Luận tạng Tây Tạng (Tengyur) — Tập 8

་ལ་མོས་པར་བྱེད་དོ། །ནི་རཾ་ཤུ་
ནི་བདག་ཉིད་སྟོན་ཁའི་ནམ་མཁའ་དྲི་མ་མེད་པའི་འོད་ལྟར་རང་བཞིན་གྱིས་བསམ་པར་བྱའོ། །པྲོ་ཀྵུ་ནཾ་ནི་རྒྱུན་མི་འཆད་པ་སྙིང་རྗེ་ལ་སྤྱོད་ཅིང་མོས་པར་བྱའོ། །ཀྲི་པི་ཏྲ་ནི་འབྱུང་པོ་རྣམས་སྐུལ་བར་བྱེད་པའོ། །དུཾ་དྷུ་ར་ནི་དེ་བཞིན་ཉིད་དུ་རྟོགས་པའོ། །ཀཱ་ལིཉྫ་ར་ནི་

རྣམ་པར་མི་རྟོག་པའི་དེ་བཞིན་ཉིད་ལ་དམིགས་པའོ། །ཌིཎྜི་མི་ནི་ཆོས་ཀྱི་སྐུ་དང་བདེ་བ་ཆེན་པོའི་སྐུ་གཅིག་པ་ཉིད་དོ། །པདྨ་བྷཉྫ་ནཾ་ནི་ནམ་མཁའོ། །ཏྲི་པི་ཏ་ནི་དེ་བཞིན་ཉིད་སྒོམ་པར་བྱེད་པའོ། །མཱ་ལ་ཏཱིནྡྷ་ནཾ་ནི་བདེ་བ་ཆེན་པོས་རྗེས་སུ་མྱོང་བའོ། །ཙ་ཏུཿས་མཾ་ནི་འབྱུང་
བ་བཞི་མཉམ་པ་ཉིད་དོ། །ཀསྟུ་རི་ནི་མི་བསྐྱོད་པའི་རང་བཞིན་དུ་བསམ་པར་བྱའོ། །སིཧླ་ནི་བསམ་གཏན་དེའི་ཡེ་ཤེས་ཀྱི་འོད་འབྱུང་བའོ། །ཀཔྤཱུ་ར་ནི་ཟླ་བའི་འོད་ཟེར་སྟོན་བར་བྱེད་པའོ། །ཀུནྡུ་རུ་ནི་ཤེས་རབ་དང་དེའི་བདག་ཉིད་ཐབས་སུ་རྣམ་པར་བརྟག་པར་བྱའོ། །བོ་
ལ་ནི་དབྱེར་མེད་པའི་སྟོང་པ་ཉིད་ཡེ་ཤེས་སོ། །ཀཀྐོ་ལ་ནི་ཆོས་ཀྱི་འབྱུང་གནས་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ། །བཤད་པའི་རྣམ་གྲངས་གསུམ་པའོ།། །།ལ་ཞེས་བྱ་བ་ནི་ཡོད་དོ། །ང་ཞེས་བྱ་བ་ནི་འདུལ་བའོ། །ཡ་ཞེས་བྱ་བ་ནི་རླུང་ངོ་། །གང་དུ་
ཞེ་ན། རྗེས་འགྲོའི་དབྱངས་ཀྱི་ཐིག་ལེའི་མ་ཞེས་བྱ་བ་ཚངས་པའི་བུ་གར་རོ། །ཨཾ་ས་ཞེས་བྱ་བ་ནི་སྒྲ་ཡིན་ཏེ། སྔགས་ཀྱི་སྒྲའོ། །འདི་གཉིས་ཀྱི་དབུས་སུ་ཡོད། དང་རླུང་འདུལ་ཞེས་བྱ་བ་སྟེ། རྣལ་འབྱོར་མའི་བརྡ་ཉིད་དོ། །ལ་ཞེས་བྱ་བ་ནི་སྤྱི་བོ་ཡིན་ལ། ཨ་ཞེས་བྱ་བ་ནི་
དབང་ཕྱུག་སྟེ། དེ་ཉིད་དུ་བྱང་ཆུབ་ཀྱི་སེམས་ཀྱི་ཐིག་ལེའོ། །ལ་ཞེས་བྱ་བ་ནི་དེ་ཉིད་དུ་སྔགས་ཀྱི་སྒྲས་ཐིམ་པར་བྱའོ། །འདིས་ནན་ཞེས་བྱ་བས་མྱ་ངན་ལས་འདས་པ་ཐོབ་པར་འགྱུར་བའོ། །ག་ཞེས་བྱ་བ་ནི་མགྲིན་པ་ཡིན་ལ། ཏ་ཞེས་བྱ་བ་ནི་གདོན་པར་བྱ་བ་ཡིན་
ཞིང་། ཨི་ཞེས་བྱ་བ་ནི་སོང་པའི་དོན་ཏེ་མྱ་ངན་ལས་འདས་ཞེས་བྱ་བའི་དོན་ཏོ། །པ་ཞེས་བྱ་བ་ནི་དེ་བསྒྲུབ་པར་བྱ་བ་ཡིན་ཞིང་། བ་ཞེས་བྱ་བ་ནི་ཁྱེད་རྣམས་ཀྱིས་སོ། །ཨ་ཞེས་བྱ་བ་ནི་འོག་མིན་གྱི་གནས་ཀྱི་བདེ་བ་ཆེན་པོ་སྟེ། ས་ཞེས་བྱ་བ་ནི་རྣལ་འབྱོར་
པའོ། །གང་གིས་དེ་ལྟར་བྱས་པ། དེས་ན་ཐི་ཞེས་བྱ་བས་གནས་པ་ཡིན་ནོ། །ཨ་ཞེས་བྱ་བ་ནི་སྒྲིབ་པ་ཡིན་ལ། བ་ཞེས་བྱ་བས་བཅོམ་པ་ཡིན་ནོ་ཞེས་བྱ་བ་ནི་གང་གིས་ཞེས་པ་ཡིན་ལ། ཎ་ཞེས་བྱ་བ་འགོག་པའི་ཚིག་ཡིན་ཞིང་ཞེན་པ་ཡིན་ཡང་ཇི་ལྟར་ཞེན་པ་

མིན་པར་འགྱུར་བའོ་ཞེས་བྱ་བའི་དོན་ཏོ། །དོན་དེ་མེད་པ་ལས་སྒྲིབ་པ་དང་བྲལ་བར་གྱུར་པའོ། །ཨ་ཞེས་བྱ་བ་ནི་དམིགས་པ་སྟེ། ག་ཞེས་བྱ་བ་ནམ་མཁའ་ལ་ཡིན་ཞིང་། ཏ་ཞེས་བྱ་བ་ཡེ་ཤེས་ཀྱི་མེས་གདུང་བས་ཨི་ཞེས་བྱ་བ་བགྲོད་པ་ཉམས་པའོ། །
ད་ཞེས་བྱ་བ་ནི་མཁའ་འགྲོ་མ་ཡིན་ལ། མ་ཞེས་བྱ་བ་ནི་ཕྱག་རྒྱའི་མཁའ་འགྲོ་མའོ་ཞེས་བྱ་བ་འདི་གཉིས་ཀྱི་བདེ་བ་ཡིན་ཞིང་དབྱེར་མེད་པར་ཉེ་བར་སྦྱར་བའི་ཚུལ་ཉིད་དོ། །འདི་དག་གིས་བདག་ཉིད་བསྒོམས་པས་རྫོགས་པར་བྱས་ལ། ཨོཾ་ཧཱུཾ་གི་སྔགས་ཀྱི་སྒྲས་
མགྲིན་པ་ནས་བརྗོད་ནས་སྤྱི་བོ་ཚངས་པའི་སྒོར་བཅུག་ལ་ཐིམ་པར་བྱའོ་ཞེས་བྱ་བའི་བར་དུའོ། །ཀ་ཞེས་བྱ་བ་ནི་བྱེད་པའོ། །ཨ་ཞེས་བྱ་བ་ནི་རྣམ་པར་མ་དག་པ་སྟེ། བྷ་ཞེས་བྱ་བ་འཁོར་བ་ཡིན་ལ། པ་ནི་རྣམ་པར་དཔྱད་པས་རྣམ་པར་ཤེས་པ་ཡིན་ཞིང་། ཡ་ཞེས་
བྱ་བ་རྣལ་འབྱོར་པས་རིམ་པ་འདིས་ནན་ཏན་དུ་བྱའོ། །བྷ་ཞེས་བྱ་བ་ལ་འཁྲུལ་པ་ཡིན་ཏེ། པ་ཞེས་བྱ་བ་རྣམ་པར་ཤེས་པའོ། །ཡ་ཞེས་བྱ་བ་རྣལ་འབྱོར་པས་རིམ་པ་འདིས་ནན་ཏན་དུ་བྱ་བའོ། །ཨ་ཞེས་བྱ་བ་ནི་མ་རིག་པའོ། །བྷ་ཞེས་བྱ་བ་ནི་འཁྲུལ་པའོ། །བ་ཞེས་
བྱ་བ་ནི་རྣམ་པར་རིག་པ་ཙམ་དུ་བདེན་པའོ། །ཡ་ཞེས་བྱ་བ་ནི་རྣལ་འབྱོར་པས་རིམ་པ་འདིས་ནན་ཏན་དུ་བྱའོ། །ཨ་ཞེས་བྱ་བ་ནི་བཅོམ་ལྡན་འདས་མ་བདག་མེད་མའོ། །བྷ་ཞེས་བྱ་བ་ནི་བཅོམ་ལྡན་འདས་སྲིད་པའི་ཆའོ། །བ་ཞེས་བྱ་བ་ནི་རྣམ་པར་རིག་པ་ཙམ་མོ། །
ཡ་ཞེས་བྱ་བ་ནི་རྣལ་འབྱོར་པས་རིམ་པ་འདིས་ནན་ཏན་དུ་བྱའོ། །བྷ་ཞེས་བྱ་བ་ནི་འབྱུང་བ་ཡིན་ལ། བ་ཞེས་བྱ་བ་ནི་རྣམ་པར་རིག་པའི་རང་བཞིན་ནོ། །ཡ་ཞེས་བྱ་བ་ནི་རྣལ་འབྱོར་པས་རིམ་པ་འདིས་ནན་ཏན་དུ་བྱའོ། །ཨ་ཞེས་བྱ་བ་ནི་ཨའི་ཡི་གེ་སྟེ། ཨ་ལ་ལ་
ལ་ལའོ། །ས་ཞེས་བྱ་བ་ནི་ཐམས་ཅད་དོ། །བ་ཞེས་བྱ་བ་ནི་ཆོས་ཀྱི་འབྱུང་གནས་སུའོ། །ཤ་ཞེས་བྱ་བ་ནི་དེ་ལ་བརྟེན་པའོ། །ར་ཞེས་བྱ་བ་ནི་བདེ་བའི་གནས་ཡིན་པའི་ཕྱིར་རོ། །དེ་བས་ན་བཅོམ་ལྡན་འདས་མས་བཅོམ་ལྡན་འདས་ལ་བརྟེན་པའོ། །ཀ་ཞེས་བྱ་

བ་ནི་གང་གིས་ཏེ། པཱ་ཞེས་བྱ་བ་ནི་སྐྱོང་བ་ཡིན་ལ། ལ་ཞེས་བྱ་བ་ནི་གནས་ཡིན་ཏེ། ཆོས་ཀྱི་འབྱུང་གནས་ཞེས་བྱ་ཞིང་འགྲོ་བ་འདི་དག་ལྷག་པར་བསྡུས་པའོ། །བྷ་ཞེས་བྱ་བ་ནི་ཉི་མའོ། །ཀ་ཞེས་བྱ་བ་ནི་ཟླ་བ་ཡིན་པས། བཅོམ་ལྡན་འདས་ནི་ཉི་མའོ། །བཅོམ་ལྡན་འདས་
མ་ནི་ཟླ་བ་ཡིན་ཏེ། རང་རང་གི་ས་བོན་གྱིས་མཚན་ཞིང་ཡི་གེ་གཉིས་པོས་ངེས་པར་སྦྱར་བར་བྱའོ། །ཏ་ཞེས་བྱ་བ་ནི་སྒྲ་གདོན་པར་བྱ་བའོ། །པ་ཞེས་བྱ་བ་ནི་སོ་སོར་བྱས་ལ་ཐ་དད་པར་བྱས་ཏེ་གཉིས་ཀར་བརྗོད་པར་བྱ་ལ། གཅིག་ཐིམ་ནས་གཉིས་པ་ཉེ་བར་བརྗོད་པར་བྱ་བ་
ཡིན་ནོ། །ཡ་ཞེས་བྱ་བ་ནི་གྲིམས་པས་ཡིན་པ་འམ། ལྷོད་པས་ཡིན་པ་འམ། ཡཾ་ནི་རླུང་གི་སྒྲར་གཏོགས་པར་བྱས་ལ་ཚངས་པའི་སྒོར་རབ་ཏུ་གཞུག་ཅིང་ཐིམ་པར་བྱའོ། །ཛ་ཞེས་བྱ་བ་ནི་ཆུ་ཡིན་ཅིང་། ན་ཞེས་བྱ་བ་ནི་རྩའི་སྒོས་བཏུང་བར་བྱ་བ་ཡིན་ཏེ་དུབ་པ་ཞི་
བར་བྱ་བའི་དོན་ཏོ། །ག་ཞེས་བྱ་བ་ནི་རྡོ་རྗེ་འཛིན་པའི་ཡོན་ཏན་ནོ། །ཨུ་ཞེས་བྱ་བ་ནི་རྣལ་འབྱོར་པས་ངེས་པར་དེ་ལྟར་གྱུར་པའོ། །ཐ་ཞེས་བྱ་བ་ནི་ཐ་ནུ་སྟེ། འོད་དཔག་མེད་དང་མཚུངས་ཤིང་དེ་ལྟར་འགྱུར་ཞེས་བྱ་བའི་དོན་ཏོ། །མ་ཞེས་བྱ་བ་ནི་ཕྱག་རྒྱ་ཡིན་ནོ། །
ཨུ་ཞེས་བྱ་བ་ནི་ཐབས་ཡིན་ལ། ཏཱ་ཞེས་བྱ་བ་ནི་སྐྱོབ་པ་སྟེ། བདེ་བ་བྱེད་བཞིན་པའི་ཐབས་ལ་བདེ་བ་བསྲུང་བའོ། །སྭ་ཞེས་བྱ་བ་ནི་སེམས་ཡིན་ནོ། །ཡ་ཞེས་བྱ་བ་ནི་རླུང་ངོ་། །བྷ་ཞེས་བྱ་བ་ནི་ཐ་དད་པས་སོ། །ཨུ་ཞེས་བྱ་བ་ནི་ཉེ་བར་ཞི་བར་གྱུར་པ་སྟེ། མྱ་ངན་ལས་འདས་
པར་ཉེ་བར་གྱུར་ཅེས་བྱ་བའི་དོན་ཏོ། །སྭ་ཞེས་བྱ་བ་ནི་སེམས་ཡིན་ཞིང་། ཡ་ནི་རླུང་ཡིན་ལ། བྷུ་ཞེས་བྱ་བ་ནི་ལུས་ཡིན་ཞིང་གསུམ་ཆར་ཉེ་བར་ཞི་བར་གྱུར་པའོ། །ས་ཞེས་བྱ་བ་ནི་བདེ་བ་ཡིན་ལ། བྷ་ཞེས་བྱ་བ་ནི་བྱེ་བྲག་ཡིན་ནོ། །ཡ་ཞེས་བྱ་བ་ནི་རྩོལ་བ་དང་ལྡན་པ་ཡིན་ཏེ།
ཁྱད་པར་གཞན་མེད་ཅེས་བྱ་བའི་དོན་ཏོ། །མྱ་ངན་ལས་འདས་པའི་ཁྱད་པར་དུ་མི་བསམ་མོ། །བྷ་ཞེས་བྱ་བ་ནི་སྲིད་པ་ཡིན་པས་ཨུ་ཞེས་བྱ་བ་དང་འདི་དག་གིས་ཉེ་བར་ཞི་བར་གྱུར་པའོ། །ས་ཞེས་བྱ་བ་ནི་བདེ་བ་དམ་པའོ། །ཨུ་ཞེས་བྱ་བ་ནི་བདེ་བར་ཤར་བའོ། །ཀྲི་ཞེས་

བྱ་བ་ནི་རིམ་པར་གྱུར་པ་དེ་གོམས་པས་ཐིམ་པ་ལས་སོ། །ཀ་ཞེས་བྱ་བ་ནི་ཆ་ལས་འདས་པ་སྟེ། ཆ་མེད་ཅེས་བྱ་བའི་དོན་ཏོ། །དེའི་རྗེས་ཐོགས་སུ་ར་ཞེས་བྱ་བ་ནི་ཉི་མའི་ཡེ་ཤེས་ཀྱི་འོད་དེ་ཤར་བའོ། །མ་ཞེས་བྱ་བ་ནི་རླུང་ཡིན་ཞིང་། ཧ་ཞེས་བྱ་བ་ནི་བཅོམ་པ་
སྟེ། ཐིམ་པ་དང་། ཨ་ཞེས་བྱ་བ་ནི་ཡིད་རླུང་གི་རྟེན་ཏོ། །ལ་ཞེས་བྱ་བ་ནི་ཡིད་དོ། །ཨ་ཞེས་བྱ་བ་ནི་ཡིད་ཀྱི་དམིགས་པ་སྟེ་ཐིག་ལེ་ཙམ་མོ། །ས་ཞེས་བྱ་བ་ནི་ཐིག་ལེ་ཡིན་ནོ། །མ་ཞེས་བྱ་བ་ནི་ནོར་བུ་སྟེ་རྡོ་རྗེ་ཡིན་ལ། དེ་ན་ཧའི་ཡི་གེ་ཡོངས་སུ་གྱུར་པ་ཉིད་དོ། །ཡང་ནོར་བུ་དེར་
ཧའི་ཡི་གེས་སྦྱར་བར་བྱས་ལ། དེ་ནི་གང་ཞིག་གནས་པ་ནི་བྱང་ཆུབ་ཀྱི་སེམས་ཡིན་ནོ། །ཨ་ཞེས་བྱ་བ་ནི་པདྨའོ། །མ་ཞེས་བྱ་བ་ནི་དེའི་ལྟེ་བའི་ནོར་བུའོ། །དེ་རུ་གང་ཞིག་ཏུ་གྱུར་པ་དེ་དག་གི་ཁུ་བའོ། །དེ་དག་གིས་ཐིག་ལེ་ཙམ་ནི་རང་གི་རིག་པའོ་ཞེས་བྱ་བའོ། །ས་ཞེས་
བྱ་བ་ནི་ཐམས་ཅད་དུ་ཁྱབ་པའོ། །དེ་ཞེས་བྱ་བ་ནི་འཁོར་ལོ་བཞི་རྣམས་ཀྱི་འདབ་མའོ། །བ་ཞེས་བྱ་བ་ནི་ལྟེ་བ་ཡིན་ལ། འཁོར་ལོ་བཞིའི་ས་བོན་གྱི་ཡི་གེ་སྟེ། ཨོཾ་ཨཱཿཧཱུཾ་ཨོཾ་གྱི་ཡི་གེ་བཞིའི་སྒྲ་ཐིམ་པར་བྱ་ཞིང་ཨེ་ཞེས་བྱ་བ་ནི་ཆོས་ཀྱི་འབྱུང་གནས་སྤྲུལ་པའི་འཁོར་ལོར་
དེའི་ཐིག་ལེའོ། །ད་ཞེས་བྱ་བ་ནི་སྦྱོར་བ་འདིས་བཏུལ་བའོ། །གཞན་ཡང་ར་ཞེས་བྱ་བ་ནི་མེའི་ས་བོན་ཡིན་ནོ། །ཡང་ན་ཅིག་ཤོས་གཞན་ཡང་ངོ་། །ཡ་ཞེས་བྱ་བ་ནི་ཡཾ་ངམ། རྣལ་འབྱོར་བཞིའི་ས་བོན་ནོ། །ཨོཾ་ཞེས་བྱ་བ་ནི་ཨོཾ་མམ་ཚངས་པའི་ས་བོན་ནོ། །ག་ཞེས་བྱ་བ་ནི་གཽ་རཱི་
ལ་སོགས་པ་རྣམས་ཀྱི་ས་བོན་ཏེ། གཾ་ཙཾ་བཾ་གྷཾ་པཾ་སཾ་ལཾ་ཌཾ་ཨཾ་ཨཱ་ལ་སོགས་པའི་ཡི་གེ་བཅུ་བཞི་ས་བོན་ཏེ། སྦྱོར་བ་འདིས་འདི་ལྟར་རྣམ་པར་བསམས་ན་རྣལ་འབྱོར་པས་རང་གི་འདོད་པ་རྙེད་པར་འགྱུར་ཏེ། རྡོ་རྗེ་སྒྲོལ་མཛད་ཀྱི་བཀའ་དྲིན་གྱིས་སོ། །བ་ཞེས་བྱ་བ་ནི་
མཆོག་གི་ཡེ་ཤེས་འདིའོ། །ཛ་ཞེས་བྱ་བ་ནི་འགྲོ་བ་རྣམས་ཀྱིས་སོ། །ར་ཞེས་བྱ་བ་ནི་འདི་ཉིད་ཀྱིས་འགྲོ་བ་རྣམས་ཀྱིས་བསྲུང་བའོ། །ག་ཞེས་བྱ་བ་ནི་གང་གིས་སོ། །ཀ་ཞེས་བྱ་བ་ནི་གང་ལག་ཞེས་བྱ་བ་ནི་ཇི་ལྟར་ཏེ། ཨོཾ་ཞེས་བྱ་བ་ནི་ཨོཾ་ལིས་ཨོ་ལི་ལ། ཇི་ལྟར་ཨོཾ་ལི་

