Luận tạng Tây Tạng (Tengyur) — Tập 45

་དཔའ་འཐོབ་པར་འགྱུར། །གཞན་དུ་དུས་མིན་འཆི་འགྱུར་ཞིང་། །དམྱལ་བ་རྣམས་སུ་རྟག་ཏུ་བསྲེག །སངས་རྒྱས་བྱང་ཆུབ་སེམས་དཔའ་དང་། །སྔགས་ཀྱི་སྤྱོད་པ་མཆོག་སྤྱོད་པས། །
འདོད་པའི་ལོངས་སྤྱོད་ཀུན་བརྟེན་ན། །ཆོས་ཀྱི་ཡི་གེ་མཆོག་ཐོབ་འགྱུར། །ཆགས་པའི་ཡེ་ཤེས་རྟག་བསྒྲུབས་པས། །འདོད་པའི་ལོངས་སྤྱོད་ལྔ་བརྟེན་ཞིང་། །བྱང་ཆུབ་དཔའ་བོ་ཆགས་པ་དང་། །བྱང་ཆུབ་སེམས་དཔའ་མཉེས་པར་བྱ། །གཟུགས་སྒྲ་དྲི་ལ་
སོགས་པ་ལ། །སྨད་པ་དག་ཏུ་མི་བྱ་སྟེ། །རྡོ་རྗེ་འཆང་རྒྱལ་དེ་ཉིད་ནི། །ཐམས་ཅད་དུ་ནི་ཡང་དག་གནས། །གཟུགས་སྒྲ་རོ་དང་རེག་གི་རྣམས། །དེ་བཞིན་རབ་འབྲིང་ཐ་མ་སྟེ། །ཁྱད་པར་རྣམ་གསུམ་ཤེས་བྱས་ནས། །རྡོ་རྗེ་སེམས་ལ་མཆོད་པར་བྱ། །སྔགས་
པས་རྣམ་པ་འདི་དག་གིས། །དམ་ཚིག་སྡོམ་པ་བསྲུང་བྱས་ན། །ཚེ་འདི་ཉིད་ལ་འདི་དག་གིས། །རྡོ་རྗེ་གསུམ་ཉིད་ཐོབ་པར་འགྱུར། །གལ་ཏེ་གཏི་མུག་ཅན་གྱིས་འདས། །དེ་ལ་དངོས་གྲུབ་མི་འབྱུང་ཞིང་། །རིམས་དང་དུག་དང་ནད་བགེགས་ཀྱིས། །བསད་ནས་
སེམས་ཅན་དམྱལ་བར་འགྲོ། །སངས་རྒྱས་བྱང་ཆུབ་སེམས་དཔའ་ཡང་། །བྱིན་གྱིས་རློབ་པར་མི་མཛད་ཅིང་། །མེ་ཏོག་བདུག་སྤོས་ལ་སོགས་རྣམས། །ཕུལ་ཡང་བཞེས་པར་མི་མཛད་དོ། །འཇིག་རྟེན་འདིར་ཡང་སྡུག་བསྔལ་ཞིང་། །ཕ་རོལ་ཏུ་ཡང་
དམྱལ་བར་འགྲོ། །དམ་ཚིག་སྤྱོད་པ་ཉམས་པ་ཡིས། །གཏི་མུག་ཅན་གྱིས་གྲུབ་མི་འཐོབ། །སྔར་སྨོས་སྡོམ་ལ་གནས་པ་ནི། །རྟག་པར་མི་ཕྱེད་བརྟུལ་ཞུགས་ཀྱིས། །ལུས་དང་ངག་ཡིད་རྡོ་རྗེ་ཡི། །སྒྲུབ་པ་དག་ནི་བརྩམ་པར་བྱ། །ནགས་ཚལ་ཆེན་

པོའི་ཕྱོགས་དག་དང་། །དབེན་པ་ཆེན་པོའི་གནས་དག་དང་། །རི་བོ་རིལ་སུལ་རྣམས་སུ་ནི། །དངོས་གྲུབ་རྟག་ཏུ་ཐོབ་པར་འགྱུར། །སེམས་དཔའ་ཡི་ནི་སྐྱིལ་ཀྲུང་གིས། །འཇམ་པའི་སྟན་ལ་འདུག་ནས་ནི། །ཞེ་སྡང་རྡོ་རྗེའི་ཏིང་འཛིན་དུ། །གནས་ནས་
གནས་བསྲུང་རྣམ་པར་བསམ། །གཟུགས་ཆེན་འབར་བ་འཇིགས་བྱེད་པའི། །ཁྲོ་བོ་བཅུ་དག་ཕྱུང་ནས་ནི། །ཧཱུཾ་ལས་སྐྱེས་པའི་ཉི་མའི་སྟེང་། །སྨད་ནི་རྩེ་མོར་རྣམ་པར་བསམ། །ཕྱོགས་བཅུའི་དཀྱིལ་འཁོར་ཕྱོགས་རྣམས་སུ། །རིམ་པ་བཞིན་དུ་ཀུན་དུ་བསམ། །བགེགས་
རྣམས་ཐམས་ཅད་གཞིག་པའི་ཕྱིར། །གནོད་མཛེས་བཀའ་སྩལ་ཕུར་བུས་གདབ། །ཉི་མའི་དཀྱིལ་འཁོར་དབུས་གནས་པའི། །དབྱར་གྱི་སྤྲིན་དཔུང་ལྟ་བུ་སྟེ། །བསྐལ་པའི་མེ་དཔུང་བཞིན་དུ་འབར། །གཡས་བརྐྱང་བར་ནི་རབ་ཏུ་གནས། །སྨིན་མཚམས་ཁྲོ་གཉེར་དམར་
བའི་སྤྱན། །ཞལ་གསུམ་མཆེ་གཙིགས་རྣམ་པར་སྒྱུར། །ཕྱག་གཉིས་ཧཱུཾ་གི་རྒྱ་བཅིངས་ཏེ། །དཔའ་བོ་རྡོ་རྗེ་དྲིལ་བུ་འཛིན། །གཡས་གཉིས་ལྕགས་ཀྱུ་རལ་གྲི་བསྣམས། །གཡོན་གཉིས་དགྲ་སྟ་ཞགས་པ་འཛིན། །འདི་འདྲའི་གཟུགས་ནི་བསམ་བྱས་ནས། །རང་གིས་
དེ་ལ་བཀའ་སྩལ་ཏོ། །ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཧཱུཾ། ཨཱ་ན་ཡ་ཧོ། བྷ་ག་ཝཱན། བི་དྱ་རཱ་ཛཱ་ཡ་ཧཱུཾ་ཕཊ། ཁྲོ་བོའི་རྒྱལ་པོ་འདི་དག་གིས། །བགེགས་ནི་ཀུན་ནས་རྣམ་པར་འཇིག །བློ་ལྡན་རབ་ཏུ་སྦྱོར་བ་ཡིས། །ཆོ་ག་བཞིན་དུ་ཕུར་ཀུན་
གདབ། །རྡོ་རྗེ་བདུད་རྩི་རྒྱལ་ཆེན་པོ། །རྡོ་རྗེ་ཕུར་བུ་ཉིད་གནས་པ། །ཨུཏྤལ་སྔོན་པོའི་འདབ་འདྲ་བ། །འབར་བའི་ཕྲེང་བ་འཁྲིགས་པའི་འོད། །ལྟེ་བ་མན་ཆད་ཆ་རྣམས་ནི། །རྩེ་མོ་ལྟ་བུར་རྣམ་པར་བསྒོམ། །རོ་སྟོད་ཁྲོ་བོ་ལྟ་བུ་ཉིད། །ཞལ་གསུམ་ཕྱག་ནི་དྲུག་པ་
སྟེ། །བགེགས་ཀྱི་ཚོགས་ལ་འོག་ཏུ་གཟིགས། །དེ་ཡི་སྔགས་འདི་བརྗོད་བྱ་སྟེ། །རྡོ་རྗེ་ཕུར་བུ་ངེས་བཏབ་ན། །བགེགས་ལུས་ཤིན་ཏུ་མི་གཡོའོ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྚཱཾ་ཧཱུཾ་ཕཊ། ཀཱི་ལ་ཡ་ཀཱི་ལ་ཡ། སརྦ་པཱ་པཾ་ཕཊ་ཧཱུཾ་ཧཱུཾ་ཧཱུཾ་བཛྲ་ཀཱི་ལ་ཡ་བཛྲ་དྷཱ་རོ་ཨཛྙཱ་

པ་ཡ་ཏི། ཀཱ་ཡ་བཱཀ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། །རྡོ་རྗེ་ཐོ་བ་ཕྱག་བསྣམས་མཆོག །གནོད་མཛེས་རྒྱལ་པོ་རྣམ་པར་བསྒོམ། །ཧཱུཾ་བརྗོད་འབར་བའི་ལྟ་བས་ནི། །བགེགས་རྣམས་ཐམས་ཅད་ཕུར་བུས་གདབ། །ཕྱོགས་རྣམས་ཀུན་དུ་རྡོ་རྗེའི་མེ། །རྣམ་པར་འཕྲོ་བ་རྣམ་
བསམས་ཏེ། །མ་རུངས་པ་ནི་ཚིག་བསམས་ན། །ཕྱོགས་བཅུ་དག་ཏུ་འབྲོས་པར་འགྱུར། །ཕྱོགས་མཚམས་ཕུར་བུས་བཏབ་ནས་ནི། །སྟེང་འོག་ཡང་དག་བྱིན་གྱིས་བརླབ། །དམ་པའི་དོན་དུ་བསྒོམ་པ་ནི། །སྲིད་གསུམ་རང་བཞིན་མེད་པ་སྟེ། །དངོས་པོ་མེད་
པ་བསྒོམ་པའི་དངོས། །བསྒོམ་པར་བྱ་བ་བསྒོམ་པ་མིན། །དེ་ལྟར་དངོས་པོ་དངོས་མེད་པས། །བསྒོམ་པ་དམིགས་སུ་མེད་པའོ། །དངོས་པོ་བརྟན་གཡོ་ལ་སོགས་ཀུན། །ཚིགས་བཅད་འདི་ཡིས་སྟོང་གྱུར་ནས། །ཆོ་ག་འདི་ཡི་སྦྱོར་བ་ཡིས། །ཡེ་ཤེས་ས་ནི་
བྱིན་གྱིས་བརླབ། །བྱང་ཆུབ་རྡོ་རྗེ་དམིགས་ནས་ནི། །ཟླ་བའི་དཀྱིལ་འཁོར་ལ་འདུག་ནས། །ནམ་མཁའི་ཁམས་ཀུན་ཁྱབ་པ་ཡི། །ལྷ་མོ་མཱ་མ་ཀཱི་ནི་བསམ། །ནམ་མཁའ་རྡོ་རྗེ་དབུས་གནས་པ། །དུང་དང་ཀུན་ད་ཟླ་འདྲ་ཡི། །ཡེ་ཤེས་བདུད་རྩི་ལས་བྱུང་བ། །
ས་ཡི་ཁམས་ནི་བྱིན་གྱིས་བརླབ། །ཆུ་ཞེང་དཔག་ཚད་བྱེ་བ་སྟེ། །དང་ལ་རང་བཞིན་དྲི་མ་མེད། །འོད་ཟེར་རྣམ་ལྔས་ཀུན་དུ་འཁྲིགས། །སངས་རྒྱས་རྡོ་རྗེ་ཅན་གྱི་གནས། །དེ་དབུས་བྷྲཱུཾ་ནི་གནས་པ་ལ། །གསེར་གྱི་རི་བོ་འདྲ་བ་ཡི། །སངས་རྒྱས་ཀུན་གྱི་གཞལ་མེད་
ཁང་། །འཁོར་ལོས་སྒྱུར་བ་བསྒོམ་པར་བྱ། །ལས་ཀྱི་རྡོ་རྗེ་སྟན་ཉིད་དུ། །ཤེས་རབ་ལྡན་པས་དེའི་འོག་བསམ། །ནམ་མཁའི་དབྱིངས་ཀྱི་དབུས་གནས་པ། །བདེ་གཤེགས་ཀུན་གྱི་ཕོ་བྲང་ངོ་། །རིན་ཆེན་བཞི་དངོས་མཆོད་རྟེན་ནི། །འོད་ཟེར་ཕྲེང་བས་རྣམ་པར་བརྒྱན། །ཡེ་
ཤེས་རྒྱ་མཚོ་དུས་གསུམ་གྱི། །གནས་སུ་དེ་ནི་རྣམ་པར་བསམ། །གྲུ་བཞི་པ་ལ་སྒོ་བཞི་པ། །སྒོ་རྒྱན་བཞི་དང་ཡང་དག་ལྡན། །དྲིལ་བུ་དར་དཔྱངས་འཕེན་ལ་སོགས། །སྒོ་ཁྱུད་ཀྱིས་ནི་རྣམ་པར་བརྒྱན། །གྲྭ་མཚམས་དག་ནི་ཐམས་ཅད་དུ། །རྡོ་རྗེ་རིན་ཆེན་རྣམས་ཀྱིས་སྤྲས། །

ཟླ་གམ་ཆུན་འཕྱང་གིས་བརྒྱན་པ། །ཉི་མ་ཟླ་ལ་སོགས་པས་བརྒྱན། །བླ་རེ་བྲས་པས་མཛེས་གྱུར་ཅིང་། །ན་བཟའ་ཕྲེང་བ་སོགས་ཀྱིས་བརྒྱན། །ཐིག་སྐུད་བཞི་ནི་ཡོངས་བཏབ་པས། །ཀ་བ་མཆོག་བརྒྱད་ཀུན་དུ་གནས། །དེ་དབུས་འཁོར་ལོ་དམིགས་བྱ་
བ། །ཀུན་ནས་ཡོངས་སུ་ཟླུམ་པོ་སྟེ། །མདོར་ན་སངས་རྒྱས་ཐམས་ཅད་ཀྱི། །རང་གི་གནས་སུ་རྣམ་པར་བསམ། །རྡོ་རྗེ་ལྷ་མོ་བཞི་རྣམས་ཀྱང་། །འཁོར་ལོའི་གྲྭར་ནི་རྣམ་པར་བསྒོམ། །གཤིན་རྗེ་གཤེད་སོགས་སྒོར་དམིགས་ཏེ། །ས་སྙིང་ལ་སོགས་བསྒོམ་པར་བྱ། །
ཉི་མའི་དཀྱིལ་འཁོར་དབུས་གནས་པ། །སེམས་ཀྱི་རྡོ་རྗེ་རང་བདག་ཉིད། །ཞལ་གསུམ་ཕྱག་དྲུག་ལྟ་བུ་ནི། །སངས་རྒྱས་དཀྱིལ་འཁོར་དབུས་སུ་གནས། །ལུས་དང་ངག་ཡིད་རྡོ་རྗེ་ཡི། །མཚན་ཉིད་དམ་པའི་དོན་ཉིད་དེ། །ཚུལ་བཞིན་རྣལ་འབྱོར་པས་དཔྱད་ནས། །སྔགས་
འདི་རབ་ཏུ་བརྗོད་པར་བྱ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ནམ་མཁའ་བཞིན་དུ་བལྟ་བར་བྱ། །ནམ་མཁའ་བསྟན་དུ་མེད་པ་ལྟར། །བདག་ཉིད་རང་བཞིན་མེད་མཐོང་ནས། །ཡི་གེའི་རྣམ་པ་བསྒོམ་པར་བྱ། །བླ་འོག་དབུས་ནི་རིམ་བཞིན་དུའོ། །བདག་ཉིད་ཡི་
གེ་འབྲུ་གསུམ་གཟུགས། །སངས་རྒྱས་དཀྱིལ་འཁོར་དབུས་ཉིད་དུ། །ཁ་དོག་གསུམ་དུ་བསྐྱེད་ནས་ནི། །ཉི་ཟླ་པདྨ་ཡང་དག་གནས། །ཨོཾ་ཨཱཿཧཱུཾ། དང་བའི་ཟླ་བ་འདྲ་བར་ནི། །ཡི་གེ་འབྲུ་གསུམ་ཞུ་བར་བརྟག །ཡེ་ཤེས་འོད་ཟེར་རྣམ་འཕྲོས་པས། །རྒྱུད་དྲུག་
གནས་པའི་སེམས་ཅན་དང་། །སངས་རྒྱས་རྣམས་ཀྱི་སྐུ་གསུང་ཐུགས། །བསྡུ་བའི་སྦྱོར་བས་ཀུན་བསྡུས་ནས། །རང་བཞིན་མེད་པར་མོས་པ་ཡིས། །བྱང་ཆུབ་སེམས་ལ་གཞུག་པར་བྱ། །ཨོཾ་དྷརྨྨཱ་དྷཱ་ཏུ་བཛྲ་སྭ་བྷཱ་བ་ཨཱཏྨ་ཀོ྅ཧཾ། བྱང་ཆུབ་སེམས་དེ་ཀུན་དུ་དག །དྲི་མེད་
ཟླ་བ་ལྟ་བུར་གནས། །ཀུན་བསྡུས་བདུད་རྩིའི་སྦྱོར་བ་ཡིས། །གཟུགས་ཀྱི་ངོ་བོར་རྣམ་པར་བསྒོམ། །སྔགས་ཀྱི་སྐུ་ནི་མཐར་ཕྱིན་པ། །སངས་རྒྱས་ཀུན་གྱི་རང་བཞིན་དག །ཕུང་པོ་ཁམས་སུ་རྣམ་བསམས་ཏེ། །སྐྱེ་མཆེད་ལ་སོགས་རྣམས་ཀྱིས་བརྒྱན། །གཟུགས་ཀྱི་

