Luận tạng Tây Tạng (Tengyur) — Tập 54

༄༅༅། །རྒྱ་གར་སྐད་དུ། ཏནྟྲཱརྠ་ཨ་བ་ཏཱ་ར། བོད་སྐད་དུ། རྒྱུད་ཀྱི་དོན་ལ་འཇུག་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྣམ་སྣང་མཛད་ཆེན་ཡེ་ཤེས་ནི། །བདེ་
བར་གཤེགས་པའི་ཐུགས་ལ་གནས། །རྡོ་རྗེ་དབྱིངས་ལ་སོགས་པའི་གཟུགས། །སངས་རྒྱས་ལ་སོགས་འཁོར་ལོ་བསྐོར། །དེ་ལྟར་ཆོས་ཀྱི་སྐུ་དང་ནི། །ལོངས་སྤྱོད་རྫོགས་དང་སྤྲུལ་པའི་སྐུ། །
རྣམ་སྣང་མཛད་དང་ཐུབ་པ་ཡང་། །རྒྱུད་འདི་སྟོན་པ་དག་བསྟོད་ནས། །དེ་ཉིད་བསྡུས་པའི་རྒྱུད་ལས་ནི། །དེ་ཉིད་རྣམ་སྒྲུབ་རིམ་པ་ཞིག །མཁས་པ་དགའ་བ་བསྐྱེད་པའི་ཕྱིར། །ལེགས་པར་བསྡུས་
ཏེ་བཤད་པར་བྱའོ། །རྒྱུད་འདི་ཤིན་ཏུ་ཟབ་ཅེས་ལ། །མཚན་མ་ཐ་དད་རབ་ཏུ་བསྟན། །དེ་བས་དེ་ལ་འཇུག་པ་ཙམ། །བདག་གིས་སུ་ནི་འདི་བགྱིས་སོ། །མི་གཉིས་ཡེ་ཤེས་སྤྱོད་ཡུལ་བ། །ཚིག་གི་
སྤྲོས་པ་མ་ལུས་གྲོལ། །དུས་ཀུན་དུ་ནི་དེ་བཞིན་པས། །དེ་ཉིད་ཅེས་ནི་བཅོམ་ལྡན་གསུངས། །དེ་ཕྱིར་ཡེ་ཤེས་གང་འཇུག་པ། །དེ་ལའང་དེ་ཉིད་ཅེས་སུ་བསྒྲགས། །གང་ཕྱིར་དེ་ཉིད་སྤྱོད་ཡུལ་བར། །

ནམ་ཡང་སླུ་བར་མི་འགྱུར་ཕྱིར། །དེ་ཉིད་བསྡུས་པའི་རྒྱུད་ལས་ནི། །ཀུན་རྫོབ་བདེན་པ་ལ་གནས་ནས། །དེ་ཉིད་མཚན་ཉིད་གཞན་བསྟན་པ། །དེ་དག་མཉན་པ་ཉིད་དུ་གྱིས། །རང་གི་ཡེ་ཤེས་མཐུ་ཡི་མཚན། །
རྡོ་རྗེ་དབྱིངས་ལ་སོགས་མཚན་ཉིད། །འགྲོ་བའི་དོན་ལ་མི་སླུ་བས། །དེ་ཉིད་ཅེས་ནི་རྒྱལ་བས་གསུངས། །ཇི་ལྟར་ཞེ་ན། བདེ་བར་གཤེགས་པ་ཐམས་ཅད་ཀྱིས་སྔགས་ཀྱི་སྤྱོད་པ་ལ་མོས་པའི་སེམས་ཅན་གྱི་ཚོགས་རྣམས་ཀྱི་དོན་
རྣམ་པ་མང་པོ་གཟིགས་ནས་སངས་རྒྱས་ཀྱི་ཞིང་སྟུག་པོ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཐམས་ཅད་གྲུབ་པ་སྤྲུལ་པ་བྱང་ཆུབ་ཀྱི་སྙིང་པོ་ན་བཞུགས་པ་ལ་མངོན་པར་བྱང་ཆུབ་པ་ལ་རྣམ་པ་ལྔ་བསྟན་ཏེ། །རྡོ་རྗེ་དབྱིངས་
དེ་བཞིན་གཤེགས་པའི་གཟུགས་སུ་བྱིན་གྱིས་བརླབས་ནས། །རང་གི་ཡེ་ཤེས་རྟོགས་པའི་གནས་སྐབས་ཀྱི་ཁྱད་པར་བྱང་ཆུབ་སེམས་དཔའ་བསོད་ནམས་དང་ཡེ་ཤེས་ཀྱི་ཚོགས་མ་ལུས་པ་དཔག་བསམ་གྱི་ཤིང་དང་ཡིད་བཞིན་གྱི་
ནོར་བུ་རིན་པོ་ཆེ་ལྟ་བུ་འབྲས་བུའི་ངོ་བོ་བླ་ན་མེད་པ། ཀུན་དུ་བཟང་པོའི་སེམས་ཞེས་བྱ་བ་རྡོ་རྗེ་ལྟར་མི་ཤིགས་པ་དེའི་རྒྱུའི་གནས་སྐབས་ན་གནས་པ་དེའི་རིགས་ཀྱི་བདག་ཉིད་དང་བཅས་པར་འཇིག་རྟེན་དང་འཇིག་རྟེན་ལས་འདས་པ་ཐམས་

ཅད་ཀྱི་སེམས་ཀྱི་རྒྱལ་པོ་ལྟ་བུར་རང་གི་སེམས་ཀྱི་བདག་ཉིད་བསྟན་ཏོ། །དེ་ནས་ཡང་བཅོམ་ལྡན་འདས་ཀུན་དུ་བཟང་པོ་དེ་ཉིད་རང་གི་ངོ་བོའི་བྱེ་བྲག་གིས་མི་བསྐྱོད་པ་དང་། རིན་ཆེན་དབང་དང་། འོད་དཔག་ཏུ་མེད་པ་དང་། དོན་ཡོད་པར་གྲུབ་པའི་བདེ་བར་གཤེགས་པ་ཞེས་བྱ་བ་
རྣམས་སུ་ཁ་དོག་དང་དབྱིབས་ཇི་ལྟར་གྲགས་པ་བཞིན་བརྟགས་ནས། དེ་རྣམས་ལས་ཀྱང་ཇི་ལྟར་གནས་པའི་རིམ་པ་བཞིན་དུ་རང་གིས་རྟོགས་པའི་མཐུའི་ཁྱད་པར་གྱི་ངོ་བོ་དེ་བཞིན་ཉིད་དང་། མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་གྲུབ་པའི་ཡེ་
ཤེས་ཞེས་བྱ་བ་རྣམས་སུ་རང་གི་ངོ་བོ་ཐ་དད་པར་བསྟན་ཏོ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་བདག་ཉིད་ཀུན་དུ་བཟང་པོའི་སེམས་བསྐྱེད་པ་དེ་ཉིད་དེ་བཞིན་གཤེགས་པ་ཐམས་ཅད་ཀྱི་སྙིང་ག་ན་གནས་པར་བརྟག་པ་སྔོན་དུ་བྱས་ཏེ།
ཇི་ལྟར་འདོད་པའི་སེམས་དཔའ་ཆེན་པོ་རྣམས་བསྐྱེད་པ་དང་རྗེས་སུ་མཐུན་པའི་བདེ་བར་གཤེགས་པའི་ཏིང་ངེ་འཛིན་གྱི་དབང་གིས་དེ་ལས་བྱུང་ནས་རིམ་པ་བཞིན་དུ་རྡོ་རྗེ་སེམས་དཔའ་དང་། རྡོ་རྗེ་རྒྱལ་པོ་དང་། རྡོ་རྗེ་ཆགས་པ་དང་། རྡོ་རྗེ་དགའ་བ་ལ་སོགས་པ་ཕལ་ཆེར་རང་གི་མིང་དང་
སྔགས་ཀྱི་ཚིག་དང་། དེ་དག་རྗེས་སུ་མཐུན་པའི་ཕྱག་རྒྱས་ཕྱག་གཉིས་མཚན་པ། དཔེ་མེད་པའི་སྐུའི་ཆ་ལུགས་འཛིན་པ་རང་གི་ངོ་བོའི་བྱེ་བྲག་ཏུ་བྱིན་གྱིས་བརླབས་ཏེ་གནས་སོ། །དེ་རྣམས་ལས་ཀྱང་བཅོམ་ལྡན་འདས་ཀུན་དུ་བཟང་པོ་རྣལ་འབྱོར་གྱི་དབང་ཕྱུག་ཆེན་པོ་དེ་བཞིན་
གཤེགས་པ་ཐམས་ཅད་ཀྱི་བྱང་ཆུབ་ཀྱི་སེམས་ཆེན་པོ་དུས་གསུམ་དུ་འཇུག་པ་དེ་ཉིད་བདེ་བར་གཤེགས་པ་འགུགས་པ་དང་། རྗེས་སུ་ཆགས་པ་དང་། མཉེས་པ་ལ་སོགས་པ་མཐུའི་བྱེ་བྲག་ངོ་མཚར་རྣམས་སུ་བསྟན་ཏོ། །དེ་ནས་ཡང་དེ་དག་དང་པོ་ཉིད་དུ་དེ་བཞིན་གཤེགས་པ་
ཉིད་ལས་བྱུང་བའི་ཕྱིར་རྒྱལ་བའི་རིགས་ཞེས་གྲགས་སོ། །ཡང་བཅོམ་ལྡན་འདས་རྡོ་རྗེ་སེམས་དཔའ་སྐྱེ་དགུའི་བདག་པོ་དེ་ཉིད་འཇིག་རྟེན་གསུམ་ལས་རྣམ་པར་རྒྱལ་བ་རྡོ་རྗེ་འཛིན་པ་དང་། འཇིག་རྟེན་དབང་པོ་དང་། ནམ་མཁའི་སྙིང་པོ་རྣམས་རང་གིས་བརྟགས་པའི་སྐུ་ལ་སྙིང་

པོ་གནས་པར་བསྟན་ནས། དེའི་རྗེས་སུ་མཐུན་པར་སྐུའི་ཚོགས་དུ་མར་གྱུར་ཏེ། དེ་དག་ཉིད་ཀྱི་ཕྱག་ན་གནས་པའི་ཕྱག་རྒྱའི་མཚན་མ་རྡོ་རྗེ་དང་པདྨ་ལ་སོགས་པ་ལས་བྱུང་ནས་རྣམ་པ་མང་པོར་གནས་པར་བརྟགས་སོ། །དེ་རྣམས་ཀྱང་བཅོམ་ལྡན་འདས་ཏིང་ངེ་
འཛིན་ཐམས་ཅད་ཀྱི་དབང་ཕྱུག་དེ་ཉིད་རང་གིས་བྱས་པའི་སྐུའི་ཚོགས་ཀྱི་བྱེ་བྲག་གདུག་པ་མང་པོ་འདུལ་བ་དང་། རྣམ་པར་དག་པའི་ཆོས་ལ་གཟིགས་པ་དང་། སྐྱེ་བོ་ཕོངས་པའི་བསམ་པ་ཐམས་ཅད་ཡོངས་སུ་རྫོགས་པར་མཛད་པ་ལ་སོགས་པ་བདེ་བར་གཤེགས་པ་མཐའ་དག་གི་ཡོན་
ཏན་གྱི་ཁྱད་པར་མཐའ་ཡས་པའི་རང་བཞིན་རྣམས་ཁྱད་པར་མེད་པར་ཡང་དག་པར་བསྐྱེད་དོ། །རྡོ་རྗེ་དང་། པདྨ་དང་། རིན་པོ་ཆེའི་རིགས་ལ་སོགས་པ་ཡང་རྡོ་རྗེ་ལ་སོགས་པ་ལས་བྱུང་བའི་ཕྱིར་དེ་དག་རྣམ་པར་བཀོད་དོ། །དེ་དག་ཀྱང་རྒྱས་པར་རྒྱུད་འདི་ཉིད་དུ་རིགས་སོ་སོའི་དཀྱིལ་འཁོར་
གྱི་ལྷ་སེམས་དཔའ་འབྱུང་བ་ལས་བསྟན་ཏེ། དེ་བཞིན་དུ་རྒྱུད་འདིར་གཏོགས་པའི་རིགས་བཞིའི་དཀྱིལ་འཁོར་གྱི་ལྷ་དཔལ་རྡོ་རྗེ་སེམས་དཔའ་ལ་སོགས་པ་ཡེ་ཤེས་སེམས་དཔའི་མཚན་ཉིད་དེ་རྣམས་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་སྒྲུབ་པའི་
ཏིང་ངེ་འཛིན་བསྟན་པ་ལས་བཤད་པ། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་སྐུ་དང་གསུང་དང་ཐུགས་རྡོ་རྗེའི་ནམ་མཁའི་དབྱིངས་ཐམས་ཅད་ན་རྟག་ཏུ་ཁྱབ་པར་གནས་པ། དེ་བཞིན་གཤེགས་པ་ཐམས་ཅད་དང་མཉམ་པར་འཇུག་པས་རྡོ་རྗེ་དབྱིངས་རྟོགས་པའི་ཡེ་
ཤེས་ཀྱི་སེམས་དཔའ་ཞེས་བྱ་བ་ལ་སོགས་པ་བཤད་པ་ནས་ཀུན་དུ་བཟང་པོ་བྱང་ཆུབ་སེམས་དཔའ་ཆེན་པོ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་ལ་གནས་སོ་ཞེས་བྱ་བའི་བར་དུ་དེ་ལྟར་གསལ་བར་བསྟན་མོད་ཀྱི། འདིར་ཡང་མདོར་བསྟན་ཏེ། ཇི་སྐད་དུ། བཅོམ་ལྡན་
སེམས་དཔའ་དེ་ཉིད་ནི། །རྡོ་རྗེ་སེམས་དཔའ་བདག་ཉིད་གཙོ། །སྐུ་དང་གསུང་དང་ཐུགས་རྡོ་རྗེ། །སེམས་དཔའ་བརྟན་པ་རང་བྱུང་བ། །སེམས་དཔའ་རྣམས་ཀྱི་སེམས་དཔའ་མཆོག །ཐུགས་ཀར་རྡོ་རྗེ་བསྒོམས་པས་ནི། །རྡོ་རྗེ་སེམས་དཔའ་ཞེས་བྱ་བ། །རྡོ་རྗེ་དེ་ལ་རབ་ཏུ་

གནས། །དེ་ཉིད་ཡེ་ཤེས་ཚུལ་གྱིས་སུ། །སངས་རྒྱས་རྣམས་ཀྱི་འོད་མཉམ་མེད། །ཐུགས་ལས་སྣ་ཚོགས་བྱུང་ནས་ནི། །སྣ་ཚོགས་གཟུགས་སུ་གྱུར་པ་ཡང་། །སེམས་ཅན་ཀུན་གྱི་རྡུལ་སྙེད་ཀྱི། །རྒྱལ་བ་དག་ཏུ་དེ་ཉིད་གྱུར། །རྡོ་རྗེ་སྐུ་ནི་དེ་རྣམས་ལས། །རྡོ་རྗེ་
སེམས་དཔའ་ཡང་དག་བྱུང་། །དེ་ལས་དང་པོའི་སེམས་དཔའ་ཡི། །མཚན་མ་ཐམས་ཅད་རབ་ཏུ་བྱུང་། །མཚན་མ་ལས་ཀྱང་སེམས་དཔའ་ཆེ། །དེ་རྣམས་ལས་ཀྱང་ཚུལ་འདི་ཀུན། །ཞེས་བྱ་བ་གསུངས་སོ། །དེ་ཉིད་བསྡུས་པ་ཆེན་པོ་ལས་ཀྱང་། །བཅོམ་ལྡན་རྣལ་
འབྱོར་དེ་ཉིད་ནི། །རྡོ་རྗེ་སེམས་དཔའ་དོན་ཆེན་སྩོལ། །རིགས་ལྔ་ཡི་ནི་ཁྱད་པར་གྱིས། །སྤྱོད་དང་མི་སྤྱོད་བཅས་པར་རོལ། །ཞེས་གསུངས་སོ། །དཔལ་མཆོག་དང་པོ་ལས་ཀྱང་དོན་འདི་ཉིད་གཞུང་འདིས་བསྟན་ཏེ། སྔོན་མཐའ་མེད་པའི་སེམས་དཔའ་ནི། །རྡོ་རྗེ་སེམས་
དཔའ་དགའ་བ་ཆེ། །ཀུན་ཏུ་བཟང་པོ་ཐམས་ཅད་བདག །རྡོ་རྗེ་སྙེམས་ཚུལ་བདག་པོའི་བདག །སེམས་ཅན་ཀུན་གྱི་སེམས་གང་ཡིན། །བརྟན་པའི་ཕྱིར་ནི་དཔའ་ཞེས་བྱ། །མཉམ་པར་གཞག་པས་ཏིང་འཛིན་གནས། །ངེས་པ་ལས་ནི་རྡོ་རྗེར་གྱུར། །སེམས་དཔའི་
བྱིན་རླབས་ཚུལ་གྱིས་ནི། །བདག་ཉིད་རྡོ་རྗེ་སེམས་དཔར་གྱུར། །དེ་ཉིད་བཅོམ་ལྡན་སྣ་ཚོགས་པ། །བྱང་ཆུབ་སྤྱོད་པའི་རྗེས་མཐུན་པ། །བདུད་དང་བདུད་ལས་རྒྱལ་བ་ཉིད། །བྱང་ཆུབ་སངས་རྒྱས་དེ་ཉིད་དེ། །རྡོ་རྗེ་དྲག་པོ་མཐར་བྱེད་པ། །ཕྱག་ན་རྡོ་རྗེ་ཉིད་ཀྱང་དེ། །དེ་ཉིད་དེ་
བཞིན་གཤེགས་པའི་རིགས། །ངེས་པར་རྡོ་རྗེ་རིགས་ཆེན་པོ། །དེ་ཉིད་པདྨའི་རིགས་དག་པ། །དེ་ཉིད་ནོར་བུའི་རིགས་བཟང་བཤད། །དེ་ཉིད་ཆགས་པའི་སྒོ་རུ་བསྟན། །འདོད་དང་གྲོལ་བ་དེ་ཉིད་དེ། །དུས་གསུམ་སྲིད་གསུམ་མཆོག་གསུམ་སྟེ། །འཇིག་རྟེན་གསུམ་མཆོག་
ཁམས་གསུམ་པ། །དེ་ཉིད་གནས་པ་ཀུན་གྱི་མཆོག །བརྟན་ལ་སྲ་བ་ཆེ་ཞིང་སྟུག །འགྲོ་བའི་སེམས་ནི་འདུས་བྱས་པས། །ཐམས་ཅད་བྱེད་པ་ཐམས་ཅད་ཉིད། །ཅེས་གསུངས་ཏེ། དེ་བས་ན་དེ་བཞིན་གཤེགས་པ་ཐམས་ཅད་རྡོ་རྗེ་སེམས་དཔའི་རིགས་སོ་ཞེས་ཀྱང་

