Luận tạng Tây Tạng (Tengyur) — Tập 111

མས་ལ། །རྟག་ཏུ་སྦྱར་བ་དེ་ཡི་བློ་འཇུག་སྟེ། །ཁེངས་པ་ང་རྒྱལ་ཅན་གྱིས་གླགས་མེད་ཅིང་། །རྒྱལ་པོ་དག་གིས་དེ་ནི་བསྟན་པར་འགྱུར། །དེ་ཡི་ལས་དགེས་བསྒྲུབས་པའི་འབྲས་བུ་བས། །དབང་པོ་ནམ་ཡང་ཉམས་པར་འགྲོ་བ་མེད། །དེ་ཕྱིར་འཇིག་རྟེན་གསུམ་གྱིས་མཆོད་འོས་པའི། །

འཁོར་ལོ་ཟློག་བྱེད་སྟོན་པའི་མཆོག་ཏུ་འགྱུར། །གནོད་སེམས་གདུང་བའི་རིམས་ནད་ཡོངས་བསལ་ཞིང་། །རང་བཞིན་དགེ་ཚུལ་ཕུན་སུམ་ཚོགས་པས་ན། །ཤིན་ཏུ་ཞི་ཞིང་གསལ་བའི་ངང་ཚུལ་གྱིས། །ཡིད་ཀྱིས་མོས་པ་ཤིན་ཏུ་གསལ་བར་འགྱུར། །བྱམས་པའི་རོ་བདེ་ཁྱད་པར་
ཐོབ་པས་ན། །འཚེ་བའི་ཚུལ་ལམ་འཐབ་མོ་འཁྲུག་ལྡན་དང་། །འཕགས་མིན་སྤྱོད་པ་ལས་ངན་རྣམ་པ་ལ། །དེ་ཡི་བློ་ནི་ནམ་ཡང་འཇུག་མི་འགྱུར། །ལས་རུང་འཇམ་པའི་ཡིད་ཀྱི་ལས་ལྡན་པ། །ཚངས་པའི་འཇིག་རྟེན་དེ་ལ་དཀོན་པ་མེད། །འཇིག་རྟེན་ཀུན་དུ་འཕགས་དང་མཉམ་
འགྱུར་ཞིང་། །འགྲོ་བས་ལྷ་བཞིན་གུས་པས་མཆོད་པར་འགྱུར། །སེམས་ཅན་ཀུན་ལ་ཕན་དགའ་ཡང་དང་ཡང་། །དབྱར་གྱིས་བསྙོགས་པའི་ཆུ་ཀླུང་ཆུ་བོ་དག །སྟོན་དུས་གསལ་བར་དངས་པར་བྱ་བ་བཞིན། །འགྲོ་བ་ཀུན་གྱི་ཡིད་ལ་དང་བ་བསྐྱེད། །ཀུན་གྱིས་བལྟ་ན་ཡིད་འོང་
བཟང་བ་དང་། །ཡེ་ཤེས་རྒྱུས་བྱུང་ཚུལ་མཆོག་རྨད་བྱུང་བ། །འཇིག་རྟེན་རྣམ་ཤེས་སོ་སོར་བསྒྲུབ་པ་དག །སངས་རྒྱས་བསྒྲུབ་ཚེ་རྣམ་པ་གཅིག་ཏུ་བསྒྲུབ། །ལོག་པར་ལྟ་བའི་འདམ་ལ་མི་འདུག་ན། །དེ་བས་བསྒྲུབ་པའི་གྲོགས་དང་ཕྲད་པར་འགྱུར། །རང་གི་ལས་བཞིན་འགྱུར་བར་
ལམ་མཐོང་བས། །སྡིག་པའི་ལས་རྣམས་དེ་ནི་ཡོངས་སུ་སྤོངས། །རྒྱལ་བ་རྣམས་ལ་དད་པ་མི་བཟློགས་ཤིང་། །ངོ་མཚར་བཀྲ་ཤིས་རྣམས་ཀྱིས་ཉོན་མོངས་མེད། །འཕགས་པའི་ལམ་ལ་གནས་པ་དེ་འཐོབ་སྟེ། །དེ་ཕྱིར་དེ་ནི་ཁྱད་པར་འགྲོ་བ་འཐོབ། །འཇིག་ཚོགས་ལྟ་བས་
ཡང་དག་འཕགས་པས་ན། །རྒྱུ་རྣམས་ཟད་ཕྱིར་ངན་འགྲོར་དེ་མི་འགྲོ། །ཆགས་མེད་ཡེ་ཤེས་མཆོག་དང་དེ་ལྡན་པས། །ས་དང་མཐོ་རིས་ཆགས་པ་མེད་པར་འགྲོ། །འགྲོ་བའི་དོན་ལ་མཐུ་ཆེ་དཔའ་བ་ཡི། །ཐམས་ཅད་མཁྱེན་མྱུར་རྒྱལ་དབང་ཆོས་ཀྱི་རྣམས། །རང་རྒྱལ་ལ་སོགས་
ཐོབ་པར་མ་གྱུར་པའང་། །ཐམས་ཅད་དེ་ལ་དེ་ཕྱིར་མངོན་དུ་འགྱུར། །དེ་འདྲའི་ལོངས་སྤྱོད་ཡོན་ཏན་རྒྱན་ལྡན་ཞིང་། །རང་ལ་དབང་ཡོད་བསྒོམ་འོས་དེ་དགའི་རྒྱུ། །མཁས་པ་སུ་ཞིག་ཡང་དག་ལེན་མི་བྱེད། །སེམས་ཅན་ཕན་དགའ་དེ་ལེན་ཅི་ཞིག་སྨོས། །ལྷ་རྫས་དགའ་རྒྱུ་

མི་ཡི་ལོངས་སྤྱོད་དང་། །བདེ་མཆོག་རོ་མཆོག་ལྷ་ཡི་ཕུན་སུམ་ཚོགས། །ཚུལ་ཁྲིམས་རྒྱུས་བྱུང་ཅི་ཞིག་ངོ་མཚར་ཆེ། །སངས་རྒྱས་ཆོས་རྣམས་དེ་ལས་བྱུང་བ་ལྟོས། །ཚུལ་ཁྲིམས་ཉམས་པས་རང་དོན་མི་ནུས་ན། །གཞན་དོན་ཚུལ་ལ་མཐུ་ཡོད་ག་ལ་འོང་། །
དེ་ཕྱིར་གཞན་དོན་ལེགས་པར་བརྩོན་པ་ཡིས། །འདི་ལ་རིམ་གྲོ་གློད་པར་རིགས་པ་མིན། །དེ་བས་མི་བཟད་འཇིགས་པ་མཐོང་བྱ་ཞིང་། །སྤང་འོས་ཆུང་ཡང་རྣམ་པར་སྤང་བར་གྱིས། །བྱང་ཆུབ་སེམས་དཔས་ལུང་བསྟན་ཚུལ་ཁྲིམས་དག །རང་གི་བདེ་ལ་བརྐམ་པས་བྲལ་
མི་བྱ། །བུད་མེད་ལུས་དང་ཚུལ་སྤྱད་མཐོང་སྩོགས་པའི། །སྐབས་ཀྱི་ཉེས་པས་ཤག་ཤིག་ཚུལ་མི་བཅང་། །མི་སྲུན་སྐྱེ་བོ་ཉོན་མོངས་རྣམ་པས་ཀྱང་། །ཚུལ་ཁྲིམས་འདྲན་འདྲེན་རྣམ་པ་ཡོངས་སུ་སྤངས། །གཅིག་ཏུ་དཀར་ཆོས་ཚོགས་ནི་བསགས་བྱས་ཤིང་། །རྙོག་དང་
རྣམ་བྲལ་ཚུལ་ཁྲིམས་བསྟེན་པར་བྱ། །རང་དབང་གྱུར་ལས་ཉམས་སུ་བདེ་བ་དང་། །མཁས་པས་བསྔགས་པའི་རྒྱན་ལྡན་ཚུལ་ཁྲིམས་བསྲུང་། །བསླབ་པའི་གནས་སྐབས་ཚང་བར་ཡོངས་རྫོགས་པས། །ཀུན་རྫོབ་བསྙེམས་མེད་ཚུལ་ཁྲིམས་ཡང་དག་བསྟེན། །རྣམ་དག་
སེམས་ལ་གཟུགས་བརྙན་གྱུར་པ་ཡི། །གཞན་དོན་རོ་གཅིག་སྦྱོར་བས་དེ་དག་བསྲུང་། །དྲན་པའི་གཞི་ལྡན་དབང་པོ་བསྡམས་བྱས་ཤིང་། །ཚུལ་ཁྲིམས་བསྲུང་ལ་ཤིན་ཏུ་བརྩོན་པར་བྱ། །འཇིག་རྟེན་ཚུལ་ཁྲིམས་འཆལ་པ་མང་པོའི་མུན། །ཉི་མའི་འོད་ཀྱིས་གསལ་བ་ཇི་བཞིན་
གསལ། །སྡུག་བསྔལ་གཉེན་པོའི་དོན་དུ་བསྟེན་པ་ཡང་། །ལུས་ཀྱི་རྨ་བསྐུའི་རྡུལ་ལ་སོགས་པ་དང་། །རིགས་པས་འཐོབ་པས་ཆོ་ག་བསམ་བྱས་ཤིང་། །གཞན་གདོང་ལྟ་བའི་རེ་བ་མེད་པར་བྱ། །ཚུལ་དང་མཐུན་ཞིང་ཡོན་ཏན་འབྱུང་བའི་རྒྱུ། །ཡིད་བཞིན་དགའ་བ་ཀུན་གྱི་སྤྱོད་གྱུར་ཀྱང་། །
ངོ་མཚར་མེད་པས་ང་རྒྱལ་སྤང་བྱ་ཞིང་། །དེ་ལས་བྱུང་བའི་གྲགས་པ་བསྙེམས་མི་བྱ། །ཐོབ་པའི་ཡོན་ཏན་རྣམ་པ་གཟུགས་བརྙན་དག །མཛའ་བའི་ཚུལ་གྱིས་དགྲ་དང་ཉེ་བ་བཞིན། །པདྨའི་ནགས་ལ་ཟླ་བའི་འོད་གསལ་ལྟར། །བརྟུལ་ཞུགས་ལྷོད་པ་རྣམས་ལ་བདེ་བ་གནོད། །ཚུལ་

ཁྲིམས་ཡོན་ཏན་བསྒོམ་པའི་ཚུལ་དུ་གསུངས། །ཡོན་ཏན་མ་ལུས་བྱང་ཆུབ་སེམས་ལ་གནས། །བྱང་ཆུབ་མཆོག་སེམས་སྙིང་རྗེའི་རྒྱུ་ལས་བྱུང་། །དེ་བས་སྙིང་རྗེའི་ངང་ཚུལ་ལྡན་པར་བྱ། །གང་ཞིག་འདོད་པའི་ཁམས་ལ་མི་གནས་ཤིང་། །གཟུགས་ཀྱི་ཁམས་ལའང་དེ་བཞིན་མི་
གནས་ཏེ། །གཟུགས་མེད་ཁམས་ལའང་དེ་བཞིན་མི་བརྟེན་པ། །དེ་ནི་ཚུལ་ཁྲིམས་ཡང་དག་ཡིན་པར་བརྗོད། །གང་ཞིག་འཇིག་རྟེན་དཔག་ཡས་སེམས་ཅན་དག །མཐའ་དག་ཚུལ་ཁྲིམས་དག་ལ་དགོད་མོས་ཤིང་། །འཇིག་རྟེན་རྔན་ཕྱིར་ཚུལ་ཁྲིམས་སྟེན་བྱེད་པ། །དེ་ནི་ཚུལ་
ཁྲིམས་ཕ་རོལ་ཕྱིན་པར་གསུངས། །དེ་བས་ངན་སོང་འཇིགས་དང་རྒྱལ་སྲིད་དང་། །མཐོ་རིས་ཕུན་སུམ་ཚོགས་པ་སྨོན་བཙལ་ཏེ། །ཚུལ་ཁྲིམས་དྲི་མེད་ཡང་དག་བསྲུང་བྱ་ཞིང་། །འཇིག་རྟེན་དོན་ལ་བརྩོན་པས་ཚུལ་ཁྲིམས་བསྟེན། །ཚུལ་ཁྲིམས་དེ་ནི་ཁྱད་པར་ཐོབ་པའི་ལམ། །
སྙིང་རྗེས་ངང་ཅན་རྣམས་དང་མཉམ་པར་བསྒྲུབ། །ཡེ་ཤེས་གཙང་མ་ལུས་ཀྱི་རང་བཞིན་ཏེ། །སྐྱོན་བྲལ་རྒྱན་དུ་འགྱུར་བའི་མཆོག་ཅེས་བྱ། །ཁམས་གསུམ་ཀུན་དུ་ཡིད་འོང་དྲི་བསུང་དང་། །རབ་ཏུ་བྱུང་དང་མི་འགལ་བྱུག་པ་ཡིན། །ཆ་ལུགས་མཐུན་ཡང་ཚུལ་ཁྲིམས་ལྡན་གྱུར་ན། །
མི་ཡི་ནང་ན་དེ་ནི་འཕགས་པར་འགྱུར། །ཚིག་ཏུ་མ་བརྗོད་ཚིགས་སུ་མ་གྱུར་ཀྱང་། །ཉམས་སུ་མཁོ་བའི་ལོངས་སྤྱོད་རིམ་གྲོ་འདུ། །སྡིག་པ་མེད་པར་འཇིག་རྟེན་ཀུན་སྡུད་དེ། །ཆགས་མེད་མ་བསྒྲུབས་དབང་ཕྱུག་ཐོབ་པར་འགྱུར། །བརྗོད་དུ་མི་འོས་རིགས་སུ་འབྱུང་བ་དང་། །ཕན་
ཞིང་དབེན་པ་གང་ཡང་མ་བྱས་ཤིང་། །སྔོན་ཆད་མི་ཤེས་སྐྱེ་བོ་ཐམས་ཅད་དང་། །ཚུལ་ཁྲིམས་ལྡན་པའི་སྐྱེ་བོ་དེ་ལ་འདུད། །རྐང་པས་བཀྲ་ཤིས་གྱུར་པའི་རྡུལ་དག་ཀྱང་། །སྤྱི་གཙུག་དམ་པས་བླངས་ཤིང་ལྷ་དང་མི། །ཕྱག་འཚལ་མགོས་གཏུགས་ཐོབ་པ་ཀུན་དུ་ཁྱེར། །དེ་ཕྱིར་
ཚུལ་ཁྲིམས་དཔལ་ལྡན་རིགས་མཆོག་ཡིན། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ལེའུའོ།། །།བདུད་རྣམས་ཐམས་ཅད་ཡོངས་སུ་རྨོངས་བྱེད་ཅིང་། །རྣམ་ཐར་ཐོབ་བྱེད་བདེ་བར་གང་གསུངས་པའི། །བཟོད་པ་ཤིན་ཏུ་ཕན་པ་སྒྲུབ་བྱེད་པ། །དེ་ལ་སུ་ཞིག་ནན་ཏན་མི་བྱེད་

ཡོད། །གཞན་ལ་གནོད་བྱེད་ནམ་ཡང་མི་ཤེས་པ། །བརྟན་པ་རྣམས་ཀྱི་ཡིད་འོང་ངང་ཚུལ་ཏེ། །འཇིག་རྟེན་དོན་བྱེད་སྙིང་རྗེའི་ཚུལ་བསྙེམས་པ། །ཡོན་ཏན་མཐུན་པའི་མིང་ནི་བཟོད་པ་ཡིན། །གཞན་དོན་མཐུན་པའི་ཡིད་དང་ལྡན་པ་ལ། །ཚུལ་གྱི་དམ་པ་བཟོད་
པ་ཡིན་ཞེས་གསུངས། །འཇིག་རྟེན་ལེགས་པ་ཕུན་སུམ་ཚོགས་པ་དག །ཁྲོ་བའི་སྐྱོན་ལ་བཟོད་པས་ཡོངས་སུ་སྐྱོབ། །མཐུ་ལྡན་རྣམས་ཀྱི་རྒྱན་གྱི་དམ་པ་སྟེ། །དཀའ་ཐུབ་ཚུལ་འཆང་རྣམས་ལ་སྟོབས་ཀྱི་ཚུལ། །གནོད་སེམས་འབྲོག་གི་མེ་ལ་ཆུ་ཡི་རྒྱུན། །འདི་ལ་གཞན་ལ་
གནོད་དགུ་བཟོད་པས་སེལ། །སྐྱེ་བོ་མཆོག་གི་བཟོད་པའི་གོ་ཆ་ལ། །མི་སྲུན་སྐྱེ་བོའི་ཚིག་གི་མདས་རྡུགས་པས། །དེ་དག་བསྟོད་པའི་མེ་ཏོག་བཟང་འགྱུར་ཞིང་། །གྲགས་པའི་ཕྲེང་བ་ཡིད་དུ་འོང་བར་འགྱུར། །སྐྱེ་བོ་གདུག་པའི་ངག་གི་མཚོན་གྱི་རྨ། །ཡེ་ཤེས་ཟླ་བ་བཞིན་དུ་སིམ་
པར་བྱེད། །བརྟུལ་ཞུགས་འཆང་བ་བརྟན་པའི་རང་བཞིན་ཏེ། །བཟོད་པ་དེ་ནི་ཡོན་ཏན་ཚོགས་ཀྱི་གནས། །ཟབ་ཅིང་བརྟན་པའི་སྙིང་པོར་གྱུར་པ་སྟེ། །ཁྲོ་བའི་གདུང་བ་གཞིལ་བ་དབྱར་དང་འདྲ། །ཡོན་ཏན་རྒྱ་མཚོའི་རླབས་ཀྱིས་བརླབས་པ་ཡི། །སྒྲ་སྙན་ཁྱབ་པ་བཟོད་པའི་མཐུ་
ལས་བྱུང་། །ཚངས་རིས་འཇིག་རྟེན་དག་ཏུ་འཛེགས་པ་ལ། །སྐས་ཀྱི་ཐེམ་བཞིན་སྐྱོ་བའི་སྐྱོན་དང་བྲལ། །ཡོན་ཏན་མཛེས་ལྡན་མཚན་རབ་བརྒྱན་པ་ཡི། །གཟུགས་བསྒྲུབ་བཟོ་ཡི་གནས་ཀྱང་བཟོད་པ་ཡིན། །སྐྱོན་གྱི་ཤིང་ཆེན་ཁོན་བཟོད་ཆུ་བོ་བཞིན། །རྫོགས་པའི་བྱང་ཆུབ་
སེམས་ཀྱིས་སྤེལ་བ་ཡིན། །བསོད་ནམས་ཆུ་ཡི་ཚོགས་དང་རྟག་ཏུ་མཐུན། །འཇིག་རྟེན་གཞན་དུ་ཕན་དགེ་རྫོགས་པར་བསྒྲུབ། །འགྲོ་ལ་ཕན་དོན་འཕེལ་བའི་མཆོག་ཀྱང་ཡིན། །གྲགས་པའི་སྙན་པའི་རང་བཞིན་ཕུལ་གྱི་རྒྱུ། །ཡོན་ཏན་ཡིད་བསྒྲུབ་གནས་ཀྱང་བཟོད་པ་ཡིན། །
སྙིང་རྗེས་སེམས་ཅན་དབེན་པར་མཐོང་བས་ན། །འཁོར་བའི་ཉེས་པས་དེ་ནི་སྐྱོ་མི་འགྱུར། །རང་གི་ལས་དགེ་འཇིག་རྟེན་ཕན་བྱེད་པས། །འཇིག་རྟེན་ཀུན་དུ་གྲགས་པའི་ཚོགས་སུ་འགྱུར། །ཡེ་ཤེས་མཆོག་གིས་སྦྱངས་པའི་བཟོད་ལྡན་ན། །མཚར་འཛིན་དཔྱ་བ་ཀུན་གྱིས་འགོ་

