Luận tạng Tây Tạng (Tengyur) — Tập 142

ཞེས་འབྱུང་བའི་ཕྱིར་སྐལ་བ་མཉམ་པའི་རྒྱུ་ནི་རྒྱུ་མཐུན་པའི་འབྲས་བུ་དང་བཅས་པ་ཡིན་ན། དེ་
ཡང་མ་འོངས་པ་ལ་རིགས་པ་མ་ཡིན་ཏེ། རྒྱུ་མཐུན་པའི་འབྲས་བུ་དེ་རིགས་པ་མ་ཡིན་ནོ། །ཅིའི་ཕྱིར་ཞེ་ན། སྔ་ཕྱི་མེད་པའི་ཕྱིར་ཏེ། མ་འོངས་པས་གནས་སྐབས་ན་ནི་འདི་ནི་སྔ་མའོ། །འདི་ནི་ཕྱི་མའོ་ཞེས་བྱ་བར་ཡོངས་སུ་མི་ཆོད་དེ། འཆོལ་བར་འདུག་པའི་
ཕྱིར་རོ། །སྔ་ཕྱི་མེད་ན་ནི་འདྲ་བའི་རྒྱུ་མཐུན་པ་དང་འདྲ་བ་ཡིན་པར་ཡང་མི་རུང་ངོ་། །འོན་ཏེ་སྐྱེས་པ་འདས་པ་དང་ད་ལྟར་བྱུང་བ་མ་འོངས་པའི་རྒྱུ་མཐུན་པར་འདོད་དོ་ཞེ་ན། དེའི་ཕྱིར་བྱུང་ཟིན་པ་ཡང་མ་འོངས་པའི་རྒྱུ་མཐུན་པར་མི་རུང་སྟེ་ཞེས་བྱ་བ་སྨོས་ཏེ། དཔེར་

ན་ད་ལྟར་གྱི་རྒྱུ་མཐུན་པ་འདས་པ་མ་ཡིན་པ་དེ་བཞིན་དུ་བྱུང་ཟིན་པ་ཡང་མ་འོངས་པའི་རྒྱུ་མཐུན་པ་ཡིན་པར་འོས་པ་མ་ཡིན་ནོ། །དེ་ཅིའི་ཕྱིར་ཞེ་ན། རྒྱུ་བས་འབྲས་བུ་སྔ་ན་ནི་མི་རུང་བས་ཞེས་བྱ་བ་སྨོས་ཏེ། སྐྱོན་དུ་འགྱུར་བའི་ཕྱིར་རོ། །རྣམ་
པར་སྨིན་པའི་འབྲས་བུ་སྔ་བ་དང་ལྷན་ཅིག་པ་མི་རུང་བའི་ཕྱིར་ལ་ཞེས་བྱ་བ་ནི་རྒྱུ་བས་འབྲས་བུ་སྔ་ན་མི་རུང་བས་སྔ་པ་ཡང་མི་རུང་ངོ་། །མ་འོངས་པའི་གནས་སྐབས་ན་ལྷན་ཅིག་པ་ཡང་མི་རུང་སྟེ། ད་ལྟར་བྱུང་བའི་གནས་སྐབས་ན་ལྷན་ཅིག་འབྱུང་བའི་རྒྱུ་བཞིན་དུ་རྣམ་པར་
སྨིན་པའི་རྒྱུའི་འབྲས་བུ་ལྷན་ཅིག་འབྱུང་བ་མི་དམིགས་སོ།། །།བམ་པོ་བཅོ་བརྒྱད་པ། དེ་ལྟ་བས་ན་མ་འོངས་པའི་དུས་ལ་ཡང་སྔ་ཕྱི་མེད་པའི་ཕྱིར་ཏེ་མ་འོངས་པའི་དུས་འཆོལ་བར་འདུག་པའི་ཕྱིར་རྣམ་པར་སྨིན་པའི་རྒྱུ་སྔ་ལ་རྣམ་པར་སྨིན་པའི་འབྲས་བུ་འཕྱི་
བར་རུང་བ་མ་ཡིན་ནོ། །དེའི་ཕྱིར་ཡང་སྐལ་བ་མཉམ་པའི་རྒྱུ་བཞིན་དུ་རྣམ་པར་སྨིན་པའི་རྒྱུ་ཡང་མ་འོངས་པ་ཡིན་པར་མི་འགྱུར་རོ། །བྱེ་བྲག་ཏུ་སྨྲ་བས་དེ་ནི་མ་ཡིན་ཏེ་ཞེས་བྱ་བ་སྨོས་ཏེ། དེ་ལྟ་ན་རྣམ་པར་སྨིན་པའི་རྒྱུ་ཡང་ཞེས་སྨྲས་པ་གང་ཡིན་པའོ། །ཕན་ཚུན་རྒྱུ་
མཐུན་པ་ཉིད་དུ་ནི་རིགས་པ་དང་ལྡན་པ་མ་ཡིན་ནོ་ཞེས་བྱ་བ་ནི་ཆོས་འདྲ་བ་གང་ཞིག་གང་གིས་སྐལ་བ་མཉམ་པའི་རྒྱུ་ཡིན་པའི་ཆོས་དེ་ཉིད་དེ་ཁོ་ནའི་ཚེ་དེའི་རྒྱུ་མཐུན་པ་ཡིན་པར་ཇི་ལྟར་རུང་སྟེ། བུ་རང་གི་ཕ་ཉིད་ཀྱི་ཕ་དེ་ཁོ་ནའི་ཚེ་མི་འགྱུར་རོ། །རྣམ་པར་སྨིན་པའི་རྒྱུ་ནི་དེ་
ལྟར་ཐལ་བར་མི་འགྱུར་ཏེ་ཞེས་བྱ་བ་ཅི་ཞེ་ན། སྔ་ཕྱི་མེད་བཞིན་དུ་ཡང་ཕན་ཚུན་རྒྱུ་དང་འབྲས་བུ་ཉིད་དུ་ཐལ་བར་མི་འགྱུར་ཏེ་འཐོབ་པར་མི་འགྱུར་རོ། །དེ་ཅིའི་ཕྱིར་ཞེ་ན། རྒྱུ་དང་འབྲས་བུ་དག་མཚན་ཉིད་ཐ་དད་པའི་ཕྱིར་ཏེ། རྣམ་སྨིན་རྒྱུ་ནི་མི་དགེ་དང་། །དགེ་བ་
ཟག་བཅས་རྣམས་ཁོ་ན། །ཞེས་བྱ་བ་དང་། རྣམ་སྨིན་ལུང་དུ་མ་བསྟན་ཆོས། །ཞེས་འབྱུང་བའི་ཕྱིར་རྒྱུའི་མཚན་ཉིད་ཀྱང་གཞན་ནོ། །ངོ་བོ་ཉིད་ཅེས་བྱ་བའི་ཐ་ཚིག་སྟེ། དེའི་མཚན་ཉིད་ནི་མི་དགེ་བ་ཉིད་དང་། དགེ་བ་ཟག་པ་དང་བཅས་པ་ཉིད་ཡིན་ནོ། །འབྲས་

བུའི་མཚན་ཉིད་ཀྱང་གཞན་ཏེ་མ་བསྒྲིབས་ལ་ལུང་དུ་མ་བསྟན་པ་ཉིད་ཡིན་ནོ། །དེ་ལྟ་བས་ན་ཞེས་བྱ་བ་རྒྱས་པར་འབྱུང་བ་གནས་སྐབས་ཀྱིས་རྣམ་པར་གནས་པ་ནི་གནས་སྐབས་ལས་རྣམ་པར་གནས་པ་སྟེ། སྐལ་བ་མཉམ་པའི་རྒྱུ་ནི་འདས་པའི་གནས་སྐབས་པ་དང་ད་ལྟར་
བྱུང་བའི་གནས་སྐབས་པ་ཡིན་གྱི་མ་འོངས་པའི་གནས་སྐབས་པ་ནི་མ་ཡིན་ནོ། །རྣམ་པར་སྨིན་པའི་རྒྱུ་ནི་མཚན་ཉིད་ལས་རྣམ་པར་གནས་པ་ཡིན་ཏེ། མཚན་ཉིད་ཀྱི་རྣམ་པར་གནས་པ་ཡིན་ནོ། །དུས་གསུམ་ཆར་དུ་ཡང་མཚན་ཉིད་ཇི་སྐད་བཤད་པ་བཞིན་ཡིན་པས་
རྣམ་པར་སྨིན་པའི་རྒྱུ་ནི་མ་འོངས་པའི་གནས་སྐབས་མི་དགག་གོ། །འདིར་འདི་དཔྱད་པར་བྱ་སྟེ། ཅི་མ་འོངས་པའི་དུས་ན་ཆོས་འདྲ་བ་རྣམས་འཆོལ་བར་འདུག་པས་འདི་ནི་རྒྱུའོ། །འདིའི་རྒྱུ་མཐུན་པའི་འབྲས་བུའོ། །ཞེས་བྱ་བར་ཡོངས་སུ་གཅད་མི་ནུས་ཏེ། དེའི་ཕྱིར་
སྐལ་བ་མཉམ་པའི་རྒྱུ་མ་འོངས་པ་རྣམ་པར་མི་གཞག་གམ། འོན་ཏེ་ཆོས་གང་ཞིག་གང་གི་སྐལ་བ་མཉམ་པའི་རྒྱུ་ཡིན་པའི་ཆོས་དེ་རྒྱུ་དང་རྐྱེན་གྱི་དབང་གིས་དེའི་རྒྱུ་མཐུན་པའི་འབྲས་བུ་ཡིན་པར་ཡང་འགྱུར་བས་དེའི་ཕྱིར་སྐལ་བ་མཉམ་པའི་རྒྱུ་མ་འོངས་པ་རྣམ་པར་མ་
བཞག་ཅེ་ན། འདི་རྣམ་པར་བཤད་པ་བྱེད་པ་རྣམས་ཀྱིས་ནི་མ་དཔྱད་དོ། །བདག་ནི་ཕྱོགས་སྔ་མ་འདི་ཁོ་ན་ལྟར་ཡིན་ནོ་སྙམ་བྱེད་དོ། །ཅི་དེ་ལྟར་ངེས་སམ་ཞེ་ན་ཞེས་བྱ་བ་ནི་ཅི་རང་གི་ས་པ་ཁོ་ནའོ་ཞེས་ངེས་པར་བཟུང་བ་ཞིག་ཡིན་ནམ་འོན་ཏེ་དེ་ལྟ་མ་ཡིན་པ་ཡང་ཡོད་སྙམ་དུ་
བསམས་པ་ཡིན་ནོ། །ས་དགུའི་ལམ་ནི་ཕན་ཚུན་དུ། །ཞེས་བྱ་བ་ལ། ནི་ཞེས་བྱ་བའི་སྒྲ་ནི་ཁྱད་པར་དུ་བྱ་བ་ཡིན་ཏེ། ལམ་ཞེས་བྱ་བ་ལམ་གྱི་བདེན་པ་ཡིན་པར་བརྗོད་པར་འདོད་པས་ཟག་པ་དང་བཅས་པ་ལས་ལམ་གྱི་བདེན་པ་ཁྱད་པར་དུ་ཤེས་པ་ཡིན་ནོ། །ཟག་པ་དང་
བཅས་པའི་ཆོས་ཀྱི་སྐལ་བ་མཉམ་པའི་རྒྱུ་ནི་རང་གི་ས་པ་ཁོ་ན་ཡིན་གྱི། གཞན་གྱི་ས་པ་ནི་མ་ཡིན་ལ། ལམ་གྱི་སྐལ་བ་མཉམ་པའི་རྒྱུ་ནི་གཞན་གྱི་ས་པ་ཡང་ཡིན་ནོ། །ས་སྨོས་ན་ནི་ཟག་པ་དང་བཅས་པ་དང་། ཟག་པ་མེད་པ་ཡང་གཟུང་གི་ཁམས་མོས་ན་ནི་ཟག་པ་དང་

བཅས་པ་ཁོ་ན་གཟུང་སྟེ། དེའི་ཕྱིར་འདི་ནི་ས་དེ་དག་ཏུ་གློ་བུར་དུ་འོངས་པ་ཡིན་ལ། ས་དེ་པའི་སྲེད་པ་དག་གིས་བདག་གིར་མ་བྱས་པའི་ཕྱིར་ཁམས་དེ་དག་ཏུ་གཏོགས་པ་མ་ཡིན་ཞེས་བྱ་བ་སྨོས་ཏེ། ཟག་པ་མེད་པའི་ཆོས་རྣམས་ནི་ཟག་པ་དང་
བཅས་པ་འདོད་པ་དང་གཟུགས་དང་གཟུགས་མེད་པ་ན་སྤྱོད་པའི་སྲེད་པ་དག་གིས་བདག་གིར་མི་བྱེད་དོ། །འོ་ན་གང་གི་ཚེ་མྱ་ངན་ལས་འདས་པ་དང་ལམ་མངོན་པར་འདོད་པ་དེའི་ཚེ་ཇི་ལྟ་བུ་ཞེ་ན། དེ་ནི་ཆོས་ལ་འདུན་པ་དགེ་བ་ཡིན་ཏེ། འདོད་ཆགས་མིན་ཏེ་སྤང་བྱའི་
ཕྱིར། །ཞེས་འབྱུང་བའི་ཕྱིར་རོ། །རིགས་མཐུན་པའི་ཞེས་བྱ་བ་ནི་ཟག་པ་མེད་པའི་རིགས་ཀྱིའོ། །དེ་ལྟ་ན་འོ་ན་ནི་ཐམས་ཅད་ཀྱང་ཐམས་ཅད་ཀྱི་སྐལ་བ་མཉམ་པའི་རྒྱུར་འགྱུར་རོ་ཞེ་ན། དེའི་ཕྱིར། མཉམ་དང་ཁྱད་པར་ཅན་གྱི་ཡིན། །ཞེས་བྱ་བ་སྨོས་སོ། །འོ་ན་ཅིའི་
ཕྱིར་ཕན་ཚུན་དུ་ཞེས་སྨོས་ཤེ་ན། ས་གོང་མ་པ་དང་ས་འོག་མ་པ་དག་ཕན་ཚུན་དུ་ཞེས་དེ་སྐད་དུ་བྱ་བའི་ཕྱིར་ཏེ། ས་གོང་མ་པ་ཡང་ས་འོག་མ་པ་དག་གི་སྐལ་བ་མཉམ་པའི་རྒྱུ་ཡིན་ལ། ས་འོག་མ་པ་ཡང་ས་གོང་མ་པ་དག་གི་ཡིན་ནོ། །འདི་ལྟ་སྟེ་ཞེས་བྱ་བ་རྒྱས་པར་
འབྱུང་བ་ནི་སྡུག་བསྔལ་ལ་ཆོས་ཤེས་པའི་བཟོད་པ་ནི་མཉམ་པ་ཡིན་པས་ཟག་པ་མེད་པ་དེ་ཉིད་མ་འོངས་པ་དང་སྡུག་བསྔལ་ལ་ཆོས་ཤེས་པ་དང་སྡུག་བསྔལ་ལ་རྗེས་སུ་ཤེས་པའི་བཟོད་པ་དང་། མི་སྐྱེ་བ་ཤེས་པའི་བར་ཁྱད་པར་ཅན་གྱི་རྒྱུ་ཡིན་ནོ། །དམན་པའི་ནི་མ་
ཡིན་ཏེ། སྡུག་བསྔལ་ལ་ཆོས་ཤེས་པ་ནི་སྡུག་བསྔལ་ལ་ཆོས་ཤེས་པའི་བཟོད་པ་མ་འོངས་པའི་སྐལ་བ་མཉམ་པའི་རྒྱུར་མི་འགྱུར་རོ། །མཐོང་བ་དང་བསྒོམ་པ་དང་མི་སློབ་པའི་ལམ་རྣམས་ནི་གསུམ་དང་གཉིས་དང་གཅིག་དག་གི་ཡིན་ནོ་ཞེས་བྱ་བ་ནི་མཐོང་
བའི་ལམ་ནི་མཐོང་བའི་ལམ་གཞན་དང་། བསྒོམ་པའི་ལམ་དང་མི་སློབ་པའི་ལམ་གྱི་སྐལ་བ་མཉམ་པའི་རྒྱུ་ཡིན་པས་གསུམ་གྱི་ཡིན་ནོ། །བསྒོམ་པའི་ལམ་ནི་བསྒོམ་པའི་ལམ་གཞན་དང་མི་སློབ་པའི་ལམ་གྱི་སྐལ་བ་མཉམ་པའི་རྒྱུ་ཡིན་གྱི། མཐོང་བའི་ལམ་གྱི་ནི་མ་ཡིན་པས་

གཉིས་ཀྱི་ཡིན་ནོ། །མི་སློབ་པའི་ལམ་ནི་མི་སློབ་པའི་ལམ་གཞན་གྱི་ཡིན་གྱི་མཐོང་བ་དང་བསྒོམ་པའི་ལམ་དག་གི་ནི་མ་ཡིན་པས་གཅིག་གི་སྐལ་བ་མཉམ་པའི་རྒྱུ་ཡིན་ནོ། །དེ་ལ་ཡང་ཞེས་བྱ་བ་ནི་མཐོང་བའི་ལམ་ལ་སོགས་པའི་དེ་ལ་ཡང་དབང་པོ་རྟུལ་པོའི་ལམ་མཐོང་
བའི་ལམ་གྱི་ངོ་བོ་ཉིད་ནི་དབང་པོ་རྟུལ་པོ་དང་རྣོན་པོའི་ལམ། དེའི་ངོ་བོ་ཉིད་ཁོ་ནའི་རྒྱུ་ཡིན་ལ་དབང་པོ་རྣོན་པོའི་ལམ་ནི་དབང་པོ་རྣོན་པོའི་ལམ་ཁོ་ནའི་ཡིན་གྱི་དམན་པའི་ཕྱིར་དབང་པོ་རྟུལ་པོའི་ལམ་གྱི་ནི་མ་ཡིན་ནོ། །དེ་བཞིན་དུ་བསྒོམ་པའི་ལམ་དང་མི་སློབ་པའི་ལམ་ལ་
ཡང་བརྗོད་པར་བྱ་སྟེ། དེ་བསྟན་པའི་ཕྱིར་འདི་ལྟ་སྟེ་ཞེས་བྱ་བ་རྒྱས་པར་སྨོས་སོ། །གང་ཟག་དབང་པོ་རྟུལ་པོ་གཅིག་ལ་ཡང་ལམ་དྲུག་ཅར་ཡོད་ལ་རང་བཞིན་གྱིས་དབང་པོ་རྣོན་པོ་ལ་ནི་གསུམ་ཡོད་དེ། དེ་ལ་དད་པས་རྗེས་སུ་འབྲང་བའི་ལམ་ནི་བདག་ཉིད་ཀྱང་དད་པས་
རྗེས་སུ་འབྲང་བའི་ལམ་གཞན་དང་བདག་ཉིད་ཀྱི་ཆོས་ཀྱི་རྗེས་སུ་འབྲང་བའི་ལམ་མ་འོངས་པའི་གནས་སྐབས་དང་། བདག་ཉིད་ཀྱང་དད་པས་མོས་པ་དང་། མཐོང་བས་ཐོབ་པ་དང་། དུས་ཀྱི་རྣམ་པར་གྲོལ་བ་དང་། དུས་དང་མི་སྦྱོར་བར་རྣམ་པར་གྲོལ་བའི་ལམ་
སྐྱེ་བ་དང་མི་སྐྱེ་བའི་ཆོས་ཅན་རྣམས་ཀྱི་ཅི་རིགས་པར་སྐལ་བ་མཉམ་པ་མཉམ་པའི་རྒྱུ་ཡིན་པས་དྲུག་གི་སྐལ་བ་མཉམ་པའི་རྒྱུ་ཡིན་ནོ། །དད་པས་མོས་པའི་ལམ་ནི་དད་པས་མོས་པའི་ལམ་གཞན་དང་མཐོང་བས་ཐོབ་པ་དང་། དུས་ཀྱི་རྣམ་པར་གྲོལ་བ་དང་། དུས་དང་མི་
སྦྱོར་བར་རྣམ་པར་གྲོལ་བའི་ལམ་གཞན་གསུམ་གྱི་ཡིན་པས་གཞིའི་སྐལ་བ་མཉམ་པའི་རྒྱུ་ཡིན་ནོ། །དུས་ཀྱི་རྣམ་པར་གྲོལ་བའི་ལམ་ནི་དུས་ཀྱི་རྣམ་པར་གྲོལ་བའི་ལམ་གཞན་དང་། དུས་དང་མི་སྦྱོར་བར་རྣམ་པར་གྲོལ་བའི་ཡིན་པས་གཉིས་ཀྱི་སྐལ་བ་མཉམ་
པའི་རྒྱུ་ཡིན་ནོ། །དད་པས་མོས་པའི་ལམ་ནི་དད་པས་རྗེས་སུ་འབྲང་བ་དང་ཆོས་ཀྱི་རྗེས་སུ་འབྲང་བའི་ལམ་དག་གི་རྒྱུ་མ་ཡིན་ཏེ། མཐོང་བའི་ལམ་དུས་སྔ་བའི་ཕྱིར་དང་། བསྒོམ་པའི་ལམ་ཡང་ཁྱད་པར་ཅན་ཡིན་པའི་ཕྱིར་རོ། །དེ་བཞིན་དུ་གཞན་ལ་ཡང་སྦྱར་