རྣལ་འབྱོར་གྱི་ཚུལ་ལས་བསྟན་ཏོ། །དེ་ཉིད་ལས་རྡོ་རྗེ་སེམས་དཔའ་དེ་བཞིན་གཤེགས་པ་ཐམས་ཅད་ཀྱི་གཙོ་བོ་ཡིན་པར་ཡང་བསྒྲགས་ཏེ། འདི་སྐད་དུ་ཐེག་པ་ཆེན་པོ་མངོན་པར་རྟོགས་པ་ཆུང་ངུ་ལས་ཀྱང་དེ་བཞིན་གཤེགས་པ་ཐམས་ཅད་ཀྱིས་བཅོམ་
ལྡན་འདས་རྡོ་རྗེ་སེམས་དཔའ་བདག་ཉིད་ཆེ་བ་བསྟན་པ་ལས་བཤད་པ། །དེ་བཞིན་གཤེགས་པས་ཕྱག་བྱ་ཞིང་། །མཆོད་ཅིང་བསྟོད་དེ་བཀུར་བར་འོས། །གང་ཕྱིར་ཐམས་ཅད་མཁྱེན་པའི་སེམས། །བྱང་ཆུབ་སེམས་ནི་ཁྱོད་ལ་བྱ། །རྫོགས་པའི་བྱང་ཆུབ་ཁྱོད་ལ་
བརྟེན། །ཁྱོད་ནི་ཐམས་ཅད་གཟིགས་པའི་ཡབ། །བྱུང་དང་འབྱུང་བར་འགྱུར་བ་ཡི། །དེ་བཞིན་གཤེགས་རྣམས་ཁྱོད་ལ་བརྟེན། །སེམས་དཔའ་རྣམ་པ་ཐམས་ཅད་མཁྱེན། །བརྟན་པས་དེ་བཞིན་གཤེགས་རྣམས་ཀྱིས། །རྡོ་རྗེ་སེམས་དཔའ་བཤད་པ་སྟེ། །
ཐམས་ཅད་གཟིགས་པའི་སྙིང་པོ་ཡིན། །དེ་བཞིན་གཤེགས་པ་ཀུན་དེ་ཉིད། །སངས་རྒྱས་ཡེ་ཤེས་བླ་ན་མེད། །དད་པས་གང་ཞིག་དད་དེ་ཡང་། །དེ་བཞིན་གཤེགས་པས་ཕྱག་བྱར་འོས། །ཞེས་གསུངས་སོ། །དེ་ལྟར་དེ་བཞིན་གཤེགས་པ་ཉིད་རྣམ་པ་དུ་མར་དེ་ཁོ་
ན་ཉིད་ཅེས་བྱ་བར་འགྲོ་བའི་དོན་མཛད་པའི་ཕྱིར་བཞུགས་པར་བློ་གྲོས་རབ་ཏུ་དྲི་མ་མེད་པ་རྣལ་འབྱོར་གྱི་བདུད་རྩིའི་བཅུད་ལེན་འདོད་པའི་སེམས་ཅན་དམ་པ་རྣམས་ཀྱིས་ཤེས་པར་བྱའོ། །གང་གི་ཕྱིར་དངོས་གྲུབ་ཁྱད་པར་ཅན་ཇི་ལྟར་འདོད་པའི་བདེ་བ་འབྱུང་བ་རྣམས་ཀྱང་དེ་དག་དང་
མཉམ་པར་ལྡན་ན་བདེ་བ་ཉིད་ཀྱིས་དེའི་གོ་འཕང་མྱུར་དུ་ཐོབ་སྟེ། བདག་ཉིད་ཆེན་པོ་སྲས་དང་བཅས་པ་དེ་དག་མཉེས་པར་བྱས་ནས་སེམས་ཅན་ཐམས་ཅད་ལ་ཕན་འདོགས་ནུས་པའི་དབང་ཕྱུག་ཆེན་པོའི་དངོས་གྲུབ་སྩོལ་བར་མཛད་དོ། །དེ་བས་ན་གང་བདག་ཉིད་ཆེ་བ་རང་བཞིན་གྱིས་
རླབས་ཆེ་བས། དེ་སེམས་ཅན་གྱི་ཚོགས་ཆེན་པོ་ལ་རྣམ་པ་ཐམས་ཅད་ཀྱིས་ཕན་འདོགས་པར་བསྒྲུབ་པར་བྱ་བའི་ཕྱིར་ཡོན་ཏན་རིན་པོ་ཆེ་མཐའ་ཡས་པའི་ཚོགས་ལ་གནས་པ་འཇིག་རྟེན་གསུམ་པོ་ཐམས་ཅད་ཀྱི་དབང་ཕྱུག་ཆེན་པོ་རྒྱུན་མི་འཆད་པར་འགྲོ་བ་མཐའ་དག་གི་དོན་མཛད་

པའི་བདེ་བ་རིང་པོར་མི་ཐོགས་པར་ཐོབ་པར་འདོད་པ་དེ་ལ་དེའི་ཕྱིར་སངས་རྒྱས་སྲས་དང་བཅས་པས་དེ་དག་ཐོབ་པར་བྱར་རུང་བ་ཉིད་དུ་དགོངས་པ་ཆེན་པོ་མཛད་དོ། །དེ་རྣམས་ཀྱིས་ཀྱང་དེའི་ཕྱིར་སྒྲུབ་པའི་ཐབས་སུ་རང་གིས་བརྟགས་པའི་ལྷའི་ངོ་བོ་ཉིད་ཀྱི་བྱེ་བྲག་ཏུ་གྱུར་པ་ཕྱག་རྒྱ་ཆེན་པོ་
ལ་སོགས་པ་བཞི་འདིར་བསྟན་ཏེ། ཇི་སྐད་དུ། ཇི་ལྟར་འཇིག་རྟེན་འདུལ་གྱུར་པ། །དེ་ལྟར་དངོས་གྲུབ་མྱུར་དུ་བསྟན། །དེ་ལ་ཐབས་ནི་ཕྱག་རྒྱ་ཆེ། །དངོས་གྲུབ་ཐམས་ཅད་རབ་སྒྲུབ་པ། །ཇི་ལྟར་ཕྱག་རྒྱས་འགྲུབ་འགྱུར་བ། །དེ་ལྟར་བྱང་ཆུབ་སྤྱོད་ལ་སོགས། །ཐབས་ཀུན་ཆོ་
གའི་རིམ་པས་ཀྱང་། །སངས་རྒྱས་སེམས་ཅན་དོན་མི་འགྲུབ། །ཅེས་གསུངས་སོ། །ཕྱག་རྒྱ་ཆེན་པོ་ལ་སོགས་པ་མཉེས་པར་བྱ་བ་དེ་རྣམས་ཀྱང་དེ་བཞིན་གཤེགས་པའི་རིགས་ལ་རྡོ་རྗེ་དབྱིངས་ཀྱི་དཀྱིལ་འཁོར་དུ་གཏོགས་པར་གསུངས་པ་ཉི་ཚེ་སྐབས་འདིར་གླེང་བར་རིག་པར་
བྱ་སྟེ། གང་གི་ཕྱིར་ཞེ་ན། དེ་དག་ཉིད་མཉེས་པར་བྱ་བའི་ཕྱིར་ཆོ་ག་བསྡུས་པ་ཡིན་ཏེ། དེ་བས་ན་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱའི་སྒྲ་རྣམས་སྤྱིའི་རྒྱུད་ནས་བཤད་པར་བྱའོ། །དེ་ལ་ལྷ་ཉིད་ཀྱིས་དེའི་བདག་ཉིད་དམ། དེའི་ཆ་ཤས་ཀྱིས་གང་ཁྱད་པར་
མེད་པ་བསྟན་པ་དེ་དག་ནི་ཕྱག་རྒྱ་ཞེས་བྱ་སྟེ་མཚན་མ་ཞེས་བྱ་བའི་དོན་ཏོ། །ཕྱག་རྒྱ་དང་མཚན་མ་དང་། རྟགས་དང་། ཉེ་བའི་མཚན་ཉིད་ཅེས་བྱ་བ་རྣམས་ནི་དོན་ཐ་དད་པར་མ་ཡིན་ཏེ། ཇི་ལྟ་ཞེ་ན། ལྷའི་ངོ་བོ་ཉིད་དམ། དེའི་ཆ་ཤས་ཀྱིས་བྱེ་བྲག་མེད་པར་བརྟགས་ཏེ་སྒྲུབ་པ་པོས་ལྷ་གང་
རྗེས་སུ་དྲན་པར་འདོད་པ་དེ་ལ་དམིགས་ནས་དྲན་པ་སྐྱེ་བར་འགྱུར་ཏེ། དེའི་ཕྱིར་འདི་དེའི་ཉེ་བའི་མཚན་ཉིད་དོ། །དེ་བས་ན་དོན་དེ་རྒྱུད་འདི་ཉིད་དང་། འཇིག་རྟེན་གསུམ་ལས་རྣམ་པར་རྒྱལ་བ་ཉིད་ལས་ཀྱང་གསལ་བ་ཉིད་དུ་བསྟན་ཏེ། ཇི་སྐད་དུ་རེ་ཞིག་འདི་ཉིད་ལས། །འདའ་དཀའ་
དེ་བཞིན་མི་ཤིགས་པ། །རྒྱལ་པོའི་ཕྱག་རྒྱ་མཆོག་གི་རྟགས། །བདག་ཉིད་ཆེན་པོ་མཚན་མའི་གཟུགས། །དེ་བས་ཕྱག་རྒྱ་ཞེས་བསྒྲགས་སོ། །ཞེས་གསུངས་སོ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ལས་ཀྱང་། སྐུ་གསུང་ཐུགས་ཀྱི་རྡོ་རྗེ་ཡི། །གཟུགས་

བརྙན་གྱི་ནི་སྦྱོར་བ་ཡིས། །ཕྱག་རྒྱ་ཐམས་ཅད་ཁྱད་པར་འདི། །བསྐྱེད་པར་རབ་ཏུ་བསྒྲགས་པ་ཡིན། །ཞེས་བཤད་ནས་དོན་དམ་པ་དེ་ཁོ་ན་ཉིད་ཕྱག་རྒྱ་ཡིན་ནོ་ཞེས་ཀྱང་བཤད་དོ། །འདིར་གཟུགས་བརྙན་ཞེས་སྨོས་པ་ནི་ལྷའི་མཚན་མའི་མཚན་ཉིད་
དུ་བསྟན་པ་སྟེ། དེའི་ཕྱིར་མི་འདྲ་བའི་མཚན་མ་ལ་ཡང་གཟུགས་སུ་བཤད་པས་ན་མཚན་ཉིད་མ་རྫོགས་པ་ལ་སོགས་པའི་ཉེས་པར་ཡང་མི་འགྱུར་རོ། །དོན་དམ་པ་ཞེས་བྱ་བ་ཡང་འདིར་གང་ཟག་དང་ཆོས་ལ་བདག་མེད་པའི་མཚན་ཉིད་ཡིན་པར་བལྟའོ། །གཞུང་གཞན་དག་ལས་
ཀྱང་དོན་དམ་པའི་ལྷའི་མཚན་མའི་མཚན་ཉིད་ཕྱག་རྒྱ་ཡིན་པར་བསྟན་ཏེ། ཇི་སྐད་དུ། ཆོས་ཀྱི་དབྱིངས་ནི་མདོ་རུ་ན། །མཚན་མའི་ཕྱག་རྒྱ་ཆེ་ཞེས་བྱ། །ཞེས་གསུངས་སོ། །དེ་ལ་ཆོས་ཀྱི་དབྱིངས་ཞེས་བྱ་བའི་སྒྲ་ནི་དོན་དམ་པ་དང་། དེ་དང་འབྲེལ་པའི་ལྷའི་ཁྱད་པར་རྣམས་ལ་བྱ་སྟེ།
དཔེར་ན་སྐབས་ཁ་ཅིག་ཏུ་རྒྱལ་པོ་ཞེས་བྱ་བའི་སྒྲས་རྒྱལ་པོ་དང་། དེ་དང་འབྲེལ་བའི་འཁོར་ལའང་བྱ་བ་བཞིན་ནོ། །ཆོས་ཀྱི་དབྱིངས་དང་འབྲེལ་པར་བརྗོད་པ་དེ་ཡང་གང་ཡིན་ཞེ་ན། གང་དག་གིས་དེ་རྟོགས་ནས་རྣམ་པར་དག་སྟེ། བདག་དང་གཞན་གྱི་དོན་ཕུན་སུམ་ཚོགས་པ་ཇི་ལྟར་
རིགས་པར་འབྱུང་བ་སྟེ་དེ་བས་ན། འདུས་མ་བྱས་ལས་བྱུང་བ་ནི་འཕགས་པའི་གང་ཟག་གོ་ཞེས་བྱ་བ་ཡང་དེ་ཉིད་ལ་བྱའོ། །ཡོངས་སུ་མ་དག་པའི་ལྷར་སྣང་བ་རྣམས་ཀྱང་ཡང་ན་ནི་དེ་ལྟ་བུས་འདུལ་བའི་སྐྱེ་བོ་རྣམས་ལ་ཕན་གདགས་པའི་ཕྱིར་དེ་བཞིན་གཤེགས་པས་བྱིན་གྱིས་
བརླབས་པ་ཉིད་དམ། ཡང་ན་ནི་ཆོས་ཀྱི་དབྱིངས་ཀྱི་ཕྱོགས་ལ་གོམས་པར་བྱས་པ་ལས་བསོད་ནམས་བསྐྱེད་པའི་སྐྱེ་བོ་ཐོབ་པ་དག་དེ་ལྟ་བུར་སྣང་ངོ་། །ཡང་ཡེ་དེ་རྣམས་ཀྱང་ཆོས་ཀྱི་དབྱིངས་དང་འབྲེལ་པ་ཉིད་དུ་ཤེས་པར་བྱ་སྟེ། དེ་བས་ན་ཐམས་ཅད་དུ་ཕྱག་རྒྱའི་མཚན་ཉིད་མཐུན་
པ་ཉིད་དུ་འགྱུར་རོ། །ཕྱག་རྒྱ་དེ་ཡང་འདིར་སྐུ་ལ་སོགས་པའི་བྱེ་བྲག་གིས་ཕྱག་རྒྱ་ཆེན་པོ་ཞེས་བྱ་བ་དང་། ལས་ཀྱི་དམ་ཚིག་དང་། ཆོས་དང་། ལས་ཀྱི་ཕྱག་རྒྱ་དང་རྣམ་པ་བཞིར་བསྟན་ཏེ། དེ་ལ་ལྷའི་སྐུའི་གཟུགས་བརྙན་ནི་ཕྱག་རྒྱ་ཆེན་པོ་སྟེ། ཇི་ལྟར་ཞེ་ན་འདྲ་བའི་ཕྱིར་ལྷ་དེ་དྲན་

པའི་རྒྱུར་ཆེ་བས་ན་ཕྱག་རྒྱ་ཆེན་པོ་ཞེས་བྱའོ། །དེའི་མཚན་ཉིད་ཀྱང་རྒྱུད་འདི་དང་གཞན་ལས་ཀྱང་ཕྱག་རྒྱ་ཆེན་པོའི་ཆོ་ག་ལས་ཀྱང་བསྟན་ཏེ་ཇི་སྐད་དུ་རྒྱུད་འདི་ལས། སྐུ་གསུང་ཐུགས་ནི་རྡོ་རྗེ་ཡི། །གཟུགས་བརྙན་གྱི་ནི་སྦྱོར་བ་ཡིས། །བདག་ཉིད་ཆེན་པོ་ཕྱག་རྒྱ་ཆེ། །
དེ་ལྟར་ཤེས་ན་འགྲུབ་པར་འགྱུར། །ཞེས་གསུངས་སོ། །དེ་བཞིན་དུ་རྒྱུད་གཞན་དག་ལས་ཀྱང་། སྐུ་གསུང་ཐུགས་ནི་རྡོ་རྗེ་དག །ཇི་ལྟར་བྲིས་པའི་ཚུལ་བཞིན་དུ། །མཚན་མའི་ཕྱག་རྒྱ་དང་ལྡན་ན། །སེམས་དཔའ་ཆེན་པོ་ཉིད་དུ་འགྱུར། །ཞེས་གསུངས་སོ། །
དེ་ལ་བྲིས་པའི་ཚུལ་བཞིན་དུ་ཞེས་བྱ་བ་ནི་ལྷའི་སྐུའི་གཟུགས་བརྙན་ཇི་ལྟར་བྲིས་པ་མཚན་མར་བརྟག་པ་སྔོན་དུ་བྱས་ཏེ། དེའི་རྗེས་སུ་མཐུན་པར་ཡིད་ཀྱིས་ལྷའི་སྐུའི་གཟུགས་བརྙན་ཉིད་ཇི་ལྟར་རིགས་པར་བདག་དང་། ལྷ་དེ་བྱེ་བྲག་མེད་པར་བསམ་མོ་ཞེས་བྱ་བའི་དོན་ཏོ། །ལྷའི་
སྐུའི་གཟུགས་ཀྱང་འདིར་རྣམ་པ་གཉིས་ཏེ་གཅིག་ནི་ཕྱག་རྒྱ་ཆེན་པོ་ལ་སོགས་པའི་ལྷའི་སྐུའོ། །དེ་ལས་གཞན་པ་ནི་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་སྟེ་ཕྱག་རྒྱ་ལྷའི་སྐུའོ། །དེ་གཉིས་ལས་གཟུགས་ཀྱི་ལྷ་མོ་རྣམས་ནི་དེ་ལྟ་བུས་འདུལ་བའི་འགྲོ་བའི་དབང་གིས་ཕྱག་རྒྱ་ལ་
སོགས་པ་ཡན་ལག་མང་པོའི་མཚན་ཉིད་དུ་བུད་མེད་ཀྱི་གཟུགས་སྦས་ནས། དེའི་བརྡར་གྱུར་པ་མཆོད་རྟེན་ཁྲི་ལ་བཞུགས་པ་ལ་སོགས་པ་ཕྱག་རྒྱའི་གཟུགས་སུ་འདིར་བསྟན་ཏོ། །དེ་བས་ན་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་ཕྱག་རྒྱ་ཞེས་བྱ་བ་བྲིས་པའམ། བྱས་
པའམ། ངོ་བོ་གཟུགས་སམ་དེ་བསྒོམས་པ་ལས་བྱུང་བ་ནི་གཟུངས་ཀྱི་ལྷ་མོའི་ཕྱག་རྒྱ་ཆེན་པོ་ཞེས་བྱའོ། །ཡང་ན་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་དེ་དག་ཉིད་ཀྱི་ཕྱག་རྒྱ་ལག་པར་བཀོད་ཅིང་བཅིངས་པ་དག་ཀྱང་གཟུངས་ཀྱི་ལྷ་མོ་དེ་དག་ཉིད་ཀྱི་ཕྱག་རྒྱ་ཆེན་པོའི་རང་གི་ངོ་
བོ་སྟོན་པར་བྱེད་པ་ཡིན་ཏེ། དེའི་རྗེས་སུ་མཐུན་པར་ལྷ་མོ་དེ་རྣམས་ཀྱི་སྐུ་དྲན་པར་བསྐྱེད་པའི་ཕྱིར་བསྟན་པར་རིག་པར་བྱའོ། །ཕྱག་རྒྱ་ཆེན་པོ་དེ་དག་ཐམས་ཅད་ཀྱང་ཕྱི་ནང་གི་བྱེ་བྲག་གིས་རྣམ་པ་གཉིས་སུ་རིག་པར་བྱ་སྟེ། དེ་ལ་བྲིས་པ་ལ་སོགས་པའི་གཟུགས་ནི་ཕྱི་རོལ་གྱིའོ། །དེ་ལས་

