Kinh tạng Tây Tạng (Kangyur Đại Học) — 064_མདོ་སྡེ།_ཝ

༄༅། །མདོ་སྡེ་ཝ་བཞུགས་སོ། །

༄༅༅། །རྒྱ་གར་སྐད་དུ། ཨཱརྱ་རད་ན་མེ་གྷ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་དཀོན་མཆོག་སྤྲིན་ཅེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། །
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་ག་ཡ་ན་ག་ཡ་མགོའི་རི་ལ་དགེ་
སློང་བདུན་ཁྲི་ཉིས་སྟོང་གི། དགེ་འདུན་ཆེན་པོ་དག་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་དགྲ་བཅོམ་པ་ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་
གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། བུར་བོར་བ། བདག་
གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། བཀའ་ཡང་དག་པས་སེམས་ཤིན་ཏུ་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་

སོན་པ། ཆོས་ཀྱི་དབྱིངས་ལ་མཁས་པ། ཆོས་ཀྱི་རྒྱལ་པོའི་སྲས། སེམས་རྙེད་པ་དང་། བཀུར་སྟི་ཐམས་ཅད་དང་བྲལ་བ། ལེགས་པར་རབ་ཏུ་བྱུང་བ། ལེགས་པར་བསྙེན་པར་རྫོགས་པ། བརྣག་པ་ཡོངས་སུ་རྫོགས་པ།
མྱ་ངན་ལས་འདའ་བའི་ལམ་ལ་གནས་པ་ཤ་སྟག་སྟེ། གང་ཟག་གཅིག་མ་གཏོགས་པ་ནི་འདི་ལྟ་སྟེ། ཚེ་དང་ལྡན་པ་ཀུན་དགའ་བོའོ། །བྱང་ཆུབ་སེམས་དཔའ་བརྒྱད་ཁྲི་བཞི་སྟོང་གི་བྱང་ཆུབ་སེམས་དཔའི་ཚོགས་ཆེན་པོ་དང་ཡང་ཐབས་ཅིག་སྟེ།
ཐམས་ཅད་ཀྱང་སྐྱེ་བ་གཅིག་གིས་ཐོགས་པ། ཐམས་ཅད་མཁྱེན་པ་ཉིད་ལ་མངོན་དུ་ཕྱོགས་པ། ཐམས་ཅད་མཁྱེན་པ་ཉིད་ལ་གཞོལ་བ། ཐམས་ཅད་མཁྱེན་པ་ཉིད་ལ་འབབ་པ། ཐམས་ཅད་མཁྱེན་པ་ཉིད་ལ་བབ་པ། ཆགས་པ་མེད་པའི་
གཟུངས་དང་ཏིང་ངེ་འཛིན་ཐོབ་པ། དཔའ་བར་འགྲོ་བའི་ཏིང་ངེ་འཛིན་ལ་ཤིན་ཏུ་གནས་པ། མངོན་པར་ཤེས་པ་ཆེན་པོས་རྣམ་པར་རོལ་པ། ལམ་གྱི་རྒྱུན་མ་བཅད་པ། སྒྲིབ་པ་དང་། ཆོད་པ་དང་། ཀུན་ནས་ལྡང་བ་ཐམས་ཅད་དང་བྲལ་བ། བྱམས་
པ་ཆེན་པོ་དང་། སྙིང་རྗེ་ཆེན་པོས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཁྱབ་པར་བྱེད་པ། སངས་རྒྱས་ཀྱི་ཞིང་མཐའ་ཡས་པར་འགྲོ་བ་ལ་མཁས་པ། སྟོང་པ་ཉིད་སྤྱོད་ཡུལ་བ། མཚན་མ་མེད་པ་ལ་གནས་པ། སྨོན་ལམ་ལ་གནས་པ་
ཐམས་ཅད་དང་བྲལ་བ། སེམས་ཅན་ཐམས་ཅད་ལ་ཕན་པར་བརྩོན་པ། སངས་རྒྱས་ཀྱི་ཡུལ་ཐམས་ཅད་ལ་མཁས་པ་ཡེ་ཤེས་མཐའ་ཡས་པ། སེམས་ནམ་མཁའ་དང་མཚུངས་པ། སེམས་རྒྱ་མཚོ་ལྟར་ཟབ་པ། སེམས་རིའི་རྒྱལ་པོ་རི་རབ་

ལྟར་མི་སྒུལ་བ། སེམས་པད་མ་ལྟར་མ་གོས་པ། སེམས་རིན་པོ་ཆེ་ལྟར་ཤིན་ཏུ་ཡོངས་སུ་དག་པ། སེམས་གསེར་ལྟར་ཤིན་ཏུ་ཡོངས་སུ་བྱང་བ་རྣམས་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་དཔལ་དང་། ལག་ན་རྡོ་རྗེ་
རིན་པོ་ཆེ་དང་། ལག་ན་ཕྱག་རྒྱ་རིན་པོ་ཆེ་དང་། རིན་པོ་ཆེའི་ཅོད་པན་དང་། གཙུག་ན་རིན་པོ་ཆེ་དང་། རིན་པོ་ཆེ་བརྩེགས་པ་དང་། རིན་པོ་ཆེ་འབྱུང་གནས་དང་། རིན་པོ་ཆེའི་རྩེ་མོ་དང་། རིན་པོ་ཆེའི་རྒྱལ་མཚན་དང་། རྡོ་རྗེའི་སྙིང་པོ་དང་། གསེར་གྱི་སྙིང་པོ་དང་། རིན་པོ་
ཆེའི་སྙིང་པོ་དང་། དཔལ་གྱི་སྙིང་པོ་དང་། དགེ་བའི་སྙིང་པོ་དང་། དགེ་བ་དྲི་མ་མེད་པའི་སྙིང་པོ་དང་། དེ་བཞིན་གཤེགས་པའི་སྙིང་པོ་དང་། ཡེ་ཤེས་ཀྱི་སྙིང་པོ་དང་། ཉི་མའི་སྙིང་པོ་དང་། ཏིང་ངེ་འཛིན་གྱི་སྙིང་པོ་དང་། པད་མའི་སྙིང་པོ་དང་། རྣམ་པར་གྲོལ་བའི་ཟླ་བ་དང་།
ཀུན་ཏུ་ཟླ་བ་དང་། སྤྱན་རས་གཟིགས་དབང་པོ་དང་། མཐུ་ཆེན་ཐོབ་དང་། ཀུན་ཏུ་བཟང་པོ་དང་། ཀུན་ནས་མིག་དང་། པད་མའི་མིག་དང་། དྲི་མ་མེད་པའི་མིག་དང་། ཡངས་པའི་མིག་དང་། ཀུན་ཏུ་སྤྱོད་ལམ་དང་། ཀུན་ཏུ་མཛེས་དང་། ཀུན་ཏུ་སྤྱོད་པའི་བློ་གྲོས་
དང་། ཡེ་ཤེས་ཀྱི་བློ་གྲོས་དང་། ཆོས་ཀྱི་བློ་གྲོས་དང་། རྒྱལ་བའི་བློ་གྲོས་དང་། བླ་མའི་བློ་གྲོས་དང་། རྡོ་རྗེའི་བློ་གྲོས་དང་། ཁྱད་པར་བླ་གྲོས་དང་། སེང་གེ་རྣམ་པར་རོལ་པ་དང་། སྒྲ་ཆེན་པོའི་དབྱངས་ཀྱི་རྒྱལ་པོ་དང་། སེང་གེའི་སྒྲ་སྒྲོགས་དང་། སྒྲ་དབྱངས་བརྗོད་པ་
ཟབ་མོ་སྒྲོགས་དང་། གོས་པ་མེད་དང་། དྲི་མ་ཀུན་བྲལ་དང་། ཟླ་བའི་འོད་དང་། ཉི་མའི་འོད་དང་། ཡེ་ཤེས་ཀྱི་འོད་དང་། ཡེ་ཤེས་ཀྱི་དཔལ་དང་། བཟང་པོའི་དཔལ་དང་། ཟླ་བའི་དཔལ་དང་། པད་མའི་དཔལ་དང་། རིན་པོ་ཆེའི་དཔལ་དང་། འཇམ་དཔལ་གཞོན་ནུར་གྱུར་པ་
དང་། བཟང་སྐྱོང་ལ་སོགས་པ་སྐྱེས་བུ་དམ་པ་བཅུ་དྲུག་དང་། བྱམས་པ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དང་། རྒྱལ་པོ་ཆེན་པོ་བཞི་ལ་སོགས་པ་རྒྱལ་ཆེན་བཞིའི་རིས་ཀྱི་ལྷའི་བུ་རྣམས་དང་། ལྷའི་དབང་པོ་བརྒྱ་བྱིན་ལ་སོགས་

པ་སུམ་ཅུ་རྩ་གསུམ་གྱི་རིས་ཀྱི་ལྷའི་བུ་རྣམས་དང་། ལྷའི་བུ་ཤིན་ཏུ་གནོད་བྲལ་ལ་ལ་སོགས་པ་གནོད་བྲལ་གྱི་ལྷའི་བུ་རྣམས་དང་། ལྷའི་བུ་ཀུན་ཏུ་དགའ་ལྡན་ལ་སོགས་པ་དགའ་ལྡན་གྱི་རིས་ཀྱི་ལྷའི་བུ་རྣམས་དང་། ལྷའི་བུ་ཤིན་ཏུ་འཕྲུལ་དགའ་ལ་སོགས་པ་འཕྲུལ་
དགའི་རིས་ཀྱི་ལྷའི་བུ་རྣམས་དང་། ལྷའི་བུ་དབང་བྱེད་ལ་སོགས་པ་གཞན་འཕྲུལ་དབང་བྱེད་ཀྱི་ལྷའི་བུ་རྣམས་དང་། དེད་དཔོན་ལ་སོགས་པ་དཀར་པོའི་ཕྱོགས་ཀྱི་བདུད་ཀྱི་བུ་རྣམས་དང་། ཚངས་པ་ཆེན་པོ་ལ་སོགས་པ་ཚངས་པའི་རིས་ཀྱི་ལྷའི་བུ་ཐམས་ཅད་དང་། ལྷའི་བུ་དབང་ཕྱུག་
ཆེན་པོ་ལ་སོགས་པ་གནས་གཙང་མའི་རིས་ཀྱི་ལྷའི་བུ་ཐམས་ཅད་དང་། ལྷ་མ་ཡིན་གྱི་དབང་པོ་ཐགས་ཟངས་རིས་དང་། སྟོབས་ཅན་དང་། ནོར་སྦྱིན་དང་། དེ་དག་ལ་སོགས་པ་ལྷ་མ་ཡིན་བརྒྱ་སྟོང་དུ་མ་དང་། ཀླུའི་རྒྱལ་པོ་མ་དྲོས་པ་དང་། གཟི་ཅན་དང་། རྒྱ་མཚོ་དང་།
མཐའ་ཡས་དང་། ནོར་རྒྱས་ཀྱི་བུ་དང་། དེ་དག་ལ་སོགས་པ་ཀླུའི་རྒྱལ་པོ་བརྒྱ་སྟོང་དུ་མ་དང་། དཔལ་གྱི་གཟི་བརྗིད་ལ་སོགས་པ་ཀླུའི་རྒྱལ་པོའི་ཁྱེའུ་བརྒྱ་སྟོང་དུ་མ་དང་། ཀླུའི་བུ་མོ་མང་པོ་རྣམས་དང་། དེ་མ་ཡིན་པ་གཞན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་།
ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་བརྒྱ་སྟོང་དག་དང་ཡང་ཐབས་ཅིག་གོ། །ཡང་དེའི་ཚེ་ག་ཡ་ན་ག་ཡ་མགོའི་རིའི་དཔག་ཚད་བཞི་ཁོ་ར་ཁོར་ཡུག་ཏུ་སྐྲའི་རྩེ་མོའི་ཆ་ཤས་ཀྱི་རྡུལ་ཕྲ་རབ་ཙམ་ཡང་གང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་།
ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དག་གིས་མ་གང་བར་གྱུར་པའི་སའི་ཕྱོགས་སམ། བར་སྣང་གི་ཕྱོགས་དེ་མེད་དོ། །འཁོར་དེ་ལྟ་བུ་འདུས་ཤིང་འཁོད་པའི་དབུས་ན་བཅོམ་ལྡན་འདས་ཀྱི་སེང་གེའི་ཁྲི་འཕང་དུ་དཔག་ཚད་གཅིག །ཁོ་ར་
ཁོར་ཡུག་ཏུ་དཔག་ཚད་ཕྱེད་པ་ལ་ལྷའི་རས་བཅོས་བུ་དུ་མ་ནི་བཏིང་། རིན་པོ་ཆེའི་དྲིལ་བུ་གཡེར་ཁའི་དྲ་བས་ནི་བླ་རེ་བྲེས། དར་གྱི་ལྡ་ལྡི་བརྒྱ་སྟོང་དུ་མ་ནི་དཔྱངས། མེ་ཏོག་སིལ་མས་ནི་གཏོར་བ་ཞིག་བཤམས་ཏེ། སེང་གེའི་ཁྲི་དེའི་ཁོ་ར་ཁོར་ཡུག་གི་སའི་ཕྱོགས་དེ་དངོས་རྡོ་རྗེ་ལ་ཡིད་དུ་འོང་ཞིང་ལག་མཐིལ་

ལྟར་མཉམ་པ་དང་། ཆག་ཆག་ལེགས་པར་བཏབ་པ་དང་། ཕྱག་དར་ལེགས་པར་བྱས་པ་དང་། དྲི་རབ་ཏུ་ཞིམ་ཞིང་ལྷའི་མེ་ཏོག་བརྒྱ་སྟོང་དུ་མས་གཏོར་བར་གྱུར་ཏོ། །བཅོམ་ལྡན་འདས་ཀྱིས་ཡོངས་སུ་ལོངས་སྤྱད་པའི་ཕྱིར་ཕྱོགས་དེ་ན་གསེར་གྱི་པད་མ་ཤིང་རྟའི་འཁོར་ལོ་ཙམ། འདབ་མ་བརྒྱ་སྟོང་
དུ་མ་ཡོད་པ། ཆུ་བ་ནི་བཻ་དཱུརྱ། སྙིང་པོ་ནི་ཨིན་དྲ་ནཱི་ལ། ཟེ་བ་ནི་ཨསྨ་གར་བྷ་སྟེ། དྲི་རབ་ཏུ་ཞིམ་ཞིང་ཡིད་དུ་འོང་ལ་རེག་ན་དགའ་བར་འགྱུར་བ་དག་སྐྱེས་པར་གྱུར་ཏོ། །སེང་གེའི་ཁྲི་དེའི་གྲྭ་བཞིར་ཧ་ཅང་ཡང་མི་རིང་། ཧ་ཅང་ཡང་མི་ཉེ་བ་ནས་རིན་པོ་ཆེའི་ཤིང་སྲིད་དུ་དཔག་ཚད་ཕྱེད་དང་
གཉིས། སྦོམས་སུ་རྒྱང་གྲགས་གཉིས་ཀྱིས་འཁོར་བ་བཞི་སྐྱེས་སོ། །སེང་གེའི་ཁྲི་ལེགས་པར་བཤམས་པ་དེ་ལ་བཅོམ་ལྡན་འདས་བློ་ནི་རབ་ཏུ་རྣམ་པར་དག །ཆོས་ཀྱི་འཁོར་ལོ་ནི་རབ་ཏུ་བསྐོར། བདུད་དང་ཕྱིར་རྒོལ་བ་ནི་བཅོམ། འཇིག་རྟེན་གྱི་ཆོས་རྣམས་ཀྱིས་ནི་མ་གོས་ལ་མི་
བསྙེངས་ཤིང་མི་འཛེམ་སྟེ། སེང་གེ་ལྟར་བག་ཚ་བ་མེད་པ། མཚོ་དང་འདྲ་བར་དང་སྟེ་རྙོག་པ་མེད་ཅིང་ཤིན་ཏུ་རྣམ་པར་དང་བ། རྒྱ་མཚོ་ཆེན་པོ་ལྟར་ཟབ་ཅིང་གཏིང་དཔག་དཀའ་ལ་རིན་པོ་ཆེའི་འབྱུང་གནས་སུ་གྱུར་པ། རི་རབ་ལྟར་མངོན་པར་འཕགས་པ། ཉི་མ་ལྟར་རབ་ཏུ་ལྷན་པ། ཟླ་བ་
ལྟར་རབ་ཏུ་སིམ་པ། ཀླུ་ཆེན་པོ་ལྟར་ཆོས་ཀྱི་ཆར་མངོན་པར་འབེབས་པ། ཚངས་པ་ཆེན་པོ་ལྟར་འཇིག་རྟེན་ཀུན་ལས་མངོན་པར་འཕགས་པ། སློབ་མ་ཤིན་ཏུ་དུལ་བའི་ཚོགས་མཐའ་ཡས་པའི་འཁོར་མངའ་བ། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་བྱེ་བ་ཁྲག་ཁྲིག་
བརྒྱ་སྟོང་རྣམས་ཀྱིས་ཞལ་དུ་བལྟས་ཤིང་མ་ཁེངས་མ་དུད་པར་བཞུགས་ཏེ། འཁོར་ཚོགས་པ་དེ་ན་ལྷམ་མེ། ལྷན་ནེ། ལྷང་ངེའོ། །བཅོམ་ལྡན་འདས་དེ་ལྟར་ལྷམ་མེ། ལྷན་ནེ། ལྷང་ངེ་བའི་དབུའི་གཙུག་གི་གཙུག་ཏོར་གྱི་གསེབ་ནས་འོད་ཟེར་ཀུན་ཏུ་སྣང་བ་ཞེས་བྱ་བ་འོད་ཟེར་
གྱི་འཁོར་བརྒྱ་སྟོང་ཕྲག་དུ་མ་ཡོད་པ་བྱུང་སྟེ། དེ་བྱུང་ནས་ཕྱོགས་བཅུ་ཐམས་ཅད་དུ་འཇིག་རྟེན་གྱི་ཁམས་རབ་འབྱམ་ཐམས་ཅད་སྣང་བར་བྱས་ཏེ། ཕྱིར་འོངས་ནས་བཅོམ་ལྡན་འདས་ལ་ལན་གསུམ་བསྐོར་ཏེ། བཅོམ་ལྡན་འདས་ཀྱི་ཞལ་གྱི་སྒོ་ནས་ཞུགས་ནས། བཅོམ་ལྡན་འདས་

