Luận tạng Tây Tạng (Tengyur) — Tập 45

ེ་ལ་ཆོ་ག་
ཇི་ལྟ་བ་བཞིན་གདབ་པར་བྱའོ། །ད་ནི་སྣང་མཛད་ཀྱི་རིགས་དང་འབྲེལ་པའི་གཤིན་རྗེ་གཤེད་ཀྱི་ཕུར་བུས་དེའི་སྐུའི་རྡོ་རྗེ་ལ་ཆོ་ག་ཇི་ལྟ་བ་བཞིན་གདབ་པར་བསྟན་པའི་ཕྱིར། རྣམ་པར་སྣང་མཛད་ཅེས་པའི་ཚིག་སྨོས་སོ། །ཡང་ན་འདོད་ཆགས་ཞེས་པ་ནི་ཆོ་ག་ཇི་ལྟ་
བས་རྟ་མགྲིན་གྱི་ཕུར་བུས་རང་གི་གསུང་གི་རྡོ་རྗེ་ལ་གདབ་པར་བྱའོ། །གཤིན་རྗེ་གཤེད་ཅེས་པ་གོང་གི་སྣང་མཛད་ཀྱི་རིགས་དང་འབྲེལ་པ་ཉིད་དེ། དེས་ནི་ཚེ་དཔག་མེད་དང་འབྲེལ་པའི་རྟ་མགྲིན་ཀྱང་བསམས་ན་ཞེས་བྱ་བར་ཤུགས་ཀྱིས་མངོན་ནོ། །ཡང་འདིར་བདུད་རྩི་འཁྱིལ་པ་
ཡིས་ཞེས་པ། སྐུའི་རྡོ་རྗེ་ལ་སོགས་པ་གོང་དུ་གསུངས་པ་རྣམས་ལ་བདུད་རྩི་ཉིད་ཀྱི་ཕུར་བུས་ཆོ་ག་ཇི་ལྟ་བ་བཞིན་དུ་གདབ་པར་བསྟན་པ་ཡིན་ཏེ། དེ་ནི་ལས་ཐམས་ཅད་པའི་བདག་ཉིད་ཡིན་པ་ཉིད་ཀྱི་ཕྱིར་རོ། །དེ་ལ་བདག་ཉིད་ཆེན་པོ་ཞེས་པ། ཐམས་ཅད་བདག་ཉིད་
གང་ཡིན་པའོ། །གདབ་པའི་ཚུལ་ནི་ཆོ་ག་ཇི་ལྟ་བས་དེའི་གནས་སྙིང་ག་ནས་རྐང་པའི་མཐར་རྡོ་རྗེ་ཕུར་བུས་གདབ་པར་བྱའོ། །དེ་ནི་གོང་དུའང་སྦྱར་བར་བྱའོ་ཞེས་སོ། །འདིར་གོང་འོག་གིའང་ཞེས་པ་དང་། ཀྱང་ཞེས་པའི་སྒྲ་ནི་གདོན་མི་ཟ་བའི་ཚིག་སྟེ། གོང་

མའི་རིམ་པས་གདུག་ཅིང་ཁྲོ་བ་ལ་སོགས་པའི་བསྒྲུབ་བྱའི་མིང་འོག་ནས་འབྱུང་བའི་སྔགས་ཀྱི་བར་དུ་བཅུག་སྟེ། གཟུགས་བརྙན་བྱས་ལ་གང་ཡིན་པ་བཀུག་ནས། གཤིན་རྗེ་གཤེད་ལ་སོགས་པར་གང་གྱུར་པས་དེའི་ཕུར་བུས་ཇི་ལྟ་བ་བཞིན་གདབ་པར་བྱའོ་ཞེས་
པའི་དོན་ཏོ། །ད་ནི་ཆོ་ག་དེ་དག་གི་གདབ་པའི་སྔགས་བསྟན་པའི་ཕྱིར་དེ་ནས་ཞེས་པ་ལ་སོགས་པ་སྨོས་ཏེ། དེ་ལ་སྐུའི་རྣམ་པར་སྤྲུལ་པ་ཞེས་པ། མེ་ལོང་དང་ལྡན་པའི་རང་གི་ལས་སོ། །དེ་མི་ཕྱེད་པའི་ཕྱིར། རྡོ་རྗེའི་ཏིང་ངེ་འཛིན་ལ་སྣང་མཛད་ཉིད་ཀྱི་ཚུལ་གྱིས་ཞུགས་
ནས་ཕྱུང་ངོ་ཞེས་འབྲེལ་ཏོ། །དེ་ལྟར་གསུང་དང་ཐུགས་ཀྱི་དམ་ཚིག་ལ་ཡང་ཇི་ལྟ་བ་བཞིན་སྦྱར་བར་བྱའོ། །དེ་དག་གི་དམ་ཚིག་གི་གནོད་པ་ནི་ཏིང་ངེ་འཛིན་གང་དང་ལྡན་པས། སྔགས་འདི་དྲག་ཏུ་བཟླས་པ་ཙམ་གྱིས་ཤེས་སོ། །དེ་དག་གི་ཆོ་ག་ནི་རང་རང་གི་ཕྱག་མཚན་
དང་ལྡན་པས་བྱ་བ་སྟེ་སྔོན་དུ་བྱས་སོ། །དེའི་སྡང་བ་དང་འཆི་བ་ནི་བསམ་པའི་དབང་པོ་མྱོས་པ་ནི་མ་རིག་པའོ། །ཨེ་མའོ་ཞེས་པ་ལ་སོགས་པ་ནི། དེ་དག་གི་དོན་ལ་གཙོ་བོ་ཉིད་དགྱེས་ནས། དམ་པའི་དོན་གྱིས་འདི་སྐད་གསུངས་སོ་ཞེས་སོ། །ཨེ་
མའོ་ཞེས་པའི་ཚིག་བཞི་ནི་སྐུ་ལ་སོགས་པའི་གནས་དང་། རྒྱལ་བའི་ས་བོན་དང་། རིག་མའི་པདྨ་ལ་གསལ་བའི་ངོ་བོ་དང་། དེའི་སྤྲུལ་པའི་ཆོ་ག་ལ་སོགས་པ་རྣམས་བསྟན་ཏེ། གསང་བས་གསལ་བར་མ་བཤད་དོ། །ལེའུ་བཅུ་བཞི་པའི་དོན་རྫོགས་
སོ།། །།ད་ནི་སྐུ་གསུང་ཐུགས་ཀྱི་བསྒྲུབ་པ་གསུངས་པ། དེ་ནས་ཞེས་པ་ལ་སོགས་པ་སྟེ། དང་པོར་གསང་བའི་དབྱིངས་སུ་རྣམ་པར་སྣང་མཛད་དུ་བསྒོམས་ནས། རིགས་ངན་པ་མི་དབྱེ་སྟེ། སྨེ་ཤ་ལ་སོགས་པ་བྱིན་གྱིས་བརླབ་པར་བྱས་ཏེ། སྦྱོར་བའི་
ཆོ་གས་བསྒྲུབ་པར་བྱ་བ་ཡིན་ནོ། །དེ་ཡང་གསང་བ་ལ་དཀྱིལ་འཁོར་རྣམས་བཀོད་དེ་བསྒོམ་པར་བྱའོ། །རྡོ་རྗེ་སེམས་དཔའ་བསྒྲུབ་པ་ནི་རྡོ་རྗེ་ཞེས་པ་རྣམས་ཏེ། རྡོ་རྗེ་སེམས་དཔར་གང་གྱུར་པས་བཙོ་བླག་མཁན་ལ་སོགས་པའི་གཟུངས་བྱིན་གྱིས་བརླབ་

ཞེས་བསྒྲུབ་པར་བྱ་བ་ཡིན་ནོ། །སྦྱོར་བའི་ཆོ་ག་ལ་གནས་ནས་གསང་བའི་དོན་ལ་འཇུག་པར་བྱའོ། །དེ་ནས་རྡོ་རྗེ་ཆོས་ཀྱི་བསྒྲུབ་པ་ནི་རྡོ་རྗེ་ཆོས་ཞེས་པའི་ཚིག་རྣམས་ཏེ། སྣང་བ་མཐའ་ཡས་སུ་གང་གྱུར་པར་བྱས་པས། གསང་བ་དབྱིངས་ཀྱི་དབུས་དག་ཏུ་གར་མཁན་གྱི་བུ་མོ་ལ་
བྱིན་གྱིས་བརླབ་པར་བྱས་ཏེ། གསང་བའི་ཆོ་གས་བསྒྲུབ་པར་བྱ་བ་ལ། ཤིན་ཏུ་སྦྱོར་བ་ལྡན་པ་ཡིན་ནོ། །གཞན་ཡང་དེས་བསྒྲུབ་པ་སྟེ། བྲམ་ཟེ་ཞེས་པའི་ཚིག་གིས་མངོན་ནོ། །དེ་དག་གི་ཡོན་ཏན་ནི་སྐབས་སུ་གསུངས་པ་རྣམས་ཏེ། གོ་སླ་བས་སོ། །བསྒྲུབ་པའི་དུས་ནི་སྐྱ་རེངས་ཞེས་པ་ལ་བྱ་སྟེ།
འདིའི་དོན་ནི་འདི་སྐད་དུ་གང་བསྒྲུབ་པའི་རྣལ་འབྱོར་པས། རང་གི་གཟུགས་ཀྱི་རྒྱན་གྱིས་བརྒྱན་ལ་བསྒྲུབ་པའི་དུས་སུ་གསང་བ་ལ་དཀྱིལ་འཁོར་བསྒོམས་ཏེ། སྤྲོ་བ་དང་བསྡུ་བས་སྦྱོར་བས། དབུགས་ཞི་བར་བྱ་བ་གང་ཡིན་པ་གསང་བའི་དོན་ནོ་ཞེས་བསྟན་པར་འགྱུར་རོ། །དབང་པོ་
གཉིས་ནི་ཞེས་པ་གང་གི་བསྒྲུབ་པ་ཉིད་སྦྱོར་བ་སྟེ། དེའི་ཆོ་ག་ཤེས་པ་ཉིད་ཀྱིས་སྐུ་ལ་སོགས་པའི་སྦྱོར་བ་གང་རྣམས་བསམ་པར་བྱའོ། །དེ་དག་གི་དུས་སུ་བཤང་གཅི་ལ་སོགས་པ་བཟའ་བར་བྱ་བ་ཁོ་ན་སྟེ་དེས་དངོས་གྲུབ་ཏུ་འགྱུར་རོ། །འདོད་དང་ཐར་པའི་ཞེས་གྲགས་པ་ནི་སྟོན་
པའི་མཚན་གྱི་ཁྱད་པར་ཏེ། ལྟག་འོག་ཏུ་ཡང་སྙེགས་སོ། །ཡ་མཱནྟ་ཀའི་སྔགས་དང་ཆོ་གས་དགུག་པ་ནི། དེ་ནས་ཞེས་པ་ལ་སོགས་པ་སྟེ། བསྐྱེད་པའམ་རྫོགས་པ་ལ་གནས་པས་དཀྱིལ་འཁོར་གྲུ་གསུམ་དུ། ཁྲོས་པའི་དཀྱིལ་འཁོར་རྣམས་བསྒོམས་ཏེ།
དེ་ལ་མཆོད་པ་དང་དུག་ལ་སོགས་པ་བསྲེག་པར་བྱའོ། །བུ་མོ་ལ་སོགས་པ་གང་དགུག་པའི་གཟུགས་བརྙན་བྱས་ཏེ། མིང་རུས་སྙིང་གར་གླན་ཏེ། ཉིན་གུང་ལ་སོགས་པར་བཀུག་ནས། སྔགས་ཀྱི་བར་དུ་ཡང་མིང་བཅུག་ནས་སྟོང་བཟླས་ཏེ་བསྲེག་པར་བྱའོ། །དེའི་ཡོན་ཏན་
དང་སྐྱོན་གསུངས་པ། བསྐལ་པ་ཞེས་པ་རྣམས་སོ། །ཡང་ན་དུར་ཁྲོད་ཅེས་པ་རྣམས་ཏེ། བསྒྲུབ་པའི་དུས་སུ་སོལ་བ་ལས་མིང་རུས་བཅས་ཏེ། མ་མོའི་གནས་ལ་སོགས་པར་བདག་ལ་མི་སྙན་པར་སྨྲ་བ་རྣམས་ཆོ་ག་བཞིན་དུ་བསྒྲུབས་ན་འདུལ་བར་འགྱུར་རོ་ཞེས་ཏེ།

འདི་དག་ལ་སོགས་པའི་ཆོ་ག་ཞིབ་ཏུ་ནི་མ་བཤད་དེ། བླ་མའི་གདམས་ངག་ལས་ཤེས་པར་བྱའོ། །སྔགས་ཤེས་པ་ཡིས་ཞེས་པ་རྣམས་ནི་རྣལ་འབྱོར་པ་ཕྱག་ན་རྡོ་རྗེར་བསྒོམས་པས། དགྲ་བགེགས་གང་ཡང་རུང་བའི་གཟུགས་བྲིས་ཏེ་དགུག་པ་བྱས་ལ། ལག་ཏུ་ཐོ་བ་ཐོགས་ཏེ་
བརྡུངས་པས་ཤི་བར་བསྒོམས་ན་དེ་ཉིད་གདོན་མི་ཟའོ། །ཧཱུཾ་ཞེས་པའི་རྣམས་ཕྱག་ན་རྡོ་རྗེ་བསྐྱེད་པའི་ཆོ་གའོ། །བསད་པའི་ཆོ་ག་གཞན་གསུངས་པ། རྡོ་རྒྱུས་ཞེས་པའི་རྣམས་ཏེ། བདག་བདུད་རྩི་འཁྱིལ་པ་ལ་སོགས་པར་བསྒོམས་ནས། རྡོ་རྒྱུས་ལ་སོགས་པས་སྐྱེས་པ་བུད་མེད་
གང་ཡིན་པའི་གཟུགས་བྲིས་ཏེ། རང་གི་ལག་ཏུ་སྟ་རེ་ཐོགས་ནས་ལིངྒ་གཏུབས་ཏེ། མིད་པ་བཅད་པར་བསྒོམས་ན་འགྲུབ་གསུངས་པའོ། །ཡང་ན་མནན་པའི་ལས་ཀྱིས་བསད་པ་གསུངས་པ། ལས་ཀྱི་ཞེས་པ་ལ་སོགས་པ་སྟེ་དེའི་དོན་གོང་གི་བསད་པའི་ལས་བྱས་པ་དེ་དོང་གྲུ་གསུམ་
པ་བརྐོས་ཏེ་ནང་དུ་གན་རྐྱལ་དུ་བཅུག་ལ། རི་རབ་དང་གླིང་བཞིས་མནན་ཏེ་དབུས་སུ་དོན་ཡོད་གྲུབ་པ་བསྒོམས་ཏེ། ས་ལ་གནོད་མཛེས་ཀྱི་བྲོ་བརྡུང་བར་བྱ་ཞེས་བསྟན་པ་ཡིན་ནོ། །ཡང་གཞན་གསུངས་པ་དཀྱིལ་འཁོར་ཞེས་པ་སྟེ། རླུང་ལ་སོགས་པའི་ཆོ་ག་ནི་བདག་སྟོབས་པོ་ཆེའི་ཕྱག་རྒྱ་
བཅས་ཏེ། དེའི་ཆོ་གས་བསྒྲུབས་ན་སངས་རྒྱས་ཀྱང་གདོན་མི་ཟ་ན་ཞེས་སོ། །ཕཊ་ཅེས་པ་གསང་བའི་དོན་གསུངས་པ་སྟེ། ཐབས་དང་ཤེས་རབ་གཉིས་སུ་མེད་པར་སྦྱོར་བས་ཕཊ་ཀྱིས་གསང་བའི་པདྨ་ཁ་ཕྱེ་ལ་སྦྱོར་བའི་ཆོ་གས་གསང་བའི་དབྱིངས་སུ་སྣང་མཛད་ལ་ལྷ་མོ་
བཞིས་བསྐོར་བར་བསྒོམ་པར་བྱའོ། །མི་བསྐྱོད་པའི་སྐུར་བསྒོམས་ནས་ཡུམ་གྱི་པདྨ་རྒྱས་པར་བྱས་ནས་གསང་བ་ལ་སྦྱོར་བའི་ཆོ་གས་ཧཱུཾ་བསྒོམས་ཏེ། སྐུ་ལ་སོགས་པ་ཕབ་ན་ཡོན་ཏན་ཐམས་ཅད་བསྐྱེད་པའོ། །ད་ནི་ཐུན་མོང་གི་བསྒྲུབ་པ་བསྟན་པའི་ཕྱིར། བཞིན་
བཟང་ཞེས་པ་ལ་སོགས་པ་སྨོས་ཏེ། གནས་ཡིད་དང་མཐུན་པར་བསྐྱེད་པའམ་རྫོགས་པས་རང་ཉིད་ལྷའི་རྣལ་འབྱོར་དུ་བྱས་ཏེ། གཟུགས་བྱིན་གྱིས་བརླབས་ནས་གསང་བ་ལ་སོགས་པ་ཤ་ལྔ་དང་སྦྱར་ཏེ་སྦྱོར་བའི་ཆོ་ག་ཇི་ལྟ་བས་ལྕགས་གསུམ་གྱིས་དཀྲིས་ཏེ།

