Luận tạng Tây Tạng (Tengyur) — Tập 67

ིང་དང་ཆེན་པོ་དང་། བསམ་པ་རྫོགས་པའི་རྒྱུར་ཤེས་རབ་བསྐྱེད་ཅིག་ཅེས་ཡང་དང་ཡང་དུ་གསོལ་བ་བཏབ་པའོ། །

བྱིན་གྱིས་བརླབ་པ་དང་ཞུགས་པའི་རང་བཞིན་གང་ཞེ་ན། བཅོམ་ལྡན་འདས་སུམ་ཅུ་རྩ་གསུམ་པའི་ཞེས་བྱ་བ་ལ་སོགས་པ་སྨོས་ཏེ། སུམ་ཅུ་རྩ་གསུམ་པའི་ལྷའི་རིས་ཞེས་བྱ་བ་ནི་ག་ཎ་པ་ཏི་ལ་སོགས་པ་སུམ་ཅུ་རྩ་གཉིས་དང་། བརྒྱ་བྱིན་གྱི་རིས་ཏེ་སུམ་ཅུ་རྩ་གསུམ་པའི་ལྷའི་རིས་སོ། །
འདི་ཉིད་ནས་ལྷའི་བུ་ནོར་བུ་དྲི་མ་མེད་པའི་འོད་ཅེས་བྱ་བ་ཅིག་ཤི་འཕོས་ཏེ་དུས་ལས་འདས་ནས་ཞེས་བྱ་བ་ནི་ལས་ཅི་ཞིག་གི་སྟོབས་ཀྱིས་ཚེ་འཕོས་པའོ། །དགུང་བདུན་ལགས་ན་ཞེས་བྱ་བ་ནི་ལྷའི་ཞག་བདུན་ལ་མིའི་ལོ་བདུན་བརྒྱ་ལོན་པའོ། །བཅོམ་ལྡན་འདས་དེ་གང་དུ་སྐྱེས་ཞེས་བྱ་
བ་ནི་གནས་གང་དུ་སྐྱེས་པ་དྲིས་པའོ། །བདེ་བའམ་སྡུག་བསྔལ་ཅི་ཞིག་མྱོང་བར་འགྱུར་ཞེས་བྱ་བ་ནི་འབྲས་བུ་དྲིས་པའོ། །བཅོམ་ལྡན་འདས་བཤད་དུ་གསོལ། བདེ་བར་གཤེགས་པ་བཤད་དུ་གསོལ་ཞེས་བྱ་བ་ནི་ཡིད་ལ་གཅགས་ནས་ཡང་དང་ཡང་དུ་གསོལ་བ་བཏབ་པའོ། །
བཅོམ་ལྡན་འདས་ཀྱིས་བཀའ་སྩལ་པ་ལྷའི་དབང་པོ་ཇི་སྟེ་དུས་ལ་བབ་པར་ཤེས་ན་ཞེས་བྱ་བ་ནི། ལྷའི་དབང་པོ་སྤྲུལ་པ་ཡིན་པའི་ཕྱིར་དུས་མཁྱེན་པས་སོ། །ཉོན་ཅིག་ཅེས་བྱ་བ་ནི་ཐོས་པའི་རང་བཞིན་གྱི་ཤེས་རབ་ཀྱིས་ཟུང་ཤིག་པའི་དོན་ཏོ། །ལྷའི་དབང་པོས་གསོལ་བ་བཅོམ་
ལྡན་འདས་འདི་ནི་དུས་ལ་བབ་པ་ལགས་སོ། །བདེ་བར་གཤེགས་པ་འདི་ནི་དུས་ལ་བབ་པ་ལགས་སོ་ཞེས་གསུངས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་ལྷའི་བུ་ནོར་བུ་དྲི་མ་མེད་པའི་འོད་ཅེས་བྱ་བ་དེ་འདི་ནས་ཤི་འཕོས་ནས་མྱོང་ཞིང་མྱོང་བར་འགྱུར་རོ་ཞེས་
བྱ་བར་སྦྱར་རོ། །ཇི་ལྟ་བུ་ཞིག་ཅེ་ན་དམྱལ་བ་ཆེན་པོར་ལོ་སྟོང་ཕྲག་བཅུ་གཉིས་ཀྱི་བར་དང་། དམྱལ་བ་ཆུང་ངུ་རྣམས་སུ་ལོ་སྟོང་ཕྲག་བརྒྱད་དང་། བྱོལ་སོང་དང་ཡི་དགས་ཀྱི་གནས་སུ་ལོ་བརྒྱ་ཕྲག་བརྒྱད་དང་། མིའི་སྐྱེ་གནས་སུ་རྣ་བ་དང་སྨྲ་བའི་སྐྱོན་ཅན་དུ་ལོ་སྟོང་ཕྲག་དྲུག་ཅུ་དང་
སྡུག་བསྔལ་བརྒྱུད་པ་དང་གཞན་ལ་གནོད་པ་བྱེད་པ་དང་ལས་ཀྱི་སྒྲིབ་པ་བརྒྱུད་པས་སྟོང་ཕྲག་བརྒྱད་ཅུ་རྩ་བཞིའི་བར་དུ་སྡུག་བསྔལ་མྱོང་ཞིང་མྱོང་བར་འགྱུར་རོ་ཞེས་ལུང་བསྟན་པ་དང་། དེ་ནས་བརྒྱ་བྱིན་ལ་སོགས་པ་ལྷའི་བུ་ཐམས་ཅད་ཀྱིས་ཐོས་ནས་ཤིན་ཏུ་སྔངས་ཤིང་ཞེས་བྱ་བ་ནི་ངག་གི་སྒོ་

ནས་སྐྲག་སྟེ་སྐྱོ་ནས་ཞེས་བྱ་བ་སེམས་ཀྱི་སྒོ་ནས་ཁ་བུབ་ཏུ་འགྱེལ་བར་གྱུར་ཏོ་ཞེས་བྱ་བ་ལུས་ཀྱི་ཚུལ་གྱིས་འགྱེལ་བར་གྱུར་པའོ། །འདིས་ནི་མོས་པ་སྤྱོད་པའི་ས་ལ་གནས་པའི་བརྒྱ་བྱིན་ལ་སོགས་པ་སྟོན་ཏོ། །དེ་ནས་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །
སྡུག་བསྔལ་ཆེན་པོ་བརྒྱུད་པ་འདི་ལས་བཅོམ་ལྡན་འདས་ཇི་ལྟར་ཐར་བར་འགྱུར། བདེ་བར་གཤེགས་པ་ཇི་ལྟར་ཐར་བར་འགྱུར། བཅོམ་ལྡན་འདས་ཅི་ནས་ཀྱང་སྡུག་བསྔལ་གྱི་ཕུང་པོ་འདི་ལས་རྣམ་པར་གྲོལ་བར་འགྱུར། བདེ་བར་གཤེགས་པ་འདི་བསྐྱབ་ཏུ་གསོལ་ཞེས་ཞུས་པ་དང་། བཅོམ་
ལྡན་འདས་ཀྱིས་བཀའ་སྩལ་པ། སངས་རྒྱས་བྱེ་བ་ཕྲག་བརྒྱད་ཅུ་རྩ་བཞིས་བཤད་པ་འདི་ཉོན་ཅིག་ཅེས་བྱ་བ་ནི་ཕྲག་བརྒྱད་ཅུ་རྩ་བཞི་ནི་ཉེ་བར་མཚོན་པ་སྟེ། སངས་རྒྱས་གྲངས་མེད་པས་བཅོམ་ལྡན་འདས་ལ་བསྐུལ་ཞིང་དུ་མར་སྣང་བའི་ཚུལ་གྱིས་འདི་བཤད་ཅེས་བྱ་བའི་དོན་ཏོ། །འདིས་ནི་གསང་
སྔགས་ཀྱི་སྒོའི་སྤྱད་པ་སྤྱོད་པར་འདོད་པ་རྣམས་ཀྱི་ལུས་ལ་དཀྱིལ་འཁོར་བརྟག་ཅེས་བྱ་བའི་ཐ་ཚིག་གོ། །སྦྱོར་བ་དང་པོའི་ཏིང་ངེ་འཛིན་རྫོགས་སོ།། །།དེ་ནས་ཞེས་བྱ་བ་ལ་སོགས་པས་དཀྱིལ་འཁོར་རྒྱལ་པོ་མཆོག་སྟོན་པ་སྟེ། དེ་ནས་ཞེས་བྱ་བ་ནི་སྦྱོར་བ་དང་པོའི་ཏིང་ངེ་འཛིན་གྱི་རྗེས་ཐོགས་
ལའོ། །ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་ཞེས་བྱ་བ་ནི། དཀྱིལ་འཁོར་སྤྲུལ་ཞིང་གསང་སྔགས་གསུང་བའི་དོན་དུ་སླར་ཡང་ཞེས་པའི་དོན་ཏོ། །མེ་ཏོག་མནྡཱ་ར་བ་དང་ཞེས་བྱ་བ་ལ་སོགས་པ་མེ་ཏོག་དང་རྒྱན་གྱི་ཁྱད་པར་གྱིས་མཆོད་དེ་བསྐོར་བ་དང་ཕྱག་འཚལ་བ་དང་ལེགས་སོ་
ཞེས་བྱ་བས་མཉེས་པར་བྱས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷ་དང་བཅས་པའི་འཇིག་རྟེན་ལ་ཕན་པ་དང་ཞེས་བྱ་བ་ཚེ་ཕྱི་མའི་དོན་དང་། བདེ་བར་བགྱི་བ་དང་ཞེས་བྱ་བ་ཚེ་འདིའི་དོན་དང་མ་འོངས་པའི་སེམས་ཅན་རྣམས་ངན་སོང་གི་རྒྱུད་གསུམ་ལས་ཐར་བར་བགྱི་
བའི་སླད་དུ་ཞེས་བྱ་བ་ནི། དཀྱིལ་འཁོར་ཡོད་ན་དབང་དང་དམ་ཚིག་ཡོད་པའི་ཕྱིར་རོ། །ལེགས་པར་བཤད་དུ་གསོལ་ཞེས་བྱ་བ་ནི་གཟུགས་བརྙན་གྱི་དཀྱིལ་འཁོར་དང་། རང་བཞིན་གྱི་དཀྱིལ་འཁོར་སྤྲུལ་ཞིང་བཤད་དུ་གསོལ་ཞེས་བྱ་བའི་དོན་ཏོ། །དེ་ནས་གཞན་ཡང་སྤྲུལ་པའི་འཁོར་

ཚངས་པ་ལ་སོགས་པ་ལྷ་མང་པོ་རྣམས་ཀྱིས་ཀྱང་འདི་སྐད་ཅེས་གསོལ་ཏོ། །ལེགས་སོ་བཅོམ་ལྡན་འདས་ལེགས་སོ། །བདེ་བར་གཤེགས་པ་ཅི་ནས་ཀྱང་མ་འོངས་པའི་སེམས་ཅན་རྣམས་ཀྱིས་མཚན་ཙམ་ཐོས་པས་ངན་སོང་གསུམ་གྱི་ལམ་ལས་རྣམ་པར་གྲོལ་ཏེ། བདེ་འགྲོ་ལྷའི་འཇིག་
རྟེན་ནས་མིའི་འཇིག་རྟེན་དུ་སྐྱེས་ནས་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ཐོབ་པར་བགྱི་བའི་སླད་དུ་བཤད་པར་གསོལ་ཞེས་བྱ་བ་ནི། དཀྱིལ་འཁོར་དང་སྔགས་དང་འབྲས་བུ་འདི་རྣམས་དང་ལྡན་པས་བཤད་པར་གསོལ་ཞེས་གསོལ་བ་བཏབ་པའོ། །དེ་ནས་བཅོམ་
ལྡན་འདས་ཀྱིས་ཏིང་ངེ་འཛིན་ལ་སྙོམས་པར་བཞུགས་སོ་ཞེས་བྱ་བར་སྦྱར་རོ། །ཅིའི་ཕྱིར་ཞེ་ན། བརྒྱ་བྱིན་དང་ཚངས་པ་ལ་སོགས་པ་ལྷའི་བུ་དེ་དག་དེ་བཞིན་གཤེགས་པ་ཐམས་ཅད་ཀྱི་སྙིང་པོ་འོག་ནས་འབྱུང་བ་བྱིན་གྱིས་བརླབ་པར་བྱ་བའི་ཕྱིར་ཞེས་བྱ་བ་ནི། ཁ་བུབ་ཏུ་འགྱེལ་བ་བསླངས་ཏེ་
རྒྱུད་སྦྱངས་ལ་དམ་ཚིག་དང་དབང་ཐོབ་པར་བྱས་ནས་དཀྱིལ་འཁོར་དུ་ལྷ་དགོད་པའི་དོན་དུའོ། །ཇི་ལྟ་བུ་ཞིག་ལ་ཞེ་ན། གདོན་མི་ཟ་བའི་ཞེས་བྱ་བ་ལ་སོགས་པ་སྨོས་ཏེ་འབྲས་བུ་ཡོད་ཅིང་དོན་ཡོད་ལ་མི་ཆོད་པའི་རྡོ་རྗེ་ངེས་པ་བསྐྱེད་པའི་དོན་དུ་མིང་དེ་སྐད་ཅེས་བྱའོ། །ཏིང་ངེ་འཛིན་ལ་སྙོམས་པར་ཞུགས་
པ་ནི་མངོན་དུ་མཛད་པའོ། །ཏིང་ངེ་འཛིན་འབའ་ཞིག་ཏུ་ཟད་དམ་ཞེ་ན་མ་ཡིན་ཏེ། ཨོཾ་བཛྲ་ཨ་དྷི་དྷིཥྛ་ཛྙཱ་ན་ས་མ་ཡེ་ཧཱུཾ། ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ་སྙོམས་པར་ཞུགས་ནས་གསང་སྔགས་གསུངས་པས་ལྷའི་བུ་རྣམས་ཀྱི་རྒྱུད་སྦྱང་བ་དང་དཀྱིལ་འཁོར་དུ་ཞུགས་པ་བསྟན་ཏོ། །གཞན་ཡང་
སྙོམས་པར་ཞུགས་ནས་ཀྱང་གདོན་མི་ཟ་བར་མི་ཆོད་པའི་རྡོ་རྗེའི་བྱིན་གྱི་རླབས་ཀྱིས་བྱིན་གྱིས་བརླབས་ནས་ཀྱང་ཞེས་བྱ་བས་ནི་དབང་བསྐུར་བ་བསྡུའོ། །གདོན་མི་ཟ་བར་ཞེས་བྱ་བ་ནི་དབང་བསྐུར་བ་ལ་ཐེ་ཚོམ་མེད་པའོ། །མི་ཆོད་པའི་ཞེས་བྱ་བ་ནི་དེའི་འབྲས་བུ་ཆོས་ཀྱི་སྐུའོ། །རྡོ་རྗེའི་བྱིན་གྱི་རླབས་
ཀྱིས་ཞེས་བྱ་བ་ནི་བུམ་པ་རྡོ་རྗེར་བྱིན་གྱིས་བརླབས་པས་སོ། །བྱིན་གྱིས་བརླབས་ནས་ཞེས་བྱ་བ་ནི་ཆུའི་དབང་བསྐུར་ནས་ཏེ། གཞན་ཡང་དབང་ཉི་ཤུ་རྩ་གཅིག་ཀུན་གྱིས་བསྐུར་རོ་ཞེས་བྱ་བའི་ཐ་ཚིག་གོ། །ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་ཞེས་བྱ་བ་ལ་སོགས་པ་ལ་ཡོངས་སུ་སྦྱོང་

བའི་རྒྱལ་པོ་ནི་རྒྱུ་དང་འབྲས་བུ་དང་ངོ་བོ་ཉིད་དང་རྟེན་དང་གནས་སྦྱོང་བ་སྟེ་ཐུགས་ཡང་དག་པའི་ཡེ་ཤེས་སོ། །དེ་སྟོན་པའི་སྒྲ་ལ་ཡང་ཉེ་བར་གདགས་པས་དེ་སྐད་ཅེས་བྱའོ། །དེ་བཞིན་གཤེགས་པ་ཐམས་ཅད་ཀྱི་སྙིང་པོ་འོག་ནས་འབྱུང་བ་འདིའོ། །རང་ཉིད་ཀྱང་ངེས་
པའི་ཡེ་ཤེས་ལས་སྒྲའི་གཟུགས་སུ་ཕྱུང་ངོ་ཞེས་བྱ་བའི་དོན་ཏོ། །ཨོཾ་ཤོ་དྷ་ནི་ཞེས་བྱ་བ་ནས། ཤུདྡྷེ་སྭཱ་ཧཱ་ཞེས་བྱ་བའི་བར་རོ། །རིག་པ་ཆེན་པོ་འདི་བཤད་མ་ཐག་ཏུ་ཅེས་བྱ་བ་ནི་གསུངས་པ་དང་སྤྲུལ་པའོ། །དེའི་ཕན་ཡོན་སེམས་ཅན་ཞེས་བྱ་བ་ལ་སོགས་པས་སྟོན་ཏོ། །དེ་ནས་གཞན་ཡང་
གསང་བའི་སྙིང་པོ་འདི་གསུངས་སོ་ཞེས་བྱ་བ་ལ། དེ་ནས་ཞེས་བྱ་བ་ནི་ཀུན་རིག་གི་གསང་སྔགས་གསུངས་པའི་རྗེས་ཐོགས་ལའོ། །གཞན་ཡང་ཞེས་བྱ་བ་ནི་སླར་ཡང་ཞེས་བྱ་བའི་དོན་ཏོ། །གསང་བའི་སྙིང་པོ་ཞེས་བྱ་བ་ནི། ཐུགས་དང་ཡོན་ཏན་དང་གསུང་དང་ཕྲིན་ལས་སོ། །དེ་སྟོན་
པའི་སྒྲ་ལ་ཡང་ཉེ་བར་གདགས་པས་དེ་སྐད་ཅེས་བྱའོ། །འདི་གསུངས་སོ་ཞེས་བྱ་བ་ནི་འོག་ནས་འབྱུང་བའོ། །ཨོཾ་ཤོ་དྷ་ནི་ཤོ་དྷ་ཡ་སརྦ་ཨ་པ་ཡཱ་ན་ཞེས་བྱ་བ་ནི་ངན་སོང་སྦྱོང་བ་དང་། རིན་ཆེན་ཏོག་དང་། ཤཱཀྱའི་དབང་པོ་དང་། མེ་ཏོག་ཆེར་རྒྱས་རྣམས་ཀྱི་ཐུན་མོང་གི་སྙིང་པོ་ཡིན་
ནོ། །སརྦ་སདྱ་བྷྱ་ཧཱུཾ་ཞེས་བྱ་བ་དང་། ཧཾ་ཞེས་བྱ་བ་དང་། ཏྲ་ཐ་ཨ་ཞེས་བྱ་བ་ནི། རིན་ཆེན་ཏོག་ལ་སོགས་པའི་ཁྱད་པར་གྱི་སྙིང་པོ་སྟེ་ཕྱིས་འབྱུང་བ་ལས་ཤེས་པར་བྱའོ། །ལྷའི་དབང་པོ་གཞན་ཡང་འདི་ནི་དེ་བཞིན་གཤེགས་པ་རྣམས་ཀྱི་སྙིང་པོའོ་ཞེས་བྱ་བ་ནི་བྱང་ཆུབ་ཀྱི་སེམས་དང་
སྦྱིན་པ་དང་ཤེས་རབ་དང་། བརྩོན་འགྲུས་དང་སྙིང་རྗེ་ལ་སོགས་པ་དང་བཅས་པའོ། །དེ་སྟོན་པའི་སྒྲ་ལ་ཡང་དེ་སྐད་ཅེས་བྱའོ། །ཨོཾ་སརྦ་ཨ་པཱ་ཡ་བི་ཤོ་དྷ་ནེ་ཞེས་བྱ་བ་ནི། སངས་རྒྱས་སྤྱན་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་རྣམས་ཀྱི་ཐུན་མོང་གི་སྙིང་པོ་ཡིན་ནོ། །
ཧཱུཾ་ཕཊ་ཅེས་བྱ་བ་དང་། ཏྲཾ་ཧཾ་ཨཿཞེས་བྱ་བ་ནི་ཁྱད་པར་གྱི་སྙིང་པོའོ། །ལྷའི་དབང་པོ་གཞན་ཡང་འདི་ནི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་དང་ཞེས་བྱ་བ་ནི་ཐུགས་སོ། །ཉེ་བའི་སྙིང་པོའོ་ཞེས་བྱ་བ་ནི་རྡོ་རྗེ་ལྟ་བུའི་ཏིང་ངེ་འཛིན་ཏོ། །དེ་སྟོན་པའི་སྒྲ་ལ་ཡང་དེ་སྐད་ཅེས་པའོ། །

