Kinh tạng Tây Tạng (Kangyur Đại Học) — 060_མདོ་སྡེ།_མ

་རྒྱས་ཀྱི་
ཆོས་རྣམས་ལ་མི་སློབ་བོ། །སྨོན་པ་མེད་པ་ལ་ཆགས་ཤིང་། སྨོན་པ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །བྱང་ཆུབ་སེམས་དཔའི་སྤྱོད་པ་ལ་ཆགས་ཤིང་། ཉན་ཐོས་དང་། རང་སངས་རྒྱས་ཀྱི་སྤྱོད་པ་ལ་ཁོང་ཁྲོ་ན། སངས་རྒྱས་ཀྱི་ཆོས་རྣམས་ལ་མི་སློབ་བོ། །
བྱང་ཆུབ་སེམས་དཔའ་ལ་ལྟུང་བས་རྒོལ་ན། བྱང་ཆུབ་ལས་རིང་དུ་འགྱུར་ཏེ། ལས་ཀྱི་སྒྲིབ་པ་ཡོངས་སུ་འཛིན་ཏོ། །སྤྱོད་པ་ལ་འཕྱ་ན་བྱང་ཆུབ་ལས་རིང་དུ་འགྱུར་རོ། །སྤྱོད་ལམ་གྱིས་རྒོལ་ན་བྱང་ཆུབ་ལས་རིང་དུ་འགྱུར་རོ། །གལ་ཏེ་བྱང་ཆུབ་སེམས་དཔས་བྱང་ཆུབ་སེམས་དཔའ་ལ་
དམའ་བའི་འདུ་ཤེས་བསྐྱེད་དེ། བདག་ལ་ཆེ་བའི་འདུ་ཤེས་བསྐྱེད་ན། བདག་ལ་རྨ་འབྱུང་སྟེ། ལས་ཀྱི་སྒྲིབ་པ་ཡང་ཡོངས་སུ་འཛིན་ཏོ། །འདི་ལ་བྱང་ཆུབ་སེམས་དཔས་བྱང་ཆུབ་སེམས་དཔའ་ལ་གདམས་ཤིང་རྗེས་སུ་བསྟན་ན་སྟོན་པའི་འདུ་ཤེས་ཉེ་བར་བཞག་སྟེ། གདམས་ཤིང་
རྗེས་སུ་བསྟན་པར་བྱའོ། །གལ་ཏེ་དེས་བྱང་ཆུབ་ཡོངས་སུ་བཏང་ཞེ་ན། བྱང་ཆུབ་སེམས་དཔས་བྱང་ཆུབ་སེམས་དཔའ་ལ་བརྙས་པའི་སེམས་བསྐྱེད་པར་མི་བྱའོ། །ལྷའི་བུ་བྱང་ཆུབ་སེམས་དཔའི་དགེ་བའི་རྩ་བ་རྣམས་ནི་ཇི་ལྟར་བྱང་ཆུབ་སེམས་དཔའ་གཉིས་པ་ལ་བརྟེན་ཏེ། འཆད་པར་

འགྱུར་བ་དེ་ལྟར་གང་གིས་ཀྱང་ཡོངས་སུ་འཆད་པར་མི་འགྱུར་རོ། །ལྷའི་བུ་དེ་ལྟ་བས་ན་བྱང་ཆུབ་སེམས་དཔའི་དགེ་བའི་རྩ་བ་ཐམས་ཅད་ཡོངས་སུ་བསྲུང་བར་འདོད་ཅིང་། ལས་ཀྱི་སྒྲིབ་པ་ཐམས་ཅད་ཡོངས་སུ་སྦྱོང་བར་འདོད་པ་དང་། ཆོས་ཐམས་ཅད་ལ་སྒྲིབ་པ་མེད་པ་
མྱུར་དུ་ཐོབ་པར་འདོད་པས་ཉིན་ལན་གསུམ་མཚན་ལན་གསུམ་དུ་བྱང་ཆུབ་སེམས་དཔའི་ཐེག་པ་པ་ཐམས་ཅད་ལ་ཕྱག་བྱའོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཇི་སྐད་དུ་གསུངས་པའི་དོན་བདག་གིས་འཚལ་ཏེ་
འདོད་ཆགས་ཀྱི་སྒྲ་དང་། སངས་རྒྱས་ཀྱི་སྒྲ་དེ་ནི་མཚུངས་པའོ། །ཞེ་སྡང་གི་སྒྲ་དང་། སངས་རྒྱས་ཀྱི་སྒྲ་དེ་ནི་མཚུངས་པའོ། །གཏི་མུག་གི་སྒྲ་དང་། སངས་རྒྱས་ཀྱི་སྒྲ་དེ་ནི་མཚུངས་པའོ། །མུ་སྟེགས་ཅན་གྱི་སྒྲ་དང་། སངས་རྒྱས་ཀྱི་སྒྲ་དེ་ནི་མཚུངས་པའོ། །འདོད་པ་ཆུང་བའི་སྒྲ་དང་།
འདོད་པ་ཆེ་བའི་སྒྲ་དེ་ནི་མཚུངས་པའོ། །ཆོག་ཤེས་པའི་སྒྲ་དང་། ཆོག་མི་ཤེས་པའི་སྒྲ་དེ་ནི་མཚུངས་པའོ། །སྡོམ་པའི་སྒྲ་དང་། མི་སྡོམ་པའི་སྒྲ་དེ་ནི་མཚུངས་པའོ། །གཅིག་པུར་དགའ་བའི་སྒྲ་དང་། འདུ་འཛིའི་སྒྲ་དེ་ནི་མཚུངས་པའོ། །ཚུ་རོལ་གྱི་སྒྲ་དང་། ཕ་རོལ་གྱི་སྒྲ་དེ་ནི་མཚུངས་
པའོ། །རིང་བའི་སྒྲ་དང་། ཉེ་བའི་སྒྲ་དེ་ནི་མཚུངས་པའོ། །འཁོར་བའི་སྒྲ་དང་། མྱ་ངན་ལས་འདས་པའི་སྒྲ་དེ་ནི་མཚུངས་པའོ། །གྲོང་གི་སྒྲ་དང་། དགོན་པའི་སྒྲ་དེ་ནི་མཚུངས་པའོ། །སྦྱིན་པའི་སྒྲ་དང་། སེར་སྣའི་སྒྲ་དེ་ནི་མཚུངས་པའོ། །ཚུལ་ཁྲིམས་ཀྱི་སྒྲ་དང་། ཚུལ་ཁྲིམས་
འཆལ་པའི་སྒྲ་དེ་ནི་མཚུངས་པའོ། །བཟོད་པའི་སྒྲ་དང་། གནོད་སེམས་ཀྱི་སྒྲ་དེ་ནི་མཚུངས་པའོ། །བརྩོན་འགྲུས་ཀྱི་སྒྲ་དང་། ལེ་ལོའི་སྒྲ་དེ་ནི་མཚུངས་པའོ། །བསམ་གཏན་གྱི་སྒྲ་དང་། འཁྲུག་པའི་སྒྲ་དེ་ནི་མཚུངས་པའོ། །ཤེས་རབ་ཀྱི་སྒྲ་དང་། ཤེས་རབ་འཆལ་པའི་སྒྲ་དེ་ནི་མཚུངས་
པའོ། །དེ་ནས་ལྷའི་བུ་པད་མོ་རྣམ་པར་རོལ་བའི་མངོན་པར་ཤེས་པས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཅིའི་ཕྱིར་ན་དེ་དག་མཚུངས་ཞེས་བྱ། འཇམ་དཔལ་གྱིས་སྨྲས་པ། ལྷའི་བུ་འདོད་ཆགས་ཀྱི་སྒྲ་ལ་ཁྱོད་ཇི་ལྟར་སེམས། ལྷའི་བུས་སྨྲས་

