Luận tạng Tây Tạng (Tengyur) — Tập 99

པོ་རྣམས་གཞན་ལས་སྐྱེ་བ་དང་། དེ་བཞིན་དུ་གང་གི་ཕྱིར་བྱེད་རྒྱུ་རྣམ་པར་མ་ཕྱེ་བ་མེར་མེར་པོ་ལ་སོགས་པའི་མཚན་ཉིད་ལས་འབྲས་བུ་མིག་ལ་སོགས་པའི་མཚན་ཉིད་ཐ་མི་དད་པ་དེའི་ཕྱིར། དངོས་པོ་རྣམས་
བདག་ལས་སྐྱེ་བ་དང་། གང་གི་ཕྱིར་བྱེད་རྒྱུ་རྣམ་པར་ཕྱེ་བ་ལས་དང་ཉོན་མོངས་པ་ལ་སོགས་པའི་མཚན་ཉིད་དག་འབྲས་བུ་མིག་ལ་སོགས་པའི་མཚན་ཉིད་ལས་ཐ་དད་པ་དེའི་ཕྱིར་དངོས་པོ་རྣམས་གཞན་ལས་སྐྱེ་བར་སེམས་པའི་ཕྱིར་རོ། །དེའི་ཕྱིར་དེ་དག་ལ་ཞེས་བྱ་བ་ནི་དེ་ལྟར་
གྲངས་ཅན་དག་གཉིས་ལས་སྐྱེ་བར་སེམས་པ་དེའི་ཕྱིར། སློབ་དཔོན་ཀླུ་སྒྲུབ་ཀྱི་ཞལ་སྔ་ནས་ཀྱིས་དེ་དགག་པའི་ཕྱིར་དེ་དག་ལ། གཉིས་ལས་མ་ཡིན་ཞེས་བྱ་བ་འདི་བཀའ་སྩལ་ཏེ་ཞེས་བྱ་བར་སྦྱར་རོ། །གཉིས་ལས་མ་ཡིན་ཞེས་བྱ་བ་དེ་ཇི་ལྟ་བུ་ཞེ་ན། དེའི་ཕྱིར་བདག་དང་གཞན་
གཉིས་ལས་མ་ཡིན་ཞེས་བྱ་བའི་ཐ་ཚིག་གོ་ཞེས་བྱ་བ་སྨྲས་སོ། །དགག་པའི་དོན་ནི་སྔ་མ་བཞིན་ནོ་ཞེས་བྱ་བ་ནི། འདིར་གཉིས་ལས་མ་ཡིན་ཞེས་བྱ་བའི་དོན་ནི་སྔར་བདག་ལས་མ་ཡིན་ཞེས་བྱ་བའི་དགག་པ་འདི་ནི་མེད་པར་དགག་པའི་དོན་དུ་བལྟ་བར་བྱ་སྟེ། ཅིའི་ཕྱིར་ཞེ་ན། དེའི་
ཕྱིར་དགག་པ་གཙོ་ཆེ་བའི་ཕྱིར་དང་ཞེས་སྨྲས་པས། མེད་པར་དགག་པ་དང་དབུ་མ་པའི་བསྟན་བཅོས་ནི་དགག་པ་གཙོ་ཆེ་བའི་ཕྱིར་རོ་ཞེས་བཤད་པ་དང་། དགག་པ་གཙོ་ཆེ་བའི་འབྲས་བུ་གང་ཡིན་ཞེ་ན། དེའི་ཕྱིར་འདི་ལྟར་རྟོག་པ་མ་ལུས་པའི་དྲ་བ་དགག་པས་རྣམ་པར་མི་རྟོག་པའི་ཡེ་ཤེས་
ཤེས་བྱ་ཡུལ་མ་ལུས་པ་དང་ལྡན་པ་འགྲུབ་པར་དགོངས་པའི་ཕྱིར་རོ་ཞེས་བྱ་བ་སྨྲས་པས། དགག་པ་གཙོ་ཆེ་བས་རྟོག་པ་མ་ལུས་པའི་དྲ་བ་དགག་པས་འཇིག་རྟེན་ལས་འདས་པའི་ཀུན་རྫོབ་ཀྱིས་རྣམ་པར་གཞག་པ་རྣམ་པར་མི་རྟོག་པའི་ཡེ་ཤེས་ཤེས་བྱ་ཡུལ་མ་ལུས་པ་དང་ལྡན་པས་
འགྲུབ་པར་དགོངས་པའི་ཕྱིར་རོ་ཞེས་བཤད་པ་དང་། མ་ཡིན་པར་དགག་པ་ཡོངས་སུ་གཟུང་ན་ནི་དེ་སྒྲུབ་པ་གཙོ་ཆེ་བའི་ཕྱིར། ཆོས་རྣམས་མ་སྐྱེས་སོ་ཞེས་སྒྲུབ་པས་སྐྱེ་བ་མེད་པར་སྟོན་པའི་ཕྱིར་མཛད་པའི་མཐའ་དང་བྲལ་བར་འགྱུར་ཏེ། ལུང་ལས་གཟུགས་ཀྱི་སྐྱེ་བ་མེད་པ་ལ་

སྤྱོད་ན་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་མ་ཡིན་ནོ་ཞེས་འབྱུང་བའི་ཕྱིར་རོ་ཞེས་སྨྲས་པས། མ་ཡིན་པར་དགག་པ་ཡོངས་སུ་གཟུང་བའི་ཉེས་དམིགས་བསྟན་པ་དང་། འདིར་དངོས་པོ་རྣམས་བདག་ལས་སྐྱེ་བ་མེད་པ་ཁོ་ནའོ་ཞེས་ངེས་པར་གཟུང་བར་བྱའོ། །གཞན་དུ་ངེས་པར་
གཟུང་ན་བདག་ཁོ་ན་ལས་སྐྱེ་བ་མེད་དེ། འོ་ན་ཅི་ཞེ་ན། གཞན་ལས་སྐྱེའོ་ཞེས་བྱ་བར་ངེས་པར་འགྱུར་བ་དང་། དེ་བཞིན་དུ་བདག་ཁོ་ན་ལས་ནི་སྐྱེ་བ་མེད་དེ། འོ་ན་ཅི་ཞེ་ན། བདག་དང་གཞན་ལས་སྐྱེའོ་ཞེས་བྱ་བར་ངེས་པར་འགྱུར་བས་དེ་ཡང་མི་བཞེད་དེ། མཛད་པའི་མཐའ་
དང་བྲལ་བའི་ཕྱིར་རོ་ཞེས་སྨྲས་པས། ངེས་པར་གཟུང་བ་རྣམ་པ་གསུམ་ལས་དང་པོ་ལྟར་གཟུང་བར་བྱ་བ་ཡིན་གྱི། ངེས་པར་གཟུང་བ་གཉིས་པ་དང་གསུམ་པ་ལྟར་གཟུང་ན་གཞན་ལས་སྐྱེ་བ་དང་བདག་དང་གཞན་ལས་སྐྱེ་བར་ཐལ་བར་འགྱུར་རོ་ཞེས་བཤད་པ་བཞིན་དུ། འདིར་
ཡང་གཞན་ལས་མ་ཡིན་ཞེས་བྱ་བའི་དགག་པ་འདི་ནི་མེད་པར་དགག་པའི་དོན་དུ་བལྟ་བར་བྱ་སྟེ། དགག་པ་གཙོ་ཆེ་བའི་ཕྱིར་དང་། འདི་ལྟར་རྟོག་པ་མ་ལུས་པའི་དྲ་བ་དགག་པས་རྣམ་པར་མི་རྟོག་པའི་ཡེ་ཤེས་ཤེས་བྱ་ཡུལ་མ་ལུས་པ་དང་ལྡན་པ་བསྒྲུབ་པར་དགོངས་པའི་ཕྱིར་རོ། །
མ་ཡིན་པར་དགག་པ་ཡོངས་སུ་གཟུང་ན་ནི། དེ་སྒྲུབ་པ་གཙོ་ཆེ་བའི་ཕྱིར། ཆོས་རྣམས་མ་སྐྱེས་སོ་ཞེས་སྒྲུབ་པས་སྐྱེ་བ་མེད་པར་སྟོན་པའི་ཕྱིར། མཛད་པའི་མཐའ་དང་བྲལ་བར་འགྱུར་ཏེ། ལུང་ལས་གཟུགས་ཀྱི་སྐྱེ་བ་མེད་པ་ལ་སྤྱོད་ན་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་མ་ཡིན་
ནོ་ཞེས་འབྱུང་བའི་ཕྱིར་རོ། །འདིར་དངོས་པོ་རྣམས་གཉིས་ལས་སྐྱེ་བ་མེད་པ་ཁོ་ནའོ་ཞེས་ངེས་པར་གཟུང་བར་བྱའོ། །གཞན་དུ་ངེས་པར་གཟུང་ན་གཉིས་ཁོ་ན་ལས་སྐྱེ་བ་མེད་དེ། འོ་ན་ཅི་ཞེ་ན། གཅིག་ལས་སྐྱེའོ་ཞེས་བྱ་བར་ངེས་པར་འགྱུར་བ་དང་། དེ་བཞིན་དུ་གཉིས་ཁོ་ན་
ལས་ནི་སྐྱེ་བ་མེད་དེ། འོ་ན་ཅི་ཞེ་ན། རྒྱུ་མེད་པ་ལས་སྐྱེའོ་ཞེས་བྱ་བ་ངེས་པར་འགྱུར་བས་དེ་ཡང་མི་བཞེད་དེ། མཛད་པའི་མཐའ་དང་བྲལ་བའི་ཕྱིར་རོ་ཞེས་སྔ་མ་བཞིན་དུ་ཅི་རིགས་པར་སྦྱར་རོ་ཞེས་བྱ་བའི་ཐ་ཚིག་གོ། །ཅི་ཞིག་ཅེ་ན་ཞེས་བྱ་བ་ནི་གཉིས་ལས་ཅི་ཞིག་མ་ཡིན་ཞེ་ན་ཞེས་འགྲེལ་

པ་བྱེད་པ་ཉིད་ཀྱིས་དྲི་བའི་ཚིག་ཡིན་ནོ། །དེའི་ལན་དུ་འགྲེལ་པ་བྱེད་པ་ཉིད་ཀྱིས། དངོས་པོ་གང་དག་གང་ན་ཡང་། །སྐྱེས་པ་རྣམས་ཀྱང་ཡོད་མ་ཡིན། །ཞེས་བྱ་བའི་སྐབས་ཡིན་ནོ་ཞེས་བྱ་བ་སྨྲས་ཏེ། གཉིས་ལས་ཅི་ཞིག་མ་ཡིན་ཞེ་ན། གཉིས་ལས་
དངོས་པོ་གང་དག་གང་ན་ཡང་། །སྐྱེས་པ་ནམ་ཡང་ཡོད་མ་ཡིན། །ཞེས་བྱ་བའི་སྐབས་ཡིན་ནོ་ཞེས་བྱ་བར་སྦྱར་རོ། །དེ་ལ་དངོས་པོ་གང་དག་ཅེས་བྱ་བ་ནི་ནང་དང་ཕྱི་རོལ་གྱི་དང་ཆ་ཕྲ་བ་དང་རགས་པ་དག་གོ། །གང་ན་ཡང་ཞེས་བྱ་བ་ནི་བདག་ཅག་གི་ཕྱོགས་དང་གཞན་གྱི་ཕྱོགས་
ན་ཡང་ངོ་། །སྐྱེས་པ་ནམ་ཡང་ཡོད་མ་ཡིན། །ཞེས་བྱ་བ་ནི་དོན་དམ་པར་ནང་དང་ཕྱི་རོལ་དང་ཆ་ཕྲ་བ་དང་རགས་པའི་དངོས་པོ་གང་དག་བདག་ཅག་གི་ཕྱོགས་དང་། གཞན་གྱི་ཕྱོགས་གང་ན་ཡང་སྐྱེས་པ་དུས་ནམ་ཡང་ཡོད་པ་མ་ཡིན་པའོ། །ནམ་ཡང་ཞེས་བྱ་བ་ནི་འདས་པ་དང་།
མ་འོངས་པ་དང་། ད་ལྟར་བྱུང་བའི་དུས་ནམ་ཡང་ངམ། རང་གི་སྡེ་པ་དང་། གཞན་གྱི་སྡེ་པས་བརྟགས་པའི་གནས་སྐབས་ནམ་ཡང་ངོ་། །ཡོད་པ་མ་ཡིན་ཞེས་བྱ་བ་ནི་གཉིས་ལས། དངོས་པོ་གང་དག་གང་ན་ཡང་། །སྐྱེས་པ་ནམ་ཡང་ཡོད་མ་ཡིན། །ཞེས་མེད་པར་
དགག་པའི་དོན་དུ་བལྟ་བར་བྱ་བ་ཡིན་གྱི། མི་སྐྱེ་བ་ཡོད་དོ་ཞེས་མ་ཡིན་པར་དགག་པའི་དོན་དུ་ནི་བལྟ་བར་མི་བྱའོ་ཞེས་བྱ་བར་སྦྱར་རོ་ཞེས་བྱ་བའི་སྐབས་ཡིན་ནོ་ཞེས་བྱ་བ་ནི་སྔར་དམ་བཅས་པ་སྤྱིའི་བཀོད་པ་དང་པོ་སྒྲུབ་པའི་སྐབས་སུ། དེ་ལ་རེ་ཞིག་བདག་ལས་མ་ཡིན་ཞེས་བྱ་བ་ཅི་ཞིག་
ཅེ་ན། སྐྱེས་པ་ནམ་ཡང་ཡོད་མ་ཡིན། །ཞེས་བྱ་བ་ལ་སོགས་པ་སྟེ། རེ་རེ་དང་སྦྱར་བར་བྱའོ་ཞེས་ཇི་སྐད་བསྟན་པའི་སྐབས་ཡིན་པ་སྟེ། དེ་ནི་གཉིས་ལས། དངོས་པོ་གང་དག་གང་ན་ཡང་། །སྐྱེས་པ་ནམ་ཡང་ཡོད་མ་ཡིན། །ཞེས་བྱ་བ་ཡིན་ནོ་ཞེས་བསྟན་ཏོ། །ཅིའི་ཕྱིར་ཞེ་ན་
ཞེས་བྱ་བ་ནི་ཅིའི་ཕྱིར་གཉིས་ལས། དངོས་པོ་གང་དག་གང་ན་ཡང་། །སྐྱེས་པ་ནམ་ཡང་ཡོད་མ་ཡིན། །ཞེས་འགྲེལ་པ་བྱེད་པ་ཉིད་ཀྱིས་དྲི་བའི་ཚིག་ཡིན་ནོ། །དེའི་ལན་དུ་འགྲེལ་པ་བྱེད་པ་ཉིད་ཀྱིས་ཕྱོགས་གཉིས་ཀར་བསྟན་པའི་སྒྲུབ་པ་དག་གིས་གཏད་ཁོངས་སུ་ཆུད་པར་འགྱུར་

བའི་ཕྱིར་དང་། གཉིས་ལས་སྐྱེ་བར་སྟོན་པའི་རྗེས་སུ་དཔག་པ་མེད་པའི་ཕྱིར་ཡང་ངོ་ཞེས་བྱ་བར་དགོངས་སོ་ཞེས་བྱ་བ་སྨྲས་ཏེ། སློབ་དཔོན་གྱི་ཞལ་སྔ་ནས་ཀྱིས་དེ་ལྟར་དགོངས་སོ་ཞེས་བྱ་བའི་ཐ་ཚིག་གོ། །དེ་ལ་ཕྱོགས་གཉི་གར་བསྟན་པའི་སྒྲུབ་པ་དག་གིས་ཞེས་བྱ་བ་ནི་
སྔར་བདག་ལས་སྐྱེ་བ་དགག་པའི་ཕྱོགས་དང་། གཞན་ལས་སྐྱེ་བ་དགག་པའི་ཕྱོགས་གཉི་གར་བསྟན་པའི་སྒྲུབ་པ་དག་གིས་ཏེ། འདི་ལ་བདག་ལས་སྐྱེ་བ་དགག་པའི་ཕྱོགས་སུ་བསྟན་པའི་སྒྲུབ་པ་ནི་དོན་དམ་པར་ནང་གི་སྐྱེ་མཆེད་རྣམས་བདག་ལས་སྐྱེ་བ་མེད་པར་ངེས་ཏེ་ཡོད་པའི་
ཕྱིར། དཔེར་ན་ཤེས་པ་ཡོད་པ་ཉིད་བཞིན་ནོ་ཞེས་སྔར་བསྟན་པ་ཡིན་ནོ། །གཞན་ལས་སྐྱེ་བ་དགག་པའི་ཕྱོགས་སུ་བསྟན་པའི་སྒྲུབ་པ་ནི་དོན་དམ་པར་ནང་གི་སྐྱེ་མཆེད་རྣམས་དེ་དག་གི་རྐྱེན་གཞན་ལས་སྐྱེ་བ་མེད་དེ། གཞན་ཡིན་པའི་ཕྱིར་དཔེར་ན་བུམ་པ་བཞིན་ནོ། །ཡང་ན་
དོན་དམ་པར་གཞན་བརྗོད་པར་འདོད་པས་མིག་ལ་སོགས་པ་ནང་གི་སྐྱེ་མཆེད་འགྲུབ་པར་བྱེད་པ་དག་རྐྱེན་མ་ཡིན་པར་ངེས་ཏེ་གཞན་ཡིན་པའི་ཕྱིར། དཔེར་ན་རྒྱུ་སྤུན་ལ་སོགས་པ་བཞིན་ནོ་ཞེས་སྔར་བསྟན་པ་ཡིན་ནོ། །སྒྲུབ་པ་དེ་དག་གིས་གཏད་ཁོངས་སུ་ཆུད་པར་འགྱུར་བའི་ཕྱིར་
ཞེས་བྱ་བ་ནི་སྔར་ཉེ་བར་སྦྱར་བའི་སྒྲུབ་པས་དེ་དག་གིས་ཕྱོགས་འདིར་ཡང་ཉེ་བར་སྦྱར་ཏེ། གཏད་ཁོངས་སུ་ཆུད་པར་འགྱུར་བའི་ཕྱིར་རོ། །གཏད་ཁོངས་སུ་ཆུད་པར་འགྱུར་བ་ཞེས་བྱ་བའི་ཟླ་འབྱོར་པ་འམ་ཁྱབ་པར་འགྱུར་བ་སྟེ། ཕྱོགས་གཉི་གར་བསྟན་པའི་སྒྲུབ་པ་དེ་དག་ཉིད་
ཕྱོགས་འདིར་ཡང་སྦྱོར་བར་འགྱུར་བའི་ཕྱིར་ཞེས་བྱ་བའི་ཐ་ཚིག་གོ། །དེས་ན་འདི་སྐད་བསྟན་ཏེ། དོན་དམ་པར་གྲངས་ཅན་དག་གི་བློས་ཡོངས་སུ་བརྟགས་པས་འབྲས་བུ་མྱུ་གུ་ཞེས་བྱ་བ་བྱེད་རྒྱུ་རྣམ་པར་མ་ཕྱེ་བ་ས་བོན་གྱི་མཚན་ཉིད་ལས་སྐྱེ་བ་མེད་པར་ངེས་ཏེ་ཡོད་པའི་ཕྱིར། དཔེར་ན་ཤེས་པ་
ཡོད་པ་ཉིད་བཞིན་ནོ། །དོན་དམ་པར་གྲངས་ཅན་དག་གི་བློས་ཡོངས་སུ་བརྟགས་པ་འབྲས་བུ་མྱུ་གུ་ཞེས་བྱ་བ། དེ་དག་གི་བྱེད་རྒྱུ་རྣམ་པར་ཕྱེ་བ་ས་ལ་སོགས་པ་གཞན་དག་ལས་སྐྱེ་བ་མེད་དེ་གཞན་ཡིན་པའི་ཕྱིར། དཔེར་ན་བུམ་པ་བཞིན་ནོ། །དོན་དམ་པར་གྲངས་ཅན་དག་

