Luận tạng Tây Tạng (Tengyur) — Tập 64

་གྲུབ་པ་ལས་གསུང་ངེས་པར་འབྱུང་བ་ལས་ནི་ཡིད་ཀྱི་རྣམ་པར་ཤེས་པ་རྣམ་
པར་དག་པ་ལས། དེ་བཞིན་གཤེགས་པ་རྣམས་ཀྱི་སོ་སོར་རྟོག་པའི་ཡེ་ཤེས་ཏེ། དེའི་ཚུལ་དུ་བཤད་པ་ནི། ཡང་དག་བདག་མེད་དེ་བཞིན་ཉིད། །ཅེས་པ་ལ་སོགས་པ་གསུངས་ཏེ། དེ་ལ་གསུང་ཡོངས་སུ་དག་པའི་ཉིན་མཚན་ནི་མུ་སྟེགས་ལ་སོགས་པས་བརྟགས་པའི་བདག་དང་བྱེད་པ་པོ་དང་
བྲལ་ཞིང་ཡང་དག་པའི་དེ་བཞིན་ཉིད་ཀྱི་བདག་ཉིད་དོ་ཞེས་བྱའོ། །ཡང་དག་པའི་མཐའ་དེ་ཉིད་ཡི་གེའི་གཟུགས་ཀྱིས་བརྗོད་པ་གང་ཡིན་པ་དེ་ལ། ཡང་དག་མཐའ་སྟེ་ཡི་གེ་མེད། །ཅེས་བྱ་ཞིང་དེ་བཞིན་གཤེགས་པའི་གསུང་ནི་ཆོས་ཐམས་ཅད་སྟོང་པ་ཉིད་དུ་སྟོན་པ་སྟེ་ཉན་ཐོས་ལ་སོགས་པའི་རྟོག་པའི་ནང་

ནས་ཁྱུའི་རྒྱལ་པོར་ཞུགས་པ་ནི། སྟོང་ཉིད་སྨྲ་བའི་ཁྱུ་མཆོག་སྟེ། །ཞེས་བྱའོ། །ཟབ་ཅིང་རྒྱ་ཆེའི་སྒྲ་སྒྲོགས་པ། །ཞེས་པ་ནི་འདོད་ཆགས་དང་ཞེ་སྡང་ལྷན་ཅིག་པ་ཐབས་དང་ཤེས་རབ་ཆགས་པའི་ཚུལ་དང་། ཁྲོ་བོ་ཆེན་པོའི་རང་བཞིན་དུ་སྟོང་པ་ནི་ཟབ་པ་ཡིན་ལ། དེ་ཉིད་ཁམས་གསུམ་པའི་
སེམས་ཅན་ཐམས་ཅད་ཡོངས་སུ་བཟུང་བའི་ཚུལ་གྱིས་ངེས་པར་གྲགས་པ་གང་ཡིན་པ་དེ་ལ་དེ་སྐད་ཅེས་བྱའོ། །དེ་ཉིད་ཐེག་པ་ཆེན་པོ་འབའ་ཞིག་གིས་དོན་མཛད་དམ། དེ་ལྟ་ན་ནི་ཉན་ཐོས་ལ་སོགས་པ་རྗེས་སུ་མི་འཛིན་པའི་ཡང་དག་པར་རྫོགས་པའི་སངས་རྒྱས་ཡིན་པར་ཐལ་བར་འགྱུར་རོ་ཞེ་ན། དེའི་ཕྱིར་
གསུངས་པ། ཆོས་ཀྱི་དུང་སྟེ་སྒྲ་ཆེན་ལྡན། །ཆོས་ཀྱི་གཎྜཱི་སྒྲ་བོ་ཆེ། །ཞེས་གསུངས་ཏེ། དེ་ལ་ཆོས་ནི་མངོན་པར་མཐོ་བ་ཐག་རིང་པོར་རབ་ཏུ་བསྒྲགས་པ་ཉིད་དུ་སྟེ། དཔེའི་ཚུལ་གྱིས་སེམས་ཅན་ཐམས་ཅད་རྗེས་སུ་འཛིན་པ་ཉིད་དོ། །དགེ་འདུན་དེ་ནི་སོ་སོ་སྐྱེ་བོ་གཞན་ལ་མེད་ཅིང་དགེ་སློང་གི་དགེ་འདུན་
བསྡུ་བར་མཛད་པ་ཉིད་དོ། །དེ་ཡང་འདིའི་ཚུལ་གྱིས་འཕགས་པ་ཉན་ཐོས་རྣམས་ཀྱང་རྗེས་སུ་འཛིན་པར་མཛད་དོ་ཞེས་བྱ་བར་དགོངས་སོ། །ཡང་དག་པར་རྫོགས་པའི་སངས་རྒྱས་ནི་ཕུང་པོ་ལྷག་མ་མེད་པར་མི་གནས་པའི་མྱ་ངན་ལས་འདས་པ་ཡིན་པས་ན། མི་གནས་མྱ་ངན་འདས་པ་པོ། །ཞེས་བྱའོ། །འོ་ན་
དེ་བཞིན་གཤེགས་པ་ནི་ཐེག་པ་ཆེན་པོའི་རིགས་ཅན་དུ་ཉན་ཐོས་ཀྱི་རིགས་ཅན་ཙམ་ཞིག་ལ་ཆོས་སྟོན་ནམ་ཞེ་ན་མ་ཡིན་པར་གསུངས་པ་ནི། ཕྱོགས་བཅུའི་ཆོས་ཀྱི་རྔ་བོ་ཆེ། །ཞེས་གསུངས་ཏེ། ཕྱོགས་བཅུ་ནི་མ་ལུས་པའི་དོན་ཡིན་ལ་རྔ་ནི་དེ་དག་ཐམས་ཅད་ལ་རབ་ཏུ་བསྒྲགས་པ་སྟེ། རིགས་མ་ངེས་པ་དག་ཀྱང་རྗེས་
སུ་འཛིན་པ་ཉིད་དོ་ཞེས་བྱ་བར་དགོངས་སོ། །གཟུགས་མེད་གཟུགས་བཟང་དམ་པ་སྟེ། །ཞེས་པ་ནི་དེ་བཞིན་གཤེགས་པའི་གསུང་ཡོངས་སུ་རྫོགས་པ་ཡིན་ཏེ། དེ་འདུས་བྱས་པའི་གཟུགས་སུ་མེད་པའི་སངས་རྒྱས་ཀྱི་སྐུ་ཕུན་སུམ་ཚོགས་པའི་བདག་ཉིད་དུ་སྒྲུབ་པས་དེ་སྐད་ཅེས་བྱའོ། །རྣམ་པར་རྟོག་པ་དང་
བྲལ་བའི་ཆོས་ཀྱི་སྐུར་གྲུབ་ལ། སྤྲུལ་པའི་སྐུས་འགྲོ་བ་དྲུག་གི་རིགས་ཀྱི་གཙོ་བོར་གྱུར་པ་དང་། རྐྱེན་གྱི་རྗེས་སུ་འདུལ་བའི་གཟུགས་རྣམ་པ་སྣ་ཚོགས་རྣམས་སྐྱོབ་པ་ཆེན་པོའི་སྐུ་ལས་བྱུང་བ་ནི། སྣ་ཚོགས་གཟུགས་ཅན་ཡིད་ལས་སྐྱེས། །ཞེས་བྱའོ། །གཟུགས་ཀྱི་སྐུ་དང་པོ་མེ་ལོང་གཡའ་དག་པའི་རང་བཞིན་

གྱི་གཟུགས་བརྙན་རྣམ་པ་སྣ་ཚོགས་པར་སྣང་ཞིང་། དེ་ལས་དྲི་མ་དག་སྨྲ་བརྗོད་ལ་སོགས་པ་ཉིད་ཀྱིས་སེལ་བ་ལྟར། བྱང་ཆུབ་སེམས་དཔའ་རྣམས་ཀྱི་ཤེས་བྱའི་སྒྲིབ་པ་མ་ལུས་པ་རྣམས་དེ་བཞིན་གཤེགས་པའི་སྐུ་ལ་སྣང་ཞིང་། དེའི་ཆོས་དེའི་ཏིང་ངེ་འཛིན་གྱིས་གྲངས་མེད་པར་གྱུར་པར་མཛད།
བྱང་ཆུབ་སེམས་དཔའ་རྣམས་རང་ཉིད་ཀྱི་སྒྲིབ་པ་རྣམ་པར་སེལ་བར་མཛད་པ་ནི། གཟུགས་རྣམས་ཐམས་ཅད་སྣང་བའི་དཔལ། །ཞེས་བྱའོ། །དེ་ཉིད་མེ་ལོང་གི་དཀྱིལ་འཁོར་ལྟར་གཟུགས་བརྙན་ཐམས་ཅད་སྣང་བར་མཛད་པས་ན། གཟུགས་བརྙན་མ་ལུས་འཆང་བ་པོ། །ཞེས་བྱ་བ་
ཉིད་དོ། །སངས་རྒྱས་ཀུན་གྱིས་གསུངས་པའི་ཆོས་དམ་པ་དེ་ལ་ཕྱི་རོལ་གྱི་རྣམ་པར་གཡེང་བ་རྣམས་ཀྱི་ཚུགས་པ་མེད་པ་དང་། ཚངས་པ་དང་ཁྱབ་འཇུག་ལ་སོགས་པའི་བསྟན་པ་བས་ཁྱད་པར་དུ་གྱུར་ཅིང་ཁམས་གསུམ་པ་ཐམས་ཅད་ཀྱི་བདག་པོར་གྱུར་པས་ན། ཚུགས་པ་མེད་
ཅིང་ཆེ་བར་གྲགས། །ཁམས་གསུམ་དབང་ཕྱུག་ཆེན་པོ་སྟེ། །ཞེས་བྱ་ཞིང་དེ་ཉིད་འཕགས་པ་རྣམས་ཀྱི་ངེས་པའི་ལམ་དུ་གྱུར་པ་དང་། བྱང་ཆུབ་སེམས་དཔའི་ས་ལ་གནས་པར་གྱུར་པ་ནི། འཕགས་ལམ་ཤིན་ཏུ་མཐོ་ལ་གནས། །ཞེས་བྱའོ། །དེ་ལྟར་གསུང་ཡོངས་སུ་དག་པ་ལས་གྲུབ་
པའི་ཡོན་ཏན་བསྟན་པ་ནི། དར་བ་ཆེན་པོ་ཆོས་ཀྱི་ཏོག །ཞེས་བྱ་བ་ལ་སོགས་པ་གསུངས་ཏེ། གཉིས་སུ་མེད་པའི་བདེ་བའི་ཡེ་ཤེས་ཆེན་པོ་དང་རྒྱུན་གྱི་ཡེ་ཤེས་ཆེན་པོ་ཐོབ་པར་གྱུར་པ་དེ་ནི་བ་དན་ཆེན་པོ་ལྟར་རྫུ་འཕྲུལ་དང་། མངོན་པར་ཤེས་པས་ནམ་མཁའ་ལ་འགྲོ་བ་དང་། ཁམས་གསུམ་
གནས་ཀྱི་གོང་ན་དེ་ལས་མེད་པའི་གཙུག་གི་ནོར་བུ་ལྟར་མཐོ་བ་གང་ཡིན་པ་དེ་ལ་དེ་སྐད་ཅེས་བྱའོ། །འཇིག་རྟེན་པའི་དངོས་གྲུབ་བཅུད་ཀྱིས་ལེན་ཡོངས་སུ་གྲུབ་པའི་ཉི་མ་དང་། ཟླ་བ་ཇི་སྲིད་གནས་ཀྱི་བར་དུ་ཁམས་གསུམ་ན་ལོ་བཅུ་དྲུག་པ་འདྲ་བའི་ཆ་བྱད་དུ་འདུག་པ་ནི། འཇིག་རྟེན་གསུམ་ན་གཞོན་
ལུས་གཅིག །ཅེས་བྱའོ། །དེས་སོ་སོའི་སྐྱེ་བོ་ཐ་མ་པའི་ཚེ་རབས་དཔག་ཏུ་མེད་པར་གནས་ཤིང་སྐྱེ་དགུ་རྣམས་ཀྱི་གཙོ་བོར་གྱུར་པ་ནི། གནས་བརྟན་རྒན་པོ་སྐྱེ་དགུའི་བདག །ཅེས་བྱའོ། །དེ་ཉིད་དེ་བཞིན་གཤེགས་པའི་མཚན་དང་དཔེ་བྱད་ལྟར་འོད་གང་བ་དང་། ཡན་ལག་དང་ཉིང་ལག་མཛེས་

ཤིང་རྒྱས་པར་གྱུར་པ་དེ་ལ། སུམ་ཅུ་རྩ་གཉིས་མཚན་འཆང་བ། །ཞེས་བྱ་ཞིང་དེ་ཉིད་ཁམས་གསུམ་པ་ཐམས་ཅད་ཀྱི་བུ་གཅིག་པ་ལྟར་ཡིད་དུ་འོང་ཞིང་ཐིག་ལེ་མཆོག་ལ་སོགས་པ་འགུགས་པར་མཛད་པ་ནི། སྡུ་གུ་འཇིག་རྟེན་གསུམ་ན་མཛེས། །ཞེས་བྱ་བ་ཉིད་དོ། །དེ་ལྟ་བུའི་བདག་ཉིད་
ཆེན་པོའི་གནས་སྦྱོར་བ་དེས་ཉི་མ་དང་། ཟླ་བ་གནས་ཀྱི་བར་དུ་འཇིག་རྟེན་དུ་གནས་ན་ཐེག་པ་ཆེན་པོའི་སེམས་ཅན་ཐམས་ཅད་གྲོལ་བར་བྱ་བའི་ཕྱིར། ཐེག་པ་ཆེན་པོའི་ཟབ་མོའི་དོན་སྟོན་ཅིང་ཕྱི་དང་ནང་གི་ནད་དང་། འཇིགས་པ་ཐམས་ཅད་དང་སྡུག་བསྔལ་སྣ་ཚོགས་དང་བྲལ་བར་གྱུར་པ་ནི། འཇིག་
རྟེན་ཤེས་ལེགས་སློབ་དཔོན་ཏེ། །འཇིག་རྟེན་སློབ་དཔོན་འཇིགས་པ་མེད། །ཅེས་བྱ་བ་ཉིད་དོ། །དེ་ལྟ་བུའི་རྡོ་རྗེ་སློབ་དཔོན་དེ་འགྲོ་བ་མཐའ་དག་གི་མགོན་དུ་གྱུར་ཅིང་། ཐུགས་རྗེ་ཆེན་པོ་དང་ལྡན་པས་སེམས་ཅན་རྣམས་ལ་ཐུགས་བརྩེ་བར་མཛད་པས་ནི། མགོན་སྐྱོབ་འཇིག་རྟེན་ཡིད་གཅུགས་པ། །
ཞེས་བྱ་ཞིང་སྐྱབས་ཐམས་ཅད་ཀྱི་གཙོ་བོར་གྱུར་པས་བླ་ན་མེད་པ་ཉིད་ཀྱིས་ན། སྐྱབས་དང་སྐྱོབ་པ་བླ་ན་མེད། །ཅེས་བྱའོ། །དེ་ལྟར་འཇིག་རྟེན་པའི་དངོས་གྲུབ་སྨོན་པར་བསྟན་ནས། འཇིག་རྟེན་ལས་འདས་པའི་དངོས་གྲུབ་བསྟན་པ་ནི། ནམ་མཁའི་ཁམས་ལ་ལོངས་སྤྱོད་པ། །ཞེས་བྱ་བ་ལ་སོགས་
པ་གསུངས་ཏེ། ཕྱག་རྒྱ་ཆེན་པོའི་དངོས་གྲུབ་ནི་ནམ་མཁའི་མཐའ་དང་མཉམ་པར་འགྲོ་བའི་དོན་ལ་མངོན་པར་སྤྱོད་པ་ལ་དེ་སྐད་ཅེས་བྱ་ལ། དེ་ཉིད་རྣམ་པ་ཐམས་ཅད་མཁྱེན་པའི་ཡེ་ཤེས་ཉིད་དེ། དེ་ཡང་ཡེ་ཤེས་རྣམ་པ་སྣ་ཚོགས་པ་ཟད་པ་མེད་པའི་རྒྱ་མཚོར་གྱུར་པ་ནི། ཐམས་ཅད་མཁྱེན་པའི་ཡེ་ཤེས་
མཚོ། །ཞེས་པ་ཉིད་དོ། །དེ་ལྟར་ཡེ་ཤེས་སྤྲོས་པ་དང་བྲལ་བའི་མཚན་ཉིད་ཀྱང་འགྲོ་བ་རྣམས་ཡིད་ཀྱི་རྣམ་པར་ཤེས་པ་མ་རིག་པའི་སྦུབས་ཀྱིས་གཡོགས་པ་ཐམས་ཅད་དང་ཤེས་རབ་ཀྱི་བདེ་བ་ཆེན་པོས་འབྱེད་པའི་ཕྱིར་ན། མ་རིག་པའི་སྦུབས་འབྱེད་པ་ཞེས་བྱ་ཞིང་དེ་ཉིད་སྲིད་པའི་དྲ་བ་ཉིད་དོ། །དེ་རབ་
ཏུ་འཇོམས་པ་གང་ཡིན་པ་དེ་ལ། སྲིད་པའི་དྲ་བ་འཇོམས་པ་པོ། །ཞེས་བྱའོ། །དེ་ལྟ་བུའི་སྲིད་པའི་འདོད་ཆགས་ལ་སོགས་པའི་རྐྱེན་གྱིས་ཡང་ནས་ཡང་དུ་འབྱུང་བའི་སྡུག་བསྔལ་བ་ནི་ཉོན་མོངས་པ་ཡིན་ལ། དེ་ལྟ་བུའི་ཡེ་ཤེས་ཀྱི་ཆུ་བོས་ཞི་བར་བྱེད་པ་ནི། ཉོན་མོངས་མ་ལུས་ཞི་བྱེད་པ། །ཞེས་བྱ་