ཀྱི་ཞལ་གྱི་སྒོ་ཕྱེ་བའམ་བཙུམས་པར་ཡང་མི་མངོན་ནོ། །འདི་ལྟ་སྟེ། དཔེར་ན་ཉི་མ་དང་ཟླ་བའི་འོད་ནམ་མཁའི་ཁམས་ཐམས་ཅད་ཀྱི་གསེབ་ཏུ་ཞུགས་ཀྱང་ནམ་མཁའི་ཁམས་ཀྱི་གསེབ་ཕྱེ་བའམ་བཙུམས་པར་མི་མངོན་པ་དེ་བཞིན་དུ། དེའི་ཚེ་ན་འོད་ཟེར་དེ་དག་ཞུགས་
ཀྱང་བཅོམ་ལྡན་འདས་ཀྱི་ཞལ་གྱི་སྒོ་ཕྱེ་བའམ་བཙུམས་པར་མི་མངོན་ནོ། །འདི་ལྟ་སྟེ་དཔེར་ན། བྱེ་མའི་ཕུང་པོ་ལ་མར་རམ་འབྲུ་མར་རམ། ཆུ་ཞུགས་ན་མི་མངོན་པ་དེ་བཞིན་དུ། དེའི་ཚེ་ན་འོད་ཟེར་དེ་དག་ཞུགས་ཀྱང་ཕྱེ་བའམ་བཙུམས་པར་མི་མངོན་ནོ། །དེ་ནས་ཤར་ཕྱོགས་
སུ་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་འདས་པ་ན། པད་མ་ཅན་ཞེས་བྱ་བའི་འཇིག་རྟེན་གྱི་ཁམས་དེ་ན། པད་མའི་སྤྱན་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་རྐང་པར་ལྡན་པ། བདེ་བར་
གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་འདི་ལྟ་སྟེ། ཐེག་པ་གཅིག་ལས་བརྩམས་ནས་ཆོས་སྟོན་ཏེ། སངས་རྒྱས་ཀྱི་
ཞིང་དེ་ན་ཉན་ཐོས་དང་། རང་སངས་རྒྱས་དག་དང་། ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པའི་མིང་ཡང་མེད། སངས་རྒྱས་ཀྱི་ཞིང་དེ་ན་རྫུས་ཏེ་སྐྱེ་བ་མ་གཏོགས་པར་བུད་མེད་དང་། མངལ་ན་གནས་ཏེ་འབྱུང་ཞིང་སྐྱེ་བའི་སྒྲ་ཡང་མི་གྲག་གོ། །འཇིག་རྟེན་གྱི་ཁམས་
དེའི་སེམས་ཅན་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་བྱང་ཆུབ་སེམས་དཔའ་ཤ་སྟག་གོ། །འཇིག་རྟེན་གྱི་ཁམས་དེ་ན་བཟའ་བ་དང་། བཏུང་བ་དང་། ཟས་ཀྱི་བྱ་བ་ཡང་མི་ཤེས་སོ། །བྱང་ཆུབ་སེམས་དཔའ་དེ་དག་ཐམས་ཅད་
ཀྱང་བསམ་གཏན་གྱི་དགའ་བའི་ཟས་ཅན་དང་། ཏིང་ངེ་འཛིན་གྱི་དགའ་བའི་ཟས་ཅན་དང་། ཆོས་ཀྱི་དགའ་བའི་ཟས་ཅན་ནོ། །དེ་བཞིན་གཤེགས་པ་དེ་ཉིད་ཀྱི་འོད་ཀྱིས་འཇིག་རྟེན་གྱི་ཁམས་དེ་ཁྱབ་ཅིང་དྲི་མ་མེད་པར་གྱུར་པ་མ་གཏོགས་པར་འཇིག་རྟེན་གྱི་ཁམས་དེ་ན་ཟླ་བ་དང་། ཉི་མ་དང་།

གཟའ་དང་། སྐར་མ་རྣམས་ཀྱི་འོད་ཀྱང་མི་ཤེས་སོ། །འཇིག་རྟེན་གྱི་ཁམས་དེ་ལག་མཐིལ་བཞིན་དུ་མཉམ་པར་གྱུར་པ་ལས་འཇིག་རྟེན་གྱི་ཁམས་དེ་ན་རྩྭ་དང་། ཤིང་དང་། བོང་བ་དང་། རྩིག་པ་དང་། རི་ལ་སོགས་པ་ཡང་མི་སྣང་ངོ་། །འཇིག་རྟེན་གྱི་ཁམས་དེ་འདྲ་བ་དེ་ན་བྱང་
ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ཞེས་བྱ་བ་དེའི་མིང་ཐོས་པ་ཙམ་གྱིས་སེམས་ཅན་གྱི་སྒྲིབ་པ་ཐམས་ཅད་ཟད་པར་འགྱུར་བ་ཞིག་གནས་ཏེ། དེ་འོད་དེས་རེག་སྟེ་བསྐུལ་ནས། རང་གི་གནས་ནས་བྱུང་སྟེ། བཅོམ་ལྡན་འདས་དེ་བཞིན་གཤེགས་པ་
པད་མའི་སྤྱན་དེ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། པད་མའི་སྙིང་པོ་ལ་ཕྱོགས་གཅིག་ཏུ་འདུག་གོ། །དེ་མ་ཡིན་པའི་བྱང་ཆུབ་སེམས་དཔའ་གཞན་དག་ཀྱང་འོད་དེས་རེག་སྟེ་བསྐུལ་བ་དང་། རང་རང་གི་གནས་ནས་བྱུང་སྟེ། བཅོམ་
ལྡན་འདས་དེ་བཞིན་གཤེགས་པ་པད་མའི་སྤྱན་དེ་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། པད་མའི་སྙིང་པོ་ལ་སོ་སོ་ཅི་རིགས་པར་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་སྟན་ལས་
ལངས་ནས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་པད་མའི་སྙིང་པོ་ལ་བཙུགས་ནས། བཅོམ་ལྡན་འདས་དེ་བཞིན་གཤེགས་པ་པད་མའི་སྤྱན་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
འདི་ལྟ་བུའི་འོད་བཟང་པོ་དྲི་མ་མ་མཆིས་པ་རྣམ་པར་དག་པ། ཡིད་དུ་མཆི་བ་ལུས་དང་སེམས་ཤིན་ཏུ་དགའ་བར་བགྱིད་པར་བྱུང་བ་འདི་སུའི་མཐུ་ལགས་ཞེས་དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་པད་མའི་སྤྱན་དེས་བྱང་ཆུབ་སེམས་དཔའ་སྒྲིབ་པ་ཐམས་ཅད་
རྣམ་པར་སེལ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ནུབ་ཕྱོགས་ན་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་འདས་པ་ན་མི་མཇེད་ཅེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་

ཡང་དག་པར་རྫོགས་པའི་སངས་རྒྱས་རིག་པ་དང་། རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དེའི་མཚན་ཐོས་པ་ཙམ་
གྱིས་སེམས་ཅན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་ཞིག་བཞུགས་ཏེ། དེས་འོད་བཟང་པོ་དྲི་མ་མེད་པ། རྣམ་པར་དག་པ་ཡིད་དུ་འོང་བ། ལུས་དང་སེམས་ཤིན་ཏུ་རྣམ་པར་དགའ་བར་བྱེད་པ་འདི་ཕྱུང་ངོ་། །དེ་སྐད་ཅེས་བཀའ་སྩལ་པ་
དང་། བཅོམ་ལྡན་འདས་དེ་བཞིན་གཤེགས་པ་པད་མའི་སྤྱན་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་ལྟར་དེ་བཞིན་གཤེགས་པ་དེའི་མཚན་ཐོས་པ་ཙམ་གྱིས་སེམས་ཅན་རྣམས་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བའི་རྒྱུ་གང་ལགས། རྐྱེན་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་པད་མའི་སྤྱན་དེས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ལ་འདི་སྐད་ཅེས་བཀའ་སྩལ་
ཏོ། །རིགས་ཀྱི་བུ་དེ་བཞིན་གཤེགས་པ་དེས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། འདི་ལྟར་སེམས་ཅན་སུ་གང་དག་གིས་བདག་མངོན་པར་རྫོགས་པར་སངས་རྒྱས་པའི་མིང་ཐོས་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ཤོག་ཤིག་ཅེས་
སྨོན་ལམ་བཏབ་བོ། །བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་གསོལ་པ། བཅོམ་ལྡན་འདས་ཅི་ལགས། འཇིག་རྟེན་གྱི་ཁམས་དེའི་སེམས་ཅན་དེ་དག་ཐམས་ཅད་ཕྱིར་མི་ལྡོག་པ་ལགས་སམ། བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་མ་ཡིན་ནོ། །
བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་གསོལ་པ། བཅོམ་ལྡན་འདས་ཅི་ལགས། སེམས་ཅན་དེ་དག་གིས་དེ་བཞིན་གཤེགས་པ་དེའི་མཚན་མ་ཐོས་སམ། བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་ཐོས་སོ། །གསོལ་པ། བཅོམ་ལྡན་འདས་དེ་ཅིའི་

སླད་དུ་ཕྱིར་མི་ལྡོག་པ་མ་ལགས། བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་དེ་དག་ཐམས་ཅད་ནི་ཕྱིར་མི་ལྡོག་པ་ཡང་ཡིན་ལ་ཕྱིར་ལྡོག་པ་ཡང་ཡིན་ནོ། །གསོལ་པ། བཅོམ་ལྡན་འདས་ཇི་ལྟར། གང་དེ་ལྟ་བུར་དེ་དག་ཐམས་ཅད་ཕྱིར་མི་ལྡོག་པ་ཡང་ལགས་ལ། ཕྱིར་ལྡོག་
པ་ཡང་ལགས། བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་དེའི་མཚན་ཐོས་པས། སེམས་ཅན་དེ་དག་གི་ཕྱིར་མི་ལྡོག་པའི་ས་བོན་སྐྱེས་པ་མཐོང་ནས་སེམས་ཅན་དེ་དག་ཕྱིར་མི་ལྡོག་པར་ལུང་སྟོན་ཏོ། །མཚན་ཐོས་པ་ཁོ་ནས་དེ་མ་ཐག་ཏུ་ཕྱིར་མི་
ལྡོག་པར་འགྱུར་བ་ཡང་མ་ཡིན་ཏེ། དེ་བས་ན་རིགས་ཀྱི་བུ་དོན་དེ་ཉིད་རབ་ཏུ་གྲུབ་པར་བྱ་བའི་ཕྱིར་ཁྱོད་ལ་དཔེ་བཤད་དོ། །རིགས་ཀྱི་བུ་འདི་ལྟ་སྟེ། དཔེར་ན་ཤིང་ལ་ལའི་ས་བོན་གྱི་རྣམ་པ་ཞིག་ཡོད་དེ། ས་བོན་དེ་ལ་ས་བོན་གྱི་ཉེས་པ་ཐམས་ཅད་མེད་ལ། མྱུ་གུ་སྐྱེ་བ་ནས་རྫོགས་པའི་
བར་དུ་རྐྱེན་རྣམས་ཡོད་ན། རིགས་ཀྱི་བུ་ས་བོན་དེ་ལ་ཇི་སྐད་ཅེས་བྱ། གསོལ་པ་བཅོམ་ལྡན་འདས་ཉེས་པ་ཐམས་ཅད་དང་བྲལ་བས་ན། དེ་ནི་ཡོངས་སུ་རྫོགས་པ་ཞེས་བགྱིའོ། །བཀའ་སྩལ་པ། རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་དེའི་མཚན་ཐོས་པ་དང་ལྡན་པའི་ཕྱིར་མི་ལྡོག་པའི་
ས་བོན་ཡོད་པའི་སེམས་ཅན་རྣམས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཡིན་ནོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་དེ་བཞིན་གཤེགས་པ་པད་མའི་སྤྱན་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་
སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་མི་མཇེད་ཀྱི་འཇིག་རྟེན་གྱི་ཁམས་དེ་བལྟ་བ་དང་། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལའང་ཕྱག་འཚལ་བ་དང་། བསྙེན་བཀུར་བགྱི་བ་དང་། བཙུན་
པར་བགྱི་བ་དང་། རི་མོར་བགྱི་བ་དང་། བཀུར་སྟི་བགྱི་བ་དང་། མཆོད་པ་བགྱི་བའི་སླད་དུ་མཆིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་པད་མའི་སྤྱན་དེས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ལ་འདི་སྐད་

