Luận tạng Tây Tạng (Tengyur) — Tập 27

མ་ཚིག་ངོ་བོ་ཉིད། །མཆོག་ཏུ་བདེ་བའི་རྣལ་

འབྱོར་སྐལ་བཟང་མཆོག་དགྱེས་པ། །རང་གི་དམ་ཚིག་རྟག་ལ་རོལ་ཅིག་རོལ་ཅིག་ཧོ། །ཡབ་ཡུམ་གསང་གནས་ཧཱུཾ་དང་ཛཿས། །རྡོ་རྗེ་པདྨ་བསྐྱེད་བྱས་ནས། །ལིངྒ་འགྲེང་བར་རང་བྱུང་བ། །བརླ་ཡི་དབུས་སུ་གཞུག་བྱས་ཏེ། །ལིང་ག་རྡོ་རྗེར་བྱིན་བརླབས་ནས། །རྡོ་རྗེ་སེམས་སོགས་སྐུ་བསྟོད་
དོ། །བྱང་ཆུབ་སེམས་དེ་ཀུན་དུ་དག །མ་ལུས་ཉེ་བར་ཁྱབ་བྱས་ནས། །འདོད་པར་བྱ་བ་རབ་ཏུ་མཉེས། །འོད་འདུས་ཐོག་མའི་གཟུགས་ལ་གཟུང་། །གནས་ནས་སོ་སོའི་གདན་དག་ལ། །ཆོས་ཀྱི་སྙིང་པོས་ལྷ་རྣམས་བསྐྱེད། །ཧཱུཾ་ལས་རྡོ་རྗེ་སེམས་དཔའ་སྟེ། །སྐྱིལ་ཀྲུང་དབུས་ཀྱི་གདན་ལའོ། །
ཛཿལས་དཔལ་ལྡན་བདེ་མཆོག་མ། །ཧཱུཾ་ལས་ཨེ་མ་བདེ་མཆོག་མ། །བཾ་ལས་ལྷ་མོ་སྣང་མཛད་མ། །ཧོཿལས་དེ་བཞིན་སློབ་མའོ། །འདི་དག་གཙོ་བོའི་ཕྱོགས་བཞི་ཡི། །རིའུ་ཆའི་གདན་ལ་རིམ་བཞིན་གནས། །ཨོཾ་ལས་སངས་རྒྱས་བྱང་ཆུབ་མ། བྷྲཱུཾ་ལས་ཆོས་ཀྱི་འཁོར་ལོ་སྟེ། །ཧཾ་ལས་
ཁམས་གསུམ་རྣམ་རྒྱལ་ཡིན། །ཁཾ་ལས་འདོད་པ་ཀུན་མཛད་མའོ། །འདི་དག་ཤར་ལ་སོགས་པ་ཡི། །རེའུ་མིག་འཁོར་ལོའི་རྩེ་ལ་གནས། །ཨོཾ་ལས་གླིང་བུ་ཏྲཱཾ་པི་ཝང་། །པཾ་ལས་རྔ་ཆེན་རྫ་རྔ་མ། །ལྷ་མོ་འདི་བཞི་མེ་མཚམས་ཀྱི། །འཁོར་ལོའི་རྩེ་ལ་རིམ་བཞིན་གནས། །ཨ་ལས་མེ་ཏོག་
ཨཱ་སྤོས་མ། །ཨཾ་ལས་མར་མེ་ཨི་དྲི་ཆབ། །འདི་དག་མཚམས་ཀྱི་གནས་བཞི་རུ། །རིམ་པ་བཞིན་དུ་བསྐྱེད་པའོ། །ཛཿཧཱུཾ་བཾ་ཧོཿས་སྒོ་བཞི་རུ། །རྟ་མགྲིན་འཕང་མཐོ་ལ་སོགས་བསྐྱེད། །བྷ་གར་ལིངྒ་བཅུག་བྱས་ནས། །དེར་ནི་མཚན་མ་བསྒོམ་པར་བྱ། །རྡོ་རྗེ་སེམས་དཔའ་ཕྱག་རྒྱ་ཆེ། །
སྐུ་གཉིས་ལྡན་པ་སྤྲོ་བར་བྱ། །ཨོཾ་མ་ཧཱ་སུ་ཁ་བཛྲ་སཏྭ་ཨཱཿཛཿཧཱུཾ་བཾ་ཧོཿ། སུ་ར་ཏ་སྟྭཾ་ཛ། ཤེས་རབ་ཕ་རོལ་ཕྱིན་པ་དང་། །ཐབས་ལ་མཁས་པའི་ཕྲིན་ལས་ཀྱིས། །འདུལ་ཕྱིར་རྡོ་རྗེ་སེམས་དཔའ་ནི། །སྐྱེ་བ་དག་གི་རིགས་ཡིན་ནོ། །བདེ་མཆོག་འགྱིང་བཅས་གར་མདངས་ཅན། །གཡོན་པས་
གཞུ་འཛིན་གཡས་མདའ་འདྲེན། །རིན་ཆེན་ཕྲེང་མཛེས་གོས་རྒྱན་བཀླུབས། །ཕྱོགས་བཅུར་འགྲོ་བའི་དོན་དབྱུང་སྤྲོ། །ཛཿབཛྲ་ཏིཥྛཱ་ས་མ་ཀེ་མ་ཛྫ། མཐར་ཕྱིན་རིགས་མཐུན་ལས་མཛད་མ། །སླར་འདུས་ཤར་གྱི་གདན་ལ་གནས། །ཨེ་མ་བདེ་བ་གསེར་གྱི་མདོག །གཡས་པས་ལིངྒ་

རྡོ་རྗེ་མཚན། །གཡོན་པས་བྷ་ག་རིན་ཆེན་སྣོད། །བདེ་སྤྲོས་འགྱིང་བཅས་ལྷོ་ཕྱོགས་སུ། །ཧཱུཾ་བཛྲ་ཀཱི་ལི་ཀཱི་ལ་ཧཱུཾ་ཛྫ། སྣང་མཛད་དམར་པོ་གཡས་པ་ན། །སྣ་ཚོགས་རྡོ་རྗེ་གཡོན་དག་གིས། །འགྱིང་བཅས་ཐོད་པའི་སྣོད་བདུད་རྩི། །ཁ་ཊྭཱཾ་ག་རྟེན་ནུབ་ཕྱོགས་གནས། །
བཾ་བཛྲི་ནི་སྨ་ར་རཏ་ཛྫ། སློབ་མ་མོ་ནི་མདོག་ལྗང་སེར། །གཡས་ཀྱིས་མདའ་བཅས་བདག་པོ་འཁྱུད། །གཡོན་པས་དཀྱིལ་ཚུལ་བདུད་རྩིའི་སྣོད། །སངས་རྒྱས་སྐུ་འཛིན་བྱང་གི་ཕྱོགས། །ཧོ་བཛྲ་ཀཱ་མེ་ཤྭ་རི་ཏྲཾ་ཛ། ཀུན་ཀྱང་རྒྱན་བཅས་ཞི་བའི་མདངས། །འོད་ཀྱི་དཀྱིལ་འཁོར་འབར་བས་
མཛེས། །ཆགས་པ་བཞིན་འཛུམ་སྟེགས་པའི་མཆོག །བདག་པོ་ཆགས་ཚུལ་སྐུལ་བར་བྱེད། །སངས་རྒྱས་བྱང་ཆུབ་དཀར་མདངས་དམར། །ཚངས་པའི་མགོ་བཞིས་མཚན་པ་ཡི། །མདའ་བཞི་དུས་གཅིག་འཕེན་པའི་ཚུལ། །འཕྲོ་འདུས་འཁོར་ལོའི་ཤར་ཕྱོགས་གནས། །ཨོཾ་ཨ་ཧ་མ་དུ་
བཛྲི་གྷུཾ་གྷུཾ་ཛྫ། ཆོས་ཀྱི་འཁོར་ལོ་དཀར་མདངས་སེར། །གཡས་པའི་གུང་མོའི་རྩེ་མོ་ལ། །འཁོར་ལོ་རྩེ་བརྒྱད་གཉིས་བརྩེགས་བསྟོད། །འཁོར་ལོའི་ལྷོ་ཕྱོགས་རྩེ་ལ་གནས། །ཨོཾ་བཛྲ་མེ་གྷེ་གུ་ལུ་གུ་ལུ་བྲུཾ་ཛྫ། ཁམས་གསུམ་རྣམ་རྒྱལ་དམར་སྐྱའི་མདོག །གཡས་གཉིས་ཏྲི་
ཤཱུལ་རྩེ་གསུམ་སྟོང་། །གཡོན་པས་རྡོ་རྗེ་རྩེ་ལྔ་འཛིན། །གར་མཛད་འཁོར་ལོའི་ནུབ་ཕྱོགས་གནས། །ཨོཾ་མ་ཧཱ་ཤ་ར་ཏི་བཛྲི་ཨོཾ་ཨོཾ་ཛྫ། འདོད་པའི་དབང་མོ་ལྗང་གུའི་མདོག །ཕྱག་གཉིས་དཔག་བསམ་མེ་ཏོག་ཤིང་། །ལྕུག་མ་རླུང་གིས་བསྐྱོད་པ་འཛིན། །གར་མཛད་འཁོར་ལོའི་
བྱང་དུ་གནས། །ཨོཾ་ཁཾ་བཛྲ་ཤི་ཤི་རི་ཧཱུཾ་ཧཱུཾ་ཛྫ། གླིང་བུ་སྔོན་མོ་རྡོ་རྗེས་མཚན། །སྣ་ཚོགས་སྒྲ་སྒྲོགས་མེ་ཡི་ཕྱོགས། །ཨེ་ཧེ་ར་ཏི་བཛྲ་བི་ལ་སི་ནི་ཏྲ་ཊ་ཛྫ། པི་ཝང་སེར་མོ་རྡོ་རྗེས་མཚན། །གླུ་དབྱངས་དྲུག་ལྡན་བདེན་བྲལ་ཕྱོགས། །ཧེ་ར་ཏི་བཛྲ་ཏེ་ཏེ་ཏེཾ་ཛྫ། རྫ་རྔ་དམར་མོ་རྡོ་རྗེའི་རྔ། །
བརྡུང་མཛད་རླུང་མཚམས་ལ་གནས་པའོ། །ཧེ་ར་ཏི་བཛྲ་ཧཱ་ས་ཧ་བཾ་ཛ། རྫ་རྔ་ལྗང་གུ་རྫ་རྔ་ལ། །རྡོ་རྗེས་མཚན་བརྡུང་དབང་ལྡན་ཕྱོགས། །ཧེ་ར་ཏི་བཛྲ་ནྲཾ་ཏྱེ་པེ་པ་པེ་པ་ཛཾ་ཛྫ། མེ་ཏོག་དམར་སེར་རྡོ་རྗེས་མཚན། །གཞོང་ཐོགས་མེ་ཡི་མཚམས་སུ་གནས། །ཨོཾ་བཛྲ་པུཥྤེ་ཛྫ། སྤོས་

མེ་དཀར་སྔོན་རྡོ་རྗེས་མཚན། །སྤོས་ཐོགས་བདེན་བྲལ་མཚམས་སུ་གནས། །ཨོཾ་བཛྲ་དྷཱུ་པེ་ཛྫ། མར་མེ་དམར་མོ་རྡོ་རྗེས་མཚན། །གསལ་འཛིན་རླུང་གི་མཚམས་སུ་གནས། །ཨོཾ་བཛྲ་ཨཱ་ལོ་ཀེ་ཛྫ། དྲི་ཆབ་ལྗང་གུ་རྡོ་རྗེས་མཚན། །དགའ་འཐོར་དབང་ལྡན་མཚམས་སུ་གནས། །
ཨོཾ་བཛྲ་གནྡྷེ་ཛྫ། རྟ་མགྲིན་འཕང་མཐོ་དཀར་མདངས་ཅན། །ལྕགས་ཀྱུ་རྟ་མགོ་ལྗང་གུ་ཤར། །ཨོཾ་བཛྲ་ཨཾ་ཀུ་ཤ་ཛྫ། ཕག་གདོང་ནག་མོ་ཞགས་པ་གཡོན། །གཡས་པས་མཆེ་བ་ལྷོ་ཡི་སྒོར། །ཨོཾ་བཛྲ་པཱ་ཤ་ཧཱུཾ་ཛྫ། སྣང་བ་དམར་མོ་ཕྱག་གཉིས་ཀྱིས། །ཉི་ཟླ་ལྕགས་སྒྲོག་ནུབ་ཀྱི་
ཕྱོགས། །ཨོཾ་བཛྲ་ཤྲིཾ་ཁ་ལེ་བཾ་ཛྫ། ཐལ་བྱེད་ལྗང་གུ་གཡས་དྲིལ་བུ། །གཡོན་པས་བྷནྡྷ་སྐུ་བཅས་བྱང་། །ཨོཾ་བཛྲ་གཎྜེ་ཧོཿཛྫ། ལྷ་མོ་འདི་དག་མཛེས་པའི་མདངས། །རིན་ཆེན་རྒྱན་དང་ཕྲེང་བས་བརྒྱན། །ཀུན་མཁྱེན་ཡེ་ཤེས་ལས་གྲུབ་ཕྱིར། །དཀྱིལ་འཁོར་ལྷ་རྣམས་ཐམས་ཅད་
ཀྱི། །མིག་ལ་སངས་རྒྱས་རྣམ་སྣང་མཛད། །རྣ་བ་རྡོ་རྗེ་ཉི་མ་རྒྱ། །ཁ་ལ་པདྨ་གར་དབང་ཕྱུག །སྣ་ལ་རྟ་མཆོག་རོལ་པ་མཆོག །ཡིད་ལ་རྡོ་རྗེ་ཧེ་རུ་ཀ །ལུས་ལ་རྡོ་རྗེ་སེམས་དཔའོ། །གནས་གསུམ་ཕྱག་རྒྱའི་ཚོགས་ལྡན་ཞིང་། །ཐུགས་ཀར་ཡེ་ཤེས་སེམས་དཔའ་གནས། །རང་
རིགས་དཀྱིལ་འཁོར་སྤྱན་དྲངས་ནས། །དབང་བསྐུར་རིགས་ཀྱི་མཚན་མ་བསམ། །ལག་གཉིས་གར་ཐབས་བསྐྱེད་བྱས་ཏེ། །གཡས་གཡོན་མདུན་རོལ་བསྐོར་བར་བྱ། །རྡོ་རྗེ་བཅིང་བའི་རྒྱ་གཉིས་ལས། །རྡོ་རྗེ་སེ་གོལ་བརྡབ་པར་བྱ། །དམིགས་མེད་མཁའ་ལྟར་དག་པ་ཁྱབ་པའི་
སྐུ། །སྤྱན་འདྲེན་གཤེགས་སུ་གསོལ་བར་མི་དམིགས་ཀྱང་། །ཐུགས་རྗེའི་ངང་ཉིད་ཆོས་སྐུ་དག་པ་ལས། །ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ། །བསྙེངས་པ་མི་མངའ་སྟོབས་བཅུའི་ཤུགས་ལྡན་ཞིང་། །མ་འདྲེས་སངས་རྒྱས་ཆོས་རྣམས་རབ་ཏུ་རྫོགས། །དཔའ་བོ་
ཆེན་པོ་ལོངས་སྤྱོད་རྫོགས་པའི་སྐུ། །མཁའ་འགྲོ་ཀུན་དང་ཐབས་ཅིག་གཤེགས་སུ་གསོལ། །ཐུགས་རྗེ་ཆེན་པོའི་སྐུ་མངའ་གསུང་གཉིས་རྫོགས། །མི་འཇིགས་ཐུགས་མངའ་སེང་གེ་བསྐྱོད་དུ་མེད། །གདུག་པའི་ཚོགས་མང་ཟིལ་གྱིས་གནོན་མཛད་པ། །བཅོམ་ལྡན་འགྲོ་ལ་

བརྩེ་སླད་གཤེགས་སུ་གསོལ། །ཛཿཧཱུཾ་བཾ་ཧོཿ། ཨེ་ཧྱེ་ཧི་བྷ་ག་བཱན། མ་ཧཱ་ཀ་རུ་ཎི་ཀ་ཌྀ་ཤྱ་ཧོ་ས་མ་ཡ་སྟྭཾ། རྡོ་རྗེ་གར་ལས་བྱུང་བ་ཡི། །དགུག་གཞུག་བཅིང་དང་པདྨའི་རྒྱ། །བདེ་གཤེགས་ཕོ་བྲང་དཀྱིལ་འཁོར་འདིར། །འགྲོ་བ་མ་ལུས་བསྒྲལ་བའི་ཕྱིར། །དོན་གྱི་
དབང་གིས་དགོངས་ནས་ཀྱང་། །འཁོར་བཅས་གཤེགས་ཤིང་བཞུགས་སུ་གསོལ། །ཨོཾ་ཨཱཿཧཱུཾ། ཀཱ་ཡ་བཱཀ་ཙིཏྟ་ཏིཥྛ་བཛྲ་ཧཱུཾ། དཔལ་ལྡན་གཡོན་པ་འགྱིང་བའི་ཐབས། །གཡས་པ་བ་དན་གསུམ་པ་ཕྱར། །སྲི་ཞུར་བཅས་ཤིང་སྟེག་པའི་མཆོག །བདག་ཉིད་རྡོ་རྗེ་སེམས་དཔའ་
དཔལ། །འཛུམ་དང་བཅས་པའི་མིག་གིས་བལྟ། །བསམ་གཡོས་ཐལ་མོ་སྦྱར་བར་བྱ། །སྒྱུ་འཕྲུལ་དགའ་བའི་རྡོ་རྗེ་རོལ་མོའི་ཚོགས། །གཞན་ལ་སྣང་བའི་དཀྱིལ་འཁོར་རྣམ་པར་མཛེས། །ཚངས་པའི་ཚོགས་རྣམས་ཟིལ་གྱིས་གནོན་མཛད་པའི། །རྟོག་པ་དུ་མའི་སྒྲོ་འདོགས་གཅོད་
པར་མཛད། །གཉིས་མེད་ཡེ་ཤེས་གཉིས་ཅན་རྣམ་མཐའ་ཡས། །སྣང་སྟོང་གཉིས་མེད་བདེ་ཆེན་དབྱིངས་ལ་རོལ། །ཀུན་འབྱུང་ཡོན་ཏན་སྩོལ་མེད་ལྷུན་འགྲུབ་སྣང་། །རྒྱན་གྱི་དཀྱིལ་འཁོར་རྣམ་བཀོད་རང་ལས་བྱུང་། །མཛད་པ་རྒྱ་ཆེན་གྲོགས་མེད་ཀུན་གྲུབ་པས། །ཚོགས་བཅས་
རོལ་པས་བྱ་བ་ཀུན་རྫོགས་མཛད། །སྣ་ཚོགས་སྐུ་སྤྲུལ་རིགས་ཀྱི་སྐུ་གནས་མཆོག །ཟབ་ཅིང་རྒྱ་ཆེ་གསུང་དབྱངས་རྡོ་རྗེའི་གླུ། །ཡེ་ཤེས་ཟག་མེད་ཐམས་ཅད་མཁྱེན་པའི་ཐུགས། །རིན་ཆེན་ཚོགས་ཀྱིས་ལེགས་སྤྲས་ཀུན་འབྱུང་ཞིང་། །བདག་གཞན་སྤྱོད་ཚོགས་ལས་རྣམས་འབྲས་
མཐར་ཕྱིན། །དཀྱིལ་འཁོར་མཛེས་པའི་ལྷ་ལ་ཕྱག་འཚལ་ལོ། །ཨོཾ་ཨཱཿཧཱུཾ། ཨ་ཏི་བྷུ་ཧོ། །སརྦ་ཏ་ཐཱ་ག་ཏ་ནཾ་ཀཱ་རོ་ཡ་མི་ཨ་ལ་ལ་ཧོ། །ཨོཾ་ཨ་ཏི་བྷུ་ཧཱུཾ། ཏ་ཐཱ་ག་ཏཱ་ས་མ་ཡོ་ག་སིདྡྷི་ཨཱཿཧཱུཾ། སྐད་ཀྱི་གསངས་ནི་མཐོ་དམན་དང་། །གྲེ་འགྱུར་ཧཱུཾ་བཅས་སོགས་པའི་གླུས། །འགྱིང་ལ་
སོགས་པའི་ཚུལ་བཅས་ནས། །ཇི་ལྟའི་ཚུལ་བཞིན་གར་བྱེད་ཅིང་། །བསྐོར་བའི་གར་རྣམས་སྣ་ཚོགས་ཀྱིས། །མཆོད་པ་ཐམས་ཅད་དབུལ་བར་བྱ། །ཨོཾ་པ་ན་པེ་ན་པེ་ནུ་སུ་ར་ཏ། དི་པུ་པར་མུ། སརྦ་ཏ་ཐཱ་ག་ཏ། ས་མ་ཡོ་ག་སིདྡྷི་ཨཱཿཧཱུཾ། གྱེན་དུ་འཐོར་དང་ཐུར་དུ་འབེབས། །གསལ་