ཨོཾ་ཏྲཊ་ཅེས་བྱ་བ་ནི་སྡིག་པ་གཞོམ་པའི་སྙིང་པོའོ། །ལྷའི་དབང་པོ་འདི་ནི་གཞན་ཡང་ངན་སོང་ཐམས་ཅད་སྦྱོང་བའི་སྙིང་པོའོ་ཞེས་བྱ་བ་ནི་ཤར་གྱི་གཙོ་བོའི་ཁྱད་པར་གྱི་སྙིང་པོའོ། །རྡོ་རྗེ་སེམས་དཔའ་ནས་བརྩམས་ཏེ་ལྷག་མ་རྣམས་ཀྱི་བདེ་བ་ཆེན་པོའི་དཀྱིལ་འཁོར་དང་གཙུག་ཏོར་ལ་
སོགས་པ་རྣམས་སུ་ཤེས་པར་བྱའོ། །ལྷའི་དབང་པོ་གཞན་ཡང་མདོར་ན་དྲན་པ་ཙམ་གྱིས་ཀྱང་བསོད་ནམས་ཆུང་བའི་སེམས་ཅན་ཐམས་ཅད་ངན་སོང་གི་རྒྱུད་ཐམས་ཅད་ལས་བདེ་བླག་ཏུ་རྣམ་པར་གྲོལ་བར་གྱུར་པ་ནི་འདི་ཡིན་ནོ་ཞེས་བྱ་བ་ནི་མདོར་བསྡུ་ན་དྲན་པ་ཙམ་གྱིས་གྲོལ་བར་འགྱུར་བའི་རྒྱུ་
ཡིན་ཏེ། ལྷ་ཐམས་ཅད་བསྐྱེད་པ་དང་། རྒྱས་གདབ་པ་དང་། སྙིང་གར་དགོད་པ་དང་། ཁྲུས་བྱ་བ་དང་། ཀུན་ལ་མཆོག་ཏུ་གྱུར་པའི་རྩ་བའི་རིག་པ་སྟེ། ན་མོ་བྷ་ག་ཝ་ཏེ་ཞེས་བྱ་བ་ནས་བརྩམས་ཏེ། སྭཱ་ཧཱའི་མཐར་ཐུག་པའོ། །སརྦ་བིད་ཅེས་བྱ་བ་ནས་བརྩམས་ཏེ། ཨོཾ་བྷ་ཞེས་བྱའི་མཐར་
ཐུག་པ་རྣམས་ཚེ་འདིའི་ཕན་ཡོན་ལ་གནས་པའམ་ཤི་བའི་ལུས་ལ་གདགས་པ་དང་བཟླས་བརྗོད་བྱ་བ་དང་། བྷ་དང་ཤའི་དོན་བསྒོམ་པ་ཡིན་ཏེ། དེ་གསུངས་པ་ལྷའི་དབང་པོ་དེ་བཞིན་གཤེགས་པ་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོ་གསང་བའི་སྙིང་པོ་འདི་ཞེས་བྱ་བ་ལ་
སོགས་པ་གསུངས་ཏེ་དེ་སྟོན་པའི་སྒྲ་ལ་ཡང་དེ་སྐད་ཅེས་བྱ་སྟེ། རིགས་ཀྱི་བུའམ་རིགས་ཀྱི་བུ་མོ་གང་ཡང་རུང་བས་ཞེས་བྱ་བ་ནི་རྒྱལ་རིགས་ལ་སོགས་པ་དུ་མ་སྟེ། བུའམ་བུ་མོ་གང་ཡང་རུང་བས་ཞེས་བྱ་བ་ནི་ཁྱད་པར་གྱི་དགག་པ་མེད་པའོ། །མིང་ཙམ་ཉན་ཏམ་ཞེས་བྱ་བ་ནི་མིང་ཉིད་ཉན་པའོ། །
བཅངས་སམ་ཞེས་བྱ་བ་ནི་དོན་དང་ཚིག་གོ། །བཀླགས་སམ་ཞེས་བྱ་བ་ནི་ཁ་ཐོན་ནམ་གླེགས་བམ་གྱིས་སོ། །དེ་འབའ་ཞིག་ཏུ་མ་ཟད་ཀྱི་གྲོ་ག་ལ་སོགས་པ་ལ་བྲིས་ནས་ཀྱང་མགོ་བོའི་གཙུག་ཕུད་དམ་དཔུང་པའམ་མགུལ་དུ་བཏགས་ཏེ་འཆང་ན་ཞེས་བྱ་བ་ནི་ཚེ་འདི་ཉིད་ལ་གནས་པའི་
གདགས་པ་གསུམ་བསྟན་ཏོ། །དེ་ཉིད་དུ་གསུངས་པ་ཚེ་འདི་ཉིད་ལ་བྱ་བའི་དོན་ཏོ། །དེ་ཉིད་ཀྱི་ཕན་ཡོན་དུས་མ་ཡིན་པར་འཆི་བ་བརྒྱད་དམ་ཞེས་བྱ་བ་ལ་སོགས་པ་སྨོས་ཏེ། དུས་མ་ཡིན་པར་འཆི་བ་བརྒྱད་ནི་མིད་པ་བསྒགས་པ་ལ་སོགས་པའོ། །དུས་མ་ཡིན་པའི་འཆི་བ་དང་

འབྲེལ་པའི་རྨི་ལམ་གྱི་རྣམ་པའམ་ཞེས་བྱ་བ་ནི། རྨི་ལམ་ནི་གསུམ་སྟེ། བག་ཆགས་ཀྱི་རྨི་ལམ་དང་ལྟས་བསྟན་པ་དང་བྱིན་གྱིས་བརླབས་པའོ། །དེས་ཀྱང་མི་འབྱུང་ལ་གཞན་ཡང་ངན་སོང་དང་འབྲེལ་པའི་མཚན་མ་དེ་དག་ཐམས་ཅད་རྨི་ལམ་དུ་ཡང་མི་འབྱུང་ན་ཞེས་
བྱ་བ་ནི་གཉིད་མ་ལོག་པ་ན་ལྟ་སྨོས་ཀྱང་ཅི་དགོས་ཞེས་བྱ་བའི་དོན་ཏོ། །མཉན་པ་ལ་སོགས་པའི་ཕན་ཡོན་བཤད་ནས། དཀྱིལ་འཁོར་དུ་ཇི་ལྟ་བར་ཞུགས་ལ་ཞེས་བྱ་བས་ཞུགས་པའི་ཕན་ཡོན་སྟོན་ཏོ། །ཞུགས་ལ་ཞེས་བྱ་བ་ལ་དང་པོར་ཞུགས་ལ་ཞུགས་ནས་དབང་བསྐུར་ནས་གོང་དུ་བཤད་
པའི་སྙིང་པོ་བཟླས་བརྗོད་བྱེད་ཅིང་སྔགས་ཀྱི་དོན་བསྒོམ་པ་གང་ཡིན་པ་ཞེས་བྱ་བ་དང་། བྷ་དང་ཤའི་དོན་བསྒོམ་པའོ། །ལྟ་སྨོས་ཀྱང་ཅི་དགོས་ཏེ་ཞེས་བྱ་བ་དང་ཕུལ་དུ་བྱུང་བ་གསུངས་པ་སྟེ་བསྟན་པའོ། །དེ་ཉིད་བཤད་པ་དེ་དག་ལས་སྡིག་པ་གང་ཡང་ཉེ་བར་མི་འགྱུར་ངན་སོང་དུ་འགྲོ་བར་ཡང་
མི་འགྱུར་རོ་ཞེས་གསུངས་སོ། །དེ་ལྟར་ཚེ་འདི་ལ་གནས་པའི་ཕན་ཡོན་བཤད་ནས། ཚེ་འདས་པ་རྣམས་ཀྱི་ཕན་ཡོན་གྱི་དབང་དུ་བྱས་ནས། སྐྱེས་པའམ་བུད་མེད་དམ་ལྷ་འམ་ཀླུའམ་གནོད་སྦྱིན་ནམ་སྲིན་པོའམ། བྱོལ་སོང་ངམ་ཡི་དགས་སམ་སེམས་ཅན་དམྱལ་བ་ལ་སོགས་ཏེ་གང་
ཡང་རུང་བ་ཤི་བའི་ལུས་དཀྱིལ་འཁོར་དུ་བཙུག་སྟེ་དབང་བསྐུར་ན་ཞེས་བྱ་བ་ནི་འོག་ནས་འབྱུང་བའི་ཚུལ་གྱིས་དཀྱིལ་འཁོར་དུ་བཅུག་ཅིང་དབང་བསྐུར་ན་ཞེས་བྱ་བའི་དོན་ཏོ། །དེ་ནས་ཅིར་འགྱུར་ཞེ་ན་འབྲས་བུ་གསུངས་པ། སེམས་ཅན་དམྱལ་བར་སྐྱེས་ན་ཡང་དེ་མ་ཐག་པར་ཡང་ཐར་ནས་ལྷའི་
རིས་སུ་སྐྱེ་བར་འགྱུར་རོ། །ལྷའི་རིས་དེར་སྐྱེས་ནས་ཀྱང་། དེ་བཞིན་གཤེགས་པ་ཐམས་ཅད་ཀྱི་ཆོས་ཉིད་མངོན་དུ་བྱེད་ཅེས་བྱ་བ་ནི་སྒྲོ་འདོགས་པ་དང་། སྐུར་པ་འདེབས་པ་དང་བྲལ་བའི་ཆོས་ཉིད་ཐོབ་ཅེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ལ་བསྙེན་བཀུར་ལ་སོགས་པ་ཡང་བྱེད།
ཕྱིར་མི་ལྡོག་པར་ཡང་འགྱུར། རྒྱུ་ངེས་པ་ཅན་དུ་ཡང་འགྱུར། དེ་བཞིན་གཤེགས་པ་ཐམས་ཅད་ཀྱི་རིགས་སུ་ཡང་སྐྱེ། སྡིག་པ་ཐམས་ཅད་རབ་ཏུ་སྤངས་ནས་དེ་བཞིན་གཤེགས་པ་ཐམས་ཅད་ཀྱི་རིགས་སམ་ལྷའི་རིགས་སམ། གང་ཡང་རུང་བར་བདེ་བ་མྱོང་བར་འགྱུར་རོ་ཞེས་བྱ་བ་ནི་དེ་བཞིན་

གཤེགས་པ་ཐམས་ཅད་ལ་བསྙེན་བཀུར་བྱེད་པ་དང་། ངེས་པར་འབྱེད་པའི་ཆ་དང་མཐུན་པ་ལ་སོགས་པ་ཕྱིར་མི་ལྡོག་པ་དང་། ཐེག་པ་ཆེན་པོའི་རིགས་ཅན་དང་། དེ་བཞིན་གཤེགས་པའི་དངོས་གྲུབ་དང་། མཆོད་པའི་སྒྲིབ་པ་ལ་སོགས་པ་སྤངས་པ་དང་། རིགས་ཀྱི་དངོས་གྲུབ་དང་། འཇིག་
རྟེན་པའི་ལྷ་དང་། རི་ལུ་ལ་སོགས་པའི་དངོས་གྲུབ་གང་ཡང་རུང་བ་དང་ལྡན་པའི་བདེ་བ་ཐོབ་པར་འགྱུར་རོ་ཞེས་བྱ་བའི་དོན་ཏོ། །ལྷའི་དབང་པོ་མདོར་ན། འཇིག་རྟེན་དང་འཇིག་རྟེན་ལས་འདས་པའི་ཕན་པ་དང་བདེ་བ་ཐམས་ཅད་མྱོང་བར་འགྱུར་རོ་ཞེས་བྱ་བ་ནི་མདོར་བསྡུ་ན་འཇིག་རྟེན་དང་འཇིག་
རྟེན་ལས་འདས་པ་གཉིས་སུ་བསྡུས་པས་དེའི་ཕན་པ་དང་བདེ་བ་མྱོང་བར་འགྱུར་རོ་ཞེས་བྱ་བའི་དོན་ཏོ། །འདིས་ནི་དཀྱིལ་འཁོར་རྒྱལ་པོ་མཆོག་སྒོམ་པ་རྣམས་ཀྱི་ཁང་པ་བརྩེགས་མ་དང་གདན་བསྐྱེད་པ་དང་། ཀུན་རིག་སྤྲུལ་ནས་ཐུགས་ཀར་ཟླ་བ་ལ་སྔགས་བཀོད་ནས་ལྷ་རྣམས་སྤྲུལ་པ་དང་། སྤྲུལ་ཅིང་
སྒྲུབ་པའི་སྔགས་འབྲས་བུ་དང་བཅས་པ་བསྟན་ཏོ། །རི་རབ་ཏུ་སྤྲུལ་པའི་དུས་ནི། གཙོ་བོ་གྲུབ་པའི་དུས་སུ་འཁོར་རྣམས་གྲུབ་པས། གཙོ་བོ་དང་འཁོར་སྤྲུལ་པ་མ་བསྟན་ཏོ། །དེ་ནས་ཞེས་བྱ་བ་ནས་བརྩམས་ཏེ་མྱོང་བར་འགྱུར་རོ་ཞེས་བྱ་བའི་བར་གྱི་གཞུང་གིས་དཀྱིལ་འཁོར་རྒྱལ་པོ་མཆོག་གི་ཏིང་
ངེ་འཛིན་བསྟན་ཏོ། །དེ་ནས་གཙོ་བོ་དང་ཐ་མི་དད་པར་བསམས་ཏེ། བསྡུ་བ་དང་ཕྱག་འཚལ་བ་དང་། ཆེད་དུ་བརྗོད་པ་དང་། བྱིན་གྱིས་བརླབ་པ་དང་། ཡང་ཆེད་དུ་བརྗོད་པ་དང་། དབང་བླང་བ་དང་། དགུག་གཞུག་བྱ་བ་དང་། རྒྱས་གདབ་པ་དང་། ཀུན་གྱི་ཕྲིན་ལས་གཅིག་ལ་སྦྱར་བ་དང་།
ཀུན་གྱི་དེ་ཁོ་ན་ཉིད་བསྡུས་པ་དང་། གསང་ཞིང་སྲ་བའི་མཆོག་མཐོན་པོ་ལས་བསྟན་པ་བཞིན་ཤེས་པར་བྱའོ། །ལས་ཀྱི་རྒྱལ་པོ་མཆོག་གི་ཏིང་ངེ་འཛིན་ཏོ།། །།དམ་ཚིག་དང་དབང་ཐོབ་པས་ཐབས་འདི་ཉིད་ལ་འཇུག་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་
དང་། སློབ་མ་གཞུག་པ་ལ་སོགས་པའི་ཆོ་ག་སྟོན་ཏོ། །དེ་ནས་སྔོན་དུ་བསྙེན་པ་བྱས་པའི་རྗེས་ཐོགས་ལའོ། །དེ་ཡང་འདིར་ལོའམ། ལོ་ཕྱེད་དམ། ཟླ་བ་གཅིག་གམ། ལྷ་རྣམས་གྲུབ་ནས་ཞེས་བྱ་བའི་དོན་ཏོ། །ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ་ཞེས་བྱ་

བར་སྦྱར་རོ། །ཅི་ཞིག་བྱས་ནས་ཤེ་ན། བཅོམ་ལྡན་འདས་ལ་དེ་བཞིན་དུ་བསྐོར་བ་བྱས་ནས་ཞེས་བྱ་བའི་དོན་ཏོ། །བཅོམ་ལྡན་འདས་བཤད་དུ་གསོལ་ཞེས་བྱ་བར་སྦྱར་རོ། །ཅིའི་སླད་དུ་ཞེ་ན། ངན་སོང་གི་དབང་དུ་གྱུར་པ་རྣམས་ལ་ཕན་པ་དང་བདེ་བར་བགྱི་བ་དང་
ཅི་ནས་ཀྱང་སེམས་ཅན་དེ་དག་ངན་སོང་ཐམས་ཅད་ཀྱི་སྒོ་ལས་རྒྱབ་ཀྱིས་ཕྱོགས་པར་བགྱིད་པ་དང་། བླ་ན་མ་མཆིས་པར་ཡང་དག་པར་རྫོགས་པའི་བྱང་ཆུབ་བདེ་བླག་ཏུ་རྟོགས་པར་བགྱི་བའི་སླད་དུ་ཞེས་བྱ་བ་ནི་དཀྱིལ་འཁོར་བྲིས་པས་མི་རྣམས་ལ་ཕན་པའི་དོན་དུ་སྟེ་དེའི་ཕྱིར་བཤད་དུ་གསོལ་
ཞེས་བྱ་བའི་དོན་ཏོ། །རྗེ་བཙུན་བཤད་དུ་གསོལ་ཞེས་བྱ་བ་ནི་ཁྱད་པར་དུ་བོད་པས་གསོལ་བ་བཏབ་པའོ། །དེ་ནས་ཞེས་བྱ་བ་ནི་གསོལ་བ་བཏབ་པའི་རྗེས་ཐོགས་ལའོ། །བཅོམ་ལྡན་འདས་ཤཱཀྱ་ཐུབ་པས་ཞེས་བྱ་བ་ནི། ཀུན་རིག་ཉིད་མི་ཡུལ་དུ་ཤཱཀྱ་ཐུབ་པར་གྱུར་པ་ལ་དགོངས་ནས་དེ་སྐད་ཅེས་
བཤད་དེ་ངེས་སོ། །དེ་བཞིན་གཤེགས་པ་ཐམས་ཅད་ཀྱི་ངན་སོང་ཐམས་ཅད་ཡོངས་སུ་སྦྱོང་བའི་ཡེ་ཤེས་ཞེས་བྱ་བ་ནི་དེར་ངེས་པའི་ཡེ་ཤེས་ཏེ། དབྱེར་མི་ཕྱེད་པས་རྡོ་རྗེ་ཞེས་བྱ་ལ་དཀྱིལ་འཁོར་གྱི་དེ་ཁོ་ན་ཉིད་དེ། དེ་ལ་དམིགས་པའི་ཏིང་ངེ་འཛིན་ལ་ཡང་དེ་སྐད་ཅེས་བྱའོ། །དེའི་སྙོམས་
པར་ཞུགས་པ་ནི་མངོན་དུ་མཛད་པ་སྟེ་དེ་མཛད་ནས་སོ། །དེ་བཞིན་གཤེགས་པ་ཐམས་ཅད་ཀྱིས་ངན་སོང་ཐམས་ཅད་ཡོངས་སུ་སྦྱོང་བའི་གཟི་བརྗིད་ཀྱི་རྒྱལ་པོ་ཞེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ་ཞེས་བྱ་བ་དཀྱིལ་འཁོར་ནི་གཟུགས་ཅན་དང་གཟུགས་མེད་པ་ལ་གཟུགས་མེད་དེ་
རང་གི་དཀྱིལ་འཁོར་གཉིས་སུ་མེད་པའི་ཡེ་ཤེས་སོ། །དེ་ཡང་ཆོས་ཀྱི་བཅུད་ཀྱི་སྙིང་པོ་འབྱུང་བའི་ཕྱིར་དང་སྙིང་པོ་ལན་པའི་ཕྱིར་དེ་སྐད་ཅེས་བྱའོ། །ཆེན་པོ་ཞེས་བྱ་བ་ནི་ཆོས་ཀྱི་དབྱིངས་སྔོན་དུ་འགྲོ་བས་ཡེ་ཤེས་གཟུགས་སྐུ་དང་བཅས་པའོ། །འདི་ཞེས་བྱ་བ་འོག་ནས་བྱུང་བ་འདིའོ་གསུངས་
སོ་ཞེས་བྱ་བ་ནི་བཀའ་སྩལ་པའོ། །གསུངས་པའི་རང་གི་ངོ་བོ་བསྟན་པའི་ཕྱིར། །སངས་རྒྱས་ཀུན་གྱི་བྱང་ཆུབ་སེམས། །བླ་ན་མེད་པ་རྟོགས་འགྱུར་བའི། །རྒྱལ་བས་གསུངས་པའི་ཡེ་ཤེས་གང་། །དེ་ནི་དཀྱིལ་འཁོར་སྙིང་པོར་གསུངས། །ཞེས་བྱ་བ་ཡིན་ཏེ། སངས་རྒྱས་ཀུན་གྱི་བྱང་ཆུབ་སེམས། །

