Luận tạng Tây Tạng (Tengyur) — Tập 45

་པ་ལ་སོགས་པའོ། །སྐུ་གསུང་ཐུགས་ཞེས་པ་ནི་དེའི་རང་བཞིན་ཡི་གེ་གསུམ་ཧོ་དང་བཅས་པའི་ཐ་ཚིག་གོ། །དབྱངས་ཀྱིས་བསྐུལ་བའི་དེ་མ་ཐག་འོད་ཀྱིས་སངས་རྒྱས་
ཐམས་ཅད་བསྡུས་པ་ནི་འདུས་པ་ཞེས་སོ། །རྒྱུད་ཀྱི་འབྲེལ་པའི་ལན་གསུངས་པ་ལྔ་པ་ཞེས་པ་ལ་སོགས་པའོ། །བཞི་པོ་དེ་ལས་དམ་ཚིག་བཞི་དང་ལྡན་པའི་སྔགས་པ་དང་། དེའི་ངོ་བོའི་དེ་ཁོ་ན་ཉིད་དང་དེའི་ངོ་བོའི་སྲུང་བ་དང་བཟའ་བའི་དམ་ཚིག་གོ་རིམས་བཞིན་དུ་གསུངས་ཏེ། དེ་ནི་

སྒྲུབ་པ་ཆེན་པོ་ཞེས་མིང་དུ་བཏགས་པ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྔགས་དང་ཀུན་དུ་སྤྱོད་པའི་དམ་ཚིག་ཏུ་གསུངས་སོ། །བཞི་པ་དང་ནི་ཞེས་བྱ་བ་ལ་སོགས་པ་བཞིས་ནི་གཞན་གྱི་དོན་དང་འབྲས་བུའི་ངོ་བོ་གསུངས་ཏེ། དེ་ཡང་བཞི་པ་ལས་ནི་དཀྱིལ་
འཁོར་ཞེས་མིང་དུ་བཏགས་པ་སློབ་མ་གཞུག་པ་ལ། མཐར་ཐུག་པའི་སློབ་དཔོན་གྱི་ལས་གསུངས་སོ། །བཅུ་དྲུག་པ་ལས་དབང་གསུངས་སོ། །བརྒྱད་པ་ལས་མཆོད་པའི་སྡོམ་པ་གསུངས་སོ། །བཅུ་གཉིས་པ་ལས་ཐུན་མོང་གི་དངོས་གྲུབ་གསུངས་ཏེ། སྡོམ་པ་དང་ཐུན་མོང་གི་
དངོས་གྲུབ་ནི་རང་གི་དོན་ལ་ཡང་འབྲེལ་ཏེ། འདིར་ལེའུ་བཞི་བཞིར་བྱས་པ་མཛེས་པ་དང་། དེ་ཡང་འབྲེལ་པའི་ཕྱིར་གསུངས་ཏེ། དེ་བཞིན་དུ་འོག་ནས་འབྱུང་བའི་དྲུག་པ་དང་བདུན་པ་ལ་སོགས་པ་ཡང་རྗེས་སུ་དཔག་གོ། །བརྒྱད་པ་དང་ནི་ཞེས་པ་ལ་སོགས་པས་ནི་རང་གི་དོན་གཉིས་
ལས་དྲག་ཤུལ་གྱི་སྒྲུབ་པ་གསུངས་ཏེ་བརྒྱད་པ་ནི་དྲུག་པའོ། །དེ་ལས་ནི་རྗེས་སུ་ཆགས་པ་དང་ཉེ་བར་སྒྲུབ་པ་གསུངས་པ། གཉིས་པ་ལས་བྱང་ཆུབ་ཀྱི་སེམས་ཀྱི་སྡོམ་པ་གསུངས་པ་བཅུ་པ་དང་བཅུ་བཞི་པ་ལས་དྲག་ཤུལ་གྱི་ཆོ་ག་གསུངས་ཏེ། ལེའུ་དེ་རྣམས་ཀྱིས་རང་གི་དོན་ལ་ཞག་
བདུན་དུ་བསྒྲུབ་པར་བྱ་ཞེས་པར་འབྲེལ་ཏེ། གཞན་ལ་ཡང་དེ་ལྟར་ཤེས་པར་བྱའོ། །བདུན་པ་དང་ནི་ཞེས་པ་ལ་སོགས་པས་རང་གི་དོན་བསྙེན་པའི་ངོ་བོ་རྗེས་སུ་དྲན་པ་ལ་སོགས་པའམ། ཁ་ཅིག་འདོད་པ་དེ་ལྟར་མ་ཡིན་པའི་ངོ་བོ་གསུངས་ཏེ། བདུན་པ་ལས་སྒྲུབ་པའི་སྡོམ་པ་རྗེས་སུ་དྲན་
པ་གསུངས། གསུམ་པ་ལས་མཆོག་གི་བསྙེན་པར་གཏོགས་པ་གསུངས། གཅིག་ལས་རྡོ་རྗེ་ཡེ་ཤེས་ཀྱི་སྤྱོད་པ་ལ་སོགས་པ་དེ་བཞིན་གཤེགས་པ་ཀུན་གྱི་ལས་གསུངས། བཅུ་གཅིག་པ་ལས་དངོས་གྲུབ་ཀྱི་ཞིང་རི་དང་དགོན་པ་ལ་སོགས་པ་གསུངས། བཅོ་ལྔ་པ་ལས་རྨི་ལམ་གྱི་མཚན་
མ་གསུངས་ཏེ་འདི་ཡང་རི་དང་དགོན་པ་ལ་སོགས་པའི་བཞི་ནས་མཚན་མ་བྱུང་བའི་བར་དང་། རྗེས་སུ་དྲན་པའི་བར་གྱི་ཆོས་ཐམས་ཅད་སྦྱར་ཏེ་འདི་རྣམས་ནི་ལེའུའི་ཆོས་གཙོར་གཟུང་བར་ཟད་དོ། །དེ་ལྟར་ལེའུའི་དོན་གྱི་འབྲེལ་པ་རྣམས་གསུངས་ནས་གཞན་ཡང་ལྷུར་འབྲེལ་པ་རྣམས་

གསུངས་པ། དུལ་བ་གདུལ་དཀའ་ཞེས་པ་ལ་སོགས་པའོ། །དེ་ལ་ཞི་བའི་སེམས་ཅན་ནི་དཀྱིལ་འཁོར་དུ་གཞུག་པ་ལ་སོགས་པར་འབྲེལ་ཏོ། །གདུལ་དཀའ་བའི་གདུག་པ་ཅན་རྣམས་ནི་དྲག་པོས་ཚར་བཅད་པར་འབྲེལ་ཏོ། །ཐུན་མོང་དང་མཆོག་གི་ལྷ་བསྐྱེད་
པ་ལ་རྡོ་རྗེ་བཞི་དང་ཆོ་ག་བཞིས་བསྙེན་པར་འབྲེལ་ཏོ། །ཐུན་མོང་དང་མཆོག་གི་དངོས་གྲུབ་དང་དེའི་ལས་ཀྱི་གཞུང་འབྲེལ་ཏོ། །དཀྱིལ་འཁོར་ལས་དང་བརྟུལ་ཞུགས་སོ། །དེ་ལྟ་བུའི་གཞུང་དེ་རྣམས་དང་སློབ་དཔོན་ནོ། །ཡང་སློབ་དཔོན་དང་སློབ་མ་སྟེ་དེ་ལྟ་བུའི་དབང་བསྐུར་བ་ནི་བདག་ཉིད་ཆེན་
པོ་ཞེས་ཏེ། དེ་ཁོ་ན་སངས་རྒྱས་དང་བྱང་ཆུབ་སེམས་དཔའི་རྣལ་འབྱོར་བསྟན་པ་ཉིད་ཀྱིས་ཡོངས་སུ་གྲོལ་བར་འདོད་དོ། །སྦྱོར་བའི་ལན་ནི་ཐབས་དང་ཤེས་རབ་སྙོམས་པར་འཇུག་པ་སྟེ། དེའི་ངོ་བོ་ནི་སྟོང་པ་དང་སྙིང་རྗེ་ལས་བྱུང་བའི་མཚན་ཉིད་དེ་ཟབ་པ་དང་རྒྱ་ཆེ་བའོ། །རྒྱུད་ཀྱི་འབྲེལ་
པ་ཞེས་པ་དང་། འདིའི་སྦྱོར་བ་ཞེས་པའི་སྒྲའི་དོན་གསུངས་པ། རྒྱུད་ཅེས་བྱ་བར་འབྲེལ་པའི་དོན་ཞེས་པ་ལ་སོགས་པའོ། །དེ་ལ་གཞི་ནི་གཞིའི་ཏིང་ངེ་འཛིན་ཏེ་དེ་ནི་ཐབས་ཞེས་མིང་དུ་བཏགས་སོ། །རང་བཞིན་ནི་ལྷ་རྣམས་སྦྱོར་བ་སྟེ་དེ་ཡང་མྱ་ངན་ལས་འདས་པ་ཞེས་པ་རང་བཞིན་
མེད་པར་འདོད་པའི་རྒྱུའོ། །འདུ་བ་མེད་པ་ནི་འབྲས་བུ་སྟེ་འདུ་བའི་རྣམ་པ་ཐམས་ཅད་དང་བྲལ་བས་སོ། །བྱེ་བྲག་ཅེས་པ་ནི་རྒྱུ་འབྲས་ཀྱི་རིམ་པ་ཐ་དད་པས་གསུམ་ཞེས་ཏེ། དེ་གསུམ་ནི་དེ་བཞིན་གཤེགས་པའི་རྒྱུད་དེ་ལེའུ་དང་པོར་གསུངས་ལ། རྣལ་འབྱོར་པའི་ཡང་དེ་བཞིན་ཞེས་
པའི་སྒྲས་ཤེས་པར་བྱའོ་ཞེས་པ་ལ་འདོད་དོ། །བདག་ཅག་གི་བླ་མ་གཅིག་པ་ཁ་ཅིག་ན་རེ། འདིར་རྒྱུ་དང་འབྲས་བུའི་སྐྱེ་བ་ནི་འབྲེལ་པ་སྟེ། དེ་ལ་རྒྱུའི་རྣམ་པ་རྡོ་རྗེ་སེམས་དཔའ་ནི་གཞི་སྟེ་དེ་ནི་ཐབས་སོ། །རང་བཞིན་ནི་དེའི་ཤེས་རབ་སྟེ་དེ་ནི་རང་བཞིན་མེད་པའི་དངོས་པོའོ། །འདིར་རྒྱུའི་སྒྲ་ནི་
དངོས་པོའི་སྒྲའོ། །འདུ་བ་མེད་པ་ནི་རེག་པའི་ལྷ་སྟེ་འབྲས་བུའི་རྣམ་པ་ཁོ་ནས་འདུ་བ་མེད་པ་ཞེས་སོ། །དེ་དག་གི་འདོད་པ་ནི་གསང་བ་འདུས་པ་ནི་བདག་སྟེ་རིག་པའི་ལྷའི་སྐུ་གསུང་ཐུགས་ཀྱིས་འདུས་པའི་ཕུང་པོ་ལ་སོགས་པ་ཇི་སྙེད་པ་གང་ཟག་གཅིག་གི་རྒྱུད་དུ་བསྡུས་པ་ནི་འདུས་པ་

ཡིན་ལ། བདག་ཕ་མ་ལས་འབྱུང་བ་ནི་དེའི་རྒྱུད་དོ་ཞེས་ངེས་པའི་ཚིག་གོ། །ཡང་གཞན་གྱི་མན་ངག་ལས་གསང་བ་ནི་རིག་པའི་ལྷའི་གསང་བས་བསྡུས་པའི་ཕུང་པོ་ལ་སོགས་པའོ། །འདུས་པ་ནི་དེའི་རིག་མ་དང་གཉིས་སུ་མེད་པར་སྦྱོར་བ་སྟེ་འདུས་པ་ནི་ཚོགས་པའོ། །དེ་ཡང་འབྲེལ་པ་ནི་
སྔ་མ་བཞིན་ཏེ། རིག་པའི་ལྷ་ནི་གཞི་སྟེ་ཐབས་ཞེས་པ་ལ་སོགས་པའོ། །འདུ་བ་མེད་པ་ནི་ཚོགས་པ་ཐ་དད་པའོ་ཞེས་སྨྲས་ཏེ། གང་ཕྱིར་རྣམ་གསུམ་རྒྱུད་ཀྱི་དོན་དུ་བསྡུས། །ཞེས་འབྱུང་བའི་ཕྱིར་དེ་དག་ལྟར་ཡང་མི་འཐད་དོ། །དེ་བས་ན་དྲིས་ཚིག་དང་པོའི་དོན་ལས་བྱུང་བའི་གཞི་ལ་
སོགས་པ་གསུམ་ནི་རྒྱུད་དོ་ཞེས་བྱ་བ་ནི་རིག་པ་སྟེ་གཞི་ལ་སོགས་པའི་བཤད་པ་ནི་འདས་མ་ཐག་པ་བཞིན་ནོ། །རྒྱུད་ཀྱི་དབྱེ་བ་གསུངས་པ། རིགས་ནི་རྣམ་པ་ལྔ་དང་ཞེས་སོ། །ཕྱི་མའི་དོན་གསུངས་པ་བྱང་ཆུབ་རྡོ་རྗེ་ཞེས་པ་ལ་སོགས་པ་སྟེ། བྱང་ཆུབ་རྡོ་རྗེས་བཅས་པ་ལ་རིགས་ལྔ་རྣམས་ཀྱི་བཤད་
པ་ནི་ཕྱི་མ་ཞེས་བྱའོ། །དེ་ཁོ་ན་ཉིད་རྣམ་པ་དུ་གསུངས་ཞེས་པ་ལ་སོགས་པ་བཞི་ལ་གསུངས་པ། དེ་ཁོ་ན་ཉིད་རིགས་ལྔར་གསུངས་ཞེས་པ་ལ་སོགས་པའོ། །རིགས་བརྒྱ་ཞེས་པ་ནི་རྒྱུ་དང་འབྲས་བུ་རྣམ་པར་དབྱེ་བ་སྟེ། རྒྱུ་ལས་ཡེ་ཤེས་ལྔ་དང་འབྲས་བུ་བཅུ་དགུ་ལ་ལྔ་ལྔ་སྟེ་བརྒྱའོ། །གཞན་
དག་གིས་ནི་གཞན་དུ་བཤད་དེ་དེ་ནི་མ་ཡིན་ནོ། །འདི་རྣམས་ནི་ལན་དང་སྦྱར་ནས་གསུངས་ཀྱི། དེ་བཞིན་དུ་འཇིག་རྟེན་ལས་འདས་པའི་ངོ་བོ་སའི་སྙིང་པོ་དང་འདོད་པའི་རྒྱལ་པོ་དང་དཔའ་བོ་རྡོ་རྗེ་ལ་སོགས་པ་རང་གི་རིག་པ་ཡེ་ཤེས་ལྔར་འདུས་པ་རྣམས་ཀྱི་དབྱེ་བ་མཐའ་ཡས་སོ། །བྱང་ཆུབ་
སེམས་ཀྱི་ལན་གསུངས་པ། སྐྱེ་འགག་མེད་པ་ཞེས་པ་ལ་སོགས་པ་སྟེ། དངོས་དང་དངོས་མེད་མི་ཟད་ཅེས་པ་ནི་དེ་གཉིས་ཀ་རང་བཞིན་མེད་ཅེའོ། །གཙོ་ཞེས་བྱ་བ་ནི་མཆོག་གི་སྒྲའོ། །ཐབས་དང་ཤེས་རབ་གཉིས་མེད་པ། །ཞེས་པ་ནི་གཉིས་སུ་མེད་པའི་སྦྱོར་བ་ལས་བྱུང་ཞེས་པའི་ཐ་ཚིག་གོ། །
དེའི་རྣམ་པ་ལ་ཆོས་ཐམས་ཅད་འདུ་བ་གསུངས་པ། སྲིད་དང་ཞི་བ་འབྱུང་བ་ཀུན། །ཞེས་ཏེ་འཁོར་བ་དང་མྱ་ངན་ལས་འདས་པ་ཐམས་ཅད་རྣམ་པ་གཅིག་གོ་ཞེས་པའི་ཐ་ཚིག་གོ། །དེའི་དོན་ནི་རྩ་བ་ལས་ཀྱང་། རང་གི་སེམས་ནི་བརྟག་པ་ལ། །ཞེས་པ་ལ་སོགས་པས་གསལ་བར་གསུངས་སོ། །

རིག་པའི་སྐྱེས་བུའི་ལན་གསུངས་པ། རང་གི་ལུས་ངག་ཅེས་པ་ལ་སོགས་པ་སྟེ། མི་ཕྱེད་པ་དེ་གཉིས་ཀྱི་རྣམ་པར་ཕྱེ་ནས་རིག་པ་དེས་ན་ལྡན་པ་དེ་དེའི་སྐྱེས་བུ་ཞེས་སོ། །བཛྲ་དྷྲྀག་ལ་སོགས་པ་ལྔའི་ལན་གསུངས་པ། རྒྱུ་ལྔ་དག་གི་ཞེས་པ་ལ་སོགས་པའོ། །དེ་ལ་
འོག་དང་སྟེང་ན་ལྔ་ལྔ་གནས་པ་ནི་རྒྱུ་དང་འབྲས་བུ་སྟེ་ཡེ་ཤེས་ལྔའི་རྡོ་རྗེའོ། །དྷྲྀཀ་ཅེས་བྱ་བ་ནི་དེ་གང་གི་ཆང་པས་འཛིན་པའོ། །རྣམ་ཤེས་ཞེས་པ་ནི་རྣམ་པར་ཤེས་པའི་ཕུང་པོ་སྟེ། དེས་རྣམ་པར་དག་པའི་རྒྱུ་འབྲས་གཉིས་གཟུང་ངོ་། །ཡོད་མེད་དབུས་ལས་འདས་པའི་ངོ་བོ་ལས། སེམས་
ཅན་ཀུན་གྱི་འབྱུང་བ་དང་དེ་ལས་གྱུར་པའི་བྱུང་བ་ཉིད་ཀྱིས་སྐྱེས་པ་དེ་རྣམ་པར་དག་པ་རྒྱལ་བས་འཛིན་ཅེས་སོ། །གཟུགས་ཞེས་པ་ཡང་དེའི་ཕུང་པོ་སྟེ་དེས་རྣམ་པར་དག་པའི་སྣང་མཛད་དོ། །དེའི་ཕྱིར་ཕྱག་ན་འཁོར་ལོ་ཐོགས་མ་ལ་སོགས་པའི་རིམ་པ་མེད་པ་རྣམས་སོ། །དོན་ཐམས་ཅད་
འབྱུང་བས་ན་སེམས་ལ་རིན་ཆེན་ཞེས་སོ། །ཚོར་བ་ཞེས་པ་ནི་གོང་མ་བཞིན་ནོ། །ཚོར་བ་དེས་སེམས་རང་རིག་ཅིང་འཛིན་པས་ན་དེའི་ཕྱག་ན་རིན་ཆེན་བསྣམས་སོ། །ཐམས་ཅད་ནས་ཞེས་པ་ནི་རྣམ་པའོ། །ཐམས་ཅད་དུ་ཞེས་པ་ནི་དུས་སོ། །རོལ་པའི་མཚན་ཉིད་ཐམས་ཅད་མཚོན་ཅིང་
ཞེས་པས་ཨཱ་རོ་ལྀཀ་གོ། །འདོད་པའི་མཚན་ཉིད་མཚོན་ཞེས་པ་ནི་འདུ་ཤེས་ཏེ་འདི་ཡང་སྔར་བཤད་པ་བཞིན་ནོ། །དེའི་ཕྱིར་འདིའི་ཕྱག་ན་ཐམས་ཅད་ཤེས་པའི་མ་ཆགས་པའི་པདྨ་བསྣམས་སོ། །རྣམ་ཤེས་ཞེས་པ་ནི་མཚོན་པ་སྟེ་གཟུགས་ལ་སོགས་པའི་ཕུང་པོ་ལྔའི་མཚན་ཉིད་གསལ་
བར་བྱེད་པ་ནི་ཤེས་རབ་བོ། །འདུ་བྱེད་ཅེས་པ་ཡང་ཕུང་པོ་སྟེ་འདུ་བྱེད་དེས་ཤེས་རབ་འཛིན་ཏེ་དེའི་གཞི་ཡིན་པས་སོ། །དེའི་ཕྱིར་ཕྱག་ན་རལ་གྲི་འཛིན་ཏོ། །རིགས་ཀྱི་ལན་གསུངས་པ་རིགས་ནི་རྒྱུད་ཅེས་པ་ལ་སོགས་པའོ། །རིགས་དང་རྒྱུད་ཀྱི་སྒྲ་འདྲའོ་ཞེས་ཏེ། དེའི་ཐོག་མ་ནི་གཉིས་སུ་མེད་
པའི་བྱང་ཆུབ་ཀྱི་སེམས་རྡོ་རྗེའོ། །དེས་ན་སྒྲ་ལས་ཀྱང་ཐོག་མར་འདིར་མཚོན་པར་བྱེད་པ་ཨེ་ཝཾ་ཞེས་སོ། །དེ་ལྟར་ཡང་བཟང་པོ་ཞབས་ཀྱིས་གསུངས་པ། གཉིས་མེད་ཐོག་མ་བཞིར་ལྡན་པ། །ཡི་གེ་གཉིས་ཀྱི་དེ་བཞིན་མཚོན། །ཞེས་སོ། །དེའི་གཙོ་བོ་ནི་སྐྱེ་འགག་མེད་པའི་སྟོང་པ་སྟེ་སྟོང་པ་