མེད་འདེགས་སོགས་སོ་སོའི་རྒྱ། །གླིང་བུ་དང་ནི་རྒྱུད་གཅིག་དང་། །རྒྱུད་མངས་རྒྱུད་དྲུག་སིལ་སྙན་བརྡུང་། །དངོས་འབྱོར་འཕྲུལ་པ་གང་ཡང་རུང་། །རིགས་ཀྱི་དཀྱིལ་འཁོར་མཉེས་པར་བྱ། །ཨོཾ་ཨཱཿཧཱུཾ། རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པ་དམ་པ་གྲུབ་པར་
མཛོད། །དམ་ཚིག་དམ་པ་གྲུབ་པར་མཛད་དུ་གསོལ། །མཆོད་པ་ཆེན་པོ་ཐམས་ཅད་དག་པར་མཛོད། །མཆོད་པ་ཆེན་པོ་ཐམས་ཅད་གྲུབ་པར་མཛོད། །ཨ་ལ་ལ་སྟེ་མཆོད་པར་འབུལ། །ཨ་ལ་ལ་སྟེ་དམ་ཚིག་བསྐངས། །ཨ་ལ་ལ་སྟེ་དགྱེས་པར་མཛོད། །ཨ་ལ་ལ་སྟེ་དངོས་གྲུབ་
སྩོལ། །དགྱེས་མཉམ་ལོངས་སྤྱོད་མཆོག་ལ་རོལ། །ཨོཾ་ཤྲཱི་རཱ་ག་ཧཱུཾ། ཨ་བཛྲ་བུཥྤེ་ཧཱུཾ། ཨ་བཛྲ་དྷཱུ་པེ་དྷུ། ཨ་བཛྲ་ཨཱ་ལོ་ཀེ་ཧྲཱིཿཨ་བཛྲ་གནྡྷེགཾ། ཨོཾ་ཧེ་ར་ཏི་བཛྲ་བི་ལ་སི་ན་ཏྲ་ཊ། ཧེ་ར་ཏི་བཛྲ་གྷི་ཏེ་ཏེ་ཏེཾ། ཧེ་ར་ཏི་བཛྲ་ཧཱ་སེ་ཧ་ཧ་པེཾ། ཧེ་ར་ཏི་བཛྲ་ནྲྀ་ཏྱ་པེ་པེ་པེ་པ་ཛཾ། ཨ་ལ་ལ་ལ་ལ་ཧོ། །ཚད་མེད་
བཞི་ཡི་ཕྱག་རྒྱ་ཡིས། །དཀྱིལ་འཁོར་མདུན་བསྐུལ་གཡོ་བྱས་ནས། །དགའ་བའི་ཁམས་སྙོམས་འོད་དཔུང་ཚོགས། །མ་འདྲེས་སོ་སོའི་གནས་སུ་བསྟིམ། །ཧཱུཾ་སེམས་དཔའ་སངས་རྒྱས་ཀུན་གྱི་དངོས། །རྡོ་རྗེ་སེམས་དཔའ་བདེ་བའི་མཆོག །གསང་བ་མཆོག་གི་དགྱེས་པ་
ན། །ཐམས་ཅད་བདག་ཉིད་རྟག་ཏུ་བཞུགས། །བདེ་བ་ཀུན་ལ་ཞེན་པ་དང་། །དངོས་གྲུབ་ཐམས་ཅད་རྣམ་དག་ཕྱིར། །རྡོ་རྗེ་སེམས་དཔའི་བདེ་བའི་མཆོག །ཟླ་བ་ཉ་ལྟར་རྩ་དམར་སྐུ། །འདོད་ཆགས་ཀུན་ལ་ཆགས་པའི་ཕྱིར། །ཆགས་པ་ཆེན་པོའི་བཅོམ་ལྡན་འདས། །རྡོ་རྗེ་
སེམས་དཔའི་ཕྱག་རྒྱ་འདི། །དམར་པོ་སྣ་ཚོགས་འབར་བའི་འོད། །བ་དན་གསུམ་པའི་ཕྱག་རྒྱ་ཡིས། །རྡོ་རྗེ་རྩེ་ལྔ་ཐུགས་ཀར་བསྟོད། །ཁ་ཊྭཱཾ་བ་དན་དྲིལ་བསྐྱོད་སྒྲ། །འགྱིང་ཚུལ་སྐུ་ཡི་གནས་སུ་བརྟན། །ལྷག་མཐོང་ཐབས་ཀྱི་མངའ་གསོར་ཞིང་། །ཞི་གནས་ཤེས་
རབ་གཞུ་ཡིས་མཛེས། །གཡས་དང་གཡོན་གྱི་སྦྱོར་བ་ཡིས། །བདེ་བའི་ཆ་ལུགས་གར་བྱེད་ཅིང་། །སེམས་དཔའི་སྐྱིལ་མོ་ཀྲུང་བཅས་ནས། །དཔུང་རྣམས་ཐམས་ཅད་རབ་ཏུ་འཇོམས། །ཨོཾ་མ་ཧཱ་སུ་ཁ་བཛྲ་སཏྭཱ་ཨཿ། ཛཿཧཱུཾ་བཾ་ཧོཿ། སུ་ར་ཏ་སྟྭཾ། མ་ཧཱ་སཱུ་ཏྲ་ཧཱུཾ་སྟྭཾ། ཟླ་བའི་ཁ་དོག་

འཛུམ་པའི་ཞལ། །དངོས་གྲུབ་ཐམས་ཅད་དག་པ་དང་། །པདྨོ་འདོད་ཆགས་རྣམ་དག་ཕྱིར། །བརླ་ཡི་དབུས་ནི་དཀར་ལ་དམར། །ཕྱག་མཆོག་ལོ་མ་སྔོན་པོ་འདྲ། །དེ་བཞིན་བདེ་བའི་དབང་ཕྱུག་དང་། །བདེ་བར་རེག་པའི་དབང་ཕྱུག་པས། །དཀར་ཞིང་སེར་བའི་བརླ་
དང་ལྡན། །ལྷ་རྫས་སྣ་ཚོགས་ཁ་དོག་མཆོག །འབར་བ་སྣ་ཚོགས་འཁྲུགས་པའི་འོད། །པདྨོ་སྣ་ཚོགས་ལ་གནས་པ། །ཐམས་ཅད་དག་པར་རབ་ཏུ་གནས། །སངས་རྒྱས་པདྨ་ལ་སོགས་མཆོག །རིན་ཆེན་སྣ་ཚོགས་རྒྱན་དང་གོས། །སངས་རྒྱས་ཐམས་ཅད་འདུས་པས་སོ། །མི་
མཇེད་ལ་སོགས་བརྒྱན་པ་བཞིན། །བྱ་བ་དང་ནི་བཟློག་པ་དང་། །དབྲོག་པ་དག་ཀྱང་ཁྱབ་པར་མཛད། །བདག་ལ་འཁྱུད་པའི་ཕྱག་རྒྱ་ཡིས། །ཡན་ལག་ཐམས་ཅད་འཕྲོག་པ་འགྲུབ། །ཛཿབཛྲཾ་དྲིཥྚི་ས་མ་ཡ་ཀེ་མ་ཊ། མ་ཧཱ་མུཏྲ་ཧཱུཾ། རྣམ་པ་སྣ་ཚོག་དམ་ཚིག་ཆགས། །བདེ་བ་འབབ་པའི་
གར་བྱེད་པ། །བདག་ལ་འཁྱུད་པའི་ཕྱག་རྒྱ་མཆོག །དབུས་ཀྱི་ལྷ་མཆོག་ཆེན་མོའོ། །ཧཱུཾ་བཛྲ་ཀཱི་ལི་ཀཱི་ལི་ཧཱུཾ། མཧཱ་མུ་ཏྲ་ཧཱུཾ། སེ་རལ་ཁ་ཡི་ཚུལ་དག་ཏུ། །རྡོ་རྗེ་ཁ་ཊྭཱཾ་ག་བཟུང་སྟེ། །བདག་ལ་འཁྱུད་པའི་ཕྱག་རྒྱ་ནི། །པད་བཅས་རྡོ་རྗེ་རྒྱ་གྲམ་མཆོག །བཾ་བ་ཛྲི་ཎི་སྨ་ར་རཏ་ཊ། མ་ཧཱ་མུ་དྲ་ཧཱུཾ། རྫོགས་
སངས་རྒྱས་ཀྱི་ཁམ་ཕོར་གྲུབ། །བདག་ལ་འཁྱུད་པའི་ཕྱག་རྒྱ་ཡིས། །རྡོ་རྗེ་སེམས་དཔའ་དཔལ་སྦྱོར་བ། །དབུས་ཀྱི་ལྷ་མོ་མཆོག་ཆེན་མོ། །ཧོཿབཛྲ་ཀཱ་མེ། ཤྭ་རི་ཏྲཱཾ། མ་ཧཱ་མུ་དྲ་ཧཱུཾ། གཙུག་ལག་ཇི་ལྟའི་རྗེས་མཐུན་པར། །དཔལ་རྫོགས་རྒྱ་ཆེ་གར་དག་གིས། །མདའ་བཞི་ཡོངས་སུ་འཕང་ནས་ནི། །བདུད་བཞི་
ལས་ནི་རྒྱལ་བར་འགྱུར། །ཨོཾ་ཨཾ་མ་དུ་བཛྲི་གྷུཾ་གྷུཾ། མ་ཧཱ་མུ་དྲ་ཧཱུཾ། རྐང་པ་བཏེག་ཅིང་ཕང་པ་དང་། །བཤིག་སྟེ་འཕང་པའི་སྟབས་དག་གིས། །འཁོར་ལོའི་ཕྱག་རྒྱ་བསྟོད་ནས་ནི། །ཁམས་གསུམ་དག་ལས་མཆོངས་པར་འགྱུར། །ཨོཾ་བཛྲ་མེ་གྷེ་གུ་ལུ་གུ་ལུ་ཧཱུཾ། མ་ཧཱ་མུ་དྲ་ཧཱུཾ། བྱ་བ་དང་
ནི་བཟློག་པ་དང་། །དབྲོག་པ་དག་གི་ཁྱད་པར་དུ། །སྣ་ཚོགས་ཕྲག་རྒྱ་གར་བྱེད་ཅིང་། །ཁམས་གསུམ་དག་ནི་བསྡུ་བར་བྱ། །ཨོཾ་མ་ཧཱ་ཤྭར་ད་བཛྲི་ཨོཾ་ཨོཾ། མ་ཧཱ་མུ་དྲ་ཧཱུཾ། ལྕགས་ཀྱུས་གང་ཡང་རུང་བཟུང་ནས། །བདག་ལ་འཁྱུད་པའི་ཕྱག་རྒྱ་ཡིས། །བུད་མེད་ཐམས་ཅད་རྩེན་ནས་ནི། །

དཔག་བསམ་ཤིང་དང་ཡོངས་སུ་འགྲུབ། །ཨོཾ་ཁཾ་བཛྲ་ཤེ་ཤི་རི་ཧཱུཾ་ཧཱུཾ། མ་ཧཱ་མུ་དྲ་ཧཱུཾ། གླིང་བུ་ལེན་པའི་ཚུལ་སྟོན་ཅིང་། །ཇི་ལྟར་འབབ་པའི་གར་བྱེད་པས། །སྟབས་གཏུགས་གླུ་བཅས་བསྒྱིངས་པའི་ཚུལ། །ཡིད་འཕྲོག་སྔགས་ཀྱིས་ལས་མཛད་པའོ། །ཨོཾ་ཧེ་ར་ཏི་བཛྲ་བི་ལ་སི་ན་ཏྲ་ཊ། མ་ཧཱ་མུ་
ཏྲ་ཧཱུཾ། པི་ཝང་ལེན་པའི་ཚུལ་སྟོན་ཅིང་། །ཇི་ལྟར་འབབ་པའི་གར་བྱེད་པས། །སྣ་ཚོགས་བསྒྱུར་ཅིང་དེ་དོན་འཕྲུལ། །དགའ་དབྱངས་བསྒྱུར་བས་གནས་གསུམ་བསྐྱོད། །ཧེ་བཛྲ་གྷེ་ཏེ་ཏེ་ཏེཾ། མ་ཧཱ་མུ་དྲ་ཧཱུཾ། ཅང་ཏེའི་ཚུལ་སྟོན་རྣལ་འབྱོར་པའི། །ཇི་ལྟར་དབབ་པའི་གར་བྱེད་པས། །སྐུ་གསུང་
ཐེག་ཆེན་རྒྱུད་སྟོན་པའི། །ཕྱག་རྒྱ་གར་གྱིས་ཀུན་ལས་རྒྱལ། །ཨོཾ་ཧེ་རཱ་ཏི་བཛྲ་ཧཱ་སེ་ཧ་ཧ་པཾ། མ་ཧཱ་མུ་དྲ་ཧཱུཾ། རྫ་རྔའི་ཚུལ་སྟོན་རྣལ་འབྱོར་པ། །ཇི་ལྟར་འབབ་པའི་གར་བྱེད་ཅིང་། །གཡས་གཡོན་མདུན་རྒྱབ་བལྟ་བའི་བཞིན། །བཞི་སྦྱོར་གླུ་བཅས་ཀུན་བསྟན་པའོ། །ཨོཾ་ཧེ་རཱ་ཏི་བཛྲ་ནྲྀ་ཏེ་
པེ་ཏེ་པེ་པེ་པཾ་ཛཿམ་ཧཱ་མུ་དྲ་ཧཱུཾ། ཅང་ཏེའུའི་ཚུལ་སྟོན་རྣལ་འབྱོར་པས། །སྦྱིན་པའི་མཆོག་གནས་རྣམ་པར་གྲོལ། །གཟུགས་མཆོག་ལྷ་རྫས་མེ་ཏོག་རྒྱ། །ས་གཞི་མདུན་རོལ་གཡས་གཡོན་བསྟོད། །སྣ་ཚོགས་དཔུང་པ་འཐོར་བྱེད་པའོ། །ཧེ་ར་ཏི་བཛྲ་པུཥྤེ། མ་ཧཱ་མུ་དྲ་ཧཱུཾ། ཚུལ་
ཁྲིམས་དྲི་མཆོག་ཚིམ་བྱེད་པའི། །བདུད་མཆོག་སྤོས་ལེགས་སྦྱར་བའི་མཆོག །གཡས་སྐོར་བཏེག་ཏེ་ཕྱོགས་བཅུར་བསྒྱུར། །མདུན་དུ་ཕྱོགས་པར་སྔོ་བྱེད་པའོ། །ཨོཾ་བཛྲ་དྷཱུ་པ་མ་ཧཱ་མུ་དྲ་ཧཱུཾ། བཟོད་གསོལ་ཤེས་རབ་ཏིང་ངེ་འཛིན། །མུན་ཚོགས་གསལ་བྱེད་མར་མེའི་རྒྱ། །ཀུན་དུ་བསྐོར་
བའི་གར་བསྒྱུར་ཞིང་། །ཐུགས་ཀའི་མཚན་མ་གསལ་སྟོན་པའོ། །ཨོཾ་བཛྲ་ཨཱ་ལོ་ཀེ །མ་ཧཱ་མུ་དྲ་ཧཱུཾ། བརྩོན་འགྲུས་རྩེ་གཅིག་འགྱུར་བ་མེད། །ཆོས་ཀུན་དག་བྱེད་བྱུག་པའི་དྲི། །སྲིན་མཐེབ་རང་གནས་རྩེ་གསུམ་འཐོར། །ཕྱོགས་ཀུན་དངོས་ནི་བཅོས་དག་འགྱུར། ཨོཾ་བཛྲ་གནྡྷེ། མ་ཧཱ་མུ་
དྲ་ཧཱུཾ། པདྨ་ཅན་དེའི་བདུད་རྩི་བསྟོད། །མྱང་བ་རྔུབ་པ་ལྟར་བྱེད་པའི། །ལྕགས་ཀྱུའི་ཕྱག་རྒྱ་རྡོ་རྗེར་བཅས། །འགུགས་པའི་ཚུལ་ལས་གྲུབ་པའོ། །ཨོཾ་བཛྲ་ཨཾ་ཀུ་ཤ་ཛཿམ་ཧཱ་མུ་དྲ་ཧཱུཾ། རྡོ་རྗེ་མཆེ་བ་འཇིགས་པའི་རྒྱ། །སྣ་ཡི་མྱང་བའི་རྔུབ་པ་ཡིས། །རིན་ཆེན་ཞགས་བཅས་གསོལ་ཀའི་