ཞེས་བྱ་བ་ནི་གཉིས་སུ་མེད་པའི་ཡེ་ཤེས་སོ། །བླ་ན་མེད་པ་ཞེས་བྱ་བ་ནི་སྤྲོས་པ་དང་བྲལ་བའོ། །རྟོགས་འགྱུར་བའི་ཞེས་བྱ་བ་ནི་ཁོང་དུ་ཆུད་པའོ། །དེ་ཉིད་ཡེ་ཤེས་ཞེས་བྱ་བས་སྟོན་ཏེ་སུས་གསུངས་ཤེ་ན། རྒྱལ་བས་གསུངས་པའི་ཞེས་བྱ་བ་སྨོས་སོ། །དེ་ནི་དཀྱིལ་འཁོར་སྙིང་པོར་གསུངས། །
ཞེས་བྱ་བ་ནི་ངེས་པར་གཟུང་བ་སྟེ་དེ་ཉིད་ཅེས་བྱ་བའི་དོན་ཏོ། །དཀྱིལ་འཁོར་སྙིང་པོར་གསུངས་ཞེས་བྱ་བ་ནི་དཀྱིལ་འཁོར་གྱི་རང་བཞིན་དུ་བཤད་པའོ། །རང་བཞིན་དུ་བཤད་པ་དེ་ཡང་འདི་ཡིན་ཏེ། མི་མཉམ་པ་མེད་པས་ཟུར་བཞི་ཡིན་ནོ། །དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་
བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་ཞེས་བྱ་བ་ནི་སྒོ་བཞི་ཡིན་ནོ། །བསམ་གཏན་རྣམས་ལ་རྟ་བབས་བཞི། །ཞེས་བྱའོ། །གཟུགས་རྣམས་ལ་ཁ་ཁྱེར་ལ་བརྟེན་པའི་ལྷ་མོ་རྣམས་ཞེས་བྱའོ། །བསམ་པ་ཐམས་ཅད་ཡོངས་སུ་རྫོགས་པ་འདུལ་བ་བསྐྱོད་པའི་རང་བཞིན་ནི།
རླུང་གིས་དར་འཕན་བསྐྱོད་ནས་སྒྲ་སྒྲོགས་པ་ཞེས་བྱའོ། །ཡེ་ཤེས་མེ་ལོང་ཞེས་བྱའོ། །བྱང་ཆུབ་ཀྱི་ཡན་ལག་མེ་ཏོག་གི་ཕྲེང་བ་ཞེས་བྱའོ། །མི་ཟད་པའི་བདེ་བ་དྲ་བ་དང་དྲ་བ་ཕྱེད་པ་དང་། རིན་ཆེན་མཆོག་ཉི་མ་དང་ཟླ་བ་ཞེས་བྱའོ། །རྣམ་པར་ཐར་པ་བརྒྱད་དཀྱིལ་འཁོར་བརྒྱད་ཅེས་བྱའོ། །ཐེག་
པ་ཆེན་པོ་མདོ་སྡེས་བསྐོར་བ་ནི་རྡོ་རྗེ་ཐེག་པ་ཞེས་བྱའོ། །འཁོར་ལོ་ནི་ཆོས་ཀྱི་འཁོར་ལོ་ཞེས་བྱའོ། །དེ་ཡང་ཇི་སྐད་དུ། མི་མཉམ་མེད་པས་ཟུར་བཞི་སྟེ། །དྲན་དང་དབང་པོ་སྒོ་བཞི་ཡིན། །བསམ་གཏན་རྣམས་ཀྱང་རྟ་བབས་ཡིན། །ཁ་ཁྱེར་ལ་བརྟེན་རྡོ་རྗེ་མཆོག །ལྷ་མོས་མཆོད་པས་གཟུངས་
རྣམས་ཡིན། །སྣ་ཚོགས་པ་ཡི་རྒྱན་རྣམས་ཀུན། །བསམ་པ་ཐམས་ཅད་རྫོགས་པ་ཡིན། །གདུལ་བྱ་བསྐྱོད་པས་སྣ་ཚོགས་མཆོག །དམ་ཆོས་མཆོག་ནི་ཀུན་དུ་འགྲོ། །རླུང་གིས་བསྐྱོད་ནས་སྣ་ཚོགས་མཆོག །དར་འཕན་དྲིལ་བུ་སྒྲ་སྒྲོགས་ནི། །མེ་ལོང་ཡེ་ཤེས་རྟགས་མེ་ཏོག །དྲ་བ་དྲ་ཕྱེད་
རིན་ཆེན་མཆོག །ཉི་མ་ཟླ་བ་ཡང་དག་ལྡན། །ཀུན་གྲུབ་མི་ཟད་བདེ་བ་སྟེ། །བདེ་བ་ཆེན་པོ་ཞེས་བཤད་དོ། །དེ་ཡི་ནང་རིམ་དག་གི་ཐིག །དཀྱིལ་འཁོར་བརྒྱད་པ་འདྲ་བ་ནི། །འདི་ན་རྣམ་པར་ཐར་པ་བརྒྱད། །དངོས་གྲུབ་ཀུན་གྱི་བདེ་བ་སྟེར། །ཐེག་པ་ཆེན་པོ་བྱང་ཆུབ་སེམས། །མདོ་སྡེའི་

འཁོར་ལོ་བསྐོར་བས་ན། །རྡོ་རྗེ་ཐིག་གིས་ཡོངས་བསྐོར་བ། །རྡོ་རྗེ་འཁོར་ལོ་ཡང་དག་བྲི། །ཞེས་པ་དང་། ཆོས་ཀྱི་འཁོར་ལོ་འདྲ་བ་ལ། །ལྟེ་བར་བཅས་ཤིང་རྩིབས་བཅུ་དྲུག །ཅེས་གསུངས་པའི་ཕྱིར་རོ། །ཡང་དེ་ཉིད་ཀྱི་བྱང་ཆུབ་སེམས་ཀྱི་འབྲས་བུ་དང་བསྡུ་བའི་
དངོས་པོ་བཞི་དང་། སེམས་ཅན་གྱི་དོན་ལ་ཆགས་པ་དང་། བྱང་ཆུབ་སེམས་དཔའ་ཀུན་མགུ་བར་བྱེད་པའི་ཚུལ་ནི་རྡོ་རྗེ་སེམས་དཔའ་དང་། རྒྱལ་པོ་དང་། ཆགས་པ་དང་། ལེགས་པའོ། །ཇི་སྐད་དུ། བྱང་ཆུབ་སེམས་ཀྱི་འབྲས་བུ་ནི། །སངས་རྒྱས་ཡེ་ཤེས་བླ་མེད་གང་། །དེ་ནི་རྡོ་རྗེ་སེམས་
རང་བཞིན། །ཆོས་དང་ལོངས་སྤྱོད་སྤྲུལ་པའོ། །ཞེས་པ་དང་། བསྡུ་བ་ཡི་ནི་དངོས་པོ་བཞི། །བཅོམ་ལྡན་འདས་ཀྱིས་གང་སྤྱད་པ། །སེམས་ཅན་འགུགས་པའི་ཐབས་ཞེས་པ། །རྡོ་རྗེ་རྒྱལ་པོ་ཡང་དག་འབྱུང་། །ཞེས་བྱ་བ་དང་། སེམས་ཅན་སྨིན་ཕྱིར་བཅོམ་ལྡན་གྱིས། །གང་ཚེ་བྱང་ཆུབ་
སྤྱོད་པ་སྤྱད། །བྱང་ཆུབ་སྤྱོད་ལ་རྗེས་ཆགས་པ། །རྡོ་རྗེ་ཆགས་པར་ཡང་དག་འབྱུང་། །ཞེས་པ་དང་། སངས་རྒྱས་ཐམས་ཅད་མཉེས་བྱེད་ཅིང་། །ལེགས་སོ་ཞེས་བྱ་རབ་སྟེར་བྱེད། །བྱང་ཆུབ་སེམས་དཔའ་ཀུན་མགུ་བྱེད། །དེ་ནི་རྡོ་རྗེ་ལེགས་པར་བརྗོད། །ཅེས་གསུངས་པའི་ཕྱིར་རོ། །
གཉིས་སུ་མེད་པའི་ཡེ་ཤེས་དེ་ཉིད་སྦྱིན་པའི་ཕ་རོལ་ཏུ་ཕྱིན་པ་དང་མི་ཤེས་པའི་མུན་ནག་འཇོམས་པ་དང་། ཆོས་ཀྱི་རྒྱལ་མཚན་ཆེན་པོ་དང་། བྱང་ཆུབ་སེམས་དཔའ་ཀུན་དབུགས་འབྱིན་པ་གོ་རིམས་བཞིན་དུ་རྡོ་རྗེ་རིན་ཆེན་དང་། གཟི་བརྗིད་དང་། རྒྱལ་མཚན་དང་བཞད་པ་བཞི་ཡིན་ཏེ། ཇི་
སྐད་དུ། བྱང་ཆུབ་སེམས་དཔའི་སྦྱིན་པ་གང་། །མཁའ་མཉམ་རིན་ཆེན་ལྟ་བུ་སྟེ། །རྡོ་རྗེ་རིན་ཆེན་སྐལ་བ་ཆེ། །དེས་ན་རྡོ་རྗེ་རིན་ཆེན་བརྗོད། །ཅེས་པ་དང་། མ་རིག་ལིང་ཏོག་འཁོར་བ་ཡི། །མི་ཤེས་མུན་པ་འཇོམས་བྱེད་ཅིང་། །ཐར་པའི་སྣང་བ་གཟི་བརྗིད་ཆེ། །དེ་ནི་རྡོ་རྗེ་གཟི་
བརྗིད་དོ། །ཞེས་པ་དང་། རྒྱལ་མཚན་སངས་རྒྱས་ཀུན་རང་བཞིན། །ཐར་པའི་ལམ་འགྲོ་རྒྱལ་མཚན་དེ། །ཆོས་ཀྱི་རྒྱལ་མཚན་རྒྱལ་མཚན་ཆེ། །དེ་ནི་རྡོ་རྗེ་རྒྱལ་མཚན་བརྗོད། །ཅེས་པ་དང་། རྣལ་འབྱོར་ཆེན་པོ་རྡོ་རྗེ་བཞད། །སངས་རྒྱས་ཐམས་ཅད་བཞད་བྱེད་ཅིང་། །བྱང་ཆུབ་སེམས་

དཔའ་ཀུན་དབུགས་འབྱིན། །དེ་ནི་རྡོ་རྗེ་བཞད་པར་བརྗོད། །ཅེས་གསུངས་པའི་ཕྱིར་གཉིས་སུ་མེད་པའི་ཡེ་ཤེས་དེ་ཉིད་སེམས་ཅན་གྱིས་རྟོགས་པར་བྱེད་པའི་རྒྱུ་དང་། ཤེས་རབ་ཆེན་པོ་དང་། ཆོས་ཀྱི་འཁོར་ལོ་དང་། ཚིག་དང་བྲལ་བས་སྨྲ་བ་སྟེ། བཞི་པོ་གོ་རིམས་བཞིན་དུ་རྡོ་རྗེ་ཆོས་དང་རྣོན་པོ་དང་།
འཁོར་ལོ་དང་སྨྲ་བ་སྟེ། ཇི་སྐད་དུ། རྣལ་འབྱོར་ཆེན་པོ་སངས་རྒྱས་ཆོས། །སངས་རྒྱས་སེམས་ཅན་རྟོགས་བྱེད་པ། །དག་པ་དེ་བཞིན་གཤེགས་སྙིང་པོ། །དེ་ནི་རྡོ་རྗེ་ཆོས་སུ་བརྗོད། །ཅེས་པ་དང་། ཤེས་རབ་རྣོན་པོ་ཡེ་ཤེས་ཆེ། །ཤིན་ཏུ་སྡུག་པའི་ཉོན་མོངས་གཅོད། །ཤེས་བྱའི་སྒྲིབ་པ་
གཅོད་པས་ན། །དེ་ནི་རྡོ་རྗེ་རྣོན་པོར་བརྗོད། །ཅེས་པ་དང་། འཁོར་ལོ་སངས་རྒྱས་གར་ཤེས་པ། །ཆོས་ཀྱི་འཁོར་ལོ་ཤིན་ཏུ་བརྟན། །དམ་ཆོས་སྒྲོལ་བའི་བཅུད་ལས་བྱུང་། །དེ་ནི་རྡོ་རྗེ་རྒྱུ་ཞེས་བྱ། །ཞེས་པ་དང་། སངས་རྒྱས་ཀུན་གྱི་ཆོས་ཆེན་པོ། །མཁའ་མཚུངས་ཚིག་དང་བྲལ་བ་སྟེ།
ཚིག་མེད་ཚིག་ལས་ཡང་དག་བྱུང་། །ཞེས་གསུངས་པའི་ཕྱིར་རོ། །གཉིས་སུ་མེད་པའི་ཡེ་ཤེས་ཉིད་སེམས་ཅན་སྨིན་པ་དང་གྲོལ་བ་དང་ཐེག་པ་དམན་པ་སྤོང་བ་དང་། ཉོན་མོངས་པ་ཐམས་ཅད་ཟད་པ་དང་དེ་བཞིན་ཉིད་ཕྱིན་ཅི་མ་ལོག་པ་སྟེ་གོ་རིམས་བཞིན་དུ། རྡོ་རྗེ་ལས་དང་སྲུང་བ་དང་།
གནོད་སྦྱིན་དང་། ཁུ་ཚུར་ཞེས་བྱའོ། །ཇི་སྐད་དུ། སེམས་ཅན་སྨིན་དང་གྲོལ་བ་ཡི། །སངས་རྒྱས་ཀུན་གྱི་ལས་གང་དང་། །སངས་རྒྱས་ལས་ནི་བདག་མེད་པ། །དེ་ནི་རྡོ་རྗེ་ལས་ཞེས་བྱ། །བྱང་ཆུབ་སེམས་དཔའ་སྲུང་བ་སྟེ། །ཐེག་པ་དམན་པ་སྤང་བྱེད་ཅིང་། །རྩེ་མོ་ནས་ལྟུང་སྲུང་བྱེད་པ། །
དེ་ནི་རྡོ་རྗེ་སྲུང་བར་བཤད། །སྡིག་པ་ཐམས་ཅད་ཟད་བྱེད་ཅིང་། །ཉོན་མོངས་ཐམས་ཅད་ངེས་པར་གཅོད། །སྲིད་པ་ཟད་བྱེད་གནོད་སྦྱིན་ཆེ། །དེ་ནི་རྡོ་རྗེ་གནོད་སྦྱིན་བརྗོད། །ཅེས་པ་དང་། བདེན་ཞིང་གཞན་མིན་དེ་བཞིན་ཉིད། །འགྱུར་མེད་དེ་ཁོ་ན་ཉིད་གང་། །སངས་རྒྱས་དེ་བཞིན་ཉིད་ཡེ་ཤེས། །
དེ་ནི་རྡོ་རྗེ་ཁུ་ཚུར་བརྗོད། །ཅེས་གསུངས་པའི་ཕྱིར་རོ། །གཉིས་སུ་མེད་པའི་ཡེ་ཤེས་དེ་ཉིད་སྦྱིན་པ་དང་ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་དང་། སྨོན་ལམ་རྣམས་ནི། ལཱ་སྱེ་དང་། མཱ་ལེ་དང་། གཱིརྟི་དང་། ནིརྟཱི་དང་། དྷཱུ་པེ་དང་།

