Luận tạng Tây Tạng (Tengyur) — Tập 99

ན་ཞེས་བྱ་བ་ནི་རྟོགས་པར་བྱ་བའི་དོན་
ཏེ། འདིར་རྟོགས་པར་བྱ་བ་མེད་པའི་ཚུལ་གྱིས་དམིགས་སུ་མེད་པ་རྟོགས་པར་བྱ་བའི་དོན་ཏོ། །དམ་པ་ཞེས་བྱ་བ་ནི་དེ་ཉིད་དམ་པ་སྟེ། ཆོས་ཐམས་ཅད་ཀྱི་དེ་ཁོ་ན་ཉིད་ཕྱིན་ཅི་མ་ལོག་པ་ཡིན་པའི་ཕྱིར་རོ། བདེན་པ་ཞེས་བྱ་བ་ནི་དོན་དམ་པར་དེ་ཉིད་དམིགས་སུ་མེད་པར་བདེན་པས་དོན་དམ་པའི་
བདེན་པ་ཞེས་བྱའོ། །བཅོམ་ལྡན་འདས་ཀྱིས་རྟེན་ཅིང་འབྲེལ་པར་འབྱུང་བའི་རིན་པོ་ཆེ་དམ་པ་དེ་ཀུན་རྫོབ་དང་དོན་དམ་པའི་བདེན་པ་ལ་བརྟེན་ནས་བཀའ་སྩལ་པ་དང་། བདེན་པ་གཉིས་པོ་དེ་ཡང་དམིགས་པ་དང་དམིགས་སུ་མེད་པའི་མཚན་ཉིད་ཡིན་པར་ཇི་ལྟར་ཤེས་ཤེ་ན། དེ་ནི་འདི་ལྟར་འཕགས་
པ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་ལས། རབ་འབྱོར་འདི་དག་ཐམས་ཅད་ནི་འཇིག་རྟེན་གྱི་ཐ་སྙད་དུ་བསྟན་པ་ཡིན་གྱི་དོན་དམ་པར་ནི་མ་ཡིན་ནོ་ཞེས་གསུངས་པ་དང་། འཕགས་པ་དཀོན་མཆོག་སྤྲིན་གྱི་མདོ་ལས་ཀྱང་། ཀུན་རྫོབ་ཀྱི་བདེན་པ་ལ་མཁས་པ་དང་། དོན་དམ་པའི་བདེན་པ་ལ་

མཁས་པ་ཡིན་ཞེས་བྱ་བ་དང་། དེའི་མཚན་ཉིད་གཟུགས་སུ་འདོགས་པར་བྱེད་ཅིང་དོན་དམ་པར་གཟུགས་དམིགས་སུ་མེད་ཅིང་མངོན་པར་ཞེན་པ་མེད་པ་དང་། བྱང་ཆུབ་དང་བྱང་ཆུབ་པར་བྱེད་པའི་བར་དུ་འདོགས་པར་བྱེད་ཅིང་། དོན་དམ་པར་བྱང་ཆུབ་དང་བྱང་ཆུབ་པར་བྱེད་པ་དམིགས་
སུ་མེད་ཅིང་མངོན་པར་ཞེན་པ་མེད་པ་ཞེས་བྱ་བ་བཀའ་སྩལ་པ་དང་། འཕགས་པ་བློ་གྲོས་མི་ཟད་པས་བསྟན་པའི་མདོ་ལས་ཀྱང་། ཀུན་རྫོབ་ཀྱི་བདེན་པ་གང་ཞེ་ན། ཇི་ཙམ་དུ་འཇིག་རྟེན་གྱི་ཐ་སྙད་དུ་ཡི་གེ་དང་སྒྲ་དང་བརྡས་བསྟན་པའོ། །དོན་དམ་པའི་བདེན་པ་གང་ཞེ་ན། གང་ལ་སེམས་ཀྱི་སྤྱོད་པ་ཡང་མེད་ན་
ཡི་གེ་རྣམས་ཀྱི་ལྟ་ཅི་སྨོས་པའོ་ཞེས་བདེན་པ་གཉིས་མཚན་ཉིད་དང་བཅས་པར་བཀའ་སྩལ་པ་དང་། འཕགས་པ་ལང་ཀར་གཤེགས་པའི་མདོ་ལས་ཀྱང་། ཀུན་རྫོབ་དང་ནི་དོན་དམ་སྟེ། །རྒྱུ་ལས་སྐྱེས་པ་གསུམ་པ་མེད། །ཀུན་རྫོབ་རྟོག་པས་བཏགས་པ་སྟེ། །དེ་ཆད་འཕགས་པའི་སྤྱོད་ཡུལ་ལོ། །ཞེས་གསུངས་
ཏེ། ཚིགས་སུ་བཅད་པ་ཕྱེད་གོང་མས་བདེན་པ་གཉིས་བསྟན་ལ། ཕྱེད་འོག་མས་དེའི་མཚན་ཉིད་བསྟན་པ་དང་། ཡང་དེ་ཉིད་ལས། ཇི་ལྟར་འཕགས་པས་རྣམ་བརྟགས་ལྟར། །དངོས་པོ་རྣམས་ཀྱི་དངོས་ཉིད་མེད། །ཇི་ལྟར་བྱིས་པས་རྣམ་བརྟགས་ལྟར། །དངོས་རྣམས་ཡོད་པ་ཁོ་ན་ཡིན། །ཞེས་གསུངས་པ་
དང་། འཕགས་པ་ཡབ་སྲས་མཇལ་བའི་མདོ་ལས་ཀྱང་། འཇིག་རྟེན་མཁྱེན་པས་གཞན་ལ་མ་གསན་པར། །བདེན་པ་གཉིས་པོ་འདི་དག་རང་གིས་གཟིགས། །ཀུན་རྫོབ་གང་ཡིན་དེ་བཞིན་དོན་དམ་སྟེ། །བདེན་པ་གསུམ་པ་གཞན་ནི་ཡོད་མ་ཡིན། །ཞེས་གསུངས་པ་དང་། འདི་ལྟར་དེ་བཞིན་གཤེགས་པ་
ཀུན་རྫོབ་དང་དོན་དམ་པ་ཐུགས་སུ་ཆུད་ཅིང་། ཤེས་བྱ་ཡང་ཀུན་རྫོབ་དང་དོན་དམ་པ་ཇི་ཙམ་པ་དེ་ཙམ་དུ་ཟད་ལ། དེ་ཡང་བཅོམ་ལྡན་འདས་ཀྱིས་སྟོང་པ་ཉིད་དུ་ཤིན་ཏུ་གཟིགས་ཤིན་ཏུ་ཐུགས་སུ་ཆུད་ཤིན་ཏུ་མངོན་སུམ་དུ་མཛད་པ་དེས་ན་ཐམས་ཅད་མཁྱེན་པ་ཞེས་བྱ་བ་འདི་ནི་ངོ་མཚར་ཆེའོ་ཞེས་ཀྱང་གསུངས་ཏེ། དེ་ལ་
ཀུན་རྫོབ་ནི་དེ་བཞིན་གཤེགས་པས་འཇིག་རྟེན་གྱི་སྤྱོད་པའི་སྒོ་ནས་གཟིགས་པ་ཡིན་ནོ། །དེ་ལ་འཇིག་རྟེན་ཞེས་བྱ་བ་ནི་རིགས་པ་དང་རིགས་པ་མ་ཡིན་པའི་ཚོགས་སུ་བརྗོད་པའོ། །འཇིག་རྟེན་དེའི་སྤྱོད་པ་ནི་ལུས་དང་ངག་དང་ཡིད་ཀྱི་སྤྱོད་པར་དམིགས་པ་ཇི་སྙེད་པ་སྟེ། དེ་ནི་ཀུན་རྫོབ་ཀྱི་བདེན་པའོ། །ཡང་ན་

གང་ལ་འཇིག་རྟེན་གྱི་སྤྱོད་ཅིང་རྣམ་པར་གནས་པ་ལ་ལོངས་སྤྱོད་ཀྱི་སྒོ་ནས་ལས་དང་འབྲས་བུར་འབྲེལ་པ་དེ་ནི་ཀུན་རྫོབ་པོ། །ཀུན་རྫོབ་ཀུན་ཏུ་ལས་དང་ལས་ཀྱི་འབྲས་བུར་འབྲེལ་པ་ཡིན་གྱི་དོན་དམ་པར་མ་ཡིན་པ་དེ་ནི་འཐད་ཀྱི། གལ་ཏེ་དོན་དམ་པར་ལས་དང་ལས་ཀྱི་འབྲས་བུ་ལ་སྤྱོད་པ་ཡོད་པར་གྱུར་
ན། འཁོར་བ་ལས་ཐར་པ་བྱེ་བྲག་མེད་པར་འགྱུར་བས་དེའི་ཕྱིར་དོན་དམ་པར་ལས་དང་ལས་ཀྱི་འབྲས་བུ་ལ་སྤྱོད་པ་མེད་དེ། འཕགས་པ་དཀོན་མཆོག་བརྩེགས་པའི་མདོ་ལས། གང་ལ་ལས་མེད་པ་དང་ལས་ཀྱི་འབྲས་བུ་མེད་པ་དེ་ནི་འཕགས་པ་རྣམས་ཀྱི་རིགས་ཡིན་ལ། འཕགས་པ་རྣམས་ཀྱི་
རིགས་གང་ཡིན་པའི་རིགས་དེ་ལ་ནི་ལུས་ཀྱིས་ལས་མི་བྱེད། ངག་གིས་མི་བྱེད། ཡིད་ཀྱིས་མི་བྱེད་དོ། །ཞེས་ཇི་སྐད་གསུངས་པ་ལྟ་བུའོ། །དོན་དམ་པ་གང་ཡིན་པ་དེ་ནི་བརྗོད་དུ་མེད་པ་ཤེས་པར་བྱར་མེད་པ། རྣམ་པར་ཤེས་པར་བྱར་མེད་པ། ཡོངས་སུ་ཤེས་པར་བྱར་མེད་པ། མ་བསྟན་པ་རབ་ཏུ་
མ་བསྟན་པ། མ་མཉན་པ། ཉན་དུ་མ་བཅུག་པ། མ་ཤེས་པ། རྣམ་པར་མ་ཤེས་པ། མ་མཐོང་བ། མཐོང་བར་མ་བྱས་པ། མ་བཏགས་པ། འཛིན་དུ་མ་བཅུག་པ། མ་རྟོགས་པ། མ་ཐོབ་པ། མ་བོར་བ། མ་བླངས་པ། མ་བསྡུས་པ། མ་བསལ་བ། མི་ཟད་པ། བྱེད་པ་མེད་པ། རབ་ཏུ་མ་
ཞི་བ། མ་སྨད་པ། མ་སྡོད་པ། ཐོབ་པ་མ་ཡིན་པ། མ་ཐོབ་པ་མ་ཡིན་པ། བདེ་བ་མ་ཡིན་པ། མི་བདེ་བ་མ་ཡིན་པ། སྙན་པ་མ་ཡིན་པ། མི་སྙན་པ་མ་ཡིན་པ། གཟུགས་མ་ཡིན་པ། གཟུགས་མེད་པ་མ་ཡིན་པ། གྲངས་མེད་པ། བགྲང་དུ་མེད་པ། འཇིག་རྟེན་མ་ཡིན་པ། འཇིག་རྟེན་མེད་པ་མ་
ཡིན་པ། བྲལ་བ་མ་ཡིན་པ། ཀུན་ནས་ཉོན་མོངས་པ་མ་ཡིན་པ། རྣམ་པར་བྱང་བ་མ་ཡིན་པ། ཀུན་རྫོབ་མ་ཡིན་པ། མྱ་ངན་ལས་འདས་པ་མ་ཡིན་པ། རྣམ་པར་མ་བརྟགས་པ། རྣམ་པར་མ་བསྒྲུབས་པ། གཡོ་བ་མེད་པ། རློམ་སེམས་མེད་པ། བསྐྱོད་པ་མེད་པ། མངོན་པར་འདུས་མ་བྱས་
པ། མ་སྤྲོས་པ། སྤྲོས་པ་དང་བྲལ་བ་སྟེ། འདི་ལྟར་གཟུགས་དམིགས་སུ་མེད་པ་དང་། རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་དམིགས་སུ་མེད་པ་ཡིན་ནོ་ཞེས་གསུངས་པ་དང་། དེ་དག་ལ་སོགས་པ་མདོ་སྡེ་མཐའ་ཡས་པ་གཞན་དག་ལས་ཀྱང་བདེན་པ་གཉིས་བཀའ་སྩལ་ཏོ། །ཉན་ཐོས་ཀྱི་ཐེག་

པ་ལས་ཀྱང་ང་ནི་ཡོད་པའི་ཆོས་ཀྱང་ཡོད་པར་སྟོན་ལ། མེད་པའི་ཆོས་ཀྱང་མེད་པར་སྟོན་ཏོ་ཞེས་གསུངས་ཏེ། དེ་ཇི་བསྟན་ཞེ་ན། གང་འཇིག་རྟེན་ལ་བདེན་པར་གྲགས་པ་དེ་ནི་ང་ལ་ཡང་བདེན་པར་གྲགས་པ་ཡིན་ལ། གང་འཇིག་རྟེན་ལ་མི་བདེན་པར་གྲགས་པ་དེ་ནི་ང་ལ་ཡང་མི་བདེན་པར་
གྲགས་པ་ཡིན་ནོ་ཞེས་བསྟན་པ་ཡིན་ཏེ། དེ་ལ་གང་བྱེད་རྒྱུ་དང་བཅས་པ་དང་། རྒྱུ་མཚན་དང་བཅས་པ་དེ་ནི་བདེན་པར་གྲགས་པ་ཡིན་ལ། གང་བྱེད་རྒྱུ་མེད་པ་དང་རྒྱུ་མཚན་མེད་པ་དེ་ནི་མི་བདེན་པར་གྲགས་པ་ཡིན་ནོ། །དེ་ལྟར་ན་ཀུན་རྫོབ་དང་དོན་དམ་པའི་བདེན་པ་གཉིས་ནི་དམིགས་པའི་མཚན་ཉིད་དང་།
དམིགས་སུ་མེད་པའི་མཚན་ཉིད་ཡིན་པར་ཐེག་པ་ཆེ་ཆུང་གི་ཕྱོགས་གཉི་ག་ལ་གྲགས་པ་ཡིན་ནོ། །རྟེན་ཅིང་འབྲེལ་པར་འབྱུང་བའི་རིན་པོ་ཆེ་དམ་པ་དེ་དེ་ལྟར་ཀུན་རྫོབ་དང་དོན་དམ་པའི་བདེན་པ་ལ་བརྟེན་ནས་བརྗོད་པ་གང་དག་གིས་བཀའ་སྩལ་ཞེ་ན། དེའི་ཕྱིར་སྐྱེ་བ་དང་སྐྱེ་བ་མེད་པ་ལ་སོགས་པའི་བརྗོད་པ་
དག་གིས་ཞེས་བྱ་བ་སྨྲས་སོ། །དེ་ལ་བརྗོད་པ་གང་དག་ལ་སྐྱེ་བ་ལ་སོགས་པ་ཡོད་པ་དེ་དག་ནི་སྐྱེ་བ་ལ་སོགས་པའི་བརྗོད་པ་དག་སྟེ། སོགས་པའི་སྒྲས་ནི་འགག་པ་དང་། ཆད་པ་དང་། རྟག་པ་དང་། འོང་བ་དང་། འགྲོ་བ་དང་། དོན་གཅིག་པ་དང་། དོན་ཐ་དད་པ་དག་བསྡུའོ། །བརྗོད་པ་གང་དག་ལ་སྐྱེ་བ་མེད་
པ་ལ་སོགས་པ་ཡོད་པ་དེ་དག་ནི་སྐྱེ་བ་མེད་པ་ལ་སོགས་པའི་བརྗོད་པ་དག་སྟེ། སོགས་པའི་སྒྲས་ནི་འགག་པ་མེད་པ་དང་། ཆད་པ་མེད་པ་དང་། རྟག་པ་མེད་པ་དང་། འོང་བ་མེད་པ་དང་། འགྲོ་བ་མེད་པ་དང་། དོན་ཐ་དད་པ་མ་ཡིན་པ་དང་། དོན་གཅིག་པ་མ་ཡིན་པ་དག་བསྡུའོ། །དེ་ལྟར་ཀུན་རྫོབ་ཏུ་དངོས་
པོ་རྣམས་ལས་སྐྱེ་བ་དང་། འགག་པ་དང་། ཆད་པ་དང་། རྟག་པ་དང་། འོང་བ་དང་། འགྲོ་བ་དང་། དོན་ཐ་དད་པ་དང་། དོན་གཅིག་པ་དག་ཡོད་པས་དེའི་ཕྱིར་བཅོམ་ལྡན་འདས་ཀྱིས་ཀུན་རྫོབ་ཀྱི་བདེན་པ་ལ་བརྟེན་ནས་ནི་སྐྱེ་བ་ལ་སོགས་པའི་བརྗོད་པ་དག་གིས་བཀའ་སྩལ་ཏོ། །དོན་དམ་པར་དངོས་པོ་རྣམས་
སྐྱེ་བ་མེད་པ་དང་། འགག་པ་མེད་པ་དང་། ཆད་པ་མེད་པ་དང་། རྟག་པ་མེད་པ་དང་། འོང་བ་མེད་པ་དང་། འགྲོ་བ་མེད་པ་དང་། དོན་ཐ་དད་པ་མ་ཡིན་པ་དང་། དོན་གཅིག་པ་མ་ཡིན་པས། དེའི་ཕྱིར་བཅོམ་ལྡན་འདས་ཀྱིས་དོན་དམ་པའི་བདེན་པ་ལ་བརྟེན་ནས་ནི་སྐྱེ་བ་མེད་པ་ལ་སོགས་པའི་བརྗོད་པ་དག་གིས་

