Luận tạng Tây Tạng (Tengyur) — Tập 27

 །སྟོང་གསུམ་ཏིལ་གོང་འབྲུ་འདྲ་རྣམས། །སངས་རྒྱས་དྲུག་གསུང་ཡི་གེའི་
ཚོགས། །བ་སྤུའི་བུ་ག་ཀུན་དུ་ཐིམ། །ཐུགས་ཀའི་གནས་སུ་ཞུ་བ་དག །བདེ་ཆེན་གནས་འདུས་རིམ་བཞིན་བཅས། །འདོད་ཆགས་ཆེན་པོ་དགའ་བའི་མེས། །སྐུ་བཅས་འོད་དཔུང་ཁ་དོག་ལྔ། །སྔོན་གྱི་གོམས་ཤུགས་ལྷ་མོ་བཞིས། །ཕྱོགས་བཞི་ནས་ནི་བསྐུལ་

མཛད་དེ། །སྟོང་པ་ཤིན་ཏུ་རྣལ་འབྱོར་ཡོད་མེད་མཐུ། །ནམ་མཁའ་ཉིད་དུ་དམ་ཚིག་ཉེ་བར་གནས། །བདེ་གཤེགས་བདེ་བར་གཤེགས་པ་བཞེངས་སུ་གསོལ། །རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག །ཡེ་ཤེས་གསང་བའི་རྒྱུད་བསྐུལ་
ནས། །ཐུགས་རྗེས་འགྲོ་བའི་རྒྱུད་གཟིགས་ཏེ། །འབྲས་བུའི་ཕྱག་རྒྱ་སྔ་མ་བཞིན། །ཆོ་ག་རྫོགས་པས་གསལ་བར་འགྱུར། །དེ་ནས་བཅོམ་ལྡན་རྡོ་རྗེ་འཆང་། །རྡོ་རྗེ་སེམས་དཔའི་སྦྱོར་བ་ཡིས། །རྡོ་རྗེ་སེ་གོལ་གཏོགས་བྱས་ཏེ། །སངས་རྒྱས་ཐམས་ཅད་བསྡུ་བར་མཛད། །འཇིག་
རྟེན་ཁམས་ནི་མ་ལུས་པ། །སངས་རྒྱས་རྡོ་རྗེ་འཛིན་བཅས་བརྒྱན། །ཤིན་ཏུ་གདུག་ཅིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ངོ་བོ་ལས། །ཁྲོ་བོར་དེ་བཞིན་གཤེགས་ཀུན་མཛད། །ཁྲོ་བོའི་ཚུལ་ཅན་ཁྲོས་པས་ཀྱང་། །འཇིག་རྟེན་གསུམ་དག་སྲེག་
བྱེད་ན། །སངས་རྒྱས་ཐམས་ཅད་ཁྲོས་པ་ཡིས། །ཁམས་གསུམ་མ་ལུས་སྨོས་ཅི་དགོས། །དེ་ནས་སྣ་ཡི་རྩེ་མོ་ལ། །ཡིད་ནི་བརྟན་པར་ཡང་དག་གཟུང་། །སྐུ་ཡི་དབུགས་རིངས་དྲོ་བ་ལས། །རྒྱལ་བའི་སྦྱོར་བ་ཕྱག་རྒྱ་འབྱུང་། །བཅོམ་ལྡན་དེ་ཉིད་རྣལ་འབྱོར་པས། །རྡོ་རྗེ་ཁྲོ་བོར་
བསྒྱུར་ནས་བྱུང་། །ཨོཾ་ཤྲཱི་ཧེ་རུ་ཀ་མ་ཧཱ་བཛྲ་ས་མ་ཡ་ཧི། སརྦ་དུཥྚ་ས་མ་ཡ་མུ་དྲ། པྲ་བཾ་ཛ་ཀ་ཕཊ། སྔ་མ་ལས་ནི་གནས་འགྱུར་ཏེ། །སྐལ་པའི་མེ་དཔུང་འཁྲིགས་པའི་ཚུལ། །དབུ་སྐྲ་སྨ་ར་སེར་གནག་མཛེས། །སྤུ་རྣམས་རྡོ་རྗེ་གྱེན་དུ་འཁྱིལ། །སྒེག་པ་དཔའ་བོ་འཇིགས་སུ་
རུང་། །དགོད་དང་གཤེ་དང་འཇིགས་པར་བྱེད། །སྙིང་རྗེ་རྔམ་དང་ཞི་བ་ཡི། །སྐུ་གསུང་ཐུགས་ཀྱི་གར་ཐབས་ཅན། །གཡས་གཡོན་དང་པོས་རྡོ་རྗེ་དང་། །རྡོ་རྗེ་ཁ་ཊྭཱཾ་དྲིལ་བུར་བཅས། །གཉིས་པ་དག་ན་འཇིགས་བྱེད་ཀྱི། །པགས་པ་རླུང་གི་ཚུལ་དུ་བསྐོར། །གསུམ་པས་
དབང་བསྐུར་དབུ་རྒྱན་ཆུ། །ཐ་མ་གཉིས་ན་དུང་ཆེན་ཁྲག །ཐོད་པ་ཤ་ཆེན་སྙིང་གིས་བཀང་། །དུར་ཁྲོད་གར་གྱི་ཕྱག་རྒྱར་བསྒྱུར། །ལ་ལར་ཞལ་གཅིག་ཞལ་གསུམ་སྐུ། །མཐིང་ནག་འཇིགས་པའི་མེ་འོད་འབར། །གཡས་པ་བ་དན་གསུམ་པ་ཕྱག །རྡོ་རྗེ་རྩེ་ལྔ་འབར་ཕྲེང་ཅན། །

རྡོ་རྗེ་ཁ་ཊྭཱཾ་དྲིལ་བུ་བཅས། །ཐོད་ཁྲག་གང་བ་གཡོན་པ་ན། །འབར་བ་ཆེན་པོ་སྐྲ་འབར་བ། །ཐོད་པ་མང་པོའི་དབུ་རྒྱན་ཅན། །འཇིགས་པ་ཆེན་པོའི་དུས་ལྟར་དྲག །དུར་ཁྲོད་བཞིན་དུ་རབ་ཏུ་འཇིགས། །ཞལ་རྣམས་སྣ་ཚོགས་འགྱུར་བ་དང་། །འབར་བའི་ལྟ་བས་གར་བྱས་པ། །
རྡོ་རྗེ་རྡོ་རྗེ་ཁ་ཊྭཱཾ་ག །དྲིལ་བུའི་སྒྲ་ནི་གསིལ་བ་ཡིས། །ཐམས་ཅད་ཕབ་ནས་སླང་ཡང་ནི། །ཐལ་བར་འགྱུར་བའང་འཚོ་བར་བྱེད། །གཏི་མུག་དབང་མཛད་ཐེག་ཆེན་རྒྱན། །གླང་ཆེན་ཀོ་རློན་སྟོད་གཡོགས་མནབས། །འདོད་ཆགས་གཞན་གྱིས་རྒོལ་བའི་ཚོགས། །ཚར་གཅོད་
སྟག་གི་ཤམ་ཐབས་ཡིན། །ང་རྒྱལ་ཐུགས་རྗེས་འགྲོ་སྒྲོལ་ཕྱིར། །འཇིགས་བྱེད་ཆེན་པོའི་གཡང་གཞི་གྱོན། །ཞེ་སྡང་གཟུང་འཛིན་རྣམ་དག་པས། །གནས་བརྒྱད་སྦྲུལ་གྱི་ཕྲེང་བ་ཅན། །ཆགས་པ་གཉིས་སྤངས་གཉིས་ལྡན་པས། །ཁྲག་གི་ཐིག་ལེས་ཚོམ་བུར་བརྒྱན། །
ཕྲིན་ལས་སྣ་ཚོགས་མཛད་པ་ཡིན། །ཐལ་བའི་ཚོམ་བུའི་མཚན་མ་ཅན། །བྱང་སེམས་གཉིས་དང་མི་འབྲལ་དོན། །ཞག་གི་རི་མོས་སྤྲས་པའོ། །ཕྲག་དོག་སྐུ་གསུང་རྒྱན་ལྡན་ཕྱིར། །ཐོད་ཕྲེང་ཐོད་དང་སེ་རལ་ཐོགས། །དྲེགས་བྱེད་ཚོགས་རྣམས་ཟིལ་མནན་པའི། །ཉི་ཟླས་
སྙན་གྱི་གོང་རྒྱན་བྱས། །ལུས་དང་ངག་སེམས་རྡོ་རྗེ་ཡི། །མཚན་མའི་ཕྱག་རྒྱར་ལྡན་བྱས་ཏེ། །ཐམས་ཅད་འབྱུང་བའི་སྦྱོར་བ་ཡིས། །བདག་གི་ལྷར་ནི་བདག་ཉིད་བྱ། །ཨོཾ་ཨཱཿཧཱུཾ། ཐུགས་ཀར་ཉི་མ་ལ་གནས་པའི། །ཡེ་ཤེས་སེམས་དཔའ་ཧཱུཾ་དང་བཅས། །འོད་ཟེར་འཕྲོ་
འདུའི་སྦྱོར་བ་ཡིས། །ཡེ་ཤེས་དཀྱིལ་འཁོར་སྤྱན་དྲངས་ཏེ། །ལྷ་མོས་བདུད་རྩི་བུམ་པས་ཁྲུས། །རིན་ཆེན་དབུ་རྒྱན་རྩེ་མོ་གཅིག །རྡོ་རྗེ་ཕྲེང་བའི་རིགས་དག་དང་། །ཐོད་ཕྲེང་ལ་གནས་རིགས་ལྔས་བརྒྱན། །ལག་པ་ཤིན་ཏུ་བརྐྱང་པ་ཡིས། །མཛུབ་མོ་གཉིས་ནི་མདུད་པར་
བཅིང་། །གྲུང་མོས་མཐེ་བོའི་རྩེ་མོ་མནན། །རྡོ་རྗེའི་ཕྱག་རྒྱ་ཡོངས་སུ་བསྒྱུར། །བཏེག་ནས་ཁྲོ་གཉེར་ལ་བཞག་སྟེ། །ཧི་བཅས་དབང་བསྐུར་སྔགས་བརྗོད་བྱ། །ཡབ་ཡུམ་མཁའ་གསང་ཧི་དང་ཨས། །རྡོ་རྗེ་པདྨོ་བསྐྱེད་བྱས་ལ། །ལིངྒ་འགྲེང་བ་རང་བྱུང་པ། །བརླ་ཡི་

དབུས་སུ་གཞུག་བྱས་ཏེ། །དབྱིངས་དང་ཡེ་ཤེས་སྦྱོར་བ་ལས། །ཧེ་རུ་ཀ་ཡི་དཀྱིལ་འཁོར་བསྐྱེད། །བྱང་ཆུབ་སེམས་དེ་ཀུན་དུ་དག །མ་ལུས་ཉེ་བར་སྦྱང་བྱས་ནས། །འདོད་པར་བྱ་བ་རབ་ཏུ་མཉེས། །འོད་འདུས་ཐོག་མའི་གཟུགས་ལ་གཟུང་། །གསང་གནས་
སོ་སོའི་གདན་དག་ལ། །ཆོས་ཀྱི་སྙིང་པོས་ལྷ་རྣམས་བསྐྱེད། །ཧི་ལས་དཔལ་ཆེན་ཧེ་རུ་ཀ །གསང་བའི་དཀྱིལ་འཁོར་དབུས་སུ་དགོད། །ཧྲཱིཿལས་ལྷ་མོ་དཀར་མོ་སྟེ། །དེ་བཞིན་ཧྣི་ལས་རྐུན་མོ་ཡིན། །ཛྷིཿལས་ལྷ་མོ་རྨོངས་བྱེད་མ། །ཛྷི་ལས་ཐལ་བྱེད་ཕྱོགས་བཞིར་རོ། །མཚམས་
སུ་ཧཱུཾ་ཕཊ་ལས་བྱུང་བའི། །སྤོས་བྱེད་ལ་སོགས་ལྷ་མོ་བཞི། །མཾ་ཁཾ་ཡཾ་རཾ་ལས་བྱུང་ལྷ་མོ་བཞི། །མདའ་འཛིན་ལ་སོགས་ཕྱི་རོལ་མཚམས། །ཨ་ཨཱ་ཨཾ་ཨཿཡི་གེ་ལས། །ལྷ་མོ་མེ་ཏོག་ལ་སོགས་བཞི། །ཛཿཧཱུཾ་བཾ་ཧོཿབཞི་རྣམས་ལས། །སྒོ་བཞིར་རྟ་མགྲིན་འཕང་མཐོ་སོགས། །བྷ་ག་
ལ་ནི་ལིངྒ་གཞག །ལིངྒ་རྡོ་རྗེར་བྱིན་བརླབས་ནས། །ཧེ་རུ་ཀ་ཡི་སྐུ་གཉིས་དག །སྤྲོ་ཞིང་རང་ལ་བསྟིམ་པར་བྱ། །ཨོཾ་ཧེ་རུ་ཀ་བཛྲ་ས་མ་ཡ་ཧི་སརྦ་དུཥྚཱན་ས་མ་ཡ་མུ་དྲ་པྲ་བཾ་ཛ་ཀ་ཧཱུཾ་ཕཊ། ཛྫཿདཀར་མོ་དཀར་སེར་ཞི་བའི་མདངས། །ཞལ་བཞི་ཕྱག་བརྒྱད་འཇིགས་པའི་སྟབས། །གཡོན་བརྐྱང་གར་
གྱིས་བཞུགས་པར་མཛད། །མདའ་བཞི་དུས་གཅིག་བཀང་བ་ལ། །ཚངས་པའི་མགོ་བཞི་དཔྱངས་པ་སྟེ། །སྤྲོ་ཞིང་བསྡུས་པས་ཤར་དུ་བཞུགས། །ཧཱུཾ་བཛྲ་གུ་ཧྱ་སིདྡྷི་པ་ར་མ་ཡོ་གི་ཤྭ་རི་ཛྫ། རྐུན་མོ་དམར་སེར་དྲག་མོའི་ཞལ། །གཡོན་པས་ལྕགས་ཀྱུ་ཁ་ཊྭཱཾ་འཁྱུད། །གཡས་
པའི་གུང་མོས་རྩེ་བརྒྱད་བསྟོད། །གཡས་བཏེག་སྟབས་གནོན་ལྷོ་ཡི་ཕྱོགས། །ཧཱུཾ་ཧཱུཾ་བཛྲ་ཙཎྜེ་ཤྭ་རི་ཁ་ཊྭཱཾ་ག་མ་ཧཱ་བཛྲ་ཀ་པཱ་ལ་མཱ་ལ་ཀུ་ལུ་རུ་ལླུ་ཧྣི་ཛྫ། རྨོངས་བྱེད་མདོག་གཉིས་གོང་མ་ཕག །འོག་མ་དམར་མོ་ཕྱག་བཞི་པ། །གཡས་ཀྱི་དང་པོས་རྡོ་རྗེ་གསུམ། །གཡོན་ཀྱི་དང་པོས་
ཁམ་ཕོར་འཆང་། །འོག་གཉིས་ཁུ་ཚུར་རོ་ལ་གཏོད། །གཡས་བཏེག་སྟོབས་གནོན་ལྷོ་ཡི་ཕྱོགས། །རྨོངས་ཚུལ་ནུབ་ཀྱི་ཕྱོགས་སུའོ། །ཧཱུཾ་བཛྲ་ན་རཱ་ཡ་ནི་ཛྷི་ཛྷ། ཐལ་བྱེད་མདོག་དཀར་སློང་ཚུལ་གཟིགས། །གཡས་ན་ཐོད་པ་བདུད་རྩིས་བཀང་། །གཡོན་པ་བ་དན་གསུམ་པའི་

གར། དགའ་བའི་བཞིན་བཅས་བྱང་གི་ཕྱོགས། །ཧཱུཾ་བཛྲ་པ་ཏ་ཀེ་ཛྫ། སྤོས་མོ་དྲག་མོ་གར་བྱེད་ཚུལ། །བོལ་བཞི་བརླ་དཔུང་དཀར་བ་ལ། །ལུས་སྦུབས་དམར་གསལ་ཡན་ལག་སྔོ། །རྡོ་རྗེ་རྩེ་ལྔ་དཔག་བསམ་ཤིང་། །གཡས་གཡོན་གར་གྱི་བསྒྱུར་བ་བཅས། །མེ་མཚམས་འཁོར་
ལོའི་སྟན་ལ་གནས། །ཧཱུཾ་བཛྲ་ཤུ་ལེ་གྲ་བྷནྡ་མ་ཊ་ཛྫ། རོ་ཁྲོད་རོ་རྟགས་ཚུལ་འཆང་ཞིང་། །སེར་ནག་གཡས་པ་རལ་གྲི་འཛིན། །གཡོན་པ་མེ་ཐབ་རྡོ་རྗེས་མཚན། །གཡོན་བརྐྱང་རླུང་མཚམས་འཁོར་ལོ་སྟོན། །ཧཱུཾ་བཛྲ་ཀི་ཤིཙྪ་ཏ་མ་ཊ་ཛྫ། ཀུན་སྤྱོད་ཀུན་གྱི་ལས་མཛད་ཅིང་། །
གཡས་པས་རྡོ་རྗེ་དུང་ཁྲག་གསོལ། །གཡོན་གྱིས་ཐོད་པ་ཞགས་པར་བཅས། །ཞལ་བཞི་མཐིང་ནག་གཙོ་བོའི་བཞིན། །རྡོ་རྗེ་ཁ་ཊྭཱཾ་སེ་རལ་ཁ། །དབང་ལྡན་འཁོར་ལོའི་རྩིབས་ལ་གནས། །ཧཱུཾ་བཛྲ་པེ་མཱ་ལ་པཱ་ཤེ་མཊ་ཛྫ། ཀུན་ཀྱང་ཐོད་ཕྲེང་སྦྲུལ་མདུད་དང་། །གཡང་གཞི་བརྒྱངས་ཏེ་གོས་སུ་
གོན། །གདན་ནི་སྣ་ཚོགས་པདྨ་ལ། །ཡི་དྭགས་ཉི་མས་མཚན་པའོ། །མདའ་འཛིན་དཀར་མོ་མདའ་དང་གཞུ། །མེ་ཡི་མཚམས་ཀྱི་གྲུ་ཆད་ལ། །ཧེ་བཛྲ་ར་ཏི་བཾ་ཛྫ། ཁ་ཊྭཱཾ་སེར་མོ་ཁ་ཊྭཱཾག། །རྡོ་རྗེ་དྲིལ་ཅན་བདེན་བྲལ་མཚམས། །བཾ་མ་ཧཱ་ར་ཏ་བཛྲེ་ཧོ་ཛྫ། འཁོར་ལོ་འཛིན་མ་དམར་སེར་མོ། །
རྩིབས་བརྒྱད་འཛིན་པ་རླུང་གི་ཕྱོགས། །ཨོཾ་བཛྲ་ལོ་ཙ་ནེ་ཡཾ་ཡ་ཛྫ། སྣ་ཚོགས་བ་དན་ལྗང་གུ་ལ། །སྣ་ཚོགས་འཕན་དྲིལ་དབང་ལྡན་ཕྱོགས། །རཾ་མ་ཧཱ་ཤྲཱི་བཛྲ་ཧིཿཛྫཿཛ། མེ་ཏོག་སེར་མོ་མེ་ཏོག་སྣོད། །རྡོ་རྗེས་མཚན་པ་བར་ཁྱམས་མེ། །ཨ་བཛྲ་པུཥྤེ་ཧཱུཾ་ཛྫ། སྤོས་མེ་སྔོན་མོ་རྡོ་རྗེ་པོག །
བར་ཁྱམས་བདེན་བྲལ་པད་གནས་པའོ། །ཨ་བཛྲ་དྷཱུ་པ་ཛྫཿ། མར་མེ་དམར་མོ་རྡོ་རྗེ་སྒྲོན། །བར་ཁྱམས་རླུང་ཕྱོགས་པདྨར་གནས། །ཨ་བཛྲ་ཨཱ་ལོ་ཀེ་ཛྫ། དྲི་ཆབ་ལྗང་གུ་དག་བྱེད་སྣོད། །འཐོར་བྱེད་དབང་ལྡན་པདྨར་གནས། །ཨ་བཛྲ་གནྡྷེ་ཛྫ། ཤར་སྒོར་རྟམ་མགྲིན་འཕང་མཐོ་དཀར། །
གཡས་ན་རྟ་གདོང་གཡོན་ལྕགས་ཀྱུ། །ཨོཾ་བཛྲ་ཨཾ་ཀུ་ཤི་ཛྫཿ། ལྷོ་སྒོར་ཕག་གདོང་སྔོན་མོ་སྟེ། །གཡས་པས་མཆེ་བ་གཡོན་ཞགས་འཛིན། །ཨོཾ་བཛྲ་པཱ་ཤེ་ཧཱུཾ་ཛྫ། ནུབ་སྒོར་སྣང་བྱེད་དམར་མོ་ནི། །ཕྱག་གཉིས་ཉི་ཟླ་ལྕགས་སྒྲོག་འཛིན། །ཨོཾ་བཛྲ་ཤྲིཾ་ཁ་ལི་བཾ་ཛྫ། བྱང་སྒོར་ཐལ་བྱེད་མདོག་