ཞིང་དེ་ལ་དུས་ཀྱི་ཡེ་ཤེས་ཆེན་པོ་དང་ལྡན་པས་རྟག་པར་བསྒྲུབས་ཤིང་དེ་ཡོངས་སུ་རྫོགས་པའི་མཐར་རྒྱུན་གྱི་ཡེ་ཤེས་འབྲས་བུ་ཆེན་པོ་ནི་སངས་རྒྱས་བཅོམ་ལྡན་འདས་འཁོར་བའི་རྒྱ་མཚོའི་ཕ་རོལ་ཏུ་ཕྱིན་པ་གང་ཡིན་པ་དེ་ནི། འཁོར་བའི་རྒྱ་མཚོའི་ཕ་རོལ་ཕྱིན། །ཞེས་བྱའོ། །དེ་ལྟ་བུའི་སྲིད་པའི་
དྲ་བ་འཇོམས་པ་འཁོར་བའི་རྒྱ་མཚོ་ལས་བརྒལ་བ་དེ་ག་ལས་ཐོབ་ཅེ་ན། ཡེ་ཤེས་དབང་བསྐུར་ཅོད་པན་ཅན། །ཞེས་བྱ་བ་ལ་སོགས་པ་གསུངས་ཏེ། ཡེ་ཤེས་ཀྱིས་དབང་བསྐུར་བ་ནི། ཡེ་ཤེས་དབང་བསྐུར་ཅོད་པན་ཅན། །ཞེས་བྱའོ། །བདེ་བ་ཆེན་པོའི་མཚན་ཉིད་དུ་གནས་པས་བདག་གི་བག་
ཆགས་ཀྱི་དྲི་མ་ཐམས་ཅད་དག་པར་གྱུར་པ་ཉིད་དང་། བདེ་བ་ཆེན་པོ་དེ་ཉིད་རྡོ་རྗེ་ནོར་བུའི་ཁ་ནས་སྤྱི་གཙུག་གི་དབུ་རྒྱན་དུ་འཁོར་བའི་ཕྱིར་ཅོད་པན་ཡིན་ལ། དེ་ཉིད་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ངོ་བོ་རྡོ་རྗེ་སེམས་དཔའ་ཡིན་ལ། དེ་བདག་རང་གི་དཔྲལ་བའི་རྒྱན་དུ་རྒྱས་
བཏབ་པ་ནི། རྫོགས་པའི་སངས་རྒྱས་རྒྱན་དུ་ཐོགས། །ཞེས་བྱ་བ་ཉིད་དོ། །སྡུག་བསྔལ་གསུམ་གྱི་སྡུག་བསྔལ་ཞི། །ཞེས་བྱ་བ་ནི་དེ་ལྟ་བུའི་རྡོ་རྗེ་འཛིན་པ་ཆེན་པོ་དབུ་རྒྱན་བྱས་པ་ལ་དགའ་བ་དང་མཆོག་གི་དགའ་བ་དང་བྲལ་བའི་དགའ་བ་གསུམ་ནི་རྟོག་པ་དང་བཅས་པའི་ཕྱིར་སྡུག་བསྔལ་ཡིན་ལ།
དེ་དག་རབ་ཏུ་ཞི་བ་གང་ཡིན་པ་དེ་ནི་ལྷན་ཅིག་སྐྱེས་པའི་དགའ་བ་ཞེས་བྱ་བར་དགོངས་ཏེ་དེ་ཉིད་ངེས་པར་བསྟན་པ་ནི། གསུམ་སེལ་མཐའ་ཡས་གྲོལ་གསུམ་ཐོབ། །ཅེས་གསུངས་ལ་དགའ་བ་དང་མཆོག་གི་དགའ་བ་དང་བྲལ་བའི་དགའ་བ་གསུམ་བསལ་བ་ལས། བདེ་བ་ཆེན་པོ་མཐའ་ཡས་
སྤྲོས་པ་དང་བྲལ་བར་གྱུར་ཅིང་། དེ་ལྟར་འཇིག་རྟེན་སྡུག་བསྔལ་ལས་ཐར་པ་ནི་གྲོལ་ཞེས་བྱ་བ་ཉིད་དོ། །རྒྱུ་དང་འབྲས་བུ་ལས་གྲོལ་ཞིང་ལྷན་ཅིག་སྐྱེས་པའི་བདེ་བ་ཆེན་པོ་ཐོབ་པོ་ཞེས་བྱ་བ་ཉིད་དོ། །དེ་ལྟ་བུ་ཉིད་ལས་དང་ཉོན་མོངས་པ་དང་། ཤེས་བྱ་དང་སྐྱེ་བའི་སྒྲིབ་པ་ཐམས་ཅད་
ངེས་པར་སྒྲོལ་བ་ནི། སྒྲིབ་པ་ཀུན་ལས་ངེས་པར་གྲོལ། །ཞེས་བྱ་ཞིང་། དེ་ཉིད་ནམ་མཁའ་ལྟར་བརྟན་པ་དང་གཡོ་བའི་དངོས་པོ་ཐམས་ཅད་ལས་མཉམ་པ་ཉིད་དུ་ཁྱབ་པར་གྱུར་པ་ནི། མཁའ་ལྟར་མཉམ་པ་ཉིད་ལ་གནས། །ཞེས་བྱ་ལ། དེ་ལ་གོང་གི་མཚམས་སྦྱར་བ་ནི། འདོད་ཆགས་དང་ཞེ་སྡང་

ལ་སོགས་པ་བདག་དང་བདག་གིར་འཛིན་པའི་རྣམ་པར་རྟོག་པའི་དྲི་མ་ཐམས་ཅད་ལས་འདས་པར་གྱུར་པ་ནི། ཉོན་མོངས་དྲི་མ་ཀུན་ལས་འདས། །ཞེས་བྱ་བ་ཉིད་དོ། །དེ་ལས་གཞན་གྱི་སེམས་རིག་པ་མཐའ་དག་རིག་པར་གྱུར་པའི་མངོན་པར་ཤེས་པ་ལྔ་ཡོངས་སུ་དག་པར་གྱུར་པ་ནི་འདས་པ་
དང་མ་འོངས་པ་དང་ད་ལྟར་བྱུང་བའི་དུས་ཀྱི་འབྲས་བུ་རྟོགས་པར་གྱུར་ཅིང་དེ་ཉིད་རྒྱུད་པ་དཔག་ཏུ་མེད་པའི་ཚུལ་གྱིས་ན་དུས་མེད་པ་ཞེས་བྱ་ལ་དེ་ལྟར་རྟོགས་པ་ནི། དུས་གསུམ་དུས་མེད་རྟོགས་པ་པོ། །ཞེས་བྱ་བ་ཉིད་དོ། །སེམས་ཅན་ཀུན་གྱི་ཀླུ་ཆེན་པོ། །ཞེས་པ་ནི་ཁམས་གསུམ་གྱི་སེམས་ཅན་ཐམས་ཅད་ལ་ཆོས་
ཀྱི་སྦྱིན་པའི་ཆར་རབ་ཏུ་འབེབས་པ་ནི་ཀླུ་ཡིན་ལ་ཁམས་གསུམ་པ་ཐམས་ཅད་དུ་ཁྱབ་པར་འགྱུར་བ་ནི་ཆེན་པོ་ཞེས་བྱ་བ་ཉིད་དོ། །ཆོས་ཀྱི་ངེས་པར་ལེགས་པ་དེ་ཉིད་ཀྱིས་སོ་སོ་སྐྱེ་བོ་རྣམས་ལྷག་པའི་ཚུལ་ཁྲིམས་དང་ཤེས་རབ་ལ་སོགས་པར་འཇིག་རྟེན་འདི་དང་ཕ་རོལ་ཏུ་ཕྱིན་པར་གྱུར་པ་ནི། ཡོན་ཏན་ཐོད་ཅན་
རྣམས་ཀྱི་ཐོད། །ཅེས་བྱའོ། །དེ་ཉིད་ཀྱིས་ཉོན་མོངས་པ་ཐམས་ཅད་ལས་ཐར་པ་གྲོལ་བར་མཛད་ཅིང་སྟོང་པ་ཉིད་ཀྱི་མཚན་ཉིད་ལ་རབ་ཏུ་གནས་པ་ནི། ལུས་ཀུན་ལས་ནི་རབ་གྲོལ་བ། །ནམ་མཁའི་མཐའ་ལ་རབ་གནས་པ། །ཞེས་བྱ་བ་ཉིད་དོ། །དེ་ལྟར་འབྲས་བུ་ཆེན་པོ་ཡོན་ཏན་དང་བཅས་པ་དང་སྣོད་རྣམ་
པར་དག་པ་ཟབ་མོའི་ཚུལ་དུ་བསྟན་ནས། དེའི་དོན་ཉིད་མ་འོངས་པའི་སེམས་ཅན་རྣམས་འདི་ལྟ་བུ་ཡོངས་སུ་གཟུང་བར་བྱའོ་ཞེས་བསྟན་པའི་ཕྱིར་ན། ཡིད་བཞིན་ནོར་བུ་ཆེན་པོ་འཆང་། །ཞེས་བྱ་བ་ལ་སོགས་པ་སྟེ། སེམས་ཅན་ཐམས་ཅད་སངས་རྒྱས་ཀྱི་ཡོན་ཏན་ཐམས་ཅད་ཀྱི་རྩ་བར་གྱུར་པ་ནི་བྱང་ཆུབ་
སེམས་ཡིན་ཏེ། དེ་བསྐྱེད་པ་ནི་ཡིད་བཞིན་ནོར་བུ་ལྟར་དགོས་པ་ཐམས་ཅད་གྲུབ་པར་བྱེད་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་ཐེག་པ་ཆེན་པོར་སེམས་བསྐྱེད་པ་ཡིན་ལ། དེ་ལས་ཁྱད་པར་དུ་ཐེག་པ་ཆེན་པོའི་གསང་སྔགས་སུ་སེམས་བསྐྱེད་པ་ནི། ཁྱབ་བདག་རིན་ཆེན་ཀུན་གྱི་མཆོག །ཅེས་བྱ་
སྟེ་དེ་ལ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་འབྱུང་བར་གྱུར་པ་ནི། དཔག་བསམ་ཤིང་ཆེན་རྒྱས་པ་སྟེ། །ཞེས་བྱ་བ་ཉིད་དོ། །དེའི་རྗེས་ལ་ངག་དང་ཡིད་ཀྱི་རྟེན་དུ་གྱུར་པ་ལུས་རྣམ་པར་དག་པར་བྱེད་པ་བུམ་པའི་དབང་བསྟན་པ་ནི། བུམ་པ་བཟང་པོ་ཆེ་བའི་མཆོག །ཅེས་གསུངས་

ཏེ། དེ་ལ་བུམ་པ་ནི་ལུས་ཀྱི་དྲི་མ་དང་རྟོག་པའི་ཚོགས་མཐའ་དག་ཞི་བར་བྱེད་པ་ཡིན་ལ། འཇིག་རྟེན་པའི་དབང་ཕྱུག་ཆེན་པོ་ལ་སོགས་པའི་སྲིད་སྲུང་གི་བུ་ཞེས་ཁྱད་པར་དུ་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་ཀྱི་སྡུག་བསྔལ་ངེས་པར་འཇིལ་བ་དང་། འབྲས་བུ་ཡོངས་སུ་གྲུབ་པའི་དོན་བྱེད་
པས་ན། བྱེད་པ་སེམས་ཅན་དོན་བྱེད་པ། །ཞེས་བྱའོ། །དེ་ལྟ་བུའི་དོན་བྱེད་པའི་ཚུལ་ནི་བདེ་བ་དང་ལྡན་པར་ཕན་འདོགས་པ་དང་། སྲིད་པའི་འཇིགས་པ་རྣམ་པ་སྣ་ཚོགས་རྣམས་སྐྱོབ་པའི་གྲོགས་སུ་གྱུར་པས་ན། ཕན་འདོགས་སེམས་ཅན་མཉེས་གཤིན་པ། །ཞེས་བྱ་ཞིང་དེ་ཉིད་ཀྱི་དུས་དེ་ཁོ་ན་ཉིད་ཅེས་
པ་ལྟར་མི་དགེ་བའི་མཚན་ཉིད་ཡིད་དུ་མི་འོང་བ་དོར་བ་དང་། དགེ་བའི་མཚན་ཉིད་ཡིད་དུ་འོང་བའི་རྒྱུ་དེ་ལ་བཀོད་པ་ནི། བཟང་ངན་ཤེས་ཤིང་དུས་ཤེས་ལ། །ཞེས་བྱ་བ་ཉིད་དོ། །དེ་ལྟ་བུའི་དེ་ཉིད་ཀྱིས་སངས་རྒྱས་ཀྱི་མངོན་པར་རྟོགས་པ་ཐམས་ཅད་ཐོབ་པར་བྱེད་པ་དང་། ཡོངས་སུ་དག་པའི་མཚན་ཉིད་ལས་
མི་འདའ་བའི་ཕྱིར་ན། ཁྱབ་བདག་དམ་ཤེས་དམ་ཚིག་ལྡན། །ཞེས་བྱ་ལ་གོང་མ་མཉེས་བརྟེན་པའི་དུས་ཤེས་པ་དང་། དངོས་གཞི་ལེགས་པར་སྒྲུབ་པའི་གསལ་བའི་དུས་ཤེས་པ་ནི། དུས་ཤེས་སེམས་ཅན་དབང་པོ་ཤེས། །ཞེས་བྱ་སྟེ་དེ་ཉིད་སྣོད་དང་རྒྱུ་དང་འབྲས་བུ་རྣམ་པར་དག་པ་ཉིད་དུ་རྟོགས་
པ་ནི། རྣམ་གྲོལ་གསུམ་ལ་མཁས་པ་པོ། །ཞེས་བྱའོ། །དེ་ལྟར་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་གྱི་ཚོགས་དཔག་ཏུ་མེད་པ་རྣམས་དང་ལྡན་ཞིང་གོང་ནས་གོང་དུ་འབྲས་བུ་ཆེན་པོ་སྐྱེད་པར་གྱུར་པ་ནི། ཡོན་ཏན་ལྡན་ཞིང་ཡོན་ཏན་ཤེས། །ཞེས་བྱ་ཞིང་བུམ་པ་དང་གསང་དབང་དང་ཤེས་
རབ་ཡེ་ཤེས་དང་རྒྱུ་རྣམ་པར་དག་པ་དང་། འབྲས་བུ་ཕུན་སུམ་ཚོགས་པ་རྣམས་བདེ་བ་ཆེན་པོའི་མཚན་ཉིད་ཀྱིས་སྲིད་པ་དང་། མི་དགེ་བའི་ཚོགས་མཐའ་དག་དང་། བདུད་དང་དབང་ཕྱུག་དང་ནད་དང་རིམས་ལ་སོགས་པ་ཐམས་ཅད་ཞི་བར་མཛད་པ་དང་། ཡིད་དུ་འོང་བ་ཕུན་སུམ་ཚོགས་པ་དང་ལྡན་
པར་བྱེད་པ་ནི་འཇིག་རྟེན་ན་བཀྲ་ཤིས་པ་ཞེས་ཟེར་ལ་དེའི་ཕྱིར་ན། ཆོས་ཤེས་བཀྲ་ཤིས་བཀྲ་ཤིས་འབྱུང་། །བཀྲ་ཤིས་ཀུན་གྱི་བཀྲ་ཤིས་པ། །གྲགས་པའི་བཀྲ་ཤིས་སྙན་གྲགས་དགེ །ཞེས་གསུངས་ཏེ་དེ་ལྟར་དབང་དང་རྒྱུ་དང་འབྲས་བུ་ནི་ཤེས་པ་ལྔ་ཡིན་པར་བསྟན་ལ་ལེའུ་དང་པོ་ལས་ཀྱང་། སྦྱོར་བ་ལྡན་

ཞིང་མི་དགེ་སྤོང་། །བཀྲ་ཤིས་སུ་ནི་བརྗོད་པ་ནི། །ལུས་དག་ནས་ནི་རྫོགས་པའི་མཐར། །ཤིས་པ་ལྔ་རུ་བཤད་པ་ཡིན། །ཞེས་གསུངས་སོ། །དེ་ཉིད་འཁོར་བའི་སྡུག་བསྔལ་དཔག་ཏུ་མེད་པ་ཆུ་བོའི་རླབས་བཞིན་དུ་ཡང་ནས་ཡང་དུ་འདས་པས་ངལ་བར་གྱུར་པ་གང་ཡིན་པ་དེ་ལ་ཤིས་པ་ཆེན་པོའི་ཚུལ་
གྱིས་དབུགས་འབྱིན་པར་བྱེད་ཅིང་རབ་ཏུ་དགའ་བའི་སྟོན་མོས་ཚིམ་པར་བྱེད་པ་དང་། སྲིད་པའི་རྐྱེན་གྱིས་སྐྱོ་བར་གྱུར་པ་ལས་རྒལ་བ་དང་། རྣམ་པ་སྣ་ཚོགས་པའི་རོལ་མོས་སངས་རྒྱས་པར་མཛད་པ་གང་ཡིན་པ་དེ་ནི། དབུགས་འབྱིན་ཆེན་པོ་དགའ་སྟོན་ཆེ། །དགའ་ཆེན་རོལ་མོ་ཆེན་པོ་སྟེ། །ཞེས་བྱའོ། །
དེ་ལྟར་ཐེག་པ་ཡོངས་སུ་རྫོགས་པའི་དབང་དམ་པ་ཐོབ་པ་ལས་གྱུར་པ་ལ་ལྷ་དང་མི་ལ་སོགས་པ་སྲིད་པ་གསུམ་གྱི་བདག་པོ་ཐམས་ཅད་ཀྱིས་རབ་ཏུ་བསྟོད་པར་གྱུར་པ་ནི། བཀུར་སྟི་རིམ་གྲོ་ཕུན་སུམ་ཚོགས། །ཞེས་བྱ་ཞིང་། མཆོག་ཏུ་དགའ་བའི་གྲགས་བདག་དཔལ། །ཞེས་པ་ནི་དེ་ལྟར་མཆོད་པའི་ཚོགས་ཕུན་སུམ་
ཚོགས་པ་ཐོབ་པར་གྱུར་པ་ལས་ནི་བདག་ཉིད་ཞེན་པ་མེད་པའི་དགའ་བ་དང་ལྡན་པ་དང་། དེ་ལ་དུས་གསུམ་གྱི་བདག་པོ་ཆེན་པོར་གྱུར་པས་གསུངས་པ་ཐམས་ཅད་དུ་གྲགས་ཤིང་བདག་གི་དོན་ཕུན་སུམ་ཚོགས་པར་རབ་ཏུ་ལྡན་པ་དེ་ལ་དེ་སྐད་ཅེས་བྱ་ཞིང་གཞན་གྱི་དོན་ཕུན་སུམ་ཚོགས་པ་ལ་ཡང་བདག་ཉིད་
དུ་གནས་པ་དང་། བདག་ཉིད་ལ་ཐར་པ་ཆེན་པོའི་རྒྱུ་རབ་ཏུ་སྟོན་པར་བྱེད་པ་ནི་སྦྱིན་པ་རྣམས་ཀྱི་ནང་ནས་མཆོག་གམ་གཙོ་བོ་ཞེས་བྱ་སྟེ། དེའི་ཕྱིར་ན། མཆོག་ལྡན་མཆོག་སྦྱིན་གཙོ་བོ་སྟེ། །ཞེས་བྱ་ལ་རབ་ཏུ་བརྒྱུད་པའི་དབང་དམ་པ་དེ་ཉིད་དམན་དང་མིའི་དབང་ཕྱུག་ལ་སོགས་པ་སྐྱབས་ཐམས་ཅད་ཀྱི་དམ་
པར་གྱུར་པ་དང་། གང་དང་གང་སྐྱབས་སུ་སོང་བ་ཐམས་ཅད་ལ་གནོད་པའི་རྐྱེན་གྱིས་མི་གོས་ཤིང་དེ་ལས་ཀྱང་ཡོན་ཏན་གྱི་ཚོགས་ཆེན་པོ་དང་ལྡན་པར་གྱུར་པས་ནི། སྐྱབས་ཀྱི་དམ་པ་སྐྱབས་སུ་འོས། །ཞེས་བྱ་བ་ཉིད་དོ། །སྐྱབས་དམ་པ་དེ་ཉིད་འཁོར་བའི་རྒྱ་མཚོའི་ནང་ན་ཆུ་སྲིན་གྱི་མཆེ་བ་དུག་དང་འདྲ་བའི་རྣམ་
པར་རྟོག་པའི་དོན་ནི་འཇིགས་པ་ཆེན་པོ་ཡིན་ལ་དེ་ཉིད་ངེས་པར་འཇིལ་བ་དེའི་དགྲ་ཡིན་ཞིང་། དེ་ཉིད་སྐྱེད་དུ་མེད་པ་གཙོ་བོར་གྱུར་པ་དང་ཕྱི་དང་ནང་གི་འཇིགས་པའི་ཚོགས་དཔག་ཏུ་མེད་པ་ཐམས་ཅད་སེལ་བར་མཛད་པ་ལས་སྐྱབས། འཇིག་རྟེན་དགྲ་སྟེ་རབ་ཀྱི་མཆོག །འཇིགས་པ་མ་ལུས་སེལ་བ་པོ། །ཞེས་