གཞན་པ་ལྷའི་སྐུའི་གཟུགས་བརྙན་ཡིད་ཀྱིས་བསམས་པ་ནི་ནང་གི་ཡིན་ཏེ། འདི་ནི་ཕྱག་རྒྱ་ཆེན་པོའི་དོན་བསྟན་པའོ། །དམ་ཚིག་གི་ཕྱག་རྒྱའི་དོན་བཤད་པར་བྱ་སྟེ། དེ་ལ་དམ་ཚིག་གི་ཕྱག་རྒྱ་མཚན་མ་སོར་མོ་བཀོད་པའི་བདག་ཉིད་ནི་དམ་ཚིག་གི་ཕྱག་རྒྱ་
སྟེ། བདག་ཉིད་ཆེན་པོ་རྣམས་ཀྱི་ཐུགས་གསང་བ་ནི་དམ་ཚིག་ཅེས་བྱ་བའི་སྒྲར་བརྗོད་དེ། རྒྱུད་ནས་བཤད་པ་ནི་ཡང་དག་པར་འཐོབ་པའམ། རྟོགས་པར་བྱ་བའི་ཕྱིར་རམ། མི་འདའ་བའི་དོན་དུ་དམ་ཚིག་ཅེས་བྱའོ། །གང་གི་ཕྱིར་ཞེ་ན། དེ་རང་གི་ཡུལ་གྱི་དེ་ཁོ་ན་ཉིད་ནི་དམ་ཚིག་གི་
ཕྱག་རྒྱ་སྟེ། བདག་ཉིད་ཆེན་པོ་རྣམས་ཀྱིས་མི་འདའ་བའི་ངོ་བོ་ཞེས་སྔར་བཤད་པ་ཡིན་ནོ། །དེ་ལྟ་བས་ན་ལྷའི་ཐུགས་གསང་བའི་མཚན་མ་ནི་དམ་ཚིག་ཅེས་བཤད་པའི་དོན་ཏེ། དེ་བས་ན་རྒྱུད་འདི་ཉིད་དང་གཞན་ལས་ཀྱང་དམ་ཚིག་གི་ཕྱག་རྒྱ་སྒྲུབ་པ་ན་བསྒྲུབ་པར་བྱ་བའི་དམ་ཚིག་
གི་ཕྱག་རྒྱ་བཅིངས་ཏེ་སྙིང་གའི་ཕྱོགས་སུ་བཞག་ལ་རང་གི་སྙིང་གར་སེམས་རྡོ་རྗེར་བསམ་མོ་ཞེས་བཤད་དོ། །དེའི་མཚན་ཉིད་ཀྱང་གཞུང་ཆེན་པོ་ལས་བཤད་པ། རང་གི་སེམས་ནི་རབ་རྟོགས་པས། །ཟླ་བ་ལས་ནི་རྡོ་རྗེ་བསྒོམ། །རྣམ་གསུམ་གཅིག་ཏུ་བསྒོམ་པ་ནི། །ཐུགས་
ཀྱི་གསང་བ་འདི་ཡིན་ནོ། །ཞེས་གསུངས་སོ། །ཐུགས་ཀྱི་མཚན་མ་གང་ཡིན་པ་དེ་ནི་དེའི་དོན་དུ་ན་དེའི་གནས་ཀྱི་མཚན་མ་ཡང་ཡིན་པར་རིག་པར་བྱ་སྟེ། ཤེས་པ་དང་ཤེས་པ་པོ་ཐ་མི་དད་པའི་ཕྱིར་རོ། །དེ་བཞིན་དུ་གཞན་དག་ལས་ཀྱང་། སྐུ་གསུང་ཐུགས་ནི་རྡོ་རྗེ་
རྣམས། །སོར་མོ་སྦྲེལ་བས་བརྟན་པ་སྟེ། དམ་ཚིག་སེམས་ལས་ཤེས་པར་བྱ། །ལས་ཀྱི་ཕྱག་རྒྱ་གཉིས་སུ་བྱ། །ཞེས་གསུངས་སོ། །སྐུ་དང་གསུང་དང་ཐུགས་གསང་བ་རྣམ་པར་དབྱེ་བ་ནི་དེའི་མཚན་མ་དང་བརྡས་གཞུང་འདི་ཉིད་དུ་དེ་རྣམ་པར་བཀོད་པས་འདུལ་བའི་
སེམས་ཅན་རྣམས་ལ་གཟིགས་ནས་བསྟན་ཏོ། །རྒྱུད་གཞན་དག་ལས་ནི་སྐུ་ལ་སོགས་པ་བསྡུས་པ་ཉིད་ལ་ཕལ་ཆེར་དམ་ཚིག་གི་ཕྱག་རྒྱར་བཏགས་པ་དག་སྣང་ངོ་། །ཡང་ན་སེམས་དཔའ་ཆེན་པོ་རྣམས་དེ་ལས་མི་འདའ་བས་ན་ལྷ་མི་འདའ་བའི་མཚན་ཉིད་ཀྱི་དམ་ཚིག་དང་

ལྡན་པའི་ཕྱིར་དམ་ཚིག་དང་ལྡན་པའི་ཕྱག་རྒྱ་ལ་དམ་ཚིག་གི་ཕྱག་རྒྱ་ཞེས་བྱའོ། །ཡང་ན་དེ་དག་ཉིད་མི་འདའ་བ་ཡིན་པས་ན་དེ་ཉིད་ལ་དམ་ཚིག་གི་ཕྱག་རྒྱ་ཞེས་བྱ་བའི་སྒྲར་བརྗོད་དེ། ཇི་སྐད་དུ། དེ་བཞིན་གཤེགས་པ་ཀུན་གྱིས་ཀྱང་། །འདའ་བ་རུ་ནི་མི་མཛད་པས། །ཕྱག་རྒྱ་
དམ་ཚིག་ཅེས་སུ་བཤད། །སྐུ་གསུང་ཐུགས་ནི་བརྟན་པའི་ཕྱིར། །ཞེས་བྱ་བ་འདི་གསུངས་སོ། །ཕྱོགས་འདི་ལ་ནི་དམ་ཚིག་ཉིད་ཕྱག་རྒྱ་ཡིན་པས་ན་དམ་ཚིག་གི་ཕྱག་རྒྱའོ་ཞེས་རྒྱུད་ནས་བཤད་པར་བྱའོ། །གྲགས་པའི་སྒྲ་ནི་ཡུལ་སོ་སོར་ངེས་པར་ཤེས་པར་བྱ་སྟེ། དེ་བས་
ན་ཕྱག་རྒྱ་ཆེན་པོ་ལ་སོགས་པ་ལ་དམ་ཚིག་གི་ཕྱག་རྒྱ་ཞེས་གདགས་པའི་རྒྱུ་སྲིད་དུ་ཟིན་ཀྱང་དེ་ལྟར་མི་བརྗོད་དོ། །དམ་ཚིག་གི་ཕྱག་རྒྱ་དེ་དག་ཀྱང་རྡོ་རྗེ་དང་། ལྕགས་ཀྱུ་དང་། མདའ་དང་། མཉེས་པ་ལ་སོགས་པར་འདུ་ཤེས་པ་སྟེ། རྡོ་རྗེ་ལ་སོགས་པའི་སྒྲ་དེ་རྣམས་ཀྱི་དགོངས་
པ་བཤད་པ་རྒྱུད་འདི་ལས་བཤད་དེ། འདི་སྐད་དུ། བཅོམ་ལྡན་སེམས་དཔའ་དེ་ཉིད་ནི། །རྡོ་རྗེ་སེམས་དཔའི་ཐུགས་ཀར་གནས། །དེ་བཞིན་གཤེགས་པའི་ཏིང་འཛིན་ནི། །སངས་རྒྱས་བྱང་ཆུབ་སྒྲུབ་པའོ། །ཤིན་ཏུ་འབིགས་པས་རྡོ་རྗེའོ། །མཆོག་ཏུ་སྦྱོར་
བས་ལྕགས་ཀྱུའོ། །ཕྲ་མོར་འབིགས་པས་མདའ་ཡིན་ནོ། །མགུ་བས་དགེ་བ་བྱེད་པ་སྟེ། །སྤྲས་པས་རིན་པོ་ཆེ་རུ་བཤད། །ཉི་མ་གཟི་བརྗིད་ཅེས་སུ་བརྗོད། །བསྒྲེང་བས་རྒྱལ་མཚན་ཞེས་བསྟན་ཏེ། །བཞད་པས་གད་མོ་ཞེས་སུ་གྲགས། །འདོད་ཆགས་དག་
པས་པདྨ་སྟེ། །ཉོན་མོངས་དགྲ་གཅོད་རལ་གྲིའོ། །དཀྱིལ་འཁོར་ཚུལ་བས་འཁོར་ལོ་སྟེ། །ཚིག་ཏུ་བརྗོད་པས་སྨྲ་ཞེས་བྱ། །སྣ་ཚོགས་ཐམས་ཅད་རྡོ་རྗེའི་ཕྱིར། །མི་ཚུགས་སྦྱོར་བས་གོ་ཆའོ། །འཇིགས་པས་སྦྱོར་བ་མཆེ་བ་སྟེ། །བཅིངས་པའི་ཚུལ་གྱིས་ཁུ་ཚུར་
རོ། །ཇི་ལྟར་བཅོམ་ལྡན་སེམས་དཔའ་ནི། །རྡོ་རྗེ་སེམས་དཔའ་ཐམས་ཅད་དུ། །དེ་བཞིན་རྡོ་རྗེ་ལ་སོགས་མཚན། །བསྒོམས་ན་དངོས་གྲུབ་ཐོབ་པར་འགྱུར། །ཞེས་གསུངས་སོ། །ཆོས་ཀྱི་ཚིག་གི་རང་བཞིན་གྱི་མཚན་མ་ནི་ཆོས་ཀྱི་ཕྱག་རྒྱ་སྟེ། བཛྲ་ཛྙཱ་ན་དང་། ས་མ་ཡ་

སྟྭཾ། ཞེས་བྱ་བ་ལ་སོགས་པའི་མཚན་ཉིད་དོ། །ཆོས་ཞེས་བྱ་བའི་སྒྲས་ནི་འདིར་གསུང་གི་བདག་ཉིད་ཀྱི་ལྷ་ནི་བཤད་པའི་ཆོས་ཉིད་ལ་བྱའོ། །གང་གི་ཕྱིར་དེ་བདག་ཉིད་ཆེན་པོ་རྣམས་ཀྱི་གསུང་ཐམས་ཅད་ནི་དོན་དམ་པའི་ཆོས་སྟོན་པ་དང་། གཞན་ལ་ཕན་པ་སྟོན་པའི་
ངོ་བོ་ཡིན་པས་ནི་བཤད་པའི་ཆོས་ཀྱི་བདག་ཉིད་ཡིན་ཏེ། དེའི་ཕྱིར་ཕྱག་རྒྱར་གྱུར་པ་བཛྲ་ཛྙཱ་ན་ཞེས་བྱ་བ་ལ་སོགས་པ་ཆོས་ཀྱི་ཕྱག་རྒྱའི་ཚིག་རྣམས་ལ་ནི་ཆོས་ཀྱི་ཕྱག་རྒྱ་ཞེས་བཤད་དོ། །དེ་བས་ན་ཆོས་ཀྱི་ཕྱག་རྒྱ་སྒྲུབ་པའི་ཚེ་ལྕེ་ལ་རྡོ་རྗེ་སྒོམ་མོ་ཞེས་གསུངས་སོ། །འདི་ལྟར་གཞན་
དག་ལས་ཀྱང་གསུང་གི་གསང་བ་བཤད་པ་ནི་ཆོས་ཀྱི་ཕྱག་རྒྱ་ཉིད་དུ་སྟོན་ཏེ། ཇི་སྐད་དུ། རྡོ་རྗེ་ཚིག་གི་སྦྱོར་བ་ཡིས། །ཆོས་ཀྱི་རང་བཞིན་ཕྱག་རྒྱར་བརྗོད། །འདི་ནི་གསལ་བ་གསུང་འཆང་བ། །རྡོ་རྗེའི་ཚིག་ནི་སྒྲ་མེད་པའོ། །ཞེས་གསུངས་སོ། །ཡང་ན་ལྷའི་གསུང་གི་མཚན་
མའི་རང་བཞིན་ནི་ཆོས་ཀྱི་ཕྱག་རྒྱའི་མཚན་ཉིད་དེ། དེའི་ཚེ་ཆོས་ཉིད་ཕྱག་རྒྱ་བས་ན་ཆོས་ཀྱི་ཕྱག་རྒྱ་ཞེས་རྒྱུད་ནས་བཤད་པར་བྱའོ། །ལྷའི་གསུང་གི་བརྡར་བསྟན་པའི་ཡི་གེ་དེ་ཡང་ཕ་རོལ་ལ་ཕན་པ་སྟོན་པའི་ངོ་བོ་ཡིན་པས་ན་ཆོས་ཉིད་ཡིན་ཏེ། དེའི་རང་བཞིན་གྱི་ཕྱག་རྒྱ་ལ་ཆོས་
ཀྱི་ཕྱག་རྒྱ་ཞེས་གསུངས་སོ། །འདིར་ཡང་སྨྲ་བ་པོ་དང་ཚིག་ཐ་མི་དད་པས་ན་དེའི་རང་བཞིན་གྱི་མཚན་མ་ཡང་དོན་དུ་ན་ཡན་ལག་དང་བཅས་པའི་ལྷའི་ངོ་བོ་ཉིད་བྱིན་གྱིས་རློབ་པར་བསྟན་པ་ཡིན་ནོ། །དེ་བཞིན་དུ་ཕྱག་རྒྱ་གཞན་རྣམས་ལ་ཡང་ཕལ་ཆེར་བསྟན་ཏེ། འདི་ནི་ཆོས་
ཀྱི་ཕྱག་རྒྱའི་རྒྱུད་ནས་བཤད་པའོ། །ལས་ཀྱི་ཕྱག་རྒྱའི་སྒྲའི་དོན་ཡང་བཤད་པར་བྱ་སྟེ། དེ་ལ་ལྷའི་ལས་ཀྱི་མཚན་མ་ནི་ལས་ཀྱི་ཕྱག་རྒྱ་སྟེ། བྱང་ཆུབ་མཆོག་ལ་སོགས་པའི་ཕྱག་རྒྱའི་མཚན་ཉིད་དོ། །དེ་བཞིན་དུ་དེ་སྒྲུབ་པའི་ཚེ་ལས་སྣ་ཚོགས་པའི་རང་བཞིན་རྡོ་རྗེ་རྩེ་མོ་ཐམས་
ཅད་པ་ལས་ཐམས་ཅད་སྒྲུབ་པ་ལུས་ཀྱི་སྙིང་གའི་ཕྱོགས་སུ་དེ་སྒྲུབ་པ་པོས་བསམ་པར་བཤད་དེ། འདིར་ཡང་ལས་ཉེ་བར་བསྟན་པའི་སྒོ་ནས་ཡན་ལག་དང་བཅས་པའི་ལྷའི་ངོ་བོ་ཉིད་ཉེ་བར་སྟོན་པར་དོན་གྱིས་ཤེས་པར་བྱ་སྟེ། ལས་དང་བྱེད་པ་པོ་ཐ་མི་དད་པའི་ཕྱིར་རོ། །ཕྱག་རྒྱ་བཞིའི་ངོ་

བོ་ཉིད་ཀྱི་བྱེ་བྲག་བཤད་ཟིན་ཏོ། །དེ་དག་ཐམས་ཅད་ཀྱང་རྣམ་པ་གཉིས་ཏེ། ལྷར་བརྟག་པའི་རང་བཞིན་དང་། དམ་ཚིག་ཅན་གྱི་སྐྱེ་བོས་བརྟགས་པའོ། །དེ་ལ་ལྷ་རྣམས་ཀྱིས་སྤྲུལ་པའི་མཚན་མར་གྱུར་པ་གང་ཡིན་པའམ་གང་ལྷའི་ངོ་བོ་ཉིད་དམ། དེའི་ཆ་ཤས་སུ་བྱེ་བྲག་མེད་
པར་བྱས་ཏེ་བརྟག་པ་དེ་ནི་ལྷར་བརྟགས་པའོ། །གང་ཡང་ལྷའི་ལུས་ལས། དེ་དང་རྗེས་སུ་མཐུན་པར་དམ་ཚིག་ཅན་གྱིས་བསྐྱེད་པའི་ལྷའི་ངོ་བོ་ཉིད་དམ། དེའི་ཆ་ཤས་སུ་བྱེ་བྲག་མེད་པར་མོས་པ་དེ་ནི་དམ་ཚིག་ཅན་གྱི་སྐྱེ་བོས་བརྟགས་པར་གྲགས་སོ། །དེས་ལྷར་བརྟགས་པའི་
ཕྱག་རྒྱ་ལྷའི་བདག་ཉིད་དུ་སྔགས་པས་བསྒོམ་པའི་དོན་དུ་བྱིན་གྱིས་རློབ་པར་མཛད་དོ་ཞེས་ཕལ་ཆེར་བཤད་དེ། གང་གི་ཕྱིར་ཞེ་ན། དམ་ཚིག་ཅན་གྱི་སྐྱེ་བོས་བརྟགས་པའི་ཕྱག་རྒྱ་ལ་སྔོན་དམ་ཚིག་མཛད་པའི་རྗེས་སུ་དགོངས་ནས་ལྷ་རྣམས་ཀྱིས་བྱིན་གྱིས་རློབ་པར་མཛད་དེ། ཇི་
སྐད་དུ། གང་དག་བཅིངས་པ་ཙམ་གྱིས་ནི། །རྡོ་རྗེ་སེམས་དཔའ་ལ་སོགས་ཚོགས། །དམ་ཚིག་ཉམས་ཀྱིས་འཇིགས་པས་ན། །བྱིན་གྱིས་རློབ་པ་ཉིད་དུ་འགྱུར། །ཞེས་གསུངས་སོ། །དེ་བཞིན་དུ་དམ་ཚིག་ཅན་གྱི་སྐྱེ་བོས་བརྟགས་པའི་ཡི་གེའི་རང་བཞིན་གྱི་ལྷའི་ངོ་བོ་
ཉིད་ཀྱང་དངོས་སུ་ལྷར་བརྟགས་པའི་ལྷའི་ངོ་བོ་ཉིད་དུ་བྱིན་གྱིས་རློབ་པར་མཛད་པར་བལྟའོ། །དེ་བཞིན་དུ་རྒྱུད་གཞན་ལས་ཀྱང་། བདག་ལྷར་བྱིན་གྱིས་རློབ་པའི་ཕྱིར་ཡི་གེའམ་ཕྱག་རྒྱར་རྣམ་པར་བརྟག་གོ་ཞེས་བཤད་དོ། །ཇི་སྐད་དུ། དེ་ནས་ཕྱག་རྒྱ་འམ་ཡི་གེ་ཡིས། །
རྡོ་རྗེའི་ལུས་སུ་བསྒྱུར་བར་བྱ། །ཞེས་གསུངས་སོ། །དེ་བཞིན་དུ་ཡང་ཡི་གེ་ལྔའམ། ཡི་གེ་གསུམ་མམ། ཡི་གེའི་ཕྱི་མོའམ། ཡི་གེ་མང་པོ་བཀོད་པ་ཙམ་གྱིས་དེ་བཞིན་གཤེགས་པས་བྱིན་གྱིས་རློབ་པར་འགྱུར་བས་ན་བདེ་བར་གཤེགས་པ་ཉིད་དུ་བཤད་དོ། །ཕྱག་རྒྱ་
ཡང་མོ་དཱ་ན་ད་མུ་དྲཱ་སྟེ། མགུ་བས་ན་ཕྱག་རྒྱའམ། མུ་དྲཱ་ན་མུ་དྲཱ་སྟེ། ཕྱག་རྒྱས་འདེབས་པས་ན་ཕྱག་རྒྱ་བས་དེ་སྐད་ཅེས་བཤད་དོ། །གང་གི་ཕྱིར་ཞེ་ན། དེས་སྲོག་ཆགས་རྣམས་བསྲུང་བའི་ཕྱིར་ཕན་གདགས་པ་དང་། འདོད་པའི་དངོས་གྲུབ་མྱུར་དུ་འགྲུབ་པའི་ཕྱིར་རྒྱས་

