Kinh tạng Tây Tạng (Kangyur Đại Học) — 077_རྒྱུད་འབུམ།_ཀ

། །སྤྱན་རས་གཟིགས་དབང་ཀ་པི་ཏ། །ཅེ་པོག་རྡོ་རྗེ་ཉི་མ་ལ། །མར་མེ་ཕྲེང་བ་སངས་རྒྱས་ལ། །རྡོ་རྗེ་ཅན་ལ་མར་མེ་མདུན། །
སྤྱན་རས་གཟིགས་ལ་མར་མེ་བརྒྱ། །སྟོང་ནི་རྡོ་རྗེ་ཉི་མ་ལ། །སངས་རྒྱས་རྣམས་ལ་ཙནྡན་སྤོས། །རྡོ་རྗེ་ཅན་ལ་གུར་གུམ་ཡིན། །སྤྱན་རས་གཟིགས་ལ་ཙནྡན་དམར། །ག་བུར་རྡོ་རྗེ་ཉི་མ་ལ། །མེ་ཏོག་ཀུན་དང་བདུག་པ་ཀུན། །དེ་བཞིན་མར་མེ་ཐམས་ཅད་དང་། །སྤོས་

རྣམས་ཐམས་ཅད་ཇི་སྙེད་པ། །རྡོ་རྗེ་རྟ་ལ་དབུལ་དུ་རུང་། །མཆོད་པ་ཐམས་ཅད་ཀྱི་ཕྱག་རྒྱ་ཤེས་པའོ། །སྒེག་མོ་དང་ནི་ན་ཆུང་དང་། །མྱོས་དང་དེ་བཞིན་བདུད་རྩི་དང་། །གཅིག་ཏུ་དཔའ་དང་འདོད་ཆགས་སྲ། །གཡོན་ཅན་བྲན་མོ་དེ་བཞིན་ཏེ། །ལན་ཚྭ་ལ་སོགས་རོ་ཀུན་དང་། །
ཁ་ར་ལ་སོགས་བདུད་རྩི་བཞིན། །བདག་ཉིད་ཀྱི་ནི་རོ་སྒྲུབ་པ། །མ་ལུས་ལུས་པ་མེད་པར་འགྲུབ། །ཤ་དང་ཆང་དུ་ལྡན་པ་ཡི། །བཟའ་བ་སྣ་ཚོགས་གྲུབ་པ་ནི། །དགའ་བའི་ལོངས་སྤྱོད་སྐལ་མཆོག་སྟེ། །ཚེ་ཡི་དམ་པ་རབ་ཏུ་འགྲུབ། །ཨ་མྲ་སྨིན་དང་རྒུན་འབྲུམ་དང་། །པ་ན་
ས་དང་ནི་ཀེ་ར། །ཨར་ཀ་ལ་སོགས་འབྲས་བུ་ཡི། །ཕྱག་རྒྱའི་མཆོག་ནི་འདི་རྣམས་ཏེ། །དངོས་གྲུབ་འབྲས་བུ་ཐམས་ཅད་འཐོབ། །ཁ་ར་སྦྲང་རྩི་བྱུགས་པ་ཡིས། །ཨ་མྲ་ལ་སོགས་ཚིག་གུས་བྱུག །ས་ཧ་ཀ་རའི་མར་ལ་སོགས། །མཉམ་པའི་དྲི་ཡིས་བསྐུ་བར་བྱ། །ཡུངས་
དང་རྒྱ་སྐེགས་ལ་སོགས་པའི། །ཚོན་གྱིས་མཐུན་པར་ཁ་བསྒྱུར་ནས། །ཤུན་པ་གྲོ་བ་ལ་སོགས་བྱས། །མཆོད་པའི་ཚེ་ན་དབུལ་བར་བྱ། །འབྲས་བུར་བཅས་པའི་ཕྱག་རྒྱ་ཤེས་པའོ། །སངས་རྒྱས་རྣམས་ལ་བཤོས་དབུལ་བར། །ཤ་དང་ཆང་ནི་རྣམ་པར་སྤངས། །གླུ་དང་
སིལ་སྙན་གྲུབ་པ་དང་། །གདུགས་དང་རྒྱལ་མཚན་བ་དན་དང་། །ཤ་དང་ཆང་དུ་བཅས་པ་ནི། །གཏོར་མའི་མཆོག་སྟེ་སྣ་ཚོགས་པའོ། །བདག་གི་ཕྱུགས་ཆེན་སྐལ་བཟང་པོ། །རྡོ་རྗེའི་ལས་ནི་དཔལ་གྲུབ་པའོ། །བཤོས་དང་གཏོར་མ་དཀར་པོ་དང་། །པདྨའི་མེ་ཏོག་
ལྡན་པ་ནི། །སྤྱན་རས་གཟིགས་དབང་གཙོ་བོ་ལ། །ཕུལ་ན་དགོས་པ་ཐམས་ཅད་འགྲུབ། །རྒྱལ་པོའི་ཁ་ཟས་སྣ་ཚོགས་པ། །ཤ་དང་ཆང་དུ་ལྡན་པ་དང་། །གླུ་དང་སིལ་སྙན་སྐལ་བཟང་དག །རྡོ་རྗེ་ཉི་མའི་འཁོར་ལ་དབུལ། །ཁ་ཟས་ཀུན་གྱི་རོ་རྣམས་དང་། །
ཤ་དང་ཤ་ཡི་མཆོག་རྣམས་དང་། །ཤ་ཡི་སྦྱོར་དང་ཤ་སྐམ་དང་། །བཤོས་དག་རྡོ་རྗེ་རྟ་ལ་དབུལ། །མཆོད་པ་དང་གཏོར་མ་ཐམས་ཅད་ཀྱི་ཆོ་གའི་ཕྱག་རྒྱའོ། །མཐེ་བོ་སེམས་དཔའི་སྐྱིལ་མོ་ཀྲུང་། །མཛུབ་མོ་གཉིས་ཀྱི་རྩེ་མོ་དགུག །གུང་མོ་གཉིས་ནི་མཉམ་པར་སྦྱར། །

ལྷག་མ་རྡོ་རྗེ་ཐལ་མོར་སྦྱར། །སངས་རྒྱས་རིན་ཆེན་ཕྱག་རྒྱ་འདི། །རང་བྱུང་རྣམས་ཀྱི་དབང་བསྐུར་བ། །རྒྱལ་སྲིད་ཐམས་ཅད་མ་ལུས་པ། །ལུས་པ་མེད་པར་མྱུར་དུ་འགྲུབ། །སྤྱི་བོ་དང་ནི་དཔྲལ་བ་དང་། །འགྲམ་པ་གཉིས་དང་ལྟག་པར་ནི། །སངས་རྒྱས་ཀུན་
གྱི་རིན་ཆེན་མཆོག །དབུ་རྒྱན་ཀུན་ཏུ་བརྒྱན་པར་བྱ། །དབུ་རྒྱན་བཅིངས་པས་བཅིངས་ནས་ནི། །འགྱིང་ཞིང་མཐའ་མས་དགྲོལ་བར་བྱ། །དར་གྱི་མཐའ་མ་དཔྱངས་པ་ལྟར། །བྱས་ནས་ཐལ་མོ་བརྡབ་པར་བྱ། །སངས་རྒྱས་པདྨོ་རྡོ་རྗེ་འཛིན། །རྡོ་རྗེ་ཉི་མ་ཁམས་གསུམ་པ། །
དེ་ཡིས་དགྲ་མེད་སྡིག་མེད་པར། །བདག་གི་ལོངས་སྤྱོད་ཉིད་དུ་སྤྱོད། །འདི་ཡིས་བསྲུང་བ་བྱས་ནས་ནི། །རྡོ་རྗེ་སེམས་དཔའ་དཔལ་དང་འདྲ། །སངས་རྒྱས་ཀུན་གྱི་དངོས་གྲུབ་ཆེ། །འཁོར་ལོས་སྒྱུར་བ་རབ་ཏུ་འགྲུབ། །དེ་བཞིན་གཤེགས་པ་ཐམས་ཅད་ཀྱི། །ནོར་བུ་རིན་པོ་
ཆེའི་དབུ་རྒྱན་མཉམ་པར་སྦྱོར་བ་སྐལ་བ་བཟང་པོ་དཔལ་གྱི་ཕྲེང་བ་ཞེས་བྱ་བའི་ཕྱག་རྒྱའོ། །སོར་མོ་ཐམས་ཅད་ནང་དུ་བསྣོལ། །སོར་མོ་རྩེ་མོ་ཀུན་སྤྲད་ནས། །མཐེ་བོ་རྡོ་རྗེས་མནན་པ་ནི། །སྣ་དང་མིག་ཕུགས་ལྟ་བུ་སྟེ། །པདྨོའི་རིན་ཆེན་ཕྱག་རྒྱ་འདི། །བདག་ཉིད་ཆེན་པོར་དབང་
བསྐུར་བ། །རྒྱལ་སྲིད་ཐམས་ཅད་མ་ལུས་པ། །ལུས་པ་མེད་པར་མྱུར་དུ་འགྲུབ། །སྤྱི་བོ་དང་ནི་དཔྲལ་པ་དང་། །འགྲམ་པ་གཉིས་དང་ལྟག་པར་སྦྱར། །ཐོད་པའི་ཕྲེང་བའི་དབུ་རྒྱན་ཏེ། །སངས་རྒྱས་གཙུག་གི་ནོར་བུ་འབར། །དབུ་རྒྱན་བཅིངས་པས་བཅིངས་ནས་ནི། །
འགྱིང་བའི་མཐའ་ནས་དགྲོལ་བར་བྱ། །དར་གྱི་མཐའ་མ་དཔྱངས་པ་ལྟར། །བྱས་ནས་ཐལ་མོ་བརྡབ་པར་བྱ། །འདི་ཡིས་བསྲུང་བ་བྱས་ན་ནི། །རྡོ་རྗེ་སེམས་དཔའ་དཔལ་དང་འདྲ། །ཁམས་གསུམ་དག་ནི་རྒྱལ་སྲིད་ཆེ། །འཁོར་ལོས་སྒྱུར་བ་རབ་ཏུ་འགྲུབ། །དཔལ་རྡོ་
རྗེ་ཧེ་རུ་ཀ་པདྨ་ནོར་བུ་རིན་པོ་ཆེའི་དབུ་རྒྱན་མཉམ་པར་སྦྱོར་བ་སྐལ་བ་བཟང་པོ་དཔལ་གྱི་ཕྲེང་བ་ཞེས་བྱ་བའི་ཕྱག་རྒྱའོ། །རྡོ་རྗེ་ཐལ་མོ་མཉམ་སྦྱར་ཏེ། །ལག་གཉིས་ནོར་བུ་རིན་ཆེན་དུ། །ཇི་ལྟར་རིགས་པར་མཉམ་སྦྱར་ནས། །མཛུབ་མོ་མཐེ་བོ་རྩེ་མོ་བཞི། །ཡོངས་སུ་བསྒྱུར་ཏེ་

བཏེག་ནས་སུ། །དཔྲལ་བར་ལེགས་པར་གཞག་ན་ནི། །ཁམས་གསུམ་བདག་པོ་རྒྱལ་བ་དག །མ་ལུས་ལུས་པ་མེད་པར་འགྲུབ། །དཔལ་རྡོ་རྗེ་རིན་ཆེན་གྱི་ཕྱག་རྒྱའོ། །ལག་པ་ཤིན་ཏུ་བརྐྱང་བ་ཡི། །མཛུབ་མོ་གཉིས་པའི་མདུད་པར་བཅིང་། །གུང་མོ་མཐེ་བོའི་རྩེ་མོ་ཅན། །
རྡོ་རྗེའི་ཕྱག་རྒྱ་ཡོངས་སུ་བསྒྱུར། །ཡོངས་སུ་བསྒྱུར་ཏེ་བཏེག་ནས་ཀྱང་། །ཁྲོ་གཉེར་དུ་ནི་ལེགས་བཞག་ན། །རྒྱལ་སྲིད་ཐམས་ཅད་ལེགས་འགྲུབ་པ། །མ་ལུས་ལུས་པ་མེད་པར་འགྲུབ། །འདི་ཡིས་བསྲུང་བ་བྱས་ན་ནི། །རྡོ་རྗེ་ལས་ཀྱི་དཔལ་དང་འདྲ། །རྣལ་འབྱོར་དབང་ཕྱུག་རབ་
བསྒྲུབས་པ། །མ་ལུས་ལུས་པ་མེད་པར་འགྱུར། །མ་མོ་དང་ནི་བྱད་མ་དང་། །མཁའ་འགྲོ་མ་ཡང་ལྷག་པར་འགྲུབ། །དུར་ཁྲོད་དངོས་གྲུབ་ཐམས་ཅད་དང་། །ལས་རྣམས་ཐམས་ཅད་བྱེད་པར་འགྱུར། །དཔལ་རྡོ་རྗེ་ཧེ་རུ་ཀའི་ཕྱག་རྒྱའོ། །མཐེ་བོ་དཔའ་བོའི་སྐྱིལ་མོ་ཀྲུང་། །
མཛུབ་མོ་གཉིས་ཀྱི་རྩེ་མོ་དགུག །གུང་མོ་གཉིས་ནི་མཉམ་པར་སྦྱར། །ལྷག་མ་རྡོ་རྗེ་ཐལ་མོའི་འོད། །རྡོ་རྗེ་རིན་ཆེན་ཕྱག་རྒྱ་འདི། །རང་བྱུང་རྣམས་ཀྱི་དབང་བསྐུར་བའོ། །འཇིག་རྟེན་དབང་པོ་དམ་པ་ཀུན། །མ་ལུས་ལུས་པ་མེད་པར་འགྲུབ། །འདི་ཡིས་བསྲུང་བ་བྱས་
ན་ནི། །རྣམ་པར་སྣང་མཛད་དཔལ་དང་འདྲ། །སངས་རྒྱས་ཀུན་གྱི་ཚེ་འགྲུབ་པ། །མ་ལུས་ལུས་པ་མེད་པར་འགྲུབ། །ཚེ་དང་ཡེ་ཤེས་དཔག་ཏུ་མེད་པ་རྣམ་པར་ངེས་པ་ཞེས་བྱ་བའི་ཕྱག་རྒྱའོ། །རྡོ་རྗེ་ཐལ་མོ་མཉམ་སྦྱར་ལ། །མཛུབ་མོ་བསྙམས་ཏེ་ཕྱི་རོལ་དགུག །
མཐེ་བོ་གཉིས་ནི་རབ་ཏུ་བརྐྱང་། །རྡོ་རྗེ་ནོར་བུ་ཞེས་ཀྱང་བྱ། །དཔྲལ་བར་མྱུར་དུ་བཞག་པ་ནི། །བསམ་པ་ཐམས་ཅད་ཡོངས་རྫོགས་ཤིང་། །རྒྱལ་སྲིད་ཐམས་ཅད་རབ་སྒྲུབ་པ། །མ་ལུས་ལུས་པ་མེད་པར་འགྲུབ། །དཔལ་ནོར་བུ་རིན་པོ་ཆེ་དབང་བསྐུར་བའི་ཕྱག་རྒྱའོ། །སངས་
རྒྱས་རིན་ཆེན་པདྨོ་དང་། །དེ་བཞིན་རྡོ་རྗེ་རིན་ཆེན་དང་། །ཡིད་བཞིན་ནོར་བུ་རིན་ཆེན་མཆོག །རྟ་མཆོག་རབ་ཏུ་འགྲུབ་པར་འགྱུར། །ཕྱག་རྒྱས་རབ་ཏུ་དབང་བསྐུར་བའི་ཕྱག་རྒྱ་ཤེས་པའོ། །སོར་མོ་ཕན་ཚུན་བསྣོལ་བ་ནི། །རྡོ་རྗེ་ཐལ་མོ་ཡིན་པར་བཤད། །སོར་མོ་

ཐམས་ཅད་བསྡམས་པ་ནི། །རྡོ་རྗེ་བསྡམས་པ་ཡིན་པར་བཤད། །རྡོ་རྗེ་བསྡམས་པ་བྱས་ན་ནི། །མཛུབ་མོ་མཐེ་བོའི་ནང་དག་ཏུ། །གཡས་པའི་མཐེ་བོའི་མཚན་མ་འདི། །རྩེ་མོ་བཅུག་ལ་བསྡམ་པར་བྱ། །དགའ་ཆེན་དཔལ་གྱི་ཕྱག་རྒྱ་སྟེ། །ཕྱག་རྒྱ་ཐམས་
ཅད་རང་བྱུང་བ། །རབ་འབྱམ་ལས་རྣམས་དངོས་གྲུབ་ནི། །མ་ལུས་ལུས་པ་མེད་པར་འགྲུབ། །དགའ་བའི་རྡོ་རྗེ་བཅིངས་ནས་ནི། །གུང་མོ་བཅིངས་པའི་ནང་དུ་གཞུག །མཐེ་བོ་མཐེའུ་ཆུང་རྩེ་མོ་ཅན། །རྡོ་རྗེའི་ཕྱག་རྒྱ་ཡོངས་སུ་བསྒྱུར། །འདི་ཡིས་སངས་རྒྱས་ཐམས་ཅད་
དང་། །དེ་བཞིན་དཔའ་བོ་ཐམས་ཅད་དང་། །རྡོ་རྗེ་འཛིན་པ་ཐམས་ཅད་ནི། །ཚེ་འདི་ཉིད་ལ་འགྲུབ་པར་འགྱུར། །དཔལ་བདེ་བ་ཆེན་པོ་རྡོ་རྗེའི་ཕྱག་རྒྱའོ། །དེ་ལས་གུང་མོ་ལྕགས་ཀྱུ་ནི། །བདག་གི་སྙིང་གར་སྦྱར་བར་བྱ། །འདི་ནི་ཐམས་ཅད་འགུགས་པའི་རྒྱ། །དེ་མ་ཐག་
ཏུ་ཕྱག་རྒྱ་འདིས། །སངས་རྒྱས་པདྨོ་རྡོ་རྗེ་འཛིན། །རྡོ་རྗེ་ཉི་མ་ཁམས་གསུམ་པ། །བཀུག་སྟེ་དབང་དུ་བྱས་ནས་ནི། །ལས་རྣམས་ཀུན་ལ་སྦྱོར་བར་བྱེད། །དཔལ་བདེ་བ་ཆེན་པོ་རྡོ་རྗེ་ལྕགས་ཀྱུ་ཞེས་བྱ་བའི་ཕྱག་རྒྱའོ། །རྡོ་རྗེ་བསྡམས་པ་བྱས་ནས་ནི། །གུང་མོ་བཅིངས་པའི་ནང་
དུ་གཞུག །མཐེའུ་ཆུང་མཐེ་བོ་རྩེ་མོ་ཅན། །རྡོ་རྗེའི་ཕྱག་རྒྱར་ཡོངས་བསྒྱུར་ན། །སངས་རྒྱས་བྱང་ཆུབ་སེམས་དཔར་ཡང་། །སྦྱོར་བ་འདི་ཡིས་མི་དཀའ་ན། །དངོས་གྲུབ་གཞན་དང་ལས་ཀྱི་མཆོག །རབ་འབྱམ་གཞན་ལྟ་ཅི་ཞིག་སྨོས། །དེ་བཞིན་གཤེགས་པ་ཐམས་
ཅད་ཀྱི་དཔལ་རྡོ་རྗེའི་ཕྱག་རྒྱའོ། །རྡོ་རྗེའི་ཕྱག་རྒྱ་བཅིངས་པ་ལས། །སྦྱོར་ལྡན་ཐལ་མོ་ཁོང་སྟོང་སྦྱར། །ཁམས་གསུམ་དག་ནི་མ་ལུས་པ། །དེ་མ་ཐག་ཏུ་འབེབས་པར་བྱེད། །དཔལ་རྡོ་རྗེ་དབབ་པའི་ཕྱག་རྒྱའོ། །རྡོ་རྗེའི་ཕྱག་རྒྱ་བཅིངས་པ་ལས། །གུང་མོ་དེ་བཞིན་བཀུག་ནས་
ནི། །རྡོ་རྗེ་རྡོ་རྗེ་ཞེས་བརྗོད་དེ། །གུང་མོ་ནམ་མཁའི་རྡོ་རྗེ་མཆོག །ཕྱག་རྒྱ་འདི་ཡིས་བཏབ་ན་ནི། །འདོད་པ་བཞིན་དུ་འགྲོ་འོང་ལྡིང་། །དཔལ་ལྡན་འདོད་པ་ཀུན་གྱི་བདག །རྡོ་རྗེ་སེམས་དཔའ་རབ་ཏུ་འགྲུབ། །དཔལ་རྡོ་རྗེ་སྙིང་པོའི་ཕྱག་རྒྱའོ། །རྡོ་རྗེ་བསྡམས་པ་ལ་གནས་