ལ་ཨོ་ལིའི་སྒྲས་ནི་ཡང་དག་པའི་རིམ་པས་ཞེས་བྱ་བ་དང་། ཡང་དག་པའི་རིམ་པ་ལ་ཡང་དག་པའི་རིམ་པར་ཐོབ་བོ་ཞེས་བྱ་བ་སྟེ་ལྷག་པར་སྡུད་པའོ། །ལ་ཞེས་བྱ་བ་ནི་ཐིམ་པ་ཡིན་ལ། །པདྨ་དང་རྡོ་རྗེ་དང་ཀུནྡུ་རུ་རྣམས་སུའོ། །པདྨ་ནི་སྤྲུལ་པ་ཡིན་ལ་དེར་ཐིམ་པའོ། །རྡོ་རྗེ་
ནི་རྩེ་ཡིན་པས་དེར་ཐིམ་པ་ཡིན་ལ། ཉུངས་ཀར་དཀར་པོ་ཕྲ་བའི་ཐིག་ལེར་རྣམ་པར་བསམ་པའོ། །ཀུནྡུ་རུ་ནཾ་འགྲོ་བ་དང་འོང་བ་སྟེ། དེར་ཐིམ་པ་ཡིན་ཞིང་སེམས་བཞག་ལ་འགྲོ་འོང་བྱ་བ་ཡིན་ནོ། །གཞན་ཡང་ཀ་ཡིག་གསུམ་གྱིས་ལུས་དང་ངག་ཡིད་གསུམ་ངེས་པར་
བསྟན་ལ། དེ་རྣམས་གཅིག་པ་ནི་བྱང་ཆུབ་ཀྱི་སེམས་ཞུ་བ་ཡིན་ཏེ། དེ་ཡང་ཨོའི་ཡི་གེས་རྡོ་རྗེའི་སྒོ་གང་དུ་གྱུར་པ་དེ་ལྟ་ནི་ཐིམ་པ་ཡིན་ནོ། །བཤད་པའི་རྣམ་གྲངས་བཞི་པའོ།། །།ཆང་ནི་སྒོམ་པ་སྟེ་ཤེས་རབ་ནི་བཏུང་བའོ། །སྟོབས་ནི་ཤེས་རབ་དེའི་
སྟོབས་སོ། །མ་ལ་ཡ་ཛཾ་ནི་དམ་ཚིག་སེམས་དཔའ་དང་། ཡེ་ཤེས་སེམས་དཔའ་གཅིག་ཏུ་བྱའོ། །ཁེ་ཊཿནི་རང་གི་ས་བོན་གྱི་འོད་ཟེར་སྤྲོ་བའོ། །བྲེ་ཀྵྱ་ནཾ་ནི་སླར་ཡང་རང་གི་ས་བོན་བསྡུ་བའོ། །ཤྲ་བ་སྭཱ་ནི་བདག་མེད་མ་ལ་བརྟེན་པའོ། །ནི་རཾ་ཤུ་ནི་ཐོད་པའི་ཕྲེང་བ་ལ་
སོགས་པ་རུས་པའི་རྒྱན་ནོ། །ཀྲི་པི་ཊ་ནི་སྔགས་ཀྱི་བརྡའོ། །དུཾ་དྷུ་ར་ནི་ང་རྒྱལ་ཕལ་པའོ། །ཀཱ་ལཉྫི་རཾ་ནི་ལྷའི་ང་རྒྱལ་བྱས་པའོ། །ཌིཎྜི་མཾ་ནི། བཅོམ་ལྡན་འདས་མའི་ཆོས་ཀྱི་འབྱུང་གནས་ཀྱི་མཐའི་བུག་པའོ། །པདྨ་བྷཉྩ་ནཾ་ནི་བཅོམ་ལྡན་འདས་ཀྱི་ཐོད་པ་བཅུ་དྲུག་
ཡིན་ལ། བཅོམ་ལྡན་འདས་མའི་ཐོད་པ་གཅིག་པོ་འམ་བྷ་ག་ཉིད་དོ། །ཏྲི་པི་ཏ་ག་རཾ་ནི་ཟུང་འཇུག་ཏུ་ཡང་དག་པར་སྦྱོར་བའི་སྦྱོར་བ་འམ། བཅོམ་ལྡན་འདས་མའི་ཁུ་བའོ། །མཱ་ལ་ཏིན་ངྷ་ནཾ་ནི་དཀྱིལ་འཁོར་གྱི་དབང་ཕྱུག་དང་དཀྱིལ་འཁོར་བ་ཐ་དད་དུ་ངེས་པར་བལྟ་བའོ། །
བཞི་མཉམ་ནི་འབྱུང་བ་བཞི་མཉམ་པ་ཉིད་ལས་ཡོངས་སུ་གྲུབ་པའི་ཁང་བུའོ། །གླ་རྩི་ནི་ཞུ་བར་གྱུར་པའོ། །སིཧླིནི་བཅོམ་ལྡན་འདས་མའི་ས་བོན་ཨཾ་ངོ་། །ཀཔྤཱུ་ར་ནི་བཅོམ་ལྡན་འདས་ཀྱི་ས་བོན་ཧཱུཾ་ངོ་། །ས་ལི་ཛཾ་ནི་སླར་བཞིན་གཉི་གའི་གཟུགས་རྫོགས་པའོ། །

གུནྡུ་རུ་ནི་མཁའ་འགྲོ་དང་མཁའ་འགྲོ་མའི་གསང་བ་གཉིས་སྦྱོར་བཞི་པའོ། །བོ་ལ་ནི་མི་བསྐྱོད་པ་ལ་སོགས་པ་དེ་བཞིན་གཤེགས་བས་རྒྱས་བཏབ་པའོ། །རིམ་པ་འདིས་འགྲོ་བའི་རྟེན་གྱི་གནས་བདེ་བ་ཆེན་པོ་བསྲུང་བ་བཅོམ་ལྡན་འདས་ཀྱིས་སྤྲུལ་པའི་
སྐུ་སྟོང་པའི་རང་བཞིན་བདེ་བ་ཅན་ཞེས་བྱ་བ་ཀཀྐོ་ལཱ་ཞེས་བྱ་བའི་བརྡས་སོ། །བཤད་པའི་རྣམ་གྲངས་ལྔ་པའོ།། །།ཆང་ནི་མ་རིག་པས་མྱོས་པ་ཡིན་ལ། བཏུང་བ་ནི་གཞོམ་པའོ། །ཤ་ནི་ང་རྒྱལ་ཕལ་པས་དྲེགས་པ་སྟེ། དེ་ཡང་བཟའ་ཞིང་བལྡད་པར་བྱ་
བའོ། །བསྡུ་བ་ནི་དམ་པ་རྣམས་དང་འཚོགས་པའོ། །འགྲོ་བ་ནི་བདེ་འགྲོའི་བྱ་བའོ། །རོ་ནི་བདག་མེད་མའི་ཆོས་རྟོགས་པའི་བྱ་བའོ། །རུས་པའི་རྒྱན་ནི་དཀའ་བའི་སྤྱོད་པས་ལུས་རུས་པའི་དྲ་བ་ཙམ་འབའ་ཞིག་ཏུ་བྱེད་པའོ། །འོང་བ་ནི་ཡུལ་ལ་མི་ལྟོས་པའོ། །
རྔེའུ་ཆུང་ནི་འགྲོ་བ་འདི་དག་སྒྲ་བརྙན་ལྟ་བུར་མོས་པར་བྱ་བའོ། །སྐལ་མིན་ནི་མི་དགེ་བ་བཅུའོ། །སྐལ་ལྡན་ནི་དགེ་བ་ཡིན་ནོ། །རེག་མིན་ནི་སྟོང་པ་ཉིད་ཀྱི་བསམ་གཏན་ནོ། །ཀ་པཱ་ལ་ནི་སྐུ་གཉིས་སྐྱོང་བ་ཡིན་ཏེ། ཆོས་དང་བདེ་བ་སྲུང་བ་ཞེས་བྱ་བའོ། །བཟའ་བ་ནི་བླ་
མ་ལ་གུས་པས་བསྟེན་པའོ། །ཚོད་མ་ནི་གཅིག་དང་དུ་མའི་ཆས་རང་གི་སེམས་ཡོངས་སུ་སྨིན་པའོ། །དྲི་ཆེན་ནི་རྣམ་པར་སྣང་མཛད་དོ། །གཅི་བ་ནི་མི་བསྐྱོད་པའོ། །རང་འབྱུང་ནི་རིན་ཆེན་འབྱུང་ལྡན་ནོ། །ཀཔྤཱུ་ར་ནི་འོད་དཔག་མེད་དོ། །ཤ་ཆེན་ནི་དོན་ཡོད་གྲུབ་པའོ། །འདི་
རྣམས་གཅིག་ཏུ་གྱུར་པའི་དངོས་པོ་ལ་བདག་ཉིད་དེའི་བདག་ཉིད་ཡིན་ནོ་ཞེས་མོས་པར་བྱ་བ་སྟེ། འདི་དག་སྙོམས་པར་ཞུགས་པར་བྱའོ། །བདུད་རྩི་བཟའ་བ་ཡང་འདི་ཉིད་ཁོ་ནའོ། །དབང་པོ་གཉིས་སྦྱོར་ནི་དབང་པོ་རྣམས་ཡིད་ཙམ་མོ་ཞེས་སྦྱར་བར་བྱའོ། །རྡོ་རྗེ་ནི་སྒྲིབ་པ་
ཐམས་ཅད་ཀྱི་ངོ་བོའི་ཕྱོགས་སྟོང་པ་ཉིད་ཀྱིས་གཅོད་པའོ། །པདྨ་ནི་འཁོར་ལོ་བཞི་ལ་ཀུན་ནས་བལྟ་བ་ཡིན་ཏེ། བདག་ནི་རང་བཞིན་གྱིས་སྤྲུལ་པ་ཡིན་ནོ་ཞེས་པ་ནི། སྤྲུལ་པ་ཀུན་ནས་བལྟ་བའོ། །བདག་ནི་རང་བཞིན་གྱིས་ཆོས་སོ་ཞེས་པ་ནི་ཆོས་ལ་ཀུན་ནས་

བལྟ་བའོ། །བདག་ནི་རང་བཞིན་གྱིས་ལོངས་སྤྱོད་རྫོགས་པའོ་ཞེས་པ་ནི། ལོངས་སྤྱོད་རྫོགས་པ་ལ་ཀུན་ནས་བལྟ་བའོ། །བདག་ནི་རང་བཞིན་གྱིས་བདེ་བ་ཆེན་པོའོ་ཞེས་པ་ནི་བདེ་བ་ཆེན་པོ་ནི་ཀུན་ནས་བལྟ་བ་ཡིན་པས་འཁོར་ལོ་བཞི་ལ་ཀུན་ནས་བལྟ་བ་སྟེ། ཀུན་ནས་
བལྟ་བ་འདིས་རྣལ་འབྱོར་པ་རྣམས་གནས་པར་བྱའོ་ཞེས་པ་ནི། བཤད་པའི་རྣམ་གྲངས་དྲུག་པ་ཡིན་ལ། གཞུང་དུ་བཤད་པ་ནི་བཤད་པའི་རྣམ་གྲངས་བདུན་པའོ། །དགོངས་བཤད་རྣམ་གྲངས་བདུན་པ་ནི། །ཡན་ལག་བདུན་གྱིས་ངག་སྟེར་བ། །མུ་ཏིག་ཕྲེང་
བཞིན་མགྲིན་པ་ལ། །སྐྱེས་མཆོག་རྣམས་ཀྱིས་དོན་གཞོལ་བྱ། །མཁའ་འགྲོའི་དགོངས་པ་བསྟན་པ་ལ། །མཁས་པ་གང་ཞིག་ང་རྒྱལ་གྱིས། །རྨོངས་ནས་སུན་ནི་འདོན་བྱེད་པ། །དེས་སྨད་མཁའ་འགྲོ་མཁའ་འགྲོ་མ། །རྡོ་རྗེ་མཁའ་འགྲོ་མ་རྣམས་ཀྱིས་བཤད་
པ་རྣམ་གྲངས་བདུན་གྱི་ལེའུ་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་མཉྫུ་གྷོ་ཥ་དང་། བོད་ཀྱི་ལོ་ཙཱ་བ་འབྲོ་དགེ་སློང་ཤེས་རབ་གྲགས་ཀྱིས་ཡེར་པའི་དབེན་གནས་སུ་བསྒྱུར་བའོ།། ༄༅༅། །རྒྱ་གར་སྐད་དུ།
གཱི་ཏི་ཏཏྟྭ་ནཱ་མ། བོད་སྐད་དུ། གླུའི་དེ་ཁོ་ན་ཉིད་ཅེས་བྱ་བ། དཔལ་ཀྱེའི་རྡོ་རྗེ་ལ་ཕྱག་འཚལ་ལོ། །ཀོལླ་ཨི་རེ་ཞེས་བྱ་བ་ནི་མགོ་བོའོ། །ཋི་ཨ་ཞེས་བྱ་བ་ནི་བྱང་ཆུབ་ཀྱི་སེམས་མ་བཅོས་པའོ། །བོ་ལ་མུམྨུ་ཎི་ཞེས་བྱ་བ་ནི་ལྟེ་བར་གནས་པ་ཐིག་ལེའི་རང་བཞིན་
ཅན་གཏུམ་མོ་སྤྲོ་བ་དང་། བསྡུ་བ་ཀཀྐོ་ལཱའོ། །རེ་ནི་བོད་པའོ། །དེ་དག་འདུས་པས་གྷ་ཎེ་ནི་རྒྱུན་དུའོ། །བརྡུངས་པས་ཀྲྀ་པི་ཊ་ཅང་ཏེའུ་དང་། རྔ་ནི་བཱཛྫ་ཨིའོ། །ཧོ་ནི་ཡང་བོད་པའོ། །ཀཱ་རུ་ཎེས་ཚངས་པའི་གནས་བཞིའོ། །གཟུགས་ལྷ་མོའི་ཚོགས་ལ་ཀི་ཨ་ཨི་ན་
རོ་ལཱ་ནི་གཡུལ་ཏེ་ན་རོ་ལཱ། བ་ལ་ནི་དགའ་བ་སྟེ། ཏ་ཧིཾ་ཁཱཛྫ་ཨིའོ། །གཱ་ཌྷེཾ་ནི་ཁོང་དུ་ཆུད་པའོ། །མ་ཨཱ་ཎཱ་ནི་མཆོག་ཏུ་དགའ་བའི་རང་བཞིན་ཅན་སྙིང་རྗེ་བཱཛྫི་ཨི་ཨ་ཨི། ཧ་ལེ་ནི་ཡང་བོད་པའོ། །ཀཱ་ལིཉྫ་ར་ནི་ཆུ་ཡང་དང་ཡང་དུ་པཱ་ཎི་ཨི་ཨིའོ། །དུནྡུ་ར་ནི་སྐད་ཅིག་

མེད་པའི་སྐད་ཅིག་བཱཛྫི་ཨ་ཨིའོ། །ཙ་ཨུ་ས་མ་ཀཙྪུ་རཱི། སིཧླ་ཀཔྤཱུ་ར་ནི་ཕུང་པོའི་རང་བཞིན་དེ་བཞིན་གཤེགས་པ་ལཱ་ཨི་ཨ་ཨིའོ། །མཱ་ལ་ཨི་ནི་བྱིན་ཟའོ། །ཨིནྡྷ་ན་ནི་ཕུང་པོའོ། །སཱ་ལིཉྫ་ནི་མཆོག་གོ། །ཏ་ཧིཾ་བྷ་རུ་ནི་མང་པོའོ། །ཁཱ་ཨི་ཨ་ཨིའོ། །
ཕྲེཾ་ཁ་ཎ་ནི་སྡུག་པའོ། །ཁེ་ཊ་ནི་རྩེ་བ། ཀ་རནྟེ་སྙིང་རྗེས། ཤུདྡྷཱ་ཤུདྡྷ་ན་མུ་ཎི་ཨ་ཨིའོ། །ནི་རཾ་ཤུ་ཨཾ་གེ་ནི་ཟླ་བའི་འོད་ཟེར་ཙ་ཌཱ་ཝིའོ། །ཏ་ཧིཾ་ཛ་ས་རཱ་པི་པ་ནི་ཨ་ཨཱི། མ་ལ་ཨ་ཛ་ནི་ཡང་གཅིག་ཏུ་འགྱུར་རོ། །ཀུནྡུ་རུ་ནི་རྒྱུན་མི་འཆད་པར་པཱ་ཊ་ཨིའོ། །ཌིཎྜ་མ་ཏ་ཧིནྣ་ནི་ཀྱེ་ཀུན་
དྷར་མའི་རྔ་བརྡུང་བ་བཱཛྫི་ཨ་ཨཱིའོ། །གཞན་ཡང་ཀོལླ་ཨི་རེ་ནི་སྤྱི་བོར་རང་གི་གཡས་པའི་གཡས་པ་དང་། ཀཱ་ལི་དང་། ཉི་མ་དང་། མ་བཅོམ་པ་དང་། འོག་ཏུ་ཁ་དང་། ངག་གི་རྡོ་རྗེའི་རྒྱུན་དང་། ཐབས་དང་པདྨ་འབར་བའི་གཟུགས་ཀྱིས་རོ་མ་གནས་པ་
ནི་བོ་ལ་ཞེས་ཟེར་རོ། །མུམྨུ་ཎི་ལྟེ་བ་སྟེ་དེ་ལས་གཞན་པ་གཡོན་པ་དང་། ཨཱ་ལི་དང་ཟླ་བ་དང་། སྤྲོ་བ་དང་སྡུད་པ་བྱེད་པ་ཅན་དང་། ཐིག་ལེ་དང་། སྐུའི་རྡོ་རྗེ་མ་དང་། སྟེང་གི་ཁ་དང་རྡོ་རྗེ་ཁུ་བར་བྱེད་པ་པོའི་རང་བཞིན་གྱིས་བརྐྱང་མ་གནས་པ་ནི་ཀཀྐོ་ལ་ཞེས་བརྗོད་དོ། །
དེ་དག་གི་ཐ་སྙད་གཅིག་ཏུ་འགྱུར་བར་བྱེད་པ་སེམས་ཀྱི་རྡོ་རྗེའི་ཚུལ་གྱིས་ཀུན་འདར་མ་ནི་ལག་པའོ། །དེའི་ཡང་གང་ཞིག་མཐེ་བོ་དང་གང་ཞིག་སྲིན་ལག་དེ་དག་དང་། རོ་མ་བརྐྱང་མ་དག་དང་། འཕེལ་བ་དང་འགྲིབ་པ་དང་། ཐབས་དང་བདག་མེད་མའི་རྣལ་འབྱོར་མ་
དག་དང་། ཀུན་རྫོབ་དང་དོན་དམ་པའི་རླབས་དག་གིས་བཙིར་བ་ཞེས་བྱ་བ་ནི་བཙིར་བ་དང་འོ་དང་འཁྱུད་པ་ལ་སོགས་པ་རྣལ་འབྱོར་པ་སྦྱོར་བ་རོ་མཉམ་པར་བྱེད་པ་ལོངས་སྤྱོད་པ་ལ་རླབས་གཉིས་ནི་བཟའ་བའོ། །འདི་ལོངས་སྤྱོད་རྫོགས་པར་བཤད་དོ། །དེ་ནས་
ཡེ་ཤེས་སྐྱེ་བར་འགྱུར། །ཞེས་བྱ་བ་ནི་མཆོག་གི་གནས་སོ། །གཞོན་ནུའི་དགའ་བ་ཇི་ལྟ་བའམ། །དུས་གཉིས་སྤངས་པ་ཞེས་བྱ་བའི་དོན་ཏོ། །ཡང་ན་བོ་ལའི་ཀོལླ་ཨི་རེ་ནོར་བུར་གནས་པ་ནི་བོ་ལ་སྟེ་རོ་མ་དང་གསང་བའི་རྡོ་རྗེའོ། །ཀཀྐོ་ལཱའི་མུམྨུ་ཎི་ལྟེ་བར་གནས་པ་