བ་མེད། །མི་རྟག་བཟོད་པའི་མཐུ་དང་ལྡན་པས་ན། །བདེ་བའི་རྣམ་པས་དགའ་བར་འགྱུར་བ་མེད། །གནོད་པའི་རྣམ་པ་མི་བཟད་མང་པོས་ཀྱང་། །སྐྱེས་མཆོག་དེ་དག་ཡིད་ནི་འགྱུར་བ་མེད། །བཟོད་པའི་སྟོབས་ཀྱིས་ཤིན་ཏུ་བརྟན་པ་ན། །བྱང་ཆུབ་མཆོག་སྒྲུབ་མོས་པ་མང་
བར་འགྱུར། །བཟོད་པས་བརྟན་པའི་སྤྱོད་པ་དམ་པ་དེས། །དཀའ་ཐུབ་དཀའ་བ་ཀུན་དུ་སྟོན་བྱེད་ཅིང་། །མུ་སྟེགས་དྲེགས་པས་མཐོ་བའི་བསམ་པ་དག །ཕན་པའི་བསམ་པས་བཅིལ་ཞིང་དམའ་བར་བྱེད། །འཇིག་རྟེན་རྨོངས་པ་བདག་སྙམ་ཆགས་གྱུར་ཏེ། །ལྷག་མ་གཞན་
སྙམ་ང་རྒྱལ་འཆང་བ་དག །དེ་ཡི་གནོད་པས་ཟིལ་གནོན་སེམས་གྱུར་ཅིང་། །བཟོད་དང་མི་ལྡན་ཡོངས་སུ་གདུང་བར་འགྱུར། །སྐྱེས་མཆོག་བསམ་པ་སྙིང་རྗེའི་མགོན་ལྡན་ཞིང་། །བཟོད་པས་བཀྲ་ཤིས་བསྒྲུབ་པ་འཆང་བ་དང་། །བདག་ཏུ་ལྟ་བ་ཡོངས་སུ་སྤངས་པ་ལ། །གནོད་
བྱེད་གཞན་དང་ཉེ་ཡང་གནོད་པ་མེད། །བརྟན་པ་ཉམ་ཆུང་སེམས་ཀྱི་སྐྱོན་གྱུར་པའི། །ཁྲོ་བ་ལོག་པ་རྣམ་པར་རྟོག་ལས་བྱུང་། །ཡང་དག་རྟོག་པ་ཡིད་ལ་ཞི་སྐྱེ་ཞིང་། །བཟོད་པའི་རྣམ་པ་མཉམ་པར་གཞོག་པར་བྱེད། །ཆུ་ལ་ཟླ་བའི་གཟུགས་བརྙན་ཡོད་འདྲ་བའི། །བཟོད་པའི་རྣམ་
རྟོག་ཞི་ལ་བརྟེན་པ་ལས། །འཕགས་པས་རྟག་ཏུ་སྐབས་མེད་འཕགས་པར་བྱ། །རྣམ་རྟོག་ཞི་བ་དོན་དམ་བཟོད་པ་ཞེས། །བཟོད་པའི་ཡང་དག་ཉིད་མཁྱེན་དེ་དག་གསུངས། །དེ་བས་འཇིག་རྟེན་མི་འདྲ་རྟོགས་བྱ་ཞིང་། །རྣམ་རྟོག་ཉེ་བར་ཞི་ལ་ནན་ཏན་གྱིས། །མིག་ནི་མིག་ཏུ་ཟད་ན་
ཅི་སྟེ་ཁྲོ། །རྣ་བ་ལ་སོགས་དེར་ཟད་ཁྲོ་མེད་ཅེས། །དེ་ལྟར་གང་བཟོད་སྐྱེ་མཆེད་ལྟོས་པ་སྟེ། །དེ་ནི་དོན་དམ་ཉིད་དུ་བཟོད་པ་མིན། །སྒྲ་དང་ཚིག་ནི་མི་རྟག་རང་བཞིན་ཏེ། །སྒྲ་དང་རྣམ་རྟོག་འདི་ཡང་མི་རྟེག་ཅེས། །གང་བཟོད་དེ་ནི་མི་རྟག་རྟོག་པ་སྟེ། །བཟོད་པའི་མཆོག་ཏུ་དེ་ཡང་གསུངས་
པ་མིན། །ཉེས་པ་བྱེད་པ་གང་ལའང་ཡོད་པ་མིན། །གང་ལ་བྱ་བ་དེ་ཡང་མེད་དོ་ཞེས། །གང་བཟོད་དེ་ནི་བདག་མེད་སྦྱར་བ་སྟེ། །དེ་ཡང་བཟོད་པའི་ཕུལ་དུ་ཕྱིན་པ་མིན། །བདེ་དང་སྡུག་བསྔལ་བསྟོད་དང་སྨད་པ་དག །ཀུན་ཀྱང་རྟེན་ཅིང་འབྲེལ་འབྱུང་དངོས་པོ་ཞེས། །གང་བཟོད་དེ་ནི་

རྟེན་འབྲེལ་རྟོགས་བྱའི་ས། །བཟོད་པ་ཤིན་ཏུ་མཉམ་བཞག་དེ་མ་ཡིན། །འདི་ནི་ཡོངས་སུ་རྨོངས་པས་བསླུས་གྱུར་པས། །བསམ་པ་ལོག་གྱུར་དེ་འདྲ་བདག་མིན་ཞེས། །གང་བཟོད་དེ་ནི་མཐོན་དམན་བསམ་པ་སྟེ། །བཟོད་པའི་ཕུལ་གྱི་གོ་སྐབས་དེ་ལ་མེད། །སྒྲ་སྐད་
ཡི་གེ་སྒྲ་སྙན་ཇི་བཞིན་ཏེ། །རེ་རེ་བརྗོད་ཅིང་དེ་བཞིན་འཇིག་པས་ན། །སུ་ལ་སུ་ཞིག་ཇི་ལྟར་གནོད་འགྱུར་ཞེས། །བཟོད་པ་དེ་ཡང་བཟོད་པའི་ཕུལ་མ་ཡིན། །འདི་ནི་བདག་གི་སྡིག་པ་ཟད་བྱའི་ཕྱིར། །རང་གི་ཆོས་ལ་གནོད་པའང་མི་ལྟ་ན། །བདེ་གཤེགས་དམ་པ་ཅི་རོབ་མ་
ཡིན་ཞེས། །གང་བཟོད་དེ་ནི་མིང་ཙམ་བཟོད་པ་མིན། །རང་གི་ལས་བཞིན་འགྱུར་བ་རྟོགས་བྱ་ཞིང་། །དེ་ཡི་ཡོན་ཏན་རྫོགས་པས་བཟོད་བྱེད་པ། །དེ་འདྲའི་བཟོད་པའང་རྣམ་རྟོག་སྦྱོར་ཅན་ཏེ། །བཟོད་པའི་མཐར་ཕྱིན་མཆོག་ནི་དེ་མ་ཡིན། །མི་རྟག་སྡུག་བསྔལ་མི་གཙང་
བདག་མེད་པ། །བདག་ལ་བཟོད་ཀྱི་བཟློག་པ་མ་ཡིན་ཞེས། །གང་ཡིན་དེ་ནི་གཉེན་པོ་ཞི་བཟོད་ཀྱི། །གཉིས་ཀྱི་རྗེས་འབྲང་དོན་དམ་བཟོད་པ་མིན། །སྐྱེ་བོ་འདི་ནི་ཡང་དག་མི་ཤེས་པས། །དེ་ཕྱིར་གཞན་ལ་གནོད་པར་དགའོ་ཞེས། །གང་བཟོད་དེ་ཡང་མཉམ་ཉིད་མཉམ་མི་འགྲོ། །
བཟོད་པ་དེ་ཡང་རྣམ་རྟོག་སྐྱོན་ཅན་ཡིན། །མཐོ་དམན་མཉམ་པའི་རྣམ་རྟོག་རྣམ་པ་དག །གང་ཚེ་མ་ལུས་ཡང་དག་ཞི་གྱུར་པ། །དེ་ནི་བཟོད་པ་བླ་མེད་དམ་པ་ཞེས། །གཉིས་མེད་ལམ་ལ་སྤྱོད་པ་དེ་དག་གསུངས། །རང་དང་གཞན་དང་གཉི་ག་རྒྱུ་མེད་ལས། །དངོས་པོ་གང་ཡང་
འབྱུང་བ་མེད་པ་དང་། །རང་དང་གཞན་དང་གཉི་ག་རྒྱུ་མེད་ལས། །དངོས་པོ་གང་ཡང་འཇིག་པར་འགྱུར་བ་མེད། །ཡོད་དང་མེད་ལ་སྐྱེ་བ་མེད་པས་ན། །སྐྱེ་བ་མེད་ཕྱིར་གང་ཡང་འགག་པ་མེད། །དངོས་པོའི་རྣམ་རྟོག་རང་བཞིན་སྟོང་པ་ཉིད། །ཡང་དག་མཐོང་ན་བཟོད་པའི་ཕུལ་
ཞེས་བྱ། །དེ་ཐོབ་གྱུར་ན་རྒྱལ་བ་འདིར་འགྱུར་ཞེས། །རྒྱལ་བ་རྣམས་ཀྱིས་རྣམ་མང་ལུང་ཡང་བསྟན། །དེ་ནི་རྟག་ཏུ་ཡང་དག་མཉམ་གཞག་ཀྱང་། །འཇིག་རྟེན་ཕན་འདོད་གྲངས་མེད་ཀུན་དུ་འབྱུང་། །ཆོས་དང་སྨོན་ལམ་ལས་ལ་དབང་ཐོབ་སྟེ། །མོས་པ་རྫུ་འཕྲུལ་སྐྱེ་བའི་དབང་

ཡང་ཐོབ། །དེ་བཞིན་སེམས་དང་ཡོ་བྱད་རྣམ་པ་དང་། །ཡེ་ཤེས་མཆོག་དང་ཚེ་ལ་དབང་བ་ཐོབ། །དབང་གི་ནོར་མཆོག་ཡུན་དུ་མི་ཟད་ཅིང་། །གཞན་དོན་ཆེ་སྒྲུབ་དེ་འདྲ་ཐོབ་གྱུར་ནས། །འགྲོ་བ་མི་བདེའི་རྒྱུན་དུ་ལྟུང་བ་དག །ཡོངས་སུ་བཟུང་ཕྱིར་དབང་ལྡན་དེ་དག་སྐྱེ། །
དེ་ཕྱིར་གཞན་དོན་ཕལ་ཆེར་བཀུར་སྤྲོ་བས། །བཟོད་པ་ཐབས་ཚུལ་འདི་འདྲ་བསྙེན་པར་བྱ། །དེ་ལ་གནས་ལ་གཞན་དོན་ཆེ་བསམ་པའི། །སྤྱོད་ཡུལ་ཡོན་ཏན་འབྲས་བུའི་རྒྱན་ལྡན་འགྱུར། །འདི་ལ་དད་པ་རྩ་བ་བརྟན་གྱུར་ན། །དེས་ཀྱང་ཐུབ་རྒྱལ་ངེས་པར་འགྱུར་ཞེས་
གསུངས། །ཆོས་ཀྱི་ལམ་ལ་དད་པ་རྒྱུན་ཆགས་ན། །བསམ་པ་ཡིད་བཞིན་ཤིང་རྟ་ཆག་མི་འགྱུར། །བཟོད་པའི་ཕ་རོལ་ཏུ་ཕྱིན་པའི་ལེའུའོ།། །།ཐམས་ཅད་བཟོད་པའི་མཐུ་ནི་སྐྱེས་གྱུར་ནས། །སྤྱོད་པའི་མཐུ་ཆེན་མཐའ་དཀའ་བརྩོན་འགྲུས་ཀྱིས། །དཔའ་
བོ་བརྟུལ་ཞུགས་ཐམས་ཅད་རྩོམ་བྱེད་པས། །ལྷའམ་བདུད་རྣམས་ལས་ཀྱང་འཕགས་པར་འགྲོ། །ཚེ་འདིར་མཐར་ཕྱིན་འཇིག་རྟེན་དོན་དག་ཀྱང་། །བརྩོན་འགྲུས་མེད་པས་མཐར་ཕྱིན་བྱ་བ་དཀའ། །ཡོངས་སུ་སྐྱོ་མེད་བརྩོན་འགྲུས་ཆེ་ལྡན་ན། །མི་འཐོབ་མི་འགྲུབ་རྣམ་པ་གང་ཡང་
མེད། །སྐྱེ་བོ་མ་རབས་ཐོག་མར་བརྩམས་མི་མོས། །བརྩམས་ནས་དབུས་སུ་སྒྱིད་ལུག་བརྩོན་འགྲུས་གཏོང་། །གཞན་དོན་ངལ་མེད་བརྩོན་འགྲུས་ལྡན་པ་ནི། །མྱ་ངན་འདས་སྟོང་སྤྱོད་པ་རྒྱ་ཆེན་རྩོམ། །ལེ་ལོས་བསླུས་པའི་འགྲོ་བ་ཕལ་ཆེར་ནི། །བརྩོན་འགྲུས་རང་དབང་ཡོད་ཀྱང་
བདག་དོན་གཏོང་། །བརྩོན་འགྲུས་ཆེ་ལྡན་གཞན་ལ་ལྟོས་མེད་ནི། །གཞན་དོན་ཁུར་ཆེན་སྐྱོ་བ་མེད་པར་འཁྱེར། །སྔ་ཕྱི་འཁོར་བའི་མཐའ་དང་མཉམ་ཙམ་དུ། །རྒྱ་ཆེ་རིང་བའི་ཉིན་དང་མཚན་གྱུར་ལ། །དེ་འདྲ་བསགས་པས་ལོ་གྱུར་དུས་རིང་བའི། །བསྐལ་པ་རྒྱ་མཚོའི་ཆུ་ཐིགས་
གྲངས་སྙེད་ཀྱིས། །བྱང་ཆུབ་མཆོག་གི་སེམས་གཅིག་སྐྱེ་འགྱུར་བ། །དེ་འདྲའི་རྣམ་པས་ཚོགས་གཞན་དེ་རེ་ཞིང་། །བསྒྲུབ་དགོས་གྱུར་ཀྱང་སྙིང་རྗེས་སྐྱོ་བསལ་ཏེ། །བྱང་ཆུབ་དམ་པ་སྒྱིད་ལུག་མེད་པར་བསྒྲུབ། །འཁོར་ཚེ་རང་གི་སྡུག་བསྔལ་སེམས་གཏང་ཞིང་། །གོ་ཆ་བརྟན་པ་དཔག་

ཡས་དེ་བསྐྱེད་ན། །བརྟུལ་ཞུགས་དཔའ་བོ་སྙིང་རྗེའི་ངང་ཅན་ལ། །ཡང་དག་བླངས་པ་དང་པོ་ཡིན་པར་བརྗོད། །འཇིག་རྟེན་མེས་བཀང་རྐང་གིས་འབོག་བྱ་ཞིང་། །ས་ཆེན་མཚོན་གྱིས་དཀྲིགས་པས་གཟིགས་བྱས་ཏེ། །བདེ་གཤེགས་ལྟ་བར་མོས་དང་གང་
ལྡན་ཞིང་། །ཆོས་ཀྱི་བདུད་རྩི་ཞི་བ་མཆོག་བསྲུང་དང་། །འཁོར་བའི་འདམ་ནས་སྐྱེ་བོ་འདི་དག་ཀུན། །བདག་གིས་བཏོན་ཏེ་བྱང་ཆུབ་བདེ་དགོད་ཅེས། །གོམས་པ་བཏེག་ཅིང་བོར་བའི་དུས་དག་ཏུ། །གང་ཞིག་དེ་འདྲར་མཉམ་འཇོག་སེམས་འཆང་དང་། །འཇིག་རྟེན་ཕན་ཕྱིར་བརྩོན་
འགྲུས་ཆེ་བསྐྱེད་ཅིང་། །གཞན་ལ་ཕན་པའི་བསོད་ནམས་མང་བསྒྲུབས་པ། །དེ་ནི་མི་ཟད་པ་ཡི་བརྩོན་འགྲུས་ཏེ། །དཔལ་ལྡན་ཡང་དག་བླངས་པ་གཉིས་ཞེས་བྱ། །བསོད་ནམས་རྣམ་པ་ཅི་སྒྲུབ་དུས་ན་ཡང་། །རྫོགས་པའི་སངས་རྒྱས་ཉིད་དུ་སྔོ་བྱེད་ན། །དེ་ནི་མི་ཟད་ཡང་དག་
བསྒྲུབ་པའི་ཕྱིར། །ཡང་དག་ལེན་པའི་མཆོག་ཅེས་ཐུབ་པས་གསུངས། །རྒྱ་མཚོ་ཆེན་པོར་ཆུ་ཐིགས་གཅིག་བོར་བ། །རྒྱ་མཚོ་མ་ཟད་དུས་སུ་ཟད་མི་འགྱུར། །དེ་བཞིན་བྱང་ཆུབ་མཆོག་ཏུ་བསྔོས་པ་ཡི། །བསོད་ནམས་རྣམ་པ་ཟད་པར་འགྱུར་བ་མེད། །དེ་ཡང་སྙིང་རྗེ་རྣམ་དག་སེམས་
ལྡན་ཞིང་། །འགྲོ་བ་རྒྱུ་དང་མི་རྒྱུ་མ་ལུས་ཀུན། །རྣམ་པ་ཐམས་ཅད་མཁྱེན་པར་བསྒྲུབ་བྱ་ཞེས། །སེམས་ཅན་དམ་པ་བསོད་ནམས་དེ་དག་རྩོམ། །སྟོང་གསུམ་ཆེན་པོའི་འགྲོ་བ་ཇི་སྙེད་པ། །ཉི་མ་གཅིག་གིས་ལ་ལ་སྒྲོལ་བྱེད་ལ། །བསྐལ་པ་དུ་མར་དེ་བཞིན་བསྒྲལ་བྱས་ཀྱང་། །སེམས་
ཅན་ཁམས་ལས་མང་པོ་མ་བསྒྲལ་ཞེས། །སེམས་ཅན་མི་ཟད་དེ་འདྲ་ཐོས་གྱུར་ཀྱང་། །མ་ལུས་སེམས་ཅན་བསྒྲལ་བར་རབ་མོས་ཤིང་། །སྒྱིད་ལུག་སྐྱོན་གྱིས་མ་བཟུང་བརྩོན་ལྡན་ན། །དོན་གྱི་སྙིང་པོ་དེ་ལ་རིང་བ་མིན། །འགྲོ་བ་ཀུན་གྱི་བསོད་ནམས་གཅིག་བསྒྲུབ་པ། །
དེ་སྙེད་བཅུ་འགྱུར་བསྒྱུར་བས་བདེ་གཤེགས་ཀྱི། །བ་སྤུའི་ཁུང་གཅིག་མངོན་པར་འགྲུབ་འགྱུར་ལ། །སྤུ་རྣམས་གཅིག་ནས་རེ་རེར་མངོན་འགྲུབ་ཅིང་། །བ་སྤུ་མངོན་སྒྲུབ་བསོད་ནམས་དེ་དག་ཚོགས། །བརྒྱ་འགྱུར་དག་ཏུ་བསྒྱུར་བའི་བསོད་ནམས་ཀྱིས། །དཔེ་བྱད་བཟང་གཅིག་