ཏེ། །མཐེ་བོའི་རྩེ་མོ་དེ་བཞིན་མཉམ། །མཛུབ་མོ་གཉིས་ཀྱི་རྩེ་མོ་དགུག །རྡོ་རྗེའི་ཕྱག་རྒྱ་བཅིང་བར་བྱ། །ཕྱག་རྒྱ་འདི་ཡིས་རྣལ་འབྱོར་པ། །དག་པ་ཀུན་ལ་རབ་ཏུ་གནས། །བྱང་ཆུབ་སེམས་ནི་མཐའ་ཡས་མཆོག །དངོས་གྲུབ་ཐམས་ཅད་རབ་ཏུ་འགྲུབ། །དཔལ་རྡོ་རྗེ་རབ་ཏུ་
གནས་པ་རྡོ་རྗེའི་ཕྱག་རྒྱའོ། །རྡོ་རྗེའི་པདྨོར་བྱས་པ་ལས། །གུང་མོ་བཅིངས་པའི་དབུས་ན་གནས། །མཐེའུ་ཆུང་མཉམ་པའི་རྩེ་མོ་མདེའུ། །རྡོ་རྗེ་མདའ་ནི་ཡོངས་སུ་འཕང་། །ཕྱག་རྒྱ་འདི་ཡིས་བཏབ་ན་ནི། །ཚངས་པ་ཉེ་དབང་དགའ་བྱེད་བཅས། །མཐུ་ཡིས་མྱུར་དུ་བརྒྱལ་བྱས་ནས། །
ཁམས་གསུམ་དག་ནི་སྒྲུབ་པར་བྱེད། །དཔལ་རྡོ་རྗེ་མདའི་ཕྱག་རྒྱའོ། །རྡོ་རྗེའི་ཕྱག་རྒྱ་ཡོངས་བཅིངས་ནས། །གུང་མོ་བཅིངས་པའི་ཕྱི་རོལ་གཞག །རྡོ་རྗེ་སྣ་ཚོགས་དཔལ་གྱི་རྒྱ། །ལྡང་བ་ཐམས་ཅད་རབ་གྲུབ་པའོ། །རྡོ་རྗེའི་ཕྱག་རྒྱ་ཐམས་ཅད་ཤེས་པའོ། །ཨཱ་ལི་ཀཱ་ལི་མཉམ་
བྱས་ནས། །མཁའ་ཡི་ཐད་ཀར་བསྡུ་བར་བྱ། །དེ་ཡི་འོག་ཏུ་རི་མོ་རྣམས། །ཡི་གེ་ཐམས་ཅད་དགོད་པར་བྱ། །གུག་སྐྱེད་དག་གིས་ལྕུག་མར་བྱ། །ཡི་གེ་ར་ནི་མྱུ་གུར་བྱ། །ཀླད་ཀོར་ཟླ་བ་ཁམ་པ་དང་། །ཚེག་གཉིས་ཟླ་བ་གཉིས་སུ་བྱ། །འདི་ནི་སངས་རྒྱས་ཐམས་ཅད་ཀྱི། །
ཕྱག་རྒྱ་མི་འགྱུར་དམ་པ་སྟེ། །སངས་རྒྱས་དཔལ་གྱི་རི་མོར་བཤད། །ཡི་གེ་དག་ཀྱང་མི་འགྱུར་མཆོག །རྡོ་རྗེ་སེམས་དཔའ་དཔལ་གྱི་ལྷའི། །བསྟོད་དང་བཅས་པའི་མཚན་བྲིས་ན། །སྡིག་པ་ཀུན་ལས་ཐར་བར་འགྱུར། །བསོད་ནམས་ཐམས་ཅད་རབ་ཏུ་འགྲུབ། །རྡོ་རྗེ་སེམས་
དཔའ་དཔལ་སྦྱོར་ཞེས། །རབ་ཏུ་ཆགས་པའི་མཚན་བྲིས་ན། །སྡུག་བསྔལ་ཀུན་ལས་ཐར་བར་འགྱུར། །བདེ་བ་ཐམས་ཅད་རབ་ཏུ་འགྲུབ། །ཆགས་ཆེན་གྲོལ་བ་དཔལ་ཞེས་བྱའི། །ཆགས་པའི་མཚན་དག་བྲིས་ན་ནི། །སྡིག་པ་ཀུན་ལས་ཐར་བར་འགྱུར། །གྲོལ་བ་ཀུན་ལ་རབ་
ཏུ་གནས། །སྙིང་རྗེ་དྲི་མེད་ཁྲོ་དཔལ་ཞེས། །བསྟོད་དང་བཅས་པའི་མཚན་བྲིས་ན། །སྡིག་པ་ཀུན་ལས་ཐར་བར་འགྱུར། །དངོས་གྲུབ་ཀུན་གྱི་མཆོག་ཀྱང་འགྲུབ། །པདྨོ་ཆགས་པ་དཔལ་དག་ཅེས། །ཆགས་པའི་མཚན་དག་བྲིས་ན་ནི། །སྡིག་པ་ཀུན་ལས་ཐར་བར་འགྱུར། །

དག་པ་ཐམས་ཅད་རྣམ་པར་དག །རྡོ་རྗེ་ཉི་མའི་དཔལ་མདངས་ཞེས། །བསྟོད་དང་བཅས་པའི་མཚན་བྲིས་ན། །སྡིག་པ་ཀུན་ལས་ཐར་བར་འགྱུར། །ལོངས་སྤྱོད་ཀུན་ལ་རབ་ཏུ་གནས། །རྟ་མཆོག་ཕ་རོལ་གནོན་དཔལ་ཞེས། །ཆགས་པའི་མཚན་དག་བྲིས་ན་ནི། །
སྡིག་པ་ཀུན་ལས་ཐར་བར་འགྱུར། །དབང་ཕྱུག་ཐམས་ཅད་རབ་ཏུ་འགྲུབ། །བརྗོད་པ་དག་ཀྱང་དེ་བཞིན་ཏེ། །ལས་ཀྱི་དངོས་གྲུབ་རབ་འབྱམ་དག །མ་ལུས་པར་ནི་མྱུར་དུ་འགྲུབ། །ལྷག་པའི་ལྷ་ནི་གང་གང་གི། །སློབ་དཔོན་གང་དང་གང་ཡིན་པས། །དེ་དང་དེ་ཡི་མཚན་དག་ནི། །
དཔལ་གྱི་ཚིག་དང་ལྡན་པར་བརྗོད། །སློབ་མ་དཀྱིལ་འཁོར་བཙུད་ནས་ཀྱང་། །ཡོན་གྱི་མཆོག་དག་བླངས་ནས་ནི། །རྡོ་རྗེ་མིང་གི་དབང་བསྐུར་བས། །དེ་བཞིན་གཤེགས་པར་དེ་ལུང་བསྟན། །ཕྱག་རྒྱའི་སྦྱོར་བ་འདི་དག་གིས། །བྱང་ཆུབ་སྙིང་པོའི་བར་དུ་ནི། །རྡོ་རྗེའི་མིང་དུ་རབ་
ཏུ་གནས། །དེ་ནས་སངས་རྒྱས་སུ་ཡང་འགྱུར། །བསྟོད་པ་དང་བཅས་པའི་མིང་གི་ཕྱག་རྒྱ་ཤེས་པའོ། །སྤྱི་བོར་ཉུག་པ་གང་ཡིན་པ། །ཕྱག་འཚལ་བར་ནི་སྟོན་པ་ཡིན། །དཔྲལ་བར་རེག་པར་བྱེད་པ་ནི། །ཕྱག་ལན་ཡིན་པར་ཤེས་པར་བྱ། །སྨིན་མ་བསྐུལ་བ་གང་ཡིན་པ། །
སངས་རྒྱས་ཐམས་ཅད་གནས་པའི་བརྡ། །གཡས་པས་ནམ་མཁར་འགྲོ་བ་འགྲུབ། །གཡོན་པ་རྣམ་པར་རྒྱལ་བ་ཡི། །རང་བྱུང་རྣམས་ཀྱི་བརྡ་ཡི་རྒྱ། །མིག་གཉིས་གཡོ་བར་འགྲུབ་པ་སྟེ། །གཡོན་པ་བུད་མེད་བཟང་མོ་ཡིན། །གཡས་པ་སྐྱེས་པ་བཟང་པོའོ། །རྣ་བ་དག་ལ་
རེག་པའི་བརྡ། །གཡས་གཡོན་གཉིས་ཀ་དེ་བཞིན་ཏེ། །གཡོན་པ་ལེགས་པར་བླངས་པའི་གླུ། །གཡས་པ་ལེགས་པར་སྨྲས་པའོ། །སྣ་ཡི་བུ་ག་གཉིས་ཀྱི་བརྡ། །སངས་རྒྱས་ཐམས་ཅད་གནས་པ་སྟེ། །གཡས་པ་བདག་ལ་བདུག་པ་སློང་། །གཡོན་པ་བདག་ལ་དྲི་སློང་
བའོ། །ལྕེ་ནི་ལྡག་པ་ལྟར་བྱེད་པ། །བརྡ་ཡི་ཕྱག་རྒྱར་གནས་པ་སྟེ། །གཡས་པ་ཤ་ཡི་ཕྱག་རྒྱ་ཡིན། །གཡོན་པ་ཆང་གི་ཕྱག་རྒྱ་ཡིན། །མཆེ་བ་གཡས་དང་གཡོན་པ་ཡི། །བར་དུ་མ་མཆུ་མནན་པ་ནི། །གཡོན་པ་བུད་མེད་རེག་ན་བདེ། །གཡས་པ་དེ་བཞིན་སྐྱེས་པའོ། །

ལྐོག་མར་རེག་པའང་དེ་བཞིན་ཏེ། །བརྡ་ཡི་ཕྱག་རྒྱར་གནས་པ་སྟེ། །ཐེག་པ་ཆེན་པོ་བླ་མེད་པའི། །རྟོག་པ་ཐམས་ཅད་སྨྲ་བའི་མཆོག །སྙིང་གར་གྱེན་དུ་འདྲེན་པ་ནི། །རང་བྱུང་ཕྱག་རྒྱའི་བརྡ་གྲུབ་པ། །རྡོ་རྗེ་ཐམས་ཅད་འདྲེན་པ་སྟེ། །འཁོར་བ་ཤིན་ཏུ་སྡུད་པའོ། །ལྟེ་བའི་དཀྱིལ་
དུ་རེག་པ་ནི། །བརྡ་ཡི་ཕྱག་རྒྱར་གནས་པ་སྟེ། །དབུ་མའི་ནན་ཏན་བསྒྲུབས་པ་ཡིས། །ཆོས་ཀྱི་འཁོར་ལོ་ཆེན་པོའི་དཀྱིལ། །རང་གི་དབང་པོ་བསྒྲེང་པ་ནི། །རང་བྱུང་རྣམས་ཀྱི་བརྡ་ཡི་རྒྱ། །དེ་ལས་དེ་བཞིན་བདེ་བ་ཡིས། །སངས་རྒྱས་ཐམས་ཅད་ཐོབ་པར་འགྱུར། །
ཕྲག་པ་གཉིས་ནི་ཀུན་བསྟོད་པ། །བརྡ་ཡི་ཕྱག་རྒྱར་གནས་པ་སྟེ། །གཡས་པ་འགུགས་པའི་ཕྱག་རྒྱ་ཡིན། །གཡོན་པ་སླད་དུ་གཏོང་བའོ། །དཔུང་པ་གཡས་གཡོན་གཉིས་ཀ་ཡིས། །བདག་ལ་ཤེས་རབ་འཁྱུད་པ་ཡི། །གཡས་པ་ཐམས་ཅད་འགྲུབ་པ་ཡིན། །གཡོན་
པ་དབང་ཕྱུག་ཐམས་ཅད་འགྲུབ། །ཁུ་ཚུར་གཡས་གཡོན་གཉིས་ཀ་ཡིས། །ཁུ་ཚུར་བཅངས་དང་དགྲོལ་བ་དག །གཡས་པ་རྒྱས་འདེབས་ཕྱག་རྒྱ་ཡིན། །གཡོན་པ་མི་རྣམས་ཐོང་ཤིག་པའོ། །བརླ་གཉིས་རབ་ཏུ་བསྡམས་པ་ནི། །གཡས་དང་གཡོན་པ་དེ་བཞིན་ཏེ། །
གཡོན་པ་འདོད་ལ་རབ་ཏུ་བརྩོན། །གཡས་པ་ཆོས་ལ་བརྩོན་པའོ། །པུས་མོ་ལྷ་ངའི་བརྡ་དག་ཀྱང་། །གཡས་དང་གཡོན་པ་དེ་བཞིན་ཏེ། །གཡོན་པ་འདུད་པའི་ཕྱག་རྒྱ་སྟེ། །གཡས་པ་རབ་ཏུ་ཕྱག་འཚལ་བའོ། །པུས་མོ་གཡས་གཡོན་གཉིས་དག་གིས། །བརྡ་ཡི་ཕྱག་
རྒྱར་རབ་ཏུ་གནས། །གཡས་པ་བཅིང་བའི་ཕྱག་རྒྱ་སྟེ། །གཡོན་པ་ཐམས་ཅད་རྣམ་པར་དགྲོལ། །རྐང་པ་གཉིས་ཀྱིས་ས་གནོན་པ། །གཡས་དང་གཡོན་པ་དེ་བཞིན་ཏེ། །གཡོན་པ་ཐམས་ཅད་གནོད་པར་བྱེད། །གཡས་པ་ཐམས་ཅད་རབ་ཏུ་འཇོམས། །དངོས་གྲུབ་
ལས་དང་བདེ་བ་དག །འདི་ཡིས་མི་འགྲུབ་གང་ཡང་མེད། །རང་དོན་ལས་རྣམས་རབ་གྲུབ་པ། །མ་ལུས་ལུས་པ་མེད་པར་འགྲུབ། །བརྡ་ཡི་ཕྱག་རྒྱ་ཤེས་པའོ། །ཨ་ཏི་བྷུ་ཞེས་བྱ་བའི་བརྡ། །འདི་ནི་ཕྱག་འཚལ་བ་ཞེས་པའོ། །པྲ་ཏི་ཨོྃདྷི་བྷུ་ཞེས་པ། །ཕྱག་ལན་ཡིན་

པར་ཤེས་པར་བྱའོ། །སེམས་དཔའ་སྔོན་དང་མཐའ་མེད་པ། །རྡོ་རྗེ་སེམས་དཔའ་བདེ་བའི་མཆོག །སངས་རྒྱས་ཕྱག་རྒྱ་བདེ་བ་ཡིས། །ཨེ་མའོ་བདེ་བ་ཡིན་པར་བཤད། །ཨེ་མའོ་བདེ་བ་དཔལ་གྱི་མཚན། །རྡོ་རྗེ་སེམས་དཔའ་གང་བརྗོད་པ། །སྡིག་པ་ཀུན་ལས་
ཐར་བར་འགྱུར། །བདེ་བ་ཐམས་ཅད་རབ་ཏུ་འགྲུབ། །བདེ་མཆོག་ཨེ་མའོ་བདེ་བ་དང་། །སྒྲོན་མ་དེ་བཞིན་ཤི་ཤི་དག །རྒྱས་འདེབས་མ་དང་རྨོངས་བྱེད་དང་། །ཟ་བ་མོ་དང་ཚེ་འཕེལ་མ། །སངས་རྒྱས་བྱང་ཆུབ་ཆོས་འཁོར་ལོ། །དེ་བཞིན་ཁམས་གསུམ་རྣམ་པར་རྒྱལ། །
འདོད་པའི་ལྕུག་མ་ཐམས་ཅད་ཀྱང་། །ཕྱག་རྒྱ་བརྡ་ཡི་ཕྱག་རྒྱའོ། །རྟ་དང་རྡོ་རྗེའི་ཞལ་དག་དང་། །དེ་བཞིན་རྡོ་རྗེ་སྣང་བ་དང་། །ཐལ་བར་རློག་པའི་རོ་ལངས་མ། །སངས་རྒྱས་ཀུན་གྱི་བརྡ་ཡིན་ནོ། །གླིང་བུ་དང་ནི་རྒྱུད་རྣམས་དང་། །དེ་བཞིན་དུ་ནི་རྒྱུད་གཅིག་དང་། །སྟུག་
པོ་དང་ནི་རྫ་རྔ་དག །སངས་རྒྱས་བརྡ་ཡི་ཕྱག་རྒྱའོ། །མེ་ཏོག་མཆོད་དང་བདུག་པའི་མཆོད། །དེ་བཞིན་མར་མེའི་མཆོད་པ་དང་། །སྦོས་ཡི་མཆོད་པ་གླ་རྩི་དག །ལོངས་སྤྱོད་ཕྱག་རྒྱའི་བརྡ་ཡིན་ནོ། །དེ་ལ་སོགས་པ་མཐའ་ཡས་མཆོག །ཆོས་དབྱིངས་མཉམ་དང་མི་མཉམ་
པ། །ནམ་མཁའི་དབྱིངས་ཀྱི་མཐའ་ཀླས་པའི། །ལྷ་མོ་ཀུན་གྱི་བརྡ་ཡིན་ནོ། །སྨིན་མ་བསྐྱོད་པ་མདའ་བཞི་ཡིན། །བྷ་ག་ལིང་ག་ཨེ་མའོ་བདེ། །ཐོད་པ་པདྨ་ཡིན་པར་བཤད། །ཁ་ཊྭཱཾ་ག་ཡང་རྒྱལ་མཚན་ཆེ། །སངས་རྒྱས་ཕྱག་རྒྱ་པདྨར་གནས། །བདེ་བ་ཀུན་གྱི་
བདུད་རྩི་ཡིན། །སངས་རྒྱས་བརྡ་ཡི་ཕྱག་རྒྱ་ཡིས། །ཤི་ཤི་སངས་རྒྱས་ཀུན་ཏུ་བཤད། །དཀྱིལ་འཁོར་ལ་ནི་འཁོར་ལོར་བཤད། །དེ་ཉིད་དམ་ཚིག་ཡིན་པར་བཤད། །ལྷ་རྣམས་ཐམས་ཅད་ཚོགས་པས་ན། །སྐྱེ་བོ་དམ་པ་ཀུན་ཚོགས་པ། །ཚོགས་ཀྱི་འཁོར་ལོ་དམ་པ་ནི། །
མཛའ་བ་ཐམས་ཅད་འདུས་པ་སྟེ། །སངས་རྒྱས་ཀུན་གྱི་བརྡ་དག་གིས། །དེ་བཞིན་མཛའ་བར་འདུས་པར་གསུངས། །རྡོ་རྗེ་སེམས་དཔའ་དཔལ་སྦྱོར་བས། །དཀྱིལ་འཁོར་ཐམས་ཅད་ཡིན་པར་བཤད། །ལྷ་མོ་ཐམས་ཅད་ཀུན་འདུས་པས། །ཐམས་ཅད་སྣ་ཚོགས་སྐལ་བ་བཟང་། །