ཀཀྐོ་ལཱ་དང་བརྐྱང་མ་གསང་བའི་པདྨའོ། །དེ་དག་ཉིད་བོ་ལ་ཀོ་ལཱ་ཨི་རེ། ཀཀྐོ་ལཱ་མུམྨུ་ཎི་ཞེས་བྱ་བ་ཡང་དེ་དག་ཉིད་རོ་མཉམ་པར་འགྱུར་བ་ཡང་ཀུན་འདར་མར་འགྱུར་བ་སྟེ། བོ་ལཱ་ཀོ་ལཱ་ཨི་རེཾ་ཀཀྐོ་ལ་མུམྨུ་ཎི་མར་ལ་མར་ཇི་ལྟ་བའོ། །གང་ཡང་ཀུན་འདར་མར་ལོངས་
སྤྱོད་རྫོགས་པ་དང་། སྤྲུལ་པའི་སྐུ་ཅན་མ་དེ་ཡང་བཅོམ་པ་དང་། ཕྱིན་པ་གང་གིས་དགའ་བྲལ་གྱི་མཐའ་དེས་དགའ་བྲལ་ཀྱི་དང་པོ་དེས་བདག་མེད་པ་དེ་ཡང་ཕྱག་རྒྱ་ཆེན་པོར་ངེས་ཏེ། ཕྱག་རྒྱ་ཆེན་པོའི་བོ་ལཱ་ཀོ་ཨི་རེ་ཀཀྐོ་ལཱ་མུམྨུ་ཎི་ཞེས་ཟེར་རོ། །རང་བཞིན་གྱི་ཐབས་
དང་ཤེས་རབ་ཀྱི་བདག་ཉིད་ཅན་ཞེས་བྱ་བའི་དོན་ཏོ། །དེ་དང་ལྷན་ཅིག་རྟག་ཏུ་ཀུན་དུ་དེའི་རང་བཞིན་ཡང་དང་ཡང་དུ་བསམས་ནས། གང་གིས་འདི་མྱུར་དུ་ངེས་པར་འགྱུར་བ་དང་། རྒྱལ་བའི་ཚོགས་ཀྱི་གཙོ་བོར་འགྱུར་བ་དང་། རང་རིག་པར་བྱ་བ་དང་། རང་རིག་པ་
པོ་དང་། རང་རིག་པ་དག་གི་ལམ་གྱི་སྤྱོད་ཡུལ་ལས་འདས་པ་དེའི་རང་བཞིན་གྱིས་ཡེ་ཤེས་ཀྱི་ཀུན་གྱི་དེ་ཁོ་ན་ཤེས་པར་འགྱུར་རོ། །ཡང་ན་ཀཀྐོ་ལཱ་མུམྨུ་ཎི་ལྟེ་བར་གནས་པ་དང་། བོ་ལཱ་ཀོ་ལཱ་ཨི་རེ་ནོར་བུའི་རྩེ་མོར་འདོད་ཆགས་དང་། འདོད་ཆགས་མེད་པ་རྣམ་
པར་སྤངས་པ་བྱང་ཆུབ་ཀྱི་སེམས་བདེ་བ་ཆེན་པོ་ཟླ་བ་དང་ཉི་མ་དང་བྲལ་བ་བདག་མེད་པ་རྡོ་རྗེའི་གནས་མཆོག་མཚུངས་པ་མེད་པ་བདེ་བའི་དགའ་བ་མེད་པ་ནི་ཀཀྐོ་ལ་མུམྨུ་ཎི་བོ་ལཱ་ཨི་རེཾ། འདོད་ཆགས་དང་འདོད་ཆགས་དང་བྲལ་བར་རོ་མཉམ་པར་འགྱུར་བའོ། །
དེ་བཞིན་དུ་ཡང་གསུངས་པ། གང་ཕྱིར་ཐབས་ནི་འགྱུར་བ་ཉིད། །འཇིགས་པ་ཤེས་རབ་སྲིད་མཐར་བྱེད། །དེས་ན་རབ་འཇིགས་ཡོད་མ་ཡིན། །དེ་ཉིད་ལ་ནི་ཆགས་པ་མེད། །ལ་ལ་འཇིག་པས་འཇིག་པར་འགྱུར། །འཇིག་པའི་དངོས་མེད་ཟད་མེད་ཅེའོ། །འདི་དག་
ཐམས་ཅད་མེད་པས་དེ་མེད་པར་འགྱུར་བ་དང་། དེ་མེད་པས་ཐམས་ཅད་མེད་པར་འགྱུར་རོ། །དེ་བཞིན་དུ་ཡང་ཇི་ལྟར་གཙོ་བོ་དེ་ནི་ཇི་ལྟར་སེམས་ཀྱི་རྡོ་རྗེ་ཕྱི་རོལ་དུ་གྱུར་པ་དབང་པོའི་དོན་གྱི་རང་བཞིན་གཟུགས་ལ་སོགས་པ་སོ་སོར་སྣང་བས་སེམས་ཉིད་ཀྱི་ཕྱི་རོལ་དུ་སྣང་

བའོ། །ཇི་ལྟར། ལུས་ལ་ཡེ་ཤེས་ཆེན་པོ་གནས། །རྟོག་པ་ཐམས་ཅད་ཡང་དག་སྤངས། །དངོས་པོ་ཀུན་ལ་ཁྱབ་པ་པོ། །ལུས་གནས་ལུས་ལས་མ་སྐྱེས་པའོ། །ཇི་ལྟར། སེམས་སྤངས་ནས་ནི་ལུས་ཀྱིས་ནི། །གནས་པ་གཞན་དུ་མཐོང་མི་འགྱུར། །ལུས་
སྤངས་ནས་ནི་སེམས་ཀྱིས་ནི། །སྒེག་པ་ཙམ་དུ་མི་འགྱུར་ཏེ། །མཆོག་ཏུ་གནས་པ་དེ་ཉིད་དོ། །ཇི་ལྟར། འཇིག་རྟེན་ཁམས་ནི་གང་དུ་ཡང་། །སངས་རྒྱས་གཞན་དུ་རྙེད་མི་འགྱུར། །སེམས་ནི་རྫོགས་པའི་སངས་རྒྱས་ཉིད། །སངས་རྒྱས་གཞན་དུ་བསྟན་དུ་མེད། །
ཅེས་བྱ་བ་ལ་སོགས་པས་འདི་རེ་ཞིག་ངེས་སོ། །དེ་ཡང་དབྱེ་བ་ཙམ་སྟེ། འདི་ལྟར་སངས་རྒྱས་ཀྱི་སྲས་པོ་རྣམས་འཇུག་པའི་ཕྱིར་ཐམས་ཅད་ཕྱེ་བ་སྟེ། དོན་དམ་པ་ལ་འབྱེད་པ་པོ་དང་། དབྱེ་བ་དང་། དབྱེ་བར་བྱ་བ་ཉིད་ཡོད་པ་མ་ཡིན་ནོ། །ཇི་ལྟར་ན་སྒོམ་པ་པོ་
དང་། བསྒོམ་པ་དང་། བསྒོམ་པར་བྱ་བ་དེ་ཉིད་དུ་ཡང་བསྟན་ཏོ། །གང་བྱང་ཆུབ་ཀྱི་སེམས་ཆེན་པོ་དེ་ཉིད་ལ་གྲོལ་བ་རྣམས་དང་། གནས་རྣམས་འབྱུང་བ་དང་། དེ་ཉིད་ཡོངས་སུ་མྱ་ངན་ལས་འདས་པ་རྣམས་སོ། །དེའི་ཕྱིར་དང་པོའི་སངས་རྒྱས་མཆོག་ཏུ་བདེ་བ་ངེས་
པ་ཁོ་ན་དང་། རང་རང་རིག་པས་རང་རིག་པ་དང་། རང་རིག་པར་བྱ་བས། རང་རིག་པར་བྱ་བ་དང་། དེའི་རང་བཞིན་གྱིས་དེའི་རང་བཞིན་དང་། དེ་ཉིད་ཀྱི་གནས་ཀྱིས་དེའི་གནས་ཕྱག་རྒྱ་ཆེན་པོ་དང་བདག་ཉིད་ཅན་བདག་གིས་ཐོགས་པ་མེད་པའི་རྡོ་རྗེའི་རྣམ་པར་
ཤེས་ཏེ། བདག་དང་གཞན་དང་། གང་ཟག་དང་། བུམ་པ་དང་། གོས་དང་བཟའ་བ་དང་། བཏུང་བ་དང་། ཁྲུས་ལ་སོགས་པ་སྲིད་པའི་གཟུགས་ཀུན་དེ་དང་མཉམ་པར་བྱས་པ་ཇི་ལྟ་བ་དེ་ལྟར་འགྲོ་བ་དང་འོང་བ་ལ་སོགས་པའི་བྱ་བ་བྱེད་པ་ཡང་དང་ཡང་དུ་
རྣམ་པར་ཤེས་པ་ཅན་བསྐུལ་བ་དང་། བསྒོམ་པ་ཞེས་བྱ་བའི་དོན་ཏོ། །གང་ལ་དེ་ལ་ཞེས་བྱ་བ་ནི་གནས་ངེས་པའམ། གནས་མ་ངེས་པའོ། །ཇི་ལྟར་དེ་ལྟར་ཞེས་བྱ་བ་ནི་ལས་ཀྱི་ཕྱག་རྒྱས་སམ། གཅིག་པུས་སམ། །དེ་ལྟར་སློང་མོ་མ་ཡིན་པས་སོ། །འདིས་

ཅི་བསྟན་ཅེ་ན། གཅེར་བུའམ། གལ་ཏེ་གཅེར་བུ་མ་ཡིན་པར་ཇི་ལྟར་འདོད་པར་བྱ་བ་ཞེས་བྱ་བའི་དོན་ཏོ། །འདི་ལྟར་དེ་ལྟར་དེ་ཁོ་ན་ཉིད་པའི་རྣལ་འབྱོར་པ་ནི། བསྐལ་བ་བྱེ་བ་ཕྲག་བརྒྱས་ཀྱང་འགྲུབ་པར་མི་འགྱུར་རོ། །འདི་ལྟར། གང་ཕྱིར་ཡིད་ཀྱིས་མི་བསྒོམ་པར། །
འགྲོ་བ་ཐམས་ཅད་བསྒོམ་པར་བྱ། །ཐམས་ཅད་ཆོས་ནི་ཡོངས་ཤེས་ན། །བསྒོམ་པ་ཉིད་ནི་བསྒོམ་པ་མིན། །ཞེའོ། །དེའི་ཕྱིར། དམན་པ་འབྲིང་དང་མཆོག་རྣམས་དང་། །གཞན་དང་གང་རྣམས་དེར་རྣམས་ཀྱང་། །རོ་མཉམ་དེ་ཉིད་བསྒོམས་པ་ཡིས། །འདི་ཀུན་
མཉམ་པ་ཉིད་དུ་བལྟ། །ཞེའོ། །འདིས་ནི། ང་ལས་འགྲོ་བ་ཐམས་ཅད་འབྱུང་། །ང་ལས་གནས་གསུམ་པོ་ཡང་འབྱུང་། །ང་ཡིས་འདི་ཀུན་ཁྱབ་པ་སྟེ། །འགྲོ་བའི་རང་བཞིན་གཞན་མ་མཐོང་། །དེ་ལྟར་རྣལ་འབྱོར་པས་ཤེས་ནས། །ཤིན་ཏུ་མཉམ་གཞག་གང་གོམས་
པ། །བསོད་ནམས་ཆུང་བའི་མི་ཡིས་ཀྱང་། །དེ་ནི་འགྲུབ་པར་ཐེ་ཚོམ་མེད། །ཅེའོ། །དེའི་ཕྱིར་འབད་པས་དེ་ཁོ་ན་ཉིད་ཤེས་ནས་ཀཀྐོ་ལཱ་མུམྨུ་ཎི་ལྟེ་བར་གནས་པ་དང་། བོ་ལཱ་ཀོལླ་ཨེ་རཾ་ནི། ནོར་བུ་ཇི་ལྟར་ནུས་པ་མཆོག་ཏུ་དགའ་བའི་ཚུལ་གྱིས་བདེ་བ་རྣམ་པར་
བཟུང་སྟེ། གླུའི་དེ་ཁོ་ན་ཉིད་བསྒོམ་ཞིང་གནས་ཏེ་འགྱུར་བར་མི་བྱའོ། །བྱང་ཆུབ་ཀྱི་སེམས་ལྷུང་བར་གྱུར་ནས་གང་ལས་གྲུབ་པ་དང་། གང་ལས་རྫུ་འཕྲུལ་དང་། གང་ལས་བསྒོམ་པར་འགྱུར་ཞེའོ། །གླུའི་དེ་ཁོ་ན་ཉིད་ཅེས་བྱ་བ་སློབ་དཔོན་མཁས་པ་དཔལ་མཚོ་
སྐྱེས་ཀྱི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་རཏྣ་བཛྲ་དང་། དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།། ༄༅༅། །རྒྱ་གར་སྐད་དུ། བཛྲ་གཱི་ཏི་བྷ་ཥྱཾ་ནཱ་མ། བོད་སྐད་དུ། རྡོ་རྗེའི་གླུ་བཤད་པ་ཞེས་བྱ་བ། བླ་མ་དམ་པའི་
ཞབས་ལ་ཕྱག་འཚལ་ལོ། །རྣལ་འབྱོར་སྤྱོད་པ་དཔྱོད་ལ་སྙིང་པོའི་འབྲས་གསོལ་འཇིག་རྟེན་གསུམ་མགོན་མངའ་བདག་དང་། །གནས་དང་ཞིང་ལ་བཞུགས་པའི་ཡོན་ཏན་ཕུང་པོ་དཔའ་བོ་དཔའ་མོའི་དབང་ཕྱུག་མ། །རྡོ་རྗེ་སློབ་དཔོན་བླ་ཆེན་ཡོན་ཏན་གཏེར་

གྱུར་འཁོར་བའི་ཕ་རོལ་སོན་པ་ལ། །ཕྱག་འཚལ་གླུ་ཡི་ཁྱད་པར་སྙེད་དཀར་བརྗོད་པ་བདག་གི་དོན་ཕྱིར་བྲི་བར་བྱ། །ཀོལླ་ཨ་རེཊྛྀ་ཨ་བོ་ལཱ་ཞེས་བྱ་བ་ནི་གནས་དང་ཉེ་བའི་གནས་མ་ལུས་པར་བསྟན་པའོ། །མུམྨུ་ཎི་རེ་ཀཀྐོ་ལཱ་ཞེས་བྱ་བ་ནི་ཞིང་དང་ཉེ་
བའི་ཞིང་མ་ལུས་པར་བསྟན་པའོ། །གྷ་ཎེ་ཀྲྀ་པི་ཊཱ་ཧོ་བཱཛྫ་ཨི། ཀཱ་རུ་ཎེ་ཀི་ཨ་ཨི་ཎ་རོ་ལཱ་ཞེས་བྱ་བ་ནི་ཙྪནྡོ་ཧ་མ་ལུས་པར་བསྟན་པའོ། །ཏ་ཧིཾ་བ་ལ་ཁཱཛྫ་ཨི། གཱ་ཌྷེཾ་མ་ཨ་ན་བཱཛྫི་ཨ་ཨི་ཞེས་བྱ་བ་ནི་ཉེ་བའི་ཙྪནྡོ་ཧ་མ་ལུས་པར་བསྟན་པའོ། །ཧ་ལེ་ཀ་ལིཉྫ་ར་པ་ནི་
ཨ་ཨི། དུ་དྷུ་ར་བཱཛྫི་ཨ་ཨི་ཞེས་བྱ་བ་ནི་འདུ་བ་མ་ལུས་པར་བསྟན་པའོ། །ཙ་ཨུ་ས་མ་ཀཙྪུ་རི་སིཧླཱ། ཀཔྤཱུ་ར་ལཱ་ཨི་ཨ་ཨི་ཞེས་བྱ་བ་ནི་ཉེ་བའི་འདུ་བ་མ་ལུས་པར་བསྟན་པའོ། །མ་ལཱ་ཨིནྡྷ་ནཾ་ཤཱ་ལིཾ་ཛ་ཏ་ཧིཾ་བྷ་རུ་ཁ་ཨི་ཨ་ཨི་ཞེས་བྱ་བ་ནི་དུར་ཁྲོད་མ་ལུས་པར་བསྟན་
པའོ། །ནི་རཾ་ཤུ་ཨངྒ་ཙ་ཌ་ཝི་ཏ་ཧིཾ་ཛ་སཱ་ར་བ་པ་ཎི་ཨ་ཨི་ཞེས་བྱ་བ་ནི་ཉེ་བའི་དུར་ཁྲོད་མ་ལུས་པར་བསྟན་པའོ། །ཕྲེཾ་ཁ་ཎ་ཁེ་ཊ་ཀ་རནྟེ་ཤུདྡྷཱ་ཤུདྡྷ་ཎྞ་མ་ཎི་ཨ། ཨི་ཞེས་བྱ་བ་ནི་འཐུང་གཅོད་མ་ལུས་པར་བསྟན་པའོ། །མ་ལ་ཨཱཾ་ཙེ་ཀུནྡུ་རུ་བ་ཌ་ཨི་ཌིཎྜི་མ་ཏ་ཧིཎྞ་བཱཛྫ་ཨ་
ཨི་ཞེས་བྱ་བ་ནི་ཉེ་བའི་འཐུང་གཅོད་མ་ལུས་པར་བསྟན་པའོ། །འདི་ནི་གླུའི་རིམ་པས་གནས་ལ་སོགས་པ་བསྡུས་པའོ། །ཕྱོགས་གཞན་ཡང་ཉེ་བར་བཤད་པ་ཡོད་དེ། ཀོལླ་ཨི་རེཊྛེ་ཨ་བོ་ལཱ་ཞེས་བྱ་བ་ལ། ཀོ་ཞེས་བྱ་བ་ནི་སྐུའི་རྡོ་རྗེའོ། །ལ་ཞེས་བྱ་བ་ནི་གསུང་
གི་རྡོ་རྗེའོ། །རེ་ཞེས་བྱ་བ་ནི་ཐུགས་ཀྱི་རྡོ་རྗེའོ། །ཊྛི་ཨ་ཞེས་བྱ་བ་ནི་བོ་ལར་གནས་པའོ། །མུམྨུ་ཎི་རེ་ཀཀྐོ་ལ་ཞེས་བྱ་བ་མུ་ཞེས་བྱ་བ་ནི་རོ་མའོ། །མྨུ་ཞེས་བྱ་བ་ནི་བརྐྱང་མའོ། །ཎི་ཞེས་བྱ་བ་ནི་ཀུན་འདར་མའོ། །རེ་ཞེས་བྱ་བ་ནི་རྩ་གསུམ་གསལ་བར་བྱེད་
པའོ། །ཀཀྐོ་ལ་ནི་དེ་རྣམས་ཀྱི་གནས་པའི་གནས་སོ། །གྷ་ཎེ་ཀྲྀ་པིཊ་ཧོ་བཱཛྫ་ཨི་ཞེས་བྱ་བ་ནི་རྩ་གསུམ་པོ་རྣམས་སུ་རྡོ་རྗེ་གསུམ་མཉམ་པར་འཇུག་པའོ། །ཀཱ་རུ་ཎེ་ཀི་ཨ་ཨི་ན་རོ་ལཱ་ཞེས་བྱ་བ་ནི་རྡོ་རྗེ་གསུམ་མཉམ་པར་གཞུག་པ་ལས་ཀུན་འདར་གྱི་རྩ་ལས་