བྱའོ། །གཙུག་ཕུད་ཕུད་བུ་ལྕང་ལོ་ཅན། །ཞེས་བྱ་བ་ལ་དེ་ལ་གཙུག་ཕུད་ནི་འཛག་པ་ཉེ་བར་བསྟེན་པ་ཞེས་བརྗོད་དེ། འཁོར་བའི་བདག་ཉིད་དུ་ཡང་ནས་ཡང་དུ་སྐྱེ་བར་འགྱུར་བ་ནི་འཛག་པ་ཞེས་བྱ་བ་ལ། དེ་ཉིད་ཐར་པ་ཆེན་པོའི་གྲོང་ཁྱེར་གྱི་སྐྱོ་བར་བྱེད་པ་དང་། རྣམ་པར་སྣང་མཛད་དེ་རབ་ཀྱི་བདག་ཉིད་གཙོ་བོར་
གྱུར་པའི་གནས་དཔྲལ་བ་རུ་རབ་ཏུ་བཞག་པ་དང་། དེ་ལ་ཡོན་ཏན་གྱི་ཚོགས་བསྐྱེད་པར་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། རལ་པ་མུཉྫ་ཅོད་པན་ཐོགས། །ཞེས་པ་ནི་དྲུག་པའི་དོན་ལ་དང་པོའི་ཚིག་སྟེ། རལ་པའི་མུཉྫ་ཞེས་བྱ་བ་ཉིད་ཡིན་ལ་རལ་པའི་སྒྲས་ནི་བེམས་པོར་བརྗོད་ལ། བེམས་པོ་རྟོག་
པ་དང་བྲལ་བའི་དོན་གྱིས་སངས་རྒྱས་ངེས་པར་འབྱིན་པ་མང་པོ་ཡང་ནས་ཡང་དུ་མདུད་ཅིང་བརྩེགས་པ་གུས་པའི་ཚུལ་གྱིས་སྤྱི་བོས་མཆོག་ཏུ་འདུད་པར་བྱེད་པ་གང་ཡིན་པ་དེ་ལ་དེ་སྐད་ཅེས་བྱའོ། །དེ་ཉིད་སྐུ་ལྔ་དང་ཡེ་ཤེས་ལྔ་དང་འབྱུང་བ་ལྔ་དང་བདག་ཉིད་ལྡོག་པའི་བྱེ་བྲག་གི་འབྲས་བུའི་ཆོས་རྒྱུ་ལ་ཚང་
བར་བསྟན་པ་ནི། གདོང་ལྔ་གཙུག་ཕུད་ལྔ་དང་ལྡན། །ཟུར་ཕུད་ལྔ་པ་མེ་ཏོག་ཐོད། །ཅེས་གསུངས་ཏེ་དེ་ལ་གདོང་ལྔ་ནི་རྩ་བར་གྱུར་པ་ཡེ་ཤེས་ཀྱི་བདག་ཉིད་དང་གཙུག་ཕུད་ནི་གཙོ་བོའི་ཚུལ་རིགས་ཀྱི་བདག་པོ་སྟེ། ཟུར་ཕུད་ནི་འཁོར་དུ་གནས་པའི་ཚུལ་གྱིས་འབྱུང་བ་སྟེ་དེ་དག་ནི་འབྱུང་བ་ཆུའི་ཁམས་དང་།
རིགས་ཀྱི་བདག་པོ་མི་བསྐྱོད་པ་དང་། མེ་ལོང་ལྟ་བུའི་ཡེ་ཤེས་ཞེས་བྱ་བ་ནས་མེ་ནི་འབྱུང་བ་ནམ་མཁའི་ཁམས་དང་རིགས་ཀྱི་བདག་པོ་རྣམ་པར་སྣང་མཛད་དང་། ཆོས་ཀྱི་དབྱིངས་ཀྱི་ཡེ་ཤེས་པའི་བར་དུ་གོ་བར་བྱ་ཞིང་སློབ་དཔོན་དང་སྣ་ཚོགས་པ་ལ་ཡང་དེ་བཞིན་དུ་གོ་བར་བྱའོ། །མེ་ཏོག་ཐོད་ནི་མེ་ཏོག་གི་ཕྲེང་བའི་
ཐོད་ཅེས་བྱའོ། །སྤྱི་བོར་ཡོངས་སུ་འཛིན་པ་རྡོ་རྗེ་སེམས་དཔའི་ངོ་བོ་ཞེས་བྱ་བར་དགོངས་སོ། །དེ་ཉིད་མུ་སྟེགས་ལ་སོགས་པའི་བརྟུལ་ཞུགས་ལས་ཁྱད་པར་དུ་གྱུར་ཅིང་རྣམ་པར་རྟོག་པའི་ཚོགས་མཐའ་དག་འབྱང་བར་གྱུར་པ་དང་། ཉན་ཐོས་ལ་སོགས་པའི་ཚངས་པར་སྤྱོད་པའི་སྐྱེ་གནས་སུ་སོང་བ་མ་ཡིན་ཞིང་
སྤྲོས་པ་དང་བྲལ་བ་ནི་རྡུལ་གྱིས་མ་གོས་ཤིང་ཉེས་པའི་སྐྱོན་མཐའ་དག་ལས་དག་པར་གྱུར་པས་ན། མགོ་ཟླུམ་བརྟུལ་ཞུགས་ཆེན་པོ་པ། །ཚངས་པར་སྤྱོད་པ་བརྟུལ་ཞུགས་མཆོག །ཅེས་བྱ་ལ་དུཿཁ་ལ་སོགས་པའི་འགོག་པ་ནི་དཀའ་ཐུབ་མ་ཡིན་ལ་བྱང་ཆུབ་ཀྱི་སེམས་རིན་པོ་ཆེ་ཐ་མལ་པའི་ཚུལ་ལས་སྐད་ཅིག་

རྟོག་པའི་ཚོགས་མཐའ་དགག་པ་ནི་ཐུབ་པ་ཆེན་པོ་སྟེ་དེའི་ཕྱིར་ན། དཀའ་ཐུབ་མཐར་ཕྱིན་དཀའ་ཐུབ་ཆེ། །ཞེས་བྱ་བ་ཉིད་དོ། །གཙང་གནས་དམ་པ་གཽ་ཏ་མ། །ཞེས་པ་ནི་དེ་ལྟར་ཉེས་པའི་ཚོགས་མཐའ་དག་དང་བྲལ་ཞིང་བསོད་ནམས་ཀྱི་ཚོགས་ཀྱི་གནས་སུ་འགྱུར་བ་དང་འགྲོ་བ་མཐའ་
དག་གི་དམ་པར་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་འཇིག་རྟེན་པའི་ཁ་ན་མ་ཐོ་བ་ཐམས་ཅད་སྤོང་བར་གྱུར་པའི་ཚུལ་གྱིས། བྲམ་ཟེ་ཚངས་པ་ཚངས་པ་ཤེས། །ཞེས་བྱ་ལ་མི་གནས་པའི་མྱ་ངན་ལས་འདས་པ་ཉིད་ཚངས་པ་ཆེན་པོ་ཐོབ་པས་ན། མྱ་ངན་འདས་པ་ཚངས་པ་ཐོབ། །ཅེས་བྱ་བ་
ཉིད་དོ། །གྲོལ་བ་ཐར་པ་རྣམ་གྲོལ་ལུས། །ཞེས་པ་ནི་དེ་ལ་གྲོལ་བ་ནི་ངན་འགྲོའི་སྡུག་བསྔལ་ལས་གྲོལ་བ་དང་ཐར་པ་ནི་བདེ་འགྲོའི་མཚན་ཉིད་དུ་གནས་པ་དང་། དེ་གཉིས་སོ་སོའི་སྐྱེ་བོ་ལས་ཁྱད་པར་དུ་འཕགས་པ་དང་དགྲ་བཅོམ་པའི་ཚུལ་གྱིས་རྣམ་པར་གྲོལ་བའི་ལུས་ཞེས་བྱ་བ་ཡིན་ལ། རང་སངས་རྒྱས་
དང་བྱང་ཆུབ་སེམས་དཔའ་དང་དེ་བཞིན་གཤེགས་པའི་ཚུལ་གྱིས་གནས་པ་དེ་ཉིད་ཕུང་པོ་ལྷག་མ་དང་བཅས་པ་དང་། ཀུན་དུ་རྟོག་པ་དང་མི་གནས་པའི་མྱ་ངན་ལས་འདས་པར་གྱུར་པ་ནི། རྣམ་གྲོལ་ཞི་བ་ཞི་བ་ཉིད། །མྱ་ངན་འདས་ཤིང་མྱ་ངན་འདས། །ལེགས་པར་མྱ་ངན་འདས་དང་ཉེ། །ཞེས་བྱ་བ་ཉིད་དོ། །བདེ་
སྡུག་སེལ་བ་མཐར་གྱུར་པ། །ཞེས་པ་ལ་དེ་ལ་སྡུག་བསྔལ་ནི་རྣམ་པར་རྟོག་པའི་ཚོགས་མཐའ་དག་ཡིན་ལ། དེ་ཉིད་ལ་བདེ་བར་འཛིན་པའི་སྒོ་ནས་བདེ་བ་སྟེ། དེ་དག་ཐམས་ཅད་མཐར་བསལ་བ། །ཞེས་བྱ་བ་ཉིད་དེ། ཆགས་བྲལ་ལུས་ལས་འདས་པ་པོ། །ཞེས་བྱ་བ་ཉིད་དོ། །ཟབ་མོའི་ཆོས་ཐེག་པ་ཆེན་པོའི་སྒྲ་
གྲགས་པར་གྱུར་པ་འདོད་ཆགས་དང་བྲལ་བར་གྱུར་པའི་དགྲ་བཅོམ་པའི་བདག་ཉིད་ལས་འདས་པ་ཞེས་བྱ་ཞིང་། དེ་ཉིད་ཀྱི་ཕྱི་རོལ་གྱི་རྣམ་པར་གཙེ་བ་ཐམས་ཅད་ཀྱིས་མི་ཐུབ་པ་དང་། འཇིག་རྟེན་གྱི་དབང་ཕྱུག་ཆེན་པོ་ལ་སོགས་པ་བགྲང་དུ་མེད་པའི་ཕྱིར། ཐུབ་པ་མེད་པ་དཔེ་མེད་པ། །ཞེས་བྱ་བ་ཉིད་
དོ། །དེ་ལྟར་ཡོངས་སུ་དག་པའི་ནུས་པ་དེ་ནི་སྐྱེས་བུའི་རྩལ་གྱི་སྟོབས་ལྟར་མངོན་དུ་གསལ་བར་གྱུར་པ་མ་ཡིན་པ་དང་། དགྲ་བཅོམ་པ་ལ་སོགས་པས་སྒྲོགས་པར་མི་ནུས་ཤིང་ཁམས་གསུམ་ཐམས་ཅད་ཁྱབ་པར་གྱུར་པ་ནི། མི་མངོན་མི་སྣང་གསལ་བྱེད་མིན། །མི་འགྱུར་ཀུན་འགྲོ་ཁྱབ་པ་པོ། །ཞེས་བྱ་

བ་དེ་ཉིད་བདེ་བ་ཆེན་པོ་ཟག་པ་མེད་པ་ཉིད་ཀྱིས་བག་ཆགས་ཀྱི་ས་བོན་ཐམས་ཅད་དང་བྲལ་ཞིང་ངག་གི་བརྗོད་པ་ཐམས་ཅད་ལས་འདས་པས་ན། ཕྲ་ཞིང་ཟག་མེད་ས་བོན་བྲལ། །ཞེས་བྱ་ལ་དེ་ལྟ་བུའི་བདེ་བ་ཆེན་པོ་ཉིད་ངན་འགྲོའི་ཉེས་པ་དང་བདེ་འགྲོའི་རྣམ་པར་རྟོག་པའི་དྲི་མ་དང་། ཉན་ཐོས་ཀྱི་འདོད་ཆགས་
དང་བྲལ་བ་དང་། རང་སངས་རྒྱས་ཀྱི་ནང་དུ་ཡང་དག་འཇོག་གི་འཛིན་པའི་ཤེས་པ་དང་། བྱང་ཆུབ་སེམས་དཔའ་རྣམས་ཀྱི་ཤེས་བྱའི་སྒྲིབ་པ་ཆ་ཕྲ་བ་རྣམས་སྤངས་ནས། རྡུལ་མེད་རྡུལ་བྲལ་དྲི་མ་མེད། །ཉེས་པ་སྤངས་པ་སྐྱོན་མེད་པ། །ཞེས་པ་ཉིད་དོ། །དེ་ལྟར་ཡོངས་སུ་དག་པའི་འབྲས་བུ་ནི་མ་རིག་པའི་གཉིད་
ལས་འདས་པ་དང་སད་པར་མཛད་པས་ན། ཤིན་ཏུ་སད་པས་སད་པའི་བདག །ཅེས་བྱ་ལ་དེ་ཉིད་ཡོངས་སུ་དག་པའི་མངོན་པར་ཤེས་པ་ལྔས་དངོས་པོ་ཐམས་ཅད་རིག་པ་ལས་གདུལ་བྱའི་སྣོད་ཉེས་པ་དང་མ་ཉེས་པ་དང་དོན་ཐམས་ཅད་ཤེས་པར་གྱུར་པ་ནི། ཀུན་ཤེས་ཀུན་རིག་དམ་པ་པོ། །ཞེས་བྱའོ། །
དེ་ལྟ་བུའི་སྤྲོས་པ་དང་བྲལ་བ་ཉིད་རྣམ་པར་ཤེས་པ་སྨྲ་བ་འབའ་ཞིག་དོན་དམ་པར་ཡོད་པར་འདོད་པ་ལས་རྣམ་པར་འདས་ཤིང་གཉིས་སུ་མེད་པའི་ཡེ་ཤེས་སྤྲོས་པ་དང་བྲལ་བའི་ཚུལ་དུ་གནས་པ་ནི། རྣམ་པར་ཤེས་པའི་ཆོས་ཉིད་འདས། །ཡེ་ཤེས་གཉིས་མེད་ཚུལ་འཆང་བ། །ཞེས་བྱ་ལ་དེ་ཉིད་ཐོག་མ་ཐ་མ་
མེད་པ་ནས་རྣམ་པར་རྟོག་པ་ཐམས་ཅད་དང་བྲལ་ཞིང་སུས་ཀྱང་མ་བཅོས་པའི་ཕྱིར་དང་། རྣམ་པར་རྟོག་མེད་ལྷུན་གྱིས་གྲུབ། །ཅེས་བྱ་ཞིང་དུས་གསུམ་སངས་རྒྱས་ཐམས་ཅད་ཀྱི་ཕྲིན་ལས་ནི་ཁམས་གསུམ་པ་ཐམས་ཅད་གྲོལ་བར་མཛད་པ་ཡིན་ལ། དེ་ཉིད་ཐེག་པ་ཆེན་པོའི་མཆོག་འདིས་གྲོལ་བར་བྱེད་པའི་ཕྱིར་
ན། དུས་གསུམ་སངས་རྒྱས་ལས་བྱེད་པ། །ཞེས་བྱ་བ་ཉིད་དོ། །དེ་ལྟར་ཡོངས་སུ་དག་པའི་བུམ་པས་གཉིས་སུ་མེད་པའི་བདེ་བ་ཆེན་པོ་གསལ་བར་བྱས་པ་ནི། སངས་རྒྱས་ཐོག་མ་ཐ་མ་མེད། །ཅེས་པ་ལ་སོགས་པ་གསུངས་ཏེ། དེ་ལ་གཉིས་སུ་མེད་པའི་ཡེ་ཤེས་ཆེན་པོ་དེ་ནི་ཐོག་མ་དང་ཐ་མ་མེད་པ་ནས་མངོན་པར་
སངས་རྒྱས་པའི་རང་བཞིན་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་ཆོས་དང་ལོངས་སྤྱོད་རྫོགས་པ་དང་སྤྲུལ་པའི་སྐུ་ལ་སོགས་པ་སངས་རྒྱས་ཐམས་ཅད་དང་པོར་གྱུར་པ་དང་། རྒྱུ་དང་རྐྱེན་གང་གིས་མ་བསྐྱེད་པའི་ཕྱིར་ན། དང་པོའི་སངས་རྒྱས་རྒྱུ་མེད་པ། །ཞེས་བྱ་ལ་ཆོས་ཀྱི་དབྱིངས་མཐོང་བ་མེད་པ་ནི་ཡེ་ཤེས་ཀྱི་མིག་དྲི་

