Kinh tạng Tây Tạng (Kangyur Đại Học) — 083_རྒྱུད་འབུམ།_ཇ

ནས་དེ་རྫོགས་པ་དང་མཆོད་པ་རྒྱ་ཆེན་པོ་བྱས་ནས་ཟས་དཀར་པོ་དང་
ཞོ་དང་བུ་རམ་དང་འོ་མའི་ཐུག་པས་ཇི་ལྟར་གསུང་བའི་མཆོད་པར་བྱའོ། །གུ་གུལ་གྱི་སྤོས་ཕུལ་ནས་མཚན་མོ་ཧྲིལ་པོ་བཟླས་པ་བྱའོ། །ཤིན་ཏུ་སྔ་བ་ན་ངེས་པར་འོང་བར་འགྱུར་རོ། །གལ་ཏེ་མ་འོངས་ན་དེའི་སྐད་ཅིག་ལ་འཆི་བར་བྱེད་དོ། །འོངས་ནས་གནང་བ་
ཞུ་བར་བྱེད་དེ། །བདག་གིས་ཅི་བྱ་ཞེས་སོ་སྒྲུབ་པ་པོས་སྨྲ་བར་བྱ་སྟེ། །བདག་གིས་གང་བསྒོ་བ་གྱིས་ཤིག་ཅེས་སོ། །དེ་ནས་བཟུང་སྟེ་གང་བསྒོ་བའི་ལས་རྣམས་བྱེད་དོ། །རིག་པ་འཛིན་པ་དང་རྒྱལ་པོ་ཡང་སྟེར་རོ། །དགྲ་རྣམས་ལ་ཆད་པས་གཅོད་པར་བྱེད་དོ། །ཟླ་བའི་ལྷ་མོ་
ཡང་བླངས་ནས་སྟེར་རོ། །རྒྱབ་ལ་ཞོན་པས་ལྷའི་འཇིག་རྟེན་དུ་འགྲོ་ཞིང་བརྒྱ་བྱིན་ཡང་སྟེར་རོ། །བསྐལ་བ་བདུན་དུ་འཚོ་བར་འགྱུར་རོ། །དེ་ནས་ཨ་ཛི་ཏ་སྒྲུབ་པར་གྱུར་ན་མཆོད་རྟེན་གྱི་མདུན་དུ་མཚན་མོ་སྟོང་ཕྲག་བརྒྱད་བཟླས་པ་བྱས་ཏེ། ཉི་མ་བདུན་པའམ་བརྒྱད་པ་ལ་མཆོད་

པ་རྒྱ་ཆེན་པོ་བྱས་ཏེ་གཏོར་མ་ཕུལ་ནས་གུ་གུལ་གྱི་སྤོས་ཕུལ་ཏེ་བཟླས་པ་བྱའོ། །བཟླས་པའི་མཐའ་ལ་ངེས་པར་འོང་བར་འགྱུར་ཏེ། །ཀྱཻ་སྒྲུབ་པ་པོ་བདག་གིས་ཅི་བགྱི་ཞེས་སོ། །སྒྲུབ་པ་པོས་སྨྲ་བར་བྱ་སྟེ། །བདག་གི་བྱ་བ་གང་ཡིན་པ་བྱ་དགོས་སོ་ཞེས་སོ། །དེ་ནས་
བཟུང་ནས་བསྒོ་བའི་ལས་རྣམས་བྱེད་པར་འགྱུར་རོ། །སླར་ཡང་རྒྱལ་པོ་སྟེར་ཞིང་ལོ་སྟོང་དུ་འཚོ་བར་འགྱུར་རོ། །དེ་ནས་གང་སྒྲུབ་པར་གྱུར་ན་རྡོ་རྗེ་འཛིན་པའི་ཁང་བར་ཞུགས་ཏེ་སྟོང་ཕྲག་བརྒྱད་བཟླས་པར་བྱའོ། །ཉི་མ་བདུན་པའམ་ཉི་མ་བརྒྱད་པ་ལ་གཏོར་མ་དང་མཆོད་པ་རྒྱ་ཆེན་པོ་
བྱས་ཏེ། །ཁ་ཟས་དཀར་པོ་དང་ཞོ་དང་ཇི་སྐད་བཤད་པའི་མཆོད་པ་ཕུལ་ནས་ཇི་སྲིད་ནམ་ཕྱེད་ཀྱི་བར་དེ་སྲིད་བཟླས་པར་བྱའོ། །ཇི་སྲིད་ནམ་ཕྱེད་དུ་གྱུར་པ་ན་རང་ཉིད་འོང་བར་འགྱུར་རོ། །མེ་ཏོག་དང་མཆོད་ཡོན་ཕུལ་ཏེ་ཚིམ་བར་བྱས་པས་རྒྱལ་པོ་སྟེར་བར་འགྱུར་རོ། །འདོད་པ་
ཐམས་ཅད་ཡོངས་སུ་རྫོགས་པར་བྱེད་དོ། །ལོ་སྟོང་དུ་འཚོ་བར་འགྱུར་རོ། །ཇི་སྲིད་འཚོའི་བར་དུ་གང་བཅོམ་བའི་ལས་རྣམས་བྱེད་དོ། །ཆེ་གེ་མོ་སོད་ཅིག་ཅེས་པ་དང་། ཆེ་གེ་མོ་འཚོ་བར་གྱིས་ཤིག་ཅེས་པ་ཡང་བྱེད་དོ། །དེ་ནས་མ་གང་བསྒྲུབ་པར་གྱུར་ན་བདུད་དང་
བཅས་པའི་མཆོད་རྟེན་གྱི་དྲུང་དུ་སྔོན་དུ་ཁྲི་བཟླས་ཏེ་བསྙེན་པ་བྱས་པར་གྱུར་པས་དེ་ནས་ཟླ་བ་ཡོངས་སུ་རྫོགས་པ་ལ་ཇི་སྐད་བཤད་པའི་དངོས་པོས་མཆོད་པ་བྱས་ནས་ཇི་སྲིད་ནམ་ཕྱེད་དུ་གྱུར་པ་དེ་སྲིད་དུ་བཟླས་པ་བྱའོ། །དེ་ནམ་ཕྱེད་ན་མྱུར་དུ་འོང་བར་འགྱུར་ཏེ་འོངས་ནས་མདུན་
དུ་བསྡད་དེ་ཀྱཻ་བུ་ཅི་བྱ་ཞེས་སྨྲ་བར་འགྱུར་རོ། །སྒྲུབ་པ་པོས་སྨྲ་བར་བྱ་སྟེ་བདག་གི་བྱ་བ་གང་ཡིན་པ་བྱ་དགོས་སོ་ཞེས་སོ། །དེ་ནས་བཟུང་སྟེ་ཅི་བཅོལ་བའི་ལས་རྣམས་བྱེད་དོ། །གནོད་སྦྱིན་གྱི་བུ་མོ་མཆོག་རྣམས་བླངས་ནས་སྟེར་བ་དང་། །འདོད་པའི་ཁ་ཟས་མཆོག་
རྣམས་སྟེར་བ་དང་། །ཉི་མ་སོ་སོ་ལ་གུས་པས་གོས་ཟུང་དང་དོང་ཙེ་ལྔ་རབ་ཏུ་སྟེར་བར་འགྱུར་རོ། །ལོ་ལྔ་བརྒྱར་འཚོ་བར་འགྱུར་རོ། །དེ་ནས་དུར་ཁྲོད་ཀྱི་བདག་པོ་སྒྲུབ་པར་གྱུར་ན་མཚན་མོ་དུར་ཁྲོད་དུ་ཕྱིན་ནས་བཟླས་པ་སྟོང་ཕྲག་གཅིག་བྱའོ། །ཉི་མ་བདུན་པ་དང་བརྒྱད་པ་ལ་

རབ་ཏུ་མང་པོའི་ཉ་དང་ཏིལ་དང་ཛི་བུ་ལི་ཀ་དང་དཀར་བའི་ཟས་དང་ཞོ་དང་བུ་རམ་དང་དྷཱུ་པ་དང་འབྲས་བུ་དང་ཉེ་བར་སྤྱོད་པ་རྣམས་དང་ཇི་སྐད་གསུངས་པའི་གཏོར་མ་བྱིན་ཏེ་གུ་གུལ་གྱི་སྤོས་ཕུལ་ཏེ་ཇི་སྲིད་ནམ་ཕྱེད་ཀྱི་བར་དེ་སྲིད་བཟླས་པ་བྱའོ། །དེའི་ནམ་ཕྱེད་ན་ཧཱ་ཧཱ་སྒྲོགས་པ་ཐོས་པར་འགྱུར་
ཏེ། དེ་ལ་འཇིགས་པར་མི་བྱའོ། །དེ་འཁོར་གྱི་ཚོགས་ཀྱིས་ཡོངས་སུ་བསྐོར་ནས་འོང་བར་འགྱུར་རོ། །འོངས་པ་དང་གཏོར་མ་བྱིན་པས་ཚིམ་པར་འགྱུར་རོ། །འབྱུང་པོ་ཐམས་ཅད་གང་བསྒོ་བ་བྱེད་དོ། །ཉི་མ་རེ་རེ་ཞིང་དོང་ཙེ་བརྒྱད་བླང་བར་འགྱུར་རོ། །དགྲ་
ཐམས་ཅད་འཇོམས་ཤིང་ལོ་སྟོང་དུ་འཚོ་བར་འགྱུར་རོ། །དེ་ནས་རིགས་ཀྱི་དབང་ཕྱུག་སྒྲུབ་པར་གྱུར་ན་ལྷའི་གནས་སུ་ཕྱིན་ནས་དྲི་དམར་པོ་དང་། མེ་ཏོག་དམར་པོ་དང་གུ་གུལ་ཕུལ་ནས་སྔོན་དུ་བསྙེན་པ་ཁྲི་བཟླས་པར་བྱའོ། །ནག་པོའི་ཕྱོགས་ཀྱི་བཅུ་བཞིའི་མཚན་མོ་ལ་ཉ་ཤ་དང་།
ཏིལ་དང་། ཛཾ་བུ་ལི་ཀ་དང་། ཁ་ཟས་དམར་པོ་དང་། ཇི་ལྟ་བའི་མཆོད་པས་གཏོར་མ་དབུལ་བར་བྱ་ཞིང་སི་ཧླའི་སྤོས་ཕུལ་ནས་ཇི་སྲིད་ནམ་ཕྱེད་ཀྱི་བར་བཟླས་པ་བྱའོ། །དེ་ནས་འབར་བ་ཆེན་པོ་མཐའ་མེད་པ་ཤིན་ཏུ་འཇིགས་པའི་གཟུགས་འོང་བར་འགྱུར་རོ། །དེ་ལ་འཇིགས་
པར་མི་བྱ་སྟེ། བུ་བདག་གིས་ཅི་བྱ་ཞེས་སྨྲ་བར་འགྱུར་རོ། །སྒྲུབ་པ་པོས་སྨྲ་བར་བྱ་སྟེ། བདག་གིས་གང་བསྒོ་བ་གྱིས་ཤིག་ཅེས་སོ། །དེ་ཇི་སྲིད་འཚོའི་བར་དུ་གང་བཅོལ་བའི་ལས་བྱེད་པར་འགྱུར་རོ། །ཉི་མ་རེ་རེ་ལ་དོང་ཙེ་ལྔ་ཐུན་མཚམས་གསུམ་དུ་སྟེར་བར་
བྱེད་དོ། །འདོད་པའི་ཁ་ཟས་མཆོག་སྟེར་ཞིང་ལོ་ལྔ་བརྒྱ་འཚོ་བར་འགྱུར་རོ། །དེ་ནས་འབྱུང་པོའི་དབང་ཕྱུག་སྒྲུབ་པར་གྱུར་ན་ལིངྒ་གཅིག་པའི་དྲུང་དུ་ཕྱིན་ཏེ། །ཉིན་མཚན་གསུམ་དུ་དམར་བའི་ཟས་དང་ཉ་ཤ་དང་ཏིལ་དང་། ཛཾ་བུ་ལི་ཀའི་གཏོར་མ་བྱིས་པས་ཉི་མ་
གསུམ་པ་ལ་བདག་ཉིད་མྱུར་དུ་འོངས་ནས་མདུན་དུ་འཁོད་དེ་བདག་གིས་ཅི་བྱ་ཞེས་སྨྲ་བར་འགྱུར་རོ། །སྒྲུབ་པ་པོས་སྨྲ་བར་བྱ་སྟེ། བདག་གིས་གང་བསྒོ་བ་གྱིས་ཤིག་ཅེས་སྨྲས་པས་རྟག་ཏུ་རྗེས་སུ་འབྲང་ཞིང་ལྷའི་བུ་མོ་བླངས་ནས་སྟེར་བར་བྱེད་ཅིང་། རང་གིས་ཟས་

བླངས་ཏེ་སྟེང་གཡོགས་ནས་རྣམ་པ་སོ་སོར་སྟེར་བར་བྱེད་དོ། །ལོ་ཉིས་སྟོང་དུ་འཚོ་བར་འགྱུར་རོ། །དེ་ནས་མངག་གཞུག་པ་མཆོག་སྒྲུབ་པར་གྱུར་ན་རྡོ་རྗེ་འཛིན་པའི་ཁང་པར་ཞུགས་ནས་ནག་པོའི་བཅུ་བཞི་ལ་བཟླས་པ་ཁྲི་ཕྲག་གཅིག་བྱའོ། །སྔོན་དུ་བསྙེན་
པ་བྱས་ནས་ཉི་མ་བདུན་པ་ལ་དེ་ནས་སྒྲུབ་པ་བརྩམ་བར་བྱའོ། །དཀྱིལ་འཁོར་ལ་ཙནྡན་གྱིས་བྱུགས་ཏེ་གུ་གུལ་གྱི་སྤོས་ཕུལ་ནས་དཀར་བའི་ཟས་དང་། ཞོ་དང་། མར་དང་། འོ་མ་དང་། ཀུ་ཤ་ཆུན་པོའི་སྟེང་དུ་མར་གྱི་མར་མེ་རབ་ཏུ་སྤར་ཏེ། མཚན་མོ་ཇི་སྲིད་པ་དེ་སྲིད་དུ་བཟླས་
པར་བྱའོ། །ནམ་ཕྱེད་ན་མངག་གཞུག་པ་མཆོག་ཉིད་འོང་བར་འགྱུར་རོ། །འོངས་པ་ན་ཙནྡན་གྱི་མཆོད་ཡོན་ཕུལ་བས་ཚིམ་པར་བྱའོ། །བདག་གིས་ཅི་བྱ་ཞེས་འདྲི་བར་འགྱུར་རོ། །སྒྲུབ་པ་པོས་སྨྲ་བར་བྱ་སྟེ། བདག་གིས་གང་བསྒོ་བ་གྱིས་ཤིག་ཅེས་སོ། །དེ་ནས་བཟུང་
སྟེ་གང་བཅོལ་བའི་ལས་རྣམས་བྱེད་པར་འགྱུར་རོ། །འདོད་པའི་འབྲས་བུ་ཐམས་ཅད་སྟེར་ཞིང་འདོད་པའི་དོན་ཐམས་ཅད་ཕུན་སུམ་ཚོགས་པར་བྱེད་དོ། །དེ་ནས་འདོད་པའི་དབང་ཕྱུག་མ་སྒྲུབ་པར་གྱུར་ན་གྲོ་གའི་ལོ་མ་ལ་གི་ཝང་གིས་གཟུགས་བརྙན་བྲིས་ཏེ། རང་གཅིག་
པུ་ཉལ་སའི་སྟེང་དུ་བསྡད་ལ་སྟོང་ཕྲག་གཅིག་བཟླས་པ་བྱའོ། །དེ་ནས་ཟླ་བའི་མཐར་མཆོད་པ་རྒྱ་ཆེན་པོ་བྱས་ལ་མར་གྱི་མར་མེ་རབ་ཏུ་སྦར་ཏེ་མི་སྨྲ་བར་གྱུར་པས་བཟླས་པར་བྱའོ། །དེའི་ནམ་ཕྱེད་ན་ངེས་པར་འོང་བར་འགྱུར་རོ། །འོངས་པ་ན་འདོད་པ་བྱས་བས་ཆུང་མར་འགྱུར་
རོ། །མཛེས་པའི་རྒྱན་དང་བཟའ་བ་དང་བཅས་ཤིང་ཉལ་ཏེ་ཉིན་མོ་ཡོངས་སུ་སྤངས་ཤིང་འགྲོའོ། །བུད་མེད་གཞན་དང་འགྲོགས་པ་སྤང་བར་བྱ་སྟེ། གཞན་དུ་ན་རྣམ་པར་འཇིག་པར་བྱེད་དོ། །དེ་ནས་ཀ་ན་མ་ནཱི་སྒྲུབ་པར་གྱུར་ན་ནྱ་གྲོ་དྷའི་ཤིང་དྲུང་དུ་ཕྱིན་ཏེ་ཆོ་གས་ཉ་ཤའི་
གཏོར་མ་སྦྱིན་ནོ། །བདག་ཉིད་འཐུངས་པའི་ལྷག་མས་མཆོད་ཡོན་བྱིན་ལ་བཟླས་པ་སྟོང་ཕྲག་གཅིག་བྱའོ། །དེ་བཞིན་དུ་ཉི་མ་བདུན་པའི་མཚན་མོ་བདག་ཉིད་འོང་བར་འགྱུར་ཏེ། རྒྱན་ཐམས་ཅད་ཀྱིས་བརྒྱན་ཅིང་འཁོར་བརྒྱ་ཕྲག་གསུམ་དང་ལྷན་ཅིག་ཏུ་ནམ་ཕྱེད་ན་ངེས་པར་འོང་