ཅེས་བཀའ་སྩལ་ཏོ། །རིགས་ཀྱི་བུ་དེའི་དུས་ལ་དབབ་པར་ཤེས་ན་ཁྱོད་སོང་ཤིག །བཅོམ་ལྡན་འདས་དེ་བཞིན་གཤེགས་པ་པད་མའི་སྤྱན་དེ་ལ་བྱང་ཆུབ་སེམས་དཔའ་དེ་དག་ཐམས་ཅད་ཀྱིས་ཀྱང་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་མི་
མཇེད་ཀྱི་འཇིག་རྟེན་གྱི་ཁམས་དེ་བལྟ་བ་དང་། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་ཡང་ཕྱག་འཚལ་བ་དང་། བསྙེན་བཀུར་བགྱི་བ་དང་། བཙུན་པར་བགྱི་བ་དང་། རི་མོར་བགྱི་བ་དང་། བཀུར་སྟི་བགྱི་བ་
དང་། མཆོད་པ་བགྱི་བའི་སླད་དུ་མཆིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་པད་མའི་སྤྱན་དེས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་དེའི་དུས་ལ་དབབ་པར་ཤེས་ན་ཁྱོད་དེང་ཤིག །འཇིག་རྟེན་གྱི་ཁམས་དེར་
བག་ཡོད་པར་གནས་པས་གནས་པར་གྱིས་ཤིག །དེ་ཅིའི་ཕྱིར་ཞེ་ན། འདི་ལྟར་འཇིག་རྟེན་གྱི་ཁམས་དེའི་སེམས་ཅན་དེ་དག་ནི་རབ་ཏུ་འདོད་ཆགས་མང་བ། ཞེ་སྡང་མང་བ། གཏི་མུག་མང་བ། དགེ་སྦྱོང་དུ་མི་འཛིན་པ། བྲམ་ཟེར་མི་འཛིན་པ། ཕར་མི་ཤེས་པ། མར་མི་
ཤེས་པ། ཆོས་མ་ཡིན་པ་འདོད་པ་མང་བ། བརླང་བ། གཏུམ་པ། ཞེ་གཅོད་པ། མུ་ཅོར་སྨྲ་བ། ཕོ་ཐེག་ཅན། གཡེངས་པ། བརྐམ་པ། ལེ་ལོ་ཅན། ངན་པའི་ངང་ཚུལ་ཅན། སྡིག་པའི་ཆོས་ཅན། ཕྲག་དོག་དང་སེར་སྣས་ཡོངས་སུ་དཀྲིས་པ། ཉོན་མོངས་
པ་དུ་མས་ཉེ་བར་ཉོན་མོངས་པར་གྱུར་པ་རྣམས་ཏེ། སེམས་ཅན་དེ་འདྲ་བ་དེ་དག་གི་ནང་ན་དེ་བཞིན་གཤེགས་པ་དེ་ཆོས་སྟོན་ཏོ། །བྱང་ཆུབ་སེམས་དཔའ་དེ་དག་གིས་གསོལ་པ། བཅོམ་ལྡན་འདས་གང་འདི་འདྲ་བའི་སེམས་ཅན་རྣམས་ཀྱི་ནང་ན་ཆོས་སྟོན་པ་ནི་དེ་བཞིན་གཤེགས་པ་དེ་
དཀའ་བ་མཛད་པ་ལགས་སོ། །བཅོམ་ལྡན་འདས་དེས་བཀའ་སྩལ་པ། དེ་དེ་བཞིན་ནོ། །རིགས་ཀྱི་བུ་དག་དེ་བཞིན་ཏེ། གང་འདི་འདྲ་བའི་སེམས་ཅན་རྣམས་ཀྱི་ནང་ན་ཆོས་སྟོན་པ་ནི་དེ་བཞིན་གཤེགས་པ་དེ་དཀའ་བ་མཛད་པ་ཡིན་ནོ། །རིགས་ཀྱི་བུ་དག་གང་དེ་ལྟ་བུར་ཀུན་ནས་ཉོན་

མོངས་པར་གྱུར་པའི་འཇིག་རྟེན་གྱི་ཁམས་ན་དགེ་བའི་སེམས་གཅིག་ཙམ་བསྐྱེད་པའི་སེམས་ཅན་དེ་དག་ཀྱང་དཀའ་བ་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། གང་ཡོངས་སུ་དག་པའི་འཇིག་རྟེན་གྱི་ཁམས་ན་སེམས་ཅན་ཡོངས་སུ་དག་པ་ཡོད་པ་ལྟ་ཅི་མཚར་ཀྱི། གང་དག་དེ་ལྟར་ཀུན་
ནས་ཉོན་མོངས་པར་གྱུར་པའི་འཇིག་རྟེན་གྱི་ཁམས་དེ་ན་སེ་གོལ་གཏོགས་པ་སྲིད་དུ་ཡང་དད་པ་རྙེད་པ་དང་། སེ་གོལ་གཏོགས་པ་སྲིད་དུ་ཡང་སངས་རྒྱས་ལ་སྐྱབས་སུ་འགྲོ་བ་དང་། ཆོས་ལ་སྐྱབས་སུ་འགྲོ་བ་དང་། དགེ་འདུན་ལ་སྐྱབས་སུ་འགྲོ་བ་དང་། སེ་གོལ་གཏོགས་པ་
སྲིད་དུ་ཡང་ཚུལ་ཁྲིམས་ཡང་དག་པར་བཟུང་སྟེ། སྤྱོད་པ་འདི་ནི་ཆེས་ངོ་མཚར་ཏོ། །དེ་བས་ཀྱང་གང་དག་སེ་གོལ་གཏོགས་པ་སྲིད་དུ་ཡང་འདོད་ཆགས་དང་བྲལ་བ་ལ་གནས་པའི་སེམས་ཡང་དག་པར་བཟུང་སྟེ་གནས་པ་འདི་ནི་ཆེས་ངོ་མཚར་ཏོ། །དེ་བས་ཀྱང་གང་དག་སེ་གོལ་
གཏོགས་པ་སྲིད་དུ་ཡང་སྙིང་རྗེ་བའི་སེམས་ཉེ་བར་གཞག་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་འདི་ནི་ཆེས་ངོ་མཚར་ཏོ། །བྱང་ཆུབ་སེམས་དཔའ་དེ་དག་གིས་གསོལ་པ། བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །
དེ་ནས་སྒྲིབ་པ་ཐམས་ཅད་རྣམ་པར་སེལ་བ་ལ་སོགས་པ་བྱང་ཆུབ་སེམས་དཔའ་དེ་དག་ཐམས་ཅད་ཀྱིས་ལེགས་སོ། །བཅོམ་ལྡན་འདས་ཞེས་གསོལ་ནས། བཅོམ་ལྡན་འདས་དེ་ལས་འདི་ལྟ་བུ་འཐུན་པའི་རྗེས་སུ་བསྟན་པ་དེ་མཉན་ནས་བཅོམ་ལྡན་འདས་དེའི་ཞབས་ལ་མགོ་
བོས་ཕྱག་འཚལ་ཏེ། རང་རང་གི་གནས་ནས་དོང་ངོ་། །དོང་ནས་བཅོམ་ལྡན་འདས་ཤཱཀྱ་ཐུབ་པ་ལ་མཆོད་པའི་ཕྱིར་ལ་ལས་ནི་རིན་པོ་ཆེའི་ཤིང་མེ་ཏོག་དང་བཅས་པ། འབྲས་བུ་དང་བཅས་པ། ཆུ་དང་ཞེང་དུ་ལྡན་པ་རྣམས་མངོན་པར་སྤྲུལ། ལ་ལས་ནི་བཻ་དཱུརྱའི་ཤིང་རྣམས།
ལ་ལས་ནི་ཤེལ་གྱི་ཤིང་རྣམས། ལ་ལས་ནི་དཔག་བསམ་གྱི་ཤིང་རྣམས། ལ་ལས་ནི་གསེར་གྱི་ཤིང་རྣམས། ལ་ལས་ནི་མེ་ཏོག་གི་ཤིང་རྣམས། ལ་ལས་ནི་འབྲས་བུའི་ཤིང་རྣམས། ལ་ལས་ནི་གོས་ཀྱི་སྤྲིན་རྣམས། ལ་ལས་ནི་རྒྱན་གྱི་སྤྲིན་རྣམས། ལ་ལས་ནི་སྤོས་ཀྱི་

སྤྲིན་རྣམས། ལ་ལས་ནི་ཕྲེང་བའི་སྤྲིན་རྣམས། ལ་ལས་ནི་ཕྱེ་མའི་སྤྲིན་རྣམས། ལ་ལས་ནི་གདུགས་ཀྱི་སྤྲིན་རྣམས། ལ་ལས་ནི་རྒྱལ་མཚན་གྱི་སྤྲིན་རྣམས། ལ་ལས་ནི་སིལ་སྙན་གྱི་སྤྲིན་རྣམས་མངོན་པར་སྤྲུལ་ཏེ། མངོན་པར་སྤྲུལ་ནས་གཅིག་ཏུ་འདུས་
ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་དང་ལྷན་ཅིག་ཏུ་མི་མཇེད་ཀྱི་འཇིག་རྟེན་གྱི་ཁམས་ག་ལ་བ་དེར་དོང་ངོ་། །དེ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་སྨྲས་
སོ། །ཀྱེ་མའོ་གྲོགས་པོ་དག་མི་མཇེད་ཀྱི་འཇིག་རྟེན་གྱི་ཁམས་ཀྱི་སེམས་ཅན་རྣམས་སྡུག་བསྔལ་ལོ། །དེ་བས་ན་གང་གིས་སེམས་ཅན་དེ་དག་ཐམས་ཅད་བདེ་བ་མཆོག་གིས་བསྟབས་པར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་བྱ་བ་ལེགས་པར་མངོན་པར་བྱའོ། །བྱང་
ཆུབ་སེམས་དཔའ་དེ་ཀུན་གྱིས་ལེགས་སོ་ཞེས་སྨྲས་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བའི་ལྟར་མཉན་ཏོ། །དེ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་ཇི་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་བྱས་པས་བྱང་ཆུབ་སེམས་དཔའ་
སྒྲིབ་པ་ཐམས་ཅད་རྣམ་པར་སེལ་བའི་ལུས་ལས་འོད་དང་བ། དྲི་མ་མེད་པ། རྣམ་པར་དག་པ། ཡིད་དུ་འོང་བ། ལུས་དང་སེམས་ཤིན་ཏུ་དགའ་བར་བྱེད་པ་བྱུང་སྟེ། འོད་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཁྱབ་ཅིང་སྣང་བར་གྱུར་པ་དང་། གང་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་སེམས་ཅན་དམྱལ་བ་པའི་ལུས་སུ་གནས་པ་དང་། བྱོལ་སོང་གི་སྐྱེ་གནས་པའི་ལུས་སུ་གནས་པ་དང་། གཤིན་རྗེའི་འཇིག་རྟེན་པའི་ལུས་སུ་གནས་པ་དེ་དག་འོད་དེས་རེག་ནས་སྡུག་བསྔལ་གྱི་ཚོར་བ་དང་བྲལ་ཏེ། བདེ་ཞིང་
ཁྲོ་བ་དང་གནོད་སེམས་དང་ཡང་བྲལ་ཏེ་ཕན་ཚུན་དུ་ཕ་མར་འདུ་ཤེས་པར་གྱུར་པ་དང་། གང་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་འཇིག་རྟེན་གྱི་བར་མུན་པ་མུན་ནག་གང་དུ་ཉི་མ་དང་། ཟླ་བ་འདི་ལྟར་རྫུ་འཕྲུལ་ཆེ་བ་འདི་ལྟར་མཐུ་ཆེ་བ། འདི་ལྟར་དབང་ཆེ་བར་

གྲགས་པ་འདི་དག་གིས་ཀྱང་ལམ་མེ། ལྷན་ནེ་ལྷང་ངེར་མ་གྱུར་པ་དེ་དག་ཀྱང་འོད་དེས་ཁྱབ་ནས་སྣང་བར་གྱུར་ཏེ། གང་དེར་སྐྱེས་པའི་སེམས་ཅན་དེ་དག་ཀྱང་གཅིག་གིས་གཅིག་མཐོང་བ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་གང་ཁོར་ཡུག་གི་
རི་རྣམས་དང་། ཁོར་ཡུག་གི་རི་ཆེན་པོ་རྣམས་དང་། རི་བཏང་བཟུང་དང་། རི་བཏང་བཟུང་ཆེན་པོ་རྣམས་དང་། དེ་མ་ཡིན་པའི་རི་ནག་པོ་གཞན་དེ་དག་ཀྱང་འོད་དེས་ཁྱབ་སྟེ་སྣང་བར་གྱུར་པ་དང་། བླར་ནི་ཚངས་པའི་འཇིག་རྟེན་མན་ཆད། འོག་ཏུ་ནི་མནར་མེད་པའི་སེམས་ཅན་
དམྱལ་བ་ཆེན་པོ་ཡན་ཆད་དེའི་བར་དུ་གང་འོད་དེས་སྣང་བར་མ་བྱས་པའི་ས་ཕྱོགས་དེ་གང་ཡང་མེད་པ་དེ་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་བྱས་སོ། །དེ་མ་ཡིན་པའི་བྱང་ཆུབ་སེམས་དཔའ་གཞན་དག་གིས་ཀྱང་ཇི་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་བྱས་པས་
ཟས་འདོད་པའི་སེམས་ཅན་རྣམས་ནི་ཟས་ཐོབ། བཏུང་བ་འདོད་པ་རྣམས་ནི་བཏུང་བ། གོས་འདོད་པ་རྣམས་ནི་གོས། བཞོན་པ་འདོད་པ་རྣམས་ནི་བཞོན་པ། ནོར་འདོད་པ་རྣམས་ནི་ནོར་ཐོབ། ལོང་བ་རྣམས་ནི་མིག་ཐོབ། འོན་པ་རྣམས་ནི་སྒྲ་ཐོས། སྒྲེན་མོ་རྣམས་ནི་གོས་ཅན་
དུ་གྱུར། སྨྱོས་པ་རྣམས་ནི་དྲན་པ་ཐོབ། སྡུག་བསྔལ་བ་རྣམས་ནི་བདེ་བར་གྱུར། སྦྲུམ་པ་རྣམས་ནི་བདེ་བར་བཙས་པ་དེ་ལྟ་བུའི་རྫུ་འཕྲུལ་མངོན་པར་བྱ་བ་མངོན་པར་བྱས་སོ། །དེ་ནས་སྒྲིབ་པ་ཐམས་ཅད་རྣམ་པར་སེལ་བ་ལ་སོགས་པ་བྱང་ཆུབ་སེམས་དཔའ་དེ་དག་ཐམས་ཅད་
ཡུལ་ག་ཡ་དང་ག་ཡ་མགོའི་རི་ག་ལ་བ་དེར་ཉེ་བ་དང་། སྐྱེས་བུ་དམ་པ་དེ་དག་ཉེ་བར་གྱུར་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེའི་དྲ་བས་ཁེབས་པར་ཀུན་ཏུ་སྣང་ངོ་། །སྟེང་གི་བར་སྣང་ལས་ཀྱང་ལྷའི་པད་མའི་ཆར་མངོན་པར་རབ་ཏུ་ཕབ་བོ། །
ལྷའི་མེ་ཏོག་གི་སྤྲིན་རྣམས་དང་། ལྷའི་ཤིང་ཏོག་གི་སྤྲིན་རྣམས་དང་། ལྷའི་ཕྲེང་བའི་སྤྲིན་རྣམས་དང་། ལྷའི་སྤོས་ཀྱི་སྤྲིན་རྣམས་དང་། ལྷའི་གོས་ཀྱི་སྤྲིན་རྣམས་དང་། ལྷའི་ཕྱེ་མའི་སྤྲིན་རྣམས་དང་། ལྷའི་ཆོས་གོས་དང་། གདུགས་དང་། རྒྱལ་མཚན་དང་། བ་དན་གྱི་སྤྲིན་གྱི་