བར་བྱའོ། །ཆོས་ཀྱི་རྗེས་སུ་འབྲང་བའི་ལམ་ནི་ཆོས་ཀྱི་རྗེས་སུ་འབྲང་བའི་ལམ་གཞན་དང་མཐོང་བས་ཐོབ་པ་དང་དུས་དང་མི་སྦྱོར་བ་རྣམ་པར་གྲོལ་བའི་ལམ་རྣམས་ཀྱི་ཡིན་པས་གསུམ་གྱི་སྐལ་བ་མཉམ་པའི་རྒྱུ་ཡིན་ནོ། །མཐོང་བས་ཐོབ་པའི་
ལམ་ནི་མཐོང་བས་ཐོབ་པའི་ལམ་གཞན་དང་། དུས་དང་མི་སྦྱོར་བར་རྣམ་པར་གྲོལ་བའི་ལམ་གྱི་ཡིན་པས་གཉིས་ཀྱི་ཡིན་ནོ། །དུས་དང་མི་སྦྱོར་བར་རྣམ་པར་གྲོལ་བའི་ལམ་ནི་དུས་དང་མི་སྦྱོར་བར་རྣམ་པར་གྲོལ་བའི་ལམ་གཞན་ཁོ་ནའི་ཡིན་པས། གཅིག་གི་སྐལ་
བ་མཉམ་པའི་རྒྱུ་ཡིན་ནོ། །ཆོས་ཀྱི་རྗེས་སུ་འབྲང་བའི་ལམ་ནི་དད་པས་རྗེས་སུ་འབྲང་བའི་ལམ་གྱི་སྐལ་བ་མཉམ་པའི་རྒྱུ་མ་ཡིན་ཏེ། ཆོས་ཀྱི་རྗེས་སུ་འབྲང་བའི་ལམ་ནི་དབང་པོའི་སྒོ་ནས་ཁྱད་པར་ཅན་ཡིན་པའི་ཕྱིར་རོ། །དད་པས་མོས་པའི་ལམ་གྱི་ཡང་མ་ཡིན་
ཏེ། དབང་པོའི་སྒོ་ནས་ཁྱད་པར་ཅན་ཡིན་པའི་ཕྱིར་རོ། །འོ་ན་ནི་དུས་ཀྱི་རྣམ་པར་གྲོལ་བའི་ལམ་མཐོང་བས་ཐོབ་པ་དབང་པོའི་སྒོ་ནས་རྒྱུ་མ་ཡིན་ཏེ་དབང་པོའི་སྒོ་ནས་ཁྱད་པར་དུ་འཕགས་པའི་སྐལ་བ་མཉམ་པའི་རྒྱུ་ཡིན་པར་འགྱུར་རོ་ཞེ་ན། མི་སློབ་པའི་ལམ་
གྱིས་བསྡུས་པ་ཡིན་པའི་ཕྱིར་མི་འགྱུར་ཏེ། འབྲས་བུ་དུས་སྔར་བྱུང་ལ་རྒྱུ་དུས་ཕྱིས་བྱུང་བ་ནི་མ་ཡིན་ནོ། །མཐོང་བས་ཐོབ་པའི་ལམ་ཡང་དུས་ཀྱི་རྣམ་པར་གྲོལ་བའི་སྐལ་བ་མཉམ་པའི་རྒྱུ་མ་ཡིན་ཏེ། དབང་པོའི་སྒོ་ནས་ཁྱད་པར་ཅན་ཡིན་པའི་ཕྱིར་རོ། །ཡང་ཇི་ལྟར་
ཞེས་བྱ་བ་རྒྱས་པར་འབྱུང་བ་ནི་ས་གོང་མ་པ་བསམ་གཏན་གཉིས་པ་ནས་བཟུང་སྟེ། ཅི་ཡང་མེད་པའི་སྐྱེ་མཆེད་ཀྱི་བར་གྱི་ས་པའི་མཐོང་བའི་ལམ་མམ། བསྒོམ་པའི་ལམ་མམ། མི་སློབ་པའི་ལམ་ནི་ཅི་རིགས་པར་ས་འོག་མའི་ལམ་རྣམ་ཤེས་མཐའ་ཡས་སྐྱེ་
མཆེད་ནས་བཟུང་སྟེ། མི་ལྕོགས་པ་མེད་པའི་བར་གྱི་ས་པའི་མཐོང་བའི་ལམ་མམ། བསྒོམ་པའི་ལམ་མམ། མི་སློབ་པའི་ལམ་དང་ཇི་ལྟར་རིགས་པར་མཉམ་པའམ་ཁྱད་པར་ཅན་ཡིན་ཇི་ལྟར་ན་ཡིན་པར་མི་འགྱུར་ཞེ་ན། ས་འོག་མ་ནི་དམན་པའི་ཕྱིར་རོ། །

དབང་པོ་དང་རྒྱུས་རྒྱས་པར་བྱས་པའི་སྒོ་ནས་ཏེ་ཞེས་བྱ་བ་ལ། རེ་ཞིག་མཐོང་བའི་ལམ་ལ་དབང་པོའི་སྒོ་ནས་ལམ་མཉམ་པའམ་ཁྱད་པར་ཅན་ཡིན་པ་ནི་བསམ་གཏན་བཞི་པའི་དད་པས་རྗེས་སུ་འབྲང་བའི་ལམ་དང་ས་འོག་མའི་དད་པས་རྗེས་སུ་འབྲང་བའི་ལམ་དེ་
ཉིད་མཉམ་པ་ཡིན་ཏེ་གཉི་ག་ཡང་དབང་པོ་རྟུལ་པོ་ཡིན་པའི་ཕྱིར་རོ། །དེ་ཉིད་པས་ཆོས་ཀྱི་རྗེས་སུ་འབྲང་བའི་ལམ་ས་འོག་མ་པ་ཁྱད་པར་དུ་འཕགས་པ་ཡིན་ཏེ། དབང་པོ་རྣོན་པོའི་ཕྱིར་རོ། །དེ་བཞིན་དུ་ཆོས་ཀྱི་རྗེས་སུ་འབྲང་བའི་ལམ་བསམ་གཏན་བཞི་པའི་ས་པ་ནི་
ཆོས་ཀྱི་རྗེས་སུ་འབྲང་བའི་ལམ་ས་འོག་མ་པ་དང་མཉམ་པ་ཡིན་ནོ། །དེ་བཞིན་དུ་དད་པས་རྗེས་སུ་འབྲང་བ་དང་ཆོས་ཀྱི་རྗེས་སུ་འབྲང་བའི་ལམ་བསམ་གཏན་བཞི་པའི་ས་པ་དེ་དག་ཉིད་ས་འོག་མ་པའི་བསྒོམ་པ་དང་མི་སློབ་པའི་ལམ་སོ་སོར་ས་དང་དབང་པོའི་བྱེ་
བྲག་གིས་ཐ་དད་པ་དག་དང་ཅི་རིགས་པར་མཉམ་པའམ་ཁྱད་པར་ཅན་ཡིན་པར་སྦྱར་བར་བྱའོ། །དེ་བཞིན་དུ་བསྒོམ་པའི་ལམ་ལ་ཡང་ཅི་ཡང་མེད་པའི་སྐྱེ་མཆེད་ཀྱི་ས་པའི་དད་པས་མོས་པའི་ལམ་ནི་ས་འོག་མ་པའི་དད་པས་མོས་པའི་ལམ་དང་མཉམ་པ་ཡིན་ཏེ། གཉི་ག་ཡང་
དབང་པོ་རྟུལ་པོ་ཡིན་པའི་ཕྱིར་རོ། །དེ་ཉིད་པས་ས་འོག་མ་པའི་མཐོང་བས་ཐོས་པའི་ལམ་ཁྱད་པར་དུ་འཕགས་པ་ཡིན་ཏེ། དབང་པོ་རྣོ་བའི་ཕྱིར་རོ། །དེ་བཞིན་དུ་དེ་ཉིད་ས་འོག་མ་པའི་དུས་ཀྱི་རྣམ་པར་གྲོལ་བའི་ལམ་དང་ནི་མཉམ་པ་ཡིན་ཏེ། གཉི་ག་ཡང་དབང་པོ་
རྟུལ་པོ་ཡིན་པའི་ཕྱིར་རོ། །དེ་ཉིད་པས་ས་འོག་མ་པའི་དུས་དང་མི་སྦྱོར་བར་རྣམ་པར་གྲོལ་བའི་ལམ་ཁྱད་པར་ཅན་ཡིན་ཏེ། དབང་པོ་རྣོ་བའི་ཕྱིར་རོ། །དེ་བཞིན་དུ་མི་སློབ་པའི་ལམ་ལ་ཡང་ཅི་ཡང་མེད་པའི་སྐྱེ་མཆེད་ཀྱི་མི་སློབ་པའི་ལམ་ནི་ཅི་རིགས་པར་ས་འོག་
མ་པ་དང་མཉམ་པའམ་ཁྱད་པར་ཡིན་པར་སྦྱར་བར་བྱ་སྟེ་ཕྱོགས་འདིས་ས་ཐམས་ཅད་སྦྱར་བར་བྱའོ། །རྒྱུས་རྒྱས་པར་བྱས་པའི་སྒོ་ནས་ཇི་ལྟར་ས་གོང་མ་པའི་ས་འོག་མའི་ལམ་དང་མཉམ་པའམ་ཁྱད་པར་ཅན་ཡིན་ཞེ་ན། དེའི་ཕྱིར་དེ་ལ་རྒྱུས་ཤིན་ཏུ་རྒྱས་པར་

བྱས་པ་ནི་མཐོང་བའི་ལམ་ལ་སོགས་པ་དང་ཞེས་བྱ་བ་འདི་རྒྱས་པར་སྨོས་སོ། །སོགས་པ་ཞེས་བྱ་བ་སྨོས་པས་ནི་བསྒོམ་པ་དང་མི་སློབ་པའི་ལམ་ཉེ་བར་བསྡུས་ཏེ། ས་གོང་མ་པའི་སྡུག་བསྔལ་ལ་ཆོས་ཤེས་པའི་བཟོད་པ་བས་ནི་ས་འོག་
མ་པའི་སྡུག་བསྔལ་ལ་ཆོས་ཤེས་པའི་རྒྱུས་རྒྱས་པར་བྱས་པའི་སྒོ་ནས་ཁྱད་པར་ཅན་ཡིན་ནོ། །ས་འོག་མ་པའི་སྡུག་བསྔལ་ལ་ཆོས་ཤེས་པ་བས་ཀྱང་ས་འོག་མ་པའི་སྡུག་བསྔལ་ལ་རྗེས་སུ་ཤེས་པའི་བཟོད་པའི་རྒྱུས་རྒྱས་པར་བྱས་པའི་སྒོ་ནས་ཁྱད་པར་ཅན་ཡིན་པ་ནས་
ས་གོང་མ་པའི་ལམ་ལ་ཆོས་ཤེས་པ་བས་ཀྱང་ས་འོག་མ་པའི་ལམ་ལ་རྗེས་སུ་ཤེས་པའི་བཟོད་པའི་བར་དུ་རྒྱུས་རྒྱས་པར་བྱས་པའི་སྒོ་ནས་ཁྱད་པར་ཅན་ཡིན་ཏེ། སྐལ་བ་མཉམ་པའི་རྒྱུ་ལྷག་པ་རེ་རེས་རྒྱས་པར་བྱས་པའི་ཕྱིར་རོ། །ས་གོང་མ་པའི་མཐོང་བའི་ལམ་པས་
ནི་ས་འོག་མ་པའི་བསྒོམ་པའི་ལམ་རྒྱུས་རྒྱས་པར་བྱས་པའི་སྒོ་ནས་ཁྱད་པར་ཅན་ཡིན་ཏེ། མཐོང་བའི་ལམ་ནི་མཐོང་བའི་ལམ་གྱི་རྒྱུས་རྒྱས་པར་བྱས་པ་ཡིན་ལ། བསྒོམ་པའི་ལམ་ནི་མཐོང་བའི་ལམ་དང་བསྒོམ་པའི་ལམ་གྱི་རྒྱུས་རྒྱས་པར་བྱས་པ་ཡིན་ནོ། །ས་གོང་
མ་པའི་མཐོང་བའི་ལམ་དང་བསྒོམ་པའི་ལམ་དག་པས་ཀྱང་ས་འོག་མ་པའི་མི་སློབ་པའི་ལམ་རྒྱུས་རྒྱས་པར་བྱས་པའི་སྒོ་ནས་ཁྱད་པར་ཅན་ཡིན་ཏེ། མཐོང་བ་དང་བསྒོམ་པ་དང་མི་སློབ་པའི་ལམ་གྱི་རྒྱུས་རྒྱས་པར་བྱས་པའི་ཕྱིར་རོ། །ས་གོང་མ་པའི་མཐོང་བའི་
ལམ་དང་ས་འོག་མ་པའི་མཐོང་བའི་ལམ་དུ་ནི་སྐད་ཅིག་མ་མཐུན་པ་ལ་ལྟོས་ན་རྒྱུས་རྒྱས་པར་བྱས་པའི་སྒོ་ནས་མཉམ་པ་ཡིན་ཏེ། བསྒོམ་པའི་ལམ་དང་བསྒོམ་པའི་ལམ་དུ་དང་མི་སློབ་པའི་ལམ་དང་མི་སློབ་པའི་ལམ་དུ་ཡང་དེ་དང་འདྲའོ། །དེ་ལྟར་ན་ཁ་ཅིག་ས་འོག་
མ་པ་ཉིད་ཡིན་ཡང་དབང་པོའི་སྒོ་ནས་མཉམ་པ་ཡིན་ལ་རྒྱུས་རྒྱས་པར་བྱས་པའི་སྒོ་ནས་ཁྱད་པར་ཅན་ཡིན་ཏེ། དཔེར་ན་བསམ་གཏན་དང་པོའི་ས་པའི་དད་པས་རྗེས་སུ་འབྲང་བའི་ལམ་པས་ས་འོག་མ་པའི་དད་པས་མོས་པ་དང་དུས་ཀྱིས་རྣམ་པར་གྲོལ་བའི་ལམ་དག་

ལྟ་བུའོ། །ཁ་ཅིག་ནི་དབང་པོ་དང་རྒྱུས་རྒྱས་པར་བྱས་པའི་སྒོ་ནས་ཁྱད་པར་ཅན་ཡིན་ཏེ། དཔེར་ན་བསམ་གཏན་བཞི་པའི་ས་པའི་དད་པས་རྗེས་སུ་འབྲང་བའི་ལམ་པས་ས་འོག་མ་པའི་མཐོང་བས་ཐོབ་པ་དང་དུས་དང་མི་སྦྱོར་བར་རྣམ་པར་གྲོལ་བའི་ལམ་དག་ལྟ་བུའོ། །
ཆུང་ངུའི་ཆུང་ངུ་ལ་སོགས་པ་གོང་ནས་གོང་དུའོ་ཞེས་བྱ་བ་ནི་མཐོང་བའི་ལམ་མ་གཏོགས་ཏེ། དེ་ལ་ཆུང་ངུའི་ཆུང་ངུ་ལ་སོགས་པ་མི་སྲིད་པའི་ཕྱིར་རོ། །དེ་ལ་ས་གོང་མ་པའི་རྣམ་པ་ཆུང་ངུའི་ཆུང་ངུ་བས་ས་འོག་མ་པའི་ཆུང་ངུའི་འབྲིང་པོ་ནས་ཆེན་པོའི་འབྲིང་པོ་བས་ཆེན་པོའི་ཆེན་
པོའི་བར་དུ་སྐད་ཅིག་མ་འདྲ་བ་དང་མི་འདྲ་བ་ལ་ལྟོས་ནས་རྒྱུས་རྒྱས་པ་བྱས་པའི་སྒོ་ནས་མཉམ་པའམ་ཁྱད་པར་ཅན་ཡིན་ཏེ། ཁྱད་པར་ཅན་ནི་རྒྱུའི་རྣམ་པ་ལྷག་མ་རེ་རེས་རྒྱས་པར་བྱས་པའི་ཕྱིར་རོ། །དད་པས་རྗེས་སུ་འབྲང་བའི་ལམ་ནི་དྲུག་གི་སྐལ་བ་མཉམ་པའི་རྒྱུ་
ཡིན་ནོ་ཞེས་གང་བཤད་པ་ཇི་ལྟར་ན་དད་པས་རྗེས་སུ་འབྲང་བའི་ལམ་ཆོས་ཀྱི་རྗེས་སུ་འབྲང་བའི་ལམ་གྱི་སྐལ་བ་མཉམ་པའི་རྒྱུ་ཡིན་ཏེ། དེ་གཉིས་རྒྱུད་གཅིག་ལ་མངོན་དུ་འགྱུར་བ་ནི་མེད་དོ་ཞེ་ན། དེའི་ཕྱིར་རྒྱུད་གཅིག་ལ་དད་པས་རྗེས་སུ་འབྲང་བ་དང་ཆོས་ཀྱི་རྗེས་སུ་འབྲང་
བའི་ལམ་དག་མི་སྲིད་མོད་ཀྱི་བྱུང་བ་ནི་མ་འོངས་པའི་རྒྱུ་ཡིན་ནོ་ཞེས་བྱ་བ་སྨོས་སོ། །མི་སྲིད་པ་ནི་འདིར་མངོན་དུ་མི་འགྱུར་བ་ལ་བྱའོ། །མེད་པ་ལ་ནི་མ་ཡིན་ཏེ། དབང་པོ་རྟུལ་པོ་རྣམས་ལ་ཡང་དབང་པོ་རྟུལ་པོའི་ལམ་བཞིན་དུ་བདག་ཉིད་ཀྱི་དབང་པོ་རྣོན་པོའི་ལམ་དག་ཀྱང་ཡོད་
དོ། །མཐོང་བས་ཐོབ་པ་དང་དུས་ཀྱི་རྣམ་པར་གྲོལ་བའི་ལམ་དག་ནི་གལ་ཏེ་དབང་པོ་འཕོ་བར་བྱེད་ན། དེའི་རྒྱུད་ལ་མངོན་དུ་འགྱུར་ཡང་སྲིད་དོ། །དེ་ལྟ་བས་ན་དད་པས་རྗེས་སུ་འབྲང་བའི་ལམ་བྱུང་བ་ནི་ཆོས་ཀྱི་རྗེས་སུ་འབྲང་བའི་ལམ་མི་སྐྱེ་བའི་ཆོས་ཅན་དང་དད་པས་མོས་
པ་དང་མཐོང་བས་ཐོབ་པ་དང་དུས་ཀྱི་རྣམ་པར་གྲོལ་བ་དང་དུས་དང་མི་སྦྱོར་བར་རྣམ་པར་གྲོལ་བའི་ལམ་མ་འོངས་པ་སྐྱེ་བའི་ཆོས་ཅན་ནམ་མི་སྐྱེ་བའི་ཆོས་ཅན་མཉམ་པ་དང་ཁྱད་པར་ཅན་རྣམས་ཀྱི་ཅི་རིགས་པར་སྐལ་བ་མཉམ་པའི་རྒྱུ་ཡིན་ནོ། །སློབ་དཔོན་དབྱིག་བཤེས་ན་རེ་ནི་