འགྲུབ་ཅིང་དེ་བཞིན་དུ། །དཔེ་བྱད་བཟང་པོའི་ལྷག་མ་ཀུན་འགྲུབ་ཅིང་། །དཔེ་བྱད་བཟང་པོས་བསྡུས་པའི་བསོད་ནམས་ཚོགས། །དེ་སྙེད་སྟོང་དུ་བསྒྱུར་བའི་བསོད་ནམས་ཀྱིས། །རྫོགས་པའི་སངས་རྒྱས་མངོན་པར་སངས་རྒྱས་ཚེ། །མཚན་ནི་སྣ་ཚོགས་རེ་རེ་འགྲུབ་འགྱུར་ལ། །
མཚན་རབ་བསྐྱེད་པའི་བསོད་ནམས་རྒྱུར་གྱུར་ཏེ། །སྟོང་དུ་བསྒྱུར་བའི་བསོད་ནམས་ཕུང་པོ་ལས། །ཟླ་བ་ཉ་ལྟར་མཛེས་ཤིང་གསལ་བ་ཡི། །མཛོད་སྤུ་མདོག་བཟང་ཡིད་འོང་འགྲུབ་འགྱུར་བ། །མཛོད་སྤུ་མངོན་སྒྲུབ་བསོད་ནམས་དེ་སྙེད་ཚོགས། །བརྒྱར་འགྱུར་སྟོང་དུ་བསྒྱུར་བའི་
བསོད་ནམས་ཀྱིས། །སྤྱི་གཙུག་བལྟར་མི་མཐོང་བའི་མཚན་ལྡན་པའི། །གཙུག་ཏོར་རྒྱན་མཛེས་སངས་རྒྱས་དབུ་འགྲུབ་སྟེ། །དེ་འདྲའི་བསོད་ནམས་སྒྲུབ་ཚུལ་དེ་དག་ཀྱང་། །བདག་གིས་བསྒྲུབ་ཅེས་བྱང་ཆུབ་སེམས་མཐོང་ན། །བརྩོན་འགྲུས་འདོར་བ་དེ་ལ་གང་གི་སྒོར། །
སྒྱིད་ལུག་ལེ་ལོའི་ཆ་ཤས་སྐབས་སུ་འགྱུར། །འཇིག་རྟེན་ཁམས་ཀུན་སེམས་ཅན་མ་ལུས་པར། །རང་རྒྱལ་རྣམས་དང་ཐམས་ཅད་འདྲར་གྱུར་ཀྱང་། །བཟོད་ལ་གནས་པའི་བྱང་ཆུབ་སེམས་དཔའ་གཅིག །ཡེ་ཤེས་དམ་པས་དེ་དག་ཀུན་པས་འཕགས། །དེ་སྙེད་བཟོད་པའི་
སྟོབས་ལ་གནས་པ་བས། །མི་ལྡོག་བྱང་ཆུབ་སེམས་དཔའ་གཅིག་འཕགས་ཏེ། །འཇིག་རྟེན་པ་དང་འཇིག་རྟེན་འདས་པ་ཡི། །དགེ་ལ་བསྒྲུབ་པ་དེ་ནི་ངལ་མི་ཤེས། །མི་ལྡོག་བྱང་ཆུབ་སེམས་དཔའ་དེ་སྙེད་པས། །སྐྱེ་བ་གཅིག་ཐོགས་རྒྱལ་སྲས་དེ་འཕགས་ཏེ། །བརྩོན་
འགྲུས་བརྟན་དང་ལྡན་པའི་ནང་ན་ཡང་། །བྱང་ཆུབ་ཤིང་དྲུང་ཕྱིན་པ་ཅི་ཞིག་སྨོས། །རྣམ་པ་དེ་འདྲའི་ཡེ་ཤེས་རྣམ་དག་དང་། །འཇིག་རྟེན་མ་ལུས་སེམས་ཅན་ཀུན་ལྡན་ཡང་། །བྱང་ཆུབ་སྙིང་པོའི་ཤིང་དྲུང་ཕྱིན་གྱུར་ལ། །བདུད་འདུལ་སྐྱེ་བ་ཐ་མའི་ཆར་མི་འགྲོ། །དེ་འདྲའི་ཡེ་
ཤེས་རྣམ་པ་དག་ལྡན་པས། །འཇིག་རྟེན་མ་ལུས་ཁམས་ཀུན་གང་གྱུར་ཀྱང་། །ཡོན་ཏན་རྣམ་མང་དེ་དག་གཅིག་སོགས་པས། །བདེ་གཤེགས་སྟོབས་ཀྱི་ཆ་ལའང་མཉམ་མི་འགྲོ། །དེ་འདྲའི་ཡེ་ཤེས་རྒྱ་མཚོ་རྨད་བྱུང་བ། །གཞན་སེམས་ཤེས་པའི་མཐུ་ལ་ཐོགས་མེད་ཅིང་། །

ཡེ་ཤེས་སྣང་བ་མཁའ་ལྟར་ཡངས་པ་ལ། །སྙིང་རྗེ་ལྡན་པ་གཅིག་པུ་ཕ་རོལ་རྒལ། །སེམས་ཅན་མ་ལུས་ཀུན་ལ་ཁྱབ་པ་ཡི། །སྙིང་རྗེ་ཆེན་པོ་འཇིག་རྟེན་ཀུན་དུ་འབྱུང་། །རྫོགས་པའི་སངས་རྒྱས་ཆོས་ཀྱི་རྣམ་པ་དག །རྨད་བྱུང་མ་ལུས་དེ་ཕྱིར་ཡང་དག་གྲུབ། །
དེ་འདྲའི་སེམས་ཅན་དམའ་བས་མཉན་དགའ་བའི། །ཡང་དག་བླང་བའི་ཡོན་ཏན་ཀུན་ལྡན་ན། །ཡང་དག་ཉིད་ལམ་ཡན་ལག་བརྒྱད་ལྡན་ཞིང་། །བརྩོན་འགྲུས་ཕུལ་བྱུང་ཤིན་ཏུ་རྣམ་པར་མཛེས། །བརྩོན་འགྲུས་རྣམ་གསུམ་དགེ་བ་སྦྱོར་བ་སྟེ། །ལུས་དང་ངག་ཡིད་བརྩོན་
འགྲུས་རྣམ་པ་ལས། །འཇུག་དང་གནས་དང་མཉམ་པར་བཞག་པ་ཡི། །བརྩོན་འགྲུས་ཕུལ་བྱུང་ཡིད་ལས་བྱུང་བ་ཡིན། །བྱང་ཆུབ་སེམས་ལ་མོས་ཤིང་ཞི་བ་དང་། །སྙིང་རྗེ་ཆེ་དང་བདག་མེད་བཟོད་པ་དང་། །འགྲོ་བ་སྡུག་བསྔལ་བསྡུ་བ་རྣམ་བཞི་དང་། །ཆོས་རྣམས་ཀུན་ལ་ཡོངས་
སུ་འཛིན་མེད་དང་། །འཁོར་བའི་འདམ་ན་ཡོངས་སུ་སྐྱོ་མེད་དང་། །ཁམས་གསུམ་ཐམས་ཅད་ཉེ་བར་མི་དམིགས་ཤིང་། །བདོག་པ་ཀུན་གཏོང་ང་རྒྱལ་འགྱུར་མེད་དང་། །བསླབ་པ་ཀུན་ལ་ཡང་དག་སློབ་པ་དང་། །གཞན་གྱི་གནོད་པས་མི་འགྱུར་བརྟན་ལྡན་ཞིང་། །སེམས་ལ་
རྣམ་འཁྲུག་ནམ་ཡང་མི་འབྱུང་དང་། །དགེ་བའི་ལས་ལ་བརྩོན་པ་བརྟན་པ་དང་། །དབེན་ལ་དགའ་བའི་རོ་གཅིག་སེམས་ལྡན་དང་། །བསམ་གཏན་བཞི་པོར་མཉམ་པར་གཞོག་པ་དང་། །བདག་མེད་ངེས་པར་རྟོགས་པའི་སེམས་ལྡན་དང་། །ཐོས་པ་མང་པོས་ངོམ་པར་མི་
འགྱུར་ཞིང་། །རིགས་པར་འཇུག་ཅིང་དེ་ལ་རྟོག་པ་དང་། །ཇི་ལྟར་ཐོབ་པ་ཡང་དག་སྟོན་བྱེད་ཅིང་། །བརྗོད་མེད་ཆོས་ཉིད་ཡང་དག་ཤེས་པ་དང་། །མངོན་ཤེས་ལྔ་ལ་མཐུ་ཆེན་ལྡན་པ་དང་། །མངོན་ཤེས་དྲུག་ལ་སྒོམ་ཙམ་བྱེད་པ་དང་། །རྫུ་འཕྲུལ་རྐང་པ་མངོན་པར་སྒྲུབ་པ་
དང་། །སྤྱོད་པ་ཚེགས་མེད་ཤིན་ཏུ་གསལ་བ་དང་། །ཡང་དག་སྤོང་ལ་སྦྱོར་བ་བྱེད་པ་དང་། །དགེ་དང་མི་དགེའི་ཕྱོགས་ལས་རྣམ་གྲོལ་ཞིང་། །དབང་པོ་ངེས་པར་བྱ་ལ་མཁས་པ་དང་། །ཆོས་རྣམས་དབང་པོ་མེད་པར་ཤེས་གྱུར་ཅིང་། །ལས་ཀྱི་ཚོགས་རྣམས་ཡོངས་སུ་

ཚོལ་བྱེད་ཀྱང་། །གར་ཡང་འགྲོ་མེད་རྨད་བྱུང་ཟབ་པ་དང་། །དེ་ལ་སོགས་པ་སེམས་སྤངས་བརྩོན་པའི་ལུས། །གཟུད་ཅིང་དགོད་པའི་ཁྱད་པར་འཕགས་པ་ཅན། །དེ་ཉིད་མི་ཟད་ཡོངས་སུ་རྫོགས་བྱའི་ཕྱིར། །དགོན་པའི་བརྩོན་འགྲུས་ཁྱད་པར་རྒྱུ་ཡང་ཡིན། །ཡེ་ཤེས་
མཆོག་གི་ལས་ལ་གནས་འཆའ་ཡང་། །མཚན་མའི་ལས་ལ་དེ་ནི་འཇུག་པ་མེད། །སྙིང་རྗེ་ཆེན་པོས་འདུས་བྱས་མི་གཏོང་ཞིང་། །བརྩོན་འགྲུས་ཆེ་ཡང་འདུས་བྱས་མེད་མི་ལྟུང་། །སྔོན་ཆད་མ་ཐོས་ཆོས་ཐོས་གནོད་པ་མེད། །ཅིས་ཀྱང་མི་ཚུགས་ཐོས་པའི་ཆོས་ཀྱང་འཛིན། །
མི་མིན་ཀུན་ཀྱང་དེ་ལ་ཕན་པར་དགའ། །ཏིང་འཛིན་རྣམ་པ་ཀུན་ཀྱང་ཐོབ་པར་འགྱུར། །ཉིན་མཚན་དུས་རྣམས་འབྲས་བུ་ཡོད་པར་ཟླ། །ཡོན་ཏན་ཚོགས་ཀྱིས་དམའ་བར་འགྱུར་བ་མེད། །མི་ཡི་ཆོས་ལས་འཕགས་པའི་དོན་རྣམས་ཀྱིས། །མེ་ཏོག་ཨུཏྤལ་བཞིན་རྣམ་པར་
འཕེལ། །གྲགས་པ་ཡང་དང་བདེ་བ་ཐོབ་པར་འགྱུར། །སེར་སྣ་དོགས་སྤངས་ཡིད་ཚུལ་མཆོག་ཀྱང་འཐོབ། །ཚེ་འདིའི་ཡོན་ཏན་ཇི་སྙེད་སྣང་བ་ཀུན། །བརྩོན་པའི་ཚུལ་འབྱུང་ཡོན་ཏན་ཆེ་བ་མེད། །ཡོན་ཏན་ཆེ་མངའ་རྫོགས་པའི་སངས་རྒྱས་ཏེ། །ཁམས་གསུམ་མཆོད་འོས་
ཉིད་ཀྱང་དེ་ལས་གྲུབ། །བརྩོན་འགྲུས་ཆེན་པོའི་ཡོན་ཏན་དེ་འདྲ་ན། །བརྩོན་འགྲུས་ཆེ་ལ་གང་ཞིང་བརྩོན་མི་བྱེད། །བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ལེའུའོ།། །།དེ་ནས་ཡེ་ཤེས་བསྐྱེད་པའི་ཕྱིར། །བསམ་གཏན་ཚུལ་ལ་བརྩོན་པར་བྱ། །འཇིག་རྟེན་ཕན་པའི་རྣམ་
པ་དག །ཡེ་ཤེས་སྣང་བས་བདེ་བར་འགྲུབ། །བསམ་གཏན་ཚུལ་གྱིས་སེམས་དག་ན། །སྟོན་གྱི་དུས་ཀྱི་སྤྲིན་བསལ་བའི། །མཁའ་ལ་ཟླ་བ་གསལ་བ་ལྟར། །ཡེ་ཤེས་ཁྱད་དུ་དང་བར་འགྱུར། །རྣམ་དག་ཚུལ་ཁྲིམས་ལྡན་བྱས་ཤིང་། །དགེ་ཕན་གྲོགས་དང་བརྟེན་བྱས་ཏེ། །བྱ་བ་ཉུང་
ཞིང་ཞི་བའི་ངང་། །དྲན་པས་བྱིན་རླབས་ཚུལ་བཅང་སྟེ། །ཤིང་དྲུང་བརྟུལ་ཞུགས་གནས་དག་གམ། །ནེའུ་གསིང་སྡུག་གུའི་ས་གཞིའམ། །ཆེད་དུ་མ་བྱས་མདངས་དགའ་བའི། །ནགས་ཀྱི་མེ་ཏོག་དྲི་ཞིམ་པའམ། །བསམ་གཏན་རྐྱེན་དུ་འོས་པ་ཡི། །ཆོག་ཤེས་འགྲོ་བའི་གནས་དག་

གམ། །འགྲོ་བའི་སྒྲ་སྐད་མི་འབྱུང་བར། །ཟབ་མོར་གནས་པའི་གནས་དག་གམ། །དགོན་པའི་ས་གཞི་བཟང་པོའམ། །སྟོང་པའི་གནས་དང་ཁྱིམ་དག་གམ། །སྨན་ལྗོངས་རི་ཁྲོད་དབེན་པ་དག །སེང་གེའི་ང་རོ་གྲགས་གནས་སམ། །འདུ་འཛི་ཉོན་མོངས་
དབེན་གྱུར་པའི། །གང་ཡང་རུང་བའི་གནས་དག་ཏུ། །སྐྱིལ་མོ་ཀྲུང་དུ་བདེར་འདུག་སྟེ། །དྲང་པོའི་ལུས་ནི་བསྲང་བྱས་ཤིང་། །དྲང་བའི་བསྲུང་བ་སེམས་གཞི་ལ། །ཉེ་བར་ཡང་དག་གཞག་བྱ་སྟེ། །སྙིང་རྗེས་ལོག་པར་རྟོགས་པ་རྣམས། །སྐབས་མེད་ཚུལ་དུ་དམ་བཅས་ཤིང་། །ཤེས་
པར་རབ་ཤེས་བྱ་བའི་དུས། །འདི་ཡིན་མྱ་ངན་འདས་དུས་མིན། །སེམས་ཅན་མྱ་ངན་མ་འདས་སུ། །མྱ་ངན་འདའ་བར་མོས་མེད་ཅེས། །དེ་ལྟར་འཇིག་རྟེན་ཕན་བསམས་ཏེ། །སངས་རྒྱས་ཉིད་དུ་མོས་བསྐྱེད་ཅིང་། །རྒྱུན་མི་འཆད་པའི་རྣལ་འབྱོར་གྱིས། །བསམ་གཏན་བསྒྲུབ་ལ་
བརྩོན་པར་བྱ། །ཡང་དང་ཡང་ཞིང་ངལ་བསོ་ན། །གཙུབས་པས་མེ་ཕྱིན་མེ་འགྱུར་ཏེ། །རྣལ་འབྱོར་ཚུལ་ལའང་དེ་བཞིན་དུ། །ཁྱད་པར་མ་ཐོབ་གཏོང་མི་བྱ། །དམིགས་པ་གཅིག་ལ་བརྟན་ཚུལ་དུ། །ཡིད་ཀྱི་བསམ་པ་བརྟན་པར་བྱ། །དམིགས་པ་མང་པོ་བརྒྱུད་པ་ལས། །འདི་
ནི་ཉོན་མོངས་འཁྲུག་པར་འགྱུར། །ལྷག་མཐོང་བརྩོན་པའི་སྟོབས་ཀྱི་མཐུས། །ཞུམ་པར་གྱུར་ན་གཟེངས་ཡང་བསྟོད། །རྒོད་པར་གང་ཚེ་གྱུར་པའི་ཡིད། །ཞི་གནས་ཚུལ་གྱིས་བཟློག་པར་བྱ། །ཏིང་འཛིན་མཐུ་ནི་མི་གཡོ་ཞིང་། །ཡང་དག་གྱུར་ན་བཏང་སྙོམས་གཞག །བདེ་
གཤེགས་ཏིང་འཛིན་ཐོབ་བྱའི་ཕྱིར། །དེ་ལ་ཆགས་པར་ཡོད་མི་བྱ། །བསམ་གཏན་དགའ་བའི་རོ་མྱང་བས། །རང་དབང་མེད་པའི་ཉམ་མི་བླང་། །བདག་གི་བདེ་ཙམ་ཐོབ་དོན་དུ། །བརྩམ་པ་རྒྱ་ཆེན་འདི་སྒྲུབ་མིན། །ལུས་དང་སྲོག་ལ་ལྟ་བ་ཡི། །ཞུམ་པས་ནོན་གྱུར་སེམས་གྱུར་
ཅིང་། །རང་གི་མགོ་བོ་ཚིག་གྱུར་ཀྱང་། །བརྩོན་འགྲུས་ལྷོད་པར་དེས་མི་བྱ། །མཚན་མའི་རྣམ་པ་ཤེས་བྱས་ཤིང་། །ཡིད་ནི་མཉམ་པར་གཞག་པའི་ཕྱིར། །དམིགས་ལས་བསམ་པ་ཉམས་གྱུར་ན། །དྲན་པས་ཕྱིར་ཡང་བསྡུ་བར་བྱ། །སྒྲིབ་པ་རྣམས་ལས་རང་གི་ཡིད། །གླང་