བྱང་ཆུབ་ཀྱི་སེམས་འབྱུང་བའོ། །ཏ་ཧིཾ་བ་ལ་ཁཱཛྫ་ཨི། གཱ་ཌྷེཾ་མ་ཨ་ཎ་པིཛྫ་ཨ་ཨི་ཞེས་བྱ་བ་ནི་དེར་ནི་བྱང་ཆུབ་ཀྱི་སེམས་འབྱུང་བ་ན་བ་ལ་བཟའ་བ་དང་། མ་ད་ནཾ་ཡང་བཏུང་བ་སྟེ། ཤིན་ཏུ་འབྱུང་བ་ནི་འདི་ནི་བསྡམས་པའི་དོན་ཏོ། །ཧ་ལེ་ཀཱ་ལིཉྫ་ར་པ་ཎི་ཨ་ཨི།
དུཾ་དྷུ་ར་བཛྫ་ཨ་ཨི། ཞེས་བྱ་བ་ལ་ཧ་ལེ་ཞེས་བྱ་བ་ལ་བོད་པའོ། །ཀཱ་ལིཉྫ་ར་པ་ནི་སྐལ་བ་དང་ལྡན་པ་སྟེ། དེ་ཉིད་གཞུག་པར་བྱའོ། །དུཾ་དྷུ་ར་ནི་སྐལ་བ་དང་མི་ལྡན་པ་སྟེ། དེ་ཉིད་སྤང་བར་བྱ་སྟེ། དུས་དེར་རོ། །ཙ་ཨུ་ས་མ་ཀ་ཙྪུ་རི་སིཧླཱ། ཀཔྤཱུ་ར་ལཱ་ཨི་ཨ་ཨི། ཞེས་བྱ་བ་
ནི་བཤང་བ་དང་གཅི་བ་དང་མེ་ཏོག་དང་ས་བོན་བཞིའི་རྫས་ཀྱིས་དྲིལ་བ་དང་། བཟའ་བར་ཡང་བྱེད་དེ། དེར་ནི་དུས་ལ་རང་གི་སེམས་རངས་པའི་དོན་དང་བདག་ཉིད་ཀྱི་རྣམ་པར་རྟོག་པ་གཞོམ་པའི་དོན་ཏེ། གོ་ཆ་དམ་པ་ཡིན་ནོ། །མ་ལ་ཨིནྡྷ་ན་ཤཱ་ལིཉྫ་ཏ་ཧིཾ་བྷ་རུ་ཁཱ་
ཨི་ཨ་ཨི་ཞེས་བྱ་བ་ལ་མཱ་ལ་ཨིནྡྷ་ནཾ་ནི་ཚོད་མའོ། །ཤཱ་ལིཾ་ཛྫ་ཞེས་བྱ་བ་ནི་ཤ་ཆེན་ནོ། །ཏ་ཧིཾ་ཞེས་བྱ་བ་ནི་དུས་དེར་རོ། །བྷ་རུ་ཁཱ་ཨི་ཨ་ཨི་ཞེས་བྱ་བ་ནི་རིམ་པར་སྦྱར་བར་ཤེས་ནས་ཟ་བའོ། །ཕྲེཾ་ཁ་ཎ་ཁེ་ཊ་ཀ་རནྟེ་ཤུདྡྷ་ཨ་ཤུདྡྷ་ཎ་མུ་ཎི་ཨ་ཨི་ཞེས་བྱ་བ་ལ། ཕྲེང་ཞེས་
བྱ་བ་ལ་གནས་ལས་སྐྱེས་པ་དང་། ཞིང་ལས་སྐྱེས་པ་དང་། མིང་ལས་སྐྱེས་པ་རྣམས་ཀྱི་དཔའ་བོ་དང་དཔའ་མོའི་དབང་ཕྱུག་མ་དེ་རྣམས་ཀྱིས་འདུས་པའོ། །ཁེ་ཊ་ཀ་རནྟེ་ཞེས་བྱ་བ་ནི་དཔའ་བོ་དང་དཔའ་མོའི་དབང་ཕྱུག་མ་དེ་རྣམས་ཀྱི་རང་གི་འདོད་པའི་ལྷའི་རྣལ་འབྱོར་
གཅིག་པའི་རང་བཞིན་ནོ། །ཤུདྡྷ་ཨ་ཤུདྡྷ་ཎན་མུ་ཎི་ཨ་ཨི་ཞེས་བྱ་བ་ནི་དུས་དེར་བགྲོད་པ་དང་། མི་བགྲོད་པ་དང་། བཟའ་བ་དང་མི་བཟའ་བ་དང་བཏུང་བ་དང་མི་བཏུང་བར་མི་བརྟག་སྟེ། གནས་དེར་གང་ཁ་ཅིག་གདོལ་བ་ལ་སོགས་པ་དང་། མཐའ་འཁོབ་ཏུ་
སྐྱེས་པ་དང་། རིགས་ལས་སྐྱེས་པ་ངན་པའི་བུད་མེད་དམ། སྐྱེས་པ་དེ་རྣམས་ཐམས་ཅད་རང་འདོད་པའི་ལྷའི་རྣལ་འབྱོར་གྱིས་མཆོད་པར་བྱ་སྟེ། འདིའི་དངོས་པོ་སྨད་པར་མི་བྱའོ། །ནི་རཱཾ་ཤུ་ཨངྒེ་ཙ་ཌཱ་བི་ཨ་ཨི། ཏ་ཧིཾ་ཛ་སཱ་ར་ཝཱ་པ་ནི་ཨ་ཨི་ཞེས་བྱ་བ་ནི་སྒྲུབ་

པ་པོས་རང་བཞིན་མེད་པས་རྣམ་པར་རྟོག་པ་ཐམས་ཅད་དང་ཡིད་གཉིས་མེད་པས་བདག་ཉིད་དཔལ་ཧེ་རུ་ཀའི་ང་རྒྱལ་བྱས་ཏེ། མཆོད་པ་ཆེན་པོའི་དོན་གྱི་ཕྱིར་རང་གི་སེམས་རངས་བས་དུར་ཁྲོད་དམ་གཡུལ་གྱི་ས་ལས་སྐྱོན་མེད་པའི་མི་བླངས་ཏེ། དཔའ་བོ་
དང་དཔའ་མོའི་དབང་ཕྱུག་མ་ལ་ཕྱག་འཚལ་ཏེ། འདུས་པ་དེ་ལ་དབུལ་བར་བྱའོ། །མ་ལ་ཨ་ཛེ་ཀུནྡུ་རུ་བ་ཊ་ཨི། ཌིཎྜི་མ་ཏ་ཧིནྣ་བཱཛྫི་ཨ་ཨི་ཞེས་བྱ་བ་ནི་དེ་ལ་འདུས་པ་ཆེན་པོའི་དུས་སུ་དཔའ་བོ་དང་དཔའ་མོའི་དབང་ཕྱུག་མས་བཱ་ལ་ཟོས་པ་དང་མ་ད་ན་འཐུངས་
པས་ཡིད་དགའ་བ་རྣམས་སྒྲུབ་པ་པོ་ལ་ཤིན་ཏུ་འདོད་ཅིང་སྙིང་ལ་སྦྱར་བར་འདོད་པས། བསོད་ནམས་བྱས་པའི་སྒྲུབ་པ་པོ་རྗེས་སུ་གཟུང་བའི་རྒྱུས་རངས་པའི་བསམ་པས་གདོལ་བ་ལ་སོགས་པའི་རིགས་ལས་སྐྱེས་པའི་ཤིན་ཏུ་ངན་པ་སྐྱུག་བྲོ་བའི་ལུས་དེ་ཉིད་
སྒྲུབ་པ་པོས་རངས་པ་ཆེན་པོ་དང་། བསམ་པ་དྲི་མ་མེད་པས་དཔལ་ཧེ་རུ་ཀའི་ང་རྒྱལ་བྱས་པས་དམ་ཚིག་བདག་མེད་མའི་གཟུགས་སུ་རབ་ཏུ་བརྟགས་པ་མཆོད་པར་བྱ་ཞིང་སྤང་བར་མི་བྱའོ། །འདི་ནི་གླུའི་མན་ངག་གི་དོན་ཉུང་ངུའོ། །ཀོལླ་ཨི་རེཊྛི་ཨ་བོ་ལཱ།
མུམྨུ་ཎི་རེ་ཀཀྐོ་ལཱ་ཞེས་བྱ་བ་ལ་ཀོལླ་ཨི་རེ་ཞེས་བྱ་བ་ནི་ཐབས་སོ། །གནས་པ་ཞེས་བྱ་བ་ནི་འདིའོ། །དེ་ལྟར་ཐབས་ནི་ཀོ་ལཱ་ཞེས་བྱ་བ་བརྗོད་དོ། །མུམྨུ་ཎི་ཞེས་ཤེས་རབ་ཀྱི་རང་བཞིན་གྱིས་ཤེས་རབ་ཀྱི་ཆོས་ཀྱི་འབྱུང་གནས་ཀཀྐོ་ལ་ཞེས་བརྗོད་དོ། །ཡང་ན་ཀོ་
ཞེས་བྱ་བ་ནི་ཀཔྤཱུར་རོ། །ལླ་ཞེས་བྱ་བ་ནི་ཐིམ་པའོ། །ཀཔྤཱུ་ར་དེའི་ཐིམ་པ་ནི་མ་ལ་བར་བརྗོད་དོ། །ཨོ་ཞེས་བྱ་བ་ནི་ཐབས་ཀྱི་ཚིག་སྟེ། རྩ་གསུམ་བཅུ་གཉིས་ཀྱི་རང་བཞིན་ནོ། །གི་རི་ཞེས་བྱ་བ་མགོ་བོའི་གནས་སོ། །མགོ་བོ་དེ་ཉིད་ན་ཐོད་པ་བརྒྱད་དང་ལྡན་པའོ། །
རི་ཡང་རྭ་བརྒྱད་ཀྱིས་ཉེ་བར་བརྒྱན་པའོ། །རིའང་སྣ་ཚོགས་དུ་མའི་སུ་ལས་རྒྱུན་མི་འཆད་པར་འཛག་གོ། །མགོ་བོ་དེ་ཉིད་རྩ་སུམ་ཅུ་རྩ་གཉིས་རྣམས་ཉིན་མཚན་དུ་རྒྱུན་མི་འཆད་པར་འཛག་གོ། །རི་ནི་ཕྱི་རོལ་དང་བཅས་པ་རིན་པོ་ཆེ་སྣ་ཚོགས་ཀྱིས་གང་བའོ། །མགོ་

བོ་དེ་ཉིད་བྱང་ཆུབ་ཀྱི་སེམས་ལ་སོགས་པ་རིན་པོ་ཆེ་རྣམ་པ་སྣ་ཚོགས་པས་བརྒྱན་པའོ། །འདི་ཉིད་ཀྱི་ཕྱིར་ནི་ལྷ་ཐམས་ཅད་ཀྱི་གནས་སོ། །མགོ་བོ་ཡང་ལྷའི་གནས་སོ། །ལུས་ལ་ཡང་དག་པར་ཡོད་པའི་དོན་འདི་ནི་ལྷ་ཞེས་བརྗོད་པ་སྟེ། འདི་ཉིད་ཀྱི་ཕྱིར་ལྷ་ཐམས་ཅད་ཀྱི་
བདག་ཉིད་རང་བཞིན་ནི་བྱང་ཆུབ་ཀྱི་སེམས་སོ། །རིགས་པ་འདིས་མགོ་བོ་གི་རི་ཞེས་བྱ་བར་བརྗོད་དོ། །བ་ཞེས་བྱ་བ་ནི་རྡོ་རྗེའོ། །ཨོ་ཞེས་བྱ་བ་ནི་རྡོ་རྗེ་འདྲེན་པའོ། །ལ་ཞེས་བྱ་བ་ནི་རྒྱན་འབྱུང་བའོ། །གནས་པ་ཞེས་བྱ་བ་ནི་རྡོ་རྗེའི་ལྟེ་བར་གནས་པའོ། །ཨ་ཞེས་བྱ་
བ་ནི་མཆོག་ཏུ་དགའ་བའི་རང་བཞིན་ནོ། །མུ་ཞེས་བྱ་བ་ནི་ཡན་ལག་ཐམས་ཅད་དོ། །མྨུ་ཞེས་བྱ་བ་ནི་པདྨ་འདབ་མ་བརྒྱད་ཟེ་བ་དང་བཅས་པའོ། །ཎ་ཞེས་བྱ་བ་ནི་པདྨའི་ལྟེ་བ་དེ་ཉིད་ལ་ཀུན་འདར་གྱི་རྩ་ཤིན་ཏུ་མི་དམིགས་པའི་གཟུགས་ཅན་མའོ། །རོ་ཞེས་བྱ་བ་
ནི་དེའི་གསལ་བ་དང་འབྱེད་པའོ། །ཀ་ཞེས་བྱ་བ་ནི་བདེ་བའོ། །ཀྐོ་ཞེས་བྱ་བ་ནི་འདོད་པའོ། །ལ་ཞེས་བྱ་བ་ནི་རྒྱན་ཁུ་བར་གྱུར་པ་ཕྱུང་བའོ། །ཨ་ཞེས་བྱ་བ་ནི་ནམ་མཁའི་རང་བཞིན་ནོ། །གྷ་ཎེ་ཀྲྀ་པི་ཊ་ཧོ་བཱཛྫ་ཨི་ཞེས་བྱ་བ་ནི་གྷ་ཎ་ཞེས་བྱ་བ་རྡོ་རྗེའོ། །ཀྲྀ་པི་ཊ་
ཞེས་བྱ་བ་པདྨའོ། །ཧོ་ཞེས་བྱ་བ་ནི་ཆ་རྡོ་རྗེ་དང་ཆུ་སྐྱེས་ཀྱི་དེ་ཁོ་ནའོ། །བཱཛྫ་ཨི་ཞེས་བྱ་བ་ནི་ཀུནྡུ་རུ་ཤིན་ཏུ་མངོན་པར་ཆགས་པས་རྡོ་རྗེ་དང་པདྨ་རྡེབས་པའི་སྒྲའོ། །ཀཱ་རུ་ཎེ་ཀི་ཨ་ཨི་ན་རོ་ལཱ་ཞེས་བྱ་བ་ནི་ཀུནྡུ་རུ་ནི་མཆོག་ཏུ་དགའ་བ་སྟེ། དེ་ཉིད་ཀྱི་ཀུནྡུ་རུའི་དུས་སུ་
མཆོག་ཏུ་དགའ་བ་སྐྱེ་བའི་དུས་སུ་སེན་མོས་འདེབས་པ་དང་། སོས་བཏབ་པའི་རྨའོ། །གཡུལ་དུ་ཧ་དང་སི་ལ་སོགས་པ་གང་བྱས་པ་དེ་ཉིད་རོལ་ཞེས་བརྗོད་དོ། །ཏ་ཧིཾ་བ་ལ་ཁཱཛྫ་ཨཱི། གཱ་ཌྷེཾ་མ་ཨ་ཎ་བཱཛྫི་ཨ་ཨི་ཞེས་བྱ་བ་ལ་ཏ་ཧིཾ་ནི་གཡུལ་གྱི་དུས་དེར་མ་མཆུ་བཟའ་
བར་བྱ་བ་དང་། བདེ་བ་ལ་ཤིན་ཏུ་མངོན་པར་ཆགས་པས་འོའི་རྣམ་པར་དགོད་པའི་སྦྱོར་བས་མ་མཆུའི་སྦྱོར་བས་ཡང་དག་པར་འཛག་པའི་བཏུང་བར་བྱ་བ་སྟེ། སྦྱོར་བ་འདིས་བཱ་ལ་བཟའ་བ་དང་མ་ད་ན་བཏུང་བ་ཞེས་བྱ་བ་ནི་དངོས་པོའོ། །ཧ་ལེ་ཀཱ་ལིཉྫ་ར་པ་ནི་ཨ་

ཨི། དུཾ་དྷུ་ར་བཱཛྫ་ཨ་ཨི་ཞེས་བྱ་བ་ལ་ཧ་ལེ་ཞེས་བྱ་བ་ནི་བོད་པའོ། །ཀཱ་ལིཉྫ་ར་ཞེས་བྱ་བ་ནི་སྐལ་བ་དང་ལྡན་པའོ། །པ་ཎི་ཨ་ཨི་ཞེས་བྱ་བ་ནི་དེར་སྐལ་བ་བཟང་པོ་གཞུག་པར་བྱའོ། །ཡང་ན་ཧ་ཞེས་བྱ་བ་ནི་རྡོ་རྗེའོ། །ལ་ཞེས་བྱ་བ་ནི་རྩེ་བ་སྟེ་ཀུནྡུ་རུ་བྱེད་
པའོ། །ཨི་ཞེས་བྱ་བ་ནི་པདྨའོ། །ཡང་ཀཱ་ལིཉྫ་ར་ཞེས་བྱ་བ་ནི་སྒྲུབ་པ་པོ་ཡང་པི་ཙུའི་ང་རྒྱལ་གྱིས་རྣལ་འབྱོར་དང་ལྡན་པ་དང་། རིག་མ་བདག་མེད་མའི་གཟུགས་ཅན་མར་རྫོགས་ནས་ཀུནྡུ་རུའི་དུས་སུ་སྒྲུབ་པ་པོའི་དབང་པོས་སྙིང་གར་ཟླ་བའི་དཀྱིལ་འཁོར་དུ་ཧཱུཾ་
གི་ས་བོན་བསམ་པར་བྱའོ། །བསམས་ནས་འོད་ཟེར་ཁ་དོག་ནག་པོ་ལྕགས་ཀྱུའི་རྣམ་པ་ཕྱུང་སྟེ། ནམ་མཁའི་དཀྱིལ་དུ་གཤེགས་པའི་སངས་རྒྱས་དཔལ་ཧེ་རུ་ཀ་ལ་སོགས་པ་གཙོ་བོ་རྣམས་སྤྱན་དྲངས་ནས། རང་གི་ལུས་ལ་བཅུག་སྟེ། བྱང་ཆུབ་ཀྱི་སེམས་ནི་
རྣམ་པར་སྤྲོས་ནས་རྡོ་རྗེའི་ལམ་གྱིས་རིག་མའི་ཆུ་སྐྱེས་སུ་བསམ་པར་བྱའོ། །གཉིས་གཉིས་མཉམ་པར་སྦྱོར་བའི་དག་པ་ལ་སེམས་རངས་པ་བྱུང་ན་ལྷའི་རྣམ་པར་སྤྲོ་ཞིང་བདེ་བའི་གཟུགས་ཀྱིས་བསྡུ་བར་བྱའོ། །ཀཱ་ལིཉྫ་ར་གཞུག་པ་ཞེས་བྱ་བའི་དོན་ཏོ། །
ཡང་ན་ཀ་ཞེས་བྱ་བ་ནི་ག་བུར་རོ། །ལི་ཞེས་བྱ་བ་ནི་ལེགས་པར་བྱེད་པས་རྡོ་རྗེ་དང་ཆུ་སྐྱེས་ཀྱི་སྦྱོར་བའོ། །ཛ་ཞེས་བྱ་བ་ནི་རྡོ་རྗེ་དང་ཆུ་སྐྱེས་སྦྱོར་བ་དེས་སྐྱེད་པར་བྱེད་པ་དང་། འབྱིན་པར་བྱེད་པའོ། །ཡང་ན་བྱང་ཆུབ་ཀྱི་སེམས་དེ་ཉིད་ཀྱིས་ཁམས་གསུམ་བསྐྱེད་
པ་དང་ཇི་སྲིད་དུ་གནས་པ་དང་། གཡོ་བ་དང་སངས་རྒྱས་ཐམས་ཅད་དང་། བྱང་ཆུབ་སེམས་དཔའ་རྣམས་སྐྱེད་པར་བྱེད་པ་ནི་ཛ་ཞེས་བྱའོ། །རེ་ཕ་ཞེས་བྱ་བ་ནི་འདོད་ཆགས་ཆེན་པོའི་རྗེས་སུ་ཆགས་པ་ལས། སངས་རྒྱས་ཐམས་ཅད་དགྱེས་པར་བྱེད་དེ། གང་གི་
ཕྱིར་འདོད་ཆགས་ཆེན་པོ་ལས་བྱུང་བ་དེའི་ཕྱིར་ཀཱ་ལིཉྫ་རར་བརྗོད་དོ། །སྦྱོར་བ་འདིས་མཆོག་ཏུ་དགའ་བ་མཛེས་པ་ལས་དེ་མ་ཐག་ཏུ་འཁོར་བའི་བྱང་ཆུབ་ཀྱི་སེམས་བདེ་བ་ཆེན་པོའི་གཟུགས་ཅན་རིགས་ཀྱི་བདག་པོའི་ཁར་གསལ་བར་མི་གནས་པ་དང་མ་