བསྒྲུབས་ན་མི་སྣང་བ་འགྲུབ་པ་ཁོ་ན་སྟེ། ལྕགས་གསུམ་ནི་གསེར་དང་དངུལ་དང་ཟངས་སོ། །གཞན་དག་ནི་གོ་སླ་བས་མ་བཤད་དོ། །སྐུ་ལ་སོགས་པའི་རིགས་ཀྱིས་ནི་དེ་ནས་ཞེས་པ་ལ་སོགས་པའོ། །ཨེ་མའོ་ཞེས་པ་བཞི་ནི་ངོ་མཚར་བ་སྟེ།
དང་པོ་ནི་སྤྱི་ཡིན་ལ། གསུམ་ནི་སྐུ་དང་གསུང་དང་ཐུགས་ཀྱི་དབང་པོ་ལས་གང་བྱེད་པ་ལ་རང་གི་རིགས་བསྒོམ་པ་ནི་སངས་རྒྱས་ཞེས་པ་རྣམས་ཏེ་རང་རང་གི་རིམ་པར་བྱ་བ་ཡིན་ནོ། །དེ་དག་གི་མཇུག་བསྡུ་བ་ནི་བསམ་གཏན་ཞེས་པ་རྣམས་ཏེ། གོང་དོན་ཉིད་
ཀྱིས་ཤིན་ཏུ་སྦྱོར་བའི་ཏིང་ངེ་འཛིན་ལ་དམིགས་པའོ། །བསམ་གཏན་གྱི་ཆོ་ག་ཡང་གསུངས་པ། དེ་ནས་སྟོན་པ་ཞེས་པ་ལ་སོགས་པའོ། །དེ་ལ་སྔགས་བཟླས་ཞེས་པ་རྡོ་རྗེ་བཟླས་པ་དང་བཞི་སྟེ། གང་བསྒོམ་པས་བཟླས་པའི་སྦྱོར་བ་ལ་འཇུག་པ་ཡིན་ནོ། །
དབབ་པའི་ཆོ་ག་གསུངས་པ། དབབ་པའི་ཞེས་པ་ལ་སོགས་པ་སྟེ། ཚངས་པ་དང་བརྒྱ་བྱིན་ལ་སོགས་པ་བསྐུལ་བ་དང་། བུ་མོ་དང་ཁྱེའུ་མཚན་དང་ལྡན་པ་དབབ་པ་སྟེ། དབབ་པའི་ཆོ་ག་དང་སྔགས་འོག་མས་བསྐུལ་བ་ཡིན་ལ། རྒྱས་པར་བླ་མ་ལས་ཤེས་
པར་བྱའོ། །ཕེབས་པའི་ཡོན་ཏན་ནི་འགུལ་བ་དང་ནི་ཞེས་རྒྱས་པར་སྨོས་སོ། །གསད་པའི་ལས་ཀྱི་རྒྱལ་བ་མཆོག་གཞན་གསུངས་པ། དེ་ནས་ཞེས་པ་ལ་སོགས་པ་སྟེ། རྩེ་གཅིག་མ་གྱུར་ཞེས་པ་ནི་དམ་པའི་དོན་ལ་རྩེ་གཅིག་པར་མ་གྱུར་པའི་གེགས་བསལ་
བའི་ཕྱིར་ཡང་བསྒྲལ་བར་བྱ་ན་གཞན་ལྟ་ཅི་སྨོས་པའོ། །གདོན་མི་ཟ་བའི་བཀའ་བསྒོ་བ་ནི་ཐམས་ཅད་ལ་ཤེས་པར་བྱའོ། །དགྲའི་གཟུགས་བརྙན་བྱས་ནས་ནི་ཞེས་པ་རང་ལྷའི་ང་རྒྱལ་དུ་བྱས་ཏེ། དུར་ཁྲོད་རྣམས་སུ་དགྲ་བགེགས་ཀྱི་གཟུགས་བརྙན་བྱས་
ཏེ་དེ་ལ་དགུག་ཅིང་བསྟིམས་པ་བྱས་ནས། སྐྲ་བཤིག་གཅེར་བུར་བྱུང་ནས་བསད་པའི་ལས་བྱས་ཏེ། ནམ་ཕྱེད་ན་དུར་ཁྲོད་དུ་སོང་ལ་དྲག་པོའི་མེ་སྦར་ཏེ། ཁྲོ་བོ་གང་ཡིན་པའི་སྔགས་བཟླས་ཏེ་བར་དུ་མིང་བཅུག་ལ་སྦྱིན་སྲེག་གི་ཆོ་ག་བྱས་ན་འགྲུབ་པར་འགྱུར་

རོ། དེ་ལས་གཞན་ཡང་གསུངས་པ། དཀྱིལ་འཁོར་ཞེས་པ་རྣམས་ཏེ། བཀའ་སྩལ་ཏོ་ཞེས་པའི་བར་དུ་བསད་པའི་ལས་ཏེ། མ་མོའི་གནས་ལ་སོགས་པར་རང་གི་ལྷ་གང་ཡིན་པས་ཁྲེ་དང་ཅུ་ཚེ་ལ་སོགས་པ་ལས་དགྲའི་གཟུགས་བྱས་ཏེ་མིང་རུས་སྙིང་གར་གླན་
ཏེ། གང་དགུག་པའི་ཆོ་ག་བྱས་ལ། གཏུབ་པ་དང་གདབ་པ་དང་བསྲེག་པ་དང་། མནན་པ་དང་དབང་པོ་ཉམས་པར་བྱ་བ་ལ་སོགས་པ་གང་ཡིན་པའི་ཆོ་ག་སྟེ། ཏིང་འཛིན་གཙོར་སྨོས་པས་ཕྱག་མཚན་ལ་སོགས་པ་གང་གིས་བྱ་བ་བཞིན་འགྲུབ་པ་སྟེ། ཆོ་ག་
ནི་བླ་མའི་མན་ངག་ལས་ཤེས་པར་བྱའོ། །དེ་ལ་ལས་ཕྲན་ཚེགས་ཀྱི་ཆོ་ག་བསྟན་པའི་ཕྱིར། དེ་ནས་ཞེས་པ་ལ་སོགས་པ་སྨོས་ཏེ། གང་ཀླུས་ཟིན་པ་རྣམས་རང་གི་ལྷར་བསྒོམས་པས་སྦྲུལ་ནག་པོ་ཆེན་པོའི་གཟུགས་དུར་ཁྲོད་ཀྱི་རས་མ་ལ་རྡོ་རྒྱུས་ཀྱིས་
བྲིས་ཏེ་བསམས་ལ་དེའི་ལྕེ་སྟེང་དུ་ཁཾ་བསམས་ཏེ། དེའི་ཡང་དབུས་ན་དུག་འདུག་པར་བསམས་ཏེ། ཁཾ་ལས་མེ་བྱུང་ནས་འོད་དུ་ཞུ་ན་ཀླུ་འགུལ་བར་གདོན་མི་ཟའོ། །ཡང་ན་རང་གི་ཁོང་དུ་ཧཾ་བསམས་ཏེ་དེ་ལས་མེ་བྱུང་ནས་དུག་བཞུ་ནས། ནུས་པ་བདུད་རྩིར་
གྱུར་པ་ལ་ཟོས་ན་ཀླུ་འབྱིན་ཏོ། །དུག་ཀླུས་ཁྱེར་བར་བསམས་ན་ཡང་འགྲུབ་བོ། །ཧཾ་གི་མེ་ལ་སོགས་པ་དེ་དག་ནི་ཀླུ་དུག་དང་སྦྱར་བ་ལ་སོགས་པ་འབྱིན་པར་བྱེད་པའོ། །ནད་ཞི་བར་བྱ་བའི་ཐབས་གསུངས་པ། འབྲས་དང་ཕོལ་མིག་ཅེས་པ་ལ་སོགས་
པ་སྟེ། པདྨ་དཀར་པོ་འདབ་མ་བརྒྱད་པའི་སྟེང་དུ། ཨོཾ་ཨཱཿཧཱུཾ་གང་ཡང་རུང་བ་བསམས་ཏེ། དེ་ཟླ་བ་བཞིན་དུ་དྲི་མ་མེད་པ་འོད་ཟེར་ལྔ་ལྡན་པ་ལས་སྤྲོ་བསྡུའི་སྒོ་ནས་ཡེ་ཤེས་བདུད་རྩིའི་ཆུ་རྒྱུན་རྣམས་བྱུང་སྟེ། ཁོང་དུ་འཐུངས་པས་ནད་རྣམས་སེལ་ཏེ་བྱང་བར་
བསམས་ན་དེ་བཞིན་དུ་འགྱུར་རོ། །གདོན་གྱིས་ཟིན་པ་ཡིན་ན་དེའི་སྟེང་དུ་དགུག་པའི་སྦྱོར་བ་བྱ་སྟེ། སྤྲེའུའམ་ཉ་ཁྱི་བ་དང་ཁྱི་གུ་ལ་སོགས་པ་བྱུང་ནས་འདུག་པ་དེ་བརླག་པར་བྱའོ། །ཆོས་ཐམས་ཅད་རྨི་ལམ་དང་མཚུངས་ཤིང་ངོ་བོ་ཉིད་དུ་གནས་པ་ནི། དེ་ནས་

ཞེས་པ་ནས་ལེའུ་རྫོགས་ཀྱི་བར་དུ་སྟེ། སྣང་བ་ཐམས་ཅད་འཁྲུལ་པ་ཡིན་ལ། དེའི་རང་བཞིན་ཆོས་ཀྱི་དབྱིངས་པས། དེ་སྒྲུབ་པའི་ཡེ་ཤེས་བསྐྱེད་པ་གང་ཡིན་པའོ། །ངོ་བོ་ཉིད་ཀྱི་སྐུ་ནི་ཆོས་དང་ཆོས་ཅན་མ་ཡིན་པ་ནམ་མཁའ་དང་འདྲ་བ་ཉིད་
དེ། དེའི་ཕྱིར་དེ་སྐད་ཅེས་བྱའོ། །དེ་ནས་ནམ་མཁའ་ལ་ནམ་མཁའ་བསྒོམ་པར་བྱའོ། །ལེའུ་བཅོ་ལྔ་པའི་དོན་རྫོགས་སོ།། །།ད་ནི་ལེའུ་བཅུ་དྲུག་པ་གཟུགས་བརྙན་སྐུ་དང་གསུང་གི་དཀྱིལ་འཁོར་བསྟན་པའི་ཕྱིར། དེ་ནས་ཞེས་པ་ལ་སོགས་པ་སྨོས་ཏེ།
དེ་ལ་སྐུའི་དཀྱིལ་འཁོར་གསུངས་པ། ཁྲུ་ནི་ཞེས་པ་རྣམས་ཏེ། རེ་ཞིག་ཚད་མཆོག་ཏུ་གསུངས་པ་ཡིན་ལ། སྤྱིར་མེད་པ་ཁོ་ན་སྟེ། འདིའི་དབུས་སུ་རྣམ་པར་སྣང་མཛད་ཆོ་ག་ཇི་ལྟ་བས་བྲི་བར་བྱ་བ་ཡིན་ནོ། །རྡོ་རྗེ་མཆོག་ཅེས་པ། དཀྱིལ་འཁོར་གྱི་ལྷ་
རྫོགས་པའོ། །ཁྲོ་བོ་རྣམས་སྒོ་ཉིད་དུ་སྟེ། ལྷའི་རྣལ་འབྱོར་དུ་བྱས་ནས། ཐུན་མོང་མ་ཡིན་པའི་མཆོད་པ་རྣམ་ལྔ་དང་། བདུད་རྩི་དང་། བྱང་ཆུབ་སེམས་ཀྱི་མཆོད་པ་དང་ནང་གི་མཆོད་པ་རྣམས་དབུལ་བར་བྱའོ། །ཡང་གསུང་གི་དཀྱིལ་འཁོར་
གསུངས་པ། དེ་ནས་ཞེས་པ་རྣམས་ཏེ། སྐུ་དང་གསུང་གི་ཁྱད་པར་ནི་གཙོ་བོར་གང་གྱུར་པ་ཉིད་ཀྱིས་སོ། །དཀྱིལ་འཁོར་ཁྲུ་ནི་ཞེས་པ་རྣམས་ཏེ། དེའི་དབུས་སུ་རྡོ་རྗེ་ཆོས་བསྒོམ་པར་བྱའོ། །འདིར་ཡང་དཀྱིལ་འཁོར་རྫོགས་པར་བསྒོམས་ཏེ། མཆོད་པ་
ལ་སོགས་པ་གོང་མ་བཞིན་བྱའོ། །འོག་ནས་རྡོ་རྗེ་འཛིན་པ་ཞེས་པའི་ཚིགས་སུ་བཅད་པ་གཅིག་གསུངས་པ་ནི། གང་ཡང་རུང་བའི་དཀྱིལ་འཁོར་ཏེ། དེ་བསྒྲུབ་པར་བྱ་བའི་དོན་ཏོ། །བསྒྲུབ་པ་ནི་ལྷར་གྱུར་པས་དེའི་གསང་བ་ལ་འཇུག་པ་ཡིན་ནོ། །གོང་གི་
དཀྱིལ་འཁོར་དེ་དག་གི་ཐིག་དང་ཚོན་ལ་སོགས་པའི་རིམ་པ་ནི་དེ་ནས་ཞེས་པ་ལ་སོགས་པའོ། །ཨོཾ་ཨཱཿཧཱུཾ་ཞེས་པས་བྱིན་གྱིས་བརླབ་པར་བྱ་སྟེ། བདག་ཉིད་བདག་པོའི་ཕྱག་རྒྱར་བསྒོམས་ཏེ། ཐིག་ཚོན་ལ་འོད་ཟེར་གྱི་ལྕགས་ཀྱོས་དྲངས་པའི་དཀྱིལ་

འཁོར་རྣམས་ཐིམ་ནས། ཡེ་ཤེས་སུ་གྱུར་པར་བྱ་བ་ཡིན་ནོ། །ཐིག་གི་ཆོ་ག་ལ་སོགས་པ་བསྒྲུབ་པ་ལ་བརྩོན་པར་བྱ་བ་ཁོ་ན་ཡིན་ནོ། །སྔགས་ཀྱི་སེམས་པས་མི་བྱ་བ་ནི་གང་གསང་བ་ལ་འཇུག་པས། དཀྱིལ་འཁོར་གྱི་རིམ་པ་སྤང་བར་བྱ་བ་ཡིན་ནོ། །
རྣམ་པར་བརྟག་ཅེས་པ་དང་། དབབ་པར་བྱ་ཞེས་པ་རྣམས་ནི་བྱིན་གྱིས་བརླབ་པ་སྟེ། ཡེ་ཤེས་ལྔའི་རང་བཞིན་ཐིག་ཚོན་ལ་ཡིག་འབྲུ་བསམས་ལ། དེའི་འོད་ཟེར་གྱིས་སྐུ་ལ་སོགས་པ་གང་ཡིན་པ་བཀུག་སྟེ་ཐིམ་པ་ནི་བྱིན་གྱིས་བརླབ་པའོ། །དེ་ལ་
ཙནྡན་ཞེས་པ། རཀྟ་ལ་སོགས་པའི་ཁུ་བ་ནི་ས་བོན་ཏེ་བྱུག་པར་བྱ་བ་ཡིན་ནོ། །སྣང་མཛད་བསྒོམས་ནས་ཞེས་པ། བདག་ཉིད་བདག་པོའི་ཕྱག་རྒྱར་བསྒོམས་ནས། སློབ་མ་ལས་ཀྱི་རྡོ་རྗེ་སྟེ་དེ་ལ་བྱིན་གྱིས་བརླབ་པ་བྱས་ཏེ་གཏད་པར་བྱའོ། །ཚོན་
རྩི་ནི་བརླབ་པར་བྱས་ཏེ། ཡང་ན་ཉི་ཤུ་རྩ་ལྔར་ཕྱེ་ལ་དགོད་པའི་རིམ་པ་ལ་འཇུག་པར་བྱའོ། སྦྱིན་སྲེག་བྱ་ཞེས་པ། ཕྱི་ནང་གསང་བ་གསུམ་སྟེ། གང་བྱ་བ་ལས་བཞི་དབྱིབས་དང་ཁ་དོག་ལ་སོགས་པ་མ་འདྲེས་པ་བྱས་ཏེ། དང་པོར་སྔོན་དུ་བཏང་བའི་ཆོ་ག་རྫོགས་
པར་བྱ་སྟེ། ལས་རླུང་ཡབ་ཀྱིས་མེ་བུས་ལ། སྐུ་གསུང་ཐུགས་ཀྱི་ཡི་གེས་སྦྱངས་ཏེ། བུད་ཤིང་དམ་ཚིག་གི་མེ་ལྷར་བསྐྱེད་ནས། ཞལ་དུ་གྱུར་པའི་ཡེ་ཤེས་ཀྱི་མེ་ལྷ་སྤྱན་དྲངས་ཏེ། ལས་བཞིའི་མཆོད་པར་རབ་ཏུ་སྦྱིན་པའོ། །དེའི་གདམས་ངག་ནི་བླ་མ་ལས་
ཤེས་པར་བྱའོ། །ད་ནི་དབང་བསྐུར་བའི་ཆོ་ག་གསུངས་པ། དེ་ལ་འདི་ནི་ཞེས་པ་རྣམས་ཏེ། སངས་རྒྱས་ཀུན་གྱི་ཞེས་པ། རྟེན་གསང་བའི་དབུས་སུ་བསྐྱེད་པའི་རིམ་པས། དཀྱིལ་འཁོར་གསལ་བར་བྱས་ནས། སིལ་སྙན་སྤོས་སྤྲིན་རྣམས་ནི་
མཆོད་པ་སྟེ། ཡེ་ཤེས་ཀྱི་དཀྱིལ་འཁོར་ལ་ཕུལ་ནས་གཉིས་སུ་མེད་པར་བྱས་ཏེ། དབང་བསྐུར་བར་བྱའོ། །བུམ་པ་ཞེས་པ་དང་པོར་བུམ་པའི་དབང་སྟེ། ཁྲུས་དག་པར་བྱས་ལ་སྣང་མཛད་དུ་གནས་པར་བྱས་པ་ནི་རྡོ་རྗེ་སྣང་མཛད་ཅེས་ཏེ། དེ་ལ་ཡེ་ཤེས་

ཀྱི་ཆུ་ཡིས་གང་བའི་བུམ་པ་དང་། སོགས་ཀྱི་སྒྲས་དབུ་རྒྱན་ལ་སོགས་པས་དབང་བསྐུར་བས། མི་བསྐྱོད་པ་དང་རིན་ཆེན་འབྱུང་ལྡན་ལ་སོགས་པར་གྱུར་པ་ལ་མཆོད་པ་རྫོགས་པར་བྱས་ཏེ། དོན་བྱེད་པར་བྱའོ། །གསོལ་བ་གདབ་པའི་
ཚིག་ནི། སངས་རྒྱས་བྱང་ཆུབ་རྡོ་རྗེ་ལ། །ཞེས་པ་རྣམས་ཏེ། སྒོ་གསལ་བས་མ་བྲིས་སོ། །གསང་བའི་དབང་གསུངས་པ། སྔགས་ཀྱིས་བསྐུལ་བ་ཞེས་པ་རྣམས་ཏེ། ཁུ་བས་ཞེས་པ་བྱང་ཆུབ་ཀྱི་སེམས་ཏེ། བཤང་བ་ལ་སོགས་པའི་ས་བོན་ཆོ་ག་ཇི་ལྟ་བས་
ཕབ་སྟེ། སློབ་མ་སྣང་མཛད་བསྒོམས་ནས་བཏུང་བར་བྱའོ། །དེའི་དུས་སུ་ཤ་ལྔ་ཡང་བཟའ་བ་ཁོ་ན་སྟེ། དེས་འགྲུབ་པར་གསུངས་སོ། །དངོས་གྲུབ་ནི་མཆོག་ཐུན་མོང་ཉིད་འགྲུབ་པ་སྟེ། གང་ལ་བྱ་བ་ཉིད་དེ་ལྟ་ཡིན་ནོ། །ད་ནི་ཤེས་རབ་ཡེ་ཤེས་ཀྱི་དོན་
གསུངས་པ། རྣམ་པ་འདི་བཞི་ཞེས་པ་རྣམས་ཏེ། སློབ་མ་ཉིད་སངས་རྒྱས་གཟུགས་སུ་བྱས་ཏེ། རིག་མ་བྱིན་གྱིས་བརླབས་ནས་རྡོ་རྗེ་ཅན་ལ་གཏད་དེ། གསང་བའི་དོན་སྨྲས་ལ། གཉིས་སུ་མེད་པར་བྱའོ། །བཞི་པའི་དོན་ནི་བླ་མའི་གདམས་ངག་
ལས་ཤེས་པར་བྱའོ། །ལྟ་བ་དང་སྤྱོད་པར་ལྡན་པས་གསང་བ་འཇུག་པ་ནི། གླང་པོ་ཤ་ཞེས་པ་ལ་སོགས་པའོ། །གྲུབ་པ་ཉིད་གང་ཞེ་ན། མི་སྣང་ཞེས་རྒྱས་པར་སྨོས་སོ། །བསྒྲུབ་པའི་རྫས་ནི། བཤང་གཅི་ལ་སོགས་པའོ། །ཧྲིཿནི་དེ་སྦྱང་བའི་ཆོ་ག་
ཇི་ལྟ་བས་སོ། །ཨཱ་ཁཾ་ཐཱ་ཞེས་པ་ནི་སྐུ་གསུང་ཐུགས་སུ་གང་གྱུར་པས་གསང་བའི་པདྨ་ལ་རིམ་པ་དང་རིམ་པ་མ་ཡིན་པས་གསང་བ་བཞག་པ་ཡིན་ནོ། །གསང་བ་ཉིད་སྐུའི་རྡོ་རྗེ་ལ་སོགས་པ་ལ་ཡང་གཞག་པ་ཁོ་ན་སྟེ། སྡུད་པ་དང་གཏོང་བའི་དབང་གིས་ཞི་བར་
བྱ་བ་ཉིད་ཡིན་ནོ། །རང་རིགས་ཀྱི་ལྷར་གྱུར་པས་བསྐུལ་བ་ནི། ཉི་མའི་དཀྱིལ་འཁོར་དབུས་གནས་པར། །ཞེས་པ་རྣམས་ཏེ། སྙིང་པོ་དང་འོད་ཟེར་གྱི་ལྕགས་ཀྱོས་ཁམས་གསུམ་དང་སྲིད་གསུམ་གང་ཡིན་པ་དགུག་པའོ། །དེ་བསྒྲུབ་པའི་གསང་