པ། བྲག་ཅ་དང་འདྲ་བར་ཤེས་སོ། །འཇམ་དཔལ་གྱིས་སྨྲས་པ། ལྷའི་བུ་འོ་ན་སངས་རྒྱས་ཀྱི་སྒྲ་ཁྱོད་ཀྱིས་ཇི་ལྟར་ཤེས། ལྷའི་བུས་སྨྲས་པ། འཇམ་དཔལ་དེ་ཡང་སྒྲ་བརྙན་གྱི་མཉམ་པ་ཉིད་ལས་མ་འདས་པའོ། །འཇམ་དཔལ་གྱིས་སྨྲས་པ། ལྷའི་བུ་རྣམ་གྲངས་དེས་ཀྱང་ཁྱོད་ཀྱིས་འདི་ལྟར་དེ་དག་ནི་
མཚུངས་པ་ཡིན་པར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་སྔོན་ལས་དང་པོ་བའི་ས་ལ་གནས་ཤིང་འདི་ལྟ་བུའི་ཚུལ་ཁོང་དུ་མ་ཆུད་པའི་ཚེ། ལས་ཀྱི་སྒྲིབ་པ་ཇི་ལྟ་བུ་དག་མངོན་པར་འདུ་བྱས་པ་ལུང་སྟོན་ཅིག་དང་
འཇམ་དཔལ་དེས་མ་འོངས་པའི་དུས་ན། བྱང་ཆུབ་སེམས་དཔར་དམ་འཆའ་བ་ཇི་སྙེད་ཅིག་འབྱུང་བར་འགྱུར་བ་དེ་དག་ཀྱང་། དེ་ལྟ་བུའི་ལས་ཀྱི་སྒྲིབ་པ་ཐོབ་པ་དང་། རང་རང་སྲུང་བར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་
ཏོ། །ཅི་སྨན་བཅོམ་ལྡན་འདས་གལ་ཏེ་དེ་ལྟར་དེ་ལྟ་བུའི་སུག་ལས་ཀྱི་སྒྲིབ་པའི་ནོངས་པ་ཐོས་ན། ཡིད་མི་བདེ་བར་ཡང་འགྱུར་ལ་སུ་ག་ལས་ཀྱི་སྒྲིབ་པ་རྣམ་པར་དག་པ་ཐོབ་ཏུ་ལགས་ཀྱང་། ཆོས་ཐམས་ཅད་ལ་སྒྲིབ་པ་འཐོབ་པར་འགྱུར་ལགས་པ་སྙམ། བཅོམ་ལྡན་འདས་སྔོན་འདས་པའི་དུས་ན།
བསྐལ་པ་གྲངས་མ་མཆིས་པ་ཤིན་ཏུ་བགྲང་བ་ལས་འདས་པ། ཡངས་པ། ཚད་མ་མཆིས་པ། བསམ་གྱིས་མི་ཁྱབ་པ་དེའི་ཕ་རོལ། དེའི་ཡང་ཕ་རོལ་དེའི་དུས་དེའི་ཚེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་ང་རོ་རྔ་སྒྲའི་རྒྱལ་པོ་ཞེས་བགྱི་བ། རིག་པ་
དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་བཞིན་གཤེགས་པ་དེའི་སྐུ་ཚེའི་ཚད་ནི་དགུང་ལོ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་གྱུར་ཏོ། །
ཐེག་པ་ནི་གསུམ་གྱིས་སེམས་ཅན་རྣམས་ཡོངས་སུ་མྱ་ངན་ལས་ཟློ་བར་གྱུར་ཏོ། །འཇིག་རྟེན་གྱི་ཁམས་དེའི་མིང་ནི་སྣང་བ་ཆེན་པོ་ཅན་ཞེས་བགྱི་སྟེ། འཇིག་རྟེན་གྱི་ཁམས་དེ་ན་ཞུགས་ཤིང་ངམ། ལྡུམ་བུ་གང་ཇི་སྙེད་པ་དེ་དག་ཐམས་ཅད་ཀྱང་རིན་པོ་ཆེ་སྣ་བདུན་གྱི་རྒྱུ་ལས་གྲུབ་པར་གྱུར་ཏེ། ཞུགས་ཤིང་དེ་དག་

ལས་ཀྱང་འདི་ལྟ་བུའི་སྒྲ་འབྱུང་སྟེ། གང་འདི་སྟོང་པ་ཉིད་ཀྱི་སྒྲ་དང་། མཚན་མ་མ་མཆིས་པའི་སྒྲ་དང་། སྨོན་པ་མ་མཆིས་པའི་སྒྲ་དང་། སྐྱེ་བ་མ་མཆིས་པའི་སྒྲ་དང་། དངོས་པོ་མ་མཆིས་པའི་སྒྲ་དང་། མཚན་ཉིད་མ་མཆིས་པའི་སྒྲ་དང་། རྣམ་པ་དེ་ལྟ་བུའི་སྒྲ་དག་
འབྱུང་སྟེ་སྒྲ་འབྱུང་བ་དེ་དག་གིས་སེམས་ཅན་དེ་དག་མངོན་པར་རྟོགས་པ་འཐོབ་པར་གྱུར་ཏོ། །དེ་བཞིན་གཤེགས་པ་དེའི་ཉན་ཐོས་ཀྱི་ཚོགས་དང་པོ་ནི་དགེ་སློང་བྱེ་བ་དགུ་བཅུ་རྩ་དགུའི་ཚོགས་སུ་གྱུར་ཏེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཁུར་བོར་བ། རང་གི་དོན་རྗེས་སུ་
ཐོབ་པ། སྲིད་པར་སྦྱོར་བ་ཡོངས་སུ་བས་པ། བཀའ་ཡང་དག་པས་སེམས་ཤིན་ཏུ་རྣམ་པར་གྲོལ་བ་ཤ་སྟག་གི་ཚོགས་སུ་གྱུར་ཏོ། །ཚོགས་གཉིས་པ་ནི་དགེ་སློང་བྱེ་བ་ཕྲག་དགུ་བཅུ་རྩ་དྲུག་གི་ཚོགས་སུ་གྱུར་ཏོ། །ཚོགས་གསུམ་པ་ནི་དགེ་སློང་བྱེ་བ་ཕྲག་དགུ་བཅུ་རྩ་གསུམ་གྱི་
ཚོགས་སུ་གྱུར་ཏོ། །ཚོགས་བཞི་པ་ནི་དགེ་སློང་བྱེ་བ་ཕྲག་དགུ་བཅུའི་ཚོགས་སུ་གྱུར་ཏེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་སྦྱོར་བ་ཡོངས་སུ་སུ་བས་པ། བཀའ་ཡང་དག་པས་སེམས་ཤིན་ཏུ་རྣམ་པར་
གྲོལ་བ་ཤ་སྟག་གི་ཚོགས་སུ་གྱུར་ཏོ། །བྱང་ཆུབ་སེམས་དཔའི་ཚོགས་ཀྱང་གྲངས་དེ་སྙེད་དུ་གྱུར་ཏེ། ཐམས་ཅད་ཀྱང་མི་སྐྱེ་བའི་ཆོས་ཀྱི་བཟོད་པ་དང་ལྡན་པ་ཚུལ་སྣ་ཚོགས་པ་བསྒྲུབ་པ་ལ་མཁས་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་བསྙེན་བཀུར་བ། སངས་རྒྱས་ཀྱི་ཞིང་