མ་དང་བྲལ་བ་གསལ་བར་གྱུར་པ་དང་སྤྲུལ་པའི་ཚོགས་དཔག་ཏུ་མེད་པ་འབྱུང་བའི་རྟེན་དུ་གྱུར་པ་དང་། དངོས་གྲུབ་རྣམ་པ་སྣ་ཚོགས་པའི་རྟེན་དུ་གྱུར་པ་དང་ཇི་ལྟ་བ་བཞིན་རྟོགས་པའི་ཕྱིར་ན། ཡེ་ཤེས་མིག་གཅིག་དྲི་མ་མེད། །ཡེ་ཤེས་ལུས་ཅན་དེ་བཞིན་གཤེགས། །ཞེས་བྱ་བ་ཉིད་དོ། །དེ་བཞིན་གཤེགས་
པའི་གསུང་རྣམ་པར་དག་པ་སོ་སོར་རྟོག་པའི་ཡེ་ཤེས་དེ་ཡང་འཇམ་དཔལ་ཞེས་བྱ་བ་ཉིད་ཡིན་པར་བསྟན་པ་ནི། ཚིག་གི་དབང་ཕྱུག་སྨྲ་བ་ཆེ། །ཞེས་བྱ་བ་གསུངས་ཏེ། འཇམ་དཔལ་ཞེས་བྱ་བ་བརྡས་མཚོན་པ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཕུལ་དུ་བྱུང་བའི་བདག་ཉིད་དོན་ངེས་པར་རྫོགས་པའི་ཚིག་གི་ཚོགས་
ཐམས་ཅད་ཀྱི་དབང་ཕྱུག་ཏུ་གྱུར་ལ་ཤེས་རབ་དེ་ཉིད་ཡེ་ཤེས་ཡིན་པའི་ཕྱིར་དེ་སྐད་ཅེས་བྱའོ། །དེ་ལྟར་རྡོ་རྗེ་དེ་ཉིད་རབ་ཏུ་བརྗོད་པ་ཐམས་ཅད་ཀྱི་མཆོག་ཏུ་གྱུར་པ་དང་། འཁོར་གྱི་སྐྱེ་བོ་ཐམས་ཅད་ཀྱི་ནང་ན་སྨྲ་བའི་རྒྱལ་པོ་ལྟར་གྱུར་པ་དང་། ཚིག་འབྲུ་བཟང་པོ་ཐམས་ཅད་ཀྱི་འབྱུང་བའི་གནས་སུ་གྱུར་པ་དང་། རི་
དགས་ཀྱི་རྒྱལ་པོ་སེང་གེ་ལྟར་ཕས་ཀྱི་རྒོལ་བ་ཐམས་ཅད་ཚར་གཅོད་པའི་ཕྱིར་ན། སྨྲ་བའི་ཁྱུ་མཆོག་སྨྲ་བའི་རྒྱལ། །སྨྲ་བའི་དམ་པ་མཆོག་གི་གནས། །སྨྲ་བའི་སེང་གེ་ཚུགས་པ་མེད། །ཅེས་བྱ་བ་ཉིད་དོ། །ཡེ་ཤེས་ཆེན་པོ་ཡོངས་སུ་རྫོགས་པའི་སྐུ་དེ་ནི་ཁམས་གསུམ་ཐམས་ཅད་ཀྱི་ལྟ་བས་ཆོག་མི་ཤེས་པ་དང་གང་
དང་གང་གིས་བལྟས་པ་དེ་དག་ཐམས་ཅད་ཀྱི་སེམས་ཀྱི་གདུང་བ་སེལ་བའི་ཕྱིར་ན། ཀུན་དུ་ལྟ་བ་མཆོག་ཏུ་དགའ། །ཞེས་བྱ་ལ་སྐུ་དེ་ཉིད་ལས་འོད་ཟེར་སྣ་ཚོགས་པས་སྟོང་གསུམ་ཐམས་ཅད་ཁྱབ་པའི་ཕྱིར་ན། གཟི་བརྗིད་ཕྲེང་བ་ལྟ་ན་སྡུག །ཅེས་བྱའོ། །དེ་ལྟར་ཡོངས་སུ་རྫོགས་པའི་སྐུ་དང་གསུང་བཤད་ནས།
ཡོངས་སུ་རྫོགས་པའི་ཐུགས་བཤད་པའི་ཕྱིར། འོད་བཟང་འབར་བ་དཔལ་གྱི་བེའུ། །ཞེས་གསུངས་ཏེ། དེ་ལ་དཔལ་བེའུ་ནི་རྡོ་རྗེ་རྩེ་ལྔ་པ་བཞིན་པདྨའི་ལྕགས་ཀྱུ་ལྟར་སྙིང་པོ་ཁ་ཕྱིར་བལྟས་པ་སྟེ། དེ་བཞིན་གཤེགས་པའི་ཐུགས་དེ་ཡང་རྣམ་པར་རྟོག་པ་དང་བྲལ་ཞིང་མི་འགྱུར་བའི་མཚན་ཉིད་དུ་གནས་པ་ལས་གདུལ་
བྱ་རྣམས་མངོན་པར་འདུལ་བའི་ཚུལ་གྱིས་རིགས་བཞིའི་བདག་ཉིད་དུ་འགྲོ་བ་རྣམས་སྣང་བར་གྱུར་པ་དེ་ལ་དེ་སྐད་ཅེས་བྱ་སྟེ། ལག་ན་འོད་འབར་སྣང་བ་པོ། །ཞེས་བྱའོ། །དེ་དག་གི་ཡོན་ཏན་བཤད་པ་སྟེ། ལག་ནས་ལག་ཏུ་སྟེར་བ་དང་འདྲ་བར་དེ་བཞིན་གཤེགས་པའི་ཡིད་བཞིན་ནོར་བུ་རིན་པོ་ཆེ་ལྟར་དགོས་པའི་

དོན་ཐམས་ཅད་སྒྲུབ་པ་དེ་ལ་དེ་སྐད་ཅེས་བྱའོ། །ནད་ཐམས་ཅད་ཀྱི་རྩ་བར་གྱུར་པ་རྣམ་པར་རྟོག་པ་ཡིན་ལ་དེ་ཉིད་རྟོག་པ་དང་བྲལ་བའི་ཚུལ་བདེ་བ་ཆེན་པོས་སེལ་བར་མཛད་པའི་གཙོ་བོར་གྱུར་པ་དང་། རྣམ་པར་རྟོག་པའི་སྡུག་བསྔལ་ཐམས་ཅད་ནི་གཟིར་བའི་ཕྱིར་ཟུག་རྔུ་ཡིན་ལ་དེ་རྩ་བ་ནས་འབྱིན་པས་ན། སྨན་པ་
ཆེ་མཆོག་གཙོ་བོ་སྟེ། །ཟུག་རྔུ་འབྱིན་པ་བླ་ན་མེད། །ཅེས་བྱ་བ་ཉིད་དོ། །སྨན་རྣམས་མ་ལུས་ལྗོན་པའི་ཤིང་། །ཞེས་པ་ནི་མཁྲིས་པ་དང་བད་ཀན་དང་འདུས་པ་ལ་སོགས་པའི་ནད་རྣམས་ལ་སྨན་ནི་ཆུ་དང་ལྗོན་ཤིང་ལ་སོགས་སོ་སོ་ཡིན་ལ། དེ་བཞིན་དུ་དེ་བཞིན་གཤེགས་པའི་བདེ་བ་ཆེན་པོས་ཀྱང་འདོད་ཆགས་
དང་ཞེ་སྡང་དང་གཏི་མུག་ལ་སོགས་པའི་ཉོན་མོངས་པའི་ནད་རྣམ་པ་སྣ་ཚོགས་པ་རྣམས་ཞི་བར་བྱེད་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་རྣམ་པར་རྟོག་པས་མ་བསྐྱེད་པའི་ནད་ཐམས་ཅད་དགྲར་གྱུར་པས། ནད་དོ་ཅོག་གི་དགྲ་ཆེ་བ། །ཞེས་བྱའོ། །འདོད་པ་དང་གཟུགས་དང་གཟུགས་མེད་པའི་
ཁམས་ཐམས་ཅད་སྔགས་པ་ཆེན་པོ་མཆོག་ཏུ་གྱུར་པས་ནི། སྡུ་གུ་འཇིག་རྟེན་གསུམ་གྱི་མཆོག །ཅེས་བྱའོ། །ཁམས་གསུམ་པ་ཐམས་ཅད་ཀྱི་སྒྲོལ་བའི་གཙོ་བོར་གྱུར་པ་དང་། དེའི་དཀྱིལ་འཁོར་གྱི་ལྷ་དང་ལྷ་མོའི་ཚོགས་དང་སྟོང་པ་ཉིད་དང་སྙིང་རྗེ་དབྱེར་མེད་པས་འགྲོ་བ་རྣམས་སྒྲོལ་བར་མཛད་པ་ནི། དཔལ་
ལྡན་རྒྱུ་སྐར་དཀྱིལ་འཁོར་ཅན། །ཞེས་བྱ་ལ་འཇིག་རྟེན་གྱི་ཁམས་མཐའ་ཡས་མུ་མེད་པ་རྣམས་སུ་ནམ་མཁའི་ཁམས་དང་འདྲ་བར་ཐུགས་རྗེས་ཁྱབ་པ་ནི། ཕྱོགས་བཅུ་ནམ་མཁའི་མཐར་ཐུག་པར། །ཆོས་ཀྱི་རྒྱལ་མཚན་ལེགས་པར་འཛུགས། །ཞེས་བྱ་བ་ཉིད་དོ། །འགྲོ་ན་གདུགས་གཅིག་ཡངས་པ་སྟེ། །ཞེས་
བྱ་བ་དེ་ལ་ཉི་མ་གཅིག་ནི་སྐད་ཅིག་མའི་བྱེ་བྲག་མི་ཤེས་པ་རྣམས་ལ་མྱུར་བའི་དཔེ་བསྟན་པ་སྟེ། དེ་བཞིན་གཤེགས་པའི་ཐུགས་ཀྱི་སྐད་ཅིག་མ་གཅིག་ལ་ནམ་མཁའི་མཐར་ཐུག་ཐམས་ཅད་བགྲོད་པར་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་བྱམས་པ་དང་ཐུགས་རྗེའི་བདག་ཉིད་ཀྱིས་འགྲོ་བ་རྣམས་ལ་
སྙིང་པོའི་དོན་སྟོན་པ་ནི། བྱམས་དང་སྙིང་རྗེའི་དཀྱིལ་འཁོར་ཅན། །ཞེས་བྱའོ། །དཔལ་ལྡན་པདྨ་གར་གྱི་བདག །ཅེས་བྱ་བ་འདིས་ནི་པདྨའི་རིགས་ཀྱི་བདག་ཉིད་སོ་སོར་རྟོག་པའི་ཡེ་ཤེས་ཉིད་ངེས་པར་གཟུང་བ་ཉིད་དོ། །དེ་ལ་ལེའུ་དང་པོ་ལས། དཔལ་ལྡན་གསུང་གི་བདག་ཉིད་ཅན། །དཔལ་ལྡན་གར་གྱི་དབང་

ཕྱུག་དང་། །སོ་སོར་རྟོག་པའི་ཡེ་ཤེས་ཏེ། །ཆགས་པ་ཆེན་པོར་རབ་ཏུ་བསྟན། །ཞེས་གསུངས་པའི་ཕྱིར་རོ། །ཁྱབ་བདག་ཆེན་པོ་རིན་ཆེན་གདུགས། །ཞེས་པ་ནི་དེ་བཞིན་གཤེགས་པ་ཆེན་པོ་ནི་འགྲོ་བ་མཐའ་དག་གཟུང་བ་དང་འཛིན་པའི་རྣམ་པར་རྟོག་པ་ལས་སྐྱོབ་པར་མཛད་དོ། །དེ་ཉིད་གྲང་བའི་
གདུང་བ་དང་ཚ་བའི་གདུང་བ་ལྟར་གནས་པས་ན་དེ་ལས་སྐྱོབ་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ལ་སངས་རྒྱས་ཀྱི་ཐུགས་རྗེ་ཆེན་པོ་འབྱུང་བའི་ཆོས་ཀྱི་འཁོར་ལོས་བག་ཆགས་ཀྱི་ས་བོན་ཐམས་ཅད་བསྲེགས་པ་དང་། མ་རིག་པའི་མུན་པ་ཐམས་ཅད་སེལ་བར་བྱེད་པས་ན། སངས་རྒྱས་ཀུན་གྱི་གཟི་བརྗིད་
ཆེ། །ཞེས་བྱ་ཞིང་དུས་གསུམ་གྱི་དེ་བཞིན་གཤེགས་པ་ཐམས་ཅད་སྐྱེད་པར་བྱེད་པའི་རྟེན་དུ་གྱུར་པས་ན། སངས་རྒྱས་ཀུན་གྱི་སྐུ་འཆང་བ། །ཞེས་བྱའོ། །སངས་རྒྱས་ཀུན་གྱི་རྣལ་འབྱོར་ཆེ། །ཞེས་པ་ནི་དེ་ལ་རྣལ་འབྱོར་ནི་ཆོས་ཐམས་ཅད་རང་བཞིན་ཐབས་དང་ཤེས་རབ་གཉིས་སུ་མེད་པའི་བདེ་བ་ཆེན་པོ་སྟེ་དེའི་
རྗེས་སུ་འཇུག་པ་དེ་ལ་དེ་སྐད་ཅེས་བྱའོ། །དེ་ཉིད་དུས་གསུམ་གྱི་དེ་བཞིན་གཤེགས་པ་ཐམས་ཅད་ཐེག་པ་ཆེན་པོ་ཡོངས་སུ་རྫོགས་པའི་ཆོས་རིགས་གཅིག་པའི་སྐྱེ་བོ་རྣམས་ལ་སྟོན་པར་གྱུར་པ་ཡིན་པས་ན། སངས་རྒྱས་ཀུན་གྱི་བསྟན་པ་གཅིག །ཅེས་གསུངས་ཏེ་དེ་ལ་ལེའུ་དང་པོ་ལས། དུས་གསུམ་བདེ་
གཤེགས་ཐམས་ཅད་ཀྱི། །ཐེག་པ་གཅིག་ཏུ་གྱུར་པ་སྟེ། །གཉིས་དང་གསུམ་དུ་དབྱེར་མེད་ཅིང་། །འབྲས་བུའི་རྟེན་ལ་རབ་ཏུ་འབད། །ཅེས་གསུངས་ཏེ་བསྟན་པ་དང་ཐེག་པ་ཞེས་བྱ་བ་གཅིག་ཏུ་དགོངས་སོ། །རྡོ་རྗེ་རིན་ཆེན་དབང་བསྐུར་དཔལ། །ཞེས་པ་ནི་ཡེ་ཤེས་ཆེན་པོའི་མཚན་ཉིད་གསལ་བར་མཛད་པ་ནི་བདུད་ཀྱི་ཚོགས་
མཐའ་དག་འཇོམས་པ་དང་འདོད་པའི་དངོས་གྲུབ་ཐམས་ཅད་སྒྲུབ་པ་དང་། བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པའི་ཕྱིར་ན་དེ་སྐད་ཅེས་བྱ་ཞིང་། དེ་ལས་སངས་རྒྱས་དང་ཆོས་དང་དགེ་འདུན་འབྱུང་བའི་བདག་པོར་གྱུར་པས་ན། རིན་ཆེན་ཀུན་བདག་དབང་ཕྱུག་སྟེ། །ཞེས་བྱའོ། །དེ་ལྟར་དེ་བཞིན་
གཤེགས་པའི་བདག་ཉིད་ཆེན་པོ་ནི་སྐུ་དང་གསུང་དང་ཐུགས་དང་ཡེ་ཤེས་ཀྱི་བདག་ཉིད་རྟགས་ཀྱི་བྱང་ཆུབ་སེམས་དཔའ་བསྟན་པ་ནི། འཇིག་རྟེན་དབང་ཕྱུག་ཀུན་གྱི་བདག །ཅེས་པ་ལ་སོགས་པ་གསུངས་ཏེ། དེ་ལ་འཇིག་རྟེན་དབང་ཕྱུག་ནི་སྤྱན་རས་གཟིགས་དབང་ཕྱུག་ཡིན་ལ། རྡོ་རྗེ་འཆང་བ་ཀུན་གྱི་རྗེ། །ཞེས་པ་ནི་འཕགས་

པ་ཕྱག་ན་རྡོ་རྗེ་ཡིན་ལ་འདིར་སྟོན་པ་འཇམ་དཔལ་གཞོན་ནུར་གྱུར་པ་དང་། རྡོ་རྗེ་སེམས་དཔའ་རྣམས་ནི་རིམ་པ་ཇི་ལྟ་བ་བཞིན་སྐུ་དང་གསུང་དང་ཐུགས་དང་ཡེ་ཤེས་ཀྱི་ངོ་བོ་ཡིན་ཏེ་དེ་ཉིད་བསྟན་པ་ནི། སངས་རྒྱས་ཀུན་གྱི་ཐུགས་ཆེ་བ། །ཞེས་གསུངས་ཏེ་མེ་ལོང་ལྟ་བུའི་ཡེ་ཤེས་སོ། །སངས་རྒྱས་ཀུན་གྱི་ཐུགས་ལ་གནས། །ཞེས་
པ་ནི་ཡེ་ཤེས་ཀྱི་བདག་ཉིད་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ཡིན་ལ། སངས་རྒྱས་ཀུན་གྱི་སྐུ་ཆེ་བ། །ཞེས་བྱ་བ་ནི་ཆོས་དབྱིངས་ཡེ་ཤེས་ཀྱི་བདག་ཉིད་ཡིན་ཞིང་། སངས་རྒྱས་ཀུན་གྱི་གསུང་ཡང་ཡིན། །ཞེས་པ་ནི་སོ་སོར་རྟོག་པའི་ཡེ་ཤེས་ཀྱི་བདག་ཉིད་ཡིན་པར་གསུངས་ཏེ་མཉམ་པ་ཉིད་དང་། བྱ་བ་གྲུབ་པ་དང་ཕྲིན་
ལས་ཀྱི་བདག་ཉིད་ནི་སྐུ་དང་གསུང་དང་ཐུགས་དང་ཡེ་ཤེས་ཀྱི་ཡོན་ཏན་དང་ཕྲིན་ལས་ཡིན་པའི་ཕྱིར་གུད་དུ་མི་བགྲང་བ་ཉིད་དོ། །དེ་ལྟ་བུའི་སྐུ་དང་གསུང་དང་ཐུགས་དང་ཡེ་ཤེས་ཀྱི་བདག་ཉིད་དེ་དག་རྣམ་པར་དག་པའི་གསང་བའི་དབང་ལ་ལྟོས་པར་བསྟན་པ་ནི། རྡོ་རྗེ་ཉི་མ་བདེ་བ་ཆེ། །ཞེས་པ་ལ་སོགས་པ་
གསུངས་ཏེ། དེ་ལ་རྡོ་རྗེ་ཉི་མ་ནི་ཤེས་རབ་ཀྱི་བདེ་བ་སྤྲོས་པ་དང་བྲལ་བ་འབྱུང་བ་རང་བྱུང་གི་མེ་ཏོག་ཅེས་བྱ་སྟེ་ཐབས་ཀྱི་བསམ་པ་ལས་བྱུང་བ་དང་། ཁ་དོག་དམར་བའི་ཕྱིར་ན་ཉི་མ་ཞེས་བྱ་ཞིང་། རྡོ་རྗེ་ཟླ་བ་དྲི་མེད་འོད། །ཅེས་བྱ་བ་ནི་ཐབས་ཀྱི་བདེ་བ་ཆེན་པོ་རྟོག་པ་དང་བྲལ་བ་ལས་བྱུང་བ་བྱང་ཆུབ་ཀྱི་སེམས་
ཞེས་བྱ་སྟེ། དེ་ཉིད་ཤེས་རབ་ཀྱི་བསམ་པ་ལས་བྱུང་ཞིང་ཁ་དོག་དཀར་པོའི་ཟླ་བ་ཞེས་བྱ་སྟེ། དེ་ཉིད་རྟོག་པའི་དྲི་མ་དང་བྲལ་བས་དྲི་མ་མེད་པའི་འོད་དང་དྲི་མ་མེད་པའི་སྣང་བ་ཞེས་བྱ་བ་ཉིད་དོ། །དེ་ཉིད་རྡོ་རྗེ་སློབ་དཔོན་གྱི་དགའ་བྲལ་ལས་བྱུང་ཞིང་དེའི་གོང་ན་ལྷན་ཅིག་སྐྱེས་པ་དང་མཆོག་ཏུ་དགའ་བ་དང་པོ་རྣམས་
ཡོད་པའི་ཕྱིར་ན། ཆགས་བྲལ་ལ་སོགས་ཆགས་པ་ཆེ། །ཞེས་གསུངས་ལ་དེ་ཉིད་སྐད་ཅིག་མ་སྣ་ཚོགས་པ་དང་། རྣམ་པར་ཉེད་པ་དང་རྣམ་པར་སྨིན་པ་དང་མཚན་ཉིད་དང་བྲལ་བ་ལས་བྱུང་ཞིང་སྐད་ཅིག་མ་རྣམས་མེ་འབར་བ་བཞིན་དུ་འདོད་ཆགས་འབར་བ་ལས་བྱུང་བའི་འོད་འབར་བ་ལས་བྱུང་བས་ན། ཁ་དོག་
སྣ་ཚོགས་འབར་བའི་འོད། །ཅེས་བྱ་བ་ཉིད་དོ། །དེ་ཉིད་སྦྱོར་བ་ཆེན་པོ་ཇི་ལྟ་བུ་ལས་བྱུང་ཞེ་ན། རྡོ་རྗེ་སྐྱིལ་ཀྲུང་རྫོགས་སངས་རྒྱས། །ཞེས་བྱུང་སྟེ་ཇི་ལྟར་སྤྲུལ་པའི་སྐུ་ཤཱཀྱ་ཐུབ་པ་རྡོ་རྗེའི་གདན་ལ་རྡོ་རྗེའི་སྐྱིལ་ཀྲུང་དུ་མངོན་པར་རྫོགས་པར་སངས་རྒྱས་པ་དེ་བཞིན་དུ་རྡོ་རྗེ་རྩེ་ལྔའི་མཚན་ཉིད་རྡོ་རྗེ་རྒྱ་གྲམ་གྱི་