བར་འགྱུར་རོ། །འོངས་པ་ན་འདོད་པ་བྱས་པས་ཆུང་མར་འགྱུར་རོ། །སྐྱེ་བ་བཅུ་གཉིས་ཀྱི་གོས་དང་རྒྱན་དང་བཟའ་བ་རྣམས་སྟེར་བར་བྱེད་དོ། །ཉི་མ་སོ་སོ་ལ་དོང་ཙེ་བརྒྱད་རབ་ཏུ་སྟེར་བར་བྱེད་དོ། །དེ་ནས་དགའ་མ་སྒྲུབ་པར་གྱུར་ན་ཐང་ཀ་ལ་རི་མོ་བྲི་བར་བྱ་སྟེ། གསེར་གྱི་མདོག་
ཅན་རྒྱན་ཐམས་ཅད་ཀྱིས་བརྒྱན་པ་ལག་ན་ཨུཏྤལ་དང་ལྡན་པའོ། །ཛ་ཏིའི་མེ་ཏོག་གིས་མཆོད་པར་བྱའོ། །གུ་གུལ་གྱི་སྤོས་བྱིན་ནས་སྟོང་ཕྲག་བརྒྱད་བཟླས་པར་བྱའོ། །ཟླ་བའི་མཐའ་ལ་ཇི་ལྟ་བའི་དངོས་པོས་མཆོད་པ་བྱ་སྟེ། མར་གྱི་མར་མེ་རབ་ཏུ་སྦར་ལ་ཇི་སྲིད་
ནམ་ཕྱེད་ཀྱི་བར་དུ་དེ་སྲིད་བཟླས་པ་ན་རང་ཉིད་འོང་བར་འགྱུར་རོ། །འོངས་པ་ན་མི་སྨྲ་བར་བསྒོམ་ཞིང་འདོད་པ་བྱས་པས་ཆུང་མར་འགྱུར་རོ། །སྒྲུབ་པ་པོའི་འཁོར་རྣམས་ནི་སྐྱོང་བར་འགྱུར་རོ། །འདོད་པའི་བཟའ་བ་མཆོག་རྣམས་དང་དངུལ་ཆུ་དང་བཅུད་ལེན་རྣམས་
སྟེར་ཞིང་དོང་ཙེ་ཉི་ཤུ་རྩ་ལྔ་རབ་ཏུ་སྟེར་བར་བྱེད་དོ། །དེ་ནས་པདྨ་ནི་སྒྲུབ་པར་གྱུར་ན་རང་གི་ཁང་པར་སྤྱི་བོའི་གནས་སུ་དཀྱིལ་འཁོར་ལ་ཙནྡན་བྱུགས་ཏེ་གུ་གུལ་གྱི་སྤོས་ཕུལ་ལ་ཟླ་བ་གཅིག་ལ་སྟོང་ཕྲག་གཅིག་བཟླས་སོ། །དེ་ན་ཟླ་བ་ཡོངས་སུ་གང་བ་ན་ཇི་ལྟ་བའི་དངོས་
པོས་མཆོད་པར་བགྱིས་ཏེ། ཇི་སྲིད་ནམ་ཕྱེད་པ་དེ་སྲིད་དུ་བཟླས་པས་ངེས་པར་འོང་བར་འགྱུར་རོ། །འོངས་པ་ན་འདོད་པ་བྱས་བས་ཆུང་མར་འགྱུར་རོ། །འདོད་པའི་མཆོག་རབ་ཏུ་སྟེར་ཞིང་དངུལ་ཆུ་དང་བཅུད་ལེན་དང་དངོས་གྲུབ་ཀྱི་རྫས་ཀྱང་སྟེར་བར་འགྱུར་རོ། །དེ་ནས་རལ་
པ་གཅིག་མའི་སྒྲུབ་ཐབས་བདག་གིས་ཡང་དག་པར་རབ་ཏུ་བཤད་པར་བྱའོ། །གནོད་སྦྱིན་མོ་རྣམས་སྒྲུབ་པའི་དུས་སུ་རལ་བ་གཅིག་མ་རྣམ་པར་བསྒོམ་བར་བྱའོ། །ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པ་ཁ་དོག་སྔོན་མོ། འཇིགས་པ་ཆེན་མོ་བྷ་གའི་དཀྱིལ་འཁོར་
ལ་བསྒོམ་པར་བྱའོ། །ཤར་གྱི་འདབ་མ་ལ་ཛམྦྷ་ལ་བསྒོམ་པར་བྱའོ། །ནོར་བུ་འཛིན་པ་ནི་ལྷོ་རུའོ། །ཆུ་དབང་ནི་ནུབ་ཏུའོ། །ཙིའི་འཁྱིལ་བ་ནི་བྱང་དུའོ། །མེ་ལ་སོགས་པའི་མཚམས་བཞི་ལ་གནོད་སྦྱིན་མོ་བཞི་བསྒོམ་བར་བྱ་སྟེ། ཀུཎྜ་ལཱཾ་དང་། ཧ་ཌྷི་ནཱི་དང་། རོ་ཧྲཾ་དང་། མཛེས་

མ་རྣམས་ཆོ་གས་དགོད་པར་བྱའོ། །དེ་ནས་སྒོ་སྐྱོང་བསྒོམ་བྱ་ཞིང་། །དབྱུག་པ་ལ་སོགས་མཐའ་དག་ལ། །སྔོན་དུ་འཁོར་ལོ་ཇི་ལྟ་བཞིན། །དེ་བཞིན་ཁ་དོག་རབ་ཏུ་སྦྱོར། །ཀུན་ལ་བདག་པོའི་མཚན་མ་འཛིན། །ཕྱི་ནས་ཀྱང་ནི་སྔགས་བཟླས་ཏེ། །ཨོཾ་ཨེ་ཀ་ཛ་ཊི་བ་
སུ་སཱ་དྷ་ནི་སྭཱ་ཧཱ། དེ་ནས་པུཀྐ་སཱི་ཡི་ནི། །སྒྲུབ་ཐབས་བདག་གིས་བཤད་པར་བྱ། །གང་གིས་བསྒོམས་ཙམ་སྐད་ཅིག་ལས། །འཇིག་རྟེན་གསུམ་ལ་པུཀྐ་སཱི། །ཁ་དོག་དམར་སེར་ཞལ་བཞི་པ། །ཕྱག་བཞི་བོང་བུ་ལ་ཞོན་སྒོམ། །ལས་ཀྱི་པུཀྐ་སཱི་ཡི་ནི། །བྱ་རོག་དང་ནི་ཐོ་བ་
དང་། །མདའ་གཞུ་བརྟུལ་ཞུགས་ཅན་གྱིས་བསྒོམ། །སྔགས་བཟླས་པར་བྱའོ། །ཨོཾ་པུཀྐ་སཱི་ཨོཾ། དེ་ནས་འཇམ་པའི་རྡོ་རྗེ་ཡི། །སྒྲུབ་ཐབས་བདག་གིས་རབ་བཤད་བྱ། །འཇམ་པའི་རྡོ་རྗེའི་གྲུབ་པ་ལས་སྐད་ཅིག་གཅིག་ལས་མི་མཐོང་བར་འགྱུར་རོ། །དེ་བཞིན་གཤེགས་པ་ཐམས་
ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་རོ་ལངས་གནོད་སྦྱིན་མོ་བསྒྲུབ་པ་སྟེ་རིམ་པར་ཕྱེ་བ་དགུ་པའོ།། །།དེ་ནས་རྡོ་རྗེ་འཛིན་པའི་རྒྱལ་པོས་རོ་ལངས་དང་། གཅན་གཟན་གདུག་པ་ཅན་ལ་སོགས་པ་བསྲུང་བའི་སྔགས་བཤད་པར་བྱའོ། །འབུམ་ཕྲག་བཞི་ནི་བཟླས་
པ་ཡིས། །དོན་གྲུབ་ས་བོན་གཏོར་བྱས་ན། །རོ་ནི་དོན་བྱེད་ལངས་འགྱུར་ཏེ། །འཚོ་བར་ཡང་ནི་ཐེ་ཚོམ་མེད། །ཞི་ལ་གཤིན་རྗེ་གཤེད་དཀར་པོ། །རྣལ་འབྱོར་བསྒོམ་བྱར་རྟག་ཏུ་རིག །ལག་ན་དོན་འགྲུབ་ས་བོན་ལ། །འབུམ་ཕྲག་བཞི་ནི་བཟླས་པ་ཡིས། །རོ་ནི་མདུན་དུ་ཕྱོགས་བྱས་ནས། །
ཡུངས་ཀར་གྱིས་ནི་བསྣུན་གྱུར་ན། །དེ་ཉིད་ལྡང་བར་ཐེ་ཚོམ་མེད། །གལ་ཏེ་ནག་པོས་བཟུང་གྱུར་ན། །ཧཱུྃ་མཛད་དཀར་པོ་དང་མཚུངས་པ། །བསྒྲུབ་བྱ་ཡི་ནི་སྙིང་གར་བསྒོམ། །ཧྲཱིཿཥྚྲཱིཿལ་སོགས་སྔགས་རྣམས་བཟླས། །འོད་ཟེར་གྱིས་ནི་དུག་རྣམས་དགུག །ལག་པ་གཡས་
དང་དེ་བཞིན་གཡོན། །པདྨ་འདབ་མ་བརྒྱད་པ་འཛིན། །དེ་དབུས་ཧཱུྃ་མཛད་དཀར་པོ་སྟེ། །འོད་ཟེར་གྱི་ནི་བདུད་རྩི་འབབ། །དེ་ཡི་མགོ་བོའི་སྟེང་དུ་ཡང་། །བསིལ་ཟེར་བྱེད་པའི་དཀྱིལ་འཁོར་དབུས། །མཁས་པས་ཧཿཡིག་བསམ་པར་བྱ། །ཧྲཱིཿཥྚྲཱིཿལ་སོགས་སྔགས་

དེ་ཡི། །རྒྱུད་ཀྱི་དུག་རྣམས་དྲང་བྱ་སྟེ། །ཨོཾ་ཧྲཱིཿཥྚྲཱིཿཧཿཧྲཱྃཿཛཿཕུཿཞེས་པའི་སྔགས་ཀྱི་ཡི་གེས་མགོ་བོ་ནས་བརྩམས་ནས་རྐང་བའི་མཐར་ཐུག་པ་སྔགས་ཀྱིས་བྱ་བ་པར་བྱའོ། །བདུད་རྩིའི་ཆར་རྒྱུན་འབབ་པར་བསྒོམ། །དེ་ཡིས་འཚོ་བར་ཐེ་ཚོམ་མེད། །ས་བོན་ཡི་གེ་ལས་གྲུབ་པའི། །
གཟུངས་ཀྱིས་འཆིང་བ་མཆོག་ཏུ་འགྱུར། །རྨ་ཡི་གནས་ལ་འདི་བསྒོམ་སྟེ། །ཁ་དོག་སེར་པོ་ལས་བྱུང་བའི། །ཨོཾ་ཡིག་ལ་སོགས་མཐར་ཚེག་དྲག །ཧ་ཋའི་རྣམ་པ་སྦྱར་བྱས་ལ། །སྦྱོར་བ་ཡིས་ཀྱང་བརྡ་བར་བྱ། །མགོ་གཟེར་རབ་ཞི་བློ་མཆོག་ལྡན། །དེ་བཞིན་གཞན་
ཡང་སྒོམ་དང་ནི། །བི་ཀ་ཊ་དང་རྐང་ཤུ་སོགས། །རབ་ཏུ་སྦྱོར་བ་མང་པོ་རྣམས། །ལག་པས་ངེས་གཟུང་འཚོ་བར་བྱེད། །དེ་ནས་རྒྱལ་པོ་རྡོ་རྗེ་འཆང་། །བསྲུང་བའི་འཁོར་ལོ་རབ་སྦྱོར་བ། །བགེགས་དང་ལོག་འདྲེན་གདུག་པ་རྣམས། །བརྟུལ་ཞུགས་ཅན་གྱིས་གཞོམ་
བྱའི་ཕྱིར། །བདག་ཉིད་དཔལ་ལྡན་དབྱུག་འཛིན་གྱི། །སྤྲུལ་བའི་འཁོར་ལོ་རབ་ཏུ་སྦྱོར། །དབྱུག་པའི་འོད་ཀྱིས་རང་ལུས་ཁྱབ། །སྐུ་གསུམ་ལས་ནི་སྐྱེས་པའོ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་
ལ། །ལྷ་མོ་ཁྱོད་ནི་དབང་དུ་གྱུར། །གཤིན་རྗེའི་གཤེད་ཀྱི་དཀྱིལ་འཁོར་དུ། །སློབ་དཔོན་བདག་གིས་དཀྱིལ་འཁོར་བྲི། །གོས་ཀྱིས་གདོང་ནས་བཅིངས་བྱས་ལ། །དཀྱིལ་འཁོར་ཁང་པའི་སྒོ་དྲུང་དུ། །ཀྱེ་མ་འབོད་པ་སུ་ཞིག་ལགས། །སྐལ་བཟང་བདག་ཅེས་བརྗོད་པར་
བྱ། །ཡོལ་བ་ཡི་ནི་ནང་བྱས་ནས། །བླ་མ་མགོན་ལ་མཁས་པས་ཞུ། །གུས་པ་ཆེན་པོས་དབང་གི་ཕྱིར། །རྗེས་སུ་མགོན་བྱེད་ལན་གསུམ་བརྗོད། །ཇི་ལྟར་སངས་རྒྱས་བདེ་ཆེན་གྱིས། །རྡོ་རྗེ་སེམས་དཔའ་དབང་བསྐུར་ལྟར། །བདག་ཀྱང་མགོན་པོས་དབང་བསྐུར་ནས། །
མཆོག་ཀྱང་བདག་ལ་སྩལ་དུ་གསོལ། །གླུ་དང་རོལ་མོས་དེ་བཞིན་མཆོད། །མཆོད་ཡོན་ཞབས་བསིལ་དེ་བཞིན་དུ། །སློབ་མས་གུས་དང་བཅས་ཏེ་དབུལ། །བསྟོད་པ་ཡང་ནི་དེ་ལ་བྱ། །དེ་ནས་རྒྱལ་པོ་རྡོ་རྗེ་འཆང་། །སྟོང་ཉིད་གསུངས་པ་འདི་ལྟ་སྟེ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་

སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་པཱུ་ཛཱ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཨོཾ་དྷརྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་ཞི་བ་ལ་སོགས་པའི། །སྦྱིན་སྲེག་རབ་དབྱེ་བདག་གིས་བཤད། །གང་གིས་ལས་ཀུན་རབ་སྒྲུབ་པ། །སྦྱིན་སྲེག་གིས་ནི་འགྲུབ་པར་འགྱུར། །ཞི་ལ་
ཞི་བའི་སེམས་ཀྱིས་ཏེ། །རྒྱས་ལ་རྒྱས་པའི་སེམས་ཀྱིས་སོ། །དབང་ལ་རྗེས་སུ་ཆགས་སེམས་ཏེ། །གསང་བ་ལ་ནི་ཁྲོ་སེམས་ཀྱིས། །ཞི་ལ་མཎྜལ་རྣམ་པ་སྟེ། །རྒྱས་ལ་རྫིང་གི་རྣམ་པའོ། །དབང་ལ་ཟླ་བ་ཕྱེད་པ་སྟེ། །ནམ་མཁའི་ཁམས་ནི་གསད་པ་ལ། །ཞི་ལ་
ཁྲུ་གང་ཚད་ཡིན་ཏེ། །རྒྱས་ལ་དེ་བཞིན་ཁྲུ་དོའོ། །རྒྱས་པ་ཇི་ལྟ་དེ་བཞིན་དབང་། །གསད་ལ་སོར་མོ་ཉི་ཤུའོ། །ཞི་ལ་ཁྲུ་ཕྱེད་གཏིང་དུའོ། །ཁྲུ་ཡི་ཚད་ཀྱིས་རྒྱས་པ་ལ། །གསད་པ་ལ་ནི་ལྔ་གཉིས་སོ། །རྒྱས་པ་ཇི་ལྟར་དེ་བཞིན་དགུག །ཞི་བའི་སྦྱིན་སྲེག་ཚེས་
གཅིག་ལ། །རྒྱས་པ་ཟླ་བ་གང་བ་ལ། །བཅུ་བཞི་ལ་ནི་མངོན་སྤྱོད་དོ། །བརྒྱད་ལ་དབང་གི་ལས་ཡིན་ནོ། །ཉ་སྐྱོགས་དང་ནི་ཤེལ་དག་དང་། །ཞི་ལ་མུ་ཏིག་འབྲས་བུ་མཆོག །དུང་གི་བུ་ནི་འཚོ་བ་ལ། །ནད་མེད་པ་ལ་མུ་མེན་ནོ། །ཙནྡན་དམར་པོ་དག་དང་ནི། །བྱི་རུ་
དམར་པོའི་ཁྱད་པར་དང་། །རགྣ་དང་ནི་ལུང་ཐང་ནག །མི་ཡི་རུས་དང་དེ་བཞིན་དུ། །ནཱ་ག་ཕ་ཎཱི་ཞེས་བྱ་རྣམས། །ཞི་བ་ལ་ནི་བརྒྱ་ཕྲག་གཅིག །རྒྱས་པ་བརྒྱད་ཀྱིས་ལྷག་དེ་བཞིན། །དབང་དགུག་ཉི་ཤུ་རྩ་ལྔའོ། །མངོན་སྤྱོད་དྲུག་ཅུ་རྩ་བཞིའོ། །རྡོག་པོ་རྣམས་ནི་
སྔགས་ཀྱིས་བསྐུ། །བརྒྱ་ཕྱེད་སྔགས་ཀྱིས་བསྒྲུབ་པར་བྱ། །ཕྲེང་བ་ཀུན་ལ་མཐར་མདུང་བྱ། །དེ་བཞིན་དུ་ནི་རི་རབ་གཉིས། །མཛུབ་མོའི་སྟེང་ནས་ཞི་བ་ལ། །གུང་མོ་ལ་ནི་རྒྱས་པའོ། །དབང་དགུག་དག་ལ་མིང་མེད་ལས། །ཆད་པས་བཅད་ལ་མཐེ་ཆུང་ལས། །ཞི་ལ་ཁ་
དོག་དཀར་པོ་དང་། །ཁ་དོག་སེར་པོ་རྒྱས་པ་ལ། །དམར་པོ་དབང་ལ་རྟག་ཏུ་བསྒོམ། །ནག་པོ་ཤིན་ཏུ་གསད་ལ་འདོད། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་སྦྱིན་སྲེག་གི་ཆོ་ག་སྟེ་རིམ་པར་བྱེ་བ་བཅུ་པའོ།། །།