བྱེ་བ་ཁྲག་ཁྲིག་བརྒྱ་སྟོང་མང་པོར་རྣམ་པར་གྲགས་པ། སེམས་ཅན་བྱེ་བ་ཁྲག་ཁྲིག་བརྒྱ་སྟོང་མང་པོ་ཡང་དག་པར་སྒྲོལ་བ། སྒོ་མཐའ་ཡས་པའི་གཟུངས་རབ་ཏུ་ཐོབ་པ། ཏིང་ངེ་འཛིན་བྱེ་བ་ཁྲག་ཁྲིག་བརྒྱ་སྟོང་མངོན་པར་བསྒྲུབ་པ་ལ་མཁས་པ་ཤ་སྟག་གི་ཚོགས་སུ་གྱུར་ཏེ། དེ་མ་
ལགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལས་དང་པོ་པ་དང་། ཐེག་པ་ལ་གསར་དུ་ཞུགས་པ་རྣམས་ལྟ་སྨོས་ཀྱང་ཅི་འཚལ་ཏེ། དེ་བཞིན་གཤེགས་པ་དེའི་སངས་རྒྱས་ཀྱི་ཞིང་གི་རྒྱན་དུ་གྱུར་པ་དེ་དག་ནི་ཚིག་གིས་བརྗོད་པར་སླ་བ་མ་ལགས་སོ། །དེ་བཞིན་གཤེགས་པ་

དེ་ཡོངས་སུ་མྱ་ངན་ལས་འདས་ནས་དམ་པའི་ཆོས་ནི་དགུང་ལོ་སྟོང་ཕྲག་དྲུག་ཅུའི་བར་དུ་གནས་པར་གྱུར་ཏེ། ཞུགས་ཤིང་དེ་དག་ལས་ཀྱང་སྒྲ་དེ་དག་དེ་སླན་ཆད་མི་འབྱུང་བར་གྱུར་ཏོ། །བཅོམ་ལྡན་འདས་དེའི་ཚེ་དགེ་སློང་བྱང་ཆུབ་སེམས་དཔའ་ཆོས་སྨྲ་བ་རབ་ཏུ་དགའ་བའི་དབང་པོ་ཞེས་
བགྱི་བ་བྱུང་སྟེ། བཅོམ་ལྡན་འདས་བྱང་ཆུབ་སེམས་དཔའ་རབ་ཏུ་དགའ་བའི་དབང་པོ་དེ་ནི་སྔོན་སྤྱོད་སྤྱོད་པ་སྟེ། སྤྱོད་ལམ་བཅོས་མི་འཚལ་བ་འཇིག་རྟེན་པའི་ཆོས་ཐམས་ཅད་ལས་སླར་ལོག་པ་མ་མཆིས་པ་སྟེ། སེམས་ཅན་དེ་དག་ཀྱང་དབང་པོ་རྣོ་ཞིང་ཕྱེ་བ་ཙམ་གྱིས་འཚལ་ལ་ཟབ་མོ་ལ་
མོས་པ་ཤ་སྟག་སྟེ། དེ་ནི་སེམས་ཅན་དེ་དག་ལ་འདོད་པ་ཆུང་བའི་བསྔགས་པ་ཡང་མི་རྗོད། ཆོག་ཤེས་པ་དང་། སྡོམ་པ་དང་། གཅིག་པུར་དགའ་བའི་བསྔགས་པ་ཡང་མི་རྗོད། འདུ་འཛི་མ་མཆིས་པའི་བསྔགས་པ་ཡང་མི་རྗོད་ཅིང་། དེས་སེམས་ཅན་དེ་དག་ལ་ཆོས་ཐམས་
ཅད་ནི་འདོད་ཆགས་ཀྱི་ངོ་བོ་ཉིད་དོ་ཞེས་བགྱི་བར་བསྟན། ཆོས་ཐམས་ཅད་ནི་ཞེ་སྡང་གི་ངོ་བོ་ཉིད་དོ་ཞེས་བགྱི་བར་བསྟན། ཆོས་ཐམས་ཅད་ནི་གཏི་མུག་གི་ངོ་བོ་ཉིད་དོ་ཞེས་བགྱི་བར་བསྟན། ཆོས་ཐམས་ཅད་ནི་སྒྲིབ་པ་མེད་པའོ་ཞེས་བགྱི་བར་བསྟན་ཏེ། དེས་ཐབས་དེས་སྤྱོད་པ་ཐམས་ཅད་ཀྱང་མཚན་ཉིད་
གཅིག་པའོ་ཞེས་བགྱི་བར་བསྟན་ནས། སེམས་ཅན་ཐབས་དེ་ལྟ་བུས་བསྟན་པ་དེ་དག་ཀྱང་བྱང་ཆུབ་སེམས་དཔའ་དེའི་སྤྱོད་པ་ལ་མི་དགའ་བར་མ་གྱུར་ཏེ། ཁོང་ཁྲོ་བའི་སེམས་མ་མཆིས་པ་དེ་དག་བཟོད་པའི་ས་ཐོབ་པར་གྱུར། དེ་བཞིན་གཤེགས་པའི་བསྟན་པ་ལ་ཡང་མི་ཕྱེད་ཅིང་ངེས་པར་གྱུར་
ཏོ། །དེའི་ཚེ་དགེ་སློང་བྱང་ཆུབ་སེམས་དཔའ་ཆོས་སྨྲ་བ་རྒྱལ་བའི་བློ་གྲོས་ཞེས་བགྱི་བ་བྱུང་སྟེ། བཅོམ་ལྡན་འདས་ཆོས་སྨྲ་བ་རྒྱལ་བའི་བློ་གྲོས་ཞེས་བགྱི་བ་དེ་ནི་བསམ་གཏན་བཞི་ཐོབ་པ། གཟུགས་མ་མཆིས་པའི་སྙོམས་པར་འཇུག་པ་བཞི་ཐོབ་པ་སྟེ། སྦྱངས་པའི་ཡོན་ཏན་བཅུ་གཉིས་
ཀྱང་ཡང་དག་པར་བླངས་ཏེ་གནས་པར་གྱུར་ཏོ། །བཅོམ་ལྡན་འདས་བྱང་ཆུབ་སེམས་དཔའ་རྒྱལ་བའི་བློ་གྲོས་ཀྱིས་འདུལ་བར་གྱུར་པ་དེ་དག་ནི་སྐྱོན་འཛིན་ཅིང་སྐྱོན་རྗོད་པ། བློ་མི་བརྟན་པ་ཤ་སྟག་ཏུ་གྱུར་ཏེ། བཅོམ་ལྡན་འདས་དེ་ནས་བྱང་ཆུབ་སེམས་དཔའ་རྒྱལ་བའི་བློ་གྲོས་བསོད་ནམས་ལ་

སྤྱོད་པ་ཞིག་གི་ཚེ། མ་རིག་ནས་བྱང་ཆུབ་སེམས་དཔའ་རབ་ཏུ་དགའ་བའི་དབང་པོའི་བསླང་བའི་གྲོང་དེར་མཆིས་ཏེ། དེས་དེ་ན་ཁྱིམ་བདག་གི་བུའི་གནས་ཤིག་མཆིས་པར་མཐོང་ནས། ཁྱིམ་བདག་གི་བུ་གང་ན་བ་དེར་མཆིས་ནས་ཕྱིན་པ་དང་། སྟན་བཏིང་བ་
ལ་མཆིས་ཏེ། ཁྱིམ་བདག་གི་བུ་དེ་ལ་འདོད་པ་ཆུང་བའི་བཀའ་མཆིད་བརྗོད། ཆོག་ཤེས་པའི་བཀའ་མཆིད་བརྗོད། སྡོམ་པའི་བཀའ་མཆིད་བརྗོད། འདུ་འཛིའི་ནོངས་པ་བརྗོད། གཅིག་པུར་དགའ་བའི་བསྔགས་པ་བརྗོད། འདུ་འཛི་མ་མཆིས་པའི་བསྔགས་པ་བརྗོད་
ནས། ཁྱིམ་བདག་གི་བུ་དེའི་མདུན་དུ་བྱང་ཆུབ་སེམས་དཔའ་རབ་ཏུ་དགའ་བའི་དབང་པོ་ལ་མི་སྙན་པ་རྗོད་པ་དགེ་སློང་དེས་ནི་སྐྱེ་བོ་མང་པོ་ལོག་པར་བསྟན་ཏོ། །དགེ་སློང་དེས་ནི་སྐྱེ་བོ་མང་པོ་ལོག་པར་ལྟ་བར་བྱས་སོ། །དགེ་སློང་དེ་ནི་འདུ་འཛིའི་ནང་ན་རྣམ་པར་སྤྱོད་པ་སྟེ། འདོད་