ཚུལ་དུ་ཐབས་དང་ཤེས་རབ་ཀྱི་ཡན་ལག་ཕན་ཚུན་དུ་བསྣོལ་བ་ལས་རྟོག་པ་དང་བྲལ་བའི་བདེ་བ་ཆེན་པོ་རྟོགས་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ལྟ་བུའི་བདེ་བ་ཆེན་པོ་ཉིད་ཀྱི་མཚན་དང་དཔེ་བྱད་ལ་སོགས་པ་སངས་རྒྱས་ཀྱི་ཆོས་མཐའ་དག་འཛིན་པར་མཛད་པ་ནི། སངས་རྒྱས་འགྲོ་
བའི་ཆོས་འཛིན་པ། །ཞེས་གསུངས་ཏེ། དེ་ཉིད་བདུན་པའི་དོན་ལ་དང་པོའི་ཚིག་གོ། །དཔལ་ལྡན་སངས་རྒྱས་པདྨ་སྐྱེས། །ཞེས་པ་ནི་པདྨ་ནི་རྟག་ཅན་ཏེ། སྐུ་གསུང་ཐུགས་ཡོངས་སུ་རྫོགས་པར་བྱེད་རྒྱུའི་རྒྱུ་བྱང་ཆུབ་ཀྱི་སེམས་དེ་ལ་གནས་ཤིང་། དེ་ཉིད་རྟོག་པ་ཆེན་པོའི་ཚུལ་གྱིས་ལྔ་པ་དང་བདུན་པ་འདོམ་
པའི་ཚིག་སྟེ། པདྨ་ལས་སྐྱེས་ཤིང་པདྨ་རུ་སྐྱེས་ཞེས་བྱ་ལ། དེ་ཉིད་ཀྱི་སྟེང་གི་པདྨ་དང་། འོག་གི་པདྨ་དང་ཞེས་གྲགས་སོ། །ཀུན་མཁྱེན་ཡེ་ཤེས་མཛོད་འཛིན་པ། །ཞེས་པ་ནི་གསང་བའི་དབང་གི་ཡོན་ཏན་བཤད་པ་སྟེ། དེ་ལ་མཛོད་ནི་རྫས་ཀྱི་དངོས་པོ་ཐམས་ཅད་འབྱུང་བའི་རྒྱུར་གྱུར་པ་ཡིན་ལ། དེ་ཇི་ལྟ་བ་
བཞིན་དུ་རྣམ་པ་ཐམས་ཅད་མཁྱེན་པའི་ཡེ་ཤེས་འབྱུང་བའི་རྒྱུར་གྱུར་པ་ཉིད་དོ། །དེ་ཉིད་དངོས་གཞི་ནི། ལོངས་སྤྱོད་རྫོགས་པའི་ཚུལ་གྱིས་ཏིང་འཛིན་དྲ་བ་དཔག་ཏུ་མེད་པ་འཆང་བས་ན། རྒྱལ་པོ་སྒྱུ་འཕྲུལ་སྣ་ཚོགས་འཆང་། །ཞེས་བྱ་བ་ཉིད་དོ། །ཆེ་བ་སངས་རྒྱས་རིག་སྔགས་རྒྱལ། །ཞེས་པ་ནི་དེ་ལྟར་
གོང་དུ་བསྟན་པའི་གསང་བའི་དབང་ནི། སངས་རྒྱས་ཐམས་ཅད་ཀྱི་རིག་པའི་རྩ་བ་ཆེན་པོར་གྱུར་པ། ཉན་ཐོས་ལ་སོགས་པའི་གཙོ་བོར་གྱུར་པས་དེ་སྐད་ཅེས་བྱ་ལ། དེ་ལྟ་བུའི་གསང་བའི་མཚན་ཉིད་ཀྱིས་རྣམ་པར་རྟོག་པའི་སྡུག་བསྔལ་ཐམས་ཅད་འཇོམས་པར་མཛད་པ་དང་། སྲིད་པའི་དྲ་བ་ཐམས་
ཅད་གཅོད་པ་དང་། མི་འགྱུར་བའི་བདེ་བ་ཆེན་པོ་རྣམ་པར་དག་པ་དང་། ཐེག་པ་ཆེན་པོའི་ལམ་གྱི་ཚུལ་གྱིས་སྡུག་བསྔལ་རྣམས་གཅོད་པར་མཛད་པས་ན། རྡོ་རྗེ་རྣོན་པོ་རལ་གྲི་ཆེ། །ཡི་གེ་མཆོག་སྟེ་རྣམ་པར་དག །ཐེག་པ་ཆེན་པོ་སྡུག་བསྔལ་གཅོད། །ཅེས་བྱ་བ་ཉིད་དོ། །མཚོན་ཆ་ཆེན་པོ་རྡོ་རྗེའི་ཆོས། །ཞེས་
བྱ་བ་ནི་གོང་དུ་ཐེག་པའི་ཚུལ་ཉིད་རྟོག་པ་དང་བྲལ་བའི་བདེ་བ་ཆེན་པོ་བསྒོམ་པའི་ཕྱིར་དང་། སྡུག་བསྔལ་མཐའ་དག་གཅོད་པའི་ཕྱིར་དེ་སྐད་ཅེས་བྱ་ཞིང་། རྟོགས་པར་དཀའ་ཞིང་དེ་བཞིན་གཤེགས་པ་ཐམས་ཅད་ཀྱི་སྐུ་འཛིན་པར་འདོད་པས་ན། རྡོ་རྗེ་ཟབ་མོ་ཛི་ན་ཛིཀ །ཅེས་བྱའོ། །དེ་ལྟ་བུའི་བདེ་བ་ཆེན་

པོ་ནི་ཤེས་རབ་ཀྱི་རང་བཞིན་གྱི་ས་དང་ཕ་རོལ་ཏུ་ཕྱིན་པའི་དོན་མཐའ་དག་ཕྱིན་ཅི་མ་ལོག་པར་རྟོགས་པ་ནི། རྡོ་རྗེ་བློ་གྲོས་དོན་བཞིན་རིག །ཅེས་བྱ་ལ་དེ་ཉིད་ཕ་རོལ་ཏུ་ཕྱིན་པ་བཅུ་ལ་སོགས་པ་ཕ་རོལ་ཏུ་ཕྱིན་པ་ཐམས་ཅད་རྫོགས་པ་དང་། གསང་བའི་པདྨ་ཆོས་ཀྱི་དབྱིངས་ཀྱི་མཚན་
ཉིད་དང་། ཕ་རོལ་ཏུ་ཕྱིན་པའི་ས་རབ་ཏུ་དགའ་བ་ནས་རྡོ་རྗེ་འཛིན་པ་ཆེན་པོ་གོ་འཕང་གི་ས་དང་མཐུན་པར་ཆ་ཕྲ་ཞིང་ལྟོ་བ་ཡངས་པ། སྟོན་ཀའི་དུས་ཟླ་བ་ཡོངས་སུ་རྫོགས་པའི་ཟླ་བ་ལྟར་དྲི་མ་དང་བྲལ་བར་གནས་པ་ནི་གསང་བའི་རྡོ་རྗེ་མཉམ་པར་སྦྱར་བའི་གནས་སྐབས་ནི་གོང་ནས་
གོང་དུ་བདེ་བ་འཕེལ་བའི་ཕྱིར་ན། །ཕ་རོལ་ཕྱིན་པ་ཀུན་རྫོགས་པ། །ས་རྣམས་ཀུན་གྱི་རྒྱན་དང་ལྡན། །ཞེས་བྱ་ལ། དེ་ཉིད་དྲི་མ་དང་བྲལ་ཞིང་རྣམ་པར་དག་པའི་ཆུས་ཡང་དང་ཡང་དུ་འཁྲུད་ཅིང་གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བར་བྱེད་པ་ནི། རྣམ་པར་དག་
པ་བདག་མེད་ཆོས། །ཞེས་བྱའོ། །ཡང་དག་ཡེ་ཤེས་ཟླ་འོད་བཟང་། །ཞེས་པ་ནི། བྱང་ཆུབ་ཀྱི་སེམས་རྡོ་རྗེའི་བུམ་པའི་ནང་ན་གནས་པ་ནི་ཡང་དག་པའི་ཡེ་ཤེས་ཟླ་བའི་དཀྱིལ་འཁོར་ལྟར་རྣམ་པར་རྟོག་པའི་འཆིང་བ་གདུང་བ་ཆེན་པོ་རིམས་དང་འདྲ་བ་སེལ་བར་མཛད་པ་གང་
ཡིན་པ་དེ་ལ་དེ་སྐད་ཅེས་བྱ་ལ། དེས་མྱུར་བ་ཉིད་དུ་ཡེ་ཤེས་ཆེན་པོའི་མཚན་ཉིད་ཐོབ་པར་བྱེད་ཅིང་ཕྱག་རྒྱ་བཞིའི་བདག་ཉིད་དང་ལྡན་པ་ནི་གཞོན་ནུ་མའི་པྲ་ཕབ་པ་དང་འདྲ་བར་གནས་པ་ན། དེ་བྱ་བ་དང་། སྤྱོད་པ་དང་། རྣལ་འབྱོར་དང་། གཉི་གའི་རྒྱུད་ཐམས་ཅད་བདག་ཉིད་
བལྟ་བ་དང་། ལག་པ་བཅངས་པ་དང་། འཁྱུད་པ་དང་སྙོམས་པར་འཇུག་པའི་ཚུལ་དུ་ཀུན་གྱི་རྒྱུར་གྱུར་པ་ན། རྒྱུད་ཀུན་གྱི་ནི་བདག་པོ་མཆོག །ཅེས་བྱ་བ་ཉིད་དོ། །རྡོ་རྗེའི་གདན་ནི་མ་ལུས་ལྡན། །ཞེས་བྱ་བ་ནི་དུས་གསུམ་གྱི་དེ་བཞིན་གཤེགས་པ་ཐམས་ཅད་མངོན་པར་སངས་
རྒྱས་པའི་གནས་གསང་བའི་པདྨ་ཡིན་ཏེ། རྣམ་པར་རྟོག་པའི་བདུད་ཀྱི་དཔུང་ཐམས་ཅད་འཇོམས་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། རྒྱུད་དང་བྲལ་བའི་ཡེ་ཤེས་རྣམ་པ་སྣ་ཚོགས་པ་མ་ལུས་པ་འཆང་བར་གྱུར་པས་ན། ཡེ་ཤེས་སྐུ་རྣམས་མ་ལུས་འཆང་། །ཞེས་བྱའོ། །

ཡེ་ཤེས་ཀྱི་སྐུ་དེ་རྣམས་ཉིད་ངེས་པར་སྟོན་པ་ནི། ཀུན་དུ་བཟང་པོ་བློ་གྲོས་བཟང་། །ཞེས་བྱ་བ་ལ་སོགས་པ་གསུངས་ཏེ། དེ་ལ་ཀུན་དུ་བཟང་པོ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀུན་དུ་བཟང་པོ་ཤེས་རབ་ཆེན་པོའི་ངོ་བོ་ནི་སངས་རྒྱས་ཀྱི་སྐུ་རྣམས་ཀྱི་གཙོ་
བོ་དང་བཟང་པོ་ཞེས་བྱ་སྟེ་དེ་ཉིད་ཆོས་ཀྱི་སྐུ་ཞེས་བྱའོ། །དེ་ལྟར་ཆོས་ཀྱི་སྐུ་ལས་བྱུང་བའི་ལོངས་སྤྱོད་རྫོགས་པའི་སྐུ་ནི་ས་བཅུའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྙིང་པོར་གྱུར་ཅིང་། རྣམ་པར་དག་པའི་འགྲོ་བ་འཛིན་པའི་ཕྱིར་ན། ས་ཡི་སྙིང་པོ་འགྲོ་བ་འཛིན། །
ཞེས་བྱ་བ་ལོངས་སྤྱོད་རྫོགས་པའི་སྐུ་ལས་བྱུང་བའི་སྤྲུལ་པའི་སྐུ་ནི་དུས་གསུམ་གྱི་སངས་རྒྱས་ཐམས་ཅད་ཀྱི་སྙིང་པོ་ཡིན་ཏེ་དྲག་པོ་ལ་སོགས་པའི་གཟུགས་ནི་རྟོགས་པར་དཀའ་བའི་ཕྱིར། སངས་རྒྱས་ཀུན་གྱི་སྙིང་པོ་ཆེ། །ཞེས་བྱ་ཞིང་། སྤྲུལ་པའི་སྐུ་རྣམ་པ་སྣ་ཚོགས་དེ་ཉིད་སྲིད་
པ་གསུམ་པོ་ཐམས་ཅད་རིམ་པ་ཇི་ལྟ་བ་བཞིན་དུ་འགྲོ་བ་རྣམས་གྲོལ་བར་མཛད་པས་ན། སྤྲུལ་པའི་འཁོར་ལོ་སྣ་ཚོགས་འཆང་། །ཞེས་བྱ་བ་ཉིད་དོ། །དེ་ལྟར་སོ་སོར་རྟོག་པའི་ཡེ་ཤེས་ལ་ཡང་སྐུ་གསུམ་གྱི་བདག་ཉིད་དུ་བཤད་ནས། སྐུ་གསུམ་བདག་ཉིད་ཡེ་ཤེས་ཆེན་པོ་
དེ་ནི་སྐུ་དང་ཡེ་ཤེས་དང་རྟ་དང་གླང་པོ་ཆེ་ལ་སོགས་པ་སྲིད་པ་དང་མྱ་ངན་ལས་འདས་པའི་དངོས་པོ་ཐམས་ཅད་ཀྱི་རང་བཞིན་དུ་གནས་པ་དང་། དངོས་པོ་ཐམས་ཅད་ཀྱི་རང་བཞིན་དུ་འབྱུང་བའི་ཕྱིར་ན། དངོས་པོ་ཀུན་གྱི་རང་བཞིན་མཆོག །དངོས་པོ་ཀུན་གྱི་རང་བཞིན་
འཛིན། །ཞེས་བྱ་བ་ཉིད་དོ། །དེ་ལྟར་ཆོས་ཐམས་ཅད་སྐྱེ་བ་མེད་པའི་ཚུལ་ལས་འགྲོ་བ་རྣམས་ཀྱི་བསམ་པའི་དབང་གིས་དེ་བཞིན་གཤེགས་པའི་སྨོན་ལམ་གྱི་མཐུ་ཆེན་པོ་དངོས་པོ་རྣམ་པ་སྣ་ཚོགས་སུ་སྣང་བ་ནི། སྐྱེ་མེད་ཆོས་དེ་སྣ་ཚོགས་དོན། །ཞེས་བྱ་ལ་དེ་ཉིད་ཟག་པ་
དང་བཅས་པའི་ཆོས་དང་ཟག་པ་མེད་པའི་ཆོས་ཐམས་ཅད་ཀྱི་བདག་ཉིད་དུ་སྟོན་པ་ནི། ཆོས་ཀུན་ངོ་བོ་ཉིད་འཆང་བ། །ཞེས་བྱ་བ་ཉིད་དོ། །ཤེས་རབ་ཆེན་པོ་སྐད་ཅིག་ལ། །ཞེས་བྱ་ཞིང་རྒྱུའི་ཡེ་ཤེས་རྣམ་པར་རྟོག་པ་ཐམས་ཅད་དང་བྲལ་བ་བདེ་བ་ཆེན་པོའི་སྐད་ཅིག་

ནི་ཤེས་པ་ཐམས་ཅད་ཀྱི་གཙོ་བོའམ་དམ་པར་གྱུར་པས་ན། ཤེས་རབ་ཆེན་པོ་ཞེས་བྱ་ལ་ཡོངས་སུ་དག་པའི་སྐད་ཅིག་མ་དེ་ལ་ཀུན་རྫོབ་ཀྱི་དངོས་པོ་ཐམས་ཅད་བདེ་བ་ཆེན་པོའི་དངོས་པོར་རྟོགས་པ་སྟེ་དངོས་ཞེས་བྱ་བ་ཉིད་དོ། །ཐུབ་པ་བློ་མཆོག་འབྱུང་པོ་སེལ། །ཞེས་པ་ནི་དེ་ལ་
དེ་ལྟ་བུའི་ཡེ་ཤེས་ཆེན་པོ་དེས་ཕྱིན་ཅི་ལོག་གི་རྟོག་པས་བསྐྱེད་པའི་བག་ཆགས་ནི་སྲེག་པར་བྱེད་པའི་ཕྱིར་འབྱུང་པོ་ཡིན་ལ། ཤེས་རབ་ཆེན་པོའི་མཚན་ཉིད་ཀྱིས་སེལ་བར་བྱེད་པ་གང་ཡིན་པ་དེ་ལ་དེ་སྐད་ཅེས་བྱ་ལ། ཕྱི་རོལ་གྱི་རྣམ་པར་རྟོག་པ་གཡེང་བ་ལ་སོགས་པ་བཀོད་པར་
མི་ནུས་པ་དང་། ཡིད་བཞིན་གྱི་ནོར་བུ་དང་བ་ལྟར་དྲི་མ་དང་བྲལ་བའི་བདག་ཉིད་དུ་གནས་པ་དང་ཡང་དག་པར་རྫོགས་པའི་སངས་རྒྱས་ཀྱི་བྱང་ཆུབ་ནི་ཆོས་ཀྱི་དབྱིངས་རྟོགས་པའི་མཚན་ཉིད་དུ་གནས་ཤིང་རབ་ཏུ་དང་བའི་མཚན་ཉིད་དེ་དེས་ཡོངས་སུ་འཛིན་པའི་ཕྱིར་ན། མི་གཡོ་
རབ་ཏུ་དང་བའི་བདག །རྫོགས་པའི་སངས་རྒྱས་བྱང་ཆུབ་འཆང་། །ཞེས་པ་ཉིད་དོ། །སངས་རྒྱས་ཀུན་གྱི་མངོན་སུམ་པ། །ཞེས་པ་ནི་དེ་ཉིད་ཀྱིས་སངས་རྒྱས་ཐམས་ཅད་ཀྱི་དོན་དམ་པ་མངོན་སུམ་གྱི་ཤེས་པ་འདྲ་བས་རྟོགས་པར་བྱེད་པའི་ཕྱིར་ན། རབ་ཏུ་རྟོགས་
པ་མངོན་སུམ་པ་དེ་ལ་དེ་སྐད་ཅེས་བྱ་ལ། དེ་ཉིད་སྤྲོས་པ་དང་བྲལ་བའི་ཡེ་ཤེས་ཆེན་པོ་ནི་རྣམ་པར་རྟོག་པའི་བུད་ཤིང་ཐམས་ཅད་སྲེག་པར་བྱེད་པའི་ཕྱིར་ན་མེ་ཡིན་ལ། མ་རིག་པའི་མུན་པ་ཐམས་ཅད་སེལ་བ་དང་ཉོན་མོངས་པའི་གདུང་བ་སེལ་བའི་ཕྱིར་ན། ཡེ་ཤེས་
མེ་ལྕེ་འོད་འབར་བ། །ཞེས་བྱ་སྟེ་དེ་ལྟར་སོ་སོར་རྟོག་པའི་ཡེ་ཤེས་ནི་གསུང་ཉེ་བར་འཛིན་པ་ཡིན་ཏེ། ཡོན་ཏན་ལས་ནི་དེའི་ཡོན་ཏན་དང་ལས་ཡིན་ལ། དེ་བས་ན་མཉམ་པ་ཉིད་དང་བྱ་བ་གྲུབ་པའི་སྔོན་དུ་འགྲོ་བས་ཀུན་གྱི་དུས་སུ་བཤད་པ་ཡིན་ལ། དེ་ཉིད་ངེས་པ་ལྔའི་
ཚུལ་དུ་བཤད་པ་སྟེ་བཞི་པའོ། །དེ་ལྟར་ཡེ་ཤེས་དང་སྐུ་དང་གསུང་དང་ཐུགས་རྣམས་བསྟན་ནས། ད་ནི་དེ་རྣམས་ཡོན་ཏན་དུ་འགྱུར་བ་མཉམ་པ་ཉིད་ཀྱི་ཡེ་ཤེས་ཀྱི་བདག་ཉིད་དུ་བཤད་པ་ནི། འདོད་པའི་དོན་གྲུབ་དམ་པ་སྟེ། །ཞེས་པ་ལ་སོགས་པ་གསུངས་ཏེ་དེ་ཉིད་ང་རྒྱལ་ཆེན་པོའི་གང་ཟག་རྣམས་