རྡོ་རྗེ་སེམས་དཔའ་དཔལ་སྦྱོར་བ། །སངས་རྒྱས་ཀུན་ཏུ་བདག་སྦྱོར་བས། །རྣམ་པ་ཀུན་མཁྱེན་ཤེས་པའི་ཕྱིར། །ཀུན་གྱི་སློབ་དཔོན་ཡིན་པར་བཤད། །ཀུན་གྱི་སློབ་དཔོན་རབ་གནས་པ། །ལྷ་མོ་ཐམས་ཅད་འདུས་པས་ན། །སངས་རྒྱས་ཀུན་གྱི་མཆོག་དག་གིས། །ཀུན་ཏུ་
སྣ་ཚོགས་སྐལ་བཟང་པོའོ། །དེ་ཡི་སློབ་མ་གྲུབ་པ་ནི། །གྲུབ་པའི་རྗེས་སུ་གྲུབ་པས་ན། །སངས་རྒྱས་བརྡ་ཡི་གསང་བ་ཡིས། །རྒྱལ་མཚན་ཡིན་པར་རྣམ་པར་བཤད། །དེ་ལས་གཞན་པའི་སློབ་མ་ཀུན། །མཆོག་དང་འབྲིང་དང་ཐ་མའི་རྣམས། །སངས་རྒྱས་ཀུན་གྱི་བརྡ་
དག་གིས། །བྱང་ཆུབ་སེམས་དཔའ་ཡིན་པར་བཤད། །སངས་རྒྱས་ཐམས་ཅད་རིན་ཆེན་མཆོག །དབུ་རྒྱན་མི་འགྱུར་དམ་པ་ཡིན། །སངས་རྒྱས་ཀུན་གྱི་རྒྱལ་སྲིད་མཆོག །ཡིན་པར་རང་བྱུང་རྣམས་ཀྱིས་གསུངས། །ཐོད་པའི་ཕྲེང་བའི་དབུ་རྒྱན་དང་། །སངས་རྒྱས་གཙུག་
གི་ནོར་བུ་དག །སངས་རྒྱས་བརྡ་ཡི་ཕྱག་རྒྱ་ཡིས། །དཔལ་གྱི་པདྨའི་ཚུལ་དུ་བཤད། །སངས་རྒྱས་རང་བཞིན་གྲུབ་གཅིག་དང་། །དེ་བཞིན་པདྨའི་རང་བཞིན་གཅིག །ཐམས་ཅད་དབང་བསྐུར་དབང་བསྐུར་ཆེ། །ཡིན་པར་དོན་ཀུན་གྲུབ་པས་གསུངས། །ཡོན་གྱི་དམ་
པ་གྲུབ་པ་ནི། །ནོར་གྱི་དབྱིག་ཏུ་བཤད་པ་སྟེ། །སྙིང་ཡང་ནོར་གྱི་མཆོག་ཡིན་པར། །སངས་རྒྱས་བརྡ་ཡི་ཕྱག་རྒྱར་བཤད། །ག་པུར་ཙནྡན་དམར་པོ་དང་། །སྦྱར་བ་ཁྲག་ཆེན་ཡིན་པར་བཤད། །ཚོགས་ཀྱི་དབུས་སུ་བཞག་པ་དཔལ། །ཐམས་ཅད་ལྡང་བའི་ར་ས་
ཡིན། །བག་ཟན་ལས་ནི་བྱས་པའི་ཕྱུགས། །ཙནྡན་དམར་པོས་བསྐུས་པ་དང་། །བག་ཕྱེའི་ཟན་ལས་བྱས་པའི་ཤ། །རྒྱལ་པོའི་ཟན་ཞེས་གང་བཤད་པའོ། །དེ་ནས་གྲུབ་པའི་མནའ་བསྒག་པ། །དམ་ཚིག་ཅེས་པར་གནས་པའོ། །བདེ་མཆོག་བདེ་མཆོག་ཅེས་གསུངས་
པ། །སངས་རྒྱས་བདེ་མཆོག་ཐམས་ཅད་ཀྱིས། །ཕྱག་རྒྱའི་བདེ་བ་མཆོག་ཏུ་གསུངས།།དེ་བཞིན་ཨེ་མའོ་བདེ་བ་དང་། །སྣང་བ་ཤེས་པའང་རབ་ཏུ་གནས། །ཤི་ཤི་སྲིད་པའང་སྲིད་པའོ། །དེ་བཞིན་གཤེགས་པ་ཀུན་གྱིས་ཀྱང་། །འདའ་བར་བྱ་བའང་མ་

ཡིན་པས། །སངས་རྒྱས་བརྡ་ཡི་ཕྱག་རྒྱ་ཡིས། །ཕྱག་རྒྱ་དམ་ཚིག་ཡིན་པར་བཤད། །ཕྱག་རྒྱའང་སྦྱོར་བ་ཡིན་པར་བཤད། །སྦྱོར་བའང་ཕྱག་རྒྱ་ཡིན་པར་བཤད། །རྡོ་རྗེ་སེམས་དཔའ་དཔལ་སྦྱོར་བ། །སྦྱོར་བ་ཐམས་ཅད་ཡིན་པར་བཤད། །ང་ནི་སྣ་ཚོགས་
དམ་ཚིག་སྟེ། །རྡོ་རྗེ་སེམས་དཔའ་བདེ་བ་ཆེ། །སངས་རྒྱས་བརྡ་ཡི་ཕྱག་རྒྱ་ཡིས། །སྦྱོར་བ་ཐམས་ཅད་ཡིན་པར་བཤད། །དེ་ཡི་ཉེ་བའི་ལོངས་སྤྱོད་ནི། །ཁམས་གསུམ་ཐམས་ཅད་མ་ལུས་པའོ། །དེ་ཡི་གཟུགས་དང་སྒྲ་དང་དྲི། །རོ་དང་རེག་པ་བདེ་མྱོས་པའོ། །
གཟུགས་ནི་རི་མོ་ཡིན་པར་གསུངས། །སྒྲ་ནི་གླུ་ཡིན་ཞེས་བཤད་དོ། །དྲི་ནི་རབ་ཏུ་ཚིམ་པར་གསུངས། །རོ་ནི་ར་ས་ཡ་ན་ཡིན། །རེག་པ་བདེ་བ་ཡིན་པར་བཤད། །རབ་ཏུ་རེག་པ་དགའ་བའི་བདེ། །སངས་རྒྱས་བརྡ་ཡི་ཕྱག་རྒྱ་ཡིས། །ཆོས་ནི་སྦྱོར་བ་ཡིན་པར་བཤད། །
སྦྱོར་བའི་ལོངས་སྤྱོད་ཐམས་ཅད་ཀྱིས། །ཇི་ལྟར་བདེ་བར་སྟེན་བྱེད་ཅིང་། །བདག་གི་ལྷག་པའི་ལྷར་སྦྱར་བ། །རང་གི་མཆོད་པའི་དམ་ཚིག་ཡིན། །རྗེས་སུ་སྦྱོར་བས་མཆོད་ན་ནི། །སྦྱོར་བ་ཀུན་གྱི་བདེ་བའི་མཆོག །སངས་རྒྱས་བརྡ་ཡི་ཕྱག་རྒྱ་ཡིས། །བདེ་བ་
ཆེན་པོ་ཡིན་པར་བཤད། །ལྷ་མོ་ཀུན་དང་མཉམ་སྦྱོར་བ། །སངས་རྒྱས་ཐམས་ཅད་འདུས་པའོ། །ཡེ་ཤེས་ཙམ་ལ་སྙོམས་འཇུག་པ། །རྣལ་འབྱོར་ཞེས་ནི་བཤད་པ་ཡིན། །སངས་རྒྱས་བརྡ་ཡི་ཕྱག་རྒྱ་ཡིས། །ཏིང་འཛིན་རབ་ཏུ་སྦྱོར་བའང་བཤད། །ལྷ་མོ་ཀུན་དང་མཉམ་
སྦྱོར་བ། །སངས་རྒྱས་ཐམས་ཅད་འདུས་པའོ། །སངས་རྒྱས་ཐམས་ཅད་མཉམ་སྦྱོར་བ། །སངས་རྒྱས་ཀུན་གྱིས་བྱིན་བརླབ་བོ། །དགའ་བར་སྤྱོད་པ་གྲུབ་པར་བཤད། །རྗེས་སུ་སྦྱོར་བ་རྗེས་སུ་གྲུབ། །སྐྱེས་པ་ལྟར་བྱེད་དགའ་སྤྱོད་པ། །སླར་ཡང་རྗེས་སུ་གྲུབ་པར་མཛད། །
ལྷ་མོ་ཀུན་ལ་བདེ་འཇུག་པ། །སྦྱོར་བ་ཀུན་ལ་མོས་པ་ནི། །ཀུན་ཏུ་སངས་རྒྱས་ཀུན་གྱི་བདག །ར་ས་ཡ་ན་བདེ་བར་བཤད། །ཐམས་ཅད་ལྡང་བ་ཀུན་འགྲོ་བ། །དངོས་གྲུབ་དམ་པར་རབ་ཏུ་བཤད། །དངོས་གྲུབ་ཆེན་པོ་ལྡང་བ་ཆེར། །སངས་རྒྱས་བརྡ་ཡི་ཕྱག་རྒྱར་བཤད། །དངོས་

གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་བླ་ན་མེད། །སངས་རྒྱས་དམ་པ་ཀུན་གྱི་མཆོག །སངས་རྒྱས་ཀུན་གྱི་བརྡ་ཡིས་བཤད། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་བདེ་བའི་མཆོག །སངས་རྒྱས་ཐམས་ཅད་མཉམ་སྦྱོར་བ། །སྦྱོར་བའི་དབང་ཕྱུག་བདེ་
ཆེན་པོ། །ཁྲག་ནི་མེ་ཏོག་ཡིན་པར་བཤད། །མདངས་ནི་བདུག་པ་ཡིན་པར་བཤད། །ཤ་ཆེན་དག་ནི་མར་མེ་སྟེ། །ཐལ་མོ་དག་ནི་སྤོས་སུ་བཤད། །ཆང་ནི་སྒེག་མོ་ཡིན་པར་བཤད། །རབ་ཏུ་མྱོས་པ་སྦྲང་རྩིའོ། །བུ་རམ་ཆང་ནི་མྱོས་བྱེད་གསུངས། །རྒུན་ཆང་དག་ནི་བདུད་
རྩི་ཡིན། །བདུད་རྩི་ལམ་གྱི་ཡན་ལག་བརྒྱད། །སངས་རྒྱས་ཀུན་གྱི་བརྡ་ཡིན་ནོ། །རྒུན་དང་སྦྲང་རྩི་མཆོག་ཏུ་དཔའ། །ཚྭ་ནི་འདོད་ཆགས་སྲ་བ་ཡིན། །སྐྱུར་པོའི་ཁུ་བ་གཡོན་ཅན་ཡིན། །ཀམྦྷི་ལ་ནི་བྲན་མོར་བཤད། །ཆུར་བ་ཟླ་བ་ཉ་བ་ཡིན། །ཤ་ནི་སྨན་གྱི་མཆོག་
ཡིན་ཏེ། །དབང་ཕྱུག་དམ་པ་ཀུན་གྱི་མཆོག །སངས་རྒྱས་ཀུན་གྱི་བརྡ་ཡིས་བཤད། །དངོས་གྲུབ་ཆེན་པོ་ཀུན་གྱི་མཆོག །ཆང་ནི་ར་ས་ཡ་ནར་བཤད། །ཟས་ནི་ཚེ་ཞེས་བྱ་བར་བཤད། །བཟའ་བ་སྣ་ཚོགས་གྲུབ་པ་ནི། །ཤ་དང་ཆང་དུ་ལྡན་པ་དག །དགའ་བའི་ལོངས་
སྤྱོད་སྐལ་བཟང་པོ། །ཚེ་ཡི་དམ་པ་ཡིན་པར་བཤད། །ཨ་མྲ་རྒུན་འབྲུམ་པ་ན་ས། །ན་ལི་ཀེ་ར་ཨ་རུ་ཀ །འབྲས་བུ་ཆེན་པོའི་ཁྱད་པར་དག །བདུད་རྩིའི་འབྲས་བུ་ཡིན་པར་བཤད། །ཨ་མྲ་སྨིན་པ་གྲོལ་བར་བཤད། །དེ་བཞིན་བདེ་བར་ཉལ་བ་དང་། །བདེ་བས་རབ་
ཏུ་རྨོངས་པ་དག །སངས་རྒྱས་ཀུན་གྱི་བརྡ་ཡིན་ནོ། །འབྲས་བུ་ཆེན་པོ་པ་ན་ས། །རྒུན་འབྲུའི་ཁུ་བ་ཁུ་བའི་མཆོག །ན་ལི་ཀེ་རའི་དངོས་གྲུབ་ཆེ། །དམ་ཆོས་འབྲས་བུ་ཨ་རུ་ཀ །གླུ་ཡི་ཚིག་ཏུ་བརྗོད་པར་བཤད། །དར་དིར་དག་ནི་སིལ་སྙན་ཡིན། །སངས་
རྒྱས་བརྡ་ཡི་ཕྱག་རྒྱ་ཡིས། །གར་ནི་རྣམ་པར་རོལ་པར་བཤད། །རྡོ་རྗེ་སེམས་དཔའ་དཔལ་སྦྱོར་བའི། །གླུ་དང་སིལ་སྙན་གར་བྱེད་པ། །བརྡ་ཡི་དམ་པར་བཤད་པ་ནི། །སངས་རྒྱས་ཀུན་གྱི་རྣམ་སྤྲུལ་པའོ། །རབ་ཏུ་ཞི་བའི་སིལ་སྙན་གླུ། །དུར་ཁྲོད་གླུ་དང་སིལ་སྙན་

དང་། །གར་ནི་ཤིན་ཏུ་རྣམ་སྤྲུལ་པའོ། །ཆགས་བཅས་གླུ་དང་སིལ་སྙན་དང་། །གར་ནི་ཤིན་ཏུ་རྣམ་སྤྲུལ་པའོ། །མི་ཡི་དབང་པོའི་སིལ་སྙན་གླུ། །གར་ནི་ཤིན་ཏུ་རྣམ་སྤྲུལ་པའོ། །རབ་ཏུ་དགའ་བའི་སིལ་སྙན་གླུ། །རང་གི་རྩལ་གྱི་གར་བྱས་པ། །རྟ་མཆོག་
རྣམ་པར་སྤྲུལ་པ་ནི། །བརྡ་ཡི་དམ་པ་རབ་ཏུ་བཤད། །ཌཱི་ཞེས་བྱ་བ་མཁའ་འགྲོ་ཡི། །ཁམས་གསུམ་འདིར་ནི་རྣམ་པར་བརྟགས། །ནམ་མཁར་འགྲོ་བའི་ཕྱག་རྒྱ་དག །མཁའ་འགྲོ་ཞེས་ནི་རབ་ཏུ་གྲགས། །ཀུན་ཏུ་སྣ་ཚོགས་ཕྱག་རྒྱ་ནི། །ཐམས་ཅད་ནམ་མཁའ་འགྲོ་
བ་སྟེ། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་མ་ཞེས་རབ་ཏུ་གྲགས། །སྒྱུ་མའི་གར་དབང་གྲུབ་པ་ནི། །ཨ་ར་ལི་ཞེས་མིང་དུ་བཏགས། །མཁའ་འགྲོ་མ་ཡང་ཨ་ར་ལི། །སངས་རྒྱས་བརྡ་ཡི་ཕྱག་རྒྱའོ། །སངས་རྒྱས་ཐམས་ཅད་མཉམ་སྦྱོར་བ། །
སྒྱུ་མ་ཀུན་གྱི་གར་བྱེད་པ། །སངས་རྒྱས་ཐམས་ཅད་མཉམ་སྦྱོར་བའི། །མཁའ་འགྲོ་མ་ཡི་དམ་ཚིག་མཆོག །བཅོམ་ལྡན་རྡོ་རྗེ་སེམས་དཔའ་དཔལ། །རྡོ་རྗེ་ཨ་ར་ལི་ཞེས་བཤད། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་བའི་མཆོག །
སེམས་དཔའ་སྔོན་དང་མཐའ་མེད་པ། །རྡོ་རྗེ་སེམས་དཔའ་དགའ་བའི་མཆོག །སངས་རྒྱས་བརྡ་ཡི་ཕྱག་རྒྱ་ཡིས། །དེ་ནི་སྐལ་བ་བཟང་པོར་བཤད། །གང་ཞིག་རྡོ་རྗེ་སེམས་དཔའི་མཚན། །སྐལ་བ་བཟང་པོ་ཞེས་བརྗོད་ན། །ཤིན་ཏུ་སྲིད་པ་ཀུན་འགྲུབ་ཅིང་། །དེ་ནི་དབང་
ཕྱུག་ཆེན་པོ་འགྲུབ། །ཊཀྐི་འདོད་པ་ཡིན་པར་བཤད། །དགའ་བ་ཀི་ལི་ཀི་ལ་ཡིན། །བྱམས་པ་ཆུ་སྲིན་ཡིན་པར་བཤད། །འདོད་པའི་དབང་པོ་དབང་ཕྱུག་མཆོག །རྡོ་རྗེ་དྲིལ་བུ་ཕྱག་རྒྱ་དག །དམ་ཚིག་གསུམ་གྱི་དམ་པ་ཡིན། ཨོཾ་དང་བྷུ་ཁཾ་ཀུན་བཤད་པ། །སངས་
རྒྱས་བརྡ་ཡི་ཕྱག་རྒྱ་ཡིན། །དྲངས་ཏེ་བཅུག་ནས་བཅིངས་པ་དང་། །ཞུགས་ནས་དབང་དུ་གྱུར་པ་ནི། །ཛཿཧཱུྃ་བྃ་ཧོཿབཤད་པ་སྟེ། །སངས་རྒྱས་ཀུན་གྱི་བརྡ་ཡིན་ནོ། །ཨེ་ཧི་ཡ་ཧི་ཞེས་བཤད་པ། །ཚུར་སྤྱོན་ཕར་བཞུད་ཅེས་བསྒྲགས་པའོ། །ཏི་ཧ་ཧ་ཞེས་གསུངས་པ་ནི། །