བའི་གནས་ཀྱང་ཉམས་དགའི་ཞེས་པ་སྟེ། ཟླ་བས་ཞེས་པ་འགྲུབ་པའི་དུས་གསུངས་སོ། །རི་རབ་ཅེས་པ་ཡོན་ཏན་ཏེ། བརྗོད་ཀྱིས་མི་ལང་བའི་འཁོར་རྣམས་དང་ལྷན་ཅིག་པར་སྐྱེ་བ་འགྲུབ་བོ། །མངག་གཞུག་པས་ཞེས་པ་བསྐུལ་བ་སྟེ། འོད་ཟེར་གྱི་
ལྷ་མོས་གང་དགུག་པ་ཁུགས་པ་ཁོ་ན་སྟེ། རང་གི་སྐུ་ཉིད་ཀྱིས་ནི་མ་ཡིན་ནོ། །དམ་ཚིག་བསྐུལ་བ་ལ་སོགས་པ་བཞི་ནི་རིམ་པ་བཞིན་དུ་གནས་པ་ཡིན་ཏེ། རིགས་ཀྱི་དཀྱིལ་འཁོར་གང་ཡིན་པ་བསྒོམས་ཏེ། འོད་ཟེར་གྱིས་དཀྱིལ་འཁོར་བསྐུལ་བ་དང་། ཡེ་
ཤེས་དེ་གསང་བའི་གནས་སུ་འཕེན་པ་དང་། དེའི་སྒྲ་དང་། གསང་བ་ལ་དམིགས་པའོ། །དེའི་ཚེ་སྐུ་ལ་སོགས་པའི་འོད་ཟེར་གྱིས་འཇིག་རྟེན་དུ་དོན་བྱས་ཏེ་བསྡུ་བའི་རིམ་པས། གོང་བུ་ལ་ཐིམ་སྟེ་དེ་ཉིད་རྨད་དུ་བྱུང་བའི་གཟུགས་སོ། །དགུག་ཅིང་དབང་
དུ་བྱ་བ་ནི་སངས་རྒྱས་རྡོ་རྗེ་སེམས་དཔའ་ལ་སོགས་པ་སྟེ། རྡོ་རྗེ་སེམས་དཔའ་འམ། སྟོབས་པོ་ཆེའི་སྐུར་བསྒོམས་ལ་དབུ་རྒྱན་ལ་སོགས་པའི་དོན་དང་ལྡན་པར་བྱས་ཏེ། དང་པོར་སྐྲག་པར་བྱས་ཏེ་དགུག་པའི་ཆོ་ག་གང་ཡིན་པས་སོ། །སངས་རྒྱས་
མཆོག་ཅེས་པ་ནི་རང་གི་ལྷར་གང་བྱས་པས་གནས་རྣམས་སུ། སྐུ་གསུང་ཐུགས་ཀྱི་ཡི་གེ་བཀོད་ནས། དེའི་སྤྲོ་བསྡུའི་སྦྱོར་བས་སྐུའི་རྡོ་རྗེ་ལ་སོགས་པ་བསྒྲུབ་པ་སྟེ། གང་ཡིན་པའི་ཆོ་གས་འགྲུབ་པ་ཁོ་ནའོ། །ཁ་ཟས་ཀྱི་ཏིང་ངེ་འཛིན་ནི་བཀྲེས་སྐོམ་ཞེས་པ་
རྣམས་ཏེ། ལྷའི་གཟུགས་སུ་གང་སྦྱོར་བས་ཁ་ཟས་བདུད་རྩིར་གང་གྱུར་པ། ཨོཾ་ལ་སོགས་པ་ཁ་དང་ལྕེ་དང་མགུལ་ལ་བསམས་ཏེ། བཟའ་བའི་སྦྱོར་བས་ཟོས་ན་རྡོ་རྗེ་གསུམ་དག་འཐོབ་པར་འགྱུར་རོ། །བཙུན་མོ་དམ་པའི་མཆོག་དགུག་པ་ནི་དེ་ནས་ཞེས་
པ་ལ་སོགས་པའོ། །དེ་ལ་སངས་རྒྱས་དཀྱིལ་འཁོར་ཉིད་རྡོ་རྗེ་འཛིན་པ་སྟེ། ནམ་མཁའི་དབུས་སུ་གཞལ་ཡས་ཁང་བརྩེགས་པ་ལ་བསྒོམ་པར་བྱའོ། །དེས་གང་དགུག་པ་རྒྱན་རྣམས་རྫོགས་ཤིང་སེར་ལ་འགྱིང་བག་ཏུ་འདུག་པ་རལ་པའི་དབུ་རྒྱན་ཅན་དགུག་

པའི་ཆོ་གས་སོ། །བཀུག་ལ་བརྩམ་པར་བྱ་བ་ནི་སྤྱད་པར་བྱ་བའི་ཐ་ཚིག་གོ། ཙུན་ད་དགུག་པ་གསུངས་པ་དེ་ནས་ཞེས་པ་རྣམས་ཏེ། གདན་ཉི་མའི་གཞལ་ཡས་ཁང་བརྩེགས་པ་ལ་བསམས་ཏེ། དེར་སངས་རྒྱས་ཀྱི་དཀྱིལ་འཁོར་
བསྒོམས་ཏེ། དགུག་པའི་ཆོ་གས་བུད་མེད་རྒྱན་དང་ལྡན་པ་ཁ་དོག་དཀར་མོ་བསམ་པར་བྱས་ཏེ་གསང་བ་ལ་འཇུག་གོ། །ཡང་ནོར་ལྷ་བསྒྲུབ་པ་གསུངས་པ། དེ་ནས་ཛཾ་ཞེས་པ་སྟེ། སངས་རྒྱས་ནམ་མཁའི་དབྱིངས་སུ་བསམ་པ་གོང་མ་བཞིན་བྱས་ལ་
གཟུགས་བརྙན་ལ་དགུག་པ་བྱས་ཏེ། མདུན་དུ་དམིགས་ཏེ། གནོད་སྦྱིན་གྱི་གཟུགས་འཛིན་པ་རལ་པའི་དབུ་རྒྱན་ཅན་རྒྱན་ཐམས་ཅད་རྫོགས་པ་དེ་སངས་རྒྱས་ལྔའི་ཆོ་གས་གནས་ལྔ་དག་ཏུ་བསྒོམ་པར་བྱའོ། །དབུ་ལ་བརྟག་པ་བྱས་ཏེ་མཆོད་པ་རྫོགས་
པར་བྱས་ནས་ཅི་འདོད་པ་ནོད་པར་བྱའོ། །འོན་ཀྱང་མཉེས་ཤིང་འགྲུབ་པར་གསུངས་སོ། །དེའི་གནོད་སྦྱིན་མོ་བསྒྲུབ་པ་ནི་དེ་ནས་ཞེས་པ་རྣམས་ཏེ། གསང་བའི་གནས་སུ་དཀྱིལ་འཁོར་བསྒོམས་ནས། གང་བསྒྲུབ་པ་དེ་གོང་མའི་ཆོ་གས་སོ། །རྒྱས་པར་
མ་བཤད་དེ་བླ་མའི་རིམ་པ་ལས་ཤེས་པར་བྱའོ། །གཞན་ཡང་དངོས་གྲུབ་ཕྲ་མོ་གསུངས་པ། དེ་ནས་ཞེས་པ་སྟེ། གཞལ་ཡས་ཁང་བརྩེགས་པ་ལ་སྣང་མཛད་ཀྱི་དཀྱིལ་འཁོར་བསྒོམས་ཏེ། མི་སྣང་བ་བསྒྲུབ་ན་གསེར་འོད་དང་འདྲ་བའམ་འཇམ་
དཔལ་འོད་དང་འདྲ་བར་འགྱུར་རོ་ཞེས་སོ། །བསྒྲུབ་པ་ཐམས་ཅད་ནི་སྔོན་དུ་བཏང་བ་རྫོགས་ནས་རྫས་དང་རི་མོ་དང་གཟུགས་བརྙན་ལ་བརྟེན་ཏེ་གང་བསྒྲུབ་པའི་ཆོ་གས་བརྟག་པ་བྱས་ན། འགྲུབ་པ་ལ་གདོན་མི་ཟ་བ་ཁོ་ན་ཡིན་ནོ།། །།ད་ནི་རིག་པའི་རྟུལ་
ཞུགས་ཀྱི་དབང་བསྟན་པའི་ཕྱིར། དེ་ནས་ཞེས་པ་ལ་སོགས་པ་སྨོས་ཏེ། དེ་ལ་གོང་མའི་རིམ་པས་སངས་རྒྱས་གནས་ཁང་དང་དཀྱིལ་འཁོར་གསལ་བར་བྱས་ཏེ། དབང་གི་རིམ་པས་བསྒྲུབས་ལ། འདིར་ཐོར་ཚུགས་ཞེས་པ། གཟུངས་ཀྱི་དབུ་

རྒྱན་ལ་སོགས་པ་སྟེ། ལོ་གྲངས་ལ་སོགས་པའི་མཚན་དང་ལྡན་པ་དེ་རྒྱན་གྱིས་བརྒྱན་ལ། དེ་ལ་རིག་པའི་བརྟུལ་ཞུགས་བྱ་བ་སྟེ་གསལ་བར་ནི་མ་བྲིས་སོ། །དེའི་གསང་བའི་རོལ་པ་བྱ་བ་དང་། སྔགས་ཀྱི་རྒྱུད་ཅེས་ཏེ་དམ་ཚིག་ལ་སོགས་པ་བསྒྲགས་
པའོ། །དེ་གང་ལ་ཞེ་ན། བཙུན་མོ་དག་ལ་སྟེ། རིག་མ་བསྟེན་ནས་དབང་ནོད་པ་གང་ཡིན་པའོ། །དེའི་དུས་སུ་དོན་རིག་པས་བརྟུལ་ཞུགས་བྱེད་པ་ནི་རིག་པའི་བརྟུལ་ཞུགས་ཞེས་ཏེ། བཤང་གཅི་དང་བཟའ་བའི་སྦྱོར་བ་རྣམས་དང་། ནོར་རྣམས་རྐུ་བ་ལ་
སོགས་པ་བྱ་བ་ཁོ་ན་ཡིན་ཏེ། ལ་ལ་དག་དགོངས་པས་བཤད་པར་བྱའོ། །ལེའུ་བཅུ་དྲུག་པའི་དོན་རྫོགས་སོ།། །།དེ་ལྟར་བདག་དབང་གསུམ་དང་ལྡན་པའི་སྒོ་ནས། གཞན་གྱི་དོན་དུ་བཞི་པ་དང་བཅུ་དྲུག་པའི་རི་མོའི་དཀྱིལ་འཁོར་ལ་བརྟེན་ནས།
འཇིག་རྟེན་དང་འཇིག་རྟེན་ལས་འདས་པའི་དོན་མཐར་ཕྱིན་པར་བྱ་བ་དང་། བསྐུལ་བའི་བདག་ཉིད་དང་། གདམས་པ་གནང་བ་ལ་སོགས་པ་གསུངས་པ་དེ་ནས་ཞེས་པ་ལ་སོགས་པ་སྟེ། དེ་ལ་མི་བསྐྱོད་ཅེས་པ་ལྔ་ནི་དཀྱིལ་འཁོར་གྱི་བདག་པོ་ལ་འཁོར་གྱི་
རིགས་ལྔ་ཡེ་ཤེས་ལྔའི་སྒོ་ནས་བསྟོད་པའོ། །བསྟོད་པའི་གསུང་ཉིད་ཀྱང་སྒྲ་མཐར་སྟོང་སྟེ། དེའི་དོན་གསུངས་པ། དེ་ནས་ཞེས་པ་དང་། ཨེ་མའོ་ཞེས་པའི་ཚིག་བཞིའོ། །དམ་ཚིག་བཞི་བསྲུང་བ་ནི། དེ་ནས་ཞེས་པ་རྣམས་ཏེ་རང་ལྷ་ཉེ་བར་གྱུར་པས་
དམ་ཚིག་བཞི་བསྲུང་བ་ནི། ཤ་ཆེན་ལ་སོགས་པ་སྟེ། ཤ་ཆེན་གྱི་དམ་ཚིག་དང་བཤང་གཅིའི་དམ་ཚིག་དང་། ཁྲག་དང་ཁུ་བའི་དམ་ཚིག་དང་། སྐུ་གསུང་ཐུགས་ཀྱི་དམ་ཚིག་སྟེ་སྐུ་གསུང་ཐུགས་སུ་གང་སྦྱོར་བས་གོང་གི་སྦྱོར་བ་ཀུན་སྤྱད་པར་བྱ་བ་ཡིན་ནོ། །གཞན་
རང་སངས་རྒྱས་ཀྱི་དམ་ཚིག་ནི་དེ་ནས་ཞེས་པ་དང་། རང་སངས་རྒྱས་ཀྱི་དམ་ཚིག་ཅེས་པ་སྟེ། དེ་དག་ལུས་ཀྱིས་སྟོན་པ་ནི་གསུང་ལ་མི་བརྟེན་པ་སྟེ། རང་གི་ལུས་ཀྱི་རྫུ་འཕྲུལ་དང་། སྤྱོད་པའི་ཁྱད་པར་དང་སྐུའི་དམ་ཚིག་ལ་གནས་པས་མཐར་ཕྱིན་པར་

བྱའོ། །ཉན་ཐོས་ཀྱི་དམ་ཚིག་ནི་དེ་ནས་ཞེས་པ་དང་། དགེ་བ་བཅུ་ཞེས་པ་སྟེ། དེ་ཡང་འདིར་དགག་པ་སྟེ། མོས་པ་ཆུང་ངུའི་དམ་ཚིག་མཐར་ཕྱིན་པའོ། །འཇིག་རྟེན་པའི་དམ་ཚིག་གསུངས་པ། དེ་ནས་ཞེས་པ་ལ་སོགས་པ་སྟེ།
དམ་ཚིག་འདི་དག་ནི་རང་རང་གི་སྤྱོད་པའི་ཁྱད་པར་ཏེ། རྣལ་འབྱོར་པ་རྣམས་ཀྱིས་གསང་བ་བསྒྲུབ་པ་ན། རང་རང་གི་དམ་ཚིག་སྦྱིན་པ་སྟེ། འོན་ཀྱང་ཕན་པ་སྒྲུབ་པ་ཉིད་དེ་ཅི་དགར་འགྲུབ་པོ། །སྔགས་ཀྱི་བདག་པོའི་དམ་ཚིག་ནི་འདི་ཡང་ཡིན་ཏེ། སངས་རྒྱས་
དང་བྱང་ཆུབ་སེམས་དཔའ་དང་། རང་རྒྱལ་བ་དང་། ཉན་ཐོས་ལ་གང་སྐུ་གསུང་ཐུགས་སུ་སྦྱོར་བས་ཕྱག་བྱ་བ་མ་ཡིན་ཏེ། དེ་ཉེས་པར་འགྱུར་བའི་ཕྱིར་རོ། །གལ་ཏེ་ན་དེ་དག་གི་སྐྲ་མཚམས་སུ་རང་གི་ལྷ་གཞག་པ་ཡིན་ནོ། །སྔགས་པ་དེ་ཉིད་ཀྱང་བསམ་གཏན་
ཁོ་ན་ལ་འཇུག་པ་ཡིན་ཏེ། ལུས་དང་ངག་དང་སེམས་ཀྱི་སྤྱོད་པ་རྣམས་ཐབས་དུ་མས་དགག་པ་ཡིན་ནོ། །གང་དཀྱིལ་འཁོར་དེ་ཉིད་ཤེས་ཤིང་བསྙེན་པ་ལ་སོགས་པ་དང་ལྡན་པས་དུས་གསུམ་གྱི་བདེ་བར་གཤེགས་པ་ལ་ཞིང་ཁམས་བཤང་གཅི་ལ་སོགས་པས་བཀང་
སྟེ། རྒྱས་པར་དབུལ་བ་ནི་དེ་ནས་ཕྱག་ན་རྡོ་རྗེ་ཞེས་པ་རྣམས་སོ། །དམ་ཚིག་འདི་དག་ནི་བདག་དང་གཞན་ལ་ཕན་པའི་ཕྱིར་བཤད་ཀྱི་གཅིག་ཁོ་ནའི་དོན་དུ་ནི་མ་ཡིན་ནོ། །དེ་ནས་རྒྱས་པར་ཞུས་པ་དང་། ལན་གསུངས་པ་ནི་དེ་ནས་ཡང་ཞེས་གསུངས་པའོ། །
དེ་ལ་དང་པོར་ཅང་མི་གསུང་བར་བཞུགས་པ་ཞུས་པ་སྟེ། ལན་འོག་ནས་གསུངས་སོ། །དེ་ནས་འཇམ་དཔལ་ཞེས་པ་ལ་སོགས་པ་ནི་རང་རང་གི་མཇལ་སྟངས་ཞུས་པ་སྟེ། སྐུ་གསུང་ཐུགས་ཀྱི་དོན་ཉིད་བརྟག་པར་དཀའ་བའི་ཕྱིར་རོ། །དེའི་ལན་ནི་དེ་ནས་
བཅོམ་ལྡན་འདས་ཞེས་པ་ལ་མངོན་ནོ། །དེ་ནས་བཅོམ་ལྡན་འདས་ཞེས་རྒྱས་པར་གསུངས་པ་ནི་སྙིང་པོ་དོན་བསྡུས་པའི་དཀྱིལ་འཁོར་ཞུས་པ་དང་། དེའི་ལན་གསུངས་པ་སྟེ། སྐུ་གསུང་ཐུགས་ཀྱི་དཀྱིལ་འཁོར་དུ་གང་གྱུར་པས། དེ་བཞིན་གཤེགས་