འདུལ་བའི་དོན་དུ་ང་རྒྱལ་ཆེན་པོའི་སྐུ་རིན་ཆེན་འབྱུང་ལྡན་ནི། ནོར་བུ་རིན་པོ་ཆེའི་རྒྱལ་མཚན་གྱིས་གདུལ་བྱའི་སྐྱེ་བོ་ཐམས་ཅད་ཀྱི་འདོད་པའི་དོན་ཐམས་ཅད་གྲུབ་པར་མཛད་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་ཀྱི་ང་རྒྱལ་ཉེ་བར་མཚོན་ནས་འདོད་ཆགས་ལ་སོགས་པ་
ཐམས་ཅད་ཉོན་མོངས་པ་ང་རྒྱལ་འགྲོ་བའི་རྒྱུ་ཡིན་ལ། དེ་ཉིད་ཡང་དག་པར་སྦྱོང་བའི་ཕྱིར་ན། ངན་སོང་ཐམས་ཅད་རྣམ་སྦྱོང་བ། །ཞེས་བྱའོ། །མགོན་པོ་སེམས་ཅན་ཀུན་གྱི་མཆོག །ཅེས་པ་ནི་དེ་ལྟར་ཉོན་མོངས་པ་ཐམས་ཅད་ཀྱི་ཡིད་ཡོངས་སུ་དག་པ་ལས་མཉམ་པ་ཉིད་ཀྱི་ཡེ་ཤེས་ནི་བདག་གཞན་གྱི་
རྒྱུད་མཉམ་སྟེ། དེ་སེམས་ཅན་ཐམས་ཅད་དང་མཚུངས་པ་མེད་པ་དང་། འགྲོ་བ་ཐམས་ཅད་ཀྱི་མགོན་དུ་གྱུར་པས་ན་དེ་སྐད་ཅེས་བྱ་ཞིང་། དེ་ཉིད་གདུལ་བྱའི་སྐྱེ་བོ་རྣམས་ངེས་པར་གྲོལ་བར་མཛད་པས་ན། སེམས་ཅན་ཐམས་ཅད་གྲོལ་བར་བྱེད། །ཅེས་བྱ་བ་ལ་འདོད་ཆགས་དང་ཞེ་སྡང་ལ་སོགས་པ་རྣམས་
ནི་སྨ་འབེབས་པའི་ཕྱིར་གཡུལ་ཡིན་ལ། དེ་ཉིད་དུ་ཡེ་ཤེས་ཆེན་པོའི་མཚན་ཉིད་ནི་ཕ་རོལ་གྱི་དཔུང་འཇོམས་པར་བྱེད་པའི་ངོ་བོར་གྱུར་པ་དང་། མ་རིག་པ་ལ་སོགས་པའི་མི་ཤེས་པའི་བདག་ཉིད་ནི་གཞན་ལ་ལྟོས་པ་མེད་པའི་ཚུལ་གྱིས་དྲེགས་པ་ཡིན་ལ་དེ་རབ་ཏུ་འཇོམས་པར་མཛད་པས་ན། ཉོན་མོངས་
གཡུལ་དུ་གཅིག་དཔའ་བ། །མི་ཤེས་དགྲ་ཡི་དྲེགས་པ་འཇོམས། །ཞེས་བྱ་བ་ཉིད་དོ། །བློ་ལྡན་སྒེག་འཆང་དཔལ་དང་ལྡན། །ཞེས་པ་ནི་འཇམ་དཔལ་ཞེས་བྱ་བ་ཉིད་འདིས་གཟུང་བ་སྟེ། མཉམ་པ་ཉིད་ཀྱི་ཡེ་ཤེས་འདི་ཡང་ཤེས་རབ་ཕུལ་དུ་བྱུང་བའི་མཚན་ཉིད་ཡིན་པ་དང་། རིན་པོ་ཆེའི་རྒྱན་གྱིས་
སེམས་ཅན་རྣམས་མཛེས་པར་མཛད་པ་བསོད་ནམས་དང་ཡེ་ཤེས་ཀྱི་ཚོགས་རྫོགས་པར་མཛད་པ་དེ་ལ་དེ་སྐད་ཅེས་བྱ་ལ། སེམས་ཅན་གདུག་པ་དང་ལྡན་པ་དེ་རྣམས་འདུལ་བའི་དོན་དུ་དྲག་པོའི་སྐུ་གཟུགས་སྟོན་ཀྱང་ཆོས་ཀྱི་དབྱིངས་ལས་མི་འགྱུར་བའི་ཕྱིར། བརྟན་པོ་མི་སྡུག་གཟུགས་འཆང་བ། །
ཞེས་བྱ་ལ་དེ་ཉིད་རིགས་བརྒྱའི་མཚན་ཉིད་ཀྱིས་ཕྱོགས་ཐམས་ཅད་དུ་གཤེགས་པར་མཛད་པ་གང་ཡིན་པ་དེ་ལྟ་བུའི་ཚུལ་གྱིས་ཐེག་པ་ཆེན་པོ་ཡོངས་སུ་རྫོགས་པའི་གོ་འཕང་གི་སྟོབས་ཀྱིས་གོང་ནས་གོང་དུ་སྤྱོད་པར་མཛད་པ་གང་ཡིན་པ་དེ་ལ་དེ་སྐད་བྱ་ལ། ལག་པ་བརྒྱ་པོ་ཀུན་བསྐྱོད་ཅིང་། །གོམ་

པའི་སྟོབས་ཀྱིས་གར་བྱེད་པ། །ཉིད་དོ། །དཔལ་ལྡན་ལག་པ་རྒྱས་གང་ལ། །ཞེས་པ་ནི་དེ་ལྟར་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པའི་རིགས་བརྒྱ་ལ་སོགས་པས་ནི་སེམས་ཅན་རྣམས་ཀྱི་ཉོན་མོངས་པ་འཛད་པ་ནི་གྲོལ་བའི་ལམ་ལ་ངེས་པར་འཇོག་པའི་ཕྱིར་དེ་སྐད་ཅེས་བྱའོ། །
དེ་ལྟ་བུའི་གཟུགས་ཀྱིས་ནམ་མཁའི་མཐར་ཐུག་པ་གདུལ་བྱ་གང་དང་གང་ན་གནས་པ་དེ་དང་དེ་ན་བསྐྱོད་པའི་གཟུགས་ཀྱིས་གནས་པ་ནི། ནམ་མཁའ་ཁྱབ་པ་གར་བྱེད་པ། །ཞེས་བྱ་ཞིང་། དེ་ཉིད་ཀྱིས་ས་དང་པོ་རབ་ཏུ་དགའ་བ་ནས་ས་བཅུ་གསུམ་པ་རྡོ་རྗེ་འཛིན་པ་ཆེན་པོའི་བར་དུ་ཡོངས་སུ་དགའ་
བའི་སྙིང་པོ་བདེ་བ་ཆེན་པོའི་མཚན་ཉིད་རྩེ་གཅིག་པ། སྤྲོས་པ་ཐམས་ཅད་དང་བྲལ་བས་གནོན་ཅིང་བགྲོད་པར་མཛད་པ་ནི། ས་ཡི་དཀྱིལ་འཁོར་བཞི་ཡི་ཁྱོན། །རྐང་པ་ཡ་གཅིག་མཐིལ་གྱིས་གནོན། །ཞེས་བྱ་བ་ཉིད་དོ། །རྐང་མཐེབ་སེན་མོའི་ཁྱོན་གྱིས་ཀྱང་། །ཚངས་པའི་ཡུལ་ས་རྩེ་ནས་གནོན། །
ཞེས་བྱ་བ་ནི། དེ་ལ་རྐང་མཐེབ་སེན་མོ་ནི་རྐང་པའི་བགྲོས་གོ་འཕང་ཡིན་ལ། ཐེག་པའི་སྒྲས་ནི་ལྕགས་ཀྱུ་བཤད་ལ། སེན་མོའི་སྒྲས་ནི་གྲུར་བཤད་དོ། །དེ་ལྟར་རྡོ་རྗེ་འཛིན་པའི་གོ་འཕང་ལས་བྱུང་བའི་ལྕགས་ཀྱུ། འཇིག་རྟེན་པའི་ཚངས་པ་ཆེན་པོའི་ང་རྒྱལ་ནི་དུག་དང་བཅས་པའི་ཕྱིར་རླུང་དང་འདྲལ་དེ་
ཉིད་ང་རྒྱལ་གནས་པའི་ཕྱིར་རོ། །ཡུལ་ས་ཡིན་ཏེ་དེ་བཞིན་གཤེགས་པའི་ཐུགས་རྗེ་ཆེན་པོས་གནོན་པར་མཛད་པས་ན་དེ་སྐད་ཅེས་བྱའོ། །དེ་ལྟར་ཡེ་ཤེས་ཆེན་པོའི་མཚན་ཉིད་འདི་ནི་དུས་གསུམ་གྱི་སངས་རྒྱས་ཐམས་ཅད་ཀྱི་བྱ་བ་རྫོགས་པའི་དོན་གཅིག་ཉིད་ཡིན་ཞིང་ལེགས་པར་གསུངས་པའི་ཆོས་མཐའ་
དག་གིས་གྲུབ་པའི་འབྲས་བུ་ཆེན་པོའི་དོན་དུ་གྱུར་པས་ན། དོན་གཅིག་གཉིས་མེད་ཆོས་ཀྱི་དོན། །ཞེས་བྱ་ཞིང་། དེ་ཉིད་རྣམ་པ་ཐམས་ཅད་ཀྱི་མཆོག་དང་ལྡན་པ་དོན་བཟང་པོ་ཡིན་ཞིང་འཁོར་བའི་འཇིགས་པ་ཐམས་ཅད་དང་བྲལ་བས་ན། དམ་པའི་དོན་ནི་འཇིགས་པ་མེད། །ཅེས་བྱ་ལ། ཡེ་ཤེས་
ཆེན་པོའི་དོན་དེ་ཉིད་རང་རིག་པའི་ཕྱི་རོལ་གྱི་དོན་རྣམ་པ་སྣ་ཚོགས་པར་སྣང་ཞིང་ཤེས་པ་ལ་ཕྱི་རོལ་ན་མེད་པའི་ཕྱིར་ན། རྣམ་རིག་སྣ་ཚོགས་གཟུགས་དོན་ཅན། །ཞེས་བྱ་བ་ཉིད་དོ། །སེམས་དང་རྣམ་ཤེས་རྒྱུད་དང་ལྡན། །ཞེས་བྱ་བ་ལ་སོགས་པ་དང་རྣམ་པར་ཤེས་པ་དང་ཀུན་གཞི་རྣམ་པར་ཤེས་

པ་དང་ཡིད་ཅེས་བྱ་བས་ན་གྲངས་ཏེ། སྣ་ཚོགས་པའི་གཟུགས་འཛིན་པ་དང་། བག་ཆགས་ཀྱི་རྣམ་པར་སྣང་བའི་ཕྱིར་དེ་སྐད་ཅེས་བྱ་ཞིང་། དེ་ཉིད་སེམས་ཀྱི་རང་བཞིན་གྱི་རྣམ་པར་དག་པའི་དངོས་པོའི་མཚན་ཉིད་དོན་རབ་ཏུ་གསལ་བར་གྱུར་པ་ནི། དངོས་དོན་མ་ལུས་
རྣམས་ལ་དགའ། །ཞེས་བྱ་བ་ཉིད་དོ། །དེ་ལྟ་བུའི་ཡེ་ཤེས་ཆེན་པོ་དངོས་པོ་ཐམས་ཅད་ཀྱི་བདག་ཉིད་དུ་མཚུངས་པའི་ལམ་ཐམས་ཅད་ཇི་ལྟ་བུས་གསལ་བར་གྱུར་ཅིང་གང་གིས་ཐོབ་ཅེ་ན། སྟོང་པ་ཉིད་དགའ་འདོད་ཆགས་བློ། །ཞེས་པ་ལ་སོགས་པ་གསུངས་ཏེ། དེ་ལ་ཤེས་རབ་ཡེ་ཤེས་ཀྱི་
དབང་གི་དུས་སུ་ཐོབ་པའི་ལྷན་ཅིག་སྐྱེས་པའི་ཡེ་ཤེས་ནི་ཆོས་ཀྱི་དབྱིངས་ལ་སོགས་པ་བྲལ་བའི་མཚན་ཉིད་བདེ་བ་ཆེན་པོ་ལ་མངོན་པར་ཞེན་པས་ན་འདོད་ཆགས་ཞེས་བྱ་ལ། དེ་ཉིད་ཆེན་པོའི་མཚན་ཉིད་དུ་གནས་པས་ན་རྣམ་པར་རྟོག་པའི་ཚོགས་མཐའ་དག་འགགས་པས་ན་སྟོང་པ་ཞེས་བྱ་ཞིང་དེ་ཉིད་
སོ་སོའི་སྐྱེ་བོ་ལ་སོགས་པའི་འདོད་ཆགས་འཛག་པ་དང་བཅས་པའི་བདེ་བ་མངོན་པར་ཞེན་པ་ངན་འགྲོའི་རྒྱུར་གྱུར་པ་སྤངས་པ་ཉིད་ལ། སྲིད་པའི་འདོད་ཆགས་སོགས་སྤངས་པ། །ཞེས་བྱ་བ་ཉིད་དོ། །སྲིད་གསུམ་དགའ་བ་ཆེན་པོ་པ། །ཞེས་བྱ་བ་ནི་སྐད་ཅིག་མ་ལ་འདོད་པ་དང་གཟུགས་
དང་གཟུགས་མེད་པའི་ཁམས་གསུམ་པ་ཐམས་ཅད་བདེ་བ་ཆེན་པོར་གཅིག་པའི་ཕྱིར་ན། ཁམས་གསུམ་པ་ལ་དེ་སྐད་ཅེས་བྱ་ཞིང་། རྣམ་པར་རྟོག་པའི་ཚོགས་མཐའ་དག་སྲེག་པར་བྱེད་པ་དང་ཡེ་ཤེས་ཆེན་པོའི་སྟོབས་གོང་ནས་གོང་དུ་འཕེལ་བར་བྱེད་པ་དང་། ཉེས་པའི་དྲི་མ་ཐམས་ཅད་དང་བྲལ་བའི་
ཕྱིར་ན། སྤྲིན་དཀར་དག་པ་བཞིན་དུ་དཀར། །ཞེས་བྱ་བ་ཉིད་དོ། །དཀར་བའི་སྒྲས་ནི་སྲེད་པ་ལས་གྱུར་པའི་དགའ་བ་དང་སྟོབས་ཞེས་བརྗོད་དོ། །འོད་བཟང་སྟོན་ཀའི་ཟླ་བའི་འོད། །ཅེས་པ་ནི་ཐབས་ཀྱི་གསང་བའི་རྡོ་རྗེ་ལས་བྱུང་བའི་བྱང་ཆུབ་ཀྱི་སེམས་ནི་དྲི་མ་དང་བྲལ་བའི་ཕྱིར། སྟོན་ཀའི་ཟླ་བའི་
དཀྱིལ་འཁོར་ལྟར་གསལ་བ་ཡིན་ལ། དེ་ལས་བྱུང་བའི་བདེ་བ་ཆེན་པོ་ནི་ཟླ་བའི་འོད་ཟེར་ལྟར་མ་རིག་པའི་མུན་པ་ཐམས་ཅད་སེལ་བར་བྱེད་པའི་ཕྱིར་ན་དེ་སྐད་ཅེས་བྱ་ལ། ཤེས་རབ་མའི་གསང་བའི་པདྨ་ལས་བྱུང་བའི་བྱང་སེམས་ནི་རང་བྱུང་གི་མེ་ཏོག་དང་འདྲེས་པའི་ཕྱིར་ན། ཉི་མ་ཤར་བའི་དཀྱིལ་