ལྗང་གུ། །སངས་རྒྱས་གཟུགས་བཅས་དྲིལ་བུ་འཁྲོལ། །ཨོཾ་བཛྲ་གྷཎྜེ་ཧོཿཛྫ། ཕྱི་ཡི་ལྷ་མོ་བཅུ་གཉིས་ཚོགས། །རིན་ཆེན་རྒྱན་ཕྲེང་ན་བཟའ་བཀླུབས། །ཁྲོ་བརྗིད་འཛུམ་བག་མཚན་མ་འཛིན། །སྒོ་བ་ཅུང་ཞིག་འགྱིང་བའི་ཚུལ། །ཀུན་མཁྱེན་ཡེ་ཤེས་ལས་གྲུབ་
ཕྱིར། །དཀྱིལ་འཁོར་ལྷ་རྣམས་ཐམས་ཅད་ཀྱི། །མིག་ལ་སངས་རྒྱས་རྣམ་སྣང་མཛད། །རྣ་བ་རྡོ་རྗེ་ཉི་མ་ཡིན། །ཁ་ལ་པདྨ་གར་དབང་ཕྱུག །སྣ་ལ་རྟ་མཆོག་རོལ་པའོ། །ཡིད་ལ་རྡོ་རྗེ་ཧེ་རུ་ཀ །ལུས་ལ་རྡོ་རྗེ་སེམས་དཔའ་གནས། །གནས་གསུམ་ཕྱག་རྒྱའི་ཚོགས་གསལ་བས། །
ཐུགས་ཀར་སེམས་དཔའ་གསུམ་སྔགས་བཅས། །རང་རིག་དཀྱིལ་འཁོར་སྤྱན་དྲངས་ནས། །དབང་བསྐུར་རིགས་ཀྱི་མཚན་མ་བསམ། །དགའ་ཆེན་དཔལ་གྱི་རྡོ་རྗེ་ལས། །རྡོ་རྗེ་སེ་གོལ་གར་དང་བཅས། །དཔུང་མགོར་ལན་གསུམ་བསྡུ་བའི་རྒྱ། །གཉིས་མེད་འོད་ཟེར་ལྕགས་ཀྱུས་དགུག །
ཡེ་ཤེས་ཅན་གྱི་སྤྱོད་ཡུལ་ཅན། །དཔལ་ཆེན་ཁྲག་འཐུང་འཁོར་དང་བཅས། །སེམས་ཅན་དོན་སླད་དམ་ཚིག་དགོངས། །གནས་འདིར་བརྩེ་ཕྱིར་གཤེགས་སུ་གསོལ། །མཛེས་པའི་ཕྱག་རྒྱ་གྱེན་དུ་བསྒྲེང་། །སྨིན་མཚམས་དབུས་སུ་གཏད་པར་བྱ། །ཛཿཧཱུཾ་བཾ་ཧོཿ། ཤྲཱི་ཧེ་རུ་ཀ །མ་ཧཱ་བཛྲ།
ཨཱ་ཀཌྜྷྱ་ཡ། ཨཱ་ཀཌྜྷྱ་ཡ། པྲ་བེ་ཤ་ཡ། པྲ་བེ་ཤ་ཡ། བནྡྷ་ཡ། བནྡྷ་ཡ། ཏོ་ཥ་ཡ། ཏོ་ཥ་ཡ། བཛྲ་ཌཱ་ཀི་ནཱི་ནཾ། ཧྲྀ་ད་ཡཾ་ཧཱུཾ་ཧཱུཾ་ཕཊ་ཕཊ། ཨོཾ་ཧེ་རུ་ཀ་བཛྲ་ས་མ་ཡ་ཧི། སརྦ་དུཥྚཱ་ས་མ་ཡ་མུ་དྲ་པྲ་བཾ་ཛ་ཀ་ཧཱུཾ་ཕཊ། པདྨའི་ཕྱག་རྒྱས་གཡས་ནས་བསྐོར། །གར་ཐབས་ཐལ་མོས་ལན་གསུམ་
གདབ། །དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་ཧེ་རུ་ཀ །ཆོས་སྐུ་ཞི་བའི་ངང་ལས་ཀྱང་། །གཟུགས་སྐུ་འཇིགས་ཚུལ་བསྟན་དུ་གསོལ། །ཐུགས་རྗེ་ཆེན་པོ་ཐབས་མཁས་པས། །གདུག་པ་འདུལ་ཕྱིར་གཤེགས་སུ་གསོལ། །ཚོགས་རྗེ་ཚོགས་བདག་དཔལ་
དང་ལྡན། །ཚོགས་ཀྱི་སློབ་དཔོན་གཤེགས་སུ་གསོལ། །ཡེ་ཤེས་རྟོགས་པའི་ཁྱད་པར་ལས། །སྤྲུལ་པ་མང་པོའི་ཚོགས་དང་གཤེགས། །ཨོཾ་ཨེ་ཧྱེ་ཧི་བྷ་ག་བཱན་ཛཿཧཱུཾ་བཾ་ཧོཿ། རུ་ལུ་རུ་ལུ་ཛཿཧཱུཾ་བཾ་ཧོཿ། ཨེ་ཧེ་ཧྱེ་ཧི་དྲྀ་ཤྱ་ཧོཿ། ས་མ་ཡ་ཧོ། ས་མ་ཡ་སྟྭཾ། ཨེ་ཧེ་ཧྱེ་ཧི་ཨ་ར་ལི་ཧོ། །ཧྲིཾ་ཧྲིཾ་ཧྲིཾ།

ཐོད་ཕྲེང་ཕྱག་རྒྱ་བཅིངས་པ་ལས། །གཡས་ནས་རིམ་བཞིན་བསྐོར་བར་བྱ། །བདེ་གཤེགས་ཕོ་བྲང་དཀྱིལ་འཁོར་འདིར། །འགྲོ་བ་མ་ལུས་བསྒྲལ་བའི་ཕྱིར། །དོན་གྱི་དབང་གིས་དགོངས་ནས་ཀྱང་། །འཁོར་བཅས་གཤེགས་རྣམས་བཞུགས་སུ་གསོལ། །ཨོཾ་ཤྲཱི་ཧེ་རུ་ཀ་མ་ཧཱ་བཛྲ་
སརྦ་དུཥྚཱན། ས་མ་ཡ་མུ་དྲ་ཨ་བེ་ཤ་ཡ། ཨ་བེ་ཤ་ཡ། པྲ་བེ་ཤ་ཡ། ཤྲཱི་ཧེ་རུ་ཀ་ཧཱུཾ་ཕཊ། རྡོ་རྗེ་ཐལ་མོ་བསྐྱེད་བྱས་ནས། །སོལ་མོ་བསྣོལ་བསྡམས་བསྐྱོད་པར་བྱ། །སེམས་ཅན་དོན་ཕྱིར་ནན་ཏན་མཆོག་བསྐྱེད་ཅིང་། །ཡེ་ཤེས་ཐུགས་རྗེས་བདག་ལ་དགོངས་ནས་ཀྱང་། །མི་གཉིས་
དོན་གྱི་དངོས་གྲུབ་མཆོག་གི་གནས། །བདག་ལ་སྩལ་ཞིང་བརྟན་པར་བཞུགས་སུ་གསོལ། །ཨོཾ་ཧེ་རུ་ཀ་བཛྲ་ས་མ་ཡ་ཧི། སརྦ་དུཥྚན་ས་མ་ཡ་མུ་དྲ་པྲ་བན་ཙཀྲ་ཧཱུཾ་ཕཊ། ཀཱ་ཡ་བཱཀ་ཙིཏྟ། ཏིཥྛ་བཛྲ་ཧཱུཾ། རྡོ་རྗེ་ཁུ་ཚུར་བཅིངས་པ་ལས། །མཐེ་བོ་མཐེའུ་ཆུང་བསྒྲེང་བར་བྱ། །ཧཱུཾ་ཆེ་མཆོག་མཉམ་སྦྱོར་
འབར་བའི་ཀློང་དཀྱིལ་ནས། །ཐུགས་རྗེ་ཁྲོས་པས་གདུག་པ་འདུལ་མཛད་པ། །གསང་སྔགས་རྨད་བྱུང་དྲག་པོའི་ཕྲིན་ལས་རྣམས། །ལྷུན་གྱིས་གྲུབ་པར་བྱིན་གྱིས་བརླབ་ཏུ་གསོལ། །ཨོཾ་ཤྲཱི་ཧེ་རུ་ཀ །མ་ཧཱ་བཛྲ་སརྦ་དུཥྚཱན། ས་མ་ཡ་སྟྭཾ། ཨ་བ་སྟཾ་བ་ཧཱུཾ་ཕཊ། དམ་ཚིག་ཕྱག་རྒྱ་རྣམ་གསུམ་
ནི། །རིམ་བཞིན་བཅིངས་ཏེ་བསྐུལ་བར་བྱ། །ཨོཾ་བཛྲ་གུ་ཧྱ་དྲྀ་ཤྱ་ཧོ་ས་ཡ་སྟྭཾ། ཨོཾ་བཛྲ་གུ་ཧྱ་ས་ཡ་ཧོ། །ཨོཾ་བཛྲ་གུ་ཧྱ་ཏྲི་ས་མ་ཡ་ཕཊ། དམ་ཚིག་ས་ལ་བཞེངས་པ་ཡི། །དཔལ་ཆེན་ཁྲག་འཐུང་འཁོར་དང་བཅས། །དམ་ཚིག་ཚུལ་བཞིན་མ་བསྲུངས་སམ། །གྲུབ་པའི་མཆོག་དག་
མ་སྩལ་ན། །སྐུ་གསུང་ཐུགས་དང་འགལ་བར་རོ། །ཞིག་པར་གྱུར་པར་གདོན་མི་ཟ། །ཟིལ་གནོན་བསྲུང་ཞིང་བསྡིག་པའི་ཕྱིར། །ལས་ཀྱི་ཕྱག་རྒྱ་རྣམ་གསུམ་བཅིང་། །ཛཿཧཱུཾ་བཾ་ཧོཿ། ཤྲཱི་ཧེ་རུ་ཀ་མ་ཧཱ་བཛྲ་སརྦ་དུཥྚཱན་ས་མ་ཡ་མུ་དྲ་མ་རཾ་པྲ་བ་ན་ཙཀྲ། བག་ཤ་ཡ་བག་ཤ་ཡ། བི་དྷྭཾ་ས་ཡ་
བི་དྷྭཾ་ས་ཡ། བྷུ་ཏ་ཀྵེ་ཏི་པྲ་ཏི་སྟྭཾ་བྷ་ཡ་ཧཱུཾ་ཕཊ། སྐུ་གསུང་ཐུགས་སུ་བདག་སྦྱོར་བས། །ཕོ་བྲང་དཀྱིལ་འཁོར་རང་ལས་སྤྲུལ། །ང་ནི་བདུད་ཀྱི་བདུད་བདག་སྟེ། །མཁའ་འགྲོའི་ཚོགས་བཅས་ངས་བསྡུས་པའོ། །ཨོཾ་ཤྲཱི་བཛྲ་ཀ་ར་མུ་ཀ་ཤ་ར་ཡཱ་ཡ་ན་མཿ། ཨོཾ་ཤྲཱི་བཛྲ་ཁ་ཊྭཱཾ་ག་པྲ་ཛཱ་ལཱ་ཡ་ན་མཿ། ཨོཾ་

ཤྲཱི་བཛྲ་གནྡྷེ་པྲ་ཛཱ་ལ་ཡ་ན་མཿ། ཨ་ཏི་བྷུ་ཧོ། །སརྦ་ཏ་ཐཱ་ག་ཏ་བནྡ་ནཱཾ་ཀཱ་རོ་ཡ་མི་མ་ཧཱ་ཡོ་གི་ནི་ཨ་ལ་ལ་ཧོ། །པྲ་ཏི་བྷུ་ཧོ། །སྨིན་མ་གཡོན་པ་འདེགས་ཚུལ་གྱིས། །རུ་ལུ་རུ་ལུ་བཅས་པས་འདུད། །ཨོཾ་བདག་མེད་ཕྱོགས་བྲལ་དོན་དམ་ཐུགས་ཆུད་ཅིང་། །བྱམས་དང་སྙིང་
རྗེས་སྒྲ་ཟིན་མི་མངའ་ཡང་། །གདུག་པ་འདུལ་ཕྱིར་དུས་ལས་མི་འདའ་བའི། །འཇིགས་བྱེད་ཧེ་རུ་ཀ་ལ་ཕྱག་འཚལ་ལོ། །ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་དགུར་སྒྱུར་བའི་གཟུགས་ཅན་འཕྲུལ་མོ་ཆེ། །མ་སྲིང་བྱམས་མའི་ཚུལ་གྱིས་གྲོགས་མཛད་པའི། །ཕྱི་ནང་མཁའ་
འགྲོའི་ཚོགས་ལ་ཕྱག་འཚལ་ལོ། །ཧཾ་ཨ་ཏི་བྷུ་ཧོ། །ཚད་མེད་བཞི་ཡི་ཕྱག་རྒྱ་ཡིས། །གཉིས་སུ་མེད་པར་བསྟན་བྱས་ནས། །དམན་པའི་ཕྱག་རྒྱ་རྣམ་པ་བཞིས། །རང་གི་དེ་ཉིད་ལས་སྦྱོར་བའི། །རྣལ་འབྱོར་དེ་ཉིད་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །དམ་ཚིག་ལ་
སྡང་རྣམ་སྦྱང་ཕྱིར། །དུར་ཁྲོད་གར་གྱི་ཕྱག་རྒྱར་གསལ། །སངས་རྒྱས་ཁྲོ་འབྱུང་ཁྲོ་བ་ནི། །ཐལ་བར་འཇིག་པའི་མཆོག་ཡིན་ཏེ། །སེམས་དཔའ་སྔོན་མོ་འབར་བ་ཅན། །འབར་བའི་དཀྱིལ་འཁོར་དམར་པོ་སྣང་། །རྡོ་རྗེ་ཁ་ཊྭཱཾ་རྡོ་རྗེར་བཅས། །དྲིལ་བུ་འཁྲོལ་བའི་སྒྲར་བཅས་པ། །གོས་ཆེན་
པོ་དང་བླུགས་པ་ཆེ། །ཤ་ཆེན་པོ་དང་སྦྲང་རྩི་ཆེ། །དུར་ཁྲོད་ཀུན་གྱི་འབྱུང་པོ་ཡིས། །ཕྱག་རྒྱ་དཔལ་ལྡན་དབང་ཕྱུག་མཆོག །ཤིན་ཏུ་ཁྲོ་གཏུམ་གདུག་པ་ཡི། །སེམས་ཅན་ཁམས་ནི་རྣམ་སྦྱང་ཕྱིར། །འདི་ནི་དཔལ་ལྡན་ཧེ་རུ་ཀའི། །རྡོ་རྗེ་རྒྱ་ཆེན་དབང་ཕྱུག་མཆོག །སེ་རལ་ཁ་ཡི་ཚུལ་དག་ཏུ། །
ཁ་ཊྭཱཾ་ག་ལ་རྒྱབ་རྟེན་བཅས། །ལག་པ་གཡོན་པས་ཐོད་པ་ཐོགས། །གཡས་པ་བ་དན་གསུམ་པར་བྱས། །ནམ་མཁའི་ཕྱག་རྒྱ་རྣལ་འབྱོར་པ། །ནམ་མཁའ་ཀུན་དུ་འགྲོ་བར་འགྱུར། །བུད་མེད་ལ་སོགས་རིན་ཆེན་མཆོག །དངོས་པོ་ཐམས་ཅད་མཁའ་ལས་འབྱིན། །གཡས་དང་གཡོན་གྱི་
སྦྱོར་བ་ཡིས། །བདེ་བར་འབབ་པའི་གར་བྱེད་པས། །སྐྱིལ་མོ་ཀྲུང་ནི་ཕྱེད་བཅས་ལ། །རྐང་པ་རང་གི་བརླས་མནན་པའོ། །ཨོཾ་མ་ཧཱ་ཤྲཱི་ཧེ་རུ་ཀ་ས་མ་ཡ་ཧི། སརྦ་དུཥྚཱ། ས་མ་ཡ་མུ་དྲ། པྲ་བཾ་ཀ་ཧཱུཾ་ཕཊ། མ་ཧཱ་མུ་ཧི། དཀར་མོ་ཐུག་མཆོག་ཞི་བའི་མདངས། །གཟིགས་ཚུལ་ཕྱོགས་