གི་བློས་ཡོངས་སུ་བརྟགས་པ་གཞན་བརྗོད་པར་འདོད་པ་བྱེད་རྒྱུ་རྣམ་པར་ཕྱེ་བ་ས་ལ་སོགས་པ་དག་རྐྱེན་མ་ཡིན་པར་ངེས་ཏེ། གཞན་ཡིན་པའི་ཕྱིར། དཔེར་ན་རྒྱུ་སྤུན་ལ་སོགས་པ་བཞིན་ནོ་ཞེས་བྱ་བ་སྦྱོར་བའི་ཚིག་རྣམས་དང་། གལ་ཏེ་གཏན་
ཚིགས་ཡོད་པ་ཉིད་ནི་མི་མཐུན་པའི་ཕྱོགས་ལས་བཟློག་པ་མ་བསྟན་པས་གཏན་ཚིགས་ཉིད་མ་ཡིན་ནོ་ཞེ་ན། མེད་པ་ཁོ་ནའི་ཕྱིར། དེ་ལ་ལྡོག་པ་མེད་པས་འདི་དང་ཐམས་ཅད་ལ་ཉེས་པ་མེད་དོ་ཞེས་བྱ་བ་ལ་སོགས་པ་རྒལ་བའི་ལམ་རྣམས་དང་། ཅི་སྟེ་གཞན་ཡིན་པའི་ཕྱིར་ཞེས་བྱ་
བ་དེ་གཏན་ཚིགས་སུ་མི་རུང་སྟེ། དམ་བཅས་པའི་དོན་གྱི་ཕྱོགས་གཅིག་ཡིན་པའི་ཕྱིར། དཔེར་ན་སྒྲ་རྟག་སྟེ་སྒྲ་ཡིན་པའི་ཕྱིར་རོ་ཞེས་བྱ་བ་བཞིན་ནོ་ཞེ་ན། དེ་ནི་བཟང་པོ་མ་ཡིན་ཏེ། སྙན་ཚིག་གི་སྒྲ་མི་རྟག་སྟེ་སྒྲ་ཡིན་པའི་ཕྱིར། དཔེར་ན་རྔ་བོ་ཆེའི་སྒྲ་བཞིན་ནོ་ཞེས་བྱ་བས་དམ་
བཅས་པའི་དོན་གྱི་ཕྱོགས་གཅིག་གཏན་ཚིགས་ཉིད་དུ་གྲུབ་པ་མཐོང་བས་གཏན་ཚིགས་མ་ངེས་པ་ཉིད་དོ་ཞེས་བྱ་བ་ལ་སོགས་པ་བརྒལ་བའི་ལན་རྣམས་ཀྱང་འདིར་སྔ་མ་དག་བཞིན་དུ་སྦྱར་བར་ཁོང་དུ་ཆུད་པར་བྱའོ། །གཉིས་ལས་སྐྱེ་བར་སྟོན་པའི་རྗེས་སུ་དཔག་པ་མེད་པའི་ཕྱིར་ཡང་ངོ་
ཞེས་བྱ་བར་དགོངས་སོ་ཞེས་བྱ་བ་ནི་གྲངས་ཅན་དག་གི་དངོས་པོ་རྣམས་བདག་དང་གཞན་གཉིས་ལས་སྐྱེ་བར་སེམས་པ་གང་ཡིན་པ་དེ་ནི་ཚིག་ཙམ་དུ་ཟད་དེ། འདི་ལྟར་གྲངས་ཅན་དག་གི་དམ་བཅས་པ་དེ་ལ་ནི་དངོས་པོ་རྣམས་གཉིས་ལས་སྐྱེ་བར་སྟོན་པའི་རྗེས་སུ་དཔག་པ་སྒྲུབ་པ་གཏན་
ཚིགས་དང་དཔེ་དག་མེད་པའི་ཕྱིར། ཡང་དངོས་པོ་རྣམ་པ་གཉིས་ལས་སྐྱེ་བ་མེད་དོ། །ཡང་ངོ་ཞེས་བྱ་བའི་སྒྲ་ནི་ཐ་དད་པར་རྟོག་པའི་དོན་ཏེ། ཕྱོགས་གཉི་གར་བསྟན་པའི་སྒྲུབ་པ་དག་གིས་གཏད་ཁོངས་སུ་ཆུད་པར་འགྱུར་བའི་ཕྱིར་གཉིས་ལས་སྐྱེ་བ་མེད་པ་འབའ་ཞིག་ཏུ་ཡང་མ་
ཟད་དེ། འདི་ལྟར་གཉིས་ལས་སྐྱེ་བར་སྟོན་པའི་རྗེས་སུ་དཔག་པ་མེད་པའི་ཕྱིར་ཡང་གཉིས་ལས་སྐྱེ་བ་མེད་དོ་ཞེས་བྱ་བར་ཐ་དད་པར་རྟོག་པ་ཡིན་ནོ་ཞེས་བྱ་བར་དགོངས་སོ་ཞེས་བྱ་བ་ནི་སློབ་དཔོན་གྱི་ཞལ་སྔ་ནས་ཀྱིས་དེ་ལྟར་དགོངས་པའོ། །དགོངས་ཞེས་བྱ་བ་ནི་ཐུགས་ལ་དགོངས་པ་སྟེ།

སློབ་དཔོན་གྱི་དགོངས་པ་འདི་གཉིས་ལས། དངོས་པོ་གང་དག་གང་ན་ཡང་། །སྐྱེ་བ་ནམ་ཡང་ཡོད་མ་ཡིན། །ཞེས་བཀའ་སྩལ་པ་ཡིན་ནོ།། །།བམ་པོ་བཅུ་གཉིས་པ། གཅེར་བུར་རྒྱུ་བའི་ཕྱོགས་དགག་པའི་ཕྱིར་ཡང་གཉིས་ལས་མ་ཡིན་ཞེས་བྱ་བ་ལ་སོགས་
པ་འདི་བཀའ་སྩལ་ཏེ་ཞེས་བྱ་བ་འདིས་ནི་གང་གི་ཕྱིར་ཕྱོགས་ཀྱི་གོས་ཅན་དག་ཀྱང་དངོས་པོ་རྣམས་བདག་དང་གཞན་གཉིས་ལས་སྐྱེ་བར་སྨྲས་པས་དེའི་ཕྱིར། དེ་དགག་པའི་ཕྱིར་ཡང་སློབ་དཔོན་གྱི་ཞལ་སྔ་ནས་ཀྱིས། གཉིས་ལས་སྐྱེ་བ་དགག་པའི་ཕྱོགས་འདི་ཡང་འཁོར་ལོ་
བཞིན་དུ་བསྐོར་ཏེ་བཀའ་སྩལ་ཏོ་ཞེས་བྱ་བར་སྟོན་ཏོ། །དེ་ལ་གཅེར་བུར་རྒྱུ་བ་པ་ཞེས་བྱ་བ་ནི་མུ་སྟེགས་རྒྱལ་བའི་གྲུབ་པའི་མཐའ་སྨྲ་བ་མུ་སྟེགས་གཅེར་བུར་རྒྱུ་བ་ཕྱོགས་ཀྱི་གོས་ཅན་ཞེས་བྱ་བ་དག་གོ། །དེ་དག་གི་ཕྱོགས་ཞེས་བྱ་བ་ནི་དངོས་པོ་རྣམས་བདག་དང་གཞན་གཉིས་ལས་སྐྱེ་
བར་སྨྲ་བ་ཡིན་ནོ། །དགག་པའི་ཕྱིར་ཡང་ཞེས་བྱ་བ་ནི་གཅེར་བུར་རྒྱུ་བའི་ཕྱོགས་དེ་དགག་པའི་ཕྱིར་ཡང་སློབ་དཔོན་གྱི་ཞལ་སྔ་ནས་ཀྱིས། གཉིས་ལས་མ་ཡིན་ཞེས་བྱ་བ་ལ་སོགས་པ་འདི་བཀའ་སྩལ་ཏེ་ཞེས་བྱ་བར་སྦྱར་རོ། །སོགས་པ་ཞེས་བྱ་བའི་སྒྲས་ནི་གཉིས་ལས། དངོས་
པོ་གང་དག་གང་ན་ཡང་། །སྐྱེས་པ་ནམ་ཡང་ཡོད་མ་ཡིན། །ཞེས་བྱ་བ་དག་བཀའ་སྩལ་བར་བསྡུའོ། །དེ་དག་ཇི་ལྟར་རྟོག་པར་བྱེད་ཅེ་ན། དེའི་ཕྱིར་འདི་ལྟར་དེ་དག་ནི་གསེར་གྱི་སོར་གདུབ་ནི་གསེར་དང་མེ་ལ་སོགས་པ་ལས་བདག་དང་གཞན་ལས་སྐྱེ་བར་སྨྲ་བའི་ཕྱིར་རོ་ཞེས་བྱ་བ་
སྨྲས་སོ། །འདི་ལྟར་ཞེས་བྱ་བའི་སྒྲ་ནི་གང་གི་ཕྱིར་ཞེས་བྱ་བའི་དོན་ཏོ། །གང་གི་ཕྱིར་གཅེར་བུར་རྒྱུ་བ་པ་དེ་དག་ནི་གསེར་གྱི་སོར་གདུབ་ནི་གསེར་དང་མེ་ལ་སོགས་པ་ལས་སྐྱེ་བར་མཐོང་བ་ན་དེ་ཉིད་ཀྱིས་དེ་དག་དངོས་པོ་རྣམས་བདག་དང་གཞན་ལས་སྐྱེ་བར་སྨྲ་བའི་ཕྱིར་ཏེ། དེས་ན་
གཅེར་བུར་རྒྱུ་བ་པ་དག་གི་བློས་ཡོངས་སུ་བརྟགས་པའི་ཕྱོགས་ནི། དངོས་པོ་རྣམས་བདག་དང་གཞན་གཉིས་ལས་སྐྱེ་བར་སྨྲ་བ་ཡིན་པར་གནས་སོ། །དེའི་ཕྱིར་གཅེར་བུར་རྒྱུ་བ་པའི་ཕྱོགས་དེ་དགག་པའི་ཕྱིར། ཡང་སློབ་དཔོན་གྱི་ཞལ་སྔ་ནས་ཀྱིས་གཉིས་ལས། དངོས་པོ་གང་

དག་གང་ན་ཡང་། །སྐྱེས་པ་ནམ་ཡང་ཡོད་མ་ཡིན། །ཞེས་བྱ་བའི་ཕྱོགས་འདི་བཀའ་སྩལ་ཏོ། །འདི་སྐད་བསྟན་ཏེ། གང་གི་ཕྱིར་གཅེར་བུར་རྒྱུ་བ་པ་དེ་དག་གསེར་གྱི་སོར་གདུབ་གསེར་དང་མེ་ལ་སོགས་པ་ལས་སྐྱེ་བ་ན། གསེར་གྱི་སོར་གདུབ་ཀྱི་
རྣམ་པ་དེའི་རྒྱུ་རིགས་མཐུན་པ་གསེར་ཁོ་ན་ལས་སྐྱེ་བར་མཐོང་བ་དེའི་ཕྱིར། བདག་ལས་སྐྱེ་བར་སྨྲ་ལ། གང་གི་ཕྱིར་གསེར་གྱི་སོར་གདུབ་ཀྱི་རྣམ་པ་དེ་རྐྱེན་རིགས་མི་མཐུན་པ་མེ་དང་གསེར་མགར་དང་། མགར་སྤྱད་དང་། བསྲེག་པ་དང་། བརྡུང་བ་དང་། བཀྲུ་བ་ལ་
སོགས་པ་གཞན་ལས་སྐྱེ་བར་མཐོང་བ་དེའི་ཕྱིར། གཞན་ལས་སྐྱེ་བར་སྨྲའོ། །དེ་བཞིན་དུ་གང་གི་ཕྱིར་མིའི་ལུས་ཀྱི་གནས་སྐབས་ཀྱི་སྲོག་ཐོག་མ་དང་ཐ་མ་མེད་པའི་བདག་ཉིད་ཀྱི་རྫས་ཀྱི་དགེ་བ་དང་མི་དགེ་བའི་ལས་བྱས་པ་གང་ཡིན་པ་དེས། ལྷ་ལ་སོགས་པའི་ལུས་སམ་
སེམས་ཅན་དམྱལ་བ་ལ་སོགས་པའི་ལུས་སུ་སྐྱེ་བ་ན་ལྷ་ལ་སོགས་པའི་ལུས་ཀྱི་གནས་སྐབས་ཀྱི་སྲོག་དང་། སེམས་ཅན་དམྱལ་བ་ལ་སོགས་པའི་ལུས་ཀྱི་གནས་སྐབས་ཀྱི་སྲོག་གི་རྣམ་པ་སྟེ་རྒྱུ་རིགས་མཐུན་པ་མིའི་ལུས་ཀྱི་གནས་སྐབས་ཀྱི་སྲོག་ཁོ་ན་ལས་སྐྱེ་བར་མཐོང་བ་དེའི་ཕྱིར་
བདག་ལས་སྐྱེ་བར་སྨྲ་ལ། གང་གི་ཕྱིར་ལྷ་ལ་སོགས་པའི་ལུས་ཀྱི་གནས་སྐབས་ཀྱི་སྲོག་དང་སེམས་ཅན་དམྱལ་བ་ལ་སོགས་པའི་ལུས་ཀྱི་གནས་སྐབས་ཀྱི་སྲོག་གི་རྣམ་པ་དེ་རྐྱེན་རིགས་མི་མཐུན་པ་མིའི་ལུས་ཀྱི་རྣམ་གྲངས་གཞན་ལས་སྐྱེ་བར་མཐོང་བ་དེའི་ཕྱིར་གཞན་ལས་སྐྱེ་བར་
སྨྲའོ། །དེས་ན་དེ་དག་སངས་རྒྱས་པ་དག་གིས་དངོས་པོ་རྣམས་བདག་ལས་སྐྱེ་བ་མེད་པར་སྒྲུབ་པ་གང་སྨྲས་པ་དེ་ནི་གྲུབ་པ་ལ་སྒྲུབ་པའི་སྐྱོན་ཆགས་པ་ཡིན་ཏེ། འདི་ལྟར་སྲོག་ནི་རྐྱེན་རིགས་མི་མཐུན་པ་ལུས་ཀྱི་རྣམ་གྲངས་གཞན་ལས་སྐྱེ་བའི་ཕྱིར་རོ་ཞེས་ཀྱང་ཟེར། སངས་རྒྱས་
པ་དག་གིས་དངོས་པོ་རྣམས་གཞན་ལས་ཀྱང་སྐྱེ་བ་མེད་པར་སྒྲུབ་པ་གང་སྨྲས་པ་དེ། ཡང་གྲུབ་པ་ལ་སྒྲུབ་པའི་སྐྱོན་ཆགས་པ་ཁོ་ན་ཡིན་ཏེ། འདི་ལྟར་སྲོག་ནི་རྒྱུ་རིགས་མཐུན་པ་སྲོག་གི་རྫས་དག་ལས་སྐྱེ་བའི་ཕྱིར་རོ་ཞེས་ཀྱང་ཟེར་ཞིང་། དེའི་ཕྱིར་དེ་དག་རྣམ་པ་གཉིས་སུ་སྨྲས་ཏེ།

འདི་ལྟར་བདག་ལས་ཀྱང་སྐྱེ་ལ་གཞན་ལས་ཀྱང་སྐྱེ་བ་དང་། རྟག་པ་ཡང་ཡིན་ལ་མི་རྟག་པ་ཡང་ཡིན་པ་དང་། དེ་ཉིད་ཀྱང་ཡིན་ལ་གཞན་ཡང་ཡིན་པའི་ཕྱིར་ཞེས་རྣམ་པ་གཉིས་སུ་སྨྲ་བས། དེ་དག་ལ་དབུ་མ་པས་འདི་སྐད་ཅེས་བརྗོད་པར་བྱའོ། །ཤེས་ལྡན་དག་ཇི་རེ་ཞིག་
གཏམ་ཞིག་ཉོན་ཅིག །མི་གཅིག་ཅིག་གིས་ཆོམ་རྐུན་པ་གཅིག་དང་མི་བསད་པ་གཅིག་བཟུང་སྟེ། རྒྱལ་པོ་ལ་ཕུལ་བ་དང་། དེ་ནས་རྒྱལ་པོས་ཆོམ་རྐུན་པ་དེ་ལ་ཀཱཪྵཱ་པ་ཎ་ལྔ་བརྒྱའི་ཆད་པས་བཅད། མི་གསོད་པ་ནི་ཀཱརྵཱ་པ་ཎ་སྟོང་གི་ཆད་པས་བཅད་དོ། །དེ་ནས་ཡང་
མི་གཞན་ཞིག་གིས་ཆོམ་རྐུན་པ་ཡང་ཡིན་ལ། མི་གསོད་པ་ཡང་ཡིན་པའི་མི་གཅིག་བཟུང་སྟེ། རྒྱལ་པོ་ལ་ཕུལ་བ་དང་། དེ་ནས་རྒྱལ་པོས་མི་དེས་ཉེས་པ་གཉི་ག་བྱས་སོ་ཞེས་ཆད་པ་ཉིས་འགྱུར་གྱིས་བཅད་དོ་ཞེས་གྲགས་པ་དེ་བཞིན་དུ། ཁོ་བོས་ཁྱོད་ཀྱང་ཆད་པ་ཉིས་
འགྱུར་གྱིས་གཅད་པར་བྱའོ། །དེ་ལ་ཆད་པ་ཉིས་འགྱུར་ནི་འདི་ཡིན་ཏེ། དོན་དམ་པར་ཕྱོགས་ཀྱི་གོས་ཅན་དག་གི་བློས་ཡོངས་སུ་བརྟགས་པ་ལྷ་ལ་སོགས་པའི་ལུས་སམ། སེམས་ཅན་དམྱལ་བ་ལ་སོགས་པའི་ལུས་ཀྱི་སྲོག་གི་བདག་ཉིད་བདག་ལས་སྐྱེ་བ་མེད་དེ་ཡོད་པའི་ཕྱིར།
དཔེར་ན་ཤེས་པ་ཡོད་པ་ཉིད་བཞིན་ནོ། །དོན་དམ་པར་ཕྱོགས་ཀྱི་གོས་ཅན་དག་གི་བློས་ཡོངས་སུ་བརྟགས་པ་ལྷ་ལ་སོགས་པའི་ལུས་སམ། སེམས་ཅན་དམྱལ་བ་ལ་སོགས་པའི་ལུས་ཀྱི་སྲོག་གི་བདག་ཉིད་དེའི་རྐྱེན་མིའི་ལུས་ལ་སོགས་པ་ལུས་ཀྱི་རྣམ་གྲངས་གཞན་དག་ལས་
སྐྱེ་བ་མེད་དེ་གཞན་ཡིན་པའི་ཕྱིར། དཔེར་ན་བུམ་པ་བཞིན་ནོ། །དོན་དམ་པར་གཞན་ཕྱོགས་ཀྱི་གོས་ཅན་དག་གིས་བརྗོད་པར་འདོད་པ་མིའི་ལུས་ལ་སོགས་པ་དག་ལྷ་ལ་སོགས་པའི་ལུས་སམ། སེམས་ཅན་དམྱལ་བ་ལ་སོགས་པའི་ལུས་ཀྱི་སྲོག་གི་བདག་ཉིད་ཀྱི་རྐྱེན་མ་ཡིན་
པར་ངེས་ཏེ་གཞན་ཡིན་པའི་ཕྱིར། དཔེར་ན་རྒྱུ་སྤུན་ལ་སོགས་པ་བཞིན་ནོ། །གཞན་ཡང་ཁྱེད་ཀྱི་བརྟུལ་ཞུགས་ནི་ཐར་པ་ཐོབ་པར་བྱེད་པ་མ་ཡིན་ཏེ། འདི་ལྟར་ཁྱེད་ན་རེ། གསོད་སེམས་མེད་པར་ཡང་གང་ན་སྲོག་ཆགས་ཡོད་པ་དེར་བསོད་ནམས་མ་ཡིན་པ་དང་འབྲེལ་པར་