ཉིད་ཀྱི་ཡེ་ཤེས་དག་པའི་རྒྱུ་འབྲས་ནི་རིགས་ལྔའི་གཙོ་བོ་ཞེས་སོ། །གོང་དུ་གསུངས་པའི་སྐུ་དེ་ལ་ཡེ་ཤེས་ལྔ་དང་སྦྱོར་བ་གསུངས་པ། རྣམ་ཤེས་ཞེས་པ་ལ་སོགས་པའོ། །དེ་ལ་རྣམ་ཤེས་ནི་གོང་དུ་བསྟན་པའི་རྣམ་པར་ཤེས་པའི་ཕུང་པོ་རྣམ་པར་དག་པའི་སྐུའོ། །དེ་གཉིས་སུ་
མེད་པའི་ཡེ་ཤེས་དང་སྦྱོར་བས་ན་ཞེ་སྡང་ཞེས་ཏེ། ཕན་ཚུན་ཐུག་པ་ནི་ཞེ་སྡང་ཞེས་འོག་ནས་འབྱུང་ངོ་། །ཡེ་ཤེས་དེ་ནི་སྐུ་གཉིས་དང་སྦྱོར་བས་ན། རྒྱུ་དང་འབྲས་བུ་གཉིས་སུ་གྲགས། །ཞེས་སོ། །གཟུགས་ཞེས་པ་ནི་གོང་དུ་བསྟན་པ་བཞིན་ཏེ་འོག་མ་ཀུན་ལ་ཡང་སྦྱར་རོ། །དེ་ནི་མཚན་
མའི་རྣམ་པར་ཤེས་པ་མེད་པས་ན་གླེན་པའི་མེ་ལོང་ལྟ་བུའི་ཡེ་ཤེས་དང་སྦྱར་ཏེ། དེས་ན་གཏི་མུག་ཅེས་བཏགས་སོ། །མཉམ་པ་ཉིད་ཀྱི་ཡེ་ཤེས་ཀྱིས་ཞེན་ཅིང་གོང་རློམ་པ་དེ་ནི་ང་རྒྱལ་ཞེས་སོ། །སོ་སོར་རྟོག་པའི་མཚན་ཉིད་གང་གཉིས་སུ་མེད་པའི་དངོས་པོ་ལ་ཆགས་པས་འདོད་ཆགས་ཞེས་སོ། །
བྱ་བ་ནན་ཏན་གྱི་ངོ་བོ་རྟག་ཏུ་སེམས་ཅན་གྱི་དོན་ལ་བརྩོན་པ་ལ་བདག་ཉིད་ཁོ་ན་རོལ་ཅིང་གཏོང་བས་ཕྲག་དོག་གོ། །གཞིའི་ལེའུ་ལས་གསུངས་པ། འདོད་དང་གྲོལ་བ་རབ་སྒྲུབ་པའོ། །ཞེས་པ་དོན་གསུངས་པ། འདོད་ཆགས་ཞེ་སྡང་ཞེས་པ་ལ་སོགས་པ་སྟེ། འདིར་ཡེ་ཤེས་གསུམ་གསུངས་
པ་ནི་གཙོ་བོ་སྟེ་གཉིས་ཀྱང་སྦྱར་རོ། །མཚན་ཉིད་སྣ་ཚོགས་འདྲ་བའི་རྡོ་རྗེ་སེམས་དཔའ་སྟེ་དེ་ནི་འདོད་པ་དེ་ལ་ཕྱོགས་ཤིང་བསྒོམས་པའི་འབྲས་བུའོ། །མོ་ཧ་ལ་སོགས་པ་བཞི་དང་། དེའི་དགའ་མ་དང་ཕུན་སུམ་ཚོགས་པའི་ལན་གསུངས་པ། གཉིས་མེད་ཆོས་ཀྱི་ཞེས་བྱ་བ་ལ་སོགས་པའོ། །
ཕྱི་རོལ་ཞེས་པ་ནི་མཚན་མའོ། །ང་རྒྱལ་ཞེས་པ་ནི་མཚན་མའི་རྣམ་པ་མི་ཤེས་པ་སྟེ་དེ་ནི་མེ་ལོང་ལྟ་བུ་གོང་དུ་གཏི་མུག་ཏུ་བསྟན་ཏོ། །ཕན་ཚུན་ཐུག་པ་ནི་གཉིས་སུ་མེད་ཅེས་གོང་དུ་བསྟན་ཟིན་ཏོ། །འདིས་ཀྱང་ཡེ་ཤེས་ཀྱང་གཉིས་སུ་མེད་པ་ཡོད་པ་དེ་ནི་ཞེ་སྡང་ངོ་ཞེས་བསྟན་ཏོ། །འདོད་ཆགས་ཀྱང་
དེ་བཞིན་དུ་ཤེས་པར་བྱའོ། །ཡེ་ཤེས་འདི་ཞེས་བྱ་བ་ནི་དབྱེར་མེད་པས་རྡོ་རྗེའོ། །གཙོ་བོ་རྣལ་འབྱོར་པ་དེ་རྣམས་ཀྱི་དགའ་བ་ནི་ལྷ་མོ་བཞིའི་རེག་པའི་ལོངས་སྤྱོད་ལས་བྱུང་བ་དེ་རྣམས་ནི་དགའ་མ་ཞེས་སོ། །བུད་མེད་དེ་རྣམས་ཁོ་ན་ལས་དགའ་བའི་རིམ་པས་ཡང་དག་པའི་བདེ་བ་ཡེ་ཤེས་ཀྱི་རང་

བཞིན་པས་མཆོག་ཕུན་སུམ་ཚོགས་པ་དེ་འབྱུང་བས་ན་ཕུན་སུམ་ཚོགས་ཞེས་སོ། །དེ་ནི་ཞེས་པ་དེ་དགའ་བ་ཉིད་དོ། །དེའི་རིམ་པས་བདེ་བའི་ཡེ་ཤེས་སངས་རྒྱས་ཐོབ་པས་ན་ཉོན་མོངས་པའི་དགའ་བ་ཉིད་རྡོ་རྗེ་ཐེག་པའོ། །ཁ་ཅིག་གིས་དེ་ནི་ཞེས་པ་དགའ་མ་བཞི་
བཟུང་སྟེ་དེ་ཡང་མི་འཐད་དེ། དེ་བཞི་ནི་ཤེས་རབ་ཡིན་པས་ཐབས་ཞེས་བྱ་བའི་སྒྲ་དང་མི་འབྱོར་བ་དང་། དེ་ལྟར་ན་ཐབས་ཀྱང་རྡོ་རྗེ་ཐེག་པར་འགྱུར་བ་ལས་མ་བཟུང་བས་སོ། །ཡ་མཱནྟ་ཀྲྀཏ་ལ་སོགས་པ་བཞིའི་ལན་གསུངས་པ། རྣམ་པར་མི་འཇོག་ཅེས་པ་ལ་སོགས་པའོ། །བཞི་པོ་འདིའི་
སྒྲ་ནི་ཕྲིན་ལས་ཀྱི་སྒོ་ནས་འཇུག་པ་སྟེ། དེ་ལ་ཡ་མཱནྟ་ཀྲྀཏ་ཀྱིས་སྤྱན་དྲངས་པའི་སྐུས་འདུལ་བའི་ཞིང་རྣམས་ལ་སྐྱེ་བ་མེད་པའི་ཕྱིར་འཇིག་པ་དང་བྲལ་བའི་ཆོས་བསྟན་པ་སྟེ་ཕྲིན་ལས་སོ། །དེ་ནི་དངོས་པོ་ཀུན་ཞེས་པ་མེ་ལོང་ལྟ་བུ་དང་། སྙིང་རྗེ་དང་སྦྱིན་པ་ལ་སོགས་པ་མི་འདའ་བའི་དམ་
ཚིག་གོ། །དེ་ནས་གཤིན་རྗེ་གཤེད་མཐར་བྱེད་དེ་ཞེས་པ་ནི་ཕྲིན་ལས་དེས་འོག་ནས་བྱུང་བའི་མ་རིག་པ་ལ་སོགས་པ་མཐར་བྱེད་པས་སོ། །འདིར་བཤད་པ་འདི་ནི་ཀུན་ལ་སྦྱར་རོ། །རྣམ་པར་མི་ཤེས་ཞེས་པ་ནི་ཨ་ལ་སོགས་པའི་ཡི་གེ་མེད་པའི་ཕྱིར་འཛིན་པའི་ཤེས་པ་མེད་པར་བསྟན་པའོ། །
སེམས་ཞེས་པ་སྟོང་པ་ཉིད་དང་བྱམས་པ་དང་ཚུལ་ཁྲིམས་ལ་སོགས་པའོ། །མིང་དང་གཟུགས་ཀྱི་བློ་ནི་བརྗོད་པའི་རྒྱུ་སྟེ་དེ་མེད་པས་བརྗོད་དུ་མེད་ཅེས་པའོ། །ཆོས་རྣམས་ནི་སོ་སོར་རྟོག་པ་ལ་སོགས་པའོ། །གཟུགས་ལ་སོགས་པ་རང་བཞིན་གྱིས་ཞི་བས་རྣམ་པར་མི་རྟོག་པའི་ཆོས་བསྟན་
པའོ། །ཤེས་ན་བདེ་བ་ཐོབ་པར་འགྱུར། །ཞེས་པ་ནི་དེ་ལྟར་བསྟན་པའི་འདུལ་བའི་ཞིང་དག་གིས་སོ། །ད་ནི་སྒྲ་འཇུག་པའི་དོན་གསུངས་པ་གཏི་མུག་ཅེས་པ་ལ་སོགས་པའོ། །དག་པའི་གཏི་མུག་ལོངས་སྤྱོད་པས་གཏི་མུག་ཆེན་པོ་མེ་ལོང་ལྟ་བུ་དེའི་དམ་ཚིག་ཕྱིན་ཅི་ལོག་གི་གཏི་མུག་གོང་དུ་བསྟན་
པའི་ཁྲོ་བོའི་ལས་ཀྱིས་ཟད་པར་བྱེད་དོ། །གཟུགས་རྣམས་ཞེས་པ་ནི་དེའི་འཇིག་ཚོགས་ལ་ལྟ་བ་སྤངས་པའོ། །ཤེས་བྱ་ཞེས་པ་ནི་ཤེས་བྱའི་སྒྲིབ་པའོ། །ཉེས་པ་ནི་ཞེ་སྡང་ངོ་། །སེམས་ཞེས་པ་ནི་མཐར་འཛིན་པར་ལྟ་བའོ། །ཚིག་ཅེས་པ་ནི་ལོག་པར་ལྟ་བ་སྟེ་ལྟ་བ་གསུམ་ལ་ལུས་ངག་ཡིད་གསུམ་གྱི་

མིང་དུ་བསྟན་པ་ནི་དེའི་རིགས་ཀྱི་ཕྱིར་རོ། །སྙོམས་འཇུག་ཅེས་པ་ནི་སྐྱེ་བའི་སྒྲིབ་པའོ། །ཉོན་མོངས་ཀུན་ཞེས་པ་ནི་གཏི་མུག་ལ་སོགས་པ་གསུམ་མོ། །རྡོ་རྗེ་ཀུན་ཞེས་པ་ནི་ལྟ་བ་མཆོག་ཏུ་འཛིན་པ་སྟེ། ལྟ་བ་གོང་མ་ཀུན་ལ་འཛིན་པས་སོ། །སྒྲིབ་པ་ཀུན་ཞེས་པ་ནི་ལས་ཀྱི་སྒྲིབ་པ་སྟེ་ཐམས་ཅད་ཀྱི་
ལས་ཡིན་པས་སོ། །གོང་དུ་ཤེས་པ་ནི་བདེ་བ་ཐོབ་པར་འགྱུར་ཞེས་པ་དེ་བཤད་པ། སེམས་ཅན་ཉོན་མོངས་རྡོ་རྗེ་སྒྲིབ། །ཅེས་ཏེ་སྔོན་ལྟ་བུའི་ཆོས་བསྟན་པས་གནས་ལ་ཞེན་པའི་སེམས་ཀྱི་ཉོན་མོངས་པ་དང་རྡོ་རྗེའི་སྒྲིབ་པ་དག་ནི་ཤེས་བཞི་ཞེས་པའོ། །དེ་དང་ལྡན་ན་མ་ལུས་པ་ལ་སོགས་པའི་ལས་
དག་པར་འགྱུར་རོ། །དེ་དག་ནི་དེའི་འབྲས་བུ་བདེ་བའོ། །དེ་དག་གི་དོན་ཡང་བཟང་པོ་ཞབས་ཀྱིས་གསུངས་པ་ལས་ཤེས་པར་བྱའོ། །དྲིས་པ་མེད་ན་ཡང་ཁྲོ་བོ་དྲུག་ལ་སོགས་པའི་དོན་གསུངས་པ། གཟུང་བ་དང་ཞེས་པ་ལ་སོགས་པའོ། །དེ་ལ་གཟུང་བ་ནི་བྱང་ཆུབ་ཀྱི་དོན་འཛིན་པའོ། །དགའ་
བ་ནི་དེ་ལ་ཆགས་པའོ། །དེ་བཞིན་ནི་དེ་འདྲ་བའོ། །མི་གཡོ་བ་ནི་དེ་ལ་སེམས་བརྟན་པའོ། །རྒྱུ་ནི་དེ་ཉིད་རྒྱུའི་ངོ་བོའོ། །འབྲས་བུ་ནི་རྒྱུ་དེ་ཉིད་གསལ་བར་གྱུར་པའོ། །ཐུགས་ལས་ཡང་དག་བྱུང་ཞེས་པ་ནི་དེ་དག་ནི་གོང་དུ་ཡང་རི་མོ་བྲི་བ་མ་ཡིན་གྱི་ཡང་དག་པའི་ཏིང་ངེ་འཛིན་ལས་འབྱུང་ངོ་
ཞེས་པའི་དོན་ཏོ། །ལྷག་མ་ནི་གསལ་ལོ། །སྐུ་གསུང་ཐུགས་ཀྱི་རྡོ་རྗེ་ཡིས། །ཞེས་པ་ནི་སྤྱིའི་སྔགས་ཡི་གེ་གསུམ་མོ། །བདག་ཉིད་ཆེན་པོ་ཞེས་པ་ནི་ཡེ་ཤེས་ལས་གྲུབ་པའི་བདག་ཉིད་ཅན་གྱི་ལྷ་མོ་དྲུག་སྟེ་དེ་དག་འབྱིན་པར་བཤད་དོ། །སྤྱོད་པ་གཉིས་ཀྱི་ལན་གསུངས་པ། རྫོགས་པའི་རིམ་
པར་ཞེས་པ་ལ་སོགས་པའོ། །དེ་ལ་རྫོགས་པའི་རིམ་པ་ནི་བསྐྱེད་པ་དང་རྫོགས་པ་སྟེ་དེའི་སྦྱོར་བས་ཤེས་རབ་དང་ཐབས་ལས་ཕུང་པོ་དང་ཁམས་དང་སྐྱེ་མཆེད་ཀྱི་ལྷ་རྣམས་འབྱུང་བ་དེ་བསྡུས་པའི་སྦྱོར་བ་ངེས་པར་བྱས་ནས་རྒྱུ་ཞིང་སྤྱད་ཅེས་སོ། །བསམ་པ་ཅི་དང་ལྡན་ཞེ་ན། དག་པར་མོས་པ་ལ་
སོགས་པ་སྟེ་དག་པར་མོས་པ་ནི་གཉིས་སུ་མེད་པར་མོས་པའོ། །འཇིགས་པ་སྤངས་པ་ནི་ཐམས་ཅད་ཟིལ་གྱིས་མནན་པའོ། །དོགས་པ་མེད་པ་ནི་དགའ་བའོ། །སེང་གེ་བཞིན་ཞེས་པ་ནི་ང་རྒྱལ་དང་ལྡན་པས་སོ། །འདི་ལ་མི་བྱ་ཞེས་པ་ལ་སོགས་པ་ནི་ལུས་དང་ངག་དང་ཡིད་ཀྱི་ལས་མ་