པུཥྤེ་དང་། ཨཱ་ལོ་ཀེ་དང་། གནྡྷེ་ཞེས་བྱ་བ་རྣམས་སོ། །ཇི་སྐད་དུ། གང་ཕྱིར་མཆོག་ཏུ་རོལ་པས་ན། །སྒེག་མོ་སྦྱིན་པའི་ཕ་རོལ་ཕྱིན། །བྱང་ཆུབ་ཡན་ལག་འབྲས་སྟེར་བས། །ཕྲེང་བ་ཚུལ་ཁྲིམས་ཕ་རོལ་ཕྱིན། །ཞེས་པ་དང་། ཞི་བའི་ཆོས་ལ་རྗེས་མོས་པས། །གླུ་
མ་བཟོད་པའི་ཕ་རོལ་ཕྱིན། །ཞེས་པ་དང་། སངས་རྒྱས་མཆོད་ལ་མི་སྐྱོ་བས། །གར་མ་བརྩོན་འགྲུས་ཕ་རོལ་ཕྱིན། །ཞེས་པ་དང་། ཐར་པ་མཆོག་ནི་དགའ་སྒྲུབ་པས། །བདུག་པ་ཤེས་རབ་ཕ་རོལ་ཕྱིན། །སངས་རྒྱས་ཉིད་འབྲས་རྒྱུ་ཡིན་པས། །མེ་ཏོག་བསམ་གཏན་ཕ་རོལ་ཕྱིན། །ཞེས་
པ་དང་། རྡོ་རྗེ་མར་མེ་ཐབས་ཆེན་པོ། །སྨོན་ལམ་རྡོ་རྗེ་བྱུག་པ་དང་། །ཞེས་གསུངས་པའི་ཕྱིར་རོ། །གཉིས་སུ་མེད་པའི་ཡེ་ཤེས་དེ་ཉིད་བྱང་ཆུབ་ཀྱི་སེམས་ཀྱི་མཚན་ཉིད་འགུགས་པར་བྱེད་པ་དང་། བྱང་ཆུབ་ཀྱི་སྤྱོད་པའི་ཞགས་པ་དང་ཐེག་པ་ཆེན་པོར་འཆིང་བ་དང་། ཆོས་ཐམས་ཅད་
སྐྱེ་བ་མེད་པར་འབབ་པ་སྟེ་གོ་རིམས་བཞིན་དུ། ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་། དྲིལ་བུའོ། །དེ་ཡང་ཇི་སྐད་དུ། བྱང་ཆུབ་སེམས་ཀྱིས་འགུགས་པ་ནི། །རྡོ་རྗེ་ལྕགས་ཀྱུར་ཡང་དག་བརྗོད། །བྱང་ཆུབ་སྤྱོད་པ་ལ་སྤྱོད་པ། །རྡོ་རྗེ་ཞགས་པར་དེ་བཤད་དོ། །ཐེག་པ་
དམན་པ་སྲུང་བྱེད་པ། །རྡོ་རྗེ་ལྕགས་སྒྲོག་དེ་བཤད་དོ། །རབ་ཏུ་འོད་གསལ་སྐྱེ་མེད་པ། །རྡོ་རྗེ་དྲིལ་བུར་དེ་བཤད་དོ། །ཞེས་གསུངས་པའི་ཕྱིར་རོ། །ཡང་གཉིས་སུ་མེད་པའི་ཐུགས་དེ་ཉིད་སྙིང་རྗེ་དང་། བྱམས་པ་དང་། དགའ་བ་དང་། བཏང་སྙོམས་དང་བཞི་ནི་གོ་རིམས་བཞིན་དུ།
སངས་རྒྱས་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་རྣམས་ཞེས་པ་ཡིན་ནོ། །ཇི་སྐད་དུ། སངས་རྒྱས་སྤྱན་ནི་བྱམས་པ་ཆེ། །མཱ་མ་ཀཱི་ནི་སྙིང་རྗེ་ཆེ། །དཀར་མོ་དགའ་བར་རབ་ཏུ་བརྗོད། །བཏང་སྙོམས་ཆེ་དང་ཐབས་ཆེ་བར། །སྒྲོལ་མ་ཞེས་ནི་བརྗོད་པ་ཡིན། །ཞེས་
གསུངས་པའི་ཕྱིར་རོ། །གཉིས་སུ་མེད་པའི་ཡེ་ཤེས་ཉིད་བྱང་ཆུབ་ཀྱི་སེམས་དང་། ཚོགས་དང་། ཤེས་རབ་དང་། བྱང་ཆུབ་ཀྱི་སྤྱོད་པ་ཞེས་བྱ་བ་བཞི་གོ་རིམས་བཞིན་དུ་ངན་སོང་སྦྱོང་བ་དང་། རིན་ཆེན་ཏོག་དང་། ཤཱཀྱའི་དབང་པོ་དང་། མེ་ཏོག་ཆེར་རྒྱས་སོ། །ཇི་སྐད་དུ། བྱང་

ཆུབ་ཏུ་ནི་སེམས་བསྐྱེད་དང་། །དེ་བཞིན་ཚོགས་དང་ཤེས་རབ་དང་། །བྱང་ཆུབ་སྤྱོད་པ་རབ་སྤྱོད་པ། །རྒྱལ་པོ་བཞིར་ནི་ཡང་དག་འབྱུང་། །ཞེས་གསུངས་པའི་ཕྱིར་རོ། །ཡེ་ཤེས་དེ་ཉིད་ཆོས་ཐམས་ཅད་གཅིག་ཏུ་བསྡུས་པ་ནི། བཅོམ་ལྡན་འདས་རྣམ་པར་སྣང་མཛད་དོ། །ཇི་སྐད་དུ།
དབུས་སུ་རྣམ་པར་སྣང་མཛད་ཅེས། །ཆོས་རྣམས་གཅིག་ཏུ་བསྡུས་པ་ཡིན། །ཞེས་གསུངས་པའི་ཕྱིར་རོ། །འདིས་ནི་འབྲས་བུ་དེ་ཉིད་ལས་ལྡོག་པའི་ཚུལ་གྱིས་ཐ་དད་པ་ཡིན་གྱི་ངོ་བོ་ཉིད་ཀྱིས་ཐ་དད་པ་ཡོད་པ་མ་ཡིན་ནོ། །འདིས་ནི་གཞན་ཡང་གསང་སྔགས་ཀྱི་སྒོའི་སྤྱད་པ་སྤྱོད་པར་འདོད་པ་
རྣམས་ཀྱིས་དཀྱིལ་འཁོར་གྱི་དེ་ཁོ་ན་ཉིད་ཐོག་མར་ཤེས་པར་གྱིས་ཤིག་ཅེས་སྟོན་ཏོ། །དེ་ལྟར་ནང་གི་དཀྱིལ་འཁོར་གཟུགས་མེད་པ་གསུངས་ནས། ད་ནི་དེ་ནས་ཞེས་བྱ་བ་ལ་སོགས་པས་ཕྱིའི་དཀྱིལ་འཁོར་གཟུགས་དང་བཅས་པ་བསྟན་ཏོ། །དེ་ནས་ཞེས་བྱ་བ་ནི་བར་མ་ཆད་པའོ། །
ཡང་ཞེས་བྱ་བ་ནི་སྡུད་པའོ། །བཅོམ་ལྡན་འདས་ཀྱིས་སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ་ཞེས་བྱ་བ་ནི་མི་རྣམས་ལ་ཕན་པའི་དོན་དུའོ། །ཕྱིའི་དཀྱིལ་འཁོར་ཞེས་བྱ་བ་ནི། །གཟུགས་དང་བཅས་ཤིང་ཐམས་ཅད་འཇུག་ཏུ་རུང་བའོ། །འདི་གསུངས་སོ་ཞེས་པ་ནི། མི་
རྣམས་ལ་ཕན་པའི་དོན་དུ་བཤད་དོ། །གཙུག་ལག་ཁང་དང་སྐྱེད་མོས་ཚལ། །མཆོད་རྟེན་ལྷ་ཁང་ཀུན་ར་སོགས། །ཇི་བཞིན་པ་ཡི་ཆོ་ག་ཡིས། །གནས་ནི་བྱིན་གྱིས་བརླབ་པ་བརྩམ། །ཞེས་བྱ་བ་ནི་གཙུག་ལག་ཁང་དང་། མཆོད་རྟེན་དང་ལྷ་ཁང་དང་ཀུན་དགའ་ར་བ་དང་འབབ་ཆུའི་
འགྲམ་དང་། གྲོང་ཁྱེར་གྱི་ཤར་དང་། བྱང་གི་ཕྱོགས་ཀྱི་ཆར་རམ་གང་དུ་ཡིད་དང་མཐུན་པའི་གནས་སུའོ། །དེ་ནས། དཀྱིལ་འཁོར་བྲི་བའི་དོན་དུ་ནི། །ཚིགས་བཅད་འདི་ནི་བསྒྲག་པར་བྱ། །ས་ལ་རྒྱུ་བའི་ལྷ་ཀུན་དང་། །གང་ཞིག་ས་ལ་བརྟན་པ་ཀུན། །བྱམས་པའི་སེམས་ཀྱིས་གནས་
ནས་སུ། །སེམས་ཅན་ཀུན་ལ་དགེ་དོན་དུ། །ཀུན་དགའི་དོན་དུ་ཞུ་ཞིང་མཆིས། །དེ་ནས་ཇི་ལྟར་འཚམ་བཞིན་དུ་པུས་མོ་ནུབ་ཙམ་འོག་ཏུ་བརྐོས་ལ། གྱོ་མོ་ལ་སོགས་པ་བསལ་ལ། སྤྱན་དང་རྡོ་རྗེ་གནོད་སྦྱིན་དང་། །བདུད་རྩི་འཁྱིལ་པའི་སྔགས་ཀྱི་ཆུས་བསང་གཏོར་བྱ། ཁྲུ་ཚད་ཀྱིས་ཆེ་

ཆུང་བརྟག་པར་བྱ། བའི་ཆུ་དང་ལྕི་བས་བྱུག །ས་གཟུང་བ་དང་སྦྱང་བའི་ཆོ་གའོ། །དེ་ནས་གོས་དང་རྒྱན་སྣ་ཚོགས་ཀྱིས་བརྒྱན། ཁྲུས་བྱས་ལུས་དྲི་ཆུས་བྱུགས། རྡོ་རྗེ་གནོད་སྦྱིན་དུ་བསྐྱེད། མིག་གཉིས་སུ་མ་དང་ཊ་ལས་ཟླ་བ་དང་ཉི་མ་དགོད། རྐང་པ་ལ་ཨ་ལས་
སྣ་ཚོགས་རྡོ་རྗེ་བསྐྱེད། ལག་པ་གཉིས་ཀྱིས་རྡོ་རྗེ་དྲིལ་བུ་བཟུང་སྟེ་ཡི་གེ་ཧཱུཾ་གི་སྒྲ་སྒྲོགས་ཤིང་། གཡས་ནས་བསྐོར་ལ་དེངས་ཞེས་བརྗོད། མཚམས་དང་ར་བ་དང་དྲ་བ་དག་ཀྱང་བྱ། བདུད་དང་སྡང་བ་བཟློག །དེ་ནས་ཕུར་བུ་བྱིན་གྱིས་བརླབས་ལ་ཕུར་བུ་གདབ་པར་བྱའོ། །འདིས་ནི།
ཇི་བཞིན་པ་ཡི་ཆོ་ག་ཡིས། །ཞེས་བྱ་བའི་དོན་ཏོ། །དེ་ནས་སྦྱོར་བ་དང་པོ་དང་། དཀྱིལ་འཁོར་རྒྱལ་མཆོག་དང་། ལས་རྒྱལ་མཆོག་བསྒོམས་ལ་དཀྱིལ་འཁོར་ནམ་མཁའ་ལ་བཏེག། །ལྷའི་གནས་སུ་ཙནྡན་ལ་སོགས་པའི་ཟླུམ་པོ་དང་། གྲུ་བཞིའི་ཐིག་ལེ་བྱ། དཀྱིལ་འཁོར་
བརྟགས་པ་བསྡུས། ལྕགས་ཀྱུ་ལ་སོགས་པས་དགུག་གཞུག་བྱ། བགེགས་བསྐྲད་པ་དང་། ར་བ་དང་། དྲ་བ་བྱ། སྒོ་བཅད་སྲུང་བ་བརྟན་པར་བྱ། མཆོད་ཡོན་དབུལ་བ་སྔོན་དུ་འགྲོ་བས་ཕྱག་རྒྱ་བཞིས་རྒྱས་གདབ། མཆོད་པ་རྣམས་ཀྱིས་མཆོད་རང་རང་གི་སྔགས་ཅི་མང་དུ་བཟླས་ཏེ།
བུམ་པ་ལྷག་པར་གནས་པ་དང་སློབ་མ་ལྷག་པར་གནས་པ་དང་། ཕྱི་རོལ་དུ་གཏོར་མ་སྦྱིན་པ་དང་། ཉེ་རེག་དང་། སྦྱིན་སྲེག་དང་། མཆོད་ཅིང་གསོལ་བ་གདབ་པ་ལ་སོགས་བྱའོ། །འདི་ཙམ་གྱིས་ནི། གནས་ནི་བྱིན་གྱིས་བརླབ་པ་བརྩམ། །ཞེས་བྱ་བའི་དོན་ཡིན་ནོ། །བྱིན་གྱིས་བརླབས་
པའི་གནས་དེར་ནི། །ཞེས་བྱ་བ་ནི་དེ་ཉིད་དུའོ། །ཕྱི་ཡི་དཀྱིལ་འཁོར་བྲི་བར་བྱ། །ཞེས་པ་ནི་དཀྱིལ་འཁོར་གྱི་སྒོ་གཉིས་པའོ། །ཕྱོགས་ཀུན་མཉམ་པ་གྲྭ་དང་བཅས་པས་གྲུ་བཞི་པ་ལ་ཕྱོགས་ཀྱི་ཆ་རེ་རེ་ཞིང་སྒོ་བཞི་ཡོད་པས་སྒོ་བཞི་པ་ཞེས་བྱའོ། །རྟ་བབས་བཞི་དང་ལྡན་པ་དང་། །ཐེམ་
སྐས་བཞི་ཡི་ཕྲེང་བ་དང་། །སེང་གེ་བ་གླང་རྣམས་ཀྱིས་བརྒྱན། །ཞེས་བྱ་བ་ནི། ཕྱོགས་རེ་རེ་ན་རྟ་བབས་རེ་དང་། ཐེམ་སྐས་ཕྲེང་བ་དང་། སེང་གེ་བ་གླང་རྣམས་ཀྱིས་མཛེས་པར་བྱས་པས་དེ་སྐད་ཅེས་བྱའོ། །དར་དང་ལྡ་ལྡི་དོ་ཤལ་ཕྲེང་། །དྲིལ་བུ་དང་ནི་རྔ་མས་བརྒྱན། །ཞེས་བྱ་བ་

ནི་དར་གྱི་ལྡ་ལྡི་དང་། མུ་ཏིག་གི་དོ་ཤལ་དང་། མེ་ཏོག་གི་ཕྲེང་བ་དང་། དྲིལ་བུ་གཡེར་ཁ་ལ་སོགས་པ་དང་། རྔ་མས་མཛེས་པར་བྱས་པ་ལ་དེ་སྐད་ཅེས་བྱའོ། །རྡོ་རྗེ་རིན་ཆེན་པདྨ་དང་། །རྒྱ་གྲམ་པ་ཡི་ཕྱག་རྒྱས་བརྒྱན། །ཞེས་བྱ་བ་ནི་ཤར་ཕྱོགས་སུ་རྡོ་རྗེ། ལྷོར་རིན་པོ་ཆེ། ནུབ་ཏུ་པདྨ།
བྱང་དུ་རྒྱ་གྲམ་གྱི་ཕྱག་རྒྱས་བརྒྱན་ཅིང་སྤྲུལ་པའོ། །སྲད་བུ་རྒྱན་དང་ལྡན་པ་དང་། །ཕྱི་ཡི་སྒོ་ཁྱུད་རྣམས་ཀྱིས་བརྒྱན། །ཞེས་བྱ་བ་ནི་ཚངས་ཐིག་གཉིས་དང་། ཟུར་ཐིག་གཉིས་དང་། ཤར་ཕྱོགས་དང་། ནུབ་དང་། བྱང་དང་། ལྷོ་ཕྱོགས་ཀྱི་ཐིག་སྟེ་བརྒྱད་དང་ལྡན་པ་དང་། སྒོ་ཁྱུད་
ནི་མཛེས་པ་དང་། རྗེས་སུ་མཛེས་པ་ཞེས་བྱ་བ་ནི་རྩིག་པར་སྟོན་པའི་ཆ་གཉིས་ཏེ་དེ་རྣམས་ཀྱིས་བརྒྱན་པའོ། །དགུ་ཡི་ཆར་ནི་བགོས་པ་ལས། །ཞེས་བྱ་བ་ནི་ནང་གི་དཀྱིལ་འཁོར་གནས་གྲུ་བཞི་པ་ཆ་དགུ་དང་ལྡན་པར་བགོས་པ་ལས་སོ། །སྒོ་དང་སྒོ་ཁྱུད་སུམ་ཆར་བྱ། །ཞེས་བྱ་བ་ནི་སྒོ་དང་སྒོ་ཁྱུད་
ལ་ཆ་ཆེན་གཅིག་གནས་པར་བྱས་པས་སུམ་ཆའི་ཡང་སུམ་ཆར་འགྱུར་རོ། །རྡོ་རྗེ་སྲད་བུས་ཐིག་གདབ་པོ། །ཞེས་བྱ་བ་ནི་རྡོ་རྗེ་སྲད་བུར་བྱིན་གྱིས་བརླབས་པས་གདབ་བོ། །དབུས་ཀྱི་དཀྱིལ་འཁོར་ཐིག་གདབ་པ། །ཞེས་བྱ་བ་ནི་དབུས་ཀྱི་ཡང་དབུས་ཀྱི་ཐིག་གདབ་པའོ། །ཆོས་ཀྱི་འཁོར་
ལོ་དྲ་བ་ལ། །ཞེས་བྱ་བ་ནི་རྡོ་རྗེ་དང་མཚོན་ཆའི་འཁོར་ལོ་ལྟ་བུ་མ་ཡིན་པ་ཆོས་ཀྱི་འཁོར་ལོ་འདྲ་བའོ། །ཡང་ན་ལྟེ་བ་དང་རྩིབས་རྟེན་དང་རྩིབས་དང་གསུམ་ཆོས་ཀྱི་འཁོར་ལོ་གསུམ་དང་འདྲ་བའོ། །ཡང་ན་སྟོང་པ་ཉིད་བཅུ་དྲུག་ཆོས་ཡིན་ལ་དེ་ཡང་འཁོར་ལོ་ནི་འདྲ་བའོ། །ལྟེ་བར་བཅས་
ཤིང་རྩིབས་བཅུ་དྲུག །ཅེས་བྱ་བ་ནི་ལྟེ་བ་དང་། རྩིབས་རྟེན་དང་བཅས་ཤིང་། རྩིབས་བཅུ་དྲུག་ཏུ་གྲངས་ངེས་པའོ། །རིམ་པ་གསུམ་དང་ལྡན་པ་ལ། །ཞེས་བྱ་བ་ནི་ལྟེ་བའི་རིམ་པ་དང་། རྩིབས་རྟེན་གྱི་རིམ་པ་དང་། རྩིབས་ཀྱི་རིམ་པ་དང་ལྡན་པའོ། །རྩིབས་ནི་ཉིས་འགྱུར་ཉིད་དུ་
བྱ། །ཞེས་པ་ནི། རྩིབས་བྱང་ཆུབ་སེམས་དཔའི་གནས་ཡིན་པས་གཙོ་བོའི་གནས་པས་ཉིས་འགྱུར་གྱིས་ཆུང་བར་བྱའོ་ཞེས་བྱ་བའི་དོན་ཏོ། །ཡང་ལྟེ་བ་ལ་བསྐོར་བའི་རིམ་པ་དང་པོ་ནི་རྩིབས་རྟེན་ནོ། །གཉིས་པ་ནི་རྩིབས་ཡིན་པའི་ཕྱིར། རྩིབས་ནི་ཉིས་འགྱུར་ཉིད་དུ་བྱ། །ཞེས་གསུངས་