བཀའ་སྩལ་ཏོ། །བཀའ་སྩལ་ཏོ་ཞེས་བྱ་བ་ནི་བསྟན་ཏོ་ཞེས་བྱ་བའི་ཐ་ཚིག་གོ། །དེ་ནི་སངས་རྒྱས་བཅོམ་ལྡན་འདས་ཀྱི་འབྲས་བུ་གཞན་གྱི་དོན་གྱི་མཚན་ཉིད་བསྟན་པ་ཡིན་ནོ། །དེ་ལྟར་དོན་གྱི་འབྲེལ་པ་སྦྱར་བས་རིགས་པའི་འབྲེལ་པར་སྦྱར་བ་དེ་ནི་རེ་ཞིག་བླ་མ་དམ་པ་སངས་རྒྱས་བཅོམ་ལྡན་འདས་ཀྱི་འབྱུང་བའི་རྒྱུ་བསྟན་
པ་ཡིན་ནོ། །ད་ནི་བསྟན་བཅོས་མཛད་པའི་འབྱུང་བའི་རྒྱུ་བསྟན་པར་བྱ་སྟེ། དེའི་ཕྱིར་སློབ་དཔོན་གྱིས་ཀྱང་དེ་བཞིན་གཤེགས་པའི་ཚུལ་སྐྱེ་བ་མེད་པ་ལ་སོགས་པའི་ཚིག་གིས་རབ་ཏུ་བསྟན་པ། མ་ནོར་བ་དེ་བཞིན་ཉིད་ཐུགས་སུ་ཆུད་ནས་དགྱེས་པའི་ཤུགས་དྲག་པོ་ཡང་དག་པར་སྐྱེས་པས་ཇི་ལྟར་ཐུགས་སུ་ཆུད་
པའི་ཚུལ་གྱིས་བཅོམ་ལྡན་འདས་ལ་མངོན་པར་བསྟོད་དེ། བསྟན་བཅོས་མཛད་པར་བཞེད་ནས་ཐུགས་རྗེ་ཉིད་ཀྱི་ཆུས་བརླན་པའི་ཐུགས་མངའ་བས་སྐྱེ་བོ་རྗེས་སུ་དཔག་པ་གཙོར་འཛིན་ཅིང་ཁོང་དུ་ཆུད་པར་འདོད་པས་རྟོགས་པར་བཞེད་ནས་ཞེས་བྱ་བ་སྨྲས་སོ། །ཚིག་འདིའི་བསྡུས་པའི་དོན་ཡང་སློབ་དཔོན་གྱི་
ཞལ་སྔ་ནས་ཀྱིས་རྒྱུ་བསྟན་པ་དང་། འབྲས་བུ་རང་དང་གཞན་གྱི་དོན་གྱི་མཚན་ཉིད་རྣམ་པ་གཉིས་བསྟན་པ་ཡིན་ནོ། །ཡན་ལག་གི་དོན་དུ་སློབ་དཔོན་གྱིས་ཀྱང་སྔོན་མོས་པས་སྤྱོད་པའི་ས་ལ་གནས་པ་ན་ལྷག་པའི་བསམ་པ་རྣམ་པར་དག་པའི་ས་འཐོབ་པའི་རྒྱུ་ཅི་ཞིག་ཐུགས་སུ་ཆུད་ནས། འབྲས་བུ་རང་གི་དོན་
གྱི་མཚན་ཉིད་བྱང་ཆུབ་སེམས་དཔའི་ས་དང་པོ་རབ་ཏུ་དགའ་བ་བརྙེས་ཏེ། འབྲས་བུ་གཞན་གྱི་དོན་གྱི་མཚན་ཉིད་སྐྱེ་བོ་རྗེས་སུ་དཔག་པ་གཙོར་འཛིན་ཅིང་ཁོང་དུ་ཆུད་པར་འདོད་པས་རྟོགས་པར་བཞེད་ནས་བསྟན་བཅོས་མཛད་ཅེ་ན། སློབ་དཔོན་གྱི་ཞལ་སྔ་ནས་ཀྱིས་རྒྱུ་ནི་དེ་བཞིན་གཤེགས་པའི་ཚུལ་སྐྱེ་
བ་མེད་པ་ལ་སོགས་པའི་ཚིག་གིས་རབ་ཏུ་བསྟན་པའོ། །མ་ནོར་བ་དེ་བཞིན་ཉིད་ཐུགས་སུ་ཆུད་ནས་ཞེས་བྱ་བས་བསྟན་ཏོ། །འབྲས་བུ་རང་གི་དོན་གྱི་མཚན་ཉིད་ནི་དགྱེས་པའི་ཤུགས་དྲག་པོ་ཡང་དག་པར་སྐྱེས་པ། ཇི་ལྟར་ཐུགས་སུ་ཆུད་པའི་ཚུལ་གྱིས་བཅོམ་ལྡན་འདས་ལ་མངོན་པར་བསྟོད་
དོ། །བསྟན་བཅོས་མཛད་པར་བཞེད་ནས་ཞེས་བྱ་བ་བསྟན་ཏོ། །འབྲས་བུ་གཞན་གྱི་དོན་གྱི་མཚན་ཉིད་ནི་ཐུགས་རྗེ་ཉིད་ཀྱི་ཆུས་བརླན་པའི་ཐུགས་མངའ་བས་སྐྱེ་བོ་རྗེས་སུ་དཔག་པ་གཙོར་འཛིན་ཅིང་ཁོང་དུ་ཆུད་པར་འདོད་པས་རྟོགས་པར་བཞེད་ནས་ཞེས་བྱ་བས་བསྟན་ཏེ། དེ་ནི་དོན་གྱི་འབྲེལ་པ་ཡིན་ནོ། །

དེ་ལ་དོན་གྱི་འབྲེལ་པར་སྦྱར་བ་ནི་འདི་ཡིན་ཏེ། སློབ་དཔོན་གྱི་ཞལ་སྔ་ནས་ཀྱིས་ཀྱང་། དེ་བཞིན་གཤེགས་པའི་ཚུལ་སྐྱེ་བ་མེད་པ་ལ་སོགས་པའི་ཚིག་གིས་རབ་ཏུ་བསྟན་པ། མ་ནོར་བ་དེ་བཞིན་ཉིད་ཐུགས་སུ་ཆུད་པའི་རྒྱུ་དེས་འབྲས་བུ་རང་གི་དོན་གྱི་མཚན་ཉིད་བྱང་ཆུབ་སེམས་དཔའི་ས་
རབ་ཏུ་དགའ་བ་བརྙེས་པས་ཇི་ལྟར་ཐུགས་སུ་ཆུད་པའི་ཚུལ་གྱིས་བཅོམ་ལྡན་འདས་ལ་མངོན་པར་བསྟོད་དེ། བསྟན་བཅོས་མཛད་པར་བཞེད་ནས། འབྲས་བུ་གཞན་གྱི་དོན་གྱི་མཚན་ཉིད་ཐུགས་རྗེ་ཉིད་ཀྱི་ཆུས་བརླན་པའི་ཐུགས་མངའ་བས་སྐྱེ་བོ་རྗེས་སུ་དཔག་པ་གཙོར་འཛིན་ཅིང་ཁོང་དུ་ཆུད་པར་འདོད་པས་རྟོགས་
པར་བཞེད་ནས་བསྟན་བཅོས་མཛད་དེ། སློབ་དཔོན་གྱི་ཞལ་སྔ་ནས་ཀྱང་འབྱུང་བའི་རྒྱུ་ནི་དེ་ལྟ་བུ་ཡིན་ནོ་ཞེས་དོན་གྱི་འབྲེལ་བ་སྦྱར་བས་རིགས་པའི་འབྲེལ་བ་སྦྱར་བར་བལྟའོ། །ད་ནི་ཡི་གེའི་དོན་བཤད་པར་བྱ་སྟེ། སློབ་དཔོན་ཞེས་བྱ་བ་ནི་མཐོ་རིས་དང་། ཐར་པ་ཐོབ་པར་བྱེད་པའི་ཆོ་ག་རྟོགས་ཤིང་ཁོང་
དུ་ཆུད་པའི་སློབ་དཔོན་ནོ། །ཡང་ན་དེ་ཐོབ་པར་བྱེད་པ་ལམ་གྱི་ཆོ་ག་ལ་རྣམ་པར་གནས་པའི་སློབ་དཔོན་ནོ། །ཡང་ན་མངོན་དུ་ལྡང་བ་དང་ཕྱག་འཚལ་བ་ལ་སོགས་པ་སྤྱོད་ལམ་གྱིས་ཆོས་འདུལ་བའི་ཆོ་ག་རྟོགས་ཤིང་དེ་ལ་གནས་པས་སློབ་དཔོན་ནོ། །ཡང་ན་འདོད་ཆགས་ལ་སོགས་པ་ཉོན་མོངས་པའི་སྤོང་
བ་འདུལ་བའི་ཆོ་ག་རྟོགས་ཤིང་དེ་ཐོབ་པས་སློབ་དཔོན་ནོ། །ཡང་ན་གཞན་དག་མཐོ་རིས་དང་ཐར་པ་ཐོབ་པར་བྱེད་པ་དང་། སྤྱོད་ལམ་ལས་བྱུང་བ་དང་། ཉོན་མོངས་པ་འདུལ་བ་ཞེས་བྱ་བའི་ཆོ་ག་གསུམ་ལ་སྦྱོར་བར་བྱེད་པས་སློབ་དཔོན་ནོ། །ཀྱང་ཞེས་བྱ་བའི་སྒྲ་ནི་བཅོམ་ལྡན་འདས་ཉག་གཅིག་ཐུགས་རྗེས་
སེམས་ཅན་གྱི་དོན་ལ་སྦྱོར་བར་མཛད་པ་འབའ་ཞིག་ཏུ་མ་ཟད་དེ། འདི་ལྟར་སློབ་དཔོན་གྱི་ཞལ་སྔ་ནས་ཀྱིས་ཀྱང་ཐུགས་རྗེས་སེམས་ཅན་གྱི་དོན་ལ་སྦྱོར་བར་མཛད་དོ་ཞེས་བྱ་བར་སྦྱར་རོ། །སློབ་དཔོན་གྱིས་ཀྱང་སྔོན་མོས་པས་སྤྱོད་པའི་ས་ལ་གནས་པ་ན་ལྷག་པའི་བསམ་པ་རྣམ་པར་དག་པའི་ས་ཐོབ་པའི་རྒྱུ་ཅི་ཞིག་
ཐུགས་སུ་ཆུད་ཅེ་ན། དེའི་ཕྱིར་དེ་བཞིན་གཤེགས་པའི་ཚུལ་ཞེས་བྱ་བ་ལ་སོགས་པ་སྨྲས་སོ། །འདིར་ཡང་དེ་བཞིན་གཤེགས་པའི་ཚུལ་ཞེས་བྱ་བ་ནི་ཁྱད་པར་གྱི་གཞི་ཡིན་ལ། སྐྱེ་བ་མེད་པ་ལ་སོགས་པའི་ཚིག་གིས་རབ་ཏུ་བསྟན་པ་ཞེས་བྱ་བ་དང་། མ་ནོར་བ་དེ་བཞིན་ཉིད་ཅེས་བྱ་བ་དེ་གཉིས་ནི་དེའི་ཁྱད་པར་ཡིན་ནོ། །

དེ་ལ་ལྷག་པའི་བསམ་པ་རྣམ་པར་དག་པའི་ས་འཐོབ་པའི་རྒྱུ་འདི་སུས་རབ་ཏུ་བསྟན་གང་ཞིག་ཡིན། ཅི་ཞིག་གིས་རབ་ཏུ་བསྟན། དེའི་ཁྱད་པར་གང་ཡིན་ཞེ་ན། དེའི་ཕྱིར་དེ་བཞིན་གཤེགས་པ་དང་། དེའི་ཚུལ་དང་། སྐྱེ་བ་མེད་པ་ལ་སོགས་པའི་ཚིག་གིས་རབ་ཏུ་བསྟན་པར། མ་ནོར་བ་དེ་བཞིན་ཉིད་ཅེས་བྱ་བ་
སྨྲས་ཏེ། གོ་རིམས་བཞིན་ནོ། །དེ་སུས་རབ་ཏུ་བསྟན་ཞེ་ན། དེའི་ཕྱིར་དེ་བཞིན་གཤེགས་པ་ཞེས་བྱ་བ་སྨྲས་སོ། །ཅིའི་ཕྱིར་དེ་བཞིན་གཤེགས་པ་ཞེས་བྱ་ཞེ་ན། གང་གི་ཕྱིར་དེས་དེ་བཞིན་ཐུགས་སུ་ཆུད་པས། དེའི་ཕྱིར་དེ་བཞིན་གཤེགས་པ་སྟེ། དེ་བཞིན་ཞེས་བྱ་བ་དེ་གང་ཡིན་ཞེ་ན། མྱ་ངན་ལས་
འདས་པའོ། །དེ་ནི་མི་བསླུ་བའི་ཕྱིར་དེ་བཞིན་ཞེས་བྱ་སྟེ། བཅོམ་ལྡན་འདས་ཀྱིས་དགེ་སློང་བདེན་པའི་མཆོག་ནི་འདི་ཡིན་ཏེ། འདི་ལྟ་སྟེ་མི་བསླུ་བའི་ཆོས་ཅན་མྱ་ངན་ལས་འདས་པའོ་ཞེས་ཇི་སྐད་གསུངས་པ་ལྟ་བུའོ། །གཤེགས་པ་ཞེས་བྱ་བ་ནི་ཐུགས་སུ་ཆུད་པ་ཞེས་བྱ་བའི་ཐ་ཚིག་སྟེ། དཔེར་ན་འཇིག་རྟེན་
ན་སྨྲ་བ་པོ་དག་མི་འདི་ནི་ཁོང་དུ་ཆུད་པ་དང་ལྡན་པ་ཡིན་ནོ་ཞེས་ཟེར་བ་ལྟ་བུའོ། །དེའི་ཕྱིར་དེས་མྱ་ངན་ལས་འདས་པ་ཐུགས་སུ་ཆུད་ཅིང་ཤིན་ཏུ་རྟོགས་པ་དང་། མངོན་པར་རྫོགས་པར་སངས་རྒྱས་པས་ན་དེ་བཞིན་གཤེགས་པ་ཞེས་བྱའོ། །ཡང་ན་དེ་བཞིན་ཞེས་བྱ་བ་ནི་རྣམ་པར་ཐར་པའི་སྒོ་གསུམ་པོ་སྟོང་པ་ཉིད་
དང་། མཚན་མ་མེད་པ་དང་། སྨོན་པ་མེད་པ་དག་གོ། །གཤེགས་པ་ཞེས་བྱ་བ་ནི་དེས་དེ་དག་རྣམ་པ་ཐམས་ཅད་དུ་ཐུགས་སུ་ཆུད་པ་སྟེ་དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི་འཕགས་པའི་བདེན་པ་བཞི་པོ་དག་གོ། །གཤེགས་པ་ཞེས་བྱ་བ་ནི་དེས་དེ་དག་རྣམ་པ་ཐམས་ཅད་
དུ་ཐུགས་སུ་ཆུད་པ་སྟེ། དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི། བྱིན་གྱི་རླབས་བཞི་པོ་བདེན་པ་དང་གཏོང་བ་དང་། ཉེ་བར་ཞི་བ་དང་། ཤེས་རབ་ཅེས་བྱ་བ་དག་གོ། །གཤེགས་པ་ཞེས་བྱ་བ་ནི་དེས་དེ་དག་རྣམ་པ་ཐམས་ཅད་དུ་ཐུགས་སུ་ཆུད་པ་སྟེ་དེའི་ཕྱིར་དེ་བཞིན་གཤེགས་པའོ། །
ཡང་ན་དེ་བཞིན་ཞེས་བྱ་བ་ནི་སངས་རྒྱས་ཀྱི་ཆོས་ཐམས་ཅད་དོ། །གཤེགས་པ་ཞེས་བྱ་བ་ནི་དེས་དེ་དག་རྣམ་པ་ཐམས་ཅད་དུ་ཐུགས་སུ་ཆུད་པ་སྟེ། དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི་ཕ་རོལ་ཏུ་ཕྱིན་པ་དྲུག་པོ་དག་གོ། །གཤེགས་པ་ཞེས་བྱ་བ་ནི་དེ་དག་གིས་ཡང་དག་པར་རྫོགས་པའི་སངས་

རྒྱས་སུ་གཤེགས་པ་སྟེ་དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི་རབ་ཏུ་དགའ་བ་ཞེས་བྱ་བ་ལ་སོགས་པ་བྱང་ཆུབ་སེམས་དཔའི་ས་བཅུ་པོ་དག་གོ། །གཤེགས་པ་ཞེས་བྱ་བ་ནི་དེ་དག་གིས། ཡང་དག་པར་རྫོགས་པའི་སངས་རྒྱས་ཉིད་དུ་གཤེགས་པ་སྟེ་དེའི་
ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི་འདི་ལྟ་སྟེ། འཕགས་པའི་ལམ་ཡན་ལག་བརྒྱད་པའི་དེ་བཞིན་གྱིས་སོ། །གཤེགས་པ་ཞེས་བྱ་བ་ནི་དེས་ཡང་དག་པར་རྫོགས་པའི་སངས་རྒྱས་ཉིད་དུ་གཤེགས་པ་སྟེ། དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི་
བསྐལ་པ་དཔག་ཏུ་མེད་པ་གྲངས་མེད་པར་བསོད་ནམས་དང་ཡེ་ཤེས་ཀྱི་ཚོགས་མཐའ་ཡས་པ་ཉེ་བར་བསགས་པ་དེས་སོ། །གཤེགས་པ་ཞེས་བྱ་བ་ནི་མངོན་པར་རྫོགས་པར་སངས་རྒྱས་པ་སྟེ། དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི་བྱང་ཆུབ་ཏུ་ཐུགས་བསྐྱེད་ནས་མགོ་དང་
གོས་ལ་མེ་འབར་བ་ལྟ་བུའི་བརྩོན་འགྲུས་ཀྱིས་སངས་རྒྱས་ཀྱི་ཡོན་ཏན་མ་ལུས་པ་ཉེ་བར་སྒྲུབ་པ་ན་ཇི་ལྟར་ཡུན་རིང་པོ་ནས་ཡང་དག་པར་ཞུགས་པ་འཕགས་པ་བྱམས་པ་ལ་སོགས་པ་བྱང་ཆུབ་སེམས་དཔའ་དག་རྒྱབ་ཏུ་མཛད་པ་དེ་ལྟར་མངོན་པར་བརྩོན་པའོ། །གཤེགས་པ་ཞེས་བྱ་བ་ནི་དང་པོར་
ཁོ་ནར་མངོན་པར་རྫོགས་པར་སངས་རྒྱས་པ་སྟེ། དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི་བསྐལ་པ་གྲངས་མེད་པ་གསུམ་དུ་ཕྱི་དང་ནང་གི་མགོ་དང་ལག་པ་དང་རྐང་པ་དང་མིག་དང་ཡན་ལག་དམ་པ་དང་། རུས་པ་དང་རྐང་དང་ལུས་ཡོངས་སུ་གཏོང་བའི་དཀའ་བ་མཛད་པ་
འབུམ་ཕྲག་དུ་མ་དག་མཛད་པས། ཇི་ལྟར་གཞན་མུ་སྟེགས་བྱེད་ནོར་ལྷ་དང་། ལྷ་ཆེན་པོ་དང་། ཚངས་པ་དང་། སེར་སྐྱ་དང་། གཟེགས་ཟན་དང་། རྐང་མིག་དང་། འཕེལ་བ་དང་། རྒྱལ་དཔོག་གི་བུ་ལ་སོགས་པ་མི་འོང་བ་དེ་ལྟར་རོ། །གཤེགས་པ་ཞེས་བྱ་བ་ནི་མངོན་པར་རྫོགས་པར་སངས་
རྒྱས་པ་སྟེ། དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི་ཇི་ལྟར་འདས་པའི་དེ་བཞིན་གཤེགས་པ་ཐམས་ཅད་ཐུགས་བརྩེ་བ་དང་ཐུགས་རྗེ་དང་བྱམས་པའི་ཐུགས་ཀྱིས་འགྲོ་བ་མཐའ་དག་ལ་ཕན་པ་དང་བདེ་བ་ཁོ་ནའི་ཕྱིར་མངོན་པར་རྫོགས་པར་སངས་རྒྱས་པ་དེ་བཞིན་དུའོ། །