ཀུན་གར་བསྒྱུར་ཞིང་། །མདའ་བཞི་དུས་གཅིག་འཕངས་པ་ཡིས། །བདུད་བཞི་དག་ལས་རྒྱལ་བར་བྱེད། །ཧཱུཾ་བཛྲ་གུ་ཧྱ་སིདྡྷི་པ་ར་མ་ཡོ་གེ་ཤྭ་རི་ཧྲཱིཿ། མ་ཧཱ་མུ་དྲ་ཧྲཱིཿ། རྐུན་མོ་རྒྱས་མཛད་དྲག་པོའི་བཞིན། །ཐུགས་རྗེ་སྐྱོ་བས་འགྲོ་གནས་འདྲེན། །ཁམས་གསུམ་ལས་རྒྱལ་གནོན་པའི་སྟབས། །
ཀུན་དུ་མྱུར་བའི་ཚོགས་པ་བསྟོད། །ཧཱུཾ་ཧཱུཾ་བཛྲ་ཙཎྜེ་ཤྭ་རི་ཁ་ཊྭཱཾ་ག་མ་ཧཱ་བཛྲ་ཀ་པཱ་ལ་མཱ་ལ་ཀུ་རུ་ལུ་རུ་ལླུ་ཧྣི། མ་ཧཱ་མུ་དྲ་ཧྣི། རྨོངས་བྱེད་དབང་གིས་ཆགས་ཚུལ་འཆང་། །ཞལ་གཉིས་མཐུན་པའི་སྟབས་བཅས་པས། །གནས་གསུམ་རྣམ་དག་སྐུ་གསུམ་སྦྱོར། །བདུད་རྩི་བཅུད་ལྡན་འཁོར་
ལོའི་རྒྱ། །ཧཱུཾ་བཛྲ་ཨ་ན་ར་ཡ་ནི་ཛྷི། ཐལ་བྱེད་དྲག་མོ་སློང་བའི་ཚུལ། །སྣོད་བཅུད་བདེ་བ་ཆེན་པོར་རོལ། །བ་དན་གསུམ་པའི་གར་ཐབས་ཀྱིས། །སྐུ་གསུང་ཐུགས་ཀྱི་དགའ་མདངས་གསལ། །ཧཱུཾ་བཛྲ་པ་ཏ་ཀེ་ཛ། མ་ཧཱ་མུ་དྲ་ཧི། སྤོས་མོ་ཕྲིན་ལས་རྣམ་འཕྲུལ་ཞིང་། །ཀུན་སྣང་གསལ་བས་
དྲག་པའི་ཚུལ། །ཡེ་ཤེས་རིགས་འབྱུང་ལྔ་ཡི་མཚན། །ཀུན་འབྱུང་གར་ཐབས་འགྱུར་བར་བཅས། །ཧཱུཾ་བཛྲ་ཧ་ར་ནི་ཕཊ། མ་ཧཱ་རུ་ཏྲ་ཧཱི། གཏུམ་མོ་འདོད་པའི་ལས་ལ་བརྩོན། །གཞན་གྱི་སྲོག་འཕྲོག་འགྱུར་བ་མེད། །འཐོར་བྱེད་རིགས་ཀྱི་མཚན་མ་ཅན། །གར་བཅས་རྩེ་གསུམ་དབུགས་
འབྱིན་ཚུལ། །ཧཱུཾ་བཛྲ་ཤཱུ་ལ་གྲ་བྷནྡི་མ་ཊ། མ་ཧཱ་རུ་ཏྲ་ཧི། རི་ཁྲོད་ཆོས་ཉིད་རོ་མྱོང་བས། །ཤེས་རབ་མཚོན་ཆས་ཀུན་གཅོད་ཅིང་། །སྲེག་བྱེད་རིགས་ཀྱི་ཕྱག་རྒྱ་འཆང་། །རིགས་ཀྱི་ཚུལ་གྱིས་གར་བྱེད་པའོ། །ཧཱུཾ་བཛྲ་ཀི་ཤིཙྪནྡ་ཕཊ། མ་ཧཱ་རུ་ཏྲ་ཧི། ཀུན་སྤྱོད་ཚུལ་རྣམས་ཀུན་གྱིས་རོལ། །དབྱིངས་
དང་ཡེ་ཤེས་ཆགས་པའི་ལས། །སྟོང་གསུམ་མི་གཏོང་འཆིང་བྱེད་པའི། །འཇིགས་བྱེད་རྔམ་པའི་ཆ་ལུགས་ཅན། །ཧཱུཾ་བཛྲ་པེ་མཱ་ལ་པཱ་ཤེ་ཕཊ། མཧཱ་རུ་ཏྲ་ཧི། བྱམས་པའི་མདའ་འཛིན་སྒེག་པའི་ཚུལ། །མ་བཅོས་ཟུང་དུ་འཇུག་པའི་གཞུ། །མཉམ་ཉིད་འཕྲོ་བས་ཀུན་བརྩོན་པའི། །རྩེ་
གཅིག་ཕྲིན་ལས་འགྱུར་བ་མེད། །ཧེ་བཛྲ་ར་ཏི་བཾ། མ་ཧཱ་རུ་ཏྲ་ཧི། ཐུགས་རྗེ་སྣ་ཚོགས་ཁྱབ་པ་ཡི། །སྒྲར་བཅས་སྐུ་གསུང་ཐུགས་རྒྱལ་བྱེད། །གནས་གསུམ་ལས་རྒྱུད་དག་བྱེད་པའི། །ཡོན་ཏན་ཀུན་གནས་འཕྲུལ་པའི་མཆོག །བཾ་མ་ཧཱ་ར་ཏ་བཛྲ་ཧོ། །མ་ཧཱ་རུ་ཏྲ་ཧི། དགའ་བྱེད་མྱུར་བའི་

བརྟུལ་ཞུགས་འཆང་། །ལས་རྒྱུད་གཅོད་བྱེད་ཐེག་པའི་མཆོག །ཟབ་ཅིང་རྒྱ་ཆེ་ཀུན་ཚུལ་གྱིས། །ཡོན་ཏན་བརྒྱད་འཛིན་བྱེད་པའོ། །ཨོཾ་བཛྲ་ལོ་ཙ་ནེ་ཡཾ་ཡ། མ་ཧཱ་རུ་ཏྲ་ཧི། བཏང་སྙོམས་སྣ་ཚོགས་ཕྲིན་ལས་སྐུ། །གཟུགས་མཛེས་སྤྱོད་པའི་སྒྲ་དང་བཅས། །
དག་བྱེད་ཕྲིན་ལས་བསྙེངས་པ་མེད། །ཐམས་ཅད་ཡེ་ཤེས་རྣམ་སྤྲོས་པའོ། །རཾ་མ་ཧཱ་བཛྲི་ཧིཿ། མ་ཧཱ་རུ་ཏྲ་ཧིཿ། སྦྱིན་པའི་མཆོག་རྣམས་རྣམ་པར་གྲོལ། །གཟུགས་མཆོག་ལྷ་རྫས་མེ་ཏོག་རྒྱ། །ས་གཞི་མདུན་རོལ་གཡས་གཡོན་བསྟོད། །སྣ་ཚོགས་སྤུངས་པ་འཐོར་བྱེད་པའོ། །ཨ་བཛྲ་
པུཥྤེ། མ་ཧཱ་རུ་ཏྲ་ཧི། ཚུལ་ཁྲིམས་དྲི་མཆོག་ཚིམ་བྱེད་པའི། །བདུག་སྤོས་ལེགས་པར་སྦྱར་བའི་མཆོག །གཡས་སྐོར་བཏེག་སྟེ་ཕྱོགས་བཅུར་བསྒྱུར། །མདུན་དུ་ཕྱོགས་པར་སྔོ་བྱེད་པའོ། །ཨ་བཛྲ་དྷཱུ་པ། མ་ཧཱ་རུ་ཏྲ་ཧི། བཟོད་གསོལ་ཤེས་རབ་ཏིང་ངེ་འཛིན། །ཕུན་ཚོགས་སེལ་བྱེད་
མེ་མར་རྒྱ། །ཀུན་དུ་བསྐོར་བའི་གར་བསྒྱུར་ཞིང་། །ཐུགས་ཀའི་མཚན་མ་གསལ་སྟོན་པའི། །ཨ་བཛྲ་ཨཱ་ལོ་ཀེ་ཧཱུཾ། མ་ཧཱ་རུ་ཏྲ་ཧི། བརྩོན་འགྲུས་རྩེ་གཅིག་འགྱུར་བ་མེད། །ཆོས་ཀུན་དག་བྱེད་བྱུག་པའི་དྲི། །སྲིན་མཐེབ་སྤྲད་ནས་རྩེ་གསུམ་འཐོར། །ཕྱོགས་ཀུན་དངོས་བཅས་རྣམ་དག་
འགྱུར། །ཨ་བཛྲ་གནྡྷེ། མ་ཧཱ་རུ་ཏྲ་ཧི། པདྨ་བནྡྷའི་བདུད་རྩི་བསྟོད། །མྱང་བ་རྔུབ་པ་ལྟར་བྱེད་ཅིང་། །ལྕགས་ཀྱུའི་ཕྱག་རྒྱ་རྡོ་རྗེར་བཅས། །དགུག་པའི་ཚུལ་མཆོག་ལས་གྲུབ་པའོ། །ཨོཾ་བཛྲ་ཨཾ་ཀུ་ཤི་ཛཿམ་ཧཱ་རུ་ཏྲ་ཧི། རྡོ་རྗེ་མཆེ་བ་གཙིགས་པའི་རྒྱ། །སྣ་ཡི་མྱང་བ་རྔུབ་པ་ཡིས། །རིན་ཆེན་
ཞགས་པ་གསོལ་ཀའི་ཚུལ། །རང་གི་ལས་ལ་སྦྱོར་བྱེད་པའོ། །ཨོཾ་བཛྲ་པཱ་ཤེཧཱུཾ། མ་ཧཱ་རུ་ཏྲ་ཧི། རྡོ་རྗེ་ལྕགས་སྒྲོག་ཉི་ཟླར་བཅས། །མིག་མཚུངས་ཞེན་པར་ལྟ་བ་ཡིས། །ཁམས་གསུམ་ཀུན་ལ་གཟིགས་པའི་རྒྱ། །ཕྱག་རྒྱའི་ལས་ཀྱིས་བསྟན་བྱེད་པའི། །བཛྲ་ཤྲི་ཁཾ་ལེ་བཾ། མ་ཧཱ་རུ་ཏྲ་ཧི།
མཚམས་ལྡན་སྐུ་མཆོག་བདུད་རྩིས་བཀང་། །ཐམས་ཅད་བདག་ཉིད་མྱང་བ་ཡིས། །སྟོན་པའི་གསུང་དབྱངས་ཀུན་དུ་སྒྲོགས། །ཐལ་འཇིག་རྒྱུད་རྣམས་སླར་འཚོ་མཛད། །ཨོཾ་བཛྲ་གྷཎྜ་ཧོཿ། མ་ཧཱ་རུ་ཏྲ་ཧི། གཟིགས་པ་རྣམ་པ་སྣ་ཚོགས་པ་ཡི་རྒྱས་ཐོབ་ལ། །རྣམ་པ་སྣ་ཚོགས་འོ་བྱེད་

འཁྱུད་པས་རྨོངས་མཛད་དེ། །རྣམ་པ་སྣ་ཚོགས་བདེ་བའི་མཆོད་སྟོན་ཀུན་གསོལ་ལ། །རྣམ་པ་སྣ་ཚོགས་བདེ་མཆོག་ངོ་མཚར་བསྟན་དུ་གསོལ། །རྒྱས་བཏབ་རྨོངས་བྱེད་མནབས་སུ་གསལ། །བདེ་མཆོག་ངོ་མཚར་བདེ་བར་བཞུགས། །ཧཱུཾ་ཨ་ལ་ལ་ལ་ལ་ཧོ། །སྣང་བར་མཛོད། །
རྣལ་འབྱོར་བདེ་མཆོག་སྒྱུ་མས་སྤྲུལ། །དམ་ཚིག་དག་ལ་འཇུག་ཏུ་གསོལ། །ཉོན་མོངས་ཀུན་ལས་རྒྱལ་བར་མཛོད། །མ་ལུས་པ་ནི་མནབས་སུ་གསོལ། །ཉོན་མོངས་ཐམས་ཅད་བསལ་བར་མཛད། །གསུང་གནས་པདྨ་རྡོ་རྗེ་ལ། །ས་བོན་གསང་སྔགས་འཕྲོ་འདུར་
བཅས། །རྒྱལ་བའི་གསུང་ཚོགས་གཉིས་མེད་པའི། །རྡོ་རྗེ་གསང་གསུམ་ཚིག་འདོན་པའོ། །ཨོཾ་སུམྦྷ་གསྟ་མ་ཧྣ་དེ་བི་ཧི་རི་མི་ཏི་རི་ཤྲཱི་ཡེ་ཧི་སྭཱ་ཧཱ། བཛྲ་ཛི་སྭཱ་ཧཱ། ཨོཾ་བཱཀ་བཛྲ་ཨཱཿཧཱུཾ། རྡོ་རྗེ་ཐལ་མོ་གྱེན་དུ་དབྱེ། །མཛུབ་མོ་གཉིས་ནི་རྩེ་མོ་དགུག །མཐེ་བོ་གཉིས་ཀྱི་མཆེ་བ་གཙིགས། །
འཇིགས་པའི་རྡོ་རྗེ་གནོད་སྦྱིན་མ། །ཡི་གེ་བརྒྱ་སྔགས་ལྡན་པ་ཡི། །དམ་ཚིག་མཆོག་གི་ཕྱག་རྒྱས་ནི། །ལྷ་རྣམས་ཀུན་གྱི་གནས་དག་ཏུ། །རྣམ་གསུམ་མཐུ་ཡིས་བསྐུལ་བར་བྱ། །རྡོ་རྗེ་ཁུ་ཚུར་བཅས་པ་ལས། །མཐེའུ་ཆུང་གཉིས་ནི་རབ་བརྐྱང་ནས། །སོ་སོའི་གསང་སྔགས་སྦྱོར་བ་
ཡི། །ལས་ཀྱི་སྔགས་བཅས་དོན་སྦྱོར་བའོ། །ལག་པ་གཡས་གཡོན་གཉིས་དག་གི། །མཛུབ་མོ་མཐེ་ཆུང་མཛེས་བསྒྱུར་ཏེ། །རྡོ་རྗེ་ཐལ་མོ་གྱེན་དུ་དགྲོལ། །མཆོད་པའི་གཏོར་མ་ཀུན་གྱི་ཚུལ། །ཨོཾ་པ་ན་པེ་ན། པེ་ནུ་སུ་རུ་ཏ། པུ་པ་ར་མུ། སརྦ་ཏ་ཐཱ་ག་ཏ། ས་མ་ཡ། ཡོ་ག་སིདྡྷ་ཨཱཿཧཱུཾ། ཨོཾ་ཨཱཿ
ཧཱུཾཿ། རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་པ་གྲུབ་པར་མཛོད། །དམ་ཚིག་དམ་པ་གྲུབ་པར་མཛད་དུ་གསོལ། །མཆོད་པ་ཆེན་པོ་ཐམས་ཅད་དག་པར་མཛོད། །མཆོད་པ་ཆེན་པོ་ཐམས་ཅད་གྲུབ་པར་མཛད་དུ་གསོལ། །ཨ་ལ་ལ་སྟེ་མཆོད་
པར་འབུལ། །ཨ་ལ་ལ་སྟེ་དམ་ཚིག་བསྐངས། །ཨ་ལ་ལ་སྟེ་དགྱེས་པར་མཛོད། །ཨ་ལ་ལ་སྟེ་དངོས་གྲུབ་སྩོལ། །དགྱེས་མཉམ་ལོངས་སྤྱོད་མཆོག་ལ་རོལ། །ཨོཾ་ཤྲཱི་ར་ག་བཛྲ་ཨ་པུཥྤེ་པུ། ཨ་དྷཱུ་པ་དྷུ། །ཨ་ཨཱ་ལོ་ཀེ་ཧྲཱིཿ། ཨ་གནྡྷེ་བཛྲ་ར་ཏི་པཾ། བཾ་མ་ཧཱ་ར་ཏ་བཛྲ་ཧོ། །ཨོཾ་བཛྲ་ལོ་

ཙ་ན་ཡཾ་ཡ། རཾ་མ་ཧཱ་ཤྲཱི་ཧི། ཨ་ལ་ལ་ཧོ། །བདེ་བར་གཤེགས་སོ་ཁྲོ་རྒྱལ་གཙོ། །རྒྱལ་བ་རྒྱ་མཚོ་ཡེ་ཤེས་ཀྱི། །སྲིད་པ་རྒྱ་མཚོ་ཐམས་ཅད་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ཨོཾ་ན་མཿསརྦ་ཏ་ཐཱ་ཏེ་བྷྱོ་བི་ཤྭ་མུ་ཁ་བྷྱཿསརྦ་ཏད་ཁཾ་ཨུདྒ་ཏེ་སྥ་ར་ན་ཧི་མཾ་ག་
ག་ན་ཁཾ་སྭཱ་ཧཱ། ཨོཾ་འབྱུང་བ་ལྔ་ལས་ཐམས་ཅད་འབྱུང་། །རང་ལས་མ་བྱུང་གང་ཡང་མེད། །གཙང་སྨེའི་དྲི་རྟོག་ཀུན་བྲལ་བའི། །བདུད་རྩི་བྱང་ཆུབ་སེམས་ཆེན་པོས། །བདག་སོགས་གཉིས་མེད་མཆོད་པའི་ཕྱིར། །མཉམ་པ་ཆེན་པོའི་རྒྱན་ལ་རོལ། །ཨོཾ་ན་མཿསརྦ་པཉྩ་ཨ་མྲྀ་ཏ་ཨཱཿཧཱུཾ།
ཨོཾ་ཀཱ་ཡ་སིདྷྷི་ཨོཾ། ཨོཾ་བཱཀ་སིདྷྷི་ཨཱཿ། ཨོཾ་ཙིཏྟ་སིདྷྷི་ཧཱུཾ། ཨོཾ་ཤྲཱི་ཧེ་རུ་ཀ་ཨི་དཾ་དྷཱུ་པ་པུཥྤ་དཱི་པ། གནྡྷ། བ་ལི་ཏ། པྲ་ཏཱིཙྪ་ཧོ། །ཤྲཱི་བྷ་ག་བཱན་ཁ་ཁ་ཁ་ལེ་ལེ་ལེ། ཁཱ་ཧི་ཁཱ་ཧི་ཁཱ་ཧི། ཛཿཧཱུཾ་བཾ་ཧོཿ། ཤྲཱི་ཧེ་རུ་ཀ །མ་ཧཱ་བཛྲ་྅ཨཱ་བེ་ཤ་ཡ། ཨཱ་བེ་ཤ་ཡ། པྲ་བེ་ཤ་ཡ། པྲ་བེ་ཤ་ཡ། པྲ་ཏཱིཙྪ་ཧོ། །
ཤྲཱི་བྷ་ག་བཱན། ཁ་ཁ་ཁ། ཁཱ་ཧི་ཁཱ་ཧི་ཁཱ་ཧི། སྒེག་པ་དཔའ་བོ་མི་སྡུག་འཇིགས་སུ་རུང་། །དགོད་དང་གཤེ་དང་འཇིགས་པར་བྱེད་པ་དང་། །སྙིང་རྗེ་རྔམ་དང་ཞི་བ་ལ་སོགས་པ། །སྐུ་ཡི་དངོས་པོ་ཤིན་ཏུ་བསྒྱུར་བ་ཡི། །གར་བྱས་གྲུབ་པའི་རྣལ་འབྱོར་པ། །གར་གྱི་དབང་ཕྱུག་གཙོ་བོ་ཆེ། །
བཟའ་བ་ལ་སོགས་སྙིང་པོ་ཅན། །མཱཾ་ས་ལ་སོགས་བྲོ་མཆོག་སྩོལ། །མེ་ཏོག་ལ་སོགས་ཙནྡན་ཕྲེང་། །བཟང་དགུར་དབུལ་གྱིས་བཞེངས་སུ་གསོལ། །མི་མོ་རྣམས་ཀྱི་རེག་བྱའི་མཆོག །བྱིན་གྱིས་རློབས་ཤིག་རྣལ་འབྱོར་པ། །སྒྲུབ་པའི་རྫས་འདི་ཐམས་ཅད་ལ། །ཧཱུཾ་དང་ཕཊ་ཀྱིས་ལྡན་
པར་མཛོད། །ཧཱུཾ་ཤིན་ཏུ་བརྒྱན་པའི་རིགས་དང་མཚན་ལྡན་མཆོག །བཀྲ་ཤིས་དབྱངས་དང་གར་གྱིས་མཆོད་བྱས་པའི། །ལྷ་མོ་རྡུལ་སྙེད་ཕྱོགས་བཅུར་སྤྲོས་བྱས་པའི། །བྱང་སེམས་བདེ་བའི་མཆོད་པ་རྣམ་པར་རྒྱལ། །ཧཱུཾ་ཧཱུཾ་མ་ཧཱ་སུ་ཁ་བོ་དྷི་ཙིཏྟ་ཨ་ལ་ལ་ཧོ། །ཧེ་རུ་ཀ་ཡི་གནས་བཅུ་
དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་ཁྲག་འཐུང་འཁོར་དང་བཅས། །དུར་ཁྲོད་མཆོག་གི་གནས་འདི་རུ། །ཞིང་ཆེན་གསར་རྙིང་སྟི་རར་བཅས། །དམར་གྱི་ཨརྒྷ་རྒྱ་མཚོར་བསྐྱིལ། །མཁའ་འགྲོ་འབར་བའི་ཚོགས་བཅས་རྣམས། །མ་ལུས་བཞེས་ནས་