པའི་ཡེ་ཤེས་ཀྱི་གསང་བ་ལ་བརྟག་པར་བྱ་བ་ཡིན་ནོ། །སློབ་དཔོན་ལ་ཇི་ལྟར་བལྟ་བ་ནི། དེ་ནས་ཡང་བྱང་ཆུབ་སེམས་དཔའ་བྱམས་པས་ཞེས་པ་རྣམས་ཏེ། དེ་བཞིན་གཤེགས་པ་རྣམས་ཀྱང་བདག་ཅག་གི་ཕའོ་མའོ་སྙམ་དུ་འཛིན་ཅིང་། དེ་བཞིན་གཤེགས་པའི་
བསོད་ནམས་ཀྱི་ཕུང་པོ་བས་ཀྱང་སློབ་དཔོན་གྱི་བ་སྤུའི་བུ་ག་གཅིག་འཕགས་སོ་ཞེས་ཏེ། དོན་གྱི་ངོ་བོ་ཉིད་དུ་ཐ་མི་དད་པའི་ཕྱིར་རོ། །སྐུ་གསུང་ཐུགས་ཀྱི་དངོས་གྲུབ་བླ་མ་དེ་ཉིད་ལ་གནས་པར་གསུངས་པ། དེ་ནས་བྱང་ཆུབ་སེམས་དཔའ་དེ་དག་གིས་ཞེས་པ་རྣམས་ཏེ།
སློབ་དཔོན་ལ་ནོད་པར་གསུངས་སོ། །ལུས་ངག་སེམས་གང་ལ་གནས་པ་ཡང་། བྱང་ཆུབ་སེམས་དཔའ་རྣམས་ཀྱིས་གསོལ་བ་ཞེས་པ་སྟེ། སློབ་དཔོན་ཉིད་བྱང་ཆུབ་སེམས་དཔའ་ཐ་མི་དད་ཅིང་གསང་བའི་བདག་ཉིད་ལྡན་པས་དེ་སྐད་ཅེས་བྱའོ། །དེ་ནས་
ཡང་ཞེས་པ་ལ་སོགས་པ་ནི་རྡོ་རྗེ་འཛིན་གྱི་དཀྱིལ་འཁོར་ཞུས་པ་སྟེ། རྟེན་གྱི་དཀྱིལ་འཁོར་ལ་རྡོ་རྗེ་འཛིན་པའི་དཀྱིལ་འཁོར་ཆོ་ག་བཞིན་དུ་བསམས་ཏེ། ཡེ་ཤེས་ཀྱི་དཀྱིལ་འཁོར་མདུན་དུ་དམིགས་ལ་མཆོད་པ་རྣམས་རྫོགས་པར་བྱས་ཏེ། རང་གི་སྐུ་ལ་
སོགས་པའི་རྡོ་རྗེ་ལ་དབང་བསྐུར་བ་ནི་བདེ་བར་གཤེགས་པ་རྣམས་ཀྱི་ཡེ་ཤེས་ཀྱི་རང་བཞིན་ཏེ། དབབ་པར་བྱ་ཞེས་ཏེ་བསྐུར་བའི་ཐ་ཚིག་གོ། །དེའི་སྦྱོར་བ་ལ་དབབ་པ་དང་། ཁ་ཟས་ཀྱི་ཏིང་ངེ་འཛིན་དང་། མཆོད་པའི་བྱེ་བྲག་དང་། སྦྱོར་བའི་ཆོ་ག་དང་དྲག་
ཤུལ་གྱི་བྱ་བ་དང་། བདུད་རྩི་བཏུང་བ་དང་། དེའི་བསམ་གཏན་ལ་གནས་ན་བསོད་ནམས་ཀྱི་ཚོགས་མི་བྱ་བ་དང་། དུག་འབྱིན་ཅིང་གནོན་པ་དང་ལུས་ངག་སེམས་བསྲུང་བའི་ཆོ་ག་དང་། མ་མོ་ལ་སོགས་པའི་གནས་སུ་རྡོ་རྗེ་ཨ་ཛ་ན་སྒྲུབ་པའི་ཐབས་
དང་། འབྲས་བུ་རྣམས་གསུངས་པ་སྟེ། དེ་དག་གི་ཆོ་ག་ནི་བླ་མའི་མན་ངག་ལས་ཤེས་པར་བྱའོ། །གསང་བའི་ཡི་གེ་གསུངས་པ། དེ་ནས་བཅོམ་ལྡན་འདས་ཞེས་པ་ནས། ཅང་མི་སྨྲ་བར་གྱུར་ཏོ་ཞེས་པའི་བར་དུ་སྟེ། ཡི་གེ་ནི་སྐུ་གསུང་ཐུགས་ཀྱི་ཡི་གེ་

སྟེ། བྱང་ཆུབ་སེམས་དཔས་ནི་རྟོགས་པར་དཀའ་བར་མ་ཟད། དེ་བཞིན་གཤེགས་པས་ཀྱང་རྟོགས་པར་དཀའ་སྟེ། ཡི་གེ་དེ་ཉིད་མ་ཐོས་པར་མངོན་པར་འཚང་མི་རྒྱའོ། །དེ་ཅིའི་ཕྱིར་ཞེ་ན། ཡི་གེ་ནི་ཆོས་ཀྱི་དེ་བཞིན་ཉིད་དང་། གསང་བའི་དཀྱིལ་
འཁོར་རྣམས་ཏེ། ཆོས་དང་བསོད་ནམས་ཀྱི་རྒྱུ་འགྲུབ་པའི་ཕྱིར་རོ། །དེ་ནས་བཅོམ་ལྡན་འདས་ཞེས་གསུངས་པ་བཞི་ནི་ལྷ་མོ་བཞིའི་དབྱངས་ཀྱིས་བསྐུལ་བ་སྟེ། ཆོས་ཀྱི་སྐུ་གང་ཡིན་པས་འགྲོ་བ་ལ་སྣང་བ་མ་ཡིན་པས། དེའི་ཕྱིར་དགྱེས་པའི་བསྟོད་པས་གཟུགས་ཀྱི་སྐུར་བསྐུལ་
བར་མཛད་དེ། འདོད་ཆགས་ཀྱི་རྗེས་སུ་བྱང་ཆུབ་ཆུད་པ་ཉིད་དེ། དེའི་དོན་གསུངས་པ་ཡིན་ནོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་ཞེས་པ་ནས། འདུག་གོ་ཞེས་པའི་བར་རྣམས་ནི་ཡོངས་སུ་གཏང་བ་སྟེ། དེ་ཡང་སངས་རྒྱས་ཀྱི་བཀའ་ཡུན་རིང་གནས་ཤིང་ཕན་
གདགས་པའི་ཕྱིར། སྐལ་བ་མཆིས་པའི་ཕྱིར་ཞེས་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་རྣམས་ལ་བོས་ནས་སྤྱིར་གཏད་པ་དང་། སྡུད་པ་པོ་རྡོ་རྗེ་ཆོས་ལ་དམིགས་ཀྱིས་གཏད་པའོ། །དབང་བསྐུར་ནས་དེ་བཞིན་བགྱིའོ། །ཞེས་ཁས་བླངས་
ཏེ། ཤེས་པའི་རྒྱུད་ལ་གནས་ནས། ཡོངས་སུ་ཆུབ་པར་བྱས་སོ། །ཅང་མི་གསུང་བ་ནི་གོང་གི་བདག་ཉིད་རྣམས་དེའི་རང་བཞིན་ཏེ། དེ་དང་དེ་ཉིད་དུ་འབྲེལ་པས་དེ་སྐད་ཅེས་བྱ་སྟེ། ཅི་ཡང་མ་ཡིན་པ་ཉིད་དང་ལྡན་པས་གསང་བའི་དོན་ལ་ཞུགས་པ་སྟེ། མཉམ་
པ་ཉིད་དུ་ལྷུན་གྱིས་གྲུབ་པར་སྦྱོར་བའོ། །ལེའུ་བཅུ་བདུན་པའི་དོན་རྫོགས་སོ།། །།བརྗོད་པར་བྱ་བའི་རྒྱུད་འདི་ཡི། །དགོངས་པ་ཉེ་བར་ལེན་པའི་འགྲེལ། །རྡོ་རྗེ་བཞད་པའི་སློབ་དཔོན་གྱིས། །སེམས་ཅན་ཡེ་ཤེས་བསྐྱེད་ཕྱིར་ཏེ། །འདི་བརྩམས་པ་ལས་བྱུང་བ་ཡིས། །དགེ་བ་དྲི་མེད་གང་ཡིན་
པ། །ཡང་དག་སློབ་མ་དྲི་མེད་དང་། །སེམས་ཅན་ཀུན་གྱིས་ཐོབ་པར་ཤོག །རྒྱུད་ཀྱི་རྒྱལ་པོ་དཔལ་གསང་བ་འདུས་པའི་དགོངས་པ་ཐམས་ཅད་ཉེ་བར་ལེན་པའི་འགྲེལ་པ་རྫོགས་སོ།། །།རྒྱ་གར་གྱི་མཁན་པོ་ཛྙཱ་ན་གརྦྷ་དང་། བོད་ཀྱི་ལོ་ཙཱ་བ་བཻ་རོ་ཙ་ནས་བསྒྱུར་ཅིང་གཏན་ལ་ཕབ་པ།།

༄༅༅། །རྒྱ་གར་སྐད་དུ། ཤྲཱི་གུ་ཧྱ་ས་མཱ་ཛ་ཏནྟྲ་ནི་དཱ་ན་གུ་རཱུ་པ་དེ་ཤེ་ནཱ་ཁྱ་ཏ། བོད་སྐད་དུ། དཔལ་གསང་བ་འདུས་པའི་རྒྱུད་ཀྱི་གླེང་གཞི་བླ་མའི་མན་ངག་གིས་བཤད་པ། ཐམས་ཅད་མཁྱེན་པ་ལ་ཕྱག་འཚལ་ལོ། །དེ་ནས་གསང་བ་འདུས་པའི་རྒྱུད་ཀྱི་གླེང་གཞི་བླ་མའི་མན་ངག་གིས་བཤད་པར་བྱའོ། །
དེ་ལ་རྒྱུད་འདི་མགོ་མཇུག་ཏུ་ཕུན་སུམ་ཚོགས་པ་རྣམ་པ་ལྔ་དང་ལྡན་པར་སྟོན་ཏོ། །ལྔ་གང་ཞེ་ན། སྟོན་པ་ཕུན་སུམ་ཚོགས་པ་དང་། སྡུད་པ་པོ་ཕུན་སུམ་ཚོགས་པ་དང་། གནས་ཕུན་སུམ་ཚོགས་པ་དང་། འཁོར་ཕུན་སུམ་ཚོགས་པ་དང་། རྒྱུད་ཕུན་སུམ་ཚོགས་པའོ། །དེ་ལ་བཅོམ་ལྡན་འདས་ཞེས་བྱ་བས་ནི་སྟོན་
པ་ཕུན་སུམ་ཚོགས་པ་སྟོན་ཏོ། །བདག་གིས་ཐོས་པ་དུས་གཅིག་ན་ཞེས་བྱ་བས་ནི་སྡུད་པ་ཕུན་སུམ་ཚོགས་པ་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ནས་བཙུན་མོའི་དཀྱིལ་ན་བཞུགས་སོ་ཞེས་བྱ་བའི་བར་གྱིས་ནི་གནས་ཕུན་སུམ་ཚོགས་
པ་སྟོན་ཏོ། །བརྗོད་དུ་མེད་པའི་ཡང་བརྗོད་དུ་མེད་པའི་སངས་རྒྱས་ཀྱི་ཞིང་གི་ཞེས་བྱ་བ་ནས་དེ་བཞིན་གཤེགས་པ་ཐམས་ཅད་ཀྱིས་གང་བར་སྣང་ངོ་ཞེས་བྱ་བའི་བར་གྱིས་ནི་འཁོར་ཕུན་སུམ་ཚོགས་པ་སྟོན་ཏོ། །འདིས་ཅིའི་ཕྱིར་རྒྱུད་ཕུན་སུམ་ཚོགས་པ་སྟོན་ཞེ་ན། ཇི་སྐད་བརྗོད་
པས་རྒྱུད་མགོ་མཇུག་གི་དོན་རྫོགས་པར་འདྲེན་པའི་ཕྱིར་རྒྱུད་ཕུན་ཚོགས་པ་སྟོན་ཏོ། །དེ་ལ་ཡང་བཅོམ་ལྡན་འདས་ཞེས་གོང་དུ་བསྟན་པ་ནི་ཀུན་རྫོབ་ཏུ་འདོད་ཆགས་ནས་ཕྲག་དོག་གི་བར་གྱི་ཆོས་ལྔ་པོའི་རང་བཞིན་དང་། ས་བོན་གྱི་ངོ་བོར་གནས་པར་བསྟན་ཏེ། དེའི་
ངོ་བོ་ལྷུན་གྱིས་གྲུབ་པ་ནི་འདོད་ཆགས་སྣང་བ་མཐའ་ཡས། ཞེ་སྡང་མི་འཁྲུགས་པ། གཏི་མུག་རྣམ་པར་སྣང་མཛད། ང་རྒྱལ་རིན་ཆེན་འབྱུང་ལྡན། ཕྲག་དོག་གདོན་མི་ཟ་བར་གྲུབ་པ། ས་བོན་ནི་རྣམ་པར་སྣང་མཛད་ཆེན་པོའོ། །ཆོས་ལྔ་པོ་འདི་དག་
ལས་ཡེ་ཤེས་ལྔར་ཡང་སྦྱར་ཏེ། དེ་ལ་མེ་ལོང་ལྟ་བུའི་ཡེ་ཤེས་ནི་མི་འཁྲུགས་པ། མཉམ་པ་ཉིད་ཀྱི་ཡེ་ཤེས་ནི་རིན་ཆེན་འབྱུང་ལྡན། སོ་སོར་ཀུན་དུ་རྟོག་པའི་ཡེ་ཤེས་ནི་སྣང་བ་མཐའ་ཡས། བྱ་བ་གྲུབ་པའི་ཡེ་ཤེས་ནི་གདོན་མི་ཟ་བར་གྲུབ་པའོ། །ཅིའི་ཕྱིར་

གདོན་མི་ཟ་བར་གྲུབ་པའི་ཡེ་ཤེས་ཀྱི་ངོ་བོར་བསྟན་ཞེ་ན། ལས་ཀྱི་རང་བཞིན་ཡིན་པའི་ཕྱིར་རོ། །ཆོས་ཀྱི་དབྱིངས་ཀྱི་ཡེ་ཤེས་ནི་རྣམ་པར་སྣང་མཛད་དོ། །རྣམ་པར་སྣང་མཛད་ཆེན་པོ་ནི་ཡང་དག་པའི་ཡེ་ཤེས་སོ། །ཡེ་ཤེས་འདི་དག་
ལས་གཟུགས་ལ་སོགས་པའི་ངོ་བོར་གནས་པ་ཐམས་ཅད་ཀྱང་འབྱུང་བར་འགྱུར་ཏེ། དེ་ལ་རིམ་པར་སྦྱར་ན་གཟུགས་ཀྱི་ཕུང་པོ་རྣམ་པར་སྣང་མཛད། ཚོར་བ་རིན་ཆེན་འབྱུང་ལྡན། འདུ་ཤེས་སྣང་བ་མཐའ་ཡས། འདུ་བྱེད་གདོན་མི་ཟ་བར་གྲུབ་པ།
རྣམ་པར་ཤེས་པ་མི་འཁྲུགས་པའོ། །འདི་དག་ཐམས་ཅད་དམ་ཚིག་གི་ངོ་བོར་ཡང་ཤེས་པར་བྱ་སྟེ། དེ་ལ་ཡང་གཟུགས་རྣམ་གསུམ་ནི་རྣམ་པར་སྣང་མཛད། སྒྲ་རྣམ་གསུམ་ནི་རིན་ཆེན་འབྱུང་ལྡན། དྲི་རྣམ་གསུམ་ནི་སྣང་བ་མཐའ་ཡས། རོ་རྣམ་
གསུམ་ནི་གདོན་མི་ཟ་བར་གྲུབ་པ། རེག་རྣམ་གསུམ་ནི་མི་འཁྲུགས་པའོ། །གཞན་ཡང་བྱང་ཆུབ་ཀྱི་སེམས་ལྷུན་གྱིས་གྲུབ་པ་ལས་ཆོས་ལྔ་པོ་འདི་དག་སྐྱེད་པར་བྱེད་དེ། ལྔ་གང་ཞེ་ན། ས་ཆུ་མེ་རླུང་ནམ་མཁའོ། །དེ་ཇི་ལྟར་སྐྱེད་པར་བྱེད་ཅེ་ན། དེ་ཡང་རིམ་
པར་དབྱེ་ན། སའི་ཁམས་ནི་སངས་རྒྱས་སྤྱན། ཆུའི་ཁམས་ནི་མཱ་མ་ཀཱི། མེའི་ཁམས་ནི་གོས་དཀར་མོ། རླུང་གི་ཁམས་ནི་འཕགས་མ་སྒྲོལ་མ། ནམ་མཁའི་ཁམས་ནི་རྡོ་རྗེ་དབྱིངས་ཀྱི་དབང་ཕྱུག་མའོ། །དེ་ཡང་འབྲས་བུ་རྣམ་པ་ལྔ་སྐྱེད་པར་བྱེད་དེ། དེ་
གང་ཞེ་ན། ཟད་པར་སར་བསྒོམས་པས་ནི་ནམ་མཁའ་ལ་འཆག་པ་དང་གཞལ་མེད་ཁང་མངོན་པར་སྐྱེད་པར་བྱེད་དོ། །བྱང་ཆུབ་ཀྱི་སེམས་རླན་པ་ལྟ་བུའི་རང་བཞིན་དུ་བསྒོམས་པས་ནི་འཇིག་རྟེན་ཐམས་ཅད་ཆུས་ཡོངས་སུ་གང་བར་སྤྲོ་བ་དང་བསྡུ་བ་ནུས་
པར་འགྱུར་རོ། །མེར་བསྒོམས་པས་ནི་འབར་བའི་རྫུ་འཕྲུལ་སྐྱེད་པར་བྱེད་དོ། །རླུང་གི་ཁམས་སུ་བསྒོམས་པས་ནི་ཡིད་ཀྱི་འགྲོ་བ་སྐྱེད་པར་བྱེད་དོ། །ནམ་མཁའི་ཁམས་སུ་བསྒོམས་པས་ནི་སྒྲིབ་པ་མེད་པའི་ཡེ་ཤེས་སྐྱེད་པར་བྱེད་དོ། །འབྲས་བུ་མདོ་