རྣལ་འབྱོར་བཞི་དང་ལྡན་པའི་རྣལ་འབྱོར་པས་སྣ་ཚོགས་པའི་བཅའ་བ་ལ་སོགས་པ་དང་། །བཟའ་བ་དང་། མྱང་བ་དང་། བཏུང་བ་དང་། བལྡག་པ་ལ་སོགས་པ་དང་ཡང་དག་པར་ལྡན་པའི་དྲི་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་།
རྒྱལ་མཚན་དང་། དྲིལ་བུ་དང་། བ་དན་ལ་སོགས་པ་རྣམས་ཀྱིས་རབ་ཏུ་གང་བ་ལ་རོལ་མོའི་སྒྲ་ཆེན་པོ་ལྔ་བསྒོམ་པར་བྱའོ། །མདུན་དུ་གཏོར་མ་བཞི་ཁྱོགས་དང་ཁུར་དང་དཔུང་ཐེགས་དང་མཐའ་ན་ཟན་ཙམ་ཆུ་དང་བཅས་པ་ཁྱོར་བ་གསུམ་དང་ཇི་ལྟར་རྙེད་པའི་དམ་ཚིག་གི་རྫས་
དང་ལྡན་པ་བཤམས་ནས་དེ་སྟོང་པར་དམིགས་ཏེ་བརྩམ་པར་བྱའོ། །ནམ་མཁའི་ཁམས་སུ་པདྨ་འདབ་མ་བརྒྱད་པ་བསྒོམ་པར་བྱ་སྟེ། །གེ་སར་དང་བཅས་པའི་ཟེའུ་འབྲུ་ལ་ཡྃ་ཡིག་ལས་རླུང་གི་དཀྱིལ་འཁོར་ཁ་དོག་ནག་པོ་གཞུའི་རྣམ་པ་ལ་རྩེ་མོ་གཉིས་ལ་གཡོ་བའི་བ་དན་
དཀར་པོ་བརྒྱད་ཀྱིས་སྤྲས་པའོ། །དེའི་སྟེང་དུ་རྃ་ཡིག་ལས་མེའི་དཀྱིལ་འཁོར་ཟུར་གསུམ་དམར་པོ་ཟུར་གསུམ་ན་ར་ཡིག་གིས་སྤྲས་པའོ། །དེའི་སྟེང་དུ་རུ་ཡིག་གསུམ་ཡོངས་སུ་གྱུར་པ་ལས་མགོ་བོ་དམར་པོའི་སྒྱེད་པུ་གསུམ་གྱི་སྟེང་དུ་ཨཱཿཡིག་ལས་སྐྱེས་པའི་པདྨའི་སྣོད་ཕྱི་
དཀར་ལ་ནང་དམར་བ་དེ་ལ་ཆུ་སྐྱེས་འདབ་མ་བརྒྱད་པའི་རྣམ་པར་བསམ་པར་བྱའོ། །དེའི་ཤར་ལ་སོགས་པའི་འདབ་མ་ལ་ཨོཾ་ཨཱྃ་ཛྲཱིྃ་ཁྃ་ཧཱུྃ་གི་ཡི་གེ་རྣམས་ལས་རྣམ་པར་སྣང་མཛད་ལ་སོགས་པའི་རང་གཟུགས་རྣམས་སོ། །དེ་བཞིན་དུ་མེ་ལ་སོགས་པའི་མཚམས་རྣམས་ལ་
ལཱྃ་མཱྃ་པཱྃ་ཏཱྃ་བཱྃ་གི་ཡི་གེ་རྣམས་ལས་སྤྱན་མ་ལ་སོགས་པའི་རང་གཟུགས་རྣམས་བསྒོམ་པར་བྱའོ། །ཡི་གེ་བཅུ་པོ་འདི་རྣམས་ཡོངས་སུ་གྱུར་པ་ནི་གོ་ཀུ་ད་ཧ་ན་རྣམས་དང་། །བི་ར་ཤུ་མཱ་མཱུ་ཞེས་པ་སྟེ། འདི་རྣམས་ཀྱི་ས་བོན་གྱི་ཡི་གེས་མཚན་པའི་དམ་ཚིག་གི་རྫས་བཅུ་པོ་དེ་པདྨའི་
སྣོད་དུ་བལྟས་ཏེ། དེའི་སྟེང་དུ་ཨོཾ་ཡིག་ཁ་དོག་དཀར་པོས་བཀབ་པའི་གཟུག་སུ་བསྒོམ་མོ། །ཨོཾ་ཡིག་ལས་སྐྱེས་པའི་ཟླ་བའི་དཀྱིལ་འཁོར་དེའི་སྟེང་དུ་ཧཱུྃ་ཡིག་དཀར་པོ་ལས་བྱུང་བའི་རྡོ་རྗེ་དབྱུག་པ། དེ་ས་བོན་གྱིས་མཚན་པ་བལྟས་ཏེ། དེ་ཡང་པདྨའི་སྣོད་ལས་འོག་

ན་སྒྱེད་པུ་ལ་ཨོཾ་ཨཱཿཧཱུྃ་ལན་གསུམ་བཟླས་ཤིང་བརྗོད་པར་བསྒོམས་ཏེ་སྔོན་མ་རྒྱུན་མ་ཆད་པར་རླུང་གི་དཀྱིལ་འཁོར་རྒྱ་ཆེན་པོ་དང་། རབ་ཏུ་འབར་བ་མེའི་དཀྱིལ་འཁོར་བསྒོམས་ཏེ། རྒྱ་ཆེན་པོ་འབར་ཞིང་བར་མ་ལུས་པའི་རང་གཟུགས་གོ་ཀུ་ལ་སོགས་པའི་
དམ་ཚིག་གི་རྫས་བཅུ་ཞུ་བ་ལས་རྡོ་རྗེ་དབྱུག་པས་དཀྲུགས་པར་བལྟའོ། །དེ་ཡང་རྡོ་རྗེ་དབྱུག་པས་བདུད་རྩི་ཞུ་སྟེ་ཉི་མ་གསར་པའི་ཁ་དོག་གམ། དངུལ་ཆུའི་རྣམ་པར་བསམ་པར་བྱའོ། །དེ་ལ་ཡང་ཨོཾ་ཨཱཿཧཱུྃ་གསུམ་གྱི་ཡི་གེ་བལྟས་ཏེ། དེ་ལས་ཡི་གེ་གསུམ་གྱི་འོད་
ཟེར་གྱི་ཚོགས་ཆེན་པོ་རྣམ་པར་འཕྲོས་ཏེ་འཇིག་རྟེན་གསུམ་ན་གནས་པའི་བདུད་རྩི་རབ་ཏུ་མང་པོ་འོད་ཟེར་གྱིས་བཀུག་སྟེ། དེ་ལ་རབ་ཏུ་གཞུག་པར་བྱའོ། །དེ་རབ་ཏུ་ཞུགས་པས་ཟླ་བའི་འོད་ཟེར་ཚོགས་པ་ཤིན་ཏུ་ལྷག་པ་ཡོངས་སུ་གྱུར་པ་ལས་ཁ་བ་ལྟ་བུ་སྦྲང་རྩིའི་ཚོགས་པའི་
གཟུགས་ཀྱིས་མནན་པར་བྱའོ། །ཕྱི་ནས་ཡི་གེ་གསུམ་གྱིས་བྱིན་གྱིས་བརླབ་པར་བྱ་སྟེ། ཁ་དོག་དང་དྲི་དང་རོ་བཅུད་དང་ལྡན་པ་སྟོན་ཀའི་ཟླ་བ་དྲི་མ་མེད་པའི་འོད་ལྟ་བུ་ཡེ་ཤེས་ཀྱི་བདུད་རྩིའི་སྦྱོར་བས་གཏོར་མར་གྲུབ་པར་འདུན་པ་བྱའོ། །གཤིན་རྗེ་གཤེད་ཀྱི་གཟུགས་འཛིན་
པའི་སྔགས་ཀྱིས་ཁྲོ་བོ་རྣམས་ལ་ཕྱག་ན་ཞགས་པ་དང་ལྕགས་ཀྱུ་འཛིན་ཅིང་འཕྲོ་བས་ཕྱོགས་སྐྱོང་རྣམས་ཀྱི་སྙིང་ག་ནས་ལྕགས་ཀྱུས་འབིགས་ཤིང་མགྲིན་པ་ལ་ཞགས་པས་བཅིངས་ཏེ་འགུགས་བར་བསྒོམ་པར་བྱའོ། །དེ་ནས་ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་དུཥྚཱནྡྲ་ས་པ་རི་ཝཱ་
ར་མཱ་ཀརྵ་ཡ་ཛཿསྔགས་འདིས་དབང་པོ་མིག་སྟོང་སེར་སྐྱ་གླང་པོ་ཆེ་དཀར་པོ་ལ་ཞོན་པ། ལག་པ་གཡས་པ་དང་གཡོན་པ་རྡོ་རྗེ་དང་སྡིགས་མཛུབ་ཅན་བཀུག་སྟེ་ཤར་དུ་རྣམ་པར་དགོད་པར་བྱའོ། །དེ་བཞིན་དུ་དེའི་སྔགས་ཀྱིས་ཉེ་བའི་དབང་པོ་བྱ་ཁྱུང་ལ་གནས་པ། རིན་པོ་ཆེའི་ཅོད་
པན་ཅན། གཡས་ན་དབྱུག་པ་དང་འཁོར་ལོ། གཡོན་ན་དུང་དང་ནོར་བུ་འཛིན་པ། དེའི་གཡོན་མི་རིང་བ་ན་གནས་པའོ། །ཡང་དེ་བཞིན་དུ་གཤིན་རྗེ་ནག་པོ་མ་ཧེ་ལ་ཞོན་པ། དབྱུག་པ་འཛིན་པ་ལྷོར་གནས་པའོ། །ཡང་དེ་བཞིན་དུ་ཆུ་བདག་ཁ་དོག་དཀར་པོ་སྦྲུལ་ལ་

གནས་པ། ལག་ན་ཀླུའི་ཞགས་པ་འཛིན་པ། ནུབ་ཏུ་རྣམ་པར་གནས་པའོ། །ཡང་དེ་བཞིན་དུ་ལུས་ངན་པོ་སེར་པོ་གཏེར་ལ་གནས་པ། ལག་ན་བཱི་ཛ་པཱུ་ར་ཀ་དང་ན་ཀུ་ལི་བསྣམས་པ། བྱང་དུ་རྣམ་པར་གནས་པའོ། །དེ་བཞིན་དུ་སྣ་ལྡན་དཀར་པོ་བྱི་བ་ལ་གནས་པ། གཡས་
ན་བགྲང་ཕྲེང་དང་དགྲ་སྟ་འཛིན་པ། །གཡོན་ན་ལ་ཕུག་དང་ལ་དུའོ། །དེ་བཞིན་དུ་དབང་ལྡན་དཀར་པོ་ཁྱུ་མཆོག་དཀར་པོ་ལ་གནས་པ། །རལ་པ་འཛིན་པ་རྩེ་གསུམ་དང་ཐོད་པ་ལག་ན་བསྣམས་པ། ལག་པ་གཉིས་གཽ་རཱི་ལ་འཁྱུད་པ། དབང་ལྡན་དུ་རྣམ་པར་གནས་པའོ། །
ཡང་དེ་བཞིན་དུ་མེ་ལྷ་དམར་པོ་ར་ལ་གནས་པ། ལག་ན་བགྲང་ཕྲེང་དང་སྤྱི་བླུགས་བསྣམས་པ། མེའི་ཕྱོགས་སུ་རྣམ་པར་གནས་པའོ། །ཡང་དེ་བཞིན་དུ་སྲིན་པོ་ནི་རོལ་ཞོན་པ། ལག་ན་གྲི་གུག་དང་ཐོད་པ། ཁ་དོག་སྔོན་པོ་ཁྲོ་ཞིང་གཏུམ་པ་བདེན་བྲལ་གྱི་ཕྱོགས་
སུ་རྣམ་པར་གནས་པའོ། །ཡང་དེ་བཞིན་དུ་རླུང་ལྷ་དུ་བའི་ཁ་དོག་རི་དགས་སེར་པོ་ལ་གནས་པ། རླུང་གི་བ་དན་བསྣམས་པ། རླུང་གི་ཕྱོགས་ན་རྣམ་པར་གནས་པའོ། །ཡང་དེ་བཞིན་དུ་ཉི་མ་ནི་དམར་པོ། ལག་པ་གཉིས་ན་པདྨ་འཛིན་པ། རྟ་བདུན་གྱི་སྟེང་ན་སྟེང་
གི་ཕྱོགས་སུ་རྣམ་པར་གནས་པའོ། །ཡང་དེ་བཞིན་དུ་ཟླ་བ་ནི་དཀར་པོ། །ལག་པ་གཉིས་ན་ཀུ་མུ་ད་བསྣམས་པ། ཤིང་རྟ་ལ་ཞོན་པ། སྟེང་གི་ཕྱོགས་ན་རྣམ་པར་གནས་པའོ། །ཡང་དེ་བཞིན་དུ་ཚངས་པ་ནི་སེར་སྐྱ་གདོང་བཞི་པ། སྤྱི་བླུགས་དང་མི་འཇིགས་པ།
དབྱུག་པ་དང་བགྲང་ཕྲེང་བསྣམས་པ། ངང་པ་ལ་ཞོན་པ། སྟེང་གི་ཕྱོགས་ན་རྣམ་པར་གནས་པའོ། །ཡང་དེ་བཞིན་དུ་སའི་ལྷ་མོ་ཕྱག་གཡོན་ན་བུམ་པ་བསྣམས་པ། གཡས་ན་དམ་འཆའ་དང་ཁས་ལེན་གྱི་ཕྱག་རྒྱ་སྟེ། འོག་གི་ཕྱོགས་སུ་རྣམ་པར་གནས་པའོ། །
ཡང་དེ་བཞིན་དུ་ཐགས་ཟངས་རིས་སྔོན་པོ་ཤིང་རྟ་ལ་གནས་པ། གཡས་དང་གཡོན་ན་རལ་གྲི་དང་སྡིགས་མཛུབ་འཛིན་པ། དེ་ཡང་དེ་བཞིན་དུ་རྣམ་པར་གནས་པའོ། །དེ་རྣམས་ཁྲོ་བོ་གཤིན་རྗེ་གཤེད་ཀྱི་གཟུགས་ལ་ལག་ན་ཕུར་བུ་འཛིན་པས་ཁྲོ་བོའི་མགྲིན་པ་དང་སྙིང་

གའི་ས་བོན་གྱི་འོད་ཟེར་གྱིས་བཀུག་སྟེ། དེ་རྣམས་ཀྱི་སྙིང་ག་དང་མགྲིན་པ་དང་སྤྱི་བོ་དང་རྐང་པའི་མཐར་ཐུག་འདིས་ཕུར་བུས་གདབ་པར་བྱ་སྟེ། ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཧཱུྃ་སརྦཱེནྟ་དི་ན་ཀཱི་ལ་ཡ་ཧཱུྃ་ཕཊ་ཅེས་པ་ནི་ཕུར་བུ་བར་མ་ཆད་པར་གྲུབ་པའི་ཁུ་
བའི་ཚོགས་པ་ལ་སོགས་པས་དེ་ཐམས་ཅད་ཀྱང་གཤིན་རྗེ་མཐར་བྱེད་ཀྱི་རྣམ་པར་གྲུབ་པའི་མཐར་བྱང་ཆུབ་སེམས་ཀྱི་ཁུ་བའི་གཟུགས་རླུང་གི་ས་བོན་གྱི་རྟགས་ཀྱི་གོ་རིམས་ཀྱིས་གྲུབ་པའི་མཐའ་ལ། དེ་ལ་ཧྲཱིཿཡིག་གི་ས་བོན་ལས་གྲུབ་པ་ནི་དབང་པོའོ། །ཥྚྲཱིཿཡིག་གི་ས་བོན་ལས་གྲུབ་
པ་ནི་གཤིན་རྗེའོ། །བི་ཡིག་གི་ས་བོན་ལས་གྲུབ་པ་ནི་ཆུ་བདག་གོ། །གྲྀ་ཡིག་གི་ས་བོན་ལས་གྲུབ་པ་ནི་ལུས་ངན་ནོ། །ཏཱ་ཡིག་གི་ས་བོན་ལས་ཟུབ་པ་ནི་དབང་ལྡན་ནོ། །ཨ་ཡིག་གི་ས་བོན་ལས་གྲུབ་པ་ནི་མེའོ། །ན་ཡིག་གི་ས་བོན་ལས་གྲུབ་པ་ནི་བདེན་བྲལ་ལོ། །ན་ཡིག་གི་
ས་བོན་ལས་གྲུབ་པ་ནི་རླུང་ངོ་། །ཧཱུྃ་ཡིག་གིས་བོན་ལས་གྲུབ་པ་ནི་ཟླ་བའོ། །ཧཱུྃ་ཡིག་གི་ས་བོན་ལས་གྲུབ་པ་ནི་ཉི་མའོ། །ཕཊ་ཡིག་གི་ས་བོན་ལས་གྲུབ་པ་ནི་ཚངས་པའོ། །ཕཊ་ཡིག་གི་ས་བོན་ལས་གྲུབ་པ་ནི་ནོར་རྒྱུན་མའོ། །ས་ཡིག་གི་ས་བོན་ལས་གྲུབ་པ་ནི་ཐགས་
ཟངས་རིས་སོ། །ཧཱ་ཡིག་གི་ས་བོན་ལས་གྲུབ་པ་ནི་འབྱུང་པོ་ཐམས་ཅད་དོ་ཞེས་ཏེ། དེ་བཞིན་དུ་གྲུབ་པར་བསམ་པར་བྱའོ། །དེ་རྣམས་ཀྱི་མིག་ལ་སོགས་པ་རྣམས་ལ་ཇི་ལྟར་གནས་པ། ཡང་མིག་ལ་སོགས་པ་རྫོགས་པའི་སྐུ་ལ་སོགས་པ་རྣམས་ལ་ཡང་སྐུ་རྡོ་རྗེ་ལ་སོགས་
པ་ཇི་ལྟར་མངོན་པར་དབང་བསྐུར་བ་བཞིན་དུ་གཤིན་རྗེ་མཐར་བྱེད་ཀྱིས་དབུ་བརྒྱན་པ་ཉིད་དོ། །ཡང་མཆོད་ཡོན་ལ་སོགས་པའི་བསང་གཏོར་དང་། ཞལ་བསིལ་ལ་སོགས་པ་དབུལ་བར་བྱའོ། །ཕྱི་ནས་གཏོར་མ་ཉེ་བར་དབུལ་བ་ནི་བདུད་རྩི་སྒྲུབ་པའི་གོ་རིམས་སྔོན་དུ་རྫོགས་
པ་ལ་དེ་ཉིད་གསུམ་གྱིས་མངོན་པར་བསྔགས་ཏེ་ཡང་དེ་རྣམས་ཀྱི་ལྗགས་རབ་ཏུ་སྦྱོར་བར་བསྒོམ་པར་བྱའོ། །སྔགས་འདིས་བདུད་རྩི་དབུལ་བར་སྟེ། ཨོཾ་རཀྟ་མུ་ཀུ་ཊཱ་ཡ། རཀྟ་ཛ་ཊཱ་ཡ། རཀྟ་མུ་ཁཱ་ཡ། རཀྟ་ཤ་རཱི་རཱ་ཡ། རཀྟ་བྷུ་ཛཱ་ཡ། རཀྟ་མུཎྜ་མཱ་ལཱ་བྷ་ར་ཎཱ་ཡ། རཀྟ་