བསྣམས་སུ་གསོལ། །ཛཿཧཱུཾ་བཾ་ཧོཿ། ཤྲཱི་ཧེ་རུ་ཀ་མ་ཧཱ་བཛྲ་སརྦ་དུཥྚཱན་ས་མ་ཡ་མུ་དྲ་མ་རཾ་ཁ་ཁ་ཁ། ཁཱ་ཧི་ཁཱ་ཧི་ཁཱ་ཧི། ཧྲྀ་ད་ཡ་པི་པ་ཧཱུཾ་ཕཊ། ང་ནི་ཟ་བྱེད་ཆེན་པོ་སྟེ། །ཁམས་གསུམ་མ་ལུས་བསྒྲལ་བ་དང་། །གདུལ་དཀའ་མ་ལུས་གདུལ་བའི་ཕྱིར། །ཤ་རུས་ལ་སོགས་བཟའ་བར་བྱ། །
ཛཿཧཱུཾ་བཾ་ཧོཿ། ཤྲཱི་ཧེ་རུ་ཀ །མ་ཧཱ་བཛྲ། ས་མ་ཡ། མ་ཧཱ་མཱཾ་ས། མ་ཧཱ་རཀྟ། མ་ཧཱ་ཙིཏྟ། མ་ཧཱ་བ་སུ་ཏ། མ་ཧཱ་པཉྩ་ཨ་མྲྀ་ཏ། མ་ཧཱ་ཨརྒྷཾ་པྲ་ཏཱིཙྪ་ཧོ། །ཁ་ཁ་ཁ། ལེ་ལེ་ལེ་ཧོ། །བྷྱོ་ཧཱུཾ་ཧཱུཾ་བྷྱོ། །ཀོ་ཏ་ཀྵ། ཀོ་ཏ་བ། ཀོ་ཏ་ཀོ་ཏ། པ་ས་པ་ས། ཀ་ཏི་ར་ག །ཀོ་ལཱ་ཀྵ། ཀོ་ལ་བ། ཀོ་ལ་ཀོ་ལ། ཀ་ལ་པ།
ཤྚཋ། རྣམ་དག་སྒྲིབ་སྦྱངས་སྲིད་གསུམ་སྐྱོན་བྲལ་ཞིང་། །སྟོན་ཀའི་ཟླ་གསལ་དྲི་མེད་ཞལ་མངའ་བ། །བཅོམ་ལྡན་བདེ་གཤེགས་རྡོ་རྗེའི་དཀྱིལ་འཁོར་དབྱིངས། །དུས་གསུམ་རྒྱལ་བ་ཐམས་ཅད་བསྐྱེད་པའི་ཡབ། །ཤེས་རབ་ལྷ་མོ་རིགས་ཀྱི་ཡུམ་རྣམས་དང་། །ཕྱག་རྒྱ་གཏུམ་ཆེན་རྔམ་
པའི་འཁོར་ལོ་སོགས། །བསོད་ནམས་ཡེ་ཤེས་ཚོགས་ཀྱི་ཞིང་རབ་རྫོགས། །དགྱེས་ཤིང་རོལ་པའི་དུས་མཆོག་སྦྱར་བ་ཡི། །བཞེས་ཏེ་ཨ་ལ་ལ་སྟེ་དགྱེས་པར་མཛོད། །ཨོཾ་བཛྲ་ཨེ་ས་ཧཱ། པེ་ས་ཧུ། ས་མ་ཡ་བག་ཤ་ཧཱུཾ། རུ་ལུ་རུ་ལུ་ཧཱུཾ་བྷྱོ་ཧཱུཾ། ཛཿཧཱུཾ་བཾ་ཧོཿ། །པྲ་ཏཱིཙྪ་ཧོ། །ཡེ་ནས་མཉམ་
ཉིད་ཆོས་སྐུ་དག་པ་ལ། །ལོག་རྟོག་དབང་གིས་སྒྲོ་དང་སྐུར་བཏབ་སྟེ། །བདེ་དང་སྡུག་བསྔལ་སྣ་ཚོགས་ངོ་བོར་སྨིན། །དེ་བཟློག་དོན་ཕྱིར་རྒྱལ་བའི་དམ་མནོས་པས། །རྒྱལ་བ་ཞི་ཁྲོའི་ཐུགས་དང་ཅི་འགལ་བ། །ཐུགས་རྗེའི་ངང་ཅན་རྣམས་ལ་བཟོད་པར་གསོལ། །བཅོམ་ལྡན་དཔལ་ལྡན་རྡོ་རྗེ་
ཧེ་རུ་ཀ །ཁྱོད་ཀྱི་ཐུགས་རྗེ་ནམ་མཁའི་མཐའ་དང་མཉམ། །མཁའ་འགྲོའི་དཀྱིལ་འཁོར་ཚོགས་དང་བཅས་པ་ཡིས། །འགྲོ་ལ་བརྩེར་དགོངས་ཚངས་པར་སྩལ་དུ་གསོལ། །བདག་ཅག་དམ་ཚིག་འདི་ལ་མངོན་དུ་ཞུགས་པ་རྣམས། །བཅད་གཏུབས་ལུས་ལ་འབྱུང་བར་མི་འགྱུར་ཞིང་། །
གྲིབ་མས་ཕོག་པའི་སྡུག་བསྔལ་མི་བཟོད་པ། །སྐུ་ཡི་ཕྱོགས་ཙམ་དྲན་པས་མོད་ལ་འཚོ་བ་དང་། །གཟི་མདངས་ལུས་ལ་འཇུག་པ་བྱེ་བ་སྟོང་ཕྲག་གི། །འོད་ཀྱིས་ཕོག་པས་འཇིག་རྟེན་ཁམས་འདིར་སྣང་བ་དང་། །ལུས་ངག་སེམས་དང་ཚེ་ནི་རྡོ་རྗེར་རབ་བརྟེན་ཏེ། །རེ་སྨོན་ཐམས་ཅད་

དུས་འདིར་གྲུབ་པར་མཛད་དུ་གསོལ། །རྣམ་གསུམ་སེམས་དཔའ་སྔགས་ཀྱི་ཕྲེང་། །དཀྱིལ་འཁོར་ཀུན་གྱི་གནས་ཞུགས་པ། །ཡན་ལག་རྣམ་གསུམ་སྤྲོ་བསྡུ་ཡི། །གསལ་བ་གཉིས་ཀྱི་སྒོ་ནས་བརྩམ། །རིམ་གྱིས་རྟེན་ཉིད་རྟེན་སྔགས་དག །འཁོར་ལོའི་ཚུལ་ལྡན་
ཤེས་རབ་ཐབས། །ཡི་གེ་མཚན་མ་སྐུ་ཡི་གནས། །བགྲང་ཞིང་གྲངས་འདས་ཚོགས་སྤྱོད་པའོ། །རྩེ་གཅིག་གནས་སུ་འཁོར་བ་ལས། །ལངས་ཤིང་འཁྲུལ་འཁོར་འཕྲོ་བ་དག །མཉེས་བསྐུལ་ལས་མཛད་བསྡུ་བྱེད་ཅིང་། །དཀྱིལ་འཁོར་གསལ་བར་གྱུར་པའོ། །ལས་ཀྱི་སྦྱོར་བ་ཀུན་སྦྱོར་
ཞིང་། །དབྱངས་དྲུག་བླངས་པས་དོན་དྲུག་གསལ། །ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཐུན་མོང་བསྙེན་པ་ལས་ཀུན་ལ། །འཇུག་པའི་ཡིག་འབྲུ་བརྒྱད་པའོ། །སོ་སོའི་ལས་ལ་སྙོམས་འཇུག་ལས། །རང་གི་མཚན་མ་སྔགས་ཕྲེང་གཉིས། །འཕྲོ་འདུས་རིགས་མཐུན་ལས་མཛད་ནས། །སྐུ་གསུང་ཐུགས་
ཀྱི་བཟླས་བརྗོད་བརྩམ། །ཨོཾ་ཤྲཱི་ཧེ་རུ་ཀ །བཛྲ་ས་མ་ཡ་ཧྲི་སརྦ་དུཥྚ་ས་མ་ཡ་མུ་དྲ་པྲ་བཾ་ཙཀྲ་ཧཱུཾ་ཕཊ། ཁྱད་པར་གཙོ་བོའི་སྙིང་པོའི་སྔགས། །ཡི་གེ་ཉི་ཤུ་རྩ་ལྔ་པའོ། །གཞན་ཡང་རིམ་བཞིན་སྔགས་གསལ་བས། །གོ་རིམས་འཁྲུལ་མེད་བརྗོད་པར་བྱ། །བཟླས་རྫོགས་མཆོད་བསྟོད་བསྐུལ་
བྱས་ནས། །རང་གི་གནས་སུ་བསྡུ་བར་བྱ། །གཞན་ཡང་ཐིག་ལེ་ཕྲ་མོའི་ཚོགས། །དཀྱིལ་འཁོར་ལྷ་ནི་རྣམ་དག་ཀུན། །མཚན་བཅས་དམིགས་པའི་ལས་སྦྱངས་པས། །ཆོས་སྐུའི་ཕྱག་རྒྱ་གསལ་གྱུར་བསྒོམ། །རིགས་ཀྱི་དཀྱིལ་འཁོར་གསལ་བྱས་ནས། །ཚོགས་གཉིས་རྫོགས་
ནས་འགྲུབ་བྱེད་པའི། །དགའ་བདེའི་ལོངས་སྤྱོད་ཚོགས་འགྱུར་བས། །རྣལ་འབྱོར་ལོངས་སྤྱོད་མཉེས་པར་བྱ། །རྟ་མཆོག་མཁའ་འགྲོའི་ཚོགས་བཅས་པ། །ལྷག་མའི་མཆོད་པས་མཉེས་པ་དག །རང་གི་ལས་ལ་སྦྱར་བྱ་སྟེ། །དངོས་གྲུབ་དོན་ཕྱིར་མཚམས་སུ་གཞག །མཉམ་ཉིད་
དཀྱིལ་འཁོར་ཀུན་གྱི་མཆོག །དོན་དམ་བདེ་བ་ཆེན་པོའི་སྐུ། །དེ་བཞིན་ཉིད་དབྱིངས་ཡེ་ཤེས་ཀྱི། །ལྷ་ཉིད་བརྩོན་པས་བསྒོམ་པར་བྱའོ། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ཁམས་གསུམ་དག་ནི་མ་ལུས་པ། །ཐམས་ཅད་སྒྱུ་མ་ལྟ་བུ་སྟེ། །

ཇི་ལྟར་སྒྱུ་མ་ཐམས་ཅད་དུ། །མཐོང་བ་དང་ནི་རེག་པར་འགྱུར། །དམིགས་སུ་ཡོད་པ་མ་ཡིན་ཏེ། །དེ་བཞིན་འགྲོ་བ་ཀུན་གྱི་ཚུལ། །གང་ཞིག་ཐུན་བཞི་ལ་སོགས་པར། །དཀྱིལ་འཁོར་འདི་ཉིད་བསྒོམས་པས་ནི། །ཡེ་ཤེས་དཀྱིལ་འཁོར་གཤེགས་གསོལ་ཞིང་། །དམ་ཚིག་དཀྱིལ་
འཁོར་རིམ་བཞིན་དུ། །སླར་ཉིད་སྦྱོར་ལྡན་བསྲུང་བྱས་ཏེ། །སྤྱོད་ལམ་རྣལ་འབྱོར་གནས་པར་བྱ། །ཚོགས་འགྱུར་སྤྱོད་མཐུན་བྱ་བ་ཡིས། །དུས་ཀུན་དུ་ནི་འགྲོ་དོན་བརྩམ། །མགོན་མཆོག་ས་སྟེངས་ཀུན་གྲགས་པས། །ཐུགས་རྗེས་འགྲོ་དོན་རྣམ་དག་སྟོན། །རྒྱ་མཚོ་འཁྲུག་
འདྲ་རྣམ་ལོག་པས། །ངེས་དོན་རྣམ་པར་བཀོད་པའི་སྒོ། །དོན་གསལ་སྲིན་བུས་གྲོང་ཁྱེར་མིན། །དམན་སོགས་མ་འོངས་གཟུང་བྱའི་ཕྱིར། །སྒྲུབ་དོན་དམ་པའི་གཞུང་གསལ་བྱས། །ཁེ་གྲགས་ངན་རྟོག་བློས་མ་ཡིན། །ཐུགས་རྗེ་མཆོག་གི་དགོངས་མཛད་བཞིན། །ངལ་བའི་དགེ་
སོགས་ཉི་ཟེར་གྱིས། །ཁམས་གསུམ་མུན་ཚོགས་བསལ་འགྱུར་ཞིང་། །ཡང་དག་གྲུབ་པའི་འབྲས་ཐོབ་ཤོག །དཔལ་ཧེ་རུ་ཀའི་སྒྲུབ་པའི་ཐབས་སློབ་དཔོན་ཆེན་པོ་ཧཱུཾ་གི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་བཛྲ་ས་ཧ་དང་། སྒྲ་བསྒྱུར་གྱི་ལོ་ཙཱ་བ་རྨ་རིན་ཆེན་
མཆོག་གིས་བསྒྱུར་ཅིང་གཏན་ལ་ཕབ་པའོ། །སླད་ཀྱི་ལོ་ཙཱ་བ་ཕྱི་མ་དག་གིས་སུམ་ཐུག་ཏུ་ཞུ་ཆེན་བཅོས་པའོ།། ༄༅༅། །རྒྱ་གར་སྐད་དུ། ཙ་ཏུ་ར་ཏཱཾ་གཱཪྠ་ཨཱ་ལོ་ཀ་ནཱ་མ། བོད་སྐད་དུ། ཡན་ལག་བཞིའི་དོན་སྣང་བར་བྱེད་པ་ཞེས་བྱ་བ། བཅོམ་ལྡན་འདས་དཔལ་རྡོ་རྗེ་
འཛིན་པ་ལ་ཕྱག་འཚལ་ལོ། །མཁའ་མཉམ་གསལ་བ་གཉིས་མེད་པའི། །ཡོན་ཏན་རིན་ཆེན་སྣ་ཚོགས་གཞི། །ཐམས་ཅད་རང་བཞིན་བདེ་ཆེན་སྐུ། །བཀོད་པ་ཀུན་སྣང་རོལ་སྟོན་འདུད། །བསྟན་པའི་སྙིང་པོ་དྲི་མེད་བཀའ། །གསང་དོན་གསང་བ་ཀུན་གྱི་མཆོག །བསྡུ་ཞིང་དེ་ངན་གསལ་
མཛད་པའི། །མཆོག་རྣམས་ཀུན་ལ་ཕྱག་འཚལ་ལོ། །དཔལ་ལྡན་བདེ་མཆོག་རྒྱུད་དག་ལས། །རིམ་འཇུག་སྒྲུབ་ཆེན་དོན་བཀོད་པའི། །ཚིག་དོན་རྟོགས་དཀའི་རིམ་པ་དག །རྣམ་གསུམ་དགུ་ཡི་གཞུང་གསལ་ཕྱིར། །བསྙེན་སྒྲུབ་ཆོ་གའི་རིམ་རྒྱས་པར། །དངོས་གཞི་དགོངས་མཛད་

སྦྲེལ་བསྡུས་པ། །དམ་པའི་རྗེས་འབྲངས་མཐའ་གཉིས་བསལ། །གཞུང་བྲལ་འཁྲུལ་སོགས་དགག་ཕྱིར་བཤད། །བསྐལ་པ་བྱེ་བ་གྲངས་མེད་པར། །སངས་རྒྱས་ཐམས་ཅད་མ་ཐོབ་པ། །ཕྱག་རྒྱའི་ཆོ་ག་གང་དག་གིས། །ཚེ་འདི་ཉིད་ལ་ཐོབ་པར་འགྱུར། །དེ་ནི་
བདག་གིས་བརྟག་པར་བྱ། །སངས་རྒྱས་ཀུན་དག་བདེ་བའི་མཆོག །བདག་ཉིད་བཞིན་དུ་བསྒྲུབས་པ་ལས། །སངས་རྒྱས་ཀུན་དག་བདེ་མཆོག་གོ། །རྣལ་འབྱོར་ཡང་དག་མ་ཡིན་སེམས། །ལྷ་ལ་དམིགས་པར་བྱེད་པ་བདག །རྣལ་འབྱོར་གཟུགས་བརྙན་རང་བཞིན་ཏེ། །ལུགས་མ་ལ་
སོགས་རྣལ་འབྱོར་སྐྱེ། །ཡང་དག་མཆོག་སེམས་རྣལ་འབྱོར་པ། །ལྷ་ལ་དམིགས་པར་བྱེད་པ་དག །རང་གི་དམ་ཚིག་བདག་སྦྱོར་བས། །མི་འགྱུར་དམ་པ་གྲུབ་པར་འགྱུར། །གཟུགས་བརྙན་ལུགས་མ་ལ་སོགས་ལ། །རྣལ་འབྱོར་འབྱུང་བར་མི་འགྱུར་གྱི། །བྱང་ཆུབ་སེམས་ལ་རབ་བརྩོན་
ན། །དེ་ལས་རྣལ་འབྱོར་ལྷར་འགྱུར་རོ། །ཆོས་རྣམས་ཐམས་ཅད་སྣང་གྲོལ་དབྱིངས། །ཀུན་གསལ་སྟོང་ཉིད་ཟུང་འཇུག་དངོས། །རང་བཞིན་མ་བཅོས་ལྷུན་གྱིས་གྲུབ། །བདེ་བ་ཆེན་པོ་མཆོག་གི་རྒྱ། །བྱང་སེམས་མཁའ་དབྱིངས་དག་པ་ལས། །ཡོན་ཏན་མ་རྩལ་ཀུན་འབྱུང་སྣང་། །སྣ་ཚོགས་
སྣང་བ་རིས་མ་འགྲུབ། །རྟོག་དཔྱོད་ཞེན་ཆགས་ཡུལ་ལས་འདས། །དབུ་མར་ཡང་ནི་མི་དམིགས་ཏེ། །ཤེས་རབ་ཕ་རོལ་ཕྱིན་སྦྱོར་བ། །ཐབས་ཀྱི་སྙིང་རྗེའི་བདག་ཉིད་རྣམས། །དེ་བས་དེ་ནི་སྙིང་རྗེའི་ཐབས། །ཤེས་རབ་ཕ་རོལ་ཕྱིན་པར་གསལ། །འདི་ནི་རྣལ་འབྱོར་བཅོམ་ལྡན་འདས། །
རྡོ་རྗེ་སེམས་དཔའ་དེ་བཞིན་གཤེགས། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་བའི་མཆོག །ཡང་དག་གྲུབ་པ་གཅིག་པུ་ཉིད། །ཇི་ལྟར་འདོད་པ་བཞིན་དུ་སྦྱར། །རྟོག་པའི་ཆོ་ག་ཐམས་ཅད་ལ། །གྲུབ་པ་དམ་པ་མཆོག་གི་མཆོག །སྣ་ཚོགས་ལས་ཀྱི་སྦྱོར་བ་
ཡི། །ཆོ་ག་སྣ་ཚོགས་འདོད་པ་ཡིས། །སེམས་ཅན་རྣམས་ནི་འདུལ་བ་དང་། །བདེ་བ་ཐམས་ཅད་བསྒྲུབ་པའི་ཕྱིར། །བཅོམ་ལྡན་རྣལ་འབྱོར་དེ་ཉིད་ནི། །སངས་རྒྱས་ཐམས་ཅད་རྣམ་འཕྲུལ་བས། །སེམས་ཅན་ཀུན་དོན་རྣམ་འཕྲུལ་ནས། །མྱུར་དུ་ཤིན་ཏུ་འགྲུབ་པར་འགྱུར། །འདས་