འགྱུར་རོ་ཞེས་ཟེར་བས། དེས་ན་ཁྱིམ་པ་དག་ཉིན་རེ་བཞིན་ཁ་ཟས་ཀྱི་གཡོས་བྱེད་པ་གང་ཡིན་པ་དེ་ཡང་བུ་དང་། ཆུང་མ་དང་། ལྷ་དང་། མགྲོན་དང་། དགེ་སྦྱོང་ལ་སོགས་པ་དང་། གཏོར་མ་དང་། སློང་བ་ལ་སྦྱིན་པ་ལ་སོགས་པ་དང་། ཐུན་
མོང་ཁོ་ནར་གཡོས་བྱེད་པ་ཡིན་ལ། འདིར་ཡང་འབྲུ་དང་། ཆུ་དང་། ཤིང་དང་། ལོ་མ་དང་། ཡལ་ག་ལ་སོགས་པ་ལ་སེམས་ཅན་གང་དག་བརྟེན་པ་དེ་དག་གསོད་པར་བྱེད་པས་དེར་སློང་མོ་ལེན་པ་དང་། ཟ་བ་བསོད་ནམས་མ་ཡིན་པ་དང་འབྲེལ་པས་ཐར་པ་མེད་
ཅིང་ངན་སོང་དུ་འགྲོ་བར་འགྱུར་བའི་ཕྱིར་དང་། ཕྱོགས་ཀྱི་གོས་ཅན་དག་གི་ཕྱིར་འདུག་གནས་གང་དག་བྱེད་པ་དང་། མུ་སྟེགས་བྱེད་དག་གི་ཕྱིར་ལྷ་ཁང་གང་དག་བྱེད་པ་དེར་ཤིང་དང་ཕ་གུ་དང་། འཇིམ་པ་དང་། ཆུ་ལ་སོགས་པ་ཉེ་བར་སྟོབས་པ་དག་ཏུ་ཡང་སྲོག་ཆགས་
མཐའ་ཡས་མུ་མེད་པ་དག་འཆི་བར་འགྱུར་བས། གལ་ཏེ་ལོངས་སྤྱད་ན་བསོད་ནམས་མ་ཡིན་པ་སྐྱེ་བས་ཕྱོགས་ཀྱི་གོས་ཅན་དག་དང་། མུ་སྟེགས་བྱེད་དག་ལ་ཐར་པ་མེད་ཅིང་ངན་སོང་དུ་འགྲོ་བར་འགྱུར་བ་ལྟ་ན། ཁྱེད་ཅག་གིས་དེར་ཡང་འཇུག་པར་མི་བྱ་བའི་ཕྱིར་རོ། །
གཞན་ཡང་རྫིང་བུ་དང་། ལྟེང་ཀ་དང་། ཁྲོན་པ་དང་། ཆུ་སྦྱིན་པའི་ཁང་པ་དག་ཏུ་ཡང་སྲོག་ཆགས་དག་སྐྱེ་ཞིང་འཆི་བས་དེ་ཡང་བཏང་དགོས་ལ། དེས་ན་ཕྱོགས་ཀྱི་གོས་ཅན་དག་ཆུ་དང་ཁ་ཟས་མིད་པར་བྱེད་པའི་ཆུ་དེ་དག་ཏུ་ཡང་སྲིན་བུའི་རིགས་བརྒྱ་སྟོང་ཕྲག་དུ་མ་དག་སྐྱེ་
ཞིང་འཆི་བར་འགྱུར་བས་དེར་ཡང་བསོད་ནམས་མ་ཡིན་པ་དང་འབྲེལ་པས་ཁྱེད་ལ་ཐར་པ་མེད་ཅིང་ངན་སོང་དུ་འགྲོ་བར་འགྱུར་བའི་ཕྱིར་རོ། །གཞན་ཡང་ཁྱེད་ན་རེ། ས་དང་ཆུ་དང་། མེ་དང་རླུང་དང་། ཤིང་ལ་སོགས་པ་ནི་རེག་པའི་དབང་པོ་དང་ལྡན་པའི་ཕྱིར། དབང་པོ་གཅིག་པ་
སྲོག་དང་ལྡན་པ་ཡིན་ནོ་ཞེས་ཟེར་བས་དེའི་ཕྱིར་ཁྱེད་ཀྱིས་བཟའ་བ་དང་། བཅའ་བ་དག་ཟོས་པ་ན་སྲོག་ཆགས་ཀྱི་ཡན་ལག་ཟོས་པར་འགྱུར་བས་ཁྱེད་ལ་ཐར་པ་མེད་ཅིང་ངན་སོང་དུ་འགྲོ་བར་འགྱུར་བའི་ཕྱིར་རོ། །གཞན་ཡང་ཁྱོད་ཀྱིས་བསྟན་པའི་ཆོས་མ་ཡིན་པ་ནི་ངན་སོང་དུ་འགྲོ་

བའི་རྒྱུ་ཡིན་ཏེ། འདི་ལྟར་མི་འདོད་བཞིན་དུ་སྲོག་ཆགས་དག་ཤི་བ་ཡང་བསོད་ནམས་མ་ཡིན་པར་འགྱུར་བར་ཁྱེད་ཅག་འདོད་པའི་ཕྱིར། སྐམ་ས་དང་ཆུ་དང་ནམ་མཁའ་ལ་སྐྱེ་བ་པོ་ཕྲ་མོ་གྲངས་མེད་པ་དག་བརྟེན་པས་ཁྱེད་ཅག་འགྲོ་བ་དང་འགྲེང་བ་དང་འདུག་པ་དང་ཉལ་
བའི་གཡང་ལ་ཡང་སྐྱེ་བ་པོ་མཐའ་ཡས་མུ་མེད་པ་དག་འཆི་བར་འགྱུར་བ་དེས་ན་ཁྱེད་ཅག་ལ་ཐར་པ་མེད་ཅིང་ངན་སོང་དུ་འགྲོ་བར་འགྱུར་བའི་ཕྱིར་རོ། །གཞན་ཡང་ཁྱེད་ན་རེ། རྩི་ཤིང་ལ་སོགས་པ་ཤེས་པ་ཡོད་པ་ཉིད་ཡིན་ཏེ། ལྡུམ་བུ་ཨཉྫ་ལི་ཀ་རི་ཀ་དང་། ས་མང་ག་དག་
འཛུམས་པའི་ཕྱིར། དཔེར་ན་སྲོག་ཆགས་མན་ད་ལ་ཀ་རི་ཀ་ལ་སོགས་པ་བཞིན་ནོ་ཞེས་ཟེར་བ་དེ་ཡང་གཏན་ཚིགས་ཀྱི་དོན་མ་ངེས་པ་ཉིད་ཡིན་ཏེ། འདི་ལྟར་སྐྲ་དང་ཀོ་ལྤགས་ལ་སོགས་པ་ཡང་ཤེས་པ་ཡོད་པ་ཉིད་མ་ཡིན་བཞིན་དུ་མེས་བསྲེགས་ན་འཛུམས་པར་སྣང་བའི་ཕྱིར་
རོ། །གཞན་ཡང་ཁྱེད་ན་རེ། རྩི་ཤིང་ལ་སོགས་པ་ཤེས་པ་ཡོད་པ་ཉིད་ཡིན་ཏེ། འདབ་མ་དང་ཡལ་ག་ལ་སོགས་པ་སྐྱེ་བའི་ཕྱིར། དཔེར་ན་མི་ལ་སོགས་པ་བཞིན་ནོ་ཞེས་ཟེར་བ་དེ་ཡང་གཏན་ཚིགས་ཀྱི་དོན་མ་ངེས་པ་ཉིད་ཡིན་ཏེ། འདི་ལྟར་བྱི་རུའི་མྱུ་གུ་དང་། གསེར་དང་
བཻ་ཌཱུརྱ་ལ་སོགས་པ་ཡང་ཤེས་པ་ཡོད་པ་ཉིད་མ་ཡིན་བཞིན་དུ་སྐྱེ་བར་སྣང་བའི་ཕྱིར་རོ། །གཞན་ཡང་ཁྱེད་ན་རེ། རྩི་ཤིང་ལ་སོགས་པ་ཤེས་པ་ཡོད་པ་ཉིད་ཡིན་ཏེ། ཤིང་ལྗོན་པ་ཉམས་པ་རྣམས་ཕྱིར་གསོར་རུང་བའི་ཕྱིར། དཔེར་ན་སྲོག་ཆགས་ཉམས་པ་བཞིན་ནོ་ཞེས་ཟེར་བ་དེ་ཡང་
གཏན་ཚིགས་ཀྱི་དོན་མ་ངེས་པ་ཉིད་ཡིན་ཏེ། འདི་ལྟར་རི་མོ་ལ་སོགས་པ་ཡང་ཤེས་པ་ཡོད་པ་ཉིད་མ་ཡིན་བཞིན་དུ་ཉམས་པ་གསོར་རུང་བ་སྣང་བའི་ཕྱིར་རོ། །གཞན་ཡང་ཁྱེད་ན་རེ། རྩི་ཤིང་ལ་སོགས་པ་ཤེས་པ་ཡོད་པ་ཉིད་ཡིན་ཏེ། ཤིང་ལྗོན་པ་དང་ལྕུག་མ་ལ་སོགས་པ་འགྲོ་བར་
འགྱུར་བའི་ཕྱིར་རོ། །སྲོག་ཆགས་ཀྱི་ཡན་ལག་ལ་སོགས་པ་བཞིན་ནོ་ཞེས་ཟེར་བ་དེ་ཡང་གཏན་ཚིགས་ཀྱི་དོན་མ་ངེས་པ་ཉིད་ཡིན་ཏེ། འདི་ལྟར་ཁབ་ལ་སོགས་པ་ལྕགས་ལས་བྱས་པ་དག་ཀྱང་ཤེས་པ་ཡོད་པ་ཉིད་མ་ཡིན་བཞིན་དུ་རྡོ་ཁབ་ལེན་གྱིས་འདྲེན་པ་དང་། འཛིན་པ་དང་།

འགྲོ་བར་སྣང་བའི་ཕྱིར་རོ། །གཞན་ཡང་ཁྱེད་ན་རེ། རྩི་ཤིང་ལ་སོགས་པ་ཤེས་པ་ཡོད་པ་ཉིད་ཡིན་ཏེ་དུས་སུ་སྐྱེ་བའི་ཕྱིར་རོ། །དཔེར་ན་སེམས་ཅན་བཞིན་ནོ་ཞེས་ཟེར་བ་དེ་ཡང་གཏན་ཚིགས་ཀྱི་དོན་མ་ངེས་པ་ཉིད་ཡིན་ཏེ། འདི་ལྟར་སེམས་ཅན་དམྱལ་
བ་དག་ན་ཡང་མི་དགེ་བའི་ལས་བྱས་པ་རྣམས་ལ་སྡུག་བསྔལ་མྱོང་བའི་དུས་སུ་ནགས་ཚལ་རལ་གྲིའི་ལོ་མ་ཅན་དང་། མེ་འབར་བ་ལ་སོགས་པ་ཡང་ཤེས་པ་ཡོད་པ་ཉིད་མ་ཡིན་བཞིན་དུ་སྐྱེ་བར་སྣང་བའི་ཕྱིར་དང་། ལྷ་དག་ལ་ཡང་དགེ་བའི་ལས་བྱས་པ་རྣམས་ལ་བདེ་བའི་
ལོངས་སྤྱོད་མྱོང་བའི་དུས་སུ་རིན་པོ་ཆེའི་ཤིང་ལྗོན་པ་ཤིན་ཏུ་ཡིད་འཕྲོག་པ་ལྷའི་ན་བཟའ་དང་། དབུ་རྒྱན་དང་། གདུ་བུ་རྒྱན་ཅན་དང་། དཔུང་རྒྱན་དང་། དོ་ཤལ་དང་། སེ་མོ་དོ་འཕྱང་བ། མེ་ཏོག་སྣ་ཚོགས་རྣམ་པར་འབྱེས་པ་དང་ལྡན་པ་ལ་སོགས་པ་ཡང་ཤེས་པ་
ཡོད་པ་ཉིད་མ་ཡིན་བཞིན་དུ་སྐྱེ་བ་སྣང་བའི་ཕྱིར་རོ། །གཞན་ཡང་ཁྱེད་ཀྱི་དཀའ་ཐུབ་ཡོངས་སུ་གདུང་བ་དང་། སྐྲ་འབལ་བ་དང་། ཟས་ཆུང་ངུ་རྩུབ་མོ་ཟ་བ་ལ་སོགས་པའི་རྣམ་པ་དག་ནི་ཉོན་མོངས་པ་ཞི་བར་འགྱུར་བའི་རྒྱུ་མ་ཡིན་ཏེ། འདི་ལྟར་བོང་བུ་རྩྭ་དང་ཕུབ་མ་ཟ་བ་རྣམས་
དང་། ལས་མི་དང་གདོལ་པ་ལ་སོགས་པ་རླུང་དང་ལྷགས་པ་དང་། ཉི་མ་དང་། ཤ་སྦྲང་དང་། སྦྲང་བུ་མཆུ་རིངས་དང་། སྡིག་སྦྲུལ་ལ་སོགས་པའི་རེག་པས་ཡོངས་སུ་གདུངས་པ་རྣམས་ལ་ཡང་འདོད་ཆགས་ཤས་ཆེན་པོ་སྐྱེ་བར་སྣང་བའི་ཕྱིར་རོ། །གཞན་ཡང་ཁྱེད་ན་རེ།
ལྷ་ཡིད་དུ་འོང་བ་རྗེས་སུ་དྲན་པ་དང་། བསམ་གཏན་ལ་རྩེ་གཅིག་ཏུ་དམིགས་པ་བཞིན་དུ་ཤི་བ་རྣམས་བདེ་འགྲོར་འགྲོ་བར་འགྱུར་རོ་ཞེས་ཟེར་བ་དེ་ཡང་ཁྱེད་ལ་མི་འགྲུབ་སྟེ། འདི་ལྟར་སྡུག་བསྔལ་གྱིས་བབ་ཅོལ་དུ་སེམས་གཡེངས་པར་གྱུར་པ་ཁྱེད་ལ། ལྷ་ཡིད་དུ་འོང་བ་རྗེས་སུ་
དྲན་པ་དང་། བསམ་གཏན་ལ་རྩེ་གཅིག་ཏུ་དམིགས་བཞིན་དུ་འཆི་འཕོ་བ་མེད་པས་གཅེར་བུར་རྒྱུ་བ་དུས་ཀྱི་ཆོས་ཀུན་དུ་སྦྱོང་བའི་གནས་སྐབས་སུ་ཤི་བ་རྣམས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་སུ་སྐྱེ་བ་ཁོ་ནར་འགྱུར་བའི་ཕྱིར་རོ། །གཞན་ཡང་འུག་པ་པ་

དག་གིས་གྲངས་ཅན་ལ་སོགས་པའི་ཚིག་ནི་བདེན་ཏེ། སྨྲས་པའི་ཕྱིར་སངས་རྒྱས་ཀྱི་བཀའ་བཞིན་ནོ་ཞེས་སྨྲས་པ་གང་ཡིན་པ་དེ་ལ། གྲངས་ཅན་ལ་སོགས་པའི་ཚིག་བདེན་པ་ཉིད་དུ་སྒྲུབ་པ་ཁས་བླངས་པ་ལ་གནོད་པར་འགྱུར་ཏེ། འདི་ལྟར་འུག་པ་པ་དག་གྲངས་ཅན་ལ་སོགས་
པའི་ཚིག་མི་ལྡན་པར་འདོད་པའི་ཕྱིར་ཏེ། འུག་པ་པའི་གཏན་ཚིགས་དེ་ཡང་མ་ངེས་པ་ཡིན་ཏེ། འདི་ལྟར་ཁྱེད་ན་རེ། གྲངས་ཅན་ལ་སོགས་པའི་ཚིག་ནི་བརྫུན་ཏེ། སྨྲས་པའི་ཕྱིར། སངས་རྒྱས་ཀྱི་བཀའ་བཞིན་ནོ་ཞེས་ཀྱང་ཟེར་བའི་ཕྱིར་རོ། །གཞན་ཡང་ཁྱེད་ན་རེ།
སངས་རྒྱས་ཀྱི་བཀའ་ནི་མི་བདེན་ཏེ་སྨྲས་པའི་ཕྱིར། གྲངས་ཅན་ལ་སོགས་པའི་ཚིག་བཞིན་ནོ་ཞེས་ཟེར་བ་གང་ཡིན་པ་དེ་ཡང་གཏན་ཚིགས་མ་ངེས་པ་ཉིད་ཡིན་ཏེ། འདི་ལྟར་ཁྱེད་མུ་སྟེགས་བྱེད་ཀྱི་ཚིག་ལ་ཡང་སྨྲས་པ་ཉིད་ཡོད་པ་དེ་ལ་ཡང་དོན་ཇི་ལྟ་བ་བཞིན་དུ་འདོད་པའི་ཕྱིར་རོ། །
གཞན་ཡང་ཁྱེད་ན་རེ། སངས་རྒྱས་པ་དག་གིས་དོན་དམ་པར་དེ་དག་གི་ཐར་པའི་ཚིག་གི་དོན་དུ་གྱུར་པ་མེད་པ་ཁོ་ནའོ་ཞེས་སྨྲས་པས། རང་ཉིད་ཀྱིས་རང་ཉིད་སུན་དབྱུང་བ་བྱས་པས། ཁོ་བོ་ཅག་གིས་སུན་དབྱུང་བར་བྱ་མི་དགོས་སོ་ཞེས་ཟེར་བ་གང་ཡིན་པ་དེ་ནི་ཁྱེད་ཀྱིས་
སངས་རྒྱས་པའི་གྲུབ་པའི་མཐའ་མ་རྟོགས་པ་ཁོ་ན་རང་དགར་སྨྲས་པ་ཡིན་ཏེ། འདི་ལྟར་སངས་རྒྱས་པའི་གྲུབ་པའི་མཐའ་ལས། མྱ་ངན་འདས་པ་དངོས་མེད་མིན། །དེ་ལ་དངོས་པོ་ག་ལ་ཡོད། །དངོས་དང་དངོས་མེད་ཡོངས་ཤེས་པ། །སྐྱེ་བ་མེད་པ་ཐར་ཞེས་བྱ། །
ཞེས་གསུངས་པའི་ཕྱིར་རོ། །གཞན་ཡང་ཁྱེད་ཀྱིས་འཇིག་རྟེན་གྱི་སྤྱི་གཙུག་ལྟ་བུའི་ཐར་པ་ཡོད་པར་བརྗོད་པ་ནི་མྱ་ངན་ལས་འདས་པ་བརྟག་པའི་སྐབས་སུ་དཔྱད་པར་བྱའོ། །ཞར་ལ་བཤད་པས་ཆོག་གི་སྐབས་ཉིད་བསྒྲུབ་པར་བྱའོ། །དེའི་ཕྱིར་དེ་ལྟར་གཉིས་ལས་མ་ཡིན་ནོ་ཞེས་
བྱ་བ་ནི་དམ་བཅས་པ་སྤྱིའི་བཀོད་པ་གསུམ་པའི་མཇུག་བསྡུ་བ་ཡིན་ནོ། །དེ་ལ་དེ་ཕྱིར་ཞེས་བྱ་བ་ནི་ཇི་སྐད་བསྟན་པའི་རྗེས་སུ་དཔག་པ་དག་གིས་བསྒྲུབས་པ་དེའི་ཕྱིར་རོ། །དེ་ལྟར་གཉིས་ལས་མ་ཡིན་ནོ་ཞེས་བྱ་བ་ནི་དོན་དམ་པར་དངོས་པོ་རྣམས་གཉིས་ལས་སྐྱེ་བ་མེད་པར་སྒྲུབ་པོ་