བཀག་པའོ། །མཉམ་གཞག་མེད་པ་ནི་ལངས་པའོ། །མཉམ་པར་གཞག་ཅེས་པ་ནི་ལྷག་པའི་ལྷའི་སྦྱོར་བའོ། །དེ་ལྟར་བཟང་པོ་ཞབས་ཀྱིས། ཏིང་ངེ་འཛིན་ལས་ལངས་ནས་སུ། །ཞེས་པ་ལ་སོགས་པ་གསུངས་སོ། །ཡུལ་དང་དབང་པོ་ལ་བརྟེན་པའི་ཤེས་
པ་ནི་མཱན་ཞེས་བྱའོ། །ཏྲ་ཞེས་པ་ནི་ངན་འགྲོ་དང་སྲིད་པ་ལས་སྐྱོབ་པའོ། །དེའི་སྤྱོད་པ་ནི་འཇིག་རྟེན་སྤྱོད་པས་གྲོལ་བ་སྟེ་སྲོག་གཅོད་པ་ལ་སོགས་པ་གང་ཉེས་པས་མ་གོས་པའོ། །དེ་ལྟ་བུའི་དམ་ཚིག་བསྐྱང་བ་ནི་སྔགས་ཀྱི་སྤྱོད་པ་སྟེ་སྡོམ་པ་ནི་རྩ་བ་བསྐང་པ་འམ་རྣམ་གྲངས་སོ། །དེ་ལྟར་ཡང་
བཟང་པོ་ཞབས་ཀྱིས། འགྲོ་བའི་དོན་དུ་ཅི་རིགས་པར། །ཞེས་པ་ལ་སོགས་པ་གསུངས་སོ། །བཟླས་བརྗོད་ཀྱི་ལན་གསུངས་པ། སོ་སོ་རང་གི་ངོ་བོ་དག །ཅེས་པ་ལ་སོགས་པ་སྟེ་དེ་ལ་སོ་སོ་རང་གི་ངོ་བོ་དག་ནི་ཡི་གེ་རྣམས་སོ། །སྙིང་ལ་ཞེས་པ་ནི་ཕྱག་རྒྱ་བཞིའི་སྙིང་གར་རོ། །དེ་ལས་སྤྲོ་བ་དང་
བསྡུ་བ་ལ་དེ་ཁོ་ནའི་སྔགས་བྱེ་བྲག་ཏུ་བརྗོད་དོ་ཞེས་ཐུན་མོང་གི་ཆོ་ག་གསུངས་ནས། ཡེ་ཤེས་སེམས་དཔའི་གསུངས་པ་ཞེས་པ་སྟེ། སྣ་ཚོགས་རྡོ་རྗེ་ནི་རིགས་ལྔའི་བདག་ཉིད་ཀྱི་སངས་རྒྱས་སོ། །དེ་རྣམས་ཡེ་ཤེས་སེམས་དཔའི་ས་བོན་ཁོ་ནས་སྤྲོ་བ་དང་བསྡུ་བ་དང་གཟུང་བ་དག་བྱའོ་ཞེས་ཇི་སྙེད་པའོ། །རྡོ་རྗེ་
གསུམ་གྱི་གསུངས་པ། གཟུགས་བཞིན་ཞེས་ཏེ་དེ་ལས་ནི་རང་དང་འདྲ་བའི་གཟུགས་ཁོ་ན་སྤྲོ་ཞེས་སོ། །དེ་ཞེས་པ་ནི་གཟུགས་གསུམ་སྟེ་སྤྲོ་བ་དང་བསྡུ་བ་དང་གཟུང་བ་དག་བྱ་བ་ནི་བཟླས་ཤེའོ། །ལྷ་རྣམས་ཀྱིས་སྔགས་ཀྱིས་ངོ་བོ་ས་བོན་བཞི་བརྗོད་པ་ནི་བཟླས་པ་ཞེས་བྱ་སྟེ། སྔགས་དེ་ཡང་
དབུགས་ཀྱི་རྒྱུན་དང་འགྲོགས་པས་ན་དབུགས་ཀྱི་རང་བཞིན་དེ་ཁོ་ན་ཉིད་གསུམ་གྱིས་བསྐུལ་ལོ། །ཇི་ལྟར་སྙིང་གར་ཞེས་པ་ལ་སོགས་པས་མཆོད་པ་གསུངས་སོ། །ཏིང་ངེ་འཛིན་ཡང་དེ་བཞིན་ནོ། །ཞེས་པ་ནི་རང་གི་རིགས་ཀྱི་ལྷ་མོ་ཞེས་པའི་ཐ་ཚིག་གོ། །དེ་ལྟར་ཡང་རྩ་བ་ཉིད་ལས། ལུས་ཀྱི་སྐུ་ཡི་ངོ་
བོ་ཉིད། །ཅེས་པ་ལ་སོགས་པ་གསུངས་སོ། །སྤྱི་བོར་དབང་བསྐུར་ཞེས་པ་ནི་མཆོད་པའི་བསྙེན་སྒྲུབ་གསུངས་པ་སྟེ་དབང་བསྐུར་ནི་གཙོར་གསུངས་པའོ། །རིག་མ་དང་སྦྱོར་ལྡན་ཞེས་པ་ལ་སོགས་པས་ནི་སྤྲོ་བའི་ལྷ་རྣམས་ཀྱི་ལོངས་སྤྱོད་བཞི་གསུངས་པ་སྟེ་རྡོ་རྗེ་འཛིན་ནི་བདག་རང་ངོ་། །དེའི་ལོངས་

སྤྱོད་བཞི་བཞིན་དུ་དང་པོར་ནི་རང་བྱིན་གྱིས་བརླབ་བོ། །དེ་ནས་རིག་མ་ལ་སོགས་པའི་དྲན་པར་བྱ་ཞེས་སོ། །དེ་ལྟར་བཟང་པོ་ཞབས་ཀྱིས། སྐུ་གསུང་ཐུགས་ཀྱི་རྡོ་རྗེ་ལས། །ཞེས་པ་ནས། སྦྱོར་བ་བསྙེན་སོགས་དེ་བཞིན་བསྒོམ། །ཞེས་པའི་བར་དུ་ཚིགས་སུ་བཅད་པ་གསུངས་སོ། །རྒྱས་
འདེབས་ཀྱི་ལན་གསུངས་པ་དཔའ་བོ་ཞེས་པ་ལ་སོགས་པའོ། །དཔའ་བོ་ནི་སེམས་དཔའ་རྣམས་སོ། །རྡོ་རྗེ་ནི་རྒྱལ་བ་རྣམས་སོ། །རྒྱུད་གཞན་ལས་རིགས་ལྔ་གསུངས་པ་འདི་མ་ཡིན་པར་བསྟན་པ་རེ་རེ་ཞེས་སོ། །བསྟན་པ་དེ་གང་ཞེ་ན་སྙིང་པོ་ཞེས་པ་ལ་སོགས་པ་སྟེ་སྙིང་པོ་ནི་རྡོ་རྗེ་
སེམས་དཔའོ། །ཕྱག་རྒྱ་ནི་ཕྱག་རྒྱར་འདོད་པ་གསུམ་མོ། །སྔགས་ནི་དེ་ལ་མ་གཏོགས་པ་གཉིས་སོ། །དེ་རྣམས་ཀྱིས་རང་གི་རིགས་བཞིན་གདབ་པོ། །འོ་ན་རྒྱུ་འབྲས་གཉིས་ཇི་ལྟ་ཞེ་ན། རྒྱུ་ལ་ཞེས་ཏེ་ཕན་ཚུན་རྒྱས་གདབ་ཅེས་བྱ་སྟེ་འབྲས་བུ་ནི་མི་བསྐྱོད་པའོ། །ཅི་ཐམས་ཅད་ཀྱང་
དེའི་འབྲས་བུ་ཡིན་ན་འདི་འབའ་ཞིག་ལ་འབྲས་བུ་ཞེས་བྱ་ཞེ་ན། དེ་ནི་སྟོང་པ་ཉིད་ཀྱི་ཡེ་ཤེས་སུ་རྣམ་པར་དག་པ་གཅིག་པས་གཙོ་བོ་སྟེ། དཔེར་ན་རྒྱལ་པོ་དཔུང་དང་བཅས་པའི་ནང་ན་ཕ་སྤང་དུ་གྱུར་པ་མང་ཡང་ཡབ་སུས་ཞེས་བྱ་བ་མི་ཕྱེད་ཡང་རྒྱལ་པོ་ལ་བྱ་བ་བཞིན་ནོ། །ཆོས་ཀྱི་འབྱུང་
གནས་ཀྱི་ལན་གསུངས་པ། ལོངས་སྤྱོད་བཞི་དང་ཞེས་པ་ལ་སོགས་པའོ། །རྡོ་རྗེ་ཅན་ཞུ་བ་ལས་བྱུང་བ་སྐུ་གསུང་ཐུགས་ཀྱི་བྱེ་བྲག་གི་རྒྱུ་གསུམ་དུ་བསྒོམ་མོ། །འདིའི་གནས་ནི་འཁོར་ལོ་སྟེ། དེའི་དབུས་ནི་དེའི་ལྟེ་བའོ། །གནས་དེའི་བསྒོམ་པ་གསུངས་པ། ཡེ་ཤེས་བཅུ་ཞེས་པ་ལ་སོགས་
པའོ། །ཡེ་ཤེས་བཅུ་ནི་སྡུག་བསྔལ་དང་སྒྲ་ཇི་བཞིན་པ་ལ་ཐུག་པའོ། །རྫོགས་པ་ཞེས་པ་ནི་འདིའི་སྦྱོར་བ་རྫོགས་པའི་ཚུལ་ལོ། །རྩེ་གཅིག་ནི་དམིགས་པ་གཅིག་གོ། །མཛེས་པ་ནི་ཁྲོ་བོའི་ཚུལ་ལོ། །མི་གཡོ་ལྟ་བུ་ཞེས་པ་ནི་ཤིན་ཏུ་མྱུར་བའི་ཕྱིར་རོ། །སྤྲོ་ཞེས་པ་ནི་དེ་རྣམས་ཁོ་ན་ལས་འོད་
དུ་འཕྲོ་བའོ། །དྲི་མ་མེད་ཅེས་པ་ནི་དཀར་པོའི་མདོག་ཏུ་བསྒོམ་ཞེའོ། །ཞི་ཞེས་པ་ནི་ཞི་བའི་སངས་རྒྱས་ཀྱི་འོད་འཕྲོ་བའོ། །སྐད་ཅིག་ཉིད་དུ་ཞེས་པ་ནི་རྗེས་ཐོགས་སོ། །སངས་རྒྱས་སྤྱན་ཞེས་པ་ནི་དེས་དེའི་བདག་པོ་རྣམ་པར་སྣང་མཛད་མཚོན་པ་གཞལ་ཡས་ཀྱི་རྒྱུ་བསྒོམ་ཞེའོ། །འདི་

ཡང་བཟང་པོ་ཞབས་ཀྱིས་གསུངས་པ་ལས་གསལ་ལོ། །སྡོམ་པའི་ལན་གསུངས་པ། རྡོ་རྗེ་ཅན་གྱིས་ཞེས་པ་ལ་སོགས་པའོ། །བསྐྱེད་པ་དང་རྫོགས་པ་ལ་བརྟེན་པའི་བསྟན་པ་ལ་རྗེས་སུ་སྒྲུབ་ཅིང་ནན་ཏན་བྱེད་པ་ནི་དམ་ཚིག་སྡོམ་པ་སྟེ། དེ་ནི་སྔོན་དུ་རྩ་བའི་
རྒྱུད་ཁོ་ན་ལས་བཤད་ཅེའོ། །དེ་ལྟར་ཡིན་ཡང་བྱང་ཆུབ་སེམས་དཔའི་འདོད་པའི་སྡོམ་པ་ཁོ་ན་བྱེ་བྲག་ཏུ་གསུངས་པ་གཟུགས་སྒྲ་ཞེས་པ་ལ་སོགས་པའོ། །གང་འདོད་པ་རྣམས་ལ་བདེ་བ་དང་སྡུག་བསྔལ་གྱི་རྣམ་པ་བསྐྱེད་པས་འདོད་ཆགས་དང་ཞེ་སྡང་བར་མ་རྣམས་ལས་མུན་པ་འབྱུང་སྟེ། དེ་
འདོད་ཆགས་ནི་རྡོ་རྗེ་དང་། ཞེ་སྡང་ནི་རིན་ཆེན་འབྱུང་བ་དང་། མུན་པ་ནི་གཏི་མུག་རྡོ་རྗེའི་ངོ་བོར་བསམ་ཞེའོ། །ཡང་སྤྲོས་པའི་རྣམ་པ་མེད་པ་གསུངས་པ་དམ་ཚིག་འདྲ་ཞེས་ཏེ། རྡོ་རྗེ་སེམས་དཔའ་རྣམ་པར་བསྒོམ་པའོ། །འདོད་ཆགས་ལ་སོགས་པས་ཇི་ལྟར་དོན་བྱེད་པ་དེ་ལ་གསུངས་
པ་རྣམ་པ་མེད་པའི་ཞེས་པ་ལ་སོགས་པའོ། །རྣམ་པ་མེད་པའི་རྣམ་པ་ནི་ཤེས་རབ་དང་ཐབས་ཀྱི་རྣམ་པའོ། །དེའི་ཡན་ལག་ནི་གནས་གསུམ་དུའོ། །ཡི་གེ་གསུམ་གྱི་བདག་པོ་ནི་རྡོ་རྗེ་གསུམ་མོ། །དེའི་ས་བོན་ལས་བསད་པ་དང་དབྲོག་པ་ལ་སོགས་པའི་དོན་དུ་བཟླས་ཤིང་སྤྲོ་ཞེས་ཏེ་བསྡུ་བ་ལ་
སོགས་པ་ཡང་གཟུང་ངོ་། །ས་གསུམ་དུ་ནི་བསྐྱེད་བྱ་ཞིང་། །ཞེས་པས་སྒྲུབ་པ་བསྟན་ཏོ། །ཀུན་དུ་རྒྱས་གདབ་ཅེས་པའི་བར་ནི་སྒྲུབ་པ་ལ་སོགས་པ་གསུངས་ཏེ། འདི་ཡང་འོག་ཉིད་ནས། སྒྲུབ་པ་ཆེན་པོའི་མཐའ་རུ་ཡང་། །བྱས་ནས་ལས་སུ་བརྩམ་པར་བྱ། །ཞེའོ། །དེ་ལྟར་སྤྱིའི་ཆོ་ག་
གསུངས་ནས་རང་རང་གི་གསུངས་པ། རྣལ་འབྱོར་བ་ཡིས་ཞེས་པ་ལ་སོགས་པའོ། །ཞེ་སྡང་ཚུལ་ཞེས་པ་ནི་ཞེ་སྡང་ཉིད་དེའི་དོན་བྱེད་པས་ཐབས་སོ། །འོག་མ་ལ་ཡང་དེ་ལྟར་སྦྱར་ཏེ་དེ་ཡང་། གང་དག་འདོད་ཆགས་སྙོམས་འཇུག་པ། །དེ་ནི་འདོད་ཆགས་ཉིད་ཀྱིས་སྦྱར། །ཞེས་བསྟན་
ཏེ། ཞེ་སྡང་འཁོར་ལོ་ནི་མི་བསྐྱོད་པ་ལ་སོགས་པ་དྲུག་པོ་རྣམས་གཙོར་གྱུར་པའི་འཁོར་ལོའོ། །རྡོ་རྗེ་གཏུམ་པོས་བཅོམ་ཞེས་པ་ནི་གཞོམ་པའི་སྦྱོར་བ་ཆོ་ག་བཞིན་བྱས་ནས་བསྡུ་བ་ལ་སོགས་པ་བྱ་ཞེས་སོ། །ཡེ་ཤེས་རྡོ་རྗེ་ཅན་ནི་མཚན་མ་ཐོབ་པ་ཡེ་ཤེས་ཀྱི་རྡོ་རྗེའོ། །དེའི་ཡོན་ཏན་ནི་བདག་

ཉིད་ཞེ་སྡང་རྡོ་རྗེ་ཞེས་པ་ལ་སོགས་པའོ། །གཏི་མུག་འཁོར་ལོ་ནི་སེར་སྣ་ཅན་གྱི་དོན་དུ་རྟག་པ་གཙོར་གྱུར་པའི་འཁོར་ལོའོ། །དགའ་བསྡུས་བདེ་ཞེས་པ་ནི་རིག་པའི་དགའ་བ་དང་བསྡུས་པའི་བདེ་བའི་སྦྱོར་བའོ། །དེ་རྣམས་ཀྱི་ཐུན་མོང་གི་ཡོན་ཏན་གསུངས་བ། དཀྱིལ་འཁོར་ཞེས་པ་ལ་སོགས་པའོ། །
ལས་ནི་ཞི་ལ་སོགས་པའོ། །དེ་དག་བྱིན་གྱིས་བརླབས་ཙམ་གྱིས་འགྲུབ་ཅེས་ཏེ་དེ་དག་ནི་ལེའུ་དགུ་པ་ཉིད་ལས་ཞིབ་ཏུ་བཤད་དོ། །དཀྱིལ་འཁོར་དང་ཕྱག་རྒྱ་དགོད་པའི་ལན་གསུངས་པ་བྱང་ཆུབ་སེམས་དཔའ་ལ་སོགས་པའོ། །བྱང་ཆུབ་སེམས་ཀྱི་དཀྱིལ་འཁོར་ནི་རིག་པའི་པདྨ་ལ་གནས་
པའོ། །བྷ་གའི་ནི་ཆོས་ཀྱི་དབྱིངས་ན་གནས་པའོ། །ལུས་ནི་ཕྱག་རྒྱ་རྣམས་ཀྱི་གནས་ཏེ་བརྟག་ཅེས་པ་ནི་སྔགས་ཀྱིས་བསྐྱེད་པ་ཞེས་པའི་དོན་ཏོ། །དཀྱིལ་འཁོར་གྱི་དོན་ཉིད་ནི་ཕྱག་རྒྱ་དགོད་པས་གསལ་བར་བྱེད་དེ་ཕུང་པོ་ནི་རིགས་ལྔའོ། །སྐྱེ་མཆེད་ནི་ལྷ་མོ་དྲུག་གོ། །ཁམས་ནི་བཞིའོ། །
དེ་དག་ལ་ཉེ་བའི་སྒྲུབ་པ་ལ་སོགས་པའི་ངོ་བོའི་ཕྱག་རྒྱ་བཀོད་པས་སྙིང་པོ་རྣམས་འདུས་པ་ནི་དཀྱིལ་འཁོར་ཏེ། དེ་ལྟར་ཡང་བཟང་པོ་ཞབས་ཀྱིས་གསུངས་པ། སྙིང་པོ་འདུས་ཕྱིར་དཀྱིལ་འཁོར་རོ། །ཞེས་སོ། །ཕྱག་རྒྱ་དགོད་པའི་སྐབས་སུ་ཁྲོ་བོ་རྣམས་ཀྱི་ཕྱག་མཚན་དང་ཁ་དོག་གསུངས་
པ་ལྕགས་ཀྱུ་ཞེས་པ་ལ་སོགས་པའོ། །གྲྭ་རུ་རྣམ་པར་དགོད་ཅེས་པ་ནི་གྲྭ་ལ་གནས་པའི་ཁྲོ་བོའི་ཕྱག་མཚན་ནོ་ཞེས་པའི་དོན་ཏོ། །གནོད་མཛེས་ཞེས་པ་ནི་རྡོ་རྗེའོ། །དེ་གཉིས་ནི་འོག་དང་སྟེང་ངོ་། །འདི་རྣམས་ཀྱི་ཁ་དོག་ནི་འོག་ནས་འབྱུང་ངོ་། །ཉེ་བའི་སྒྲུབ་པའི་ངོ་བོའི་ཕྱག་རྒྱ་དག་གི་ཕྱག་མཚན་
དང་ཁ་དོག་གསུངས་པ་རིག་པའི་རྒྱལ་པོ་ཞེས་ཏེ། སེམས་དཔའ་དྲུག་པོ་ཕྱག་མཚན་དང་ཁ་དོག་ནི་འཁོར་ལོས་སྒྱུར་བ་དྲུག་གིའོ། །སེམས་མ་དྲུག་ནི་ཕྱིའི་དཀྱིལ་འཁོར་དང་འདྲ་བར་ནང་དུ་ཡང་ཞེའོ། །རྡོ་རྗེ་ཅན་ཞེས་པ་སྟེ་རྒྱལ་པོ་དྲུག་གོ། །དེའི་ཁ་དོག་གིས་ཤེའོ། །སྒྲུབ་པ་དང་སྒྲུབ་པ་
ཆེན་པོའི་ངོ་བོའི་ཕྱག་རྒྱ་གསུངས་པ་སངས་རྒྱས་ཞེས་ཏེ་ལྔ་དང་། བྱང་ཆུབ་སེམས་དཔའི་ངོ་བོ་ལྷ་མོ་རྣམས་དང་། ཁྲོ་རྒྱལ་བཞི་ལ་རྡོ་རྗེ་གསུམ་དང་། ཡེ་ཤེས་སེམས་དཔའ་དང་དབུ་རྒྱན་དང་ལྔས་གདབ་ཅེས་ཏེ། རྩ་བ་ལས་ཀྱང་དེ་བཞིན་གསུངས་སོ། །རྒྱས་འདེབས་དང་ཁ་དོག་གི་ངོ་བོ་