གང་གི་ཚེ་དད་པས་རྗེས་སུ་འབྲང་བ་ལ་སོགས་པའི་དབང་པོ་འཕོ་བར་བྱེད་ཅིང་ཆོས་ཀྱི་རྗེས་སུ་འབྲང་བའི་ལམ་ལ་སོགས་པ་མངོན་དུ་བྱེད་པ་ན་དད་པས་རྗེས་སུ་འབྲང་བའི་ལམ་བྱུང་བ་ཆོས་ཀྱི་རྗེས་སུ་འབྲང་བའི་ལམ་མ་བྱུང་བ་དང་། མཐོང་བས་
ཐོབ་པའི་ལམ་གྱི་རྒྱུ་ཡིན་ནོ་ཞེས་ཟེར་ཏེ། དེ་ནི་དད་པས་རྗེས་སུ་འབྲང་བའི་དབང་པོ་རྣམས་འཕོ་བ་མེད་པས་རིགས་པ་མ་ཡིན་གྱི། དད་པས་མོས་པ་ལ་སོགས་པ་ནི་འཕོ་བར་འགྱུར་རོ། །སྦྱོར་བ་ལས་བྱུང་བ་ཞེས་བྱ་བ་ལས་སྦྱོར་བས་གྲུབ་པ་ནི་སྦྱོར་བ་ལས་བྱུང་བ་དག་སྟེ།
སྦྱོར་བ་ལས་བྱུང་བ་དག་པ་ནི། སྐྱེས་ནས་ཐོབ་པ་ཅན་བསལ་བའི་ཕྱིར་རོ། །འདོད་པ་ན་སྤྱོད་པའི་ཐོས་པ་ལས་བྱུང་བ་རྣམས་ཞེས་བྱ་བ་ནི་སངས་རྒྱས་ཀྱི་བཀའ་ཐོས་པ་ལས་ངེས་པར་བྱུང་བ་གང་དག་ཡིན་པ་དེ་དག་ནི་ཐོས་པ་ལས་བྱུང་བའོ། །བསམས་པ་ལས་བྱུང་བ་
རྣམས་ནི་བསམས་པ་ལས་བྱུང་བ་རྣམས་ཀྱི་ཡིན་ཏེ་ཞེས་བྱ་བ་ནི་བསམས་པ་ལས་བྱུང་བ་རྣམས་ཁོ་ནའི་ཡིན་གྱི། མཉམ་དང་ཁྱད་པར་ཅན་གྱི་ཡིན། །སྦྱོར་བྱུང་དེ་གཉིས་ཁོ་ནའི་ཡིན། །ཞེས་འབྱུང་བའི་ཕྱིར་ཐོས་པ་ལས་བྱུང་བ་རྣམས་ཀྱི་ནི་མ་ཡིན་ནོ། །བསྒོམས་
པ་ལས་བྱུང་བ་ནི་མེད་པའི་ཕྱིར་རོ་ཞེས་བྱ་བ་ནི་འདོད་པའི་ཁམས་མཉམ་པར་གཞག་པ་མ་ཡིན་པའི་ཕྱིར་བསྒོམས་པ་ལས་བྱུང་བ་དག་མེད་དོ། །བསམས་པ་ལས་བྱུང་བ་ནི་མེད་པའི་ཕྱིར་རོ་ཞེས་བྱ་བ་ལ། བསམས་པ་ལས་བྱུང་བ་མེད་པའི་གཏན་ཚིགས་ནི་གང་གི་ཚེ་
དེ་དག་སེམས་པར་རྩོལ་བ་དེ་ཁོ་ནའི་ཚེ་དེ་དག་གི་ཏིང་ངེ་འཛིན་ཉིད་ཉེ་བར་གནས་པར་འགྱུར་རོ་ཞེས་བྱ་བ་ཡིན་ནོ། །དེ་དག་ཀྱང་ཞེས་བྱ་བ་ནི་ཐོས་པ་ལས་བྱུང་བ་ལ་སོགས་པའོ། །ཆུང་ངུའི་ཆུང་ངུ་དག་ནི་ཐམས་ཅད་ཀྱི་ཡིན་ལ་ཞེས་བྱ་བ་ནི་ཆུང་ངུའི་ཆུང་ངུ་དག་ནི་
མཉམ་པ་ཆུང་ངུའི་ཆུང་ངུ་གཞན་དག་དང་ཁྱད་པར་ཅན་ཆུང་ངུའི་འབྲིང་པོ་ལ་སོགས་པ་གཞན་བརྒྱད་ཀྱི་ཡང་ཡིན་པས་ཐམས་ཅད་ཀྱི་སྐལ་བ་མཉམ་པའི་རྒྱུ་ཡིན་ནོ། །ཆུང་ངུའི་འབྲིང་པོ་དག་ནི་བརྒྱད་ཀྱི་ཡིན་ཏེ་ཞེས་བྱ་བ་ནི་རྣམ་པ་ཆུང་ངུའི་ཆུང་ངུ་དོར་ཏེ་དེ་ནི་དམན་པའི་ཕྱིར་

རོ། །ལུགས་ནི་དེ་ལྟའོ་ཞེས་བྱ་བ་ནི་འདི་ལྟ་སྟེ་ཆུང་ངུའི་ཆེན་པོ་ནི་བདུན་གྱི་ཡིན་ལ། འབྲིང་པོའི་ཆུང་ངུ་ནི་དྲུག་གི་ཡིན་པ་ནས། ཆེན་པོའི་ཆེན་པོ་ནི་ངོ་བོ་གཅིག་པ་ཆེན་པོའི་ཆེན་པོ་གཞན་དག་གི་སྐལ་བ་མཉམ་པའི་རྒྱུའི་བར་དུ་ཡིན་པ་སྟེ། དེ་དང་དེ་དག་ནི་དམན་པ་ཡིན་
པའི་ཕྱིར་སྔ་མ་སྔ་མ་རྣམས་ནི་དོར་བར་བྱའོ། །སྐྱེས་ནས་ཐོབ་པ་ཅན་གྱི་དགེ་བའི་ཆོས་རྣམས་ཞེས་བྱ་བ་ལ་སྐྱེ་བས་ཐོབ་པ་ནི་སྐྱེས་ནས་ཐོབ་པའོ། །དེ་འདི་དག་ལ་ཡོད་པས་སྐྱེས་ནས་ཐོབ་པ་ཅན་དག་གོ། །རྣམ་པ་དགུ་པོ་ཐམས་ཅད་ཕན་ཚུན་དུ་སྐལ་བ་མཉམ་པའི་
རྒྱུ་ཡིན་ཏེ་ཞེས་བྱ་བ་ནི་ཆུང་ངུའི་ཆུང་ངུ་རྣམས་ནས་ཆེན་པོའི་ཆེན་པོ་རྣམས་ཁོ་ནའི་བར་གྱི་སྐལ་བ་མཉམ་པའི་རྒྱུ་ཡིན་ལ་ཆེན་པོའི་ཆེན་པོ་ནི་ཆུང་ངུའི་ཆུང་ངུ་རྣམས་ནས་ཆེན་པོའི་ཆེན་པོ་རྣམས་ཀྱི་བར་གྱི་སྐལ་བ་མཉམ་པའི་རྒྱུ་ཡིན་ནོ། །མངོན་པར་འདུ་བྱེད་པ་ལས་བྱུང་བ་
མ་ཡིན་པའི་ཕྱིར་མཉམ་པ་དང་ཁྱད་པར་ཅན་དག་ཁོ་ནའི་ནི་མ་ཡིན་ཏེ། སྐལ་བ་མཉམ་པའི་རྒྱུ་མངོན་པར་འདུ་བྱེད་པའི་ལས་བྱུང་བའི་འབྲས་བུ་ནི་དམན་པ་ཡིན་པར་མི་འདོད་ཀྱི་མངོན་པར་འདུ་བྱེད་པ་མེད་པ་ལས་བྱུང་བའི་ནི་མ་ཡིན་ནོ། །ཉོན་མོངས་པ་ཅན་རྣམས་ཀྱང་དེ་དང་
འདྲའོ་ཞེས་བྱ་བ་ནི་བརྩལ་བ་ལས་བྱུང་བ་མ་ཡིན་པའི་ཕྱིར་རྣམ་པ་དགུ་པོ་ཐམས་ཅད་ཕན་ཚུན་དུ་སྐལ་བ་མཉམ་པའི་རྒྱུ་ཡིན་པས་སྔར་བྱུང་བ་ཐམས་ཅད་ཀྱང་རང་གི་ས་པ་ཕྱིས་འབྱུང་བ་ཐམས་ཅད་ཀྱི་སྐལ་བ་མཉམ་པའི་རྒྱུ་ཡིན་ཏེ། འདི་ལ་མཉམ་པ་དང་ཁྱད་པར་ཅན་ཉིད་ལ་
ལྟོས་པ་ནི་མེད་དོ། །དེ་དག་ནི་གོ་རིམས་བཞིན་དུ་བཞི་དང་གསུམ་དང་གཉིས་དང་གཅིག་དག་གི་སྐལ་བ་མཉམ་པའི་རྒྱུ་ཡིན་ནོ་ཞེས་བྱ་བ་ལ་རྣམ་པར་སྨིན་པ་ལས་སྐྱེས་པ་ནི་རྣམ་པར་སྨིན་པ་ལས་སྐྱེས་པ་ལ་སོགས་པ་བཞིའི་སྐལ་བ་མཉམ་པའི་རྒྱུ་ཡིན་ནོ། །སྤྱོད་ལམ་པ་དག་ནི་སྤྲུལ་པ་
ནི་སྤྱོད་ལམ་པ་ལ་སོགས་པ་གསུམ་ཁོ་ནའི་ཡིན་གྱི་རྣམ་པར་སྨིན་པ་ལས་སྐྱེས་པ་རྣམས་ཀྱི་ནི་མ་ཡིན་ཏེ། དེ་དག་ནི་མངོན་པར་འདུ་བྱེད་པ་ལས་བྱུང་བ་མ་ཡིན་པ་ཉིད་ཀྱིས་དམན་པའི་ཕྱིར་རོ། །བཟོའི་གནས་པ་དག་ནི་གཉིས་ཀྱི་ཡིན་ནོ། །སྤྲུལ་པ་དག་ནི་སྤྲུལ་པ་རྣམས་

ཁོ་ནའི་ཡིན་གྱི་གོང་མ་རྣམས་ཀྱི་ནི་མ་ཡིན་ཏེ། སྔ་མ་སྔ་མ་དག་ནི་ཆོས་མངོན་པར་འདུ་བྱེད་པ་མེད་པ་ལས་བྱུང་བ་ཡིན་པའི་ཕྱིར་རོ། །སྤྲུལ་པའི་སེམས་བསམ་གཏན་བཞིའི་འབྲས་བུ་འདོད་པ་ན་སྤྱོད་པ་ཡང་ཡིན་ཏེ་ཞེས་བྱ་བ་ནི་བསམ་གཏན་བཞི་པོ་
དག་གི་འབྲས་བུ་སྟེ། སྤྲུལ་པའི་སེམས་འདོད་པ་ན་སྤྱོད་པ་ནི་བསམ་གཏན་དང་པོ་དང་གཉིས་པ་དང་གསུམ་པ་དང་བཞི་པའི་འབྲས་བུ་ཡིན་པས་རྣམ་པ་བཞིའོ། །དེ་ཡང་གོ་རིམས་བཞིན་དུ་བཞི་དང་གསུམ་དང་གཉིས་དང་གཅིག་དག་གི་སྐལ་བ་མཉམ་པའི་རྒྱུ་ཡིན་ནོ་ཞེས་བྱ་
བར་སྦྱར་ཏེ། བསམ་གཏན་དང་པོའི་འབྲས་བུ་ནི་བསམ་གཏན་དང་པོ་དང་གཉིས་པ་དང་གསུམ་པ་དང་བཞི་པའི་འབྲས་བུའི་སྟེ། བཞིའི་སྐལ་བ་མཉམ་པའི་རྒྱུ་ཡིན་ནོ། །བསམ་གཏན་གཉིས་པའི་འབྲས་བུ་ནི་བསམ་གཏན་གཉིས་པ་དང་གསུམ་པ་དང་བཞི་པའི་འབྲས་བུའི་སྟེ།
གསུམ་གྱི་སྐལ་བ་མཉམ་པའི་རྒྱུ་ཡིན་ནོ། །བསམ་གཏན་གསུམ་པའི་འབྲས་བུ་ནི་བསམ་གཏན་གསུམ་པ་དང་བཞི་པའི་འབྲས་བུའི་སྟེ་གཉིས་ཀྱི་ཡིན་ནོ། །བསམ་གཏན་བཞི་པའི་འབྲས་བུ་ནི་བསམ་གཏན་བཞི་པའི་འབྲས་བུ་གཞན་ཁོ་ནའི་སྟེ། གཅིག་གི་སྐལ་བ་མཉམ་པའི་རྒྱུ་
ཡིན་ནོ། །འདིར་གང་གིས་དེ་ལྟར་ངེས་པའི་རིགས་པ་ཅི་ཞིག་ཡོད་ཅེ་ན། རིགས་པ་དེ་བསྟན་པར་འདོད་ནས་བསམ་གཏན་གོང་མའི་འབྲས་བུ་ནི་བསམ་གཏན་འོག་མའི་འབྲས་བུའི་མ་ཡིན་ནོ་ཞེས་བྱ་བ་རྒྱས་པར་སྨོས་ཏེ། སྤྲུལ་པའི་སེམས་འདོད་པ་ན་སྤྱོད་པ་བསམ་གཏན་བཞི་
པའི་འབྲས་བུ་ནི་སྤྲུལ་པའི་སེམས་འདོད་པ་ན་སྤྱོད་པ་བསམ་གཏན་དང་པོའི་འབྲས་བུ་ནས་སྤྲུལ་པའི་སེམས་འདོད་པ་ན་སྤྱོད་པ་བསམ་གཏན་གསུམ་པའི་འབྲས་བུའི་བར་གྱི་སྐལ་བ་མཉམ་པའི་རྒྱུ་མ་ཡིན་ནོ། །ཅིའི་ཕྱིར་ཞེ་ན། སྨྲས་པ། སྐལ་བ་མཉམ་པའི་རྒྱུ་མངོན་པར་
འདུ་བྱེད་པ་ཅན་ཏེ། འབད་པ་ཆེན་པོས་བསྒྲུབ་པར་བྱ་བའི་འབྲས་བུ་ནི་དེ་ལྟར་འབད་པ་ཆེན་པོས་བསྒྲུབ་པར་བྱ་བ་མ་ཡིན་པ་དམན་པ་མ་ཡིན་ཏེ། འབད་པའི་ཁྱད་པར་ཇི་ལྟ་བུས་བསམ་གཏན་དང་པོ་ནས་བསམ་གཏན་གསུམ་པའི་བར་སྒྲུབ་པར་བྱེད་པ་དེ་ལྟ་བུ་ཁོ་ནས་སྒྲུབ་པར་

བྱེད་པ་ནི་མ་ཡིན་ནོ། །འོ་ན་ཅི་ཞེ་ན། འབད་པའི་ཁྱད་པར་ཆེས་མཆོག་ཏུ་གྱུར་པས་སྒྲུབ་པར་བྱེད་དོ། །དེ་ལྟ་བས་ན་འབྲས་བུ་ཡང་འབད་པའི་ཁྱད་པར་མཆོག་ཏུ་གྱུར་པས་སྒྲུབ་པར་བྱེད་དོ་ཞེས་བྱ་བར་ཁོང་དུ་ཆུད་པར་བྱའོ། །བསམ་གཏན་འོག་མའི་འབྲས་བུ་ནི་བསམ་
གཏན་གོང་མའི་འབྲས་བུའི་སྐལ་བ་མཉམ་པའི་རྒྱུ་ཡིན་གྱི་བསམ་གཏན་གོང་མའི་འབྲས་བུ་ནི་བསམ་གཏན་འོག་མའི་འབྲས་བུའི་མ་ཡིན་ནོ། །བསམ་གཏན་བཞི་པའི་འབྲས་བུ་སྦྱར་བ་ཇི་ལྟ་བར་བསམ་གཏན་གསུམ་པ་དང་གཉིས་པའི་འབྲས་བུ་ཡང་དེ་བཞིན་དུ་སྦྱར་
བར་བྱའོ། །དེ་ཉིད་ཀྱི་ཕྱིར་གསུངས་སོ་ཞེས་བྱ་བ་ནི་གང་གི་ཕྱིར་སྐལ་བ་མཉམ་པའི་རྒྱུ་མངོན་པར་འདུ་བྱེད་པ་ཅན་གྱི་འབྲས་བུ་དམན་པ་མ་ཡིན་པ་དེའི་ཕྱིར་གསུངས་སོ་ཞེས་བྱ་བའི་ཐ་ཚིག་གོ། །ཅི་ཞིག་གསུངས་ཤེ་ན། ཟག་པ་མེད་པ་སྐྱེས་པ་ཟག་པ་མེད་པ་མ་སྐྱེས་
པའི་རྒྱུ་མ་ཡིན་པ་ཡོད་དམ་ཞེས་བྱ་བ་རྒྱས་པར་སྨོས་ཏེ། ཟག་པ་མེད་པ་སྡུག་བསྔལ་ལ་ཆོས་ཤེས་པ་སྐྱེས་པ་ནི་ཟག་པ་མེད་པ་སྡུག་བསྔལ་ལ་ཆོས་ཤེས་པའི་བཟོད་པ་མི་སྐྱེ་བའི་ཆོས་ཅན་རྣམས་ཀྱི་རྒྱུ་མ་ཡིན་པ་ལྟ་བུ་སྟེ། སྡུག་བསྔལ་ལ་ཆོས་ཤེས་པ་ནི་མངོན་པར་
འདུ་བྱེད་པ་ཅན་ཉིད་ཀྱིས་སྡུག་བསྔལ་ལ་ཆོས་ཤེས་པའི་བཟོད་པ་དག་པས་ཁྱད་པར་དུ་འཕགས་པའི་ཕྱིར་རོ། །འདི་ལྟར་ཉོན་མོངས་པའི་བྲལ་བའི་ཐོབ་པ་དང་ལྷན་ཅིག་ལ་སྐྱེ་བ་གང་ཡིན་པ་དེ་ནི་ཁྱད་པར་དུ་འཕགས་པ་ཡིན་ནོ། །ཁྱད་པར་ཅན་ཐམས་ཅད་ཀྱང་དམན་པའི་
རྒྱུ་མ་ཡིན་པ་ལྟ་བུ་སྟེ། དཔེར་ན་དགྲ་བཅོམ་པ་ཉིད་ལས་ཡོངས་སུ་ཉམས་པའི་མི་སློབ་པའི་ལམ་སྐྱེས་པ་ནི་ལན་ཅིག་ཕྱིར་འོང་བ་དང་ཕྱིར་མི་འོང་བའི་ལམ་ཕྱིས་སྐྱེ་བ་དག་གི་སྐལ་བ་མཉམ་པའི་རྒྱུ་མ་ཡིན་པ་ལྟ་བུའོ། །རྒྱུད་གཅིག་ལ་ངེས་པའི་ཟག་པ་མེད་པའི་ཆོས་སྔོན་
ཐོབ་པ་ཞེས་བྱ་བ་རྒྱས་པར་འབྱུང་བ་ནི་རྒྱུད་གཅིག་ཏུ་གཏོགས་པའི་སྡུག་བསྔལ་ལ་ཆོས་ཤེས་པའི་བཟོད་པ་མ་འོངས་པ་སྐད་ཅིག་མ་དང་པོ་ཁོ་ན་ལ་ཐོབ་པ་དེ་དག་ནི་མ་སྐྱེས་པ་ལ་ཆོས་ཤེས་པ་སྐད་ཅིག་མ་གཉིས་པ་ལ་སྐྱེས་པའི་རྒྱུ་མ་ཡིན་ཏེ། འདི་ལྟར་འབྲས་བུ་སྔ་བ་ནི་