སོ། །འདི་ནི་དོན་སླར་ཡང་གསལ་བར་བྱ་སྟེ། ས་ཡི་ཆ་ཡིད་དུ་འོང་བར་དཀྱིལ་འཁོར་གྱི་ཉིས་འགྱུར་གྱི་ཚད་ལ། མིག་བྱིན་གྱིས་བརླབ་ཅིང་བསྒྲིལ་བ་དང་རང་རྡོ་རྗེ་སེམས་དཔར་བསྐྱེད་དེ། གྲོགས་པོ་རྡོ་རྗེ་ལས་སུ་བསྐྱེད་ནས། དང་པོ་རང་ཤར་དུ་བལྟས་ཏེ་ཚངས་
ཐིག་གདབ། དེའི་འོག་ཏུ་བྱང་དུ་བལྟས་ཏེ་ཚངས་ཐིག་གཉིས་པ་གདབ། མེའི་གནས་སུ་གནས་ལ་ཤར་གྱི་ཐིག་གདབ། རླུང་གི་ཕྱོགས་སུ་བལྟས་ཏེ་ནུབ་ཀྱི་ཐིག་ཀྱང་གདབ། དེ་ཉིད་དུ་འདུག་སྟེ་ཤར་དུ་བལྟས་ཏེ་བྱང་དུ་ཐིག་ཀྱང་གདབ། མེའི་མཚམས་སུ་གནས་ནས་ལྷོ་ཕྱོགས་ཀྱི་
ཐིག་གདབ། དེ་ཉིད་དུ་འདུག་སྟེ་རླུང་ཕྱོགས་སུ་བལྟས་ཏེ་ཚངས་ཐིག་གདབ་པར་བྱ། བདེན་བྲལ་གྱི་ཕྱོགས་སུ་འདུག་སྟེ་དབང་ལྡན་དུ་ཁ་བལྟས་ལ་ཟུར་ཐིག་གཉིས་པ་གདབ། དེ་ལྟར་གྲུ་བཞིར་གནས་པ་ལ་ཆ་ཆེན་བཅུ་དྲུག་གདབ་པར་བྱའོ། །ཐ་མར་ཆ་ཆེན་གཉིས་པར་བྱའོ། །དབུས་ཀྱི་བཅུ་པོ་
གཉིས་གཉིས་གདབ། ཉི་ཤུ་རྩ་བཞི་དག་ཏུ་འགྱུར། །དེ་ནས་ཆ་ཕྲ་མོ་གདབ་པར་བྱ་བ་ནི། ཆ་ཆེན་དགུ་རུ་གནས་པ་ལ། །ཐ་མར་ལྔ་པའི་ཕྱེད་བོར་བ་ལ་ལྷག་མ་བརྒྱད་ལ་བཞི་བཞིར་བགོ་གསུམ་པ་དང་དེ་བཞིན་དུ་ལྔ་པ་ལ་ཡང་ངོ་། །ཕྱི་རོལ་གྱི་སྒོ་དང་ནང་གི་སྒོ་ཁྱུད་དང་ལོགས་སུ་འགྱུར་རོ། །
ལྔ་པའི་ཕྱེད་ནང་དུ་བོར་ནས་ཕྱི་རོལ་གཉིས་སུ་གདབ། དྲུག་པ་ལ་ཆ་བྲན་བཞི་བཏབ་ལ་བདུན་པའི་ནང་རོལ་ཆ་ཆུང་གཅིག་གདབ་བོ། །ཆ་གསུམ་མི་གདབ། དགུ་པ་དང་བཅུ་པ་བཅུ་གཅིག་པ་བཅུ་གཉིས་པ་བཞི་བཞིར་གདབ་བོ། །དེ་ནས་ཚོན་གྱི་ཐིག་གདབ་པར་བྱ་སྟེ། ལྔ་པ་ཕྱེད་ཀྱི་དང་པོ་
གདབ། །དེ་ནས་གཉིས་དོར་གསུམ་པ་གདབ། །དྲུག་པ་ལ་ཡང་གདབ་པར་བྱ། །དགུ་པའི་ནང་གི་ཆ་གཅིག་གདབ། །ཡང་གཉིས་དོར་ལ་ཆ་གཅིག་གདབ། །ཡང་གཉིས་བཞག་ལ་ཆ་གཅིག་གདབ། །ངོས་དང་འགྲམ་དང་ཡ་ཕུབས་འགྱུར། །ལྷག་མ་ནི་ཅི་རིགས་པར་སྦྱར་བར་བྱའོ། །དབུས་ཀྱི་དཀྱིལ་འཁོར་
ཐིག་གདབ་པ་ལ། ཚངས་ཐིག་གི་ཕྱོགས་གཅིག་ཏུ་བཅུ་གཅིག་པ་ཡོངས་སུ་བསྐོར་བས་རྩིབས་རྟེན་དུ་འགྱུར་རོ། །དེའི་ནང་དུ་ཕྱོགས་གཅིག་གི་བཞི་པ་བཏབ་བས་ཀ་བར་འགྱུར་རོ། །རྩིབས་རྟེན་གྱི་ཕྱི་རོལ་གསུམ་དོར་བ་ལ་རྩིབས་བཅུ་དྲུག་ཏུ་བྱ་སྟེ། གཙོ་བོའི་གནས་པས་ཕྱེད་ཀྱིས་

ཆུང་བ་ཉིས་འགྱུར་དུ་བྱའོ། །བཞི་པ་ཡོངས་སུ་བསྐོར་བས་རྡོ་རྗེའི་ཕྲེང་བའོ། །ཐིག་གདབ་པའི་ཆོ་གའོ། །དབུས་ཀྱི་ཕྱོགས་སུ་ཀུན་རིག་ནི། །དུང་དང་ཀུནྡ་ཟླ་འདྲ་བ། །ཞེས་པ་ནི་དཀྱིལ་འཁོར་གྱི་དབུས་ཀྱི་ཕྱོགས་སུ་བཅོམ་ལྡན་འདས་རྣམ་པར་སྣང་མཛད་ཁ་དོག་དུང་དང་ཀུནྡ་དང་། ཟླ་བ་
དང་འདྲ་བ་ལ་མཆོག་ཏུ་ཕུལ་དུ་བྱུང་བའོ། །དབྱིབས་དང་གདན་དང་རྒྱན་ཅི་ཞིག་ཅེ་ན། ཞལ་བཞི་པ་ལ་རྡོ་རྗེ་ཡི། །སེང་གེའི་གདན་ལ་བཞུགས་པ་དང་། །ཏིང་འཛིན་ཕྱག་རྒྱར་ལྡན་པ་དང་། །རྒྱན་རྣམས་ཀུན་གྱིས་བརྒྱན་པ་བྲི། །ཞེས་གསུངས་སོ། །ཞལ་བཞི་པ་ལ་ཞེས་བྱ་བ་སྐུ་གཅིག་
ལ་ཞལ་བཞིའོ། །དེ་ཡང་འོག་ནས་དེའི་སྤྱན་སྔར་ངན་སོང་ཀུན་འདྲེན་ཤར་ཕྱོགས་ལ་གསུངས་པའི་ཕྱིར་རོ། །སེང་གེའི་གདན་ལ་ཞེས་པ་སེང་གེ་དང་པདྨ་དང་ཟླ་བ་ལའོ། །རྡོ་རྗེའི་བཞུགས་པ་དང་ཞེས་སྦྱར་རོ། །འདིས་ནི་རྡོ་རྗེ་སྐྱིལ་ཀྲུང་གིས་བཞུགས་པར་བསྟན་ཏོ། །ཏིང་འཛིན་ཕྱག་རྒྱར་ལྡན་
པ་དང་། །རྒྱན་རྣམས་ཀུན་གྱིས་བརྒྱན་པར་བྲི། །ཞེས་བྱ་བ་ནི་ཏིང་ངེ་འཛིན་གྱི་ཕྱག་རྒྱ་དང་དབུ་རྒྱན་ལ་སོགས་པས་བརྒྱན་པར་བྲི་བ་དང་། གཞག་པ་དང་དགོད་ཅེས་བྱ་བའི་དོན་ཏོ། །བཅོམ་ལྡན་འདས་རྣམ་པར་སྣང་མཛད་དེའི་སྤྱན་སྔར་ཏེ། ཤར་དུ་ངན་སོང་ཀུན་སྦྱོང་བའི་རྒྱལ་པོ་བྲི་སྟེ་
ཕྱག་གཉིས་ཏིང་ངེ་འཛིན་དུ་བསྣོལ་བ་ཁ་དོག་ཇི་ལྟ་བུ་ཞེ་ན། ཟླ་བ་རྒྱས་དང་བ་མོའི་མདོག །རྒྱན་ཇི་ལྟ་བུ་ཞེ་ན། རྒྱན་རྣམས་ཀུན་གྱིས་ལེགས་རྫོགས་ལ། །རྒྱལ་མཆོག་སྐྱེས་བུ་གང་བ་བྲི། །ཞེས་བྱ་བ་ནི། རྒྱལ་མཆོག་གང་བས་མཚན་དང་དཔེ་བྱད་རང་བཞིན་གྱིས་བརྒྱན་པར་བསྟན་ལ།
སྔ་མས་ནི་གསལ་བའི་རྒྱན་སྟོན་ཏོ། །རྒྱབ་ཏུ་ཤཱཀྱའི་རིགས་དབང་པོ། །གཙོ་བོ་ཐུབ་པ་བྲི་བར་བྱ། །ཞེས་བྱ་བ་ནི་ནུབ་ཀྱི་ཕྱོགས་སུ་ཤཱཀྱ་ཐུབ་པ་ཁ་དོག་དམར་པོ་ཆོས་ཀྱི་འཁོར་ལོའི་ཕྱག་རྒྱ་ཅན་བྲི་བར་བྱའོ། །གཡོན་དང་གཡས་ཀྱི་ཕྱོགས་ཆར་ནི། །རྒྱལ་མཆོག་རིན་ཆེན་མེ་ཏོག་གཉིས། །
ཞེས་བྱ་བ་ནི་ལྷོ་དང་བྱང་དུའོ། །རིན་ཆེན་མེ་ཏོག་ཁ་དོག་སྔོན་པོ་མཆོག་སྦྱིན་གྱི་ཕྱག་རྒྱ་ཅན་དང་། བྱང་ཕྱོགས་སུ་མེ་ཏོག་ཆེར་རྒྱས་ཁ་དོག་ལྗང་གུ་མི་འཇིགས་པའི་ཕྱག་རྒྱ་ཅན་བྲི་ཞིང་དགོད་པར་བྱའོ། །འདི་དག་གི་གདན་ཡང་གླང་པོ་ཆེ་ལ་སོགས་པ་ཇི་སྐད་དུ་བཤད་པ་བཞིན་ཤེས་པར་

བྱའོ། །ལོ་ཙ་ན་དང་མཱ་མ་ཀཱི། །དེ་བཞིན་གོས་དཀར་སྒྲོལ་མ་རྣམས། །རང་གི་རིགས་ཀྱི་མཚན་མ་བཞིན། །གྲྭ་ཡི་ཕྱོགས་ནི་ཀུན་དུ་བྲི། །ཞེས་བྱ་བ་ནི། སངས་རྒྱས་སྤྱན་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་རྣམས་རང་གི་རིགས་གཙོ་བོའི་ཁ་དོག་དང་
མཚན་མ་ཅན་དང་། རྡོ་རྗེ་དང་། པདྨ་དང་། ཨུཏྤ་ལ་རྣམས་གོ་རིམས་བཞིན་དུ་ཕྱག་གཡས་ན་འཛིན་ཅིང་། གྲྭའི་ཕྱོགས་ཀུན་དུ་བྲི་བར་བྱའོ་ཞེས་བྱ་བའི་དོན་ཏོ། །རྩིབས་ཀྱི་ནང་ནི་ཐམས་ཅད་དུ། །རྡོ་རྗེ་སེམས་སོགས་སེམས་དཔའ་མཆོག །རྫུ་འཕྲུལ་ཆེ་བའི་སེམས་དཔའ་རྣམས། །གོ་རིམས་བཞིན་
དུ་བྲི་བར་བྱ། །ཞེས་བྱ་བ་ནི་རྩིབས་བཅུ་དྲུག་པའི་ནང་ཐམས་ཅད་དུ་རྡོ་རྗེ་སེམས་དཔའ་ལ་སོགས་པ་འབྲས་བུའི་བྱང་ཆུབ་སེམས་དཔའ་རྫུ་འཕྲུལ་ཆེ་བ་རྣམས་དབང་ལྡན་གྱི་མཚམས་ནས་བརྩམས་ཏེ་གོ་རིམས་བཞིན་དུ་བྲི་བར་བྱ་ཞེས་བྱ་བའི་དོན་ཏོ། །མཁས་པས་ལཱ་སྱེ་ལ་སོགས་པ། །མཆོད་པ་གྲྭ་ཡི་
ཕྱོགས་སུ་བྲི། །ཞེས་བྱ་བ་དཀྱིལ་འཁོར་གྱི་མདོག་དང་། །དབྱིབས་ལ་བྱ་བས་ལཱ་སྱེ་ལ་སོགས་པ་མཆོད་པ་བརྒྱད་ནང་གི་གྲྭ་དང་། ཕྱི་རོལ་གྱི་གྲྭར་བྲི་ཞེས་བྱ་བའི་དོན་ཏོ། །སྒོ་ཡི་ཕྱོགས་ནི་ཐམས་ཅད་དུ། །ཞེས་བྱ་བ་ནི་ཤར་ལ་སོགས་པ་བཞིར། སྒོ་བ་བཞི་ནི་བྲི་བར་བྱ། །ཞེས་བྱའོ། །རྟ་བབས་ཁྱམས་
ནི་ཐམས་ཅད་དུ། །ཞེས་བྱ་བ་ནི་ཀྱང་ཞེས་བྱ་བའི་དོན་ཏོ། །དེས་ནི་འདི་ལྟར་འགྱུར་ཏེ། ནང་གི་དཀྱིལ་འཁོར་གྱི་རྟ་བབས་ཀྱི་གནས་དང་། ནང་གི་ཁྱམས་ཉིད་ཀྱི་ནང་དུ་བྲི་ཞེས་བྱ་བ་སྟེ་བསྟན་པའོ། །དེ་ཉིད་བཤད་པ། བྱམས་པ་ལ་སོགས་བྲི་བར་བྱ། །ཞེས་བྱ་བ་ལ་སོགས་པ་གསུངས་ཏེ་ནང་གི་
ཁྱམས་ཉིད་དུ་བྱམས་པ་ལ་སོགས་པ་བཅུ་དྲུག་བྲི་བར་བྱའོ། །རྟ་བབས་ཀྱི་གནས་ཀྱི་ཁྱམས་ལ། རིམ་པ་གསུམ་གྱི་རང་བཞིན་བྲི། །ཞེས་ཏེ་དང་པོ་ལ་འཁོར་བ་གཅོད་མཛད་ལ་སོགས་པ་བཅུ་དྲུག་བྲི་བར་བྱའོ། །གཉིས་པ་ལ། ཉན་ཐོས་རྒྱལ་བ་ཐམས་ཅད་དང་། །ཞེས་བྱ་སྟེ། ཉིད་ཀྱི་གཅུང་ཚེ་
དང་ལྡན་པ་དགའ་བོ་ལ་སོགས་པ་བཅུ་དྲུག་བྲི་བར་བྱའོ། །གསུམ་པ་ལ་ཉོན་མོངས་འཇོམས་པ་འཇིགས་མེད་གདུང་བ་སེལ་བ་ལ་སོགས་པ་བཅུ་གཉིས་བྲི་བར་བྱའོ། །ཁྲོ་བོ་མངག་པ་ཕོ་ཉ་རྣམས། །བྲི་བྱ་ཡང་ན་མིང་ཡང་རུང་། །ཞེས་བྱ་བ་ནི་ཁྲོ་བོ་ཉིད་མངག་པ་ཡང་ཡིན་ལ་ཕོ་ཉ་ཡང་ཡིན་པས་

དེ་སྐད་ཅེས་བྱའོ། །བྲིའམ་ཡང་ན་མིང་ཡང་རུང་། །ཞེས་བྱ་བ་ནི་འདྲ་བའམ་མིང་དེ་ཡི་གེར་དགོད་པའང་རུང་སྟེ་ཕྱག་མཚན་དུ་དགོད་པར་བྱ་ཞེས་བྱ་བའི་དོན་ཏོ། །འདིས་ནི་དཀྱིལ་འཁོར་རྒྱལ་པོ་མཆོག་བསྒོམ་པ་སྟོན་ཏོ། །ཤར་ཕྱོགས་ཀྱི་སྒོར་འཇིག་རྟེན་གསུམ་སྣང་དང་འཇིག་རྟེན་གསུམ་འཇིག་
གོ། །ལྷོ་ཕྱོགས་ཀྱི་སྒོར་འཇིག་རྟེན་གསུམ་མཐར་བྱེད་དང་འཇིག་རྟེན་གསུམ་འདུལ་ལོ། །ནུབ་ཕྱོགས་ཀྱི་སྒོར་བདུད་རྩི་འཁྱིལ་པ་དང་། བེ་ཅོན་སྔོན་པོའོ། །བྱང་ཕྱོགས་ཀྱི་སྒོར་མི་གཡོ་མགོན་པོ་དང་རྟ་མགྲིན་བྲི་བར་བྱའོ། །ཕྱི་ཡི་དཀྱིལ་འཁོར་ཕྱི་རོལ་དུ། །ཞེས་བྱ་བ་ནི་སྔར་བསྟན་པ་དེ་ཉིད་ཀྱི་
ཕྱི་རོལ་དུ་མུ་རན་དཀར་པོ་བྲི་ཞིང་། དེ་ཉིད་ཀྱི་བར་དུ། གླིང་བཞི་པོ་ནི་བྲི་བར་བྱ། །འཛམ་བུའི་གླིང་དུ་ཚངས་པ་བྲི། །བྱང་ཕྱོགས་སུ་ནི་དབང་ཕྱུག་ཆེ། །ཤར་དང་ནུབ་ཀྱི་གླིང་དུ་ནི། །བརྒྱ་བྱིན་གཏོགས་འདོད་ཐམས་ཅད་ཀྱང་། །འཁོར་དང་བཅས་པ་བྲི་བར་བྱ། །ཞེས་བྱ་བ་ནི། ཤར་ཕྱོགས་སུ་བརྒྱ་
བྱིན་འཁོར་དང་བཅས། ལྷོ་ཕྱོགས་སུ་ཚངས་པ་འཁོར་དང་བཅས། ནུབ་ཕྱོགས་སུ་གཏོག་འདོད་འཁོར་དང་བཅས། བྱང་ཕྱོགས་སུ་མ་ཧཱ་དེ་བ་འཁོར་དང་བཅས་པ་བྲི་བར་བྱའོ་ཞེས་བྱ་བའི་དོན་ཏོ། །གཞན་རྣམས་དག་ཀྱང་དེ་བཞིན་ཏེ། །ཞེས་བྱ་བ་ནི། བརྒྱ་བྱིན་ནས་བརྩམས་ཏེ་དབང་
ལྡན་གྱི་མཐར་ཐུག་པར་འཁོར་དང་བཅས་པ་བྲི་བར་བྱའོ། །དེ་ཉིད་ཀྱི་འཁོར་བཤད་པ་ལྷ་མིན་ཞེས་བྱ་བ་ལ་སོགས་པའོ། །ལྷ་མིན་ཞེས་བྱ་བ་སུམ་བརྩེགས་དང་། རབ་སིམ་དང་། ཧེ་རན་ཀེ་ཤུ་དང་། ཀུན་དུ་སྣང་བ་ལ་སོགས་པའོ། །དྲི་ཟའི་རྒྱལ་པོ་ཡུལ་འཁོར་སྲུང་ལ་སོགས་པའོ། །ནམ་
མཁའ་ལྡིང་གསེར་མིག་ལ་སོགས་པའོ། །གནོད་སྦྱིན་ནོར་འཛིན་ལ་སོགས་པའོ། །སྲིན་པོ་ཨུ་བ་ཀརྣི་པུརྣ་ལ་སོགས་པའོ། །གཞན་ཡང་དེ་བཞིན་དུ་ལྟོ་འཕྱེ་ཆེན་པོ་དང་། ཡི་དགས་དང་། འདྲེ་རྣམས་དང་། ཀླུ་དང་། སྦྲུལ་དང་། རི་རྣམས་དང་། རྒྱལ་པོ་ཆེན་པོ་བཞི་རྣམས་དང་། གཟའ་
དང་། རྒྱུ་སྐར་དང་། ཁྲོ་བོ་མ་རུངས་པ་འཚེ་བའི་བགེགས་དང་། བི་ན་ཡ་ཀ་རྣམས་དང་། སེམས་ཅན་ཀུན་ལ་ཕན་པར་བྱེད་པའི་དྲང་སྲོང་སྐལ་བ་ཆེན་པོ་རྣམས་དང་། མཁའ་འགྲོ་མའི་བུད་མེད་རྣམས་དང་། སྲིན་པོ་རྣལ་འབྱོར་མ་རྣམས་དང་། འབྱུང་པོ་བཞིའི་ལྷ་ཆེན་པོ་རྣམས་དང་། ཁྱིམ་