པོ་རང་དབང་ཐོབ་འགྱུར་ན། །ལྕགས་ཀྱུས་བཟློག་པར་བྱ་བ་བཞིན། །ལོག་པའི་ཕྱོགས་ལས་བཟློག་པར་བྱ། །དེ་ནས་སྒྲིབ་པའི་ནད་ཀྱི་རྣམས། །བསལ་བས་སོས་པའི་ཡིད་གྱུར་ཅིང་། །དབུལ་པོ་ཉམ་ཐག་ཕོངས་པ་ལས། །ལོངས་སྤྱོད་སྐྱིད་ཐོབ་ཐར་པ་བཞིན། །བདེ་དང་
ལྡན་པའི་ཡིད་ཀྱིས་ནི། །འདོད་པའི་སྐྱོན་རྣམས་བསལ་བར་བྱ། །དེ་དང་བྲལ་བས་དམིགས་པ་ཡི། །བདེ་བ་གཅིག་ནས་གཅིག་བརྒྱུད་ཀྱང་། །གློག་ལྟར་མི་རྟག་འགྱུར་བ་དང་། །དབུ་བ་གསོག་ལྟར་བདག་མེད་པའི། །རྨི་ལམ་བཞིན་དུ་དོན་མེད་པར། །བསླུ་བའི་དོན་དུ་འོངས་
འདྲ་དོར། །ཕ་རྣམས་བུ་ལ་བྱམས་པ་དང་། །བུ་རྣམས་ཕ་ལ་དེ་བཞིན་ཏེ། །མཛའ་ལ་མཛའ་བོ་བྱམས་པ་དང་། །འགྲོ་རྣམས་ཕན་ཚུན་བྱམས་པ་དག །ཡོན་ཏན་ཚོགས་ཀྱིས་བསྒྲུབ་བྱས་ཤིང་། །བརྟན་པའི་སྙིང་པོས་བརྟན་བྱས་ཏེ། །གཡུལ་དུ་གྲུ་གདོང་འདྲེན་བཞིན་གྱི། །
མཛའ་བྱམས་ས་མཚམས་འཇིགས་བྱེད་ཀྱང་། །འདི་ཚེ་བརྩལ་བའི་སྡུག་བསྔལ་དང་། །གཞན་དུ་ངན་འགྲོ་སྐྱེད་བྱེད་པའི། །རྒྱུར་གྱུར་འདོད་པའི་རྣམ་པ་ཡིན། །དེ་བས་འདོད་པ་བསྟེན་མི་བྱ། །རྣམ་རྟོག་རྣམས་ཀྱི་གཞིར་གྱུར་ཅིང་། །བདག་དང་གཞན་རྣམས་ཀུན་གྱི་ཡང་། །
ཤེས་རབ་མིག་ལྡོངས་བྱེད་པའི་རྒྱུ། །མི་བདེ་སྣ་ཚོགས་སྐྱེད་པ་ཡང་། །བདག་འདོད་དོན་ལ་བརྩོན་པར་བྱ། །རྣམ་པ་ཀུན་དུ་ཡོངས་སྤངས་པའི། །འདོད་པ་དེ་དག་གཞན་དོན་ལ། །བརྩོན་པས་དྲན་བྱར་འོས་པ་མིན། །འདོད་པ་དེ་དག་ཐོབ་པ་དང་། །ཉིན་གཅིག་བཞིན་དུ་བསྟེན་པ་དང་། །
མང་དུ་བསགས་པས་མི་ངོམས་ན། །དེ་ལས་ནད་ཆེན་གང་ཞིག་ཡོད། །བཙལ་ཚེ་རོ་མེད་ཉོན་མོངས་ལ། །བསྲུང་ཚེ་འཇིགས་པ་སྐྱེད་བྱེད་ཅིང་། །མེད་འགྱུར་མྱ་ངན་ཆེ་བསྐྱེད་ན། །དེ་ལ་འདོད་བྱེད་སུ་ཞིག་ཡོད། །གང་གི་རོ་ལ་མྱོས་གྱུར་ན། །རང་དོན་ཉིད་ཀྱང་མི་རིགས་ཏེ། །མྱོས་
འགྱུར་སྨྱོན་ཆུ་ཇི་བཞིན་པའི། །འདོད་པ་སེམས་ལྡན་སུ་ཞིག་བསྐྱེད། །དེ་ལྟར་རྣམ་པ་ཐམས་ཅད་དུ། །འདོད་པ་སྐྱོན་ལྡན་ཤེས་གྱུར་ན། །དེ་ལས་སེམས་ནི་ལྡོག་འགྱུར་ཏེ། །འབྱུང་ལམ་ཆོས་ལ་མོས་པར་འགྱུར། །དབེན་ལས་སྐྱེས་པའི་དགའ་དང་བདེ། །བག་ཡངས་ཐོབ་ལས་སྐྱེས་པ་འབྱུང་། །

ཡན་ལག་དེ་དང་ལྡན་པས་ན། །བསམ་གཏན་དང་པོ་ཐོབ་པ་ཡིན། །དེར་ནི་རྣམ་རྟོག་རྣམ་དཔྱོད་དག །འདོད་ལྡན་སྐྱོན་ལྡན་མཐོང་འགྱུར་ཞིང་། །དེ་དག་ཞི་བ་ཚོལ་བྱེད་པས། །ཏིང་འཛིན་དགའ་སྐྱེས་བདེ་བ་ཐོབ། །ནང་ནི་ཡོངས་སུ་དང་གྱུར་ཞིང་། །དེ་སེམས་
རྩེ་གཅིག་གྱུར་པ་ནི། །བསམ་གཏན་གཉིས་པའི་བསམ་གཏན་ཞེས། །གཉིས་མེད་དྲང་སྲོང་མཆོག་གིས་གསུངས། །ཡིད་ཀྱི་འཁྲུག་ལོང་ཡིན་ཤེས་ནས། །དགའ་ལས་འདོད་ཆགས་བྲལ་གྱུར་པ། །དྲན་པ་བཏང་སྙོམས་ལྡན་པ་ཡི། །བསམ་གཏན་གསུམ་པ་ཐོབ་པར་འགྱུར། །
བདེ་བའི་བསམ་པ་ཡོངས་བཏང་བས། །བདེ་དང་སྡུག་བསྔལ་མེད་གྱུར་ཅིང་། །བཏང་སྙོམས་དྲན་པས་རྣམ་དག་པའི། །བསམ་གཏན་བཞི་པ་འཐོབ་པར་འགྱུར། །དེ་ནས་མངོན་ཤེས་ལྔ་ཐོབ་སྟེ། །ཆོས་རྒྱལ་རྒྱལ་སྲིད་གནས་པ་ན། །དཔལ་ལྡན་གྲགས་པ་ཁྲེལ་དང་གཟུངས། །
དེ་ཡི་རྗེས་སུ་འབྲང་བར་འགྱུར། །གཞན་གྱི་དོན་དུ་མངོན་བསྒྲུབས་པས། །རང་རྒྱལ་ཉན་ཐོས་ཡོན་ཏན་ལ། །དེ་དག་ཤིན་ཏུ་འདས་གྱུར་ཅིང་། །ཤིན་ཏུ་ཁྱད་འཕགས་མཐུ་དང་ལྡན། །གཏོང་བ་འཇུངས་པ་འགོད་བྱེད་ཅིང་། །ཚུལ་ཁྲིམས་མེད་པ་ཚུལ་ལ་འགོད། །ཁྲོ་བ་བཟོད་ཅིང་
ངེས་པ་དང་། །སྒྱིད་ལུག་བརྩོན་འགྲུས་ཆེན་པོ་དང་། །འཁྲུག་པའི་སེམས་ལྡན་བསམ་གཏན་དང་། །ཤེས་རབ་འཆལ་པ་ཤེས་རབ་ལ། །སྙིང་རྗེ་ཆེན་པོ་སྐྱོ་མེད་པར། །བརྩོན་འགྲུས་སྤྱོད་པས་སྦྱོར་བ་བྱེད། །དེ་ནས་མཐའ་ཡས་སྤྱོད་ཡུལ་ཅན། །ཉི་མ་འོད་ཆེན་ཇི་བཞིན་དུ། །མི་ཉམས་
གསལ་བའི་འོད་ཆེན་གྱིས། །འཇིག་རྟེན་ཐམས་ཅད་སྣང་བར་བྱེད། །དེ་ནས་སེམས་ཅན་སྡིག་ཅན་དག །ངན་འགྲོར་ལྟུང་བར་གྱུར་པ་དང་། །བསོད་ནམས་ཚེ་དག་ཟད་གྱུར་ཅིང་། །ལྷ་ལས་ལྟུང་བར་གྱུར་པ་དང་། །འཇིག་རྟེན་སྡུག་བསྔལ་དེ་དང་དེས། །ཡོངས་སུ་གདུང་བར་
གྱུར་པ་དག །འཇིག་རྟེན་ཁམས་ན་གང་ཡོད་པ། །ལྷ་མིག་གསལ་བས་མཐོང་གྱུར་ཅིང་། །སྙིང་རྗེ་ཆེན་པོ་སྐྱེ་འགྱུར་ཏེ། །སྙིང་རྗེ་ལྡན་པས་བག་མེད་སྤོང་། །གཞན་དོན་སྒྲུབ་ལ་བག་ཡོད་པས། །བསམ་གྱིས་མི་ཁྱབ་མཐུ་དང་ལྡན། །དེ་ནས་འཇིག་རྟེན་ཁམས་མང་ན། །

དེ་བཞིན་གཤེགས་པ་མང་བཞུགས་དང་། །སངས་རྒྱས་ཞིང་གི་རྒྱན་དག་དང་། །དགེ་འདུན་ཕུན་སུམ་ཚོགས་མཐོང་ཞེས། །བྱང་ཆུབ་སེམས་དཔའ་ཁྱུ་མཆོག་གི །རྣམ་དག་སྤྱོད་ཡུལ་སྤྱོད་མཐོང་སྟེ། །སེམས་ཅན་གཞན་ལ་ཕན་དོན་དུ། །དཔལ་ལྡན་སྤྱོད་པ་མཐོང་གྱུར་པས། །
དེ་ལ་སྨོན་ལམ་ཆེ་སྐྱེད་ཅིང་། །སྨོན་ལམ་དཀྱིལ་འཁོར་འགྲུབ་འགྱུར་ཏེ། །གཞན་དོན་རྒྱ་ཆེན་སྔོ་བྱེད་པས། །རྒྱལ་སྲས་ཚུལ་མཆོག་ཡོངས་སུ་འགྲུབ། །མི་ལས་འདས་པའི་རྣ་བ་སྟེ། །ལྷ་ཡི་རྣ་བ་རྣམ་དག་པས། །རྒྱང་རིང་སྒྲ་རྣམས་ཉེ་བ་བཞིན། །ཆེ་ཆུང་རྣམ་པ་ཀུན་ཐོས་ཤིང་། །
སྙིང་བརྩེ་མེད་པས་གང་སྨྲས་པའི། །ཞེ་གཅོད་རོ་མེད་ཚིག་གི་རྣམས། །ཁྲོ་བའི་མེ་ལས་བྱུང་བ་ཡི། །མེ་སྟག་རྒལ་འདྲ་ཐོས་འགྱུར་ཞིང་། །ལྷ་མོའི་གླུ་རུ་སྙན་པ་དང་། །རྒྱན་གྱི་ཕར་ཕུར་སིལ་ཁྲོལ་དང་། །ལྷ་རྫས་རོལ་མོའི་སྒྲ་སྙན་པས། །མི་རྟག་ཚུལ་ཐོས་སྒྲ་ཐོས་ཤིང་། །
འཇིགས་དང་སྡུག་བསྔལ་རྣམ་པ་ལས། །མི་བཟད་མྱ་ངན་དྲག་པོའི་སྒྲ། །ཉོན་མོངས་ཉམས་བབ་ཐོས་པ་དག །མི་དགའི་རྣམ་པ་ཐོས་གྱུར་ན། །སྐུལ་མ་དྲག་པོས་བསྐུལ་བ་བཞིན། །བྱང་ཆུབ་སེམས་དཔའ་མཐུ་ལྡན་ཞིང་། །ཁོང་ནས་སྙིང་རྗེ་ཆེ་ལྡན་ཏེ། །བརྩོན་འགྲུས་མཆོག་
ནི་རྩོམ་པར་བྱེད། །འཇིག་རྟེན་སྣ་ཚོགས་འཇིག་པ་ཡི། །བདེ་གཤེགས་རྣམས་ལས་ཆོས་ཐོས་ཏེ། །མྱ་ངན་འདས་ལ་མོས་པའི་བློས། །སེམས་ཅན་དོན་མང་སྒྲུབ་པར་བྱེད། །གཞན་སེམས་ཚུལ་ལ་དེ་མཁས་ཤིང་། །བག་ལ་ཉལ་དང་བསམ་ཤེས་པས། །ཡེ་ཤེས་ཡོ་བྱད་
ལྡན་པ་དེ། །བསོད་ནམས་མྱུ་གུ་གསར་ཡང་བསྐྱེད། །བསྐལ་པ་བྱེ་བ་མང་པོ་ཡི། །སྔོན་གྱི་གནས་རྣམས་རྗེས་དྲན་ཞིང་། །འཇིག་རྟེན་བསོད་ནམས་རྣམ་པ་དང་། །སྟོབས་དང་སྟོབས་མེད་མཐོང་གྱུར་ནས། །དེ་དག་བསམ་པའི་ཚུལ་བཞིན་དུ། །རྫུ་འཕྲུལ་རྣམ་པས་ལུས་བསྒྱུར་ཅིང་། །
སྣོད་བཞིན་སྟོན་པར་བྱེད་པས་ན། །དོན་ཡོད་རྗོད་བྱེད་མཆོག་ཏུ་འགྱུར། །ལ་ལར་གཟུགས་མཛེས་ཡུན་ལྡན་ཞིང་། །ཉི་མ་བརྒྱ་ལྟའི་འོད་ལྡན་ཏེ། །རི་མོ་གསལ་བའི་མཚན་རྒྱས་པ། །ཐུབ་རྒྱལ་མཚན་ལྡན་སྐུ་མཆོག་གིས། །འགྲོ་བའི་མིག་ལ་བདེ་སྐྱིད་ཅིང་། །ཡིད་ལ་ཁྱབ་པར་སིམ་བྱེད་པས། །

རྒྱལ་དབང་མོས་པ་བྱང་ཆུབ་ཏུ། །བསྒྲུབ་ཕྱིར་འཆི་མེད་སྟོན་པར་བྱེད། །ཐུབ་དབང་ཞི་ཚུལ་དཔལ་ལྡན་པའི། །སྤྱོད་པ་རྣམ་པར་སྤྱོད་བྱེད་ཅིང་། །ལ་ལར་འདུལ་དབང་ཇི་བཞིན་དུ། །སློབ་མའི་ཚུལ་གྱིས་འདུལ་བར་བྱེད། །ལ་ལར་ལྷ་དབང་བརྒྱ་བྱིན་བཞིན། །ལྷ་
ཡི་སྤྱི་བོ་ཞབས་ལ་ཐུག །ནོར་སྦྱིན་ཇི་བཞིན་ནོར་མང་གཏོང་། །ལ་ལར་ཚངས་ལྟར་གཟུགས་མཆོག་འཛིན། །ལ་ལར་སྤྱན་གསུམ་ཕྱེ་བ་སྟེ། །དྲི་མེད་ཟླ་བའི་རྒྱན་ལྡན་སྟོན། །ལ་ལར་ལྷ་མིའི་རྒྱལ་པོ་དང་། །ཀླུ་ཡི་དཔལ་ཆེན་ཁྱེར་བ་སྟོན། །ལ་ལར་གནོད་སྦྱིན་རྒྱལ་པོ་ལྟར། །རྡོ་རྗེ་འབར་
བ་ཐོགས་པ་སྟོན། །ཡོན་ཏན་འོད་ལྡན་ཐུབ་ཟླ་ལྟར། །ལ་ལར་གཡང་གཞི་མཚན་བསྟན་སྟོན། །ལ་ལར་བརྒྱ་བྱིན་ནོར་བུ་ཡིས། །བྲང་ལ་འོད་འབར་མཛེས་པ་སྟོན། །ལ་ལར་ཆུ་ཡི་ལྷ་གཟུགས་དང་། །ལ་ལར་འདོད་པའི་ལྷ་ལྟར་སྟོན། །ལ་ལར་བུད་མེད་གཟུགས་མཛེས་དང་། །ལ་ལར་ཕོ་
སྨོས་དགའ་བ་སྟོན། །ལ་ལར་བརྟུལ་ཞུགས་ནོར་ལྡན་ཏེ། །འདོད་ལས་འདོད་ཆགས་བྲལ་བ་སྟོན། །ལ་ལར་མི་རྣམས་ཡིད་འཕྲོག་ཅིང་། །སློབ་དཔོན་སློབ་མ་རྒྱལ་པོ་བྱེད། །ལ་ལར་མཐུ་ཆེན་བྱིན་རླབས་ཀྱིས། །ངན་སོང་སྡུག་བསྔལ་རྣམ་མང་སེལ། །འགྲོ་བའི་དད་པ་
ཚུལ་བཞིན་དུ། །སྣ་ཚོགས་སྤྱོད་པ་ལས་བསྟན་ཞིང་། །སྙིང་རྗེའི་ཡོན་ཏན་རྒྱ་ཆེ་བས། །འཇིག་རྟེན་ཕན་པ་གྲངས་མེད་བྱེད། །བསམ་གཏན་འདི་འདྲའི་གནས་ཐོབ་ཅིང་། །ཁྱད་པར་ཕུན་སུམ་ཚོགས་ཐོབ་པས། །གཏེར་གྱི་མཚན་མ་སླུ་མེད་བཞིན། །ཁྱད་པར་གོང་ནས་གོང་
བརྩོན་བྱ། །དེ་ལ་གནས་འཆའ་ཡན་བོར་ཅིང་། །བརྟུལ་ཞུགས་ལྷོད་པའི་ཚུལ་བོར་ཏེ། །དགེ་བ་སྤེལ་ཕྱིར་བརྩོན་པར་བྱ། །དེ་ལས་བཟློག་པ་དམན་པར་འགྲོ། །ཏིང་འཛིན་རྩོམ་པ་མེད་པ་སྟེ། །རྗེས་སུ་བསྒྲུབ་པ་དཀོན་པས་ན། །རྣམ་པར་རྒྱལ་བ་འདོད་རྣམས་ཀྱིས། །ཞི་བའི་གཉེན་པོ་
ཚུགས་མེད་བསྟེན། །ཡིད་ཚུལ་སྤང་བའི་མཆོག་གྱུར་ཀྱང་། །ས་ལྟར་མི་གཡོ་བརྟན་པ་ཡི། །ས་མཆོག་མི་གཡོ་མ་ཐོབ་ཏུ། །དེ་ལ་ཡིད་བརྟན་གཡོ་མི་བྱ། །མངོན་པར་འདུས་བྱས་ལམ་བྱས་པ། །ཏིང་འཛིན་བསྒྲུབ་པའང་འཇིག་པར་འགྱུར། །དེ་བས་རྣམ་རྟོག་རྣམ་སྤངས་ཏེ། །