ཆགས་ནི་སྒྲིབ་པ་མེད་དོ་ཞེས་སྟོན་ཏོ། །ཞེ་སྡང་ནི་སྒྲིབ་པ་མེད་དོ་ཞེས་སྟོན་ཏོ། །གཏི་མུག་ནི་སྒྲིབ་པ་མེད་དོ་ཞེས་སྟོན་ཏོ། །ཆོས་ཐམས་ཅད་ནི་སྒྲིབ་པ་མེད་དོ་ཞེས་སྟོན་ཏོ་ཞེས་བརྗོད་པ་དང་། ཁྱིམ་བདག་གི་བུ་དེ་ཡང་དབང་པོ་རྣོ་བ་བཟོད་པ་ཐོབ་པ་ཞིག་སྟེ། དེས་དགེ་སློང་དེ་ལ་སྨྲས་པ།
བཙུན་པ་ཁྱོད་ཀྱིས་འདོད་ཆགས་ཇི་ལྟར་མཁྱེན། དེས་སྨྲས་པ། ཁྱིམ་བདག་གི་བུ་འདོད་ཆགས་ནི་ཀུན་ནས་ཉོན་མོངས་པར་ཤེས་སོ། །སྨྲས་པ། བཙུན་པ་འོ་ན་འདོད་ཆགས་དེ་ནང་ན་མཆིས་སམ། ཕྱི་རོལ་ན་མཆིས། སྨྲས་པ། འདོད་ཆགས་ནི་ནང་ན་ཡང་མེད། ཕྱི་རོལ་ན་ཡང་
མེད་དོ། །སྨྲས་པ། བཙུན་པ་དེ་ལྟར་འདོད་ཆགས་ནང་ན་ཡང་མ་མཆིས། ཕྱི་རོལ་ན་ཡང་མ་མཆིས་ཤར་ཕྱོགས་ན་ཡང་མ་མཆིས། ལྷོ་ཕྱོགས་ན་ཡང་མ་མཆིས། ནུབ་ཕྱོགས་ན་ཡང་མ་མཆིས། བྱང་ཕྱོགས་ན་ཡང་མ་མཆིས། སྟེང་ན་ཡང་མ་མཆིས། འོག་ན་ཡང་མ་
མཆིས། ཕྱོགས་མཚམས་རྣམས་ན་ཡང་མ་མཆིས་ཏེ། དེ་ལྟ་ལགས་ན་དེ་ནི་མ་སྐྱེས་པ་ལགས་ཏེ། གང་ལ་མ་སྐྱེས་པ་དེ་ལ་ཀུན་ནས་ཉོན་མོངས་པའམ། རྣམ་པར་བྱང་བའང་ཅི་ཞིག་མཆིས། དེ་ནས་དགེ་སློང་རྒྱལ་བའི་བློ་གྲོས་ཀྱིས་བསྟན་པ་དེ་ཐོས་ནས་འཁྲུགས་ཏེ་ཤིན་ཏུ་མི་དགའ་

ནས། བསོད་སྙོམས་ཀྱང་མ་བླངས་པར་སྟན་ལས་ལངས་ཏེ་མཆིས་སོ། །འདི་སྐད་ཀྱི་ཚིག་ཀྱང་རྗོད་དེ། ཀྱེ་མ་དགེ་སློང་དེས་ནི། སྐྱེ་བོ་མང་པོ་ལོག་པར་བསྟན་ཏོ་ཞེས་ཀྱང་བརྗོད་ནས་དེ་ཁྱིམ་དེ་ནས་བྱུང་སྟེ། དགོན་པ་ལོགས་སུ་མཆིས་སོ། །དེ་སླད་ཀྱིས་གཙུག་ལག་ཁང་དུ་མཆིས་
ནས་དགེ་སློང་ལྷག་མ་རྣམས་ལ་ཡང་བསྒོའོ། །དགེ་འདུན་གྱི་ནང་དུ་ཡང་དགེ་སློང་དེ་མཐོང་ནས། འདི་སྐད་དུ་དགེ་སློང་འདི་ནི་སྐྱེ་བོ་མང་པོ་ལོག་པར་སྟོན་ཅིང་། དགེ་སློང་འདི་ནི་སྐྱེ་བོ་མང་པོ་ལོག་པར་ལྟ་བར་བྱེད་དེ། འདི་ནི་འདོད་ཆགས་སྒྲིབ་པ་མེད་དོ་ཞེས་སྟོན་ཏོ། །ཞེ་སྡང་སྒྲིབ་པ་མེད་དོ་ཞེས་
སྟོན་ཏོ། །གཏི་མུག་སྒྲིབ་པ་མེད་དོ་ཞེས་སྟོན་ཏོ། །ཆོས་ཐམས་ཅད་སྒྲིབ་པ་མེད་དོ་ཞེས་སྟོན་ཏོ་ཞེས་བགྱིས་སོ། །དེ་ནས་བྱང་ཆུབ་སེམས་དཔའ་རབ་ཏུ་དགའ་བའི་དབང་པོ་དེ་འདི་སྙམ་དུ་གྱུར་ཏེ། དགེ་སློང་འདིས་ནི་གདོན་མི་ཟ་བར་ལས་ཀྱི་སྒྲིབ་པ་བསགས་པར་གྱུར་གོར་མ་ཆག་ན་དེ་ལ་བདག་གིས་
ཟབ་མོའི་གཏམ་བྱའོ། །དེས་ནི་མ་ནུས་ནའང་འདིའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་བསྒོམ་པའི་རྒྱུ་ཙམ་དུའང་འགྱུར་རོ་སྙམ་སྟེ། དེ་ནས་བྱང་ཆུབ་སེམས་དཔའ་རབ་ཏུ་དགའ་བའི་དབང་པོས། དགེ་སློང་གི་དགེ་འདུན་ཐམས་ཅད་གཅིག་ཏུ་འདུན་པར་བགྱིས་ནས། དེའི་ཚེ་ཚིགས་སུ་བཅད་པ་འདི་
དག་སྨྲས་སོ། །འདོད་ཆགས་མྱ་ངན་འདས་པར་གསུངས། །ཞེ་སྡང་གཏི་མུག་དེ་བཞིན་ཏེ། །བྱང་ཆུབ་དེ་དག་གནས་ཉིད་ཡིན། །སངས་རྒྱས་བྱང་ཆུབ་བསམ་མི་ཁྱབ། །འདོད་ཆགས་གང་གིས་རྣམ་བརྟགས་པ། །ཞེ་སྡང་གཏི་མུག་དེ་བཞིན་ཏེ། །སངས་རྒྱས་བྱང་ཆུབ་དེ་ལ་རིང་། །
གནམ་དང་ས་གཉིས་ཅི་བཞིན་ནོ། །བྱང་ཆུབ་འདོད་ཆགས་གཉིས་ནི་གཉིས་སུ་མེད། །འཇུག་པ་གཅིག་པ་མཉམ་ཉིད་ལྡན་པ་སྟེ། །འདི་དག་ཆོས་ལ་བྱིས་པ་གང་འཇིགས་པ། །དེ་དག་སངས་རྒྱས་བྱང་ཆུབ་རིང་བ་ཡིན། །འདོད་ཆགས་སྐྱེ་མིན་འཇིག་པ་མ་ཡིན་ཏེ། །སེམས་ཀྱང་ཀུན་
ནས་ཉོན་མོངས་འགྱུར་བ་མེད། །གང་ཞིག་དམིགས་པའི་བདག་ལ་བློ་ཆགས་པ། །འདོད་ཆགས་ངན་སོང་དེ་དག་ལྟུང་བར་བྱེད། །གང་ཞིག་འདོད་ཆགས་ཆོས་ཀྱང་སངས་རྒྱས་ཆོས། །དེ་དག་ཁྱད་པར་གང་ཡང་མེད་པ་སྟེ། །ཡི་གེ་གཅིག་ཅིང་ཚུལ་གཅིག་མཚན་ཉིད་མེད། །དེ་ལྟར་