དྲུག་གི་གསུངས་པ། དེ་ནས་གཞན་ཡང་ཞེས་ཏེ་དཔའ་བོ་ནི་མི་འཁྲུགས་པའོ། །ཁ་དོག་ཀྱང་རིགས་ཀྱི་བརྟག་ཅེའོ། །ཁ་དོག་ནི་ཀུན་དུ་བཟང་པོ་དང་གནོད་མཛེས་ལ་དཔའ་བོ་རྡོ་རྗེ་སེམས་དཔའི་དབུ་རྒྱན་ཞེས་འདོད་དེ། དེ་ལྟར་ཡང་གང་གི་ཕྱིར་ཀུན་དུ་
བཟང་པོ་ལ་སོགས་པ་ཉེ་བའི་སྒྲུབ་པ་ལ་གཏོགས་པ་རིན་པོ་ཆེའི་དབུ་རྒྱན་ཁོ་ན་ཡིན་ལ། ཕྱིའི་ནི་བཤད་ཟིན་པ་དང་གནོད་མཛེས་ཀྱང་རྩ་བ་ལས། མི་བསྐྱོད་དམ་ཚིག་དབུ་རྒྱན་ལ། །ཞེས་གསལ་བར་བཤད་པའི་ཕྱིར་མི་འཐད་དོ། །མེ་ཏོག་དང་མཆོད་རྟེན་གྱི་ལན་ནི་འདི་ལ་མེ་ཏོག་ཅེས་པ་
ལ་སོགས་པ་སྟེ་གོ་སླའོ། །ཡེ་ཤེས་འཁོར་ལོའི་ལན་ནི་སེམས་ཅན་ཤེས་པ་སེམས་དཔའ་ཞེས་པ་སྟེ་ཡེ་ཤེས་སེམས་དཔའི་འོད་ཀྱིས་རེག་ཅིང་བསྐུལ་བ་ནི་དེ་སྐད་ཅེས་བྱའོ། །སྔགས་ཀྱི་ཐབས་ལ་སོགས་པའི་ལན་གསུངས་པ། ཡི་གེ་ཞེས་པ་ལ་སོགས་པའོ། །ས་བོན་ནི་ཐབས་སོ། །
དེ་ལས་འོད་འཕྲོ་བ་ནི་སྟོང་པའོ། །དེས་གྲུབ་པ་འདོད་པ་ཆེ་གེ་མོ་ཞེས་བྱ་བ་ལ་སོགས་པ་བྱིན་གྱིས་བརླབ་པའི་དོན་དུ་གཤེགས་ཤིང་སྨྲས་པ་ནི་བོད་པའོ། །དེ་ནས་ཚིགས་སུ་བཅད་པ་སྨྲ་བ་ནི་བསྐུལ་བའོ། །དེ་ནས་ཐམས་ཅད་ཀྱི་ཡི་གེ་ལ་བསྡུས་པ་ནི་བཅིངས་པའོ། །དབང་བསྐུར་
གྱི་ལན་གསུངས་པ། སྐུ་གསུང་ཐུགས་ཀྱི་ཞེས་པ་ལ་སོགས་པའོ། །སྐུ་གསུང་ཐུགས་ཀྱི་རྒྱ་ཞེས་པ་ནི་གཙོར་གསུངས་པ་སྟེ་ཐམས་ཅད་སྦྱར་རོ། །རྒྱུད་འདི་ཞེས་པ་ནི་རྩ་བ་ལས་སོ། །བུམ་པ་ཞེས་པ་ནི་ཕྱིར་མི་ལྡོག་པའི་ངོ་བོ་ཇི་སྙེད་པའོ། །དེ་ལྟར་དེ་བཞིན་ཞེས་པ་གཉི་ག་ལ་བཞི་པའོ་
ཞེས་པ་སྦྱར་ཏེ། དེ་ལྟར་ཞེས་པས་དབང་ལ་བསྙེགས་སོ། །དེ་བཞིན་ཞེས་པས་ཡེ་ཤེས་སུ་སྨྲ་སྟེ་འདིའི་དོན་ནི་བླ་མའི་ཁ་ལས་འབྱུང་བ་དེ་ཡང་དབང་དང་ཡེ་ཤེས་སོ་ཞེས་སྨྲས་སོ། །ཁ་ཅིག་ན་རེ་ཤེས་རབ་དང་ཡེ་ཤེས་ལ་སྦྱར་ཞེས་ཟེར་རོ། །དེས་ནི་དགའ་བ་ལ་ཤེས་རབ་ཏུ་འདོད་ལ་
བདེ་བ་ལ་ཡེ་ཤེས་སུ་འདོད་དོ། །དེ་ནི་མ་ཡིན་ཏེ་ཤེས་རབ་ནི་འདིར་རིག་མར་འདོད་ལ་དགའ་བ་ནི་རེག་པ་ལས་བྱུང་བར་འོག་ནས་སྟོན་ཏོ། །གཞན་དག་ནི་ཤེས་རབ་ནི་སེམས་པར་སྨྲ་ལ་ཡེ་ཤེས་ནི་ཤེས་བྱའི་འབྱུང་བ་ཟད་པ་ཞེས་སྦྱོར་ཏེ། དེ་ལྟར་ན་ཡང་སེམས་རྩེ་གཅིག་པ་ཁོ་ན་ཉིད་ཡིན་པས་

བསམ་གཏན་གྱི་ཡན་ལག་དྲུག་ཏུ་འགྱུར་བས་ཁོ་བོས་ནི་དེ་ལྟར་མ་རངས་སོ། །མེ་ཏོག་བཅས་ཞེས་པ་ནི་དུས་སུ་འབྱུང་བ་འམ་མེ་ཏོག་གི་ཕྲེང་བ་དང་ལྡན་པའོ། །གནས་མཆོག་ཅེས་པ་ནི་ཐབས་ཉིད་དོ། །སྦྱོར་བ་གཅིག་གོམས་ཞེས་པ་ནི་གཉིས་སུ་མེད་པའི་ཏིང་ངེ་འཛིན་ལ་བསླབས་
པའོ། །དམ་ཚིག་ཅེས་པ་ནི་རྒྱུད་ལ་བསླབས་པའོ། །གཟུངས་མ་འདིའི་སྦྱོར་བ་སློབ་དཔོན་གྱི་བྱ་བར་གསུངས་པ། དེ་ལ་བླ་མས་ཞེས་སོ། །གཏི་མུག་ཅེས་པ་ནི་བདག་ཉིད་གཏི་མུག་རྡོ་རྗེར་སྦྱོར་བ་སྟེ། རྒྱུན་གྱི་ཞེས་པ་ནི་གཏི་མུག་དགའ་མ་སློབ་མའི་སྙིང་ལ་ཐིམ་པར་བྱའོ་ཞེའོ། །དེ་བཞིན་
དུ་ཀུན་ལ་སྦྱར་རོ། །དབང་དེ་གཉིས་ཀྱང་བཟང་པོ་ཞབས་ཀྱིས་བཤད་པ་ལས་གསལ་བས་འབད་པ་མ་བྱས་སོ། །རིག་པའི་བརྟུལ་ཞུགས་ཀྱི་ལན་གསུངས་པ། དེ་ཉིད་ཀྱི་ལྷ་མོ་ཞེས་པ་ལ་སོགས་པ་སྟེ། དེ་ཉིད་ནི་གོང་དུ་བསྟན་པའི་གཟུངས་མ་དེ་ཁོ་ནའོ། །སློབ་མས་དེ་བཞིན་གཤེགས་
པ་ཀུན་དུ་དྲན་པར་བྱས་ལ་བླ་མས་སྨྲའོ། །དེ་ཡང་གང་ཞེ་ན། ཐམས་ཅད་ཆོས་ནི་ཞེས་པ་ལ་སོགས་པའོ། །བདུད་རྩི་ལྔའི་ལན་གསུངས་པ། ལུས་ཀྱི་ཆོས་ལ་རང་བཞིན་གྱིས། །ཞེས་པ་ལ་སོགས་པའོ། །ཡེ་ཤེས་ལྔ་ཞེས་པ་ནི་ཡི་གེ་ལྔའི་ངོ་བོའོ། །དྲོ་བ་དང་ནི་འབར་བ་ཡིས། །
ཞེས་པ་ནི་མེས་བསྐོལ་བར་བྱའོ་ཞེའོ། །སྔགས་ཀྱི་གཟུགས་ནི་ཞེས་པ་ལྷའི་རྣམ་པའོ། །དེ་ལྟར་བཟའ་ཞེས་གསུངས་ནས་དེའི་ཆོ་ག་གསུངས་པ། བར་སྣང་ཞེས་ཏེ་རང་གི་ས་བོན་ལས་བྱུང་བའི་རླུང་དང་མེ་ལ་གནས་པའི་པདྨ་ཨས་བསྐྱེད་དེ། དེར་བཟའ་བའི་དམ་ཚིག་ལྔ་རིམ་པར་བཞག་
ནས་རིམ་པར་ཡི་གེ་ལྔས་བརླབས་ཏེ་དེའི་བར་སྣང་ལ་ཧཱུཾ་གིས་བསྐྱེད་པའི་རྡོ་རྗེ་བཞག་ནས། དེ་གཉིས་མཉམ་པར་སྦྱོར་བའི་ངོ་བོ་རྡོ་རྗེའི་འོད་ཀྱིས་མེ་འབར་བར་བྱས་པས་བསྐོལ་ཏེ། དྲི་མ་བསལ་ཞིང་འབར་བ་དཔེ་མེད་པའི་རོས་ཚིམ་ཞིང་རྒྱས་པར་བྱས་ཏེ། ཡང་དེ་ལ་ཨོཾ་བཀོད་ནས་སངས་རྒྱས་
ཀྱི་ངོ་བོས་ཡེ་ཤེས་ཀྱི་བདུད་རྩི་དེའི་འོད་ཀྱི་མཚོན་ཆས་དྲངས་ནས་ཐིམ་སྟེ། ལྕེ་དག་པ་ལ་སོགས་པ་བཟའ་བའི་སྦྱོར་བ་བྱས་ཏེ་བཟའ་ཞེས་པའོ། །དཔའ་བོ་ལན་གསུངས་པ། ཡི་གེ་གསུམ་ཞེས་པ་ལ་སོགས་པའོ། །ཡི་གེ་གསུམ་ནི་ཨོཾ་ཨཱཿཧཱུཾ་ངོ་། །ཚུལ་ཞེས་པ་ནི་གོང་དུ་བསྟན་པའི་ཆོ་

གའོ། །བསྒྲུབ་བྱ་ཞེས་པ་ནི་མི་སྣང་བ་ལ་སོགས་པའོ། །དེ་ལྟར་བཟང་པོ་ཞབས་ཀྱིས། ཉི་མ་ཟླ་བ་ཆུ་སྨན་དྲི། །ཞེས་པ་ལ་སོགས་པ་གསུངས་སོ། །ཐུན་མོང་དང་མཆོག་གི་དངོས་གྲུབ་ཀྱི་ལན་གསུངས་པ། མི་སྣང་བ་ལ་སོགས་ཞེས་པ་ལ་སོགས་པའོ། །
སངས་རྒྱས་པ་ནི་རྐྱེན་གྱི་སངས་རྒྱས་མ་ཡིན་པའི་དོན་ཏོ། །དེའི་ཐབས་ཀྱི་ལན་གསུངས་པ། བྱང་ཆུབ་རྡོ་རྗེས་གསུངས་པ་ནི། །ཞེས་པ་ལ་སོགས་པའོ། །དེ་ལ་བསྙེན་པ་ནི་རང་གི་ཆོ་གའོ། །ཉེ་བར་སྒྲུབ་པ་ནི་རིག་མའི་ཆོ་གའོ། །སྒྲུབ་པ་ནི་དེ་གཉིས་ཀྱི་སྙོམས་པར་འཇུག་པའོ། །སྒྲུབ་པ་
ཆེན་པོ་ནི་དེ་ལས་བྱུང་བའི་རྒྱལ་བ་མཆོག་གི་ལྷ་རྣམས་ཀྱི་ཆོ་གའོ། །དེ་ནི་ལེའུ་བཅུ་གཉིས་པ་ལས་ཀྱང་ཞིབ་ཏུ་བཤད་དེ། གལ་ཏེ་འདིར་བསྒྲུབ་པར་བྱ་བ་ཞེས་པའི་ཚིག་གིས་ཐབས་མ་ཡིན་ནོ་ཞེ་ན། རྡོ་རྗེ་ཅན་གྱི་ཐེག་པ་མེད་དེ་འབྲས་བུ་ཡང་རྒྱུའི་རྣམ་པར་འཇུག་ལ། རྒྱུ་གསལ་བ་ཡང་འབྲས་
བུའོ་ཞེས་སྔར་སྨྲས་པའི་ཕྱིར་རོ། །ཐུན་མོང་མཆོག་ཅེས་པ་ལ་སོགས་པ་ནི་བསྙེན་པའི་ངོ་བོར་འདོད་པའི་བྱེ་བྲག་ཇི་སྙེད་པའོ། །དེ་ལ་རྡོ་རྗེ་བཞི་དང་སྦྱོར་བའི་ཡན་ལག་དྲུག་གི་ཐུན་མོང་གིའོ། །ཡེ་ཤེས་བདུད་རྩི་དང་མཆོག་གྲུབ་པའི་བསྙེན་པ་ནི་མཆོག་གིའོ། །རྡོ་རྗེ་བཞི་གསུངས་པ། དང་པོ་
སྟོང་པའི་ཞེས་ཏེ་སྟོང་པ་ནི་རིག་མ་སྟེ། དེའི་པདྨ་ལ་གནས་པའི་སེམས་ནི་དང་པོའོ། །ཡིག་འབྲུ་ནི་གཉིས་པའོ། །དེ་ལ་ཕྱི་ནང་གི་འཁོར་ལོ་རྫོགས་པ་ནི་གསུམ་པའོ། །ཡི་གེ་བཛྲ་དྷྲྀཀ་ལ་སོགས་པས་སྤྱན་དྲངས་ཏེ་ཡེ་ཤེས་ཀྱི་འཁོར་ལོ་དགུག་པ་ནས་མཉེས་པའི་དགོད་པ་ཡན་ཆད་ནི་བཞི་
པའོ། །ཡེ་ཤེས་བདུད་རྩི་ཉིད་ཅེས་པ་ལ་འདིར་གཅིག་པུར་འཛིན་པ་མ་ཡིན་ཏེ་རྩ་བ་ལས་བཤད་པ་དེ་ཉིད་མཆོག་ཡིན་ནོ་ཞེས་དྲན་པའོ། །སྦྱོར་བའི་ཡན་ལག་དྲུག་ཅེས་པ་ལ་སྦྱོར་བ་ནི་ཏིང་ངེ་འཛིན་གསུམ་མོ། །དེའི་ཡན་ལག་ནི་ཆའོ། །དེ་ནི་སོ་སོར་སྤོང་བ་དང་ཞེས་པ་ལ་སོགས་པའོ། །
སོ་སོར་སྤོང་བ་བཤད་པ་དབང་པོ་རྣམ་བཅུ་ཞེས་ཏེ། ཀུན་དུ་སྤྱོད་པའི་ངོ་བོ་གང་ཡུལ་རྣམས་འདོད་པའི་ངོ་བོ་ལྟར་རང་རང་གནས་པས་ཕྱི་རོལ་གྱི་ངོ་བོ་སྤོང་བ་སྟེ། ཁྱིའུའི་ཁྱེའུ་འབྱིན་པའི་ཚུལ་ལོ། །བསམ་གཏན་ནི་འདི་སྟེ། འདོད་པ་ལྔ་ནི་འདོད་ཆགས་ཆེན་པོ་ལ་སོགས་པ་སྟེ། དེ་ལ་འདོད་

ཆགས་ཞེ་སྡང་གཏི་མུག་གི་སེམས་ནི་འདོད་པར་གསུངས་པ་སྟེ་ཞེས་གོང་དུ་བཤད་དོ། །དེ་རྣམས་གཙོ་བོ་ལྔར་སྦྱར་བ་ནི་གཙོར་གསུངས་པ་སྟེ། གཞན་ཡང་ཚད་མེད་པ་དང་ཕ་རོལ་ཏུ་ཕྱིན་པ་དང་སྟོབས་ལྔ་ཡང་བསྡུས་ནས་ལྷ་མོ་རྣམས་དང་ཁྲོ་བོར་སྦྱར་རོ་ཞེས་ཏེ། སྦྱོར་བ་དང་པོ་དང་
ཆེན་པོའི་ལྷའི་སྦྱོར་བ་ནི་བསམ་གཏན་དུ་བཞེད་དོ། །དེ་ཡང་ཡན་ལག་ལྔ་སྟེ། བསམ་གཏན་རྟོག་པ་ལ་སོགས་པ་ཞེས་སོ། །དེ་ཡང་གསང་བ་གསུམ་ཡང་མཆོག་གི་ལྷའི་ཕྱིར་ན་གཙོར་གསུངས་པ་སྟེ། ཉེ་བར་སྒྲུབ་པ་ལ་སོགས་པ་ཡང་རྟོག་པར་སྦྱོར་རོ། །དེ་རྣམས་ནི་གོང་དུ་སྨོས་
བའི་ལྷ་ལས་ལྷག་པའི་ལྷ་དང་དེའི་རིག་མ་ལ་བྱའོ། །དེ་ཉིད་གཉིས་སུ་མེད་པར་སྦྱོར་བ་ནི་གཉིས་པའོ། །དེའི་རེག་པ་ལས་བྱུང་བའི་དགའ་བ་ནི་གསུམ་པའོ། །དེ་གཉིས་ཀྱི་སེམས་རྡོ་རྗེ་དང་པདྨ་ལ་བསྡུས་པའི་བདེ་བ་ནི་བཞི་པའོ། །རང་གི་སེམས་དེ་ཤེས་བྱའི་འབྱུང་བ་ཟད་པའི་ཡེ་ཤེས་ནི་
ལྔ་པའོ། །ཡན་ལག་གསུམ་པ་གསུངས་པ་སངས་རྒྱས་ཀུན་གྱི་ཞེས་པ་ལ་སོགས་པ་སྟེ་སངས་རྒྱས་ཀུན་ནི་རང་གི་སེམས་སོ། །དེའི་དངོས་གཞི་ནི་དེའི་བཞོན་པའི་དབུགས་སོ། །འདོད་པ་ཐམས་ཅད་ནི་དངོས་གྲུབ་བོ། །ཡེ་ཤེས་ལྔ་དང་འབྱུང་བ་ལྔ་ནི་དབུགས་ཏེ། ཁ་དོག་ལྔ་དང་
གང་དེའི་རང་བཞིན་དུ་ལྡན་པའོ། །དེའི་འོད་ཀྱི་གོང་བུ་ལྟ་བུར་རྡོ་རྗེ་ལས་བྱུང་ནས་སྣ་རྩེ་ལ་བསྒོམ་སྟེ། ཁ་དོག་ལྔ་པ་རིན་པོ་ཆེ་ཞེས་པ་ནི་ཕྱི་ནང་གི་འཁོར་ལོ་དང་ལྡན་པའི་ངོ་བོ་སྟེ་དེས་ནི་ཕྲ་མོའི་སྦྱོར་བ་གསུངས་སོ། །ཇི་སྟེ་དེ་བཞིན་དུ་འགྱུར་ཞིང་ཉམས་ན་སླར་ཡང་གཟུང་བ་གསུངས་པ།
རང་སྔགས་ཞེས་པ་ལ་སོགས་པ་སྟེ། དེ་ལས་ཉམས་པའི་རྣལ་འབྱོར་པས་ཕྲ་མོའི་གཙོ་བོ་རང་གི་ངོ་བོ་ཡེ་ཤེས་སེམས་དཔའི་སྙིང་ལ་ས་བོན་བཀོད་པའི་ཐིག་ལེ་ལ་དབུགས་ཡེ་ཤེས་ཀྱི་འོད་དུ་བསྒོམས་ནས་སྔར་གྱི་རིན་པོ་ཆེ་དེ་སླར་ཡང་གཟུང་ཞེའོ། །དེས་ཡང་མཚན་མ་དབྱུང་སྟེ་དེ་ནས་
དབུགས་དེ་རྡོ་རྗེའི་ལམ་ནས་པདྨ་ལ་སྤྲོའོ། །ཅི་སྟེ་དེ་ལས་ཀྱང་ཉམས་ན་དེ་ནི་དབང་པོ་ཤིན་ཏུ་རྟུལ་བས་ཕྱི་རོལ་ལས་ཀྱི་ཕྱག་རྒྱ་མ་བཙལ་ཏེ་ལེའུ་བདུན་པ་ལྟར་སྦྱར་ནས་ཡང་དེའི་ཚུལ་དུ་སྤྲོས་ནས་སོ་སོར་སྣང་བ་ནི་རྗེས་སུ་དྲན་པའོ། །ཏིང་ངེ་འཛིན་གསུངས་པ་ཐབས་དང་ཞེས་པ་ལ་སོགས་པ་སྟེ།