འཁོར་ལྟར་དམར་སྐྱར་སྣང་ཞིང་། དེ་ཉིད་དྲི་མ་དང་བྲལ་བ་དང་རབ་ཏུ་དང་བའི་བདག་ཉིད་དུ་གནས་པ་མཛེས་པའི་ཕྱིར་ན། ཉི་མ་ཤར་ཀའི་དཀྱིལ་ལྟར་མཛེས། །ཞེས་བྱ་བ་ལ། དེ་ལས་འབྱུང་བ་ཆེན་པོ་ནི་ཉི་དཀྱིལ་གྱི་འོད་ལྟར་སྤྲོས་པ་དང་བྲལ་བའི་ཆགས་པ་ཆེན་པོར་གནས་པ་ནི། སེན་མོའི་འོད་
ནི་ཤས་ཆེར་དམར། །ཞེས་བྱ་བ་ཉིད་དོ། །ཐབས་དང་ཤེས་རབ་གཉིས་ཀྱི་བྱང་སེམས་དུས་མཚུངས་པ་ཉིད་ལས་ལྷན་ཅིག་སྐྱེས་པའི་ཡེ་ཤེས་རྣམ་པར་རྟོག་པ་ཐམས་ཅད་དང་བྲལ་བ་ཚིག་གི་བརྗོད་པ་ཐམས་ཅད་དང་བྲལ་བ་བདེ་བ་ཆེན་པོ་ཉིད་རྩེ་གཅིག་པའི་སེམས་ཀྱིས་བསྒོམ་པར་བྱའོ་ཞེས་བྱ་བའི་དོན་
ཏོ། །ཅི་དེ་འཛག་པ་དང་བཅས་པ་ལ་སོགས་པ་ཐོབ་པར་འགྱུར་རམ་དེ་ལྟ་ན་ནི་སོ་སོའི་སྐྱེ་བོ་ཐ་མལ་པ་རྣམས་དང་ཁྱད་པར་མེད་དོ་ཞེ་ན། ཅོད་པན་བཟང་པོ་མཐོན་ཀའི་རྩེ། །ཞེས་པས་ཏེ། དེ་ལ་ཅོད་པན་ནི་མགོ་ལ་བཅིངས་པ་ཉིད་ལ་བྱ། བཟང་པོ་ནི་ཡིད་བཞིན་གྱི་ནོར་བུ་རིན་པོ་ཆེའི་རྒྱན་ཏེ་མཐོན་ཀ་ནི་མཐིང་
ནག་ཅེས་བྱ་བའི་དོན་ཏོ། །རང་གི་བྱང་ཆུབ་ཀྱི་སེམས་ཀྱི་ཅོད་པན་གྱི་གནས་བདེ་བ་ཆེན་པོའི་འཁོར་ལོར་རྡོ་རྗེ་ནོར་བུ་ནས་བཀུག་སྟེ་ཅོད་པན་དུ་བྱ་ལ་རང་གི་གནས་བཞག་པ་ལས་ཟག་པ་མེད་པའི་བདེ་བ་ཆེན་པོ་སྐྱེའོ་ཞེས་བྱ་བར་དགོངས་སོ། །སྐྲ་མཆོག་མཐོན་ཀ་ཆེན་པོ་འཆང་། །ཞེས་པ་ནི། དེ་ཉིད་དུས་གསུམ་
གྱི་དེ་བཞིན་གཤེགས་པ་ཐམས་ཅད་ཀྱི་ཡོན་ཏན་གྱིས་བརྒྱན་ཅིང་རྣམ་རྟོག་རླུང་གིས་བསྐྱོད་མི་ནུས་ཤིང་མི་འགྱུར་བ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ནི་ཡིད་བཞིན་གྱི་ནོར་བུ་རིན་པོ་ཆེ་དེ་ལྟར་དགོས་པ་ཐམས་ཅད་སྒྲུབ་པར་བྱེད་པ་དང་བདེ་བ་ཆེན་པོའི་འོད་ཟེར་གྱིས་སྲིད་པ་གསུམ་གྱི་མུན་པ་ཐམས་ཅད་
འཇོམས་པར་བྱེད་ཅིང་རང་གི་རྒྱུད་ཉིད་རོ་མཉམ་པ་ཉིད་ཀྱིས་འཚེད་པར་བྱེད་པས་ན། ནོར་བུ་ཆེན་པོ་འོད་ཆགས་དཔལ། །ཞེས་བྱའོ། །དེ་ལྟ་བུའི་ཟག་པ་མེད་པའི་བདེ་བའི་ཕན་ཡོན་བསྟན་པ་ནི། སངས་རྒྱས་སྤྲུལ་པའི་རྒྱན་དང་ལྡན། །ཞེས་པ་ལ་སོགས་པ་གསུངས་ཏེ། དེ་ལྟར་བདེ་བ་ཆེན་པོ་དེ་ཉིད་ལས་
གྲུབ་པས་དེ་བཞིན་གཤེགས་པ་དེའི་སྤྲུལ་པ་དང་འདྲ་བས་བསྐལ་པ་གྲངས་མེད་པ་ཁམས་གསུམ་པ་རྣམས་ཀྱི་སྤྱི་གཙུག་གི་ནོར་བུའི་རྒྱན་དུ་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་ཀྱི་སྤྲུལ་པའི་གཟུགས་རྣམ་པ་སྣ་ཚོགས་པ། འཇིག་རྟེན་གྱི་ཁམས་བརྒྱ་ཕྲག་སྟོང་ལ་སོགས་པར་འགྲོ་བའི་

དོན་མཛད་པ་ཉིད་དང་རྫུ་འཕྲུལ་ཆེན་པོའི་ཐུགས་ཀྱིས་སྐད་ཅིག་པས་འདུལ་བྱའི་ཞིང་ཐམས་ཅད་ཤེས་པའི་ཕྱིར་ན། འཇིག་རྟེན་ཁམས་བརྒྱ་ཀུན་བསྐྱོད་པ། །རྫུ་འཕྲུལ་རྐང་པའི་སྟོབས་ཆེན་ལྡན། །ཞེས་བྱ་བ་ཉིད་དོ། །ཡོངས་སུ་རྫོགས་པའི་མཐར་མངོན་པར་བྱང་ཆུབ་ན་བཞུགས་
པའི་གནས་སྐབས་ན་སེམས་ཅན་ཐམས་ཅད་མངོན་པར་རྫོགས་པར་འཚང་རྒྱ་བར་མཛད་པར་ཞལ་གྱིས་བཞེས་པ་ཉིད་ནི་སྔོན་གྱི་སྨོན་ལམ་རྗེས་སུ་དྲན་ཞེས་བྱ་ལ། དེ་ཉིད་མི་བསྙེལ་བའི་ཚུལ་གྱིས་རབ་ཏུ་འཛིན་པ་གང་ཡིན་པ་དེ་ལ་དེ་སྐད་ཅེས་བྱ་ལ། དེ་ཉིད་འགྲོ་བ་རྣམས་ལ་གསུམ་གཟུང་བའི་ཚུལ་གྱི་སངས་
རྒྱས་དང་ཆོས་དང་དགེ་འདུན་དང་། ལྷ་ཉིད་རྗེས་སུ་དྲན་པར་རྩེ་གཅིག་པའི་ཚུལ་གྱིས་གནས་པའི་ཕྱིར་ན། དྲན་པ་བཞི་པོ་ཏིང་འཛིན་རྒྱལ། །ཞེས་བྱ་ཞིང་། དེ་ཉིད་ཀྱིས་ཕྱིན་ཅི་ལོག་གི་ཤེས་པ་ལ་སྐྱེད་པའི་དྲི་མ་རྣམས་སེལ་བར་མཛད་པ་དང་། སྤྲུལ་པའི་གཟུགས་ཀྱིས་འཁོར་བའི་གནས་ནས་ཀྱང་སྲིད་
པའི་བཅིངས་པ་ལས་གྲོལ་བའི་ཕྱིར་གནས་པ་དང་། དེ་ཉིད་མཚན་དང་དཔེ་བྱད་དང་། སྟོབས་དང་མི་འཇིགས་པ་ལ་སོགས་པ་དེ་བཞིན་གཤེགས་པའི་ཡོན་ཏན་དཔག་ཏུ་མེད་པ་རྣམས་ཀྱི་རྒྱུར་གྱུར་པས་ན། བྱང་ཆུབ་ཡན་ལག་མེ་ཏོག་སྤོས། །དེ་བཞིན་གཤེགས་པའི་ཡོན་ཏན་མཚོ། །ཞེས་བྱ་བ་ཉིད་དོ། །
ལམ་གྱི་ཡན་ལག་བརྒྱད་ཚུལ་རིག །ཅེས་བྱ་བ་ནི། དེ་ལྟ་བུའི་བདེ་བ་ཆེན་པོས་འཕགས་པའི་ལམ་ཡན་ལག་བརྒྱད་ཀྱི་ཚུལ་ཡང་དག་པར་རིག་པ་དང་། འབྲས་བུ་ཡོངས་སུ་རྫོགས་པའི་མཚན་ཉིད་ཆོས་ཀྱི་སྐུ་ཡོངས་སུ་རིག་པར་གྱུར་པ་གང་ཡིན་པ་དེ་ནི། ཡང་དག་སངས་རྒྱས་ལམ་རིག་པ། །ཞེས་
བྱ་བ་ཉིད་དོ། །སེམས་ཅན་ཀུན་ལ་ཤས་ཆེར་ཆགས། །ཞེས་བྱ་བ་ནི་ནམ་མཁའ་འདི་གྲུབ་པའི་རྟེན་དང་འདྲ་བར་གཟུགས་ཀྱི་སྐུས་ནི་ཁམས་གསུམ་གྱི་སེམས་ཅན་ཐམས་ཅད་ལ་བུ་གཅིག་པ་ལྟར་བྱམས་པ་ཆེན་པོའི་ཚུལ་གྱིས་གནས་པ་དེ་ལ་དེ་སྐད་ཅེས་བྱ་ཞིང་། དེ་ཉིད་རྣམ་པར་རྟོག་པ་ཐམས་ཅད་དང་བྲལ་
བའི་མཚན་ཉིད་སྟོན་ཀའི་ནམ་མཁའ་དང་བ་ལྟར་དྲི་མ་དང་བྲལ་ཞིང་མི་འགྱུར་བར་གནས་པ་ནི། ནམ་མཁའ་ལྟ་བུར་ཆགས་པ་མེད། །ཅེས་བྱ་བ་ཉིད་དོ། །དེ་ལྟར་ཡེ་ཤེས་ཆེན་པོའི་མཚན་ཉིད་ནི་ཁམས་གསུམ་གྱི་སེམས་ཅན་ཐམས་ཅད་ཀྱི་སེམས་ལ་འཇུག་པའི་ཕྱིར་ན། སེམས་ཅན་ཀུན་གྱི་ཡིད་ལ་འཇུག །

ཅེས་བྱ་ཞིང་ཁམས་གསུམ་གྱི་སེམས་ཅན་ཐམས་ཅད་ལ་གང་དང་གང་གིས་འདུལ་བ་ལ་དེ་དང་དེའི་གཟུགས་ཀྱིས་ཐོག་མ་སྐྱེ་བ་ལ་སོགས་པའི་མཚན་ཉིད་རྣམས་ལ་དེ་ཡོངས་སུ་འཛིན་པའི་མཚན་ཉིད་ཐོགས་པ་མེད་པར་འཇུག་པས་ན། སེམས་ཅན་ཀུན་གྱི་ཡིད་ལྟར་མགྱོགས། །ཞེས་བྱ་བ་ཉིད་དོ། །སེམས་
ཅན་ཀུན་གྱི་དབང་དོན་ཤེས། །ཞེས་བྱ་བ་ནི་དེ་ལྟར་འདུལ་བ་ལ་ཉེ་བར་བརྩོན་པའི་སེམས་ཅན་རྣམས་ཐབས་གང་ཡོངས་སུ་ཤེས་པ་འཇུག་པ་ཞེས་བྱ་བ་སྟེ། དེ་ཉིད་བདག་དང་གཞན་གྱི་དོན་ཆེན་པོར་རབ་ཏུ་གྱུར་པ་ཡིན་ལ་ངེས་པར་འབྱུང་བའི་ཚུལ་དུ་ཤེས་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། ཞི་བ་ཆེན་
པོ་ངེས་པའི་ཚུལ་གྱིས་སེམས་ཅན་གང་དང་གང་གི་རྒྱུད་ལ་བརླན་པ་དེ་དང་དེའི་ཡིད་ངེས་པར་མཛད་པ་དང་། དེ་ལྟར་རྣམ་པར་རྟོག་པའི་ཚོགས་མཐའ་དག་རབ་ཏུ་ནུབ་པར་གྱུར་པ་ལས་དེའི་ཡིད་གོང་ནས་གོང་དུ་ཞེན་ཅིང་མི་འབྲལ་བའི་ཚུལ་དུ་གནས་ན། སེམས་ཅན་ཀུན་གྱི་ཡིད་འཕྲོག་པ། །ཞེས་བྱ་བ་ཉིད་
དོ། །དེ་ལྟ་བུའི་སྤྲོས་པ་དང་བྲལ་བའི་བདེ་བ་ཆེན་པོ་ནི་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྣམས་བདེ་བ་ཆེན་པོའི་མཚན་ཉིད་དུ་རིག་པ་ནི་ཕྱིན་ཅི་ལོག་གི་ཤེས་པས་བསྐྱེད་པ་གཟུགས་སུ་མངོན་པར་ཞེན་པ་ལ་སོགས་པ་སྤངས་ཤིང་ཕྱིན་ཅི་ལོག་རྟོགས་པས་ན།
ཕུང་པོ་ལྔ་པོ་དེ་ཉིད་ཤེས། །ཞེས་བྱ་ཞིང་། དེ་ལྟར་བདེ་བ་ཆེན་པོ་བྱིན་གྱིས་བརླབ་པའི་གནས་སྐབས་ནས་ཀུན་ནས་ཉོན་མོངས་པའི་ཕུང་པོ་ལྔ་རྣམ་པར་དག །རྣམ་པར་དག་པའི་ཕུང་པོ་ལྔ་ཡོངས་སུ་རྫོགས་པར་གྱུར་ལ་དེ་ཉིད་རྣམ་པར་སྣང་མཛད་དང་མི་བསྐྱོད་པ་ལ་སོགས་པ་དེ་བཞིན་གཤེགས་པ་རྣམ་པ་
ལྔའི་བདག་ཉིད་དུ་གནས་པས་ན། རྣམ་དག་ཕུང་པོ་ལྔ་འཆང་བ། །ཞེས་བྱའོ། །དེ་ལྟ་བུའི་བདེ་བ་ཆེན་པོའི་སྤྲོས་པ་དང་བྲལ་བ་ཉིད་སྣོད་ཀྱི་གནས་སྐབས་ཀྱི་བདག་ཉིད་ནི་བདག་དང་གཞན་གཉིས་ཀ་ན་ངེས་པར་འབྱུང་བ་རྟོག་པ་དང་བྲལ་བའི་མཚན་ཉིད་ཡང་དག་པའི་མཐའ་ལ་རབ་ཏུ་གནས་པ་དང་། རྒྱུ་
ནུས་པ་ཐོགས་པ་མེད་པའི་མཚན་ཉིད་འདོད་པ་དང་གཟུགས་དང་གཟུགས་མེད་པའི་མཚན་ཉིད་ལས་ངེས་པར་འབྱུང་བའི་བདེ་བ་ཆེན་པོ་རབ་ཏུ་རྟོགས་པ་དང་། དེ་ཉིད་ཆུ་བོ་ཆེན་པོའི་རྒྱུན་ལྟར་ལམ་གྱི་གནས་སྐབས་རྒྱུན་མི་འཆད་པ་བདེ་བ་ཆེན་པོར་རང་དང་གཞན་གྱི་རྣམ་པའི་ཆ་མཐའ་དག་ནུབ་པར་གྱུར་པ་ལ་

རབ་ཏུ་གནས་ནས་ལམ་གྱི་ངེས་པར་འབྱུང་བ་དང་། ལམ་ལ་ངེས་པར་འབྱུང་བའི་ལས་ཐོབ། འབྲས་བུ་ངེས་པར་འབྱུང་བ་ནི་བདག་ཉིད་ངེས་པར་འབྱུང་བ་ལས་གཞན་གྱི་དོན་ཕུན་སུམ་ཚོགས་པས་འགྲོ་བ་གཞན་ལ་བདག་ཉིད་དང་པོ་ཐབས་ཇི་ལྟ་བུས་མངོན་པར་རྫོགས་པར་བྱང་ཆུབ་པ་དེ་ལྟར་ཕྱིན་ཅི་
མ་ལོག་པའི་ཚུལ་གྱིས་སྟོན་པར་མཛད་ཅིང་། རྒྱུད་བཞིའི་ཚུལ་དུ་གནས་པར་བསྟན་པ་ནི། ངེས་འབྱུང་ཀུན་གྱི་ལམ་ལ་གནས། །ངེས་པར་འབྱུང་བ་ཀུན་ལ་མཁས། །ངེས་པར་འབྱུང་བ་ཀུན་སྟོན་པ། །ཞེས་བྱ་བ་ཉིད་དོ། །ཡན་ལག་བཅུ་གཉིས་སྲིད་རྩ་བཏོན། །ཞེས་པ་ནི་དེ་ལ་ཡན་ལག་བཅུ་གཉིས་ནི་མ་རིག་པ་
དང་འདུ་བྱེད་ལ་སོགས་པ་ནང་རྟེན་ཅིང་འབྲེལ་པ་བཅུ་གཉིས་ཡིན་ལ་དེ་ཉིད་ཡང་དང་ཡང་དུ་འབྱུང་བས་སྲིད་པའི་རྩ་བ་ཉིད་དོ། །དེ་བདེ་བ་ཆེན་པོ་སྤྲོས་པ་དང་བྲལ་བས་ཕྱིན་ཅི་མ་ལོག་པའི་ཚུལ་གྱིས་བཏོན་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་ཉིད་རྣམ་པར་དག་པ་ལས་དེ་བཞིན་གཤེགས་པའི་
གནས་སྐབས་དང་སྒྱུ་མ་ལྟ་བུའི་མཛད་པ་བཅུ་གཉིས་པར་དུ་འཛིན་པར་མཛད་པས་ན། དག་པ་རྣམ་པ་བཅུ་གཉིས་འཆང་། །ཞེས་བྱ་བ་ཉིད་དོ། །དེ་ཉིད་སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་གྱི་བདེན་པ་ལས་ཡོངས་སུ་གྲུབ་པ་བདག་ཉིད་དུ་གནས་པ། བདེན་བཞིའི་ཚུལ་གྱི་རྣམ་པ་ཅན། །ཞེས་བྱ་ལ།
མིག་གི་རྣམ་པར་ཤེས་པ་ལ་སོགས་པ་རྣམ་པར་དག་པ་ལས་སའི་སྙིང་པོ་ལ་སོགས་པའི་བྱང་ཆུབ་སེམས་དཔའ་བརྒྱད་དུ་ངེས་པར་ལྡན་པ་ནི། ཤེས་པ་བརྒྱད་པོ་རྟོགས་པ་འཆང་། །ཞེས་བྱ་ཞིང་དེ་ཉིད་ཆོས་ཀྱི་འཁོར་ལོ་ཡོངས་སུ་དག་པའི་ལས་མ་རིག་པ་ལ་སོགས་པ་ཉིད་དག་པའི་ཚུལ་གྱི་བདེན་པ་ཡིན་ལ་དེས་གྲོལ་བ་ངེས་
པར་སྟོན་པའི་ཚུལ་གྱིས་དེ་བཞིན་གཤེགས་པའི་ཕུན་སུམ་ཚོགས་པ་དང་ལྡན་པས། བདེན་དོན་རྣམ་པ་བཅུ་གཉིས་ལྡན། །ཞེས་བྱ་བ་ཉིད་དོ། །དེ་ཉིད་རྣམ་པ་བཅུ་དྲུག་རིག །ཅེས་བྱ་བ་ནི་ཡེ་ཤེས་ཀྱི་སྐུའི་སྐུ་དང་གསུང་དང་ཐུགས་དང་ཡེ་ཤེས་དང་ཆོས་ཀྱི་སྐུའི་སྐུ་དང་གསུང་དང་ཐུགས་དང་ཡེ་ཤེས་དང་ལོངས་སྤྱོད་རྫོགས་པའི་སྐུའི་སྐུ་དང་
གསུང་དང་ཐུགས་དང་ཡེ་ཤེས་དང་སྤྲུལ་པའི་སྐུའི་སྐུ་དང་གསུང་དང་ཐུགས་དང་ཡེ་ཤེས་རྣམ་པར་དག་པ་རིག་པར་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ལ། རྣམ་པ་ཉི་ཤུས་བྱང་ཆུབ་པ། །ཞེས་པ་ནི་རྒྱུའི་མཚན་ཉིད་ཀྱི་གནས་སྐབས་ན་སྐུ་དང་གསུང་དང་ཐུགས་དང་ཡེ་ཤེས་དང་ཆོས་ཀྱི་དབྱིངས་ཀྱི་མཚན་ཉིད་ཀྱི་སྒོ་