ལམ་གྱི་དམ་པ་བསྒོམ་པར་བྱ། །བདེ་གཙང་རྟག་པའི་རྣམ་རྟོག་དག །འདུས་བྱས་སླུ་བའི་ཆོས་ཅན་དུ། །ཡང་དག་རྟོགས་པར་ཤེས་བྱ་སྟེ། །དངོས་པོའི་རྣམ་རྟོག་ཡོངས་སུ་སྤང་། །དམིགས་པ་ཆུང་ཡང་བྱུང་གྱུར་ན། །ཉོན་མོངས་མདས་གཙག་གཞིར་ཡང་འགྱུར། །དེ་
འདྲའི་གནོད་པ་ཀུན་བཅིལ་ན། །བདུད་ཀྱི་སྤྱོད་ཡུལ་འདས་པར་འགྱུར། །གནས་པའི་སྐྱོན་དང་ལྡན་གྱུར་ན། །བསམ་གཏན་རྣམ་དག་ཚུལ་མི་འགྱུར། །གནས་པའི་རྗེས་འབྲངས་ཉམས་པ་སྟེ། །དོང་སྐམ་བཅས་ཞེས་དེ་ཕྱིར་བརྗོད། །ཐ་སྙད་ཚུལ་དག་འགྲུབ་དོན་དུ། །དེ་ནི་འཇིག་རྟེན་
ལམ་ཞེས་བྱ། །ཡོད་དང་མེད་བྱུང་གཏང་མེད་པས། །གང་ནའང་ཅི་ཡང་སྐྱེ་བ་མེད། །ནམ་མཁའི་དབྱིངས་འདྲ་ཡིད་ལྡན་ན། །སྲིད་པ་གསུམ་གྱི་གནས་དང་བྲལ། །ཚུལ་འཆོས་བྲལ་བའི་སྤྱོད་བརྟན་ལ། །ཁ་གསག་མེད་པའི་ཚུལ་ལྡན་ན། །འཇིག་རྟེན་སྤྱོད་པ་དེ་བྱེད་ཀྱང་། །འགྲོ་བ་
གཅིག་ཏུ་ཕན་པ་སྤྱོད། །སེམས་ལ་དབང་གྱུར་ཐོབ་པས་ན། །ཏིང་འཛིན་སྟོབས་ལས་ཉམས་པ་མེད། །དེ་ཐོབ་ཡན་ཆད་རྨད་བྱུང་བའི། །ཏིང་འཛིན་འབྲས་བུ་མང་ལྡན་པས། །དབྱར་དུས་རྒྱ་མཚོ་ཆུ་ཀླུང་དག །ཆུ་གསར་བྱུང་བས་སྐྱེ་ཞིང་འཕེལ། །བསམ་གཏན་གྱི་ཕ་རོལ་ཏུ་ཕྱིན་
པའི་ལེའུའོ།། །།སྦྱིན་ལ་སོགས་པའི་བསོད་ནམས་འདི་དག་ནི། །ཤེས་རབ་མགོན་བཅས་ལྷག་པར་མཐུ་ལྡན་འགྱུར། །གསེར་གྱི་རྒྱན་བཟངས་རྣམ་པ་སྣ་ཚོགས་ལ། །རིན་ཆེན་ཕྲ་བཀོད་འོད་ཀྱིས་གསལ་བ་བཞིན། །སོ་སོའི་དོན་ལ་དེ་དག་ཡོན་ཏན་མཐུ། །ཤེས་
རབ་འདི་ཉིད་རྒྱ་ཆེན་སྒྲུབ་པར་བྱེད། །དབང་པོ་རང་རང་ཡུལ་གྱི་བྱེ་བྲག་ལ། །མཐུ་ཞེན་ཡིད་ཀྱིས་གསལ་བར་བསྟན་པ་བཞིན། །ལུས་འདི་སྲོག་དང་བྲལ་ན་མཐུ་མེད་ཅིང་། །རང་གི་དགོས་པ་བསྒྲུབ་པ་མི་མཛེས་པ། །དེ་བཞིན་ཤེས་རབ་མེད་པས་བློ་གྱུར་ན། །དོན་སྒྲུབ་འཇིག་
རྟེན་དག་ན་མཛེས་པ་མེད། །དད་ལ་སོགས་པའི་དབང་པོའི་རྣམ་པ་ཡང་། །དབང་པོ་གཞན་ལ་བློ་འཛིན་ཤེས་རབ་གཙོ། །དེ་ཡི་མགོན་ལྡན་ཡོན་ཏན་སྐྱོན་ཤེས་པས། །ཉོན་མོངས་ཟད་པའི་ཚུལ་ལ་མཁས་པར་འགྱུར། །ཤེས་རབ་མེད་ན་འབྲས་བུ་དོན་གཉེར་ལ། །སྦྱིན་པ་བདག་ཉིད་

རྣམ་པར་དག་མི་འགྱུར། །གཞན་དོན་བཏང་བ་སྦྱིན་པའི་མཆོག་ཅེས་གསུངས། །ལྷག་མ་ནོར་སྤེལ་དོན་གྱི་སྦྱོར་བ་ཡིན། །ཤེས་རབ་མི་གསལ་རྣམ་པར་བྱིང་གྱུར་ན། །བྱང་ཆུབ་སེམས་དཔས་རང་གི་ཤ་བྱིན་ན། །སྨན་གྱི་ཤིང་ལྟར་རྣམ་པར་མི་རྟོག་པར། །
མཐོའམ་དམའ་བར་འགྱུར་བ་དེ་ལ་མེད། །དེ་བས་འཇིག་རྟེན་འདས་པ་དོན་གྱི་གཞི། །ཁྲོ་མེད་དགའ་བས་ཕུན་སུམ་ཚོགས་པའི་སེམས། །སྦྱིན་པ་ཆེན་པོས་འགྲོ་དོན་བསྒྲུབ་མོས་པ། །རྒྱལ་སྲས་ས་ཡི་དང་པོ་འཐོབ་པར་འགྱུར། །དེ་ལ་གནས་པ་ཕལ་ཆེར་བྱང་ཆུབ་ཏུ། །མི་འཕྲོགས་བློ་
འཆང་འཁོར་ལོས་སྒྱུར་བར་འགྱུར། །ཤེས་རབ་མཐུས་བསྟན་ལམ་མཆོག་བདེ་བ་དེས། །རིམ་གྱིས་དྲི་མེད་རྒྱལ་སྲས་ས་ཡང་ཐོབ། །དེ་ནས་རང་བཞིན་རྣམ་དག་ཚུལ་འཆང་ཞིང་། །གླིང་བཞི་འཁོར་ལོས་སྒྱུར་བར་དེ་འགྱུར་ཏེ། །རྒྱལ་པོ་ཀུན་གྱི་སྤྱི་བོས་བཀའ་བླང་ཞིང་། །ཐུབ་དབང་
རྒྱལ་བ་བཞིན་དུ་མཆོད་པར་འགྱུར། །དེ་དག་ཡན་ཆད་འདོད་པའི་ལྷ་རིས་དང་། །འཇིག་རྟེན་བྱུར་བུ་སྟོང་གཉིས་སྟོང་གསུམ་གྱི། །དབང་ཕྱུག་ཐོབ་འགྱུར་དེ་དག་ཡན་ཆད་དུ། །ཤེས་རབ་འོད་ཀྱིས་རྒྱུ་རྣམས་སྦྱངས་པས་འཐོབ། །ཤེས་རབ་སྣང་བས་མུན་པ་མ་བསལ་ན། །ཚུལ་ཁྲིམས་དག་
དང་ལྡན་པར་དེ་མི་འགྱུར། །ཕལ་ཆེར་ཤེས་རབ་མེད་པས་ཚུལ་ཁྲིམས་དག །ཤེས་པའི་སྐྱོན་གྱིས་ཉོན་མོངས་རྙོག་བཅས་འགྱུར། །རང་གི་དོན་དུ་ཚུལ་ཁྲིམས་མི་བསྒྲུབ་ན། །བློ་ལྡན་སྲིད་པའི་བཙོན་རའི་སྐྱོན་མཐོང་ཞིང་། །དེ་ནས་འཇིག་རྟེན་མ་ལུས་གདོན་མོས་པ། །སྲིད་པའི་དོན་དུ་མི་
སྒྲུབ་སྨོས་ཅི་དགོས། །ཤེས་རབ་ལོག་པའི་སྐྱོན་གྱིས་སེམས་རྙོག་ན། །བཟོད་པའི་ཡོན་ཏན་དེ་ལ་གནས་ཅི་སྨོས། །ལེགས་པར་རྟོགས་ལ་མི་དགའི་ཚུལ་འཆང་ཞིང་། །ཡོན་ཏན་མེད་པའི་རྒྱན་ལ་གྲགས་པ་བཞིན། །ཤེས་རབ་ལྡན་པ་རྣམས་ལ་གནོད་པ་དག །བཟོད་པའི་ཡོན་ཏན་ཡོད་
པས་གནོད་མི་འགྱུར། །ཤིན་ཏུ་དུལ་བའི་གླང་པོ་མཆོག་རྣམས་ལ། །ལས་ཀྱི་ཁྱད་པར་རྣམ་མང་བཟོད་པ་བཞིན། །བརྩོན་འགྲུས་གཅིག་པུ་བྱས་པ་ངལ་བའི་མཐའ། །ཤེས་རབ་གྲོགས་ཀྱིས་བསྟངས་ན་དོན་ཆེན་འགྲུབ། །བསྒྲུབས་བྱས་རྗེས་ལ་དེ་ཡི་ཡོན་ཏན་འཐོབ། །དེ་ལས་བྱུང་

བའི་དུབ་པ་ཡོངས་སུ་སེལ། །མཁས་པ་རྣམས་ལ་ཕུལ་དུ་བསྔགས་འགྱུར་ཞིང་། །དེ་ལས་ཕྲ་ཞིང་ཟབ་པ་གཞན་མེད་པས། །འདོད་པའི་སྐྱོན་གྱིས་ཡོངས་སུ་མ་བསྒྲིབས་པའི། །ཡིད་ལམ་དྲང་པོར་ཤེས་རབ་མེད་མི་འགྱུར། །དེ་འདྲའི་བསམ་གཏན་བདེ་དགའ་མཆོག་ལྡན་པ། །
སྐྱོན་བསགས་ཉེས་པ་ཆེན་པོ་གྲགས་གྱུར་པའི། །ལམ་གོལ་རིགས་པའི་ཚུལ་ལས་བརྟེན་པ་ནི། །སྐྱེ་བོ་མ་རབས་ཡིད་ལ་ཇི་ལྟར་འགྲུབ། །ཤེས་རབ་ཚུལ་ལ་བརྩོན་མེད་བློ་འཆང་ན། །དེ་ཡི་ལྟ་བ་ཡོངས་སུ་དག་མི་འགྱུར། །དེ་མེད་ཚུལ་ཁྲིམས་མི་འདག་དེ་མེད་པས། །ཏིང་
འཛིན་མི་འཐོབ་སྡུག་བསྔལ་ཟད་མི་འགྱུར། །ཤེས་རབ་ལྡན་པས་སྐྱོན་ལས་བག་བྱེད་ཅིང་། །ཡོན་ཏན་ཚོགས་ལས་རྒྱུན་དུ་བདེ་ཐོབ་པས། །ཉོན་མོངས་འགྲོ་བའི་དོན་ལ་རབ་བརྩོན་ཞིང་། །ཡོན་ཏན་ཚོགས་ཀྱི་བདེ་བའི་ལམ་དུ་འཇུག །ཡང་དག་རྟོགས་པས་ཏིང་འཛིན་འཐོབ་
པར་འགྱུར། །ངག་ཡིད་ལུས་རྣམས་རྣམ་པར་དག་པ་འགྲུབ། །དེ་ཕྱིར་སྐྱོན་མེད་མཐུ་དང་ལྡན་གྱུར་པ། །འཇིག་རྟེན་ཕན་པ་ཕུན་སུམ་ཚོགས་ལ་འཇུག །སྦྱིན་པས་ཅི་འདོད་ཡིད་བཞིན་སྒྲུབ་པ་བྱེད། །ཚིག་སྙན་བདུད་རྩི་ཤིན་ཏུ་གསལ་བ་དང་། །རྒྱུ་མེད་མཐུ་དང་
ལྡན་པའི་སྡོམ་པ་ཡིས། །གཞན་གྱི་དོན་ལ་མཉམ་པར་ཀུན་དུ་སྤྱོད། །དོན་ལ་ཐུན་མོང་ཡང་དག་བསྟན་བྱས་ཤིང་། །བྱམས་པས་དེ་དག་ཡིད་ནི་དབང་བསྐུར་ཏེ། །ཤེས་རབ་སྟོབས་ཀྱིས་འཁོར་ལོ་ཐོགས་མེད་དེ། །མྱ་ངན་འདས་པའི་བདེ་ལ་འགོད་པར་བྱེད། །ཤེས་
རབ་སྔོན་འགྲོ་མཐུ་ཆེན་འདི་དག་གིས། །བྱིན་གྱིས་བརླབས་ཤིང་ཡོངས་སུ་བསྲུངས་པས་ན། །མཚོ་མེད་ངན་འགྲོ་འཆི་དང་སྨད་པ་དང་། །དོགས་པའི་སྟོབས་ཀྱིས་འཇིགས་པ་ཉེར་མི་འོང་། །འཇིགས་པ་ཐམས་ཅད་སྐྱོན་ལས་བྱུང་བ་སྟེ། །ཤེས་རབ་སྐྱོན་དང་ལྷན་ཅིག་མི་
འགྲོགས་པས། །སྟོན་གྱི་ནམ་མཁའི་སྤྲིན་ཚོགས་མེད་པ་ལ། །ཉི་འོད་གསལ་བ་མུན་དང་མི་འགྲོགས་བཞིན། །ཉི་མ་འོད་ཆེན་ཤར་བར་གྱུར་བཞིན་དུ། །འགྲོ་བའི་རྒྱུད་རྣམས་མུན་ནག་གང་འགེབས་པ། །ཤེས་རབ་འོད་ཀྱི་མཐུ་ཆེན་འབྱུང་བས་ན། །ཐམས་ཅད་གསལ་

འགྱུར་མིང་ཙམ་འབའ་ཞིག་ལུས། །གང་ལ་ཤེས་རབ་འོད་ཆེན་ཤར་གྱུར་པ། །དེ་ལ་བྱ་བའི་ལྷག་མ་ལས་པ་མེད། །བསྐལ་པའི་མེས་བསྲེགས་འཇིག་རྟེན་གསལ་བའི་ཚེ། །བསྲེག་བྱའི་ལྷག་མ་ཡོད་པར་བརྗོད་མེད་བཞིན། །སྣང་བ་ཐམས་ཅད་གཅིག་ཏུ་
འདུས་གྱུར་ཀྱང་། །ཤེས་རབ་འོད་ལ་བསྐྲུན་དུ་ཉེར་མི་འགྲོ། །དེ་བས་ཁེ་ཆེན་དེ་ལས་མཆོག་གཞན་མེད། །ཡོངས་སུ་མཉམ་པ་མེད་པར་འང་གཞན་མེད་དོ། །ཤེས་རབ་ཚུལ་བརྩོན་བསླབ་པ་བདེ་ཚུལ་དུ། །ཡོངས་སུ་རྫོགས་འགྱུར་ཚུལ་ཁྲིམས་ཞི་བར་འགྱུར། །དེ་བས་རང་གི་མཐུ་
རྣམས་ཀུན་གཏུགས་ཏེ། །དེ་འདྲའི་ཤེས་རབ་ཚུལ་ལ་བརྩོན་པར་བྱ། །ཕུང་པོ་ཁམས་དང་སྐྱེ་མཆེད་རྒྱུ་དག་དང་། །བདེན་པའི་གནས་ལ་སོམ་ཉིར་མི་འགྱུར་ཞིང་། །དུས་གསུམ་དེ་འདྲར་བསྡུས་པའི་རིགས་པ་ནི། །ཤེས་རབ་ཤིན་ཏུ་སྦྱངས་པའི་ཡུལ་འཇུག་ཡིན། །ཤེས་རབ་དག་
སྦྱངས་སྤྱོད་པའི་རྣམ་པ་དག །ཡིད་ཆེས་དཀའ་ཞིང་ཡོན་ཏན་སྣང་ལ་ཡང་། །སྐྱི་གཡའ་ངོ་མཚར་ཐོབ་པའི་དབང་གྱུར་པས། །རྒྱལ་སྲས་གྲགས་པ་ཆེན་པོས་ཁྱབ་པར་འགྱུར། །ཤིན་ཏུ་མཐུ་འབར་ཤེས་རབ་སྟོབས་ཀྱི་ཕུལ། །བདུད་དང་དཔུང་བཅས་ཚོགས་ཀྱིས་བཟོད་མི་ནུས། །
ཤེས་རབ་འོད་ཀྱིས་དེ་དག་མིག་རྨོངས་པས། །དེ་དག་མགོ་འདེགས་ལྟ་བར་མོས་པ་མེད། །འདོད་པའི་ལྟས་འཕངས་མདའ་ལ་མགོ་ཐུབ་པའི། །ཤེས་རབ་གོ་ཆ་སེམས་ཀྱིས་བརྟན་བགོས་ན། །གཟུགས་ལ་སོགས་པའི་དམག་མང་ཚོགས་ཀྱི་རྣམས། །གཅིག་པུ་འཇིགས་མེད་
ཟིལ་གྱིས་མནན་ཅིང་འགྲོ། །མི་བརྟན་ངང་ཚུལ་འཇིགས་ཤིང་རྟབས་པའམ། །གླེན་པའི་ངང་ཚུལ་མྱ་ངན་འཛིན་པའམ། །མཐུ་ཞན་སེམས་ལ་རྩ་བ་ཟུག་གྱུར་པའི། །ཁྲོ་དང་ཆགས་དང་དམན་ཟིལ་གནོན་པའམ། །ཕན་བྱེད་རྣམས་ལ་འཇུངས་པའི་དྲི་མ་དག །འདོད་ཆགས་ལྡན་
ལ་རྟེན་འཆའ་རྒོད་པའམ། །གཟི་བརྗིད་མཐུ་ཆུང་ལེ་ལོའི་བསམ་པ་དང་། །ཤིན་ཏུ་གཡེང་བས་མ་ཞི་འཆར་ཚུལ་དག །སོ་སོའི་རྐྱེན་གྱི་བསམ་པ་ཐིབས་པོ་ལ། །གནས་འཆའ་ཉེས་པའི་རྣམ་པ་དེ་དང་དེ། །འགྲོ་ལ་ཕན་དོན་དམ་བཅས་ཤེས་རབ་ཅན། །ཤེས་རབ་ཆེན་པོས་མ་