གཤེགས་པ་ཞེས་བྱ་བ་ནི་བཅོམ་ལྡན་འདས་འདི་ཡང་མངོན་པར་རྫོགས་པར་སངས་རྒྱས་པ་དེ་དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི་བསམ་གཏན་བཞི་པ་ལ་བརྟེན་ནས་སྐྱེས་པ་རྡོ་རྗེ་ལྟ་བུའི་ཏིང་ངེ་འཛིན་གྱི་སྟོབས་ཀྱིས་སྲིད་པའི་རྩེ་མོ་པའི་ཉོན་མོངས་པ་སྤོང་པ་མཛད་ནས་ཇི་ལྟར་ཕྱི་རོལ་
པ་ཉོན་མོངས་པ་སྤོང་བ་རབ་ཏུ་མི་ཤེས་པ་དག་འཁོར་བར་ལྡོག་པར་འགྱུར་བ་དེ་ལྟ་མ་ཡིན་པ་དེ་བཞིན་དུའོ། །གཤེགས་པ་ཞེས་བྱ་བ་ནི་མྱ་ངན་ལས་འདས་པའི་གྲོང་ཁྱེར་དུ་གཤེགས་པ་སྟེ། དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི་ཇི་ལྟར་དེ་བཞིན་གཤེགས་པ་མར་མེ་མཛད་ལ་
སོགས་པས་སེམས་ཅན་གྱི་ཁམས་སྐལ་བ་དང་ལྡན་པ་མཐའ་ཡས་པ་དག་མྱ་ངན་ལས་བཟླ་བར་མཛད་ནས་མྱ་ངན་ལས་འདས་པ་དེ་བཞིན་དུའོ། །གཤེགས་པ་ཞེས་བྱ་བ་ནི་བཅོམ་ལྡན་འདས་འདི་ཡང་མྱ་ངན་ལས་འདས་པར་གྱུར་པ་སྟེ། དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི་
ལས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་སྤོང་བར་མཛད་ནས། ཇི་ལྟར་གཞན་མུ་སྟེགས་བྱེད་དག་གིས་འགྲོ་བར་མི་ནུས་པ་དེ་ལྟར་རོ། །གཤེགས་པ་ཞེས་བྱ་བ་ནི། མྱ་ངན་ལས་འདས་པར་གྱུར་པ་སྟེ། དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་
ན་ལས་ཀྱི་སྒྲིབ་པ་དང་། ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་སྤོང་བར་མཛད་ནས། ཇི་ལྟར་ཡང་ལས་དང་ཉོན་མོངས་པའི་དབང་གིས་མི་སྐྱེ་ཞིང་། ཤེས་བྱ་ལ་ཡེ་ཤེས་ཐོགས་པ་མི་མངའ་བས་དེ་ལྟར་རོ། །གཤེགས་ཞེས་བྱ་བ་ནི་མྱ་ངན་ལས་འདས་པར་གྱུར་པ་སྟེ། དེའི་ཕྱིར་དེ་བཞིན་
གཤེགས་པའོ། །ཡང་ན་དེ་བཞིན་ཞེས་བྱ་བ་ནི་ལས་དང་ཉོན་མོངས་པ་དང་ཤེས་བྱའི་སྒྲིབ་པ་སྤོང་བར་མཛད་ཅིང་། རྣམ་པར་རྟོག་པ་དང་སྤྲོས་པ་ཐམས་ཅད་ཀྱང་སྤོང་བར་མཛད་ནས། ཇི་ལྟར་ཡང་ལས་དང་ཉོན་མོངས་པ་དང་ཤེས་བྱའི་སྒྲིབ་པ་མི་སྐྱེ་ཞིང་རྣམ་པར་རྟོག་པ་དང་སྤྲོས་པ་མི་འབྱུང་བ་དེ་ལྟར་
རོ། །གཤེགས་པ་ཞེས་བྱ་བ་ནི་མྱ་ངན་ལས་འདས་པར་གྱུར་པ་སྟེ། དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི་དེ་བཞིན་ཉིད་དོ། །གཤེགས་པ་ཞེས་བྱ་བ་ནི་ཐོབ་པ་མེད་པར་ཐོབ་པ་སྟེ། དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི་དེ་བཞིན་ཉིད་དོ། །གཤེགས་

པ་ཞེས་བྱ་བ་ནི་རྟོགས་པ་སྟེ། དེའི་ཕྱིར་དེ་བཞིན་གཤེགས་པའོ། །ཡང་ན་དེ་བཞིན་ཞེས་བྱ་བ་ནི་དེ་བཞིན་ཉིད་དོ། །གཤེགས་པ་ཞེས་བྱ་བ་ནི་གསུངས་པ་སྟེ། དེའི་ཕྱིར་དེ་བཞིན་གཤེགས་པ་སྟེ། དཔེར་ན་སའི་སྟེང་ན་སྒྲོགས་པས་ས་སྟེང་སྒྲོགས་ཞེས་བྱ་བ་དང་འདྲའོ། །ཡང་ན་དེ་
བཞིན་ཞེས་བྱ་བ་ནི་འཇིག་རྟེན་པ་དང་འཇིག་རྟེན་ལས་འདས་པའི་ཆོས་ཐམས་ཅད་དང་ཀུན་རྫོབ་དང་དོན་དམ་པའི་བདེན་པ་གཉིས་ཐུགས་སུ་ཆུད་པས་དམིགས་པ་དང་དམིགས་སུ་མེད་པའི་མཚན་ཉིད་ཇི་ལྟ་བ་བཞིན་དུའོ། །གཤེགས་པ་ཞེས་བྱ་བ་ནི་གསུངས་པ་སྟེ། དེའི་ཕྱིར་དེ་བཞིན་གཤེགས་པའོ། །ཡང་
ན་དེ་བཞིན་ཞེས་བྱ་བ་ནི་ངར་འཛིན་པ་དང་། བདག་གིར་འཛིན་པ་དང་། སྒྲིབ་པ་དང་རྣམ་པར་རྟོག་པ་དང་། སྤྲོས་པ་ཐམས་ཅད་ཀྱི་རྒྱུ་ལས་བྱུང་བ་འཁོར་བའི་སྡུག་བསྔལ་གྱི་དྲ་བ་ཐམས་ཅད་དྲུངས་དབྱུང་བར་མཛད་དེ། ཡོན་ཏན་རིན་པོ་ཆེ་མི་ཟད་པའི་གཏེར་བླ་ན་མེད་པ་བསམ་གྱིས་མི་ཁྱབ་པ་རྨད་དུ་བྱུང་བ་
མ་ལུས་པ་ཉེ་བར་སྒྲུབ་པ་མཛད་ནས། ཇི་ལྟར་བཅོམ་ལྡན་འདས་དེ་འཁོར་བ་ཇི་སྲིད་པའི་བར་དུ་འཇིག་རྟེན་གྱི་ཁམས་སྐལ་བ་དང་ལྡན་པ་རབ་འབྱམ་མ་ལུས་པ་དག་ཏུ་རྣམ་པར་རྟོག་པའི་རྩོལ་བ་མི་མངའ་བར་སྔོན་གྱི་སྨོན་ལམ་གྱི་ཤུགས་ཀྱིས་དགའ་ལྡན་གྱི་གནས་ན་བཞུགས་པ་དང་། འཕོ་བ་དང་། འཇུག་པ་དང་།
ལྷུམས་ན་ཞུགས་པ་དང་། བལྟམས་པ་དང་། གཞོན་ནུ་རོལ་པ་དང་། བཙུན་མོའི་འཁོར་ཉེ་བར་བསྟེན་པ་དང་། མངོན་པར་འབྱུང་བ་དང་། དཀའ་བ་སྤྱོད་པ་དང་། བྱང་ཆུབ་ཀྱི་སྙིང་པོར་གཤེགས་པ་དང་། བདུད་བཏུལ་བ་དང་། མངོན་པར་བྱང་ཆུབ་པ་དང་། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་
མྱ་ངན་ལས་འདས་པ་ཆེན་པོ་ལ་སོགས་པའི་མཛད་པ་གཞལ་དུ་མེད་པ་ལ་འཇུག་པ་དེ་ལྟར་རོ། །གཤེགས་པ་ཞེས་བྱ་བ་ནི་སྐྱེ་བ་དང་འགག་པ་མེད་པའི་ཆོས་ཀྱི་སྐུ་ཞེས་བྱ་བའི་མྱ་ངན་ལས་འདས་པ་བརྙེས་པར་གྱུར་པ་སྟེ་དེའི་ཕྱིར་དེ་བཞིན་གཤེགས་པའོ། །ཡང་ན་བཅོམ་ལྡན་འདས་ཉིད་ཀྱིས་འཕགས་པ་ཕྱིར་མི་
ལྡོག་པའི་འཁོར་ལོའི་མདོ་ལས། ཇི་ལྟར་བྱིས་པས་རྣམ་བརྟགས་པ། །དེ་ལྟར་བྱང་ཆུབ་མི་རྙེད་དེ། །ཆོས་ཀུན་རྙེད་པ་མེད་པས་ན། །དེ་ཕྱིར་དེ་བཞིན་གཤེགས་ཞེས་བྱ། །ཞེས་ངེས་པའི་ཚིག་ཇི་སྐད་བཀའ་སྩལ་པ་ལྟ་བུའོ། །ཉེན་པའི་སྐྱེ་བོ་སྤོབས་པ་བསྐྱེད་པའི་ཕྱིར་དེ་བཞིན་གཤེགས་པའི་སྒྲ་བྱེ་བྲག་ཏུ་

རྟོགས་པར་བྱ་བ་བྱས་ཏེ་རྒྱ་ཆེར་ནི་མི་དགོས་སོ། །ལྷག་པའི་བསམ་པ་རྣམ་པར་དག་པའི་ས་འཐོབ་པའི་རྒྱུ་དེ་གང་ཞིག་ཡིན་ཞེ་ན། དེའི་ཕྱིར་དེ་བཞིན་གཤེགས་པའི་ཚུལ་ཞེས་བྱ་བ་སྨྲས་སོ། །དེ་ལ་དེ་བཞིན་གཤེགས་པའི་ཞེས་བྱ་བ་ནི་དེ་བཞིན་གཤེགས་པས་རབ་ཏུ་བསྟན་པ་འམ། དེ་བཞིན་གཤེགས་པ་ཡིན་
པས་ན། དེ་བཞིན་གཤེགས་པའི་ཞེས་བྱའོ། །ཚུལ་ཞེས་བྱ་བ་ནི་དེ་བཞིན་གཤེགས་པས་རབ་ཏུ་བསྟན་པའམ། །དེ་བཞིན་གཤེགས་པའི་གང་ཡིན་པ་དེ་ཉིད་ཚུལ་ཏེ། གང་གིས་ཆོས་ཐམས་ཅད་དམིགས་སུ་མེད་པར་ཁྲིད་པར་བྱེད་པ་འམ། གང་གིས་གཞན་གྱི་རྒྱུད་ལ་དོན་ཁྲིད་པར་བྱེད་པའོ། །ཡང་
ན་གང་གིས་བསོད་ནམས་དང་ཡེ་ཤེས་ཀྱི་ཚོགས་གཞལ་དུ་མེད་པ་ཉེ་བར་བསགས་པའི་འཇིག་རྟེན་འཁོར་བའི་བཙོན་ར་ནས་བསྒྲལ་ཏེ། བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་ཡིད་བཞིན་གྱི་ནོར་བུ་རིན་པོ་ཆེ་ལྟ་བུར་ཁྲིད་པར་བྱེད་པ་དེ་ནི་ཚུལ་ལོ། །དེ་ཅི་ཞིག་གིས་རབ་ཏུ་བསྟན་ཞེ་ན། དེའི་ཕྱིར་
སྐྱེ་བ་མེད་པ་ལ་སོགས་པའི་ཚིག་གིས་རབ་ཏུ་བསྟན་པ་ཞེས་བྱ་བ་སྨྲས་སོ། །དེ་ལ་སྐྱེ་བ་མེད་པ་ལ་སོགས་པའི་ཚིག་གིས་ཞེས་བྱ་བ་ནི་སྐྱེ་བ་མེད་པ་དང་། འགག་པ་མེད་པ་དང་། ཆད་པ་མེད་པ་དང་། རྟག་པ་མེད་པ་དང་། འོང་བ་མེད་པ་དང་། འགྲོ་བ་མེད་པ་དང་། དོན་ཐ་དད་པ་མ་ཡིན་པ་དང་། དོན་གཅིག་པ་
མ་ཡིན་པ་ཞེས་ཇི་སྐད་སྔར་བསྟན་པའི་ཚིག་དེ་དག་གིས་སོ། །རབ་ཏུ་བསྟན་པ་ཞེས་བྱ་བ་ལ། རབ་ཏུ་ཞེས་བྱ་བ་ནི་སེམས་ཅན་སྐལ་བ་དང་ལྡན་པའི་ཕྱིར་རམ་མཆོག་ཏུའོ། །བསྟན་པ་ཞེས་བྱ་བ་ནི་ཕྱེ་བ་འམ་བཞག་པའོ། །དེ་བཞིན་གཤེགས་པའི་ཚུལ་དེ་སྐྱེ་བ་མེད་པ་ལ་སོགས་པའི་ཚིག་གིས་རབ་ཏུ་
བསྟན་པ་འབའ་ཞིག་ཏུ་ཡང་མ་ཟད་དེ། འདི་ལྟར་དེ་ནི་མ་ནོར་བ་དེ་བཞིན་ཉིད་ཀྱང་ཡིན་ཏེ། མ་ནོར་བ་དེ་བཞིན་ཉིད་ཅེས་བྱ་བ་ནི་ཕྱིན་ཅི་མ་ལོག་པའི་རྣམ་པ་ཉིད་དོ། །འདི་ལ་ཁ་ཅིག་འདི་སྐད་ཅེས། གལ་ཏེ་དེ་བཞིན་གཤེགས་པའི་ཚུལ་སྐྱེ་བ་མེད་པ་ལ་སོགས་པའི་ཚིག་གིས་རབ་ཏུ་བསྟན་པ་དེ་ལ་ནོར་བ་
ཡང་ཡོད་ན་ནི་དེའི་ཚེ་དེ་ལ་འཁྲུལ་པ་ཡོད་པས་མ་ནོར་བ་དེ་བཞིན་ཉིད་ཅེས་བྱ་བའི་ཁྱད་པར་གཞན་ཡང་བསྟན་པར་བྱ་དགོས་པ་ཞིག་ན། ཁྱད་པར་གྱི་གཞི་དེ་བཞིན་གཤེགས་པའི་ཚུལ་ཞེས་བྱ་བ་སྐྱེ་བ་མེད་པ་ལ་སོགས་པའི་ཚིག་གིས་རབ་ཏུ་བསྟན་པ་ཞེས་བྱ་བའི་ཁྱད་པར་གྱིས་མཚོན་པ་དེ་ལ་ནོར་བ་མེད་པ་སྔོན་བཞིན་

དུ་ཅིའི་ཕྱིར་མ་ནོར་བ་དེ་བཞིན་ཉིད་ཅེས་བྱ་བའི་ཁྱད་པར་གཞན་གྱིས་མཚོན་པར་བྱེད་ཅེས་ཟེར་ན། དེ་ལ་འདི་སྐད་ཅེས་བརྗོད་པར་བྱའོ། །ཁ་ཅིག་གིས་འདི་ནོར་བའི་རྣམ་པར་རྟོགས་ཏེ། དངོས་པོ་རྣམས་ཇི་ལྟར་བྱིས་པའི་རྣམ་པར་ཤེས་པས་གཟུང་བ་ཀུན་བརྟགས་པའི་བདག་ཉིད་ཀྱིས་
ནི་སྟོང་ལ། འཕགས་པའི་ཡེ་ཤེས་ཀྱི་སྤྱོད་ཡུལ་ཡོངས་སུ་གྲུབ་པའི་བདག་ཉིད་ཀྱིས་ནི་མི་སྟོང་ངོ་ཞེས་ཟེར་བ་དག་གིས་ནི་ནོར་བའི་རྣམ་པར་རྟོགས་པ་ཡིན་ནོ། །གལ་ཏེ་དེ་ཅིའི་ཕྱིར་ནོར་བའི་རྣམ་པར་རྟོགས་པ་ཡིན་ཞེ་ན། འདི་ལྟར་བཅོམ་ལྡན་འདས་ཀྱིས་འཕགས་པ་ལང་ཀར་གཤེགས་པའི་མདོ་ལས།
ཇི་ལྟར་འཕགས་པས་རྣམ་བརྟགས་ལྟར། །དངོས་པོ་རྣམས་ཀྱི་དངོས་ཉིད་མེད། །ཇི་ལྟར་བྱིས་པས་རྣམ་བརྟགས་ལྟར། །དངོས་རྣམས་ཡོད་པ་ཁོ་ན་ཡིན། །ཞེས་གསུངས་པ་དང་། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཀྱང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་ཞུས་པ།
བཅོམ་ལྡན་འདས་ཀྱིས་ཆོས་གང་མངོན་པར་རྫོགས་པར་སངས་རྒྱས་པའི་ཆོས་དེ་ཅི་ལགས། འཇིག་རྟེན་གྱི་ཐ་སྙད་དུ་མངོན་པར་རྫོགས་པར་སངས་རྒྱས་སམ། འོན་ཏེ་དོན་དམ་པར་མངོན་པར་རྫོགས་པར་སངས་རྒྱས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་བཞིན་གཤེགས་པས་
ཆོས་འདི་མངོན་པར་རྫོགས་པར་སངས་རྒྱས་སོ་ཞེས་བྱ་བ་ནི་འཇིག་རྟེན་གྱི་ཐ་སྙད་དུ་བརྗོད་པར་ཟད་ཀྱི། དེ་ལ་ཆོས་འདིས་ཆོས་འདི་མངོན་པར་རྫོགས་པར་སངས་རྒྱས་པ་ཞེས་བྱ་བ་འགའ་ཡང་དམིགས་སུ་མེད་དོ། །དེ་ཅིའི་ཕྱིར་ཞེ་ན། རབ་འབྱོར་ཆོས་འདིས་ཆོས་འདི་མངོན་པར་རྫོགས་པར་སངས་རྒྱས་པ་
ཞེས་བྱ་བ་དེ་ནི་དམིགས་པ་ཡིན་ཏེ། གཉིས་ལས་འཐོབ་པ་དང་མངོན་པར་རྟོགས་པ་འགའ་ཡང་མེད་ཅིང་གཉིས་མེད་པའི་ཕྱིར་རོ་ཞེས་གསུངས་པ་དང་། ཡང་དེ་ཉིད་ལས་རབ་འབྱོར་དེ་བཞིན་གཤེགས་པས་དོན་དམ་པར་སྤྱན་ལྔ་པོ་དེ་དག་གིས་མ་དམིགས་པ་གང་ཡིན་པ་དེ་ལ་མི་གཏི་མུག་ཅན་སངས་
རྒྱས་ལ་སྐུར་པ་འདེབས་པ་དག་དངོས་པོ་དམིགས་པར་བྱ་བ་དེ་གང་ཡིན་སྙམ་དུ་སེམས་སོ་ཞེས་གསུངས་པའི་ཕྱིར་རོ། །ནོར་བ་དང་མ་ནོར་བར་རྟོགས་པ་ནི་འགྲེལ་པ་བྱེད་པ་ཉིད་ཀྱིས་མྱ་ངན་ལས་འདས་པ་བརྟག་པའི་སྐབས་སུ་བྱས་པ་ལྟར་བལྟ་བར་བྱའོ། །ད་ནི་སྐབས་ཉིད་བརྗོད་པར་བྱ་སྟེ། དེ་བཞིན་གཤེགས་