ཙམ་ཞིག་བསྟན་པ་ཡིན་ནོ། །གཞན་ཡང་མིག་ལ་སོགས་པས་འཕྲུལ་གྱི་མིག་ལ་སོགས་པ་སྐྱེད་པའི་རྒྱུར་ཡང་སྟོན་ཏེ། དེ་ཡང་གང་ཞེ་ན། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་དོ། །དེ་ལ་མིག་ནི་སའི་སྙིང་པོ། རྣ་བ་ནི་ཕྱག་ན་རྡོ་རྗེ། སྣ་
ནི་ནམ་མཁའི་སྙིང་པོ། ལྕེ་ནི་སྤྱན་རས་གཟིགས་དབང་ཕྱུག །ལུས་ནི་སྒྲིབ་པ་རྣམ་པར་སེལ་བ། ཡིད་ནི་རྡོ་རྗེ་སེམས་དཔའོ། །དེ་ལྟར་བསྒོམས་པའི་འབྲས་བུ་ནི་འདི་དག་སྐྱེད་པར་བྱེད་དེ། སའི་སྙིང་པོས་འཕྲུལ་གྱི་མིག །ཕྱག་ན་རྡོ་རྗེས་འཕྲུལ་གྱི་རྣ་བ།
ནམ་མཁའི་སྙིང་པོས་འཕྲུལ་གྱི་སྣ། སྤྱན་རས་གཟིགས་ཀྱི་དབང་པོས་འཕྲུལ་གྱི་ལྕེ་སྟེ། སེམས་ཅན་སྣ་ཚོགས་ལ་སྒྲ་སྣ་ཚོགས་ཀྱིས་སོ་སོའི་མོས་པ་ཇི་ལྟ་བ་བཞིན་ཆོས་སྟོན་པའོ། །སྒྲིབ་པ་རྣམ་པར་སེལ་བས་ལུས་ཀྱི་རྫུ་འཕྲུལ་དང་ཡིད་ཀྱི་གཟུགས་དང་སྤྲུལ་པ་སྐྱེད་
པར་བྱེད་དོ། །གཞན་ཡང་འཇིག་རྟེན་གྱི་ཁམས་ཐམས་ཅད་དུ་རྡོ་རྗེའི་རྫུ་འཕྲུལ་ཡང་སྐྱེད་པར་བྱེད་དོ། །ཡིད་རྡོ་རྗེ་སེམས་དཔས་ནི་སྔོན་གྱི་གནས་རྗེས་སུ་དྲན་པ་དང་། ཟག་པ་ཐམས་ཅད་ཟད་པའི་ཡེ་ཤེས་སྐྱེད་པར་བྱེད་དོ། །མཉམ་པར་སྦྱོར་བའི་དུས་སུ་འཕགས་
པ་གཤིན་རྗེ་གཤེད་ལག་པ་གཉིས་ཏེ་ལྕགས་ཀྱུའི་དོན། འཕགས་པ་གཞན་གྱིས་མི་ཐུབ་པ་རྡོ་རྗེ་པདྨོར་ཞུགས་པ་སྟེ་ཞགས་པའི་ཚུལ། འཕགས་པ་རྟ་མགྲིན་ནི་ཕྱག་རྒྱ་ཆེན་པོ་དང་མུ་དྲ་གཉིས་ཞལ་སྦྱོར་བ་སྟེ་ལྕགས་སྒྲོག་གི་དོན་ཏོ། །འཕགས་པ་བདུད་རྩི་
འཁྱིལ་པ་ལས་ཀྱི་ཕྱིར་ལས་ཀྱི་དུས་སུ་བདེ་བ་ཆེན་པོའི་གནས་གཉིས་མཉེས་པར་བྱེད་པ་སྟེ་དྲིལ་བུའི་དོན་ཏོ། །དེ་དག་ཐམས་ཅད་བྱང་ཆུབ་ཀྱི་སེམས་ལས་བྱུང་བར་སྟོན་ཏོ། །ཐམས་ཅད་མཁྱེན་པའི་ཡེ་ཤེས་བསྐྱེད་པར་འདོད་པའི་རྣལ་འབྱོར་པས། སྔར་བསྡུས་པའི་དོན་གསལ་
བར་བསྟན་ནས། ཕྱིས་སློབ་དཔོན་གྱི་རྒྱུད་བཤད་པར་བརྩམ་པར་བྱའོ། །དེ་ལ་འདི་སྐད་བདག་གིས་ཐོས་པ་ཞེས་བྱ་བ་ནས། བཙུན་མོའི་དཀྱིལ་ན་བཞུགས་སོ་ཞེས་པའི་བར་དག་གི་དོན་ནི་སློབ་དཔོན་གྱི་མན་ངག་གིས་བསྟན་པར་བྱ་སྟེ། ཨེ་ཞེས་པ་དམ་ཚིག་གི་ཕྱག་རྒྱ། ཝཾ་ཞེས་

པ་ནི་ཕྱག་རྒྱ་ཆེན་པོ། མ་ནི་ཆོས་ཀྱི་ཕྱག་རྒྱ། ཡཱ་ནི་ལས་ཀྱི་ཕྱག་རྒྱ། ཤྲུ་ཀྲ་ཞེས་པ་ནི་སྤྲོ་བའི་དོན་ཏོ། །ཨེ་ཞེས་པ་ནི་གཟུངས་མའོ། །ཝཾ་ཞེས་བྱ་བ་ནི་བྱང་ཆུབ་ཀྱི་སེམས་རྡོ་རྗེ། འདིའི་དུས་ན་ཞེས་པ་ནི་འདིའི་ཚེ་ན་ཞེས་བྱ་བར་སྦྱར། ཡང་ན་ས་མ་
ཡ་ཞེས་པ་ནི་དུས་དང་མི་སྦྱར་གྱི། འདིའི་ཕྱག་རྒྱ་ཉིད་ལ་གནས་སོ་ཞེས་བྱ་བར་སྦྱར་རོ། །བཅོམ་ལྡན་འདས་ཞེས་བྱ་བ་ནི་བདུད་སྡེ་བཞི་བཅོམ་པ་དང་། ལེགས་པའི་ཡོན་ཏན་དྲུག་དང་ལྡན་པའི་ཕྱིར་ཡང་བཅོམ་ལྡན་འདས་ཞེས་བྱའོ། །ཡང་རྣམ་པ་གཅིག་ཏུ་ན། ཡེ་
ཤེས་ཕུན་སུམ་ཚོགས་པ་མངའ་བའི་ཕྱིར་ཡང་བཅོམ་ལྡན་འདས་སོ། །དེ་བཞིན་གཤེགས་པ་ཞེས་པ་ནི་ཇི་ལྟར་སྐྱེ་བ་བཞིན་སྐྱེས་པའི་ཕྱིར་ཡང་དེ་བཞིན་གཤེགས་ཞེས་པའོ། །དེ་ལ་ཡང་ཇི་ལྟར་སྐྱེ་ཞེ་ན། ཕ་མ་གཉིས་ཐོག་མ་མེད་པའི་དུས་ནས་འདོད་ཆགས་དང་ལྡན་པའི་
དབང་གིས་ཕོ་མོ་ཕྲད་པར་གྱུར་ནས། དེ་ཉིད་རྣམ་པར་སྦྱངས་ནས་ཡང་དག་པའི་ལམ་དུ་འགྲོ་བའི་ཕྱིར་ན་དེ་བཞིན་གཤེགས་པའོ། །ཡང་ན་ཇི་ལྟར་འོངས་བཞིན་འགྲོ་བའི་ཕྱིར་ཡང་དེ་བཞིན་གཤེགས་པའོ། །དཔེར་ན་ཟངས་དང་འཁར་བ་ལ་སོགས་པ་རྫས་
ཀྱི་དངོས་པོ་གཅིག་ལ་ཆོལ་ཟངས་སུ་བྱས་པའི་དུས་ན་ནི་བཙོག་པར་འཛིན་ཅིང་མཆིལ་སྣབས་ལ་སོགས་པ་འདོར་བར་བྱེད། དེ་ལ་གཞོང་པ་ལ་སོགས་པར་བྱས་ན་ནི་གཙང་བར་འཛིན་ཅིང་། ཟས་སྐོམ་ལ་སོགས་པ་འཇོག་ཅིང་ཟ་བར་བྱེད། དེ་ལ་སྐུ་གཟུགས་
ལ་སོགས་པ་བྱས་པའི་དུས་ན་ནི་ཕྱག་འཚལ་ཞིང་མཆོད་པའི་ལས་སུ་བྱེད་དོ། །དེ་དང་འདྲ་བར་འཁོར་བའི་རྒྱུ་འདོད་ཆགས་ཀྱང་ཉོན་མོངས་པ་དང་བཅས་པའི་དུས་ན་ནི་སྨད་ཅིང་སྤང་བར་བྱ་བ་ཡིན་ལ་དེ་ཉིད་ཐབས་དང་ཤེས་རབ་ཀྱི་ཚུལ་དུ་སྦྱོར་བའི་དུས་ན་རྡོ་རྗེ་སེམས་
དཔའི་སྐུར་གྲུབ་པར་བྱེད་པའི་དགའ་བའི་ལོངས་སྤྱོད་ཀྱི་གནས་ཀྱང་ཡིན་ལ། དེ་ལྟར་ཐབས་དང་ཤེས་རབ་ཟུང་དུ་འབྲེལ་བའི་ཏིང་ངེ་འཛིན་གྱི་ལོངས་སྤྱོད་གོམས་པའི་དབང་གིས་འབྲས་བུ་དཔལ་རྡོ་རྗེ་སེམས་དཔའ་ཉིད་མངོན་པར་གྲུབ་པར་བྱེད་དོ། །དེ་བཞིན་དུ་འདོད་ཆགས་

ནས་ཕྲག་དོག་གི་བར་གྱི་ཆོས་ལྔ་པོ་འདི་དག་ཀྱང་དང་པོའི་ཚུལ་ལྟར་སྤྱད་ན་ངན་སོང་གི་རྒྱུ་ཡང་ཡིན། དེ་ཉིད་རང་བཞིན་རྣམ་པར་དག་པར་བསྒོམས་ན་ཐམས་ཅད་མཁྱེན་པའི་ཡེ་ཤེས་བསྐྱེད་པའི་རྒྱུ་ཡང་ཡིན་པས་ཉེས་པར་མི་འགྱུར་ཏེ། དེའི་ཕྱིར་དེ་བཞིན་གཤེགས་པ་ཞེས་བྱའོ། །
དེ་བཞིན་གཤེགས་པའི་སྒྲ་མང་དུ་སྦྱར་ཞིང་བཤད་ཅི་དགོས་ཏེ། རྒྱུད་ཀྱི་དོན་ངེས་པར་བསྟན་པ་འདི་ཡིན་ནོ།། །།སྐུ་དང་གསུང་དང་ཐུགས་ཀྱི་སྙིང་པོ་རྡོ་རྗེ་བཙུན་མོའི་དཀྱིལ་ན་བཞུགས་སོ་ཞེས་བྱ་བ་ལ། སྐུ་གསུང་ཐུགས་ནི་ལུས་ངག་ཡིད་དོ་ཅོག་གི་རང་བཞིན་ཡང་ཡིན་ལ།
དེ་བཞིན་གཤེགས་པ་ཐམས་ཅད་ཀྱི་སྐུ་ལ་སོགས་པའི་རང་བཞིན་ཡང་ཡིན་པས་དེའི་ཕྱིར་སྐུ་དང་གསུང་དང་ཐུགས་རྡོ་རྗེ་ཞེས་བྱའོ། །སྙིང་པོ་ནི་ས་བོན་ཏེ། རྣམ་པར་སྣང་མཛད་ཆེན་པོའི་བཙུན་མོའི་དཀྱིལ་ན་བཞུགས་སོ་ཞེས་པ་ནི་བཙུན་མོ་ནི་དམ་ཚིག་གི་ཕྱག་རྒྱ། དཀྱིལ་ཞེས་པ་ནི་པདྨོ་སྟེ་དེ་ནི་བཞུགས་པར་
སྦྱར། དེ་ཡང་ཇི་ལྟར་བཞུགས་ཤེ་ན། རྣམ་པར་སྣང་མཛད་ཆེན་པོ་ཡེ་ཤེས་ཀྱི་རང་བཞིན་ཆུ་ལྟ་བུའི་ངོ་བོ་ཟླ་བ་ལྟ་བུར་དཀར་ཞིང་དག་པའི་ཚུལ་དུ་བཞུགས་སོ། །དེ་ལ་ཡང་འདི་སྐད་ཅེས་པ་ནས་བཙུན་མོའི་དཀྱིལ་ན་བཞུགས་སོ་ཞེས་པའི་བར་དེ་དག་རྣམ་གྲངས་གཞན་དུ་ཡང་བསྟན་པར་བྱ་སྟེ། ཨེ་ནི་ཆོས་ཀྱི་
འབྱུང་གནས། ཝཾ་ནི་རྡོ་རྗེ་མ་ནི་རྣམ་པར་སྣང་མཛད་ཆེན་པོའི་ཡེ་ཤེས་ཀྱི་ས་བོན། ཡ་ནི་བསྐྱོད་པ་ལས་ཀྱི་མཚན་ཉིད། ཤྲུ་ཀྲ་ནི་འབྱུང་བའི་དོན། ཨེ་ཀ་ནི་ལྡན་པའི་མཚན་ཉིད། འདིའི་དུས་ན་ཞེས་བྱ་བ་ནི་རྡོ་རྗེ་དབྱིངས་ཀྱི་དབང་ཕྱུག་མའི་དགེས་པའི་གནས་བྷ་ག་བཱན་ནི་བྷ་གའི་གནས་ན་བཞུགས་པའི་
ཕྱིར། བྷ་ག་བཱན་ཞེས་བྱའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་རྡོ་རྗེ་ཞེས་པ་ནི་ས་བོན་ཟླ་བ་ལྟ་བུ་དང་སྦྱར། བཙུན་མོའི་དཀྱིལ་ན་བཞུགས་སོ་ཞེས་པ་ནི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོ་རྡོ་རྗེ་དབྱིངས་ཀྱི་དབང་ཕྱུག་མའི་
པདྨའི་གནས་ན་བཞུགས་པར་སྟོན་ཏོ། །བི་ཛ་ཧ་རའི་སྒྲས་ནི་བཞུགས་པའི་དོན་ཏོ། །བཞུགས་སོ་ཞེས་པའི་སྒྲས་ནི་རྣམ་པར་གནས་སོ་ཞེས་པའི་དོན་ཏོ། །ཡང་རྣམ་གྲངས་གཞན་དུ་ཡང་བཤད་པར་བྱ་སྟེ། ཨེ་ཁཾ་ཞེས་པ་ནི་འཛིན་པའི་དོན་ཏེ། སྡུད་པར་མཛད་པ་རྡོ་རྗེ་ཆོས་ཀྱིས་བསྡུས་

པའོ། །དེ་ཡང་འདི་སྐད་ཅེས་བྱ་བ་ནས། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ་ཞེས་པའི་བར་དག །བདག་གིས་མངོན་སུམ་དུ་ཐོས་སོ་ཞེས་སྟོན་ཏོ། །བདག་གིས་ཞེས་པ་ནི་གཞན་དང་གཞན་ལས་བརྒྱུད་པ་ལྟ་བུ་མ་ཡིན་པའི་དོན་ཏོ། །
ས་མ་ཡ་ཞེས་པའི་སྒྲ་ནི་དུས་མཚོན་པའོ། །འདི་ལྟར་དུས་མཚོན་པ་ཡང་དུས་གསུམ་ལ་སོགས་པ་དུས་ངེས་པར་བསྟན་པ་ནི་མ་ཡིན་ནོ། །ཅིའི་ཕྱིར་ཞེ་ན། དགོས་པ་མེད་པའི་ཕྱིར་རོ། །བཅོམ་ལྡན་འདས་ཞེས་བྱ་བ་ནི་བདུད་བཞི་བཅོམ་པ་དང་། དབང་ཕྱུག་ལ་སོགས་པ་དང་ལྡན་པའི་ཕྱིར་བཅོམ་
ལྡན་འདས་ཞེས་བྱའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་སྙིང་པོ་རྡོ་རྗེ་ཞེས་པ་ནི་སངས་རྒྱས་བཅོམ་ལྡན་འདས་དེ་དག་གི་ཐུགས་ཀྱི་སྙིང་པོའི་ས་བོན་ནི་རྡོ་རྗེ་ཞེས་པ་ནི་མི་ཕྱེད་པའི་མཚན་ཉིད་དོ། །བཙུན་མོ་ཞེས་པ་ནི་ཕྱག་རྒྱའི་དོན་ཏོ། །བཅོམ་ལྡན་འདས་ཆོས་ཀྱི་འབྱུང་
གནས་དེའི་གནས་ན་བཞུགས་སོ་ཞེས་བྱ་བ་དེ་ནི་ངོ་མཚར་ཆེའོ། །སྐབས་འདིར་གཞན་དག་གིས་བརྒལ་བ་བཅོམ་ལྡན་འདས་ཀྱིས་གསུངས་པ་ཞེས་བྱ་བས་ཆོག་མོད། འདི་སྐད་བདག་གིས་ཐོས་པ་དགོས་ཆེད་མེད་དེ། དེ་ནས་ཞེས་བྱ་བ་དང་རྒྱུད་ལྡན་པའམ། ལྷན་ཅིག་ཅེས་བྱས་ན་ཚིག་འབྲེལ་
ཅིང་བདེ་སྟེ། དེ་ཡང་ཅིའི་ཕྱིར་ཞེ་ན། བཅོམ་ལྡན་འདས་མྱ་ངན་ལས་འདས་པའི་འོག་ཏུ་བརྗོད་ན་ནི་འདི་སྐད་བདག་གིས་ཐོས་པ་ཞེས་བརྗོད་པའི་རིགས་ཀྱི། ད་ལྟར་བཅོམ་ལྡན་འདས་མངོན་སུམ་དུ་བཞུགས་པའི་དུས་སུ་འདི་སྐད་བདག་གིས་ཐོས་པ་ཞེས་པ་འདི་རིགས་པ་མ་ཡིན་ནོ་ཞེ་ན། ལན་དུ་རིགས་
པ་ཡིན་ཏེ། རྒྱུད་ཐམས་ཅད་ལས་ཀྱང་འདི་སྐད་བདག་གིས་ཐོས་སོ་ཞེས་འབྱུང་ལ། སྟོན་པ་མྱ་ངན་ལས་འདས་སོ་ཞེས་ནི་རྒྱུད་གཞན་གང་ལས་ཀྱང་མ་གསུངས་སོ། །ཁ་ཅིག་གིས་བརྒལ་བ། རྒྱུད་སྡུད་པར་མཛད་པ་དག་མེད་དོ་ཞེས་གཞན་དག་སྨྲའོ། །དེ་ཅིའི་ཕྱིར་ཞེ་ན། རྒྱུད་འདི་དག་
གཉིས་སུ་མེད་པར་གནས་པའི་ཕྱིར་རོ་ཞེའོ། །ལན་དུ་རྒྱུད་འདི་དག་ལས་ཕྱིར་གྱུར་པ་གཞན་དག་ཅི་སྟེ་འདྲི་བ་པོ་ཞིག་མེད་ན་རྒྱུད་འདི་དག་ཇི་ལྟར་འབྱུང་བར་འགྱུར་ཞེས་རྣམ་པར་རྟོག་སྟེ། །དེ་དག་བསལ་བའི་ཕྱིར་འདི་སྐད་བདག་གིས་ཐོས་སོ་ཞེས་སྨོས་སོ། །བརྗོད་དུ་མེད་པའི་ཡང་བརྗོད་དུ་མེད་པ་