འདེབས་ཏེ། ཇི་སྐད་དུ། ཇི་ལྟར་རྒྱལ་པོ་རང་གི་རྒྱས། །རྒྱལ་པོའི་གཙིགས་ནི་བཏབ་པ་ལྟར། །བདག་ཆེན་ཉིད་ཀྱི་ཕྱག་རྒྱས་ཀྱང་། །སྐྱེ་བོ་རྣམས་ལ་དེ་བཞིན་བཏབ། །ཅེས་གསུངས་སོ། །དེ་བཞིན་དུ་གཞན་དག་ལས་ཀྱང་གསང་བའི་བདག་པོ་དེ་བཞིན་
གཤེགས་པ་རྣམས་ཀྱི་རྒྱན་དུ་གྱུར་པ་ཆོས་ཀྱི་དབྱིངས་རྟོགས་པའི་མཚན་མ་ཕྱག་རྒྱའི་རིམ་པར་དབྱེ་བའི་ལེའུ་རྒྱས་པ་ཞེས་བྱ་བ་ཡོད་དོ། །དེས་བརྒྱན་ན་བྱང་ཆུབ་སེམས་དཔའ་རྣམས་འཁོར་བར་འཁོར་བ་ན་འགྲོ་བ་ཐམས་ཅད་དུ་དེ་བཞིན་གཤེགས་པ་ཐམས་ཅད་ཀྱི་མཚན་མས་བཏབ་
པས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་ཀུན་དུ་འབྱོལ་བར་འགྱུར་ཞིང་དེ་རྣམས་ཀྱང་དེ་དག་གི་བཀའ་ཉན་པར་འགྱུར་རོ་ཞེས་གསུངས་སོ། །ཕྱག་རྒྱས་དེ་ལྟར་བྱིན་གྱིས་རློབ་པ་དེ་ཡང་
སྐྱེས་བུའི་སྐལ་བ་དང་། མོས་པ་དང་། མཉམ་པར་གཞག་པ་རྣམ་པ་གསུམ་ལས་ཆུང་ངུ་དང་། འབྲིང་པོ་དང་ཆེན་པོའི་བྱེ་བྲག་རྣམ་པ་གསུམ་དུ་འགྱུར་རོ། །དེ་བས་ན་དམ་ཚིག་ཅན་གྱི་སྐྱེ་བོས་བརྟགས་པའི་ཕྱག་རྒྱའི་སྒོ་ནས་ལྷར་བསྒོམ་པ་གོམས་པ་དང་ལྡན་པ་ཆེན་པོ་དང་། འབྲིང་
པོ་དང་། ཆུང་ངུའི་བྱེ་བྲག་གིས་དགོས་པ་ཡང་རྣམ་པ་གསུམ་དུ་འགྲུབ་པར་བཤད་དོ། །ཡང་ན་སྲིད་པ་དང་། མྱ་ངན་ལས་འདས་པར་སོ་སོར་བཅིངས་པའམ་གྲོལ་བའམ། དོན་ཆེན་པོ་ལ་བར་ཆད་བྱེད་པའི་བགེགས་རྣམས་འཇིགས་པར་བྱེད་པས་ན་ཕྱག་རྒྱ་ཞེས་བྱའོ། །གཞུང་
གཞན་དག་ལས་ཀྱང་རྒྱུད་ནས་བཤད་པ་འདི་རྣམས་གཞན་དུ་བསྟན་པ། འདི་ནི་དམ་ཚིག་རྩ་བ་སྟེ། །དབུ་རྒྱན་བཅིངས་པ་རྒྱུ་ཡི་མཆོག །གང་གིས་ལུས་ཀུན་བརྟན་པས་ན། །དེ་བས་ཕྱག་རྒྱར་རབ་ཏུ་བསྒྲགས། །ཞེས་གསུངས་སོ། །དེ་ཁོ་ན་ཉིད་རབ་ཏུ་དབྱེ་བ་བསྡུས་པའོ། །དེ་
བས་ན་བདག་ཉིད་ཆེན་པོ་དེས་དེ་རིག་པར་བྱས་ནས་ངེས་པར་སེམས་ཅན་གྱི་ཚོགས་ཆེན་པོ་ལ་ཕན་གདགས་པའི་ཕྱིར་གོ་འཕང་དམ་པ་ཐོབ་པར་འདོད་པས་བདེ་བར་གཤེགས་པ་སྲས་དང་བཅས་པ་ཐམས་ཅད་ལ་བདག་ཉིད་ཕུལ་ནས་བདག་གིས་ལྷག་པའི་ལྷ་སེམས་དཔའ་གང་

ཡང་རུང་བ་ཅིག་ཇི་ལྟར་ཡོངས་སུ་བཟུང་བ་མཉེས་པར་བྱེད་པས་གང་འདོད་པའི་དངོས་གྲུབ་བསྒྲུབ་པར་བྱའོ། །མཉེས་པར་བྱ་བའི་ཡན་ལག་རྣམས་ཀྱི་བྱེ་བྲག་ཀྱང་འདིར་ཕལ་ཆེར་ལུང་གི་ཚིག་གིས་བལྟ་བར་བྱའོ། །དེའི་ཕྱིར་དེའི་ཐབས་ཀྱི་ཆོ་ག་ཤེས་པའི་བླ་མ་རིན་པོ་ཆེ་མཉེས་པ་ཉིད་
དུ་བྱའོ། །དེ་ནས་བླ་མ་མཉེས་པར་བྱས་པ་དེས་བསྟན་པའི་དཀྱིལ་འཁོར་ཆེན་པོ་དང་། དམ་ཚིག་དང་། ཆོས་དང་ལས་ཀྱི་དཀྱིལ་འཁོར་དུ་ཆོ་ག་ཇི་ལྟ་བ་བཞིན་དུ་དབང་བསྐུར་བས་ཐེག་པ་ཆེན་པོ་མངོན་པར་རྟོགས་པའི་ཆོ་གས་སྡོམ་པ་གཟུང་བ་དང་། ཡོངས་སུ་བསྲུང་བར་བྱ་བའི་
དམ་ཚིག་དང་། འདུལ་བ་དང་། སྤྱོད་པ་དང་། སྤྱོད་ཡུལ་རྣམས་ལ་ཆོ་ག་བཞིན་དུ་མཁས་པར་བྱས་པས་དེ་ཕྱིན་ཆད་དམ་ཚིག་ལ་སོགས་པ་ཇི་ལྟར་བླངས་པ་བསྲུང་བའི་ཕྱིར་རྟག་ཏུ་སྤྲོ་བ་མི་གློད་པར་བྱ་སྟེ། བདག་དང་གཞན་གྱི་དོན་མ་ལུས་པར་སྒྲུབ་པ་ལ་དེ་ཐོག་མར་འགྲོ་བའི་ཕྱིར་རོ། །
དམ་ཚིག་ཀྱང་སྐབས་འདིར་ནི་འབྲས་བུ་འདོད་པ་རྣམས་ཀྱིས་མི་འདའ་བར་བྱ་བ་ཡིན་པས་རང་གི་ལྷག་པའི་ལྷ་མཉེས་པར་འགྱུར་བ་དང་། རྗེས་སུ་མཐུན་པའི་ལུས་དང་ངག་དང་ཡིད་ཀྱི་སྤྱོད་པ་དགེ་བ་དང་མི་དགེ་བ་ལ་སོགས་པ་ལ་འཇུག་པ་དང་ལྡོག་པའི་མཚན་ཉིད་དེ་སྟོན་པས་
གསུངས་པའི་ཚུལ་གྱིས་ཁྱད་པར་རོ། །ཀུན་འཐོབ་ཅིང་འགྲོ་བའམ། འདིར་ཀུན་རྟོགས་ཤིང་ཆུད་པར་འགྱུར་བས་ན་རྒྱུད་ནས་བཤད་པ་ལ་དགོངས་ནས་དམ་ཚིག་ཅེས་བཤད་དོ། །དེ་ཡང་ལྷ་ཐམས་ཅད་ཐུན་མོང་བ་དང་ཁྱད་པར་དུ་འཕགས་པ་སྟེ། རྒྱུད་འདི་དང་དེ་ལས་གཞན་
པའི་དཔལ་མཆོག་དང་པོ་ལ་སོགས་པ་ཆ་མཐུན་པའི་རྣལ་འབྱོར་གྱི་རྒྱུད་རྣམས་དང་། རྡོ་རྗེ་རྩེ་མོ་ལ་སོགས་པའི་རྒྱུད་རྣལ་འབྱོར་གྱི་ཚུལ་ཐམས་ཅད་ཀྱི་དགོངས་པ་འགྲེལ་པ་རྣམས་ལས་བཤད་པར་རིག་པར་བྱའོ། །དེ་གཉིས་ལས་རྒྱུད་གཞན་ལས་གསུངས་པ་ལྷ་ཐམས་
ཅད་ཐུན་མོང་བ་དེ་རེ་ཞིག་བཤད་པར་བྱ་སྟེ། གང་གི་ཕྱིར་དེ་ཡང་དོན་གྱིས་རྗེས་སུ་བརྟག་ན་འདི་ཉིད་ཀྱི་ནང་དུ་འདུས་པར་མངོན་ཏེ། དེ་ལྟར་རེ་ཞིག་དཔལ་མཆོག་དང་པོ་ལས་གསུངས་པ། །དམ་ཚིག་སྡོམ་པ་གྲུབ་པ་འདི། །རྟག་ཏུ་ཁྱོད་ཀྱིས་བསྲུང་བར་བྱ། །སངས་རྒྱས་ཀུན་

གྱིས་མཐུན་པར་གསུངས། །དམ་པ་བརྟག་པའི་བཀའ་ཡིན་ནོ། །བྱང་ཆུབ་སེམས་ནི་གཏང་མི་བྱ། །ཕྱག་རྒྱ་རྡོ་རྗེ་གང་ཡིན་པ། །གང་ནི་བསྐྱེད་པ་ཙམ་གྱིས་སུ། །སངས་རྒྱས་ཉིད་དུ་དོགས་པ་མེད། །དམ་པའི་ཆོས་ནི་མི་སྨོད་ཅིང་། །ནམ་
ཡང་གཏང་བར་མི་བྱའོ། །མི་ཤེས་པ་དང་རྨོངས་པ་ཡིས། །ཚུལ་ཆེན་བསྟན་པར་མི་བྱའོ། །བདག་ནི་ཡོངས་སུ་སྤངས་ནས་སུ། །དཀའ་ཐུབ་ཀྱིས་ཀྱང་མ་གདུང་ཤིག །ཅི་བདེ་བར་ནི་བདེ་བར་གཟུང་། །འདི་ནི་མ་བྱོན་རྫོགས་སངས་རྒྱས། །སློབ་དཔོན་སྨད་པར་མི་བྱ་
སྟེ། །འདི་ནི་སངས་རྒྱས་ཀུན་དང་འདྲ། །སངས་རྒྱས་ཀུན་མཚུངས་བླ་མ་ཡི། །སློབ་དཔོན་ལ་ནི་གང་སྨོད་པ། །དེ་ནི་སངས་རྒྱས་སྨད་པས་ན། །རྟག་ཏུ་སྡུག་བསྔལ་འཐོབ་འགྱུར་ཏེ། །རིམས་དང་དུག་དང་དབྱིག་དུག་ནད། །མཁའ་འགྲོ་རྣམས་ཀྱིས་གཙེ་བ་དང་། །
གདོན་དང་ལོག་འདྲེན་གཏུམ་པོ་ཡིས། །བསད་ནས་སེམས་ཅན་དམྱལ་ལྟུང་འགྱུར། །དེ་བས་བསམ་གཏན་ཐམས་ཅད་ཀྱིས། །རྡོ་རྗེ་སློབ་དཔོན་བློ་གྲོས་ཆེ། །དགེ་བ་རབ་ཏུ་མི་སྤྱོམས་པ། །ནམ་ཡང་སྨད་པར་མི་བྱའོ། །རྟག་ཏུ་བདག་གིས་དམ་ཚིག་བསྲུང་། །
རྟག་ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་ཡང་དབུལ། །འདི་ནི་སངས་རྒྱས་ཀུན་དང་འདྲ། །དེ་བྱིན་སངས་རྒྱས་ཐམས་ཅད་ལ། །རྟག་ཏུ་བྱིན་པ་ཉིད་དུ་འགྱུར། །དེ་བྱིན་བསོད་ནམས་ཚོགས་དག་གིས། །དངོས་གྲུབ་མཆོག་ནི་ཐོབ་པར་འགྱུར། །ཞེས་
གསུངས་སོ། །གཞན་ཡང་དེ་ཉིད་དུ། བཅོམ་ལྡན་འདས་རྡོ་རྗེ་སེམས་དཔས། སྲིད་པ་རྣམ་པར་དག་པ་ཐབས་ཀྱི་མཆོག །རྟོག་པ་ཐམས་ཅད་གསང་བ་ཆེན་པོ་ཡི། །དམ་ཚིག་རྟག་ཏུ་བསྒོམ་པར་བྱའོ་ཞེས་གསུངས་སོ། །དེ་ལ་དེ་བཞིན་གཤེགས་པས་ཐམས་ཅད་
ཀྱི་རབ་ཏུ་གསང་བ་བླ་མ་མེད་པ་ཐེག་པ་ཆེན་པོའི་དམ་ཚིག་ཆེན་པོ་རྣལ་འབྱོར་པ་བཅོམ་ལྡན་འདས་ནི་དམ་ཚིག་གོ། །དེ་ཇི་ལྟ་ཞེ་ན་དེ་བཞིན་དུ། །དེ་བཞིན་གཤེགས་པ་ཀུན་གྱིས་ཀྱང་། །འདའ་བ་རུ་ནི་མི་མཛད་པས། །ཕྱག་རྒྱ་དམ་ཚིག་ཅེས་སུ་བཤད། །ཡིད་ཀྱི་ལུས་ནི་

བརྟན་པའི་ཕྱིར། །སྲིད་པ་བདེ་བ་ཆུང་ངུ་ཡི། །སྡུག་བསྔལ་ཆེན་པོ་ཞི་བའི་ཕྱིར། །ཤིན་ཏུ་བཟང་ཞིང་བདེ་བའི་ཐབས། །ཞི་བར་མཛད་པའི་དམ་ཚིག་འདི། །དེ་བས་ཐམས་ཅད་འདོད་ལོངས་སྤྱོད། །ཅི་འདོད་པ་རུ་སྤྱད་ནས་སུ། །རང་གི་ལྷ་ཡི་རྣལ་འབྱོར་གྱིས། །
བདག་དང་གཞན་ལ་མཆོད་པར་བྱ། །ཞེས་གསུངས་སོ། །འདོད་པ་ཞེས་བྱ་བའི་སྒྲ་ཡང་སྐབས་འདིར་རང་གི་ལྷ་ཉིད་བྱང་ཆུབ་ཀྱི་སེམས་འདོད་པ་ཆེན་པོ་ལས་བྱུང་བའི་མཚན་ཉིད་ལ་བྱའོ། །འདོད་པ་དེའི་ལོངས་སྤྱོད་ཀྱང་བཞི་སྟེ། འདི་ལྟ་སྟེ། བྱང་ཆུབ་ཀྱི་སེམས་
ལ་དགའ་བའི་མཚན་ཉིད་རྡོ་རྗེ་ལཱ་སྱ་དང་། དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་དང་། རྣམ་པར་ཐར་པ་དང་། གཟུངས་ཀྱི་ཡོན་ཏན་མེ་ཏོག་གི་མཚན་ཉིད་རྡོ་རྗེ་ཕྲེང་བ་དང་། དེ་བཞིན་གཤེགས་པ་ཐམས་ཅད་ཀྱི་གསུང་རབ་སྒྲོགས་པའི་མཚན་ཉིད་རྡོ་རྗེ་
གླུ་དང་། སེམས་ཅན་ཐམས་ཅད་ཀྱི་དོན་མཛད་པ་གར་གྱི་མཚན་ཉིད་རྡོ་རྗེ་གར་མ་རྣམས་ཏེ། དེ་བཞི་ནི་རང་གི་ལྷའི་འདོད་པ་ཞེས་བྱ་བའི་ལོངས་སྤྱོད་དུ་རིག་པར་བྱའོ། །ཐེག་པ་ཆེན་པོ་མངོན་པར་རྟོགས་པ་སྟོང་ཕྲག་བརྒྱ་པ་ལས་ཀྱང་། །སྐུ་དང་གསུང་དང་ཐུགས་
གསང་བ། །མཁས་པ་ཡིས་ནི་བསྲུང་བར་བྱ། །བསྲུངས་ན་བསོད་ནམས་ཆེན་པོ་ནི། །ཐམས་ཅད་ཀུན་དུ་སྐྱེ་བར་འགྱུར། །ཞེས་གསུངས་སོ། །དེ་ལ། གང་དག་དུ་མ་རྒྱ་ཆེན་པོ། །ཁ་དོག་དང་ནི་དབྱིབས་གདན་དང་། །ཕྱག་བསྐྱོད་ལ་སོགས་གཟུགས་འདི་
ནི། །སྐུ་ཡི་གསང་བར་རིག་པར་བྱའོ། །རྡོ་རྗེ་ཚིག་གི་སྦྱོར་བ་ཡིས། །སྨྲ་བ་ཆོས་ཀྱི་ཕྱག་རྒྱ་སྟེ། །འདི་ནི་གསལ་བར་གསུང་གསང་བ། །རྡོ་རྗེ་ཚིག་ནི་སྒྲ་མེད་པའོ། །རང་གི་སེམས་ནི་རབ་རྟོགས་པས། །ཟླ་བ་ལ་ནི་རྡོ་རྗེ་བསྒོམ། །རྣམ་གསུམ་གཅིག་ཏུ་བསྒོམ་
པ་ནི། །ཐུགས་ཀྱི་གསང་བ་འདི་ཞེས་བྱ། །དེ་དག་དེ་ཉིད་མཆོག་ཆེན་པོ། །རྟག་ཏུ་ཡང་དང་ཡང་བསྒོམ་པ། །གསུམ་གྱི་སྦྱོར་བས་གྲུབ་འགྱུར་ཏེ། །གཞན་དུ་མ་ཡིན་ཀུན་མཁྱེན་གསུངས། །གསང་བ་གསུམ་གྱི་ཆོ་ག་ཡིས། །ཕྱག་རྒྱ་ཐམས་ཅད་ཤིན་ཏུ་བསྡུས། །