ལུས་ཡོངས་སུ་སེལ། །སྐྱོན་བྲལ་བརྟན་ཞིང་ངང་དེས་དེ་མཁྱེན་ནས། །དགའ་བདེ་སྐྱིད་ཕྱིར་ལེགས་པར་དེ་གཟིགས་ཤིང་། །དབང་བསྐུར་བདུད་རྩི་ཤིན་ཏུ་སིམ་བྱེད་པས། །ཐུབ་དབང་རྣམས་ཀྱིས་དེ་ནི་དབང་ཡང་བསྐུར། །བདེ་གཤེགས་མཛོད་སྤུ་མཚན་རབ་ཐོན་པ་ཡི། །འོད་
ཆེན་ཟླ་བ་གསལ་བཞིན་སིམ་བྱེད་པས། །རྒྱལ་སྲས་དེ་ཡི་མགོ་ནས་དབང་བསྐུར་ན། །མཆོད་སྦྱིན་མེ་ལ་མར་ཁུས་བླུགས་ལྟར་མཛེས། །ཆོས་རྒྱལ་རྒྱལ་ཚབ་ཐབས་དེ་ཐོབ་གྱུར་ན། །ཕྱོགས་བཅུ་ཀུན་དུ་སྤྲུལ་པའི་ལུས་བཀྱེ་ཞིང་། །སྤྲིན་ཆེན་ཆར་གྱི་རྒྱུན་གྱིས་རྡུལ་བསལ་བཞིན། །
འཇིག་རྟེན་སྡུག་བསྔལ་ལྷུན་གྱིས་གྲུབ་པར་སེལ། །རྒྱལ་སྲས་མཐུ་མཆོག་དེ་འདྲ་རྨད་བྱུང་དག །ཐམས་ཅད་ཤེས་རབ་དེ་ཡི་མཐུ་ལས་བྱུང་། །བུ་ལ་བྱམས་པའི་མ་འདྲ་ཤེས་རབ་ལས། །དེ་འདྲའི་ཕུན་སུམ་ཚོགས་འབྱུང་ཅི་མཚར་གྱི། །བདེ་གཤེགས་སྟོབས་བཅུ་སྟོབས་ཀྱི་ཕུལ་
བྱུང་བ། །མཚུངས་མེད་མཆོག་ཏུ་བྱ་བ་ཐམས་ཅད་དང་། །ཡོན་ཏན་ཚོགས་གཞན་མ་ལུས་ཐམས་ཅད་ཀྱང་། །དེ་འདྲའི་ཤེས་རབ་རྒྱུ་ལ་བརྟེན་ཞིང་འབྱུང་། །འཇིག་རྟེན་དག་ན་སྒྱུ་རྩལ་གཏེར་མཆོག་དང་། །གཙུག་ལག་མིག་འདྲ་ཅི་སྙེད་ཡོད་པ་དང་། །ཡོངས་སུ་སྐྱོབ་བྱེད་བློ་
དང་སྔགས་ལ་སོགས། །རྣམ་བཀོད་ཆོས་ཀྱི་ཁྱད་པར་ཐ་དད་དང་། །རྣམ་གྲངས་རྣམ་མང་རྣམ་ཐར་སྒོ་དག་དང་། །འཇིག་རྟེན་ཕན་པའི་རྣམ་པ་དེ་དང་དེས། །རྒྱལ་སྲས་མཐུ་ཆེན་རྣམ་པར་སྟོན་བྱེད་པ། །དེ་དག་ཐམས་ཅད་ཤེས་རབ་མཐུ་ལས་འབྱུང་། །དབང་པོའི་ཡུལ་རྣམས་ལྷ་
རྫས་འདྲ་བདོག་པའི། །རྒྱལ་སྲིད་ཆེ་ལྡན་བྱང་ཆུབ་སེམས་དཔའ་དག །རང་བཞིན་ཚུལ་མིན་འགྱུར་བ་མེད་པ་ཡང་། །ཤེས་རབ་ཡོན་ཏན་བློན་པོ་ལྡན་པའི་མཐུས། །གཞན་ལ་ཕན་བྱེད་རོ་གཅིག་བྱམས་པ་ལ། །འདོད་ཆགས་འགོ་བ་ཡོངས་སུ་སྤང་བ་དང་། །གཞན་གྱི་སྡུག་བསྔལ་མི་
བཟོད་སྙིང་རྗེ་ལ། །མྱ་ངན་ཁུར་གྱི་ལེ་ལོས་མི་དམའ་དང་། །དགའ་མཆོག་དང་ལྡན་ཡང་དག་གཡེང་མེད་དང་། །འགྲོ་དོན་མི་གཡེལ་བཏང་སྙོམས་ཆེན་པོ་དང་། །ཡོན་ཏན་དེ་དང་དེ་དག་གཉེན་པོའི་ལམ། །ཤེས་རབ་ཆེན་པོས་བཀག་པས་རྣམ་པར་མཛེས། །བསམ་པ་བག་ལ་ཉལ་ལ་

བཀའ་བརྩན་པའི། །ཤེས་རབ་ཉི་འོད་འབར་ལྟར་དེ་མེད་ན། །སུ་ཞིག་ཡུན་རིང་འཇིག་རྟེན་རྐྱེན་འབྱུང་བའི། །རང་བཞིན་ཚུལ་གྱུར་མུན་ནག་སེལ་ནུས་ཡོད། །བརྟན་འོས་བླ་མ་རིམ་གྲོ་བསྙེན་བཀུར་ཏེ། །ཤེས་རབ་བསྒྲུབ་ཕྱིར་ཐོས་པ་བཙལ་བར་བྱ། །རྣམ་པ་སུམ་ཅུ་
གཉིས་ཀྱིས་ཤེས་བྱ་སྟེ། །ཡང་དག་མཉམ་གཞག་ཡིད་ཀྱིས་རྣམ་པར་སེལ། །ཐོས་ཉུང་དམུས་ལོང་བསྒོམ་པའི་ཚུལ་མི་ཤེས། །དེ་མེད་དེས་ཀོ་ཅི་ཞིག་བསམ་པར་བྱ། །དེ་བས་ཐོས་ལ་བརྩོན་བྱ་དེ་རྒྱུ་ལས། །བསམས་བཞིན་བསྒོམས་པས་ཤེས་རབ་ཡངས་པ་འབྱུང་། །དྲི་མ་རྩོད་
མེད་སྒོ་དང་བརྟན་པ་དང་། །དོན་ཚོལ་རྟོགས་པའི་མཐུ་ཡོད་རྟོགས་པ་དང་། །བསམ་གཏན་དེ་ཡི་ཡོན་ཏན་སྐྱེད་པ་བས། །ཤེས་རབ་བསྒྲུབ་ལ་མངོན་པར་བརྩོན་པར་བྱ། །ཤེས་རབ་ཐོབ་པའི་ཚུལ་ལ་ཐབས་ཀྱི་མདོ། །བསམ་གཏན་དེ་དོན་ངེས་པའི་ཐོས་མང་བ། །ཡོན་ཏན་
ཚོགས་རྒྱུ་ཤེས་རབ་སྣང་བ་ནི། །གཉིས་པོ་དེ་ལས་གཙུབ་ཤིང་མེ་ལྟར་འབྱུང་། །མཁས་པའི་སྐྱེ་བོས་སྤྱོད་པའི་ལམ་བསྟེན་ཏེ། །གཏི་མུག་རྒྱུར་གྱུར་ཐིབས་པོ་སྤང་བར་བྱ། །དེ་བསྒྲིབས་གྱུར་ན་ཟླ་བ་ཤར་གྱུར་ཀྱང་། །ཆར་སྤྲིན་ཆེར་བསྒྲིབས་མི་སྣང་མཚུངས་མི་སྣང་། །ལེ་ལོ་སྙོམ་
དང་རྟེན་ངན་བརྟེན་པ་དང་། །གཉིད་ཀྱི་དབང་གྱུར་མི་རྟོག་ངང་ཚུལ་དང་། །ཐུབ་པའི་ཡེ་ཤེས་མཆོག་ལ་མོས་མེད་དང་། །ལོག་པའི་ང་རྒྱལ་ནོན་པས་དོན་འདྲི་དང་། །དམའ་སེམས་ངག་ལ་ཞེན་པས་བྱུང་བའི་རྒྱུས། །མཁས་པའི་སྐྱེ་བོ་བསྟེན་པར་མ་དད་དང་། །ལོག་པའི་རྣམ་རྟོག་དུས་ཚེ་
ལོག་ལྟ་དག །གཏི་མུག་རྒྱུ་ཡིན་དེ་བསལ་གཉེན་པོ་ནི། །ཕུང་པོ་ཁམས་དང་སྐྱེ་མཆེད་བདེན་པ་དང་། །རིག་པ་དག་དང་རྒྱུ་བྱུང་ཚུལ་བརྟག་དང་། །ཆོས་ལ་མཁས་པའི་རྣམ་པ་དེ་དག་ནི། །ཤེས་རབ་ཐབས་ཀྱི་ཡུལ་བརྒྱད་རྣམ་པ་ཡིན། །གཟུགས་རྣམས་དབུ་བའི་ཚོགས་འདྲ་སྙིང་པོ་
མེད། །ཚོར་བ་རྣམ་གསུམ་ཆུ་ཡི་ཆུ་བུར་ཚུལ། །འདུ་ཤེས་འདོད་པའི་ཡོན་ཏན་ཞུགས་པ་ནི། །སྨིག་རྒྱུས་རི་དགས་སླུ་བཞིན་བྱིས་པ་སླུ། །འདུ་བྱེད་རྣམ་པ་ཆུ་ཤིང་རང་བཞིན་འདྲ། །སྒྱུ་མའི་ཚུལ་ལས་རྣམ་ཤེས་གཏད་པ་མེད། །དེ་ལ་བརྟེན་ཞིང་རོ་འདྲའི་ལུས་འདི་ཉིད། །རྣམ་མང་བསྐྱོད་

ཅིང་ལམ་རྒྱུད་ཀུན་དུ་འཁྱམ། །བདག་དང་བདག་གི་འདི་ལ་གང་ཡང་མེད། །མི་གཙང་སྣ་ཚོགས་འདུས་པའི་ཚོགས་འདི་སྟེ། །རང་དབང་ཡོད་ལྟར་འཁྲུལ་འཁོར་བྱས་པ་བཞིན། །སེམས་ཅན་འདུ་ཤེས་བྱིས་པ་སླུ་བ་བྱེད། །མིག་འདི་སྐད་ཅིག་འཇིག་སྟེ་བདག་མ་ཡིན། །
མིག་ལྡན་དེ་མིན་མིག་ལ་བདག་ཀྱང་མེད། །བདག་ལ་མིག་མེད་སྐྱེ་མཆེད་ལྷག་མ་ཡང་། །དེ་དང་ཚུལ་འདྲ་གཏད་མེད་བདག་གི་མེད། །ལུས་ལ་གནས་པའི་ཁམས་དང་ཕྱི་རོལ་ཁམས། །མཚན་ཉིད་མི་མཚུངས་འགལ་བ་གང་ཡང་མེད། །རྣམ་ཤེས་ཁམས་ཀྱང་མི་རྟག་བདག་
མ་ཡིན། །དེ་ལས་གཞན་ཡང་ནམ་མཁའི་མེ་ཏོག་བཞིན། །དེ་ལྟར་འདི་ནི་སྲེད་རྨོངས་ཡིད་ལྡན་ལ། །སྡུག་བསྔལ་འབའ་ཞིག་བྱུང་བར་གྱུར་པ་ཡིན། །སྲེད་དང་བྲལ་ན་ཞི་བའི་མཆོག་ཐོབ་སྟེ། །ཚུལ་ཁྲིམས་ཏིང་འཛིན་སྲེད་སེལ་ལམ་ཡང་ཐོབ། །དེ་དང་དེ་དག་རྟེན་འབྲེལ་བྱུང་བ་
ཞེས། །ལྟ་བ་རྣམ་དག་ཡོད་མེད་གཉིས་མི་དམིགས། །འགྲོ་བ་འདི་དག་དེ་ལ་སྒྱུ་ལྟར་སྣང་། །དེ་ཕྱིར་བདེ་ལ་སོགས་པས་འགྱུར་མེད་བསྟན། །འདས་གྱུར་བྱུང་གྱུར་རྟོག་པ་ལོག་ལྟ་སྟེ། །བྱུང་གྱུར་གང་ཡིན་སྲིད་ལས་བདེ་འགྱུར་ཞེས། །དེ་ལྟར་འདས་པའི་ཡུལ་ལ་འདོད་བྲལ་ཞིང་། །
བྱུང་དང་འབྱུང་བར་འགྱུར་བ་སྨོན་པ་མེད། །སྡུག་བསྔལ་ཚུལ་གྱིས་མངོན་པར་མི་བདེ་ཞིང་། །མི་བཟད་མིག་ཕྱེ་མངོན་པའི་ཚུལ་ཡོད་ན། །དེ་དག་དོན་བསྒྲུབ་ཕོངས་དོར་ཚུལ་བསམས་ཤིང་། །ཤེས་ལྡན་སུ་ཞིག་དགར་གནས་སླ་སྙམ་སེམས། །དེ་ལྟར་རྣམ་གྲོལ་བློ་ལྡན་སྙིང་རྗེ་ཅན། །
འགྲོ་བ་མགོན་མེད་ཉོན་མོངས་གཟིར་མཐོང་ན། །ཐམས་ཅད་བྱང་ཆུབ་མཆོག་ལ་མ་བཀོད་དུ། །དམའ་ལས་བྱམས་བཏང་མྱ་ངན་འདར་མི་མོས། །འཇིག་རྟེན་དོན་སྒྲུབ་ཚུལ་ལ་མཐུ་མེད་པའི། །ཐེག་པ་གཉིས་པོ་གཏན་དུ་སྤང་བྱས་ཤིང་། །ཐུབ་རྒྱལ་ཐེག་པ་སྙིང་རྗེས་བསྟན་པའི་ལམ། །
གཞན་ཕན་རོ་གཅིག་རང་བཞིན་དེ་དག་འཇུག །དམའ་འོས་ཚུལ་ལ་ལེགས་པའི་བློ་མི་གཞོལ། །ཆེ་ལ་ཆེ་མིན་ནམ་ཡང་གནས་མི་འགྱུར། །གཙང་མའི་རང་བཞིན་གཙང་དང་རྟག་ཏུ་འབྲེལ། །གཞན་ཡང་མཐུན་དང་མཐུན་གྱུར་ཆོས་ཉིད་ཚུལ། །བདེ་དང་མི་བདེ་རྨི་ལམ་འདྲར་འབྲངས་ཤིང་། །

གཏི་མུག་སྐྱོན་གྱིས་དམའ་བའི་འགྲོ་མཐོང་ན། །ལས་ཀྱི་དམ་པ་གཞན་དོན་དགའ་བོར་ཞིང་། །རང་གི་དོན་ལ་དེ་ཀོ་ཅི་སྟེ་བརྩོན། །གང་ཞིག་འཇིག་རྟེན་ཕན་ཕྱིར་ཀུན་སྤྱོད་ཅིང་། །མངོན་པའི་ང་རྒྱལ་བདག་ལྟ་ཡོངས་སྤངས་ཏེ། །ཀུན་ལ་བྱམས་པས་མི་གཉིས་ལམ་རྒྱུ་བ། །
དེ་ནི་མྱ་ངན་འདས་ཀྱང་འཇིག་རྟེན་སྤྱོད། །ཤེས་རབ་རྣམ་དག་མངོན་སྒྲུབ་ཐེག་པའི་མཆོག །ཐུབ་ཆེན་ཐམས་ཅད་མཁྱེན་ཉིད་དེ་ལས་འབྱུང་། །དེ་ནི་འཇིག་རྟེན་རྣམས་ཀྱི་མིག་བཞིན་ཏེ། །འོད་ལྡན་ཉི་མ་ཤར་བའི་འོད་དང་འདྲ། །འཁོར་བའི་སྐྱོན་གྱི་ཁུར་གྱིས་ངལ་ཆད་ཀྱང་། །ཤེས་རབ་རྣམ་
པར་དབྱེ་ལ་སྐྱོན་མེད་པ། །དེ་ནི་སངས་རྒྱས་ལེགས་བསྒྲུབ་ཐེག་པ་ལ། །བདག་ཉིད་ཡོངས་སུ་སྐྱོ་བར་འགྱུར་བ་མེད། །བདེ་གཤེགས་མཐུ་ཅན་རྨད་བྱུང་མཐོང་འགྱུར་བས། །ཡན་ལག་ཐམས་ཅད་སྤུ་གཡོ་དགའ་གྱུར་ཅིང་། །དེ་བསྒྲུབ་ཐེག་པའི་དམ་པ་སྤོང་བྱེད་པ། །གཡོ་སྒྱུ་སྤྱོད་མིན་རྒྱུ་
ནི་གཞན་མེད་དོ། །བདུད་ཀྱི་འཁྲུག་པས་མ་ནོན་སུ་ཞིག་ཀོ །དཀོན་མཆོག་གསུམ་གྱི་འབྱུང་གནས་ཐེག་པ་སྟེ། །གནོད་པའི་མདའ་འབྱིན་བདེ་གཤེགས་ཐེག་པ་ལ། །སྨོད་པར་སུ་བྱེད་དེ་ནི་འགྲོ་བའི་སྒྲ། །ཤེས་རབ་མིག་ཟུམས་འགྲོས་འཁྱར་གྱུར་པ་ལ། །འཇིག་རྟེན་དོན་སྒྲུབ་རྒྱལ་བའི་རྒྱལ་
རིགས་ན། །སྙིང་རྗེ་མི་སྐྱེད་སྐྱེས་བུ་གང་ཞིག་ཡོད། །དེ་དག་རྨོངས་བསལ་བརྩོན་འགྲུས་སུ་མི་རྩོམ། །ཤེས་རབ་ཀྱི་ཕ་རོལ་ཏུ་ཕྱིན་པའི་ལེའུའོ།། །།ཕ་རོལ་ཏུ་ཕྱིན་པ་བསྡུས་པ་ཨཱརྱ་ཤཱུ་རས་མཛད་པ་རྫོགས་སོ།། །།ལོ་ཙཱ་བ་ཨཱ་ཙཱརྱ་བཻ་རོ་ཙ་ན་རཀྵི་ཏས་བསྒྱུར་བའོ།། །།
༄༅༅། །རྒྱ་གར་སྐད་དུ། ཡ་ཏི་ཀརྨི་བྷཱུ་མི་ཀ་རི་པ་རི། བོད་སྐད་དུ། ལས་དང་པོ་པའི་ས་སྦྱང་བ། སངས་རྒྱས་ལ་ཕྱག་འཚལ་ལོ། །ཉི་མ་ལྟ་བུར་གཟི་ལྡན་སྐུ། །སངས་རྒྱས་ཞབས་ལ་ཕྱག་འཚལ་ཏེ། །ལས་ནི་དང་པོ་པ་ཡི་ས། །སྦྱང་བ་འདིར་ནི་བཤད་པར་བྱ། །ལམ་མ་སྦྱངས་པའི་ཉེས་
པ་དང་། །ལམ་གྱི་སྦྱང་བ་གང་ཞེ་ན། །ལམ་མ་སྦྱངས་པའི་སྐྱེ་བོ་དག །བྱེས་བགྲོད་ངལ་དུབ་ཚ་གྲང་དང་། །ལྕི་དང་རྩུབ་དང་སྐྱོ་བ་དང་། །བཀྲེས་སྐོམ་གདུང་ཤིང་བརྙས་པ་དང་། །འཇིག་དང་ཡི་མུག་ཉམས་སུ་མྱོང་། །མྱ་ངན་འཚོར་འགྲིབ་བཅས་པ་དང་། །ཁ་ཅིག་སྤྱིའུ་ཚུགས་དམྱལ་བ་