ཞེས་བསྟན་པ་ཡིན་ནོ། །དམ་བཅས་པའི་སྤྱིའི་བཀོད་པ་གསུམ་པ་བཤད་ཟིན་ཏོ། །ད་ནི་དམ་བཅས་པའི་སྤྱི་བཀོད་པ་བཞི་པ་བསྒྲུབ་པར་བྱ་སྟེ། དེའི་ཕྱིར་དེ་ནི་རྒྱུ་མེད་མིན། །ཞེས་བྱ་བ་བརྗོད་པར་བྱ་སྟེ། རྒྱུ་མེད་པར་ཞེས་བྱ་བའི་ཐ་ཚིག་གོ་ཞེས་བྱ་བ་
ལ་སོགས་པ་སྨྲས་སོ། །འདི་སྐད་བསྟན་ཏེ། ཁོ་བོས་སྔར་དམ་བཅས་པའི་སྤྱི་རྣམ་པ་བཞི་བཀོད་པ་ལས། དམ་བཅས་པའི་སྤྱི་དང་པོ་དང་གཉིས་པ་དང་གསུམ་པ་ནི་བསྒྲུབས་ཟིན་ཏོ། །དེའི་འོག་ཏུ་ད་ནི་དམ་བཅས་པའི་སྤྱི་བཀོད་པ་བཞི་པ་དངོས་པོ་རྣམས་རྒྱུ་མེད་པ་ལས་སྐྱེ་བ་
མེད་པ་ཞེས་བྱ་བ་དེ་བསྒྲུབ་པར་བྱའོ། །དེ་ལ་ད་ནི་ཞེས་བྱ་བ་ནི་དའམ་ད་ལྟར་ཏེ། ད་ནི་དམ་བཅས་པའི་སྤྱི་བཀོད་པ་བཞི་པ་བསྒྲུབ་པར་བྱའོ་ཞེས་བྱ་བར་སྦྱར་རོ། །དེའི་ཕྱིར་རྒྱུ་མེད་མིན་ཞེས་བྱ་བ་བརྗོད་པར་བྱ་སྟེ་ཞེས་བྱ་བ་ལ་སོགས་པ་སྨྲས་སོ། །འདིར་ཡང་རྒྱུ་མེད་མིན་ཞེས་བྱ་བའི་
དགག་པ་འདི་ནི་མེད་པར་དགག་པའི་དོན་དུ་བལྟ་བར་བྱ་སྟེ། དགག་པ་གཙོ་ཆེ་བའི་ཕྱིར་དང་། འདི་ལྟར་རྟོག་པ་མ་ལུས་པའི་དྲ་བ་དགག་པས་རྣམ་པར་མི་རྟོག་པའི་ཡེ་ཤེས་ཤེས་བྱ་ཡུལ་མ་ལུས་པ་དང་ལྡན་པ་འགྲུབ་པར་དགོངས་པའི་ཕྱིར་རོ། །མ་ཡིན་པར་དགག་པ་ཡོངས་སུ་གཟུང་
ན་ནི་དེ་སྒྲུབ་པ་གཙོ་ཆེ་བའི་ཕྱིར་ཆོས་རྣམས་མ་སྐྱེས་སོ་ཞེས་སྒྲུབ་པས་སྐྱེ་བ་མེད་པར་སྟོན་པའི་ཕྱིར་མཛད་པའི་མཐའ་དང་བྲལ་བར་འགྱུར་ཏེ། ལུང་ལས་གཟུགས་ཀྱི་སྐྱེ་བ་མེད་པ་ལ་སྤྱོད་ན་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་མ་ཡིན་ནོ་ཞེས་འབྱུང་བའི་ཕྱིར་རོ། །འདིར་དངོས་པོ་
རྣམས་རྒྱུ་མེད་པ་ལས་སྐྱེ་བ་མེད་པ་ཁོ་ནའོ་ཞེས་ངེས་པར་གཟུང་བར་བྱའོ། །གཞན་དུ་ངེས་པར་གཟུང་ན་རྒྱུ་མེད་པ་ཁོ་ན་ལས་སྐྱེ་བ་མེད་དེ། འོ་ན་ཅི་ཞེ་ན། རྒྱུ་ལས་སྐྱེའོ་ཞེས་བྱ་བར་ངེས་པར་འགྱུར་བ་དང་། དེ་བཞིན་དུ་རྒྱུ་མེད་པ་ཁོ་ན་ལས་ནི་སྐྱེ་བ་མེད་དོ། །འོ་ན་ཅི་ཞེ་ན། རྒྱུ་ཡོད་
པ་དང་མེད་པ་ལས་སྐྱེའོ་ཞེས་བྱ་བར་ངེས་པར་འགྱུར་བས་དེ་ཡང་མི་བཞེད་དེ། མཛད་པའི་མཐའ་དང་བྲལ་བའི་ཕྱིར་རོ་ཞེས་སྔ་མ་བཞིན་དུ་སྦྱར་བར་བྱའོ། །རྒྱུ་མེད་པ་ནི་རྣམ་པ་གཉིས་ཏེ། དངོས་པོར་གྱུར་པ་མ་ཡིན་པ་དང་། དངོས་པོར་གྱུར་པའོ། །དེ་ལ་དངོས་པོར་གྱུར་

པ་མ་ཡིན་པ་ནི་རྒྱུའི་དངོས་པོར་གྱུར་པ་གཏན་མེད་པར་སྨྲ་བ་སྟེ། འཇིག་རྟེན་རྒྱང་པན་པའི་གྲུབ་པའི་མཐའ་ལས་དངོས་པོ་རྣམས་རྒྱུ་མེད་པ་ལས་སྐྱེ་བར་སྨྲ་བ་ཡིན་ནོ། །དངོས་པོར་གྱུར་པ་ནི་རྒྱུའི་དངོས་པོར་གྱུར་པ་མི་མཐུན་པ་གཞན་ཡོད་པར་སྨྲ་བ་སྟེ། ངོ་བོ་ཉིད་དང་དབང་ཕྱུག་ལ་
སོགས་པ་རྒྱུར་སྨྲ་བའི་གྲུབ་པའི་མཐའ་ལས་མི་མཐུན་པ་རྒྱུར་སྨྲ་བ་ཡིན་ནོ། །དེ་ལ་དང་པོར་རྒྱུ་མེད་པར་དངོས་པོར་གྱུར་པ་མ་ཡིན་པ་ལས་སྐྱེ་བ་དགག་པར་བྱ་སྟེ། དེའི་ཕྱིར་རྒྱུ་མེད་པར་ཞེས་བྱ་བའི་ཐ་ཚིག་གོ་ཞེས་བྱ་བ་སྨྲས་ཏེ། རྒྱུ་མེད་ཅེས་བྱ་བ་ནི་རྒྱུ་མེད་པར་ཞེས་བྱ་བའི་ཐ་ཚིག་
གོ་ཞེས་བྱ་བར་སྦྱར་རོ། །ཅི་ཞིག་ཅེ་ན་ཞེས་བྱ་བ་ནི་རྒྱུ་མེད་པ་ལས་ཅི་ཞིག་མ་ཡིན་ཞེ་ན་ཞེས་འགྲེལ་པ་བྱེད་པ་ཉིད་ཀྱིས་དྲི་བའི་ཚིག་ཡིན་ནོ། །དེའི་ལན་དུ་འགྲེལ་པ་བྱེད་པ་ཉིད་ཀྱིས། དངོས་པོ་གང་དག་གང་ན་ཡང་། །སྐྱེས་པ་ནམ་ཡང་ཡོད་མ་ཡིན། །ཞེས་བྱ་བའི་སྐབས་ཡིན་ནོ་ཞེས་
བྱ་བ་སྨྲས་ཏེ། རྒྱུ་མེད་པ་ལས་ཅི་ཞིག་མ་ཡིན་ཞེ་ན། རྒྱུ་མེད་པ་ལས། དངོས་པོ་གང་དག་གང་ན་ཡང་། །སྐྱེས་པ་ནམ་ཡང་ཡོད་མ་ཡིན། །ཞེས་བྱ་བའི་སྐབས་ཡིན་ནོ་ཞེས་བྱ་བར་སྦྱར་རོ། །དེ་ལ་དངོས་པོ་གང་དག་ཅེས་བྱ་བ་ནི་ནང་དང་ཕྱི་རོལ་གྱི་ཆ་ཕྲ་བ་དང་རགས་པ་དག་གོ། །
གང་ན་ཡང་ཞེས་བྱ་བ་ནི་བདག་ཅག་གི་ཕྱོགས་དང་། གཞན་གྱི་ཕྱོགས་ན་ཡང་ངོ་། །སྐྱེས་པ་ནམ་ཡང་ཡོད་མ་ཡིན། །ཞེས་བྱ་བ་ནི་དོན་དམ་པར་ནང་དང་ཕྱི་རོལ་དང་། ཆ་ཕྲ་བ་དང་རགས་པའི་དངོས་པོ་གང་དག་བདག་ཅག་གི་ཕྱོགས་དང་། གཞན་གྱི་ཕྱོགས་གང་ན་ཡང་སྐྱེས་པ་
དུས་ནམ་ཡང་ཡོད་པ་མ་ཡིན་པའོ། །ནམ་ཡང་ཞེས་བྱ་བ་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་དུས་ནམ་ཡང་ངམ་རང་གི་སྡེ་པ་དང་གཞན་གྱི་སྡེ་པས་བརྟགས་པའི་གནས་སྐབས་ནམ་ཡང་ངོ་། །ཡོད་མ་ཡིན་ཞེས་བྱ་བ་ནི་རྒྱུ་མེད་པ་ལས། དངོས་པོ་གང་དག་གང་
ན་ཡང་། །སྐྱེས་པ་ནམ་ཡང་ཡོད་མ་ཡིན། །ཞེས་མེད་པ་དགག་པའི་དོན་དུ་བལྟ་བར་བྱ་བ་ཡིན་གྱི། མི་སྐྱེ་བ་ཡོད་དོ་ཞེས་མ་ཡིན་པར་དགག་པའི་དོན་དུ་ནི་བལྟ་བར་མི་བྱའོ་ཞེས་བྱ་བར་སྦྱར་རོ་ཞེས་བྱ་བའི་སྐབས་ཡིན་ནོ་ཞེས་བྱ་བ་ནི་སྔར་དམ་བཅས་པའི་སྤྱི་བཀོད་པ་དང་པོ་སྒྲུབ་

པའི་སྐབས་སུ་དེ་ལ་རེ་ཞིག་བདག་ལས་མ་ཡིན་ཞེས་བྱ་བ་ཅི་ཞིག་ཅེ་ན། སྐྱེས་པ་ནམ་ཡང་ཡོད་མ་ཡིན། །ཞེས་བྱ་བ་ལ་སོགས་པ་སྟེ། རེ་རེ་དང་སྦྱར་བར་བྱའོ་ཞེས་ཇི་སྐད་བསྟན་པའི་སྐབས་ཡིན་པ་སྟེ། དེས་ན་རྒྱུ་མེད་པ་ལས། དངོས་པོ་གང་དག་གང་
ན་ཡང་། །སྐྱེས་པ་ནམ་ཡང་ཡོད་མ་ཡིན། །ཞེས་བྱ་བ་ཡིན་ནོ་ཞེས་བསྟན་ཏོ། །འདི་ལ་དྲང་སྲོང་ཆེན་པོ་འཇིག་རྟེན་མིག་ཅེས་བྱ་བ་དེས་གྲངས་ཅན་དག་ཁོ་ནའི་གྱེས་པ་གཅིག་ལ་བརྟེན་ནས་འཇིག་རྟེན་རྒྱང་པན་པའི་གྲུབ་པའི་མཐའ་འབུམ་བྱས་པས་དེ་འདི་སྐད་ཅེས། སེམས་ཅན་
སྐྱེ་བ་གཞན་དུ་ལས་དགེ་བ་དང་མི་དགེ་བ་ཉེ་བར་བསགས་པའི་རྒྱུ་ཅན་དག་འདིར་སྐྱེ་བར་འགྱུར་བ་ཡང་མེད་དོ། །འདས་པའི་འཇིག་རྟེན་ཡང་མེད་དོ། །དེ་ནས་འདིར་འོང་བ་ཡང་འགའ་ཡང་མེད་དོ། །འདི་ནས་གང་དུ་འགྲོ་བར་འགྱུར་བའི་འཇིག་རྟེན་གཞན་ཡང་མེད་དེ། འདི་ལྟར་
རྒྱུ་ལས་དང་ཉོན་མོངས་པ་མེད་པར་ཡང་བུ་རམ་དང་། ཆུ་དང་། སྐྱུ་རུ་ར་དང་། དྷ་ཏ་ཀི་དང་། ཕབས་དང་། འབྲས་ཕྱེ་དང་། ཤིང་ཤུན་ལ་སོགས་པ་སྨན་བསྡུས་ཏེ་མནན་པ་ལས་བུ་རམ་ཆང་གི་ཁྱད་པར་རྣམ་པ་ཐ་དད་པ་རོ་དང་མཐུ་དང་སྨིན་པ་ཐ་དད་པ་དག་འབྱུང་བར་འགྱུར་
བ་དེ་དག་ཀྱང་འཇིག་རྟེན་ཕ་རོལ་ནས་འོངས་ཏེ་འདིར་སྐྱེ་བ་མ་ཡིན་གྱི། འདི་ལྟར་བུ་རམ་དང་། ཆུ་དང་། སྐྱུ་རུ་ར་དང་། དྷ་ཏ་ཀི་དང་། ཕབས་དང་། འབྲས་ཕྱེ་དང་། ཤིང་ཤུན་ལ་སོགས་པ་སྨན་གྱི་རྫས་དེ་དག་ཉིད་བསྡུས་ཏེ་མནན་པའི་མཐུ་ལས་བུ་རམ་ཆང་དེ་ལྟ་བུར་འགྱུར་བ་
ཡིན་ནོ། །དེ་བཞིན་དུ་ནང་གི་སྐྱེ་མཆེད་རྣམས་ཀྱང་ལས་དང་ཉོན་མོངས་པ་དག་མེད་པར་ཁུ་ཆུ་དང་། ཁྲག་ལ་སོགས་པ་ཚོགས་པ་ལས་སྐྱེའོ། །གཞན་ཡང་གལ་ཏེ་ཤའི་ཕུང་པོ་རི་རབ་ཙམ་སྤུངས་ཏེ། དེར་ཞག་བདུན་གྱི་བར་དུ་ཆར་བབ་པར་འགྱུར་ན། དེར་ཤའི་ཕུང་པོའི་ཚད་ཁོ་
ན་ཙམ་གྱི་སྲིན་བུའི་ཕུང་པོ་སྐྱེ་བར་འགྱུར་ན། ཅི་དེ་སྙེད་ཀྱི་སེམས་ཅན་དེ་དག་འཇིག་རྟེན་ཕ་རོལ་ནས་འོངས་སམ་ཞེས་ཟེར་ཏེ། དེ་དག་ལ་སོགས་པ་དཔེ་ལྟར་སྣང་བ་དུ་མ་དག་གིས་རྒྱུ་མེད་པ་ལས་སྐྱེ་བར་སེམས་པས་དེ་དག་ལ་སོགས་པ་ལྟ་བ་ངན་པ་སྤང་བའི་ཕྱིར། སློབ་དཔོན་ཀླུ་སྒྲུབ་

ཀྱི་ཞལ་སྔ་ནས་ཀྱིས་རྒྱུ་མེད་པ་ལས། དངོས་པོ་གང་དག་གང་ན་ཡང་། །སྐྱེས་པ་ནམ་ཡང་ཡོད་མ་ཡིན། །ཞེས་བྱ་བ་འདི་བཀའ་སྩལ་ཏོ། །ཅིའི་ཕྱིར་ཞེ་ན་ཞེས་བྱ་བ་ནི་འགྲེལ་བ་བྱེད་པ་ཉིད་ཀྱིས། གལ་ཏེ་གཞན་དག་ཅིའི་ཕྱིར་རྒྱུ་མེད་པ་ལས་སྐྱེ་བ་མེད་སྙམ་དུ་སེམས་པའི་
བསམ་པ་ལ་བརྟགས་ནས་དོགས་པ་བསུ་བའི་ཚུལ་དུ་དྲི་བ་ཡིན་ནོ། །དེའི་ཕྱིར་དེ་སྟོན་པའི་རྗེས་སུ་དཔག་པ་མེད་པའི་ཕྱིར་དང་། རྗེས་སུ་དཔག་པ་དང་གྲགས་པའི་གནོད་པར་འགྱུར་བའི་སྐྱོན་ཡོད་པའི་ཕྱིར་ཡང་ངོ་ཞེས་བྱ་བར་དགོངས་སོ་ཞེས་བྱ་བ་སྨྲས་སོ། །འདི་སྐད་བསྟན་ཏེ།
ཁྱོད་ཀྱི་རྒྱུ་མེད་པ་ལས་སྐྱེ་བར་སྒྲུབ་པའི་དོན་དེ་སྟོན་པའི་རྗེས་སུ་དཔག་པ་མེད་པའི་ཕྱིར། འདི་ལྟར་དེ་ནི་ཚིག་ཙམ་དུ་ཟད་པས་དེའི་ཕྱིར་དངོས་པོ་རྣམས་རྒྱུ་མེད་པ་ལས་སྐྱེ་བ་མེད་དོ། །གཞན་ཡང་ཁྱོད་ཀྱི་རྒྱུ་མེད་པ་ལས་སྐྱེ་བར་སྒྲུབ་པ་དེ་ལ་རྗེས་སུ་དཔག་པའི་གནོད་པར་འགྱུར་བའི་
སྐྱོན་ཡོད་པའི་ཕྱིར་དང་། གྲགས་པའི་གནོད་པར་འགྱུར་བའི་སྐྱོན་ཡོད་པའི་ཕྱིར་ཡང་དངོས་པོ་རྣམས་རྒྱུ་མེད་པ་ལས་སྐྱེ་བ་མེད་དོ། །ཡང་ངོ་ཞེས་བྱ་བའི་སྒྲས་ནི་སྐྱོན་གཉི་ག་བསྡུ་བའི་དོན་ཏོ་ཞེས་བྱ་བར་དགོངས་སོ་ཞེས་བྱ་བ་ནི་དེ་ལྟར་ཁྱོད་ཀྱི་རྒྱུ་མེད་པ་ལས་སྐྱེ་བར་སྒྲུབ་པའི་དོན་
དེ་སྟོན་པའི་རྗེས་སུ་དཔག་པ་མེད་པའི་ཕྱིར་དང་། ཁྱོད་ཀྱི་ཕྱོགས་འདི་ལ་རྗེས་སུ་དཔག་པའི་གནོད་པར་འགྱུར་བའི་སྐྱོན་དང་། གྲགས་པའི་གནོད་པར་འགྱུར་བའི་སྐྱོན་ཡོད་པའི་ཕྱིར། ཡང་དངོས་པོ་རྣམས་རྒྱུ་མེད་པ་ལས་སྐྱེ་བ་མེད་དོ་ཞེས་བྱ་བར་མདོ་མཛད་པས་དགོངས་སོ་ཞེས་
བྱ་བའི་ཐ་ཚིག་གོ། །གལ་ཏེ་ཇི་ལྟར་རྗེས་སུ་དཔག་པའི་གནོད་པར་འགྱུར་བའི་སྐྱོན་ཡོད་ཅེ་ན། དེ་བསྟན་པའི་ཕྱིར། དེ་ལ་རྗེས་སུ་དཔག་པའི་གནོད་པ་ནི་ཞེས་བྱ་བ་ལ་སོགས་པ་སྨྲས་སོ། །དེ་ལ་ཇི་ལྟར་རྗེས་སུ་དཔག་པའི་གནོད་པར་འགྱུར་བའི་སྐྱོན་ཡོད་པ་དེ་བསྟན་པའི་ཕྱིར།
ཀུན་རྫོབ་ཏུ་ཁས་བླངས་པ་ནང་གི་སྐྱེ་མཆེད་ཀྱི་དངོས་པོ་རྣམས་རྒྱུ་མེད་པ་ལས་སྐྱེ་བ་མེད་དེ། སྤྱི་དང་ཁྱད་པར་ཉིད་དང་ལྡན་པའི་ཕྱིར། དཔེར་ན་མྱུ་གུ་བཞིན་ནོ་ཞེས་བྱ་བ་སྨྲས་སོ། །དེ་ལ་ཀུན་རྫོབ་ཏུ་ཁས་བླངས་པ་ནང་གི་སྐྱེ་མཆེད་ཀྱི་དངོས་པོ་རྣམས་ཞེས་བྱ་བ་འདི་ནི་ཆོས་ཅན་