དུས་བསྐལ་པ་རིམ་བཞིན་དུ། །ལོག་པའི་ལམ་ཞུགས་རྣམ་དྲུག་པོས། །བདག་གཞན་གཉིས་ག་ཕུང་བྱེད་ཅིང་། །དྲེགས་བྱེད་ཆེན་པོར་གྱུར་པ་ལ། །ཐབས་གཞན་དག་གིས་མི་འདུལ་ཕྱིར། །སངས་རྒྱས་ཐུགས་རྗེ་ཆེན་པོ་ཡིས། །དགོངས་མཛད་གསང་བ་བླ་མའི་མཆོག །
རྣམ་འཕྲུལ་ཆེན་པོ་བསྟན་པ་ཡིན། །སེམས་དཔའ་སངས་རྒྱས་ཀུན་གྱི་དངོས། །རྡོ་རྗེ་སེམས་དཔའ་བདེ་བའི་མཆོག །གསང་བ་མཆོག་གི་དགྱེས་པ་ལ། །ཐམས་ཅད་བདག་ཉིད་རྟག་ཏུ་བཞུགས། །འདི་ནི་རང་བྱུང་བཅོམ་ལྡན་འདས། །གཅིག་པུ་རབ་ཏུ་ཆེ་བའི་ལྷ། །རྒྱལ་བ་ཀུན་
གྱི་དགོངས་མཛད་མཆོག །འཁོར་ལོ་གསང་བའི་རྒྱུད་ཆེན་དག །རིམ་བཞིན་བརྡ་དོན་གསལ་མཛད་ཅིང་། །ངེས་སྐྱེས་ཕྱག་རྒྱས་གཏན་ལ་དབབ། །ཤེས་བྱའི་དཀྱིལ་འཁོར་གསལ་གྱུར་ནས། །རྟེན་མཆོག་གི་ནི་དོན་སྦྱར་ནས། །ཡན་ལག་བཞི་སྣང་བཅུ་དྲུག་ཚོགས། །རྒྱུ་རྐྱེན་
ཚོགས་འབྲས་མཛད་བཅས་རྫོགས། །གང་ཞིག་ཡུན་རིངས་སྦྱངས་པའི་མཐུས། །སྙིང་རྗེ་ཆེན་པོའི་གོམས་ཤུགས་ཅན། །དད་བརྩོན་ལྟ་བས་བློ་གསལ་ཞིང་། །དེས་བརྟགས་དཀྱིལ་འཁོར་དབང་ཐོབ་པས། །སྨིན་ལམ་རྫོགས་བྱེད་འགྱུར་མེད་གནས། །བླ་མས་བསྒོ་བའི་དོན་བཞིན་
སྤྱོད། །བདག་གཞན་དོན་སྒྲུབ་ལམ་ལ་གནས། །བློ་གྲོས་མཆོག་གྱུར་གསང་བའི་སྣོད། །དཀྱིལ་འཁོར་ཐེག་པར་མ་ཞུགས་ཤིང་། །དམ་ཚིག་སྤངས་ཤིང་གསང་དོན་རྨོངས། །ཤེས་རབ་ཆེ་དང་སྙིང་རྗེ་བྲལ། །ལོག་སྨན་གུས་པ་མེད་སྤངས་བྱ། །གང་དུ་འབྲས་བུ་ཕུན་ཚོགས་
ཤིང་། །དབེན་པའི་དགོན་པ་ཉམས་དགའ་བ། །གཞན་དབང་དགྲ་ཡི་ཚེར་མ་མེད། །ཆུ་མཆོག་ཤིང་གིས་མཛེས་བྱས་པར། །ཀུན་དུ་སྣ་ཚོགས་སྐལ་བཟང་པོར། །ཀུན་དུ་སྣ་ཚོགས་བདེ་མཆོག་གིས། །ཀུན་དུ་སྣ་ཚོགས་དགོས་པ་རྣམས། །ཅི་བདེ་བར་ནི་བསྒྲུབ་པར་བྱ། །རྟེན་དང་དགོན་པ་
གཙུག་ལག་ཁང་། །རི་ཡི་རྩེ་རྣམས་ཐམས་ཅད་དུ། །རྣམ་པ་དུ་མ་སྣ་ཚོགས་པའི། །སངས་རྒྱས་དགོངས་པ་བསྒྲུབ་པར་བྱ། །པདྨའི་སྐྱེད་མོས་ཚལ་དགའ་དང་། །ཆུ་བོ་དག་གི་མདོ་དག་ཏུ། །པདྨ་འཛིན་པའི་དགོས་པ་རྣམས། །རྣམ་པ་དུ་མར་འགྲུབ་པར་འགྱུར། །རྒྱལ་པོའི་ཕོ་བྲང་

དགའ་བ་དང་། །པདྨོ་སྐྱེད་མོས་ཚལ་ཉིད་དུ། །རྣམ་པ་སྣ་ཚོགས་དུ་མ་ཡིས། །རྒྱལ་བའི་དགོངས་པ་བསྒྲུབ་པར་བྱ། །མཁར་ནི་རྣམ་པ་སྣ་ཚོགས་དང་། །དེ་བཞིན་ཆུ་བོའི་འགྲམ་དག་གམ། །རྒྱལ་ཁམས་གཞན་ལས་གྲུབ་པ་རུ། །རྡོ་རྗེ་རྟ་ནི་བསྒྲུབ་པར་
བྱ། །ཡུལ་འཁོར་ཡོ་བྱད་རྒྱན་བཅས་དང་། །ཆ་ལུགས་རྣམ་པ་སྣ་ཚོགས་ཀྱིས། །གནས་ཀྱི་ས་གཞི་མཛེས་བྱས་ཏེ། །སྒྲུབ་པའི་སྐྱེས་བུ་དབྱེ་བ་ལས། །སྒྲུབ་པ་རྣམ་པ་སྣ་ཚོགས་ཀྱིས། །བདག་གཞན་བྱ་བ་སྣ་ཚོགས་འགྲུབ། །གཞན་དོན་དམིགས་པའི་ལས་ལ་ནི། །སློབ་དཔོན་དེ་
ཉིད་བཅུ་སོགས་ཤེས། །ཚད་ལྡན་རང་རྒྱུད་དག་པ་ཡིས། །དཀྱིལ་འཁོར་དབང་བསྐུར་སྒྲུབ་པ་དང་། །ཕྲིན་ལས་ཚོགས་བསགས་བསྲུང་དོན་དུ། །བསྙེན་འགྲོ་བསྙེན་པ་རྫོགས་བྱས་པས། །ས་གཞི་ས་བོན་ལ་འཇུག་ཅིང་། །ཡང་དག་དཀྱིལ་འཁོར་རྒྱས་པ་ཡི། །གཞུང་བཞིན་འཇུག་
པར་བྱ་བ་སྟེ། །རྟོག་པ་སྣ་ཚོགས་ལས་འཕྲོས་པའོ། །བདག་དོན་བྱ་བ་དེ་ལས་གཞན། །ས་གཞི་སྟ་གོན་སྔོན་བརྩམས་ཕྱིར། །བདག་ཉིད་རང་གི་ལྷར་སྦྱོར་བས། །ལུས་ངག་ཡིད་གསུམ་མཐུ་བསྐྱེད་ཅིང་། །བདག་དང་འགྲོ་བ་སྦྱང་བྱས་ནས། །རང་བཞིན་དག་པའི་རྣམ་པར་བསམ། །
བྱ་བའི་རྒྱུད་སོགས་གསུངས་པ་ཡི། །གཏོར་སྦྱིན་ཆེན་པོའི་ཆོ་ག་ཡིས། །མགྲོན་ཚོགས་བཞི་པོ་ཚིམ་བྱས་ནས། །བསྒོ་བའི་ཕྲིན་ལས་དྲག་ཏུ་བྱ། །ཕྱོགས་བཞིར་སྲུང་བའི་སྟེགས་བུ་ལ། །བསྲུང་བའི་ཡི་གེ་བརྩམས་ཏེ་གཞག །ཡང་དག་གསང་བའི་དཀྱིལ་འཁོར་འདིར། །གསང་
བའི་དམ་ཅན་སོ་སོ་ནས། །འདུ་བ་ལས་ནི་མ་གཏོགས་ཤིང་། །ཉན་པ་ལས་ནི་མི་དབང་བའི། །བགེགས་དང་འབྱུང་པོ་ཐམས་ཅད་ཀུན། །ད་ལྟ་ཉིད་དུ་སོ་སོར་དངས། །ཇི་སྟེ་བཀའ་ལས་འདས་གྱུར་ན། །རྡོ་རྗེ་འཛིན་རྒྱལ་ཁྲོས་ནས་ཀྱང་། །རྡོ་རྗེ་མཚོན་ཆེན་འབར་བ་ཡིས། །གཏན་དུ་
བརླག་ཅིང་ཕུང་བར་འགྱུར། །ཧཱུཾ་བཛྲ་ཛྭ་ལ་རཾ་ཡཾ། ཁཾ་ཙཀྲ་བི་ཤྭ་ཧཱུཾ་ཕཊ་ཕཊ། ཐབས་དང་ཤེས་རབ་སྒྲུབ་པ་པོས། །ཕྱི་དང་ནང་གི་བསྐང་བཤགས་ཀྱིས། །རིན་ཆེན་སྣོད་མཛེས་དྲི་ཡང་བསྒྲིབས། །རྣམ་དག་རིས་གསལ་ཇི་བཞིན་པའོ། །ཐུགས་ཀའི་འོད་ཟེར་སྤྲོ་བསྡུ་ཡིས། །དཀྱིལ་

འཁོར་མདུན་དུ་དགུག་བྱ་སྟེ། །དགའ་ཆེན་དཔལ་ལས་བྱུང་བ་ཡི། །སེ་གོལ་དཔུང་མགོར་ལན་གསུམ་གཏོགས། །རྡོ་རྗེ་བཅིང་སྐྱོའི་སེ་གོལ་གྱིས། །སངས་རྒྱས་ཐམས་ཅད་བསྡུ་བར་བྱ། །ཨོཾ་བཛྲ་ས་མཱ་ཛཿཧཱུཾ། ཨོཾ་ཐམས་ཅད་སྤྲོས་བྲལ་དེ་ཉིད་ཆེ། །མཁའ་མཉམ་ཡེ་
ཤེས་རྟོགས་མེད་མཆོག །གཉིས་སྣང་སོ་སོར་སྨིན་དགོངས་མཛད། །ཐུགས་རྗེས་སྨོན་ལམ་ཐབས་མཁས་པས། །དབང་པོའི་གཞུ་བཞིན་ཅི་འདུལ་སྟོན། །ཕྱོགས་བཅུའི་རྒྱལ་བ་སྲས་དང་བཅས། །ལྷ་མོ་དག་མཆོག་དམ་པའི་ལྷ། །དཀྱིལ་འཁོར་ཚོགས་རྣམས་དགོངས་སུ་
གསོལ། །ཛཿཧཱུཾ་བཾ་ཧོཿ། ཨོཾ་ཨེ་ཧྱེ་ཧི་མ་ཧཱ་ཀ་རུ་ཎི་ཀ་ས་མ་ཡ་སྟྭཾ། སྣ་ཚོགས་གར་ལས་བྱུང་བ་ཡི། །རྡོ་རྗེ་ཐལ་མོ་སྤྱི་བོར་སྦྱར། །ཨོཾ་རྡོ་རྗེ་རྒྱལ་པོ་ཡོན་ཏན་མཆོག །བྱང་ཆུབ་མཆོག་སྟོན་འདྲེན་མཛད་ཅིང་། །ཉོན་མོངས་མཚོ་སྐེམས་སྒྲོན་མས་བརྒྱན། །ཐུགས་རྗེ་ཅན་ལ་སྐྱབས་
སུ་མཆི། །ཕྱོགས་བཅུ་ཀུན་ན་བཞུགས་པ་ཡི། །རྫོགས་སངས་ཐུབ་པ་སྲས་ཚོགས་བཅས། །ཐུགས་རྗེ་ཆེན་པོ་མངའ་རྣམས་ལ། །གུས་པར་ཕྱག་འཚལ་སྐྱབས་སུ་མཆི། །ཨོཾ་ཨ་ཏི་བྷུ་ཧཱུཾ། ཨོཾ་ཧྲིཿཧྲིཿཏྲཾ་ཧཱུཾ། མཚོན་ཆ་དྲུག་གི་ཚུལ་འདྲ་ཡི། །ཐལ་མོ་ཁ་ཡི་གནས་སུ་གཏུག །
ཨོཾ་ན་མཿསརྦ་ཏྲོ་ཏ་ཧཱུཾ། ཨོཾ་ཧྲིཿཧྲིཿཏྲཾ་ཧོ། །མཆོད་པ་སོ་སོའི་རྗེས་མཐུན་པར། །ལྷ་མོ་གར་བཅས་ཕྱག་རྒྱ་བཅིང་། །ཨོཾ་སྟོང་གསུམ་མི་མཇེད་གནས་འདི་དང་། །གཞན་ཡང་ཕྱོགས་བཅུའི་འཇིག་རྟེན་གྱི། །ལས་ཀྱི་ལོངས་སྤྱོད་མངོན་རྒྱུད་དང་། །སངས་རྒྱས་ཡོན་ཏན་སྣང་བ་ཡི། །
མཆོད་རྫས་བཟང་པོ་ཁྱད་པར་ཅན། །དངོས་སུ་སྦྱར་ཚོགས་སེམས་ཀྱིས་སྤྲུལ། །མེ་ཏོག་གཟུགས་མཛེས་ཁ་དོག་དང་། །དབྱིབས་རྣམས་སྣ་ཚོགས་མཐའ་ཡས་མཆོག །བདུག་སྤོས་དྲི་མཆོག་ཁྱད་པར་ཅན། །སོ་སོའི་རྒྱུ་ལས་བྱུང་བའི་དྲི། །མར་མེ་རིན་ཆེན་ཤིང་
གི་འོད། །མུན་པའི་ཚོགས་འཇོམས་གསལ་བྱེད་རྒྱུན། །དྲི་མཆོག་བཟང་པོས་སྦྱར་བ་ཆུ། །རྣམ་རྟོག་དྲི་མ་དག་བྱེད་རྒྱུན། །བཟའ་བཏུང་སྣ་ཚོགས་རྒྱུ་ལས་བྱུང་། །ཚིམ་བྱེད་རོ་མཆོག་བརྒྱ་ལྡན་རྫས། །ཡན་ལག་བརྒྱད་ལྡན་ཁྲུས་ཀྱི་ཆུ། །མཆོད་ཡོན་ཚུལ་དུ་དགའ་

བདེའི་མཆོག །དཀྱིལ་འཁོར་ཀུན་ལ་ལེགས་འབུལ་ན། །མགོན་པོ་ཐུགས་རྗེ་ཅན་གྱིས་བཞེས། །ཨོཾ་བཛྲ་པུཥྤེ་ཨོཾ། །ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་ཨཱ་ལོ་ཀེ་ཧྲཱིཿ། ཨོཾ་བཛྲ་གནྡྷེ་ཧོཿ། ཨོཾ་བཛྲ་ན་ཝི་ཏྱེ་ཏྲེཾ། ཨོཾ་བཛྲ་ཨཱ་ཧ་ར་ཧི། སྨན་དང་འབྲུ་ཡི་རྣམ་
པ་དང་། །བླ་རེ་ན་བཟའ་རྒྱལ་མཚན་གདུགས། །བ་དན་ཕྲེང་བ་སྣ་ཚོགས་དང་། །དོ་ཤལ་དཔུང་རྒྱན་སོར་གདུབ་སྤྲས། །དམ་པ་རྣམས་ཀྱི་ལོངས་སྤྱོད་རྐྱེན། །བསོད་ནམས་མཐུ་ལས་བྱུང་བ་ཡི། །ཡོན་ཏན་ཐམས་ཅད་འབྱུང་བའི་གནས། །ནོར་བུ་རིན་ཆེན་འཁོར་ལོའི་མཆོག །
བློན་པོ་དམག་དཔོན་བཙུན་མོ་བཟང་། །རྟ་མཆོག་གླང་པོ་རིན་ཆེན་མཆོག །རྣམ་སྤྲས་ཉེ་བའི་རིན་ཆེན་བདུན། །བཀྲ་ཤིས་རྫས་མཆོག་བཅུ་དྲུག་མཆོག །བུམ་པ་བཟང་པོ་རྒྱན་ལ་སོགས། །པ་ཊའི་ཕྲེང་བ་མཛེས་སོགས་རྣམས། །དཀྱིལ་འཁོར་ཀུན་ལ་ལེགས་འབུལ་ན། །མགོན་པོ་
ཐུགས་རྗེ་ཅན་གྱིས་བཞེས། །ཨོཾ་ན་མཿསརྦ་ཏ་ཐཱ་ག་ཏེ་བྷྱོ། །ཨ་ལཾ་ཀ་ར་ཡ་ན་པེ་ནུ་ཧཱུཾ་སྭཱ་ཧཱ། བོ་དྷེ་དྷཾ་ཤ་རཏྣ་མེ་གྷ་ར་ན་ཧཱུཾ། ཨོཾ་སྣ་ཚོགས་གཟུགས་མཛེས་སྒྲ་སྙན་ཞིང་། །དྲི་ཞིམ་རོ་མཆོག་བརྒྱ་ལྡན་པ། །རེག་བྱའི་བདེ་བ་སྤྲིན་ཕུང་བཞིན། །ནམ་མཁའ་གང་བར་བྱུང་བ་དང་། །གང་གཞན་
འགྲོ་བ་དྲུག་པོ་དག །ལྷ་ཚོགས་ལྷ་མོར་བཅས་འགྱུར་བས། །རྒྱན་རྣམས་ཀུན་གྱིས་ལེགས་མཛེས་པར། །གླུ་དབྱངས་ཚིགས་སུ་བཅད་པ་དང་། །ཁྲོ་ཚོགས་གར་གྱིས་བསྐྱོད་བྱས་པའི། །སྟོང་གསུམ་རྡུལ་སྙེད་སྤྲུལ་བྱས་རྣམས། །དཀྱིལ་འཁོར་ཀུན་ལ་ལེགས་འབུལ་ན། །མགོན་
པོ་ཐུགས་རྗེ་ཅན་གྱིས་བཞེས། །ཨོཾ་ན་མཿསརྦ་ཏ་ཐཱ་ག་ཏེ་བྷྱོ། །བི་ཤྭཱ་མུ་ཁེ་བྷྱིཿསརྦ་ཏ་ད་ཁཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ཨོཾ་རིགས་ལྔའི་དམ་ཚིག་རྫས་ཆེན་པོ། །ཡེ་ཤེས་ལྔ་རྫོགས་གྲུབ་པའི་དབྱིངས། །རྒྱུད་ལྔའི་སེམས་ཅན་ཀུན་གྲོལ་ཞིང་། །རྒྱུད་ལྔའི་སེམས་ཅན་བདུད་རྩི་འདི། །
སྙིང་པོ་ཚིམ་བྱེད་བཅུད་ཀྱི་མཆོག །བྱང་ཆུབ་སེམས་སོགས་བདེ་བའི་རྒྱུན། །མ་ལུས་ཀུན་གྱི་རེག་བྱ་ལས། །རོལ་པ་སྣ་ཚོགས་སྣང་བ་དང་། །སྲིད་གསུམ་བརྟན་གཡོའི་དངོས་པོ་དང་། །ཉོན་མོངས་སྒོ་གསུམ་སྤྱོད་ཚོགས་དང་། །ཕུང་པོ་ཁམས་དང་སྐྱེ་མཆེད་ཀྱི། །གཟུགས་