བྱུང་བའི་དུས་ན་ཇི་སྲིད་དུ་འཇིག་རྟེན་གསུམ་དང་ཁམས་གསུམ་དང་། གནས་པ་དང་གཡོ་བའི་རྣམ་པའི་ཆོས་ཐམས་ཅད་རྟག་ཏུ་རོ་གཅིག་པའི་རང་བཞིན་གྱིས་དུས་དེར་ཞུགས་པ་དང་ནང་དུ་ཕྱིན་པ་དང་། རང་བཞིན་གང་ཞིག་ཐིམ་པར་གྱུར་པ་ཞེས་བྱ་བ་དེ་
ཉིད་ཀཱ་ལིཉྫ་ར་གཞུག་པ་ཞེས་བརྗོད་དོ། །དུ་དྷུ་ར་ཞེས་བྱ་བའི་དུ་ཞེས་བྱ་བ་ནི་གཏི་མུག་གོ། །དྷུ་ཞེས་བྱ་བ་ནི་ཞེ་སྡང་ངོ་། །ར་ཞེས་བྱ་བ་ནི་འདོད་ཆགས་སོ། །འདོད་ཆགས་དང་ཞེ་སྡང་དང་གཏི་མུག་གཙོ་བོ་རྣམས་དང་། ཉོན་མོངས་པ་མ་ལུས་པར་བགྲང་
བ་ཡོངས་སུ་གསལ་ཞིང་སྤང་བ་ནི་བཏང་སྙོམས་ཀྱི་དངོས་པོ་ཞེས་བྱའོ། །ཀ་ནི་འདོད་པ་ཞེས་བརྗོད་དོ། །ཐུ་ནི་འདོད་པའི་གཞིར་བརྗོད་དོ། །ར་ནི་ཅུང་ཟད་འཚོད་པ་སྟེ། དགའ་བ་ནི་ཀ་ཐུ་རིར་བརྗོད་དོ། །སི་ཎཾ་བདེ་བར་བརྗོད་དོ། །ཧླཱ་ནི་དགའ་བར་བྱེད་པ་པོ་
སྟེ། སེམས་ཀྱི་རངས་པས་ཆེན་པོ་ནི་དམ་པ་ཞེས་བརྗོད་དོ། །ཙ་ནི་བྷ་ག་ཞེས་བརྗོད་དོ། །ཨུ་ནི་གསལ་བར་བྱེད་པར་བརྗོད་དོ། །ས་ནི་གདོང་མཉམ་པོར་ཤེས་པར་བྱའོ། །མ་ནི་འདུ་བའི་བདག་ཉིད་དོ། །ཀ་ནི་ཁུ་བའི་གཟུགས་སོ། །པྤཱུ་ནི་པདྨ་སྐྱེས་ཞེས་
བརྗོད། །ར་ནི་པདྨར་དགའ་བ་སྟེ། །ཀཔྤཱུ་ར་ནི་དགའ་བྲལ་ཞེས་བརྗོད་དོ། །ཀཱ་ལིཉྫ་རར་གཞུག་པའི་དུས་དེར་དོན་དམ་པ་བྱང་ཆུབ་ཀྱི་སེམས་ཀྱི་རང་བཞིན་འབྱུང་བ་དགའ་བ་བཞིའི་རང་བཞིན་གྱིས་གང་བསྟན་གཏད་པ་དམ་ཚིག་གཞིའི་རྩེ་བརྗོད་པ་དེ་བསྟན་ཏོ། །མ་
ལ་ཨིནྡྷ་ནཾ་ཤཱ་ལིཾ་ཛ། ཏ་ཧིཾ་བྷ་རུ་ཁ་ཨུ་ཨ་ཨི་ཞེས་བྱ་བ་ལ་མ་ཞེས་བྱ་བ་ནི་མགོ་བོའོ། །ལ་ཞེས་བྱ་བ་ནི་བཅོམ་པའི་གནས་སོ། །ཨིནྡྷ་ཎཾ་ཞེས་བྱ་བ་ནི་གསལ་བར་བྱེད་པའོ། །ཤུ་ནི་ཞེས་བྱ་བ་ནི་བདེ་བ་སྟེ། བྱང་ཆུབ་སེམས་སོ། །ལིཾ་ཞེས་བྱ་བ་ནི་འཛག་པའོ། །ཏ་ཧིཾ་
ཞེས་བྱ་བ་ནི་སྐད་ཅིག་བཞིའི་དུས་དེར་རོ། །བྷ་རུ་ཞེས་བྱ་བ་ནི་རྒྱུན་དེ་ཉིད་མཚན་དུའོ། །ཁཱ་ཨི་ཨ་ཨི་ཞེས་བྱ་བ་ནི་མ་ཆད་པར་བདེ་བ་མྱང་བ་དམིགས་པའོ། །ཡང་ན་དུས་རེར་བྱང་ཆུབ་ཀྱི་སེམས་རྣམ་པར་བོར་བ་དེ་ཉིད་བཟའ་བར་བྱ་བ་དང་། ཡོངས་སུ་

སྤང་བར་མི་བྱ་བ་ཞེས་བྱ་བའི་དངོས་པོའོ། །པ་ཞེས་བྱ་བ་ནི་པདྨ་སྙིང་པོ་དང་། ཟེ་བར་ལྡན་པའོ། །ཨེ་ཞེས་བྱ་བ་ནི་ཨེའི་ཆ་བྱད་དོ། །ར་ཞེས་བྱ་བ་ནི་རྡོ་རྗེ་རྩེ་གསུམ་པའི་ཆ་བྱད་དེ་པདྨ་གསལ་བར་བྱེད་པའོ། །ཁ་ཞེས་བྱ་བ་ནི་མཁའ་འགྲོའི་
གདོང་ཕྱེ་བ་སྟེ་ཀུན་འདར་གྱི་རྩ་ཕྱེ་བ་ཞེས་བྱ་བའི་དངོས་པོའོ། །ཎ་ཞེས་བྱ་བ་ནི་བྱང་ཆུབ་ཀྱི་སེམས་ཀྱི་ཐིག་ལེའི་རང་བཞིན་བདེ་བ་རྡོ་རྗེ་དང་པདྨའི་རྩེ་མོར་གསལ་བར་གནས་པའོ། །ཁེ་ཊ་ཀ་རནྟེ་ཞེས་བྱ་བ་ནི་རྡོ་རྗེ་དང་ཆུ་སྐྱེས་གཉིས་ཀྱིས་གཉིས་སྦྱོར་བས་ཐིག་ལེ་
གཉིས་འདུ་བ་གཉིས་མེད་པར་བྱེད་པ་ཞེས་བྱ་བའི་དངོས་པོའོ། །ཤུདྡྷཱ་ཤུདྡྷ་ན་མུ་ཎི་ཨི་ཞེས་བྱ་བ་ནི་ཐིག་ལེ་གཉིས་གཉིས་སུ་མེད་པར་འགྱུར་བའི་བདེ་བ་བཟང་པོའི་དུས་དེར་དངོས་པོ་དང་དངོས་པོ་མེད་པ་དང་། བདག་དང་བདག་གི་དང་གཟུང་བ་དང་འཛིན་པ་སྟེ།
མ་ནི་ཨ་ཨི་ཞེས་བྱ་བ་ནི་མི་འདོད་དོ་ཞེས་བྱ་བའི་དངོས་པོའོ། །ནི་རཱཾ་ཤུ་ཨཾ་གེ་ཙ་ཌཱ་པི་ཨ་ཨི་ཞེས་བྱ་བ་ལ་ནི་རཱཾ་ཤུ་ཞེས་བྱ་བ་ནི་སངས་རྒྱས་ལྔའི་རང་བཞིན་གྱི་ཕྱག་རྒྱ་སྟེ། རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་དང་། ཨ་རོ་ལྀ་ཀ་དང་།
དོན་ཡོད་ཀྱི་མཐར་ཐུག་པའོ། །ཨངྒ་ཙ་ཌ་བི་ཞེས་བྱ་བ་ནི་སངས་རྒྱས་ཀྱི་གཟུགས་འདིས་ཕུང་པོ་ལྔའི་ང་རྒྱལ་བྱའོ། །ཏ་ཧིཾ་ཞེས་བྱ་བ་ནི་གཉིས་གཉིས་འཁྱུད་པའི་དུས་དེར་རོ། །ཛ་ཞེས་བྱ་བ་ནི་ཇི་ཙམ་གནས་པ་དང་གཡོ་བའི་ཆོས་ཐམས་ཅད་དོ། །ས་ཞེས་
བྱ་བ་ནི་ལྷན་ཅིག་སྐྱེས་པའི་དགའ་བའོ། །རྭ་ཞེས་བྱ་བ་ནི་གསལ་བའོ། །པ་ཞེས་བྱ་བ་ནི་བག་ཆགས་གཉིས་ཀྱིས་ཟིན་པའི་སེམས་ཀྱི་འཁོར་བ་རྣམས་སོ། །དེ་ནི་ལྷན་ཅིག་སྐྱེས་པའི་དགའ་བས་ཡང་དག་པར་སྦྱངས་པ་གཡོ་བ་དང་གནས་པ་ཐམས་ཅད་ཀྱི་
རང་བཞིན་གཅིག་ཏུ་འབྱུང་བའི་སྦྱོར་བས་བཏང་བའི་སྒོམ་པར་བྱེད་པ་གང་ཞིག་གི་རང་བཞིན་དེ་གཞུག་པ་ཞེས་བྱ་བའི་དངོས་པོའོ། །མ་ལ་ཨ་ཛེ་ཀུནྡུ་རུ་བ་ཊཱ་ཨི། ཌིཎྜི་མ་ཏ་ཧིཾ་ནཾ་བཱཛྫ་ཨ་ཨི་ཞེས་བྱ་བ་ལ། མ་ལ་ཨ་ཛེ་ཞེས་བྱ་བ་ནི་དཔའ་བོ་དང་དཔའ་མོའི་

དབང་ཕྱུག་མ་ཐམས་ཅད་འདུ་བའོ། །དཔའ་བོ་ཐམས་ཅད་ཀྱི་སྒྲས་ནི་རྟག་པ་ལ་སོགས་པ་འཁོར་ལོས་སྒྱུར་བ་དྲུག་གོ། །དཔའ་མོའི་དབང་ཕྱུག་མ་ཐམས་ཅད་ཀྱི་སྒྲས་ནི་གཏི་མུག་རྡོ་རྗེ་མ་ལ་སོགས་པའི་འཁོར་ལོས་སྒྱུར་མ་དྲུག་གོ། །ཇི་སྲིད་དུ་རྡུལ་ཕྲ་རབ་
དང་མཉམ་པའི་དཔའ་བོ་དང་དཔའ་མོའི་དབང་ཕྱུག་མ་དེའི་བདག་ཉིད་ལས་སྐྱེས་པ་དཔའ་བོ་དེ་རྣམས་ཐམས་ཅད་སྒྲུབ་པ་པོས་རང་གི་ལུས་ཀྱི་ནང་དུ་བསྒོམ་མོ། །གང་དཔའ་མོའི་དབང་ཕྱུག་མ་དེ་རྣམས་ཐམས་ཅད་དེ་ཉིད་ཀྱི་ནང་དུ་བསྒོམ་མོ། །སྦྱོར་བ་འདིས་སྒྲུབ་
པ་པོའི་དབང་པོས་རང་དང་འདྲ་བ་དང་ལྷན་ཅིག་མཉམ་པར་སྦྱོར་བར་བྱེད་པའི་སྒོམ་པ་ནི་མ་ལ་ཨ་ཛེ་ཞེས་བྱ་བའི་དངོས་པོའོ། །རྡོ་རྗེ་དང་པདྨ་མཉམ་པར་གཞུག་པར་བྱེད་པའི་སྒོམ་པ་ནི་ཀུནྡུ་རུ་ཡིན་ནོ་ཞེས་བྱ་བའི་དངོས་པོའོ། །ཌིཎྜི་མ་ཞེས་བྱ་བ་ནི་ལྷན་ཅིག་
སྐྱེས་པའི་གཟུགས་ཅན་གྱི་བྱང་ཆུབ་སེམས་མ་རེག་པའི་ཕྱིར་ཌིཎྜི་མའོ། །ལྷན་ཅིག་སྐྱེས་པའི་གཟུགས་ཅན་བྱང་ཆུབ་ཀྱི་གཟུགས་ཀྱང་རེག་པར་བྱེད་པ་དཀའ་བ་རང་རིག་པ་ཙམ་གཟུང་བ་དང་འཛིན་པ་ལས་འདས་པ་སྟེ། རྒྱུ་འདིས་དོན་དམ་པ་བྱང་ཆུབ་ཀྱི་སེམས་
ཌིཎྜི་མ་ཞེས་བརྗོད་དོ། །ཏ་ཧིཾ་ཞེས་བྱ་བ་ནི་ལྷན་ཅིག་སྐྱེས་པ་འབྱུང་བའི་དུས་དེར་བྱང་ཆུབ་ཀྱི་སེམས་ཇི་ལྟར་ནུས་པ་གཟུང་བ་དང་མི་སྤང་བ་ཞེས་བྱ་བའི་དོན་ཏོ། །འདི་ནི་པི་ཙུ་རྡོ་རྗེའི་རྒྱུད་ལས་གསུངས་པ་གླུའི་མཆོག་རྙེད་པར་དགའ་བ་གསང་བ་ཆེན་པོའི་ཤིན་ཏུ་གསང་བའི་
དོན་བཟང་པོའི་དོན་ཡོངས་སུ་བསྡུ་བའི་ཕྱིར་དང་། ཐེ་ཚོམ་བསལ་བའི་ཕྱིར་རྣལ་འབྱོར་མའི་གཙོ་མོ་བདག་མེད་མས་འདོད་ཆགས་ཆེན་པོའི་རྗེས་སུ་ཆགས་པས་རྡོ་རྗེ་མཆོད་པས་ཡང་དག་པར་མཆོད་པའི་དུས་སུ་བཅོམ་ལྡན་འདས་ལ་ཞུས་པ་དང་། ཤིན་ཏུ་དགྱེས་པ་
ཐུགས་ཀྱི་རྣལ་འབྱོར་མ་རྣམས་ཀྱིས་རྟོགས་པར་བྱ་བའི་ཕྱིར་གང་གསུངས་པ་གླུའི་རྒྱལ་པོ་མཆོག་གསུངས་པའི་སྙེམས་པ་མེད་པའི་དོན་བཤད་པའོ།། །།དེ་ནས་གར་བཤད་པ་བརྗོད་དོ། །དྲན་པ་མི་འཕྲོགས་རྣལ་འབྱོར་ལས། །ཧེ་རུ་ཀ་ཡི་གཟུགས་ཀྱི་

གར། །ཆགས་བྲལ་མི་གོས་སེམས་ཀྱིས་ནི། །འདོད་ཆགས་སེམས་ཀྱིས་བསྒོམ་པ་ཉིད། །ཤྲཱི་ནི་གཉིས་སུ་མེད་པའི་ཡེ་ཤེས་ཏེ། སྟོང་པ་དང་སྙིང་རྗེ་གཉིས་སུ་མེད་པའི་སྦྱོར་བས་བྱང་ཆུབ་ཀྱི་སེམས་གང་བྱུང་བ་དེ་ཉིད་གཉིས་སུ་མེད་པའི་ཡེ་
ཤེས་སོ། །ཧེ་ཞེས་བྱ་བ་ནི་རྒྱུ་ལ་སོགས་པས་སྟོང་པ་སྟེ། ཧེ་ཞེས་བྱ་བ་ནི་རྡོ་རྗེའོ། །ཨེ་ཞེས་བྱ་བ་ནི་པདྨ་སྟེ། རྡོ་རྗེ་དང་པདྨར་རྒྱུར་གྱུར་པ་དེས་བདེ་བ་གང་འབྱུང་བས་རྟོག་པ་མེད་པ་དེ་ཉིད་རྒྱུ་ལ་སོགས་པས་སྟོང་པའོ། །རུ་ཞེས་བྱ་བ་ནི་ཚོགས་པ་དང་བྲལ་བ་སྟེ། འདོད་
ཆགས་ལ་སོགས་པའི་ཉོན་མོངས་པ་དང་བྲལ་བའོ། །ཀ་ཞེས་བྱ་བ་ནི་གང་དུའང་མི་གནས་པ་སྟེ། རབ་ཏུ་བཅུག་པ་དང་བྲལ་བར་གྱུར་པ་ནི་རྣམ་པར་གྲོལ་བ་ཉིད་དེ། ཆོས་ཐམས་ཅད་རོ་གཅིག་པའི་རང་བཞིན་གྱིས་ཐམས་ཅད་ཀྱི་ན་བདག་ཉིད་ལ་གནས་སོ། །
འདི་ནི་གང་དུ་ཡང་མི་གནས་པའོ། །དཔལ་ཧེ་རུ་ཀའི་རང་བཞིན་འདིས་རྒྱུ་བས་གར་ཞེས་བྱའོ། །དཔལ་ཧེ་རུ་ཀའི་གཟུགས་ཀྱིས་སེམས་ཀྱི་དྲན་པ་མི་ཕྱེད་པ་རྙོག་པ་མེད་པ་འདིས་ནི་རྣལ་འབྱོར་དྲན་པ་མི་འཕྲོགས་པ་ལས་ཞེས་བྱ་བའི་དོན་ཏོ། །སྒོམ་པ་འདིས་ནི་
འདོད་ཆགས་ཀྱི་སེམས་ཏེ། ཆགས་པ་དང་བྲལ་བ་མ་ཡིན་པའི་སེམས་ཀྱིས་སོ། །རྡོ་རྗེ་ཆོས་དང་སངས་རྒྱས་དང་། །རྣལ་འབྱོར་མ་དང་མ་མོ་ཡིས། །འདི་དག་གིས་དཔལ་ཧེ་རུ་ཀའི་གཟུགས་ཀོལླ་གི་རིར་བཞུགས་པ་ཞེས་བྱ་བ་ལ་སོགས་པའི་གླུ་དང་གར་དག་
གིས་ངེས་པར་གླུ་བླང་བ་དང་གར་བྱའོ། །འདི་ཉིད་ཀྱིས་ནི་ཚོགས་བསྲུང་ཞིང་། །དེ་བཞིན་དག་ཀྱང་བསྲུང་བ་ཉིད། །འདིས་ནི་འཇིག་རྟེན་དབང་དུ་བྱེད། །འདིས་ནི་སྔགས་ཀྱི་བཟླས་པ་ཉིད། །གང་དུ་གུས་བཅས་གླུ་ལེན་དང་། །གང་དུ་གུས་བཅས་གར་བྱེད་པ། །
ཚོགས་ཀྱི་བདག་པོས་སྔོན་བྱས་ནས། །དེ་ལ་དྲི་ནི་མཚོན་པར་བྱ། །གང་དུ་གུས་བཅས་གླུ་དང་གར། །ཞེས་བྱ་བ་ལ། བཅས་ཞེས་བྱ་བ་ནི་བདེ་བའོ། །གུས་པ་ཞེས་བྱ་བ་ནི་བདེ་བ་མངོན་པར་འདོད་པ་སྟེ། དེ་ཉིད་བདེ་བ་མངོན་པར་འདོད་པའོ། །གང་ལ་གླུ་ལེན་པ་