ཕུང་པོ་རང་བཞིན་དུ། །རྣམ་པར་སྣང་མཛད་རབ་ཏུ་གནས། །ཚོར་བ་དཀོན་མཆོག་དཔལ་དང་ནི། །འདུ་ཤེས་སུ་ནི་སྣང་མཐའ་ཡས། །འདུ་བྱེད་ཐམས་ཅད་གདོན་མི་ཟ། །རྣམ་པར་ཤེས་སུ་མི་བསྐྱོད་གནས། །མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔར་
ནི་རབ་ཏུ་གྲགས། །ཨོཾ་སྭཱ་ཨཾ་ཧཱ་ཧཱུཾ། ས་ཡི་ཁམས་ནི་རྣམ་བསམས་པ། །ཕྱི་དང་ནང་གི་བརྟན་པ་སྟེ། །གྲུབ་པར་སྤྱན་ནི་བསམ་བྱས་ན། །སྲ་བ་ལྟ་བུར་བྱིན་གྱིས་རློབ། །ཆུ་ཁམས་མཱ་མ་ཀཱིར་བསམས་པ། །ཁུ་བ་ཁྲག་ནི་ཉིད་ཀྱི་རྒྱུ། །ལུས་ངག་སེམས་ཞེས་བརྗོད་པ་ལ། །
གང་བ་ཉིད་དུ་རྣམ་པར་གནས། །མེ་ཡི་ཁམས་སུ་རབ་སྦྱོར་བ། །གོས་དཀར་མོར་ནི་བལྟ་བར་བྱ། །ཀུན་དུ་མཆོག་རབ་འབར་བ་སྟེ། །དེ་ནི་འབར་བ་ལྟ་བུར་འབྱུང་། །རླུང་གི་ཁམས་ཀྱི་རང་བཞིན་དུ། །བློ་དང་ལྡན་པས་སྒྲོལ་མ་བསམ། །དེ་ནི་རླུང་ལྔ་འབྱུང་བ་སྟེ། །དེ་བཞིན་ཡིད་
ཀྱི་འགྲོ་བ་འགྲུབ། །ནམ་མཁའི་ཁམས་ཀྱི་རང་བཞིན་དུ། །ཀུན་དུ་བཟང་མོ་རབ་ཏུ་བརྟག །ནམ་མཁའ་དེ་ཡི་སྦྱོར་བས་ནི། །སངས་རྒྱས་ཀྱིས་ཀྱང་མི་གཟིགས་སོ། །ཕུང་པོ་ཁམས་ཀྱི་བྱེ་བྲག་ནི། །གཉིས་སུ་མེད་པའི་སྦྱོར་བར་གནས། །དེ་ལྟར་ཁམས་ཉིད་བསམ་བྱས་
ན། །དེ་ནི་ཀུན་དུ་ཚིམ་པར་འགྱུར། །མོ་ཧ་ར་ཏི། དྭེ་ཥ་ར་ཏི། རཱ་ག་ར་ཏི། བཛྲ་ར་ཏི། མིག་དང་རྣ་བ་སྣ་དང་ནི། །ལྕེ་དང་ལུས་དང་ཡིད་དག་ཏུ། །ས་ཡི་སྙིང་པོ་ལ་སོགས་སེམས། །སྐྱེ་མཆེད་དག་ཏུ་རྣམ་པར་བསྒོམ། །ཐླྷིཾ་ཨོཾ་ཨོཾ་ཨོཾ་ཧཾ་ཨོཾ། ནང་གི་སྐྱེ་མཆེད་རྣམས་སུ་ནི། །
ས་ཡི་སྙིང་པོ་ལ་སོགས་གནས། །ཕྱི་ཡི་སྐྱེ་མཆེད་རང་བཞིན་དུ། །གཟུགས་ལ་སོགས་པ་རབ་ཏུ་གནས། །ས་སྙིང་ལ་སོགས་སྔགས་རྣམས་ནི། །རྡོ་རྗེ་ཅན་གྱི་རྒྱུད་ལས་གསུངས། །འདི་དག་རྣམས་ནི་མ་གསུངས་ཕྱིར། །གཟུགས་ལ་སོགས་པ་མ་བྲིས་སོ། །ཕྱི་ཡི་ལོངས་
སྤྱོད་ཀྱིས་མཆོད་ཕྱིར། །གཟུགས་སྒྲ་དག་ཏུ་རབ་ཏུ་གནས། །བྱིན་གྱི་རླབས་ཀྱིས་བྱིན་བརླབས་ནས། །འདོད་པ་ལྔ་ནི་སྤྱད་པར་བྱ། །གཟུགས་ནི་མིག་གི་སྤྱོད་ཡུལ་གནས། །སྒྲ་ནི་རྣ་བའི་གནས་སུ་གནས། །དྲི་ནི་སྣ་དང་མཚུངས་ལྡན་ཏེ། །རོ་ནི་ལྕེ་ལ་རབ་ཏུ་གནས། །རེག་

ནི་ལུས་ཀྱི་བདེ་བར་གནས། །ཕྱི་ཡི་སྐྱེ་མཆེད་ཉིད་དག་ནི། །བྱང་ཆུབ་སེམས་དཔའི་དཀྱིལ་འཁོར་མཆོག །གཤིན་རྗེ་གཤེད་པོ་ལག་པ་གཡས། །གཞན་གྱིས་མི་ཐུབ་གཡོན་པ་སྟེ། །ཁ་ལ་རྟ་མགྲིན་བསྒོམ་པར་བྱ། །བདུད་རྩི་འཁྱིལ་པ་རྡོ་རྗེ་ལའོ། །ཡ་
མཱནྟ་ཀྲྀ་ཏ། པྲཛྙཱནྟ་ཀྲྀཏ། པདྨཱནྟ་ཀྲྀཏ། བིབྷྣཱནྟ་ཀྲྀཏ། དེ་ལྟར་དོན་ཀུན་རབ་ཞུགས་ནས། །སངས་རྒྱས་ཀུན་བདག་གཙོ་བོ་ནི། །བསྐྱེད་ནས་བྱིན་གྱིས་བརླབ་བྱ་སྟེ། །ཚིགས་སུ་བཅད་པས་གསོལ་བ་གདབ། །སྤྱི་བོའི་དབུས་གྱུར་བསམ་པ་ནི། །ཟླ་བའི་དཀྱིལ་འཁོར་གང་བ་སྟེ། །དེར་ནི་ཨོཾ་དཀར་
འོད་ལྡན་པའི། །འོད་ཟེར་ལྔ་ནི་འཕྲོ་བའོ། །དེ་ལས་ལྷ་མོ་རྣམས་འཕྲོ་བ། །བདག་པོའི་རབ་ཏུ་སྦྱོར་བ་སྟེ། །སྤྱན་ནི་རྣམ་པར་བསམ་བྱ་བ། །ནམ་མཁའི་ཁམས་ཀུན་གང་བར་རོ། །རྡོ་རྗེའི་སྐུ་ནི་རྣམ་བསམས་པ། །བར་སྣང་ཁམས་ནི་གང་བར་གནས། །དེ་དབུས་བདག་པོར་བསམ་
བྱ་ཞིང་། །བདག་གི་མདུན་ན་གནས་པར་རོ། །སུམ་ཅུ་རྩ་གཉིས་མཚན་འཆང་བ། །དཔེ་བྱད་བཟང་པོ་བརྒྱད་ཅུས་བརྒྱན། །སྔགས་པ་དེ་ཡིས་བཅོལ་བ་ནི། །ཚིགས་སུ་བཅད་པ་གཉིས་གཉིས་བརྗོད། །དཔལ་ལྡན་སངས་རྒྱས་སྐུ་འཆང་བ། །རྡོ་རྗེ་མི་ཕྱེད་གསུམ་
བསྒོམས་པས། །དེང་ཉིད་བྱིན་གྱིས་བརླབས་ནས་སུ། །རྡོ་རྗེ་སྐུས་ནི་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་ནི། །རྡོ་རྗེ་མི་ཕྱེད་གསུམ་བསྒོམས་ཏེ། །དེང་ཉིད་བྱིན་གྱིས་བརླབས་ནས་སུ། །རྡོ་རྗེ་སྐུས་ནི་མཛད་དུ་གསོལ། །སྤྱན་དང་ཐབས་ཅིག་ལྡན་པར་
ནི། །རྟག་པར་རྣམ་པར་བསྒོམ་པར་བྱ། །དེ་བཞིན་ཞུགས་པར་མོས་བྱས་ལ། །ཕུང་པོ་ལྔ་ནི་བྱིན་གྱིས་བརླབ། །སངས་རྒྱས་ཀུན་གྱི་སྐུ་ནི་གང་། །ཕུང་པོ་ལྔ་ལ་རབ་ཏུ་གང་། །སངས་རྒྱས་སྐུ་ཡི་རང་བཞིན་གྱིས། །བདག་ཀྱང་དེ་དང་འདྲ་བར་ཤོག །ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་
སྭ་བྷཱ་ཝ་ཨཱཏྨ་ཀོ྅ཧཾ། དེ་བཞིན་ལྕེ་དབུས་པདྨ་ལ། །ཨ་ལས་རྡོ་རྗེ་འདོད་ཆགས་ཏེ། །རབ་ཞུགས་དེ་ལ་གསོལ་གདབ་ཅིང་། །རྡོ་རྗེ་དག་ཏུ་བྱིན་གྱིས་བརླབ། །ཆོས་ཀྱི་ངག་ལམ་དཔལ་ལྡན་པ། །རྡོ་རྗེ་མི་ཕྱེད་གསུམ་བསྒོམས་པས། །དེང་ཉིད་བྱིན་གྱིས་བརླབས་ནས་སུ། །རྡོ་རྗེ་

གསུང་གིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་ནི། །རྡོ་རྗེ་མི་ཕྱེད་གསུམ་བསྒོམས་ཏེ། །དེང་ཉིད་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། །ལྕེ་ནི་འཕྲོ་བར་རྣམ་བསྒོམས་ཏེ། །རང་ངག་ཆོས་རྣམས་ཀུན་གྱི་གནས། །གསུང་
དབྱངས་ཐམས་ཅད་རྣམ་དག་དང་། །ཆོས་ཀྱི་ངག་ཏུ་བྱིན་གྱིས་བརླབ། །ངག་དེ་རྡོ་རྗེ་ཆོས་ཀྱི་ནི། །ངེས་པའི་ཚིག་ནི་ཕུན་སུམ་ཚོགས། །བདག་གི་ཚིག་ཀྱང་དེ་བཞིན་དུ། །ཆོས་འཆད་ལྟ་བུར་འགྱུར་བར་ཤོག །ཨོཾ་སརྦ་ཏ་ཐཱ་ག་ཏ་བཱཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྙིང་གི་ཟླ་བ་ལ་
དམིགས་པ། །ཁ་དོག་མཐིང་ཤུན་ལྟ་བུ་ཡི། །ཧཱུཾ་ཞེས་པ་ཡི་རྡོ་རྗེ་སེམས། །འོད་ཟེར་རྣམ་ལྔ་ཤིན་ཏུ་འབར། །སྔར་སྨོས་པ་ཡི་རིམ་པ་ཡིས། །རྡོ་རྗེ་སེམས་ལ་གསོལ་བཏབ་ནས། །དེ་ནི་ཞུགས་པར་བསྒོམ་བྱས་ཏེ། །སེམས་ནི་བྱིན་གྱིས་བརླབ་པར་བྱ། །དཔལ་ལྡན་
སེམས་ནི་རྡོ་རྗེ་འཆང་། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་
སུ། །རྡོ་རྗེ་ཐུགས་ཀྱིས་མཛད་དུ་གསོལ། །སྙིང་ལ་དཔལ་བེའུ་བསམ་པ་ནི། །སྐྱེས་བུ་ཆེན་པོའི་མཚན་ཉིད་དོ། །འོད་ཟེར་ལྔས་འཁྲིགས་ལྟ་བུ་ནི། །ང་རྒྱལ་བསྐྱེད་པས་སྦྱར་བར་བྱ། །ཀུན་དུ་བཟང་པོའི་སེམས་ནི་གང་། །གསང་དབང་གི་ནི་བློ་ལྡན་པ། །བདག་དང་དེ་དང་
འདྲ་བའི་སེམས། །རྡོ་རྗེ་འཆང་འདྲར་གྱུར་པར་ཤོག །ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དབང་བསྐུར་གོང་མ་བཞིན་བསྒོམ་པ། །ཆེན་པོའི་རྒྱུ་མཐུན་ལ་སོགས་ཡིན། །མི་བསྐྱོད་དབུ་བརྒྱན་སངས་རྒྱས་བཞིན། །ལྷག་མ་རང་གི་བདག་དབང་བསྐུར། །སྐུ་ཡི་
དབང་ཕྱུག་མི་བསྐྱོད་པ། །ངག་གི་དབང་ཕྱུག་ཐུགས་ཀྱི་དབང་། །དབུ་རྒྱན་དེ་བཞིན་འདོད་པའོ། །དེ་ལྟར་རིམ་པས་དབང་བསྐུར་ནས། །རང་གི་སྙིང་པོ་འོད་ཟེར་གྱིས། །ཤེས་རབ་མ་ཡི་དཀྱིལ་དུ་ནི། །གཟུགས་ལ་སོགས་པ་ཐིམ་བྱས་ཏེ། །བ་སྤུའི་བུ་ག་ལས་བྱུང་བའི། །གཟུགས་

ཀྱི་རྡོ་རྗེ་སོགས་འོད་ནི། །གཞལ་ཡས་ཁང་ནས་བྱུང་ནས་སུ། །བར་སྣང་དཀྱིལ་དུ་ཁྱབ་པ་ཡིས། །བདག་དང་ཐུབ་དབང་མཆོད་བྱས་ཏེ། །མཆོད་དང་མཆོད་པའི་བདག་ཉིད་འགྱུར། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧཾ། རིགས་གསུམ་
རིགས་ལྔ་བརྒྱ་རྣམས་ལ། །ཡེ་ཤེས་ལྔ་དང་ཕྱག་རྒྱ་དང་། །སངས་རྒྱས་བདག་ཉིད་གཟུགས་རྣམས་ཀྱིས། །དཀྱིལ་འཁོར་ཆོས་རྣམས་ཀྱིས་བསྟོད་པ། །མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་
དབྱིངས་ལ་ཕྱག་འཚལ་བསྟོད། །རྣམ་པར་སྣང་མཛད་དགའ་ཆེན་པོ། །རྡོ་རྗེ་ཞི་བ་དགའ་བ་ཆེ། །རང་བཞིན་གྱིས་ནི་འོད་གསལ་མཆོག །རྡོ་རྗེ་སྟོན་ལ་ཕྱག་འཚལ་བསྟོད། །རིན་ཆེན་རྒྱལ་པོ་ཤིན་ཏུ་ཟབ། །ནམ་མཁའ་རྡོ་རྗེ་དྲི་མ་མེད། །རྡོ་རྗེ་སྐུ་ལ་ཕྱག་འཚལ་བསྟོད། །
རྡོ་རྗེ་མཐའ་ཡས་ཆགས་པ་ཆེ། །རྣམ་པར་མི་རྟོག་རྡོ་རྗེ་མཁའ། །འདོད་ཆགས་ཕ་རོལ་ཕྱིན་པ་ཐོབ། །རྡོ་རྗེ་གསུང་ལ་ཕྱག་འཚལ་བསྟོད། །རྡོ་རྗེ་དོན་གྲུབ་རྫོགས་སངས་རྒྱས། །བསམ་པ་ཐམས་ཅད་ཡོངས་རྫོགས་པའི། །རང་བཞིན་དག་པ་ཉིད་ལས་བྱུང་། །རང་བཞིན་དག་
པས་གོས་པ་མེད། །རྡོ་རྗེ་སེམས་ལ་ཕྱག་འཚལ་བསྟོད། །ཟླ་བ་ཉི་མ་ཆུ་སྨན་དྲི། །རླུང་མེའི་དཀྱིལ་འཁོར་ལ་གནས་པའི། །འོད་ལྡན་ཕྱག་འཚལ་བྱིན་གྱིས་བརླབ། །དེ་ཉིད་གསུམ་གྱི་སྔགས་བཏབ་ནས། །ལྕེ་ལ་རྡོ་རྗེ་ཧཱུཾ་བཀོད་དེ། །ཡེ་ཤེས་བདུད་རྩི་གང་བསྒོམས་ནས། །སྙིང་
གའི་ཟླ་བའི་དཀྱིལ་གནས་ཀུན། །དཀྱིལ་འཁོར་དེ་ཡིས་ཚིམ་པར་བྱ། །སྙིང་འོད་སྤྲུལ་པ་མགོན་པོ་ཡིས། །དབུས་ཀྱི་ཀུན་རྟོག་ཡོངས་སྤངས་ཏེ། །འགྲོ་བ་སངས་རྒྱས་ཉིད་བྱས་ནས། །ཡེ་ཤེས་ས་བོན་དཀྱིལ་དུ་ཐིམ། །སྙིང་གའི་ཕྱག་མཚན་དཀྱིལ་གནས་པ། །ཟླ་བའི་སྙིང་
པོ་ཐིག་ལེ་གཟུགས། །འོད་གསལ་རང་གི་ཡིད་བསྒོམས་ཏེ། །ཡེ་ཤེས་སེམས་དཔའ་གསལ་བར་བྱ། །སྐུ་གསུང་ཐུགས་ཀྱི་རྡོ་རྗེ་ཡང་། །འོད་ཟེར་འཕྲོས་པས་གསལ་བྱེད་དེ། །དེ་ཡང་སྙིང་ལ་བཞུགས་བསམས་ནས། །དེ་ནི་ཡེ་ཤེས་བདུད་རྩིའི་རྒྱུན། །དེ་ནས་ལུས་ཀྱི་ནང་

ཀུན་དུ། །དེ་ཡིས་ཀུན་དུ་གསལ་བྱས་ཏེ། །སོ་སོ་བ་སྤུའི་འོད་ཟེར་གྱིས། །འགྲོ་བའི་དོན་ནི་རྫོགས་པར་བྱ། །རང་གི་ཕྱག་མཚན་ཕྲ་མོ་ལ། །རང་རིག་ཐུབ་པའི་དཀྱིལ་འཁོར་ནི། །འོད་འབར་དམ་པའི་ཤེས་རབ་ཐོགས། །རིག་མའི་སྣ་ལ་གནས་པར་བསྒོམ། །བརྟན་པའི་
མཚན་མ་མཐོང་མ་ཐག །དེ་ཡི་འོད་ཟེར་འཕྲོ་བ་ནི། །སངས་རྒྱས་སྣ་ཚོགས་ཕྱག་མཚན་བསྣམས། །ཡང་དང་ཡང་དུ་འཕྲོ་བར་བསྒོམ། །སྐུ་གསུང་ཐུགས་ཀྱི་རྡོ་རྗེ་དང་། །འོད་ཟེར་ལྔ་ཡི་ཡེ་ཤེས་ལས། །འཕྲོས་ནས་སྔགས་ནི་ཟློས་བྱེད་པ། །ལྷན་ཅིག་ཡང་ན་རིམ་པར་བྱ། །
དབུགས་ཕྱུང་འཕྲོ་བ་སྤྲོ་བྱས་ཏེ། །དབུགས་བསྡུ་སྔགས་ཀྱང་བསྡུ་བར་བྱ། །སྐུ་ལ་སོགས་པའི་སྤྲོ་བསྡུ་བ། །རིམ་པ་རིམ་པར་བཟླས་པར་བྱ། །དེ་ལྟར་བཟླས་ན་ནམ་མཁའ་ལ། །སྐུ་སོགས་དེ་དག་རྣམས་ཀྱིས་ཁྱབ། །སྔོན་བཞིན་རང་གི་འོད་ཟེར་མཆོད། །དབུགས་ཕྱུང་རིག་
མའི་ཆུ་བོ་ཡིས། །གསང་བའི་རིག་མ་ལེ་ལོ་ཡིས། །བདེ་བར་ཞུགས་ནས་དབང་གྱུར་པ། །ཡེ་ཤེས་སངས་རྒྱས་ཆུ་བོ་རྣམས། །དགག་པའི་དབུགས་ཀྱིས་ཐིམ་ནས་སུ། །རང་གི་དཀྱིལ་དུ་ཐིམ་པར་བྱ། །རྒྱུ་མཐུན་ལ་སོགས་མོས་པ་ཡིས། །ཐིག་ལེ་ཕྲ་མོ་གསང་གསུམ་
ལ། །འབྲིང་པོ་ཆུང་སོགས་ཕྱེ་ནས་སུ། །སྦྱོར་བ་བསྙེན་སོགས་དེ་བཞིན་ནོ། །རང་སྙིང་དེ་ཉིད་མཆོག་གཟིགས་པ། །སེམས་ལ་ཉམས་སུ་ཕྱུང་གྱུར་ན། །སྤྱན་སོགས་ཡོན་ཏན་དབྱངས་ཀྱིས་ནི། །དཀྱིལ་འཁོར་གསོལ་ནས་མཆོད་པར་བྱ། །སྤྱི་བོར་ཟླ་བ་ཕྱག་མཚན་
ལྡན། །དམ་པའི་སེམས་ནི་ཆུ་རྒྱུན་ནི། །འབབ་པ་རིམ་པར་བྱས་ནས་སུ། །སྐུ་གསུང་ཐུགས་ལ་ཐིམ་པར་བྱ། །དེ་ལྟར་དབུགས་ཕྱུང་བཟླས་ནས་སུ། །མཁས་པས་མཆོད་པ་ལ་སོགས་བྱ། །ཅི་ཕྱིར་དེ་བཞིན་ཉིད་གསུམ་དག །ཐོགས་པ་སྤངས་ནས་རྫོགས་པར་བྱ། །དེ་
འདྲ་དེ་ཉིད་དང་བྲལ་བའི། །འགྲོ་བ་ཐམས་ཅད་མཐོང་ནས་སུ། །དེ་དག་ཕན་ཕྱིར་སྙིང་རྗེ་ཡིས། །སྨོན་ལམ་ཀུན་དུ་མངོན་པར་བྱ། །ཏིང་ངེ་འཛིན་ལས་ལངས་ནས་སུ། །འགྱིང་བག་གཙོ་བོ་དང་ལྡན་ནས། །སྤྱོད་པ་སངས་རྒྱས་ཤེས་བྱས་ཏེ། །སྤྱོད་ཡུལ་རྣམས་ཀྱིས་རབ་ཏུ་མཆོད། །