ཚུལ། །རང་གི་ལས་ལ་སྦྱོར་བྱེད་པའོ། །ཨོཾ་བཛྲ་པཱ་ཤེ་ཧཱུཾ། མ་ཧཱ་མུ་དྲ་ཧཱུཾ། རྡོ་རྗེ་ལྕགས་སྒྲོག་ཉི་ཟླར་བཅས། །མིག་བཙུམས་ཞེན་པར་བལྟ་བ་ཡིས། །ཁམས་གསུམ་ཀུན་ལ་གཟིགས་པའི་རྒྱ། །ཕྱག་རྒྱའི་ལས་ཀྱིས་བསྟེན་བྱེད་པའོ། །ཨོཾ་བཛྲ་ཤྲིཾ་ཁ་ལེ་བཾ། མ་ཧཱ་མུ་དྲ་ཧཱུཾ།
མཚན་ལྡན་སྐུ་མཆོག་བདུད་རྩིས་བཀང་། །ཐམས་ཅད་བདག་ཉིད་མྱང་བ་ཡིས། །སྟོང་པ་གསུང་དབྱངས་རྒྱུན་མི་འཆད། །ཐལ་འཇིག་རྒྱུད་རྣམས་སླར་འཚོ་མཛད། །ཨོཾ་བཛྲ་གྷཎྜེ་ཧོཿམ་ཧཱ་མུ་དྲ་ཧཱུཾ། རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག །བདག་ཅག་སྒྲུབ་ལ་རྟོག་པར་མཛད་དུ་
གསོལ། །ཀྱེ་དེ་བཞིན་གཤེགས་པ་ཀུན་གྱི་བདག་ཉིད་བདེ། །མཁའ་འགྲོ་སྒྱུ་མ་སྣ་ཚོགས་བདེ་བའི་མཆོག །འགྲོ་བའི་རྒྱུད་རྣམས་རྣམ་པ་སྣ་ཚོགས་འདུལ། །དངོས་གྲུབ་བདག་ལ་གྲུབ་པར་མཛད་དུ་གསོལ། །ཨ་ལ་ལ་ཧོ། །དེ་བཞིན་གཤེགས་པའི་སྦྱོར་བ་རྣམས། །རྣམ་པ་སྣ་ཚོགས་གར་
རྣམས་བསྟན་དུ་གསོལ། །ཛཿཧཱུཾ་བཾ་ཧོཿ། ཀྱེ་བདེ་བ་ཆེན་པོའི་མཆོག་ཀུན་གྱི། །བདེ་བས་ཟུང་ལ་རྣམ་པར་འཕྲུལ་པར་མཛད། །ཧཱུཾ་སྣང་བར་མཛད་དུ་གསོལ། །ཨ་ལ་ལ་ཧོ། །བདེ་གཤེགས་མཁའ་འགྲོ་སློབ་མ་གཟུང་དུ་གསོལ། །མཚན་མའི་ཡི་གེ་པདྨའི་དཀྱིལ། །ཀུན་གྱི་རྩེ་ལ་བསྒོམ་བྱས་ནས། །
འོད་ཟེར་འཕྲོ་འདུའི་སྦྱོར་བ་ཡིས། །རང་སྔགས་ཆོས་ཀྱི་ཕྱག་རྒྱར་བཅས། །ཨོཾ་ན་མོ་བཛྲ་སརྦ་སྟུ་ཏ་སརྦ་བུདྡྷེ་བྷྱཿཧཱུཾ་སྭཱ་ཧཱ། རྡོ་རྗེ་སེམས་དཔའི་དཀྱིལ་འཁོར་གྱི། །སྦྱོར་བའི་སྔགས་ཀྱི་མཐུ་དག་གིས། །ལ་སོགས་མཆོད་པ་མ་ལུས་པ། །ལུས་པ་མེད་པར་ཀུན་ལ་སྦྱར། །མཛུབ་མོས་མཐེ་བོ་མནན་
ནས་ནི། །རང་གི་མཐེ་བོས་མཛུབ་མོ་མནན། །དཔལ་གྲུབ་ཅན་གྱི་ཕྱག་རྒྱ་སྟེ། །མཛུབ་མོ་མིག་གི་འབྲས་བུར་བྱ། །རྡོ་རྗེ་ཐལ་མོ་མཉམ་སྦྱོར་ནས། །ཁོང་སྟོང་དུ་ནི་བྱས་ནས་སུ། །གསང་སྔགས་དམ་ཚིག་སྦྱོར་བཞག་སྟེ། །རིམ་བཞིན་མཐའ་ནས་གྲོལ་བར་བྱ། །ཨོཾ་བཛྲ་ས་ཏྭ་ས་མ་ཡ། མ་ནུ་
པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲཾ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། སརྦ་སིདྡྷིཾ་མེ་པྲ་ཡཙྪ། སརྦ་ཀརྨཱ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོ། །བྷ་ག་བཱན། སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿ། སྲིན་ལག་མཐེའུ་ཆུང་ཡན་ལག་དབུས། །

མཐེ་བོ་ལེགས་པར་གཞག་པར་བྱ། །དེ་ནས་ཁུ་ཚུར་བཅིངས་ནས་ནི། །མཛུབ་མོ་ལེགས་པར་དགུག་པར་བྱ། །གསང་སྔགས་ལ་སོགས་སྦྱོར་བྱས་པས། །སོ་སོའི་ལས་ལ་གཞུག་བྱ་སྟེ། །ལས་ཀྱི་ཕྱག་རྒྱའི་འཆིང་གྲོལ་གྱིས། །རང་གི་ཕྲིན་ལས་ཀུན་སྤྱོད་པའོ། །དམན་པའི་ཕྱག་རྒྱ་རྣམ་པ་བཞིས། །
དངོས་གྲུབ་སྣ་ཚོགས་ལས་སྦྱོར་བའོ། །བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱ་མཚོ་ཡེ་ཤེས་ཀྱིས། །སྲིད་པའི་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ཨོཾ་ན་མཿསརྦ་ཏ་ཐཱ་ག་ཏེ་བྷྱོ། །བི་ཤྭ་མུ་ཁེ་བྷྱེཿསརྦ་ཏདྑཾ་ཨུངྒ་ཏེ་ཧི་མཾ་ག་ག་ན་ཁཾ་སྭཱ་ཧཱ། ཨོཾ་འབྱུང་བ་ལྔ་
ལས་ཐམས་ཅད་འབྱུང་། །རང་ལས་མ་བྱུང་གང་ཡང་མེད། །གཙང་སྨེའི་དྲི་རྟོག་ཀུན་བྲལ་བའི། །བདུད་རྩི་བྱང་ཆུབ་སེམས་ཆེན་པོས། །བདག་སོགས་གཉིས་མེད་མཆོད་པའི་ཕྱིར། །མཉམ་པ་ཆེན་པོས་གནས་ལ་རོལ། །ཧཱུཾ་མ་ཧཱ་སུ་ཁ་བོ་དྷི་ཙིཏྟ་ཨ་ལ་ལ་ཧོ་ཨ་ལ་ལ་ཧོ། །ཨོཾ་མཉམ་མེད་མི་གཡོ་
མཉམ་ཉིད་མཆོག་གི་ཆོས་ཉིད་ཅན། །ཐུགས་རྗེས་བདག་ཉིད་འགྲོ་བའི་སྡུག་བསྔལ་སེལ་བར་མཛད། །ཡོན་ཏན་མཐའ་ཡས་དངོས་གྲུབ་ཐམས་ཅད་སྦྱིན་མཛད་པ། །དྲི་མེད་མི་གཡོ་མཉམ་པ་མེད་པའི་ཆོས་མཆོག་ཅན། །ཨོཾ་ཡོན་ཏན་ཤིན་ཏུ་ཕྲ་བའི་ཆ་ལའང་ཚད་མེད་དེ། །དཔེ་ནི་ནམ་མཁའ་དང་
ཡང་བསྐྲུན་དུ་ཡོད་མ་ཡིན། །དངོས་གྲུབ་མཐའ་ཡང་མཉམ་མེད་དཔེ་དང་བྲལ་བ་རྣམས། །སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། །ཨོཾ་རྟག་ཏུ་དྲི་མ་མེད་པའི་ཐུགས་རྗེ་ཤུགས་ལས་བྱུང་། །སྨོན་ལམ་གྲུབ་པ་འགག་པ་མེད་པའི་ཆོས་ཉིད་ཅན། །འགྲོ་བའི་དོན་གྲུབ་རབ་
ཏུ་བརྩོན་པ་མཐའ་ཡས་པ། །ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་སྣང་། །ཨོཾ་ཚད་མེད་ཚད་དང་བྲལ་བ་ཤིན་ཏུ་རྫོགས་པ་ཡིས། །བདེ་བར་གཤེགས་པའི་གོ་འཕང་དམ་པ་བརྙེས་གྱུར་ཀྱང་། །ཁམས་གསུམ་རྣམས་ལ་དངོས་གྲུབ་མཆོག་ཏུ་སྩོལ་མཛད་ཅིང་། །ཐུགས་རྗེའི་སྤྱོད་པ་
མི་གཡོ་འགག་པར་ཡོངས་མི་འགྱུར། །ཨོཾ་ཨེ་མའོ་ཤིན་ཏུ་བཟང་པོའི་དངོས་གྲུབ་མཆོག་དང་ལྡན། །མཆོག་སྦྱིན་རྣམས་ཀྱི་ནང་ན་གོ་འཕང་མཆོག་བརྙེས་པ། །ཁམས་གསུམ་རྣམས་ལ་རྟག་ཏུ་དངོས་གྲུབ་མཆོག་སྩོལ་མཛད། །མགོན་པོ་དུས་གསུམ་བསྒྲིབ་པ་མེད་པར་རབ་མཁྱེན་པ། །

དམ་ཚིག་མཆོག་གསུམ་དངོས་གྲུབ་དམ་པ་བདག་ལ་སྩོལ། །ཨོཾ་ཕྱོགས་བཅུ་ནམ་མཁའི་མཐའ་ཀླས་པར། །སེམས་ཅན་ཀུན་གྱི་དོན་སྒྲུབ་ལ། །ཇི་ལྟར་ཐུགས་ཀྱི་དབང་ཕྱུག་བཞིན། །དེ་ཉིད་སྤྱོད་པར་བདག་གྱུར་ཅིག །ཇི་སྲིད་ཐོག་མ་མེད་དུས་ནས། །འཁོར་བ་
ཡི་ནི་མཐར་ཐུག་པར། །དེ་སྲིད་སེམས་ཅན་ཕན་པ་ཉིད། །མཐའ་ཡས་སྤྱོད་པར་བདག་གྱུར་ཅིག །སྔགས་ཀྱི་ཚུལ་གྱིས་སེམས་ཅན་རྣམས། །དེ་ཚེ་བདག་གིས་དུལ་འགྱུར་ཞིང་། །ཀུན་གྱིས་རིག་འཛིན་གནས་ཐོང་ནས། །དེ་ཉིད་མགོན་པོ་མཐོང་བར་ཤོག །ལྷ་རྣམས་ཀུན་གྱི་གནས་
ཞུགས་པའི། །ཡེ་ཤེས་སེམས་དཔའི་སྔགས་འཁོར་ལོ། །ཉི་ཟླ་རྟེན་དང་བརྟེན་པའི་སྔགས། །འཁོར་ལོའི་ཚུལ་ལྡན་ཤེས་རབ་ཐབས། །ཡི་གེ་མཚན་མ་སྐུ་ཡི་གནས། །ཡན་ལག་རྣམ་གསུམ་ལྡན་བྱས་ཏེ། །གསལ་བ་ཉིད་ཀྱི་སྒོ་ནས་བརྩམ། །བགྲང་བ་ལས་ནི་འདས་པའོ། །རྩེ་གཅིག་
གནས་སུ་འཁོར་བ་དང་། །ལས་དང་རྒྱུ་དང་འཕྲོ་བ་ལས། །མཆོད་བསྐུལ་ལས་མཛད་བསྡུ་བྱེད་ཅིང་། །དཀྱིལ་འཁོར་གསལ་བར་གྱུར་པའོ། །ཨོཾ་བཛྲ་སཏྭ་མ་ཧཱ་ས་མ་ཡ་ཨཱཿཧཱུཾ་སྭཱཧཱ། ཐུན་མོང་གི་གསང་སྔགས་ཡི་གེ་བཅུ་བཞི་པའོ། །སོ་སོའི་ལས་ལ་སྙོམས་ཞུགས་ནས། །རང་གི་ཐུན་མཚན་
སྔགས་ཡིག་བཅས། །འཕྲོ་འདུས་རང་གི་ལས་མཛད་ནས། །སྐུ་གསུང་ཐུགས་ཀྱི་གསལ་གྲུབ་པའོ། །ཨོཾ་མ་ཧཱ་སུ་ཁ་བཛྲ་སཏྭ་ཨཱཿ། ཛཿཧཱུཾ་བཾ་ཧོཿ། སུ་ར་ཏ་སྟྭཾ། ཁྱད་པར་གྱི་སྙིང་པོ་ཡི་གེ་བཅོ་བརྒྱད་པའོ། །སྔགས་གཞན་རིམ་བཞིན་གསལ་ལྡན་པས། །གོ་རིམས་འཁྲུལ་མེད་བཟླས་བརྗོད་
བྱ། །ལས་རྫོགས་མཆོད་བསྟོད་བསྐུལ་བྱས་ནས། །རང་གི་གནས་སུ་བསྡུ་བར་བྱ། །ཐུན་མཚམས་གཞན་དུ་བསམ་བྱ་བ། །བཟླས་བརྗོད་ཁྱད་པར་ཕྱེད་པའི་ཚད། །བཞིའམ་དྲུག་ཏུ་རིམ་བཞིན་བཟླ། །ཀུན་བཟང་མཆོད་པ་ནས་བརྩམས་ཏེ། །དེ་མཐར་ཕྱིན་པའི་ལས་རྫོགས་ནས། །གླུ་གར་
དབྱངས་ཀྱིས་དངོས་གྲུབ་བསྐུལ། །རིགས་ཀྱི་དཀྱིལ་འཁོར་གསལ་བྱས་ནས། །ཚོགས་གཉིས་རྫོགས་པར་སྒྲུབ་བྱེད་པའི། །ཚོགས་ཀྱི་དགའ་བདེའི་ལོངས་སྤྱོད་ཀྱིས། །རྣལ་འབྱོར་བཅས་པ་མཉེས་པར་བྱ། །ལྷ་རྣམས་མཉེས་ཤིང་ཚིམ་པ་དང་། །ལས་ཀུན་བསྒྲུབ་པར་བྱ་བའི་ཕྱིར། །

ལས་རྣམས་མ་ལུས་བསྡུས་པ་ཡི། །སྦྱིན་སྲེག་ཆོ་ག་རྒྱས་པར་བརྩམ། །རྟ་མཆོག་མཁའ་འགྲོ་འཁོར་བཅས་ལ། །ལྷག་པའི་མཆོད་པས་མཉེས་བྱས་ནས། །རང་གི་ལས་ལ་སྦྱར་བྱ་སྟེ། །དངོས་གྲུབ་དོན་ཕྱིར་མཚམས་སུ་གཞག །ནང་པར་དཀྱིལ་འཁོར་མཆོད་བསྟོད་ཅིང་། །བསྐོར་
བཅས་རྒྱུན་དུ་བཤགས་ཏེ་གདོན། །ཡེ་ཤེས་དམ་ཚིག་གཉིས་མེད་བསྡུ། །རྡུལ་ཚོན་གཙང་མའི་གནས་སུ་གཞག །རྡོ་རྗེ་སེམས་དཔའ་དཔལ་སྦྱོར་བ། །ཇི་ལྟའི་གཟུགས་དང་དབྱིབས་སུ་ལྡན། །བདེ་བ་ཉིད་ཀྱིས་ཀུན་དུ་བདག །ཀུན་གྱིས་བདག་ལ་གཞུག་པར་བྱ། །ཆགས་པ་
མེད་ཅིང་མ་ཆགས་མེད། །དབུ་མར་ཡང་ནི་དམིགས་སུ་མེད། །བུད་མེད་ཀུན་གྱི་རྒྱུ་སྦྱོར་འདི། །གཉིས་སུ་མེད་པའི་ཐེག་པའི་མཆོག །མཉམ་ཉིད་དཀྱིལ་འཁོར་ཀུན་གྱི་གཞི། །དོན་དམ་བདེ་བ་ཆེན་པོའི་སྐུ། །དེ་བཞིན་ཉིད་དབྱིངས་ཡེ་ཤེས་ཀྱི། །ལྷ་ཉིད་བརྩོན་པས་བསྒོམ་
པར་བྱ། །མཛོད་གནས་དཔའ་བོའི་གཟུགས་བརྙན་མཆོག །རིན་ཆེན་སྣ་ལྔའི་ཕྲེང་བས་འཁྲིགས། །ཚོན་གང་ཟླ་ཉིའི་གདན་ལ་གནས། །ཕོ་བྲང་སྒོ་བཞི་གདན་པདྨ། །ཆོས་ཀྱི་སྙིང་པོ་ཉི་ཤུ་གཅིག །ཟླ་མདངས་འཁོར་ལོའི་ཚུལ་འཆང་བའོ། །མི་གསལ་གསལ་བའི་རྣམ་
པར་བརྟག །འཕྲོ་འདུས་རིགས་ཀྱི་སྐུར་རྫོགས་ཤིང་། །རྒྱན་ཆས་ཆ་ལུགས་གསལ་བྱས་ཏེ། །རང་གི་ཕྲིན་ལས་སྤྲོ་བྱེད་པའོ། །ཕྱག་རྒྱ་བཞི་རྫོགས་དབང་བསྐུར་ལྡན། །ཡེ་ཤེས་དཀྱིལ་འཁོར་གཉིས་མེད་བསྟིམ། །མཆོད་བསྟོད་ལས་ལ་བསྐུལ་གསལ་འགྲུབ། །ཡུན་རིང་
མཚན་མ་ལྔ་ཡི་མཐར། །དཀྱིལ་འཁོར་རྒྱས་པ་ལ་དམིགས་ཏེ། །ཀུན་གྱི་གསང་བའི་མཛོད་རྒྱས་པར། །དམིགས་པ་གཅིག་བཞིན་གསལ་བ་རུ། །བརྟེན་པར་གྱུར་ནས་སྤྲོ་བར་བྱ། །རྒྱ་ཆེར་གནས་གསུམ་རྡོ་རྗེ་ལ། །བུམ་པའི་ཁང་པར་དཀྱིལ་འཁོར་བསྒོམ། །རིམ་བཞིན་
གཙོ་བོའི་རྣམ་པ་གནས། །འཁོར་གྱི་ལྷ་མོ་མཐར་ཐུག་པར། །དཀྱིལ་འཁོར་གཉིས་མེད་རྫོགས་པའི་མཐར། །མཉེས་མཛད་འགྲོ་བའི་དོན་ལ་སྦྱར། །དཔའ་བོ་མཚན་མ་གསང་གསུམ་སྔགས། །འཕྲོ་འདུའི་ཕྲེང་བ་ཀུན་འཁོར་བས། །འགལ་མེའི་འཁོར་ལོའི་རྣམ་པ་བཞིན། །

གནས་ཀུན་བར་ཆད་མེད་པར་བརྩམ། །སྨིག་རྒྱུ་དུ་བ་སྲིན་བུ་མེ། །མར་མེ་ཟླ་ཉིའི་འོད་བཞིན་དུ། །ཐིག་ལེ་རྒྱས་པའི་དཀྱིལ་འཁོར་གྱིས། །ཕྱག་རྒྱ་ཆེན་པོའི་ལམ་ལ་སྦྱོར། །གཉིས་མེད་རོལ་པའི་མཁའ་གསང་དུ། །གཙོ་བོའི་མཚན་མ་གསལ་གྱུར་ནས། །བུམ་
པར་རྟེན་དང་བརྟེན་པའི་ལྷ། །གཙོ་བོ་ནས་བཟུང་རིམ་པར་བསྒོམ། །ཕྱག་རྒྱ་རྒྱན་ཆས་ཆ་ལུགས་ཀྱི། །རིགས་ཀྱི་དཀྱིལ་འཁོར་རྫོགས་པ་དང་། །ཕྱག་རྒྱ་བཞིས་མཚན་དབང་བསྐུར་འབྲས། །སྐྱེ་མཆེད་བྱིན་བརླབས་གསལ་བར་བྱ། །ཡེ་ཤེས་ལྷ་དང་སྦྱོར་གནས་ནས། །དམན་པའི་
ཕྱག་རྒྱ་བཞི་ཡིས་གདབ། །མཆོད་བསྟོད་འགྲོ་བའི་དོན་སྤྲོ་བ། །རིམ་བཞིན་མཚན་མ་ལྔ་ཡི་བར། །ལྷ་རྣམས་ཀུན་སྦྱོར་གནས་རྒྱས་པར། །རྣམ་གཅིག་བསྐུལ་གསལ་ཇི་ལྟ་བར། །སྤྲོ་དང་བསྡུ་བའི་ཚུལ་བརྟན་པ། །ཕྲ་རགས་དཀྱིལ་འཁོར་མཐར་ཕྱིན་པའོ། །དེས་ནི་ཕྲིན་ལས་དངོས་གྲུབ་
ཀྱི། །ཕྲ་མོའི་ལས་ཀུན་བརྩམས་པས་འགྲུབ། །དེ་ལྟར་ཐིག་ལེ་ཕྲ་མོའི་ཚུལ། །དཀྱིལ་འཁོར་ལྷ་ཡི་རྣམ་དག་གི། །མཚན་མས་དམིགས་པ་སྦྱང་བྱས་ཏེ། །ཆོས་སྐུའི་ཕྱག་རྒྱ་ཆེན་པོར་གནས། །གང་ཟག་བཞི་ཡི་དབྱེ་བ་ཡིས། །རང་གི་ཕྲིན་ལས་སྦྱོར་བའི་མཐུས། །བསྙེན་སྒྲུབ་ཡན་
ལག་བཞི་རྫོགས་ཏེ། །མཆོག་གྱུར་ཕྱག་རྒྱ་བཞི་མཐར་ཕྱིན། །བསྙེན་སྒྲུབ་སྦྱོར་བ་བཞི་དག་གིས། །དང་པོའི་དཀྱིལ་འཁོར་མཉེས་བྱས་པ། །སྤྱི་ཡི་བསྙེན་པ་དང་པོ་སྟེ། །ཐུན་མོང་བཞི་ཡི་དཀྱིལ་འཁོར་ཡིན། །རྣལ་འབྱོར་དེ་ཉིད་བཅོམ་ལྡན་འདས། །རྡོ་རྗེ་སེམས་དཔའ་བསྒྲུབ་འདོད་
པས། །བར་ཆད་མེད་པར་ཞི་རྒྱས་དབང་། །ཕྲིན་ལས་སྣ་ཚོགས་སྒོ་དག་ནས། །ཉེ་བའི་བསྙེན་པ་བརྩམ་པའི་ཕྱིར། །དཀྱིལ་འཁོར་བཞི་ཡི་ལས་ལ་འཇུག །དང་པོ་ཞི་བ་ཆེན་པོའི་ལས། །རྒྱུད་སྦྱང་བསྲུང་ཞིང་ལྷག་གནས་དང་། །དངོས་གྲུབ་ཤིས་པ་བརྟག་པའི་ཕྱིར། །རྣམ་སྣང་
དཀྱིལ་འཁོར་ཉེ་བར་བསྙེན། །དེ་བཞིན་ཉིད་ནས་བརྩམ་བྱ་སྟེ། །ཕྲེང་བས་བརྒྱན་པའི་བར་དུ་བསྒོམ། །ནང་གི་དཀྱིལ་འཁོར་དབྱིངས་དག་ནི། །རེའུ་མིག་ཟླུམ་པོ་འཁོར་ལོས་བརྒྱན། །འཁོར་ལོའི་ཕྲེང་བས་རྣམ་པར་སྤྲས། །སྣ་ཚོགས་པདྨའི་གདན་གྱིས་མཚན། །ཕྱི་རོལ་ར་བ་