དང་། གར་བྱེད་པ་ནི་བླ་མའི་མན་ངག་གིས་ལྷན་ཅིག་སྐྱེས་པ་བསྐྱེད་པའི་དོན་གྱི་ཕྱིར་ཀུན་དུ་རུ་བྱེད་པ་ཞེས་བྱ་བའི་དངོས་པོའོ། །ཚོགས་ཀྱི་བདག་པོས་སྔོན་བྱས་ཏེ། དཔའ་བོ་དང་དཔའ་མོའི་དབང་ཕྱུག་མའི་ཚོགས་ཏེ་མང་པོའོ། །བདག་པོ་ཞེས་བྱ་བ་
ནི་དཔའ་བོ་དཔའ་མོའི་དབང་ཕྱུག་མ་དེ་རྣམས་ཀྱི་ནང་དུ་གཙོ་མོ་དང་འདྲེན་པ་དང་འཁོར་ལོ་ཅན་ཞེས་བྱ་བའི་དོན་ཏོ། །སྔོན་དུ་བྱས་ཏེ་ཞེས་བྱ་བ་ནི་སྒྲུབ་པ་པོ་བདག་ཉིད་དཔལ་ཧེ་རུ་ཀའི་ང་རྒྱལ་དང་། རིག་མ་བདག་མེད་མའི་གཟུགས་ཀྱིས་
རྫོགས་པ་དེ་དང་ལྷན་ཅིག་སྙོམས་པར་ཞུགས་པའི་སྦྱོར་བ་བྱེད་པ་ཞེས་བྱ་བའི་དངོས་པོའོ། །དེ་ལ་ཞེས་བྱ་བ་ནི་ཀུན་དུ་རུའི་སྙོམས་པར་ཞུགས་པ་ལ་མངོན་པར་ཆགས་པའི་དུས་དེར་རོ། །དྲི་ནི་མཚོན་པར་བྱ་ཞེས་བྱ་བ་ནི་དགའ་བ་བཞི་དང་སྐད་ཅིག་མ་
བཞིའི་རབ་ཏུ་དབྱེ་བས་བྱང་ཆུབ་སེམས་མི་ཟད་པའི་རང་བཞིན་དེ་མཚོན་པར་བྱ་སྟེ། བལྟ་བར་བྱ་ཞེས་བྱ་བའི་དོན་ཏོ། །སྒོག་པའི་དྲི་ནི་དང་པོ་ཉིད། །དེ་ནས་ཡང་ནི་བྱ་རྒོད་དྲི། །ག་བུར་མ་ལ་ཡ་ཛ་རྗེས། །གླུ་ཡི་བྱིན་བརླབས་མཚན་ཉིད་ནི། །རུ་ནི་ཏཾ་ཧཾ་ས་སྱ་བྷྲ་
མ་ར་སྱ། གླུ་ཡི་མཐར་ནི་མཉན་པར་བྱ། །གོ་མ་ཡོར་གྱི་སྒྲ་དང་ནི། །ཕྱི་རོལ་ཚལ་དུ་མཚོན་པར་བྱ། །གླུ་ཡི་བྱིན་བརླབས་མཚན་ཉིད་དོ། །སྒོག་པའི་དྲི་ཞེས་བྱ་བ་ནི་དགའ་བའོ། །བྱ་རྒོད་ཀྱི་དྲི་ཞེས་བྱ་བ་ནི་མཆོག་ཏུ་དགའ་བའོ། །ག་བུར་མ་ལ་ཡ་ཛ་ཞེས་བྱ་
བ་ནི་མཆོག་ཏུ་དགའ་བ་མཛེས་པ་ལས་ནང་དུ་འཁོར་བའི་བྱང་ཆུབ་ཀྱི་རིགས་ཀྱི་བདག་པོའི་ཁར་ཐིག་ལེའི་གཟུགས་ཀྱིས་བསྡུས་པ་གསལ་བར་བརྗོད་པ་ནི་ཀཔྤཱུ་ར་མ་ཡ་ཛ་ཞེས་བྱ་བའི་དངོས་པོའོ། །དེ་རྗེས་སུ་གླུ་ཡི་བྱིན་བརླབས་མཚན་ཉིད་དོ། །ཞེས་བྱ་བ་ནི་
དེའི་རྗེས་སུ་ག་བུར་དང་མ་ལ་ཡ་ཛ་སྐད་ཅིག་དེར་གླུའི་བྱིན་བརླབས་རང་རིག་པའི་བྱིན་གྱི་རླབས་ལྷན་ཅིག་སྐྱེས་པའི་དགའ་བ་བརྟག་པ་ཞེས་བྱ་བའི་དོན་ཏོ། །རུ་ཏཾ་ཧཾ་ས་སྱ་བྷྲ་མ་ར་སྱ། གླུ་ཡི་མཐར་ནི་མཉམ་པར་བྱ། །ཞེས་བྱ་བའོ། །ཧ་ཞེས་བྱ་བ་ནི་སྤྲོས་

པའི་བྱང་ཆུབ་ཀྱི་སེམས་སོ། །ས་ཞེས་བྱ་བ་ནི་སྤྲོས་པ་དང་བྱང་ཆུབ་ཀྱི་སེམས་ཏེ། བདེ་བ་ཡང་དག་པར་རིག་པ་ཙམ་མོ། །བྷ་ཞེས་བྱ་བ་ནི་དེ་རྣམས་ཀྱི་བསྒོམ་པའོ། །མ་ཞེས་བྱ་བ་ནི་བདག་རིག་པའོ། །ར་ཞེས་བྱ་བ་ནི་དགའ་བ་སྟེ། དེས་བསྒྲུབ་
པ་པོ་སྡིག་པ་དང་བྲལ་བར་གྱུར་པའོ། །རུ་ཏ་ཞེས་བྱ་བ་ནི་བརྗོད་པ་ཞེས་བྱ་བའི་དངོས་པོའོ། །སྒྲ་ཞེས་བྱ་བ་ནི་རྟོག་པ་ཞེས་བྱ་བའི་དངོས་པོའོ། །འདི་ནི་ངང་པ་དང་བུང་བའི་མཉན་པར་བྱ་ཞེས་བྱ་བའི་དངོས་པོའོ། །གོ་ཞེས་བྱེ་བ་ནི་རྣམ་པར་སྣང་མཛད་དོ། །མ་ཞེས་བྱ་བ་ནི་མི་བསྐྱོད་
པའོ། །ཡོ་ཞེས་བྱ་བ་ནི་འོད་དཔག་ཏུ་མེད་པའོ། །ར་ཞེས་བྱ་བ་ནི་རིན་ཆེན་འབྱུང་གནས་སོ། །པི་ཞེས་བྱ་བ་ནི་དོན་ཡོད་གྲུབ་པའོ། །སྒྲ་ཞེས་བྱ་བ་ནི་དེ་བཞིན་གཤེགས་པ་ལྔ་པོ་དེ་རྣམས་ཀྱིས་རྟོགས་པའོ། །ཕྱི་རོལ་ཚལ་དུ་མཚོན་བྱ་བ། །ཞེས་བྱ་བ་ནི་བྱང་ཆུབ་ཀྱི་སེམས་རྣམ་པར་
དགའ་བ་བོར་བ་རིག་མའི་ཆུ་སྐྱེས་སུ་གནས་པ་དེ་ཉིད་དཀྱིལ་འཁོར་གྱི་འཁོར་ལོའི་རང་བཞིན་དུ་བསམས་ཏེ་བཟའ་བར་བྱའོ། །ཟོས་ནས་བདག་ཉིད་དཀྱིལ་འཁོར་འཁོར་ལོའི་གཟུགས་སུ་བརྟག་པར་བྱ་བ་སྟེ། བསྒོམ་པར་བྱ་བ་ཞེས་བྱ་བའི་དགོས་པའོ། །སྔགས་ཀྱི་རྒྱ་མཚོའི་ཕ་
རོལ་སོན། །གྲགས་བཟང་བསོད་ནམས་ཅན་བཟོད་མཛོད། །བདག་ཉིད་དྲན་པ་ཙམ་དུ་ནི། །ཇི་ལྟར་ཐོབ་པ་བྲིས་པའོ། །རྡོ་རྗེའི་གླུ་བཤད་པ་ཞེས་བྱ་བ་སློབ་དཔོན་སྒྲོལ་མ་ཅན་གྱི་སྡེས་མཛད་པ་རྫོགས་སོ།། །།རྒྱ་གར་གྱི་མཁན་པོ་ག་ཡ་ངྷ་ར་དང་། དགེ་སློང་
ཤཱཀྱ་ཡེ་ཤེས་ཀྱིས་བསྒྱུར་བའོ།། ༄༅༅། །རྒྱ་གར་སྐད་དུ། ཨ་བྷི་ས་མ་ཡ་ཀྲ་མ་ནཱ་མ། བོད་སྐད་དུ། མངོན་པར་རྟོགས་པའི་རིམ་པ་ཞེས་བྱ་བ། དཔལ་ཀྱེའི་རྡོ་རྗེ་ལ་ཕྱག་འཚལ་ལོ། །དཔལ་ཨུ་ཌྱན་ནས་འོངས་པའི་ཀྱེའི་རྡོ་རྗེའི་རྒྱུད་ཀྱི་རིན་པོ་
ཆེའི་མངོན་པར་རྟོགས་པ་བསྟན་པར་བྱ་སྟེ། བྱང་ཆུབ་ཀྱི་སེམས་སུམ་ཅུ་རྩ་གཉིས་འབབ་པའི་རྩ་རྣམས་ནི་ཀུན་རྫོབ་དང་དོན་དམ་པའི་བདག་ཉིད་ཅན་ནོ། །དེ་རྣམས་ཀྱི་གཙོ་མོ་ནི་གསུམ་སྟེ། བརྐྱང་མ་དང་། རོ་མ་དང་། ཀུན་འདར་མའོ། །བརྐྱང་མ་ནི་ཤེས་རབ་ཀྱི་རང་

བཞིན་ནོ། །རོ་མ་ནི་ཐབས་ཀྱི་རང་བཞིན་ནོ། །ཀུན་འདར་མ་ནི་སྐྱེ་གནས་ཀྱི་འཁོར་ལོར་གཉིས་སུ་མེད་པའི་དེ་ཁོ་ནའི་གཟུགས་སོ། །མི་བསྐྱོད་འབབ་པ་ནི་བརྐྱང་མའོ། །ཁྲག་འབབ་པ་ནི་རོ་མའོ། །བྱང་ཆུབ་ཀྱི་སེམས་འབབ་པ་ནི་ཀུན་འདར་མའོ། །ཆོས་རྣམས་ཐམས་ཅད་ཀྱི་
ཤིན་ཏུ་ཕྲ་བ་ཉིད་ནི་བརྐྱང་མའོ། །ཆོས་རྣམས་ཐམས་ཅད་ཀྱི་སྤྲོས་པ་མེད་པ་ཉིད་ནི་རོ་མའོ། །མི་ཕྱེད་པའི་བདག་ཉིད་ཅན་ནི་ཀུན་འདར་མའོ། །རྩ་སུམ་ཅུ་རྩ་གཉིས་པོ་དེ་རྣམས་ཀྱི་གནས་དང་། རང་བཞིན་བརྗོད་པར་བྱ་སྟེ། རྐང་པ་གཡོན་པའི་མཐེ་བོང་ལ་མི་ཕྱེད་མ་ནི་རང་བཞིན་
མེད་པའི་ཕྱིར་རོ། །བྱིན་པ་ཕྲ་གཟུགས་མ་ནི་ནམ་མཁའ་དབྱིངས་ཀྱི་རང་བཞིན་ནོ། །བརླ་གཡོན་པར་བརྩེ་བ་མ་ནི་འདོད་པ་ལྔའི་བདག་ཉིད་ཅན་གྱི་ཕྱིར་རོ། །སྐྱེ་གནས་ཀྱི་གཡོན་པའི་ངོས་ཀྱི་རྩ་ལ་གཡོན་པ་མ་ནི་བཟང་པོའི་དེ་ཁོ་ན་འཛིན་པ་ཤེས་རབ་ཀྱི་གནས་ཀྱི་ཕྱིར་རོ། །ལྟེ་བ་རུ་ཐུང་ངུ་མ་
ནི་རྒྱལ་ཆེན་པོའི་རྒྱུ་མཐུན་པའི་བདག་ཉིད་ཅན་ནོ། །སྙིང་གི་ཟེ་འབྲུ་ལ་གཡོན་པའི་ཆ་ལ་རུས་སྦལ་སྐྱེས་མ་ནི་སྲིད་པ་དང་མྱ་ངན་ལས་འདས་པ་ཁ་སྦྱར་གཟུགས་ཀྱི་ཕྱིར་རོ། །ནུ་མ་གཡོན་པར་བསྒོམ་པ་མ་ནི་བདེ་བ་ཆེན་པོའི་བསྒོམ་པའོ། །མགུལ་པ་གཡོན་པའི་ཆ་ལ་དབང་མ་
ནི་དྲི་མ་མེད་པར་བྱེད་པའི་ཕྱིར་རོ། །ལག་པ་གཡོན་པའི་མཐིལ་དུ་སྐྱོན་མ་ནི་ཐལ་ལྕག་ལ་སོགས་པས་འགྱུར་བར་བྱེད་པའི་ཕྱིར་རོ། །ཆུ་ལ་འཇུག་མ་ནི་བདེ་བ་ཆེན་པོ་འཇུག་པའི་ཕྱིར་རོ། །མཁུར་ཚོས་སུམ་མོ་ནི་ཀུན་བཞི་མཐོང་བར་བྱེད་པའི་ཕྱིར་རོ། །མིག་གཡོན་པར་
མཚན་མོ་ནི་བདེ་བ་ཆེན་པོའི་འཁྲུས་པའི་བདག་ཅན་ནོ། །རྣ་བ་གཡོན་པའི་རྩ་བར་བསིལ་སྦྱིན་མ་ནི་རླུང་རབ་ཏུ་འབྱུང་བའི་ཕྱིར་རོ། །ཀླད་པ་གཡོན་པའི་ངོས་སུ་ཚ་བ་མ་ནི་མེ་དང་ལྡན་པའི་ཕྱིར་རོ། །སྤྱི་བོར་རྡོ་རྗེ་འཛིན་པ་ཆེན་པོའི་གཡོན་ངོས་སུ་བརྐྱང་མ་ནི་རྣམ་པར་རྩེ་བའི་རང་
བཞིན་གྱི་ཕྱིར་རོ། །མདུན་དུ་ཀུན་འདར་མ་ནི་སྤྲོས་པ་དང་བྲལ་བའི་ཕྱིར་རོ། །གཡས་པར་རོ་མ་ནི་མྱང་བར་འདོད་པའི་ཕྱིར་རོ། །རྒྱབ་ནས་ཚད་མ་ནི་སྐུ་ལ་སོགས་པའི་ཚད་མའི་ཕྱིར་རོ། །གླད་པའི་གཡས་ངོས་སུ་མདོག་ནག་མ་ནི་མི་བསྐྱོད་པ་གནག་པའི་ཕྱིར་རོ། །རྣ་བ་གཡས་

པའི་རྩ་བར་སྤྱི་མ་ནི་ཐམས་ཅད་དུ་རྗེས་སུ་འགྲོ་བའི་ཕྱིར་རོ། །མིག་གཡས་པ་ལ་རྒྱུ་སྦྱིན་མ་ནི་བྱེད་རྒྱུར་གྱུར་པའི་ཕྱིར་རོ། །མཁུར་བ་ལ་སྦྱོར་བྲལ་མ་ནི་དགའ་བ་སྤངས་པའི་ཕྱིར་རོ། །ཡ་མཆུ་ལ་སྡུ་གུ་མ་ནི་གནས་ཐམས་ཅད་ཕངས་པར་བྱེད་པའི་ཕྱིར་རོ། །
ལྐོག་མ་ལ་གྲུབ་མ་ནི་ཐོག་མ་མེད་པའི་རང་བཞིན་གྱི་ཕྱིར་རོ། །ལག་པ་གཡས་པ་འཚེད་མ་ནི་སྒེག་པའི་རོ་རྒྱས་པར་བྱེད་པའི་ཕྱིར་རོ། །ནུ་མ་གཡས་པ་ལ་ཡིད་བཟང་མ་ནི་ལུས་ཀྱི་འབྲས་བུ་འབྱུང་བ་ཡིད་བཟངས་འཐོབ་པའི་ཕྱིར་རོ། །སྙིང་གི་གཡས་ངོས་སུ་སུམ་སྐོར་མ་
དང་སྐུ་དང་གསུང་དང་ཐུགས་ཀྱི་བདག་ཉིད་ཀྱི་ཕྱིར་རོ། །ལྟེ་བ་གཡས་པའི་ཡུལ་དུ་འདོད་མ་ནི་འདོད་པ་ལ་སྡུག་པའི་ཕྱིར་རོ། །སྐྱེ་གནས་སུ་ཁྱིམ་མ་ནི་འབྱུང་བ་ཐམས་ཅད་ཀྱི་གནས་ཀྱི་ཕྱིར་རོ། །བརླ་ལ་གཏུམ་བདག་མ་ནི་བདེ་བ་ཆེན་པོས་ཐམས་ཅད་དུ་ཁྱབ་པའི་ཕྱིར་རོ། །
བྱིན་པ་ལ་ཀ་ཏ་ཡ་ནཱ་ནི་བགེགས་གཅོད་པར་བྱེད་པའི་ཕྱིར་རོ། །གཡས་པའི་མཐེ་བོང་ལ་བདུད་འདྲལ་མ་ནི་སྡུག་བསྔལ་ཐམས་ཅད་འཇུག་པ་མེད་པའི་ཕྱིར་རོ། །རྩ་སུམ་ཅུ་རྩ་གཉིས་པོ་ལ་གནས་ཇི་ལྟ་བར་ཡི་གེ་བཅུ་དྲུག་དང་། ཚེས་གཅིག་ལ་སོགས་པ་ཉིན་མོ་ཡང་
རིམ་པ་དང་། རིམ་པ་ལས་བཟློག་པའི་ཕྱིར་རོ། །རྩ་དེ་རྣམས་ནི་སྲིད་པ་གསུམ་ཡོངས་སུ་གྱུར་པ། སྐུ་ལ་སོགས་པའི་རང་བཞིན་གྱིས་བདེ་བ་ཆེན་པོས་ཡོངས་སུ་གྱུར་པའོ། །ཨཱ་ལི་ནི་ཨའི་རྣམ་པ་ལ་སོགས་པའོ། །ཀཱ་ལི་ནི་ཀའི་རྣམ་པ་ལ་སོགས་པའོ། །རྡོ་རྗེ་དང་
པདྨ་དང་ཐབས་ཤེས་རབ་བོ། །ཆོས་དང་ལོངས་སྤྱོད་རྫོགས་པ་དང་། སྤྲུལ་པ་དང་། ལྷན་ཅིག་སྐྱེས་པ་དང་། དགའ་བྲལ་དང་མཆོག་དང་། ཐུགས་དང་གསུང་དང་། སྐུའོ། །ཨེ་ཝཾ་མ་ཡ་ནི། ཨེའི་རྣམ་པ་ནི་ཆོས་ཀྱི་འབྱུང་གནས་དང་། སྟོང་པ་ཉིད་དང་།
དགའ་བ་དང་ལྷ་མོ་སྤྱན་ནོ། །ཝཾ་གྱི་རྣམ་པར་རྡོ་རྗེ་དང་། མཚན་མ་མེད་པ་དང་། མཆོག་ཏུ་དགའ་བ་དང་། མཱ་མ་ཀཱིའོ། །མའི་རྣམ་པ་ནི་ཆེ་བ་དང་། སྨོན་པ་མེད་པ་དང་། དགའ་བྲལ་གྱི་དགའ་བ་དང་། གོས་དཀར་མོའོ། །ཡཱའི་རྣམ་པ་ནི་གཤེར་བ་ཉིད་དང་།