འཇམ་དཔལ་རྡོ་རྗེ་བདག་ཉིད་ཀུན། །རང་བཞིན་ལས་ནི་སྤྱོད་ཡུལ་འགྲོ། །སྤྱོད་ཡུལ་དེ་དག་བསྒོམ་པ་ཉིད། །རང་རང་དག་ནས་གནས་ཕྱིར་རོ། །རྟག་པ་ལ་སོགས་གནས་པའི་ཕྱིར། །སོ་སོ་རང་རིག་ཆོས་སུ་གནས། །དཔལ་ལྡན་རྡོ་རྗེ་འཛིན་པའི་
གཟུགས། །སེམས་དཔའ་དག་པ་དང་ལྡན་པས། །དབུགས་ཀྱི་རྟོག་པ་སྤངས་ནས་སུ། །བྱ་བ་ཐམས་ཅད་བྱ་བ་ཡིན། །དཀྱིལ་འཁོར་མཆོད་པ་མཐའ་ཡས་འདི། །རྟག་ཏུ་སྒོམ་པའི་རྣལ་འབྱོར་པའི། །རང་གི་སྙིང་གའི་ཟླ་བ་ལ། །རང་གི་དཀྱིལ་འཁོར་གཙོ་བོ་ནི། །གཞི་ཡི་ས་བོན་
གྱིས་བསྐྱེད་ལ། །རང་གིས་བཟའ་བ་ཟ་དུས་ན། །རང་སྙིང་དེ་བཞིན་ཉིད་དམིགས་དང་། །བདུད་རྩིས་སངས་རྒྱས་ཀུན་ཚིམ་བྱ། །ཆོས་ཉིད་ཀྱི་ནི་ཀུན་དག་ལ། །དེ་ཉིད་གསུམ་གྱི་སྔགས་བཏབ་ནས། །དཀྱིལ་འཁོར་རང་གི་རིག་པའི་ལྷ། །དེ་ཡིས་ཚིམ་པར་བྱས་ནས་མཆོད། །ཕྱི་ཡི་
སྦྱིན་སྲེག་རྗེས་དཔགས་ཏེ། །སེམས་ནི་སེམས་ཉིད་ཡིན་པའི་ཕྱིར། །བླ་ན་མེད་པ་འདི་ཡིན་ཏེ། །ཡེ་ཤེས་མེ་ནི་འབར་བྱེད་ནས། །ཕུང་པོའི་བུད་ཤིང་བསྲེགས་པའོ། །འདོད་པ་འདི་དག་ཐམས་ཅད་ནི། །རང་རང་ལྷ་དག་རང་བཞིན་སྐྱེ། །དེ་ལྟར་བདག་གཞན་མཆོད་བྱེད་པ། །
བདེ་བར་གཤེགས་པའི་དམ་ཚིག་ཡིན། །གང་ཞིག་ལ་ནི་དེ་སྐུ་སོགས། །སངས་རྒྱས་ཀུན་ལ་མཆོད་བྱེད་དང་། །རྗེས་སུ་རིག་པ་འགྲོ་བའི་དོན། །རྟག་ཏུ་མཉམ་གཞག་བསམ་གཏན་བྱ། །གང་ཞིག་ལུས་ངག་དངོས་པོ་ལས། །ཕྱག་རྒྱ་སྔགས་ཀྱི་བདག་ཉིད་ཆེ། །ལས་དེ་
ཡང་དག་བརྩམས་ནས་སུ། །སངས་རྒྱས་ཐམས་ཅད་མཆོད་པར་བྱ། །རྣམ་རྟོག་དངོས་པོ་གཅིག་པུ་ལ། །སྣ་ཚོགས་རྣམ་པར་སྣང་བ་སྟེ། །སྡུག་བསྔལ་བདེ་བ་གྲོལ་འབྱུང་བ། །ཅི་ཕྱིར་ལས་མ་ལུས་པ་ཡིན། །དེ་ཕྱིར་དགེ་དང་མི་དགེ་ལས། །ལུས་ལ་སོགས་པའི་རྟོག་
པ་འབྱུང་། །ཀུན་རྟོག་ཐམས་ཅད་ངེས་གྲོལ་ནས། །ཡེ་ཤེས་རྟོགས་པར་ག་ལ་འགྱུར། །དོན་ཡོད་རྡོ་རྗེ་དཀྱིལ་འཁོར་གཙོར། །བསམས་ནས་དམ་ཚིག་བསླབ་དོན་དུ། །སྙིང་གར་ལས་ཀྱི་རྡོ་རྗེ་ཁང་། །བསམས་ནས་ཀུན་བདག་དབང་བསྐུར་བྱ། །བླ་མ་བརྙས་

སོགས་སྐྱོན་གྱུར་ན། །ཡོན་དང་བཅས་པར་སྟོན་མོ་དབུལ། །རང་གི་དཀྱིལ་འཁོར་ལ་གནས་ཏེ། །བདག་ཉིད་ལ་ནི་ཕ་རོལ་ཏུ། །རིམ་པ་གཅིག་ནི་རྣམ་བསམས་པ། །སྔ་མའི་གཟུགས་ནི་གནས་གྱུར་ནས། །ཞེ་སྡང་གཟུགས་སུ་རྣམ་པར་གནས། །ཨནྡྲ་ནཱི་ལའི་མདོག་
ལྟ་བུ། །ཞལ་གདངས་མཆེ་བ་གཙིགས་པས་འཇིགས། །མི་འཁྲུགས་འབར་བ་སྤྱི་བོར་འཆང་། །འཇིག་རྟེན་ཁམས་ཀུན་འཁྲུགས་པར་བྱེད། །ཉི་མའི་དཀྱིལ་འཁོར་དབུས་གནས་པ། །ཉི་མ་བྱེ་བ་ཕྲག་བརྒྱའི་འོད། །དམར་བའི་སྤྱན་ནི་འཇིགས་པ་ཆེ། །རྒྱན་རྣམས་
ཀུན་གྱིས་རབ་ཏུ་བརྒྱན། །ཁྲོ་གཉེར་ཞི་བ་འདོད་ཆགས་ཆེ། །ཞལ་གསུམ་དག་ནི་རྣམ་པར་འཆང་། །རང་གི་དམ་ཚིག་མཉམ་པར་ལྡན། །ཕྱག་དྲུག་གིས་ནི་མངོན་པར་བརྒྱན། །འཛམ་བུ་ན་དའི་འོད་འདྲ་བའི། །སངས་རྒྱས་སྤྲིན་གྱིས་རྣམ་འཁྲིགས་པའི། །རྡོ་རྗེ་ཆེན་པོ་རྩེ་
དགུ་པ། །དེ་ཡི་ཕྱག་ཏུ་རྣམ་པར་བསྒོམ། །སྔར་གསུངས་པ་ཡི་རིམ་བཞིན་དུ། །ཕྱག་རྒྱ་ཕྱི་མ་རྣམ་པར་བསྒོམ། །ཞེ་སྡང་རྡོ་རྗེར་བྱིན་བརླབས་ནས། །དཀྱིལ་འཁོར་ཐམས་ཅད་རབ་ཏུ་སྤྲོ། །ཛི་ན་ཛིཀ །ས་བོན་ལས་ནི་བསྐྱེད་བྱ་བ། །རྣམ་པར་སྣང་མཛད་གཙོ་བོ་
སྟེ། །ཞི་བའི་ཆ་ལུགས་དག་དང་ལྡན། །ཕྱོགས་ནི་ཐམས་ཅད་སྣང་བར་མཛད། །སྟོན་ཀའི་འདམ་བུའི་འོད་འདྲ་བ། །རལ་པའི་ཅོད་པན་དག་གིས་བརྒྱན། །མི་འཁྲུགས་པས་ནི་དབང་བསྐུར་ཞིང་། །སྣ་ཚོགས་རྒྱན་རྣམས་ཀུན་གྱིས་བརྒྱན། །དཀར་དང་གནག་དང་
དམར་ཆེན་པོ། །ཁ་དོག་གསུམ་པ་ཞལ་གསུམ་པ། །འོད་ཟེར་སྣ་ཚོགས་ཆེན་པོས་བརྒྱན། །ཕྱག་དྲུག་རྣམ་པར་བསྒོམ་པར་བྱ། །འཁོར་ལོ་རྡོ་རྗེ་པདྨ་དཀར། །གཡས་པའི་ཕྱག་ཏུ་རྣམ་པར་བསམ། །དྲིལ་བུ་ནོར་བུ་རལ་གྲི་རྣམས། །གཡོན་པའི་ཕྱག་ཏུ་རྣམ་པར་བསྒོམ། །
སྙིང་ལས་དེ་བཞིན་བྱུང་ནས་ནི། །ཕྱོགས་ཀུན་དུ་ནི་རྣམ་པར་གཟིགས། །སངས་རྒྱས་རྫུ་འཕྲུལ་མཛད་ལ་སོགས། །ཆོས་ཀྱི་འཁོར་ལོ་རབ་ཏུ་བསྐོར། །གཏི་མུག་ལམ་ལ་རབ་གནས་པའི། །སེམས་ཅན་མ་ལུས་སྦྱངས་ནས་ནི། །སླར་ལོག་མདུན་གྱི་ཕྱོགས་དག་ན། །ཟླ་བའི་

དབུས་སུ་རྣམ་པར་གནས། །རཏྣ་དྷྲྀཀ །ས་བོན་ལས་ནི་སྐྱེས་པ་ཡི། །དཀོན་མཆོག་དཔལ་ནི་མཁས་པས་བསྐྱེད། །རལ་པ་ཅོད་པན་འཆང་ལ་ཞི། །མི་འཁྲུགས་དབང་བསྐུར་བས་ནི་བརྒྱན། །ཞལ་གསུམ་ཁ་དོག་གསུམ་པ་སྟེ། །སེར་དང་དམར་དང་
དཀར་བའི་ཞལ། །ཐམས་ཅད་རྒྱན་དང་རབ་ལྡན་པའི། །ཕྱག་དྲུག་པ་ནི་རྣམ་པར་བསྒོམ། །ནོར་བུ་རྡོ་རྗེ་འཁོར་ལོ་ནི། །གཡས་པའི་ཕྱག་ཏུ་བསྒོམ་པར་བྱ། །དྲིལ་བུ་རལ་གྲི་པདྨ་སེར། །གཡོན་པ་དག་ཏུ་རྣམ་པར་བསྒོམ། །དེ་བཞིན་སྙིང་ག་ནས་བྱུང་ནས། །འཇིག་
རྟེན་ཁམས་ནི་རྣམ་པར་གཟིགས། །ང་རྒྱལ་གནས་ལ་གནས་པ་ཡི། །སེམས་ཅན་ཐམས་ཅད་སྦྱོང་བར་མཛད། །རིན་ཆེན་ཆེན་པོ་སླར་གཤེགས་ནས། །ཐམས་ཅད་དབང་བསྐུར་ཕུན་སུམ་ཚོགས། །རྡོ་རྗེ་སེམས་དཔའི་གཡས་ཕྱོགས་ཀྱི། །རིན་ཆེན་དབུས་སུ་རྣམ་པར་བཞུགས། །
ཨ་རོ་ལྀཀ །ས་བོན་དག་ལས་གྲུབ་པ་ཡིས། །རྡོ་རྗེ་སྣང་བ་མཐའ་ཡས་བསྐྱེད། །པདྨ་རཱ་གའི་མདོག་འདྲ་བའི། །མི་འཁྲུགས་པས་ནི་ཅོད་པན་བརྒྱན། །ཞི་བ་རལ་པ་ཅོད་པན་འཆང་། །དམར་དང་གནག་དང་དཀར་བའི་ཞལ། །ཐམས་ཅད་རྒྱན་གྱིས་རྣམ་བརྒྱན་པའི། །ཕྱག་དྲུག་
པ་ནི་བསྒོམ་པར་བྱ། །གཡོན་པ་འགྱིང་བས་པདྨ་འཛིན། །དྲིལ་བུ་དཀུར་བརྟེན་ཕན་ཕྱིར་ཏེ། །གཡས་པར་པདྨ་སྐྱོད་མཛད་ཅིང་། །ཐུགས་ཀར་པདྨ་ཁ་ཡང་འབྱེད། །ཕྱག་གཉིས་རྡོ་རྗེ་འཁོར་ལོ་དང་། །གཡོན་གཉིས་རིན་ཆེན་རལ་གྲི་བསྣམས། །སྙིང་ག་ནས་ནི་བྱུང་གྱུར་
ནས། །ཐམས་ཅད་ཕྱོགས་སུ་རྣམ་པར་གཟིགས། །སེམས་ཅན་འདོད་ཆགས་ལྡན་སྦྱོང་སྟེ། །འདམ་ཅན་ཆུ་ཡི་པདྨ་བཞིན། །སླར་གཤེགས་པདྨའི་དབུས་སུ་ནི། །རྒྱབ་ཀྱི་ཕྱོགས་སུ་མངོན་པར་བཞུགས། །པྲཛྙཱ་དྷྲྀཀ།། ས་བོན་ལས་ནི་གྲུབ་པ་ཡི། །རྡོ་རྗེ་གདོན་མི་ཟ་བ་བསྐྱེད། །
ལྗང་གུ་བཻ་ཌཱུཪྻ་འདྲ་བ། །རལ་པ་ཅོད་པན་རྡོ་རྗེ་གནས། །ཐམས་ཅད་རྒྱན་གྱིས་རྣམ་པར་བརྒྱན། །ལྗང་གུ་གནག་དང་དཀར་བའི་ཞལ། །འོད་ཟེར་རྣམ་ལྔ་འཁྲིགས་པར་འབར། །ཕྱག་དྲུག་རྣམ་པར་བསམ་པར་བྱ། །རལ་གྲི་རྡོ་རྗེ་རྒྱ་གྲམ་དང་། །འཁོར་ལོ་གཡས་པའི་ཕྱག་ཏུ་བསྒོམ། །

དྲིལ་བུ་པདྨའི་སྡོང་བཅས་དང་། །ནོར་བུ་གཡོན་པའི་ཕྱག་ཏུ་བསམ། །དེ་བཞིན་སྙིང་ག་ནས་བྱུང་ནས། །ཕྱོགས་བཅུ་ཀུན་དུ་གཟིགས་མཛད་དེ། །བརྫུན་ཚིག་སྨྲ་བའི་ལམ་གནས་པའི། །སེམས་ཅན་ཐམས་ཅད་ཀུན་དུ་སྤྱོད། །སྣ་ཚོགས་ཆེན་པོ་སླར་གཤེགས་ནས། །གྲུ་གསུམ་དཀྱིལ་
འཁོར་དབུས་སུ་ནི། །རྡོ་རྗེ་སེམས་ཀྱི་བྱང་ཕྱོགས་སུ། །སེམས་དཔའི་སྐྱིལ་མོ་ཀྲུང་གིས་བཞུགས། །ཞེ་སྡང་གཏི་མུག་འདོད་ཆགས་དང་། །ཡིད་བཞིན་ནོར་བུ་དམ་ཚིག་སྟེ། །རིགས་ལྔར་གཏོགས་པ་འདི་རྣམས་ཀྱིས། །འདོད་དང་གྲོལ་བར་རབ་གྲུབ་པའོ། །དྭེ་ཥ་ར་ཏི། གསང་
སྔགས་ལས་ནི་གྲུབ་པ་ཡི། །རྒྱལ་བའི་ཡུམ་གྱི་ལྷ་མོ་བསྐྱེད། །སྔོ་བསངས་ཨུཏྤལ་མདོག་འདྲ་བ། །ཡིད་དུ་འོང་བ་མཛེས་པའི་ཞལ། །གནག་དང་དམར་དང་དཀར་འདྲ་བའི། །ཞལ་གསུམ་གྱིས་ནི་རྣམ་པར་བརྒྱན། །མི་འཁྲུགས་ཅོད་པན་གནས་བྱས་པའི། །ཕྱག་དྲུག་པ་ནི་
བསྒོམ་པར་བྱ། །རྒྱལ་མོ་རྡོ་རྗེ་འཁོར་ལོ་འཛིན། །སྔོ་དམར་ཨུཏྤལ་ཕྱག་ན་བསྣམས། །གཡོན་པ་འགྱིང་བས་དྲིལ་བུ་སྟེ། །རིན་ཆེན་རལ་གྲི་རྟག་ཏུ་འཆང་། །སྙིང་ག་ནས་ནི་བྱུང་གྱུར་ནས། །ཕྱོགས་བཅུར་རྣམ་པར་གཟིགས་མཛད་དེ། །བགེགས་ཆེན་གྱིས་ནི་འཇིགས་རྣམས་
ལ། །རྟག་ཏུ་སྲུང་བ་ཉིད་དུ་མཛད། །འབར་བསླར་ཡང་གཤེགས་ནས་ནི། །རྡོ་རྗེ་དཀྱིལ་འཁོར་དབུས་མ་ཡིན། །ལྷོ་ཡི་གྲྭར་ནི་བཞུགས་ནས་ཀྱང་། །རབ་དགྱེས་རྡོ་རྗེ་ལ་ཡང་གཟིགས། །མོ་ཧ་ར་ཏི། གསང་སྔགས་ལས་ནི་གྲུབ་པ་ཡི། །སྤྱན་གྱི་ལྷ་མོ་བསྐྱེད་པར་བྱ། །
སྟོན་ཀའི་ཟླ་བའི་མདོག་འདྲ་བའི། །རྣམ་པར་སྣང་མཛད་སྤྱི་བོར་གནས། །མེ་ཏོག་སྣ་ཚོགས་ཚད་མེད་པས། །དབུ་ལ་ཐོད་དུ་རྣམ་པར་བཅིངས། །དཀར་དང་གནག་དང་དམར་ཆེན་པོའི། །ཞལ་གསུམ་པ་ནི་རབ་ཏུ་འབར། །ཆ་ལུགས་བརྒྱད་དང་ལྡན་པ་སྟེ། །འོད་ཟེར་དཀར་པོས་ཀུན་
དུ་འཁྲིགས། །རྒྱན་རྣམས་ཀུན་དང་ལྡན་པ་ཡི། །ཕྱག་དྲུག་པ་ནི་རྣམ་པར་བསམ། །རྒྱལ་མོ་འཁོར་ལོ་རྡོ་རྗེ་འཛིན། །ཨུཏྤལ་དཀར་པོ་ཕྱག་ན་བསྣམས། །རིན་ཆེན་སྡོང་བུ་གཡོན་ན་སྟེ། །དྲིལ་བུ་རལ་གྲི་འཛིན་པའི་མཆོག །དེ་བཞིན་སྙིང་ག་ནས་བྱུང་ནས། །ཕྱོགས་བཅུ་