དུར་ཁྲོད་དང་། །ཀུན་འབྱུང་ཁོར་ཡུག་ཏུ་བཞིས་མཚན། །མངོན་པར་བྱང་ཆུབ་རྣམ་ལྔ་ཡིས། །མགོན་པོ་རྒྱུ་ཡི་སེམས་དཔའ་བསྐྱེད། །སྐུ་མདོག་རྒྱན་ཆ་ནས་བཟུང་སྟེ། །བྱིན་རླབས་རྫོགས་པས་དག་པར་བྱ། །རང་འོད་རིག་མ་བསྐྱེད་པ་ནས། །ལྷ་མོས་བསྐུལ་བའི་མཐར་ཐུག་
བརྩམ། །ཐུགས་རྗེས་འགྲོ་བའི་རྒྱུད་གཟིགས་ཏེ། །ཁཾ་དང་འཁོར་ལོ་ལས་བྱུང་སྟེ། །ཞིང་ཨོཾ་བྷྲུཾ་ཁཾ་གིས་བསྐྱེད་པའི། །འདུལ་ཕྱིར་རྣམ་སྣང་མཛད་དུ་གྱུར། །གསེར་མདོག་ཞལ་བཞི་ཕྱག་བཞི་མཛེས། །ཞལ་གསུམ་དཀར་དམར་ལྗང་གུའི་མདོག །ཆོས་ཀྱི་འཁོར་ལོའི་རྩིབས་
རྣམས་ལ། །སྣ་ཚོགས་མཚན་མས་བརྒྱན་པའམ། །ལྷུང་བཟེད་ཁར་གསིལ་ཆོས་གོས་དང་། །དམ་པའི་ཆོས་ཀྱི་གླེགས་བམ་འཛིན། །རིན་ཆེན་སྣ་ཚོགས་རྒྱན་དང་གོས། །མཚན་དཔེ་ཕྱག་རྒྱ་ལྔ་ཡིས་སྤྲས། །སྐུ་གསུང་ཐུགས་ཀྱི་རྡོ་རྗེ་དང་། །ཡེ་ཤེས་སེམས་དཔའ་སྔགས་དང་
བཅས། །སངས་རྒྱས་ཀུན་གྱིས་དབང་བསྐུར་ཞིང་། །དབུ་ལ་རིགས་ཀྱི་བདག་པོས་བརྒྱན། །རྡོ་རྗེ་ཐལ་མོ་མཉམ་སྦྱར་ཏེ། །ལག་གཉིས་ནོར་བུ་རིན་ཆེན་དུ། །ཇི་ལྟར་རིགས་པས་མཉམ་སྦྱར་ནས། །མཛུབ་མོ་མཐེ་བོ་རྩེ་མོ་བཞི། །ཡོངས་སུ་བསྒྱུར་ཏེ་བཏེག་ནས་སུ། །དཔྲལ་བའི་གནས་
སུ་གཞག་པར་བྱ། །ཨོཾ་ཨ་བྷི་ཥིཉྩ་མཱཾ། རིན་ཆེན་མྱུ་གུ་འཁོར་ལོའི་ཕྲེང་། །དར་དཔྱངས་དགྱེས་པའི་ཐལ་མོར་བཅས། །རང་འོད་ཡུམ་དང་འཁྲིལ་བ་ནས། །གནས་ནས་ཁཾ་དང་ཤཾ་བརྒྱན་ཏེ། །ལིངྒ་འབར་བའི་རིན་ཆེན་ཕཊ། །རྩེ་མོ་འཁོར་ལོ་རྣམ་པར་མཛེས། །རྣམ་ཐར་པདྨ་ཨེ་
དཀྱིལ་ཅན། །མདོག་སེར་ལྟེ་བ་ཟེའུ་འབྲུ་དམར། །ས་མ་ཡ་སོགས་བརྡས་བསྐུལ་ནས། །ཛཿཧཱུཾ་བཾ་ཧོཿས་རོལ་པ་བྱ། །ལིངྒ་འགྲེང་བ་རང་འབྱུང་བ། །བརླ་ཡི་དབུས་སུ་གཞུག་བྱས་ནས། །ལིངྒ་མཚན་མར་བྱིན་བརླབས་ཏེ། །རྡོ་རྗེ་དབྱིངས་དག་སྔོན་སྐྱེའོ། །གསང་གནས་སོ་སོའི་གདན་དག་
ལ། །ཆོས་ཀྱི་སྙིང་པོས་ལྷ་རྣམས་བསྐྱེད། །ཁཾ་ལས་རྣམ་པར་སྣང་མཛད་ཉིད། །དབུས་ཀྱི་གདན་ལ་བསྒོམ་པར་བྱ། །ཤཾ་ལས་སངས་རྒྱས་དབྱངས་མ་སྟེ། །རཾ་ལས་དེ་བཞིན་དཔལ་མོ་མ། །མཾ་ལས་ཀུན་དུ་བཟང་མོ་ཡིན། །ཐཾ་ལས་ཟད་མེད་སྣོད་འཛིན་མའོ། །འདི་བཞིའི་གཙོ་བོའི་ཕྱོགས་རྣམས་སུ། །

ཕོ་བྲང་པདྨ་བཞི་ལ་གནས། །ཧཾ་ལས་སངས་རྒྱས་སྐུ་ལྡན་མ། །ཚཾ་ལས་ལྷ་མོ་ཞལ་མཛེས་མོ། །ཏྲཾ་ལས་དེ་བཞིན་སྤྲིན་ཆེན་མོ། །དཾ་ལས་ནམ་མཁའི་སྤྱན་མ་ཡིན། །གླིང་བུ་མ་སོགས་ལྷ་མོ་རྣམས། །རྡོ་རྗེ་སེམས་དཔའི་དཀྱིལ་འཁོར་བཞིན། །བྷ་གར་ལིངྒ་
བཅུག་བྱས་ནས། །དེར་ནི་མཚན་མ་བསྒོམ་པར་བྱ། །རྣམ་པར་སྣང་མཛད་གཟུགས་འདྲ་བའི། །སྐུ་གཉིས་ལྡན་པ་སྤྲོ་བྱའོ། །ཨོཾ་བྷྲཱུ་ཁཾ་ཛྫ། ཕྱོགས་བཅུར་དོན་བྱས་འདུས་པ་དག །གཙོ་བོ་ཡབ་ཡུམ་ལ་གཞུག་བྱ། །སངས་རྒྱས་དབྱངས་མ་ཆུ་ཤེལ་མདངས། །རྒྱན་མཛེས་ལྕེ་ཡི་ཕྱག་
རྒྱས་མཚན། །ཨོཾ་བཛྲ་སཏྭ་ཤཾ་ཛྫ། དཔལ་མོ་གསེར་མདོག་ཕྱག་གཉིས་ཀྱིས། །ཆ་ལང་འཁྲོལ་ཞིང་གར་མཛད་པའོ། །ཨོཾ་བཛྲ་རཏྣ་རཾ་ཛྫ། ཀུན་དུ་བཟང་མོ་དམར་གསལ་མདངས། །ཕྱག་གཉིས་རྡོ་རྗེ་རིན་པོ་ཆེ། །ཨོཾ་བཛྲ་དྷརྨཱ་མཾ་ཛྫ། ཟད་མེད་སྣོད་འཛིན་སྣ་ཚོགས་མདོག །རྒྱན་
ཆས་སྣོད་དང་དུང་འཛིན་པའོ། །ཨོཾ་བཛྲ་ཀརྨ་ཐཾ་ཛྫ། འདི་བཞི་དབུས་ཀྱི་ལྷ་མོ་སྟེ། །ཕྱག་རྒྱའི་སྐུ་དང་འཁྲིལ་བར་བཞུགས། །སངས་རྒྱས་སྐུ་ལྡན་མེ་ལོང་མདོག །ཕྱག་གཉིས་མི་བསྐྱོད་ཐུགས་ཀར་འཛིན། །ཧཾ་སཏྭ་བཛྲ་ཛྫ། ཞལ་མཛེས་སྔོ་སྐྱ་ཕྱག་གཉིས་ཀྱིས། །མེ་ལོང་མདངས་གསལ་
རླུང་ཡབ་འཛིན། །ཚཾ་བཛྲ་རཏྣེ་ཛྫ། སྤྲིན་ཆེན་བཻ་དཱུརྱ་མདོག་ཕྱག །རྡོ་རྗེའི་སྤྲིན་ལས་སེར་བ་འབེབས། །ཏཾ་བཛྲ་པདྨེ་ཛྫ། ནམ་མཁའི་སྤྱན་མ་གུར་གུམ་མདོག །ཕྱག་ན་པདྨ་ལ་གནས་སྤྱན། །དཾ་བི་ཤྭ་བཛྲ་ཛྫ། འདི་དག་ཕྱོགས་ཀྱི་འཁོར་ལོ་ལ། །རིམ་པ་བཞིན་དུ་དགོད་པར་བྱ། །ལྷ་མོ་
འདི་དག་མཛེས་པའི་མདངས། །རིན་ཆེན་དར་དང་ཕྲེང་བས་བརྒྱན། །བྱིན་བརླབས་དབང་བསྐུར་རྫོགས་བྱས་པས། །དམ་ཚིག་དཀྱིལ་འཁོར་གསལ་བར་གྱུར། །སྦྱོར་བས་རང་རིག་དཀྱིལ་འཁོར་བསྐུལ། །ཞི་བའི་ཚུལ་བཅས་མདུན་དུ་བཞུགས། །རྡོ་རྗེ་དཔལ་གྱི་ཐལ་མོ་བསྒྱུར། །བསམ་
པ་གཡོས་པས་ཕྱག་རྒྱའོ། །ཨོཾ་ཨ་ཏི་བྷུ་ཨོཾ། །གར་བསྒྱུར་རྡོ་རྗེ་ཐལ་མོ་བསྒྱུར། །གཡོན་སྐོར་སྤྱི་བོའི་མཚམས་སུ་གཞག །སྐལ་བཟང་ཨོཾ་ཞེས་བྱ་བའི་གླུ། །མཆོད་པ་ཐམས་ཅད་དབུལ་བར་བྱ། །ཚད་མེད་བཞི་ཡི་སྦྱོར་བ་ཡིས། །ལྷ་རྣམས་གཉིས་སུ་མེད་པར་གྱུར། །ཨོཾ་རྣལ་འབྱོར་དེ་

ཉིད་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །ཐར་པ་ཐམས་ཅད་རྣམ་དག་ཕྱིར། །སངས་རྒྱས་ཕྱག་རྒྱ་དཔལ་དུ་གནས། །དོན་དམ་རྣམ་པར་དག་པའི་ཕྱིར། བཙོ་མ་གསེར་གྱི་ཁ་དོག་བཞིན། །ཆགས་མེད་ལ་སོགས་ཆགས་ཆེན་ཕྱིར། །དཀར་ཞིང་སྣ་ཚོགས་གསལ་
བའི་མདངས། །ཆོས་ཀྱི་རྒྱལ་སྲིད་རབ་བསྒྲུབ་པ། །རིན་ཆེན་ཆོས་ལས་ལྷག་པ་མེད། །དེ་བས་ཐེག་ཆེན་བྱང་ཆུབ་སེམས། །རྒྱལ་བ་རྡོ་རྗེ་རིན་ཆེན་ཅན། །གཡས་པའི་མཐེ་བོང་གུང་མོ་གཉིས། །གཡོན་པའི་ཁུ་ཚུར་བཅངས་པ་ཡིས། །སོར་མོ་ཀུན་ལ་རེག་པ་ནི། །རྩ་བའི་ཕྱག་རྒྱ་
ཡིན་པར་གྲགས། །འདི་ནི་སངས་རྒྱས་ཐམས་ཅད་ཀྱི། །ཤེས་རབ་ཕ་རོལ་ཕྱིན་གསལ་ཡིན། །གཡས་པའི་ཡན་ལག་གནོན་པ་ཡིས། །གཡོན་པའི་ཡན་ལག་ཀུན་ལས་རྒྱས། །སེམས་དཔའི་སྐྱིལ་མོ་ཀྲུང་བཅས་ན། །དཔུང་རྣམས་ཐམས་ཅད་འཇོམས་པར་བྱེད། །ཨོཾ་བྷཱུ་ཁཾ་མ་ཧཱ་
མུ་དྲ་ཨོཾ། རྡོ་རྗེ་ཁུ་ཚུར་བཅངས་ནས་ཀྱང་། །ལག་པ་གཡོན་པས་བཀབ་ནས་ནི། །སངས་རྒྱས་ཀུན་བརྗོད་དངོས་གྲུབ་རྣམས། །མ་ལུས་ལུས་པ་མེད་པར་འགྲུབ། །ཨོཾ་བཛྲ་སཏྭ་ཤཾ་མ་ཧཱ་མུ་དྲ་ཨོཾ། དེ་བཞིན་དཔལ་ལྡན་ཧེ་རུ་ཀའི། །རྡོ་རྗེ་ཁུ་ཚུར་ཆེན་པོ་དགབ། །དཔའ་བོ་མ་ཡིས་དངོས་གྲུབ་
རྣམས། །མ་ལུས་ལུས་པ་མེད་པར་འགྲུབ། །ཨོཾ་བཛྲ་རཏྣ་རཾ་མ་ཧཱ་མུ་དྲ་ཨོཾ། པདྨོའི་བུད་མེད་ཁུ་ཚུར་ནི། །དེ་བཞིན་ལག་པ་གཡོན་པས་དགབ། །བྱང་ཆུབ་སྤྱོད་པ་རབ་གྲུབ་རྣམས། །མ་ལུས་ལུས་པ་མེད་པར་འགྲུབ། །ཨོཾ་བཛྲ་དྷརྨ་མཱཾ་མ་ཧཱ་མུ་དྲ་ཨོཾ། རིན་ཆེན་འཛིན་པའི་ཁུ་ཚུར་ཡང་། །
ལག་པ་གཡོན་པས་བཀབ་ནས་ནི། །སངས་རྒྱས་ནོར་ཀུན་དངོས་གྲུབ་རྣམས། །མ་ལུས་ལུས་པ་མེད་པར་འགྲུབ། །ཨོཾ་བཛྲ་ཀརྨ་མ་ཧཱ་མུ་དྲ་ཨོཾ། སངས་རྒྱས་ཁུ་ཚུར་བཅངས་ནས་སུ། །ལག་པ་གཡོན་པས་བཀབ་ནས་ནི། །སངས་རྒྱས་ཀུན་གྱི་ཚེ་སྒྲུབ་པ། །མ་ལུས་ལུས་པ་མེད་པ་
འགྲུབ། །ཧཾ་སཏྭ་བཛྲ་མ་ཧཱ་མུ་དྲ་ཨོཾ། བུད་མེད་ཕྱག་རྒྱ་བཅིངས་ནས་སུ། །ལག་པ་གཡོན་པས་བཀབ་ན་ནི། །དངོས་གྲུབ་ཐམས་ཅད་མྱུར་འགྲུབ་པ། །མ་ལུས་ལུས་པ་མེད་པར་འགྲུབ། །ཚཾ་བཛྲ་རཏྣེ་མ་ཧཱ་མུ་དྲ་ཨོཾ། །རྟ་མཆོག་དཔལ་གྱི་ཁུ་ཚུར་ཡང་། །ལག་པ་གཡོན་པས་བཀབ་ནས་