པའི་ཚུལ་སྐྱེ་བ་མེད་པ་ལ་སོགས་པའི་ཚིག་གིས་རབ་ཏུ་བསྟན་པ་མ་ནོར་བ་དེ་བཞིན་ཉིད་ཐུགས་སུ་ཆུད་ནས་ཞེས་བྱ་བ་ནི་བྱང་ཆུབ་སེམས་དཔའི་ས་དང་པོ་རབ་ཏུ་དགའ་བ་བརྙེས་ནས་ཞེས་བྱ་བའི་ཐ་ཚིག་སྟེ། དེ་ལྟར་ཡང་འཕགས་པ་ལང་ཀར་གཤེགས་པའི་མདོ་ལས། བདེ་གཤེགས་མྱ་ངན་འདས་འོག་ཏུ། །ཚུལ་རྣམས་
འཛིན་པར་འགྱུར་བ་དེ། །དུས་དག་འདས་ནས་འབྱུང་བ་ནི། །བློ་གྲོས་ཆེན་པོ་ཁྱོད་ཤེས་བྱོས། །ལྷོ་ཕྱོགས་བྷེ་ཏའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་བོད་པ་སྟེ། །ཡོད་དང་མེད་པའི་ཕྱོགས་འཇིག་པ། །ང་ཡི་ཐེག་པ་འཇིག་རྟེན་དུ། །བླ་མེད་ཐེག་པ་རབ་བཤད་ནས། །རབ་ཏུ་
དགའ་བའི་ས་བསྒྲུབས་ཏེ། །བདེ་བ་ཅན་དུ་དེ་འགྲོའོ། །ཞེས་ཇི་སྐད་གསུངས་པ་དང་། །སློབ་དཔོན་གྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ཀློག་པ་ན་བྱང་ཆུབ་སེམས་དཔའི་ས་དང་པོ་རབ་ཏུ་དགའ་བ་བརྙེས་སོ་ཞེས་གྲགས་པ་ལས་ཤེས་པར་བྱའོ། །དེ་ལ་ཐུགས་སུ་ཆུད་ནས་ཞེས་བྱ་བ་ནི་མངོན་པར་རྟོགས་ནས་ཏེ། བྱང་ཆུབ་
སེམས་དཔའི་ས་དང་པོ་རབ་ཏུ་དགའ་བ་ལ་གནས་པར་གྱུར་ནས་ཞེས་བྱ་བའི་ཐ་ཚིག་གོ། །དེ་ལྟར་ཡང་འཕགས་པ་བྱང་ཆུབ་སེམས་དཔའ་ས་བཅུའི་མདོ་ལས། གནས་གང་ཡོད་པ་དང་། གང་གི་ཕྱིར་དང་། གཞི་གང་ཡིན་པ་དང་། ཇི་འདྲ་བའི་སེམས་སྐྱེ་བས་ས་དང་པོ་ལ་གནས་པར་གྱུར་པ་དེ་ནི་གནས་པ་ཡིན་ཏེ།
དེ་ལ་རེ་ཞིག་གནས་གང་ཡོད་ན་སེམས་དེ་སྐྱེ་བ་དེ་ནི་ཀྱེ་རྒྱལ་བའི་སྲས་དག །དེ་ལ་སེམས་ཅན་དགེ་བའི་རྩ་བ་ཤིན་ཏུ་བསགས་པ། ཚོགས་ཤིན་ཏུ་བསགས་པ། སྤྱད་པ་ཤིན་ཏུ་སྤྱད་པ། སངས་རྒྱས་བྱུང་བ་ལ་ཤིན་ཏུ་བསྙེན་བཀུར་བྱས་པ། ཆོས་དཀར་པོ་ཤིན་ཏུ་བསྡུས་པ། དགེ་བའི་བཤེས་གཉེན་གྱིས་ཤིན་ཏུ་
བཟུང་བ། བསམ་པ་ཤིན་ཏུ་རྣམ་པར་དག་པ། ལྷག་པའི་བསམ་པ་རྒྱ་ཆེན་པོ་དང་ལྡན་པ། མོས་པ་རྒྱ་ཆེན་པོ་དང་ལྡན་པ། སྙིང་བརྩེ་བ་དང་སྙིང་རྗེ་མངོན་དུ་གྱུར་པ་ཞེས་གསུངས་པ་ཡིན་ནོ། །གང་གི་ཕྱིར་སེམས་དེ་སྐྱེ་བ་དེ་ནི་སངས་རྒྱས་ཀྱི་ཡེ་ཤེས་ལ་མངོན་པར་འདོད་པར་བྱ་བའི་ཕྱིར་དང་། སྟོབས་བཅུའི་སྟོབས་
ཐོབ་པར་བྱ་བའི་ཕྱིར་དང་། མི་འཇིགས་པ་ཆེན་པོ་ཐོབ་པར་བྱ་བའི་ཕྱིར་དང་། སངས་རྒྱས་ཀྱི་ཆོས་མཉམ་པ་ཉིད་ཐོབ་པར་བྱ་བའི་ཕྱིར་དང་། འགྲོ་བ་ཐམས་ཅད་ཡོངས་སུ་བསྐྱབ་པར་བྱ་བའི་ཕྱིར་དང་། སྙིང་བརྩེ་བ་དང་། སྙིང་རྗེ་ཆེན་པོ་རྣམ་པར་དག་པར་བྱ་བའི་ཕྱིར་དང་། ཕྱོགས་བཅུ་མ་ལུས་པར་ཤེས་པ་ཐོབ་པར་

བྱ་བའི་ཕྱིར་དང་། སངས་རྒྱས་ཀྱི་ཞིང་ཐམས་ཅད་ཐོགས་པ་མེད་པར་ཡོངས་སུ་སྦྱོང་བར་བྱ་བའི་ཕྱིར་དང་། དུས་གསུམ་སྐད་ཅིག་གཅིག་གིས་ཁོང་དུ་ཆུད་པར་བྱ་བའི་ཕྱིར་དང་། ཆོས་ཀྱི་འཁོར་ལོ་ཆེན་པོ་རབ་ཏུ་བསྐོར་བ་ལ་འཇིགས་པ་མེད་པར་བྱ་བའི་ཕྱིར་བྱང་ཆུབ་སེམས་དཔའ་
རྣམས་ཀྱི་སེམས་དེ་སྐྱེ་བར་འགྱུར་ཏེ། ཞེས་གསུངས་པ་ཡིན་ནོ། །གཞི་གང་ལས་སེམས་དེ་སྐྱེ་བར་འགྱུར་བ་དེ་ནི་སྙིང་རྗེ་ཆེན་པོ་སྔོན་དུ་འགྲོ་བ་ཤེས་རབ་དང་། ཡེ་ཤེས་ཀྱི་དབང་དུ་གྱུར་པ་ཐབས་མཁས་པས་ཡོངས་སུ་བཟུང་བ། བསམ་པ་དང་ལྷག་པའི་བསམ་པས་རབ་ཏུ་བསྟན་པ། དེ་བཞིན་གཤེགས་
པའི་སྟོབས་དཔག་ཏུ་མེད་པ་དང་ལྡན་པ། སྙིང་སྟོབས་ཀྱི་སྟོབས་དང་། བློའི་སྟོབས་ཀྱིས་ཤིན་ཏུ་རྣམ་པར་ཕྱེ་བ་རྣམ་པར་འབྱེད་པ་དང་ལྡན་པ། རང་བྱུང་གི་ཡེ་ཤེས་དང་མཐུན་པ། སངས་རྒྱས་ཀྱི་ཆོས་ཐམས་ཅད་ལ་ཤེས་རབ་དང་ཡེ་ཤེས་ཀྱི་གདམས་ངག་ཡང་དག་པར་ཚོལ་བ། ཆོས་ཀྱི་དབྱིངས་ཀྱིས་ཀླས་པ་
དང་ལྡན་པ། ནམ་མཁའི་ཁམས་ལྟར་གནས་ཤིང་ཕྱི་མའི་མཐའི་མུར་ཐུག་པ་ལས་སེམས་དེ་སྐྱེ་བར་འགྱུར་ཏེ་ཞེས་གསུངས་པ་ཡིན་ནོ། །ཇི་འདྲ་བའི་སེམས་དེ་སྐྱེ་བར་འགྱུར་བ་དེ་ནི་སེམས་སྐྱེ་བ་དེ་སྐྱེས་མ་ཐག་ཏུ་བྱང་ཆུབ་སེམས་དཔའ་བྱིས་པ་སོ་སོ་སྐྱེ་བོའི་ས་ལས་ཤིན་ཏུ་འདས་པ་ཡིན། བྱང་ཆུབ་སེམས་
དཔའི་སྐྱོན་མེད་པར་ཞུགས་པ་ཡིན། དེ་བཞིན་གཤེགས་པའི་རིགས་སུ་སྐྱེས་པ་ཡིན། མན་ངག་བརྗོད་པས་ཁ་ན་མ་ཐོ་བ་མེད་པ་ཡིན། འཇིག་རྟེན་གྱི་འགྲོ་བ་ཐམས་ཅད་ལས་ཕྱིར་ལོག་པ་ཡིན། འཇིག་རྟེན་ལས་འདས་པའི་འགྲོ་བར་ཞུགས་པ་ཡིན། བྱང་ཆུབ་སེམས་དཔའི་ཆོས་ཉིད་ལ་གནས་པ་ཡིན།
བྱང་ཆུབ་སེམས་དཔའི་གནས་ལ་རབ་ཏུ་གནས་པ་ཡིན། དུས་གསུམ་མཉམ་པ་ཉིད་དུ་རྟོགས་པ་ཡིན། དེ་བཞིན་གཤེགས་པའི་རིགས་སུ་ངེས་ཤིང་རྫོགས་པའི་བྱང་ཆུབ་ལ་གཞོལ་བ་ཡིན་ཏེ། ཀྱེ་རྒྱལ་བའི་སྲས་དག་ཆོས་འདི་ལྟ་བུ་ལ་གནས་པའི་བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་
ས་རབ་ཏུ་དགའ་བ་ལ་མི་གཡོ་བའི་ཚུལ་གྱིས་གནས་པ་ཡིན་ནོ་ཞེས་གསུངས་པ་ཡིན་ནོ། །སློབ་དཔོན་གྱི་ཞལ་སྔ་ནས་ཆོས་དེ་ལྟ་བུ་ལ་གནས་ཤིང་བྱང་ཆུབ་སེམས་དཔའི་ས་རབ་ཏུ་དགའ་བ་ལ་མི་གཡོ་བའི་ཚུལ་གྱིས་རབ་ཏུ་གནས་པར་གྱུར་པ་ནི་དེ་བཞིན་གཤེགས་པའི་ཚུལ་སྐྱེ་བ་མེད་པ་ལ་སོགས་པའི་

ཚིག་གིས་རབ་ཏུ་བསྟན་པ། མ་ནོར་བ་དེ་བཞིན་ཉིད་ཐུགས་སུ་ཆུད་ནས་ཞེས་བྱ་བས་བསྟན་པ་ཡིན་ནོ། །དེ་ནི་སློབ་དཔོན་གྱི་ཞལ་སྔ་ནས་ཀྱིས་རྒྱུ་བསྟན་པ་ཡིན་ནོ།། །།བམ་པོ་གསུམ་པ། དེ་ལྟར་སློབ་དཔོན་གྱི་ཞལ་སྔ་ནས། སྔོན་མོས་པས་སྤྱོད་པའི་ས་ལ་གནས་པ་ན། ལྷག་པའི་
བསམ་པ་རྣམ་པར་དག་པའི་ས་འཐོབ་པའི་རྒྱུ་དེ་ལྟ་བུ་ཐུགས་སུ་ཆུད་པས། འབྲས་བུ་རང་གི་དོན་གྱི་མཚན་ཉིད་ཅི་ཞིག་བརྙེས་ཤེ་ན། དེའི་ཕྱིར་དགྱེས་པའི་ཤུགས་དྲག་པོ་ཡང་དག་པར་སྐྱེས་པས་ཇི་ལྟར་ཐུགས་སུ་ཆུད་པའི་ཚུལ་གྱིས་བཅོམ་ལྡན་འདས་ལ་མངོན་པར་བསྟོད་དེ། བསྟན་བཅོས་
མཛད་པར་བཞེད་ནས་ཞེས་བྱ་བ་སྨྲས་སོ། །དེ་ལ་དགྱེས་པའི་ཤུགས་དྲག་པོ་ཡང་དག་པར་སྐྱེས་པས་ཞེས་བྱ་བ་ནི་འབྲས་བུ་རང་གི་དོན་གྱི་མཚན་ཉིད་བརྙེས་པ་དངོས་བསྟན་ལ། ཇི་ལྟར་ཐུགས་སུ་ཆུད་པའི་ཚུལ་གྱིས་བཅོམ་ལྡན་འདས་ལ་མངོན་པར་བསྟོད་དེ་ཞེས་བྱ་བས་ནི་བདག་ཉིད་ཀྱི་སངས་རྒྱས་ཀྱི་ཆོས་
ཡོངས་སུ་སྨིན་པར་བྱ་བའི་ཕྱིར་ཇི་ལྟར་ཐུགས་སུ་ཆུད་པའི་ཚུལ་གྱིས་བཅོམ་ལྡན་འདས་ལ་མངོན་པར་བསྟོད་པར་མཛད་ནས། འབྲས་བུ་རང་གི་དོན་གྱི་མཚན་ཉིད་དེ་བརྙེས་པ་བྱེ་བྲག་ཏུ་བསྟན་ཏོ། །བསྟན་བཅོས་མཛད་པར་བཞེད་ནས་ཞེས་བྱ་བ་ནི་ཕྱི་རོལ་གྱི་སེམས་ཅན་ཡོངས་སུ་སྨིན་པར་བྱ་བའི་ཕྱིར་བསྟན་
བཅོས་མཛད་པར་བཞེད་པས། འབྲས་བུ་རང་གི་དོན་གྱི་མཚན་ཉིད་དེ་བརྙེས་པ་བྱེ་བྲག་ཏུ་བསྟན་ཏོ། །དེ་ལ་དགྱེས་པའི་ཤུགས་དྲག་པོ་ཡང་དག་པར་སྐྱེས་པས་ཞེས་བྱ་བ་ནི་བྱང་ཆུབ་སེམས་དཔའི་ས་དང་པོ་རབ་ཏུ་དགའ་བ་བརྙེས་པ་ཞེས་བྱ་བའི་ཐ་ཚིག་གོ། །དེ་ལ་དགྱེས་པའི་ཤུགས་ཞེས་བྱ་བ་ནི་མཆོག་ཏུ་དགའ་བ་
མང་བས་རབ་ཏུ་དགའ་བ་དང་། དམིགས་པས་རབ་ཏུ་དགའ་བའི་ཤུགས་སོ། །དྲག་པོ་ཞེས་བྱ་བ་ནི་ཆེན་པོའོ། །ཡང་དག་པར་སྐྱེས་པས་ཞེས་བྱ་བ་ནི་ཕྱིས་ཀྱང་འབྲལ་བར་མི་འགྱུར་བ་སྐྱེས་པའོ། །དེ་ལྟར་ན་སློབ་དཔོན་གང་ལ་བྱང་ཆུབ་སེམས་དཔའི་ས་དང་པོ་རབ་ཏུ་དགའ་བ་བརྙེས་པས་དགྱེས་པའི་ཤུགས་དྲག་པོ་ཡང་དག་
པར་བརྙེས་པ་མངའ་བ་དེ་ནི་དགྱེས་པའི་ཤུགས་དྲག་པོ་ཡང་དག་པར་སྐྱེས་པ་སྟེ་དེས་སོ། །དེ་ལྟར་ཡང་འཕགས་པ་བྱང་ཆུབ་སེམས་དཔའ་ས་བཅུའི་མདོ་ལས། མཆོག་ཏུ་དགའ་བ་མང་བས་རབ་ཏུ་དགའ་བ་དང་། དམིགས་པས་རབ་ཏུ་དགའ་བ་ཡིན་ཏེ། དེ་ལ་རེ་ཞིག་མཆོག་ཏུ་དགའ་བ་མང་བས་རབ་ཏུ་