ཡིན་ལ། རྒྱུ་མེད་པ་ལས་སྐྱེ་བ་མེད་དེ་ཞེས་བྱ་བ་འདི་ནི་བསྒྲུབ་པར་བྱ་བ་ཆོས་ཡིན། སྤྱི་དང་ཁྱད་པར་ཉིད་དང་ལྡན་པའི་ཕྱིར་ཞེས་བྱ་བ་འདི་ནི་སྒྲུབ་པའི་ཆོས་ཡིན། དཔེར་ན་མྱུ་གུ་བཞིན་ནོ་ཞེས་བྱ་བ་འདི་ནི་དཔེ་ཡིན་པར་སྦྱར་རོ། །དེ་ལ་ཀུན་རྫོབ་ཏུ་ཁས་
བླངས་པ་ནང་གི་སྐྱེ་མཆེད་ཀྱི་དངོས་པོ་རྣམས་ཞེས་བྱ་བ་ནི་དབུ་མ་པས་ཀུན་རྫོབ་ཏུ་ཁས་བླངས་པ་ནང་གི་སྐྱེ་མཆེད་ཀྱི་དངོས་པོ་མིག་ལ་སོགས་པ་གང་དག་ཡིན་པ་རྣམས་ཏེ། དེ་རྣམས་འདིར་ཆོས་ཅན་དུ་བྱའོ། །རྒྱུ་མེད་པ་ལས་སྐྱེ་བ་མེད་དེ་ཞེས་བྱ་བ་ནི་ཀུན་རྫོབ་ཏུ་ཁས་བླངས་པ་
ནང་གི་སྐྱེ་མཆེད་ཀྱི་དངོས་པོ་དེ་རྣམས་རྒྱུ་མེད་པ་ལས་སྐྱེ་བ་མེད་པར་བསྒྲུབ་པར་བྱ་བ་སྟེ། དེ་ནི་འདིར་བསྒྲུབ་པར་བྱ་བ་ཆོས་ཡིན་ནོ། །སྤྱི་དང་ཁྱད་པར་ཉིད་དང་ལྡན་པའི་ཕྱིར་ཞེས་བྱ་བ་ལ་སྤྱི་ཉིད་དང་ལྡན་པའི་ཕྱིར་ཞེས་བྱ་བ་ནི་མིག་ལ་སོགས་པ་སྐྱེ་མཆེད་དྲུག་པོ་དག་ལ་སྐྱེ་མཆེད་
ཅེས་བྱ་བ་སྤྱི་ཡོད་པའི་ཕྱིར་རོ། །ཁྱད་པར་ཉིད་དང་ལྡན་པའི་ཕྱིར་ཞེས་བྱ་བ་ནི་མིག་ལ་སོགས་པ་སྐྱེ་མཆེད་དྲུག་པོ་དག་ལ། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཅེས་བྱ་བ་སོ་སོའི་ཁྱད་པར་ཉིད་ཡོད་པའི་ཕྱིར་རོ། །ཡང་ན་སྤྱི་ཉིད་དང་ལྡན་པའི་ཕྱིར་
ཞེས་བྱ་བ་ནི་སྐྱེ་མཆེད་ཐམས་ཅད་ལ་སྐྱེ་མཆེད་རྣམས་སྐྱེ་མཆེད་རྣམས་ཞེས་བྱ་བ་སྤྱི་ཡོད་པའི་ཕྱིར་རོ། །ཁྱད་པར་ཉིད་དང་ལྡན་པའི་ཕྱིར་ཞེས་བྱ་བ་ནི་མིའི་སྐྱེ་མཆེད་རྣམས་ཞེས་བྱ་བ་དང་། ལྷའི་སྐྱེ་མཆེད་རྣམས་ཞེས་བྱ་བ་དང་། དུད་འགྲོའི་སྐྱེ་མཆེད་རྣམས་ཞེས་བྱ་བ་ཁྱད་པར་
ཉིད་ཡོད་པའི་ཕྱིར། ཉིད་ཅེས་བྱ་བ་ནི་སྤྱི་དང་ཁྱད་པར་གྱི་དངོས་པོ་རྣམས་ནི་སྤྱི་དང་ཁྱད་པར་ཉིད་དོ། །ལྡན་པའི་ཕྱིར་ཞེས་བྱ་བ་ནི་སྤྱི་དང་ཁྱད་པར་ཉིད་དང་ལྡན་པའི་ཕྱིར་ཏེ། དེ་ནི་འདིར་སྒྲུབ་པའི་ཆོས་སོ། །དཔེར་ན་མྱུ་གུ་བཞིན་ནོ་ཞེས་བྱ་བ་ནི་འདི་ལྟར་མྱུ་གུ་ལ་ཡང་མྱུ་གུ་ཐམས་ཅད་ལ་མྱུ་གུ་ཞེས་བྱ་
བའི་རིགས་སྤྱི་ཉིད་ཀྱང་ཡོད་ལ། འབྲས་ཀྱི་མྱུ་གུ་དང་། ནས་ཀྱི་མྱུ་གུ་ཞེས་བྱ་བ་ལ་སོགས་པ་ཁྱད་པར་ཉིད་ཀྱང་ཡོད་པ་སྟེ། དཔེར་ན་མྱུ་གུ་ཀུན་རྫོབ་ཏུ་སྤྱི་དང་ཁྱད་པར་ཉིད་དང་ལྡན་པའི་ཕྱིར་རྒྱུ་མེད་པ་ལས་སྐྱེ་བ་མེད་དེ། འདི་ལྟར་ཐོག་མ་མེད་པའི་རྒྱུ་བརྒྱུད་པ་ལས་སྐྱེ་བས་རྒྱུ་མེད་པ་

ལས་སྐྱེ་བ་མེད་པ་དེ་བཞིན་དུ་ཀུན་རྫོབ་ཏུ་ཁས་བླངས་པ་ནང་གི་སྐྱེ་མཆེད་ཀྱི་དངོས་པོ་རྣམས་ཀྱང་སྤྱི་དང་ཁྱད་པར་ཉིད་དང་ལྡན་པའི་ཕྱིར་རྒྱུ་མེད་པ་ལས་སྐྱེ་བ་མེད་དོ། །འདི་ལྟར་ཐོག་མ་མེད་པའི་རྒྱུ་བརྒྱུད་པ་ལས་སྐྱེ་བས་རྒྱུ་མེད་པ་ལས་སྐྱེ་བ་མེད་དེ། དེ་ནི་འདིར་ཆོས་མཐུན་པའི་དཔེ་
ཡིན་ནོ། །དེ་ལྟར་རེ་ཞིག་ཁྱོད་ཀྱི་རྒྱུ་མེད་པ་ལས་སྐྱེ་བར་སྒྲུབ་པ་དེ་ལ་རྗེས་སུ་དཔག་པའི་གནོད་པར་འགྱུར་བའི་སྐྱོན་ཡོད་པའི་ཕྱིར་དངོས་པོ་རྣམས་རྒྱུ་མེད་པ་ལས་སྐྱེ་བ་མེད་པར་དགོངས་སོ། །གལ་ཏེ་ཇི་ལྟར་གྲགས་པའི་གནོད་པར་འགྱུར་བའི་སྐྱོན་ཡོད་ཅེ་ན། དེ་བསྟན་པའི་
ཕྱིར་གྲགས་པའི་གནོད་པ་ནི་ཞེས་བྱ་བ་ལ་སོགས་པ་སྨྲས་སོ། །དེ་ལ་ཇི་ལྟར་གྲགས་པའི་གནོད་པར་འགྱུར་བའི་སྐྱོན་ཡོད་པས་དེ་བསྟན་པའི་ཕྱིར། འཇིག་རྟེན་འདི་ན་ཡོད་པ་གང་ཡིན་པ་དེ་ནི་རྒྱུ་ལས་སྐྱེ་བར་གྲགས་པ་སྟེ། དཔེར་ན་རྒྱུ་སྤུན་དག་ལས་སྣམ་བུ་དང་རྩི་རྐྱང་དག་
ལས་སབ་མ་སྐྱེ་བ་ལ་སོགས་པ་བཞིན་ནོ་ཞེས་བྱ་བ་སྨྲས་སོ། །འདི་སྐད་བསྟན་ཏེ། བ་ལང་རྫིའི་ཆུང་མ་ཡན་ཆད་ལ་སྣམ་བུ་དང་སབ་མ་ལ་སོགས་པ་རྒྱུ་དང་བཅས་པ་ལས་སྐྱེ་བར་གྲགས་པས། ཁྱོད་ཀྱི་ཀུན་རྫོབ་ཏུ་ནང་གི་སྐྱེ་མཆེད་ཀྱི་དངོས་པོ་རྣམས་རྒྱུ་མེད་པ་ལས་སྐྱེ་
བར་སྒྲུབ་པའི་དོན་དེ་ལ་ནི་གྲགས་པ་དང་འགལ་བའི་གནོད་པར་འགྱུར་བའི་སྐྱོན་ཡོད་པའི་ཕྱིར་ཡང་དངོས་པོ་རྣམས་རྒྱུ་མེད་པ་ལས་སྐྱེ་བ་མེད་པར་དགོངས་སོ། །དེ་ལྟར་ན་རེ་ཞིག་རྒྱུ་མེད་པ་དངོས་པོར་གྱུར་པ་མ་ཡིན་པ་ལས་གློ་བུར་དུ་སྐྱེ་བ་མེད་དོ། །ད་ནི་རྒྱུ་མེད་པ་དེ་དངོས་པོར་གྱུར་
པ་ལས་སྐྱེ་བ་དགག་པར་བྱ་སྟེ། དེའི་ཕྱིར་ཡང་ན་རྒྱུ་མེད་ཅེས་བྱ་བ་ནི་རྒྱུ་ངན་པ་སྟེ། ཆུང་མ་མེད་པ་ཞེས་བྱ་བ་ལ་སོགས་པ་བཞིན་ནོ་ཞེས་བྱ་བ་སྨྲས་ཏེ། ཡང་ན་རྒྱུ་མེད་ཅེས་བྱ་བ་ནི་རྒྱུ་ངན་པ་སྟེ། ངོ་བོ་ཉིད་དང་དབང་ཕྱུག་ལ་སོགས་པ་རྒྱུར་སྨྲ་བའི་གྲུབ་པའི་མཐའ་ལས་མི་མཐུན་པ་རྒྱུར་
སྨྲ་བ་ཡིན་ནོ་ཞེས་བྱ་བར་སྦྱར་རོ། །དེ་ལ་ཡང་ན་ཞེས་བྱ་བ་ནི་རྒྱུ་མེད་ཅེས་བྱ་བ་ནི་རྒྱུ་མེད་པ་དངོས་པོར་གྱུར་པ་མ་ཡིན་པ་སྔར་བསྟན་པ་འབའ་ཞིག་ཏུ་ཡང་མ་ཟད་དེ། ཡང་རྣམ་པ་གཅིག་ཏུ་ན་རྒྱུ་མེད་ཅེས་བྱ་བ་ནི། རྒྱུ་མེད་པ་དངོས་པོར་གྱུར་པ་ངན་པ་ལ་ཡང་བྱའོ་ཞེས་བྱ་བའི་ཐ་ཚིག་

གོ། །རྒྱུ་མེད་ཅེས་བྱ་བ་ནི་རྒྱུ་ངན་པ་སྟེ་ཞེས་བྱ་བ་ནི་རྒྱུའི་བྱ་བ་བྱེད་པ་ཉིད་མ་ཡིན་པས་རྒྱུ་མེད་པ་དང་འདྲ་བར་རྒྱུ་མེད་པ་ཞེས་བྱ་སྟེ། གང་ངོ་བོ་ཉིད་ཀྱིས་ཡོད་ཀྱང་སྐྱེ་བར་བྱེད་པ་མ་ཡིན་པས་ངན་པ་དེ་ནི་རྒྱུ་མེད་པ་ཞེས་བྱའོ། །དེ་ཡང་ཇི་ལྟ་བུ་ཞེ་ན། དཔེར་ན་
ཆུང་མ་མེད་པ་ཞེས་བྱ་བ་ལ་སོགས་པ་བཞིན་ནོ་ཞེས་བྱ་བ་སྨྲས་ཏེ། དཔེར་ན་ཆུང་མ་ངན་པ་སྐྱོན་ཆགས་པ་དངོས་པོར་གྱུར་པ་ཡོད་ཀྱང་ཆུང་མའི་བྱ་བ་ནི་མི་བྱེད་པས་དེ་ལ་ཆུང་མ་མེད་པ་ཞེས་བྱ་བ་དང་། བུ་ངན་པ་སྐྱོན་ཆགས་པ་དངོས་པོར་གྱུར་པ་ཡོད་ཀྱང་བུའི་བྱ་བ་མི་བྱེད་པས་དེ་ལ་བུ་
མེད་པ་ཞེས་བྱ་བ་བཞིན་དུ། ངོ་བོ་ཉིད་དང་དབང་ཕྱུག་ལ་སོགས་པ་རྒྱུར་སྨྲ་བའི་གྲུབ་པའི་མཐའ་ལས་མི་མཐུན་པ་རྒྱུར་སྨྲ་བ་དག་ཀྱང་རྒྱུ་ངན་པ་སྐྱོན་ཆགས་པ་དངོས་པོར་གྱུར་པ་ཡོད་ཀྱང་རྒྱུའི་བྱ་བ་མི་བྱེད་པས་དེ་ཡང་རྒྱུ་མེད་པ་ཞེས་བྱའོ། །རྒྱུ་ངན་པ་གང་ཞེ་ན་ཞེས་བྱ་བ་ནི་རྒྱུ་མེད་པ་
དངོས་པོ་གྱུར་པ་ཡོད་ཀྱང་རྒྱུའི་བྱ་བ་མི་བྱེད་པས་རྒྱུ་ངན་པ་ཐེག་པ་ཞེས་བྱ་བ་དེ་ཡང་གང་ཞེ་ན་ཞེས་འདིར་འགྲེལ་པ་བྱེད་པ་ཉིད་ཀྱིས་དྲི་བའི་ཚིག་ཡིན་ནོ། །དེའི་ལན་དུ་འགྲེལ་པ་བྱེད་པ་ཉིད་ཀྱིས། ངོ་བོ་ཉིད་དང་། དབང་ཕྱུག་དང་། སྐྱེས་བུ་དང་། གཙོ་བོ་དང་། དུས་དང་། སྲེད་
མེད་ཀྱི་བུ་ལ་སོགས་པ་སྟེ་ཞེས་བྱ་བ་སྨྲས་ཏེ། སོགས་པ་ཞེས་བྱ་བའི་སྒྲས་ནི་ཚངས་པ་དང་། སྐྱེ་དགུའི་བདག་པོ་དང་། མ་ནུ་དང་། གནམ་གྱིས་བསྐོས་པ་དང་། པར་སིག་རྣམས་ཀྱི་དྲུ་བཱ་ན་དང་། བར་བར་རྣམས་ཀྱི་ཡུ་ན་ཞེས་བྱ་བའི་བར་དག་བསྡུའོ། །ཅིའི་ཕྱིར་དེ་དག་རྒྱུ་
མེད་པ་ཡིན་ཞེ་ན། དེའི་ཕྱིར་ཡང་དག་པ་མ་ཡིན་པའི་ཕྱིར་རོ་ཞེས་བྱ་བ་སྨྲས་ཏེ། ངོ་བོ་ཉིད་དང་། དབང་ཕྱུག་དང་། སྐྱེས་བུ་དང་། གཙོ་བོ་དང་། དུས་དང་། སྲེད་མེད་ཀྱི་བུ་དང་། ཚངས་པ་དང་། སྐྱེ་དགུའི་བདག་པོ་དང་། མ་ནུ་དང་། གནམ་གྱིས་བསྐོས་པ་དང་། དྲུ་བཱ་ན་
དང་། ཡུ་ན་ལ་སོགས་པ་དེ་དག་ནི་ངོ་བོ་ཉིད་ཀྱི་རྒྱུ་ཡང་དག་པ་མ་ཡིན་པའི་ཕྱིར་ཏེ། དེ་དག་ནི་ཀུན་རྫོབ་ཏུ་དངོས་པོར་གྱུར་པ་ཡིན་དུ་ཟིན་ཀྱང་སྐྱེད་པར་བྱེད་པ་ཉིད་མ་ཡིན་པའི་ཕྱིར། ངན་པས་མེད་པ་དང་འདྲ་བའི་ཕྱིར་རྒྱུ་ཉིད་མ་ཡིན་ནོ། །ད་ནི་རྒྱུ་མེད་པ་དངོས་པོར་གྱུར་པ་དེ་ལས་སྐྱེ་

བ་དགག་པར་བྱ་སྟེ། དེའི་ཕྱིར་དངོས་པོ་རྣམས་རྒྱུ་མེད་པ་དེ་ལས་སྐྱེ་བ་མེད་དེ་ཞེས་བྱ་བ་ལ་སོགས་པ་སྨྲས་སོ། །གལ་ཏེ་དངོས་པོ་རྣམས་རྒྱུ་མེད་པ་དེ་ལས་ཅིའི་ཕྱིར་སྐྱེ་བ་མེད་ཅེ་ན། དེའི་ཕྱིར་དེ་ལས་སྐྱེ་བར་སྟོན་པའི་རྗེས་སུ་དཔག་པ་མེད་པའི་ཕྱིར་དང་། རྗེས་སུ་དཔག་པའི་
གནོད་པར་འགྱུར་བའི་ཕྱིར་ཡང་ངོ་ཞེས་བྱ་བར་དགོངས་སོ་ཞེས་བྱ་བ་སྨྲས་སོ། །འདི་སྐད་བསྟན་ཏེ། ཁྱོད་ཀྱི་ངོ་བོ་ཉིད་དང་། དབང་ཕྱུག་ལ་སོགས་པ་དེ་ལས་དངོས་པོ་རྣམས་སྐྱེ་བར་སྟོན་པའི་རྗེས་སུ་དཔག་པ་མེད་པའི་ཕྱིར། འདི་ལྟར་དེ་ནི་ཚིག་ཙམ་དུ་ཟད་པས་དེའི་ཕྱིར་དངོས་པོ་
རྣམས་རྒྱུ་ངན་པ་ལས་སྐྱེ་བ་མེད་དོ། །གཞན་ཡང་ཁྱེད་ཀྱི་རྒྱུ་ངན་པ་ངོ་བོ་ཉིད་དང་། དབང་ཕྱུག་ལ་སོགས་པ་དེ་ལས་དངོས་པོ་རྣམས་སྐྱེ་བར་སྒྲུབ་པ་དེ་དག་ཐམས་ཅད་ཁོ་བོས་རྗེས་སུ་དཔག་པ་དག་གིས་དགག་པར་ནུས་པའི་གནོད་པ་ཁྱོད་ལ་འབྱུང་བར་འགྱུར་བའི་ཕྱིར་ཡང་
དངོས་པོ་རྣམས་རྒྱུ་ངན་པ་ལས་སྐྱེ་བ་མེད་དོ། །ཡང་ངོ་ཞེས་བྱ་བའི་སྒྲ་ནི་སྐྱོན་གཉི་ག་བསྡུས་པའི་དོན་ཏོ་ཞེས་བྱ་བར་དགོངས་སོ་ཞེས་བྱ་བ་ནི། དེ་ལྟར་ཁྱོད་ཀྱི་རྒྱུ་ངན་པ་ངོ་བོ་ཉིད་དང་དབང་ཕྱུག་ལ་སོགས་པ་དེ་ལས་དངོས་པོ་རྣམས་སྐྱེ་བར་སྟོན་པའི་རྗེས་སུ་དཔག་པ་མེད་པའི་ཕྱིར་དང་།
ཁྱོད་ཀྱི་ཕྱོགས་འདི་ལ་རྗེས་སུ་དཔག་པའི་གནོད་པར་འགྱུར་བའི་ཕྱིར་ཡང་དངོས་པོ་རྣམས་རྒྱུ་ངན་པ་ལས་སྐྱེ་བ་མེད་དོ་ཞེས་བྱ་བར་མདོ་མཛད་པས་དགོངས་སོ་ཞེས་བྱ་བའི་ཐ་ཚིག་གོ། །དེ་ནི་རེ་ཞིག་རྒྱུ་མེད་པས་དངོས་པོར་གྱུར་པ་ལས་སྐྱེ་བ་དགག་པ་སྤྱིར་བསྟན་པ་ཡིན་ནོ། །ད་ནི་རྒྱུ་མེད་
པ་དངོས་པོར་གྱུར་པ་ལས་སྐྱེ་བར་སྨྲ་བ་དག་རིམ་བཞིན་དུ་དགག་པར་བྱའོ། །དེ་ལ་རེ་ཞིག་རྒྱུ་མེད་པ་དངོས་པོར་གྱུར་པ་ངོ་བོ་ཉིད་དུ་སྨྲ་བ་དག་གི་གྲུབ་པའི་མཐའ་ནི་གང་ཡིན། ཇི་ལྟར་དངོས་པོ་རྣམས་ངོ་བོ་ཉིད་ལས་སྐྱེ་བ་མེད་ཅེ་ན། དེའི་ཕྱིར་རེ་ཞིག་ངོ་བོ་ཉིད་དུ་སྨྲ་བ་དག་གི་གྲུབ་པའི་
མཐའ་བསྟན་པའི་ཕྱིར། དེ་ལ་རེ་ཞིག་ངོ་བོ་ཉིད་དུ་སྨྲ་བ་དག་ན་རེ། ནང་གི་སྐྱེ་མཆེད་རྣམས་ངོ་བོ་ཉིད་ལས་སྐྱེ་བར་དམ་འཆའ་སྟེ། ལུས་སྣ་ཚོགས་འགྲུབ་པའི་ཕྱིར། དཔེར་ན་པདྨ་དག་གི་ཁ་དོག་དང་། དབྱིབས་དང་། ལོ་མ་དང་། ཆུ་བ་དང་། འདབ་མ་དང་། ཟེ་བ་དང་།