དག་ཏུ་རྣམ་པར་གཟིགས། །གདོན་ནད་ན་བའི་སེམས་ཅན་དག །ཞི་བའི་གནས་ཀྱིས་ཞི་བར་མཛད། །སྣང་མཛད་དེ་ནི་སླར་གཤེགས་ནས། །དད་པའི་དཀྱིལ་འཁོར་དབུས་སུ་ནི། །ཤར་གྱི་གྲྭར་ནི་བཞུགས་ནས་ཀྱང་། །རྡོ་རྗེ་མགོན་ལ་གཟིགས་པར་མཛད། །
རཱ་ག་ར་ཏི། གསང་སྔགས་ལས་ནི་གྲུབ་པ་ཡི། །གོས་དཀར་མོ་ནི་བསྐྱེད་པར་བྱ། །ཞལ་མཛེས་སྤྱན་ནི་རིང་བ་སྟེ། །པདྨ་རཱ་ག་ཟླ་མདོག་འདྲ། །ཞལ་གསུམ་དག་ནི་བཞད་པའི་ཞལ། །དམར་དང་གནག་དང་དཀར་བ་སྟེ། །སྣང་བ་མཐའ་ཡས་ཅོད་པན་གནས། །ཐམས་ཅད་རྒྱན་
གྱིས་རྣམ་པར་བརྒྱན། །སྒྱུ་འཕྲུལ་མཚོན་ལས་ཀུན་དུ་འབྱུང་། །འདོད་ཆགས་དམར་པོ་འཆད་ལ་དགའ། །མཚན་རྣམས་ཐམས་ཅད་ཀུན་རྫོགས་པའི། །ཕྱག་དྲུག་རྣམ་པར་བསྒོམ་པར་བྱ། །གཡོན་པ་འགྱིང་བས་དྲིལ་བུ་དང་། །སྡོང་བུ་ལོར་བཅས་ཨུཏྤལ་འཛིན། །སྒེག་
དང་བཅས་པའི་གཡས་པ་ཡིས། །ཨུཏྤལ་དམར་པོ་ཁ་ཡང་འབྱེད། །གཉིས་ནི་རྡོ་རྗེ་འཁོར་ལོ་འཛིན། །གཡོན་གཉིས་ནོར་བུ་རལ་གྲི་འཆང་། །སྙིང་ག་ནས་ནི་བྱུང་གྱུར་ནས། །ཐམས་ཅད་ཕྱོགས་སུ་རྣམ་པར་གཟིགས། །གཟའ་སོགས་ཀྱིས་སྐམས་སེམས་ཅན་རྣམས། །ཚེ་དང་མཚུངས་
པར་རྒྱས་པར་མཛད། །སླར་གཤེགས་པདྨའི་དབུས་སུ་བཞུགས། །བཛྲ་ར་ཏི། གསང་སྔགས་ལས་ནི་གྲུབ་པ་ཡི། །ལྷ་མོ་སྒྲོལ་མ་མཁས་པས་བསྐྱེད། །ཡན་ལག་མཚན་རྣམས་ཀུན་དང་ལྡན། །བུད་མེད་མ་རུངས་མྱོས་མཛད་བརྩོན། །མཛེས་པའི་ཞལ་ནི་སྤྱན་རིང་བ། །མརྒད་
སེར་པོའི་མདོག་ཀྱང་འདྲ། །གདོན་མི་ཟ་མཆོག་ཅོད་པན་མཛེས། །མེ་ཏོག་ཕྲེང་གི་ཅོད་པན་དཀྲིས། །ལྗང་གུ་ནག་དང་དཀར་འདྲ་བའི། །ཞལ་གསུམ་གྱིས་ནི་རྣམ་པར་བརྒྱན། །རྒྱན་རྣམས་ཐམས་ཅད་ཀུན་རྫོགས་པའི། །ཕྱག་དྲུག་པ་ནི་བསམ་པར་བྱ། །རྡོ་རྗེ་རྒྱ་གྲམ་འཁོར་ལོ་འཛིན། །
ཨུཏྤལ་སེར་པོ་ཕྱག་ན་བསྣམས། །གཡོན་པ་འགྱིང་བས་དྲིལ་བུ་སྟེ། །རིན་ཆེན་རལ་གྲིས་ཕྱག་ནི་བརྒྱན། །སྙིང་ག་ནས་ནི་བྱུང་གྱུར་ནས། །འདོད་ཆགས་ཞེ་སྡང་གིས་རྨོངས་པའི། །སེམས་ཅན་དབང་དུ་བྱེད་པ་ནི། །འོད་ཀྱིས་རེག་པ་ཙམ་གྱིས་ཏེ། །སེམས་ནི་མེད་ལྟར་དབང་གྱུར་

ནས། །ཐམས་ཅད་མངོན་པར་ཕྱོགས་པར་གནས། །སླར་གཤེགས་དམ་ཚིག་དབུས་སུ་ནི། །བྱང་གི་ཕྱོགས་ཀྱི་གྲྭར་ནི་བཞུགས། །གསང་སྔགས་ཡི་གེ་ལས་གྲུབ་པའི། །མཁས་པས་བྱང་ཆུབ་སེམས་དཔའ་བསྐྱེད། །རིགས་ཀྱི་བདག་པོས་དབང་བསྐུར་བའི། །ཁ་དོག་
གསུམ་དག་ཞལ་གསུམ་པའོ། །རྣམ་པ་ཐམས་ཅད་མཆོག་ལྡན་པ། །ཕྱག་དྲུག་པ་ནི་རྣམ་པར་བསྒོམ། །སོ་སོའི་རིགས་བཞིན་ཁ་དོག་བརྒྱ། །དེ་དག་ཐམས་ཅད་བསྒོམ་པར་བྱ། །སྒྲོལ་མའི་ཕྱག་རྒྱར་གསུངས་པ་ནི། །ཀུན་དུ་བཟང་པོ་བསྒོམ་པར་བྱ། །ཨུཏྤལ་ཡོངས་སུ་བསལ་
ནས་ནི། །པདྨ་དེ་ལ་སྦྱིན་པར་བྱ། །བྱམས་པ་ཀླུ་ཤིང་མེ་ཏོག་སྟེ། །ལྷག་མ་རྣམ་སྣང་མཛད་ཀྱི་གནས། །འཇམ་དཔལ་དྲིལ་བུ་རལ་གྲི་མཆོག །དེ་བཞིན་དུ་ནི་རབ་ཏུ་གནས། །ལག་པ་གཡོན་པ་ས་ལ་གནོན། །གཡས་པ་ཞུ་བའི་ཕྱག་རྒྱ་སྟེ། །ལྷག་མ་ཀུན་དུ་བཟང་པོ་ཡི། །ཕྱག་
རྒྱ་དེ་ནི་རྣམ་པར་བསྒོམ། །ཤར་གྱི་ངོས་ལ་གཉིས་ཉིད་དེ། །ས་ཡི་སྙིང་པོ་བྱམས་པ་གནས། །ལྷོར་ནི་ཕྱག་ན་རྡོ་རྗེ་དང་། །ནམ་མཁའ་ཞེས་བསྟན་ཀུན་དུ་གནས། །ནུབ་ཏུ་འཇིག་རྟེན་དབང་ཕྱུག་དང་། །འཇམ་པའི་དབྱངས་ནི་རྣམ་པར་གནས། །བྱང་དུ་སྒྲིབ་སེལ་བསྟན་པ་དང་། །
ཀུན་དུ་བཟང་པོ་རབ་ཏུ་གྲགས། །འདི་ལྟར་འདི་ཡི་དམ་གསུངས་པ། །གཟུགས་ཀྱི་རྡོ་རྗེ་ལ་སོགས་ལྷ། །འདི་དང་ཐབས་ཅིག་བཞུགས་པ་ནི། །ལག་གཉིས་རང་རྟགས་ལྡན་པར་གཞག །གཟུགས་ནི་ལག་གཉིས་མེ་ལོང་འཛིན། །སྒྲ་ནི་ལག་གཉིས་པི་ཝང་ངོ་། །དྲི་ནི་ལག་
གཉིས་དུང་ཕོར་ཏེ། །རོ་ནི་ལག་གཉིས་སྣོད་གནས་སོ། །རེག་ནི་རྡོ་རྗེ་ཡོངས་འཁྱུད་མ། །སྙིང་ག་དག་ཏུ་ཡོངས་སུ་འཁྱུད། །རྡོ་རྗེ་རྒྱ་གྲམ་དམ་ཚིག་གིས། །བདེ་བར་གནས་པ་ཆོས་ཀྱི་དབྱིངས། །རྣམ་སྣང་མཛད་སོགས་ཁ་དོག་དང་། །མཚོན་ཆ་དག་ནི་སྣ་ཚོགས་ཏེ། །
གཟུགས་ལ་སོགས་པ་རྣམ་བསྒོམ་པ། །ཇི་སྐད་གསུངས་པའི་རིམ་བཞིན་ནོ། །རྣམ་པར་སེལ་དང་བྱམས་གཉིས་ཀྱི། །ཁ་དོག་མཚོན་ཆ་ཇི་བཞིན་གནས། །དམ་ཚིག་གཉིས་ནི་བསྒོམ་བྱ་བ། །བྱམས་པ་སྙིང་རྗེ་ཞེས་བྱ་གཉིས། །ཡ་མཱནྟ་ཀྲྀཏ། ཡེ་ཤེས་ལས་ནི་གྲུབ་པ་ཡི། །

རྡོ་རྗེ་ཞབས་དྲུག་བསྐྱེད་པར་བྱ། །སྤྲིན་སྔོ་ལྟ་བུའི་ཁ་དོག་ལ། །གསུས་པོ་ཆེ་ལ་སྟོབས་པོ་ཆེ། །འོད་ཟེར་སྟུག་པོ་དག་གིས་འབར། །ཀུན་དུ་ཁྲོས་པའི་འཇིགས་དང་བཅས། །སྤྱན་དམར་ཞལ་གདངས་མཆེ་བ་གཙིགས། །ཞལ་གསུམ་དག་ནི་རྣམ་པར་
བསྐྱོད། །འབར་བའི་དབུ་ནི་གྱེན་དུ་བཅིངས། །རྟག་པར་ཅོད་པན་གནས་བྱས་ཏེ། །ཡན་ལག་རྒྱན་གྱིས་རབ་བརྒྱན་པའི། །ཕྱག་དྲུག་རྣམ་པར་བསྒོམ་པར་བྱ། །འཁོར་ལོ་རལ་གྲི་བསྙེམས་པས་འཛིན། །གཏུན་ཤིང་མངོན་པར་བསྟོད་པའི་ཕྱག །གཡོན་པ་འགྱིང་བས་
དྲིལ་བུ་མཆོག །དགྲ་སྟ་ཞགས་པ་བསྡིགས་པར་བཅས། །སྙིང་ག་ནས་ནི་བྱུང་གྱུར་པ། །ཉི་མའི་དཀྱིལ་འཁོར་དབུས་དག་ཏུ། །གཡས་བརྐྱང་གནོན་པའི་ཚུལ་གྱིས་ནི། །ཤར་ཕྱོགས་ཀྱི་ནི་སྒོར་གནས་སོ། །པྲཛྙཱནྟ་ཀྲྀཏ། ཡེ་ཤེས་ལས་ནི་གྲུབ་པ་ཡི། །རྡོ་རྗེ་གཞན་གྱིས་མི་ཐུབ་
བསྐྱེད། །འོད་ཟེར་འཕྲོ་བ་གདུག་འབར་ཞིང་། །སྦྲུལ་རྣམས་ཀྱིས་ནི་ཡན་ལག་བརྒྱན། །འབར་བའི་དབུ་ནི་བརྟན་པར་བཅིངས། །མི་འཁྲུགས་པས་ནི་སྤྱི་བོར་བརྒྱན། །ཁྲོ་གཉེར་མཛད་ཅིང་དམར་བའི་སྤྱན། །ཞལ་གསུམ་དག་ནི་རྣམ་པར་གདངས། །དུང་དང་ཀུནྡ་ཟླ་འདྲ་བའི། །
ཞབས་གཡས་བརྐྱང་བར་གནས་པ་སྟེ། །རྣམ་པ་ཐམས་ཅད་མཆོག་ལྡན་པ། །ཕྱག་དྲུག་པ་ནི་རྣམ་པར་བསྒོམ། །རྡོ་རྗེ་བེ་ཅོན་ཕྱག་ན་བསྒྲེང་། །རལ་གྲི་འདེབས་པའི་ཚུལ་དུ་གནས། །གཡོན་པ་འགྱིང་བས་དྲིལ་བུ་འཛིན། །དགྲ་སྟ་མཛུབ་མོ་ཞགས་པ་འཆང་། །དེ་བཞིན་སྙིང་ག་ནས་
བྱུང་ནས། །ཉི་མའི་དཀྱིལ་འཁོར་དབུས་དག་ཏུ། །ལྷོ་ཡི་སྒོ་ཡི་དབུས་སུ་ནི། །འདོད་པའི་ཁྲོ་བོ་ཀུན་དུ་གནས། །པདྨཱནྟ་ཀྲྀཏ། ཡེ་ཤེས་ལས་ནི་གྲུབ་པ་ཡི། །རྡོ་རྗེ་གཉིས་མེད་བསྐྱེད་པར་བྱ། །འོད་ཟེར་སྟུག་པོ་འཕྲོ་འབར་བའི། །བནྡུ་ཀ་ཡི་མེ་ཏོག་འདྲ། །དབུ་སྐྲ་འབར་བཅིངས་གྱེན་
དུ་འགྲེང་། །རྡོ་རྗེ་སྣང་བས་རྣམ་པར་བརྒྱན། །ཕྱག་དྲུག་པ་ནི་འཇིགས་པ་ཆེ། །ཞལ་ནི་ཁྲོ་གཉེར་མཛད་པ་སྟེ། །ཕྱག་ན་པདྨ་བསྐྱོད་པ་ཆེ། །རལ་གྲི་གཏུན་ཤིང་མཚོན་ཆའི་ཕྱག །གཡས་བརྐྱང་འགྱིང་བའི་ཚུལ་དུ་གནས། །གཡོན་པ་དགྲ་སྟ་ཞགས་པ་འཆང་། །ཁྲོ་བོ་སྙིང་ག་ནས་

བྱུང་ནས། །ཉི་མའི་དཀྱིལ་འཁོར་དབུས་སུ་ནི། །བཏུལ་ནས་རང་གི་དཀྱིལ་འཁོར་ལ། །ནུབ་ཕྱོགས་ཀྱི་ནི་སྒོ་རུ་གནས། །བིགྷྣནྟ་ཀྲྀཏ། ཡེ་ཤེས་ལས་ནི་གྲུབ་པ་ཡི། །བདུད་རྩི་འཁྱིལ་པ་བསྐྱེད་པར་བྱ། །འོད་ཟེར་སྟུག་པོ་འབར་བ་ནི། །ཁ་དོག་ཟར་མའི་མེ་ཏོག་འདྲ། །འབར་
བས་འཁྲིགས་པའི་སྒྲ་ཅན་དང་། །རྡོ་རྗེ་དོན་གྲུབ་ཅོད་པན་ཅན། །ཞལ་གསུམ་ཁྲོ་གཉེར་རབ་བསྐྱོད་ཅིང་། །མཆེ་བ་རྣོ་ཅན་ཧ་ཧར་བཞད། །རྡོ་རྗེ་རྒྱ་གྲམ་རལ་གྲི་མཚོན། །ཕྱག་ན་གཏུན་ཤིང་གསོད་པར་གནས། །དྲིལ་བུ་དགྲ་སྟ་རལ་གྲི་དང་། །གཡོན་པའི་ཕྱག་ཏུ་རྣམ་པར་བརྟག །
དེ་བཞིན་སྙིང་ག་ནས་བྱུང་ནས། །ཉི་མའི་དཀྱིལ་འཁོར་དབུས་སུ་ནི། །ཁྲོ་བོ་ཞབས་གཡས་བརྐྱང་བ་ཡིས། །བྱང་གི་སྒོ་ཡི་དབུས་སུ་གནས། །ཁྲོ་བོའི་དམ་ཚིག་གསུངས་པ་ནི། །རོ་ལངས་གཞན་གྱིས་མི་ཐུབ་མ། །ཁྲོ་གཉེར་རལ་པ་གཅིག་མ་སྟེ། །ལྷ་མོ་འདི་བཞི་རབ་ཏུ་
གྲགས། །སངས་རྒྱས་རྣམས་ནི་མཉམ་སྦྱོར་བ། །སེམས་དཔའི་སྐྱིལ་ཀྲུང་སྦྱོར་བ་སྟེ། །བྱང་ཆུབ་སེམས་དཔའ་དེ་བཞིན་གསུངས། །ཁྲོ་མོ་གཡོན་བརྐྱང་དག་ཏུའོ། །དཀྱིལ་འཁོར་དག་ནི་བསྐྱེད་པ་རྣམས། །ཐམས་ཅད་དམ་ཚིག་བཞིས་རྒྱས་གདབ། །དེ་ལྟར་སྦྱོར་བས་མཉམ་
བསྡུས་ནས། །ཕྲ་མོའི་སྦྱོར་བ་བརྩམ་པར་བྱ། །སྣ་རྩེར་ཡུངས་ཀར་བསམས་ནས་ནི། །ཡུངས་ཀར་དེ་ནི་སྤྲོ་ཞིང་བསྡུ། །ཚད་མེད་ཡེ་ཤེས་གནས་བསྒོམ་པའི། །གསང་བའི་ཡེ་ཤེས་བརྟགས་པའོ། །ཁ་དོག་ལྔ་པའི་རིན་པོ་ཆེ། །ཡུངས་ཀར་སྦོམ་པོའི་ཚད་ཙམ་དག །སྣ་ཡི་རྩེ་
མོར་ནན་ཏན་དུ། །རྣལ་འབྱོར་པས་ནི་རྟག་ཏུ་བསྒོམ། །བརྟན་པར་གྱུར་ནས་རིན་ཆེན་སྤྲོ། །བརྟན་པར་མ་གྱུར་སྤྲོ་མི་བྱ། །སངས་རྒྱས་འོད་འབར་ལྟ་བུ་ཡི། །སྤྲིན་གྱི་མཆོག་ནི་སྤྲོ་བར་བྱ། །རྡོ་རྗེ་འཁོར་ལོ་སྤྲིན་ཆེན་པོ། །པདྨ་མཛོད་ནི་མཚོན་ཆ་འཛིན། །བྱང་ཆུབ་སེམས་
དཔའ་སྤྲིན་ཆེན་པོ། །སྤྲོ་བའི་བདག་ཉིད་སྤྲོ་བར་བྱ། །ཨུཏྤལ་སྔོན་པོའི་འདབ་འདྲ་བའི། །རྩེ་མོ་ལྔ་པ་ཁྱད་པར་དུ། །ནས་ཀྱི་ཚད་ཙམ་ནན་ཏན་གྱིས། །སྣ་ཡི་རྩེ་མོར་རྣམ་པར་བསམ། །འཁོར་ལོ་ལ་སོགས་བྱེ་བྲག་གིས། །དེ་ལྟར་བསྒོམས་པས་བརྟགས་པ་སྟེ། །བྱང་ཆུབ་