དང་རི་དང་། ཀུན་དགའ་ར་བ་དང་། ནགས་ཚལ་དང་། དུར་ཁྲོད་ན་གནས་པ་དང་། གྲོང་ཁྱེར་ན་གནས་པ་རྣམས་ཀྱང་བྲི་སྟེ་མིང་དུ་གཞག་པ་དང་། ཕྱག་རྒྱར་གཞག་པ་དང་། ཐིག་ལེ་ཙམ་དུ་བྲི་བར་བྱ་སྟེ། འཁོར་འདི་རྣམས་ཀྱི་ཁ་དོག་ལ་སོགས་མ་བཤད་དོ། །
འདིས་ནི་འདི་སྐད་སྟོན་པ་ཡིན་ཏེ། ཐིག་བཏབ་པའི་རྗེས་ཐོགས་ལའོ། །ཚོན་གྱི་ལས་རྣམས་བྱས་ནས། ཚོན་དགྱེ་བ་སྔོན་དུ་འགྲོ་བས་ལྷ་རྣམས་གཞག་ཅིང་འཁོར་རྣམས་ནི་མིང་དང་། ཕྱག་རྒྱ་དང་། ཐིག་ལེ་ཙམ་དུ་བྲིས་ཀྱང་འགྲུབ་པར་འགྱུར་རོ་ཞེས་སྟོན་ཏོ། །དེ་ནས་ཞེས་བྱ་བ་ལ་སོགས་
པ་ལ་མཁས་པས་གཞག་ཅེས་ཐམས་ཅད་ལ་སྦྱར་བར་བྱའོ། །དེ་ཡང་དཀྱིལ་འཁོར་ལ་མཆོད་པའི་ཕྱིར། བླ་རེ་དང་། རྒྱལ་མཚན་དང་། ལྷབ་ལྷུབ་དང་། གདུགས་དང་། རྔ་མ་དང་། ལྡ་ལྡི་དང་། འཕན་དང་། སྣ་ཚོགས་པའི་ན་བཟའ་དང་། གསེར་ལས་བྱས་པའི་བྱ་བརྒྱད་དང་བཅུ་དྲུག་
གམ། སུམ་ཅུ་རྩ་གཉིས་ཀྱང་རུང་བ་དང་། དབང་བསྐུར་བའི་བུམ་པ་ཆུས་བཀང་བ་ལྔ་དང་། མེ་ཏོག་དང་། མར་མེ་དང་། གཏོར་མའི་བུམ་པ་དང་། མཛེས་པའི་བཤོས་ལ་སོགས་པ་དང་། བཟའ་བ་དང་། བཏུང་བ་ལེགས་པར་སྦྱར་བ་དང་། བཅའ་བ་སྣ་ཚོགས་པ་དང་། གནོད་སྦྱིན་སྲིན་པོའི་
ཁ་ཟས་སུ་གཏོར་མ་རྣམ་པ་སྣ་ཚོགས་པ་དང་། འབྱུང་པོ་ཀུན་དང་། ཀླུ་རྣམས་དང་། ལྷ་དང་། མི་དང་། མི་མ་ཡིན་གྱི་ཁ་ཟས་སུ་མེ་ཏོག་དང་། དྲི་སྣ་ཚོགས་དང་། འོ་མ་དང་། མར་དང་། ལི་ཁ་ར་དང་བཅས་པ་གཞག་པར་བྱའོ། །སློབ་མ་དང་བདག་དབང་བསྐུར་བའི་དོན་དུ་རྣམ་པར་རྒྱལ་
བའི་བུམ་པ་དྲིའི་ཆུས་རབ་ཏུ་བཀང་བ་རྡོ་རྗེ་སེམས་དཔའི་སྤྱན་སྔར་གཞག་པར་བྱའོ། །ལས་ཐམས་ཅད་པའི་བུམ་པ་ནི་ཤར་ཕྱོགས་ཀྱི་སྒོར་གཞག་པར་བྱའོ། །བུམ་པ་ལྷག་མ་རྣམས་ནི་ཕྱི་རོལ་གྱི་འཁོར་ཡུག་རྣམས་ལ་གཞག་པར་བྱའོ། །གཞན་ཡང་ཆོས་ཀློག་པ་བཞི་ཕྱོགས་བཞིར་གཞག་
པར་བྱའོ། །དེ་ལྟར་དཀྱིལ་འཁོར་ཀུན་དུ་ལེགས་པར་བཀོད་ནས་དགོངས་ཀའི་དུས་ནས་བརྩམས་ཏེ། དེ་ནས་ཞེས་བྱ་བ་ལ་སོགས་པས་ལྷ་རྣམས་མཆོད་པ་སྟོན་ཏེ། ཁྲུས་ལ་སོགས་པ་བྱས་ནས་ཞེས་བྱ་བ་ནི་དང་པོར་ཁྲུས་བྱ། གནས་བསྲུང་རྐང་པ་བཀྲུས་ཏེ་ཉེ་རེག་བྱ། སྔོན་དུ་བདག་

བསྲུང་བ་ལ་སོགས་པ་འགྲོ་བས་རྒྱན་གདགས་དྲིས་བྱུག །རྡོ་རྗེ་འཛིན་མས་ཞུགས་ནས་བསྐོར་བ་བྱ། ཆད་པ་དང་ལྷག་པ་ཞི་བར་བྱ། སྒོ་ཕྱེ་ལ་ཞེས་བྱ་བའི་དོན་ཏོ། །དེ་ཉིད་དྲི་དང་ཕྲེང་མཆོག་ཕྲེང་བ་ཅན། །དྲི་ཞིང་ཁ་བཀང་མཆོག་མཛེས་པ། །རྡོ་རྗེ་འཛིན་མས་ཞུགས་ནས་ཀྱང་། །ཞེས་བྱ་བའི་
དོན་ཡིན་ནོ། །ཀྱང་ཞེས་བྱ་བའི་དོན་ནི་བསྡུ་བ་སྟེ། དང་པོའི་སྦྱོར་བ་དང་། དཀྱིལ་འཁོར་རྒྱལ་མཆོག་དང་ལས་རྒྱལ་མཆོག་བསྒོམས་ལ། མཆོད་པ་གསང་བ་བཟླས་བརྗོད་བྱ། །ཧཱུཾ་མཛད་ང་རྒྱལ་གྱིས་སྒོ་ཕྱེ། །ཞེས་བྱ་བའི་དོན་ཏོ། །ཡང་། མེ་ཏོག་ཐོགས་ཏེ་སྒོ་ཕྱོགས་འདུག །གཙོ་བོ་
རྒྱལ་བ་སྲས་ཀྱི་འཁོར། །མང་པོ་རྣམས་ནི་སྤྱན་དྲངས་ཏེ། །ཞེས་བྱ་བ་ནི་གཙོ་བོའི་རྣལ་འབྱོར་དང་ལྡན་པས་དཔུང་པར་སེ་གོལ་བརྡབ་པ་བྱས་ལ། ཛཿཧཱུཾ་བཾ་ཧོཿཞེས་བརྗོད་དེ་སྤྱན་དྲང་ངོ་ཞེས་བྱ་བའི་དོན་ཏོ། །ཕྱག་རྒྱ་སྔགས་དང་བདག་ལྡན་པས། །ལྕགས་ཀྱུ་ལ་སོགས་བདག་སྦྱོར་ཞིང་། །ཞེས་
བྱ་བ་ནི། བདག་ཕྱག་རྒྱ་དང་སྔགས་དང་ལྡན་པའི་སྒོ་ནས་ལྕགས་ཀྱུ་ལ་སོགས་པའི་ལས་བྱ་ཞིང་ངོ་། །ཅི་ཞིག་སྤྱན་དྲང་ཞེ་ན། ཛཿཧཱུཾ་བཾ་ཧོཿཐུགས་རྗེའི་བདག །ཚུར་གཤེགས་ཞེས་ནི་བརྗོད་ནས་ཀྱང་། །ཞེས་བྱ་བ་གསུངས་སོ། །གསང་བའི་བཅིང་བ་བཅིངས་ནས་ནི། །ཞེས་བྱ་བ་ནི་དམ་ཚིག་དང་།
ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་པས། དམ་ཚིག་གི་བཅིང་བས་བཅིངས་ཞེས་བྱ་བའི་དོན་ཏོ། །ཕྱག་རྒྱ་གང་ཞིག་གིས་དགུག་པ་ལ་སོགས་པའི་ལས་བྱ་བ་མཛུབ་མོ་གཉིས་ཞེས་བྱ་བ་ལ་སོགས་པ་སྨོས་ཏེ། མཛུབ་གཉིས་ལྕགས་ཀྱུའི་ཚུལ་དུ་བྱ། །ཞེས་བྱ་བ་ནི་མཁྲིག་མ་
གཉིས་བསྣོལ་ཏེ། མཐེའུ་ཆུང་ལུ་གུ་རྒྱུད་དུ་སྦྲེལ། མཛུབ་མོ་གཉིས་ལྕགས་ཀྱུའི་ཚུལ་དུ་བྱ་བ་ནི་ལྕགས་ཀྱུའོ། །མཁྲིག་མ་གཉིས་མདུད་པ་བྱས་པ། །ཞགས་པ་བཞིན་དུ་སྦྱར་ནས་ཀྱང་། །ཞེས་བྱ་བའོ། །དེ་ལ་ལྕགས་སྒྲོག་ཚུལ་དུ་བྱ། །ཞེས་བྱ་བ་ནི་མཛུབ་མོ་གཉིས་གདུ་བུར་བཅིངས་པའོ། །
མཛུབ་མོ་གཉིས་སླར་ནང་དུ་བཀུག་ནས་བསྐྱོད་པར་གྱུར་ན་དབང་དུ་འགྱུར་ཞེས་བྱ་བ་ནི་དྲིལ་བུའོ། །དེ་ནས་མཚན་མ་སྐྱེས་ཏེ་མགུ་ནས་ནི། །ཐོག་མ་ཐ་མ་མེད་པར་མངོན་སུམ་མཐོང་། །ཞེས་བྱ་བ་ནི། དེ་ནས་ཞེས་བྱ་བ་ནི་བར་མ་ཆད་པ་སྟེ། སྤྱན་དྲངས་ལྕགས་ཀྱུ་ལ་སོགས་པས་ལས་བྱས།

བགེགས་བསལ་མཆོད་པ་དབུལ་བ་སྔོན་དུ་འགྲོ་བས་ཕྱག་རྒྱ་བཞིས་རྒྱས་གདབ། དབང་བསྐུར་བའི་རྗེས་ཐོགས་ཉིད་ལ་ཞེས་བྱ་བའི་དོན་ཏོ། །མཚན་མ་སྐྱེས་ཏེ་ཞེས་བྱ་བ་ནི། བསྒོམ་པ་དང་བཟླས་པ་བྱ་བར་བསྟན་ཏོ། །དེའི་འབྲས་བུ་ཁྱད་པར་མཐོང་ནས་མགུ་ནས་ནི།
ཐོག་མཐའ་མེད་པར་དངོས་པོ་ཐམས་ཅད་མངོན་པར་ཤེས་པ་སྐྱེས་པས་མཐོང་བར་འགྱུར་རོ་ཞེས་བྱ་བའི་དོན་ཏོ། །དེ་ནས་མཐོང་བ་ལ་སོགས་པའི་ལྷ་རྣམས་ལ། ཨརྒྷས་མཆོག་བསྟབས་གསང་ལ་སོགས་པ་ཡི། །དབྱངས་སྙན་པ་ཡི་བསྟོད་པའི་ལྷ་རྫས་ཀྱི། །མཆོག་གི་དམ་པ་རྣམས་ཀྱིས་
ལེགས་པར་མཆོད། །ཅེས་བྱ་བ་ནི། ཨརྒྷ་བྱིན་གྱིས་བརླབས་པ་དང་། གསང་བ་ལཱ་སྱེ་ལ་སོགས་པ་བརྒྱད་དང་། བསྟོད་པ་རྣམས་དབྱངས་སྙན་པས་འབུལ་ཞིང་། ལྷ་རྫས་ཀྱི་མཆོག་དམ་པ་གོང་དུ་བཤད་པ་བུམ་པ་ལ་སོགས་པ་རྣམས་ཀྱིས་ལེགས་པར་མཆོད་དོ་ཞེས་བྱ་བའི་ཐ་ཚིག་གོ། །འདི་
སྐད་དུ་སྟོན་པ་ཡིན་ཏེ། དང་པོ་རྡོ་རྗེ་འཛིན་མ་དང་དཔལ་གྱི་ལག་གཉིས་ལྟ་བུར་བཅིངས་ནས་མེ་ཏོག་གི་ཕྲེང་བ་ཐོགས་ཏེ། ཡིད་ཀྱིས་དཀྱིལ་འཁོར་དུ་ཞུགས་ལ་ཆད་པ་དང་ལྷག་པ་ཞི་བར་བྱ། མེ་ཏོག་གི་ཕྲེང་བ་དོར། མགོ་ལ་བཅིང་ངོ་། །ཨོཾ་བཛྲ་སཏྭ་ཧཱུཾ་ཞེས་ཀྱང་རྒྱུན་མི་ཆད་པར་བཟླས་པ་བྱ། ཧཱུཾ་
མཛད་ཀྱི་ང་རྒྱལ་དང་ལྡན་པས་སྒོ་བཞི་ཕྱེ། ཁྲུས་བྱས་དྲི་དང་ཕྲེང་བ་ལ་སོགས་པའི་རྒྱན་རྣམ་པ་སྣ་ཚོགས་ཀྱིས་བརྒྱན། ས་མ་ཡ་སྟྭཾ། ཞེས་བརྗོད་དེ་སྟན་ཐོག་ཏུ་འདུག །ལྕེ་ལག་པ་བྱིན་གྱིས་བརླབ་པ་ནས་བརྩམས་ཏེ། སྲུང་བའི་འཁོར་ལོ་ཐམས་ཅད་རྫོགས་པར་བྱ་ལ། སེམས་ཅན་ཐམས་ཅད་ལ་
ཕན་པའི་ཕྱིར་ནམ་མཁར་དཀྱིལ་འཁོར་བསྒོམ་པར་བྱའོ། །དེ་ནས་དྲིལ་བུ་སྟོང་པའི་བདག་ཏུ་བརྟག་པ་དང་། མཆོད་པ་རྣམ་པ་ལྔ་དང་། སྡིག་པ་ཐམས་ཅད་བཤགས་པ་ལ་སོགས་པ་ལྷ་དང་ལྷ་མ་ཡིན་གྱིས་མཆོད་ནས་མི་སྣང་བར་གྱུར་པ་དང་། བསམ་གཏན་དང་གཟུགས་མེད་པའི་སྙོམས་
པར་འཇུག་པ་མངོན་དུ་བྱས་ནས། འོག་མིན་དུ་བྱིན་ནས་མངོན་པར་བྱང་ཆུབ་པ་ལྔས་རྡོ་རྗེ་དབྱིངས་སུ་བསྐྱེད་དེ་བྱིན་གྱིས་བརླབ་པ་དང་། དབང་བསྐུར་བ་སྔོན་དུ་འགྲོ་བ་དང་བཅས་ཏེ་སྙིང་གའི་དཀྱིལ་འཁོར་དུ། ངན་སོང་སྦྱོང་བ་ལ་སོགས་པ་བྱས་ནས་དཀྱིལ་འཁོར་ལུས་ལ་བརྟགས་ཏེ། ནམ་མཁའི་

ཕྱོགས་སུ་གནས་ནས། རི་རབ་དང་ཁང་པ་བརྩེགས་པ་ལ་སོགས་པ་བསྐྱེད་དེ་ཐབས་དང་ཤེས་རབ་ཀྱིས་བདག་ཉིད་ཞུ་བ་ལས། ཀུན་རིག་གི་སྐུར་གྱུར་ནས། ཐུགས་ཀའི་ཟླ་བ་ལ་ལྷ་ཐམས་ཅད་བསྐྱེད་པ་ལས་ཐ་མི་དད་པར་བསམས་ཏེ་བསྡུ་བ་སྔོན་དུ་འགྲོ་བས། ཕྱག་དང་ཆེད་དུ་བརྗོད་པ་དང་། དཀྱིལ་
འཁོར་དུ་ཞུགས་ནས་བྱིན་གྱིས་བརླབས་ནས་ཡང་ཆེད་དུ་བརྗོད་པ་དང་། རྣལ་འབྱོར་པས་དབང་བླངས་ཤིང་། ལྕགས་ཀྱུ་ལ་སོགས་པས་ལས་བྱ་ཞིང་ཕྱག་རྒྱ་བཞིས་རྒྱས་བཏབ་ནས། ངན་སོང་ཐམས་ཅད་སྦྱོང་བའི་ལས་ལ་སྦྱར་ཏེ། མཆོད་པ་བསངས་ལ་བཟླས་པར་བྱ་བ་བརྗོད་ཅིང་། ཧཱུཾ་མཛད་ཀྱི་
ང་རྒྱལ་དང་ལྡན་པས་སྒོ་ཕྱེ་སྟེ། གཙོ་བོའི་སྦྱོར་བས་སངས་རྒྱས་རྣམས་བསྡུས་ལ། ལྕགས་ཀྱུ་ལ་སོགས་པས་ལས་བྱས་ལ། རྡོ་རྗེ་གནོད་སྦྱིན་གྱིས་བགེགས་བསལ་ལ། ར་བ་དང་དྲ་བ་བྱས་ལ། རྡོ་རྗེ་ཁུ་ཚུར་གྱིས་སྒོ་བཅད་དེ། བསྲུང་བས་བརྟན་པར་བྱས་ལ། མཆོད་ཡོན་དབུལ་བ་སྔོན་དུ་འགྲོ་
བས་ལྷ་ཐམས་ཅད་ཀྱི་དམ་ཚིག་གི་ཕྱག་རྒྱ་དང་། ཆོས་ཀྱི་ཕྱག་རྒྱ་དང་། ལས་ཀྱི་ཕྱག་རྒྱ་དང་། ཕྱག་རྒྱ་ཆེན་པོས་རྒྱས་བཏབ་ལ། །ལྷ་ཐམས་ཅད་དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ཏེ། སྒོམ་པ་དང་བཟླས་བརྗོད་མཐོང་སྣང་གི་བར་དུ་བྱས་ལ་མཐོང་བ་གསལ་བ་དང་། ཨརྒྷ་ལ་སོགས་
པ་མཆོད་པ་རྣམ་པ་ལྔ་དང་བརྒྱད་དང་བསྟོད་པ་དང་། བྱང་ཆུབ་སེམས་དཔའ་བཅུ་དྲུག་ལ་སོགས་པ་རྣམས་ཀྱིས་སྤ་ར་ཎ་ཁཾ་ཞེས་བྱ་བས་དབུལ་བར་བྱའོ་ཞེས་བྱ་བའི་དོན་ཏོ། །དེ་ནས་འབྱུང་པོ་ཀུན་གྱི་གཏོར་མ་བྱ། །སེམས་ཅན་བཀྲེས་ཤིང་སྐོམ་ལ་བཏུང་བ་དང་། །ཕྱོགས་ན་གནས་པ་རྣམས་ལ་རྣམ་
པར་བརྟག །དེ་ཡི་གཏོར་མ་ཇི་ལྟར་མཐུན་པར་བྱ། །ཞེས་བྱ་བ་ནི་དངོས་གྲུབ་གསོལ་བའི་ལྷ་རྣམས་མཆོད་པ་དེ་ནས་འབྱུང་པོ་ཀུན་ཞེས་བྱ་བ་སེམས་ཅན་ཐམས་ཅད་ཀྱི་དཀར་གསུམ་གྱིས་གཏོར་མ་བྱས་ཏེ་སེམས་ཅན་བཀྲེས་པ་ལ་བཟའ་བ་དང་ཞེས་སྦྱར། སྐོམ་པ་ལ་བཏུང་བ་དང་། ཕྱོགས་སྐྱོང་ཕྱོགས་
ན་གནས་པ་རྣམས་སྤྱན་དྲངས་ཏེ་གཏོར་མ་སྦྱིན། འཁོར་རྣམས་ལ་དེའི་གཏོར་མ་ཇི་ལྟར་མཐུན་ཞིང་འཚམ་པར་སྦྱིན་པར་བྱ་སྟེ། དེ་ཡང་ཕྱི་རོལ་དུ་གཏོར་མ་སྦྱིན་པར་བྱ་སྟེ། འབྲས་ཆན་མེ་ཏོག་ཆུ་དང་བཅས། །ཞེས་བྱ་བ་ལ་སོགས་པ་ལ། ཨ་ཀཱ་རོ་ཞེས་བྱ་བ་ལ་སོགས་པས་བྱིན་གྱིས་བརླབས་