དང་། །དུད་འགྲོ་ཡི་དགས་རྣམས་སུ་བསྟེན། །ནོར་དང་བཟའ་བཏུང་གྲགས་པ་དང་། །འདོད་པས་བྱེས་འགྲོད་སྡུག་བསྔལ་ཅན། །རེ་བ་འབྲས་བུ་མེད་པ་དང་། །སྡུག་དང་བྲལ་དང་མི་སྡུག་ཕྲད། །མི་བཟད་ན་རྒས་འཛོམས་བཞིན་དུ། །འཆི་བདག་དྲུང་དུ་མྱུར་འགྲོ་བ། །མ་ཚོར་
ག་ཞར་བཅས་ཤིང་བརྩེ། །ཚེ་འདི་དོན་མེད་མྱུར་དུ་འདའ། །ཡང་དང་ཡང་དུ་སྐྱེ་བ་ཡི། །འཁོར་བའི་ཉེས་པ་གྲངས་མེད་བསྟེན། །ཀྱི་ཧུད་ལམ་ལས་ཉམས་པ་ཡི། །སྐྱེ་བོ་དག་ནི་ཉམ་ངར་གནས། །མི་བཟད་མྱ་ངན་འབྲོག་དགོན་དུ། །ལམ་གོལ་གྱུར་པ་དག་དང་མཚུངས། །མིག་
ལྡན་ལམ་ལོག་འགྲོ་བ་ལྟར། །ལམ་ལས་ཉམས་པའི་སྐྱེ་བོ་སྨད། །དེ་ལ་ལམ་སྦྱངས་པ་གང་ཞེ་ན། འདིར་ལས་དང་པོ་པའི་ས་ནི་ལམ་གྱི་དང་པོ་སྟེ། དེ་སྦྱང་བ་ནི་དབྱེ་བ་རྣམ་པ་དུ་མ་དང་ལྡན་པའི་དཀོན་མཆོག་གསུམ་ལེགས་པར་ཤེས་ནས་ཕྱག་འཚལ་བ་དང་། རྒྱ་ཆེར་མཆོད་
པ་དང་། ཡོན་ཏན་བརྗོད་པས་བསྟོད་པ་དང་། སྙིང་ཐག་པ་ནས་སྐྱབས་སུ་འགྲོ་བ་དང་། རྗེས་སུ་དྲན་པ་བསྒོམས་པས་བསླབ་པ་ལ་སློབ་པས་སྐྱབས་ཕུན་སུམ་ཚོགས་པ་ཡིན། མི་དགེ་བ་བཅུའི་ཉེས་པ་ཤེས་པ་དང་། དགེ་བ་བཅུའི་ཡོན་ཏན་ཤེས་པ་དང་། དགེ་བ་བཅུའི་
སྡོམ་པ་ལེན་པ་དང་། བླངས་པ་སླར་མི་གཏོང་བ་དང་། ལན་འགའ་ཉམས་ན་ཡང་ཆོས་བཞིན་དུ་སླར་འཆོས་པས་སྡོམ་པ་ལ་གནས་པ་ཡིན། བྱང་ཆུབ་སེམས་ཀྱི་ཕན་ཡོན་ལེགས་པར་ཤེས་པ་དང་། དེ་སྐྱེ་བའི་རྒྱུ་ལ་གནས་པ་དང་། སེམས་དེ་ཡང་དག་པར་བསྐྱེད་པ་དང་། བསྐྱེད་
པའི་མི་མཐུན་པའི་ཕྱོགས་རིང་དུ་སྤོང་བ་དང་། སེམས་དེ་འཕེལ་ཞིང་མི་བརྗེད་པའི་ཆོས་ལ་གནས་པས་བྱང་ཆུབ་ཀྱི་སེམས་ལ་གནས་པ་ཡིན་པས། དེ་ལྟར་ཆོས་རྣམ་པ་གསུམ་ལ་རྣམ་པ་བཅོ་ལྔར་ཕྱེ་བ་འདི་ནི་འདིར་ས་སྦྱང་བའི་གཞི་དང་། རྟེན་དང་། གནས་ཞེས་བྱའོ། །དེ་གཞི་དེ་ལྟ་བུ་
ལ་བརྟེན་ནས། ལམ་གྱི་དངོས་གཞི་གང་། ཇི་ལྟར་སྦྱང་ཞེ་ན། གཞི་དེ་དག་ལ་ལེགས་པར་གནས་པས་འཇུག་པ་བྱང་ཆུབ་ཀྱི་སེམས་བླང་བ་བྱས་ནས། ཇི་ལྟར་བླངས་པའི་སྡོམ་པ་ལས་མི་འདའ་བར་བྱམས་པ་ཚད་མེད་པ་བསྒོམ་པ་དང་། དྲན་པ་ཉེ་བར་གཞག་པ་བཞི་བསྒོམ་ཞིང་།

ཡང་དག་པར་སྤོང་བ་བཞི་ལ་གནས་པར་བྱ་སྟེ། འདི་ནི་ལས་དང་པོ་པའི་སའི་དངོས་གཞི་ཡིད་ལ་བྱ་བས། རིམ་གྱིས་འཕགས་པའི་བདེན་པ་ལ་འཇུག་པར་བྱའོ། །དེ་ཡང་དྲན་པ་ཉེ་བར་གཞག་པ་དང་། ཡང་དག་པར་སྤོང་བ་བཞི་གྲུབ་ནས། ཏིང་ངེ་འཛིན་གྱི་ངོ་བོ་རྫུ་
འཕྲུལ་གྱི་རྐང་པ་བཞི་ལ་གནས་པ་ན། ས་དེ་ཉིད་ཀྱི་ཁྱད་པར་ཐར་པའི་ཆ་དང་མཐུན་པའི་དགེ་བའི་རྩ་བ་བསྐྱེད་པ་ཡིན་ཏེ། བདག་དང་གཞན་གྱི་འབྱོར་པ་དང་། །འདུན་དང་ཚུལ་ཁྲིམས་དབང་པོ་དང་། །དེ་བཞིན་ཟས་དང་མི་ཉལ་དང་། །ཤེས་བཞིན་དུ་ནི་མི་སྤྱོད་དང་། །དེ་བཞིན་དགེ་
བའི་བཤེས་གཉེན་དང་། །དམ་ཆོས་ཉན་དང་སེམས་པ་དང་། །བར་ཆད་མེད་དང་གཏོང་བ་དང་། །དགེ་སྦྱོང་བརྒྱ་ནི་ཐ་མ་ཡིན། །དད་ལྡན་གཡོ་མེད་ནད་ཉུང་དང་། །བརྩོན་འགྲུས་ཤེས་རབ་འདོད་ཆུང་དང་། །ཆོག་ཤེས་གསོ་སླ་དགང་སླ་དང་། །སྦྱངས་དང་མཛེས་དང་དྲོད་རིག་དང་། །སྐྱེས་
བུ་དམ་ཆོས་མཁས་རྟགས་དང་། །བཟོད་དང་དེས་དང་གྱ་ནོམ་པའོ། །ཞེས་བྱ་བའི་ཡོན་ཏན་དང་ལྡན་ལ། དེ་ལས་གཞན་པ་ཐེག་པ་ཆེན་པོའི་ཚོགས་ལམ་གྱི་ཁྱད་པར་ལུས་ལ་དབང་བ་ལ་སོགས་པ་དང་། སྙིང་རྗེ་ཆེན་པོའི་སྒོ་སྔོན་དུ་གྱུར་པས་སྡུག་བསྔལ་བ་མཐོང་བ་ན་རང་དབང་མེད་
པར་མཆི་མའི་རྒྱུན་འབབ་པ་ལ་སོགས་པ་འབྱུང་ངོ་། །དེ་ལྟར་བྱང་ཆུབ་སེམས་དཔའི་སྡོམ་པ་དང་། བྱམས་པའི་ཏིང་ངེ་འཛིན་དང་། དྲན་པ་ཉེ་བར་གཞག་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་བཞི་པོ་སྔ་མའི་རྟེན་དང་བཅས་པ་འདི་ནི། ཚོགས་ཀྱི་ལམ་དང་།
ལས་དང་པོ་པའི་ས་དང་། དད་པའི་ས་ཞེས་བྱའོ། །ད་ནི་འདིར་ཉིན་མཚན་གྱི་ཆ་ལས་ཡང་དག་པར་སྤོང་བ་བཞི་ལ་གནས་པས་ལམ་སྦྱང་བ་བརྗོད་པ། ཐོ་རངས་མལ་ནས་ལངས་ནས་ནི། །བཞི་གསུམ་དྲན་པས་བརྟུལ་ཞུགས་མཆོག །བདག་གཞན་བརྗེ་དང་འཇིག་རྟེན་གྱི། །ཆོས་བརྒྱད་
མཉམ་པར་མོས་པ་བསྐྱེད། །དེ་ནས་ཡིད་ནི་བསྡུས་པ་ཡི། །ཀྱེ་མ་སེམས་ཅན་བདེ་འགྱུར་བསམ། །དེ་ནས་ལུས་དང་ཚོར་བ་དང་། །སེམས་དང་ཆོས་ནི་མི་གཙང་དང་། །སྡུག་བསྔལ་མི་རྟག་བདག་མེད་ཅེས། །ཕྱིན་ཅི་ལོག་བཞིའི་གཉེན་པོ་བསྒོམ། །རེ་རེའམ་ཡང་ན་རིམ་གྱིས་ཀྱང་། །ནམ་

ལངས་བར་དུ་འབད་པས་བསྒོམ། །གང་ཞིག་ལུས་ཅན་གྲོལ་འགྱུར་བའི། །ལམ་གྱི་དང་པོ་འདི་ཉིད་ཡིན། །དེ་ནས་ནམ་ནི་ལངས་པ་དང་། །ཅི་རིགས་གཙང་སྦྲ་བྱས་ནས་ནི། །མཆོད་རྟེན་ཕྱག་འཚལ་མཎྜལ་བྱ། །སྡིག་བཤགས་ལ་སོགས་རྒྱས་བྱས་ཏེ། །ལྷག་པར་སྐྱབས་སུ་
འགྲོ་བ་དང་། །བྱང་ཆུབ་སེམས་ནི་བརྟན་པོ་བསྐྱེད། །ཅི་རིགས་བསྐོར་བ་བྱས་ནས་ནི། །བླ་མ་དང་ནི་རྒན་པོ་དང་། །ཆོས་སྨྲ་བ་ལའང་ཕྱག་བྱས་ཏེ། །འཛུམ་ཞིང་སྙན་པར་སྨྲ་བ་དང་། །དེ་དག་དགོས་པ་འབད་དེ་བསྒྲུབ། །བར་དེར་དུས་ནི་ཉེར་གནས་ན། །ཆོས་བཤད་ལ་སོགས་སེམས་
ཅན་དོན། །རང་བདེ་བཏང་ལ་འབད་པས་བསྒྲུབ། །ཁྱེའུ་སུས་ལ་སོགས་ཟས་ལ་སྤྱོད། །དཀོན་མཆོག་སྤྲིན་ལས་གསུངས་པ་བཞིན། །ཆ་བཞིར་བགོས་ཏེ་བཟའ་བར་བྱ། །ལྷག་པར་ཕོངས་ལ་བཟའ་བཏུང་བགོ །སྔ་དྲོ་ཡི་ནི་དུས་དག་ཏུ། །བྲི་དང་ཀློག་པ་ལ་སོགས་པའི། །
ཆོས་སྤྱོད་བཅུ་ལ་འབད་པའམ། །ཚ་ཚ་བྱའམ་འགྲོ་ཕན་གདགས། །དུས་ཀྱི་དམ་པ་སྔ་དྲོ་ནི། །དོན་མེད་འདའ་བར་མི་བྱའོ། །ཉི་མའི་གུང་ལ་བྱམས་པ་དང་། །དྲན་པ་ཉེར་གཞག་ཅུང་ཟད་བསྒོམ། །དེ་ནས་ཡང་ནི་ཕྱག་འཚལ་སོགས། །སྔ་མ་བཞིན་དུ་རྒྱས་པར་བྱ། །
ཕྱི་དྲོ་སྐྱེ་བོ་དམ་པ་དང་། །འགྲོགས་ཤིང་ངལ་སོ་བདེན་དོན་ལ། །འགྲོ་ཞིང་སྲིད་ལས་ཡིད་འབྱུང་བའི། །ལེགས་བཤད་རོ་ནི་མྱང་བར་བྱ། །ཕྱི་འཕྲེད་སླར་ཡང་སྔ་མ་བཞིན། །ཞི་གནས་ལྷག་མཐོང་བསྒོམ་པ་དང་། །མཆོད་རྟེན་ཕྱག་འཚལ་ལ་སོགས་བྱ། །དམར་ཐག་ཆད་ནས་
མཚན་མོ་ནི། །བླ་མའི་བསྙེན་བཀུར་ཚུལ་བཞིན་བྱ། །རང་གི་རྐང་པ་བཀྲུས་ནས་ནི། །ཞི་གནས་ལྷག་མཐོང་བསྒོམ་པའམ། །དོན་ཆེན་ལྡན་པའི་ཁ་ཏོན་བྱ། །ནམ་གྱི་ཆ་སྟོད་འདས་པ་དང་། །ཚུལ་བཞིན་ཡིད་ལ་བྱེད་པ་ཡིས། །རིགས་པ་བཞིན་དུ་ཉལ་བར་བྱ། །ཉིན་པར་དང་ནི་མཚན་
མོ་ཡང་། །ལག་བཟངས་ཀྱིས་ནི་ཞུས་པ་དང་། །རིན་ཆེན་ཕྲེང་བ་ལས་བཤད་ལྟར། །སྣ་ཚོགས་དགེ་བའི་ཕྱོགས་ལ་འབད། །དེ་ནས་ཚེ་འདི་ཉིད་ལ་ཡང་། །དྲོད་ལ་སོགས་པ་ཐོབ་པར་འགྱུར། །དེ་ལྟར་ཐོས་པ་དང་བསམ་པ་ལ་གནས་པས་ཚོགས་ཀྱི་ལམ་ཕལ་པ་དང་ཁྱད་པར་ཅན་སྦྱང་

ངོ་། །དེ་ལས་གོང་དུ་བསྒོམ་པ་ལ་བྱང་བས་མོས་པས་སྤྱོད་པའི་ས་དག་ལ་དབང་པོ་དང་སྟོབས་ཀྱི་བདེན་པ་དག་བསྒོམས་པའི་ས་སྦྱང་བ་ནི་དཀོན་མཆོག་སྤྲིན་ལ་སོགས་པར་བལྟ་ཞིང་། རབ་ཏུ་དགའ་བ་ལ་སོགས་པའི་ས་སྦྱང་བ་ནི་ས་བཅུའི་ལེའུ་ལས་
བསྟན་ཏོ། །རྒྱལ་བའི་སྲས་ཀྱི་ས་ཡི་དང་པོ་པ། །ཚོགས་ཀྱི་ས་སྟེ་དེ་སྦྱངས་མདོར་བསྡུས་པ། །ཅུང་ཟད་བཤད་ལས་དགེ་བ་གང་ཐོབ་པ། །དེས་ནི་འགྲོ་རྣམས་དག་པའི་ས་ཐོབ་ཤོག །ལས་དང་པོ་པའི་ས་སྦྱང་བ་ཞེས་བྱ་བ་སློབ་དཔོན་མཁས་པ་ཆེན་པོ་བྱང་ཆུབ་སེམས་དཔའ་དགྲ་
ལས་རྒྱལ་གསང་བའི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཀྲྀཥྞ་པ་དང་། ཞུ་ཆེན་གྱི་ལོ་ཙཱ་བ་དགེ་སློང་ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅༅། །རྒྱ་གར་སྐད་དུ། བོ་ངྷི་སཏྭ་ཙརྱ་སུ་ཏྲི་ཀྲྀ་ཏ་པ་
བཱ་ར། བོད་སྐད་དུ། བྱང་ཆུབ་སེམས་དཔའི་སྤྱོད་པ་མདོ་ཙམ་གདམས་ངག་ཏུ་བྱས་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ངེས་པར་ལེགས་པའི་བྱང་ཆུབ་དང་། །མངོན་པར་མཐོ་བ་ཐོབ་འདོད་པས། །དཀོན་མཆོག་གསུམ་ལ་ལྷར་
བཟུང་ནས། །དང་པོ་སྙིང་རྗེ་ཀུན་ལ་ལྟ། །དེ་ནས་བྱང་ཆུབ་སེམས་བསྐྱེད་དེ། །ཐབས་དང་ལྡན་པའི་སྤྱོད་པ་ཡིས། །རང་གི་སེམས་ཉིད་དང་པོར་གདུལ། །དང་པོ་རང་ཉིད་མ་འདུལ་བར། །གཞན་དག་གདུལ་བར་ཇི་ལྟར་ནུས། །ཇི་ལྟར་འདབ་གཤོག་མ་ཚང་བའི། །བྱ་ཡིས་མཁའ་ལ་
འཕུར་མི་ནུས། །དེ་བཞིན་ལྟ་སྤྱོད་མེད་པ་ཡི། །གང་ཟག་དག་ནི་ཇི་ལྟར་གྲོལ། །དེ་ཕྱིར་དེ་གཉིས་འགྲུབ་པའི་ཕྱིར། །དཀའ་བའི་འབད་པ་ཆེན་པོས་བྱ། །དཀའ་བས་སྦྱང་བ་མ་བྱས་པར། །སླ་བས་གོམས་པར་ཇི་ལྟར་འགྱུར། །གོ་བགོས་ཁུར་ཁྱེར་རྒྱལ་སྲས་དེས། །དགེ་བའི་བཤེས་གཉེན་
བསྟེན་བྱས་ཏེ། །ཤེས་རབ་གསུམ་ལ་གཞི་བཅས་ནས། །གོ་འཕང་མཆོག་ཏུ་འགྲོ་བ་ཡི། །ལྟ་བ་ཉིད་ལ་གཙོར་སྦྱངས་ཏེ། །ཚུལ་ཁྲིམས་གཙང་མའི་གོས་གྱོན་ནས། །སྒྲུབ་ལ་ནན་ཏན་གཅེས་སུ་བྱ། །ཆོས་ཀྱི་རྗེས་སུ་བསྒྲུབ་པའི་ཕྱིར། །དུས་དང་གནས་སྐབས་ཀུན་དུ་ཡང་། །སྦྱོར་བ་དངོས་གཞི་