ནས་དེ་དག་ཐམས་ཅད་རྣལ་འབྱོར་གྱི་ལམ་གྱི་གནས་སྐབས་སུ་དགའ་བ་དང་། མཆོག་ཏུ་དགའ་བ་དང་། ལྷན་ཅིག་སྐྱེས་པའི་དགའ་བ་དང་། དགའ་བྲལ་གྱི་དགའ་བའི་ཚུལ་གྱིས་རྣམ་པར་ཕྱེ་བ་དེ་ལ་དེ་སྐད་ཅེས་བྱའོ། །རྣམ་པ་སངས་རྒྱས་ཀུན་རིག་མཆོག །ཅེས་བྱ་བ་ནི་དེ་ལྟར་རྣམ་པ་ཉི་ཤུ་མངོན་
པར་བྱང་ཆུབ་པའི་བདེ་བ་ཆེན་པོ་ནི་བརྟན་པ་དང་གཡོ་བའི་དངོས་པོ་ཐམས་ཅད་གཉིས་སུ་མེད་པར་རྟོགས་ཤིང་རང་རིག་པའི་ཕུང་པོའི་བདེ་བ་ཆེན་པོར་རིག་ཅིང་། དེ་ཉིད་འཇིག་རྟེན་པའི་བདེ་བ་ལས་ཁྱད་པར་དུ་འཕགས་པས་དེ་སྐད་ཅེས་བྱ་ལ། རང་རིག་པའི་བདེ་བ་ཆེན་པོ་དེ་ཉིད་ཉན་ཐོས་འགོག་པའི་སྙོམས་པར་
འཇུག་པ་ལྟར་བདག་ཉིད་འབའ་ཞིག་བདེ་བའི་རྒྱུན་དང་ལྡན་པ་མ་ཡིན་ཞིང་བརྟན་པ་དང་གཡོ་བ་དང་དངོས་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་བདེ་བ་ཆེན་པོའི་གཟུགས་ཀྱི་སྤྲུལ་པ་དཔག་ཏུ་མེད་པས་ཁྱབ་པར་བྱེད་ཅིང་། སངས་རྒྱས་ཀྱི་མཛད་པ་དང་འདྲ་བས་འགྲོ་བ་རྣམས་ཀྱི་སྡུག་བསྔལ་སེལ་
བར་མཛད་པ་ནི། སངས་རྒྱས་ཀུན་གྱི་སྤྲུལ་པའི་སྐུ། །བྱེ་བ་དཔག་མེད་འགྱེད་པ་པོ། །ཞེས་པ་ཉིད་དོ། །དེ་ལྟ་བུའི་བདེ་བ་ཆེན་པོ་སྐད་ཅིག་ལ་དུས་ཀྱི་མཐའི་སྐད་ཅིག་མ་དཔག་ཏུ་མེད་པ་ཐམས་ཅད་བདེ་བ་ཆེན་པོའི་ངོ་བོར་རྟོགས་པ་གང་ཡིན་པ་དེ་ནི། སྐད་ཅིག་ཐམས་ཅད་མངོན་པར་རྟོགས། །ཞེས་བྱ་
ཞིང་། བདེ་བ་ཆེན་པོ་ཉིད་རྣམ་པར་རྟོག་པ་ཐམས་ཅད་ཟད་པར་གྱུར་ཅིང་། གཉིས་སུ་མེད་པར་གྱུར་པ་ནི་སྐད་ཅིག་མའི་སྒྲར་བརྗོད་ཅིང་སྐད་ཅིག་མ་ནི་ཡེ་ཤེས་དང་གཅིག་ཏུ་བརྗོད་ཅིང་ཀྵ་དང་ན་ནི་མ་ནིང་གི་རྟགས་ཏེ། ཟད་ཅིང་མེད་པ་ཞེས་བྱ་བ་དང་། འཛག་པ་མེད་པ་ཞེས་བྱ་བ་ཉིད་དོ། །འདིར་ཡང་དུས་ཀྱི་
མཐའི་སྐད་ཅིག་མ་ཐམས་ཅད་ཟད་ཅིང་མེད་པར་གྱུར་པ་དང་། དེ་ཉིད་ཟག་པ་མེད་པའི་བདེ་བ་ཉིད་དུ་གནས་པས་ན་དེ་སྐད་ཅེས་བྱ་སྟེ་གང་དུ་ཡང་འགལ་བ་མེད་ལ། དེ་ཉིད་དོན་དམ་པའི་བྱང་ཆུབ་ཀྱི་སེམས་ཀྱིས་དངོས་པོའི་དོན་མཐའ་དག་ལས་རིག་པར་གྱུར་པ་ནི། སེམས་ཀྱི་སྐད་ཅིག་དོན་ཀུན་རིག་པ་ཉིད་དོ། །
ཐེག་པ་སྣ་ཚོགས་ཐབས་ཚུལ་གྱིས། །འགྲོ་བའི་དོན་ལ་རྟོགས་པ་པོ། །ཞེས་པ་ནི་དེ་ལ་ཉན་ཐོས་ཀྱི་ཐེག་པ་དང་། རང་རྒྱལ་གྱི་ཐེག་པ་དང་། བྱང་ཆུབ་སེམས་དཔའི་ཐེག་པ་རྣམས་ལ་རང་རང་གི་ལྷག་པའི་ཤེས་རབ་ཀྱི་ངོ་བོས་དོན་གྱི་དངོས་པོ་རྣམ་པ་སྣ་ཚོགས་པ་ཡིན་ལ། དེ་ལྟ་བུའི་ཐབས་ཀྱིས་

འགྲོ་བ་གང་དང་གང་ལ་དོན་གྱི་མཚན་ཉིད་ངེས་པར་གྱུར་པ་དེ་ལ་དེ་སྐད་ཅེས་བྱ་སྟེ། དེ་ཇི་ལྟ་བ་བཞིན་དུ་འདིར་ཡང་རྟོག་པའི་བྱེ་བྲག་གི་ཆོས་ཀྱིས་ཉན་ཐོས་དང་། རང་རྒྱལ་དང་། བྱང་ཆུབ་སེམས་དཔའ་དང་། ཐེག་པ་ཆེན་པོ་ལ་སོགས་པ་རྣམས་དང་པོ་ནས་རྣམ་པ་ཉི་ཤུའི་
བར་དུ་ངེས་པར་ཚང་བའི་ཕྱིར་ན་དེ་སྐད་བྱ་བ་ཉིད་དོ། །ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་བྱ་བ་ནི། དེ་ལ་ཐེག་པ་གསུམ་ནི་ཉན་ཐོས་དང་། རང་རྒྱལ་དང་བྱང་ཆུབ་སེམས་དཔའི་ཐེག་པ་ཡིན་ལ། དེ་དག་ལས་རིམ་པ་ཇི་ལྟ་བ་བཞིན་དུ་ལུས་དང་ངག་རྣམས་
ཡང་དག་པར་སྦྱངས་པ་ནི་ལམ་གྱི་གནས་སྐབས་ཀྱི་མཚན་ཉིད་ལ་གོང་ནས་ངེས་པར་འབྱུང་བ་ཞེས་བྱ་ལ་བདག་ཉིད་ཀྱི་སེམས་ཡང་དག་པར་སྦྱང་བའི་ཕྱིར་ཐེག་པ་རྣམས་ཀྱི་རབ་བམ་མཆོག་ཆེན་པོར་འགྱུར་བའི་རྡོ་རྗེ་ཐེག་པ་ཆེན་པོའི་གནས་ན་བདེ་བ་ཆེན་པོའི་ཚུལ་གྱིས་འབྲས་བུ་ཉིད་ལམ་དུ་བྱས་ནས་མྱུར་བ་
ཉིད་དུ་འབྲས་བུ་ལ་གནས་པར་བྱེད་པ་ནི་འབྲས་བུའི་ས་ལ་རབ་ཏུ་གནས་སོ་ཞེས་བྱ་བར་དགོངས་སོ། །དེ་ལྟ་བུ་འབྲས་བུའི་ཐེག་པའི་ཡོན་ཏན་ཇི་ལྟ་བུ་ཡིན་སྙམ་པ་ལ། ཉོན་མོངས་ཁམས་རྣམས་དག་པའི་བདག །ཅེས་གསུངས་ཏེ། དེ་ལྟར་འབྲས་བུའི་མཚན་ཉིད་རྡོ་རྗེ་ཐེག་པའི་འདོད་ཆགས་
ལ་སོགས་ཉོན་མོངས་པའི་དྲི་མ་རྣམས་རྗེས་སུ་མཐུན་པའི་སྟོབས་ཀྱིས་དག་པར་བྱེད་པ་དེ་ལ་དེ་སྐད་ཅེས་བྱ་ལ། དེ་ཉིད་ཀྱི་ལས་ཀྱི་རྒྱུ་དང་ལས་ཀྱི་འབྲས་བུ་ཐམས་ཅད་ཟད་པར་བྱེད་པ་ནི། ལས་ཀྱི་ཁམས་རྣམས་ཟད་བྱེད་པ། །ཞེས་བྱའོ། །དེ་ཉིད་ལས་དང་ཉོན་མོངས་པ་དཔག་ཏུ་མེད་པ་ཡང་དང་ཡང་དུ་འབྱུང་
བར་གྱུར་པའི་རྒྱུར་གྱུར་པས་ན་ཁམས་ཞེས་བྱ་སྟེ། དེ་ཡང་གསང་འདུས་རྒྱུད་ཕྱི་མ་ལས། ཉོན་མོངས་རྡོ་རྗེ་བདུད་རྩི་དག །ལས་རྣམས་ཐམས་ཅད་འགྲུབ་པར་འགྱུར། །ལས་རྣམས་ཐམས་ཅད་དག་པ་ལས། །ལས་ལས་སྐྱེས་པའི་འབྲས་བུ་དག །ཅེས་གསུངས་པའི་ཕྱིར་རོ། །ཆུ་བོ་
རྒྱ་མཚོ་ཀུན་ལས་རྒལ། །ཞེས་བྱ་བ་ནི་ཆུ་བོ་ནི་འཁོར་བའི་སྡུག་བསྔལ་དཔག་ཏུ་མེད་པ་ཡིན་ལ། དེ་ལས་རབ་ཏུ་རྒལ་ཞེས་བྱ་བ་ཉིད་དོ། །དེ་ལྟ་བུའི་ཐབས་དེ་དང་ཤེས་རབ་དེ་དང་བདེ་བ་ཆེན་པོར་མཉམ་པར་སྦྱོར་བ་སྤྲོས་པ་དང་བྲལ་བའི་མཚན་མ་ལས་ཡང་དག་པར་བྱུང་བ་ཡིན་ལ། སྦྱོར་བའི་

དགོན་པ་ལས་བྱུང་བ། །ཞེས་བྱ་བ་ཉིད་དོ། །དེ་ལྟར་ཐབས་དང་ཤེས་རབ་མཉམ་པར་སྦྱོར་བ་ལས་བྱུང་བའི་མཚན་ཉིད་ཀྱིས་མཚམས་མེད་པ་རྣམ་པ་ལྔ་དང་། སྲོག་གཅོད་པ་ལ་སོགས་པའི་ཕས་ཕམ་པར་གྱུར་པའི་ཆོས་བཞི་དང་། ཚིག་རྩུབ་མོ་ལ་སོགས་པ་ཕྲ་མོའི་ཉོན་མོངས་པ་མ་ལུས་པ་
རྣམས་དང་། དེ་ལས་བྱུང་བ་བག་ཆགས་ཀྱི་ས་བོན་མ་ལུས་པ་ཐམས་ཅད་ཕྱིས་ས་བོན་མི་འཇོག་པའི་ཚུལ་གྱིས་སྤངས་པ་གང་ཡིན་པ་དེ་ལ། ཉོན་མོངས་ཉེ་བ་ཀུན་ཉོན་མོངས། །བག་ཆགས་བཅས་པ་གཏན་སྤངས་པ། །ཞེས་བྱ་བ་ཉིད་དོ། །སྙིང་རྗེ་ཆེན་པོ་ཤེས་རབ་ཐབས། །ཞེས་བྱ་བ་ནི་ལས་ཀྱི་
ཕྱག་རྒྱ་དང་། རྣལ་འབྱོར་པའི་མཚན་ཉིད་སྟོང་པ་ཉིད་དང་། ཡེ་ཤེས་ཀྱི་བདག་ཉིད་ནི་ཤེས་རབ་དང་ཐབས་ཀྱི་ངོ་བོ་སྟེ། དེ་ཉིད་རོ་མཉམ་པ་ལས་བྱུང་བའི་བདེ་བ་ཆེན་པོ་ནི་ཁམས་གསུམ་གྱི་སེམས་ཅན་ཐམས་ཅད་ལ་ཁྱབ་པའི་ཕྱིར་ན་སྙིང་རྗེ་ཆེན་པོ་ཞེས་བྱ་ཞིང་། དེ་ལྟ་བུའི་ཚུལ་གྱིས་འགྲོ་བའི་དོན་
འབྲས་བུ་དང་བཅས་པའི་བྱེད་པ་གང་ཡིན་པ་དེ་ནི། དོན་ཡོད་འགྲོ་བའི་དོན་བྱེད་པ། །ཞེས་བྱ་བ་ཉིད་དོ། །དེ་ལྟར་དེ་ལྟ་བུའི་བདེ་བ་ཆེན་པོའི་སྟོབས་ཕྱིན་ཅི་ལོག་གི་ཤེས་པ་སྣ་ཚོགས་པའི་ཡུལ་ལ་མཚན་མའི་དངོས་པོར་འཛིན་པའི་མཚན་མའི་རྣམ་པར་རྟོག་པ་མ་ལུས་པར་སྤངས་པར་གྱུར་པ་གང་ཡིན་
པ་དེ་ནི། འདུ་ཤེས་ཀུན་གྱི་དོན་སྤངས་ཤིང་། །བྱ་བ་ལ་བག་ཆགས་ཀྱི་རྣམ་པར་སྣང་བའི་དོན་རྟ་དང་གླང་པོ་ལ་སོགས་པའི་གནས་དང་། ལུས་དང་ལོངས་སྤྱོད་དུ་སྣང་བ་ཐམས་ཅད་འགག་པར་བྱེད་པ་ནི། རྣམ་ཤེས་དོན་ནི་འགོག་པར་བྱེད། །ཅེས་བྱ་སྟེ། གཉིས་སུ་མེད་པའི་བདེ་བ་ཆེན་པོ་སྐྱེས་པ་དང་
དུས་མཚུངས་པར་མིག་ལ་སོགས་པའི་དབང་པོ་ཐམས་ཅད་དང་གཟུགས་ལ་སོགས་པའི་ཡུལ་ཐམས་ཅད་འགག་པར་མཛད་ཅིང་རང་རིག་པའི་ཡེ་ཤེས་སད་པར་མཛད་ཅེས་པར་དགོངས་སོ། །དེ་ལྟ་བུའི་རྒྱུ་དྲི་མ་དང་བྲལ་བའི་མཚན་ཉིད་ལས་ཡོངས་སུ་གྲུབ་པའི་འབྲས་བུའི་དྲི་མ་དང་བྲལ་བའི་བདག་ཉིད་
ཀྱི་དོན་ཕུན་སུམ་ཚོགས་པ་བཤད་ནས། དེ་ལས་བྱུང་བ་གཞན་གྱི་དོན་ཕུན་སུམ་ཚོགས་པར་བསྟན་པ་ནི། སེམས་ཅན་ཀུན་ཡིད་ཡུལ་དང་ལྡན། །ཞེས་པ་ལ་སོགས་པ་གསུངས་ཏེ། དེ་ལ་དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ནི། སེམས་ཅན་ལ་མོས་པ་རྣམ་པ་སྣ་ཚོགས་ཀྱི་དབང་གིས་འདོད་པའི་

དོན་གང་དང་གང་བསམས་པ་དེ་དང་དེ་ཐམས་ཅད་ཀྱི་རེ་བ་ཕུན་སུམ་ཚོགས་པར་མཛད་པ་དང་། དེ་བཞིན་དུ་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་བྱིན་རླབས་ཆེན་པོ་ནི་ཁམས་གསུམ་གྱི་སེམས་ཅན་ཐམས་ཅད་ཀྱི་སྐྱབས་དང་མགོན་དང་
རེ་བ་ཐམས་ཅད་ཀྱི་ཡུལ་དུ་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་ཞིང་། དེ་བཞིན་གཤེགས་པའི་ཐུགས་ཡེ་ཤེས་བླ་ན་མེད་པ་གདུལ་བྱའི་སེམས་ཅན་ཐམས་ཅད་ཀྱི་སེམས་ཀྱི་བསམ་པ་རྣམ་པ་སྣ་ཚོགས་པ་རྣམས་ཡང་དག་པར་མཁྱེན་པ་གང་ཡིན་པ། སེམས་ཅན་ཀུན་གྱི་ཡིད་
རིག་པ། །ཞེས་བྱ་བ་ལ། སེམས་ཅན་ཀུན་གྱི་ཡིད་ལ་གནས་པ་ནི་ཡེ་ཤེས་ཆེན་པོ་ཡིན་ལ། དེ་ཉིད་དེ་བཞིན་གཤེགས་པ་ཐམས་ཅད་ཀྱི་ངོ་བོ་ཡིན་ལ། ཆོས་ཐམས་ཅད་ཀྱི་རང་བཞིན་དང་ལྷན་ཅིག་སྐྱེས་པའི་བདེ་བ་ཆེན་པོ་ཞེས་པ་ཉིད་དོ། །དེ་ལྟ་བུའི་ཚུལ་གྱིས་
སེམས་ཅན་ཐམས་ཅད་ཀྱི་ཡིད་ལ་ང་གནས་ཞེས་བྱ་བ་སྟེ། དེ་ཡང་ལེའུ་དང་པོ་ལས། ང་ནི་དེ་བཞིན་གཤེགས་ཀུན་དང་། །འབྱུང་བ་ཀུན་གྱི་སྙིང་ལ་གནས། །སྤྲོས་པ་ཀུན་དང་བྲལ་བ་སྟེ། །དངོས་ཀུན་ངོ་བོར་རྟག་ཏུ་བཞུགས། །ཞེས་གསུངས་པའི་ཕྱིར་
རོ། །དེ་དག་སེམས་དང་མཐུན་པར་འཇུག །ཅེས་པ་ནི་དེ་ལྟར་གདུལ་བྱའི་སྐྱེ་བོ་ཐམས་ཅད་ཀྱི་སེམས་གདུག་པ་དང་བཅས་པ་དེ་ཐམས་ཅད་ཀྱང་རྗེས་སུ་མཐུན་པའི་ཚུལ་གྱིས་འདུལ་བར་མཛད་པ་སྟེ། དཔེར་ན། སྨད་འཚང་མའི་དབང་ཕྱུག་ཆེན་མོ་ཨུཏྤ་ལའི་གཟུགས་
འཁྲིག་པའི་ཆོས་ལ་རྟག་ཏུ་ཉེ་བར་ཆགས་ཤིང་སྐྱེས་བུའི་མཚན་མ་རྟག་ཏུ་ཆེ་བ་འདོད་ལ། དྲན་པའི་ཚུལ་གྱིས་ཚིམ་པར་བྱས་པ་ལས། ངན་འགྲོའི་ལམ་ལས་གྲོལ་ནས། དགྲ་བཅོམ་པའི་འབྲས་བུ་ཐོབ་པ་བཞིན་དེ་ཉིད་འབྲས་བུ་ཕུན་སུམ་ཚོགས་པའི་བདག་ཉིད་ཡུལ་
ལ་མངོན་པར་དགའ་བ་དང་། དེ་ཡིན་པ་ལ་ཡིད་ཆེས་པར་གྱུར་པ་ལས། ཁམས་གསུམ་གྱི་སེམས་ཅན་ཐམས་ཅད