ཆར་མངོན་པར་རབ་ཏུ་བབ་བོ། །དེ་དག་མངོན་པར་རབ་ཏུ་བབ་པས་སེམས་ཅན་གང་ལ་རེག་པ་དེ་དག་ཐམས་ཅད་རབ་ཏུ་བདེ་བར་གྱུར། ཡུལ་ག་ཡ་དང་ག་ཡ་མགོའི་རི་ལ་ཤིང་ཐ་མལ་པ་དང་། ས་ཕྱོགས་ཐ་མལ་པ་གང་ཡོད་པ་དེ་དག་ཐམས་ཅད་ཀྱང་མེད་པར་སྣང་
ངོ་། །ས་ཕྱོགས་དེ་དག་ན་རིན་པོ་ཆེའི་ཤིང་རྣམས་དང་། དཔག་བསམ་གྱི་ཤིང་རྣམས་དང་། མེ་ཏོག་གི་ཤིང་རྣམས་དང་། འབྲས་བུའི་ཤིང་རྣམས་དང་། ཙན་དན་གྱི་ཤིང་རྣམས་དང་། ཨ་ག་རུའི་ཤིང་རྣམས་ཀུན་ཏུ་སྣང་སྟེ། དེ་དག་ཀུན་ཏུ་བཟང་པོར་འདུག་པར་གྱུར་ཏོ། །
བར་སྣང་ལས་ལྷའི་སིལ་སྙན་དག་སྒྲ་འབྱིན་ཅིང་། སིལ་སྙན་དེ་དག་ལས་འདི་ལྟ་བུའི་ཚིགས་སུ་བཅད་པ་འདི་དག་ཀྱང་བྱུང་ངོ་། །ལུམ་བིའི་ཚལ་རབ་མཆོག་ཏུ་གང་སྐྱེས་པ། །མཉམ་མེད་གཞར་ཡང་ཉོན་མོངས་དབང་མི་འགྱུར། །ནམ་མཁའ་མཚུངས་མཉམ་དེ་ལ་ཕྱག་འཚལ་དུ། །
རི་བོ་མཆོག་རབ་འདི་ལ་བདག་ཅག་ལྷགས། །བྱང་ཆུབ་མཆོག་སུས་བྱང་ཆུབ་ཤིང་དབང་དྲུང་། །བདུད་ཀྱི་སྡེ་སྟོབས་བཅོམ་ནས་སངས་རྒྱས་པ། །དྲི་མེད་གཟི་ལྡན་དེ་ལ་ཕྱག་འཚལ་དུ། །རི་བོ་མཆོག་རབ་འདི་ལ་བདག་ཅག་ལྷགས། །ཆོས་ཚུལ་འདི་དག་སྒྱུ་མ་སྨིག་རྒྱུ་དང་། །ཆུ་ཟླ་
འདྲ་བར་གང་གིས་རྟོགས་གྱུར་པ། །བསོད་ནམས་ཞིང་རབ་དེ་ལ་ཕྱག་འཚལ་དུ། །རི་བོ་མཆོག་རབ་འདི་ལ་བདག་ཅག་ལྷགས། །ཆོས་རྣམས་སྣ་ཚོགས་འཇའ་དང་འདྲ་བ་དང་། །གར་མཁན་ཚོན་འདྲར་གང་གིས་རབ་རྟོགས་པ། །མི་གཡོ་བསོད་ནམས་གཏེར་ལ་ཕྱག་འཚལ་དུ། །རི་བོ་
མཆོག་རབ་འདི་ལ་བདག་ཅག་ལྷགས། །གང་གིས་བསྐལ་པ་བརྒྱ་ཕྲག་མང་པོར་ནི། །ཐུགས་རྗེའི་ཐུགས་ཀྱིས་ཚོགས་ཀུན་རྫོགས་མཛད་པ། །དྲི་མེད་ཟླ་ཞལ་དེ་ལ་ཕྱག་འཚལ་དུ། །རི་བོ་མཆོག་རབ་འདི་ལ་བདག་ཅག་ལྷགས། བྱང་ཆུབ་སེམས་དཔའ་བྱེ་བ་བརྒྱ་མང་དང་། །ལྷ་
ཡི་ཚོགས་ཀྱིས་དེ་བཞིན་གང་མཆོད་པ། །གཏི་མུག་མུན་བྲལ་དེ་ལ་ཕྱག་འཚལ་དུ། །རི་བོ་མཆོག་རབ་འདི་ལ་བདག་ཅག་ལྷགས། །གང་གིས་མཆོག་གི་ཆོས་ཀྱི་གཏེར་བརྙེས་ཤིང་། །ཐུགས་རྗེ་ཉིད་ཀྱིས་འཇིག་རྟེན་དག་ལ་བཏང་། །མཉམ་མེད་ཕན་མཛད་དེ་ལ་ཕྱག་འཚལ་དུ། །

རི་བོ་མཆོག་རབ་འདི་ལ་བདག་ཅག་ལྷགས། །གང་ཞིག་ཐུགས་ཞི་རྟག་པར་བྱམས་པའི་ཡིད། །པད་མ་ཆུས་ལྟར་ཉོན་མོངས་མ་གོས་པ། །ཡོན་ཏན་མཆོག་རབ་མངའ་ལ་ཕྱག་འཚལ་དུ། །རི་བོ་མཆོག་རབ་འདི་ལ་བདག་ཅག་ལྷགས། །མཚན་གྱི་མེ་ཏོག་རྒྱས་པ་ཡོངས་སུ་
དག་པའི་སྐུ། །དཔེ་བྱད་བཟང་པོའི་འབྲུ་ཆགས་འགྲོ་བའི་འཚོ་བ་གང་། །ཡལ་ག་མཐའ་ཡས་རིན་ཆེན་ཤིང་ལ་ཕྱག་འཚལ་དུ། །བདག་ཅག་ཐམས་ཅད་ལྷན་ཅིག་མཆོད་པ་ཐོགས་ཏེ་ལྷགས། །ཚིགས་སུ་བཅད་པ་འདི་དག་བྱུང་མ་ཐག་ཏུ་དེ་ནས་ཚེ་དང་ལྡན་པ་མཽད་གལ་གྱི་བུ་
ཆེན་པོ་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྔོན་མ་ཐོས་སྔོན་མ་མཐོང་
བའི་སྔ་ལྟས་གདའ་བ་འདི་དག་སུའི་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །མཽད་གལ་གྱི་བུ་ཤར་ཕྱོགས་ན་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་
སྙེད་འདས་པ་ན་འཇིག་རྟེན་གྱི་ཁམས་པད་མ་ཅན་ཞེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་སྤྱན་ཞེས་བྱ་བ་ད་ལྟར་བཞུགས་སོ། །འཚོའོ། །གཞེས་སོ། །ཆོས་ཀྱང་སྟོན་ཏོ། །དེ་བཞིན་གཤེགས་པ་དེའི་
སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ཞེས་བྱ་བ་འཇིག་རྟེན་གྱི་ཁམས་མི་མཇེད་འདིར་འོངས་པ་དང་། དེ་མ་ཡིན་པའི་བྱང་ཆུབ་སེམས་དཔའ་གཞན་བྱེ་བ་ཁྲག་ཁྲིག་བརྒྱ་སྟོང་གང་སྐྱེས་བུ་དམ་པ་དེ་ཉིད་དང་ལྷན་ཅིག་ཏུ་མི་མཇེད་
ཀྱི་འཇིག་རྟེན་གྱི་ཁམས་འདིར་འོངས་པ་དེ་དག་གི་སྔ་ལྟས་འདི་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་མ་ཐག་ཏུ། དེ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་བསྐོར་ཅིང་མདུན་དུ་

བདར་ཏེ། རྫུ་འཕྲུལ་གྱི་མཐུ་ཆེན་པོ་དང་། བྱང་ཆུབ་སེམས་དཔའི་མཐུ་ཆེན་པོས་བཅོམ་ལྡན་འདས་ག་ལ་བ་དེར་འོངས་ཏེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བྱང་ཆུབ་སེམས་དཔའ་དེ་དག་དང་ལྷན་ཅིག་ཏུ་བཅོམ་ལྡན་འདས་ཀྱི་སྤྱན་སྔར་འཁོད་ནས། བཅོམ་ལྡན་
འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །གྲགས་ཆེན་ཤེས་རབ་ཆེན་པོ་པ། །ཐུབ་ཆེན་དཔའ་བོ་ཆེན་པོ་པ། །སྲིད་པའི་མྱ་ངན་རྒལ་བ་པོ། །ཉོན་མོངས་རྒལ་ལ་ཕྱག་འཚལ་ལོ། །
ཐམས་ཅད་དུ་ཡང་ཐ་ལེ་སྟེ། །ཀུན་ནས་རབ་ཏུ་ལྷན་ནེར་བཞུགས། །ཀུན་ནས་རྣམ་པར་གྲོལ་བ་པོ། །ཕྱག་འཚལ་མི་མཚུངས་མཚུངས་མེད་ལ། །རབ་ཏུ་མི་སྒུལ་རི་བོ་བཞིན། །གཏིང་ཚོད་ཡངས་པ་རྒྱ་མཚོ་འདྲ། །མུ་སྟེགས་ཀུན་ནས་མི་བསྐྱོད་པ། །ཆོས་རྒྱལ་ཁྱོད་ལ་
ཕྱག་འཚལ་ལོ། །ཆོས་ཀྱི་འཁོར་ལོ་བསྐོར་བ་ན། །གཟོད་ནས་ཞི་ཞིང་མ་སྐྱེས་པ། །རང་བཞིན་མྱ་ངན་འདས་པ་ཡི། །ཆོས་རྣམས་མགོན་པོ་ཁྱོད་ཀྱིས་བསྟན། །ལ་ལ་ལ་ནི་ལམ་ཡང་བསྟན། །ལ་ལ་ཡང་དག་ཉིད་ལ་བཀོད། །ལ་ལ་ཡང་དག་མྱ་ངན་བཟླས། །ལ་ལ་བྱང་ཆུབ་
ལུང་ཡང་བསྟན། །བག་ལ་ཉལ་དང་བསམ་པ་མཁྱེན། །ཁྱོད་ཀྱིས་མི་མཁྱེན་ཅི་ཡང་མེད། །དེ་ཕྱིར་འདུལ་བའི་བྱ་བ་རྣམས། །གཟིགས་པས་ཁྱོད་ཀྱི་བཀའ་འགྲུབ་བོ། །བྱང་ཆུབ་སྙིང་པོར་བཞུགས་པ་ན། །འདོད་ཆགས་ཞེ་སྡང་གཏི་མུག་དང་། །དྲི་མ་སྣ་ཚོགས་གཞན་རྣམས་
ཀྱང་། །ཁྱོད་ཀྱི་ཡེ་ཤེས་མེ་ཡིས་བསྲེགས། །རྒལ་ནས་སེམས་ཅན་རྣམས་སྒྲོལ་ཞིང་། །གྲོལ་ནས་སྐྱེ་དགུ་གྲོལ་མཛད་དེ། །སྲིད་པའི་མྱ་ངན་འཁྱམས་པ་ཡི། །འཇིག་རྟེན་ཚོལ་བ་ཁྱོད་ལགས་སོ། །སྲིད་པའི་བཙོན་རར་སེམས་ཅན་དག །ཡུན་རིང་མི་ཤེས་གཉིད་ལོག་རྣམས། །
སད་པར་མཛད་པ་མགོན་པོ་ཁྱོད། །གཉེན་གྱུར་ཁྱོད་ལ་ཕྱག་འཚལ་ལོ། །ཁྱོད་ཀྱི་སྲས་མཆོག་འདི་དག་ཀྱང་། །ཐམས་ཅད་བྱང་ཆུབ་སླད་དུ་ཞུགས། །དམ་པའི་ཆོས་ནི་ཉན་འཚལ་ན། །འདྲེན་པས་དེ་དག་བསྟན་དུ་གསོལ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་

སྒྲིབ་པ་ཐམས་ཅད་རྣམ་པར་སེལ་བས་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་ནས། བཅོམ་ལྡན་འདས་ཀྱིས་གནང་སྟེ་པད་མའི་སྙིང་པོ་ལ་ཕྱོགས་གཅིག་ཏུ་འདུག་གོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་བཅོམ་ལྡན་འདས་ཀྱིས་གནང་ནས་པད་མའི་སྙིང་
པོ་ལ་སོ་སོ་ཅི་རིགས་པར་འཁོད་དོ། །དེ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་པད་མའི་སྙིང་པོ་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་
བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ། བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བདག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱོགས་འགའ་ཞིག་ཞུའོ། །
དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ལ་འདི་སྐད་ཅེས་བཀའ་སྩལ་ཏོ། །སྐྱེས་བུ་དམ་པ་ཁྱོད་ལ་དེ་བཞིན་གཤེགས་པ་ཐམས་ཅད་ཀྱིས་རྟག་ཏུ་སྐབས་ཕྱེས། དེ་བཞིན་གཤེགས་པ་ལ་ཁྱོད་ཅི་དང་ཅི་འདོད་པ་དྲིས་
ཤིག་དང་། དྲིས་པ་ལུང་བསྟན་པ་དེ་དང་དེ་ཉིད་ཀྱིས་ངས་ཁྱོད་ཀྱི་སེམས་རངས་པར་བྱའོ། །བཅོམ་ལྡན་འདས་ཀྱིས་སྐབས་ཕྱེ་བ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་
སེམས་དཔའ་སེམས་དཔའ་ཆེན་པོ་སྦྱིན་པ་ཕུན་སུམ་ཚོགས་པ་རྣམས་ལགས། ཇི་ལྟར་ན་ཚུལ་ཁྲིམས་ཕུན་སུམ་ཚོགས་པ་རྣམས་ལགས། ཇི་ལྟར་ན་བཟོད་པ་ཕུན་སུམ་ཚོགས་པ་རྣམས་ལགས། ཇི་ལྟར་ན་བརྩོན་འགྲུས་ཕུན་སུམ་ཚོགས་པ་རྣམས་ལགས། ཇི་ལྟར་ན་བསམ་གཏན་
ཕུན་སུམ་ཚོགས་པ་རྣམས་ལགས། ཇི་ལྟར་ན་ཤེས་རབ་ཕུན་སུམ་ཚོགས་པ་རྣམས་ལགས། ཇི་ལྟར་ན་ཐབས་མཁས་པ་ཕུན་སུམ་ཚོགས་པ་རྣམས་ལགས། ཇི་ལྟར་ན་སྨོན་ལམ་ཕུན་སུམ་ཚོགས་པ་རྣམས་ལགས། ཇི་ལྟར་ན་སྟོབས་ཕུན་སུམ་ཚོགས་པ་རྣམས་ལགས། ཇི་ལྟར་

ན་ཡེ་ཤེས་ཕུན་སུམ་ཚོགས་པ་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་ས་དང་མཚུངས་པ་རྣམས་ལགས། ཇི་ལྟར་ན་ཆུ་དང་མཚུངས་པ་རྣམས་ལགས། ཇི་ལྟར་ན་མེ་དང་མཚུངས་པ་རྣམས་ལགས། ཇི་ལྟར་ན་རླུང་མར་དང་མཚུངས་
པ་རྣམས་ལགས། ཇི་ལྟར་ན་ནམ་མཁའ་དང་མཚུངས་པ་རྣམས་ལགས། ཇི་ལྟར་ན་ཟླ་བ་ལྟ་བུ་རྣམས་ལགས། ཇི་ལྟར་ན་ཉི་མ་ལྟ་བུ་རྣམས་ལགས། ཇི་ལྟར་ན་སེང་གེ་ལྟ་བུ་རྣམས་ལགས། ཇི་ལྟར་ན་དུལ་བ་རྣམས་ལགས། ཇི་ལྟར་ན་ཅང་ཤེས་པ་རྣམས་ལགས། ཇི་
ལྟར་ན་པད་མ་ལྟ་བུ་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་རྒྱ་ཆེ་བ་རྣམས་ལགས། ཇི་ལྟར་ན་སེམས་རྣམ་པར་དག་པ་རྣམས་ལགས། ཇི་ལྟར་ན་སེམས་ནེམ་ནུར་མ་མཆིས་པ་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་
བློ་རྒྱ་མཚོ་ལྟ་བུ་རྣམས་ལགས། ཇི་ལྟར་ན་བློ་ཞིབ་པ་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་རིགས་པའི་སྤོབས་པ་ཅན་རྣམས་ལགས། ཇི་ལྟར་ན་གྲོལ་བའི་སྤོབས་པ་ཅན་རྣམས་ལགས། ཇི་ལྟར་ན་རྣམ་པར་དག་པའི་སྤོབས་པ་ཅན་རྣམས་ལགས།
ཇི་ལྟར་ན་སེམས་ཅན་ཐམས་ཅད་མགུ་བར་བྱེད་པའི་སྤོབས་པ་ཅན་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་ཚིག་གཟུང་བ་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་ཆོས་བརྗོད་པ་རྣམས་ལགས། ཇི་ལྟར་ན་ཆོས་ཀྱི་རྗེས་སུ་འབྲང་
བ་རྣམས་ལགས། ཇི་ལྟར་ན་ཆོས་ཀྱི་དབྱིངས་ལ་མཁས་པ་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སྟོང་པ་ཉིད་སྤྱོད་ཡུལ་བ་རྣམས་ལགས། ཇི་ལྟར་ན་མཚན་མ་མེད་པ་ལ་གནས་པ་རྣམས་ལགས། ཇི་ལྟར་ན་སྨོན་ལམ་ལ་གནས་པ་ཐམས་ཅད་དང་བྲལ་བ་
རྣམས་ལགས། ཇི་ལྟར་ན་བྱམས་པའི་བདག་ཉིད་ཅན་རྣམས་ལགས། ཇི་ལྟར་ན་སྙིང་རྗེའི་བདག་ཉིད་ཅན་རྣམས་ལགས། ཇི་ལྟར་ན་དགའ་བ་ལ་གནས་པ་རྣམས་ལགས། ཇི་ལྟར་ན་བཏང་སྙོམས་ལ་གནས་པ་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་

