུན་ཤེས་པར་མི་ནུས་པ་ལ་ཉེས་པ་སྦོམ་པོའོ། །སྐྱེས་པ་དང་སྤྲུལ་པ་དང་ཟ་མ་དང་མ་ནིང་དང་མཚན་གཉིས་པ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་
ཀུན་ཤེས་པར་ནུས་པ་ལ་ཉེས་པ་སྦོམ་པོའོ། །མི་མ་ཡིན་པའི་འགྲོ་བར་གཏོགས་པ་མོ་ལ་ཉེས་པ་སྦོམ་པོའོ། །རང་བཞིན་ཉམས་པ་ལ་ཉེས་པ་སྦོམ་པོའོ། །དོན་མ་གོ་བ་ལ་ཉེས་པ་སྦོམ་པོའོ། །མངགས་པ་དང་བརྒྱུད་པ་ལ་སོགས་པ་དང་སྤྲིང་ཡིག་དང་ལག་ཡིག་ལ་སོགས་པ་ལ་
ཉེས་པ་སྦོམ་པོའོ། །བདག་ཉིད་དང་མ་འབྲེལ་པ་དག་ལ་ཉེས་པ་སྦོམ་པོའོ། །གཞན་གྱི་དོན་དུ་བྱེད་པ་ལ་ཉེས་པ་སྦོམ་པོའོ། །རང་དང་གཞན་གཉིས་ཀའི་དོན་དུ་སྨྲས་པ་ལ་ཉེས་པ་སྦོམ་པོའོ། །དགེ་འདུན་གྱི་དོན་དུ་སྨྲས་ན་ཉེས་པ་སྦོམ་པོའོ། །གཉིད་ལོག་པ་དང་། སྙོམས་པར་
ཞུགས་པ་དང་། གླེན་པ་དང་། འོན་པ་དང་། དབུས་པ་དང་། མཐའ་ཁོབ་པའི་སྐད་དག་ཀྱང་དོན་མ་གོ་བ་ཉིད་ཡིན་པས་ཉེས་པ་སྦོམ་པོའོ། །ལྐུགས་པ་དང་ཀླ་ཀློ་ལ་སོགས་པ་དེ་སྨྲ་མི་ཤེས་པ་དག་ལ་དོན་གོ་བ་ཡོད་ཀྱང་། རྣམ་པར་རིག་བྱེད་ཀྱི་ཡན་ལག་མ་ཡིན་པས་དེ་དག་ལ་
སྨྲས་ན་ཡང་ཉེས་པ་སྦོམ་པོའོ། །དགེ་སློང་འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་མེད་པ་ལ་ཉེས་པ་སྦོམ་པོའོ། །དངོས་གཞི་ལ་སྦྱོར་བ་ཐ་དད་པ་ཇི་སྙེད་བྱས་པ་རེ་རེ་ལ་ཉེས་པ་སྦོམ་པོ་རེ་རེར་འགྱུར་རོ། །སྦྱོར་བའི་སྦྱོར་བའི་ལྟུང་བ་ནི་འཁྲིག་པ་དང་ལྡན་པའི་ཚིག་སྨྲ་
བའི་ཕྱིར་བརྩམས་ནས་ཇི་སྲིད་དུ་སྦྱོར་བ་ལ་མ་ཐུག་གི་བར་དུ་ཉེས་བྱས་སོ། །བུད་མེད་དམ་གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་ལ་ཉེས་པ་སྦོམ་པོ་གང་ཡིན་པ་དེ་མི་ནུས་པ་ལ་ཉེས་བྱས་སོ། །སྐྱེས་པ་དང་སྤྲུལ་པ་དང་ཟ་མ་
དང་མ་ནིང་དང་མཚན་གཉིས་པ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་ལ་ཉེས་པ་སྦོམ་པོ་གང་ཡིན་པ་དེ་མི་ནུས་པ་ལ་ཉེས་བྱས་སོ། །བུད་མེད་དམ་གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་

པར་ནུས་པ་ལ་ཉེས་བྱས་གང་ཡིན་པ་དེ་མི་ནུས་པ་ལ་ཉེས་བྱས་ན་སྨད་དོ། །སྐྱེས་པ་དང་སྤྲུལ་པ་དང་ཟ་མ་དང་མ་ནིང་དང་མཚན་གཉིས་པ་ལེགས་པར་སྨྲས་པ་དང་ཉེས་པར་སྨྲས་པའི་ཆོས་རྣམས་ཀྱི་དོན་ཀུན་ཤེས་པར་ནུས་པ་དེ་ལ་ཉེས་བྱས་གང་ཡིན་པ་དེ་ནི་མི་ནུས་པ་
ལ་ཉེས་བྱས་ན་སྨད་དོ། །མི་མ་ཡིན་པའི་འགྲོ་བར་གཏོགས་པ་ཕོ་ལ་ཉེས་བྱས་སོ། །དུད་འགྲོའི་འགྲོ་བར་གཏོགས་པ་མོ་ལ་ཉེས་བྱས་སོ། །དུད་འགྲོའི་འགྲོ་བར་གཏོགས་པ་ཕོ་ལ་ཉེས་བྱས་ན་སྨད་དོ། །སྦྱོར་བའི་ལྟུང་བ་ལ་སྦྱོར་བ་ཐ་དད་པ་ཇི་སྙེད་བྱས་པ་རེ་རེ་ལ་ཉེས་བྱས་རེ་རེར་