དེ་བས་རྣམ་པ་ཐམས་ཅད་དུ། །གསང་བ་རྣམ་གསུམ་རྣམ་པར་སྦ། རྡོ་རྗེ་ཆེན་པོ་མཆོག་འཛིན་པ། །མགོན་པོ་ཆེན་པོ་བྱིན་བརླབས་པ། །བློ་ངན་གང་ཞིག་འདའ་བ་ནི། །རྡོ་རྗེ་འཛིན་པ་མོད་ལ་སྤོང་། །སྤངས་པའི་སེམས་ཅན་ཆེན་པོ་དེ། །ངན་
སོང་གསུམ་དུ་ཡང་དང་ཡང་། །ཇི་སྲིད་འཁོར་བའི་སྤྱོད་ཡུལ་དུ། །ཤིན་ཏུ་མི་བཟད་ཆོ་ངེས་འདེབས། །ཞེས་གསུངས་སོ། །འདིར་ཡང་སུ་ལ་བསྟན་པར་རིགས་ཤེ་ན། དེ་ཉིད་དུ། རྡོ་རྗེ་དབྱིངས་ནི་དགའ་ཆེན་པོ། །མངོན་པར་དབང་བསྐུར་མཁས་པ་གང་། །རྟག་
ཏུ་གསང་བའི་མཆོག་དང་ལྡན། །དེ་ལ་མཁས་པས་བསྟན་པར་བྱའོ། །ཞེས་གསུངས་སོ། །ཇི་སྐད་དུ། གསུངས་པའི་དམ་ཚིག་ལ་གནས་པ་ནི། རྟག་ཏུ་ནང་སྦྱང་བའི་ཕྱིར་ཕྱི་རོལ་གྱི་གཙང་སྦྲ་བྱ་བ་དང་། དཀའ་བ་སྤྱོད་པ་ལ་སོགས་པ་ལུས་ལ་གནོད་པར་འགྱུར་
བ་རྣམས་མི་བྱ་བ་འདི་ཉིད་དུ། སྡོམ་དང་གཙང་སྦྲ་འདིར་མི་དགོས། །དཀའ་ཐུབ་དཀའ་སྤྱད་མི་དགོས་སོ། །སངས་རྒྱས་ཀུན་དང་སེམས་དཔའ་ཆེ། །བདག་ཏུ་སྦྱོར་བས་འགྲུབ་པར་འགྱུར། །ཞེས་གསུངས་སོ། །རྟོག་པ་ཐམས་ཅད་བསྡུས་པ་རྣལ་འབྱོར་
གྱི་རྒྱུད་ཐམས་ཅད་ཀྱི་དགོངས་པ་ངེས་པར་འགྲེལ་པ་ལས་ཀྱང་། །སྲོག་གི་ཕྱིར་ཡང་བྱང་ཆུབ་སེམས། །ཡོངས་སུ་གཏང་བར་མི་བྱ་ཞིང་། །རྡོ་རྗེ་དྲིལ་བུ་ཕྱག་རྒྱ་དག །ནམ་ཡང་གཏང་བར་མི་བྱའོ། །དཀོན་མཆོག་གསུམ་ནི་མི་གཏོང་སྟེ། །དད་པ་ཡང་ནི་ཡོངས་
མི་གཏང་། །སྡོམ་པ་ཡང་ནི་མི་སྤང་ཞིང་། །བདག་ཀྱང་གདུང་བར་མི་བྱའོ། །སློབ་དཔོན་ལ་ནི་མ་སྨོད་ཅིང་། །བླ་མ་སངས་རྒྱས་ཀུན་དང་མཚུངས། །སྔགས་དང་ཕྱག་རྒྱ་ཐམས་ཅད་ལ། །ནམ་ཡང་སྨད་པར་མི་བྱའོ། །འཁོར་ལོ་རྡོ་རྗེ་པདྨོ་སོགས། །ཅུང་
ཟད་མཚན་མར་བྱས་པ་གང་། །དངོས་གྲུབ་འདོད་པས་སྦྱོར་ཤེས་པས། །འགོམ་དང་བཟའ་བར་མི་བྱའོ། །དེ་བཞིན་དམན་མ་ལྷ་ཡི་གྲིབ། །བླ་མའི་སྟན་ལ་སོགས་དེ་བཞིན། །བློ་ཅན་གྱིས་ནི་རྟག་ཏུ་སྤང་། །རྐང་པས་ཀྱང་ནི་མ་འགོམས་ཤིག །ལུས་ཀྱི་སྡིག་

པ་རྣམ་གསུམ་དང་། །ངག་གི་ཡང་ནི་རྣམ་བཞི་དང་། །ཡིད་ཀྱི་རྣམ་པ་གསུམ་དག་ཀྱང་། །དེ་བཞིན་ཀུན་ཏུ་མི་སྤྱོད་དོ། །ཞེས་གསུངས་སོ། །ཡང་ཡུལ་དང་དུས་ཀྱི་དབང་གིས་མི་འགོང་པ་ལ་འགོང་པ་དང་། །བརྫིས་པ་ལ་སོགས་པ་ཡང་རྡོ་རྗེ་ཤུགས་དང་ལྡན་པ་
དང་། ཕྱག་རྒྱ་ཆེན་པོའི་རྣལ་འབྱོར་པ་ལ་ནི་གནང་བ་སྟེ། དེ་བས་ན་དེ་གཉིས་དེ་ལྟ་བུའི་ཡུལ་དང་དུས་ཀྱི་དབང་གིས་བྱས་ན་མི་འགོང་བ་དང་འགོང་བ་ལ་སོགས་པ་རྣལ་འབྱོར་པ་ལ་ཉེས་པར་མི་འགྱུར་ཏེ། འདི་སྐད་དུ་གཞན་དག་ལས། མི་ཤེས་པའམ་གཏི་མུག་དང་། དེ་བཞིན་ལེ་ལོ་
འམ་མི་དྲན་པས། །རྡོ་རྗེ་རི་མོ་ལ་སོགས་བརྫིས། །ངེས་པར་དམ་ཚིག་ཉམས་པར་འགྱུར། །དེ་བས་ནན་ཏན་ཐམས་ཅད་ཀྱིས། །རྡོ་རྗེ་ཤུགས་ཀྱིས་མ་ཡེངས་པར། །ཤེས་རབ་ཅན་གྱིས་རྟག་ཏུ་བྱ། །ཁྱད་པར་དུ་ནི་དཀྱིལ་འཁོར་དུའོ། །དམན་མ་རི་མོ་རྡོ་རྗེའི་
མཚན། །སངས་རྒྱས་ཕྱག་རྒྱ་ལ་སོགས་ཚོགས། །དམན་ནམ་བརྫིས་པར་གྱུར་པ་ཡང་། །རྡོ་རྗེ་ཤུགས་ལྡན་ཉེས་མི་འགྱུར། །ཞེས་གསུངས་སོ། །ཕྱག་རྒྱའི་རྣལ་འབྱོར་གྱི་དབང་དུ་བྱས་ནས་ཀྱང་དེ་བཞིན་དུ་གསུངས་ཏེ། རྡོ་རྗེ་ཤུགས་ཞེས་བྱ་བའི་སྒྲའི་གནས་
སུ་ཕྱག་རྒྱའི་རྣལ་འབྱོར་ཞེས་བྱ་བ་སྒྲ་བརྗོད་པར་བྱའོ་ཞེས་ཁྱད་པར་དུ་གཟུང་ངོ་། །དེ་ལ་རེ་ཞིག་འདིར་རྡོ་རྗེ་ཤུགས་ཀྱི་ཕྱག་རྒྱ་དང་། གསང་སྔགས་ཀྱི་རྣལ་འབྱོར་པ་དག་བསྟན་པ་འདི་ལྟར། རི་མོའམ་རྡོ་རྗེ་སྲད་བུའང་རུང་། །ཡིད་ཀྱིས་གྱེན་དུ་བཏེག་ནས་ནི། །འཇུག་ཅིང་
འབྱུང་བར་བྱེད་པ་སྟེ། དམ་ཚིག་ཉམས་པར་མི་འགྱུར་རོ། །ཞེས་གསུངས་སོ། །རྡོ་རྗེ་རི་མོ་དང་རྡོ་རྗེའི་སྲད་བུ་སྨོས་པ་ཡང་ཉེ་བའི་མཚན་ཉིད་དེ། དེ་བས་ན་ཕྱག་རྒྱ་ལ་སོགས་པ་འགོང་པར་མི་བྱ་བ་གཞན་ཡང་འདུས་པར་བལྟའོ། །འདི་ནི་ཡིད་ཀྱི་ཕྱག་རྒྱ་སྟེ། འདིའི་སྔགས་ནི་
འདིའོ། །བཛྲ་བེ་ག་ཨ་ཀྲ་མ། གཞན་དག་ཏུ་འདི་སྐད་ཀྱང་བཤད་དེ། །བདག་ཉིད་རྡོ་རྗེ་ཤུགས་ལྡན་པས། །བཛྲ་བཛྲ་ཞེས་སྨྲ་བ། །རྡོ་རྗེ་ཤུགས་ཞེས་བཤད་པ་སྟེ། །ཀུན་དུ་འགྲོ་བར་གྲུབ་པའོ། །ཕྱག་རྒྱའི་སྦྱོར་བ་གཞན་དག་ཀྱང་། །རང་གི་ལྷའི་སྦྱོར་བ་རྗེས་སུ་སྒྲུབ་པ་དང་

བཅས་པར་བཤད་དེ། དེ་ཡང་གཞུང་འདི་ལས་རབ་ཏུ་གྲགས་པ་ནི་ཕྱིས་བཤད་དོ། །གཞུང་གཞན་དག་ལས་ཀྱང་ཕྱིར་སྨོས་པ་ནི། །རང་གི་ལྷ་ཡི་རྣལ་འབྱོར་གྱིས། །བདག་ནི་སངས་རྒྱས་ཐམས་ཅད་དང་། །བྱང་ཆུབ་སེམས་དཔའ་ཉིད་དུ་འགྱུར། །
དེ་བས་འདིར་ནི་རབ་ཏུ་བརྟག །ཕྱག་རྒྱ་ཐམས་ཅད་ཀྱི་སྦྱོར་བ་རབ་ཏུ་གསང་བའོ་ཞེས་གསུངས་སོ། །རྣལ་འབྱོར་གྱི་སྒྲའི་དོན་ཀྱང་དེ་ཉིད་ལས་གཙོ་བོར་བསྟན་ཏེ། འདི་ལྟ་སྟེ། དཔེར་ན། རྫས་མང་པོ་བསྡུས་པ་ལ་སྦྱོར་བ་ཞེས་གྲུབ་པ་དེ་བཞིན་དུ། ཕྱག་རྒྱ་ཐམས་ཅད་
བདག་ཏུ་སྦྱོར་བ་ཐམས་ཅད་དམ་ཚིག་གི་རྣལ་འབྱོར་ཅེས་བྱ་བའི་སྐབས་སུ་བསྟན་པ། ཕྱག་རྒྱ་ཀུན་དུ་བདག་སྦྱོར་བ། །དབྱིབས་དང་ལུས་ནི་ཅི་འདྲ་བར། །བདག་ཉིད་ལ་ནི་བདག་ཉིད་དུ། །ཡང་དག་བཀོད་དེ་རྗེས་སུ་བསྒྲུབ། །ཅེས་གསུངས་སོ། །རྣམ་པ་གཞན་
དུ་ཡང་། རྡོ་རྗེ་སེམས་དཔར་བདག་སྦྱོར་བ། །དབྱིབས་དང་ལུས་ནི་ཅི་འདྲ་བར། །ཕྱག་རྒྱ་ཀུན་དུ་བདག་སྦྱོར་བ། །མི་འགྱུར་དམ་པ་འགྲུབ་པར་འགྱུར། །ཞེས་གསུངས་སོ། །རྗེས་སུ་སྒྲུབ་པ་འདི་ཡང་དེ་ཉིད་ལས། །ལྷ་ཉིད་གང་དང་གང་དག་གིས། །ཕྱག་རྒྱ་
གང་དང་གང་བཅིངས་པ། །དེ་དང་དེ་ཡི་རྣལ་འབྱོར་གྱིས། །ཕྱག་རྒྱ་དེ་དང་དེ་འགྲུབ་པོ། །ཞེས་གསུངས་སོ། །དེ་བས་ན་རྡོ་རྗེ་ཤུགས་ཅན་དང་། །ཕྱག་རྒྱ་ཆེན་པོའི་རྣལ་འབྱོར་པས་མཆོད་པར་བྱ་བའི་གྲིབ་མ་ལ་སོགས་པ་འགོང་པ་ལ་སོགས་པས་དམ་ཚིག་
ཉམས་པར་མི་འགྱུར་བ་དེ་ལྟ་བུར་འགྲུབ་པོ། །ལྷ་ཐམས་ཅད་སྤྱིའི་དམ་ཚིག་མདོར་བསྡུས་པ་བསྟན་པའོ། །གཞུང་འདིར་ནི་ལྷ་སོ་སོར་ངེས་པའི་དམ་ཚིག་བསྟན་པས་ན་དམ་ཚིག་རྣམ་པ་ལྔར་གསུངས་སོ། །གང་གི་ཕྱིར་འདི་ལ་ལྷ་རྣམ་པ་ལྔ་སྟེ། ཐམས་ཅད་
ཀྱི་བདག་པོ་བདེ་བར་གཤེགས་པ་རྣམས་དང་། དེ་ལས་བྱུང་བའི་རིགས་དང་། རྡོ་རྗེ་དང་པདྨ་དང་རིན་པོ་ཆེ་ལས་བྱུང་བའི་རིགས་རྣམ་པ་གསུམ་མོ། །དེ་ལྟར་འདི་དག་ནི་ལྷ་རྣམ་པ་ལྔའི་བྱེ་བྲག་བསྟན་པ་སྟེ། དེ་བས་ན་འདི་ནི་བསྡུས་ཏེ་བསྟན་པའོ། །རབ་ཏུ་ཕྱེ་སྟེ་བཤད་

ན། དེ་བཞིན་གཤེགས་པ་ལྔ་རྣམས་གཅིག་ཏུ་གྱུར་པ་རྒྱལ་བ་ཐམས་ཅད་ཀྱི་སྐུ་རྟག་པ་དང་། མི་འཁྲུགས་པ་དང་། རིན་ཆེན་དབང་དང་། འོད་དཔག་ཏུ་མེད་པ་དང་། དོན་ཡོད་གྲུབ་པ་ཞེས་བྱ་བ་རྣམས་ཏེ། དོན་ལྔར་བཤད་པ་རྣམ་པ་ལྔར་བཏགས་པ་སྟེ་གྲགས་པ་
རྣམས་སོ། །དེ་རྣམས་སོ་སོར་རེ་རེ་ལ་ཡང་རིགས་སུ་གྱུར་པས་ན་དེ་བཞིན་གཤེགས་པའི་རིགས་ལས་ཀྱང་རྟག་པ་དང་། མི་འཁྲུགས་པ་ལ་སོགས་པའི་རིགས་ཀྱི་བྱེ་བྲག་ལས་རྣམ་པ་ལྔའོ། །གཞུང་ཆེན་པོ་ལས་ནི་དེ་བཞིན་གཤེགས་པ་རྣམས་མཐའ་
ཡས་པའི་ཕྱིར་དེ་དག་གི་རིགས་ཀྱང་མཐའ་ཡས་པར་སྲིད་དོ། །རིགས་ལྔར་བཤད་པ་ཡང་བསྡུས་ཏེ་བཤད་པ་ཉིད་དུ་བསྟན་ཏེ། ཇི་སྐད་དུ་འདིར། རྟག་དང་མི་འཁྲུགས་རིན་ཆེན་དབང་། །འོད་དཔག་མེད་དང་ངེས་འགྲུབ་རྣམས། །རིགས་ནི་རྣམ་པ་བརྒྱར་
བཤད་པ། །མདོར་བསྡུས་པ་ནི་རྣམ་པ་ལྔ། །ཞེས་གསུངས་སོ། །རྡོ་རྗེ་དང་པདྨ་དང་རིན་པོ་ཆེའི་རིགས་རྣམས་ཀྱང་རེ་རེ་ལས་ཀྱང་སོ་སོའི་དཀྱིལ་འཁོར་རྣམ་པ་བཞི་སྟེ། དེ་ལ་རྡོ་རྗེའི་རིགས་ནི་འཇིག་རྟེན་གསུམ་ལས་རྣམ་པར་རྒྱལ་བ་དང་། རྡོ་རྗེའི་དབང་བསྐུར་
བ་དང་། རྡོ་རྗེའི་སྡེ་དང་། རྡོ་རྗེ་དབབ་པ་ཞེས་བྱ་བ་རྣམས་སོ། །དེ་བཞིན་དུ་པདྨའི་རིགས་ལ་ནི་འགྲོ་བ་འདུལ་བ་དང་། སངས་རྒྱས་ཐོར་ཚུགས་དང་། ཏིང་ངེ་འཛིན་གྱི་པདྨ་དང་། སྣ་ཚོགས་པདྨ་ཞེས་བྱ་བའི་བྱེ་བྲག་གིས་རྣམ་པ་བཞིའོ། །རིན་པོ་ཆེའི་རིགས་ལ་ཡང་།
དོན་ཐམས་ཅད་གྲུབ་པ་དང་། རིན་ཆེན་ལྟ་བ་དང་། རིན་ཆེན་པདྨ་དང་། རིན་ཆེན་དབབ་པ་རྣམས་ཏེ། རིགས་ཀྱི་བྱེ་བྲག་རྣམ་པ་བཞིར་བསྟན་ཏོ། །དེ་ལྟར་འདི་དག་སྤྱིར་བསྡོམས་ན་རིགས་བཅུ་བདུན་དུ་འགྱུར་རོ། །བསྡུས་ཏེ་བཤད་ན་ནི་རིགས་བཞིར་བཤད་དེ་ལས་
ཀྱི་རིགས་ནི་དེ་ཉིད་བསྡུས་པའི་རྒྱུད་འདིར་ལོགས་ཤིག་ཏུ་མ་ཕྱེ་སྟེ། དེ་ནི་རིན་པོ་ཆེའི་རིགས་ཀྱི་ནང་དུ་བསྡུས་པའི་ཕྱིར་རོ། །ཇི་ལྟར་ཞེ་ན། བླ་ན་མེད་པའི་མཚན་དང་། དཔེ་བྱད་རིན་པོ་ཆེ་སྣ་ཚོགས་པའི་མཚན་ཉིད་རྒྱལ་བ་མ་ལུས་པའི་སྐུའི་རང་བཞིན་ནི། །རྡོ་རྗེ་རིན་ཆེན་