ར་ཐ་ས་མཱ་རཱུ་ཌྷཱ་ཡ། རཀྟ་པདྨཱ་ས་ནཱ་ཡ། རཀྟ་བྷ་ར་ཎ་བྷཱུ་ཥ་ཎཱ་ཡ། ཨི་དཾ་བ་ལིཾ་གྲྀཧྞ་གྲྀཧྞ། མ་མ་བི་གྙཱཾ་ཧ་ར་ཧ་ར། ཙ་ཏུ་ར་མཱ་རཱ་ནཱི་བཱ་ར་ཡ། ནི་བཱ་ར་ཡ། ཏྲཱ་ཤ་ཡ་ཏྲཱ་ཤ་ཡ། བྷྲཱ་མ་ཡ་བྷྲུ་མ་ཡ། ཙྪིནྡ་ཙྪིནྡ། བྷིནྡྷ་བྷིནྡྷ། ནཱ་ཤ་ཡ་ནཱ་ཤ་ཡ། ཤོ་ཥ་ཡ་ཤོ་ཥ་ཡ། ཙྪེད་ཙྪེད། བྷེ་
ད་བྷེ་ད། ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཕྱི་ནས་སོ་སོའི་ཆ་ཡིས་སྤྱད་པར་བྱ། །ཨོཾ་ཨིནྡྷཱ་ཡ་ན་མཿཧྲཱིཿ། ཡ་མཱ་ཡ་ན་མཿཥྚྲཱིཿ། བ་རུ་ཎཱ་ཡ་ན་མཿཝི། ཀུ་བེ་རཱ་ཡ་ན་མཿཀྲྀ། ཨི་ཤྭ་རཱ་ཡ་ན་མཿཏ། ཡགྣ་ཡེ་ན་མཿཨཱ། ནཻ་རྀ་ཏྱཱ་ཡ་ན་མཿན། བཱ་ཡ་བེ་ན་མཿན། ཙནྡྲ་ཡ་ན་མཿཧཱུྃ། ཨརྐྐ་ཡ་ན་མཿཧཱུྃ།
བྲཧྨ་ཎེ་ན་མཿཕཊ། བ་སུ་དྷ་རཱ་ཡཻ་ན་མཿཕཊ། བེ་མ་ཙི་ཏྲི་ཎེ་ན་མཿསྭཱ། སརྦྦ་བྷཱུ་ཏི་བྷྱོ་ན་མཿཧཱ། ཧ་ཧ་ཧ་ཧི་ཧི་ཧི་ཧཱུྃ་ཧཱུྃ་ཧཱུྃ། ཕེྃ་ཕེྃ་ཕེྃ། ཕྱི་ནས་མེ་ཏོག་དང་སྤོས་དང་མར་མེ་དང་ཞལ་ཟས་ལ་སོགས་པ་ཡང་དབུལ་བར་བྱའོ། །དེ་རྣམས་ཀྱང་སྒྲུབ་པ་པོའི་མངོན་པར་རབ་ཏུ་དད་པས་རོ་བཅུད་
ཐམས་ཅད་མྱོང་ཞིང་ལོངས་སྤྱོད་པར་འགྱུར་རོ། །རྡོ་རྗེ་གསོར་ཞིང་དྲིལ་བུ་དལ་གྱིས་འཁྲོལ་བས་གནས་དེ་ལ་བསྟོད་པར་བྱའོ། །གཏི་མུག་དགའ་མ་ལ་སོགས་པ་རྣམས་ལ་ཕྱི་ནས་མངོན་པར་འདོད་པ་ཞུས་ཏེ་མཆོད་པའི་མཐར་བཞད་པ་སྔགས་རྣམ་པ་བརྒྱད་བརྗོད་པར་བྱ་སྟེ།
དེ་ལ་སྔགས་འདིས་གཤེགས་སུ་གསོལ་ལོ། །ཧ་ཧཱ་ཧེ་ཧྲཻ་ཧོ་ཧཽ་ཧཱུྃ་ཧཱུྃ། བི་ས་རཛྫ་ཡེ་ཏ། ཨོཾ་ཨཱཿམུ་ཞེས་པས་ཀྱང་ངོ་། །ཕྱི་ནས་སྒྲུབ་པ་པོའི་མངོན་པར་འདོད་པས། སེམས་ཅན་ཀུན་གྱི་དོན་མཛད་ཕྱིར། །ཇི་ལྟར་རྗེས་འཇུག་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་
ཀྱང་། །སླར་ཡང་འདིར་ནི་བྱོན་པར་ཞུ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་གཏོར་མའི་རིམ་པར་ཕྱེ་བ་སྟེ་བཅུ་གཅིག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་
བཅོམ་ལྡན་འདས་རྡོ་རྗེ་སེམས་དཔའ་ཆེན་པོ་ལ་བསྟོད་པ་མཛད་དེ། གཏི་མུག་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ཤིན་ཏུ་འཇིགས། །སྟོན་པ་སངས་རྒྱས་ཀུན་རང་བཞིན། །རྡོ་རྗེའི་སྐུ་ལ་ཕྱག་འཚལ་བསྟོད། །ཕྲ་མ་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་

ཤིན་ཏུ་འཇིགས། །རྡོ་རྗེའི་ཐུགས་དང་རབ་མཚུངས་པ། །རིན་ཆེན་རྡོ་རྗེ་ཕྱག་འཚལ་བསྟོད། །འདོད་ཆགས་རྡོ་རྗེའི་རང་བཞིན་ཁྱོད། །འདོད་ཆགས་ཆོས་ཀྱི་འབྱུང་གནས་གཙོ། །དབྱངས་མཆོག་ཀུན་གྱི་མཆོག་གི་མཆོག །རྡོ་རྗེའི་གསུང་ལ་ཕྱག་འཚལ་བསྟོད། །ཕྲག་དོག་རྡོ་རྗེའི་རང་
བཞིན་ཁྱོད། །གཤིན་རྗེ་གཤེད་པོ་ལས་ཀུན་པ། །རྡོ་རྗེའི་སྐུ་དང་རབ་མཚུངས་པ། །ཕྱག་ན་རལ་གྲི་ཕྱག་འཚལ་བསྟོད། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་གྱི་རབ་མཆོག་གཙོ། །དཀྱིལ་འཁོར་
དབང་ཕྱུག་ཕྱག་འཚལ་བསྟོད། །རྡོ་རྗེའི་མིག་དང་རྡོ་རྗེའི་རྣ་བ་དང་རྡོ་རྗེའི་སྣ་དང་རྡོ་རྗེའི་ལྕེ་དང་རྡོ་རྗེའི་ལུས་དང་རྡོ་རྗེའི་ཡིད་ཅེས་བཅོམ་ལྡན་འདས་ཀྱིས་གསུངས་པ་ནི་མིག་ལ་སོགས་པ་བྱིན་གྱིས་བརླབ་པའི་དམ་ཚིག་གོ། །དེ་ནས་གཤིན་རྗེ་གཤེད་འཇིགས་ཀྱི། །དཀྱིལ་འཁོར་
བདག་གིས་རབ་བཤད་བྱ། །གཤིན་རྗེ་གཤེད་པོ་དང་མཚུངས་པ། །དོན་རྣམས་ཐམས་ཅད་སྒྲུབ་བྱེད་པ། །སྲད་བུ་གསར་པ་ལེགས་བསྒྲིམས་ཤིང་། །མཛེས་ཤིང་ཚད་དང་ཡང་དག་ལྡན། །གཤིན་རྗེ་གཤེད་ཀྱི་དཀྱིལ་འཁོར་ལ། །ཤེས་རབ་ཅན་གྱིས་ཐིག་གདབ་བོ། །མཚན་
ཉིད་ཐམས་ཅད་ཡོངས་རྫོགས་པ། །དོན་མེད་ཐམས་ཅད་རྣམ་པར་འཇིག །ཞི་བ་ལ་སོགས་རབ་སྒྲུབ་པའི། །མཎྜལ་དཀྱིལ་འཁོར་རྣམ་པ་ལ། །ལས་ཀྱི་རྡོ་རྗེ་བྲི་བྱ་སྟེ། །དེ་ལ་རྩེ་ལྔ་མཐའ་དག་ལ། །དེ་ཡི་དབུས་སུ་རྡོ་རྗེ་བྲི། །རྡོ་རྗེ་འབར་བས་ཀུན་ཏུ་འཁྲིགས། །ཤར་གྱི་
རྩིབས་ལ་འཁོར་ལོ་བྲི། །འཁོར་ལོའི་འོད་ཟེར་ཀུན་ཏུ་འཁྲིགས། །ལྷོ་རུ་རིན་ཆེན་བྲི་བྱ་སྟེ། །འོད་ཟེར་ཕྲེང་བས་ཀུན་ཏུ་ཁྱབ། །ནུབ་ཏུ་པདྨ་བྲི་བྱ་སྟེ། །པདྨ་རཱ་གའི་འོད་ཟེར་མཛེས། །བྱང་དུ་རལ་གྲི་བྲི་བྱ་སྟེ། །སྤྲིན་གྱི་ཁ་དོག་འོད་ཟེར་མཚུངས། །ཤར་གྱི་མཚམས་སུ་འཁོར་
ལོ་བྲི། །ལྷོ་རུ་རྡོ་རྗེ་བྲི་བར་བྱ། །ནུབ་ཏུ་པདྨ་བྲི་བྱ་སྟེ། །པདྨ་གདོང་བཅས་རྒྱས་པའི་ཞལ། །བྱང་དུ་རལ་གྲི་བྲི་བྱ་སྟེ། །འོད་ཟེར་ལྔ་དང་མཚུངས་པར་ལྡན། །ཤར་གྱི་སྒོ་རུ་ཐོ་བ་སྟེ། །རྡོ་རྗེ་དབྱུག་པ་ལྷོ་རུའོ། །ནུབ་ཀྱི་སྒོ་རུ་ཆུ་སྐྱེས་ཏེ། །རྡོ་རྗེ་རལ་གྲི་བྱང་དུའོ། །དཀྱིལ་འཁོར་

རྫོགས་པར་ཤེས་བྱས་ལ། །ཁྱད་པར་ཅན་གྱིས་མཆོད་བྱ་བ། །འདོད་པའི་ཡོན་ཏན་ལྔ་རྣམས་ཀྱིས། །ཐེ་ཚོམ་མེད་པས་སངས་རྒྱས་མཆོད། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་དཀྱིལ་འཁོར་ཆེན་པོའི་རིམ་པར་ཕྱེ་བ་
སྟེ་བཅུ་གཉིས་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་འཆང་ཆེན་པོ་ལ་བསྟོད་པའི་རྒྱལ་པོ་འདིས་གསོལ་བ་གདབ་བོ། །ཕྱག་རྒྱ་གསུངས་པས་རབ་སྦྱོར་བ། །གང་
གིས་རྡོ་རྗེ་རྣམས་ལ་བསྟོད། །ཕྱག་རྒྱ་རྡོ་རྗེ་ཕྱག་རྒྱ་ཡིས། །དངོས་གྲུབ་མང་པོ་སྒྲུབ་པར་མཛོད། །དེ་ནས་རྒྱལ་པོ་རྡོ་རྗེ་འཆང་། །ཚིག་འདི་དག་ནི་གསུང་བར་མཛད། །དཀྱིལ་འཁོར་པ་རྣམས་ཐམས་ཅད་ཀྱི། །སྤྱི་བོར་གཤིན་རྗེ་གཤེད་པོ་བསྒོམ། །རྟག་ཏུ་དཀྱིལ་འཁོར་ཟླུམ་བྱས་ལ། །རྟག་
ཏུ་སྦྱིན་སྲེག་མཆོད་པ་དང་། །རྟག་ཏུ་དམ་ཚིག་བསྒྲུབ་བྱ་ཞིང་། །དེ་ཡི་སྡོམ་པ་གཟུང་བར་བྱ། །དང་པོ་ཅོད་པན་དབང་བསྐུར་ཏེ། །གཉིས་པ་རལ་གྲི་སྦྱིན་པར་བྱ། །གསུམ་པ་རྡོ་རྗེ་དྲིལ་བུ་སྟེ། །བཞི་པ་ཟླ་བའི་བཟའ་བའོ། །དབང་བསྐུར་ཆེན་པོ་བཞི་པ་ནི། །དམར་པོའི་ཞལ་ནས་འབྱུང་བ་
སྟེ། །དབང་བསྐུར་འདི་ཡི་མཐུ་ཡིས་ནི། །བྱང་ཆུབ་རྒྱལ་བའི་རོ་བཅུད་འཐོབ། །དེ་ནས་བདག་གིས་སྔགས་བཤད་པས། །འབྱུང་པོ་ཀུན་ལ་གཏོར་མ་བྱ། །སྔགས་ཆེན་པོ་ནི་བརྗོད་པ་ཡིས། །འབྱུང་པོ་ཐམས་ཅད་རབ་ཏུ་འབར། །སྔགས་ཀྱི་ས་བོན་ཧྲཱིཿཥྚྲཱིཿསོགས། །མཐར་ནི་
སྭཱ་ཧཱ་ངེས་པར་སྦྱར། །བི་ཊ་མ་ཊ་ཆུ་བསྲེས་ཀྱིས། །མཎྜལ་ཟུར་གསུམ་བྱས་ནས་ནི། །ལྷ་རྣམས་མཉེས་བྱ་རྣལ་འབྱོར་པས། །ཧཱ་ཧཱ་ཞེས་སྒྲོགས་སླར་དྲན་བྱ། །འཁོར་ལོ་རིམ་གསུམ་བྱ་བ་ནི། །བརྒྱད་དང་བཅུ་གཉིས་བཅུ་དྲུག་དང་། །མཁས་པས་ཆོ་ག་བཞིན་དུ་བྲི། །
སྔགས་ནི་ཀུན་ཏུ་དགོད་པར་བྱ། །བརྟུལ་ཞུགས་ཅན་གྱིས་བཅུ་གཉིས་པར། །གྲུབ་པའི་སྔགས་རྣམས་དགོད་པར་བྱ། །ཁམས་གསུམ་གཡོ་དང་མི་གཡོ་བ། །མ་ལུས་ལུས་པ་མེད་པར་འགྲུབ། །ཡ་མ་རཱ་ཛཱ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ།

ཡ་ཀྵེ་ཡཙྪ་ནི་རཱ་མ་ཡ། ཡ་དབུས་ཀྵེ་ནི་ཤར་དུ་སྟེ། །མ་ཡིག་འཇམ་པའི་རྡོ་རྗེ་ལྷོར། །མེ་ཡིག་ནུབ་ཏུ་བྲི་བར་བྱ། །བྱང་དུ་ད་ནི་དཀར་པོ་སྟེ། །བསྒྲུབ་བྱའི་མིང་ནི་བཟུང་བྱས་ནས། །སྟོང་པའི་མཚམས་ལ་དགོད་པར་བྱ། །ཧཱུྃ་གཉིས་དག་གིས་བརྟེན་པར་བྱ། །
དགོས་པ་ཐམས་ཅད་སྒྲུབ་པར་བྱེད། །ཡཙྪ་ནི་ར་ཛཱ་ས་དོ་རུ། །ཎ་ཡོ་ནི་ར་ཞེས་པས་ཀྱང་ནི་ཕྱི་རོལ་དུ། །གཡོན་ནས་བརྩམས་ཤིང་ཡང་དག་བྲི། །དོན་ཀུན་རབ་ཏུ་བསྒྲུབ་པའི་ཕྱིར། །རེའུ་མིག་གསུམ་པའི་མདུན་ནས་ནི། །རེའུ་མིག་ཆ་རེ་སྤངས་པར་ནི། །ཤར་ནས་བརྩམས་ཏེ་བྲི་བར་བྱ། །
ཧྲཱིཿཥྚྲཱིཿཞེས་པའི་སྔགས་རྣམས་ཀྱིས། །རེའུ་མིག་བརྒྱད་ཀྱི་བར་བར་དུ། །རེའུ་མིག་རྣམས་ལ་ཡང་དག་བྲི། །ཆེ་གེ་མོ་ཀུ་རུ་མཱ་ར་ཡ། ཨུཙྪ་ཊ་ཡ། བ་ཤཾ་ཀུ་རུ། བི་དྭེ་ཥ་ཡ་ཤཱནྟིཾ་ཀུ་རུ། པུཥྚིཾ་ཀུ་རུ། ཞེས་པ་ལ་སོགས་པ་ནི་ལས་ཀྱི་རྗེས་སུ་འབྲངས་ཏེ། ཨོཾ་ནི་དང་པོར་ན་མཿམཐར། །མཐར་
ནི་བ་ཤཾ་བཽ་ཥ་ཊ། ཧཱུྃ་ཕཊ་ཡི་གེ་དང་ལྡན་པས། །ཞི་རྒྱས་དབང་དུ་བྱེད་པའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་དབང་བསྐུར་བ་དང་འཁྲུལ་འཁོར་གྱི་སྣང་བ་ཞེས་བྱ་བའི་རིམ་པར་ཕྱེ་བ་སྟེ་བཅུ་གསུམ་པའོ།། །།
བཅོམ་ལྡན་འདས་ཀྱིས་བརྩེ་བར་མཛད། །གཤིན་རྗེ་གཤེད་ཆེན་ཡང་དག་གཟུགས། །ཞེ་སྡང་གིས་མནན་འགྲོ་ལ་གཟིགས། །ཞེ་སྡང་ཐམས་ཅད་ཟད་པར་མཛད། །བཅོམ་ལྡན་འདས་ཀྱིས་བརྩེ་བར་མཛད། །གཏི་མུག་གཤིན་རྗེ་གཤེད་མཆོག་གཟུགས། །གཏི་མུག་གིས་
མནན་འགྲོ་ལ་གཟིགས། །གཏི་མུག་ཐམས་ཅད་ཟད་པར་མཛད། །བཅོམ་ལྡན་འདས་ཀྱིས་བརྩེ་བར་མཛད། །ཕྲ་མ་གཤིན་རྗེ་གཤེད་མཆོག་གཟུགས། །ཕྲ་མས་མནན་པའི་འགྲོ་ལ་གཟིགས། །ཕྲ་མ་ཐམས་ཅད་ཟད་པར་མཛད། །བཅོམ་ལྡན་འདས་ཀྱིས་བརྩེ་བར་མཛད། །འདོད་
ཆགས་གཤིན་རྗེ་གཤེད་མཆོག་གཟུགས། །འདོད་ཆགས་ཀྱིས་མནན་འགྲོ་ལ་གཟིགས། །འདོད་ཆགས་ཐམས་ཅད་ཟད་པར་མཛད། །བཅོམ་ལྡན་འདས་ཀྱིས་བརྩེ་བར་མཛད། །ཕྲག་དོག་གཤིན་རྗེ་གཤེད་མཆོག་གཟུགས། །ཕྲག་དོག་གིས་མནན་འགྲོ་ལ་གཟིགས། །ཕྲག་