ལོངས་ལ་དྲོངས་ཤིག་དྲོངས་ཤིག་པའོ། །ཁ་ཁ་ཁཱ་ཧི་ཟོ་ཤིག་པའོ། །ཨ་པི་ཞེས་པ་འཐུང་ཞིག་པའོ། །ད་ར་ད་ར་བྱིན་ཞེས་པའོ། །རུ་ཏ་མ་ཏ་རོལ་ཅིག་པའོ། །ཧུ་ལུ་ཧུ་ལུ་ཞུགས་ཤིག་པའོ། །ཨ་ར་ར་རར་སྐུལ་ཅིག་པའོ། །ཨེ་མའོ་བདེ་མཆོག་ངོ་མཚར་ནི། །ཨ་ལ་ལ་
ཧོ་ཞེས་བཤད་པའོ། །བདེ་མཆོག་རྒྱས་འདེབས་ཕྱག་རྒྱ་ཡིན། །ཨེ་མའོ་བདེ་བ་རྨོངས་བྱེད་མའོ། །སྣང་བ་ཞེས་པ་ཟ་བ་མོ། །ཧཱུཾ་ཤི་ཤི་ནི་ཚེ་འཕེལ་མའོ། །ཤིན་ཏུ་བརྟན་དང་རབ་ཏུ་བརྟན། །ཀུན་ཏུ་བརྟན་དང་ཆེར་བརྟན་པ། །སངས་རྒྱས་རྡོ་རྗེ་འཛིན་པ་དང་། །འཇིག་རྟེན་
དབང་དང་མཁའ་ལས་སྐྱེས། །ཤེས་འགྱུར་དག་འགྱུར་གྲུབ་པར་འགྱུར། །ཞུགས་ལ་དབང་དུ་འགྱུར་བར་མཛོད། །ཨོཾ་ཨོཾ་ཨ་ཨ་ཀུན་བཤད་པ། །སངས་རྒྱས་བརྡ་ཡི་ཕྱག་རྒྱ་ཡིན། །ཐམས་ཅད་མཁྱེན་པར་གྱུར་པ་དང་། །དེ་བཞིན་བདེ་བར་མཁྱེན་པ་ནི། །ཨོཾ་སརྦ་
བིད་ཅེས་བཤད་པ་སྟེ། །སངས་རྒྱས་བརྡ་ཡི་ཕྱག་རྒྱ་ཡིན། །ཨོཾ་རུ་རུ་སྥུ་རུ་ཛྭ་ལ་ཏིཥྛ་སིད་དྷ་ལོ་ཙ་ནི་སརྦྦ་ཨརྦྦ་སཱ་དྷ་ནི་སྭཱ་ཧཱ། འཁོར་ལོ་དངོས་གྲུབ་མཁྱེན་པ་དང་། །དོན་དམ་ཉེ་བར་ཞི་བའི་ཕྱིར། །སངས་རྒྱས་རང་བྱུང་བཅོམ་ལྡན་འདས། །རྣམ་སྣང་མཛད་ཆེན་གཙོ་བོ་ནི། །
སངས་རྒྱས་བརྡ་ཡི་ཕྱག་རྒྱ་ཡིན། །སྐལ་བ་བཟང་པོ་ཞེས་བཤད་པའོ། །ཀོ་ཊ་ཀྵ། ཀོ་ཊ་བ། ཀོ་ཊ་བཤྩ། ཀོ་ཊཱ་རི་ཀ །ཀོ་ལ་གཀྵ། ཀོ་ལ་བ། ཀོ་ལ། ཀོ་ལ་བཤྩ། །ཀོ་ལ་བྷ་སྟ་ཐཱ། ཕྱག་ན་རྡོ་རྗེ་རང་དོན་གྱི། །མཚན་འདི་རྣམས་ནི་གང་བརྗོད་པ། །དེ་ལ་རྒྱལ་པོ་རྡོ་རྗེ་འཛིན། །
བྲན་བཞིན་དངོས་གྲུབ་སྟེར་བར་འགྱུར། །རྒྱལ་སྲིད་དང་ནི་ལོངས་སྤྱོད་དང་། །གཏེར་གྱི་རྣམས་ཀྱང་ལྷག་པར་སྟེར། །དགོས་པ་ཐམས་ཅད་བྱེད་པར་འགྱུར། །དེ་བཞིན་དགྲ་ཡང་མེད་པར་བྱེད།།མིག་དང་རྣ་བ་སྣ་དག་དང་། །ལྕེ་དང་ལུས་ཀྱང་དེ་བཞིན་ཏེ། །གཟུགས་དང་
སྒྲ་དང་དྲི་དག་དང་། །རོ་དང་རེག་ཀྱང་བདག་གི་དོན། །རྡོ་རྗེ་མཚོན་ཆ་བེ་དི་དང་། །དགྲ་བོ་དག་ཏུ་རབ་གྲགས་པ། །དེ་ཡིས་ཕྱག་ན་རྡོ་རྗེར་འགྱུར། །ལག་ན་རྡོ་རྗེ་ཞེས་ཀྱང་བྱ། །ཉོན་མོངས་ཐམས་ཅད་གང་ཟད་དང་། །དགྲ་རྣམས་ཀྱང་ནི་གང་ཟད་པ། །ཕྱག་ན་རྡོ་རྗེས་

འདུལ་བའི་ཕྱིར། །དེ་ནི་ཡཀྵ་ཡིན་པར་བཤད། །ཧེ་རུ་དཔལ་ནི་རྡོ་རྗེ་ཆེ། །ཐལ་བར་འཇིག་པའི་མཆོག་ཡིན་ཏེ། །སངས་རྒྱས་ཀུན་གྱི་ཁྲོ་བོ་ཆེ། །བརྡ་ཡིས་རབ་ཏུ་བཤད་པ་ཡིན། །རྡོ་རྗེ་འབར་བ་རབ་ཏུ་འཇིགས། །ཁ་ཊྭཱཾ་ག་ནི་རྒྱལ་མཚན་ཆེ། །ཐོད་པ་
ཁམ་ཕོར་པདྨའི་སྣོད། །ཁྲག་ཆེན་དང་ནི་སྦྲང་རྩི་ཆེ། །དཀར་མོ་རྐུ་བྱེད་རབ་རྨོངས་དང་། །རོ་ལངས་དང་ནི་སྦོས་བྱེད་དང་། །གཏུམ་མོ་དང་ནི་སྨེ་མ་དང་། །ལྷ་མོ་བདུན་ནི་བརྡ་ཡིན་ནོ། །སྲུངས་ཤིག་མྱུར་དུ་རྣམ་རྒྱལ་དཔལ། །ཐལ་བ་བཞིན་དུ་རབ་ཏུ་ལྷོགས། །ཧྃ་ཧྃ་ཧྲི་ཧཱུྃ་ཀུན་
བཤད་པ། །སངས་རྒྱས་བརྡ་ཡི་ཕྱག་རྒྱ་ཡིན། །རོལ་ཅིག་དགོངས་ཤིག་དེ་བཞིན་དུ། །རོལ་དུ་ཆུག་ཅིག་གསོད་དུ་ཆུག །མཱར་ཊ་ཕཊ་ཕཊ་ཅེས་བཤད་པ། །སངས་རྒྱས་ཀུན་གྱི་བརྡ་ཡིན་ཏེ། །རྒྱལ་པོ་ཆེན་པོ་རྡོ་རྗེ་འཛིན། །དབང་ཕྱུག་དམ་པའི་རིག་པ་ནི། །སངས་
རྒྱས་བརྡ་ཡི་ཕྱག་རྒྱ་ཡིས། །སྐལ་བ་བཟང་པོ་ཡིན་པར་བཤད། །རྒྱལ་པོ་སྤྱན་རས་གཟིགས་དབང་ཕྱུག །འཇིག་རྟེན་དབང་ཕྱུག་ཅེས་བཤད་དེ། །སངས་རྒྱས་ཀུན་གྱི་བརྡ་དག་གིས། །དེ་ཡང་སྐལ་བ་བཟང་ཞེས་བཤད། །དག་དང་གྲུབ་དང་དེ་བཞིན་བློ། །རྫུ་འཕྲུལ་
འཕེལ་དང་འབྱོར་པ་དང་། །རྣམ་པར་ལྟ་དང་སྒྲོལ་མ་དང་། །རྒྱ་ཆེན་མ་དང་ཁྲོ་གཉེར་མ། །པདྨར་གནས་ཞེས་བྱ་བ་དང་། །རྡོ་རྗེ་པདྨའི་དབང་ཕྱུག་མ། །པདྨ་ལྷ་མོ་རིགས་ཆེན་ཏེ། །སངས་རྒྱས་བརྡ་ཡི་ཕྱག་རྒྱས་བཤད། །ནམ་མཁའི་སྙིང་པོ་ཐམས་ཅད་ཕྱོགས། །རེ་བ་
ཐམས་ཅད་རྫོགས་མཛད་པ། །སྐལ་བ་བཟང་ཞེས་རྣམ་པར་གྲགས། །རྡོ་རྗེ་ཉི་མ་ནོར་བུ་ཆེ། །ཊྭཱྃ་དང་བ་བ་ཊ་ཊ་དང་། །ཏྲ་ཊ་ཏྲ་ཊ་ཀུན་གྲགས་པ། །སངས་རྒྱས་ཀུན་གྱི་བརྡ་ཡིན་ཏེ། །དབང་བསྐུར་བ་དང་གཏེར་དག་དང་། །རྒྱལ་མཚན་རྩེ་མོ་མཆོད་ཆེན་པོ། །སྣ་ཚོགས་
པདྨ་ཐམས་ཅད་སྤྱན། །དེ་བཞིན་འཇིག་རྟེན་ཐམས་ཅད་པ། །བྱང་ཆུབ་ཀུན་གྱི་སེམས་ཆེན་པོ། །སྣ་ཚོགས་རྡོ་རྗེ་བླ་ན་མེད། །ཐམས་ཅད་དག་པར་མོས་པ་ཡིས། །འཇིག་རྟེན་ཐམས་ཅད་རབ་འཇིགས་པ། །རྟ་མཆོག་པདྨ་དཔལ་དང་ལྡན། །སྐལ་བ་བཟང་ཞེས་བརྡ་

ཡིས་བསྟན། །བརྡ་ཡི་ཕྱག་རྒྱ་འདི་རྣམས་ཀྱིས། །དཀྱིལ་འཁོར་སྦྱོར་བས་ངེས་པ་ནི། །གྲོགས་པོ་མཁས་པར་བཅས་པ་ཡིས། །དངོས་གྲུབ་ཐམས་ཅད་འགྲུབ་པར་འགྱུར། །བརྡ་ཡི་ཕྱག་རྒྱ་ཤེས་པའོ། །རྗེས་སུ་ཆགས་པར་བྱའོ་ཞེས། །ཆ་ལུགས་ཤེས་པ་བཞིན་
བྱེད་ཅིང་། །དངོས་གྲུབ་ཀུན་ལ་རྗེས་ཆགས་པ། །མི་འགྱུར་དམ་པ་འགྲུབ་པར་འགྱུར། །ཀུན་ཏུ་ཀུན་ནས་ཐམས་ཅད་ནི། །བདག་ཉིད་རྟག་ཏུ་རྣམ་པ་ཀུན། །ལས་ཀྱི་དངོས་གྲུབ་རབ་འབྱམ་དག །མ་ལུས་པར་ནི་མྱུར་དུ་འགྲུབ། །རྗེས་སུ་ཆུད་པར་བྱའོ་ཞེས། །ཆ་ལུགས་
ཤེས་པ་བཞིན་བྱེད་པས། །སྐུ་གསུང་ཐུགས་ཀྱི་རྡོ་རྗེ་མཆོག །ཆོ་འཕྲུལ་དག་ནི་སྟོན་པར་བྱེད། །རྗེས་སུ་ཆུད་པར་བྱའོ་ཞེས། །ཆ་ལུགས་ཤེས་པ་བཞིན་བྱེད་པས། །མཁའ་འགྲོ་སྒྱུ་མ་བདེ་བའི་མཆོག །མ་ལུས་ལུས་པ་མེད་པར་འགྲུབ། །རྗེས་སུ་སྦྱང་བར་བྱའོ་ཞེས། །
ཆ་ལུགས་ཤེས་པ་བཞིན་བྱེད་པས། །སྒྲིབ་སྦྱང་ཐམས་ཅད་དངོས་གྲུབ་རྣམས། །མ་ལུས་ལུས་པ་མེད་པར་འགྲུབ། །རྗེས་སུ་ཡི་རང་བྱའོ་ཞེས། །ཆ་ལུགས་ཤེས་པ་བཞིན་བྱེད་པས། །བུད་མེད་ལ་སོགས་རིན་ཆེན་མཆོག །མཆོད་པའི་ལས་ཀུན་མྱུར་དུ་འགྲུབ། །རྗེས་
སུ་གཞོམ་པར་བྱའོ་ཞེས། །ཆ་ལུགས་ཤེས་པ་བཞིན་བྱེད་པས། །རྟུལ་ཕོད་ལས་རྣམས་ཐམས་ཅད་ནི། །མ་ལུས་ལུས་པ་མེད་པར་འགྲུབ། །ཡེ་ཤེས་ཀྱི་ཕྱག་རྒྱ་ཤེས་པའོ། །རྡོ་རྗེ་སེམས་དཔའ་དཔལ་སྦྱོར་བ། །དབྱིབས་དང་གཟུགས་ནི་ཅི་འདྲར་ལྡན། །ཐམས་ཅད་
བདག་ཉིད་རྒྱར་སྦྱོར་བས། །མི་འགྱུར་དམ་པ་འགྲུབ་པར་འགྱུར། །ཀུན་ཏུ་ཀུན་ནས་ཐམས་ཅད་ནི། །བདག་ཉིད་རྟག་ཏུ་རྣམ་པ་ཀུན། །པྲ་སེ་ན་ཡི་དངོས་གྲུབ་མཆོག །མ་ལུས་ལུས་པ་མེད་པར་འགྲུབ། །སངས་རྒྱས་ཐམས་ཅད་མཉམ་སྦྱོར་བ། །མཁའ་འགྲོ་སྒྱུ་མ་བདེ་
མཆོག་གིས། །ཡང་དག་བདེན་པ་ཚུལ་བཞིན་དུ། །མཐོང་བ་དང་ནི་ཐོས་པར་བྱེད། །ས་ཆུ་མེ་རླུང་ནམ་མཁའ་དང་། །ཁམས་རྣམས་ཀུན་ནི་ཐམས་ཅད་ལས། །ཐམས་ཅད་མཐོང་ཞིང་ཐོས་པར་བྱེད། །རྣམ་པར་ཤེས་པ་ཀུན་འགྲུབ་ཅིང་། །ཀུན་ཏུ་ཐམས་ཅད་ཀུན་གྱི་བདག །

འདོད་པའི་ཡོན་ཏན་ཐམས་ཅད་དང་། །རྣམ་པར་ཤེས་པའི་ལས་ཀུན་ལ། །ཐམས་ཅད་མཐོང་ཞིང་ཤེས་པར་བྱེད། །པདྨར་ཆགས་པར་རྗེས་ཆགས་ཤིང་། །སྣ་ཚོགས་པདྨར་ཁ་འབྱེད་པས། །པྲ་སེ་ན་ནི་སྣ་ཚོགས་པ། །མཐོང་བ་དང་ནི་ཐོས་པར་བྱེད། །མེ་ཏོག་བདུག་
པ་མར་མེ་མཆོག །སྤོས་དང་མཆོད་པ་ཐམས་ཅད་ལ། །རྣམ་པར་ཤེས་པ་ཀུན་གྲུབ་པ། །ཐམས་ཅད་མཐོང་ཞིང་ཐོས་པར་བྱེད། །རེག་དང་མ་རེག་རྡོ་རྗེ་ཆེ། །རལ་གྲི་མེ་ལོང་མདའ་གཞུ་དང་། །ཤིང་དང་ཆུ་དང་འབབ་ཆུ་བྲག །གཟུགས་བརྙན་བྱུང་བའི་ཁྱིམ་བདག་ལས། །
བྱ་དང་དེ་བཞིན་མི་བྱ་དང་། །སྟོར་བ་དང་ནི་མ་སྟོར་དང་། །ཕྲོགས་པ་དང་ནི་མ་ཕྲོགས་དང་། །དེ་བཞིན་རྙེད་དང་མ་རྙེད་དང་། །གསོན་པ་དང་ནི་ཤི་བ་དང་། །དེ་བཞིན་རྒྱལ་དང་ཕམ་པ་དང་། །དོན་ཡོད་དང་ནི་དོན་མེད་དང་། །དེ་བཞིན་གྲུབ་དང་མི་གྲུབ་དང་། །བདེ་དང་མི་
བདེ་ཆོ་ག་བཞིན། །ལྷ་ཡུལ་དག་གི་དོན་རྣམས་དང་། །སངས་རྒྱས་ཞིང་གི་དོན་རྣམས་ཀྱང་། །ཀུན་ཏུ་ཀུན་ནས་ཐམས་ཅད་ནི། །བསམས་པ་མཐོང་ཞིང་ཐོས་པར་བྱེད། །རྣམ་པར་ཤེས་པའི་ཕྱག་རྒྱ་ཤེས་པའོ། །རྡོ་རྗེ་སེམས་དཔའ་དཔལ་སྦྱོར་བ། །ཅི་ལྟའི་དབྱིབས་དང་གཟུགས་
ལྡན་པས། །དུར་ཁྲོད་ལྷ་ཡི་གནས་རྣམས་དང་། །མ་མོ་གནས་ཀྱི་ཐལ་བ་མཆོག །ཐམས་ཅད་དཔྲལ་བའི་བསྲུང་བ་ནི། །ཐིག་ལེ་སོར་རིས་གསུམ་དུ་བྱ། །ཕྱོགས་མཚམས་ནམ་མཁའ་ས་བཅིངས་ན། །བསྲུང་བ་ཀུན་གྱི་བླ་མེད་པའོ། །དཔལ་རྡོ་རྗེ་ཐལ་བའི་དམ་ཚིག་ཅེས་བྱ་བའི་
བསྲུང་བའོ། །རྡོ་རྗེ་སེམས་དཔའ་དཔལ་སྦྱོར་བ། །ཅི་ལྟའི་དབྱིབས་དང་གཟུགས་ལྡན་པས། །རྒྱ་མཚོར་འབབ་པའི་གཟུགས་ཆུའི་འགྲམ། །ལྷ་རྫས་ཞི་བའི་ཆུ་མཆོག་གིས། །གཏོར་བ་དང་ནི་བླུགས་པ་དང་། །ཁྲུས་བྱས་པ་དང་འབོགས་པ་ཡིས། །ཕྱོགས་མཚམས་
ནམ་མཁའ་ས་བཅིངས་ན། །བསྲུང་བ་ཀུན་གྱི་བླ་མེད་པའོ། །དཔལ་རྡོ་རྗེ་བདུད་རྩི་དྲི་མ་མེད་པའི་རྒྱ་མཚོ་ཞེས་བྱ་བའི་ཕྱག་རྒྱའོ། །རྡོ་རྗེ་སེམས་དཔའ་དཔལ་སྦྱོར་བ། །ཅི་ལྟའི་གཟུགས་དང་དབྱིབས་ལྡན་པས། །མི་ཡི་ཐོད་པའི་ནང་དུ་ནི། །ཡུངས་ཀར་བསྐྱེད་ནས་བླང་