ནས་འཕགས་པ་དཔུང་བཟང་ཀྱིས་ཞུས་པ་ལས་འབྱུང་བ་ལྟར་གཏོར་མ་སྦྱིན་པར་བྱའོ་ཞེས་བྱ་བའི་དོན་ཏོ། །དེ་ནས་ཉེ་རེག་དང་འཐོར་འཐུང་བྱས་ལ། ཐབ་ཁུང་དུ་མེ་ཏོག་གིས་ལྷ་རྣམས་སྤྱན་དྲངས་ལ་མར་གྱི་དགང་བླུགས་ལ་སོགས་པ་ཕུལ་ལ་སླར་སྤྱན་དྲངས་ཏེ།
བདག་མིང་འདི་ཞེས་བགྱི་བ་ཡི། །རྡོ་རྗེ་སློབ་དཔོན་དཀའ་ཐུབ་ཆེ། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །ཞེས་བརྗོད་པར་བགྱིའོ། །འདི་ཙམ་གྱིས་ནི་སློབ་དཔོན་གྱི་ལས་ཀྱི་ཆོ་ག་སྟོན་ཏོ། །དེ་ནས་སྔགས་པ་ཞེས་བྱ་བ་ལ་སོགས་པས་སློབ་མ་གཞུག་པ་ལ་
སོགས་པ་སྟོན་ཏོ། །དེ་ནས་ཞེས་བྱ་བ་ནི་སྔ་མ་བཞིན་ནོ། །སྔགས་པས་བླ་ན་མེད་པའི་བྱང་ཆུབ་ཀྱི། །གནས་སུ་སློབ་མ་ཡོངས་སུ་སྨིན་པར་བྱ། །འགྲོ་ལ་ཕན་ཕྱིར་མྱུར་དུ་བྱང་ཆུབ་སེམས། །དེ་དག་བྱང་ཆུབ་མཆོག་སེམས་བསྐྱེད་དུ་གཞུག །དེ་རྣམས་བྱིན་བརླབ་བྱང་ཆུབ་སྨོན་ལམ་གདབ། །
ཟབ་ཅིང་རྒྱ་ཆེ་བ་ཡི་ཆོས་བསྒྲགས་ལ། །སྲུང་བ་བྱས་ནས་བརྟུལ་ཞུགས་སྡོམ་གནས་པ། །ཞེས་བྱ་བ་ནི་འགྲོ་བ་ལ་ཕན་པའི་ཕྱིར་མྱུར་དུ་བྱང་ཆུབ་ཏུ་འགྱུར་བ་དང་། བྱང་ཆུབ་མཆོག་ཏུ་སེམས་བསྐྱེད་པ་དང་། རྡོ་རྗེ་སེམས་དཔར་བྱིན་གྱིས་བརླབ་ཅིང་བསྐྱེད་པ་དང་། སྡིག་པ་བཤགས། རྗེས་སུ་
ཡི་རང་བསྐུལ། གསོལ་བ་གདབ། ལམ་བསྒོམ། ཕྱག་འཚལ་བ་ལ་སོགས་པས་སྨོན་ལམ་གདབ་པ་དང་། ལྷག་པར་གནས་པའི་དུས་སུ་ཟབ་ཅིང་རྒྱ་ཆེ་བའི་ཆོས་བསྒྲགས་ལ། སྲུང་སྐུད་བཏགས་པས་སྲུང་བ་བྱས་ནས་ལྷག་པར་གནས་པ་དང་། དཀྱིལ་འཁོར་དུ་གཞུག་པའི་དུས་སུ་བརྟུལ་
ཞུགས་དང་སྡོམ་པ་ལ་གནས་པ་ཞེས་བྱ་བའི་དོན་ཏོ། །རང་གི་ཁ་ནས་སྔགས་ཟློས་གཞུག་པར་བྱ། །དར་ལ་སོགས་པས་མིག་གཉིས་གཡོགས་ནས་ནི། །རྡོ་རྗེ་འཛིན་མར་དཔལ་གྱི་ལག་གཉིས་སྦྱར། །མེ་ཏོག་རིན་ཆེན་ལ་སོགས་དེ་བརྒྱན་ལ། །གཡོན་གྱིས་ལག་པ་བཀང་སྟེ་གཞུག་པར་བྱ། །
ཞེས་བྱ་བ་ནི་སློབ་དཔོན་རང་གི་ཁ་ནས་སྔགས་བརྗོད་ཅིང་སློབ་མ་གཞུག་པར་བྱ་བ་དང་། དར་དང་རས་དམར་པོས་སྟོད་གཡོགས་དང་སྨད་གཡོགས་བྱས་ཤིང་མིག་གཉིས་གཡོགས་ནས་རྡོ་རྗེ་འཛིན་མར་དཔལ་གྱི་པདྨོར་ལག་པ་གཉིས་བྱས་ལ། མེ་ཏོག་ལ་སོགས་པའི་ཕྲེང་བས་བརྒྱན་ལ་ཡོན་

འབུལ་དུ་གཞུག་པར་བྱའོ་ཞེས་བྱ་བའི་དོན་ཏོ། །གཞུག་པའི་སྔགས་བསྟན་པ་ནི་སྔགས་ནི་འདི་རྣམས་ཡིན་ནོ་ཞེས་བྱ་བ་ནས། ས་མ་ཡེ་ཧཱུཾ་ཞེས་བྱ་བའི་བར་རོ། །དེ་ནས་སྔགས་འདིས་མེ་ཏོག་ལ་སོགས་པ་དོར་བར་བྱའོ་ཞེས་བྱ་བ་ནས་ས་མ་ཡ་སྟྭཾ་ཞེས་བྱ་བའི་བར་གྱིས་མེ་ཏོག་དང་རིན་པོ་ཆེ་ལ་
སོགས་པ་དོར་བ་བསྟན་ཏོ། །དོར་ནས་ཅི་ཞིག་བྱེད་ཅེ་ན། དངོས་གྲུབ་ཏུ་འགྱུར་བ་ནི་ལྷ་བཟུང་ཞིང་བསྒྲུབས་པས་འགྲུབ་པོ་ཞེས། མེ་ཏོག་རིན་ཆེན་ལ་སོགས་པ། །གང་ལ་བབ་པ་རིགས་ཀྱི་ལྷ། །གཙོ་བོའི་རིགས་དེ་བསྒྲུབས་ནས་ནི། །དངོས་གྲུབ་འགྱུར་ཏེ་ཐེ་ཚོམ་མེད། །ཅེས་གསུངས་སོ། །
དེ་ནས་སྔགས་ལ་མཁས་པ་ཡིས། །ཞེས་བྱ་བ་སློབ་དཔོན་གྱིས། སྔགས་འདིས་དམ་ཚིག་སྦྱིན་པར་བྱ། །ཞེས་བྱ་བ་ནི། སྔགས་འདི་བརྗོད་པ་སྔོན་དུ་འགྲོ་བས་སྦྱིན་པར་བྱ་སྟེ། ཨོཾ་ཞེས་བྱ་བ་ནས། ཧཱུཾ་ཞེས་བྱ་བའི་བར་རོ། །དེ་ནས་འདིས་དམ་ཚིག་བསྒྲག་པར་བྱའོ་ཞེས་བྱ་བ་ནས། བདག་གི་
དེ་ཉིད་དང་ནི་སྔགས་སོགས་དེ་བཞིན་ནོ། །ཞེས་བྱ་བའི་བར་འདིའི་དོན་ནི། སློབ་དཔོན་གྱི་དམ་ཚིག་བསྒྲག་པར་བྱ་བ་དང་། འདི་ནི་དམྱལ་བའི་ཆུ་ཡིན་ཏེ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ཐོབ། །ཅེས་གསུངས་པ་ནི། ཡང་ཅིས་ཏེ་དམ་ཚིག་འདས་ན་
སྔར་ཞུགས་པའི་ཡེ་ཤེས་ཀྱི་སེམས་དཔའ་གཤེགས་ཤིང་ཁྲོས་པས་ཀྱང་རང་གིས་བརྩམས་པ་བུ་དང་ཚ་བོ་ལ་སོགས་པ་བརླག་པར་མཛད་དེ། སྐྱོན་དེ་ལྟར་གནས་པ་དེ་བས་ན། རྟག་ཏུ་ཁྱོད་ཀྱིས་དམ་ཚིག་དང་བླ་མའི་བཀའ་མོས་པས་བསྲུང་བར་བྱའོ། །བསྲུང་བར་བྱ་བ་དེ་ཉིད་གང་ཡིན་ན་སྲོག་
གཅོད་པ་དང་། མ་བྱིན་པར་ལེན་པ་དང་། བརྫུན་དང་། འདོད་པ་ལོག་པར་སྤྱོད་པ་དང་། ཆང་བཏུང་བ་དང་། ཤ་ལ་སོགས་པ་བཟའ་བ་སྤང་། །སེམས་ཅན་གནོད་པར་སྦྱོར་བ་རྣམས་ཀྱང་མི་བྱ། དཀོན་མཆོག་གསུམ་མི་སྤང་། དུས་ཀུན་དུ་བྱང་ཆུབ་ཀྱི་སེམས་དང་། སྙིང་པོ་དང་། སྔགས་དང་།
ཕྱག་རྒྱ་དང་། ལྷ་དང་བླ་མ་མི་སྤང་། སྡིག་པའི་ལས་མི་བྱ། བླ་མའི་བཀའ་ལས་མི་འདའ། ལྷ་ལ་ཕུལ་བའི་རྙིང་པ་དང་། བླ་མའི་གྲིབ་མ་དང་། ཕྱག་རྒྱའི་གཟུགས་ལ་མི་འགོམ། སྔགས་དང་ལྷ་ལ་མི་སྨད། གཞན་ལ་གནོད་པ་དྲག་པོ་མི་བསྐུལ། མུ་སྟེགས་ཅན་ལ་མི་སྨད། དམ་པའི་

ཆོས་ལ་སོམ་ཉི་དང་ཡིད་གཉིས་མི་བྱ། བདག་གི་དེ་ཉིད་དང་སྔགས་དང་ཕྱག་རྒྱ་ལ་སོགས་པ་ལ་ཡིད་གཉིས་མི་བྱ་བའོ་ཞེས་བྱ་བའི་དོན་ཏོ། །འདིའི་སླར་ཡང་བསྒྲུབ་པའི་རིམ་པ་ནི་འདི་ཡིན་ཏེ། བསླབ་པ་ལྔ་ཡོངས་སུ་གཟུང་བའམ། དགེ་སྦྱོང་ངམ་དགེ་སློང་
གི་སྡོམ་པ་ཡོངས་སུ་གཟུང་བ་ལྷག་པར་གནས་པའི་ཆོ་ག་ཇི་ལྟ་བ་བཞིན་དུ་བྱས་པས། སློབ་དཔོན་གྱི་ཞབས་གཉིས་ལ་ཕྱག་བྱས་ཏེ་འདི་སྐད་ཅེས་བརྗོད་པར་བྱའོ། །དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་སེམས་དཔའི་ཚུལ་བསྟན་པ། །
མགོན་པོ་དེ་རིང་བདག་འཚལ་ལོ། །དམ་ཚིག་ཆེན་པོ་དེ་ཉིད་གསོལ། །སྡོམ་པ་རྣམས་ཀྱང་བདག་ལ་གསོལ། །དེ་ནས་ཡོལ་བའི་མཐར་རྡོ་རྗེ་སྲུང་བ་ཡོངས་སུ་བཟླས་པའི་རས་ཤིན་ཏུ་དམར་བས་སྟོད་གཡོགས་སྨད་གཡོགས་བསྐོན་ཞིང་། སྒོ་སྲུང་བཟླས་པའི་དར་དཀར་གྱི་གདོང་གཡོགས་
བཅིངས་ལ་ཕྱག་བྱེད་དུ་གཞུག་གོ། །མེ་ཏོག་ཐོགས་པས་ཡང་སློབ་དཔོན་ལ་ཕྱག་བྱས་ལ། སྡིག་པ་བཤགས་པ་དང་། རྗེས་སུ་ཡི་རང་བ་དང་བསྐུལ་བ་དང་། གསོལ་བ་གདབ་པ་ཡང་བྱས་ལ་འདི་སྐད་ཅེས་བརྗོད་པར་བྱའོ། །གཙོ་བོ་བདག་ལ་སྡོམ་པ་གསོལ། །ཐུབ་པའི་ཉི་མ་མ་ལུས་
པ། །སངས་རྒྱས་བདག་ལ་དགོངས་སུ་གསོལ། །བདག་མིང་འདི་ཞེས་བྱ་བ་ནི། །སློབ་དཔོན་དཔང་དུ་གནས་པ་ལ། །སངས་རྒྱས་རོལ་མོ་ལས་བྱུང་བ། །མི་ལྡོག་འཁོར་ལོའི་འབྱོར་པར་ལྡན། །ཐར་པ་ཆེན་པོའི་གྲོང་ཁྱེར་མཆོག །གསང་བ་ཆེན་པོར་འཇུག་པར་བགྱི། །གསང་བའི་རིགས་མཐོ་
ཐམས་ཅད་དུ། །སློབ་དཔོན་བདག་ནི་འཇུག་པར་མཛོད། །མི་ལྡོག་པ་ཡི་དབང་བསྐུར་བ། །སྐལ་བ་ཆེན་པོ་བདག་ལ་གསོལ། །མཚན་རྣམས་ཀུན་གྱིས་རབ་བརྒྱན་ཅིང་། །དཔེ་བྱད་རྣམས་དང་ཡང་དག་ལྡན། །སངས་རྒྱས་སྐུ་ནི་ཡིད་འོང་བ། །སློབ་དཔོན་ཆེན་པོ་བདག་ལ་སྩོལ། །དབང་བསྐུར་
ཆེན་པོ་རྨད་བྱུང་བ། །སེམས་ཅན་ཀུན་གྱི་དོན་བགྱིད་ཕྱིར། །བདག་ནི་རྟག་ཏུ་སློབ་དཔོན་འགྱུར། །སློབ་དཔོན་ཆེན་པོ་བདག་ལ་སྩོལ། །དེ་ནས་སློབ་དཔོན་གྱིས་རིགས་ལ་གསོལ་བ་གདབ་སྟེ། ཆེ་གེ་ཞེས་བྱ་འདི་ཉིད་ནི། །བྱང་ཆུབ་སེམས་ནི་ཡོངས་འཛིན་པ། །དམ་ཚིག་མཆོག་དང་གསང་བ་

ཡི། །འཁོར་ལོ་འདིར་ཡང་འཇུག་པར་འཚལ། །དེ་ནས་སློབ་དཔོན་གྱིས་འདི་སྐད་བརྗོད་པར་བྱའོ། །གསང་བ་ཆེན་པོའི་རིགས་དག་པ། །གསང་བ་ཆེན་པོ་འཛིན་པར་ནི། །བདག་ཉིད་ཆེན་པོ་ཁྱོད་འདོད་དམ། །དེས་ཀྱང་འཚལ་ཞེས་བརྗོད་པར་བྱ། །དེ་ནས། ཇི་ལྟར་དུས་གསུམ་མགོན་པོ་རྣམས། །
ཞེས་བྱ་བ་ནས། སེམས་ཅན་མྱ་ངན་འདས་ལ་དགོད། །ཅེས་བྱ་བའི་བར་དུ་བརྗོད་པར་བྱའོ། །ཡང་ཨོཾ་སརྦ་ཡོ་ག་ཙིཏྟ་ཨུཏྤཱ་ད་ཡཱ་མི་ཞེས་བྱ་བས་བྱང་ཆུབ་ཏུ་སེམས་བསྐྱེད་ནས། སྙིང་གར་རྡོ་རྗེ་བཞག་ནས། སུ་ར་ཏེ་ས་མ་ཡ་སྟྭཾ་ཧོ་བཛྲ་སིདྡྷི་ཡ་ཐཱ་སུ་ཁཾ། དེ་ནས་བཛྲ་སཏྭ། ཞེས་ཟློས་ཤིང་རྡོ་རྗེ་སེམས་
དཔའི་དམ་ཚིག་གི་ཕྱག་རྒྱས། རྡོ་རྗེ་སེམས་དཔར་བྱིན་གྱིས་བརླབས་ལ། རིགས་ཀྱི་དམ་ཚིག་གི་ཕྱག་རྒྱ་བཞིས་སྙིང་ག་ལ་སོགས་པ་བཞིར་བྱིན་གྱིས་བརླབས་ལ། དྲི་དང་མེ་ཏོག་ལ་སོགས་པས་མཆོད་ལ་ཡོན་གྱི་མཆོག་ཕུལ་ཏེ། ཕྱི་རོལ་ན་གནས་པའི་བུམ་པས་དབང་བསྐུར་ལ། ས་མ་ཡ་སྟྭཾ་ཞེས་
བྱ་བས་རྡོ་རྗེ་འཛིན་མ་དཔལ་གྱི་ལག་པ་གཉིས་སུ་ཤེས་པར་བྱ་སྟེ། མེ་ཏོག་གི་ཕྲེང་བ་ཐོགས་ལ། ཨོཾ་བཛྲ་ཨ་དྷི་ཏིཥྛ་ཧཱུཾ། ཨོཾ་བཛྲ་ས་མ་ཡ་ཧཱུཾ། ཨོཾ་བཛྲ་པྲ་བེ་ཤ་བཛྲ་ཧཱུཾ། ཨ་ས་མེ་ཏྲི་ས་མེ་མ་ཧཱ་ས་མ་ཡེ་ཧཱུཾ་ཞེས་བྱ་བ་འདིས་གཞུག་པར་བྱའོ། །དེ་ནས་སྒོ་དབྱེ་བའི་ཕྱག་རྒྱས་སྙིང་གར་ཕྱེ་ལ། རང་གི་སྙིང་
ག་ན་གནས་པའི་རྡོ་རྗེའི་དབུས་ན་ཡི་གེ་ཨ་རྡོ་རྗེ་དམར་པོའི་འོད་ཟེར་གྱི་ཕྲེང་བ་དང་ལྡན་པར་བསམས་ནས། སློབ་མའི་སྙིང་ག་ན་གནས་པའི་རྡོ་རྗེའི་དབུས་སུ་བློས་བཅུག་ལ་ལུས་ཐམས་ཅད་གང་བར་བསམས་ཤིང་། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ། རྡོ་རྗེ་སེམས་
དཔའ་བདག་ལ་འབབ་པར་གྱུར་ཅིག་ཅེས་སྨྲར་གཞུག་གོ། །དེ་ནས་སེམས་མ་རྡོ་རྗེ་འཛིན་མའི་ཕྱག་རྒྱ་བཅིངས་ལ། འདི་ནི་རྡོ་རྗེ་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བླ་མེད་འདི། །ད་ལྟ་ཉིད་དུ་འབབ་པར་ཤོག །ཅེས་བརྗོད་དུ་བཅུག་ལ། བཛྲ་ཨ་བེ་ཤ་ཨ་ཨ་ཨ་ཨ་
ཨཱ། ལན་བརྒྱའི་བར་དུ་བཟླས་ཤིང་དབབ་པར་བྱའོ། །དེ་ནས་སྣང་བ་དྲི་བར་བྱའོ། །མེ་ཏོག་གི་ཕྲེང་བ་ཧཱུཾ་པྲ་ཏཱིཙྪ་བཛྲ་ཧཱུཾ་ཞེས་བྱ་བས་དོར། ཡང་ན། སངས་རྒྱས་དངོས་གྲུབ་ཐོབ་བྱའི་ཕྱིར། །ཞེས་བྱ་བ་ལ་སོགས་པ་སྨོས་པས་དོར་རོ། །དེ་ནས་མགོ་ལ་བཅིང་བ་ནི། །ཨོཾ་པྲ་ཏི་གྲྀཧྞ་སྭ་མི་མཾ། སཏྭ་