ཤེས་པ་བདེ་གཤེགས་ཉིད་དུ་འགྱུར། །ཚུལ་ཁྲིམས་འཆལ་དང་ཚུལ་ཁྲིམས་རྣམ་བརྟགས་ཤིང་། །གང་ཞིག་ཚུལ་ཁྲིམས་རློམ་པས་མྱོས་གྱུར་པ། །དམིགས་པའི་ལྟ་ལ་རབ་གནས་དེ་ལ་ནི། །བྱང་ཆུབ་མེད་ཅིང་སངས་རྒྱས་ཆོས་ཀྱང་མེད། །གང་ཞིག་དགོན་པའི་གནས་
ལ་རྟོག་བྱེད་ཅིང་། །བདག་ལ་སྟོད་བྱེད་གཞན་ལ་སྨོད་བྱེད་པ། །དགོན་པར་ལྟ་ལ་རབ་གནས་དེ་ལ་ནི། །མཐོ་རིས་མེད་ན་བྱང་ཆུབ་ག་ལ་ཡོད། །བྱང་ཆུབ་ལྟ་བ་གཉིས་སུ་མེད་གསུངས་ཏེ། །མིང་དང་ཡི་གེ་གྲངས་དང་སྒྲ་འཇུག་པ། །དེ་དག་གང་གིས་ཡང་དག་རྟོགས་གྱུར་པ། །དེ་ལ་
སངས་རྒྱས་བྱང་ཆུབ་རིང་བ་མིན། །ཀུན་ནས་ཉོན་མོངས་དེ་ལ་རྣམ་རྟོག་ཅིང་། །རྣམ་བྱང་ལྟ་ལ་བྱིས་པ་གང་ཆགས་པ། །དམིགས་པའི་ལྟ་ལ་རབ་གནས་དེ་ལ་ནི། །བྱང་ཆུབ་མེད་ཅིང་སངས་རྒྱས་ཆོས་ཀྱང་མེད། །གང་ཞིག་སངས་རྒྱས་ཆོས་ལ་འདོད་སྐྱེད་པ། །དེ་ལ་སངས་རྒྱས་བྱང་ཆུབ་
རིང་བ་སྟེ། །ཡོད་མིན་ཆོས་ལ་འདོད་པ་སྐྱེད་པས་ན། །དེ་ནི་སྡུག་བསྔལ་ཡོངས་སུ་མྱོང་བར་འགྱུར། །གང་ཞིག་འདོད་ཆགས་ཞེ་སྡང་མི་རྟོག་ཅིང་། །གཏི་མུག་ཆུང་བས་བྱང་ཆུབ་ཡིན་ལྟ་བ། །དེ་ལ་སངས་རྒྱས་བྱང་ཆུབ་རིང་བ་མིན། །བཟོད་པ་མཆོག་ཀྱང་མྱུར་དུ་དེས་འཐོབ་འགྱུར། །
འདུས་མ་བྱས་དང་འདུས་བྱས་སུས་མཐོང་བ། །དེ་ནི་འཁོར་བའི་ཆོས་ལས་གཞར་མི་འགྲོལ། །གང་གིས་ཁམས་དེ་མཉམ་པ་ཉིད་རྟོགས་པ། །དེ་མྱུར་སྐྱེས་བུ་སངས་རྒྱས་མཆོག་ཏུ་འགྱུར། །གང་གིས་སངས་རྒྱས་ཆོས་དང་སངས་རྒྱས་དག །ཐམས་ཅད་ཀུན་ཏུ་ནམ་ཡང་མ་མཐོང་ན། །ཆོས་
རྣམས་ཀུན་གྱིས་གོས་པ་མེད་པ་དེ། །བདུད་བཅོམ་བྱང་ཆུབ་མངོན་པར་འཚང་ཡང་རྒྱ། །སུ་ཞིག་སེམས་ཅན་རྣམ་པར་འགྲེལ་འདོད་པ། །དེས་ནི་སེམས་ཅན་ཁམས་སུ་བལྟ་མི་བྱ། །མ་ལུས་སེམས་ཅན་མྱ་ངན་འདས་དང་འདྲ། །དེ་ལྟར་སུས་ཤེས་དེ་ནི་རང་བྱུང་འགྱུར། །དགོན་པའི་ཆོས་
ལ་གང་ཞིག་མི་སྣང་ཞིང་། །གྲོང་དུ་ཕྱིན་ན་སྤྱོད་ལམ་འཆོས་བྱེད་པ། །དེ་ནི་འཇིག་རྟེན་ལྷར་བཅས་རྐུན་པོ་སྟེ། །དེ་ལ་བྱང་ཆུབ་སངས་རྒྱས་ཆོས་རྣམས་མེད། །བདག་ནི་སངས་རྒྱས་འགྱུར་ཞེས་གང་རློམ་པ། །བྱིས་པ་དེ་ནི་གཏི་མུག་དབང་གིས་ནོན། །སངས་རྒྱས་ཆོས་ནི་ནམ་མཁའ་

མཚུངས་པ་སྟེ། །བླང་དང་དོར་བའི་སྒྲ་ནི་དེ་ལ་མེད། །རྒྱལ་བས་ནམ་ཡང་བྱང་ཆུབ་སངས་མ་རྒྱས། །དེས་ནི་ནམ་ཡང་སེམས་ཅན་བཀྲོལ་བ་མེད། །མེད་པའི་ཆོས་རྣམས་བརྟགས་ཤིང་བྱིས་པ་རྣམས། །སངས་རྒྱས་བྱང་ཆུབ་ལས་ནི་རིང་བ་ཡིན། །སེམས་ཅན་འདི་དག་ཉོན་མོངས་
སུས་མཐོང་བ། །དེ་ལ་ཉོན་མོངས་མཐའ་ཡས་འབྱུང་བར་འགྱུར། །སེམས་ཅན་དེ་དག་སེམས་ཅན་མེད་ཅེས་གསུངས། །སེམས་ཅན་འདུ་ཤེས་གནས་ལ་བྱང་ཆུབ་མེད། །གང་གིས་སེམས་ཅན་ཤིན་ཏུ་གྲོལ་མཐོང་ཞིང་། །འདོད་ཆགས་ཞེ་སྡང་གཏི་མུག་རྟག་མེད་ལ། །སེམས་
ཅན་ཞི་ཞིང་རབ་ཞི་རྣམ་ཞི་བར། །གང་གིས་ཤེས་པ་དེ་ནི་མགོན་པོར་འགྱུར། །གང་གིས་སེམས་ཅན་སེམས་ཅན་མེད་མ་མཐོང་། །ཡང་དག་ཉིད་དུ་སངས་རྒྱས་ཆོས་མ་དམིགས། །ཇི་ལྟར་སེམས་ཅན་དེ་བཞིན་སངས་རྒྱས་ཤེས། །དེ་ལྟར་སུས་ཤེས་དེ་ནི་མགོན་པོར་འགྱུར། །ཉོན་
མོངས་རྟོག་ན་ཉོན་མོངས་ཡོད་པར་འགྱུར། །ཚུལ་བཞིན་ལམ་སེམས་དེ་བཞིན་ཉོན་མོངས་ཡོད། །ཉོན་མོངས་ལམ་དུ་ནམ་ཡང་མ་བརྟགས་ན། །དེས་ནི་བྱང་ཆུབ་མི་རྟོག་ས་འཐོབ་བོ། །སྟོང་པའི་ཆོས་ཀྱིས་མི་མཁས་གང་འཇིགས་པ། །དེ་དག་སངས་རྒྱས་ཆོས་ལས་རིང་བ་ཡིན། །
སྟོང་ཉིད་ཆོས་ལ་ཐེ་ཙོམ་སུ་མེད་པ། །དེ་དག་སངས་རྒྱས་བྱང་ཆུབ་འཐོབ་པར་འགྱུར། །བྱང་ཆུབ་མཆོག་ཐོབ་པར་ནི་སུ་འདོད་པ། །དེས་ནི་འདོད་ཆགས་ཆོས་ལ་བརྟག་མི་བྱ། །འདོད་ཆགས་ཆོས་ཀྱི་མཚན་ཉིད་གང་ཡིན་པ། །དེ་དག་སངས་རྒྱས་ཡོན་ཏན་བསམ་མི་ཁྱབ། །གང་ཞིག་