དགའ་བ་ནི། ཀྱེ་རྒྱལ་བའི་སྲས་དག་དེ་ལ་བྱང་ཆུབ་སེམས་དཔའི་ས་རབ་ཏུ་དགའ་བ་ལ་གནས་པའི་བྱང་ཆུབ་སེམས་དཔའ་ནི་མཆོག་ཏུ་དགའ་བ་མང་བ་ཡིན་ཏེ། དང་བ་མང་བ་ཡིན། དགའ་བ་མང་བ་ཡིན། རངས་པ་མང་བ་ཡིན། མགུ་བ་མང་བ་ཡིན། དགའ་རླབས་མང་བ་ཡིན།
སྤྲོས་པ་མང་བ་ཡིན། མི་འཁྲུག་པ་མང་བ་ཡིན། རྣམ་པར་འཚེ་བ་མེད་པ་མང་བ་ཡིན། ཁྲོ་བ་མེད་པ་མང་བ་ཡིན་ནོ་ཞེས་གསུངས་པ་ཡིན་ནོ། །དམིགས་པས་རབ་ཏུ་དགའ་བ་ནི་རྣམ་པ་གཉིས་ཏེ། མ་འོངས་པ་ན་ཐོབ་པར་བྱ་བ་དང་། ད་ལྟར་བྱུང་བ་ན་ཐོབ་པའི་དམིགས་པས་རབ་ཏུ་དགའ་བའོ། །དེ་ལ་མ་
འོངས་པ་ན་ཐོབ་པར་བྱ་བའི་དམིགས་པས་རབ་ཏུ་དགའ་བ་ནི། ཀྱེ་རྒྱལ་བའི་སྲས་དག་དེ་ལྟར་བྱང་ཆུབ་སེམས་དཔའི་ས་རབ་ཏུ་དགའ་བ་ལ་གནས་པའི་བྱང་ཆུབ་སེམས་དཔའ་ནི་སངས་རྒྱས་བཅོམ་ལྡན་འདས་རྣམས་དང་། སངས་རྒྱས་ཀྱི་ཆོས་རྣམས་དང་། བྱང་ཆུབ་སེམས་དཔའ་རྣམས་དང་། བྱང་ཆུབ་
སེམས་དཔའི་སྤྱོད་པ་རྣམས་དང་། ཕ་རོལ་ཏུ་ཕྱིན་པ་རྣམ་པར་དག་པ་དང་། བྱང་ཆུབ་སེམས་དཔའི་སའི་ཁྱད་པར་དང་། བྱང་ཆུབ་སེམས་དཔའི་མི་འཕྲོགས་པ་ཉིད་དང་། དེ་བཞིན་གཤེགས་པའི་གདམས་ངག་དང་། རྗེས་སུ་བསྟན་པ་དང་། སེམས་ཅན་གྱི་དོན་ཡང་དག་པར་ཐོབ་པར་བྱེད་པ་དང་། དེ་བཞིན་
གཤེགས་པའི་ཡེ་ཤེས་ལ་འཇུག་པའི་སྦྱོར་བ་རྗེས་སུ་དྲན་ཞིང་རབ་ཏུ་དགའ་བ་ཡིན་ནོ་ཞེས་གསུངས་པ་ཡིན་ནོ། །ད་ལྟར་བྱུང་བ་ན་ཐོབ་པའི་དམིགས་པས་རབ་ཏུ་དགའ་བ་ནི་ཕྱིར་ཞིང་མཆོག་ཏུ་དགའ་བ་དང་ལྡན་པ་ཡིན་ཏེ། བདག་ནི་འགྲོ་བ་ཐམས་ཅད་ཀྱི་ཡུལ་ལས་ཕྱིར་ལོག་གོ། །བདག་ནི་སངས་རྒྱས་དང་
ཉེ་བ་ལ་ཞུགས་སོ། །བདག་ནི་བྱིས་པ་སོ་སོའི་སྐྱེ་བོའི་ས་ལས་རིང་དུ་གྱུར་ཏོ། །བདག་ནི་ཡེ་ཤེས་ཀྱི་ས་དང་ཉེ་བར་གྱུར་ཏོ། །བདག་ནི་ངན་སོང་ངན་འགྲོ་ལོག་པར་ལྟུང་བ་ཐམས་ཅད་ཀྱི་རྒྱུན་ཆད་པའོ། །བདག་ནི་སེམས་ཅན་ཐམས་ཅད་ཀྱི་སྟོན་པར་གྱུར་ཏོ། །བདག་ནི་དེ་བཞིན་གཤེགས་པ་རྣམས་མཐོང་བ་
དང་། ཉེ་བར་གྱུར་ཏོ། །བདག་ནི་སངས་རྒྱས་ཀྱི་ཡུལ་ལ་ཡང་དག་པར་བྱུང་ངོ་། །བདག་ནི་བྱང་ཆུབ་སེམས་དཔའ་ཐམས་ཅད་ཀྱི་མཉམ་པ་ཉིད་དང་ལྡན་པར་གྱུར་ཏོ། །བདག་ནི་འཇིགས་པ་དང་། དངང་བ་དང་། བག་ཚ་བ་དང་བྲལ་ལོ་ཞེས་མཆོག་ཏུ་དགའ་བ་སྐྱེད་དོ་ཞེས་གསུངས་པ་ཡིན་ནོ། །ཇི་ལྟར་

ཐུགས་སུ་ཆུད་པའི་ཚུལ་གྱིས་བཅོམ་ལྡན་འདས་ལ་མངོན་པར་བསྟོད་དེ་ཞེས་བྱ་བ་ནི་དེ་ལྟར་དགྱེས་པའི་ཤུགས་དྲག་པོ་ཡང་དག་པར་སྐྱེས་པས་བདག་ཉིད་ཀྱི་སངས་རྒྱས་ཀྱི་ཆོས་ཡོངས་སུ་སྨིན་པར་བྱ་བའི་ཕྱིར། ཇི་ལྟར་ཐུགས་སུ་ཆུད་པའི་ཚུལ་གྱིས་བཅོམ་ལྡན་འདས་ལ་མངོན་པར་བསྟོད་པར་མཛད་དོ་ཞེས་
བྱ་བར་སྦྱར་རོ། །དེ་ལ་ཇི་ལྟར་ཐུགས་སུ་ཆུད་པའི་ཚུལ་གྱིས་ཞེས་བྱ་བ་ནི་དེ་བཞིན་གཤེགས་པའི་ཚུལ་གང་ཁོ་ན་ཐུགས་སུ་ཆུད་པ་དེ་ཁོ་ན་དང་། ཇི་ལྟར་ཐུགས་སུ་ཆུད་པ་དེ་ཁོ་ནས་ཏེ་སྐྱེ་བ་མེད་པ་ལ་སོགས་པའི་ཚིག་གིས་རབ་ཏུ་བསྟན་པ། མ་ནོར་བའི་དེ་བཞིན་ཉིད་ཐུགས་སུ་ཆུད་པའི་ཚུལ་གྱིས་སོ། །
བཅོམ་ལྡན་འདས་ལ་མངོན་པར་བསྟོད་དེ་ཞེས་བྱ་བ་ནི། གང་གིས་རྟེན་ཅིང་འབྲེལ་པར་འབྱུང་། །འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱི། །
དམ་པ་དེ་ལ་ཕྱག་འཚལ་ལོ། །ཞེས་འོག་ནས་འབྱུང་བའི་ཚིགས་སུ་བཅད་པ་གཉིས་པོ་དེ་དག་གིས་མངོན་པར་བསྟོད་དེའོ། །ཅིའི་ཕྱིར་བཅོམ་ལྡན་འདས་ལ་མངོན་པར་བསྟོད་པ་མཛད་ཅེ་ན། དེའི་ཕྱིར་བསྟན་བཅོས་མཛད་པར་བཞེད་ནས་ཞེས་བྱ་བ་སྨྲས་ཏེ། འདིས་ནི་ཕྱི་རོལ་གྱི་སེམས་ཅན་ཡོངས་སུ་
སྨིན་པར་བྱ་བའི་ཕྱིར་བསྟན་བཅོས་མཛད་པར་བཞེད་དོ་ཞེས་བྱ་བར་སྦྱར་རོ། །དེ་ལ་བསྟན་བཅོས་ཞེས་བྱ་བའི་ཚིག་གི་དོན་ནི་སྔ་མ་བཞིན་ནོ། །མཛད་པར་བཞེད་ནས་ཞེས་བྱ་བ་ནི་ཕྲིན་ལས་སུ་བརྩམས་པར་བཞེད་ནས་སོ། །བསྟན་བཅོས་མཛད་པར་བཞེད་པ་ཅིའི་ཕྱིར་དང་པོར་བཅོམ་ལྡན་འདས་ལ་མངོན་པར་
བསྟོད་པར་མཛད་ཅེ་ན། འདི་ལྟར་ཕྱི་རོལ་གྱི་སེམས་ཅན་ཡོངས་སུ་སྨིན་པར་བྱ་བའི་ཕྱིར་བསྟན་བཅོས་མཛད་པར་བཞེད་པ་ན། བདག་ཉིད་ཀྱི་སངས་རྒྱས་ཀྱི་ཆོས་ཡོངས་སུ་སྨིན་པར་བྱ་བའི་ཕྱིར་དང་པོར་ལྷ་ཡིད་དུ་འོང་བ་ལ་མངོན་པར་བསྟོད་ཅིང་ཕྱག་འཚལ་ན། བདག་ཉིད་ཀྱི་སངས་རྒྱས་ཀྱི་ཆོས་ཡོངས་སུ་སྨིན་
པས་བརྩམས་པ་དེ་འགྲུབ་ཅིང་ཕྱི་རོལ་གྱི་སེམས་ཅན་ཡོངས་སུ་སྨིན་པར་འགྱུར་བའི་ཕྱིར་རོ། །དེ་ལྟར་སློབ་དཔོན་གྱི་ཞལ་སྔ་ནས་ཀྱིས་བྱང་ཆུབ་སེམས་དཔའི་ས་དང་པོ་རབ་ཏུ་དགའ་བ་བརྙེས་ཤིང་། བདག་ཉིད་ཀྱི་སངས་རྒྱས་ཀྱི་ཆོས་ཡོངས་སུ་སྨིན་པར་བྱ་བ་དང་། ཕྱི་རོལ་གྱི་སེམས་ཅན་ཡོངས་སུ་སྨིན་པར་བྱ་

བའི་ཐབས་དང་ལྡན་པར་གྱུར་པ་ནི་འབྲས་བུ་རང་གི་དོན་གྱི་མཚན་ཉིད་ཡིན་ནོ། །དེ་ནི་སློབ་དཔོན་གྱི་ཞལ་སྔ་ནས་ཀྱི་འབྲས་བུ་རང་གི་དོན་གྱི་མཚན་ཉིད་བསྟན་པ་ཡིན་ནོ། །དེ་ལྟར་འབྲས་བུ་རང་གི་དོན་གྱི་མཚན་ཉིད་བྱང་ཆུབ་སེམས་དཔའི་ས་དང་པོ་རབ་ཏུ་དགའ་བ་བརྙེས་ཤིང་། བདག་ཉིད་ཀྱི་
སངས་རྒྱས་ཀྱི་ཆོས་ཡོངས་སུ་སྨིན་པར་བྱ་བ་དང་། ཕྱི་རོལ་གྱི་སེམས་ཅན་ཡོངས་སུ་སྨིན་པར་བྱ་བའི་ཐབས་དང་ལྡན་པར་གྱུར་ནས། འབྲས་བུ་གཞན་གྱི་དོན་གྱི་མཚན་ཉིད་ཅི་ཞིག་མཛད་ཅེ་ན། དེའི་ཕྱིར་ཐུགས་རྗེ་ཉིད་ཀྱི་ཆུས་བརླན་པའི་ཐུགས་མངའ་བས་སྐྱེ་བོ་རྗེས་སུ་དཔག་པ་གཙོར་འཛིན་ཅིང་ཁོང་དུ་
ཆུད་པར་འདོད་པས་རྟོགས་པར་བཞེད་ནས་ཞེས་བྱ་བ་སྨྲས་སོ། །དེ་ལ་ཐུགས་རྗེ་ཉིད་ཀྱི་ཆུས་བརླན་པའི་ཐུགས་མངའ་བས་ཞེས་བྱ་བས་ནི་འབྲས་བུ་གཞན་གྱི་དོན་གྱི་མཚན་ཉིད་བསྟན་བཅོས་མཛད་པའི་རྒྱུ་བསྟན་ལ། སྐྱེ་བོ་རྗེས་སུ་དཔག་པ་གཙོར་འཛིན་ཅིང་ཁོང་དུ་ཆུད་པར་འདོད་པས་ཞེས་བྱ་བས་
ནི་འབྲས་བུ་གཞན་གྱི་དོན་གྱི་མཚན་ཉིད་བསྟན་བཅོས་མཛད་པ་དེ་གང་ལ་ཕན་གདགས་པའི་ཕྱིར་མཛད་པའི་ཡུལ་བསྟན་ཏོ། །རྟོགས་པར་བཞེད་ནས་ཞེས་བྱ་བས་ནི་འབྲས་བུ་གཞན་གྱི་དོན་གྱི་མཚན་ཉིད་བསྟན་བཅོས་མཛད་པ་དངོས་བསྟན་ཏོ། །དེ་ལ་ཅིའི་ཕྱིར་བསྟན་བཅོས་མཛད་ཅེ་ན། དེའི་
ཕྱིར་ཐུགས་རྗེ་ཉིད་ཀྱི་ཆུས་བརླན་པའི་ཐུགས་མངའ་བས་ཞེས་བྱ་བ་སྨྲས་ཏེ། སློབ་དཔོན་གྱི་ཞལ་སྔ་ནས་ཐུགས་རྗེ་ཉིད་ཀྱི་ཆུས་བརླན་པའི་ཐུགས་མངའ་བས་སྐྱེ་བོ་རྗེས་སུ་དཔག་པ་གཙོར་འཛིན་ཅིང་ཁོང་དུ་ཆུད་པར་འདོད་པས་རྟོགས་པར་བཞེད་ནས་བསྟན་བཅོས་མཛད་ཀྱི། ཟང་ཟིང་དང་བཅས་པའི་
སེམས་ཀྱིས་རྙེད་པ་དང་བཀུར་སྟིའི་ཕྱིར་ནི་མ་ཡིན་ནོ་ཞེས་བྱ་བར་སྦྱར་རོ། །དེ་ལ་ཐུགས་རྗེ་ཉིད་ཅེས་བྱ་བ་ལ་ཐུགས་རྗེའི་དངོས་པོ་ནི་ཐུགས་རྗེ་ཉིད་དོ། །ཐུགས་རྗེ་ཉིད་ཀྱི་ཆུ་ཞེས་བྱ་བ་ནི་ཐུགས་རྗེ་ཉིད་ཆུ་དང་འདྲ་བས་ཐུགས་རྗེ་ཉིད་ཀྱི་ཆུ་སྟེ་དེས་སོ། །བརླན་པ་ཞེས་བྱ་བ་ནི་ཐུགས་རྗེ་ཉིད་ཀྱི་ཆུས་གཤེར་བ་དང་བངས་
པ་དང་ཁྱད་པར་གྱུར་པའོ། །ཐུགས་མངའ་བས་ཞེས་བྱ་བ་ནི་སློབ་དཔོན་གང་ལ་ཐུགས་རྗེ་ཉིད་ཀྱི་ཆུས་བརླན་པའི་ཐུགས་མངའ་བ་དེ་ནི་ཐུགས་རྗེ་ཉིད་ཀྱི་ཆུས་བརླན་པའི་ཐུགས་མངའ་བ་སྟེ་ངེས་སོ། །གང་ལ་ཕན་གདགས་པའི་ཕྱིར་བསྟན་བཅོས་བརྩམ་པ་མཛད་ཅེ་ན། དེའི་ཕྱིར་སྐྱེ་བོ་རྗེས་སུ་དཔག་པ་གཙོར་

འཛིན་ཅིང་ཁོང་དུ་ཆུད་པར་འདོད་པས་ཞེས་བྱ་བ་སྨྲས་ཏེ། སྐྱེ་བོ་རྗེས་སུ་དཔག་པ་གཙོར་འཛིན་ཅིང་ཁོང་དུ་ཆུད་པར་འདོད་པས་རྟོགས་པར་བྱ་ཞིང་དེ་ལ་ཕན་གདགས་པའི་ཕྱིར་བསྟན་བཅོས་བརྩམས་སོ་ཞེས་བྱ་བར་སྦྱར་རོ། །དེ་ལ་སྐྱེ་བོ་རྗེས་སུ་དཔག་པ་གཙོར་འཛིན་ཅིང་ཁོང་དུ་ཆུད་པར་འདོད་པས་ཞེས་བྱ་བ་
ལ་སྐྱེ་བོ་ཞེས་བྱ་བ་ནི་ལས་དང་ཉོན་མོངས་པ་དག་གིས་བསྐྱེད་པར་བྱ་བ་ཡིན་པས་སྐྱེ་བོའོ། །རྗེས་སུ་དཔག་པ་གཙོར་འཛིན་ཅིང་ཞེས་བྱ་བ་ནི་རྗེས་སུ་དཔག་པ་ལ་མོས་ཤིང་ཞེས་བྱ་བའི་ཐ་ཚིག་གོ། །ཁོང་དུ་ཆུད་པར་འདོད་པས་ཞེས་བྱ་བ་ནི་དབུ་མའི་བསྟན་བཅོས་འདི་ཁོང་དུ་ཆུད་པ་དང་ཤེས་པར་འདོད་པས་
སོ། དེ་ལྟར་ན་སྐྱེ་བོ་གང་ལ་རྗེས་སུ་དཔག་པ་ལ་མོས་པ་དང་དབུ་མའི་བསྟན་བཅོས་འདི་ཁོང་དུ་ཆུད་པ་དང་ཤེས་པར་འདོད་པ་ཡོད་པ་དེ་ནི་སྐྱེ་བོ་རྗེས་སུ་དཔག་པ་གཙོར་འཛིན་ཅིང་ཁོང་དུ་ཆུད་པར་འདོད་པས་ཏེ་ངེས་སོ། །འདི་ལ་གང་ཟག་བཞི་ཡོད་དེ། མགོ་སྨོས་པས་གོ་བ་དང་། རྣམ་པར་སྤྲོས་ནས་
གོ་བ་དང་། བཀྲི་དགོས་པ་དང་། ཚིག་ལྷུར་ལེན་པའོ། །དེ་ལ་མགོ་སྨོས་པས་གོ་བ་ནི་མགོ་སྨོས་ཤིང་གླེངས་པ་ཙམ་གྱིས་དོན་གོ་བ་གང་ཡིན་པའོ། །རྣམ་པར་སྤྲོས་ནས་གོ་བ་ནི་རྣམ་པར་སྤྲོས་ཤིང་རྒྱས་པར་བཤད་ན་དོན་གོ་བ་གང་ཡིན་པའོ། །བཀྲི་དགོས་པ་ནི་བསྡུ་བ་བྱས་པའི་དོན་གསལ་བ་ཡང་མི་གོ་ཞིང་
མཚོན་མ་པས་འདི་ལྟར་གྱིས་ཤིག་ཅེས་བྱས་ཀྱང་མི་ཤེས་པ། བྱ་བས་ཁྲིད་པ་ན་དོན་གོ་བ་ལོང་བ་དང་འོན་པ་ལྟ་བུ་གང་ཡིན་པའོ། །ཚིག་ལྷུར་ལེན་པ་ནི་རྣམ་པ་ཐམས་ཅད་དུ་དོན་མི་གོ་ཞིང་ཚིག་ལ་འཆེལ་པ་གང་ཡིན་པ་སྟེ། འཕགས་པ་ལང་ཀར་གཤེགས་པའི་མདོ་ལས། །ཇི་ལྟར་བྱིས་པ་མཛུབ་མོའི་རྩེར། །
འཛིན་ཅིང་ཟླ་བ་མི་མཐོང་བ། །དེ་བཞིན་ཡི་གེར་བཞེད་པ་ཡིས། །ང་ཡི་དེ་བཞིན་ཉིད་མི་མཐོང་། །ཞེས་ཇི་སྐད་གསུངས་པ་ལྟ་བུའོ། །དེ་ལ་མགོ་སྨོས་པས་གོ་བ་དང་། རྣམ་པར་སྤྲོས་ནས་གོ་བ་དང་། བཀྲི་དགོས་པ་གསུམ་ནི་ཐར་པའི་སྐལ་བ་ཡོད་པ་ཡིན་ནོ། །ཚིག་ལྷུར་ལེན་པ་ནི་ཚེ་དེ་ལ་ཐར་པའི་
སྐལ་བ་མེད་པས་བཅོམ་ལྡན་འདས་ཀྱང་དེ་ལ་ཆོས་སྟོན་པར་མི་མཛད་དེ། འདི་ལྟར་སངས་རྒྱས་བཅོམ་ལྡན་འདས་རྣམས་ནི་ཆོས་སྟོན་པ་འབྲས་བུ་མེད་པ་མ་ཡིན་པའི་ཕྱིར་རོ། །གང་ཟག་བཞི་པོ་དེ་དག་ནི་རྟ་བཞི་དང་འདྲ་བར་ཤེས་པར་བྱ་སྟེ། འདི་ལྟ་སྟེ་དཔེར་ན། རྟ་ལ་ལ་ཁ་ལོའི་བསམ་པ་ཤེས་