མེད་དོ། །འདི་ལ་ནི་སྡུག་བསྔལ་ལ་ཆོས་ཤེས་པའི་བཟོད་པ་དག་པས་སྡུག་བསྔལ་ལ་ཆོས་ཤེས་པ་ཆེས་སྔ་སྟེ། དེ་ནི་སྐྱེས་ཟིན་པའི་ཕྱིར་ལ་དེ་དག་ནི་མ་སྐྱེས་པའི་ཕྱིར་རོ། །ཡང་ན་འདི་ལྟར་སྐལ་བ་མཉམ་པའི་རྒྱུ་མ་འོངས་པ་མེད་པའི་ཡང་ཕྱིར་
རོ། །སྡུག་བསྔལ་ལ་ཆོས་ཤེས་པའི་བཟོད་པ་མ་འོངས་པ་དཔག་ཏུ་མེད་པ་ཞིག་ཐོབ་པ་ཁོ་ན་ཡིན་གྱི་སྐྱེས་པ་ནི་མ་ཡིན་ནོ། །ཟག་པ་མེད་པའི་ཆོས་སྔར་སྐྱེས་པ་ཞེས་བྱ་བ་རྒྱས་པར་འབྱུང་བ་ནི་གང་དུ་མ་སྐྱེས་པ་ནི་སྐལ་བ་མཉམ་པའི་རྒྱུ་མ་ཡིན་ནོ་ཞེས་ཐོབ་པ་ཙམ་གྱི་ཆོས་ཤིག་
དྲིས་པར་ཟད་གྱི་ཆོས་སྐྱེས་པ་ནི་མ་ཡིན་ནོ། །ད་ནི་ཅི་སྐྱེས་པ་ཡང་སྐལ་བ་མཉམ་པའི་རྒྱུ་མ་ཡིན་པ་ཡོད་དམ་ཞེས་ཁྱད་པར་གྱི་ངོ་བོར་འབྲི་བ་ཡིན་ནོ། །ཆེན་པོ་ཆུང་ངུའི་ལྟ་བུ་སྟེ་ཞེས་བྱ་བ་ནི་ཁྱད་པར་ཅན་དམན་པའི་ལྟ་བ་ཞེས་བྱ་བའི་ཐ་ཚིག་གོ། །འདི་ལྟ་སྟེ་འབྲས་བུ་གོང་མ་
ལས་ཡོངས་སུ་ཉམས་པ་སྟེ་དགྲ་བཅོམ་པ་ཉིད་ཀྱི་འབྲས་བུ་ལས་ཡོངས་སུ་ཉམས་པའམ། ཕྱིར་མི་འོང་བའི་འབྲས་བུ་ལས་ཡོངས་སུ་ཉམས་པ་འབྲས་བུ་འོག་མ་མངོན་དུ་བྱེད་པའི་ཚེ་སྟེ་ཕྱིར་མི་འོང་བའི་འབྲས་བུ་མངོན་དུ་བྱེད་པའམ་ལན་ཅིག་ཕྱིར་འོང་བའི་འབྲས་བུ་
མངོན་དུ་བྱེད་པའི་ཚེ་དགྲ་བཅོམ་པ་ཉིད་གྱི་ལམ་ཆེན་པོའི་ཆེན་པོ་སྔར་སྐྱེས་པ་གང་ཡིན་པ་དེ་ནི་ཕྱིར་མི་འོང་བའི་འབྲས་བུའམ་ལན་ཅིག་ཕྱིར་འོང་བའི་འབྲས་བུ་ཕྱིས་སྐྱེས་པའི་སྐལ་བ་མཉམ་པའི་རྒྱུ་མ་ཡིན་ཏེ། དམན་པའི་ཕྱིར་རོ། །དེ་བཞིན་དུ་ཕྱིར་མི་འོང་བའི་འབྲས་བུ་
ལས་ཡོངས་སུ་ཉམས་པའི་ཕྱིར་མི་འོང་བའི་འབྲས་བུའི་ལམ་སྔར་སྐྱེས་པ་གང་ཡིན་པ་དེ་ནི་ལན་ཅིག་ཕྱིར་མི་འོང་བའི་འབྲས་བུ་ཕྱིས་སྐྱེས་པའི་སྐལ་བ་མཉམ་པའི་རྒྱུ་མ་ཡིན་ཏེ། དེ་དམན་པའི་ཕྱིར་རོ། །སྡུག་བསྔལ་ལ་ཆོས་ཤེས་པའི་བཟོད་པ་ཐོབ་པ་ཞེས་བྱ་བ་རྒྱས་པར་འབྱུང་
བ་ནི་སྡུག་བསྔལ་ལ་ཆོས་ཤེས་པའི་ཐོབ་པ་སྔར་སྐྱེས་པ་གང་ཡིན་པ་དེ་ནི་སྐད་ཅིག་མ་ཕྱི་མ་དང་ལྷན་ཅིག་སྐྱེས་པ་སྟེ་སྐད་ཅིག་མ་ཕྱི་མ་སྡུག་བསྔལ་ལ་ཆོས་སུ་ཤེས་པའི་བཟོད་པའི་མཚན་ཉིད་ལ་སོགས་པ་ལམ་ལ་རྗེས་སུ་ཤེས་པའི་བཟོད་པའི་བར་དག་དང་ལྷན་ཅིག་སྐྱེས་པ་སྡུག་

བསྔལ་ལ་ཆོས་ཤེས་པའི་བཟོད་པའི་ཐོབ་པ་རྣམས་ཀྱི་སྐལ་བ་མཉམ་པའི་རྒྱུ་མ་ཡིན་ནོ། །ཅིའི་ཕྱིར་ཞེ་ན། དེ་དག་ནི་དམན་པའི་ཕྱིར་ལ་དེ་ནི་ཁྱད་པར་ཅན་ཡིན་པའི་ཕྱིར་རོ། །ཡང་ཇི་ལྟར་ན་དེ་དག་ནི་དམན་པ་ཉིད་ཡིན་ལ་དེ་ནི་ཁྱད་པར་ཅན་ཉིད་ཡིན་ཞེ་ན། སྡུག་
བསྔལ་ལ་ཆོས་ཤེས་པའི་བཟོད་པ་བས་ནི་སྡུག་བསྔལ་ལ་ཆོས་ཤེས་པ་ཁྱད་པར་ཅན་ཡིན་ཏེ། དེས་གཞོམ་པར་བྱ་བའི་ཉོན་མོངས་པའི་ཐོབ་པ་ལས་རྣམ་པར་གྲོལ་བའི་ཕྱིར་དང་། རྒྱུས་ཤིན་ཏུ་རྒྱས་པར་བྱས་པའི་ཕྱིར་རོ། །དེ་ལྟ་བས་ན་སྡུག་བསྔལ་ལ་ཆོས་ཤེས་པའི་
བཟོད་པའི་ཐོབ་པ་རྒྱུས་ཤིན་ཏུ་རྒྱས་པར་བྱས་པ་དག་པས་ཀྱང་སྡུག་བསྔལ་ལ་ཆོས་ཤེས་པའི་ཐོབ་པ་ཁྱད་པར་ཅན་ཡིན་ནོ། །དེ་དག་ནི་དམན་པ་ཡིན་ཏེ་དེའི་ཐོབ་པ་ཡིན་པའི་ཕྱིར་རོ། །གཞན་ཡང་རྒྱུ་གཉིས་པོ་དེ་ཉིད་ཀྱི་ཕྱིར་སྡུག་བསྔལ་ལ་ཆོས་ཤེས་པའི་ཐོབ་པ་ནི་སྡུག་
བསྔལ་ལ་ཆོས་ཤེས་པའི་བཟོད་པའི་ཐོབ་པ་སྐད་ཅིག་མ་དང་པོ་ལ་སྐྱེས་པ་བས་ཁྱད་པར་ཅན་ཡིན་ལ་སྡུག་བསྔལ་ལ་ཆོས་ཤེས་པའི་བཟོད་པའི་ཐོབ་པ་དེ་ནི་དམན་པ་ཡིན་ནོ། །དེའི་ཕྱིར་དེ་སྔོན་དུ་འགྲོ་བ་སྐད་ཅིག་མ་ཕྱི་མ་དང་ལྷན་ཅིག་སྐྱེས་པ་སྡུག་བསྔལ་ལ་ཆོས་ཤེས་
པའི་བཟོད་པའི་ཐོབ་པ་གཞན་དག་ཀྱང་རྒྱུས་ཤིན་ཏུ་རྒྱས་པར་བྱས་པ་ཡིན་ཡང་དམན་པ་ཁོ་ན་ཡིན་ནོ། །དེ་ལྟ་བས་ན་དེ་དག་གི་སྐལ་བ་མཉམ་པའི་རྒྱུ་མ་ཡིན་ནོ། །མཚུངས་ལྡན་རྒྱུ་ནི་སེམས་དག་དང་། །སེམས་བྱུང་ཞེས་བྱ་བ་ལ། ནི་ཞེས་བྱ་བའི་སྒྲ་ནི་ངེས་པར་
གཟུང་བའམ། མཚུངས་པར་ལྡན་པའི་རྒྱུ་ནི་སེམས་དང་སེམས་ལས་བྱུང་བ་དག་ཁོ་ན་ཡིན་ནོ་ཞེས་རིམ་པ་གཞན་དུ་སྦྱར་བ་ཡིན་ནོ། །དེ་ལྟ་ན་ནི་ཞེས་བྱ་བ་རྒྱས་པར་འབྱུང་བ་ནི་གལ་ཏེ་མཚུངས་པར་ལྡན་པའི་རྒྱུ་ནི་སེམས་དང་སེམས་ལས་བྱུང་བ་ཁོ་ན་ཡིན་ནོ། །ཞེས་
དེ་ཙམ་ཞིག་བརྗོད་ན་ནི་དུས་ཐ་དད་པ་ལས་སྐྱེས་པ་རྣམས་ཀྱང་དུས་ཐ་དད་པ་ལས་སྐྱེས་པ་དག་དང་ལྷན་ཅིག་མཚུངས་པར་ལྡན་པའི་རྒྱུར་ཐལ་བར་འགྱུར་ལ། རྒྱུད་ཐ་དད་པ་ལས་སྐྱེས་པ་རྣམས་ཀྱང་རྒྱུད་ཐ་དད་པ་ལས་སྐྱེས་པ་དག་དང་ལྷན་ཅིག་མཚུངས་པར་ལྡན་

པའི་རྒྱུར་ཐལ་བར་འགྱུར་ཏེ། དུས་དང་རྒྱུད་ཀྱིས་ཐ་དད་པ་དེ་དག་སེམས་དང་སེམས་ལས་བྱུང་བ་མ་ཡིན་ནོ། །འོ་ན་ནི་རྣམ་པ་དང་དམིགས་པ་གཅིག་པ་དག་ཡིན་ནོ་ཞེས་བྱ་བ་ནི་གལ་ཏེ་སེམས་དང་སེམས་ལས་བྱུང་བ་དག་རྣམ་པ་གཅིག་པ་སྟེ།
སྔོན་པོ་ལ་སོགས་པའི་རྣམ་པ་གཅིག་པ་ཅན་དང་དམིགས་པ་གཅིག་པ་སྟེ། སྔོན་པོ་ལ་སོགས་པའི་དམིགས་པ་གཅིག་པ་ཡིན་ན། དེ་ལྟ་ན་དེ་དག་ན་མཚུངས་པར་ལྡན་པའི་རྒྱུ་ཡིན་གྱི་གཞན་དུ་ནི་མ་ཡིན་ནོ། །དེ་ལྟར་ན་དུས་ཐ་དད་པ་ལས་སྐྱེས་པ་ཉིད་དང་རྒྱུད་ཐ་དད་པ་ལས་
སྐྱེས་པ་ཉིད་བཟློག་པར་འགྱུར་རོ་སྙམ་དུ་བསམས་པ་ཡིན་ནོ། །དེ་ལྟ་ན་ཡང་དེ་ཉིད་དུ་ཐལ་བར་འགྱུར་རོ་ཞེས་བྱ་བ་ནི་དུས་དང་རྒྱུད་ཐ་དད་པ་ལས་སྐྱེས་པ་རྣམས་ཕན་ཚུན་མཚུངས་པར་ལྡན་པའི་རྒྱུ་ཉིད་དུ་ཐལ་བར་འགྱུར་རོ་ཞེས་བྱ་བའི་ཐ་ཚིག་སྟེ། སེམས་དང་སེམས་ལས་བྱུང་བ་
དུས་དང་རྒྱུད་ཐ་དད་པ་ལས་སྐྱེས་པ་རྣམས་ལ་ཡང་རྣམ་པ་དང་དམིགས་པ་གཅིག་པ་ཉིད་ནི་སྲིད་དོ། །རྒྱུད་ཐ་དད་པ་ལས་སྐྱེས་པ་རྣམས་ལ་ཡང་ཐལ་བར་འགྱུར་ཏེ་ཞེས་བྱ་བ་ནི་དུས་ཐ་དད་པ་ལས་སྐྱེས་པ་ཉིད་གཅིག་པུ་བསྩལ་བར་ཟད་ཀྱི། མང་པོ་ཟླ་བ་ཚེས་པ་ལ་སོགས་
པ་ལ་ལྟ་བ་དག་ནི་སེམས་དང་སེམས་ལས་བྱུང་བ་རྣམ་པ་དང་དམིགས་པ་གཅིག་པ་རྣམས་འབྱུང་ངོ་། །རྟེན་མཚུངས་པ་ཅན་རྣམས་སོ་ཞེས་བྱ་བ་ནི་འདི་དག་ལ་རྟེན་མཚུངས་ཤིང་ཐ་མི་དད་པ་ཡོད་པས་ན་རྟེན་མཚུངས་པ་དག་སྟེ། མཚུངས་པ་ཞེས་བྱ་བའི་སྒྲ་འདྲ་བའི་དོན་ཡིན་
པར་བཟུང་ན་ནི་རིགས་འདྲ་བའི་ཕྱིར་དེ་ཉིད་དུ་ཐལ་བར་འགྱུར་རོ། །ཕན་ཚུན་འབྲས་བུའི་དོན་གྱིས་ན་ཞེས་བྱ་བ་ནི་ཇི་ལྟར་ན་འགྲོན་པ་རྣམས་ཕན་ཚུན་གྱི་སྟོབས་ཀྱིས་ལྷན་ཅིག་ལམ་དུ་འགྲོ་བ་དེ་བཞིན་དུ་སེམས་ཀྱང་སེམས་ལས་བྱུང་བའི་འབྲས་བུ་ཡིན་ལ། སེམས་ལས་བྱུང་བ་ཡང་
སེམས་ཀྱི་ཡིན་པས་ན་ཕན་ཚུན་དུ་འབྲས་བུ་ཡིན་པའི་ཕྱིར་དོན་འདིས་ལྷན་ཅིག་འབྱུང་བའི་རྒྱུ་ཡིན་ནོ། །མཚུངས་པ་ལྔས་ཞེས་བྱ་བ་རྒྱས་པར་འབྱུང་བ་ནི་མཚུངས་པ་ལྔ་པོ་རྟེན་དང་དམིགས་པ་དང་རྣམ་པ་དང་དུས་དང་རྫས་མཚུངས་པ་དག་གིས་ཞེས་བྱ་བའི་ཐ་ཚིག་གོ། །

མཚུངས་པར་ལྡན་པའི་དོན་གྱིས་ན་ཞེས་བྱ་བ་ནི་མཚུངས་པར་འཇུག་པའི་དོན་གྱིས་ན་མཚུངས་པར་ལྡན་པའི་རྒྱུ་ཡིན་ཏེ། ཇི་ལྟར་ཕན་ཚུན་སྟོབས་ཀྱིས་ལམ་དུ་འགྲོ་བའི་འགྲོན་པ་དེ་དག་ཉིད་ཟས་དང་སྐོམ་དང་ཁྲུས་དང་མལ་ཆ་དང་སྟན་ལ་སོགས་པ་ཡོངས་སུ་སྤྱད་པའི་བྱ་བ་ལ་
འདྲ་བར་སྦྱོར་བ་དེ་བཞིན་དུ་འདི་དག་ཀྱང་ཕན་ཚུན་མཚུངས་པར་ལྡན་པ་ཉིད་ཡིན་ནོ། །དེ་ཉིད་ཀྱི་ཕྱིར་གཅིག་མེད་ན་ཡང་ཐམས་ཅད་མཚུངས་པར་ལྡན་པས་ཞེས་བྱ་བ་སྨོས་སོ། །ཀུན་འགྲོ་ལྔ་ཞེས་བྱ་བ་ནི་དེ་དག་ཀུན་དུ་འགྲོ་བ་ཡང་ཡིན་ལ་སྔ་མ་ཡང་ཡིན་པས་ཀུན་འགྲོ་སྔ་མ་
ཡིན་ཏེ། ཀུན་དུ་འགྲོ་བ་སྔར་སྐྱེས་པ་རྣམས་ཞེས་བྱ་བའི་ཐ་ཚིག་གོ། །རང་གི་ས་པའི་ཀུན་དུ་འགྲོ་བའི་ཆོས་སྔར་སྐྱེས་པ་རྣམས་ཞེས་བྱ་བ་ནི་ཕྲ་རྒྱས་ཀུན་དུ་འགྲོ་བ་འདས་པ་དང་ད་ལྟར་བྱུང་བ་རྣམས་ཏེ། ཉོན་མོངས་པ་ཅན་ཉོན་མོངས་པའི་ངོ་བོ་ཉིད་དང་མཚུངས་པར་ལྡན་པ་
དང་ཀུན་ནས་བསླང་བ་ཕྱི་མ་འདས་པ་དང་ད་ལྟར་བྱུང་བ་ཕྱི་མ་རྣམས་དང་མ་འོངས་པ་རྣམས་ཀྱི་ཀུན་དུ་འགྲོ་བའི་རྒྱུ་ཡིན་ནོ། །བཤད་པར་བྱའོ་ཞེས་བྱ་བ་ནི་མཛོད་ཀྱི་གནས་ལྔ་པ་ལས། སྡུག་བསྔལ་རྒྱུ་མཐོང་སྤང་བྱ་བ། །ལྟ་དང་དེ་བཞིན་ཐེ་ཚོམ་དང་། །གང་དེ་ལྷན་ཅིག་མ་
འདྲེས་པའི། །མ་རིག་གང་ཡིན་ཀུན་དུ་འགྲོ། །ཞེས་བྱ་བ་འདིར་བསྟན་པར་བྱ་བ་ཡིན། ཉོན་མོངས་པ་ཅན་གྱི་ཆོས་ཀྱི་ཐུན་མོང་གི་རྒྱུ་ཉིད་ཡིན་པས་ན་ཞེས་བྱ་བ་རྒྱས་པར་འབྱུང་བ་ནི་གང་གི་ཕྱིར་འདི་ནི་ཉོན་མོངས་པ་ཅན་དག་ཁོ་ནའི་རིགས་ལྔ་ཆར་གྱི་ཡང་ཀུན་དུ་འགྲོ་
བའི་རྒྱུ་ཡིན་ལ་སྐལ་བ་མཉམ་པའི་རྒྱུ་ནི་ཉོན་མོངས་པ་ཅན་རྣམས་ཀྱི་ཡང་ཡིན་ཉོན་མོངས་པ་ཅན་མ་ཡིན་པ་རྣམས་ཀྱི་ཡང་ཡིན་པ་དེའི་ཕྱིར་ལོགས་ཤིག་ཏུ་རྣམ་པར་གཞག་གོ། །འདི་ཇི་ལྟར་ཉོན་མོངས་པ་ཅན་གྱི་ཆོས་ཀྱི་ཐུན་མོང་གི་རྒྱུ་ཉིད་ཡིན་ཞེས་བྱ་བ་བསྟན་པའི་ཕྱིར་
རིས་གཞན་དག་གི་ཡང་རྒྱུ་ཡིན་པའི་ཕྱིར་ཏེ་ཞེས་བྱ་བ་སྨོས་ཏེ། དེ་དག་གི་མཐུས་ནི་ཞེས་བྱ་བ་ནི་ཀུན་དུ་འགྲོ་བ་དེ་དག་གི་མཐུས་རིས་གཞན་པའི་ཉོན་མོངས་པ་འདོད་ཆགས་ལ་སོགས་པ་སྐྱེ་བར་འགྱུར་རོ། །དེ་དག་ཀྱང་གང་ཞེ་ན། ཀུན་དུ་འགྲོ་བའི་རྒྱུ་སྡུག་བསྔལ་