ཚད་མེད་འགྲུབ་འགྱུར་ཞིང་། །ཡོན་ཏན་གནས་རྣམས་ཐམས་ཅད་འགྲུབ། །མདོར་ན་དེ་ལྟར་བསྐྱེད་བྱས་ན། །སངས་རྒྱས་བྱང་ཆུབ་རབ་ཏུ་གནས། །ཆོས་ཀྱི་གནས་ནི་འབྱུང་འགྱུར་ཏེ། །ལུས་དང་ངག་ཡིད་མཚོན་པའོ། །དེ་ནས་སྤྲོ་བར་བྱ་བ་ནི། །རྡོ་རྗེ་
བྱེ་བ་གྲངས་མེད་དེ། །ཏིལ་གོང་བཞིན་དུ་མཁའ་དགང་ལ། །རྡོ་རྗེ་བཟླས་པ་བརྩམ་པར་བྱ། །བཟླས་མཐར་སངས་རྒྱས་ཡེ་ཤེས་ཀྱི། །རྡོ་རྗེ་མི་ཕྱེད་གསུམ་བསྒོམས་ཏེ། །རྡོ་རྗེ་བཟླས་པའི་སྤྱོར་བས་ནི། །སངས་རྒྱས་ཀུན་གྱི་བྱིན་གྱིས་རློབ། །དུས་གསུམ་སངས་རྒྱས་ཀུན་འབྱུང་
བ། །སྐུ་གསུང་ཐུགས་ནི་རྡོ་རྗེ་སྟེ། །རྡོ་རྗེ་གསང་སྔགས་བྱིན་རླབས་ཀྱིས། །མཚུངས་པ་མེད་པའི་ཡེ་ཤེས་འཐོབ། །གསང་སྔགས་དོན་ཀུན་བཟླས་པ་ནི། །རྡོ་རྗེ་མི་ཕྱེད་གསུམ་གྱིས་མཚན། །རྡོ་རྗེ་མི་ཕྱེད་གསུམ་རྫོགས་པ། །འདི་དམིགས་རྡོ་རྗེ་གསུམ་ཞེས་བྱ། །སངས་རྒྱས་
རྣམས་ཀྱི་སྐུ་གསུང་ཐུགས། །རྡོ་རྗེ་ཡེ་ཤེས་བསྒོམས་ནས་ནི། །མཆོད་པའི་མཆོག་ནི་རྟག་བྱས་ན། །འདིས་ནི་བྱང་ཆུབ་མཚུངས་པར་འགྱུར། །སྐུ་གསུང་ཐུགས་ནི་མངོན་སུམ་དུ། །ཆོ་ག་གསུམ་གྱིས་སྤྲོ་བར་བྱ། །བཟླས་པ་རྡོ་རྗེ་འདི་ཡིས་ནི། །རྡོ་རྗེ་གསུམ་གྱི་སེམས་འདྲར་འགྱུར། །
ཡང་ན་སྤྲོ་བར་བྱ་བ་ནི། །སོ་སོར་གསུམ་གྱི་བྱེ་བྲག་གིས། །སྐུ་གསུང་ཐུགས་ནི་བདག་མེད་པར། །ཡེ་ཤེས་སེམས་ཀྱིས་སྤྲོ་བར་བྱ། །ཁྲོ་བོའི་དམ་ཚིག་ཡེ་ཤེས་ཀྱིས། །རང་གི་རྡོ་རྗེའི་དཀྱིལ་འཁོར་དུ། །སྔགས་ཀྱི་ཡི་གེའི་སྒྲ་སྒྲོགས་པ། །དེ་ནི་ཁྲོ་བོའི་བཟླས་པ་ཡིན། །བཟླས་པ་རྡོ་རྗེ་
ཀུན་དུ་སྤྲོ། །རྫོགས་ནས་རབ་ཏུ་བསྡུ་བར་བྱ། །འདི་ནི་སངས་རྒྱས་ཐམས་ཅད་ཀྱིས། །བཟླས་པར་གསུངས་བ་དོན་དམ་པའོ། །ཆོས་དང་ཕྱག་རྒྱ་གླུར་བླངས་པ། །རྡོ་རྗེ་ཚིག་ཏུ་སྦྱོར་བ་སྟེ། །འདི་ནི་གསལ་བ་གསང་བའི་ཚིག །རྡོ་རྗེའི་ཚིག་ནི་སྐད་གདངས་མེད། །ཧཱུཾ་བཛྲ་དྷྲྀཀ །གསུམ་
པ་སྤྲོས་པ་བསྡུས་ནས་ནི། །རྡོ་རྗེ་སེམས་དཔའ་བསྒྲུབ་པར་བྱ། །གལ་ཏེ་རྒྱལ་པོ་མ་གྲུབ་ན། །དྲག་ཤུལ་སྦྱོར་བས་བསྒྲུབ་པར་བྱ། །རྡོ་རྗེ་ཆེན་པོས་བསྒྲུབ་པར་བྱ། །ཆོ་ག་བཞིན་དུ་རྟག་བསྒོམས་ཏེ། །སྙིང་ག་དག་ཏུ་བརྡེག་པ་ཡིས། །ཡེ་ཤེས་སེམས་དཔའ་རབ་ཏུ་བསྐུལ། །ཡང་

ན་རང་གི་དམ་ཚིག་ཁྲོ། །ལུས་དང་ངག་སེམས་ལས་བྱུང་བ། །གཡོན་པའི་ཕྱག་ན་ལྕགས་ཀྱུ་དང་། །གཡས་པ་ན་ནི་རྡོ་རྗེ་འཛིན། །གལ་ཏེ་མེ་ལྟར་འབར་བ་ཡི། །སྟོབས་ཆེན་དེ་ནི་གཏང་བར་བྱ། །མི་གནས་མྱ་ངན་འདས་པ་ཐོབ། །རྡོ་རྗེ་སེམས་དཔའ་གནས་པ་དེ། །ཁྲོ་བོས་
སྙིང་གར་བརྡེག་བྱ་ཞིང་། །ཁྲོ་བོའི་ཚིག་གིས་བསྐུལ་བར་བྱ། །ཆེ་གེ་ཞེས་བྱ་རྡོ་རྗེ་ཆེ། །ཁྱོད་ནི་སྒྲུབ་པར་གནས་པ་སྟེ། །འདི་ལྟར་རྟག་ཏུ་ཁྱོད་ལ་གུས། །དེ་ནི་དམ་ཚིག་སྲུང་བའི་མཆོག །དབང་བསྐུར་རྗེས་སུ་གནང་བ་སྟེ། །དེ་ལ་དངོས་གྲུབ་རབ་ཏུ་སྩོལ། །འདི་ནི་རྡོ་རྗེ་
ཚུལ་མཆོག་སྟེ། །ཞག་བདུན་བར་དུ་བྱས་ན་ནི། །ལུས་ངག་ཡིད་ནི་འགྲུབ་འགྱུར་ཏེ། །རྡོ་རྗེ་གསང་བའི་དངོས་གྲུབ་བོ། །འཇིགས་ཤིང་སྐྲག་པའི་སེམས་ཀྱིས་ནི། །མཆོག་སྦྱིན་མགོན་པོ་གཟིགས་མཛད་དེ། །ཆོག་ཤེས་སེམས་དང་དགའ་བར་ནི། །དངོས་གྲུབ་ཆེན་པོ་སྩོལ་
བར་མཛད། །རྡོ་རྗེ་གསུམ་འབྱུང་འདྲ་བར་ནི། །འདིས་ནི་བྱང་ཆུབ་ཐོབ་འགྱུར་ཏེ། །རྒྱལ་བ་བྱང་ཆུབ་རྒྱ་མཚོ་ཡི། །རྡོ་རྗེ་སེམས་དཔར་དེ་འགྱུར་རོ། །སྤྱན་ལ་སོགས་པའི་ལྷ་མོ་དང་། །བྲལ་བའི་ཆ་ལུགས་ཇི་བཞིན་དུ། །བདེ་བ་མཆོག་ལ་ཞེན་པ་ཡིས། །རྡོ་རྗེ་སེམས་དཔའ་རྣམ་
པར་གཟིགས། །སྙན་ཅིང་འཇེབས་པའི་དབྱངས་དག་དང་། །ཕྲ་མོ་ཡི་ནི་དབྱངས་ལ་སོགས། །འདོད་པ་བདེ་བ་ཞི་དོན་གྱིས། །བསྐུལ་བ་དག་ཏུ་རྣམ་པར་བསམ། །རྡོ་རྗེ་སེམས་ཁྱོད་ས་བདག་སྟེ། །སེམས་ཅན་ཁམས་ནི་སྐྱེད་མཛད་པ། །འདོད་དགའ་ཡིད་འོང་དོན་ཆེན་ཏེ། །
སེམས་ཅན་ཀུན་གཉེན་ཆེ་མཆོག་གིས། །གལ་ཏེ་བདག་སྲོག་བཞེད་པ་ན། །མགོན་པོ་བདག་ལ་འདོད་པ་སྤྱོད། །རྡོ་རྗེ་སྐུ་ཁྱོད་སངས་རྒྱས་འཁོར་ལོ་དོན། །སེམས་ཅན་མང་པོ་དགའ་བ་རྟོགས་མཛད་ཅིང་། །བྱང་ཆུབ་དམ་པའི་དོན་ནི་ཕན་པ་སྟོན། །དམ་ཚིག་ལ་ནི་འདོད་པས་འདོད་
ཆགས་པ། །གལ་ཏེ་མགོན་པོ་བདག་སྲོག་བཞེད་པ་ན། །ཁྱོད་ཀྱིས་འདོད་པ་བདག་ལ་སྤྱད་དུ་གསོལ། །རྡོ་རྗེ་གསུང་ཁྱོད་ཐམས་ཅད་ཀུན་ལ་ནི། །ཕན་དང་འཇིག་རྟེན་ཐུགས་བརྩེ་སེམས་ཅན་དོན། །དགོས་པའི་བྱ་བ་ཀུན་ལ་རབ་ཏུ་ཆགས། །གལ་ཏེ་མགོན་པོ་བདག་སྲོག་བཞེད་པ་ན། །

རབ་དགྱེས་ཀུན་བཟང་འདོད་པས་བདག་ལ་སྤྱོད། །རྡོ་རྗེ་འདོད་ཁྱེད་དམ་ཚིག་མཆོག་ལགས་ཏེ། །ཕན་པའི་དོན་ཆེན་རྫོགས་སངས་རྒྱས་པའི་རིགས། །མཉམ་ཉིད་ཐིག་ལེ་རྗེས་སུ་ཐུགས་བརྩེར་ལྡན། །གལ་ཏེ་མགོན་པོ་བདག་སྲོག་བཞེད་པ་ན། །ཡོན་ཏན་རིན་
ཆེན་གཏར་མང་བདག་ལ་སྤྱོད། །དེ་ལྟར་ལྷ་མོས་བསྐུལ་ནས་ནི། །དེ་བཞིན་གཤེགས་ལ་སྟོད་པར་བྱེད། །མི་བསྐྱོད་པ་ནི་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །གསང་བ་གསུམ་ལ་ཕྱག་འཚལ་ལོ། །རྣམ་པར་སྣང་
མཛད་དགའ་ཆེན་པོ། །རྡོ་རྗེ་ཞི་བ་དགྱེས་པ་ཆེ། །རང་བཞིན་གྱིས་ནི་འོད་གསལ་ཆོས། །རྡོ་རྗེ་སྟོན་ལ་ཕྱག་འཚལ་ལོ། །རིན་ཆེན་རྒྱལ་པོ་ཤིན་ཏུ་ཟབ། །ནམ་མཁའ་རྡོ་རྗེ་དྲི་མེད་མཁའ། །རང་བཞིན་དག་པ་དྲི་མ་མེད། །གསང་བ་གསུམ་ལ་ཕྱག་འཚལ་ལོ། །རྒྱལ་ཆེན་རྡོ་རྗེ་
སྣང་མཐའ་ཡས། །རྣམ་པར་མི་རྟོག་རྡོ་རྗེ་མཁའ། །འདོད་ཆགས་ཕ་རོལ་ཕྱིན་བརྙེས་པའི། །རྡོ་རྗེ་གསུམ་ལ་ཕྱག་འཚལ་ལོ། །རྡོ་རྗེ་དོན་གྲུབ་རྫོགས་སངས་རྒྱས། །བསམ་པ་ཐམས་ཅད་རྫོགས་པར་མཛད། །རང་བཞིན་དག་པ་ཉིད་ལས་བྱུང་། །རྡོ་རྗེ་སེམས་ལ་ཕྱག་འཚལ་
ལོ། །འདི་ལྟར་བསྟོད་ཚིག་ཞི་བ་ཡིས། །སངས་རྒྱས་ཐམས་ཅད་བསྐུལ་བྱས་ནས། །རྡོ་རྗེ་ལོངས་སྤྱོད་ཀྱིས་བསྟོད་ན། །དེ་ཡང་སངས་རྒྱས་འདྲ་བར་འགྱུར། །ལྷ་མོས་དེ་བཞིན་གཤེགས་བསྟོད་པ། །རྡོ་རྗེ་བློ་ཡིས་གཟིགས་ནས་ནི། །སྐུ་གསུང་ཐུགས་ལ་བསྡུས་མཛད་ནས། །
སྣ་ཚོགས་རྗེས་སུ་ཆགས་པར་མཛད། །དཀྱིལ་འཁོར་ཐམས་ཅད་མཐོང་བ་ནི། །སྐུ་གསུང་ཐུགས་ཀྱི་རྡོ་རྗེ་ནི། །ཆོ་ག་བཞིན་དུ་བརྟན་བྱས་ནས། །བཟླས་པ་དག་ནི་བསྡུ་བར་བྱ། །ཏིང་ངེ་འཛིན་ལ་དམིགས་པ་ན། །སྔགས་པ་ལུས་ཉམ་ཆུང་གྱུར་ན། །ལུས་ངག་ཡིད་ནི་བརྟན་
བྱའི་ཕྱིར། །སྦྱོར་བ་འདི་ནི་བརྩམ་པར་བྱ། །སྤྱི་བོར་དཀྱིལ་འཁོར་བརྟག་པ་ནི། །མཐོ་གང་གི་ནི་ཚད་ཙམ་སྟེ། །ཨོཾ་ནི་དབུས་སུ་བསྒོམས་ནས་ཀྱང་། །བདུད་རྩི་ལྔ་ནི་འགྱུར་བར་བསམ། །རྡོ་རྗེ་སྦྱོར་བ་འདི་ཡིས་ནི། །སྐད་ཅིག་གིས་ནི་མདངས་ལྡན་འགྱུར། །ལུས་དང་ངག་

སེམས་བདེ་གནས་པ། །ཐེ་ཚོམ་མེད་པར་འགྲུབ་པ་ཡིན། །བཀྲེས་སྐོམ་ལ་སོགས་སྡུག་བསྔལ་ལ། །སྦྱོར་བ་འདི་ནི་རྣམ་པར་བསམ། །སྡུག་བསྔལ་ཐམས་ཅད་མེད་འགྱུར་བ། །མི་གཙང་རྡོ་རྗེ་ཚིག་བཞིན་ཏེ། །རྣམ་པར་སྣང་མཛད་གཟུགས་ཆེན་པོ། །བསྒོམས་པས་དོན་ཀུན་
ཕུན་སུམ་ཚོགས། །བ་ནི་ཁ་ལ་བསྒོམ་བྱས་ནས། །ཨོཾ་ཞེས་པ་ནི་ལྕེ་ལ་དམིགས། །བཟའ་བ་ཀུན་གྱི་གནས་གྱུར་པ། །ཡིད་བཞིན་ནོར་བུས་རྣམ་པར་བརྒྱན། །སྡུག་བསྔལ་ཀུན་སེལ་རབ་ཞི་བ། །ཡེ་ཤེས་རྡོ་རྗེ་བྱིན་བརླབ་སྟེ། །གང་ཞིག་འདི་ནི་སྒོམ་བྱེད་པ། །བྱང་ཆུབ་སེམས་དཔའ་
གྲགས་ཆེན་འགྱུར། །རྡོ་རྗེ་སེམས་དཔའི་སྦྱོར་ལྡན་ན། །སྐུ་གསུང་དངོས་གྲུབ་ཐོབ་པར་འགྱུར། །དད་པ་མེད་དང་ཐེག་དམན་ཞུགས། །འདོད་ཆགས་ཞེ་སྡང་དབང་རྟུལ་ན། །སློབ་བུ་ལ་ཡང་སྦྱིན་མི་བྱ། །གང་ཕྱིར་སྒྲུབ་པ་འདི་བརྩམས་པ། །རྒྱུད་དོན་མངོན་པར་རྟོགས་ནས་ནི། །རྡོ་རྗེ་
སེམས་བསྒྲུབ་ཕྱིར་བྲིས་ཏེ། །རྡོ་རྗེ་བཞད་པའི་སློབ་དཔོན་གྱིས། །སེམས་ཅན་ཡེ་ཤེས་བསྐྱེད་ཕྱིར་རོ། །དཔལ་བདེ་བ་ཆེན་པོའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཤྲཱི་མ་ཧཱ་སུ་ཁ་སཱ་དྷ་ནོ་པི་ཀ་བྱ་ཁྱ་ན། བོད་སྐད་དུ། དཔལ་བདེ་བ་ཆེན་པོ་སྒྲུབ་པའི་
ཐབས་རྣམ་པར་བཤད་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བདེ་བ་ཆེན་པོ་རྡོ་རྗེ་ཆེ། །ཡེ་ཤེས་མཐའ་ཡས་འབྱུང་གནས་ལ། །ཕྱག་འཚལ་སྒྲུབ་ཐབས་དོན་རྣམས་ནི། །བླ་མས་བསྟན་བཞིན་བདག་གིས་བྲི། །དཔལ་ཞེས་བྱ་བ་ནི་ཕུན་སུམ་ཚོགས་པ་ལ་བྱའོ། །
དེ་ཡང་འཇིག་རྟེན་དང་འཇིག་རྟེན་ལས་འདས་པའོ། །འཇིག་རྟེན་གྱི་དཔལ་ནི་ལྷ་དང་མིའི་འབྱོར་པ་ཐམས་ཅད་དང་ལྡན་པའོ། །འཇིག་རྟེན་ལས་འདས་པ་ནི་སངས་རྒྱས་ཀྱི་ཡོན་ཏན་ཐམས་ཅད་ལ་བྱའོ། །དེ་གཉིས་དང་ལྡན་པས་དཔལ་ལྡན་ཞེས་བྱའོ། །དཔལ་གྱི་སྒྲས་ནི་ལྷ་མོ་བཞི་ལ་
སོགས་པ་ལ་ཡང་བྱ་སྟེ། དེ་རྣམས་དང་གཉིས་སུ་མེད་པའི་སྦྱོར་བའི་ཚུལ་དུ་གནས་པས་དཔལ་ལྡན་ནོ། །རྡོ་རྗེ་ནི་ཡང་དག་པའི་ཡེ་ཤེས་སེམས་དཔའ་ནི་དེ་ཉིད་ཀྱི་རང་བཞིན་ཡིན་པས་སེམས་དཔའ་ཞེས་བྱ་སྟེ། སེམས་ཅན་ཐམས་ཅད་དང་མཐུན་པར་སྐུ་བསྟན་པས་སེམས་དཔའོ། །