ཡེ་ཤེས་ཐམས་ཅད་ལ་དབང་ཐོབ་པས་དངོས་པོ་ཀུན་བསྡུས་ཏེ་གོང་བུ་རྡོ་རྗེ་ལས་བྱུང་ནས་ཤིན་ཏུ་ཕྲ་བའི་རྡུལ་ལྟ་བུའི་ནང་དུ་ལྷའི་གཟུགས་རྣམས་ཀྱི་ཡེ་ཤེས་སྐད་ཅིག་མས་རྫོགས་པའི་ཚུལ་དུ་གཞན་ལ་ཕན་པའི་དོན་དུ་སྤྲོ་བ་དང་བསྡུ་བ་དག་བྱེད་པ་དམ་པའི་མཚན་མ་ཐོབ་པ་ནི་
ཏིང་ངེ་འཛིན་ནོ། །དེ་རྣམས་ཀྱི་ཡོན་ཏན་གསུངས་པ་སོ་སོར་སྤོང་བ་ཞེས་པ་ལ་སོགས་པའོ། །དེ་ལྟར་ཐུན་མོང་གི་བསྙེན་པ་གསུངས་ནས། དེའི་ཞར་ལ་ཐུན་མོང་དེ་ཁོ་ནའི་སྒྲུབ་པའི་ངོ་བོ་དྲག་ཤུལ་གསུངས་པ། ཟླ་བའི་རྡོ་རྗེ་ཞེས་པ་ལ་སོགས་པའོ། །དེ་ལ་སྙིང་ལ་གནས་པའི་ཟླ་བ་ལ་
སེམས་ཀྱི་ངོ་བོའི་ས་བོན་བཀོད་ནས་དེ་ལས་འཕྲོས་པའི་སྔགས་རང་དང་འདྲ་བའི་གཟུགས་ཀྱི་མཚོན་གྱིས་རང་གི་དཀྱིལ་འཁོར་འདུས་པའི་ལྷ་རྣམས་དྲངས་ནས་མཆོད་པ་ལ་སོགས་པའི་ཆོ་ག་སྦྱར་ཏེ་རང་གི་ཚིགས་བཅད་བརྗོད་ནས་དེ་རྣམས་སེམས་དེ་ལ་ཐིམ་ནས། སེམས་དེ་རྣམས་འོད་ཟེར་
རྣམ་པ་ལྔ་གསལ་བར་འབར་བའི་ཡེ་ཤེས་སུ་བྱས་པ་ནི་ཉེ་བར་སྒྲུབ་པ་ཞེས་བརྟགས་ཏེ། རང་གི་བྱང་ཆུབ་ཅེས་པས་ནི་རིག་མ་ལ་སོགས་པའི་ཚིགས་བཅད་མི་བརྗོད་པའི་དོན་ཏོ། །འདི་ཡང་ཆེད་དུ་སྒྲུབ་པས་གཙོར་གསུངས་ཀྱི་ཐམས་ཅད་སྦྱར་རོ། །དེ་ལྟ་བུ་དེས་བརྟན་པའི་མཚན་མ་མཐོང་
ནས་འདོད་པ་ལ་ལོངས་སྤྱོད་ནས་ཟླ་བ་དྲུག་དང་དེས་མ་འགྲུབ་ན་བཅོ་བརྒྱད་དུ་བརྩམ་ཞེས་ཏེ། དེ་བཞིན་གྱིས་ནི་གཞན་དུ་བཤད་དོ། །གཉིས་བ་ཞེས་པ་ནི་ཞི་བ་དང་དྲག་ཤུལ་ཞེའོ། །མཐོང་བར་མ་གྱུར་ཞེས་པ་ནི་ལྷའི་གཟུགས་ཀྱི་ཡེ་ཤེས་སྐད་ཅིག་གིས་བརྟན་པར་མ་མཐོང་བའོ། །མ་
གྲུབ་ཅེས་པ་ནི་སྐུ་གསུམ་གྱི་སེམས་འོད་འབར་བའི་བྱང་ཆུབ་པའོ། །དེ་ལྟར་ཡང་མ་གྲུབ་ན་སྒྲུབ་པའི་ངོ་བོ་དྲག་ཤུལ་ཏེ་དགུག་པ་ལ་སོགས་པ་བྱས་ནས། རང་གི་རིགས་ཀྱི་ཁྲོ་བོའི་ཕུར་པས་མནན་ནོ། །དབང་དུ་བྱ་དང་སྲུང་བ་ཡང་། །ཞེས་པ་ནི་རྩ་བ་ལས་བཤད་པའི་དབང་དུ་བྱས་པས་ཀྱང་བསྒྲུབ་
བོ་ཞེས་ཏེ་སྲུང་བ་ཡང་མཱ་མ་ཀཱིས་གཉི་ག་ལ་བྱའོ་ཞེས་པའི་དོན་ཏོ། །དེ་ལྟར་འདས་མ་ཐག་པ་དེ་གཉིས་ནི་ཏིང་ངེ་འཛིན་གྱི་ཆོ་གར་མངོན་ནོ། །གོང་དུ་བཤད་པའི་བསམ་གཏན་དེ་སྦྱོར་བ་གཉིས་ཀྱི་རྣམ་པ་གསུངས་པ། འདོད་ཆགས་ཆེན་པོའི་ཚུལ་ཞེས་པ་ལ་སོགས་པའོ། །དེ་ཡང་འདོད་ཆགས་

ཆེན་པོའི་ཚུལ་ལ་སོགས་པ་ནི་ལེའུ་དང་པོར་བཤད་དོ། །དེའི་རིམ་པའི་ཆོ་གས་བདུད་རྩིར་ཞུ་བ་ལ་གོང་དུ་ཕྱུང་བའི་བུད་མེད་བཞིས་བསྐོར་རོ་ཞེས་གསུངས་པ། དཀྱིལ་འཁོར་ཕྱག་རྒྱ་བཞི་དག་གིས། །དེ་ཡང་ཡོངས་སུ་བསྐོར་བ་བརྟག །ཅེའོ། །བདག་ཉིད་དབུས་སུ་གནས་བྱས་ཞེས་པ་ལ་སོགས་
པས་ནི་འདི་ལྟར་གསུངས་ཏེ། ལྷ་མོའི་དབུས་ན་གནས་པ་དེས་བསྐུལ་མ་ཐག་ཏུ་ཡེ་ཤེས་ཀྱི་དཀྱིལ་འཁོར་ཐམས་ཅད་བསྡུས་ཏེ་ཀུན་གྱི་ངོ་བོར་བྱས་ནས་བྱང་ཆུབ་དེ་བསྒོམ་ཞེའོ། །དེ་ནས་ཡང་དེ་ལ་བསྐུལ་བ་ཁོ་ནའི་ཕྱིར་ཡེ་ཤེས་ལྟ་བུའི་སྐུར་བསྒོམ་པ་གསུངས་པ། རྣམ་བཞིའི་དབྱངས་ཀྱིས་
བསྐུལ་བ་ཡིས། །ཞེས་པ་ལ་སོགས་པའོ། །དེའི་ཁ་དོག་ནི་མ་ངེས་ཏེ་ལྷག་མའི་ཆ་གང་འདོད་པས་དེ་འགྱུར་རོ། །དེས་ནི་མཆོག་གི་བསྙེན་པ་གསུངས་ནས། ཉེ་བའི་སྒྲུབ་པ་ལ་སོགས་པ་གསུངས་པ། དེ་བཞིན་རོ་ཡི་ཐུགས་སུ་འགྱུར། །ཞེས་པ་ལ་སོགས་པ་སྟེ། རོའི་མཐུས་ཐུགས་
ནི་ཉེ་བའི་སྒྲུབ་པ་དང་སྒྲུབ་པའི་རོ་བསྒོམ་ཞེའོ། །རང་གི་རྒྱུས་ཀྱང་དབང་བསྒྱུར་བ། །ཞེས་པ་ནི་སྒྲུབ་པ་ཆེན་པོའོ། །དེ་ལ་རྒྱུ་དེ་ནི་གཞིའི་ངོ་བོའི་འབྲས་བུ་ཁོ་ནས་བྱེ་བྲག་ཏུ་འགྱུར་རོ། །སྒྲུབ་པ་ཆེན་པོ་འདི་ཁོ་ན་ལས་ལེའུ་བཅུ་བཞི་པའི་ཚིག་གི་དོན་ཞར་ལ་འོངས་པ་གསུངས་པ། འཁོར་ལོས་
སྒྱུར་བའི་ཞེས་པ་ལ་སོགས་པའོ། །དེ་ནི་བསྙེན་པ་བདག་གི་ཆོ་ག་ཤེས་པ་ལ་བཞིར་ཕྱེ་བ་ལ་ཆུང་ངུའི་བསྙེན་སྒྲུབ་བོ། །རིག་མའི་ཆོ་ག་ཉེ་བའི་སྒྲུབ་པ་ལ་བཞིར་ཕྱེ་བ་གསུངས་པ་གསང་སྔགས་ཀྱིས་ནི་ཞེས་པ་ལ་སོགས་པ་སྟེ། དེ་ལྟར་ཡིན་ན་ཡང་དེ་རང་དང་དུས་གཅིག་ཏུ་ས་བོན་དེ་ཁོ་ན་ལས་
བསྐྱེད་པ་གསུངས་པ་གསང་སྔགས་ཀྱིས་ནི་ཞེས་སོ། །ཐབས་ཀྱི་རྒྱ་ཞེས་པ་ནི་དེའི་ཡེ་ཤེས་སེམས་དཔའ་ཡང་ཕོའི་ངོ་བོ་ཞེས་ཏེ། གཟུགས་ཀྱི་ནི་མོའི་ཚུལ་ལོ། །ཆོ་ག་འདིའི་ཚུལ་ཞེས་པ་ནི་ཡན་ལག་བཞི་པོ་དེ་རང་གི་ཆོ་ག་ཁོ་ན་ལྟར་བྱའོ་ཞེའོ། །ཡེ་ཤེས་ནི་རིག་མའོ། །ལུས་ནི་བདག་
གོ། །ལུས་དང་ངག་ཡིད་རྡོ་རྗེ་དག །གཉིས་སུ་མེད་པར་བྱས་ཏེ་བསྒྲུབ། །ཅེས་པ་ནི་དེའི་གཉིས་སུ་མེད་པ་ཁོ་ན་ལ་སྒྲུབ་པར་བརྟགས་སོ་ཞེས་པའི་དོན་ཏོ། །འདི་ཡང་ཡན་ལག་བཞི་ནི་འོག་ནས་སྟོན་ཏོ། །དེ་ལྟར་འདོད་པ་ཆེན་པོའི་ཚུལ་ནས་ཐུག་པ་འདི་ནི་གཉིས་ལས་དང་པོའི་སྦྱོར་

བའོ། །ད་ནི་ཆེན་པོ་སྟོན་ཏེ་གོང་དུ་སྨོས་པའི་ཞེས་པ་ལ་སོགས་པའི་དོན་ཏོ། །རིམ་པ་ཁོ་ནས་རྒྱལ་བ་མཆོག་གི་ལྷ་རྣམས་རང་དང་འདྲ་བའི་ཡན་ལག་བཞི་དང་ལྡན་པར་ཕྱུང་བ་ལ་སྒྲུབ་པ་ཆེན་པོར་འདོད་ཅེས་པ་འདི་ཡིན་ནོ། །དེ་ཁོ་ནའི་ཡན་ལག་བཞི་གསུངས་པ། བསྙན་
དུས་གཙུག་ཏོར་ཆེན་པོའི་ཞེས་པ་ལ་སོགས་པ་སྟེ། གཙུག་ཏོར་ཆེན་པོ་ནི་བདག་པོའོ། །དེའི་ཤེས་རབ་དང་སྦྱོར་བ་ལས་བྱུང་བ་དེ་བསྙེན་པ་ཞེས་ཏེ། དེས་ན་སྒྲུབ་པ་ཆེན་པོར་འདོད་པ་འདི་རྣམས་ནི་བསམ་གཏན་གྱི་ཡན་ལག་སྤྱོད་པར་འདུས་ཏེ་དེའི་འབྲས་བུའི་རིམ་པ་ཡིན་པའི་ཕྱིར་རོ། །གཟུགས་
ནས་ཞེས་པ་ནི་ཉེ་བར་སྒྲུབ་པ་འདི་ནི་གཟུགས་ནས་བརྩམས་ཏེ་བྱ་བར་གསུངས་ཏེ་རྣམ་པར་ཤེས་པ་རང་གི་ངོ་བོར་གཟུང་བའོ། །དེ་ནི་སྔར་རང་ལ་ཐིམ་པར་བྱ་བ་མ་ཡིན་ཞེས་པའི་དོན་ཏོ། །ཆོ་ག་བཞིན་ཞེས་པ་ནི་གོང་དུ་བཤད་པའི་ཆོ་ག་བསྐུལ་བ་དང་སྔགས་མ་གཏོགས་པའོ། །བྱེ་བྲག་ཅེས་པ་ནི་བཞི་
ལ་ཆེ་འབྲིང་གི་ཡན་ལག་བཅུ་དྲུག་ཏུ་ཕྱེ་བ་སྟེ་རྩ་བར་བཤད་པ་བཞིན་ནོ། །ད་ནི་སྒྲུབ་པའི་ཡན་ལག་བཞི་མཆོག་ལ་སྦྱར་ཏེ་གསུངས་པ། བསྒྲུབ་བྱ་ཞེས་པ་ལ་སོགས་པ་སྟེ། ཚུལ་ཞེས་པ་ནི་ཧཱུཾ་གིས་རྡོ་རྗེ་བསྐྱོད་པ་ལ་སོགས་པ་དེ་ཉིད་ཡང་དག་པའི་ཐབས་ཡིན་ནོ་ཞེས་པའི་ཐ་ཚིག་གོ། །རང་བཞིན་གྱིས་
ཞི་བའི་བདེ་བ་དེ་ཁོ་ན་སྒྲུབ་པ་ཆེན་པོ་སྟེ་མཆོག་ཡིན་པས་སོ། །འདིར་བཤད་པ་བཞི་པོ་འདི་ནི་ལས་ཀྱི་ཕྱག་རྒྱ་དང་སྦྱོར་བ་ཀུན་ལ་ཡང་ཐུན་མོང་དུ་གྱུར་པའོ། །དེ་ལྟར་བསམ་གཏན་གྱི་སྦྱོར་བ་གཉིས་གསུངས་སོ། །ལས་ཀྱི་མཆོག་གི་དབུགས་དགག་གཏོང་བ་ལ་སོགས་པས་བསྟན་ཏེ། དེས་ན་
ཡན་ལག་དྲུག་པོ་ཆ་དང་བཅས་ཏེ་ལས་དང་པོ་པ་ལ་སོགས་པའི་སྦྱོར་བ་གསུམ་གསུངས། དེ་ལ་ཆ་ནི་ཐིག་ལེ་དང་བཟླས་པ་སྟེ་དེ་ལྟར་ཡང་བཟང་པོ་ཞབས་ཀྱིས་གསུངས་པ། ཡེ་ཤེས་སེམས་དཔའི་སྙིང་པོ་ཡི། །ཐིག་ལེ་རང་སེམས་འོད་བཀོད་དེ། །སྔགས་ཀྱི་རྣམ་ཤེས་བསྒོམ་པ་ནི། །སྦྱོར་བའི་ཆ་
ཞེས་བཤད་པ་ཡིན། །བྱིང་བའི་སེམས་ལས་སློང་བ་ཡི། །དེ་བཞིན་བཟླས་པའི་ངོ་བོ་ཡང་། །ཞེས་སོ། །ཐབས་བྱའི་ལན་གསུངས་པ། དཔལ་ལྡན་ཞེས་པ་ལ་སོགས་པ་སྟེ་གོང་དུ་བསྟན་པའི་ཞི་བ་དེ་ཁོ་ན་སངས་རྒྱས་ཀུན་གྱི་བདག་ཉིད་དང་གནས་དང་ཆོས་ཉིད་ཡིན་ཞེས་ཏེ་བཅོ་ལྔ་པ་ལས་

གསུངས་པ། རང་གི་སེམས་ནི་བརྟག་པ་ཞེས་པ་ལ་སོགས་པའི་ཚིགས་སུ་བཅད་པ་གཅིག་གསུངས་སོ། །བཀའ་ཇི་ལྟར་སྩལ་པའི་ལན་གསུངས་པ། གང་ལས་དང་ཞེས་པ་ལ་སོགས་པ་སྟེ། ཞི་བ་ལ་སོགས་པའི་ལས་གང་དང་མཐུན་པའི་རྟག་པ་ལ་སོགས་པའི་སྦྱོར་བ་བྱས་ཏེ།
དེའི་ལས་དང་རྗེས་སུ་མཐུན་པའི་ཕྲེང་བའི་སྔགས་དང་། ཤཱནྟིཾ་ཀུ་རུ་ཨོཾ་ཞེས་པ་ལ་སོགས་པའི་བསྐུལ་ཚིག་གི་ཆོ་ག་ཇི་སྐད་གསུངས་པ་ལྷ་ཐམས་ཅད་ལ་བཀའ་སྩལ་པའོ། །ལས་དེ་ལ་ཡང་སྲུང་བ་གསུངས་པ། དམ་ཚིག་མི་ཟད་པསྙོམ་པར་བྱ། །ཞེས་པ་ལ་སོགས་པའོ། །ཡང་
ན་དཀྲུགས་པ་ལ་ལྟོས་པ་ཉིད་ཀྱིས་ཆོས་ཀྱི་འབྱུང་གནས་ཀྱི་སྐབས་སུ་སྦྱར་རོ། །གདུག་པའི་སེམས་ཅན་ལ་ལས་སྣ་ཚོགས་ཀྱི་ལན་གསུངས་པ། གང་ཞིག་བསྒྲུབ་བྱའི་ལུས་ཀུན་ཡང་། །ཞེས་པ་ལ་སོགས་པའོ། །ཡང་ཞེས་པའི་དོན་ནི་ཕྱོགས་བཅུའི་སེམས་ཅན་ཐམས་ཅད་
བསྡུའོ། །དེ་ནས་སེམས་ཅན་ཐམས་ཅད་ཀྱི་འཁོར་ལོ་རྡོ་རྗེ་ཕུང་པོ་དག་གིས་འདི་ནི་ཉེས་པ་ཆེན་པོ་ཞེས་རང་གིས་བསྒོ་ནས། དེའི་གཞོམ་པའི་སྦྱོར་བ་བྱ་བ་ནས་ཕུར་བུའི་བྱ་བ་ལས་གསུངས་པ། དངོས་པོ་ཐམས་ཅད་དྲངས་ནས་ནི། །རང་གི་ཕུར་བུས་གདབ་པར་བྱ། །ཞེའོ། །དེ་ལྟར་མདོར་
གསུངས་ནས་དེའི་ཆོ་ག་ཞིབ་ཏུ་གསུངས་པ། ཇི་སྐད་གསུངས་པའི་རྫས་ལྡན་པ། །ཞེས་པ་ལ་སོགས་པ་སྟེ་རྩ་བ་ལས་བཤད་པའི་རྫས་ཀྱིས་ལིངྒ་བྱས་ནས་ཁྲོ་བོའི་སེམས་ཀྱིས་མནན་པའོ། །དེའི་རྗེས་ལ་ནང་གི་མངོན་སྤྱོད་གསུངས་པ། དེ་ནས་ཁྲོ་བོ་ཞེས་ཏེ། བཀའ་ནོད་པ་ནི་ཆོས་
ཀྱི་རྗེ་བཀའ་ཅི་སྩལ་ཞེས་ནོད་པའོ། །དེ་ཡང་གང་འོད་ལས་སྤྲུལ་པའི་རྡོ་རྗེ་སྲིན་པོ་བྱ་རྒོད་ལ་སོགས་པ་དེའི་འཁོར་གྱིས་བསྐོར་བ་ཕྲེང་བ་དང་བསྐུལ་བའི་སྔགས་ཀྱིས་ཕྱུང་སྟེ། ཀྱོ་བ་དང་ཞགས་པས་བཟུང་ཞིང་བཅིངས་ཏེ་ཁྲིད་ནས་ཐོ་བ་ལ་སོགས་པས་བརྡེག་ཅིང་བསྐྲད་པ་དང་གཞུག་པ་
བྱས་ནས་གསད་པའི་ཕྱིར་སྦྱོར་བ་ཞེས་ཇི་སྙེད་པའོ། །དེ་ཡང་སྒྱུ་འཕྲུལ་དྲ་བ་ལས་གསུངས་པ། གསོད་པའི་ཡེ་ཤེས་ལས་སྤྲུལ་པ། །ནང་གི་ཡང་ནི་ཞེས་པ་ལ་སོགས་པ་སྟེ་དེ་ཁོ་ན་འདིར་བལྟའོ། །དེའི་རྗེས་ཐོགས་ལ་ཕྱིའི་མངོན་སྤྱོད་ཕུར་པ་གདབ་པ་གསུངས་པ། དེ་ནས་བསྒྲུབ་བྱ་དྲང་ཞེས་པ་ལ་