འགྱུར་རོ། །ལྟུང་བ་མེད་པ་ནི་དོན་གཞན་ལ་བསམ་པས་ལྗོངས་ཀྱི་ངེས་པའི་ཚིག་སྨྲ་བ་དཔེར་ན་ཡུལ་དབུས་ན་ཆུ་སྣོད་ཀྱི་བྱེ་བྲག་ལ་ཀུན་དི་ཀ་ཞེས་བྱ་བ་ལས་བསམས་ཏེ། ཡུལ་ཀོ་ས་ལ་ན་མོ་མཚན་ལ་ཀུན་དི་ཀ་ཞེས་ཟེར་བའི་མིང་བརྗོད་པ་ལྟ་བུ་ལ་ལྟུང་བ་མེད་དོ། །མིང་གི་ཆ་ཉིད་
འདྲ་བ་དཔེར་ན་ནས་ལ་ཡ་བ་རྩྭ་དང་ཡ་བས་ཡོལ་བ་ལ་ཡ་བ་ནི་ཀ་ཞེས་བྱ་བ་ལ་མི་ཚངས་པར་སྤྱོད་པ་ལ་ཡ་བྷ་ཞེས་བྱ་བ་དེ་ལ་ནས་དང་རྩྭ་དང་ཡོལ་བའི་ཡ་བྷ་ཞེས་བརྗོད་པས་ཡ་བྷ་ཞེས་བྱ་བ་ཚིག་ཟུར་འཁྲུལ་བ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་
འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པར་བྱ་བ་ནི་ཡུལ་ཐམས་ཅད་ལ་གནས་སྐབས་ཐམས་ཅད་དུ་གནས་ངན་ལེན་བརྗོད་པའི་སྦྱོར་བའི་སྦྱོར་བ་ཉེས་བྱས་དང་། སྦྱོར་བ་སྦོམ་པོ་དང་། དངོས་གཞིར་འགྱུར་བ་རྣམ་པ་ཐམས་ཅད་མི་བསྟེན་པར་བསླབ་
པར་བྱའོ། །ཕྱིར་བཅོས་པ་ནི་འོག་ནས་སྟོན་ཏོ། །འཁྲིག་པ་དང་ལྡན་པ་སྨྲ་བའི་དགེ་འདུན་ལྷག་མ་སྟེ་གསུམ་པ་བཤད་ཟིན་ཏོ།། །།བསྙེན་བཀུར་བསྔགས་པའི་དགེ་འདུན་ལྷག་མའི་གླེང་གཞིའི་མགོ་ཡང་ལུས་ཀྱི་རེག་པའི་དགེ་འདུན་ལྷག་མའི་གླེང་གཞིའི་མགོ་དང་
འདྲའོ། །བྱེ་བྲག་ཏུ་ན་འཆར་ཀས་བྲམ་ཟེ་དང་ཁྱིམ་བདག་གི་ཆུང་མ་དེ་དག་ལ་ཆོས་བསྟན་པར་བརྩམས་ནས་དེ་ཇི་ལྟ་ཇི་ལྟར་དྲལ་བ་དེ་ལྟ་དེ་ལྟར་དེ་དག་གི་མདུན་དུ་བདག་ཉིད་ཀྱི་ལུས་ཀྱི་བསྙེན་བཀུར་གྱི་ཕྱིར་འདི་ལྟ་སྟེ་ང་ལྟ་བུའི་དགེ་སློང་ཚུལ་ཁྲིམས་དང་ལྡན་པ་དགེ་བའི་ཆོས་ཅན་

ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན་སྲུ་འདི་ནི་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་བསྔགས་པ་བརྗོད་པར་བརྩམས་སོ། །དེ་དག་ལས་གང་དག་བདག་གིར་བྱེད་པ་དེ་དག་ནི་དེ་དང་ལྷན་ཅིག་གཞོགས་སྟེགས་དང་། འཕྱར་
གཡེང་དང་། ཐོ་འཚམས་པ་དང་། ཀུན་དུ་རྩེ་བ་དང་། ཀུན་དུ་ཅ་ཅོ་འདོན་པ་དང་། ལུས་ལ་རྡེག་པ་དག་བྱེད་དོ། །གང་དག་བདག་གིར་མི་བྱེད་པ་དེ་དག་ནི་དེ་ནས་ཕྱིར་བྱུང་སྟེ། འཆགས་དང་། དག་ར་དང་། སྒོ་གང་དག་ན་བདག་ཅག་གི་རང་གི་ཁྱིམ་ཐབ་དག་ལས་ཀྱང་
ཚིག་གང་དག་སྔོན་མ་ཐོས་པ་དེ་དག་འཕགས་པ་འཆར་ཀ་ལས་ཐོས་སོ། །གལ་ཏེ་བདག་ཅག་གི་ཕ་མ་དང་ཕུ་ནུ་མོ་དག་གིས་ཐོས་པར་གྱུར་ན་རྒྱལ་བྱེད་ཀྱི་ཚལ་ག་ལ་བ་དེར་ལྟར་མི་སྟེར་ན་འགྲོར་ལྟ་ཅི་སྨོས་ཀྱང་ཅི་དགོས་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་
བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