དོག་ཐམས་ཅད་ཟད་པར་མཛད། །བྱམས་པ་ཙརྩི་ཀཱར་གསུངས་ཏེ། །ཕག་མོ་དེ་བཞིན་སྙིང་རྗེའོ། །དབྱངས་ཅན་དགའ་བར་ཤེས་བྱ་སྟེ། །བཏང་སྙོམས་གཽ་རཱིའི་གཟུགས་སུའོ། །བདག་ཉིད་དངོས་པོ་ཐམས་ཅད་ཀྱིས། །སླར་ཡང་དཀྱིལ་འཁོར་ཡོངས་རྫོགས་པ། །
རྣལ་འབྱོར་སྙིང་གའི་ས་བོན་སྤྲོ། །འགྲུབ་འགྱུར་འདི་ལ་ཐེ་ཚོམ་མེད། །དེ་ནས་སྤྱོད་པའི་མཚན་ཉིད་མཆོག །བདག་གིས་ཡང་དག་བཤད་པར་བྱ། །གཤིན་རྗེ་གཤེད་པོའི་འཇིགས་གཟུགས་ཀྱི། །སྐུ་དང་གསུང་དང་ཐུགས་རྣམས་དག །དགོན་པ་ཆེན་པོའི་ཕྱོགས་
རྣམས་ལ། །མ་ཧེ་མཆོག་ལ་ཞོན་བྱས་ཏེ། །སྦྲུལ་གྱི་རྒྱན་གྱིས་རྣམ་པར་བརྒྱན། །ལྕགས་ཀྱི་རྡོ་རྗེ་བསྒོམ་པར་བྱ། །སྐྲ་ནི་དམར་སེར་གྱེན་དུ་འཁྱིལ། །ཁྱད་དུ་འཕགས་པའི་གཟུགས་ཅན་བྱ། །མགོ་ལ་ཐོད་པས་ཡང་དག་བསྐོར། །སྨ་ར་དམར་སེར་བརྫེས་པ་སྟེ། །ཧྲཱིཿ
ཥྚྲཱིཿལ་སོགས་སྔགས་རྣམས་བརྗོད། །རྡོ་རྗེ་དབྱུག་པ་ཡང་དག་གསོར། །གཤིན་རྗེ་གཤེད་ཀྱི་རྣལ་འབྱོར་པས། །སེང་གེའི་སྒྲ་ནི་བསྒྲག་པར་བྱ། །ཅུང་ཟད་མཐུ་ནི་ཐོབ་པ་ཡིས། །གྲོང་ཁྱེར་ཞུགས་ཏེ་རོལ་པར་བྱ། །རབ་མཛེས་གར་ནི་བྱ་བ་དང་། །དྲུག་འགྱུར་ལ་སོགས་གླུ་
བླང་ངོ་། །སྲང་དུ་རྒྱལ་མཚན་དེ་བལྟ་ཞིང་། །དེ་ལ་འོ་མ་རབ་ཏུ་བསྒྲུབ། །འོ་མ་ལ་འདྲིས་རྩེ་གཅིག་སེམས། །ཕྱག་རྒྱ་ཆེན་པོ་རབ་བསྒྲུབ་བྱ། །ཕག་མོའི་གཟུགས་སུ་བསྒོམ་བྱས་ལ། །འདོད་པའི་མཐའ་ལ་བཙུན་མོ་ཀུན། །སེང་གེ་བཞིན་དུ་འཇིགས་མེད་པས། །འདོད་
དོན་ཀུན་འགྲུབ་རྣལ་འབྱོར་པའི། །དེ་ནས་ཕྱག་རྒྱ་རབ་བསྒྲུབ་པ། །བདག་གིས་ཡང་དག་རབ་བཤད་བྱ། །ཡི་གེ་གཅིག་གི་སྔགས་ཆེན་ཏེ། །དེ་ཡི་བཟླས་པ་ངེས་པར་བཤད། །ཥྚཱིཿཡིག་ས་བོན་ལས་བྱུང་བའི། །མ་ཧེའི་གདོང་པ་རྣམ་པར་བསྒོམ། །རྡོ་རྗེའི་དཀྱིལ་
འཁོར་ལ་གནས་པ། །མ་ཧེའི་སྟེང་དུ་བསྒོམ་པར་བྱ། །གང་ཞིག་ས་ལ་གནས་པ་ཡི། །སྣ་ཚོགས་མཚོན་ཆའི་རང་གཟུགས་རྣམས། །བློ་དང་ལྡན་པས་ལག་ན་བསྒོམ། །མ་ཧེའི་གདོང་ཅན་སྒྲུབ་པའོ། །དེ་ནས་རྡོ་རྗེ་དབྱུག་པ་ཡི། །སྒྲུབ་ཐབས་བདག་གིས་རབ་བཤད་

བྱ། །ཡི་གེ་ཧྲཱིཿནི་གསང་སྔགས་ཆེ། །མ་ཧེ་ཆེན་པོ་ལ་ཞོན་པ། །འབུམ་ཕྲག་གཉིས་ནི་རྫོགས་པའི་ཕྱག །ཐལ་བའི་རྡུལ་གྱིས་ལུས་ལ་བྱུགས། །རི་རབ་བཞིན་དུ་མཐོ་བ་ལ། །རོ་ལྡན་འོག་དུ་ཡང་དག་གནོན། །དེ་ནས་ཕྱག་ནི་བྱེ་བ་ཡི། །སྒྲུབ་ཐབས་
བདག་གིས་རབ་བཤད་བྱ། །ཝི་ཀྲྀ་ཏཱ་ན་གསང་སྔགས་ཆེ། །ཧཱུྃ་ཡིག་ལས་བྱུང་གཙོ་བོ་སྟེ། ཨོཾ་ཝི་ཀྲྀ་ཏཱ་ན་ན་ཧྃ་ཧཱ་ཧི་ཧོཿཧཱུྃ་ཧཱུྃ་ཧེ་ཧེཿཧོཿཧཿསྭཱ་ཧཱ། དགོས་པ་ཐམས་ཅད་རབ་སྒྲུབ་པའི། །དམ་ཚིག་སྒྲུབ་པ་འདིར་བཤད་དོ། །སྔགས་ཀྱིས་དུབ་ལ་ཁ་ཟས་བཟའ། །ཁ་ན་མ་ཐོ་
མེད་རྙེད་བླང་། །ཤ་ཆེན་དེ་བཞིན་རྟ་དང་ནི། །དེ་བཞིན་གླང་ཆེན་ཁྱད་པར་ཅན། །བ་ལང་གཟུགས་དང་ཁྱི་དང་ནི། །བོང་བུ་རྔ་མོ་ཅེ་སྦྱང་ངོ་། །རམས་དང་བསྲེས་ཤིང་བཙོ་བྱས་ནས། །ཞག་ཆེན་ལུས་ལ་མངོན་པར་བྱུག །འདི་ཡིས་ལུས་ལ་བྱུགས་ཙམ་གྱིས། །འགྲོ་བ་མཐའ་
དག་དབང་དུ་བྱེད། །རྣམ་སྣང་སིན་དུ་བཱ་རཉྩ། །དེ་བཞིན་བིལ་བའི་ལོ་མ་དང་། །སོ་ཕག་ཕྱེ་མ་ལྷན་ཅིག་ཏུ། །གསེར་ཤིང་ལོ་མའི་ཁུ་བ་རྣམས། །འདི་ཡི་ལུས་ལ་དྲིལ་ཕྱིས་བྱ། །རྡོ་རྗེ་ཆེན་པོའི་བདུད་རྩི་བཞིན། །རང་འབྱུང་མེ་ཏོག་བཏུང་བ་བཞིན། །འདི་ནི་རྣལ་འབྱོར་རབ་
མཆོག་གོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་སྤྱོད་པའི་དམ་ཚིག་སྒྲུབ་པའི་རིམ་པར་ཕྱེ་བ་སྟེ་བཅུ་བཞི་པའོ།། །།དེ་ནས་བཅོམ་ལྡན་འདས་སྐྱེས་བུ་ཆེན་པོའི་དམ་ཚིག་ཙརྩི་ཀཱའི་རྣམ་པའི་ཏིང་ངེ་འཛིན་
ལ་སྙོམས་པར་ཞུགས་པ་དང་། །རྡོ་རྗེ་ཕག་མོའི་རྣམ་པའི་ཏིང་ངེ་འཛིན་ལ་སྙོམས་པར་ཞུགས་པ་དང་། གཽ་རཱི་མའི་རྣམ་པའི་ཏིང་ངེ་འཛིན་ལ་སྙོམས་པར་ཞུགས་པ་ལས་མཆོད་པའི་གླུ་འདིས་གསོལ་བ་གདབ་བོ། །
ཨེ་མ་གཤིན་རྗེ་གཤེད་དམར་པོ། །བླ་མ་སྲིན་པོའི་རང་བཞིན་ཏེ། །བདག་ནི་ཁྱོད་མཐོང་པས་འཇིགས་པས། །བླ་མ་ཁྲོ་བོའི་རང་བཞིན་སྤངས། །མཐོ་རིས་ས་སྟེང་ས་འོག་རྣམས། །ཁྱོད་ཀྱི་གར་གྱིས་གཡོ་བར་བྱེད། །ཁྲག་གི་མིག་སྨན་ཁྲོ་བའི་སེམས། །གར་མཛད་ཁྱོད་

ནི་རོ་ལངས་གཟུགས། །དམར་ཞིང་ཐུང་བའི་ཚད་ལྡན་པ། །རྣམ་པ་མང་པོའི་སྤྲུལ་གཟུགས་བྱེད། །རྡོ་རྗེ་དབྱངས་ཅན་མ་ཡིས་ཞུས། །ཁྱོད་ཀྱི་གར་མཛད་བདེ་བ་ཆེ། །ཁྱོད་ཀྱི་ཧྲཱིཿཥྚྲཱིཿའི་སྔགས་ཀྱི་གར། །ས་གསུམ་པོ་ཡི་འཁྲུལ་པ་སོལ། །བརྩེ་བས་ཁྲོ་བའི་རྗེ་བཙུན་
ཁྱོད། །འགྲོ་ལ་བལྟ་ཞིང་གར་མཛད་དོ། །དེ་ནས་བཟླས་པའི་མཚན་ཉིད་མཆོག །བདག་གིས་ཡང་དག་རབ་བཤད་བྱ། །གང་གིས་བཟླས་པ་རབ་སྦྱོར་བས། །མང་པོ་ཡིས་ནི་དངོས་གྲུབ་འཐོབ། །མྱུར་བ་མ་ཡིན་བུལ་བ་མིན། །རིང་པོ་མ་ཡིན་ཐུང་བ་མིན། །ཅུང་ཟད་
སྔགས་ནི་ཐོས་པར་རོ། །གཤིན་རྗེ་གཤེད་ཀྱི་སློབ་དཔོན་མཆོག །མི་དང་མ་ཧེ་གཉིས་འཐུང་དང་། །བ་ལང་གཟུགས་དང་རྟ་དང་ནི། །བོང་བུ་རྔ་མོའི་རུས་བཟུང་ནས། །བཟླས་པའི་ཕྲེང་བས་རབ་བསྒྲུབ་བྱ། །ཟླ་བ་ཟླ་བའི་བཅུ་བཞི་ལ། །བདུད་རྩི་ལྔ་དང་ལྡན་པ་ཡི། །ཤ་
ལྔ་ཡིས་ནི་བྱུག་པར་བྱ། །བཟླས་པ་ཡིས་ནི་དངོས་གྲུབ་མཆོག །སོ་སོའི་རྐང་པའི་རིལ་བུ་ལ། །གཤིན་རྗེ་གཤེད་སྒོམ་རྣལ་འབྱོར་པས། །མཁས་པས་ཡང་ན་མི་མགོ་ནི། །ཁྲག་འཛག་རློན་པ་བསྒོམ་པར་བྱ། །ཁྲི་ཡི་སྔགས་ཀྱིས་འབྱུང་པོ་རྣམས། །མཁའ་འགྲོ་མ་རྣམས་
སྟོང་གིས་ཏེ། །གཤིན་རྗེ་གཤེད་པོ་རབ་སྦྱོར་བས། །ཡི་དགས་རྣམས་ནི་གཞོམ་ཞིང་བསད། །རྣལ་འབྱོར་བདག་ཉིད་འབུམ་བཟླས་ན། །ལས་ཀུན་དེ་ཡིས་བྱེད་པར་འགྱུར། །བྱེ་བ་བཟླས་ན་དངོས་གྲུབ་སྟེ། །བྱེ་བ་ལྔ་ཡིས་སྨོས་ཅི་དགོས། །ཉི་མ་སོ་སོའམ་ཡང་ན་ཟླ། །
ཡང་ན་ལོ་ནི་སོ་སོ་ལ། །མཁས་པས་དབྱུག་གུ་དྲུག་ཅུ་བཞིའི། །གཏོར་མ་དྲུག་ཅུ་རྩ་བཞི་སྦྱིན། །འགའ་ཞིག་རྟག་ཏུ་བཟའ་བ་དང་། །འགའ་ཞིག་དེ་བཞིན་བཏུང་བ་དང་། །གཞན་ཡང་བཟའ་བ་ཐམས་ཅད་ཀྱི། །དང་པོ་གཤིན་རྗེ་གཤེད་ལ་དབུལ། །དེ་ནས་བླ་མར་
ཡོན་གྱི་མཆོག །དབུལ་བར་བྱ་བ་དག་བཤད་བྱ། །བདག་ཉིད་ཞི་བའི་ཕྱིར་དང་ནི། །དེ་བཞིན་ལས་ཀུན་སྒྲུབ་པའི་ཕྱིར། །བདག་གི་ལུས་དབུལ་ངེས་པར་འདུད། །རྟ་དང་བ་ལང་གླང་པོ་དང་། །གསེར་དང་ནོར་དང་མ་མ་དང་། །རང་གི་ཆུང་མ་དེ་བཞིན་བུ། །མ་དང་སྲིང་

མོ་ཚ་མོ་དང་། །གོས་ནི་རྣམ་པ་སྣ་ཚོགས་དང་། །གདུགས་དང་མཛེས་པའི་རྔ་ཡབ་དང་། །ཁྱིམ་དང་ཁྲི་དང་དྲི་བཟངས་དང་། །གླུ་དང་དེ་བཞིན་རོལ་མོ་དང་། །རལ་གྲི་རྒྱན་རྣམས་དེ་བཞིན་དུ། །བརྟུལ་ཞུགས་ཅན་གྱིས་བླ་མར་དབུལ། །དེ་བཞིན་གཤེགས་
པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་ཐབས་ཐམས་ཅད་སྒྲུབ་པའི་རིམ་པར་ཕྱེ་བ་སྟེ་བཅྭ་ལྔ་པའོ།། །།དེ་ནས་སེམས་ཅན་ཐམས་ཅད་ཀྱི་བདུད་དང་འདོད་ཆགས་ལ་སོགས་པའི་ཉོན་མོངས་པ་གཅོད་ཅིང་གཞོམ་པའི་དོན་གྱི་ཕྱིར་སྐུ་མདོག་
དམར་པོའོ། །སྤྱན་གསུམ་ནི་འདས་པ་དང་། མ་འོངས་པ་དང་ད་ལྟར་གྱི་དུས་གསུམ་མོ། །ཕྱག་གཉིས་ནི་དངོས་པོ་དང་དངོས་པོ་མེད་པའི་རྣམ་པར་རྟོག་པ་རྣམས་འཇོམས་པའོ། །ཤེས་རབ་མ་ལ་འཁྱུད་པ་ནི་སྟོང་པ་ཉིད་དང་སྙིང་རྗེ་ཐ་མི་དད་པར་སྦྱོར་བའོ། །ཀླུ་བརྒྱད་ནི་རྣམ་པར་
ཤེས་པར་བརྒྱད་དུ་གསུངས་སོ། །མགོ་བོའི་བརྒྱ་ཕྱེད་ཕྲེང་བ་ནི་ཡི་གེ་ལྔ་བཅུ་སྦྱོར་བའོ། །གཡོན་ན་ཐོད་པ་ནི་ཡེ་ཤེས་ལྔའི་བདུད་རྩིའི་བཅུད་ཀྱིས་ཡོངས་སུ་གང་ཞིང་སྟོང་པ་ཉིད་ཀྱི་རང་བཞིན་ནོ། །གཡས་ན་དབྱུག་པ་ནི་ཕུང་པོ་དང་ཉོན་མོངས་པ་དང་ལྷའི་བུ་དང་འཆི་བའི་བདུད་རྣམས་
འཇོམས་ཤིང་སྙིང་རྗེའི་རང་བཞིན་ནོ། །ཞབས་གཡོན་བརྐྱང་བ་ནི་ཁམས་གསུམ་དུ་བཤད་དོ། །ལྷ་མོའི་ཕྱག་གཡོན་ན་ཐོད་པ་བདུད་བཞིའི་ཁྲག་དཔག་ཏུ་མེད་པ་དངུལ་ཆུ་དང་བཅུད་ལེན་དང་རོ་བཅུད་དོ། །གཡས་ན་དངོས་པོ་དང་དངོས་པོ་མེད་པའི་རྣམ་པར་རྟོག་པ་གཅོད་པའི་
གྲི་གུག་གོ། །ཁྲོ་བོའི་གཟུགས་ཕྱལ་རྒྱས་པ་ནི་གདུག་པ་ཅན་རྣམས་འདུལ་བའོ། །སྐྲ་དམར་སེར་གྱེན་དུ་བརྫེས་པ་ནི་སྤྲུལ་པ་དཔག་ཏུ་མེད་པའི་ཕྱིར་རོ། །གྲུ་བཞི་ནི་སྡུག་བསྔལ་དང་ཀུན་འབྱུང་དང་འགོག་པ་དང་ལམ་གྱི་བདེན་པར་བཤད་དོ། །སྒོ་བཞི་ནི་བདུད་བཞི་སྐྲག་པར་བྱེད་
པའོ། །ཟུར་བཞི་ནི་ཚངས་པའི་གནས་བཞི་རབ་ཏུ་རྫོགས་པའི་ཕྱིར་རོ། །ཀ་བ་བརྒྱད་ནི་སྒྱུ་མའི་དཔེ་བརྒྱད་ཀྱི་ཕྱིར་ཏེ། སྤྲུལ་པའི་གྲོང་ཁྱེར་དང་སྒྲ་བརྙན་དང་སྒྱུ་མ་དང་སྤྲིན་དང་རི་དགས་སྲེད་དང་མེ་ལོང་དང་གཟུགས་བརྙན་དང་ཆུ་ཟླའོ། །ནམ་མཁའ་ནི་དངོས་པོ་དང་དངོས་པོ་མེད་པའི་