མ་ཧཱ་བ་ལ་ཞེས་བྱའོ། །དམ་ཚིག་བསྒྲག་པར་བྱ་སྟེ། འདི་ནི་ཁྱོད་ཀྱི་དམྱལ་བའི་ཆུ། །ཞེས་བྱ་བ་ནས། བདག་གི་དེ་ཉིད་དང་ནི་སྔགས་སོགས་དེ་བཞིན་ནོ། །ཞེས་བྱ་བ་བརྗོད་དོ། །དེ་ནས་ཨོཾ་བཛྲ་ཧཱ་སྱོད་གྷ་ཊ་ཡ་ཧཱུཾ་ཞེས་བྱ་བས་གདོང་གཡོགས་དགྲོལ། ཨོཾ་བཛྲ་པཱ་ཤྱ་ཧཱུཾ་
ཞེས་བྱ་བས་དཀྱིལ་འཁོར་བསྟན། ཏིཥྛ་བཛྲ་ཞེས་བྱ་བ་ལ་སོགས་པས་འཇུག་པའི་ཕྱག་རྒྱ་སྙིང་གར་དགྲོལ་ལོ། །དེ་ལྟར་སློབ་མ་དཀྱིལ་འཁོར་དུ་གཞུག་པ་བཤད་ནས། དབང་བསྐུར་བར་བྱ་བའི་ཕྱིར་མོས་པ་བརྟན་པ་དང་ལྡན་པས་དམ་བཅའ་ཞིང་། སརྦ་བིད་ཀྱིས་ཇི་ལྟར་དབང་བསྐུར་
ཏེ། །བུམ་པ་ལ་སོགས་ཇི་སྙེད་མང་ཐོགས་པས། །བཅུ་པོ་རྣམས་ཀྱིས་དབང་བཅུ་ཅི་དགར་བསྐུར། །དེ་ནས་ལག་ཏུ་དྲིལ་བུ་རྡོ་རྗེ་སྦྱིན། །འཁོར་ལོ་ལ་སོགས་རིན་ཆེན་བདུན་ཐོགས་ལ། །མི་དབང་དབང་ཕྱུག་འཁོར་ལོ་ཐོགས་པ་དང་། །སྡིག་པ་གཞོམ་ཕྱིར་དབང་ནི་བསྐུར་བར་བྱ། །ཞེས་
བྱ་བ་ནི་སྡོམ་པ་འཛིན་པས་མོས་པ་བརྟན་པ་དང་ལྡན་པར་དམ་བཅས་ནས། ཨོཾ་སརྦ་བིད་ཨ་བྷི་ཥིཉྩ་ཞེས་བརྗོད་ཅིང་། ཇི་ལྟར་གསུངས་པའི་བུམ་པས་དབང་བསྐུར་ཞིང་། གཞན་ཡང་དབུ་རྒྱན་དང་དར་དཔྱངས་ལ་སོགས་པའི་ཕྲེང་བ་དང་། ཕྱག་རྒྱ་དང་། རྡོ་རྗེ་དང་། ལས་ཀྱི་རྡོ་རྗེ་དང་། འཁོར་ལོ་
དང་། ཐབས་ཤེས་རབ་གཉིས་སུ་མེད་པ་གསང་བ་དང་ཤེས་རབ་ཡེ་ཤེས་རྣམས་ཀྱིས་དབང་བསྐུར་བ་ཇི་སྙེད་ཐོགས་པས། བཅུ་པོ་རྣམས་ཀྱིས་དབང་བཅུ་ཅི་དགར་བསྐུར་རོ། །དེ་ནས་ལག་པ་གཡོན་དུ་དྲིལ་བུ་གཡས་སུ་རྡོ་རྗེ་བྱང་ཆུབ་ཀྱི་སེམས་དང་སྟོང་པ་ཉིད་དུ་བརྟགས་ལ་སྦྱིན། འཁོར་
ལོ་རིན་པོ་ཆེ་ལ་སོགས་པ་རིན་པོ་ཆེ་སྣ་བདུན་ཐོགས་ལ། ཨོཾ་བཛྲ་རཏྣ་ཨ་བྷི་ཥིཉྩ་ཞེས་བརྗོད་ཅིང་དབང་བསྐུར་བར་བྱའོ། །དེའི་ཕན་ཡོན་ནི། མི་དབང་དབང་ཕྱུག་འཁོར་ལོ་སྟེ། །འཁོར་ལོས་སྒྱུར་བའི་རྒྱལ་པོ་འཐོབ་པར་བྱ་བའི་ཕྱིར་དང་། འདིས་ནི་རིན་པོ་ཆེ་སྣ་བདུན་གྱི་འབྲས་བུ་བསྟན་ཏོ། །ཐམས་
ཅད་ཀྱི་ཐུན་མོང་གི་འབྲས་བུ་ནི། སྡིག་པ་གཞོམ་ཕྱིར་དབང་ནི་བསྐུར་བར་བྱ། །ཞེས་བྱའོ། །དེ་ནས་བཀའི་དབང་བསྐུར་བ་དང་། ལས་ཀྱི་དབང་བསྐུར་བ་ཡང་སྦྱིན་ཏེ་ཕྱིས་བཤད་པར་བྱའོ། །དེ་ལྟར་ན་དབང་ཉི་ཤུ་རྩ་གཅིག་ཏུ་འགྱུར་རོ། །ཅིའི་ཕྱིར་ཇི་ལྟ་བུ་ཞིག་ཅེ་ན། འཁྲུད་པར་བྱེད་པས་བརྟན་

པར་བྱེད་པའི་བདག་ཉིད་ཀྱི་ངོ་བོ་དང་ཕྱིར་མི་ལྡོག་པའི་ས་བོན་ལ་བྱའོ། །སྔགས་བསྒྲུབ་ཕྱིར་དུ་མོས་ལྡན་སློབ་མ་ལ། །སྔགས་པས་བཀའ་ནི་རབ་ཏུ་བསྒོ་བར་བྱ། །ཞེས་བྱ་བ་ནས་བརྩམས་ཏེ། བརྩེར་ལྡན་དངོས་གྲུབ་མྱུར་དུ་འགྲུབ། །ཅེས་བྱ་བའི་བར་གྱིས་སྔགས་བསྒྲུབ་པའི་ཕྱིར་སློབ་དཔོན་
གྱིས་བཀའ་རབ་ཏུ་བསྒོ་ཞིང་། སློབ་མས་བླ་མ་ལ་ཡོན་ཕུལ་ཏེ་དམ་ཚིག་སྦྱིན་པ་བསྟན་ཏེ་གོ་སླ་བའི་ཕྱིར་མ་བཤད་དོ། །སླར་ཡང་འདི་དག་གི་དོན་བཤད་པར་བྱ་སྟེ། ཤར་ཕྱོགས་ཀྱི་སྒོ་དང་ཉེ་བར་པདྨ་དཀར་པོ་ལ་གནས་པའི་འཁོར་ལོ་རྩིབས་བརྒྱད་པ་ལེགས་པར་བྲིས་ལ། དེ་ལ་སློབ་མ་རང་གིས་
ལྷར་བསྐྱེད་ནས། དྲི་དང་། བདུག་པ་དང་། མེ་ཏོག་དང་། ལྷ་བཤོས་དང་། མར་མེས་ཡང་དག་པར་མཆོད་དེ། བཀྲ་ཤིས་ཀྱི་ཚིགས་སུ་བཅད་པ་འདོན་ཅིང་། རྣམ་པར་རྒྱལ་བའི་བུམ་པ་ལས་རྡོ་རྗེ་ཁུ་ཚུར་གྱིས་ཆུ་བླངས་ལ། ཨོཾ་སརྦ་བིད་ཨ་བྷི་ཥིཉྩ་མཾ། ཞེས་བྱ་བའི་སྔགས་འདིས། སྤྱི་བོ་ནས་དབང་
བསྐུར་བར་བྱའོ། །དེ་ནས་རྡོ་རྗེ་འཛིན་པའི་བུམ་པ་དང་། ཤར་ཕྱོགས་ཀྱི་ངན་སོང་སྦྱོང་བའི་བུམ་པས་དབང་བསྐུར་ཞིང་། ཨོཾ་བཛྲ་ཀ་ལ་ཤ་ཨ་བྷི་ཥིཉྩ་ཧཱུཾ་ཞེས་བྱ་བ་དང་། གཙོ་བོའི་བུམ་པས་དབང་བསྐུར་ཞིང་། བུདྡྷ་ཀ་ལ་ཤ་ཨ་བྷི་ཥིཉྩ་ཨོཾ་ཞེས་བྱ་བ་དང་། རིན་ཆེན་ཏོག་གི་བུམ་པ་དང་། ཨོཾ་རཏྣ་ཀ་
ལ་ཤ་ཨ་བྷི་ཥིཉྩ་ཏྲཱཾ་ཞེས་བྱ་བ་དང་། ཤཱཀྱའི་དབང་པོའི་བུམ་པ་དང་། ཨོཾ་པདྨ་ཀ་ལ་ཤ་ཨ་བྷི་ཥིཉྩ་ཧྲཱིཿཞེས་བྱ་བ་དང་། མེ་ཏོག་ཆེར་རྒྱས་ཀྱི་བུམ་པ་དང་། ཨོཾ་ཀརྨ་ཀ་ལ་ཤ་ཨ་བྷི་ཥིཉྩ་ཨཿཞེས་བྱ་བས་དབང་བསྐུར་བར་བྱའོ། །དེ་ནས་རིན་པོ་ཆེ་ལ་སོགས་པའི་རྒྱུ་ལས་བྱས་པའི་དབུ་རྒྱན་དང་དེ་བཞིན་
གཤེགས་པའི་རིགས་སམ་བདེ་བར་གཤེགས་པའི་སྐུ་གཙོ་བོ་ཡིན་ན་རིན་པོ་ཆེའི་མྱུ་གུ། ཨོཾ་བཛྲ་ཨ་བྷི་ཥིཉྩ་ཧཱུཾ། བུདྡྷ་ཨོཾ། རཏྣ་ཏྲཱཾ། པདྨ་ཧྲིཿ། ཀརྨ་ཨཿཞེས་བྱས་པས། ཨོཾ་དང་ཨ་བྷི་ཥིཉྩ་བརྗོད་པས་དབང་བསྐུར་བར་བྱའོ། །དེ་ནས་རིན་པོ་ཆེ་ལ་སོགས་པའི་ཕྲེང་བས་དབང་བསྐུར་བ། ཨོཾ་རཏྣ་
མཱ་ལེ་ཨ་བྷི་ཥིཉྩ་ཏྲཾ་ཏྲཾ་ཏྲཾ་ཏྲཾ། ཨོཾ་པ་ཊ་བཱ་ལཾ་པ་ན་ཨ་བྷི་ཥིཉྩ་ཏྲཾ་ཞེས་བརྗོད་པར་བྱའོ། །དེ་ནས་རང་གི་དམ་ཚིག་གི་ཕྱག་རྒྱ་བཅིངས་ལ། ཨོཾ་བུདྡྷ་མུ་དྲ་ཨ་བྷི་ཥིཉྩ་ཨོཾ། དབུས་སུའོ། །ཨོཾ་བཛྲ་མུ་དྲ་ཨ་བྷི་ཥིཉྩ་ཧཱུཾ་ཤར་དུའོ། །ལྷོ་ནུབ་བྱང་རྣམས་སུ་ཏྲཱཾ་ཧྲཱིཿཨཿགཞན་འགྲེ། ཕྱག་རྒྱའི་དབང་

བསྐུར་བའོ། །དེ་ནས་དང་པོའི་རྡོ་རྗེ་བཅིངས་ལ། ཨོཾ་བཛྲ་ནཱ་མ་ཨ་བྷི་ཥིཉྩ་ཧཱུཾ། ཨོཾ་ཏྲཾ་ཧྲི་ཨཿཞེས་བྱ་བ་བརྗོད་དེ། ཡེ་ཤེས་ཀྱི་རྡོ་རྗེའི་དབང་བསྐུར་བའོ། །ལས་ཀྱི་རྡོ་རྗེ་སྣ་ཚོགས་ལག་ཏུ་བྱིན་ལ། ཨོཾ་ཀརྨ་བཛྲ་ཨ་བྷི་ཥིཉྩ་ཨཿཞེས་བྱ་བས་ལས་ཀྱི་རྡོ་རྗེའི་དབང་བསྐུར་རོ། །
ཆོས་ཀྱི་འཁོར་ལོ་རྐང་པའི་བར་དུ་བཅུག་ལ། ཨོཾ་བཛྲ་ཙཀྲ་ཨ་བྷི་ཥིཉྩ་ཧཱུཾ་བྷྲཱུཾ། ཨོཾ་ཙཀྲ་ཨ་དྷི་པ་ཏི་སྟྭཾ། ཨ་བྷི་ཥིཉྩ་ཨོཾ་ཧཱུཾ་ཏྲཾ་ཧྲི་ཨཿཞེས་གསུམ་དུ་རིགས་ཀྱི་དབྱེ་བས་བརྗོད་པར་བྱའོ། །འཁོར་ལོས་དབང་བསྐུར་བའོ། །དེ་ནས་རྡོ་རྗེ་དྲིལ་བུ་གཉིས་འཁྱུད་པའི་ཚུལ་དུ་བཟུང་ལ། ཨོཾ་བཛྲ་དྷ་ར་ན་
ཨ་བྷི་ཥིཉྩ་ཧཱུཾ། རིན་པོ་ཆེའི་དྲིལ་བུ་རིན་ཆེན་རྡོ་རྗེ་དང་འཁྱུད་པ། ཨོཾ་རཏྣ་དྷ་ར་ན་ཨ་བྷི་ཥིཉྩ་ཏྲཾ། པདྨོའི་རྡོ་རྗེ་དྲིལ་བུ་དང་། པདྨ་དྷ་ར་ན་ཨ་བྷི་ཥིཉྩ་ཧྲི། སྣ་ཚོགས་རྡོ་རྗེ་དྲིལ་བུ་དང་། ཀརྨ་དྷ་ར་ན་ཨ་བྷི་ཥིཉྩ་ཨཿ། དེ་བཞིན་གཤེགས་པའི་རྡོ་རྗེའི་དྲིལ་བུ་དང་། ཨོཾ་སརྦ་ཏ་ཐཱ་ག་ཏ་རཏྣ་ཨ་བྷི་ཥིཉྩ་ཨོཾ་
ཞེས་བྱ་བ་རིགས་ཐ་དད་པའི་སྒོ་ནས་ཐབས་དང་ཤེས་རབ་གཉིས་སུ་མེད་པར་དབང་བསྐུར་བར་བྱའོ། །དེ་ནས་ཨོཾ་སརྦ་ཏ་ཐཱ་ག་ཏ་གུ་ཧྱ་ཨ་བྷི་ཥིཉྩ་ཨོཾ་ཞེས་བརྗོད་དེ་སྐུའི་གསང་བ། ཨོཾ་བཛྲ་གུ་ཧྱ་ཨ་བྷི་ཥིཉྩ་ཧཱུཾ་ཞེས་བརྗོད་དེ་ཐུགས་ཀྱི་གསང་བ། ཨོཾ་རཏྣ་གུ་ཧྱ་ཨ་བྷི་ཥིཉྩ་ཏྲཾ་ཞེས་བརྗོད་དེ། ཡོན་ཏན་གྱི་
གསང་བ། ཨོཾ་པདྨ་གུ་ཧྱ་ཨ་བྷི་ཥིཉྩ་ཧྲི་ཞེས་བརྗོད་དེ། གསུང་གི་གསང་བ། ཨོཾ་ཀརྨྨ་གུ་ཧྱ་ཨ་བྷི་ཥིཉྩ་ཨ་ཨ་ཨ་ཞེས་བརྗོད་དེ། ཕྲིན་ལས་ཀྱི་གསང་བའོ། །གསང་བའི་དབང་བསྐུར་བ་སྦྱིན་པའོ། །དེ་ནས་ཆོས་ཐམས་ཅད་ནི་སྐྱེ་བ་མེད་པ་ཉིད་བསྟན་ཅིང་། ཨོཾ་པྲཛྙཱ་ས་མ་ཡ་ཨ་བྷི་ཥིཉྩ་ཧཱུཾ་ཨ། ཞེས་
བྱ་བས་ཤེས་རབ་ཡེ་ཤེས་ཀྱི་དབང་བསྐུར་བར་བྱའོ། །དེ་ནས་རས་སམ་གྲོ་ག་ལ་སོགས་པ་ལ། འཁོར་ལོ་རིན་པོ་ཆེ་ལ་སོགས་པ་བདུན་བྲིས་ལ། ཨོཾ་རཏྣ་ཨ་བྷི་ཥིཉྩ་ཞེས་དབང་བསྐུར་རོ། །དེ་ནས་ལག་པ་གཡས་པར་རྡོ་རྗེ་བྱིན་ལ། སངས་རྒྱས་རྣམས་ཀྱི་རྡོ་རྗེའི་དབང་། །དི་རིང་ཁྱོད་ལ་བསྐུར་
བར་བྱ། །སངས་རྒྱས་ཀུན་དུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང་། །ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་མི་ཏིཥྛ་བཛྲ་ས་མ་ཡ་སྟྭཾ་ཞེས་བྱ་བས་སྦྱིན་པར་བྱའོ། །ཨཿཞེས་བྱ་བས་དྲིལ་བུ་བསྐྱེད་ལ་སྦྱིན་པར་བྱའོ། །དེ་ནས་གདེངས་ཀའི་དབང་བསྐུར་བར་བྱའོ། །ཨོཾ་སརྦ་ཏ་ཐཱ་ག་ཏ་ཨཱ་ཛྙཱ་

ཏེ་དཱ་སི་མི་གྲྀཧྞ་བཛྲ