ནི། །ཐམས་ཅད་འགུགས་པ་རབ་བསྒྲུབ་པ། །མ་ལུས་ལུས་པ་མེད་པར་འགྲུབ། །ཏྲཱཾ་བཛྲ་པདྨེ་མ་ཧཱ་མུ་དྲ་ཨོཾ། དཔལ་གྲུབ་སྤྱན་གྱི་ཁུ་ཚུར་ཡང་། །ལག་པ་གཡོན་པས་བཀབ་ན་ནི། །སྣང་བ་ཐམས་ཅད་རབ་འགྲུབ་འགྱུར། །མ་ལུས་ལུས་པ་མེད་པར་འགྲུབ། །དཾ་བི་ཤྭ་
བཛྲ་མ་ཧཱ་མུ་དྲ་ཨོཾ། ཨོཾ་འཇིག་རྟེན་ཁམས་མང་རྡུལ་ཕྲན་སྙེད། །གྲངས་མེད་ཁྱབ་པར་སྤྲོས་པ་ཡིས། །རྒྱལ་བའི་དོན་རྣམས་རབ་དག་ཏུ། །ཕྲ་བའི་རྡུལ་གྱི་གྲངས་སྙེད་པ། །སྤྲུལ་པའི་སྐུ་རྣམས་རབ་དག་ཏུ། །ཕྲ་བའི་རྡུལ་གྱི་གྲངས་སྙེད་ནི། །སྲིད་པ་བདེ་ཆེན་དེ་བཞིན་གཤེགས། །རྣམ་
འཕྲུལ་རྣམ་པ་སྣ་ཚོགས་ཀྱིས། །རྡུལ་ཕྲན་གྲངས་སྙེད་དེ་བཞིན་གཤེགས། །རྣམ་པར་འཕྲུལ་པས་རོལ་མཛད་དོ། །རྣམ་པར་སྣང་མཛད་དཔལ་སྦྱོར་བ། །ཨ་ལ་ལ་ཧོ་བདེ་གྲུབ་མཛོད། །ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོཙྪ་ནེ་སརྦ་ཨརྠ་སིདྡྷ་ནི་སྭཱ་ཧཱ། རྡོ་རྗེ་ཐལ་མོ་མཉམ་སྦྱར་ནས། །མཛུབ་
མོ་གཉིས་ཀྱི་རྩེ་མོ་དགུག །མཐེ་བོའི་རྩེ་མོ་མཉམ་པར་བཞག །ཁོང་སྟོང་མི་འགྱུར་དམ་པ་པོ། །སྤྱི་བོའི་གཙུག་ཏུ་བཞག་ནས་ཀྱང་། །སྔགས་བཅས་རིམ་བཞིན་གྲོལ་བར་བྱ། །རྡོ་རྗེ་ཁུ་ཚུར་ལེགས་བཅིངས་ལ། །བདག་གི་མཐེ་བོ་ནང་ནས་གཞུག །ཞི་བའི་ལས་རྣམས་བསྒྲུབ་པ་
ཡིས། །ཕྱག་རྒྱ་སྔགས་རྣམས་མཉམ་སྦྱོར་བའོ། །ཕྱི་ནང་གསང་བའི་མཆོད་ཚོགས་དག །བྱིན་བརླབས་སྔགས་དང་ཕྱག་རྒྱས་དབུལ། །མཉམ་མེད་མི་གཡོ་ལ་སོགས་པའི། །བསྟོད་པའི་ཕྱག་རྒྱས་མཉེས་པར་བྱ། །སྨོན་ལམ་རྒྱ་ཆེན་བཏབ་བྱས་ནས། །བཟླས་བརྗོད་ཐིག་ལེ་ཕྲ་མོ་དང་། །
དཀྱིལ་འཁོར་དེ་ཉིད་གང་རུང་གིས། །མཚན་མའི་དཀྱིལ་འཁོར་བརྟན་པར་བྱ། །སྒྲིབ་སྦྱང་བདེ་བ་བསྐྱེད་པའི་ཕྱིར། །རིན་ཆེན་བུམ་པ་བྱབས་པའི་རྫས། །སྔགས་ཀྱི་བྲ་ཏི་མེ་ཏོག་ཕྲེང་། །བཟའ་བཏུང་ཕྱག་རྒྱ་བདུད་རྩིའི་ཚོགས། །ལམ་མཉེས་མགྲོན་ཚིམ་ལས་གྲུབ་བྱེད། །ཚོགས་དང་སྦྱིན་
སྲེག་ལྷག་མའི་ལས། །ལས་རྫོགས་མཆོད་བསྟོད་བསྐུལ་བྱས་ཤིང་། །རང་གི་གནས་སུ་བསྡུས་ནས་ནི། །མཚན་མ་ཀུན་དང་ཡོངས་བྲལ་བའི། །མཉམ་ཉིད་དབྱིངས་སུ་གནས་པར་བྱ། །ཡོད་པ་མ་ཡིན་མེད་པ་མིན། །དབུ་མར་ཡང་ནི་དམིགས་སུ་མེད། །ཤེས་རབ་ཕ་རོལ་ཕྱིན་སྦྱོར་བ། །

སངས་རྒྱས་བྱང་ཆུབ་རབ་བསྒྲུབ་པའོ། །ཐམས་ཅད་དབང་དུ་བྱ་བའི་ཕྱིར། །པདྨ་གར་དབང་མཆོད་བྱས་ཏེ། །ཆགས་བཅས་བསྡུས་ཤིང་གཟུང་བྱས་ནས། །ཚེ་ཡི་ཆོ་ག་རྒྱ་ཆེར་བྱ། །གཞི་ཡི་ཏིང་འཛིན་རིམ་པ་ནས། །ཕྲེང་བས་བརྒྱན་པའི་བར་དུ་བསྒོམ། །ནང་གི་དཀྱིལ་འཁོར་དབྱིབས་
དག་ནི། །རེའུ་ཆ་དགུ་དང་པདྨས་བསྐོར། །པདྨའི་ལྕུག་མ་མུ་ཁྱུད་མཛེས། །སྣ་ཚོགས་པདྨའི་གདན་གྱིས་མཚན། །ཕྱི་རོལ་ར་བ་དུར་ཁྲོད་དང་། །ཀུན་འབྱུང་ཁོར་ཡུག་ཏུ་བཞིས་མཚན། །མངོན་པར་བྱང་ཆུབ་རྣམ་ལྔ་ཡིས། །མགོན་པོ་རྒྱུ་ཡི་སེམས་དཔའ་བསྐྱེད། །སྐུ་མདོག་རྒྱན་ཆ་ནས་
བཟུང་སྟེ། །བྱིན་བརླབས་རྫོགས་པས་དག་པར་བྱ། །རང་འོད་རིག་མ་བསྐྱེད་པ་ནས། །ལྷ་མོས་བསྐུལ་བའི་མཐར་ཐུག་བརྩམ། །ཐུགས་རྗེས་འགྲོ་ལ་དམིགས་ནས་བཞེངས། །ཧྲཱིཿདང་པདྨོ་ལས་བྱུང་བའོ། །ཨོཾ་སྭ་བྷཱ་ཝ་བི་ཤུདྡྷ་པདྨ་ནརྟེ་ཤྭ་རེ་ཧྲཱིཿ། དཔལ་ལྡན་པདྨ་གར་དབང་ཕྱུག །ཟླ་གསལ་
ཤེལ་མདངས་ཞལ་བཅོ་ལྔ། །ལྔ་བཅུ་གཉིས་ལྡན་མཚན་བཅས་གར། །ཞལ་བཞི་མཉམ་པའི་པདྨ་ལ། །ཟླ་མདོག་དམར་མདངས་ཞལ་བཞི་པ། །ཕྱག་གཡས་ཉི་ཤུ་རྩ་ལྔ་ན། །པདྨ་རྡོ་རྗེ་སོགས་ཀྱིས་མཚན། །ཁ་དོག་བདུན་ལྡན་ཉི་ཤུ་ལྔ། །རིན་ཆེན་སྣ་ཚོགས་རྒྱན་གོས་བཀླུབས། །
མཚན་དཔེ་ཕྱག་རྒྱ་ལྔ་ཡིས་སྤྲས། །སྐུ་གསུང་ཐུགས་ཀྱི་རྡོ་རྗེ་དང་། །ཡེ་ཤེས་སེམས་དཔའ་སྔགས་དང་བཅས། །སངས་རྒྱས་ཀུན་གྱིས་དབང་བསྐུར་ཞིང་། །དབུ་ལ་རིགས་ཀྱི་བདག་པོས་བརྒྱན། །མཐེ་བོང་སེམས་དཔའི་སྐྱིལ་མོ་ཀྲུང་། །མཛུབ་མོ་གཉིས་ཀྱི་རྩེ་མོ་དགུག །གུང་མོ་གཉིས་
ནི་མཉམ་པར་སྦྱར། །ལྷག་མ་རྡོ་རྗེ་ཐལ་མོའི་འོད། །རྡོ་རྗེ་རིན་ཆེན་ཕྱག་རྒྱ་འདི། །རང་འབྱུང་རྣམས་ཀྱི་དབང་བསྐུར་བའོ། །ཨོཾ་ཨ་བྷི་ཥིཉྩ་ཧྲིཿ། པདྨའི་མྱུ་གུ་ཕྱག་རྒྱའི་ཕྲེང་། །དར་དཔྱངས་དགྱེས་པའི་ཐལ་མོ་བཅས། །རང་འོད་ཡུམ་དང་འཁྲིལ་བ་ལས། །གསང་གནས་ཧྲཱིཿདང་
ཛཿས་བརྒྱན་ཏེ། །པདྨ་འབར་བ་ཕཊ་དང་བཅས། །རྣམ་ཐར་པདྨ་ཨེ་དཀྱིལ་ཅན། །མདོག་སེར་ལྟེ་བ་ཟེའུ་འབྲུ་དམར། །བརྡས་བསྐུལ་བྱིན་བརླབས་རོལ་པར་མཛད། །ལིངྒ་བསྒྲིང་བ་རང་བྱུང་བ། །བརླ་ཡི་དབུས་སུ་གཞུག་བྱས་ནས། །ལིངྒ་པདྨོར་བྱིན་བརླབས་ཏེ། །པདྨོ་གར་བདག་སྔོན་

སྐྱེའོ། །གསང་གནས་སོ་སོའི་གདན་དག་ལ། །ཆོས་ཀྱི་སྙིང་པོས་ལྷ་རྣམས་བསྐྱེད། །ཧྲཱིཿལས་པདྨ་གར་དབང་ཕྱུག །གསང་གནས་དབུས་ཀྱི་གདན་ལ་བསྒོམ། །ཛཿཡིས་རྣམ་པར་གཟིགས་པ་སྟེ། །ཧཱུཾ་གིས་ལྷ་མོ་སྒྲོལ་མའོ། །བཾ་གྱིས་ལྷ་མོ་རྒྱན་
བཅས་མ། །ཧོཿཡིས་ཁྲོ་གཉེར་ཆེན་མོའོ། །ཧཱུཾ་གིས་གཏུམ་པའི་དབང་ཕྱུག་མ། །ཧེས་ནི་སྣ་ཚོགས་པདྨ་ཡིན། །ཨ་ལས་པདྨའི་ན་བཟའ་སྟེ། །ཧོཿཡིས་འདོད་པའི་དབང་མོའོ། །གླིང་བུ་མ་ལ་སོགས་པ་ཡི། །ལྷ་མོ་གཞན་རྣམས་སྔ་མ་བཞིན། །བྷ་གར་ལིངྒ་བཅུག་བྱས་
ནས། །དེར་ནི་ཧྲཱིཿཡིག་བསྒོམ་པར་བྱ། །པདྨ་གར་དབང་གཟུགས་འདྲ་བ། །སྐུ་གཉིས་ལྡན་པར་སྤྲོ་བའོ། །ཨོཾ་སྭ་བྷཱ་ཝ་བི་ཤུདྡྷ་པདྨ་ནརྟེ་ཤྭ་རི་ཛྫ། ཕྱོགས་བཅུར་དོན་བྱས་འདུས་པ་དག །གཙོ་བོ་ཡབ་ཡུམ་གཞུག་པར་བྱ། །རྣམ་གཟིགས་དཀར་དམར་མདངས་ལྡན་པ། །གཡོན་
པས་པདྨར་གཡས་འབྱེད་ཤར། །ཨོཾ་སརྦ་ཏ་ཐཱ་ག་ཏེ་པདྨི་ཛྫ། སྒྲོལ་མ་དཀར་གསལ་གཡོན་དཀུར་བརྟེན། །ཨུཏྤལ་སྔོ་གཡས་བུད་མེད་ལྷོ། །ཨོཾ་བཛྲ་པདྨི་ཛྫ། རྒྱན་ཅན་དམར་མོ་གཡོན་པད་དཀར། །གཡས་པས་འཁོར་ལོ་རྩེ་བརྒྱད་ནུབ། །ཧེ་པདྨི་པདྨི་བཾ་ཛྫ། ཁྲོ་གཉེར་ལྗང་གུ་
གཡོན་པ་མཐིང་། །དཀུར་བརྟེན་གཡས་པས་རྩེ་གསུམ་བྱང་། །ཧོ་པདྨ་ནི་ར་ཛ་ཛྫ། པད་གཏུམ་དབང་ཕྱུག་མཐིང་ག་གཡོན། །པདྨ་གཡས་པས་རྡོ་རྗེ་འཛིན། །ཧཱུཾ་པདྨ་ཙཎྜེ་ཤྭ་རི་ཧཱུཾ་ཕཊ་ཛྫ། སྣ་ཚོགས་པདྨ་སྔོན་མོ་གཡོན། །སྣ་ཚོགས་པད་འཛིན་གཡས་འཁོར་ལོ། །ཧེ་མ་ཧཱ་བི་ཤྭ་པདྨ་
མུ་དྲེ་སིདྡྷ་ཧཱུཾ་ཕཊ་ཛྫ། པདྨའི་ན་བཟའ་སེར་མོ་གཡོན། །པད་མཐིང་གཡས་པས་ཆུ་སྲིན་རྒྱལ། །ཧྲཱིཿཔདྨ་པདྨེ་ཧཱུཾ་ཨཾ་ཛྫ། རྡོ་རྗེ་པདྨ་དབང་ཕྱུག་ལྗང་། །གཡོན་ན་པདྨ་གཡས་རྡོ་རྗེ། །ཧོ་པདྨེ་བི་ཤྭ་ཀྲ་མ་ཧཱུཾ་ཛྫ། འདི་བཞི་ཕྱི་རོལ་པདྨ་ཡི། །ཤར་སོགས་རིམ་བཞིན་གནས་པའོ། །འོད་འབར་
སྣ་ཚོགས་འཁྲུགས་འོད་བཅས། །པདྨ་རྒྱན་བཅས་ཕྲེང་བས་མཛེས། །དབང་བསྐུར་བྱིན་བརླབས་རྫོགས་བྱས་ཏེ། །དབུ་ལ་རིགས་ཀྱི་བདག་པོས་མཚན། །སྦྱོར་བས་རིགས་ཀྱི་དཀྱིལ་འཁོར་བསྐུལ། །ཆགས་པའི་ཚུལ་བཅས་མདུན་དུ་བཞུགས། །ཐལ་མོ་པདྨ་ཁ་འབུས་

བཞིན། །རང་གི་འབྱོར་ལྡན་སྙིང་གར་བཅིང་། །མཐེ་བོ་མཐེའུ་ཆུང་འདབ་མ་བཞིན། །རྒྱས་པར་འདུད་པའི་ཕྱག་ཀྱང་བྱ། །ཨོཾ་ཨ་ཏི་བྷུ་ཧྲཱིཿ། གར་བསྒྱུར་གཡས་གཡོན་ཐལ་མོས་བརྡབ། །པདྨོ་གར་གྱི་མཆོད་པ་འབུལ། །ཚད་མེད་བཞི་ཡི་སྦྱོར་བ་ཡིས། །ལྷ་རྣམས་གཉིས་སུ་མེད་པར་
བྱ། །ཧྲཱིཿརྣལ་འབྱོར་དེ་ཉིད་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །འདོད་ཆགས་ཐམས་ཅད་རྣམ་དག་ཕྱིར། །པདྨའི་ཕྱག་རྒྱ་དཔལ་དུ་གནས། །མི་འགྱུར་དམ་པ་དག་པའི་ཕྱིར། །ཤེལ་སྒོང་བཞིན་དུ་དག་པ་འདྲ། །འདོད་ཆགས་ཐམས་ཅད་བསལ་བའི་ཕྱིར། །
འབར་བ་སྣ་ཚོགས་འཁྲིགས་པའི་འོད། །སངས་རྒྱས་རིན་ཆེན་རབ་ཏུ་སྤྲས། །གོས་དང་སྣ་ཚོགས་རྒྱན་གྱིས་མཛེས། །སངས་རྒྱས་ཐམས་ཅད་འདུས་པ་ཡི། །བདེ་བ་ཅན་བཞིན་དམ་པར་འགྱུར། །གར་ཐབས་རྣམ་པ་སྣ་ཚོགས་ཀྱིས། །ཡོངས་སུ་བསྒྱུར་ཞིང་གར་བྱས་པ། །པདྨའི་མཚན་
མཆོག་པདྨོར་བཅས། །ཕྱག་ནི་རྒྱ་རྣམས་འཁོར་ལོ་བསྐོར། །གཡས་དང་གཡོན་གྱི་སྦྱོར་བ་ཡིས། །སྐྱིལ་མོ་ཀྲུང་ནི་ཕྱེད་མར་བཅས། །ཨོཾ་སྭ་བྷཱ་ཝ་བི་ཤུདྡྷ་པདྨ་ནརྟེ་ཤྭ་རི་ཧྲཱིཿམ་ཧཱ་མུ་དྲ་ཧྲཱིཿ། སྙེམས་པའི་ལག་པ་གཡོན་པ་ཡིས། །པདྨ་དམར་པོ་ཅི་བདེར་གཟུང་། །རང་གི་སྙིང་གར་
འདེན་པའི་ཚུལ། །གཡས་པས་འདབ་མ་ཁ་འབྱེད་པའོ། །ཨོཾ་སརྦ་ཏ་ཐཱ་ག་ཏཱ་པདྨེ་ཛྫཿམ་ཧཱ་མུ་དྲ་ཧྲཱིཿ། སྙེམས་པའི་ལག་པ་གཡོན་པ་ཡི། །སྐྱིལ་མོ་ཀྲུང་ནི་ཕྱེད་མར་བྱ། །པདྨ་སྔོན་པོ་ཅི་བདེར་གཟུང་། །རང་གི་སྙིང་གར་འདྲེན་ཚུལ་གྱིས། །བུད་མེད་ཕྱག་རྒྱ་བཅིང་བར་བྱ། །ཧཱུཾ་བཛྲ་པདྨི་མ་ཧཱ་
མུ་དྲ་ཧྲཱིཿ། སྙེམས་པའི་ལག་པ་གཡོན་པ་ཡིས། །པདྨ་དཀར་པོ་ཅི་བདེར་གཟུང་། །འཁོར་ལོའི་ཕྱག་རྒྱ་བཅིངས་ནས་ནི། །ཆོས་ཀྱི་འཁོར་ལོ་རབ་ཏུ་བསྐོར། །ཧེ་པདྨི་པདྨི་བཾ་མ་ཧཱ་མུ་དྲ་ཧྲཱིཿ། སྙེམས་པའི་ལག་པ་གཡོན་པ་ཡིས། །པདྨ་མཐིང་ག་ཅི་བདེར་གཟུང་། །གཡས་པ་རབ་
ཏུ་གར་བྱེད་པ། །དཔལ་གྱི་ཕྱག་རྒྱ་བ་དན་གསུམ། །ཧོ་པདྨ་ནི་ར་ཛཾ་མ་ཧཱ་མུ་དྲ་ཧྲཱིཿ། སྙེམས་པའི་ལག་པ་གཡོན་པ་ཡིས། །པདྨ་དམར་པོ་ཅི་བདེར་གཟུང་། །གཡས་པས་རྡོ་རྗེ་སྟོད་བྱེད་ཅིང་། །གཞན་དག་ཟིལ་གནོན་འཇིགས་པའི་ཚུལ། །ཧཱུཾ་པདྨ་ཙཎྜི་ཤྭ་རི་ཧཱུཾ་ཕཊ། མ་ཧཱ་མུ་དྲ་ཧྲཱིཿ།