མགོན་པོ་སངས་རྒྱས་ཀུན་ངོ་བོ། །ཞེས་པ་ནི་ཐུགས་རྗེའི་རང་བཞིན་ཡིན་པས་སེམས་ཅན་གྱི་བསམ་པ་དང་མཐུན་པར་ཐམས་ཅད་ཀྱི་དོན་མཛད་པས་མགོན་པོ་ཞེས་བྱ། ཕྱོགས་བཅུ་དུས་གསུམ་གྱི་སངས་རྒྱས་ཀྱི་བདག་ཉིད་ཡིན་པས་སོ། །ཞེ་སྡང་རྡོ་རྗེ་རྒྱལ་བའི་
གཙོ། །ཞེས་པ་ནི་སེམས་ཅན་ཞེ་སྡང་ཅན་ཐམས་ཅད་འདུལ་བའི་ཆ་ལུགས་སུ་བསྟན་པས་ཞེ་སྡང་རྡོ་རྗེའོ། །རང་སངས་རྒྱས་དང་ཉན་ཐོས་ཀྱི་མཆོག་ཏུ་གྱུར་པ་དང་། །དཀྱིལ་འཁོར་གྱི་བདག་པོ་ཡིན་པས་ན་རྒྱལ་བའི་གཙོ། ལྷ་མོ་ཞེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་ཆོས་
ཀྱི་དབྱིངས་ཀྱི་ཕྱག་རྒྱ་དང་ལྡན་པ་རྣམས་དང་གཉིས་སུ་མེད་པའི་ཚུལ་དུ་བདེ་བ་ཆེན་པོ་རྟག་ཏུ་ཉམས་སུ་མྱོང་བ་ལ་བྱའོ། །དད་པས་ཞེས་པ་ནི་གུས་པ་དང་བཅས་པས་སོ། །བདག་གི་ལུས་ངག་ཡིད་གསུམ་གྱི་སྒོ་ནས་ཕྱག་འཚལ་ནས། །དེ་ལྟར་ཕྱག་འཚལ་བའི་དོན་ནི་རྒྱུད་ཐམས་ཅད་
ཀྱི་རྒྱལ་པོ་གསང་བ་འདུས་པ་འདི་གང་ཟག་བློ་དམན་པ་རྣམས་ཀྱིས་རྟོགས་ཤིང་གོ་དཀའ་བས་དེ་ལྟ་བུའི་སེམས་ཅན་རྣམས་ལ་ཕན་གདགས་པའི་ཕྱིར་རོ། །དཔལ་ནི་བཛྲ་སཏྭ། དེ་དང་ལྡན་པས་དཔལ་ལྡན་ནོ། །གསང་འདུས་ནི་རྒྱུད་ཀྱི་མཚན་ནོ། །དོན་ནི་ངེས་པའོ། །རྟོགས་པ་ནི་སེམས་ཀྱིས་
སོ། །གསང་བ་ནི་ཚིག་གིས་སོ། །སེམས་ཅན་ནི་ཁམས་གསུམ་ན་གནས་པའོ། །ཕན་པ་ནི་མཐོ་རིས་དང་ཐར་པ་ཐོབ་པར་བྱ་བ་རྒྱུད་འདི་ལ་འཇུག་པར་བྱའོ། །བསྒྲུབ་པར་བྱ་བའི་ཕྱིར་སྒྲུབ་པའོ། །དེ་ཡང་གང་ཞེ་ན། དཔལ་རྡོ་རྗེ་སེམས་དཔའ་ལ་སོགས་པའོ། །ཐབས་ནི་ཡན་ལག་
གོ། །འདི་ནི་བརྩམས་པའི་དངོས་པོའོ། །བཤད་པར་བྱ་ཞེས་པ་ནི་དམ་བཅའ་བའོ། །དང་པོ་སེམས་བསྐྱེད་མ་ཐག་གོ། །སྔགས་པ་ཞེས་བྱ་བ་ནི་གསང་སྔགས་ཀྱི་ཚུལ་ལ་སྤྱོད་པའོ། །ངེས་པ་ནི་ཐེ་ཚོམ་མེད་པའོ། །ད་ནི་འཇུག་པའི་རིམ་པ་བསྟན་པ་ཡིན་ཏེ། རྡོ་རྗེ་ནི་ཡང་དག་པའི་དོན་ཏེ་དེ་ལ་
མ་ནོར་བར་སྟོན་ཅིང་བདེ་བ་ཆེན་པོའི་གོ་འཕང་ཐོབ་པར་བྱེད་པའོ། །མཉེས་པར་བྱ་བ་ཡང་རྣམ་པ་གསུམ་སྟེ་ཕྱི་དང་ནང་དང་གསང་བའོ། །ཕྱི་ནི་ལུས་དང་ལོངས་སྤྱོད་དོ། །ནང་ནི་ཤེས་རབ་རྣམ་གསུམ་གྱི་སྒོ་ནས་སོ། །གསང་བ་ནི་གསང་བའི་མཆོད་པས་སོ། །དེ་ལྟར་སློབ་དཔོན་མཉེས་

པར་བྱས་ནས་དབང་རྣམ་གསུམ་ཐོབ་ནས་གནང་བ་ནི་སྒྲུབས་ཤིག་ཅེས་བྱ་བའི་དོན་ཏོ། །དེ་ནས་ཞེས་བྱ་བ་ནི་མཉེས་པར་བྱ་བ་ལ་སོགས་པ་ཟིན་ནས་སོ། །སྒྲུབ་པ་ནི་གང་ཡང་རུང་བའི་སྒྲུབ་པའི་དངོས་པོའོ། །བརྩམ་པར་བྱ་བ་ནི་འཇུག་པའོ། །དཀྱིལ་འཁོར་གྱི་དོན་ནི་སྒྲ་ལས་དྲངས་ན་
མཎྜ་ནི་སྙིང་པོའོ། །ལ་ནི་ཨ་ད་ན་སྟེ་ལེན་པའོ། །དཀྱིལ་འཁོར་པས་དཀྱིལ་འཁོར་རོ། །དེར་ཞུགས་པ་ནི་ཚུལ་བཞིན་དུ་སློབ་དཔོན་གྱིས་བསྟན་ཞིང་དབང་བསྐུར་བའོ། །དེ་བཞིན་ནི་འདྲ་བའི་དོན་གསང་བ་ནི་ཐུན་མོང་མ་ཡིན་པ་དང་། །རྟོག་གེ་བས་མ་ཡིན་པའོ། །ཉིད་ནི་མ་ནོར་བ་
དཀྱིལ་འཁོར་གྱི་དོན་དང་གཉིས་སུ་མེད་པའི་དོན་ཏོ། །ཤེས་པ་ནི་གོ་བའོ། །ཀུན་བྱེད་ཐམས་ཅད་ཟ་བ་ཡིས། །ཞེས་པ་ནི་རྟོག་པ་མེད་ཅིང་གཉིས་སུ་མེད་པའི་སྤྱོད་པའོ། །ཐེ་ཚོམ་མེད་པར་དངོས་གྲུབ་ཐོབ། །ཅེས་བྱ་བ་ནི་ཡོན་ཏན་དེ་ལྟ་བུ་དང་ལྡན་པས་བསྒྲུབས་ན་ཡིད་ཀྱི་འདོད་པའི་དོན་
གྲུབ་ཅེས་བྱ་བའི་དོན་ཏོ། །གཙོ་བོ་ནི་ཡི་དམ་གྱི་ལྷ་དང་རྡོ་རྗེ་སློབ་དཔོན་གཉིས་སོ། །མི་ཕྱེད་པ་ནི་མི་འགྱུར་བ་དང་རྒྱུན་མི་འཆད་པའོ། །དད་པ་ནི་ཡིད་ཆེས་པ་དང་གུས་པ་དང་ཆགས་པའོ། །རྣམ་པ་ནི་ཐ་དད་པ་མི་རྟོག་པའི་བློ་ནི་ཐ་དད་པའི་འདུ་ཤེས་མེད་ཅིང་གཉིས་སུ་མེད་པའོ། །དམ་ཚིག་
ནི་མི་འདའ་བ་སྟེ་སྐུ་གསུང་ཐུགས་ལ་སོགས་པའོ། །སྡོམ་པ་ནི་མི་གཡེང་བའོ། །གནས་པ་ནི་ལྡན་པའོ། །དེ་ལྟ་བུའི་རྣལ་འབྱོར་པས་བསྒྲུབས་ན་སྐུ་གསུང་ཐུགས་ཀྱི་འབྲས་བུ་འགྲུབ་པར་འགྱུར་རོ། །བྲམ་ཟེ་ཞེས་བྱ་བ་ནི་དགེ་བའི་ངང་ཉིད་ཡིན་པས་ན་དོར་བའི་ཚིག་གོ། །དཀྱིལ་
འཁོར་དག་ནི་དམན་པ་དང་། །ཞེས་བྱ་བ་ལ་སོགས་པའི་དོན་ནི་གོང་དུ་བསྟན་པའི་ཡོན་ཏན་དང་མི་ལྡན་པར་རང་བཟོ་དང་གཟུ་ལུམས་སུ་བྱས་ཤིང་བསྒྲུབས་ན། འབྲས་བུ་མི་འཐོབ་ཅིང་བྱས་པ་ཆུད་ཟོས་པས་བྱར་མི་རུང་བར་བསྟན། དེ་ལྟ་བས་ན་དམ་ཚིག་དང་སྡོམ་པ་བསྟན་ཏེ། དམ་ཚིག་
ནི་བསྒྲུབ་པའི་དམ་རྫས་སོ། །སྡོམ་པ་ནི་ཁ་ན་མ་ཐོ་བ་མེད་པར་དང་དུ་ལེན་པའོ། །དེ་ཡང་གང་ཡིན་ཞེ་ན། ཤ་ལ་སོགས་པ་བདུད་རྩི་ལྔའོ། །ཤ་ནི་ཤ་ཆེན། རཀྟ་ནི་ཁྲག་ཐམས་ཅད། དྲི་ཆེན་དང་རྡོ་རྗེ་ཆུ་ཡང་ཀུན་གྱིའོ། །སེམས་ནི་ལྔ་པ་བྱང་ཆུབ་བྱུང་བ་ཞེས་པ་ནི་ཐབས་དང་ཤེས་རབ་གཉིས་སུ་མེད་

པའི་རོལ་པ་ལས་བྱུང་བ་ཡིན་པས་སོ། །སྔགས་པ་ནི་རྣམ་པར་མི་རྟོག་པ་སྒྲུབ་པ། ཆོ་གས་ཞེས་པ་ནི་བྱ་བ། དེ་བཞིན་གཤེགས་པའི་རང་བཞིན་དུ་བྱིན་གྱིས་བརླབས་པ་དང་འགྲོ་ནས་འབྱུང་བའི་ཐབས་སོ། །ཉིན་གཅིག་བཞིན་དུ་ནི་དུས་ཐམས་ཅད་དུའོ། །སྦྱང་བ་ནི་
ཧཱུཾ་གིས་སོ། །འབར་བ་ནི་ཨོཾ་གྱིས་སོ། །རྟོགས་པ་ནི་ཨཱཿཡིས་སོ། །དོགས་པ་ནི་འགྲུབ་མི་འགྲུབ་པའི་ཐེ་ཚོམ་མོ། །མེད་པ་ནི་སྤངས་པའི་སེམས་སོ། །དེ་བཞིན་གཤེགས་པ་ནི་སྔོན་གྱི་དེ་བཞིན་གཤེགས་པ་ཅི་ལྟར་གཤེགས་པ་བཞིན་གཤེགས་པས་དེ་བཞིན་གཤེགས་པའོ། །དེ་ཡང་གང་ཞེ་ན་ཐབས་
དང་ཤེས་རབ་གཉིས་སུ་མེད་པའི་ཚུལ་བསྒོམས་ཤིང་བསྒྲུབས་པས་བདེ་བ་ཆེན་པོའི་ངང་དུ་གྱུར་པ་རྣམ་པར་སྣང་མཛད་ལ་སོགས་པའོ། །མཉེས་པ་ནི་དགྱེས་པའི་དོན་ཏོ། །དེ་ཡང་མངོན་སུམ་དུ་གྱུར་པའོ། །དེ་བཞིན་གཤེགས་པ་ནི་གསང་སྔགས་ཀྱི་སྒོར་ཞུགས་པའི་རྣལ་འབྱོར་པ། མཉེས་
པ་ནི་སྐུ་གསུང་ཐུགས་ཀྱི་འབྲས་བུ་འཐོབ་པའོ། །སྦྱང་པའི་ཐབས་ནི་སྒྲུབ་པའི་རྫས་སྣོད་དུ་བཞག་ལ་དེའི་སྟེང་དུ་ཧཱུཾ་གཅིག་འབར་བར་བསྒོམ། །དེའི་འོད་ཟེར་གྱིས་མ་རྟོགས་པ་དང་ལོག་པར་རྟོགས་པའི་དྲི་མ་ཐམས་ཅད་བསྲེགས་པར་བསམ། དེ་ལྟར་རྣམ་པར་དག་པར་བྱས་ལ། དེའི་སྟེང་དུ་ཟླ་བའི་
དཀྱིལ་འཁོར་དང་ཨ་གཅིག་བསྐྱེད། ཨ་ལས་འོད་ཟེར་འཕྲོས་པས་ཟླ་བའི་དཀྱིལ་འཁོར་ལ་ཕོག་པས་ཞུ་སྟེ། བདུད་རྩིའི་ཐིགས་པ་ཚུལ་བཞིན་དུ་ཞུ་ཞིང་གཉིས་སུ་མེད་པར་སོང་བས་བདུད་རྩིར་གྱུར་པ་ནི་རྟོགས་པའོ། །དེའི་སྟེང་དུ་ཨོཾ་བསྒོམ་ཞིང་འཕྲོ་འདུ་བྱ་བ་ནི་མ་འབར་གྱི་བར་དུའོ། །
དེ་ལྟར་བྱས་ཤིང་སྤྱད་ན་སྐུ་གསུང་ཐུགས་ཀྱི་དངོས་གྲུབ་འཐོབ་པས་དམ་ཚིག་དམ་པའོ། །དེ་ལྟར་ཤ་རྣམ་པ་ལྔ་ཡང་སྒྲུབ་པའི་རྫས་ཡིན་པ་དང་། རྟོག་པ་སྤོང་བ་དང་། རང་བཞིན་གྱིས་མཐུ་ཡོད་པས་སྤྱད་པར་བྱ་བ་བསྟན། དེ་ཡང་གླང་པོ་ཆེའི་ཤ་ནི་ལོ་ཙ་ནར་བྱིན་གྱིས་བརླབ་ཅིང་རྣམ་
པར་སྣང་མཛད་ལ་མཆོད་པའི་ཚུལ་དུ་སྤྱད། རྟ་ཤ་ནི་རཏྣ་ལོ་ཙ་ན་དང་རིན་ཆེན་འབྱུང་ལྡན་གྱི་ཚུལ་དུ་སྤྱད། ཤ་ཆེན་ནི་མཱ་མ་ཀཱི་དང་རྡོ་རྗེ་སེམས་དཔའ། བ་ལང་ནི་ན་བཟའ་དཀར་མོ་དང་སྣང་བ་མཐའ་ཡས། ཁྱི་ནི་སྒྲོལ་མ་དང་དོན་ཡོད་གྲུབ་པའི་ཚུལ་དུ་སྤྱད། མཆོག་ནི་ཐུན་མོང་

མ་ཡིན་པས་མཆོག་གོ། །འདི་རྣམས་ཀྱང་སྦྱོང་བ་ལ་སོགས་པ་གོང་མ་དང་འདྲའོ། །སྐུ་གསུང་ཐུགས་སྒྲུབ་པར་འདོད་པའི་རྣལ་འབྱོར་པས་འཇིག་རྟེན་གྱི་ཟས་སྤངས་ལ་རྟག་ཏུ་སྒྲུབ་པའི་དམ་རྫས་སྤྱད་པའི་དོན་ཏོ། །གཞན་ནི་ཟན་ལ་སོགས་པའོ། །རྣལ་འབྱོར་པས་དེ་དག་བདེ་
བླག་ཏུ་མ་རྙེད་ན་ཟས་སྐོམ་ཐམས་ཅད་ལ་ཤ་རྣམས་ཡིན་པར་བསམ་ཞིང་སྤྱད་པར་བྱ་བར་བསྟན། རྡོ་རྗེ་སྦྱོར་བ་འདི་དག་ཅེས་བྱ་བ་ནི་གོང་གི་སྦྱོང་བ་ལ་སོགས་པའི་ཆོ་ག་རྣམས་སོ། །དེ་ལྟར་སྤྱད་པའི་ཡོན་ཏན་ནི་སངས་རྒྱས་ཐམས་ཅད་ཀྱིས་དབང་བསྐུར་བར་འགྱུར་རོ། །ཟན་དང་ཁུར་བ་
ལ་སོགས་པ་བཟའ་བའམ། ཡང་ན་ཆུ་དང་ཆང་ལ་སོགས་པ་བཏུང་བའང་རུང་འཇིག་རྟེན་པས་མི་ནུས་པའི་དཀའ་བའི་སྤྱོད་པ་དང་ལྡན་པས་བརྟུལ་ཞུགས་ཅན་གྱིས་ཟས་སྐོམ་ཅི་ཟ་བ་དྲི་ཆུ་སྨན་ལྔ་ཤ་ལྔ་ཅི་ལྟར་སྦྱོར་བས་སྦྱོང་བ་ལ་སོགས་པའི་ཏིང་ངེ་འཛིན་ཆོ་ག་བཞིན་དུ་རུང་བར་བྱའོ། །
ད་ནི་རྣལ་འབྱོར་པས་ཐ་མལ་པའི་ཚུལ་དུ་གནས་དང་དམ་རྫས་དང་ཡོ་བྱད་སྤྱད་དུ་མི་རུང་བས་དེའི་ཏིང་ངེ་འཛིན་བསྟན། རྣམ་པ་ཐམས་ཅད་མཆོག་ལྡན་པ། །ཞེས་པ་ནི་སྐུ་གསུང་ཐུགས་དང་མཚན་དང་དཔེ་བྱད་དང་རྒྱན་ལ་སོགས་པའི་སངས་རྒྱས་ཀྱི་ཡོན་ཏན་ཐམས་ཅད་དང་
ལྡན་པའི་ལྷ་གང་ཡང་རུང་བ་བསྒོམ་པའི་དོན་ཏོ། །དེ་ལྟར་གནས་པའི་རྣལ་འབྱོར་པའི་ལུས་ངག་ཡིད་གསུམ་ལ་སྐུ་གསུང་ཐུགས་ཀྱི་ལྷ་བསྒོམ་པ་བསྟན། རྡོ་རྗེ་ནི་མི་ཕྱེད་པའི་དོན། ཡི་ནི་དེའི་དོན། དེ་ཡང་ཅི་ལྟར་བསྒོམ་ཞེ་ན། བདག་གི་སྙིང་གི་བར་སྣང་ལ་ཨ་ལས་བསྐྱེད་
པའི་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་ཡེ་ཤེས་སེམས་དཔའ་སྐུ་མདོག་དཀར་བ་རྡོ་རྗེ་དང་དྲིལ་བུ་འཛིན་པ་རྒྱན་ཐམས་ཅད་དང་ལྡན་པར་བསྒོམ་མོ། །སྤྱི་བོར་ཟླ་བའི་དཀྱིལ་འཁོར་གྱི་སྟེང་དུ་ཨོཾ་ལས་རྣམ་པར་སྣང་མཛད་བྱང་ཆུབ་མཆོག་གི་ཕྱག་རྒྱ་དང་ལྡན་པར་བསྒོམ།
ལྕེའི་སྟེང་དུ་པདྨ་བསྐྱེད་ལ་ཨ་ལས་སྣང་བ་མཐའ་ཡས་བསྒོམ། ཧཱུཾ་ལས་རྡོ་རྗེ་བསྒོམ་པ་ནི་ཡེ་ཤེས་སེམས་དཔའ་བསྐྱེད་པ་ལ་བྱའོ། །ཨ་ལས་ནི་སྣང་བ་མཐའ་ཡས། ཨོཾ་ལས་ནི་རྣམ་པར་སྣང་མཛད། སྦྱོར་བ་ཞེས་བྱ་བ་ནི་སྤྱི་བོ་དང་ལྕེའི་སྟེང་དུ་དེ་གཉིས་ཀྱི་སྐུ་བསྐྱེད་པ་ལ་བྱ། དེ་ལྟར་བདག་