བར་བྱ། །ལོ་མ་ཡུངས་མར་ཟས་སུ་བཟའ། །མགོ་བསྐུས་དེ་བཞིན་འབྲས་བུ་ཡིས། །ཕྱོགས་མཚམས་ནམ་མཁའ་ས་བཅིངས་ན། །བསྲུང་བ་ཀུན་གྱི་བླ་མེད་པའོ། །དཔལ་དོན་ཐམས་ཅད་གྲུབ་པ་ཞེས་བྱ་བའི་ཕྱག་རྒྱའོ། །རྡོ་རྗེ་སེམས་དཔའ་དཔལ་སྦྱོར་བ། །མ་མཆུ་
སོ་ཡིས་ལེགས་མནན་ནས། །དཔལ་ལྡན་གཡོན་དུ་འགྱིང་དང་བཅས། །གསལ་བར་ཕྱོགས་སུ་འཁོར་ལོའི་ཚུལ། །བླ་འོག་ཏུ་ནི་བྱིན་བརླབས་ན། །གནས་གསུམ་དག་ནི་རྒྱས་འདེབས་སོ། །གཞུག་དཀའ་བདག་ཉིད་ངན་པའི་རྣམས། །སངས་རྒྱས་ཀུན་གྱི་ངོ་བོར་
འགྲུབ། །ཐམས་ཅད་ཀྱི་མཆོག་གནས་ཀྱི་དབང་ཕྱུག་བྱིན་གྱིས་བརླབས་པ་དཔལ་སྐལ་བ་བཟང་པོ་ཞེས་བྱ་བའི་ཕྱག་རྒྱའོ། །རྡོ་རྗེ་སེམས་དཔའ་དཔལ་སྦྱོར་བ། །ལྷ་མོ་ཀུན་དང་འདུས་པ་ཡིས། །ཀུན་ཏུ་སྣ་ཚོགས་སྐལ་བཟང་པོ། །བདེ་བར་རབ་ཏུ་འགྲུབ་པར་འགྱུར། །རྒྱ་
འདིས་བཏབ་མ་ཐག་ཏུ་ནི། །སངས་རྒྱས་ཀུན་གྱིས་བྱིན་བརླབས་འགྱུར། །ཤིན་ཏུ་བྱིན་གྱིས་བརླབས་འགྱུར་ལས། །སངས་རྒྱས་ཀུན་དང་ཕྲད་པར་འགྱུར། །སངས་རྒྱས་ཀུན་དང་མཉམ་སྦྱོར་བས། །སངས་རྒྱས་ཀུན་དང་མཉམ་པར་འགྱུར། །སངས་རྒྱས་ཀུན་དང་
མཉམ་པས་ན། །སངས་རྒྱས་ཐམས་ཅད་རབ་ཏུ་འགྲུབ། །སངས་རྒྱས་ཐམས་ཅད་མཉམ་སྦྱོར་བ། །དཔལ་སྐལ་བ་བཟང་པོའི་དམ་ཚིག་ཅེས་བྱ་བའི་བསྲུང་བའོ། །རྡོ་རྗེ་སེམས་དཔའ་དཔལ་སྦྱོར་བ། །སངས་རྒྱས་ཀུན་བདག་སྦྱོར་ལྡན་པས། །ཕྱོགས་སུ་ལེགས་པར་
འཁོར་ལོའི་ཚུལ། །བླ་དང་འོག་ཏུ་བྱིན་བརླབས་ནས། །འདི་ཡིས་བསྲུང་བ་བྱས་ན་ནི། །ཁམས་གསུམ་དག་ནི་མ་ལུས་པར། །གཞུག་དཀའ་བདག་ཉིད་ངན་པ་རྣམས། །སངས་རྒྱས་ཀུན་གྱིས་བྱིན་བརླབས་འགྱུར། །ཐམས་ཅད་ཀྱི་མཆོག་གནས་ཀྱི་དབང་ཕྱུག་དཔལ་ཞེས་བྱ་
བའི་ཕྱག་རྒྱའོ། །རྡོ་རྗེ་སེམས་དཔའ་དཔལ་སྦྱོར་བ། །ཧེ་རུ་དཔལ་གྱིས་རྣམ་སྤྲུལ་པས། །ཐམས་ཅད་ཀུན་ཏུ་ཀུན་གྱི་བདག །ཐམས་ཅད་བསྲུང་བ་མི་འགྱུར་ཆེ། །རིམས་དང་དུག་དང་དབྱིག་དུག་ནད། །མཁའ་འགྲོས་གཙེ་དང་གདོན་རྣམས་དང་། །བདུད་དང་ངན་ཁྲིད་ཐམས་

ཅད་ནི། །མོད་ལ་རབ་ཏུ་ཞི་བར་འགྱུར། །དཔལ་རྡོ་རྗེ་ཧེ་རུ་ཀ་དབབ་པ་རྣམ་པར་སྤྲུལ་པ་ཞེས་བྱ་བའི་ཕྱག་རྒྱའོ། །རྡོ་རྗེ་སེམས་དཔའ་དཔལ་སྦྱོར་བ། །ཅི་ལྟའི་དབྱིབས་དང་གཟུགས་ལྡན་ཞིང་། །སྣ་ཚོགས་པདྨ་ཁ་འབྱེད་པས། །སྒྲིབ་པ་མེད་པར་འགྲུབ་པར་འགྱུར། །
སྒྲིབ་པ་ཀུན་ལས་རྣམ་པར་གྲོལ། །དག་པ་ཐམས་ཅད་ཐོབ་པར་འགྱུར། །དག་པ་ཐམས་ཅད་རྣམ་དག་ན། །མི་འགྱུར་དམ་པ་འགྲུབ་པར་འགྱུར། །ཆོས་ཐམས་ཅད་ལ་སྒྲིབ་པ་མེད་པའི་ཡེ་ཤེས་རྡོ་རྗེའི་པདྨ་ཞེས་བྱ་བའི་བསྲུང་བའོ། །རྡོ་རྗེ་སེམས་དཔའ་དཔལ་སྦྱོར་བ། །འབར་བ་
བལྟ་བའི་ཚུལ་ཞུགས་ན། །རྡོ་རྗེ་རབ་ཏུ་འབར་བའི་མེ། །རབ་ཏུ་འཇིགས་པ་མི་བཟོད་འགྱུར། །འདི་ཡིས་བསྲུང་བ་བྱས་ན་ནི། །བསྐལ་པ་ཡི་ནི་མེ་ལྟར་འབར། །འདི་ཡིས་ངན་འགྲོ་རྣམས་གསུམ་དང་། །ཁམས་གསུམ་དག་ཀྱང་ཐལ་བར་རློག །རྡོ་རྗེ་ཆེན་པོའི་མེ་རབ་ཏུ་
འཇིགས་པ་འབར་བ་མི་བཟད་པའི་དམ་ཚིག་ཆེན་པོའི་དཔལ་ཞེས་བྱ་བའི་ཕྱག་རྒྱའོ། །རྡོ་རྗེ་སེམས་དཔའ་དཔལ་སྦྱོར་བ། །ཅི་ལྟའི་ཚུལ་བཞིན་བྱེད་པ་ཡིས། །རྡོ་རྗེ་ཁུ་ཚུར་གཉིས་བཅིངས་ནས། །གོ་ཆ་བགོ་བའི་ཐབས་སུ་བྱ། །སྤྱི་བོ་དང་ནི་དཔྲལ་བར་གཉིས། །གློ་གཉིས་
དང་ནི་རྒྱབ་ཏུ་གཉིས། །རྡོ་རྗེ་ཕྲེང་བ་བཅིང་བ་དང་། །སངས་རྒྱས་གཙུག་གི་ནོར་བུ་དག །དར་དཔྱངས་ཐབས་སུ་བཅིངས་ནས་ནི། །འགྱིད་དང་བཅས་པར་མཐའ་ནས་དགྲོལ། །དར་དཔྱངས་པ་ཡི་ཐབས་བྱས་ནས། །ཐལ་མོ་བརྡབས་པས་བརྟན་པར་བྱ། །འདི་ཡིས་བསྲུང་བ་
བྱས་ན་ནི། །རྡོ་རྗེ་སེམས་དཔའ་དཔལ་དང་འདྲ། །མི་ཆོད་པ་དང་མི་ཕྱེད་པའི། །རྡོ་རྗེའི་སྐུ་ནི་རབ་ཏུ་འགྲུབ། །རིམས་ནད་དུག་དང་དབྱིག་དུག་ནད། །མཁའ་འགྲོས་གཙེ་དང་གདོན་རྣམས་དང་། །ཡན་ལག་མ་རུང་བྱེད་པ་ཀུན། །འདི་ཡིས་བསྲུངས་ན་ཡོང་མི་ཚུགས། །དཔལ་
རྡོ་རྗེ་གོ་ཆ་ཞེས་བྱ་བའི་ཕྱག་རྒྱའོ། །བསྲུང་བ་ཐམས་ཅད་ཀྱི་ཕྱག་རྒྱ་ཤེས་པའོ། །ཆོས་སེམས་དཔའ་ཡི་ཚུལ་སྟོན་ཅིང་། །རྡོ་རྗེ་ཁུ་ཚུར་གཉིས་དག་དང་། །ཞི་བའི་ལྟ་བས་བལྟས་ནས་ནི། །རིམས་དང་དུག་རྣམས་ཐམས་ཅད་སེལ། །རྡོ་རྗེ་ཁུ་ཚུར་གཉིས་བཅིངས་ནས། །མཐེའུ་

ཆུང་ལྕགས་ཀྱུ་ལྟ་བུར་བཅིང་། །མཛུབ་མོ་མཉམ་པའི་རྩེ་མོས་མནན། །ནད་རྣམས་ཐམས་ཅད་ཟློག་པར་བྱེད། །ཡོངས་སུ་བསྒྱུར་ཏེ་བཏེག་ནས་ནི། །དཔྲལ་བར་བདེ་བར་གཞག་པར་བྱ། །མ་ལུས་ལུས་པ་མེད་པ་ཡིས། །སྡུག་བསྔལ་ཐམས་ཅད་སེལ་བར་བྱེད། །དཔལ་རྡོ་རྗེ་
སྨིན་མཚམས་ལུས་ཀྱི་ནད་གསོ་བའོ། །རྡོ་རྗེ་བསྡམ་པ་བྱས་པ་ལས། །མཛུབ་མོ་ཕན་ཚུན་མངོན་ཕྱོགས་པ། །མ་ལུས་ལུས་པ་མེད་པ་ཡི། །ཟུག་རྔུ་ཀུན་ལས་གྲོལ་བར་འགྱུར། །བུ་ནད་ལྷོག་རྒལ་སྐྲན་དག་དང་། །དམུ་རྫིངས་ལ་སོགས་ཀུན་ལས་ཐར། །འདི་ཉིད་གྲུབ་པར་
གྱུར་ནས་ནི། །ནད་རྣམས་ཀུན་གྱིས་གནོད་པ་མེད། །ཟུག་རྔུ་ཐམས་ཅད་མེད་པར་བྱེད་པའོ། །གྲུབ་པ་དཔལ་གྱི་སྤྱན་བཅིངས་ཏེ། །འདི་ཡིས་མིག་གཉིས་ཕྱིས་ན་ནི། །ཕྱག་རྒྱ་གྲུབ་པ་མཆོག་འདི་ཡིས། །ལོང་བ་དག་ཀྱང་མཐོང་བར་འགྱུར། །བདག་ཉིད་སྦྱོར་བས་ལྡན་
བྱས་ལ། །རྡོ་རྗེ་ཁུ་ཚུར་དམ་པོ་ཡིས། །དྲང་བའི་ཚུལ་དུ་ཀླད་པ་ནས། །ཁ་ཕྱོགས་དྲང་ཞིང་བཏུང་བར་བྱ། །རིམས་དང་དུག་དང་གདོན་རྣམས་ཀུན། །རྡོ་རྗེ་ཁུ་ཚུར་དཔལ་གྱིས་བཟུང་། །བདག་གི་ལྷར་ནི་སྦྱོར་ལྡན་པས། །འཐུངས་ན་ཐམས་ཅད་མེད་པར་འགྱུར། །ཀླད་
པའི་སྨན་ནོ། །ཏ་ཐཱ་ག་ཏ་གརྦྷ་སྟྭ་སི་ཧོ། །འདི་ན་རྣ་བར་བཟླས་པའི་མཆོག །ཟུག་རྔུ་མེད་ཅིང་མྱུར་དུ་ཐར། །ཟུག་རྔུ་ཐམས་ཅད་སྦྱིན་པ་པོའོ། །གཡས་པ་ཡི་ནི་ལག་པ་ཡིས། །སེམས་པའི་གཙུག་ཏོར་བཅིངས་ན་ནི། །བྱིས་པ་ནད་མེད་འཚོ་བར་འགྱུར། །ཐམས་ཅད་བསྲུངས་
ཤིང་བདེ་བ་ཐོབ། །གཞོན་ནུ་གསོ་བའོ། །གཡས་པ་ཡི་ནི་ལག་པ་ཡི། །ཀླུ་ཡི་གདེངས་ཀ་ལྟ་བུར་བྱ། །འབར་བའི་ཚུལ་སྟོན་འབེབས་བཅས་ན། །དུག་གི་ལས་རྣམས་བསྒྲུབ་པར་བྱ། །འབར་དང་འདུལ་དང་བཅིངས་པ་དང་། །ཟ་བའི་དུག་རྣམས་མེད་པར་བྱེད། །གདུག་
པས་ཟིན་དང་ལུ་ཏ་དང་། །ཤི་བ་སོས་པར་བྱེད་པའི་མཆོག །གདེངས་ཀའི་ཕྱག་རྒྱའོ། །གཡས་པའི་མཐེ་བོ་གུང་མོ་གཉིས། །གཡོན་པའི་ཁུ་ཚུར་བཅངས་པ་ཡི། །གུང་མོ་ལ་ནི་རེག་བྱས་ན། །གདོན་རྣམས་ཀུན་ལས་ཐར་བར་འགྱུར། །དུག་གསོ་བ་དང་གདོན་གྱི་ཆོ་གའོ། །

བ་དན་གསུམ་པོ་གཉིས་བཅིངས་ནས། །གུང་མོ་གཉིས་ནི་མདུད་པར་བཅིང་། །མཛུབ་མོ་མཐེའུ་ཆུང་རྩེ་མོ་ཅན། །རྡོ་རྗེའི་ཕྱག་རྒྱ་ཡོངས་བཅིངས་ལ། །ཡོངས་སུ་བསྒྱུར་ཏེ་བཏེག་ནས་སུ། །སྨིན་མའི་མཚམས་སུ་བཞག་པ་ནི། །མཁའ་འགྲོའི་ལས་རྣམས་མ་ལུས་པ། །
ལུས་པ་མེད་པ་ཐམས་ཅད་འགྲུབ། །ཕྱག་རྒྱ་འདི་ཡིས་བཏབ་ན་ནི། །གནས་གསུམ་པོ་ནི་མ་ལུས་པ། །རྒྱས་བཏབ་རྨོངས་བྱས་ཟོས་པ་དང་། །ཐལ་བར་གྱུར་པའང་འཚོ་བར་བྱེད། །དཔལ་རྡོ་རྗེ་ཧེ་རུ་ཀའི་ཁྲོ་གཉེར་ཞེས་བྱ་བའི་ཕྱག་རྒྱ་སྟེ་མ་མོ་ཤེས་པའོ། །རྡོ་རྗེ་སེམས་
དཔའ་དཔལ་སྦྱོར་བས། །རྟ་རྣམས་ཐམས་ཅད་ཞོན་ན་ནི། །རྟ་རྣམས་ནད་མེད་སོས་པ་དང་། །ཉམ་སྐྱེ་མཐར་ཞིང་མགྱོགས་པར་འགྱུར། །དཔལ་རྟ་མཆོག་གི་ཕྱག་རྒྱའོ། །རྡོ་རྗེ་སེམས་དཔའ་དཔལ་སྦྱོར་བས། །གླང་པོ་ཀུན་ལ་ཞོན་ན་ནི། །གླང་པོ་ཐམས་ཅད་ནད་
མེད་སོས། །ཉམ་སྐྱེ་སྤྲོ་ལྡན་མོས་པར་འགྱུར། །ཤྲཱི་བཛྲ་སཏྭ་སྟྭཾ་སི་ཧོ། །འདི་ནི་རྣ་བར་བཟླས་པའི་མཆོག །བྱ་རྣམས་ནད་མེད་འཚོ་བར་འགྱུར། །མི་ཡི་སྐད་དུ་སྨྲ་བར་འགྱུར། །བྱ་གསོ་བའི་ཕྱག་རྒྱའོ། །རྡོ་རྗེ་སེམས་དཔའ་དཔལ་སྦྱོར་བས། །འབྱོར་པ་ཀུན་ལ་རྗེས་ཆགས་
ན། །ཤིང་རྣམས་ནད་མེད་མི་བསྐམས་ཤིང་། །རྟག་ཏུ་མེ་ཏོག་འབྲས་བུར་ལྡན། །ཤིང་རྣམས་བསྐྱེད་པའི་གཙུག་ལག་ལས། །སྦྱོར་བའི་ཆོ་ག་གང་བཤད་པ། །ཕྱག་རྒྱ་འདི་ཡིས་ཐམས་ཅད་ནི། །ཡིད་ལ་བསམས་པ་བཞིན་དུ་འགྲུབ། །ཤིང་བསྐྱེད་པའི་ཕྱག་རྒྱ་ཤེས་པའོ། །
འཁྲུལ་འཁོར་གྱིས་འཕངས་མ་འཕངས་དང་། །དེ་བཞིན་ལག་པས་འཕངས་པ་དང་། །འཕངས་ནས་སླད་དུ་བཟུང་བ་དང་། །སྟོབས་སུ་འགྱེད་པ་ལྔ་ཡིན་ཏེ། །རང་བྱུང་རྣམས་ཀྱི་དགྲ་ཆའི་དཔྱད། །ཕྱག་རྒྱ་ལྔ་ལྔ་རབ་ཏུ་གནས། །རྡོ་རྗེ་སེམས་དཔའ་དཔལ་གྱིས་བཤད། །དམ་
པ་དེ་དག་བཤད་པར་བྱ། །དབྱིབས་དང་བདེ་བླག་སྦྱོར་བ་དང་། །ཀུན་ཏུ་སྦྱོར་དང་འདྲེན་མར་གྱུར། །འགེངས་དང་འཕེན་དང་གསལ་བའོ། །རྐང་པ་གཤིབས་པས་ས་མནན་ཅིང་། །རྐང་པ་འགྱེད་པས་ས་གནོན་ཏོ། །དཀྱིལ་འཁོར་དག་ཀྱང་མནན་པར་བྱ། །བརྐྱང་བསྐུམ་གྱིས་