མཐོང་བས་སྤང་བར་བྱ་བའི་རིས་གཞན་ནི་ཀུན་འབྱུང་བ་དང་འགོག་པ་དང་ལམ་མཐོང་བ་དང་བསྒོམ་པས་སྤང་བར་བྱ་བ་དག་ཡིན་ནོ། །ཀུན་དུ་འགྲོ་བས་ཀུན་འབྱུང་མཐོང་བས་སྤང་བར་བྱ་བའི་རིས་གཞན་ནི་སྡུག་བསྔལ་དང་འགོག་པ་དང་ལམ་མཐོང་བ་
དང་བསྒོམ་པས་སྤང་བར་བྱ་བ་དག་ཡིན་ནོ། །ཉོན་མོངས་པའི་རིས་ཐམས་ཅད་དུ་འགྲོ་ཞིང་དམིགས་པའམ་ཉོན་མོངས་པའི་རིས་ཐམས་ཅད་ཀྱི་རྒྱུའི་དངོས་པོར་འགྱུར་བས་ན་ཀུན་དུ་འགྲོ་བ་དག་ཡིན་ནོ། །དེ་ཉིད་ཀྱི་ཕྱིར་ཉོན་མོངས་པ་ཐམས་ཅད་ནི་འཇིག་ཚོགས་ལ་ལྟ་བའི་རྩ་
བ་ཅན་ཡིན་ནོ། །འཇིག་ཚོགས་ལ་ལྟ་བ་ལས་རབ་ཏུ་སྐྱེ་བ་དང་། འཇིག་ཚོགས་ལ་ལྟ་བ་ལས་ཀུན་འབྱུང་བ་ཡིན་ནོ་ཞེས་གསུངས་ཏེ། བདག་ཏུ་འཛིན་པའི་སྒོ་ནས་འདོད་ཆགས་དང་ང་རྒྱལ་དང་ཁོང་ཁྲོ་བ་ལ་སོགས་པ་ཀུན་འབྱུང་བའི་ཕྱིར་རོ། །ཇི་འཕགས་པའི་གང་
ཟག་གི་ཉོན་མོངས་པ་ཅན་གྱི་ཆོས་རྣམས་ཀྱང་ཞེས་བྱ་བ་ནི་འཕགས་པའི་གང་ཟག་གི་ཀུན་དུ་འགྲོ་བ་རྣམས་ནི་མཐོང་བས་སྤང་བར་བྱ་བ་ཡིན་པའི་ཕྱིར་ཐམས་ཅད་སྤངས་པ་ཁོ་ན་ཡིན་ལ་འདོད་ཆགས་ལ་སོགས་པ་ནི་སློབ་པ་རྣམས་ཀུན་དུ་སྤྱོད་དེ། དེ་དག་གི་འདོད་ཆགས་ལ་
སོགས་པ་དེ་དག་ནི་ཀུན་དུ་འགྲོ་བའི་རྒྱུ་ཅན་མ་ཡིན་ནོ་སྙམ་དུ་སེམས་ཤིང་དེ་སྐད་དུ་འདྲི་བ་ཡིན་ནོ། །ཉོན་མོངས་པ་ཅན་གྱི་ཆོས་རྣམས་ཞེས་བྱ་བ་ནི་བྱེ་བྲག་ཏུ་མ་ཕྱེ་བའི་ཕྱིར་སོ་སོའི་སྐྱེ་བོ་དང་འཕགས་པའི་རྒྱུད་ལས་སྐྱེས་པ་རྣམས་ཞེས་བྱ་བར་ཤེས་སོ། །མཐོང་བས་
སྤང་བར་བྱ་བའི་ཆོས་རྣམས་ཀྱི་རྣམ་པར་སྨིན་པ་གང་ཡིན་པའོ་ཞེས་བྱ་བ་འདི་ནི་དོན་ཡོངས་སུ་རྫོགས་པར་བྱ་བའི་ཕྱིར་སྨོས་པ་ཡིན་གྱི་འདི་དཔེར་བརྗོད་པ་ནི་མ་ཡིན་ནོ། །ལུང་དུ་མ་བསྟན་པའི་ཆོས་འདུས་བྱས་རྣམས་ཞེས་བྱ་བ་ནི་བསྒྲིབས་ལ་ལུང་དུ་མ་བསྟན་པ་དང་མ་
བསྒྲིབས་ལ་ལུང་དུ་མ་བསྟན་པ་རྣམས་བཟུང་སྟེ་བསྒྲིབས་ལ་ལུང་དུ་མ་བསྟན་པ་དག་ནི་འདོད་པའི་ཁམས་ཀྱི་འཇིག་ཚོགས་ལ་ལྟ་བ་དང་མཐར་འཛིན་པར་ལྟ་བ་དང་དེ་དག་དང་མཚུངས་པར་ལྡན་པ་དང་། ཀུན་ནས་བསླང་བའི་ཆོས་རྣམས་དང་གཟུགས་དང་གཟུགས་

མེད་པ་ན་སྤྱོད་པའི་ཉོན་མོངས་པ་ཅན་གྱི་ཆོས་རྣམས་སོ། །འདུས་བྱས་སྨོས་པ་ནི་ནམ་མཁའ་དང་སོ་སོར་བརྟགས་པ་མ་ཡིན་པས་འགོག་པ་བསྩལ་བའི་ཕྱིར་ཏེ། ཡང་དག་ལུང་མ་བསྟན་བསྟན་དག །ཅེས་འབྱུང་བས་དེ་གཉིས་ལུང་དུ་མ་བསྟན་པ་ཡིན་པའི་ཕྱིར་རོ། །
དེ་ལ་འདོད་པ་ན་སྤྱོད་པའི་ཉོན་མོངས་པ་ཅན་གྱི་ཆོས་རྣམས་ནི་ཅི་རིགས་པར་འཇིག་ཚོགས་ལ་ལྟ་བ་ལ་སོགས་པ་དེ་དག་ཉིད་སྐལ་བ་མཉམ་པ་དང་ཀུན་དུ་འགྲོ་བ་དང་ལྷན་ཅིག་འབྱུང་བ་དང་མཚུངས་པར་ལྡན་པའི་རྒྱུར་གྱུར་པ་དག་གིས་ལུང་དུ་མ་བསྟན་པའི་རྒྱུ་ཅན་ཡིན་གྱི།
གཞན་དག་གིས་ནི་མ་ཡིན་ནོ། །ས་གོང་མ་པ་རྣམས་ནི་གཞན་དག་གིས་ཀྱང་ཡིན་ནོ་ཞེས་བྱ་བ་དེར་ནི་གོ་སླའོ། །མ་བསྒྲིབས་ལ་ལུང་དུ་མ་བསྟན་པ་རྣམས་ནི་སྐལ་བ་མཉམ་པའི་རྒྱུས་བསྒྲིབས་ལ་ལུང་དུ་མ་བསྟན་པའི་རྒྱུ་ཅན་ཡིན་ནོ། །མི་དགེ་བ་རྣམས་ནི་འདོད་པ་ན་སྤྱོད་པའི་
འདོད་ཆགས་ལ་སོགས་པ་ཡིན་ནོ། །དེ་དག་ཀྱང་ཀུན་དུ་འགྲོ་བའི་རྒྱུས་འཇིག་ཚོགས་ལ་ལྟ་བ་ལ་སོགས་པའི་རྒྱུ་ཅན་ཡིན་ཏེ་འདིར་དཔེར་བརྗོད་པ་ནི་འདི་ཡིན་ནོ། །མི་དགེ་བ་རྣམས་སོ་ཞེས་ཁྱད་པར་དུ་མ་བྱས་པར་འབྱུང་བའི་ཕྱིར་མཐོང་བས་སྤང་བར་བྱ་བ་དང་། བསྒོམ་པས་སྤང་
བར་བྱ་བ་རྣམས་འབྱུང་སྟེ། འདི་ནི་འདིར་ཁུངས་གཉིས་པ་ཡིན་ནོ། །དེ་དག་ལས་གཞན་པ་སྡུག་བསྔལ་གྱི་བདེན་པ་ཉོན་མོངས་པ་ཅན་གང་ཡིན་པའོ་ཞེས་བྱ་བ་ནི་ཁུངས་གསུམ་པ་ཡིན་ཏེ། དེ་དག་ལས་གཞན་པ་སྡུག་བསྔལ་གྱི་བདེན་པ་ཉོན་མོངས་པ་ཅན་ནི་བྱེ་བྲག་ཏུ་མ་ཕྱེ་བའི་
ཕྱིར་མཐོང་བས་སྤང་བར་བྱ་བ་དང་བསྒོམ་པས་སྤང་བར་བྱ་བ་རྣམས་གཟུང་སྟེ། སོ་སོའི་སྐྱེ་བོ་རྣམས་ཀྱི་བཞིན་དུ་འཕགས་པ་རྣམས་ཀྱི་བསྒོམ་པས་སྤང་བར་བྱ་བ་ཡང་ཀུན་དུ་འགྲོ་བའི་འཇིག་ཚོགས་ལ་ལྟ་བའི་རྒྱུ་ཅན་ཡིན་གྱི་འཇིག་ཚོགས་ལ་ལྟ་བའི་རྒྱུ་ནི་མ་ཡིན་ནོ་ཞེས་དེ་ནི་
བཤད་ཟིན་ཏོ། །འོ་ན་བཏགས་པའི་བཤད་པ་ནི་ཞེས་བྱ་བ་ནི་གལ་ཏེ་མི་དགེ་བ་ལུང་དུ་མ་བསྟན་པའི་རྒྱུ་ཅན་དག་ཀྱང་ཡིན་གྱི་མི་དགེ་བའི་རྒྱུ་ཅན་འབའ་ཞིག་ནི་མ་ཡིན་ན། བཏགས་པའི་བཤད་པ་ཡོད་དེ། འཕགས་པའི་གང་ཟག་འདོད་པའི་འདོད་ཆགས་དང་བྲལ་བ་ལས་

ཡོངས་སུ་ཉམས་པ་དེ་ལས་དང་པོར་ཉོན་མོངས་པ་ཅན་གྱི་སེམས་པ་མངོན་དུ་བྱེད་པ་གང་ཡིན་པའོ་ཞེས་བྱ་བ་ཇི་ལྟར་དྲང་། བཏགས་པའི་བཤད་པའི་དོན་ནི་འདོད་པའི་འདོད་ཆགས་དང་བྲལ་བ་ལས་ཡོངས་སུ་ཉམས་པའི་ཚེ་ནི་འཕགས་པའི་གང་ཟག་གི་སེམས་
པ་ལྷན་ཅིག་འབྱུང་བའི་རྒྱུ་དང་མཚུངས་པར་ལྡན་པའི་རྒྱུས་མི་དགེ་བའི་རྒྱུ་ཅན་ཁོ་ན་ཡིན་གྱི་ལུང་དུ་མ་བསྟན་པའི་རྒྱུ་ཅན་ནི་མ་ཡིན་ཏེ་འཇིག་ཚོགས་དང་མཐར་འཛིན་པར་ལྟ་བ་དག་སྤངས་པའི་ཕྱིར་རོ་ཞེས་བྱ་བ་ཡིན་པར་འགྱུར་རོ་སྙམ་པའི་བསམ་པ་འདིས་རྒོལ་བར་བྱེད་དོ། །བྱེ་
བྲག་ཏུ་སྨྲ་བས་དེ་ནི་རྒྱུ་མ་སྤངས་པ་ལ་དགོངས་ནས་གསུངས་པ་ཡིན་གྱི་ཞེས་བྱ་བ་སྨོས་ཏེ་བཏགས་པའི་བཤད་པ་འདི་ནི་ལྷན་ཅིག་འབྱུང་བའི་རྒྱུ་དང་མཚུངས་པར་ལྡན་པའི་རྒྱུ་ལས་དགོངས་ཤིང་ཐུགས་ལ་དགོངས་ནས་གསུངས་པ་ཡིན་ཏེ། སེམས་པ་དེའི་རྒྱུ་མཐོང་བས་སྤང་བར་བྱ་
བ་འཇིག་ཚོགས་ལ་ལྟ་བ་ལ་སོགས་པ་ནི་མཐོང་བའི་ལམ་གྱིས་སྤངས་ཟིན་པའི་ཕྱིར་བཏགས་པའི་བཤད་པ་ལས་མ་གསུངས་སོ། །མི་དགེ་བ་རྣམས་དང་དགེ་བའི་ཆོས་ཟག་པ་དང་བཅས་པ་རྣམས་ཞེས་བྱ་བ་ནི་མི་དགེ་བ་རྣམས་ནི་ཟག་པ་དང་བཅས་པ་ཁོ་ན་ཡིན་པས་བྱེ་བྲག་ཏུ་
མ་བྱས་སོ། །དགེ་བ་དག་ནི་རྣམ་པ་གཉིས་ཏེ། ཟག་པ་དང་བཅས་པ་དག་ཀྱང་ཡིན་ཟག་པ་མེད་པ་དག་ཀྱང་ཡིན་པས་དེའི་ཕྱིར་དགེ་བ་ཟག་པ་དང་བཅས་པ་གང་དག་ཡིན་པ་དེ་དག་རྣམ་པར་སྨིན་པའི་རྒྱུ་ཡིན་གྱི་ཟག་པ་མེད་པ་དག་ནི་མ་ཡིན་ནོ་ཞེས་བྱེ་བྲག་ཏུ་བྱེད་དོ། །
རྣམ་པར་སྨིན་པའི་ཆོས་ཅན་ཡིན་པའི་ཕྱིར་རོ་ཞེས་བྱ་བ་ནི་རྣམ་པར་སྨིན་པའི་རང་བཞིན་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །སྟོབས་ཆུང་བའི་ཕྱིར་ཏེ་ས་བོན་རུལ་པ་བཞིན་ནོ་ཞེས་བྱ་བ་རྒྱས་པར་འབྱུང་བ་ནི་ཇི་ལྟར་ས་བོན་རུལ་པ་དག་སྟོབས་ཆུང་བའི་ཕྱིར་མངོན་པར་བརླན་
ཀྱང་མྱུ་གུ་སྐྱེ་བའི་རྒྱུར་མི་འགྱུར་བ་དེ་བཞིན་དུ་ལུང་དུ་མ་བསྟན་པའི་ཆོས་རྣམས་སྲེད་པར་མངོན་པར་བརླན་ཀྱང་རྣམ་པར་སྨིན་པ་སྐྱེ་བའི་རྒྱུར་མི་འགྱུར་ཏེ་སྟོབས་ཆུང་བའི་ཕྱིར་རོ། །ཟག་པ་མེད་པ་རྣམས་ནི་སྟོབས་དང་ལྡན་ཡང་སྲེད་པས་མངོན་པར་མ་བརླན་པའི་ཕྱིར་རྣམ་པར་སྨིན་

པ་འགྲུབ་པར་མི་བྱེད་དོ། །དཔེར་ན་ས་བོན་གྲུང་པོ་སྐམ་པོ་རྣམས་ཆུ་དག་གིས་མ་བརླན་པའི་ཕྱིར་མྱུ་གུ་འགྲུབ་པར་མི་བྱེད་པ་དེ་དང་འདྲའོ། །སྔ་མ་དག་ནི་རང་གི་མཐུ་མེད་པ་ཡིན་ནོ། །གཞན་དག་ནི་ལྷན་ཅིག་བྱེད་པའི་རྒྱུ་གཞན་མེད་པ་ཡིན་ནོ། །གང་དང་ལྡན་པ་ཞེས་བྱ་བ་ནི་
ཁམས་གང་དང་ལྡན་པ་སྟེ། ལྡན་པ་མ་ཡིན་པ་འདོད་པ་ལ་སོགས་པ་དང་ལྡན་པ་མ་ཡིན་པ་ཟག་པ་མེད་པ་རྣམས་གང་དང་ལྡན་པའི་རྣམ་པར་སྨིན་པ་ཞིག་མངོན་པར་འགྲུབ་པར་བྱེད་པར་འགྱུར། རྣམ་པར་སྨིན་པ་ནི་ལྡན་པ་ཡིན་པར་འགྱུར་གྱི་མི་ལྡན་པ་ནི་མ་ཡིན་ཏེ།
འདོད་པའི་ཁམས་ལ་སོགས་པ་དང་ལྡན་པའི་ཆོས་ཀྱི་ངོ་བོ་ཉིད་ཡིན་པའི་ཕྱིར་རོ། །ལྷག་མ་རྣམས་ནི་ཞེས་བྱ་བ་རྒྱས་པར་འབྱུང་བ་ནི་ལྷག་མ་མི་དགེ་བ་རྣམས་དང་དགེ་བ་ཟག་པ་དང་བཅས་པ་རྣམས་ནི་རྣམ་པ་གཉི་ག་ཡིན་ཞིང་རྣམ་པ་གཉིས་ཡིན་པའི་ཕྱིར་ཏེ། སྟོབས་དང་
ལྡན་པ་དང་མངོན་པར་བརླན་པའི་རྣམ་པ་ཡིན་པའི་ཕྱིར་རོ་ཞེས་བྱ་བའི་ཐ་ཚིག་གོ། །དེ་དག་ནི་རྣམ་པར་སྨིན་པ་འགྲུབ་པར་བྱེད་དེ། དཔེར་ན་ས་བོན་གྲུང་པོ་མངོན་པར་བརླན་པ་རྣམས་ཀྱིས་མྱུ་གུ་མངོན་པར་འགྲུབ་པར་བྱེད་པ་དང་འདྲའོ། །རྣམ་པར་སྨིན་པའི་རྒྱུ་ཞིག་ཅེས་
བྱ་བ་རྒྱས་པར་འབྱུང་བ་ནི་གལ་ཏེ་རྣམ་པར་སྨིན་པ་ཞེས་བྱ་བ་རྣམ་པར་སྨིན་པས་ན་རྣམ་པར་སྨིན་པའོ་ཞེས་བྱ་བར་ངོ་བོར་བསྒྲུབ་ན་ནི་རྣམ་པར་སྨིན་པའི་རྒྱུ་ཞེས་དྲུག་པར་བསྡུ་བ་ཡིན་ནོ། །འོན་ཏེ་བདག་ཉིད་རྣམ་པར་སྨིན་པར་འགྱུར་བས་ཞེས་ལས་སུ་སྒྲུབ་ན་ནི་དེ་ལ་རྣམ་པར་
སྨིན་པ་ཉིད་རྒྱུ་ཡིན་པས་རྣམ་པར་སྨིན་པའི་རྒྱུའོ་ཞེས་ལས་ཀྱི་གཞིར་བྱ་བ་ཡིན་ནོ། །དེས་ན་ཅིར་འགྱུར་ཞེས་བྱ་བ་ནི་དེས་ན་ཉེས་པ་ཅིར་འགྱུར་ཞེས་བྱ་བ་ཡིན་ནོ། །གལ་ཏེ་རྣམ་པར་སྨིན་པའི་རྒྱུ་ཞེས་བྱ་བར་ངོ་བོ་སྒྲུབ་པར་བཟུང་ན་ནི་མིག་རྣམ་པར་སྨིན་པ་ལས་སྐྱེས་པ་ཡིན་ནོ་
ཞེས་བྱ་བར་དེར་མི་འགྱུར་ཏེ། མིག་ནི་རྣམ་པར་སྨིན་པ་ལས་སྐྱེས་པ་མ་ཡིན་ནོ། །འོ་ན་ཅི་ཞེ་ན། རྣམ་པར་སྨིན་པའི་རྒྱུ་ལས་ལས་ཞེས་བྱ་བའི་ཐ་ཚིག་སྟེ། རྣམ་པར་སྨིན་པ་ནི་རྒྱུ་མ་ཡིན་ནོ། །འོན་ཏེ་རྣམ་པར་སྨིན་པ་ཉིད་རྒྱུ་ཡིན་པས་ཞེས་ལས་སུ་སྒྲུབ་པར་གཟུང་ན་ནི། ལས་ཀྱང་རྣམ་