ལྷར་བསྒོམ་ཞིང་དམ་རྫས་དང་བཟའ་བཏུང་ཐམས་ཅད་ནི་སྐུ་གསུང་ཐུགས་ཀྱི་འབྲས་བུ་འཐོབ་པར་འགྱུར་བའི་དོན་ཏོ། །འདི་ནི་དམ་ཚིག་ཅེས་པ་ནི་གོང་དུ་བསྟན་པའི་དམ་རྫས་ལ་སོགས་པའི་སྤྱད་པའི་ཚུལ་ལོ། །མཆོག་ནི་བླ་ན་མེད་པའི་འབྲས་བུ་ཐོབ་པར་
བྱེད་པའི་ཐབས་ཀྱི་རབ་ཡིན་པས་སོ། །སངས་རྒྱས་ཐམས་ཅད་ནི་རྡོ་རྗེ་སེམས་དཔའ་ལ་སོགས་པ་ལྔའོ། །མཉེས་པ་ནི་སྔགས་ཀྱི་སྤྱོད་པ་ཚུལ་བཞིན་དུ་སྤྱད་པས་དགྱེས་པ་དང་མངོན་དུ་གྱུར་པ་ལ་བྱའོ། །མཆོག་ནི་སྐུ་གསུང་ཐུགས་སོ། །དངོས་གྲུབ་ཀྱང་ཚེ་འདི་ཉིད་ལ་ཐོབ་པའི་དོན་
ཏོ། །ཐམས་ཅད་ནི་འཇིག་རྟེན་པའི་སྤྱོད་པ་གྲུབ་ཀྱང་བསྡུའོ། །དེ་བས་ན་དམ་ཚིག་མཆོག་ཅེས་བྱའོ། །གཞན་ཡང་རྣལ་འབྱོར་པས་དམ་ཚིག་དང་དུས་ཐམས་ཅད་དུ་ལྡན་པར་བྱ་དགོས་པར་བསྟན་པ། རྟག་པ་ཞེས་པ་ནི་དུས་ཐམས་ཅད་དུ་རྒྱུན་མི་འཆད་པའོ། །གཞན་ནི་བདག་ལས་
གཞན་པ་འཕགས་པ་རྣམས་སོ། །འཕྲོག་པ་ནི་བདག་གིར་བྱ་བའོ། །སྤྱིར་འཕགས་པ་རྣམས་ཀྱི་སྐུ་གསུང་ཐུགས་བསྒོམ་ཞིང་ཐོབ་པར་བྱ་བ་ལའང་བྱའོ། །གནོད་སྦྱིན་དང་རྒྱལ་པོ་ལ་སོགས་པའི་ནོར་ཁ་ན་མ་ཐོ་བ་མེད་པའི་སྒོ་ནས་བླངས་ཤིང་སྤྱོད་པ་ལ་ཡང་བྱའོ། །
རྨད་དུ་བྱུང་བ་གསོད་པ་དང་། ཞེས་པ་ནི་ཆོས་ཐམས་ཅད་བདག་མེད་པའི་རང་བཞིན་དུ་མི་བལྟ་ཞིང་། བདག་ཏུ་བལྟ་བ་ལ་སོགས་པའི་ལྟ་བ་ལོག་པའོ། །དེ་ལ་དེ་སྐད་ཅིའི་ཕྱིར་བྱ་ཞེ་ན། ཡང་དག་པའི་དོན་གྱི་གནས་བྱེད་པ་དང་ངན་སོང་དུ་གཏོང་བའི་ཕྱིར་རོ། །གསོ་བ་ནི་
སྤོང་བའོ། །རྨད་དུ་བྱུང་བ་ནི་དཀོན་མཆོག་གསུམ་དང་རྡོ་རྗེ་སློབ་དཔོན་དང་སེམས་ཅན་མང་པོ་ལ་གནོད་པར་བྱེད་པའོ། །གསོད་པ་ནི་ཁ་ན་མ་ཐོ་བ་མེད་པར་སྙིང་རྗེའི་སྒོ་ནས་བསྒྲལ་བའོ། །འདོད་པ་ནི་སྐུ་གསུང་ཐུགས། ཆགས་པ་ནི་གཞན་མི་སེམས་པའོ། །རྡོ་རྗེ་ནི་མི་ཕྱེད་པའི་
དོན་ཏོ། །དེ་ཉིད་ནི་མ་ནོར་བའོ། །སྤྱོད་པ་ནི་བསྒོམ་པའོ། །མདོར་ན་སྐུ་གསུང་ཐུགས་རྒྱུན་མི་འཆད་པར་བསྒོམ་པ་ལ་བྱའོ། །འདོད་ཆགས་ནི་བླ་ན་མེད་པའི་བདེ་བའོ། །སྤྱོད་པ་ནི་ཐབས་དང་ཤེས་རབ་ཀྱི་ཚུལ་གྱིས་ཉམས་སུ་མྱོང་བའོ། །འདི་ཞེས་བྱ་བ་ནི་དམ་ཚིག་གསུམ་མོ། །སྡོམ་པ་ནི་

སྲུང་བའོ། །བསྡམས་པའོ་ཞེས་པ་བསྲུང་བའི་ནང་ན་ཁྱད་པར་དུ་བསྟན་པའོ། །དེ་ལྟར་སྒྲུབ་པའི་རྒྱུ་དམ་ཚིག་རྣམས་བསྟན་ནས། དེ་དང་མི་མཐུན་པའི་སྤྱོད་པ་རྣམས་སྤང་བར་སྟོན་ཏེ། དམ་བཅའ་ནི་ཉན་ཐོས་ཀྱི་སྤྱོད་པ་དང་ཀྲྀ་ཡའོ། །བརྟུལ་ཞུགས་ནི་མུ་སྟེགས་ཅན་
བྲག་ལ་མཆོད་པ་ལ་སོགས་པའོ། །དཀའ་སྤྱོད་ནི་མེ་ལྔ་བསྟེན་པ་དང་ཟས་མི་ཟ་བ་ལ་སོགས་པའོ། །བརྟེན་པས་མི་འགྲུབ་ཅེས་བྱ་བ་ནི་ཉན་ཐོས་ལ་སོགས་པའི་སྤྱོད་པ་རྣམས་སྤྱོད་པས་སྐུ་གསུང་ཐུགས་ཀྱི་དངོས་གྲུབ་མི་ཐོབ་པས་སྤོངས་ཤིག་པའི་དོན་ཏོ། །འདོད་པ་ནི་སྐུ་གསུང་
ཐུགས། ལོངས་སྤྱོད་ནི་གཉིས་སུ་མེད་པར་བསྒོམ་པའོ། །ཐམས་ཅད་ནི་དཀྱིལ་འཁོར་གྱི་ལྷ་ཐམས་ཅད་ལ་བྱའོ། །ཡང་ན་འདོད་པ་ནི་འདོད་པའི་ཡོན་ཏན་ཐམས་ཅད་དོ། །བསྟན་པ་ཞེས་པ་དུས་ཐམས་ཅད་དུ་རྒྱུན་མི་འཆད་པར་སྤྱད་པའོ། །མྱུར་དུ་འགྲུབ་ཅེས་བྱ་བ་ནི་དེ་ལྟར་
བསྐྱེད་པས་སེམས་ལས་སུ་རུང་བས་ཚེ་འདི་ཉིད་ལ་འབྲས་བུ་འཐོབ་པའི་དོན་ཏོ། །སློང་མོ་ཟ་ཞིང་མི་བཟླས་ཏེ། །ཞེས་པ་ནི་མ་ཧཱ་ཡོ་གའི་སྒོར་ཞུགས་པའི་རྣལ་འབྱོར་པས་ཀྲྀ་ཡའམ་མུ་སྟེགས་པ་ལྟར་འཕྲལ་དུ་བསླང་ཞིང་སྔགས་བཟླ་བར་མི་བྱའོ། །དེ་ཅིའི་ཕྱིར་ཞེ་ན། ལུས་ངག་
ཡིད་གསུམ་ཐང་ཆད་པ་དང་ཚུལ་བཞིན་དུ་བསྒོམ་མི་ནུས་པ་དང་། མ་རྙེད་ན་བཀྲེས་སྐོམ་གྱིས་ཉོན་མོངས་པ་དང་སེམས་ལས་སུ་མི་རུང་བས་སོ། །སློང་ལ་དགའ་བར་མི་བྱའོ། །ཞེས་པ་ནི་འཕྲལ་སློང་བ་ལ་དེ་ལྟར་སྐྱོན་ཡོད་པས་སྔོན་དུ་བསླང་ཞིང་གཟུང་ངམ་སྙམ་ན། དེ་ཡང་
ཡིད་དང་འཐད་པ་མི་རྙེད་པས་མི་རུང་ངོ་། །ཡོ་བྱད་ཐམས་ཅད་ཕུན་སུམ་ཚོགས་པས་བྱ་བའི་དོན་ཏོ། །ཡན་ལག་མི་གཉིས་ཞེས་བྱ་བ་ནི་ཀྲྀ་ཡ་བ་ལྟར་བདག་དམ་ཚིག་སེམས་དཔར་བསྒོམ་ཞིང་ཡེ་ཤེས་སེམས་དཔའ་ལོགས་སུ་མཆོད་པ་བཞིན་དུ་མི་བྱ་བར་ཡེ་ཤེས་སེམས་དཔའ་
དང་བདག་གཉིས་སུ་མེད་པར་བསྒོམ་ཞིང་འདོད་པའི་ལོངས་སྤྱོད་ཐམས་ཅད་བཟླ་བའི་དོན། ཡང་ན་ཡན་ལག་མི་གཉིས་ཞེས་པ་ནི་གཟུངས་མ་དང་གཉིས་སུ་མེད་པའི་ཚུལ་དུ་འདུག་ནས་བཟླ་བའི་དོན་ཏོ། །འདོད་པའི་ལོངས་སྤྱོད་ནི་འདོད་པ་ཐམས་ཅད་དོ། །དེ་ཡང་གཟུངས་ཀྱི་ལྷ་མོ་ལ་

སོགས་པའི་ཚུལ་དུ་བསྒོམ་ཞིང་སྤྱད་པའི་དོན་ཏོ། །དེ་ལྟར་སྤྱད་པའི་ཡོན་ཏན་བསྟན་པ། ལུས་དང་ངག་ཡིད་བདེར་གནས་ན། །ཞེས་པ་སྟེ། སློང་བའི་ཟས་སྤང་ཞིང་འདོད་པ་ཐམས་ཅད་སྤྱད་པས་ལུས་ངག་ཡིད་གསུམ་ལས་སུ་རུང་བའི་དོན་ཏོ། །བྱང་ཆུབ་དམ་པ་ནི་
ཉན་ཐོས་དང་རང་སངས་རྒྱས་ལས་འཕགས་པ་བླ་ན་མེད་པའི་བྱང་ཆུབ་ཆོས་ཀྱི་སྐུའི་རང་བཞིན་འཐོབ་པའི་དོན་ཏོ། །གསང་སྔགས་ཚུལ་བཞིན་དུ་སྤྱད་པའི་སྐྱོན་བསྟན་པ་གཞན་དུ་བྱ་བ་ནི་གོང་དུ་སྤྱོད་པ་སྤངས་ནས་ཚུལ་དང་མི་ལྡན་པའི་སྒོ་ནས་གསང་སྔགས་བཟླས་ན་དུས་མིན་འཆི་བ་ཞེས་བྱ་
སྟེ་ཚེའི་མཐར་མ་ཐུག་བར་གློ་བུར་དུ་འཆི་བ་ལ་བྱ། དམྱལ་བ་རྣམས་སུ་རྟག་ཏུ་བསྲེག །ཅེས་པ་ནི་ཤི་ནས་ཀྱང་དམྱལ་བར་རིམ་པ་རིམ་པར་འགྲོ་ཞིང་དུས་ཐམས་ཅད་དུ་བསྲེག་པར་འགྱུར་བའི་སྐྱོན་ཡོད་པས་བྱར་མི་རུང་བར་བསྟན་ཏོ། །སངས་རྒྱས་བྱང་ཆུབ་སེམས་དཔའ་ཞེས་པ་ལ་
སོགས་པས་ནི་གསང་སྔགས་མ་ཧཱ་ཡོ་གའི་སྒོར་ཞུགས་པའི་རྣལ་འབྱོར་པས་འདོད་པའི་ཡོན་ཏན་ལྔ་མི་བསྟེན་དུ་མི་རུང་བར་བསྟན་ཏོ། །སྔོན་གྱི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱང་འདོད་པའི་ཡོན་ཏན་ལྔ་བསྟེན་ཞིང་། སྔགས་ཀྱི་སྤྱོད་པ་མཆོག་འདི་སྤྱད་པས་འགྲུབ་པ་
ཡིན་ནོ་ཞེས་པའི་དོན་ཏོ། །ཆོས་ཀྱི་ཡི་གེ་ནི་ཡི་གེ་ཐམས་ཅད་ཀྱི་མཆོག་ཡི་གེ་ཨའོ། །འཐོབ་པར་འགྱུར་བ་དེ་ནི་དོན་འཐོབ་པའོ། །དེ་ལྟ་བས་ན་ད་ལྟར་གྱི་རྣལ་འབྱོར་པས་ཀྱང་འདོད་པའི་ཡོན་ཏན་ལྔ་སྤྱོད་ཅིང་བསྒྲུབ་པར་བྱ་བ་བསྟན་ཏོ། །ཆགས་པ་ནི་དང་པོའམ་འདོད་པ་ལ་བྱ།
ཡེ་ཤེས་ནི་སྐུ་གསུང་ཐུགས་སམ་ཡི་དམ་གྱི་ལྷ། རྟག་ཅེས་པ་ནི་དུས་ཐམས་ཅད་དམ་རྒྱུན་མི་འཆད་པ་ལ་བྱ། བསྒྲུབ་ཅེས་བྱ་བ་ནི་བསྒོམ་པའམ་མངོན་སུམ་དུ་བྱེད་པ་བྱ་བས་ནི་དེ་འདོད་པའི་རྣལ་འབྱོར་པ་གཟུགས་ལ་སོགས་པའི་ཡོན་ཏན་ལྔ་ལ་སྤྱད་པར་བྱ་བའི་དོན་ཏོ། །དེ་ཡང་བསམ་
པ་ཇི་ལྟ་བུ་བྱེད་ཅེ་ན། ཡེ་ཤེས་སེམས་དཔའ་དང་བྱང་ཆུབ་སེམས་དཔའ་ལ་མཆོད་པའི་ཚུལ་དུའོ། །དེ་ལ་བྱང་ཆུབ་ནི་ཆོས་ཀྱི་དབྱིངས་སོ། །དཔའ་བོ་ཞེས་པ་ནི་གཟུགས་ཀྱི་སྐུ་སྟོན་ཅིང་སེམས་ཅན་གྱི་དོན་བྱེད་པའི་དཔལ་རྡོ་རྗེ་སེམས་དཔའོ། །ཡང་ན་བྱང་ཆུབ་ནི་བཛྲ་སཏྭ་ལ་སོགས་པ་