བཟང་མཆོད་སྤྲིན་ཐམས་ཅད་ཀུན། །སྐུ་ལྔ་རིགས་ལྔ་ཡེ་ཤེས་ལྔ། །ལྷ་མོ་སྲས་བཅས་ངོ་བོ་ཉིད། །འཁོར་འདས་སྣང་བའི་དཀྱིལ་འཁོར་ཀུན། །སྣ་ཚོགས་དངོས་མེད་བྱང་ཆུབ་སེམས། །གཉིས་སུ་མེད་པར་འབུལ་ལགས་ན། །མཉམ་ཉིད་བླང་དོར་མེད་པས་བཞེས། །ཨོཾ་ན་མཿ
སརྦ་པཉྩ་རཱ་ས་ཡ་ན་ཨ་མྲྀ་ཏེ་ཧཱུཾ་ཕཊ། ཨོཾ་བོ་དྷི་ཙིཏྟ་མ་ཧཱ་སུ་ཁ་ཧཱུཾ། །བརྡ་མེད་རྩེ་གཅིག་སེམས་ངེས་པར། །རྡོ་རྗེ་ཐལ་མོ་སྙིང་གར་སྦྱར། །ཧཱུཾ་བདག་དང་མཐའ་ཡས་སེམས་ཅན་གྱི། །མགོན་པོའི་སྤྱན་སྔར་བཤགས་པ་ནི། །ཐོག་མ་མེད་ནས་དུས་འདིའི་བར། །མི་དགེ་ལས་ཀྱི་དབང་
སོང་སྟེ། །ཉོན་མོངས་སྒོ་གསུམ་སྐྱེས་པ་ཡི། །མི་དགེ་བཅུ་དང་མཚམས་མེད་ལྔ། །ལྟ་ལོག་སྒྲོ་སྐུར་ཞེན་ལོག་གིས། །རྣམ་གྲོལ་ལམ་ལས་གོལ་གྱུར་དང་། །ཉོན་མོངས་ཉེ་བའི་ཉོན་མོངས་ཚོགས། །ཤེས་དང་མི་སྤང་གཞན་གཟུང་དང་། །བགྱིད་དང་བགྱིད་དུ་སྩལ་བ་དང་། །གང་
གཞན་རྗེས་སུ་ཡི་རང་བཤགས། །མགོན་པོ་རྣམས་ཀྱི་སྤྱན་ལམ་དུ། །རང་བཞིན་ཁ་ན་མ་ཐོ་སྡིག །མི་འཆབ་རིམ་བཞིན་ངེས་བཤགས་ཤིང་། །ཕྱིས་ཀྱང་མི་བྱེད་སྡོམ་པ་གཟུང་། །བཅས་སྡོམ་སོ་སོར་ཐར་པ་ལས། །རྩ་བ་ཡན་ལག་ཉམས་པ་དང་། །སྐྱབས་འགྲོ་མཁན་སོགས་
སློབ་དཔོན་སྤངས། །དད་པའི་དགེ་འདུན་དབྱེན་སོགས་དང་། །ལོག་ཚོ་ཉེས་བྱས་ཕྲ་ལ་སོགས། །ཚུལ་ཁྲིམས་ཞིག་འགྱུར་ལས་རྣམས་བཤགས། །ཧཱུཾ་བྱང་ཆུབ་སེམས་སོགས་མ་སྐྱེས་ཤིང་། །སྡོམ་པ་རྣམ་པར་སྤངས་པ་དང་། །ཕ་རོལ་ཕྱིན་གཞུང་ཉམས་པ་ཡི། །ལོག་པའི་
ལམ་ལ་ཞུགས་པ་དང་། །ཚངས་པའི་གནས་ནས་བསྡུ་བ་བཞི། །ལམ་སོགས་སུམ་ཅུ་རྩ་བདུན་དང་། །མ་འདྲེས་འབྲས་བུ་མཛད་པར་བཅས། །སྨོད་སྤངས་སྡིག་རྣམས་དུས་འདིར་བཤགས། །ཧཱུཾ་གསང་ལྡན་རྡོ་རྗེ་ཆེ་གེ་མོས། །རྡོ་རྗེ་སློབ་དཔོན་སྨོད་འགལ་ཞིང་། །ལྷ་སྤངས་མཆེད་
ལ་འཁུས་པ་དང་། །སྔགས་དང་ཕྱག་རྒྱ་སྤངས་པ་དང་། །སྣོད་མིན་གསང་བ་བསྒྲགས་ལ་སོགས། །གཉིས་གསུམ་ཉི་ཤུ་རྩ་བརྒྱད་ཚོགས། །ཡན་ལག་ཆ་ཤས་ཉམས་ལས་འདས། །འགྱོད་སེམས་ངེས་པར་བཤགས་པར་བགྱི། །ཨོཾ་ན་མཿཀཱ་ཡ་ཝཱཀ་ཙིཏྟ་སརྦ་པཱ་པཾ་ཤུདྡྷ་ཤུདྡྷ་ཧཱུཾ་

སྭཱ་ཧཱ། འདས་དང་ད་ལྟར་མ་བྱོན་ཚོགས། །རྒྱལ་བ་སྲས་དང་བཅས་རྣམས་ཀྱི། །དད་བརྩོན་ཤེས་རབ་ཆེ་བསྐྱེད་ཅིང་། །རྒྱུ་འབྲས་ཚོགས་གཉིས་བསགས་བྱས་ནས། །མཛད་པ་བཅུ་གཉིས་ལ་སོགས་དང་། །ཁྱད་པར་གསང་སྔགས་མཛད་པ་ཡིས། །འགྲོ་རྣམས་
ལམ་གཉིས་མཛད་ཐོབ་ལ། །བདག་གི་རྗེས་སུ་ཡི་རང་ངོ་། །ལམ་གཞན་འཕགས་པ་རང་རྒྱལ་དང་། །ཉན་ཐོས་སོ་སོ་སྐྱེ་བོ་ཡི། །དགེ་བསམ་སྒོམ་སོགས་གང་སྤྱད་ལ། །ཕྲག་དོག་མེད་པར་རྗེས་ཡི་རང་། །ཕྱོགས་རྣམས་ཀུན་ན་བཞུགས་པ་ཡི། །མགོན་པོ་ཐུགས་རྗེའི་དབང་གིས་
ནི། །འགྲོ་བའི་མོས་པ་བཞིན་སྟོན་ཅིང་། །སྔོན་གྱི་སྨོན་ལམ་ཇི་ལྟ་བར། །དམ་ཆོས་བཙུན་པར་མཛད་པའི་ཆེད། །བསྐུལ་བའི་ས་ལ་བཞུགས་པ་དང་། །ཇི་ལྟར་ཚངས་པའི་རྒྱལ་ཚོགས་ཀྱིས། །ཆོས་འཁོར་འགྲོ་བའི་དོན་བསྐོར་ཕྱིར། །གསེར་གྱི་འཁོར་ལོ་སྟོང་ལྡན་ཕུལ། །འཇིག་རྟེན་
མགོན་ལ་བདག་གསོལ་འདེབས། །རྒྱལ་བ་བདེ་གཤེགས་བཅོམ་ལྡན་འདས། །ཐོག་མ་འདི་ནས་ཐ་མའི་བར། །མཛད་པ་རྣམ་གསུམ་མཐར་ཕྱིན་ནས། །སྐུ་ལྔ་ཡེ་ཤེས་ཆེན་པོར་ནི། །མྱུར་དུ་སྤྲུལ་པ་བསྡུ་བཞེད་རྣམས། །འགྲོ་རྣམས་ཀུན་གྱི་དོན་སླད་དུ། །བསྐལ་པ་ཇི་སྲིད་གནས་
ཀྱི་བར། །གཟུགས་མང་སྤྲུལ་སྐུའི་ཚུལ་བཞུགས་ཤིང་། །མཚན་དཔེ་ཆོ་འཕྲུལ་མི་འཇིགས་སྟོབས། །བཀྲ་ཤིས་ཚོགས་ཀྱིས་རྒྱས་མཛད་ཅིང་། །རྟག་ཏུ་ཉི་ཟླ་སྒྲིབ་གསལ་ལྟར། །སྙོམས་མཛད་འགྲོ་བའི་མུན་སེལ་མཛོད། །ཇི་ལྟ་ཇི་ལྟར་འདུལ་འགྱུར་བ། །དེ་ལྟ་དེ་ལྟར་འགྲོ་བ་
རྣམས། །སྡུག་བསྔལ་རྒྱུ་དང་དེ་ཉིད་ལས། །བསྒྲལ་ཞིང་ཐར་བར་བྱས་ནས་ནི། །བདེ་ཚོགས་ལྡན་པར་བྱ་བ་དང་། །བླ་མེད་འབྲས་བུ་བསྐྱེད་བྱའི་ཕྱིར། །དང་པོ་ཐབས་ཀྱིས་བདག་བསྒྲལ་ནས། །སྨོན་ལམ་རྫུ་འཕྲུལ་དཔག་མེད་དང་། །ཞི་གནས་ལྷག་མཐོང་མངོན་ཤེས་སོགས། །ཐོགས་
པ་མེད་པར་འབྱུང་བ་ཡིས། །མྱུར་དུ་མཐུ་སྟོབས་བརྟས་གྱུར་ནས། །གཡེལ་མེད་འགྲོ་དོན་བརྩོན་བྱེད་ཅིང་། །ཐམས་ཅད་དབུགས་དབྱུང་བྱས་ནས་ནི། །རྡོ་རྗེ་འཛིན་པའི་གནས་བཀོད་པའོ། །ཕྱོགས་བཅུ་དག་ན་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་དང་། །བླ་མ་རྡོ་རྗེ་

ལྕམ་དྲལ་དང་། །དཀྱིལ་འཁོར་ཚོགས་རྣམས་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །སྐྱེ་བ་འདི་དང་གཞན་དག་ཏུ། །དགེ་རྩ་སྤྱི་དང་ཁྱད་པར་དོན། །སྔོན་བགྱིས་བགྱིད་ལ་རྗེས་ཡི་རང་། །ཇི་ལྟར་སྔོན་གྱི་དེ་བཞིན་གཤེགས། །རྒྱལ་བ་སྲས་བཅས་ཚོགས་གྱུར་པས། །
བླ་ན་མེད་པའི་བྱང་ཆུབ་ཏུ། །ཐུགས་མཆོག་རིན་ཆེན་བསྐྱེད་པ་ལྟར། །བླ་མེད་ཡང་དག་རྫོགས་པ་ཡི། །བྱང་ཆུབ་ཆེན་པོར་སེམས་བསྐྱེད་དེ། །རྒྱལ་བ་རྣམས་ཀྱི་རྗེས་སུ་སློབ། །མདོར་ན་འགྲོ་བ་མ་ལུས་པ། །སྐུ་གསུམ་འབྲས་བུ་ཐོབ་བྱའི་ཕྱིར། །དཀྱིལ་འཁོར་དྲུག་གི་སྤྲུལ་པ་ཡིས། །རྣམ་
པར་རོལ་པའི་དོན་གནས་བྱ། །དེ་ལས་བྱུང་བའི་འབྲས་བཟང་མཆོག །ཀུན་མཁྱེན་གནས་མཆོག་སྙོམས་མཛད་པ། །དངོས་རྣམས་གང་ལའང་ཆགས་མེད་དེ། །བྱང་ཆུབ་སེམས་དཔའི་ལས་ཆེན་པོས། །འགྲོ་བ་ཐམས་ཅད་བཅོམ་ལྡན་འདས། །རྡོ་རྗེ་འཛིན་པའི་གནས་ཐོབ་ཤོག །སྣ་
ཚོགས་སྣང་གྲགས་རྣམ་གྲོལ་བ། །དབྱིངས་ན་ཆོ་འཕྲུལ་དགག་མེད་ཀྱང་། །དེ་ཡི་ཆོ་འཕྲུལ་དེ་ཉིད་པས། །ནམ་མཁའི་མཐའ་ལྟར་སྔོ་དང་བྲལ། །འཁོར་གསུམ་ཡོངས་སུ་དག་པར་ནི། །མཉམ་ཉིད་བདེ་བ་ཆེན་པོའི་ངང་། །ཐམས་ཅད་འདུ་འབྲལ་མེད་པ་ཡི། །དོན་ཉིད་ངོ་བོ་ལྷུན་གྲུབ་
ཤོག །རྡོ་རྗེ་ཁུ་ཚུར་གཉིས་གཞིབས་ཏེ། །མཐེབ་ཆེན་བསྒྲེངས་ནས་གཡོབ་པར་བྱ། །ཨོཾ་བཛྲ་གཙྪ་མུཿ། རྡོ་རྗེ་ཐལ་མོས་ལན་གསུམ་དུ། །མི་དྲག་སྨད་གཉིས་བརྡབ་པར་བྱ། །ཨོཾ་བཛྲ་ཏུ་ཥྱ་ཧོཿ། མ་ལུས་འགྲོ་བ་ཐམས་ཅད་ལ། །མཉམ་སྙོམས་ཉིད་དུ་དམིགས་ནས་ཀྱང་། །བྱམས་པའི་
སེམས་ནི་ཉེར་གནས་པས། །སྡུག་བསྔལ་གསུམ་དང་བརྒྱད་དག་གིས། །གདུངས་པའི་ཉམ་ཐག་གང་ཡིན་པ། །དེ་དག་སྡུག་བསྔལ་མེད་འདོད་ཕྱིར། །སེམས་ཅན་གྲངས་མེད་སྐུར་སྤྲུལ་ནས། །འོད་ཟེར་མཐུ་དང་རྫུ་འཕྲུལ་ཚོགས། །དཔག་མེད་སྤྲུལ་པས་དོན་མཐུན་ཚུལ། །བྱམས་
པ་ཆེན་པོས་ཁྱབ་པར་བྱ། །རྣམ་གསུམ་སྙིང་རྗེ་ཆེན་པོ་ཡིས། །དེ་དག་བདེ་བ་ཐོབ་བྱས་ཏེ། །འདོད་པའི་ཡོན་ཏན་ལྔ་སོགས་ཀྱི། །བདེ་བ་དག་ལ་སྤྲུལ་བྱ་སྟེ། །ཡིད་བཞིན་ནོར་བུ་རིན་ཆེན་ལྟར། །སེམས་ཅན་གྲངས་མེད་སྐུར་སྤྲུལ་ནས། །འོད་ཟེར་མཐུ་དང་རྫུ་འཕྲུལ་ཚོགས། །འཕངས་མེད་

སེམས་ཅན་ཀུན་ལ་གཏང་། །དོན་ལྡན་དགའ་བ་ཆེན་པོའི་བློས། །རེག་པས་འགྲོ་བའི་བག་ཆགས་ཀུན། །རིམ་གྱིས་བྱང་སེམས་ལམ་རྣམ་བདུན། །མྱུར་བར་བྱང་ཆུབ་རྫོགས་མཐར་ཕྱིན། །སྐུ་དང་ཡེ་ཤེས་ཕུན་སུམ་ཚོགས། །བཀོད་པའི་ཡོན་ཏན་དཔག་མེད་
སྣང་། །གཞིར་གྱུར་བཏང་སྙོམས་ཆེན་པོའི་བློས། །ངན་པའི་མཚན་རྟགས་རྣམ་བྲལ་ནས། །གསལ་སེམས་སྙོམས་གནས་བྲལ་བ་མེད། །རང་བཞིན་བྱང་སེམས་མཉམ་པའི་དབྱིངས། །མི་རྟོག་ཏིང་འཛིན་ཆེན་པོ་ཡིས། །མཐའ་ལས་གྲོལ་བའི་སེམས་ཉིད་བསྐྱེད། །འདི་ནི་ཚངས་པའི་
གནས་བཞི་ལས། །མཆོག་ཏུ་གྱུར་པའི་ཚད་མེད་བཞི། །སྙིང་པོ་སྔགས་ཀྱིས་སྤྲོ་བྱས་ལ། །རིག་བཅས་འོད་ཟེར་ཁྱབ་པར་གནས། །ཕྱོགས་གཞན་རྟོག་པ་སྣ་ཚོགས་ཀྱིས། །རྐང་དང་སྲེག་མནན་ཆོ་ག་དང་། །གསར་བུ་ཤིས་བར་བྱས་པའི་ལས། །ལས་ཀྱི་ཆོ་ག་གཞན་བསྟན་པའོ། །
རྡོ་རྗེ་སེམས་དཔའི་སྦྱོར་བ་ཡིས། །དགའ་བའི་རྡོ་རྗེ་ལས་བྱུང་བའི། །དཔུང་མགོར་སེ་གོལ་བརྡབ་བྱས་ནས། །རྡོ་རྗེ་བཅིང་ཀྱོའི་སེ་གོལ་སྒྲས། །འཇིག་རྟེན་ཁམས་ནི་མ་ལུས་པ། །སངས་རྒྱས་རྡོ་རྗེ་འཛིན་བཅས་ཀུན། །དམ་ཚིག་མཆོག་གི་གསང་སྔགས་ཀྱིས། །ཏིལ་གྱི་གོང་བུ་བཞིན་དུ་
རྒྱས། །ཤིན་ཏུ་གདུག་ཅིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་རྣལ་འབྱོར་པས། །ཁྲོ་བོར་དེ་བཞིན་གཤེགས་ཀུན་མཛད། །ཁྲོ་བོའི་ཚུལ་ཅན་ཁྲོས་པས་ཀྱང་། །འཇིག་རྟེན་གསུམ་དག་སྲེག་བྱེད་ན། །སངས་རྒྱས་ཐམས་ཅད་ཁྲོས་པ་ཡིས། །ཁམས་
གསུམ་མ་ལུས་སྨོས་ཅི་དགོས། །དེ་ནས་སྣ་རྩེའི་རྩ་མོ་ལ། །ཡིད་ནི་བརྟན་པར་ཡང་དག་ཟུང་། །སྣ་ཡི་དབུགས་རིངས་དྲོ་བ་ལས། །རྒྱལ་བས་ཕྱག་རྒྱའི་སྦྱོར་བ་འབྱུང་། །བཅོམ་ལྡན་དེ་ཉིད་རྣལ་འབྱོར་པས། །རྡོ་རྗེ་ཁྲོ་བོར་བསྒྱུར་ནས་ཕྱུང་། །དཔལ་ཆེན་རྡོ་རྗེ་ཧེ་རུ་ཀ །འབར་བས་ཐལ་བ་
རབ་ཏུ་འཇུག། །སེམས་དཔའ་སྔོན་མོ་འབར་བའི་ངང་། །འོད་ཀྱི་དཀྱིལ་འཁོར་དམར་པོ་འབར། །དུར་ཁྲོད་ཀྱི་ནི་མེ་དང་འདྲ། །འབར་བ་ཆེན་པོ་སྐྲ་འབར་བ། །ཐོད་པ་མང་པོའི་དབུ་རྒྱན་ཅན། །འཇིགས་པ་ཆེན་པོའི་དུས་ལྟར་དྲག །དུར་ཁྲོད་བཞིན་དུ་རབ་ཏུ་འཇིགས། །ཁྲོ་ལ་སོགས་