མངོན་པར་ཤེས་པས་རྣམ་པར་རོལ་པ་རྣམས་ལགས། ཇི་ལྟར་ན་མི་ཁོམ་པ་བརྒྱད་རྣམ་པར་སྤངས་པ་རྣམས་ལགས། ཇི་ལྟར་ན་བྱང་ཆུབ་ཀྱི་སེམས་མ་སྟོར་བ་རྣམས་ལགས། ཇི་ལྟར་ན་སྐྱེ་བ་དྲན་པ་རྣམས་ལགས། ཇི་ལྟར་ན་དགེ་བའི་བཤེས་གཉེན་དང་མ་བྲལ་བ་རྣམས་
ལགས། ཇི་ལྟར་ན་སྡིག་པའི་གྲོགས་པོ་ཡོངས་སུ་སྤངས་པ་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པའི་སྐུའི་ཆོས་ཉིད་འཐོབ་པར་འགྱུར། ཇི་ལྟར་ན་ལུས་རྡོ་རྗེ་ལྟར་སྲ་བ་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་
དཔའ་དེད་དཔོན་ཆེན་པོ་རྣམས་ལགས། ཇི་ལྟར་ན་ལམ་ལ་མཁས་པ་རྣམས་ལགས། ཇི་ལྟར་ན་ལམ་མ་ལོག་པར་སྟོན་པ་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་རྟག་ཏུ་རྒྱུན་མི་འཆད་པར་སེམས་མཉམ་པར་བཞག་པ་རྣམས་ལགས། བཅོམ་
ལྡན་འདས་ཇི་ལྟར་ན་བྱང་ཆུབ་སེམས་དཔའ་ཕྱག་དར་ཁྲོད་པ་རྣམས་ལགས། ཇི་ལྟར་ན་ཆོས་གོས་གསུམ་པ་རྣམས་ལགས། ཇི་ལྟར་ན་ཕྱིང་པ་ཅན་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་བསོད་སྙོམས་པ་རྣམས་ལགས། ཇི་ལྟར་ན་སྟན་གཅིག་
པ་རྣམས་ལགས། ཇི་ལྟར་ན་ཟས་ཕྱིས་མི་ལེན་པ་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་དགོན་པ་པ་རྣམས་ལགས། ཇི་ལྟར་ན་ཤིང་དྲུང་པ་རྣམས་ལགས། ཇི་ལྟར་ན་བླ་གབ་མེད་པ་པ་རྣམས་ལགས། ཇི་ལྟར་ན་དུར་ཁྲོད་པ་རྣམས་ལགས།
ཇི་ལྟར་ན་ཅོག་པུ་པ་རྣམས་ལགས། ཇི་ལྟར་ན་གཞི་ཇི་བཞིན་པ་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་རྣལ་འབྱོར་སྤྱོད་པ་རྣམས་ལགས། ཇི་ལྟར་ན་མདོ་སྡེ་འཛིན་པ་རྣམས་ལགས། ཇི་ལྟར་ན་འདུལ་བ་འཛིན་པ་རྣམས་ལགས། ཇི་ལྟར་
ན་མ་མོ་འཛིན་པ་རྣམས་ལགས། ཇི་ལྟར་ན་ཆོ་ག་དང་། སྤྱོད་ཡུལ་དང་། སྤྱོད་པ་དང་། སྤྱོད་ལམ་ཕུན་སུམ་ཚོགས་པ་རྣམས་ལགས། ཇི་ལྟར་ན་སེར་སྣ་དང་། ཕྲག་དོག་དང་བྲལ་བ་རྣམས་ལགས། ཇི་ལྟར་ན་སེམས་ཅན་ཐམས་ཅད་ལ་སེམས་སྙོམས་པ་རྣམས་ལགས། ཇི་ལྟར་ན་

དེ་བཞིན་གཤེགས་པ་ལ་མཆོད་པ་དང་རིམ་གྲོ་བགྱིད་མཁས་པ་རྣམས་ལགས། ཇི་ལྟར་ན་ང་རྒྱལ་བཅོམ་པ་རྣམས་ལགས། ཇི་ལྟར་ན་དད་པ་མང་བ་རྣམས་ལགས། ཇི་ལྟར་ན་ཀུན་རྫོབ་ལ་མཁས་པ་རྣམས་ལགས། ཇི་ལྟར་ན་དོན་དམ་པ་ལ་མཁས་པ་
རྣམས་ལགས། ཇི་ལྟར་ན་རྟེན་ཅིང་འབྲེལ་པར་འབྱུང་བ་ལ་མཁས་པ་རྣམས་ལགས། ཇི་ལྟར་ན་བདག་ཤེས་པ་རྣམས་ལགས། ཇི་ལྟར་ན་འཇིག་རྟེན་ཤེས་པ་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སངས་རྒྱས་ཀྱི་ཞིང་ཡོངས་སུ་དག་པར་སྐྱེ། ཇི་ལྟར་ན་
མངལ་གྱི་དྲི་མས་མ་གོས་པར་སྐྱེ། ཇི་ལྟར་ན་ཁྱིམ་གྱི་གནས་ནས་མངོན་པར་བྱུང་བ་རྣམས་ལགས། ཇི་ལྟར་ན་འཚོ་བ་ཡོངས་སུ་དག་པ་རྣམས་ལགས། ཇི་ལྟར་ན་ཡིད་ཡོངས་སུ་མི་སྐྱོ་བ་རྣམས་ལགས། ཇི་ལྟར་ན་དེ་བཞིན་གཤེགས་པ་རྣམས་ཀྱི་བཀའ་བཞིན་བགྱིད་པ་རྣམས་
ལགས། ཇི་ལྟར་ན་བཞིན་འཛུམ་ཞིང་ཁྲོ་གཉེར་མ་མཆིས་པ་རྣམས་ལགས། ཇི་ལྟར་ན་མང་དུ་ཐོས་པ་རྣམས་ལགས། ཇི་ལྟར་ན་དམ་པའི་ཆོས་ཡོངས་སུ་འཛིན་པ་རྣམས་ལགས། ཇི་ལྟར་ན་ཆོས་ཀྱི་རྒྱལ་པོའི་སྲས་རྣམས་ལགས། ཇི་ལྟར་ན་བརྒྱ་བྱིན་དང་། ཚངས་པ་དང་
འཇིག་རྟེན་སྐྱོང་བས་བསྩུ་བ་རྣམས་ལགས། ཇི་ལྟར་ན་བསམ་པ་དང་། བག་ལ་ཉལ་འཚལ་བ་རྣམས་ལགས། ཇི་ལྟར་ན་སེམས་ཅན་ཡོངས་སུ་སྨིན་པར་བགྱི་བའི་ཆོ་ག་འཚལ་བ་རྣམས་ལགས། ཇི་ལྟར་ན་དེས་པ་རྣམས་ལགས། ཇི་ལྟར་ན་འགྲོགས་ན་བདེ་བ་རྣམས་ལགས།
ཇི་ལྟར་ན་བསྡུ་བའི་དངོས་པོ་ལ་མཁས་པ་རྣམས་ལགས། ཇི་ལྟར་ན་ཚུལ་དུ་ཤིས་པ་རྣམས་ལགས། ཇི་ལྟར་ན་གནས་བཅའ་བ་རྣམས་ལགས། ཇི་ལྟར་ན་རྩིའི་རྒྱལ་པོའི་ཤིང་ཆེན་པོ་ལྟ་བུ་རྣམས་ལགས། ཇི་ལྟར་ན་བསོད་ནམས་བགྱི་བ་ལ་བརྩོན་པ་རྣམས་ལགས།
ཇི་ལྟར་ན་སྤྲུལ་པ་ལ་མཁས་པ་རྣམས་ལགས། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་དག་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་

དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ལེགས་སོ་ལེགས་སོ། །ཡང་རིགས་ཀྱི་བུ་ཁྱོད་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་
དོན་དང་། ཕན་པ་དང་བདེ་བའི་ཕྱིར་ཞུགས་ཤིང་། དེ་ལྟར་དེ་བཞིན་གཤེགས་པ་ལ་ཁྱོད་འདི་ལྟ་བུའི་དོན་འདྲི་བར་སེམས་པ་ལེགས་སོ། །རིགས་ཀྱི་བུ་དེའི་ཕྱིར་ལེགས་པར་ཤིན་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་ལེགས་སོ་ཞེས་བྱང་ཆུབ་སེམས་
དཔའ་སྒྲིབ་པ་ཐམས་ཅད་རྣམ་པར་སེལ་བས་བཅོམ་ལྡན་འདས་ཀྱི་ལྟར་མཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཆོས་བཅུ་དང་ལྡན་ན་བྱང་ཆུབ་སེམས་དཔའ་སྦྱིན་པ་ཕུན་སུམ་ཚོགས་པ་རྣམས་ཡིན་ནོ། །བཅུ་གང་ཞེ་ན། འདི་ལྟ་སྟེ། ཆོས་ཀྱི་སྦྱིན་པ་
ཕུན་སུམ་ཚོགས་པ་རྣམས་ཡིན། མི་འཇིགས་པའི་སྦྱིན་པ་ཕུན་སུམ་ཚོགས་པ་རྣམས་ཡིན། ཟང་ཟིང་གི་སྦྱིན་པ་ཕུན་སུམ་ཚོགས་པ་རྣམས་ཡིན། ལན་དུ་ཕན་འདོགས་པ་ལ་མི་རེ་བའི་སྦྱིན་པ་ཕུན་སུམ་ཚོགས་པ་རྣམས་ཡིན། སྙིང་རྗེ་བའི་སྦྱིན་པ་ཕུན་སུམ་ཚོགས་པ་རྣམས་ཡིན།
མི་བརྙས་པའི་སྦྱིན་པ་ཕུན་སུམ་ཚོགས་པ་རྣམས་ཡིན། བསྟི་སྟང་གི་སྦྱིན་པ་ཕུན་སུམ་ཚོགས་པ་རྣམས་ཡིན། མཆོད་པ་དང་རིམ་གྲོའི་སྦྱིན་པ་ཕུན་སུམ་ཚོགས་པ་རྣམས་ཡིན། མི་གནས་པའི་སྦྱིན་པ་ཕུན་སུམ་ཚོགས་པ་རྣམས་ཡིན། ཡོངས་སུ་དག་པའི་སྦྱིན་པ་ཕུན་སུམ་ཚོགས་པ་
རྣམས་ཡིན་ནོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་ཆོས་ཀྱི་སྦྱིན་པ་ཕུན་སུམ་ཚོགས་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ཟང་ཟིང་མེད་པའི་སེམས་ཀྱིས་ཆོས་རྣམས་འཛིན་ཅིང་ཀུན་ཆུབ་པར་བྱེད་དེ། རྙེད་པ་དང་བཀུར་སྟིའི་ཕྱིར་མ་ཡིན། ཤེས་ཀྱི་ཁེ་འདོད་
པའི་ཕྱིར་མ་ཡིན། གྲགས་པ་འདོད་པའི་ཕྱིར་མ་ཡིན་ཏེ། གཞན་དུ་ན་དེ་འདི་ལྟར་སེམས་ཅན་འདི་དག་གི་སྡུག་བསྔལ་ཐམས་ཅད་ཇི་ལྟར་ཟད་པར་བྱ་སྙམ་སྟེ། ཆོས་དེ་དག་ཀྱང་ཟང་ཟིང་མེད་པའི་སེམས་ཀྱིས་གཉིས་སུ་མེད་པར་གཞན་དག་ལ་ཡང་ཡང་དག་པར་སྟོན་ཏོ། །ཇི་ལྟར་རྒྱལ་པོའམ་

བློན་པོ་ཆེན་པོ་ལ་ཡང་དག་པར་སྟོན་པ་དེ་ལྟར་གདོལ་པའམ། གདོལ་བུ་ལ་ཡང་ཡང་དག་པར་སྟོན་ན། དེ་མ་ཡིན་པ་གྲོང་པ་དང་། ཡུལ་གྱི་མི་གཞན་དག་ལ་ལྟ་ཅི་སྨོས། ཆོས་ཀྱི་སྦྱིན་པ་དེས་ཁེངས་པར་ཡང་མི་འགྱུར་ཏེ། རིགས་ཀྱི་བུ་དེ་ལྟར་ན་བྱང་ཆུབ་སེམས་
དཔའ་ཆོས་ཀྱི་སྦྱིན་པ་ཕུན་སུམ་ཚོགས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་མི་འཇིགས་པའི་སྦྱིན་པ་ཕུན་སུམ་ཚོགས་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་བདག་གིས་དབྱིག་པ་བོར་བ་དང་། མཚོན་ཆ་བོར་བ་ཡིན་ཏེ། གཞན་དག་ཀྱང་བསླབ་པ་དེ་
ཉིད་ལ་གཞོག་གོ། །དེ་སེམས་ཅན་ཐམས་ཅད་ལ་ཕར་འདུ་ཤེས་པ་ཡིན། མར་འདུ་ཤེས་པ་ཡིན། བུར་འདུ་ཤེས་པ་ཡིན། གཉེན་བཤེས་སུ་འདུ་ཤེས་པ་ཡིན། ཉེ་དུའམ་སྣག་གི་གཉེན་མཚམས་དག་ཀྱང་རུང་བར་འདུ་ཤེས་པ་ཡིན་ནོ། །དེ་ཅིའི་ཕྱིར་ཞེ་ན། དེ་འདི་སྙམ་དུ་
སེམས་ཏེ། དེ་བཞིན་གཤེགས་པས་ཀྱང་སྐྱེ་བ་འཕོ་བ་དེ་དང་དེ་དག་ཏུ་སེམས་ཅན་གྱི་རིས་སུ་གང་ཁྱོད་ཀྱི་ཕའམ། མ་འམ་བུའམ། གཉེན་བཤེས་སམ། ཉེ་དུའམ། སྣག་གི་གཉེན་མཚམས་དག་གང་ཡང་རུང་བའི་གནས་སུ་མ་གྱུར་པའི་སེམས་ཅན་དེ་ལྟ་བུ་མེད་དོ་ཞེས་གསུངས་སོ་
སྙམ་ནས། དེ་སྲོག་ཆགས་སུ་གྱུར་པ་ཕྲ་མོའི་ཕྱིར་ཡང་བདག་གི་ཤ་དག་གིས་ཀྱང་ཕན་འདོགས་ན། སྲོག་ཆགས་ཆེན་པོ་ཆེ་བ་གཞན་དག་ལ་ལྟ་ཅི་སྨོས་ཏེ། དེ་ལྟར་ན་བྱང་ཆུབ་སེམས་དཔའ་མི་འཇིགས་པ་སྦྱིན་པ་ཕུན་སུམ་ཚོགས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་ཟང་
ཟིང་གི་སྦྱིན་པ་ཕུན་སུམ་ཚོགས་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་ཅན་གང་དག་མི་དགེ་བའི་ལས་རབ་ཏུ་བྱེད་པ་མཐོང་ན། དེ་དག་ཟང་ཟིང་གིས་སྡུད་ཅིང་། ཟང་ཟིང་གིས་བསྡུས་ནས་མི་དགེ་བའི་གནས་དེ་ནས་བསླང་སྟེ། དགེ་བའི་གནས་སུ་འགོད་དོ། །
དེ་ཡང་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་ཀྱང་སྦྱིན་པ་ནི་བྱང་ཆུབ་སེམས་དཔའི་བྱང་ཆུབ་བོ། །བྱང་ཆུབ་སེམས་དཔའ་སྦྱིན་པ་སྦྱིན་པ་ན་མི་དགེ་བའི་ཆོས་ཕྲག་དོག་དང་། སེར་སྣ་དང་། ངན་སེམས་གསུམ་སྤངས་པ་ཡིན་ནོ་ཞེས་གསུངས་ཏེ། དེ་བས་ན་བདག་གིས་དེ་བཞིན་