མངོན་པར་འདུས་མ་བྱས་པ་དང་། ལྷན་ཅིག་སྐྱེས་པ་དང་། སྒྲོལ་མའོ། །སྐྱེ་གནས་སུ་སྤྲུལ་བའི་འཁོར་ལོ་འདབ་མ་དྲུག་ཅུ་རྩ་བཞི་ལ་ཀ་ལ་སོགས་པའི་ཡི་གེ་སུམ་ཅུ་གཉིས་པོ་རྣམས་ནི་རིམ་པ་དང་རིམ་པ་མ་ཡིན་པས་ཡི་གེ་དྲུག་ཅུ་རྩ་བཞིའོ། །པདྨ་འདབ་མ་བཞི་པོ་རེ་རེ་
ལ་སོགས་པ་རྣམས་ཀྱི་སྟོང་པ་ཉིད་བཅུ་དྲུག་གི་ཡི་གེ་རྣམ་པར་དག་པ་སྤྱན་ལ་སོགས་པ་རང་བཞིན་གྱིས་ཡོངས་སུ་གྱུར་པ་འདབ་མ་དྲུག་ཅུ་རྩ་བཞིའི་རྣམ་པར་སྐྱེས་པ་གནས་ཀྱི་འཁོར་ལོའོ། །སྙིང་གར་ཆོས་ཀྱི་འཁོར་ལོ་འདབ་མ་བརྒྱད་པར་ཡི་གེ་བརྒྱད་དེ་ཨ་ཀ་ཙ་ཊ་ཏ་པ་ཡ་ཤ་འབྱུང་
བ་དང་འབྱུང་བ་ལས་གྱུར་པ། གཟུགས་ཤིན་ཏུ་ཕྲ་བའོ། །པདྨ་འདབ་མ་བརྒྱད་པའོ། །ལྐོག་མར་ལོངས་སྤྱོད་རྫོགས་པའི་འཁོར་ལོ་འདབ་མ་བཅུ་དྲུག་ལ་ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿ། སྟོང་པ་ཉིད་བཅུ་དྲུག་རྣམ་པར་དག་པ་ནི་ལོ་བཅུ་དྲུག་མ་ལོངས་སྤྱོད་
རྫོགས་པའི་རྣམ་པའི་ཤེས་རབ་བོ། །དེ་ཉིད་ལོངས་སྤྱོད་རྫོགས་པའི་འཁོར་ལོ་འདབ་མ་བཅུ་དྲུག་པའོ། །སྤྱི་བོར་བདེ་བ་ཆེན་པོའི་འཁོར་ལོ་འདབ་མ་སུམ་ཅུ་རྩ་གཉིས་ལ་ཀ་ཁ་ག་གྷ་ང་། ཙ་ཚ་ཛ་ཛྙ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས།
སྐྱེས་བུ་ཆེན་པོའི་ཆོས་ཀྱི་མཚན་རྣམ་པར་དག་པ་ནི་འདབ་མ་སུམ་ཅུ་རྩ་གཉིས་སོ། །འཁོར་ལོ་བཞི་ལ་གྲངས་ཇི་ལྟ་བས་སྐད་ཅིག་མ་བཞི་ནི་རྣམ་པ་སྣ་ཚོགས་དང་། རྣམ་པར་སྨིན་པ་དང་། རྣམ་པར་ཉེད་པ་དང་། མཚན་ཉིད་དང་བྲལ་བའོ། །བདེན་པ་བཞི་ནི་སྡུག་
བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་མོ། །དེ་ཁོ་ན་བཞི་ནི་བདག་གི་དེ་ཁོ་ན་དང་། སྔགས་ཀྱི་དེ་ཁོ་ན་དང་། ལྷའི་དེ་ཁོ་ན་དང་། ཡེ་ཤེས་ཀྱི་དེ་ཁོ་ནའོ། །དགའ་བ་བཞི་ནི་དགའ་བ་དང་། མཆོག་ཏུ་དགའ་བ་དང་། དགའ་བྲལ་གྱི་དགའ་བ་དང་། ལྷན་
ཅིག་སྐྱེས་པའི་དགའ་བའོ། །སྡེ་པ་བཞི་ནི་གནས་བརྟན་པ་དང་། ཐམས་ཅད་ཡོད་པར་སྨྲ་བ་དང་། ཀུན་གྱིས་བཀུར་བ་དང་། དགེ་འདུན་ཕལ་ཆེན་ནོ། །དེ་རྣམས་སྐད་ཅིག་མ་དང་། བདེན་པ་དང་། དེ་ཁོ་ན་དབྱེ་བ་དང་། སྡེའི་རང་བཞིན་གྱི་ཆུང་ངུ་དང་། འབྲིང་དང་ལྷག་མ་དང་།

ཆེས་ལྷག་པ་ཉིད་ཀྱིས་གནས་བཞི་ལ་རྣམ་པར་གནས་སོ། །ཟླ་བ་གཡོན་པ། ཉི་མ་གཡས་པ། ཨཱ་ལི་ཕྲ་བ། ཀཱ་ལི་སྦོམ་པོའོ། །འཕོ་བ་བཅུ་དྲུག་ནི་ལུག་དང་། བ་གླང་དང་། འཁྲིག་པ་དང་། ཀརྐ་ཊ་དང་། སེང་གེ་དང་། བུ་མོ་དང་། སྲང་དང་། སྡིག་
པ་དང་། གཞུ་དང་། ཆུ་སྲིན་དང་། བུམ་པ་དང་། ཉ་དང་། ཟླ་བ་གཟས་ཟིན་པ་དང་། ཉི་མ་གཟས་ཟིན་པ་དང་། ཐིག་ལེ་འགོག་པ་དང་། ནམ་མཁའ་འགོག་པ་སྟེ། དེ་རྣམས་ནི་འཕོ་བ་བཅུ་དྲུག་ལ་སོགས་པ་སྦོམ་པོའོ། །ཡང་ན་ཁུ་བའི་གཡོན་སྐོར་དང་། གཡས་སྐོར་གྱི་
དབྱེ་བས་གནས་བཅུ་དྲུག་ཏུ་འཕོ་བར་གྱུར་པའོ། །མཐེ་བོང་ལ་ཚེས་གཅིག་ལ་ཨའི་རྣམ་པ་དང་། བྱིན་པ་ལ་གཉིས་ལ་ཨཱའི་རྣམ་པ། བརླ་ལ་གསུམ་ལ་ཨིའི་རྣམ་པ། སྐྱེ་གནས་སུ་བཞི་ལ་ཨཱའི་རྣམ་པ། ལྟེ་བར་ལྔ་ལ་ཨུའི་རྣམ་པ། སྙིང་ལ་དྲུག་ལ་ཨཱུའི་རྣམ་པ། ནུ་མ་
ལ་བདུན་ལ་རྀའི་རྣམ་པ། ལྐོག་མ་ལ་བརྒྱད་ལ་རཱྀའི་རྣམ་པ། ལག་པའི་རྩེ་མོར་དགུ་ལ་ལྀའི་རྣམ་པ། མཁུར་ཚོས་ལ་བཅུ་ལ་ལཱྀའི་རྣམ་པ། མིག་ཏུ་བཅུ་གཅིག་ལ་ཨེའི་རྣམ་པ། རྣ་བའི་རྩ་བར་བཅུ་གཉིས་ལ་ཨིའི་རྣམ་པ། བཅུ་གསུམ་ལ་དཔྲལ་བར་ཨོའི་རྣམ་པ།
སྤྱི་བོར་བཅུ་བཞི་ལ་ཨཽའི་རྣམ་པ། མཆན་གྱི་གཡོན་དང་གཡས་སུ་གང་བ་ལ་ཨཾ་ཨཿདེ་དང་དེའི་ཆང་གི་ཤིན་ཏུ་ཕྲ་བའི་རྣམ་པས་འཕོ་བར་གྱུར་པའོ། །དབྱི་གུ་དྲུག་ཅུ་རྩ་བཞི་ནི་དུས་ཀྱི་རྣམ་པའི་ཆ་ལ་རྒྱུ་སྐར་ཉི་ཤུ་བརྒྱད་དང་། ཉིན་པར་བཅོ་ལྔ་དང་། གཟའ་དགུ་དང་། ཆ་
བཅུ་གཉིས་དུས་ཀྱི་རྣམ་པའི་ཆ་ཡིས་དབྱི་གུ་བླང་བར་བྱའོ། །མཚན་མོ་དང་། ཉིན་པར་དག་ལ། སྦུ་གུ་ཅན་དྲུག་ཅུ་དང་། དེ་དག་ཉིད་ལ་ཟད་པ་དང་། འཕེལ་བས་བཞིའོ། །དེ་ཉིད་ཀྱི་ཕྱིར་དུས་ཀྱིས་དབྱི་གུ་དྲུག་ཅུ་རྩ་བཞི་གཟུང་བར་བྱའོ། །ཡང་ན་ཤེས་རབ་དང་།
ཐབས་དག་ལ་དོན་དམ་པ་དང་། ཀུན་རྫོབ་ཀྱི་དབྱེ་བས་དེ་དང་དེ་ལ་གནས་ཉིད་དུ་རྣམ་པར་དག་པ་འཕོ་བ་བཅུ་དྲུག་གིས་མྱོས་བྱེད་ཀྱི་དབྱེ་བས་དབྱི་གུ་གཟུང་ངོ་། །དེ་རྣམས་ནི་རྩ་སུམ་ཅུ་རྩ་གཉིས་རྣམས་སོ། །དེ་རྣམས་ཐམས་ཅད་ནི་འཁོར་ལོ་བཞི་ལ་བསྡུ་བ་རྣམས་སོ། །ཡང་

བཞི་ནི་ལྟེ་བར་གཏུམ་མོ་འབར་བ་ཞེས་བྱ་བ་ཕྱག་རྒྱ་ཆེན་མོར་ཐིམ་མོ། །མངོན་པར་རྟོགས་པའི་རིམ་པ་རྫོགས་སོ།། ༄། །དབྱུ་གུ་དྲུག་ཅུ་རྩ་བཞིའི་བཤད་པ་བཞུགས། ༄༅༅། །དབྱུ་གུ་དྲུག་ཅུ་རྩ་བཞིའི་མཚན་ཉིད་ནི་ཉི་མ་ཕྱེད་ཀྱི་དབུགས་ཀྱི་གྲངས་ལྔ་སྟོང་དང་བཞི་བརྒྱའོ། །དེ་ལྟར་གྲངས་
བགྲངས་པས་ཉིན་དང་མཚན་མོ་སྟོང་ཕྲག་ཉི་ཤུ་རྩ་གཅིག་དང་ལྷག་པ་བརྒྱ་སྟེ། ཇི་ལྟར་གྲངས་ཀྱིས་བགྲངས་པ་ཤེས་པར་བྱའོ། །ཆུ་ཚོད་གཅིག་ལ་དབུགས་སུམ་བརྒྱ་དང་དྲུག་ཅུའོ། །དབྱུ་གུ་དྲུག་ཅུ་རྩ་བཞིའི་མཚན་ཉིད་བརྗོད་དོ། །ཆུ་ཚོད་ནི་ཉིན་མོ་དང་མཚན་མོ་བཅུ་དྲུག་དང་། དེ་ཉིད་ཀྱི་འཕེལ་
བ་དང་འགྲིབ་པ་བཞི་སྟེ། དེ་ལྟར་དྲུག་ཅུ་རྩ་བཞི་བླང་བར་བྱའོ་ཟེར། ཟངས་སྲང་བཅུ་གཉིས་ལས་བརྡུངས་པ་རྒྱར་སོར་བཅུ་གཉིས་ཁ་དང་དཔངས་སུ་སོར་བརྒྱད་པ་ལ། གསེར་མན་ཆ་གསུམ་ལས་བརྡུངས་པའི་མགོ་མཇུག་མཉམ་པ་སོར་དྲུག་པས་ཕུག་པའི་བུག་པ་ཅན་ཆུའི་ཁ་རུ་
གཞག་པའི་བུ་ག་ནས་བྱུང་བའི་ཆུས་ཁེངས་ནས་གཏིང་དུ་ནུབ་པ་ཆུ་ཚོད་དོ། །དབྱུ་གུ་ཡང་དེ་དང་འདྲའོ། །རྒྱ་གར་གྱི་མཁན་པོ་རཏྣ་བཛྲ་དང་། དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།། ༄། །ཀྱེ་རྡོ་རྗེའི་དེ་ཁོ་ན་ཉིད་རྣམ་པར་ཕྱེ་བ་བཞུགས། ༄༅༅། །ཀྱེའི་རྡོ་རྗེའི་དེ་ཁོ་ན་ཉིད་རྣམ་པར་ཕྱེ་བ་
ལས་གསུངས་པ། དེ་བཞིན་སྟོང་པ་བཅུ་དྲུག་ནི། །བཅུ་དྲུག་ཕྱག་ཏུ་རབ་ཏུ་གྲགས། །གླང་པོ་གཏི་མུག་ཆོས་ཡིན་པས། །གླང་པོ་རྣམ་པར་སྣང་མཛད་བརྗོད། །ཞེ་སྡང་ཆོས་ནི་རྟ་ཡིན་པས། །རྟ་ནི་མི་བསྐྱོད་པར་རབ་བརྗོད། །བོང་བུ་ང་རྒྱལ་ཆོས་ཡིན་པས། །བོང་བུ་རིན་ཆེན་
འབྱུང་གནས་བརྗོད། །བ་གླང་འདོད་ཆགས་ཆོས་ཡིན་པས། །བ་གླང་པདྨ་སྐྱེས་པར་བརྗོད། །རྔ་མོ་ཕྲག་དོག་ཆོས་ཡིན་པས། །རྔ་མོ་དོན་ཡོད་གྲུབ་པ་ཉིད། །ལས་དང་ཉོན་མོངས་སྡུག་བསྔལ་ལ། །མི་དང་ཤ་ར་བྷ་བྱི་ལ། །སྟོང་པ་བརྒྱད་དུ་ཡང་དག་འབྱུང་། །ཐོད་པ་བརྒྱད་དུ་
ཡང་དག་གནས། ཀྱེའི་རྡོ་རྗེ་དེ་ཁོ་ན་ཉིད་རྣམ་པར་ཕྱེ་བ་ལས་གསུངས་པ། རྡོ་རྗེ་གསུམ་ངོས་མི་ཕྱེད་ཕྱིར། །དེ་ནི་མི་ཕྱེད་མར་རབ་གྲགས། །སྐྲ་ཡི་རྩེ་སོགས་རབ་དབྱེ་བས། །དེ་ཉིད་ཀྱང་ནི་ཕྲ་བར་སྐྱེ། །མོ་གཤམ་བུ་ཡི་ངོ་བོའི་ཕྱིར། །དེ་ཉིད་ཀྱང་ནི་གཟུགས་ཞེས་

བསྒྲགས། །གང་ཕྱིར་ལུས་ལས་འབྱུང་བའི་ཕྱིར། །དེ་ལ་བརྩེ་བ་མར་རབ་གྲགས། །གང་ལ་གཡོན་དུ་འཁོར་འགྱུར་བ། །དེ་ལ་གཡོན་པ་མ་ཞེས་བརྗོད། །གང་ཚེ་ཟླུམ་པོའི་ལྷ་མོ་ནི། །ཐུང་ངུ་མ་ཞེས་རབ་ཏུ་བརྗོད། །གང་ཚེ་རུས་སྦལ་རྣམ་སྐྱེས་པ། །
རུས་སྦལ་སྐྱེས་ཞེས་མངོན་པར་བརྗོད། །གང་ལ་སྲིད་པའི་མངོན་གནས་པ། །དེ་ལ་བསྒོམ་པ་མ་ཞེས་བརྗོད། །བསིལ་བ་བསིལ་སྦྱིན་མ་ཡི་རྩ། །ཚ་བ་ཡང་ནི་ཚེ་སྦྱིན་མ། །ཏྲི་པ་ཏ་མེད་རང་བཞིན་གྱིས། །དེ་ལ་བརྐྱང་མ་ཞེས་བྱར་བརྗོད། །རང་བཞིན་མེད་པའི་ངོ་བོས་ནི། །
ཀུན་འདར་མ་ཞེས་རབ་ཏུ་བསྒྲགས། །ཐམས་ཅད་རོ་ནི་སྟེར་བའི་ཕྱིར། །དེ་ལ་རོ་མ་ཞེས་སུ་བརྗོད། །གང་ཚེ་ཟླ་བའི་རྣམ་པའི་གཟུགས། །མཁས་པས་ཚད་མ་ཞེས་སུ་བསྒྲགས། །འཇིགས་པ་མུན་པའི་གཟུགས་སུ་ནི། །ཁ་དོག་ནག་པོའང་སྐྱེ་བར་འགྱུར། །མཉམ་
པའི་སེམས་ཀྱི་སྦྱོར་བ་ཡིས། །སྤྱི་མ་ཞེས་ནི་མངོན་པར་བརྗོད། །གང་ཚེ་རྒྱུ་ཀུན་སྦྱིན་པ་ཡང་། །རྒྱུ་སྦྱིན་མ་ཞེས་རབ་ཏུ་གྲགས། །རྒྱུ་ཡི་སྦྱོར་བྲལ་སྡུག་བསྔལ་གྱིས། །དེ་ལ་སྦྱོར་བྲལ་མ་ཞེས་བསྒྲགས། །གཉེན་གྱི་ཚུལ་གྱིས་སྡུག་པ་ཡང་། །སྡུ་གུ་མ་ཞེས་
བྱ་བར་གྲགས། །ཡིད་ལ་འདོད་པ་གྲུབ་པའི་ཕྱིར། །གྲུབ་མ་ཞེས་ནི་རབ་ཏུ་བརྗོད། །མེ་ཡི་ཁམས་ཀྱི་རང་བཞིན་གྱིས། །འཚེད་མ་ཞེས་ནི་ངེས་པར་བརྗོད། །ཆུ་ཡི་ཁམས་ཀྱི་རང་བཞིན་གྱིས། །དེ་བཞིན་ཡིད་བཟངས་མ་ཞེས་བརྗོད། །གཏུམ་པའི་ལས་གནས་ལྷ་མོ་
ནི། །དེ་བཞིན་གཏུམ་མོ་ཞེས་སུ་བསྒྲགས། །གཞོན་ནུ་མ་ནི་གཡོ་བའི་ཕྱིར། །གཞོན་ནུ་མ་ནི་འདྲལ་མར་བརྗོད། །འདི་རྣམས་རྩ་ཡི་དབྱེ་བ་ཡིས། །ལྷ་མོ་འདི་རྣམས་རབ་ཏུ་གྲགས། །ཡང་དག་པར་ནི་སྦྱོར་བ་དང་། །རྡོ་རྗེ་མཁའ་འགྲོ་ལས་གསུངས་པ། །མགྲིན་པ་
ནས་བརྩམས་གཡོན་པའི་རྩ། །ལོངས་སྤྱོད་པ་ཡི་སྐུ་ཅན་མ། །ལྟེ་བའི་ནང་དུ་ངལ་བསོས་ཤིང་། །ཁ་ནི་འོག་ཏུ་མྱོས་བྱེད་འབབ། །གང་ཞིག་ལྟེ་བ་ནས་སྟེང་རྩ། །དེ་བཞིན་ཁ་ནི་སྟེང་དུ་འབབ། །མགྲིན་པའི་ནང་དུ་ངལ་སོས་ཤིང་། །ཁྲག་འབབ་པར་ནི་རབ་ཏུ་