སྙེམས་པའི་ལག་པ་གཡོན་པ་ཡིས། །སྣ་ཚོགས་པདྨ་ཅི་བདེར་གཟུང་། །གཡས་ཀྱི་འཁོར་ལོའི་ཕྱག་རྒྱ་ཡིས། །ཁམས་གསུམ་ཕྲིན་ལས་གནོན་པའོ། །ཧེ་མ་ཧཱ་བི་ཤྭ་པདྨ་མུ་དྲེ་སིདྡྷྱ་ཧཱུཾ་ཕཊ། མ་ཧཱ་མུ་དྲ་ཧྲཱིཿ། སྙེམས་པའི་ལག་པ་གཡོན་པ་ཡིས། །པདྨ་མཐིང་ག་
ཅི་བདེར་གཟུང་། །གཡས་པས་རབ་ཏུ་གར་བྱེད་པས། །ཆུ་སྲིན་ཚུལ་དུ་བསྒྲེང་བར་བྱ། །ཧྲཱིཿཔདྨི་པདྨི་ཧཱུཾ་ཨཱཿམ་ཧཱ་མུ་དྲ་ཧྲཱིཿ། སྙེམས་པའི་ལག་པ་གཡོན་པ་ཡིས། །པདྨ་ལེ་བརྒན་ཅི་བདེར་གཟུང་། །རང་གི་སྙིང་གར་འདྲེན་ཚུལ་གྱིས། །རྡོ་རྗེའི་ཕྱག་རྒྱ་བཅིང་བར་བྱ། །ཧོ་པདྨོ་ཤྭ་ཏྲ་མ་
ཧཱུཾ་ཛྫ། མ་ཧཱ་མུ་དྲ་ཧྲཱིཿ། དེ་བཞིན་གཤེགས་པ་ཐམས་ཅད་ལ། །སོགས་པའི་གཟུགས་མཆོག་སྣ་ཚོགས་འཛིན། །སེམས་ཅན་རྣམ་པ་སྣ་ཚོགས་ཀྱིས། །འདུལ་མཆོག་དངོས་གྲུབ་མཆོག་མངའ་བ། །སེམས་དཔའ་པདྨོ་དགའ་བའི་མཆོག །སྒྱུ་མའི་དགའ་བ་བསྟན་དུ་གསོལ། །ཨ་ལ་
ལ་ཧོ། །ཨེ་མ་ཧོ། །གར་དབང་ཐར་པའི་གར་མཛོད་ཅིག །སངས་རྒྱས་རྡོ་རྗེ་འཛིན་པའི་བདག །ཚངས་པ་འཇུག་སེལ་དབང་ཕྱུག་བདག །ཉི་ཟླ་བདག་ལགས་ཨ་ལ་ལ་ཧོ། །པདྨོ་སྒྱུ་མ་དཔལ་སྣ་ཚོགས། །འདུལ་མཛད་དགའ་བའི་ཚུལ་དགར་མཛོད། །པདྨོ་དམ་ཚིག་སངས་རྒྱས་
ཀྱི། །དབང་ཕྱུག་གར་རྣམས་མཛད་དུ་གསོལ། །འདོད་ཆགས་རྣམ་པར་སྦྱོང་བ་དག །ཐམས་ཅད་ད་རུང་རྣམ་པར་སྦྱོང་། །པདྨོ་འཛིན་པས་མངོན་སུམ་དུ། །སྤྱན་སྔར་གར་མཁན་གར་མཛོད་ཅིག །ཨོཾ་ཏཱ་རེ་ཏུཏྟཱ་རེ་སྭཱཧཱ། རྡོ་རྗེ་ཐལ་མོ་མཉམ་སྦྱར་ནས། །གོང་མ་མཉམ་པ་རབ་ཏུ་
བསྒྲུབ། །མཐེ་བོ་མཐེའུ་ཆུང་འདབ་མ་བཞི། །པདྨ་དྲི་མེད་རབ་ཏུ་རྒྱས། །བརྡེག་པའི་ཁུ་ཚུར་བཅངས་པ་ལས། །མཐེ་བོ་དག་ལ་གུང་མོ་གཞག །པདྨའི་ཁུ་ཚུར་གྲུབ་པ་སྟེ། །ཐམས་ཅད་གྲུབ་པའི་ལས་ལ་སྦྱར། །ཕྱི་ནང་གསང་བའི་མཆོད་ཚོགས་དག །བྱིན་རླབས་སྔགས་དང་
ཕྱག་རྒྱས་དབུལ། །མཉམ་མེད་མི་གཡོ་ལ་སོགས་པའི། །བསྟོད་པའི་ཕྱག་རྒྱ་མཉེས་པར་བྱ། །སྨོན་ལམ་རྒྱས་གདབ་བྱས་ནས་ནི། །བཟླས་བརྗོད་ཐིག་ལེ་ཕྲ་མོ་དང་། །དཀྱིལ་འཁོར་དེ་ཉིད་གང་རུང་གིས། །མཚན་མའི་དམིགས་པ་བརྟན་པར་བྱ། །ཕོ་བྲང་བཀྲ་ཤིས་མཚན་ལྡན་

དུ། །པདྨ་ལ་གནས་གསང་བའི་མིང་། །བདུད་རྩིས་བཀང་བ་བསྒྲུབ་པའི་མཆོག །རིགས་ཀྱི་དཀྱིལ་འཁོར་ཕྱག་རྒྱར་བཅས། །གསང་སྔགས་མཐའ་རྒྱན་མ་ཉམས་པར། །འཕྲོ་འདུའི་དམིགས་པ་གསལ་ལྡན་ཞིང་། །བསྐུལ་ཚིག་གླུ་དབྱངས་ཕྱག་རྒྱའི་གར། །བཟའ་བཏུང་
ཚོགས་བཅས་རོལ་པས་སྤྱད། །ལྷ་མཉེས་མགྲོན་ཚིམ་ལས་གྲུབ་བྱེད། །ཚོགས་སྒྲུབ་སྦྱིན་སྲེག་ལྷག་མའི་ལས། །ལས་རྫོགས་མཆོད་བསྟོད་བསྐུལ་བྱས་ཤིང་། །རང་གི་གནས་སུ་བསྡུས་ནས་ནི། །མཚན་མ་ཀུན་དང་ཡོངས་བྲལ་བའི། །གཉིས་མེད་དབྱིངས་སུ་གནས་པར་
བྱ། །ཇི་ལྟར་པདྨ་དམར་པོ་འདི། །ཆགས་པའི་ཉེས་པས་མི་གོས་པ། །རྣལ་འབྱོར་ལྡན་པས་དེ་བཞིན་དུ། །གནས་ཀྱི་ཉེས་པས་ཡོང་མི་གོས། །ཐམས་ཅད་རྒྱས་པར་བྱ་བའི་ཕྱིར། །རྡོ་རྗེ་ཉི་མའི་ཚོགས་སྒྲུབ་སྟེ། །དཔལ་དང་གཟི་མདངས་ཀུན་གྲུབ་པའི། །རྒྱས་པའི་ལོངས་
སྤྱོད་དགོད་པར་བྱ། །གཞི་ཡི་ཏིང་འཛིན་ནས་བཟུང་སྟེ། །ཕྲེང་བས་བརྒྱན་པའི་བར་དུ་བསྒོམ། །ཕོ་བྲང་ནང་གི་མཚན་བཅས་སོགས། །རིན་ཆེན་འབར་བ་ཆ་བརྒྱད་པ། །ཉིས་རིམ་ལྟེ་བ་རེའུ་ཆ་དགུ། །རིན་ཆེན་ཕྲེང་བ་མུ་ཁྱུད་འཛིན། །ཀ་བ་མཆོག་བརྒྱད་རིན་ཆེན་ཏོག །སྣ་བདུན་
པདྨའི་གདན་གྱིས་མཚན། །ཕྱི་རོལ་ར་བ་དུར་ཁྲོད་དང་། །ཀུན་འབྱུང་ཁོར་ཡུག་ཏུ་བཞིས་མཚན། །མངོན་པར་བྱང་ཆུབ་རྣམ་ལྔ་ཡིས། །མགོན་པོ་རྒྱུ་ཡི་སེམས་དཔའ་བསྐྱེད། །སྐུ་མདོག་རྒྱན་ཆ་ནས་བཟུང་སྟེ། །བྱིན་རླབས་སྤྲུལ་པས་དག་པར་བསྒོམ། །རང་འོད་རིག་མ་བསྐྱེད་པ་ནས། །
ལྷ་མོས་བསྐུལ་བའི་མཐར་ཐུག་བརྩམ། །ཐུགས་རྗེས་འགྲོ་བའི་རྒྱུད་གཟིགས་ཏེ། །ཏཾ་ཡིག་ནོར་བུ་མདའ་ལས་བྱུང་། །ཨོཾ་སིདྡྷྱ་བྷུ་སིདྡྷྱ་བྷུ། སིདྡྷྱ་ས་མ་སིདྡྷྱ་ཤ། མ་ཧཱ་བཛྲ་རཏྣ་བྷ་ཝཱ་ཏ་ཏྲཱཾ། དཔལ་ལྡན་རྡོ་རྗེ་ཉི་མ་རྒྱལ། །གསེར་མདོག་ཞལ་བཞི་ཕྱག་མཛེས་མཚུངས། །གཡས་པས་མདའ་གསོར་
གཡོན་གཞུ་འཛིན། །འཛུམ་བཅས་གཡོན་མིག་གྱེན་དུ་གཟིགས། །གཡས་ཀྱི་འོག་མས་རལ་གྲི་འཛིན། །གཡོན་པ་པདྨ་ཉི་དཀྱིལ་ལ། །རྡོ་རྗེ་རྩེ་ལྔ་འབར་བ་གནས། །ཞབས་གཉིས་རྒྱལ་པོའི་སྐྱིལ་མོ་ཀྲུང་། །ཁྲོ་མདངས་པདྨ་རཱ་གའི་མདོག །ཉི་མའི་དཀྱིལ་འཁོར་འབར་བས་མཚན། །

རིན་ཆེན་སྣ་ཚོགས་རྒྱན་དང་གོས། །མཚན་དཔེ་ཕྱག་རྒྱ་ལྔ་ཡིས་མཚན། །སྐུ་གསུང་ཐུགས་ཀྱི་རྡོ་རྗེ་དང་། །ཡེ་ཤེས་སེམས་དཔའ་སྔགས་དང་བཅས། །སངས་རྒྱས་ཀུན་གྱི་དབང་བསྐུར་ཞིང་། །དབུ་ལ་རིགས་ཀྱི་བདག་པོས་བརྒྱན། །རྡོ་རྗེ་ཐལ་མོ་མཉམ་སྦྱར་
ནས། །མཛུབ་གཉིས་མཉམ་སྟེ་ཕྱི་རུ་དགུ། །མཐེ་བོང་གཉིས་ནི་རབ་ཏུ་བརྐྱང་། །རྡོ་རྗེ་ནོར་བུ་དཔྲལ་བར་གཞག །ཨོཾ་ཨ་བྷི་ཥིཉྩ་ཏྲཱཾ། རིན་ཆེན་མྱུ་གུའི་ཕྱག་རྒྱ་ཕྲེང་། །དར་དཔྱངས་དགེས་པའི་ཐལ་མོར་བཅས། །རང་འོད་ཡུམ་དང་འཁྲིལ་བ་ལས། །གསང་གནས་ཧྲཱིཿདང་ཨས་བརྒྱན་ཏེ། །
རིན་ཆེན་འབར་བ་ཕཊ་དང་བཅས། །བརྡས་བསྐུལ་གཉིས་མེད་རོལ་བ་མཛད། །ལིངྒ་བསྒྲེང་བ་རང་བྱུང་བ། །བརླ་ཡི་དབུས་སུ་གཞུག་བྱས་ནས། །ལིངྒ་རིན་ཆེན་བྱིན་བརླབས་ཏེ། །རྡོ་རྗེ་ཉི་མར་བདག་མངོན་བསྐྱེད། །གསང་གནས་སོ་སོའི་གདན་དག་ལ། །ཆོས་ཀྱི་སྙིང་པོས་ལྷ་རྣམས་
བསྐྱེད། །ཏྲཱཾ་ལས་རྡོ་རྗེ་ཉི་མ་སྟེ། །གསང་གནས་དབུས་ཀྱི་གདན་ལའོ། །ཛཿལས་ལྷ་མོ་དབང་བསྐུར་མ། །ཧཱུཾ་གིས་ལྷ་མོ་གཏེར་ལྡན་མཆོག །བཾ་ལས་རྒྱལ་མཚན་མཆོག་ལྡན་སྟེ། ཧོཿལས་ལྷ་མོ་མཆོད་ཆེན་མོ། །དེ་བཞིན་ཨོཾ་ལས་མདའ་འཛིན་རྒྱལ། །ཧྲཱིཿལས་རལ་གྲི་འཛིན་མ་
ཡིད། །ཧོ་ཡིས་ལྷ་མོ་ཉི་མ་སྟེ། །ཧཾ་ལས་རྡོ་རྗེ་མེ་མའོ། །ལྷག་པའི་ལྷ་མོ་གླིང་སོགས་རྣམས། །རྡོ་རྗེ་སེམས་དཔའི་དཀྱིལ་འཁོར་བཞིན། །བྷ་གར་ལིངྒ་བཅུ་གནས་ནི། །དེར་ནི་ཏཾ་ཡིག་བསྒོམ་པར་བྱ། །རྡོ་རྗེ་ཉི་མའི་གཟུགས་འདྲ་བ། །སྐུ་གཉིས་ལྡན་པར་སྤྲོ་བྱའོ། །ཨོཾ་སིདྡྷྱ་བྷུ་སིདྡྷྱ་
བྷུ་སིདྡྷྱ་ས་མ་སིདྡྷྱ་ཤ། མ་ཧཱ་བཛྲ་རཏྣ་བྷ་བ་ཏ་ཏ་ཏྲཾ་ཛྫ། ཕྱོགས་བཅུར་དོན་མཛད་འདུས་པ་དག །གཙོ་བོ་ཡབ་ཡུམ་ལ་གཞུག་བྱ། །ལྷ་མོ་དབང་བསྐུར་དཀར་གསལ་མདངས། །དབུ་རྒྱན་རྩེ་ལྔ་བུམ་པའི་ཆུ། །བཛྲ་སཏྭ་ཛཿཛྫ། གཏེར་ལྡན་སེར་མོ་ཕྱག་གཉིས་ན། །རིན་ཆེན་གཏེར་གྱི་
བུམ་པ་ཐོགས། །བཛྲ་རཏྣ་ཧཱུཾ་ཛྫ། རྒྱལ་མཚན་མཆོག་ལྡན་དམར་བའི་མདངས། །རྒྱལ་མཚན་རིན་ཆེན་ཏོག་བཅས་འཛིན། །བཛྲ་རཏྣ་མ་བཾ་ཛྫ། །མཆོད་ཆེན་ལྗང་སྔོན་རིན་ཆེན་སྣོད། །རིན་ཆེན་མཆོད་རྫས་གང་བ་འཛིན། །བཛྲ་ཀརྨ་ཧོཿཛྫ། དེ་དག་གཙོ་བོའི་ཕྱོགས་བཞི་ཡི། །

རེའུ་ཆའི་པདྨ་དག་ལ་གནས། །མདའ་གཞུ་དམར་སེར་མཚན་ཐུན་ཕྱག །ཤར་གྱི་ཕྱོགས་ཀྱི་རྩེ་ལ་དགོད། །ཨོཾ་པྲ་ཏི་བཛྲ་ནི་མ་ཏ་ཛྫ། རྡོ་རྗེ་ཁ་ཊྭཱཾ་བཻཌཱུརྱ། རལ་གྲི་ཁ་ཊྭཱཾ་ལྷོ་ཡི་རྩེ། །ཨོཾ་བཛྲ་པྲ་ཏི་ཧྲཱིཿཛྫ། རྡོ་རྗེ་ཉི་མ་དམར་སེར་མདངས། །ཉི་མའི་དཀྱིལ་འཁོར་ནུབ་ཀྱི་ཕྱོགས། །ཨོཾ་ཙིནྟ་
མ་ནི་ཧོ་ཛྫ། རྡོ་རྗེ་མེ་མོ་ལྗང་སེར་མདོག །རྡོ་རྗེ་སྣོད་བཅས་མི་འཛིན་བྱང་། །ཨོཾ་བཛྲ་མ་ཥ་ཧཱ་ཥྚཾ་ཛྫ། །ཕྱི་རོལ་ཤར་སོགས་པདྨའི་གདན། །རིན་ཆེན་འབར་བའི་རྩིབས་ལ་གནས། །འོད་འབར་སྣ་ཚོགས་འཁྲུགས་འོད་བཅས། །རིན་ཆེན་རྒྱན་ཕྲེང་ན་བཟའ་བཀླུབས། །བྱིན་རླབས་དབང་བསྐུར་
རིགས་བདག་གིས། །དམ་ཚིག་དཀྱིལ་འཁོར་གསལ་བར་འགྱུར། །སྦྱོར་བས་རང་གི་དཀྱིལ་འཁོར་བསྐུལ། །རྒྱལ་བའི་ཚུལ་བརྗིད་གདན་ལ་བཞུགས། །ལུས་ཀུན་ས་ལ་བསྙལ་བྱས་ཏེ། །གནས་གསུམ་ཐལ་སྦྱར་ཕྱག་འཚལ་ལོ། །ཨོཾ་ཨ་ཏི་བྷུ་ཏྲཱཾ། གར་བསྒྱུར་རིན་ཆེན་ཐལ་སྦྱར་ནས། །ཉི་མའི་ཚོགས་མཉེས་
མཆོད་པ་དབུལ། །ཚད་མེད་བཞི་ཡི་སྦྱོར་བ་ཡིས། །ལྷ་རྣམས་གཉིས་སུ་མེད་པར་བྱ། །ཏྲཱཾ་རྣལ་འབྱོར་དེ་ཉིད་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །ནོར་མཆོག་རྣམ་པར་སྦྱང་བའི་ཕྱིར། །རྡོ་རྗེ་ཉི་མའི་ཕྱག་རྒྱར་གནས། །ནམ་མཁའ་སྙིང་པོ་ཐམས་ཅད་
ཕྱོགས། །རེ་བ་ཐམས་ཅད་ཡོངས་རྫོགས་པར། །བུད་མེད་ལ་སོགས་རིན་ཆེན་མཆོག །རིན་ཆེན་ཐམས་ཅད་མཁའ་ལས་འབེབས། །དྲག་པོ་འདུས་པའི་འཇིག་རྟེན་རྣམས། །དྲག་པོ་ཉིད་ཀྱིས་སྒྲུབ་པར་བྱེད། །ཉི་མའི་གཟུགས་དང་སྤྱོད་ལམ་དང་། །ཚུལ་དང་གཟི་བརྗིད་ཆེན་པོ་
སྟོན། །རྡོ་རྗེ་གཞུ་དང་མདའ་མཆོག་དང་། །ཤིན་ཏུ་ལེགས་པར་བཟུང་བ་སྟེ། །མདངས་གསལ་འཛུམ་དང་བཅས་པའི་སྤྱན། །གཡོན་པས་འབྱེད་ཅིང་གྱེན་དུ་འདེགས། །རྡོ་རྗེ་པུས་མོ་གཉིས་གཞིབས་ཏེ། །རྒྱལ་པོའི་སྐྱིལ་མོ་ཀྲུང་བཅས་ནས། །རང་གི་སྟན་ལ་འདུག་ནས་ནི། །བགེགས་
རྣམས་ཐམས་ཅད་གཞིག་པར་བྱ། །ཨོཾ་སིདྡྷྱ་བྷུ་སིདྡྷྱ་བྷུ་སིདྡྷྱ་ས་མ་སིདྡྷྱ་ཤ། མ་ཧཱ་བཛྲ་རཏྣ་བྷ་ཝ་ཏ་ཏ་ཏྲཱཾ། མ་ཧཱ་མུ་དྲ་ཏྲཱཾ། ཁམས་གསུམ་གནས་ཀུན་དག་མཛད་ཅིང་། །ཆོས་ཀྱི་རྒྱལ་པོར་དབང་བསྐུར་བའི། །ཡེ་ཤེས་ལྔས་མཚན་རྒྱན་གྱིས་སྤྲས། །སྐྱོན་གྱིས་མ་གོས་སྒྲིབ་ཚོགས་སྤངས། །བཛྲ་