གཤེགས་པའི་རྗེས་སུ་བསླབ་ཅིང་སྦྱིན་པ་སྦྱིན་པར་བྱའོ་སྙམ་སྟེ། དེ་སྦྱིན་པ་ཡང་སྦྱིན་ཞིང་སྦྱིན་པ་དེས་ཁེངས་པར་ཡང་མི་འགྱུར་ཏེ། དེ་ལྟར་ན་བྱང་ཆུབ་སེམས་དཔའ་ཟང་ཟིང་གི་སྦྱིན་པ་ཕུན་སུམ་ཚོགས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་ལན་དུ་ཕན་འདོགས་པ་ལ་མི་རེ་བའི་
སྦྱིན་པ་ཕུན་སུམ་ཚོགས་པ་ཡིན་ཞེ་ན། བྱང་ཆུབ་སེམས་དཔའ་སྦྱིན་པ་སྦྱིན་པ་ཡང་འདོད་པའི་ཕྱིར་སྦྱིན་པ་མི་སྦྱིན། ཕན་འདོགས་སུ་རེ་བའི་ཕྱིར་མ་ཡིན། དོན་གྱི་ཕྱིར་མ་ཡིན། གཡོག་གི་ཕྱིར་མ་ཡིན། འཇིག་རྟེན་གྱི་ཚུལ་གྱི་ཕྱིར་མ་ཡིན་གྱི། གཞན་དུ་ན་འདི་སྙམ་དུ་སེམས་ཏེ། གང་བྱང་ཆུབ་སེམས་དཔའ་
སྦྱིན་པའི་ངང་ཚུལ་ཅན་དུ་འགྱུར་བ་འདི་ནི་ཆོས་ཉིད་ཡིན་ནོ་སྙམ་སྟེ། དེ་རྒྱུ་དེ་དང་རྐྱེན་དེ་དང་གཞིས་ཕན་བཏགས་པའི་ལན་དུ་ཕན་འདོགས་པ་ཐམས་ཅད་ལ་མི་རེ་བར་སྦྱིན་པ་སྦྱིན་པར་བྱེད་དེ། དེ་ལྟར་ན་བྱང་ཆུབ་སེམས་དཔའ་ལན་དུ་ཕན་འདོགས་པ་ལ་མི་རེ་བའི་སྦྱིན་པ་ཕུན་སུམ་ཚོགས་པ་ཡིན་ནོ། །ཇི་
ལྟར་ན་བྱང་ཆུབ་སེམས་དཔའ་སྙིང་རྗེ་བའི་སྦྱིན་པ་ཕུན་སུམ་ཚོགས་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་སེམས་ཅན་སྡུག་བསྔལ་བ་དང་། བཀྲེས་པ་དང་། སྐོམ་པ་དང་། གཅེར་བུ་དང་། གོས་ངན་པ་དང་། བགོ་བ་ངན་པ་དང་། མགོན་མེད་པ་དང་། དཔུང་གཉེན་
མེད་པ་དང་། སྐྱབས་མེད་པ་དང་། གནས་མེད་པ་དང་། རྟེན་མེད་པ་ལྟ་བུ་བསོད་ནམས་མེད་པ་དག་མཐོང་ན། དེ་དག་ལ་སྙིང་རྗེ་བའི་སེམས་རབ་ཏུ་སྐྱེད་ཅིང་། དེ་འདི་སྙམ་དུ་སེམས་ཏེ་སེམས་ཅན་གང་དག་གི་ཕྱིར་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
བསྐྱེད་པའི་སེམས་ཅན་དེ་དག་ནི་སྡུག་བསྔལ་བ། མགོན་མེད་པ། དཔུང་གཉེན་མེད་པ། སྐྱབས་མེད་པ། གནས་མེད་པ། རྟེན་མེད་པ་འདི་དག་ཡིན་ཏེ། ཀུན་ཏུ་འཁྱམ་ན་ནམ་ཞིག་བདག་སེམས་ཅན་དེ་དག་གི་མགོན་དང་། དཔུང་གཉེན་དང་། སྐྱབས་དང་། གནས་དང་།
རྟེན་དུ་འགྱུར་སྙམ་ནས། དེ་སྙིང་རྗེས་རབ་ཏུ་མི་བཟད་དེ། བདོག་ཅིང་ཡོད་པའི་དངོས་པོས་སེམས་ཅན་དེ་དག་ལ་ཕན་འདོགས་སོ། །ཕན་བཏགས་པའི་མོད་ལ་སྐྱེས་པའི་དགེ་བའི་རྩ་བ་དེས་ཀྱང་ཁེངས་པར་མི་འགྱུར་ཏེ། དེ་ལྟར་ན་བྱང་ཆུབ་སེམས་དཔའ་སྙིང་རྗེ་བའི་སྦྱིན་པ་ཕུན་སུམ་ཚོགས་པ་

ཡིན་ནོ། །ཇི་ལྟར་ན་བྱང་ཆུབ་སེམས་དཔའ་མི་བརྙས་པའི་སྦྱིན་པ་ཕུན་སུམ་ཚོགས་པ་ཡིན་ཞེ་ན། བྱང་ཆུབ་སེམས་དཔའ་སྦྱིན་པ་སྦྱིན་པ་ན། བོར་བའི་སྦྱིན་པ་མི་སྦྱིན། བརྙས་ཤིང་སྦྱིན་པ་མི་སྦྱིན། གཤེ་ཞིང་སྦྱིན་པ་མི་སྦྱིན། ཉོན་མོངས་ཤིང་
སྦྱིན་པ་མི་སྦྱིན། ཕྱུག་པས་རྒྱགས་ཤིང་དྲེགས་ཏེ་སྦྱིན་པ་མི་སྦྱིན། གྲགས་པ་འདོད་ཅིང་སྦྱིན་པ་མི་སྦྱིན། མང་དུ་ཐོས་པས་རྒྱགས་ཤིང་དྲེགས་པས་སྦྱིན་པ་མི་སྦྱིན་གྱི། ཅི་སྦྱིན་པ་དེ་ཡང་བསྟི་སྟང་དུ་བྱས་ཤིང་སྦྱིན་པ་སྦྱིན་པར་བྱེད་དོ། །བཙུན་པར་བྱས་ཤིང་སྦྱིན་པ་སྦྱིན་
པར་བྱེད་དོ། །རི་མོར་བྱས་ཏེ་མཆོད་ཅིང་རང་གི་ལག་ནས་སྦྱིན་པ་སྦྱིན་པར་བྱེད་དོ། །དེ་ལྟར་ན་བྱང་ཆུབ་སེམས་དཔའ་མི་བརྙས་པའི་སྦྱིན་པ་ཕུན་སུམ་ཚོགས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་བསྟི་སྟང་གི་སྦྱིན་པ་ཕུན་སུམ་ཚོགས་པ་ཡིན་ཞེ་ན། བྱང་ཆུབ་སེམས་
དཔས་སློབ་དཔོན་དང་། མཁན་པོ་དང་། བླ་མ་ལྟ་བུ་དང་། ཚངས་པ་མཚུངས་པར་སྤྱོད་པ་དག་མཐོང་ན། ལུས་ཀྱིས་གུས་པ་དང་བཅས་པ་ཡིན། སེམས་ཀྱིས་རི་མོ་དང་བཅས་པ་ཡིན་ཏེ། དེས་གུས་པ་བསྐྱེད། རི་མོ་བསྐྱེད་ནས་གུས་པར་སྨྲ་བ་དང་། ཕྱག་འཚལ་བ་དང་།
བསྩུ་བ་དང་། ཐལ་མོ་སྦྱར་བ་དང་། འདུད་པའི་ལས་དག་བྱེད་དོ། །དེ་དག་གི་དགེ་བ་དང་ལྡན་པའི་བྱ་བ་དེ་དང་དེ་དག་ལ་ཡང་གྲོགས་སུ་འགྱུར་ཏེ། དེ་ལྟར་ན་བྱང་ཆུབ་སེམས་དཔའ་བསྟི་སྟང་གི་སྦྱིན་པ་ཕུན་སུམ་ཚོགས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་མཆོད་པ་དང་།
རིམ་གྲོའི་སྦྱིན་པ་ཕུན་སུམ་ཚོགས་པ་ཡིན་ཞེ་ན། བྱང་ཆུབ་སེམས་དཔའ་སངས་རྒྱས་དང་། ཆོས་དང་དགེ་འདུན་ལ་བྱ་བ་དག་བྱེད་དེ། ཇི་ལྟར་ན་སངས་རྒྱས་ལ་བྱ་བ་དག་བྱེད་ཅེ་ན། འདི་ལྟ་སྟེ། དེ་བཞིན་གཤེགས་པའི་མཆོད་རྟེན་དག་དང་། དེ་བཞིན་གཤེགས་པའི་སྐུ་གཟུགས་ལ་
སྤོས་སམ། མེ་ཏོག་གམ། བདུག་པའམ། བྱུག་པའམ། སྐྱོང་ནུལ་ལམ། དེ་བཞིན་གཤེགས་པའི་མཆོད་རྟེན་ཞིག་པ་བཅོས་པ་དག་གིས་ཏེ། དེ་ལྟར་ན་སངས་རྒྱས་ལ་བྱ་བ་དག་བྱེད་དོ། །ཇི་ལྟར་ན་ཆོས་ལ་བྱ་བདག་བྱེད་ཅེ་ན། དེ་ཆོས་ཉན་ཏོ། །ཀློག་གོ། །འཆང་ངོ་། །

ཡི་གེར་འདྲིའོ། །ཁ་ཏོན་བྱེད་དོ། །ཀུན་ཆུབ་པར་བྱེད་དོ། །སེམས་སོ། །མ་ལོག་པར་སྒོམ་པའི་སྦྱོར་བས་གོམས་པར་བྱེད་དེ། དེ་ལྟར་ན་ཆོས་ལ་བྱ་བ་དག་བྱེད་དོ། །ཇི་ལྟར་ན་དགེ་འདུན་ལ་བྱ་བ་དག་བྱེད་ཅེ་ན། དེ་གོས་དང་། བསོད་སྙོམས་དང་། མལ་ཆ་དང་། ན་བའི་རྐྱེན་
སྨན་དང་། ཡོ་བྱད་རྣམས་དང་། ཆུང་ངུ་ན་ཆུ་གྲང་མོ་ཁྱོར་གང་ཙམ་ཡང་དགེ་འདུན་ལ་འབུལ་ཏེ། དེ་ལྟར་ན་དགེ་འདུན་ལ་བྱ་བ་དག་བྱེད་དེ། དེ་ལྟར་ན་བྱང་ཆུབ་སེམས་དཔའ་མཆོད་པ་དང་རིམ་གྲོའི་སྦྱིན་པ་ཕུན་སུམ་ཚོགས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་མི་གནས་པའི་སྦྱིན་པ་
ཕུན་སུམ་ཚོགས་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་སྦྱིན་པ་བྱིན་པ་ན། སྦྱིན་པ་འདིས་བདག་ལྷའམ་ལྷ་ལ་ལ་ཞིག་ཏུ་ཤོག་ཤིག་ཅེའམ། རྒྱལ་པོའམ་རྒྱལ་པོ་ལ་ལ་ཞིག་ཏུ་ཤོག་ཤིག་ཅེས་དེ་ལྟར་སེམས་མི་སྐྱེད་དེ། དེ་ལྟར་ན་བྱང་ཆུབ་སེམས་དཔའ་མི་གནས་པའི་སྦྱིན་
པ་ཕུན་སུམ་ཚོགས་པ་ཡིན་ནོ། །རིགས་ཀྱི་བུ་ཇི་ལྟར་ན་བྱང་ཆུབ་སེམས་དཔའ་ཡོངས་སུ་དག་པའི་སྦྱིན་པ་ཕུན་སུམ་ཚོགས་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་སྦྱིན་པ་འདི་དག་ཇི་སྐད་དུ་བཤད་པ་ལ་སོ་སོར་རྟོག་པའི་རང་བཞིན་ཅན་ཡིན་ཏེ་དེ་སྦྱིན་པ་ཅི་དང་ཅི་སྦྱིན་ཡང་།
སྦྱིན་པ་དེ་དང་དེ་ལ་སོ་སོར་རྟོག་པའི་རང་བཞིན་ཅན་ཡིན་ནོ། །དེ་དེ་ལྟར་སོ་སོར་རྟོག་པ་ལ་གང་འདི་སྦྱིན་པའི་ཉེས་པ་དང་། སྦྱིན་པའི་དྲི་མ་དང་། སྦྱིན་པའི་བར་དུ་གཅོད་པ་དེ་དག་མི་འབྱུང་སྟེ། དེ་ལྟར་ན་རིགས་ཀྱི་བུ་བྱང་ཆུབ་སེམས་དཔའ་ཡོངས་སུ་དག་པའི་སྦྱིན་པ་ཕུན་སུམ་ཚོགས་པ་ཡིན་
ནོ། །རིགས་ཀྱི་བུ་ཆོས་བཅུ་པོ་དེ་དག་དང་ལྡན་ན་བྱང་ཆུབ་སེམས་དཔའ་སྦྱིན་པ་ཕུན་སུམ་ཚོགས་པ་རྣམས་ཡིན་ནོ། །རིགས་ཀྱི་བུ་ཆོས་བཅུ་དང་ལྡན་ན་བྱང་ཆུབ་སེམས་དཔའ་ཚུལ་ཁྲིམས་ཕུན་སུམ་ཚོགས་པ་རྣམས་ཡིན་ནོ། །བཅུ་གང་ཞེ་ན། འདི་ལྟ་སྟེ། སོ་སོར་ཐར་པའི་སྡོམ་པས་
བསྡམས་པ་རྣམས་ཡིན། བྱང་ཆུབ་སེམས་དཔའི་བསླབ་པའི་སྡོམ་པས་བསྡམས་པ་རྣམས་ཡིན། ཉོན་མོངས་པ་ཐམས་ཅད་ཀྱི་ཡོངས་སུ་གདུང་བ་དང་བྲལ་བ་རྣམས་ཡིན། ཚུལ་བཞིན་མ་ཡིན་པ་ཡིད་ལ་བྱེད་པ་དང་བྲལ་བ་རྣམས་ཡིན། ལས་ཀྱི་འཇིགས་པ་རྣམས་ཡིན། ཁ་ན་

མ་ཐོ་བས་འཇིགས་པ་རྣམས་ཡིན། འཇིགས་པར་ལྟ་བ་རྣམས་ཡིན། ཡང་དག་པར་བླངས་པ་ལ་བརྟན་པ་རྣམས་ཡིན། མི་གནས་པའི་ཚུལ་ཁྲིམས་པ་རྣམས་ཡིན། འཁོར་གསུམ་ཡོངས་སུ་དག་པའི་ཚུལ་ཁྲིམས་པ་རྣམས་ཡིན་ནོ། །རིགས་ཀྱི་བུ་དེ་ལ་ཇི་ལྟར་
ན་བྱང་ཆུབ་སེམས་དཔའ་སོ་སོར་ཐར་པའི་སྡོམ་པས་བསྡམས་པ་རྣམས་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་བཞིན་གཤེགས་པས་མདོ་སྡེའམ། འདུལ་བའམ། གནས་གང་ཡང་རུང་བ་ལ་ལ་དག་ཏུ་བསླབ་པའི་གནས་འདི་དག་གང་བཅས་པ་དེ་དག་སྟོན་པས་བསྟན་
པའོ་སྙམ་དུ་སེམས་ཏེ། གནས་དེ་དང་དེ་དག་ལ་ཤིན་ཏུ་ལེགས་པར་སློབ་ཀྱི། རིགས་ལ་འདོད་ཆགས་པས་མ་ཡིན། ལྟ་བ་ལ་འདོད་ཆགས་པས་མ་ཡིན། འཁོར་ལ་འདོད་ཆགས་པས་མ་ཡིན། གང་ཟག་གི་སྐྱོན་གྱི་ཕྱིར་བསླབ་པའི་གནས་དེ་དང་དེ་དག་ལ་རི་མོ་བྱེད་པ་མ་ཡིན་ཏེ།
དེ་ལྟར་ན་བྱང་ཆུབ་སེམས་དཔའ་སོ་སོར་ཐར་པའི་སྡོམ་པས་བསྡམས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་བྱང་ཆུབ་སེམས་དཔའི་བསླབ་པའི་སྡོམ་པས་བསྡམས་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་འདི་སྙམ་དུ་སོ་སོར་ཐར་པའི་སྡོམ་པ་ཙམ་གྱིས་ནི། བདག་གིས་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་ཀྱིས། དེ་བཞིན་གཤེགས་པས་མདོ་སྡེ་དེ་དང་དེ་དག་ལས་བྱང་ཆུབ་སེམས་དཔའི་ཡང་དག་པར་སྤྱད་པ་དང་། བྱང་ཆུབ་སེམས་དཔའི་བསླབ་པའི་གནས་འདི་དག་གང་བཅས་པ་དེ་དག་ལ་བདག་གིས་
བསླབ་པར་བྱའོ་ཞེས་རྣམ་པར་དཔྱོད་དོ། །བྱང་ཆུབ་སེམས་དཔའི་ཡང་དག་པར་སྤྱད་པ་དེ་དག་ནི་གང་བྱང་ཆུབ་སེམས་དཔའི་བསླབ་པའི་གནས་དེ་རྣམས་ཀྱང་གང་ཞེ་ན། འདི་ལ་བྱང་ཆུབ་སེམས་དཔའ་གང་གི་ཕྱིར་དེ་ལ་སེམས་ཅན་རྣམས་དད་པར་འགྱུར་བའི་གནས་མ་ཡིན་པར་མི་སྤྱོད། དུས་
མ་ཡིན་པར་མི་སྤྱོད། ཡུལ་མ་ཡིན་པར་མི་སྤྱོད། དུས་མ་ཡིན་པར་མི་སྨྲ་བ་ཡིན། དུས་མི་ཤེས་པ་མ་ཡིན། ཡུལ་མི་ཤེས་པ་མ་ཡིན། ཚོད་མི་ཤེས་པ་མ་ཡིན་ཏེ། དེ་སེམས་ཅན་རྗེས་སུ་བསྲུང་བ་དང་། བདག་གི་བྱང་ཆུབ་ཀྱི་ཚོགས་ཡོངས་སུ་རྫོགས་པར་བྱ་བའི་ཕྱིར་སྤྱོད་ལམ་