ཞེས་པ་ནི་རྒྱ་གར་གྱི་སྒྲ་དང་སྦྱར་ན་ཨ་ཕྱི་ལ་པ་ནི་གྲངས་བསྟན་པ་ཡིན་ལ། ནས་བཀག་ན་གྲངས་ལས་འདས་པའི་དོན་དུ་བསྟན་པ་ཡིན་ཏེ། དེའི་ཕྱིར་བརྗོད་དུ་མེད་པ་ཞེས་བྱའོ། །ཡང་བརྗོད་དུ་མེད་པ་ཞེས་བྱ་བ་ནི་གཟུགས་དང་ཡོན་ཏན་བརྗོད་དུ་མེད་པ་སྟེ། དེའི་ཕྱིར་བརྗོད་དུ་མེད་པའི་བརྗོད་
དུ་མེད་པ་ཞེས་བྱའོ། །དེ་ལ་སངས་རྒྱས་ཀྱི་ཞིང་གི་རྡུལ་ཕྲ་རབ་དང་མཉམ་པ་ཞེས་པ་ནི་རབ་ཏུ་མང་པོའི་དོན་ཏེ་གྲངས་མེད་པའི་བྱང་ཆུབ་སེམས་དཔའ་ཆེན་པོའོ། །བྱང་ཆུབ་སེམས་དཔའ་ཆེན་པོ་ཞེས་པ་ལ་བྱང་ཆུབ་ནི་ཕྱག་རྒྱ། སེམས་དཔའ་ནི་འདོད་པ་སྟེ། དེའི་ཕྱིར་བྱང་ཆུབ་
སེམས་དཔའོ། །དེ་ཅིའི་ཕྱིར་ཞེ་ན། དེ་ནི་གཉིས་སུ་མེད་པར་གནས་པའི་དོན་ཏོ། །སེམས་དཔའ་ཆེན་པོ་ཞེས་པ་ནི་བདེ་བ་ཆེན་པོའི་ཡེ་ཤེས་ལ་གནས་སོ་ཞེས་བྱ་བའི་དོན་ཏེ། དེའི་ཕྱིར་སེམས་དཔའ་ཆེན་པོ་ཞེས་བྱའོ། །དེ་ལྟ་བས་ན་ཆོས་ཀྱི་འབྱུང་གནས་ལ་གནས་སོ། །དེ་ཡང་
སུའི་ཐད་ན་བཞུགས་ཤེ་ན། བཅོམ་ལྡན་འདས་ཀྱི་འཁོར་ན་བཞུགས་སོ། །དེ་ལ་གོང་དུ་སངས་རྒྱས་ཀྱི་ཞིང་རྡུལ་ཕྲན་དང་མཉམ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བསྡུས་པའི་དོན་དུ་བསྟན་གྱི། གང་དང་གང་བཞུགས་པ་བསྟན་པའི་ཕྱིར་འདིར་སོ་སོའི་མཚན་
ཡང་སྨོས་སོ། །དེ་ལ་དམ་ཚིག་རྡོ་རྗེ་ཞེས་བྱ་བའི་བྱང་ཆུབ་སེམས་དཔའ་ཆེན་པོ་དང་ཞེས་བྱ་བ་ཐོག་མར་ཅིའི་ཕྱིར་སྨོས་ཤེ་ན། དམ་ཚིག་གིས་ལྷ་རྣམས་མཉེས་པའི་རྒྱུར་བྱེད་པའི་ཕྱིར་གཙོར་སྨོས་ཏེ་དང་པོར་བསྟན་པ་ཡིན་ནོ། །དམ་ཚིག་ཉིད་ཇི་ལྟ་བུ་ཞེན་རྣམ་པ་གཉིས་ཏེ། ཕྱི་དང་ནང་ངོ་། །
དེ་ལ་ཕྱི་གང་ཞེ་ན། འཇིག་རྟེན་པའི་བསྲུང་བར་བྱ་བ་རྣམས་སོ། །ནང་གི་གང་ཞེ་ན། བྱང་ཆུབ་ཀྱི་སེམས་ལ་སོགས་པ་བཟའ་བའོ། །དེ་ལྟར་དམ་ཚིག་བསྲུངས་ནས་སྐུ་བསྒྲུབ་པའི་ཕྱིར་སྐུ་རྡོ་རྗེ་ཞེས་བྱ་བའི་བྱང་ཆུབ་སེམས་དཔའ་ཆེན་པོ་ཞེས་བྱ་བ་སྨོས་སོ། །གང་གིས་སྐུ་གྲུབ་པ་དང་།
ཚིག་ཀྱང་དགོས་ཏེ། སྐུ་དང་གསུང་མི་ཕྱེད་པར་བསྟན་པའི་ཕྱིར་ཏེ། བཅོམ་ལྡན་འདས་ཀྱིས་ཀྱང་བྱང་ཆུབ་སེམས་དཔའི་ཚུལ་དུ་མངོན་པར་སྤྲུལ་ནས་གནས་པར་བསྟན་ཏོ། །དེའི་ཕྱིར་གསུང་རྡོ་རྗེ་ཞེས་བྱ་བའི་བྱང་ཆུབ་སེམས་དཔའ་ཆེན་པོ་ཞེས་སྨོས་སོ། །དེ་ལྟར་ཚིག་འགྲུབ་ནས་སེམས་

དཔྱོད་པར་བྱེད་དེ། དེ་ལ་སེམས་ནི་དངོས་པོ་ཐམས་ཅད་དང་རང་བཞིན་གྱིས་བྲལ་བར་ཡང་མཁྱེན་ལ། ཐམས་ཅད་དང་མི་གཉིས་པར་ཡང་མཁྱེན་པས་བྱང་ཆུབ་སེམས་དཔའི་ཚུལ་དུ་མངོན་པར་སྤྲུལ་ནས་གནས་པར་བསྟན་ཏེ། དེའི་ཕྱིར་ཐུགས་རྡོ་རྗེ་ཞེས་བྱ་བའི་བྱང་
ཆུབ་སེམས་དཔའ་སེམས་དཔའ་ཆེན་པོ་ཞེས་སྨོས་སོ། །དེ་ལ་སྐུ་གསུང་ཐུགས་ཏིང་ངེ་འཛིན་མེད་པར་སངས་རྒྱས་ཀྱི་སྐུ་གཉིས་སུ་མེད་པར་མངོན་པར་མི་འགྲུབ་པས། དེའི་ཕྱིར་ཏིང་ངེ་འཛིན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་སྨོས་སོ། །དེ་ལྟར་ཏིང་ངེ་འཛིན་ཐོབ་
ནས་གང་གིས་སེམས་མངོན་པར་དགའ་བར་འགྱུར་བ་དེ་རྒྱལ་བར་བསྟན་པ་ཡིན་ཏེ། དེའི་ཕྱིར་རྒྱལ་བ་རྡོ་རྗེ་ཞེས་བྱང་ཆུབ་སེམས་དཔའ་སེམས་དཔའ་ཆེན་པོ་སྨོས་སོ། །གང་གིས་སྐུ་གསུང་ཐུགས་དང་ཕྱག་རྒྱ་ཆེན་པོའི་གཟུགས་ལྷ་མོ་དང་ལྡན་པའི་བདེ་བ་ཆེན་པོའི་ཡེ་ཤེས་རྒྱལ་བ་དེ་ཐམས་ཅད་
ས་ལ་སོགས་པ་མེད་པར་གཟུགས་བསྐྱེད་པར་མི་ནུས་པས་དེའི་ཕྱིར་ས་རྡོ་རྗེ་ཞེས་བྱང་ཆུབ་སེམས་དཔའ་སེམས་དཔའ་ཆེན་པོ་ལ་སོགས་པ་རིམ་པ་བཞིན་དུ་བསྟན་ཏེ། དེའི་ཕྱིར་ས་རྡོ་རྗེ་ཞེས་བྱ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་སྨོས་སོ། །ད་ནི་ཆོས་ཀྱི་ཆུའི་ཆར་འབེབས་པས་
ཆུ་རྡོ་རྗེ་ཞེས་བྱ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱ་བར་བསྟན་ཏོ། །དེའི་ཕྱིར་ཆུ་རྡོ་རྗེ་ཞེས་བྱའོ། །དེ་ལྟར་ཆུ་རྡོ་རྗེ་ཞེས་བྱ་བའི་བྱང་ཆུབ་སེམས་དཔར་བསྟན་ནས་མེ་ལས་ཐམས་ཅད་འགྲུབ་པར་བསྟན་པའི་ཕྱིར་མེ་རྡོ་རྗེ་ཞེས་བྱ་བར་བསྟན་ཏོ། །དེ་ལྟར་མེ་རྡོ་རྗེ་ཞེས་བྱ་བའི་
བྱང་ཆུབ་སེམས་དཔར་བསྟན་ནས། ཐམས་ཅད་དུ་འགྲོ་བའི་གཟུགས་ལྷུན་གྱིས་གྲུབ་པར་བསྟན་པའི་ཕྱིར། རླུང་རྡོ་རྗེ་ཞེས་བྱ་བའི་བྱང་ཆུབ་སེམས་དཔར་བསྟན་ཏོ། །དེ་ལྟར་རླུང་རྡོ་རྗེ་ཞེས་བྱ་བའི་བྱང་ཆུབ་སེམས་དཔར་བསྟན་ནས། སྒྲིབ་པ་མེད་པར་སྣང་བའི་རང་བཞིན་ནམ་མཁའ་རྡོ་རྗེ་
ཞེས་བྱ་བའི་བྱང་ཆུབ་སེམས་དཔའི་ཚུལ་དུ་བཅོམ་ལྡན་འདས་ཀྱིས་མངོན་པར་སྤྲུལ་པའི་ཕྱིར་ནམ་མཁའ་རྡོ་རྗེ་ཞེས་བྱ་བའི་བྱང་ཆུབ་སེམས་དཔའ་སྨོས་སོ། །དེ་ལྟར་ནམ་མཁའ་རྡོ་རྗེ་ཞེས་བྱ་བ་མངོན་པར་བསྒྲུབས་ནས། ད་ནི་གཉིས་སུ་མེད་པ་ལ་དམིགས་པ་ལྟ་བས་ཆོག་མི་ཤེས་པའི་

གཟུགས་ཡེ་ཤེས་ཀྱི་རང་བཞིན་དུ་བསྟན་ཏེ། དེའི་ཕྱིར་གཟུགས་རྡོ་རྗེ་ཞེས་བྱ་བའི་བྱང་ཆུབ་སེམས་དཔའ་སྨོས་སོ། །དེ་ལྟར་གཟུགས་ཇི་ལྟ་བུ་ཡང་བསྟན་ནས། གཉིས་སུ་མེད་པའི་སྒྲས་སེམས་ཅན་ཐམས་ཅད་ཀྱི་སེམས་ཚིམ་པར་བྱེད་པའི་སྒྲ་བཞིན་དང་། གང་དག་གིས་སྒྲར་བརྗོད་
པ་དེ་དག་བྱང་ཆུབ་སེམས་དཔའི་ཚུལ་དུ་གནས་པར་བསྟན་ཏེ། དེའི་ཕྱིར་སྒྲ་རྡོ་རྗེ་ཞེས་བྱ་བའི་བྱང་ཆུབ་སེམས་དཔའ་སྨོས་སོ། །དེ་ལྟར་པདྨ་དང་རྡོ་རྗེ་ལ་སོགས་པའི་སྒྲ་བསྟན་ནས། ད་ནི་བདག་ཉིད་རབ་ཏུ་ཚིམ་པ་མྱོང་བར་བསྟན་པའི་ཕྱིར་བྱང་ཆུབ་སེམས་དཔའི་ཚུལ་དུ་བཅོམ་ལྡན་འདས་ཀྱིས་
མངོན་པར་སྤྲུལ་ནས་གནས་པར་བསྟན་ཏེ། དེའི་ཕྱིར་དྲི་རྡོ་རྗེ་ཞེས་བྱ་བའི་བྱང་ཆུབ་སེམས་དཔའ་སྨོས་སོ། །དེ་ལྟར་དྲི་རྡོ་རྗེས་བདག་དང་གཞན་གྱི་སེམས་ཚིམ་པར་བྱེད་པ་བསྟན་ནས། ད་ནི་དམ་ཚིག་དང་ཞལ་མི་གཉིས་པ་སྤྲད་པའི་རོ་མྱང་བར་བསྟན་པའི་ཕྱིར་བྱང་ཆུབ་སེམས་དཔའི་ཚུལ་དུ་
གནས་པར་བསྟན་ཏེ། དེའི་ཕྱིར་རོ་རྡོ་རྗེ་ཞེས་བྱ་བའི་བྱང་ཆུབ་སེམས་དཔར་སྨོས་སོ། །དེ་ལྟར་རོ་རྡོ་རྗེ་ཞེས་བྱ་བར་བསྟན་ནས། དབང་པོ་གཉིས་རེག་པའི་བདེ་བ་བསྟན་པའི་ཕྱིར་རེག་རྡོ་རྗེ་ཞེས་བྱ་བའི་བྱང་ཆུབ་སེམས་དཔའ་སྨོས་སོ། །དེ་ལྟར་དེ་ཡན་ཆད་དུ་འདོད་པའི་ཡོན་ཏན་ལྔ་མདོར་
བསྟན་པའམ་ཡང་ན་འདོད་པའི་ཡོན་ཏན་ལྔ་བྱང་ཆུབ་སེམས་དཔའི་ཚུལ་དུ་བསྟན་པ་ཡིན་ནོ། །དེ་ལྟར་རེག་རྡོ་རྗེ་ཞེས་བྱ་བའི་བྱང་ཆུབ་སེམས་དཔར་བསྟན་ནས། རྡོ་རྗེ་དང་པདྨོར་ལྡན་པ་ལས་བྱང་ཆུབ་ཀྱི་སེམས་འབྱུང་བའི་དུས་ན་རྣལ་འབྱོར་པས་ཤེས་པར་བྱ་བ་ནི། འདོད་ཆགས་མ་ཡིན་ཆགས་
བྲལ་མིན། །གཉིས་ཀ་མིན་པའང་མི་དམིགས་སོ། །ཞེས་བསྟན་པ་ཁོང་དུ་ཆུད་པར་བྱ་ཞིང་བྱང་ཆུབ་ཀྱི་སེམས་འབྱུང་བ་ན་བདག་ཉིད་ཆོས་ཀྱི་དབྱིངས་ཡིན་ནོ་ཞེས་ང་རྒྱལ་བསྐྱེད་པར་བྱ་བའི་ཕྱིར་ཆོས་ཀྱི་དབྱིངས་རྡོ་རྗེ་ཞེས་བྱ་བའི་བྱང་ཆུབ་སེམས་དཔའ་སྨོས་སོ། །དེ་ལ་སོགས་པ་བརྗོད་དུ་མེད་
པའི་ཡང་བརྗོད་དུ་མེད་པ་ཞེས་བྱ་བ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་ཞེས་པའི་བར་དག་ནི་གོང་དུ་བསྟན་པས་འདིར་མ་སྨོས་སོ། །དེ་ལྟར་འཁོར་ཕུན་སུམ་ཚོགས་པ་བསྟན་ནས། ད་ནི་སྟོན་པ་ཕུན་སུམ་ཚོགས་པ་སྟོན་ཏེ། དེ་ཡང་ཚད་ཇི་ཙམ་ཞེ་ན། ནམ་མཁའི་

དབྱིངས་དང་མཉམ་པ་ཞེས་འབྱུང་མོད་ཀྱི། རེ་ཞིག་འདིར་མི་བསྐྱོད་པ་ལ་སོགས་པ་གཙོ་བོ་ཙམ་ཞིག་བསྟན་པ་ཡིན་ནོ། །དེ་ལ་བདག་གི་འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག་རྣམས་ཀྱི་རང་བཞིན་བསྟན་ཏེ། མི་བསྐྱོད་པ་རྡོ་རྗེ་ཞེས་པའི་དེ་བཞིན་གཤེགས་
པ་གང་དག་ཞེ་སྡང་དང་ལྡན་པའི་སེམས་དེའི་ངོ་བོར་གནས་པར་བསྟན་ཏོ། །རྣམ་པར་སྣང་མཛད་རྡོ་རྗེ་ཞེས་བྱ་བའི་དེ་བཞིན་གཤེགས་པ་ནི་གང་དག་གཏི་མུག་དང་བཅས་པ་རྣམས་ལ་དེའི་ངོ་བོར་རྣམ་པར་སྣང་མཛད་ཀྱི་ཚུལ་དུ་གནས་པར་བསྟན་ཏོ། །རིན་ཆེན་འབྱུང་ལྡན་ཞེས་པའི་དེ་
བཞིན་གཤེགས་པ་ནི་གང་དག་ང་རྒྱལ་དང་ལྡན་པའི་སེམས་ཀྱི་ཚུལ་དུ་རིན་ཆེན་འབྱུང་ལྡན་དེའི་ངོ་བོར་གནས་པར་བསྟན་ཏོ། །ཚད་མེད་པ་རྡོ་རྗེ་ཞེས་བྱ་བའི་དེ་བཞིན་གཤེགས་པ་ནི་གང་དག་འདོད་ཆགས་དང་ལྡན་པའི་སེམས་སྣང་བ་མཐའ་ཡས་དེའི་རང་བཞིན་ལས་བྱུང་བར་བསྟན་པའི་
ཕྱིར་ཚད་མེད་པ་རྡོ་རྗེ་ཞེས་པའི་དེ་བཞིན་གཤེགས་པ་སྨོས་སོ། །གདོན་མི་ཟ་བ་རྡོ་རྗེ་ཞེས་བྱ་བའི་དེ་བཞིན་གཤེགས་པ་གང་ཕྲག་དོག་དང་ལྡན་པའི་སེམས་དེའི་ངོ་བོར་གདོན་མི་ཟ་བའི་རྡོ་རྗེ་གནས་པར་བསྟན་ཏོ། །དེ་དག་ལ་སོགས་པ་དེ་བཞིན་གཤེགས་པ་ནམ་མཁའི་དབྱིངས་དང་མཉམ་པར་
བསྟན་པ་འདི་དག་ནི་ཕྱག་རྒྱ་ཆེན་པོའི་གཟུགས་ལྷུན་གྱིས་གྲུབ་པར་བསྟན་ཏེ། རང་གི་ལུས་ཀྱི་ཡན་ལག་དང་ཉིང་ལག་བྱང་ཆུབ་ཀྱི་སེམས་ལས་རང་གྲུབ་པའི་ཕྱིར་དེ་བཞིན་གཤེགས་པ་དང་བྱང་ཆུབ་སེམས་དཔའ་དེ་དག་རྒྱུད་ལས་གཙོར་སྨོས་ཏེ་བསྟན་པ་ཡིན་ནོ། །གཞན་ཡང་དེ་བཞིན་
གཤེགས་པ་དང་བྱང་ཆུབ་སེམས་དཔའ་ནམ་མཁའི་དབྱིངས་དང་མཉམ་པར་བསྟན་པ་དེ་དག་ནི་ཆོས་ཀྱི་དབྱིངས་དང་མཉམ་པར་སྤྲུལ་པས་ཁྱད་པར་སྤྲུལ་པའི་དོན་དུ་བསྟན་པའོ། །དེ་ལ་ནམ་མཁའ་ཐམས་ཅད་ཅེས་པ་ནི་ཆོས་ཀྱི་འབྱུང་གནས། དབྱིངས་ཞེས་པ་ནི་ས་བོན། མཉམ་
ཞེས་པ་ནི་ཁྱབ་པ། བསྟན་པ་ཞེས་པ་ནི་གསུངས་པའི་དོན་ཏོ། །འདི་དག་གསུངས་པ་ནི་ཆོས་ཀྱི་འབྱུང་གནས་ཀྱི་དཀྱིལ་ན་ས་བོན་གྱི་ཚུལ་དུ་ཕྱག་རྒྱ་ཐམས་ཅད་ཀྱི་སྐུར་ཁྱབ་པར་གནས་པར་བསྟན་པའོ། །ཡང་ན་ནམ་མཁའ་ཐམས་ཅད་ཅེས་པ་ནི་ལྷ་མོ་བཞི་དང་དེ་བཞིན་གཤེགས་པར་ལྡན་པ་