ཉོན་མོངས་པ་འཇོམས་པའི་ཕྱིར་རོ། །ཡང་དག་པར་སྤོང་བ་ནི་དྲ་བ་དྲ་ཕྱེད་དོ། །རྟ་བབས་བཞི་ནི་སྦྱིན་པ་དང་སྙན་པར་སྨྲ་བ་དང་དོན་སྤྱོད་པ་དང་དོན་མཐུན་པ་བཞིའི་རྣམ་པར་དག་པའོ། །དེ་ནས་རྡོ་རྗེ་མཁའ་འགྲོ་མའི། །སྒྲུབ་ཐབས་བདག་གིས་རབ་བཤད་བྱ། །ནམ་མཁའི་
ཁམས་ཀྱི་དབུས་སོང་ནས། །ཉི་མའི་དཀྱིལ་འཁོར་མཆོག་བསམས་ཏེ། །རྩེ་ལྔ་པ་ནི་རྣམ་པར་བསྒོམ། །དེ་ཡི་སྟེང་དུ་པདྨ་དགོད། །འདི་མདོག་ནག་ལ་འཇིགས་ཆེན་མོ། །ཕྱག་དྲུག་མཛེས་པའི་གཟུགས་ལྡན་མ། །ཕྱག་ན་རྡོ་རྗེ་རྣམ་པར་བསྒོམ། །ལྷག་མའི་ཕྱག་ཏུ་
གཞན་དགོད་དོ། །ཤར་དུ་སངས་རྒྱས་མཁའ་འགྲོ་མ། །ཕྱག་དྲུག་གཏི་མུག་དང་མཚུངས་པ། །ཕྱག་ན་འཁོར་ལོ་འཇིགས་ཆེན་མོ། །རྣལ་འབྱོར་དཀྱིལ་འཁོར་ལ་བསྒོམ་བྱ། །ལྷོ་རུ་རིན་ཆེན་མཁའ་འགྲོ་མ། །ཕྲ་མ་དང་མཚུངས་ཕྱག་དྲུག་མ། །ཕྱག་ན་རིན་ཆེན་
འཇིགས་ཆེན་མོ། །ཉི་མའི་དཀྱིལ་འཁོར་ལ་བསྒོམ་བྱ། །ནུབ་ཏུ་ཆོས་ཀྱི་མཁའ་འགྲོ་མ། །ཕྱག་དྲུག་པདྨ་འཛིན་པ་མོ། །བྱང་ན་ལས་ཀྱི་མཁའ་འགྲོ་མ། །སྙིང་པོའི་དཀྱིལ་འཁོར་རལ་གྲི་མ། །མེ་ལ་སོགས་པའི་མཚམས་བཞི་ལ། །བརྟུལ་ཞུགས་ཅན་གྱིས་ལྷ་མོ་
བསྒོམ། །དྲི་མ་དེ་བཞིན་གར་མ་དང་། །གླུ་མ་སྒེག་མོ་ཁྱད་པར་ཅན། །དེ་ནས་སྒོ་སྐྱོང་བསྒོམ་པར་བྱ། །ཆོ་ག་བཞིན་དུ་ལས་རྣམས་བལྟ། །ཐོ་བ་དབྱུག་པ་པད་རལ་གྲི། །ཨོཾ་བུདྡྷ་ཌཱ་ཀི་ནཱི། ཨོཾ་བཛྲ་ཌཱ་ཀི་ནཱི། ཨོཾ་དྷརྨྨ་ཌཱ་ཀི་ནཱི། ཨོྃ་རཏྣ་ཌཱ་ཀི་ནཱི། ལཱྃ་མཱྃ་ནཱྃ་གཱྃ་མཚམས་སུའོ། །ཨོཾ་
མུངྒ་ར་ཛཿ། ཨོཾ་དཎྜ་ཧཱུྃ། ཨོཾ་པདྨ་བྃ། ཨོཾ་ཁཌྒ་ཧོཿ། ཞེས་པ་ནི་བཅོམ་ལྡན་འདས་རྡོ་རྗེ་ཅན་གྱིས་རྡོ་རྗེ་མཁའ་འགྲོ་མའི་སྒྲུབ་ཐབས་གསུངས་པའོ། །རིང་པོ་ནས་ཐོས་པ་བསྒྲུབ་པའི་ཕྱིར་རྡོ་རྗེ་མཁའ་འགྲོ་མ་བསྒོམ་པར་བྱའོ། །དེའི་སྔགས་ཀྱི་ཚིག་རྣམས་ནི་འདི་ཡིན་ཏེ། །ཨོཾ་ཨཱ་ཀཱ་ཤ་ཙ་ར་
བཛྲ་ཌཱ་ཀི་ནཱི་སྭཱ་ཧཱ། དེ་ནས། གཞན་ཡང་རྡོ་རྗེ་ས་འོག་གི། །སྒྲུབ་ཐབས་བདག་གིས་རབ་བཤད་བྱ། །ས་འོག་བུ་ག་བསྒྲུབ་བའི་ཕྱིར། །གནོད་མཛེས་རྡོ་རྗེ་བསྒོམ་པར་བྱ། །ཕྱག་དྲུག་ཁ་དོག་སྔོན་པོ་ལ། །ཕྱག་ན་གཏུན་ཤིང་འཛིན་པར་བྱེད། །སྙིང་པོའི་དཀྱིལ་འཁོར་དབུས་སུ་ནི། །

འདི་ནི་རབ་ཏུ་སྤྱོད་པར་བྱེད། །ཤར་ལ་སྤྱན་མ་དགོད་བྱ་སྟེ། །ལྷོ་རུ་དེ་བཞིན་མཱ་མ་ཀཱི། །ནུབ་ཏུ་ལྷ་མོ་གོས་དཀར་མོ། །བྱང་དུ་སྒྲོལ་མ་དགོད་པར་བྱ། །མེ་ཏོག་སྤོས་དང་མར་མེ་དང་། །དྲི་རྣམས་མེ་སོགས་རྣམས་ལ་དགོད། །སྒོ་ལ་ཐོ་བ་ལ་སོགས་ཏེ། །སྦྲུལ་
གྱི་རྒྱན་གྱིས་སྐེ་རགས་བྱས། །དེ་བཞིན་འཁོར་ལོ་བསྒོམ་བྱ་ཞིང་། །ཆོ་ག་བལྟ་བས་ལས་རྣམས་སོ། །རྡོ་རྗེ་ས་འོག་སྦྱོར་ལྡན་པས། །རྨི་ལམ་དུ་ནི་བུ་ག་ཤེས། །དེ་ནས་རྒྱལ་པོ་བདུན་གྱི་ནི། །དཀྱིལ་འཁོར་བདག་གིས་རབ་བཤད་བྱ། །མཁའ་སྤྱོད་རབ་ཏུ་བསྒྲུབ་བྱའི་ཕྱིར། །རྟ་
མཆོག་རབ་ཏུ་བསྒྲུབ་པར་བྱ། །ཞལ་གཅིག་པ་དང་ཕྱག་གཉིས་པ། །སྐུ་མདོག་སྔོན་པོ་འཇིགས་པར་བྱེད། །ཉི་མའི་སྟེང་དུ་གནས་པ་སྟེ། །ཤིན་ཏུ་འཇིགས་བྱེད་རྟ་ཡི་གདོང་། །གཡས་ན་རལ་གྲི་ཁུ་ཚུར་ཏེ། །ཕྱག་དྲུག་གཡོན་ན་ཐོད་པའོ། །ཨོཾ་ཕུ་ཕུ་ཧཱི་ཧཱི། །ཤེས་རབ་
ཅན་གྱིས་སྔགས་འདི་བཟླ། །རྟ་མཆོག་རབ་ཏུ་བསྒྲུབ་པའི་ཕྱིར། །ཤར་ལ་བྷི་ད་བཱི་བསྒོམ་བྱ། །ལྷོ་ཕྱོགས་སུ་ནི་མྱུར་འགྲོ་མ། །ནུབ་ཏུ་བདུན་པའི་རྒྱལ་མོ་སྟེ། །རྟ་མཆོག་མ་ནི་བྱང་དུ་དགོད། །བདག་པོའི་ཞལ་དང་ཕྱག་བཞིན་དུ། །ཐམས་ཅད་དེ་བཞིན་མཚུངས་པར་བསྒོམ། །
སྔགས་འདིས་ཐམས་ཅད་མཚུངས་པ་དང་། །སྤྲོ་བ་རུ་ནི་རབ་ཏུ་གྲགས། །གླིང་བུ་པི་ཝང་རྔ་ཟླུམ་དང་། །རྔ་བྲན་རྣམས་ཀྱང་ཟུར་ལ་དགོད། །བ་ལང་སྣ་དང་གླང་ཆེན་སྣ། །དེ་བཞིན་བཞིན་བཟང་བཞིན་ངན་མ། །གཏུན་ཤིང་དང་ནི་སྟ་རེ་དང་། །ལྕགས་ཀྱུ་དང་ནི་ཞགས་པའོ། །
གར་ལ་སོགས་པའི་རྣལ་འབྱོར་གྱིས། །སྒོ་བཞི་ལ་ནི་རྟག་ཏུ་བསྒོམ། །ནས་ལྗང་སྙེ་མ་དང་བཅས་བསམ། །རང་གི་རྟགས་རྣམས་དེ་བཞིན་གཡས། །ཇི་ལྟར་རྟ་མཆོག་གི་ནི་སྔགས། །རྡོ་རྗེ་ས་འོག་གི་ཡང་ངོ་། །རྟ་མཆོག་བསྒོམ་པའི་སྦྱོར་བ་ལས། །ཁམས་གསུམ་
མཁའ་ལ་རྒྱུ་བར་བྱེད། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་དངོས་གྲུབ་ངེས་པའི་རིམ་པར་ཕྱེ་བ་སྟེ་བཅུ་དྲུག་པའོ།། །།དེ་ལ་འདིར་ཐིག་གདབ་པའི་དམ་ཚིག་མཆོག་ནི། ཨ་ཀཱ་རོ་མུ་ཁཾ་སརྦ་དྷརྨཱ་ཎཱ་མཱ་

དྱ་ནུཏྦ་ནྣ་ཏྭཱཏ། དཔལ་ལྡན་གཤིན་རྗེ་མཐར་བྱེད་གཟུགས། །སློབ་མ་རྣམ་པར་སྣང་མཛད་བྱ། །ཡེ་ཤེས་ཐིག་མཆོག་རྩེ་དག་གཟུང་། །མཉམ་གཞག་ནས་ནི་ལེགས་པར་གདབ། །དེ་ལ་འདི་ནི་དཀྱིལ་འཁོར་ཆེན་པོར་རབ་ཏུ་འཇུག་པའི་དམ་ཚིག་གོ། །ཨོཾ་ཨཱཿཧཱུྃ། དཀྱིལ་འཁོར་
ཉིས་འགྱུར་རིང་བ་ལ། །སྒོ་ཡི་ཉི་ཤུ་ཆ་ཡིས་སྦོམ། །བ་ཡི་རྣམ་ལྔས་ལེགས་པར་བྱུག །སྐུད་པ་གཉིས་སུ་མེད་པར་བརྟག །དེ་ལ་འདི་ནི་རྡོ་རྗེ་ཆེན་པོར་རབ་ཏུ་འཇུག་པའི་དམ་ཚིག་སྟེ། ཀྱེ་མ་སངས་རྒྱས་སློབ་དཔོན་ཆེ། །ཀྱེ་མ་ཆོས་དང་ཚོགས་ཀྱི་གཙོ། །དམ་ཚིག་དེ་ཉིད་བདག་ལ་
སྩོལ། །བྱང་ཆུབ་སེམས་ཀྱང་བདག་ལ་བྱིན། །དེ་ལ་འདི་ནི་ས་ཆེན་པོ་ཡོངས་སུ་གཟུང་བའི་དམ་ཚིག་གོ། །རྡོ་རྗེ་ས་ཡི་ལྷ་མོ་སྤྱན་དྲངས་ལ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །སྒོ་ནི་དཀྱིལ་
འཁོར་བརྒྱད་ཆ་རུ། །བདག་ཉིད་ཆེན་པོས་ཤེས་བྱ་སྟེ། །ཁམས་ཆེན་པོ་ནི་མ་གཏོགས་པའི། །ཚད་ལྡན་ཤིན་ཏུ་མཛེས་པའོ། །སྒོ་དང་སྒོ་ཁྱུད་དེས་ཤེས་བྱ། །དེ་ཡི་ཕྱེད་ཀྱིས་སྣམ་བུ་སྟེ། །གླུ་མ་རྔ་མ་གར་མ་སོགས། །རྡོ་རྗེའི་ལྷ་མོ་ཡང་དག་ལྡན། །དེ་ཡི་ཕྱེད་ཀྱིས་རྡུལ་ཚོན་ས། །སྒོ་ཡི་
ཕྱེད་ཀྱིས་འགྲམ་དང་ལོགས། །འདིར་ཡང་དྲ་བ་དྲ་ཕྱེད་དང་། །ཉི་མ་ཟླ་བ་མེ་ཏོག་ཕྲེང་། །ལྷ་ཡི་སྣམ་བུ་དང་པོའི་ཚད། །དེ་བཞིན་ཕྱི་ཡི་དཀྱིལ་འཁོར་རོ། །དེ་ལ་སྙིང་པོ་ཆེན་པོ་འདི། །བདག་གིས་འཁོར་ལོ་ནམ་མཁར་དགོད། །རང་གི་ཕྱག་རྒྱའང་དེ་རུ་བརྟེན། །དམ་ཚིག་ཡེ་ཤེས་གཞུག་
བྱས་ནས། །དཀྱིལ་འཁོར་རབ་ཏུ་བསྒྲུབ་པར་བྱ། །ཤར་དུ་དཀར་པོ་ཆེན་པོ་སྟེ། །ལྷོ་རུ་སེར་པོ་དང་ལྡན་པ། །དམར་པོ་ནུབ་ཀྱི་ཆ་ལ་སྟེ། །བྱང་དུ་མ་ར་ཀ་ཏ་ལྡན། ཨིནྡྲ་ནཱི་ལའི་འོད་མཚུངས་པ། །དབུས་ཀྱི་ས་གཞིར་ཡང་དག་བྲི། །ལས་ཀྱི་ཆོ་ག་མཐོང་བ་ཡིས། །དེ་ཡི་ཕྱག་རྒྱ་
དགོད་པར་བྱ། །དབུས་སུ་རྡོ་རྗེ་ཡང་དག་བྲི། །ཤར་ལ་འཁོར་ལོ་ལེགས་པར་བྲི། །དེ་ལྟ་བུ་ལ་སོགས་པར་བལྟ། །ཕྱག་རྒྱ་རྟག་ཏུ་ནམ་མཁའ་མཚུངས། །དེ་ལ་བླུགས་གཟར་དགང་གཟར་ཚད། །འདི་ཡི་ཚད་ཀྱིས་ཡུ་བ་བྱ། །ཁྲུ་གང་ཚད་དང་ལྡན་པ་ལ། །དེ་ཡི་རྩེ་མོར་དཀྱིལ་

འཁོར་བྱ། །སོར་མོ་བཞི་ཡི་ཚད་ལྡན་ལ། །གཏིང་དུ་སོར་གཉིས་ཟབ་པ་ལ། །དེ་ལ་སོར་ཕྱེད་བཅུད་ཁུང་དུ། །བླུགས་གཟར་པད་མའི་རྣམ་པ་བཞིན། །མཐེ་བོའི་ལྟོ་གང་ཚད་ལ་ནི། །གཏིང་དུ་སོར་མོའི་ཚད་ལྡན་ནོ། །རྒྱུད་འདི་ལ་ནི་རབ་ཏུ་བསྔགས། །དཀྱིལ་འཁོར་དུ་ནི་
མ་ཞུགས་ཤིང་། །མཚམས་མེད་ལྔ་ནི་བྱས་པ་དང་། །གང་གིས་སྲོག་ཆགས་གསོད་པ་དང་། །ཉ་དང་ཤ་སོགས་ཟ་བ་དང་། །ཆང་དང་འདོད་མ་ལ་ཆགས་དང་། །ཆད་ལྟའི་བརྟུལ་ཞུགས་འཛིན་པ་དང་། །མངོན་པར་དབང་ནི་མ་བསྐུར་དང་། །བྱ་བ་མ་ཡིན་བྱེད་སྤྲོ་དང་། །གྲོང་ཁྱེར་དབྱེན་བྱེད་
བས་ཀྱང་ནི། །དམར་པོའི་གསུང་ནི་ཇི་ལྟར་བར། །གཤིན་རྗེ་གཤེད་རྒྱུད་མཆོག་ལ་གཞོལ། །འགྲུབ་འགྱུར་འདི་ལ་ཐེ་ཚོམ་མེད། །དེ་ནས་བྱམས་པ་ལ་སོགས་པའི་རྡོ་རྗེའི་བྱང་ཆུབ་སེམས་དཔའ་ཀུན་གྱིས་རྡོ་རྗེ་ཆེན་པོའི་སྔོན་མེད་པའི་གསུང་ཐོས་པས་ཅང་མི་སྨྲ་བར་གྱུར་ཏོ། །དེ་ལ་འདི་ནི་རྡོ་རྗེ་དབབ་
པའི་དམ་ཚིག་སྟེ། །དེ་ཡང་འབྱུང་བའི་ས་བོན་ཆེ། །འཁོར་ལོ་བཞི་པོ་རབ་བསྒྲུབ་བྱ། །གནས་བཞིར་རབ་ཏུ་སྦྱོང་བ་ཡིས། །ནམ་མཁའ་ཡང་ནི་གཡོ་བར་བྱེད། །རྐང་ཡ་དག་གི་འོག་ཏུ་ཡྃ། །ལྟེ་བར་རྃ་སྟེ་སྙིང་གར་ལྃ། །མགོ་བོ་ལ་ནི་བྃ་ཡིག་གོ། །གཞུ་ཡི་རྣམ་པ་ནག་པོ་ཆེ། །གཏུམ་པོའི་
རླུང་ནི་འཇིགས་བྱེད་པ། །སྲེག་བྱེད་ཟུར་གསུམ་མེ་བཞིན་འབར། །ཉི་མ་དམར་པོའི་འོད་དང་མཚུངས། །རྡོ་རྗེའི་ས་གཞིའི་རིམ་པ་ནི། །སེར་པོ་ཆེན་པོ་གྲུ་བཞི་པ། །རི་རབ་རི་ཡིས་མནན་པ་ཡི། །ནོར་འཛིན་དེ་ནི་བསྒོམ་པར་བྱ། །དཀར་པོ་ཟླུམ་པོ་བུམ་པ་བཞིན། །སྤྲིན་བཞིན་དུ་ནི་
ཆར་པ་འཛིན། །སྟོང་གིས་རབ་ཏུ་གང་བ་ཡི། །གངས་ཀྱི་རི་བོ་ལྟ་བུར་བསིལ། །གནས་བཞི་རབ་ཏུ་སྦྱོར་བ་ཡིས། །སློབ་མ་རྡོ་རྗེ་ཅན་ལ་བསྒོམ། །རྡོ་རྗེ་སྣང་བ་མཐའ་ཡས་སྦྱོར། །མྱུར་བ་ཉིད་དུ་འབེབས་པར་བྱེད། །དེ་ལ་འདི་ནི་དྲི་བའི་དམ་ཚིག་གོ། །རྡོ་རྗེ་ཆོས་ནི་མགོན་ཆེན་པོ། །
སྣང་བ་མཐའ་ཡས་བདེ་བ་ཆེ། །གསུངས་ཤིག་འདོད་ཆགས་ཆོས་ཆེན་པོ། །དགེ་དང་མི་དགེ་ལེགས་པར་འདྲི། །ཁྲུ་གང་ནས་ནི་བཟུང་ནས་ནི། །ཇི་སྲིད་ཁྲུ་ནི་སྟོང་གི་བར། །སློབ་མ་ཆེན་པོ་འཕར་བར་འགྱུར། །འདི་ནི་དབབ་པའི་དམ་ཚིག་གོ། །རི་མོ་བྲི་བའི་མཚན་ཉིད་རྣམས། །བདག་