ཕུན་སུམ་ཚོགས་ཤིང་འཇམ་པར་སྨྲ་བ་དང་། དལ་བུས་སྨྲ་བ་དང་། འདུ་འཛི་མི་མང་བ་དང་། རབ་ཏུ་དབེན་པ་ལ་མངོན་པར་ཕྱོགས་པ་དང་། བཞིན་གྱི་མདངས་རབ་ཏུ་དང་བ་ཡིན་ཏེ། དེ་ལྟར་ན་བྱང་ཆུབ་སེམས་དཔའ་ཆོ་ག་ཕུན་སུམ་ཚོགས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་
བྱང་ཆུབ་སེམས་དཔའི་བསླབ་པའི་སྡོམ་པས་བསྡམས་པ་ཡིན་ཞེ་ན། དེ་བཞིན་གཤེགས་པས་མདོ་སྡེ་དེ་དང་དེ་དག་ལ་བྱང་ཆུབ་སེམས་དཔའ་རྣམས་ཀྱིས་བསླབ་པའི་གནས་འདི་དག་གང་བཅས་པའི་བསླབ་པའི་གནས་དེ་དག་ལ་གུས་པར་བྱེད་པ་ཡིན། བརྩོན་པར་བྱེད་པ་ཡིན་ཏེ། དེ་ལྟར་ན་
བྱང་ཆུབ་སེམས་དཔའ་བྱང་ཆུབ་སེམས་དཔའི་བསླབ་པའི་སྡོམ་པས་བསྡམས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་ཉོན་མོངས་པ་ཐམས་ཅད་ཀྱིས་ཡོངས་སུ་གདུང་བ་དང་བྲལ་བ་ཡིན་ཞེ་ན། འདི་ལ་བྱང་ཆུབ་སེམས་དཔའ་འདོད་ཆགས་ཀྱིས་ཡོངས་སུ་གདུང་བའམ། ཞེ་སྡང་གིས་
ཡོངས་སུ་གདུང་བའམ། གཏི་མུག་གིས་ཡོངས་སུ་གདུང་བའམ། ཉོན་མོངས་པས་ཡོངས་སུ་གདུང་བ་གང་ཡང་རུང་བ་ལ་ལའམ། ཡོ་བྱད་ཀྱིས་ཕོངས་པའི་ཡོངས་སུ་གདུང་བ་གང་ཡང་རུང་བ་ལ་ལས་ཡོངས་སུ་གདུང་བར་མི་འགྱུར་ཏེ། དེ་འདོད་ཆགས་ཀྱི་གཉེན་པོ་ལ་རྟེན་ཅིང་འདོད་
ཆགས་སྐྱེ་བའི་རྐྱེན་རྣམས་ཡོངས་སུ་སྤོང་ངོ་། །འདོད་ཆགས་ཀྱི་གཉེན་པོ་དེ་ནི་གང་འདོད་ཆགས་སྐྱེ་བའི་རྐྱེན་དེ་དག་ནི་གང་ཞེ་ན། མི་སྡུག་པ་སྒོམ་པ་ནི་འདོད་ཆགས་ཀྱི་གཉེན་པོའོ། །ཡུལ་གྱི་བཟང་མོ་ནི་འདོད་ཆགས་སྐྱེ་བའི་རྐྱེན་ཏོ། །མི་སྡུག་པ་བསྒོམ་པ་དེ་གང་ཞེ་ན། འདི་
ལྟ་སྟེ། ལུས་འདི་ལ་སྐྲ་དང་། སྤུ་དང་། སེན་མོ་དང་། སོ་དང་། རྔུལ་དང་། དྲི་མ་དང་། པགས་པ་དང་། ཤ་དང་། རུས་པ་དང་། རྒྱུས་པ་དང་། རྩ་དང་། མཁལ་མ་དང་། སྙིང་དང་། མཆིན་པ་དང་། གློ་བ་དང་། རྒྱུ་མ་དང་། གཉེ་མ་དང་། ཕོ་བ་དང་། སུལ་མངས་
དང་། ལོང་ཀ་དང་། ལྒང་པ་དང་། མཚེར་པ་དང་། ཕྱི་ས་དང་། མཆིལ་མ་དང་། རྡུལ་དང་། སྣབས་དང་། ངར་སྣབས་དང་། ཞག་དང་། ཆུ་སེར་དང་། རྐང་དང་། ཚིལ་དང་། མཁྲིས་པ་དང་། བད་ཀན་དང་། རྣག་དང་། ཁྲག་དང་། ཀླད་པ་དང་། ཀླད་རྒྱས་དང་། གཅིན་

དག་ཀྱང་ཡོད་དེ། དངོས་པོ་དེ་དག་ལ་བྱང་ཆུབ་སེམས་དཔའ་ཡོངས་སུ་རྟོག་པའི་རང་བཞིན་ཅན་ཡིན་ཏེ། ཡོངས་སུ་རྟོག་པའི་རང་བཞིན་ཅན་དེ་འདི་སྙམ་དུ་བྱིས་པ་བླུན་པོ་མི་གསལ་བ་མི་མཁས་པ་དེ་ཡང་དངོས་པོ་འདི་དག་ཤེས་ནས། འདོད་ཆགས་ཀྱི་སེམས་མི་སྐྱེད་
ན། ཤེས་རབ་དང་ལྡན་པའི་རང་བཞིན་ཅན་ལྟ་སྨོས་ཀྱང་ཅི་དགོས་སྙམ་སྟེ། དེ་ལྟར་ན་བྱང་ཆུབ་སེམས་དཔའ་མི་སྡུག་པ་སྒོམ་པ་མང་བ་ཡིན་ནོ། །ཡུལ་གྱི་བཟང་མོ་དེ་གང་ཞེ་ན། འདི་ལ་བྱང་ཆུབ་སེམས་དཔས་ཆགས་པར་འགྱུར་བའི་བུད་མེད་གཟུགས་བཟང་བ། ཡིད་དུ་འོང་བ།
མཛེས་པ། མིག་ཏུ་སྡུག་པ། སེམས་འཕྲོག་པ་མཐོང་ཡང་དེས་དེ་ལྟ་བུ་དག་མཐོང་ན་འདི་ལྟར་ཡོངས་སུ་རྟོག་སྟེ། བཅོམ་ལྡན་འདས་ཀྱིས་ཀྱང་ཡུལ་ནི་རྨི་ལམ་དང་འདྲ་བ་དག་སྟེ། བྱུང་ནས་མེད་པར་འགྱུར་བ་ཡིན་ན་མཁས་པའི་རང་བཞིན་ཅན་སུ་ཞིག་རྨི་ལམ་ལྟ་བུའི་ཡུལ་དག་ལ་
འདོད་ཆགས་སྐྱེད་པར་བྱེད་ཅེས་གསུངས་སོ་སྙམ་སྟེ། དེ་ལྟར་ན་བྱང་ཆུབ་སེམས་དཔའ་འདོད་ཆགས་ཀྱི་གཉེན་པོ་ལ་སྟེན་ཅིང་འདོད་ཆགས་སྐྱེ་བའི་རྐྱེན་རྣམས་ཡོངས་སུ་སྤོང་ངོ་། །ཇི་ལྟར་ན་བྱང་ཆུབ་སེམས་དཔའི་ཞེ་སྡང་གི་གཉེན་པོ་ལ་སྟེན་ཅིང་ཞེ་སྡང་སྐྱེ་བའི་རྐྱེན་རྣམས་ཡོངས་སུ་སྤོང་
ཞེ་ན། འདི་ལ་བྱང་ཆུབ་སེམས་དཔའ་སེམས་ཅན་རྣམས་ལ་བྱམས་པ་མང་བ་ཡིན་ཏེ། དེ་གཞི་གང་དང་རྒྱུ་གང་དང་རྐྱེན་གང་གིས་ཁྲོ་ཞིང་གནོད་སེམས་སུ་འགྱུར་བ་དང་། ཁོན་དུ་འཛིན་པར་འགྱུར་བའི་རྒྱུ་དེ་དག་དང་། རྐྱེན་དེ་དག་ཡོངས་སུ་སྤངས་ཏེ། དེ་ལྟར་ན་བྱང་ཆུབ་སེམས་དཔའ་ཞེ་སྡང་
གི་གཉེན་པོ་ལ་རྟེན་ཅིང་ཞེ་སྡང་སྐྱེ་བའི་རྐྱེན་རྣམས་ཡོངས་སུ་སྤོང་བ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་གཏི་མུག་གི་གཉེན་པོ་ལ་སྟེན་ཅིང་། གཏི་མུག་སྐྱེ་བའི་རྐྱེན་རྣམས་ཡོངས་སུ་སྤོང་ཞེ་ན། དེ་དེ་ལྟར་ཡོངས་སུ་རྟོག་པས་གཏི་མུག་དང་བྲལ་བར་འགྱུར་རོ། །གཏི་མུག་དང་བྲལ་
བས་འདོད་པ་མ་འབྱོར་ཏམ། ཡོ་བྱད་མ་འབྱོར་ཀྱང་ཡོངས་སུ་ཡི་འཆད་པ་མེད་དེ། དེ་ལྟར་ན་བྱང་ཆུབ་སེམས་དཔའ་ཉོན་མོངས་པ་ཐམས་ཅད་ཀྱིས་ཡོངས་སུ་གདུང་བ་དང་བྲལ་བ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་ཚུལ་བཞིན་མ་ཡིན་པའི་ཡིད་ལ་བྱེད་པ་དང་བྲལ་བ་ཡིན་ཞེ་ན། འདི་ལ་བྱང་ཆུབ་

སེམས་དཔའ་གཅིག་པུ་ལྐོག་ཏུ་སོང་སྟེ། རབ་ཏུ་དབེན་པ་ན་གནས་ཤིང་འདི་ལྟར་བདག་ནི་མ་འདྲེས་པར་གནས་པ་སྟེ། བདག་ནི་རབ་ཏུ་དབེན་པ་ན་འདུག་པའོ། །བདག་ནི་དེ་བཞིན་གཤེགས་པའི་ཆོས་འདུལ་བ་ལ་ཞུགས་པའོ། །དགེ་སྦྱོང་ངམ། བྲམ་ཟེ་གཞན་དག་ནི་ཀུན་ཀྱང་
འདྲེས་པར་གནས་པ། འདུ་འཛི་མང་བ། དེ་བཞིན་གཤེགས་པའི་ཆོས་འདུལ་བ་ལས་ཉམས་པའོ་སྙམ་དུ་སེམས་མི་སྐྱེད་དེ། དེ་ལྟར་ན་བྱང་ཆུབ་སེམས་དཔའ་ཚུལ་བཞིན་མ་ཡིན་པ་ཡིད་ལ་བྱེད་པ་དང་བྲལ་བ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་ལས་ཀྱིས་འཇིགས་པ་ཡིན་ཞེ་ན། འདི་
ལ་བྱང་ཆུབ་སེམས་དཔའ་འདི་ལྟར་བཅོམ་ལྡན་འདས་ཀྱིས་ཀྱང་དགེ་སློང་རྣམས་བསོད་ནམས་དག་གུས་པར་བྱའོ། །ཚུལ་ཁྲིམས་གུས་པར་བསྲུང་ངོ་། །ཤེས་རབ་གུས་པར་བསྒོམ་མོ། །དེ་ཅིའི་ཕྱིར་ཞེ་ན། བསོད་ནམས་གུས་པར་བྱས་པ་རྣམས་ཀྱི་རྣམ་པར་སྨིན་པ་ནི་འདོད་པ་དང་། འཐད་པ་དང་།
དགའ་བ་དང་། ཡིད་དུ་འོང་བར་ཉམས་སུ་མྱོང་བར་འགྱུར་རོ། །ཞེས་གསུངས་སོ་སྙམ་དུ་དཔྱོད་དོ། །དེ་དེ་ལྟར་མངོན་པར་ཡིད་ཆེས་པས་མི་དགེ་བའི་ཆོས་ཐམས་ཅད་དང་བྲལ་བར་འགྱུར་ཏེ། དེ་ལྟར་ན་བྱང་ཆུབ་སེམས་དཔའ་ལས་ཀྱིས་འཇིགས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་ཁ་ན་
མ་ཐོ་བས་འཇིགས་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་ཁ་ན་མ་ཐོ་བ་ཕྲ་མོ་ཙམ་དག་ལ་ཡང་འཇིགས་པར་ལྟ་ཞིང་སྡིག་པ་ཆུང་ངུ་ཡང་ཁྱད་དུ་མི་གསོད་པ་ཡིན་ཏེ། དེ་འདི་སྙམ་དུ་བཅོམ་ལྡན་འདས་ཀྱིས་ཀྱང་དགེ་སློང་དག་དུག་ཆུང་ངུས་ཀྱང་སྐྱེས་བུ་འཆི་བར་འགྱུར་རོ། །དགེ་སློང་དག་དུག་ཆེན་
པོས་ཀྱང་སྐྱེས་བུ་འཆི་བར་འགྱུར་རོ། །དེ་བཞིན་དུ་སྡིག་པ་ཆུང་ངུས་ཀྱང་ངན་སོང་རྣམས་སུ་ཕྱིན་པར་བྱེད་དོ། །སྡིག་པ་ཆེན་པོས་ཀྱང་ངན་སོང་རྣམས་སུ་ཕྱིན་པར་བྱེད་དོ་ཞེས་གསུངས་སོ་སྙམ་དུ་སེམས་ཏེ། དེ་དེ་ལྟར་ཡོངས་སུ་རྟོག་པས་ཁ་ན་མ་ཐོ་བས་འཇིགས་པ་ཡིན་ཏེ། དེ་ལྟར་ན་བྱང་ཆུབ་
སེམས་དཔའ་ཁ་ན་མ་ཐོ་བས་འཇིགས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་འཇིགས་པར་ལྟ་བ་ཡིན་ཞེ་ན། འདི་ལ་བྱང་ཆུབ་སེམས་དཔའ་བྲམ་ཟེ་དང་། རྒྱལ་རིགས་དང་། གྲོང་རྡལ་གྱི་མི་དང་། ཡུལ་གྱི་མི་རྣམས་ཀྱིས་ཡིད་བརྟན་དུ་རུང་བ་ཡིན་ཏེ། བྲམ་ཟེ་དང་། རྒྱལ་རིགས་དང་།