སོགས་པ་སྟེ། དེའི་ལིངྒ་ལ་གཞུག་པ་དང་བཅིང་བ་ལ་སོགས་པ་བྱས་ཏེ་སྔགས་ཀྱིས་བྱིན་གྱིས་བརླབས་པའི་ཕུར་བུས་གདབ་བོ། །ལིངྒ་དེ་ཁོ་ན་ལ་ཡུལ་གྱི་འཚེ་བ་ལ་སོགས་པ་མངོན་སྤྱོད་བྱ་བར་གསུངས་པ། དེ་ནས་བསྒྲུབ་བྱ་དྲང་ཞེས་པ་ལ་སོགས་པ་སྟེ། དེ་
ལྟར་ཕུར་པ་བཤད་ནས་གཉིས་ཀྱང་གསུངས་པ། དེ་བཞིན་སྦྱོར་བ་ཐམས་ཅད་ནི། །ཞེས་ཏེ་ཆོ་ག་ཇི་སྐད་གསུངས་པ་ཞེས་པ་དེ་ནི་ལེའུ་བཅུ་བཞི་པ་དང་བཅོ་ལྔ་པར་རོ། །ཐབས་ནི་ལུས་ཀྱི་ལས་སོ། །སྔགས་ནི་ངག་གི་ལས། སྦྱོར་བ་ཡིད་ཀྱིའོ། །བྱེ་བྲག་ཅེས་པ་ནི་གཉིས་ཀྱི་ངོ་བོ་སྟེ་དེ་ཁོ་ན་གསུངས་པ།
མཚན་མ་མནན་ནས་བཟླས་པའམ་གདུག་བའི་སེམས་ཅན་སྦྱིན་སྲེག་ཏུ་དབུལ་ལོ། །ཕྱིའི་ངོ་བོ་དེ་རྣམས་ཀྱང་སྒྱུ་འཕྲུལ་དྲ་བ་ལས། མི་རུས་ལས་བྱུང་ཕུར་བུ་འམ། །ཞེས་པ་ལ་སོགས་པའོ། །དེ་ལ་ཕུར་བུ་བཟླས་པ་ནི་ལེའུ་བཅུ་བཞི་པར་གསུངས་ལ་ས་བླང་བ་ནི་བཅོ་
ལྔ་པར་བཤད་དེ། ནང་གི་མངོན་སྤྱོད་དེ་འོག་མ་གཉིས་ལ་ཡང་ཤེས་པར་བྱའོ། །དེ་ནས་ཞེས་པ་ལ་སོགས་པ་སྡུད་པ་པོའི་ནན་ཚིག་ཏུ་གསུངས་ནས། བྱང་ཆུབ་སེམས་དཔའ་རྣམས་ཀྱིས་བསྟོད་པ་སྔོན་དུ་བྱས་ནས་བཤད་པ་ཁོ་ན་ལ་ཐེ་ཚོམ་ཞུས་པས་གསུངས་པ། དེ་ནས་
ཞེས་པ་ལ་སོགས་པ་སྟེ། ཐམས་ཅད་མཛད་ཅེས་པ་ནི་མངོན་སྤྱོད་གཙོར་བྱས་ནས་གསུངས་པའོ། །སྐུ་གསུང་ཐུགས་ནི་སངས་རྒྱས་ཀྱིའོ། །ལུས་ངག་ཡིད་ནི་སེམས་ཅན་ཏེ་ཐམས་ཅད་སངས་རྒྱས་ཀྱི་ངོ་བོར་མཉམ་པས་ན་བསྒྲུབ་བྱ་དང་སྒྲུབ་བྱེད་ག་ལ་ཡོད་ཅེས་བྱ་བ་འདི་ནི་ཐེ་ཚོམ་
གཅིག་ཡིན་ནོ། །གཉིས་པ་ནི་མཉམ་པ་ཉིད་ཀྱིས་སྒྲུབ་པ་པོ་དེ་ནི་སངས་རྒྱས་གསོད་པ་ཡིན་ཏེ། དེས་ན་ཇི་ལྟར་རང་སྡིག་པས་མི་གོས་ཏེ་སྡིག་པ་ཤིན་ཏུ་ཆེ་བས་འབྲས་བུ་ཇི་ལྟར་ཐོབ་སྙམ་པ་ཡིན་ནོ། །དེ་ནས་ལེགས་སོ་ཞེས་སྔོན་དུ་གསུངས་ནས་ལན་གསུངས་པ་དེ་ནས་ཞེས་པ་ལ་
སོགས་པའོ། །དེ་ལ་སེམས་དཔའ་ཆེ་ཞེས་པ་ནི་བོད་པའོ། །བདག་ཉིད་ནི་སྐུའོ། །དབྱངས་ནི་ངག་གོ། །ཆེ་བ་ནི་ཐུགས་སོ། །གཉིས་སུ་ཡོད་པར་གསུངས་པ། བྱང་ཆུབ་ཅེས་པ་ལ་སོགས་པ་སྟེ་སློབ་དཔོན་དེ་དང་བྱང་ཆུབ་རྡོ་རྗེ་འདྲ་སྟེ་སངས་རྒྱས་ཀུན་གྱི་བདག་ཉིད་ཡིན་ལ། དེ་ལྟ་

བུ་དེས་སྒྱུ་མ་ལྟར་ཤེས་ནས་སྤྲོ་བ་དང་བསྡུ་བ་དག་བྱེད་དེ། དེས་ན་སྒྱུ་མའི་རྣམ་པ་ལྟར་གཉིས་སུ་སྣང་བའི་དོན་ཏོ། །འབྲས་བུ་གསུངས་པ་དེ་ནས་ཞེས་ཏེ་སྒྱུ་མ་ནི་ཡང་དག་པར་མེད་པས་བསོད་ནམས་དང་སྡིག་པ་མེད་དོ། །གང་ཡང་མེད་པ་ནི་བྱང་ཆུབ་ཉིད་དུ་འགྱུར་བའི་དོན་ཏོ། །བསྒྲུབ་
བྱའི་ཡང་འབྲས་བུ་གསུངས་པ། མགོན་པོ་དེ་ཡིས་ཞེས་པ་ལ་སོགས་པ་སྟེ་གཉིས་སུ་མེད་པའི་ཡེ་ཤེས་ཀྱིས་རྒྱས་བཏབ་པས་ན་ཡོན་ཏན་དེ་དག་ཏུ་འགྱུར་རོ། །སྒྲུབ་པ་ཆེན་པོའི་མཐའ་ནི་སྒྲུབ་པ་ཆེན་པོ་སྟེ་ཡང་ཞེས་པ་ནི་ལས་ནི་མཆོག་ཀྱང་བྱས་ནས་ལས་བྱ་ཞེས་སོ། །
དེ་ནས་བྱང་ཆུབ་སེམས་དཔའ་རྣམས་ཀྱིས་ལེགས་པར་བརྗོད་ནས་ངོ་མཚར་གསུངས་པ་དེ་ནས་ཞེས་པ་ལ་སོགས་པའོ། །མགོན་པོ་ཞེས་པ་ནི་བོད་པའོ། །ཐུབ་པ་དང་ཆོས་དང་ཐུགས་རྗེ་ནི་སྐུ་ལ་སོགས་པ་རིམ་བཞིན་ནོ། །ཀྱེ་མ་ནི་འདི་ལ་ངོ་མཚར་བའོ། །དེ་ནས་བྱང་ཆུབ་སེམས་
དཔའ་དག་ཡིད་ཆེས་ནས་དེ་བཞིན་གཤེགས་པས་ནན་ཚིག་ཏུ་གསུངས་པ་དེ་ནས་ཞེས་པ་ལ་སོགས་པའོ། །ཅིའི་ཕྱིར་འཇིགས་པར་མི་བྱ་ཞེ་ན་ཞེ་སྡང་རྡོ་རྗེ་ཞེས་ཏེ། ཞེ་སྡང་རྡོ་རྗེ་ནི་མངོན་སྤྱོད་ཀྱི་ལས་གཙོར་བྱེད་པའོ། །དེ་ཡང་གོང་དུ་སྨོས་པའི་ཚུལ་གྱིས་བྱང་ཆུབ་རྡོ་རྗེའི་རྒྱུར་འགྱུར་བས་
ན་ལས་དེ་མི་སྤང་བར་སྤྱད་པར་བྱའོ་ཞེས་པའི་དོན་ཏོ། །དེ་ལྟར་ཡང་བཟང་པོ་ཞབས་ཀྱིས་གསུངས་པ། ཇི་སྐད་གསུངས་པའི་ཆོ་ག་ཡིས། །འཇིགས་པ་མེད་པར་སྡང་རྣམས་ལ། །ཞེས་པ་ལ་སོགས་པའོ། །དེ་ལྟར་ཡང་ཐེ་ཚོམ་མེད་པར་བྱས་པས་དྲིན་ལེན་དུ་བསྟོད་པ་དེ་ནས་ཞེས་
པ་ལ་སོགས་བའོ། །དུས་གསུམ་རྡོ་རྗེ་འབྱུང་བ་ནི་རྒྱུད་དང་བོར་འགྲོ་བ་སྟེ་དེས་ན་རིགས་ནི་ཐོག་མ་ཞེས་གོང་དུ་བྱས་སོ། །སྲིད་པ་ལས་ཐར་པ་ནི་མྱ་ངན་ལས་འདས་པའོ། །སྒྲིབ་པ་ནི་ཤེས་བྱའི་སྒྲིབ་པ་ལ་སོགས་པའོ། །དངོས་པོ་ཞི་བ་ནི་དབང་པོ་ལས་འདས་པའོ། །དེ་ཁོ་ན་དབང་ཕྱུག་སྟེ་བྱང་ཆུབ་རྡོ་རྗེའོ། །
དེ་ལྟར་རང་གི་དོན་ལ་བསྟོད་ནས་གཞན་གྱི་དོན་འབྱུང་བའི་སྐུ་རྣམས་ལ་བསྟོད་པ། གང་དག་གཟུགས་དང་ཞེས་པ་ལ་སོགས་པའོ། །དེ་རྣམས་ཁོ་ན་འདོད་ཆགས་ལ་སོགས་པ་དག་ཅིང་རང་གི་རིག་མ་དང་སྦྱོར་བ་ལས་བྱུང་བའི་རིམ་པས་དངོས་གྲུབ་མཆོག་དང་ལྡན་པས་ཕྱག་འཚལ་བར་གསུངས་པ། གང་དག་འདོད་

ཆགས་ཞེས་པ་ལ་སོགས་པའོ། །གོང་དུ་སྨོས་པ་ལ་གཏོགས་པའི་ཁྲོ་བོ་རྣམས་ལ་བསྟོད་པ། དང་པོར་གཟུང་དང་ཞེས་པ་ལ་སོགས་པ་སྟེ་སེམས་དང་འབྲེལ་པ་ནི་མུན་པ་ལ་སོགས་པའོ། །གོང་དུ་སྨོས་པའི་རིམ་པས་ཕྱིན་ཅི་ལོག་གི་མུན་པ་སྟེ། དེ་དག་གཞོམ་པ་ནི་སྲིད་པ་ལ་སོགས་
པ་དང་ཤེས་བྱ་ལ་སོགས་པའི་སྒྲིབ་པ་དང་། ལྟ་བའི་རྡོ་རྗེ་ཟད་པར་བྱེད་པས་ཁྲོ་བོ་བཞི་ནི་ཞེའོ། །དེ་ལྟར་མངོན་དུ་གྱུར་པའི་སངས་རྒྱས་རྣམས་ལ་བསྟོད་ནས་དེས་ཡོངས་སུ་སྨིན་པའི་སེམས་ཅན་གང་གསང་བའི་དབང་ལ་སོགས་པ་དང་ལྡན་པ་ལ་ཡང་བསྟོད་པ་གསུངས་པ། གང་དག་ཐོག་པ་
མེད་པའི་ཞེས་པ་ལ་སོགས་པའོ། །གང་དག་དངོས་གྲུབ་ཀྱི་ཐབས་བཞི་སྒོམ་པ་དེ་ལ་ཡང་བསྟོད་པ་འདོད་ཆགས་ཞེ་སྡང་ཞེས་པ་ལ་སོགས་པའོ། །གང་མཚམས་བཞི་ལ་སྦྱོར་བ་གསུམ་སྒོམ་པའི་ལས་དང་པོ་པ་དེ་ལ་ཡང་བསྟོད་པ། གང་དག་གིས་མཚམས་ཞེས་པ་ལ་སོགས་པའོ། །གང་དག་
རྒྱུད་འདི་ཉན་པ་ལ་སོགས་པ་ལ་ཡང་བསྟོད་པ་གང་གིས་ཤིན་ཏུ་ཞེས་པ་ལ་སོགས་པའོ། །གང་དག་མངོན་སྤྱོད་ལ་སོགས་པའི་ཡུལ་དུ་གྱུར་པ་ཡང་ཡེ་ཤེས་ཀྱི་རྒྱས་བཏབ་པས་བསྟོད་པ། གང་ཞིག་བསྒྲུབ་བྱ་ཞེས་པ་ལ་སོགས་པའོ། །གང་དག་བླ་མ་ལ་ཕྱོགས་པ་དེ་དག་ཀྱང་ཤིན་ཏུ་དགེ་བས་བསྟོད་པ་གང་
དག་གིས་ཀྱང་ཞེས་པ་ལ་སོགས་པའོ། །དེ་ལྟར་བསྟོད་པས་མཉེས་པ་གསུངས་པ། བསྟོད་ཚིག་ཞི་བ་ཞེས་པ་ལ་སོགས་པའོ། །ཡང་རྒྱུད་འདི་ཐུན་མོང་མ་ཡིན་པའི་གླེང་གཞིའི་ངོ་བོར་འདོད་པ་གསུངས་པ་ལེགས་པར་གསུངས་པའི་ཞེས་པ་སྟེ། བྱང་ཆུབ་ཀྱི་སེམས་རྡོ་རྗེ་གསང་བ་གཉིས་སུ་མེད་པ་དེ་ལས་བྱུང་
ཞེས་ཏེ་འདིས་ཀྱང་ཐོག་མའོ། །དེ་ནས་ཅང་མི་གསུང་ཞེས་ཏེ་བྱ་བ་རྫོགས་ནས་གཉིས་སུ་མེད་པ་བསམ་པས་ན་ཅང་མི་གསུང་བའི་དོན་ཏོ། །འདི་ལྟར་བདག་ནི་གྲུབ་པ་མེད་ཅིང་ཤེས་རབ་མཆོག་མེད་དེ། །འོན་ཀྱང་དམ་ཆོས་ཚོལ་ལ་ཤིན་ཏུ་འབད་པ་བྱས་པ་ཡིས། །སྦྱོར་རྒྱུད་དག་དང་
བཤད་རྒྱུད་གཞན་དང་དཔོན་གཞན་བཤད་པ་དག །མང་དུ་མཐོང་ཡང་བླ་མའི་གཞུང་འདི་མཆོག་ཏུ་མཐོང་བས་བྲིས། །དེ་ལྟར་བཟང་པོ་ཞབས་སོགས་བླ་མའི་རྗེས་འགྲོ་བདག་གིས་ནི། །ཚིག་མང་སྐྱོན་གྱི་འཇིགས་པས་སྒྲ་ཡི་སྦྱོར་བ་མ་བྱས་ཤིང་། །མི་ཤེས་དབང་གིས་གང་ཡང་