ཞེས་བྱ་སྟེ། དེ་བས་ན་བྱེད་པ་པོ་དང་ལས་ཐ་མི་དད་པར་རིགས་པས་ན་བདེ་བར་གཤེགས་པ་ཐམས་ཅད་ཀྱི་སྤྱོད་པའི་མཚན་ཉིད་ལས་སྣ་ཚོགས་དང་ཐ་མི་དད་པར་དགོངས་པའི་ཕྱིར་རོ། །རྡོ་རྗེ་རྩེ་མོ་ལས་ནི་ཇི་ལྟར་བརྟག་པའི་བྱེ་བྲག་དེ་ལ་བརྟེན་ནས་ལས་ཀྱི་
རིགས་ལྷག་པར་བཤད་དེ། དེ་བས་ནི་དེ་ལྟར་རིགས་ལྔར་གྲགས་སོ། །བདུད་རྩི་འབྱུང་བ་ལས་ནི་དེ་ལྟར་བརྟག་པ་ཉིད་ལས་རྡོ་རྗེ་སེམས་དཔའི་རིགས་ནི་རིགས་ཐམས་ཅད་ཀྱི་གཙོ་བོར་བརྟགས་ནས་ཁྲོ་བོའི་རིགས་དེར་འདུས་པར་བསྟན་ཏེ། དེ་ལ་སོགས་པའི་རིགས་
རྣམ་པར་བརྟག་པ་ནི་འདུལ་བའི་སྐྱེ་བོ་ལ་གཟིགས་ནས་བསྟན་པར་ཤེས་པར་བྱའོ། །དེ་ལྟར་རྣམ་པ་དེས་རྒྱུད་འདིར་རིགས་བཞིར་བསྡུས་པའི་དེ་བཞིན་གཤེགས་པ་རྣམས་ཀྱི་སྐུ་དང་གསུང་དང་ཐུགས་དང་། སྤྱོད་པ་མཐའ་ཡས་པ་མི་ཟད་པའི་བཀོད་པ་བསྟན་པ་ཡིན་ནོ། །
དེ་བཞིན་དུ་རིགས་བཞི་རྣམས་ལ་ཡང་། དཀྱིལ་འཁོར་ཆེན་པོ་རྣམས་སུ་ནི་ལྷ་རྣམས་དགོད་པ་གཟུགས་ཀྱི་སྐུར་བཀོད་པའི་ཕྱིར། སྐུ་མི་ཟད་པའི་མཛོད་རྣམ་པར་སྤྲུལ་པ་བསྡུས་པ་ཡིན་པར་བལྟའོ། །དམ་ཚིག་གི་དཀྱིལ་འཁོར་ནི་ཇི་ལྟར་རྟོགས་པའི་རྣམ་པར་གྲོལ་བའི་
སྒོ་མཚོན་པར་བྱེད་པ་རྡོ་རྗེ་དང་ལྕགས་ཀྱུ་དང་། མདའ་དང་མགུ་བ་ལ་སོགས་པ་རྣམ་པར་བཀོད་པ་ཉེ་བའི་མཚན་ཉིད་ནི་ཐུགས་མི་ཟད་པ་རྣམ་པར་བཀོད་པའི་མཛོད་རྣམ་པར་སྤྲུལ་པ་བསྡུས་པའོ། །ཆོས་ཀྱི་འཁོར་ལོ་ནི་ཇི་ལྟར་རྟོགས་པའི་ཆོས་བསྟན་པའི་ཐབས་སྤྱོད་པ་
མཉམ་པར་གཞག་པ་རྣམ་པར་བཀོད་ཅིང་གནས་པའི་ལྷ་རྣམས་ཏེ། དེ་བཞིན་གཤེགས་པ་ཐམས་ཅད་ཀྱི་གསུང་མི་ཟད་པ་རྣམ་པར་བཀོད་པའི་མཛོད་རྣམ་པར་སྤྲུལ་པར་བྱིན་གྱིས་བརླབས་པའོ། །དེ་བཞིན་དུ་ལས་ཀྱི་དཀྱིལ་འཁོར་ལ་ཡང་མཆོད་པ་ལ་སོགས་པའི་ལས་
ཀྱི་ལྷ་རྣམས་བཀོད་པས་དེ་བཞིན་གཤེགས་པ་ཐམས་ཅད་ཀྱི་སེམས་ཅན་གྱི་དོན་སྤྱོད་པ་ལ་སོགས་པ་བསྡུས་པ་བསྟན་པར་བལྟའོ། །རིམ་པ་འདིས་ནི་སྐུ་ལ་སོགས་པ་རྣམ་པ་བཞི་གཙོ་བོར་གྱུར་པའི་ཕྱིར། དཀྱིལ་འཁོར་རྣམ་བཞིར་གསུངས་མོད་ཀྱི། འོན་ཀྱང་

ཕལ་ཆེར་ལུས་མེད་པའི་སེམས་ཀྱང་མི་སྲིད་ལ། སེམས་ཀྱང་ལུས་མེད་པ་དག་ཀྱང་མི་སྲིད་དེ། དེ་བས་ན་དཀྱིལ་འཁོར་སོ་སོ་ལས་ཀྱང་སྐུ་ལ་སོགས་པ་བཞི་ཆར་དགོས་པར་བལྟའོ། །དེ་བས་ན་རིགས་ཀྱི་དཀྱིལ་འཁོར་ཐམས་ཅད་དུ་ཡང་སྐུ་ལ་སོགས་པའི་མཚན་
མར་གྱུར་པ་གོ་རིམས་བཞིན་དུ་ཕྱག་རྒྱ་ཆེན་པོ་དང་། དམ་ཚིག་དང་ཆོས་དང་ལས་ཀྱི་ཕྱག་རྒྱ་དང་རྣམ་པ་བཞི་འདིར་བཤད་དོ། །དེ་ལྟར་དེ་བཞིན་གཤེགས་པ་རྣམས་ཀྱི་སྐུ་མི་ཟད་པ་ལ་སོགས་པ་རྣམ་པར་བཀོད་པའི་རིགས་སོ་སོའི་དཀྱིལ་འཁོར་རྣམ་པ་བཞིས་བསྡུས་
པར་བསྟན་པ་ཡིན་ནོ། །དེ་བས་ན་སྐུ་ལ་སོགས་པའི་ལྷ་རྣམས་རིགས་བཞིར་གསུངས་པ། དེ་བཞིན་གཤེགས་པ་ལ་སོགས་པ་དེ་རྣམས་མཉེས་པར་བྱ་བའི་ཕྱིར། རིགས་སོ་སོའི་དམ་ཚིག་སྤྱོད་པའི་མཚན་ཉིད་རིགས་ཀྱི་བྱེ་བྲག་ལས་ཇི་སྐད་དུ་གསུངས་པ་བཏུས་ཏེ་
བཤད་པར་བྱའོ། །དེ་ལ་དེ་བཞིན་གཤེགས་པ་རྣམས་ཀྱི་དམ་ཚིག་ནི། གང་དག་འདོད་ཆགས་སྙོམས་འཇུག་པ། །དེ་ནི་འདོད་ཆགས་ཉིད་ཀྱིས་སྦྱང་། །འདི་ནི་སངས་རྒྱས་ཕྱག་རྒྱ་ཆེ། །ཡེ་ཤེས་དམ་ཚིག་ཡིན་པར་བཤད། །འདིར་ནི་འདོད་ཆགས་ལ་སྙོམས་
པར་འཇུག་པ་ཞེས་བྱ་བའི་སྒྲ་ནི་བྱང་ཆུབ་ཀྱི་སེམས་གོམས་པར་བྱེད་པ་ཉིད་ལ་བྱའོ། །འདོད་ཆགས་ཀྱིས་སྦྱང་ཞེས་བྱ་བ་འདིས་ཀྱང་བྱང་ཆུབ་ཀྱི་སེམས་གོམས་པར་བྱེད་ཅིང་རྗེས་སུ་ཆགས་པས་བདག་ཉིད་དེ་བཞིན་གཤེགས་པའི་སྐུར་བསྒྲུབ་པ་དང་། སེམས་ཅན་སྨིན་པ་
དང་། གྲོལ་བར་བྱ་བ་ལ་ཆགས་པར་ནན་ཏན་བྱའོ་ཞེས་བསྟན་པའོ། །དེ་བཞིན་གཤེགས་པའི་རིགས་ཀྱི་དམ་ཚིག་ཀྱང་འདི་ལྟ་སྟེ། འདོད་ལ་སྐྱོ་བར་མི་བྱ་བ། །དམ་ཚིག་ཤིན་ཏུ་ཚུལ་ཆེན་ཏེ། །དེ་བཞིན་གཤེགས་པའི་རིགས་དག་ལས། །རྒྱལ་བ་རྣམས་ཀྱང་འདའ་
མི་མཛད། །ཅེས་གསུངས་སོ། །འདོད་པ་ཞེས་བྱ་བའི་སྒྲ་ཡང་འདིར་བྱང་ཆུབ་ཀྱི་སེམས་ཉིད་བསྟན་པ་དང་། རྗེས་སུ་ཆགས་པ་དང་། འགུགས་པ་དང་། རབ་ཏུ་འགུགས་པ་ལ་སོགས་པའི་ཡོན་ཏན་དང་ལྡན་པ་རྡོ་རྗེ་སེམས་དཔའ་ལ་སོགས་པའི་མཚན་ཉིད་ལ་བྱ་སྟེ།

འདོད་ཅིང་མངོན་པར་དད་པར་བྱ་བ་ཡིན་པར་རྒྱུད་ནས་བཤད་པའི་ཕྱིར་རོ། །དེ་བས་ན་བྱང་ཆུབ་ཀྱི་སེམས་ཀྱི་རང་བཞིན་བདག་གི་རྣམ་པར་གྲོལ་བ་ལ་རྗེས་སུ་ཞེན་པར་རང་གི་ལྷའི་ཏིང་ངེ་འཛིན་ལ་སྐྱོ་བར་མི་བྱ་སྟེ། ཉིན་མཚན་དུ་ཅི་ནུས་པར་ངལ་བསོ་ཞིང་དེར་
བསམ་པ་བརྟན་པར་བྱའོ་ཞེས་བསྟན་པ་ཡིན་ནོ། །འདི་སྐད་དུ། འདོད་པ་བཅོམ་ལྡན་རྟག་པ་སྟེ། །སེམས་ཅན་ཐམས་ཅད་བདེ་སྩོལ་བ། །རྡོ་རྗེ་སེམས་དཔའ་བདག་ཉིད་ཅེས། །བསྒོམས་ན་རབ་ཏུ་འགྲུབ་པར་འགྱུར། །ཞེས་གསུངས་སོ། །ཡང་དེ་བཞིན་གཤེགས་
པའི་མཆོད་པའི་ཏིང་ངེ་འཛིན་གྱི་དབང་དུ་བྱས་ཏེ། འདོད་པ་ལ་སོགས་བདེ་བ་ཀུན། །རྟག་ཏུ་བདག་ཉིད་སྙིང་གར་གནས། །ཨེ་མའོ་སེམས་ཅན་དོན་གྱི་ཕྱིར། །མ་ཆགས་པ་ཡང་ཆགས་པར་བཤད། །ཅེས་གསུངས་སོ། །དོན་དེ་ཉིད་དམ་ཚིག་ཆེན་པོ་དེ་ཁོ་ན་ཉིད་ཀྱི་རྟོག་པ་
ལས་དམ་ཚིག་བཤད་པའི་ཕྱིར་གཞུང་འདིས་གསལ་བར་བསྟན་ཏེ། འདི་སྐད་དུ། །སྒྲུབ་པ་ཆེན་པོ་དང་ལྡན་པར་བྱ་སྟེ། དེ་ལ་སྒྲུབ་པ་ནི་འདོད་པ་རྣམས་ལས་མི་སྐྱོ་བས་སོ། །དེ་ཅིའི་ཕྱིར་ཞེ་ན། འདོད་པ་ཞེས་བྱ་བ་ནི་བཅོམ་ལྡན་འདས་རྡོ་རྗེ་སེམས་དཔའོ་ཞེས་རྒྱ་ཆེར་
བསྟན་ཏོ། །རྡོ་རྗེ་དང་། པདྨ་དང་། རིན་པོ་ཆེའི་རིགས་ཀྱི་དམ་ཚིག་འདི་ནི་འདི་ལྟ་སྟེ། སེམས་ཅན་དོན་ཕྱིར་མི་ཁྲོ་བའང་། །ཁྲོ་བོ་ཆེན་པོར་རབ་སྟོན་པ། །འདི་ནི་རྡོ་རྗེ་རིགས་ཆེན་གྱི། །དམ་ཚིག་འདའ་བར་དཀའ་བའོ། །ཁྲོ་བོ་ཆེན་པོ་ཞེས་བྱ་བའི་སྒྲས་ནི་འཇིག་
རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་ཆེན་པོ་ལ་སོགས་པ་ཡིན་པར་བསྟན་ཏེ། ཁྲོ་བར་བཅོས་པ་དང་བཅས་པ་ཞེས་བཤད་དོ། །པདྨ་རིགས་ཀྱི་དམ་ཚིག་ནི། །རང་བཞིན་དག་པར་ཤེས་ནས་ནི། །དགོས་པ་དེ་དང་དེ་དག་བྱེད། །འདི་ནི་པདྨའི་རིགས་ཆེན་
གྱི། །དམ་ཚིག་འདའ་བར་དཀའ་བའོ། །འདིར་ཡང་རང་བཞིན་དག་པ་ནི་ཆོས་ཐམས་ཅད་རྣམ་པ་མེད་པར་མོས་པ་སྟེ། དེ་སྔོན་དུ་བྱས་ནས་ཕྱག་རྒྱ་ཆེན་པོ་ལ་སོགས་པའི་དགོས་པ་བསྒྲུབ་པའི་མཚན་ཉིད་དགོས་པ་དེ་དང་དེ་བྱའོ་ཞེས་པའི་ཐ་ཚིག་གོ། །རིན་པོ་ཆེའི་རིགས་

ཀྱི་དམ་ཚིག་ནི། ཉུང་ངམ་ཡང་ན་མང་ཡང་རུང་། །ཇི་ལྟར་འདོད་པ་བཞིན་དུ་ནི། །སྦྱིན་པ་ཉིན་གཅིག་བཞིན་དུ་ཡང་། །བྱ་བ་འདི་ནི་དམ་ཚིག་གོ། །ཞེས་གསུངས་སོ། །འདི་ནི་དམ་ཚིག་རྣམ་པ་ལྔ་སྟེ་ལྷ་རྣམ་པ་ལྔར་སྨོས་པའི་ཕྱིར་གོ་རིམས་བཞིན་དུ་རྗེས་སུ་མཐུན་པར་གཙོ་
བོར་བསྟན་མོད་ཀྱི། རིགས་གཞན་གང་ཡང་རུང་བ་ཟློས་པས་ཀྱང་རྣམ་པ་ལྔ་ཅར་བསྲུང་དགོས་ཏེ། བདེ་བར་གཤེགས་པ་ལས་གཞན་པ་ཇི་སྐད་དུ་གསུངས་པའི་ལྷའི་བྱེ་བྲག་རྣམས་དེ་བཞིན་གཤེགས་པའི་ངོ་བོ་ཉིད་ཡིན་པ་དང་། དེ་དག་གི་དམ་ཚིག་ཐམས་ཅད་ཀྱང་བདེ་བར་
གཤེགས་པའི་དམ་ཚིག་གི་ངོ་བོ་ཡིན་པ་དང་། བདེ་བར་གཤེགས་པའི་ཚུལ་གྱིས་གསང་སྔགས་ཟློས་པ་རྣམས་ཀྱང་རྒྱལ་བ་ཐམས་ཅད་ལ་བདག་གི་ལུས་ཕུལ་བས། དེས་གསུངས་པ་བཞིན་དུ་བྱ་བར་ཁས་བླངས་པས་དེ་དག་མཐུན་པར་བྱ་བ་ལ་འཇུག་པའི་
ཕྱིར་རོ། །དེ་བཞིན་གཤེགས་པ་ཐམས་ཅད་ཀྱང་སྔོན་འགྲོ་བ་མ་ལུས་པ་འདི་དག་སྒྲིབ་པ་རྣམ་པ་གཉིས་ཀྱི་དྲི་མས་ཡོག་ཅིང་དེ་ལས་བྱུང་བའི་ནད་ཀྱིས་གཟིར་བར་གཟིགས་ནས། ཐུགས་རྗེའི་དབང་དུ་གྱུར་པའི་ཐུགས་ཀྱིས་འདོད་ཆགས་ལ་སོགས་པའི་སྐྱོན་དང་ལྡན་
པ་ཁ་ཅིག་ངོ་བོ་ཉིད་ཀྱིས་རྣམ་པར་དག་པ་མངོན་དུ་གྱུར་པའི་ཡིད་དང་ལྡན་པ་རྣམས་ལ་རབ་ཏུ་ཞི་བ་ཉིད་ཀྱི་ཚོགས་ཡོངས་སུ་དག་པར་མཛད་དོ། །ཡང་འདོད་ཆགས་ལ་སོགས་པས་སེམས་ཤིན་ཏུ་དབང་དུ་བྱས་པ་ཁ་ཅིག་ལ་ནི་བདག་ཉིད་རྣམ་པ་ཐམས་ཅད་དུ་ཉེས་པ་ཐམས་ཅད་
དང་བྲལ་ཡང་འདོད་པ་དང་ཁྲོ་བ་ལ་སོགས་པ་སོ་སོར་མཐུན་པར་བསྟན་ནས། ཉེས་པ་དེ་དང་དེ་དག་ཇི་ལྟར་རིགས་པས་སྤོང་ངོ་། །དེ་བས་ན་རྣལ་འབྱོར་པ་བདེ་བར་གཤེགས་པའི་གོ་འཕང་ཐོབ་པར་འདོད་པ་རྣམས་ཀྱིས་ཀྱང་སེམས་ཅན་གྱི་ཁམས་མཐའ་ཡས་པ་རྣམ་
པར་སྦྱོང་བའི་ཐབས་དཔལ་རྡོ་རྗེ་སེམས་དཔའ་ལ་སོགས་པའི་མཚན་ཉིད་འདོད་པའི་ཡོན་ཏན་རྣམས་ལ་ཤིན་ཏུ་བརྟན་པར་རྗེས་སུ་ཆགས་པར་བྱའོ། །ཉན་ཐོས་ལྟར་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་ལ་གཞོལ་བས་རྣམ་པ་ཐམས་ཅད་དུ་