པར་སྨིན་པར་འགྱུར་བས་རྣམ་པར་སྨིན་པ་ཡིན་པའི་ཕྱིར་མིག་རྣམ་པར་སྨིན་པ་ལས་སྐྱེས་པ་ཡིན་ནོ་ཞེས་བྱ་བ་འདི་ནི་འགྲུབ་མོད་ཀྱི། འོན་ཀྱང་ལས་ཀྱི་རྣམ་པར་སྨིན་པ་ཞེས་བྱ་བ་དེར་ནི་མི་འགྱུར་ཏེ། རྣམ་པར་སྨིན་པ་ནི་ལས་ཁོ་ན་ལ་བྱའི། རྣམ་
པར་སྨིན་པ་ནི་མ་ཡིན་ལ། ལས་ཀྱི་རྣམ་པར་སྨིན་པ་ཞེས་བྱ་བ་འདིར་ནི་ངོ་བོ་སྒྲུབ་པའི་དོན་དུ་བཞེད་ཀྱི་ལས་སུ་སྒྲུབ་པ་ནི་མ་ཡིན་ནོ། །དེ་ལྟ་བས་ན་ལས་ཀྱི་རྣམ་པར་སྨིན་པ་ཞེས་བྱ་བ་དེར་མི་འགྱུར་རོ། །གཉིས་ཀ་ལྟར་ཡང་རུང་ངོ་ཞེས་སྔར་བཤད་ཟིན་ཏོ་ཞེས་བྱ་བ་ནི།
རྣམ་པར་སྨིན་པ་ལས་སྐྱེས་པ་དང་། རྒྱས་ལས་བྱུང་བ་ནང་གི་ལྔ། །ཞེས་བྱ་བ་དེར་བཤད་ཟིན་ཏེ། དེར་རྣམ་པར་སྨིན་པའི་རྒྱུ་ལས་སྐྱེས་པ་ནི་རྣམ་པར་སྨིན་པ་ལས་སྐྱེས་པ་སྟེ། བར་གྱི་ཚིག་མི་མངོན་པར་བྱས་པའི་ཕྱིར་བ་ལང་གི་ཤིང་རྟ་ཞེས་བྱ་བ་ལྟ་བུའོ་ཞེས་བྱ་བ་
ནི་ངོ་བོ་བསྒྲུབ་པར་གཟུང་བ་ཡིན་ནོ། །ཡང་ན་འབྲས་བུའི་དུས་སུ་ཕྱིན་པའི་ལས་ནི་རྣམ་པར་སྨིན་པ་ཞེས་བྱ་སྟེ། རྣམ་པར་སྨིན་པར་འགྱུར་བའི་ཕྱིར་རོ། །དེ་ལས་སྐྱེས་པ་ནི་རྣམ་པར་སྨིན་པ་ལས་སྐྱེས་པ་རྣམས་སོ་ཞེས་བྱ་བ་ནི་ལས་སུ་སྒྲུབ་པར་གཟུང་བ་ཡིན་ནོ། །འབྲས་
བུ་ནི་རྣམ་པར་སྨིན་པ་ཁོ་ན་ཡིན་པས་རྣམ་པར་སྨིན་པའོ་ཞེས་བྱ་བ་ནི་འབྲས་བུ་ཡིན་པར་བརྗོད་པར་འདོད་ན་ནི་ངོ་བོ་སྒྲུབ་པ་ཁོ་ནར་ཡོངས་སུ་གཟུང་ཞེས་བྱ་བའི་ཐ་ཚིག་གོ། །དེ་ལྟ་བས་ན་མིག་ནི་རྣམ་པར་སྨིན་པ་ལས་སྐྱེས་པ་ཡིན་ནོ་ཞེས་བྱ་བ་ཡང་བར་གྱི་ཚིག་མི་མངོན་པར་
བྱས་ཏེ། ངོ་བོ་སྒྲུབ་པར་སྨིན་པའི་སྒོ་ནས་ཀྱང་གྲུབ་ལ་ལས་ཀྱི་རྣམ་པར་སྨིན་པ་ཞེས་བྱ་བ་ཡང་ངོ་བོ་སྒྲུབ་པ་སྨོས་པའི་སྒོ་ནས་འགྲུབ་པར་འགྱུར་ཏེ། སྒྲས་རྟོགས་པ་ནི་བརྗོད་པར་འདོད་པ་སྔོན་དུ་འགྲོ་བ་ཡིན་པའི་ཕྱིར་རོ། །མི་འདྲ་བར་སྨིན་པ་ནི་རྣམ་པར་སྨིན་པའོ་
ཞེས་བྱ་བ་ནི་རྒྱུ་དང་མི་འདྲ་བའི་འབྲས་བུ་ཞེས་བྱ་བའི་ཐ་ཚིག་གོ། །རྒྱུ་ནི་ལུང་དུ་བསྟན་པ་ཁོ་ན་ཡིན་ལ་འབྲས་བུ་ནི་ལུང་དུ་མ་བསྟན་པ་ཁོ་ན་ཡིན་ཏེ། ལྷན་ཅིག་འབྱུང་བའི་རྒྱུ་ལ་སོགས་པའི་སྨིན་པ་ནི་འདྲ་བ་ཁོ་ན་ཡིན་པས་ཁྱད་པར་དུ་བྱས་པ་ཡིན་ནོ། །བསྟན་

བཅོས་ཆོས་མངོན་པ་ལས་འདི་སྐད་དུ་རྣམ་པར་འཆད་པས་དེའི་ཕྱིར་འདི་སྐད་དུ། རྣམ་པར་སྨིན་པའི་རྒྱུ་ཕུང་པོ་གཅིག་ལ་ཞེས་བྱ་བ་རྒྱས་པར་འགོད་པར་བྱེད་དེ། འདི་ལ་ཐོབ་པ་དག་ནི་ཤིང་ལྗོན་པའི་ཕྱི་ཤུན་བཞིན་དུ་སེམས་པ་ལ་སོགས་པ་ལས་ཐ་དད་པར་གནས་པས་
དེ་དག་གི་འབྲས་བུ་ཡང་ཡོངས་སུ་རྫོགས་པར་བྱེད་པ་ཡིན་པའི་ཚུལ་དུ་ལོགས་ཤིག་ཏུ་བརྗོད་དོ། །འདི་ལ་ཕུང་པོ་གཅིག་ཡོད་པས་ན་རྣམ་པར་སྨིན་པའི་རྒྱུ་ཕུང་པོ་གཅིག་པ་སྟེ། ཕུང་པོ་གང་ལ་ཐོབ་པ་དག་ཡོད་པ་དེ་ཉིད་དེ་ལ་དེ་དག་གིས་སྐྱེ་བ་ལ་སོགས་པ་ཡང་ཡོད་པས་
ཕུང་པོ་གཅིག་པ་ཡིན་ནོ། །ཐོབ་པ་དག་གི་འབྲས་བུ་གང་ཡིན་པ་དེ་ཉིད་དེ་དག་གི་སྐྱེ་བ་ལ་སོགས་པའི་ཡང་ཡིན་པས་འབྲས་བུ་ཐུན་མོང་བའི་ཕྱིར་འབྲས་བུ་གཅིག་པ་ཅན་ཡིན་ནོ། །རྣམ་པར་སྨིན་པའི་རྒྱུ་ཕུང་པོ་གཉིས་ལ་འབྲས་བུ་གཅིག་པ་ཅན་ནི་ལུས་དང་ངག་གི་ལས་
དང་དེ་དག་གི་སྐྱེ་བ་ལ་སོགས་པ་སྟེ་ལུས་དང་ངག་གི་ལས་དག་ནི་གཟུགས་ཀྱི་ཕུང་པོར་བསྡུས་པའི་ཕྱིར་ལ། དེ་དག་གི་སྐྱེ་བ་ལ་སོགས་པ་ནི་འདུ་བྱེད་ཀྱི་ཕུང་པོར་བསྡུས་པའི་ཕྱིར་ཕུང་པོ་གཉིས་ཡིན་ནོ། །དེ་དག་གི་འབྲས་བུ་ཐ་མི་དད་པའི་ཕྱིར་འབྲས་བུ་གཅིག་པ་ཅན་ཡང་
ཡིན་ནོ། །ཕུང་པོ་བཞི་ལ་འབྲས་བུ་གཅིག་པ་ཅན་ནི་སེམས་དང་སེམས་ལས་བྱུང་བ་དགེ་བ་དང་མི་དགེ་བ་སྐྱེ་བ་ལ་སོགས་པ་དང་བཅས་པ་དག་སྟེ་སེམས་དང་སེམས་ལས་བྱུང་བ་དེ་དག་ནི་ཅི་རིགས་པར་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་ཕུང་པོས་བསྡུས་
པའི་ཕྱིར་ལ་སྐྱེ་བ་ལ་སོགས་པ་ནི་འདུ་བྱེད་ཀྱི་ཕུང་པོས་བསྡུས་པའི་ཕྱིར་རྣམ་པར་སྨིན་པའི་རྒྱུ་ཕུང་པོ་བཞི་ཡིན་ནོ། །འབྲས་བུ་ཐུན་མོང་བའི་ཕྱིར་འབྲས་བུ་གཅིག་པ་ཅན་ཡིན་ཏེ། སེམས་ཀྱི་འབྲས་བུ་ཡང་གཞན་ལ་སེམས་ལས་བྱུང་བ་རྣམས་ཀྱི་ཡང་གཞན་པ་ནི་མ་ཡིན་
ནོ། །འདོད་པའི་ཁམས་ན་མཉམ་པར་གཞག་པ་མེད་པའི་ཕྱིར་རྣམ་པར་སྨིན་པའི་རྒྱུ་ཕུང་པོ་ལྔ་ལ་འབྲས་བུ་གཅིག་པ་ནི་མེད་དོ། །འདི་ན་གཟུགས་ཀྱི་ཕུང་པོས་སྡུག་བསྔལ་ལུས་དང་ངག་གི་ལས་ནི་སེམས་དང་སེམས་ལས་བྱུང་བ་དག་དང་འབྲས་བུ་གཅིག་པར་

མི་འགྱུར་ཏེ། ཚོགས་པ་ཐ་དད་པའི་ཕྱིར་རོ། །ཕུང་པོ་གསུམ་པ་ཅན་ནི་ཁམས་གསུམ་ཆར་ན་ཡང་མེད་དེ། སེམས་དང་སེམས་ལས་བྱུང་བ་རྣམས་ནི་གདོན་མི་ཟ་བར་འབྲས་བུ་གཅིག་པའི་ཕྱིར་དང་། ཅི་རིགས་པར་ཕུང་པོ་བཞིའི་ངོ་བོ་ཉིད་
ཡིན་པའི་ཡང་ཕྱིར་རོ། །གཟུགས་ཀྱི་ཁམས་ན་རྣམ་པར་སྨིན་པའི་རྒྱུ་ཕུང་པོ་གཅིག་ལ་ཞེས་བྱ་བ་རྒྱས་པར་འབྱུང་བ་ནི་ཐོབ་པ་སྐྱེ་བ་ལ་སོགས་པ་དང་བཅས་པ་ནི་འདུ་བྱེད་ཀྱི་ཕུང་པོས་བསྡུས་པའི་ཕྱིར་ཕུང་པོ་གཅིག་ཡིན་ནོ། །དེ་བཞིན་དུ་འབྲས་བུ་ཐུན་མོང་པའི་
ཕྱིར་འབྲས་བུ་གཅིག་པ་ཅན་ཡང་ཡིན་ནོ། །འདུ་ཤེས་མེད་པའི་སྙོམས་པར་འཇུག་པ་སྐྱེ་བ་ལ་སོགས་པ་དང་བཅས་པ་ཡང་དེ་དང་འདྲ་བ་ཁོ་ནར་བརྗོད་པར་བྱའོ། །རྣམ་པར་རིག་བྱེད་ནི་གཟུགས་ཀྱིས་བསྡུས་པའི་ཕྱིར་ལ་སྐྱེ་བ་ལ་སོགས་པ་ནི་འདུ་བྱེད་ཀྱི་ཕུང་པོའི་ངོ་བོ་ཉིད་
ཡིན་པའི་ཕྱིར་ཕུང་པོ་གཉིས་པ་ཡིན་ནོ། །འབྲས་བུ་གཅིག་པ་ཅན་ནི་སྔ་མ་བཞིན་ནོ། །དགེ་བའི་སེམས་མཉམ་པར་མ་བཞག་པ་ལ་ནི་རྗེས་སུ་འཇུག་པའི་གཟུགས་མེད་པས་གཟུགས་ཀྱི་ཕུང་པོ་མ་གཏོགས་པ་ཚོར་བ་ལ་སོགས་པའི་ཕུང་པོས་བསྡུས་པའི་ཕྱིར་ཕུང་པོ་བཞི་
པ་ཡིན་ནོ། །ཕུང་པོ་ལྔ་པ་ནི་སེམས་མཉམ་པར་བཞག་པ་ན་སྟེ། རྗེས་སུ་འཇུག་པའི་གཟུགས་ནི་སེམས་ལ་སོགས་པ་དང་གཅིག་ཏུ་འབྱུང་བའི་ཕྱིར་རོ། །གཟུགས་མེད་པའི་ཁམས་ན་ཞེས་བྱ་བ་རྒྱས་པར་འབྱུང་བ་ནི་དེ་ན་གཟུགས་ཐམས་ཅད་མེད་པ་ཉིད་པས་རྣམ་པར་
སྨིན་པའི་རྒྱུ་ཕུང་པོ་གཅིག་པ་དང་ཕུང་པོ་བཞི་པ་ཡིན་ཏེ། དེ་ལ་ཐོབ་པ་སྐྱེ་བ་ལ་སོགས་པ་དང་བཅས་པ་ནི་ཕུང་པོ་གཅིག་ཡིན་ཏེ། སྔ་མ་བཞིན་ནོ། །འགོག་པའི་སྙོམས་པར་འཇུག་པ་སྐྱེ་བ་ལ་སོགས་པ་དང་བཅས་པ་ཡང་རྣམ་པར་སྨིན་པའི་རྒྱུ་ཕུང་པོ་གཅིག་པ་ཡིན་
ནོ། །འབྲས་བུ་གཅིག་པ་ཅན་ཡིན་ནོ་ཞེས་བྱ་བ་ནི་གོ་བར་སླའོ། །ལས་ཀྱང་ཡོད་དེ་ཞེས་བྱ་བ་རྒྱས་པར་འབྱུང་བ་ནི་གང་གི་རྣམ་པར་སྨིན་པ་ནི་སྲོག་གི་དབང་པོ་ཡིན་པ་ལས་དེའི་རྣམ་པར་སྨིན་པ་ནི་གདོན་མི་ཟ་བར་སྲོག་གི་དབང་པོ་དེ་དང་དེའི་སྐྱེ་བ་ལ་སོགས་པ་ལྡན་པ་མ་ཡིན་པ་

རྣམས་ཡིན་ལ། དེ་ཐམས་ཅད་ཀྱང་ཆོས་ཀྱི་སྐྱེ་མཆེད་ཀྱིས་བསྡུས་པའི་ཕྱིར་རྣམ་པར་སྨིན་པ་སྐྱེ་མཆེད་གཅིག་རྣམ་པར་སྨིན་པར་འགྱུར་རོ། །གང་གི་ཡིད་ཀྱི་སྐྱེ་མཆེད་ཡིན་པ་དེའི་ནི་གཉིས་ཏེ། ཡིད་དང་ཆོས་ཀྱི་སྐྱེ་མཆེད་དག་གོ་ཞེས་བྱ་བ་ནི་ཡིད་ཀྱི་སྐྱེ་མཆེད་དེའི་
ཚོགས་པ་ལ་ནི་གདོན་མི་ཟ་བར་ཚོར་བ་ལ་སོགས་པ་དང་སྐྱེ་བ་ལ་སོགས་པ་ལྷན་ཅིག་འབྱུང་བ་རྣམ་པར་སྨིན་པའི་ངོ་བོར་འགྱུར་ལ། ཚོར་བ་ལ་སོགས་པ་དང་སྐྱེ་བ་ལ་སོགས་པ་ཡང་ཆོས་ཀྱི་སྐྱེ་མཆེད་ཀྱིས་བསྡུས་པའི་ཕྱིར་རྣམ་པར་སྨིན་པ་ཡིད་དང་ཆོས་ཀྱི་སྐྱེ་མཆེད་དང་དེ་
གཉིས་རྣམ་པར་སྨིན་པར་འགྱུར་རོ། །གང་གི་རེག་བྱའི་སྐྱེ་མཆེད་ཡིན་པ་ཡང་དེ་དང་འདྲའོ་ཞེས་བྱ་བ་ནི་རེག་བྱའི་སྐྱེ་མཆེད་དེ་ལ་གདོན་མི་ཟ་བར་སྐྱེ་བ་ལ་སོགས་པ་ཡང་ཡོད་པའི་ཕྱིར་ཆོས་ཀྱི་སྐྱེ་མཆེད་ཀྱང་རྣམ་པར་སྨིན་པར་འགྱུར་གྱི་རེག་བྱའི་སྐྱེ་མཆེད་འབའ་ཞིག་པ་ནི་
མ་ཡིན་པས་དེའི་སྐྱེ་མཆེད་གཉིས་རྣམ་པར་སྨིན་པར་འགྱུར་རོ། །གང་གི་ལུས་ཀྱི་སྐྱེ་མཆེད་ཡིན་པ་དེའི་ནི་གསུམ་སྟེ་ལུས་ཀྱི་སྐྱེ་མཆེད་དེ་ཉིད་དང་དེ་ནི་གདོན་མི་ཟ་བར་འབྱུང་བ་བཞི་ཚན་ལ་བརྟེན་པའི་ཕྱིར་དེའི་རྟེན་རེག་བྱའི་སྐྱེ་མཆེད་འབྱུང་བ་བཞི་ཚན་དང་དེའི་སྐྱེ་བ་ལ་
སོགས་པ་ཡང་ཡོད་པས་དེ་ལ་གསུམ་པ་ཆོས་ཀྱི་སྐྱེ་མཆེད་ཀྱང་རྣམ་པར་སྨིན་པར་འགྱུར་རོ། །དེ་དང་འདྲའོ་ཞེས་བྱ་བ་རྒྱས་པར་འབྱུང་བ་ནི་གང་གི་རྣམ་པར་སྨིན་པ་གཟུགས་དང་དྲི་དང་རོའི་སྐྱེ་མཆེད་རྣམས་ལས་གང་ཡང་རུང་བ་ཞིག་ཡིན་པ་དེའི་རྣམ་པར་སྨིན་པ་ཡང་དེ་བཞིན་
དུ་སྐྱེ་མཆེད་གསུམ་པོ་ཡིན་ཏེ། གཟུགས་ལ་སོགས་པ་གང་ཡང་རུང་བའི་སྐྱེ་མཆེད་དེ་ཉིད་དང་དེའི་རྟེན་འབྱུང་བའི་ངོ་བོ་ཉིད་རེག་བྱའི་སྐྱེ་མཆེད་དང་དེའི་སྐྱེ་བ་ལ་སོགས་པའི་ངོ་བོ་ཉིད་ཆོས་ཀྱི་སྐྱེ་མཆེད་དོ། །གང་གི་མིག་གི་སྐྱེ་མཆེད་ཡིན་པ་དེ་ནི་བཞི་སྟེ། མིག་དེ་ཉིད་དང་
མིག་ཀྱང་གདོན་མི་ཟ་བར་ལུས་ལ་རག་ལུས་ཏེ། འབྱུང་བའི་ཕྱིར་ལུས་ཀྱི་སྐྱེ་མཆེད་དང་སྔ་མ་བཞིན་དུ་རེག་བྱ་དང་ཆོས་ཀྱི་སྐྱེ་མཆེད་དག་གོ། །གང་གི་རྣ་བ་དང་སྣ་དང་ལྕེའི་སྐྱེ་མཆེད་དག་ཡིན་པ་ཡང་དེ་དང་འདྲའོ་ཞེས་བྱ་བ་རྒྱས་པར་འབྱུང་བ་ནི་གང་གི་རྣམ་པར་སྨིན་པ་རྣ་བ་