གིས་ཡང་དག་བཤད་པར་བྱ། །ས་ནི་སྣུམ་པ་བླངས་བྱས་ལ། །བརྟུལ་ཞུགས་ཅན་གྱིས་མནན་པར་བྱ། །སྲན་གྲེ་དེ་བཞིན་འོ་མ་ཤ། །བུ་རམ་བསེ་ཡབ་ལ་སོགས་པ། །ཏིལ་དང་ནིམ་པའི་ལོ་མ་དང་། །དེ་བཞིན་ནཱ་ཊཱིའི་ས་བོན་ནོ། །དང་པོ་དཀར་པོ་བྲི་བར་བྱ། །དེ་ལ་ཁ་དོག་གཞན་
གྱིས་བྲི། །ཐོད་ལོ་ཀོར་དང་བཙག་དག་ལ། །ཆུ་ཡིས་སྦྱར་བས་རྒྱ་སྐྱེགས་བཞིན། །ཡུང་བ་དང་ནི་རམས་དག་ལས། །དེ་བཞིན་ཁ་དོག་ལྗང་གུར་འགྱུར། །སྔོན་པོ་རྟག་ཏུ་རམས་ཀྱིས་སོ། །དེ་བཞིན་མེ་དྲག་ནག་པོ་སྟེ། །སྐྱ་བོ་དེ་བཞིན་བ་བླ་ཡིས། །དེ་བཞིན་དམར་པོ་
མཚལ་གྱིས་སོ། །ཀ་པེད་ཁུ་བ་དེ་ལ་སྦྱིན། །ཆུང་དུས་མ་ཡིན་ལྷག་དེ་བཞིན། །ལྷག་པས་ནག་པོ་དམན་པ་ཡིས། །སྐྱ་བོ་རུ་ནི་འགྲོ་བར་བྱེད། །ཁྲོ་དང་ཞི་བ་རྣམ་གཉིས་ཀྱི། །གཟུགས་ཀྱི་མཚན་ཉིད་བཤད་པར་བྱ། །ཞི་བ་སྒེག་པོར་གསུངས་པ་སྟེ། །ཁྲོ་བོ་སྦོམ་ལ་ཐུང་བར་
ཐོས། །སོར་མོ་བཞི་ཡི་ཚད་ཀྱིས་ནི། །དཔྲལ་བ་དེ་བཞིན་ཁ་ལའོ། །མགྲིན་པ་དེ་བཞིན་འགྲམ་པ་དང་། །གསང་གནས་ལ་ནི་སོར་བཞིའི་ཚད། །སོར་མོ་ཉི་ཤུ་བཞི་ཡིས་ལག །སོར་མོ་ཉི་ཤུ་བར་ལྷུའོ། །ལག་པ་རྐང་པ་དེ་བཞིན་གདོང་། །མིག་ལ་མཐེ་བོའི་ཚད་ཡིན་ཏེ། །རྣ་བ་ལ་ནི་སོར་གཉིས་གསུངས། །
སྒོ་ངའི་སྦུབས་ལ་དེ་བཞིན་བཞི། །མཆུ་གཉིས་དག་ལ་སོར་གཉིས་སོ། །ལྟེ་བའི་ཟབས་སུ་སོར་མོ་སྟེ། །མགྲིན་པ་མ་གཏོགས་ལུས་ལ་ནི། །གདོང་གི་སུམ་འགྱུར་དག་ཏུ་འདོད། །རལ་པ་རྣམས་ནི་གདོང་གི་ཚད། །རིན་ཆེན་དབུ་རྒྱན་སོར་མོ་དྲུག །དེ་ནས་འཕགས་མ་སོར་
མོ་ཡི། །སྒྲུབ་ཐབས་བདག་གིས་རབ་བཤད་བྱ། །གང་གིས་བསྒོམ་པ་ཙམ་གྱིས་ནི། །ཆུ་ཡི་སྟེང་དུ་འཆགས་པར་བྱེད། །སེར་མོ་ཞལ་གསུམ་ཕྱག་དྲུག་པ། །ཕུ་ཡིག་ས་བོན་ལས་བྱུང་བ། །ཕྱག་ན་སྦྲུལ་དང་གཟུགས་ཆེན་མོ། །རྨ་བྱ་ལ་ནི་ཞོན་པར་དགྱེས། །ཤར་ལ་རྨ་བྱ་མ་
དགོད་དོ། །ལྷོ་རུ་དེ་བཞིན་ཁྲོ་གཉེར་ཅན། །ནུབ་ཏུ་རི་ཁྲོད་ལོ་མ་ཅན། །བྱང་དུ་རྡོ་རྗེ་ལྕགས་སྒྲོག་མ། །རྨ་བྱའི་སྒྲོ་དང་སྤྱི་བླུགས་དང་། །ཡལ་ག་དེ་བཞིན་ལྕགས་སྒྲོག་སྟེ། །དེ་རྣམས་རྣམ་པར་བསྒོམ་པར་བྱ། །སེར་པོ་དམར་པོ་ལྗང་གུ་དང་། །ཁ་དོག་སྔོན་པོའི་དབྱེ་བ་ཉིད། །

ཤེས་རབ་ཅན་གྱིས་དེ་བཞིན་བསྒོམ། །དེ་བཞིན་དུ་ནི་སྔགས་འདི་བཟླས། །ཨོཾ་ཕུ་ཛཿར། ཐོ་བ་ལ་སོགས་སྒོ་ལ་དགོད། །མེ་ཏོག་ལ་སོགས་མཚམས་སུའོ། །ཨཱརྱ་ཛཾ་གུ་ལིའི་སྦྱོར་ལྡན་པས། །ཆུ་ཡི་སྟེང་དུ་རྟག་ཏུ་འགྲོ། །དེ་ནས་ཀུ་རུ་ཀུལླེ་ཡི། །སྒྲུབ་ཐབས་བདག་
གིས་རབ་བཤད་བྱ། །གང་གིས་བསྒོམས་པ་ཙམ་གྱིས་ནི། །ཀླུ་ཡི་བུ་མོ་འགུག་པར་བྱེད། །ཁ་དོག་དམར་པོ་ཞལ་བཞི་པ། །ཕྱག་བརྒྱད་དང་ནི་ཡང་དག་ལྡན། །ཧྲཱིཿཡིག་ས་བོན་ལས་བྱུང་བ། །ཀླུ་རྣམས་འགུགས་པར་བྱེད་པའོ། །མཐའ་ཡས་ལ་སོགས་ཀླུ་རིགས་བརྒྱད། །
ཕྱག་བརྒྱད་དུ་ནི་དགོད་པར་བྱ། །སྦྲུལ་གྱི་རྒྱན་གྱིས་སྐུ་ལ་བརྒྱན། །བརྟུལ་ཞུགས་ཅན་གྱིས་མཛེས་མ་བསྒོམ། །སྔགས་ནི་ཀུ་རུ་ཀུལླེ་ཧྲཱིཿཕུཿསྭཱ་ཧཱ། །དེ་ནས་རྒྱས་མིན་མདོར་བསྡུས་པས། །གསང་བ་བ་ནི་བཤད་པར་བྱ། །གང་གིས་ཤེས་པ་ཙམ་གྱིས་ནི། །ལྷ་ཡི་བུ་མོ་འགུགས་པར་བྱེད། །
ཞལ་གཅིག་མ་དང་ཕྱག་གཉིས་མ། །ཕྱག་ན་མདའ་དང་གཞུ་བསྣམས་པ། །ལུས་ནི་སེར་པོ་ཆེན་པོ་ཡི། །ལུས་མེད་རྣམ་པར་བསྒོམ་པར་བྱ། །ཤར་དུ་དགའ་མ་བསྒོམ་པར་བྱ། །མྱོས་བྱེད་མཛེས་མ་ལྷོ་རུ་བསྒོམ། །ནུབ་ཏུ་འདོད་པའི་ལྷ་མོ་སྟེ། །བྱང་དུ་མྱོས་པར་སྤྲོ་མའོ། །འདོད་པའི་ལྷ་
མོ་ཐམས་ཅད་ཀྱི། །ལག་ན་མདའ་དང་གཞུ་བསྒོམ་མོ། །སེར་དང་དམར་དང་དེ་བཞིན་ལྗང་། །དཀར་དམར་ཉིད་རྣམས་བསྒོམ་པར་བྱ། །མཚམས་སུ་རྟག་ཏུ་རྒོད་མ་དང་། །མ་འགགས་མ་དང་དབང་བྱེད་མ། །ཆུ་སྲིན་རྒྱལ་མཚན་ཞེས་པ་རྣམས། །སྒོ་ཡི་ཆ་ལ་རབ་ཏུ་བཤད། །འདོད་
འགྱིང་དང་ནི་སྙེམས་ཅན་དང་། །དྲན་པ་དེ་བཞིན་མཚམས་ཀྱི་བདག །ལྷ་རྣམས་དེ་དག་ཐམས་ཅད་ཀྱི། །སྤྱི་བོར་གཤིན་རྗེ་གཤེད་པོ་བསྒོམ། །བུད་མེད་རྣམས་ཀྱིས་ནམ་མཁའི་གདོང་། །མཐའ་ལ་རྡོ་རྗེ་ལུས་མེད་སྒོམ། །ཤཱིཏ་ཡིག་སྔགས་ལས་ཡང་དག་བྱུང་། །ཀུན་ཏུ་རྣམ་པར་འཕྲོ་བ་
སྟེ། །བསླུས་ཤིང་གཡེང་བ་བསྒོམ་པར་བྱ། །མྱོས་པས་བདེ་བ་འདོད་ཡིད་ཀྱིས། །གོས་ནི་དམར་པོས་ཡོངས་དཀྲིས་ཏེ། །རྐང་པ་དག་གི་དྲུང་དུ་ལྷུང་། །དེ་ལ་སྔགས་ནི་ཤིན་ཏུ་བཟླ། །ཨོཾ་ཡིག་དབྱངས་ཀྱི་དབྱེ་བ་དང་། །སྭཱ་ཧཱའི་ཡི་གེ་མཐའ་མར་སྦྱིན། །ཤཱི་ཏ་ཡི་གེའི་སྔགས་

རྣམས་བརྗོད། །ཆེ་གེ་མོ་ནི་བདག་དབང་གིས། །དམར་པོའི་གསུང་ནི་ཇི་བཞིན་དུ། །ཐམས་ཅད་དུ་ནི་བསྒོམས་བྱས་ན། །རྣལ་འབྱོར་པ་ཡི་འདོད་པ་འཐོབ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་ལུས་མེད་པ་ལ་སོགས་པའི་
རིམ་པར་ཕྱེ་བ་སྟེ་བཅུ་བདུན་པའོ།། །།དེ་ནས་ཧེ་རུ་ཀ་ཆེན་གྱི། །སྒྲུབ་ཐབས་བདག་གིས་རབ་བཤད་བྱ། །རྣལ་འབྱོར་འཁོར་བས་བཅིངས་པ་ལས། །གང་ཞིག་ཤེས་པས་མྱུར་གྲོལ་བ། །ཞལ་གཅིག་པ་ལ་ཕྱག་གཉིས་ཏེ། །སྐུ་མདོག་སྔོན་པོ་གཏུམ་པོ་ཆེ། །ཕྱག་ན་རྡོ་རྗེ་བསྒོམ་
པར་བྱ། །གཞན་ལ་ཐོད་པ་དགོད་པར་བྱ། །སྤྱན་གསུམ་སྐྲ་ནི་གྱེན་དུ་བརྫེས། །ཕྱག་རྒྱ་ལྔ་ཡིས་རྣམ་པར་བརྒྱན། །ཁ་ཊྭཱྃ་ག་ནི་གཡོན་གྱི་ཆར། །རྐང་གདུབ་ཆེན་པོས་རྣམ་པར་བརྒྱན། །ཧཱུྃ་ཡིག་ས་བོན་ལས་བྱུང་བ། །ཡི་དགས་སྟེང་བཞུགས་རྟག་ཏུ་འཛུམ། །སངས་རྒྱས་ལྔ་ནི་རབ་
སྦྱོར་བས། །ཐོད་པ་ལྔ་ཡིས་དབུ་ལ་བརྒྱན། །མི་བསྐྱོད་པ་ཡི་ཅོད་པན་བསམ། །ཧེ་རུ་ཀར་གྲགས་རྣམ་པར་བསྒོམ། །ཤར་དུ་ཆོས་ཀྱི་འཁོར་ལོ་བྲི། །སངས་རྒྱས་བྱང་ཆུབ་ལྷོ་རུའོ། །འདོད་ལྔའི་ཁྲོ་ཤིང་ནུབ་ཏུ་སྟེ། །བྱང་དུ་ཧེ་རུ་ཀ་དང་མཚུངས། །སྣ་ཚོགས་གཟུགས་ཅན་
སྒེག་པ་ལ། །རྒྱན་རྣམས་ཀུན་གྱིས་རྣམ་པར་བརྒྱན། །གཟུགས་མཛེས་ཡི་དགས་སྟེང་དུ་སྟེ། །གཏི་མུག་ཐམས་ཅད་ཉེར་འཇོམས་མ། །ཆོས་ཀྱི་འཁོར་ལོ་དེ་བཞིན་གཞན། །ཡིད་བཞིན་ནོར་དང་དཔག་བསམ་ཤིང་། །བུམ་པ་བཟང་པོ་དེ་བསྒོམ་བྱ། །ལྷ་མོ་རྣམས་ནི་ཕྱག་གཡས་
ན། །རྡོ་རྗེ་ཡང་ནི་བསྒོམ་པར་བྱ། །དཀྱིལ་འཁོར་དཀྱིལ་འཁོར་ཐམས་ཅད་ལ། །ཐོད་པའི་སྣོད་ནི་གཡོན་དུའོ། །སྤྱན་དང་མཱ་མ་ཀཱི་སྒྲོལ་མ། །གོས་དཀར་ཤིན་ཏུ་ཡིད་འོང་རྣམས། །མེ་ལ་སོགས་པའི་མཚམས་བཞི་ལ། །ཕྱི་ཡི་འཁོར་ལོར་གཤིན་རྗེ་གཤེད། །ཤེས་རབ་མཐར་བྱེད་རྟ་མགྲིན་
དང་། །བདུད་རྩི་འཁྱིལ་བཅས་བསྒོམ་པར་བྱ། །འཁོར་ལོ་ཡི་ནི་སྒོ་སྲུངས་ཏེ། །ལས་རྣམས་ཆོ་ག་མཐོང་བ་ཡིས། །རྣམ་པ་ལྔ་ནི་བསྒོམས་བྱས་ནས། །སངས་རྒྱས་བྱང་ཆུབ་རྣམ་པར་བསྒོམ། །འཁོར་ལོ་བསྒོམ་བྱ་རྣལ་འབྱོར་བས། །གླུ་བཞི་རབ་ཏུ་སྦྱོར་བ་ཡིས། །འཁོར་ལོ་ཅན་ནི་བསྐུལ་བར་

བྱ། །ཙརྩི་ཀཱ་སོགས་སྙན་པའི་གླུ། །དྲུག་འགྱུར་ལ་སོགས་གླུ་རྣམས་ཀྱིས། །བརྩེ་བས་ཁྲོ་བའི་རྗེ་བཙུན་བཞེངས། །ས་གསུམ་པོ་ཡི་གཏི་མུག་སོལ། །བསམ་དུ་མེད་པའི་རྗེ་བཙུན་བཞེངས། །བདུད་བཞི་རྣམས་ལས་རྒྱལ་བར་མཛད། །འཇིག་རྟེན་མགོན་པོས་སྟོད་པར་
བཞུགས། །འཇིག་རྟེན་བསོད་ནམས་རྗེ་བཙུན་བཞེངས། །བྱང་ཆུབ་དངོས་ལ་འཇིག་རྟེན་མགོན། །ཁྱོད་ནི་སྟོང་ཉིད་སེམས་པར་མཛད། །ཇི་ལྟར་སྐར་མ་འཕྲོ་བ་ལྟར། །བྱང་ཆུབ་སེམས་ནི་དེ་ལ་ཞུགས། །བརྩེ་བས་ཆགས་པའི་སེམས་ཞུ་སྟེ། །རྡོ་རྗེ་འཛིན་པ་རང་ཉིད་དོ། །དང་
པོར་རྣལ་འབྱོར་བསྒོམ་པར་བྱ། །རྗེས་སུ་རྣལ་འབྱོར་གཉིས་པའོ། །ཤིན་ཏུ་རྣལ་འབྱོར་གསུམ་པའོ། །རྣལ་འབྱོར་ཆེན་པོ་བཞི་པའོ། །རྡོ་རྗེ་སེམས་དཔའ་རྫོགས་པ་ལ། །རྣལ་འབྱོར་ཞེས་ནི་མངོན་པར་བརྗོད། །ལྷ་ཡི་སྐུ་ནི་རྫོགས་པ་ལ། །རྗེས་སུ་རྣལ་འབྱོར་ཞེས་གྲགས་སོ། །
འཁོར་ལོ་ཐམས་ཅད་རྫོགས་པ་ལ། །ཤིན་ཏུ་རྣལ་འབྱོར་ཡིན་པར་འདོད། །ལྷ་ཡི་མིག་སོགས་བྱིན་བརླབ་དང་། །སྐུ་དང་གསུང་དང་ཐུགས་རྣམས་དང་། །ཡེ་ཤེས་འཁོར་ལོ་རབ་གཞུག་དང་། །དེ་བཞིན་བདུད་རྩི་མྱང་བ་དང་། །མཆོད་དང་བསྟོད་པ་ཆེན་པོ་ནི། །རྣལ་འབྱོར་
ཆེན་པོ་ཞེས་འདོད་དོ། །སློབ་དཔོན་ལ་ནི་བརྙས་མི་བྱ། །བདེ་གཤེགས་བཀའ་ལས་མི་འདའ་སྟེ། །དེ་བཞིན་སྤུན་ལ་ཁྲོ་བ་དང་། །ཉེས་པ་བསྒྲག་པར་མི་བྱའོ། །སེམས་ཅན་ཀུན་ལ་བྱམས་པའི་སེམས། །ནམ་ཡང་གཏང་བར་མི་བྱའོ། །བྱང་ཆུབ་སེམས་ཀྱང་གཏང་མི་བྱ། །བདག་
གཞན་ཆོས་ལ་སུན་མི་དབྱུང་། །ཡོངས་སུ་མ་སྨིན་སེམས་ཅན་ལ། །གསང་བ་བསྒྲག་པར་མི་བྱའོ། །བདག་གི་ཕུང་པོ་སྨད་མི་བྱ། །བཅོམ་ལྡན་ཆོས་ནི་སུན་མི་དབྱུང་། །གདུག་པའི་བྱམས་པ་རྟག་ཏུ་སྤང་། །ཆོས་ལ་ཚད་གཞལ་མི་བྱའོ། །སེམས་ཅན་དད་པ་ཅན་མི་བསླུ། །རྟག་
ཏུ་དམ་ཚིག་བསྟེན་པར་བྱ། །བུད་མེད་ཤེས་རབ་རང་བཞིན་ལ། །སྨོད་པའི་ཉེས་པ་དེ་བཞིན་ནོ། །རྣལ་འབྱོར་སློང་མོས་རྒྱུ་མི་བྱ། །རྣལ་འབྱོར་སྤང་བར་མི་བྱ་སྟེ། །རྟག་པར་ཀུན་དུ་གསང་སྔགས་བཟླ། །རྟག་ཏུ་དམ་ཚིག་ལ་སོགས་བསྟེན། །གལ་ཏེ་བག་མེད་གྱུར་པ་ཡིས། །བླ་མའི་