འདིར་ནི་ལོག་པར་སྨྲས་པ་དག །རྡོ་རྗེ་འཛིན་ལ་སོགས་པས་བཟོད་པ་དང་དུ་བཞེས་པར་མཛོད། །དེ་ལྟར་བླ་མའི་དྲིན་ལས་བྱུང་བའི་བདག་གི་རྩོལ་བ་ཡིས། །བསྐྲུན་པའི་དགེ་བ་གང་ཡིན་དྲི་མེད་ཟླ་བ་ལྟ་བུ་དེས། །འགྲོ་བ་ཐམས་ཅད་ཐབས་དང་ཤེས་རབ་སྦྱོར་ལྡན་ཡོངས་འགྱུར་ཏེ། །ད་ལྟ་
ཉིད་དུ་དེ་ལས་བྱུང་བའི་བདེ་མཆོག་སྐུ་ཐོབ་ཤོག །རྒྱུད་ཀྱི་རྒྱལ་པོ་ཆེན་པོ་དཔལ་གསང་བ་འདུས་པའི་འགྲེལ་པ་བླ་མའི་མན་ངག་ཉིད་ལས་བྲིས་པ་དམ་པ་རྣམས་ཀྱི་སྤྱི་བོས་བླངས་པ་པཎྜི་ཏ་ཆེན་པོ་སྨྲི་ཏི་ཛྙཱན་ཀཱིརྟིས་མཛད་ཅིང་པཎྜི་ཏ་དེ་ཉིད་ཀྱིས་རང་འགྱུར་དུ་མཛད་པ་རྫོགས་སོ།། །།
༄༅༅། །རྒྱ་གར་སྐད་དུ། ཙ་ཏུར་དེ་བ་ཏི་པ་རི་པྲིཾཙྪ་བྱཱ་ཁྱ་ནཾ་ཨུ་པ་དེ་ཤ་པཽཥྚ་ཀ་ནཱ་མ། བོད་སྐད་དུ། ལྷ་མོ་བཞིས་ཡོངས་སུ་ཞུས་པའི་རྣམ་པར་བཤད་པ་མན་ངག་རྒྱས་པ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདོད་ཆེན་བཅོམ་ལྡན་དགའ་ཆེན་པོ། །བདེ་ཆེན་ཀུན་བདག་ཆགས་
ཆེན་པོ། །མགོན་པོ་རྡོ་རྗེ་སེམས་དཔའ་ལ། །བཏུད་ནས་རྣམ་བཤད་འདི་བྲིས་སོ། །རྒྱུད་དོན་བླ་མ་ལ་ཐོས་པ། །སློབ་མས་ཞུས་པས་འདི་བྱས་ཀྱང་། །འདི་ལ་སྐྱོན་ཡོད་བདག་ཉེས་ཏེ། །མཁས་པས་སླད་ནས་དཔྱད་དུ་གསོལ། །རྒྱུད་འདི་ནི་ཐམས་ཅད་གསང་བའི་མཆོག་ཅེས་བྱ་བ་སྟོང་ཕྲག་གཅིག་བཞུགས་
ཏེ། དེའི་རྒྱུད་ཕྱི་མ་ལྷ་མོ་བཞིས་ཡོངས་སུ་ཞུས་པ་འདིའོ། །འདིའི་བཤད་པ་ལ་རྟོག་པ་སྔོན་དུ་བྱེད་པའི་ཤེས་རབ་ལ་རྗེས་སུ་འབྲང་བའི་སེམས་ཅན་དད་པ་ལ་རྗེས་སུ་འབྲང་བར་བྱ་བའི་དོན་དུ་ཚིག་དང་དོན་དང་ཚིག་དང་དོན་མཚམས་འབྲེལ་པ་དང་། དགོས་པ་དང་དགོས་པའི་ཡང་དགོས་པ་ལྔ་
ཡང་གདོན་མི་ཟ་བར་བརྗོད་པར་བྱའོ། །དེ་ལ་ཚིག་ནི་གསུམ་སྟེ། གཞུང་ཚིག་དང་། ལེའུའི་ཚིག་དང་། ཚིགས་བཅད་དོ། །དེ་ལ་གཞུང་ཚིག་ནི་རྒྱུད་དོ། །ལེའུའི་ཚིག་ནི་ལེའུ་བཞིའོ། །ཚིགས་བཅད་ནི་ཚིག་རྐང་བཞིའོ། །དོན་ནི་གསུམ་སྟེ། བསྡུས་པའི་དོན་དང་། རྒྱས་པའི་དོན་དང་། ཁྱད་པར་གྱི་དོན་ཏོ། །
ལྷག་པ་བྱང་ཆུབ་ཀྱི་སེམས་ཀྱི་ངོ་བོ་བདེ་བ་ཆེན་པོ་རྡོ་རྗེ་སེམས་དཔའ་ལ་ལྷ་མོ་བཞིས་ཡོངས་སུ་བསྐོར་བ་ནི་བསྡུས་པའི་དོན་ཏོ། །ཆོས་ཀྱི་དབྱིངས་འཕྲོ་བ་དང་། ཆོས་ཀྱི་དབྱིངས་ཀྱི་རིམ་པ་དང་། ཆོས་ཀྱི་དབྱིངས་བསྡུ་བ་དང་། ཆོས་ཀྱི་དབྱིངས་ཀྱི་དོན་སྒྲུབ་པ་ནི་རྒྱས་པའི་དོན་ཏོ། །ཡིག་འབྲུ་

གཞོམ་པ་ལ་སོགས་པ་ནི་ཁྱད་པར་གྱི་དོན་ཏོ། །ཚིག་དང་དོན་མཚམས་འབྲེལ་པ་ནི་བསྡུས་པའི་དོན་གཞུང་ཚིག་དང་འབྲེལ་ཞིང་རྒྱས་པའི་དོན་ལེའུའི་ཚིག་དང་འབྲེལ་ལ། ཁྱད་པར་གྱི་དོན་ཚིགས་བཅད་དང་འབྲེལ་ཏོ། །དགོས་པ་ནི་རྣམ་པར་མི་རྟོག་པའི་བདེ་བ་ཆེན་
པོའི་ཡེ་ཤེས་མངོན་དུ་བྱ་བ་ཤིན་ཏུ་སྦྱོར་བས་སྐྱེ་བོ་རྣམས་ཀྱི་ལོག་པའི་འདོད་ཆགས་ལ་སོགས་པ་ཉོན་མོངས་པའི་སྐྱོན་ཅན་བཅོམ་ནས་ཡང་དག་པའི་འདོད་ཆགས་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཉིད་ཐོབ་པའོ། །དགོས་པའི་ཡང་དགོས་པ་ནི་སངས་རྒྱས་ཟིན་
ནས་ཀྱང་སེམས་ཅན་གྱི་དོན་བྱེད་པའོ། །འོ་ན་འདོད་ཆགས་ཁོ་ན་སྲིད་པ་ན་འཁོར་བ་ལ་འཇིག་རྟེན་པ་ལས་འགལ་བར་འདོད་ཆགས་བྱང་ཆུབ་ཀྱི་རྒྱུར་བྱས་ནས་འདི་ལྟ་བུའི་རྒྱུད་བཅོམ་ལྡན་འདས་ཀྱིས་བསྟན་པ་ཅིའི་ཕྱིར་ཞེས་སྨྲ་ན་ལན་བཏབ་པ། འདོད་ཆགས་ལ་སྤྱོད་པའི་སེམས་ཅན་
ཐམས་ཅད་ཐབས་གཞན་གྱིས་སངས་རྒྱས་ཉིད་དུ་མི་འགྱུར་ཏེ། དེ་བས་ན་སེམས་ཅན་གྱི་དོན་དུ་འདོད་ཆགས་ཡང་དག་པར་སྤྱོད་པའི་སྒོ་ནས་བྱང་ཆུབ་པ་བཅོམ་ལྡན་འདས་ཀྱིས་བསྟན་པ་སྟེ། ཅིའི་ཕྱིར་ཞེ་ན། འདོད་ཆགས་ཞེས་བྱ་བའི་ཉོན་མོངས་པ་དོན་དམ་པར་ནི་རང་བཞིན་མེད་ཅིང་མི་
དམིགས་པའོ་ཞེས་དེ་ལྟར་ཡང་དབུ་མ་ལས་གསུངས་པ། གང་ངམ་ཆགས་པ་གང་དུའམ། །ཆགས་པ་གང་གིས་སམ་ཆགས་པ། །ཆོས་དེ་དག་ནི་མི་དམིགས་ཏེ། །དམིགས་སུ་མེད་པའི་ཆགས་པ་ནི་སྐྱོན་མེད་ཅེས་སོ། །ཡང་མཉམ་སྦྱོར་ལས་ཀྱང་གསུངས་པ། ཆགས་མེད་
ཆགས་པ་དང་བྲལ་མིན། །དབུ་མར་ཡང་ནི་མི་དམིགས་ཏེ། །བུད་མེད་ཐམས་ཅད་སྒྱུ་མའི་རྒྱུ། །གཉིས་སུ་མེད་པའི་ཐེག་པའི་མཆོག །ཅེས་པའོ། །དེ་བས་ན་དེ་ཁོ་ན་བཞིན་དུ་ཞེ་སྡང་སྤྱོད་པའི་སེམས་ཅན་རྣམས་ལ་ཡང་ཕན་པའི་དོན་དུ་ཐུགས་རྗེ་ཆེན་པོ་དང་ལྡན་པའི་བཅོམ་ལྡན་
འདས་ཀྱིས་ཀྱང་སྡང་བའི་ཚུལ་ཁྲོ་བོའི་རྒྱུད་བསྟན་པའོ། །དེ་ལྟར་ཡང་དག་པའི་ཆོས་ལས་གསུངས་པ། སྣོད་མི་རུང་བའི་བུ་རྣམས་ལ། །དེ་རྣམས་སྣོད་རུང་མཛད་བཞེད་པས། །ཐུགས་རྗེ་ཁྲོ་རྒྱུད་བསྟན་པ་སྟེ། །སྡང་བ་ནོར་འདོད་མ་ཡིན་ནོ། །ཡང་མཉམ་སྦྱོར་ལས་ཀྱང་གསུངས་

པར་ཤིན་ཏུ་སྡང་ཞིང་གཏུམ་པ་ལ། ཞི་བ་ཉིད་ནི་མི་འབྱོར་ཏེ། །སྡང་བ་ཐབས་དང་ཤེས་རབ་དངོས། །དེ་བཞིན་གཤེགས་པ་ཀུན་གྱིས་མཛད། །ཅེས་སོ། །དེ་ལྟར་གཏི་མུག་ཅན་གྱི་སེམས་ཅན་རྣམས་ལ་ཡང་གཏི་མུག་གི་དབང་གིས་བདག་དང་བདག་གིས་འཛིན་པ་ལ་སོགས་པའི་ཕྱིན་
ཅི་ལོག་གི་ལྟ་བ་གཞོམ་པའི་དོན་དུ་ཉན་ཐོས་ཀྱི་ཐེག་པ་ལ་གང་ཟག་ལ་བདག་མོད་པའི་དོན་བསྟན་པ་དང་། བྱང་ཆུབ་སེམས་དཔའི་ཐེག་པ་ལ་ཆོས་ལ་བདག་མེད་པའི་དོན་བསྟན་པ་དང་། བླ་མ་དང་བཅས་པའི་སངས་རྒྱས་ལ་ཆོས་ཐམས་ཅད་བདག་མེད་པར་བསྟན་པ་དང་། རྡོ་རྗེའི་ཐེག་
པ་ལ་མ་རིག་པ་གཞོམ་པའི་དོན་དུ། ཤེས་རབ་ཀྱི་འཁོར་ལོ་བསྒོམ་པ་ལ་སོགས་པ་ཞི་བའི་ཕོ་གཟུགས་ཀྱི་ལྷ་བསྒོམ་པ་ལ་སོགས་པ་བཅོམ་ལྡན་འདས་ཀྱིས་བསྟན་ཏོ། །དེ་ལྟར་ཡང་ཐམས་ཅད་གསང་ཆེན་རྒྱུད་ལས་གསུངས་པ། ཆོས་བདག་མེད་པའི་སྦྱོར་བ་ཡིས། །བཅོམ་ནས་རང་
ཉིད་འཇིགས་བྱས་ཏེ། །རང་སེམས་ཁོ་ན་སངས་རྒྱས་ཉིད། །རང་སེམས་ཁོ་ན་ཤེས་པར་བྱ། །ཞེས་སོ། །དེ་ལྟར་ཡེ་ཤེས་ཞབས་ཀྱིས་ཀྱང་གསུངས་པ། ཡང་དག་བྱང་ཆུབ་སེམས་བསྐྱེད་ནས། །བྱམས་པ་ཆེན་པོར་རབ་འབྱོར་ཏེ། །ཆོས་ཐམས་ཅད་ལ་བདག་མེད་པར། །དེ་ལྟར་ཤེས་ན་
རྣམ་པར་གྲོལ། །ཞེས་སོ། །དེ་བས་ན་འདོད་ཆགས་དང་། ཞེ་སྡང་དང་། གཏི་མུག་ཅན་གྱི་སེམས་ཅན་རྣམས་ལ་དུ་མའི་ཐབས་ཀྱིས་སེམས་ཅན་གྱི་དོན་བྱེད་པ་ལ་འགལ་བ་མེད་དོ། །དེ་ལྟར་ཡང་བཀྲ་ཤིས་སྒྲུབ་པ་ལས་གསུངས་པ། གང་དང་གང་གིས་བཅིངས་འགྱུར་བའི། །སྐྱེ་བོ་དྲག་
པོའི་ལས་རྣམས་ཀྱི། །ཐབས་དང་བཅས་ན་དེ་ཉིད་ཀྱིས། །སྲིད་པའི་བཅིང་བ་ལས་གྲོལ་ལོ། །ཞེས་པའོ། །དེ་ལྟར་ཡང་དེ་ཉིད་བསྡུས་པའི་རྒྱུད་ལས་གསུངས་པ། ཇི་ལྟ་ཇི་ལྟར་འདུལ་འགྱུར་བ། །སེམས་ཅན་རང་བཞིན་དུ་ནི་འགྲོ། །དེ་ལྟ་དེ་ལྟར་སེམས་ཅན་དོན། །འདོད་ཆགས་ལ་སོགས་
དག་པས་བྱ། །ཞེས་སོ། །དེ་ལྟ་བས་ན་རྣལ་འབྱོར་མའི་དེ་ཁོ་ན་ཉིད་ཀྱི་རྒྱུད་འདི་ཡང་འདོད་ཆགས་ཅན་ལ་ཕན་འདོགས་པའི་དོན་དུ་བསྟན་ཏོ། །དེ་ནས་དང་ལ་སྡུད་པ་པོ་རྣམས་ཀྱི་རྒྱུད་དག་པར་བྱ་བའི་དོན་དུ་ཕུན་སུམ་ཚོགས་པ་བྲིས་པ། ལྷ་མོ་བཞི་དང་མཉམ་ལྡན་ཞིང་། །སངས་རྒྱས་

གཟུགས་ཀྱིས་ཉེར་བརྒྱན་པ། །ཤིན་ཏུ་དགའ་བའི་སྦྱོར་ཆེན་ལ། །རྡོ་རྗེ་སེམས་དཔའ་ཆེར་བཞུགས་ཏེ། །ཞེས་ཏེ། དེ་ལ་ལྷ་མོ་བཞི་ཞེས་པ་ནི། སྡུད་པ་པོ་ཕུན་སུམ་ཚོགས་པ་སྟེ། འོག་ནས་སྤྱན་མ་ལ་སོགས་པ་བཞིས་ཞུས་པའི་ཕྱིར་རོ། །ལྷ་མོ་ཞེས་པ་
ནི་རང་གི་འོད་ལ་ལོངས་སྤྱོད་པ་དང་། ལྷའི་རིས་སུ་གྱུར་པའི་ཕྱིར་རོ། །ལྷ་མོ་ཡང་དེ་བཞི་ཡང་དེ་ཉིད་པས་ལྷ་མོ་བཞི་ཞེས་པ་ནི་གསུམ་དང་ལྔའི་གྲངས་སུན་ཕྱུང་བ་སྟེ་རང་བཞིན་ཚད་མེད་པ་བཞི་དང་འབྱུང་བ་ཆེན་པོ་བཞིའི་ངོ་བོ་ཉིད་ཀྱི་ཕྱིར་རོ། །ལྷ་མོ་དེ་དག་གིས་ཡོངས་སུ་བསྐོར་བ་ནི་
དེ་དག་མཉམ་ལྡན་ཞེས་པ་སྟེ། ལྷ་མོ་དེ་བཞིས་ཡང་དག་པར་ལྡན་པའི་ཕྱག་རྒྱ་བཞི་པའི་དཀྱིལ་འཁོར་རོ། །འདི་ལྟ་སྟེ། དབུས་ཀྱི་གཙོ་བོ་ནི་རྡོ་རྗེ་སེམས་དཔའ་ཡབ་ཡུམ་བཞུགས་པ་ལས་མེ་མཚམས་ན་སྤྱན་མ་དང་། བདེན་བྲལ་གྱི་མཚམས་ན་མཱ་མ་ཀཱི་དང་། རླུང་གི་མཚམས་ན་ན་བཟའ་
དཀར་མོ་དང་། དབང་ལྡན་གྱི་མཚམས་ན་སྒྲོལ་མ་བཞིའི་སྐུ་སྟེ་ཕྱག་རྒྱ་བཞིས་བསྐོར་ནས་བཞུགས་པའོ། །དེ་ལྟར་ཡང་གསང་བ་འདུས་པའི་རྒྱུད་ཕྱི་མ་ལས་གསུངས་པ། སྤྲོས་ནས་ཕྱག་རྒྱ་བཞི་དག་ནི། །དཀྱིལ་འཁོར་དེ་ལ་བསྐོར་བར་བརྟག །བདག་ཉིད་དབུས་སུ་གནས་བྱས་ཏེ། །
འཁོར་ལོ་ཐམས་ཅད་བསྡུ་བར་བྱ། །ཞེས་སོ། །ཡང་ན་ལྷ་མོ་བཞི་དང་མཉམ་ལྡན་ཞེས་པ་ནི་གསང་བའི་བསྙེན་སྒྲུབ་ཡན་ལག་བཞིའི་སྒོ་ནས་ཐབས་དང་ཤེས་རབ་རོལ་པ་ལ་རྡོ་རྗེ་སེམས་དཔའ་ལྷ་མོ་བཞི་དང་ལྡན་ཏེ། བསྙེན་པ་ལ་སྤྱན་མ། ཉེ་བར་སྒྲུབ་པ་ལ་མཱ་མ་ཀཱི། སྒྲུབ་པ་ལ་ན་བཟའ་
དཀར་མོ། །སྒྲུབ་པ་ཆེན་པོ་ལ་སྒྲོལ་མ་རང་གི་རིག་མ་ལ་སྒོམ་པའི་ཕྱིར་རོ། །གསང་བའི་བསྙེན་སྒྲུབ་བཞི་ནི་འདི་ལྟ་སྟེ། ཐབས་དང་ཤེས་རབ་སྐུ་སྦྱོར་བ་ནི་བསྙེན་པའོ། །གསང་བའི་རྡོ་རྗེ་དང་པདྨར་སྦྱོར་བ་ནི་ཉེ་བའི་བསྙེན་པའོ། །བསྐུལ་ཞིང་སྔགས་བཟླ་བ་ནི་སྒྲུབ་པའོ། །བདེ་བ་ཆེན་པོ་ནི་
སྒྲུབ་པ་ཆེན་པོའོ། །དེ་ལྟར་ཡང་གསང་བ་འདུས་པའི་རྒྱུད་ཕྱི་མ་ལས་གསུངས་པ། བསྒྲུབ་བྱ་སྒྲུབ་པར་སྦྱོར་བ་གང་། །དེ་ནི་བསྙེན་པ་ཞེས་སུ་གསུངས། །རྡོ་རྗེ་པདྨོ་མཉམ་སྦྱོར་བ། །ཉེ་བར་བསྙེན་པ་ཞེས་བྱ་སྟེ། །ཧཱུཾ་ཕཊ་ཚུལ་དང་ལྡན་པ་རུ། །བསྐྱོད་པ་སྒྲུབ་པར་གསུངས་པའོ། །རང་