གྲོང་རྡལ་གྱི་མི་དང་། ཡུལ་གྱི་མི་རྣམས་བྱང་ཆུབ་སེམས་དཔའ་དེ་གཅིག་པུ་གཉིས་སུ་མེད་པ་ལ་འགྲོན་བུ་དང་། གསེར་དང་ནོར་བུ་དང་། མུ་ཏིག་དང་བཻ་དཱུརྱ་དང་། དུང་དང་། མན་ཤེལ་དང་བྱི་རུ་ལ་སོགས་པ་ནོར་དང་། ཡོ་བྱད་ཀྱི་རྣམ་པ་དག་འདེབས་ཀྱང་། དེ་ལ་བྱང་
ཆུབ་སེམས་དཔའ་བརྣབ་སེམས་ཀྱང་མི་སྐྱེད་དོ། །གལ་ཏེ་བྱང་ཆུབ་སེམས་དཔའ་མཆོད་རྟེན་གྱིའམ། དགེ་འདུན་གྱི་དངོས་པོའི་ཕྱིར་ལས་སུ་བསྐོས་ན་ཡང་དངོས་པོ་དེས་ཀྱང་ཉེ་བར་མི་འཚོ་སྟེ། དེ་འདི་སྙམ་དུ་སེམས་ཤིང་བཅོམ་ལྡན་འདས་ཀྱིས་ཀྱང་བྱང་ཆུབ་སེམས་དཔས་ནི་བདག་གི་ལུས་ལས་ཤ་
ཟོས་ཀྱང་བླའི་གཞན་གྱི་ཟས་སམ། སྐོམ་འམ། ཡོ་བྱད་ཀྱི་རྣམ་པ་གང་ཅི་ཡང་རུང་བ་དག་མ་བྱིན་ལ། མ་གནང་བར་སྤྱད་པ་ནི་མི་རུང་ངོ་ཞེས་གསུངས་སོ་སྙམ་སྟེ། དེ་ལྟར་ན་བྱང་ཆུབ་སེམས་དཔའ་འཇིགས་པར་ལྟ་བ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་ཡང་དག་པར་བླངས་པ་ལ་
བརྟན་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་བདུད་དམ་བདུད་ཀྱི་རིས་ཀྱི་ལྷ་རྣམས་ཀྱིས་གཙེས་སམ། ནོར་དང་། འཁྲིག་པའི་ཡན་ལག་གིས་བརྗོད་ཀྱང་མི་གཡོ་མི་འགྱུར་ཞིང་ཉམས་པར་མི་འགྱུར་ཏེ། དེ་ལྟར་ན་བྱང་ཆུབ་སེམས་དཔའ་ཡང་དག་པར་བླངས་པ་ལ་བརྟན་པ་ཡིན་ནོ། །ཇི་ལྟར་
ན་བྱང་ཆུབ་སེམས་དཔའ་མི་གནས་པའི་ཚུལ་ཁྲིམས་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་ཚུལ་ཁྲིམས་སྲུང་ན། ཚུལ་ཁྲིམས་འདིས་བདག་ལྷར་ཤོག་ཤིག་ཅེ་འམ། ལྷ་ལ་ལར་ཤོག་ཤིག་ཅེ་འམ། རྒྱལ་པོར་ཤོག་ཤིག་ཅེ་འམ། རྒྱལ་པོ་ལ་ལར་ཤོག་ཤིག་ཅེས་སེམས་མི་སྐྱེད་
དེ། དེ་ལྟར་ན་བྱང་ཆུབ་སེམས་དཔའ་མི་གནས་པའི་ཚུལ་ཁྲིམས་པ་ཡིན་ནོ། །རིགས་ཀྱི་བུ་ཇི་ལྟར་ན་བྱང་ཆུབ་སེམས་དཔའ་འཁོར་གསུམ་ཡོངས་སུ་དག་པའི་ཚུལ་ཁྲིམས་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་ལུས་ཀྱིས་ཡོངས་སུ་དག་པ་ཡིན། ངག་དང་ཡིད་ཀྱིས་ཡོངས་སུ་དག་པ་
ཡིན་ཏེ། ཇི་ལྟར་ན་ལུས་ཀྱིས་ཡོངས་སུ་དག་པ་ཡིན་ཞེ་ན། དེ་གང་ལུས་ཀྱིས་ངན་དུ་སྤྱོད་པ་འདི་དག་ཐམས་ཅད་དུ་ཐམས་ཅད་ཡོངས་སུ་སྤོང་སྟེ། ལུས་ཀྱིས་ངན་དུ་སྤྱོད་པ་དེ་དག་ཀྱང་གང་ཞེ་ན། འདི་ལྟ་སྟེ་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་སྟེ། དེ་

ལྟར་ན་ལུས་ཀྱིས་ཡོངས་སུ་དག་པ་ཡིན་ནོ། །ཇི་ལྟར་ན་ངག་གིས་ཡོངས་སུ་དག་པ་ཡིན་ཞེ་ན། དེ་གང་འདི་དག་ངག་གིས་ངན་དུ་སྤྱོད་པ་དེ་དག་ཐམས་ཅད་དུ་ཐམས་ཅད་ཡོངས་སུ་སྤོང་སྟེ། ངག་གིས་ངན་དུ་སྤྱོད་པ་དེ་དག་ཀྱང་གང་ཞེ་ན། འདི་ལྟ་སྟེ། བརྫུན་དུ་སྨྲ་བ་དང་། ཕྲ་མ་དང་།
ཚིག་རྩུབ་པོ་དང་། ཚིག་ཀྱལ་པ་སྟེ། དེ་ལྟར་ན་ངག་གིས་ཡོངས་སུ་དག་པ་ཡིན་ནོ། །ཇི་ལྟར་ན་ཡིད་ཀྱིས་ཡོངས་སུ་དག་པ་ཡིན་ཞེ་ན། དེ་གང་འདི་དག་ཡིད་ཀྱིས་ངན་དུ་སྤྱོད་པ་དེ་དག་ཐམས་ཅད་དུ་ཐམས་ཅད་ཡོངས་སུ་སྤོང་སྟེ། ཡིད་ཀྱིས་ངན་དུ་སྤྱོད་པ་དེ་དག་ཀྱང་གང་ཞེ་ན། འདི་ལྟ་
སྟེ། བརྣབ་སེམས་དང་། གནོད་སེམས་དང་། ལོག་པར་ལྟ་བའོ། །དེ་ལྟར་ན་ཡིད་ཀྱིས་ཡོངས་སུ་དག་པ་ཡིན་ཏེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་འཁོར་གསུམ་ཡོངས་སུ་དག་པའི་ཚུལ་ཁྲིམས་ཅན་ཡིན་ནོ། །རིགས་ཀྱི་བུ་ཆོས་བཅུ་པོ་དེ་དག་དང་ལྡན་ན་བྱང་ཆུབ་སེམས་དཔའ་
ཚུལ་ཁྲིམས་ཕུན་སུམ་ཚོགས་པ་རྣམས་ཡིན་ནོ། །རིགས་ཀྱི་བུ་ཆོས་བཅུ་དང་ལྡན་ན། བྱང་ཆུབ་སེམས་དཔའ་བཟོད་པ་ཕུན་སུམ་ཚོགས་པ་རྣམས་ཡིན་ནོ། །བཅུ་གང་ཞེ་ན། འདི་ལྟ་སྟེ་ནང་གི་བཟོད་པ་ཕུན་སུམ་ཚོགས་པ་རྣམས་ཡིན། ཕྱིའི་བཟོད་པ་ཕུན་སུམ་ཚོགས་པ་རྣམས་ཡིན།
ཆོས་ཀྱི་བཟོད་པ་ཕུན་སུམ་ཚོགས་པ་རྣམས་ཡིན། སངས་རྒྱས་ཀྱིས་གནང་བའི་བཟོད་པ་ཕུན་སུམ་ཚོགས་པ་རྣམས་ཡིན། ཉི་ཚེ་བ་མ་ཡིན་པའི་བཟོད་པ་ཕུན་སུམ་ཚོགས་པ་རྣམས་ཡིན། ཐ་དད་པ་མེད་པའི་བཟོད་པ་ཕུན་སུམ་ཚོགས་པ་རྣམས་ཡིན། དགོས་པ་ལ་མི་ལྟ་བའི་བཟོད་པ་ཕུན་སུམ་
ཚོགས་པ་རྣམས་ཡིན། རྣམ་པར་མི་འཁྲུགས་པའི་བཟོད་པ་ཕུན་སུམ་ཚོགས་པ་རྣམས་ཡིན། སྙིང་རྗེའི་བཟོད་པ་ཕུན་སུམ་ཚོགས་པ་རྣམས་ཡིན། དམ་བཅས་པ་ལས་སྒྲོལ་བར་བྱེད་པའི་བཟོད་པ་ཕུན་སུམ་ཚོགས་པ་རྣམས་ཡིན་ནོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་ནང་གི་བཟོད་
པ་ཕུན་སུམ་ཚོགས་པ་ཡིན་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་གང་འདི་ནང་གི་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་དེ་དག་བཟོད་ཅིང་དང་དུ་ལེན་ལ་ཡོངས་སུ་ཡི་མི་འཆད་དེ། དེ་ལྟར་ན་བྱང་ཆུབ་སེམས་དཔའ་ནང་གི་

བཟོད་པ་ཕུན་སུམ་ཚོགས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་ཕྱིའི་བཟོད་པ་ཕུན་སུམ་ཚོགས་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་མ་ལས་སྨོས་པ་འམ། ཕ་ལས་སྨོས་པ་འམ། ཉེ་དུ་ལས་སྨོས་པ་འམ། མཁན་པོ་ལས་སྨོས་པ་འམ། སློབ་
དཔོན་ལས་སྨོས་པའི་ཚིག་གི་ལམ་ངན་དུ་བརྗོད་པ་དང་། ངན་དུ་སྨྲས་པ་ཕ་རོལ་ལས་ཐོས་སམ། སངས་རྒྱས་སམ། ཆོས་སམ། དགེ་འདུན་ལ་མི་སྙན་པ་བརྗོད་པ་ཐོས་ན། མི་ཁྲོ་ཞིང་གནོད་པར་མི་སེམས་ལ་ཁོན་དུ་མི་འཛིན་ཏེ། དེ་བཟོད་ཅིང་དང་དུ་ལེན་ལ་གནོད་སེམས་མི་མང་བ་ཡིན་ཏེ།
དེ་ལྟར་ན་བྱང་ཆུབ་སེམས་དཔའ་ཕྱིའི་བཟོད་པ་ཕུན་སུམ་ཚོགས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་ཆོས་ཀྱི་བཟོད་པ་ཕུན་སུམ་ཚོགས་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་གང་འདི་དག་མདོ་སྡེ་ཟབ་མོ་དག་ལས་དེ་བཞིན་གཤེགས་པས་ཆོས་བསྟན་པ་རྒྱུད་ཆད་པ། མཚམས་
སྦྱོར་བ་ལས་རྣམ་པར་གྲོལ་བ་བསྡུར་མེད་པ་འདི་ལྟ་སྟེ། ཆོས་ཐམས་ཅད་ཐོག་མ་ནས་ཞི་བའོ། །ཆོས་ཐམས་ཅད་རང་བཞིན་གྱིས་མྱ་ངན་ལས་འདས་པའོ་ཞེས་བསྟན་པ་དེ་དག་ཐོས་ཀྱང་མི་འཇིགས་མི་དངང་སྐྲག་པར་མི་འགྱུར་ཏེ། དེ་འདི་ལྟར་ཆོས་འདི་དག་མ་ཤེས་སམ་མ་ཐོས་པར་ནི་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་སོ། །སྙམ་དུ་སེམས་ཏེ། དེའི་ཕྱིར་གང་ཆོས་དེ་དག་འཛིན་པ་དང་། སེམས་པ་དང་། སྒོམ་པ་དང་། ཡོངས་སུ་རྟོག་པ་དང་། མོས་པ་འདི་ནི་ཆོས་ཀྱི་བཟོད་པ་ཞེས་བྱ་སྟེ། དེ་ལྟར་ན་བྱང་ཆུབ་སེམས་དཔའ་ཆོས་ཀྱི་
བཟོད་པ་ཕུན་སུམ་ཚོགས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་སངས་རྒྱས་ཀྱིས་གནང་བའི་བཟོད་པ་ཕུན་སུམ་ཚོགས་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་ཁྲོ་བའི་བསམ་པ་སྐྱེས་སམ། གནོད་སེམས་ཀྱི་བསམ་པ་སྐྱེས་ན། འདི་ལྟར་ཁྲ་བ་འདི་གང་ནས་བྱུང་། གང་དུ་འགག །
གང་ལས་འབྱུང་། ཇི་ལྟར་འབྱུང་། ཇིའི་དོན་དུ་འབྱུང་ཞེས་ཡོངས་སུ་རྟོག་སྟེ། དེས་དེ་ལྟར་ཡོངས་སུ་བརྟགས་ན། ཁྲ་བའི་སྐྱེ་བའང་ཡང་དག་པར་རྗེས་སུ་མི་མཐོང་། འགག་པའང་ཡང་དག་པར་རྗེས་སུ་མི་མཐོང་། གང་ལས་སྐྱེ་བ་དེ་ཡང་ཡང་དག་པར་རྗེས་སུ་མི་མཐོང་། ཇི་ལྟར་སྐྱེ་བ་དེ་

ཡང་ཡང་དག་པར་རྗེས་སུ་མི་མཐོང་། རྐྱེན་གང་གིས་སྐྱེ་བ་ཡང་ཡང་དག་པར་རྗེས་སུ་མི་མཐོང་སྟེ། དེ་དེའི་ཕྱིར་བཟོད་ཅིང་དང་དུ་ལེན་ལ་ཀུན་ནས་ལྡང་བ་མི་མང་བ་ཡིན་ཏེ། དེ་ལྟར་ན་བྱང་ཆུབ་སེམས་དཔའ་སངས་རྒྱས་ཀྱིས་གནང་བའི་བཟོད་པ་ཕུན་སུམ་ཚོགས་པ་ཡིན་ནོ། །ཇི་ལྟར་ན་
བྱང་ཆུབ་སེམས་དཔའ་ཉི་ཚེ་བ་མ་ཡིན་པའི་བཟོད་པ་ཕུན་སུམ་ཚོགས་པ་ཡིན་ཞེ་ན། བྱང་ཆུབ་སེམས་དཔའ་ནི་ཉིན་པར་བཟོད་ལ་མཚན་མོ་མི་བཟོད་པའམ། མཚན་མོ་བཟོད་ལ་ཉིན་པར་མི་བཟོད་པའམ། བདག་གི་ཡུལ་ན་བཟོད་ལ་གཞན་གྱི་ཡུལ་ན་མི་བཟོད་པའམ། གཞན་གྱི་ཡུལ་ན་
བཟོད་ལ་བདག་གི་ཡུལ་ན་མི་བཟོད་པའམ། བཤེས་པ་ལ་བཟོད་ལ་མི་བཤེས་པ་ལ་མི་བཟོད་པའམ། མི་བཤེས་པ་ལ་བཟོད་ལ་བཤེས་པ་ལ་མི་བཟོད་པ་མ་ཡིན་གྱི། བྱང་ཆུབ་སེམས་དཔའ་ནི་དུས་ཐམས་ཅད་དུའང་བཟོད། ཡུལ་ཐམས་ཅད་དུའང་བཟོད། ཐམས་ཅད་ལའང་བཟོད་པ་
ཡིན་ཏེ། དེ་ལྟར་ན་བྱང་ཆུབ་སེམས་དཔའ་ཉི་ཚེ་བ་མ་ཡིན་པའི་བཟོད་པ་ཕུན་སུམ་ཚོགས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་ཐ་དད་པ་མེད་པའི་བཟོད་པ་ཕུན་སུམ་ཚོགས་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་ཕ་དང་། མ་དང་བླ་མ་དང་བུ་དང་བུ་མོ་དང་ཆུང་མ་དང་ཉེ་དུ་འམ་སྣག་གི་
གཉེན་མཚམས་ལ་བཟོད་ལ། གཞན་ལ་མི་བཟོད་པ་མ་ཡིན་གྱི། བྱང་ཆུབ་སེམས་དཔའ་ནི་ཐ་ན་གདོལ་པ་གཞོན་ནུ་ཡན་ཆད་ལ་ཡང་བཟོད་དེ། དེ་ལྟར་ན་བྱང་ཆུབ་སེམས་དཔའ་ཐ་དད་པ་མེད་པའི་བཟོད་པ་ཕུན་སུམ་ཚོགས་པ་ཡིན་ནོ། །ཇི་ལྟར་ན་བྱང་ཆུབ་སེམས་དཔའ་དགོས་པ་ལ་མི་ལྟ་
བའི་བཟོད་པ་ཕུན་སུམ་ཚོགས་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་དོན་གྱི་ཕྱིར་བཟོད་པ་མ་ཡིན། འཇིགས་པའི་ཕྱིར་མ་ཡིན། ཕན་ཐོགས་སུ་རེ་བའི་ཕྱིར་མ་ཡིན། འཇིག་རྟེན་གྱི་ཚུལ་གྱིས་མ་ཡིན། ངོ་ཚ་བས་བཟོད་པ་མ་ཡ