པའི་ཚུལ་ལྡན་པ། །ཞལ་རྣམས་སྣ་ཚོགས་འགྱུར་བ་དང་། །སྨིན་མ་ཁྲོ་གཉེར་བཅས་པར་བསྒྱུར། །འབར་བའི་ལྟ་བས་གར་བྱས་པས། །གུ་ལང་དབང་ཆེན་དེ་དབང་བཅས། །ཉི་ཟླ་གཤིན་རྗེའི་ཚངས་པར་བཅས། །གནས་བཅས་དག་ནི་འབར་བཅས་ནས། །ཐལ་བ་བཞིན་དུ་རབ་
ཏུ་བཤིག །རྡོ་རྗེ་རྡོ་རྗེ་ཁ་ཊྭཱཾ་ག །དྲིལ་བུའི་སྒྲ་ནི་གསིལ་བ་ཡིས། །ཐམས་ཅད་ཕབ་ནས་སླར་ཡང་ནི། །ཐལ་བར་གྱུར་པའང་འཚོ་བར་བྱེད། །གཡས་གཉིས་ལྕགས་ཀྱུ་རལ་གྲི་སྟེ། །གཡོན་གཉིས་ཞགས་པ་ཐོད་པ་ཐོགས། །འོག་མ་གཉིས་ཀྱིས་མདའ་དང་གཞུ། །བརྐྱང་བསྐུམ་ཉི་
མའི་གདན་ལ་གནས། །དེ་ཡི་འབར་བའི་ཉི་མ་ལས། །བྱུང་བའི་གྲིབ་མ་མི་ཟད་པ། །བསྐྱེད་ནས་མ་ལུས་བདུད་ལ་སོགས། །གདུག་པ་རྣམས་ཀྱི་ཁྲག་ཟ་ནུས། །རང་སྔགས་འོད་ཟེར་གཡོ་བའི་མཐུས། །ཤིན་ཏུ་བགེགས་མེད་ས་མཐོང་ནས། །རྡོ་རྗེ་ས་གཞི་ར་སོགས་བསྒོམ། །འཁོར་
ལོ་མེ་འོད་མཚོན་ཆར་བཅས། །འདོད་པའི་རྒྱལ་པོ་དྲེགས་ཆེན་པོས། །སུམྦྷ་ནི་ཡི་སྔགས་བརྗོད་ཅིང་། །བརྗིད་གནོན་ཁྲོ་བ་ཆེན་པོའི་ཚུལ། །ཕྱོགས་བཅུའི་བགེགས་རྣམས་བཀུག་མཛད་ནས། །ཕོ་མོར་བསྣོལ་ཏེ་ཉི་མར་བཀོད། །སོ་སོའི་ཚོགས་བཅས་མྱོས་པར་མཛད། །ཨོཾ་སུམྦྷ་ནི་
སུམྦྷ་ཧཱུཾ། གྲྀ་ཧྞ་གྲྀ་ཧྞ་ཧཱུཾ། གྲྀ་ཧྞཱ་པ་ཡ་གྲྀ་ཧྞཱ་པ་ཡ། ཨཱ་ན་ཡ་ཧོཿ བྷ་ག་བཱན། བིདྱ་རཱ་ཛ་ཧཱུཾ་ཕཊ། ཨིནྡྲ་ཡེ་ཛཿ། ཡཱ་མ་ཡ་ཛཿབ་རུ་ཎ་ཡེ་ཛཿ། ཀུ་བེ་ར་ཡེ་ཛཿ། ཨགྣེ་ཡེ་ཛཿ། ནཻ་ཪྼྀ་ཏི་ཡེ་ཛཿ། བ་ཡ་བེ་ཡེ་ཛཿ། ཨི་ཤྭ་ན་ཡེ་ཛཿ། ཙནྡྲ་ཡེ་ཛཿ། སཱུརྱ་ན་ཡེ་ཛཿ། སུ་རི་ཏ་ཡེ་ཛཿ། ཨ་དྷི་པ་ཏ་ན་ཡེ་ཛཿ། ཡེ་ཤེས་ཆེ་
ལས་སྤྲུལ་པའི་སྐུ། །ཞལ་གསུམ་ཕྱག་དྲུག་འཇིགས་པའི་གཟུགས། །གཡས་དཀར་གཡོན་དམར་མཐིང་ནག་སྐུ། །རྡོ་རྗེ་ཐོད་ཁྲག་རལ་གྲི་ཞགས། །ཐོ་བ་ལྕགས་ཀྱུ་གཡས་དང་གཡོན། །དུར་ཁྲོད་འཇིགས་པའི་ཆ་ལུགས་བརྒྱན། །ཨོཾ་བཛྲ་ཀྲོ་དྷ་བི་ཛཱ་ཡ་ཧཱུཾ། ཧ་ན་ཧ་ན་ཧཱུཾ་ཕཊ། ཨོཾ་
བཛྲ་ཀྲོ་དྷ་ཡ་མཱནྟ་ཀ་ཧཱུཾ་ཏིཥྛ་ཏིཥྛ་ཧཱུཾ་ཕཊ། ཨོཾ་བཛྲ་ཀྲོ་དྷ་ཧ་ཡ་གྲྀ་ཝ་ཧཱུཾ། ཧུ་ལུ་ཧུ་ལུ་ཧཱུཾ་ཕཊ། ཨོཾ་བཛྲ་ཀྲོདྷ་ཨ་མྲྀ་ཏ་ཀུནྜ་ལི་ཧཱུཾ་ཙྪིནྡ་ཙྪིནྡ་ཧཱུཾ་ཕཊ། །ཨོཾ་བཛྲ་ཀྲོ་དྷ་ནཱི་ལ་དཎྜ་ཧཱུཾ་ད་ཧ་ད་ཧ་ཧཱུཾ་ཕཊ། ཨོཾ་བཛྲ་ཀྲོ་དྷ་ཨཱརྱ་ཨཱ་ཙ་ལ་ཧཱུཾ། བནྡྷ་བནྡྷ་ཧཱུཾ་ཕཊ། ཨོཾ་བཛྲ་ཀྲོ་དྷ་ཨ་བ་ར་ཛི་ཏེ་ཧཱུཾ། ཏིཥྛ་ཏིཥྛ་ཧཱུཾ་ཕཊ། ཨོཾ་

བཛྲ་ཀྲོ་དྷ་ཏྲཻ་ལོཀྱ་བི་ཛ་ཡ་ཧཱུཾ་བིནྡ་བིནྡ་ཧཱུཾ་ཕཊ། ཨོཾ་བཛྲ་ཀྲོ་དྷ་ཧཱུཾ་ཀ་ར་ཧཱུཾ་གརྫ་གརྫ་ཧཱུཾ་ཕཊ། ཨོཾ་བཛྲ་ཀྲོ་དྷ་མ་ཧཱ་པ་ལ་ཧཱུཾ་སྥོ་ཊ་སྥོ་ཊ་ཧཱུཾ་ཕཊ། རྡོ་རྗེ་བདུད་རྩི་རྣམ་འཕྲུལ་བས། །རྡོ་རྗེ་ཐོ་བ་ཕྱག་བསྣམས་ཤིང་། །ཕྱོགས་མཚམས་སྟེང་འོག་བཏབ་ནས་ནི། །རང་གི་གནས་སུ་ངེས་པར་འདེབས། །ཨོཾ་བཛྲ་གྷ་
གྷ་གྷཱ་ཏ་ཡ་གྷཱ་ཏ་ཡ་སརྦ་དུཥྚཱན་ཕཊ། བཛྲ་དྷ་རོ་ཨཱ་ཛྙཱ་བ་ཡ་ཏི། ཀཱ་ཡ་བཱཀ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། ཨོཾ་ཕྱོགས་བཅུ་ཁྲོ་བོའི་དཀྱིལ་འཁོར་རྣམས། །འཇིགས་པའི་མཚོན་ཆ་མེ་འོད་འཕྲོ། །རིགས་མཐུན་ཁྲོ་བོའི་འཁོར་ཚོགས་དང་། །དབང་བསྐུར་རིགས་ཀྱི་སྐུས་བརྒྱན་པའོ། །སངས་རྒྱས་
ཀུན་གྱི་དམ་ཚིག་དཔལ། །རྡོ་རྗེ་སེམས་དཔའ་སྣང་བ་བདེ། །དེ་བཞིན་གཤེགས་པའི་ལྷ་རྫས་མཆོག །རིན་ཆེན་རྒྱན་ལ་སོགས་པས་བརྒྱན། །དྲིལ་བུ་རྒྱལ་མཚན་མཆོག་ལྡན་པའི། །བླ་རེ་དམ་པ་བྲེས་པས་ན། །རྡོ་རྗེ་ཚིག་དང་མཆོད་ལ་སོགས། །གླུ་དང་སིལ་སྙན་རྣམ་པར་འཕྲུལ། །མེ་ཏོག་
བདུག་པའི་སྦྱོར་བ་དང་། །མར་མེ་དྲི་ལ་སོགས་པར་ལྡན། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་མཆོག་སྒྲུབ། །མེ་ཏོག་དཀར་དང་དམར་བ་དང་། །མཐིང་ག་སེར་པོ་ཀུན་བསྡུས་པ། །མེ་ཏོག་ཕྱག་རྒྱ་མཆོག་འདི་ནི། །འདོད་པའི་ཡོན་ཏན་ལྔ་ལས་འཕྲོ། །
རྒྱ་སྐྱེགས་མཐིང་ག་ལྗང་གུའི་མཆོག །ཚོན་སྣ་བཞི་ཡིས་བཙོས་པ་དང་། །དཀར་པོ་ལྔ་ཡི་ཕྱག་རྒྱ་དག །སྔ་མ་བཞིན་དུ་མཉམ་པར་འགྱུར། །ཁམས་ལས་བྱུང་བ་ཐམས་ཅད་དང་། །སྲོག་དང་རྩ་བ་དེ་བཞིན་ཏེ། །རྣམ་པར་མཛེས་ཤིང་དྲི་ཞིམ་པ། །སྔ་མ་བཞིན་དུ་མཉམ་པ་འགྲུབ། །
ཙནྡན་གཉིས་དང་གླ་རྩི་དང་། །ག་པུར་ན་ཀ་ལ་ལ་གྱི། །བདུག་པ་བུ་རམ་དང་སྦྱར་བ། །ལས་རྣམས་ཐམས་ཅད་རབ་སྒྲུབ་པའོ། །གནྡྷ་དྲི་དང་གུ་གུལ་དག །སརྫ་ག་པུར་གླ་རྩི་དང་། །རྫས་འདི་དག་ལ་བཙོས་པའི་མར། །མེ་མར་བྱས་ན་སྣང་བ་སྐྱེད། །ཙནྡན་གུམ་ཀུམ་པྲི་ཀ་དང་། །
ག་བུར་དང་ནི་གླ་རྩི་དག །བཙོས་པའི་བདུག་པ་བསྒྲུབ་པ་སྟེ། །སྤོས་ཀྱི་ཕྱག་རྒྱས་སྤོས་མཆོག་འགྱུར། །ཀཀྐོ་ལ་དང་སུག་སྨེལ་དང་། །གླ་སྒང་ག་བུར་གླ་རྩི་དང་། །འདི་དག་ཞིབ་ཏུ་བཏགས་པ་ནི། །སེང་ལྡེང་བུ་རམ་དག་དང་སྦྱར། །ཤིང་ཚ་པ་ཏྲ་ལོ་འདྲ་དང་། །ན་ལེ་ཤམ་དང་ག་

པུར་སྦྱར། །ཧ་ས་ཀ་རི་ཤིང་མངར་གྱིས། །སྦྲུས་པ་ཁ་ཡི་སྤོས་ཡིན་ནོ། །མེ་ཏོག་དམར་པོ་སངས་རྒྱས་ལ། །རྡོ་རྗེ་ཅན་ལ་སྣ་ཚོགས་པ། །འཇིག་རྟེན་དབང་ལ་ཁ་དོག་དཀར། །སེར་པོ་མཁའ་ལས་བྱུང་བ་ལ། །ཙནྡན་བདུག་པ་སངས་རྒྱས་ལ། །རྡོ་རྗེ་ཅན་ལ་ཏུ་རུཥྐ། །སྤྱན་རས་གཟིགས་ལ་
ཀ་པི་ཏ། །ལྕེ་པོག་རྡོ་རྗེ་ཉི་མ་ལ། །མར་མེའི་ཕྲེང་བ་སངས་རྒྱས་ལ། །རྡོ་རྗེ་ཅན་ལ་མར་མེ་བདུན། །སྤྱན་རས་གཟིགས་ལ་མར་མེ་བརྒྱ། །སྟོང་ནི་རྡོ་རྗེ་ཉི་མ་ལ། །སངས་རྒྱས་རྣམས་ལ་ཙནྡན་སྤོས། །རྡོ་རྗེ་ཅན་ལ་གུར་གུམ་ཡིན། །སྤྱན་རས་གཟིགས་ལ་ཙནྡན་དམར། །ག་པུར་རྡོ་རྗེ་ཉི་མ་
ལ། །མེ་ཏོག་ཀུན་དང་བདུག་པ་ཀུན། །དེ་བཞིན་མར་མེ་ཐམས་ཅད་དང་། །སྤོས་རྣམས་ཐམས་ཅད་ཇི་སྙེད་པ། །རྡོ་རྗེ་རྟ་ལ་དབུལ་དུ་རུང་། །སྒེག་མོ་དང་ནི་ན་ཆུང་དང་། །མོས་དང་དེ་བཞིན་བདུད་རྩི་དང་། །གཅིག་པུ་དཔའ་དང་འདོད་ཆགས་སྲ། །གཡོན་ཅན་བྲན་མོ་དེ་བཞིན་ཏེ། །ལན་ཚྭ་ལ་
སོགས་རོ་ཀུན་དང་། །ཀ་ར་ལ་སོགས་བདུད་རྩི་སྦྱིན། །བདག་ཉིད་ཀུན་གྱི་རོ་འགྲུབ་པ། །ཤ་དང་ཆང་དུ་ལྡན་པ་ཡི། །བཟའ་བ་སྣ་ཚོགས་འགྲུབ་པ་ནི། །དགའ་བའི་ལོངས་སྤྱོད་སྐལ་མཆོག་སྟེ། །ཚེ་ཡི་དམ་ཚིག་རབ་ཏུ་བསྒྲུབ། །ཨ་མྲ་སྨིན་དང་རྒུན་འབྲུམ་དང་། །པ་ན་སེ་དང་ན་ལེ་ཀར། །
ཨ་ཀ་རུ་ལ་སོགས་པ་ཡི། །འབྲས་བུའི་ཕྱག་རྒྱ་ཐམས་ཅད་འགྲུབ། །ཁ་ར་སྦྲང་རྩིས་བྱུགས་པ་ཡི། །ཨ་མྲ་ལ་སོགས་ཚི་གུ་བྱུག །ཧ་ས་ཀ་རི་མར་ལ་སོགས། །མཉམ་པའི་དྲི་ཡིས་བསྐུ་བར་བྱ། །ཡུང་དང་རྒྱ་སྐྱེགས་ལ་སོགས་པའི། །ཚོན་གྱིས་མཐུན་པར་ཁ་བསྒྱུར་ནས། །ཤུན་པ་གྲོ་
ག་ལ་སོགས་བྱས། །མཆོད་པའི་ཚེ་ན་དབུལ་བར་བྱ། །སངས་རྒྱས་རྣམས་ལ་བཤོས་དབུལ་བ། །ཤ་དང་ཆང་ནི་རྣམ་པར་སྤངས། །གླུ་དང་སིལ་སྙན་གྲུབ་པ་དང་། །གདུགས་དང་རྒྱལ་མཚན་བ་དན་དང་། །ཤ་དང་ཆང་དུ་བཅས་པ་ནི། །གཏོར་མའི་མཆོག་སྟེ་ཚོགས་པའོ། །བདག་གི་ཕྱུག་སྟེ་
སྐལ་བཟང་པོ། །རྡོ་རྗེ་ལས་ནི་དཔལ་གྲུབ་པའོ། །བཤོས་དང་གཏོར་མ་དཀར་པོ་དང་། །པདྨ་མེ་ཏོག་ལྡན་པ་ནི། །སྤྱན་རས་གཟིགས་དབང་གཙོ་བོ་ལ། །ཕུལ་ན་དགོས་པ་ཐམས་ཅད་འགྲུབ། །རྒྱལ་པོ་ཁ་ཟས་ལ་སོགས་པ། །ཤ་དང་ཆང་དུ་ལྡན་པ་དང་། །གླུ་དང་སིལ་སྙན་སྐལ་བཟང་

དག །རྡོ་རྗེ་ཉི་མའི་འཁོར་ལ་འབུལ། །ཁ་ཟས་ཀུན་གྱི་རོ་ཀུན་དང་། །ཤ་དང་ཤ་ཡི་མཆོག་རྣམས་དང་། །ཤ་ཡི་སྦྱོར་བ་ཤ་སྐམ་དང་། །བཤོས་དག་རྡོ་རྗེ་ལྷ་ལ་དབུལ། །གཞན་ཡང་བཟའ་བཏུང་ལོངས་སྤྱོད་ཚོགས། །གཡོས་ཀྱི་སྟོན་མོ་མང་དུ་བཤམ། །དཀྱིལ་
འཁོར་ཆེན་པོའི་ཕྱོགས་ཀུན་ནས། །སྤོས་ཆེན་སིལ་སྙན་ཕྲེང་ཐོགས་ཤིང་། །གར་དབྱངས་དྲོ་ཐབས་དྲུག་འགྱུར་རྩེ། །གཟིངས་བསྟོད་དགའ་བའི་བཞིན་རྒྱས་སྤྱོད། །ཧཱུཾ་འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། །དམ་ཚིག་བསྐང་བའི་དུས་ལ་བབ། །དངོས་
གྲུབ་སྩལ་བའི་དུས་ལ་བབ། །མཐུ་ཆེན་མཐུ་སྟོབས་བཅོམ་ལྡན་འདས། །བྱིན་ཆེན་བྱིན་རློབས་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་གི་ལས་རྣམས་གང་སྒྲུབ་པ། །འབྲས་བུ་དུས་འདིར་མཆིས་པར་
མཛོད། །ཨ་ལ་ལ་ཧོ་བྷ་ག་བཱན། ས་མ་ཡ་ཧོ། །ས་མ་ཡ་སྟྭཾ། ཨོཾ་ཡེ་ནས་རྣམ་པ་ཀུན་ལྡན་པའི། །གསང་བ་ཆེན་པོའི་དཀྱིལ་འཁོར་འདིར། །གསལ་ལ་བརྟན་པའི་རྣལ་འབྱོར་པས། །གཉིས་མེད་བརྡ་ཡིས་མཚན་པར་བྱོས། །ཨོཾ་སྟོང་གསུམ་སྟོང་གི་འཇིག་རྟེན་ན། །ཕྱོགས་བཞིའི་
དཀྱིལ་འཁོར་དབུས་རྣམས་ཀྱི། །སྐྱེ་འགྲོ་རྡུལ་སྙེད་གནས་པ་ཀུན། །བདེ་གཤེགས་ལྔ་ཡི་དཀྱིལ་འཁོར་དབྱིངས། །ཕྱོགས་དུས་ཀུན་ནས་ཚོགས་པའི་ལྷ། །གཉིས་སུ་མེད་པས་ཕྱག་འཚལ་ལོ། །ཧཱུཾ་ཨོཾ་ཧྲི་ཏྲཾ་ཧཾ། ཨ་ཏི་བྷུ་ཧོ། །པྲ་ཏི་བྷུ་ཧོ། །ཏ་ཐཱ་ག་ཏོ་གུ་རུ་པ་ཏི་ཨ་ལ་ལ་ཧོ། །ལུས་ངག་སྤྱི་དང་
ཁྱད་པར་གྱི། །གསང་སྔགས་བརྡ་ཡི་ཕྱག་རྒྱ་འཛིན། །བྱིན་རླབས་མཚན་མ་གསལ་གྲུབ་ཕྱིར། །ཕྱག་རྒྱའི་མཚན་ཉིད་སྤྱད་པར་བྱ། །ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་དུ། །དམ་ཚིག་རྟགས་ཀྱི་མཚན་མ་ཡི། །དཔལ་གྱི་ཆས་བརྒྱད་རྒྱན་དང་བཅས། །འཁོར་བའི་
རྒྱུ་རྐྱེན་འབྲས་བུ་རྣམས། །ཐུགས་རྗེས་རྩད་ནས་གཅོད་པའི་ཕྱིར། །སྤྱི་དང་ཁྱད་པར་རྟགས་དག་དང་། །དོན་གྱི་སྒོ་ནས་གཞོམ་པར་མཛད། །སེམས་ཉིད་བདེ་བ་ཆེན་པོའི་གནས། །ཕུང་པོ་དུར་ཁྲོད་གཞལ་ཡས་ཁང་། །དགའ་བ་ཆེན་པོའི་གླུ་དང་གར། །དངོས་ཀྱང་མཆོད་པའི་རྫས་སུ་བསྔོ། །