ནས་རྒྱུག་པ་དང་། རྟ་ལ་ལ་ལྕག་གི་གྲིབ་མ་མཐོང་ནས་རྒྱུག་པ་དང་། རྟ་ལ་ལ་ལྕག་གིས་བཏབ་ནས་རྒྱུག་པ་དང་། རྟ་སྐྱོན་ཆགས་པ་ལ་ལྕག་གིས་གཞུས་ཀྱང་རྒྱུག་ཏུ་མི་བཏུབ་པ་དང་འདྲ་བར། གང་ཟག་མགོ་སྨོས་པས་གོ་བ་ནི་སངས་རྒྱས་བཅོམ་ལྡན་འདས་སྐྱེས་བུ་
གདུལ་བའི་ཁ་ལོ་བསྒྱུར་བ། བླ་ན་མེད་པ་ཆེན་པོས་ངེས་པར་འབྱུང་བ་བསྟན་པ་ཐོས་ནས་སྲིད་པ་གསུམ་གྱི་བཙོན་ར་ནས་ངེས་པར་འབྱུང་སྟེ། དཔེར་ན་འཕགས་པ་ཀུན་ཤེས་ཀཽཎྜི་ནྱ་ལྟ་བུ་སྟེ། འདོད་པའི་རོ་མྱང་བ་རིག་པའི་ཕྱིར་དང་། འདོད་པའི་ཉེས་དམིགས་རིག་པའི་ཕྱིར་རོ། །དེ་ལ་
འདོད་པའི་རོ་མྱང་བ་ཞེས་བྱ་བ་ནི། འདོད་པ་རྣམས་ནི་རོ་མྱང་བའི་མནོག་ཆུང་བ་སྟེ། རལ་གྲིའི་སོ་ལ་སྦྲང་རྩིའི་ཐིགས་པས་བསྐུས་པ་ལ་ལྕེས་བལྡགས་པ་ལྟ་བུ་ཡིན་ནོ། །འདོད་པ་རྣམས་ཀྱི་ཉེས་དམིགས་ཞེས་བྱ་བ་ནི་མདོར་བསྡུ་ན་ཉེས་པ་མང་བ་སྟེ། འདི་ལྟ་སྟེ། འདོད་པ་རྣམས་ནི་སྡུག་བསྔལ་
མང་པོ་དང་ལྡན་པ་དང་། འཁྲུག་པ་མང་པོ་དང་ལྡན་པ་ཡིན་ནོ། །རྒྱས་པར་ནི་འདོད་པ་རྣམས་ནི་རོ་མྱང་བ་ཆུང་བའི་དོན་གྱིས་རུས་པའི་ཀེང་རུས་ལྟ་བུ་དང་། འདོད་པ་རྣམས་ནི་མང་པོ་དང་ཐུན་མོང་བའི་དོན་གྱིས་ཤའི་ཁམ་ཚད་ལྟ་བུ་དང་། འདོད་པ་རྣམས་ནི་ཡུན་ཐུང་བའི་དོན་གྱིས་རྩྭའི་སྒྲོན་མ་ལྟ་བུ་དང་།
འདོད་པ་རྣམས་ནི་ཡོངས་སུ་གདུང་བ་ཆེ་བའི་དོན་གྱིས་མེ་མདག་གི་རླུབས་ལྟ་བུ་དང་། འདོད་པ་རྣམས་ནི་ཡུན་མི་རིང་བར་གནས་པའི་དོན་གྱིས་ཆུང་བ་དང་། འདོད་པ་རྣམས་ནི་རེ་ཞིག་པའི་དོན་གྱིས་བརྙན་པོ་ལྟ་བུ་དང་། འདོད་པ་རྣམས་ནི་བཅག་ནས་རྟོག་པའི་དོན་གྱིས་ཤིང་ལྗོན་པའི་རྩེ་མོའི་འབྲས་
བུ་ལྟ་བུ་དང་། འདོད་པ་རྣམས་ནི་ལྷག་པར་གཅོད་པའི་དོན་གྱིས་རལ་གྲིའི་སོ་ལྟ་བུ་དང་། འདོད་པ་རྣམས་ནི་ངེས་པར་འབིགས་པའི་དོན་གྱིས་མདུང་ཐུང་གི་གསལ་ཤིང་ལྟ་བུ་དང་། འདོད་པ་རྣམས་ནི་འཇིག་པ་དང་བཅས་པའི་དོན་གྱིས་སྦྲུལ་གྱི་མགོ་ལྟ་བུ་དང་། འདོད་པ་རྣམས་ནི་བསྡུ་བ་དང་
བསྲུང་དཀའ་བའི་དོན་གྱིས་འབབ་ཆུའི་ངོགས་ལྟ་བུ་དང་། འདོད་པ་རྣམས་ནི་བྱིས་པ་འདྲིད་པའི་དོན་གྱིས་སྒྱུ་མ་ལྟ་བུ་དང་། འདོད་པ་རྣམས་ནི་མིག་གིས་མི་རྩོལ་བའི་དོན་གྱིས་མུན་པ་ལྟ་བུ་དང་། འདོད་པ་རྣམས་ནི་དགེ་བའི་བར་ཆད་བྱེད་པའི་དོན་གྱིས་ལམ་འགོག་པ་ལྟ་བུ་དང་། འདོད་པ་རྣམས་

ནི་དྲན་པ་ཉམས་པར་བྱེད་པའི་དོན་གྱིས་རྨོངས་པར་བྱེད་པ་དང་། འདོད་པ་རྣམས་ནི་ཆགས་པའི་དོན་གྱིས་འཆིང་བ་དང་། འདོད་པ་རྣམས་ནི་སྐྲོད་པའི་དོན་གྱིས་སླུ་བར་བྱེད་པ་དང་། འདོད་པ་རྣམས་ནི་ཡོན་ཏན་འཕྲོག་པའི་དོན་གྱིས་ཆོམ་རྐུན་པ་ལྟ་བུ་དང་། འདོད་པ་རྣམས་ནི་འཐབ་ཀྲོལ་བསྐྱེད་པའི་
དོན་གྱིས་ཤ་ཁོན་ཅན་ལྟ་བུ་དང་། འདོད་པ་རྣམས་ནི་ཉམ་ཐག་པར་བྱེད་པའི་དོན་གྱིས་སྡུག་བསྔལ་བ་ཡིན་ནོ་ཞེས་བྱ་བ་འདི་ནི་ཉེས་དམིགས་ཡིན་ནོ། །ངེས་པར་འབྱུང་བ་ནི་མི་རྟག་པ་དང་སྡུག་བསྔལ་བ་དང་། སྟོང་པ་དང་བདག་མེད་པར་བསྟན་པ་སྟེ། དེ་ལྟར་ཡང་ཀཽཎྜི་ནྱ་མིག་མི་རྟག་པ་
ཡིན་ནམ། བཅོམ་ལྡན་འདས་ལགས་སོ་ཞེས་ཇི་སྐད་གསུངས་པ་ལྟ་བུའོ། །གང་ཟག་རྣམ་པར་སྤྲོས་ནས་གོ་བ་ནི་མདོར་བསྟན་པ་དང་། རྒྱས་པར་བཤད་པ་རྣམ་པར་དབྱེ་བ་ལས་ཉེས་དམིགས་མཐོང་བས་ངེས་པར་འབྱུང་བ་བསྟན་པ་ཐོས་ནས་ངེས་པར་འབྱུང་བ་སྟེ། རོ་མྱང་བ་ཆུང་བར་རིག་
པའི་ཕྱིར་དང་། ཉེས་དམིགས་ཆེ་བར་རིག་པའི་ཕྱིར་དང་། ངེས་པར་འབྱུང་བ་མ་རིག་པའི་ཕྱིར་རོ། །གང་ཟག་བཀྲི་དགོས་པ་ནི་རོ་མྱང་བ་ཆུང་བར་བསྟན་པ་དང་། ཉེས་དམིགས་ཆེ་བར་བསྟན་པ་དང་། ངེས་པར་འབྱུང་བ་བསྟན་པ་ཐོས་ནས་ངེས་པར་འབྱུང་སྟེ། འདོད་པ་རྣམས་ལ་ལྷག་པར་
ཆགས་པའི་ཕྱིར་དང་། རོ་མྱང་བ་ཆུང་བར་མ་རིག་པའི་ཕྱིར་དང་། ཉེས་དམིགས་ཆེ་བར་མ་རིག་པའི་ཕྱིར་དང་། ངེས་པར་འབྱུང་བ་མ་རིག་པའི་ཕྱིར་རོ། །འདིར་སྐྱེ་བོ་རྗེས་སུ་དཔག་པ་གཙོར་འཛིན་ཅིང་ཁོང་དུ་ཆུད་པར་འདོད་པས་ཞེས་བྱ་བ་ནི་གང་ཟག་མགོ་སྨོས་པས་གོ་བ་ཡིན་པར་ཤེས་པར་བྱ་སྟེ།
འདི་ལྟར་ཆོས་དང་ཆོས་ཅན་བསྡུས་པའི་ཕྱོགས་ཙམ་ཞིག་ཐོས་པ་ཁོ་ནས་རང་ཉིད་ཀྱི་ཕྱོགས་ཀྱི་ཆོས་དང་། དཔེ་ཡང་རྗེས་སུ་དཔོགས་ཤིང་མངོན་དུ་རྟོགས་པར་ནུས་པ་དང་། ཕྱོགས་ཀྱི་ཆོས་ཐོབ་པ་ཙམ་གྱིས་རང་ཉིད་ཀྱི་ཕྱོགས་དང་དཔེ་ཡང་མངོན་དུ་རྟོགས་པར་ནུས་པ་དང་དཔེ་ཐོས་པ་ཙམ་གྱིས་རང་ཉིད་ཀྱིས་
གཏན་ཚིགས་དང་དམ་བཅས་པ་ཡང་མངོན་དུ་རྟོགས་པར་ནུས་པའི་ཕྱིར་ཏེ། དེས་ནི་འབྲས་བུ་གཞན་གྱི་དོན་གྱི་མཚན་ཉིད་བསྟན་བཅོས་མཛད་པ་དེ་གང་ལ་ཕན་གདགས་པའི་ཕྱིར་མཛད་པའི་ཡུལ་བསྟན་པ་ཡིན་ནོ། །རྟོགས་པར་བཞེད་ནས་ཞེས་བྱ་བ་ནི་སློབ་དཔོན་ལ་སྐྱེ་བོ་རྗེས་སུ་དཔག་པ་གཙོར་འཛིན་

ཅིང་ཁོང་དུ་ཆུད་པར་འདོད་པས་དབུ་མའི་བསྟན་བཅོས་འདི་འཛིན་དུ་གཞུག་པར་བཞེད་པ་མངའ་བས་སོ། །དེ་ལྟར་ན་སློབ་དཔོན་གང་ལ་སྐྱེ་བོ་རྗེས་སུ་དཔག་པ་གཙོར་འཛིན་ཅིང་ཁོང་དུ་ཆུད་པར་འདོད་པས་དབུ་མའི་བསྟན་བཅོས་འདི་འཛིན་དུ་གཞུག་པར་བཞེད་པ་མངའ་བ་དེ་ནི་
སྐྱེ་བོ་རྗེས་སུ་དཔག་པ་གཙོར་འཛིན་ཅིང་ཁོང་དུ་ཆུད་པར་འདོད་པས་རྟོགས་པར་བཞེད་པ་སྟེ། དེས། གང་གིས་རྟེན་ཅིང་འབྲེལ་པར་འབྱུང་། །འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་བསྟན་པ། །
རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །ཞེས་བཅོམ་ལྡན་འདས་ལ་མངོན་པར་བསྟོད་དེ་བསྟན་བཅོས་མཛད་དོ། །དེ་ལྟར་སློབ་དཔོན་གྱི་ཞལ་སྔ་ནས་ཀྱིས་ཐུགས་རྗེ་ཉིད་ཀྱི་ཆུས་བརླན་པའི་ཐུགས་མངའ་བས་སྐྱེ་བོ་རྗེས་སུ་དཔག་པ་གཙོར་འཛིན་ཅིང་ཁོང་དུ་ཆུད་པར་འདོད་
པས་རྟོགས་པར་བཞེད་ནས། བཅོམ་ལྡན་འདས་ལ་ཚིགས་སུ་བཅད་པ་གཉིས་པོ་དེ་དག་གིས་མངོན་པར་བསྟོད་དེ། བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དང་གང་ན་ཡང་། །སྐྱེས་པ་ནམ་ཡང་ཡོད་མ་ཡིན། །ཞེས་བྱ་བ་ལ་སོགས་པ་རབ་ཏུ་
བྱེད་པའི་སྐབས་ཉི་ཤུ་བདུན་གྱིས་བསྟན་བཅོས་རྫོགས་པར་མཛད་པ་ནི་འབྲས་བུ་གཞན་གྱི་དོན་གྱི་མཚན་ཉིད་ཡིན་ནོ། །དེ་ནི་སློབ་དཔོན་གྱི་ཞལ་སྔ་ནས་ཀྱིས་འབྲས་བུ་གཞན་དོན་གྱི་མཚན་ཉིད་བསྟན་པ་ཡིན་ནོ། །དེ་ལྟར་འབྲེལ་པ་བྱེད་པས་བསྟན་བཅོས་ཀྱི་འབྲེལ་པ་གཉིས་པོ་རིགས་པའི་འབྲེལ་པ་དང་།
དོན་གྱི་འབྲེལ་པ་སྨྲས་པ་ལ། རིགས་པའི་འབྲེལ་པ་བླ་མ་བརྒྱུད་པ་དག་ཇི་ལྟར་འབྱུང་བའི་རྒྱུ་བསྟན་པ་དེའི་དོན་གྱི་འབྲེལ་པ་ཡན་ལག་གི་དོན་བསྟན་པས་བྱེ་བྲག་ཏུ་བཤད་པ་དེ་དག་ནི་བསྟན་བཅོས་ཀྱི་འབྲེལ་པ་ཡིན་པར་ཤེས་པར་བྱའོ། །གང་གིས་རྟེན་ཅིང་འབྲེལ་བར་འབྱུང་། །འགག་པ་མེད་
པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །ཞེས་བྱ་བ་ནི་གང་གིས་རྟེན་ཅིང་འབྲེལ་བར་འབྱུང་བ་བསྟན་པ་དེ་ལ་ཕྱག་འཚལ་

ལོ་ཞེས་བྱ་བར་སྦྱར་རོ། །དེ་ལ་རྟེན་ཅིང་འབྲེལ་བར་འབྱུང་བ་ཞེས་བྱ་བ་ནི་ཁྱད་པར་གྱི་གཞི་ཡིན་ལ། འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་ཞེས་བྱ་བ་དག་ནི་དེའི་ཁྱད་པར་ཡིན་ཏེ་དེས་ནི་ལས་བསྟན་ཏོ། །
གང་གིས་བསྟན་པ་ཞེས་བྱ་བ་ནི་ཁྱད་པར་གྱི་གཞི་ཡིན་ལ། རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་ཞེས་བྱ་བ་དག་ནི་དེའི་ཁྱད་པར་ཡིན་ཏེ། དེས་ནི་མཛད་པ་པོ་བསྟན་ཏོ། །དེ་ལྟར་ན་མཛད་པ་པོ་གང་གིས་ཕྲིན་ལས་དེ་ལྟ་བུ་བསྟན་པ་མཛད་པ་དེ་ལ་ཕྱག་འཚལ་ལོ་ཞེས་བྱ་བར་དོན་གྱི་འབྲེལ་
པ་སྦྱར་བར་བྱའོ། །འདིར་སུའི་མིང་ཡང་དམིགས་ཀྱིས་མ་བསྟན་ན། འོག་ནས་དེ་ལ་ཕྱག་འཚལ་ལོ་ཞེས་འབྱུང་བ་དེ་གང་ལ་ཕྱག་འཚལ་ལོ་ཞེས་བྱ་བར་སྦྱར་ཞེས་འདྲི་བ་ལ་ལན་གདབ་པའི་ཕྱིར། གང་གིས་ཞེས་བྱ་བའི་སྒྲ་སྤྱི་ཡིན་ཡང་། འདིས་ནི་ཐུན་མོང་མ་ཡིན་པའི་ཁྱད་པར་དང་ལྡན་པའི་རྟེན་
ཅིང་འབྲེལ་པར་འབྱུང་བ་སྟོན་པར་མཛད་པ་ཉིད་ཀྱིས་བརྗོད་པར་བཞེད་པའི་ཕྱིར་བཅོམ་ལྡན་འདས་ཁོ་ན་དང་སྦྱར་རོ་ཞེས་བྱ་བ་སྨྲས་ཏེ། གང་གིས་ཞེས་བྱ་བའི་སྒྲ་སྤྱི་ཡིན་ཡང་སྐབས་འདིར་བཅོམ་ལྡན་འདས་ཁོ་ན་དང་སྦྱར་རོ་ཞེས་བྱ་བར་བལྟའོ། །འདིས་ནི་ཞེས་བྱ་བ་ནི། འགག་པ་མེད་པ་སྐྱེ་མེད་པ། །
ཞེས་བྱ་བ་ལ་སོགས་པའི་མཚན་ཉིད་ཇི་སྐད་བསྟན་པའི་གཞུང་འདིས་སོ། །ཐུན་མོང་མ་ཡིན་པའི་ཁྱད་པར་དང་ལྡན་པའི་རྟེན་ཅིང་འབྲེལ་བར་འབྱུང་བ་ཞེས་བྱ་བ་ནི་རྟེན་ཅིང་འབྲེལ་བར་འབྱུང་བ་གང་ལ་མུ་སྟེགས་བྱེད་དང་། ཉན་ཐོས་དང་རང་སངས་རྒྱས་ཐམས་ཅད་ལ་མེད་ཅིང་དེ་དག་དང་ཐུན་མོང་
མ་ཡིན་པའི་ཁྱད་པར་འགག་པ་མེད་པ་དང་། སྐྱེ་བ་མེད་པ་ལ་སོགས་པ་ཡོད་པ་དེ་ནི་ཐུན་མོང་མ་ཡིན་པའི་ཁྱད་པར་དང་ལྡན་པའི་རྟེན་ཅིང་འབྲེལ་པར་འབྱུང་བ་ཞེས་བྱའོ། །སྟོན་པར་མཛད་པ་ཉིད་ཀྱིས་ཞེས་བྱ་བ་ནི་བཅོམ་ལྡན་འདས་ཐུན་མོང་མ་ཡིན་པའི་ཁྱད་པར་དང་ལྡན་པའི་རྟེན་ཅིང་འབྲེལ་བར་འབྱུང་
བ་སྟོན་པར་མཛད་པའོ། །སྟོན་པར་མཛད་པའི་དངོས་པོ་ནི་སྟོན་པར་མཛད་པ་ཉིད་དེ་སྟོན་པར་མཛད་པ་ཉིད་ཀྱི་སྒོ་ནས་སོ། །བརྗོད་པར་བཞེད་པའི་ཕྱིར་ཞེས་བྱ་བ་ནི་སློབ་དཔོན་བཅོམ་ལྡན་འདས་ཀྱི་ཡོན་ཏན་བརྗོད་པར་བཞེད་པའི་ཕྱིར་ཏེ། བཅོམ་ལྡན་འདས་ཐུན་མོང་མ་ཡིན་པའི་ཁྱད་པར་དང་ལྡན་པའི་