གྲགས། །འདིར་ནི་མྱོས་བྱེད་ཟླ་བར་བཤད། །ཁྲག་ནི་ཉི་མ་ཞེས་སུ་གསུངས། །འདི་དག་ཟླ་བ་ཉི་མ་གཉིས། །རྩ་གཉིས་སུ་ནི་རབ་ཏུ་གྲགས། །ཞེའོ། །ཡང་དག་པར་སྦྱོར་བ་ལས་གསུངས། །སྙིང་གི་ནང་སོན་པདྨ་ནི། །འདབ་མ་བརྒྱད་པར་སྙིང་པོར་བཅས། །དེ་ཡི་
ནང་དུ་སོན་པའི་རྩ། །མར་མེ་རང་གི་ངོ་བོ་ཅན། །ཀ་ཏ་ལ་ཡི་མེ་ཏོག་མཚུངས། །ནར་ཞིང་ཁ་ནི་འོག་ཏུའོ། །དེ་ཡི་ནང་ནས་དཔའ་བོ་ནི། །ཡུངས་ཀར་གྱི་ནི་སྦོམ་ཕྲ་ཙམ། །གཞོམ་མེད་ཧཱུཾ་གི་ས་བོན་ནི། །སྙིང་པོ་ལྟ་བུ་འཛག་པ་ཉིད། །འགྲོ་དང་འོང་བར་བྱེད་པ་
འདི། །ཐམས་ཅད་ལུས་ལ་རྣམ་པར་གནས། །དངོས་མེད་རྣམ་པའི་གཟུགས་སུ་ནི། །ཐུང་ངུ་རུ་ནི་ཡོངས་སུ་གྲགས། །སྙིང་གར་ཧཱུཾ་གི་རྣམ་པ་ནི། །རིང་པོ་མ་མོ་གཉིས་དང་གནས། །མགྲིན་པར་ཨོཾ་གྱི་གཟུགས་ཀྱིས་ནི། །མ་མོ་གསུམ་དང་པུ་ལུ་ཏ། །དཔྲལ་བར་ཧཾ་
གི་རྣམ་པ་འདི། །སྒྲ་དང་ཐིག་ལེ་གཞོམ་མེད་པའི། །རྡོ་རྗེ་སེམས་དཔའི་གཟུགས་ཀྱིས་ནི། །འདིར་ནི་ཇི་ལྟར་བདེ་བར་རོལ། །འདབ་མ་རྣམས་ཀྱི་བཞི་ལ་ཡང་། །ཕྱོགས་བཞི་དག་ཏུ་རྣམ་པར་གནས། །འབྱུང་བ་བཞི་ཡི་རྩ་རྣམས་ནི། །མར་མེའི་རང་བཞིན་ལྟ་བུའོ། །
མི་ཕྱེད་མ་ནི་སྤྱི་བོར་གནས། །སོ་དང་སེན་མོ་འབབ་མར་བརྗོད། །སྤྱི་བོའི་གཙུག་ཏུ་ཕྲ་གཟུགས་མ། །སྐྲ་དང་བ་སྤུ་འབབ་པར་བརྗོད། །རྣ་བ་གཡས་པར་བརྩེ་བ་མ། །པགས་པ་དང་ནི་དྲི་མ་འབབ། །རྒྱབ་ཀྱི་ངོས་སུ་གཡོན་པ་མ། །ཤ་ནི་འབབ་པ་ཉིད་དུ་བརྗོད། །
རྣ་བ་གཡོན་པར་ཐུང་ངུ་མ། །ཆུ་རྒྱུས་འབབ་པར་བརྗོད་པའོ། །སྨིན་མའི་དབུས་སུ་རུས་སྦལ་སྐྱེས། །རུས་པའི་ཕྲེང་བ་འབབ་པའོ། །མིག་དག་ཏུ་ནི་བསྒོམ་པ་མ། །མཁལ་མ་འབབ་པར་བརྗོད་པའོ། །ལག་པའི་རྩ་བར་དབང་མ་ནི། །སྙིང་ནི་འབབ་པར་བརྗོད་
པའོ། །སྐྱོན་ཞེས་བྱ་བ་སྐྱོན་ལྡན་མ། །མཆན་ཁུང་དག་ཏུ་མིག་འབབ་མ། །འཇུག་མ་ཞེས་བྱའི་འཇུག་ཆེན་མོ། །ནུ་མ་དག་ཏུ་མཁྲིས་པ་འབབ། །ལྟེ་བ་མ་མོ་གློ་བ་འབབ། །སྣ་ཡི་རྩེ་མོར་མཚན་མོ་ནི། །རྒྱུ་མའི་ཕྲེང་བ་འབབ་པ་ཉིད། །ཁ་དག་ལ་ནི་བསིལ་སྦྱིན་

མ། །ངོས་ཀྱི་ཆུ་རྒྱུས་འབབ་པ་ཉིད། །མགྲིན་པ་རུ་ནི་ཚ་བ་མ། །ལྟོ་བ་དག་ནི་འབབ་པ་ཉིད། །བརྐྱང་མ་དང་། རོ་མ་དང་། ཀུན་འདར་མ་ཞེས་པ་འདི་གསུམ་ནི་གོང་དུ་བཤད་པ་ཉིད་དོ། །སྙིང་གར་གཞོལ་མ་བཤང་བ་འབབ། །རངས་མ་ཞེས་བྱ་རངས་
མའི་གདོང་། །འཁྱུད་མ་མཚམས་ཀྱི་མཐའ་ནང་སོན། །རྟགས་ལ་ཤིན་ཏུ་གཟུགས་ཅན་མ། །བད་ཀན་འབབ་པ་ཉིད་དུ་བརྗོད། །བཤང་བའི་ལམ་དུ་གཅི་མ་ནི། །རྣག་འབབ་པར་ནི་བརྗོད་པ་ཡིན། །བརླ་དག་ཏུ་ནི་རྒྱུ་སྦྱིན་མ། །ཁྲག་འབབ་པར་ནི་བརྗོད་པའོ། །
བྱིན་པ་དག་ཏུ་སྦྱོར་བྲལ་མ། །རྡུལ་ནི་འབབ་པ་རུ་ནི་བརྗོད། །རྐང་པའི་སོར་མོ་སྡུ་གུ་མ། །ཚིལ་བུ་འབབ་པར་བརྗོད་པ་ཉིད། །རྐང་པའི་རྒྱབ་ཏུ་འགྲུབ་མ་ནི། །མཆི་མ་འབབ་པར་བརྗོད་པ་ཉིད། །མཐེ་བོར་འཚེད་མ་མཆིལ་མ་འབབ། །པུས་མོ་གཉིས་སུ་ཡིད་
བཟངས་མ། །ཤ་དང་སྣབས་ནི་འབབ་པ་ཉིད། །སྙིང་གི་པདྨའི་ཟེ་འབྲུ་ནི། །ཕྱོགས་འདབ་རིམ་པ་ཇི་ལྟ་བ། །སུམ་སྐོར་འདབ་མ་ཁྱིམ་མ་དང་། །གཏུམ་མོ་དང་ནི་བདུད་འདྲལ་མའོ། །བརྐྱང་མ་རོ་མ་ཀུན་འདར་མ། །གསུམ་ནི་བདག་མེད་རྣལ་འབྱོར་མ། །མི་ཕྱེད་
མ་དང་ཕྲ་གཟུགས་མ། །རྒྱལ་བས་རྡོ་རྗེ་མ་རུ་བཤད། །བརྩེ་བ་མ་དང་གཡོན་པ་མ། །གཉིས་ནི་གཽ་རཱི་ཉིད་དུ་བརྗོད། །ཐུང་ངུ་མ་དང་རུས་སྦལ་སྐྱེས། །ཆུ་ཡི་རྣལ་འབྱོར་མ་ཞེས་ཟེར། །སྒོམ་པ་མ་དང་དབང་མ་ཉིད། །རྡོ་རྗེ་མཁའ་འགྲོ་མར་ནི་བཤད། །སྐྱོན་
ལྡན་མ་དང་འཇུག་ཆེན་མ། །གཉིས་ནི་པུཀྐ་སཱི་རུ་བརྗོད། །མ་མོ་དང་ནི་མཚན་མོ་ཡང་། །རི་ཁྲོད་མར་ནི་རབ་ཏུ་གྲགས། །བསིལ་སྦྱིན་མ་དང་ཚ་བ་མ། །གདོལ་པ་མོར་ཡང་བརྗོད་པ་ཉིད། །གཞོལ་མ་དང་ནི་རངས་མའི་གདོང་། །འདི་གཉིས་གཡུང་མོར་བརྗོད་པ་
ཉིད། །ཤིན་ཏུ་གཟུགས་ཅན་སྤྱི་མ་གཉིས། །གཽ་རཱི་སྒོ་ནི་སྐྱོང་བ་མོ། །སྒྱུ་སྦྱིན་མ་དང་སྦྱོར་བྲལ་མ། །ཆོམ་རྐུན་མ་རུ་ཐུབ་པས་གསུངས། །སྡུ་གུ་མ་དང་གྲུབ་མ་ཡང་། །རོ་ལངས་མར་ནི་མངོན་པར་བརྗོད། །འཚེད་མ་དང་ནི་ཡིད་བཟངས་མ། །གྷསྨ་རཱི་རུ་དྲན་པར་བྱ། །སུམ་

སྐོར་མ་དང་འདོད་མ་ཉིད། །གཉིས་ནི་ས་སྤྱོད་མ་རུ་བརྗོད། །ཁྱིམ་པ་གཏུམ་མོ་བདུད་འདྲལ་མ། །རྩ་རྣམས་གསུམ་ནི་མཁའ་སྤྱོད་མ། །མཁའ་འགྲོ་མར་ནི་འདོད་པ་ཡི། །བཅོ་ལྔས་ཐམས་ཅད་བསྡུས་པ་ཉིད། །ཀྱེའི་རྡོ་རྗེའི་དེ་ཁོ་ན་ཉིད་རྣམ་པར་ཕྱེ་བ་དང་།
ཀྱེའི་རྡོ་རྗེའི་བཤད་པའི་རྒྱུད་ཡང་དག་པར་སྦྱོར་བ་དང་། རྡོ་རྗེ་མཁའ་འགྲོ་ལས། རྩའི་འཁོར་ལོའི་སྐབས། དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།། ༄༅༅། །རྒྱ་གར་སྐད་དུ། ཨཥྚཥྨ་ཤཱ་ན་ནཱ་མ། བོད་སྐད་དུ། དུར་ཁྲོད་བརྒྱད་ཅེས་བྱ་བ། ཀྱེའི་
རྡོ་རྗེ་ལ་ཕྱག་འཚལ་ལོ། །ཞིང་བརྒྱད་ལ་སོགས་པ་རྣམས་འཇིག་རྟེན་སྐྱོང་བ་བརྒྱད་པོ་དང་། ཀླུའི་རྒྱལ་པོ་རིགས་བརྒྱད་དང་། ཞིང་གི་བདག་པོའི་ལྷ་དང་། ཤིང་དང་། ཆར་སྤྲིན་རིམ་པ་ཇི་ལྟ་བ་བཞིན་བལྟ་བར་བྱའོ། །དང་པོར་རེ་ཞིག་ཤར་དུ་ནཱ་ག་པུཥྤའི་ཤིང་དང་།
ཨཊྚ་ཧ་ས་དང་། དབང་པོ་དང་། ཀླུའི་རྒྱལ་པོ་པདྨ་ཆེན་པོ་དང་། ཆར་སྤྲིན་གྷོ་ར་ཞེས་བྱ་བ་གུར་གུམ་གྱི་མདོག་ལྟ་བུའོ། །ལྷོ་རུ་ཨ་མྲའི་ཤིང་དང་། ཙ་རི་ཏྲ་དང་། གཤིན་རྗེ་དང་། ཀླུའི་རྒྱལ་པོ་རིགས་ལྡན་དང་། ཆར་སྤྲིན་ཙཎྜ་ཞེས་བྱ་བ་སྔོན་པོའོ། །
ནུབ་ཏུ་ཤིང་ཨ་ཤྭཏྛ་དང་། ཀོ་ལ་གི་རི་དང་། ཆུ་བདག་དང་། ཀླུའི་རྒྱལ་པོ་སྟོབས་ཀྱི་རྒྱུ་དང་། ཆར་སྤྲིན་གྷ་ན་ཞེས་བྱ་བ་མདོག་དཀར་པོའོ། །བྱང་དུ་ཤིང་པུནྣཱ་ག་ར་དང་། ཛ་ཡཎྚི་དང་། ལུས་ངན་པོ་དང་། ཀླུའི་རྒྱལ་པོ་དུང་སྐྱོང་དང་། ཆར་སྤྲིན་ཨ་པ་རྟོ་ཞེས་བྱ་བ་
ཁ་དོག་སེར་པོའོ། །དབང་ལྡན་དུ་ཤིང་ནྱ་གྲོ་ངྷ་དང་། ཨུཛྫ་ཡ་ནི་དང་། དྲག་པོ་དང་། ཀླུའི་རྒྱལ་པོ་འཇོག་པོ་དང་། ཆར་སྤྲིན་གརྫི་ཏ་ཞེས་བྱ་བ་ཁ་དོག་ནག་པོའོ། །མེ་རུ་ཤིང་ཀ་རཉྫ་དང་། པྲ་ཡཱ་ག་དང་། མེ་དང་། ཀླུའི་རྒྱལ་པོ་པདྨ་ཞེས་བྱ་བ་དང་། ཆར་
སྤྲིན་གྷརྨི་ཏ་ཞེས་བྱ་བ་ཁ་དོག་སྣ་ཚོགས་སོ། །བདེན་བྲལ་དུ་ལ་ཏ་ཛ་ཏའི་ཤིང་དང་། རྣ་འཆུས་ས་མ་དང་། སྲིན་པོ་དང་། ཀླུའི་རྒྱལ་པོ་མཐའ་ཡས་དང་། ཆར་སྤྲིན་འབབ་པ་ཞེས་བྱ་བ་ནག་པོའོ། །རླུང་དུ་ཤིང་ཨུ་དུམྺཱ་ར་དང་། ལྷ་མོའི་མཁར་དང་། རླུང་

དང་། །ཀླུའི་རྒྱལ་པོ་ནོར་རྒྱས་ཀྱི་བུ་དང་། ཆར་སྤྲིན་པུ་རཱ་ཎ་ཞེས་བྱ་བ་དཀར་ནག་གི་མདོག་གོ་ཞེས་བྱ་བ་ལ་སོགས་པའི་ཞིང་རིམ་པ་ཇི་ལྟ་བས་ཤེས་པར་བྱའོ།། །།རྒྱ་གར་གྱི་མཁན་པོ་རཏྣ་ཤྲཱི་མི་ཏྲ་དང་། དགེ་སློང་ཤཱཀྱ་ཡེ་ཤེས་ཀྱིས་
བསྒྱུར་བའོ།། ༄༅༅། །རྒྱ་གར་སྐད་དུ། ཨཥྚཥྨ་ཤ་ན་ནཱ་མ། བོད་སྐད་དུ། དུར་ཁྲོད་བརྒྱད་ཅེས་བྱ་བ་ དཔལ་ཧེ་རུ་ཀ་ལ་ཕྱག་འཚལ་ལོ། །ཧེ་རུ་ཀ་དཔལ་དཔའ་བོ་ནི། །ལྷན་ཅིག་སྐྱེས་དགའ་མཛེས་པ་དང་། །བཟའ་དང་གྲོལ་བའི་འབྲས་རབ་
སྩོལ། །བླ་མའི་ཞབས་པད་ཕྱག་འཚལ་ནས། །དུར་ཁྲོད་ཤིང་དང་ཕྱོགས་སྐྱོང་དང་། །ཀླུ་བདག་ཆུ་འདོར་རྣམས་ཀྱི་ནི། །མིང་དང་ཕྱོགས་དབྱེ་གནས་པ་ནི། །བདག་ཉིད་དྲན་ཕྱིར་བྲི་བར་བྱ། །གཡོན་གྱི་ཤར་སོགས་ཕྱོགས་རྣམས་སུ། །གཡས་ཀྱི་དབང་ལྡན་
ཕྱོགས་རྣམས་ལ། །རྡོ་རྗེ་གུར་གྱི་ནང་དུ་ནི། །བཞི་བཞིར་སྦྱོར་བར་བྱ་བ་ཉིད། །གཏུམ་མཆོག་ག་ཧ་ར་ཉིད་དང་། །འབར་བ་འཁྱིམ་པ་ཐོད་པ་ཅན། །རྣམ་འཇིགས་ཤར་ལ་སོགས་པ་ཡི། །ཕྱོགས་སུ་གཡོན་གྱིས་ཡང་དག་གནས། །ཨཊྚ་ཧ་ས་དབང་ལྡན་དུ། །
བྱིན་ཟ་རུ་ནི་ལཀྵི་ཅན། །འཇིག་པའི་མུན་པ་བདེན་བྲལ་དུ། །རླུང་དུ་ཀཱི་ལི་ཀཱི་ལའི་སྒྲས། །རོ་ལངས་འབྱུང་པོའི་ཚོགས་ཀྱིས་དང་། །ཅེ་སྦྱང་སྒྲ་ཡི་འཇིགས་པ་ཡིས། །རྡོ་རྗེ་གུར་གྱི་ནང་དུ་ནི། །དུར་ཁྲོད་རྣམས་ནི་འཇིགས་པའི་གཟུགས། །འདི་ཉིད་ཀྱི་ནི་རིམ་པ་
འདིར། །དུར་ཁྲོད་བརྒྱད་པོ་རྣམས་ནི་གནས། །ཤིང་དང་། ཕྱོགས་སྐྱོང་དང་། ཀླུའི་དབང་པོ་དང་། ཆར་སྤྲིན་གྱི་དབང་པོ་དེ་རྣམས་གང་ཞེ་ན། ཤི་ར་ཤ་དང་ཨ་ཤྭདྠ། །ཀཾ་ཀེལླེ་ཤིང་ཙུ་ཏ་ཉིད། །གོང་མཚུངས་བ་ཏ་ཀ་རཉྫ། །དབང་པོ་དང་ནི་ནོར་སྦྱིན་ཉིད། །ཀླུ་
དབང་དེ་ནས་གཤིན་རྗེ་བདག །དབང་ལྡན་དེ་ནས་བྱིན་ཟ་བདག །སྲིན་པོའི་དབང་པོ་རླུང་བདག་ཉིད། །ནོར་རྒྱས་བུ་དང་འཇོག་པོ་ཉིད། །སྟོབས་ཀྱི་རྒྱུ་དང་པདྨ་ཉིད། །པད་ཆེན་ཧུ་ལུ་ཧུ་ལུ་དང་། །རིགས་ལྡན་དང་ནི་དུང་སྐྱོང་ངོ་། །གརྫི་གྷུརྨི་ཏོ་འཇིགས་དང་། །ཨ་བ་ཏོ་དང་གྷ་ན་ཉིད། །པཪྵ་ན་དང་བུ་ར་ཎ། །གཏུམ་

པ་འདི་རྣམས་ཆར་སྤྲིན་བདག །རྒྱ་གར་གྱི་མཁན་པོ་རཏྣ་ཤྲཱི་མི་ཏྲ་དང་། དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བ།། ༄། །བརྡ་ངེས་པར་གཟུང་བ་བཞུགས། ༄༅༅། །དཔལ་དགྱེས་པའི་རྡོ་རྗེ་ལ་ཕྱག་འཚལ་ལོ། །བརྡ་ངེས་པར་གཟུང་བར་བྱ་སྟེ། དང་པོ་སྒྲ་
ཇི་ལྟ་བ་བཞིན་དུ་ཤེས་པར་བྱ་ཞིང་། དེ་ནས་ཡང་མན་ངག་གི་རིམ་པ་བཞིན་དུ་ཤེས་པར་བྱའོ། །བརྡ་ཞེས་བྱ་བ་ནི་ལུས་དང་ངག་གི་སྤྱོད་པའོ། །ལུས་ནི་རྡོ་རྗེ་དང་པདྨ་སྟེ། དེའི་སྤྱོད་པའོ། །ངག་ནི་ཡི་གེ་སྟེ། དེས་མཁའ་གསང་བྱིན་གྱིས་བརླབས་པ་ནི། དེའི་སྤྱ