ཀྱང་གནས་གསུམ་གནོན། །དབྱིབས་ཀྱི་ཕྱག་རྒྱའོ། །མི་ལྷོད་པ་དང་སྲན་གཟུགས་དང་། །མཉེན་ཞིང་ཡན་ལག་བསྟན་པ་དང་། །རྒྱ་ཆེར་འགེངས་ཤིང་རྣམ་པར་དག །ལུས་ཀྱི་ཕྱག་རྒྱ་བདེ་བླག་ཅན། །འདི་ཡིས་ལུས་ལ་གནོན་པ་དང་། །རིམས་དང་དུག་དང་དབྱིག་
དུག་དང་། །མཁའ་འགྲོས་གཙེ་དང་གདོན་རྣམས་ཀྱིས། །ནམས་ཀྱང་ཚུགས་པར་ཡོང་མི་འགྱུར། །རྒྱ་ཆེར་འགེངས་པའི་ཕྱག་རྒྱའོ། །རང་གི་སྙིང་གར་འདྲེན་ཚུལ་དུ། །བདེ་བླག་ཅན་གྱིས་གཞུ་བཟུང་ནས། །གཡས་པ་རབ་ཏུ་གར་བྱེད་ཅིང་། །མདའ་འཕངས་ན་ནི་འགྲུབ་
པར་འགྱུར། །དཔལ་ཁམས་གསུམ་རྣམ་པར་རྒྱལ་བའིའོ། །ལག་པ་གཡོན་པ་ལེགས་བསྲང་ལ། །སྐྱོན་མེད་པ་ཡིས་གཡས་པ་དགུག །གཞུ་རྒྱུད་དལ་བུས་དྲངས་ནས་ནི། །འགྲོ་བ་ཐམས་ཅད་དགུག་པར་བྱ། །ཐམས་ཅད་དགུག་པའི་ཕྱག་རྒྱའོ། །རྣ་དྲུང་བར་དུ་ཟླུམ་
པོར་ནི། །ཇི་ལྟར་རིགས་པར་ལེགས་བཀང་ལ། །ཡི་གེ་ཨོྃ་ཙམ་རང་གི་ཁར། །བཟུང་ན་འགྲོ་བ་འཛིན་པར་འགྱུར། །འཛིན་པའི་ཕྱག་རྒྱའོ། །ཇི་ལྟར་རིགས་པས་དྲངས་ནས་ནི། །ཆོ་ག་བཞིན་དུ་བཟུང་ནས་ཀྱང་། །དེར་ནི་ཅུང་ཟད་དབྱེ་བར་བྱ། །འགེངས་པས་ཐམས་
ཅད་འགྲུབ་པར་འགྱུར། །འགེངས་པའི་ཕྱག་རྒྱའོ། །ཆང་པས་འབེན་ནི་འགྲིབ་པར་བྱ། །འཛུམ་དང་བཅས་པའི་མིག་གིས་བལྟ། །ལྟ་བ་ཆང་པ་ལ་གཏད་ནས། །མྱུར་དུ་འཕངས་ན་དམ་པ་འགྲུབ། །མདའ་གཞུས་རྒྱལ་བར་བྱ་བའི་ཕྱག་རྒྱའོ། །གྲུ་བཞི་པ་ལ་རྣོ་བ་དང་། །
དེ་བཞིན་ཀུན་ནས་བསྐོར་བར་བྱ། །གཡས་ཕྱོགས་ནས་ནི་མངའ་བསྐོར་ནས། །སྣད་དེ་དེ་བཞིན་བསྟོད་པ་དང་། །རྐང་པས་མནན་ཅིང་རྨིག་པས་གནོན། །འབིགས་པ་བཅུ་ཡི་རྒྱ་མཆོག་གིས། །ཁམས་གསུམ་རྒྱལ་སྲིད་ཆེན་པོ་དག །བདེ་བར་ཐུབ་ནས་ཉེ་བར་སྤྱོད། །
དཔལ་ཁམས་གསུམ་རྣམ་པར་རྒྱལ་བའོ། །རབ་ཏུ་འཕངས་དང་མཉམ་པར་འཕངས། །དེ་བཞིན་གློག་ལྟར་འཕངས་པ་དང་། །གློག་ལྟར་འཁྲུག་པ་དེ་བཞིན་ཏེ། །ཕྱག་རྒྱ་ཐབས་རྣམས་སྒྲུབ་པའོ། །ཐབས་ཐམས་ཅད་ཀྱི་ཕྱག་རྒྱའོ། །ཉམ་ང་ལག་དང་བདེ་ཕྱོགས་དང་། །

ཐད་ཀ་དེ་བཞིན་གྱེན་དུ་འདེབས། །འདི་དག་བཟློག་པའི་ཕྱག་རྒྱ་སྟེ། །གནས་གསུམ་དག་ནི་བཟློག་པར་བྱ། །ངེས་པར་བཟློག་པ་ཐམས་ཅད་ཀྱི་ཕྱག་རྒྱའོ། །ཐམས་ཅད་འདེབས་དང་ངེས་པར་འདེབས། །ཀུན་འདེབས་གྱེན་དུ་འདེབས་པའི་གར། །འདི་དག་
འཕྲོག་པའི་ཕྱག་རྒྱ་སྟེ། །གནས་གསུམ་དག་ཀྱང་འཕྲོག་པར་བྱེད། །འཕྲོག་པ་ཐམས་ཅད་ཀྱི་ཕྱག་རྒྱའོ། །ཀུན་ཏུ་ཀུན་ནས་ཐམས་ཅད་ཀྱི། །རྟག་ཏུ་བདག་ཉིད་རྣམ་པ་ཀུན། །མདའ་གཞུའི་དཔྱད་ཀྱི་ཕྱག་རྒྱའི་མཆོག །མི་འགྱུར་དམ་པ་འགྲུབ་པར་འགྱུར། །དགྲ་ཆ་
ཐམས་ཅད་ཀྱི་ཕྱག་རྒྱ་ཤེས་པའོ། །སྲིན་ལག་གཉིས་ཀྱི་ནང་དུ་ནི། །མཐེ་བོ་ལེགས་པར་གཞག་པར་བྱ། །དེ་ནས་ཁུ་ཚུར་བཅངས་ནས་ནི། །མཛུབ་མོ་ལེགས་པར་དགུག་པར་བྱ། །རྡོ་རྗེ་ཁུ་ཚུར་དཔལ་གྱི་རྒྱ། །རྡོ་རྗེ་སེམས་དཔའ་དཔལ་ལ་གནས། །ལས་ཀྱི་དངོས་གྲུབ་
རབ་འབྱམ་རྣམས། །མ་ལུས་པར་ནི་མྱུར་དུ་འགྲུབ། །དཔལ་རྡོ་རྗེ་ཁུ་ཚུར་གྱི་ཕྱག་རྒྱའོ། །རྡོ་རྗེ་ཁུ་ཚུར་ལེགས་བཅངས་ལ། །བདག་གིས་མཐེ་བོའི་ནང་དུ་གཞུག །ཞི་བའི་ལས་རྣམས་རབ་གྲུབ་པས། །མ་ལུས་ལུས་པ་མེད་པར་འགྲུབ། །དེ་བཞིན་གཤེགས་པ་ཐམས་ཅད་ཀྱི་
ཁུ་ཚུར་རོ། །རྡོ་རྗེ་ཁུ་ཚུར་ལེགས་བཅངས་ལ། །མཐེའུ་ཆུང་གཉིས་ནི་རབ་བརྐྱང་ནས། །མཁའ་འགྲོའི་ལས་རྣམས་ཐམས་ཅད་ནི། །མ་ལུས་ལུས་པ་མེད་པར་འགྲུབ། །དཔལ་རྡོ་རྗེ་ཧེ་རུ་ཀའི་ཁུ་ཚུར་གྱི་ཕྱག་རྒྱའོ། །བརྡེག་པའི་ཁུ་ཚུར་བཅངས་པ་ལས། །མཐེ་བོ་དག་ལ་གུང་
མོ་བཞག །དཔལ་པདྨོའི་ཁུ་ཚུར་གྲུབ་པ་སྟེ། །ཐམས་ཅད་དག་པའི་ལས་ལ་སྦྱར། །དཔལ་པདྨོའི་ཁུ་ཚུར་རོ། །ཁུ་ཚུར་རྡོ་རྗེ་རིན་ཆེན་མཆོག །འབེབས་པ་ཐམས་ཅད་ཡོངས་རྫོགས་པ། །རང་དོན་ལས་རྣམས་གྲུབ་པ་ནི། །མ་ལུས་ལུས་པ་མེད་པར་འགྲུབ། །དཔལ་རྡོ་རྗེ་རིན་
པོ་ཆེའི་ཁུ་ཚུར་གྱི་ཕྱག་རྒྱའོ། །རྡོ་རྗེ་ཁུ་ཚུར་དཔལ་བཅངས་ལ། །སོར་མོ་ཐམས་ཅད་ཡོངས་སུ་བཟུང་། །རྟུལ་ཕོད་ལས་རྣམས་ཐམས་ཅད་ནི། །མ་ལུས་ལུས་པ་མེད་པར་འགྲུབ། །ལས་ཐམས་ཅད་ཀྱི་ཕྱག་རྒྱ་ཤེས་པའོ། །རྐང་པ་བརྐྱང་དང་གནོན་པ་དང་། །བསྐུམ་ནས་

བཏེག་པའི་སྟབས་དག་དང་། །གཡས་དང་གཡོན་གྱི་སྦྱོར་བ་ཡིས། །གཟུགས་རྣམས་ཐམས་ཅད་གནོན་པར་བྱ། །སྡིག་མེད་སྟོབས་ཀྱིས་ངོ་འཐོན་དུ། །རྣམ་པར་སྣང་མཛད་དཔལ་མནན་ནས། །ཀུན་ཏུ་བྱང་ཆུབ་ཡོངས་བཀུག་སྟེ། །བདག་གི་སྤྱད་པར་དེ་སྤྱོད་དོ། །
སྡིག་མེད་སྟོབས་ཀྱིས་ངོ་འཐོན་དུ། །རྡོ་རྗེ་འཛིན་པ་དཔལ་མནན་ནས། །ཀུན་ཏུ་གྲུབ་པ་ཡོངས་བཀུག་སྟེ། །བདག་གི་སྤྱད་པར་དེ་སྤྱོད་དོ། །སྡིག་མེད་སྟོབས་ཀྱིས་ངོ་འཐོན་དུ། །སྤྱན་རས་གཟིགས་དབང་དཔལ་མནན་ནས། །ཀུན་ཏུ་དཔལ་མོ་ཡོངས་བཀུག་སྟེ། །བདག་
གི་སྤྱད་པར་དེ་སྤྱོད་དོ། །སྡིག་མེད་སྟོབས་ཀྱིས་ངོ་འཐོན་དུ། །རྡོ་རྗེ་ཉི་མ་དཔལ་མནན་ནས། །ཀུན་ཏུ་ལོངས་སྤྱོད་ཡོངས་བཀུག་སྟེ། །བདག་གི་སྤྱད་པར་དེ་སྤྱོད་དོ། །སྡིག་མེད་སྟོབས་ཀྱིས་ངོ་འཐོན་དུ། །རྟ་མཆོག་དམ་པ་དཔལ་མནན་ནས། །ཐམས་ཅད་དབང་ཕྱུག་ཡོངས་
བཀུག་སྟེ། །བདག་གི་སྤྱད་པར་དེ་སྤྱོད་དོ། །བྱང་ཆུབ་ཕ་རོལ་ཕྱིན་པ་དང་། །གྲུབ་དང་གཟུངས་དང་ས་རྣམས་དང་། །རིག་དང་ཕྱག་རྒྱ་རྣམས་མནན་ནས། །བདག་གི་སྤྱད་པར་དེ་སྤྱོད་དོ། །སྡིག་མེད་སྟོབས་ཀྱིས་ངོ་འཐོན་དུ། །དབང་ཕྱུག་དམ་པ་མནན་ནས་ནི། །མིག་
གསུམ་པ་ལས་གསུམ་གྲུབ་བཀུག །བདག་གི་སྤྱད་པར་དེ་སྤྱོད་དོ། །སྡིག་མེད་སྟོབས་ཀྱིས་ངོ་འཐོན་དུ། །མཐུ་བོ་ཆེ་ཡང་མནན་ནས་ནི། །སྙིང་ལས་དཔའ་མོ་ཡོངས་བཀུག་སྟེ། །བདག་གི་སྤྱད་པར་དེ་སྤྱོད་དོ། །སྡིག་མེད་སྟོབས་ཀྱིས་ངོ་འཐོན་དུ། །སྐྱེ་དགུའི་བདག་པོ་མནན་
ནས་ནི། །མོས་ལས་གྲོལ་མ་ཡོངས་བཀུག་ནས། །བདག་གི་སྤྱད་པར་དེ་སྤྱོད་དོ། །སྡིག་མེད་སྟོབས་ཀྱིས་ངོ་འཐོན་དུ། །རབ་དགའི་དབང་ཕྱུག་མནན་ནས་ནི། །ཀུན་གྱི་བདག་ལས་དགའ་བར་བཀུག །བདག་གི་སྤྱད་པར་དེ་སྤྱོད་དོ། །འཇིགས་ལ་སོགས་པའི་ལྷ་མོ་
དང་། །མ་མོ་བྱད་མའི་མ་མོ་དང་། །མཁའ་འགྲོ་མ་རྣམས་མནན་ནས་ནི། །བདག་གི་སྤྱད་པར་དེ་སྤྱོད་དོ། །དེ་བཞིན་ཀུ་བེ་ར་ལ་སོགས། །རིག་པ་འགྲུབ་པ་སྤྱོད་པ་དང་། །མི་ཡི་རྒྱལ་པོ་ལ་སོགས་ཀྱང་། །མནན་ནས་བདག་གི་སྤྱད་པ་སྤྱོད། །འགྲོ་བ་དང་ནི་མི་འགྲོ་

བའི། །དངོས་པོ་ཐམས་ཅད་མ་ལུས་པའང་། །རྣལ་འབྱོར་བདག་ཉིད་དེས་མནན་ནས། །བདག་གི་སྤྱད་པར་དེ་སྤྱོད་དོ། །དཔལ་རྡོ་རྗེ་གནོན་པའི་ཕྱག་རྒྱ་ཤེས་པའོ། །ཁུ་ཚུར་སྙིང་གར་བཅངས་པ་ནི། །བུད་མེད་ཕྱག་རྒྱར་དེ་བཤད་དེ། །བུད་མེད་སྦྱོར་བ་མ་ལུས་པ། །
ལུས་པ་མེད་པའང་ཐམས་ཅད་འགྲུབ། །གཡོན་པ་འགྱིང་བའི་ཚུལ་བྱས་ནས། །ལག་གཡས་བདག་གི་སྙིང་གར་ནི། །གྱེན་དུ་དྲང་བའི་ཚུལ་བྱས་ནས། །བུད་མེད་ཐམས་ཅད་དབང་དུ་འགྱུར། །དཔལ་རྡོ་རྗེ་འགྱིང་བའོ། །དཔལ་ལྡན་སྣ་ཚོགས་པདྨོ་འཛིན། །གཡོན་པ་བརྡེག་
པའི་ཁུ་ཚུར་དང་། །གཡས་པར་ལྡང་བར་གྱུར་པ་དང་། །སངས་རྒྱས་དབང་ཕྱུག་ཏིང་འཛིན་བྱ། །སངས་རྒྱས་ཐམས་ཅད་དུ་འཕར་བའོ། །གཡོན་པ་དྲིལ་བུའི་སྒྲ་སྒྲོགས་ཤིང་། །གཡས་པ་ཡི་ནི་ལག་པ་ཡིས། །རྡོ་རྗེ་གྱེན་དུ་གསོར་ཞིང་བསྐོར། །སྒྱུ་མ་ཐམས་ཅད་འབྱུང་
བར་བྱ། །དཔལ་རྡོ་རྗེ་སྒྱུ་མའི་དབང་ཕྱུག་མའོ། །གཡོན་པ་གཡོན་པའི་བརླ་ལ་བཞག །ལག་པ་གཡས་པའི་མཛུབ་མོ་ཡི། །རྩེ་མོས་པདྨ་དམ་པ་འཛིན། །གཡས་པའི་བརླ་ལ་ལག་ངར་བཞག །མི་དགེ་བ་ཐམས་ཅད་སེལ་བའི་ཕྱག་རྒྱའོ། །བདག་གི་སྙིང་གར་འདྲེན་
ཚུལ་དུ། །གཡོན་པ་ནོར་བུ་རིན་ཆེན་འཛིན། །གཡས་པ་རེ་བ་ཀུན་རྫོགས་པའི། །བུད་མེད་ལ་སོགས་རིན་ཆེན་འཛིན། །བསམ་པ་ཐམས་ཅད་ཡོངས་སུ་རྫོགས་པར་བྱེད་པའོ། །བདག་གི་སྙིང་གར་འདྲེན་ཚུལ་དུ། །པདྨ་སྣ་ཚོགས་དམ་པ་འཛིན། །གཡས་པ་རྡོ་རྗེ་འགྱིང་བ་
ཡིས། །དབང་ཕྱུག་དམ་པ་ཐོབ་པར་འགྱུར། །དངོས་གྲུབ་ཀུན་གྱི་དབང་ཕྱུག་གི་ཕྱག་རྒྱ་ཤེས་པའོ། །ཞེས་བཅོམ་ལྡན་འདས་རྡོ་རྗེ་སེམས་དཔས་དེ་སྐད་གསུངས་སོ། །སངས་རྒྱས་ཐམས་ཅད་དང་མཉམ་པར་སྦྱོར་བ་མཁའ་འགྲོ་མ་སྒྱུ་མ་བདེ་བའི་མཆོག་ལས་ཀུན་ཏུ་རྣམ་པ་སྣ་
ཚོགས་ཀྱི་དམ་ཚིག་གི་ཕྱག་རྒྱའི་རྟོག་པ་སྟེ་དགུ་པའོ།། །།དེ་ནས་ཀུན་ཏུ་སྣ་ཚོགས་འདི། །ཕྱག་རྒྱ་ཤེས་པའང་གྲུབ་པ་ནི། །ཀུན་ཏུ་སྣ་ཚོགས་སྦྱོར་བ་ཡིས། །ཀུན་ཏུ་སྣ་ཚོགས་བཤད་པར་བྱ། །སྨིན་མ་མིག་དང་སོ་དང་མཆུ། །ཁ་དང་ལུས་དང་རྐང་ལག་གིས། །ཆ་ལུགས་

བཞིན་དུ་གར་བྱེད་པས། །ཕྱག་རྒྱ་ཐམས་ཅད་ཡོངས་སུ་དགྲོལ། །རྡོ་རྗེ་སེམས་དཔའ་དཔལ་སྦྱོར་བས། །ལྷ་མོ་ཀུན་དང་འདུས་པ་ནི། །ཀུན་ཏུ་སྣ་ཚོགས་སྐལ་བཟང་པོ། །རབ་ཏུ་བདེ་བར་འགྲུབ་པར་འགྱུར། །ཕྱག་རྒྱ་འདི་ཡིས་བཏབ་ན་ནི། །སངས་རྒྱས་ཐམས་ཅད་བྱིན་གྱིས་
རློབ། །ལེགས་པར་བྱིན་གྱིས་བརླབས་ན་ནི། །སངས་རྒྱས་ཐམས་ཅད་འདུས་པར་འགྱུར། །སངས་རྒྱས་ཀུན་དང་མཉམ་སྦྱོར་བས། །སངས་རྒྱས་ཀུན་དང་མཉམ་པར་འགྱུར། །སངས་རྒྱས་ཀུན་དང་མཉམ་པས་ན། །སངས་རྒྱས་ཐམས་ཅད་རབ་ཏུ་འགྲུབ། །རྡོ་རྗེ་སེམས་
དཔའ་དཔལ་སྦྱོར་བའི། །མཐུ་ཉིད་ཀྱིས་ནི་ཐམས་ཅད་དུ། །མདོར་ན་ཕྱག་རྒྱ་ཐམས་ཅད་ནི། །སོ་སོ་དག་ནས་གྲུབ་པ་སྟེ། །བལྟ་བས་མི་ངོམས་པ་ཡི་སྐུ། །ཐམས་ཅད་བདག་ཉིད་སྟོན་པར་མཛད། །ལེགས་སོ་ལེགས་སོ་ཞེས་གྲུབ་པའི། །དམ་པ་དག་ཀྱང་རབ་ཏུ་སྩོལ། །
བསམ་པ་ཐམས་ཅད་ཡོངས་རྫོགས་པའི། །གྲུབ་པ་ཀུན་མཆོག་ཉམས་དགའ་བ། །ཇི་ལྟར་འདོད་པའི་ལོངས་སྤྱོད་དུ། །ཐམས་ཅད་ཀྱི་ནི་བདག་ཉིད་སྩོལ། །དང་པོ་ཀུན་ལས་བྱུང་བ་ཡི། །མཆོད་པའི་སྤྲིན་ཆེན་ཐམས་ཅད་ཀྱི། །བཀོད་པ་རབ་འབྱམ་ཚོགས་རྣམས་ཀྱིས། །
ཐམས་ཅད་བདག་ཉིད་མཆོད་པ་མཛད། །དཔལ་ལྡན་གཡོན་པ་འགྱིང་དང་བཅས། །དཔལ་ལྡན་ལག་པ་གཡས་པ་ཡི། །པདྨོ་ཁུ་ཚུར་དཔྲལ་བར་བཞག །བདག་གི་མིག་ནི་གྱེན་དུ་བལྟ། །འདི་ནི་རྡོ་རྗེ་སེམས་དཔའ་ཡི། །ཕྱག་རྒྱ་ཐམས་ཅད་རབ་སྒྲུབ་པའོ། །གྱེན་དུ་འཕར་
བའི་དངོས་གྲུབ་དང་། །རབ་འབྱམ་ལས་རྣམས་མྱུར་དུ་འགྲུབ། །ཕྱག་རྒྱ་འདི་ཡིས་བཏབ་ན་ནི། །ཁམས་གསུམ་པ་དག་མ་ལུས་པ། །རྒྱས་བཏབ་རྨོངས་བྱས་ཟོས་པ་དང་། །ཐལ་བར་གྱུར་པའང་འཚོ་བར་བྱེད། །བཅོམ་ལྡན་འདས་རྡོ་རྗེ་སེམས་དཔས་དེ་སྐད་གསུངས་སོ། །
ཀུན་ཏུ་སྣ་ཚོགས་སྐལ་བཟང་པོ། །དཔལ་རྡོ་རྗེ་པདྨ་གྱེན་དུ་འཕར་བའི་སྤྱན་ཞེས་བྱ་བའི་ཕྱག་རྒྱ་སྟེ། རྣམ་པ་སྣ་ཚོགས་ཐམས་ཅད་ཀྱི་ཕྱག་རྒྱ་དང་ཕྱག་རྒྱའི་ལན་ཞེས་བྱའོ། །སངས་རྒྱས་ཐམས་ཅད་འདུས་པ་ཡིས། །རྟག་ཏུ་དཔག་མེད་ཚེ་དང་ལྡན། །ནམ་མཁའི་དབྱིངས་