གཟུགས་ལ་སོགས་པའི་ཕུང་པོ་ལ་སྐྱོ་བ་བསྐྱེད་པར་མི་བྱའོ། །དེ་བཞིན་དུ་གདུག་པའི་སྐྱེ་བོ་བདག་དང་གཞན་ལ་གནོད་པར་སྦྱོར་ཞིང་ངན་པར་སྤྱོད་པ་རྣམས་ལ་རབ་ཏུ་བསྡིགས་པར་བྱའོ། །སེམས་ཅན་རྣམས་ལ་བྱམས་པ་ཡིད་དུ་བྱའོ། །ལས་
ཐམས་ཅད་ལ་ཡང་ཆོས་ཐམས་ཅད་ཀྱི་ངོ་བོ་ཉིད་དག་པར་བལྟས་ནས་མ་ཆགས་པར་བྱའོ། །ཐབས་ཀྱིས་ནི་ཀུན་རྫོབ་ཀྱི་བདེན་པ་ལ་མོས་པས་འགྲོ་བ་མ་ལུས་པའི་དོན་བྱ་བ་དང་དེ་སྒྲུབ་པ་ལ་ཆགས་པར་བྱའོ། །བདག་ལ་སྦྱིན་པར་བྱ་བའི་དངོས་པོ་མང་དུ་མི་བདོག་གོ། །
ཞེས་ཉིན་རེ་བཞིན་སྦྱིན་པའི་བར་ཆད་མི་བྱའོ། །ཅི་ནུས་པར་ཆུང་ངམ་ངན་ཡང་བླའི་སྦྱིན་པ་སྦྱིན་པར་བྱ་སྟེ། ཡང་ཡེ་དེས་འདི་ལས་འདའ་བར་མི་བྱའོ། །དེ་བས་ན་གང་ཡང་རུང་བའི་རིགས་ལ་རང་གི་ལྷ་མཉེས་པར་བྱེད་པས་ཀྱང་། རིགས་ཀྱི་རྗེས་སུ་མཐུན་པར་བསྟན་
པའི་དམ་ཚིག་གི་བྱེ་བྲག་འདི་དག་ཐམས་ཅད་ཀྱང་ཅི་ནུས་པས་ཀྱང་རྗེས་སུ་འཇུག་པར་བྱའོ། །མཉེས་པར་བྱ་བ་རང་གི་ལྷའི་རྗེས་སུ་མཐུན་པའི་དམ་ཚིག་གང་ཡང་རུང་བ་ལ་ནི་ཤིན་ཏུ་ལྷག་པར་ནན་ཏན་དུ་བྱ་དགོས་ཏེ་ཁྱད་པར་ནི་དེ་ཡོད་དོ། །དམ་ཚིག་འདི་ཡང་དམ་
ཚིག་གི་ཕྱག་རྒྱ་བསྒྲུབ་པའི་ཚེ་ནི་ཁྱད་པར་དུ་ཡིད་ལ་བྱའོ། །འདི་དག་ནི་དམ་ཚིག་གི་བྱེ་བྲག་བསྡུས་པའོ། །དེ་ལྟར་དེ་ལ་སོགས་པ་གཞན་ཡང་དེ་བཞིན་གཤེགས་པའི་རིགས་ཀྱི་དཀྱིལ་འཁོར་ཆེན་པོར་བཤད་པའི་ལྷ་སྒྲུབ་པ་པོས་རྒྱུད་དང་མཐུན་པར་བླ་མའི་མན་ངག་
ལས་བཟླས་བརྗོད་བྱེད་པའམ། བསྒོམས་པས་བསྒྲུབ་པའི་ཡན་ལག་རྣམས་ངེས་པར་བྱས་ནས་དེ་ལ་ནན་ཏན་བྱ་བར་ཡིད་ཤིན་ཏུ་བརྟན་པར་བྱས་ཏེ། གྲོགས་པོ་མཐུན་པ་དང་ལྷན་ཅིག་གམ། ཡང་ན་གཅིག་པུ་རྩོལ་བ་དང་གཉིས་ཀྱིས་བཟླས་བརྗོད་བྱེད་པ་དང་།
བསྒོམ་པ་ལ་སོགས་པ་ལ་འཇུག་པར་བྱའོ། །དེའི་རིམ་པ་ཡང་འདི་ལྟ་སྟེ། དང་པོར་རེ་ཞིག་ནང་པར་གྱི་དུས་ལ་བབ་པ་དང་། ཁྲི་ལ་སོགས་པ་མེད་པ་ལ་རྣལ་འབྱོར་དང་རྗེས་སུ་མཐུན་པའི་མལ་བདེ་བ་ནས་ལངས་ལ། དམ་པའི་ཆོས་ཀློག་པ་ལ་སོགས་པ་བྱས་ནས་

མི་བརྗེད་པའི་ཆོས་ཉིད་མངོན་པར་འཕེལ་བར་བྱ་བའི་ཕྱིར་མཚན་མོ་དང་ཉིན་པར་ལེགས་པར་སྤྱད་པའི་ཡི་དམ་ཇི་ལྟར་བླངས་པ་ཞིག་པའམ། མ་ཞིག་པ་ལུགས་དང་མཐུན་པ་དང་། ལུགས་དང་མི་མཐུན་པ་དྲན་པར་བྱས་ཏེ་ཉེས་པ་ཡང་ཕྱིན་ཆད་མི་བྱ་བའི་སེམས་བསྐྱེད་ལ་དཀྱིལ་
འཁོར་ཆེན་པོ་ན་བཞུགས་པའི་བདེ་བར་གཤེགས་པ་ལ་སོགས་པ་སེམས་དཔའ་ཆེན་པོ་རྣམས་ཐང་ཅིག་ཡུད་ཙམ་ཞིག་དྲན་པ་སྔོན་དུ་བྱས་ནས་ཕྱག་འཚལ་ལོ། །དེ་ནས་ཇི་སྐད་གསུངས་པའི་རང་གི་རིགས་ཀྱི་སྲུང་བའི་སྦྱོར་བ་བསྟན་པ་ནན་ཏན་དུ་བྱས་ཏེ། ཕྱི་རོལ་གྱི་
ས་ལ་སོགས་པར་འགྲོ་བར་བྱའོ། །དེ་ལས་གཞན་པའི་དུས་དང་སྤྱོད་པའི་ཚེ་དམ་ཚིག་སེམས་དཔའི་ང་རྒྱལ་ཡོངས་སུ་མ་བཏང་དུ་ཟིན་ཀྱང་ཕྱི་རོལ་གྱི་ས་ལ་སོགས་པར་འགྲོ་བའི་ཚེ་རང་གི་རིགས་དང་རྗེས་སུ་མཐུན་པར་སྲུང་བའི་སྦྱོར་བ་ནན་ཏན་མི་གཏོང་ངོ་། །དེ་ཅིའི་ཕྱིར་ཞེ་ན།
དངོས་པོའི་ངོ་བོ་ཉིད་ཀྱིས་རབ་ཏུ་སྦྱོར་བ་ལ་དེ་ལྟ་བུའི་དུས་ཉིད་ཀྱི་ཚེ་ན་དམ་ཚིག་གིས་ངེས་པར་བྱེད་པར་ནི་རིགས་སོ། །དེ་ལ་དེ་བཞིན་གཤེགས་པ་མཉེས་པར་བྱེད་པ་རྣམས་ཀྱི་དབང་དུ་བྱས་ཏེ་སྲུང་བ་གསུངས་པ་ནི་འདིའོ། །སེམས་ཅན་ཐམས་ཅད་ཡོངས་མི་གཏང་། །
རྟག་ཏུ་སངས་རྒྱས་མཆོད་པའི་བདག །རྟག་ཏུ་སངས་རྒྱས་ཡིད་ལ་བྱེད། །སྲུང་བ་འདི་ནི་དམ་པ་མཆོག །ཅེས་གསུངས་སོ། །དེ་བཞིན་གཤེགས་པའི་རིགས་ཀྱི་སྲུང་བ་ཡང་། རྡོ་རྗེ་སེམས་དཔའ་ལན་ཅིག་གཅིག །མིང་ཙམ་ཡོངས་སུ་འཛིན་པ་ཡང་། །འདི་ནི་
སྲུང་བ་ཆེན་པོ་སྟེ། །ངེས་པར་འགྲུབ་སྟེ་སྐད་ཅིག་གིས། །ཞེས་གསུངས་སོ། །དེ་ནས་ཕྱི་རོལ་གྱི་ས་ལ་སོགས་པར་བྱ་བ་བྱས་ནས་གཙང་སྦྲ་ཇི་ལྟ་བ་བཞིན་དུ་བྱས་ཏེ། དེ་བཞིན་དུ་སྲུང་བའི་སྦྱོར་བ་ཡང་རྗེས་སུ་དྲན་པར་བྱས་ནས་ཆོས་ཐམས་ཅད་སྤྲོས་པ་དང་བྲལ་བར་སྔ་ནས་
བསྒོམས་པས་སྒྱུ་མ་དང་སྨིག་རྒྱུ་དང་། རྨི་ལམ་ལ་སོགས་པར་སྣང་བ་དང་འདྲ་བར་འཇིག་རྟེན་ན་གྲགས་པ་རྣམས་བློས་བརྟགས་ཏེ། ཕྱི་རོལ་གྱི་ཁྲུས་ལ་སོགས་པ་གཙང་སྦྲའི་རྣམ་པར་རྟོག་པ་མ་ལུས་པ་སྤང་ངོ་། །གཞན་དུ་ན་དེ་ལྟ་བུའི་འཇིག་རྟེན་དང་མཐུན་པར་བྱ་བ་དང་།

རང་གི་ལུས་ལ་ཕན་ཞིང་བདེ་བར་བྱ་བའི་ཕྱིར་ནི་གཙང་སྦྲ་དང་སྤྱད་པའི་ཆོ་ག་ཇི་ལྟར་བསྟན་པ་བཞིན་དུ་བྱའོ། །ཡང་ན་རང་གི་ལྷའི་དམ་ཚིག་སེམས་དཔའི་ང་རྒྱལ་མངོན་དུ་བྱས་པ་ནི་ཕྱི་རོལ་གྱི་གཙང་སྦྲ་ལ་སོགས་པ་མི་དགོས་པའི་རྒྱུར་བཤད་དེ། དེའི་ཕྱིར་རྗེས་
སུ་དྲན་པའི་ཡིད་ལ་བྱ་བ་བསྐྱེད་པར་བྱ་སྟེ། ཇི་སྐད་དུ། གཙང་སྦྲ་བསྡམ་པ་འདིར་མི་དགོས། །དཀའ་ཐུབ་དཀའ་སྤྱད་མི་དགོས་ཏེ། །སངས་རྒྱས་ཐམས་ཅད་སེམས་དཔའ་ཆེ། །བདག་ཏུ་སྦྱོར་བས་འགྲུབ་པར་འགྱུར། །ཞེས་གསུངས་སོ། །དེ་ལྟར་དག་པར་ཀུན་དུ་རྟོག་
པ་ལེགས་པར་བྱས་ནས་བདག་གི་ཡིད་དང་མཐུན་པའི་ཡུལ་གྱི་བྱེ་བྲག་གང་ཡང་རུང་བའམ། ལྷ་ཁང་ལ་སོགས་པར་གནས་ཏེ། ཕྱོགས་དང་དུས་ཐམས་ཅད་ན་བཞུགས་པའི་བདེ་བར་གཤེགས་པ་ལ་སོགས་པ་བླ་མ་རྣམས་ལ་ཕྱག་འཚལ་ལ་ཁ་ནུབ་ཕྱོགས་སུ་བལྟས་
སམ་ཕྱོགས་ཐམས་ཅད་མཉམ་པ་ཉིད་དུ་དམིགས་པས་གང་འདོད་པར་ཁ་བལྟས་ཏེ། ཇི་ལྟར་བདེ་བའི་སྟན་ལ་འདུག་ནས་དེ་བཞིན་དུ་སྲུང་བའི་སྦྱོར་བ་རྗེས་སུ་དྲན་པས། བདག་དང་གཞན་དང་ཡོ་བྱད་ལ་སོགས་པ་རྣམས་ཡིད་ཀྱིས་སྲུང་བའི་སྦྱོར་བ་བྱས་ཏེ། དེ་ནས་རང་གི་
ལྷའི་དམ་ཚིག་སེམས་དཔའི་རྣལ་འབྱོར་འོག་ནས་འབྱུང་བའི་ཆོ་ག་བཞིན་དུ་བྱས་ལ། དད་པའི་ལྷ་རྣམས་ལ་མཆོད་པའི་ཆོ་ག་བྱས་ཟིན་ནས་བཟླས་བརྗོད་བྱ་བའམ། བསྒོམ་པ་བྱས་ཏེ། ཇི་སྐད་དུ། བདག་ཉིད་ལྷ་ཡི་རྣལ་འབྱོར་པས། །བདག་དང་གཞན་ལ་མཆོད་པར་བྱ། །
ཞེས་གསུངས་སོ། །འདིར་ཡང་མཆོད་པར་དགོངས་པ་དང་། རང་གི་ལྷར་བསྒྲུབ་པའི་སྙིང་པོ་རྣམས་ལན་གཉིས་སམ། ལན་གསུམ་མམ། དེ་ལས་ལྷག་པར་བརྗོད་པས་རང་གི་ལྷ་དགོས་པ་སྒྲུབ་པར་བྱེད་པར་གསུངས་ཏེ། རྣལ་འབྱོར་གྱི་ཚུལ་གྱི་ཆོ་ག་ལ་ཏིང་ངེ་འཛིན་
གཙོ་བོར་འགྱུར་བའི་ཕྱིར་རོ། །ཇི་སྐད་དུ། རྡོ་རྗེ་སེམས་སོགས་སེམས་དཔའ་རྣམས། །བསྒྲུབ་དང་ལས་རྣམས་ཐམས་ཅད་ལ། །འདིར་ནི་བཟླས་བརྗོད་ཅི་འདོད་པས། །རྟོག་པ་ཀུན་ལས་དངོས་གྲུབ་སྩོལ། །ཞེས་གསུངས་སོ། །དེ་ལ་རེ་ཞིག་དེ་བཞིན་གཤེགས་པ་རྣམས་

དང་། དེའི་རིགས་ཀྱི་བཟླས་བརྗོད་དང་བསྒོམ་པའི་ཆོ་ག་འདིར་བསྟན་པར་བྱའོ། །དང་པོར་རེ་ཞིག་དེ་དག་ལ་མཆོད་པར་བྱ་བའི་ཕྱིར་དེ་བཞིན་གཤེགས་པ་ལ་སོགས་པ་དམ་ཚིག་སེམས་དཔར་བྱིན་གྱིས་བརླབ་པར་བྱའོ། །དེ་ལ་དེ་བཞིན་གཤེགས་པའི་དམ་ཚིག་སེམས་དཔར་
སྒྲུབ་པའི་ཆོ་ག་ནི་འདི་ལྟ་སྟེ། ཨོཾ་སྭ་བྷཱ་བ་ཤུདྡྷཿ སརྦ་དྷརྨཱཿ སྭ་བྷཱ་བ་ཤུདྡྷོ྅ཧཾ། ཞེས་བརྗོད་ལ། ཆོས་ཐམས་ཅད་ངོ་བོ་ཉིད་ཀྱིས་དག་པར་མོས་པ་བྱ་སྟེ། རྡོ་རྗེ་ཐལ་མོ་སྙིང་གར་བཅིངས་ལ་དེའི་སྙིང་པོ་བརྗོད་དོ། །ཐལ་མོ་ཁོང་སྟོང་དུ་བྱས་ལ་སོར་མོའི་རྩེ་མོ་རྣམས་ཕན་
ཚུན་དུ་བསྣོལ་ཏེ་གཟུང་ངོ་། །འདི་ནི་རྡོ་རྗེའི་ཐལ་མོའི་མཚན་ཉིད་དེ། དེའི་སྙིང་པོའི་ནི་འདིའོ། །ཨོཾ་བཛྲ་ཨཉྫཱ་ལི། དེ་ནས་ཐལ་མོ་དེ་ཉིད་ལག་པ་རྒྱབ་ཏུ་བཀུག་པ་ནི་རྡོ་རྗེ་བཅིངས་པ་སྟེ། ཨོཾ་བཛྲ་བནྡྷ། ཞེས་བྱ་བ་ནི་སྙིང་པོའོ། །དེ་ནས་རྡོ་རྗེ་བཅིངས་པ་དེ་ལས་སྙིང་
གའི་ཕྱོགས་སུ་སྒྲ་དང་བཅས་པར་དགྲོལ་ཞིང་སྙིང་པོ་འདི་བརྗོད་དོ། །ཨོཾ་བཛྲ་བནྡྷ་ཏྲཊ། དེ་ནས་རྡོ་རྗེ་དབབ་པའི་ཕྱག་རྒྱ་བཅིངས་ཏེ། དེའི་སྙིང་པོ་བརྗོད་ཅིང་ཡེ་ཤེས་དབབ་པ་དང་། ཕྱག་རྒྱ་ཆེན་པོ་དབབ་པར་བྱའོ། །རྡོ་རྗེ་བཅིངས་པ་ལས་མཐེབ་མོ་གཉིས་ནང་དུ་
བཅུག་པ་ནི་དབབ་པའི་ཕྱག་རྒྱ་སྟེ། ཨོཾ་བཛྲ་ཨཱ་བེ་ཤ་ཨ་ཨ་ཨ། ཞེས་བྱ་བ་ནི་སྙིང་པོའོ། །དེའི་འོག་ཏུ་རང་གི་སེམས་བརྟག་པ་ལ་སོགས་པ་མཉམ་པར་གཞག་པའི་མཚན་ཉིད་དེ་བཞིན་གཤེགས་པ་ཐམས་ཅད་ཀྱིས་མངོན་པར་རྫོགས་པར་བྱང་ཆུབ་པ་མོས་པར་བྱས་
ལ་དེ་བཞིན་གཤེགས་པའི་སྐུར་བདག་ཉིད་བྱིན་གྱིས་བརླབ་པོ། །ཇི་སྐད་དུ། དེ་བཞིན་གཤེགས་པའི་དམ་ཚིག་ཆེན་པོའི་སེམས་དཔའ་བསྒྲུབ་པ་བསྟན་པ་ལས། སེམས་ཤེས་པ་ལས་བརྩམས་ནས་ནི། །བདག་ཉིད་སངས་རྒྱས་སྐུར་བསྒྱུར་ཏེ། །རྡོ་རྗེ་དབྱིངས་ནི་ཟློས་
བྱེད་ཅིང་། །རྡོ་རྗེ་ཉི་མ་བསྒོམ་པར་བྱ། །ཞེས་གསུངས་སོ། །རང་གི་སེམས་བརྟག་པ་ལ་སོགས་པའི་རིམ་པ་ཡང་འདི་ལྟ་སྟེ། དང་པོར་རེ་ཞིག་ཡིད་བདག་གི་སྙིང་གའི་ནང་དུ་བསྡུས་ལ། ལུས་ཐམས་ཅད་ཀྱི་སྲོག་སླར་བསྡུས་པའི་ཚུལ་གྱིས་དབང་པོ་མཐའ་