ལ་སོགས་པ་གང་ཡང་རུང་བ་ཞིག་ཡིན་པ་དེའི་རྣམ་པར་སྨིན་པ་ཡང་དེ་དང་འདྲ་བར་སྐྱེ་མཆེད་བཞི་ཡིན་ཏེ། རྣ་བ་ལ་སོགས་པ་གང་ཡང་རུང་བའི་སྐྱེ་མཆེད་དེ་ཉིད་དང་སྔ་མ་བཞིན་དུ་ལུས་དང་རེག་བྱ་དང་ཆོས་ཀྱི་སྐྱེ་མཆེད་དག་གོ། །ལས་དེ་ཡང་ཡོད་
དེ་ཞེས་བྱ་བ་རྒྱས་པར་འབྱུང་བ་ནི་སྐྱེ་མཆེད་ལྔ་ནས་བཅུ་གཅིག་གི་བར་ཞེས་ཅི་རིགས་པར་སྦྱར་རོ། །རྣམ་པར་སྨིན་པ་སྐྱེ་མཆེད་བཅུ་གཉིས་པ་ནི་མེད་དེ། སྒྲའི་སྐྱེ་མཆེད་རྣམ་པར་སྨིན་པའི་ངོ་བོ་ཉིད་མེད་པའི་ཕྱིར་རོ། །འདི་ལ་སློབ་དཔོན་དབྱིག་བཤེས་ན་རེ་གང་གི་རྣམ་པར་
སྨིན་པ་ཆོས་ཀྱི་སྐྱེ་མཆེད་གཅིག་ཁོ་ན་སྨིན་པར་འགྱུར་བའི་ལས་ཀྱང་ཡོད་དེ་ཞེས་བྱ་བ་མི་འཐད་དོ། །ཅིའི་ཕྱིར་ཞེ་ན། སྲོག་གི་དབང་པོ་ནི་འཕེན་པར་བྱེད་པའི་ལས་ཀྱི་འབྲས་བུ་ཡིན་པའི་ཕྱིར་རོ། །རེ་ཞིག་གལ་ཏེ་འདོད་པའི་ཁམས་ན་ལས་ཀྱི་རྣམ་པར་སྨིན་
པར་འགྱུར་ན་གདོན་མི་ཟ་བར་སྐྱེ་མཆེད་དྲུག་མ་དོད་པ་ནུར་ནུར་པོ་ལ་སོགས་པའི་གནས་སྐབས་ན་ནི་ལུས་དང་སྲོག་གི་དབང་པོ་དག་ཡོད་དོ། །སྐྱེ་མཆེད་དྲུག་དོད་ནས་ནི་མིག་ལ་སོགས་པ་དྲུག་དང་ཡིད་ཀྱི་སྐྱེ་མཆེད་བདུན་ཡོད་པར་འགྱུར་རོ། །གཟུགས་ཀྱི་ཁམས་
ན་ཡང་བདུན་ནོ། །གཟུགས་མེད་པའི་ཁམས་ན་ཡང་ཡིད་དང་ཆོས་ཀྱི་སྐྱེ་མཆེད་དག་གདོན་མི་ཟ་བར་ཡོད་པར་འགྱུར་ཏེ། སྲོག་གི་དབང་པོ་ནི་སྐྱེ་བ་ཐམས་ཅད་འཕེན་པར་བྱེད་པའི་འབྲས་བུ་ཡིན་པའི་ཕྱིར་རོ། །ཡང་ན་འདིར་ཁམས་གང་ལས་བསམས་ཞེས་
སྨྲས་སོ། །གཟུགས་མེད་པའི་ཁམས་ཡིན་ནོ། །དེ་ན་ཡང་སྲོག་གི་དབང་པོ་ནི་འཕེན་པར་བྱེད་པའི་ལས་ཀྱི་འབྲས་བུ་ཡིན་པའི་ཕྱིར་གདོན་མི་ཟ་བར་ཡིད་ཀྱི་སྐྱེ་མཆེད་ཀྱང་ཡོད་པར་འགྱུར་ལ་རྣམ་པར་སྨིན་པ་ནི་ཚོར་བས་རབ་ཏུ་ཕྱེ་བའི་ཕྱིར་རྣམ་པར་སྨིན་པ་སྲོག་གི་
དབང་པོ་ཁོ་ན་རྣམ་པར་སྨིན་པར་འགྱུར་བ་ཡང་མ་ཡིན་པས་དེ་ནི་ཚོར་བ་ལ་སོགས་པ་ཡང་ཡོད་པར་འགྱུར་རོ་ཞེ་ན།། །།བམ་པོ་བཅུ་དགུ་པ། འདིར་སྨྲས་པ། འདི་ནི་སྐད་ཅིག་མ་སྐྱེ་བ་ལས་བསམས་ནས་བཤད་པ་ཡིན་ཏེ། སྐད་ཅིག་མ་གང་ལ་གཟུགས་

མེད་པར་སྐྱེས་པའི་སེམས་རྣམ་པར་སྨིན་པ་ལས་སྐྱེས་པ་ཀུན་དུ་མི་འབྱུང་བའི་སྐད་ཅིག་མ་དེ་ལ་རྣམ་པར་སྨིན་པ་སྲོག་གི་དབང་པོ་ཁོ་ན་འབྱུང་བའི་ཕྱིར་དང་། ཡིད་ཀྱི་སྐྱེ་མཆེད་ནི་ཀུན་དུ་མི་འབྱུང་བའི་ཕྱིར་རྣམ་པར་སྨིན་པར་སྲོག་གི་དབང་པོ་ཁོ་ན་རྣམ་པར་སྨིན་པར་
འགྱུར་ན་ཅིའི་ཕྱིར་དེ་ཀུན་དུ་འབྱུང་བའི་ཚེ་གཞན་ཡིད་ཀྱི་སྐྱེ་མཆེད་ཀྱང་ཡོད་པས་དེའི་རྣམ་པར་སྨིན་པ་ཡིད་དང་ཆོས་ཀྱི་སྐྱེ་མཆེད་གཉིས་ཡིན་ཞེས་རྣམ་པར་འཆད་པར་བྱེད། འདི་དཔྱད་པར་བྱ་སྟེ། སྲོག་གི་དབང་པོ་ནི་འཕེན་པར་བྱེད་པའི་ལས་ཀྱི་རྣམ་པར་སྨིན་པ་
ཡིན་ནོ་ཞེས་བྱ་བ་འདི་ནི་ཡིན་ན་སྲོག་གི་དབང་པོ་རྣམ་པར་སྨིན་པའི་ཚེ་ཡིད་ཀྱི་སྐྱེ་མཆེད་ལ་སོགས་པ་ཡང་རྣམ་པར་སྨིན་པར་འགྱུར་གྱི། སྐྱེ་མཆེད་གཞན་རྣམ་པར་སྨིན་པ་ཡིན་པ་ནི་མི་འགོག་གོ། །འདིར་ནི་རྣམ་པར་སྨིན་པའི་རྒྱུ་བསམ་པ་ཡིན་ཏེ་གང་གི་ཆོས་ཀྱི་སྐྱེ་མཆེད་
གཅིག་ཁོ་ན་རྣམ་པར་སྨིན་པར་འགྱུར་གྱི་སྐྱེ་མཆེད་གཞན་ནི་མ་ཡིན་པའི་ལས་དེ་ཡང་ཡོད་དེ་ཞེས་བྱ་བ་འདི་ཙམ་ཞིག་བརྗོད་པར་འདོད་པར་ཟད་དོ། །སྲོག་གི་དབང་པོ་འཕེན་པར་བྱེད་པའི་ལས་ཉིད་ལ་ཡིད་ཀྱི་སྐྱེ་མཆེད་ལ་སོགས་པ་ཡང་རྣམ་པར་སྨིན་པར་འགྱུར་གྱི་སྐྱེ་
མཆེད་གཅིག་ཁོ་ན་ནི་མ་ཡིན་ནོ་ཞེ་ན། འདི་ལ་སྨྲ་བར་བྱ་སྟེ། དེ་ལ་ཡིད་ལ་སོགས་པ་གཞན་དག་ཡོད་པ་ཡང་ལས་དེ་ཁོ་ནའི་རྣམ་པར་སྨིན་པ་ཡིན་གྱི་ལས་གཞན་གྱི་ནི་མ་ཡིན་ནོ་ཞེས་བྱ་བའི་ངེས་པ་འདི་ཅིས་བྱས། རིས་མཐུན་པ་ཡང་ལས་གཅིག་གི་རྣམ་པར་སྨིན་
པ་ཡིན་ལ། སྲོག་གི་དབང་པོ་ཡང་གཞན་གྱི་ཡིན། ཡིད་ཀྱི་སྐྱེ་མཆེད་ལ་སོགས་པ་ཡང་གཞན་ཁོ་ནའི་ཡིན་ནོ་ཞེས་བྱ་བའི་སྲིད་པ་གང་ཡིན་པ་ནི་ཡོད་དོ། །གལ་ཏེ་ཁྱོད་ཇི་ལྟར་གང་གིས་མིག་གི་སྐྱེ་མཆེད་ཡིན་པ་དེ་ནི་མིག་དང་ལུས་དང་རེག་བྱ་དང་ཆོས་ཀྱི་སྐྱེ་མཆེད་
རྣམས་སོ་ཞེས་བྱ་བའི་སྐབས་སུ་གང་གི་རྣམ་པར་སྨིན་པ་མིག་གི་སྐྱེ་མཆེད་ཡིན་པ་དེའི་ནི་གདོན་མི་ཟ་བ་ཡིན་པའི་ཕྱིར་ལུས་ཀྱི་སྐྱེ་མཆེད་ཀྱང་ཡིན་པ་དེ་བཞིན་དུ་ཡིད་ཀྱི་སྐྱེ་མཆེད་ལ་སོགས་པ་ཡང་ལས་དེ་ཁོ་ནའི་རྣམ་པར་སྨིན་པ་ཡིན་ནོ་ཞེས་བྱ་བར་འགྱུར་ན།

དེ་ནི་མ་ཡིན་ཏེ། འགའ་ཞིག་ནི་འགའ་ཞིག་ཁོ་ན་ལ་རག་ལས་ཏེ་འབྱུང་བའི་ཕྱིར་ཏེ། མིག་གི་དབང་པོ་ནི་ལུས་ཀྱི་དབང་པོ་མེད་པར་འབྱུང་བ་མེད་ཀྱི་སྲོག་གི་དབང་པོ་ནི་རྣམ་པར་སྨིན་པའི་ཡིད་མེད་ཀྱང་འབྱུང་བ་ཡོད་པས་འདི་ནི་མི་
མཚུངས་སོ། །སློབ་དཔོན་འདུས་བཟང་ན་རེ་གང་གི་རྣམ་པར་སྨིན་པ་ཆོས་ཀྱི་སྐྱེ་མཆེད་ཁོ་ན་རྣམ་པར་སྨིན་པར་འགྱུར་བའི་ལས་ཀྱང་ཡོད་དེ། གང་གི་སྲོག་གི་དབང་པོ་ཡིན་པའོ། །གང་གི་མིག་གི་སྐྱེ་མཆེད་ཡིན་པ་དེའི་ནི་ལྔ་སྟེ། མིག་དང་ལུས་དང་
གཟུགས་དང་རེག་བྱ་དང་ཆོས་ཀྱི་སྐྱེ་མཆེད་རྣམས་སོ། །ལྕེའི་སྐྱེ་མཆེད་ཀྱི་བར་དུ་ཡང་དེ་དང་འདྲའོ། །གང་གི་ལུས་ཀྱི་སྐྱེ་མཆེད་ཡིན་པ་དེའི་ནི་བཞི་སྟེ། ལུས་དང་གཟུགས་དང་རེག་བྱ་དང་ཆོས་ཀྱི་སྐྱེ་མཆེད་རྣམས་སོ་ཞེས་ཟེར་ཏེ། གཟུགས་མེད་ན་མི་འབྱུང་བ་
ཡིན་པའི་ཕྱིར་གཟུགས་ཀྱི་སྐྱེ་མཆེད་ཀྱང་མིག་སྒྲུབ་པར་བྱེད་པའི་ལས་དེ་ཉིད་ཀྱི་རྣམ་པར་སྨིན་པ་ཡིན་ནོ་ཞེས་གཞུང་ལུགས་གཞན་ཞིག་འདོད་པར་བྱེད་དོ། །སློབ་དཔོན་འདི་ནི་གཟུགས་ཀྱི་སྐྱེ་མཆེད་ལས་དེ་ཁོ་ནའི་རྣམ་པར་སྨིན་པ་ཡིན་པར་ངེས་པ་མེད་དོ་ཞེས་བྱ་
བ་ཕྱོགས་གཞན་གང་གི་ལུས་ཀྱི་སྐྱེ་མཆེད་ཡིན་པ་དེའི་ནི་གསུམ་མོ། །གང་གི་མིག་གི་སྐྱེ་མཆེད་ཡིན་པ་དེའི་ནི་བཞིའོ་ཞེས་བྱ་བའི་རྗེས་སུ་འབྲང་སྟེ། སྲོག་གི་དབང་པོ་དང་རིས་མཐུན་པ་ལ་སོགས་པ་ཕན་ཚུན་མེད་ན་མི་འབྱུང་བ་རྣམས་གདོན་མི་ཟ་བར་ལས་གཅིག་
ཁོ་ནའི་རྣམ་པར་སྨིན་པ་ཡིན་པ་ནི་མ་ཡིན་ནོ་སྙམ་དུ་བསམས་པ་ཡིན་ནོ། །རྣམ་པར་བཤད་པ་བྱེད་པ་རྣམས་ཀྱིས་ཕྱོགས་དེ་གཉིས་བྲིས་པ་ལ་དེ་དག་གང་ཞིག་གང་ལ་དད་པ་དེ་དེས་ཡོངས་སུ་བཟུང་བར་ཟད་དེ། ཞར་ལ་འོངས་པས་ཆོག་གོ། །ཡང་ཇི་ལྟར་ན་ལས་ཁ་
ཅིག་གི་རྣམ་པར་སྨིན་པ་ནི་སྐྱེ་མཆེད་གཅིག་རྣམ་པར་སྨིན་པར་གྱུར་པ་ནས་ཁ་ཅིག་གི་ནི་བཅུ་གཅིག་གི་བར་ཡིན་ཞེ་ན། དེའི་ཕྱིར་ལས་ཀྱི་འབྲས་བུ་སྣ་ཚོགས་དང་སྣ་ཚོགས་མ་ཡིན་པའི་ཕྱིར་ཞེས་བྱ་བ་རྒྱས་པར་སྨོས་སོ། །པདྨ་དང་བལ་པོ་སེའུ་དང་ཤིང་ནྱ་གྲོ་དྷ་ལ་

སོགས་པ་དག་གི་ས་བོན་ཏེ་པདྨ་ལ་སོགས་པའི་ས་བོན་ནི་འབྲས་བུ་རྩ་བ་དང་མྱུ་གུ་དང་སྡོང་བུ་དང་འདབ་མ་དང་ཟེ་བ་དང་ཟེ་འབྲུ་དང་སྙིང་པོ་སྣ་ཚོགས་པ་ཡིན་ལ། ཤིང་ནྱ་གྲོ་དྷ་ལ་སོགས་པ་ཡང་ཡལ་གའི་མདོ་དང་ཡལ་ག་དང་འདབ་མ་དང་མགོ་ལྕོག་དང་མྱུ་གུ་དང་མེ་
ཏོག་དང་འབྲས་བུ་དུ་མ་ཕུན་སུམ་ཚོགས་པ་སྤྲིན་ལྟ་བུར་སྣང་ངོ་། །ཁ་ཅིག་ནི་འབྲས་བུ་སྣ་ཚོགས་པ་མ་ཡིན་ཏེ། འདི་ལྟ་སྟེ་ནས་དང་གྲོ་ལ་སོགས་པའི་ས་བོན་དག་ལྟ་བུའོ། །འབྲས་བུ་ངོ་བོ་གཅིག་པའི་ཕྱིར་ཏེ་འདི་ནི་ས་བོན་གྱི་ཆོས་ཉིད་ཡིན་ནོ། །ལས་དུས་གཅིག་
པའི་སྟེ་འདས་པའི་རྣམ་པར་སྨིན་པ་དུས་གསུམ་པ་སྟེ་འདས་པ་དང་མ་འོངས་པ་དང་ད་ལྟར་བྱུང་བ་རྣམ་པར་སྨིན་པར་ནི་འགྱུར་གྱི་ལས་དུས་གཉིས་པ་ཡང་སྟེ་འདས་པ་དང་ད་ལྟར་བྱུང་བའི་ཡང་དུས་གཅིག་པ་སྟེ་མ་འོངས་པ་ནི་མ་ཡིན་ནོ། །བཟློག་པ་ནི་མ་ཡིན་ནོ་ཞེས་
བྱ་བ་ནི་ལས་སྐད་ཅིག་མ་མང་པོའི་སྐད་ཅིག་མ་གཅིག་པ་སྟེ། རྒྱུ་བས་འབྲས་བུ་ཧ་ཅང་ཉུང་བར་འགྱུར་དུ་འོང་བའི་ཕྱིར་རོ་ཞེས་བྱ་བར་སྦྱར་རོ། །རྣམ་པར་སྨིན་པ་ནི་ལས་དང་ལྷན་ཅིག་ཏུ་རྣམ་པར་སྨིན་པ་ཡང་མ་ཡིན་ཏེ། ལྷན་ཅིག་སྐྱེས་པ་ནི་ལྷན་ཅིག་འབྱུང་བ་
དང་མཚུངས་པར་ལྡན་པའི་རྒྱུ་དག་བྱ་བ་བྱེད་པའི་ཕྱིར་ལ་རྣམ་པར་སྨིན་པའི་རྒྱུ་ནི་མི་འདྲ་བར་སྨིན་པ་ལ་ལྟོས་པའི་ཕྱིར་རོ། །རྣམ་པར་སྨིན་པ་མཇུག་ཐོགས་སུ་རྣམ་པར་སྨིན་པ་ཡང་མ་ཡིན་ནོ། །ཅིའི་ཕྱིར་ཞེ་ན། མཇུག་ཐོགས་ཀྱི་སྐད་ཅིག་མ་ནི་མཚུངས་
པ་དེ་མ་ཐག་པའི་རྐྱེན་གྱིས་དྲངས་པའི་ཕྱིར་ཏེ། འདི་ལྟར་མཇུག་ཐོགས་ཀྱི་སྐད་ཅིག་མ་ནི་མཚུངས་པ་དེ་མ་ཐག་པའི་རྐྱེན་གྱི་སྟོབས་ཀྱིས་དྲངས་པ་ཡིན་གྱི་མཚུངས་པ་དེ་མ་ཐག་པའི་རྐྱེན་འདི་རྣམ་པར་སྨིན་པའི་རྒྱུ་ཡིན་ཡང་། རྣམ་པར་སྨིན་པའི་
རྒྱུའི་སྟོབས་ཀྱིས་དྲངས་པ་ནི་མ་ཡིན་ནོ། །འདི་ནི་དེ་ལྟ་བུ་ཁོ་ན་ཡིན་ཏེ། འདི་ལྟར་མཚུངས་པ་དེ་མ་ཐག་པའི་རྐྱེན་རྣམ་པར་སྨིན་པའི་རྒྱུ་ལས་མཇུག་ཐོགས་ཀྱི་སྐད་ཅིག་མ་རེས་འགའ་ནི་དགེ་བ་རེས་འགའ་ནི་མི་དགེ་བ་རེས་འགའ་ནི་ལུང་དུ་མ་བསྟན་