སངས་རྒྱས་ཆོས་ལ་མི་འཇུག་ཅིང་། །སེམས་དང་བྱང་ཆུབ་སྐྱེ་བ་མེད་པ་དང་། །སེམས་དང་སངས་རྒྱས་བྱང་ཆུབ་གཉིས་མེད་པར། །ཤེས་པར་གྱུར་ན་དེ་ནི་མགོན་པོར་འགྱུར། །སྡིག་སེམས་མུ་སྟེགས་ཅན་གྱིས་གང་བརྗོད་དང་། །སངས་རྒྱས་རྣམས་ཀྱིས་གསུང་གང་བཀའ་སྩལ་པ། །
དེ་དག་ཐ་དད་ཚུལ་གྱུར་མེད་པ་སྟེ། །དེ་ལྟར་ཤེས་ན་དེ་ནི་མགོན་པོར་འགྱུར། །གང་གིས་བྱང་ཆུབ་མཐོང་ཞིང་སྨོན་བྱེད་པ། །དེ་དང་བྱང་ཆུབ་རིང་སྟེ་བྱང་ཆུབ་མེད། །སངས་རྒྱས་སངས་རྒྱས་མིན་པ་མི་མཉམ་ཞེའམ། །སངས་རྒྱས་འདི་ཞེས་མི་རྟོག་མགོན་པོར་འགྱུར། །གང་

ཞིག་བདག་ནི་སེམས་ཅན་འགྲེལ་པ་ཞེས། །རློམ་ན་སེམས་ཅན་འདུ་ཤེས་ཆགས་རྨོངས་པས། །དམིགས་པའི་ལྟ་ལ་རབ་གནས་དེ་ལ་ནི། །བྱང་ཆུབ་མེད་ཅིང་སངས་རྒྱས་ཆོས་ཀྱང་མེད། །འདོད་ཆགས་ནང་དང་ཕྱི་ན་མི་གནས་ཏེ། །ཕྱོགས་དང་ཕྱོགས་མཚམས་གང་
ནའང་ཡོད་པ་མིན། །ཆོས་རྣམས་ཡོད་མིན་རྣམ་པར་བརྟག་བྱས་ཤིང་། །བྱིས་པ་འདོད་ཆགས་འདུ་ཤེས་དེ་ལྟར་རྨོངས། །སྒྱུ་མ་སྨིག་རྒྱུ་བྲག་ཅ་ལྟ་བུ་སྟེ། །མོ་གཤམ་བུ་དང་རྨི་ལམ་འདྲ་བ་ནི། །ཉོན་མོངས་འདི་དག་ཐམས་ཅད་དམིགས་སུ་མེད། །བྱིས་པ་དེ་ལྟར་མི་ཤེས་རྣམ་པར་རྨོངས། །
འདུས་བྱས་ཆོས་དང་འདུས་མ་བྱས་ཀྱི་ཆོས། །དེ་དག་ཐ་དད་གཉིས་སུ་ནམ་ཡང་མེད། །གང་ལ་གྲངས་དང་བགྲང་དུ་མེད་པ་དང་། །དེ་ཡི་ཚུལ་གྱིས་གཉིས་སུ་མེད་པར་འཇུག །བྱིས་པ་གང་ཞིག་བྱང་ཆུབ་སེམས་རློམ་ཞིང་། །སངས་རྒྱས་འགྱུར་ཞེས་རློམ་སེམས་བྱེད་གྱུར་ན། །ཆོས་ཀྱི་དངོས་
ཉིད་ཕྱག་རྒྱ་འདི་བོར་བས། །དེ་ལ་སངས་རྒྱས་ཆོས་དང་བྱང་ཆུབ་མེད། །སྨྲ་ལ་གང་དགའ་ཡོངས་རྟོག་སྤྱོད་ཡུལ་ཅན། །སྨྲ་བའི་དོན་ལ་རྣམ་པར་མི་སེམས་ཤིང་། །མིང་དང་ལེགས་ལ་དེ་བཞིན་ཆགས་གྱུར་པ། །དེ་དག་བྱང་ཆུབ་འགྱུར་བ་ཐེ་ཙོམ་ཡོད། །ལྟ་བའི་རྣམ་པ་བྱང་ཆུབ་གཉིས་
མེད་གསུངས། །མིང་དང་ཡི་གེ་གྲངས་དང་སྐད་འཇུག་པ། །མི་མཁས་གང་གིས་ཆོས་འདི་མ་རྟོགས་པ། །དེ་དག་སངས་རྒྱས་བྱང་ཆུབ་རིང་བར་གནས། །མིང་ལ་ཆགས་ཤིང་སྨྲ་ལ་དགའ་བ་དང་། །བདག་ཏུ་ལྟ་ལ་གང་ཞིག་གནས་གྱུར་ཅིང་། །འདོད་པ་ཆུང་དང་ཆོག་ཤེས་རྣམ་བརྟགས་
པས། །འདོད་པའི་དབང་གིས་ད་དུང་དེ་འདུག་གོ། །འདོད་ཆགས་ཆོས་ལས་ཤེད་སྐྱེས་གང་འབྲོས་པ། །དེ་ནི་འདོད་ཆགས་ཆོས་ལས་གཞར་མི་འགྲོལ། །གང་གིས་ཡང་དག་འདོད་ཆགས་ཆོས་ཤེས་ན། །འདོད་ཆགས་བྲལ་བའི་འདོད་ཆགས་ཆོས་ཤེས་འགྱུར། །ཡུན་རིང་དུས་སུ་
ཚུལ་ཁྲིམས་བསྲུང་བྱས་ཤིང་། །བསྐལ་པ་བྱེ་བར་བསམ་གཏན་བསྐྱེད་བྱས་ཀྱང་། །ཡང་དག་ཉིད་མཐའ་འདི་ནི་མ་རྟོགས་ན། །བསྟན་པ་འདི་ལ་དེ་དག་བློ་ཡོད་མིན། །ཅི་ཡང་མ་ཡིན་ཆོས་འདི་སུས་ཤེས་པ། །ནམ་ཡང་དེ་ནི་ཆོས་ཀུན་ཆགས་མི་འགྱུར། །ཚུལ་ཁྲིམས་འཆལ་དང་

ཚུལ་ཁྲིམས་རྣམ་བརྟགས་པས། །བྱིས་པ་དམིགས་པའི་སྤྱོད་ཡུལ་ཐར་མི་འགྱུར། །ཚུལ་ཁྲིམས་ཚུལ་ཁྲིམས་མེད་པར་སུས་ཤེས་ཤིང་། །ཚུལ་ཁྲིམས་འཆལ་དང་ཚུལ་ཁྲིམས་ཚུལ་གཅིག་ཅེས། །ཚུལ་ཁྲིམས་ངང་ཚུལ་དེ་ལྟར་སུས་ཤེས་པ། །ཚུལ་ཁྲིམས་འཆལ་པ་དེ་ལ་ནམ་
ཡང་མེད། །ཆོས་རྒྱལ་ཆོས་ལ་རྟོག་པར་མ་གྱུར་ན། །ཐབས་ཀྱི་ས་ལ་སེམས་ཅན་རྣམ་འདུལ་ཞིང་། །བྱང་ཆུབ་ཟག་མེད་ཞི་བ་འདི་ལ་ཡང་། །ཚུལ་གཅིག་ཆོས་ཀྱིས་སེམས་ཅན་འཛུད་པ་ཡིན། །ཆོས་རྒྱལ་དམ་པའི་ཆོས་འདི་མི་གཡོ་ཞིང་། །དངོས་མེད་མཚན་ཉིད་མེད་ལ་ཚུལ་གཅིག་
པར། །ངོ་བོ་ཉིད་ཀྱིས་སྟོང་ཆོས་མ་ཐོས་པས། །གཡང་ས་ཆེན་པོར་བྱིས་པ་དེ་དག་ལྟུང་། །ཆོས་འདི་ཐོས་ཤིང་མི་དངང་གང་གྱུར་པའི། །འདོད་པའི་ཡོན་ཏན་ལྔ་ཆགས་ཁྱིམ་པའང་བླའི། །བསྟན་པ་འདི་ལ་རབ་ཏུ་བྱུང་གྱུར་ཅིང་། །དམིགས་སྟ་སྦྱངས་པའི་ཡོན་ཏན་རློམ་པ་མིན། །