སཏྭ་ཛཿམ་ཧཱ་མུ་དྲ་ཏྲཾ། རྒྱལ་སྲིད་ཀུན་ལ་ལོངས་སྤྱོད་ཅིང་། །འཕགས་པའི་ནོར་ཚོགས་ཟག་པ་མེད། །རང་བཞིན་མི་འགྱུར་ལྷུན་གྲུབ་རྒྱས། །རྟག་ཏུ་འགྱུར་མེད་རྣམ་པར་སྤྱོད། །བཛྲ་རཏྣ་ཧཱུཾ་མ་ཧཱ་མུ་དྲ་ཏྲཾ། ཆོས་ཀུན་མཚན་མ་ལས་རྒྱལ་ཞིང་། །ཡོན་
ཏན་ཚོགས་ལྡན་ནུབ་པ་མེད། །ཆགས་པའི་ཐུགས་རྗེས་ཀུན་ཁྱབ་མཛད། །མཆོག་གི་མཚན་མས་མཉེས་པའི་ཚུལ། །བཛྲ་དྷརྨཱ་བཾ་མ་ཧཱ་མུ་དྲ་ཏྲཾ། མཉེས་མཛད་ཕྲིན་ལས་ཀུན་སྤྱོད་ཅིང་། །ཀུན་འབྱུང་ཡོན་ཏན་སྣོད་བཅུད་སོགས། །རྣམ་ཀུན་སྤུངས་པའི་སྤྲིན་ཆེན་པོ། །སྣ་ཚོགས་ལས་མཛད་
འགྱུར་བ་མེད། །བཛྲ་ཀརྨཱ་ཧོཿ མ་ཧཱ་མུ་དྲ་ཏྲཾ། ཐབས་དང་ཤེས་རབ་འབྲེལ་པའི་མཆོག །རྒྱ་ཆེན་ཟབ་མོའི་དབྱིངས་སུ་སྦྱོར། །ཆགས་པའི་སྐྱོན་བྲལ་རྒྱས་བྱེད་མདངས། །ཐུགས་རྗེས་མཛད་པས་བཤོལ་བ་མེད། །ཨོཾ་པྲ་ཏི་བཛྲ་ནི་ཕཊ། མ་ཧཱ་མུ་དྲ་ཏྲཾ། སྐུ་གསུང་ཐུགས་མཆོག་རྟགས་ལྡན་
པས། །སྣ་ཚོགས་སྒྲར་བཅས་ཁམས་གསུམ་གནོན། །ཤེས་རབ་མཚོན་ཚོགས་གཡུལ་ལས་རྒྱལ། །དོན་དམ་འགྱུར་མེད་མཁའ་འགྲོ་མ། །ཨོཾ་བཛྲ་པྲ་ཏི་ཧྲིཿམ་ཧཱ་མུ་དྲ་ཏྲཾ། སྲ་བརྟན་མི་ཤིགས་འགྲོ་རྒྱུད་ཁྱབ། །འོད་མདངས་གསལ་བའི་དཀྱིལ་འཁོར་ཅན། །ལྷག་པའི་ཐུགས་
གཉིས་དབྲི་དཀྲོལ་མེད། །དེ་ཉིད་བཞིན་འདས་ཚུལ་སྟོན་པའོ། །ཨོཾ་ཙིནྟ་མ་ནི་ཧོ་མ་ཧཱ་མུ་དྲ་ཏྲཾ། དྲག་པོ་བསྐལ་པས་འཁྲིགས་བྱས་ནས། །མི་མཐུན་གནས་ཀྱི་རྒྱུད་ཀུན་བསྲེག །ཀུན་སྤྱོད་ཡོན་ཏན་མཐར་ཕྱིན་པའི། །གསུང་གསུམ་རྟེན་བཅས་འགྲོ་ལ་སྟོན། །ཨོཾ་བཛྲ་མ་ཥཱ་མ་ཧཱ་ཥུཾ་མཧཱ་མུ་དྲ་
ཏྲཾ། ཏྲཾ་ཁམས་གསུམ་ཀུན་གྱི་རྒྱལ་སྲིད་བདག །སྣ་ཚོགས་མཆོག་གི་ནོར་ལྡན་པས། །འཇལ་དུམ་གཡུལ་འགྱེད་ལ་སོགས་པའི། །རྣམ་མང་སངས་རྒྱས་ཀྱིས་འདུལ་བ། །རྣམ་པ་སྣ་ཚོགས་འཇལ་དུམ་ལས། །རྣམ་པར་རྒྱལ་བའི་རྒྱལ་མཚན་ཅན། །རྡོ་རྗེ་ཉི་མའི་རྒྱལ་པོ་ཡི། །བདེ་
མཆོག་སྒྱུ་མ་བསྟན་དུ་གསོལ། །སེམས་ཅན་སྤྲིན་ལ་བྱང་ཆུབ་སེམས། །མཆོག་སྦྱིན་སྣ་ཚོགས་ཆར་འབེབས་པ། །བདག་གི་རེ་བ་ཐམས་ཅད་བསྒྲུབ། །མྱུར་སྟོན་ཨ་ལ་ལ་ལ་ཧོ། །མི་ཟད་གཏེར་གྱི་དབང་བསྐུར་བ། །ཁྱད་པར་བདག་ལ་བསྟན་དུ་གསོལ། །ཧཱུཾ་པ་པ་ཏ་ཏ་ཊྲ་ཊྲ་ཏ་ཏ། ཏཾ་ཏཾ་སྭཱ་ཧཱ། རྡོ་རྗེ་

ཐལ་མོ་མཉམ་སྦྱར་ལ། །མཛུབ་མོ་མཉམ་པར་ཕྱིར་བཀུག་སྟེ། །མཐེ་བོ་རྡོ་རྗེ་གཡོགས་པ་ནི། །རྡོ་རྗེ་དཔལ་གྱི་ནོར་བུ་ཡིན། །རྡོ་རྗེ་ཁུ་ཚུར་རིན་ཆེན་མཆོག །འབེབས་པ་ཐམས་ཅད་ཡོངས་རྫོགས་པའོ། །ཕྱི་ནང་གསང་བའི་མཆོད་ཚོགས་བདག །བྱིན་རླབས་སྔགས་དང་ཕྱག་རྒྱ་འབུལ། །མཉམ་མེད་མི་གཡོ་
ལ་སོགས་པའི། །བསྟོད་པའི་ཕྱག་རྒྱས་མཉེས་པར་བྱ། །སྨོན་ལམ་རྒྱ་ཆེན་བཏབ་བྱས་ནས། །སླར་བརྗོད་ཐིག་ལེ་ཕྲ་མོ་དང་། །དཀྱིལ་འཁོར་དེ་ཉིད་གང་རུང་གིས། །མཚན་མའི་དཀྱིལ་འཁོར་བརྟན་པར་བྱ། །འབྱོར་ཚོགས་ཡོན་ཏན་རྒྱས་པའི་ཕྱིར། །རིན་ཆེན་སྣོད་བཟང་ལེགས་
སྤྲས་པར། །དཀྱིལ་འཁོར་ཕོ་བྲང་ཐིག་གིས་དབྱེ། །བཟའ་བཏུང་བརྡ་སྦྱོར་བདུད་རྩིས་བཀང་། །རིགས་ཀྱི་བསྒོམ་བཟླས་འཕྲོ་འདུར་བཅས། །གླུ་གར་དབྱངས་ཀྱི་སྤྲུལ་པར་བྱ། །གཉིས་མེད་རོལ་པས་ལོངས་སྤྱོད་ཅིང་། །རྟེན་གྱི་དཀྱིལ་འཁོར་བཅང་བར་བྱ། །ལྷ་མཉེས་མགྲོན་ཚིམ་
ལས་གྲུབ་བྱེད། །ཚོགས་འཁོར་སྦྱིན་སྲེག་ལྷག་མའི་ལས། །ལས་རྫོགས་མཆོད་བསྟོད་བསྐུལ་བྱས་ཤིང་། །རང་གི་གནས་སུ་བསྡུས་ནས་ནི། །མཚན་མ་ཀུན་དང་ཡོངས་བྲལ་བའི། །མཉམ་ཉིད་དབྱིངས་སུ་གནས་པར་བྱ། །ཤིན་ཏུ་གདུག་ཅིང་དྲག་པོ་ལ། །ཞི་བས་ཕན་པར་མི་འགྱུར་
ཏེ། །ཤེས་རབ་ཐབས་ཀྱི་སྦྱོར་བ་ནི། །རྣམ་པར་རྒྱལ་ཕྱིར་རབ་ཏུ་དྲག །སྣ་ཚོགས་ལས་རྣམས་བརྩམ་པའི་ཕྱིར། །རྟ་མཆོག་དཀྱིལ་འཁོར་མཆོད་བྱ་སྟེ། །བྲོ་གར་ཕྱག་རྒྱའི་ཚོགས་བཅས་པས། །རང་གི་ལས་གཞུང་རྣམ་པར་འཕྲུལ། །དེ་བཞིན་ཉིད་ནས་བརྩམ་བྱ་སྟེ། །ཕྲེང་
བས་བརྒྱན་པའི་བར་དུ་བསྒོམ། །ནང་གི་དཀྱིལ་འཁོར་དབྱིབས་དག་ནི། །སྣ་ཚོགས་པདྨ་འདབ་བརྒྱད་མཛེས། །འཁོར་ལོས་མཚན་པ་མུ་ཁྱུད་མཆོག །རིམ་གཉིས་རྒྱ་གྲམ་པདྨའི་གདན། །ཕྱི་རོལ་ར་བ་དུར་ཁྲོད་དང་། །ཀུན་འབྱུང་ཁོར་ཡུག་གྲུ་བཞིས་མཚན། །མངོན་པར་བྱང་ཆུབ་
རྣམ་ལྔ་ཡིས། །མགོན་པོ་རྒྱུ་ཡི་སེམས་དཔའ་བསྐྱེད། །སྐུ་མདོག་རྒྱན་ཆ་ནས་བཟུང་སྟེ། །བྱིན་བརླབས་རྫོགས་པས་དག་པར་བྱ། །རང་འོད་རིག་མ་བསྐྱེད་པ་ནས། །ལྷ་མོས་བསྐུལ་བའི་མཐར་ཐུག་བརྩམ། །ཐུགས་རྗེས་འགྲོ་རྒྱུད་གཟིགས་མཛད་དེ། །ཧཾ་ཡིག་རྒྱ་གྲམ་ལས་བྱུང་

བའོ། །ཨོཾ་སུམྦྷ་ནི་སུམྦྷ་ཧཱུཾ། རྟ་མཆོག་ལྗང་སེར་ཞལ་གསུམ་པ། །དབུས་སྟེང་རྟ་མགོ་ལྗང་སྔོན་བཅས། །བགེགས་བཅས་དྲག་ཚུལ་ཞི་མདངས་ཁྲོས། །ལག་ངར་བརྒྱད་པ་དཔའ་བོའི་མཆོག །གཡས་པས་བ་དན་གསུམ་པའི་ཕྱག །འདེགས་པའི་ཚུལ་དུ་
མཛད་པ་དང་། །གཉིས་པ་རྡོ་རྗེ་རྒྱ་གྲམ་འཛིན། །འོག་མ་གཉིས་ན་རལ་གྲི་མདའ། །གཡོན་གྱིས་སྣ་ཚོགས་པདྨ་དང་། །ཤག་ཏི་རྩེ་གཅིག་བེ་ཅོན་གཞུ། །གཡས་ཀྱི་རྨིག་པ་དང་པོ་ཡིས། །དངོས་གྲུབ་གསུམ་དང་དཔལ་མོ་གནོན། །གཉིས་པས་ཞི་ལ་དགའ་བ་མོ། །གཡོན་པས་
དྲག་པོ་ཁྱབ་འཇུག་དང་། །གཉིས་པས་ཚངས་པ་འདོད་པའི་ལྷ། །རིན་ཆེན་སྣ་ཚོགས་རྒྱན་དང་གོས། །ཁྲོ་འཛུམ་ཕྱག་རྒྱ་ལྔ་ཡིས་སྤྲས། །སྐུ་གསུང་ཐུགས་ཀྱི་རྡོ་རྗེ་དང་། །ཡེ་ཤེས་སེམས་དཔའ་སྔགས་དང་བཅས། །སངས་རྒྱས་ཀུན་གྱིས་དབང་བསྐུར་ཞིང་། །དབུ་ལ་རིགས་ཀྱི་བདག་པོས་
བརྒྱན། །སངས་རྒྱས་རིན་ཆེན་པདྨོ་དབང་། །དེ་བཞིན་རྡོ་རྗེ་རིན་ཆེན་དང་། །ཡིད་བཞིན་ནོར་བུ་རིན་ཆེན་མཆོག །རྟ་མཆོག་རབ་ཏུ་འགྲུབ་པར་འགྱུར། །ཨོཾ་ཨ་བྷི་ཥིཉྩ་ཧཾ། རྒྱ་གྲམ་ཕྲེང་བའི་ཕྱག་རྒྱ་དང་། །དར་དཔྱངས་དགྱེས་པའི་ཐལ་མོར་བཅས། །རང་འོད་ཡུམ་དང་འཁྲིལ་བ་
ལས། །གསང་གནས་ཧཱུཾ་དང་ཨས་བརྒྱན་ཏེ། །རྒྱ་གྲམ་འབར་བ་ཕཊ་དང་བཅས། །རྣམ་པར་ཐར་པ་ཨེ་དཀྱིལ་ཅན། །ས་མ་ཡ་སོགས་བརྡས་བསྐུལ་ནས། །ཛཿཧཱུཾ་བཾ་ཧོཿས་རོལ་པ་བྱ། །ལིངྒ་འགྲེང་བ་རང་འབྱུང་བ། །བརླ་ཡི་དབུས་སུ་གཞུག་བྱ་སྟེ། །ལིངྒ་སྣ་ཚོགས་རྡོ་རྗེ་
སྟེ། །རྟ་ཡི་རྒྱལ་པོར་བདག་སྔོན་བསྐྱེད། །གསང་གནས་སོ་སོའི་གདན་དག་ལ། །ཆོས་ཀྱི་སྙིང་པོས་ལྷ་རྣམས་བསྐྱེད། །ཧཾ་གི་རྟ་མཆོག་རྒྱལ་པོ་སྟེ། །གསང་གནས་དབུས་ཀྱི་གདན་ལའོ། །ཛཱི་ལས་སྣ་ཚོགས་པདྨའི་རྒྱ། །ཧ་ལས་སྣ་ཚོགས་རྡོ་རྗེ་མ། །ཁྱད་པར་རྟ་ཡི་ལྷ་མོ་
སྟེ། །གཡས་གཡོན་ཕྱོགས་ཀྱི་པདྨ་ལའོ། །འཁོར་གཞན་རིགས་རྣམས་གང་རུང་གི། །ལྷ་མོ་ཉི་ཤུ་གོང་མ་བཞིན། །བྷ་གར་ལིངྒ་བཅུག་ནས་ནི། །དེར་ནི་ཧཱུཾ་ཡིག་བསྒོམ་པར་བྱ། །རྟ་མཆོག་རོལ་པའི་གཟུགས་དག་ནི། །སྐུ་གཉིས་ལྡན་པས་སྤྲོ་བྱའོ། །ཨོཾ་སུམྦྷ་ནི་སུམྦྷ་ཧཱུཾ་ཛྫ།

ཕྱོགས་བཅུར་དོན་བྱས་འདུས་པ་དག །གཙོ་བོ་ཡབ་ཡུམ་ལ་གཞུག་བྱ། །སྣ་ཚོགས་པདྨ་ལྗང་སེར་འཕྲོ། །མཚན་མཐུན་ཕྱག་རྒྱ་གཡས་ཀྱི་ཕྱོགས། །ཨོཾ་བྷི་ཤ་བཛྲ་དྷ་བོ་ཛྫཿ། སྣ་ཚོགས་རྡོ་རྗེ་ལྗང་སྔོན་འཕྲོ། །མཚན་མཐུན་ཕྱག་འཛིན་གཡོན་གྱི་ཕྱོགས། །ཨོཾ་བྷི་ཤ་བཛྲ་སཏྭ་ཛྫ། འཁོར་གཞན་
ལྷ་མོ་ཚོགས་བཅས་པ། །སྣ་ཚོགས་རྡོ་རྗེ་རྒྱན་ཕྲེང་མཛེས། །བྱིན་རླབས་དབང་བསྐུར་རྫོགས་བྱས་པས། །དམ་ཚིག་དཀྱིལ་འཁོར་གསལ་བར་སྣང་། །སྦྱོར་བས་རང་རིགས་དཀྱིལ་འཁོར་བསྐུལ། །སྣ་ཚོགས་ཚུལ་གྱིས་མདུན་དུ་བཞུགས། །དཔལ་ལྡན་རྡོ་རྗེ་འགྱིང་བའི་ཐབས། །འཛུམ་
པའི་མིག་གིས་ཕྱག་བྱའོ། །ཨོཾ་ཨ་ཏི་བྷུ་ཧཾ། གང་ངམ་འོན་ཏེ་སྟོང་ཡང་རུང་། །ཡང་ན་ཅི་འབྱོར་པ་ཡིས་ཀྱང་། །དམ་ཚིག་མཉམ་པར་བསྒྲུབ་པ་ཡིས། །མཆོད་པ་ཐམས་ཅད་འགྲུབ་པར་འགྱུར། །ཚད་མེད་བཞི་ཡི་སྦྱོར་བ་ཡིས། །ལྷ་རྣམས་གཉིས་སུ་མེད་པར་བྱ། །ཧཱུཾ་རྣལ་འབྱོར་དེ་ཉིད་
བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །དྲག་ཤུལ་སྦྱོར་བས་རྣམ་སྦྱོར་བ། །རྟ་མཆོག་ཕྱག་རྒྱས་རབ་ཏུ་གནས། །ཐམས་ཅད་པདྨོ་མོས་པ་ཡིས། །སྡིག་མེད་སྟོབས་ཀྱི་ངོ་འཐོན་དུ། །རབ་ཏུ་གནོན་པའི་སྩལ་དག་གིས། །འཇིག་རྟེན་ཐམས་ཅད་རབ་ཏུ་འཇོམས། །འདོད་
ཆགས་ཅན་ལ་གཡེམ་པར་སྟོན། །གདུག་པ་རྣམས་ལས་གདུག་པར་འགྱུར། །ཞི་བ་རྣམས་ལ་ཞི་བའི་མཆོག །དྲག་ཤུལ་ཅན་ལ་དྲག་ཤུལ་སྦྱོར། །ཞལ་བཞི་པ་ལ་ཕྱག་བཞི་པ། །ཞལ་བཞི་པ་ལ་རྨིག་པ་བཞི། །རྟ་མགྲིན་རྒྱལ་པོ་ཆེན་པོ་སྟེ། །དབང་ཕྱུག་དམ་པ་འགྲུབ་པར་འགྱུར། །གཡོན་
པའི་ཁུ་ཚུར་མཛུབ་མོ་ཡིས། །དཔལ་ལྡན་པདྨ་སྣ་ཚོགས་འཛིན། །རྡོ་རྗེར་བཅས་ཤིང་སློང་བ་འགྲུབ། །གཡས་པས་བ་དན་གསུམ་པ་བྱས། །གཡས་དང་གཡོན་པའི་སྦྱོར་བ་ཡིས། །བརྐྱང་བསྐུམ་པ་ཡི་ཚུལ་བྱས་ནས། །ཁྲོ་བོའི་སྐྱིལ་མོ་ཀྲུང་བཅས་ཏེ། །འཇིག་རྟེན་ཐམས་ཅད་རབ་ཏུ་བཤིག །
ཧཾ་མྱོས་བྱེད་སྟོང་པས་ལྷག་པ་ཡི། །བདེ་བར་འདོད་པའི་གཟུགས་སྟོན་པ། །འདུལ་བའི་དབང་གིས་གཤིན་རྗེའི་ཚོགས། །སྟོང་པས་ལྷག་པར་རབ་ཏུ་འཇིགས། །ཞི་བའི་སྐུར་ཡང་ཚངས་པའི་ཚོགས། །སྟོང་པས་ཤིན་ཏུ་ལྷག་པར་སྟོན། །དཀྱིལ་འཁོར་ཀུན་གྱི་མཆོག་དག་ཏུ། །དེ་བཞིན་