བཞིན་རང་བདེ་ཞི་བ་ནི། །སྒྲུབ་པ་ཆེན་པོ་ཞེས་བྱའོ། །ཞེས་སོ། །ཞིང་ཞེས་བ་ནི་གཞན་གྱི་དོན་ལ་བསྙེགས་པ་སྟེ། ལྷ་མོ་བཞི་ཁོ་ན་དང་ལྡན་པ་མ་ཡིན་ཏེ། ལུས་ཀྱི་དཀྱིལ་འཁོར་གྱི་ལྷ་རྣམས་དང་ཡང་ལྡན་པའི་དོན་སྟོན་པའོ། །འཁོར་ཕུན་སུམ་ཚོགས་པ་བསྟན་པ། སངས་རྒྱས་གཟུགས་
ཀྱིས་ཉེར་བརྒྱན་པ། །ཞེས་ཏེ། དེ་ལ་སངས་རྒྱས་ཞེས་པ་ནི་བླ་ན་མེད་པ་ཡང་དག་པར་རྫོགས་པའི་སངས་རྒྱས་རིགས་ལྔ་དང་། རིག་མ་བཞི་དང་། ལྕགས་ཀྱུ་མ་ལ་སོགས་པ་བཞི་དང་། སྤོས་མེ་མ་ལ་སོགས་པ་བཞི་དང་། སྒེག་མོ་ལ་སོགས་བ་བཞི་དང་། བྱང་ཆུབ་སེམས་དཔའ་བརྒྱད་དེ།
པདྨ་བཞིན་དུ་སངས་རྒྱས་ཀྱི་ཆོས་ཐམས་ཅད་ཐུགས་སུ་ཆུད་ནས་མ་ལུས་པར་བྱང་ཆུབ་ལ་བློ་རྒྱས་པའི་ཕྱིར་རོ། །དེ་དག་གི་སྐུ་ཕྱག་རྒྱ་ནི་སངས་རྒྱས་གཟུགས་ཞེས་སོ། །སངས་རྒྱས་ཀྱི་གཟུགས་དེས་རྡོ་རྗེ་སེམས་དཔའི་ཕུང་པོ་ལྔ་དང་། འབྱུང་བ་ཆེན་པོ་བཞི་དང་། རྣམ་པར་ཤེས་པ་བརྒྱད་དང་།
ཡབ་ཡུམ་གྱི་བདུད་རྩི་ལ་སོགས་པའི་རིགས་ལྔ་ལ་སོགས་པར་ཉེ་བར་སྦྱོར་བ་དང་ལྡན་པས་ན། སངས་རྒྱས་གཟུགས་ཀྱིས་ཉེར་བརྒྱན་པ། །ཞེས་པ་ནི་མཛེས་པའོ། །ཡང་ན་སྐུ་གསུང་ཐུགས་དང་ལྡན་ཞིང་སྤྲོ་བ་དང་བསྡུ་བ་མཛད་པས་སངས་རྒྱས་གཟུགས་ཀྱིས་ཉེར་བརྒྱན་པ་ཞེས་སོ། །གནས་
ཕུན་སུམ་ཚོགས་པ་བསྟན་པ། ཤིན་ཏུ་དགའ་བའི་སྦྱོར་ཆེན་ལ། །ཞེས་པ་སྟེ། དེ་ལ་ཤིན་ཏུ་དགའ་བའི་ཞེས་པ་ནི་ཁྱད་པར་དུ་སྐྱོན་མེད་ཅིང་རྟག་པར་ཀུན་དུ་ཁྱབ་པའི་སེམས་ཅན་གྱི་དོན་ལ་ཆགས་པའི་རྡོ་རྗེ་འཛིན་པའི་སྐུའི་གསང་བའོ། །དེ་ལྟར་ཡང་མཉམ་སྦྱོར་གྱི་རྒྱུད་ཕྱི་མ་ལས་གསུངས་པ།
སྐྱོན་མེད་རྟག་པ་གཏན་དུ་ནི། །ཐམས་ཅད་འདོད་ཆགས་རྗེས་ཆགས་པས། །དེ་ཉིད་གསང་བ་བཅོམ་ལྡན་འདས། །འདོད་ཆགས་ཆེན་པོ་དགའ་བ་ཆེ། །ཞེས་སོ། །ཡང་ན་ཤིན་ཏུ་དགའ་བའི་ཞེས་པ་ནི་རྣམ་པར་མི་རྟོག་པའི་ཡེ་ཤེས་ཀྱི་ངོ་བོ་བདེ་བ་ཆེན་པོའོ། །དེ་གཉིས་མངོན་དུ་བྱ་བའི་དོན་
དུ་ཐབས་དང་ཤེས་རབ་མཉམ་པར་སྦྱོར་བ་ནི་སྦྱོར་ཆེན་ཞེས་པ་སྟེ། །སེམས་ཅན་གྱི་དོན་ཆེན་པོ་མཛད་པའི་ཕྱིར་རོ། །ལ་ཞེས་པ་ནི་གནས་དེ་ལ་ཞེས་པའི་དོན་ཏོ། །སྟོན་པ་ཕུན་སུམ་ཚོགས་པ་བསྟན་པ། རྡོ་རྗེ་སེམས་དཔའ་ཞེས་པ་སྟེ་དེ་ཡང་དམ་ཚིག་སེམས་དཔའི་སྒོ་ནས་ནི་རིགས་ལྔའི་

བདག་ཉིད་ཡེ་ཤེས་ལྔའི་ངོ་བོ་ཉིད་དོ། །འདི་ལྟ་སྟེ། སྟོང་པ་ཉིད་ཀྱི་རང་བཞིན་རྡོ་རྗེ་སྟེང་འོག་གི་རྩེ་ལྔ་ནི་རིགས་ལྔ་དང་ཡེ་ཤེས་ལྔའི་དོན་བསམ་པ་བསྟན་པའི་ཕྱིར་རོ། །དེ་ལྟར་ཡང་གསང་བ་འདུས་པའི་རྒྱུད་ཕྱི་མ་ལས་གསུངས་པ། རྒྱུད་ལྔ་དང་ནི་འབྲས་དག་
ནི། །རྡོ་རྗེ་ཞེས་སུ་བསྟན་པ་ཡིན། །ཞེས་སོ། །ཡིག་འབྲུ་འཇོམས་པ་ནི། རྡོ་ནི་མེ་ལོང་ལྟ་བུའི་ཡེ་ཤེས་དང་རྣམ་པར་སྣང་མཛད། རྗེ་ནི་མཉམ་པ་ཉིད་ཀྱི་ཡེ་ཤེས་དང་རིན་ཆེན་འབྱུང་ལྡན། སེ་ནི་སོ་སོར་ཀུན་དུ་རྟོག་པའི་ཡེ་ཤེས་དང་སྣང་བ་མཐའ་ཡས། མ་ནི་བྱ་བ་ནན་ཏན་གྱི་ཡེ་
ཤེས་དང་དོན་ཡོད་གྲུབ་པ། ས་ནི་ཆོས་ཀྱི་དབྱིངས་ཀྱི་ཡེ་ཤེས་དང་མི་བསྐྱོད་པ། དེ་དག་དང་ལྡན་པའི་དོན་ནི་དཔའ་བའོ། །ཡང་ན་རྡོ་རྗེ་སེམས་དཔའ་ཞེས་པ་ནི་ཡེ་ཤེས་སེམས་དཔའི་གནས་སྐབས་སུ་མཆོག་གི་བྱང་ཆུབ་ཡེ་ཤེས་ལས་བྱུང་བའོ། །དེ་ལྟར་ཡང་ཐམས་ཅད་གསང་བའི་རྒྱུད་ལས་
གསུངས་པ། མཆོག་གི་བྱང་ཆུབ་དངོས་ཡེ་ཤེས། །དེ་ནི་རྡོ་རྗེར་འདིར་གསུངས་ཏེ། །རྡོ་རྗེ་ཡེ་ཤེས་ལས་བྱུང་བ། །དེ་ནི་རྡོ་རྗེ་སེམས་དཔར་གསུངས། །ཞེས་སོ། །དུས་ཕུན་སུམ་ཚོགས་པ་མཚོན་པ་ནི་ཆེར་བཞུགས་ཏེ་ཞེས་པ་སྟེ། རྡོ་རྗེ་སེམས་དཔའ་སྦྱོར་བ་ཆེན་པོ་ལ་བཞུགས་པའི་
དུས་སུ་རྒྱུད་འདི་བསྟན་པ་ཡིན་ནོ་ཞེས་པའི་དོན་ཏོ། །དེ་ལ་ཆེར་ཞེས་པ་ནི་ཐབས་དང་ཤེས་རབ་རོལ་པ་རྣམ་པ་སྣ་ཚོགས་རྣམ་པ་གཅིག་ཏུ་བསྐལ་པ་གཞན་དང་གཞན་གྱི་མཐའ་མེད་པར་བདེ་བ་ཆེན་པོའི་ལོངས་སྤྱོད་ལ་བཞུགས་པའོ། །བཞུགས་སོ་ཞེས་པ་ནི་བཅོམ་ལྡན་འདས་བདེ་བ་ཆེན་
པོའི་ངོ་བོ་བྱང་ཆུབ་སེམས་ཀྱི་ཐིག་ལེར་ཡུམ་གྱི་གསང་བའི་པདྨར་གནས་པའོ། །དེ་ལྟ་བས་ན་རྣལ་འབྱོར་པ་རྣམས་ཀྱིས་ཀྱང་ལྷ་དང་སྦྱོར་བ་མངོན་དུ་བྱེད་འདོད་ན་འདི་ལ་གོམས་པར་བྱའོ། །ད་ནི་རེ་ཞིག་བཅོམ་ལྡན་འདས་ཀྱིས་སྐུའི་སྒོ་ནས་ཆོས་བསྟན་པ་འོད་ཟེར་འཆང་ཞིང་ཞེས་པ་ལ་སོགས་
པ་སྟེ། དེ་ལ་འོད་ཟེར་ཞེས་པ་ནི་དེ་བཞིན་གཤེགས་པའི་ངོ་བོ་ཁ་དོག་ལྔ་དང་ལྡན་པའི་དོན་ཏོ། །འཆང་ཞིང་ཞེས་པ་ནི་འོད་ཟེར་གྱིས་ཆོས་ཀྱི་འབྱུང་གནས་ལ་ཆགས་པའོ། །འཁྲིགས་པའི་ཞེས་པ་ནི་སྔ་མ་བསྡུ་བ་དང་ཕྱི་མ་བསྣོལ་བའོ། །གསང་ཆེན་ཞེས་པ་ནི་བདེ་བ་ཆེན་པོའི་རྣམ་པར་མི་

རྟོག་པའི་ཡེ་ཤེས་ཏེ་ཐེག་པ་འོག་མ་དང་ཐུན་མོང་མ་ཡིན་པའི་ཕྱིར་རོ། །ཡོན་ཏན་དེ་དག་དང་ལྡན་པའི་ཆོས་ཀྱི་འབྱུང་གནས་ནི། འོད་ཟེར་འཆང་ཞིང་འཁྲིགས་པ་ཡི། །གསང་ཆེན་ཆོས་ཀྱི་འབྱུང་གནས་ཞེས་པ་སྟེ་གསང་བ་ནི་གསང་བའི་པདྨའོ། །དེ་ལ་ཆོས་ཞེས་པ་ནི་ཕུང་པོ་དང་ཁམས་དང་
སྐྱེ་མཆེད་ལ་སོགས་པའི་འཁོར་བ་དང་མྱ་ངན་ལས་འདས་པའི་མཚན་ཉིད་དེ། མཚན་ཉིད་འཛིན་པས་ཆོས་ཞེས་བྱ། །ཞེས་གསུངས་པའི་ཕྱིར་རོ། །དེ་དག་གི་སྐྱེ་གནས་ནི་ཆོས་ཀྱི་འབྱུང་གནས་ཞེས་སོ། །འདི་ལྟ་སྟེ་ཆོས་ཀྱི་འབྱུང་གནས་ཨེ་གྲུ་གསུམ་ནི་སྐུ་གསུང་ཐུགས་ཀྱི་རང་བཞིན་ཡིན་
པ་དང་། ཆོས་ཐམས་ཅད་སྐུ་གསུང་ཐུགས་ཁོ་ན་འཕྲོས་པ་ཡིན་ནོ། །དེ་ལྟར་ཡང་གསང་བ་འདུས་པའི་རྒྱུད་ཕྱི་མ་ལས་གསུངས་པ། སྐུ་གསུང་ཐུགས་ཀྱི་བྱེ་བྲག་གིས། །གྲུ་གསུམ་ལ་ནི་རྣམ་པར་བསྒོམ། །ཞེས་སོ། །ཡང་དེ་ཁོ་ལས་གསུངས་པ། སེམས་ཅན་ཐམས་ཅད་འབྱུང་བ་ནི། །
དུས་གསུམ་རྡོ་རྗེའི་ངོ་བོ་ཉིད། །ཅེས་པའོ། །ལ་ཞེས་པ་ནི་འཕྲོས་པའི་གནས་མཚོན་པའོ། །བྱང་ཆུབ་སེམས་ཞེས་པ་ནི་གསང་བའི་རྡོ་རྗེ་དང་པདྨའི་སྦྱོར་བ་ལས་བྱུང་བ་བརྗོད་ཀྱིས་མི་ལང་བའི་བདེ་བ་ཆེན་པོའི་ངོ་བོ་ལྷག་པའི་བྱང་ཆུབ་ཀྱི་སེམས་ཏེ། དོན་དམ་པའི་བྱང་ཆུབ་ཀྱི་སེམས་ཐོབ་པའི་
རྒྱུར་གྱུར་པའོ། །དེ་ལྟར་ཡང་ཟླ་གསང་ཐིག་ལེའི་རྒྱུད་ལས་གསུངས་པ། བྱང་ཡིག་རྡོ་རྗེ་ཞེས་གསུངས་ཏེ། །ཡི་གེ་ཆུབ་ནི་གཟུངས་མའི་ཚིག །སེམས་ཡིག་བཞུ་བ་གསུངས་པ་ཏེ། །ཡི་གེ་དཔའ་ནི་བདེ་བ་ཆེ། །ཞེས་སོ། །འཕྲོས་ནས་སུ་ཞེས་པ་ནི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཐིག་ལེའི་
གཟུགས་སེམས་ཅན་གྱི་བདག་ཉིད་ཡེ་ཤེས་ལྔའི་ངོ་བོ་ལྷག་པའི་བྱང་ཆུབ་སེམས་སུ་གྱུར་ནས་གསང་བའི་རྡོ་རྗེ་ནས་གསང་བའི་པདྨ་ལ་ཕབ་པའོ། །ཆོས་ཀྱི་དབྱིངས་ཞེས་པ་ལ་ཆོས་ཞེས་པ་ནི་བཤད་ཟིན་ཏོ། །དབྱིངས་ཞེས་པ་ནི་རྒྱུའོ། །དོན་ནི་འདི་ལྟ་སྟེ་ཆོས་ཐམས་ཅད་ཀྱི་ས་བོན་ཕྲ་མོའི་ཡིག་འབྲུ་ཡི་གེ་
ཀྵཱུཾ་གི་ངོ་བོར་བཞུགས་པའོ། །ཡི་གེ་འབྲུ་དེ་ཞུ་མཛད་དོ། །ཞེས་པ་སྟེ། འོད་ཀྱི་གོང་བུར་བྱེད་པའོ། །ད་ནི་གསུང་གི་སྒོ་ནས་ཆོས་བསྟན་པ་ཐོས་པར་འདོད་ནས་ལྷ་མོ་སྤྱན་མས་ཆོས་ཀྱི་དབྱིངས་འཕྲོ་བའི་དོན་ཞུས་པ། ཞུ་བའི་དངོས་པོ་དེ་མཐོང་ནས། །ཞེས་པ་ལ་སོགས་པ་སྟེ། དེ་ལ་ཞུ་བའི་དངོས་

པོ་ཞེས་པ་ནི་བཤད་ཟིན་ཏོ། །དེ་མཐོང་ནས་ཞེས་པ་ནི་སྐུའི་སྒོ་ནས་ཆོས་སྟོན་པའི་རྡོ་རྗེ་སེམས་དཔའ་དེ་མཐོང་ནས་ལྷ་མོ་སྤྱན་མས་ཡོངས་སུ་ཞུས་པ་ཞེས་ཏེ། དེ་ལ་ལྷ་མོ་ནི་བཤད་ཟིན་ཏོ། །ལྷ་མོ་ཡང་དེ་སྤྱན་མ་ཡང་དེ་བས་ན་ལྷ་མོ་སྤྱན་མ་ཞེས་ཏེ། སྤྱན་དང་འདྲ་བའི་དམ་
ཚིག་གི་ཕྱག་རྒྱའི་བདག་མོ་ཡིན་པའི་ཕྱིར་རོ། །ཡོངས་ཤེས་པ་ནི་དོན་མ་ལུས་པའོ། །ཞུས་པ་ཞེས་པ་ནི་རང་གི་སྟན་ལས་ལངས་པ་དང་བླ་གོས་ཕྲག་པ་གཅིག་ཏུ་གཟར་བ་དང་། ལན་གསུམ་བསྐོར་ནས་ཕྱག་བྱས་པ་དང་། པུས་མོ་ས་ལ་བཙུགས་ཏེ་ཐལ་མོ་སྦྱར་བ་རྣམས་ཞུ་བའི་ཚུལ་ལྔས་གསོལ་
བ་བཏབ་པའོ། །གང་ལ་ཞུས་ཤེ་ན། བཅོམ་ལྡན་འདས་རྡོ་རྗེ་སེམས་དཔའ་ལ་ཞེས་ཏེ། སྟོན་པ་པོ་ལ་ཞུས་པའི་ཐ་ཚིག་གོ། །ཡིག་འབྲུ་འཇོམས་པ་ནི་བཅོམ་ལྡན་འདས་ཡང་སྟེ། རྡོ་རྗེ་སེམས་དཔའ་ཡང་དེ་ཡིན་པས་བཅོམ་ལྡན་རྡོ་རྗེ་སེམས་དཔའོ། །དེ་ལ་བཅོམ་ལྡན་ཞེས་པ་ནི་ཐེག་པ་
བཞིའི་བྱེ་བྲག་གིས་བཤད་དེ། རྡོ་རྗེའི་ཐེག་པ་ལ་ཐེག་པ་འོག་མའི་དོན་བཅུག་ཀྱང་མི་འགལ་ཏེ། རྡོ་རྗེ་སེམས་དཔའ་ཐེག་པ་ཀུན་ལས་སངས་རྒྱས་པའི་ཕྱིར་རོ། །དེ་ལྟར་ཡང་སངས་རྒྱས་མཉམ་སྦྱོར་གྱི་རྒྱུད་ལས་གསུངས་པ། སེམས་དང་སེམས་དཔའི་ཏིང་འཛིན་དང་། །བྱང་ཆུབ་
སྤྱོད་པ་སྣ་ཚོགས་ཉིད། །བདུད་དང་དེ་བཞིན་བདུད་ལས་རྒྱལ། །བྱང་ཆུབ་སངས་རྒྱས་དེར་འགྱུར་རོ། །ཞེས་དང་། ཡང་མཉམ་སྦྱོར་གྱི་རྒྱུད་ཕྱི་མ་ལས་གསུངས་པ། དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ལ་སོགས་ལྷག་པའི་ལྷ། །རྒྱལ་པོ་རྡོ་རྗེ་འཛིན་པ་ཆེ། །ཡིག་འབྲུ་དམ་པ་
མཆོག་ཏུ་དགའ། །ཞེས་སོ། །འདི་ལྟ་སྟེ། ཉན་ཐོས་ཀྱི་ཐེག་པ་བཅོམ་ལྡན་ཞེས་པ་ནི་ཉོན་མོངས་པ་དང་། འཆི་བདག་དང་། ཕུང་པོ་དང་། ལྷའི་བུའི་བདུད་བཞི་བཅོམ་ཞིང་ཟད་པ་དང་མི་སྐྱེ་བའི་ཡེ་ཤེས་དང་ལྡན་པའོ། །དེ་ལྟར་ཡང་མདོ་ལས་གསུངས་པ། ཉོན་མོངས་ལས་དང་སྐྱེ་བ་
དང་། །ཉོན་མོངས་ཤེས་བྱའི་སྒྲིབ་དེ་བཞིན། །རྣམ་པར་སྨིན་ཆོས་གང་དེ་ནི། །བཅོམ་པས་དེས་ན་བཅོམ་ལྡན་འདོད། །ཅེས་པའོ། །བཅོམ་པའི་རིམ་པ་ནི་འདི་ལྟ་སྟེ་བྱང་ཆུབ་ཀྱི་ཤིང་དྲུང་དུ་རྡོ་རྗེའི་གདན་མནན་པའི་དུས་སུ་སྲོད་ཀྱི་དུས་དང་པོ་ལ་འདོད་པའི་ཟག་པ་ཟད་བས་ལྷའི་བུའི་བདུད་

བཅོམ། ནམ་ཕྱེད་ཀྱི་དུས་གཉིས་པ་ལ་ལྷའི་སྤྱན་ཕྱེ་བས་འཇིག་རྟེན་ཐམས་ཅད་གཟིགས་ཏེ་ཐོ་རངས་ཀྱི་དུས་གསུམ་པ་ལ་མ་རིག་པའི་ཟག་པ་ཟད་པས་ཉོན་མོངས་པའི་བདུད་བཅོམ། རྩྭ་མཆོག་གི་གྲོང་ཁྱེར་དུ་ཡོན་བདག་བྲམ་