དུས་གསུམ་གྱི་སངས་རྒྱས་སོ། །དཔའ་བོ་སྒྲ་ལས་དྲངས་ན་ཉི་མ་ལ་བྱ། མདོར་ན་ཇི་ལྟར་ཉི་མས་རབ་རིབ་ཐམས་ཅད་སེལ་བ་བཞིན་དུ་སངས་རྒྱས་རྣམས་ཀྱང་སེམས་ཅན་གྱི་མི་ཤེས་པའི་རབ་རིབ་ཐམས་ཅད་ཐུགས་རྗེའི་འོད་ཟེར་གྱིས་སེལ་བར་བྱེད་པས་བྱང་ཆུབ་ཉི་མ་ཞེས་བྱ་བའི་དོན་ཏོ། །
གཉིས་སུ་མེད་པའི་ལྟ་བ་ལ་གོམས་པར་བྱེད་པས་རྣལ་འབྱོར་པས་འདི་དག་ལ་སྨད་པར་མི་བྱ་བ་བསྟན་ཏོ། །གཟུགས་སྡུག་པ་དང་མི་སྡུག་པ་དང་གཉི་ག་མ་ཡིན་པ་རྣམས་སོ། །དེ་བཞིན་དུ་སྒྲ་ལ་སོགས་པ་ལ་ཡང་སྨད་པར་མི་བྱ་སྟེ་དེ་ཅིའི་ཕྱིར་ཞེ་ན་ལྷའི་རང་བཞིན་ཡིན་པས་སོ། །རྡོ་རྗེ་ནི་དུས་གསུམ་
གྱི་སངས་རྒྱས་ཀྱི་སྐུ་གསུང་ཐུགས་སོ། །འཆང་བ་ནི་དེ་ཉིད་ཀྱི་རང་བཞིན་ནམ་འཛིན་པ་ལ་བྱ། རྒྱལ་ཞེས་པ་ནི་མཛེས་ཤིང་འབར་བ་ཉོན་མོངས་པ་མེད་པ་བྱང་ཆུབ་སེམས་རྡོ་རྗེ་ལ་བྱ། དེ་ཉིད་ཐམས་ཅད་དུ་ཡང་དག་པར་གནས་ཞེས་པ་ནི་གཟུགས་ལ་སོགས་པའི་རང་བཞིན་དོན་དམ་པར་དེ་དང་གཉིས་
སུ་མེད་པ་དང་། ཀུན་རྫོབ་ཏུ་གཟུགས་ཀྱི་ལྷ་མོ་ལ་སོགས་པའི་སྐུར་བསྟན་ཞིང་སེམས་ཅན་གྱི་དོན་བྱེད་པས་སོ། །དེ་ལྟ་བས་ན་གཟུགས་ལ་སོགས་པ་རབ་འབྲིང་ཐ་མ་གསུམ་ཁྱད་པར་རྣམ་པ་གསུམ་དུ་བསྒོམ་ཞིང་རྡོ་རྗེ་སེམས་དཔའ་དེ་བཞིན་གཤེགས་པ་ཐམས་ཅད་ཀྱི་བདག་ཉིད་ལ་མཆོད་པར་བྱའོ། །
དེ་ལ་ཁྱད་པར་རྣམ་པ་གསུམ་ཞེས་བྱ་བ་ནི་རྣམ་པར་ཐར་པའི་སྒོ་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པར་ཤེས་པ་དང་། སྐུ་གསུང་ཐུགས་སུ་བྱིན་གྱིས་བརླབ་པའོ། །སྔགས་པ་ནི་རྣལ་འབྱོར་པའོ། །རྣམ་པ་ནི་འདི་དག་གིས་ཞེས་པ་གོང་དུ་བསྟན་པའི་མཆོད་པའི་ཐབས་རྣམས་སོ། །
དམ་ཚིག་སྡོམ་པ་བསྲུང་ཞེས་པ་ནི་དེ་ཉིད་ལས་མི་འདའ་བར་བྱས་ན་བྱ་བའི་དོན་ཏོ། །ཚེ་འདི་ཉིད་ལ་ཞེས་པ་ནི་ཕུང་པོ་འདི་ཉིད་མ་བརྗེས་པའི་དོན་ཏོ། །འདི་དག་གིས་ཞེས་པ་གོང་དུ་བསྟན་པའི་མཆོད་པའི་ཐབས་རྣམས་སོ། །རྡོ་རྗེ་གསུམ་ཉིད་ཅེས་པ་ནི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་
ཐུགས་ཀྱི་རང་བཞིན་དུ་འགྱུར་བ་འམ། རིགས་གསུམ་གྱི་རིག་འཛིན་གྱི་འབྲས་བུ་འཐོབ་པའོ། །གལ་ཏེ་གཏི་མུག་ཅན་ཞེས་པ་ལ་སོགས་པས་ནི་གོང་དུ་བསྟན་པའི་སྔགས་ཀྱི་སྤྱོད་པ་དང་མི་ལྡན་པར་བདག་སྔགས་པའོ་ཞེས་པའི་མངོན་པའི་ང་རྒྱལ་གྱིས་བསྒོམ་པ་དང་བཟླས་པ་བྱ་བ་འམ། གསང་

སྔགས་དང་གསང་སྔགས་ཀྱི་སྤྱོད་པ་སྨད་ཅིང་སྤོང་བའི་སྐྱོན་བསྟན། དེ་ལ་ཞེས་པ་ནི་དམ་ཚིག་ལས་འདས་པའོ། །དངོས་གྲུབ་མི་འབྱུང་བ་ནི་འཇིག་རྟེན་པའི་དངོས་གྲུབ་ཕྲ་མོ་ཡང་མི་འཐོབ་པའི་དོན་ཏོ། །ཞིང་ཞེས་པ་ནི་མི་འཐོབ་པའི་སྟེང་དུ་གོང་མ་ལྟར་ཡང་འགྱུར་བའི་
དོན་ཏོ། །རིམས་ནི་ཞག་གཅིག་པ་ལ་སོགས་པའོ། །དུག་ནི་སྦྲུལ་ལ་སོགས་པའི་སྲོག་ཆགས་ཀྱི་དུག་དང་། ཤིང་ཀིམྤ་ཀ་ལ་སོགས་པའི་རྩྭ་ཤིང་གི་དུག་དང་ལུས་ལས་བྱུང་བའི་དུག་གོ། །ནད་ནི་ནད་བཞི་བརྒྱ་རྩ་བཞི་ལ་སོགས་པའོ། །བགེགས་ནི་བགེགས་ཀྱི་རྒྱལ་པོ་བི་ན་ཡ་ཀ་ལ་སོགས་
པའོ། །ཀྱིས་ཞེས་པ་ནི་དེ་རྣམས་ཀུན་གྱིས་བསད་ནས་ཞེས་པའོ། །སེམས་ཅན་ཞེས་པ་ནི་དམ་ཚིག་ལས་འདས་པའོ། །དམྱལ་བར་འགྲོ་ཞེས་པ་ནི་དམྱལ་བ་ཆེན་པོ་བརྒྱད་ལ་སོགས་པར་སྐྱེ་བའོ། །སངས་རྒྱས་བྱང་ཆུབ་སེམས་དཔའ་ཞེས་བྱ་བ་ལ་སོགས་པས་ནི་དམ་
ཚིག་ལས་འདས་པ་དེ་ཤིན་ཏུ་སྡིག་ཆེ་བར་བསྟན། བྱིན་གྱིས་བརླབ་པར་མཛད་པ་ནི་ཐུགས་རྗེ་ཆེ་བ་དེ་རྣམས་ཀྱིས་མི་བཟློག་པའི་དོན་ཏོ། །མེ་ཏོག་ལ་སོགས་ཕུལ་ཡང་མི་བཞེས་པ་ནི་དམ་ཚིག་ལས་ཉམས་པ་དེ་དགེ་བའི་རྩ་བ་ཅི་བྱས་ཀྱང་བསོད་ནམས་ཆེན་པོར་མི་འགྱུར་བའི་དོན་ཏོ། །འཇིག་
རྟེན་འདིར་ཡང་སྡུག་བསྔལ་ཞེས་བྱ་བ་ལ་སོགས་པ་ནི་མདོར་ན་དམ་ཚིག་ཉམས་པའི་གང་ཟག་ནི་འཇིག་རྟེན་འདི་དང་ཕ་རོལ་ཏུ་ཤིན་ཏུ་ཡང་སྡུག་བསྔལ་བར་འགྱུར་བས་དམ་ཚིག་ལས་སྐད་ཅིག་ཀྱང་འདའ་བར་མི་རུང་བར་བསྟན། འཇིག་རྟེན་འདི་ཞེས་པ་ནི་ཚེ་འདིའོ། །སྡུག་བསྔལ་བ་ནི་
བཀྲེས་སྐོམ་ལ་སོགས་པའི་སྡུག་བསྔལ་ཐམས་ཅད་ཀྱི་ཚོར་བ་མྱོང་བའོ། །ཕ་རོལ་ནི་ཚེ་ཕྱི་མའོ། །ཡང་ཞེས་པ་ནི་འདི་ལ་མ་གཏོགས་པའོ། །དམྱལ་བར་འགྲོ་བ་ནི་གོང་མ་དང་མཐུན་ནོ། །དམ་ཚིག་སྤྱོད་པ་ནི་གོང་དུ་བསྟན་པ་རྣམས་སོ། །ཉམས་པ་ནི་མི་བསྲུང་བའོ། །གཏི་མུག་ཅན་ནི་
ལེགས་ཉེས་ཀྱི་དོན་མི་གོ་བའོ། །འབྲས་བུ་མི་ཐོབ་ཅེས་པ་ནི་བྱས་པ་ཐམས་ཅད་འབྲས་བུ་མེད་པའི་དོན་ཏོ། །དེ་ལྟར་དམ་ཚིག་དང་སྤྱོད་པ་རྣམས་ལ་རྣལ་འབྱོར་པ་གནས་པར་བསྟན་ནས། ད་ནི་རང་གི་ལུས་ངག་ཡིད་གསུམ་འཕགས་པའི་སྐུ་གསུང་ཐུགས་སུ་སྒྲུབས་ཤིག་པར་

བསྟན། སྔར་སྨོས་པའི་སྡོམ་པ་ནི་གོང་དུ་བསྟན་པ་རྣམས་སོ། །གནས་ནས་ཞེས་པ་ནི་དང་དུ་བླངས་ནས་ཞེས་པའི་དོན་ཏོ། །རྟག་པར་ནི་དུས་ཐམས་ཅད་དུའོ། །མི་ཕྱེད་པ་ནི་མི་འགྱུར་བའོ། །བརྟུལ་ཞུགས་ཞེས་པ་ནི་ནན་ཏན་གྱིས་ཞེས་བྱ་བའི་དོན་ཏོ། །ལུས་ངག་ཡིད་གསུམ་
ནི་རང་གིའོ། །རྡོ་རྗེ་ཞེས་པ་ནི་འཕགས་པ་རྣམས་ཀྱི་སྐུ་གསུང་ཐུགས་སོ། །སྒྲུབ་པ་བརྩམ་པར་བྱ་བ་ནི་དེར་བསྒྱུར་བའི་སྤྱོད་པ་དང་ཏིང་ངེ་འཛིན་ལ་འཇུག་པར་བྱ་བའི་དོན་ཏོ། །དེ་ཡང་གནས་ཇི་ལྟ་བ་བཞིན་དུ་བརྩམ་ཞེ་ན། ནགས་ཚལ་ལ་སོགས་པ་བསྟན་པ་ཡིན་ནོ། །ནགས་
ཚལ་ནི་ཤིང་སྣ་ཚོགས་ཡོད་པའི་ཕྱོགས་སོ། །ཆེན་པོ་ནི་སྡུག་པའམ་རྒྱ་ཆེ་བའི་དོན་ཏོ། །རི་བོ་ནི་བྱ་རྒོད་སྤུངས་པ་ལ་སོགས་པའོ། །རི་སུལ་ནི་དབང་པོ་རིའི་བྲག་ཕུག་ལ་སོགས་པའོ། །དབེན་པ་ཆེན་པོ་ནི་དུར་ཁྲོད་དམ་ལྷ་ཁང་སྟོང་པ་ལ་སོགས་པའི་གནས་དབེན་ཞིང་ཡིད་དུ་
འོང་བ་ཐམས་ཅད་དོ། །རྣམས་སུ་ཞེས་པ་ནི་དེ་རྣམས་གང་ཡང་རུང་བའི་དོན་ཏོ། །དངོས་གྲུབ་ཐོབ་ཅེས་པ་ནི་དེ་ལྟ་བུའི་གནས་སུ་བསྒྲུབས་ན་ཡིད་ཀྱིས་འདོད་པའི་འབྲས་བུ་འཐོབ་པའི་དོན་ཏོ། །སེམས་དཔའི་སྐྱིལ་ཀྲུང་ཞེས་བྱ་བ་ལ་སོགས་པ་ནི་སྒྲུབ་པའི་སྲུང་མཚམས་བཅད་པའི་
ཆོ་ག་བསྟན། སེམས་དཔའི་སྐྱིལ་ཀྲུང་ནི་ཕྱེད་སྐྱིལ་ལོ། །དེ་ཡང་གཡོན་པ་བསྐུམ་ཞིང་གཡས་ཅུང་ཟད་བརྐྱང་བའི་ཚུལ་ལོ། །འཇམ་པའི་སྟན་ནི་ཕྱི་དང་ནང་དང་གསང་བ་རྣམས་སོ། །ཕྱི་ནི་སྲིན་བལ་ལ་སོགས་པ་ལ་བྱས་ལ་འཇམ་ཞིང་ཡིད་དུ་འོང་བ་རྣམས་སོ། །
ནང་ནི་ཉི་ཟླ་པདྨ་ལ་སོགས་པའོ། །སྐབས་འདིར་ནང་གི་ལས་ཉི་མའི་དཀྱིལ་འཁོར་རོ། །གསང་བ་ནི་ཡུམ་དང་གཉིས་སུ་མེད་པར་རྡོ་རྗེ་དང་པདྨར་ལྡན་པའི་ཚུལ་ལོ། །འདུག་ནས་ཞེས་པ་ནི་སྟན་དེ་གསུམ་གྱི་སྟེང་དུ་བདག་གོང་དུ་བསྟན་པའི་ཚུལ་དུ་འདུག་པའོ། །ཅི་བྱེད་
ཅེ་ན། ཞེ་སྡང་རྡོ་རྗེ་འོག་ནས་འབྱུང་བའི་ཚུལ་དུ་བསྒོམ་ཞེས་བྱ་བའི་དོན། གནས་ནས་ཞེས་པ་ནི་ཏིང་ངེ་འཛིན་ལ་ཞུགས་པའོ། །གནས་ནི་སྒྲུབ་པའི་ས་ཕྱོགས་སོ། །སྲུང་བ་ནི་བགེགས་ཐམས་ཅད་ཀྱིས་གླགས་མི་རྙེད་པར་བྱེད་པའོ། །རྣམ་པར་བསམ་པ་ནི་འོག་གི་

ཏིང་ངེ་འཛིན་རྣམས་སོ། །གཟུགས་ཆེན་འབར་བ་ཞེས་པ་ནི་བདག་ཞེ་སྡང་རྡོ་རྗེ་ཡབ་ཡུམ་དུ་གནས་པའི་ཐུགས་ཀ་ནས་ཧཱུཾ་ལས་ཁྲོ་བོ་བཅུ་ཕྱུང་བའི་ཆ་ལུགས་སོ། །གཟུགས་ཆེ་བ་ནི་སྲིད་པ་གསུམ་གྱི་སེམས་ཅན་ཟིལ་གྱིས་གནོན་པའི་སྐུ་དང་
ལྡན་པའོ། །འབར་བ་ནི་ཡེ་ཤེས་ཀྱི་འོད་ཟེར་བསྐལ་པའི་མེ་བཞིན་འབར་བའི་སེམས་ཅན་གྱི་ཉོན་མོངས་པ་སྲེག་པར་བྱེད་པའོ། །འཇིགས་བྱེད་པ་ནི་སེམས་ཅན་ཐམས་ཅད་འཁོར་བ་ལས་འཇིགས་ཤིང་མྱ་ངན་ལས་འདས་པའི་སར་འབྲོས་པར་བྱེད་པའམ་སྒྲུབ་པ་པོ་ལ་བར་
ཆོད་བྱེད་པའི་བགེགས་ཐམས་ཅད་སྐྲག་ཅིང་འབྲོས་པར་བྱེད་པའོ། །ཁྲོ་བོ་ནི་ཁྲོས་པའི་ཆ་ལུགས་ཤིན་ཏུ་འཇིགས་པའི་ཚུལ་ལོ། །བཅུ་དག་ནི་གྲངས་སོ། །ཕྱུང་བ་ནི་ཞེ་སྡང་རྡོ་རྗེ་ཡབ་ཡུམ་གཉིས་སུ་མེད་པའི་ཐུགས་ཀ་ནས་སོ། །དེ་ཡང་ཅི་ལྟ་ཞེ་ན་ཞེ་སྡང་རྡོ་རྗེ་ཡབ་ཡུམ་
གཉིས་སུ་མེད་པའི་བྱང་ཆུབ་སེམས་བདེ་བ་ཆེན་པོའི་ཆ་བཅུར་བྱས་ཏེ་དེའི་ཧཱུཾ་བཅུར་གྱུར་པར་བསམ། དེ་ནས་ཡ་མཱནྟ་ཀ་པྲཛྙཱནྟ་ཀ་ཞེས་བྱ་བ་ལ་སོགས་པ་མིང་བརྗོད་པ་ཙམ་གྱིས་ཁྲོ་བོ་བཅུ་ཐུགས་ཀ་ནས་ཕྱུང་ཞིང་སོ་སོའི་ཕྱོགས་སུ་མ་ལས་བསྐྱེད་པའི་ཉི་མའི་དཀྱིལ་འཁོར་གྱི་སྟེང་དུ་
གནས་པར་བསམ་མོ། །སྨད་རྩེ་མོར་བསམ་པ་ནི་ཁྲོ་བོ་དེ་རྣམས་རྐེད་པ་མན་ཆད་ཟུར་གསུམ་པ་ཕུར་བུའི་ཚུལ་དུ་བྱའོ། །རོ་སྟོད་ཁྲོ་བོ་ལྟ་བུ་ཞེས་པ་ནི་རྐེད་པ་ཡན་ཆོད་ཁྲོ་བོའི་ཆ་ལུགས་ཞལ་གསུམ་ཕྱག་དྲུག་པ་ལ་སོགས་པ་དང་ལྡན་པར་བསྒོམ་ཞེས་བྱ་བའི་དོན་ཏོ། །ཕྱོགས་
བཅུའི་དཀྱིལ་འཁོར་ཞེས་པ་ནི་ཤར་ཕྱོགས་ལ་སོགས་པའི་ཕྱོགས་བཅུར་ཉི་མའི་དཀྱིལ་འཁོར་བཅུ་བསྐྱེད་ནས་ཁྲོ་བོ་དེ་རྣམས་དཀྱིལ་འཁོར་དག་གི་སྟེང་དུ་གནས་པར་བསམ་པའོ། །རིམ་བཞིན་ཞེས་པ་ནི་ཕྱོགས་དང་ཁྲོ་བོ་མ་ནོར་བ་དང་ཤར་ཕྱོགས་ནས་བསྐྱེད་པའོ། །དེ་ཡང་
ཤར་ཕྱོགས་སུ་གཤིན་རྗེ་གཤེད་དོ། །ཤར་ལྷོར་མི་གཡོ་མགོན་ནོ། །ལྷོར་ཤེས་རབ་མཐར་བྱེད། ལྷོ་ནུབ་ཏུ་འདོད་པའི་རྒྱལ་པོ། ནུབ་ཏུ་པདྨ་མཐར་བྱེད། ནུབ་བྱང་དུ་ནཱི་ལ་དཎྜ། བྱང་དུ་ཨ་མྲྀ་ཏ་ཀུཎྜ་ལི། བྱང་ཤར་དུ་མ་ཧཱ་བ་ལ། འོག་ཏུ་ཀ་མ་ལ་ཀུཎྜ་ལི། སྟེང་དུ་ཧཱུཾ་མཛད་

དོ། །དེ་ལྟར་ཁྲོ་བོ་རྣམས་བསྐྱེད་ནས་ཡང་འདི་ལྟར་བྱའོ་ཞེས་པའི་དོན་ཏོ། །བགེགས་ཞེས་བྱ་བ་ནི་ཏིང་ངེ་འཛིན་གྱི་བར་ཆད་བྱེད་པའོ། །ཐམས་ཅད་ནི་བགེགས་ཀྱི་རིགས་ཇི་ལྟ་བུ་ཡང་རུང་བ་མ་ལུས་པའི་དོན་ཏོ། །བཤིག་པ་ནི་མེད་པར་བྱས་པ་འམ། ཚར་གཅད་པའི་དོན་ཏོ། །
གནོད་མཛེས་བཀའ་སྩལ་ཞེས་པ་ལ་སོགས་པ་ནི་ཁྲོ་བོ་གནོད་མཛེས་བསྐྱེད་ཅིང་བགེགས་རྣམས་ཁུག་ཅིག་པར་བཀའ་ས