རྗེས་གསུམ་གྱི། །ལས་རྣམས་དྲན་པས་ཟིན་པར་བྱ། །སྐྱོན་སྤངས་ལེགས་སྒྲུབ་དོན་ཡོད་བྱ། །སྤྱོད་ལམ་དོན་མེད་དུ་མི་བྱ། །རྟག་ཏུ་རང་གི་ཡོན་ཏན་སྦྱངས། །དགེ་བའི་ཕྱོགས་ཀྱི་སྦྱོར་བ་ལ། །སྤྲོ་བྱ་ཞུམ་དང་སེམས་མི་གསད། །ཉེས་སྤོང་ཡོན་ཏན་དགེ་འཕེལ་བའི། །གྲོགས་
བཙལ་མཐུན་པས་དེ་སེམས་བཟུང་། །ཡོན་ཏན་ཅན་ལ་གུས་ཕྱག་བྱ། །ཉོན་མོངས་སྐྱེ་འགྲོ་ཐབས་ཀྱིས་སྤང་། །མཐོ་དམན་གྲོགས་ཀུན་དག་ལ་ཡང་། །ཆུ་ལས་འོ་མ་ལེན་པ་བཞིན། །ཉེས་པ་དོར་ལ་ལེགས་པ་བླང་། །བྱས་པ་དྲིན་གཟོ་སླར་ཕན་གདགས། །གཞན་གྱི་སྡིག་རྐྱེན་མི་བྱ་
ཞིང་། །དགེ་བའི་བར་ཆད་མི་བྱའོ། །མཐོ་ལ་ཕུན་ཚོགས་ཕྲག་དོག་མེད། །གྲོགས་དང་དམན་ལ་བརྙས་ཐབས་དང་། །ཁྱད་དུ་གསད་པ་ཉིད་མི་བྱ། །རང་སྐྱོན་གཞན་གྱི་ཡོན་ཏན་བསྒྲག །གཞན་སྐྱོན་མི་གླེང་རང་མི་བསྟོད། །འདི་བས་ཕྱི་མ་གཙོར་གཟུང་སྟེ། །བྱེད་དགུ་ཆོས་དང་བསྟུན་
ཏེ་བྱ། །འདི་ཡི་ཟང་ཟིང་རྣམ་སྤངས་ཏེ། །འཕགས་པའི་ནོར་གྱིས་ལུས་བརྒྱན་བྱ། །སྡུག་བསྔལ་དག་ལ་བདེར་མི་བཟུང་། །གཉིད་རྨུགས་ལེ་ལོ་གཡེང་སྤངས་ཏེ། །ངེས་པར་འཆི་བའི་དུས་ཤེས་བསྐྱེད། །དགེ་བ་ཆུང་ཡང་འབད་པས་བསྒྲུབ། །སྡིག་པ་ཆུང་ཡང་རྣམ་པར་སྤང་། །
ཆོས་ཀྱི་ཆེད་དུ་མ་གཏོགས་པར། །ཁ་ཟས་གོས་སོགས་དོན་མི་གཉེར། །འདོད་པ་ཆུང་དང་ཆོག་ཤེས་བྱ། །འཇིག་རྟེན་ཆོས་བརྒྱད་རྣམ་པར་སྤང་། །ངོ་དགའ་གཞོགས་སློང་སོགས་མི་བྱ། །རང་ལ་སྐྱོན་ཡོད་མི་ཚོར་བར། །གཞན་གྱི་སྐྱོན་ལ་དཔྱད་མི་བྱ། །སྨྲ་དགའ་ཁས་ལེན་དཔའ་
བྱས་ནས། །དེ་བཞིན་མི་སྒྲུབ་སྤང་བར་བྱ། །གཡོ་དང་སྒྱུ་དག་མི་བྱ་ཞིང་། །ལོག་པའི་འཚོ་བ་རྣམ་པར་སྤང་། །ཆོས་དང་མཐུན་པས་བསྒྲུབ་པར་བྱ། །ཉེ་དུ་འབྲེལ་བ་ལ་སོགས་ལ། །ཞེན་པར་ཆགས་པར་མི་བྱ་ཞིང་། །ཕྱོགས་རིས་ཞེན་ཕྱོགས་མེད་པར་བྱ། །གཞན་ལ་རེ་བ་ཆུང་བར་
བྱ། །མི་དགེའི་ལས་ལ་མི་བསྟོད་སྨད། །དགོས་པ་མེད་པའི་འདུ་འཛི་སྤང་། །བྲེ་མོའི་གཏམ་ལ་དགའ་མི་བྱ། །ཞེས་པས་འདོད་པའི་ཡིད་སྨོན་དགག །ཡོན་ཏན་ཐོབ་དང་ཚོགས་འཕེལ་བའི། །ལས་ལ་ཞུམ་དང་ངོ་ཚ་སྤང་། །ང་རྒྱལ་ཁེངས་པ་གཉེན་པོས་གཞོམ། །ཞེ་གདུག་ཁེང་

གྲགས་རྣམ་པར་སྤང་། །དངོས་དང་བརྒྱུད་པས་སེམས་ཅན་ཀུན། །ཉེ་དུ་འབྲེལ་པར་གྱུར་པ་ན། །ལུས་ངག་ཡིད་གསུམ་དྲི་མེད་པས། །དེ་དག་ཀུན་ལ་བུ་བཞིན་བལྟ། །སྙིང་རྗེས་བཞིན་འཛུམ་གསོང་པོར་སྨྲ། །དགའ་བའི་མིག་གིས་ཀུན་ལ་བལྟ། །འགྲོར་གྲོགས་
མཐོ་དམན་ཉེ་རིང་སྙོམས། །བསྟོད་དང་བཀུར་སྟིས་མི་དྲེགས་ཤིང་། །སྨོད་དང་བརྙས་ལ་ཞེ་མི་སྡང་། །ཕོངས་པ་རྣམས་ལ་སྙིང་རྗེ་ཡིས། །ཕན་ནི་གདགས་པ་ཉིད་དུ་བྱ། །གང་ལ་ཆགས་པ་སྤང་བྱ་སྟེ། །དམན་པ་རྣམས་ལ་སྙིང་རྗེ་དང་། །ཕན་པའི་བསམ་པས་གདམས་ངག་བྱ། །སེམས་ཅན་
བསམ་པ་ཐ་དད་པས། །བྱ་བ་དོན་ཆེན་བརྟགས་ཏེ་བྱ། །ཐམས་ཅད་མགུ་བར་སུ་ཡིས་ནུས། །འོན་ཀྱང་འགྱོད་པ་མེད་པ་ཡིས། །སྡུག་བསྔལ་ཁྱད་བསད་བདེ་མ་ཆགས། །རང་གི་སེམས་སྦྱང་གཞན་སེམས་གཟུང་། །བརྙས་དང་ཉེས་པ་བྱུང་ལ་སོགས། །གཉེན་པོ་ལས་དང་བརྫུན་པས་སྦྱང་། །
དེ་ལྟར་བལྟ་ཞིང་བྱང་ཆུབ་ཀྱི། །སྤྱོད་པ་ཡི་དམ་བརྟན་པར་བྱ། །མི་ལུས་རིན་ཆེན་ཆུད་མི་གསན། །ངེས་པར་འཆི་བས་ལོང་མེད་སྲིད། །བརྩོན་འགྲུས་མེ་བཞིན་དྲག་ཏུ་སྤྱོད། །མངོན་ཞེན་བདག་ལྟའི་རྩ་བ་ཆོད། །དུག་གསུམ་འཁོར་བ་གཉེན་པོས་ཆོམ། །ཕྱིན་ཅི་ལོག་གི་གཡང་ས་དོར། །
འཁོར་བའི་རྒྱུན་ཆོད་ལས་ཆུ་སྐོམས། །ངན་སོང་གསུམ་པོ་སྒོ་ཆོད་ལ། །སྡུག་བསྔལ་གསུམ་གྱི་ནད་གཞིལ་སྟེ། །མཐོ་རིས་ཐར་པའི་སྐས་ལ་འཛེགས། །སྒྲིབ་པ་གཉིས་སྦྱོང་ཚོགས་གཉིས་རྫོགས། །སྐུ་དང་ཡེ་ཤེས་ས་འཐོབ་སྟེ། །འབད་པ་མེད་པར་གཞན་དོན་སྒྲུབས། །བྱང་ཆུབ་
སེམས་དཔའི་སྤྱོད་པ་མདོ་ཙམ་གདམས་ངག་ཏུ་བྱས་པ། སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། བོ་དྷི་པཱ་ཐ་པྲ་དཱི་པཾ། བོད་སྐད་དུ། བྱང་ཆུབ་ལམ་གྱི་སྒྲོན་མ། བྱང་ཆུབ་སེམས་དཔའ་
འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དུས་གསུམ་རྒྱལ་བ་ཐམས་ཅད་དག་དང་དེའི་ཆོས་དང་། །དགེ་འདུན་རྣམས་ལ་གུས་པ་ཆེན་པོས་ཕྱག་བྱས་ཏེ། །སློབ་མ་བཟང་པོ་བྱང་ཆུབ་འོད་ཀྱིས་བསྐུལ་གྱུར་པས། །བྱང་ཆུབ་ལམ་གྱི་སྒྲོན་མ་རབ་ཏུ་གསལ་བར་བྱ། །ཆུང་ངུ་

འབྲིང་དང་མཆོག་གྱུར་པས། །སྐྱེས་བུ་གསུམ་དུ་ཤེས་པར་བྱ། །དེ་དག་མཚན་ཉིད་རབ་གསལ་བ། །སོ་སོའི་དབྱེ་བ་བྲི་བར་བྱ། །གང་ཞིག་ཐབས་ནི་གང་དག་གིས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །དེ་ནི་སྐྱེས་བུ་ཐ་མར་ཤེས། །སྲིད་པའི་བདེ་
ལ་རྒྱབ་ཕྱོགས་ཤིང་། །སྡིག་པའི་ལས་ལས་ལྡོག་བདག་ཉིད། །གང་ཞིག་རང་ཞི་ཙམ་དོན་གཉེར། །སྐྱེས་བུ་དེ་ནི་འབྲིང་ཞེས་བྱ། །རང་རྒྱུད་གཏོགས་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །སྐྱེས་བུ་དེ་ནི་མཆོག་ཡིན་
ནོ། །སེམས་ཅན་དམ་པ་བྱང་ཆུབ་མཆོག །འདོད་པར་གྱུར་པ་དེ་དག་ལ། །བླ་མ་རྣམས་ཀྱིས་བསྟན་པ་ཡི། །ཡང་དག་ཐབས་ནི་བཤད་པར་བྱ། །རྫོགས་སངས་བྲིས་སྐུ་ལ་སོགས་དང་། །མཆོད་རྟེན་དམ་པ་མངོན་ཕྱོགས་ནས། །མེ་ཏོག་བདུག་སྤོས་དངོས་པོ་དག །ཅི་འབྱོར་པ་ཡི་
མཆོད་པ་བྱ། །ཀུན་བཟང་སྤྱོད་ལས་གསུངས་པ་ཡི། །མཆོད་པ་རྣམ་པ་བདུན་དག་ཀྱང་། །བྱང་ཆུབ་སྙིང་པོའི་མཐར་ཐུག་པར། །མི་ལྡོག་པ་ཡི་སེམས་དག་གིས། །དཀོན་མཆོག་གསུམ་ལ་རབ་དད་ཅིང་། །པུས་མོ་ལྷ་ང་སར་བཙུགས་ནས། །ཐལ་མོ་སྦྱར་བ་བྱས་ནས་ནི། །དང་པོར་
སྐྱབས་འགྲོ་ལན་གསུམ་བྱ། །དེ་ནས་སེམས་ཅན་ཐམས་ཅད་ལ། །བྱམས་པའི་སེམས་ནི་སྔོན་འགྲོ་བས། །ངན་སོང་གསུམ་དུ་སྐྱེ་སོགས་དང་། །འཆི་འཕོ་སོགས་ཀྱིས་སྡུག་བསྔལ་བའི། །འགྲོ་བ་མ་ལུས་ལ་བལྟས་ཏེ། །སྡུག་བསྔལ་གྱིས་ནི་སྡུག་བསྔལ་བ། །སྡུག་བསྔལ་
སྡུག་བསྔལ་རྒྱུ་མཚན་ལས། །འགྲོ་བ་ཐར་པར་འདོད་པ་ཡིས། །ལྡོག་པ་མེད་པར་དམ་འཆའ་བའི། །བྱང་ཆུབ་སེམས་ནི་བསྐྱེད་པར་བྱ། །དེ་ལྟར་སྨོན་པའི་སེམས་དག་ནི། །བསྐྱེད་པའི་ཡོན་ཏན་གང་ཡིན་པ། །དེ་ནི་སྡོང་པོ་བཀོད་པ་ཡི། །མདོ་ལས་བྱམས་པས་རབ་ཏུ་བཤད། །
དེ་ཡི་མདོ་ཀློག་པའམ་བླ་མ་ལ་མཉན་ཏེ། །རྫོགས་པའི་བྱང་ཆུབ་སེམས་ཀྱི་ཡོན་ཏན་མཐའ་མེད་པ། །རྣམ་པར་ཤེས་པར་བྱས་ལ་དེ་ནས་རྒྱུ་མཚན་དུ། །དེ་ལྟར་ཡང་དང་ཡང་དུ་སེམས་ནི་བསྐྱེད་པར་བྱ། །དཔའ་སྦྱིན་གྱིས་ཞུས་མདོ་དག་ལས། །འདི་ཡི་བསོད་ནམས་རབ་བསྟན་པ། །

གང་དེ་ཚིགས་བཅད་གསུམ་ཙམ་དུ། །མདོར་བསྡུས་འདིར་ནི་བྲི་བར་བྱ། །བྱང་ཆུབ་སེམས་ཀྱི་བསོད་ནམས་གང་། །དེ་ལ་གལ་ཏེ་གཟུགས་མཆིས་ན། །ནམ་མཁའི་ཁམས་ནི་ཀུན་གང་སྟེ། །དེ་ནི་དེ་བས་ལྟག་པར་འགྱུར། །གངྒཱའི་བྱེ་བ་གྲངས་སྙེད་ཀྱི། །
སངས་རྒྱས་ཞིང་རྣམས་མི་གང་གིས། །རིན་ཆེན་དག་གིས་ཀུན་བཀང་སྟེ། །འཇིག་རྟེན་མགོན་ལ་ཕུལ་བ་བས། །གང་གིས་ཐལ་མོ་སྦྱར་བགྱིས་ཏེ། །བྱང་ཆུབ་ཏུ་ནི་སེམས་བཏུད་ན། །མཆོད་པ་འདི་ནི་ཁྱད་པར་འཕགས། །དེ་ལ་མཐའ་ནི་མ་མཆིས་སོ། །བྱང་ཆུབ་སྨོན་པའི་
སེམས་དག་བསྐྱེད་ནས་ནི། །འབད་པ་མང་པོས་ཀུན་དུ་སྤེལ་བྱ་ཞིང་། །འདི་ནི་སྐྱེ་བ་གཞན་དུའང་དྲན་དོན་དུ། །ཇི་སྐད་བཤད་པའི་བསླང་བའང་ཡོངས་སུ་བསྲུང་། །འཇུག་སེམས་བདག་ཉིད་སྡོམ་པ་མ་གཏོགས་པར། །ཡང་དག་སྨོན་པ་འཕེལ་བར་འགྱུར་མ་ཡིན། །རྫོགས་པའི་
བྱང་ཆུབ་སྨོན་པ་འཕེལ་འདོད་པས། །དེ་ཕྱིར་འབད་པས་འདི་ནི་ངེས་པར་བླང་། །སོ་སོར་ཐར་པ་རིགས་བདུན་གྱི། །རྟག་ཏུ་སྡོམ་གཞན་ལྡན་པ་དང་། །བྱང་ཆུབ་སེམས་དཔའི་སྡོམ་པ་ཡི། །སྐལ་པ་ཡོད་ཀྱི་གཞན་དུ་མིན། །སོ་སོར་ཐར་པ་རིས་བདུན་དང་། །དེ་བཞིན་གཤེགས་པས་
བཤད་པ་ལ། །ཚངས་སྤྱོད་དཔལ་ནི་མཆོག་ཡིན་ཏེ། །དགེ་སློང་སྡོམ་པ་དག་ཏུ་བཞེད། །བྱང་ཆུབ་སེམས་དཔའི་ས་དག་གི །ཚུལ་ཁྲིམས་ལེགས་གསུངས་ཆོ་ག་ཡིས། །ཡང་དག་མཚན་ཉིད་ལྡན་པ་ཡི། །བླ་མ་བཟང་ལས་སྡོམ་པ་བླང་། །སྡོམ་པའི་ཆོ་ག་ལ་མཁས་དང་། །བདག་
ཉིད་གང་ཞིག་སྡོམ་ལ་གནས། །སྡོམ་པ་འབོགས་བཟོད་སྙིང་རྗེར་ལྡན། །བླ་མ་བཟང་པོར་ཤེས་པར་བྱ། །དེ་ལ་འབད་པས་འདི་འདྲ་བའི། །གལ་ཏེ་བླ་མ་མ་རྙེད་ན། །དེ་ལས་གཞན་སྡོམ་ནོད་པ་ཡི། །ཆོ་ག་ཡང་དག་བཤད་པར་བྱ། །དེ་ལ་སྔོན་ཚེ་འཇམ་པའི་དཔལ། །ཨ་བ་རཱ་ཛར་གྱུར་
པ་ཡིས། །ཇི་ལྟར་བྱང་ཆུབ་ཐུགས་བསྐྱེད་པ། །འཇམ་དཔལ་གྱི་ནི་སངས་རྒྱས་ཞིང་། །རྒྱན་གྱི་མདོ་ལས་བཤད་པ་ལྟར། །དེ་བཞིན་འདིར་ནི་རབ་གསལ་བྲི། །མགོན་པོ་རྣམས་ཀྱི་སྤྱན་སྔ་རུ། །རྫོགས་པའི་བྱང་ཆུབ་སེམས་བསྐྱེད་ཅིང་། །འགྲོ་བ་ཐམས་ཅད་མགྲོན་དུ་གཉེར། །དེ་

དག་འཁོར་བ་ལས་བསྒྲལ་ལོ། །གནོད་སེམས་ཁྲོ་བའི་སེམས་ཉིད་དང་། །སེར་སྣ་དང་ནི་ཕྲག་དོག་ཉིད། །དེང་ནས་བཟུང་ནས་བྱང་ཆུབ་མཆོག །ཐོབ་ཀྱི་བར་དུ་མི་བྱའོ། །ཚངས་པར་སྤྱོད་པ་སྤྱད་བྱ་ཞིང་། །སྡིག་དང་འདོད་པ་སྤང་བར་བྱ། །ཚུལ་ཁྲིམས་སྡོམ་པ་ལ་དགའ་བས། །
སངས་རྒྱས