དག་གི་རྒྱུད་ནང་དུ་ཕྱོགས་པར་བྱས་ནས། ལྕེ་རྐན་ལ་བཅར་ཏེ་མགྲིན་པ་ཅུང་ཟད་བཀུག་ལ། མིག་ཟམ་ཟིམ་བྱས་ནས་ལུས་དྲང་པོར་བསྲངས་ཏེ་བཞག་ལ་སེམས་བརྟག་པའི་སྙིང་པོ་དབུགས་མི་འབྱུང་བར་བརྗོད་ཅིང་ལུས་དང་སེམས་ལས་སུ་མི་རུང་བ་སྤངས་ཏེ་དེ་
གཉིས་མཐུན་པར་འཇུག་པར་བྱའོ། །དེ་ལ་རང་གི་སེམས་བརྟག་པའི་སྙིང་པོ་ནི་འདི་ལྟ་སྟེ། རང་བཞིན་གྱིས་གྲུབ་པའོ། །ཨོཾ་ཙིཏྟ་པྲ་ཏི་བེ་དྷཱཾ་ཀ་རོ་མི། རང་གི་སེམས་བརྟག་པ་ཡང་སྐབས་འདིར་ནི་གང་ཟག་དང་ཆོས་ལ་བདག་མེད་པར་བསྟན་པའི་གཏན་ཚིགས་ཀྱིས་བདག་
དང་བདག་གིར་འཛིན་པ་དང་། ཕུང་པོ་དང་། ཁམས་དང་། སྐྱེ་མཆེད་དང་། གཟུང་བ་དང་འཛིན་པའི་དྲི་མ་སྤངས་ཏེ། ཅུང་ཟད་ཅིག་ནམ་མཁའ་དང་འདྲ་བར་དམིགས་ནས་ཟླ་བ་ཚེས་གཅིག་གི་ཤས་འདྲ་བ་ནང་སྟོང་པ་ཟླ་བའི་དཀྱིལ་འཁོར་གྱི་རྣམ་པར་མོས་པར་བྱའོ། །གང་
གི་ཕྱིར་བཅོམ་ལྡན་འདས་དོན་ཐམས་ཅད་གྲུབ་པའི་བྱང་ཆུབ་སེམས་དཔའ་སེམས་དཔའ་ཆེན་པོས་མངོན་པར་རྟོགས་པའི་ཚེ་ན། འོག་ནས་འབྱུང་བའི་ཆོ་གས་བྱང་ཆུབ་ཀྱི་སེམས་བསྐྱེད་ནས། དེ་བཞིན་གཤེགས་པ་རྣམས་ལ་ཟླ་བའི་དཀྱིལ་འཁོར་གྱི་རྣམ་པ་གང་ཡིན་པ་
དེ་ནི་ཟླ་བའི་དཀྱིལ་འཁོར་ཉིད་དུ་མཐོང་ངོ་། །ཞེས་གསོལ་བའི་ཕྱིར་རོ། །འདིར་ཟླ་བའི་དཀྱིལ་འཁོར་གྱི་རྣམ་པ་ཟླ་བའི་དཀྱིལ་འཁོར་ཉིད་དུ་མཐོང་ངོ་ཞེས་བྱ་བའི་ཚིག་གིས་ན། ཟླ་བའི་དཀྱིལ་འཁོར་གྱི་རྣམ་པ་ཟླ་བའི་དཀྱིལ་འཁོར་མ་རྫོགས་པ་ཡིན་པར་མངོན་ཏེ། གང་གི་
ཕྱིར་ཟླ་བའི་དཀྱིལ་འཁོར་ཉིད་དུ་མཐོང་ངོ་ཞེས་ཕྱིས་སྨྲས་པའི་ཕྱིར་རོ། །དེའི་དགོངས་པ་ནི་འདི་ལྟ་སྟེ། འཁོར་བའི་བག་ཆགས་ཀྱི་རྡུལ་གྱི་ཁུག་རྣ་ཐམས་ཅད་སྤངས་པས། སེམས་དེ་ཡོངས་སུ་དག་ནས་ཐོག་མ་མེད་པའི་དུས་ནས་བསགས་པའི་དཀར་པོའི་ཆོས་ཀྱི་བག་
ཆགས་ཡོངས་སུ་མ་རྒྱས་པ་དང་ལྡན་པས། ཟླ་བའི་དཀྱིལ་འཁོར་གྱི་རྣམ་པ་ཡོངས་སུ་མ་རྫོགས་ཏེ། བསོད་ནམས་དང་ཡེ་ཤེས་ཀྱི་ཚོགས་རྫོགས་པར་མ་བྱས་ཀྱི་བར་དུ་ཟླ་བའི་དཀྱིལ་འཁོར་གཅིག་ཁོ་ནར་ཡོངས་སུ་རྫོགས་པར་སྣང་བར་མི་འགྱུར་རོ། །འདིས་ཀྱང་འབྲས་བུ་

དང་བཅས་པའི་ཡེ་ཤེས་ཀྱིས་ཆོས་དཀར་པོ་ཐམས་ཅད་ཀྱི་བག་ཆགས་ཀྱི་གནས་ཐོག་མ་མེད་པའི་དུས་ནས་བྱུང་བར་བསྟན་ཏོ། །དེ་ནས་རང་བཞིན་གྱིས་འོད་གསལ་བའི་ཡེ་ཤེས་ཀྱི་ཟླ་བ་དེ་ཡོངས་སུ་རྫོགས་པར་འགྱུར་བའི་མཚན་ཉིད་བརྟན་པར་བྱེད་པའི་རྒྱུ་བྱང་ཆུབ་
ཀྱི་སེམས་རང་བཞིན་གྱིས་གྲུབ་པའི་སྙིང་པོ་འདིས་སྐྱེད་ཅིག །ཨོཾ་བོ་དྷི་ཙིཏྟོ་པཱ་ད་ཡཱ་མི། སྙིང་པོའོ། །དེ་ལྟར་བྱས་ནས་ཟླ་བའི་དཀྱིལ་འཁོར་གྱི་རྣམ་པ་འོད་ཟེར་མང་པོ་འཕྲོ་བའི་སྦྱོར་བས། སྟོན་ཀའི་ཟླ་བ་ཉ་གང་བའི་དཀྱིལ་འཁོར་ལྟར་རྙོག་པ་མེད་པར་མོས་པར་བྱ་སྟེ།
ཤིན་ཏུ་ཡུན་རིང་དུ་རབ་ཏུ་གསལ་བར་སྣང་བ་དང་དྲན་པ་དང་། སྲོག་གཉིས་བསྡམས་ནས་ཇི་སྲིད་འདོད་པར་བསམ་མོ། །འདིས་ནི་རྒྱུའི་གནས་སྐབས་སུ་བསྡུས་པ་ཀུན་དུ་བཟང་པོའི་ཡེ་ཤེས་ཀྱི་སའི་མཐར་ཐུག་པ་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་
རྫོགས་པར་བྱིན་གྱིས་བརླབས་པར་རིག་པར་བྱའོ། །རྟོག་པ་ཐམས་ཅད་བསྡུས་པ་ལས་ནི། ཟླ་བའི་དཀྱིལ་འཁོར་ཡོངས་སུ་རྫོགས་པའི་སྟེང་དུ། ཟླ་བ་ཡོངས་སུ་རྫོགས་པ་གཉིས་པ་བསྒོམ་པར་བཤད་པ་གང་ཡིན་པ་དེ་ནི་མངོན་པར་རྫོགས་པར་བྱང་ཆུབ་པའི་བྱིན་གྱིས་
བརླབས་པར་བཤད་པས་འདུལ་བའི་སྐྱེ་བོའི་དབང་གིས་གཞན་དུ་བརྟག་པ་ཉིད་དེ། དེར་ནི་རང་གི་སེམས་རྟོག་པས་ཀུན་ནས་ཉོན་མོངས་པའི་བག་ཆགས་ཐམས་ཅད་རྣམ་པར་དག་ཅིང་། ས་དང་ཕ་རོལ་ཏུ་ཕྱིན་པའི་བག་ཆགས་ཡོངས་སུ་རྫོགས་པའི་གནས་སྐབས་ཟླ་བའི་
དཀྱིལ་འཁོར་སྔ་མས་བྱིན་གྱིས་བརླབས་སོ། །ཟླ་བ་གཉིས་པས་ནི་དེ་བཞིན་གཤེགས་པ་རྣམས་ཀྱི་མངོན་པར་རྟོགས་པ་ཐོབ་པའི་བྱང་ཆུབ་ཀྱི་ངོ་བོ་ཉིད་ཀྱི་སེམས་ཀྱི་མཚན་མར་བསྟན་ཏོ། །དེ་ལ་གནས་པའི་རྡོ་རྗེས་ནི་དེའི་འོག་ཏུ་འབྱུང་བའི་ཡེ་ཤེས་རྣམ་པར་དག་པ་ལྔ་
རྣམས་སུ་བྱིན་གྱིས་བརླབས་ཏེ་འདི་སྐད་དུ་ཡང་དེ་ཉིད་ལས། སྙིང་པོ་བློ་ཅན་གྱིས་བླངས་ནས། །རང་གི་སེམས་ནི་བརྟག་པར་བྱ། །དེ་ནི་སྐད་ཅིག་མཉམ་གཞག་ལ། །ཟླ་བའི་དཀྱིལ་འཁོར་བཞིན་དུ་བལྟ། །དེ་ནི་སེམས་ཀྱི་རང་བཞིན་ནམ། །ཀུན་ནས་ཉོན་མོངས་ས་བོན་ཡིན། །

དགེ་དང་མི་དགེ་བ་ཡི་སེམས། །འདི་ནི་ཀུན་གཞི་ས་བོན་ཡིན། །ཆོས་ཀྱི་མཐར་ནི་རྟོགས་ནས་སུ། །ཕ་རོལ་ཕྱིན་དྲུག་བག་ཆགས་བསགས། །ཡོངས་སུ་དག་པའི་སེམས་ཆེན་དེ། །ཉོན་མོངས་ཀུན་གཞི་མ་ཡིན་གྱི། །བསོད་ནམས་ཡེ་ཤེས་ཚོགས་
ཆེན་པོ། །ཡུན་རིང་དུ་ནི་བསགས་པ་སྟེ། །ཇི་ལྟར་ཟླ་བ་གང་བ་བཞིན། །དག་ཅིང་དང་བ་དྲི་མ་མེད། །དེ་ལྟར་ཚོགས་ནི་རྫོགས་པའི་ཕྱིར། །རང་སེམས་ཟླ་བ་གང་བ་བཞིན། །ཡོད་པ་མ་ཡིན་དངོས་མེད་ཕྱིར། །ཟླ་བ་ལྟར་ཡང་མི་བཤད་དེ། །བསོད་ནམས་ཡེ་ཤེས་
ཚོགས་ཆེན་དག །རྫོགས་པས་ཟླ་བ་ལྟ་བུར་བཤད། །རང་སེམས་ཟླ་བའི་དཀྱིལ་འཁོར་ལ། །ལེགས་པར་བྱས་པའི་ཚོགས་མཐོང་ནས། །དགའ་ཞིང་མགུ་བ་སྐྱེས་པ་སྟེ། །ཡང་ནི་ཚིག་ཏུ་རབ་སྨྲས་པ། །མགོན་པོ་བཅོམ་ལྡན་བདག་གིས་ནི། །ཉོན་མོངས་དྲི་མ་
ཐམས་ཅད་དང་། །གཟུང་དང་འཛིན་པ་སྤངས་པ་ཡིས། །རང་སེམས་ཟླ་བའི་དཀྱིལ་འཁོར་མཐོང་། །དེ་ནས་སངས་རྒྱས་ཀུན་གསུངས་པ། །སྔ་ནས་མ་སྐྱེས་སེམས་བཟང་འདི། །འོན་ཀྱང་གློ་བུར་གྱིས་ཉོན་མོངས། །རྫོགས་པའི་བྱང་ཆུབ་སེམས་སྦྱང་བའི། །
ཟླ་བའི་དཀྱིལ་འཁོར་དབུས་སུ་ནི། །ཉེས་པ་ཐམས་ཅད་རྣམ་སྤངས་པ། །བྱང་ཆུབ་སེམས་ཀྱང་རྣམ་པར་རྟོགས། །ཀུན་དུ་དགའ་བའི་སྙིང་པོ་འདིས། །སྙིང་པོ་དག་པ་བླངས་ནས་ཀྱང་། །ཟླ་བའི་དབུས་སུ་རྣམ་བརྟགས་ན། །ཟླ་བའི་དཀྱིལ་འཁོར་གཉིས་པ་ཡང་། །
ཟླ་བའི་དཀྱིལ་འཁོར་དབུས་ན་མཐོང་། །དེ་ནས་སངས་རྒྱས་ཀུན་གསུངས་པ། །བྱང་ཆུབ་སེམས་འདི་བསྟན་པའོ། །ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །དེ་བས་ན་རྟོག་པ་ཐམས་ཅད་བསྡུས་པ་ལས་གསུངས་པའི་མངོན་པར་རྫོགས་པར་བྱང་ཆུབ་
པའི་ཚུལ་ཡང་དགོངས་པ་གཞན་ཡིན་ལ། འདིར་ཡང་གཞན་དུ་དགོངས་པས་ན་ཉེས་པ་མེད་པའོ། །དེ་ནས་ཀུན་ཏུ་བཟང་པོའི་སེམས་བསྐྱེད་པ། ཟླ་བའི་དཀྱིལ་འཁོར་དེ་ལ་རྡོ་རྗེའི་ཚིག་གི་སྙིང་པོ་འདི་བརྗོད་ལ། རྡོ་རྗེ་རྩེ་ལྔ་པ་ཁ་གཉིས་པ་བསམས་ནས། དེ་ཡང་ཤིན་དུ་

གསལ་བ་ཀུན་དུ་སྣང་བར་བྱའོ། །དེ་ལ་སྙིང་པོ་འདིའོ། །ཨོཾ་ཏིཥྛ་བཛྲ། འདིས་ཀྱང་མངོན་པར་བྱང་ཆུབ་པས་ཐོབ་པར་བྱ་བའི་གནས་སྐབས་ཐོབ་པ་ན་ཐམས་ཅད་མཁྱེན་པ་ཞེས་བྱ་བའི་ཡན་ལག་ལྔའི་མཚན་ཉིད་ཀྱིས་མཚན་པ་དེ་བཞིན་གཤེགས་པའི་ས་ལ་གནས་པ་བསྟན་ཏོ། །
དེ་ལྟར་འདི་ནི་ལོག་པར་ལྟ་བའི་རི་ཐམས་ཅད་འཇོམས་པ་ལ་མཁས་པའི་ཡེ་ཤེས་རྡོ་རྗེ་རྩེ་མོ་དབུས་མ་ནི་ཆོས་ཀྱི་དབྱིངས་རྣམ་པར་དག་པའི་མཚན་མར་བསྟན་ཏོ། །དེ་ལས་གཞན་པའི་གཞི་རྣམས་ནི་མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་གྲུབ་པའི་
ཡེ་ཤེས་སུ་བསྟན་ཏོ། །ཁ་གཉིས་ཀྱིས་ནི་དེ་བཞིན་གཤེགས་པའི་ཡེ་ཤེས་ཀྱི་སྣང་བ་དེ་ཕྱོགས་བཅུར་རྒྱས་པའི་མཐུ་བསྟན་པའོ། །དེ་ནས། ཨོཾ་བཛྲ་ཨཱཏྨ་ཀོ྅ཧཾ། ཞེས་བྱ་བའི་སྙིང་པོ་འདི་ཡིད་ལ་བྱས་ཏེ། དེ་བཞིན་གཤེགས་པ་ཐམས་ཅད་ཀྱི་ཀུན་དུ་བཟང་པོའི་སེམས་
བསྐྱེད་པའི་རྡོ་རྗེ་དེ་ལ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་དབྱིངས་སུ་ཞུགས་ནས། རྡོ་རྗེ་དེ་ཤིན་ཏུ་ཡུན་རིང་དུ་བསམས་པས་རབ་ཏུ་གསལ་བར་སྣང་བར་རབ་ཏུ་བརྟན་པར་བྱ་སྟེ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་
དབྱིངས་ནི་བདག་ཡིན་ནོ་སྙམ་དུ་ང་རྒྱལ་བྱའོ། །སྐུའི་དབྱིངས་ཀྱང་འདིར་དེ་བཞིན་གཤེགས་པའི་སྐུ་མང་པོ་རྣམས་སོ། །སངས་རྒྱས་ཀྱི་གསུང་བཀོད་པའི་རྒྱན་སོ་སོར་སྣང་བ་ཡང་འདིར་གསུང་གི་དབྱིངས་སོ། །ཐུགས་ཀྱི་དབྱིངས་ནི་ཐུགས་ཀྱི་ཕྱག་རྒྱར་གྱུར་པ་རལ་གྲི་དང་།
འཁོར་ལོ་དང་། རྡོ་རྗེ་དང་། རིན་པོ་ཆེ་ལ་སོགས་པའི་མཚན་ཉིད་དུ་རིག་པར་བྱའོ། །དེ་བས་ན་སྒོམ་པ་ཤིན་ཏུ་བརྟན་པར་བྱ་བ་བསྟན་པ་འདིས་ནི་རྣམ་པ་ཐམས་ཅད་མཁྱེན་པའི་གནས་མི་གནས་པའི་མྱ་ངན་ལས་འདས་པའི་མཚན་ཉིད་དུ་བྱིན་གྱིས་བརླབས་པར་རིག་པར་བྱའོ། །དེ་
ནས་སྙིང་པོ་འདི་བརྗོད་དོ། །ཡེ་ཤེས་ཀྱི་རྡོ་རྗེ་ཟླ་བའི་དཀྱིལ་འཁོར་ལ་གནས་པ་དེ་ཉིད་འོད་ཟེར་མང་པོ་འཕྲོ་བ་དང་འདུ་བའི་ཚུལ་གྱིས་བཅོམ་ལྡན་འདས་རྣམ་པར་སྣང་མཛད་ཀྱི་སྐུའམ། སངས་རྒྱས་བཅོམ་ལྡན་འདས་ཤཱཀྱ་ཐུབ་པའི་སྐུ་ཉི་མའི་འོད་ཀྱི་དཀྱིལ་འཁོར་གྱིས་འཇིག་

རྟེན་གྱི་ཁམས་མཐའ་ཡས་པར་ཁྱབ་པར་བདག་ཉིད་གྱུར་པར་རབ་ཏུ་བརྟག་གོ། །དེ་ལ་སྙིང་པོ་ནི་འདིའོ། །ཨོཾ་སརྦ་ཏ་ཐཱ་ག་ཏ་སཱ་ཐཱ་ཨ་ཧཾ། ཞེས་བྱ་བ་འདིས་ཀྱང་ཡེ་ཤེས་ཀྱི་ཀུན་དུ་འོད་ཀྱིས་རྒྱུ་མཐུན་པར་གྱུར་པ་དེ་བཞིན་གཤེགས་པ་ཐམས་ཅད་ཀྱི་སྐུ་དང་
གསུང་དང་ཐུགས་རྣམས་བསྡུས་པར་བལྟའོ། །དགོངས་པ་འདི་དག་ཐམས་ཅད་ཀྱང་རྡོ་རྗེ་རྩེ་མོ་ཐེག་པ་ཆེན་པོ་མངོན་པར་རྟོགས་པར་རབ་ཏུ་དབྱེ་བ་ལས་གསལ་བར་བསྟན་ཏེ། སྲ་ཞིང་སྡུག་ལ་རབ་ཏུ་དག །ནམ་མཁའ་དང་ནི་མཚུངས་མཉམ་པ། །གནས་ངན་ལེན་པ་
ཀུན་ལས་གྲོལ། །རྣམ་པར་རྟོག་པ་སྤངས་པའི་མཆོག །ཉོན་མོངས་དྲི་མ་ཐམས་ཅད་དག །ཟླ་བ་ལྟ་བུ་སྔོན་མཐོང་བ། །བྱམས་དང་སྙིང་རྗེ་ལས་བྱུང་ཞིང་། །སེམས་ཅན་ལ་ནི་ཕན་མཛད་ཅིང་། །བྱང་ཆུབ་སེམས་ཆེན་རབ་ཏུ་དག །སངས་རྒྱས་བྱང་ཆུབ་སྐྱོན་
མེད་པ། །དགེ་བའི་ཆོས་རྣམས་ཀུན་རྫོགས་ཤིང་། །ཉོན་མོངས་ཐམས་ཅད་རྣམ་པར་གྲོལ། །སྟུག་པོའི་དབུས་ན་ཟླ་ཆེན་པོ། །བྱང་ཆུབ་སེམས་ནི་གཉིས་པ་སྟེ། །བསྐལ་པ་གྲངས་མེད་གསུམ་དུ་ནི། །བྱང་ཆུབ་བསྒྲུབས་པས་