ཀྱི་མཐའ་ཀླས་པའི། །བདེན་པའི་ཚིག་ནི་རབ་ཏུ་སྨྲ། །མཐའ་ཡས་པ་དང་མུ་མེད་པའི། །རྟོག་པ་ཀུན་དང་འདི་ཡི་ནི། །མཐུ་དང་ཡོན་ཏན་བསྔགས་པའི་མཐའ། །བརྗོད་པ་དག་ཏུ་ཡོངས་མི་ནུས། །མཐུ་དང་རང་བཞིན་དག་གིས་གྲུབ། །ངོ་བོ་ཉིད་ཀྱིས་རྟག་ཏུ་
འགྲུབ། །སོ་སོར་རྗེས་གྲུབ་བདེ་བ་སྟེར། །འདི་ནི་གསང་མཆོག་མཆོག་གི་མཆོག །སེམས་ཅན་དོན་ཕྱིར་ལས་རྣམས་སྦྱོང་བ་དང་། །རྣམ་པར་དག་པར་རྒྱལ་བ་ཡོང་མི་མཛད། །འདི་ལ་བགེགས་མེད་བདུད་ཀྱང་ཡོད་མ་ཡིན། །རྟོག་པས་མི་འགྲུབ་ཐར་བར་ཡོང་མི་ནུས། །
མི་བརྟན་པ་དང་བདུད་དུ་ང་མི་འགྱུར། །བརྟན་པར་བྱ་བའི་ཕྱིར་ཡང་ང་མི་འདོམས། །གང་ཞིག་རང་གི་བདེ་བས་ང་སྒྲུབ་ན། །དངོས་གྲུབ་མཆོག་གིས་ང་ཡི་བསྟན་པར་བྱེད། །ཀུན་ཏུ་སྣ་ཚོགས་པས་ནི་དེ་སྐད་གསུངས། །བཅོམ་ལྡན་དེ་བཞིན་གཤེགས་པ་རྟག་ཏུ་དགྱེས། །རྡོ་རྗེ་
སེམས་དཔའ་དཔལ་གྱིས་ལེགས་གསུངས་ལ། །མངོན་པར་བསྟོད་ཅིང་རབ་ཏུ་དགྱེས་པར་གྱུར། །ལེའུ་བཅུ་པའོ།། །།རྣམ་མང་རྗེས་ཆགས་དགའ་བའི་པདྨོ་རྣམ་དག་མཆོད་པ་དང་། །རྟ་མཆོག་རྣལ་འབྱོར་བདེ་བས་གསལ་བར་རྗེས་སུ་མཆོད་ན་ནི། །རབ་ཏུ་
བདེ་བའི་རྣལ་འབྱོར་དམ་པ་སྐལ་བཟང་དགའ་བའི་མཆོག །རབ་མཆོག་བདེ་བའི་རང་བཞིན་དམ་ཚིག་བདེ་བས་རྗེས་གྲུབ་འགྱུར། །བཅོམ་ལྡན་འདས་དཔལ་རྡོ་རྗེ་སེམས་དཔས་དེ་སྐད་གསུངས་སོ། །སངས་རྒྱས་ཐམས་ཅད་དང་མཉམ་པར་སྦྱོར་བ་མཁའ་འགྲོ་སྒྱུ་མ་བདེ་བའི་
མཆོག་ཅེས་བྱ་བའི་རྟོག་པ། རྟོག་པ་ཐམས་ཅད་ཀྱི་འཁོར་ལོ་བསྐོར་བ་ཆེན་པོ་བདེ་བ་ཆེན་པོ་རྫོགས་སོ།། ༄༅༅། །རྒྱ་གར་སྐད་དུ། སརྦ་ཀལྤ་ས་མུཙྪ་ཡ་ནཱ་མ་སརྦ་བུདྡྷ་ས་མ་ཡོ་ག་ཌཱ་ཀི་ནཱི་ཛཱ་ལ་སམྦ་ར་ཨུཏྟ་ར་ཨུཏྟ་
ར་ཏནྟྲ། བོད་སྐད་དུ། རྟོག་པ་ཐམས་ཅད་འདུས་པ་ཞེས་བྱ་བ་སངས་རྒྱས་ཐམས་ཅད་དང་མཉམ་པར་སྦྱོར་བ་མཁའ་འགྲོ་སྒྱུ་མ་བདེ་བའི་མཆོག་གི་རྒྱུད་ཕྱི་མའི་ཕྱི་མ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སངས་རྒྱས་ཐམས་ཅད་ཕྱག་འཚལ་ཏེ། །མ་ལུས་ལུས་

པ་མེད་པར་གྲུབ། །རྣམ་རྟོག་མེད་པའི་སེམས་ལ་ནི། །དེ་ཁོ་ན་ཉིད་ངེས་པར་གནས། །སེམས་དཔའ་སངས་རྒྱས་ཀུན་གྱི་དངོས། །རྡོ་རྗེ་སེམས་དཔའ་བདེ་བའི་མཆོག །གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །འདོད་ཆགས་ཆེན་པོ་
བདེ་ཆེན་པོ། །བདེ་ཆེན་རྡོ་རྗེ་ཆེན་པོ་བས། །རྡོ་རྗེ་འཛིན་དང་ལྷན་ཅིག་པའི། །བདེ་གཤེགས་མགོན་མཆོག་རྣམས་ཀྱིས་བཞུགས། །ཐམས་ཅད་མཆོག་འགྱུར་འདོད་ཆེན་གྱིས། །དངོས་གྲུབ་དབང་ཕྱུག་རབ་གྲུབ་ཕྱིར། །སངས་རྒྱས་ཐམས་ཅད་མཉམ་སྦྱོར་ལས། །རྟོག་
པ་འདུས་པས་བཀའ་སྩལ་འཚལ། །རྣམ་པར་མི་རྟོག་ཆོས་བདག་ལས། །རྟོག་པའི་དོན་འདི་གང་ལ་གསུངས། །ཅི་ཡི་སླད་དུའང་རྒྱུད་ཕྱི་མ། །དང་པོའི་ས་མཆོག་ཇི་ལྟར་ལགས། །གདོད་མ་ཐ་མ་མེད་ཉིད་ཡང་། །རྡོ་རྗེ་སེམས་དཔའ་དེ་བཞིན་ཏེ། །ཡིག་འབྲུ་ཇི་ལྟར་གསུངས་
པ་ལགས། །སྔགས་ཕྱུང་བ་ཡང་ཅི་འདྲ་སྟེ། །ཤིན་ཏུ་དགའ་དང་བཟང་ཉིད་དེ། །རྡོ་རྗེ་སྙིང་པོ་གཙོ་བོ་གཙོ། །སེམས་དང་སེམས་དཔའི་ཏིང་འཛིན་ཡང་། །དེ་བཞིན་རྡོ་རྗེ་རྡོ་རྗེ་འཛིན། །རྡོ་རྗེ་འཛིན་ཉིད་ཆེན་པོ་ཡང་། །བྱང་ཆུབ་སྤྱོད་པ་རྣམས་ཅི་ལྟར། །བདུད་དང་བདུད་ལས་
རྒྱལ་བ་ཡང་། །སངས་རྒྱས་བྱང་ཆུབ་ཇི་ལྟར་ལགས། །རྡོ་རྗེ་གཏུམ་པོ་ཐར་བྱེད་དང་། །ཕྱག་ན་རྡོ་རྗེ་ཡང་ཇི་ལྟར། །དང་པོ་རིགས་བསྐྱེད་ཇི་ལྟར་ལགས། །འདོད་པའི་ཐར་པ་རྣམ་པ་ཅི། །མགོན་པོ་རྣམ་གསུམ་ཇི་ལྟར་འཚལ། །ཐམས་ཅད་ཡང་ཉིད་ཇི་ལྟར་ལགས། །
ཇི་ལྟར་དང་པོ་སྙིང་པོ་འབྱུང་། །ཉེ་བའི་སྙིང་པོ་དེ་ཇི་ལྟར། །བདེ་བ་ཆེན་པོ་རྡོ་རྗེ་ཆེ། །དོན་ཡོད་དམ་ཚིག་ཇི་ལྟར་ལགས། །དཀྱིལ་འཁོར་ཇི་ལྟར་གསུངས་པར་གྱུར། །དེ་ཡི་རྣམ་སྨིན་ཅི་འདྲ་སྟེ། །ཐིག་གདབ་དེ་བཞིན་རྟོག་པ་ཡིས། །དངོས་གྲུབ་ཇི་ལྟར་བཤད་པ་ལགས། །
གསང་བ་ལྔ་དང་དེ་ཉིད་ཆེ། །གང་ལགས་ཅི་འདྲ་དེ་བཞིན་ཏེ། །དཀྱིལ་འཁོར་གཙོ་བོ་རྣམས་དང་ནི། །རིགས་རྣམས་ཀྱང་ནི་ཇི་ལྟར་ལགས། །ཐམས་ཅད་དབང་བསྐུར་དེ་ཉིད་དང་། །དེ་ཉིད་ཚོགས་ཀྱི་ཕྱག་མཚན་ཡང་། །ཐམས་ཅད་དགུག་དང་མཆོད་ཆེན་དང་། །རང་

གི་བྱིན་རླབས་སོགས་གྲུབ་པ། །དེ་རྣམས་དེ་ཉིད་གསང་ཆེན་དང་། །དམ་པ་དང་ནི་དོན་དམ་པ། །དམ་པའི་ཡི་གེ་གྲུབ་དོན་དུ། །ཐམས་ཅད་མི་གསུང་འོས་མ་ལགས། །སངས་རྒྱས་ཐམས་ཅད་དང་མཉམ་པར་སྦྱོར་བ་མཁའ་འགྲོ་མ་སྒྱུ་མ་བདེ་བའི་མཆོག་ལས་
དེ་ཁོ་ན་ཉིད་ཐམས་ཅད་ངེས་ཚིག་གི་རྟོག་པ་སྟེ་བཅྭ་བརྒྱད་པའོ།། །།དེ་ནས་སྟོན་པ་རྡོ་རྗེ་འཛིན། །རྟོག་པ་ཀུན་གྱི་གཙོ་ཆེན་པོས། །ཐེ་ཙོམ་ཀུན་གྱི་ཚོགས་གནས་ནས། །དོན་དམ་འཛིན་པ་ཡང་བཀའ་སྩལ། །དེ་ལ་ཇི་ལྟར་རྟོག་པའི་དོན་རྒྱུད་ཡིན་ཞེ་ན། རྣམ་པར་མི་རྟོག་
ཆོས་དག་ལས། །སེམས་ཅན་དོན་དུ་ཡོངས་སུ་རྟོག །དེ་ཕྱིར་རྟོག་པར་ཡང་དག་བཤད། །རྟོག་པ་ཡོངས་སུ་དག་ཕྱིར་རོ། །དེ་ལ་ཇི་ལྟར་རྒྱུད་ཕྱི་མ་ཡིན་ཞེ་ན། རྒྱུད་ནི་རབ་ཏུ་འབྲེལ་པར་བཤད། །ཕྱི་མ་གོང་དུ་ཕྱུང་བ་ཡིན། །དེ་ཉིད་གསང་བ་གསང་ཆེན་རྣམས། །དེ་ཡང་
རྒྱུད་ནི་ཕྱི་མར་འདོད། །དེ་ལ་ཇི་ལྟར་དང་པོ་ཉིད་ཀྱི་ཡེ་ཤེས་ཡིན་ཞེ་ན། ནམ་མཁའ་ཀུན་ཏུ་རབ་གནས་པ། །རྡོ་རྗེ་ཀུན་གྱི་དངོས་པོ་མཆོག །བདེ་ཆེན་དགྱེས་པ་ཆེན་པོ་དེ། །དམ་པའི་ཡི་གེ་གཞལ་ཡས་ཁང་། །ཞེས་བཅོམ་ལྡན་འདས་དཔལ་རྡོ་རྗེ་སེམས་དཔས་གསུངས་སོ། །དེ་
ལ་ཇི་ལྟར་གདོད་མ་དང་ཐ་མ་མེད་པའི་རྡོ་རྗེ་སེམས་དཔའ་ཡིན་ཞེ་ན། ཡི་གེ་ཀ་སོགས་དྷ་ཡིག་མཐའ། །ང་ཉ་སྤངས་ནས་འཇུག་པར་བྱ། །ཡི་གེ་དྷ་སོགས་ཥ་ཡི་མཐའ། །ཕྲེང་བ་གཉིས་པ་ཡང་དག་བྲི། །དབུས་གནས་པར་ནི་ཨ་ཡིག་ཕྲེང་། །ཟླ་བའི་དཀྱིལ་འཁོར་ལ་བཀོད་དེ། །
ཐིག་ལེ་ཟླ་ཚེས་དང་ལྡན་པར། །ཚེག་དྲག་ཟླ་བ་གཉིས་ཡིན་ཏེ། །ཨ་ཡིག་མི་འགྱུར་བསྒོམ་པར་བྱ། །དབུས་སུ་རྡོ་རྗེའི་ངོ་བོར་གནས། །དེ་དབུས་རྟག་ཏུ་བསྒོམ་པ་ནི། །འདོད་ཆགས་ཆེན་པོ་བདེ་བ་ཆེ། །འདི་དེ་སངས་རྒྱས་ཐམས་ཅད་ཀྱི། །སངས་རྒྱས་རི་མོ་གྲགས་པ་ཡིན། །
དེ་ལས་འགྲོ་བ་གཡོ་མི་གཡོ། །ཐམས་ཅད་ཡང་དག་འབྱུང་བས་ནི། །ནམ་མཁའ་ལས་བྱུང་མཚན་མའི་ཕྱིར། །གདོད་མ་ཐ་མ་མེད་མཆོག་ཡིན། །རྡོ་རྗེ་ཆེན་པོ་དངོས་སེམས་ནི། །རྡོ་རྗེ་སེམས་དཔའ་ཞེས་འདོད་དོ། །དེ་ལ་བཅོམ་ལྡན་འདས་དེ་གང་ཞེ་ན། དངོས་གྲུབ་ཆེན་

པོ་ཀུན་གྱི་མཆོག །དབང་ཕྱུག་ཆེན་པོ་རིག་པ་ལྷ། །རྒྱལ་པོ་ཆེན་པོ་རྡོ་རྗེ་འཛིན། །དམ་པ་ཡི་གེ་ཤིན་ཏུ་དགའ། །དེ་ལ་ཇི་ལྟར་ཡི་གེ་རྟོག་པ་ཡིན་ཞེ་ན། །ཡི་གེ་ཨ་སོགས་ཀྵ་མཐའ་ནི། །ཡི་གེར་ཡང་དག་བཤད་པ་སྟེ། །མི་ཟད་དགའ་བའི་རྡོ་རྗེ་ཅན། །དེ་ཉིད་ཀུན་དོན་མཚན་
ཉིད་ཕྱིར། །དེ་ལ་ཇི་ལྟར་སྔགས་འབྱུང་བ་ཡིན་ཞེ་ན། །རྡོ་རྗེ་སེམས་སོགས་འཁོར་ལོ་ལ། །གང་རྣམས་སྔགས་སུ་ཆེར་བཤད་པ། །དེ་རྣམས་བྱུང་བའི་དོན་དུ་ནི། །རྡོ་རྗེ་ཅན་གྱིས་ཡང་བཀའ་སྩལ། །གུར་གུམ་ལ་སོགས་བྱུགས་པ་ལ། །བྲི་སྐུ་ལ་སོགས་རྣམ་བརྒྱན་ནས། །
བླ་རེ་ལ་སོགས་བྲེས་ནས་སུ། །རྟག་ཏུ་རེའུ་མིག་བཞི་བརྩམས་ནས། །གྲུ་བཞི་གཞལ་ཡས་ཁང་བྱས་ཏེ། །རེའུ་མིག་ཕྱོགས་བཞིར་འབར་བར་བྱས། །རེའུ་མིག་སུམ་ཅུ་ཐམ་པ་ལ། །བཅུ་དགུ་དང་ནི་ལྡན་པར་བྱ། །བརྒྱ་ཕྱེད་སྟན་ལ་གནས་པ་ལ། །སྡེ་པ་ལྔ་མཐའ་ཐིག་
ལེ་ཡིས། །སྤྱི་བོ་གཙུག་ལ་རྟག་པ་ཡི། །ཀ་དང་ཤ་ཞེས་བྱ་བ་ནི། །དབུས་ཀྱི་རེའུ་མིག་ལ་བྲིའོ། །དེ་ཡི་ཕྱི་རོལ་གནས་བརྒྱད་དག །མཚམས་དང་ཕྱོགས་ཀྱི་རེའུ་མིག་ལ། །དབང་ལྡན་ལ་སོགས་རིམ་པ་རུ། །ཡ་དང་ཤ་ཡི་སྡེ་བཀོད་དོ། །མེ་མཚམས་ལ་སོགས་རེའུ་མིག་
ལ། །མ་ཡི་ཡིག་འབྲུ་བཞི་པོ་དང་། །ཨ་ཡིག་ས་བོན་ལ་བརྟེན་ནས། །ས་བོན་བཅུ་གཉིས་དགོད་པར་བྱ། །དབང་ལྡན་ལ་སོགས་རེའུ་མིག་ལ། །ཀ་ཡིག་ལ་སོགས་རིམ་པར་དགོད། །དེ་ལྟར་བཞི་ལ་རིམ་པར་ནི། །ཐམས་ཅད་རྣམ་པར་གནས་བྱས་ཏེ། །ཀ་སོགས་
རེའུ་མིག་བཟུང་ནས་སུ། །ཡིག་འབྲུ་དམ་པ་ཕྱུང་བར་བྱ། །ཤིན་ཏུ་དགའ་ཆེན་རྒྱལ་པོ་ནི། །སྦྱོར་བ་ཐམས་ཅད་དབང་ཕྱུག་གཙོ། །རེའུ་མིག་ཉི་ཤུ་རྩ་བཞི་ལ། །གནས་པ་ཟླ་ཕྱེད་གཙུག་ཕུད་ཞལ། །དེ་འོག་སུམ་ཅུ་རྩ་གཉིས་ནི། །དགའ་བ་རྡོ་རྗེ་ཅན་གྱིས་ཕྱུང་། །རེའུ་
མིག་བཅུ་བཞི་ཞེས་པ་ལས། །གནས་པ་ཚེག་དྲག་དང་ལྡན་པ། །རེའུ་མིག་ཉི་ཤུ་རྩ་བཞིར་གནས། །སུམ་ཅུ་རྩ་བཞི་ཟླ་དང་ལྡན། །རེའུ་མིག་སུམ་ཅུ་རྩ་གཅིག་ལ། །གནས་པ་ང་རོ་ཐིག་ལེ་ལྡན། །རེའུ་མིག་ཉི་ཤུ་རྩ་བཞི་ལ། །གནས་པ་ཚེག་དྲག་སྦྱོར་བ་བྱ། །སུམ་