གཤེགས་ཀུན་གྲུབ་པར་མཛོད། །ཐམས་ཅད་དག་པར་མོས་པ་ཡིས། །ངོ་འཐོན་སྟོབས་ཀྱིས་ནོན་པས་གནོན། །ཨེ་ཧི་ཨི་ཧི་དབང་ཕྱུག་ཚོགས། །ཐམས་ཅད་རབ་ཤིག་རབ་ཏུ་ཤིག །རབ་ཀྱི་རྩལ་གྱིས་ནོན་པ་ཡིས། །སྟོབས་ཀྱི་ངོ་འཐོན་དབང་ཕྱུག་གནོན། །སྦྱོར་ཆེན་
ཧུ་ལུ་ཧུ་ལུ་ཡི། །མིག་གསུམ་པ་ལས་གསུམ་གྲུབ་དྲོངས། །རབ་ཀྱི་རྩལ་གྱིས་མངོན་གནོན་པའི། །སྟོབས་ཀྱིས་ངོ་འཐོན་མཐུ་ཆེན་གནོན། །མཉམ་སྦྱོར་རུ་ཏྲ་མ་སྙིང་ལས། །དཔལ་མོ་དྲོངས་ཤིག་རབ་དྲོངས་ཤིག །རབ་ཀྱི་རྩལ་གྱིས་གནོན་པ་ཡིས། །སྟོབས་ཀྱི་ངོ་འཐོན་ཚངས་པ་གནོན། །
སྦྱོར་ཆེན་ཚངས་པའི་སྒྱུ་མ་ལས། །སྒྲོལ་མ་དྲོངས་ཤིག་སྨར་ཏ། །རབ་ཀྱི་རྩལ་གྱིས་གནོན་པ་ཡི། །སྟོབས་ཀྱིས་ངོ་འཐོན་དགའ་དབང་གནོན། །མཉམ་སྦྱོར་ཀུན་གྱིས་བདག་ལ་དགའ། །དྲོངས་ཤིག་ཨ་ལ་ལ་ལ་ཧོ། །གདུག་ཅིག་ཁྲོ་ལ་རབ་གཏུམ་པའི། །སེམས་ཅན་བསྒྲལ་བའི་ཕྱིར་
བསྒྲུབ་ཞུགས། །ཨ་ལ་ལ་ཧོ་ཨ་ལ་ལ་ལ་ཧོ། །ཨོཾ་སུམྦྷ་ནི་སུམྦྷ་ཧཱུཾ་ཕཊ། མ་ཧཱ་མུ་དྲ་ཧཾ། མཛའ་བོ་མི་ལ་བྱ་བའང་མིན། །ཡོངས་རྟོག་དེ་དག་མེད་ཀྱང་བླ། །དེ་འདྲའི་མཛའ་བོ་སྒྱུ་བཞིན་པས། །དེ་ལ་མཛའ་ཞེས་སུ་ཞིག་ཟེར། །རྒོལ་བ་མི་ལ་བྱ་བ་མིན། །ཡོངས་སུ་རྟོག་པ་མེད་ཀྱང་བླ། །དེ་འདྲའི་
རྒོལ་བ་སྒྲུབ་བཞིན་པས། །དེ་ལ་སུ་ཞིག་པ་ཞེས་ཟེར། །ཨོཾ་ཤྲཱི་པདྨ་བ་ཌ་བ་མུ་ཁ་ཡོ་གི་ཤྭ་རི་ཧི་ཧི་ཧི་ཧི་ཧཾ། རྡོ་རྗེ་ཐལ་མོ་མཉམ་སྦྱར་ནས། །མཐེའུ་ཆུང་སྲིན་ལག་མཉམ་པར་བརྐྱང་། །མཛུབ་མོ་རྩེ་བསྙམས་བཀུག་པ་ནི། །དཔལ་མཆོག་རྟ་ཞེས་གྲགས་པ་ཡིན། །རྡོ་རྗེ་ཁུ་ཚུར་དཔལ་
བཅིངས་ལ། །སོར་མོ་ཐམས་ཅད་ཡོངས་སུ་བཟུང་། །དེ་ལྟར་ཕྱག་རྒྱ་གོང་མ་དང་། །རང་རང་ལས་ལ་སྦྱར་བར་བྱ། །ཕྱི་ནང་གསང་བའི་མཆོད་ཚོགས་དག །བྱིན་རླབས་སྔགས་དང་ཕྱག་རྒྱས་དབུལ། །མཉམ་མེད་མི་གཡོ་ལ་སོགས་པའི། །བསྟོད་པའི་ཕྱག་རྒྱས་མཉེས་པར་བྱ། །སྨོན་
ལམ་རྒྱ་ཆེན་གདབ་བྱས་ནས། །བཟླས་བརྗོད་ཐིག་ལེ་ཕྲ་མོ་དང་། །དཀྱིལ་འཁོར་དེ་ཉིད་གང་རུང་གིས། །མཚན་མའི་དཀྱིལ་འཁོར་བརྟན་པར་བྱ། །གླུ་གར་བྲོ་སྔགས་ཕྱག་རྒྱའི་ཚོགས། །ཕྲིན་ལས་རྣམ་བཞིའི་བཞིན་ལྟར་འཛུམ། །ལས་ཀྱི་བསྐུལ་ཚིག་དང་བཅས་པའི། །སྣ་ཚོགས་

སྟང་སྟབས་འཕྲོ་འདུའི་གར། །ལྷ་མཉེས་མགྲོན་ཚིམ་ལས་གྲུབ་བྱེད། །ཚོགས་དང་སྦྱིན་སྲེག་ལྷག་མའི་ལས། །ལས་རྫོགས་མཆོད་བསྟོད་བསྐུལ་བྱས་ཤིང་། །རང་གི་གནས་སུ་བསྡུས་ནས་ནི། །མཚན་མ་ཀུན་དང་ཡོངས་བྲལ་བའི། །མཉམ་ཉིད་དབྱིངས་སུ་གནས་པར་བྱ། །ཐམས་
ཅད་དག་པར་མོས་པ་ཡིས། །སྡིག་མེད་སྟོབས་ཀྱིས་ངོ་འཐོན་དུ། །དྲག་ཤུལ་སྦྱོར་བས་མཉམ་སྦྱར་བས། །འཇིག་རྟེན་ཐམས་ཅད་གཞོམ་པར་བྱེད། །ཕྱག་རྒྱ་སྒྲུབ་པའི་དུས་སུ་ནི། །སྔ་མ་ལས་ནི་གནས་བསྒྱུར་ཏེ། །བསྐལ་པ་མེ་དཔུང་འཁྲིགས་པ་བཞིན། །འབར་བའི་ཚོགས་ནི་རྣམ་
པར་བསམ། །གཞི་དང་རྟེན་པའི་ཏིང་འཛིན་ཉིད། །སྦྱོར་བ་བཞི་ཡིས་གསལ་བྱས་ཏེ། །དམ་ཚིག་འཕྲོ་འདུའི་ཡན་ལག་དག །མངོན་སུམ་སྣང་བ་ལྟར་གནས་ནས། །ཡེ་ཤེས་དཀྱིལ་འཁོར་ལ་དམིགས་ཤིང་། །མདུན་ནས་གཉིས་མེད་དཀྱིལ་འཁོར་གྱི། །ཆོ་ག་རྫོགས་པར་སྤྱད་བྱས་
པས། །ཡེ་ཤེས་དཀྱིལ་འཁོར་བསྒྲུབ་པར་བྱ། །འཁོར་བཅས་མཆོད་པ་རྫོགས་ནས་ནི། །བསྙེན་པའི་ལུང་བཞིན་བརྩོན་པས་འབད། །བསྙེན་པར་གནས་པའི་དབང་ཐོབ་ནས། །བསྒོམ་དབྱངས་ཡི་གེ་འབྲུ་བརྒྱད་བསྟན། །འཕྲོ་འདུའི་ཡན་ལག་ཀུན་ལྡན་པས། །དབྱངས་དྲུག་
བླངས་པས་དོན་དྲུག་གསལ། །སྔགས་མཆོག་ཡི་གེའི་འབྲུ་བརྗོད་པས། །དེས་ནི་དྲག་པོའི་དཀྱིལ་འཁོར་བསྐྱེད། །དགེ་མཆོག་དངོས་གྲུབ་ཀུན་བསྡུས་ཏེ། །གནས་གསུམ་བསྐོར་ཞིང་གསང་མཆོག་སྒྲུབ། །ཁྱད་པར་གསང་སྔགས་རིམ་པ་བཞིན། །འཕྲོ་འདུ་མཆོད་བསྟོད་བསྐུལ་
ཚིག་ལྡན། །མཐར་ཕྱིན་གསང་སྔགས་རྒྱལ་པོ་ཡིས། །ལས་ཀྱི་སྦྱོར་བ་ཀུན་བརྩམ་བྱ། །མཉེས་ཤིང་མགྲོན་ཚིམ་ལས་གྲུབ་བྱེད། །ཚོགས་དང་སྦྱིན་སྲེག་ལྷག་པའི་ལས། །ལས་རྫོགས་མཆོད་བསྟོད་བསྐུལ་བྱས་ཤིང་། །རང་གི་གནས་སུ་བསྡུས་ནས་ནི། །མཚན་མ་ཀུན་དང་ཡོངས་
བྲལ་བའི། །མཉམ་ཉིད་དབྱིངས་སུ་གནས་པར་བྱ། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ཁམས་གསུམ་དག་ནི་མ་ལུས་པ། །ཐམས་ཅད་སྒྱུ་མ་ལྟ་བུ་སྟེ། །ཇི་ལྟར་སྒྱུ་མ་ཐམས་ཅད་དུ། །མཐོང་བ་དང་ནི་རེག་པར་འགྱུར། །དམིགས་

སུ་ཡོད་པ་མ་ཡིན་ཏེ། །དེ་བཞིན་འགྲོ་བ་ཀུན་གྱི་ཚུལ། །དབུགས་དབྱུང་དཀྱིལ་འཁོར་རྣམ་དྲུག་དག །སྦྱོར་བ་བཞི་དང་ལྡན་པར་བྱ། །སྦྱོར་དང་རྗེས་སུ་སྦྱོར་བ་དང་། །ཤིན་ཏུ་སྦྱོར་དང་སྦྱོར་ཆེན་པོ། །ཡེ་ཤེས་ཙམ་ལ་སྙོམས་འཇུག་པ། །སྦྱོར་བ་
ཞེས་ནི་བཤད་པ་ཡིན། །ཡུམ་ལྡན་བྱིན་བརླབས་རོལ་པས་མཆོད། །གཞུག་པ་རྗེས་སུ་སྦྱོར་བའོ། །དག་མཛད་དཀྱིལ་འཁོར་རྫོགས་བྱས་ནས། །འཕྲོ་འདུ་ཤིན་ཏུ་སྦྱོར་བ་ཡིན། །བྱིན་བརླབས་དབང་བསྐུར་ལས་རྫོགས་པ། །སྦྱོར་བ་ཆེན་པོ་ཞེས་བྱའོ། །སྒྲུབ་པ་དངོས་གྲུབ་ཚུལ་
བཞིན་དུ། །མཚན་བརྟགས་གསལ་བའི་གནས་ཤེས་པས། །བདག་གཞན་དོན་ཚོགས་ལས་སྦྱར་ཏེ། །རེ་དོག་མཐའ་ཀུན་བྲལ་བས་བླང་། །དེ་བཞིན་ཉིད་ནས་བརྩམ་བྱ་སྟེ། །ཕྲེང་བས་བརྒྱན་པའི་བར་དུ་བསྒོམ། །ནང་གི་དཀྱིལ་འཁོར་དབྱིབས་དག་ནི། །ཐིག་བཞིས་རྣམ་པར་ཕྱེ་བ་
ལ། །སོ་སོའི་ཕོ་བྲང་ཇི་ལྟ་བར། །རིགས་བསྡུས་དཀྱིལ་འཁོར་རྒྱས་པའི་ཚུལ། །དབུས་སུ་རིགས་བདག་འཁོར་ལོ་སྟེ། །ཤར་དུ་དེ་བཞིན་གཤེགས་པའི་རིགས། །ལྷོ་ཕྱོགས་རྡོ་རྗེ་དྲག་པོའི་ཚོགས། །ནུབ་ཏུ་པདྨ་རྣམ་དག་ཆོས། །བྱང་ཕྱོགས་ཡོན་ཏན་རིན་ཆེན་མཛོད། །ཤར་
མཚམས་བཞི་དཀྱིལ་སྡུད་པའི་ཚུལ། །ལྷོ་མཚམས་དྲག་པོ་སྲེག་བྱེད་ལྟར། །ནུབ་མཚམས་དབང་མཛད་གཡོ་བའི་བཞིན། །བྱང་མཚམས་རྒྱས་པ་དབང་ཆེན་ལྟར། །རང་རང་ཕྲེང་བས་མཛེས་པར་བྱ། །ཕོ་བྲང་ཁ་དོག་རིན་ཆེན་བཞི། །སྣ་ཚོགས་པདྨ་གདན་གྱིས་མཚན། །ཕྱི་རོལ་
ར་བ་དུར་ཁྲོད་དང་། །ཀུན་འབྱུང་ཁོར་ཡུག་ཏུ་བཞིས་མཚན། །མངོན་པར་བྱང་ཆུབ་རྣམ་ལྔ་ཡིས། །མགོན་པོ་རྒྱུ་ཡི་སེམས་དཔའ་བསྐྱེད། །སྐུ་མདོག་རྒྱན་ཆ་ནས་བཟུང་སྟེ། །བྱིན་རླབས་རྫོགས་པས་དག་པར་བྱ། །རང་འོད་རིག་མ་བསྐྱེད་པ་ནས། །ལྷ་མོས་བསྐུལ་བའི་མཐར་
ཐུག་པར། །ཐུགས་རྗེས་འགྲོ་རྒྱུད་ལ་གཟིགས་ནས། །འོད་ཀྱི་གོང་བུ་ལས་འཕྲོ་བའི། །ཐིག་ལེ་རིན་ཆེན་སྣ་ལྔའི་མདངས། །ཕྱོགས་མཚམས་དབུས་ཀྱི་ལྟེ་བ་ལ། །ཡི་གེ་འཕྲོ་འདུས་མཚན་མ་སྟེ། །སྔགས་ཀྱི་ཕྱག་རྒྱ་ཆེན་པོའི་སྐུ། །སྐུ་མདོག་ཕྱག་ཆན་རྒྱན་ཆ་དང་། །ཆ་ལུགས་

སོ་སོའི་དཀྱིལ་འཁོར་བཞིན། །སྐུ་གསུང་ཐུགས་ཀྱི་རྡོ་རྗེ་དང་། །ཡེ་ཤེས་སེམས་དཔའ་སྔགས་དང་བཅས། །སངས་རྒྱས་ཀུན་གྱིས་དབང་བསྐུར་ཞིང་། །དབུ་ལ་རིགས་ཀྱི་བདག་པོས་མཚན། །སོ་སོའི་དབང་བསྐུར་ཕྱག་རྒྱ་དང་། །རང་གི་གསང་སྔགས་བཅས་པའོ། །རིན་ཆེན་མྱུ་
གུ་ལ་སོགས་དང་། །དར་དཔྱངས་དགྱེས་པའི་ཐལ་མོར་བཅས། །སོ་སོའི་ཡུམ་དང་འཁྲིལ་བ་ལས། །གསང་གནས་བྱིན་རླབས་བཅས་བསྐུལ་ཏེ། །སྙོམས་འཇུག་ཆོས་ཀྱི་སྙིང་པོ་ལས། །རིགས་དགུའི་དཀྱིལ་འཁོར་གསལ་བར་བསྒོམ། །ཕྱི་ནང་སྔགས་ཀྱིས་སྤྲོ་མཛད་
ནས། །རང་རིག་དཀྱིལ་འཁོར་གནས་ལ་འཁོད། །བྱིན་རླབས་དབང་བསྐུར་རྫོགས་བྱས་པས། །དམ་ཚིག་དཀྱིལ་འཁོར་གསལ་བར་འགྱུར། །ཡེ་ཤེས་དཀྱིལ་འཁོར་རྒྱས་དམིགས་པས། །མདུན་གྱི་དཀྱིལ་འཁོར་མཉེས་པར་བྱ། །གཉིས་མེད་དཀྱིལ་འཁོར་རྒྱས་བཏབ་ནས། །
ཆོ་ག་ལྷག་མས་མཉེས་པར་བྱ། །རྣམ་ཤེས་ཡེ་ཤེས་བྱེ་བྲག་གིས། །དཀྱིལ་འཁོར་དྲུག་གི་རིམ་པ་བཞིན། །ཡི་གེ་གཅིག་པའི་སྔགས་བཟླས་ཤིང་། །ལས་བཞིའི་བསྐུལ་སྔགས་གསང་བ་ལ། །མཐའ་བརྒྱན་གྱུར་པས་གསོལ་གདབ་ཅིང་། །བར་སྐབས་མཆོད་བསྟོད་འཕྲོ་འདུ་
དང་། །གླུ་དབྱངས་གར་གྱིས་བསྐུལ་བར་བྱ། །རྣམ་ཤེས་ཡེ་ཤེས་བྱེ་བྲག་གིས། །མཚན་མ་གང་རུང་གསལ་བར་བརྟག །རྡོ་རྗེས་མི་མཐུན་འཇོམས་བྱེད་ཅིང་། །འཁོར་ལོས་ཁམས་གསུམ་གཙོ་བོར་འགྱུར། །མདའ་ཡིས་ཕྲ་བར་འབིགས་བྱེད་ཅིང་། །རལ་གྲིས་ལྷ་མིན་གྲོང་
ཁྱེར་འཇོམས། །པདྨས་ལྷ་མོ་ལ་སོགས་འགུགས། །རྩེ་གསུམ་ལྷ་དབང་དུལ་འགྱུར་ཞིང་། །བུམ་པས་བཀྲ་ཤིས་བདུད་རྩི་འགྲུབ། །རྒྱ་གྲམ་ས་འོག་གསེར་འགྱུར་རྩི། །ཉི་མས་གསེར་མདོག་འོད་དང་ལྡན། །ལྕགས་ཀྱུས་སྲིད་པའི་རྩེ་མོར་འགྲོ། །ནོར་བུས་གྲོང་ཁྱེར་རྒྱས་པར་
བྱེད། །མེ་ལོང་མངོན་པར་ཤེས་པ་འགྲུབ། །པི་ཝང་སྣ་ཚོགས་གསུང་སྒྲོགས་ཤིང་། །གླིང་བུས་ཆོས་ཀྱི་ཚིག་བརྗོད་པའོ། །གཞན་ཡང་གཟུགས་སོགས་མང་བཤད་པའི། །ཡུལ་དྲུག་སྣང་བའི་མཚན་མ་ཀུན། །ཏིང་འཛིན་སྔགས་དང་ལས་སྦྱར་ཞིང་། །བརྩོན་ལྡན་བར་

ཆད་མེད་པས་གཟུང་། །གཡས་གཡོན་ཉི་ཟླའི་དཀྱིལ་འཁོར་ལ། །ཡབ་ཡུམ་ས་བོན་བཅུ་གཉིས་བསྒོམ། །ཟུང་དུ་སྤྲོས་ཤིང་འདུས་པ་ལས། །རིགས་ཀྱི་ལྷ་ཚོགས་སྙོམས་འཇུག་པའོ། །སོར་མོ་ཕན་ཚུན་སྦྱོར་རྫས་བསྣོལ། །གཉིས་མེད་རྡོ་རྗེ་ཐལ་མོའི་རྒྱ། །
དེ་རྗེས་རྡོ་རྗེ་བསྡམས་པ་ལས། །གཡོན་མཛུབ་རྩེ་མོའི་ནང་དག་ཏུ། །གཡས་པའི་མཐེ་བོའི་མཚན་མ་གཞུག །ལེགས་བསྡམས་སྤྱོད་པ་དགའ་ཆེན་དཔལ། །འདི་ནི་སངས་རྒྱས་ཐམས་ཅད་ཀྱི། །ཐུན་མོང་སྔོན་འགྲོའི་ཡན་ལག་ཡིན། །དགའ་ཆེན་དཔལ་གྱི་རྡོ་རྗེ་ལས། །གུང་མོ་
བཅིངས་པའི་ནང་དུ་གཞུག །མཐེ་བོང་མཐེའུ་ཆུང་རྩེ་མོ་ཅན། །རྡོ་རྗེའི་ཕྱག་རྒྱ་ཡོངས་ས