སྙིང་པོ་མཛེས་པ་ལྟ་བུ་དང་། རྨ་བྱ་དག་གི་མགྲིན་པའི་ཕྱོགས་རིན་པོ་ཆེ་མཐོན་ཀ་ཆེན་པོ་དང་། ཨནྡ་རྙིལ་ལྟར་མཐོན་མཐིང་དུ་འདུག་ལ། མཇུག་སྒྲོའི་ཚོགས་དག་གི་མདོངས་བཀྲ་ཞིང་འཚེར་བག་ཡོད་པ་བཞིན་ནོ་ཞེས་ཟེར་རོ་ཞེས་བྱ་བ་སྨྲས་ཏེ། འདིས་
ཅི་བསྟན་ཞེ་ན། སྔར་དབུ་མ་པས་དངོས་པོ་རྣམས་རྒྱུ་མེད་པ་དེ་ལས་སྐྱེ་བ་མེད་དེ། དེ་ལས་སྐྱེ་བར་སྟོན་པའི་རྗེས་སུ་དཔག་པ་མེད་པའི་ཕྱིར་དང་། རྗེས་སུ་དཔག་པའི་གནོད་པར་འགྱུར་བའི་ཕྱིར་ཡང་ངོ་ཞེས་བྱ་བར་དགོངས་སོ་ཞེས་སྨྲས་པ་གང་ཡིན་པ་དེ་ལ་ངོ་བོ་ཉིད་དུ་སྨྲ་བ་དག་ངོ་བོ་ཉིད་ལས་སྐྱེ་
བར་སྟོན་པའི་རྗེས་སུ་དཔག་པའི་ཕྱིར་ཞེས་བྱ་བ་དེ་མི་བཟོད་པས། འདིར་ངོ་བོ་ཉིད་ལས་སྐྱེ་བར་སྟོན་པའི་རྗེས་སུ་དཔག་པ་དང་། རང་གི་ལོ་རྒྱུས་ཀྱང་སྟོན་པར་བྱེད་པ་ཡིན་ནོ། །དེ་ལ་ཞེས་བྱ་བའི་སྒྲ་ནི་དམིགས་ཀྱིས་བསལ་བའི་དོན་དེ་རྒྱུ་མེད་པ་དངོས་པོར་གྱུར་པ་ལས་སྐྱེ་བར་སྨྲ་བ་དེ་ལའོ། །
རེ་ཞིག་ཅེས་བྱ་བའི་སྒྲ་ནི་རིམ་པ་ལ་ལྟོས་པའི་དོན་ཏེ། རྒྱུ་མེད་པ་དངོས་པོར་གྱུར་པ་ལས་སྐྱེ་བར་སྨྲ་བ་དག་ལས་རེ་ཞིག་ངོ་བོ་ཉིད་དུ་སྨྲ་བ་དག་གི་ལོ་རྒྱུས་སྟོན་པ་ཡིན་ནོ། །ངོ་བོ་ཉིད་དུ་སྨྲ་བ་དག་ན་རེ་ཞེས་བྱ་བ་ནི་རྒྱུ་མེད་པ་དངོས་པོར་གྱུར་པ་ངོ་བོ་ཉིད་ལས་སྐྱེ་བར་སྨྲ་བ་དག་ན་རེ་འདི་སྐད་ཅེས་ཟེར་
རོ་ཞེས་བྱ་བར་སྦྱར་རོ། །དེ་ལ་ངོ་བོ་ཉིད་ཅེས་བྱ་བ་ནི་གང་དངོས་པོ་ཐམས་ཅད་ལ་མི་ལྟོས་པར་རང་གི་ངོ་བོ་ཉིད་ཀྱིས་ཡང་དག་པར་འགྲུབ་པ་ལྷན་ཅིག་སྐྱེས་པ་བཅོས་མ་མ་ཡིན་པ་དེ་ནི་ངོ་བོ་ཉིད་ཅེས་བྱའོ། །ངོ་བོ་ཉིད་དུ་སྨྲ་བ་ཞེས་བྱ་བ་ནི་དངོས་པོ་རྣམས་ངོ་བོ་ཉིད་ལས་སྐྱེ་བར་སྨྲ་བ་སྟེ། འཇིག་
རྟེན་རྒྱང་པན་པའི་གྲུབ་པའི་མཐའ་བྱེད་པ་དྲང་སྲོང་ཆེན་པོ་འཇིག་རྟེན་མིག་ཅེས་བྱའོ། །ངོ་བོ་ཉིད་དུ་སྨྲ་བ་དག་ཅེས་བྱ་བའི་སྒྲས་ནི་དྲང་སྲོང་ཆེན་པོ་འཇིག་རྟེན་མིག་གི་གྲུབ་པའི་མཐའ་སྨྲ་བ་དག་ཅེས་བྱ་བའི་དོན་ཏེ། འཇིག་རྟེན་རྒྱང་པན་པ་དག་ཅེས་བྱ་བའི་ཐ་ཚིག་གོ། །དེ་ལ་འདིར་ནང་གི་
སྐྱེ་མཆེད་རྣམས་ཞེས་བྱ་བ་འདི་ནི་ཆོས་ཅན་ཡིན་ལ། ངོ་བོ་ཉིད་ལས་སྐྱེ་བར་དམ་འཆའ་སྟེ་ཞེས་བྱ་བ་འདི་ནི་བསྒྲུབ་པར་བྱ་བ་ཆོས་ཡིན། ལུས་སྣ་ཚོགས་འགྲུབ་པའི་ཕྱིར་ཞེས་བྱ་བ་འདི་ནི་སྒྲུབ་པའི་ཆོས་ཡིན། དཔེར་ན་པདྨ་དག་གི་ཁ་དོག་དང་། དབྱིབས་དང་། ལོ་མ་དང་།

ཆུ་བ་དང་། འདབ་མ་དང་། ཟེ་བ་དང་། སྙིང་པོ་མཛེས་པ་ལྟ་བུ་དང་། རྨ་བྱ་དག་གི་མགྲིན་པའི་ཕྱོགས་རིན་པོ་ཆེ་མཐོན་ཀ་ཆེན་པོ་དང་། ཨནྡ་རྙིལ་ལྟར་མཐོན་མཐིང་དུ་འདུག་ལ། མཇུག་སྒྲོའི་ཚོགས་དག་གི་མདོངས་བཀྲ་ཞིང་འཚེར་བག་ཡོད་པ་བཞིན་ནོ་ཞེས་བྱ་བ་འདི་ནི་
དཔེ་ཡིན་པར་སྦྱར་རོ། །དེ་ལ་ནང་གི་སྐྱེ་མཆེད་རྣམས་ཞེས་བྱ་བ་ལ། ནང་གི་ཞེས་བྱ་བ་ནི་བདག་གིས་བྱིན་གྱིས་བརླབས་ཤིང་གནས་སུ་བྱས་པའོ། །བདག་ཅེས་བྱ་བ་ནི་འཚམ་ལ་བདག་གིར་བྱེད་པ་སྟེ། ཡོ་བྱད་གྱ་ནོམ་པ་དང་། རྒྱ་ཆེན་པོ་དག་དང་པོར་བྱས་ནས། ཡོ་བྱད་ངན་པ་
དང་ཁྱོན་ཆུང་ངུའི་བར་དག་ལ་བདག་གིར་བྱེད་པས་བདག་ཅེས་བྱའོ། །བདག་དེས་བྱིན་གྱིས་བརླབས་ཤིང་གནས་སུ་བྱས་པ་ནི་ནང་གི་ཞེས་བྱའོ། །སྐྱེ་མཆེད་རྣམས་ཞེས་བྱ་བ་ནི་སེམས་དང་སེམས་ལས་བྱུང་བ་རྣམས་སྐྱེ་ཞིང་འབྱུང་བ་དང་། མཆེད་ཅིང་རྒྱས་པར་བྱེད་པས་སྐྱེ་མཆེད་
རྣམས་ཏེ། འདི་ལྟ་སྟེ། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཅེས་བྱ་བ་རྣམས་སོ། །ནང་གི་སྐྱེ་མཆེད་དེ་དག་ལ་བསྒྲུབ་པར་བྱ་བ་ཆོས་ངོ་བོ་ཉིད་ལས་སྐྱེ་བར་དམ་འཆའ་སྟེ་ཞེས་བྱ་བ་དང་། སྒྲུབ་པའི་ཆོས་ལུས་སྣ་ཚོགས་འགྲུབ་པའི་ཕྱིར་ཞེས་བྱ་བ་དེ་
གཉིས་ཡོད་པས་དེ་ནི་འདིར་ཆོས་ཅན་ཡིན་ནོ། །ངོ་བོ་ཉིད་ལས་སྐྱེ་བར་དམ་འཆའ་སྟེ་ཞེས་བྱ་བ་ནི། ནང་གི་སྐྱེ་མཆེད་དེ་དག་དངོས་པོ་ཐམས་ཅད་ལ་མི་ལྟོས་པར་རང་གི་ངོ་བོ་ཉིད་ཀྱིས་ཡང་དག་པར་འགྲུབ་པ་ལྷན་ཅིག་སྐྱེས་པ་བཅོས་མ་མ་ཡིན་པར་ཁས་ལེན་པ་སྟེ། དེ་ནི་འདིར་བསྒྲུབ་
པར་བྱ་བ་ཆོས་ཡིན་ནོ། །རྗེས་སུ་དཔག་པ་འདི་ལ་བསྒྲུབ་པར་བྱ་བ་ཆོས་ངོ་བོ་ཉིད་ལས་སྐྱེ་བར་དམ་འཆའ་སྟེ་ཞེས་བྱ་བ་དང་། གང་ལ་དེ་བསྒྲུབ་པར་བྱ་བའི་ཆོས་ཅན་ནང་གི་སྐྱེ་མཆེད་རྣམས་ཞེས་བྱ་བ་དེ་གཉིས་གཅིག་ཏུ་བསྡུས་པ་ནི་ཕྱོགས་ཡིན་པར་སྦྱར་རོ། །ལུས་སྣ་ཚོགས་གྲུབ་པའི་
ཕྱིར་ཞེས་བྱ་བ་ལ། ལུས་ཞེས་བྱ་བ་ནི་རང་གི་ངོ་བོ་ཉིད་དོ། །སྣ་ཚོགས་ཞེས་བྱ་བ་ནི་སྣ་ཚོགས་པ་དང་བརྒྱན་པ་དང་སྤྲས་པའོ། །འགྲུབ་པའི་ཕྱིར་ཞེས་བྱ་བ་ནི་ཁ་དོག་དཀར་པོ་དང་། དམར་པོ་དང་། སྔོན་པོ་དང་། སེར་པོ་ལ་སོགས་པ་དང་། དབྱིབས་རིང་པོ་དང་། ཐུང་ངུ་

དང་། ཟླུམ་པོ་དང་། གྲུ་བཞི་ལ་སོགས་པས་ལུས་སྣ་ཚོགས་འགྲུབ་པའི་ཕྱིར་ཏེ། དེ་ནི་འདིར་ནང་གི་སྐྱེ་མཆེད་རྣམས་ངོ་བོ་ཉིད་ལས་སྐྱེ་བར་དམ་འཆའ་བའི་སྒྲུབ་པའི་ཆོས་ཡིན་ནོ། །དེ་ཡང་ཇི་ལྟ་བུ་ཞེ་ན། དེའི་ཕྱིར་དཔེར་ན་ཞེས་བྱ་བ་ལ་སོགས་པ་སྨྲས་
ཏེ། དཔེར་ན་པདྨ་དག་གི་ཁ་དོག་ལ་སོགས་པ་མཛེས་པ་དང་། རྨ་བྱ་དག་གི་མགྲིན་པའི་ཕྱོགས་མཐོན་མཐིང་དུ་འདུག་པ་དག་ལ་སོགས་པ་བྱེད་པ་པོ་གང་ཡང་མེད་པར་ངོ་བོ་ཉིད་ཀྱིས་དེ་ལྟར་སྐྱེས་པ་བཞིན་དུ་ནང་གི་སྐྱེ་མཆེད་ཁ་དོག་དང་དབྱིབས་ལ་སོགས་པ་དག་གི་ལུས་སྣ་ཚོགས་
གྲུབ་པ་རྣམས་ཀྱང་བྱེད་པ་པོ་གང་ཡང་མེད་པར་ངོ་བོ་ཉིད་ཀྱིས་དེ་ལྟར་སྐྱེའོ་ཞེས་དམ་འཆའ་བར་སྦྱར་རོ། །དེ་ལ་པདྨ་དག་ཅེས་བྱ་བ་ནི་མཚོ་ལས་སྐྱེས་པ་དག་མཚོན་པ་སྟེ། དེས་ན་པདྨ་མ་དང་། ཨུཏྤལ་དང་། ཀུ་མུ་ད་དང་། དྲི་མཆོག་དང་། པདྨ་དཀར་པོ་ལ་སོགས་པ་
དག་སྤྱིར་གཟུང་ངོ་། །ཁ་དོག་དང་། དབྱིབས་དང་། ལོ་མ་དང་། ཆུ་བ་དང་། འདབ་མ་དང་། ཟེ་བ་དང་། སྙིང་པོ་མཛེས་པ་ཞེས་བྱ་བ་ནི། ཁ་དོག་ལ་སོགས་པ་གང་ལ་མདོག་མཛེས་པ་ཡོད་པ་དེ་ནི་ཁ་དོག་ལ་སོགས་པ་མཛེས་པའོ། །དེས་ན་པདྨ་ལ་སོགས་པ་མཚོ་
ནས་སྐྱེས་པ་གང་དག་ལ་ཁ་དོག་མཛེས་པ་དང་། དབྱིབས་མཛེས་པ་དང་། ལོ་མ་མཛེས་པ་དང་། ཆུ་བ་མཛེས་པ་དང་། འདབ་མ་མཛེས་པ་དང་། ཟེ་བ་མཛེས་པ་དང་། སྙིང་པོ་མཛེས་པ་ཡོད་པ་དེ་དག་ནི། ཁ་དོག་དང་། དབྱིབས་དང་། ལོ་མ་དང་། ཆུ་བ་དང་།
འདབ་མ་དང་། ཟེ་བ་དང་། སྙིང་པོ་མཛེས་པ་ཞེས་བྱ་བའོ། །ལྟ་བུ་ཞེས་བྱ་བ་ནི་དཔེར་ན། པདྨ་ལ་སོགས་པ་དེ་དག་གི་ཁ་དོག་ལ་སོགས་པའི་མཛེས་པ་དེ་དག་སུ་ཞིག་ཆུར་ཞུགས་ཏེ། ཁ་དོག་དང་དབྱིབས་སྣ་ཚོགས་བཀྲ་ཞིང་མཛེས་པ་དག་ཏུ་བྱེད་པར་འགྱུར་ཏེ། བྱེད་པ་
པོ་མང་པོ་ཞིག་ཡོད་དུ་ཟིན་ཀྱང་དེ་དག་བྱེད་མི་ནུས་ན་བྱེད་པ་པོ་དང་འབྱིན་པ་པོ་གཅིག་གིས་དེ་དག་བྱེད་ནུས་པར་ལྟ་ག་ལ་འགྱུར་ཏེ། མི་ནུས་པ་དེ་བཞིན་དུ་ནང་གི་སྐྱེ་མཆེད་ཁ་དོག་དང་དབྱིབས་ལ་སོགས་པ་དག་གིས་ལུས་སྣ་ཚོགས་གྲུབ་པ་རྣམས་ཀྱང་བྱེད་པ་པོ་གང་གིས་