ཕྱོགས་བཅུ་ཀུན་ན་སངས་རྒྱས་རང་བྱུང་བ། །འཇིག་རྟེན་དོན་མཛད་གང་དག་བཞུགས་པ་རྣམས། །དེ་དག་ཀུན་གྱིས་ནམ་མཁའ་མཚུངས་པའི་ཆོས། །གཡོ་བ་མེད་ཤེས་བྱང་ཆུབ་འགྱུར་ཞེས་གསུངས། །མི་མཁས་གང་རྣམས་མི་སྡུག་བསྒོམ་སེམས་ཤིང་། །ཆོས་རབ་འདི་ཐོས་འཇིགས་
པར་འགྱུར་བ་དག །རྟག་པར་སྡུག་བསྔལ་ཆེ་དང་ལྡན་གྱུར་ཅིང་། །བསྐལ་པ་བྱེ་བ་མང་པོར་སྡུག་བསྔལ་འགྱུར། །ཚིགས་སུ་བཅད་པ་བསྟན་པ་འདི་བཤད་པའི་ཚེ། ལྷའི་བུ་སྟོང་ཕྲག་སུམ་ཅུ་རྩ་གཉིས་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་བོ། །དགེ་སློང་སྟོང་ཕྲག་བརྒྱད་ཅུ་ཉེ་བར་ལེན་པ་མེད་
པར་ཟག་པ་ལས་སེམས་རྣམ་པར་གྲོལ་ལོ། །བྱང་ཆུབ་སེམས་དཔའ་རྒྱལ་བའི་བློ་གྲོས་ཀྱང་འཆི་བའི་དུས་བགྱིས་ནས་དོག་སའི་སྒོ་ཕྱེ་སྟེ། སེམས་ཅན་དམྱལ་བ་ཆེན་པོར་ལྟུང་ངོ་། །དེ་སུག་ལས་ཀྱི་སྒྲིབ་པ་དེས་བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་སེམས་ཅན་དམྱལ་བ་ཆེན་པོ་དག་ཏུ་
སྡུག་བསྔལ་ཚ་ཞིང་རྩུབ་ལ་ཡིད་དུ་མི་འོང་བའི་ཚོར་བ་མི་བཟད་པ་མྱོང་བར་གྱུར་ཏོ། །ཚེ་རབས་བརྒྱ་སྟོང་ཕྲག་བདུན་ཅུ་རྩ་བཞིར་མི་སྙན་པར་བརྗོད་པ་ཐོབ་པར་གྱུར་ཏོ། །བསྐལ་པ་བརྒྱ་སྟོང་མང་པོར་དེ་བཞིན་གཤེགས་པའི་མཚན་ཙམ་ཡང་མ་ཐོས་པར་གྱུར་ཏོ། །དེ་དེ་ནས་སླད་ཀྱིས་དེ་བཞིན་གཤེགས་པ་

གཞན་དང་གཞན་དག་དང་མཇལ་ཏེ། དེ་དག་གི་བསྟན་པ་ལ་རབ་ཏུ་བྱུང་ནས་མངོན་པར་མོས་པར་མ་གྱུར་ཏེ། ཚེ་རབས་སྟོང་ཕྲག་བདུན་ཅུ་རྩ་དྲུག་རབ་ཏུ་བྱུང་བ་ལས་སླར་བབས་པར་གྱུར་ཏོ། །སུག་ལས་ཀྱི་སྒྲིབ་པ་དེ་ཉིད་ཀྱི་ལྷག་མས་ཚེ་རབས་སྟོང་ཕྲག་མང་པོར་དབང་པོ་
རྟུལ་པོར་གྱུར་ཏོ། །བཅོམ་ལྡན་འདས་དེའི་ཚེ་བྱང་ཆུབ་སེམས་དཔའ་དགེ་སློང་ཆོས་སྨྲ་བ་རབ་ཏུ་དགའ་བའི་དབང་པོ་ཞེས་བགྱི་བ་བྱུང་བ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། ད་ལྟར་བཞུགས་ཤིང་འཚོ་གཞེས་ཆོས་ཀྱང་སྟོན་ཏོ། །ཤར་
ཕྱོགས་ཀྱི་འཇིག་རྟེན་གྱི་ཁམས་བྱེ་བ་བརྒྱ་སྟོང་འདས་པ་ན། སངས་རྒྱས་ཀྱི་ཞིང་རིན་ཆེན་སྣ་ཚོགས་ཀྱི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཟི་བརྗིད་སྟུག་ཅིང་དྲི་མ་མེད་ལ་ཉི་ཟླ་ཟིལ་གྱིས་གནོན་པ་བཞུགས་ཤིང་འཚོ་གཞེས་
ཆོས་ཀྱང་སྟོན་ཏེ། བཅོམ་ལྡན་འདས་དགེ་སློང་རྒྱལ་བའི་བློ་གྲོས་ཞེས་བགྱི་བར་གང་གྱུར་པ་དེ་ནི་བདག་ཉིད་དེའི་ཚེ་དེའི་དུས་ན། དགེ་སློང་རྒྱལ་བའི་བློ་གྲོས་ཞེས་བགྱི་བར་གྱུར་ཏེ། བཅོམ་ལྡན་འདས་བདག་གི་དེའི་ཚེ་ཚུལ་འདི་མ་འཚལ་བས་དེ་ལྟ་བུའི་སྡུག་བསྔལ་མྱོང་བར་གྱུར་ཏོ། །བཅོམ་
ལྡན་འདས་བདག་ནི་དེ་འདྲ་བའི་གནས་སུ་གྱུར་ཏེ། དེ་ལྟ་བུའི་སྡུག་བསྔལ་མ་མཆིས་པའི་སྡུག་བསྔལ་ཡོངས་སུ་བརྟགས་པའི་སྡུག་བསྔལ། ཕྱིན་ཅི་ལོག་གི་སྡུག་བསྔལ་རྣམ་པ་དེ་ལྟ་བུ་མྱོང་བར་གྱུར་ཏོ། །བཅོམ་ལྡན་འདས་དེ་ལྟ་ལགས་པས་བྱང་ཆུབ་སེམས་དཔའི་ཐེག་པ་ལ་ཞུགས་པའམ།
ཉན་ཐོས་ཀྱི་ཐེག་པ་ལ་ཞུགས་པ་གང་ཡང་རུང་སྟེ། དེ་ལྟ་བུའི་སུག་ལས་ཀྱི་སྒྲིབ་པ་མི་འཚལ་ཞིང་། དེ་ལྟ་བུའི་སྡུག་བསྔལ་མི་འཚལ་ན་དེས་དམ་པའི་ཆོས་སྤང་བར་མི་བགྱིའོ། །དམ་པའི་ཆོས་ལ་དཔྱ་བར་མི་བགྱིའོ། །ཆོས་གང་ལ་ཡང་ཁོང་ཁྲོ་བར་མི་བགྱིའོ། །དེ་ནས་བཅོམ་ལྡན་འདས་ཀྱིས་
འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཚིགས་སུ་བཅད་པ་དེ་ཐོས་པས་ཁྱོད་ལ་ཁྱད་པར་ཅི་ཞིག་ཏུ་གྱུར། གསོལ་པ། བཅོམ་ལྡན་འདས་ཚིགས་སུ་བཅད་པ་དེ་ཐོས་ལས་ཀྱི་སྒྲིབ་པ་དེ་ལས་ལངས་ནས་གང་དང་གང་དུ་སྐྱེས་པ་དེ་དང་དེ་དག་ཏུ་ཡང་