ཕྱག་རྒྱ་ཆོས་ཀྱི་འབྱུང་གནས་རྡོ་རྗེ་དང་མི་གཉིས་པར་ཆོས་ཀྱི་དབྱིངས་ཀྱི་རང་བཞིན་དུ་ཐམས་ཅད་སྤྲུལ་ནས་བཞུགས་སོ། །མང་པོར་སྨོས་ཅི་དགོས་ཏེ་དོན་མདོར་བསྟན་པ་ནི་འདི་དག་ཡིན་ནོ་ཞེ་ན། དེ་ལ་སྔར་སྨོས་པ་འདི་དག་ནི་བྱང་ཆུབ་ཀྱི་སེམས་ཟླ་བའི་དཀྱིལ་འཁོར་དུ་བསྡུས་ཏེ་བསྒྲུབ་
བའི་གཞུང་གིས་བཅོམ་ལྡན་འདས་ངོ་མཚར་དུ་སྐྱེད་དོ། །དེ་ལྟར་བཅོམ་ལྡན་འདས་ཉིད་བསྐྱེད་པར་མ་ཟད་ཀྱི་སྔགས་པ་ཉིད་ཀྱང་འདི་ལྟ་བུའི་ཚུལ་གྱིས་མངོན་པར་བསྒྲུབ་བོ། །རྒྱུད་འདི་ཉིད་ཀྱང་འཕགས་པ་ཉིད་ཀྱི་སྐུ་དང་མཉམ་པའི་ཚུལ་དུ་བྱིན་གྱིས་བརླབས་པར་ཤེས་པར་བྱའོ། །
ཡང་ན་དེ་བཞིན་ཉིད་རྣམ་པར་བསྒོམས་ལ་དེ་ལས་སྣང་བའི་ཡེ་ཤེས་སྐྱེ་བར་འགྱུར་རོ། །དེ་སྐྱེས་པས་ཡིག་འབྲུའི་རྒྱུར་འགྱུར་ཏེ་སྔགས་ཀྱི་འབྲུ་སྐྱེད་པར་འགྱུར་རོ། །དེ་ལས་ལུས་ཀྱི་བདག་པོ་བཅོམ་ལྡན་འདས་རབ་ཏུ་འགྲུབ་པར་འགྱུར་ཏེ། དེ་ཡང་མཚན་དང་གཉིས་སུ་མེད་པའི་
སྦྱོར་བར་ལྡན་པ་པདྨའི་གནས་ན་བཞུགས་པའི་ནམ་མཁའི་ཕྱོགས་ན་རྒྱུད་ལས་སྨོས་པའི་ལྷ་ཐམས་ཅད་ཀྱི་རང་བཞིན་གྱི་ཡན་ལག་དང་ཉིང་ལག་ཏུ་བློས་རྣམ་པར་རྟོག་སྟེ། དེ་ཡང་ཇི་ལྟར་རྣམ་པར་རྟོག་ཅེ་ན། འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག་དེ་ཁོ་ན་ཉིད་རྣམ་པ་ལྔ་
དང་བདག་ལྡན་པར་རྣམ་པར་རྟོག་པར་བྱེད་དོ། །འདོད་ཆགས་སྣང་བ་མཐའ་ཡས། ཞེ་སྡང་མི་བསྐྱོད་པ། གཏི་མུག་རྣམ་པར་སྣང་མཛད། ང་རྒྱལ་རིན་ཆེན་འབྱུང་ལྡན། ཕྲག་དོག་གདོན་མི་ཟ་བར་གྲུབ་པ། ས་བོན་རྣམ་པར་སྣང་མཛད་ཆེན་པོ་སྟེ། དེ་ལས་རྣམ་པ་ལྔ་
པོ་འདི་དག་ཏུ་འགྱུར་བར་སྟོན་ནོ། །འདོད་ཆགས་ལ་སོགས་པ་འདི་དག་དེ་བཞིན་གཤེགས་པའི་སྐུར་རྣམ་པར་བརྟག་གོ། །དེ་ནས་ཡང་ཡེ་ཤེས་ཀྱི་ཚུལ་དུ་སོ་སོར་དབྱེ་ན། མེ་ལོང་ལྟ་བུའི་ཡེ་ཤེས་མི་བསྐྱོད་པ། མཉམ་པ་ཉིད་ཀྱི་ཡེ་ཤེས་རིན་ཆེན་འབྱུང་ལྡན། སོ་སོར་ཀུན་དུ་
རྟོག་པའི་ཡེ་ཤེས་སྣང་བ་མཐའ་ཡས། བྱ་བ་གྲུབ་པའི་ཡེ་ཤེས་གདོན་མི་ཟ་བར་གྲུབ་བ། ཆོས་ཀྱི་དབྱིངས་ཀྱི་ཡེ་ཤེས་རྣམ་པར་སྣང་མཛད་གང་བཅོམ་ལྡན་འདས་ཀྱི་གཟུགས་འདི་གཏི་མུག་སྟེ་རྣམ་པར་སྣང་མཛད། གང་བདེ་བ་དང་སྡུག་བསྔལ་བའི་ཚོར་བ་མཉམ་པ་ཉིད་ཀྱི་བདག་ཉིད་ཀྱི་ཚུལ་

དུ་གནས་པ་ནི་རིན་ཆེན་འབྱུང་ལྡན། གང་དུས་གསུམ་དུ་ཆགས་པའི་འདུ་ཤེས་འབྱུང་བའི་རང་བཞིན་ནི་སྣང་བ་མཐའ་ཡས། གང་ཕྲག་དོག་མངོན་པར་འདུ་བྱེད་པའི་རང་བཞིན་ནི་གདོན་མི་ཟ་བར་གྲུབ་པའོ། །གང་ཞེ་སྡང་བ་ནི་མི་བསྐྱོད་པ་སྟེ་རྣམ་པར་ཤེས་པའོ། །
རྣལ་འབྱོར་པས་ནི་འདོད་ཆགས་ལ་སོགས་པ་ཆོས་ཇི་སྙེད་པ་ཐམས་ཅད་ཀྱི་བདག་པོའི་རང་བཞིན་དུ་བདག་གྱུར་པར་རྣམ་པར་བརྟག་གོ། །གཟུགས་རྣམ་པ་གསུམ་གྱི་ཚུལ་དུ་གནས་པ་རྣམ་པར་སྣང་མཛད། སྒྲ་རྣམ་པ་གསུམ་གྱི་ཚུལ་དུ་གནས་པ་རིན་ཆེན་འབྱུང་ལྡན། དྲི་རྣམ་པ་
གསུམ་གྱི་ཚུལ་དུ་གནས་པ་ནི་སྣང་བ་མཐའ་ཡས། རོ་རྣམ་པ་གསུམ་གྱི་ཚུལ་དུ་གནས་པ་ནི་གདོན་མི་ཟ་བར་གྲུབ་པ། རེག་རྣམ་པ་གསུམ་གྱི་ཚུལ་དུ་གནས་པ་ནི་མི་བསྐྱོད་པའོ། །དེ་ལྟར་རྣམ་པར་བརྟགས་ནས་ཡང་འབྱུང་བ་ཆེན་པོ་བཞི་ཇི་ལྟར་རྣམ་པར་བརྟག་ཅེ་ན། དེ་ལ་སའི་
ཁམས་ནི་སངས་རྒྱས་སྤྱན། མེའི་ཁམས་ནི་གོས་དཀར་མོ། །ཆུའི་ཁམས་ནི་མཱ་མ་ཀཱི། རླུང་གི་ཁམས་ནི་འཕགས་མ་སྒྲོལ་མ། ནམ་མཁའི་ཁམས་ནི་རྡོ་རྗེ་དབྱིངས་ཀྱི་དབང་ཕྱུག་མའོ། །དེ་ལ་མིག་གི་རྣམ་པར་ཤེས་པའི་རང་བཞིན་ཡང་འདི་ལྟར་ཤེས་པར་བྱ་སྟེ། མིག་གི་རྣམ་
པར་ཤེས་པ་ནི་སའི་སྙིང་པོ། རྣ་བའི་རྣམ་པར་ཤེས་པ་ནི་ཕྱག་ན་རྡོ་རྗེ། སྣའི་རྣམ་པར་ཤེས་པ་ནི་ནམ་མཁའི་སྙིང་པོ། ལྕེའི་རྣམ་པར་ཤེས་པ་ནི་སྤྱན་རས་གཟིགས་དབང་ཕྱུག །ལུས་ཀྱི་རྣམ་པར་ཤེས་པ་ནི་སྒྲིབ་པ་རྣམ་པར་སེལ་བ། ཡིད་ཀྱི་རྣམ་པར་ཤེས་པ་ནི་དཔལ་
རྡོ་རྗེ་སེམས་དཔའ་སྟེ། འཕྲུལ་གྱི་མིག་ལ་སོགས་པ་ཡང་རྣམ་པར་དག་གོ། །མཉམ་པ་ཉིད་ཀྱི་དུས་སུ་བློས་འདི་ལྟར་ཤེས་པར་བྱ་སྟེ། ལག་པ་གཉིས་ནི་གཤིན་རྗེ་གཤེད་ཀྱི་རང་བཞིན་ཏེ་ཡོངས་སུ་འཛིན་པའི་དུས་ན་ལྕགས་ཀྱུའི་དོན། འཕགས་པ་གཞན་
གྱིས་མི་ཐུབ་པ་རྡོ་རྗེ་པདྨོར་གནས་པའི་དུས་ན་ཞགས་པའི་ཚུལ་དུ་བསམ་མོ། །འཕགས་པ་རྟ་མགྲིན་ནི་ཞལ་སྤྲོད་པའི་དུས་སུ་ལྕགས་སྒྲོག་སྟེ། ཚེམས་ཀྱི་སྒྲོས་བསྡམས་པའོ། །བདུད་རྩི་འཁྱིལ་པ་ལས་ཀྱི་རང་བཞིན་ཏེ། ལས་ཀྱི་དུས་ན་བདེ་བ་ཆེན་པོ་ལ་གནས་པའམ་མཉེས་

པར་བྱེད་པ་སྟེ་དྲིལ་བུའི་དོན་ཏོ། །སྒྲུབ་པའི་རྣལ་འབྱོར་པས་དེ་ལྟར་རྣམ་པར་རྟོགས་པར་བྱའོ། །འདི་དག་ཐབས་ཆེན་པོ་ཡེ་ཤེས་ལས་གྲུབ་པར་ཤེས་པར་བྱའོ། །རྒྱུད་ལས་འཁོར་སེམས་དཔའ་གང་དག་གསུངས་པ་མངོན་པར་འབྱུང་བའི་དུས་ན་ལུས་ཐམས་ཅད་ཀྱི་ཡན་
ལག་དང་ཉིང་ལག་ལྟ་བུ་བློས་རྣམ་པར་དབྱེ་བར་བྱ་བ་སྟེ། དེ་ལ་དམ་ཚིག་རྡོ་རྗེ་དང་། སྐུ་གསུང་ཐུགས་རྡོ་རྗེ་དང་། ཏིང་ངེ་འཛིན་རྡོ་རྗེ་དང་། རྒྱལ་བ་རྡོ་རྗེ་དང་། ས་རྡོ་རྗེ་དང་། ཆུ་རྡོ་རྗེ་དང་། མེ་རྡོ་རྗེ་དང་། རླུང་རྡོ་རྗེ་དང་། ནམ་མཁའ་རྡོ་རྗེ་དང་། གཟུགས་རྡོ་རྗེ་དང་། སྒྲ་རྡོ་རྗེ་དང་།
དྲི་རྡོ་རྗེ་དང་། རོ་རྡོ་རྗེ་དང་། རེག་རྡོ་རྗེ་དང་། ཆོས་ཀྱི་དབྱིངས་རྡོ་རྗེ་དང་། རྣམ་པར་སྣང་མཛད་རྡོ་རྗེ་དང་། མི་འཁྲུགས་པ་རྡོ་རྗེ་དང་། རིན་ཆེན་འབྱུང་ལྡན་རྡོ་རྗེ་དང་། སྣང་བ་མཐའ་ཡས་རྡོ་རྗེ་དང་། གདོན་མི་ཟ་བར་གྲུབ་པ་རྡོ་རྗེ་དང་སྟེ། འདི་དག་ཐམས་ཅད་ལུས་ཀྱི་ཡན་ལག་དང་
ཉིང་ལག་ཏུ་བློས་རིམ་པ་བཞིན་དུ་གཙོ་བོའི་སྐུར་རྣམ་པར་བརྟག་གོ། །དེ་ལ་དམ་ཚིག་གི་རང་བཞིན་ནི་བདུད་རྩི་དང་ལྡན་པའི་ངོ་བོ་སྟེ། དེ་བས་ན་དམ་ཚིག་རྡོ་རྗེ་ཞེས་བྱའོ། །དེ་ལ་སྐུ་གསུང་ཐུགས་ཀྱི་རྡོ་རྗེ་ཞེས་བྱ་བ་ལ་སྐུ་ནི་ཆོས་ཀྱི་སྐུ་དང་ལོངས་སྤྱོད་རྫོགས་པའི་སྐུ་དང་སྤྲུལ་པའི་
སྐུའོ། །གསུང་གི་རང་བཞིན་ནི་གསང་སྔགས་ཐམས་ཅད་སྟོན་པའི་རང་བཞིན་ནོ། །སྐུ་གསུང་ཐུགས་ཀྱི་རིག་པ་ལ་རྗེས་སུ་ཆགས་པའི་དོན་ནི་ཏིང་ངེ་འཛིན་ཏོ། །དེ་ལྟར་ཏིང་ངེ་འཛིན་བརྙེས་པ་ལས་དགྱེས་པ་འབྱུང་བ་ནི་རྒྱལ་བའོ། །ས་ལ་སོགས་པའི་རང་བཞིན་ལས་སྐུར་འགྲུབ་
སྟེ། ས་ནི་གཞལ་མེད་ཁང་གི་རང་བཞིན་ནོ། །ཆུ་ནི་གཤེར་བའོ། །མེ་ནི་ཆོ་འཕྲུལ་ལོ། །རླུང་ནི་བརྐྱང་བསྐུམ་བྱེད་པའོ། །ནམ་མཁའ་ནི་ལུས་ཐམས་ཅད་གསལ་བར་བྱེད་པའོ། །གཟུགས་ནི་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུའོ། །སྒྲ་ནི་
རྡོ་རྗེ་དང་པདྨར་ལྡན་པའོ། །དྲི་ནི་ཡིད་ཚིམ་པར་བྱེད་པའོ། །རོ་ནི་ཞལ་གཉིས་མྱོང་བར་བྱེད་པའོ། །རེག་པ་ནི་དབང་པོ་གཉིས་བདར་བར་བྱེད་པའོ། །ཆོས་ཀྱི་དབྱིངས་ནི་བདེ་བ་ཆེན་པོ་ལ་གནས་པའོ། །མི་བསྐྱོད་པ་ནི་ཞེ་སྡང་། རྣམ་པར་སྣང་མཛད་ནི་གཏི་མུག །རིན་ཆེན་འབྱུང་

ལྡན་ནི་ང་རྒྱལ། གདོན་མི་ཟ་བར་གྲུབ་པ་ནི་ཕྲག་དོག །སྣང་བ་མཐའ་ཡས་ནི་འདོད་ཆགས་ཏེ། ཐམས་ཅད་ཀྱང་ལུས་ལ་གནས་པར་ཤེས་ནས་གཙོ་བོ་འདི་དག་ལ་སོགས་པ་སྤྲོ་བར་མཛད་དོ། །ཞལ་དུ་ཞུགས་ནས་དབང་པོའི་ལམ་དུ་བྱུང་སྟེ་ཆོས་
ཀྱི་འབྱུང་གནས་ཀྱི་དཀྱིལ་དུ་བདག་པོའི་སྐུ་དང་ལྡན་པར་གནས་ཏེ། དེ་ཡང་ལུས་ཐམས་ཅད་རྣམ་པར་ཞུ་ནས་ས་བོན་གྱི་ཚུལ་དུ་བདེ་བ་ཆེན་པོའི་ལུས་ལ་གནས་པར་རྣལ་འབྱོར་པས་མཐོང་ངོ་། །སྒྲུབ་པ་ཐམས་ཅད་ཀྱི་ཐབས་ཀྱི་རིམ་གྱིས་བདག་ཉིད་དངོས་པོ་ཐམས་ཅད་ཀྱི་
རང་བཞིན་དུ་མཐོང་སྟེ་འདི་ཉིད་ཕྱག་རྒྱ་ཆེན་པོའོ། །རྡོ་རྗེ་པདྨོར་ལྡན་པ་ནི་དམ་ཚིག་གི་ཕྱག་རྒྱའོ། །བདེ་བ་ཆེན་པོ་ནི་ཆོས་ཀྱི་ཕྱག་རྒྱའོ། །གཉིས་ཀྱི་ལས་གང་ཡིན་པ་དེ་ཉིད་ལས་ཀྱི་ཕྱག་རྒྱའོ། །རྡོ་རྗེ་དང་པདྨོར་མཉམ་པར་སྦྱོར་བ་ཡིད་ཀྱིས་མཐོང་ནས་འདི་ལོངས་སྤྱོད་རྫོགས་
པའི་སྐུ་ཞེས་མངོན་པའི་ང་རྒྱལ་བསྐྱེད་དོ། །ཡང་ན་བདེ་བ་ཆེན་པོ་ལ་གནས་ཏེ། བྱང་ཆུབ་ཀྱི་སེམས་ས་བོན་གྱི་ཚུལ་དུ་ལུས་ཐམས་ཅད་ལ་ཁྱབ་སྟེ་དེ་ལ་འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག་དང་། གཟུགས་དང་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་
པར་ཤེས་པ་དང་། ས་ཆུ་མེ་རླུང་ནམ་མཁའ་དང་། མིག་དང་། རྣ་བ་དང་། སྣ་དང་། ལྕེ་དང་། ལུས་དང་ཡིད་ལ་སོགས་པ་ལུས་ཐམས་ཅད་བྱང་ཆུབ་ཀྱི་སེམས་ཀྱི་རང་བཞིན་དུ་བྱས་ནས། འདོད་ཆགས་མ་ཡིན་ཆགས་བྲལ་མིན། །དབུས་སུ་འང་དམིགས་པར་མི་འགྱུར་རོ། །
ཞེས་བྱ་བའི་ཚུལ་གྱིས་མཉམ་པར་སྤྲོས་ནས། རྣམ་པར་མི་རྟོག་པར་འགྱུར་ཏེ་གནས་སོ། །དེ་ལྟར་ལྷུན་གྱིས་གྲུབ་ནས་སྤྲུལ་པའི་འཁོར་ལོ་སྐོར་བར་བྱེད་དོ། །དེ་ཡང་སྔོན་གྱི་སྟོབས་ཀྱིས་སེམས་ཅན་གྱི་དོན་བྱེད་པར་འབྱུང་བར་འགྱུར་རོ། །དེ་ལ་རྟག་ཏུ་དཀྱིལ་འཁོར་གྱི་དབུས་སུ་
ཐབས་དང་ཤེས་རབ་གཉིས་ཀྱི་ཚུལ་དུ་གནས་ཏེ། ཐམས་ཅད་བདེ་བ་ཆེན་པོ་ཡེ་ཤེས་ཀྱི་ཚུལ་དུ་བསྒོམ་པར་བྱའོ། །གཟུགས་རྣམ་གསུམ་ནི་མིག་གི་དབང་པོ་ལ་རྣམ་པར་སྣང་མཛད་ཀྱི་ཚུལ་དུ་ཡོངས་སུ་ཐིམ་མོ། །སྒྲ་རྣམ་གསུམ་ནི་རྣ་བའི་དབང་པོ་ལ་རིན་ཆེན་འབྱུང་ལྡན་གྱི་ཚུལ་དུ་