ཀྱང་མ་བྱས་པར་ངོ་བོ་ཉིད་ལས་སྐྱེ་བར་དམ་འཆའོ་ཞེས་བྱ་བ་ལ་སོགས་པའི་ཐ་ཚིག་གོ། །རྨ་བྱ་དག་ཅེས་བྱ་བ་འདིས་ནི་ནང་གི་སེམས་ཅན་དུ་བགྲང་བ་དག་གི་དཔེ་ཡིན་ནོ། །དེ་ལ་མགྲིན་པའི་ཕྱོགས་རིན་པོ་ཆེ་མཐོན་ཀ་ཆེན་པོ་དང་། ཨནྡ་རྙིལ་ལྟར་མཐོན་མཐིང་དུ་འདུག་ལ་ཞེས་བྱ་
བ་ནི་རྨ་བྱ་གང་དག་ལ་མགྲིན་པའི་ཕྱོགས་ཀྱི་ནོར་བུ་རིན་པོ་ཆེ་མཐོན་ཀ་ཆེན་པོ་དང་། ཨནྡ་རྙིལ་ལྟར་མཐོན་མཐིང་དུ་འདུག་པ་ཡོད་པ་དེ་དག་ནི་མགྲིན་པའི་ཕྱོགས་རིན་པོ་ཆེ་མཐོན་ཀ་ཆེན་པོ་དང་ཨནྡ་རྙིལ་ལྟར་མཐོན་མཐིང་དུ་འདུག་པ་ཞེས་བྱའོ། །དེ་ལ་རིན་པོ་ཆེ་མཐོན་ཀ་ཆེན་པོ་ཞེས་བྱ་བ་ནི་ཁ་
དོག་མཐོན་ཀའི་ཤས་ཤིན་ཏུ་ཆེ་བས་མཐོན་ཀ་ཆེན་པོ་ཞེས་བྱའོ། །ཨནྡ་རྙིལ་ཞེས་བྱ་བ་ནི་རིན་པོ་ཆེ་མཐོན་ཀ་ཆེན་པོ་དེ་དག་ཉིད་ཀྱི་བྱེ་བྲག་སྟེ། རིན་པོ་ཆེ་ཨིནྡྲ་ནཱི་ལ་ཞེས་བྱ་བ་ཡིན་ནོ། །དེས་ནི་རིན་པོ་ཆེ་མཐོན་ཀ་ཆེན་པོ་དང་། ཨནྡ་རྙིལ་ལྟར་མཐོན་མཐིང་དུ་འདུག་ལ་ཞེས་བྱ་བ་ནི་
དེ་འདྲ་བར་མགྲིན་པའི་ཕྱོགས་མཐོན་མཐིང་དུ་འདུག་པ་ཡིན་ནོ། །རྨ་བྱ་དེ་དག་གི་མགྲིན་པའི་ཕྱོགས་རིན་པོ་ཆེ་མཐོན་ཀ་ཆེན་པོ་དང་། ཨནྡ་རྙིལ་ལྟར་མཐོན་མཐིང་དུ་འདུག་ལ་ཞེས་བྱ་བ་འབའ་ཞིག་ཏུ་ཡང་མ་ཟད་དེ། འདི་ལྟར་མཇུག་སྒྲོའི་ཚོགས་དེ་དག་གི་མདོངས་བཀྲ་ཞིང་
འཚེར་བག་ཡོད་པ་ཡང་ཡིན་ཏེ། རྨ་བྱ་གང་དག་ལ་མཇུག་སྒྲོའི་ཚོགས་དག་གི་མདོངས་བཀྲ་ཞིང་འཚེར་བག་ཡོད་པ་དེ་དག་ནི་མཇུག་སྒྲོའི་ཚོགས་དག་གི་མདོངས་བཀྲ་ཞིང་འཚེར་བག་ཡོད་པ་ཞེས་བྱའོ། །བཞིན་ནོ་ཞེས་བྱ་བ་ནི་དཔེར་ན་རྨ་བྱ་དེ་དག་གི་མགྲིན་པའི་ཕྱོགས་རིན་པོ་ཆེ་མཐོན་ཀ་
ཆེན་པོ་དང་། ཨནྡ་རྙིལ་ལྟར་མཐོན་མཐིང་དུ་འདུག་པ། མཇུག་སྒྲོའི་ཚོགས་དག་གི་མདོངས་བཀྲ་ཞིང་འཚེར་བག་ཡོད་པ་དེ་དག་སུ་ཞིག་ཚོན་ལ་སོགས་པ་ཐོགས་ཏེ། ཁ་དོག་དང་དབྱིབས་སྣ་ཚོགས་ལ་བཀྲ་ཞིང་འཚེར་བག་ཏུ་བྱེད་པར་འགྱུར་ཏེ། བྱེད་པ་པོ་མང་པོ་ཞིག་ཡོད་དུ་ཟིན་
ན་ཡང་དེ་དག་བྱེད་མི་ནུས་ན། བྱེད་པ་པོ་དང་འབྱིན་པ་པོ་གཅིག་གིས་དེ་ལྟར་བྱེད་ནུས་པར་ག་ལ་འགྱུར་ཏེ། མི་ནུས་པ་དེ་བཞིན་དུ་ནང་གི་སྐྱེ་མཆེད་ཁ་དོག་དང་དབྱིབས་ལ་སོགས་པ་དག་གི་ལུས་སྣ་ཚོགས་གྲུབ་པ་རྣམས་ཀྱང་བྱེད་པ་པོ་གང་གིས་ཀྱང་མ་བྱས་པར་ངོ་བོ་ཉིད་ལས་སྐྱེ་བར་

དམ་འཆའོ་ཞེས་བྱ་བའི་ཐ་ཚིག་གོ། །དེ་ལྟར་ན་ཕྱི་རོལ་དང་ནང་གི་རྫས་ཚོགས་པའི་མཐུ་ལས་ཕྱི་ནང་གི་དངོས་པོ་རྣམས་ཀྱི་ཁ་དོག་དང་། དབྱིབས་དང་། བོང་ཚོད་དང་། སྒྲ་སྐད་དང་། བསམ་པའི་དབྱེ་བ་ཐ་དད་པར་གྱུར་པ་ཡིན་པས། དབུ་མ་པ་
ན་རེ། ངོ་བོ་ཉིད་ལས་སྐྱེ་བར་སྟོན་པའི་རྗེས་སུ་དཔག་པ་མེད་པའི་ཕྱིར་དངོས་པོ་རྣམས་ངོ་བོ་ཉིད་ལས་སྐྱེ་བ་མེད་དོ་ཞེས་ཟེར་བ་དེ་རིགས་པ་མ་ཡིན་ནོ་ཞེས་ཟེར་རོ།། །།བམ་པོ་བཅུ་གསུམ་པ། དེ་སྐད་ཅེས་ཟེར་བ་དེའི་ལན་དུ་འདིར་འགྲེལ་པ་བྱེད་པ་ཉིད་ཀྱིས་དེས་ན་དེ་ལ་
དམ་པའི་དོན་དེ་གལ་ཏེ་ཀུན་རྫོབ་ཏུ་ནང་གི་སྐྱེ་མཆེད་ཀུན་རྫོབ་པའི་ཤེས་པ་སྤྱོད་ཡུལ་རྣམས་བྱེད་པ་པོ་རང་དབང་ཅན་གྱི་བྱ་བ་ལ་མི་ལྟོས་པའི་ཕྱིར་དང་། སུས་ཀྱང་མ་བྱས་པ་ཁོ་ནའི་ཕྱིར་རྐྱེན་ངེས་པ་ལས་སྐྱེ་བ་ཡིན་ན་ནི་གྲུབ་པ་ལ་སྒྲུབ་བོ། །ཅི་སྟེ་དོན་དམ་པར་ན་ནི་དཔེ་མེད་དེ།
དོན་དམ་པར་པདྨ་ལ་སོགས་པ་སྐྱེ་བར་ཁས་མ་བླངས་པའི་ཕྱིར་རོ་ཞེས་བྱ་བ་སྨྲས་སོ། །དེ་ལ་དེས་ན་ཞེས་བྱ་བ་ནི་ངོ་བོ་ཉིད་དུ་སྨྲ་བ་དག་གིས་ཇི་སྐད་སྨྲས་པ་དེས་ནའོ། །དེ་ལ་ཞེས་བྱ་བ་ནི་ངོ་བོ་ཉིད་དུ་སྨྲ་བ་དག་གིས་སྒྲུབ་པའི་སྦྱོར་བ་བྱས་པ་དེ་ལའོ། །དམ་བཅས་པའི་དོན་དེ་
ཞེས་བྱ་བ་ནི་ངོ་བོ་ཉིད་དུ་སྨྲ་བ་དག་གིས་བསྒྲུབ་པར་བྱས་པའི་དམ་བཅས་པའི་དོན་སྔར་སྨྲས་པ་དེའོ། །དེས་ན་དེ་ལ་རེ་ཞིག་འདི་སྐད་ཅེས་དྲི་བར་བྱ་སྟེ། ཅི་ངོ་བོ་ཉིད་ལས་སྐྱེ་བར་དམ་བཅས་པའི་དོན་དེ་ཀུན་རྫོབ་ཏུ་སྒྲུབ་བམ། འོན་ཏེ་དོན་དམ་པར་སྒྲུབ་པ་འདི་ལ་ཁྱེད་ཀྱི་བསམ་པ་ནི་
གང་། དམ་བཅས་པ་ནི་གང་ཞེས་དྲི་བར་བྱའོ། །དེ་སྐད་དྲིས་པ་ན་ངོ་བོ་ཉིད་དུ་སྨྲ་བ་དག་དམ་བཅས་པའི་དོན་དེ་ཀུན་རྫོབ་ཏུ་སྒྲུབ་པོ་ཞེས་ཟེར་ན། དེའི་ཕྱིར་དེ་དག་ལ་འདི་སྐད་ཅེས་གལ་ཏེ་ཀུན་རྫོབ་ཏུ་ནང་གི་སྐྱེ་མཆེད་ཀུན་རྫོབ་ཤེས་པའི་སྤྱོད་ཡུལ་རྣམས་བྱེད་པ་པོ་རང་དབང་ཅན་གྱི་བྱ་བ་ལ་མི་
ལྟོས་པའི་ཕྱིར་དང་། སུས་ཀྱང་མ་བྱས་པ་ཁོ་ནའི་ཕྱིར་རྐྱེན་ངེས་པ་ལས་སྐྱེ་བ་ཡིན་ན་ནི་གྲུབ་པ་ལ་སྒྲུབ་པོ་ཞེས་བརྗོད་པར་བྱའོ། །དེ་ལ་གལ་ཏེ་ཀུན་རྫོབ་ཏུ་ཞེས་བྱ་བ་ནི་གལ་ཏེ་ནང་གི་སྐྱེ་མཆེད་ཀུན་རྫོབ་པའི་ཤེས་པའི་སྤྱོད་ཡུལ་རྣམས་བྱེད་པ་པོ་རང་དབང་ཅན་གྱི་བྱ་བ་ལ་མི་ལྟོས་པའི་ཕྱིར་

དང་། སུས་ཀྱང་མ་བྱས་པ་ཁོ་ནའི་ཕྱིར་ཀུན་རྫོབ་ཏུ་རྐྱེན་ངེས་པ་ལས་སྐྱེ་བ་སྒྲུབ་ཀྱི། དོན་དམ་པར་མི་སྒྲུབ་ན་ནིའོ། །ནང་གི་སྐྱེ་མཆེད་ཅེས་བྱ་བ་ནི་ཁྱད་པར་གྱི་གཞི་ཡིན་ཏེ། མིག་ལ་སོགས་པ་ནང་གི་སྐྱེ་མཆེད་དྲུག་པོ་རྣམས་སོ། །ཀུན་རྫོབ་པའི་ཤེས་པའི་སྤྱོད་ཡུལ་རྣམས་ཞེས་
བྱ་བ་ནི་དེ་དག་གི་ཁྱད་པར་ཡིན་ཏེ། ནང་གི་སྐྱེ་མཆེད་དེ་དག་ཉིད་ཀུན་རྫོབ་པའི་ཤེས་པའི་སྤྱོད་ཡུལ་དང་ཡུལ་ཡིན་པའི་ཕྱིར་རོ། །བྱེད་པ་པོ་རང་དབང་ཅན་གྱི་བྱ་བ་ཞེས་བྱ་བ་ནི། བྱེད་པ་པོའི་མཚན་ཉིད་ནི་རང་དབང་ཅན་ཡིན་ལ། དེའི་བྱ་བ་ནི་གཡོ་བ་དང་རྩོལ་བ་ཡིན་པས་བྱེད་པ་པོ་
རང་དབང་ཅན་གྱི་བྱ་བ་ཞེས་བྱ་བ་སྟེ། གཞན་ལ་མི་བརྟེན་པར་བྱེད་པ་ཞེས་བྱ་བའི་ཐ་ཚིག་གོ། །བྱེད་པ་པོ་རང་དབང་ཅན་གྱི་བྱ་བ་དེ་ལ་མི་ལྟོས་པའི་ཕྱིར་ཞེས་བྱ་བ་ནི་ནང་གི་སྐྱེ་མཆེད་ཀུན་རྫོབ་པའི་ཤེས་པའི་སྤྱོད་ཡུལ་གང་དག་བྱེད་པ་པོ་རང་དབང་ཅན་གྱི་བྱ་བ་ལ་མི་ལྟོས་ཤིང་རྐྱེན་ངེས་
པ་ལ་ལྟོས་པ་དེ་དག་ནི་བྱེད་པ་པོ་རང་དབང་ཅན་གྱི་བྱ་བ་ལ་མི་ལྟོས་པ་ཞེས་བྱ་སྟེ། དེ་ལ་མི་ལྟོས་པའི་ཕྱིར་རྐྱེན་ངེས་པ་ལས་སྐྱེ་བ་ཡིན་ན་ནི་ཞེས་བྱ་བར་སྦྱར་རོ། །སུས་ཀྱང་མ་བྱས་པ་ཁོ་ནའི་ཕྱིར་ཞེས་བྱ་བ་ནི་ནང་གི་སྐྱེ་མཆེད་ཀུན་རྫོབ་པའི་ཤེས་པའི་སྤྱོད་ཡུལ་གང་དག་ཚངས་པ་ལ་
སོགས་པ་སུས་ཀྱང་མ་བྱས་པ་ཁོ་ན་ཡིན་ཞིང་། རྐྱེན་ངེས་པ་ཁོ་ན་ལས་སྐྱེ་བ་དེ་དག་ནི་སུས་ཀྱང་མ་བྱས་པ་ཁོ་ན་ཞེས་བྱ་སྟེ། སུས་ཀྱང་མ་བྱས་པ་ཁོ་ནའི་ཕྱིར་ངེས་པ་ལས་སྐྱེ་བ་ཡིན་ནོ་ཞེས་བྱ་བར་སྦྱར་རོ། །བྱེད་པ་པོ་རང་དབང་ཅན་གྱི་བྱ་བ་ལ་མི་ལྟོས་པ་དང་། ཚངས་པ་ལ་
སོགས་པ་སུས་ཀྱང་མ་བྱས་པ་དེ་དག་ཀྱང་གང་ཞེ་ན། ནང་གི་སྐྱེ་མཆེད་ཀུན་རྫོབ་པའི་ཤེས་པའི་སྤྱོད་ཡུལ་རྣམས་ཞེས་བྱ་བ་ཡིན་ཏེ། དེ་རྣམས་བྱེད་པ་པོ་རང་དབང་ཅན་གྱི་བྱ་བ་ལ་མི་ལྟོས་པའི་ཕྱིར་དང་། ཚངས་པ་ལ་སོགས་པ་སུས་ཀྱང་མ་བྱས་པ་ཁོ་ནའི་ཕྱིར་རྐྱེན་ངེས་པ་ལས་སྐྱེ་
བ་ཡིན་ན་ནི། ངོ་བོ་ཉིད་དུ་སྨྲ་བ་དག་གི་དམ་བཅས་པའི་དོན་དེ་གྲུབ་པ་ལ་སྒྲུབ་པའི་སྐྱོན་དུ་འགྱུར་རོ་ཞེས་བྱ་བར་སྦྱར་རོ། །དེ་ལ་རྐྱེན་ཞེས་བྱ་བ་ནི་ལས་དང་ཉོན་མོངས་པ་དང་། ཁུ་ཆུ་དང་། ཁྲག་ལ་སོགས་པ་ཞེས་བྱ་བ་དང་། ས་བོན་དང་། ས་དང་། ཆུ་དང་། མེ་དང་། རླུང་ཞེས་

བྱ་བ་དག་གོ། །ངེས་པ་ཞེས་བྱ་བ་ནི་མེར་མེར་པོ་ལ་སོགས་པ་དང་། མིར་གྱུར་པའི་ལས་ཀྱི་རྐྱེན་ལས་མིའི་སྐྱེ་མཆེད་རྣམས་སྐྱེ་བར་འགྱུར་བ་དང་། དེ་བཞིན་དུ་དུད་འགྲོ་དང་། ཡི་དགས་དང་། སེམས་ཅན་དམྱལ་བར་འགྱུར་བའི་ལས་ཀྱི་རྐྱེན་
ལས་དུད་འགྲོ་དང་། ཡི་དགས་དང་། སེམས་ཅན་དམྱལ་བ་པའི་སྐྱེ་མཆེད་རྣམས་སྐྱེ་བར་འགྱུར་བ་དང་། དེ་བཞིན་དུ་པདྨ་དང་། ཨུཏྤལ་དང་། དྲི་མཆོག་དང་། པདྨ་དཀར་པོ་ལ་སོགས་པའི་ས་བོན་རིགས་མཐུན་པ་ལས། པདྨ་དང་། ཨུཏྤ་ལ་ལ་སོགས་པ་སྐྱེ་བར་
འགྱུར་བ་དེ་ནི་ངེས་པ་ཞེས་བྱའོ། །དེའི་ཕྱིར་རྐྱེན་ངེས་པ་དེ་ལས་ནང་གི་སྐྱེ་མཆེད་ཀུན་རྫོབ་པའི་ཤེས་པའི་སྤྱོད་ཡུལ་རྣམས་སྐྱེ་བ་ཡིན་ན་ནི་དེས་ན་ཁྱོད་ཀྱིས་དམ་བཅས་པའི་དོན་དེ་གྲུབ་པ་ལ་སྒྲུབ་པ་ཡིན་ཏེ། འདི་ལྟར་གྲུབ་པའི་མཐའ་གང་ལས་ས་བོན་ཡང་འདི་སྙམ་དུ། བདག་
གིས་མྱུ་གུ་མངོན་པར་བསྒྲུབ་པར་བྱའོ་སྙམ་དུ་མི་སེམས་ལ། མྱུ་གུ་ཡང་འདི་སྙམ་དུ་བདག་ནི་ས་བོན་གྱིས་མངོན་པར་བསྒྲུབས་སོ་སྙམ་དུ་མི་སེམས་སོ། །དེ་བཞིན་དུ་མ་རིག་པ་ཡང་འདི་སྙམ་དུ་བདག་གིས་འདུ་བྱེད་རྣམས་མངོན་པར་སྒྲུབ་བོ་སྙམ་དུ་མི་སེམས་ལ། འདུ་བྱེད་རྣམས་
ཀྱང་འདི་སྙམ་དུ་བདག་ཅག་ནི་མ་རིག་པས་མངོན་པར་བསྒྲུབས་སོ་སྙམ་དུ་མི་སེམས་ཏེ། འདི་ལྟར་བྱེད་པ་པོ་ཡོངས་སུ་བཙལ་ན་ནང་གི་བྱེད་པའི་སྐྱེས་བུའམ་འབྱིན་པ་པོ་དམིགས་སུ་མེད་མོད་ཀྱི། འོན་ཀྱང་རྒྱུ་དང་རྐྱེན་སོ་སོར་ངེས་པ་ཚོགས་པའི་དབང་དང་སེམས་ཅན་རྣམས་ཀྱི་ལས་
ཐུན་མོང་བའི་དབང་གིས་འབྲས་བུ་ཡོ་བྱད་སོ་སོར་ངེས་པ་དག་ཀུན་རྫོབ་ཏུ་སྐྱེ་བ་གང་ཡིན་པ་དེ་ནི་ཆོས་ཉིད་ཡིན་ནོ་ཞེས་གསུངས་པའི་གྲུབ་པའི་མཐའ་དེ་ཉིད་ཁྱོད་ཀྱིས་བསྒྲུབས་པས་གྲུབ་པ་ལ་སྒྲུབ་པ་ཡིན་ནོ། །དེ་སྐད་ཅེས་སྨྲས་པ་ན། གལ་ཏེ་ངོ་བོ་ཉིད་དུ་སྨྲས་པ་དག་དམ་བཅས་
པའི་དོན་དེ་དོན་དམ་པར་སྒྲུབ་བོ་ཞེས་ཟེར་ན། དེའི་ཕྱིར་དེ་དག་ལ་འདི་སྐད་ཅེས་ཏེ། དོན་དམ་པར་ན་ནི་དཔེ་མེད་དེ། དོན་དམ་པར་པདྨ་ལ་སོགས་པ་སྐྱེ་བར་ཁས་མ་བླངས་པའི་ཕྱིར་རོ་ཞེས་བརྗོད་པར་བྱའོ། །དེ་ལ་ཅི་སྟེ་དོན་དམ་པར་ན་ནི་ཞེས་བྱ་བ་ནི་ངོ་བོ་ཉིད་དུ་སྨྲ་བ་དག་གི་