རྟེན་ཅིང་འབྲེལ་པར་འབྱུང་བ་སྟོན་པར་མཛད་པའི་ཕྲིན་ལས་ཀྱི་སྒོ་ནས། འདིར་སློབ་དཔོན་བཅོམ་ལྡན་འདས་ཀྱི་ཡོན་ཏན་བརྗོད་པར་བཞེད་པའི་ཕྱིར་རོ། །བཅོམ་ལྡན་འདས་ཁོ་ན་དང་སྦྱར་རོ་ཞེས་བྱ་བ་ནི་བཅོམ་ལྡན་འདས་ཤཱཀྱ་ཐུབ་པ་ཁོ་ན་དང་སྦྱར་བར་དགོངས་
སོ་ཞེས་བྱ་བའི་ཐ་ཚིག་གོ། །འདི་སྐད་བསྟན་ཏེ། གང་གིས་ཞེས་བྱ་བའི་སྒྲ་དམིགས་ཀྱིས་མ་བསྟན་པར་སྤྱི་ཡིན་དུ་ཟིན་ཀྱང་། ཐུན་མོང་མ་ཡིན་པའི་ཁྱད་པར་དང་ལྡན་པའི་རྟེན་ཅིང་འབྲེལ་བར་འབྱུང་བ་སྟོན་པར་མཛད་པ་ཉིད་ཀྱིས་ཕྲིན་ལས་ཀྱི་སྒོ་ནས་བཅོམ་ལྡན་འདས་ཉིད་ཡིན་པས་
ཡང་མངོན་ལ། སློབ་དཔོན་ཡང་དེ་ཁོ་ན་ཐུགས་སུ་ཆུད་པ་ཡིན་པས་ལྷ་གཞན་ལ་ཕྱག་མི་འཚལ་བའི་ཕྱིར། བཅོམ་ལྡན་འདས་ཁོ་ན་དང་སྦྱར་བར་ངེས་སོ་ཞེས་བྱ་བའི་ཐ་ཚིག་གོ། །འདིར་གཞན་དག་ན་རེ། གལ་ཏེ་བསྟན་བཅོས་འདི་གཙོ་ཆེར་དོན་རབ་ཏུ་འབྱེད་པ་ཡིན་ལ། མདོ་ནི་དོན་སྨོས་
པའི་ཕྱིར་མདོ་ཞེས་བྱ་བ་ཡིན་ན། མདོའི་གནས་སུ། གང་གིས་རྟེན་ཅིང་འབྲེལ་བར་འབྱུང་བ་བསྟན་པ་རྫོགས་པའི་སངས་རྒྱས་སྨྲ་བ་རྣམས་ཀྱི་དམ་པ་དེ་ལ་ཕྱག་འཚལ་ལོ་ཞེས་བྱ་བ་དེ་ཙམ་ཞིག་བརྗོད་པས་ཆོག་ན། གང་གིས་རྟེན་ཅིང་འབྲེལ་བར་འབྱུང་། །འགག་པ་མེད་པ་སྐྱེ་མེད་པ། །ཆད་
པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །ཞེས་བྱ་བའི་ཚིག་མང་པོ་དེ་སྙེད་སྨྲས་པས། དེའི་ཕྱིར་མདོ་བྱེད་པས་ཉེས་པར་སྨྲས་པ་ཉིད་ཡིན་ནོ་
ཞེས་ཟེར་བས་དེའི་ལན་དུ། རྟེན་ཅིང་འབྲེལ་བར་འབྱུང་ཞེས་བྱ་བས་ནི་གང་གི་ཕྱིར་ཁྱད་པར་བསྟན་ཀྱང་ཁྱད་པར་གྱི་གཞིའི་མིང་མ་བསྟན་ན་དེ་མི་རྟོགས་པས་དེ་བསྟན་པ་ཡིན་ནོ་ཞེས་བྱ་བ་སྨྲས་སོ། །དེ་ལ་གང་གི་ཕྱིར་ཞེས་བྱ་བའི་སྒྲ་ནི་འདི་ལྟར་ཞེས་བྱ་བའི་དོན་ཏེ། འདི་ལྟར་ཁྱད་པར་བསྟན་ཀྱང་ཁྱད་པར་
གྱི་གཞིའི་མིང་མ་བསྟན་ན་དེ་མི་རྟོགས་པས། དེའི་ཕྱིར་རྟེན་ཅིང་འབྲེལ་བར་འབྱུང་བ་ཞེས་ཁྱད་པར་གྱི་གཞིའི་མིང་དངོས་སུ་བསྟན་ཏོ་ཞེས་བྱ་བར་སྦྱར་རོ། །ཁྱད་པར་བསྟན་ཀྱང་ཞེས་བྱ་བ་ནི་ཁྱད་པར་གྱི་གཞི་རྟེན་ཅིང་འབྲེལ་པར་འབྱུང་བ་ཞེས་བྱ་བ་གང་གི་ཁྱད་པར། །འགག་པ་མེད་པ་སྐྱེ་མེད་པ། །ཆད་པ་མེད་པ་

རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་ཞེས་བྱ་བ་དག་བསྟན་ཀྱང་ངོ་། །ཁྱད་པར་གྱི་གཞིའི་མིང་མ་བསྟན་ན་ཞེས་བྱ་བ་ནི་འགག་པ་མེད་པ་སྐྱེ་མེད་པ་ཞེས་བྱ་བ་ལ་སོགས་པ་ཁྱད་པར་དེ་དག་གི་གཞི་རྟེན་ཅིང་འབྲེལ་བར་འབྱུང་ཞེས་བྱ་བའི་མིང་མ་
བསྟན་ནའོ། །དེ་མི་རྟོགས་པས་ཞེས་བྱ་བ་ནི། འགག་པ་མེད་པ་སྐྱེ་མེད་པ། །ཞེས་བྱ་བ་ལ་སོགས་པ་ཁྱད་པར་དེ་དག་གང་གི་ཡིན་པ་དེ་མི་རྟོགས་པས་སོ། །དེ་བསྟན་པ་ཡིན་ནོ་ཞེས་བྱ་བ་ནི་རྟེན་ཅིང་འབྲེལ་བར་འབྱུང་ཞེས་བྱ་བ་ཁྱད་པར་གྱི་གཞི་དེ་བསྟན་པ་ཡིན་ནོ། །ཅི་སྟེ་གང་གིས་རྟེན་ཅིང་འབྲེལ་པར་འབྱུང་
བ་བསྟན་པ་རྫོགས་པའི་སངས་རྒྱས་སྨྲ་བ་རྣམས་ཀྱི། དམ་པ་དེ་ལ་ཕྱག་འཚལ་ལོ། །ཞེས་བྱ་བ་དེ་ཙམ་ཞིག་བརྗོད་དུ་ཟིན་ན་ཡང་། རྟེན་ཅིང་འབྲེལ་པར་འབྱུང་བ་དེ་ནི་མཚན་ཉིད་ཇི་ལྟ་བུ་ཡིན་པ་མི་རྟོགས་པས་དེའི་ཕྱིར་མཚན་ཉིད་ཀྱི་གཞི་དང་མཚན་ཉིད་གཉི་ག་སྨོས་སོ། །མདོ་དག་ཀྱང་མཚན་ཉིད་ཀྱི་གཞི་དང་
མཚན་ཉིད་དག་སྨོས་པར་བྱེད་པས་དེའི་ཕྱིར་སློབ་དཔོན་གྱིས་ལེགས་པར་གསུངས་པ་ཡིན་ནོ། །རྟེན་ཅིང་འབྲེལ་པར་འབྱུང་ཞེས་བྱ་བ་ལ་ཞེས་བྱ་བའི་སྐབས་འདིར་ནི་སློབ་དཔོན་རྣམས་ཀྱི་བློ་ཐ་དད་པའི་བྱེ་བྲག་སྟོན་ཏོ། །ཁ་ཅིག་ན་རེ། རྟེན་ཅིང་ཞེས་བྱ་བའི་ཚིག་གི་ཕྲད་ནི་ཟློས་པའི་དོན་ཡིན་པའི་ཕྱིར་དང་། འབྲེལ་
པར་ཞེས་བྱ་བ་ནི་ཕྲད་པའི་དོན་ཡིན་པའི་ཕྱིར་དང་། འབྱུང་ཞེས་བྱ་བའི་སྒྲ་ནི་སྐྱེ་བའི་དོན་ཡིན་པའི་ཕྱིར་རྟེན་ཅིང་འབྲེལ་བར་འབྱུང་བ་སྟེ། དེ་དང་དེ་ལ་རྟེན་ཅིང་ཕྲད་ནས་འབྱུང་བའོ་ཞེའོ་ཞེས་བྱ་བ་ལ། ཁ་ཅིག་ན་རེ་ཞེས་བྱ་བ་ནི་དབུ་མ་པའི་གྲུབ་པའི་མཐའ་སྨྲ་བ་ཁ་ཅིག་ན་རེ། རྟེན་ཅིང་ཞེས་བྱ་བའི་ཚིག་གི་ཕྲད་
ནི་ཟློས་པའི་དོན་ཡིན་པའི་ཕྱིར་དང་ཞེས་བྱ་བ་ནི་རྒྱུ་དང་རྐྱེན་སོ་སོར་ངེས་པ་དེ་དང་དེ་ལ་རྟེན་ཅིང་ཞེས་བྱ་བའི་ཚིག་གི་ཕྲད་དེ་ནི་ཟློས་པའི་དོན་ཡིན་པའི་ཕྱིར་རྟེན་ཅིང་ཞེས་བྱ་བར་སྦྱར་རོ། །ཟློས་པའི་དོན་ཡིན་པའི་ཕྱིར་ཞེས་བྱ་བ་ནི་རྒྱུ་དང་རྐྱེན་སོ་སོར་ངེས་པ་དེ་དང་དེ་ལ་རྟེན་ཅིང་ཞེས་ཟློས་པའི་ཕྱིར་ཏེ། དཔེར་ན་ཡུལ་
འདི་ན་གྲོང་དང་གྲོང་དག་ཉམས་དགའོ་ཞེས་བྱ་བ་ལྟ་བུའོ། །འབྲེལ་པར་ཞེས་བྱ་བ་ནི་ཕྲད་པའི་དོན་ཡིན་པའི་ཕྱིར་དང་ཞེས་བྱ་བ་ནི་རྒྱུ་དང་། རྐྱེན་སོ་སོར་ངེས་པ་དེ་དང་དེ་དག་དང་འབྲས་བུ་གང་ཡིན་པར་ཕྲད་ཅིང་འབྲེལ་པའི་དོན་ཡིན་པའི་ཕྱིར་ཏེ། དཔེར་ན་སྲང་མདའི་མཐོན་དམན་ཕྲད་ཅིང་འབྲེལ་པ་ཞེས་བྱ་བ་ལྟ་

བུའོ། །འབྱུང་ཞེས་བྱ་བའི་སྒྲ་ནི་སྐྱེ་བའི་དོན་ཡིན་པའི་ཕྱིར་ཞེས་བྱ་བ་ནི་འབྲས་བུ་མཚན་ཉིད་འབྱུང་ཞིང་སྐྱེ་བའི་དོན་ཡིན་པའི་ཕྱིར་རོ། །རྟེན་ཅིང་འབྲེལ་བར་འབྱུང་བ་སྟེ་ཞེས་བྱ་བ་ནི་དེ་ལྟར་རྒྱུ་དང་རྐྱེན་སོ་སོར་ངེས་པ་དེ་དང་དེ་དག་ལ་རྟེན་ཅིང་འབྲེལ་བར་འབྱུང་བའི་ཕྱིར་རྟེན་ཅིང་འབྲེལ་བར་འབྱུང་བ་
སྟེ་ཞེས་བྱ་བའི་ཐ་ཚིག་གོ། །དེ་དང་དེ་ལ་རྟེན་ཅིང་ཕྲད་ནས་འབྱུང་བའོ་ཞེས་བྱ་བ་ནི་ཚིག་གི་དོན་སྔ་མ་དག་གི་མཇུག་བསྡུ་བ་བསྟན་ཏེ། རྒྱུ་དང་རྐྱེན་སོ་སོར་ངེས་པ་དེ་དང་དེ་ལ་རྟེན་ཅིང་ཕྲད་ནས་འབྲས་བུ་འབྱུང་བའོ་ཞེས་བྱ་བའི་ཐ་ཚིག་གོ་ཞེའོ་ཞེས་བྱ་བ་ནི་འགྲེལ་པ་བྱེད་པ་རང་ཉིད་མ་ཡིན་པ་དབུ་མ་པའི་གྲུབ་པའི་མཐའ་
སྨྲ་བ་ཁ་ཅིག་ན་རེ་དེ་སྐད་ཟེར་རོ་ཞེས་བྱ་བའི་ཐ་ཚིག་གོ། །གཞན་དག་ན་རེ་སོ་སོར་འཇིག་པ་དང་ལྡན་པ་རྣམས་ཀྱི་འབྱུང་བ་ནི་རྟེན་ཅིང་འབྲེལ་པར་འབྱུང་བའོ་ཞེའོ་ཞེས་བྱ་བ་ལ། གཞན་དག་ན་རེ་ཞེས་བྱ་བ་ནི་དབུ་མ་པའི་གྲུབ་པའི་མཐའ་སྨྲ་བ་གཞན་དག་ན་རེའོ། །སོ་སོར་འཇིག་པ་དང་ལྡན་པ་རྣམས་ཀྱི་འབྱུང་བ་
ཞེས་བྱ་བ་ནི་རྒྱུ་དང་རྐྱེན་སོ་སོར་ངེས་པ་སྐད་ཅིག་སོ་སོ་རེ་རེ་ལ་འཇིག་པ་དང་ལྡན་པའི་འབྲས་བུ་རྣམས་ཀྱི་ཚོགས་ཤིང་འབྱུང་བ་སྟེ། ཕྲད་ནས་འབྱུང་བ་ཞེས་བྱ་བའི་ཐ་ཚིག་གོ། །རྟེན་ཅིང་འབྲེལ་པར་འབྱུང་བའོ་ཞེས་བྱ་བས་ནི་ཚིག་གི་དོན་སྔ་མའི་མཇུག་བསྡུ་བ་བསྟན་ཏེ། རྒྱུ་དང་རྐྱེན་སོ་སོར་ངེས་པ་སྐད་ཅིག་སོ་
སོ་རེ་རེ་ལ་འཇིག་པ་དང་ལྡན་པའི་འབྲས་བུ་རྣམས་ཀྱི་ཚོགས་ཤིང་འབྱུང་བ་གང་ཡིན་པ་དེ་ནི་རྟེན་ཅིང་འབྲེལ་པར་འབྱུང་བའོ་ཞེས་བྱ་བར་སྟོན་ཏོ་ཞེའོ་ཞེས་བྱ་བ་ནི། འགྲེལ་པ་བྱེད་པ་རང་ཉིད་མ་ཡིན་པ་དབུ་མ་པའི་གྲུབ་པའི་མཐའ་སྨྲ་བ་གཞན་དག་དེ་སྐད་ཟེར་རོ་ཞེས་བྱ་བའི་ཐ་ཚིག་གོ། །གཞན་མ་ཡིན་པ་ནི་དེ་ཡང་
མི་རུང་སྟེ། མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་འབྱུང་ངོ་ཞེས་གསུངས་པ་འདི་ལ་དོན་གཉི་ག་མེད་པའི་ཕྱིར་རོ་ཞེས་བྱ་བ་ལ། གཞན་མ་ཡིན་པ་ནི་ཞེས་བྱ་བ་ནི་གཞན་མ་ཡིན་པས་རང་ཉིད་ཡིན་ཏེ། འགྲེལ་པ་བྱེད་པ་ཉིད་ཡིན་ནོ། །དེའི་ཕྱིར་འགྲེལ་པ་བྱེད་པ་ཉིད་ནི་དབུ་མ་པའི་
གྲུབ་པའི་མཐའ་སྨྲ་བ་སྔ་མ་དག་གཉིས་ཀྱིས་སྨྲས་པ་དེ་གཉི་ག་ཡང་མི་རུང་སྟེ་ཞེས་ཟེར་བར་སྦྱར་རོ། །དེ་ཡང་མི་རུང་སྟེ་ཞེས་བྱ་བ་ནི་དབུ་མ་པའི་གྲུབ་པའི་མཐའ་སྨྲ་བ་སྔ་མ་གཉིས་ཀྱིས་རྣམ་པར་བཤད་པ་དེ་གཉི་ག་ཡང་མི་རུང་སྟེའོ། །མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་འབྱུང་ངོ་ཞེས་