པར་འབྱུང་ངོ་། །དེ་ལྟ་མ་ཡིན་ནོ་ལུང་དུ་མ་བསྟན་པ་ཁོ་ནར་འགྱུར་རོ། །རྣམ་པ་གཅིག་ཏུ་མཇུག་ཐོགས་ཀྱི་སྐད་ཅིག་མ་རྣམ་པར་སྨིན་པའི་ངོ་བོ་ཉིད་མ་ཡིན་པ་མཚུངས་པ་དེ་མ་ཐག་པའི་རྐྱེན་གྱིས་དྲངས་པའི་ཕྱིར་རོ། །རྣམ་པར་སྨིན་པའི་ངོ་བོ་ཉིད་
ནི་མ་ཡིན་ཏེ། མཚུངས་པ་དེ་མ་ཐག་པའི་རྐྱེན་གྱིས་མ་དྲངས་པའི་ཕྱིར་རོ་སྙམ་དུ་བསམས་པ་ཡིན་ནོ། །རྣམ་པར་སྨིན་པའི་རྒྱུ་ལས་འབྲས་བུ་སྨིན་པ་ནི་རྒྱུན་ལ་ལྟོས་པ་ཡིན་ནོ་ཞེས་བྱ་བ་ནི་སེམས་དང་སེམས་ལས་བྱུང་བའི་རྒྱུན་ཡོད་ན་རྣམ་པར་སྨིན་པའི་རྒྱུ་འདས་པས་
རྣམ་པར་སྨིན་པའི་འབྲས་བུ་འབྱིན་པར་འགྱུར་ཏེ། འདི་ནི་ཆོས་ཉིད་ཡིན་ནོ་སྙམ་དུ་བསམས་པའོ། །འདི་དག་གི་དུས་ངེས་པ་དོན་གྱིས་ནི་བཤད་མོད་ཀྱི་ཞེས་བྱ་བ་ནི་དོན་གྱིས་བཤད་ཀྱི་རང་གི་སྒྲས་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །བརྗོད་པ་ནི་རྣམ་པ་གཉིས་
ཏེ། རང་གི་སྒྲས་བསྟན་པ་དང་། དོན་གྱིས་བཤད་པའོ། །ཇི་ལྟ་ཞེ་ན། སྐལ་མཉམ་རྒྱུ་ནི་འདྲ་བའོ། །རང་རིས་ས་པའོ་སྔར་སྐྱེས་རྣམས། །ཞེས་བྱ་བ་དང་། དེ་བཞིན་དུ། ཀུན་འགྲོ་ཞེས་བྱ་ཉོན་མོངས་ཅན། །རྣམས་ཀྱི་རང་སར་ཀུན་འགྲོ་ལྔ། །ཞེས་འབྱུང་
བའི་ཕྱིར་སྐལ་བ་མཉམ་པ་དང་ཀུན་དུ་འགྲོ་བའི་རྒྱུ་དག་ནི་འདས་པ་དང་ད་ལྟར་བྱུང་བ་དག་ཁོ་ན་ཡོད་ཀྱི་མ་འོངས་པ་དག་ནི་མེད་དོ། །ལྷན་ཅིག་འབྱུང་བ་དང་མཚུངས་པར་ལྡན་པ་དང་རྣམ་པར་སྨིན་པའི་རྒྱུ་དག་ནི་ཁྱད་པར་མ་སྨོས་པ་ཉིད་ཀྱི་ཕྱིར་དོན་གྱིས་ན་དུས་གསུམ་པ་
ཡིན་ནོ་ཞེས་བཤད་པ་ཡིན་ནོ། །སྐལ་བ་མཉམ་པ་དང་ཀུན་དུ་འགྲོ་བའི་རྒྱུ་དག་ཁོ་ན་སྔར་སྐྱེས་པ་ཡིན་ལ། སྔར་སྐྱེས་པ་ཁོ་ན་ཡང་དེ་དག་ཡིན་ནོ་ཞེས་ངེས་པར་གཟུང་བའི་ཕྱིར་དང་། ཕན་ཚུན་དུ་འབྲས་བུ་ཉིད་ཡིན་པར་འབྱུང་བའི་ཕྱིར་དང་། སེམས་ལ་སོགས་པ་དང་།
མི་དགེ་བ་ལ་སོགས་པའི་ངོ་བོ་ཉིད་ཡིན་པའི་ཕྱིར་འདི་རྣམས་དུས་སུ་མ་གཏོགས་པ་ཉིད་བཟློག་པ་ཡིན་ནོ། །མདོར་བྱ་སྟེ་ཞེས་བྱ་བ་ནི་བསྡུས་ཏེ། མདོར་བྱ་བའམ་མདོར་མ་བྱས་པ་མདོར་བྱ་བ་ཡིན་ནོ། །འདིར་གཏན་ཚིགས་ནི་བཤད་ཟིན་ཏོ་ཞེས་བྱ་བ་ཇི་ལྟར་བཤད་ཅེ་ན།

སྐལ་བ་མཉམ་པའི་རྒྱུ་ནི་རྒྱུ་མཐུན་པའི་འབྲས་བུས་འབྲས་བུ་དང་བཅས་པ་ཡིན་ན། དེ་ཡང་མ་འོངས་པ་ལ་རིགས་པ་མ་ཡིན་ཏེ། སྔ་ཕྱི་མེད་པའི་ཕྱིར་རོ་ཞེས་བྱ་བ་དེ་ལྟ་བུ་ལ་སོགས་པ་ཡིན་ཏེ། སྐལ་བ་མཉམ་པའི་རྒྱུའི་གཏན་ཚིགས་བཤད་པ་གང་ཡིན་པ་དེ་ནི་ཀུན་དུ་
འགྲོ་བའི་རྒྱུའི་གཏན་ཚིགས་བཤད་པའི་ངོ་བོ་ཡིན་པར་ཡང་རིག་པར་བྱའོ། །ཀུན་དུ་འགྲོ་བའི་རྒྱུ་ནི་སྐལ་བ་མཉམ་པའི་རྒྱུ་དང་འདྲ་སྟེ། སྐལ་བ་མཉམ་པའི་རྒྱུ་ནི་ཉོན་མོངས་པ་ཅན་རྣམས་ཀྱི་རྒྱུ་ཉོན་མོངས་པ་ཅན་ཡིན་ནོ། །ཀུན་དུ་འགྲོ་བའི་རྒྱུ་ཡང་ཉོན་མོངས་པ་
ཅན་རྣམས་ཀྱི་རྒྱུ་ཉོན་མོངས་པ་ཅན་ཁོ་ན་ཡིན་ལ། འདི་ནི་ཉོན་མོངས་པ་ཅན་གྱི་ཆོས་སྤྱིའི་རྒྱུ་ཡིན་པ་ཉིད་ཀྱིས་སྐལ་བ་མཉམ་པའི་རྒྱུ་ལས་ལོགས་ཤིག་ཏུ་རྣམ་པར་བཞག་གོ་ཞེས་དེ་ནི་བཤད་ཟིན་ཏོ། །འདི་ནི་སྐལ་བ་མཉམ་པའི་རྒྱུ་ཁོ་ན་བཞིན་དུ་མ་འོངས་པ་ཡང་མེད་ལ་
རྒྱུ་མཐུན་པའི་འབྲས་བུས་འབྲས་བུ་དང་བཅས་པ་ཡང་ཡིན་པས་འདིའི་ཚུལ་ནི་དེ་ཁོ་ན་དང་འདྲའོ། །གསུམ་པོ་དག་ནི་དུས་གསུམ་པ་ཞེས་བྱ་བ་ནི་དུས་གསུམ་པ་ཁོ་ན་གསུམ་ཡིན་ལ། གསུམ་ཁོ་ན་ཡང་དུས་གསུམ་པ་ཡིན་ནོ་ཞེས་ངེས་པར་གཟུང་བའི་ཕྱིར་བྱེད་རྒྱུའི་རྒྱུ་
ནི་དེ་ལྟ་མ་ཡིན་པར་འགྱུར་རོ། །ཇི་ལྟར་དེ་ལྟ་མ་ཡིན་ཞེ་ན། བྱེད་རྒྱུའི་རྒྱུ་ནི་དུས་ངེས་པ་མ་བསྟན་པས་དུས་ཐམས་ཅད་པ་དང་དུས་དང་བྲལ་བར་ཡང་རིག་པར་བྱའོ་ཞེས་བྱ་བ་སྨོས་ཏེ། རང་ལས་གཞན་པ་རང་གི་ངོ་བོ་མ་གཏོགས་པ་ཆོས་ཐམས་ཅད་ནི་བྱེད་རྒྱུའི་རྒྱུ་ཡིན་ནོ། །
དེའི་ཕྱིར་ན་དེ་ལྟར་འགྱུར་གྱི་གཞན་དུ་ནི་མ་ཡིན་ནོ། །རྒྱུ་དང་འབྲས་བུ་ཞེས་བྱ་བ་འདི་གཉིས་ནི་ཕན་ཚུན་ལྟོས་པ་ཡིན་པས་དེའི་རྒྱུ་དེ་དག་གང་གི་ཡིན་པའི་འབྲས་བུ་དེ་གང་ཞེ་ན་ཞེས་འདྲིའོ། །འདུས་བྱས་བྲལ་བཅས་འབྲས་བུ་ཡིན། །ཞེས་བྱ་བ་ནི་ནམ་མཁའ་དང་
སོ་སོར་བརྟགས་པ་མ་ཡིན་པས་འགོག་པ་མ་གཏོགས་པ་ཆོས་ཐམས་ཅད་འབྲས་བུ་ཡིན་ནོ་ཞེས་བཤད་པར་འགྱུར་རོ། །དེ་ལྟ་ན་འོ་ན་ནི་ཞེས་བྱ་བ་རྒྱས་པར་འབྱུང་བ་ནི་འདུས་མ་བྱས་འབྲས་བུ་ཡིན་པའི་ཕྱིར་ཏེ། འདུས་མ་བྱས་འབྲས་བུ་ཡིན་པས་ན་འདིའི་

བདག་ཉིད་ལས་གཞན་པ་འདུས་མ་བྱས་དེ་གང་གི་འབྲས་བུ་ཡིན་པའི་རྒྱུ་གཞན་ཞིག་ཀྱང་ཡོད་པར་འགྱུར་ལ་འདུས་མ་བྱས་རྒྱུ་ཡིན་པའི་ཕྱིར་འདིའི་བདག་ཉིད་ལས་གཞན་པ་འདུས་མ་བྱས་དེ་གང་གི་རྒྱུ་ཡིན་པའི་འབྲས་བུ་གཞན་ཞིག་ཀྱང་ཡོད་
པར་འགྱུར་རོ་ཞེ་ན། འདུས་མ་བྱས་ལ་རྒྱུ་དང་འབྲས་བུ་དེ་དག་མེད་དེ། བྲལ་བའི་འབྲས་བུ་ནི་འདུས་མ་བྱས་སོ་སོར་བརྟགས་པས་འགོག་པའི་མཚན་ཉིད་ཡིན་ནོ། །དེ་ལ་ནི་རྒྱུ་གཞན་མེད་དེ། བསྐྱེད་པར་བྱ་བ་མ་ཡིན་པའི་ཕྱིར་རོ། །རྒྱུ་ནི་ཡིན་ཏེ། འདུས་
བྱས་སྐྱེ་བ་ལ་བགེགས་མི་བྱེད་པའི་ངོ་བོར་གནས་པའི་ཕྱིར་རོ། །དེ་ལ་འབྲས་བུ་རྣམ་པར་གཞག་པ་ཡང་མེད་དེ། འབྲས་བུ་འཛིན་པ་དང་དམིགས་པའི་མཐུ་མེད་པའི་ཕྱིར་རོ། །དེ་ཉིད་ཀྱི་ཕྱིར་རྒྱུ་རྣམ་པ་དྲུག་མི་སྲིད་པའི་ཕྱིར་དང་ཞེས་བྱ་བ་རྒྱས་པར་སྨོས་སོ། །
འདི་ལ་ལྷན་ཅིག་འབྱུང་བའི་རྒྱུ་དང་མཚུངས་པར་ལྡན་པའི་རྒྱུ་ནི་མི་སྲིད་དོ། །དེ་དང་ཆོས་འགའ་ཡང་ལྷན་ཅིག་མི་འབྱུང་བའི་ཕྱིར་དང་། མཚུངས་པར་མི་ལྡན་པའི་ཕྱིར་རོ། །འདི་ལ་སྐལ་བ་མཉམ་པའི་རྒྱུ་ཡང་འགའ་ཡང་མེད་དེ། འདུས་བྱས་དང་མི་འདྲ་བའི་ཕྱིར་
དང་ས་མཚུངས་པ་ཉིད་དུ་མི་རུང་བའི་ཕྱིར་རོ། །དེ་ཉིད་ཀྱི་ཕྱིར་དང་། དེ་ཉོན་མོངས་པ་ཅན་མ་ཡིན་པའི་ཕྱིར་ཀུན་དུ་འགྲོ་བའི་རྒྱུ་ཡང་མེད་དེ། རྣམ་པར་སྨིན་པའི་ངོ་བོ་ཉིད་མ་ཡིན་པའི་ཕྱིར་འདི་ལ་རྣམ་པར་སྨིན་པའི་རྒྱུ་ཡང་མེད་དེ། རྣམ་པར་སྨིན་པའི་ཆོས་ནི་སེམས་ཅན་
དུ་བགྲང་བ་དང་ཁམས་སུ་གཏོགས་པ་ཡིན་ནོ། །བསྐྱེད་པར་བྱ་བ་མ་ཡིན་པ་ཁོ་ནའི་ཕྱིར་ཡང་དེ་ལ་རྒྱུ་འདི་དག་མེད་དོ། །བསྐྱེད་པར་བྱ་བ་མ་ཡིན་པ་ཉིད་ཀྱི་ཕྱིར་འདི་ལ་བྱེད་རྒྱུའི་རྒྱུ་ཡང་མེད་དེ། དེ་ཉིད་ཀྱི་ཕྱིར། ཅིའི་ཕྱིར་ལམ་འབྲལ་བའི་བྱེད་རྒྱུའི་རྒྱུར་མི་འདོད་ཅེ་ན།
འདི་ལྟར་དེ་ནི་སྐྱེ་བ་ལ་བགེགས་མི་བྱེད་པའི་ངོ་བོར་རྣམ་པར་གཞག་པ་ཡིན་ན་འདུས་མ་བྱས་ནི་སྐྱེ་བ་དང་ལྡན་པ་མ་ཡིན་ནོ་ཞེས་བྱ་བ་སྨོས་སོ། །དུས་སུ་མ་གཏོགས་པའི་ཕྱིར་ཡང་འདི་ལ་རྒྱུ་དག་མེད་དེ། རྒྱུ་ནི་དུས་སུ་གཏོགས་པའི་ཆོས་ཀྱི་ཡིན་པར་རྣམ་པར་གཞག་

གོ། །དེ་ལྟར་ན་རྒྱུ་རྣམ་པ་དྲུག་མི་སྲིད་པའི་ཕྱིར་འདུས་མ་བྱས་ལ་རྒྱུ་མེད་དོ། །འབྲས་བུ་རྣམ་པ་ལྔ་མི་སྲིད་པའི་ཕྱིར་འདུས་མ་བྱས་ལ་འབྲས་བུ་ཡང་མེད་དོ། །ཅིའི་ཕྱིར་ཞེ་ན། རེ་ཞིག་སྤྱིར་དུས་ལས་རྣམ་པར་གྲོལ་བ་ལ་འབྲས་བུ་འཛིན་པ་དང་། སྨིན་པའི་མཐུ་མེད་
པའི་ཕྱིར་ཏེ། འདི་སྐད་དུ། ལྔ་པོ་ད་ལྟར་འབྲས་བུ་དག །འཛིན་ཏེ་གཉིས་ནི་འབྱིན་པར་བྱེད། །ཅེས་བྱ་བ་དེ་ལྟ་བུ་ལ་སོགས་པ་འབྱུང་བ་ཡིན་ནོ། །གཞན་ཡང་རེ་ཞིག་བདག་པོའི་འབྲས་བུ་ནི་མེད་དེ་དེ་ནི། སྔོན་འབྱུང་མ་ཡིན་འདུས་བྱས་ནི། །འདུས་བྱས་ཁོ་ནའི་
བདག་པོའི་འབྲས། །ཞེས་འབྱུང་བས་ལྷན་ཅིག་སྐྱེས་པ་དང་ཕྱིས་བྱུང་བ་ཡིན་ན། དེ་ཡང་སྐྱེ་བ་དང་ལྡན་པ་མ་ཡིན་པས་འདི་ལ་འབྲས་བུ་ལྷན་ཅིག་སྐྱེས་པ་དང་ཕྱིས་སྐྱེས་པ་མེད་དོ། །སྐྱེ་བ་དང་ལྡན་པ་མ་ཡིན་པ་ཉིད་ཀྱི་ཕྱིར་རྒྱུ་མཐུན་པའི་འབྲས་བུ་ཡང་མེད་དོ། །
རྒྱུ་མཐུན་པའི་འབྲས་བུ་ནི་སྐྱེ་བ་དང་ལྡན་པ་དང་འདྲ་བའི་ཆོས་སྐྱེ་བ་དང་ལྡན་པ་ཡིན་ནོ། །དེ་ཉིད་ཀྱི་ཕྱིར་དང་། སྐྱེས་བུའི་བྱེད་པ་མེད་པའི་ཕྱིར་འདུས་མ་བྱས་ལ་སྐྱེས་བུ་བྱེད་པའི་འབྲས་བུ་ཡང་མེད་དེ། །གང་གི་མཐུས་གང་ཞིག་སྐྱེ་བའམ་འཐོབ་པ་དེ་ནི་དེའི་སྐྱེས་
བུའི་བྱེད་པའི་འབྲས་བུ་ཡིན་ནོ། །དེ་ཉིད་ཀྱི་ཕྱིར་ན་བྲལ་བའི་འབྲས་བུ་ཡང་མེད་དེ། བྲལ་བ་ནི་ལམ་གྱི་སྟོབས་ཁོ་ནས་འཐོབ་ན་ལམ་དེ་ཡང་འདུས་བྱས་ཡིན་ནོ། །རྣམ་པར་སྨིན་པའི་རྒྱུ་དང་ཆོས་མི་མཐུན་པའི་ཕྱིར་རྣམ་པར་སྨིན་པའི་འབྲས་བུ་ཡང་མེད་དེ། །རྣམ་
པར་སྨིན་པའི་འབྲས་བུ་རྒྱུ་ནི་ཟག་པ་དང་བཅས་པ་ཡིན་ན། འདུས་མ་བྱས་ནི་ཟག་པ་དང་བཅས་པ་ཡང་མ་ཡིན་ནོ། །རྣམ་པ་གཅིག་ཏུ་ན་རྒྱུ་རྣམ་པ་ལྔ་དང་ཆོས་མི་མཐུན་པའི་ཕྱིར་འབྲས་བུ་རྣམ་པ་ལྔ་མི་སྲིད་པས་འདུས་མ་བྱས་ལ་འབྲས་བུ་མི་སྲིད་དོ། །
གལ་ཏེ་ལམ་འབྲལ་བའི་བྱེད་རྒྱུའི་