ཡོངས་སུ་ཐིམ་མོ། །དྲི་རྣམ་གསུམ་ནི་སྣའི་དབང་པོ་ལ་སྣང་བ་མཐའ་ཡས་ཀྱི་ཚུལ་དུ་ཡོངས་སུ་ཐིམ་མོ། །རོ་རྣམ་གསུམ་ནི་ལྕེའི་དབང་པོ་ལ་གདོན་མི་ཟ་བའི་ཚུལ་དུ་ཡོངས་སུ་ཐིམ་མོ། །རེག་རྣམ་གསུམ་ནི་ལུས་ཀྱི་དབང་པོ་ལ་མི་བསྐྱོད་པའི་ཚུལ་དུ་ཡོངས་
སུ་ཐིམ་མོ། །བདག་གི་ལུས་སམ་གང་དག་གི་ལུས་དང་ལྡན་པ་དེ་དག་འདི་ལྟར་རྣམ་པར་གནས་ཏེ། དེ་ལ་འདོད་ཆགས་ཀྱི་རང་བཞིན་སྣང་བ་མཐའ་ཡས་ཏེ་འདི་ལྟར་ང་རྒྱལ་བསྐྱེད་པར་བྱའོ། །གང་དག་ཞེ་སྡང་དང་ལྡན་པ་དེ་དག་ནི་མི་བསྐྱོད་པའི་རང་བཞིན་དུ་
ང་རྒྱལ་བསྐྱེད་པར་བྱའོ། །བདག་གམ་བདག་གི་ལུས་ལ་བད་ཀན་ལྟར་གནས་པ་དེ་དག་ནི་གཏི་མུག་སྟེ་རྣམ་པར་སྣང་མཛད་ཀྱི་རང་བཞིན་ང་རྒྱལ་བསྐྱེད་པར་བྱའོ། །རྒྱས་པ་ནི་ནོ་པེ་ཀ་དག་ལས་སྨོས་ཏེ། འདིར་ནི་ས་འཛིན་ཙམ་དུ་སྨོས་པར་ཟད་དོ། །བཟའ་བ་ལ་སོགས་པ་ཡང་
འདིར་མ་སྨོས་སོ། །དེ་ནས་རང་བཞིན་གྱིས་གྲུབ་པ་ཡང་རིམ་བཞིན་དུ་བསྟན་ཏོ། །བྱང་ཆུབ་ཀྱི་སེམས་རང་བཞིན་བསྐྱེད་པ་མདོ་ཙམ་ཞིག་བསྐྱེད་པར་བྱ་སྟེ། དེ་བས་ན་འདི་ལྟར་བརྟག་པར་བྱའོ། །བདག་སྔོན་ཕ་མ་ཕྲད་པའི་ས་བོན་ལས་བསྐྱེད་པ་བཞིན་དུ་བདག་སྐྱེས་ཏེ། དེ་བས་
ན་བདག་ནི་གྲུབ་པའོ་ཞེས་སྐུ་འབའ་ཞིག་དྲན་པར་བྱའོ། །ཇི་ལྟར་གྲུབ་པ་དང་རིམ་གྱིས་བསྟན་ཏེ། ཕ་གང་ཡིན་པ་དེ་བདག་གི་ལྷའོ། །མ་གང་ཡིན་པ་དེ་རིགས་ཀྱི་ལྷ་མོའོ། །དེའི་ལུས་ཀྱི་འདོད་ཆགས་གང་ཡིན་པ་དེ་སྣང་བ་མཐའ་ཡས། ཞེ་སྡང་གང་ཡིན་པ་དེ་མི་འཁྲུགས་
བ། གཏི་མུག་གང་ཡིན་པ་དེ་རྣམ་པར་སྣང་མཛད། ང་རྒྱལ་གང་ཡིན་པ་དེ་རིན་ཆེན་འབྱུང་ལྡན། ཕྲག་དོག་གང་ཡིན་པ་དེ་གདོན་མི་ཟ་བར་གྲུབ་པ། གཞན་ཡང་བྱང་ཆུབ་ཀྱི་སེམས་ས་བོན་གང་ཡིན་པ་དེ་ནི་རྣམ་པར་སྣང་མཛད་ཆེན་པོ་སྟེ། དེ་བས་དེ་དག་མངོན་པར་འབྱུང་ངོ་། །དེ་
ནས་ཡང་ཡེ་ཤེས་ལྔའི་རང་བཞིན་དུ་བསྟན་ཏེ། ཕ་དང་མའི་མེ་ལོང་ལྟ་བུའི་ཡེ་ཤེས་ནི་མི་བསྐྱོད་པ། མཉམ་པ་ཉིད་ཀྱི་ཡེ་ཤེས་ནི་རིན་ཆེན་འབྱུང་ལྡན། སོ་སོར་ཀུན་དུ་རྟོག་པའི་ཡེ་ཤེས་ནི་སྣང་བ་མཐའ་ཡས། བྱ་བ་ནན་ཏན་གྱི་ཡེ་ཤེས་ནི་དོན་ཡོད་གྲུབ་པ། ཆོས་ཀྱི་དབྱིངས་

ཀྱི་ཡེ་ཤེས་ནི་རྣམ་པར་སྣང་མཛད་དོ། །གཞན་ཡང་གཟུགས་ལ་སོགས་པ་དེ་དག་ཐམས་ཅད་གཟུགས་སོ་ཞེས་དྲན་པར་བྱའོ། །ཕ་དང་མའི་གཟུགས་ནི་རྣམ་པར་སྣང་མཛད། ཚོར་བ་རིན་ཆེན་འབྱུང་ལྡན། འདུ་ཤེས་སྣང་བ་མཐའ་ཡས། འདུ་བྱེད་དོན་
ཡོད་གྲུབ་པ། རྣམ་པར་ཤེས་པ་མི་བསྐྱོད་པ། ཕ་དང་མའི་ལུས་ཀྱི་ས་ནི་སངས་རྒྱས་སྤྱན། ཆུ་ནི་རྒྱལ་བའི་ཡུམ། མེ་ནི་གོས་དཀར་མོ། །རླུང་ནི་འཕགས་མ་སྒྲོལ་མ། ནམ་མཁའ་ནི་རྡོ་རྗེ་དབྱིངས་ཀྱི་དབང་ཕྱུག་མ། ཡང་གཞན་ཡང་དྲན་པར་བྱ་སྟེ། མིག་སའི་སྙིང་པོ་
རྣ་བ་ཕྱག་ན་རྡོ་རྗེ། སྣ་ནམ་མཁའི་སྙིང་པོ། ལྕེ་སྤྱན་རས་གཟིགས་དབང་ཕྱུག །ལུས་སྒྲིབ་པ་རྣམ་པར་སེལ་བ། ཡིད་རྡོ་རྗེ་སེམས་དཔའ་ཕ་དང་མ་ཀུན་དུ་སྦྱོར་བའི་ལྕགས་ཀྱུ་གཤིན་རྗེ་གཤེད། རྡོ་རྗེ་པདྨར་ཞུགས་པ་ཞགས་པ་སྟེ་གཞན་གྱིས་མི་ཐུབ་པ། འཆིང་བ་ལྕགས་
སྒྲོག་སྟེ་རྟ་མགྲིན། ལས་སམ་ས་བོན་འབྱུང་བའི་དུས་ན་བདུད་རྩི་འཁྱིལ་པ་སྟེ། དེའི་དུས་ན་བདག་ཞུགས་སོ། །ཞུགས་པའི་དུས་ན་འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག །གཟུགས་སྒྲ་དྲི་རོ་རེག་བྱ། ས་ཆུ་མེ་རླུང་ནམ་མཁའ། མིག་རྣ་བ་སྣ་ལྕེ་ལུས་
ཡིད་ལ་སོགས་པ་ས་བོན་རྣམ་པར་སྣང་མཛད་ཆེན་པོས་བསྐྱེད་དེ། བདེ་བ་ཆེན་པོ་ལ་གནས་པའི་དུས་ནའོ། །དེ་བས་ན་བདག་དང་དེ་བཞིན་གཤེགས་པ་ཐམས་ཅད་ཀྱི་རང་བཞིན་ནོ། །གང་དག་རྫས་དགུའི་དངོས་པོ་ལས་སྐྱེས་པའི་དུས་ན་དགུ་པོ་དེ་དག་རྣམ་པར་བསྒོམ་པར་
བྱའོ། །དེ་ལ་རྫས་དགུ་ནི་འདི་དག་སྟེ། གཟུགས་ཚོར་བ་འདུ་ཤེས་འདུ་བྱེད་རྣམ་པར་ཤེས་པ་ས་ཆུ་མེ་རླུང་ནམ་མཁའ། མིག་རྣ་བ་སྣ་ལྕེ་ལུས་ཡིད་ལ་སོགས་པ་བ་སྤུའི་བུ་ག་ཐམས་ཅད་ནས་བྱང་ཆུབ་ཀྱི་སེམས་ལས་མངོན་པར་སྤྲུལ་ཏེ། ཆོས་ཀྱི་དབྱིངས་ཀྱི་རང་བཞིན་དུ་བདག་
སྐྱེས་པས། དེའི་ཕྱིར་བདག་ཆོས་ཀྱི་དབྱིངས་སོ། །དེ་ལྟར་ཤེས་པར་བྱ་སྟེ། སྤྱོད་ལམ་རྣམ་པ་བཞི་ཐམས་ཅད་དུ་རྟག་པར་བསྒོམ་པར་བྱའོ། །བྱང་ཆུབ་ཀྱི་སེམས་ལས་དེ་ལྟ་བུའི་ཚུལ་དུ་སྐྱེ་བའམ། ཡང་ན་སྣང་བ་མཐའ་ཡས་ཀྱི་ཚུལ་དུ་སྐྱེས་པའོ། །ཡེ་ཤེས་ཙམ་དུ་ཤེས་པར་

བྱས་ནས་ཐམས་ཅད་ཀྱི་རང་བཞིན་དུ་བདག་བསྒོམ་པར་བྱའོ། །གཞན་ཡང་རང་བཞིན་གྱིས་གྲུབ་པ་རིམ་གྱིས་བསྟན་པར་བྱ་སྟེ། འདོད་ཆགས་འདོད་ཆགས་ཀྱི་རང་བཞིན་གྱིས་མེད་དོ། །དེ་བས་ན་ཞེ་སྡང་ཞེ་སྡང་གི་རང་བཞིན་གྱིས་མེད་དོ། །དེ་བཞིན་དུ་གཏི་མུག་གཏི་མུག་གི་
རང་བཞིན་གྱིས་མི་དམིགས་སོ། །ང་རྒྱལ་ཡང་ཤིན་ཏུ་རང་བཞིན་མེད་དོ། །དེ་བཞིན་དུ་ཕྲག་དོག་ཀྱང་རང་བཞིན་མེད་དོ། །ས་ནི་རྡུལ་ཕྲ་མོའི་རང་བཞིན་ཡིན་པའི་ཕྱིར་རང་བཞིན་གྱིས་སྟོང་ངོ་། །ཆུ་ཡང་དེ་བཞིན་ནོ། །མེ་དང་རླུང་དང་ནམ་མཁའ་ཡང་འདུ་ཤེས་ཙམ་དུ་བརྟག་
པར་བྱའོ། །གཟུགས་དང་ཚོར་བ་དང་། འདུ་ཤེས་དང་། འདུ་བྱེད་དང་རྣམ་པར་ཤེས་པ་ལ་སོགས་པ་ཡང་སྟོང་ངོ་། །དེ་བཞིན་དུ་མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་ལ་སོགས་པ་ཡང་སྟོང་ངོ་། །གང་གི་དུས་ན་དེ་ལྟ་བུའི་བྱང་ཆུབ་ཀྱི་སེམས་སྐྱེས་པ་དེ་ནི་ཡོངས་སུ་
མྱ་ངན་ལས་འདས་པའོ། །དེ་ལྟ་བས་ན་བདག་རང་བཞིན་གྱིས་གྲུབ་པ་སྟེ། སྐྱེ་བ་དང་འཇིག་པ་མེད་པའི་ཕྱིར་རོ། །དེ་བཞིན་དུ་འགྲོ་བ་དང་གནས་པ་ལ་སོགས་པ་ཐམས་ཅད་ཀྱང་བདག་གྲུབ་པ་བཞིན་ནོ་བར་ཤེས་པར་བྱའོ། །རང་བཞིན་གྱིས་ཀུན་འདི་ལྟར་ལྷུན་གྱིས་གྲུབ་པའི་
སྒྱུ་མ་སྟོང་པའི་སྦྱོར་གཞི་མགོན་པོ་ཐམས་ཅད་མཁྱེན་པའི་བདག་གོ་ཞེས་འདི་ལྟར་ཤེས་པར་བྱས་ན། རབ་ཏུ་འགྲུབ་པར་འགྱུར་རོ། །དཀྱིལ་འཁོར་གྱི་སློབ་དཔོན་སྒེག་པའི་རྡོ་རྗེས་མཛད་པ་རྫོགས་སོ།། ༄། །དཔལ་བདེ་བ་ཆེན་པོའི་སྒྲུབ་ཐབས་བཞུགས།
༄༅༅། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །མགོན་པོ་སངས་རྒྱས་ཀུན་ངོ་བོ། །ཞེ་སྡང་རྡོ་རྗེ་རྒྱལ་བའི་གཙོ། །ལྷ་མོའི་ཚོགས་བཅས་བདེ་ཆེན་ལ། །དད་པས་རྟག་ཏུ་ཕྱག་འཚལ་ཏེ། །དཔལ་ལྡན་གསང་འདུས་རྒྱུད་འདི་ཡི། །དོན་རྟོགས་གསལ་བར་
བྱ་བ་དང་། །སེམས་ཅན་རྣམས་ལ་ཕན་པའི་ཕྱིར། །སྒྲུབ་པའི་ཐབས་འདི་བཤད་པར་བྱ། །དང་པོར་སྔགས་པས་ངེས་པར་ནི། །རྡོ་རྗེ་སློབ་དཔོན་མཉེས་བྱས་ཏེ། །དབང་བསྐུར་གནང་བ་ཐོབ་ནས་ནི། །དེ་ནས་སྒྲུབ་པ་བརྩམ་པར་བྱ། །དཀྱིལ་འཁོར་དུ་ནི་ཞུགས་པ་དང་། །

དེ་བཞིན་གསང་ཉིད་ཤེས་པ་དང་། །ཀུན་བྱེད་ཐམས་ཅད་ཟ་བ་ཡིས། །ཐེ་ཚོམ་མེད་པར་དངོས་གྲུབ་ཐོབ། །གཙོ་ལ་མི་ཕྱེད་དད་པ་དང་། །རྣམ་པར་མི་རྟོག་བློ་ལྡན་ཞིང་། །དམ་ཚིག་སྡོམ་ལ་གནས་པ་ནི། །བྲམ་ཟེ་བསད་ནའང་འགྲུབ་པར་
འགྱུར། །དཀྱིལ་འཁོར་དག་ནི་དམན་པ་དང་། །དམ་ཚིག་རྣམ་པར་སྤངས་པ་དང་། །གསང་བ་དེ་ཉིད་མི་ཤེས་པས། །བསྒྲུབས་ཀྱང་ཅུང་ཟད་འགྲུབ་མི་འགྱུར། །དེ་ལ་འདི་ནི་དམ་ཚིག་སྡོམ་པ་སྟེ། ཤ་ཁྲག་དྲི་ཆེན་རྡོ་རྗེ་ཆུ། །ལྔ་པ་སེམས་ནི་འབྱུང་བ་སྟེ། །སྔགས་
པས་ཆོ་གས་བྱིན་བརླབས་ནས། ཉིན་གཅིག་བཞིན་དུ་བཟའ་བར་བྱ། །སྦྱང་སྦར་དེ་བཞིན་རྟོགས་བྱས་ལ། །དོགས་པ་མེད་པའི་སེམས་ཀྱིས་ནི། །དེ་བཞིན་གཤེགས་པ་མཉེས་བྱའི་ཕྱིར། །དགའ་བའི་སེམས་ཀྱིས་བཟའ་བར་བྱ། །ཧཱུཾ་ཞེས་པས་ནི་ཀུན་དུ་སྦྱར། །ཨཱཿཞེས་
པས་ནི་རྟོགས་པར་བྱ། །ཨོཾ་གྱིས་འབར་བར་བསྒོམ་བྱས་པ། །འདི་ནི་དམ་ཚིག་དམ་པའོ། །གླང་ཆེན་རྟ་དང་ཤ་ཆེན་དང་། །བ་ལང་ཁྱི་ཤ་མཆོག་ཡིན་ཏེ། །ཟས་ཕྱིར་འདི་དག་བཟའ་བར་བྱ། །གཞན་ནི་བཟའ་བར་མི་བྱའོ། །ཤ་རྣམས་དག་ནི་མ་རྙེད་ན། །ཀུན་ལ་བསྒོམ་
ཞིང་རྣམ་པར་བརྟག །རྡོ་རྗེའི་སྦྱོར་བ་འདི་དག་གིས། །སངས་རྒྱས་ཀུན་གྱིས་བྱིན་གྱིས་རློབ། །བཟའ་བའམ་ཡང་ན་བཏུང་བ་སྟེ། །བརྟུལ་ཞུགས་ཅན་གྱིས་ཅི་བཟའ་བ། །དྲི་ཆུ་ཤ་ཡི་སྦྱོར་བ་སྟེ། །ཆོ་ག་ཇི་བཞིན་བརྟག་པར་བྱ། །རྣམ་པ་ཐམས་ཅད་མཆོག་ལྡན་པ། །
རང་ལུས་ངག་ཡིད་རྡོ་རྗེ་ཡི། །སྙིང་གར་ཡེ་ཤེས་དམ་ཚིག་སྟེ། །རྡོ་རྗེ་མཆོག་འཛིན་ཅོད་པན་དུའོ། །དམ་ཚིག་རྡོ་རྗེ་ལྕེ་རྩེར་ནི། །ཧཱུཾ་ལས་རྡོ་རྗེར་བསྒོམ་བྱས་ལ། །ཨཱཿདང་ཨོཾ་གྱི་སྦྱོར་བ་ཡིས། །ཟོས་ན་བྱང་ཆུབ་འཐོབ་པར་འགྱུར། །འདི་ནི་དམ་ཚིག་མཆོག་ཡིན་ཏེ། །
སངས་རྒྱས་ཐམས་ཅད་མཉེས་འགྱུར་བ། །དམ་ཚིག་མཆོག་ཅེས་བྱ་བ་སྟེ། །མཆོག་གི་དངོས་གྲུབ་ཐམས་ཅད་བྱེད། །རྟག་པར་གཞན་ནས་དབྲོག་པ་དང་། །རྨད་དུ་བྱུང་བས་གསོད་པ་དང་། །འདོད་ཆགས་རྡོ་རྗེ་ཉིད་སྦྱོར་བ། །འདི་ནི་སྡོམ་པས་བསྡམས་པའོ། །དམ་བཅའ་

བརྟུལ་ཞུགས་དཀའ་སྤྱོད་པ། །བསྟེན་པས་འགྲུབ་པར་མི་འགྱུར་ཏེ། །འདོད་པའི་ལོངས་སྤྱོད་ཐམས་ཅད་ལ། །བརྟེན་ན་མྱུར་དུ་འགྲུབ་པར་འགྱུར། །སློང་མོའི་ཟན་ཟས་མི་བཟླས་ཤིང་། །སློང་ལ་དགའ་བར་མི་བྱ་སྟེ། །ཡན་ལག་མི་གཉིས་སྔགས་བཟླས་ལ། །འདོད་
པའི་ལོངས་སྤྱོད་ཀུན་སྤྱད་དོ། །ལུས་དང་ངག་ཡིད་བདེར་གནས་ན། །བྱང་ཆུབ་སེམས