གསུངས་པ་འདི་ལ་དོན་གཉི་ག་མེད་པའི་ཕྱིར་རོ་ཞེས་བྱ་བ་ལ་ནི། དེ་དང་དེ་ལ་རྟེན་ཅིང་ཕྲད་ནས་འབྱུང་བའོ་ཞེས་བྱ་བ་དང་། སོ་སོར་འཇིག་པ་དང་ལྡན་པ་རྣམས་ཀྱི་འབྱུང་བ་ཞེས་བྱ་བའི་དོན་དེ་གཉི་ག་མེད་པའི་ཕྱིར་ཏེ། དེ་དང་དེ་ལ་རྟེན་ཅིང་ཕྲད་ནས་འབྱུང་བ་ཞེས་བྱ་བའི་དོན་དེ་ཇི་ལྟར་མེད་ཅེ་ན། དེའི་ཕྱིར་ལུང་
ལས། དེ་ནི་མིག་དང་གཟུགས་ལ་མེད། །དེ་གཉིས་བར་ནའང་ཡོད་མ་ཡིན། །གང་དུ་དེ་ནི་གནས་འགྱུར་བ། །དེ་ཡོད་མ་ཡིན་དེ་མེད་མིན། །ཞེས་གསུངས་པས། ལུང་དེས་ན་མིག་གི་རྣམ་པར་ཤེས་པ་ནི་མིག་ལ་ཡང་མེད། གཟུགས་ལ་ཡང་མེད། གཉི་གའི་བར་ན་ཡང་མེད་དེ། མིག་གི་རྣམ་པར་ཤེས་པ་
དེ་གང་དུ་གནས་པར་འགྱུར་བ་དེ་ནི་ཡོད་པ་ཡང་མ་ཡིན། མེད་པ་ཡང་མ་ཡིན་པས་དེའི་ཕྱིར་མིག་གི་རྣམ་པར་ཤེས་པ་འབྱུང་བ་ནི་མེད་པ་ཡིན་ལ། མིག་གི་རྣམ་པར་ཤེས་པ་བདག་ཉིད་མེད་པ་དེས་དེ་འབྱུང་བའི་རྒྱུ་དང་རྐྱེན་མིག་དང་གཟུགས་དང་སྣང་བ་དང་ནམ་མཁའ་དང་དེ་དག་འབྱུང་བའི་ཡིད་
ལ་བྱེད་པ་ལ་སོགས་པ་དེ་དག་དེ་ལ་ཇི་ལྟར་རྟེན་ཅིང་ཕྲད་པར་རུང་སྟེ་མི་རུང་ངོ་། །གལ་ཏེ་མིག་གི་རྣམ་པར་ཤེས་པ་ཡོད་ན་ནི་དེ་དག་དང་ཕྲད་པར་ཡང་རུང་མོད་ཀྱི། ཡོད་ན་འབྱུང་བར་ཡང་བྱ་མི་དགོས་པས་དེའི་ཕྱིར་མིག་གི་རྣམ་པར་ཤེས་པ་མེད་པ་རྐྱེན་དང་མི་ཕྲད་པའི་ལུང་དེས་ན་དེ་དང་དེ་ལ་རྟེན་
ཅིང་ཕྲད་ནས་འབྱུང་བ་ཞེས་བྱ་བ་དེ་མེད་དོ། །སོ་སོར་འཇིག་པ་དང་ལྡན་པ་རྣམས་ཀྱི་འབྱུང་བ་ཞེས་བྱ་བའི་དོན་དེ་ཇི་ལྟར་མེད་ཅེ་ན། འདི་ལྟར་རྒྱུ་དང་རྐྱེན་སོ་སོར་ངེས་པ་སྐད་ཅིག་སོ་སོ་རེ་རེ་ལ་འཇིག་པ་གང་དག་ཡིན་པ་དེ་དག་ནི་འབྱུང་བའི་ཚེ་ཡོངས་སུ་མ་གྲུབ་པའི་གནས་སྐབས་ཁོ་ནར་སྐད་ཅིག་རེ་རེ་ལ་
འགག་ཅིང་མེད་པར་འགྱུར་བས་ཚོགས་ཤིང་འབྲས་བུ་བསྐྱེད་པར་འགྱུར་བ་མེད་པས་འབྲས་བུ་འབྱུང་བ་ཡང་མེད་དེ། འབྲས་བུ་ཡང་འབྱུང་བའི་ཚེ་ཉིད་ན་སྐད་ཅིག་རེ་རེ་ལ་འཇིག་པར་འགྱུར་བའི་སོ་སོར་འཇིག་པ་དང་ལྡན་པ་རྣམས་ཀྱི་འབྱུང་བ་ཞེས་བྱ་བ་དེ་ཡང་མེད་དོ། །གལ་ཏེ་དེ་ལྟར་དོན་དེ་གཉི་ག་མེད་པས་
དབུ་མ་པའི་གྲུབ་པའི་མཐའ་སྨྲ་བ་དེ་གཉིས་ཀྱི་གཞུང་ལུགས་མི་རུང་ན། འོ་ན་འདིར་རྟེན་ཅིང་འབྲེལ་པར་འབྱུང་བའི་དོན་གང་ཡིན་ཞེ་ན། དེའི་ཕྱིར་འདི་ཡོད་པས་འདི་འབྱུང་ལ་འདི་སྐྱེས་པའི་ཕྱིར་འདི་སྐྱེ་བ་སྟེ་ཞེས་བྱ་བ་རྐྱེན་འདི་དང་ལྡན་པ་ཉིད་ཀྱི་དོན་ནི་རྟེན་ཅིང་འབྲེལ་བར་འབྱུང་བའི་དོན་ཏོ་ཞེས་ཟེར་རོ་ཞེས་བྱ་བ་

སྨྲས་ཏེ། འདིར་འགྲེལ་པ་བྱེད་པ་ཉིད་ནི་རྟེན་ཅིང་འབྲེལ་བར་འབྱུང་བའི་དོན་རྣམ་པ་དེ་ལྟ་བུ་ཡིན་ནོ་ཞེས་ཟེར་རོ་ཞེས་བྱ་བར་སྦྱར་རོ། །དེ་ལ་འདི་ཡོད་པས་འདི་འབྱུང་ལ་ཞེས་བྱ་བ་ནི་ཕྱི་རོལ་གྱི་ས་བོན་དང་། ས་དང་ཆུ་དང་མེ་དང་རླུང་དང་ནམ་མཁའ་དང་དུས་ཀྱི་ཁམས་ཞེས་བྱ་བ་དག་ཡོད་པས་མྱུ་གུ་
འབྱུང་བ་དང་། ནང་གི་ལས་དང་ཉོན་མོངས་པ་དང་། ཁུ་ཆུ་དང་། ཁྲག་དང་། ས་དང་། ཆུ་དང་། མེ་དང་། རླུང་དང་། ནམ་མཁའ་དང་། རྣམ་པར་ཤེས་པ་ཞེས་བྱ་བ་དག་ཡོད་པས། མེར་མེར་པོ་དང་། ནུར་ནུར་པོ་དང་། ནར་ནར་པོ་དང་། མཁྲང་གྱུར་དང་། རྐང་ལག་འགྱུས་པ་དག་འབྱུང་བའོ། །འདི་སྐྱེས་པའི་
ཕྱིར་འདི་སྐྱེ་བ་སྟེ་ཞེས་བྱ་བ་ནི་ཕྱི་རོལ་གྱི་སྐྱེ་བ་དང་མི་མཐུན་པའི་རྐྱེན་མེད་པས་མྱུ་གུ་སྐྱེས་པའི་ཕྱིར་འདབ་མ་དང་། སྦུ་གུ་དང་། སྡོང་པོ་དང་། སྦལ་མིག་དང་། མེ་ཏོག་དང་། གྲ་མ་དང་། སྦུན་པ་དང་། སྲུས་དང་། འབྲས་ཐུག་པོ་ཆེ་རྣམས་སྐྱེ་བ་དང་། ནང་གི་མི་མཐུན་པའི་རྐྱེན་མེད་པས་མེར་མེར་པོ་དང་། ནུར་
ནུར་པོ་དང་། ནར་ནར་པོ་དང་། མཁྲང་གྱུར་དང་། རྐང་ལག་འགྱུས་པ་རྣམས་སྐྱེས་པའི་ཕྱིར་བཙའ་བའི་གནས་སྐབས་ཀྱི་ལུས་སྐྱེ་བའོ། །ཡང་ན་འདི་ཡོད་པས་འདི་འབྱུང་བ་ཞེས་བྱ་བ་ནི་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་དབང་པོ་རྣམས་དང་། གཟུགས་དང་། སྒྲ་དང་། དྲི་དང་།
རོ་དང་། རེག་བྱ་དང་། ཆོས་རྣམས་ཡོད་པས་འབྲས་བུ་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རྣམ་པར་ཤེས་པ་དག་འབྱུང་བའོ། །འདི་སྐྱེ་བའི་ཕྱིར་འདི་སྐྱེ་བ་སྟེ་ཞེས་བྱ་བ་ནི་མིག་གི་རྣམ་པར་ཤེས་པ་ལ་སོགས་པ་སྐྱེས་པ་ན་དེ་དག་དང་ལྷན་ཅིག་འབྱུང་བ། ཚོར་བ་དང་།
སེམས་པ་དང་། འདུ་ཤེས་དང་། འདུན་པ་དང་། རེག་པ་ལ་སོགས་པ་ས་མང་པོ་པ་དག་སྐྱེ་བར་འགྱུར་བའོ། །དེ་བཞིན་དུ་བུམ་པ་དང་། སྣམ་བུ་ལ་སོགས་པ་དག་ལ་ཡང་སྦྱར་བར་བྱའོ། །རྐྱེན་འདི་དང་ལྡན་པ་ཉིད་ཀྱི་དོན་ཞེས་བྱ་བ་ལ། རྐྱེན་འདི་དང་ལྡན་པ་ཉིད་ཅེས་བྱ་བ་ནི་རྒྱུ་དང་རྐྱེན་ལ་རག་ལས་པའི་སྐྱེ་
བ་ཉིད་དེ། འདི་ཡོད་པས་འདི་འབྱུང་ལ། འདི་སྐྱེས་པའི་ཕྱིར་འདི་སྐྱེ་བས་ཏེ་ཞེས་ཇི་སྐད་སྔར་བསྟན་མ་ཐག་པ་ཉིད་ཡིན་ནོ། །རྟེན་ཅིང་འབྲེལ་བར་འབྱུང་བའི་དོན་ཏོ་ཞེས་ཟེར་རོ་ཞེས་བྱ་བ་ནི་འདི་ཡོད་པས་འདི་འབྱུང་ལ། འདི་སྐྱེས་པའི་ཕྱིར་འདི་སྐྱེ་བ་སྟེ་ཞེས་བྱ་བ་རྐྱེན་འདི་དང་ལྡན་པ་ཉིད་ཀྱི་དོན་ནི་རྟེན་ཅིང་

འབྲེལ་བར་འབྱུང་བའི་དོན་ཏོ་ཞེས་འགྲེལ་པ་བྱེད་པ་ཉིད་ཟེར་རོ་ཞེས་པའི་ཐ་ཚིག་གོ། །འདིར་ཁ་ཅིག་ན་རེ། གལ་ཏེ་འབྱུང་བའི་སྔ་རོལ་དུ་འབྲས་བུ་རྐྱེན་དང་ཕྲད་ནས་ཕྱིས་འབྱུང་ན་ནི་དེའི་ཕྱིར་རྟེན་ཅིང་འབྲེལ་པར་འབྱུང་ཞེས་བྱ་བར་འགྱུར་བ་ཞིག་ན་ནི། འབྱུང་བའི་སྔ་རོལ་དུ་འབྲས་བུ་རྐྱེན་དང་མི་ཕྲད་
དེ་མེད་པའི་ཕྱིར་རོ། །དེ་ལྟ་བས་ན་རྟེན་ཅིང་འབྲེལ་བར་འབྱུང་བའི་སྒྲ་མི་འགྲུབ་པོ། །གལ་ཏེ་རྟེན་ཅིང་འབྲེལ་པར་ཞེས་བྱ་བ་དང་། འབྱུང་ཞེས་བྱ་བ་གཉིས་དུས་གཅིག་ཏུ་ཁས་ལེན་པས་ཉེས་པ་མེད་དོ་ཞེ་ན་ཡང་། རྟེན་ཅིང་འབྲེལ་པར་འབྱུང་བའི་སྒྲ་ལ་བྱ་བ་གཉིས་དུས་གཅིག་ན་མེད་དོ། བར་
ཞེས་བརྗོད་པའི་ཕྱིར་དཔེར་ན་ཁྲུས་བྱས་ཏེ་བཟའ་ཞེས་བྱ་བ་བཞིན་ནོ། །བྱེད་པ་པོ་མེད་པར་ཡང་གཞི་མེད་པའི་བྱ་བ་མི་རུང་སྟེ། མེད་པའི་ཕྱིར་མོ་གཤམ་གྱི་བུ་འགྲོ་བ་བཞིན་ནོ་ཞེས་ཟེར་རོ་ཞེས་བྱ་བ་ནི་འདི་བརྡ་སྤྲོད་པ་དག་སངས་རྒྱས་པ་ལ་རྒོལ་བའི་ཚིག་ཡིན་ནོ། །དེ་ལ་འདིར་ཞེས་བྱ་བ་ནི་ལུང་དང་རིགས་
པས་རྟེན་ཅིང་འབྲེལ་བར་འབྱུང་བའི་དོན་བསྒྲུབས་པ་ལ་ཕས་ཀྱི་རྒོལ་བ་ཐམས་ཅད་ཀྱི་སྙིང་བསྐམ་པར་གྱུར་པའི་སྐབས་འདིར་ཏེ། འདི་ལྟར་རྒྱུ་མེད་པར་སྨྲ་བ་རྣམས་དང་། རྒྱུ་མི་མཐུན་པར་སྨྲ་བ་ཐམས་ཅད་ཀྱི་སྙིང་བསྐམ་པར་གྱུར་པའི་ཕྱིར་རོ། །ཁ་ཅིག་ན་རེ་ཞེས་བྱ་བ་ནི་དེ་དག་ཉིད་འདིར་སྐབས་མེད་
བཞིན་དུ་བརྡ་སྤྲོད་པའི་ཐམ་ལག་གི་རྗེས་སུ་ཞུགས་ནས་དགྲས་རྒོལ་བར་བྱེད་པ་ཁ་ཅིག་ན་རེའོ། །གལ་ཏེ་འབྱུང་བའི་སྔ་རོལ་དུ་ཞེས་བྱ་བ་ནི་གལ་ཏེ་འབྲས་བུ་འབྱུང་བའི་དུས་ཀྱི་སྔ་རོལ་དུ་སྟེ། ཇི་སྲིད་དུ་འབྲས་བུ་མ་བྱུང་བའི་དུས་དེའི་ཚེའོ། །འབྲས་བུ་ཞེས་བྱ་བ་ནི་མྱུ་གུ་ཞེས་བྱ་བའམ། མིག་གི་རྣམ་པར་ཤེས་
པ་ཞེས་བྱ་བའི་འབྲས་བུའོ། །རྐྱེན་དང་ཕྲད་ནས་ཞེས་བྱ་བ་ནི་རྐྱེན་གྱི་གན་དུ་འགྲོ་ཞིང་རྐྱེན་དང་ཕྲད་པ་འམ། རྐྱེན་རྙེད་ནས་སོ། །ཕྱིས་འབྱུང་ན་ནི་ཞེས་བྱ་བ་ནི་དེའི་འོག་ཏུ་འབྲས་བུ་མྱུ་གུ་ཞེས་བྱ་བ་འམ། མིག་གི་རྣམ་པར་ཤེས་པ་ཞེས་བྱ་བ་དེ་འབྱུང་ན་ནིའོ། །དེའི་ཕྱིར་རྟེན་ཅིང་འབྲེལ་པར་འབྱུང་བ་ཞེས་
བྱ་བར་འགྱུར་བ་ཞིག་ན་ཞེས་བྱ་བ་ནི་སངས་རྒྱས་པ་རྣམས་ཀྱིས་རྟེན་ཅིང་འབྲེལ་བར་འབྱུང་བ་ཞེས་སྨྲར་རུང་བ་ཞིག་ནའོ། །ཅི་སྟེ་སངས་རྒྱས་པ་རྣམས་རྟེན་ཅིང་འབྲེལ་བར་འབྱུང་བ་ཞེས་བྱ་བར་འགྲུབ་པར་བྱ་བའི་ཕྱིར་རང་གི་ལུང་བོར་ཏེ་འབྱུང་བའི་སྔ་རོལ་དུ་འབྲས་བུ་རྐྱེན་དང་ཕྲད་ནས་ཕྱིས་འབྱུང་ངོ་ཞེས་ཟེར་ན། དེའི་

ཕྱིར་འབྱུང་བའི་སྔ་རོལ་དུ་འབྲས་བུ་རྐྱེན་དང་མི་ཕྲད་དེ་ཞེས་བྱ་བར་སྨྲས་སོ། །ཅིའི་ཕྱིར་འབྱུང་བའི་སྔ་རོལ་དུ་འབྲས་བུ་རྐྱེན་དང་མི་ཕྲད་ཅེ་ན། དེའི་ཕྱིར་མེད་པའི་ཕྱི་རོལ་ཞེས་བྱ་བ་སྨྲས་ཏེ། འབྱུང་བའི་སྔ་རོལ་དུ་འབྲས་བུ་རྐྱེན་དང་ཕྲད་ཅེས་བྱ་བར་ནི་དེའི་ཚེ་ན་འབྲས་བུ་བདག་ཉིད་མ་བྱུང་ཞིང་
མེད་པའི་ཕྱིར་རྐྱེན་དང་མི་ཕྲད་དེ། འདི་ལྟར་སངས་རྒྱས་པ་རྣམས་ཀྱི་ལུང་ལས་འདུས་བྱས་ནི་མ་བྱུང་བ་ལས་འབྱུང་ངོ་ཞེས་ཟེར་བའི་ཕྱིར་རོ། །དེ་ལྟ་བས་ན་རྟེན་ཅིང་འབྲེལ་པར་འབྱུང་བའི་སྒྲ་མི་འགྲུབ་པོ་ཞེས་བྱ་བ་ནི་ཇི་སྐད་བསྟན་པའི་གཏན་ཚིགས་དེས་ན། སངས་རྒྱས་རྣམས་ཀྱི་རྟེན་ཅིང་འབྲེལ་པར་འབྱུང་བ་
ཞེས་བྱ་བའི་སྒྲ་དེ་མི་འགྲུབ་པོ། །གལ་ཏེ་རྟེན་ཅིང་འབྲེལ་བར་ཞེས་བྱ་བ་དང་འབྱུང་བ་ཞེས་བྱ་བ་གཉིས་དུས་གཅིག་ཏུ་ཁས་ལེན་པས་ཉེས་པ་མེད་དོ་ཞེ་ན་ཡང་ཞེས་བྱ་བ་ནི་བར