ཟབ་མོའི་བཟོད་པ་ཅན། ངེས་པའི་བཟོད་པ་ཅན་དུ་གྱུར་ཏེ། ཆོས་ཟབ་མོ་སྟོན་པ་ལ་མཁས་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་སུའི་མཐུས་ཁྱོད་ཀྱིས་དེ་ལྟར་ཡུན་རིང་པོ་ན་མངོན་པར་འདུ་བྱས་པའི་ལས་ཀྱི་སྒྲིབ་པ་རྗེས་སུ་དྲན། འཇམ་དཔལ་གྱིས་གསོལ་པ། བཅོམ་
ལྡན་འདས་བྱང་ཆུབ་སེམས་དཔའ་རྣམས་ནི་ཅི་སེམས་ཅི་སྨྲ། རྗེས་སུ་ཅི་དྲན་ཡང་དེ་དག་ཐམས་ཅད་དེ་བཞིན་གཤེགས་པའི་མཐུ་སྟེ། དེ་ཅིའི་སླད་དུ་ཞེ་ན། བཅོམ་ལྡན་འདས་དེ་བཞིན་གཤེགས་པ་ལས་བྱུང་བ་ནི་ཆོས་ཐམས་ཅད་དོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་
བཞིན་གཤེགས་པའི་སྟོབས་བཅུ་ཐོབ་པ་དང་། འདི་ཐོས་པ་དེ་ནི་མཚུངས་སོ། །མི་སྐྱེ་བའི་ཆོས་ལ་བཟོད་པ་ཐོབ་པ་དང་། འདི་ཐོས་པ་དེ་ནི་མཚུངས་སོ། །འཇམ་དཔལ་གྱིས་གསོལ་པ། བདག་གིས་བཅོམ་ལྡན་འདས་ཀྱིས་གསུངས་པའི་དོན་འཚལ་ཏེ། ཆོས་ཀྱི་རྣམ་གྲངས་འདི་ཐོས་པ་ནི་
བསམ་གྱིས་མི་ཁྱབ་བོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ཏེ། ཆོས་ཀྱི་རྣམ་གྲངས་འདི་ཐོས་པ་ནི་བསམ་གྱིས་མི་ཁྱབ་བོ། །འོན་ཀྱང་སྦྱོར་བ་མེད་པ་ལ་ལ་དེ་ཐོས་ནས་མོས་པར་མི་འགྱུར་དུ་འོང་བའི་ཕྱིར། དེ་བཞིན་གཤེགས་པ་ལུང་མི་སྟོན་ཏོ། །དེ་ནས་བཅོམ་
ལྡན་འདས་ལ་འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་སླད་མའི་དུས་ལྔ་བརྒྱ་པ་ཐ་མ་ལ་ཅི་ནས་ཀྱང་ཆོས་ཀྱི་རྣམ་གྲངས་འདི་རྒྱས་པར་འགྱུར་ཞིང་སྐྱེ་བོ་མང་པོའི་སུག་པར་ཕྱིན་པར་འགྱུར་བ་དང་། དེ་ལ་
བདུད་དམ་བདུད་ཀྱི་རིས་ཀྱི་ལྷ་དག་གིས་གླགས་རྙེད་པར་མི་འགྱུར་བ་དེ་ལྟར་བྱིན་གྱིས་བརླབ་ཏུ་གསོལ། དེ་ནས་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བྱིན་གྱིས་བརླབ་པའི་ཕྱིར་གཡས་གཡོན་དུ་གཟིགས་སོ། །བཅོམ་ལྡན་འདས་ཀྱིས་དེ་ལྟར་གཟིགས་མ་ཐག་ཏུ་དེའི་ཚེ་ཕྱོགས་བཅུར་སངས་
རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་རྣམ་པ་དྲུག་ཏུ་གཡོས་པར་གྱུར། རབ་ཏུ་གཡོས་པར་གྱུར། ཀུན་ཏུ་གཡོས་པར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བྱིན་གྱིས་བརླབ་པ་མཛད་དེ། སངས་རྒྱས་བཅོམ་ལྡན་འདས་གཞན་དག་གིས་ཀྱང་འཇིག་རྟེན་གྱི་ཁམས་

གང་གཱའི་ཀླུང་གི་བྱེ་མ་སྙེད་དག་ནས་ཆོས་ཀྱི་རྣམ་གྲངས་འདི་བྱིན་གྱིས་བརླབས་སོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བསྟན་པའི་ཚེ་ཕྱོགས་བཅུ་ན་གང་གཱའི་ཀླུང་གི་བྱེ་མ་ཇི་སྙེད་ཡོད་ལ་དེ་བས་ཀྱང་ཤིན་ཏུ་མང་བའི་སེམས་ཅན་རྣམས་ཀྱིས་མི་སྐྱེ་བའི་ཆོས་ལ་བཟོད་པ་
ཐོབ་པར་གྱུར་ཏོ། །གང་དག་ཉན་ཐོས་ཉིད་ལ་གནས་པར་གྱུར་པ་དང་། སློབ་པའི་སའམ། མི་སློབ་པའི་ས་ལ་གནས་པར་གྱུར་བ་དག་ནི་སྨོས་ཀྱང་མི་སྨོས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་
མིང་ཅི་ཞེས་བགྱི། ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། དགའ་བོ་དེ་བས་ན་ཆོས་ཀྱི་རྣམ་གྲངས་འདི་ཆོས་ཐམས་ཅད་འབྱུང་བ་མེད་པ་ཞེས་བྱ་བར་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། འཇམ་དཔལ་གཞོན་ནུར་གྱུར་པ་དང་།
བྱང་ཆུབ་སེམས་དཔའ་བྱམས་པ་དང་། ལྷའི་བུ་པད་མོ་རྣམ་པར་རོལ་བའི་མངོན་པར་ཤེས་པ་དང་། བྱང་ཆུབ་སེམས་དཔའི་ཚོགས་ཆེན་པོ་དེ་དང་། དགེ་སློང་ལྔ་བརྒྱ་ཙམ་པོ་དེ་དག་དང་། ཚེ་དང་ལྡན་པ་ཀུན་དགའ་བོ་དང་། ལྷ་དང་། མི་དང་། ལྷ་མ་ཡིན་
དང་། དྲི་ཟར་བཅས་པའི་འཇིག་རྟེན་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་དགའོ།། །།འཕགས་པ་ཆོས་ཐམས་ཅད་འབྱུང་བ་མེད་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།ལོ་ཙྪ་བ་བན་དེ་རིན་ཆེན་འཚོས་
བསྒྱུར་ཅིང་ཞུས་ཏེ་གཏན་ལ་ཕབ་པ།། །།