ཅུ་རྩ་བརྒྱད་སྦྱོར་བ་ཡིས། །དེ་ནི་བཞི་པར་རྣམ་པར་བཤད། །བདེ་བ་ཆེན་པོ་རྒྱལ་ཆེན་པོ། །ལྷ་མོ་དམ་པ་བརྟག་པའོ། །རེའུ་མིག་བཅུ་གཅིག་ལ་གནས་པ། །ཐིག་ལེ་ང་རོར་ཡང་དག་ལྡན། །རེའུ་མིག་བརྒྱད་པ་ལ་གནས་པ། །བཅུ་དགུ་དག་ནི་ལྡན་པ་སྟེ། །
དེ་འོག་སུམ་ཅུ་རྩ་བཞི་དང་། །ཐིག་ལེ་ང་རོས་བརྒྱན་པའོ། །རེའུ་མིག་ཉི་ཤུ་རྩ་བཞི་ལ། །གནས་པ་ཚེག་དྲག་སྦྱོར་བའོ། །རེའུ་མིག་གཉིས་པ་ལ་བཀོད་པའི། །ཐིག་ལེ་ང་རོ་ལྡན་པའོ། །གླིང་བུ་མ་ལ་སོགས་བཏུས་པའི། །སྔགས་ཕྱུང་བ་ནི་མཆོག་ཡིན་ཏེ། །རེའུ་མིག་
སུམ་ཅུ་རྩ་བརྒྱད་ལ། །གནས་པའི་ཐིག་ལེ་ང་རོ་ལྡན། །དབུས་ན་ཉི་ཤུ་རྩ་གཅིག་ལ། །དབུས་ནས་བཅྭ་ལྔ་ཟླ་བ་ཅན། །རེའུ་མིག་སུམ་ཅུ་རྩ་གཅིག་གནས། །དབུས་ནས་བཅྭ་ལྔ་ཟླ་བ་ཅན། །རེའུ་མིག་ཉི་ཤུ་རྩ་གཅིག་གནས། །བཅུ་གཅིག་ཟླ་བ་དང་ལྡན་ཏེ། །ལྷ་མོ་གླིང་བུ་
མ་སོགས་ཀྱི། །སྔགས་ཕྱུང་རྨད་དུ་བྱུང་བའོ། །རེའུ་མིག་བཅུ་པ་ལ་གནས་དང་། །བཅུ་གཅིག་པ་ཡང་དེ་བཞིན་ཏེ། །རེའུ་མིག་སུམ་ཅུ་རྩ་གསུམ་གནས། །བཅུ་དྲུག་པ་ཡང་དེ་བཞིན་ཏེ། །མེ་ཏོག་ལ་སོགས་བསྡུས་པ་ཡི། །འདི་ནི་སྔགས་ཕྱུང་མཆོག་ཡིན་ནོ། །རྟ་མགྲིན་
འཕང་མཐོ་ལྕགས་ཀྱུ་སོགས། །དང་པོ་བྱུང་བའི་ས་བོན་ཉིད། །རྡོ་རྗེ་སེམས་དཔའི་དཀྱིལ་འཁོར་གྱི། །སྒོ་ལ་ནན་ཏན་གྱིས་སྦྱོར་རོ། །ཞེས་དཔལ་རྡོ་རྗེ་སེམས་དཔས་གསུངས་ཏེ། དཔལ་རྡོ་རྗེ་སེམས་དཔའི་དཀྱིལ་འཁོར་གྱི་ཆོས་ཀྱི་ཡི་གེ་འབྱུང་བའི་ཕྱག་རྒྱ་ཤེས་པའོ། །
རེའུ་མིག་གཉིས་པ་ཅན་ཁོ་ན། །ཟླ་ཚེས་གཙུག་དང་ལྡན་པའི་ཞལ། །རྣམ་པར་སྣང་མཛད་རྒྱལ་ཆེན་པོ། །ཀུན་མཆོག་ས་ཡི་དབང་ཕྱུག་ཡིན། །རེའུ་མིག་བཅྭ་ལྔ་གནས་པ་ལ། །ཐིག་ལེ་ང་རོ་ལྡན་པའོ། །རེའུ་མིག་བཅུ་དགུ་ལ་གནས་པ། །ཐིག་ལེ་ང་རོས་བརྒྱན་པའོ། །རེའུ་
མིག་ཉི་ཤུ་རྩ་ལྔར་ལྡན། །ཐིག་ལེ་ང་རོས་བརྒྱན་པའོ། །དབུས་ནས་ཉི་ཤུ་པ་ཉིད་ལ། །ཐིག་ལེ་ང་རོས་བརྒྱན་པའོ། །ཆོས་གོས་མ་ཚོགས་བཞི་དག་གིས། །ས་བོན་འབྱུང་བ་མཆོག་འདི་ཡིན། །རེའུ་མིག་ཉི་ཤུ་རྩ་བཞིར་གནས། །ཐིག་ལེ་ང་རོས་བརྒྱན་པའོ། །རེའུ་མིག་

བདུན་པ་དེ་བཞིན་ཡང་། །དབུས་ནས་བཅྭ་ལྔ་པ་དང་ལྡན། །ཐིག་ལེ་ང་རོ་ལྡན་པ་ནི། །བྱང་དུ་སིལ་སྙན་ཆ་ལང་ངོ་། །དབུས་ནས་ཉི་ཤུ་རྩ་གཅིག་ལ། །གནས་པ་བཅུ་དགུ་དང་ལྡན་པ། །ཐིག་ལེ་ང་རོ་ལྡན་པ་ནི། །རྡོ་རྗེ་རིན་ཆེན་ཆེར་བརྗོད་དོ། །དབུས་ནས་བཅྭ་བརྒྱད་
པ་དག་ཉིད། །ཐིག་ལེ་ང་རོས་བརྒྱན་པ་སྟེ། །སངས་རྒྱས་ཀུན་གྱི་དཀྱིལ་འཁོར་ལ། །ཆོས་ཀྱི་དུང་གི་ཕྱག་རྒྱ་ཆེ། །ཞེས་བཅོམ་ལྡན་འདས་དཔལ་རྡོ་རྗེ་སེམས་དཔས་གསུངས་པ་རྣམ་པར་སྣང་མཛད་ཀྱི་ཆོས་ཀྱི་ཡི་གེ་འབྱུང་བའི་ཕྱག་རྒྱ་ཤེས་པའོ། །ཉི་ཤུ་རྩ་བཞི་རེའུ་མིག་
ལ། །གནས་པ་ཉི་ཤུ་པ་ལྡན་ནི། །ཁྲག་འཐུང་ཞེས་པའི་རྒྱལ་པོ་ཆེ། །ཚེག་དྲག་ལྷག་ཆད་གྱུར་པའོ། །རེའུ་མིག་ཉི་ཤུ་རྩ་བཞི་ལ། །གནས་པ་འོག་ན་བཅུ་དགུར་ལྡན། །རེའུ་མིག་ཉི་ཤུ་གནས་པ་དང་། །སྦྱོར་བ་ཚེག་དྲག་ལྡན་པའོ། །ཚེག་དྲག་དང་ནི་རྩ་བཞི་ལ། །
གནས་པ་དབུས་ནས་བཅུ་གཅིག་ལྡན། །རེའུ་མིག་བཅུ་གཉིས་པ་སྦྱོར་བའི། །ཚེག་དྲག་ལྡན་པར་འདོད་པའོ། །རེའུ་མིག་བཅུ་བཞི་ལ་གནས་པ། །འོག་གི་འདྲེན་པ་ཉི་ཤུ་གཅིག །བཅུ་གཉིས་པ་དང་ཚེག་དྲག་ཅན། །གསུམ་པ་ཅན་དེ་བཤད་པའོ། །རེའུ་མིག་བཅུ་བཞི་
ལ་གནས་པ། །བཅུ་གཉིས་པ་དང་ལྡན་པ་ལ། །ཚེག་དྲག་དང་ནི་མཉམ་སྦྱོར་བ། །ལྷ་མོ་སྣོད་ཆེན་མ་ཡི་འདོད། །རེའུ་མིག་ཉི་ཤུ་རྩ་བཞི་ལ། །གནས་པ་དབུས་ནས་གཉིས་པ་ཅན། །དེ་བཞིན་ཐིག་ལེ་ང་རོར་ལྡན། །ཐིག་ལེ་འབྱུང་གནས་གསུམ་པ་སྟེ། །དབུས་ནས་
བཅུ་པ་གང་ཡིན་པ། །རྟག་ཏུ་ཚེག་དྲག་ལྡན་པ་ནི། །དམར་ཆེན་སོགས་པའི་ལྷ་མོ་ཡི། །བཞི་པོ་དག་ནི་ཕྱུང་བའོ། །རེའུ་མིག་ཉི་ཤུ་རྩ་ལྔ་པ། །གནས་པའི་ཐིག་ལེ་བཅས་པའོ། །དབུས་ལས་དྲུག་པ་གང་ཡིན་པ། །ཐིག་ལེ་ང་རོ་ལྡན་པའོ། །རེའུ་མིག་དེ་བཞིན་བཅུ་བདུན་
པ། །ཐིག་ལེ་ང་རོས་བརྒྱན་པའོ། །རེའུ་མིག་བཅུ་དགུ་ལ་གནས་པ། །ཐིག་ལེ་ང་རོས་བརྒྱན་པའོ། །ལྷ་མོ་མདའ་རྣོན་འཛིན་སོགས་ཀྱི། །ས་བོན་བྱུང་བ་དེ་ངོ་མཚར། །ལྷ་མོ་མེ་ཏོག་མ་སོགས་ཀྱི། །ས་བོན་བྱུང་བ་སྔོན་བསྟན་ཡིན། །གང་དག་སྒོ་སྲུང་བསྟན་པ་ཡང་། །

གཟུགས་མི་མཐུན་པ་ཁོ་ནའོ། །ཞེས་བཅོམ་ལྡན་འདས་དཔལ་རྡོ་རྗེ་སེམས་དཔས་དེ་སྐད་ཅེས་གསུངས་སོ། །མཁའ་འགྲོ་སྒྱུ་མའི་དཀྱིལ་འཁོར་གྱི་ཆོས་ཀྱི་ཡི་གེ་འབྱུང་བའི་ཕྱག་རྒྱ་ཤེས་པའོ། །རེའུ་མིག་ཉི་ཤུ་རྩ་བཞི་ལ། །གནས་པ་བཅུ་དགུའི་གདན་ལ་
གནས། །ཉི་ཤུ་ཚེག་དྲག་སྦྱོར་བ་ནི། །པདྨ་གར་གྱི་དབང་ཕྱུག་ཡིན། །རེའུ་མིག་བཅུ་བཞི་ལ་གནས་པའི། །ཚིག་གཉིས་ལྕི་བ་དེ་བཞིན་ནོ། །རེའུ་མིག་ཉི་ཤུ་རྩ་བཞི་ལ། །གནས་ནས་དབུས་ནས་དགུ་པ་ལྡན། །རྟག་པར་ཐིག་ལེ་དང་ལྡན་ནི། །གཉིས་པ་ཡི་ནི་ཡོངས་
གྲགས་པ། །རེའུ་མིག་སུམ་ཅུ་རྩ་གཅིག་ལ། །གནས་པར་ང་རོ་ཐིག་ལེས་བརྒྱན། །རེའུ་མིག་ཉི་ཤུ་རྩ་བཞི་ལ། །གནས་པ་དབུས་ནས་བཅུ་གསུམ་ལྡན། །ཚེག་དྲག་ཅན་ནི་བཞི་པ་ཡི། །ཁྲོ་གཉེར་མ་ཡི་རྒྱུད་ལས་གྲགས། །རེའུ་མིག་ཉི་ཤུ་རྩ་བཞིར་ལྡན། །དབུས་
ནས་དགུ་པའི་ཐིག་ལེར་བཅས། །རེའུ་མིག་ཉི་ཤུ་རྩ་བཞིར་གནས། །དབུས་ནས་བཅྭ་ལྔ་དང་ལྡན་ནོ། །རེའུ་མིག་བཅུ་གཅིག་ལ་གནས་པ། །ཚེག་དྲག་གིས་ནི་སྦྱོར་བའོ། །རེའུ་མིག་ཉི་ཤུ་རྩ་བཞིར་གནས། །སུམ་ཅུ་རྩ་བརྒྱད་པ་དང་ལྡན། །ཚེག་དྲག་མཉམ་པོར་སྦྱོར་བ་
ནི། །པདྨ་གར་དབང་མཆོག་ཡིན་ནོ། །ལྷ་མོ་གླིང་བུ་མ་སོགས་ཉིད། །དེ་བཞིན་ལྷ་མོ་མེ་ཏོག་སོགས། །ལྷ་མོ་ལྕགས་ཀྱུ་མ་སོགས་ཀྱང་། །རྡོ་རྗེ་སེམས་དཔའ་ལ་སོགས་པའི། །དཀྱིལ་འཁོར་ལ་ནི་བསྐྱེད་པ་ཡིན། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་ཏེ། །
པདྨ་གར་གྱི་དབང་ཕྱུག་གི་དཀྱིལ་འཁོར་གྱི་ཆོས་ཀྱི་ཡི་གེ་འབྱུང་བའི་ཕྱག་རྒྱ་ཤེས་པའོ། །དབུས་ནས་ཉི་ཤུ་རྩ་གཅིག་པ། །བཅུ་གཅིག་པ་དང་ལྡན་པ་སྟེ། །བཅུ་དགུ་ཟླ་བ་གཙུག་ལྔ་ནི། །རྡོ་རྗེ་ཉི་མ་འབྱུང་བ་ཡིན། །དབུས་ནས་བཅུ་གསུམ་གང་ཡིན་པ། །ཟླ་ཚེས་ཐིག་ལེ་
གཙུག་གི་ཞལ། །རེའུ་མིག་ཉི་ཤུ་རྩ་བཞི་ལ། །གནས་པ་བཅུ་དགུ་དང་ལྡན་པ། །རེའུ་མིག་ཉི་ཤུ་གནས་དང་སྦྱོར། །ཚེག་དྲག་ལྡན་པས་གཉིས་པའོ། །རེའུ་མིག་ཉི་ཤུ་རྩ་བཞིར་གནས། །དབུས་ནས་བཅུ་གསུམ་པ་དང་ལྡན། །ཚེག་དྲག་ལྷན་ཅིག་ཅན་དང་ནི། །གསུམ་པ་

ཡི་ནི་གྲགས་པ་ཡིན། །རེའུ་མིག་ཉི་ཤུ་རྩ་བཞིར་གནས། །བཅུ་གཅིག་དང་ནི་ཐིག་ལེ་ལྡན། །རེའུ་མིག་བཅུ་བཞི་ལ་གནས་པ། །ཚེག་དྲག་ལྡན་པ་འདོད་པའོ། །རེའུ་མིག་ཉི་ཤུ་རྩ་བཞིར་གནས། །དབུས་གནས་དགུ་དང་ཟླ་བའོ། །རེའུ་མིག་སུམ་ཅུ་རྩ་གཅིག་གནས། །
ཐིག་ལེ་ང་རོས་བརྒྱན་པའོ། །རེའུ་མིག་ཉི་ཤུ་རྩ་བཞིར་གནས། །དབུས་ནས་བཅུ་གསུམ་པ་དང་ལྡན། །ཚེག་དྲག་མཉམ་པར་ལྡན་པ་ནི། །རྡོ་རྗེ་ཉི་མ་ལྷ་དག་ཡིན། །ལྷ་མོ་གླིང་བུ་མ་སོགས་ཀུན། །རྩ་བའི་དཀྱིལ་འཁོར་སྦྱོར་སྐྱེས་ཡིན། །ཞེས་བཅོམ་ལྡན་འདས་དཔལ་རྡོ་རྗེ་
སེམས་དཔས་གསུངས་ཏེ། རྡོ་རྗེ་ཉི་མའི་དཀྱིལ་འཁོར་གྱི་ཆོས་ཀྱི་ཡི་གེ་འབྱུང་བའི་ཕྱག་རྒྱ་ཤེས་པའོ། །རེའུ་མིག་ཉི་ཤུ་རྩ་བཞིར་གནས། །ཉི་ཤུ་རྩ་བདུན་ཞེས་སྦྱོར་བ་སྟེ། །ཟླ་ཚེས་ཐིག་ལེ་གཙུག་ཅན་ནི། །ཡུལ་འཁོར་ཐམས་ཅད་འདུལ་བའོ། །རེའུ་མིག་བཅུ་བཞི་
ལ་གནས་པ། །བཅུ་དགུ་པ་དང་ལྡན་པ་སྟེ། །ཉི་ཤུ་ཚེག་དྲག་སྦྱོར་བ་སྟེ། །སྣ་ཚོགས་པ་ཡི་བརྗོད་པ་ཡིན། །རེའུ་མིག་ཉི་ཤུ་རྩ་བཞིར་གནས། །གནས་པ་ཚེག་དྲག་ལྡན་པ་འདོད། །རྟ་ཡི་རྒྱལ་པོའི་དཀྱིལ་འཁོར་ལ། །རྡོ་རྗེ་རྒྱ་གྲམ་ཞེས་གྲགས་སོ། །ཞེས་
བཅོམ་ལྡན་འདས་དཔལ་རྡོ་རྗེ་བདེ་བ་ཆེན་པོ་རྡོ་རྗེ་སེམས་དཔས་གསུངས་ཏེ། རྟ་མཆོག་གི་ཆོས་ཀྱི་ཡི་གེ་འབྱུང་བའི་ཕྱག་རྒྱ་ཤེས་པའོ། །སངས་རྒྱས་ཐམས་ཅད་དང་མཉམ་པར་སྦྱོར་བ་མཁའ་འགྲོ་མ་སྒྱུ་མ་བདེ་བའི་མཆོག་ལས་ཆོས་ཀྱི་ཡི་གེ་འབྱུང་བའི་རྟོག་པ་
སྟེ་བཅུ་དགུ་པའོ།། །།རི་མོ་གཉིས་ཀྱི་དཀྱིལ་འཁོར་གྱི། །ཕྱི་རོལ་པདྨ་འདབ་བརྒྱད་བྲི། །དེ་ཡི་ནང་དུ་རྣལ་འབྱོར་པས། །ཨ་ཡིག་ཚོགས་ཀྱང་བྲི་བར་བྱ། །ཤར་ཕྱོགས་འདབ་མར་ཀ་ཡི་སྡེ། །ལྷོ་ཕྱོགས་འདབ་མར་ཙ་ཡི་སྡེ། །ནུབ་ཕྱོགས་འདབ་མར་ཊ་ཡི་སྡེ། །
ཏ་ཡི་ས