དབང་བསྒྱུར་ཆེན་པོའི་ཏིང་འཛིན་སོགས། །ཐམས་ཅད་ཚུལ་བཞིན་བྱིན་བརླབས་ཏེ། །ཅིར་ཡང་གྱུར་པའི་ཡིག་འབྲུ་ལས། །འབར་བའི་ཁང་པ་རྣམ་པར་བརྗིད། །རང་འོད་ས་བོན་སོ་སོ་ལས། །བཀོད་པའི་རྒྱན་གྱི་དཀྱིལ་འཁོར་ཆེ། །སྐུ་གསུང་ཐུགས་ཀྱི་གསང་ཆེན་པོས། །བསྒྲུབ་རྫས་དེ་དག་
བྱིན་གྱིས་བརླབས། །ཀྲོ་དྷེ་ཤྭ་རི་དག་བྱེད་ཀྱིས། །མཚན་མའི་གནས་ཀུན་སྦྱང་པར་བྱ། །མཚན་ལྡན་པདྨའི་ཕོ་བྲང་དུ། །འཆི་མེད་ལྕགས་ཀྱུ་ཚོགས་པ་དག །དཔའ་བོ་འབྲུ་དགུའི་འཕྲོ་འདུ་ཡིས། །ཐམས་ཅད་བདུད་རྩི་བྱང་ཆུབ་སེམས། །མཆོད་དང་གཏོར་ཚོགས་ཞལ་ཟས་རྣམས། །
ཀུན་བཟང་དཀྱིལ་འཁོར་རྣམ་པར་དག །ཨོཾ་མ་ཧཱ་བཛྲ་ཙཀྲ་མཎྜ་ལ་ཧཱུཾ། ཧཱུཾ་ཨོཾ་ཧི་ཧྲི་ཏྲཾ་ཧཾ། ཨོཾ་ཨཱཿཧཱུཾ། ཨོཾ་མཧཱ་ཀྲོ་དྷེ་ཤྭ་རི་སརྦ་ཏྲབ་ཕྱཾ་ཤྭ་དྷ་ཡ་ཨཱཿཧཱུཾ། ཨོཾ་ཨཱཿཧཱུཾ་སརྦ་པཉྩ་ཨ་མྲྀ་ཏེ་ཧཱུཾ་ཧྲི་ཐ། ཨོཾ་ཏེ་ཛོ་བ་ལིཾ་ཏེ་བྷ་ལ་བྷ་ཏི་གུ་ཧྱ་ས་མ་ཡ་སྭཱ་ཧཱ། སོ་སོའི་ཏིང་འཛིན་ཕྱག་རྒྱ་དང་། །སྔགས་ཀྱིས་གསལ་
བར་བྱས་ནས་ནི། །སྒྲུབ་པའི་དཀྱིལ་འཁོར་གནས་རྣམས་སུ། །དེ་དག་སོ་སོར་དགོད་པར་བྱ། །དཀྱིལ་འཁོར་སྔོན་འགྲོ་རྫོགས་བྱས་ནས། །བསྙེན་སྒྲུབ་ཡན་ལག་རྣམ་བཞི་ཡིས། །ལས་ཀུན་འབྲས་བུའི་གནས་སྦྱོར་བའི། །ཕྱག་རྒྱའི་དཀྱིལ་འཁོར་བསྒྲུབ་པར་བྱ། །དང་པོ་ཆོས་ཀྱི་དབྱིངས་
ཉིད་ལ། །དམིགས་པ་མེད་པའི་དོན་གྱིས་བསྒོམ། །དངོས་པོ་མེད་པར་བདག་སྦྱོར་བས། །ནམ་མཁའ་ཀུན་དང་མཉམ་སྦྱོར་བའོ། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭཱ་བྷཱ་ཝ་ཨཱཏྨ་ཀོ྅ཧཾ། །ཆོས་ཀྱི་དབྱིངས་ཀྱི་ཡེ་ཤེས་ཀྱིས། །ཐམས་ཅད་དུ་ཡང་ཁྱབ་བྱས་ལ། །ཆོས་ཀུན་སྟོང་གསལ་རང་བཞིན་
མེད། །མི་དམིགས་སྙིང་རྗེ་ཆེན་པོའི་ངང་། །ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། རྡོ་རྗེ་སེམས་དཔའི་ཏིང་འཛིན་གྱིས། །མཁའ་དབྱིངས་སྣ་ཚོགས་ལ་གནས་ནས། །ཅིར་ཡང་གྱུར་པའི་ཡིག་འབྲུ་བསམ། །འོད་ཟེར་ཚུལ་དུ་འཕྲོས་ནས་ཀྱང་། །མ་ལུས་ཉེ་བར་ཁྱབ་བྱས་ཏེ། །རེ་ཞིང་དམ་
པའི་ཚུལ་དུ་དགོངས། །ཨེ་འབྱུང་འ་ཁའ་དབྱིངས་གྲུ་གསུམ་དཀར། །གྱེན་བསྒྲེང་བཟང་པོའི་མཁའ་དབྱིངས་ནས། །ཡཾ་འབྱུང་རླུང་གི་དཀྱིལ་འཁོར་དབྱིབས། །དུད་ཁ་སྲ་མཁྲེགས་སྒྲོལ་མའི་མཁའ། །བཾ་ལས་ཆུ་དཀྱིལ་དཀར་ཞིང་ཟླུམ། །བུམ་པས་མཚན་པ་མཱ་མ་ཀཱི། །ལཾ་ལས་

གསེར་གྱི་ས་གཞི་སྟེ། །གྲུ་བཞི་སྤྱན་མ་རྡོ་རྗེས་མཚན། །ཁཾ་ལས་སྣ་ཚོགས་ཅན་གྱི་མཚོ། །ལྕགས་རི་མུ་ཁྱུད་ནོར་བུས་མཚན། །སུཾ་ལས་རི་རབ་བང་རིམ་ལྕོག །རིན་ཆེན་སྣ་ཚོགས་རྒྱུ་ལས་གྲུབ། །རཾ་ལས་མེ་དཀྱིལ་དཀར་སེར་འབར། །ཟུར་མང་གོས་དཀར་ནམ་
མཁའི་དབྱིངས། །སྲ་མཁྲེགས་རྡོ་རྗེའི་གཞི་སྟེངས་ལ། །ཀུན་འབྱུང་འཁོར་ལོ་སྣ་ཚོགས་འབུམ། །དེ་དབུས་བྷྲཱུཾ་ལས་གཞལ་ཡས་ཁང་། །ཡེ་ཤེས་རིན་ཆེན་སྣ་ཚོགས་རྒྱན། །ནང་གི་དཀྱིལ་འཁོར་གནས་རྣམས་སུ། །རེའུ་མིག་འཁོར་ལོ་མཚུངས་པ་བརྒྱད། །རྡོ་རྗེ་ཕྲེང་བའི་ཚོགས་
ཀྱིས་བརྒྱན། །སྣ་ཚོགས་པདྨ་གདན་གྱིས་མཚན། །དཀྱིལ་འཁོར་ཕྱི་རིམ་གནས་བརྒྱད་དུ། །དུར་ཁྲོད་ཤིང་དང་ཞིང་སྐྱོང་དང་། །ཕྱོགས་སྐྱོང་རྣལ་འབྱོར་མཚོ་དང་སྤྲིན། །ཀླུ་རྒྱལ་དེ་དག་གནས་བརྒྱད་དུ། །ཤ་ཟ་འབྱུང་པོ་གཤིན་རྗེ་དང་། །མཁའ་འགྲོ་བྱ་ཁྱི་རོ་ལངས་དང་། །ཅེ་སྤྱང་
ཁྲོས་པའི་སྒྲ་འབྱིན་ཅིང་། །རོ་ཡི་ཚོགས་ལ་ལོངས་སྤྱོད་མཛད། །རང་འབྱུང་མཆོད་རྟེན་དང་བཅས་པ། །ཕྲེང་བ་རིམ་གསུམ་ཕྱི་རོལ་གྱི། །ར་བའི་མཚམས་སུ་གནས་པ་ལས། །ཀུན་འབྱུང་རྒྱན་གྱིས་མཚན་སྤྲས་པའོ། །དེ་དབུས་འཁོར་ལོའི་ལྟེ་བ་ལ། །པད་ཟླ་ཉི་མའི་གདན་སྟེངས་སུ། །
དཔལ་མཆོག་དང་པོ་གནས་མཛད་ནས། །འཕྲུལ་དགའི་ཏིང་འཛིན་མངོན་པར་སྟོན། །ཆོས་རྣམས་ཐམས་ཅད་རྣམ་བརྟགས་ན། །དངོས་མེད་མཚན་མ་ཀུན་དང་བྲལ། །ཟླ་དཀྱིལ་ཨཱ་ལི་བཅུ་དྲུག་བཞི། །ཉི་དཀྱིལ་ཀཱ་ལིས་བརྒྱན་པའི་འོད། །འཕྲོ་འདུ་མཛད་པར་བཅས་པ་ཡིས། །ཉིས་འགྱུར་
མཚན་དང་དཔེ་བྱད་གསལ། །དེ་དག་འོད་དུ་གྱུར་པ་ལ། །འོད་ཕུང་ཁ་དོག་སྣ་ལྔ་ཉིད། །ཧཱུཾ་ལས་རྡོ་རྗེ་རྩེ་ལྔ་པ། །དཀར་པོ་བུམ་པར་ཧཱུཾ་གིས་མཚན། །ཐོག་མ་ཐ་མ་མེད་པའི་དབྱིངས། །དང་པོ་རྡོ་རྗེ་ཆེན་པོ་ཡིན། །བཛྲ་ཨ་ཧཾ། འོད་ཟེར་ལྔ་ཡི་འཕྲོ་འདུ་ཡིས། །དཀྱིལ་འཁོར་དྲུག་གི་ལས་མཛད་
ནས། །སྐུ་གསུང་ཐུགས་དབྱིངས་ཞུགས་པ་ལས། །འོད་ཟེར་ཕྲེང་མཛེས་བརྗིད་པའི་མཆོག །དེ་ལས་སྐུ་མཆོག་ཕྱག་རྒྱ་ཡིས། །སྔགས་ཀྱི་ཡི་གེ་བརྗོད་པར་བྱ། །ཨོཾ་མ་ཧཱ་སུ་ཁ་བཛྲ་སཏྭ་ཨ། ཛཿཧཱུཾ་བཾ་ཧོཿ། སུ་ར་ཏ་སྟྭཾ། དེ་དག་ཡེ་ཤེས་བྱང་ཆུབ་སེམས། །མངོན་བྱང་ལྔ་ཡི་བདག་ཉིད་དོ། །

ཤེལ་མདོག་དཀར་ཏེ་འོད་འབར་བའི། །རི་བོ་ཉི་མའི་མདངས་ཆགས་པ། །བཞིན་འཛུམ་སྣུམ་ཞིང་ཉམས་ཚོགས་རྒྱས། །ཆགས་ཚུལ་དར་ལ་བབ་པ་བཞིན། །ཞལ་ཕྱག་མཚུངས་ཞིང་སྔོན་དམར་སེར། །གཡས་ན་རྡོ་རྗེ་རྩེ་ལྔ་འབར། །གཡོན་པ་ཁ་ཊྭཱཾ་དྲིལ་བུར་བཅས། །འོག་མ་གཉིས་ཀྱིས་
མདའ་དང་གཞུ། །རིན་ཆེན་རྒྱན་དང་ན་བཟའ་དང་། །མགུལ་དུ་དོ་ཤལ་དཔུང་རྒྱན་དང་། །ཕྱག་ཞབས་གདུ་བུ་སེ་མོ་དོ། །མཚན་དཔེ་ཕྱག་རྒྱ་ལྔ་ཡིས་མཛེས། །རྡོ་རྗེ་རྩེ་ལྔའི་ཕྱག་རྒྱ་ནི། །གནས་ལྔ་དག་ཏུ་གཏུགས་བྱ་སྟེ། །སྔགས་ཀྱིས་བདེ་གཤེགས་ཐམས་ཅད་ཀྱི། །སྐུ་གསུང་ཐུགས་སོགས་
རྣམ་པར་བསམ། །ཨོཾ་ན་མཿསརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་གུ་ཎ་ཀརྨ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ལུས་ཀྱི་བ་སྤུའི་གནས་རྣམས་སུ། །དཀྱིལ་འཁོར་དྲུག་གི་རྡུལ་ཕྲན་གནས། །མཁའ་དབྱིངས་དབང་ཕྱུག་ཕྱག་རྒྱ་ཡིས། །གནས་ཀུན་བྱིན་གྱིས་བརླབ་པར་བྱ། །ཨོཾ་དྷརྨཱ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ།
རང་འོད་ཡུམ་དང་འཁྲིལ་བ་ལས། །གསང་གནས་ཧཱུཾ་དང་ཨཱས་བརྒྱན་ཏེ། །ཡེ་ཤེས་རྡོ་རྗེ་ཕཊ་དང་བཅས། །རྩེ་མོ་ནོར་བུ་འབར་བས་མཚན། །རྣམ་ཐར་པདྨ་ཨེ་དཀྱིལ་ཅན། །མདོག་སེར་ལྟེ་བ་ཟེའུ་འབྲུ་དམར། །ས་མ་ཡ་སོགས་བརྡས་བསྐུལ་ནས། །ཛ་ཧཱུཾ་བཾ་ཧོཿས་རོལ་བ་བྱ། །ཨོཾ་པྲ་བེ་ཤ་ཡ་
ཕཊ། ཨ་ལ་ལ་ལ་ལ་ཧོ། །བདེ་བ་ཆེན་པོའི་འོད་ཟེར་གྱིས། །ཕྱོགས་བཅུའི་རྒྱལ་བ་མཉེས་མཛད་དེ། །འགྲོ་བའི་ལུས་ངག་ཡིད་རྟོག་སྦྱངས། །སྐུ་གསུང་ཐུགས་ཀྱི་རྒྱུན་གྱིས་བརྗིད། །སྟོང་གསུམ་ཏིལ་གང་འབྲུ་འདྲ་རྣམས། །ཐམས་ཅད་འོད་ཀྱིས་སླར་བསྡུས་ནས། །སངས་རྒྱས་དྲུག་
གི་ཡི་གེར་གྱུར། །བ་སྤུའི་བུ་ག་ཀུན་དུ་ཐིམ། །ཐུགས་ཀའི་གནས་སུ་ཞུ་བ་དག །བདེ་བ་ཆེན་པོའི་གནས་ནས་བབ། །འདོད་ཆགས་ཆེན་པོ་དགའ་བའི་མེས། །སྐུ་དང་བཅས་པ་འོད་དུ་གྱུར། །སྔོན་གྱི་གོམས་ཤུགས་ལྷ་མོ་བཞིས། །ཕྱོགས་བཞི་ནས་ནི་བསྐུལ་བྱས་ཏེ། །སྟོང་པ་ཤིན་ཏུ་རྣལ་
འབྱོར་ཡོད་མེད་མཐུ། །ནམ་མཁའ་ཉིད་དུ་དམ་ཚིག་ཉེ་བར་གནས། །བདེ་གཤེགས་བདེ་བར་གཤེགས་པ་བཞེངས་སུ་གསོལ། །རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག །ཡེ་ཤེས་གསལ་བའི་རྒྱུད་བསྐུལ་ནས། །ཐུགས་རྗེས་འགྲོ་ལ་དམིགས་མཛད་དེ། །རྒྱུ་ཡི་རྗེས་མཐུན་

མགོན་པོའི་སྐུ། །རྡོ་རྗེ་སེམས་དཔའ་བཞེངས་པར་འགྱུར། །མཚན་མ་རྒྱན་སོགས་ཆ་ལུགས་དང་། །སྐུ་མདོག་ཕྱག་མཚན་སྔ་མ་བཞིན། །ལུས་དང་ངག་སེམས་རྡོ་རྗེ་ཡིས། །མཚན་མའི་ཕྱག་རྒྱར་ལྡན་བྱས་ཏེ། །ཐམས་ཅད་འབྱུང་བའི་སྦྱོར་བ་ཡིས། །བདག་གི་ལྷར་ནི་
བདག་ཉིད་བྱ། །ཨོཾ་ཨཱཿཧཱུཾ། ཐུགས་གསལ་ཉི་མ་ལ་གནས་པའི། །ཡེ་ཤེས་སེམས་དཔའ་ཧཱུཾ་སྔགས་བཅས། །གསང་བའི་ཕྱག་རྒྱ་རྣམ་པ་བཞིས། །ལས་ཀུན་གྲུབ་བྱེད་དངོས་གྲུབ་གསལ། །འོད་ཟེར་འཕྲོ་འདུའི་སྦྱོར་བ་ཡིས། །ཡེ་ཤེས་དཀྱིལ་འཁོར་སྤྱན་དྲངས་ཏེ། །ཐུགས་ཀ་ནས་བྱུང་
ལྷ་མོ་བཞིས། །བདུད་རྩི་བུམ་པས་ཁྲུས་བྱས་ནས། །གནས་གསུམ་དབང་བསྐུར་དྲི་བྲལ་བྱས། །སླར་འདུས་ཚངས་བུག་གནས་སུ་ཐིམ། །མཐེ་བོ་སེམས་དཔའི་སྐྱིལ་མོ་ཀྲུང་། །མཛུབ་མོ་གཉིས་ནི་རྩེ་མོ་དགུག །གུང་མོ་གཉིས་ནི་མཉམ་པར་སྦྱར། །ལྷག་མ་རྡོ་རྗེ་ཐལ་མོ་བྱ། །སྤྱི་བོ་དང་
ནི་དཔྲལ་བ་དང་། ལྷན་པ་གཉིས་དང་ལྟག་པར་སྦྱར། །ཨོཾ་ཨ་བྷི་ཥིཉྩ་མཾ། སོར་མོ་ཐམས་ཅད་ནང་དུ་བསྣོལ། །རྩེ་མོ་ངོས་རྣམས་ཀུན་སྤྲད་ནས། །མཐེ་བོང་རྡོ་རྗེས་མནན་པ་ནི། །སྣ་དང་མིག་ཕུགས་ལྟ་བུ་སྟེ། །གོང་བཞིན་མགོ་བོའི་གནས་ལྔར་གཏུགས། །རིན་ཆེན་ཐོད་ཕྲེང་སྐུར་བཅས་
འགྱུར། །ཧཱུཾ་ཨ་བྷི་ཥིཉྩ་མཾ། སངས་རྒྱས་ཀུན་གྱི་རིན་ཆེན་མཆོག །དཔུང་རྒྱན་ཀུན་དུ་བརྒྱན་པར་བྱ། །ཨོཾ་རཏྣ་མཱ་ལེ་ཨ་བྷི་ཥིཉྩ་ཏྲཱཾ། དབུ་རྒྱན་བཅིངས་པས་བཅིངས་ནས་ནི། །འགྱིང་ཞིང་མཐའ་ནས་གྲོལ་བར་བྱ། །ཨོཾ་པ་ཊ་ལཾ་བ་ཨ་བྷི་ཥིཉྩ་ཧཱུཾ། དར་གྱི་མཐའ་མ་དཔྱངས་པ་ལྟར། །བྱས་
ནས་ཐལ་མོ་བརྡབ་པར་བྱ། །ཨོཾ་བཛྲ་ཏུ་ཥྱེ་ཧོ། །ཁམས་གསུམ་དག་ན་རིན་ཆེན་གཞན། །སངས་རྒྱས་རིན་ཆེན་ལྟ་བུ་མེད། །སངས་རྒྱས་ཀུན་གྱི་རིན་པོ་ཆེ། །དབུ་རྒྱན་ཅན་ནི་དེ་བས་མཆོག །གཞན་གྱི་ནོར་མིན་མི་འཕྲོག་པ། །ལྷ་ཡི་ཆུ་ནི་དག་པ་སྟེ། །ཐོད་པའི་ཕྲེང་བའི་དབུ་རྒྱན་དང་། །
སངས་རྒྱས་གཙུག་གི་ནོར་བུ་ཡི། །རྗེས་སུ་ཆགས་པའི་རྣམ་མང་དགའ་བའི་པདྨོ་རྣམས། །དགའ་བ་མཆོད་པས་གསལ་བར་རྗེས་སུ་མཆོད་བྱས་པས། །མཆོག་ཏུ་རྟག་པའི་རྣལ་འབྱོར་བདེ་བས་བདེ་གྲུབ་མཛོད། །ཨེ་མའོ་མཆོག་ཏུ་བདེ་བའི་ད