ངོ་བོ་ཉིད་ལས་སྐྱེ་བར་དམ་བཅས་པའི་དོན་དེ་ཇི་སྟེ་དོན་དམ་པར་སྒྲུབ་ན་ནིའོ། །དཔེ་མེད་དེ་ཞེས་བྱ་བ་ནི་དོན་དམ་པར་དངོས་པོ་རྣམས་ཀྱི་དཔེ་མེད་པས་དངོས་པོ་རྣམས་ངོ་བོ་ཉིད་ལས་སྐྱེ་བར་དམ་བཅས་པའི་དོན་དེ་ནི་མི་འགྲུབ་པོ་ཞེས་བྱ་བར་སྦྱར་རོ། །གལ་ཏེ་དོན་དམ་པར་ཇི་ལྟར་དཔེ་མེད་
ཅེ་ན། དེའི་ཕྱིར་དོན་དམ་པར་པདྨ་ལ་སོགས་པ་སྐྱེ་བར་ཁས་མ་བླངས་པའི་ཕྱིར་རོ་ཞེས་བྱ་བ་སྨྲས་ཏེ། ཅི་ཁྱེད་ཀྱི་ཁོ་བོའི་གྲུབ་པའི་མཐའ་ལས་གཟུགས་ཀྱི་སྐྱེ་བ་མེད་པ་ལ་སྤྱོད་ན་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་མ་ཡིན་ནོ་ཞེས་གསུངས་པ་མ་ཐོས་སམ། དེའི་ཕྱིར་དོན་དམ་པར་པདྨ་
ལ་སོགས་པར་ཆོས་ཐམས་ཅད་སྐྱེ་བར་ཁས་མ་བླངས་པའི་ཕྱིར་དཔེ་མེད་དོ། །གཞན་ཡང་ཁྱེད་ཀྱིས་གལ་ཏེ་བསྐལ་པ་དུ་མར་རྐང་པའི་མཐེ་བོ་ཡ་གཅིག་གིས་འགྲེང་སྟེ། ལྷ་ཐམས་ཅད་མཉེས་པར་བྱེད་ཅིང་། བདག་ལ་དབུ་མ་པའི་ཕྱིར་དོན་དམ་པར་གཉི་ག་ལ་གྲགས་པའི་དཔེ་ཞིག་
སྩོལ་ཅིག་ཅེས་གསོལ་བ་བཏབ་དུ་ཟིན་ཀྱང་། ལྷ་དེ་དག་གིས་ཁྱོད་ལ་དཔེ་དེ་ལྟ་བུ་སྦྱིན་པར་མི་ནུས་ཏེ། འདི་ལྟར་བཅོམ་ལྡན་འདས་ཀྱིས་དོན་དམ་པར་དངོས་པོ་ཐམས་ཅད་སྐྱེ་བ་མེད་པ་ཁོ་ནར་བཀའ་སྩལ་པའི་ཕྱིར་རོ། །ཁྱེད་ཀྱི་གཏན་ཚིགས་ལུས་སྣ་ཚོགས་འགྲུབ་པའི་ཕྱིར་ཞེས་བྱ་
བ་དེ་ཡང་གང་ཡང་རུང་བ་ལ་མ་གྲུབ་པ་ཡིན་ཏེ། བྱས་པའི་ཕྱིར་ཞེས་བྱ་བ་བཞིན་ཏེ། འདི་ལྟར་ཁོ་བོའི་ལུང་དོན་དམ་པའི་བདེན་པ་གང་ཞེ་ན། གང་ལ་ཤེས་པ་ཡང་མི་འཇུག་ན། ཡི་གེ་རྣམས་ལྟ་སྨོས་ཀྱང་ཅི་དགོས་ཞེས་གསུངས་པ་དེས་ན། ལུས་སྣ་ཚོགས་འགྲུབ་པ་ཞེས་བྱ་བ་
ཁྱོད་ཀྱི་གཏན་ཚིགས་ཀྱི་དོན་དེ་ཁོ་བོ་ལ་མ་གྲུབ་པ་ཉིད་ཡིན་པས། དེས་ན་ནང་གི་སྐྱེ་མཆེད་རྣམས་ངོ་བོ་ཉིད་ལས་སྐྱེ་བར་དམ་འཆའ་སྟེ་ཞེས་བྱ་བ་དེ་ནི་དམ་བཅས་པ་ཙམ་ཁོ་ནར་ཟད་དོ། །རྒྱུ་མེད་པར་སྨྲ་བ་དག་ཁོ་བོའི་ཕྱིར་ནི་ཐམས་ཅད་རྒྱུ་མེད་པ་ལས་འགྲུབ་པར་འདོད་ལ། བསྒྲུབ་པར་བྱ་བ་
ནི་གཏན་ཚིགས་ཀྱིས་འགྲུབ་པར་འདོད་ན་ནི་ཕྱོགས་སྔ་མ་དང་འགལ་ལོ་ཞེས་བྱ་བས་ནི་འདི་སྐད་བསྟན་ཏེ། ངོ་བོ་ཉིད་དུ་སྨྲ་བ་ཁྱེད་ཀྱི་ལུང་ནི་དངོས་པོ་ཐམས་ཅད་རྒྱུ་མེད་པ་ལས་སྐྱེ་བ་འདི་ཡིན་པས་དེས་ན་ཁྱེད་ཁོ་བོའི་ཕྱིར་དངོས་པོ་ཐམས་ཅད་རྒྱུ་མེད་པ་ལས་འགྲུབ་པར་འདོད་པའི་བསྒྲུབ་

པར་བྱ་བ་དངོས་པོ་རྣམས་རྒྱུ་མེད་པ་ལས་སྐྱེ་བར་སྒྲུབ་པ་གང་ཡིན་པ་དེ་མི་འགྲུབ་བོ། །ཅིའི་ཕྱིར་ཞེ་ན། རྒྱུ་མེད་པར་སྨྲ་བ་ཁྱེད་དངོས་པོ་རྣམས་རྒྱུ་མེད་པ་ལས་སྐྱེ་བར་སྒྲུབ་པའི་གཏན་ཚིགས་སུ་ལུས་སྣ་ཚོགས་འགྲུབ་པའི་ཕྱིར་ཞེས་བྱ་བ་གཏན་ཚིགས་ཀྱི་མཚན་
ཉིད་དུ་ཁས་ལེན་པས། དེས་ན་ཁྱེད་ཀྱི་དངོས་པོ་རྣམས་རྒྱུ་ཁོ་ན་ལས་སྐྱེ་བར་ཁས་བླངས་པ་ཡིན་གྱི། རྒྱུ་མེད་པ་ལས་སྐྱེ་བར་ཁས་མ་བླངས་པའི་ཕྱིར། དེ་ལྟར་ན་རང་གི་ཕྱོགས་སྔ་མ་དང་འགལ་ཏེ། དཔེར་ན་བྱེ་བྲག་པས་སྔར་སྒྲ་མི་རྟག་པ་ཉིད་དུ་ཁས་མ་བླངས་པ་འགྱེད་པའི་དུས་ན་རྟག་
པ་ཉིད་དུ་སྒྲུབ་པ་དེ་བཞིན་དུ། ཁྱེད་ཀྱང་རང་གི་གྲུབ་པའི་མཐའ་ལས་དངོས་པོ་ཐམས་ཅད་རྒྱུ་མེད་པ་ལས་སྐྱེ་བར་སྨྲ་ལ། འགྱེད་པའི་དུས་སུ་ཁོ་བོའི་ཕྱིར་ནི་བསྒྲུབ་པར་བྱ་བ་གཏན་ཚིགས་ཀྱི་རྒྱུས་འགྲུབ་པར་འདོད་པས་དེ་ལྟ་ན་ཁྱེད་རང་གི་གྲུབ་པའི་མཐའ་དང་འགལ་བར་འགྱུར་རོ་ཞེས་བྱ་
བར་སྟོན་ཏོ། །དེ་ལ་རྒྱུ་མེད་པར་སྨྲ་བ་དག་ཅེས་བྱ་བ་ནི་ངོ་བོ་ཉིད་དུ་སྨྲ་བ་དག་གོ། །ཁོ་བོའི་ཕྱིར་ནི་ཞེས་བྱ་བ་ནི་དབུ་མ་པ་ལ་བརྒལ་བའི་ཕྱིར་ནའོ། །ཐམས་ཅད་རྒྱུ་མེད་པ་ལས་འགྲུབ་པར་འདོད་པ་ཞེས་བྱ་བ་ནི་ནང་གི་སྐྱེ་མཆེད་ལ་སོགས་པ་དངོས་པོ་ཐམས་ཅད་ངོ་བོ་ཉིད་ལས་སྐྱེ་བར་
དམ་འཆའ་ཞིང་རྒྱུ་མེད་པ་ལས་འགྲུབ་པར་འདོད་པའོ། །བསྒྲུབ་པར་བྱ་བ་ནི་གཏན་ཚིགས་ཀྱིས་འགྲུབ་པར་འདོད་ན་ནི་ཞེས་བྱ་བ་ནི་ངོ་བོ་ཉིད་དུ་སྨྲ་བ་དག་གིས་བསྒྲུབ་པར་བྱ་བ་ནང་གི་སྐྱེ་མཆེད་རྣམས་ངོ་བོ་ཉིད་ལས་སྐྱེ་བར་དམ་འཆའ་སྟེ་ཞེས་སྨོས་པ་གང་ཡིན་པ་དེ་ནི་གཏན་ཚིགས་
གང་ལུས་སྣ་ཚོགས་འགྲུབ་པའི་ཕྱིར་ཞེས་བྱ་བ་དེས་འགྲུབ་པར་འདོད་ན་ནིའོ། །ཕྱོགས་སྔ་མ་དང་འགལ་ལོ་ཞེས་བྱ་བ་ནི་ངོ་བོ་ཉིད་དུ་སྨྲ་བ་དག་གི་གྲུབ་པའི་མཐའ་ལས་དངོས་པོ་ཐམས་ཅད་རྒྱུ་མེད་པ་ལས་འགྲུབ་པར་འདོད་པའི་ཕྱོགས་སྔ་མ་དེ་དང་། དེ་སྒྲུབ་པ་གཏན་ཚིགས་ཀྱི་རྒྱུས་
འགྲུབ་པར་འདོད་པ་འགལ་བའོ། །ཅི་སྟེ་རྒྱུ་ཡོད་པར་སྨྲ་བ་ལ་གཏན་ཚིགས་མེད་པར་བསྟན་པར་མི་ནུས་པས་ཀླ་ཀློ་ལ་ཀླ་ཀློའི་སྐད་བཞིན་ཏེ། དེས་ན་གཏན་ཚིགས་སྦྱར་ཀྱང་ཕྱོགས་སྔ་མའི་གནོད་པ་མེད་དོ་ཞེ་ན་ཞེས་བྱ་བ་ནི་ཅི་སྟེ་ངོ་བོ་ཉིད་དུ་སྨྲ་བ་དག་དབུ་མ་པ་ལ་ལན་འདི་སྐད་

ཅེས་ཁྱེད་དབུ་མ་པ་རྒྱུ་ཡོད་པར་སྨྲ་བ་ལ་གཏན་ཚིགས་ཀྱི་རྒྱུ་མེད་པར་དོན་བསྟན་པར་མི་ནུས་པས། དཔེར་ན་ཀླ་ཀློ་ལ་ཀླ་ཀློའི་སྐད་མ་སྨྲས་པར་དབུས་པའི་སྐད་ཀྱིས་དོན་བསྟན་པར་མི་ནུས་པ་བཞིན་ནོ། དེས་ན་ཁོ་བོ་ཅག་རྒྱུ་མེད་པར་སྨྲ་བ་རྣམས་ཀྱིས་ཀྱང་ཁྱེད་དབུ་མ་པ་རྒྱུ་ཡོད་པར་སྨྲ་
བ་རྣམས་ལ་བསྟན་པར་བྱ་བའི་ཕྱིར། གཏན་ཚིགས་སྦྱར་བ་བྱས་ཀྱང་ཁོ་བོ་ཅག་ལ་ཕྱོགས་སྔ་མ་དང་འགལ་བའི་གནོད་པ་མེད་དོ་ཞེས་ཟེར་བ་དེའི་དོགས་པ་བསུ་བ་ཡིན་ནོ། །དེ་ལ་ཅི་སྟེ་ཞེས་བྱ་བ་ནི་དབུ་མ་པས་ངོ་བོ་ཉིད་དུ་སྨྲ་བ་དག་གི་དོགས་པ་བསུ་བའི་ཚིག་ཡིན་ནོ། །རྒྱུ་ཡོད་
པར་སྨྲ་བ་ལ་ཞེས་བྱ་བ་ནི་དབུ་མ་པ་ལའོ། །གཏན་ཚིགས་མེད་པར་བསྟན་པར་མི་ནུས་པས་ཞེས་བྱ་བ་ནི་ནང་གི་སྐྱེ་མཆེད་རྣམས་ངོ་བོ་ཉིད་ལས་སྐྱེ་བར་དམ་འཆའ་སྟེ་ཞེས་བྱ་བའི་གཏན་ཚིགས་ལུས་སྣ་ཚོགས་འགྲུབ་པའི་ཕྱིར་ཞེས་བྱ་བ་མ་སྨོས་པར་དོན་དེ་བསྟན་པར་མི་ནུས་པས་སོ། །
ཀླ་ཀློ་ལ་ཀླ་ཀློའི་སྐད་བཞིན་ཏེ་ཞེས་བྱ་བ་ནི་དཔེར་ན་དབུས་པས་ཀླ་ཀློ་མཐའ་འཁོབ་པ་ལ་ཀླ་ཀློའི་སྐད་མ་སྨྲས་པར་དབུས་པའི་སྐད་ཀྱིས་དོན་བསྟན་པར་མི་ནུས་པས་དབུས་པས་ཀླ་ཀློ་མཐའ་འཁོབ་པ་ལ་ཀླ་ཀློའི་སྐད་ཀྱིས་དོན་བསྟན་ཀྱང་། དབུས་པ་དེ་ཀླ་ཀློ་ཡིན་པར་བརྗོད་པར་མི་བྱ་བ་བཞིན་
དུ་ངོ་བོ་ཉིད་དུ་སྨྲ་བ་དག་གིས་ཀྱང་། དབུ་མ་པ་ལ་གཏན་ཚིགས་མེད་པར་དོན་བསྟན་པར་མི་ནུས་པས་ངོ་བོ་ཉིད་དུ་སྨྲ་བ་དག་གིས་དབུ་མ་པ་གཏན་ཚིགས་ཀྱི་དོན་བསྟན་ཀྱང་ངོ་བོ་ཉིད་དུ་སྨྲ་བ་རྒྱུ་ཡོད་པར་སྨྲ་བ་ཡིན་པར་བརྗོད་པར་མི་བྱ་བའོ། །དེས་ན་གཏན་ཚིགས་སྦྱར་ཀྱང་ཞེས་བྱ་བ་ནི་རིགས་པ་
དེས་ན་ངོ་བོ་ཉིད་དུ་སྨྲ་བ་དག་གིས་ནང་གི་སྐྱེ་མཆེད་རྣམས་ངོ་བོ་ཉིད་ལས་སྐྱེ་བར་དམ་འཆའ་སྟེ་ཞེས་བྱ་བའི་གཏན་ཚིགས་སུ་ལུས་སྣ་ཚོགས་འགྲུབ་པའི་ཕྱིར་ཞེས་བྱ་བ་སྦྱར་དུ་ཟིན་ཀྱང་ངོ་། །ཕྱོགས་སྔ་མའི་གནོད་པ་མེད་དོ་ཞེས་བྱ་བ་ནི་ངོ་བོ་ཉིད་དུ་སྨྲ་བ་དག་གི་གྲུབ་པའི་མཐའ་ལས་དངོས་པོ་
ཐམས་ཅད་རྒྱུ་མེད་པ་ལས་འགྲུབ་པར་དམ་བཅས་པའི་ཕྱོགས་སྔ་མ་དང་འགལ་བའི་གནོད་པ་མེད་དོ་ཞེ་ནའོ། །དེ་སྐད་ཅེས་ཟེར་བ་དེའི་ལན་དུ་འདིར་འགྲེལ་པ་བྱེད་པ་ཉིད་ཀྱིས། སྐད་གཞན་དུ་བསྒྱུར་ཀྱང་ཇི་ལྟར་རྟོགས་པའི་རྟགས་ཁོ་ནས་རྟགས་ཅན་གྱི་དོན་སྟོན་པའི་ཕྱིར། དཔེར་ན་ཀླ་ཀློ་

ལ་ཕྱོགས་འདི་ན་དུ་བ་ལས་མེ་ཡོད་དོ་ཞེས་སྟོན་པར་བྱེད་པ་དེ་ལ་རྟགས་རྟོགས་པ་སྐྱེ་བའི་ཐབས་ཐ་དད་པ་བཞིན་པས་དེ་ནི་ལན་དུ་མི་རུང་ངོ་ཞེས་བྱ་བ་སྨྲས་སོ། །འདི་སྐད་བསྟན་ཏེ། ཀླ་ཀློའི་སྐད་གཞན་ཡོངས་སུ་གཟུང་ཡང་བདག་ཉིད་ཀྱིས་ཇི་ལྟར་རྟོགས་པའི་
རྟགས་ཀྱི་རྒྱུ་དེ་ཁོ་ནས་རྟགས་ཀྱིས་མཚོན་པར་བྱ་བའི་རྟགས་ཅན་གྱི་དོན་སྟོན་པར་བྱེད་པ་ལ་དོན་སྟོན་པའི་རྒྱུ་ཡོད་པ་ཡིན་ཏེ། དཔེར་ན་དབུས་པས་རང་གི་དུ་བའི་རྟག་ལས་མེ་ཡོད་པར་རྟོགས་པའི་རྟགས་ཁོ་ནས་ཀླ་ཀློ་ལ་ཀླ་ཀློའི་སྐད་ཀྱིས་ཕྱོགས་འདི་ན་དུ་བ་འཐུལ་བ་ལས་མེ་ཡོད་དོ་ཞེས་
རྟགས་ཀྱིས་རྟགས་ཅན་སྟོན་པར་བྱེད་པ་ན་དེ་ལ་རྟགས་སུ་དུ་བ་རྟོགས་པ་སྐྱེ་བའི་ཐབས་སྐད་ཐ་དད་པ་ཙམ་དུ་ཟད་ཀྱི་རྟགས་ཉིད་ཡོད་པ་དང་འདྲ་བར་ཁྱེད་ཀྱང་ཁོ་བོ་ལ་གཏན་ཚིགས་ཀྱི་དོན་སྟོན་པར་བྱེད་པ་ཉིད་དོན་གོ་བར་བྱ་བའི་རྒྱུ་གཏན་ཚིགས་ཐ་དད་པ་གཞན་གྱིས་བསྒྱུར་ཏེ་སྟོན་པ་ཡིན་པས་རྒྱུ་
ཡོད་པར་སྨྲ་བ་ཡིན་ནོ་ཞེས་བྱ་བར་སྦྱར་རོ། །དེ་ལ་སྐད་གཞན་དུ་བསྒྱུར་ཀྱང་ཞེས་བྱ་ནི་དབུས་པས་ཀླ་ཀློའི་སྐད་གཞན་དུ་བསྒྱུར་ཀྱང་ངོ་། །ཇི་ལྟར་རྟོགས་པའི་ཞེས་བྱ་བ་ནི་ཇི་ལྟར་ཁོང་དུ་ཆུད་པའོ། །རྟགས་ཁོ་ནས་ཞེས་བྱ་བ་ནི་དུ་བ་སྔོ་བ་ཉིད་དང་ལྷུན་སྟུག་པ་ཉིད་དང་། འཐུལ་བ་
ཉིད་དང་། གྱེན་དུ་འགྲོ་བ་ཉིད་ཀྱི་མཚན་ཉིད་དང་ལྡན་པའི་རྟགས་ཁོ་ནས་སོ། །རྟགས་ཅན་ཞེས་བྱ་བ་ནི་རྗེས་སུ་དཔག་པར་བྱ་བ་གང་ལ་རྟགས་ཡོད་པ་ཞེས་བྱ་བ་དེ་ནི་རྟགས་ཅན་ཞེས་བྱ་སྟེ། སྐབས་འདིར་ནི་རྗེས་སུ་དཔག་པར་བྱ་བ་མེའི་མཚན་ཉིད་གང་ལ་རྟགས་དུ་བ་ཡོད་པ་དེ་ནི་རྟགས་
ཅན་ཡིན་ནོ། །དེའི་དོན་སྟོན་པར་བྱེད་པའི་ཕྱིར་ཞེས་བྱ་བ་ནི་ཇི་ལྟར་