དམ་ཚིག་ལས་ཉམས་ན། །དེས་ནི་དཀྱིལ་འཁོར་ཟླུམ་པོ་བྲི། །བདེ་གཤེགས་རྣམས་ལ་ཉེས་པ་བཤགས། །དད་པས་བླ་མའི་དམ་ཚིག་བསྲུང་། །སྙིང་རྗེ་ཅན་གྱིས་མི་རྟོག་པར། །ཉེས་པ་མ་ལུས་སྤང་སེམས་ཀྱིས། །བསམ་གཏན་ལ་གཞོལ་བཟླས་མཆོག་གཞོལ། །བརྟན་ཞིང་དུལ་
ལ་བརྩེ་བའི་སེམས། །དད་དང་ལྷག་པའི་བསམ་པ་དང་། །མཆོག་ཏུ་བཟོད་པ་འཛིན་པ་ཡི། །སྐྱེས་བུ་རྟག་ཏུ་བླ་མར་བྱ། །སློབ་མ་བླ་མ་ལ་གུས་དང་། །གཤིན་རྗེ་གཤེད་ལ་རབ་གུས་པ། །བརྟུལ་ཞུགས་ཅན་གྱིས་ཡོངས་སྨིན་བྱ། །དེ་ནས་བཅོམ་ལྡན་འདས་དེ་བཞིན་གཤེགས་པ་
ཐམས་ཅད་ཀྱི་བདེ་བ་ཆེན་པོ་མཆོག་ཏུ་དགའ་བའི་ངོ་བོ་ཉིད་རྡོ་རྗེ་སེམས་དཔའི་གསུང་ཉེ་བར་ཐོས་ནས་ཅང་མི་སྨྲ་བར་གྱུར་ཏོ། །འདི་ལྟ་བུའི་ཆེད་དུ་བརྗོད་དོ། །འཁྲུལ་འཁོར་མཐར་ཐུག་གཤིན་རྗེ་གཤེད། །བརྟུལ་ཞུགས་མཐར་ཐུག་ཐོད་པ་ཆེ། །རྒྱུད་ཀྱི་མཐར་ཐུག་འདུས་པ་སྟེ། །མ་བྱུང་
འབྱུང་བར་མི་འགྱུར་རོ། །ཨེ་མ་ཞི་བ་ཆེན་པོའི་ཆོས། །ཨེ་མ་ཁྲོ་བོ་འཇིགས་མཛད་པ། །ཨེ་མ་མྱ་ངན་འདས་པའི་མཆོག །ཨེ་མ་འཁོར་བ་ཞི་བ་ཉིད། །ཨེ་མ་འདི་ནི་རབ་ཏུ་མཚར། །ཉེས་པ་གང་དེ་ཡོན་ཏན་འགྱུར། །བྱང་ཆུབ་མེད་ཅིང་མངོན་རྟོགས་མེད། །དངོས་པོ་མེད་ཅིང་སྒོམ་
པའང་མེད། །ཁམས་ཀྱང་མེད་ཅིང་རྣམ་ཤེས་མེད། །ནམ་མཁའི་དཀྱིལ་དང་མཚུངས་པ་ཉིད། །ནམ་མཁའ་བཞིན་དུ་བདག་མེད་པ། །ཆོསའདི་བདེ་བ་ཆེན་པོའོ། །ས་ཡང་མེད་ཅིང་ཆུ་ཡང་མེད། །མེ་མེད་རླུང་མེད་ནམ་མཁའ་མེད། །རྡོ་རྗེ་སེམས་དཔའ་རབ་སྦྱོར་བས། །བསྐྱེད་པ་
འདི་ནི་རབ་ཏུ་གནས། །དངོས་པོ་ཐམས་ཅད་དངོས་མེད་བཤད། །དེས་ན་རང་བཞིན་མེད་ཅེས་བསྒྲགས། །རྣལ་འབྱོར་སྦྱོར་བ་དང་ལྡན་པས། །ཆད་པ་མ་ཡིན་རྟག་པ་མིན། །ཡན་ལག་མེད་ཅིང་ཁ་དོག་མེད། །དངོས་པོ་ཐམས་ཅད་བདེན་པར་མེད། །ཐོག་མ་བར་དང་
མཐའ་མ་སྤངས། །མཆོག་ཏུ་དགའ་བའི་མཚན་ཉིད་དོ། །དེ་ནས་ཙརྩི་ཀཱ་ལ་སོགས་པས་ཆེད་དུ་བརྗོད་པ་འདི་བརྗོད་དོ། །བསོད་ནམས་སྡིག་པ་དག་དང་མ་འབྲེལ་བས། །མཆོག་ཏུ་དགའ་བ་དྲི་མེད་རྣམ་དག་པ། །དེ་བཞིན་ཉིད་ཀྱི་གཏེར་ཆེན་གཅིག་པུ་ནི། །ཀུན་

ནས་སྙིང་རྗེའི་སེམས་ཀྱིས་རབ་ཏུ་གནས། །མཆོག་ཏུ་དགའ་བ་འདི་ཡི་ངོ་བོ་ནི། །ཆོས་རྣམས་ངོ་བོ་བདེ་བ་ཆེན་པོའི་དངོས། །གཟུགས་མེད་བསོད་ནམས་མེད་ཅིང་སྡིག་པ་མེད། །སྐྱེ་དང་འགག་པ་དག་ནི་ཡོད་མ་ཡིན། །དེ་བཞིན་
གཤེགས་པ་ཐམས་ཅད་ཀྱི། །སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་བྱང་ཆུབ་སེམས་ཀྱི་རིམ་པར་ཕྱེ་བ་སྟེ་བཅྭ་བརྒྱད་པའོ།། །།དེ་ནས་གཏམ་རྒྱུད་རབ་ཏུ་བཤད་པར་བྱ་སྟེ། བཅོམ་ལྡན་འདས་མངོན་པར་བྱང་ཆུབ་པའི་དུས་སུ་བཅོམ་
ལྡན་འདས་ཐུབ་པ་ཆེན་པོ་ལ་བྱང་ཆུབ་ལ་བར་དུ་གཅད་པའི་ཕྱིར་ཤིན་ཏུ་འཇིགས་སུ་རུང་བའི་འཇིགས་པ་ཆེན་པོ་སྟོན་ཅིང་བདུད་ཀྱི་དཔུང་གི་ཚོགས་ཆེན་པོ་དཔག་ཏུ་མེད་པ་ལྷགས་ཏེ། དེའི་དུས་ན་བདུད་ཆེན་པོ་ལས་མཆོག་ཏུ་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ། །བཅོམ་ལྡན་འདས་ཉིད་ཀྱི་སྐུ་གསུང་ཐུགས་རྡོ་རྗེ་རྣམས་ལས་གཤིན་རྗེ་གཤེད་ཀྱི་ཁྲོ་བོ་ངེས་པར་ཕྱུང་སྟེ། ངེས་པར་ཕྱུང་ནས་ཀྱང་ཕྱག་ན་རྡོ་རྗེ་བཅོམ་ལྡན་འདས་ཐུབ་པ་ཆེན་པོའི་བཀའ་བཞིན་བྱེད་པ་ལ། ཕྱག་ན་རྡོ་རྗེ་ཁྱོད་འདི་ལྟ་བུའི་གཤིན་རྗེ་གཤེད་ཀྱི་ཁྲོ་
བོའི་གཟུགས་སུ་བསྒྱུར་ཏེ། བདུད་དང་། གནོད་སྦྱིན་དང་། ལྷ་མ་ཡིན་དང་། ལྷ་དང་། སྲིན་པོ་རྣམས་སྐྲག་ཅིང་འཇིགས་པ་དང་སོད་ཅིག་ཅེས་གསུངས་སོ། །དེའི་དུས་ན་ཇི་ལྟར་བདག་གིས་བཅོམ་ལྡན་འདས་ཀྱིས་གསུངས་པ་ཐོས་ཏེ། སྐད་ཅིག་ལ་
བཟུང་ཞིང་དོན་བཟུང་སྟེ། བསྡུས་ནས་ཤིན་ཏུ་དགའ་བས་ལེགས་པར་སེམས་བསྐྱེད་དོ། །གསང་བའི་བདག་པོ་ཆེན་པོ་ལ། །འདི་སྐད་ཅེས་ནི་བཀའ་སྩལ་ཏོ། །ཕ་རོལ་གྲོང་དུ་རབ་འཇུག་པའི། །ཐབས་རྣམས་རབ་ཏུ་གསལ་བྱ་སྟེ། །འགྲོ་དང་འོང་བར་འདོད་པ་
ཡིས། །ཏིང་ངེ་འཛིན་དང་གསང་སྔགས་བཟླ། །བྱེ་བ་བཟླས་པས་འགྲུབ་འགྱུར་ཏེ། །བྱེ་བ་ལྔ་ཡིས་སྨོས་ཅི་དགོས། །དང་པོ་དེ་ནས་བརྩམ་པར་བྱ། །བདག་ཉིད་ནམ་མཁའ་ལྟ་བུ་སྟེ། །དང་པོར་གོམས་པར་བྱ་བའི་དུས། །སེམས་ལ་སེམས་ཉིད་གཞུག་པར་བྱ། །

དཔེར་ན་སེམས་འདི་རྨི་ལམ་ན། །འགྲོ་དང་སླར་ཡང་བཟློག་པར་བྱ། །སྐད་ཅིག་ལ་ནི་དེ་བཞིན་གནས། །རྒྱུན་མི་འཆད་པར་སྦྱོར་གོམས་པས། །དཔེར་ན་མཚོན་ཆ་གནས་བྱས་ནས། །གཞུ་ཡིས་མདའ་ནི་འཕེན་པ་སྟེ། །དེ་བཞིན་འདིར་ཡང་ཡིད་ཀྱི་གཞུས། །རྒྱུན་
མི་འཆད་པར་འགྲོ་བར་བྱེད། །ཟླ་བ་ཉི་མ་སྦྱོར་བ་ཡིས། །རླུང་གིས་སེམས་ནི་གཞུག་པར་བྱ། །ལུས་ནི་རྣམ་པར་སྤངས་ནས་ནི། །དེ་ལ་ཡིད་ནི་འགྲོ་དང་འཇུག །ཅུང་ཟད་དྲོད་ནི་རྙེད་པ་ཡིས། །ཐོབ་པའི་ཕྱོགས་སུ་སྒོམ་པ་པོ། །ལུས་ཀྱི་ནང་དུ་འཇུག་པ་ནི། །
དཔེར་ན་གྲོང་གཞན་ལས་འགྲོ་ཞིང་། །ཟླ་བ་ཉི་མའི་འགྲོས་འཇོམས་ཤིང་། །སྒྲ་གཅན་འཇུག་པ་སྦྱོར་བ་ཡིས། །བགྲོད་པའི་གནས་ནི་ཐོབ་པ་ན། །རླུང་གི་བཞོན་པའི་སྦྱོར་བ་ཡིས། །འཚི་ལྟས་མཚན་ཉིད་ཤེས་བྱས་ལ། །ཆོ་ག་མཚན་ཉིད་ལྡན་པས་བགྲོད། །ཇི་ལྟར་
འདོད་པ་གཡོ་མི་གཡོ། །རང་འདོད་ཀུན་ཏུ་སྐྱེ་བར་འགྱུར། །ཐུར་སེལ་འོག་ལམ་གསང་བའི་མཐའ། །གཏོང་ཞིང་ལྟེ་བར་རྩོམ་པར་བྱེད། །སྙིང་ག་མགྲིན་པར་སོང་ནས་ནི། །སྲོག་ནི་སྣ་བུག་དག་ནས་འགྲོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་
གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་ཕ་རོལ་གྱི་གྲོང་དུ་འཇུག་པ་སྟེ། རིམ་པར་ཕྱེ་བ་བཅུ་དགུ་པའོ།། །།དཔལ་ལྡན་གཤིན་རྗེ་གཤེད་དམར་པོའི་རྒྱུད་ཀྱི་རྒྱལ་པོ་རྫོགས་སྷོ།། །།བླ་མ་ཆོས་ཀྱི་རྒྱལ་པོའི་
གསུང་གི་འོད་ཟེར་དང་། །བྷོ་ཊ་པཎྜི་ཏའི་གསུང་དང་། མིའི་དབང་པོ་ཀུན་དགའ་བཟང་པོའི་གསུང་དང་། དཔོན་ཀུན་གཞོན་གྱིས་གསེར་གནང་བ་ལ་བརྟེན་ནས། ཤཱཀྱའི་དགེ་སློང་ཙནྡྲ་ཤྲཱིའི་ཞལ་སྔ་ནས་ཞུས་ཤིང་། པཎྜི་ཏ་ཆེན་པོ་ཙནྡྲ་ཀཱིརྟི་
དང་། ཡར་ལུངས་པ་གྲགས་པ་རྒྱལ་མཚན་གྱིས། བལ་ཡུལ་ཡམ་བུའི་གྲོང་ཁྱེར་དུ་བསྒྱུར་རོ།། །།

༄༅༅། །རྒྱ་གར་སྐད་དུ། ཤྲཱི་མཱཾ་རཀྟ་ཡ་མཱ་རི་ཏནྟྲ་རཱ་ཛ་ནཱ་མ། བོད་སྐད་དུ། དཔལ་ལྡན་གཤིན་རྗེ་གཤེད་དམར་པོའི་རྒྱུད་ཀྱི་རྒྱལ་པོ་ཞེས་བྱ་བ། གཤིན་རྗེ་མཐར་བྱེད་དམར་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་
ལྡན་འདས་དེ་བཞིན་གཤེགས་པ་ཐམས་ཅད་གཅིག་ཏུ་འདྲེས་པར་གྱུར་པ་བདག་མེད་མའི་བྷ་ག་ལ་བཞུགས་སོ། །དེ་ལ་མགྲིན་པར་དམ་འཁྱུད་དེ། །རང་ཉིད་སེམས་ཅན་ཆེད་ཞུས་པ། །ཀྱཻ་རྡོ་རྗེར་གསུངས་པ་དང་། །ཐར་པ་དེ་བཞིན་སྡོམ་པར་ཡང་། །འདུས་པ་ལ་སོགས་རྒྱུད་དུ་
ཡང་། །སླར་ཡང་ཆེས་མང་དུ་གསུངས་ཀྱང་། །སེམས་ཅན་བསམ་པ་ཡོངས་རྫོགས་བྱེད། །ད་ནི་བདག་གིས་རབ་བཤད་བྱ། །ཁ་ཅིག་རྒྱལ་སྲིད་འདོད་པ་དང་། །ཚེ་རིང་ནད་མེད་ཕུན་སུམ་ཚོགས། །ཞི་བ་ལ་སོགས་ལས་རྒྱས་པ། །སྣ་ཚོགས་རྒྱུད་དུ་གསུངས་པ་ཡང་། །
གང་ཡང་མངོན་པར་སྤྱོད་པ་དང་། །དགྲ་ཡི་སྡེ་ཉམས་བྱེད་པ་དང་། །སྐྲོད་དང་འགུགས་དང་གསོད་པ་དང་། །སྣ་ཚོགས་རྒྱུད་དུ་མ་བརྗོད་པའི། །འཁྲུལ་འཁོར་འཇིག་རྟེན་གསུམ་རྙེད་དཀའ། །ཁྱོད་ལ་ཕན་པའི་ཐབས་གཟུང་ཕྱིར། །བཤད་བྱ་ལྷ་མོ་གུས་བཅས་ཉོན། །འཁྲུལ་
འཁོར་གང་གི་མཐུ་སྟོབས་ཀྱིས། །རྟག་ཏུ་རྒྱལ་སྲིད་ཐོབ་བྱ་ནི། །ཇི་སྲིད་ཉི་མ་ཟླ་བ་བཞིན། །འཚོ་བར་འདོད་དོ་གལ་ཏེ་མིན། །ད་ནི་མིང་གི་སྤྱོད་ཡུལ་དུ། །ཁུ་བ་རེངས་དང་སྡེ་འགུགས་དང་། །མཁའ་སྤྱོད་ཉིད་དང་མཆོག་ཏུ་མྱུར། །དེ་ཡི་སྨན་ནི་བཤད་པར་བྱ། །དང་
པོར་བྱམས་པ་བསྒོམ་པར་བྱ། །གཉིས་པར་སྙིང་རྗེ་དེ་བཞིན་ནོ། །གསུམ་པར་དགའ་བ་བསྒོམ་པར་བྱ། །བཞི་པར་བཏང་སྙོམས་རྣམ་བསྒོམ་བྱ། །འཇིག་རྟེན་ཆོས་རྣམས་བརྒྱད་པོ་ནི། །ཡོངས་བཏང་སྟོང་པར་བསམ་པར་བྱ། །སླར་ཡང་སྟོང་ཉིད་བྱང་ཆུབ་སྟེ། །གཉིས་
པ་ལ་ནི་ས་བོན་བསྡུ། །བཞི་པར་ཡི་གེ་དགོད་པའོ། །ར་ཡིག་ལས་བྱུང་ཉི་མ་ལ། །ཧཱུྃ་བྱུང་སྣ་ཚོགས་རྡོ་རྗེའོ། །དེ་ཉིད་ཀྱིས་ནི་རྡོ་རྗེ་ཡི། །ར་བ་ཞེས་དང་དེ་བཞིན་དུ། །ས་གཞི་རྡོ་རྗེ་བཅིངས་པའོ། །དང་པོར་སྟོང་པར་བསྒོམ་པར་བྱ། །དེ་ནས་ཡི་གེ་ཨཾ་དམར་པོ་ཡོངས་

སུ་གྱུར་པ་ལས་ཉི་མའི་དཀྱིལ་འཁོར་རོ། །དེའི་སྟེང་དུ་ཡི་གེ་ཧཱུྃ་དམར་པོའོ། །དེའི་སྟེང་དུ་བརླན་དང་བཅས་པའི་མགོ་བོས་བརྒྱན་པའི་དབྱུག་པའི་དབུས་སུ་ཧཱུྃ་ཡིག་དམར་པོའོ། །དེར་ཡང་ཉི་མ་ལ་ཧཱུྃ་ཡིག་གོ། །དེ་ལས་ངེས་པར་བྱུང་བའི་འོད་ཟེར་རྣམས་ཀྱིས་ནམ་མཁའི་ཕྱོགས་སུ་
དཔའ་བོའི་གཟུགས་དེ་ལ་འཇིག་རྟེན་གསུམ་པ་ཐམས་ཅད་བསྡུས་ནས་སླར་ཡང་དེ་ཉིད་དུ་བཅུག་སྟེ། དཔལ་གཤིན་རྗེ་གཤེད་དམར་པོའི་གཟུགས་སུ་བདག་ཉིད་བསམ་པར་བྱའོ། །སྐུ་མདོག་དམར་པོ་གཡོན་བརྐྱང་ཞིང་རྣམ་པར་འགྱུར་བའི་ཞལ་མཆེ་བ་གཙིགས་པ། ལྗགས་འདྲིལ་
བ་འཇིགས་པར་བྱེད་པ། ཀླུ་བརྒྱད་ཀྱིས་རྣམ་པར་བརྒྱན་པ། དབུ་སྐྲ་དམར་སེར་གྱེན་དུ་འབར་བ། རྐེད་པའི་ཕྱོགས་སུ་སྟག་གི་པགས་པ་འཛག་པས་རྣམ་པར་བརྒྱན་པ། མིའུ་ཐུང་གསུས་པ་འཕྱང་ཞིང་འཇིགས་པ། སྤྱན་གསུམ་པ་ཤིན་ཏུ་འཇིགས་པར་བྱེད་པ་དམར་པོ་
འབར་བའི་རྒྱུན་མི་ཟད་པ་འོད་ཟེར་སྣ་ཚོགས་ཀུན་ཏུ་འཁྲུགས་པ། གཡོན་པར་སྲེད་མེད་ཀྱི་བུ་ལ་སོགས་པའི་ཁྲག་གིས་གང་བའི་ཐོད་པ་དང་། གཡས་པར་བདུད་བཞི་རྣམ་པར་འཇོམས་པར་བྱེད་པའི་དབྱུག་པ་དཀར་པོ་དང་ཀླུའི་རྒྱན་ལ་སོགས་པས་སྤྲས